# unfoldingWord Open Bible Stories — Aari

- Language code: `aiw`
- Canonical page: https://openbiblestories.org/l/aiw/
- Stories in this file: 50 of 50
- Published by: DokuWiki
- Last release: 2026-10-27
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Aari translation; it is not a translation of the whole Bible.

## 1. ፕዥሪ

https://openbiblestories.org/l/aiw/story-1/

![](https://cdn.door43.org/obs/jpg/360px/obs-en-01-01.jpg?direct&)

ኮዖዛንክ ሾሽ ዶዖቕዳኬታም ዎ ሼድንክ ሳዓቢ ሬይ ሙዴናም ዬዛቓብ ማዓትንትንክታሜ፡፡ ካንካን ሳዓቢ ርካምኬ ፔጫምክ ዋዓርኮቴሬ ሃዓፔርዳክ ሬይናም ላዓ ሴጽግር ፕዤ፤ ሳዓቤሬ ይ ፕዣኬት ቡዑር ፔጫ ዹምኬ ዋዓርንት ሬይ ዳክንዳ ሃዓቔ፤ ዋዓር ሬይ ዎላቔሴ ኣኪ ፕዥራቕ ሃዓቔ፤ ዳዓኖንምሺ ሳዓብት ማንፔስ ኖቔት ዜን ሽርዳቔ።

![](https://cdn.door43.org/obs/jpg/360px/obs-en-01-02.jpg?direct&)

ኮዖዛንኬሬ ሳዓቢ “ሻዓክሚ ማዓታኔ” ጋይሴ ሻዓክሜሬ ማዓሤ፤ ሳዓቤሬ ሻዓክምና ላቕሚ ኮ ማዓሥምሽ ሼጆ «ሮዖሬ» ጋይሶ ናዓምኮት ዎጄ፤ ሳዓቤሬ ሮዖርናም ዹምንግራንክ ፓዓሾ ዹምናም ሶይትዬ ጋይሶ ናዓምኮት ዎጄ፤ ሳዓቤሬ ብራ ሴጽንክ ሻዓክማም ፕዤ።

![](https://cdn.door43.org/obs/jpg/360px/obs-en-01-03.jpg?direct&)

ቓስትምሲ ሴጽንክ ሳዓቢ ፔጬት ዜርሜክ ዶዖቕዳክ ርኬናም ፕዤ፤ ካንካን ሳዓቢ ኖቔናም ርኬንዳንክ ፓዓሼ።

![](https://cdn.door43.org/obs/jpg/360px/obs-en-01-04.jpg?direct&)

ማክምሲ ሴጽንክ ሳዓቢ ኖቔናም ፔጫ ዎቼንዛንክ ፓዓሽምቴምሽ ማዓስሴ፤ ሳዓቤሬ ዎቼናም “ፔጬ” ኖቔናሜሬ “ጼዔርዬ” ጋይሶ ናዓምኮት ዎጄ። ሳዓቤሬ ይ ፕዣቓክ ሬይናም ላቕሚ ማዓሥምሽ ሼጄ።

![](https://cdn.door43.org/obs/jpg/360px/obs-en-01-05.jpg?direct&)

ኮዖግሬሬ ሳዓቢ ፔጬና ሬይ ሙዴናም ሃዓቓምኬ ኮርማምክ ኮ ባቓልሳኔ ጋይሴ፤ ክ ጋይስምሼሬ ማዓሤ፤ ሳዓቤሬ ይ ፕዣቓክ ሬይና ላቕሚ ማዓሥምሽ ሼጄ።

![](https://cdn.door43.org/obs/jpg/360px/obs-en-01-06.jpg?direct&)

ኦይሥምሲ ፕዥርን ሴጽንክ ሳዓቢ ሃያም፥ ኣርፓምኬ ማንካምክ ፕዤ፤ ሳዓቢ ሮዖራምኬ ሶይታምክ ማሻ ኣርፓምኬ ቦናምክ ኬ ፓዓሽምቴምሽ ማዓስሴ፤ ሳዓቤሬ ይ ፕዣቓክ ሬይና ላቕሚ

ማዓሥምሽ ሼጄ።

![](https://cdn.door43.org/obs/jpg/360px/obs-en-01-07.jpg?direct&)

ዶንቕሲ ሴጽንክ ሳዓቢ ኖቔግር ዶዖቕዴዳምኬ ኣፕቲ ሙዴናምክ ፕዤ፤ ሳዓቤሬ ኮዖና ላቕሚ ማዓሥምሽ ሼጄ፤ ፕዤርሻቔድናሜሬ ኣንጄ።

![](https://cdn.door43.org/obs/jpg/360px/obs-en-01-08.jpg?direct&)

ላሲ ሴጽንኬሬ ሳዓቢ “ፔጬት ዜን ዴቢ ሙዳ ይንት ካዓሥይምሽ ኬ ማዓታኔ” ጋይሴ፤ ሳዓቢ ጋይስምሼሬ ማዓሤ፤ ዋይኒ ዎዖኒ ዋኪ ዋይንኔሬ ፔጬክ ባዝዴድ ዋይንኔሬ ቖሤግር ዶዖቕዴድ ዴቢ ሃዓቔኬ፤ ሳዓቤሬ ኮዖና ላቕሚ ማዓሥሽ ሼጄ።

![](https://cdn.door43.org/obs/jpg/360px/obs-en-01-09.jpg?direct&)

ሳዓቤሬ “ኤድናም ዎንት ካምስምሽ ዎ ፕዣኔ ኬቴሬ ፔጫ ሙዴዜንኬ ቖልማ ሙዴዜንክ ጋዓንምኬት ዶዖቓኔ” ጋይሴ።

![](https://cdn.door43.org/obs/jpg/360px/obs-en-01-10.jpg?direct&)

ካንካን ሳዓቢ ፔጬራንክ ፔጫም ቴዮ ኤዔድ ማዓስቶ ኣክሼትዳቦ ክ ኡክንቴምሽ ኪም ማዓስሴ፤ ኤዔሥን ኮዖቴሬ ናዓሚ ኣዳም ጋዓርሴ፤ ሳዓቢ ኣዳም ዶዖቕዳክ ካርንግር ኮርሚ ኮርስዮ ክT ኤዔቕስቴምሽ ዋዓር ኪም ዎጄ።

![](https://cdn.door43.org/obs/jpg/360px/obs-en-01-11.jpg?direct&)

ኮርምንቴሬ ሞልትግር ሳዓቢ ሃዓቓ ቓስቴን ጋላ ጋሌዳም ኮርሴ፤ ኡክና ዶዖቕስድንዳ ሃዓቔኬ ላቕማምኬ ዳቕላምክ ፓዓሽትዮ ኤሴርቴምሽ ማዓስስዴድ ሃዓቓ ዶዖቕዳቔኬ፤ ሳዓቤሬ ኣዳማ ኮርሚ ካርንግር ዶዖቕዳክ ላቕምናምኬ ዳቕልናምክ ፓዓሽትዮ ኤሴርቴምሽ ማዓስዳክ ሃዓቔን ካይሳ ኮርሚ ሃዓምንግር ዶዖቕዳክ ሃዓቓ ሃምንቴሬ ኣዓፕናም እሥንቲ ኪን ማዓድምሽ ኪን ኬዔዜ። ዳይንኬኬሬ ላቕምናምኬ ዳቕልናምክ ፓዓሽትዮ ኤሴርቴምሽ ማዓስዳክ ሃዓቔንት ኣዓፒ ክ እሥድንክ ዴኢ ክ ዴእድምሽ ኪን ኬዔስታ ሃዓቔ።

![](https://cdn.door43.org/obs/jpg/360px/obs-en-01-12.jpg?direct&)

ሳዓቢ ኤዔድ ሃኪ ክ ማዓሥንክ ላቕሚ ዳክዬ ጋይሴ፤ ዴብንግራንክ ኣዳምካን ኬልሺ ማዓዳብ ሃዓፔርክዬ።

![](https://cdn.door43.org/obs/jpg/360px/obs-en-01-13.jpg?direct&)

ሳዓቤሬ ኣዳምዜን ዛምንዳ ግንእ ታዓዴ፤ ራዓታ ክ ዳይክ ሌግግርክታንክ ሌፒ ዎላቔንዳታም ቴይዮ ማዓ ማዓስሶ ኣክሼትዳቦ ኣዳምዳ ኮዖም ታዓዴ።

![](https://cdn.door43.org/obs/jpg/360px/obs-en-01-14.jpg?direct&)

ኣዳሜሬ ኮዖም ይ ሼጃኬንክ ኮይን ጋይሴ፤ “ኮና ኢም ካምድንዴ፤ ኣንግዳንክ ኮ ሃዓፔርሳቕንካን ማዓ ኮዖም ጋዓራኔ ጋይሴ፤ ካንካን ኤዔድ ባዓቤናምኬ እንዴናምክ ጋጋርዴ ማይንት ኪክን ዎላቕ ማዓዴ።

![](https://cdn.door43.org/obs/jpg/360px/obs-en-01-15.jpg?direct&)

ሳዓቢ ኣንጋምኬ ማዓምክ ይንት ካምስክ ፕዤ፤ ሳዓቤሬ ኬዔም ኣንጄ፤ ኮይኔሬ ኬዔን ጋይሴ “ቤድሚ ይንሤንትኬ ይንሥት ይንሤንቴሬ ዬዔን ኬ ዶዖቓኔ ፔጬንኬሬ ጾዖጽኬቴ” ሳዓቤሬ ይ ፕዣቓክ ሙዳም ላቕሚ ማዓሥምሽ ሼጄ፤ ሬይ ሙዴኬሬ ጉሜርሴ፤ ኮዖና ሙዳ ላዓ ሴጽግር ማዓሤ።

![](https://cdn.door43.org/obs/jpg/360px/obs-en-01-16.jpg?direct&)

ታፕሲ ሴጽንኬሬ ሳዓቢ ፕዤይንታም ማቕሼ፤ ካንካን ሳዓቢ ይ ዎዖንዳቓክ ዎዖኒ ሙዴግራንክ ሃዉሼ፤ ታፕሲ ሴጽናም ኣንጆ ኮዖም ጪልሼ፤ ሃራካኔ ጋዓርስንክ ኮዖ ሴጽንግር ይ ዎዖንዳቓክ ዎዖኒ ሙዴግራንክ ክ ሃዉሻቕንካኔ፤ ሳዓቢ ርካምኬ ፔጫምክ ዋዓርኬቴሬ ዶዖቕዴዳም ክ ፕዥዳኬንክ ሬይን ዎዖንምሳቓክ ኮይናሜጎክ ሃዓቔ።

*ማጻዓፕ ጪልት ኣቴና ፕዥ1-2*

## 2. ዳቔልሲ ፔጬዜን ሃዓድምሽ

https://openbiblestories.org/l/aiw/story-2/

![](https://cdn.door43.org/obs/jpg/360px/obs-en-02-01.jpg?direct&)

ኣዳምኬ ማይንክቴክ ሳዓቢ ኬዔን ፕዥቓክ ኮርሚ ካርንግር ኬ ዶዖቕዳኬንክ ጋእሻ ጉሜርክ ሃዓቔኬ፤ ቓስቴንኔሬ ዜና ጉሪ ሃዓቔኬ ዳይንኬሬ ዜና ጉሪ ማዓትንትኔኬት ኬ ኦዖሽንቴምሽ ኬዔም ማዓሳቕዬ፤ ሃራካኔ ጋዓርስንክ ዳቔልሲ ፔጬዜን ዳኪ ሃዓቔ፤ ኬቴሬ ኮርሚ ካርንግር ኡንጋሮ ሳዓቢ ኪክን ኬዔዝምዳቔኬ።

![](https://cdn.door43.org/obs/jpg/360px/obs-en-02-02.jpg?direct&)

ዳይንኬሬ ዺዽሜባብ ጉኒ ኮርሚ ሃዓምንግር ሃዓቔ፤ ማይናሜሬ ጎይሴ “ሳዓቢ ኮርሚ ሃዓምንግር ዶዖቕዳክ ሃዓቓ ሃምንቴሬ ኣዓፒ ዬ እሣይምሽ ዬዔን ጋዓቶ?” ኮዖን ጋይሴ።

![](https://cdn.door43.org/obs/jpg/360px/obs-en-02-03.jpg?direct&)

ኤዔድቴኔሬ “ሳዓቢ ዳቕልናምኬ ላቕምናምክ ፓዓሽትዮ ኤስምስዳክ ሃዓቔን ካይሳ ሃዓቓ ሃምንቴሬ ኣዓፒ ዎ እሥድምሽ ዎዖን ኬዔስቴ፤ ዳይንኬሬ ሃዓቔን ኮዖት ኣዓፒ ዬ እሥንክ ዋይ ኣዓኔንቴክ ካንክ ዬ ዎዖልስንክ ዴኢ ዴእዴቴ” ዎዖን ጋይሳቔ።

![](https://cdn.door43.org/obs/jpg/360px/obs-en-02-04.jpg?direct&)

ጉንስኔሬ ኤዔቴንቴን ማዓስቶ፤ “ኮዖና ዶዖፔን ዳክዬ ዴኢ ዴኣዬቴ ሃዓቔንት ኣዓፕንግራንክ ዬ እሥንክ ኣዓፕዬንት ፖዖችምዳኬታምኬ ዳቕልናምኬ ላቕምናምክ ፓዓሽትዮ ኤስንትክ ሳዓብምሽ ዬ ማዓዳኬታም ይ ኤስድንካን ሃይ እሥኬቴ ዬዔን ጋይሳቔ” ጋይሴ።

![](https://cdn.door43.org/obs/jpg/360px/obs-en-02-05.jpg?direct&)

ኤዔቴን ሃዓቔስንት ኣዓፕና እሥካን ላቕሚ፥ ኣዓፕክ ሼዴርሽንኬሬ ጉሜርሽዳብኬ ሩዑርማም ኤስንትካኔሬ ኡቑምሽዳብ ክ ማዓዳኬታም ይ ሼጃኬንክ ኣዓፕንግራንክ ቴዮ እሤ፤ ኮ ኪክን ሃዓቓብን ክእስካኔሬ እምሴ፤ ኖዖሬ ሃዓቔስንት ኣዓፕንግራንክ እሤ።

![](https://cdn.door43.org/obs/jpg/360px/obs-en-02-06.jpg?direct&)

ሳዓኔሬ ቓስቴንንት ኣዓፕኬት ፖዖችምሼ፤ ዜና ጉሪ ይ ሃዓቕምሼሬ ኤስቴኬ፤ ቓልኣሜሬ ሎዖሽቴኮ ዣዓክትዮ ኣብሌምሽ ዜኔዜይንት እቤርሽካን ጴጼኬ።

![](https://cdn.door43.org/obs/jpg/360px/obs-en-02-07.jpg?direct&)

ኤዔሥንኬ ማይንክቴክ ሳዓብት ኡፕሳም ኮርሚ ሃዓምንት ሞልትግር ክ ኡንድክ ኤሴርቴኮ ሙዴና ሳዓብት ብሬዛንክ ዛቕሴኬ፤ ሳዓቤሬ ኣዳማም ኤዔልቶ “ሃብራ ዳዬ?” ኪን ጋይሴ፤ ኣዳሜሬ “ኮርሚ ሃዓምንግር ሃ ኡንግድክ ኤሴርስቴ ዜና ጉሪ እ ማዓሥንካን ጳሽንትክ ዛቕሳቕቴ” ጋይሶ ኪን ማዓስሴ።

![](https://cdn.door43.org/obs/jpg/360px/obs-en-02-08.jpg?direct&)

ሳዓቤሬ “ዜና ጉሪ ሃ ማዓሥምሽ ሃይ ሃዓን ኬዔዜ? ኮ ግራንክ ሃይ እሥካ ጋይስቶ ሃዓን እ ኬዛቓብ ሃዓቔስንት ኣዓፔን እሣ?” ኪን ጋይሴ፤ ኣዳሜሬ “ኮና እ ኪክን ኮ ዶዖቕቴምሽ ሃ እምሳቓክ ኤዔቴን ናዓ ሃዓቔስንት ኣዓፕንግራንክ ኢን ኮ እምስክ እሥቴ” ኪን ጋይሴ፤ ሳዓቤሬ ኤዔቴንቴን ኮና ሃ ዬእሳቓክ ሃራ ዳይኬ?” ኮዖን ጋይሴ፤ ናዓሬ “ጉኒ ኢም ቱንትምስክ እሥቴ” ኪን ጋይሴ።

![](https://cdn.door43.org/obs/jpg/360px/obs-en-02-09.jpg?direct&)

ሳዓቢ ጉንስንቴን ኮይን ጋይሴ፤ “ኣሽምቴባባዬ፤ ልጳንቴክ ባዓዝዳዬ ፔጬሬ እሥዳዬ ሃንኬ ኤዔቴንክ ኪክ ይዥዴድ ማዓዴቴ ሃንት ይንሥንኬ ኮት ይንሥንክ ኮይን ኪክ ይዥዴድ ማዓትዴኬ ኤዔድቴንት ካዓሥና ማታሃንታም ግእዴ ሃዓኔሬ ዴጌልትክታም ጋእዳዬ።”

![](https://cdn.door43.org/obs/jpg/360px/obs-en-02-10.jpg?direct&)

ሳዓቤሬ ኤዔድቴኔን ኮይን ጋይሴ “ኣዽማ ሃ ጋኤርዳኬንክ ካልምናም ሃዜን ቤሥድቴ፥ ጶቕሽሃንቴሬ ሃክእዳንክ ማዓዴ ኖዖሬ ሃዓም ጌሥዳብ ማዓዴ።”

![](https://cdn.door43.org/obs/jpg/360px/obs-en-02-11.jpg?direct&)

ሳዓቢ ኣዳሜኔሬ ኮይን ጋይሴ፤ “ማይሃንቴት ኬዔዛም ኤሴርሳዮ ሃ እሣይምሽ እ ሃዓን ኬዔዛቓክ ሃዓቔስንት ኣዓፒ ሃ እሥንካን ፔጫ ሃዛንክ ዻዓምሳቕንዳ ኣሽምቴ፤ ኡክና ቦንሃንት ሙዴክ እሥምሃንታም ኦዖጼርሲ ላንቕስዮ ግራንክ እሥዳዬ፤ ኮዖዛንኬሬ ዴእዳዬ ፔጫ ሃ ማዓሣቕንካን ፔጬዳ ማዓዳዬ።” ኣዳሜሬ ማይንታም ኣዓፓካሜድ ሙዴት እንዲ ኮ ማዓሥንካን ሄዋኔ ጋይሶ ናዓምኮት ዎጄ፤ ቡልንኮቴሬ ኡክናም እምድንዴ ጋይንትዬ፤ ሳዓቤሬ ቖልሜት ጉፕቴጌራንክ ዾዖኒ ኣክሽቶ ኣዳሜንኬ ሄዋኔቴንክ ቖፕሴ።

![](https://cdn.door43.org/obs/jpg/360px/obs-en-02-12.jpg?direct&)

ሳዓቤሬ ኤዔድ ላቕማምኬ ዳቕላምክ ፓዓሽትዮ ኤስንትጎካን ታ ኣና ዎግራንክ ዎላቓብንምሽ ማዓቴ ታ ዳይንኬሬ ኣዓንይንቴክ ሃዓቔስንት ኣዓፒ ቓሽቶ ክ እሥታክምሽኬ ሌፒ ሴጽካን ክ ዶዖቕታክምሽ ኣዳማምኬ ሄዋኔታምክ ላቕማይሳክ ኮርሚ ሃዓምንግራንክ ኬዔም ዉሥሴ፤ ኮዖዛንኬሬ ኮርሚ ሃዓምንግር ካይዳክ ጎኦግናም ጶይንትካንኬ ሃይዬሬ ኣዓፔክ ዶዖቔርቴምሽ ማዓስዳብ ሃዓቔስንት ኣዓፒ ቓሽቶ ኬ እሣይምሽ ዛሜድ ሳዓቢ ርኬግራንክ ዎዖንይንትካን ክ ኦይዴድናም ኮርሚ ሃዓምንግር ኬዔም ዎጄ።

*ማጻዓፒ ጪልንት ኣቴና ፕዥ 3*

## 3. 3 ካይሳዳክ ኖቔና

https://openbiblestories.org/l/aiw/story-3/

![](https://cdn.door43.org/obs/jpg/360px/obs-en-03-01.jpg?direct&)

ሮዖትሚ ቦንት ቡዑር ቤድሚ ኤዔድ ፔጬዜን ዶዖቕዳቔ፤ ኬቴሬ ጋእሻ ዳቕሊ ኤዔድኬ ዛሜድ ማዓሤኬ፤ ዳቔልስኔሬ ጋእሻ ቤድንትንኮቴክ ሳዓቢ ፔጬናም ሙዳ ኣቕዝንትክ ካይስድንዳ ኖቓ ዜንኬት ታዓድቴ ጋይሶ ጶቕሼ።

![](https://cdn.door43.org/obs/jpg/360px/obs-en-03-02.jpg?direct&)

ኖህ ዳይንክ ሳዓብዳንክ ስልሜት ሃዓፕሴ፤ ኖህ ይንት ቦንንግር ዶዖቕዴድ ኤዔድን ሙዴዛንክ ጋዓጺ ጪልባብኬ ባሥግራንክ ፔግምቴባብ ኤዔድ ሃዓቔ፤ ሳዓቤሬ ታዓድካን ይ ጶቕሻቓክ ካይስዳክ ኖቔንጎክ ኖህካን ኬዔዜ፥ ካንካን ኖህ ጋእሼባብ ማርኬብ ጋዓርዳክ ኖቔዜን ካይዳኬታም ክ ኣክሻን ሳዓቢ ኬዔዜ።

![](https://cdn.door43.org/obs/jpg/360px/obs-en-03-03.jpg?direct&)

ሳዓቤሬ ኖሄን ማርኬብ ክ ኣክሻን ኬዔዜ፤ ማርኬብንቴሬ ሮዖትምና ቓስቴን ማቶኬ ቓስታንታሜስ ኣዓኒ (140) ሾሽንኮት ኦይዲ ታምኬ ላዓ ኣዓኒ (23) ፔስንኮት ቦንዴኬ ላዓ ኣዓንኬ ባግክ (13.5) ኣዓኒ ዳዓኔ ጋይሴ፤ ኖህ ኮዖም ኣክሽዳክ ማርኬብና ሃዓቔግራንክ ኣክሼርሻቕንዳ ማዓሦ ፔስ ማኬን ካርክ ኤዬት ዜን ኤያ ማዓስሶ ቤድሚ ጎፓካማ ዱዑርኬ ፑላኮት ዶዖድንዳ ሃዓቔ፤ ናዓሬ ኖሃምኬ ኤዔር ኤዔድንክታምክ ሬይ ሙዳሜሬ ፔጬዜናማ ቖልማም ካይስዳክ ኖቔንግራንክ ክ ጶይቴምሽ ኪን ኬዔዜ።

![](https://cdn.door43.org/obs/jpg/360px/obs-en-03-04.jpg?direct&)

ኖሄሬ ሳዓብካን ኤዔእንትክ ሳዓቢ ኬዔን ኬዔዝምሽ ኪኬ ማኬን ይንሥንክትክ ማርኬብናም ኣክሼኬ፤ ናዓሬ ጋእሼንዳ ኮ ሃዓቕንካን ኣክሼርድክ ቤድሚ ቦን ማቕሴ፤ ኖህ ዣእዳክ ካይስዳክ ኖቔንጎካን ኤዔድንካን ጶቕሽሻሮ ሳዓብዳ ኬ ማዓቴምሽ ኬዔን ኬዔዝዳቔ ዳዓኖንምሺ ክራ ዶዖፕስኬኬ።

![](https://cdn.door43.org/obs/jpg/360px/obs-en-03-05.jpg?direct&)

ሳዓቢ ኖህካንኬ ኤዔር ኤዔድንክቴንክ ዝክስድንዳ እሥማም ይማትካንኬ ቖልሜንካንክ ኬ ሱዽቴምሽ ኬዔዜ ሬይ ሙዳም ኡሴርሳኬት ማርኬብንግር ኣርድንትካን ኖህካንኬ ማይንክቴንክ፥ ማኬንን ኣንግ ይንሥንኬ ማዓኔንኬቴክ ሴጼና ዣእንትንኮታም ኪን ኬዔዜ፤ ቓስታንታሜርስ ኤዔድኔሬ ማርኬብንግር ኣርዜኬ።

![](https://cdn.door43.org/obs/jpg/360px/obs-en-03-06.jpg?direct&)

ሳዓቢ ካይስዳክ ኖቔንግራንክ ኬዔም ጶዬርቴምሽ ቖልሜን ሙዴንት ኣንጋምኬ ማዓምክ ኣፕታሜሬ ጉጅትዮ ኖህይዳ ኬዔም ኦይቴርሴ፤ ጪልሽት እሜካን ማዓዴድን ታብዛ ኣንግኬ ማዓ ቖልምክ ሙዴንግራንክ ኖሄዳ ማርኬብንግር ኦይቴርሴ፤ ሙዴኔሬ ማርኬብንግር ኬ ኣርዝምሽ ሳዓቢ ይንቲ ማርኬብንት ፑልቴናም ዚጼ።

![](https://cdn.door43.org/obs/jpg/360px/obs-en-03-07.jpg?direct&)

ኮዖዛንኬሬ ዶዖብና ቓኒ ዬዜ ቓኖ ቓኖ ቓኖ ጋርክሲ ኦይዲ ታም ሴጽካን (40) ሶይትክ ሮዖርክ ቓንሴ፤ ፔጬንግራንኬሬ ቱዑቲ ፑእዳቔ ፔጫጎይክ ዶዖቕዳክ ሬይ ሙዳ ኖቔክ ቕጭምሼ፤ ሮዖትሚ ባሌኔሬ ካንክ ኔክዳይክ ኖቔክ ኣዓችምሼኬ።

![](https://cdn.door43.org/obs/jpg/360px/obs-en-03-08.jpg?direct&)

ማርኬብንግር ሃዓቔድን ኤዔድንግራንክ ካይሳ ፔጬዜን ዶዖቕዳቔድ ሬይ ሙዳ ዴእሴ፤ ማርኬብቴኔሬ ኖቔት ዜን ኮ ሽርድክ ዋዓርኮት ዶዖቕዴድ ሙዴናም ዴእግራንክ ኬዔም ዻቕሼ።

![](https://cdn.door43.org/obs/jpg/360px/obs-en-03-09.jpg?direct&)

ዶዖብን ቓንን ጋርሻኬት ቡዑር ማርኬብቴንን ኣርፒ `ዶንቕካን ኖቔት ዜን ሽራሮ ዶዖቕሴ፤ ኮዖ ሴጽንክ ኖቔና ዦዖጊ ዬዜ፥ ሴጻ ዎላቕማት ማርኬብቴና ባሌት ማቴዜን ሃዉሼ፤ ዳዓኖንምሺ ፔጫ ሙዴናም ታዓሬ ኖቓ ኣቕዝምስዮ ዳዬ፥ ኣርፒ ማኬንት ቡዑር ባሌንት ማቴና ሃዓፕሪ ዬዜ።

![](https://cdn.door43.org/obs/jpg/360px/obs-en-03-10.jpg?direct&)

ኦይዲ ታም ሴጽት ቡዑር ኖህ ኖቔና ፔጬዛንክ ዎችታ ዳይንክ ኮ ሼቴምሽ ኣፕቲ ቑዑራካም ኦይሤ፤ ቑዑራኬኔሬ ሴሴሬ ሴንኬሬ ፔዔታሮ ፔጫ ዎቻም ሃዓፕካን ኮዖን ማዓትክዬ።

![](https://cdn.door43.org/obs/jpg/360px/obs-en-03-11.jpg?direct&)

ቡዑሬሬ ኖህ ዎሎላም ኦይሤ፥ ዳዓኖንምሺ ኮ ሃዓዉሽድንዳ ፔጫ ሃዓፕንትንካን ኮዖን ማዓትክንካን ኖህዳ ማዓቲ ሃዓዴ፤ ማዓሪ ዎላቕት ቡዑር ኖህ ኣልካ ዎሎልቴናም ኦይሤ ናዓሬ ሃዓቓ ዣንጌርት ቓልኣም ኣፔግርንት ቴዮ ሃዓዴ፤ ኖቔና ዦዖጋሮ ሃዓቕንካን ሬዬሬ ኣልካ ፔጬዜን ባቕላ ዬዜ።

![](https://cdn.door43.org/obs/jpg/360px/obs-en-03-12.jpg?direct&)

ኖህ ታዓሬ ማዓሪ ዎላቕ ጶይሶ ዎሎላም ማክምሲ ካርክ ኦይሤ ኮዖ ሴጽንክ ይ ሃዉሽድንዳ ካሪ ሃዓፕንትክ ማዓትዮ ክራ ሃዓትክዬ፥ ኖቔኔሬ ዎቻሮ ሃዓቔ።

![](https://cdn.door43.org/obs/jpg/360px/obs-en-03-13.jpg?direct&)

ኣርፒ ቓስቴንት ቡዑር ሳዓቢ ኖሄን ሃዓና ሃንት ኤዔር ኤዔድንኬ ቖልሜንክ ሙዳ ማርኬብንግራንክ ዉትኬቴ ኪን ጋይሴ፤ ኤዔር ኤዔድንክቴሬ ማርኬብንግራንክ ዉታቕሴኬ፤ ቤድሚ ይንሣምኬ ይንሥት ይንሣምክ ኣእሴኬ ፔጬንኬሬ ጾዖጼኬ።

![](https://cdn.door43.org/obs/jpg/360px/obs-en-03-14.jpg?direct&)

ኖሄሬ ማርኬብንግራንክ ክ ዉታቕሳኬት ቡዑር ጪልሽት እማ ካር ኣክሼትዳቦ ጪልሽት እሜካን ማዓዴድ ቖልማ ሙዴግራንክ ሳዓብካን እማ እምሴ፤ ሳዓቤሬ ጪልሽት እሜንክ ጉሜርሴ ኖሃምኬ ኤዔር ኤዔድንክታምክ ኣንጄ።

![](https://cdn.door43.org/obs/jpg/360px/obs-en-03-15.jpg?direct&)

ሳዓቤሬ ኮይን ጋይሴ፤ «ኤዔድን ኬ ዎዖንዳኬ ዳቕሊ ሬይንጎክ ኣልክምሲ ፔጫም ዎላቔሴ እ ኣሻያኬታም ጫዓቓ ኣርድቴ፤ ሃስን ዳይኬሴሬ ኤዔድና ይንሥርምዜይንታንክ ዬዞ ዳቕልሲ ኤዔድ ኬ ዳይንኬሬ ፔጬናም ኣልክምሲ ካይስድንዳ ኖቔክ ካይሳይቴ» ጋይሴ።

![](https://cdn.door43.org/obs/jpg/360px/obs-en-03-16.jpg?direct&)

ሳዓቢ ይንት ጫዓቓ ኣርትንት ጴዔጵ ማዓቴምሽ ኤናንክ ዳክንዳ ዙላም ኣክሼ፤ ሙዳ ሴጽክ ዙላም ርኬዜን ሃዓፔርዴ ሳዓቢ ኮዖ ዙልንጎክ ኤዔድንካን ይ ኣርዛቓክ ጫዓቔናም ኤስምስዴ።

*ማጻዓፕ ጪልት ኣቴና ፕዥር 6-8*

## 4. 4 ሳዓብት ጫዓቓ ኡፕስን ኣብራም ኪክን

https://openbiblestories.org/l/aiw/story-4/

![](https://cdn.door43.org/obs/jpg/360px/obs-en-04-01.jpg?direct&)

ካይስዳክ ኖቔንት ቤድሚ ቦንት ቡዑር ኤዔድና ኣልካ ፔጬት ዜን ቤዜኬ፤ ሙዴና ዎላቔንዳ ኣፓ ኣልቕዳቔ ሳዓቢ ዪን ኬዔዛቕምሽ ፔጬንክ ጾዖጽንት ኔግክ ኪክዜን ዎላቕ ማዓሦ ሱዽምንትክ ካትማ ኣክሼኬ።

![](https://cdn.door43.org/obs/jpg/360px/obs-en-04-02.jpg?direct&)

ኬቴሬ ጋእሻ ጺልዴድኬ ሳዓቢ ዪን ኬዔዛቓኬትካን ይካሣም ጶያቔድ ሃዓቔኬ፤ ኮዖዛንኬሬ ርኬግር ዣእንትካን ሮዖትምንዳ ኤያ እክንቲ ዬዜኬ፤ ሳዓቤሬ ኬዔና ኤዔድን ዳቕልንዳ ሬያም ዎዖንንትንኬታምኬ ጋርክሶ ፕክሽንትኬታምክ ሼጄ፤

![](https://cdn.door43.org/obs/jpg/360px/obs-en-04-03.jpg?direct&)

ካንካን ሳዓቢ ኣልቕንኬታም ቤድሚ ኣፓ ኣልቕድንዴትክ ኦዖክንትክ ኤዔድናም ፔጬት ዜን ሙዳም ኮፕትዮ ኦይሤ፤ ኣክሽካን ኬ ዬዛቓክ ካትሜንት ናዓሚ ባብሎን ጋዓርዴ ናዓምንት ቡልኔሬ ቡቕምቴንዴ ዋይ ኬ ጶቕሽድንዳ ይራንክ ካያቔድ ጋይንትዬ።

![](https://cdn.door43.org/obs/jpg/360px/obs-en-04-04.jpg?direct&)

ዎላቕ ማቶ ቦንት ቡዑር ኣብራም ጋዓርዳብ ኤዔሥኔን ሳዓቢ ኮይን ጋይሴ፤ ፔጫሃንታምኬ ኤዔር ኤዔድሃንታምክ ጋርሻዮ እ ሃዓን ዻዉዳክ ፔጭንግር ካይካ፤ ኮዖግሬሬ ሃዓም ኣንጅድቴ ናዓምሃንታሜሬ ዴዔጽሚ ማዓስድቴ ሃዓም ኣንጅዳባም ኣንጃንጅድቴ ሃዓም ኣሽዳብናሜሬ ኣሻሽድቴ ሃዛንክ ዻዓምሳቕንዳ ፔጫዜናሜድ ኤዔድ ሙዳ ኣንጃንጅምዴኬ።

![](https://cdn.door43.org/obs/jpg/360px/obs-en-04-05.jpg?direct&)

ኣብራሜሬ ሳዓብካን ኤዔእሴ ማይንት ሶራምኬ ይንት ፕክሽዴድ ሙዳምክ ቖልቴይንት ሙዳሜሬ ቴዮ ሳዓቢ ዪን ዻዉሳቓክ ካናኣን ፔጭግር ካዬ።

![](https://cdn.door43.org/obs/jpg/360px/obs-en-04-06.jpg?direct&)

ኣብራም ካናኣን ፔጭግር ክ ዣእሻክ ሴጽንክ ኣዓቢ «ሼዔጋሃንቴክ ዶዖቕዳክ ሙዳም ሼትካ፤ ሃ ሼዳክ ፔጫ ሙዳም ሃዓኔንኬ ካዓሥሃንቴንክ ዻዓልማ ሃዓሜንት ማዓስስቶ ዬዔን እምድድቴ» ኪን ጋይሴ፤ ኣብራሜሬ ፔጬንዜን ዶዖቕሴ።

![](https://cdn.door43.org/obs/jpg/360px/obs-en-04-07.jpg?direct&)

ሴጼግራንክ ዎላቕማት ኣብራም ማልክ ጻዴቕ ጋዓርዳብ ጋእሼባብ ሳዓብት ኤዔድናም ሳዓቢ ኪክን ቔዔሽምሽዳብስንዳ ማሽምሼ፤ ማልክ ጻዼቔሬ ኣብራማም ኣንጄ ኮይኔሬ ኪን ጋይሴ፤ «ርኬቴኬ ፔጬቴክ ባዓባ ዴዔጽምባብስን ሳዓቢ ኣብራማም ክ ኣንጃኔ» ኣብራሜሬ ማልክ ጻድቔን ይንት ዶዖቕዳክ ሙዴግራንክ ታሜንግራንክ ዎላቕ ኪን እምሴ።

![](https://cdn.door43.org/obs/jpg/360px/obs-en-04-08.jpg?direct&)

ቤድሚ ቦን ማቕድንኬሴ ኣብራምኬ ማይንክት ሶራክ ታዓሬ ይንሥኬት ዳክዳይክ ዶዖቕዳቔኬ ሳዓቢ ኣብራሜን ኣልክምሲ ጉሜርናም ኪን ኬዔዜ ይንሢ ክ ኣእስድምሽኬ ካዓሥንክት ርኬዜናማክ ማንኬምሽ ኬ ቤድምሽ ኪን ኬዔዜ፤ ኣብራሜሬ ሳዓብት ጉሜር ኬዔስትንዜን ቡዑድ እዝንትንክትጎክ ጪልባብ ኪም ማዓሴርሴ።

![](https://cdn.door43.org/obs/jpg/360px/obs-en-04-09.jpg?direct&)

ሳዓቢ ኣብራም ኪክን ጫዓቓ ኣርዜ፤ ጫዓቓ ቓስቴኔድ ኤዔድንት ሞልትግር ዎዖኔርድንዳ ኤዔድምት ጶቕሽዬ፤ ሳዓቤሬ ኣብራሜን «ሃንት ኮዖርግራንክ ይንሢ ሃዓን እምድቴ» ኪን ጋይሴ፤ «ሃንት ካዓሥንካኔሬ ካናኣን ፔጭናም ሃዓን እምድቴ።» ኣብራም ዳይንክ ኮዖ ሴጽንክ ይንሥክት ዳክዳይክ ዶዖቕዳቔ።

*ማጻዓፕ ጪልት ኣቴና ፕዥ11—15*

## 5. ጉሜር ይንሥስና

https://openbiblestories.org/l/aiw/story-5/

![](https://cdn.door43.org/obs/jpg/360px/obs-en-05-01.jpg?direct&)

ታማ ቦንት ቡዑር ኣብራምኬ ሶራክ ካናኣንግር ዣእሼኬ፤ ኮዖኬካ ይንሥኬት ዳክ ሃዓቔ፤ ካንካን ኣብራምት ማይን ሶራ ኮይን ኪን ግይሴ፤ «ሳዓቢ ይንሢ ኢን ክ ሜርስንካንኬ እቴሬ ጋልቴርቴንዳ እ ማዓሥንካን እስት ፕክሽዳክ ኣጋር ሃራ ኮናዬ ኮዖም ቴይካ ኢኔሬ ይንሢ ኮ ኣዻኔ» ኪን ጋይሴ።

![](https://cdn.door43.org/obs/jpg/360px/obs-en-05-02.jpg?direct&)

ኮዖጎክ ኣብራም ኣጋራም ቴዬ፤ ኣጋሬሬ ኣንግ ይንሢ ኪን ኣጼ፤ ኣብራሜሬ «እስማኤል» ጋይሶ ናዓምክት ዎጄ፤ ዳዓኖንምሺ ሶራ ኣጋርዜን ኒቕምሴ፤ እስማኤል ታሜኬ ማኬን ቦንክት ማዓሥክ ሳዓቢ ኣብራሜን ኮይን ጋይሴ።

![](https://cdn.door43.org/obs/jpg/360px/obs-en-05-03.jpg?direct&)

ሳዓቤሬ ኣብራሜን «እታ ሃሬሬ ኢም ባሻይባብ ሳዓብቴ፤ ሃ ኪክን ጫዓቓ ኣርድቴ» ኪን ጋይሴ ኣብራሜሬ ዎትንቴክ ፔጬዜን ቡኬልሴ፤ ሳዓቤሬ ኣብራሜን ኮይን ጋይሴ፤ «ሃዓና ቤድሚ ኤዔድንት ባዓቢ ማዓዳዬ፤ ካናኣን ፔጭን ሃካንኬ ካዓሥሃንትካንክ ዻዓልማ ሃዓሜንት ማዓስስቶ ዬዔን እምድቴ እቴሬ ሌፒ ሴጽካን ሳዓቤንት ማዓድቴ ሃዓኔሬ ኤዔር ኤዔድሃንትግር ዳዬድ ኣንግ ሙዴት ሾላም ቴችካ» ኪን ጋይሴ።

![](https://cdn.door43.org/obs/jpg/360px/obs-en-05-04.jpg?direct&)

ሳዓቤሬ «ማይሃንት ሶራ ኣንግ ይንሢ ሃዓን ኣዽዴ ኖዖሬ ጉሜርን ይንክ ዶዖቕዳብን ማዓዴ ናዓምንክታም ይሳቔ ጋይሶ ዎጅታዬ፤ ጫዓቓእስታሜሬ ክ ኪክን ማዓስድቴ ኖዖሬ ዴዔጽምባብ ኤዔድ ማዓዴ፤ እስማኤላሜሬ ዴዔጽምባብ ኤዔድ ማዓስድቴ፤ ዳዓኖንምሺ ጫዓቓእስት ይሳቕ ኪክን ማዓዴ» ኪን ጋይሴ፤ ሳዓቤሬ ኣብራምት ናዓሚ «ኣብርሃም» ጋይሶ ኦዖክሴ ቡልንኮቴሬ «ቤድሜድንት ባዓቢ» ጋይንትዬ። ሳዓቢ ሶራቴሬ ናዓሚ ሳራ ጋይሶ ኦዖክሴ ቡልንኮቴሬ «ቤድሜድንት እንዲ» ጋይንትዬ።

![](https://cdn.door43.org/obs/jpg/360px/obs-en-05-05.jpg?direct&)

ኮዖ ሴጼን ካንክ ኣብራም ኤዔርንት ዶዖቕዴድ ኣንግ ሙዴት ሾሌናም ቴቼ፤ ቦንት ቡዑር ኣብራምት ዎላቕ ማቶ ቦን ጾዖጽክ ሳራ ዎልቓንታሜርስ ታምኬ ዎልቓንታሜርስክ ቦንኮት ማዓሥክ ኣብራሜን ኣንግ ይንሢ ኪን ኣጼ ሳዓቤሬ ኬዔን ጋይስምሽ «ይሳቔ» ጋይሶ ናዓምክት ዎጄኬ።

![](https://cdn.door43.org/obs/jpg/360px/obs-en-05-06.jpg?direct&)

ይሳቕ ማርድ ክ ማዓሣኬንክ ሳዓቢ ኣብራምት ቡዑድ እዝንትናም ኮይን ጋይንትክ ጴጼ፤ «ሃ ዪም ናሽዳብን ይንሥስሃንታም ጪልሽት እማ ማዓስሳዮ ኢን ኪም ቴችካ» ኪን ጋይሴ፤ ኣልክምሴሬ ኣብራም ሳዓብካን ኤዔእሶ ይንሥስናም እምካን ኡስሴ።

![](https://cdn.door43.org/obs/jpg/360px/obs-en-05-07.jpg?direct&)

ኣብራምኬ ይሳቕክ ጪልሽት እማ ካርንዜን ሙክንቲ ኬ ዬዛኬንክ ይሳቕ ባዓቤኔን «ዬ እባቦ ጪልሽት እሜንካን ኦዖሴርድንዳ ሃዓቔና ኮናዬ ቖልስን ዳይንክ ሃብርክ ዳዬ?» ጋይሶ ኪም ጎይሴ፤ ባዓቤኔሬ ዬ ይንሥስእስቶ ጪልሽት እሜንት ቖልስናም ዳይንክ ሳዓቢ ኡሱስዴ» ጋይሶ ኪን ማዓስሴ።

![](https://cdn.door43.org/obs/jpg/360px/obs-en-05-08.jpg?direct&)

ጪልሽት እሜን ካርንዜን ኬ ዣእሽምሽ ኣብራም ይንሥስን ይሳቓም ዻክቶ ጪልሽት እሜን ካርዜን ኪም ራዓሥሴ፤ ኣብራም ይንሥስናም ቴችካን ኣዓንይንታም ኦይሦ ሃልፔናም ቴዬ፤ ሳዓቢ ዳይንክ «ጋርካ ይንሥስንዜን ሬይ ዎላቕሴ ካልሚ ሃይ ዣእሽካ እካን ሃ ጳሽድምሽኬ ዎላቓብን ይንሥስሃንታም ክካን ኡቕምሳዮ ኪም ኢን ሃ ሜራቓኬታም ታ ኤስትቴ» ጋይሴ።

![](https://cdn.door43.org/obs/jpg/360px/obs-en-05-09.jpg?direct&)

ሼዔጌርኬት ኡሣ ትርሼግር ዻኬርሳቓብ ቖሊ ሼጄ፤ ሳዓቢ ይሳቕ ካርግር ጪልሽት እሜንካን ማዓዳብ ቖሊ ኡስታ ሃዓቔ፤ ኣብራሜሬ ጉሜርክ ቖልስናም ጪልሽት እማ ካርንዜን ቴዮ ቴቼ።

![](https://cdn.door43.org/obs/jpg/360px/obs-en-05-10.jpg?direct&)

ሳዓቢ ኣብራሜን ኮይን ጋይሴ፤ «ዎላቕባብ ይንሥስሃንታም ካንክ ኔክዳይክ ሃንት ዶዖቕዳክ ሙዳም ኢን እምንትካን ኤዔእቴባብ ሃ ማዓሥንካን ሃዓም ኣንጅካን ጫዓቓ ኣርድቴ፤ ካዓሥሃንት ርኬት ማንኬዛንክ ጋዓጽዮ ቤድሚ ማዓዴኬ; እካን ሃ ኤዔእሳቕንካን ፔጬዜናሜድ ኤዔድን ሙዳ ሃንክ ኣንጅምዴኬ።»

*ማጻዓፕ ጪልት ኣቴና ፕዥ16—22*

## 6. ሳዓቢ ይሳቕካን ማዓ ክ ኡስስምሽ

https://openbiblestories.org/l/aiw/story-6/

![](https://cdn.door43.org/obs/jpg/360px/obs-en-06-01.jpg?direct&)

ኣብራም ጋእሻ ክ ጋልቴርሳኬንክ ይሳቕት ቦንንክት ማዓ ቴይንትካን ዣእሼ፤ ካንካን ኣብራም ይንት ፕክሽዴድግራንክ ዎላቓብናም ይንት ሱሴን ፔጭግራንክ ይንሥስይንት ይሳቕካን ማዓ ክ ታዓድቴምሽ ኪም ኦይሤ።

![](https://cdn.door43.org/obs/jpg/360px/obs-en-06-02.jpg?direct&)

ኣብራምት ሱሴን ዶዖቕዳክ ፔጭንግር ቤድሚ ሴጽካን ይ ሙክስንዴት ቡዑር ዣእሼ፤ ሳዓቤሬ ዪም ኦይቴርሳቓብን ኣብራምት ፕክሽዳብናም ርብቓዳ ኪም ዣእሼ፤ ርብቓ ኣብራምት እንዴፕስት ይንሥስንት ይንሢ ሃዓቔ።

![](https://cdn.door43.org/obs/jpg/360px/obs-en-06-03.jpg?direct&)

ርብቓ ኤዔር ኤዔድይንታም ጋርሽዮ ኤዔሥን ኣብራምት ፕክሽዳብንት ራቕክ ካይንትካን ኤዔድምሴ፤ ይ ዣእሽምሼሬ ይሳቕት ኤዔር ይእሴ።

![](https://cdn.door43.org/obs/jpg/360px/obs-en-06-04.jpg?direct&)

ቤድሚ ሴጽት ቡዑር ኣብራም ዴእሴ፤ ሳዓቢ ኣብራም ኪክን ክ ኣርዛቓክ ጉሜርንት ጫዓቓ ኬዔዜና ሙዳ ይሳቔን ዣእሼ፤ ሳዓቢ ኣብራሜን ፓይትዮ ማቕሽማይንዳ ካዓሥክት ዶዖቕድምሽ ካዔስታ ሃዓቔ፤ ዳዓኖንምሺ ይሳቕት ማይን ርብቓ ይንሢ ኣዽንቲ ኮዖን ማዓትክዬ።

![](https://cdn.door43.org/obs/jpg/360px/obs-en-06-05.jpg?direct&)

ይሳቕ ዳይንክ ርብቓካን ምክስክ ርብቓ ምንቲ ይንሣም ኮ ሲርቴምሽ ማዓሤ፤ ይንሢ ቓስቴንና ርብቓት ኮዖርግር ኪክ ኪክዜን ዣቕሚ ዬዳቔኬ፤ ርብቓሬ ይንት ኮዖርግር ማዓዳክ ሃራ ዳይንኬሬ ሳዓባም ጎይሴ።

![](https://cdn.door43.org/obs/jpg/360px/obs-en-06-06.jpg?direct&)

ሳዓቤሬ ርብቓካን ኮይን ጋይሴ፤ «ኮዖርግራንት ዳዬድ ቓስቴን ይንሥንግራንክ ቓስቴን ባዓቢ ዉትዴኬ ኬቴሬ ኪክ ኪክዜን ዣቕምዴኬ ቶይድስና ሜራብንካን ፕክሽዴ» ኮዖን ጋይሴ።

![](https://cdn.door43.org/obs/jpg/360px/obs-en-06-07.jpg?direct&)

ርቓብት ይንሥና ኬ ኣዼርዳክ ሴጽንክ ቶይዲ ይንሥስን ዜይምኬ ዜኔንክቴሬ ስጽካምባብ ማዓሦ ኣዼርሴ <ኤሳ> ጋይሴሬ ናዓምክት ዎጄኬ፤ ሜራብን ይንሥስን ኤሳት ዱዑቲ ዬትዮ ኣዼርሴ ናዓምንክታሜሬ <ያይቖብ> ጋይሶ ዎጄኬ።

*ማጻዓፕ ጪልንት ኣቴና ፕዥ 24፥1—25፤26*

## 7. ሳዓቢ ያይቖባም ኣንጅምሽ

https://openbiblestories.org/l/aiw/story-7/

![](https://cdn.door43.org/obs/jpg/360px/obs-en-07-01.jpg?direct&)

ይንሥስኔሬ ጋጵስምሽ ያይቖብ እንዴን ኪክን ኤዔር ዶዖቕንታም ናሽዳቔ፤ ኤዔሳ ዳይንክ ዴቢ ማንጋ ናሽዳቔ፤ ርብቓ ያይቖባም ኮ ናሽድክ ይሳቕ ዳይንክ ኤዔሳም ናሽዳቔ።

![](https://cdn.door43.org/obs/jpg/360px/obs-en-07-02.jpg?direct&)

ሴጼግራንክ ዎላቕማት ኤዔሳ ዴቢ ማንጋግራንክ ማዓትዮ ክ ሃዓድንክ ጋእሻ ዳቔርታ ሃዓቔ፤ ኤዔሳሬ ያይቖቤን «ዋዓዴ ሃ ኡሻቓክ እሥምንግራንክ ቶክሚ ኢን እምካ» ኪን ጋይሴ፤ ያይቖቤሬ ብሬዜን ሃንት ቶይድምናም ኢን እምካ ኪን ጋይሴ፤ ካንካን ኤዔሳ ቶይድምይንቴት ጋዓንምናም ያይቖቤን እምሴ፤ ኮዖዛንኬሬ ያይቖብ ይ ኡሻቓክ እሥምንግራንክ ኪን እምሴ።

![](https://cdn.door43.org/obs/jpg/360px/obs-en-07-03.jpg?direct&)

ይሳቕ ኣንጄትናም ያይቖብካን እምካን ዝግዜ፤ ዳይንኬሬ ኮዖም ይ ዎዖንካኬት ብሬዜን ርብቓኬ ያይቖብክ ይሳቓም ጌሽሼኬ፤ ያይቖብ ኤዔሳም ካምሶ ይሳቕዳ ኡሥምቴ፤ ይሳቕ ጋልቴርታ ክ ሃዓቕንካን ኣዓፕክት ሼዳይ ሃዓቔ፤ ካንካን ያይቖብ ኤዔሳት ኣብላም ቖቤርቶ ዴርትቴሬ ጉፕታም ባዓርግርንትኬ ኣዓንዜይንቴክ ዻክቶ ይሳቕዳ ኡሥምንትክ ኪም ጌሽሼ።

![](https://cdn.door43.org/obs/jpg/360px/obs-en-07-04.jpg?direct&)

ያይቖብ ኤዔሳዳ ሃዓዶ ኮይን ኪን ጋይሴ፤ «እታ ኤዔሳ ሃዓድትቴ ኢም ኣንጅካን ሃዓን ማማዓዴ» ጋይሴ፤ ይሳቕ ዴርትንት ጉፕቴናም ሃዓጾ ሼጆ ኣብሌንክታሜሬ ዎሽሾ ኤዔሳ ማዓሥምሽ ጶቕሽንትክ ኪም ኣንጄ።

![](https://cdn.door43.org/obs/jpg/360px/obs-en-07-05.jpg?direct&)

ያይቖብ ቶይድምንት ጋዓንምናምኬ ኣንጄትናምክ ጌሽሽዮ ክራንክ ክ ቴይንካን ኤዔሳ ያይቖባም ይዤ፤ ባዓቤንኬት ክ ዴእሳኬት ቡዑር ኪም ዴይስካኔሬ ጶቕሼ።

![](https://cdn.door43.org/obs/jpg/360px/obs-en-07-06.jpg?direct&)

ዳይንኬሬ ርብቓ ኤዔሳት ጶቕሽናም ኤሴርቴ፤ ካንካን ኮዖኬ ይሳቕክ ሱሴይንቴዳ ክ ዶዖቓን ፔጋ ፔጭግር ያይቖባም ኦይሤኬ።

![](https://cdn.door43.org/obs/jpg/360px/obs-en-07-07.jpg?direct&)

ያይቖቤሬ ቤድሚ ቦንካን ርብቓት ሱሴን ኪክን ዶዖቕሴ፤ ኮዖ ሴጽንግር ማዓ ቴይሶ ታሜኬ ቓስቴን ኣንግ ይንሥኬ ዎላቕ ማይንሥክ ኣእሴ፤ ሳዓቤሬ ኪም ጋእሻ ዎድምስሴ።

![](https://cdn.door43.org/obs/jpg/360px/obs-en-07-08.jpg?direct&)

ካናኣን ፔጭግር ክ ዶዖቕሳቓክ ቦንዳ ቦንት ቡዑር ያይቖብ ይንት ኤዔር ኤዔድንኬ ክት ፕክሽዴድንክ ቖልሜይንት ሙዴን ኪክን ካናኣን ፔጭግር ማዓትንትካን ጶቕሼ።

![](https://cdn.door43.org/obs/jpg/360px/obs-en-07-09.jpg?direct&)

ኤዔሳ ታዓሬ ኢም ዴይስካን ጶጶቕሽዳ ዳዓቴሬ ጋይሶ ቡዑዴግርንት ይ ጶቕሽንካን ጳሼ፤ ኮዖካኔሬ ቤድሚ ቖልማም እማ ኪን ማዓቴምሽ ኤዔሳካን ኦይሤ፤ ቖልሜናም ክራ ቤይዴድ ያይቖብት ፕክሽዴድን ኤዔሳሬን «ሃንት ፕክሽዳብን ያይቖብ ኬዔና ቖልሜናም ሃዓን ኦይሣቔ ኖዖሬ ኡሣ ሃዓዳዴ» ኪን ጋይሴኬ።

![](https://cdn.door43.org/obs/jpg/360px/obs-en-07-10.jpg?direct&)

ኤዔሳ ዳይንክ ብሬዜኔሬ ያይቖቤን ኔጋኔ ጋዓታ ክ ማዓሥንካን ክራ ማሽምካን ጉሜርዳቔ፤ ያይቖብ ካናኣን ፔጭግር ላቕምክ ዶዖቕሳቔ፤ ኮዖዛንኬሬ ይሳቕ ዴእሴ፤ ያይቖብኬ ኤዔሳክ ኪም ዱዑክሴኬ፤ ሳዓቢ ኣብራምካን ክ ጫዓቕሻቓክ ጉሜር ኡፕስና ታ ይሳቕዳንክ ያይቖቤን ዣእሼ።

*ማጻዓፕ ጪልንት ኣቴና ፕዥ 25፥27—33፥20*

## 8. ሳዓቢ ዬሶፓምኬ ኤዔር ኤዔድንክታምክ ዻቕሼ

https://openbiblestories.org/l/aiw/story-8/

![](https://cdn.door43.org/obs/jpg/360px/obs-en-08-01.jpg?direct&640x361)

ባዓቤንኬት ያይቖብ ዬሶፓም እንዴፕስኬስ ሙዴግራንክ ጋዓጺ ኪም ክ ናሽዳቕንካን ጋዓኔኬት ይ ማዓድምሽ ሃዓሜትክ ክ ሼጃቕንካን ዬሶፕት እንዴፕስኬስ ኪም ይዤኬ ዬሶፔሬ እንዴፕስኬስዳ ክ ሃዓዳኬንክ ኪም ዬቴኮ ኤዔዳም ዛላካን ሼንዴድንቴን ኪ ሼንሼኬ።

![](https://cdn.door43.org/obs/jpg/360px/obs-en-08-02.jpg?direct&)

ቤድሚ ቦንት ቡዑር ያይቖብ ይ ጋልቴርሳኬንክ ቖልሜንክታም ግሽዴድን እንዴፕስኬስ ሃስን ኬ ዳይንኬሬ ኬዔም ክ ሼድቴምሽ ይ ናሽዳብን ይንሥስይንት ዬሶፓም ኬራ ኦይሤ

![](https://cdn.door43.org/obs/jpg/360px/obs-en-08-03.jpg?direct&)

ዬሶፕት እንዴፕስኬስ ኤዔር ኬ ሃዓድካኬት ብሬዜን ዬሶፕት ኣብሌናም ሃእሴኮ ዴርትት ዞምእክ ሳይሴኬ፤ ኮዖዛንኬሬ ዞምእክ ሙልክምሳቓክ ዬሶፕት ኣብሌናም ባዓቤኔን ዻዉሴኬ፤ ኖዖሬ ዴቢ ቖሤግራማ ኪም ዴይሳቔ ጋይሶ ጶቕሽንትክ ጋእሻ ኣቴርሴ።

![](https://cdn.door43.org/obs/jpg/360px/obs-en-08-04.jpg?direct&)

ዛላ ዛልዴድና ዬሶፓም ግብጽግር ኪም ቴይ ካዬኬ፤ ኮዖ ሴጽንክ ግብጽ ፔጭና ኣባይ ኖቔንት ሼዔጌር ዳይንዳ ጋእሼንዳ ፔጫ ሃዓቔ፤ ኤዔዳም ዛላ ዛልዴድኔሬ ዬሶፓም ኤዔዴን ፕክሽዳብ ማዓስሶ ዎድምቴባብ ፔጬን ጌሥዳስንት ጋዓኔስኔን ኪም ሼንሼኬ፤ ዬሶፔሬ ባዓቤስይንቴን ላቕምስትዮ ፕክሽዳቔ፤ ሳዓቤሬ ዬሶፓም ኣንጄ፤፤

![](https://cdn.door43.org/obs/jpg/360px/obs-en-08-05.jpg?direct&)

ባዓቤስንክቴት ማይን ዬሶፕ ይንክ ራዓቴምሽ ኪም ካሌርሴ፤ ዬሶፕ ዳይንክ ሳዓብት ቤሬዜን ዳቔልሲ ዎዖናይቴ ጋይንትክ ኮዖን ኤዔእክዬ፤ ናዓሬ ክዜን ይ ምዼርስንካን ታውክ ኪም ኮ ጻዓጽክ ዬድትዮ ኪም ዻኬርሴ፤ ዻክሪ ኤይንግር ዳይንኬሬ ሳዓብካን ይዜን ቡዑድ እዜርቴባብ ክ ማዓሥንካን ሳዓቢ ኪም ኣንጄ፤፤

![](https://cdn.door43.org/obs/jpg/360px/obs-en-08-06.jpg?direct&)

ሃስን ዳይንኬሬ ዬሶፕ ጪልባብ ክ ማዓድንኬሴሬ ቦን ቓስቴን ማዓሥቴንክ ዬካ ዻክሪ ኤይንግር ሃዓቔ፤ ሴጻ ዎላቕ ግብጽ ኤዔድና <ባዓብስዎንቴ> ኬ ጋዓዳብን ፓርኦን ጋእሻ ዪም ሪርሽዴድ ሃዓሜት ቓስቴን ሼጄ፤ ባዓብስናም ኣዓችዴድንግራንክ ዎላቓቤሴሬ ሃዓሜትንት ቡልናም ኪን ኬዔስካን ኬዔን ማዓትክዬ

![](https://cdn.door43.org/obs/jpg/360px/obs-en-08-07.jpg?direct&)

ሳዓቢ ዬሶፕካን ሃዓሜት ክ ቡልቴምሽ ኪም ማዓስታ ሃዓቔ፤ ካንካን ፓርኦን ዬሶፓም ዻክሪ ኤይንግራንክ ይራ ኪም ታዓሥሴ፤ ኖዖሬ ሃዓሜትናም ኪን ቡልንትክ ኮይን ጋይሴ፤ «ሳዓቢ ታብዛ ምሺ ቦናም ታዓድዴ ኮዖዛንኬሬ ታብዛ ዳዓቒ ቦን ማዓዴ» ጋይሴ፤፤

![](https://cdn.door43.org/obs/jpg/360px/obs-en-08-08.jpg?direct&)

ፓርኦኔሬ ዬሶፕጎክ ጋእሻ ሪርሴ፤ ግብጽ ፔጭን ሙዴዜን ይዛንክ ቓስትምሲ ጋዓንምይንት ዶዖቕዳብ ኪም ማዓስንትክ ኪም ዎጄ፤፤

![](https://cdn.door43.org/obs/jpg/360px/obs-en-08-09.jpg?direct&)

ዬሶፔሬ ኤዔድና ታብዛ ምሺ ቦንንግር ቤድሚ እስን ኬ ሱዽቴምሽ ኬዔን ኬዔዜ፤ ታብዛ ዳዓቒ ቦንን ዣእሻኬንክ ዬሶፕ ሪቔንግራንክ ኤዔድኔን እስን ክ ሼንድንካን ጋእሻ እሤርድንዳ እሥሚ ሃዓፕዳቔኬ፤፤

![](https://cdn.door43.org/obs/jpg/360px/obs-en-08-10.jpg?direct&)

ዳዓቕንት ቤድንትና ግብጽግር ዬሌክ ማዓትክዳይክ ያይቖብኬ ኤዔር ኤዔድንክት ዶዖቕዳክ ፔጬን ካናኣንግር ካንክ ሃዓቔ፤፤

![](https://cdn.door43.org/obs/jpg/360px/obs-en-08-11.jpg?direct&)

ያይቖብ ይንሥይንት እስን ኬ ሼንቴምሽ ግብጽግር ኬዔም ኦይሤ፤ ዬሶፕ እንዴፕስኬስ እስን ሼንካን ሃዓዴኮ ብሬዜንክት ኬ ዎእሳክ ሴጽንክ ዬሶፕ ማዓትንትንክታም ጶቕሻቔኬ፤ ዬሶፕ ዳይንክ ኬዔም ኤስቴ፤፤

![](https://cdn.door43.org/obs/jpg/360px/obs-en-08-12.jpg?direct&)

ዬሶፕ እንዴፕስኬሳም ይ ጴጻኬት ቡዑር ኬዔን ኤስምታ ዳይንክ ሼድንካን ኮይን ኬዔን ጋይሴ፤ «ሃይ ጳሽኬቴ እታ ዬንዴፕስ ዬሶፕቴ ኤዔዴን እ ፕክሽቴምሽ ኢም ዬ ሼንድንክ ዳቔልሚ እዜን ጶቕሽቴቴ ዳይንኬሬ ሳዓቢ ዳቕልናም ላቕምካን ማዓስሳቔ፤ ሃዓዴቶ ግብጽ ፔጭግር ዶዖቕኬቴ እቴሬ ዬዔኔንኬ ኤዔር ኤዔድዬንቴንክ ዬዔም ዝክስዳክ ሙዳም እምምድቴ።

![](https://cdn.door43.org/obs/jpg/360px/obs-en-08-13.jpg?direct&)

ዬሶፕት እንዴፕስኬስ ፔጬግርንት ማዓቴኮ ዬሶፕ ኣዓፔክ ዶዖቕንትንክታም ባዓቤን ያይቖቤን ኬ ኬዔዛክ ሴጽንክ ኖዖ ጋእሻ ጉሜርሴ።

![](https://cdn.door43.org/obs/jpg/360px/obs-en-08-14.jpg?direct&)

ሃስን ዳይንኬሬ ያይቖብ ይ ጋልቴርስንኬሴ ኤዔር ኤዔድይንት ሙዳ ኪክን ግብጽግር ካዮ ዋዓር ዶዖቕሴኬ፤ ያይቖብ ይ ዴእካኬት ብሬዜን ይንሥይንት ሙዳም ኣንጄ፤፤

![](https://cdn.door43.org/obs/jpg/360px/obs-en-08-15.jpg?direct&)

ሳዓቢ ኣብራምካን ይ ጫዓቕሻቓክ ጉሜርናም ይሳቕዜን ዣእሼ፤ ኮዖዛንኬሬ ያይቖብዜን፥ ኣልክምሴሬ ታሜኬ ቓስቴንን ያይቖብት ይንሥንኬ ኤዔር ኤዔድንኬቴንክ ዣእሼ፤ ታሜኬ ቓስቴን ይንሥና ካዓሥንኬት ታሜኬ ቓስቴን እስራኤል ኤዔድንት ማታ ሱስ ማዓሤኬ።

*ማጻዓፕ ጪልንት ኣቴና ፕዥ37—50*

## 9. ሳዓቢ ሙሳም ኤዔልስምሽ

https://openbiblestories.org/l/aiw/story-9/

![](https://cdn.door43.org/obs/jpg/360px/obs-en-09-01.jpg?direct&)

ዬሶፕ ዴእሳኬት ቡዑር ሱሴንክት ሙዳ ግብጽግር ዶዖቕሴኬ፤ ኬቴሬ ካዓሥንኬቴሬ ቤድሚ ቦንካን ዋዓር ዶዖቕሴኬ፤ ቤድሚ ይንሤሬ ኣእሴኬ ኬዔሜሬ እስራኤሌ ጋዓርሴ።

![](https://cdn.door43.org/obs/jpg/360px/obs-en-09-02.jpg?direct&)

ቤድሚ ማቶ ቦንት ቡዑር እስራኤል ኤዔድና ቤዳሮ ካዬኬ፤ ግብጽ ኤዔድኔሬ ዬሶፓምኬ ኬዔምክ ክ ኬልሽዳቓኬታም ሙዳ ዋልሴኬ እስራኤል ኤዔድንት ቤድንትንዛንክ ዻዓምሳቕንዳ ግብጽ ኤዔድና ኬካን ጳሼኬ፤ ካንካን ኮዖ ሴጽንግር ግብጽ ኤዔድናም ጌሥዜን ዶዖቕዳብን ፓርኦን እስራኤልናም ግብጽ ኤዔድንቴን ፕክሽዴድ ኬዔም ማዓስሴ።

![](https://cdn.door43.org/obs/jpg/360px/obs-en-09-03.jpg?direct&)

ግብጽ ኤዔድና እስራኤል ኤዔድናም ኬዔልቲ ኣክሼርድንዳ ኤያ ኬ እክቴምሽ ካትሜን ሙዳም ኬ እክቴምሽ ማዓስንትክ ዛምክ ኬ ዎዖንቴምሽ ካሌርስዳቔኬ፤ ዴዔጽዳክ ዎዖንና ዶዖቕንትኬታም ካሌርስድንዳ ማዓሤ፤ ሳዓቢ ዳይንክ ኬዔም ኣንጄ ቤድሚ ይንሤሬ ኣእሴኬ።

![](https://cdn.door43.org/obs/jpg/360px/obs-en-09-04.jpg?direct&)

ፓርኦኔሬ እስራኤል ኤዔድንት ቤድሚ ይንሢ ቶክማይሴድ ዶዖቕድምሽ ሼጄ፤ ካንካን ፓርኦን ኬት ኣንግ ይንሢ ኣዼርስንክ ኣባይ ኖቔንግር ዣቕንትክ ኬዔም ዴይሴርቴምሽ ዛፕስትዮ ኬዔዜ።

![](https://cdn.door43.org/obs/jpg/360px/obs-en-09-05.jpg?direct&)

እስራኤል ኤዔድንግራንክ ማዓ ዎላቔንዳ ኣንግ ይንሢ ኣጼ፤ ኮዖኬ ክእስክ ዪን ማዓድንዴትክ ዬካ ይንሥስናም ኣዓቼኬ።

![](https://cdn.door43.org/obs/jpg/360px/obs-en-09-06.jpg?direct&)

ይንሥስንት ኣጼድና ይንሥስናም ኣዓችንትካን ኬዔን ማዓትካኬንክ ይንሥስናም ኖቓ ጼዔርዜን ካይድንዳ ዳቼግር ዎድቶ ኣባይ ኖቔንት ሼዔጌር ዶዖቕዳክ ሱጽርንግር ኪም ዴይስራይምሽ ዻቕሽካን ኖቔንት ዜን ኪም ጋርሼኬ፤ እናንክት ቶይድቴኔሬ ክ ማዓዳኬታም ሼድንትካን ኡሤክ ኪም ሼዳቔ።

![](https://cdn.door43.org/obs/jpg/360px/obs-en-09-07.jpg?direct&)

ፓርኦንት ማዓ ይንሢ ዳቼናም ይ ሃዓፕታኬንክ ዋዓር ዶዖቕዳብናም ሼጄ፤ ይንሥስናሜሬ ይንት ይንሥምሽ ማዓስሶ ኪም ቴዬ፤ ናዓሬ ይንሥስናም ዪን ጋጵሽድንዳ እስራኤል ኤዔድንግራንክ ባዛ ካሽዮ ጋጵሽንትካን ኤዔድምሴ፤ ዪም ኤዔድምሴርሳቓክ ኤዔቴን ይንሥስስንት እንዴን ማዓትንትንኮታም ኤስክ ሃዓቔ፤ ይንሥስኔሬ ክ ጋጵሳኬንኬ ኣሚ ጋእ ክ ጋርሻኬንክ ኤዔቴን ፓርኦንት እኔንዳ ኪም ማዓስሴ ናዓምንክታሜሬ «ሙሳ» ጋይሶ ዎጄኬ።

![](https://cdn.door43.org/obs/jpg/360px/obs-en-09-08.jpg?direct&)

ሴጻ ዎላቕ ሙሳ ይ ጋጵሳኬንክ ግብጽ ኤዔድ ዎላቕባብ እስራኤል ኤዔድ ዎላቕባባም ክ ግእድክ ኪም ሼጄ ሙሴሬ ይንት ኤዔዴስን እስራኤል ኤዔሥናም ዻቕሽካን ጴጼ።

![](https://cdn.door43.org/obs/jpg/360px/obs-en-09-09.jpg?direct&)

ሙሳ ሃይዬሬ ዪም ሼዳይንዳ ኪን ካምስክ ግብጽ ኤዔሥናም ዴይሶ ኪም ዴዑክሴ፤ ዳይንኬሬ ሙሳ ዬእሳቓኬታም ኤዔድ ዎላቕባብ ኪም ሼድታ ሃዓቔ።

![](https://cdn.door43.org/obs/jpg/360px/obs-en-09-10.jpg?direct&)

ሙሳ ዬእሳቓኬታም ፓርኦን ይ ኤሴርታኬንክ ኪም ዴይስካን ጶቕሼ፤ ሙሳ ዳይንክ ፓርኦንት ፖሊስንዳክ ይካሣም ዻቕሽካን ግብጽግራንክ ፔጫ ጉርንግር ሃስትዮ ካዬ።

![](https://cdn.door43.org/obs/jpg/360px/obs-en-09-11.jpg?direct&)

ግብጽግራንክ ፔጋ ማዓድንዳ ፔጫ ጉርንግር ሙሳ ቖሊ ግሽዳብ ማዓሤ፤ ፔጬን ኮዖግራንኬሬ ማዓ ቴዮ ቓስቴን ኣንግ ይንሢ ኣእሴ።

![](https://cdn.door43.org/obs/jpg/360px/obs-en-09-12.jpg?direct&)

ሴጻ ዎላቕ ሙሳ ቖልናም ግሻሮ ክ ዳይክ ኖዖ ዋዓርንት ሮጵድንዳ ትርሻ ሼጄ፤ ዳዓኖንምሺ ትርሼና ኣትክዬ፤ ሙሴሬ ላቕምስትዮ ሼድንትካን ትርሼንት ሼዔጌር ኡሣ ሃዓዴ፤ ክ ኡሥድንክ ሳዓብት ኡፕሲ «ዬ ሙሶ ፔጫ ጪልንዴት ዜን ሃ ዎእሳቕንካን ዱዑትግራንታንክ ኮጴናም ዉሥካ» ኪን ጋይሴ።

![](https://cdn.door43.org/obs/jpg/360px/obs-en-09-13.jpg?direct&)

ሳዓቤሬ ኮይን ጋይሴ፤ «ኤዔድእስቴት ካልርናም እ ሼጃቕንካን ፓርኦንዳ ሃዓም ኦይድቴ እስራኤል ኤዔድናሜሬ ግብጽት ሃይልስንግራንክ ባዛ ካይሳ ኬዔም ዉሥዳዬ፤ ኣብራምካን፥ ይሳቕካንኬ ያይቖብካንክ እ ኬዔዛቓክ ጉሜር ፔጭን ካናኣናም ኬዔን እምድቴ።

![](https://cdn.door43.org/obs/jpg/360px/obs-en-09-14.jpg?direct&)

ኤዔድና ሃይ ሃዓም ኦይሤ ጋይሶ ኢም ኬ ጎይስንክ ሃሪ ኬዔን ጋዓዴ? ጋይንትክ ሳዓባም ጎይሴ፤ ሳዓቤሬ ሙሴን «እታ ዶዖቕዳቓብኬ ኮዛንክ ኦሴሬ ዶዖቕዳብቴ፤ ካንካን ኖዖ ኢም ኦይሣቔ ጋይሳዮ ኬዔን ኬዔስካ» ኪን ጋይሴ።

![](https://cdn.door43.org/obs/jpg/360px/obs-en-09-15.jpg?direct&)

ሙሳ ይ ጳሽንካን ፓርኦንዳ ካይካን ዝግክዬ፤ ሃራካኔ ጋዓርስንክ ኬዔዛም ኤሳይቴ ጋይሶ ይ ጶቕሽንካን ሃዓቔ፤ ካንካን ሳዓቢ ሙሴት እንዴፕስ ኣሮናም ክ ኪክን ክ ካይቴምሽኬ ሙሳሜሬ ክ ኬልሽቴምሽክ ኪም ኦይሤ፤ ሳዓቢ ሙሳምኬ ኣሮናምክ ፓርኦን ኤዔድናም ጋራይቴ ጋይንትክ ቡዑድንታም ክ ዛፕስድምሽ ኬዔን ጶቕሽሽንትክ ኬዔዜ።

*ማጻዓፕ ጪልንት ኣቴና ዉትንቲ 1—4*

## 10. ታማ ሳዓብት ጋዓምና

https://openbiblestories.org/l/aiw/story-10/

![](https://cdn.door43.org/obs/jpg/360px/obs-en-10-01.jpg?direct&)

ሙሴኬ ኣሮንክ ፓርኦንዳ ካዬኬ፤ «እስራኤልት ሳዓብስን ኤዔድእስታም ጋርካ» ሃዓን ጋዓዴ ኪን ጋይሴኬ፤ ፓርኦን ኬራ ኤሴርክዬ እስራኤል ኤዔድናም ባዛ ካይሳ ኬ ዉትዳኬት ኦዖላይሲ ብሬንዛንክ ጋዓጽድንዳ ዎዖኒ ኬ ዎዖንቴምሽ ካሌርሴ።

![](https://cdn.door43.org/obs/jpg/360px/obs-en-10-02.jpg?direct&)

ፓርኦን ኤዔድናም ጋራይቴ ይ ጋዓዳኬትዜን ዛብዝዮ ኔጌ፤ ካንካን ሳዓቢ ግብጽ ኤዔድንዜን ታማ ካርክ ጋዓምይንታም ኦይሤ፤ ሳዓቢ ኬዔና ጋዓምንጎክ ፓርኦንቴኬ ግብጽ ኤዔድንት ጾይስን ሙዴዛንክ ዛምባብ ማዓትንትይንታም ፓርኦንካን ዻዉስሴ።

![](https://cdn.door43.org/obs/jpg/360px/obs-en-10-03.jpg?direct&)

ሳዓቢ ኣባይ ኖቔናም ዞምእምሽ ማዓስሶ ኦዖክሴ፤ ዳይንኬሬ ፓርኦን ታዓሬ እስራኤል ኤዔድናም ጋርክዬ።

![](https://cdn.door43.org/obs/jpg/360px/obs-en-10-04.jpg?direct&)

ሳዓቢ ፔጬን ሙዴዜን ፓንቓም ኦይሤ፤ ፓርኦን ሙሴን ፓንቔናም ክ ፔግምስቴምሽ ኪም ምክሴ፤ ማዓታኖንምሺ ፓንቔና ሙዳ ዴእሴኬ፤ ፓርኦን ቡዑዴይንታም ዛፕስንትክ እስራኤል ኤዔድን ግብጽ ፔጭግራንክ ኬ ዉትቴምሽ ኬዔም ጋርክዬ።

![](https://cdn.door43.org/obs/jpg/360px/obs-en-10-05.jpg?direct&)

ካንካን ሳዓቢ ግምዛም ኦይሤ፤ ኮዖዛንኬሬ ሱንግላም ኦይሤ፤ ፓርኦን ሙሳምኬ ኣሮናምክ ኤዔልቴዳቦ ኬዔና ጋዓምናም ዬ ሜርስንክ እስራኤል ኤዔድን ግብጽግራንክ ዉትንቲ ኬዔን ማዓድምሽ ኬዔዜ፤ ሙሳ ምክሳኬንክ ሳዓቢ ሱንግሌናም ሙዳ ግብጽግራንክ ሜርሴ፤ ዳይንኬሬ ፓርኦን ቡዑዴይንታም ዛፕስንትክ ኤዔድናም ጋርክዬ።

![](https://cdn.door43.org/obs/jpg/360px/obs-en-10-06.jpg?direct&)

ኣልክምሲ ሳዓቢ ግብጽ ኤዔድንት ቖልሜና ሙዳ ሃዤርሽዮ ኬ ዴእቴምሽ ማዓስሴ፤ ዳይንኬሬ ፓርኦንት ቡዑዴና ዛብዝንካን እስራኤል ኤዔድናም ጋርክዬ።

![](https://cdn.door43.org/obs/jpg/360px/obs-en-10-07.jpg?direct&)

ኮዖዛንኬሬ ሳዓቢ ፓርኦንት ብሬዜን ብንዲ ርኬዜን ክ ኮፕቴምሽ ሙሴን ኬዔዜ፤ ብንድናሜሬ ክ ኮፕሳኬንክ ግብጽ ኤዔድንዜን ሴዔቕስድንዳ ዲድ ማዓሤ፤ እስራኤል ኤዔድንዜን ዳይንክ ዲድና ዉትክዬ፤ ሳዓቢ ፓርኦንት ቡዑዴናም ክ ዛፕስንካን ፓርኦን ኤዔድናም ጋርክዬ።

![](https://cdn.door43.org/obs/jpg/360px/obs-en-10-08.jpg?direct&)

ኮዖት ቡዑር ሳዓቢ ግብጽግር ዶዖቕዳክ ባቕላም ሙዳ ካይስድንዴትኬ ኤዬግራንክ ማዓል ሃዓቓብ ኤዔዳም ዴይስድንዳ ኣዚ ኦይሤ፤ ፓርኦን ሙሳምኬ ኣሮናምክ ኤዔልትዮ «ዳቔልስትቴ ካይንቲ ዬዔን ማማዓዴ» ጋይሶ ኬዔን ኬዔዜ፤ ካንካን ሙሳ ሳዓባም ምክሴ፤ ኣዝኔሬ ርኬግራንክ ቓንንትን ጋርሼ።

![](https://cdn.door43.org/obs/jpg/360px/obs-en-10-09.jpg?direct&)

ዳይንኬሬ ኣልክምሲ ዳቔልሲ ዎዖንሴ፤ ቡዑዴይንታሜሬ ዛፕሴ፤ እስራኤል ኤዔድናም ጋርክዬ።

![](https://cdn.door43.org/obs/jpg/360px/obs-en-10-10.jpg?direct&)

ካንካን ሳዓቢ ግብጽዜን ኤይኪ ኤዔሌኬናም ታዓዴ፤ ኬዔና ኤይክና ኣዝን ካይሳቓክ እስንን ሙዳም እሤ።

![](https://cdn.door43.org/obs/jpg/360px/obs-en-10-11.jpg?direct&)

ኮዖዛንኬሬ ሳዓቢ ሴጻ ማኬንካን ዶዖቕድንዳ ዹማም ኦይሤ፤ ግብጽ ኤዔድና ኤዔርንታንክ ኬ ዉታክንዴትክ ዬካ ጋእሻ ዹምታ ሃዓቔ፤ እስራኤል ኤዔድን ዶዖቕዳክ ካርና ዳይንክ ሻዓክሚ ሃዓቔ።

![](https://cdn.door43.org/obs/jpg/360px/obs-en-10-12.jpg?direct&)

ኬዔና ዎልቓንታሜርስ ሳዓብት ጋዓምንት ቡዑር ዳይንኬሴሬ ፓርኦን ታዓሬ እስራኤል ኤዔድናም ጋይራቴ ጋይሴ፤ ፓርኦን ኤሴራይንካን ሳዓቢ ሬይ ዎላቕ ማቕንቴንዳ ጋዓሚ ኦይትንትካን ጶቕሼ፤ ኮዖና ፓርኦንት ጶቕሽናም ኦዖኮክዴ።

*ማጻዓፕ ጪልንት ኣቴና ፕዥ 5—10*

## 11. ፓስጋ ጋዓርዳክ ሳዓቢ ሴጽና

https://openbiblestories.org/l/aiw/story-11/

![](https://cdn.door43.org/obs/jpg/360px/obs-en-11-01.jpg?direct&)

እስራኤል ኤዔድናም ክ ጋርክንክ ኤዔድቴኬ ቖልሜቴክ ካንክ ቶይዲ ሙዳ ዴይሴርድምሽ ሳዓቢ ፓርኦኔን ዛምክ ጶቕሽሼ፤ ፓርኦን ኮዖም ይ ኤሴርታኬንክ ታዓሬ ዶዖፕስንትኬ ሳዓብካን ኤዔኣይቴ ጋይሴ።

![](https://cdn.door43.org/obs/jpg/360px/obs-en-11-02.jpg?direct&)

ሳዓቢ ይዜን ቡዑድ እዝዴድንት ኤዔድ ሃንባብቴሬ ቶይዲ ኣንግና ሙዳም ዻቕሽንትት ጎዖጊ ኡስሴ፤ ኤዔር ኤዔድ ሙዴና ላቕምቴባብ ቖሊ ዬርድ እድትዮ ቴቼ።

![](https://cdn.door43.org/obs/jpg/360px/obs-en-11-03.jpg?direct&)

ሳዓቢ እስራኤል ኤዔድንካን ቖሊ ዬርድንት ዞምእናም ኤዬይንቴት ፑልቴዜን ኬ ሳዓቴምሽ ዋዓናሜሬ ኣሥትዮ ጫዓርሚ ዋዓርንት ዳክንዳ ቕጼክ ሳዓና ኬ እሥቴምሽ ኬዔን ኬዔዜ፤ ይ እሥምሼሬ ግብጽግራንክ ዉትንትካን ኬ ኡስምቴምሽ ኬዔዜ።

![](https://cdn.door43.org/obs/jpg/360px/obs-en-11-04.jpg?direct&)

እስራኤል ኤዔድና ሳዓቢ ዪን ኬዔዛቕምሽ ኬ ዬይቴምሽ ኬዔዜርሳቓኬታም ሙዳ ቦዖሥሴኬ ሶይቲ ካዓስሜዜን ሳዓቢ ግብጽግር ዶዖቕዳክ ፔጫ ሙዴግር ኣንግ ቶይዲ ሙዴናም ዴይሴ።

![](https://cdn.door43.org/obs/jpg/360px/obs-en-11-05.jpg?direct&)

እስራኤል ኤዔድንት ኤዬን ሙዴት ፑልቴንት ዜን ዞምእ ሳዓታ ሃዓቔኬ፤ ካንካን ሳዓቢ ኤዬንት ማቴክ ካዬ፤ ኤዬንግር ዶዖቕዴድ ኤዔድ ሙዳ ዻቔ፤ እስራኤል ኤዔድና ቖልስንት ዞምእንጎክ ዴእግራንክ ዻቔኬ።

![](https://cdn.door43.org/obs/jpg/360px/obs-en-11-06.jpg?direct&)

ግብጽ ኤዔድን ዳይንክ ሳዓብዜን ቡዑድ እስኬኬ፤ ኬዔስቴንክታሜሬ ቦዖሣቔኬ፤ ካንካን ሳዓቢ ኤዬንዜኬታንክ ጎብዝዮ ካያቕዬ፤ ሳዓቢ ግብጽ ኤዔድንት ቶይዲ ኣንግ ይንሢ ሙዳም ዴይሴ፤

![](https://cdn.door43.org/obs/jpg/360px/obs-en-11-07.jpg?direct&)

ዻክሪ ኤዔር ዶዖቕዴድ ቶይድዛንክ ዬዞ ፓርኦንት ቶይዲ ካንካ ግብጽ ኤዔድንት ቶይዲ ኣንግ ይንሢ ሙዴና ዴእሴ፤ ጋእሻ ኣትርይትዛንክ ዻዓምሳቕንዳ ግብጽግር ሃዓቔድ ቤድሚ ኤዔድና ኤዔፕክ ኡዑግምዳቔኬ።

![](https://cdn.door43.org/obs/jpg/360px/obs-en-11-08.jpg?direct&)

ኮዖ ሶይትንክ ፓርኦን ሙሳምኬ ኣሮናምክ ኤዔልቶ፤ «እስራኤል ኤዔድናም ኤንሥቴቶ ታ ኮዜን ሳዓና ካይኬቴ!» ኬዔን ጋይሴ።

*ማጻዓፕ ጪልንት ኣቴና ዉትንቲ 11፥1—12፥32*

## 12. እስራኤል ኤዔድና ግብጽግራንክ ዉትንትኬት

https://openbiblestories.org/l/aiw/story-12/

![](https://cdn.door43.org/obs/jpg/360px/obs-en-12-01.jpg?direct&)

እስራኤል ኤዔድን ግብጽግራንክ ኬ ዉታቕስንካን ጋእሻ ኬዔም ጉሜርሼ ታ ኮዛንክ ኦስ ኤዔዴን ፕክሽዴድ ዳኬኬ፤ ጉሜር ዶዖቕዳክ ፔጬንግርንት ሙክንትዜን ሃዓቔኬ፤ ግብጽ ኤዔድና እስራኤል ዋርቕኬ ዱንዳምክ ኣቤድ ዴዔጽምንዳ ሬይ ኔክዳይክ ኬ ጎይሳቔድ ሬይ ሃሬናሜሬ ኬዔን እምሴኬ ግብጽግራንክ ኬ ዉትድክ ኣቤድ ኤዔድን ሳዓብዜን ቡዑድ እዞ ኤዔድን ኪክን ካዬኬ።

![](https://cdn.door43.org/obs/jpg/360px/obs-en-12-02.jpg?direct&)

ሳዓቢ ብሬዜኬት ሙክድንዳ ሮዖርክ ሊላ ሶይትክ ኖዖክ ኬዔም ኤንሤ፤ ሳዓቢ ሙዳ ሴጽ ኬ ኪክን ክ ሃዓቕንካን ኬ ሙክዳኬንክ ኬዔም ኤንሤ፤ ዬይንት ኬዔም ዝክስድንዳ ሬይ ዳይንክ ራቕክቴክ ሙክንት ዬሌክ ሃዓቔ።

![](https://cdn.door43.org/obs/jpg/360px/obs-en-12-03.jpg?direct&)

ቶክሚ ሴጽት ቡዑር ፓርኦንኬ ኤዔድንክቴክ ጶቕሽይንታም ኦዖክሴኮ እስራኤል ኤዔድናም ኣልክምሲ ይንት ፕክሽዴድ ኬዔም ማዓስካን ዝግዜኬ፤ ሳዓቢ ይንቲ ዬሌክ ዶዖፔናምባብ ሳዓቢ ማዓትንክታም ኤዔድን ሼድቴምሽ ኮይኔሬ ኖዖ ኮይን ዶዖቕዳብ ፓርኦንዛንኬ ጾይስንዛንክ ጋዓጺ ዛምባብ ክ ማዓድምሽ ኬ ኤስቴምሽ ፓርኦንት ጶቕሽናም ጋእሻዛፕሴ።

![](https://cdn.door43.org/obs/jpg/360px/obs-en-12-04.jpg?direct&)

ካንካን ፓርኦንኬ ክት ዳዓሚ ዶብዴድንክ ኣልክምሲ ይንት ፔክሽዴድ ኬዔም ማዓስንትካን እስራኤል ኤዔድናም ኣልሴኬ እስራኤል ኤዔድኔሬ ግብጽ ኤዔድንት ዳዓሚ ዶብዴድን ሃዓድክ ይ ሼጃኬንክ ፓርኦንት ዳዓሚ ዶብዴድንኬ ዜይሚ ኖቓ ጼዔርንት ሞልትግር ይ ቔዔንምስምሽ ኤስቴኬ፤ ጋእሻ ይ ጳሽንካን «ግብጽግራንክ ሃራካና ዎዖም ዉሥሴ? ዴእንቶንቴ!» ጋይሶኡዑግምሴኬ።

![](https://cdn.door43.org/obs/jpg/360px/obs-en-12-05.jpg?direct&)

ሙሳ እስራኤል ኤዔድኔንካን «ሃይ ጳሽኬቴ ክና ሳዓቢ ዬካን ዳዓምዴ ዬዔም ዻዻቕሽዴ፤» ጋይሶ ኬዔን ኬዔዜ፤ ኮዖዛንኬሬ ሳዓቢ ኖቓ ጼዔርንዳ ኬ ሙክቴምሽ ኤዔድንካን ኬዔስካ ጋይሶ ሙሴን ኬዔዜ፤ ኮዖዛንኬሬ ሳዓቢ ግብጽ ኤዔድና እስራኤል ኤዔድናም ኬ ሼታክምሽ ሊሌናም እስራኤልቴኬ ግብጽቴክ ሞልትግር ማዓስሴ።

![](https://cdn.door43.org/obs/jpg/360px/obs-en-12-06.jpg?direct&)

__ኮዖዛንክሳዓቢብሬዜኬትሞሶሶምሽዎእሳቓኬሊሌናምእስሬልቴኬግብፅኤዴንትዎክዜንማዓስሴ፤ካንካንግብፅኤድናኬዔምሼድንካንኬዔንማዓትክዬ።__

![](https://cdn.door43.org/obs/jpg/360px/obs-en-12-07.jpg?direct&)

ሳዓቢ ሙሴን ጼዔርንዜን ኣዓንይት ክ ኣፕቴምሽኬ ኖቔናሜሬ ክ ካሽቴምሽክ ኬዔዜ፤ ኮዖዛንኬሬ ሳዓቢ ኖቔንት ሞልትክ ሙኬርድንዳ ጎዖጊ ማዓትቴምሽ ኖቔናም ዦጋ ምዝዜንኬ ብቴዜንክ ኮ ሃችቴምሽ ኮዖም ማዓስሴ።

![](https://cdn.door43.org/obs/jpg/360px/obs-en-12-08.jpg?direct&)

እስራኤል ኤዔድና ኖቔና ምዝዜንኬቴኬ ብቴዜንኬቴክ ዶቻ ኬዔን ማዓሥክ ፔጫ ዎቼክ ሙክቶ ቓዓሌኬ።

![](https://cdn.door43.org/obs/jpg/360px/obs-en-12-09.jpg?direct&)

ኮዖዛንኬሬ ሳዓቢ ግብጽ ኤዔድና እስራኤል ኤዔድን ኬራንክ ዻቖ ካይንትንኬታም ኬ ሼድቴምሽ ሊሌናም ጎዖግንዛንክ ዻዓስሴ፤ ግብጽ ኤዔድኔሬ ቡዑርኬት ማዓሦ ኬዔም ኣልካን ጶቕሼኬ።

![](https://cdn.door43.org/obs/jpg/360px/obs-en-12-10.jpg?direct&)

ካንካን ኖቓ ጼዔርንግርጎክ ራቕኬቴክ ሙክሴኬ ዳይንኬሬ ሳዓቢ ግብጽ ኤዔድና ኬ ካሌርቴምሽኬ ሴሬጌላ ጋዓርዳክ ዚጌንኬቴሬ ዻክምቴምሽ ማዓስሴ፤ «ሃስኬቴ ሳዓቢ እስራኤል ኤዔድንካን ዳዓምዜን ዳዬ!» ጋይሶ ኡዑግምሴኬ።

![](https://cdn.door43.org/obs/jpg/360px/obs-en-12-11.jpg?direct&)

እስራኤል ኤዔድና ኖቓ ጼዔርናም ላቕምክ ኬ ቓዓልታኬት ቡዑር ሳዓቢ ኣልክምሲ ኣዓንይንታም ኖቔንዜን ክ ኦይታን ሙሴን ኬዔዜ፤ ኖዖሬ ክ ኤዔእስንካን ኖቔና ግብጽ ኤዔድንት ዳዓሚ ዶብዴድንዜን ማዓቲ ብሬይምሽ ማዓሤ፤ ግብጽ ኤዔድንት ዳዓሚ ዶብዴድን ሙዳ ኣቕዝምሴኬ።

![](https://cdn.door43.org/obs/jpg/360px/obs-en-12-12.jpg?direct&)

እስራኤል ኤዔድና ግብጽ ኤዔድን ኬ ዴእሳኬታም ይ ሼጃኬንክ ሳዓብዜንኬ ሙሴዜንክ ቡዑድ እዜኬ፤ ሙሴሬ ሳዓብት ማዓትካን ዬይዳኬታም ኬዔዝዳብ ማዓትንትንክታም ዶዖፕሴኬ።

![](https://cdn.door43.org/obs/jpg/360px/obs-en-12-13.jpg?direct&)

ኣልኬሬ እስራኤል ኤዔድና ሳዓቢ ዴእግራንኬ ኤዔድካን ፕክሽንትግራንክ ክ ዻቕሽንካን ጋእሻ ጉሜርሴኬ፤ ታ ሳዓብካን ፕክሽንትካን ባዛ ይዜን ዳኬድ ማዓቴኬ፤ እስራኤል ኤዔድና ሳዓቢ ግብጽ ኤዔድንት ዳዓሚ ዶብዴድት ኣዓንግራንክ ኬዔም ክ ዻቕሽንካን ክላ ዻቕንትንጎካን ቦንችካንኬ ሳዓባሜሬ ጎዖፕሽንትካን ቤድሚ ዬሥናም ዬሥሴኬ።

![](https://cdn.door43.org/obs/jpg/360px/obs-en-12-14.jpg?direct&)

ሳዓቢ ሃስን ግብጽ ኤዔድናም ኬ ሺችቴምሽ ክ ማዓስሳቓኬታምኬ ኤዔዴን ፕክሽንትግራንክ ክ ዻቕሻቕምሽክ ጶቕሽንትክ ቦንክ ቦንክ ፓስጋ ጋዓርዳክ ሳዓቢ ሴጽናም ኬ ቦንችቴምሽ እስራኤል ኤዔድኔን ኬዔዜ፤ ላቕምቴባብ ቖሊ ዬርድ ቴቼኮ ጫዓርሚ ዋዓርንት ዳክንዳ ቕጻ ኪክን እሥንትክ ጉሜርኬቴ።

*ማጻዓፕ ጪልንት ኣቴና ዉትንቲ 12፥33-15፥21*

## 13. ሳዓቢ እስራኤል ኪክን ክ ኣርዛቓክ ጫዓቔና

https://openbiblestories.org/l/aiw/story-13/

![](https://cdn.door43.org/obs/jpg/360px/obs-en-13-01.jpg?direct&)

ሳዓቢ እስራኤል ኤዔድናም ኖቓ ጼዔርን ዜይምንዴጎክ ኬዔም ይ ኤንሣኬት ቡዑር ፔጫ ጉርንግር ሲና ጋዓርዳብ ባሌስንዳ ኬዔም ዣእሼ፤ ኮዖኔሬ ሙሳ ኣትዳክ ትርሼናም ክ ሼጃቓክ ባሌስኔ፤ ኤዔድና ባሌስንት ጎይር ኣብላ ኤይንታም ቶሼኬ።

![](https://cdn.door43.org/obs/jpg/360px/obs-en-13-02.jpg?direct&)

ሳዓቢ «ኢን ዬ ኤዔእድንኬ ጫዓቓእስታም ዬ ጶይድንክ ቦንችምቴንዳ ዻዓልማ ሃዓሜንት ባዓብት ኤዔድናም ሳዓቢ ኪክን ቔዔሽምሽዴድ ኮይኔሬ ጪሊ ኤዔድ ኢን ማዓዴቴ» ጋይሶ ሙሴንኬ እስራኤል ኤዔድኔንክ ኬዔዜ።

![](https://cdn.door43.org/obs/jpg/360px/obs-en-13-03.jpg?direct&)

ኤዔድና ማንፔስጎክ ዶዖቕንትይንታም ኬ ኡስሳኬት ማኬን ሴጽት ቡዑር ሳዓቢ ጉዑግንኬ ጳልቕንትክ ጩቤክ ኡፕሲ ጫዓጭክ ኤስምድንዳ ፓራ ሲና ባሌንዜን ሃቼ፤ ባሌንዜን ክ ኤፕቴምሽ ዪን ኬዔዜርሳቓብ ሙሳ ዬኬክ ሃዓቔ።

![](https://cdn.door43.org/obs/jpg/360px/obs-en-13-04.jpg?direct&)

ኮዖዛንኬሬ ሳዓቢ ጫዓቓ ኣርድንትክ ኮይን ኬዔን ጋይሴ፤ «እታ ግብጽግራንክ ኤዔዴን ፕክሽዴድ ዬ ዳይክ ዬዔም ዻቕሻቓብ ሳዓብስዬንት ሙዴናም ማዓስዳብቴ፤ ኣቤድን ጾይስናም ሃይ ምክስኬቴ።

![](https://cdn.door43.org/obs/jpg/360px/obs-en-13-05.jpg?direct&)

ጾይስናም ሃይ ኣክሽካ ኬዔም ሃይ ምክስካ፤ ሃራካኔ ጋዓርስንክ እታ ሙዴናም ማዓስዳብ ኒቕምዳብ ሳዓብቴ፤ ናዓምእስታም ጉሪ ሃይ ኤዔልካ ሃዉሽ ሴጽእስታም ሃ ጪልሽቴምሽ ጶቕሽካ ኮዖኔሬ ዎዖንሃታም ሙዳ ላዓ ሴጽግር ዎዖንካ ሃራካኔ ጋዓርስንክ ታፕሲ ሴጽና ሃ ሃዉሽድንዴትኬ ኢም ሃ ጶቕሽድንዳ ሴጼ።

![](https://cdn.door43.org/obs/jpg/360px/obs-en-13-06.jpg?direct&)

ሃባባምኬ ሃንዴታምክ ቦንችካ፥ ሃይ ዴይስካ፥ ሃይ ቤዔልምካ፥ ሃይ ዲብካ፥ ሃይ ታውካ፥ ሃ ቤዔልሥስንት ማዓም፥ ኤዬንክታም፥ ዋይ ክት ማዓሣቕንዳ ሃምናሜሬ ሬይ ሃይ ኡቕምካ።»

![](https://cdn.door43.org/obs/jpg/360px/obs-en-13-07.jpg?direct&)

ኮዖዛንኬሬ ሳዓቢ ኬዔና ታማ ካርቴናም ሴይኒ ቓስቴን ላዓታላትዜን ክልክቶ ሙሴን እምሴ፤ ሳዓቢ ኣቤሬ ካንክ ኬ ኤንሥምድንዳ ኣቤድ ቤድሚ ካርቴናም ኬዔን ኬዔዜ፤ ኤዔድና ኬዔና ካርቴናም ኬ ቦዖሥክንክ ዳይንክ ሳዓቢ ኬዜን ጋጋዓምዴ።

![](https://cdn.door43.org/obs/jpg/360px/obs-en-13-08.jpg?direct&)

ታዓሬ ሳዓቢ እስራኤል ኤዔድና ኬ ዎዖንቴምሽ ይ ዝግዳክ ኣብላ ኤይንጎክ ኬዔን ኬዔዜ፤ ኮዖኔሬ ሳዓቢ ኪክን ማሽሜርዳክ ኣብላ ኤይኔ ኮዖም ጋዓርዴ፤ ጋእሻ እቤርሼርድንዳ ኣብሌክ ቓስቴንክ ካሼርሻቕንዳ ጎፓኮት ሃዓቔ፤ ሳዓቢ ዋዓር ክ ሃዓድንካን እቤርሽቴን ኣብሌንት ቡዑርጎክ ዶዖቕዳክ ጎፔንግር ኣርዳብን ኤዔድናም ሳዓቢ ኪክን ቔዔሽምሽዳብን ዬሌክ ሃዓቔ።

![](https://cdn.door43.org/obs/jpg/360px/obs-en-13-09.jpg?direct&)

ኤዔድኔሬ ሙዳ ሳዓቢ ኬዔን ኬዔዛቓክ ካርቴናም ቦዖሥንትካን ሳዓባም ዬሌክ ምክስንትካን ኮይኔሬ ክካን ፓዓሽምቴድ ኤዔድክት ማዓትንትካን ኤዔድምሴኬ፤ ዳይንኬሬ ሳዓቤን ኤዔእንትካን ጫዓቓ ይ ኣርዛቓኬት ቶክሚ ሴጽት ቡዑር ጋእሼንዳ ዳቔልሲ ዎዖንሴኬ።

![](https://cdn.door43.org/obs/jpg/360px/obs-en-13-10.jpg?direct&)

ሙሳ ቤድሚ ሴጽካን ሲና ባሌንት ማቴዜን ማዓሦ ሳዓቢ ኪክን ኬዔዝምዜን ሃዓቔ፤ ኤዔድና ክ ማዓቴቴንክ ዬካ ኪም ጶይንቲ ኬዔም ይሽሼ፤ ካንካን ኣሮንዳ ዋርቒ ታዓዴኮ ጾይሲ ኬዔን ክ ኣክሻን ኪን ኬዔዜኬ።

![](https://cdn.door43.org/obs/jpg/360px/obs-en-13-11.jpg?direct&)

ኣሮኔሬ ዋዓኪ ኦዖቴምሽ ዋርቕንት ጾይስናም ኬዔን ኣክሼ፤ ኤዔድኔሬ ይ ናሽምሽ ጾይስናም ምክስ ዬዜኬ ጪልሽት እሜሬ ኮዖን እምሴኬ፤ ዳቔልስንኬትጎክ ሳዓቢ ጋእሻ ኬዔም ጋዓምሶ ኬዔም ካይስካኔሬ ጶቕሼ፤ ዳይንኬሬ ሙሳ ኬካን ምክሴ፥ ሳዓቤሬ ምክስንክታም ኤሴርሴ ኬዔሜሬ ካይስክዬ።

![](https://cdn.door43.org/obs/jpg/360px/obs-en-13-12.jpg?direct&)

ሙሳ ባሌንዛንክ ክ ሃችድንኬ ጾይስናሜሬ ይ ሼጃኬንክ ጋእሻ ጋዓምሴትዳቦ ታማ ሳዓብት ካርቴን ክልኬርሳቓ ሴይንናም ኣይሴ።

![](https://cdn.door43.org/obs/jpg/360px/obs-en-13-13.jpg?direct&)

ኮዖዛንኬሬ ሙሳ ጾይስናም ዴይስትዮ ሊቕሴ ኖቔት ዜኔሬ ኮዖም ኮፕሴ፤ ኖቔናሜሬ ኤዔድናም ዎእሼ፤ ሳዓቤሬ ኤዔድንዜን ክ ጋዓምስንካን ኤድሚ ኤዔድና ዴእሴኬ።

![](https://cdn.door43.org/obs/jpg/360px/obs-en-13-14.jpg?direct&)

ሙሳ ኣልክምሲ ባሌንት ዜን ኤብንትክ ሳዓቢ ኤዔድኔን ኔጋኔ ክ ጋዓቴምሽ ምክሴ፤ ሳዓቤሬ ሙሴት ምክስናም ኤሴርንትክ ኔጋኔ ኬዔን ጋይሴ፤ ሙሳ ኣይሳቓኬት ኦዖላሲ ክላ ሴይናም ኣክሽቶ ታማ ሳዓብት ካርቴናም ክልክሴ።

![](https://cdn.door43.org/obs/jpg/360px/obs-en-13-15.jpg?direct&)

1. ኮዖዛንኬሬ ሳዓቢ እስራኤል ኤዔድናም ሲና ባሌንዛንክ ጉሜር ፔጭን ካናኣንግር ኬዔም ኤንሤ።

*ማጻዓፕ ጪልንት ኣቴና ዉትንቲ 19-34*

## 14. እስራኤል ኤዔድን ፔጫ ጉርንግር ጎዖትምሴኬ

https://openbiblestories.org/l/aiw/story-14/

![](https://cdn.door43.org/obs/jpg/360px/obs-en-14-01.jpg?direct&)

ሳዓቢ ኬ ኪክን ይ ኣርዛቓክ ጫዓቔንት ካርቴንካን ኬ ኤዔእቴምሽ እስራኤል ኤዔድንካን ይ ኬዔዛኬት ቡዑር ሲና ጋዓርዳክ ባሌንዛንክ ካዬ፤ ሳዓቢ ሲና ባሌንዛንክ ጉሜር ፔጭን ካናኣንግር ኬዔም ኤንሥንቲ ዬዜ፤ ሊሌኔሬ ብሬዜኬት ካናኣን ፔጭግር ካዬ፤ ኬቴሬ ራቕክ ካዬኬ።

![](https://cdn.door43.org/obs/jpg/360px/obs-en-14-02.jpg?direct&)

ሳዓቢ ጉሜር ፔጭናም ካዓሥንኬቴን ይ እምድምሽ ኣብራምካን፥ ይሳቕካንኬ ያይቖብካንክ ጉሜር ካዔስታ ሃዓቔ፤ ዳይንኬሬ ታ ፔጬን ኮዖግር ቤድሚ ኤዔድ ዶዖቕዳቔኬ፤ ኬቴሬ ካናኣን ኤዔድኔ ኬዔም ጋዓርዳቔ፤ ካናኣን ኤዔድን ሳዓባም ምክሳዬኬ ዋይ ኪን ኤዔኣዬኬ፤ ታዉዴድ ጾይስናም ምክሴኬ ቤድሚ ሬያሜሬ ዎዖንዳቔ።

![](https://cdn.door43.org/obs/jpg/360px/obs-en-14-03.jpg?direct&)

ሳዓቢ እስራኤል ኤዔድንካን ኮይን ኬዔን ጋይሴ፤ «ጉሜር ፔጭንግር ዶዖቕዴድ ካናኣን ኤዔድናም ሙዳ ካይስኬቴ፤ ኬ ኪክን ላቕምክ ሃይ ዶዖቕኬቴ ኬዔም ሃይ ቴይኬቴ፤ ጾይስንኬታሜሬ ሙዳ ካይስኬቴ፤ እካን ዬ ኤዔእክንካን እ ኦዖላይስ ጾይስንኬታም ምክስዴቴ።»

![](https://cdn.door43.org/obs/jpg/360px/obs-en-14-04.jpg?direct&)

እስራኤል ኤዔድና ካናኣን ፔጬንት ዎስሌንዜን ኬ ዣእዳኬንክ ሙሳ ኬ ሙዴንዳንክ ኣዽርንት ታሜኬ ቓስቴንንግራንክ እዜ፤ ካዬኮ ፔጭቴንና ሃስናማ ኮ ዳይንኬሬ ኬ ጭርሽቴምሽ ጶቕሺ ኬዔን ኬዔዜ፤ ኤዔድን ኬዔና ዛሜዴኮ ዋይ ላንቕሜዴኮ ሼድንትካን ካናኣን ኤዔድናም ሼድንት ኬዔም ዝክስዳቔ።

![](https://cdn.door43.org/obs/jpg/360px/obs-en-14-05.jpg?direct&)

ታሜኬ ቓስቴን ኤዔድና ካናኣንግር ኦይዲ ታም ሴጻ ሙክንትክ ሼጅዮ ማዓቶ ሃዓዴኬ፤ ፔጬና ጋእሻ ኤዔቕሜንዴ እስኔሬ ጋእሻ ዋዓር ኡዑሽቴ!» ጋይሴኮ ኤዔድኔን ኬዔዜኬ፤ ታሜና ጭርሽንካን ካያቔድን ዳይንክ «ካትሜና ጋእሻ ዛምንዴ ኤዔድኔሬ ሮዖትሜዴኬ ኬዔም ዳዓሚ ዎ ዶብድንክ ዶዖፔን ዎዖም ሺችዴኬ ዎዖም ዴዴይስዴኬ!» ጋይሴኬ።

![](https://cdn.door43.org/obs/jpg/360px/obs-en-14-06.jpg?direct&)

ሳዓኔሬ ኣቤድ ቓስቴን ጭርሽንካን ካያቔድን ካሌብኬ እያስክ ካናኣን ኤዔድን ሮዖትሜድኬ ዛሜድክ ማዓትንትኔኬት ዶዖፔኔ፤ ዳይንኬሬ ዎታ ኬዔም ሽሺችዶቴ! ሳዓቢ ዎካን ኬዔም ዳዓሚ ዶዶብዴ!» ጋይሴኬ።

![](https://cdn.door43.org/obs/jpg/360px/obs-en-14-07.jpg?direct&)

ኤዔድና ዳይንክ ካሌብዴኬ እያስዴክ ኤሴርኬኬ፤ ሙሳምኬ ኣሮናምክ ጋዓምሴኮ ኮዖ ዳቕልንዳ ፔጬንግር ሃራካኔ ዎዖም ታዓዴ? ዳዓምግር ዎ ዴእዳኬቴን ማዓኔዎንቴኬ ይንሢ ዎንቴክ ኤዔዴን ፕክሽዴድ ኬ ማዓዳኬቴን ግብጽግር ዎ ዶዖቕዳቕንክ ላቕሚ ሃዓቔ» ጋይሴኬ፤ ኤዔድኔሬ ግብጽግር ዪም ኤንሥዴድ ጋላ ኤንሥዴዳም እድካን ዝግዜኬ።

![](https://cdn.door43.org/obs/jpg/360px/obs-en-14-08.jpg?direct&)

ሳዓቢ ጋእሻ ጋዓምሴትዳቦ ሳዓቢ ኪክን ማሽሜርዳክ ኣብላ ኤይንዳ ሃዓዴ፤ ኮይኔሬ ጋይሴ፤ «ዬታ ኢን ዬ ኤዔእክንካን ኤዔድን ሙዳ ፔጫ ጉርንግር ቱንትምክ ጎዖትምዴኬ፤ እያስኬ ካሌብክ ካይሳ ቦንዳ ቦንይንት ማዓሣቓብኬ ኮዖዛንክ ጋዓጽ ቦንይንት ማዓሣቓብ ሙዳ ኮግር ዴእዴኮንምሺ ሃስንዳይንኬሬ ጉሜር ፔጭንግር ኣርዳዬኬ።

![](https://cdn.door43.org/obs/jpg/360px/obs-en-14-09.jpg?direct&)

ኤዔድና ኮዖም ይ ኤሴርታኬንክ ዳቔልስይንትጎክ ኣቴርሴኬ፤ ዳዓሚ ዶቤርዳክ ዚጌይንታም ቴዬኮ ካናኣን ኤዔድንዳ ዳዓሚ ዶብምካን ካዬኬ፤ ሙሳ ሳዓቢ ኬ ኪክን ይ ማዓትክንካን ኬ ካያይምሽ ኬዔን ጶቕሽሼ፤ ዳይንኬሬ ክራ ኤሴርኬኬ።

![](https://cdn.door43.org/obs/jpg/360px/obs-en-14-10.jpg?direct&)

ሳዓቢ ኬ ኪክን ዳዓሚ ዶቤርዳኬግር ካያቕዬ፤ ካንካን ኬዔም ሺቼርቴ ቤድሚ ኤዔዳሜሬ ዴይሴርሴ፤ ኮዖዛንክ እስራኤል ኤዔድና ካናኣን ማዓቴኮ ፔጫ ጉርንግር ኦይዲ ታም ቦንካን ኦስ ኦንክ ጋዓዶ ዶዖቕሴኬ።

![](https://cdn.door43.org/obs/jpg/360px/obs-en-14-11.jpg?direct&)

እስራኤል ኤዔድና ኦይዲ ታም ቦንካን ፔጫ ጉርንግር ሳዓቢ ኬዔም እሥሴ፤ ርኬግራንክ ማና ጋዓርዳክ ባልሻም ኬዔን እምሴ፤ ታዓሬ ዋዓሬ ኬ እሥቴምሽ ሞሬንግርኬት ኮኬናም ኬዔን ኦይሤ፤ ኮዖ ሴጽንግር ሳዓቢ ኣብሌንኬትኬ ኮጴንኬትክ ማቓይምሽ ማዓስሴ።

![](https://cdn.door43.org/obs/jpg/360px/obs-en-14-12.jpg?direct&)

ሳዓቢ ሪርሽድንዳ ጎዖግክ ኖቓሜሴሬ ሴይኒ ላዓልግራንክ ኬዔን ዉሥሴ፤ ኮዖና ሙዳ ማዓድንኬሬ እስራኤል ኤዔድና ሳዓብዜንኬ ሙሴዜንክ ምዽራሮ ጉንድምዳቔኬ፤ ዳይንኬሬ ሳዓቢ ኣብራምካን፥ ይሳቕካንኬ ያይቖብካን ይ ኬዔዛቓክ ጉሜርና ታዓሬ ይዜን ቡዑድ እዜርቴንዳ ሃዓቔ።

![](https://cdn.door43.org/obs/jpg/360px/obs-en-14-13.jpg?direct&)

ኤዔድና ኖቓ ይራ ዳካኬንክ ሴጻ ኣብንክ ሳዓቢ ሙሴካን «ሴይኒ ላዓልንካን ኬዔስካ ዋዓራንክ ኖቓ ዉትዴ» ኪን ጋይሴ፤ ዳይንኬሬ ሙሳ ሴይንንቴን ኬዔዝንትን ኦዖላይሲ ጉፔክ ቓስቴን ካርክ ክ ዋጽንካን ኤዔድን ሙዴት ብሬዜን ሳዓባም ቶክስሴ፤ ኤዔድን ሙዳ ዎጭቴምሽ ሴይኒ ላዓልንግራንክ ኖቓ ዉታቕሴ፤ ዳይንኬሬ ሳዓቢ ሙሴዜን ጋዓምሴትዳቦ «ጉሜር ፔጭቴንንግር ኣርዳያዬ» ኪን ጋይሴ።

![](https://cdn.door43.org/obs/jpg/360px/obs-en-14-14.jpg?direct&)

እስራኤል ኤዔድና ኦይዲ ታም ቦንካን ፔጫ ጉርንግር ጉሪ ኡንግንትክ ኬ ጎዖትምሳኬት ቡዑር ሳዓብካን ኤዔኣቔድን ሙዳ ዴእሴኬ፤ ኮዖዛኬሬ ሳዓቢ ኤዔድናም ኣልክምሲ ጉሜር ፔጭንት ዎስሌዜን ኬዔም ኤንሤ፤ ሙሳ ጋልቴርታ ክ ማዓሥንካን ኤዔድናም ኤንሥንትክ ኪም ክ ኬልሽቴምሽ ሳዓቢ እያሳም እድዜ፤ ታዓሬ ሳዓቢ ሴጻ ዎላቕ ሙሴምሻብ ኣብ ማዓካን ዬይዳኬታም ኬዔዝዳብ ይ ኦይድምሽ ሙሴካን ጉሜርናም ኪን ኬዔዜ።

![](https://cdn.door43.org/obs/jpg/360px/obs-en-14-15.jpg?direct&)

ኮዖዛንኬሬ ሳዓቢ ጉሜር ፔጭናም ክ ሼድቴምሽ ባሌት ማቴዜን ክ ኤፕቴምሽ ሙሴካን ኬዔዜ፤ ሙሴሬ ጉሜር ፔጭናም ሼጄ፤ ዳይንኬሬ ሳዓቢ ዋዓር ክ ኣርቴምሽ ኪን ኤዔእክዬ፤ ኮዖዛንኬሬ ሙሳ ዴእሴ፤ እስራኤል ኤዔድኔሬ ክካን ማኬን ታም ሴጽ ኤዔፕክ ኣቴርሴኬ፤ እያስ ክሌባብ ኬት ኤንሥዳብ ማዓሤ፤ እያስ ሳዓብዜን ቡዑድ እዝዳብኬ ኤዔእዳብክ ክ ሃዓቕንካን ላቕምክ ኤንሥዳብ ሃዓቔ።

*ማጻዓፕ ጪልንት ኣቴና ዉትን 16-17፥ፓይድ10-14፥20፥27፤ኣል34*

## 15. ጉሜር ፔጭና

https://openbiblestories.org/l/aiw/story-15/

![](https://cdn.door43.org/obs/jpg/360px/obs-en-15-01.jpg?direct&)

ማቕንቴዜን እስራኤል ኤዔድና ጉሜር ፔጭን ካናኣግር ኬ ኣርድንዳ ሴጻ ዣእሼ፤ እያስ ዛምክ ጉርዴርሳቓክ ካናኣንት ካትሜን እያርኬዳ ቓስቴን ጭርሽዴድ ኤዔዳም ኦይሤ፤ ኮዖ ካትሜንግር ጭርሽዴድናም ኣዓቻቕንዳ ቡዑሬሬ ሃስትዮ ኬ ዻቕቴምሽ ኬዔም ኬልሻቕንዳ ሬኣብ ዪም ጋዓርድንዳ ማዓ ጎዖሊ ዶዖቕዳቔ፤ ናዓሬ ሳዓብዜን ቡዑድ ኮ እዝንካን ኮዖም ዎዖንሳቔ፤ ጭርሽዴድን እስራኤል ኤዔድና እያርካም ኬ ካይስዳኬንክ ሬኣባምኬ ኤዔር ኤዔድንኮታምክ ኬዔም ዻቕሽንትካን ጫዓቓ ኮዖን ኣርዜኬ።

![](https://cdn.door43.org/obs/jpg/360px/obs-en-15-02.jpg?direct&)

እስራኤል ኤዔድና ጉሜር ፔጭንግር ኣርድካን ዮርዳኖስ ኖቔናም ቓዓልንት ኬዔም ዝክስዳቔ፤ ሳዓቢ «ብሬዜን ኤዔድናም ሳዓቢ ኪክን ቔዔሽምሽዴድን ቓዓልቴምሽ ማዓስካ» ጋይሶ እያሴን ኬዔዜ፤ ኤዔድናም ሳዓቢ ኪክን ቔዔሽምሽዴድን ዮርዳኖስ ኖቔንግር ኣርድንቲ ኬ ዬዛኬንክ እስራኤል ኤዔድና ፔጫ ዎቼክ ኬ ቓዓልቴምሽ ፔጎክ ዶዖቕዳክ ኖቔና ሃችንትይንታም ጋርሼ።

![](https://cdn.door43.org/obs/jpg/360px/obs-en-15-03.jpg?direct&)

ኤዔድና ዮርዳኖስ ኖቔናም ኬ ቓዓልታኬት ቡዑር ሳዓቢ ዛምኣክ እያርኬት ካትሜናም ሃስን ዳዓሚ ይ ዶብድምሽ እያስካን ኬዔዜ፤ ኤዔድኔሬ ሳዓብካን ኤዔእሴኬ፤ ዳዓሚ ዶብዴድንኬ ኤዔድናም ሳዓቢ ኪክን ቔዔሽምሽዴድንክ ሳዓቢ ኬዔን ኬዔዛቕምሽ ሴጼክ ሴጼክ ላዓ ሴጽካን እያርኬት ካትሜናም ሽራ ኡንግዜኬ፤

![](https://cdn.door43.org/obs/jpg/360px/obs-en-15-04.jpg?direct&)

ኮዖዛንኬሬ ታፕሲ ሴጽንክ እስራኤል ኤዔድና ታብዛ ካርክ ካትሜናም ሽርትዮ ኡንግዜኬ፤ ማቕንቴዜን ካትሜናም ሽራሮ ኬ ኡንግድክ ዳዓሚ ዶብዴድና ኡዑግምሴኬ፥ ኤዔድናም ሳዓቢ ኪክን ቔዔሽምሽዴድኔሬ ፓራይንታም ፑግዜ ቔዔሽምሽዴድኔሬ ፓራይንታም ፑግዜኬ።

![](https://cdn.door43.org/obs/jpg/360px/obs-en-15-05.jpg?direct&)

ኮዖዛንኬሬ እያርኬት ሼዔጌክ ዶዖቕዳክ ሴይኒ ኬዔልቴና ቡኬልሴ፤ ሳዓቢ ኬዔዝምሽ እስራኤል ኤዔድና ካሜንግር ዶዖቕዳክ ሬይ ሙዳም ካይሴኬ፤ እስራኤል ኤዔድንት ኤዔዳ ማዓሣቔድን ሬኣብኬ ኤዔር ኤዔድንኮታምክ ዬሌክ ዻቕሼኬ፤ ካናኣንግር ዶዖቕዴድ ኣቤድ ኤዔድና እስራኤል ኤዔድን እያርካም ኬ ካይስምሽ ይ ኤሴርታኬንክ ዪሜሬ ዳዓሚ ኬ ዶብድምሽ ጶቕሽንትክ ጳሼኬ።

![](https://cdn.door43.org/obs/jpg/360px/obs-en-15-06.jpg?direct&)

ሳዓቢ ካናኣንግር ዶዖቕዴድ ኤዔድ ሃይኬስ ኤዔድንት ሱሴን ኪክን ላቕምክ ዶዖቕንትካን ኬ ኤዔድማን እስራኤል ኤዔድን ኬዔን ኬዔስታ ሃዓቔኬ፤ ዳይንኬሬ ጋባኦን ዪም ጋዓርዴድ ኤዔድና ካናኣን ኤዔድንት ሱሳ ማዓዴድንግራንክ ዎላቔና ኬራንክ ፔጋ ማዓድንዳ ካርግራንክ ሃዓዳቔድ ማዓትንትይንታም እያስካን ታዉሴኮ ኬዔዜኬ፤ ክ ኪክኔሬ ላቕምክ ኤዔድምካን እያሳም ጎይሴኬ፤ ጋባኦን ኤዔድና ሃብራንክ ኬ ማዓድንኬሬ እያስኬ እስራኤል ኤዔድና ሳዓባም ጎይሳቔኬ፤ ካንካን እያስ ኬ ኪክን ላቕምክ ዶዖቕንትካን ኤዔድምሴ።

![](https://cdn.door43.org/obs/jpg/360px/obs-en-15-07.jpg?direct&)

ጋባኦን ኤዔድና ኬዔም ጌሽሽምሽ ኬ ኤስታክ ሴጽንክ እስራኤል ኤዔድና ምዽርሴኬ፤ ዳይንኬሬ ሳዓብት ብሬዜን ኬ ኣርዛቓክ ጫዓቓኬት ሃዓቕንካን ኬ ኪክን ይ ኣርዛቓክ ጫዓቔናም ሃጴ ጋይሶ ሴጻ ኣብንዴትክ ካናኣንግር ሃዓቔድ ኣብ ኤዔድንት ሱሴንት ባዓብና ኣሞራ ኤዔድና ጋባኦን ኤዔድን እስራኤል ኤዔድን ኪክን ላቕምክ ዶዖቕንትካን ኤዔድምንትንኬታም ኤሴርሴኬ፤ ካንካን ዳዓሚ ዶብዴድይንታም ሱጼኮ ጋባኦን ኤዔድናም ዳዓሚ ዶብዜኬ፤ ጋባኦን ኤዔድና ኬልሺ ሃዓፕንትካን ጎይስንትክ እያስዳ ጋዓና ኦይሤኬ።

![](https://cdn.door43.org/obs/jpg/360px/obs-en-15-08.jpg?direct&)

ካንካን እያስ እስራኤልት ዳዓሚ ዶብዴድናም ሱእቴትዳቦ ጋባኦንግር ዣእካን ሶይትናም ሙዳ ሙክድዮ ጌሤ፤ ዣማ ጌልቲ ኬ ጶቕሽክዳይክ ኣሞራ ኤዔድንት ዳዓሚ ዶብዴድናም ዶብዜኬ።

![](https://cdn.door43.org/obs/jpg/360px/obs-en-15-09.jpg?direct&)

ኮዖ ሴጽንክ ሳዓቢ እስራኤል ኤዔድንካን ዳዓሚ ዶብዜ፤ ኣሞራ ኤዔድናም ሪርሽንትክ ኣዚ ሴይንምሽ ጋእሼዳም ሃችንትክ ኣሞራ ኤዔድንግራንክ ቤድሚ ኤዔዳም ዴይሴ።

![](https://cdn.door43.org/obs/jpg/360px/obs-en-15-10.jpg?direct&)

ኣልክምሲ ሳዓቢ እስራኤል ኤዔድን ኣሞራ ኤዔድናም ማቕንታ ኬ ሺችቴምሽ ማዓስንትካን ሃይናም ርኬዜን ካሪ ዎላቕዜን ኮ ሃጵቴምሽ ማዓስሴ፤ ኮዖ ሴጽንክ ሳዓቢ እስራኤል ኤዔድን ጋእሼንዴክ ኬ ሺችቴምሽ ማዓስሴ።

![](https://cdn.door43.org/obs/jpg/360px/obs-en-15-11.jpg?direct&)

ሳዓቢ ኬዔና ዳዓሚ ዶብዴድናም ይ ሺችሻኬት ቡዑር ቤድሚ ካናኣን ኤዔድን እስራኤላም ዳዓሚ ዶብንትካን ኪክዜን ሱዽምሴኬ እያስኬ ኣቤድን እስራኤል ኤዔድንክ ዳዓሚ ዶብዞ ኬዔም ሺችሼኬ።

![](https://cdn.door43.org/obs/jpg/360px/obs-en-15-12.jpg?direct&)

ዳዓምን ኮዖት ቡዑር ሳዓቢ ጋላ ጋሌድ ማታ ሱስንቴን ጉሜር ፔጭንግራንክ ዻዓልማ ሃዓምን ዣእዳኬታም ኬዔን ካሼ፤ ኮዖዛንክ ሳዓቢ እስራኤል ይንት ዎሴሌን ሙዴክ ላቕምክ ኮ ዶዖቕቴምሽ ማዓስሴ።

![](https://cdn.door43.org/obs/jpg/360px/obs-en-15-13.jpg?direct&)

እያስ ጋልቴርሳኬንክ እስራኤል ኤዔድናም ሙዳ ዎላቕዜን ኤዔልሴ፤ ኮዖዛንኬሬ እያስ ሳዓቢ ሲና ባሌንዜን እስራኤል ኤዔድን ኪክን ክ ኣርዛቓክ ጫዓቔንካን ኬ ኤዔእቴምሽ ኤዔድንዳንክ ኔጋይንዳ ማዓትንትናም ኬዔን ጶቕሽሼ፤ ኤዔድኔሬ ሳዓቤን ኤዔእዴድ ማዓሥዮ ዶዖቕንትካንኬ ካርቴናሜሬ ጶይንትካን ጫዓቓ ኣርዜኬ።

*ማጻዓፕ ጪልንት ኣቴና እያስ 1—24*

## 16. ባዛ ካይሳ ዶዖቕንትናም ታዓሥዴድን

https://openbiblestories.org/l/aiw/story-16/

![](https://cdn.door43.org/obs/jpg/360px/obs-en-16-01.jpg?direct&)

እያስ ዴእሳኬት ቡዑር እስራኤል ኤዔድና ሳዓቤን ኤዔእኬኬ ኔጋቔድ ካናኣን ኤዔድናም ሞልትግርንታንክ ኬዔም ዉሣቔኬ ዋይ ሳዓብት ካርቴናም ጶያቔኬ፤ ኤዔድንቴኔሬ ዶዖፔናምባብ ሳዓቢ ማዓሣቓብናም ምክስንትዛንክ ጋዓጽ ካናኣን ኤዔድንት ጾይስናም ምክስንቲ ዬዛቔኬ፤ እስራኤል ኤዔድንት ባዓብኬት ዳክ ሃዓቔ፤ ካንካን ኤዔድ ሙዳ ኡዝማ ካምሶ ዪን ሃዓፔርሳቓክ ሙዳም ዎዖንዳቔ።

![](https://cdn.door43.org/obs/jpg/360px/obs-en-16-02.jpg?direct&)

እስራኤል ኤዔድና ሳዓብካን ይ ኤዔኣያኬትክ ዜን ዛብንትንኬትክ ሳዓቢ ኬዔም ይዥዴድን ካሌርስቴምሽ ማዓስሴ፤ ኬዔና ኬዔም ይዣዴድኔሬ እስራኤል ኤዔድንት ዚጌናም ሙዳ ዲብዜኬ፤ ኬት ዶዖቕዳኬታም ሙዳ ካይሴኬ፤ ቤድሚ ኤዔድናም ዴይሴኬ፤ እስራኤል ኤዔድና ሳዓብካን ኤዔኣ ጋርንትይንትኬ ኬዔም ይዥዴድንት ሃይልስንክ ቤድሚ ቦንካን ይ ዶዖቕሳኬት ቡዑር ሳዓብዳ ማዓቴኬ ሳዓባሜሬ ኬዔም ይዥዴድንዳንክ ክ ዻቕሽቴምሽ ኪም ጎይሴኬ።

![](https://cdn.door43.org/obs/jpg/360px/obs-en-16-03.jpg?direct&)

ኮዖዛንኬሬ ሳዓቢ ኬዔም ይዥዴድንዳንክ ባዛ ካይሳ ኬዔም ዉሥዳባም ኦይሤ ፔጭቴንዜኔሬ ላቕምናም ታዓዴ፤ ዳይንኬሬ ኤዔድና ሳዓባም ኣልካ ዋልሴኬ፤ ጾይስናሜሬ ምክስ ዬዜኬ፤ ኮይን ማዓሥንካን ሳዓቢ ኡሣ ኬራ ዶዖቕዴድ ኬዔም ይዥዴድን ምዳም ኤዔድናም ኬዜን ዻዓስሴ ኬዔም ሺችሼኬ።

![](https://cdn.door43.org/obs/jpg/360px/obs-en-16-04.jpg?direct&)

ምዳም ኤዔድና እስራኤል ኤዔድንት እስናም ሙዳ ቦን ታብዜካን ቴዬኬ፤ እስራኤል ኤዔድና ጋእሻ ጳሽታ ሃዓቔኬ፤ ፔጬት ምልእግርኬ ፔጬት ቖዖፔግርክ ዛቕሴኮ ኬ ሃዓቕንካን ምዳም ኤዔድና ኬዔም ሃዓፕካን ኬዔን ማዓትክዬ፤ ማቕንቴዜኔሬ ኬዔም ክ ዻቕሽቴምሽ ሳዓብዳ ኡዑግምሴኬ።

![](https://cdn.door43.org/obs/jpg/360px/obs-en-16-05.jpg?direct&)

ሴጻ ዎላቕ ጌዶን ጋዓራብ እስራኤል ኤዔድ ምዳም ኤዔድን እስንይንታም ኬ ቴያይምሽ ዛቕስዮ እስን ግእዳቔ፤ ሳዓቢ ርኬግራንክ ዎዖንይንትካን ክ ኦይዳብን ጌዶንዳ ሃዓድዮ ኮይን ኪን ጋይሴ፤ «ሃዓና ዛምክ ዳዓሚ ዶብዳብ ኤዔሥኖ ሳዓቢ ሃ ኪክኔ፤ ካያዮ እስራኤል ኤዔድናም ምዳም ኤዔድንዳንክ ኬዔም ዻቕሽካ።»

![](https://cdn.door43.org/obs/jpg/360px/obs-en-16-06.jpg?direct&)

ጌዶንት ባዓቤን ጾይሳም ምክሴርድንዳ እማ ክሪ ኡስቴክት ሃዓቔ፤ ሳዓቤሬ ጌዶኔን ካርን ኮዖም ክ ኮፕቴምሽ ኪን ኬዔዜ፤ ዳይንኬሬ ጌዶን ኤዔድንካን ይ ጳሽንካን ሃክስቴንክ ዬካ ጶይሴ፤ ኮዖዛንኬሬ እማ ካርናም ኮፕሴ ኮ ሊቕስቴንክ ዬካ ኣይስትዮ ኮዖም ካይሴ ሼዔጌሬሬ ሳዓብካን ክላ ጪልሽት እማ ካሪ ኡስሴ ሳዓቤን ጪልሽት እማም ኣሤ።

![](https://cdn.door43.org/obs/jpg/360px/obs-en-16-07.jpg?direct&)

ሼናክንኮቴክ ዣማ ኤዔድና ኤዔድ ዎላቕባብ እማ ካርንኬታም ኮፕሳቕምሽ ሼጄኮ ጋእሻ ምዼርሴኬ፤ ጌዶናም ዴይስካን ጌዶንት ኤዔር ካዬኬ፤ ዳይንኬሬ ጌዶንት ባዓቤን «ሃራካኔ ሳዓብስዬንታም ኬልሽካን ዝግዴ? ኖዖ ሳዓቢ ይ ማዓሥንክ ይማትካን ክ ዳርማኔ!» ኬዔን ጋይሴ፤ ኮዖሜሬ ክ ጋይስንካን ኤዔድና ጌዶናም ዴይስኬኬ።

![](https://cdn.door43.org/obs/jpg/360px/obs-en-16-08.jpg?direct&)

ምዳም ኤዔድና እስራኤል ኤዔድናም ቡርንትካን ኣልክምሲ ሃዓዴኬ፤ ፓይዴንኬቴሬ ጋእሻ ሃዓቕንካን ሃይዬሬ ኬዔም ፓይድካን ኪን ማዓታይ ሃዓቔ፤ ጌዶኔሬ ምዳም ኤዔድናም ዳዓሚ ዶብካንትካን እስራኤል ኤዔድናም ኤዔልሴ፤ ሳዓቢ ክጎክ እስራኤል ኤዔድናም ክ ዻቕሽድንዳ ማዓሥንክ ዶዖፕስንትካን ቓስቴን ሬይ ጴዔጳም ሳዓብዳንክ ጎይሴ።

![](https://cdn.door43.org/obs/jpg/360px/obs-en-16-09.jpg?direct&)

ብሬን ጴዔጵና ኣብላ ፔጬዜን ፓቾ ዣሜት ዳዓዤና ኣብሌንት ዜን ዬሌክ ኮ ማዓታኔ ፔጭንዜን ኮ ማዓታይምሽ ጎይሴ፤ ሳዓቢ ኮይምሽ ዎዖንሴ፤ ኣልክምስንክ ሶይቲ ጌዶን ሳዓባም ኮይን ጋይሶ ጎይሴ፤ «ፔጬና ዣሜንት ዳዓዤንክ ኮ ልምጫኔ ኣብሌና ዳይንክ ዎቻ ኮ ማዓታኔ» ጋይሴ፤ ሳዓቤሬ ኮዖም ዎዖንሴ፤ ኬዔና ቓስቴን ጴዔጵና ሳዓቢ ኪክ ማዓሦ እስራኤል ኤዔድናም ምዳም ኤዔድንዳንክ ክ ዻቕሽድምሽ ንቓዓሽ ኪን ማዓሣቕንዴ።

![](https://cdn.door43.org/obs/jpg/360px/obs-en-16-10.jpg?direct&)

ቦንዴኬ ታማ ቓስቴን ሺ ዳዓሚ ዶብዴድና ጌዶንዳ ሃዓዴኬ፤ ዳይንኬሬ ሳዓቢ ፓይዴኔኬት ቤድምዬ ኪን ጋይሴ፤ ካንካን ጌዶን ዳዓሚ ዶብካን ጳሻቔድን ቦንዴኬ ቓስቴን ሺ ዳዓሚ ዶብዴድናም ኤዔርኬት ኬዔም ማዓስሴ፤ ሳዓቢ ጌዶኔን ታዓሬ ዳዓሚ ዶብዴድንት ፓይዴና ቤድምዬ ኪን ጋይሴ፤ ኮዖካን ጌዶን ማኬን ማቶ ዳዓሚ ዶብዴዳም ኔክሾ ኣቤድናም ኤዔርኬት ኬዔም ኦይሤ።

![](https://cdn.door43.org/obs/jpg/360px/obs-en-16-11.jpg?direct&)

ኮዖ ሶይትንክ ሳዓቢ ጌዶኔን «ምዳም ኤዔድንት ዳዓሚ ዶብዴድንዳ ሃችካ ኬ ጋዓዳኬታሜሬ ሃ ኤሴርድንክ ዎላቔሴ ኬካን ሃይ ጳሽካ» ኪን ጋይሴ፤ ካንካን ጌዶን ሶይትን ኮዖክ ምዳም ኤዔድንት ዳዓሚ ዶብዴድን ዳያኬትግር ሃቼ ምዳምት ዳዓሚ ዶብዴድንግራንክ ዎላቕባብ ቤዔልሥሴን ሃዓሜትይንቴክ «ጌዶንት ዳዓሚ ዶብዴድና ምዳምት ዳዓሚ ዶብዴድናም ክ ሺችድክ» ይ ሼጃቕንዴታም ክ ኬዔዝድክ ኤሴርሴ፤ ጌዶን ኮዖም ይ ኤሴርታኬንክ ሳዓቤን ጉምፔርሴ።

![](https://cdn.door43.org/obs/jpg/360px/obs-en-16-12.jpg?direct&)

ኮዖዛንክ ጌዶን ይንት ዳዓሚ ዶብዴድንዳ ማዓቶ ሙዴንቴን ቖሽሜት ብልድሪ፥ ቲሌኬ ኩዑሼክ ኬዔን እምሴ፤ ምዳም ኤዔድንት ዳዓሚ ዶብዴድን ራዓታ ኬ ዳይክ ኬ ሃዉሻቓ ዳዓሚ ካርናም ቔዔንሴኬ፤ ጌዶንት ማኬን ማቶ ዳዓሚ ዶብዴድና ቲሌንግርንት ኩዑሻም ቴይታ ሃዓቔኬ፤ ምዳምት ዳዓሚ ዶብዴድና ዳይንክ ኩዑሼንት ሻዓክምናም ሼድንት ኬዔን ማዓታቕዬ።

![](https://cdn.door43.org/obs/jpg/360px/obs-en-16-13.jpg?direct&)

ኮዖዛንኬሬ ጌዶንት ዳዓሚ ዶብዴድና ሙዳ ካሪ ዎላቔክ ቲሌይንታም ግእሴኬ ሳዓና ኩዑሼንት ሻዓክምና ብልድይንታም ፑጋሬኮ «ሳዓብቴኬ ጌዶንት ዳዓሚ ዶብዴድኔ» ጋዓሮ ኡዑግምሴኬ።

![](https://cdn.door43.org/obs/jpg/360px/obs-en-16-14.jpg?direct&)

ሳዓቤሬ ምዳም ኤዔድንት ዳዓሚ ዶብዴድንዜን ሬይ ካይቴምሽ ማዓስሴ፤ ኪክ ኪካሜሬ ዴይሴኬ፤ ሳዓኔሬ ኤዔርንት ዶዖቕዴድ እስራኤል ኤዔድና ኪካም ኤዔልትዮ ምዳም ኤዔድንት ዳዓሚ ዶብዴድናም ዳይንትክ ኬልሽማሮ ቤድሚ ኤዔድናም ዴይሴኬ፤ ኔጋቔድናሜሬ እስራኤልት ፔጬንግራንክ ኬዔም ዳይሴኬ፤ ኮዖ ሴጽንክ ዎላቕ ማቶኬ ቦንዳ ሺ ምዳምት ዳዓሚ ዶብዴድን ዴእሴኬ፤ ሳዓቤሬ እስራኤል ኤዔድናም ዻቕሼ።

![](https://cdn.door43.org/obs/jpg/360px/obs-en-16-15.jpg?direct&)

ኤዔድኔሬ ጌዶናም ባዓብንት ክ ማዓቴምሽ ኪም ዝግዜኬ፤ ጌዶን ዳይንክ ኮዖም ኬ ዬይቴምሽ ኬዔን ኤዔእክዬ፤ ዳይንኬሬ ኬታ ሙዴና ምዳም ኤዔድንዳንክ ይ ቴያቓክ ዎርቕት ሼክምናም ኬ ታዓድቴምሽ ጎይሴ፤ ኤዔድኔሬ ጌዶኔን ቤድሚ ዎርቕናም ኪን እምሴኬ።

![](https://cdn.door43.org/obs/jpg/360px/obs-en-16-16.jpg?direct&)

ጌዶኔሬ ዎርቕናም ዬልክስቶ ኤዔድናም ሳዓቢ ኪክን ቔዔሽምሽዳብንት ቖቤርዳክ ጋላኣክ ኣብሌንምሽ ማዓስሶ ኮዖም ኣክሼ፤ ዳዓኖንምሺ ኤዔድና ኣብሌናም ጾይስምሽ ኮዖም ምክስንት ዬዜኬ ኮዖዛንክ ዻዓምሳቕንዳ ሳዓቢ ኬዔም ይዥዴድን ሺችቴምሽ ማዓስንትክ ኬዔም ቓእሴ፤ ማቕንቴዜኔሬ ኤዔድና ኣልካ ሳዓቢ ኬዔም ዻቕሽቴምሽ ጎይሴኬ ሳዓቢ ኬዔም ዻቕሽዳብ ኣብባባም ኬዔን ኦይሤ።

![](https://cdn.door43.org/obs/jpg/360px/obs-en-16-17.jpg?direct&)

ኮይናሜትጎክ ቤድሚ ካርክ ዎዖንምሴ፤ እስራኤል ኤዔድና ዳቕልሲ ዎዖንዴኬ ሳዓቤሬ ኬዔም ቓቓእስዴ፤ ኣልክምሴሬ ሳዓብዳ ማዓዴኬ ሳዓቤሬ ኬዔም ዻቕሽካን ኬዔም ኬልሽዳባም ኦይዴ፤ ቤድሚ ቦንካን ሳዓቢ እስራኤል ኤዔድናም ዻቕሽካን ቤድሚ ካልሪ ካይሳ ኬ ዶዖቕቴምሽ ኬዔም ማዓስዴዳም ኬዔን ኦይቴ።

![](https://cdn.door43.org/obs/jpg/360px/obs-en-16-18.jpg?direct&)

ማቕንቴዜኔሬ ኤዔድና ኣቤድን ሳዓባም ኤሳዬድንት ዶዖቕድምሽ ባዓቢ ኬዔን ባዓምሴርቴምሽ ሳዓባም ጎይሴኬ፤ ዳዓሚ ሴጽክ ዪም ኤንሥዳብ ዛምባብ ባዓብኬት ዶዖቕቴምሽ ዝግዜኬ፤ ሳዓቢ ዳይንክ ኮዖ ጎይስንኬታም ናሽክዬ፤ ዳይንኬሬ ኬ ዝግዛቕምሽ ባዓቢ ኬዔን ባዓምሴ።

*ማጻዓፕ ጭልንት ኣቴና ቤዔርዴድ 1-5፤6-8*

## 17. ሳዓቢ ዳዊት ኪክን ክ ኣርዛቓክ ጫዓቔና

https://openbiblestories.org/l/aiw/story-17/

![](https://cdn.door43.org/obs/jpg/360px/obs-en-17-01.jpg?direct&)

ሳኦል እስራኤል ኤዔድንት ብሬዜናምባብ ባዓብስን ሃዓቔ፤ ኖዖሬ ኤዔድን ዝግግዳቕምሽ ሮዖትምባብኬ ቤራይካምባብ ሃዓቔ፤ ሳኦል እስራኤል ኤዔድናም ክ ጌሥዳክ ብሬዜናሜድ ቶክሚ ቦንንግር ላቕምባብ ባዓቢ ሃዓቔ፤ ኮዖት ቡዑር ዳይንክ ሳዓብካን ኤዔኣያብ ዳቕላይሳብ ኤዔድ ማዓሤ፤ ካንካን ሳዓቢ ሴጻ ዎላቕ ሳኦልት ካርግር ባዓቢ ማዓዳብ ጋሌባብ ኤዔዳም እዜ።

![](https://cdn.door43.org/obs/jpg/360px/obs-en-17-02.jpg?direct&)

ሳዓቢ ሳኦልት ቡዑር ባዓቢ ክ ማዓቴምሽ ዳዊት ጋዓርዳብ እስራኤልት ኣግሊ ይንሣም እዜ፤ ዳዊት ቤትሌም ጋዓርድንዳ ካትሜንግር ዶዖቕዳብ ቖሊ ግሽዳብ ሃዓቔ፤ ዳዊት ጋላ ጋሌንዳ ሴጼግር ባዓቤንት ቖልናም ክ ጶይድክ ቖልናም እሥዴድ ዞብኬ ድብ ጋዓርዴድ ዴብናም ዴይስታ ሃዓቔ፤ ዳዊት ሳዓብዜን ቡዑድ እዝዳብኬ ክካን ኤዔእዳብ ዋዬባብ ኡዝሜክ ዎዖንዳብ ሃዓቔ።

![](https://cdn.door43.org/obs/jpg/360px/obs-en-17-03.jpg?direct&)

ዳዊት ዴዔጽምባብ ዳዓሚ ዶብዳብኬ ኤንሥዳብክ ማዓሤ፤ ዳዊት ኣኪ ኣግልምክ ይ ዶዖቕዳኬንክ ጎልያድ ጋዓርዳብ ጋእሼባብ ኤዔሥን ኪክን ዳዓሚ ዶብምሴ፤ ጎልያድ ዳዓሚ ዶብሚ ኤስቴባብ ጋእሻ ዛምባብ ኮይኔሬ ሮዖትምኔክት ላዓ ኣዓኒ ሃዓቔ፤ ዳይንኬሬ ሳዓቢ ጎልያዳም ዴይሶ እስራኤል ኤዔድናም ክ ዻቕሽቴምሽ ዳዊታም ኬልሼ፤ ኮዖት ቡዑር ዳዊት ኤዔድንት ብሬዜን ኪም ስሌርቴምሽ ማዓዴድ እስራኤልንት ይዥዴድንዜን ቤድሚ ሺችድባብ ማዓሤ።

![](https://cdn.door43.org/obs/jpg/360px/obs-en-17-04.jpg?direct&)

ሳኦል ኤዔድና ዳዊታም ኬ ናሻኬትጎክ ክዜን ኒቕምሴ፤ ሳኦል ቤድሚ ሴጽካን ዳዊታም ዴይስካን ዝግዜ ካንካን ዳዊት ሳኦልዳንክ ዛቕሴ፤ ሴጻ ዎላቕ ሳኦል ዳዊታም ዴይስካን ዝጋሮ ሃዓቔ፤ ሳኦል ዳዊት ክራንክ ክ ዛቕዳክ ዎሬንግር ካዬ፤ ዳይንኬሬ ሳኦል ኪም ሼትክዬ፤ ዳዊቴሬ ሳኦልዳ ኡሣ ሃዓዶ ኪም ዴይስንቲ ኪን ማዓዳቔ፤ ዳዓኖንምሺ ኪም ዴይስክዬ፤ ዳዊት ባዓቢ ማዓትንትካን ኪም ዴይሳቕዬ ሳኦል ኤስቴምሽ ኣብሌንክቴት ዋጽራም ቴችትዮ ቴዬ።

![](https://cdn.door43.org/obs/jpg/360px/obs-en-17-05.jpg?direct&)

ማቕንቴዜኔሬ ሳኦል ዳዓምግር ዴእሴ፤ ዳዊቴሬ እስራኤል ኤዔድንት ባዓቢ ማዓሤ፤ ዳዊት ላቕምባብ ባዓቢ ሃዓቔ፤ ኤዔድኔሬ ኪም ናሼኬ ሳዓቤሬ ዳዊታም ኣንጄ፤ ኪን ኡስቴምሼሬ ማዓስሴ፤ ዳዊት ቤድሚ ዳዓሚ ዶብምሴ፤ እስራኤል ኤዔድንት ይዥዴድናም ክ ሺችቴምሼሬ ሳዓቢ ኪም ኬልሼ፤ ዳዊት ዬሩሳሌማም ሺችቶ ዋዓር ይ ዶዖቕድንዳ ካትማ ኮዖም ማዓስሴ፤ ዳዊት ባዓምዳክ ቦንንግር እስራኤል ኤዔድና ዛሜድኬ ዎድምቴድክ ማዓሤኬ።

![](https://cdn.door43.org/obs/jpg/360px/obs-en-17-06.jpg?direct&)

ዳዊት እስራኤል ኤዔድን ሙዴካን ሳዓባም ኬ ምክስድንዴትኬ ክካን ጪልሽት እማ ኬ ታዓድንዳ ጪሊ ኤያም እክንትካን ዝግዜ፤ ኤዔድና ኦይዲ ማቶ ቦንንግር ሙሳ እክሳቓክ ሳዓቢ ኪክን ማሽሜርዳክ ኣብላ ኤዬንግር ሳዓባም ምክስንትኬ ጪልሽት እማ ኪን ታዓዳቔ።

![](https://cdn.door43.org/obs/jpg/360px/obs-en-17-07.jpg?direct&)

ዳይንኬሬ ሳዓቢ ጋዓና ኬዔዜካን ማዓትካን ዬይዳኬታም ኬዔዝዳብን ናታናም ዳዊትዳ ኦይሤ፤ «ሃዓና ዳዓሚ ዶብዳቓብ ኤዔድ ሃ ማዓሥንካን ኮዖ ጪሊ ኤዬናም ኢን እካያዬ» ይንሥስሃንት ኮዖም እክክዴ፤ ዳይንኬሬ ጋእሻ ሃዓም ኣንጅድቴ፤ ሃንት ካዓሥንግራንክ ዎላቓብን ኤዔድእስትዜን ባዓቢ ማዓሦ ሌፒ ሴጽካን ጌሥዴ!» ሌፒ ሴጽካን ክ ጌሥዳክ ሃክባብ ዳዊት ካዓሥንግራንክ ሳዓቢ ዪም ሳይሳቓብኔ፤ ሳዓቢ ዪም ሳይሳቓብስን ፔጬዜናሜድ ኤዔድንት ዳቔልስንኬትግራንክ ኬዔም ዻቕሽዳብን ሳዓብት እዴርቴባብስኔ።

![](https://cdn.door43.org/obs/jpg/360px/obs-en-17-08.jpg?direct&)

ዳዊት ኬዔና ኬዔዜናም ይ ኤሴርታኬንክ ኮዖ ጋእሼንዳ ቦንችምኬ ቤድሚ ኣንጄትክ ኪን እምንትካን ጫዓቓ ኪን ክ ኣርዛቕንካን ሳዓና ሳዓባም ጎዖፕሼ ኪም ሳእሴ፤ ዳዊት ኬዔና ሬይናም ሃይንት ክ ዬይድኬሬ ኤሳቕዬ፤ ዳዓኖንምሺ ዶዖፔንካን ማዓሥንክ እስራኤል ኤዔድና ሳዓቢ ሳይሳቓብስን ሃዓድክንዴት ብሬዜን ሮዖትምንዳ ቦንካን ሃሬስንግር ዎላቕ ሺ ቦናም ጶይንት ኬዔም ዝክስዳቔ።

![](https://cdn.door43.org/obs/jpg/360px/obs-en-17-09.jpg?direct&)

ዳዊት ኡዝማ ቤዔርንትኬ ቡዑድ እዜርቴባብ ማዓትንትክ ቤድሚ ቦንካን ጌሥሳቔ፤ ሳዓቤሬ ኪም ኣንጄ፤ ዳዓኖንምሺ ማቕንታ ቦንይንትግር ሳዓብት ብሬዜን ጋእሼንዳ ዳቔልሲ ዎዖንሴ።

![](https://cdn.door43.org/obs/jpg/360px/obs-en-17-10.jpg?direct&)

ሴጻ ዎላቕ ዳዊት ዳዓሚ ዶብዴድን ሙዳ ኤዔርንታንክ ካዬኮ ዳዓሚ ኬ ዶብዳኬንክ ኖዖ ባዓሚ ኤያይንቴት ማዓል ዶዖቕሶ ዎላቕ ላቕማይስንዳ ማዓ ዜናይንታም ኮ ሼርድክ ኮዖም ሼጄ፤ ናዓምንኮቴሬ ቤርሳቤ ሃዓቔ።

![](https://cdn.door43.org/obs/jpg/360px/obs-en-17-11.jpg?direct&)

ዳዊት ኣዓፕይንታም ኦስ ኮዛንክ ማዓስንትን ኦዖላይሲ ክራ ኮዖም ታዓዴርቴምሽ ኤዔድ ኦይሤ፤ ኮ ኪክኔሬ ራዓሤ ኤዔርኮት ማዓስቶ ኮዖም ኦይሤ፤ ቶክሚ ሴጽት ቡዑር ቤርሳባ «ሲርትቴ» ጋይሶ ዳዊትዳ ኬዔዛ ኦይሤ።

![](https://cdn.door43.org/obs/jpg/360px/obs-en-17-12.jpg?direct&)

ኦርዮ ዪም ጋዓርዳብ ቤርሳቤት ክእስ ዳዊት እዴርቴድ ዳዓሚ ዶብዴድንግራንክ ዎላቓብን ሃዓቔ፤ ዳዊት ኦሮናም ዳዓምንግራንክ ማዓስትዮ ኤዔልስሴትዳቦ ማይንት ኪክን ክ ራዓታን ኪን ኬዔዜ፤ ዳይንኬሬ ኦርዮ ኔጋቔድ ዳዓሚ ዶብዴድን ዳዓምግር ኬ ዳይክ ኤዔርእስት ካያይቴ ጋይሴ፤ ካንካን ዳዊት ኦሮን ዳዓምንግር ማዓትዮ ክ ካይቴምሽኬ ኪም ዴይሴርቴምሽ ይዥምዴድን ጋእሻ ኬ ዛብዳኬትዜን ኪም ዬሥትዮ ዳዓምን ዶፕስዳብንቴን ኬዔዜርሴ።

![](https://cdn.door43.org/obs/jpg/360px/obs-en-17-13.jpg?direct&)

ኦሮናም ዴይሴርሳኬት ቡዑር ዳዊት ቤርሳባም ማይንት ማዓስሶ ኮዖም ቴይሴ፤ ቡዑር ናዓ ዳዊቴን ኣንግ ይንሢ ኪን ኣጼ፤ ሳዓቢ ዳዊት ዎዖንሳቓክ ሬይንጎክ ጋእሻ ጋዓምሴ፤ ዳቔልስኔክት ሃስን ዳቔልድንዳ ኮ ማዓሥምሽ ዳዊካን ክ ኬዔስቴምሽ ማዓትካን ዬይዳኬታም ኬዔዝዳብን ናታናም ክራ ኦይሤ፤ ዳዊት ዳቔልስይንታም ቡዑጼ ሳዓቤሬ ኔጋኔ ኪን ጋይሴ፤ ዳዊት ኔጋቓክ ቦንይንትግር ካልምስድንዳ ሴጼግሬሴ ሳዓብቴንክ ሙክንትክ ኪን ኤዔእሴ።

![](https://cdn.door43.org/obs/jpg/360px/obs-en-17-14.jpg?direct&)

ዳይንኬሬ ዳዊት ዎዖንሳቓክ ዳቔልስንካን ቓእሲ ማዓሥክ ይንሥስን ዴእሴ፤ ታዓሬ ኔጋቓክ ቦንይንትግር ዳዊት ኤዔር ኤዔድንግር ዳዓሚ ሃዓቔ፤ ዳዊት ዛምኔሬ ጋእሻ ላንቕሴ፤ ዳዊት ሳዓብዜን ቡዑድ ክ እስክንኬሴሬ ሳዓቢ ታዓሬ ጉሜር ኬዔስትንካን ይዜን ቡዑድ እዜርቴባብ ሃዓቔ፤ ቡዑር ዳዊትኬ ቤርሳቤክ ኣብ ኣንግ ይንሢ ኣጼኬ ናዓምንክታሜሬ ሶሎምን ጋይሶ ዎጄኬ።

*ማጻዓፕ ጪልንት ኣቴና 1ሳሙ10፥15-19፤24፥31፤2ሳሙ5፥7፤11-12*

## 18. ካሽምቴንዳ ባዓብና

https://openbiblestories.org/l/aiw/story-18/

![](https://cdn.door43.org/obs/jpg/360px/obs-en-18-01.jpg?direct&)

ቤድሚ ቦንት ቡዑር ዳዊት ዴእሴ፤ ይንሥንክት ሶሎምን እስራኤል ኤዔድንዜን ባዓምሴ፤ ሳዓቢ ኪን ኮይን ኬዔዜ ጋዓጽ ሃራ ክ ዝግድንኬሬ ኪም ጎይሴ፤ ሶሎምን ሩዑርማም ክ ምክሳኬንክ ፔጬት ዜን ጋእሻ ሩዑርምባብ ኤዔድ ኪም ማዓስሴ፤ ሶሎምን ቤድሚ ሬያም ኤስንትክ ጋእሻ ሩዑርምክ ቤዔርዳብ ማዓሤ፤ ኣልክምሴሬ ሳዓቢ ጋእሻ ዎድምቴባብ ኪም ማዓስሴ።

![](https://cdn.door43.org/obs/jpg/360px/obs-en-18-02.jpg?direct&)

ሶሎምን ዬሩሳሌምግር ባዓቤን ዳዊት ጶቕሻቓኬታምኬ ኤያ እክንትካን ዝክስዴድ ሱዼርሳቔድንክ ጪሊ ኤዬናም እክሴ፤ ታ ኤዔድና ሳዓቢ ኪክን ማሽሜርዳክ ኣብላ ኤይን ኦዖላይስ ጪሊ ኤዬንግር ሳዓባም ምክሴኬ፤ ጪልሽት እሜሬ ኪን ታዓዴኬ፤ ሳዓቢ ሃዓድዮ ጪሊ ኤዬንግር ሃዓፔርሴ፤ ዋዓሬሬ ኤዔድን ኪክን ማዓሤ።

![](https://cdn.door43.org/obs/jpg/360px/obs-en-18-03.jpg?direct&)

ዳይንኬሬ ሶሎምን ፔጫ ኣብግራሜድ ማዓኔናም ናሼ፤ ዎላቕ ሺ ማዓዴድ ቤድሚ ማዓናም ቴይንትክ ሳዓብካን ኤዔእክዬ ኬዔና ማዓኔንግራንክ ቤድምና ኤዔድ ሃዓምዛንክ ሃዓዳቔኬ ይንት ጾይስናም ታዓዴኮ ኬዔም ምክስንት ዬዜኬ፤ ሶሎምን ይ ጋልቴርሳኬንክ ኖዖ ታዓሬ ኬት ጾይስናም ምክሴ።

![](https://cdn.door43.org/obs/jpg/360px/obs-en-18-04.jpg?direct&)

ሳዓቢ ሶሎምንዜን ጋዓምሴ ኖዖ ቡዑድ ክ እስካኬትጎክ ኪም ቓእስምሽ ሶሎምን ክ ዴእሳኬት ቡዑር እስራኤልት ኤዔድናም ቓስቴን ካርዜን ባዓቢ ኬ ማዓድምሽ ኬዔዜ።

![](https://cdn.door43.org/obs/jpg/360px/obs-en-18-05.jpg?direct&)

ሶሎምን ክ ዴእሳኬት ቡዑር ይንሥስንክት ሮብኣም ባዓምሴ፤ ሮብኣም ጋዴባብ ሃዓቔ፤ እስራኤል ኤዔድና ሙዳ ባዓምንክታም ዶዖፕስስካን ሱዽምስዮ ሃዓዴኬ፤ ሶሎምን ቤድሚ ጋእሼንዳ ዎዖኒ ኬዔም ክ ዎዖንስምሽኬ ጊሬሬ ኬዔም ክ ካሽሽምሽ ሮብኣምካን ኣትርይንታም ኬዔዜኬ።

![](https://cdn.door43.org/obs/jpg/360px/obs-en-18-06.jpg?direct&)

ሮብኣም ጋድርምክ ኮይን ኬዔን ጋይሴ፤ «እባብ ሶሎምን ጋእሼንዳ ዎዖኒ ዎዖም ዎዖንስቴ ጋይሴቶ ጶቕሽቴቴ፤ ዳይንኬርሬ እታ ክዛንክ ጋዓጺ ጋእሼንዳ ዎዖኒ ዬዔም ዎዖንስድቴ ክዛንክ ጋዓጽቶ ዬዔም ቓእስድቴ.»

![](https://cdn.door43.org/obs/jpg/360px/obs-en-18-07.jpg?direct&)

ታሜና እስራኤል ኤዔድንት ማታ ሱስና ሮብኣምዜን ኣቕልምሴኬ፤ ቓስቴን ማታ ሱስን ዬሌክ ክካን ቡዑድ እዜርቴድ ማዓሤኮ ክራ ሙክዳቔኬ፤ ኬዔና ቓስቴን ማታ ሱስና ይሁዴት ባዓቢ ማዓሤኬ።

![](https://cdn.door43.org/obs/jpg/360px/obs-en-18-08.jpg?direct&)

ሮብኣምዜን ዳቕልምሳቔድን ታማ እስራኤል ኤዔድንት ማታ ሱስና ኢሮብኣም ጋዓርዳብ ኤዔሥናም ባዓብንት ማዓስሶ ኪም ባዓምሴኬ፤ ኬዔስጎክ ዶዖቕዳክ ፔጬንግር ባዓምይንታም ዎይሴኬ፤ እስራኤልት ኤዔድንት ባዓምኔ ኬዔም ጋዓርዳቔ።

![](https://cdn.door43.org/obs/jpg/360px/obs-en-18-09.jpg?direct&)

ኢሮብኣም ሳዓቤን ኤዔኣይቴ ጋይንትክ ኤዔድና ዳቔልሲ ኬ ዎዖንቴምሽ ኬዔም ማዓስሴ፤ ይሁዴት ባዓምንግር ዶዖቕዳክ ጪሊ ኤዬንግር ሳዓባም ምክስንትን ኦዖላይሲ ኤዔድን ምክስቴምሽ ቓስቴን ጾይስናም ኬዔን ኣክሼ።

![](https://cdn.door43.org/obs/jpg/360px/obs-en-18-10.jpg?direct&)

ይሁዴቴኬ እስራኤል ኤዔድንት ይዥዴድኬት ማዓሤኮ ቤድሚ ሴጽካን ኪክ ኪካም ዳዓሚ ዶብምሴኬ።

![](https://cdn.door43.org/obs/jpg/360px/obs-en-18-11.jpg?direct&)

ክላኣክ እስራኤልት ባዓምንዜን ባዓብና ሙዳ ዳቕሌድ ሃዓቔኬ፤ ኬዔና ባዓብንግራንክ ቤድምና ኬት ካርንዜን ባዓምካን ዝግዴድን ኣብን እስራኤል ኤዔድናም ዴይሴርሴ።

![](https://cdn.door43.org/obs/jpg/360px/obs-en-18-12.jpg?direct&)

ባዓብን ሙዴንኬ ቤዴድን እስራኤል ኤዔድንት ባዓብንክ ጾይስናም ምክሴኬ፤ ጾይስናም ምክስንትኔኬት ቤድሚ ሴጽካን ጪልምንት ዳክንዳ ቤዔልምኬ ይንሥይንታም ጪልሽት እሜምሽ ማዓስሶ ኣሥዳቔኬ።

![](https://cdn.door43.org/obs/jpg/360px/obs-en-18-13.jpg?direct&)

ይሁዴት ባዓምንግር ዳዊት ካዓሥና ሃዓቔኬ፤ ኬዔና ባዓብንግራንክ ዋይንና ባዓብና ዳቕላይሴድ ሃዓቔኬ ጾይስናሜሬ ምክስዳቔኬ፤ ባንግ ባዓብና ይንሥይንታም ካንክ ጾይስንካን ቴችዳቔኬ፤ ታዓሬ ቤድሜድና ይሁዳ ኤዔድና ሳዓቤን ኤዔእንት ጋርሼኬ ኣቤድ ጾይስንሜሬ ምክሴኬ።

*ማጻዓፕ ጪልንት ኣቴና1ባዓብን 1-6፤11-12*

## 19. ማዓትካን ዬይዳኬታም ኬዔዝዴድና

https://openbiblestories.org/l/aiw/story-19/

![](https://cdn.door43.org/obs/jpg/360px/obs-en-19-01.jpg?direct&)

ሳዓቢ እስራኤል ኤዔድንት ኣቴንግር ሙዳ ማዓትካን ዬይዳኬታም ኬዔዝዴድናም ኬዔን ኦይሤ፤ ሳዓብዳንክ ኬዔዜናም ኤሴርሴኬ ኮዖዛንኬሬ ሳዓብት ኬዔስቴናም ኤዔድንካን ኬዔዜኬ።

![](https://cdn.door43.org/obs/jpg/360px/obs-en-19-02.jpg?direct&)

ኣካብ እስራኤል ኤዔድንዜን ክ ባዓምሳኬንክ ኤላስ ሳዓብት ማዓትካን ዬይዳኬታም ኬዔዝዳብ ሃዓቔ፤ ኣብ ባኣል ጋዓርዳክ ጾይስናም ኬ ምክስቴምሽ ኤዔድናም ዛፕስስዳብ ዳቕልባብ ኤዔድ ሃዓቔ፤ ኤላስ ኣካቤን «እ ኬዔስቴንክ ዬካ እእስራኤል ፔጭግር ዶዖቢ ዋይ ኦልካ ዶዖቓዬ» ኪን ጋይሴ፤ ኮዖና ኣካባም ጋእሻ ጋዓምስሴ።

![](https://cdn.door43.org/obs/jpg/360px/obs-en-19-03.jpg?direct&)

ሳዓቢ ኪም ዴይስካን ዝግዳብስን ኣካብዳንክ ኪም ኣዓችንትካን ፔጫ ጉርንግር ዶዖቕዳክ ኖቔንዳ ክ ካይቴምሽ ኤላስካን ኬዔዜ፤ ዣሜክ ሃክስንክ ኣፕትና ባልሽኬ ዋዓክ ኪን ታዓዳቔኬ፤ ኣካብኬ ክት ዳዓሚ ዶብዴድንክ ኤላሳም ዝግዜኬ፤ ዳይንኬሬ ኪም ሃዓፕንትካን ኬዔን ማዓትክዬ፤ ሉሜና ፔጬንዜን ጋእሻ ዛብዝንካን ማቕንቴዜን ኖቔና ኣሤ።

![](https://cdn.door43.org/obs/jpg/360px/obs-en-19-04.jpg?direct&)

ካንካን ኤላስ ዎላቔንዳ ሞሬግር ዶዖቕድንዳ ፔጬንግር ካዬ፤ ፔጬን ኮዖግር ሉሜንዛንክ ዻዓምሳቕንዳ ማዓ ቡና ዎላቔንዳ ኣንግ ይንሥኮት ዎላቕባብንክ እሥምንኬት ማቕካን ዬይታ ሃዓቔ፤ ዳይንኬሬ ኤላሳም እሥሣኬትክ ሳዓቤሬ እሌና ቲሌንግራንክ ዛይትኔሬ ዚጌንግራንክ ዦዖግራይምሽ ማዓስሶ ኬዔም እሥሴ፤ ዳዓቕን ሴጽንክ ሙዳ እሥምኬት ዶዖቓ ሃዓቔ፤ ኤላስ ኮዖግር ቤድሚ ቦንካን ዶዖቕሴ።ካንካን ኤላስ ዎላቔንዳ ሞሬግር ዶዖቕድንዳ ፔጬንግር ካዬ፤ ፔጬን ኮዖግር ሉሜንዛንክ ዻዓምሳቕንዳ ማዓ ቡና ዎላቔንዳ ኣንግ ይንሥኮት ዎላቕባብንክ እሥምንኬት ማቕካን ዬይታ ሃዓቔ፤ ዳይንኬሬ ኤላሳም እሥሣኬትክ ሳዓቤሬ እሌና ቲሌንግራንክ ዛይትኔሬ ዚጌንግራንክ ዦዖግራይምሽ ማዓስሶ ኬዔም እሥሴ፤ ዳዓቕን ሴጽንክ ሙዳ እሥምኬት ዶዖቓ ሃዓቔ፤ ኤላስ ኮዖግር ቤድሚ ቦንካን ዶዖቕሴ።

![](https://cdn.door43.org/obs/jpg/360px/obs-en-19-05.jpg?direct&)

ቦን ማኬንኬ ባግክ ዶዖቕሳኬት ቡዑር ዶዖቢ ቓንድምሽ እስራኤል ፔጭንት ባዓብንካን ማዓትዮ ኣካብካን ክ ኬዔስቴምሽ ሳዓቢ ኤላስካን ኬዔዜ፤ ኣካብ ኤላሳም ይ ሼጃኬንክ «ሃዓና ካልሚ ፕዥዳብስን ሃዓዳዮ!» ኪን ጋይሴ፤ ኤላሴሬ ኮይን ኪን ጋይሴ፤ «ካልሚ ፕዥዳብስን ሃዓኔ! ዶዖፔናምባብ ሳዓቢ ሙዴናም ማዓስዳብናም ጋርታዬ፤ ባኣላም ምክስታዬ እስራኤልት ባዓምንግር ዶዖቕዴድ ኤዔድናም ሙዳ ቔርሜሎስ ባሌዜን ሱዽካ።» ኪን ጋይሴ።

![](https://cdn.door43.org/obs/jpg/360px/obs-en-19-06.jpg?direct&)

ኦይዲ ማቶ ዶንቕ ታም ማዓትካን ዬይዳኬታም ኬዔዝዴዴድን ኪክን እስራኤልግር ዶዖቕዴድ ኤዔድን ሙዳ ቔርሜሎስ ባሌዜን ሃዓዴኬ፤ ኤላስ ኤዔድንካን «ሃይንትክ ዬኬ ጶቕሽዬንታም ኦዖክዴ? ሳዓቢ ኖዖ ሳዓቢ ክ ማዓሥንክ ክካን ፕክሽኬቴ ባኣል ሳዓቢ ክ ማዓሥንክ ክካን ፕክሽኬቴ» ኬዔን ጋይሴ።

![](https://cdn.door43.org/obs/jpg/360px/obs-en-19-07.jpg?direct&)

ኮዖዛንኬሬ ኤላስ ባኣልት ማዓካን ዬይዳኬታም ኬዔዝዴድንካን «ዋዓኪ ዚያ ዎላቕ ቴቼቶ ጪልሽት እማ ማዓስንትክ ታዓድኬቴ፤ ዳይንኬሬ ኖዖ ጎይሪ ሃይ ኦዖስኬቴ፤ እቴሬ ኮይን ዬይድቴ፤ ኖዖክ ማዓስዳብ ሳዓቢ ኖዖ ዶዖፔናምባብ ሳዓብዬ» ኬዔን ጋይሴ፤ ካንካን ባኣልት ፕክሽዴድና ጪልሽት እሜናም ኣክሼኬ፤ ዳይንኬሬ ኖዖ ጎይሪ ኦዖስኬኬ።ኮዖዛንኬሬ ኤላስ ባኣልት ማዓካን ዬይዳኬታም ኬዔዝዴድንካን «ዋዓኪ ዚያ ዎላቕ ቴቼቶ ጪልሽት እማ ማዓስንትክ ታዓድኬቴ፤ ዳይንኬሬ ኖዖ ጎይሪ ሃይ ኦዖስኬቴ፤ እቴሬ ኮይን ዬይድቴ፤ ኖዖክ ማዓስዳብ ሳዓቢ ኖዖ ዶዖፔናምባብ ሳዓብዬ» ኬዔን ጋይሴ፤ ካንካን ባኣልት ፕክሽዴድና ጪልሽት እሜናም ኣክሼኬ፤ ዳይንኬሬ ኖዖ ጎይሪ ኦዖስኬኬ።

![](https://cdn.door43.org/obs/jpg/360px/obs-en-19-08.jpg?direct&)

ኮዖት ቡዑር ባኣልት ማዓትካን ዬይዳኬታም ኬዔዝዴድና «ባኣሎ፥ ዎራ ኤሴርካዮ!» ጋዓሮ ባኣልዳ ምክሴኬ፤ ሴጼናም ሙዳ ሃዓቕንታ ምክሴኬ ኡዑግምሴኬ ኮይኔሬ ዜኔይንታም ሃልፔክ ቴቼኬ ዳይንኬሬ ማዓሲ ዳክ ሃዓቔ።

![](https://cdn.door43.org/obs/jpg/360px/obs-en-19-09.jpg?direct&)

ማቕንቴዜን ኤላስ ሳዓብካን ጪልሽት ኤማ ካር ኣክሼ፤ ዜናንኬሬ ዋዓም፥ ሃዓቓም፥ ኮይኔሬ ጪልሽ ካርንት ሼዔጌክ ዶዖቕዳክ ፔጬን ጫፕሽቴንክ ዬካ ታሜኬ ቓስቴን ቲላ ጾዖጺ ኖቓ ጪልሽት እማ ካርዜን ኬ ላልቴምሽ ኤዔድኔን ኬዔዜ።

![](https://cdn.door43.org/obs/jpg/360px/obs-en-19-10.jpg?direct&)

ኮዖዛንኬሬ ኤላስ ኮይን ጋይሶ ምክሴ፤ «ሙዴና ሃዓን ኤዔእዳብ ኣብራምቴኬ ይሳቕቴክ ያይቖብቴሬ ሃዓና እስራኤልት ሳዓብስን ሃ ማዓድምሽኬ እቴሬ ሃንት ፕክሽዳብስን እ ማዓሥምሽክ ኬዔና ኤዔድን ኤስቴምሽ ኢን ማዓስካዮ» ጋይሴ።

![](https://cdn.door43.org/obs/jpg/360px/obs-en-19-11.jpg?direct&)

ሳዓኔሬ ኖዖ ርኬግራንክ ዋዓቾ ዋዓናም፥ ሃዓቔናም፥ ሴይንናም፥ ሃዓጽሜናም ኮይኔርሬ ጪልሽት እሜንት ሼዔጌክ ሃዓቓክ ኖቔናም ሙዳ ኣሤ፤ ኤዔድና ኮዖም ይ ሼጃኬንክ ፔጬዜን ቡኬልሴኮ «ሙዴን ዪን ኤዔእዳብ ሳዓብዬ!» ጋይሴኬ።

![](https://cdn.door43.org/obs/jpg/360px/obs-en-19-12.jpg?direct&)

ኮዖዛንኬሬ ኤላስ «ባኣልት ማዓካን ዬይዳኬታም ኬዔዝዴድንግራንክ ዎላቓቤሴሬ ዻቖ ካያይምሼ!» ጋይሴ፤ ካንካን ኤዔድና ዬትዮ ካዮ ኬዔም ዴይሴኬ።

![](https://cdn.door43.org/obs/jpg/360px/obs-en-19-13.jpg?direct&)

ኮዖት ቡዑር ኤልስ ባዓብስን ኣካቤን «ዶዖቢ ሃዓታ ማዓሣቕንካን ሳዓና ካትሜንግር ማዓትካ» ኪን ጋይሴ፤ ሳዓና ርኬና ጫልሼ ጋእሼንዳ ዶዖቤሬ ቓን ዬዜ ሙዴና ዪን ኤዔእዳብ ሉሜናም ኔክሼ ዶዖፔናምባብ ሳዓቢ ማዓንትይንታሜሬ ዶዖፕስሴ።

![](https://cdn.door43.org/obs/jpg/360px/obs-en-19-14.jpg?direct&)

ኤላስት ቦንንት ቡዑር ሳዓቢ ይንት ማዓትካን ዬይዳኬታም ኬዔዝዳብ ክ ማዓቴምሽ ኤልሳእ ጋዓርዳብ ኤዔዳም እዜ፤ ሳዓቢ ኤልስጎክ ቤድሚ ክላ ሬያም ዎዖንሴ፤ ክላ ሬይንግራንክ ዎላቔና ዳቕልንዳ እሣ ሃዥም ዪም ዬዛቓብ ይዥዴድንት ዳዓሚ ዶብዴድናም ኤንሥዳብን ንእማንዜን ሃዥምና ሃዓፔርሴ፤ ኤልሳእጎ ኤሴርታ ይ ሃዓቕንካን እሤንግራንክ ዪም ክ ሃልሽሽቴምሽ ኤልሳኣም ካይዮ ጎይሴ፤ ኤልሳኤሬ ዮርዳኖስ ኖቔንግር ታብዛ ካርክ ካዮ ዋዓር ኣርዝዮ ዉት ኣርዝዮ ዉትክ ክ ዬይቴምሽ ንእማንካን ኬዔዜ።

![](https://cdn.door43.org/obs/jpg/360px/obs-en-19-15.jpg?direct&)

ብሬዜን ንእማን ጋዓምሴ ጋዴርሚ ኪን ካምስንካን ኤልሳእ ኪን ኬዔዛቓኬታም ዎዖናቕዬ፤ ቡዑር ዳይንክ ጶቕይንታም ኦዖክንትክ ዮርዳኖስ ኖቔንግር ታብዛ ካርክ ዉትኬ ኣይድክ ማዓሤ፤ ማቕንቴዜን ኖቔንግራንክ ክ ዉታቕሳኬንክ ዜኔንክት ሃልሼ! ሳዓቢ ኪም ሃልሽሼ።

![](https://cdn.door43.org/obs/jpg/360px/obs-en-19-16.jpg?direct&)

ሳዓቢ ኣቤድ ቤድሚ ማዓትካን ዬይዳኬታም ኬዔዝዴድናም ኦይሤ፤ ሙዴና ጾይስናም ምክስንትን ኬ ጋርቴምሽኬ ኣቤድንካን ኡዝማ ኬ ቤዔርቴምሽ ኔጋኔ ጋይንታም ኬ ዬቴምሽ ኤዔድንካን ኬዔዜ፤ ማዓትካን ዬይዳኬታም ኬዔዝዴድን ዳቕልንዳ ሬያም ዎዖንንትን ኬ ጋርክንኬ ሳዓብካን ኤዔእንት ኬ ዬትክንክ ሳዓቢ ባሥንኬትምሽ ኬዜን ክ ቤዔርድምሽኬ ክ ቓእስድምሽክ ኤዔድንካን ኤስምስኬቴ።

![](https://cdn.door43.org/obs/jpg/360px/obs-en-19-17.jpg?direct&)

ቤድሚ ሴጽካን ሳዓብካን ኤዔእኬኬ ቤድሚ ሴጽግር ማዓትካን ዬይዳኬታም ኬዔዝዴድናም ዳቕልምክ ኬዔም ዬዳቔኬ ዋይንንክ ኬዔም ዴይስዳቔኬ፤ ዋይንንክ ማዓትካን ዬይዳኬታም ኬዔዝዳብን ኤርማስ ዎቻ ማዓሣቔድ ኖቓ ኦዖልግር ዪም ዣቔርሽክ ዋዓር ክ ዴኣን ኪም ጋሬርታ ሃዓቔ፤ ኦዖሌንት ማቕንቴዜን ዶዖቕዳክ ቓኔንግር ኣርዜ፤ ዳይንኬሬ ኮዖ ሴጽንክ ባዓብስን ክካን ኣትርንትክ ክ ዴእካኬት ብሬዜን ኦዖሌንግራንክ ጎችትዮ ኪም ኬ ዉሥቴምሽ ይንት ፕክሽዴዴን ኬዔዜ።

![](https://cdn.door43.org/obs/jpg/360px/obs-en-19-18.jpg?direct&)

ማዓትካን ዬይዳኬታም ኬዔዝዴድና ኤዔድን ኬዔም ይዥድንኬሴ ሳዓብጎካን ኬዔዜናም ጋርኬኬ ሳዓብዳ ኬ ማዓትክንክ ሳዓቢ ኬዔም ካይስድምሽ ኤዔድኔን ዛፕስትዮ ኬዔዜኬ፤ ታዓሬ ሳዓቢ ሳይይሳቓብን ሃዓድምሽ ኬዔዜርሳቓክ ጉሜርናም ኤዔድንካን ጶቕሽሼኬ።

*ማጻዓፕ ጪልንት ኣቴና 1ባዓብን16-18፤2ባዓብን5፤ ኤር38*

## 20. ዎእሽቲ ቴይኬ ዎእሽትዮ ቴዬቴግራንክ ማዓትንቲ

https://openbiblestories.org/l/aiw/story-20/

![](https://cdn.door43.org/obs/jpg/360px/obs-en-20-01.jpg?direct&)

እስራኤልት ባዓምንኬ ይሁዴት ባዓምንክ ሳዓብዜን ዳቔልሲ ዎዖንሴኬ፤ ሳዓቢ ኬ ኪክን ሲና ባሌንዜን ክ ኣርዛቓክ ጫዓቔናም ጋርሼኬ፤ ሳዓቢ ይራ ኬ ማዓቴምሽኬ ኣልካ ኪም ኬ ምክስቴምሽ ኬዔን ጶቕሽሽካን ማዓትካን ዬይዳኬታም ኬዔዝዴድናም ኬራ ኦይሤ፤ ኬታ ዳይንክ ኪን ኤዔኣዮቴ ጋይሴኬ።

![](https://cdn.door43.org/obs/jpg/360px/obs-en-20-02.jpg?direct&)

ካንካን ሳዓቢ ኬዔም ይዥዴድን ኬ ሺችቴምሽ ኤዔእንትክ ቓስቴንን ባዓብናሜሬ ቓእሴ፤ ዛምክ ዳቕላይሳክ ኣሶር ፔጭንት ባዓብስና እስራኤልት ባዓምናም ካይሴ ሬይ ሜይዳክ ሙዳም ይንክ ቴዬ፤ ፔጬንግራንኬሬ ጋዓጽናም ካይሴ።

![](https://cdn.door43.org/obs/jpg/360px/obs-en-20-03.jpg?direct&)

ኣሶር ኤዔድና ኤንሥዴድናም፥ ዎድምቴድናም፥ ኮይኔሬ ጉዑሼድናም ሙዳ ሱጼትዳቦ ኣሶርግር ኬዔም ቴይ ካዬ፤ ዪም ዴይሳራቔድና ጋእሻ ቓምእ ሃዓቔድ እስራኤል ኤዔድን ዬሌክ እስራኤልግር ኔጌኬ።

![](https://cdn.door43.org/obs/jpg/360px/obs-en-20-04.jpg?direct&)

ኮዖዛንኬሬ ኣሶር ኤዔድና እስራኤልት ባዓምና ይ ዳያክ ራቕንዜን ኬ ዶዖቕቴምሽ ኣብዛሜዳም ታዓዴኬ፤ ኣብዛሜድኔሬ ኮፕምቴድ ካትሜናም ኣልክምሲ እክሴኮ ዋዓር ኔግንትክ ዶዖቕዳቔድ እስራኤል ኤዔድናም ቴይሴኬ ኣብዛሜድናም ቴያቔድ እስራኤል ኤዔድንት ካዓሥንግራንክ ሳምራ ኤዔድን ኬዔም ጋዓርዳቔ።

![](https://cdn.door43.org/obs/jpg/360px/obs-en-20-05.jpg?direct&)

እስራኤልት ባዓምንግራሜድ ኤዔድና ሳዓብዜን ቡዑድ ኬ እዝካኬትጎኬ ክካን ኬ ኤዔእካኬትጎክ ሃስን ኬዔም ክ ቓእሳቕንኬሬ ይሁዴት ባዓምንግራሜድን ካናኣን ኤዔድንት ጾይስናምኬ ኣብናሜሬ ምክሴኬ፤ ሳዓቢ ኬዔም ጶቕሽሻቕምሽ ማዓትካን ዬይዳኬታም ኬዔዝዴድናም ኦይሤ፤ ኬታ ዳይንክ ኤስራዮቴ ጋይሴኬ።

![](https://cdn.door43.org/obs/jpg/360px/obs-en-20-06.jpg?direct&)

ኣሶር ኤዔድና እስራኤልት ባዓምናም ኬ ካይሳቓክ ዎላቕ ማቶ ቦንት ቡዑር ይሁዳ ፔጭንት ባዓምናም ኬ ዶብቴምሽ ሳዓቢ ባብሎን ኤዔድናም ታዓዴ፤ ባብሎን ዛምንዳ ባዓምንት ዶዖቕድንዳ ሃዓቔ፤ ይሁዴት ባዓብስን ናቡኬዴናጾርት ፕክሽዳብ ማዓትንትካንኬ ቦንክ ቦንክ ቤድሚ ሶሊ ኪን ካሽንትካን ኤዔድምሴ።

![](https://cdn.door43.org/obs/jpg/360px/obs-en-20-07.jpg?direct&)

ዳይንኬሬ ቶክሚ ቦንት ቡዑር ይሁዴት ባዓብስን ባብሎንካን ኤዔእክዬ፤ ካንካን ባብሎን ኤዔድና ማዓቲ ሃዓድዮ ይሁዴት ባዓምንግራሜድናም ዳዓሚ ዶብዜኬ፤ ዬሩሳሌምት ካትሜናሜሬ ዬዜኬ፤ ጪሊ ኤዬናሜሬ ካይሴኬ ኮይኔሬ ካትሜንቴኬ ጪሊ ኤዬንቴክ ሬይ ዶዖቕድንዳ ሙዳም ቴዬኬ።

![](https://cdn.door43.org/obs/jpg/360px/obs-en-20-08.jpg?direct&)

ይሁዴት ባዓብስን ዪን ክ ኤዔእክንካን ናቡኬዴናጾር ኪም ቓእስካን ክት ዳዓሚ ዶብዴድን ይሁዴት ባዓብስንት ኣንግ ይንሥናም ብሬዜክት ዴይሴርሴ ክቴሬ ኣዓፕናም ዢልሼርሼ፤ ኮዖት ቡዑር ባብሎን ፔጭግር ዻክር ኤይግር ክ ዴእቴምሽ ባዓብስናም ቴዬኬ።

![](https://cdn.door43.org/obs/jpg/360px/obs-en-20-09.jpg?direct&)

ናቡኬዴናጾርኬ ክት ዳዓሚ ዶብዴድንክ ዎዖኒ ሃዓምግር ኬ ዎዖንቴምሽ ጋእሻ ቓምኤርሳቔድናም ዬሌክ ጋርንትክ ይሁዴት ባዓምንግራሜድ ኤዔድናም ሙዳ ባብሎንግር ዎእሽትዮ ቴዬኬ፤ ሳዓብት ኤዔድና ጉሜር ፔጭናም ኬ ጋርቴምሽ ማዓሴርሳቕንዳ ሴጽን ኮዖም ዎእሽትዮ ኮዖም ቴይ ጋዓርዴ።

![](https://cdn.door43.org/obs/jpg/360px/obs-en-20-10.jpg?direct&)

ሃስንዳይንኬሬ ሳዓቢ ዎእሽትዮ ቴይንትክ ኤዔድናም ዳቔልስንኬትጎክ ኬዔም ይ ቓእስድንኬሬ ኬዔማምኬ ጉሜርይንት ኬዔስትናም ዋልክዬ፤ ሳዓቢ ኤዔድናም ጶይንትናምኬ ይንት ማዓትካን ዬይዳኬታም ኬዔዝዴድንጎክ ኬዔም ኬዔስስንትናም ጋርክዬ፤ ቦን ታብዜት ቡዑር ጉሜርሽዳክ ፔጬንግር ኣልክምሲ ኬ ማዓድምሽ ኬዔዜ።

![](https://cdn.door43.org/obs/jpg/360px/obs-en-20-11.jpg?direct&)

ቦን ታብዜንት ቡዑር ፓርስ ፔጭንት ባዓብስን ባብሎናም ሺችሼ፤ ካንካን ፓርስት ባዓምንት ጌሥና ባብሎንት ባዓምንት ጌሥንግር ማዓሤ፤ ታ እስራኤል ኤዔድና ኣይሁድ ኬዔም ጋዓርዴ ጋዓጽኔኬት ኡክናይንታም ሙዳ ባብሎንግር ጋርሻቔዴኬ፤ ጋእሻ ጋልቴርሳቔድ ቶክሚ ኣይሁድ ኤዔድና ዬሌክ ኣይሁድ ፔጭናም ጶሼኬ።

![](https://cdn.door43.org/obs/jpg/360px/obs-en-20-12.jpg?direct&)

ፓርስት ባዓብስንት ጌሥና ዛምንዳ ዳይንኬሬ ይ ዬዛቔድንካን ኣቴርዳብ ሃዓቔ፤ ቒሮስ ፓርስ ኤዔድንት ባዓቢ ክ ማዓሣኬት ቶክሚ ሴጽት ቡዑር ኣይሁድግር ማዓትንትካን ዝግዳብ ሃይዬሬ ኣይሁድ ፓርስ ፔጭናም ጋርሽዮ ይሁዴግር ማዓትንቲ ኪን ማዓድምሽ ኬዔዜ፤ ጪሊ ኤይናም ኣልክምሲ እኬርቴምሽ ሶሊት ኬልሺ ኔክዳይክ እሜርሴ! ካንካን ዎእሽትዮ ቴይርክ ዶዖቔርሳቓክ ታብዛ ታም ቦንንት ቡዑር ቶክሜድ ኣይሁድ ኤዔድንት ካሽምና ኣይሁድ ፔጭግር ዶዖቕዳክ ዬሩሳሌም ካሜንግር ማዓቴኬ።

![](https://cdn.door43.org/obs/jpg/360px/obs-en-20-13.jpg?direct&)

ኤዔድና ዬሩሳሌምግር ይ ዣእሻኬንክ ጪሊ ኤዬናምኬ ካትሜንት ሼዔጌክ ዶዖቕዳክ ጉርዴናምክ ኣልክምሲ ክልሴኬ፤ ሃስን ዳይንኬሬ ታዓክ ዬካ ኣቤድ ኤዔድን ሾላ ቴቼርቴድ ኬ ዳይንኬሴ ኣልክምሲ ጉሜር ፔጭንግር ዶዖቕሴኮ ጪሊ ኤዬንግር ምክሴኬ።

*ማጻዓፕ ጪልንት ኣቴና 2 ባዓብን17፥24-25፤2ክላ.ኬ 36፤እዝ 1-10፤ኔማ 1-13*

## 21. ሳዓቢ ባዓባ ሳዓቢ ዪ ሳይሳቓብጎ ክ ኬዔዛቓክ ጉሜርና

https://openbiblestories.org/l/aiw/story-21/

![](https://cdn.door43.org/obs/jpg/360px/obs-en-21-01.jpg?direct&)

ኣኪ ብሬዜን ሳዓቢ ባዓባ ሳዓቢ ዪም ሳይሳቓብናም ኦይትንትካን ጶቕሽቴ ብሬና ሳዓቢ ዪም ሳይሳቓብት ጉሜርና ኣዳምዴኬ ሄዋንዴክ ሃዓዴ፤ ሳዓቢ ጉንስንት ማታም ግእዳብ ሄዋኔት ካዓሥግራንክ ኣዼርድምሽ ጉሜርናም ኬዔዜ፤ ሄዋኔታም ጌሽሻቓብን ጉንስን ሴጣን ሃዓቔ፤ ጉሜርና ሳዓቢ ዪም ሳይሳቓብን ሴጣናም ማቕንቴኮት ሺችዴ ጋይንትዬ።

![](https://cdn.door43.org/obs/jpg/360px/obs-en-21-02.jpg?direct&)

ክጎክ ፔጬዜናሜድ ኤዔድንት ሱሴና ሙዳ ኣንጄት ኬ ቴይይቴምሽ ሳዓቢ ኣብራምጎክ ጉሜርናም ኬዔዜ፤ ኮዖና ኣንጄትና ኦስ ብሬዜን ሳዓብዳንክ ሳዓርሳቓብን ሃዓድንክ ቦዖድምዴ፤ ኖዖ ፔጬዜን ዶዖቕዴድ ኤዔድንት ሱሳ ማዓሣቔድን ኬ ዻቕቴምሽ ማዓስዴ።

![](https://cdn.door43.org/obs/jpg/360px/obs-en-21-03.jpg?direct&)

ኦስ ብሬዜን ሙሴምሻብ ኣብ ማዓትካን ዬይዳኬታም ኬዔዝዳባም ይ ዻዓስስድምሽ ሳዓቢ ሙሴካን ጉሜርናም ኬዔዛቔ፤ ኮዖና ካፕስዮ ሃዓዳብን ሳዓቢ ዪም ሳይሳቓብንጎክ ኬዔዜርሳቓክ ኣብ ጉሜርን ሃዓቔ።

![](https://cdn.door43.org/obs/jpg/360px/obs-en-21-04.jpg?direct&)

ካዓሥንግራንክ ዎላቓብን ሳዓብት ኤዔድንዜን ባዓቢ ማዓሦ ሌፒ ሴጽካን ክ ባዓምድምሽ ሳዓቢ ባዓብስን ዳዊትካን ጉሜርናም ኬዔዛቔ፤ ኮዖኔሬ ሳዓቢ ዪም ሳይሳቓብን ዳዊት ካዓሥንግራንክ ዎላቓብን ማዓዴ ጋይንትዬ።

![](https://cdn.door43.org/obs/jpg/360px/obs-en-21-05.jpg?direct&)

ሳዓቢ ክላ ጫዓቓ ይ ኣርድምሽ ማዓትካን ዬይዳኬታም ኬዔዝዳብን ኤርማስጎክ ጉሜርናም ኬዔዛቔ፤ ኮዖና ጫዓቔና ሳዓቢ ሲና ባሌንዜን እስራኤል ኤዔድን ኪክን ክ ኣርዛቓክ ጫዓቔንምሽ ዳክዬ፤ ክላ ጫዓቓ ኣርትንክ ሳዓብት ካርቴና ኤዔድንት ቡዑዴግር ክልክዴ፤ኤዔድኔሬ ይንት ማቴክ ሳዓባም ኤስዴኬ ኤዔድንክቴሬ ማዓዴኬ ሳዓቤሬ ዳቔልስንኬታም ኔጋኔ ኬዔን ጋዓዴ ሳዓቢ ዪም ሳይሳቓብኔሬ ክላ ጫዓቔናም ካንክ ዬዴ።

![](https://cdn.door43.org/obs/jpg/360px/obs-en-21-06.jpg?direct&)

ታዓሬ ሳዓብት ማዓትካን ዬይዳኬታም ኬዔዝዴድን ሳዓቢ ዪም ሳዓሳቓብስን ማዓትካን ዬይዳኬታም ኬዔዝዳብ፥ ኤዔድናም ሳዓቢ ኪክን ቔዔሽምሽዳብን፥ ኮይኔሬ ባዓቢ ማዓዴ ጋይሴኬ፤ ማዓትካን ዬይዳኬታም ኬዔዝዳቤሬ ማዓዴ።

![](https://cdn.door43.org/obs/jpg/360px/obs-en-21-07.jpg?direct&)

እስራኤል ኤዔድንት ኤዔድናም ሳዓቢ ኪክን ቔዔሽምሽዴድን ይንት ዳቔልስንጎክ ይዜን ዣእዳክ ቓእስንኬት ኦዖላይሲ ኤዔድን ካርግር ሳዓብካን ጪልሽት እሜናም ታዓዴኬ ኣልካ ኤዔድናም ሳዓቢ ኪክን ቔዔሽምሽዴድን ኤዔድንካን ሳዓብዳ ምክሴኬ፤ ሳዓቢ ዪም ሳይሳቓብን ዶዖፔን ጪልሽት እማ ማዓስሶ ይ ምታም ሳዓብካን እምዳብ ዶዖፔናምባብ ኤዔድናም ሳዓቢ ኪክን ቔዔሽምሽዴድንት ጌሥዳብን ማዓዴ።

![](https://cdn.door43.org/obs/jpg/360px/obs-en-21-08.jpg?direct&)

ባዓብስን ባዓምንዜይንት ጌሥዳብኬ ኤዔድንዜን ቤዔርዳብክ ኤዔዴ፤ ሳዓቢ ዪም ሳይሳቓብን ኣዓካስይንት ዳዊት ባዓሚ ካርንዜን ዶዖቕዳብ ዶዖፔናምባብ ባዓቢ ማዓዴ፤ ፔጫ ሙዴዜን ሌፒ ሴጽካን ጌሥዴ፤ ኮይኔሬ ሙዳ ሴጽካን ኡዝሜክ ቤዔርንትክ ዶዖፔንኣኬታም ዜዔዝዴ።

![](https://cdn.door43.org/obs/jpg/360px/obs-en-21-09.jpg?direct&)

ሳዓብት ማዓትካን ዬይዳኬታም ኬዔዝዴድን ሳዓቢ ዪም ሳይሳቓብንጎክ ኣብንዳ ቤድሚ ሬያም ኬዔስቴኬ፤ ማዓትካን ዬይዳኬታም ኬዔዝዳብን ምልካስ ሳዓቢ ዪም ሳይሳቓብን ሃዓድካኬት ብሬዜን ጋእሼባብ ማዓትካን ዬይዳዳኬታም ኬዔዝዳብን ሃዓድምሽ ብሬዜን ኬዔስቴ፤ ሳዓቢ ዪም ሳይሳቓብን ዎላቕ ሙናኣክዳንክ ክ ኣዼርድምሽ ማዓትካን ዬይዳኬታም ኬዔዝዳብን እሳስ ኬዔዛቔ፤ ማዓትካን ዬይዳኬታም ኬዔዝዳብን ምካስ ሳዓቢ ዪም ሳይሳቓብን ቤቴሌም ካትሜንግር ኣዼርዴ ጋይሳቔ።

![](https://cdn.door43.org/obs/jpg/360px/obs-en-21-10.jpg?direct&)

ማዓትካን ዬይዳኬታም ኬዔዝዳብን እሳስ ሳዓቢ ዪም ሳይሳቓብን ጋልሌግር ዶዖቕዴ፤ ቡዑዴይንት ኣይሳቔድ ኤዔድናም ዛፕስስዴ፥ ኮይኔሬ ዎእሽትዮ ዪም ቴይራቔድናም ባዛ ካይሳ ዉትንትናም፥ ዻኬርታ ኤዔድንካን ቡልምንትናም ኬዔዝዴ፤ ታዓሬ ኮይን ሳዓቢ ዪም ሳይሳቓብን ሃዤርታ ኤዔድናምኬ ኤስርንቲ ሼድንቲ ኬዔዝንቲ ሙክንቲ ዪን ማዓታዬድናም ክ ሃልሽሽድምሽ ማዓትካን ዬይዳኬታም ኬዔዛቔ።

![](https://cdn.door43.org/obs/jpg/360px/obs-en-21-11.jpg?direct&)

ታዓሬ ማዓትካን ዬይዳኬታም ኬዔዝዳብን እሳስ ሳዓቢ ዪም ሳይሳቓብን ሃሬሬ ዜንክት ዳክዳይክ ኪም ይዤርድምሽ ኬዔዛቔ፤ ኣቤድ ማዓትካን ዬይዳኬታም ኬዔዝዴድን ሳዓቢ ዪም ሳይሳቓብናም ዴይስዴድን ኬዔና ኣብሌንክትዜን እጣ ኬ ዣቕድምሽኬ ኤዔዴኔክት ኪም ጋርድምሽክ ብሬዜን ኬዔዛቔ፤ ማዓትካን ዬይዳኬታም ኬዔዝዳብን ዜክራስ ሳዓቢ ዪም ሳይሳቓብስናም ኪም ኤሳይቴ ጋዓዳብን ቦንዴኬ ታማ ብሪ ኪን ካሼርድምሽ ኬዔስቴ።

![](https://cdn.door43.org/obs/jpg/360px/obs-en-21-12.jpg?direct&)

ኣልካ ማዓትካን ዬይዳኬታም ኬዔዝዳብስን ሳዓቢ ዪም ሳይሳቓብንት ዴእንጎካን ኬዔስቴ፤ እሳስ ኤዔድና ሳዓቢ ዪም ሳይሳቓብንዜን ኬ ትጽምድምሽ ዜንክቴሬ ኬ ላጽድምሽ ኪም ኬ ግእድምሼሬ ኬዔስቴ፤ ሬይ ሃሬሬ ቱንትሚ ዎዖናቕባብ ክ ማዓድንኬሴሬ ኪም እክክዴኬ ጋእሼንዳ ሴዔቕርኬ ካልርክ ዴእዴ።

![](https://cdn.door43.org/obs/jpg/360px/obs-en-21-13.jpg?direct&)

ታዓሬ ማዓትካን ዬይዳኬታም ኬዔዝዴድና ሳዓቢ ዪም ሳይሳቓብን ዳቔልስንት ዳክባብ ዶዖፔናምባብ ማዓዴ ጋይሳቔኬ፤ ኣቤድ ኤዔድንት ዳቔልስንት ቓእስናም ቴይንትክ ኖዖት ሞልትግር ላቕምናም ታዓዴ፤ ኮዖጎክ ሳዓቢ ዪም ሳይሳቓብናም ካሌርስንትና ሳዓብት ጶቕሺ ሃዓቔ።

![](https://cdn.door43.org/obs/jpg/360px/obs-en-21-14.jpg?direct&)

ሳዓቢ ዪም ሳይሳቓብን ዴእድምሽኬ ሳዓቢ ታዓሬ ኪም ዻዓስድምሽክ ማዓትካን ዬይዳኬታም ኬዔዝዴድና ብሬዜን ኬዔስቴኬ፤ ሳዓቢ ባዓባ ሳዓቢ ዪም ሳይሳቓብንት ዴእንኬ ዻዓምንትንጎክ ዳቔልሲ ኤዔድናም ዻቕሽካን ጶቕሽይንታም ቦዖሥንትክ ክላ ጫዓቔናም ዬዴ።

![](https://cdn.door43.org/obs/jpg/360px/obs-en-21-15.jpg?direct&)

ሳዓቢ ማዓትካን ዬይዳኬታም ኬዔዝዴድንካን ሳዓቢ ዪም ሳይሳቓብንጎክ ቤድሚ ሬያም ኬዔን ኬዔስቴ፤ ዳይንኬሬ ሳዓቢ ዪም ሳይሳቓብን ኬዔና ማዓትካን ዬይዳኬታም ኬዔዝዴድንት ሴጼንግር ሃዓትክዬ ኬዔና ኬዔስቴንግራንክ ማቕንቴስን ኬዔዛኬት ኦይዲ ሜቶ ቦንንት ቡዑር ኡዝማ ይንት ሴጼንግር ሳዓቢ ባዓባ ሳዓቢ ዪም ሳይሳቓብናም ፔጬዜን ኦይዴ።

*ማጻዓፕ ጪልንት ኣቴና ፕዥ 3፥15፤12፥1-3፤ ኣልክ 8፥15፤ 2ሳሜ 7፤ ኤርማስ 31፤ እሳስ 59፥16፤ ዳን 7፤ ሚል 4፥5፤ እሳስ 7፥14፤ ሚክ 5፥2፤ እሳስ 9፥1-7፤ 35፥3-5፤ 61፥53፤ ዬሢ 2218፤35፥19፤ 69፥4፤ 41፥9፤ ዜክ 11፥12-13፤ እሳስ 50፥6፤ ዬሢ 16፥10-11።*

## 22. ዋንስት ኣዽርና

https://openbiblestories.org/l/aiw/story-22/

![](https://cdn.door43.org/obs/jpg/360px/obs-en-22-01.jpg?direct&)

ብርስዮ ሳዓቢ ይንት ዎዖንንካን ይ ኦይዴድንኬ ማዓትካን ዬይዳኬታም ኬዔዝዴድንጎክ ኤዔድንካን ኬዔስታ ሃዓቔ፤ ዳይንኬሬ ኬካን ኬዔዝራቓክ ኦይዲ ማቶ ቦንና ማቕሴኬ፤ ጶቕሼርክዳይክ ዎላቕ ሳዓቢ ርኬግራንክ ዎዖንይንትካን ክ ኦይዳብን ዜክራስ ዪም ጋዓርዳብን ጋልሥን ኤዔድናም ሳዓቢ ኪክን ቔዔሽምሽዳብንዳ ሳዓብዳንክ ጋዓና ኬዔዛ ዪም ኦይቴርስክ ሃዓዴ፤ ዜክራስኬ ኬዔንን ኤልሳቤጥክ ሳዓብካን ጳሽዴድ ኤዔድ ሃዓቔኬ፤ ዳይንኬሬ ናዓ ይንሢ ኣዻቕንዳ ሃዓቔ።

![](https://cdn.door43.org/obs/jpg/360px/obs-en-22-02.jpg?direct&)

ሳዓቢ ርኬንግራንክ ዎዖንይንትካን ክ ኦይዳብን ዜክራሴን ኮይን ጋይሴ፤ «ማይሃንት ኣንግ ይንሥ ሃዓን ኣጽቴሬ፤ ናዓምክታም ዋንስ ጋይሳዮ ዎጅታዬ ኖዖ ማንፔስ ጪልና ኪክ ጾዖጽዴ ኤዔድናሜሬ ሳዓቢ ዪም ሳይሳቓብንካን ኬዔም ኡስዴ!» ዜክራስ ዳይንክ «ማይን እስት ኬ እንክ ይንሢ ኣዽንትካን ጋእሻ ጋልቴርቶቴ! ኮዖና ማዓድምሽ ሃስኒ ኤስዴ?» ጋይሶ ኪም ጎይሴ።

![](https://cdn.door43.org/obs/jpg/360px/obs-en-22-03.jpg?direct&)

ሳዓቢ ዎዖንይንትካን ርኬግራንክ ክ ኦይዳብን ዜክራስካን ኮይን ጋይሴ፤ «ክላ ኬዔዜናም ዬዔን እ ኬዔስቴምሽ ሳዓቢ ኢም ኦይሣቔ፤ እ ኬዔዝዳኬታም ሃ ዶዖፕስክንካን ይንሥስን ኣዼርስቴንክ ዬካ ኣልቕንት ሃዓን ማዓታዬ፤» ሳዓና ዜክራስ ኬዔዝንቲ ኪም ባሼ፤ ኮዖት ቡዑር ሳዓብት ርክርግራንክ ዎዖንይንትካን ክ ኦይዳብን ዜክራስዳንክ ፓዓሽምሼ፤ ዜክራሴሬ ኤዔርንት ማዓቴ ማይንክቴሬ ሲርቴ።

![](https://cdn.door43.org/obs/jpg/360px/obs-en-22-04.jpg?direct&)

ኤልሳቤጥ ኣርፒ ላዓት ሲርማ ኮ ዳያኬንክ ኮዖና ሳዓቢ ርኬግራንክ ዎዖንይንትካን ክ ኦይዳብን ጶቕሼርክዳይክ ናዓምንኮት ማራም ዪም ጋዓርዳክ ኤልሳቤጥት ሱሴቴንካን ሃዓፔርሴ፤ ናዓሬ ሙናካማ ይ ሃዓቕንካን ዬሶፕ ጋዓርዳብ ኤዔሥን ኮዖም ሶዖርታ ሃዓቔ፤ ሳዓብት ኦይቴርዳብስኔሬ «ሃዓና ስሲርዳዬ ኣንግ ይንሤሬ ኣዻዻዬ ናዓምንክታሜሬ ዬሱስ ኪም ጋዓዳዬ፤ ኖዖሬ ባዓብስን ሳዓብት ይንሥዬ ሌፒ ሴጽካኔሬ ጌሥዳብ ማዓዴ» ጋይሴ።

![](https://cdn.door43.org/obs/jpg/360px/obs-en-22-05.jpg?direct&)

ማራም «እታ ኣንግ እይንክ ዣእሺ ኤሳይንዳ ሙናካማ እ ማዓሥንካን ኮና ሃስኖክ ማዓዴ?» ጋይስዮ ማዓስሴ፤ ኦይቴርባብስኔሬ ኮይን ጋይንትክ ኮዖን ፕእስትዮ ኬዔዜ፤ «ማንፔስ ጪልና ሃዜን ሃዓዳዴ ባዓቢ ሳዓብት ዛምኔሬ ሃዜን ሽሽፕሽዴ፤ ካንካን ይንሥስን ጪልባብ ሳዓብት ይንሢ ማዓዴ፤» ማራሜሬ ዶዖፕሴ፤ ኦይቴርቴባብስን ጋይሳቓታሜሬ ኢን ማዓታኔ ጋይሴ።

![](https://cdn.door43.org/obs/jpg/360px/obs-en-22-06.jpg?direct&)

ኦይቴርቴባብስን ማራምካን ይ ኬዔዛኬት ቡዑር ሳዓና ይ ካይንክ ኤልሳቤጣም ሼጄ፤ ኤልሳቤጤሬ ማራምት ኣልቕሽናም ኮ ኤሴርታኬንክ ኤልሳቤጥት ይንሥስን ኮዖርግርኮት ጎብዜ፤ ማዓኔና ሳዓቢ ይካን ዎዖንሳቓክ ሬይንጎክ ኪክን ኬ ጉሜርድክ ማራም ኤልሳቤጥት ኤዔር ኣርፒ ማኬንካን ይ ዶዖቕሳኬት ቡዑር ኤዔርንት ናዓ ማዓቴ።

![](https://cdn.door43.org/obs/jpg/360px/obs-en-22-07.jpg?direct&)

ኤልሳቤጥ ኣንግ ይንሥይንታም ይ ኣጻኬት ቡዑር ዜክራስኬ ኤልሳቤጥክ ኦይቴርቴባብስን ኬዔን ኬዔዛቕምሽ ይንሥስንት ናዓሚ ዋንስ ጋይሶ ዎጄኬ፤ ኮዖ ሴጽንክ ሳዓቢ ዜክራስዳ ኣልክምሲ ክ ኣልቕቴምሽ ማዓስሴ፤ ዜክራስ ኮይን ጋይሴ፤ «ኤዔድይንታም ክ ጶቕሽንካን ሳዓቢ ክ ጎዖፕሽማኔ! ሃዓኔሬ ይንሥእስቶ፤ ዳቔልስንኬትካን ኔጋኔ ጋይንቲ ሃስን ኬ ሃዓፕድኬሬ ኤዔድንካን ኬዔዝዳብ ባዓብስን ሳዓብት ማዓትካን ዬይዳኬታም ኬዔዝዳብ ሃዓም ጋዓርዴ።

*ማጻዓፕ ጪልንት ኣቴና ሉቓስ 1*

## 23. ዬሱስት ኣዽርና

https://openbiblestories.org/l/aiw/story-23/

![](https://cdn.door43.org/obs/jpg/360px/obs-en-23-01.jpg?direct&)

ማራም ዬሶፕ ጋዓርዳብ ጪልባብ ኤዔዴን ኮዖም ኩጵሴርስክ ሃዓቔ፤ ኮዖም ኩጵሳቓብስን ዬሶፕ ማራም ሲዒርማ ኔግንትንኮት ይ ኤሴርሳኬትክ ይንሥስን ክሬይ ክ ማዓትካኬታም ኤስቴ፤ ማራማም ኦዖሽንሽካን ዚጋቕዬ ካንካን ጫሜ ጋይሶ ኮዖም ጋርካን ጶቕሼ፤ ኮይን ክዬእካኬት ብሬዜን ሳዓብት ኦይቴርቴባብስን ሃዓዴትዳቦ ሃዓሜትክ ኪን ኬዔዜ።

![](https://cdn.door43.org/obs/jpg/360px/obs-en-23-02.jpg?direct&)

ኦይቴርቴባብስን ኮይን ጋይሴ፤ «ዬሶፖ ማራማም ማዓሃንት ኮዖም ማዓስሶ ቴይንትካን ሃይ ጳሽካ፤ ኮዖርግርኮት ዶዖቕዳብን ማንፔስ ጪልዳንኬ፤ ኣንግ ይንሢ ኣጽቴሬ ናዓምንክታሜሬ ዬሱስ ጋይሶ ዎጅታዬ (ቡልኔሬ <ሌፒ ሴጽካን ዻቕሽዳብ>) ጋይንትዬ፤ ሃራካኔ ጋዓርስንክ ኤዔድይንታም ዳቔልስንክትግራንክ ኬዔም ዻዻቔሽዴ

![](https://cdn.door43.org/obs/jpg/360px/obs-en-23-03.jpg?direct&)

ካንካን ዬሶፕ ማራማም ማይንትምሽ ማዓስሶ ኤዔርንት ኮዖም ቴዮ ካዬ፤ ዳይንኬሬ ኮ ኣጽቴንክ ዬካ ኮ ኪክን ራዓትክዬ።

![](https://cdn.door43.org/obs/jpg/360px/obs-en-23-04.jpg?direct&)

ኣዽማ ሴጽንኮት ዣእሽምሽ ሮማ ፔጭንት ባዓብስን ኤዔድ ሙዳ ፓይድርካን ይንት ኣዓካ ፔጭንት ካትሜንግር ካይቴምሽ ኬዔዜ፤ ዬሶፕኬ ማራምክ ይ ዶዖቕዳክ ናዝሬታንክ ቤቴሌምግር ጎዖጊ ፔግማ ሙክሴኬ፤ ሃራካኔ ጋዓርስንክ ቤቴሌም ካትሜና ኣዼርሳቓብንት ኣዓኬና ዳዊት ሃዓቕንካኔ።

![](https://cdn.door43.org/obs/jpg/360px/obs-en-23-05.jpg?direct&)

ቤቴሌምግር ኬ ዣእሻኬንክ ኬ ሃዉሽድንዳ ካሪ ዳኪ ሃዓቔ፤ ኬ ሃዓፕታቓክ ካርና ዋዓክት ካሌግር ሃዓቔ፤ ይንሥስን ኣዼርሳኬንክ ኬ ራዓሥድንዳ ካሪ ዳክንካን እንዴን ዋዓክንት እሥሚ ጎንግር ኪም ራዓሥሴ፤ ናዓምንክታሜሬ ዬሱሴ ጋይሴኬ።

![](https://cdn.door43.org/obs/jpg/360px/obs-en-23-06.jpg?direct&)

ሶይትን ኮዖክ ኬራ ሼዔጌር ዶዖቕዳክ ዛክንዜን ቖልምንት ግሽዴድ ሃዓቔኬ፤ ጶቕሼርክዳይክ ሳዓብት ኦይቴርቴባብስን ሻዓክድክ ሼጄኬ ኬቴሬ ጳሼኬ፤ ኦይቴርቴባብስኔሬ «ሃይ ጳሽኬቴ ሃራካኔ ጋዓርስንክ ዬካን ክላ ኬዔዛ እስት ዶዖቕዴ፤ ሳዓብት ሳዓርቴባብስን ባዓባ ቤቴሌምግር ኣዼርቴ!» ጋይሴ።

![](https://cdn.door43.org/obs/jpg/360px/obs-en-23-07.jpg?direct&)

«ካዬቶ ይንሥስናም ዝኬቴ ኣብሌክ ቕጭቶ ዋዓክት ጎዖንጌግር ራዓሥታ ኪም ሃዓዴቴ፤» ጶቕሼርክዳይክ ሳዓቢ ርኬግራንክ ዎዖንይንትካን ክ ኦይዴድን ቤድሚ ሃዓቔ፤ ሳዓባሜሬ ጎዖፕሻሬኮ ቦንችሚ ሳዓብካን ርኬግር ማዓታኔ ላቕምኔሬ ፔጭዜን ኤዔድንካን ማዓታኔ!» ጋይሴኬ።

![](https://cdn.door43.org/obs/jpg/360px/obs-en-23-08.jpg?direct&)

ግሽሜን ግሽዳቔድን ዬሱስ ዳያክ ካርንግር ዣእሼኮ ኦይቴርቴባብስን ዪን ጋይሳቓኬታም ዋዓክንት ጎንጌንግር ራዓሥታ ኪም ሃዓፕሴኬ፤ ጋእሼሬ ጉሜርሴኬ ማራሜሬ ጉሜርሴ ቖልማ ግሽዴድና ይ ኤሴርሳቓኬ ይ ሼጃቓክ ሙዴካን ሳዓባም ጎዖፕሻሮ ቖልሜይንት ዳያኬዳ ካዬኬ።

![](https://cdn.door43.org/obs/jpg/360px/obs-en-23-09.jpg?direct&)

ቶክሚ ሴጽት ቡዑር ሃይት ዉትንቴጎክ ፔጋ ፔጭግራሜድ ሩዑርሜድን ርኬግር ኤናንክ ዱሴርክንዳ ማንካ ሼጄኬ፤ ክሌባብ ኣይሁድ ኤዔድንት ባዓብስስን ኣዼርስምሽ ኤስምስድንዳ ማዓትንትናም ኤስቴኬ፤ ካንካን ባዓብስን ኮዖባባም ሼድንካን ፔጋንክ ሙክሴኮ ቤቴሌምግር ሃዓዴኮ ዬሱስኬ ኪም ኣጼድንክ ኬ ሃዓቓክ ኤዬናም ሃዓፕቴኬ።

![](https://cdn.door43.org/obs/jpg/360px/obs-en-23-10.jpg?direct&)

ሩዑርሜድኔሬ ዬሱሳም እንዴን ኪክን ይ ሼጃኬንክ ጉምፔርስዮ ኪም ጎዖፕሼኬ፤ ዬሱስካኔሬ ጋጵምንዳ እማ እምሴኬ ኮዖዛንኬሬ ፔጬግርንት ካዬኬ።

*ማጻዓፕ ጪልንት ኣቴና ማቶስ11፤ ሉቓስ2*

## 24. ዋንስ ዬሱሳም ሽእሽምሽ

https://openbiblestories.org/l/aiw/story-24/

![](https://cdn.door43.org/obs/jpg/360px/obs-en-24-01.jpg?direct&)

ዜክራስቴኬ ኤልሳቤጥት ይንሥስን ዋንስ ጋጵሶ ማዓትካን ዬይዳኬታም ኬዔዝዳብ ማዓሤ፤ ፔጫ ጉርንግር ዶዖቕዳቔ፤ ዳዉላግራማ ኣንጽ ባእቴት ኩርኬ ኤይክክ እሥዳቔ ግሜልት ጉፕቴግራንክ ኣክሼርሻቕንዳ ኣብላ ቖቤርዳቔ።

![](https://cdn.door43.org/obs/jpg/360px/obs-en-24-02.jpg?direct&)

ቤድሚ ኤዔድ ዋንስዳ ኤስርካን ፔጫ ጉርንግር ክራ ሃዓዴኬ፤ ኖዖሬ «ሳዓብት ባዓምና ዬራ ኡሥታ ማዓሥንካን ሳዓብዳ ማዓትኬቴ» ጋይንትክ ኬዔም ሳንሴ።

![](https://cdn.door43.org/obs/jpg/360px/obs-en-24-03.jpg?direct&)

ኤዔድና ዋንስት ኬዔዜናም ይ ኤሴርሳኬንክ ቤድሚ ኤዔድና ዳቔልስይንታም ቡዑጼኬ፤ ዋንሴሬ ኬዔም ሽእሼ፥ ቤድሚ ቡዑድ እዝንትናም ኤንሥዳቔድ ታዓሬ ዋንስዳ ሽእርካን ሃዓዴኬ፤ ዳይንኬሬ ሳዓብዳ ማዓትኬኬ ዳቔልስይንታሜሬ ቡዑጽኬኬ።

![](https://cdn.door43.org/obs/jpg/360px/obs-en-24-04.jpg?direct&)

ዋንስ ቡዑድ እዝንትናም ኤንሥዴድንቴን ኮይን ጋይሴ፤ «ዬታ ኤዔድ ዴይስድንዳ ጉንኖ! ኔጋኔ ጋይንትን ቴዬቶ ዬ ዎዖንዳኬታም ኦዖክኬቴ፤ ላቕምንዳ ኣዓፒ ኡዑሻይንዳ ሃዓቓ ሙዳም ፓክትዮ ኖዖግር ኮዖም ዣቔርዴ፤» ዋንስ ጋዓቶ «ጎዖግሃንታም ኡስዳብ ጋዓና እስታም ኬዔዝዳብናም ብሬዜሃንት ኦይድቴ» ጋይንትክ ኬ ኬዔዝዳቓኬታም ቦዖሥሴ።

![](https://cdn.door43.org/obs/jpg/360px/obs-en-24-05.jpg?direct&)

ኣይሁድ ኤዔድን ባግና ሳዓቢ ዪም ሳይሳቓብን ማዓትንትንክታም ጎይሴኬ፤ ዋንስ ዳይንክ ኮይን ጋይሴ፤ «እታ ሳዓቢ ዪም ሳይሳቓብን ዳክቴ ዳይንኬሬ እስት ቡዑር ሃዓዳብ ኤዔድ ዶዖቔ፤ ቖጴንክቴት ዻዓክናም ቡልንቲ ኢን ማዓታያብ ጋእሻ ዴዔጽምባቤ።»

![](https://cdn.door43.org/obs/jpg/360px/obs-en-24-06.jpg?direct&)

ቓስትምሲ ሴጽንክ ዬሱስ ዋንስዳ ሽእርካን ሃዓዴ፤ ዋንሴሬ ኪም ይ ሼጃኬንክ «ሼትኬቴ! ዬዔኔቶ ፔጬዜናሜድንት ዳቔልስናም ኔክሽዳብን ሳዓብት ቖልስኔ» ጋይሴ።

![](https://cdn.door43.org/obs/jpg/360px/obs-en-24-07.jpg?direct&)

ዋንስ ዬሱሴን «እታ ሃዓም ሽእሽንትካን ኢን ማዓዳብ ዳክቴ፤ ኮዖ ኦዖላይሲ ሃዓና ኢም ሽእሽንቲ ሃዓን ማዓዶንምሺ» ኪን ጋይሴ፤ ዬሱስ ዳይንክ «ዬይንት ማዓዳክ ሬይና ኡዝሜንዳ ኮ ማዓሥንካን ሃዓና ኢም ሽእሽንቲ ሃዓን ማዓዴ» ጋይሴ፤ ካንካን ዬሱስ ሃስን ዳቔልስንት ዳክባብ ክ ማዓድንኬሬ ዋንስ ኪም ሽእሼ።

![](https://cdn.door43.org/obs/jpg/360px/obs-en-24-08.jpg?direct&)

ዬሱስ ይ ሽኤርሻኬት ቡዑር ኖቔንግራንክ ክ ዉታቕስምሽ ሳዓብት ማንፔስ ዎሎሌት ካምስክ ሃዓፕርንትክ ዬሱስት ዜን ሃቾ ዶዖቕሴ፤ ኮዖ ሴጽንክ ሳዓብት ኡፕሲ ርኬግራንክ «ሃዓም እ ናሽዳብን ይንሥስእስት ሃዓናዬ ሃንክ ጋእሻ ጉሜርድቴ» ጋይሶ ኬዔዜ።

![](https://cdn.door43.org/obs/jpg/360px/obs-en-24-09.jpg?direct&)

ሳዓቢ ዋንሴን «ማንፔስ ጪሊ ሃችንትክ ሃ ሽእሽዳብ ኤዔሥንት ዜን ሃዉሽዴ፤ ኤዔሥኔሬ ሳዓብት ይንሥዬ» ጋይሶ ኪን ኬዔስታ ሃዓቔ፤ ሳዓቢ ዎላቕባብ ዬሌክ ዶዖቕዴ፤ ዳይንኬሬ ዋንስ ዬሱሳም ክ ሽእሽዳኬንክ ሳዓቢ ባዓቤን ኬዔዝድክ ኤሴርሴ፤ ሳዓቢ ይንሥስናሜሬ ሼጄ፤ ኖዖሬ ዬሱሴ፤ ኮይኔሬ ማንፔስ ጪልናሜሬ ሼጄ።

*ማጻዓፕ ጪልንት ኣቴና ማቶስ3፤ ማር1፥9-11፤ ሉቓስ3፥1-23*

## 25. ሴጣን ዬሱሳም ጴጽምሽ

https://openbiblestories.org/l/aiw/story-25/

![](https://cdn.door43.org/obs/jpg/360px/obs-en-25-01.jpg?direct&)

ዬሱስ ክ ሽኤርሻኬት ቡዑር ሳዓና ማንፔስ ጪሊ ኪም ፔጫ ዎቼንግር ኤንሤ፤ ኮዖግሬሬ ኦይዲ ታም ሮዖርኬ ኦይዲ ታም ሶይትክ እሥክስ ዶዖቕሴ፤ ኮዖዛንኬሬ ሴጣን ዬሱስዳ ሃዓድዮ ዳቔልሲ ክ ዎዖንቴምሽ ዬሱሳም ጴጼ።

![](https://cdn.door43.org/obs/jpg/360px/obs-en-25-02.jpg?direct&)

«ሳዓብት ይንሢ ሃ ማዓሥንክ እሥካን ሃዓን ማዓቴምሽ ኬዔና ሴይንናም ባልሺ ማዓስሳዮ ኦዖካ» ጋይንትክ ሴጣን ዬሱሳም ጴጼ።

![](https://cdn.door43.org/obs/jpg/360px/obs-en-25-03.jpg?direct&)

ዬሱሴሬ «ኤዔድ ባልሺ እሦ ዬሌክ ኣዓፔክ ዶዖቓዬ፤ ዳይንኬሬ ሳዓቢ ኬዔዝዳክ ኡፕስን ካንኮንምሺ ጋይስዮ ክልኬርቴ!» ጋይሴ።

![](https://cdn.door43.org/obs/jpg/360px/obs-en-25-04.jpg?direct&)

ኮዖዛንክ ሴጣን ዬሱሳም ጪሊ ኤዬንት ዱዑርዜን ኤፕሴትዳቦ «ሳዓብት ይንሥ ሃ ማዓሥንክ ማታሃንታም ሾሽ ጹላ ዣቕካ ሃራካኔ ጋዓርስንክ <ሴይኒ ዱዑታንታም ግኣይምሽ ሃዓም ኬ ክልሽቴምሽ ሳዓቢ ርኬግራንክ ዎዖንይንትካን ይ ኦይዴድኔን ኬኬዔዝዴ» ኪን ጋይሴ።

![](https://cdn.door43.org/obs/jpg/360px/obs-en-25-05.jpg?direct&)

ዳይንኬሬ ዬሱስ ሳዓብት ኡፕስግራንክ ኬዔዝንትክ ሴጣናም ማዓስሴ፤ «ሳዓብት ኡፕስግር <ባዓባ ሳዓብስሃንታም ሃይ ጴጽካ> ጋይሶ ኤዔድኔን ኬዔዝዴ» ጋይሴ።

![](https://cdn.door43.org/obs/jpg/360px/obs-en-25-06.jpg?direct&)

ኮዖዛንክ ሴጣን ፔጬንት ባዓብናምኬ ቦንችምንኬታምክ ሙዳ ኪን ይ ዻዉስንክ «ጉምፔርሳዮ ኢም ሃ ምክስድንክ ኮዖም ሙዳ ሃዓን እምምድቴ» ኪን ጋይሴ።

![](https://cdn.door43.org/obs/jpg/360px/obs-en-25-07.jpg?direct&)

ዬሱስ «ካይካ ሃዓና ሴጣኖ! ሳዓብት ኡፕስክ ኤዔድኔን <ባዓቤስሃንት ሳዓብካን ዬሌክ ጉምፔርካ ኪም ዬሌክ ምክስካ> ጋይሶ ኬዔዜርቴ» ኪን ጋይሴ።

![](https://cdn.door43.org/obs/jpg/360px/obs-en-25-08.jpg?direct&)

ዬሱስ ሴጣንት ጴጽንክ ሺችራቕዬ፤ ካንካን ሴጣን ሴጼካን ኪም ጋርሼ፤ ኮዖት ቡዑር ሳዓቢ ርኬግራንክ ዎዖንይንትካን ክ ኦይዴድን ሃዓድዮ ኪን ፕክሼኬ

*ማጻዓፕ ጪልንት ኣቴና ማቶስ 4፥1-11፤ ማር. 1፥12—13፤ ሉቓ4፥1-13*

## 26. ዬሱስ ፕክሼይንታም ክ ዬዝምሽ

https://openbiblestories.org/l/aiw/story-26/

![](https://cdn.door43.org/obs/jpg/360px/obs-en-26-01.jpg?direct&)

ዬሱስ ሴጣንት ጴጽምናም ክ ሺችሻኬት ቡዑር ማንፔስ ጪልንት ዛምክ ይ ዶዖቕዳቓክ ጌልላ ፔጭንግር ማዓቴ፤ ዬሱስ ራቕ ራቕግር ኡንጋሮ ኤስ ኤስስዳቔ፤ ኤዔድ ሙዳ ክት ላቕሚ ማዓትንትንጎክ ኬዔዝዳቔኬ።

![](https://cdn.door43.org/obs/jpg/360px/obs-en-26-02.jpg?direct&)

ዬሱስ ይንሤርምይንቴክ ይ ዶዖቕዳቓክ ናዝሬት ካትሜንግር ማዓቴ፤ ሃዉሽ ሴጽንክ ምክስ ኤይንግር ካዬ፤ ክ ጎስቴምሽ ማዓትካን ዬይዳኬታም ኬዔዝዳብን እሳስት ቑርታ ክልክሜናም ኪን እምሴኬ፤ ዬሱስ ቑርታ ክልክሜናም ፕእስት ባግኮታም ኤዔድኔን ጎስሤ።

![](https://cdn.door43.org/obs/jpg/360px/obs-en-26-03.jpg?direct&)

ዬሱሴሬ «ቓምእንካን ዻቕሺ ኡፕስናም፥ ዎእሽትዮ ዪም ቴይራቔድኔን ባዛ ካይሳ ዉትንታም፥ ኣዓፕንት ሼዳዬድኔን ኣዓፕንኬት ሼድቴምሽ፥ ዻኬርታ ኤዔድኔን ቡልምንትናም እ ሳንቴምሽ ሳዓቢ ማንፔስይንታም ኢን እምቴ፤ ኮና ዪም ናሼርዳክ ባዓቤት ቦንኔ» ጋይሶ ጎስትሤ።

![](https://cdn.door43.org/obs/jpg/360px/obs-en-26-04.jpg?direct&)

ኮዖዛንኬሬ ዬሱስ ዶዖቕሴ፤ ሙዴኔሬ ኡሣ ክራ ሼጄኮ ታ ክ ጎስትሣዓክ ሳዓብት ኡፕስና ሳዓቢ ዪም ሳይሳቓብንጎክ ኬዔዝዴ፤ ዬሱስ ኮዖ እ ጎስትሣቓክ ኡፕስና ታ ቦዖድምሴ» ጋይሴ፤ ኤዔድና ሙዳ ሪርቴኬ «ኮና ዬሶፕት እንስ ዳኮ?» ጋይሴኬ።

![](https://cdn.door43.org/obs/jpg/360px/obs-en-26-05.jpg?direct&)

ኮዖዛንክ ዬሱስ «ማዓትካን ዬይዳኬታም ኬዔዝዳብ ይንት ፔጬግር ክ ቦንችማያክ ዶዖፔኔ፤ ማዓትካን ዬይዳኬታም ኬዔዝዳብን ኤላስ ቦንንክ እስራኤል ፔጭንግር ቤድሚ ማዓና ቡና ሃዓቔኬ፤ ዳይንኬሬ ቦን ማኬንኬ ባግክ ዶዖቢ ቓንክስ ጋርሻኬንክ ሳዓቢ ኤላሳም ፔጫ ኣብግሮንምሺ እስራኤልግር ዶዖቕዳክ ማዓና ቡኔንዳ ኪም ኬ ኬልሽቴምሽ ኦይታቕዬ።

![](https://cdn.door43.org/obs/jpg/360px/obs-en-26-06.jpg?direct&)

ዬሱስ ይ ኬዔዝዳኬታም ማቕሽክሶ «ማዓትካን ዬይዳኬታም ኬዔዝዳብን ኤልሳእ ቦንንኬሬ እስራኤል ፔጭግር እሣ ሃዥም ዪም ዬዛቔድ ቤድሚ ኤዔድን ሃዓቔኬ፤ ዳይንኬሬ ኤልሳእ ዎላቓባባሜሬ ሃልሽሻቕዬ፤ እስራኤል ኤዔድናም ይዥዴድንት ዳዓሚ ዶብዴድናም ኤንሥዳብን ንእማንት እሣ ሃዥምናም ዬሌክ ሃልሽሻቔ፤ ዬሱስዳ ኤስርዜን ሃዓቔድን ኤዔድና ኣይሁድ ኤዔድ ሃዓቔኬ፤ ካንካን ኮዖም ክ ኬዔዝድክ ኬ ኤሴርሳኬንክ ክዜን ምዼርሴኬ።

![](https://cdn.door43.org/obs/jpg/360px/obs-en-26-07.jpg?direct&)

ናዝሬትግራሜድ ኤዔድና ዬሱሳም ምክስ ራቕዛንክ ጎችቴኮ ኪም ዣቕሽዮ ዴይስካን ባሌት ማቴዜን ዣእሼኬ፤ ዳይንኬሬ ዬሱስ ኤዔድንት ሞልትግርክ ሙክሶ ናዝሬት ካትሜንግር ካዬ።

![](https://cdn.door43.org/obs/jpg/360px/obs-en-26-08.jpg?direct&)

ኮዖዛንኬሬ ዬሱስ ጋልላ ፔጭንግር ኡንጋሮ ቤድሚ ኤዔድኔሬ ክራ ሃዓዴኬ፤ ሼድንቲ፥ ሙክክንቲ፥ ኤስርንቲ፥ ኬዔዝንቲ ዪን ማዓታዬድ ኤዔድናም ኣልክምሴሬ ቤድሚ ሃዤርታ ኤዔድናምኬ ዜኔይንት ዎብዛቔድናምክ ክራ ታዓዴኬ።

![](https://cdn.door43.org/obs/jpg/360px/obs-en-26-09.jpg?direct&)

ዥኒ ዪም ዬዛቔድ ኤዔድናም ክራ ታዓዴኬ፤ ዬሱስት ኬዔዜክ ዥንና ኤዔድንዛንክ ዉታቕሴኬ ቤድሚ ካርክ «ሃዓና ሳዓብት ይንሥስናዬ!» ጋይሶ ኡዑግምሴኬ፤ ኤዔድና ሪርቴኮ ሳዓባም ጎዖፕሼኬ።

![](https://cdn.door43.org/obs/jpg/360px/obs-en-26-10.jpg?direct&)

ኮዖዛንኬሬ ዬሱስ ክት ራቕክ ሙክዴድን ኬዔም ጋዓርዴድ ታሜኬ ቓስቴን ኤዔድናም እድዜ።

*ማጻዓፕ ጪልንት ኣቴና ማቶስ 4፥12-25፤ ማር 1፥14-፤5፤35-39፤ 3፥13-21፤ ሉቓስ 4፥14-30፤ 38-44*

## 27.ላቕማይሳብ ሳምራ ኤዔሥንት ኣቴና

https://openbiblestories.org/l/aiw/story-27/

![](https://cdn.door43.org/obs/jpg/360px/obs-en-27-01.jpg?direct&)

ሴጻ ዎላቕ ኣይሁድ ኤዔድንት ካርቴናም ኤስዳብ ዎላቕባብ ዬሱሳም ጴጽንትካን ክራ ሃዓዴ፤ «ዬ ኤስስዳብስኖ ሌፒ ሴጽት ኡክኔናም ሃዓፕንትካን ሃሪ ዎዖንስቴ?» ኪን ጋይሴ፤ ዬሱሴሬ «ሳዓብት ካርቴንግር ሃሮክ ክልኬርሳቔ?» ጋይሶ ኪን ማዓስሴ።

![](https://cdn.door43.org/obs/jpg/360px/obs-en-27-02.jpg?direct&)

ኤዔሥኔሬ ሳዓብት ካርቴና «ባዓባ ሳዓብስሃንታም ዶዖፔናማ ቡዑዴግራንታንክ፥ ዶዖፔናማ ኡክንሳግራንታንክ፥ ጋእሻ ዛምሃንቴክ፥ ዶዖፔናማ ጶቕሽሃንቴኬሬ ኪም ናሽካ፤ ሃ ቤዔልሥስናሜሬ ሃማትምሽ ኪም ናሽካ» ጋዓዴ ኪን ጋይሴ፤ ዬሱሴሬ «ዶዖፔኔ ሃዓኔሬ ኮይን ዬይካ ኣዓፔኬሬ ዶዖቕዳዬ» ኪን ጋይሴ።

![](https://cdn.door43.org/obs/jpg/360px/obs-en-27-03.jpg?direct&)

ዳይንኬሬ ካርቴን ኤስስዳብን ጪልባብ ማዓትንይንታም ዶዖፕስስካን ዝግዜ፤ ካንካን «እቤዔልሥስን ሃይዬ?» ጋይሶ ጎይሴ።

![](https://cdn.door43.org/obs/jpg/360px/obs-en-27-04.jpg?direct&)

ዬሱሴሬ ኣታም ኬዔዝንትክ ኤዔሥንቴን ማዓስሴ፤ «ዬሩሳሌግራንክ ያርኮግር ሙክዳቓብ ዎላቕ ኣይሁድ ኤዔድ ሃዓቔ።

![](https://cdn.door43.org/obs/jpg/360px/obs-en-27-05.jpg?direct&)

ዬሱሴሬ ኣታም ኬዔዝንትክ ኤዔሥንቴን ማዓስሴ፤ «ዬሩሳሌግራንክ ያርኮግር ሙክዳቓብ ዎላቕ ኣይሁድ ኤዔድ ሃዓቔ።

![](https://cdn.door43.org/obs/jpg/360px/obs-en-27-06.jpg?direct&)

ኮዖት ቡዑር ሳዓና ኣይሁድ ኤዔድንግራንክ ዎላቕባብ ኤዔድናም ሳዓቢ ኪክን ቔዔሽምሽዳብ ጎዖግንክ ካይዳቔ፤ ኮዖና ኤዔሥን ቡዑድ እዝንትናም ኤንሥዳብስን ዜንክታንክ ቡርስዮ ዪም ጋሬርሻቓብ ኤዔሥናም ይ ሼጃኬንክ ጎዖግንት ፔጎክ ዳቕቶ ካዬ፣ ኬልሽንቲ ዪም ዝክስዳብ ኤዔሥናም ጋርሾ ጎዖግይንት ካዬ።

![](https://cdn.door43.org/obs/jpg/360px/obs-en-27-07.jpg?direct&)

ኮዖት ቡዑር ቤድሚ ካፕክዳይክ ሌዊ ኤዔድ ዎላቕባብ ሃዓዴ፤ (ሌዊ ኤዔድና ጪሊ ኤዬንግር ኤዔድናም ሳዓቢ ኪክን ቔዔሽምሽዴድናም ኬልሽዴድ ኣይሁድንት ማታ ሱስን ሃዓቔኬ፤) ሌዊ ኤዔሥኔሬ ታዓሬ ጎዖግንት ፔጎክ ዳቕቲ ኤቦ ዪም ቡርስዮ ግኤርሳቓብ ኤዔሥንካን ጶቕሽክስ ጋርሽዮ ካዬ።

![](https://cdn.door43.org/obs/jpg/360px/obs-en-27-08.jpg?direct&)

ጎዖግን ኮዖክ ካይዳቓብ ሳምራ ኤዔድ ሃዓቔ፤ (ሳምራ ኤዔድና ፔጫ ኣብዛሜድናም ቴያቔድ ኣይሁድ ኤዔድንት ካዓሤኬ፤ ሳምራ ኤዔድንኬ ኣይሁድ ኤዔድንክ ኪካም ይዝንዴድ ሃዓቔኬ፤) ዳይንኬሬ ሳምራ ኤዔሥን ግኤርቴባብ ኣይሁድ ኤዔሥናም ይ ሼጃኬንክ ክካን ጋእሻ ኣቴርሴ፤ ካንካን ኪም ስብትዮ ዻዓስንትክ ዲድንክታም ዻክሴ።

![](https://cdn.door43.org/obs/jpg/360px/obs-en-27-09.jpg?direct&)

ኮዖት ቡዑር ሳምራ ኤዔሥና ኤዔሥናም ዻዓስትዮ ይንት ሃሬዜን ኪም ዶዖቕስቶ ሾዖቺ ጌሥዳኬትግር ቴዮ ኪም ራዓሥንትክ ጶይሴ።

![](https://cdn.door43.org/obs/jpg/360px/obs-en-27-10.jpg?direct&)

ሼናክንኮቴክ ሳምራ ኤዔሥን ጎዖግይንት ካይንቲ ኪም ዝክሴ፤ ሾዖችን ጌሥዳኬት ኤዬንባብኔን ቶክሚ ሶሊ ኪን እምሴዳቦ «ኪም ጶይካ ኮዛንክ ኣብ ሶሊ ሃ ዉሥድንዳ ማዓሥንክ እ ማዓዳኬንክ ሃዓን ካካሽድቴ» ኪን ጋይሴ።

![](https://cdn.door43.org/obs/jpg/360px/obs-en-27-11.jpg?direct&)

ኮዖት ቡዑር ዬሱስ ካርቴን ኤስስዳብኔን «ሃሮክ ሃዓን ጶቕዴ? ቡርስዮ ዪም ግኤርሳቓብን ኤዔሥንካን ቤዔልሥስክት ኤዔድን ማኬንንግራንክ ሃምንባብ ሃዓቔ?» ጋይሶ ኪም ጋይሴ፤ ኖዖሬ ክካን ኣቴርሳቓብኔ» ጋይሶ ኪን ማዓስሴ፤ ዬሱስ «ሃዓኔሬ ካያዮ ኮይን ዬይካ» ኪን ጋይሴ።

*ማጻዓፕ ጪልንት ኣቴና ሉቓስ 10፥ 25-37*

## 28.  ዎድምቴባብ ሼኬንስን

https://openbiblestories.org/l/aiw/story-28/

![](https://cdn.door43.org/obs/jpg/360px/obs-en-28-01.jpg?direct&)

ሴጻ ዎላቕ ዎድምቴባብ ሼኬን ዎላቕባብ ዬሱስዳ ሃዓዶ «ላቕማይሳብ ኤስስብኖ ሌፒ ሴጽት ኡክናም እ ሃዓፕቴምሽ ሃሪ ዬእቴ፤ ጋይሶ ኪም ጎይሴ፤ ዬሱሴሬ «ሃራካና ላቕማይሳብ ኢም ሃ ጋዓዴ? ላቕማይሳብን ዎላቕ ዬሌክ ዶዖቕዴ፤ ዳይንኬሬ ሃዓና ሌፒ ሴጽት ኡክና ሃንት ዶዖቕቴምሽ ሃ ዝግዝንክ ሳዓብት ካርቴንካን ኤዔእካ» ኪን ጋይሴ።

![](https://cdn.door43.org/obs/jpg/360px/obs-en-28-02.jpg?direct&)

«ካርታ ሃምንካኒ ኤዔእቴ» ጋይሶ ኪም ጎይሴ፤ ዬሱሴሬ ኮይን ጋይሶ ኪን ማዓስሴ፤ «ሃይ ዴይስካ፥ ሃይ ቤዔልምካ፥ ሃይ ዲብካ፥ ሃይ ታውካ፥ ሃባባምኬ ሃንዴታምክ ቦንችካ፥ ሃ ቤዔልሥስናሜሬ ሃንት ማቴምሽ ናሽካ።»

![](https://cdn.door43.org/obs/jpg/360px/obs-en-28-03.jpg?direct&)

ዳይንኬሬ ሼኬንስን «ይንሥርምዜእስታንክ ዬዝቶ ኬዔና ካርቴናም ሙዳ ቦዖሥትቴ፤ ሌፒ ሴጽ ዶዖቕንትካን ኣቤስ ሃራ ዬእንቶክ ኢም ዝክስዴ?» ጋይሴ፤ ዬሱሴሬ ኪም ሼጄትዳቦ ኪም ናሼ።

![](https://cdn.door43.org/obs/jpg/360px/obs-en-28-04.jpg?direct&)

ዬሱስ «ዶዖፔናምባብ ማዓትንትካን ሃ ዝግዝንክ ሃንት ዶዖቕዳክ ሬይ ሙዳም ሼንሻዮ ሶሊናም ቓምእንካን እምካ፤ ርኬግሬሬ ባዛሃንታም ሃዓፕዳዬ፤ ኮዖት ቡዑር እራ ሃዓዳዮ ራቕእስቴክ ሙካ» ኪን ጋይሶ ማዓስሴ።

![](https://cdn.door43.org/obs/jpg/360px/obs-en-28-05.jpg?direct&)

ሼኬንስን ዬሱስ ዪን ኬዔዛኬታም ይ ኤሴርታኬንክ ጋእሻ ዎድምቴባብ ይ ሃዓቕንካን ይንት ዶዖቕዳክ ሙዳም እምንቲ ይ ዝክንካን ጋእሻ ኣቴርሴ፤ ኣዓፕይንታም ዬሱስዛንክ ማዓስትዮ ሽርቶ ካዬ።

![](https://cdn.door43.org/obs/jpg/360px/obs-en-28-06.jpg?direct&)

ኮዖ ሴጽንክ ዬሱስ ይንት ራቕክ ሙክዴድኔን ኮይን ጋይሴ፤ «ዎድምቴድን ሳዓብት ባዓምንግር ኣርድንቲ ጋእሻ ካሌርስድንዴ! ዶዖፔኔ ዎድምቴድን ሳዓብት ባዓምንግር ኬ ኣርዳክ ኔግክ ግሜል እኬት ጹዑቕክ ዉትንቲ ኮዖን ሻሻዓዥዴ

![](https://cdn.door43.org/obs/jpg/360px/obs-en-28-07.jpg?direct&)

ክት ራቕክ ሙክዴድና ዬሱስ ኬዔዛኬታም ይ ኤሴርታኬንክ ሪርቴኮ «ታ ኮዖክ ሃይዬ ዻቕዳብን?» ኪን ጋይሴኬ።

![](https://cdn.door43.org/obs/jpg/360px/obs-en-28-08.jpg?direct&)

ዬሱስ ይንት ራቕንክ ሙክዴድንዳ ሼጄትዳቦ «ኮዖና ኤዔዳ ማዓታዬ ሳዓብዳ ዳይንክ ሙዳ ማማዓዴ» ጋይሴ።

![](https://cdn.door43.org/obs/jpg/360px/obs-en-28-09.jpg?direct&)

ጴጥሮስ ዬሱሴን «ዎታ ሬይ ሙዴናም ጋርሾቶ ሃንት ራቕክ ሙክዶቴ፤ ባዛዎንት ሃራ ዳይኬ?» ኪን ጋይሴ።

![](https://cdn.door43.org/obs/jpg/360px/obs-en-28-10.jpg?direct&)

ዬሱስ ኮይን ጋይሶ ኪን ማዓስሴ፤ «እ ጎዖካን ኤያይንታም፥ እንዴፕስኬሳም፥ እናንኬሳም፥ ባዓቤናም፥ እንዴናም፥ ዋይ ይንት ዶዖቕክ ቖልቴናም ጋርሻቓብ ሙዳ ማቶ ካርክ ቴቴይዴ ሌፒ ሴጽት ኡክናም ዻዻዓልዴ፤ ዳይንኬሬ ብሬዜናሜድን ቤድምና ቡዑር፥ ቡዑራሜድ ቤድምና ብሬዜናሜድ ማዓዴኬ።»

*ማጻዓፕ ጪልንት ኣቴና ማቶስ19፥16-30፤ ማር 10፥17-31፤ ሉቓስ18፥ 18-30*

## 29. ኔጋኔ ዪን ጋዓራቓብ ፕክሽዳብንት ኣቴና

https://openbiblestories.org/l/aiw/story-29/

![](https://cdn.door43.org/obs/jpg/360px/obs-en-29-01.jpg?direct&)

ሴጻ ዎላቕ ጴጥሮስ ዬሱሴን «ዬ ኤስስዳብስኖ እንዴፕስ ኢም ክ ባሥስንክ ሜዔም ካርኪ ኔጋኔ ኪን ጋይስቴ? ታብዛ ካርኮ?» ጋይሶ ጎይሴ፤ ዬሱስ «ታብዛ ካርክ ዳክዬ ታብዜናም ካሪ ታብዜክ ሃ ቤሥስንኮንምሺ» ኪን ጋይሴ፤ ዬሱስ ኮዖም ክ ጋዓድንክ ሙዳ ሴጽካን ኔጋኔ ጋይንቲ ዎዖም ዝክስዴ ጋይንትክቴ፤ ኮዖዛንኬሬ ዬሱስ ኣቴን ኮዖም ኬዔዜ።

![](https://cdn.door43.org/obs/jpg/360px/obs-en-29-02.jpg?direct&)

ዬሱስ ኮይን ጋይሴ፤ «ሳዓብት ባዓምና ይንት ፕክሽዴድናም ጎይስካን ዝግዛቓብ ባዓብስናም ካምዴ፤ ክት ፕክሽዴድንግራንክ ዎላቕባብን ታማ ሺ ሜክልት ጋዓርዳኬይንቴት ባዛ ዜንክት ሃዓቔ።

![](https://cdn.door43.org/obs/jpg/360px/obs-en-29-03.jpg?direct&)

ፕክሽዳብስን ባዜናም ካሽንቲ ኪን ማዓትክንካን ባዓብስን «ባዜናም ክ ካሽቴምሽ ኤዔሥን ኮባባምኬ ኤዔር ኤዔድንክታምክ ኬዔም ሼንኬቴ» ኪን ጋይሴ።

![](https://cdn.door43.org/obs/jpg/360px/obs-en-29-04.jpg?direct&)

ክት ፕክሽዳብስን ባዓብስንት ብሬዜን ጉምፔርሴትዳቦ «ዋዓዴ ኢን እዝካዮ፤ እዜን ዶዖቕዳክ ባዜን ሙዳ ሃዓን ካካሼድቴ» ኪን ጋይሴ፤ ባዓብስን ይንት ፕክሽዳብንካን ኣቴርሴ ባዜናሜሬ ሙዳ ኔጋኔ ጋይንትክ ክ ካይቴምሽ ኪም ጋርሼ።

![](https://cdn.door43.org/obs/jpg/360px/obs-en-29-05.jpg?direct&)

ዳይንኬሬ ፕክሽዳብስን ባዓብስንዳንክ ይ ዉታቕስምሽ ኣርፒ ኦይድት ባዜክት ካሻቕባብ ቤዔልሥስኬስ ፕክዴድንግራንክ ዎላቕባባም ሃዓፕቴ፤ ፕክሽዳብን ክት ቤዔልሥስ ማዓሣቓብናም ዬቶ <ባዜናም ኢን ካሽካ!»> ኪን ጋይሴ።

![](https://cdn.door43.org/obs/jpg/360px/obs-en-29-06.jpg?direct&)

«ቤዔልሥስ ፕክሽዳብን ቦቕንቴክ ጉምፔርሶ <ዋዓዴ ኢን እዝካዮ እዜን ዶዖቕዳክ ባዜን ሃዓን ካካሽድቴ> ኪን ጋይሴ፤ ዳይንኬሬ ኖዖ ኮዖ ኦዖላይስ ፕክሽዳብስን ቤዔልሥስን ባዜይንት ዪን ክ ካሽቴንክ ዬካ ዻክሪ ኤይግር ኪም ዻክስሴ።»

![](https://cdn.door43.org/obs/jpg/360px/obs-en-29-07.jpg?direct&)

«ኣቤድ ፕክሽዴድን ማዓሣቓክ ሬይናም ሼጄኮ ጋእሻ ኣቴርሴኬ፤ ባዓብስንዴሬ ካዬኮ ማዓሣቓክ ሬይናም ሙዳ ኪን ኬዔዜኬ።

![](https://cdn.door43.org/obs/jpg/360px/obs-en-29-08.jpg?direct&)

«ባዓብስን ፕክሽዳብናም ኤዔልሶ <ሃዓና ዳቕልባብ ፕክሽዳብኖ! ሃ ኢም ምክስንካን ባዛሃንታም ሃዓን ጋርሽቴ፤ ሃዓኔሬ ኮይን ዬይንቲ ሃዓም ዝክስዳቔ> ኪን ጋይሴ፤ ባዓብስን ጋእሻ ጋዓምሴትዳቦ ባዜናም ሙዳ ካሽትዮ ክ ማቕሽቴንክ ዬካ ዳቕላይሳብ ፕክሽዳብስናም ዻክሪ ኤይግር ኪም ዻክስሴ።

![](https://cdn.door43.org/obs/jpg/360px/obs-en-29-09.jpg?direct&)

ኮዖዛንክ ዬሱስ ኮይን ጋይሴ፤ «ዬግራንክ ኤዔድ ሙዳ እንዴፕሴን ኔጋኔ ክ ጋዓክንክ

ኮይኔሬ ርኬግራንባብ እባብ ኮይን ዬዜን ዬይዴ።»

*ማጻዓፕ ጪልንት ኣቴና ማቶስ 18፥21-35*

## 30. ዬሱስ ዶንቕ ሺ ኤዔድናም ክ እሥስምሽ

https://openbiblestories.org/l/aiw/story-30/

![](https://cdn.door43.org/obs/jpg/360px/obs-en-30-01.jpg?direct&)

ዬሱስ ጋላ ጋሌድ ቤድሚ ሞዖሬንግር ኬ ሳንቴምሽኬ ኤዔድናም ኬ ኤስስቴምሽክ ኦይቴርቴድይንታም ኦይሤ፤ ኬታ ዬሱስ ሃዓቓክ ካርንግር ይ ማዓታኬንክ ይ ዬእሳቓክ ሬይን ሙዳም ኪን ኬዔዜኬ፤ ኮዖት ቡዑር ዬሱስ ኖቓ ጼዔርናም ቓዓልቴኮ ሬይ ይኔ ጋዓይንዳ ካርግር ካዬኮ ቶክሚ ኬ ሃዉሽቴምሽ ኬዔን ኬዔዜ፤ ካንካን ቓዓሌርዳክ ጎንጌንግር ኣርዜኮ ኖቓ ጼዔርናም ቓዓልቴኬ።

![](https://cdn.door43.org/obs/jpg/360px/obs-en-30-02.jpg?direct&)

ዳይንኬሬ ጎንጌንክ ኬ ቓዓልድክ ዬሱሳምኬ ክት ራቕንክ ሙክዴድናምክ ኬዔም ሼጃቔድ ቤድሚ ኤዔድ ሃዓቔኬ፤ ኬዔና ኤዔድና ኬዔን ብርካን ጼዔርንት ሼዔጌክ ዞዖዜኬ፤ ካንካን ዬሱስኬ ክት ራቕንክ ሙክዴድንክ ሴ ፓዓማ ኬ ዣእሻኬንክ ጋእሻ ቤድሚ ኤዔድ ብርትዮ ሴ ዋዓር ዣእሼኮ ኬዔም ጶይዳቔኬ።

![](https://cdn.door43.org/obs/jpg/360px/obs-en-30-03.jpg?direct&)

ኤዔድና ማዓኔንኬ ይንሥንክ ፓይዴርክዳይክ ዶንቕ ሺ ኤዔድዛንክ ጋዓጺ ኣንግኔና ሃዓቔኬ፤ ዬሱስ ኤዔድንካን ጋእሻ ኣቴርሴ፤ ዬሱስካን ኬዔና ኤዔድን ግሽዳብንት ዳኬድ ቖልምሽ ሃዓቔኬ፤ ካንካን ኬዔም ኤስሴትዳቦ ሞልትግርኬት ሃዓቔድ ሃዤርቴድናም ሃልሽሼ።

![](https://cdn.door43.org/obs/jpg/360px/obs-en-30-04.jpg?direct&)

ኮዖ ሶይትንክ ክት ራቕንክ ሙክዴድና ኮይን ኪን ጋይሴኬ፤ «ፔጬና ሃክስቴ ኡሣ ካትማ ዳክዬ፤ ይ እሥድንዳ ሬይ ኬ ሼንቴምሽ ኤዔድናም ኦይትካዮ።

![](https://cdn.door43.org/obs/jpg/360px/obs-en-30-05.jpg?direct&)

ዬሱስ ዳይንክ ይንት ራቕክ ሙክዴድንቴን «ኬ እሥድንዴታም ዬታ ኬዔን እምኬቴ!» ኬዔን ጋይሴ፤ ኬቴሬ «ኮዖም ሃስኖ ዬይዴ? ዎራ ዶዖቕዳክ ባልሽ ኣክሻ ዶንቕኬ ቶይላ ኣሥታ ቓስቴን ዬሌኬ» ጋይሶ ማዓስሴኬ።

![](https://cdn.door43.org/obs/jpg/360px/obs-en-30-06.jpg?direct&)

ዶንቕ ታም ዶንቕ ታም ማዓሦ ዲዒሬዜን ኬ ዶዖቕቴምሽ ኤዔድኔን ኬ ኬዔስቴምሽ ዬሱስ ይንት ራቕክ ሙክዴድንቴን ኬዔዜ።

![](https://cdn.door43.org/obs/jpg/360px/obs-en-30-07.jpg?direct&)

ኮዖዛንኬሬ ዬሱስ ዶንቕ ባልሽናምኬ ቶይላ ቓስቴንናምክ ቴዮ ርኬግር ሼጄ፤ እሥምንካኔሬ ሳዓባም ጎዖፕሼ።

![](https://cdn.door43.org/obs/jpg/360px/obs-en-30-08.jpg?direct&)

ኮዖዛንኬሬ ዬሱስ ባልሽናምኬ ቶይሌናምክ ቱርሼ፤ ኤዔድንካኔሬ ኬ እምቴምሽ ይንት ራቕክ ሙክዴድንቴን እምሴ፤ ኬቴሬ ኤዔድንቴን እሥምናም እምንቲ ዬዜኬ፤ ዎላቔሴሬ ማቕክዬ! ኤዔድኔሬ ሙዳ እሦ ምሼኬ።

![](https://cdn.door43.org/obs/jpg/360px/obs-en-30-09.jpg?direct&)

ኮዖት ቡዑር ክት ራቕክ ሙክዴድና ድንግማ እሥምናም ሱጼኬ፤ ናዓሬ ታሜኬ ቓስቴን ላይጼት ጾዖጺ ሃዓቔ፤ እሥምን ሙዳ ሃዓፔርሳቓክ ዶንቕ ባልሽንኬ ቓስቴን ቶይሌንግራንክ ሃዓቔ።

*ማጻዓፕ ጪልንት ኣቴና ማቶስ14፥13-21፤ማር 6፥31-44፤ ሉቓስ9፥10-17፤ዋንስ6፥5-15*

## 31. ዬሱስ ኖቔዜን ሙክትዮ ክ ካይምሽ

https://openbiblestories.org/l/aiw/story-31/

![](https://cdn.door43.org/obs/jpg/360px/obs-en-31-01.jpg?direct&)

ኮዖዛንኬሬ ዬሱስ ኤዔድናም ኤዔር ክ ኦይድክ ኖቓ ጼዔርዛንክ ቓዓሌርዳክ ጎንጌግር ኣርዜኮ ኖቔንት ፓዓማ ኬ ቓዓልቴምሽ ይንት ራቕክ ሙክዴድኔን ኬዔዜ፤ ዬሱሴሬ ኤዔድናም ይ ኦይሣኬት ቡዑር ምክስካን ባሌዜን ኤቤ፤ ኮዖግር ዬሱስ ይንቲ ሃኪ ሃዓቔ ሶይቲ ካዓስቴንክ ዬካ ምክሴ።

![](https://cdn.door43.org/obs/jpg/360px/obs-en-31-02.jpg?direct&)

ኮዖ ጭርንክ ዬሱስት ራቕክ ሙክዴድና ኖቔንዜን ቓዓሌርዳክ ዚጌናም ሙክስካን ቤይዳቔኬ ሶይቲ ካዓስሜዜን ኬ ዣእሻቓክ ኖቔንት ዬኬን ማዓዳኬትዜን ዬሌክ ሃዓቔ፤ ዦጌሬ ዜንኬት ጋእሻ ዦግዳቕንካን ኬ ቤይዳክ ካልምክ ሃዓቔ።

![](https://cdn.door43.org/obs/jpg/360px/obs-en-31-03.jpg?direct&)

ኮዖ ጭርንክ ዬሱስ ምክስይንት ማቕሾ ይንት ራቕክ ሙክዴድንዳ ሃዓዴ፤ ኖቔንት ዜን ሙካሮ ኖቔን ቓዓሌርዳክ ጎንጌንዳ ሃዓዴ።

![](https://cdn.door43.org/obs/jpg/360px/obs-en-31-04.jpg?direct&)

ክት ራቕክ ሙክዴድና ዬሱሳም ይ ሼጃኬንክ ጋእሻ ጳሼኬ፤ ሃራካኔ ጋዓርስንክ ቡንካም ኬ ሼጅንዳ ኬዔን ካምስንካኔ፤ ዬሱስ ጳሽንትንኬታም ኤስቴ፤ ካንካን ዬሱስ ኬዔም ኤዔልሶ «ሃይ ጳሽኬቴ» እታ እስትዬ!» ኬዔን ጋይሴ።

![](https://cdn.door43.org/obs/jpg/360px/obs-en-31-05.jpg?direct&)

ኮዖ ጭርንክ ጴጥሮስ ዬሱሴን «ዬ ኤስስዳብኖ፥ ሃ ማዓሥንክ ኖቔት ዜን ሙክስቶ ሃራ እ ሃዓዳን ኬዔስካዮ!» ኪን ጋይሴ፤ ዬሱሴሬ ጴጥሮሴን «ሃዓድካ» ኪን ጋይሴ።

![](https://cdn.door43.org/obs/jpg/360px/obs-en-31-06.jpg?direct&)

ካንካን ጴጥሮስ ዚጌንግራንክ ዉታቕሴትዳቦ ኖቔንዜን ዬሱስዳ ሙክንቲ ዬዜ፤ ዳይንኬሬ ቶክሚ ይ ሙክሳኬት ቡዑር ኣዓፕይንታም ዬሱስዛንክ ማዓስቶ ጼዔርንት ሾይናም ሼጄ፤ ዛምንዳ ዦጌና ክራ ኤስምዳቔ።

![](https://cdn.door43.org/obs/jpg/360px/obs-en-31-07.jpg?direct&)

ኮዖ ጭርንክ ጴጥሮስ ጳሽንትክ ኖቔንግር ኣቕዝሚ ዬዜ፤ «ዬ ኤስስዳብኖ፥ ኢም ዻቕሽካዮ!» ጋይሶ ኡፕሲ ጫዓጭክ ኡዑግምሴ፤ ዬሱሴሬ ሳዓና ኣዓንይንታም ኦይሦ ኪም ዬቴ፤ ኮዖዛንኬሬ ጴጥሮሴን «ሃዓና ቡዑድ እዝንትሃንት ዦዖጌርሻቓብኖ ሃራካና እቼርሼ?» ኪን ጋይሴ።

![](https://cdn.door43.org/obs/jpg/360px/obs-en-31-08.jpg?direct&)

ጴጥሮስኬ ዬሱስክ ኖቔን ቓዓሌርዳክ ዚጌንግር ኬ ኣርዛኬንክ ዦጌና ዦግንትይንያም ሳዓና ጋርሽክ ሬይ ስያኤ ጋይሴ፤ ክት ራቕክ ሙክዴድኔሬ ሪርቴኬ፤ «ዶዖፔን ሃዓና ሳዓብት ይንሣዬ» ጋይትክ ዬሱሳም ጎዖፕሼኬ።

*ማጻዓፕ ጪልንት ኣቴና ማቶስ14፥22-23፤ ማር6፥45-52፤ ዋንስ6፥16-21*

## 32. ዬሱስ ዼብ ማንፔስክ ዬድምሳቓባምኬ ሃዤርቴንዳ ማዓምክ ክ ሃልሽሽምሽ

https://openbiblestories.org/l/aiw/story-32/

![](https://cdn.door43.org/obs/jpg/360px/obs-en-32-01.jpg?direct&)

ሴጻ ዎላቕ ዬሱስኬ ክት ራቕክ ሙክዴድንክ ኖቔዛንክ ቓዓሌርዳክ ዚጌንክ ኖቔዜን ቓዓላሮ ጌርጌስኖን ኤዔድን ዶዖቕዳኬትግር ካዬኬ።

![](https://cdn.door43.org/obs/jpg/360px/obs-en-32-02.jpg?direct&)

ኖቔንት ፓዓማ ኬ ዣእሻኬንክ ዼብ ማንፔስ ዪም ዬዛቓብ ኤዔድ ሃዝምክ ዬሱስዳ ሃዓዴ።

![](https://cdn.door43.org/obs/jpg/360px/obs-en-32-03.jpg?direct&)

ኤዔሥን ኮዖና ሃይዬሬ ዪም ዬዳያብ ጋእሻ ዛምባብ ሃዓቔ፤ ኤዔድና ኣዓንክታምኬ ዱዑትክታምክ ካዉሤክ ዻክስዮ ሃዓቔኬ፤ ዳይንኬሬ ካዉሤናም

![](https://cdn.door43.org/obs/jpg/360px/obs-en-32-04.jpg?direct&)

ኤዔሥን ኤዔድንት ዱዑክ ካርግር ዶዖቕዳብ ሃዓቔ፤ ኤዔሥን ኮዖና ሮዖርክ ሶይትክ ሙዳ ኡዑግምዳቔ፤ ኣብሌሬ ቖብራይባብ ሃዓቔ፤ ዜኔይንታም ካርክ ማዓሲ ማዓሶ ሴይንክ ቦዖጽዳቔ።

![](https://cdn.door43.org/obs/jpg/360px/obs-en-32-05.jpg?direct&)

ኤዔሥን ዬሱስዳ ይ ሃዓኬንክ ብሬዜንክት ቦንቕንቴክ ጉምፔርሶ ኪም ጎዖፕሼ፤ ዬሱስ ዼብ ማንፔስኔን «ኤዔሥን ኮባብዛንክ ዉትካ!» ኪን ጋይሴ።

![](https://cdn.door43.org/obs/jpg/360px/obs-en-32-06.jpg?direct&)

ዼብ ማንፔስን ዜይንት ዶዖቕዳብ ኤዔሥን ኡፕሲ ጫዓጭክ «ባዓቢ ሳዓብት ይንሥስን ዬሱሶ እራንክ ሃራ ዝግዴ? ዋዓዴ ሃይ ኢም ሴዔቕስካዮ» ጋይሶ ኡፕሲ ጫዓጭ ኡዑግምሴ፤ ኮዖዛን ዬሱስ ዼቢ ማንፔስንቴን «ናዓምሃንት ሃይዬ?» ጋይሶ ጎይሴ፤ ኖዖሬ «ቤድሚ ዎ ማዓሥንካን ናዓምእስት ሌጎኔ» ጋይሶ ማዓስሴ (ሌጎን ሮማ ፔጭንት ዳዓሚ ዶብዴድንት ቤድሚ ሺያም ዬድንዴ ጋይንትዬ።

![](https://cdn.door43.org/obs/jpg/360px/obs-en-32-07.jpg?direct&)

ማንፔስን «ዋዓዴ ኩዑራንክ ዎዖም ሃይ ፔግምስካዮ» ጋይሶ ኪም ምክሴኬ፤ ሼዔጌርጎክ ዶዖቕዳክ ባሌንዜን ጉድም ግሽማ ግሼርዴዳም ኦይቴርታ ሃዓቔ፤ ካንካን ዼብ ማንፔስና ዬሱሴን «ዋዓዴ ኮዛንክ ዎዖም ጉድምንዳ ኦይትካዮ!» ጋይስዮ ኪም ምክሴኬ፤ ዬሱሴሬ «ካይኬቴ!» ኬዔን ጋይሴ።

![](https://cdn.door43.org/obs/jpg/360px/obs-en-32-08.jpg?direct&)

ዼቢ ማንፔስና ኤዔሥንዛንክ ዉታቕሴኮ ጉድምንግር ኣርዜኬ፤ ጉድምኔሬ ባሌንዛንክ ጹላ ሃዝንትክ ኖቓ ጼዔርንግር ኣቕዝምሴኬ፤ ግሼርዴድ ጉድምና ቓስቴን ሺ ማዓዴድ ሃዓቔኬ።

![](https://cdn.door43.org/obs/jpg/360px/obs-en-32-09.jpg?direct&)

ጉድምናም ግሽዳቔድ ኤዔድና ሬይን ማዓሣኬታም ይ ሼጃኬንክ ካትሜንግር ሃዝምክ ካዬኮ ዬሱስ ዎዖንሳቓኬታም ይ ሃዓፕታቔድ ኤዔድን ሙዴካን ኬዔዜኬ፤ ካትሜንግራሜድ ኤዔድና ሃዓዴኮ ዼብ ማንፔስን ዜይንት ዶዖቕዳብ ኤዔሥናም ሼጄኬ፤ ኣብሌይንታም ቖቤርቶ ሃልሽሜባብ ኤዔድምሽ ማዓሦ ጫሜ ጋይሶ ዶዖቕታ ሃዓቔ።

![](https://cdn.door43.org/obs/jpg/360px/obs-en-32-10.jpg?direct&)

ኤዔድና ጋእሻ ጳሽታ ይ ሃዓቕንካን ዬሱስ ፔጬንግርኬታንክ ክ ካይቴምሽ ኪም ጎይሴኬ፤ ካንካን ዬሱስ ኖቔዛንክ ቓዓሌርዳክ ጎንጌንግር ኣርዝዮ ካይካን ኡስምሴ፤ ዼብ ማንፔስን ዜይንት ሃዓቓብ ኤዔሥን ዬሱስ ኪክን ካይንትካን ኪም ምክሴ።

![](https://cdn.door43.org/obs/jpg/360px/obs-en-32-11.jpg?direct&)

ዳይንኬሬ ዬሱስ «ማዓታዬ ኤዔራንት ካያዮ ሳዓቢ ሃዓን ክ ዎዖንሳቓክ ሬይን ሙዳም ኬዔስካ ሃካን ክ ኣቴርሳቕንኬሬ ሱሳሃንትካንኬ ኤዔር ኤዔድሃንትካን ሃ ኬዔስቴምሽ ዝግርድቴ» ኪን ጋይሴ።

![](https://cdn.door43.org/obs/jpg/360px/obs-en-32-12.jpg?direct&)

ካንካን ኤዔሥን ካዬትዳቦ ዬሱስ ዪን ዎዖንሳቓክ ሬይንጎክ ኤዔድን ሙዴንካን ኬዔዜ፤ አቴንክታም ኤሴርሳቔድን ኤዔድ ሙዳ ሪርንትክ ኣፕንት ዬዜኬ።

![](https://cdn.door43.org/obs/jpg/360px/obs-en-32-13.jpg?direct&)

ዬሱስ ኖቔን ጼዔርንት ፓዓማ ማዓቴ፤ ኮዖግሬሬ ክ ዣእሻኬንክ ቤድሚ ኤዔድን ሼዔጌክቴክ ሱዽምሴኮ ኪም ዽምትዮ ካሌርሴኬ፤ ኤዔድንት ሞልትግር ታሜኬ ቓስቴን ቦን ዞምእ ዜይንታንክ ሃችድክ ዶዖቕዳቕንዳ ማይን ሃዓቔ፤ ኮዖም ኬ ሃልሽሽቴምሽ ሶልይንታም ሙዳ ዼዔሻ እምዴድንካን ካሽትዮ ኮ ማቕሽክ ዜንኮት ቤዛቖንምሺ ሃልሽካን ኮዖን ማዓትክዬ።

![](https://cdn.door43.org/obs/jpg/360px/obs-en-32-14.jpg?direct&)

ዬሱስ ቤድሚ ሃዤርታ ኤዔድናም ክ ሃልሽሽምሽ ናዓ ኤሴርታ ሃዓቔ፤ «ዬሱስት ኣብሌናም ዬሌክ እ ዎዖልስንክ እቴሬ ሃልሽሃልሽድቴ!» ጋይንትክ ጶቕሼ፤ ካንካን ዬሱስት ቡዑርጎክ ሃዓድንትክ ኣብሌንክታም ዎዖልሴ፤ ኣብሌንክታም ኮ ዎዖልስምሽ ሳዓና ዞምእንኮት ሃችን ጋርሼ።

![](https://cdn.door43.org/obs/jpg/360px/obs-en-32-15.jpg?direct&)

ሳዓና «ዬሱስ ዛምይንት ይራንክ ዉታቕስምሽ ኤስቴ፤ ካንካን ዋልዋሌ ጋዓቶ ቡዑርጎክ ማዓቶ «ሃይ ኢም ዎዖልሴ?» ጋይሶ ጎይሴ፤ ክት ራቕክ ሙክዴድኔሬ «ሼዔጋንቴክ ሱዽምሳቔድኬ ሃንቕምዴድ ቤድሚ ኤዔድ ዳዬኬ፤ <ሃይ ኢም ዎዖልሴ> ሃስና ጋዓዴ?» ጋይሶ ኪን ማዓስሴኬ።

![](https://cdn.door43.org/obs/jpg/360px/obs-en-32-16.jpg?direct&)

ኤዔቴና ብልቓሮኬ ጋእሻ ጳሽንትክ ዬሱስት ብሬዜን ቡኬልሴ፤ ኮዖዛንኬሬ ይ ዬእሳቓኬታምኬ ኮይኔሬ ሃልሽንትይንታምክ ኪን ኬዔዜ፤ ዬሱሴሬ «ቡዑድ እዝንትሃንት ሃዓም ሃልሽሻቔ፤ ላቕምክ ካይካ» ኮዖን ጋይሴ።

*ማጻዓፕ ጪልንት ኣቴና ማቶስ 8፥28-34፤9፥20-22፤ ማር 5፥1-20፤ 5፥24-34፤ ሉቓስ 8፥26-39፤8፥42-48*

## 33. ፔጫ ዎዖንዳብስንት ኣቴና

https://openbiblestories.org/l/aiw/story-33/

![](https://cdn.door43.org/obs/jpg/360px/obs-en-33-01.jpg?direct&)

ሴጻ ዎላቕ ዬሱስ ኖቓ ጼዔርንት ሼዔጌር ቤድሚ ኤዔድናም ኤስሳሮ ሃዓቔ፤ ዬሱስ ኬዔን ኬዔዝንትካን ግድምንዳ ካሪ ሃዓፕንትካን ኖቔንት ሼዔጌዜን ጎንጌግር ኣርዝዮ ክ ዶዖቕስቴንክ ዬካ ጋእሻ ቤድሚ ኤዔድና ኪም ኤስርካን ሃዓዴኬ፤ ጎንጌንግር ዶዖቕስዮ ኤዔድናም ኤስሴ።

![](https://cdn.door43.org/obs/jpg/360px/obs-en-33-02.jpg?direct&)

ዬሱስ ኣቴን ኮዖም ኬዔዜ፤ «ኤዔድ ፔጫ ዎዖንዳብ ዎላቕባብ ጴዔታ ማሼካን ዉታቕሴ፤ ኣዓንንቴክ ጴዔቴናም ክ ማሽድክ ባግና ጎዖግዜን ዋዓቼ፤ ኣፕትኔሬ ሃዓዴኮ ሙዳ ኮዖም እሤኬ።

![](https://cdn.door43.org/obs/jpg/360px/obs-en-33-03.jpg?direct&)

«ኣብን ጴዔቴኔሬ ቤድሚ ፔጫ ዳንክ ሴይንዜን ዋዓቼ፤ ዳይንኬሬ ጫዓጪ ፔጬግር ኮ ኦይትክንካን ሃይ ዉትሣኬንኬ ኮ ኦይጻኬንክ ባቔሌና ዎቕስዮ ዎቼ።»

![](https://cdn.door43.org/obs/jpg/360px/obs-en-33-04.jpg?direct&)

«ታዓሬ ኣብን ፔዔቴና ኡክሜት ሞልትግር ዋዓቼ፤ ኮዖና ጴዔቴኔሬ ባቕልሴ፤ ዳይንኬሬ ኡክሜና ኮዖም ጩዑልሼ፤ ካንካን ኡክሜግር ባቔልሳቓክ ባቕሌና ኣዓፒ ዎላቔሴ ኡዑሽክዬ።

![](https://cdn.door43.org/obs/jpg/360px/obs-en-33-05.jpg?direct&)

«ኣብን ጴዔቴኔሬ ላቕምቴንዳ ፔጬዜን ዋዓቼ፤ ኮዖና ጴዔቴና ባቔልሶ ዎላቔና ቦንዴኬ ታማ ዎላቔኔሬ ላዓ ታም ዎላቔኔሬ ዎላቕ ማቶ ኣዓፒ ኡዑሼ» ኤስር ቓዓምንት ዶዖቕዳብ ክ ኤስራኔ!»

![](https://cdn.door43.org/obs/jpg/360px/obs-en-33-06.jpg?direct&)

ኮዖና ኣቴና ዬሱስት ራቕክ ሙክዴድንቴን ኣርትክዬ፤ ካንካን ዬሱስ ኮይን ጋይሶ ፕእስትዮ ኬዔን ኬዔዜ፤ «ጴዔቴና ሳዓብት ኡፕስኔ፤ ጎዖግት ኣሥዜን ዋዓቻቓክ ኤዔድ ሳዓብት ኡፕስን ኤሴርዳቤ፤ ዳይንኬሬ ሜይስትዮ ጶቕሻዬ፤ ይዥዳቤሬ ኡፕስናም ክራንክ ቴይዴ።»

![](https://cdn.door43.org/obs/jpg/360px/obs-en-33-07.jpg?direct&)

«ሴይንዜን ዋዓቻቓክ ጴዔቴና ሳዓብት ኡፕስናም ኤሴርትዮ ጉሜርክ ቴይዳብ ኤዔዴ፤ ዳይንኬሬ ካልሚ ዋይ ዳዓሪ ይዜን ሃዓዳክ ሴጽንክ ቡዑድ እዝንትይንታም ጋጋርዴ።»

![](https://cdn.door43.org/obs/jpg/360px/obs-en-33-08.jpg?direct&)

«ኡክማ ዶዖቕዳኬትግር ዋዓችቓክ ሳዓብት ኡፕስናም ኤሴርዳብ ኤዔዴ፤ ዳይንኬሬ ሴጼት ቡዑር ፔጬን ኮዖት ጶቕሺ፥ ዎድምንትኬ ጉሜርክ ሳዓብካን ክት ዶዖቕዳክ ሶዖልሜናም ጩዑልዴ፤ ኮዖዛንክ ዻዓምሳቕንዳ ክ ኤሴርታቓክ ኡፕስና ኣዓፒ ኡዑሻዬ።

![](https://cdn.door43.org/obs/jpg/360px/obs-en-33-09.jpg?direct&)

«ላቕምኣክ ፔጬና ዳይንክ ሳዓብት ኡፕስናም ኤሴርዳብ ኤዔዴ፥ ኖዖሬ ኡፕስናም ኤሴርዳብ፥ ቡዑድ እዝዳብኬ ኣዓፒ ኡዑሽዳብክ ማዓዴ።»

*ማጻዓፕ ጪልንት ኣቴና ማቶስ 13፥1-8፤18-23፤ ማር 4፥1-8፤13-20፤ ሉቓስ 8፥4-15*

## 34. ዬሱስ ኣብ ኣቴናም ክ ኤስስምሽ

https://openbiblestories.org/l/aiw/story-34/

![](https://cdn.door43.org/obs/jpg/360px/obs-en-34-01.jpg?direct&)

ዬሱስ ሳዓብት ባዓምንጎካንኬ ኣቤሬ ኣቴናም ኤስሴ፤ ካምስካን ኮይን ጋይሴ፤ «ሳዓብት ባዓምና ኤዔድ ሃዓምይንትግር ክ ማሻቓክ ኤክኔምሻኬት ኣዓፕናም ካምዴ ናዓሬ ጴዔታ ሙዴግራንክ ቶክድንዴ።»

![](https://cdn.door43.org/obs/jpg/360px/obs-en-34-02.jpg?direct&)

«ዳይንኬሬ ኤክኔምሻኬት ጴዔቴና ባቔልሶ ኮ ጋጵሳኬንክ ኣፕትኔሬ ሃዓዴኮ ዋዓር ኬ ዶዖቕስቴንክ ዬካ ኮርሚ ሃዓምንግር ዶዖቕዴድ ኮርምን ሙዴግራንክ ናዓ ጋጋጽዴ።

![](https://cdn.door43.org/obs/jpg/360px/obs-en-34-03.jpg?direct&)

ዬሱስ ኣብ ኣታም ኬዔዜ «ሳዓብት ባዓምና ማይንሢ ቴዮ ሙዴና ቡዑርቕስቴንክ ዬካ እሌን ኪክን ኮ ዽቕዳክ ጫዓርሚ ሚዼናም ካምዴ።

![](https://cdn.door43.org/obs/jpg/360px/obs-en-34-04.jpg?direct&)

«ታዓሬ ሳዓብት ባዓምና ኤዔድ ዎዖኒ ሃዓምግርንት ክ ኣዓቻቕንዳ ዚጋም ካምዴ፤ ኤዔድ ኣብባብ ዚጌናም ሃዓፕቴትዳቦ ኣልካ ኮዖም ዱዑክሴ፤ ጋእሻ ጉሜርታ ይ ሃዓቕንካን ካዮ ይንት ዶዖቕዳክ ሬይ ሙዳም ሼንሾ ሶልንክ ሃዓምናም ሼንቴ።»

![](https://cdn.door43.org/obs/jpg/360px/obs-en-34-05.jpg?direct&)

«ታዓሬ ሳዓብት ባዓምና ባዜንኮት ጋእሻ ጋጵሚ ማዓሣቓክ እንቑ ጋዓርዳክ ሼክምናም ካምዴ፤ ዛላ ዛልዳብ ኮዖም ይ ሃዓፕትንክ ይንት ዶዖቕዳክ ሬይን ሙዳም ሼንሾ ኮዖም ሼንቴ።»

![](https://cdn.door43.org/obs/jpg/360px/obs-en-34-06.jpg?direct&)

ኮዖት ቡዑር ዬሱስ ይንት ማቴክ ላቕሚ ዎዖንይንቴክ ዳቕዴድንኬ ኣቤድናም ዳይንክ ቶክስዴድንካን ኣታ ዎላቕ ኬዔን ኬዔዜ፤ «ቓስቴን ኤዔድ ምክስካን ጪሊ ኤዬንግር ካዬኬ፤ ዎላቓብን ጊራ ካሽሽዳብ ክ ማዓሥክ ኣብባብና ቡዑድ እዝዴድናም ኤንሥዳብ ሃዓቔ» ጋይሴ።

![](https://cdn.door43.org/obs/jpg/360px/obs-en-34-07.jpg?direct&)

«ቡዑድ እዝዴድናም ኤንሥዳብስን ኮይን ጋይሶ ምክሴ፤ <ሳዓብዮ ኣቤድ ኤዔድንምሽ ሙዳ ቡራ ቡሮ እሥዴድኬ ኤዔኣዬድክ ቤዔልምዴድምሼሬ ኮባብ ጊራ ካሽዳብምሼሬ እ ማዓትክንካን ሃዓም ጎዖፕሽድቴ።»

![](https://cdn.door43.org/obs/jpg/360px/obs-en-34-08.jpg?direct&)

«እታ ማዓሪ ዎላቕግር ካሪ ቓስቴንክ እሥክስኬ ዎጭክስክ ዶዖቕድቴ፤ እ ሃዓፕታቓክ ሶልግራንክ ሬይ ሙዴግራንኬሬ ታምስናም ዉሥድቴ።»

![](https://cdn.door43.org/obs/jpg/360px/obs-en-34-09.jpg?direct&)

«ጊራ ካሽሽዳብስን ዳይንክ ቡዑድ እዝዴድናም ኤንሥዳብስንዳንክ ፔጋ ዎእሴ፤ ፔስ ርኬግሬሬ ሼድንትካን ዝክዬ፤ ኮዖ ኦዖላይስ ሳዝንታም ጎዖዳሮ፥ <ሳዓብዮ! እታ ዳቔልስባብ እ ማዓሥንካን ዋዓዴ ኢን ኔጋኔ ጋዓካዮ።»

![](https://cdn.door43.org/obs/jpg/360px/obs-en-34-10.jpg?direct&)

ኮዖት ቡዑር ዬሱስ ኮይን ጋይሴ፤ «ዶዖፔን ዬዔን ጋዓድቴ፤ ሳዓቢ ጊራ ካሽሽዳብንት ምክስናም ኤሴርሶ ሃዓና ኡዝማ ዎዖንዳባዬ ኪን ጋይሴ፤ ቡዑድ እዝዴድናም ኤንሥዳብንት ምክስናም ዳይንክ ናሽክዬ፤ ሳዓቢ ይንት ማቴናም ጼክስ ዬይዳብናም ሙዳ ቶቶክስዴ፤ ማቴይንታም ቶክስዳብናም ዳይንክ ጼክስ ዬይዴ» ጋይሴ።

*ማጻዓፕ ጪልንት ኣቴና ማቶስ 13፥31-33፤44-46፤ ማር 4፥30-32፤ ሉቓስ 13፥18-21፤18፥9-14*

## 35. ዋዬባብ ባዓቤንት ኣቴና

https://openbiblestories.org/l/aiw/story-35/

![](https://cdn.door43.org/obs/jpg/360px/obs-en-35-01.jpg?direct&)

ሴጻ ዎላቕ ዬሱስ ቤድሚ ኤዔድን ጊዒራ ካሽሽዴድንኬ ክራ ኤስርካን ሱዽምሳቔድ ኣቤድን ዳቔልሲ ኤዔድናምክ ኤስ ኤስስዳቔ።

![](https://cdn.door43.org/obs/jpg/360px/obs-en-35-02.jpg?direct&)

ታዓሬ ኮዖግር ሃዓቔድ ቡዑድ እዝንትናም ኤንሥዴድና ዬሱስ ዳቔልሲ ኤዔድናም ሱስንት ማዓስሶ ክ ኬዔም ናሽድክ ኪም ሼጄኬ፤ ኪክ ኪክዴሬ ኪም ይዝንንት ዬዜኬ፤ ካንካን ዬሱስ ኣቴን ኮዖም ኬዔዜ።

![](https://cdn.door43.org/obs/jpg/360px/obs-en-35-03.jpg?direct&)

ይንሥንት ቓስቴን ዶዖቕዳብ ኤዔድ ዎላቕ ሃዓቔ፤ ይንሥስን ሜራብን ባዓቤኔን <እባዓቦ! ሶልንግርሃንታንክ ኢን ዣእዳክ ካሽንግራክ ታ ኢን እምካ!> ኪን ጋይሴ፤ ካንካን ባዓቤን ሶልናም ቓስቴንንካን ካሽትዮ ኬዔን እምሴ።

![](https://cdn.door43.org/obs/jpg/360px/obs-en-35-04.jpg?direct&)

«ሜራብ ይንሥስን ሳዓና ይንት ዶዖቕዳክ ሙዳም ሱዽቶ ፔጫ ፔጌግር ካዮ ዳቔልስክ ዶዖቓሮ ሶልናም ካይሴ።

![](https://cdn.door43.org/obs/jpg/360px/obs-en-35-05.jpg?direct&)

ኮዖት ቡዑር ሜራብን ይንሥስን ዶዖቕዳክ ፔጬንግር ሉማ ማዓሤ፤ እሥሚ ሼኔርድንዳ ሶሌሬ ክራ ዳክ ሃዓቔ፤ ካንካን ኣብንዳ ዎዖኒ ዳክንካን ጉድማም ግሽማ ግሽንቲ ዬዜ፤ ጋእሻ ካሌርሶ ዳዓቔርታ ይ ሃዓቕንካን ጉድምንት እሥምናም እሥንትካን ኡቕምዳቔ።»

![](https://cdn.door43.org/obs/jpg/360px/obs-en-35-06.jpg?direct&)

ማቕንቴዜኔሬ ይንሥስን ሜራብና ይማትካን ኮይን ጶቕሼ፤ <ሃራ ዬእንትስቴ? እባብት ፕክሽዴድን ሙዳ ኬ እሥድንዳ ቤድሚ እሥሚ ኬራ ዶዖቔ፤ እታ ዳይንክ ዳዓቔርትቴ፤ እባብዳ ኤዔር ማዓትዮ ካይቶ ሃንት ፕክሽዴድንግራንክ ዎላቓብንምሽ ኢም ክ ማዓስቴምሽ ኪም ምክስድቴ» ጋይሴ።

![](https://cdn.door43.org/obs/jpg/360px/obs-en-35-07.jpg?direct&)

ካንካን ሜራብ ይንሥስን ባዓቤንዳ ኤዔር ማዓቴ፤ ኣኪ ፔጋ ክ ዳይክ ባዓቤን ኪም ይ ሼጃኬንክ ክካን ኣቴርሴ ክራ ሃዝንትክ እምጭትዮ ኪም ሶንቕቴ።»

![](https://cdn.door43.org/obs/jpg/360px/obs-en-35-08.jpg?direct&)

ይንሥስኔሬ ኮይን ጋይሴ፤ <እባዓቦ! ሳዓባምኬ ሃዓማምክ ዳቔልስትቴ፤ ይንሥስሃንቴ ኢም ጋዓራን ኢን ማዓታዬ» ኪን ጋይሴ።

![](https://cdn.door43.org/obs/jpg/360px/obs-en-35-09.jpg?direct&)

ዳይንኬሬ ባዓቤን ይንት ፕክሽዴድንግራንክ ዎላቕባቤን ኮይን ጋይሴ፤ <ሳዓና ካያዮ ላቕምቴንዳ ኣብላ ታዓዳዮ ይንሥስእስቴን ቖፕስካ! ኣዓንንክቴት ግልኤንግር ዎርቒ ዱዑትግርክት ኮጳ ዎድካ፤ ኮዖዛንኬሬ ዎ እሥቴምሽኬ ዎ ጉሜርቴምሽክ ዱርፕቴባብ ቖልማ ታዓዶ ቴችኬቴ ሃራካኔ ጋዓርስንክ ኮና ይንሥስእት ዴእታ ሃዓቔ፤ ታ ኣዓፔክ ማዓቴ! ካይታ ሃዓቔ ታ ዳይንክ ሃዓፔርቴ!» ጋይሴ።

![](https://cdn.door43.org/obs/jpg/360px/obs-en-35-10.jpg?direct&)

«ካንካን ኤዔድና ጉሜርንቲ ዬዜኬ፤ ቤድሚ ሃጵክዳይክ ዎዖንግራንክ ቶይድስን እንዴፕስክት ኤዔር ሃዓዴ፤ ሌዔቔቴኬ ባይድቴክ ኡፕሲ ኤሴርሴ፤ ሃራ ዳይኬ ጋይሶ ሪርቴ።»

![](https://cdn.door43.org/obs/jpg/360px/obs-en-35-11.jpg?direct&)

ቶይዲ ይንሥስን እንዴፕስን ሃዓዳቕንካን ኬ ጉሜርዳኬታም ይ ኤስታኬንክ ጋእሻ ይ ጋዓምስንካን ኤዔር ኣርድንትካን ናሽክዬ፤ ባዓቤንክት ዉታቕሶ ኤዔር ኣርዝዮ ኬ ኪክን ክ ጉሜርቴምሽ ኪም ምክሴ፤ ኖዖ ዳይንክ ሃኦ ጋይሴ።

![](https://cdn.door43.org/obs/jpg/360px/obs-en-35-12.jpg?direct&)

ቶይዲ ይንሥስን ባዓቤኔን ኮይን ጋይሴ፤ <ኬዔና ቦንን ሙዴክ ሃዓን ኤዔኤክ ፕክሽትቴ ዎላቔሴ ሃዓን ኤዔእክስ እ ጋርሻቕንዳ ሴጻ ዳክዬ፤ ታዓክ ዬኬሬ እቤዔልሥኬስ ኪክን እ ጉሜርቴምሽ ዴርቲ ቕንጺ ዎላቔሴ ኢን እማቓዬ፤ ዳቔልሲ ዎዖንንትክ ሶልሃንታም ካይሳቓብን ይንሥስን ዳይንክ ኤዔር ክ ሃዓድንካን ዱርፕቴባብ ኣብዝስናም ቴቻዬ! ጋይሴ።

![](https://cdn.door43.org/obs/jpg/360px/obs-en-35-13.jpg?direct&)

«ባዓቤን ዳይንክ ኮይን ጋይሴ <ዬ ይንሥስእስቶ ሃዓና ሙዳ ሴጽ እ ኪክናዬ እስት ዶዖቕዳክ ሬይ ሙዴና ሃሬዬ፤ ጉሜርዎንት ዳይንክ ኡዝሜንዴ፤ ሃራካኔ ጋዓርስንክ ሃንዴፕስን ኮና ዴእታ ሃዓቔ ታ ዳይንክ ኣዓፔክ ማዓቴ፤ ካይታ ሃዓቔ ታ ዳይንክ ሃዓፔርቴ!» ኪን ጋይሴ።

*ማጻዓፕ ጪልንት ኣቴና ሉቓስ 15፥11-32*

## 36. ዬሱስት ብሽን ኦዖክምስምሽ

https://openbiblestories.org/l/aiw/story-36/

![](https://cdn.door43.org/obs/jpg/360px/obs-en-36-01.jpg?direct&)

ሴጻ ዎላቕ ዬሱስ ይንት ራቕክ ሙክዴድን ማኬንናም ኬዔኔሬ ጴጥሮስ፥ ያይቖባምኬ ዋንሳምክ ኤንሥቶ ምክስካን ሮዖትምባብ ባሌዜን ኤቤኬ፤ (ዋንስ ጋዓርሳቓብን ዬሱሳም ሽእሻቓብ ኤዔሥን ዳክዬ።)

![](https://cdn.door43.org/obs/jpg/360px/obs-en-36-02.jpg?direct&)

ዬሱስ ምክስዜን ክ ዳይክ ኣዓፕርክታንክ ሃይምሽ ሻዓክሼ፤ ኣብሌንክቴሬ ሻዓክምምሽ ጻዓሚ ማዓሤ፤ ፔጬዜን ኤዔድ ሃይዬሴሬ ሽእትዮ ጻዓምሳይንዳ ኣብሌምሽ ጋእሻ ጻዓ ማዓሤ።

![](https://cdn.door43.org/obs/jpg/360px/obs-en-36-03.jpg?direct&)

ኮዖ ጭርንክ ሙሴኬ ማዓትካን ዬይዳኬታም ኬዔዝዳብን ኤላስክ ሃዓፕምሴኬ፤ ኬዔና ኤዔድና ቤድሚ ማቶክ ፓይዴርዴድ ቦንንት ብሬዜን ፔጬዜን ዶዖቕዳሻሼድ ሃዓቔኬ፤ ኡሣ ሴጽግር ዬሩሳምግር ማዓዳክ ዴእንጎክትካን ዬሱስ ኪክን ኬዔዝምሴኬ።

![](https://cdn.door43.org/obs/jpg/360px/obs-en-36-04.jpg?direct&)

ሙሴኬ ኤላስክ ዬሱስ ኪክን ኬዔዝምዜን ኬ ዳይክ ጴጥሮስ ዬሱሴን «ኩዑር ማዓትንትን ዎዖን ዋዓኔ፤ ዎላቕ ሃካን፥ ዎላቕ ሙሴካን፥ ታዓሬ ዎላቕ ኤላስካን ማኬን ዴልሣ ዎ ኣክሻኔ» ኪን ጋይሴ፤ ጴጥሮስ ኮዖም ይ ኬዔዝዳኬታም ኤሳይ ሃዓቔ።

![](https://cdn.door43.org/obs/jpg/360px/obs-en-36-05.jpg?direct&)

ጴጥሮስ ኬዔዜዜን ክ ዳይክ፤ ሻዓክምንዳ ሊላ ሃዓዶ ኬዔም ሽፕሽድክ ሊሌንግራንክ ኡፕሲ «ኪክ እ ጉሜርዳብን እ ዪም ናሽዳብ ይንሥስእስት ኮዖናዬ፤ ክራንክ ኤሴርኬቴ» ጋይሴ፤ ማኬንን ዬሱስት ራቕክ ሙክዴድና ጳሼኮ ፔጬዜን ቡኬልሴኬ።

![](https://cdn.door43.org/obs/jpg/360px/obs-en-36-06.jpg?direct&)

ኮዖክ ዬሱስ ኬዔም ዎዖልሶ «ሃይ ጳሽኬቴ ዻዓምኬቴ» ኬዔን ጋይሴ፤ ሼዔግንቴክ ኬ ሼድንክ ዬሱስ ካይሳ ሃይዬሬ ዳክ ሃዓቔ።ዳክ ሃዓቔ።

![](https://cdn.door43.org/obs/jpg/360px/obs-en-36-07.jpg?direct&)

ዬሱስኬ ክት ራቕክ ሙክዴድንክ ባሌንዛንክ ሃቼኬ፤ ኮዖ ጭርንክ ዬሱስ ኮይን ኬዔን ጋይሴ፤ «ኩዑር ማዓሣቓክ ሬይንጎክ ሃይካኔሬ ሃይ ኬዔስኬቴ፤ እታ ሳዓና ዴእድቴ ኣዓፔካምባቤሬ ማማዓድቴ፤ ኮዖት ቡዑር ኤዔድንካን ኬዔዝንት ዬዔን ማማዓዴ።»

*ማጻዓፕ ጪልንት ኣትና ማቶስ 17፥1-9፤ ማር 9፥2-8፤ ሉቓስ 9፥28-36*

## 37. ዬሱስ ኣልዛራም ዴእግራንክ ኪም ዻዓስሴ

https://openbiblestories.org/l/aiw/story-37/

![](https://cdn.door43.org/obs/jpg/360px/obs-en-37-01.jpg?direct&)

ሴጻ ዎላቕ ዬሱስዳ ኣላዛር ጋእሻ ሴዔቔርቴ ጋዓርድንዳ ኬዔዛ ክራ ዣእሼ፤ ኣላዛርኬ ቓስቴን እናንኬስ ማራምኬ ማርታክ ዬሱስት ኡሣ ሱሴክት ሃዓቔኬ፤ ዬሱስ ኬዔዜን ኮዖም ይ ኤሴርታኬንክ «ኮና ሴዔቕምና ሳዓብት ቦንችምካኖንምሺ ዴእካን ዳክዬ» ጋይሴ፤ ዬሱስ ኤዔዴይንታም ናናሽዳቔ፤ ዳይንኬሬ ቓስቴን ሴጽካን ይ ዳያክ ካርንግር ኔጌ።

![](https://cdn.door43.org/obs/jpg/360px/obs-en-37-02.jpg?direct&)

ቓስቴን ሴጽን ማቕሳኬት ቡዑር ዬሱስ ይንት ራቕክ ሙክዴድንቴን «ይሁዳ ፔጭግር ዎዖኔቴ» ኬዔን ጋይሴ፤ ኬታ ዳይንክ «ዬ ኤስስዳብስኖ! ቶክሚ ሴጽት ብሬዜን ኮዖግር ዶዖቕዴድን ሃዓም ዴይስካን ዝግዳቔኬ!» ጋይሶ ኪን ማዓስሴኬ፤ ዬሱስ «ዎንት እንዴፕስ ኣላዛር ራዓቴ ራዓቴንግርክታንክ ኪም ዻዓስካን ካይድቴ» ኬዔን ጋይሴ።

![](https://cdn.door43.org/obs/jpg/360px/obs-en-37-03.jpg?direct&)

ዬሱስት ራቕክ ሙክዴድን «ባዓቦ! ኣላዛር ራዓታ ክ ማዓሥንክ ሃልሻልሽዴ» ኪን ጋይሴኬ ኮዖ ጭርንክ ዬሱስ ኣይቴር ኬዔን ኬዔዜ፤ «ኣላዛር ዴእቴ፤ እዜን ቡዑድ ዬ እዝቴምሽ ኮዖግር እ ማዓትካኬትካን ጉጉሜርድቴ።»

![](https://cdn.door43.org/obs/jpg/360px/obs-en-37-04.jpg?direct&)

ዬሱስ ኣላዛር ኣዼርሳቓክ ካትሜንግር ክ ዣእሻኬንክ ኣላዛር ዴእስክ ሴጻ ኦይዲ ማዓታ ሃዓቔ፤ ማርታ ዬሱስዳ ማሽምካን ዉታቕሴትዳይንዶ ኮይን ኪን ጋይሴ፤ «ባዓቦ! ሃዓና ኩዑር ዶዖቓ ሃ ሃዓቕንክ እንዴፕስ ዴኣይ ሃዓቔ፤ ዳይንኬሬ ሳዓቢ ሃ ምክስዳክ ሙዴናም ክ እምድምሽ ቡዑድ እዝድቴ» ጋይሴ።

![](https://cdn.door43.org/obs/jpg/360px/obs-en-37-05.jpg?direct&)

ዬሱስ ኮይን ጋይሶ ኮዖን ማዓስሴ፤ «ዻዓምንትኬ ኣዓፔክ ዶዖቕንትክ እትቴ፤ እዜን ቡዑድ እዝዳብ ሙዳ ይ ዴእስንኬሴሬ ኣዓፔክ ማዓዴ፤ እዜን ቡዑድ እዝዳብ ሙዳ ሃስን ዳይኬሬ ዴኣዬ፤ ኮዖም ዶዖፕስዳዮ? ማርታሬ «ዪይዬ ዬ ባዓቦ! ሃዓና ሳዓቢ ሃዓም ሳይሳቓብን ሳዓብት ይንሥስን ማዓትንትሃንታም ዶዶዖፕስድቴ» ግይሶ ኪን ማዓስሴ።

![](https://cdn.door43.org/obs/jpg/360px/obs-en-37-06.jpg?direct&)

ኮዖዛንኬሬ ማራም ሃዓዴ፤ ዬሱስት ዱዑትር ቡክልንትክ «ባዓቦ! ሃዓና ኩዑር ዶዖቓ ሃ ሃዓቕንክ እንዴፕስ ዴኣይ ሃዓቔ» ኪን ጋይሴ፤ ዬሱስ «ኣላዛራም ሃብሬ ኪም ዎጃቔ?» ጋይሶ ኬዔም ጎይሴ፤ «ዱዑክግሬ ሃዓዳዮ ሼትካዮ» ጋይሶ ኪን ኬዔዜኬ፤ ዜናንኬሬ ዬሱስ ኤዔፕሴ።

![](https://cdn.door43.org/obs/jpg/360px/obs-en-37-07.jpg?direct&)

ዱዑክና ሴይንት ቖዖፔግር ሃዓቔ፤ ሴይኔሬ ዜን ዬሥቴንዳ ሃዓቔ፤ ዬሱስ ዱዑክንዳ ይ ዣእሻኬንክ ሴይንናም ዜናንክ ዛዓክስኬቴ» ጋይሶ ኬዔን ኬዔዜ፤ ዳይንኬሬ ማርታ «ክ ዴእስክ ኮና ሴጻ ኦይዲ ማዓቴ፤ ታ ሾሾቕዴ» ኪን ጋይሴ።

![](https://cdn.door43.org/obs/jpg/360px/obs-en-37-08.jpg?direct&)

ዬሱስ እዜን ቡዑድ ሃ እዝድንክ ሳዓብት ቦንችምናም ሃ ሼድምሽ ሃዓን ኬዔስክቶ?» ኮዖን ጋይሴ፤ ካንካን ሴይንናም ዛዓክሴኬ።

![](https://cdn.door43.org/obs/jpg/360px/obs-en-37-09.jpg?direct&)

ኮዖት ቡዑር ዬሱስ ፔስ ርኬግር ሼጆ «እባዓቦ ኢም ሃ ኤሴርድንካን ሃዓም ጎጎዖፕሽድቴ፤ ሃዓና ሙዳ ሴጽካን ኢም ሃ ኤሴርድምሽ ኤሴስድቴ፤ ዳይንኬሬ ሃ ኢም ኦይሣቕምሽኬ ኬ ቡዑድ እዝቴምሽ ኩዑር ዎእሳቔድ ኬዔና ኤዔድን ሙዴካን ኮዖም ኬዔዝድቴ» ጋይሴ። ኮዖዛንኬሬ ዬሱስ «ኣላዛሮ ኦንክ ማዓል ሃዓድካ!» ጋይሶ ኡፕሲ ጫዓጭክ ኡዑግምሴ።

![](https://cdn.door43.org/obs/jpg/360px/obs-en-37-10.jpg?direct&)

ካንካን ኣላዛር ዉታቕሴ! ኣብሌንክ ሱዑድትዮ ኦቼርሻቕምሽ ሃዓቔ፤ ዬሱሴሬ «ኪም ቡልሴቶ ጋርኬቴ ክ ሙካኔ!» ኬዔን ጋይሴ፤ ኣይሁድ ኤዔድን ቤድሜድ ኮዖ ክላ ዎዖንንጎክ ዬሱስዜን ቡዑድ እዜኬ።

![](https://cdn.door43.org/obs/jpg/360px/obs-en-37-11.jpg?direct&)

ዳይንኬሬ ኣይሁድ ኤዔድንት ቡዑድ እዝንትናም ኤንሥዴድን ክዜን ኒቕምሴኬ፤ ካንካን ዬሱሳምኬ ኣላዛራምክ ሃስን ይ ዴይስድምሽ ዪን ማዓዳኬታም ጶቕሽንትካን ኪክዜን ሱዽምሴኬ።

*ማጻዓፕ ጪልንት ኣቴና ዋንስ 11፥1-46*

## 38.  ዬሱሳም ዬሥትዮ እሜርሴ

https://openbiblestories.org/l/aiw/story-38/

![](https://cdn.door43.org/obs/jpg/360px/obs-en-38-01.jpg?direct&)

ኣይሁድና ቦንክ ቦንክ ሳዓቢ ሴጽናም ቦንችዳቔኬ፤ ኮዖኔሬ ሳዓቢ ሴጽና ቤድሚ ቦን ፓይዴርክንዴት ብሬዜን ሳዓቢ ብራ ኣዓኬኔኬት ግብጽግር ኬ ሻዓሻዓክ ኤዔዴን ፕክሽንትንግራንክ ሃስን ኬዔም ክ ዻቕሻቕንኬሬ ኬ ቦንችድንዳ ሃዓቔ፤ ዬሱስ ብሬዜን ኣይቴር ክ ሳንናምኬ ኤስስናምክ ክ ዬዛኬት ማኬን ቦንት ቡዑር ኮዖ ሳዓቢ ሴጽናም ዬሩሳሌምግር ኬ ኪክን ቦንችንትካን ክ ዝግዝምሽኬ ግሬሬ ኪም ዴይሴርድምሽክ ይንት ራቕክ ሙክዴድንቴን ኬዔዜ።

![](https://cdn.door43.org/obs/jpg/360px/obs-en-38-02.jpg?direct&)

ዬሱስት ራቕክ ሙክዴድንግራንክ ዎላቕባብ ይሁዳ ዪም ጋዓርዳብ ኤዔድ ሃዓቔ፤ ይሁዳ ክት ራቕክ ሙክዴድንት ሶሊ ዬዳብ ሃዓቔ፤ ዳይንኬሬ ሶሊ ናሽዳብ ይ ሃዓቕንካን ቤድሚ ሴጽ ሶልን ዬዴርዳክ ሱልጵንግራንክ ሶልናም ዲብዳቔ፤ ዬሱስኬ ክት ራቕክ ሙክዴድንክ ዬሩሳሌምግር ኬ ዣእሻኬት ቡዑር ይሁዳ ኣይሁድናም ጌሥዴድንዳ ካዬትዳቦ ዬሱሳም ሶልካን ዬሥትዮ ኬዔን እምንትካን ኤዔድምሴ፤ ዬሱስ ሳዓቢ ዪም ሳይሳቓብን ማዓትንትንክታም ኣይሁድንት ኤንሥዴድን ኬ ዶዖፕስክምሽኬ ኪም ዴይስካኔሬ ኣልቕምንትንኬታም ኤሴስዳቔ።

![](https://cdn.door43.org/obs/jpg/360px/obs-en-38-03.jpg?direct&)

ኣይሁድንት ኤንሥዴድን ኤዔድናም ሳዓቢ ኪክን ቔዔሽምሽዴድንት ጌሥዳብንት ኤንሤክ ዬሱሳም ዬሥትዮ ኬዔን ክ እምቴምሽ ይሁዴካን ቦንዴኬ ታማ ሶሊ ኪን ካሼኬ፤ ማዓትካን ዬይዳኬታም ኬዔዝዴድን ኬዔዝሻሽምሽ ኮዖና ማዓሤ፤ ይሁዳ ኤዔድምንትክ ሶልናም ቴይዮ ካዬ፤ ዬሱሳም ኬ ዬድቴምሽ ኬዔም ኬልሽካን ማዓድንዳ ሴጻ ዝግርዳቔ።

![](https://cdn.door43.org/obs/jpg/360px/obs-en-38-04.jpg?direct&)

ዬሩሳሌምግር ዬሱስ ይንት ራቕክ ሙክዴድን ኪክን ሳዓቢ ሴጽናም ቦንችሼ፤ ሳዓቢ ሴጽንት እሥምንዜን ዬሱስ ባልሽናም ዻዓስቶ ቱርሼ፤ ኮይኔሬ ጋይሴ «ኮኔቴ ኮዖም እሥኬቴ፤ ኮና ዬካን እሜርሳቕንዳ እስት ዋዓዬ ኮዖም ኢም ዬ ጶሽሽድንዳ ኮዖም ማዓስኬቴ፤» ኮይናሜትጎክ ዬሱስ ይንት ዋዓም ኬ ጎዖካን ይ ዴእድምሽ ኬዔን ኬዔዜ።

![](https://cdn.door43.org/obs/jpg/360px/obs-en-38-05.jpg?direct&)

ኮዖዛንኬሬ ዬሱስ ዎጭምናም ዻዓስንትክ «ኮዖም ዎጭኬቴ ዳቔልሳም ኔጋኔ ጋዓርቴምሽ ላልምዳክ ክላ ጫዓቔንት ዞምእእስቴ፤ ኮዖም ዬ ዎጫዓኬንክ ሙዳ ኢም ዬ ጶሽሽድንዳ ኮዖም ማዓስኬቴ።»

![](https://cdn.door43.org/obs/jpg/360px/obs-en-38-06.jpg?direct&)

ኮዖዛንኬሬ ዬሱስ ይንት ራቕክ ሙክዴድንቴን «ዬግራንክ ዎላቓብና ኢም ዬሥትዮ እምምዴ» ኬዔን ጋይሴ፤ ክት ራቕክ ሙክዴድኔሬ ሪርቴኬ፥ ኮይናማክ ሬይናም ሃይ ዬይዴ?» ጋይሶ ጎይሴኬ፤ ዬሱስ «ኮዖ ቱርሽምን ባልሽናም ኪን እ እምዳብን ኤዔሥን ኢም ዬሥትዮ እምዴ» ጋይሴ፤ ኮዖት ቡዑር ባልሽናም ይሁዴካን እምሴ።

![](https://cdn.door43.org/obs/jpg/360px/obs-en-38-07.jpg?direct&)

ይሁዳ ባልሽናም ይ ቴያኬት ቡዑር ዥንስን ቡዑዴግርክት ኣርዜ፤ ይሁዳ ዬሱሳም ኬ ዬድቴምሽ ኣይሁድንት ኤንሥዴድናም ኬልሽካን ካዬ ሮዖርና ሶይታ ሃዓቔ።

![](https://cdn.door43.org/obs/jpg/360px/obs-en-38-08.jpg?direct&)

ዬሱስኬ ክት ራቕክ ሙክዴድንክ ሶይቲ እሥምን ኬ እሣኬት ቡዑር ዴብራዛይት ካዬኬ፤ ዬሱስ ክና ሶይትንክ ዬታ ሙዴና ኢም ጋጋርዴቴ፤ <ግሽዳብናም ግግእድቴ ቖልንክቴሬ ሙዳ ኮኮፕምዴኬ> ጋይሶ ክልኬርቴ» ጋይሴ።

![](https://cdn.door43.org/obs/jpg/360px/obs-en-38-09.jpg?direct&)

ጴጥሮስ «ኣቤድን ሃዓም ኬ ጋርድንኬሴሬ እታ ዳይንክ ኮይን ዬኣይቴ!» ጋይሶ ማዓስሴ፤ ጭርን ኮዖክ ዬሱስ ጴጥሮስካን ኮይን ጋይሴ፤ «(ሴጣን) ዥንስና ዬ ሙዴናም ቴይካን ዝግዴ ዳይንኬሬ ጴጥሮሶ ቡዑድ እዝንትሃንት ላንቓይምሽ ሃካን ምምክስድቴ፤ ኮይን ማዓድንኬሴሬ ክና ሶይትን ኮዖክ ባዓቻ ቒቕክንዴት ብሬዜን ማኬን ካርክ እታ ኪም ኤሳይቴ ጋይንትክ ኢም ጋርዳዬ።»

![](https://cdn.door43.org/obs/jpg/360px/obs-en-38-10.jpg?direct&)

ጭርን ኮዖክ ጴጥሮስ ዬሱሶ ዴኢ ኢም ዝክስድንኬሴሬ ዎላቕሴ ሃዓም ጋራይቴ» ኪን ጋይሴ፤ ኣቤድን ዬሱስት ራቕክ ሙክዴድን ሙዳ ኮዖም ጋይሴኬ።

![](https://cdn.door43.org/obs/jpg/360px/obs-en-38-11.jpg?direct&)

ኮዖት ቡዑር ዬሱስ ይንት ራቕክ ሙክዴድን ኪክን ጌቴሴማን ጋዓርዳክ ካርዜን ካዬኬ፤ ዬሱስ ጴጽምግር ዬ ኣርታክምሽ ዛብዝዮ ምክስኬቴ ጋይንትክ ኬዔን ኬዔዜ፤ ኮዖዛንኬሬ ዬሱስ ይንቲ ዬሌክ ምክስካን ካዬ።

![](https://cdn.door43.org/obs/jpg/360px/obs-en-38-12.jpg?direct&)

ዬሱስ ማኬን ካርክ ምክሴ፤ «እባዓቦ! ሃዓን ማዓድንክ ኮዖ ካልምንት ዎጭምናም እ ዎጭታክምሽ ማዓስካዮ፤ ዳይንኬሬ ኤዔድንት ድቔልስናም ኔጋኔ ጋዓርድንዳ ኣብንዳ ጎዖግ ዳክንክ ጶቕሽሃንት ማዓታኔ፤» ዬሱሴሬ ጋእሻ ሪርሴ ኤርሜንክቴሬ ዞምእምሽ ጾዽዳቔ፤ ሳዓቤሬ ኪም ዛፕስንትካን ርኬግራንክ ዎዖንይንትካን ይ ኦይዴድናም ኦይሤ።

![](https://cdn.door43.org/obs/jpg/360px/obs-en-38-13.jpg?direct&)

ካሪ ማኬንክ ይ ምክስዳቓኬት ቡዑር ዬሱስ ይንት ራቕክ ሙክዴድንዳ ማዓቲ ማዓቶ ሃዓዳቔ፤ ኬታ ዳይንክ ራዓታ ሃዓቔኬ፤ ማክምሲ ይ ማዓዳኬንክ ዳይንክ «ዻዓምኬቴ! ዬሥትዮ ኢም እምዳብን ኩዑር ዳዬ» ጋይሴ።

![](https://cdn.door43.org/obs/jpg/360px/obs-en-38-14.jpg?direct&)

ይሁዳ ኣይሁድ ኤዔድንት ኤንሥዴድንኬ ፖዖልስንክ ቤድሚ ኤዔድ ኪክን ሃዓዴ፤ ካሥምኬ ጉፔክ ቴይታ ሃዓቔኬ፤ ይሁዳ ዬሱስዳ ሃዓዴትዳቦ «ዬ ኤስስዳብኖ ላቕሚ ሃዓን ማዓታኔ» ኪን ጋይሴ፤ ሶንቔሬ ኪም ሶንቕቴ፤ ኮዖም ዬይንትክ ኣይሁድንት ኤንሥዴድና ሃያም ኬ ዬድንኬሬ ኬዔን ጴዔጲ ሃዓቔ፤ ኮዖዛንኬሬ ዬሱስ «ዬ ይሁዶ ሶንቕንትክ ዬሥትዮ ኢም ሃ እምዶ?» ጋይሴ።

![](https://cdn.door43.org/obs/jpg/360px/obs-en-38-15.jpg?direct&)

ፖዖልስና ዬሱሳም ኬ ዬትምሽ ጴጥሮስ ሃልፓ ቴዬትዳቦ ኤዔድናም ሳዓቢ ኪክን ቔዔሽምሽዳብንት ፕክሽዳብት ቓዓሚ ፓክሴ፤ ዬሱስ ሃልፓሃንታም ሾንድንግርኮት ማዓስካ! ኢን ኬ ዳርምቴምሽ ርኬግራንክ ዎዖንይንትካን ይ ኦይዴድናም ክ ኦይቴምሽ እባዓባም ጎይስንቲ ኢን ማማዓዳቔ» ኪን ጋይሴ፤ ኮዖዛንኬሬ ዬሱስ ኤዔሥንት ቓዓምናም ካርንዜን ማዓስንትክ ሃልሽሼ፤ ዬሱሳም ዬዴርታኬት ቡዑር ክት ራቕክ ሙክዳቔድን ሙዳ ሃስትዮ ካዬኬ።

*ማጻዓፕ ጪልንት ኣቴና ማቶስ 26፥14-56፤ ማር14፥10-50፤ ሉቓስ22፥1-5 ዋንስ12፥6፤18፥1-11*

## 39. ዬሱሳም ቤዔርካን ዎይሴርሴ

https://openbiblestories.org/l/aiw/story-39/

![](https://cdn.door43.org/obs/jpg/360px/obs-en-39-01.jpg?direct&)

ታ ጭርና ሶይቲ ካዓስማ ማዓሥንካን ኤዔድናም ሳዓቢ ኪክን ቔዔሽምሽዴድንት ጌሥዳብን ኪም ክ ጎይስቴምሽ ፖዖልስና ዬሱሳም ክራ ዬትዮ ካዬኬ፤ ጴጥሮስ ፔግማ ማዓሦ ቡዑርክት ኬራ ሙክዳቔ፤ ዬሱሳም ኤዔርክት ኬ ኣርሥሳኬንክ ጴጥሮስ ማዓልጎክ ዶዖቕሶ ኖዖ ኦይዼርዳቔ።

![](https://cdn.door43.org/obs/jpg/360px/obs-en-39-02.jpg?direct&)

ኤዬንት ግድር ኣይሁድንት ኤንሥዴድን ዬሱሳም ቤዔርካን ታዓዴኬ፤ ክጎዖክ ታዋሬኮ ናቔሽዴድ ቤድሚ ንቓዓሽ ታዓዴኬ፤ ዳዓኖንምሺ ኬዔዜኔኬት ኪክን ኤዔድምክዬ፤ ካንካን ኣይሁድንት ኤንሥዴድና ዬሱስ ሬይ ሃምንጎኬሬ ባሥቴባብ ማዓትንትንክታም ዶዖፕስንት ኬዔን ማዓትክዬ።

![](https://cdn.door43.org/obs/jpg/360px/obs-en-39-03.jpg?direct&)

ማቕንቴዜኔሬ ኤዔድናም ሳዓቢ ኪክን ቔዔሽምሽዴድንት ጌሥዳብን ዬሱሳም ኡዝሜክ ሼጄትዳቦ «ዎዖን ኬዔስካ ሃዓና ሳዓቢ ሃዓም ሳይሳቓብን ሌፒ ሴጽ ዶዖቕዳብን ሳዓብት ይንሥስናዮ?» ኪን ጋይሴ።

![](https://cdn.door43.org/obs/jpg/360px/obs-en-39-04.jpg?direct&)

ዬሱሴሬ «እትቴ ታ ኮይን ሳዓቢ ኪክን ዶዖቕስቶ ርክርግራንክ እ ሃዓድክ ሼዳዬ» ኪን ጋይሴ፤ ኤዔድናም ሳዓቢ ኪክን ቔዔሽምሽዴድንት ጌሥዳብን ጋዓምክ ኣብሌይንታም ሃእስንትክ ኣቤድን ቡዑድ እዝንትናም ኤንሥዴድንቴን «ኣቤድ ንቓዓሽ ዎዖም ዝክሳዬ! ሳዓብት ይንሥስንቴ ክ ጋዓድክ ዉርስቴቴ ዬ ቤዔርዳክ ሃሬ?» ጋይሶ ኡፕሲ ጫዓጭክ ኬዔዜ።

![](https://cdn.door43.org/obs/jpg/360px/obs-en-39-05.jpg?direct&)

ኤንሥዴድን ሙዴና «ዴእንቲ ኪም ዝክስዴ!» ጋይሶ ኤዔድናም ሳዓቢ ኪክን ቔዔሽምሽዴድንት ጌሥዳብንካን ማዓሲ ኬዔዜኬ፤ ኮዖዛንኬሬ ዬሱስት ኣዓፓም ኦቼኬ፥ ዜንክት ትጽምሴኬ፥ ኪም ግእሴኬ፥ ዜንክት ላጼኬ።

![](https://cdn.door43.org/obs/jpg/360px/obs-en-39-06.jpg?direct&)

ጴጥሮስ ኤዬንት ማዓልጎክ ጶይዜን ክ ዳይክ ኤዬንግር ፕክሽዳቕንዳ ማይንሥ ኪም ሼድንትክ «ሃዓና ዬሱስ ኪክን ሃዓቓዬ!» ኪን ጋይሴ፤ ጴጥሮስ ኮ ኬዔዝዳኬታም ዶዖፕስክዬ፤ ኮዖት ቡዑር ኣብኣክ ማይንሥ ኤዬንግር ፕክሽድንዳ እናማኬትምሽ ኬዔዜ፤ ጴጥሮሴሬ ኣልክምሲ ዶዖፕስክዬ፤ ማቕንቴዜን ኤዔድና «ዬታ ሙዴና ጋልላንክ ዬ ማዓሥንካን ሃዓና ዬሱስ ኪክን ማዓትንትሃንታም ኤሴስዶቴ» ኪን ጋይሴኬ።

![](https://cdn.door43.org/obs/jpg/360px/obs-en-39-07.jpg?direct&)

ኮዖዛንኬሬ ጴጥሮስ «ኤዔሥን ኮባባም እ ኤስድንዳ ማዓሥንክ ሳዓብት ኣሼትና እዜን ኮ ማዓታኔ!» ጋይሶ ጫዓቕሼ፤ ሳዓኔሬ ባዓቻ ቒቕሴ፤ ዬሱሴሬ ዋሌ ጋዓቶ ጴጥሮሳም ሼጄ።

![](https://cdn.door43.org/obs/jpg/360px/obs-en-39-08.jpg?direct&)

ጴጥሮስ ካዬትዳቦ ጋእሻ ኤዔፕሴ፤ ኮዖና ኮይን ማዓድክ ዬሱሳም ዬሥትዮ እምሳቓብን ይሁዳ ኣይሁድንት ኤንሥዴድን ክ ዴእቴምሽ ዬሱስዜን ኬ ቤዔርስምሽ ሼጄ፤ ይሁዳ ኣትርክ ካሌርቶ ካዮ ይካሣም ሮዖክትዮ ዴእሴ።

![](https://cdn.door43.org/obs/jpg/360px/obs-en-39-09.jpg?direct&)

ሼናክንኮቴክ ዣማ ጌልትዜን ኣይሁድንት ኤንሥዴድን ዬሱሳም ሮማ ኤዔድንት ፔጬናም ጌሥዳብን ጵላጦስዳ ኪም ታዓዴኬ፤ ጴላጦስ ዬሱሳም ዳቔልስታባባዬ ኪን ጋዓካንኬ ክዜን ቤዔርካንክ ክ ዴእቴምሽ ማማዓስዴ ጋይሶ ጉሜርዳቔኬ፤ ጵላጦስ ዬሱሴን «ሃዓና ኣይሁድንት ባዓብስናዮ?» ጋይሶ ኪም ጎይሴ።

![](https://cdn.door43.org/obs/jpg/360px/obs-en-39-10.jpg?direct&)

ዬሱስ ኮይን ጋይሶ ኪን ማዓስሴ፤ «ሃዓና ጋይሳዬ ዳይንኬሬ ባዓምእስት ፔጬዜናማ ባዓሚ ዳክዬ፤ ኮይን ማዓዳቕንክ እስት ፕክሽዴድን እካን ዳዓሚ ዶዶብዳቔኬ ሳዓብጎካን ዶዖፔንናም ኬዔዝንትካን ፔጬዜን ሃዓድትቴ፤ ዶዖፔናም ናሽዴድን ሙዳ እራ ኤሴሴርዴኬ፤» ጵላጦሴሬ «ዶዖፔንን ሃሬ?» ጋይሴ።

![](https://cdn.door43.org/obs/jpg/360px/obs-en-39-11.jpg?direct&)

ጵላጦስ ዬሱስ ኪክን ይ ኬዔዝምሳኬት ቡዑር ኤዔድንዳ ዉታቕሴትዳቦ «ኤዔሥን ኮዖት ሃሬሴሬ ባሥክት ሃዓፕክቴ» ጋይሴ፤ ኣይሁድንት ኤንሥዴድንኬ ኤዔድንክ ዳይንክ «ኪም ሮዖኬ!» ጋይሶ ኡፕሲ ጫዓጭክ ኦዖዤኬ፤ ጵላጦስ «ኖዖ ባሥባብ ዳክዬ» ጋይሶ ኬዔን ማዓስሴ፤ ኬታ ዳይንክ ጋዓጺ ኦዖዤኬ ኮዖዛንኬሬ ጵላጦስ ማክምሲ ካርክ «ባሢ ክዜን ዳክዬ!» ጋይሴ።

![](https://cdn.door43.org/obs/jpg/360px/obs-en-39-12.jpg?direct&)

ጵላጦስ ኤዔድና ኦዖዥ ቤሥዴኬ ጋይሶ ጳሼ፤ ካንካን ዬሱሳም ኬ ሮዖክቴምሽ ፖዖልስኔን ኬዔዜ፤ ሮማ ፔጬንት ፖዖልስና ዬሱሳም ቶእሴኬ ዜይምንዳ ኣብሌሬ ኪም ቖፕሴኬ ኣልካ ኡክሜሬ ጋይብቴኮ ማቴዜክት ዎጄኬ፤ ኮዖዛንኬሬ «ኣይሁድ ኤዔንት ባዓብስኔ!» ጋይንትክ ዜንክት ላጼኬ።

*ማጻዓፕ ጪልንት ኣቴና ማቶስ 26፥57-27፥26፤ ምር14፥53-15፥15፤ ሉቓስ 22፥54- 23፥25፤ ዋንስ18፥12-19፥15*

## 40. ዬሱሳም ሮዖኬርስምሽ

https://openbiblestories.org/l/aiw/story-40/

![](https://cdn.door43.org/obs/jpg/360px/obs-en-40-01.jpg?direct&)

ፖዖልስና ዬሱስዜን ኬ ላጻኬት ቡዑር ኪም ሮዖክካን ቴዮ ካዬኬ፤ ኪም ዜን ሮዖኬርዳኬታም ክ ባልቴምሽ ማዓስሴኬ።

![](https://cdn.door43.org/obs/jpg/360px/obs-en-40-02.jpg?direct&)

ፖዖልስና ዬሱሳም «ማቴት ጉስዬ» ጋዓርዳክ ካርንዜን ኪም ታዓዴኮ ኣዓንንክታምኬ ዱዑትንክታምክ ማስቔልንት ዜን ቶሼኬ፤ ዬሱስ ዳይንክ «እባዓቦ ይ ዬይዳኬታም ኬ ኤሳይንካን ኔጋኔ ኬዔን ጋዓካዮ» ጋይሴ፤ ጵላጦስ ጴዔጵንዜን «ኣይሁድንት ባዓብስን» ጋይሴኮ ኬ ክልክቴምሽኬ ዬሱስት ማቴርጎክ ማስቔልንዜን ኬ ዎድቴምሽ ኬዔዜ።

![](https://cdn.door43.org/obs/jpg/360px/obs-en-40-03.jpg?direct&)

ፖዖልስና ዬሱስት ኣብሌንዜን እጣ ዣቕሼኬ፤ ኮዖም ኬ ዬእዳኬንክ «ኣብሌእስታም ካሽምቴኬ፥ ኣብሌእስትዜኔሬ እጣ ዣቕሼኬ» ጋዓዳክ ማዓትካን ዬይዳክ ኬዔዝትናም ኬዔዜናም ቦዖሥሴኬ።

![](https://cdn.door43.org/obs/jpg/360px/obs-en-40-04.jpg?direct&)

ዬሱስ ቓስቴን ቡራ ቡሮ እሥዴድንት ሞልትግር ኪም ሮዖክሴኬ፤ ዎላቓብን ዬሱስዜን ላጼ፤ ኣብባብና ዳይንክ «ሃዓና ሳዓብካን ጳሻያዮ? ዎታ ባሢ ኤዔዶቴ ኤዔሥን ኮና ዳይንክ ባሢ ክዜን ዳክዬ» ጋይሴ፤ ኮዖዛንኬሬ ዬሱሴን «ዋዓዴ ባዓምሃንትግር ኢም ጶቕሽካዮ» ኪን ጋይሴ፤ ዬሱስ ኪን «ክና ሳዓብት ኮርሚ ሃዓምንግር እ ኪክን ማዓዳዬ» ጋይሶ ኪን ማዓስሴ።

![](https://cdn.door43.org/obs/jpg/360px/obs-en-40-05.jpg?direct&)

ኣይሁድንት ኤንሥዴድንቴኬ ኤዔድንቴክ ሞልትግር ሃዓቔድ ኣቤድ ኤዔድን ዬሱስት ዜን ላጼኬ፤ «ሳዓብት ይንሢ ሃ ዳይንክ ማስቔልንዛንክ ሃቻዮ ሃማታም ዻቕሽካ! ኮዖት ቡዑር ሃዜን ቡዑድ እዝዶቴ» ኪን ጋይሴኬ።

![](https://cdn.door43.org/obs/jpg/360px/obs-en-40-06.jpg?direct&)

ጭሪና ሮዖርታ ኮ ማዓድንኬሴሬ ፔጫ ሙዴዜን ርኬና ጋእሻ ዹሚ ማዓሤ፤ ላዓ ጭሪዛንክ ዎልቓንታሜርስ ጭሪክ ኬካ ይ ዹምስምሽ ካፕሴ።

![](https://cdn.door43.org/obs/jpg/360px/obs-en-40-07.jpg?direct&)

ኮዖት ቡዑር ዬሱስ «ቦዖድምሴ! እባዓቦ ኡክናእስታም ኣዓንዛሃንት እምድቴ» ጋይሶ ኡፕሲ ጫዓጭክ ኡዑግምሴ፤ ኮዖዛንኬሬ ማቴይንታም ይርክስ ዬእሴትዳቦ ኡክናይንታም እምሴ፤ ክ ዴእሳኬንክ ፔጫ ሾይሼ፤ ጪሊ ኤዬንግር ሃዓቓክ ኤዔድናም ሳዓብዳ ማሽምናም ፓዓሻቓክ ጋእሻኣክ እቤርሽታ ኣብሌና ፔያንክ ዬዞ ሾኬካ ቓስቴን ካርዜን ሃእሴ።

![](https://cdn.door43.org/obs/jpg/360px/obs-en-40-08.jpg?direct&)

ዬሱስ ይንት ዴእንጎክ ሳዓብዳ ኬ ሃዓድቴምሽ ኤዔድንካን ጎዖጊ ኬዔን ፖዖቻቔ፤ ዬሱሳም ጶይዜን ሃዓቓብን ፖዖልስን ማዓሣቓክ ሬይን ሙዳም ይ ሼጃኬንክ «ዶዖፔን ኮባብ ኤዔሥን ባሥክት ዳክዬ፥ ሳሽብቴሬ ይንሥዬ» ጋይሴ።

![](https://cdn.door43.org/obs/jpg/360px/obs-en-40-09.jpg?direct&)

ኮዖ ጭርንክ ዬሱስ ሳዓቢ ዪም ሳይሳቓብን ማዓትንትንክታም ዶዖፕሳቔድ ቓስቴን ኣይሁድንት ኤንሥዴድን ዬሶፕኬ ኒቔድሞስክ ዬሱስት ሌይስናም ኬዔን እሜርቴምሽ ጵላጦሳም ምክሴኬ፤ ሌይስንክታም ኣብሌክ ኦቼኮ ሴይኒ ላዓላም ጫቕቶ ኡሴርሳቕንዳ ዱዑክግር ኪም ዱዑክሴኬ፤ ኮዖዛንኬሬ ካሪ ሼግናም ዚጽንትካን ዱዑክንት ኡዝሜክ ኣፔናም ሴይኒ ዜን ዛዓክስቶ ዎይሴኬ።

*ማጻዓፕ ጪንት ኣቴና ማቶስ 27፥27-61፤ ማር 15፥16-47፤ ሉቓስ 23፥26-56፤ ዋንስ 19፥17-42*

## 41. ሳዓቢ ዬሱሳም ዱዑክግራንክ ኪም ዻዓስስምሽ

https://openbiblestories.org/l/aiw/story-41/

![](https://cdn.door43.org/obs/jpg/360px/obs-en-41-01.jpg?direct&)

ፖዖልስና ዬሱሳም ይ ሮዖክሳኬት ቡዑር ቡዑድ እዝዴድን ኣይሁድንት ኤንሥዴድን ጵላጦሳም «ታዉዳብስን ዬሱስን ካዓባብ ማክምሲ ሴጽንት ቡዑር ዱዑክግራንክ ዻዻዓምድቴ ጋይሳቔ፤ ክት ራቕክ ሙክዴድና ሌይስንክታም ኬ ዲባይምሽኬ ዱዑክግራንክ ዻዓምቴ ኬ ጋዓይምሽክ ኤስንትካን ኤዔድ ዎላቕባብ ዱዑክናም ጶይንቲ ዝክስዴ» ኪን ጋይሴኬ።

![](https://cdn.door43.org/obs/jpg/360px/obs-en-41-02.jpg?direct&)

ጵላጦስ «ዎላቕ ዎላቕ ፖዖልስናም ቴዬቶ ዱዑክናም ዬዔን ማዓድምሽ ጶዬርቴምሽ ማዓስኬቴ» ኬዔን ጋይሴ፤ ካንካን ዱዑክንግር ኣርዴርዳኬትዳ ዶዖቕዳክ ሴይንንዜን ጴዔጲ ዬሥሴኮ ሌይስንዜክታንም ሃይዬሬ ዲባይምሽ ኤስንትካን ኮዖግር ፖዖልስናም ዎይሴኬ።

![](https://cdn.door43.org/obs/jpg/360px/obs-en-41-03.jpg?direct&)

ዬሱሳም ሮዖኬርዳኬንክ ሳዓብት ሃዉሽ ሴጽን ሃዓቔ፤ ኣይሁድን ኮዖ ሴጽንክ ዱዑክግር ኬ ካይቴምሽ ዝክሳይ ሃዓቔ፤ ካንካን ሃዉሽ ሴጽንት ቡዑር ዣማ ጌልቲ ቤድሚ ማይንሥን ሌይስዜን ዎሽሚ ካይንትካን ዬሱስት ዱዑክንግር ካይካን ኡስምሴኬ።

![](https://cdn.door43.org/obs/jpg/360px/obs-en-41-04.jpg?direct&)

ጶቕሼርክዳክ ጋእሼንዳ ፔጫ ሾይሼ፤ ጳልቕንትምሽ ሻዓክድንዳ ሳዓቢ ርኬግራንክ ዎዖንይንትካን ክ ኦይዳብን ርኬግራንክ ሃዓፔርሴ፤ ዱዑክንት ኣርድንት ካርናም ዚጼርሳቓብን ሴይንስናም ዛዓክሴትዳቦ ዜን ዶዖቕሴ፤ ዱዑክናም ጶይዜን ሃዓቔድ ፖዖልስና ጳሼኮ ዴእቴድ ኤዔድምሽ ማዓሤኮ ፔጬዜን ቡኬልሴኬ።

![](https://cdn.door43.org/obs/jpg/360px/obs-en-41-05.jpg?direct&)

ማዓኔና ዱዑክንዳ ኬ ዣእሻኬንክ ሳዓቢ ርኬግራንክ ዎዖንይንትካን ክ ኦይዳብን «ሃይ ጳሽኬቴ ዬሱስ ኩዑር ዳክዬ፤ ዱዑክግራንክ ዻዻዓምድቴ ጋይስዮ ይ ኬዔዛቕምሽ ዱዑክንግራንክ ዻዓምቴ! ዱዑክናም ሼጄቶ ዶዖፕስኬቴ» ኬዔን ጋይሴ፤ ማዓኔኔሬ ዱዑክንግር ኣርዝዮ ሼድንትክ ዬሱስት ሌይስን ዎዴሻቓኬት ካርናም ሼጄኬ፤ ሌይስንክት ኮዖግር ዳክ ሃዓቔ።

![](https://cdn.door43.org/obs/jpg/360px/obs-en-41-06.jpg?direct&)

ኮዖዛንኬሬ ሳዓቢ ርኬግራንክ ዎዖንይንትካን ክ ኦይዳብን ማዓኔንካን «ካይኬቴ ዬሱስ ዱዑክንግራንክ ዻዓምቴ ዬዔን ብርትዮ ጋሊላ ካይዴ ጋይሴቶ ክት ራቕክ ሙክዴድንቴን ኬዔስኬቴ፤» ኬዔን ጋይሴኬ።

![](https://cdn.door43.org/obs/jpg/360px/obs-en-41-07.jpg?direct&)

ማዓኔና ጳሻሬኬ ጋእሻ ጉሜራሬኮ ማዓቴኬ፤ ክላ ኬዔዛም ክት ራቕክ ሙክዳቔድኔን ኬዔዝንትካን ሃዝምክ ካዬኬ።

![](https://cdn.door43.org/obs/jpg/360px/obs-en-41-08.jpg?direct&)

ማዓኔና ክላ ኬዔዜናም ክት ራቕክ ሙክዴድንቴን ኬዔስካን ሙክንትዜን ኬ ዳይክ ዬሱስ ኬራ ሃዓፕምሴ፤ ኬቴሬ ኪን ጉምፔርሴኬ፥ ዬሱሴሬ «ሃይ ጳሽኬቴ ጋልሌግር ኬ ካይቴምሽ እስት ራቕክ ሙክዴድንቴን ኬዔስኬቴ፤ ኮዖግሬሬ ኢም ሼዴኬ» ኬዔን ጋይሴ።

*ማጻዓፕ ጪልንት ኣቴና ማቶስ 27፥62-28፥15፤ ማር 16፥1-11፤ ሉቓስ 24፥1-12፤ ዋንስ 20፥1-18*

## 42. ዬሱስ ርኬግር ክ ማዓትምሽ

https://openbiblestories.org/l/aiw/story-42/

![](https://cdn.door43.org/obs/jpg/360px/obs-en-42-01.jpg?direct&)

ዬሱስ ዱዑክግራንክ ክ ዻዓምታቓክ ሴጽንክ ክት ራቕክ ሙክዴድንግራንክ ቓስቴኔድን ኡሣ ዶዖቕዳክ ካትሜንግር ካይዳቔኬ፤ ኬ ሙክድኬሬ ዬሱስዜን ዣእሻቓክ ሬይንጎክ ኬዔዝምዳቔ ኖዖ ሳዓቢ ዪም ሳይሳቓብን ክ ማዓሥምሽ ጉሜርዳቔኬ፤ ዳይንኬሬ ኮዖ ሴጼንክ ኪም ዴይሴርሴ ጋዓርዳኬትኬ ታ ማዓኔና ኣልካ ኣዓፔክ ማዓቴ ጋይሴኬ፤ ቓስቴንን ክት ራቕክ ሙክዴድና ይ ቡዑድ እዝዳብናም ኤሳቔኬ።

![](https://cdn.door43.org/obs/jpg/360px/obs-en-42-02.jpg?direct&)

ዬሱስ ኬራ ኡሥቴትዳቦ ኬ ኪክን ሙክንት ዬዜ፤ ኬታ ዳይንክ ኪም ኤሳቔኬ፤ ሬይ ሃራካን ኬ ኬዔዝምዳቕንኬሬ ኬዔም ጎይሴ፤ ኬቴሬ ኣንቓእስ ቶክሚ ሴጽት ብሬዜን ማዓሣቓክ ሪርሽድንዳ ሬይን ሙዴካን ኪን ኬዔዜኬ ዬሩሳሌምግር ማዓሣቓክ ሬይናም ኤሳይባብ ሾዖቺ ኪክን ይ ኬዔዝምድምሽ ጶቕሼኬ።

![](https://cdn.door43.org/obs/jpg/360px/obs-en-42-03.jpg?direct&)

ኮዖዛንኬሬ ዬሱስ ሳዓቢ ዪም ሳይሳቓብንጎክ ኬዔዝዳክ ሳዓብት ኡፕስናም ኬዔን ፕእስትዮ ኬዔዜ፤ ሳዓቢ ዪም ሳይሳቓብን ካልሪ ዜንክት ዣእድምሽኬ ኪም ዴይሴርድምሽክ ዳይንኬሬ ማክምሲ ሴጽንክ ክ ዻዓምድምሽ ሳዓብት ማዓትካን ዬይዳኬታም ኬዔዝዴድን ኬዔዛቓኬታም ኬዔን ጶቕሽሼ፤ ኤዔድን ቓስቴንኔሬ ጌሥካን ይ ዝግዛቓክ ኬትሜንግር ኬ ዣእሻኬንክ ፔጬና ሃክስካን ዬይዳቕንካን፥

![](https://cdn.door43.org/obs/jpg/360px/obs-en-42-04.jpg?direct&)

ኤዔድን ቓስቴንና ኬ ኪክን ክ ጌሣን ዬሱሳም ጎይሴኬ ኖዖሬ ጎይስንኬታም ኤዔእሴ፤ ሶይቲ እሥምካን ኬ ኡስምዳኬንክ ዬሱስ ባልሽናም ቴዮ ሳዓባም ጎዖፕሼ፤ ዜናንኬሬ ባልሽናም ቱርሼ፥ ጶቕሻቕዶቕዶ ዬሱስ ማዓትንትንክታም ኤስቴኬ፤ ዳይንኬሬ ኮዖ ጭርንክ ኖዖ ኬራንክ ኣዓችምሼ።

![](https://cdn.door43.org/obs/jpg/360px/obs-en-42-05.jpg?direct&)

ኤዔድን ቓስቴንና «ዬሱስ ይንትዬ! ሳዓብት ኡፕስናም ዎዖን ፕእስትዮ ክ ኬዔዝዳኬንክ ብዑዴዎንት ዎዖልምድክ ሃዓቓክ ካንካኔ!» ጋይሴኬ፤ ሳዓኔሬ ዬሩሳሌምግር ማዓቴኬ፤ ይ ዣእሻኬንኬሬ ክት ራቕክ ሙክዳቔድንቴን «ዬሱስ ኣዓፔክ ዳዬ! ኪም ሼድቶቴ ጋይሶ ኬዔን ኬዔዜኬ።

![](https://cdn.door43.org/obs/jpg/360px/obs-en-42-06.jpg?direct&)

ክት ራቕክ ሙክዳቔድኔሬ ኬዔዝማሮ ኬ ዳይክ ዬሱስ ኬ ጶቕሽክዳይክ ኬ ሃዓቓክ ኤዬንግር ሞልትግርኬት ሃዓፕርንትክ «ላቕምን ዬዔን ማዓታኔ!» ኬዔን ጋይሴ፤ ክት ራቕክ ሙክዴድኔሬ ማንፔስ ኬ ሼድንዳ ኬዔን ካምሳቔ፤ ዬሱስ ዳይንክ «ሃራካኔ ጳሽዴ፥ ሃራካኔ እቼርዴ? ኣዓንእስታምኬ ዱዑትእስታምክ ሼድኬቴ፤ ማንፔስና እይምሽ ዜኔኬት ዳክዬ» ኬዔን ጋይሴ፤ ማንፔስ ይ ማዓትካኬታም ኬ ዶዖፕስቴምሽ እሥሚ ኪን ኬ እምቴምሽ ኬዔም ጎይሴ፤ ኬቴሬ እሥምኬ ኣሤርቴንዳ ቶይሌክ ኪን ኬ እምስክ እሤ።

![](https://cdn.door43.org/obs/jpg/360px/obs-en-42-07.jpg?direct&)

ዬሱሴሬ «ሳዓብት ኡፕስና እጎክ ክልኬርሳቓክ ሙዳ ቦዖሥምንት ኮዖም ዝክስዴ ጋይስቶ ዬዔን ኬዔስትቴ» ጋይሴ፤ ኮዖ ጭርንክ ሳዓብት ኡፕስናም ኬ ዶዖፕስቴምሽ ማክሣኬታም ኬዔን ፖዖቼ፤ «ሳዓቢ ዪም ሳይሳቓብንዜን ካልሪ ዣእድምሽ፥ ክ ዴእድምሽ፥ ማክምሲ ሴጽንክ ዱዑክግራንክ ክ ዻዓምድምሽ ቤድሚ ቦንት ብሬዜን ክልኬርቴ» ኬዔን ጋይሴ።

![](https://cdn.door43.org/obs/jpg/360px/obs-en-42-08.jpg?direct&)

ኣልክምሲ ክልክሜንግር ዳቔልሲ ኤዔድንቴን ኔጋኔ ጋይንትናም ሃዓፕንትካን ኤዔድ ሙዳ ሳዓብዳ ኬ ማዓቴምሽ እስት ራቕክ ሙክዴድና ኬ ኬዔስቴምሽ ክልኬርቴ፤ ኬታ ዬሩሳሌምዛንክ ዬዞ ኮዖም ዎዖንዴኬ፤ ኮዖዛንኬሬ ካሪ ሙዴዜን ዶዖቕዴድ ኤዔድንዴኬ ሱሴን ሙዴዳ ካይዴኬ፤ ዬቴሬ ሬይን ኬዔኔት ንቓሽእስቴቴ።

![](https://cdn.door43.org/obs/jpg/360px/obs-en-42-09.jpg?direct&)

ኮዛንክ ኦስ ኦይዲ ታም ሴጽንግር ዬሱስ ቤድሚ ካርክ ይንት ራቕክ ሙክዴድንዳ ሃዓፔርሴ! ዶንቕ ማቶ ማዓዴድካን ካሪ ዎላቔክ ሃዓፕምቴ! ኣዓፔክ ክ ማዓሥምሽ ቤድሚ ጎዖግክ ይንት ራቕክ ሙክዴድንቴን ኣይቴር ማዓስሳቔ፤ ሳዓብት ባዓምንጎካኔሬ ኬዔም ኤስስቴ።

![](https://cdn.door43.org/obs/jpg/360px/obs-en-42-10.jpg?direct&)

ዬሱስ ይንት ራቕክ ሙክዴድንቴን ኮይን ኬዔን ጋይሴ፤ «ጋዓንሚ ሙዳ ርኬግርኬ ፔጬዜንክ ኢን እሜርቴ፤ ካንካን ካይኬቴ፥ ኤዔድንቴን ሙዳ ሳዓቢ ባዓቤን፥ ሳዓቢ ይንሥስን፥ ሳዓቢ ማንፔስ ጪልንቴሬ ናዓምክ ኬዔም ሽእሻሬቶ እ ኬዔዛቓኬታም ሙዳ ኬ ቦዖሥቴምሽ ኬዔም ኤስሳሬቶ እስት ራቕክ ሙክዴድ ኬዔም ማዓስኬቴ፤ እታ ፔጬንት ማቕንቴክ ዬካ ሙዳ ሴጽ ዬ ኪክን እ ማዓድምሽ ጶቕሽኬቴ።

![](https://cdn.door43.org/obs/jpg/360px/obs-en-42-11.jpg?direct&)

ዬሱስ ዱዑክግራንክ ክ ዻዓምታኬት ኦይዲ ታም ሴጽንት ቡዑር ይንት ራቕክ ሙክዴድንቴን «ማንፔስ ጪልን ዬዜን ሃዓዳኬንክ እባዓብ ዛምን ዬዔን ክ እምስቴንክ ዬካ ዬሩሳሌምግር ዶዖቕኬቴ» ኬዔን ጋይሴ፤ ኮዖት ቡዑር ዬሱስ ፔስ ርኬግር ኤቤ፤ ሊሌኔሬ ኣዓፕዜንኬታንክ ኪም ኣዓቼ ዬሱስ ፕዥር ሙዴናም ጌሥንትካን ሳዓብት ምዝዜን ዶዖቕሴ።

*ማጻዓፕ ጪልንት ኣቴና ማቶስ 28፥16-20፤ ማር16፥12-20፤ ሉቓስ 24፥13-53፤ ዋን20፥19-23፤ ኦ.ዎ 1፥1-11*

## 43. ምክስ ኤይ ዎእስምሽ

https://openbiblestories.org/l/aiw/story-43/

![](https://cdn.door43.org/obs/jpg/360px/obs-en-43-01.jpg?direct&)

ዬሱስ ርኬግር ክ ማዓታኬት ቡዑር፤ ክት ራቕክ ሙክዴድና ዬሱስ ኬዔን ኬዔዛቓኬትምሽ ዬሩሳሌግር ዶዖቕሴኬ፤ ኮዖግር ሃዓቔድ ቡዑድ እዝዴድና ሳዓባም ምክስንትካን ጋርክዶቕዶ ሱዽምዳቔኬ።

![](https://cdn.door43.org/obs/jpg/360px/obs-en-43-02.jpg?direct&)

ኣይሁድ ኤዔድን ቦንክ ቦንክ ሳዓቢ ሴጽንት ቡዑር ዶዖቕዳክ ዶንቕ ታም ሴጽናም ኮዖኔሬ ጴንጤቖስጤ ጋዓርዳክ ሴጼናም ቦንችዳቔኬ፤ ጴንጤቖስጤ ኣይሁድንት እስን ሱዼርዳኬት ሴጼንክ ቦችዳቔኬ ኣይሁድና ሴጼናም ቦንችትካን ኪክዜን ፔጫ ጎይካንክ ዬሩሳሌግር ሃዓዳቔኬ፤ ኮዖ ቦንንክ ዬሱስ ርኬግር ክ ኤባኬት ማዓሪ ዎላቕ ማዓዳኬት ቡዑር ጴንቴቖስቴ ሴጽና ዣእሼ።

![](https://cdn.door43.org/obs/jpg/360px/obs-en-43-03.jpg?direct&)

ቡዑድ እዝዴድን ሙዳ ኪክዜን ሱዽምስዮ ኬ ዳይክ ጶቕሼርክዳይክ ኬ ሃዓቓክ ኤዬና ሬይ ኡፕሲ ኤስምድምሽንዳ ጋእሼንዳ ዦጌክ ጾዖጼ፤ ኮዖዛንኬሬ ቡዑድ እዝዴድን ሙዴንት ማቴዜን ኖዖት ዞዖጳ ካምድንዳ ሬይ ሃዓፔርሴ፤ ሙዴኔሬ ማንፔስ ጪልንክ ጾዖጼኮ ጋላ ጋሌንዳ ኣፔክ ኬዔዛ ዬዜኬ።

![](https://cdn.door43.org/obs/jpg/360px/obs-en-43-04.jpg?direct&)

ዬሩሳሌግር ሃዓቔድ ኤዔድና ኡፕስናም ይ ኤሴርታኬንክ ሬይን ማዓዳኬታም ሼድንትካን ቤድሚ ሃዓዴኬ፤ ቡዑድ እዝዴድና ሳዓብት ሪርሽድንዳ ዎዖንናም ኬ ኬዔዝድክ ኤዔድና ይ ኤሴርታኬንክ ኬዔና ሬይናም ኬ ይንትት ኣፔክ ኤስርንትይንቴክ ሪርቴኬ።

![](https://cdn.door43.org/obs/jpg/360px/obs-en-43-05.jpg?direct&)

ኤዔድን ባግና ኤዔድን ኬዔና ጎዖሽቴኬ ጋይሶ ኬዔን ካንቼኬ፤ ዳይንኬሬ ጴጥሮስ ዻዓምቴትዳቦ ኮይን ኬዔን ጋይሴ፤ «እራ ኤሴርኬቴ! ኬዔና ኤዔድና ጎዖሽኬኬ! ሳዓቢ ማዓትካን ዬይዳኬታም ኬዔዝዳብን እዮኤል <ማቕንታ ሴጽንክ ማንፔስእስታም ኤዔድንዜን ላልድቴ!> ክ ጋይሳቓክ ማዓትካን ዬይዳኬት ኬዔዜና ኮዖክ ቦዖድምዴ።

![](https://cdn.door43.org/obs/jpg/360px/obs-en-43-06.jpg?direct&)

«ዬ እስራኤል ኤዔድኖ ዬታ ዬ ሼጅምሽኬ ብሬዜኔሬ ዬ ኤስድምሽክ ዬሱስ ሳዓብት ዛምክ ቤድሚ ሪርሽድንዳ ሬይናም ዎዖንሳቓብ ኤዔዴ፤ ዳይንኬሬ ዬታ ኪም ዱዑክሴቴ።»

![](https://cdn.door43.org/obs/jpg/360px/obs-en-43-07.jpg?direct&)

«ዬሱስ ዴእስንኬሴሬ ሳዓቢ ኪም ዱዑክግራንክ ዻዓስሴ፤ ኮዖኔሬ <ጪልስናም ክ ጫፕቴምሽ ዱዑክግር ኪም ጋራያዬ> ጋዓዳክ ማዓትካን ዬይዳኬት ኬዔዜንት ቦዖድምንትኔ፤ ሳዓቢ ዬሱሳም ኣዓፔካምባብ ኪም ማዓስሶ ክ ዻዓስስምሽ ዎታ ንቓሾቴ።

![](https://cdn.door43.org/obs/jpg/360px/obs-en-43-08.jpg?direct&)

«ዬሱስ ታ ሳዓቢ ባዓቤንት ምዝዜን ጼካ ካርዜን ዳዬ፤ ኣልክምሲ ዬሱስ ብሬዜን ይ ኬዔዛቓክ ጉሜርንምሽ ማንፔስ ጪልናም ኦይቴ፤ ታ ኬዔና ዬ ሼዴድናምኬ ዬ ኤሴርዴድ ሬይናምክ ዎዖንሳቓብን ማንፔስ ጪልዬ።

![](https://cdn.door43.org/obs/jpg/360px/obs-en-43-09.jpg?direct&)

«ዬሱስን ኮዖባባም ሮዖክሴቴ፤ ዳይንኬሬ ሳዓቢ ዬሱሳም ባዓቤኬ ሳዓቢ ዪም ሳይሳቓብን ኪም ክ ማዓስሳቕምሽ ዶዖፔን ኤስኬቴ።

![](https://cdn.door43.org/obs/jpg/360px/obs-en-43-10.jpg?direct&)

ጴጥሮስዳ ኤስርዜን ሃዓቔድ ኤዔድና ክ ኬዔዝዳክ ኬዔዜንክ ቡዑዴኬት ጋእሻ ዎዖልምሴ፤ ካንካን ጴጥሮሳምኬ ዬሱስት ራቕክ ሙክዳቔድናም «ዎንድፕስኬሶ ዎታ ሃሮ ዬይቴ!» ጋይሶ ኬዔም ጎይሴኬ።

![](https://cdn.door43.org/obs/jpg/360px/obs-en-43-11.jpg?direct&)

ጴጥሮሴሬ ኮይን ጋይሶ ኬዔን ማዓስሴ፤ «ሳዓቢ ዳቔልስዬንታም ኔጋኔ ዬዔን ክ ጋዓቴምሽ ዬታ ሙዴና ሳዓብዳ ማዓቴቶ ዬሱስ ክርስቶስዜን ቡዑድ እዝንትክ ሼርኬቴ፤ ኮዖት ቡዑር ኖዖ ዬዔን ማንፔስ ጪልንት እሜናም ታዓሬ ዬዔን እምምዴ።»

![](https://cdn.door43.org/obs/jpg/360px/obs-en-43-12.jpg?direct&)

ማኬን ሺ ማዓዴድ ኤዔድና ጴጥሮስ ኬዔዛቓኬታም ዶዖፕሴኮ ቡዑድ እዝንትክ ዬሱስት ራቕክ ሙክዴድ ማዓሤኬ፤ ኬታ ሽኤርሼኮ ዬሩሳሌግር ዶዖቕዳክ ምክስ ኤይንት ዋዓር ፓይድምሴኬ።

![](https://cdn.door43.org/obs/jpg/360px/obs-en-43-13.jpg?direct&)

ዬሱስት ራቕክ ሙክዴድን ጋርክዶቕዶ ኦይቴርቴድንት ኤስንትናም ኤሴርሴኬ፤ ኪክን ዎላቕ ማዓሦ ዶዖቕንትክ ኪክን እሥዳቔኬ ዎላቓብና ኣባብንካን ምክስዳቔኬ ኪክን ሳዓባም ጎዖፕሽዳቔኬ ይንት ዶዖቕድንዳ ሬያም ሙዳ ኪክ ኪክን ካሽምዳቔኬ፤ ኤዔድን ሙዴኔሬ ኬ ጎዖካን ላቕምንዳ ሬያም ጶቕሽዳቔ ሴጻ ሙዴክ ቤድሚ ኤዔድን ቡዑድ እዝዳቔኬ።

*ማጻዓፕ ጪልንት ኣቴና ኦይ. ዎ. 2*

## 44. ጴጥሮሳምኬ ዋንሳምክ ምክስዳቓብን ኤዔሥንት ማንፔስና

https://openbiblestories.org/l/aiw/story-44/

![](https://cdn.door43.org/obs/jpg/360px/obs-en-44-01.jpg?direct&)

ሴጻ ዎላቕ ጴጥሮስኬ ዋንስክ ምክስ ኤይግር ካይዳቔኬ፤ ምክስ ኤይንት ማዓልንግር ኬ ዣእድንክ ሶሊ ምክስዳብ ኤዔድ ዎፕቴባብ ዎላቓባም ሼጄኬ።

![](https://cdn.door43.org/obs/jpg/360px/obs-en-44-02.jpg?direct&)

ጴጥሮሴሬ ዎፕቴባብናም ሼጄትዳቦ «ዎ ሃዓን እምድንዳ ሶሊ እራ ዳክዬ እራ ዶዖቕዳኬታም ሃዓን እምምድቴ ዬሱስት ናዓምክ ዻዓምታዮ ኡንግካ!» ኪን ጋይሴ።

![](https://cdn.door43.org/obs/jpg/360px/obs-en-44-03.jpg?direct&)

ሳዓኔሬ ሳዓቢ ዎብንባባ ኤዔሥናም ሃልሽሼ፤ ኖዖሬ ኡንግንትኬ ጎቤክ ሳዓባም ጎዖፕሺ ዬዜ፤ ምክስ ኤይንት ጉርዴን ዋዓር ሃዓቔድ ኤዔድና ሪርቴኬ።

![](https://cdn.door43.org/obs/jpg/360px/obs-en-44-04.jpg?direct&)

ኤዔድኔሬ ሃልሻቓብ ኤዔሥናም ሼድንትካን ሳዓና ሱዽምሴኬ፤ ጴጥሮሴሬ ኮይን ኬዔን ጋይሴ፤ «ኤዔሥን ኮና ክ ሃልሽንካን ሃራካኔ ሪርዴ? ዎንት ዛምክ ዋይ ዎንት ላቕምክ ኪም ሃልሽሽኮቴ፤ ጋዓጼሬ ኤዔሥን ኮባባም ሃልሽሻቓብን ዬሱስት ዛምኬ ዬሱስ ኪን እምሳቓክ ቡዑድ እዝንትንኬ።»

![](https://cdn.door43.org/obs/jpg/360px/obs-en-44-05.jpg?direct&)

«ዬሱሳም ክ ዴይስቴምሽ ሮማ ፔጭንት ባዓብስኔን እምሳቔድን ዬቴ፤ ኡክኔት ዬድኔስናም ዴይሴቴ፤ ሳዓቢ ዳይንክ ኪም ዱዑክግራንክ ዻዓስሴ፤ ዬ ዬይዳቓክ ሬይን ኣይቴር ዬዔን ማዓትክንኬሴሬ ሳዓቢ ዪም ሳይሳቓብን ካልሪ ክዜን ዣእቴምሽኬ ክ ዴእድምሼሬ ማዓትካን ዬይዳኬታም ኬዔዝዴድንት ኬዔዜን ቦዖድቴምሽክ ሳዓቢ ዎዖንዬንቴክ ካንክ ቦዖሥሴ፤ ካንካን ዳቔልስዬንታም ዬዔን ኔክሼርቴምሽ ታ ሳዓብዳ ማዓቴቶ ኔጋኔ ጋይንትናም ቴይኬቴ።

![](https://cdn.door43.org/obs/jpg/360px/obs-en-44-06.jpg?direct&)

ጪሊ ኤዬንት ጌሥዴድና ጴጥሮስኬ ዋንስክ ኬ ኬዔዝዳቓኬትክ ጋእሻ ምዼርሴኬ፤ ካንካን ኬዔም ዬቴኮ ዻክሪ ኤዔር ኬዔም ዻክስሴኬ፤ ዳይንኬሬ ቤድሚ ኤዔድና ጴጥሮስት ኬዔዜናም ዶዖፕስንትክ ቡዑድ እዜኬ ዬሱስክ ቡዑድ እዜድንት ፓይዴና ዶንቕ ሺ ማዓሤኬ።

![](https://cdn.door43.org/obs/jpg/360px/obs-en-44-07.jpg?direct&)

ሼናክንኮቴክ ኣይሁድንት ኤንሥዴድን ጴጥሮሳምኬ ዋንሳምክ ኤዔድናም ሳዓቢ ኪክን ቔዔሽምሽዴድንት ጌሥዳብንዴኬ ኣቤድን ቡዑድ እዝንትናም ኤንሥዴድንዴክ ኬዔም ታዓዴሬ፤ ጴጥሮሴንኬ ዋንሴንክ «ኤዔሥን ዎብባብን ኮዖም ሃራ ዛሜንቴኬ ኪም ሃልሽሼ?» ጋይሶ ኬዔም ጎይሴኬ።

![](https://cdn.door43.org/obs/jpg/360px/obs-en-44-08.jpg?direct&)

ጴጥሮሴሬ ኮይን ጋይሶ ኬዔን ማዓስሴ፤ «ኤዔሥን ኮና ሳዓቢ ዪም ሳይሳቓብን ዬሱስት ዛምክ ሃልሾ ብሬዜዬንት ዎእቴ፤ ዬታ ዬሱሳም ሮዖክሴቴ ሳዓቢ ዳይንክ ኣልክምሲ ኪም ዱዑክግራንክ ዻዓስሳቔ! ዬታ ኪም ቴይኬቴ፤ ዳይንኬሬ ዬሱስት ዛምክ ማዓትክንክ ካይሳ ኣብ ዻቕንትት ጎዖጊ ዳክዬ!»

![](https://cdn.door43.org/obs/jpg/360px/obs-en-44-09.jpg?direct&)

ጴጥሮስኬ ዋንስክ ጋእሻ ዛምክ ኬዔዝንትንኬቴክ ኬዔና ኤንሥዴድና ሪርቴኬ፤ ሃራካኔ ጋዓርስንክ ኬዔና ኤዔድና ኤስንትንት ዳኬድ ኬ ማዓሥምሽ ሼድታ ሃዓቔኬ፤ ዳይንኬሬ ኮዖ ጭርንክ ኬዔና ኤዔድና ዬሱስ ኪክን ኬ ሃዓቕምሽ ጶቕሽቴኬ፤ ጴጥሮሳምኬ ዋንሳምክ ይ ጳሽሻኬት ቡዑር ኬ ካይቴምሽ ጋርሼኬ።

*ማጻዓፕ ጪልንት ኣቴና ኦይ. ዎዖኒ3፥1-4፤22*

## 45. 45  ፕልጶስኬ ኢቶጳ ኤዔድንት ጋዓኔስንክ

https://openbiblestories.org/l/aiw/story-45/

![](https://cdn.door43.org/obs/jpg/360px/obs-en-45-01.jpg?direct&)

ኤናማክ ምክስ ኤይንግር ዶዖቕዳቔድ ኤንሥዴድንግራንክ ዎላቓብን እስጥፓኖስ ዪም ጋዓርዳብ ኤዔድ ሃዓቔ፤ ኖዖ ላቕማይስንዳ ናዓምንት ዶዖቕዳብኬ ማንፔስ ጪልን ይንክ ጾዖጻቓብ ኤዔድ ሃዓቔ፤ እስጥፓኖስ ቤድሚ ክላ ሬይናም ዎዖንሳቓብኬ ኤዔድኔሬ ዬሱስክ ቡዑድ ኬ እስቴምሽ ዶዖፕስስድንዳ ኬዔዛም ኤስስዳብ ኤዔድ ሃዓቔ።

![](https://cdn.door43.org/obs/jpg/360px/obs-en-45-02.jpg?direct&)

ሴጻ ዎላቕ እስጥፓኖስ ዬሱስጎካን ክ ኤስስዳኬንክ ዬሱስክ ቡዑድ እዝኬድ ኣይሁድ ኤዔድና እስጥፓኖስ ኪክን ሜርምዳቔኬ፤ ጋእሻ ጋዓምሴኮ ቡዑድ እዝንትናም ኤንሥዴድንቴን ታውንትክ ኬዔዜኬ፤ «ሙሳጎካንኬ ሳዓብጎካንክ ዳቕሊ ሬያም ክ ኬዔዝድክ ኤሴርቶቴ!» ጋይሴኬ፤ ካንካን ቡዑድ እዝንትናም ኤንሥዴድን እስጥፓኖሳም ዬቴኮ ኣልክምሲ ጉጄክ ታዉንትክ ናቓሽዴዳም እስጥፓኖስዜን ዝግንትክ ኤዔድናም ሳዓቢ ኪክን ቔዔሽምሽዴድንት ጌሥዳብንዴኬ ኣቤድን ኣይሁድ ኤዔድንት ኤንሥዴድንዴክ ኪም ታዓዴኬ።

![](https://cdn.door43.org/obs/jpg/360px/obs-en-45-03.jpg?direct&)

ኤዔድናም ሳዓቢ ኪክን ቔዔሽምሽዴድንት ጌሥዳብና እስጥፓኖሳም «ኬዔና ሬይና ዶዖፔኖ?» ጋይሶ ኪም ጎይሴ፤ እስጥፓኖሴሬ ኣብራምት ቦንንዛንክ ዬዞ ዬሱስ ቦንንክ ዬካ ዶዖቕዳክ ሳዓቢ ዎዖንሳቓኬታም ቤድሚ ሪርሽድንዳ ሬይናም ኮዖኔሬ ሳዓቢ ኤዔድን ካርክ ካርክ ክካን ኤዔእክስ ጋርንትንኬታም ጶቕሽሽንትክ ማዓስናም ኬዔዜ፤ ኮዖዛንኬሬ ኮይን ኬዔን ጋይሴ፤ «ዬታ ቡዑዴንት ጫልሽታቔድ ኤዔኣዬድ ኤዔድኖ ኤና ኣዓኬዬንትምሽ ሳዓባም ይዥዴድንኬ ክት ማዓትካን ዬይዳኬታም ኬዔዝዴድናም ዴይሳቔድንምሽ ሙዳ ሴጽካን ማንፔስ ጪላም ይዥዴዴቴ፤ ዬታ ዳይንክ ኬዛንክ ጋዓጽንዳ ሬይ ዎዖንቴቴ፤ ሳዓቢ ዪም ሳይሳቓብናም ዴይስቴቴ።

![](https://cdn.door43.org/obs/jpg/360px/obs-en-45-04.jpg?direct&)

ቡዑድ እዝንትናም ኤንሥዴድን ኮዖም ኬ ኤሴርታኬንክ ቓዓምይንታም ይ ቱዑንስቴንዴትክ ኡፕሲ ጫዓጭክ ይ ኡዑግምስቴንክ ዬካ ጋእሻ ጋዓምሴኬ፤ እስጥፓኖሳም ካትሜንት ማዓልጎክ ጎችቴኮ ኪም ዴይስንትካን ሴይንክ ጎዖዜኬ።

![](https://cdn.door43.org/obs/jpg/360px/obs-en-45-05.jpg?direct&)

እስጥፓኖስ ዴእ ይራ ዣእሽክ «ባዓባ ዬሱሶ ኡክንእስታም ቴይካዮ» ጋይሶ ኡዑግምሴ፤ ኮዖዛንኬሬ ቦቕንቴክ ጉምፔርሶ «ባዓቦ ኮዖም ዳቔልሲ ዜንኬት ሃይ ፓይድካዮ» ጋይሶ ኣልክምሲ ኡዑግምሴ፤ ኮዖት ቡዑር ዴእሴ።

![](https://cdn.door43.org/obs/jpg/360px/obs-en-45-06.jpg?direct&)

ሳዉል ዪም ጋዓርዳብ ኣግልባብስን እስጥፓኖሳም ዴይሳቔድ ኤዔድን ኪክን ኤዔድምቴባብኬ ዜንክት ሴይንን ዣቔርዳኬንክ ኤዔድንት ኣብሌናም ጶይዳቓብ ሃዓቔ፤ ኮዖ ሴጽንክ ዬሩሳሌግር ሃዓቔድ ቤድሚ ኤዔድና ዬሱስት ራቕክ ሙክዴድናም ዳዓና ዬዜኬ፤ ካንካን ቡዑድ እዝዴድና ፔጫ ኣብንዳ ካርግር ሃዝዮ ካዬኬ፤ ዳይንኬሬ ዳዓርን ዶዖቕድንኬሴሬ ይ ካያክ ካሪ ሙዴዜን ዬሱስጎካን ሳንሴኬ።

![](https://cdn.door43.org/obs/jpg/360px/obs-en-45-07.jpg?direct&)

ፕልጶስ ጋዓርዳብ ኤዔድ ዬሱስት ራቕክ ሙክዳብ ዳዓርን ሴጽንክ ዬሩሳሌማንክ ሃዛቔድ ቡዑድ እዝዴድንግራንክ ዎላቓብን ሃዓቔ፤ ሴማራ ፔጭግር ካይንትክ ዬሱስጎካን ክ ሳንዳኬንክ ቤድሚ ኤዔድን ቡዑድ እዝንትክ ዻቔኬ፤ ኮዖት ቡዑር ሴጻ ዎላቕ ሳዓቢ ርኬግራንክ ዎዖንይትካን ክ ኦይዳብን ፔጫ ጉርንግር ዶዖቕዳክ ካሪ ዎላቕግር ክ ካይቴምሽ ፕልጶሴን ኬዔዜ፤ ፕልጶሴሬ ጎዖግናም ክ ካይድክ ዎላቕ ኤስምቴባብ ኢቶጳ ኤዔድ ጋዓንምንት ዶዖቕዳብ ኡክሊ ፓሬስ ጎችዳክ ዚጌዜን ዶዖቕሶ ክ ካይድክ ኪም ሼጄ፤ ኤዔሥን ኮዖባብዳ ካዮ ኪም ክ ኬዔስስቴምሽ ማንፔስ ጪልና ፕልጶሴን ጶቕሽሼ።

![](https://cdn.door43.org/obs/jpg/360px/obs-en-45-08.jpg?direct&)

ፕልጶስ ኡክሊ ፓሬስን ጎችዳክ ዚጌንዳ ክ ኡሥምዳኬንክ ኢቶጳ ኤዔሥና ማዓትካን ዬይዳኬታም ኬዔዝዳብን እሳስት ክልክኔናም ክ ጎስትክ ኤሴርሴ፤ ኤዔሥኔሬ ኮይን ጎስትሴ «ዪም ቴቼርዳብ ቖልምሽ ኪም ቤይሴኬ ቖልኔሬ ጫሜ ጋዓድምሽ ዎላቔሬ ሬይ ኬዔስክዬ፤ ቤዔሪ ሴጽንካን ኪም ቴዬሬ ኪም ቦንችኬኬ ኣዓፔክ ዶዖቕዴድንት ፔጬንግራንክ ኪም ካይሴኬ።»

![](https://cdn.door43.org/obs/jpg/360px/obs-en-45-09.jpg?direct&)

ፕልጶስ ኢቶጳ ኤዔሥናም «ሃ ጎስትዳኬታም ሜይስዳዮ?» ጋይሶ ኪም ጎይሴ፤ ኤዔሥኔሬ «ኣዓይዬ ኢን ኣይቴር ማዓስዳብ ኤዔድ ዳክዳይክ ሜይስንትካን ኢን ማዓሥቴሮ ዋዓዴ ሃዓዳዮ እራ ኤቴር ዶዖቕካ እሳስ ክልክሳቓክ ይማትካኖ ዋይ ኣብባብ ኤዔድካኖ?»

![](https://cdn.door43.org/obs/jpg/360px/obs-en-45-10.jpg?direct&)

እሳስ ክልክሳቓክ ዬሱስጎካን ማዓትንትናም ፕልጶስ ኢቶጳ ኤዔሥንካን ፔናክስትዮ ኬዔዜ፤ ታዓሬ ፕልጶስ ዬሱስጎካን ይ ኬዔዝዳክ ክላ ኬዔዜናም ኬዔዝንትካን ኣቤድን ሳዓብት ኡፕስንግራንክ ጎስትሴ።

![](https://cdn.door43.org/obs/jpg/360px/obs-en-45-11.jpg?direct&)

ፕልጶስኬ ኢቶጳ ኤዔሥንክ ኬ ሙክድክ ኖቓ ዶዖቕድንዳ ካርግር ዣእሼኬ፤ ኢቶጳ ኤዔሥኔሬ «ኩዑር ኖቓ ዶዖቔ! ካርቴንክ እ ሽእራኖ?» ጋይሴ፤ ዚጌናም ቤይዳብስንቴን ክ ዎይስቴምሽ ኬዔዜ።

![](https://cdn.door43.org/obs/jpg/360px/obs-en-45-12.jpg?direct&)

ካንካን ኖቔንግር ሃቼኬ፤ ፕልጶሴሬ ኢትጳ ኤዔሥናም ካርቴንክ ሽእሼ፤ ኖቔንግራንክ ኬ ዉታቕስንዴት ቡዑር ማንፔስ ጪልና ጶቕሼርክዳይክ ፕልጶሳም ካሪ ኣብግር ዻዓስትዮ ካዬዬ፤ ዬሱስጎካን ኤዔድኔን ኬዔዝንትናም ዬዜ።

![](https://cdn.door43.org/obs/jpg/360px/obs-en-45-13.jpg?direct&)

ኢቶጳ ኤዔሥን ዬሱሳም ኤስንትይንቴክ ጉምራሮ ፔጬግርንት ሙክንትይንታም ዬዜ።

*ማጻዓፕ ጪልንት ኣቴና ኦይ. ዎ.6፥8-85፤ 8፥25-40፤*

## 46. ጳውሎስ ቡዑድ እዝምሽ

https://openbiblestories.org/l/aiw/story-46/

![](https://cdn.door43.org/obs/jpg/360px/obs-en-46-01.jpg?direct&)

ሳዉል እስጥፓኖሳም ዴይሳቔድ ኤዔድንት ኣብላም ጶይዳቓብ ሼኬን ሃዓቔ፤ ዬሱስዜን ቡዑድ እዛቕዬ፤ ካንካን ቡዑድ እዝዴድናም ዳዓዳቔ ኣንግኔናምኬ ማዓኔናምክ ዬትዮ ዻክር ኤዔር ታዓድንትካን ዬሩሳሌምግር ኤዬግራንክ ኤዬግር ካይዳቔ፤ ኤዔድናም ሳዓቢ ኪክን ቔዔሽምሽዴድንት ኤንሥዳብን ኮዖግር ዶዖቕዴድ ቡዑድ እዝዴድናም ክ ዬድቴምሽኬ ዬሩሳሌምግሬሬ ኬዔም ክ ታዓድቴምሽ ዴማስቓ ካትሜንግር ክ ካይቴምሽ ኪም ኦይቴርሴ።

![](https://cdn.door43.org/obs/jpg/360px/obs-en-46-02.jpg?direct&)

ሳዉል ዴማስቔግር ሙክንትዜን ክ ዳይድክ ርኬግራንክ ጋእሻ ጻልጵድንዳ ሻዓክሚ ሼዔጌክቴክ ሙዳ ሻዓክሼ፤ ኖዖሬ ፔጬዜን ቡኬልሴ ኤዔድ ዎላቕባብ «ሳዉል! ሳዉል! ሃራካና ኢም ዳዓዴ?» ክ ጋዓድክ ኤሴርሴ፤ ሳዉሌሬ «ባዓቦ ሃዓና ሃይዬ?» ጋይሶ ጎይሴ፤ ዬሱሴሬ ኮይን ጋይሶ ማዓስሴ፤ «እታ ዬሱስቴ ሃዓና ኢም ዳዓዳዬ!» ጋይሶ ኪን ማዓስሴ።

![](https://cdn.door43.org/obs/jpg/360px/obs-en-46-03.jpg?direct&)

ሳዉል ክ ዻዓምዳኬንክ ኣዓፕክት ሼዳይቴ ጋይሴ፤ ቤዔልሥስኬሴሬ ዴማስቔግር ኤንሥትዮ ኪም ዣእሼኬ፤ ሳዉል ሴጻ ማኬንካን ሃሬሬ እሥክዬ ዎጭክዬ።

![](https://cdn.door43.org/obs/jpg/360px/obs-en-46-04.jpg?direct&)

ዴማቔግር ሃናን ዪም ጋዓርዳብ ዬሱስት ራቕክ ሙክዳብ ሃዓቔ፤ ሳዓቢ ሃናንካን «ሳዉል ዶዖቕዳክ ኤዬንግር ካይካ ኣልክምሲ ክ ሼድቴሽ ኣዓንሃንታም ዜንክት ዎትካ» ኪን ጋይሴ፤ ሃናንያ ዳይንክ «ባዓቦ ኤዔሥን ኮዖና ቡዑድ እዝዴድናም ሃስን ክ ዳዓዳቕንኬሬ ኤሴርትቴ» ጋይሴ፤ ሳዓቢ ዳይንክ «ካይካ! ኣይሁድ ኤዔድንካንኬ ኣቤድ ኤዔድንግራንክ ማዓሣቔድ ኤዔዴንካን ናዓምእስትካን ክ ኬዔስቴምሽ ኪም እድትቴ፤ ናዓምእስትካን ቤድሚ ካልራም ቴይዴ» ኪን ጋይሴ።

![](https://cdn.door43.org/obs/jpg/360px/obs-en-46-05.jpg?direct&)

ካንካን ሃናንያ ሳዉልዳ ካዬ፤ ኣዓንንታም ዎጄ ኮይኔሬ ኪን ጋይሴ፤ «ኩዑር ሃ ሃዓድክ ሃራ ሃዓፔርሳቓብን ዬሱስ ኣልካ ሃ ሼድቴምሽኬ ማንፔስ ጪልክ ሃ ጾዖጽቴምሽ ሃራ ኢም ኦይሣቔ» ሳዉሌሬ ሳዓና ሼጄ ሃናኔሬ ኪም ካርቴንክ ሽእሼ፤ ኮዖት ቡዑር ሳዉል እሥሚ እሥዮ ዛብዜ።

![](https://cdn.door43.org/obs/jpg/360px/obs-en-46-06.jpg?direct&)

ሳዉል ሳዓና «ዬሱስ ሳዓብት ይንሥዬ!» ጋይንትክ ዴማስቔግር ሃዓቔድ ኣይሁድንካን ሳን ዬዜ፤ ኣይሁድ ኤዔድና ቡዑድ እዝዴድናም ካይስካን ዝግዳቓብ ኤዔሥን ታ ዬሱስክ ቡዑድ እዝንትንክቴክ ሪርቴኬ! ሳዉል ዬሱስ ሳዓቢ ዪም ሳይሳቓብን ማዓትንትንክታም ዶዖፕስንትክ ኣይሁድ ኤዔድናም ቡዑድ ኬ እስቴምሽ ማዓስሴ።

![](https://cdn.door43.org/obs/jpg/360px/obs-en-46-07.jpg?direct&)

ቤድሚ ሴጽት ቡዑር ኣይሁድ ኤዔድና ሳዉላም ዴይስካን ጶቕሼኬ፤ ኪም ይ ዴይስቴምሽ ካትሜንት ፑልቴንዜን ጶይዴድ ኤዔድናም ኦይሤኬ፤ ዳይንኬሬ ሳዉል ጶቕሽንኬታም ኤሴርሴ፤ ቤዔልሥኬሴሬ ክ ዬድምታክምሽ ኪም ኬልሼኬ ሶይቲ ዎላቔክ ዳቼግር ኪም ዎድቶ ካትሜንት ጉርዳ ማትክ ሃችሼኬ፤ ሳዉል ዴማስቔግራንክ ይ ዻቓኬት ቡዑር ዬሱስጎካን ሳንንትናም ጋርክዬ።

![](https://cdn.door43.org/obs/jpg/360px/obs-en-46-08.jpg?direct&)

ሳዉል ዬሱስት ራቕክ ሙክዴድን ኪክን ማሽምንትካን ዬሩሳሌምግር ካዬ፤ ኬታ ዳይንክ ክካን ጳሼኬ ኮዖ ሴጽንክ ባርናባስ ጋዓርዳብ ቡዑድ እዝዳብ ሳዉላም ቡዑድ እዝዴድንዳ ኪም ታዓድንትክ ሳዉል ዴማስቔግር ሃስን ዛምክ ክ ሳንድምሽ ኬዔን ኬዔዜ፤ ኮዖት ቡዑር ዬሱስት ራቕንክ ሙክዴድና ኪም ይራ ማዓስቴኬ።

![](https://cdn.door43.org/obs/jpg/360px/obs-en-46-09.jpg?direct&)

ዬሩሳሌምግር ሃዓቓክ ዳዓርንዛንክ ሃዛቔድ ኤዔድን ቡዑድ እዝዴድና ኣንጾካግር ፔግምስዮ ካዬኮ ዬሱስጎካን ሳንሴኬ፤ ኣንጾካግር ሃዓቔድ ቤድሚ ኤዔድና ኣይሁድ ዳካቔኬ ዳይንኬሬ ብሬዜን ጋእሻ ቡዑድ እዝዴድ ማዓሤኬ፤ ባርናባስኬ ሳዉልክ ኬዔና ክላ ቡዑድ እዝዴድናም ጉጅሽዮ ዬሱስጎካን ኬዔም ኤስንትካንኬ ምክስ ኤይናም ዛፕስንትካን ኮዖግር ካዬኬ፤ ዬሱስዜን ቡዑድ እዝዴድን ብሬዜን ኣንጾካግር «ቡዑድ እዝዴድ» ኬዔም ጋዓርሴ።

![](https://cdn.door43.org/obs/jpg/360px/obs-en-46-10.jpg?direct&)

ሴጻ ዎላቕ ኣንጾካግር ዶዖቕዳቔድ ቡዑድ እዝዴድን እሥክስኬ ዎጭክስክ ዶዖቕንትክ ምክሳሮ ኬ ዳይክ ማንፔስ ጪሊ «እ ኬዔም ኤዔልሳቓክ ዎዖንናም ኬ ዎዖንቴምሽ ባርናባሳምኬ ሳዉላምክ ኢን ኬዔም ፓዓሽኬቴ» ኬዔን ጋይሴ፤ ካንካን ኣንጾካ ምክስ ኤይንግር ፕክሽዳቔድ ባርናባሳምኬ ሳዉላምክ ኬካን ምክሴኮ ኣዓንንታም ዜንኬት ዎጄኬ፤ ኮዖዛንኬሬ ኣቤድ ካርንግር ዬሱስጎካን ኬዔዝዳክ ሳዓብት ኡፕስናም ኬ ሳንቴምሽ ኬዔም ኦይሤኬ፤ ባርናባስኬ ሳዉልክ ጋላ ጋሌድ ኤዔድንኬ ኣቤድንካን ኤስሴኬ፤ ቤድሚ ኤዔድኔሬ ዬሱስዜን ቡዑድ እዜኬ።

*ማጻዓፕ ጪልንት ኣቴና ኦይ ዎዖ8፥3፤ 9፥1-31፤ 11፥19-26፤ 13፥1-3*

## 47. ጳዉሎስኬ ስላስክ ፕልጵሶስግር

https://openbiblestories.org/l/aiw/story-47/

![](https://cdn.door43.org/obs/jpg/360px/obs-en-47-01.jpg?direct&)

ሳዉል ሮማ ፔጭንት ባዓብስንት ጌሥንግር ሙዳ ክ ኡንግዳኬንክ ሮማጎክ ኪም ኤዔሌርዳክ ናዓምንክ «ጳዉሎስ» ጋዓዳክ ናዓምንክ ኤዔልምንት ዬዜ፤ ሴጻ ዎላቕ ጳዉሎስኬ ቤዔልሥስ ስላስክ ዬሱስጎካን ኬዔዝዳክ ሳዓብት ኡፕስናም ኬ ኬዔዝንትካን ፕልጵሶስ ካሜንግር ካዬኬ፤ ኤዔድና ምክስካን ኬ ሱዽምሳቕንዳ ኬትሜንት ማዓልጎክ ኖቔት ሼዔጌር ዶዖቕዳክ ካርንግር ካዬኬ፤ ኮዖግር ዛላ ዛልድንዳ ሊዳ ዪም ጋዓርድንዳ ማይንሢ ዎላቔንዴታም ሃዓፕቴኬ፤ ናዓሬ ሳዓባም ናሽድንዴትኬ ኪም ምክስድንዳ ሃዓቔ።

![](https://cdn.door43.org/obs/jpg/360px/obs-en-47-02.jpg?direct&)

ዬሱስጎካን ኬዔርዳክ ኬዔዜናም ኮ ዶዖፕስቴምሽ ሳዓቢ ልዳት ቡዑዴናም ፖዖቼ፤ ኮዖኬ ኤዔር ኤዔድንኮትክ ካርቴንክ ሽኤርሼኬ፤ ኤዔርንት ኬ ዶዖቕቴምሽ ጳዉሎሳምኬ ስላሳምክ ኤዔልሴ፤ ካንካን ኬታ ኮሬኬ ኤዔር ኤዔድንኮት ኪክን ዶዖቕሴኬ።

![](https://cdn.door43.org/obs/jpg/360px/obs-en-47-03.jpg?direct&)

ጳዉሎስኬ ስላስክ ቤድሚ ሴጽ ምክስ ካርዜን ኤዔድን ኪክን ማሽምዳቔ ሴጻ ሙዴክ ኮዖግር ኬ ካይድንክ ዥኒ ዪም ዬዛቕንዳ ማይንሥ ኣንዛ ዎላቔንዳ ካርኬቴክ ሙክዳቔ ናዓሬ ኮዖ ዥንንጎክ ኣኪ ሃዓድንዴትካን ኤዔድንካን ማዓትካን ዬይዳኬታም ኬዔዝዳቔ፤ ካንካን ጾዖማ ቓንንትክ ቤድሚ ሶሊ ሃዓፕስስዳቔ።

![](https://cdn.door43.org/obs/jpg/360px/obs-en-47-04.jpg?direct&)

ፕክሽዳክ ኣንዝቴኔሬ ኬ ኡንግድንክ ካርኬቴክ «ኬዔና ኤዔድና ባዓብስን ሳዓብት ፕክሽዴዴኬ፤ ዻቕንትት ጎዖግናም ዬዔን ኬዔዝዴኬ!» ጋይንትክ ኡዑግምትናም ጋራቕዬ፤ ጳዉሎስ ክ ጋዓምስቴንክ ዬካ ኮዖም ካርክ ማዓሲ ማዓሶ ጋዓዳቔ።

![](https://cdn.door43.org/obs/jpg/360px/obs-en-47-05.jpg?direct&)

ማቕንቴዜኔሬ ሴጻ ዎላቕ ፕክሽዳክ ኣንዝቴን ኡዑግምን ኮ ዬዛኬንክ ጳዉሎስ ኮራ ማዓትዮ ሼጆ እዜግርኮት ዶዖቕዳክ ዥንስናም «ዬሱስት ናዓምክ ኮግራንክ ዉትካ» ጋይሴ፤ ሳዓኔሬ ዥንስን ዉታቕሴ።

![](https://cdn.door43.org/obs/jpg/360px/obs-en-47-06.jpg?direct&)

ፕክሽዳክ ኣንዝቴንቴሬ ጌሥዴድ ኤዔድን ጋእሻ ጋዓምሴኬ! ዥንስን ካይሳ ሃዓዳኬታም ኤዔድንካን ኬዔዝንት ኮዖን ማዓታያኬም ኤስቴኬ፤ ኮዖኔሬ ኤዔድና ኬዜን ዣእዳክ ሬይናም ኮ ኬዔስቴምሽ ኮዖን ማዓታያክ ጌሥዴድንኮትካን ሶሊ ካሻዬኬ ጋይንትዬ።

![](https://cdn.door43.org/obs/jpg/360px/obs-en-47-07.jpg?direct&)

ካንካን ፕክሽዳክ ኣንዝቴንት ጌሥዴድና ጳዉሎሳምኬ ስላሳምክ ሮማ ፕጭንት ጋዓኔንዳ ኬዔም ቴይ ካዬኬ፤ ኬቴሬ ኬዔም ግእሴኮ ዻክር ኤዔር ኬዔም ዻስሴኬ።

![](https://cdn.door43.org/obs/jpg/360px/obs-en-47-08.jpg?direct&)

ኬቴሬ ጳዉሎስኬ ስላስክ ዻክር ኤይንት ኦ ዋዓርጎክ ዶዖቕዳትኬግር ኬዔም ዻክንትክ ዱዑትንኬታም ሃዓቓ ዛምቤክ ዻክሴኬ፤ ማዓሤሬ ሶይቲ ካዓስሜዜን ሳዓብካን ጎዖፕሽት ዬሢ ዬሥሴኬ።

![](https://cdn.door43.org/obs/jpg/360px/obs-en-47-09.jpg?direct&)

ጶቕሼርክዳይክ ጋእሼንዳ ፔጬት ሾዖ ማዓሤ፤ ዻክሪ ኤይንት ፑልቴና ሙዳ ዋንጋኤ ጋይ ፖዖችምሼኬ፤ ዻኬርታ ኤዔድን ሙዴት ካዉሤና ፔጬዜን ድንግዜኬ።

![](https://cdn.door43.org/obs/jpg/360px/obs-en-47-10.jpg?direct&)

ዻክሪ ኤይንት ጶይዳብስን ራዓቴዜይንታንክ ዻዓምቴ፤ ዻክሪ ኤይንት ፑልቴን ሙዳ ፖዖችምቴንኬታም ይ ሼጃኬንክ ጳሼ! ዻኬርታ ኤዔድን ሙዳ ካይቴንዳ ኪን ካምሳቔ፤ ካንካን ይካሣም ዴይስካን ጶቕሼ፤ ዻኬርቴድን ዻቖ ካይቴድ ኬ ማዓሥንክ ሮማ ፔጭንት ባዓብስንት ጋዓኔና ኪም ዴይስዳኬታም ኤስቴ፤ ዳይንኬሬ ጳዉሎስ ኪም ይ ሼጃኬንክ «ጋርካ! ሃካሣም ሃይ ዴይስካ፤ ዎታ ሙዴና ኩዑር ዶዖቖቴ» ጋይሶ ኡፕሲ ጫዓጭክ ኡዑግምሴ።

![](https://cdn.door43.org/obs/jpg/360px/obs-en-47-11.jpg?direct&)

ዻክሪ ኤይንት ጶይዳስን ጳዉሎስዴኬ ስላስዴክ ሃዓዶ ብልቓሮ «ዻቕንትካን ሃሪ ዬይቴ?» ጋይሶ ጎይሴ፤ ጳዉሎሴሬ «ባዓባ ዬሱስዜን ቡዑድ እዝካ ሃንኬ ኤዔር ኤዔዳንቴክ ዻዻቕዳዬ» ጋይሶ ኪን ማዓስሴ፤ ኮዖዛንኬሬ ዻክሪ ኤይንት ጶይዳብስን ጳዉሎሳምኬ ስላሳምክ ኤዔርንት ኬዔም ኤንሥትዮ ኬዮ ዲድንኬታም ኬዔን ሽእሼ፤ ጳዉሎስ ኤዔርክት ዶዖቕዳቔድ ሙዴካን ዬሱስጎካማኬታም ሙዳ ኬዔን ሳንሴ።

![](https://cdn.door43.org/obs/jpg/360px/obs-en-47-12.jpg?direct&)

ዻክሪ ኤይንት ጶይዳብስንኬ ኤዔር ኤዔድንክት ሙዳ ዬሱስክ ቡዑድ እዜኮ ካርቴንክ ሽኤርሼኬ፤ ኮዖዛንኬሬ ዻክሪ ኤይንት ጶይዳብስን ጳዉሎስካንኬ ስላስካንክ እሥሚ ኬዔን እምሴትዳቦ ኪክን ዎላቕዜን ጉሜርሴኬ።

![](https://cdn.door43.org/obs/jpg/360px/obs-en-47-13.jpg?direct&)

ሼናኬንኮቴክ ፕልጵሶስ ፔጭንት ኤንሥዴድና ጳዉሎስኬ ስላስክ ዻክሪ ኤይንግራንክ ኬዔም ቡልሴኮ ፕልጵሶስግራንክ ኬ ካይቴምሽ ኬዔም ጎይሴኬ፤ ጳዉሎስኬ ስላስክ ልዳምኬ ኣቤድናሜሬ ኬዔም ጎይሴኮ ካትሜንግራንክ ዉታቕሶ ካዬኬ፤ ዬሱስጎካን ኬዔዛሬኮ ኬ ካይንካን ዻቕሽ ኡፕስና ግድማሮ ምክስ ኤዬሬ ግድማሮ ካዬ።

![](https://cdn.door43.org/obs/jpg/360px/obs-en-47-14.jpg?direct&)

ጳዉሎስኬ ኣቤድን ቡዑድ እዝዴድንት ኤንሥዴድንክ ዬሱስጎክ ኬዔዝዳክ ክላ ኬዔዜናም ሳናሬኬ ኤሳሬክ ቤድሚ ካትሜንዜን ኡንጋ ዬዜኬ፤ ታዓሬ ምክስ ኤይንግር ዶዖቕዴድ ኤዔድን ሙዴካን ኬዔም ዛፕስካንኬ ኬዔም ኤስስንትካንክ ቤድሚ ኦይቴናም ኬዔን ክልክሳቔኬ ኬዔና ኦይቴንግራንክ ባግና ማጻዓፕ ጪልንግር ክልኬርቴድ ማዓሤኬ።

*ማጻዓፕ ጪልንት ኣቴና ኦይ. ዎ.16፥11-40*

## 48. ዬሱስ ጉሜርን እሜርሳቓብ ሳዓቢ ዪም ሳይሳቓብኔ

https://openbiblestories.org/l/aiw/story-48/

![](https://cdn.door43.org/obs/jpg/360px/obs-en-48-01.jpg?direct&)

ሳዓቢ ፕዤናም ክ ፕዥዳኬንክ ሬይ ሙዳ ላቕሚ ሃዓቔ፤ ዳቔልሲ ዳክ ሃዓቔ ኣዳምኬ ሄዋንክ ኪክ ኪካም ናናሽዳቔኬ ሳዓባሜሬ ናናሽዳቔኬ፤ ሃዥም ዋይ ዴኢ ዳኪ ሃዓቔ፤ ሳዓቤሬ ፕዥቴኔክት ኮ ማዓትቴምሽ ክ ዝግዛቓክ ኮይኔ።

![](https://cdn.door43.org/obs/jpg/360px/obs-en-48-02.jpg?direct&)

ሴጣን ሳዓብት ኮርሚ ሃዓምንግር ሄዋናም ቱንትምስካን ጉንጎክ ኬዔዜ፤ ኮዖት ቡዑር ኮዖኬ ኣዳምክ ሳዓብዜን ዳቔልሲ ዎዖንሴኬ፤ ዳቔልስንኬትጎካን ፔጬዜን ዶዖቕዴድ ኤዔድ ሃዣዤርዴ ዴዴእዴ።

![](https://cdn.door43.org/obs/jpg/360px/obs-en-48-03.jpg?direct&)

ኣዳምኬ ሄዋንክ ዳቔልሲ ኬ ዎዖንሳቓኬትዛንክ ዻዓምስንዳ ኮዖዛንክ ጋዓጽድንዳ ዳቕልንዳ ሬዬሬ ማዓታን ኬታ ሳዓብት ይዥምዴድ ማዓሤኬ፤ ካንካን ኮዖ ሴጽንዛንክ ዬዞ ኤዔድ ሙዳ ዳቔልስት ጌቔክ ኣዼርሳቔ፤ ታዓሬ ሳዓባም ይዥዳብ ማዓቴ፤ ሳዓብቴኬ ኤዔድቴክ ሞልትግር ሃዓቓክ ማሽምና ዳቔልስጎካን ኔክቴ፤ ዳይንኬሬ ሳዓቢ ኮዖ ማሽምናም ኣልካ ማዓስንትካን ጶቕሽንክት ሃዓቔ።

![](https://cdn.door43.org/obs/jpg/360px/obs-en-48-04.jpg?direct&)

ሄዋንት ካዓሥንግራንክ ዎላቓብና ሴጣንት ማታም ግእድምሽ ሴጣኔሬ ዱዑትንክቴት ጋዓሬናም ጋእድምሽክ ሳዓቢ ጉሜር ኡፕስንግር ኬዔስቴ፤ ኮዖኔሬ ሴጣን ሳዓቢ ዪም ሳይሳቓብናም ዴዴይስዴ ዳይንኬሬ ሳዓቢ ኣልክምሲ ኪም ዻዻዓስዴ ጋይንትዬ፤ ኮዖዛንኬሬ ሳዓቢ ዪም ሳይሳቓብን ሴጣንት ዛምናም ሌፒ ሴጽካን ግግእዴ፤ ቤድሚ ቦንንት ቡዑር ሳዓቢ ይንቲ ሳዓቢ ዪም ሳይሳቓብን ዬሱስ ማዓሥምሽ ኣይቴር ማዓስሴ።

![](https://cdn.door43.org/obs/jpg/360px/obs-en-48-05.jpg?direct&)

ሳዓቢ ፔጬናም ሙዳ ካይስዳክ ኖቔንክ ክ ካይሳኬንክ ክዜን ቡዑድ እዛቔድ ኤዔድናም ዻቕሽንትካን ማርኬብ ጋዓርዳኬታም ኡስሴ፤ ኮዖም ካምድንዴትጎክ ኤዔድ ሙዳ ዳቔልስይንትጎክ ዴእንቲ ኪም ዝክስዳቔ፤ ዳይንኬሬ ሳዓቢ ክዜን ቡዑድ እዝዴድናም ሙዳ ዻቕሽንትካን ዬሱሳም እምሴ።

![](https://cdn.door43.org/obs/jpg/360px/obs-en-48-06.jpg?direct&)

ቤድሚ ማቶ ቦንካን ኤዔድናም ሳዓቢ ኪክን ቔዔሽምሽዴድን ዳቔልስጎካን ዝክስዳኬታም ቓእስርናም ዻዉስንትካን ኤዔድንካን ጋርክዶቕዶ ዳቔልስጎካን ጪልሽት እማ እምዳቔኬ፤ ዳይንኬሬ ኬዔና እሜና ዳቔልስንኬታም ኔክሽካን ማዓትክዬ፤ ዬሱስ ዴዔጽምስን ኤዔድናም ሳዓቢ ቔዔሽምሽዴድንት ጌሥዳብስኔ፤ ኣቤድን ኤዔድናም ሳዓቢ ኪክን ቔዔሽምሽዴድንዛንክ ጋሌንዴትጎክ ይካሣም ፔጬዜን ዶዖቕዴድ ኤዔድን ሙዴካን ዳቔልስናም ኔክሽንትካን ዪን ማዓዳብ ኣብንዳ ጪልሽት እማ ማዓስሶ እምሳቔ፤ ዬሱስ ኤዔድ ሃይያሜሬ ክ ዎዖንሳቓክ ዳቔልስንት ቓእስርናም ቴያቓብ ጋዓጽ ኤዔድናም ሳዓቢ ኪክን ቔዔሽምሽዳቤ።

![](https://cdn.door43.org/obs/jpg/360px/obs-en-48-07.jpg?direct&)

ሳዓቢ ኣብራሜን «ፔጬት ኤዔዴና ሙዳ ሃንክ ኣንጅምዴኬ» ጋይሶ ኪን ኬዔዜ፤ ዬሱስ ኣብራምት ካዓሥግራንኬ፤ ክጎክ ኤዔድን ሙዳ ኣንጅምቴኬ፤ ሃራካኔ ጋዓርስንክ ዬሱስዜን ቡዑድ እዝዳብ ኤዔድ ሙዳ ዳቔልስግርንታንክ ዻቕቴ፤ ኮይኔሬ ኣብራምት ማንፔስጎክ ኣዽርንክት ማዓቴ።

![](https://cdn.door43.org/obs/jpg/360px/obs-en-48-08.jpg?direct&)

ይንሥስን ይሳቓም ጪልሽት እማ ማዓስሶ ክ እምቴምሽ ሳዓቢ ኣብራሜን ክ ኬዔዛኬንክ ሳዓቢ ይንሥስን ይሳቕ ኦዖላይስ ጪልሽት እሜንካን ማዓዳብ ቖልስናም ዻዉሴ፤ ዎታ ሙዴኔሬ ዳቔልስክ ዴእንቲ ዎዖን ማዓዳቔ! ዳይንኬሬ ሳዓቢ ጪልሽት እማ ማዓሦ ዎ ካርግር ክ ዴእቴምሽ ሳዓብት ቖልስን ማዓሣቓብን ዬሱሳም እምሴ።

![](https://cdn.door43.org/obs/jpg/360px/obs-en-48-09.jpg?direct&)

ሳዓቢ ግብጽዜን ማቕንቴን ጋዓምናም ክ ኦይሣኬንክ ሃሬሬ ይዜን ዳክባብ ቕንጽ ኬ ቴችቴምሽኬ ዞምእናም ፑልቴንዜንኬ ፑልቴንት ጌድንዜንክ ኬ ዪጽቴምሽ እስራኤል ኤዔድንካን ኬዔዜ፤ ሳዓቢ ዞምእናም ይ ሼጃኬንክ ኤዬንት ማቴክ ካዬ፤ ቶይዲ ይንሥንኬታሜሬ ዴይስክዬ ኮዖና ኣታካማ ዎዖንምቴናም ፓዓስጋ ኮዖም ጋዓርሳቔ።

![](https://cdn.door43.org/obs/jpg/360px/obs-en-48-10.jpg?direct&)

ዬሱስ ዎንት ፓዓስጋ ቖልስኔ፤ ኖዖ ዎላቔሴ ዳቔልሳቕባቤ ፓዓስጋ ሳዓቢ ሴጽንክ ዪም ዴይሴርሳቓቤ፤ ኤዔድ ሃይዬሬ ዬሱስዜን ቡዑድ ክ እዝዳኬንክ ዬሱስት ዞምእና ኤዔሥን ኮዖባብት ዳቔልስት ካሺ ማዓቴ፤ ሳዓብት ቓእስኔሬ ኤዔሥን ኮዖባባም ዴይሳዬ።

![](https://cdn.door43.org/obs/jpg/360px/obs-en-48-11.jpg?direct&)

ሳዓቢ እዴርቴድ ኤዔድንክት ሃዓቔድን እስራኤል ኤዔድን ኪክን ጫዓቓ ኣርዜ፤ ዳይንኬሬ ታ ሳዓቢ ኤዔድን ሙዴንካን ማዓድንዳ ክላ ጫዓቓ ኣርቴ፤ ኮዖ ክላ ጫዓቔንጎክ ኤዔድን ሃሜድንት ኤዔዳ ማዓሣቓብ ኤዔድ ሃይዬሬ ዬሱስክ ቡዑድ ክ እዝንትክ ሳዓብት ኤዔዳ ማማዓዴ።

![](https://cdn.door43.org/obs/jpg/360px/obs-en-48-12.jpg?direct&)

ሙሳ ሳዓብት ኡፕስናም ኬዔዝዳቓብ ዴዔጽምባብ ማዓትካን ዬይዳኬታም ኬዔዝዳብ ሃዓቔ፤ ዬሱስ ዳይንክ ሙዴዛንክ ጋዓጽዳብ ማዓትካን ዬይዳኬታም ኬዔዝዳብኔ፤ ኖዖ ሳዓብዬ ካንካን ክ ዎዖንሳቓክ ሬይ ሙዳ ሳዓብት ዎዖንኬ ኡፕስኬ ካንካን ዬሱስ ሳዓብት ኡፕስዬ ጋይሶ ኤዔሌርዳኬ።

![](https://cdn.door43.org/obs/jpg/360px/obs-en-48-13.jpg?direct&)

ካዓሥንግርክታንክ ዎዖላቓብን ባዓቢ ማዓሦ ሳዓብት ኤዔድንዜን ሌፒ ሴጽካን ባዓምድምሽ ሳዓቢ ባዓብስን ዳዊትካን ጉሜርናም ኬዔዛቔ፤ ዬሱስ ሳዓብት ይንሥስንኬ ሳዓቢ ዪም ሳይሳቓብንክ ክ ማዓሥንካን ሌፒ ሴጽካን ባዓምንት ዪን ማዓዳብ ጋሌባብ ዳዊት ካዓሥስኔ።

![](https://cdn.door43.org/obs/jpg/360px/obs-en-48-14.jpg?direct&)

ዳዊት እስራኤል ኤዔድንት ባዓቢ ሃዓቔ፤ ዬሱስ ዳይንክ ፕዥር ፔጬዜናሜድ ሙዴት ባዓብዬ፤ ማዓትዮ ሃዓዶ ኡዝማ ቤዔርኬ ላቕምክ ባዓምናም ሌፒ ሴጽካን ጌሥዴ።

*ማጻዓፕ ጪልንት ኣቴና ፕዥ1-3፤6፤ 14፥22፤ ዉት12፥20፤ 2ሳሙ7፥እብ 3፥ 1-3፤ 4፥14-5፥10፤ 7፥1-8፤13፤ 9፥11-10፥18 ዋንስ ሼ21*

## 49. ክሌና ሳዓብት ጫዓቓ ኡፕስን

https://openbiblestories.org/l/aiw/story-49/

![](https://cdn.door43.org/obs/jpg/360px/obs-en-49-01.jpg?direct&)

ዎላቕ ሳዓቢ ርኬግራንክ ዎዖንይንትካን ክ ኦይዳብስን ማራም ጋዓርድንዳ ሙናኣኬዳ ሳዓብት ይንሢ ኮ ኣዽምሽ ኮዖን ኬዔዜ፤ ካንካን ናዓ ኣኪ ሙናካማ ኮ ዳይክ ኣንግ ይንሥ ኣዽንትክ ናዓምክታም ዬሱሴ ጋይሶ ዎጄ፤ ካንካን ዬሱስ ሳዓቤሬ ኤዔዴሬ ማዓቴ።

![](https://cdn.door43.org/obs/jpg/360px/obs-en-49-02.jpg?direct&)

ዬሱስ ሳዓቢ ማዓትንትንክታም ዶዖፕስስድንዳ ቤድሚ ክላ ሬያም ዎዖንቴ፤ ኖቔት ዜን ኡንግቴ ኖቔንት ዻዓምንትናም ጫምሲ ዬይቴ፤ ቤድሚ ሃዤርታ ኤዔድናም ሃልሽሽቴ ዥንናም ዉሥቴ ዴእታ ኤዔድናም ዱዑክግራንክ ዻዓስቴ፤ ኮይኔሬ ዶንቕ ባልሻምኬ ቓስቴን ቶይላምክ ዶንቕ ሺ ኤዔዛንክ ጋዓጽዴዳም ኬ ምሽቴምሽ ማዓስቴ።

![](https://cdn.door43.org/obs/jpg/360px/obs-en-49-03.jpg?direct&)

ታዓሬ ዬሱስ ዴዔሥምባብ ኤስስዳቤ፤ ሳዓብት ይንሥ ይ ማዓሥንካኔሬ ጋዓንምክ ኬዔስቴ፤ ዬማታም ዬ ናሽድምሽ ኣቤድ ኤዔድናሜሬ ናሽኬቴ ጋይሶ ኤስስቴ።

![](https://cdn.door43.org/obs/jpg/360px/obs-en-49-04.jpg?direct&)

ታዓሬ ኖዖ ቖልታዬንታም ዬ ናሽድምሽኬ ሬይ ሃሬናሜሬ ዬ ናሽድምሽክ ሳዓባም ናሽንት ዬዔም ዝክስዴ ጋትሶ ኤስስቴ።

![](https://cdn.door43.org/obs/jpg/360px/obs-en-49-05.jpg?direct&)

ዬሱስ ሳዓብት ባዓምና ፔጬዜን ዶዖቕዳክ ሬይን ኔግክ ቦንችምታኣኬ ጋይሳቔ፤ ኤዔድ ሃይካኔሬ ጋእሻ ላቕሚ ማዓድንዳ ሬይና ሳዓብት ባዓንግራምባብ ማዓትንትዬ፤ ሳዓብት ባዓምንግር ኣርድንትካን ዳቔልስንግሬንታክ ዻቕንት ዬዔም ዝክስዴ።

![](https://cdn.door43.org/obs/jpg/360px/obs-en-49-06.jpg?direct&)

ዬሱስ ዎላቕ ዎላቔድ ኤዔድናም ኪም ቴይዮ ኬ ዻቕድምሽ ኣቤድን ዳይንክ ኪም ኬ ቴይዳክምሽ ኤስሴ፤ ዎላቕ ዎላቔድና ላቕሚ ፔጬናም ካምዴኬ ጋይሴ፤ ዬሱስት ኬዔዜናም ዶዖፕስታቔድ ዻዻቕዴኬ፤ ኣቤድ ኤዔድና ሳዓብት ኡፕስና ጴዔታ ዋዓርንት ባቕላያክ ሃሬሬ __ኡዑሻያክ__ __ጎዖግት__ __ኣሥዜን__ ዋዓቻቓክ ላዓልዜናማክ ፔጬናምሼኬ፤ ኬዔና ኤዔድና ዬሱስጎካን ኬዔዜርዳክ ኬዔዜናም ቴያዬድኬ ሳዓብት ባዓምንግር ኣርዳዬዴኬ።

![](https://cdn.door43.org/obs/jpg/360px/obs-en-49-07.jpg?direct&)

ዬሱስ ሳዓቢ ዳቔልሴድናም ጋእሻ ክ ናሽድምሽ ኤስሴ፤ ኔጋኔ ኬዔን ጋዓካንኬ ይንሥይንት ኬዔም ማዓስንትካን ዝዝግዴ።

![](https://cdn.door43.org/obs/jpg/360px/obs-en-49-08.jpg?direct&)

ታዓሬ ዬሱስ ሳዓቢ ዳቔልሳም ክ ይዥድምሽ ዎዖን ኬዔስቴ፤ ኣዳምኬ ሄዋኔትክ ዳቔልሲ ኬ ዎዖንሳኬንክ ዳቔልሲ ካዓሥንኬት ሙዳም ካሌርሴ፤ ኮዖዛንክ ዻዓምሳቕንዳ ፔጬዜን ዶዖቕዳብ ኤዔድ ሙዳ ዳቔልሲ ዎዖንዴ፤ ሳዓብዳንኬሬ ፓዓሽምዴ፤ ካንካን ኤዔድ ሙዳ ሳዓባም ይዥዳብ ማዓቴ።

![](https://cdn.door43.org/obs/jpg/360px/obs-en-49-09.jpg?direct&)

ዳይንኬሬ ክዜን ቡዑድ እዝዳብ ሙዳ ሌፒ ሴጽት ኡክኔክት ዶዖቕቴምሾኒ ክ ዴእታክምሽ ሳዓቢ ይንሥስይንት ዎላቓብናም ይ እምስቴንክ ዬካ ፔጫ ኮዛሜድናም ጉሪ ኮይን ናሻቔ።

![](https://cdn.door43.org/obs/jpg/360px/obs-en-49-10.jpg?direct&)

ዳቔልስጎክ ባሥቴድ ዬ ማዓሥንካን ዴእንቲ ዬዔን ማዓዴ፤ ሳዓቢ ዬዜን ጋዓምንቲ ኪም ዝክስዳቔ፤ ዳይንኬሬ ዬዔም ጋዓምንትን ኦዖላይስ ዬሱሳም ጋዓምሴ፤ ዬሱስ ማስቔልዜን ክ ዴእሳክ ሴጽንክ ዬንት ቓእስርና ክዜን ዣእሼ።

![](https://cdn.door43.org/obs/jpg/360px/obs-en-49-11.jpg?direct&)

ዬሱስ ዎላቔሴ ዳቔልሲ ዎዖንክዬ፤ ዳይንኬሬ ዬንት ዳቔልስናምኬ ፔጬዜን ዶዖቕዴድ ኤዔድን ሙዴት ዳቔልስናም ኔክሽንትካን ቓእስርናምኬ ጪልሽት እማ ማዓሦ ዴእንትናም እድዜ፤ ዬሱስ ይማታም ጪልሽት እማ ክ ማዓስስንካን ሳዓቢ ዳቔልሲ ሃምንኬኬሬ ኮ ዳቔልድንክ ኔጋኔ ጋይንቲ ኪን ማማዓዴ።

![](https://cdn.door43.org/obs/jpg/360px/obs-en-49-12.jpg?direct&)

ላቕሚ ዎዖንዬንት ዬዔም ዻቕሽንት ኮዖን ማዓታዬ፤ ሳዓቢ ኪክን ዬ ማሽምቴምሽ ዎዖንንት ዬዔን ማዓድንዳ ሬይ ሃሬሬ ዳክዬ፤ ዬሱስ ዬሌክ ዳቔልስዬንታም ሽእንትካን ኪን ማዓዴ፤ ዬሱስ ሳዓብት ይንሢ ማዓትንትንክታም ዬንት ኦዖላይሲ ማስቔልዜን ዴእንትንክታም ሳዓቤሬ ዱዑክግራንክ ኪም ዻዓስስምሽ ዬሌክ ቡዑድ እዝንት ዬዔም ዝክስዴ።

![](https://cdn.door43.org/obs/jpg/360px/obs-en-49-13.jpg?direct&)

ሳዓቢ ዬሱስዜን ቡዑድ እዝዳባምኬ ይንት ባዓባ ኪም ማዓስዳብን ኤዔድ ሃምንባባሜሬ ዻዻቕሽዴ፤ ዎድምቴድን ዋይ ቓምእን ኣንግ ዋይ ማዓ ጋልታ ዋይ ኣግልባብ ዋይ ሃብሪ ዬ ዶዖቕድንኬሬ ካልማዬ ሳዓቢ ዬ ኪክን ይ ማሽምቴምሽ ዬዔም ናናሽዴ፤ ዬሱስዜኔሬ ቡዑድ ዬ እዝቴምሼሬ ዝዝግዴ።

![](https://cdn.door43.org/obs/jpg/360px/obs-en-49-14.jpg?direct&)

ዬሱስ ክዜን ቡዑድ ዬ እዝቴምሽኬ ካርቴንክ ዬ ሽኤርቴምሽክ ዬዔም ኤዔሌልዴ፤ ዬሱስ ሳዓቢ ዪም ሳይሳቓብን ኖዖ ዬሌክ ሳዓብት ይንሥስን ማዓትንትንክታም ቡዑድ እዝዴቶ? ዳቔልሴድ ማዓይንትዬንታምኬ ሳዓቢ ዬዔም ክ ቓእስድንክ ኡዝሜንዳ ማዓትንትናም ዶዖፕስዴቶ? ዬሱስ ዳቔልስዬንታም ኔክሽካን ማስቔልዜን ዴእንትንክታም ዶዖፕስዴቶ?

![](https://cdn.door43.org/obs/jpg/360px/obs-en-49-15.jpg?direct&)

ዬሱስዜንኬ ኖዖ ዬካን ክ ዎዖንሳቓክትዜን ቡዑድ ዬእዝድንክ ዬታ ክት ራቕክ ሙክዴዴቴ! ሳዓቢ ሴጣንዳንኬ ዹምኣክ ፔጬንት ጌሥንግራንክ ዬዔም ዉሥትዮ ሳዓብት ሻዓክምንት ባዓምንግር ዬዔም ማዓስቴ፤ ሳዓቢ ሬይናም ሙዳ ዬ ዬይዳቓክ ጌዔሼናምኬ ዳቔልስዜን ዬ ሙክዳቓክ ጎዖግዬንታም ኔክሾ ክሌንዴትኬ ኡዝሜንዳ ዎዖንንትት ጎዖጋም ዬዔን እምቴ።

![](https://cdn.door43.org/obs/jpg/360px/obs-en-49-16.jpg?direct&)

ዬታ ቡዑድ እዝዴድኔቴ ዬሱስ ዎዖንሳቓክ ዎዖንንጎክ ዳቔልስዬንታም ኔጋኔ ዬዔን ጋዓቴ፤ ታ ሳዓቢ ይዥምዴድ ማዓትንትዛንክ ጋዓጺ ይንት ኤዔዳ ማዓስሶ ዬዔም ጶቕሽዴ።

![](https://cdn.door43.org/obs/jpg/360px/obs-en-49-17.jpg?direct&)

ሳዓብት ኤዔዴኬ ባዓባ ዬሱስት ፕክሽዴድክ ዬ ማዓሥንክ ዬሱስ ዬዔም ክ ኤስስዳኬትካን ኤዔእዴቴ፤ ቡዑድ እዝዴድ ዬ ማዓድንኬሴሬ ታ ዳይንኬሬ ዳቔልሲ ዎዖንንትካን ጴጽምዴቴ፤ ዳይንኬሬ ሳዓቢ ኖዖ ይዜን ቡዑድ እዜርቴባብ ክ ማዓሥንካን ዳቔልስዬንታም ዬ ቡዑጽድንክ ኔጋኔ ዬዔን ጋዓዴ፤ ዳቔልሳም ዬ ይዝንድንዳ ዛማም ዬዔን እምምዴ።

![](https://cdn.door43.org/obs/jpg/360px/obs-en-49-18.jpg?direct&)

ሳዓባም ዬ ምክስቴምሽኬ ኡፕስንክታም ሜይስትዮ ዬ ጎስቴምሽክ ኣቤድን ቡዑድ እዝዴድን ኪክን ዬ ጉምፔርቴምሽ ዬዔን ክ ዎዖንሳቓኬታሜሬ ኣቤድንካን ዬ ኬዔስቴምሽ ዬዔም ጎይስዴ፤ ኬዔና ሬይን ሙዳ ክ ኪክን ኡዝሜንዳ ማሽሜንት ዶዖቕቴምሽ ዬዔም ማዓስድንዴ።

*ሮማ3፥21-26፤ 5፥1-11፤ ዋንስ3፥16፤ ማር16፥16፤ ቖላ1፥13-14፤ 2ቖሮ5፥17-21፤ 1ዋንስ1፥5-10*

## 50. ዬሱስ ማዓትዮ ሃዓዳዴ

https://openbiblestories.org/l/aiw/story-50/

![](https://cdn.door43.org/obs/jpg/360px/obs-en-50-01.jpg?direct&)

ቓስቴን ሺ ቦንንካን ፔጬት ሼዔጋ ሼዔግክ ዶዖቕዴድ ኤዔድን ሙዳ ሳዓቢ ዪም ሳይሳቓብን ዬሱስጎክ ኬዔዝዳኬታም ዳቕሽ ኡፕስናም ኤስራሮ ዶዖቕቴኬ፤ ምክስ ኤይና ጋጳሮ ዶዖቕዳቔ፤ ዬሱስ ፔጬንት ማቕንቴዜን ይ ማዓድምሽ ጉሜርን ኬዔስቴ፤ ኖዖ ታ ኣኪ ክ ማዓትክንኬሴሬ ጉሜርይንታም ጶጶይዴ።

![](https://cdn.door43.org/obs/jpg/360px/obs-en-50-02.jpg?direct&)

ዬሱስት ማዓትንትናም ጶያሮ ዎ ዶዖቕዳኬንክ ሳዓቢ ጪልምክ ማዓሣቕንዴትኬ ኪም ቦችሽድንዳ ጎዖግክ ዎ ዶዖቕቴምሽ ዝግዴ፤ ታዓሬ ክት ባዓምንጎካን ኣቤድንካን ዎ ኬዔስቴምሽዝግዴ፤ ዬሱስ ፔጬዜን ይ ዶዖቕዳኬንክ «እስት ራቕክ ሙክዴድና ሳዓብት ባዓምንጎካማኬታም ኬዔዝዳክ ዻቕሺ ኡፕስናም ፔጬት ሼዔጌክ ዶዖቕዳክ ካሪ ሙዴዜን ኤዔድንካን ሳንዴኬ፤ ኮዖ ሴጽንክ ማቕንቴና ሃዓዴ» ጋይሴ።

![](https://cdn.door43.org/obs/jpg/360px/obs-en-50-03.jpg?direct&)

ቤድሚ ኤዔድና ታዓክ ሃይዬሬ ዬሱስጎካን ኤሴርኬኬ፤ ዬሱስ ርኬግር ይ ማዓትካኬት ብሬዜን ዻቕሺ ኡፕስናም ዎላቔሴ ኤሴርኬድ ኤዔድንካን ኬ ኬዔስቴምሽ ቡዑድ እዝዴድንካን ኬዔስቴ፤ «ካዬቶ ዻቕሺ ኡፕስናም ኬዔዝንትክ ኤዔድን ሙዴናም እስት ራቕክ ሙክዴድ ኬዔም ማዓስኬቴ!» ጋይንትክ «ሱዼርዳኬሬ ዣእቴ!» ጋይሳቔ።

![](https://cdn.door43.org/obs/jpg/360px/obs-en-50-04.jpg?direct&)

ታዓሬ ዬሱስ ኮይን ጋይሴ፤ «ፕክሽዳብ ፕክሽሽዳብንዛንክ ጋዓጻዬ፤ ኮይን ፔጬን ኮዜን ዶዖቕዴድ ጋዓኔና ኢም ይ ይዥምሽ እ ጎዖካን ዬዔም ሴዔቕስዴኬ ዬዔም ዴዴይስዴኬ ሃስንዳይንኬሬ ፔጬን ኮዖት ካልርናም ዬ ቴይድንኬሴሬ ሃይ ጳሽኬቴ፤ ሃራካኔ ጋዓርስንክ እታ ፔጬን ኮዖም ጌሥዳብን ሴጣናም ሺችትቴ፤ ዬታ እዜን ቡዑድ እዜቶ ማቕንቴክ ዬካ ዬ ዛብድንክ ኮዖ ሴጽንክ ሳዓቢ ዬዔም ዻዻቕሽዴ!»

![](https://cdn.door43.org/obs/jpg/360px/obs-en-50-05.jpg?direct&)

ዬሱስ ፔጬንት ማቕንታ ማዓዳኬንክ ኤዔድንዜን ዣእዳክ ሬይናም ፕእስትዮ ኬዔዝንትካን ይንት ራቕክ ሙክዴድንቴን ኣታ ዎላቓም ኬዔዜ፤ ኤዔድ ዎላቕባብ ሃዓምግርንት ላቕምቴንዳ ዜርግት ጴዔታም ማሼ፤ ራዓታ ክ ዳይክ ኪም ይዥዳብን ሃዓዶ ዜርግንግር ሌዔሻም ማሾ ካዬ።

![](https://cdn.door43.org/obs/jpg/360px/obs-en-50-06.jpg?direct&)

«ማሼርሻቓክ ዜርግና ኮ ባቔልሳኬንክ ኤዔሥንት ዎዖኒ ዎዖንዴድን <ባዓቦ ሃዓምንግር ላቕምቴንዳ ጴዔታ ማሽታ ሃዓቓዬ፤ ታ ኮዖክ ዋዓርኮት ሌዔሼና ሃብራንኮክ ሃዓፔርሴ?> ጋይሶ ጎይሴኬ፤ ባዓቤስኔሬ ማሻቓብን ይዥዳብ ዳዓቴሬ» ጋይሶ ኬዔን ማዓስሴ።

![](https://cdn.door43.org/obs/jpg/360px/obs-en-50-07.jpg?direct&)

«ክት ዎዖንዴድኔሬ ባዓቤስንካን <ሌዔሼናም ዎ ቡዑጫኖ?> ኪን ጋይሴኬ፤ ባዓቤስንኬቴሬ ኮይን ጋይሴ ሃዓይዬ፤ ኮዖም ዬ ዬይድክ ዜርግናሜሬ ቡቡዑጭዴቴ፤ ሽካ ሴጽንክ ዬካ ጋርኬቴ ሽኬርዳኬንክ ሌዔሼናም ሱዽትዮ ኖዖግር ኣሥኬቴ፤ ዜርግናም ዳይንክ ሪቔንግርእስት ካዓኬቴ።»

![](https://cdn.door43.org/obs/jpg/360px/obs-en-50-08.jpg?direct&)

ክት ራቕክ ሙክዴድና ኣቴንት ቡልና ኬዔን ኣይቴር ኬዔን ማዓክንካን ኬዔን ፕእስትዮ ክ ኬዔስቴምሽ ዬሱሳም ጎይሴኬ፤ ዬሱሴሬ ኮይን ኬዔን ጋይሴ፤ «ላቕሚ ጴዔቴናም ማሻቓብ ኤዔሥን ሳዓቢ ዪም ሳይሳቓብን ዬሱሳም ጶቕሽሽዴ፤ ሃዓምና ፔጫ ኮዛሜድናም ጶቕሽሽዴ፤ ላቕምታ ጴዔቴና ሳዓብት ኤዔድናም ጶቕሽሽዴ።»

![](https://cdn.door43.org/obs/jpg/360px/obs-en-50-09.jpg?direct&)

«ሌዔሼና ዳቕልስንዳንክ ማዓሣቔድ ኤዔድናም ጶቕሽሽዴ፤ ሌዔሼናም ማሻቓብን ይዥዳብ ሴጣናም ጶቕሽሽዴ፤ ሽኬና ፔጬን ኮዖት ማቕንቴናም ጶቕሽሽዴ፤ ሽክዴድኔሬ ሳዓቢ ርኬግራንክ ዎዖንይንትካን ክ ኦይዴድናም ጶቕሽሽዴ።

![](https://cdn.door43.org/obs/jpg/360px/obs-en-50-10.jpg?direct&)

«ፔጬንት ማቕንቴንክ ሳዓብት ኦይቴርቴድና ሴጣንካን ማዓሣቔድድ ኤዔድናም ሙዳ ዎላቕዜን ሱዽምሴኮ ዞዖጴድንዳ ኖዖግር ኬዔም ዣቕዴኬ ኮዖግሬሬ ኡዑግምዴኬ ዳቕላይስንዳ ሴዔቕርኬሬ ኣሥንታም ቕርጭዴኬ፤ ኮዖ ሴጽንክ ሳዓብካን ኡዝሜክ ዎዖንዳቔድና ባዓቤንንቴት ባዓምንግር ሃይምሽ ሻዓክዴኬ።»

![](https://cdn.door43.org/obs/jpg/360px/obs-en-50-11.jpg?direct&)

ታዓሬ ዬሱስ ፔጬንት ማቕንቴንት ብሬዜን ኮዖር ፔጬዜን ማዓትዮ ይ ሃዓድምሽ ኬዔስቴ፤ ይ ካያቓኬትምሽ ኮይን ማዓትዮ ሃዓዳዴ፤ ኮዖኔሬ ሃዓፕምድንዳ ዜኔክት ዶዖቕዴ፤ ርኬት ሊሌዜን ሃዓዳዴ፤ ዬሱስ ክ ማዓዳኬንክ ዎላቕ ዎላቔና ቤዴድ ዴእታ ኤዔድና ዱዑክግራንክ ዻዓምቴኮ ርኬግር ክራ ማሽምዴኬ።

![](https://cdn.door43.org/obs/jpg/360px/obs-en-50-12.jpg?direct&)

ኮዖ ሴጽንክ ኣኪ ኣዓፔክ ዶዖቕዴድ ቡዑድ እዝዴድና ርኬግር ኤቤኮ ዱዑክግራንክ ዻዓምታቔድ ኣቤድን ቡዑድ እዝዴድን ኪክን ቡቕምዴኬ፤ ኮዖግር ሙዴኔሬ ዬሱስ ኪክን ማዓዴኬ፤ ኮዖት ቡዑር ዬሱስ ኤዔድን ኪክን ማቕንቴኮት ማዓሣቕንዳ ላቕምኬ ኪክን ማዓትንትክ ሌፒ ሴጽካን ዶዖቕዴ።

![](https://cdn.door43.org/obs/jpg/360px/obs-en-50-13.jpg?direct&)

ዬሱስ ይዜን ቡዑድ እዝዴድን ሙዴካን ሼክሽት ቖዖጵ ይ እምድምሽ ጉሜርንክ ኬዔስቴ፤ ኬቴሬ ማቕንትንት ዳክንዳ ላቕምንክ ሳዓቢ ኪክን ሌፒ ሴጽካን ዶዖቕዴኬ

![](https://cdn.door43.org/obs/jpg/360px/obs-en-50-14.jpg?direct&)

ዳይንኬሬ ሳዓቢ ዬሱስክ ቡዑድ እዛዬድ ሙዴንዜን ቤቤዔርዴ፤ ሌፒ ሴጽካን ኬ ኤዔፕድንዴትኬ ሴዔቕርክ ኣሥይንታም ኬ ቕርጭድንዳ ሌፒ ሴጽት ቤዔሪ ኖዖንግር ኬዔም ዣቕዴ፤ ዎላቔሴ ድካይንዳ ኖዖና ድክዶቕዶ ኬዔም ኣሥዴ፤ ዱምእሬኔሬ ኬዔም እሥንትናም ጋራዬኬ።

![](https://cdn.door43.org/obs/jpg/360px/obs-en-50-15.jpg?direct&)

ዬሱስ ማዓዳኬንክ ሴጣናምኬ ባዓምንክታም ሙዳ ካካይስዴ፤ ሴጣናም ሳዓቤን ኤዔእንዛንክ ጋዓጽዮ ክት ራቕክ ሙክንትካን ኪም እዛቔድ ሙዳ ኪክን ሌፒ ሴጽካን ኪም ኣሥድንዳ ቤዔርት ኖዖንግር ኪም ዣቕዴ።

![](https://cdn.door43.org/obs/jpg/360px/obs-en-50-16.jpg?direct&)

ኣዳምኬ ሄዋኔትክ ሳዓቤን ኬ ኤዔእክንካንኬ ፔጬዜኔሬ ዳቔልሳም ኬ ታዓዳቓኬትጎክ ሳዓቢ ፔጬዜናሜታም ኣሼ፤ ኮዖም ካይስካኔሬ ጶቕሼ፤ ዳይንኬሬ ሴጻ ዎላቕ ሳዓቢ ካያይንዳ ክላ ርካምኬ ክላ ፔጫምክ ፕፕዥዴ።

![](https://cdn.door43.org/obs/jpg/360px/obs-en-50-17.jpg?direct&)

ዬሱስኬ ኤዔድንክቴክ ክላኣክ ፔጬንዜን ዶዖቕዴኬ፤ ዶዖቕዳክ ሬይ ሙዴዜን ሌፒ ሴጽካን ባዓምዴኬ ኖዖሬ ኤርሜናም ሙዳ ኣዓፕዜናንክ ሃዓጽዴ ኮዛንክ ኦስ ሴዔቕሪ፥ ኣትሪ፥ ኤዔፒ፥ ዳቕልንዳ ሃዥም፥ ዋይ ዴኢ ዶዖቓዬ፤ ዬሱስ ባዓምይንታም ላቕምኬ ኡዝማ ቤዔርክ ጌሥዴ፤ ሌፒ ሴጽካን ይንት ኤዔድን ኪክን ዶዖቕዴ።

*ማጻዓፕ ጪልንት ኣቴና ማቶስ24፥14፤28፥18፤ ዋንስ15፥20፤ 16፥33፤ ዋንስ ሼ2፥10፤ ማቶስ 22፥13፤ ዋንስ ሼ20፥10፤ 21፥1-22፤ 21*