# unfoldingWord Open Bible Stories — Mahasu Pahari (Pahari, Mahasu)

- Language code: `bfz`
- Canonical page: https://openbiblestories.org/l/bfz/
- Stories in this file: 50 of 50
- Published by: OBS-TLF
- Last release: 2026-06-26
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Mahasu Pahari translation; it is not a translation of the whole Bible.

## 1. शुरुआत

https://openbiblestories.org/l/bfz/story-1/

![](https://cdn.door43.org/obs/jpg/360px/obs-en-01-01.jpg)

इणै कौरी शुरू दी परमेश्वरै सारी च़िज़ु री शुरुआत की। तिणिऐ छ़ौ दिना दी दुनिया री और ज़ो कुछ़ तेथादी आ सारेउरी सृष्टी की आ। परमैश्वरा रै ज़ौरिऐ धौतरी चाणनै बासिऐ धौतरी न्यारी और खाली थी, कैलैकि ईबी झ़ाऊं परमेश्वरै तेथादी केज़ी भी च़ीज़ नाईं चाणी थी। पर परमेश्वरा री आत्मा पाणी माथी घुमा थी।

![](https://cdn.door43.org/obs/jpg/360px/obs-en-01-02.jpg)

तैबै परमेश्वरै बोलौ, “प्याशौ च़ाईं हुऔ!” और प्याशौ हुई गौ। परमेश्वरै देखौ की प्याशौ आच्छ़ौ आ तैबै तेथालै “दिन” बोलौ। और न्यारौ औलग कियौ ज़ेथालै तिणिऐ राच बोलौ।

![](https://cdn.door43.org/obs/jpg/360px/obs-en-01-03.jpg)

सृष्टी चाणनै रै दुजै दिनै परमेश्वरै बोलौ, “पाणी माथिऐ एक फौरक च़ाईं हुणौ” और एक फौरक हुई गौ। परमेश्वरै तेस फौरका लै “सौरग” बोलौ।

![](https://cdn.door43.org/obs/jpg/360px/obs-en-01-04.jpg)

चीजै दिनै परमेश्वरै बोलौ, “पाणी एकी ज़ागै च़ाईं कौठै हुऔ और शुकी ज़ौबीन च़ाईं दिशणी।” तिणिऐ शुकी ज़ौबीना लै धौतरी बोलौ और पाणी लै “समुंदर” बोलौ। परमेश्वरै देखौ कि ज़ो तिणिऐ चाणौ सेऊ आच्छ़ौ थौ।

![](https://cdn.door43.org/obs/jpg/360px/obs-en-01-05.jpg)

तैबै परमेशवरै बोलौ, “धौतरी सारै रौंगा रै पेड़-पौधै ज़ौमावा।” और तिणौ ई हुऔ। परमेश्वरै देखौ कि ज़ो तिणिऐ चाणौ सेऊ आच्छ़ौ थौ।

![](https://cdn.door43.org/obs/jpg/360px/obs-en-01-06.jpg)

सृष्टि चाणनै रै च़ोथै दिनै परमेश्वरै बोलौ, “सौरगा दी प्याशौ हुआ।” और सूरज, ज़ून और तारै परगट हुऐ। परमेश्वरै सै धौतरी माथै प्याशै देणा लै और दिन और राच, मौसम और बौरिशा दी फौरक कौरना लै चाणै।

![](https://cdn.door43.org/obs/jpg/360px/obs-en-01-07.jpg)

पाँज़वै दिनै परमेश्वरै बोलौ, “ज़िउंदै प्राणी पाणी मांझ़िऐ भौरिया और सौरगा दी च़ौड़कु उड़ा।” इणै कौरी तिणिऐ पाणी दी तैरनै वाल़ै ज़न्तु और च़ौड़कु चाणै। परमेश्वरै देखौ कि इयौ आच्छ़ौ थौ और तिउंलै आशिष देई।

![](https://cdn.door43.org/obs/jpg/360px/obs-en-01-08.jpg)

सृष्टि रै च़ोथै दिनै परमेश्वरै बोलौ, “धौतरी माथी सारै रौंगा रै जानवर हुआ।” और परमेश्वरा रै बोल़नै रै अनुसार इणौ हुई गौ। कुछ़ जानवर धाचणा लै थै, कुछ़ ज़ौमिना माथी लौअराणै वाल़ै थै, और कुछ़ ज़ाँगली जानवर थै। सृष्टि चाणनै रै च़ोथै दिनै परमेश्वरै बोलौ, कि इयौ आच्छ़ौ आ।

![](https://cdn.door43.org/obs/jpg/360px/obs-en-01-09.jpg)

तैबै परमेश्वरै बोलौ, “आशौ आमै आदमी आपनै रूपा दी और आपणी बराबरी दी चाणी आ। सै सारी धौतरी माथी और सारै जानवरु माथी राज़ कौराई।”

![](https://cdn.door43.org/obs/jpg/360px/obs-en-01-10.jpg)

यानिके परमेश्वरै धौतरी रै माटै कौरी आदमी चाणौ और तेसदी ज़िंदगी रौ सास फूकरी ऐरौ। एस आदमी रौ नाउं आदम थौ। परमेश्वरै आदमा कालै रौइणा लै एक बौड़ौ बौगीच़ौ चाणौ और तेसरी देखभाल़ कौरना लै आदम तिऐ छ़ाड़ी ऐरौ।

![](https://cdn.door43.org/obs/jpg/360px/obs-en-01-11.jpg)

तेस बौगीच़ै रै बीच़ा दी परमेश्वरै दुई खास पेड़ लाऐ–- ज़िंदगी दैणै रौ पेड़ और भौलै-बुरै ज्ञान दैणै रौ पेड़। परमेश्वरै आदमा लै बोलौ, कि तुमै एस बौगीच़ा दी ज़िंदगी और भौलै बुरै ज्ञाना रै पेड़ा रै फौल़ ना खाएऊ, बाकी सारै पेड़ा रै फौल़ खाई बौल़ा ई। अगर ताइंऐ भौलै बुरै रै ज्ञाना रै पेड़ा रै फौल़ खाऐ ता पोरु तू मौरा ई।

![](https://cdn.door43.org/obs/jpg/360px/obs-en-01-12.jpg)

तैबै परमेश्‍वरै बोलौ, “मौरदा रौ ऐखुली रौइणौ आच्छ़ौ नाईं आ। पर कोई भी जानवर मौरदा रौ साथी नाईं हुई बौल़ौ।

![](https://cdn.door43.org/obs/jpg/360px/obs-en-01-13.jpg)

एथीलै परमेश्वरै आदम गहरी नीजा दी सुताल़ी गौ, तैबै परमेश्वरै आदमी री एक पाशूड़ गाड़ियौ तेथ कौरी एक छ़ेवड़ी चाणी और सै आदमा काऐ आणी।

![](https://cdn.door43.org/obs/jpg/360px/obs-en-01-14.jpg)

ज़ैबै आदमै सै छ़ेउड़ी देखी ता तिणिऐ बोलौ, “कम से कम इयै ता मूं ज़ीणी सा। इयांलै छ़ेवड़ी बोलाई, कैलैकि इयै मौरदा कु आ चाणी ऐन्दी।” ऐज़ै कारणै मौरद आपणै माँ-बाबा छ़ाड़ियौ आपणी बोउटी आइलै मिलियौ रौआ सा।

![](https://cdn.door43.org/obs/jpg/360px/obs-en-01-15.jpg)

परमेश्वरै छ़ेवड़ी और मौरद आपणै रूपा दी चाणै, और तिउंलै आशिष देई, और तिउंलै बोलौ, “भौरी का छ़ोटी-छ़ोहरू और कौई-कौनाल़डु पैदौ कौरौ और धौतरी माथी भौरियौ।” और परमेश्वरै देखौ कि ज़ो कुछ़ भी तिणिऐ चाणौ थौ सेऊ भौरी आच्छ़ौ थौ, और सेऊ तिऊं सौभी कु खुश थौ। एउ सारौ कुछ़ सृष्टि चाणनै रै छ़ौउऐ दिनै हुऔ।

![](https://cdn.door43.org/obs/jpg/360px/obs-en-01-16.jpg)

ज़ैबै सातुऔ दीन आशौ ता ज़ो कुछ़ परमेश्वर कौरदै थौ लागौ औंदौ तिणिऐ सै सारै काम निपटाई ऐरै। तिणिऐ सातवै दिना लै आशीष देई और सेऊ दीन पवित्र ठहराऔ, कैलैकि सेज़ै दिनै तिणिऐ सारी सृष्टि चाणियौ फारिक की। इणै कौरी परमेश्वरै दुनिया और ज़ो कुछ़ तेथदी आ सारेऊ री सृष्टि की आ।

*उत्पत्ति अध्याय 1-2 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_01_128kbps.m4a

## 2. पापा रौ दुनिया दी आशणौ

https://openbiblestories.org/l/bfz/story-2/

![](https://cdn.door43.org/obs/jpg/360px/obs-en-02-01.jpg)

आदम और तेसरी बोउटी परमेश्वरा रै ज़ौरिऐ तिउंलै चाणै औंदै बौड़िया बौगीच़ै दी रौइंदी बारै खुश थै। तिउं मांज़िए कोइयौ भी जूड़कै नाईं भीड़ा थौ, तैबै भी एज़ी बुशुए तिउं मांझ़िया कु कोइयौ बेईज़त नाईं कियौ थौ, कैलैकि दुनिया दी पाप नाईं थौ। सै रोज़ तेस बौगीच़ै दी गुमा फिरा थै और परमेश्वरा आइलै बुशै ला थै।

![](https://cdn.door43.org/obs/jpg/360px/obs-en-02-02.jpg)

पर तेस बौगीच़ा दी एक साप थौ सेउ भौरी मुरुख थौ। तिणिऐ तियां छ़ेउड़ी कु पूछ़ौ, “का परमेश्वरै तुमुलै एस बौगीच़ा रै केज़ै भी पेड़ा रै फौल़ा खाणा लै मौना की आ?”

![](https://cdn.door43.org/obs/jpg/360px/obs-en-02-03.jpg)

तियां छ़ेउड़ीऐ ज़वाब दियौ, “परमेश्वरै आमु आइलै बोलौ आ कि आमै एस भौलै बुरै रै ज्ञाना रै पेड़ा रै फौल़ा रै इलावा केज़ैभी पेड़ा रै फौल़ खाई बौल़ा ई। परमेश्वरै आमु आइलै बोलौ आ कि अगर तुमुऐ एउ फौल़ खाऔ या सेउ छ़ूंऔ भी, ता तुमै पोरु मौराई।”

![](https://cdn.door43.org/obs/jpg/360px/obs-en-02-04.jpg)

तिणी सापै छ़ेउड़ी लै ज़वाब दियौ, “इयै बूश सौच़ी नाईं आसती! तुमै नाईं मौरदै। परमेश्वर ज़ाणा कि ज़िणौ इ तुमै तेस फौल़ खा लै, तुमै परमेश्वरा री बराबरी दी हुआई और तेस भाशिऐ भौलौ और बुरौ सौमुझ़दै लागाई।”

![](https://cdn.door43.org/obs/jpg/360px/obs-en-02-05.jpg)

तियां छ़ेउड़िऐ देखौ कि सेउ फौल़ मौना लोभाउणै वाल़ौ थौ और स्वादा वाल़ौ दिशा थौ। सै भी सौमझ़दार बौणनौ च़ाहा थी, एथिलै तिऐं सेउ फौल़ चोड़ियौ खाई ऐरौ। तैबै तिएं आपणै बोउटा लै ज़ो तिआं आइलै थौ सेउ फौल़ दियौ और तिणिऐ भी खाऔ।

![](https://cdn.door43.org/obs/jpg/360px/obs-en-02-06.jpg)

फेटी ई, तिउंरी आखी खुली गौई, तिउंकै पौतौ लागौ कि सै नांगै थै। तिउंऐ पाच ज़ोड़ियौ, जुड़कै चाणियौ आपणै ज़िवा दुमणा री कोशिश की।

![](https://cdn.door43.org/obs/jpg/360px/obs-en-02-07.jpg)

तैबै तिणी मौरदै और तेसरी छ़ेउड़िऐ तेस बौगिच़ा दी घुमदै बारै परमेश्वरा री आक शुणी। सै दुईया परमेश्वरा कु च़ोरुई गौए। तैबै परमेश्वरै मौरदा लै आक देई, “तू किऐ ई?” आदमै ज़वाब दियौ, “मुइंऐ तुमै बौगिच़ा दी घुमदी बारै शूणै, और हाऊं डौरी गौ थौ, कैलैकि हाऊं नांगौ थौ ऐथीलै हाऊं च़ोरुई गौ आ।”

![](https://cdn.door43.org/obs/jpg/360px/obs-en-02-08.jpg)

तैबै परमेश्वरै पुछ़ौ, “ताउंलै कुणिऐ बोलौ कि तू नांगौ आ? का ताइंऐ सेउ फौल़ ता ना खाऔ, ज़ेथलै मुइंऐ मौना की थी?” मौरदै ज़वाब दियौ, ” तुमुऐ मुकै ज़ो इयै छ़ेउड़ी देई आ इयांऐ एऊ फौल़ मुलै दियौ। तैबै परमेश्वरै छ़ेउड़ी कु पुछ़ौ, “ताईंऐ ऐऊ का कियौ आ?” तिएं छ़ेउड़िए बोलौ, “सापै मुलै धोखौ दैऔ आ।”

![](https://cdn.door43.org/obs/jpg/360px/obs-en-02-09.jpg)

परमेश्वरै सापा लै बोलौ, तू शापित आ! तू आपणै पेटा कौरी आंडा लौ और माटौ च़ाटा लौ और तू और इयै छ़ेउड़ी एकी दूजै कु नौफरत कौराई, तेरी औलाद और इंआरी औलाद भी एकी दूजै कु नौफरत कौराई। इआं छ़ेउड़ी रौ वंश तैरौ मूंड फेच़ा लौ, और तू तेसरौ फाइनौ टुकाई।”

![](https://cdn.door43.org/obs/jpg/360px/obs-en-02-10.jpg)

तैबै परमेश्वरै छ़ेउड़ी लै बोलौ, “हाऊं ताउंलै औल़खिंदै बारी भौरी दुख दिआऊ। तू आपनै बोउटै माथी आश छ़ाड़ाई, और सेउ ताउं माथी राज़ कौरा सा।”

![](https://cdn.door43.org/obs/jpg/360px/obs-en-02-11.jpg)

परमेश्वरै मौरदा लै बोलौ, “ताइंऐ आपणी बोउटी री शुणी और मेरी आज्ञा नाईं मानी। ऐथीलै धौतरी शापित हुई आ, और ताउं नाज़ ज़ौमाउणा लै भौरी काठी मैहनत कौरना री ज़रुरत आ। तैबै तू मौराई, और तैरौ शरीर माटै दी मिला सा।” तिणी मौरदै आपणी बोउटी रौ नाउं हव्वा छ़ाड़ौ, ज़ेथारौ मतलब आ “ज़िंदगी देणै वाल़ी”, कैलैकि सै सारी ज़ातिउ री आम्मा हुई सा, और परमेश्वरै आदम और हव्वा कालै जानवरू रै खाल़डै रै चाणै औंदै जूड़कै भीड़ाऐ।

![](https://cdn.door43.org/obs/jpg/360px/obs-en-02-12.jpg)

तैबै परमेश्वरै बोलौ, “ऐबै भौलै बुरै ज़ाणियौ आदमी आमु ज़िणौ हुई गौ आ। ऐथीलै तिउं ऐबै तेस ज़िंदगी रौ फौल़ तिउंलै नाईं च़ाईं खाणै देणौ कि सै सौदा ज़िउंदै रौआ।” ऐथीलै परमेश्वरै आदम और हव्वा तेस बीगिच़ै कु बाइरै गाड़ी गौऐ। और परमेश्वरै कोइयौ भी तेस ज़िंदगी रै पेड़ा रै फौल़ खाणै कु रोकणा लै बौगौच़ै काऐ ताकती वाल़ै सौरगा रै दूत बोशाल़ी गौऐ।

*उत्पत्ति अध्याय 3 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_02_128kbps.m4a

## 3. नुह नावा रै आदमी री काहणी

https://openbiblestories.org/l/bfz/story-3/

![](https://cdn.door43.org/obs/jpg/360px/obs-en-03-01.jpg)

भौरी बौगता बासिऐ दुनिया दी भौरी लोग रौआ थै। सै भौरी दुष्ट और पापी हुई गोऐ थै। एउ एती बूरौ थौ कि परमेश्वरै एक भौरी बौड़ै काल़ा कौरी इएं पुरी दुनिया खातम कौरणै रौ फैसलौ कियौ।

![](https://cdn.door43.org/obs/jpg/360px/obs-en-03-02.jpg)

पर परमेश्वर नूह नांवा रै आदमी कु खुश थौ। और सेउ बुरै आदमी मांझ़ी रौइणै वाल़ौ एक धौरमी आदमी थौ। परमेश्वरै नूहा लै बोलौ कि हाऊं भौरी बौड़ौ पाणी रौ काल़ आणनै वाल़ौ आ। ऐथीलै तिणिऐ, नूहा कू एक भौरी बौड़ी किस्ती चाणना लै बोलौ।

![](https://cdn.door43.org/obs/jpg/360px/obs-en-03-03.jpg)

परमेश्वरै नूहा लै बोलौ तकरीबन एक शौ दुई बिऐ मीटर लांबी, एक बिऐ चिन मीटर बिली और साढ़ै तेरह मीटर ऊँच़ी किस्ती चाणनै लै बोलौ। और बोलौ ताईं सै किस्ती ज़ूखड़ै री और तेथादी चीन मंज़िलै और भौरी का कौमरै और एक छ़ापर और एक खिड़की चाणनी आ। सै किस्ती नूह, तेसरै टौबर, और धौतरी रै सारै जआनवरु पाणी रै काल़ा कु बौच़ाई छ़ाड़ा सा।

![](https://cdn.door43.org/obs/jpg/360px/obs-en-03-04.jpg)

नूहै परमेश्वरा री बूश मानी। तिणिऐ और तेसरै छ़ोहरुऐ तीणी इ किस्ती चाणी ज़िणी परमेश्वरै बोली थौ। कैलैकि सै किस्ती भौरी बौड़ी थी ऐथीलै तियां चाणना लै कई साल लागै। नूहै लोगु लै आशणै वाल़ै पाणी रै काल़ा रै बारै दी खौबरदार किऐ और तिउंलै परमेश्वरा री भीलै बौदलिणा लै बोलौ, पर तिउंऐ तेस माथी विश्वास नाईं कियौ।

![](https://cdn.door43.org/obs/jpg/360px/obs-en-03-05.jpg)

परमेश्वरै नूह और तेसरै टौबर आपुलै और जानवरु लै खाणा री च़ीज़ै कौठै कौरणै रौ हुकम दियौ। ज़ैबै सब कुछ़ तैयार थौ, ता परमेश्वरै नूहा लै बोलौ कि एज़ौ बौगत तेसरी बोउटी रै, तेसरै चिएऊ छ़ोहरु रै, और तिउंरी बोउटी रै कुल मिलाइयौ आठ ज़ौणै किस्ती दी डेउणै रौ थौ।

![](https://cdn.door43.org/obs/jpg/360px/obs-en-03-06.jpg)

परमेश्वरै हर जानवर और पक्षी रै नर और मादा नुहा काऐ भेज़े, ताकि सै बौड़ी किश्ती भितै डेई सौका। और पाणी लागणै रै दौरान बौच़ी रौई सौका। परमेश्वरै हर ज़ाती रै जानवरा रै सात नर और सात मादा भेज़ै ज़ो बौल़ी चढ़ाउणा लै इस्तेमाल कौरी सौका। ज़ैबै सै सारै बौड़ी किश्ती दी पौउंच़ी गौऐ ता परमेश्वरै आपु तिऐं बौड़ी किश्ती रौ दार बंद कियौ।

![](https://cdn.door43.org/obs/jpg/360px/obs-en-03-07.jpg)

तैबै पाणी लागणौ शुरु हुऔ, और पाणी लगातार लागदै थाकौ लागी, बिणा टेकी पाणी दुई बिऐ दिना और दुई बिऐ राची झ़ाउं लागदै थाकौ लागी। सारी दुनिया री हर च़ीज़, इदरा झ़ाउं कि ऊँच़ै-ऊँच़ै पर्वत भी पाणी दी डूबी गोऐ।

![](https://cdn.door43.org/obs/jpg/360px/obs-en-03-08.jpg)

शुकी धौतरी माथी रौइणै वाल़ी हर एक च़ीज़ मौरी गोई, तिउं लोगु और ज़ानवरु छ़ाडियौ, ज़ो किस्ती दी थै। सै किस्ती पाणी मांझ़ी तैरदै थी लागी औंदी और किस्ती भितै ज़ो थै सै सारै सही-सलामत छ़ाड़ै।

![](https://cdn.door43.org/obs/jpg/360px/obs-en-03-09.jpg)

पाणी रुकणै बासिऐ, पांज़ा मिहनै झ़ाउं सै किस्ती पाणी माथी तैहरदै थाकी लागी, सेज़ै बौगता दी पाणी कम थौ औंदै लागौ औंदौ। तैबै एकी दिनै सै किस्ती एकी परवता री च़ोटी माथी डेइयौ टेकी, पर दुनिया इबी भी पाणी दी ढुबी औंदी थी। चीआ मिना बासिऐ, परबतु री च़ोटी दिशदै लागी थी।

![](https://cdn.door43.org/obs/jpg/360px/obs-en-03-10.jpg)

तैबै तौइंऐ दुई बिऐ दिना बासिए, नूहै एक कवागौ इणै देखणा लै बाइरै भेजौ कि का पाणी शुकी गो लौ। सेउ कवागौ शुकी ज़ागा लोड़दै लोड़दै ओरु-पोरु उड़दै थाकौ लागी। पर तेसकै शुकी ज़ागा नाईं मिली।

![](https://cdn.door43.org/obs/jpg/360px/obs-en-03-11.jpg)

तैबै बासिए नूहै एक कबुतरी बाइरै भेज़ी। पर तिआंकै भी शूकी ज़ौबीन नाईं मिली, ऐथीलै सै नूहा काऐ वापिस आशी गोई। साता दिना बासिऐ सै कबुतरी तौइं भेज़ी, और तिआंए आपणी छूँजा दी जैतूना री एक शाउंटी आणियौ वापिस आशी। पाणी घौटदै थौ लागौ औंदौ, और पौधै तौइं दुजी बारै ज़ौमदै लागै थै,

![](https://cdn.door43.org/obs/jpg/360px/obs-en-03-12.jpg)

नूहै साता दिना झ़ाउं पौखौ तैबै चीजी बारी सै कबुतरी बाइरै भेज़ी। ऐज़ै फेरा दी तिआंकै रुकणा री ज़ागा मिली और से वापिस नाईं आशी।पाणी शुकदै थौ लागौ औंदौ।

![](https://cdn.door43.org/obs/jpg/360px/obs-en-03-13.jpg)

दुई मिना बासिऐ परमेश्वरै नूहा लै बोलौ, “ऐबै तू और तैरौ टौबर और सारै जानवर बाइरै गाड़ियौ आणौ। भौरी सारै लोल़डै और कौई-कौनाल़डु पैदै कौरौ और धौतरी माथी भौरियौ। तैबै नूह और तेसरौ टौबर किस्ती कु बाइरै आशै।

![](https://cdn.door43.org/obs/jpg/360px/obs-en-03-14.jpg)

नूहै बाइरै आशियौ एक बेदी वाणी, और बौल़ी लै इस्तैमाला रै लायक धौणु मांझ़िऐ कुछ़ धौण नीइंयौ बौल़ी च़ौड़ाई। परमेश्वर तिआं बौल़ी कु खुश हुऔ और नूह और तेसरै टौबरा लै आशिष देई

![](https://cdn.door43.org/obs/jpg/360px/obs-en-03-15.jpg)

परमेश्वरै बोलौ, “हाऊं वायदौ कौराऊ कि आदमीऊ रै ज़ौरिऐ किऐ औन्दै बुरै कामु रै कारण हाऊं तौइंऐ केभी भी धौतरी लै श्राप नाईं दैंदौ या पाणी-बाड़ा दी दुजी बारै नाईं बौआउंदौ, हालांकी आदमी ज़न्मा कु पापी आ।

![](https://cdn.door43.org/obs/jpg/360px/obs-en-03-16.jpg)

तैबै परमेश्वरै आपणै निशाणा रै रुपा दी पैहली पौणीयार चाणी। ज़ैबै केभी भी सौरगा दी पौणीयार दिशा ली, ता परमेश्वर याद कौरा कि तिणिऐ का वाइदौ कियौ आ और इणी इ तेसरै लोग भी याद कौराई।

*उत्पत्ति अध्याय 6-8 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_03_128kbps.m4a

## 4. अब्राहमा आइलै परमेश्वरा रौ वायदौ

https://openbiblestories.org/l/bfz/story-4/

![](https://cdn.door43.org/obs/jpg/360px/obs-en-04-01.jpg)

पाणी रै काल़ा रै भौरी बौरशा बासिऐ, भौरी लोग रौआ थै, और तिउंए तौइंऐ दुजी बारै परमेश्वरा और एकी दुजै रै बारै दी पाप कियौ। कैलैकि सै सब एक ही बोली बोला थै, ऐथीलै सै एकी साथाई कौठै हुऐ, और ज़ो आज्ञा परमेश्वरै थी देई औंदी कि दुनिया दी भौरियौ, पर तिउंए इलाकौ चाणौ।

![](https://cdn.door43.org/obs/jpg/360px/obs-en-04-02.jpg)

सै भौरी घौमंडी थे, और तिउं किणौ ज़िउणौ च़ाइं तेथारै बारै दी परमेश्वरारी आज्ञा नाईं मानणै च़ाहा थै। इदरा झ़ाउं कि तिउंए एक इणौ मिनार चाणनौ शुरु कियौ ज़ो सौरगा झ़ाउं पहुंच़ा सा। परमेश्वरै देखौ कि अगर सै एकी साथाई बुराई कौरदै थाका लै लागी, ता शायद सै भौरी पाप वाल़ै काम कौराई।

![](https://cdn.door43.org/obs/jpg/360px/obs-en-04-03.jpg)

एथीलै परमेश्वरै तिउंरी बोली भौरी अलग-अलग बोली दी बौदल़ी ऐरी और सै लोग सारी दुनिया दी फौईलाई गोऐ। ज़ो इलाकौ तिउंऐ चाणनौ शुरु कियौ थौ तेथालै बाबेल बोलौ, ज़ेथारौ मतलब आ “गड़बड़ी”।

![](https://cdn.door43.org/obs/jpg/360px/obs-en-04-04.jpg)

कई साला बासिऐ, परमेश्वरै अब्रामा नांवा रै एकी आदमी आइलै बुशै लाई। परमेश्वरै तेस लै बोलौ, “आपणै देश और टौबरा छ़ाड़ियौ सेज़ै देशा लै डेउ ज़ो हाउं ताउंकै देखाल़ु लौ। हाउं ताउंलै आशिष दिआऊ, और ताउंकु एक बौड़ी ज़ाती चाणाऊ। हाउं तैरौ नाउं बौड़ौ कौराऊ। ज़ो ताउंलै आशिष दिआई तेसलै हाउं आशिष देआऊ, और ज़ो ताउंलै शाप देआलौ तेसलै हाउं शाप दिआऊ। तैरै कारणै दुनिया रै कुल़ आशिष पा आ ई।

![](https://cdn.door43.org/obs/jpg/360px/obs-en-04-05.jpg)

और अब्रामे परमेश्वरा री बूश मानी। तिणिऐ आपणै सारै नुकुर आपणी सारी धन-ज़यदादा आइलै आपणी बोउटी सारै आइलै तेस कनान देशा लै डियौ ज़ो परमेश्वरै अब्रामा के देखाल़ौ थौ

![](https://cdn.door43.org/obs/jpg/360px/obs-en-04-06.jpg)

ज़ैबै अब्राहम कनान देशा दी पहुंच़ौ ता परमेश्वरै तेसलै बोलौ, “आपणै च़ारौ तौरफै देख। हाउं ताउंलै एस सारौ देश दिआऊ तैरौ वंश सौदा लै एस देशा माथी हक छ़ाड़ाई।” तैबै अब्राहम सेज़ै देशा दी बौसौ।

![](https://cdn.door43.org/obs/jpg/360px/obs-en-04-07.jpg)

मलिकिसिदक नावां रौ एक आदमी थौ ज़ो परमेश्वरा रौ सौबी कु बौड़ो याजक थौ। एकी दिनै अब्राहम ज़ैबै लौड़ाई कौरियौ थौ वापिस आशदै लागौ औंदौ ता मलिकिसिदक और अब्राहमा री मुलाकात हुई। मलिकिसिदकै अब्राहमा लै आशिष देई और बोलौ, सौभी कु बौड़ै परमेश्वर ज़ो सौरग और धौतरी रौ मालिक आ सेउ तांउलै आशिष दिआ।” तैबै अब्राहमे लौड़ाई दी ज़ीती औंदी सारी च़ीज़ू रौ दशवांस मलिकिसिदका कै दैयौ।

![](https://cdn.door43.org/obs/jpg/360px/obs-en-04-08.jpg)

कई बौरिश बीती गोऐ, पर इबी भी अब्राहम और तेसरी बोउटी सारै रै कोई भी लोल़डै नाईं हुऐ थै। परमेश्वरै अब्रामा आइलै बुशै लाई और तैबै वाइदौ कियौ कि तेसरौ एक छ़ोहरु पैदौ हुआ और ज़िणै सौरगा दी तारै तिणौ इ तैरौ वंश हुआ। अब्रामे परमेश्वरा रै वाइदै माथी विश्वास कियौ। परमेश्वरै बोलौ कि अब्राहम एक धौरमी आदमी आ कैलैकि तिणिऐ परमेश्वरा रै वइदै माथी विश्वास कियौ आ।

![](https://cdn.door43.org/obs/jpg/360px/obs-en-04-09.jpg)

तैबै परमेश्वरै अब्राहम कु एक वाइदौ बानौ। एक वाइदौ दुई गुटा रै बीच़ा दी एकी दुजा लै कामा कौरनै रौ समझ़ौतौ हुआ सा। परमेश्वरै अब्रामा आइलै सेउ वाइदौ तेबी कियौ थौ ज़ेबी सेउ सुतौ औंदौ थौ, पर सेउ तेबी भी परमेश्वरा री बुशै शुणी बौल़ा थौ। परमेश्वरै रै बोलौ, हाउं ताउंकै एक तैरौ आपणौ छ़ोहरु दिआउ। हाउं तैरै वंशा लै एक कनान देश दिआउ। पर इबी झांऊ अब्रामा रै कोई भी छ़ोहरु नाईं हुऐ थौ।

*उत्पत्ति अध्याय 11-15 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_04_128kbps.m4a

## 5. वाइदै रौ छ़ोहरु

https://openbiblestories.org/l/bfz/story-5/

![](https://cdn.door43.org/obs/jpg/360px/obs-en-05-01.jpg)

अब्राम और सारै रै कनान देशा दी पहुंच़णै रै दौस बौरशा बासिऐ, भी इबी झ़ाउं तिउंरै कोई औलाद नाईं थी। ऐथीलै, अब्रामा री बोउटी सारै तेसलै बोलौ, “ परमेश्वरै इबी झ़ाऊं हाऊं लोल़डै पैदै कौरणै रै लायक नाईं कियौ ऊ और ऐबै हाऊं लोल़डै पैदै कौरणा लै भौरी स्याणी ऊ, देख, मेरी नुकराण हाजिरा इदै आ। इआं आइलै शादी कौर कि मुकालै एक लोल़डौ पैदौ कौरी सौका”

![](https://cdn.door43.org/obs/jpg/360px/obs-en-05-02.jpg)

अब्रामै हाजिरा आइलै शादी कौरी गोई और हाजिरा रौ एक छ़ोहरु पैदौ हुऔ, और अब्रामै तेसरौ नाऊं इश्माएल छ़ाड़ौ। पर सारा, हाजिरा कु मीश कौरदै लागी। ज़ेबी इश्माएल तेरह बौरशा रौ थौ, परमेश्वरै तौइंऐ अब्रामा आइलै बुशै लाई।

![](https://cdn.door43.org/obs/jpg/360px/obs-en-05-03.jpg)

परमेश्वरै बोलौ, “हाउं सौभी कु बौड़ौ ताकती वाल़ौ परमेश्वर उ। हाऊं ताऊं आइलै एक वाइदौ बानाउं।” तैबै अब्रामे ज़ौबिना माथी पौड़ियौ ढाल की परमेश्वरै अब्रामा लै इणौ भी बोलौ, “तू भौरीका ज़ातिऊ रौ बाब हुआई। हाऊं ताऊं और तैरै वंशा कै आपणी ज़ौबीन हुणा लै कनान देश दिआउ और हाऊं सौदा लै तिउंरौ परमेश्वर हुआउ। ताऊं आपणै टौबरा रै सारै मौरदू रौ खौतनौ जा कौरणौ।

![](https://cdn.door43.org/obs/jpg/360px/obs-en-05-04.jpg)

“तेरी बोउटी सारै रौ एक लोल़डौ हुआ—सेउ वाइदै रौ छ़ोहरु हुआ। तेसरौ नाउं इसहाक छ़ाड़नौ। हाऊं तिआं आइलै आपणौ वाइदौ बानी छ़ाड़ाउ और सै एक बौड़ी ज़ाती बौणा सा। हाउं इश्माएला कु भी बौड़ी ज़ाती चाणाऊ, पर मैरौ वाइदौ इसाहका आइलै रौआ सा।” तैबै परमेश्वरै अब्रामा रौ नाऊं बौदलियौ अब्राहम छ़ाड़ौ। ज़ेथरौ मतलब आ “भौरी सारेउ रौ बाब”। परमेश्वरै सारै रौ नाउं भी बौदलियौ सारा छ़ाड़ौ ज़ेथारौ मतलब आ “पैहल की मा”।

![](https://cdn.door43.org/obs/jpg/360px/obs-en-05-05.jpg)

सेज़ै दिनै अब्राहमे आपणै सारै घौरा रै मौरदू रौ खौतनौ कियौ। तकरीबन एकी साला बासिऐ, ज़ेबी अब्राहम एक शौ बौरशा रौ थौ और सारा च़ार बिए दस बौरशा री थी तैबै सारै अब्राहमा लै एक लोल़डौ पैदौ कियौ। ज़िणौ परमेश्वरै तिउं आइलै बोलौ थौ तिउंऐ तेसरौ नाउं इसहाक छ़ाड़ौ।

![](https://cdn.door43.org/obs/jpg/360px/obs-en-05-06.jpg)

ज़ैबै इसहाक ज़वान हुऔ त परमेश्वरै इणै बोलियौ अब्राहमा रौ इम्तहान नियौं, “आपणौ एकलौतौ छ़ोहरू निउं, और मुकालै बौल़ी रै रूपाई च़ौड़ाऊ” तैबै तौइंऐ अब्राहमै परमेश्वरा री बूश मानी और आपणौ छ़ोहरु बौल़ी कौरना लै तैयार कियौ।

![](https://cdn.door43.org/obs/jpg/360px/obs-en-05-07.jpg)

ज़ेबी अब्राहम और इसहाक बौल़ी च़ौडाउणै री ज़ागाह भिलै डेउंदै लागै ता इसहाकै पूछ़ौ, “ओ बाब, आमुकै बौल़ी लै ज़ुखड़ै ता आसती आ, पर खाड़ु किदै आ?” अब्राहमे ज़वाब दियौ, “ओ मैरौ छ़ोहरु, परमेश्वर बौल़ी कौरना लै खाड़ू रौ इंतज़ाम आपु कौरा सा।”

![](https://cdn.door43.org/obs/jpg/360px/obs-en-05-08.jpg)

ज़ैबै सै बौल़ी कौरणै री ज़ागा दी पहुच़ै, ता अब्राहमै इसहाक बानियौ बेदी माथै पाई गो आ। सेउ आपणौ छ़ोहरु झ़ांगणै इ वाल़ौ थौ कि परमेश्वरै बोलौ, “ टेक आपणै छ़ोहरु रौ नुकसान नाईं कौर, मंइऐ ज़ाणी ऐरौ आ कि तू मैरौ डौर मानाई कैलैकि ताइंऐ आपणौ एकलौतौ छ़ोहरु भी मुकु बौचाइयौ नाई छ़ाडौ।”

![](https://cdn.door43.org/obs/jpg/360px/obs-en-05-09.jpg)

तेबी ई अब्राहमै बेदी रै नज़दीक एक खाड़ु देखौ ज़ो झ़ाड़िउ दी थौ फौसौ औंदौ। परमेश्वरै इसहाका रै बौदलै बौल़ी लै खाड़ु रौ इंतजाम कियौ थौ अब्राहमे खुशी कौरियै खाड़ु री बौल़ी कौरी।

![](https://cdn.door43.org/obs/jpg/360px/obs-en-05-10.jpg)

तैबै परमेश्वरै अब्राहमा लै बोलौ, “कैलैकि तू मुलै सब कुछ़ देणै वाल़ौ थौ, इदरा झ़ाउं कि आपणौ एकलौतौ छ़ोहरु भी। ऐथीलै हाउं ताउंलै आशीष देणै रौ वाइदौ कौराऊ। तैरौ वंश सौरगा रै तारै कु भी ज़ादौ हुआ कैलै कि ताऐं मैरौ हुकम मानौ आ ऐथीलै हाउं तैरै टौबरा रै ज़ौरिऐ दुनिया रै सारै लोगु लै आशीष दियाऊ।”

*उत्पत्ति अध्याय 16-22 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_05_128kbps.m4a

## 6. परमेश्वर इसहाका लै इंतज़ाम कौरा सा

https://openbiblestories.org/l/bfz/story-6/

![](https://cdn.door43.org/obs/jpg/360px/obs-en-06-01.jpg)

ज़ेबी अब्राहम भौरी बूढ़ौ हुई गौ तेबी तेसरौ छ़ोहरु, इसहाक, एक मौरदा री उमरी रौ हुई गौ थौ। ऐथीलै अब्राहमे आपणौ एक नुकुर आपणै छ़ोहरु इसाहका लै सेज़ै देशा कु बोउटी आणना लै भेज़ौ ज़िऐ तेसरै रिश्तैदार रौआ थै।

![](https://cdn.door43.org/obs/jpg/360px/obs-en-06-02.jpg)

ज़िऐ अब्राहमा रै रिश्तै दार रौआ थै तेस देशा दी डेउणा लै एक लांबै सौफरा बासिए तेस नुकरा री मुलाकात रिबका कु कौराई सै अब्राहमा रै भाई री कौनाल़डी थी।

![](https://cdn.door43.org/obs/jpg/360px/obs-en-06-03.jpg)

रिबका आपणै टौबरा छ़ाड़ियौ तेस नुकरा आइलै मानी गोई। ज़ीणी इ सै पहुंच़ै इसहाकै तियां आइलै शादी कौरी गोई।

![](https://cdn.door43.org/obs/jpg/360px/obs-en-06-04.jpg)

एक लांबै बौगता बासिऐ, अब्राहम मौरी गौ आ। तैबै परमेश्वरै अब्राहमा रै छ़ोहरु इसहाका लै, अब्राहमा आइलै बानी औंदौ वाइदै री वज़ाह कु आशीष देई। तेस वचना दी परमेश्वरा रौ एक वाइदौ थौ कि अब्राहमा रै अनगिणत वंश हुआई। पर रिबका रै कोई भी लोल़डै नाईं हुऐ।

![](https://cdn.door43.org/obs/jpg/360px/obs-en-06-05.jpg)

इसाहकै रिबका लै प्राथना की, और परमेश्वरै तिआंरौ गौर्ब ज़ुड़ुवा लोल़डै हुणै रै लायक कियौ। ज़ेज़ै बौगतै सै छ़ोहरु तिआंरै गौर्बा दी इ थै सै आपु मांझ़ी पिटिंदै लागै, ऐथीलै ज़ो कुछ़ औंदै थौ लागौ औंदौ रिबकै परमेश्वरा आइलै बोली ऐरौ।

![](https://cdn.door43.org/obs/jpg/360px/obs-en-06-06.jpg)

परमेश्वरै रिबका लै बोलौ, “ तू दुई लोल़डै पैदै कौराई और तिउंरै वंश दुई औलग-औलग ज़ाती बौणाई। पर बौड़ै छ़ोहरु कु पैदी हुणै वाल़ी ज़ाती छ़ोटै छ़ोहरु रै लोल़डै री आज्ञा जा मानणी।”

![](https://cdn.door43.org/obs/jpg/360px/obs-en-06-07.jpg)

ज़ेबी रिबका रै लोल़डै हुऐ, ता बौड़ौ छ़ोहरु रातौ और बाल़ा वाल़ौ थौ, और तिउंऐ तेसरौ नाउं एसाव छ़ाड़ौ। पर छ़ोटौ छ़ोहरु एसावा रै फाइनै पाकड़ियौ पैदौ हुऔ, और तिउंऐ तेसरौ नाउं याकूब छ़ाड़ौ।

*उत्पत्ति अध्याय 24:1-25:26 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_06_128kbps.m4a

## 7. परमेश्वर याकुबा लै आशीष दिया सा

https://openbiblestories.org/l/bfz/story-7/

![](https://cdn.door43.org/obs/jpg/360px/obs-en-07-01.jpg)

ज़ैबै सै छ़ोहरु बौड़ै हुऐ ता याकूबा कै घौरा कै रौइणौ आच्छ़ौ लागौ, पर एसाबा कै ज़ांगली ज़ानबरू रौ शिकार कौरणौ आच्छ़ौ लागौ। रिबकै याकूबा आइलै प्यार कियौ, पर इसाहाकै एसाबा आइलै प्यार छ़ाड़ौ।

![](https://cdn.door43.org/obs/jpg/360px/obs-en-07-02.jpg)

एकी दिनै ज़ैबै एसाब शिकारा कौरियौ वापिस आशौ ता सेउ भौरी भोखौ थौ। एसावै याकूबा लै बोलौ, “ज़ो ताइंऐ चाणौ औन्दौ आ तेथ मांझ़िया कु थोड़ी रोटी मुलै दै।” याकूबै ज़वाब दियौ, “मु आइलै वाइदौ कर कि पेहलै छ़ोहरु हुणै रै कारण ज़ो सारी च़ीज ज़ो ताउंकै मिलनौ च़ाइं, तेस सारौ तू मुकै दिआलौ। और एसावै सै सारी च़ीज़ै याकूबा कै देणै रौ वाइदौ की एरौ। तैबै याकूबै तेसलै कुछ़ रोटी देई।

![](https://cdn.door43.org/obs/jpg/360px/obs-en-07-03.jpg)

इसहाक एसाबा लै आशीष दैणौ च़ाहा थौ। पर एथकु पैहलै रिबकै इणौ कियौ, कि याकूबा रौ भेश बौदल़ियौ एसाव चाणौ और इसहाका आईलै धोखौ कियौ। इसहाक बुढ़ौ थौ और तेसकै नाईं दिशा थौ। ऐथीलै याकूबै एसाबा रै जूड़कै भिड़ै और बाकरी रौ खाल़डौ आपणै गौल़ै और बाई दी लौपेटौ।

![](https://cdn.door43.org/obs/jpg/360px/obs-en-07-04.jpg)

याकूब इसहाका काए आशौ और बोलौ, “हाउं एसाव उ। हाउं ऐथीलै आशौ उ कि तू मुलै आशिष दिया।” ज़ैबै इसहाकै बाकरी रै बाल़ तोपै और जुड़कै शिंगै, तिणिए सुंच़ौ, कि एउ एसाब आ और तेसलै आशिष देई।

![](https://cdn.door43.org/obs/jpg/360px/obs-en-07-05.jpg)

एसावै याकूबा कु मीश की कैलैकि याकुबै तेसरै पेहलकै छ़ोहरु रौ हक और साथाई आशिष भी च़ोरी ऐरी थी। एथीलै तिणिए याकूबा झ़ांगणै रौ बिच़ार कियौ।

![](https://cdn.door43.org/obs/jpg/360px/obs-en-07-06.jpg)

पर रिबकै एसावा रौ बिच़ार शुणी ऐरौ। ऐथीलै तियांए याकूब आपणै रिश्तैदारा रै काए रौइणा लै दूर भेज़ौ।

![](https://cdn.door43.org/obs/jpg/360px/obs-en-07-07.jpg)

याकूब कई बौरशा झ़ाउं रिबका रै रिश्तैदारु आइलै रौ। सेज़ै बौगतै तिणिए शादी की और तेसरै बारह छ़ोहरु एक छ़ोटूड़ पैदी हुई। परमेश्वरै सेउ भौरी सेठ चाणी ऐरौ आ।

![](https://cdn.door43.org/obs/jpg/360px/obs-en-07-08.jpg)

एक बिए बौरशा झ़ाउं कनाना दी आपणै घौरा कु दूर रौइणै बासिए, याकूब आपणै टौबरा, आपणै नुकरु, और आपणै धौणु री टोली आइलै वापिस आशौ।

![](https://cdn.door43.org/obs/jpg/360px/obs-en-07-09.jpg)

याकूब एथलै डौरौ औंदौ थौ कैलैकि तिणिए सुंच़ौ एसाव औज़ौ भी तेस झ़ांगणौ च़हा सा। एथीलै तिणिए भेटा रै रुपा दी धौणु री टोली एसावा काए भेज़ी। ज़ो नुकुर धौनु री टोली आणियौ आशै थै तिउंए बोलौ, “तैरौ नुकुर याकूब, इउं धौण ताउंकै दिआ सा। सेउ शीग्री आ आशदै लागौ औंदौ।”

![](https://cdn.door43.org/obs/jpg/360px/obs-en-07-10.jpg)

पर एसाव ऐबै याकूबा लै नुकसान नाइं देणौ च़ाहा थौ। ऐथारै बौदल़ै, सेउ तेस एकी बारी तौइं देखियौ भौरी खुश थौ। तेथ बासी याकूब कनाना दी आरामा कौरी रौ। तैबै इसहाक मौरी गौ और याकूब और एसावै सेउ दाबौ। ज़ो वाइदै परमेश्वरै अब्राहम कु थै किऐ औन्दै सै ऐबै इसहाका कु याकूबा माथै आशी गोऐ।

*उत्पत्ति अध्याय 25:27-35:29 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_07_128kbps.m4a

## 8. परमेश्वर यूसुफ और तेसरै टौबर बौच़ावा सा

https://openbiblestories.org/l/bfz/story-8/

![](https://cdn.door43.org/obs/jpg/360px/obs-en-08-01.jpg)

कई बौरशा बासिऐ, ज़ैबै याकूब बुढ़ौ हुई गौ थौ, ता तिणिए आपणै प्यारै छ़ोहरु यूसुफ तेसरै भाईउ री देखभाल़ कौरना लै भेज़ौ ज़ो धौणु रै शाल़ा री देखभाल़ कौरदै थै लागै औंदै।

![](https://cdn.door43.org/obs/jpg/360px/obs-en-08-02.jpg)

यूसुफा रै भाई तेस आइलै मीश कौरा थै कैलै कि तेसरौ बाब तेस आइलै भौरी प्यार छ़ाड़ा थौ और एथलै भी कि यूसुफै सुइणौ देखौ कि सेउ तिउंरौ अधिकारी हुआ सा। ज़ेबी यूसुफ आपणै भाइउ काए आशौ ता तिउंए सेउ पाकड़ी ऐरौ आ और सेउ नुकरु रै बेच़णै वाल़ेउ रै हाथाई बेच़ी ऐरौ आ।

![](https://cdn.door43.org/obs/jpg/360px/obs-en-08-03.jpg)

घौरै आशणै कु पेहलै यूसुफा रै भाईउए यूसुफा रै जुड़कै बाकरी रै लोउ दी भिज़ाई ऐरै। और तिउंए सै जुड़कै आपणै बाबा कै देखाए ताकी सेउ ज़ाणा लौ कि यूसुफ ज़ांगली ज़ानवरुए झ़ागीं ऐरौ आ। याकूब भौरी उदास थौ।

![](https://cdn.door43.org/obs/jpg/360px/obs-en-08-04.jpg)

नुकरु बेच़णै वाल़ैउऐ यूसुफ मिस्रा लै नीं गौ आ नील नौइ काए बौसौ औंदौ मिस्र एक बौड़ौ और ताकती वाल़ौ देश थौ। तिउं नुकरु बेच़णै वाल़ैउऐ सेउ यूसुफ एकी सेठा कै नुकरा रै रूपा दी बेच़ी ऐरौ आ। युसुफै आपणै मालिका री बौड़िया सेवा की, और परमेश्वरै यूसुफा लै आशीष देई।

![](https://cdn.door43.org/obs/jpg/360px/obs-en-08-05.jpg)

यूसुफा रै मालिका री बोउटिए यूसुफा काए सुतणा री कोशिश की, पर यूसुफै इणै कौरी परमेश्वरा रै खिलाफ पाप कौरना लै इनकार की। तिंआरै रोश आशी गौऐ और यूसुफा माथै झ़ूठौ आरोप लाई ऐरौ, ऐथीलै सेउ पाकड़ियौ ज़ेलखानै लै भेज़ी गौ। इदरा झ़ाउं कि ज़ेलखानै दी भी यूसुफ परमेश्वरा आइलै सौच़्च़ाई दी रौ, परमेश्वरै यूसुफा लै आशीष देई।

![](https://cdn.door43.org/obs/jpg/360px/obs-en-08-06.jpg)

दुई बौरशा बासिऐ, यूसुफ इबी भी ज़ेलखानै दी थौ, भलै इ सेउ सौच्च़ौ थौ। एकी राचिए, फिरौन राज़ै दुई सुइणै देखै ज़िणै कौरी सेउ राज़ौ भौरी परेशान हुई गौ। तेस सुइणै रौ मतलब कोई भी बिदुवान नाईं बोली बौल़ौ।

![](https://cdn.door43.org/obs/jpg/360px/obs-en-08-07.jpg)

परमेश्वरै यूसुफा कै सुइणा रै मतलब बोलणा री ताकत देई थी, एथीलै फिरौनै यूसुफ ज़ेलखानै कु आपु कँए औटाऔ। यूसुफै तेसकै तिउं सुइणै रौ मतलब बोलौ, “ परमेश्वर भरपूरा री फौसला वाल़ै साता बौरशा बासिऐ काल़ा रै सात बौरिश भेज़णै वाल़ौ आ।”

![](https://cdn.door43.org/obs/jpg/360px/obs-en-08-08.jpg)

फिरौन यूसुफा कु एती खुश हुऔ कि तिणिए सेउ मिस्र देशा रौ दूजौ ताकती वाल़ौ आदमी छ़ाँटी ऐरौ आ।

![](https://cdn.door43.org/obs/jpg/360px/obs-en-08-09.jpg)

यूसुफै लोगु कु आच्छ़ी फौसला वाल़ै सात बौरशा दी भौरीका नाज़ कौठै कौरना लै बोलौ। ज़ैबै साता बौरशा रौ काल़ आशौ तैबै यूसुफै लोगु लै नाज़ बेच़ौ ताकी तिउं कै खाणा लै पूरौ हुआ।

![](https://cdn.door43.org/obs/jpg/360px/obs-en-08-10.jpg)

सेउ काल़ सिर्फ मिस्रा देशा दी नाईं पर कनाना दी भी पौड़ौ थौ। ज़िऐ याकूब और तेसरै टौबरा रै रौआ थै।

![](https://cdn.door43.org/obs/jpg/360px/obs-en-08-11.jpg)

एथीलै याकूबै सौबी कु बौड़ै छ़ोहरु नाज़ा खरीदणा लै मिस्रा लै भेज़ै। ज़ैबै सै नाज़ा खरीदणा लै यूसुफा काए खौड़ै हुऐ ता तिउं भाईउए यूसफ नाईं प्राणौ। पर यूसुफै सै प्राणी गौए।

![](https://cdn.door43.org/obs/jpg/360px/obs-en-08-12.jpg)

इणौ पौतौ कौरणा लै की सै बौदल़ुई गौए आ तिउं परखुणै बासिऐ, यूसुफै बोलौ, हाउं तुमारौ भाई यूसफ उ! डौरौ नाईं ज़ेबी तुमुए हाउं नुकरा रै रुपा दी बेच़ौ थौ तेबी तुमुए बुरै कौरणै री ठाणी थी, पर परमेश्वरै सै बुराई भौलाई लै इस्तैमाल की आ! आशौ मिस्रा दी रौ ताकी हाउं तुमुलै और तुमारै टौबरा लै नाज़ा रौ इंतज़ाम कौरी बौल़ू।”

![](https://cdn.door43.org/obs/jpg/360px/obs-en-08-13.jpg)

ज़ेबी यूसुफा रै भाई घौरै वापिस आशै ता तिउंऐ आपणै बाबा याकूबा लै बोलौ की आमारौ भाई यूसुफ इबी भी ज़िउंदौ आ ता सेउ भौरी खुश हुऔ।

![](https://cdn.door43.org/obs/jpg/360px/obs-en-08-14.jpg)

हालाँकि याकूब बुढ़ौ आदमी थौ तैबै भी सेउ आपणै पूरै टौबरा आइलै मिस्रा लै डिऔ, और सै तिऐ बौसी गौऐ। याकूबा रै मौरणै कु पैहलै, तिणिए आपणै सारै छ़ोहरु लै आशिष देई।

![](https://cdn.door43.org/obs/jpg/360px/obs-en-08-15.jpg)

ज़ो वाइदै परमेश्वरै अब्राहमा आइलै किए थै सै इसहाका माथी, और तेथ बासिऐ याकूब, तेथ बासिऐ तेसरै बारह छ़ोहरु और तेसरै टौबरा माथी आशी गौई थी। तिउं बारह छ़ोहरु रै वंश इस्राएला रै बारह गोत्र बौणी गौऐ।

*उत्पत्ति अध्याय 37-50 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_08_128kbps.m4a

## 9. परमेश्वर मूसा औटावा सा

https://openbiblestories.org/l/bfz/story-9/

![](https://cdn.door43.org/obs/jpg/360px/obs-en-09-01.jpg)

यूसुफा रै मौरणै बासिए तेसरै सारै रिश्तैदार मिस्रा दी बौसी गौए। सै और तेसरै वंश कई बौरशा झ़ाउं मिस्रा दी रौऐ और तिउंए भौरी औलाद पैदी की। तिउंलै इस्राएली बोला थै।

![](https://cdn.door43.org/obs/jpg/360px/obs-en-09-02.jpg)

कई शौ साला बासिऐ, इस्राएलिउ री गिनती भौरी बौड़ी गोई थी। यूसुफै ज़ो कुछ़ मिस्रिउ लै कियौ मिस्री सारौ कुछ़ बिसरी गोए थै। सै मिस्रिउ कु डौरी गोए कैलै कि सै गिनती दी भौरी हुई गोए थै। एथीलै सेज़ै बौगतै मिस्रिउ माथी राज़ कौरणै वाल़ै फिरौनै इस्राएली मिस्रिउ रै गुलाम चाणी गोए।

![](https://cdn.door43.org/obs/jpg/360px/obs-en-09-03.jpg)

मिस्रिउए इस्राएली भौरीका घौर और इलाकै चाणना लै मज़बूर किए। तेस काठै कामा कौरियौ तिउंरी ज़िदंगी भौरी दुखी हुई गोई, परमेश्वरै तिउं लै आशिष देई और तिउंरै भौरी लोल़डै पैदै हुए।

![](https://cdn.door43.org/obs/jpg/360px/obs-en-09-04.jpg)

फिरौनै देखौ कि इस्राएलिउ रै भौरी लोल़डै औंदै लागै औंदै, एथीलै तिणिऐ आपणै लोगु लै इस्राएलिउ रै छ़ोटै छ़ोहरु नील नौई दी शोटिणै और झ़ांगणै रौ हुकम दैयौ।

![](https://cdn.door43.org/obs/jpg/360px/obs-en-09-05.jpg)

एकी इस्राएली छ़ेवड़िऐ एक छ़ोहरु पैदौ कियौ। तिआं छ़ेउड़िए बौशा झ़ाउं सेउ छ़ोहरु च़ोरी छ़ाड़ौ।

![](https://cdn.door43.org/obs/jpg/360px/obs-en-09-06.jpg)

ज़ैबै तेस छ़ोहरु रै मा-बाबा रै बेबश हुई ता सै च़ोरी ना बौल़ै, ता तिउंए झ़ांगणै कु बौच़ाउणा लैएकी तैहरनै वाल़ी टोकरी दी नील नौई रै डिका दी सरकांडै मांझ़ी छ़ाड़ी गौ। तेसरी बौड़ी बौइण च़ोकसिए रौई कि एस छ़ोहरु आइलै का हुआ सा।

![](https://cdn.door43.org/obs/jpg/360px/obs-en-09-07.jpg)

फिरौना री छ़ोटिए तियां टोकरी दी सेऊ छोहरु देखौ। और तिंआऐ सेउ आपणै छ़ोहरु रै रूपा दी अपणाई ऐरौ। और तेस छ़ोहरु लै दूधा प्याउणा लै एक इस्राइली छ़ेउड़ी छ़ाड़ी एरी। तिआंकै इणौ ठेउ नाईं थौ कि ऐ छ़ेउड़ी एस छ़ोहरु री औसली मा सा। ज़ैबै सेउ छ़ोहरु एती बौड़ौ हुऔ कि ऐबै तेसकै आपणी मा रै दूधा पीणा री कोई ज़रुरत नाईं थी। ता तिआंए सेउ छ़ोहरु फिरौना री छ़ोटी कै वापिस देई गो आ, तेसरौ नाउं मूसा थौ।

![](https://cdn.door43.org/obs/jpg/360px/obs-en-09-08.jpg)

ज़ेबी मूसा बौड़ौ हुई गौ थौ, ता तिणिऐ देखौ कि एक मिस्री इस्राएली पीटदै थौ लागौ औंदौ। मूसै आपणौ साथी इस्राएली बौच़ाउणा री कोशिष की।

![](https://cdn.door43.org/obs/jpg/360px/obs-en-09-09.jpg)

मूसै सुंच़ौ कि तेस कोइयौ नाईं देखदै लागौ औंदौ ता तिणिऐ सेउ मिस्री झ़ांगी ऐरौ और तेसरौ मौड़ौ दाबी गौ। पर मूसै ज़ो कियौ थौ सेउ कुणिऐ देखी ऐरौ थौ।

![](https://cdn.door43.org/obs/jpg/360px/obs-en-09-10.jpg)

फीरौना कै पौतौ लागौ कि मूसै का कियौ आ। तिणिऐ तेस झ़ांगणै री कोशिश की, पर मूसा मिस्रा कु ज़ांगला दी भागी गौ और फिरौना रै फौज़ी तेस लोड़ी नाईं बौल़ै।

![](https://cdn.door43.org/obs/jpg/360px/obs-en-09-11.jpg)

मुसा मिस्रा कु दूर ज़ांगला दी डेइयौ एक ग्वाल़ौ बौणी गौ। तिऐ तिणिऐ एकी छ़ेउड़ी आइलै शादी की गोई और तेसरै दुई छ़ोहरु हुई गोऐ।

![](https://cdn.door43.org/obs/jpg/360px/obs-en-09-12.jpg)

मूसा आपणै शेउरा री भेरी रै शाल़ा री देख-भाल़ कौरा थौ। एकी दिनै, तिणिऐ देखौ कि आग झ़ाड़ी दी लागी ऐन्दी पर झ़ाड़ी नाईं थी ज़ाल़दै लागी औंदी। मूसा आगी देखदै झ़ाड़ी रै नज़दीक डैउंदै लागौ ता तेबी परमेश्वरै मूसा आइलै बुशै लाई और बोलौ, “ओ मूसा, आपणै बूट पोरु गाड़। कैलैकि तू एक पवित्र ज़ागाह दी खौड़ी ई।”

![](https://cdn.door43.org/obs/jpg/360px/obs-en-09-13.jpg)

परमेश्वरै बोलौ, मुइंऐ लोगु रै बौड़ै दुख देखै इ। हाउं ताउं फिरौना काऐ भेज़ाउ ताकी तू इस्राएलिउ मिस्रा री गुलामी कु छ़ुड़ावा। हाऊं तिउंकै कनान देश दिआउ, सेज़ौ देश ज़ासरौ वायदौ मुंइऐ अब्राहम, इसहाक और याकूबा आइलै कियौ थौ।”

![](https://cdn.door43.org/obs/jpg/360px/obs-en-09-14.jpg)

मूसै पूछ़ौ, “अगर लोग मुंकु तैरौ नाऊं पुछ़ा लै ता हाउं का बोलु लौ?” परमेश्वरै बोलौ, मैरौ नाऊं, “ज़ो हाउं आ सेउ हाउं आ। तिउं आइलै बोलै, ज़ो हाउं आ सेऊ हाऊं आ।” तिणीए हाउं तुमु काऐ भेज़ो उ।’ तिउंकै इणौ भी बोलै, हाउं तुमारै बुज़ुर्ग अब्राहम, इसहाक और याकूबा रौ परमेश्वर यहोवा उ।’ मैरौ एऊ नाउं सौदा रौ आ।”

![](https://cdn.door43.org/obs/jpg/360px/obs-en-09-15.jpg)

मूसा डौरा थौ और फिरौना काऐ नाईं डेउणौ च़ाहा थौ कैलैकि तिणिऐ सुंच़ौ कि सेउ आच्छ़ै कौरी नाईं बोली बौल़दौ, एथीलै परमेश्वरै मूसा रौ भाई हारून तेसरी मज़द कौरणा लै भेज़ौ।

*निर्गमन अध्याय 1-4 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_09_128kbps.m4a

## 10. दस मुश्किल

https://openbiblestories.org/l/bfz/story-10/

![](https://cdn.door43.org/obs/jpg/360px/obs-en-10-01.jpg)

परमेश्वरै मूसा और हारून च़ितलाए कि फिरौना रौ ज़िऊ काठौ हुआ सा। ज़ैबै सै फिरौना काए डिए ता तिउंए बोलौ, “इस्राएला रौ परमेश्वर इणौ बोला सा, ‘मैरै लोगु डेउणै दै!” पर फिरौनै तिउंरी नाईं शुणी और इस्राएली डेउणै और आज़ाद कौरणै रै बज़ाय काठै कामा कौरणा लै मज़बूर किए।

![](https://cdn.door43.org/obs/jpg/360px/obs-en-10-02.jpg)

फिरौन इस्राएली लोगु छ़ाड़ना लै लगातार मौना थाकौ कौरदै लागी, एथीलै परमेश्वरै मिस्रा माथी दस मुश्किलै भेज़ी। इउं मुश्किला रै ज़ौरिए परमेश्वरै फिरौना कै देखाऔ कि सेउ फिरौन और मिस्रा रै देउ कु भौरी ताकती वाल़ौ आ।

![](https://cdn.door43.org/obs/jpg/360px/obs-en-10-03.jpg)

परमेश्वरै नील नौ लोऊ दी बौदली गोई, पर फिरौनै से नाईं डेउनै दै।

![](https://cdn.door43.org/obs/jpg/360px/obs-en-10-04.jpg)

परमेश्वरै पूरै मिस्रा दी मानु भेज़ै। फिरौनै मानु दूर कौरना लै मूसा कु औरज़ की। पर सारै मानु मौरनै बासिए, फिरौनै आपणौ ज़िउ काठौ कियौ और इस्राएली नाईं डेऊणै दै।

![](https://cdn.door43.org/obs/jpg/360px/obs-en-10-05.jpg)

एथीलै परमेश्वरै धणकुटी री मुश्किल भेज़ी। तेथ बासी तिणिए डाँसेउ री मुश्किल भेज़ी। फिरौनै मूसा और हारून औटाऐ और तिउं आइलै बोलौ कि अगर सै इयां मुश्किल रोका लै ता इस्राएली मिस्रा छ़ाड़ियौ डेइ बौल़ाई। ज़ैबै मूसै प्राथना की ता परमेश्वरै मिस्रा कु डाँस भौगाई गोए। पर फिरौनै आपणौ ज़िउ काठौ कियौ और सिए लोग आज़ाद हुइयौ डेउणै नाईं दिए।

![](https://cdn.door43.org/obs/jpg/360px/obs-en-10-06.jpg)

एथ बासी, परमेश्वरै मिस्रिउ रै सारै धाचणै वाल़ै धौण बिमार हुइयौ मौरणै दिए। पर फिरौना रौ ज़िउ काठौ हुई गौ थौ और तिणिए इस्राएली लोग डेउणै नाईं दै।

![](https://cdn.door43.org/obs/jpg/360px/obs-en-10-07.jpg)

तैबै परमेश्वरै मूसा कु फिरौना रै सामनै छ़ार फुकुरणा लै बोलौ। ज़ेबी तिणिए इणौ कियौ ता मिस्री लोगु दी दुखणै वाल़ै फालु निकल़ी गोए, पर इस्राएलिउ दी कुछ़ नाईं हुऔ। परमेश्वरै फिरौना रौ ज़िउ काठौ कियौ, और इस्राएली आज़ाद हुईयौ डेउणै नाईं दिए।

![](https://cdn.door43.org/obs/jpg/360px/obs-en-10-08.jpg)

एथ बासी, परमेश्वरै शौरु पाऐ मिस्रा री आधै कु ज़ादी फौसल नाश की और ज़ुण-कुण बाईरै निकल़ौ सेउ झ़ांगी ऐरौ। फिरौनै मूसा और हारून औटाए और तिउंलै बोलौ, “ मुइंए पाप कियौ आ। और मूसै प्राथना की सौरगा कु शौरु लागणै रुकी ऐरै।

![](https://cdn.door43.org/obs/jpg/360px/obs-en-10-09.jpg)

पर फिरौनै तौइं पाप कियौ और आपणौ मन काठौ कियौ। तिणिए इस्राएली आज़ाद हुईयौ डेउणै नाईं दिए।

![](https://cdn.door43.org/obs/jpg/360px/obs-en-10-10.jpg)

और परमेश्वरै मिस्रा माथी थाड़ेऊ रौ झ़ुंड आशणै दियौ। इउं थाड़ेउए सै सारी फौसलै खाई ऐरी ज़ो शौरु कु नाश हुणै कु बौच़ी ऐंदी थी।

![](https://cdn.door43.org/obs/jpg/360px/obs-en-10-11.jpg)

तैबै परमेश्वरै राच पाई ऐरी ज़ो चिआ दिना झ़ाउं बौणी रौई। राच ऐती न्यारी थी की लोग आपणै घौरा कु निकल़ी नाईं बौल़ै। पर ज़िए इस्राएली लोग रौआ थै तिऐ प्याशौ थौ।

![](https://cdn.door43.org/obs/jpg/360px/obs-en-10-12.jpg)

इउं नौ मुसिबता बासिऐ भी, फिरौनै इस्राएली आज़ाद हुईयौ डेउणै नाईं दिए। कैलै कि फिरौनै नाईं शुणौ थौ। एथीलै परमेश्वरै एक आखरी मुश्किल भेज़णै री तरकीब चाणी। इयै फिरौना रौ ज़िउ बौदल़ा सा।

*निर्गमन अध्याय 5-10 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_10_128kbps.m4a

## 11. फसह रौ साज़ौ

https://openbiblestories.org/l/bfz/story-11/

![](https://cdn.door43.org/obs/jpg/360px/obs-en-11-01.jpg)

परमेश्वरै मूसा और हारून फिरौना काऐ इणै बोलणा लै भेज़ै कि इस्राएलिउ डेऊणै दै। तिउंऐ सेऊ च़ितलाऔ कि अगर सेऊ डेऊणै नाईं देआ लौ, ता परमेश्वर मिस्रा रै लोगु रै धौण और पैहलकै छ़ोहरु झ़ांगा सा। फिरौनै इणौ शुणियौ परमेश्वरा माथी विश्वास कौरणै और तिउंरी बूश मानणा लै इन्कार कौरी गोई।

![](https://cdn.door43.org/obs/jpg/360px/obs-en-11-02.jpg)

परमेश्वरै तेस माथी विश्वास कौरणै वाल़ै सौबी रै पैहलकै छ़ोहरु बौच़ाउणा लै एक तरीकै रौ इन्तज़ाम कियौ। हर टौबर एक शानौ गाबड़ू नीइंयौ काटणौ थौ।

![](https://cdn.door43.org/obs/jpg/360px/obs-en-11-03.jpg)

परमेश्वरै इस्राएलिउ कु तेस गाबड़ु रौ लोऊ नीइंयौ आपणै घौरा रै दारा माथी लाइणा लै बोलौ। तिउंऐ तेसरौ मास भुज़णौ थौ और रोटी आइलै फेटी फेटी खाणौ थौ। तेथ बासीऐ तिऊं एकदम मिस्र देशा कु निकुल़ना लै तैयार हुणा लै बोलौ।

![](https://cdn.door43.org/obs/jpg/360px/obs-en-11-04.jpg)

ज़ो हुकम परमेश्वरै इस्राएली लोगु लै कौरणा लै बोलौ थौ तिउंऐ तिणी ई सब कुछ़ कियौ। आधी राचिऐ परमेश्वर मिस्रिउ रै हर टौबरा रै पैहलै छ़ोहरु झ़ांगियौ मिस्र देशा रै बीच़ा दी आशौ।

![](https://cdn.door43.org/obs/jpg/360px/obs-en-11-05.jpg)

इस्राएलिउ रै हर एकी रै धरा रै दारा माथी लोऊ लागौ औंदौ थौ, एथीलै परमेश्वरै तिउंरै घौर छ़ाड़ी ऐरै। तिउंरै घौरा दी सारै लोग सुखी थै। सै गाबड़ु रै लोऊ रै कारणै बौच़ी ऐरै।

![](https://cdn.door43.org/obs/jpg/360px/obs-en-11-06.jpg)

पर मिस्रिउऐ परमेश्वरा माथी विश्वास नाईं कियौ थौ और तेसरौ हुकम नाईं मानौ थौ। ऐथीलै परमेश्वरै तिउंरै घौर नाईं छ़ाड़ै। परमेश्वरै मिस्रिउ रै हर एक पैहलकै छ़ोहरू झांगी ऐरै।

![](https://cdn.door43.org/obs/jpg/360px/obs-en-11-07.jpg)

ज़ेला दी पाऐ औंदै कैदिउ कु नीइंयौ फिरौन राज़ै रै पैहलकै छ़ोहरु झ़ाऊं सारै झ़ांगी गोऐ। आपणै बौड़ै दुखा रै कारण मिस्रा रै भौरी लोग लेरदै थै लागै औंदै और दुख मौनाउंदै थै लागै औंदै।

![](https://cdn.door43.org/obs/jpg/360px/obs-en-11-08.jpg)

सेज़ी राचिऐ, फिरौनै मूसा और हारून औटाऐ और बोलौ। “इस्राएलिउ नीइंयौ एकदम मिस्रा कु पोरु निकल़ौ!” मिस्रा रै लोगुऐ भी इस्राएलिउ कु निकुल़नै री औरज़ की।

*निर्गमन अध्याय 11:1-12:32 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_11_128kbps.m4a

## 12. निर्गमन मतलब डेउणौ

https://openbiblestories.org/l/bfz/story-12/

![](https://cdn.door43.org/obs/jpg/360px/obs-en-12-01.jpg)

इस्राएली लोग मिस्रा कु निकल़ियौ भोरी खुश थै। सै ऐबै गुलाम नाईं थै, और सै वाइदै वाल़ै देशा लै थै डेउंदै लागै औंदै! ज़ो कुछ़ भी इस्राएलिउऐ मांगौ, मिस्रिउऐ तिउंकै सेऊ सब कुछ़ देऔ, इदरा झ़ांउ की सुनौ और च़ाँदी तौइं ओर किमती वाल़ी च़ीज़ै भी पोरु देई। दुजै देशा रै कुछ़ लोगुऐ परमेश्वरा माथी विश्वास कियौ और ज़ेबी इस्राएली लोग मिस्रा कु निकल़ै ता सै भी तिऊं आइलै हुई गोऐ।

![](https://cdn.door43.org/obs/jpg/360px/obs-en-12-02.jpg)

दुसै रै बौगतै बादला रौ एक बौड़ौ खांबौ तिउंरै औगाड़ी-औगाड़ी आंडौ। और राची रै बौगतै आगी रौ खांबौ बौणी गौ। परमेश्वर ज़ो कि तेस बादला रै खाँबै और आगी रै खाँबै दी थौ। सौदा तिउं आइलै थौ और तिणिऐ आंडदी बारी तिउंरी अगुवाई की। तिऊं सिरफ एती जा थौ कौरणौ कि तेस पिछ़ाड़ी आंड़ा।

![](https://cdn.door43.org/obs/jpg/360px/obs-en-12-03.jpg)

थोड़ै बौगता बासिऐ, फिरौन और तेसरै लोगुऐ आपणौ मन बौदल़ी गौ। सै इस्राएलिउ दुजी बारै आपणै गुलाम चाणनै च़ाहा थै। एथीलै तिउंऐ इस्राएलिउ रौ पिछ़ौ कियौ। सेऊ पेमेश्वर इ थौ ज़ुणिऐ तिउंरौ मन बौदल़ी गौ थौ। तिणीऐ इणौ एथलै कियौ कैलैकि सेऊ च़ाहा थौ कि सारै इणौ ज़ाणा लै कि फिरौना कु और मिस्रिउ रै सारै देवा कु सेऊ, यहोवा परमेश्वर, भौरी तागती वाल़ौ आ।

![](https://cdn.door43.org/obs/jpg/360px/obs-en-12-04.jpg)

ज़ेबी इस्राएलिउए मिस्रा री फौज़ आशदै देखी ता तिउंकै पौतौ लागौ कि सै फिरौना री फौज़ और रातै समुंदरा रै बीच़ा दी फौसी गौऐ। सै भौरी डौरै और लेरदै लागी गोऐ, “आमुऐ मिस्र कैलै छ़ाड़ौ? आमै मौरणै वाल़ै ई!”

![](https://cdn.door43.org/obs/jpg/360px/obs-en-12-05.jpg)

मूसै इस्राएलिउ लै बोलौ, “डौरौ नाईं! परमेश्वर आज़ तुमारै बौदल़ै लौड़ाई कौरा सा और तुमु बौच़ाउवा सा।” तैबै परमेश्वरै मुसा कै बोलौ, इउं लोगु लै रातै समुंदरा भिलै बौड़ना लै बोल।”

![](https://cdn.door43.org/obs/jpg/360px/obs-en-12-06.jpg)

तैबै परमेश्वरै सेऊ बादला रौ खाँबौ नीइंयौ इस्राएली और मिसी रै बीच़ा दी छ़ाड़ी गौ आ ताकी मिस्री लोग इस्राएली लोगु देखी ना बौल़ा।

![](https://cdn.door43.org/obs/jpg/360px/obs-en-12-07.jpg)

परमेश्वरै मूसा लै समुंदरा भिलै हाथा बौड़ाउना लै बोलौ। तैबै परमेश्वरै बागुरा कौरी रातै समुंदरा रौ पाणी उल़टी और सुल़टी भिलै कौराई ऐरौ, ज़िणै कौरी समुंदरा दी बाट बौणी गोई।

![](https://cdn.door43.org/obs/jpg/360px/obs-en-12-08.jpg)

इस्राएली लोग आपणी दुइया भिला रौ पाणी दवाली आइले शुकी ज़ौबीना माथी समुंदरा रै बिचा दी डेउंदै लागै।

![](https://cdn.door43.org/obs/jpg/360px/obs-en-12-09.jpg)

तैबै परमेश्वरै सेऊ बादला रौ खाम्बौ तिऐं बाटा कु पोरु च़ुंगौ ताकी मिसी लोग इस्राइली लोगु बौच़ियौ डेउन्दै देखी सौका। मिस्री लोगुऐ तिऊं पाकुड़ना रौ विच़ार कियौ।

![](https://cdn.door43.org/obs/jpg/360px/obs-en-12-10.jpg)

और तिउंऐ समुंदरा रै ज़ौरिऐ तियां बाटा दी इस्राएलिउ रौ पिछ़ौ कियौ, पर परमेश्वरै मिस्री डौराई गौऐ तिउंरै रथ फौसाई गौऐ। सै च़िलांदै लागै, “भागौ! इस्राएलिउ री तौरफा कु परमेश्वर थौ लौड़दै लागौ औंदौ!”

![](https://cdn.door43.org/obs/jpg/360px/obs-en-12-11.jpg)

सारै इस्राएली समुंदरा पारभिलै पहुंच़ी गोऐ। तैबै परमेश्वरै मूसा लै बोलौ कि समुंदरा भिलै तौइं हाथ बौड़ाउ। ज़ेबी मूसै इणौ कियौ, ता पाणी मिस्रिउ रै फौज़ी माथी आशी गौ और पाणी पैहलकौ ज़िणौ हुई गौ। सारी मिस्री फौउज़ डूबी गोई।

![](https://cdn.door43.org/obs/jpg/360px/obs-en-12-12.jpg)

ज़ेबी इस्राएलिउऐ देखौ कि मिस्री मौरी गोऐ थै ता तिउंऐ परमेश्वरा माथी विश्वास कियौ। तिउंऐ विश्वास कियौ कि मूसा परमेश्वरा री तौरफा कु भविष्यद्वक्ता सा।

![](https://cdn.door43.org/obs/jpg/360px/obs-en-12-13.jpg)

इस्राएली लोग एथलै भी खुश थै कि परमेश्वरै से मौरनै कु और गुलाम हुणै कु बौच़ाऐ आ। ऐबै सै परमेश्वरा री आराधना कौरदै और तेसरै हुकम मानणा लै आज़ाद थै। इस्राएलिउऐ आपणी आज़ादी रौ साज़ौ मानणा लै और परमेश्वरा री तारीफ कौरणा लै कई गीत गाऐ कैलैकि तिणिऐ सै मिस्रिउ री फौउज़ा कु बौच़ाऐ थै।

![](https://cdn.door43.org/obs/jpg/360px/obs-en-12-14.jpg)

परमेश्वरै इस्राएलिउ कै हर बौरशै एक साज़ौ मौनाउणा रौ हुकम दैयौ इणौ याद कौरणा लै कि परमेश्वरै मिस्रि लोग किणै हौराऐ और इस्राइली लोग गुलाम हुणा कु आज़ाद किऐ। एसलै फसह रौ साज़ौ बोलौ थै। एस साज़ै लै तिउं च़ांगौ और शानौ गाबड़ु बौल़ी कौरणौ थौ, सेउ भुज़णौ थौ, और तेस बिण सौंज़ेड़े री रोटी आइलै खाणौ थौ।

*निर्गमन अध्याय 12:33-15:21 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_12_128kbps.m4a

## 13. इस्राएला आइलै परमेश्वरा रौ वाइदौ

https://openbiblestories.org/l/bfz/story-13/

![](https://cdn.door43.org/obs/jpg/360px/obs-en-13-01.jpg)

ज़ेबी परमेश्वरै इस्राएली लोग रातै समुंदरा पारभिलै निंऐ तेथ बासिऐ, परमेश्वरै सै ज़ांगला बाटिऐ सीनै नावां रै पर्वता री भिलै नींऐ। एउ सेउ इ पर्वत थौ ज़िऐ मूसै ज़ौल़दी झ़ाड़ी देखी थी। तिऊं लोगुऐ तेस पर्वता थालिऐ आपणै तांबु पाऐ।

![](https://cdn.door43.org/obs/jpg/360px/obs-en-13-02.jpg)

परमेश्वरै मूसा और इस्राएला लोगु लै बोलौ, “तुमुए सौदा मेरी बुशै मानणी आ और ज़ो वाइदौ हाउं तुमु आइलै बानुलौ तेथारै अनुसार आंड़ा लै, “ता तुमे मैरौ ईनाम भौरी किमती धन, और याजकु रौ राज़, और पवित्र ज़ाती ठहराई।”

![](https://cdn.door43.org/obs/jpg/360px/obs-en-13-03.jpg)

परमेश्वरा रै ज़ौरिऐ तिऊं काऐ आशणा लै चिआ दिना झ़ाउं आपणौ ज़िऊ तैयार कियौ। तैबै परमेश्वर सीनै पर्वता री च़ोटी माथा कु तौल़ै उतरौ। ज़ेबी सेउ आशौ ता भुइंच़ल आशौ, बिज़ल़ी च़ौमकी, धूँऔ उठौ, और तुरही री ज़ोरै आवाज़ आशी। तैबै मूसा आपु पर्वता माथी च़ौड़ी गौ।

![](https://cdn.door43.org/obs/jpg/360px/obs-en-13-04.jpg)

तैबै परमेश्वरै लोगु आइलै वाइदौ बानौ। तिणिए बोलौ, “हाउं तुमारौ परमेश्वर यहोवा उ। हाउं इ उ ज़ुणिए तुमै मिस्रा री गुलामी कु छ़ुड़ाऐ आ। कासी भी दुजै देवा री भौगती नाईं कौरियौ।”

![](https://cdn.door43.org/obs/jpg/360px/obs-en-13-05.jpg)

“मूरती नाईं चाणियौ और तिउं नाईं पुज़ीयौ, कैलैकि हाउं, यहोवा, तुमारौ एक इ परमेश्वर उ। बुरै कामा लै मैरौ इस्तैमाल नाईं कौरियौ। सब्ता रौ दिन पवित्र मानणा लै याद छ़ाड़नौ। दुजी बुशु दी छ़ौ दिना दी आपणै सारै काम कौरणी, सातवौ दिन तुमुलै आराम कौरणै और मूँ याद कौरणै रौ दिन आ।”

![](https://cdn.door43.org/obs/jpg/360px/obs-en-13-06.jpg)

“आपणै मा-बापा रौ आदर कौरणौ। खून नाईं कौरणौ। गांदै काम नाईं कौरणै। आपणै पड़ोसी री छ़ेउड़ी, तेसरै घौर, या तेसरी केज़ी भी च़ीज़ा निणा री आश नाईं कौरणी।”

![](https://cdn.door43.org/obs/jpg/360px/obs-en-13-07.jpg)

तैबै परमेश्वरै इऐ दस हुकम दुई ज़ानटै दी लिखियौ मूसा कै दै। परमेश्वरै मानणा लै दस हुकम दै। अगर सै इउं हुकम माना लै ता परमेश्वरै आशिष देणै और बौच़ाउणै रौ वाइदौ कौरा सा। इणौ भी बोलौ कि अगर सै इउं हुकम नाईं माना लै ता तिउंलै डाँड देआ सा।

![](https://cdn.door43.org/obs/jpg/360px/obs-en-13-08.jpg)

परमेश्वरै इस्राएलिउ लै एक बौड़ौ तांबु चाणना लै बोलौ— मिलाप वाल़ौ तांबु। परमेश्वरै तिउंकै ठीक बोलौ कि एऊ तांबु किणौ चाणनौ आ, और तेथ भितै का का च़ीज़ै छ़ाड़नी आ। तिणिए तिउंलै सेउ तांबु दुई कौमरै दी बाँटणा लै बोलौ और एक बौड़ौ पौर्दौ चाणना लै भी बोलौ। परमेश्वर तेस पौर्दै भीतरी भीलै वाल़ै कौमरै दी आशा सा और तिऐ रौआ सा। ज़िए परमेश्वर थौ तेस कौमरै दी डेउणा री ज़ाज़त सिरफ बौड़ै याजका लै थी।

![](https://cdn.door43.org/obs/jpg/360px/obs-en-13-09.jpg)

तिउं लोगुऐ तेस मिलाप वाल़ै तांबु रै सामनै एक बेदी चाणनी जा सा। कोई भी ज़ो परमेश्वरा रै कानून नाईं माना लौ सेउ तियां बेदी माथी एक धौण आणा लौ। तैबै याजक तेस बौल़ी कौरा और बेदी माथी परमेश्वरा लै बौल़ी रै रुपा दी जाल़ा। परमेश्वरै बोलौ कि तेस धौणा रौ लोउ तेस आदमी रै पाप दुमा लौ। इणी रीती कु, ऐबै परमेश्वर तेस पाप नाईं देखदौ। सेउ आदमी परमेश्वरा री नौदरी दी “ शुध्द” ठहरा। परमेश्वरै मूसा रै भाई हारून और हारूना रौ वंश आपणै याजक हुणा लै छ़ाँटौ।

![](https://cdn.door43.org/obs/jpg/360px/obs-en-13-10.jpg)

परमेश्वरै तिउं लोगु कै ज़ो हुकम दै थै सै तिउं मानणा लै तैयार हुऐ। सै सिरफ परमेश्वरा रै लोग हुणा लै और सिरफ तेसरी आराधना कौरणै लै तैयार हुए।

![](https://cdn.door43.org/obs/jpg/360px/obs-en-13-11.jpg)

कई दिना झ़ाउं, मूसा सीनै पर्वता माथी रौ। सेऊ परमेश्वरा आइलै बुशै लाइंदै थाकौ लागी। पर लोग तेस पौखदै-पौखदै खौड़ी गौए। एथीलै तिउंए हारूना काए सुनौ आणौ और तेसकु एक मूरती चाणना लै बोलौ ताकी सै परमेश्वरा छ़ाड़ियौ तियां मूरती री आराधना कौरा। इणी रीती कु, तिउंए परमेश्वरा रै खिलाफ पाप कियौ।

![](https://cdn.door43.org/obs/jpg/360px/obs-en-13-12.jpg)

हारूनै बाशटु रै रूपा दी सुनै री एक मूरती चाणी। तिउं लोगुए तियां मूरती री आराधना कौरणी शुरु की और बौल़ी च़ौड़ाई। तिउंरै पापा री वज़ाह कु परमेश्वर तिउंकु भौरी रोशुऔ। सेउ तिउं नाश कौरणौ च़ाहा थौ। पर मूसै तिउं नाईं झ़ांगणै री औरज़ की। परमेश्वरै तेसरी औरज़ शुणी और सै नाश नाईं किऐ।

![](https://cdn.door43.org/obs/jpg/360px/obs-en-13-13.jpg)

तैबै मूसा सीनै पर्वता कु तौल़ै उतरौ। सेउ तिउं दुई ज़ांटी आणियौ आशौ ज़ेथ माथी परमेश्वरै दस आज्ञा लिखी थी। तैबै तिणिए सै मूरती देखी। तेसरै एती रोश आशै तिणिए सै ज़ांटी भानियौ च़ूर-च़ूर किऐ।

![](https://cdn.door43.org/obs/jpg/360px/obs-en-13-14.jpg)

तैबै मूसै सै मूरती पिशियौ नांदी कौरी गौई, और पाणी दी मिलाइयौ सेउ पाणी लोगु लै पिलाऔ। परमेश्वरै तिउं लोगु माथी एक मुश्किल भेज़ीयौ तेथादी भौरी लोग मौरी गौऐ।

![](https://cdn.door43.org/obs/jpg/360px/obs-en-13-15.jpg)

ज़ो ज़ांटै मूसै भानी गौऐ थै तिउंरी ज़ागा दी निणा लै मूसै तिउं दस आज्ञाउ री पाथरा री नौई ज़ांटी चाणी। तैबै सेउ तौइंऐ पर्वता माथी डेई गौ और प्राथना की परमेश्वर तिउं लोगु माफ कौरा। परमेश्वरै मूसा री प्राथना शुणी और सै माफ कौरी ऐरै। नौई ज़ांटी माथी दस आज्ञाउ आणियौ मूसा पर्वता कु तौल़ै उतरौ। तैबै परमेश्वरै सीनै पर्वता कु नीईंयौ वाइदा रै देशा झ़ाउं इस्राएलिउ री अगुवाई की।

*निर्गमन अध्याय 19-34 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_13_128kbps.m4a

## 14. ज़ांगला दी भौटकुणौ

https://openbiblestories.org/l/bfz/story-14/

![](https://cdn.door43.org/obs/jpg/360px/obs-en-14-01.jpg)

परमेश्वरै इस्राएलिउ कै सै नियम बोलनै बंद की गौऐ ज़ेथ माथी आंडणा लै तिउंकै बोलौ थौ। तैबै तिणिऐ सीनै पर्वता कु औगाऊं तिउंरी अगुवाई की। सेऊ तिउं वाइदा रै देशा दी निणौ च़हा थौ। तेस देशा लै कनान बोला थै परमेश्वर बादला रै खांबै दी तिउंरै औगाड़ी-औगाड़ी आंड़ा थौ, और सै पिछ़ाड़ी-पिछ़ाड़ी आंड़ा थै।

![](https://cdn.door43.org/obs/jpg/360px/obs-en-14-02.jpg)

परमेश्वरै अब्राहम, इसहाक और याकूबा कु वाइदौ कियौ थौ कि सेऊ वाईदा रौ देश तिउंरै वंशा लै दिया, पर ऐसै बौगतै तिऐ भौरी का ज़ाती रौआ थी। तिउंलै कनानी बोला थै। सै कनानी लोग परमेश्चरा री आराधना नाईं कौरा थै। और तेसरी आज्ञा नाईं माना थै। सै झ़ूठै देवा री आराधना कौरा थै। और भौरी बुरै काम कौरा थै।

![](https://cdn.door43.org/obs/jpg/360px/obs-en-14-03.jpg)

परमेश्वरै इस्राएलिउ लै बोलौ, “ज़ैबै तुमै तेस वाइदा रै देशा दी डेआलै ता सारै कनानिउ कु छ़ुटकारौ पाइणौ। तिउं आइलै सुलौ नाईं कौरणौ और तिउं आइलै शादी नाईं कौरणी। तुमुए तिउंरी सारी मूरतिउ आच्छ़ा कौरी नाश कौरणी आ। अगर तुमे मेरी आज्ञा नाईं माना लै ता, ता तुमै मैरै बज़ाए तिउंरै देउवा री आराधना कौरदै लागालै।”

![](https://cdn.door43.org/obs/jpg/360px/obs-en-14-04.jpg)

ज़ेबी इस्राएली कनाना रै बानै खाऐ पहुंच़ै, मूसै इस्राएलिउ रै हर एक गोत्रा मांझ़िया कु एकी एकी कौरियौ बारह पुरुष छ़ाँटै। तिणीए सै कनान देशा रै भेद निणा लै भैज़ै कि सेउ देश किणौ देश आ। तिउंए तिउं कनानिउ रौ भैद भी नीणौ थौ कि देखुलै कि सै तागती वाल़ै थै या कमज़ोर थै।

![](https://cdn.door43.org/obs/jpg/360px/obs-en-14-05.jpg)

तिऊं बारहा मौरदुऐ पुरै कनान देशा बाटिऐ डेइयौ चालिस दिना रौ सफर कियौ और तैबै सै वापिस आशै। तिउंऐ लोगु लै बोलौ, “सेऊ देश भौरी नौमी वाल़ौ आ तिऐ भौरी फसल आ लागी ऐन्दी!” पर दस भेदिउऐ बोलौ, “तिउंरै इलाकै भौरी मज़बूत ई और तिदलै आदमी लाम्बे-च़ौअड़ै ई! अगर आमै तिऊं माथै हामलौ कौरुलै, ता सै पाकौ आमु हरावा ई, और आमु झ़ांगा ई।”

![](https://cdn.door43.org/obs/jpg/360px/obs-en-14-06.jpg)

तेबी ई कालेब और यहोशू तौइं दुई भेदिउऐ बोलौ, “इयै बूश सौच्च़ी आ कि कनाना रै लोग लांबै और ताकती वाल़ै ई, पर आमे तिऊं पाकै ई हौराई! कैलैकि परमेश्वर आमुलै लौड़ाई कौरा सा!”

![](https://cdn.door43.org/obs/jpg/360px/obs-en-14-07.jpg)

पर लोगुऐ कालेब और यहोशू री नाईं शूणी। सै मूसा और हारूना लै रोशुई गौऐ और बोलौ, “तुमुए आमै इणै खौतरनाक ज़ागा दी कैलै आणै ई? आमु मिस्रा दी इ रौइणौ च़ाईं थौ। अगर आमे तेस देशा दी डेउलै ता आमे लौड़ाई दी पोरु मौरी आ, और कनाना रै लोग आमारी बोउटी और छ़ोहरु नुकुर चाणाई।” सै लोग मिस्रा लै वापिस डेउणा लै आपु कालै एक स्याणौ छ़ाँटणौ च़ाहा थै।

![](https://cdn.door43.org/obs/jpg/360px/obs-en-14-08.jpg)

ज़ैबै लोगुऐ इणौ बोलौ ता परमेश्वर भौरी रोशुऔ। सेउ मिलाप वाल़ै लांबु दी आशौ और बोलौ, तुमुऐ मैरै बिरोधाई पाप कियौ आ, तुमु सौभी ऐस ज़ांगला दी भौटकुणौ जा सा। हर एक आदमी ज़ो बीश बौरशा और तेथकु ज़ादी उमरी रौ आ तिए मौरा सा और केबी भी तेस देशा दी डेई ना बौल़ा लौ ज़ो तुमकै दिआऊ। सिर्फ कालेब औ यहोशू इ तेथा दी डेई बौल़ाई।

![](https://cdn.door43.org/obs/jpg/360px/obs-en-14-09.jpg)

ज़ेबी लोगुऐ इणौ शुणौ, ता सै दुखी हुई गौए कैलै कि तिउंऐ पाप कियौ थौ। ऐथीलै तिउंऐ कनान देशा माथी लौड़ाई कौरणा रौ फैसलौ निंऔ। मूसै सै नाईं डेउणा लै खौबरदार किऐ कैलैकि परमेश्वर तिउं आइलै नाईं डेउंदौ, पर तिउंऐ तेसरी नाईं शुणी।

![](https://cdn.door43.org/obs/jpg/360px/obs-en-14-10.jpg)

परमेश्वर तिउं आइलै लौड़ाई दी साथाई नाईं डिऔ थौ, एथलै कनानिउए सै हौराई गौए और तिउं मांझ़िऐ भौरीका झ़ांगी भी गौए। तैबै इस्राएली लोग कनाना कु वापिस मुड़ी गौए। तेथ बासी दुई बिऐ बौरशा झ़ाउं, सै ओरु-पोरु भौटकदै लागै।

![](https://cdn.door43.org/obs/jpg/360px/obs-en-14-11.jpg)

इस्राएली लोगु रै ज़ौरिए ज़ांगला दी दुई बिऐ बौरशा दी भौटकुणा रै बौगतै, परमेश्वरै तिउंरी ज़रुरत पूरी की। तिणिऐ तिउंलै सौरगा कु “मन्ना” बोलणै वाल़ी रोटी देई। और बटेरु रै झ़ुंड ज़ेथलै बाडै बोलाई तिउंरै डेरै दी भेज़ै ताकी तिउंलै खाणा लै मास हुआ। तेस पूरै बौगतै, परमेश्वरै तिउंरै जूड़कै और बूट च़िरिणै कु बौच़ाई छ़ाड़ै।

![](https://cdn.door43.org/obs/jpg/360px/obs-en-14-12.jpg)

इदरा झ़ाउं कि परमेश्वरै तिउंलै पिणा लै ज़ादुई रूपा कौरी डोका कु पाणी भी गाड़ौ। पर इणौ सारौ कुछ़ कौरियौ भी, इस्राएली लोगुए परमेश्वरा रै बिरोधा इ और मूसा रै बिरोधाई च़ुगली पाई और कुड़कुड़ाए तैबै भी परमेश्वर विश्वास वाल़ौ थौ। तिणिऐ वाइदौ कियौ थौ कि सेऊ अब्राहम, इसहाक, और याकूबा रै वंशा लै कौरा तिणिऐ सेऊ कियौ।

![](https://cdn.door43.org/obs/jpg/360px/obs-en-14-13.jpg)

तौइं एकी बौगतै तिउंकै पीणा लै पाणी नाईं थौ, परमेश्वरै मूसा लै बोलौ, “डोका आइलै बुशै ला, और तेथाकु पाणी निकल़ा सा।” पर मूसै डोका कु बुशै नाईं लाई। तेथारै बौदलै, डोका दी दुई बारै डोकै दी डिंगै री लाई। इणै कौरी मूसै परमेश्वरा री बेईज़ती की। सारैउ लै पिणा लै डोका कु पाणी ता निकल़ौ, पर परमेश्वर मूसा आइलै रोशुऔ। तिणी बोलौ, कैलै कि ताइंए इणौ कियौ आ, एथीलै तु वाइदै वाल़ै देशा दी नाईं डेई बौल़दौ।

![](https://cdn.door43.org/obs/jpg/360px/obs-en-14-14.jpg)

ज़ैबै इस्राएली दुई बिऐ बौरशा झ़ाऊं ज़ांगला दी भौटकी ऐरै थै, तेबी तिउंऐ परमेश्वरा रै बिरोधाई पाप कियौ थौ। सै सारै मौरी गौऐ थै। तैबै परमेश्वरै सै लोग तौइंए वाइदा रै देशा रै बानै झ़ाउं नी गौए। ऐबै मूसा बूढ़ौ हुई गो थौ, एथीलै परमेश्वरै लोगु री अगुवाई कौरणै दी तेसरी मज़त कौरणै लै यहोशू छ़ाँटौ। परमेश्वरै मूसा लै वाइदौ भी कियौ थौ एकी दिनै सेऊ लोगु काऐ एक मूसा ज़िणौ भविष्यद्वक्ता भेज़ा सा।

![](https://cdn.door43.org/obs/jpg/360px/obs-en-14-15.jpg)

तैबै परमेश्वरै मूसा लै पर्वता री च़ोटी माथी डेउणा लै बोलौ ताकी सेउ वाइदा रौ देश देखी सौका। मूसै वाइदा रौ देश देखौ पर परमेशवरै तेसलै तिए डेउणा री आज्ञा नाईं देई थी। तैबै मूसा मौरी गौ, इस्राएलिउऐ एक बिऐ दौसा दिना झ़ाउं शोक मौनाऔ। तेथ बासिऐ यहोशू तिउंरौ नौवौ अगुवौ बौणी गौ। यहोशू एक आच्छ़ौ अगुवौ थौ कैलैकि तिणिऐ परमेश्वरा माथी भोरौसौ कियौ और तेसरी बुशै मानी।

*निर्गमन अध्याय 16-17; गिनती 10-14; 20; 27; व्यवस्थाविवरण 34 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_14_128kbps.m4a

## 15. वाइदा रौ देश

https://openbiblestories.org/l/bfz/story-15/

![](https://cdn.door43.org/obs/jpg/360px/obs-en-15-01.jpg)

आखरी दी, ऐबै सेऊ बौगत आशी गौ थौ कि इस्राएली लोग वाइदा रै देश, कनाना दी डेआ। तेस देशा दी यरीहो नावां रौ एक इलाकौ थौ। तेस बौच़ाउणा लै च़ारौ तौरफै पाकी दवाली थी। यहोशुए तेस इलाकै दी दुई आदमी भेद नीणा लै भेज़ै। तेस इलाकै दी एक राहाब नावां री गांदै काम कौरणै वाल़ी छ़ेउड़ी रौआ थी। तियांए सै भेदी च़ोरै, और बासिए तियांए सै बौच़ाइयौ इलाकै कु बाइरै गाड़ै। तियांए इणौ ऐथलै कियौ कि सै परमेश्वरा माथी विश्वास कौरा थी। ज़ेज़ै बौगतै लोग यरीहो नाश कौरालै तैबै तिउंए राहाब और तेसरै टौबरा री रौक्षा कौरना रौ वाइदौ कियौ थौ।

![](https://cdn.door43.org/obs/jpg/360px/obs-en-15-02.jpg)

इस्राएली लोगु वाइदा रै देशा दी डेउणा लै यरदन नौ जा थी टौपणी। परमेश्वरै यहोशू लै बोलौ क, “याजकु पैहलै डेउणै दियौ।” ज़ेबी याजकुए यरदन नौई दी आपणै कौदम पाऐ धारा रौ बौइणौ कम हुई गौ आ, ज़िणै कौरी कि इस्राएली लोग नौई पारभिलै शुकी ज़ौबीना माथी डेई बौल़ा।

![](https://cdn.door43.org/obs/jpg/360px/obs-en-15-03.jpg)

तिउं लोगुऐ यरदन नौ टौपी गोई ता यहोशु कु बोलौ कि यरीहौ माथी लौड़ाई कौरणा लै तैयार रौ, सेऊ बौड़ौ पाकौ इलाकौ थौ। परमेश्वरै तिउं लोगु लै बोलौ कि तिउंरै याजकु और फौज़िउ छ़ौ दिना झ़ाउं तेस इलाकै रै फेदियालै घुमणौ आ। और याजकु और फौज़िउए तीणौ इ कियौ।

![](https://cdn.door43.org/obs/jpg/360px/obs-en-15-04.jpg)

तैबै सातवै दिनै,इस्राएलिउऐ तेस इलाकै रै च़ारौ तौरफै घुमै तिउंरै इलाकै रै च़ारौ तौरफै सातवी बारै घुमियौ याजकुए आपणी कौरनाल़ फुकरी और फौज़िउए ज़ोरै-ज़ोरै हाकै-हुँगारै मारै।

![](https://cdn.door43.org/obs/jpg/360px/obs-en-15-05.jpg)

तैबै यरीहो री च़ारौ तौरफा री दवाली ढौल़ी गोई! ज़ीणी परमेश्वरै आज्ञा देई थी इस्राएलिउ ए इलाकै री हर च़ीज़ नाश की गोई। तिउंए सिरफ राहब और तिउंरै टौबर छ़ाड़ी गौए, ज़ो इस्राएलिउ रै भाग बौणी गोए थै। ज़ैबै कनाना दी रौइणै वाल़ै सारै लोगुऐ शुणौ कि इस्राएलिउए यरीहो नाश की गो आ, ता सै डौरी गौए आ कि इस्राएली लोग तिउं माथी भी हमलौ कौराई।

![](https://cdn.door43.org/obs/jpg/360px/obs-en-15-06.jpg)

परमेश्वरै इस्राएलिउ लै आज्ञा देई कि कनाना दी रौइणै वाल़ै केज़ी भी ज़ाती आइलै मेल-मिलाप नाईं कौरणौ आ। पर गिबोनियों नावां री एक ज़ातीए यहोशू कु झ़ूठ बोलौ कि सै कनाना कु दूर एकी ज़ागा रै रौइणै वाल़ै ई। तिउंए यहोशू आइलै मेल-मिलाप कौरणै री औरज़ की। यहोशू और दुजै इस्राएली अगुएउए परमेश्वरा कु नाईं पूछ़ौ कि तिउं का कौरणौ च़ाईं, बिणपुछ़ी तिउंए गिबोनिउ आइलै मेल-मिलाप कियौ।

![](https://cdn.door43.org/obs/jpg/360px/obs-en-15-07.jpg)

चीआ दिना बासिए इस्राएलिउ कै पौतौ लागौ कि गिबोनी लोग कनाना दी इ रौआई। ता तिउंरै रोश आशी गोऐ आ कैलैकि गिबोनिउए तिउंलै धोखौ दियौ थौ। पर तिउंए तिउं आइलै मेल-मिलाप चाणी छ़ाड़ौ कैलैकि मेल-मिलाप परमेश्वरा रै सामनै कियौ थौ। तैबै कुछ़ बौगता बासिए कनाना दी रौइणै वाल़ी एक दुजी ज़ाती, एमोरिउ रै राज़ै शुणौ कि गिबोनिउए इस्राएलिउ आइलै मेल-मिलाप की गो आ, एथीलै तिउंए आपणी-आपणी सेना कौठै कौरियौ एक बौड़ी सेना चाणी और गिबोनिउ माथौ हमलौ कियौ। गिबोनिउए आपणी सहायता लै यहोशू काए खौबर भेज़ी।

![](https://cdn.door43.org/obs/jpg/360px/obs-en-15-08.jpg)

और यहोशुऐ इस्राएली सेना कौठै की और गिबिनिउ काऐ पहुंच़णा लै पुरी राचिऐ आंडै। दोउतराची तिउंऐ एमिरिउ री सेना हैरान की गोई और तिउं माथी हमलौ की गौ आ।

![](https://cdn.door43.org/obs/jpg/360px/obs-en-15-09.jpg)

सैज़ै दिनै परमेश्वर इस्राएलिउ कालै लौड़ौ। तिउंए एमोरी डौराई गौए और परमेश्वरै बौड़ै-बौड़ै शौरु पाईयौ भौरी का एमोरी झ़ांगी गौए।

![](https://cdn.door43.org/obs/jpg/360px/obs-en-15-10.jpg)

परमेश्वरै सूरज भी एकी ज़ागै टेकाल़ी गो आ ताकी इस्राएलिउ कै पूरौ बौगत मिला कि एमोरिउ आच्छ़ा कौरी हौरावा। सेज़ै दिनै, परमेश्वरै इस्राएलिउ लै बौड़ी ज़ीत हासिल की।

![](https://cdn.door43.org/obs/jpg/360px/obs-en-15-11.jpg)

ज़ैबै परमेश्वरै तिउंरी सेना हौराइयौ, भौरीका कनानी ज़ाती रै लोग इस्राएली माथी लौड़ाई कौरना लै कौठै हुऐ। यहोशू और इस्राएलीउए हमलौ कियौ तिउंरौ सत्यानाश कियौ।

![](https://cdn.door43.org/obs/jpg/360px/obs-en-15-12.jpg)

इउं लौड़ाई बासिऐ, परमेश्वरै इस्राएलिउ रै हर एक गोत्रा लै तिउंरौ हिस्सौ दियौ तैबै परमेश्वरै इस्राएली और तिउंरै सारै बानैउ माथी शान्ती देई।

![](https://cdn.door43.org/obs/jpg/360px/obs-en-15-13.jpg)

ज़ेबी यहोशू बुढ़ौ हुऔ ता तिणिए बादै इस्राएली अपु काए औटाऐ। तैबै यहोशूए तिउं लोगु कै याद दिलाऔ कि तिउंए तेस वाइदै माथी आंडणा लै बोलौ ज़ो तिणिए सिनै पर्वता माथी बानौ थौ। तिउं लोगुऐ परमेश्वरा आइलै विश्वासा दी रौइणै और तेसरै कानूना माथी आंडणै रौ वाइदौ कियौ।

*यहोशू अध्याय 1-24 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_15_128kbps.m4a

## 16. छुड़ाउणै वाल़ै

https://openbiblestories.org/l/bfz/story-16/

![](https://cdn.door43.org/obs/jpg/360px/obs-en-16-01.jpg)

यहोशू रै मौरनै बासिऐ इस्राएलिउऐ आज्ञा नाईं मानीं। तिउंए परमेश्वरा रै दैऔ औंदै नियम नाईं मानै, और तिउंऐ तेस वाइदा रै देशा कु बौच़ै औंदै कनानी बाइरै नाईं गाड़ै। इस्राएलिउए आपणै सौच्च़ै परमेश्वर, यहोवा छ़ाडियौ कनानिउ रै देउवा री आराधना शुरु कौरी ऐरी आ। इस्राएलिउ कै कोईयौ भी राज़ौ नाईं थौ, एथीलै ज़ो ज़ासकै ठीक लागौ तिणिऐ सेऊ इ कियौ।

![](https://cdn.door43.org/obs/jpg/360px/obs-en-16-02.jpg)

परमेश्वरा री आज्ञा ना मानणै रै ज़ौरिऐ इस्राएलिउऐ एक बुरौ बिच़ार कियौ कि कुछ़ साला झ़ाउं इस्राएली परमेश्वरा री आज्ञा नाईं मानदै, तैबै सेऊ तिउंरै दुशमनु कु हौराउणा रै ज़ौरिऐ डाँड दिया। इयै दुशमन इस्राएलिउ कु तिउंरी च़ीज़ै लुटाई, तिउंरी धन-ज़यदाद नाश कौराई, और तिउं मांझ़िऐ भौरी लोगु झ़ांगाई। तैबै ज़ेबी इस्राएलिउ रै दुशमन तिउं माथी कई बौरशा झ़ाउं ज़ुलम कौराई, तेथ बासिऐ इस्राएली आपणै पाप मानाई और परमेश्वरा कु बौच़णा लै प्राथना कौराई।

![](https://cdn.door43.org/obs/jpg/360px/obs-en-16-03.jpg)

सौदा ज़ैबै इस्राएली पाप माना लै ता परमेश्वर तिउं बौच़ाउवा आ। सेऊ छ़ुड़ाउणै वाल़ै रै ज़ौरिऐ इणौ कौरा— एक इणौ आदमी ज़ो तिउंरै दुशमनु आइलै लौड़ा लौ और तिउं हौरावा सा। तैबै देशा दी शान्ती हुआ। और सेउ छ़ुड़ाउणै वाल़ौ तिउं माथी ठीक राज़ कौरा सा। परमेश्वरै तिउं लोगु बौच़ाउणा लै भौरीका छ़ुड़ाउणै वाल़ै भेज़ै। परमेश्वरै नज़दीका री एक दुशमण ज़ाती, मिध्यानिउ कौरिए इस्राएलिउ हौराउणा रै ज़ौरिऐ तौइं इणौ कियौ।

![](https://cdn.door43.org/obs/jpg/360px/obs-en-16-04.jpg)

मिध्यानिउऐ साता बौरशा झ़ाउं इस्राएलिउ रौ नाज़ लूटौ। इस्राएली लोग भोरी डौरी गौऐ थै, और सै ओडाच़िउ दी च़ोरुई गौए ताकी मिध्यानी लोग तिउं लोड़ी ना बौल़ा। आखिरकार, तिउंए बौच़णा लै परमेश्वर लोड़ौ।

![](https://cdn.door43.org/obs/jpg/360px/obs-en-16-05.jpg)

गिदोन नावां रौ एक इस्राएली आदमी थौ, सेऊ एक गुप्त ज़ागाह दी गीऊँ झ़ाड़दै थौ लागौ औंदौ ताकी मिध्यानी लोग गिउँ च़ोरा नाईं। यहोवा रै दूतै गिदोना काए डेइयौ बोलौ, “ओ बीर सूरमा, परमेश्वर ताउं आइलै आ। डेउ इस्राएलिउ मिध्यानी रै हाथा कु बौच़ाऊ।”

![](https://cdn.door43.org/obs/jpg/360px/obs-en-16-06.jpg)

गिदोना रै बाबै एक मूरती कालै एक बेदी थी चाणी औंदी। सौबी कु पैहलै परमेश्वरै गिदोना कै तिआं मूरती चोड़ना लै बोलौ। पर गिदोन लोगु कु डौरा थौ, एथीलै तिणिए राच पौखी। ज़ेबी राच पौड़ी ता तिणिए तिआं बेदी चोड़ियौ टुकड़ै-टुकड़ै किऐ। तिणिए परमेश्वरा कालै एक नौई बेदी चाणी और तिआं बेदी माथी परमेश्वरा लै बौल़ी च़ौड़ाई

![](https://cdn.door43.org/obs/jpg/360px/obs-en-16-07.jpg)

दुजी दोउती लोगुए देखौ कि इऐ बेदी चोड़ियौ टुकड़ै-टुकड़ै कौरी औली, ऐथीलै तिउंरै रोश आशै। सै गिदोना झ़ांगणा लै तेसरै घौरा कै आशै, पर गिदोना रै बाबै बोलौ, “तुमै कैलै आपणै देउवा री मज़त कौरणा री कोशीश कौरदै लागै औंदै? अगर सेऊ देऊ आ ता तेस आपणी रौक्षा आपु इ कौरणै दैयौ!” कैलैकि तिणिऐ इणौ बोलौ तैबै तिउंए गिदोन नाईं झ़ांगौ।

![](https://cdn.door43.org/obs/jpg/360px/obs-en-16-08.jpg)

तैबै इस्राएलिउ लुटदै मिध्यानी लोग तौइं आशी गौए। सै सारै ऐती भीरी थै कि गौणिया भी नाईं थै। गिदोने तिउं आइलै लौड़ाई कौरणा लै इस्राएली लोग कौठै औटाऐ। गिदौने परमेश्वरा कु दुई निशाण माँगै कि ताकी विश्वास हुआ की परमेश्वर सौच्च़ी इ तेसलै इस्राएली बौच़ाउणा लै आ बोलदै लागौ औंदौ।

![](https://cdn.door43.org/obs/jpg/360px/obs-en-16-09.jpg)

पैहलै निशाणा लै, गिदोने भेरी री ऊन ज़ौबिना माथी छ़ाड़ियौ परमेश्वरा लै बोलौ दोतकी ओश सिरफ ऊना माथी पौड़ा और ज़ौबिना माथी ना पौड़ा। परमेश्वरै इणौ इ कियौ। दुजी राचिऐ, परमेश्वरा कु बोलौ ओशा कौरी ज़ौबीन सीनी हुआ पर ऊन शुकी रौआ। परमेश्वरै इणौ इ कियौ। इउं दुई निशाणा रै कारणै, गिदौने विश्वास कियौ कि परमेश्वर सौच्च़ी इ च़ाहा सा कि सेऊ इस्राएलिउ मिध्यानिउ रै हाथा कु बौच़ावा।

![](https://cdn.door43.org/obs/jpg/360px/obs-en-16-10.jpg)

तैबै गिदोने फौज़ी आपु काए औटाऐ और एक बिए बारह हौज़ार मौरद आशै। पर परमेश्वरै तेस आइलै बोलौ कि इयै भौरी का सा। और गिदोने सै सब एक बिए दुई हौज़ार वापिस भेज़ी ऐरै। परमेश्वरै गिदोना आइलै बोलौ इयै मौरद तौइं भी भौरीका सा। एथीलै गिदोने चिन शौ फौज़ी आपुकाए छ़ाड़ै बाकी सारै घौरै भेज़ै।

![](https://cdn.door43.org/obs/jpg/360px/obs-en-16-11.jpg)

सेज़ी राची परमेश्वरै गिदोना लै बोलौ, “मिध्यानिउ रै डेरे दी डेउ और तिउं बुशै लाइंदी बारै शुण। ज़ैबै तू शुणा लौ कि सै का बोलाई ता तू तिउं माथी हमलै कौरणा लै नाईं डौरै।” एथीलै सेज़ी राची गिदोन तौल़ै तिउंरै डेरै भिलै डिया और तिणिए एक मिध्यानी फौज़ी इणै बोलदै शुणौ कि शुणाउ ज़ो ताइंए सुईणै दी देखौ थौ। ता तिणी मौरदै बोलौ, “ एस सुइणा मतलब आ कि गिदोना री फौउज़ आमारी फौउज़ हौरावा सा!” ज़ैबै गिदोनै इणौ शुणा ता तिणिए परमेश्वरा री स्तूती कौरी।

![](https://cdn.door43.org/obs/jpg/360px/obs-en-16-12.jpg)

तैबै गिदोन आपणै फौज़िउ काए वापिस आशौ और तिउं मांझ़िए एकी एकी कै रौणशींग, एक माटै रौ ओखर, और एक ज़ोकटी रौ मौसालौ दियौ। तिउंए सेऊ डेरौ घेरी गो। ज़िऐ मिध्यानी फोज़ी सुतै औंदै थै। गिदोना रै चिन शौ फौज़ी आपणै मौसालै ओखरा कौरी थै दुमै औंदै थै एथीलै मिध्यानी लोग तिउं मौसालै रौ प्याशौ नाईं देखी बौल़ै।

![](https://cdn.door43.org/obs/jpg/360px/obs-en-16-13.jpg)

तैबै गिदोना रै सारै फौज़िउए आपणै सारै माटै रै ओखर मौसालै माथै कु चोड़ियौ एकदम प्याशौ देखाल़ी गौ आ। तिउंए आपणै रौणशींग फुकरै और ज़ोरै-ज़ोरै आकै मारी, “यहोवा री और गिदोना री तलवार!”

![](https://cdn.door43.org/obs/jpg/360px/obs-en-16-14.jpg)

परमेश्वरै मिध्यानी डौराई गौऐ, एथीलै सै आपु मांझ़ी काटिंदै-पिटिंदै लागै। तेबी इ, गिदोने इस्राएलिउ काए खोबरी देणै वाल़ै भेज़ै कि सै मिध्यनिउ रौ पिछ़ौ कौरा। तिउंए तिउं मांझ़ा रौ भौरीका झ़ांगै बाकी लोगु रौ पिछ़ौ कौरियौ सै देशा कु बाइरै गाड़ी गौऐ। सेज़ै दिनै एक लाख बिश हौज़ार झ़ांगै। इणै कौरी परमेश्वरै इस्राएली लोग बौच़ाऐ

![](https://cdn.door43.org/obs/jpg/360px/obs-en-16-15.jpg)

सै लोग गिदोन आपणौ राज़ौ चाणनौ च़हा थै, पर गिदोनै इणौ कौरणै नाईं दियौ, पर तिणिए तिउंकु सै सुनै रै चाण मांगै ज़ो तिउं मांझ़िए हर एकिए लुटै थै। तिउं लोगुए भौरीका सुनौ गिदोना कै दैयौ।

![](https://cdn.door43.org/obs/jpg/360px/obs-en-16-16.jpg)

तैबै गिदोने तेस सुनै कौरी एक खास जुड़कै चाणै ज़िणै कि बौड़ै याजक भिड़ा थै। पर लोगुए तेसरी कौरणी शुरु की ज़िणी की सेउ एक मूरती आ। तैबै परमेश्वरै इस्राएल तौइंऐ दोषी चाणै कैलैकि तिउंए मूरती री आराधना की थी। परमेश्वरै तिउंरै दुशमनु कु सै हौराए। आखिरकार तिउंए तौइंए परमेश्वरा कु मज़ता लै प्राथना की, और परमेश्वरै तिउं काए तिउं बौच़ाउणा लै एक ओर छ़ुड़ाउणै वाल़ौ भेज़ौ।

![](https://cdn.door43.org/obs/jpg/360px/obs-en-16-17.jpg)

इणी बुशै कई बारै बीती: इस्राएली लोग पाप कौराई, परमेश्वर तिउंलै सौज़ा दिया, सै पाप मानाई, और परमेश्वर तिउं छ़ुड़ाउणा लै कास भेज़ा सा। कई बौरशा झ़ाउं, परमेश्वरै छ़ुड़ाउणै वाल़ै भेज़ै ज़ुणिए इस्राएली तिउंरै दुशमनु कु बौचाऐ।

![](https://cdn.door43.org/obs/jpg/360px/obs-en-16-18.jpg)

आखिरकार, तिउं लोगुए ओरी देशा रै ज़िणौ परमेश्वरा कु आपुलै एक राज़ै री मांग की। सै एक इणौ राज़ौ च़हा थै कि ज़ो लांबौ और ताकती वाल़ौ औलौ, ज़ो लौड़ाई दी तिउंरी अगुवाई कौरा लौ। परमेश्वरा कै तिउंरी मांगौ औंदौ ढौबौ नाईं, पर परमेश्वरै तिउंकै तिणौ इ राज़ौ दियौ ज़िणौ तिउंए मांगौ थौ।

*न्यायियों अध्याय 1-3; 6-8; 1 शमूएल 1-10 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_16_128kbps.m4a

## 17. दाउदा आइलै परमेश्वरा रौ वाइदौ

https://openbiblestories.org/l/bfz/story-17/

![](https://cdn.door43.org/obs/jpg/360px/obs-en-17-01.jpg)

शाऊल इस्राएला रौ पैहलौ राज़ौ थौ। सेऊ लांबौ और बांठणौ थौ, ज़िणौ लोग च़हा थै सेऊ बिल्कुल तिणौ इ थौ। इस्राएला माथी आपणै राज़ कौरणै कु पैहलै शाऊल एक आच्छ़ौ राज़ौ थौ। पर बासिए सेऊ बुरौ आदमी बौणौ ज़ुणिए परमेश्वरारी बुशै नाईं मानी, एथीलै परमेश्वरै दुजौ आदमी छ़ाँटौ ज़ो कि तेसरै ज़ागा दी राज़ौ बौणा लौ।

![](https://cdn.door43.org/obs/jpg/360px/obs-en-17-02.jpg)

परमेशवरै दाऊद नावां रै एक ज़वान इस्राएली आदमी छ़ाँटियौ एकी दिनै शाऊला री ज़ागा दी राज़ै हुणै लै तैयार कौरणौ शुरू कौरी ऐरौ। दाऊद बैतलहम इलाकै रौ एक गवाल़ौ थौ। कई बारै दाऊदै, रीख ब्राग दुईया झ़ाँगै थै। कैलै कि तिउंए दाऊदा रै ज़ौरिए च़ोकीदारी कौरदी बारै तेसरै बाबा री भेरी माथी हमलौ कियौ थौ। दाऊद एक निउंलौ और धौरमी आदमी थौ। तिणिए परमेश्वरा माथी भोरोसौ कियौ और तेसरी बुशै मानी।

![](https://cdn.door43.org/obs/jpg/360px/obs-en-17-03.jpg)

दाऊद इबी ज़वान इ आदमी थौ, तिणिए लांबै मोटै आदमी गोलियता आइलै लौड़ाई की। गोलियत एक भौरी आच्छ़ौ फौज़ी थौ। सेऊ भौरी मज़बूत और तकरीबन दस फुट लांबौ थौ! पर परमेश्वरै गोलियत झ़ांगणै और इस्राएली बौच़ाउणै लै दाऊदा री मज़त की। तेथ बासिए दाऊदै इस्राएला रै कई दुशमन हौराऐ। दाऊद एक बौड़ौ फौज़ी बौणियौ, सेऊ भौरी लौड़ाई दी इस्राएलिउ फौज़ी रौ मुख्यौ रौ। लोगुए तेसरी भौरी तारीफ की।

![](https://cdn.door43.org/obs/jpg/360px/obs-en-17-04.jpg)

लोगुए दाऊदा कु एती प्यार कियौ कि शाऊल तेसकु मीश कौरदै लागी गौ आ। आखिरकार शाऊल तेस झ़ांगणौ च़ाहा थौ, एथीलै दाऊद तेसकु और तेसरै फौज़ी कु च़ोरिदै ज़ांगला दी भागी गो। एकी दिनै, ज़ेबी शाऊल और फौज़ी तेस लोड़दै थै लागै औंदै ता शाऊल एकी ओडाच़ी दी डियौ। सै सेज़ी ओडाच़ी थी ज़ेथादी दाऊद च़ोरुऔ औंदौ थौ, पर शाऊलै सेऊ नाईं देखौ। दाऊद शाऊला पिछ़ाड़ी-पिछ़ाड़ी भौरी नौज़दीक डेई गौ आ और तेसरै जुड़कै कु टालकौ काटी गौ । बासिए, ज़ेबी शाऊल तियां ओडाच़ी कु निकल़ौ ता दाऊदै तेसलै औटाइयौ तेस पाकड़ै औंदै जुड़कै रौ टालकौ देखाल़ौ, इणै सुंच़ियौ, शाऊलै ज़ाणी गो आ कि दाऊदै राज़ै बौणना री ताइंए तेस झ़ाँगणा लै मौना कौरी गोई

![](https://cdn.door43.org/obs/jpg/360px/obs-en-17-05.jpg)

कुछ़ बौगता बासिए, शाऊल लौड़ाई दी मौरी गौ आ, और दाऊद इस्राएला रौ राज़ौ बौणी गो आ। सेउ एक आच्छ़ौई राज़ौ थौ, और लोगुऐ तेस आइलै प्यार छ़ाड़ौ। परमेश्वरै दाऊदा लै आशीष देई और सेऊ कामयाब चाणौ। दाऊदै भौरी लौड़ाई लौड़ी, और परमेश्वरै इस्राएला रै दुशमनु हौराऊणा लै दाऊदा री मज़त की। दाऊदै यरूश्लेम इलाकै ज़ितियौ तिदै आपणी राज़धानी चाणी, ज़िए सेऊ रौ और राज़ कियौ। दाऊदै दुई बिए बौरशा झ़ाउं राज़ौ रौ। तेसरै राज़ा रै बौगतै इस्राएली तागती वाल़ै और सेठ बौणी गौए।

![](https://cdn.door43.org/obs/jpg/360px/obs-en-17-06.jpg)

दाऊद एक परमेश्वरा रौ भवन चाणनौ च़हा थौ ज़िए सारै इस्राएली परमेश्वरा री आराधना कौरी बौल़ा और तेसलै बौल़ी भी च़ौड़ाई बौल़ा। तकरीबन च़ार शौ बौरशा ओउलै, सै लोग मूसा रै चाणै औंदै मिलाप वाल़ै ताबूं दी परमेश्वरा री आराधना कौरा थै और तेसलै बौल़ी च़ौड़ावा थै।

![](https://cdn.door43.org/obs/jpg/360px/obs-en-17-07.jpg)

पर तिए नातान नावां रौ एक भविष्यद्वक्ता थौ। परमेश्वरै सेउ दाऊदा कै इणौ बोलणा लै भेज़ौ: “ताइंए भौरीका लौड़ाई लौड़ी आ, एथीलै तू मुकालै एस भवन नाईं चाणालौ। तैरौ छ़ोहरु एस चाणा। तैबै भी, हाउं ताउंलै भौरीका आशीष दिआऊ। तैरौ एक वंश सौदा लै मैरै लोगु माथी राज़ै रै रुपा दी राज़ कौरा।” सौदा लै राज़ कौरणै वाल़ौ सेऊ दाऊदा रौ एक वंश मसीह थौ। मसीह परमेश्वरा रौ छ़ाँटौ औंदौ आदमी थौ ज़ो दुनिया रै लोगु तिउं रै पापा कु बौच़ाउवा।

![](https://cdn.door43.org/obs/jpg/360px/obs-en-17-08.jpg)

ज़ेबी दाऊदै नाताना रौ संदेश शुणौ ता तिणिए परमेश्वरा रौ धन्यवाद कियौ और तेसरी स्तुति की। परमेश्वर तेसरी प्रतिष्ठा थौ बौड़ाउंदै लागौ औंदौ और तेसलै भौरीका आशीष थौ देंदै लागौ औंदौ। बेशक, दाऊद नाईं ज़ाणा थौ कि परमेश्वर इउं बुशै केबी कौरा सा। एज़ै बौगतै आमै ज़ाणी कि इस्राएली एक लांबै बौगता झ़ाउं, तकरीबन एक हौज़ार बौरषा झ़ाउं मसीह आशणै रौ इन्तज़ार थै कौरदै लागै औन्दै।

![](https://cdn.door43.org/obs/jpg/360px/obs-en-17-09.jpg)

दाऊदै कई बौरशा झ़ाउं ईमानदारी आपणै लोगु माथी कौरी राज़ कियौ। तिणिए तौना-मौना कौरी परमेश्वरा री बुशै मानी और परमेश्वरै तेसलै भौरी आशीष देई। हालाँकी, तिणिए ज़िंदगी री आखरी दी परमेअशवरा रै खिलाप बौड़ौ पापा कियौ।

![](https://cdn.door43.org/obs/jpg/360px/obs-en-17-10.jpg)

एकी दिनै दाऊदै आपणै मैहला कु बाइरै जाचौ और एक बाँठणी छ़ेउड़ी नाइंदी बारै देखी। सेऊ तियां नाईं ज़ाणा थौ, पर तिणिए पौतौ लाई गो कि तिआंरौ नाउं बैतशेबा थौ।

![](https://cdn.door43.org/obs/jpg/360px/obs-en-17-11.jpg)

ज़िए तिणिए आपणी नौदर जा थी टाल़नी, तिणिए तियां छ़ेउड़ी आणना लै एक आदमी भेज़ौ। दाऊद तिआं आइलै सुतौ और सै घौरै वापिस भेज़ी गोई। थोड़ै बौगता बासिए बैतशेबै इणै बोलियौ दाऊदा कै खौबर भेज़ी कि हाऊं तैरै बौच्चै री मां बौणनै वाल़ी ऊ।

![](https://cdn.door43.org/obs/jpg/360px/obs-en-17-12.jpg)

बेतशेबा रौ बोउटौ ऊरिय्याह नावां रौ एक आदमी थौ। सेऊ दाऊदा रौ एक बौड़िया फौज़ी मांझ़िया कु एक थौ। सेज़ै बौगतै सेऊ लौड़ाई कौरदै बाइरै थौ डेऔ औंदौ। दाऊदै उरिय्याह लौड़ाई कु वापिस औटाइयौ तेसलै आपणी छ़ेउड़ी आइलै साथाई रौइणा लै बोलौ। पर दुजै फौज़ी लौड़ाई दी थै। एथीलै उरिय्याहै घौरै डेउणा लै इन्कार कौरी गोई। पर दाऊदै उरिय्याह वापिस भेज़ी गौ आ और सेनापति कु लौड़ाई लै सेज़ी ज़ागा दी छ़ाडना लै बोलौ ज़िए दुशमन सौबिकु ताकती वाल़ै थै ताकी तेस पोरु झ़ांगा। ता इणौ हुऔ कि उरिय्याह लौड़ाई दी मौरी गौ।

![](https://cdn.door43.org/obs/jpg/360px/obs-en-17-13.jpg)

उरिय्याह मौरणै बासिए दाऊदै बेतशेबा आइलै शादी कौरी गोई, बासिए तिएं दाऊदा रौ छ़ोहरु पैदौ कियौ। तेसकु परमेश्वरा रै भौरी रोश थै आशै औंदै, एथीलै तिणिए नातान भविष्यद्वक्ता दाउदा काए इणौ बोलणा लै भेज़ौ कि तेसरौ पाप केती बुरौ थौ। दाऊदै आपणै पाप मानै और परमेश्वरै सेऊ माफ कियौ। आपणी बाकी ज़िंदगी दी, आपणै काठै बौगता दी भी परमेश्वरा पिछ़ु आंडदै थाकौ लागी और तेसरी बुशै मानी।

![](https://cdn.door43.org/obs/jpg/360px/obs-en-17-14.jpg)

पर दाऊदा रौ छ़ोहरु मौरी गौ आ। इणै कौरी परमेश्वरै तेसलै डांड दियौ। एथरै अलावा, दाऊदा रै मौरणै झ़ाउं, तेसरै आपणे टौबरा रै कुछ़ लोगुए तेसरै खिलाफ लौड़ाई की, और दाऊदा री आपणी ताकत खातम हुई गोई थी। पर परमेश्वर विश्वासवाल़ौ थौ और इबी भी तिणिए तिणौ कियौ ज़ो तिणिए दाऊदा आइलै कौएणै रौ वाइदौ थौ दिऔ औंदौ कि सेऊ कौरा, भलै इ तेसरी आज्ञा नाईं मानी थी। और बासिए दाऊद और बेतशेबा री दुजी औलाद पैदी हुई, और तिउंए तेसरौ नाउं सुलैमाण छ़ाड़ौ।

*1 शमूएल अध्याय 10; 15-19; 24; 31; 2 शमूएल 5; 7; 11-12 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_17_128kbps.m4a

## 18. राज़्य बांटणौ

https://openbiblestories.org/l/bfz/story-18/

![](https://cdn.door43.org/obs/jpg/360px/obs-en-18-01.jpg)

दाऊद राज़ै दुई बिए बौरशा झ़ाउं राज़ कियौ। तैबै सेऊ मौरी गो आ, और तेसरै छ़ोहरु सुलैमाने इस्राएला माथी राज़ कौरणौ शुरु कियौ। परमेश्वरै सुलैमाना आइलै बुशै लाई और तेसकु पुछ़ौ कि सौभी कु ज़ादौ तू का च़ाहा सा कि परमेश्वर ताउंलै कौरा। सुलैमानै मांगौ कि सेऊ तेस बुध्दीमान चाणा। एज़ी बुशै परमेश्वर खुश कियौ, एथीलै परमेश्वरै सुलैमान दुनिया रौ सौभी कु बुध्दी वाल़ौ आदमी चाणी गौ आ। सुलैमानै भौरी बुशै शिखी और सेऊ एक बुध्दी वाल़ौ राज़ौ थौ।

![](https://cdn.door43.org/obs/jpg/360px/obs-en-18-02.jpg)

यरूशलेमा दी सुलैमानै एक परमेश्वरा रौ भवन चाणौ ज़ेथालै तेसरै बाबै योजना चाणी थी और सामान कौठै भी कियौ थौ। ऐबै लोग मिलाप वाल़ै तांबु री बज़ाय भवना दी आराधना कौरा थै और बौल़ी च़ौड़ावा थै। परमेश्वर आशियौ तिउं मांझ़िए रौआ थौ, और तिए सेउ आपणै लोगु आइलै रौआ थौ।

![](https://cdn.door43.org/obs/jpg/360px/obs-en-18-03.jpg)

पर सुलैमानै दुजै देशा री छ़ेउड़ी आइलै प्यार कियौ। तिणिए भौरीका, तकरीबन एक हौज़ार छ़ेउड़ी आइलै शादी कौरियौ परमेश्वरा री आज्ञा चोड़ी! इउं मांझ़िया रौ भौरीका छ़ेउड़ी बिगानै देशा कु आशी और आपु आइलै आपणै देऊ आणै और तिउंरी आराधना कौरदै थाकी लागी। ज़ेबी सुलेमान बुढ़ौ हुऔ ता तिणिए भी तिउंरै देउआ री आराधना की।

![](https://cdn.door43.org/obs/jpg/360px/obs-en-18-04.jpg)

एज़ी बज़ाए कु परमेश्वरा रै तेसलै भौरी रोश थै आशै औंदै। तिणिए बोलौ सेऊ इस्राएल देश बाँटणा रै ज़ौरिए तेसलै डाँड दिआ। सेउ सुलैमाना रै मौरणै बासिए इणौ कौरा सा।

![](https://cdn.door43.org/obs/jpg/360px/obs-en-18-05.jpg)

सुलैमाना रै मौरणै बासिए, रहबाम राज़ौ बौणौ। इसराएला देशा रै सारै लोग तेस आपणै राज़ै रै रूपा दी मानणा लै कौठै हुए। सै रहबामा आइलै शिखाउऐ कि सुलैमानै तिउंकु भौरी काठौ काम कौरावा थौ और भौरीका मामलौ निंआ थौ। तिउंए रहबामा आइलै औरज़ की कि तिउं कु कामती काम कौरावा।

![](https://cdn.door43.org/obs/jpg/360px/obs-en-18-06.jpg)

पर रहबामै तिउंलै भौरी मूर्खता कौरी ज़वाब दियौ, “ तुमै बोलाई कि मैरै बाबै सुलमानै तुमकु काठौ काम कौराऔ आ, पर हाऊ तुमकु तेसकु भी काठौ काम कौरावाउ, और हाउं तुमु तेसकु भी ज़ादौ दुखी कौराऊ।”

![](https://cdn.door43.org/obs/jpg/360px/obs-en-18-07.jpg)

ज़ैबै लोगुए सेउ इणौ बोलदै शुणौ ता तिउं मांझ़िया कु कई लोगुऐ तेसरौ साथ छ़ाड़ी गौ आ। दस गोत्रुऐ सेऊ छ़ाड़ी गो आ; तेस आइलै ऐबै दुई इ गोत्र बौच़ै। इउं दुई गोत्रुए आपुलै यहूदा रौ राज़्य बोलौ।

![](https://cdn.door43.org/obs/jpg/360px/obs-en-18-08.jpg)

बाकी दस गोत्रुए यारोबाम नावां रै एक आदमी आपणौ राज़ौ चाणी ऐरौ। ऐ गोत्र उत्तर और पुर्वा री भीलै रै हिस्सै दी थै। तिउंए आपुलै इस्राएला रौ राज़ौ बोलौ।

![](https://cdn.door43.org/obs/jpg/360px/obs-en-18-09.jpg)

पर यारोबामै परमेश्वरारै बिरोधा ई पाप कियौ और लोगु कु भी पाप कौराऔ। तिणिए आपणै लोगु रै ज़ौरिए आराधना कौरना लै मूरती चौणाई। सै ऐबै यहूदा रै राज़्या दी यरूशलेमा दी परमेश्वरा रै भवना रै भवना दी तेसरी आराधना कौरना ता नाईं डेवै।

![](https://cdn.door43.org/obs/jpg/360px/obs-en-18-10.jpg)

यहूदा और इस्राएला रै राज़्य आपु मांझ़िए दुशमन बौणी गौऐ और रोज़ एकी दुजै आइलै पिटिदै लागै।

![](https://cdn.door43.org/obs/jpg/360px/obs-en-18-11.jpg)

इस्राएला रै नौए राज़्या दी, सारै इ राज़ै दुष्ट थै इउं मांझ़िया कई राज़ै तिउंरी ज़ागा दी आश छ़ाड़नै वाल़ै ओरी इस्राएलिउ रै ज़ौरिए झ़ांगी गोऐ थै।

![](https://cdn.door43.org/obs/jpg/360px/obs-en-18-12.jpg)

इस्राएला रै सारै भौरी राज़ेउए मुरतिऊ री पूज़ा की आ। ज़ेबी तिउंए इणौ कियौ ता से रोज़ गांदी छ़ेउड़ी आइलै सुतै और इदरा झ़ाउं कि लोल़डै भी मुरती काए बौल़ी भी किए।

![](https://cdn.door43.org/obs/jpg/360px/obs-en-18-13.jpg)

यहूदा रै राज़्या रै राज़ै, दाऊदा रै वंशारै थै। इउं राज़ेऊ मांझ़िए कई भौलै आदमी थै ज़ुणिए परमेश्वरा रै अनुसार राज़ कियौ और परमेश्वरा री आराधना की। पर यहूदा रै भौरी राज़ै दुष्ट थै। तिउंए बुराई कौरी राज़ कियौ, और मुरतिउ री आराधना की। इदरा झ़ाउं कि कुछ़ राज़ेउए झूठै देउवा काए आपणै लोल़डेउ री बौल़ी की। यहूदा रै भौरी लोगुए भी परमेश्वरा रै बिरोधाई पाप कियौ और दुजै देउवा री पूज़ा की।

*1 राजा अध्याय 1-6; 11-12 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_18_128kbps.m4a

## 19. भविष्यद्वक्ता

https://openbiblestories.org/l/bfz/story-19/

![](https://cdn.door43.org/obs/jpg/360px/obs-en-19-01.jpg)

परमेश्वर रोज़ इस्राएलिउ काए भविष्यद्वक्ता भेज़दै थाका थौ लागी। भविष्यद्वक्ता परमेश्वरा कु संदेश शुणा थै और लोगु कै बोला थै।

![](https://cdn.door43.org/obs/jpg/360px/obs-en-19-02.jpg)

ज़ेबी आहाब इस्राएला रौ राज़ौ थौ ता सेज़ै बौगतै एलिय्याह भविष्यद्वक्ता थौ। अहाब एक बुरौ आदमी थौ। तिणिए झ़ूठै बाल देउवा री पूज़ा कौरणा लै लोग मज़बूर किए थै।। एलिय्याहे आहाबा कु बोलौ कि परमेश्वर तिउं लोगु डाँडणै वाल़ौ थौ। तिणिए बोलौ, “ ज़ेबी झ़ाउं हाउं दुजी बारै पाणी लागणा लै ना बोलु तेबी झ़ाउं इस्राएला रै राज़्या दी पाणी नाईं लागदौ और ना इ ओश पौड़दै।” एज़ी बुशै आहाबा रै एती रोश आशै कि तिणिए एलिय्याह झ़ांगणै रौ फैसलौ कियौ।

![](https://cdn.door43.org/obs/jpg/360px/obs-en-19-03.jpg)

एथीलै परमेश्वरै एलिय्याह लै बोलौ कि ज़ांगला दी डेइयौ आहबा कु च़ोरुइ। एलिय्याह ज़ांगला दी तेस सोते काए डियौ ज़िऐ परमेश्वरै बोलौ थौ। रोज़ दोउती और ब्याल़ी, कवागै एलिय्याह लै रोटी और मास आणा थै। एस पुरै बौगतै, आहाब और तेसरी सैना एलिय्या लोड़दै थाकै लागी, पर सै तेस लोड़ी नाईं बौल़ै।

![](https://cdn.door43.org/obs/jpg/360px/obs-en-19-04.jpg)

पाणी ना लागणै कु कुछ़ बौगता बासिए पाणी रौ सोतौ शुकी गौ आ। एथीळै एलिय्याह एक नज़दिका रै देशा दी डेई गौ आ। तेस देशा दी एक गरीब बिदुआ थी ज़ासरौ एक छ़ोहरु थौ। तियांकै राशण तकरीबन खातम हुई गौ थौ कैलै कि तिऐ कोई फौसल नाईं हुई थी। पर तैबै भी तियां छ़ेउड़िए तेसरी देखभाल़ की, एथीलै परमेश्वरै तियांरी और तियांरै छ़ोहरु री देखभाल़ की और तिउंरी ज़रुरत पुरी की, एज़ै कारणै तियांरै पिठै रौ ओखर और तेला री कुपी केबी भी खातम नाईं हुई। तेस पूरै काल़ा रै बौगतै तिउंकै नाज़ थौ। एलिय्याह कुछ़ बौरशा झ़ाउं तिए रौ।

![](https://cdn.door43.org/obs/jpg/360px/obs-en-19-05.jpg)

साढ़ै चिआ साला बासिए, परमेश्वरै एलियाह कु बोलौ कि हाउं तौइंए पाणी ला ऊ। तिणिए एलिय्याह कु वापिस इस्राएला रै राज़्या दी डेइयौ आहाबा कु बुशै लाइणा लै बोलौ। एथीलै एलिय्याह वापिस डियौ। ज़ैबै आहाबै सेऊ देखौ ता तिणिए बोलौ, “आच्छ़ा तू ई, मुसिबत पैदौ कौरणै वाल़ौ!” एलिय्याहे ज़वाब दियौ, “ मुसिबत पैदौ कौरणै वाल़ौ ता तू ई! ताइंए यहोवा पोरु छ़ाड़ी गो आ। सेऊ सौच्च़ौ परमेश्वर आ, पर तू बाल देउवा री पूज़ा कौरदै लागौ औंदौ। ऐबै ताइंए इस्राएल राज़्या रै सारै लोग कर्मेल पर्वता माथी आशणौ आ।”

![](https://cdn.door43.org/obs/jpg/360px/obs-en-19-06.jpg)

और सारै लोग कर्मेल पर्वता माथी डेवै। सै मौरद भौ आशै ज़ो बोला थै कि सै लोग बाल देउवा री बुशै बोला थै। इयै बाल देउवा रै भविष्यद्वक्ता थै। सै सारै च़ार शौ दुई बिए दस थै। एलिय्याहे लोगु आइलै बोलौ, “केबी झ़ाउं तुमै आपणौ मन बौदल़ी छ़ाड़ाई? अगर यहोवा परमेश्वर आ ता तेसरी आराधना कौरौ! अगर बाल परमेश्वर आ ता तेसरी आराधना कौरौ!”

![](https://cdn.door43.org/obs/jpg/360px/obs-en-19-07.jpg)

तैबै एलिय्याहे बाल देउवा रै भविष्यद्वक्ता लै बोलौ, “ एक बौल़द बौल़ी कौरियौ तेसरौ मास ज़ाल़ना लै एक बेदी माथी छ़ाड़ौ, पर आग ना लाइयौ। तेथ बासिए हाउं भी तिणौ कौराऊ, और एक अलग बेदी माथी हाउं तेस मास छ़ाड़ाऊ। तैबै अगर परमेश्वर बेदी माथी आग ला लौ ता तुमे ज़ाणा लै कि सेऊ सौच़ौ परमेश्वर आ।” तैबै बाल देउवा रै भविष्यद्वक्तुए एक बौल़ी तैयार की पर आग नाईं लाई।

![](https://cdn.door43.org/obs/jpg/360px/obs-en-19-08.jpg)

तैबै बाल देउवा रै भविष्यद्वक्तुए प्राथना की, “ओ बाल देउ आमारी शुण!” पूरै दिना दी तिउंए प्राथना की और आकै मारी और इदरा झ़ाउं आपु दी च़ाकु कौरी काटियौ ज़ाखम पाए, पर बाल देउए ज़वाब नाईं देऔ, तिणिए कोई भी आग नाईं लाई।

![](https://cdn.door43.org/obs/jpg/360px/obs-en-19-09.jpg)

बाल देउवा रै भविष्यद्वक्तुए बाल देउवा काऐ प्राथना कौरदै-कौरदै तकरीबन एक दिन बीताई गो आ। तेथ बासिए तिउंए प्राथना कौरनी बंद कौरी गोई। तैबै एलिय्याहे दुजै बौल़दा रौ मास पमेश्वरा री बेदी माथी छ़ाड़ी गौ। तेथ बासिए, तिणिए लोगु कु पाणी रै बौड़ै ओखर तियां बेदी माथी पेरणा लै बोलौ ज़ेबी झ़ाउं कि मास, ज़ुखड़ै, और इदरा झ़ाउं कि बेदी फेदीयालै ज़ौबीन आच्छ़ा कौरी ना रुज़ा।

![](https://cdn.door43.org/obs/jpg/360px/obs-en-19-10.jpg)

तैबै एलिय्याहे प्राथना की, “ओ यहोवा, अब्राहम, इसहाक, और आकूबा रै परमेश्वर, आमकै देखाउ कि तुमे इस्राएला रै परमेश्वर ई और इणौ भी कि हाउं ताउं मानणै वाल़ौ उ। मुकै ज़वाब दै ज़िणै कौरी इयै लोग ज़ाणा लै कि तुमै इ सौच्च़ै परमेश्वर ई।”

![](https://cdn.door43.org/obs/jpg/360px/obs-en-19-11.jpg)

तेबी फेटी इ सौरगँ कु आग आशी और आगिए मास, ज़ुखड़ै, शाकरौ-माटौ और इदतरा झ़ाउं कि ओरु-पोरु रौ पाणी भी ज़ाल़ी ऐरौ। ज़ैबै लोगुए इणौ देखौ, सै ज़ौबीना माथी धौनी पौड़ी गोऐ और बोलदै लागै, “यहोवा इ परमेश्वर आ! यहोवा इ परमेश्वर आ!”

![](https://cdn.door43.org/obs/jpg/360px/obs-en-19-12.jpg)

तैबै एलिय्याहे बोलौ, “बाल देउवा रौ एक भी भविष्यद्वक्ता बौच़ियौ नाईं डेऊणौ च़ाईं!” एथीलै लोगुए बाल देउवा रै भविष्यद्वक्ता पाकड़ी गोऐ और सै तिदरु औलग नीं गोऐ और सै झ़ांगी ऐरै।

![](https://cdn.door43.org/obs/jpg/360px/obs-en-19-13.jpg)

तैबै एलिय्याहे अहाब राज़ै लै बोलौ, “शीघ्री आपणै घौरै डेऊ, कैलैकि पाणी लागणै वाल़ौ आ।” शीघ्री इ बादल घौणै हुई गोऐ, और भौरी पाणी लागणौ शुरू हुई गौ आ। यहोवा तेस शुकौ खातम कौरदै थौ लागौ औंदौ। इणै कौरी परगट हुऔ कि यहोवा इ सौच्च़ौ परमेश्वर आ।

![](https://cdn.door43.org/obs/jpg/360px/obs-en-19-14.jpg)

ज़ैबै एलिय्याहे आपणौ काम खातम की गौ आ, ता परमेश्वरै एलीशा नावां रै एक मौरद आपणौ भविष्यद्वक्ता छ़ाँटौ। परमेश्वरै एलीशा रै ज़ौरिए भौरी नोखै काम किऐ। एक नोखौ काम नामान आइलै हुऔ। सेऊ एक दुशमना रै फौज़िउ रौ मुखियौ थौ, पर तेसरै ज़िवा दी एक भौरी बुरौ रोग थौ लागौ औंदौ। नामानै एलीशा रै बारै दी शुणौ थौ। एथीलै सेऊ एलीशा काए आशौ और तेसकु तेस रोग ठीक कौरना री औरज़ की। एलीशै नामाना कु बोलौ कि डेइयौ यरदन नौई दी साता बारी डुबकी मार।

![](https://cdn.door43.org/obs/jpg/360px/obs-en-19-15.jpg)

नामाना रै रोश आशी गोऐ। तिणिए इणै कौरणा लै मौना कौरी ऐरी, कैलैकि इणौ तेसकै मुरखा वाल़ौ काम लागा थौ। पर बासिए तिणीए आपणौ मौन बौदली गौ आ और डेइयौ यरदन नौई रै पाणी दी साता बारी डुबकी लाई। ज़ैबै सातवी बारै डुबकी लाइयौ पाणी कु बाइरै निकल़ौ ता परमेश्वरै सेऊ च़ांगौ की गौ आ।

![](https://cdn.door43.org/obs/jpg/360px/obs-en-19-16.jpg)

परमेश्वरै इस्राएला रै लोगु काऐ ओर भौरीका भविष्यद्वक्ता भेज़ै। तिउं सौभिउए लोगु कु मूरती री पूज़ा कौरना लै मौना की। एथारै बौदल़ै, तिउंलै एकी दुजै आइलै आच्छ़ौ बौरताव और दया कौरणी च़ाईं। तिउं भविष्यद्वक्तुए लोग खौबरदार किए कि तिउं बुरै काम बंद कौरणै ई और ऐथारै बौदल़ै परमेश्वरा री बुशै मानणी आ। अगर तिउं लोगुए इणौ ना कियौ ता परमेश्वर तिउं दोषी चाणियौ तिउंरौ फैसलौ कौरा सा, और डाँड दिया सा।

![](https://cdn.door43.org/obs/jpg/360px/obs-en-19-17.jpg)

काफी ज़ादै बौगतै, तिउं लोगुए परमेश्वरा री आज्ञा नाईं मानी। रोज़ तिउंए भविष्यद्वक्तु आइलै बुरौ बर्ताव कियौ और इदरा झ़ाउं कि केबड़ी-केबड़ी सै झ़ाँगै। एकी बारै तिउंए यिर्मयाह भविष्यद्वक्ता शुकै कुऐ दी पाऔ और तिए मौरणै लै छ़ाड़ी गौ आ। सेऊ गारी मांझ़ी कुऐ री पौई झ़ाउं डुबी गौ आ। पर तैबै राज़ै रै तेस माथी दया आशी और तिणिए आपणै फौज़िउ लै हुकम दियौ कि यीर्मयाह मौरनै कु पैहलै कुऐ कु बाइरै गाड़ौ।

![](https://cdn.door43.org/obs/jpg/360px/obs-en-19-18.jpg)

भविष्यद्वक्तुए परमेश्वरा री तौरफा कु बोलणौ लगातार छ़ाड़ौ भलै इ लोगुए तिउं आइलै नफरत की। तिउंए लोग खौबरदार किए कि अगरतिउंए पापा री माफी नाईं मांगी ता परमेश्वर तिउं नाश कौरा सा। तिउंए लोगु कु इणी भी आद दिलाई कि परमेश्वरै तिउं काए मसीह भेज़णा रौ वाइदौ कियौ आ।

*1 राजा अध्याय 16-18; 2 राजा 5; यिर्मयाह 38 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_19_128kbps.m4a

## 20. गुलामी और वापिस आशणौ

https://openbiblestories.org/l/bfz/story-20/

![](https://cdn.door43.org/obs/jpg/360px/obs-en-20-01.jpg)

इस्राएला रै राज़्य और यहूदा रै राज़्य दुइएउऐ परमेश्वरा रै बिरोधाई पाप कियौ। तिउंए सेऊ वाइदौ चोड़ी ऐरौ ज़ो सीनै पर्वता माथी परमेश्वरा आइलै बानौ थौ। परमेश्वरै सै पापा कु माफी मांगणै और आराधना रै बारै दी खौबरदार कौरणा लै आपणै भविष्यद्वक्ता भेज़ै, पर लोगुऐ तिउंरी बुशै मानणा लै मौना कौरी गोई।

![](https://cdn.door43.org/obs/jpg/360px/obs-en-20-02.jpg)

और परमेश्वरै तिउंरै दशमनु तिउं नाश कौरणा लै तैयार किए और तिउंलै डाँड देऔ। अश्शूर एक दूजौ देश थौ ज़ो भौरी ताकती वाल़ौ हुई गौ थौ। सै एकी दुजै रै खिलाप पापी भी थै। तिउंए आशियौ इस्राएला रौ राज़्य नाश कौरी गौ। आश्शूरिउए आशियौ इस्राएला रै राज़्या दी भौरी लोग झ़ांगै, और सब कुछ लूटी गौ और देशा रै कई हिस्सै ज़ाल़ी गौऐ।

![](https://cdn.door43.org/obs/jpg/360px/obs-en-20-03.jpg)

अश्शूरिउए इस्राइला रै सारै सयाणै, सेठ लोग, और इणै लोग ज़ो कीमती च़ीज़ै चाणी बौल़ा थै, कौठै किऐ और सै आपणै देशालै निंऐ। इस्राएल दी सिर्फ गरीब लोग इ बौच़ै।

![](https://cdn.door43.org/obs/jpg/360px/obs-en-20-04.jpg)

तैबै अश्शूरी लोगुऐ सेज़ै देशा दी रौइणा लै बाइलै देशा रै लोग आणै। तिउं बाइलै देशा रै लोगुए तौइंए इलाकै चाणै। ज़ो इस्राएली तिए बौच़ै थै तिउं आइलै तिउंए शादी कौरी। तिउं लोगु रै वंशा लै सामरी लोग बोला थै।

![](https://cdn.door43.org/obs/jpg/360px/obs-en-20-05.jpg)

यहूदा रै राज़्या रै लोगुऐ देखौ कि किणौ परमेश्वरै तेस माथी विश्वास ना कौरणै और ना मानणै री बज़ाए इस्राएला रै राज़्य बरबाद किए थै। पर तैबै भी तिउंए कनानिउ रै देउवा री पूज़ा की आ। परमेश्वरै तिउंलै खौबरदार कौरणा लै भविष्यद्वकता भेज़ै, पर तिउंए भी शुणना लै इनकार कियौ।

![](https://cdn.door43.org/obs/jpg/360px/obs-en-20-06.jpg)

तकरीबन शौ बौरशा बासिए अश्शूरिउए इस्राएला रौ नाश कौरी ऐरौ। परमेश्वरै बेबीलोना रौ राज़ौ, नबूकदनेस्सर यहूदा रै देशा माथी हामलै कौरणा लै भेज़ौ। बेबीलोन एक तागती वाल़ौ देश थौ। यहूदा रौ राज़ौ नबूकदनेस्सरा रौ नुकुर बौणने और भौरी सारी ज़यदाद दैणा लै राज़ी हुई गौ।

![](https://cdn.door43.org/obs/jpg/360px/obs-en-20-07.jpg)

पर कुछ़ साला बासिए, यहूदा रै राज़ै बेबीलोना रै खिलाफ पाप कियौ। और बेबीलोनै वापिस आशियौ यहूदा रै राज़्या माथी हामलौ कियौ। तिउंए यरूशलेम इलाकै माथी कौबज़ौ कियौ, परमेश्वरा रौ भवन नाश कियौ, इलाकै और भवना रौ खौज़ानौ लुटी ऐरौ।

![](https://cdn.door43.org/obs/jpg/360px/obs-en-20-08.jpg)

पाप कौरणै रै कारणै यहूदा रौ राज़ौ डाँडणा लै, नबूकदनेस्सरा रै फौज़िउए तेस राज़ै रौ छ़ोहरु तेसी रै सामनै झ़ांगौ और तैबै सेउ शेड़ौ कौरी ऐरौ। तेथ बासिए, तिउंए राज़ौ आपु आइलै नीं ऐरौ ताकी सेऊ बेबीलोना रै ज़ेलखानै दी पोरु मौरा।

![](https://cdn.door43.org/obs/jpg/360px/obs-en-20-09.jpg)

नबूकदनेस्सर और तेसरै सिपाइउऐ यहूदा राज़्य रै तकरीबन सारै लोग बेबीलोना लै नीं गोए, सिरफ सौभी कु गरीब लोग पिछ़ाड़ी छ़ाड़ै ताकी सै डोखरै दी नाज़ पैदौ कौरा। ऐज़ै बौगता लै गुलामी रौ बौगत बोलौ एथादी परमेश्वरा रै लोगु वाइदा रै देशा कु निकुल़ना लै मज़बूर की गोऐ थै।

![](https://cdn.door43.org/obs/jpg/360px/obs-en-20-10.jpg)

भलै इ परमेश्वरै आपणै लोगु लै गुलामी दी डेउणा रै ज़ौरिए डाँडा रै भागी चाणै, तैबै भी तिउं और तिउं आइलै कियौ औंदौ आपणौ वाइदौ नाइं बिसरौ । परमेश्वर आपणै लोगु री देखभाल़ कौरदै थाकौ लागी और आपणै भविष्यद्वक्ता रै ज़ौरिए तिउं आइलै बुशै लाइंदै थाकौ लागी। तिणिए वाइदौ कियौ कि चिन बिए दस बौरशा बासिए, सै तौइंए वाइदा रै देशा दी डियाई।

![](https://cdn.door43.org/obs/jpg/360px/obs-en-20-11.jpg)

तकरीबन चिन बिए दस बौरशा बासिए, फरसा रै राज़ै कुस्रुए बेबीलोन राज़्य हौराऔ, एथीलै बेबीलोना राज़्या री बज़ाए फरसा रै राजै कई देशा माथी राज़ कियौ। इस्राएली लोगु लै यहूदी बोला थै। तिउं मांझ़िए भौरी लोगुए आपणी ज़िंदगी बेबीलोना दी बिताई गोई। सिरफ थोड़ै इ लोग बुढ़ै थै तिउंकै यहूदा देश याद थौ।

![](https://cdn.door43.org/obs/jpg/360px/obs-en-20-12.jpg)

फारसी लोग भौरी ताकती वाल़ै थै, पर तिउंए ज़ीतै औंदै लोगु माथी दया की थी। फारसी राज़ा बौणनै रै थोड़ै बौगता बासिए, कुस्रु राज़ै एक हुकम दैयौ कि केज़ौ भी यहूदी ज़ो यहूदा लै डेउणौ च़ाहा सा, सेऊ फारसा कु निकल़ियौ यहूदा लै डेई बौल़ा सा। इदरा झ़ाउं कि तिणिए परमेश्वरा रौ भवन तौइं चाणना लै धन-ज़यदाद भी देई। और गुलामी रै चिन बिए दस बौरशा बासिए, यहूदिउ रौ एक छ़ोटौ झ़ुंड यहूदा दी यरूशलेमा रै इलाकै दी डैऔ।

![](https://cdn.door43.org/obs/jpg/360px/obs-en-20-13.jpg)

ज़ैबै सै लोग यरूशलेमा दी पहुंच़ै ता तिउंए भवन और इलाकै री च़ारौ तौरफा री दवाल दुजी बारै चाणी गोई। फारसी लोग औज़ौ भी तिउं माथी राज़ कौरा थै पर एकी बारै तौइंऐ वाइदा रै देशा दी रौइंदै थै लागै औंदै और भवना दी परमेश्वरा री आराधना कौरा थै।

*2 राजा अध्याय 17; 24-25; 2 इतिहास 36; एज़्रा 1-10; नहेम्याह 1-13 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_20_128kbps.m4a

## 21. परमेश्वर मसीहा रौ वाइदौ कौरा सा

https://openbiblestories.org/l/bfz/story-21/

![](https://cdn.door43.org/obs/jpg/360px/obs-en-21-01.jpg)

ज़ेबी परमेश्वरै दुनिया चाणी थी, सेऊ ज़ाणा थौ कि बासिए एकी दिनै मसीहा जा भेज़णौ। तिणिए आदम और हव्वा लै वाइदौ कियौ थौ कि सेऊ इणौ कौरा सा। तिणिए बोलौ कि हव्वा कु एक वंश पैदौ कौरा ज़ो सापा रौ मूंड फेच़ा सा। ज़ेज़ै सापै हव्वा लै धोखौ देऔ सेऊ पाकौ इ शैतान थौ। परमेश्वरा री मौरज़ी थी कि मसीह शैतान आच्छ़ा कौरी हौरावा।

![](https://cdn.door43.org/obs/jpg/360px/obs-en-21-02.jpg)

परमेश्वरै अब्राहमा कु वाइदौ कियौ थौ कि तेसरै ज़ौरिऐ दुनिया री सारी ज़ाती आशीष पा आ ई। परमेश्वर बासिए एकी बौगतै मसीह भेज़णै रै जौरिऐ एस वाइदौ पूरौ कौरा सा। सेऊ मसीह दुनिया री हर एक ज़ाती मांझ़िया कु लोगु तिउंरै पापा कु छ़ुड़ावा सा।

![](https://cdn.door43.org/obs/jpg/360px/obs-en-21-03.jpg)

परमेश्वरै मूसा कु वाइदौ कियौ थी कि सेऊ मूसा रै ज़िणौ एक दुजौ भविष्यद्वक्ता भेज़ा सा एऊ भविष्यद्वक्ता मसीह हुआ सा ईणी रीती कौरी, परमेश्वरै तौइंए वाइदौ कियौ कि सेऊ एक मसीह भेज़ा सा।

![](https://cdn.door43.org/obs/jpg/360px/obs-en-21-04.jpg)

परमेश्वरै राज़ा दाऊदा कु वाइदौ कियौ थौ तेसरौ एक वंशा कु मसीह आशा सा। सेऊ राज़ौ हुआ और परमेश्वरा रै लोगु माथी सौदा-सौदा लै राज़ कौरा सा।

![](https://cdn.door43.org/obs/jpg/360px/obs-en-21-05.jpg)

परमेश्वरै यिर्मयाह भविष्यद्वक्ता कु बुशै लाई थी कि एक दिनै सेऊ नौवौ वाइदौ बाना सा। सेऊ नौवौ वाइदौ इसराएला आइलै सीनै पर्वता माथी बानै औंदै पुराणै वाइदै ज़िणौ नाईं औंदौ। ज़ेबी लोगु आइलै सेऊ नौवौ वाइदौ बाना सा, ता सेऊ तिउं माथी आपु आदमी रै रूपा दी परगट कौरा सा। हर एक आदमी तेस आइलै प्यार छ़ाड़ा सा और तेसरै कानूना माथी आंडणै री ईच्छ़ा छ़ाड़ा सा। परमेश्वरै बोलौ कि सेऊ तेसरौ कानूना रौ तेसरै ज़िवा दी लिखणै ज़िणौ हुआ सा। सै तेसरै लोग हुआई, और परमेश्वर तिउंरै पाप माफ कौरा सा। सेऊ मसीहा हुआ सा ज़ो तेस आइलै नौवौ वाइदौ बाना सा।

![](https://cdn.door43.org/obs/jpg/360px/obs-en-21-06.jpg)

परमेश्वरा रै भविष्यद्वक्तुए इणौ भी बोलौ आ कि मसीह एक भविष्यद्वक्ता हुआ सा। एक भविष्यद्वक्ता सेउ आदमी आ ज़ो परमेश्वरारै वचन शुणा सा और तैबै लोगु माथी परमेश्वरा रै संदेशा रै बारै दी बोला सा। ज़ास भेज़णा रौ वाइदौ परमेश्वरै कियौ थौ सेऊ मसीह एक पाकौ भविष्यद्वक्ता हुआ सा। यानिके सेऊ मसीह परमेश्वरा री संदेश आच्छ़ा कौरी शुणा सा, और सेऊ लोगु कै तिउं संदेश आच्छ़ा कौरी शिखावा सा।

![](https://cdn.door43.org/obs/jpg/360px/obs-en-21-07.jpg)

इस्राएली याजकुए लोगु लै परमेश्वरा काए बौल़िइदान कौरदै थाकै लागी। ऐउ बौल़िदान लोगु रै पाप लै तिउं परमेश्वरा रै ज़ौरिए सौज़ा वाल़ै ज़ागा दी च़ौड़ावा थै। याजकुए लोगु लै प्राथना की। पर सेऊ मसीह पाकौ याजक औलौ ज़ो परमेश्वरा लै देणा लै एक पाकी बौल़ी रै रूपा दी आपु हुआ सा यानिके, सेऔ केबी भीपाप नाईं कौरदौ, और सेऊ आपु आपणौ शरीर बौल़ी कौरणा लै दिया सा, ता दुनिया रौ कोई भी दुजी बौल़ी ज़रूरी नाईं औल़ी

![](https://cdn.door43.org/obs/jpg/360px/obs-en-21-08.jpg)

लोगु रै झ़ुंडा माथी राज़ौऔर परधान राज़ कौरा सा, और केबी-केबी सै गौल़ती कौराई, राज़ा दाऊदै सिरफ इसराएलिउ माथी राज़ कियौ आ, पर राज़ा दाउदा रौ वंश मसीह पूरी दुनिया माथी राज़ कौरा सा, और सेऊ सौदा राज़ कौरा सा एथारै अलावा, सेऊ सौदा इमान दारी कौरी राज़ कौरा सा, और सही फैसलै कौरा सा।

![](https://cdn.door43.org/obs/jpg/360px/obs-en-21-09.jpg)

परमेश्वरारै भविष्यद्वक्तु रै ज़ौरिऐ मसीहा रै बारै दी भौरी बुशै बोली। ज़िणौ कि, मलाकीए बोलौ कि मसीहा आशणै कु पैहला एक दुजौ भविष्यद्वक्ता आशा सा। सेऔ भविष्यद्वक्ता भोरी ज़रूरी हुआ सा। एथारै अलावा यशायाह भविष्यद्वक्तै लिखौ आ मसीह एक बिण ब्याई छ़ोटुड़ी कु पैदौ हुआ सा। और मीका भविष्यद्वक्तै बोलौ कि मसीहा बैलहम इलाकै दी पैदौ हुआ सा।

![](https://cdn.door43.org/obs/jpg/360px/obs-en-21-10.jpg)

यशायाहै भविष्यद्वक्तै बोलौ कि मसीह गलीला रै इलाकै दी रौआ आ। ज़ो लोग दुखी आ मसीहा तिउंलै शान्ति दिया सा। सेऊ कैदिउ भी आज़ाद कौरा सा। मसीहा बीमार लोगु और ज़ासकै शुणिदौ नाईं, ज़ासकै दिशदौ नाईं, लाटै इ, या आंडिदौ नाईं तिउं भी च़ांगौ कौरा सा

![](https://cdn.door43.org/obs/jpg/360px/obs-en-21-11.jpg)

यशायाह भविष्यद्वक्तै इणौ भी बोलौ कि लोग मसीह आइलै नफरत कौराई और तेस नाईं अपणाउंदै। ओर भविष्यद्वक्तुए बोलौ कि मसीहा रौ एक साथी तेसरै बिरोधाई उठा सा। जकर्याह भविष्यद्वक्तै बोलौ कि तेसरौ एक साथी इणौ कौरणा लै दुजै लोगु कु एक बिए दस च़ाँदी रै सिक्कै निंआ। एथारै अलावा, कुछ़ भविष्यद्वक्तुए बोलौ कि लो मसीह झ़ाँगाई, और तेसरै जुड़कै बाँडणा लै पौरच़ी पा ई।

![](https://cdn.door43.org/obs/jpg/360px/obs-en-21-12.jpg)

भविष्यद्वक्तुए इणौ भी बोलौ कि मसीह किणौ मौरा सा। यशायाहै भविष्यवाणी की कि लोग मसीहा माथी थुकाई तेसरौ मज़ाक उड़ाउवाई, तेस पीटाई सै तेस छोपाई और सेऊ भौरी बेदण और भौरी पिटियौ पोरु मौरा सा, ज़ैबै कि सेऊ कुछ़ भी गौलत काम नाईं कौरदौ।

![](https://cdn.door43.org/obs/jpg/360px/obs-en-21-13.jpg)

भविष्यद्वक्तुए इणौ भी बोलौ कि मसीहा पाप नाईं कौरदौ। सेऔ सिध हुआ सा सारी बुध्दी और औकली कु भौरुऔ औंदौ हुआ सा। पर सेउ एथलै मौरा कि परमेश्वर तेसलै दुजै लोगु रै पापा रै कारणै सौज़ा दिआ। तेस मौरनै कु लोग परमेश्वरा आइलै मेल कौरणै रै लायक हुआई। एथीलै परमेश्वर च़ाहा सा कि मसीह मौरा।

![](https://cdn.door43.org/obs/jpg/360px/obs-en-21-14.jpg)

भविष्यद्वक्तुए इंणौ भी बोलौ कि परमेश्वर मसीह मौरै औंदेउ मांझ़ा कु ज़िउंदौ कौरा सा। एऊ देखावा कि एउ सब नौऐ वाइदौ बानणै री परमेश्वरा री योजना थी, ताकी सेऊ तिउं लोगु बौच़ाई बौल़ा ज़ुणिए तेसरै बिरोधाई पाप कियौ।

![](https://cdn.door43.org/obs/jpg/360px/obs-en-21-15.jpg)

परमेश्वरै भविष्यद्वक्ताउ माथी मसीहा रै बारै दी भौरीका बुशै परगट की, पर मसीह तिउं भविष्यद्वक्तु मांझ़िया कु कासी री भी ज़िंदगी दी नाईं आशौ थौ। इउं भविष्यवाणी देणै रै च़ार शौ बौरशा बासिए, ठीक बौगता माथी, परमेश्वर, मसीह इयां दुनिया दी भेज़ा सा।

*उत्पत्ति 3:15; 12:1-3; व्यवस्थाविवरण 18:15; 2 शमूएल 7; यिर्मयाह 31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7; 35:3-5; 61; 53; भजन संहिता 22:18; 35:19; 69:4; 41:9; जकर्याह 11:12-13; यशायाह 50:6; भजन संहिता 16:10-11 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_21_128kbps.m4a

## 22. यूहन्ना रौ ज़ौनम

https://openbiblestories.org/l/bfz/story-22/

![](https://cdn.door43.org/obs/jpg/360px/obs-en-22-01.jpg)

पुराणै बौगता दी, परमेश्वरै भविष्यद्वक्तु आइलै बुशै लाई थी एथीलै सै लोगु कु बुशै लाई बौल़ै थै। पर सेज़ै बौगतै कु च़ार शौ बौरिश बीतनै झ़ाउं तिणिए तिउंकु बुशै नाईं लाई थी। तैबै परमेश्वरै जकर्याह नावां रै भविष्यद्वक्ता काए एक स्वर्गदूत भेज़ौ। जकर्याह और तेसरी छ़ेउड़ी एलीशिबा परमश्वरा री बुशै माना थै सै भौरी बुढ़ै हुई गोऐ थै, और तेसरै कोई भी लोल़डै पैदै नाईं हुए थै।

![](https://cdn.door43.org/obs/jpg/360px/obs-en-22-02.jpg)

तीणी स्वर्गदुतै जकर्याह लै बोलौ, “तेरी बोउटी एक छ़ोहरु पैदौ कौरा सा तू तेसरौ नाउं यूहन्ना छ़ाड़ै। परमेश्वर तेस पवित्र आत्मा कु भौरा सा, और यूहन्ना लोगु मसीहा मानणा लै तैयार कौरा सा।” जकर्याहै ज़वाब देयौ, “ हाउं और मेरी बोउटी छ़ोहरु पैदै कौरणा रै लायक नाईं आसतै कैलैकि आमै बुढ़ै हुई गौऐ ई! हाउं किणौ ज़ाणु कि तुमै मुआइलै सौच्चौ ई बोल़दै लागै औंदै?”

![](https://cdn.door43.org/obs/jpg/360px/obs-en-22-03.jpg)

तिणी स्वर्गदुतै जकर्याह लै ज़वाब देऔ, “ताउं काए एस खुशी रौ संदेश दैणा लै हाउं परमेश्वरा रै ज़ौरिऐ ऊ भेज़ौ औंदौ। कैलै कि ताइंए मुं माथी विश्वास नाईं कियौ, एथीलै ज़ेबी झ़ाउं तैरै छ़ोहरु पैदौ नाईं हुऔ तेबी झ़ाउं तू लाटौ रौआई।” तेबी इ जकर्याह लाटौ बौणी गो थौ। तैबै सेउ स्वर्गदूत तेस काए कु डेई गौ आ। जकर्याह घौरै आशी गौ और तेसरी बोउटी गौरकी हुई गोई।

![](https://cdn.door43.org/obs/jpg/360px/obs-en-22-04.jpg)

ज़ेबी एलिशिबा छ़ौ मीनै री गौरकड़ी थी, ता सेऊ स्वर्गदूत खरकच़ार एलीशिबा रै रिश्तैदारा काए परगट हुऔ, ज़ासरौ नाउं मरियम थौ। मरीयम बिणब्याई थी और शादी कौरणा लै यूसुफ नावां रै छ़ोहरु आइलै तिआंरी मांगणी हुई गोई थी। स्वर्गदूतै बोलौ, तू गौरकी हुआई और एकी छ़ोहरु लै ज़ौनम दिआई। ताइं तेसरौ नाउं यीशु जा छ़ाड़णौ। सेऊ सौभी कु ताकती वाल़ौ परमेश्वरा रौ छ़ोहरु हुआ और सौदा लै राज़ कौरा सा।”

![](https://cdn.door43.org/obs/jpg/360px/obs-en-22-05.jpg)

मरियमै ज़वाब देऔ, “एऊ किणौ हुआ सा, कैलैकि हाउं ता बिणब्याई उ?” तिणी स्वर्गदूतै समझ़ाऔ, “पवित्र आत्मा रै ज़ौरिऐ तू गौरकड़ी हुआई, और परमेश्वरा री तागत ताउं दी आशा सा। एथीलै सेऊ माऊं पवित्र हुआ सा, और सेऊ परमेश्वरा रौ छ़ोहरु हुआ सा।” ज़ो तिणी स्वर्गदूतै बोलौ तेथ माथी मरियमै विश्वास कियौ।

![](https://cdn.door43.org/obs/jpg/360px/obs-en-22-06.jpg)

ज़ेबी इणौ हुऔ तेथ बासिए, मरियमे डेइयौ एलीशबा आइलै मुलाकात की। ज़िणी इ मरियमे तियांकै ढाल की, एलीशिबा रौ लोल़डौ तियां रै पेटा दी हिलदै लागौ। तिउंलै परमेश्वरै ज़ो कियौ थौ तिआंरै बारै दी भौरी छ़ेउड़ी खुश हुई। एलीशिबा आइलै चिन मीनै रौइणै बासिए, मरियम वापिस घौरै डेई गोई।

![](https://cdn.door43.org/obs/jpg/360px/obs-en-22-07.jpg)

तेथ बासिए, एलीशिबै आपणै छ़ोहरु लै ज़ौनम दैऔ। जकर्याह और एलीशिबै तेस माऊं रौ नाउं यूहन्ना छ़ाड़ौ, ज़िणौ कि स्वर्गदूतै हुकम देऔ थौ। तैबै परमेश्वरै जकर्याह लाटै कु बेज़ौ चाणौ। जकर्याहै बोलौ, “परमेश्वरा री स्तुति च़ाईं हुई, कैलैकि तिणिए आपणै लोगु री मज़त कौरणा लै याद छ़ाड़ै इ! ओ मैरै छ़ोहरु, तू सौभिकु बौड़ै ताकती वाल़ै परमेश्वरा रौ भविष्यद्वक्ता हुआई। तू लोगु लै बोलाई कि सै पापा कु माफी किणौ पाई बौल़ाई!”

*लूका अध्याय 1 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_22_128kbps.m4a

## 23. यीशु रौ जौनम

https://openbiblestories.org/l/bfz/story-23/

![](https://cdn.door43.org/obs/jpg/360px/obs-en-23-01.jpg)

यूसुफ नावां रौ एक धौरमी आदमी आइलै मरियमा री मांगणी हुई गोई थी। ज़ैबै तिणिए शुणौ कि मरियम गौरकड़ी आ ता सेऊ ज़ाणा थौ कि तेसरौ छ़ोहरु नाईं आसतौ, पर, सेऊ मरियम बदनाम नाईं कौरणौ च़ाहा थौ, एथीलै तिणिए तियं माथी दया की और च़ुटा-च़ुटी छ़ाड़नै रै बारै दी सुंच़ौ। पर एथकु पेहलै सेऊ इणौ कौरा, एक स्वर्गदूतै तेसरै सुइणा दी आशियौ तेस आइलै बुशै लाई।

![](https://cdn.door43.org/obs/jpg/360px/obs-en-23-02.jpg)

तिणी स्वर्गदूतै बोलौ, “ओ यूसुफ, मरियम आपणी छ़ेउड़ी चाणना लै नाईं डौर। तियांरै पेटा दी ज़ो छ़ोहरु आ सेऊ पवित्र आत्मा रै ज़ौरिया आ। सै एक छ़ोहरु पैदौ कौरा सा। तेसरौ नाउं यीशु छ़ाड़ै (ज़ेथारौ मतलब आ, ‘यहोवा बौच़ाउणै वाल़ौ आ’), कैलै कि सेऊ लोगु तिउंरै पापा कु बौच़ावा सा।

![](https://cdn.door43.org/obs/jpg/360px/obs-en-23-03.jpg)

और यूसुफै मरियमा आइलै शादी कौरी गोई और सै आपणी छ़ेउड़ी रै रूपा दी घौरै आणी गोई, पर ज़ेबी झ़ाउं तियांरै छ़ोहरु नाईं हुऔ तेबी झ़ाउं सेऊ तियां काए नाईं सुतौ।

![](https://cdn.door43.org/obs/jpg/360px/obs-en-23-04.jpg)

ज़ेबी मरियमा रै औल़खिणा रौ बौगत नज़दीक आशौ, ता तिएं और यूसुफै बैतलहमा डेउणा लै एक लांबौ सफर कियौ। तिउं तिदै डेउणौ जा थौ कैलैकि रोमी अधिकारी इस्राएला दी रौइणै वाल़ै सौभी लोगु गौणनै च़ाहा थौ। सै च़ाहा थै कि सौभी लोग तिए डेआ ज़िए तिउंरै बुज़ुर्ग रौआ थै। राज़ा दाऊदा रौ ज़ौनम भी बैललहमा दी हुऔ थौ, और सेउ मरियम और यूसुफ दुइया रौ बुज़ुर्ग थौ।

![](https://cdn.door43.org/obs/jpg/360px/obs-en-23-05.jpg)

मरियम और यूसुफ बैतलहमा लै डेवै। पर तिए गुशाल़ी री ज़ागा रै रै अलावा रौइणै लै कोई ज़ागा नाईं थी। सेई ज़ागा थी ज़िए मरियमै आपणौ छ़ोहरु पैदौ कियौ। तिउंएं सेऊ खुरली दी छ़ाड़ौ कैलैकि तिए तेस कालै छ़ाड़नै री ज़ागा नाई थी। और तिउंए तेसरौ नाऊं यीशु छ़ाड़ौ।

![](https://cdn.door43.org/obs/jpg/360px/obs-en-23-06.jpg)

सेज़ी राची, नज़दिका रै एकी डोखरै दी कुछ़ गवाल़ै आपणी भेरी री च़ोकसी थै कौरदै लागै औंदै। तेबी ई, एक स्वर्गदूत तिउं काए परगट हुऔ, और सै डौरी गोऐ। तिणी स्वर्गदूतै बोलौ, “नाईं डौरौ, कैलैकि मुकै तुमु कालै एक खुशी री खौबर आ। बैतलहमा दी मसीह, मालीका रौ ज़ौनम हुई गो आ!”

![](https://cdn.door43.org/obs/jpg/360px/obs-en-23-07.jpg)

तुमै डेइयौ तेस छ़हरु लोड़ौ, और तुमुकै सेऊ जुड़कै दी मेटाओ औंदौ और एकी खुरली दी मिला सा।” खौरकच़ार सौरग स्वर्गदूता कौरी भौरुइ गौ। सै परमेश्वरा री स्तुति कौरदै थै लागै औंदै। तिउंए बोलौ, “ सारी महिमा सौरगा दी रौइणा वाल़ै परमेश्वरा लै मिला। धौतरी माथै तिउं लोगु लै शांति हुआ ज़ासरी सेऊ फिकर कौरा सा!”

![](https://cdn.door43.org/obs/jpg/360px/obs-en-23-08.jpg)

तैबै स्वर्गदूत डेई गौए। सै गवाल़ै भी आपणी भेरी छ़ाड़ियौ माऊं देखदै च़ाली पौड़ै। सै सेज़ी ज़ागा दी पहुंच़ी गोऐ ज़िऐ यीशु थौ और तिउंए सेऊ खुरली दी मेटाऔ औंदौ देखौ, ज़िणौ कि तीणी स्वर्गदूतै बोलौ थौ। सै बौड़ै खुश थै। तैबै सै भेराल़डु वापिस डेई गोऐ ज़िए तिउंरी भेरी थी। तिउंए ज़ो भी शुणौ और देखौ थौ तिउं सौभी लै सै परमेश्वरा री स्तुति थै कौरदै लागै औंदै।

![](https://cdn.door43.org/obs/jpg/360px/obs-en-23-09.jpg)

पूर्वा री भीला रै एक दूर देशा दी कुछ़ आदमी थै। ज़ुणिए तारेऊ रै बारै दी थौ शिखौ औंदौ और सै भौरी बुध्दी वाल़ै थै। तिउंए एक बौड़ौ तारौ सौरगा दी देखौ। तिउंए बोलौ रथारौ मतलब आ कि यहूदीउ रै एक नौऐ राज़ै रौ ज़ौनम हुऔ आ। एथीलै तिउंए तेस छ़ोहरु देखणा लै आपणै देशा कु एक लांबौ सौफर कौरणै रौ फैसलौ कियौ। लांबै सौफरा बासिए, सै बैतलहमा दी आशै और सेऊ घौर देखौ ज़िऐ यीशु और तेरै तेसरै मा-बाप थै रौऐ औंदै।

![](https://cdn.door43.org/obs/jpg/360px/obs-en-23-10.jpg)

तिउं मौरदुए यीशु आपणी मा आइलै देखौ ता तिउंऐ तेस काऐ झुकियौ तेसरी आराधना की। तिउंए यीशु लै किमती भेटा देई। तैबै सै तिदरु आपणै घौरै वापिस डेई गौऐ।

*मत्ती अध्याय 1; लूका 2 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_23_128kbps.m4a

## 24. यूहन्ना यीशु लै बपतिस्मौ दिआ सा

https://openbiblestories.org/l/bfz/story-24/

![](https://cdn.door43.org/obs/jpg/360px/obs-en-24-01.jpg)

एलीशिबा और जकर्याह रौ छ़ोहरु युहन्ना, बौड़ौ हुइयौ एक भविष्यद्वक्ता बौणी गौ आ। सेऊ ज़ांगला दी रौआ थौ और ज़ांगली मौ और थाड़ै खा थौ, और ऊँटा रै बाल़ा रै बौणै औंदै जुड़कै भीड़ा थौ।

![](https://cdn.door43.org/obs/jpg/360px/obs-en-24-02.jpg)

भौरीका लोग यूहन्ना री बुशै शुणदै ज़ांगला लै निकल़ै। तिणिए इणौ बोलियौ तिउंलै परचार कियौ, “आपणै पापा री माफी मांगौ, कैलैकि सौरगा रौ राज़ नज़दीक आ!”

![](https://cdn.door43.org/obs/jpg/360px/obs-en-24-03.jpg)

ज़ैबै लोगुए यूहन्ना री खुशखौबरी शुणी, ता तिउं मांझ़ा कु भौरिउए आपणै पाप कु माफी मांगी, यूहन्ना कु बपतिस्मौ निंऔ। यूहन्ना देखदै भौरीका धौरमा रै गुरू भी आशै, पर तिउंए आपणै पापा कु माफी नाईं मांगी और ना मानै।

![](https://cdn.door43.org/obs/jpg/360px/obs-en-24-04.jpg)

यूहन्नै धौरमा रै गुरू लै बोलौ, “ओ बिषलै सापा ज़िणै लोगुओ! आपणै पापा री माफी मांगौ और आपणौ च़ाल-च़लण बौदल़ौ। परमेश्वर सारै पेड़ काटा ज़ो आच्छ़ै फौल़ नाईं आणदौ, और तिउं आगी दी पा सा।” ज़ो भविष्यद्वक्तुए बोलौ थौ यूहन्नै पूरौ कियौ, देख हाउं शीघ्री ताउं काए खौबरी देणै वाल़ौ भेज़ाऊ ज़ो ताऊं कालै बाट तैयार कौरा सा।”

![](https://cdn.door43.org/obs/jpg/360px/obs-en-24-05.jpg)

कुछ़ धौरमा रै गुरुऐ यूहन्ना कु पुछ़ौ का तू मसीहा ई? यूहन्नै ज़वाब दैयौ, “हाउं मसीह नाईं उ, पर सेऊ एती बौड़ौ आ कि हाउं तेसरै बूटा रै तौसमै खोलणै रै लायक भी नाईं आसतौ।”

![](https://cdn.door43.org/obs/jpg/360px/obs-en-24-06.jpg)

आगलै दिनै, यीशु बपतिस्मा निंदै युहन्ना काए आशौ। ज़ेबी यूहन्नै सेऊ देखौ, ता तिणिए बोलौ, “देखौ! एऊ परमेश्वरा रौ गाबड़ु ज़ो दुनिया रै पाप उठाइयौ निंया सा।”

![](https://cdn.door43.org/obs/jpg/360px/obs-en-24-07.jpg)

यूहन्नै यीशु लै बोलौ, “हाउं ताउंलै बपतिस्मा दैणै रै लायक नाईं आसतौ। एथकु आच्छ़ौ इणौ आ कि तू मुलै बपतिस्मौ दै।” पर यीशुए बोलौ, “ताइंए मुलै बपतिस्मौ देणौ च़ाईं, कैलैकि इणौ ठीक आ।” और यूहन्नै तेसलै बपतिस्मौ देऔ, ज़ैबै कि यीशुए कोई भी पाप नाईं कियौ थौ

![](https://cdn.door43.org/obs/jpg/360px/obs-en-24-08.jpg)

बपतिस्मा देणै बासिऐ ज़ेबी यीशु पाणी मांझ़ा कु बाइरै आशौ, ता सौरग खुली गौ और परमेश्वरा रौ आत्मा कबुतरा रै रूपा दी तौल़ै आशियौ तेस माथी बोशौ। तेबी ई, परमेश्वरै सौरगा कु बुशै लाई। और बोलौ, तू मैरौ छ़ोहरु ई। हाउं ताउं आइलै प्यार कौराऊ, और हाउं ताउंकु भौरी खुश उ।”

![](https://cdn.door43.org/obs/jpg/360px/obs-en-24-09.jpg)

इऐ बूश पैहलै परमेश्वरै यूहन्ना कु बोली थी, “कि पवित्र आत्मा तौल़ै आशियौ कास माथी बोशा ज़ासलै तू बपतिस्मौ देआई।” सेऊ इ परमेश्वरा रौ छ़ोहरु आ परमेश्वर एक इ आ। पर ज़ेबी यूहन्नै यीशु लै बपतिस्मौ देऔ, ता तिणिए परमेश्वर बाब बुशै लाइंदै शुणौ, छ़ोहरु परमेश्वर देखौ, ज़ो कि यीशु आ, और तिणीए पवित्र आत्मा देखी।

*मत्ती अध्याय 3; मरकुस 1:9-11; लूका 3:1 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_24_128kbps.m4a

## 25. शैतान यीशु पौरखा सा

https://openbiblestories.org/l/bfz/story-25/

![](https://cdn.door43.org/obs/jpg/360px/obs-en-25-01.jpg)

यीशु रै बपतिस्मा हुणै बासिऐ फेटी इ, पवित्र आत्मै सेऊ सुनसान ज़ागाह दी नीं गौ। यीशु तिऐ दुई बिऐ दिना झ़ाउं थौ। सेज़ै बौगतै तिणिऐ ब्रौत किए, और शैतानै यीशु काए आशियौ तेसकु पाप कौराउणा लै सेऊ पौरखौ।

![](https://cdn.door43.org/obs/jpg/360px/obs-en-25-02.jpg)

पैहलै, शैतानै यीशु लै बोलौ, “अगर तू परमैश्वरा रौ छ़ोहरू ई ता इऊं पात्थरु रोटी चाण ताकी तू खाई बौल़ा!”

![](https://cdn.door43.org/obs/jpg/360px/obs-en-25-03.jpg)

पर यीशुऐ शैताना लै बोलौ, “परमेश्वरा रै वचना दी आ लिखौ औंदौ कि, “ज़िउंदै रौइणा लै आदमी लै सिरफ रोटी री ज़रुरत नाईं आ, पर तिउंलै हर तिउं बुशु री ज़रुरत आ ज़ो परमेश्वर तिउं आइलै बोला सा!’”

![](https://cdn.door43.org/obs/jpg/360px/obs-en-25-04.jpg)

तैबै शैतानै यीशु भवना रै सौबी कु उंच़ै छ़ाप्परा माथी नीं गौ आ। तिणिऐ तेसलै बोलौ, तू इदरा कु तौल़ै फाल़ दै, कैलैकि परमेश्वरा रै वचना दी आ लिखौ औंदौ, ‘परमेश्वर ताउं बौच़ाउणा लै आपनै स्वर्गदूत भेज़ा सा ताकी तैरै बाँगणै दी च़ोट ना लागा।’”

![](https://cdn.door43.org/obs/jpg/360px/obs-en-25-05.jpg)

पर यीशुऐ तीणौ नाईं कियौ ज़ो शैतानै तेस आइलै बोलौ थौ। तेथारै बौदल़ै, तिणिऐ बोलौ, “परमेश्वर सौभी लै बोला सा, ‘कि तू आपणौ परमेश्वर पौरखै नाईं।’”

![](https://cdn.door43.org/obs/jpg/360px/obs-en-25-06.jpg)

तैबै शैतानै तेसकै दुनिया रै सारै राज़्य देखाल़ै। तिणिऐ तेसकै देखाल़ै कि सै केती ताकती वाल़ै थै, और सै केती आच़्छै थै। तिणिऐ यीशु लै बोलौ, “हाउं ताउंलै एस सारौ कुछ़ देआऊ अगर तू झुकियौ मेरी आराधना कौरालौ।”

![](https://cdn.door43.org/obs/jpg/360px/obs-en-25-07.jpg)

यीशुऐ ज़वाब देऔ, “ओ शैतान मुकाए कु दूर डेऊ! परमेश्वरा रौ वचन लोगु लै इणौ हुकम देआ सा, ‘सिरफ आपणै प्रभु परमेश्वरा री आराधना कौरौ। परमेश्वरा रै रूपा दी सिरफ तेसी री ईज्ज़त कौरौ।’”

![](https://cdn.door43.org/obs/jpg/360px/obs-en-25-08.jpg)

यीशुऐ शैताना रै पौरखणै माथी हार नाईं मानी, एथीलै शैतान तेस काए कु पोरु भागी गौ आ। तैबै स्वर्गदूत तेस काए आशियौ तेसरी सेवा-पाणी कौरदै लागै।

*मत्ती अध्याय 4:1-11; मरकुस 1:12-13; लूका 4:1-13 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_25_128kbps.m4a

## 26. यीशु आपणी सेवा शुरु कौरा सा

https://openbiblestories.org/l/bfz/story-26/

![](https://cdn.door43.org/obs/jpg/360px/obs-en-26-01.jpg)

शैताना री परिक्षा रौ इनकार कौरने बासीऐ, यीशु वापिस गलीला रै इलाकै दी आशौ। इऐ सै ज़ागाह सा ज़िऐ सेऊ रौआ थौ। पवित्र आत्मा तेसलै भौरी शक्ति दैन्दै थौ लागौ औन्दौ, और यीशु एकी ज़ागाह कु दूजी ज़ागाह दी डैऔ और लोगु ले शिक्षा देई। सारेऊऐ तेसरै बारै दी आच्छी बुशै बोली।

![](https://cdn.door43.org/obs/jpg/360px/obs-en-26-02.jpg)

यीशु नासरत इलाकै दी डैऔ। ऐऊ सेऊ गांऊ थौ ज़िऐ सेऊ पौल़ौ-बौल़ौ थौ। आरामा रै दीनै, सेऊ आराधना कौरना री ज़ागाह दी डैऔ। एकी अगुऐ तेसकै यशायाह भविष्यद्वक्ता रै संदेशा री एक कीताब देई। सै च़ाह थै की सेऊ तेथकु पौड़ा। एथीलै यीशुऐ तिंऐ कीताब खोलिऔ तेसरौ एक भाग लोगु लै पौड़ौ।

![](https://cdn.door43.org/obs/jpg/360px/obs-en-26-03.jpg)

यीशुऐ पौड़ौ, “परमेश्वरै मुक्कै एक आत्मा दैऔ आ ताकी हाऊं गरीबु लै खुश-खबरी रौ परचार कौरी सौकू। तिणीऐ हाऊं एथीलै भेज़ौ ऊ कि कैदिऊ आज़ाद कौरु, शेड़ेऊ लै तौइंऐ प्याशौ देऊ, और तिउंलै छ़ुटकारौ देऊ जास दूजै लोग दबाउंदै ई लागै औन्दै। एऊ एज़ौ बौगत आ ज़ेबी परमेश्वर आमु माथै दयालु हौआ लौ और आमारी मौज़द कौरालौ।”

![](https://cdn.door43.org/obs/jpg/360px/obs-en-26-04.jpg)

तैबै यीशु बोशी गौ। सारे लोग तेस भौरी ध्याना कौरी देखदै थै लागै औन्दै। सै ज़ाणा थै कि पवित्रशास्त्रा रौ ज़ो भाग तिणीऐ ईबी पौड़ौ थौ सेऊ मसीह रै बारै दी थौ। यीशुऐ बोलौ, “ज़ो बूश मुइंऐ ईबी तुमुलै पौड़ी आ, सै एज़ै बौगतै पुरी औन्दै लागी ऐन्दी।” सारै लोग हैरान हुऐ। सै आपु मांझ़िऐ बोलदै लागै, “का एऊ यूसुफा रौ छ़ोहरू नाईं आसतौ?”

![](https://cdn.door43.org/obs/jpg/360px/obs-en-26-05.jpg)

तैबै यीशुऐ बोलौ, “एऊ सौच़ आ कि लोग केज़ै इणै भविष्यद्वक्ता केबी नाईं अपणाउंदै ज़ो तिउंरै इलाकै दी पौल़ौ-बौड़ौ औलौ। एलिय्याह भविष्यद्वक्ता रै बौगता दी, इस्राएला दी भौरी का विधवाऐ थी। पर ज़ेबी साढ़ै चीन साला झ़ाऊं पाणी नाईं लागौ ता परमेश्वरै एलिय्याह लै इस्राएला दी केज़ी विधवा री मौज़द कौरना लै नाईं भेज़ौ। एथरै बज़ाऐ, तिणीऐ एलिय्याह केज़ै ओर देशा री विधवा काऐ भेज़ौ।”

![](https://cdn.door43.org/obs/jpg/360px/obs-en-26-06.jpg)

यीशुऐ बोलदै थाकौ लागी, “और एलिय्याह भविष्यद्वक्ता रै बौकता दी, इस्राएला दी भौरी का लोग च़ांबड़ी री बिमारी कु दु:खी थै। पर एलीशै तिऊं मांझ़ा कु केज़ै भी च़ांगै नाईं किऐ। तिणीऐ सिर्फ इस्राएला रै दुश्मणु रौ सिपाई नामान चांगौ कियौ।” पर ज़ो लोग यीशु शुणदै थै लागै औन्दै सै यहूदी थै। एथीलै ज़ेबी तिउंऐ सेऊ इणौ बौलदै शुणौ ता सै तेसलै रोशुऐ।

![](https://cdn.door43.org/obs/jpg/360px/obs-en-26-07.jpg)

नासरता रै लोगुऐ यीशु पाकड़ी ऐरौ और सेऊ आराधना री ज़ागाह कु झिड़िऔ बाइरै नीं गौ। तिउंऐ सेऊ तौल़ै शोटीयौ झ़ांगणा लै एकी डोकै माथै निंयौ। पर यीशु भीड़ा कु निकल़ी गौ और नासरत इलाकै छ़ाड़िऔ डेइ गौ।

![](https://cdn.door43.org/obs/jpg/360px/obs-en-26-08.jpg)

तैबै यीशु सारै गलीला रै इलाकै दी डैऔ, और लोगु री बौड़ी भीड़ तेस काऐ आशी। तिउंऐ इणै भौरी का लोग आणै ज़ो बिमार और अपंग थै। तिऊं मांझ़ा कु केज़ै शेड़ै, केज़ै लौंगड़ै, केज़ै टौणै और केज़ै लाटै थै, और यीशुऐ सै सारै चांगै किऐ।

![](https://cdn.door43.org/obs/jpg/360px/obs-en-26-09.jpg)

एथरै अलावा, भौरी का इणै लोग यीशु काऐ आणै ज़ासदी बुरी आत्माएँ थीं। यीशुऐ बुरी आत्मा लै तिऊं मांझ़ा कु निकुल़ने रौ हुकुम दैऔ। सै दुष्टात्माएँ बार-बार च़िल्लाई, “तु परमेश्वरा रौ छ़ोहरु ई!” भीड़ा रै लोग हैरान थै, और तिऊंऐ परमेश्वरा री बौड़ाई कौरी।

![](https://cdn.door43.org/obs/jpg/360px/obs-en-26-10.jpg)

तैबै यीशुऐ बाराह मौरद छ़ांटै ज़ासलै तिणीऐ आपणै खास च़ेलै बोलौ। तिऊं च़ेलेउऐ तेस आईलै सफर कियौ और तेसरी शिक्षा अपणाई।

*मत्ती अध्याय 4:12-25; मरकुस 1:14-15, 35-39; 3:13-21; लूका 4:14-30, 38-44 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_26_128kbps.m4a

## 27. दयालु सामरी री कहाऩी

https://openbiblestories.org/l/bfz/story-27/

![](https://cdn.door43.org/obs/jpg/360px/obs-en-27-01.jpg)

एकी दिनै, यहूदी धार्मिक गुरु यीशु काऐ आशौ। सेऊ सारेऊ के इणौ दैखाल़नौ च़ाह थौ कि यीशु गलत रीति कौरी शिक्षा दैन्दै आ लागौ औन्दौ। एथीलै तिणीऐ यीशु लै बोलौ, “ओ गुरु, सौदा री ज़िन्दगी पाइणा लै हाऊं का कौरु?” यीशुऐ ज़वाब दैऔ, “परमेश्वरा रै वचना दी का सा लिखौ औन्दौ?”

![](https://cdn.door43.org/obs/jpg/360px/obs-en-27-02.jpg)

तिणी आदमीऐ बोलौ, “इणौ बोला सा कि, तू आपणै सारै ज़िवा कौरी, प्राणा कौरी, सामर्थ और बुध्दि कौरी परमेश्वरा कु प्यार कौर। और आपणै पड़ोसी कु आपु ज़िणौ प्यार कौर।” यीशुऐ ज़वाब दैऔ, “तु एकदम ठिक बोलाई! अगर तु ईणौ कौरा लौ, ता ताऊं लै सौदा री ज़िन्दगी मिला सा।

![](https://cdn.door43.org/obs/jpg/360px/obs-en-27-03.jpg)

पर सेऊ यहूदी धार्मिक गुरु लोगु कै देखाल़नौ च़ाह थौ कि तेसरी ज़िन्दगी ज़िउणै रौ तरीकौ ठीक थौ। एथीलै तिणीऐ यीशु कु पुछ़ौ, “ठीक आ, ता मैरौ पड़ौसी कूण आ?”

![](https://cdn.door43.org/obs/jpg/360px/obs-en-27-04.jpg)

यीशुऐ तेस यहूदी धार्मिक गुरु लै एक काहणी बोलिऔ ज़वाब दैऔ। “एक यहूदी आदमी थौ ज़ो बाटा दी यरूशलेमा कु यरीहो लै थौ लागौ औन्दौ डेउंदै।”

![](https://cdn.door43.org/obs/jpg/360px/obs-en-27-05.jpg)

“पर कुछ़ डाकुऐ सेऊ देखौ और तेस माथै हौमलौ कियौ। तिउंऐ तेसरौ सारौ कुछ़ नीं गौ और सेऊ पीटियौ औदमौरौ कियौ, और आपु तिदरु डेई गौऐ।

![](https://cdn.door43.org/obs/jpg/360px/obs-en-27-06.jpg)

कुछ़ बौगता बासिऐ, एक यहुदी याजक सेज़ी बाटा दी आशौ तिणी याजकै सेऊ औदमौरौ आदमी बाटा दी पौड़ौ औन्दौ देखौ। पर सेऊ देखियौ बाटा रै दुजै धुरै बाटिऐ औगाऊं बौड़ी गौ। तिणीऐ सेऊ आदमी अनदेखौ कियौ।”

![](https://cdn.door43.org/obs/jpg/360px/obs-en-27-07.jpg)

“तेथ बासिऐ कुछ़ बौगत बीतियौ, एक लेवी सेज़ी बाटा दी आशौ। पर सेऊ लेवी भी बाटा रै दुजै धुरै बाटिऐ निकल़ी गौ। तीणिऐ भी सेऊ आदमी अनदेखौ कियौ।”

![](https://cdn.door43.org/obs/jpg/360px/obs-en-27-08.jpg)

“तेथ बासिऐ तिऐं बाटा दी एक आदमी आशौ ज़ो सामरिया रौ थौ। (सामरी और यहूदी एकी दूजा कू नौफरत कौरा थै।) तिणी सामरी आदमीऐ बाटा दी सेऊ औदमौरौ आदमी देखौ। तिणीऐ देखौ कि सेऊ यहूदी थौ, पर तैबै भी तिणीऐ तेस माथै बौड़ी दया कौरी। एथीलै सेऊ तेस काऐ डैऔ और तेसरै ज़खमा दी पाट्टी बानी।”

![](https://cdn.door43.org/obs/jpg/360px/obs-en-27-09.jpg)

“तैबै तिणी सामरिऐ सेऊ आदमी आपणै गादै माथै पाइयौ आपु आइलै एकी रौइणै री ज़ागाह दी निंयौ, और तिऐ तिणीऐ तेसरी देखबाल़ कौरी।”

![](https://cdn.door43.org/obs/jpg/360px/obs-en-27-10.jpg)

आगल़ै दिनै, तेस सामरी आदमी रै आपणै सफरा दी डेउणै री ज़रूरत थी। तिणीऐ तेस घौरा री देखभाल कौरनै वाल़ै आदमी कै कुछ़ पैसै दै। और तेसलै बोलौ, “ऐस आदमी री देखभाल़ कौरै। अगर इऊं पैसै रै अलावा तैरै कुछ़ ओर पैसै खौरच हुआ लै ता वापिस आशिऔ हाऊं तैरै तिऊं खौरच़ै औन्दै पैसेऊ रौ भुगतान पोरु कौराऊ।”

![](https://cdn.door43.org/obs/jpg/360px/obs-en-27-11.jpg)

तैबै यीशुऐ तेस यहुदी धार्मिक अगुऐ कु पूछ़ौ, “तू का सुंचा ई? ईऊं चीन लोगू मांझ़ा कु तेस लुटै और पिटै औन्दै आदमी रौ पड़ोसी कुण आ?” तिणीऐ ज़वाब दैऔ, “सेऊ ज़ो तेस माथै दयालु थौ।” यीशुऐ तेसलै बोलौ, “तु डेऊ और ईणी ई कौर।”

*लूका अध्याय 10:25-37 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_27_128kbps.m4a

## 28. सेठ ज़वान आफसर

https://openbiblestories.org/l/bfz/story-28/

![](https://cdn.door43.org/obs/jpg/360px/obs-en-28-01.jpg)

एकी दिनै, एकी ज़वान आफसरै यीशु काऐ नौज़दीक आशिऔ तेसकु पूछ़ौ, “ओ सारेउकु आच्छ़ौ गुरु, सौदा री ज़िन्दगी पाइणा लै मुइंऐ का कौरनौ च़ाईं?” यीशुऐ तेसलै बोलौ, “तू मु्लै सारेउकु आच्छ़ौ कैलै बोलाई? सिरफ एक ही सारेउकु आच्छ़ौ परमेश्वर आ। पर अगर तू सौदा री ज़िन्दगी पाइणौ च़ाह ई ता परमेश्वरा रै हुकम मान।”

![](https://cdn.door43.org/obs/jpg/360px/obs-en-28-02.jpg)

तिणिऐ पूछ़ौ, मु्इंऐ केज़ै-केज़ै हुकम जा ई मानणै?” यीशुऐ ज़वाब दैऔ, खून न कौरणौ। गान्दै काम ना कौरणै। च़ोरी ना कौरणी। झ़ुठ ना बोलणौ। आपणै मां और बाबा री इज़्ज़त कौरणी, और आपणै पड़ोसी आइलै आपु ज़िणौ प्यार कौरणौ।”

![](https://cdn.door43.org/obs/jpg/360px/obs-en-28-03.jpg)

पर तिणी ज़वान मौरदै बोलौ, “हाऊं आपणै बचपना कू ईऊं सारै हुकूम मानदै लागौ औन्दौ। मु्इंऐ सौदा लै ज़िउंदौ रौइणा लै औज़ौ भी का कौरणै री ज़रुरत आ?” यीशुऐ तेस माथै नौज़र लाई और तेस आइलै प्यार किऔ।

![](https://cdn.door43.org/obs/jpg/360px/obs-en-28-04.jpg)

यीशुऐ ज़वाब दैऔ, “अगर तु बिणा दोषा रौ हुणौ च़ाह ई ता डेइऔ आपणौ सारौ कुछ़ पोरु बेच़ और धन गरीबु दी बाँट, और ताऊंलै सौरगा दी धन मिला। तैबै आशै मुंअ पिछ़ु।

![](https://cdn.door43.org/obs/jpg/360px/obs-en-28-05.jpg)

ज़ो यीशुऐ बोलौ ज़ेबी तिणी ज़वान मौरदै शुणौ ता सेऊ भौरी निराश हुई गौ, कैलैकि सेऊ भौरी सेठ थौ और सेऊ आपणौ सारौ धन-ज़यदाद नाईं देणौ च़ाह थौ। सेऊ मुड़ियौ यीशु काऐ कु डेई गौ।

![](https://cdn.door43.org/obs/jpg/360px/obs-en-28-06.jpg)

तैबै यीशुऐ आपणै च़ेलेऊ लै बोलौ, “परमेश्वरा रै राज़ा दी सेठ लोगु रौ आशणौ भौरी मुश्किल आ! एक सेठ आदमी रौ परमेश्वरा रै राज़्य दी आशणै कु आसान आ ऊँटा रै सिउणी रै शेड़ै बाटिऐ कु डेउणौ।”

![](https://cdn.door43.org/obs/jpg/360px/obs-en-28-07.jpg)

ज़ो यीशुऐ बोलौ ज़ेबी च़ेलेउऐ शुणौ ता सै हैरान थै। तिउंऐ बोलौ, “अगर एऊ ईणौ आ ता परमेश्वर कास बौच़ावा?”

![](https://cdn.door43.org/obs/jpg/360px/obs-en-28-08.jpg)

यीशुऐ च़ेलेऊ भिलै नौदर लाइऔ बोलौ, “लोगु लै आपणौ छ़ुटकारौ कौरणौ मुश्किल आ। पर परमेश्वरा लै कुछ़ भी कौरणौ मुश्किल नाईं आ।”

![](https://cdn.door43.org/obs/jpg/360px/obs-en-28-09.jpg)

पतरसै यीशु लै बोलौ, “आमै च़ेलै आपणौ सारौ कुछ़ छ़ाड़ियौ ताऊं पिछ़ु हुई गौऐ आ: ता आमुरौ ईनाम का हुआ लौ?”

![](https://cdn.door43.org/obs/jpg/360px/obs-en-28-10.jpg)

यीशुऐ ज़वाब दैऔ, “हर एक ज़ौणौ ज़ुणिऐ मैरै कारण घौर, भाई-बौइण, मां-बाब, लोल़डै या धन-ज़यदाद छ़ाड़ौ आ, सेऊ तेसकै शौ गुणा ज़ादौ मिला और सेऊ सौदा री ज़िन्दगी भी पा लौ। पर भौरी का ज़ुण पैहलै ई सै पिछ़ाऊं हुआ ई, और भौरी का ज़ुण पिछ़ाड़िऐ ई सै औगाड़िऐ हुणे ई।

*मत्ती अध्याय 19:16-30; मरकुस 10:17-31; लूका 18:18-30 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_28_128kbps.m4a

## 29. नीघीणै नुकरा री कहाणी

https://openbiblestories.org/l/bfz/story-29/

![](https://cdn.door43.org/obs/jpg/360px/obs-en-29-01.jpg)

एकी दिनै, पतरसै यीशु कु पुछ़ौ, “ओ मालिक, ज़ेबी मैरौ भाई मैरै खिलाफ पाप कौरा आ ता, मुंइऐ सेऊ केती बारै माफ कौरणौ चाईं? का साता बारै?” यीशुऐ बोलौ, “सात बारै नाईं पर साता रै सत्तर गुणा बारै!” इणै बौलणै रौ यीशु रौ मतलब आ कि आमुऐ सौदा माफ ही कौरणौ चाईं। तैबै यीशुऐ इऐ कहाणी बोली।

![](https://cdn.door43.org/obs/jpg/360px/obs-en-29-02.jpg)

यीशुऐ बोलौ, परमेश्वरा रौ राज़ एकी राज़ै ज़िणौ आ ज़ुंणिऐ कु हिसाब-किताब निणौ च़ाऔ ज़ेबी सेऊ हिसाब-किताब निंदै लागौ, ता तेसरौ एक नुकुर दुई लाख दिना री मज़दूरी रौ एक बौड़ै कौर्ज़े रौ कौरज़दार थौ।

![](https://cdn.door43.org/obs/jpg/360px/obs-en-29-03.jpg)

पर सेऊ नुकुर आपणौ कौरज़ौ नाईं देई बौल़ौ, एथीलै राज़ै बोलौ, एसरौ कौरज़ौ दैणा लै एस और एसरौ टौबर नुकुरु रै रूपा दी बेच़ौ।

![](https://cdn.door43.org/obs/jpg/360px/obs-en-29-04.jpg)

“तिणी नुकरै राज़ै काऐ धौनी झुकियौ बोलौ, छ़ौंअटी मुं आइलै शांती छ़ाड़, और हाऊं आपणै कौरज़ा री पूरी रौकमा रौ भुगतान कौराऊ। राज़ै नुकुरा माथी दया की, एथीलै तिणीऐ तेसरौ सारौ कौरज़ौ माफ कियौ और सेऊ डेउणै दैऔ।”

![](https://cdn.door43.org/obs/jpg/360px/obs-en-29-05.jpg)

“पर ज़ेबी सेऊ नुकुर राज़ा काऐ कु बाइरै डेऔ, ता तेसकै तेसरौ एक गोश्टण नुकुर मिलौ ज़ो तेसरौ च़ार महीनै री मज़दूरी रौ कौरज़दार थौ। तिणी नुकरै आपणौ गोश्टण नुकुर पाकड़ौ और बोलौ, ‘ज़ो ताऊं माथी मैरौ कौरज़ौ आ मु्कै तेसरौ भुगतान कर!”

![](https://cdn.door43.org/obs/jpg/360px/obs-en-29-06.jpg)

“तिणी गोश्टण नुकुरै धौनी झुकियौ बोलौ, ‘छ़ौंअटी मुं आइलै शांती छ़ाड़, और हाऊं आपणै कौरज़ा री पूरी रौकमा रौ भुगतान कौराऊ।’ पर एथरै बज़ाऐ, तिणी नुकुरै आपणै गोश्टण नुकुर ज़ेल़ा इ टाली एरौ ज़ेबी झ़ाऊं कि सेऊ तेस कौरज़ा रौ भुगतान ना कौरा।”

![](https://cdn.door43.org/obs/jpg/360px/obs-en-29-07.jpg)

ज़ो कुछ़ हुऔ थौ सेऊ कुछ़ ओरी नुकुरेउऐ देखौ और से भौरी परेशान हुऐ। सै राज़ै काऐ डैऐ और तेसकै सारौ कुछ़ बोलौ।”

![](https://cdn.door43.org/obs/jpg/360px/obs-en-29-08.jpg)

“राज़ै सेऊ नुकुर औटाऔ और तेसलै बोलौ, ‘ओ पापी नुकुर! मुंइऐ तैरौ कौरज़ौ एथीलै माफ कियौ थौ कैलैकि तांइऐ मुंकु औरज़ कौरी थी। तांइऐ भी तिणी ही कौरणौ चाईं थौ।’ राज़ौ एती रोषा इ थौ कि तिणिऐ सेऊ नुकुर ज़ेला दी टाली ऐरौ ज़ेबी झ़ाऊं कि सेऊ आपणै सारै कौरज़ा रौ भुगतान न कौर।”

![](https://cdn.door43.org/obs/jpg/360px/obs-en-29-09.jpg)

तैबै यीशुऐ बोलौ, “मैरौ सौरगा दी विराज़मान बाब तुमु मांझिऊ कु हर एकी आइलै इणी कौरा अगर तुमै आपणौ भाई आपणै ज़िवा कु माफ नाईं कौरालै।”

*मत्ती अध्याय 18:21-35 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_29_128kbps.m4a

## 30. यीशु पांज़ हज़ार लोगु लै रोटी खिलावा सा

https://openbiblestories.org/l/bfz/story-30/

![](https://cdn.door43.org/obs/jpg/360px/obs-en-30-01.jpg)

यीशुऐ आपणै खास च़ेलै परचार कौरना लै और लोगु लै शिक्षा देणा लै भौरी का अलग-अलग गाँवा दी भेज़ै। ज़ेबी सै वापिस आशै ता तिऊंऐ यीशु लै बोलौ कि तिऊंऐ का किऔ थौ। तैबै यीशुऐ सै झ़िला री दूजी भिलै एक शान्त ज़ागाह दी डेइऔ कुछ़ बौगता इ आराम कौरणा लै औटाऐ। एथीलै सै एकी किश्ती दी च़ौड़ै और झ़िला रै दूजी भिलै दी डेई गौऐ।

![](https://cdn.door43.org/obs/jpg/360px/obs-en-30-02.jpg)

पर तिऐ भौरी ईणै लोग थै ज़ुणिऐ यीशु और च़ेलै किश्ती दी डेउंदै देखै थै। इऐ लोग तिउंकु औगाड़िऐ झ़िला री दूज़ी भिलै डेउणा लै झ़िला री कुनियारै-कुनियारै दी भागै। एथीलै ज़ेबी यीशु और च़ेलै पौंउचै ता लोगु री एक बौड़ी भीड़ तिऊं ज़ागदै पैहला कु तिऐ पौउंच़ी गोऐ।

![](https://cdn.door43.org/obs/jpg/360px/obs-en-30-03.jpg)

तिऐं भिड़ा दी छ़ेउड़ी और लोल़डै री गिणती छ़ाड़ियौ पांज़ हज़ार मौरद थै। यीशुऐ तिऊं लोगु माथै बौड़ौ तरस खाऔ। यीशु लै सै लोग बिणा भेराल़डु री भेरी ज़िणै थै। एथीलै तिणीऐ तिउंलै शिक्षा देई और तिऊं माझ़ै ज़ो लोग बीमार थै सै च़ागै किऐ।

![](https://cdn.door43.org/obs/jpg/360px/obs-en-30-04.jpg)

ब्याल़ हुणै रै बौगतै, च़ेलेउऐ यीशु लै बोलौ, “आबै बेर हुई गौई आ और नौज़दिका दी केज़ौ इलाकौ नाईं आ। ईऊं लोगु डेउणै दै ताकि सै डेइयौ खाणा लै कुछ़ नीं बौल़ा।

![](https://cdn.door43.org/obs/jpg/360px/obs-en-30-05.jpg)

पर यीशुऐ च़ेलेऊ लै बोलौ, “तुमै तिउंलै कुछ़ खाणै लै दैऔ!” तिउंऐ ज़वाब दैऔ, “आमै ईणौ किणै कौरी सौकी आ? आमुकै सिरफ पांज़ रोटी और दूई छ़ोटी माच्छ़ी ई।”

![](https://cdn.door43.org/obs/jpg/360px/obs-en-30-06.jpg)

यीशुऐ आपणै च़ेलेऊ लै बोलौ कि सै भिड़ा रै लोगु घासा माथै पचास-पचासा री पांगती दी बोशणा लै बोलौ।

![](https://cdn.door43.org/obs/jpg/360px/obs-en-30-07.jpg)

तैबै यीशुऐ पांज़ रोटी और दूई माच्छ़ी निंइयौ सौरगा भिलै देखौ, और तींऐ रोटी लै परमेश्वरा रौ धन्याबाद दैऔ।

![](https://cdn.door43.org/obs/jpg/360px/obs-en-30-08.jpg)

तैबै यीशुऐ रोटी और माच्छ़ी टुकड़ै दी चोड़ै। तिणीऐ लोगु लै देणा लै आपणै च़ेलेऊ कै सै टुकड़ै दै। च़ेले तिंऐ रोटी बांटदै लागै, और सै केबी खातम नाईं हुई! सै सारै लोग खाइयौ भरपूर हुई गौऐ।

![](https://cdn.door43.org/obs/jpg/360px/obs-en-30-09.jpg)

तेथ बासिऐ, च़ेलेउऐ सै बौच़ी औन्दी रोटी कौठै कौरी ज़ो खाउई नाईं थी तेथ कौरी बाराह छ़ाबड़ै भौरुऐ! सै सारी रोटी तिऊं पांज़ ऱोटी और दुई माच्छ़ी कु आशी थी।

*मत्ती अध्याय 14:13-21; मरकुस 6:31-44; लूका 9:10-17; यूहन्ना 6:5-15 कु बाइबला री एक काहणी।*

Audio: https://git.door43.org/OBS-TLF/bfz_obs/releases/download/v1/bfz_obs_v1_30_128kbps.m4a

## 31. यीशु पाणी माथै हाण्डा सा

https://openbiblestories.org/l/bfz/story-31/

![](https://cdn.door43.org/obs/jpg/360px/obs-en-31-01.jpg)

पांज़ हज़ार लोगु लै रोटी खिलाउणै बासिऐ, यीशुऐ आपणै च़ेलेऊ लै किश्ती दी डेउणा लै बोलौ। तिणीऐ तिउंलै झ़िला री दुजी आंगै डेउणा लै बोलौ ज़ैबैकि सेऊ थोड़े बौगता लै तिदै रुकी गौ। एथीलै च़ेले डेई गौऐ और यीशुऐ सै भीड़ ज़ो तिऐ थी विदा कौरी कि सै आपणै घौरै डेई बौल़ा। एथ बासिऐ, यीशु प्राथना कौरना लै एकी डोकै माथै डेई गौ। सेऊ एखुली थौ, और तिणीऐ आधी राच़ी झ़ाऊं प्राथना कौरी।

![](https://cdn.door43.org/obs/jpg/360px/obs-en-31-02.jpg)

सेज़ै बौगतै, च़ेले आपणी किश्ती दी बौच़ी-बौच़ीयौ थै आण्डदै लागै औन्दै, पर बागुर तिऊं भिलै भौरी तेज़ी कौरी थौ बौइंदै लागौ औन्दौ। भौरी राच हुइयौ भी सै सिरफ झ़िला रै माझ़ा दी पौंउच़ै थै।

![](https://cdn.door43.org/obs/jpg/360px/obs-en-31-03.jpg)

सेज़ै बौगतै यीशुऐ प्राथना कौरणौ बन्द किऔ और आपणै च़ेलेऊ काऐ वापिस डैऔ। सेऊ किश्ती भिलै डेउणा लै पाणी माथै हाण्डदै लागौ।

![](https://cdn.door43.org/obs/jpg/360px/obs-en-31-04.jpg)

तैबै च़ेलै तेस देखियौ भौरी डौरी गौऐ कैलैकि तिउंऐ सुंच़ौ थौ कि एऊ भूत आ। यीशु ज़ाणा थौ कि सै डौरी गौऐ ई, एथीलै तिणीऐ तिउंलै हाका देइऔ बोलौ, “डौरौ नाईं ऐऊ हाऊं ऊ।”

![](https://cdn.door43.org/obs/jpg/360px/obs-en-31-05.jpg)

तैबै पतरसै यीशु लै बोलौ, “ओ प्रभु, अगर ऐऊ तु ई ता मु्लै पाणी माथै आण्डिऔ ताऊं काऐ आशणै रौ हुकुम दै।” यीशुऐ पतरसा लै बोलौ, “आश बा!

![](https://cdn.door43.org/obs/jpg/360px/obs-en-31-06.jpg)

एथीलै पतरस किश्ती कु उतरी गौ और यीशु काऐ डेउणा लै पाणी री माथै आण्डणौ शुरु किऔ। पर थोड़ौ दूर डेइऔ, तिणीऐ आपणी आखी यीशु कु फेरी गोई और पाणी री छ़ालै देखणी और तेज़ बागुर महसूस कौरणौ शुरू कौरी ऐरौ।

![](https://cdn.door43.org/obs/jpg/360px/obs-en-31-07.jpg)

तैबै पतरस डौरी गौ और पाणी दी डूबदै लागौ। सेऊ च़िलांदै लागौ, “ओ प्रभु, मुं बौच़ाऊ!” यीशुऐ तेभी हाथ बौड़ाइऔ सेऊ पाकड़ी ऐरौ और तेसलै बोलौ, “तैरौ विश्वास भौरी कम आ! ताइंऐ मुं माथै विश्वास कैलै नाईं किऔ कि हाऊं ताऊं डुबणै नाईं दैंदौ?

![](https://cdn.door43.org/obs/jpg/360px/obs-en-31-08.jpg)

तैबै यीशु और पतरस किश्ती दी च़ौड़ी गौऐ, और फेटी बागुरा रौ बौइणौ बन्द हुई गौ। पाणी शान्त हुई गौ। च़ेलै हैरान हुइऔ यीशु काऐ धौनी झुकी गौऐ। तिउंऐ तेसरी आराधना कौरी और तेसलै बोलौ, “सौच्ची तुमै परमेश्वरा रै छ़ोहरु ई।”

*मत्ती अध्याय 14:22-33; मरकुस 6:45-52; यूहन्ना 6:16-21 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_31_128kbps.m4a

## 32. यीशु बुरी आत्मा दी फौशौ औन्दौ आदमी और एक बीमार छ़ेउड़ी च़ागौ कौरा सा

https://openbiblestories.org/l/bfz/story-32/

![](https://cdn.door43.org/obs/jpg/360px/obs-en-32-01.jpg)

यीशु और तेसरै च़ेलै आपणी किश्ती दी सेज़ै इलाकै दी डेई गौऐ ज़िऐ गिरासेनी लोग रौआ थै। सै सेज़ै इलाकै दी पौंउच़िऔ किश्ती कु उतरी गौऐ।

![](https://cdn.door43.org/obs/jpg/360px/obs-en-32-02.jpg)

तिऐ एक आदमी थौ ज़ासदी बुरी आत्मा थी लागी ऐन्दी।

![](https://cdn.door43.org/obs/jpg/360px/obs-en-32-03.jpg)

ऐऊ आदमी एती शौकतीशाली थौ कि कोई भी तेस नाईं सोभाल़ी बौल़ा थौ। मोकती बारै लोगुऐ तेसरै हाथ और टांगै शांघल़ी कौरी भी पोरु बानै, पर सेऊ तिऊं पोरु च़ोड़ा थौ।

![](https://cdn.door43.org/obs/jpg/360px/obs-en-32-04.jpg)

सेऊ आदमी तेस इलाकै दी कौबरा दी रौआ कौरा थौ। सेऊ आदमी पूरै दिनै और पूरी राच़ी राड़ै मारा थौ। सेऊ जुड़कै नाईं भीड़ा थौ और बार-बार आपु दी पात्थरा कौरी ज़ाखम दिआ थौ।

![](https://cdn.door43.org/obs/jpg/360px/obs-en-32-05.jpg)

सेऊ आदमी दुड़ियौ यीशु काऐ आशौ और तेस काऐ घुंडै टेकी ऐरै। तैबै यीशुऐ तेस आदमी दी ज़ो बुरी आत्मा थी तिंयालै डांटियौ बोलौ, “ऐस आदमी कु बाइरै निकल़!”

![](https://cdn.door43.org/obs/jpg/360px/obs-en-32-06.jpg)

सै बुरी आत्मा ज़ोरै च़िलाई, “ओ यीशु, परम परधान परमेश्वरा रौ छ़ोहरु, तैरौ मु्कू का काम आ? छ़ोंअटी मुं नाईं सौताऊ!” तैबै यीशुऐ तिंऐ बुरी आत्मा कु पुछ़ौ, “तैरौ का नाऊं आ? तिणीऐ ज़वाब दैऔ, “मैरौ नाऊं सेना सा, कैलैकि आमै भौरी का सी।”

![](https://cdn.door43.org/obs/jpg/360px/obs-en-32-07.jpg)

तिऊं बुरी आत्माउऐ यीशु कु औरज़ की, “छ़ौअंटी आमु ऐस इलाकै कु बाइरै नाईं भेज़ै!” तिदै नज़दिका रै डोका माथै सुंगरा रौ शाल़ थौ चौरदै लागौ औन्दौ। एथीलै तिऊं बुरी आत्माउऐ यीशु कु औरज़ कौरी, छ़ौअंटी आमु ईऊं सुंगरा दी भेज़!” यीशुऐ बोलौ, “ठीक आ, तिउंदी डैऔ!”

![](https://cdn.door43.org/obs/jpg/360px/obs-en-32-08.jpg)

एथीलै सै बुरी आत्माऐ तेस आदमी कु निकल़िऔ तिऊं सुंगरा दी डेई गोई। सै सुंगुर दुड़िऔ टीरा कु झ़िला दी पौड़ी गौऐ और डूबिऔ पोरु मौरै। तेस शाल़ा दी लगभग दूई हज़ार सुंगुर थै।

![](https://cdn.door43.org/obs/jpg/360px/obs-en-32-09.jpg)

तिऊं सुंगुरा री देखभाल़ कौरणै वाल़ै लोगुऐ ज़ो कुछ़ हुऔ थौ ज़ेबी तिउंऐ देखौ ता सै इलाकै दी भागी गौऐ। यीशुऐ ज़ो किऔ थौ तिऐ तिउंऐ सारेऊ कै बोलौ। तेस इलाकै रै लोग निकल़िऔ आशै और सेऊ आदमी देखौ ज़ासदी बुरी आत्मा थी। सेऊ शांति कौरी, जुड़कै भिड़ीयौ, और एक आम आदमी ज़िणौ बरताव कौरिऔ बोशौ औन्दौ थौ।

![](https://cdn.door43.org/obs/jpg/360px/obs-en-32-10.jpg)

सै लोग भौरी डौरै औन्दै थै और तिउंऐ यीशु लै डेउणा लै बोलौ। एथीलै यीशु किश्ती दी च़ौड़ी गौ। सेऊ आदमी ज़ासदी बुरी आत्मा थी तिणीऐ यीशु आइलै डेउणा लै औरज़ कौरी।

![](https://cdn.door43.org/obs/jpg/360px/obs-en-32-11.jpg)

पर यीशुऐ तेसलै बोलौ, “नाईं। हाऊं च़ाह ऊ कि तु घौरै डेइऔ सारेऊ कै बोलै कि परमेश्वरै ताउंलै का किऔ आ। तिउंलै बोल कि परमेश्वरै किणै कौरी ताऊं माथै दया कौरी आ।”

![](https://cdn.door43.org/obs/jpg/360px/obs-en-32-12.jpg)

एथीलै सेऊ आदमी डेई गौ और सारेऊ कै ऐज़ै बारै दी बोलौ ज़ो यीशुऐ तेसलै किऔ थौ। और तेसरी काहणी शुणनै वाल़ौ हर एक ज़ौणौ हैरान हुऔ।

![](https://cdn.door43.org/obs/jpg/360px/obs-en-32-13.jpg)

यीशु झ़िला रै दूजी तौरफी दी वापिस आशौ। तेस तिऐ पौंउच़णै बासिऐ, एक बौड़ी भीड़ तेस काऐ कौठै हुई और तेस दाबदै लागै। तिंऐ भीड़ा दी एक छ़ेउड़ी थी ज़ो बाराह बौरिषा ओइलै खून बौइणा री बिमारी कु दु:खी थी। तिंऐ आपणै सारै पैसै डाक्टरा कै देई ऐरै थै ताकि सै तिंऐ ठीक कौरी सौका, पर तिंआ रौ रोग तौइंऐ बिगड़ी गौ।

![](https://cdn.door43.org/obs/jpg/360px/obs-en-32-14.jpg)

तिंआऐ शुणौ थौ कि यीशुऐ कई बीमार लोग चांगै किऐ थै और तिंऐ सुंच़ौ, “मु्कै पूरौ विश्वास आ कि अगर हाऊं सिरफ यीशु रौ जुड़कौ ई छूं लौ, ता हाऊं भी च़ांगौ हौआ ऊ!” एथीलै सै यीशु रै पिछ़ु आशी और तेसरै जुड़कै रौ धुरौ छ़ूई ऐरौ। ज़िणी ही तिंऐ सेऊ छ़ुऔ, तिणी ई खुना रौ बौइणौ बन्द हुई गौ आ।

![](https://cdn.door43.org/obs/jpg/360px/obs-en-32-15.jpg)

फेटी ही, यीशुऐ ज़ाणी ऐरौ कि तेसकु शौकती निकल़ी आ। एथीलै तिणीऐ पिछ़ाऊं मुड़ियौ पुछ़ौ, “हाऊं कुणिऐ छ़ुंऔ उ?” च़ेलेउऐ ज़वाव दैऔ, “इदै ऐती सारै लोगुऐ तुमु फिदियालै भीड़ लाई ऐन्दी, और तुमुदी धाक्कौ लाइंदै लागै औन्दै। ता तुमै कैलै पूछ़ा ई कि हाऊं कुणिऐ छ़ुंऔ ऊ।

![](https://cdn.door43.org/obs/jpg/360px/obs-en-32-16.jpg)

सै छ़ेउड़ी यीशु काऐ कांबियौ और भौरी डौरी औन्दी घुंडुं माथै बोशी गोई। तैबै तिंऐ तेसकै बोली ऐरौ कि तिंऐ का किऔ सा, और ईणौ भी की सै चांगी हुई गोई आ। यीशुऐ तिंआलै बोलौ, तैरै विश्वासै तु च़ागी की ऐरी आ, शांति कौरी डेऊ।

*मत्ती अध्याय 8:28-34; 9:20-22; मरकुस 5:1-20; 5:24b-34; लूका 8:26-39; 8:42b-48 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_32_128kbps.m4a

## 33. एकी ज़िमिदारा री काहणी

https://openbiblestories.org/l/bfz/story-33/

![](https://cdn.door43.org/obs/jpg/360px/obs-en-33-01.jpg)

एकी दिनै, यीशु झ़िला रै डिका काऐ थौ। सेऊ लोगु री एक बौड़ी भीड़ा लै शिक्षा देन्दै थौ लागौ औन्दौ। तेस शुणना लै एती सारै लोग आशै कि यीशु कै तिउं सारेऊ कु बुशै लाइणा लै ज़ागाह नाईं बौच़ी। एथीलै सेऊ पाणी दी खौड़ी किश्ती माथै चौड़ी गौ। तिदै सेऊ बोशी गौ और लोगु लै शिक्षा देई।

![](https://cdn.door43.org/obs/jpg/360px/obs-en-33-02.jpg)

यीशुऐ तिउंकै एक काहणी शुणाई, “एक ज़िम्मीदार बीज बौइणा लै बाइरै निकल़ौ। ज़ेबी सेऊ हाथा कु बीज बिखेरदै थौ लागौ औन्दौ ता कुछ़ बीज बाटा दी फोकुऐ, पर च़िड़ु-च़िटकोरुऐ आशिऔ सै सारै बीज खाई ऐरै।”

![](https://cdn.door43.org/obs/jpg/360px/obs-en-33-03.jpg)

“दुजै बीज पथरियाल़ी ज़मीना दी फोकुऐ ज़िऐ भौरी कम माट्टौ थौ, पथरियाल़ी ज़मीना दी फोकु औन्दै बीज फेटी ज़ौमै, पर तिउंरी ज़ौड़ ज़मीना दी गहराई दी डेउणा रै काबिल नाईं थी। ज़ेबी सुरज़ निकल़ौ और गौरमी हुई ता सै पौधै मुरझ़ाई ऐरै और शुकी गौऐ।”

![](https://cdn.door43.org/obs/jpg/360px/obs-en-33-04.jpg)

कुछ़ बीज झ़ाड़िऊ माझ़िऐ फोकुऐ, तिउं बीजै बौड़नौ शुरु किऔ, पर कांडेउऐ सै दाबी ऐरै। एथीलै कांडै वाली ज़मीना दी फोकु औन्दै बीजा रै पौधा कु कोई भी नाज़ पैदौ नाईं हुई बौल़ौ।”

![](https://cdn.door43.org/obs/jpg/360px/obs-en-33-05.jpg)

“पर दुजै बीज आच्छ़ी ज़मीना दी फोकुऐ। सै बीज बौड़ै और ज़ेती बीज बौऐ औन्दै थै तिउंकु तीस, साठ और ईदरा झ़ाऊं कि शौ गुणा नाज़ पैदौ हुऔ। ज़ुण कुण भी परमेश्वरा पीछ़ु आण्डणौ च़ाह सा, सेऊ तिंऊं बुशु माथी ध्यान दिया ज़ो हाऊं बोलदै ऊ लागौ औन्दौ!”

![](https://cdn.door43.org/obs/jpg/360px/obs-en-33-06.jpg)

एज़ी काहणिऐ च़ेलेऊ उलझ़नाई टाली ऐरै। एथीलै यीशुऐ सै सौमझ़ाऐ, “सेऊ बीज परमेश्वरा रौ बचन आ। सै बाट एक ईणौ आदमी आ ज़ो परमेश्वरा रै बचन शुणा सा, पर तेस सौमुझ़दौ नाईं आ। तैबै शैतान तेस काऐ रौ बचन पोरु च़ोरा सा। यानिके शैतान तेस बचन सौमुझ़णा कु दूर छ़ाड़ा सा।”

![](https://cdn.door43.org/obs/jpg/360px/obs-en-33-07.jpg)

“सेऊ पथरियाल़ी ज़मीन ईणौ आदमी आ ज़ो परमेश्वरा रौ बचन शुणा सा और खुशी कौरी तेस अपणाई ऐरा सा। पर ज़ेबी काठौ बौगत आशा सा, या ज़ेबी ओर लोग तेस सौतावा ई, ता सेऊ परमेश्वरा कु दूर डिआ सा। यानिके सेऊ परमेश्वरा माथै विश्‍वास कौरणौ बन्द कौरा सा।”

![](https://cdn.door43.org/obs/jpg/360px/obs-en-33-08.jpg)

“सै कांडैवाल़ी ज़मीन ईणौ आदमी सा ज़ो परमेश्वरा रै बचन शुणा, पर सेऊ भौरी का बुशु रै बारै दी झ़ौरी कौरणौ शुरु कौरा सा, और सेऊ भौरी पैसै कमाउणा री कोशिश कौरा सा, और सेऊ भौरी का च़िज़ै पाइणा लै कोशिश कौरा सा कुछ़ बौगता बासिऐ आबे सेऊ परमेश्वरा आइलै प्यार कौरणा रै काबिल नाईं आ। एथीलै ज़ो तिणीऐ परमेश्वरा रै बचना कु शिखौ थौ सेऊ तेस परमेश्वर खुश कौरणै रै इस्तेमाल नाईं कौरदौ। सै गीऊं रै डंठल़ा ज़िणै आ ज़ो केज़ौ नाज़ पैदौ नाईं कौरदौ।”

![](https://cdn.door43.org/obs/jpg/360px/obs-en-33-09.jpg)

“पर आच्छ़ी ज़मीन सेऊ आदमी आ ज़ो परमेश्वरा रै बचन शुणा सा, तेथ माथै विश्वास कौरा सा, और फौल़ पैदौ कौरा सा।”

*मत्ती अध्याय 13:1-8, 18-23; मरकुस 4:1-8, 13-20; लूका 8:4-15 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_33_128kbps.m4a

## 34. यीशु दुजी काहणी री शिक्षा दैआ सा

https://openbiblestories.org/l/bfz/story-34/

![](https://cdn.door43.org/obs/jpg/360px/obs-en-34-01.jpg)

यीशुऐ परमेश्वरा रै राज़्य रै बारै दी ओर भौरी का काहणी शुणाई। तिणीऐ बोलौ, “परमेश्वरा रौ राज़ एकी राई रै बीजा रै ज़िणौ आ ज़ो कुणिऐ आपणै डोखरा दी बौई गौ। तुमै ज़ाणाई कि राई रौ बीज सारै बीजा दी सारेउकु छ़ोटौ औआ सा।”

![](https://cdn.door43.org/obs/jpg/360px/obs-en-34-02.jpg)

“पर ज़ेबी राई रौ बीज बौड़ा सा ता सेऊ बौगीच़ा रै सारै पेड़ा दी सारेउकु बौड़ौ औआ सा, ऐती बौड़ौ कि च़ौड़की आशीऔ तेसरी डाल़िऊ दी आराम कौरा इ।”

![](https://cdn.door43.org/obs/jpg/360px/obs-en-34-03.jpg)

यीशुऐ एक ओर काहणी बोली, “परमेश्वरा रौ राज़ संज़ेड़ै रै ज़िणौ आ ज़ास निईऔं एक छ़ेउड़ी पिठा मांझ़िऐ मुच्छ़ा सा तैबै सेऊ पिठौ मांझ़ी फौइला सा।”

![](https://cdn.door43.org/obs/jpg/360px/obs-en-34-04.jpg)

सौरगा रौ राज़ तेस खौज़ानै ज़िणौ आ ज़ो कुणीऐ डोखरा दी च़ोरी ऐरौ आ। कास ओर आदमी कै सेऊ खौज़ानौ मिली गौ और तिणीऐ तेस निईणै री कोशिश कौरी। एथीलै तिणीऐ सेऊ तौइंऐ दाबी गौ। सेऊ खुशी कौरी एती भौरु औन्दौ थौ कि तिणीऐ डेइऔ आपणौ सारौ कुछ़ बेच़ी ऐरौ ताकि सेऊ तेस डोखरौ खरीदी सौका ज़िऐ सेऊ खौज़ानौ थौ।”

![](https://cdn.door43.org/obs/jpg/360px/obs-en-34-05.jpg)

सौरगा रौ राज़ एक भौरी कीमती शुध्द मोती ज़िणौ भी आ। ज़ैबै कुण मोतिऊ रौ बाणी तेस पाआ सा ता सेऊ तेस खरीदणा लै आपणौ सारौ कुछ़ बेच़ी ऐरा सा।”

![](https://cdn.door43.org/obs/jpg/360px/obs-en-34-06.jpg)

तिऐ कुछ़ लोग थै ज़ो सुंच़ा थै कि परमेश्वर तिऊं एथीलै अपणाउवा लौ कैलैकि सै भौलै काम कौरदै थै लागै औन्दै। इऐ लोग इणै लोगु निकाम्मै माना थै ज़ो तिऊं भौलै काम नाईं कौरा थै। एथीलै यीशुऐ तिउंकै इऐ काहणी बोली: “दूई मौरद थै और दूइया प्राथना कौरदै मंदिरा दी डै। तिऊं मांझा कु एक मामलै निंणै वाल़ौ थौ, और दूजौ एक धार्मिक गुरू थौ।”

![](https://cdn.door43.org/obs/jpg/360px/obs-en-34-07.jpg)

“तिणी धार्मिक गुरुऐ इणै तरीका कौरी प्राथना कौरी, “ओ परमेश्वर, तैरौ धन्यावाद कि हाऊं ओर लोगु ज़िणौ – ज़िणै कि डाकू, ज़ुलम कौरणै वाल़ौ आदमी, गांदै काम कौरणै वाल़ौ, या इदरा झ़ाऊं कि इदै एस मामलै नींणै वाल़ै ज़िणौ नाईं ऊ।”

![](https://cdn.door43.org/obs/jpg/360px/obs-en-34-08.jpg)

“मतलब की, हाऊं हर हौप्तै दी दूई बारै ब्रौत छ़ाड़ा ऊ, और हाऊं आपणै पैसै और समाना रौ दौसुऔ हिस्सौ ताउंकै दिआ ऊ।”

![](https://cdn.door43.org/obs/jpg/360px/obs-en-34-09.jpg)

“पर सेऊ मामलै निंणै वाल़ौ आदमी तेस धार्मिक गुरू कु भौरी दूर खौड़ौ हूई गौ। तिणीऐ सौरगा भिलै आखी भी नाईं लाई। एथरै बज़ाऐ, तिणीऐ आपणी मुट्ठी कु आपणी छ़ाती पीटी-पिटियौ प्राथना की, ओ परमेश्वर, छ़ौअंटीं मुं माथै दया कर कैलैकि हाऊं एक पापी आदमी ऊ।”

![](https://cdn.door43.org/obs/jpg/360px/obs-en-34-10.jpg)

तैबै यीशुऐ बोलौ, “हाऊं तुमू कू सौच्चौ बोलाऊ, परमेश्वरै तेस मामलै निंणै री प्राथना शुणी और सेऊ धौरमी घोषित कौरी ऐरौ। पर तिणीऐ तेस धार्मिक अगुवै री प्राथना पसंद नाईं कौरी। परमेश्वर हर एक घमंडी रौ मूंड धौनी कौरा, पर सेऊ हर तेस ज़ौणा लै इज्जत दिआ ज़ुण आपु निउलौ कौरा सा।”

*मत्ती अध्याय 13:31-33, 44-46; मरकुस 4:30-32; लूका 13:18-21; 18:9-14 कु बाइबला री एक काहणी।*

Audio: https://git.door43.org/OBS-TLF/bfz_obs/releases/download/v1/bfz_obs_v1_34_128kbps.m4a

## 35. दया कौरणै वाल़ै बाबा री काहणी

https://openbiblestories.org/l/bfz/story-35/

![](https://cdn.door43.org/obs/jpg/360px/obs-en-35-01.jpg)

एकी दिनै, यीशु तिऊं भौरी का लोगु लै शिक्षा दैन्दै थौ लागौ औन्दौ ज़ो तेसरी शुणना लै कौट्ठै थै हूऐ औन्दै। इऐ लोग मामलै निंणै वाल़ै और साथाई ओर लोग भी थै ज़ूणिऐ मूसा रै कानूना मानणै री कोशिश नाईं की।

![](https://cdn.door43.org/obs/jpg/360px/obs-en-35-02.jpg)

कुछ़ धार्मिक गुरुऐ देखौ कि यीशु इऊं लोगु आइलै एक गोश्टणा ज़िणौ बुशै लाइन्दै लागौ औन्दौ थौ। एथीलै तिउंऐ एकी दुजै कु इणौ बोलणौ शुरु किऔ कि सेऊ गलत थौ बोलदै लागौ औन्दौ। यीशुऐ सै बूशै कौरदै शुणै, एथीलै तिणीऐ तिउंकै ऐज़ी काहणी बोली।

![](https://cdn.door43.org/obs/jpg/360px/obs-en-35-03.jpg)

“एक आदमी थौ ज़ासरै दूई छ़ोहरु थै। छ़ोटै छ़ोहरुऐ आपणै बाबा लै बोलौ, ‘ओ बाब, मुक्कै इबी मैरौ हिस्सौ चाईं! एथीलै बाबै आपणै दूइयौ छ़ोहरु रै मांझ़ा दी आपणै धन-ज़यदाद बांटी ऐरौ सा।”

![](https://cdn.door43.org/obs/jpg/360px/obs-en-35-04.jpg)

फेटी इ छ़ोटौ छ़ोहरु आपणौ सारौ कुछ़ कौट्ठै कौरिऔ दूर देशा लै डेई गौ और पापी ज़िन्दगी ज़िउंणा दी आपणै सारै पैसै बर्बाद की ऐरै।”

![](https://cdn.door43.org/obs/jpg/360px/obs-en-35-05.jpg)

“तेथ बासिऐ, ज़िऐ छ़ोटौ छ़ौहरु थौ तेस देशा दी एक बौड़ौ काल़ पौड़ौ, और तेसकै रोटी खाणा लै पैसै खातम हुई गौऐ। एथीलै तेसकै ज़ो काम मिलौ सेऊ सुंगंरु च़ारनै रौ थौ। सेऊ एती दुखी और भूखौ थौ कि सेऊ सुंगंरु रौ चापण खाणौ च़ाह थौ।”

![](https://cdn.door43.org/obs/jpg/360px/obs-en-35-06.jpg)

“आखिरकार, तिणी छ़ोटै छ़ोहरुऐ आपु कु बोलौ, हाऊं का ऊ कौरदै लागौ औन्दौ? मैरै बाबा रै नुकरु कै खाणा लै भौरी खाणौ औआ, तैबै भी हाऊं ईऐ भूखौ मौरदै लागौ औन्दौ। हाऊं आपणै बाबा काऐ वापिस डिआ ऊ और आपणै बाबा रौ एक नुकुर बौणना लै औरज़ कौराऊ।”

![](https://cdn.door43.org/obs/jpg/360px/obs-en-35-07.jpg)

एथीलै तिणी छ़ोटै छोहरुऐ वापिस आपणै बाबा रै घौरा भिलै डेउणौ शुरु किऔ। ज़ैबैकि सेऊ औज़ौ दूर ही थौ, तेसरै बाबै सेऊ देखौ और तेसदी आशीयौ घीण लाई। सेऊ दूड़िऔ आपणै छ़ोहरु काऐ डेऔ और सेऊ गौल़ै लाइऔ खोबियाऔ।

![](https://cdn.door43.org/obs/jpg/360px/obs-en-35-08.jpg)

“तिणी छ़ोहरुऐ बोलौ, ‘ओ बाब, मुंइऐ परमेश्वरा रै और तैरै खिलाफ पाप किऔ आ। हाऊं तैरै छ़ोहरु बोलणा लै लायक नाईं ऊ।”

![](https://cdn.door43.org/obs/jpg/360px/obs-en-35-09.jpg)

“पर बाबै आपणै नुकुरा लै बोलौ, ‘फेटी डेइऔ सारेऊ कु बौड़िया जुड़कै आणौ और मैरै छ़ोहरु कै भिड़ाऔ! तेसरी औउंठी दी कांगणी और तेसरै लाता दी बूट भिड़ाऔ। तैबै सारेउ कु आच्छ़ौ च़ेल्टू झ़ांगौ ताकी आमै खाई और खुशी मौनाई लै, कैलैकि मैरौ छ़ोहरु मौरी गौ थौ, पर आबै सेऊ ज़िउंदौ आ! सेऊ औरच़ी गौ थौ, पर आमुकै सेऊ मिली गौ आ!”

![](https://cdn.door43.org/obs/jpg/360px/obs-en-35-10.jpg)

“एथीलै लोगुऐ खुशी मौनाउणी शुरु कौरी। कुछ़ बौगत बितीऔ, बौड़ौ छ़ोहरु डोखरा दी काम कौरियौ घौरै आशौ। तिणीऐ गाणै और नाच़णै री बाच़ शुणी और हैरान हुऔ कि इयौ का हुन्दै लागौ औन्दौ।”

![](https://cdn.door43.org/obs/jpg/360px/obs-en-35-11.jpg)

“ज़ेबी बौड़ौ छ़ोहरु कै पौतौ लागौ कि सै एथीलै खुशी मौनाउंदै लागै औन्दै, कि तेसरौ भाई घौरै आशी गौ थौ, ता सेऊ भौरी रोषुऔ और घौरा भित्तै नाईं हुऔ। तेसरै बाबै बाइरै आशीऔ तेसलै तिऊं आइलै खुशी मौनाउणा लै औरज़ की, पर तिणीऐ इनकार किऔ।”

![](https://cdn.door43.org/obs/jpg/360px/obs-en-35-12.jpg)

तिणी बौड़ै छ़ोहरुऐ आपणै बाबा लै बोलौ, इऊं सारै बौरिषा दी मुंइऐ ईमानदारी कौरी काम किऔ! और केबी भी तेरी बुशै नाईं टाल़ी, पर ताइंऐ केबी मुकै एक छ़ोटी बाकरी नाईं देई ताकि हाऊं आपणै गोश्टणा आइलै दूपारी कौरी सौकू। पर तैरै एस छ़ोहरुऐ तैरै पैसै पापी कामा कौरणा दी बर्बाद कौरै ई। और आबै ज़ेबी सेऊ आशौ आ ता तेस कालै खुशी मौनाउणा लै ताइंऐ सारेऊ कु आच्छ़ौ च़ेल्टू झ़ांगौ!”

![](https://cdn.door43.org/obs/jpg/360px/obs-en-35-13.jpg)

“बाबै ज़वाब दैऔ, ‘ओ मैरै छ़ोहरु, तु सौदा मुं आइलै ई, और ज़ो कुछ़ मैरौ आ सेऊ सारौ तैरौ आ। पर आमुलै खुशी मौनाउणौ ठीक आ कैलैकि तैरौ भाई मौरी गौ थौ, पर आबै सेऊ ज़िउंदौ आ। सेऊ औच़ी गौ थौ, पर आबै आमुकै सेऊ मिली गौ आ!”

*लूका अध्याय 15:11-32 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_35_128kbps.m4a

## 36. रूप बौदल़िणौ

https://openbiblestories.org/l/bfz/story-36/

![](https://cdn.door43.org/obs/jpg/360px/obs-en-36-01.jpg)

एकी दिनै, यीशुऐ आपणै चीन च़ेलै, पतरस, याकूब, और यूहन्ना आपु आइलै निंऐ। (एऊ यूहन्ना च़ेलौ आ सेऊ आदमी नाईं सा ज़ुणिऐ यीशु लै बपतिस्मौ दैऔ थौ।) सै प्राथना कौरना लै एक उंच़ी धारा माथै डेवै।

![](https://cdn.door43.org/obs/jpg/360px/obs-en-36-02.jpg)

ज़ेबी यीशु प्राथना कौरदै थौ लागौ औन्दौ ता तेसरौ मूंअ सुरज़ा ज़िणौ च़ौमकिलौ हुई। तेसरै जुड़कै प्याशै ज़िणै शेतै हुई गौऐ, ज़िणौ धौतरी माथै कुण धोआ तेथकु भी बौढ़ियौ शेतौ।

![](https://cdn.door43.org/obs/jpg/360px/obs-en-36-03.jpg)

तैबै मूसा और एलिय्याह भविष्यद्वक्ता पौगड़ै हुऐ। ईऐ मौरद एज़ी धौतरी माथै ऐज़ै बौगता कु कई शौ बौरीष पैहलै रौआ थै। तिउंऐ यीशु रै मौरना रै बारै दी बुशै लाई, कि सेऊ शीग्री इ यरूशलेमा दी आमारै पापा री तांई पोरू मौरा आ।

![](https://cdn.door43.org/obs/jpg/360px/obs-en-36-04.jpg)

ज़ैबै मूसा और एलिय्याह यीशु आइलै बुशै लाइन्दै थै लागै औन्दै तैबै पतरसै यीशु लै बोलौ, “आमारौ इदै रौइणौ भौलौ आ। आमै चीन ताम्बु चाणी, एक तुमु कालै, एक मूसा कालै, और एक एलिय्याह कालै।” पर पतरस नाईं ज़ाणा थौ कि सेऊ का सा बोलदै लागौ औन्दौ।

![](https://cdn.door43.org/obs/jpg/360px/obs-en-36-05.jpg)

ज़ेबी पतरस बुशै लाइन्दै थौ लागौ औन्दौ, ता एक च़ौमकिलौ बादल़ तौल़ै आशिऔ तिऊं माथै छ़ाई गौ। तैबै तिउंऐ बादल़ा कु एक बाच़ आशदै शुणी। तिणीऐ बोलौ, “एऊ मैरौ छ़ोहरु आ ज़ासकु हाऊं भौरी प्यार कौराऊ। हाऊं एसकु खुश ऊ। एसरी शुणौ।” सै च़ीनिआ च़ेलै डौरी गौऐ और धौतरी माथै धौनी पौड़ी ऐरै।

![](https://cdn.door43.org/obs/jpg/360px/obs-en-36-06.jpg)

तैबै यीशुऐ सै छ़ुऐ और बोलौ, “डौरौ नाईं! उठौ!” ज़ेबी तिउंऐ च़ारौ तौरफा दी देखौ। ता ज़ो भी तिऐ थौ सेऊ सिरफ यीशु थौ।

![](https://cdn.door43.org/obs/jpg/360px/obs-en-36-07.jpg)

यीशु और सै च़ीनिआ च़ेलै तिंऐ धारा कु वापिस तौल़ै उतरी गौऐ। तैबै यीशुऐ तिउंलै बोलौ, “इबी ज़ो इदै हुऔ तेसरै बारै दी कासी कै नाईं बोलेऊ, हाऊं शीग्री मौराऊ और तैबै ज़िउंदौ हुआ ऊ। तेथ बासिऐ, तुमै लोगु कै बोली सौकाई।”

*मत्ती अध्याय 17:1-9; मरकुस 9:2-8; लूका 9:28-36 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_36_128kbps.m4a

## 37. यीशु लाज़र मौरै औन्दै मांझ़ा कु ज़िउन्दौ कौरा सा

https://openbiblestories.org/l/bfz/story-37/

![](https://cdn.door43.org/obs/jpg/360px/obs-en-37-01.jpg)

लाज़र नावां रौ एक आदमी थौ। तेसरी दूई बौइणी थी ज़ासरै नाऊं मरियम और मार्था थै। सै सारै यीशु रै पाक्कै गोष्टण थै। एकी दिनै, कुणिऐ यीशु कै बोलौ कि लाज़र भौरी बीमार आ। ज़ैबै यीशुऐ इणौ शुणौ ता तिणीऐ बोलौ, “इऐ बीमारी लाज़रा लै मौरनै री नाईं आसती। बल्कि इऐ लोगु लै परमेश्वरा री इज्ज़त कौरना लै प्रेरित कौरा सा।”

![](https://cdn.door43.org/obs/jpg/360px/obs-en-37-02.jpg)

यीशु आपणै गोष्टणु आइलै प्यार कौरा थौ, पर ज़िऐ सेऊ थौ तिऐ तिणीऐ दुई दिना झ़ाऊं इंतज़ार किऔ। तिऊं दुई दिना बासिऐ, तिणीऐ आपणै च़ेलेऊ लै बोलौ, आशौ, वापिस यहूदिया लै डेई।” च़ेलेउऐ ज़वाब दैऔ, “ओ गुरू, इबी कुछ़ इ बौगत पैहलै तिदलै लोग तुमु झ़ांगणौ च़ाह थै!” यीशुऐ बोलौ, “आमारौ गोष्टण लाज़र सुती गौ आ, और मुंइऐ सेऊ उज़ियाउणौ आ।”

![](https://cdn.door43.org/obs/jpg/360px/obs-en-37-03.jpg)

यीशु रै च़ेलेउऐ ज़वाब दैऔ, ओ प्रभु, अगर लाज़र सुतौ औन्दौ आ, ता सेऊ ठीक औआ।” तैबै यीशुऐ तिउंलै साफ-साफ बौलौ, कि “लाज़र मौरी गौ आ। हाऊं खुश ऊ कि हाऊं तिदै नाईं थौ, ताकी तुमै मुं माथै विश्वास कौरी सौका।”

![](https://cdn.door43.org/obs/jpg/360px/obs-en-37-04.jpg)

ज़ैबै यीशु लाज़रा रै गावां दी पौउंच़ौ ता लाज़र मौरिऔ पैहलै कु च़ार दीन हुई गौऐ थै। मार्था यीशु कु मिलणा लै बाइरै आशी और बोलौ, “ओ प्रभु, अगर तु इदै औआ थौ ता मैरौ भाई लाज़र नाईं मौरा थौ। पर हाऊं विश्वास कौरा ऊ कि ज़ो कुछ़ भी तु परमेश्वरा कु मांगा लौ सेऊ ताउंकै दिआ।”

![](https://cdn.door43.org/obs/jpg/360px/obs-en-37-05.jpg)

यीशुऐ ज़वाब दैऔ, “हाऊं ऊ सेऊ ज़ो मौरै औन्दै ज़िउंदै कौराऊ। ज़ुण मुं माथै विश्वास छ़ाड़ा आ, अगर सेऊ मौरा भी लौ, तैबै भी ज़िउंदौ औआ। ज़ुण मुं माथै विश्वास छ़ाड़ा सा सेऊ केबी नाईं मौरदौ। का तु एज़ी बुशा माथै विश्वास कौराई?” मार्थै ज़वाब दैऔ, “ओ प्रभु, हाऊं विश्वास कौराऊ कि तु परमेश्वरा रौ छ़ोहरु मसीह आ।”

![](https://cdn.door43.org/obs/jpg/360px/obs-en-37-06.jpg)

तैबै मरियम आशी। तिंऐ यीशु रै बांगणै माथै पौड़िऔ बोलौ, “ओ प्रभु, अगर तु इदै औआ थौ ता मैरौ भाई नाईं मौरा थौ।” यीशुऐ तिंआ कु पूच्छ़ौ, “तुमुऐ लाज़र किऐ आ छ़ाड़ौ औन्दौ?” तिउंऐ तेसले बोलौ, “कौबरा दी। आश और देख।” तैबै यीशु लेरदै लागौ।

![](https://cdn.door43.org/obs/jpg/360px/obs-en-37-07.jpg)

सै कौबर एक ढवारा दी थी ज़ासरै दारा काऐ एक बौड़ौ पात्थर थौ छ़ाड़ौ औन्दौौ। ज़ैबै यीशु कौबरा काऐ पौउंच़ौ ता तिणीऐ तिउंलै बोलौ, “एस पात्थर पोरु गाड़ौ।” पर मार्थै बोलौ, “तेस मौरिऔ च़ार दिन हुई गौऐ आ। तेसकु बास आशालौ।”

![](https://cdn.door43.org/obs/jpg/360px/obs-en-37-08.jpg)

यीशुऐ तिउंलै ज़वाब दैऔ, का मुंइऐ तुमुलै नाईं बोलौ थौ कि अगर तुमै मुं माथै विश्वास करालै ता परमेश्वरा री तागत देखालै?” एलीथै तिउंऐ पात्थर पोरु गाड़ौ।

![](https://cdn.door43.org/obs/jpg/360px/obs-en-37-09.jpg)

तैबै यीशुऐ ऊपरै सौरगा री भिलै देखिऔ बोलौ, “ओ बाब, मेरी शुणना लै हाऊं तैरौ धन्यावाद कौरा ऊ। हाऊं ज़ाणा ऊ कि तु सौदा मेरी शुणा ई, पर मुंइऐ एऊ इदै खौड़ै इऊं सारै लोगु री मज़दा लै बोलौ आ ताकी इऐ विश्वास कौरा कि ताइंऐ हाऊं भेज़ौ ऊ।” तैबै यीशु लाज़रा लै औटाउऔ, “ओ लाज़र, बाइरै निकल़िऔ आश!”

![](https://cdn.door43.org/obs/jpg/360px/obs-en-37-10.jpg)

एथीलै लाज़र बाइरै निकल़िऔ आशौ! सेऊ इबी भी कफना दी लिपटौ औन्दौ थौ। यीशुऐ तिउंलै बोलौ, “एस कफना कु निकुल़नै दी एसरी मज़द कौरौ और एस आज़ाद कौरौ।” एज़ै च़मत्कारा री बज़ाह कु भौरी का यहुदिउऐ यीशु माथै विश्वास किऔ।

![](https://cdn.door43.org/obs/jpg/360px/obs-en-37-11.jpg)

पर यहुदिउ रै धार्मिक अगुवै यीशु कु ज़ौल़दै लागै, एथीलै सै तरकीब च़ाणना लै एकी साथै कौट्ठै हुऐ कि किणै कौरी यीशु और लाज़र झ़ांगा।

*यूहन्ना 11:1-46 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_37_128kbps.m4a

## 38. यीशु पौकड़ावा ई

https://openbiblestories.org/l/bfz/story-38/

![](https://cdn.door43.org/obs/jpg/360px/obs-en-38-01.jpg)

हर साल, यहुदी लोग फसह रौ साज़ौ मौनावा थै। एऊ एज़ै बारै दी साज़ौ थौ कि कई साल पैहलै परमेश्वरै सै तिउंरै बुजुर्गु मिस्रा री गुलामी कु छ़ड़ाऐ थै। लगभग चीन बौरीष बासिऐ यीशुऐ साधारण रीति कौरी प्रचार कौरणौ और शिक्षा देणौ शुरु किऔ। यीशुऐ आपणै च़ेलेऊ लै बोलौ कि सेऊ तिऊं आइलै यरुशलेमा दी फसह रौ साज़ौ मौनाउणौ च़ाह सा, और एऊ भी कि तेस तिदै झ़ांगा ई।

![](https://cdn.door43.org/obs/jpg/360px/obs-en-38-02.jpg)

यीशु रै च़ेलेऊ मांझ़ै यहुदा नावां रौ एक आदमी थौ। यहूदा च़ेलेऊ रै पैसै री थैली छ़ाड़नै रौ काम थौ, पर कई बारै सेऊ तिंऐ थैली कु पैसै गाड़ा थौ। यीशु और च़ेलेउ रै यरुशलेमा दी पौउंच़णै बासिऐ यहूदा, यहूदी अगुवै काऐ डैऔ। तिणीऐ पैसै रै बौदलै यीशु तिउंरै हाथाई पौकड़वाउणा री बूश छ़ाड़ी। सेऊ ज़ाणा थौ कि यहूदी अगुवै नाईं माना थै कि यीशु ही मसीह थौ। सेऊ ज़ाणा थौ कि सै तेस झ़ागणौ च़ाह थै

![](https://cdn.door43.org/obs/jpg/360px/obs-en-38-03.jpg)

महायाजका रै बोलणा माथै यहूदी अगुवेउऐ यीशु तिउं रै हाथा दी पकड़ाउणा लै यहूदा कै तीस च़ांदी रै सिक्कै दै। एऊ तिणौ हुऔ ज़िणौ कि भविष्यद्वक्तै बोलौ थौ कि इणौ औआ। तैबै यहूदा मानी ऐरौ और पैसै निंइयौ डेई गौ। सेऊ यीशु पाकुड़ना दी तिउंरी मज़द कौरना लै केज़ौ मौकौ लोड़दै थौ लागौ औन्दौ।

![](https://cdn.door43.org/obs/jpg/360px/obs-en-38-04.jpg)

यरुशलेमा दी, यीशुऐ आपणै च़ेलेऊ आइलै फसह रौ साज़ौ मौनाऔ। फसह री रोटी रै दौरान, यीशुऐ रोटी निंइयौ च़ोड़ी। तिणीऐ बोलौ, “इंऐ निंयौ और खाऔ। एऊ मैरौ शरीर आ ज़ास हाऊं तुमुलै देआ ऊ। एस मेरी यादा दी कौरिऔ।” इणै कौरी, यीशुऐ बोलौ कि सेऊ तिउंलै मौरा, यानिके तिउंलै सेऊ आपणौ शरीर बौल़ी कौरा आ।

![](https://cdn.door43.org/obs/jpg/360px/obs-en-38-05.jpg)

तैबै यीशुऐ एक अंगुरा रै रौसा रौ एक खोरु निंयौ और बोलौ, “एस पीयौ। एऊ नौई वाचा रौ मैरौ लोऊ आ ज़ो कि हाऊं बहावा ऊ ताकि परमेश्वर तुमारै पाप माफ कौरा। हर बार एस पींणै रै बौगत मेरी यादा दी एस कौरौ ज़िणौ हाऊं इबी कौरदै ऊ लागौ औन्दौ।”

![](https://cdn.door43.org/obs/jpg/360px/obs-en-38-06.jpg)

तैबै यीशुऐ आपणै च़ेलेऊ लै बोलौ, “तुमु मांझ़ा कु एक ज़ौणौ मुं पौकड़ावा।” च़ेलै हैरान हुई गौऐ,, और पूछ़दै लागै कि इणौ काम कुण कौरा? यीशुऐ बोलौ, “मुं पौकड़ाउणै वाल़ौ आदमी सेऊ आ ज़ासकै हाऊं इंऐ रोटी रौ टुकड़ौ दैआ ऊ।” तैबै तिणीऐ सै रोटी यहूदा लै देई।

![](https://cdn.door43.org/obs/jpg/360px/obs-en-38-07.jpg)

तिंऐ रोटी निणै बासिऐ, यहूदा दी शैतान डेई गौ। यहूदा निकल़िऔ यीशु गिरफ्तार कौरना ले यहूदी अगुवे री मज़द कौरणा लै डेइ गौ। एऊ राची रौ बौगत थौ।

![](https://cdn.door43.org/obs/jpg/360px/obs-en-38-08.jpg)

रोटी बासिऐ, यीशु और तेसरै च़ेलै जैतून डोकै दी डेई गौऐ। यीशुऐ बोलौ, “तुमै सारै आज़ राच़िऐ मुं छ़ाड़ाई। इणौ आ लिखौ औन्दौ, ‘हाऊं भेराल़डू झ़ांगाऊ और सारी भेरी वारै-पारै बागा ई।”’

![](https://cdn.door43.org/obs/jpg/360px/obs-en-38-09.jpg)

पतरसै ज़वाब दैऔ, “च़ाऐ बाकी सारै ताऊं छ़ाड़ालै, पर हाऊं नाईं छ़ाड़दौ!” तैबै यीशुऐ पतरसा लै बोलौ, “शैतान तुमु सारै निणौ च़ाह सा, पर ओ पतरस, मुंइऐ ताउंलै प्राथना कौरी आ कि तु विश्वासा कु न हौटा। तैबै भी, आज़ राची, कुखड़ै बाशणा कु पैहलै तु चीया बारै इनकार कौराई कि तु मुं नाईं ज़ाणदौ।”

![](https://cdn.door43.org/obs/jpg/360px/obs-en-38-10.jpg)

पतरसै तैबै यीशु लै बोलौ, “च़ाऐ हाऊं मौरू भी लौ, हाऊं केबी भी तैरौ इनकार नाईं कौरदौ!” बाकी ओरी च़ेलेउऐ भी इणी ई बोलौ।

![](https://cdn.door43.org/obs/jpg/360px/obs-en-38-11.jpg)

तैबै यीशु आपणै च़ेलेऊ आइलै गतसमनी नावां री ज़ागाह दी डैऔ। यीशुऐ आपणै च़ेलेऊ लै प्राथना कौरना लै बोलौ ताकी शैतान तिउंरी परिक्षा न कौरा। तैबै यीशु आपु प्राथना कौरदै डैऔ।

![](https://cdn.door43.org/obs/jpg/360px/obs-en-38-12.jpg)

यीशुऐ चीना बारै प्राथना कौरी, “ओ मैरै बाब, छ़ौंअटी अगर इणौ हूई सौका कि एस दुखा रौ खोरु पीणा लै मु्लै नाईं दै। पर अगर लोगु रै पाप माफ कौरणा लै केज़ी ओर बाट नाईं आ, ता तेरी इच्छ़ा पूरी च़ाईं हूई।” यीशु भौरी परेशान थौ और तेसरौ पसीनौ लोऊ रै टिपु ज़िणै थी। तेसकै तागती देणा लै परमेश्वरै एक स्वर्गदूत भेज़ौ।

![](https://cdn.door43.org/obs/jpg/360px/obs-en-38-13.jpg)

हर बार प्राथना बासिऐ, यीशु आपणै च़ेलेऊ काऐ वापिस आशौ, पर सै सुतै औन्दै थै। ज़ैबै यीशु चीजी बारै आशौ ता यीशुऐ बोलौ, “उज़िऔ! मुं पौकड़वाउणै वाल़ौ इदै आ।”

![](https://cdn.door43.org/obs/jpg/360px/obs-en-38-14.jpg)

यहुदी अगुवौ, सिपाई, और एक बौड़ी भीड़ा आइलै यहूदा आशौ। तिउंऐ तलवार और डींगै थै आणै औन्दै। यहूदै यीशु काऐ आशिऔ तेसलै बोलौ, “ओ गुरु, ढाल,” और सेऊ खोबियाऔ। तिणीऐ गिरफ्तार कौरणै वाल़ै आदमी लै यहूदी अगुवौ दी परगट कौरणा लै इणौ कीऔ आ। तैबै यीशुऐ बोलौ, “ओ यहूदा, का तू मुं एक खोबु कौरी पौकड़ावा ई?”

![](https://cdn.door43.org/obs/jpg/360px/obs-en-38-15.jpg)

ज़ैबै सै सिपाई यीशु पाकुड़दै लागै औन्दै थै, तैबै पतरसै आपणी तलवार गाड़ी और महायाजका रै सेवका रौ एक कौन्थु काटौ। यीशुऐ बोलौ, “तलवार दूर कर! हाऊं आपणै बाबा कु मुं बौच़ाउणा लै स्वर्गदूतु री एक फौज़ा लै औरज़ कौरी सौका ऊ। पर मुंइऐ मैरै बाबा री बूश मानणी आ।” तैबै यीशुऐ तेस आदमी रौ कौन्थु ठीक कौरी गौ। तैबै सारै च़ेलै भागी गौऐ।

*मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_38_128kbps.m4a

## 39. यीशु माथै मुकद्दमौ च़ाला सा

https://openbiblestories.org/l/bfz/story-39/

![](https://cdn.door43.org/obs/jpg/360px/obs-en-39-01.jpg)

आबै एऊ आधी राची रौ बौगत थौ। तिऊं सिपाईऐ यीशु महायाज़का रै घौरा कै निंयौ, कैलैकि सेऊ यीशु कु स्वाल कौरणौ च़ाह थौ। पतरस दूरा कु तिऊं रौ पीछ़ौ कौरदै लागौ औन्दौ थौ। ज़ैबै सिपईऐ यीशु महायाज़का रै घौरै आणी गौ ता पतरस बाइरै रुकीऔ आपु आगी तापदै थौ लागौ औन्दौ।

![](https://cdn.door43.org/obs/jpg/360px/obs-en-39-02.jpg)

घौरा भित्तै, यहूदी अगुवेउऐ यीशु माथै मुकद्दमौ च़ौलाऔ। सै तेसरै खिलाफ झ़ूठी बुशेऊ बोलणा लै भौरी का झ़ुठै गवाह निईयौ आशै। हालांकि, तिउंरी बुशै एकी दूजै कु नाईं मिला थी, एथीलै यहूदी अगुवै इणौ साबित नाईं कौरी सौकै कि सेऊ केज़ी बुशा रौ दोषी थौ। यीशुऐ कुछ़ नाईं बोलौ।

![](https://cdn.door43.org/obs/jpg/360px/obs-en-39-03.jpg)

आखिरा दी, महायाज़कै सीधौ यीशु भिलै देखिऔ बोलौ, “आमुकै बोल कि का तु ही ज़िउंदै परमेश्वरा रौ छ़ोहरू मसिह आ?”

![](https://cdn.door43.org/obs/jpg/360px/obs-en-39-04.jpg)

यीशुऐ बोलौ, हाउं ऊ, तुमै मुं परमेश्वरा काऐ बोशौ औन्दौ और सौरगा कु आशदै भी देखाई।” महायाज़कै आपणै जुड़कै च़िरै कैलैकि ज़ो यीशुऐ बोलौ सेऊ सेज़ी बुशा माथै तेसरै भौरी रोष आशै थै। सेऊ ओरी अगुवे माथै च़िखौ, “आमुकै इणौ बोलणा लै कासी ओर गवाह री ज़रूरत नाईं आ कि एज़ै आदमिऐ का किऔ आ! तुमुऐ आपु ई सेऊ इणौ बोलदै शुणौ आ कि सेऊ परमेश्वरा रौ छ़ोहरु आ। तेसरै बारा दी तुमुरौ का बिच़ार आ?”

![](https://cdn.door43.org/obs/jpg/360px/obs-en-39-05.jpg)

सारै यहूदी अगुवे महायाज़का लै ज़वाब दैऔ, “सेऊ मौरना रै काबिल आ!” तैबै तिउंऐ यीशु री आखी दी पाट्टी बानी, और तेस माथै थूकौ, और सेऊ पिटौ, और तेसरौ मौज़ाक उड़ाऔ।

![](https://cdn.door43.org/obs/jpg/360px/obs-en-39-06.jpg)

और पतरस, ज़ेबी सेऊ घौरा बाइरै इंतज़ार कौरदै लागौ औन्दौ थौ। ता एक दासी छ़ोटुड़िऐ सेऊ देखौ। तिंऐ तेसलै बोलौ, “तु भी यीशु आइलै थौ!” पतरसै मौना कौरी ऐरौ। बासिऐ, कासी दुजी छेउड़िऐ एज़ी बूश बोली, और पतरसै तौइंऐ मौना कौरी ऐरी। आखिरा दी, कुछ़ लोगुऐ बोलौ, “आमै ज़ाणी ई कि तु यीशु आइलै थौ कैलैकि तुमै दूई गलीला रै ई।”

![](https://cdn.door43.org/obs/jpg/360px/obs-en-39-07.jpg)

तैबै पतरसै बोलौ, “अगर हाऊं एस आदमी ज़ाणाऊ ता परमेश्वरै मुलै शाप च़ाईं दैऔ!” फेटी ई पतरस इणै कौरी कौसम खाणै बासिऐ, एक कुखड़ौ बाशौ। यीशुऐ पीछ़ांऊ मुड़िऔ पतरस देखौ।

![](https://cdn.door43.org/obs/jpg/360px/obs-en-39-08.jpg)

पतरस तिदरा कु डेई एरौ और डीकरी-डीकरीऔ लैरदै लागौ। सेज़ै बौगतै, यीशु पौकड़ाउणै वाल़ै यहूदै देखौ कि यहूदी अगवेउऐ यीशु लै मौता री सौज़ा देई आ। यहुदा भौरी दुखी हूई गौ और डेइऔ आपु मौरी गौ।

![](https://cdn.door43.org/obs/jpg/360px/obs-en-39-09.jpg)

तेस देशा रौ राज्यपाल पिलातुस थौ। सेऊ रोम देशा लै काम कौरा थौ। यहूदी अगुवै यीशु तेस काऐ निंयौ। सै च़ाह थै कि पिलातुस तेसलै मौता री सौज़ा दिया और सै तेस झ़ांगा। तैबै पिलातुसै यीशु कु पूछ़ौ, “का तु यहुदिऊ रौ राज़ौ ई?”

![](https://cdn.door43.org/obs/jpg/360px/obs-en-39-10.jpg)

यीशुऐ ज़वाब दैऔ, “ताइंऐ सौच्चौ इ बोलौ आ। पर मैरौ राज़ इऐ धौतरी रौ नाईं आ। अगर औआ थौ ता मैरै दास मेरी तांइऐ लौड़ा थै। हाउं धौतरी माथै परमेश्वरा रै बारै दी सौच़्च़ौ बोलणा लै आशौ ऊ। हर एक ज़ौणौ ज़ुण परमेश्वरा आइलै प्यार कौरा सा सेऊ मेरी शुणा सा।” पिलातुसै बोलौ, “ता सौच़ का सा?”

![](https://cdn.door43.org/obs/jpg/360px/obs-en-39-11.jpg)

यीशु आइलै बुशै लाइणै बासिऐ, पिलातुसै बाइरै भीड़ा काऐ डेइऔ बोलौ, हाऊं इणी केज़ी बज़ाह नाईं पाईंदौ कि एऊ आदमी झ़ांगणा रै काबिल आ। “पर यहूदी गुरुऐ और भीड़ै च़िखिऔ बोलौ, एस क्रुसा माथै च़ौड़ाऔ।” पिलातुसै ज़वाब दैऔ, “सेऊ कुछ़ भी गलत कौरणै रौ दोषी नाईं आ।” पर सै औज़ौ भी ज़ोर-ज़ोरै च़िखदै लागै। तैबै पिलातुसै चिजी बारै बोलौ, “सेउ दोषी नाईं आ!”

![](https://cdn.door43.org/obs/jpg/360px/obs-en-39-12.jpg)

पिलातुस डौरी गौ कि सै भीड़ लौड़ाई शुरु कौरा, एथीलै सेऊ आपणै सिपाइउ रै ज़ौरिऐ यीशु क्रुसा माथै च़ौड़ाउणा लै मानी गौ। रोमी सिपाइउऐ यीशु दी कोड़ै लाऐ, और तेसकै राज़ै-महाराज़ै रै जुड़कै भिड़ाऐ, और तेसरै मुंडा माथी कांडेऊ कौरी चाणौ औन्दौ ताज़ छ़ाड़ौ। और सै इणै बोलिऔ तेसरौ मौज़ाक उड़ाउंदै लागै, “देखौ, यहूदिऊ रौ राज़ौ!”

*मत्ती 26:57-27:26; मरकुस 14:53-15:15; लूका 22:54-23:25; यूहन्ना 18:12-19:16 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_39_128kbps.m4a

## 40. यीशु क्रुसा माथै च़ौड़ावाई

https://openbiblestories.org/l/bfz/story-40/

![](https://cdn.door43.org/obs/jpg/360px/obs-en-40-01.jpg)

यीशु रौ मौज़ाक कौरणै बासिऐ, सिपाईऐ सेऊ क्रुसा माथै च़ौड़ाउणा लै नींइ ऐरौ। तिउंऐ सेउ क्रुस तेसी कु च़ुंगाऔ ज़ास माथै सेऊ लटकाउणौ थौ।

![](https://cdn.door43.org/obs/jpg/360px/obs-en-40-02.jpg)

तिऊं सिपाइउऐ यीशु तिंऐ ज़ागाह दी निंयौ ज़ासलै “खोपड़ी” ज़िणी ज़ागाह बोलाई और यीशु रै हाथ और बांगणै क्रुसा दी ठोकी एरै। यीशुऐ बोलौ, ओ बाब, इऊं माफ कर, कैलैकि इऐ नाईं जाणदै कि इऐ का ई कौरदै लागै औन्दै।” तिउंऐ एक तौखती भी तेसरै मुंडा काऐ क्रुसा माथै टांगी गौई। तेथदी थौ लिखौ औन्दौ, “यहूदिऊ रौ राज़ौ।” पिलातुसै तिउंलै इणै लिखणा लै बोलौ औन्दौ थौ।

![](https://cdn.door43.org/obs/jpg/360px/obs-en-40-03.jpg)

तैबै सिपाइउऐ यीशु रै जुड़केउ लै च़िट्ठी पाई। ज़ेबी तिउंऐ इणौ किऔ ता तिउंऐ सै भविष्यद्वाणी पूरी कौरी ज़ो बोला थी, “तिउंऐ मैरै जुड़कै आपु मांझै बांटी एरै, और मैरै जुड़का लै च़िट्ठी पाई।”

![](https://cdn.door43.org/obs/jpg/360px/obs-en-40-04.jpg)

तिदै दूई डाकू भी थै, ज़ो सिपाइउऐ सेज़ै बौगतै क्रुसा माथै च़ौड़ाऐ थै। तिउंऐ सै यीशु री दूइया भिलै थै टांगै औन्दै। तिऊं मांझ़ा कु एकी डाकुऐ यीशु रौ मौज़ाक उड़ाऔ, पर दूजै डाकुऐ बोलौ, “का तु नाईं डौरदौ कि परमेश्वर ताउंलै डांड दैआ सा? आमै भौरी का गांदै काम कौरणा रै दोषी आ, पर एऊ आदमी ता बिण दोषा रौ आ।” तैबै तिणीऐ यीशु लै बोलौ, “ज़ैबै तु आपणै राज़्य दी आशा लौ ता छ़ौअंटी मुं आद छ़ाड़ै।” यीशुऐ ज़वाब दैऔ, “आज़ ई तु मुं आइलै सौरगा दी औआ ई।”

![](https://cdn.door43.org/obs/jpg/360px/obs-en-40-05.jpg)

यहूदी अगुवे और भीड़ा रै ओरी लोगुऐ यीशु रौ मौज़ाक उड़ाऔ। तिउंऐ तेसलै बोलौ, “अगर तु परमेश्वरा रौ छ़ोहरु ई, ता क्रुसा कु तौल़ै उतुर और आपु बौच़ाऊ! तैबै आमै ताऊं माथै विश्वास कौरी ई।”

![](https://cdn.door43.org/obs/jpg/360px/obs-en-40-06.jpg)

तेभी ई पूरै देशा रौ सौरग पुरौ काल़ौ हुई गौ, हाल़ांकी सेऊ दूसकौ बौगत थौ। और चिया घाण्टै झ़ाऊं इणी ई रौ।

![](https://cdn.door43.org/obs/jpg/360px/obs-en-40-07.jpg)

तैबै यीशुऐ हाका देइऔ बोलौ, “पूरौ हूऔ! ओ बाब, हाऊं आपणी आत्मा तैरै हाथा दी सौंभाल़ा ऊ।” तैबै तिणीऐ आपणौ मूंड झ़ुकाऔ और आपणै प्राण छ़ाड़ी ऐरै। ज़ेबी सेऊ मौरौ ता एक भुईंच़ल़ पौड़ौ। और सेऊ मन्दिरा रौ बौड़ौ पौरदौ ज़ो परमेश्वरा री मौज़ुदगी कु लोगु अलग कौरा थौ माथा कु तौल़ा झ़ाऊं च़िरुइऔ दूई भिलै हुई गौऔ।

![](https://cdn.door43.org/obs/jpg/360px/obs-en-40-08.jpg)

आपणी मौता रै ज़ौरिऐ, यीशुऐ लोगु लै परमेश्वरा काऐ आशणै री बाट खोली एरी आ। ज़ेबी यीशु री च़ोकसी कौरणै वाल़ौ एक सिपाइऐ ज़ो कुछ़ हुऔ थौ एऊ सारौ देखौ ता तिणीऐ बोलौ, पाकौ ई, एऊ आदमी बिणा दोषा रौ थौ। एऊ परमेश्वरा रौ छ़ोहरू आ।”

![](https://cdn.door43.org/obs/jpg/360px/obs-en-40-09.jpg)

तैबै युसुफ और नीकुदेमुस नावां रै दूई यहूदी अगुवै आशै। सै विश्वास कौरा थै कि यीशु ही मसीह थौ। तिउंऐ पिलातुसा कु यीशु रौ मौड़ौ मांगौ। तिउंऐ यीशु रौ मोड़ौ कापड़ै दी मेटौ। तैबै सै तेस एकी डोका माझ़ै काटिऔ चाणी औन्दी कौबरा दी नींइ गौ और कौबरा भित्तै छ़ाड़ी एरौ। तैबै तिउंऐ तिऐं कौबरा रौ दार बन्द कौरना लै एक बौड़ौ पात्थर लाई ऐरौ।

*मत्ती 27:27-61; मरकुस 15:16-47; लूका 23:26-56; यूहन्ना 19:17-42 कु बाइबला री एक काहणी।*

Audio: https://git.door43.org/OBS-TLF/bfz_obs/releases/download/v1/bfz_obs_v1_40_128kbps.m4a

## 41. परमेश्वर यीशु मौरे औन्दैउ मांझ़िया कु ज़िउंदौ कौरा सा

https://openbiblestories.org/l/bfz/story-41/

![](https://cdn.door43.org/obs/jpg/360px/obs-en-41-01.jpg)

सिपाइऊ कौरी यीशु क्रुसा माथै च़ौड़ाउणै बासिऐ, यहूदी अगुवे पिलातुसा लै बोलौ, “तिणी झ़ुठै, यीशुऐ बोलौ थौ की सेउ चिना दिना बासिऐ मौरे औन्देउ मांझ़िया कु ज़िउंदौ उठा आ। कुणिऐ एउ पाकौ कौरणै लै कौबरा री च़ोकसी जा कौरणी की तैसरै च़ैलै तैसरी लाश च़ोरिये ना निंया। अगर सै इणौ कौरालै ता तिउंऐ बोलनौ आ की सेउ मौरे औन्दैउ मांझ़िया कु ज़िउंदौ हुऔ आ।

![](https://cdn.door43.org/obs/jpg/360px/obs-en-41-02.jpg)

पिलातुसै बोलौ, “कुछ सिपाई नियौ, और ज़िणौ तुमै कौरी सौका ई तिणौ कौबरा री च़ोकसी कौरौ।” एथीलै तिउंऐ तिऐं कौबरा दी डैउणा रै दारा दी एक मुहर लाइ गोई। तिउंऐ इणौ पाकौ कौरणा लै तिऐ सिपाई भी बौशाल़ी गौऐ की कोई भी तेसरी लाश च़ोरी ना बौल़ा।

![](https://cdn.door43.org/obs/jpg/360px/obs-en-41-03.jpg)

यीशु रै मौरनै रै दुजै दिनै आरामा रौ दीन थौ। कोई भी आरामा रै दीने काम नाईं कौरी सौका थौ। एज़ी ताइंऐ यीशु रौ कोई भी गोशटण कौबरा माथै नाई आशौ थौ। पर आरामा रै दुजै दिनै, दोउती राची, कुछ़ छ़ेउड़ी यीशु री कौबरा माथै डैउणा लै त्यार हुई। सै तौइंऐ तेसरै मौड़ै दी मौसालौ लाइणौ च़ाहा थी।

![](https://cdn.door43.org/obs/jpg/360px/obs-en-41-04.jpg)

तिउं छ़ेउडीउ रै पौउंच़णै कु पेहलै, कौबरा माथै एक बौडौ भुइंच़ल़ आशौ। सौरगा कु एक स्वर्गदुतै सेऊ पात्थर ढ़ाल़ी गौ ज़ेथ कौरी दार बौन्द थौ औन्दौ और तेथ माथी बोशी गौ। एउ स्वर्गदुत च़ौमुकदै थौ लागौ औन्दौ। कौबरा काऐ ज़ो सिपाई थै तिउंऐ सेउ देखौ। सै ऐती डौरी गौए थे की मौरै औन्दै बाशिऐ धौनी पौड़ौ गौऐ।

![](https://cdn.door43.org/obs/jpg/360px/obs-en-41-05.jpg)

ज़ेबी सै छ़ेउड़ी कौबरा काऐ पौउंच़ी ता तिणी स्वर्गदुतै तिउंलै बोलौ, “नाईं डौरौ। यीशु इदै नाई सा। सेउ मौरे औन्देउ मांझ़िया कु ज़िउंदौ हुई गौ आ, ज़िणौ की तिणीऐ बौलौ थौ की सैउ ज़िउंदौ हुआ सा! कौबरा दी लोड़ौ और देखौ" तिऊं छ़ेउडिऐ कौबरा बितै और ज़िऐ यीशु री लाश छ़ाड़ी ऐन्दी थी तिए लोड़ौ और देखौ की तेसरी लाश तिऐ नाईं थी।

![](https://cdn.door43.org/obs/jpg/360px/obs-en-41-06.jpg)

तेबै तिणी स्वर्गदुतै तिऊं छ़ेउड़िउ लै बोलौ, “डेइऔ तेसरै च़ेलेऊ कै बोलौ, ‘यीशु मौरै औन्दै रै मांझ़िया कु ज़िउंदौ हुइ गौ आ और सेऊ तुमु कु औगाड़ी-औगाड़िऐ गलीला लै डेवा'"

![](https://cdn.door43.org/obs/jpg/360px/obs-en-41-07.jpg)

सै छ़ेउड़ी हैरान हुई और भौरी खुश हुई। सै च़ेलेऊ कै ऐज़ी खुशी री खौबर शुणाउणा लै दौड़ी।

![](https://cdn.door43.org/obs/jpg/360px/obs-en-41-08.jpg)

ज़ेबी सै छ़ेउड़ी चैलेउ कै खुशी री खौबर शुणाउणा लै आपणी बाटाई थै, ता यीशु तिऊं काऐ परगट हुऔ। सै तेसरी टांगा माथी धौनी पौड़ी। तैबै यीशुऐ बोलौ, “नाईं डौरौ डेइऔ मैरै च़ेलैऊ लै गलीला लै डैउणा लै बोलौ। सै तिऐ मुं देखा लै।"

*मत्ती 27:62-28:15; मरकुस 16:1-11; लूका 24:1-12; यूहन्ना 20:1-18 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_41_128kbps.m4a

## 42. यीशु रौ सौरगा लै डेउणौ

https://openbiblestories.org/l/bfz/story-42/

![](https://cdn.door43.org/obs/jpg/360px/obs-en-42-01.jpg)

ज़ेज़ै दिनै परमेश्वरै यीशु मौरै औन्देऊ मांझ़िया कु ज़िउंदौ कियौ थौ, तेसरै च़ेलै नौज़दिका रै गांवा दी थै डेउंदै लागै औन्दै। हाण्डदी भारै सै यीशु आइलै ज़ो हुऔ थौ, तेथरै बारै दी बुशै लाइन्दै थै लागै औन्दै, तिऊंकै आश थी की सेउ मसीह थौ, पर तैबै भी सेऊ झ़ांगौ आ। ऐबै सै छ़ेउड़ी बोलाई इणौ कि सेउ तौइंऐ ज़िउंदौ हुइ गौ आ। सै नाईं ज़ाणा थै की केज़ी बुशा माथी बिश्वास कौरणौ आ।

![](https://cdn.door43.org/obs/jpg/360px/obs-en-42-02.jpg)

यीशुऐ तिऊं काऐ आशियौ तिऊं आइलै हान्डणौ शुरु कियौ, पर सै तेस प्राणी नाईं बौल़ै। तिणिऐ पु्छ़ौ की तुमै केज़ै बारे दी बूशै लाइंन्दै लागै औन्दै। बितै औन्दै दिनै यीशु आइलै ज़ो हुऔ थौ तेथारै बारै दी सारौ बोलौ। तिऊंऐ सुच़ौ की सै कास परदेशी आइलै ई बुशै लाइन्दै ई लागै औन्दै ज़ो नाई ज़ाणा थौ की यरुशलेमा दी का हुऔ थौ।

![](https://cdn.door43.org/obs/jpg/360px/obs-en-42-03.jpg)

तैबै यीशुऐ सै सौमझ़ाऐ थै की परमेश्वरा रौ वच़न मसीह रै बारै दी का बोला सा। भौरी पहलै, भविष्यद्वक्तुऐ बोलौ थौ की बुरै लोग मसीह दुखी कौराई और झ़ांगाई। पर भविष्यद्वक्तुऐ इणौ भी बोलौ थौ की सेउ चिजै दिनै ज़िउंदौ हुआ सा।

![](https://cdn.door43.org/obs/jpg/360px/obs-en-42-04.jpg)

ज़ेबी सै तेस इलाकै दी पौंउच़ै ज़िऐ सै दुई ज़ौणै रौइणौ च़ाआ थै, तेबी झ़ाउं फिलहाल ब्याल़ हुइ गौइ थी। तिऊंऐ यीशु रुकणा लै पुछ़ौ, यानिकै सेऊ तिऊं आइलै एकी घौरा दी डैऔ। आपणै ब्याल़ी री रोटी खांदै बोशी गौऐ। यीशुऐ एक रोटी निइंऔ तेथलै परमेश्वरा रौ धन्यवाद देऔ, और तैबै सै चोड़ी। तेभी तिऊंऐ ज़ाणी गौ की सेऊ यीशु थौ। पर तेभी ई सेउ तिऊंरी आखी काऐ रौ छ़ुपी गौ।

![](https://cdn.door43.org/obs/jpg/360px/obs-en-42-05.jpg)

तिऊं दुई ज़ौणेउऐ एकी दुज़ै कु बोलौ, "सेउ यीशु थौ! एथीलै ज़ेबी तिणीऐ आमुकै परमेश्वरा रौ वच़न सौमझ़ाऔ थौ ता आमै भौरी उताउल़ै थै!" ता फेटी ई सै, तिदरु निकल़िऔ वापिस यरुशलेमा लै डेऐ। ज़ेबी सै पौउंच़ै ता तिउंऐ च़ेलेऊ लै बोलौ, "यीशु ज़िउंदौ सा! आमुऐ सैउ देखौ आ!"

![](https://cdn.door43.org/obs/jpg/360px/obs-en-42-06.jpg)

ज़ेबी च़ेलै बुशै लाइन्दै थै लागै औन्दै, यीशु तेभी तेस कौमरै दी तिऊं काऐ परगट हुऔ। तिणीऐ बोलौ, "तुमुलै शान्ति च़ाईं मिली!" च़ेलैउऐ सुंच़ौ की एऊ कोई भूत थौ, पर यीशुऐ बोलौ, "तुमै केलै डौराई? तुमै इणौ कैलै नाईं सुंच़दै की एऊ सौच़ी ई हाऊं यीशु ऊ? मैरै हाथ और लात देखौ। भूता कै इणौ शरीर नाईं औन्दौ ज़िणौ मुकै सा।" इणौ दैखाल़णा लै की सेउ कोई भूत नाईं आ तिणीऐ खाणा लै कुछ़ मांगौ। तिऊंऐ तेसकै माच्छ़ी रौ ऐक टुकड़ौ दैऔ, और तिणिऐ सेउ खाऔ।

![](https://cdn.door43.org/obs/jpg/360px/obs-en-42-07.jpg)

यीशुऐ बोलौ, मैरै बारे दी परमेश्वरा रौ वच़न ज़ो कुछ़ बोला सा सेउ घौटा सा। मुंइऐ तुमुकै बोली गौ थौ की ऐथारौ हुणौ पाकौ सा।" तैबै यीशुऐ तिऊंकै परमेश्वरा रौ वच़न आच्छ़ै कौरी सौमझ़ाऔ। तिणीऐ बोलौ, "भौरी पहलै भविष्यद्वक्तुऐ लिखौ थौ की मूइऐ, मसीहै दुख उठाउणै ज़ा ई, मौरणौ ज़ा सा और तैबै चिजै दिनै मौरै औन्देउ मांझ़िया कु ज़िउंदौ ज़ा हुणौ।"

![](https://cdn.door43.org/obs/jpg/360px/obs-en-42-08.jpg)

तिऊं भविष्यद्वक्तुऐ इणौ भी लिखौ थौ की मैरै च़ेलै परमेश्वरा रै वच़ना री घोषणा कौराई। सै हर एकी लै आपणै पाप मानणा लै बोलाई। अगर सै इणौ कौराई ता परमेश्वर तिऊंरै पाप माफ कौरा। मैरै च़ेलै एज़ी खौबरा रौ परच़ार कौरणौ यरुशलेमा कू शुरु कौराई। तैबै सै सारी ज़ागाह सारी ज़ातिउ दी डिआई। तुमै लोग मेरी हर एक बुश और कामा रै गवाह ई ज़ो मुइऐ बोलौ और कियौ थौ।, और सारेउ रौ ज़ो मू आइलै हुऔ आ।

![](https://cdn.door43.org/obs/jpg/360px/obs-en-42-09.jpg)

आगलै चाल़ीस दिनु रै दौरान, यीशु आपणै च़ेलैउ माथै काई बारै परगट हुऔ। एकी बारै ता सेऊ एकी ही बौक्ता ई 500 कु ज़ादै लौगु माथै परगट हुऔ! तिणीऐ आपणै च़ेलैउ माथै काई तरिकै कौरी साबित किऔ की सेउ ज़िउंदौ थौ, और तिणिऐ तिऊंकै परमेश्वरा रै राज़्य रै बारै दी शिक्षा देई।

![](https://cdn.door43.org/obs/jpg/360px/obs-en-42-10.jpg)

यीशुऐ आपणै च़ेलेऊ लै बोलौ, "परमेश्वरै मुकै सौरग और धौतरी रै हर एकी माथै राज़ कौरणै रौ अधिकार आ दैऔ औन्दौं। एथीलै ऐबै हाउं तुमुलै बोलाऊ डैऔ सारी ज़ाती रै लोगु च़ैलै चाणौ। इणौ कौरणा लै, तुमुऐ बाब, छ़ौहरु, और पवित्र आत्मा रै नावा कौरी बपतिस्मा दैणौ आ। ज़ो कुछ़ भी मुइंऐ तुमुलै हुकम देऔ आ तिऊं सारी बुशेउ भी तिउंकै तुमै मानणी शिखाऔ। याद छ़ाड़ौ, हाउं तुमु आइलै सौदा रौआउ।"

![](https://cdn.door43.org/obs/jpg/360px/obs-en-42-11.jpg)

यीशु रै मौरै औन्देउ मांझ़िया कु ज़िउंदै हुणै रै चाल़ीस दिना बासिऐ, तिणिऐ आपणै च़ेलेउ लै बोलौ, "ज़ेबी झ़ाऊं मैरौ बाब तुमुलै तागत नाईं दिया लौ तेबी झ़ाऊं यरुशलेमा दी रुकी रौएऊ। सेउ तुमू माथै पवित्र आत्मा छ़ाड़णै रै ज़ौरिऐ इणौ कौरा" तैबै यीशु सौरगा दी डैइ गौ, और एकी बादलै सेउ तिऊंरी नौदरी कु छ़ुपाइ गौ। सौरगा दी यीशु सारी च़िज़ू माथै राज़ कौरणा लै परमेशवरा रै सुल्टी भिलै बोशी गौ।

*मत्ती 28:16-20; मरकुस 16:12-20; लूका 24:13-53; यूहन्ना 20:19-23; Acts 1:1-11 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_42_128kbps.m4a

## 43. कलीसिया री शुरुआत

https://openbiblestories.org/l/bfz/story-43/

![](https://cdn.door43.org/obs/jpg/360px/obs-en-43-01.jpg)

यीशु रै सौरगा लै डैउणै बासिऐ, च़ेलै यरुशलेमा दी रुकै ज़िणौ की यीशु ऐ तिउंलै कौरणै रौ हुक्कुम दैऔ थौ। तिदलै विश्वासी लोग लगातार एकी साथाई प्राथना कौरणा लै कौठै हुआ थै।

![](https://cdn.door43.org/obs/jpg/360px/obs-en-43-02.jpg)

हर साल, फसह रै साज़ै रै 50 दिनु बासिऐ, यहुदी लोग पिन्तेकुस्ता रौ साज़ै रै दिनु मौनाउणा लै यरुशलेमा दी कौठै हुआ थै। पिन्तेकुस्त मौनाउणै रौ बौगत यीशू रै सौरगा लै डैउणै रै तकरीबन एक हौपतै रै बासिऐ आशौ थौ।

![](https://cdn.door43.org/obs/jpg/360px/obs-en-43-03.jpg)

ज़ेज़ै बौगतै बिश्वासी लोग एकी साथै कौठै थै, ता ज़ेज़ै घौरा दी सै थै सेउ घौर भौरी बागुरा री बाच़ा कौरी भौरुई गौ। तैबै आगी री लौपटै ज़िणौ दिशणै वाल़ौ कुछ़ सारै बिशवासिऊ माथै परगट हुऔ। सै सारै पवित्र आत्मा कौरी भौरुई गौऐ और दुज़ी बोलिऊ दी परमेश्वरा री स्तुति कौरदै लागै। इऐ सै बोली थी ज़ास बोलना लै सै पवित्र आत्मै त्यार किऐ थै।

![](https://cdn.door43.org/obs/jpg/360px/obs-en-43-04.jpg)

ज़ेबी यरुशलेमा दी रौइणै वाल़ै लोगुऐ सेउ हालौ शुणौ, ता सै भौरी का तिउं देखणा लै एकी साथाई आशै की का थौ हुन्दै लागौ औन्दौ। तिउंऐ बिशवासी परमेशवरा रै ज़ौरिऐ कौरै औन्दै बौड़ै-बौड़ै कामा री घोषणा कौरदी भारै शुणै। सै हैरान थै कैलैकी सै तिऊं काम आपणी ही बोली दी थै शुणदै लागै औन्दै।

![](https://cdn.door43.org/obs/jpg/360px/obs-en-43-05.jpg)

इउं मांझ़िया कु कुछ़ लोगुऐ बोलौ की इऐ च़ेलै नौशै दी ई। पर पतरस खौड़ौ हुऔ और तिउंलै बोलदै लागै, "मेरी बूश शुणौ! इयै लोग नौशै दी नाईं ई! ऐथारी बज़ाऐ, ज़ो तुमै देखाई सेऊ इणौ सा ज़िणौ योऐल भविष्यद्वक्तै बोलौ थौ कि: परमेश्‌वर इणौ बोला कि, ‘आखरी रै दीनु दी, हाऊं आपणी आत्मा दियाऊ

![](https://cdn.door43.org/obs/jpg/360px/obs-en-43-06.jpg)

“ओ इस्राइली मौरदेउओ, यीशु एक इणौ आदमी थौ ज़ुणिऐ इणै दैखाउणा लै की सेउ कुण थौ भौरी नोखै काम किऐ थै। तिणिऐ परमेश्वरा री शक्ती कौरी भौरी सारै नोखै काम किऐ थै। तुमै इणौ ज़ाणाई, केलैकी तुमुऐ इऐ काम देखै ई। पर तूमुऐ सेउ क्रुसा माथै च़ौढ़ाऔ!”

![](https://cdn.door43.org/obs/jpg/360px/obs-en-43-07.jpg)

यीशु मौरी गौ पर परमेश्वरे सेउ मौरे औन्दैउ मांझ़िया कु ज़िउंदौ कौरी गौ। ईणीऐ सै बूश पुरी कौरी गोइ ज़ो एकी भविष्यद्वक्तै लिखी थी: ‘तु आपणै पवित्र ज़ौणेऊ कौबरा दी शौड़नै नाईं दैन्दौ।’ आमै गवाह ई की परमेश्वरै यीशु तौंइऐ ज़िउंदौ कौरी गौ।”

![](https://cdn.door43.org/obs/jpg/360px/obs-en-43-08.jpg)

परमेश्वर बाबै यीशु आबै आपणी सुल्टी भिलै बौशाल़ियौ तेसलै आदर दैऔ आ। और यीशुऐ आमुलै पवित्र आत्मा भेज़ी सा ज़िणौ की तिणिऐ वायदौ कियौ थौ कि सेऊ भेज़ा। पवित्र आत्मा ई तिऊं काम हुणै दैन्दै लागी औन्दौ ज़ास तुमै आज़ देखदै और शुणदै ई लागै औन्दै।“

![](https://cdn.door43.org/obs/jpg/360px/obs-en-43-09.jpg)

तुमुऐ सेऊ यीशु क्रूसा माथै च़ौढ़ाऔ। पर पाकौ ज़ाणौ की परमेश्वरै यीशु सारी च़िज़ू माथै प्रभु और मसीह दुई चाणा सा!"

![](https://cdn.door43.org/obs/jpg/360px/obs-en-43-10.jpg)

पतरसा री बुशै तिऊं लोगु रै ज़िवा दी च़ुबी गोई थी। ऐथिलै तिउंऐ पतरस और चेलेऊ कु पुछ़ौ, "ओ भाइउऔ आमुऐ का च़ांई कौरणौ?"

![](https://cdn.door43.org/obs/jpg/360px/obs-en-43-11.jpg)

पतरसै तिउंलै ज़वाब दैऔ, “तुमु मांझ़िया कु हर एक ज़ौणौ आपणै पापा लै माफी मांगौ ताकी परमेश्वर तुमारै पाप माफ कौरा, और यीशु मसीह रै नावा कु बपतिस्मा निया। तैबै सेऊ वरदाना आइलै पवित्र आत्मा भी दिया सा।”

![](https://cdn.door43.org/obs/jpg/360px/obs-en-43-12.jpg)

पतरसै ज़ो बोलौ तेथ माथै तकरीबन चिन हज़ार लोगुऐ विश्वास कियौ और यीशु रै च़ेलै बौणी गौऐ। तिउंऐ बपतिस्मा निंऔ और यरुशलेमा री कलिसिया रै हिस्सौ बौणी गौऐ।

![](https://cdn.door43.org/obs/jpg/360px/obs-en-43-13.jpg)

ज़ेबी तिऊं खास च़ेलेउऐ तिउंकै शिक्षा देई ता विश्वासिउऐ घौड़ी-घौड़िऐ शुणौ। सै रोज़ आपु मांझ़िऐ मिला थै और कौट्ठै रोटी खा थै और तिउंऐ रोज़ एकी दुज़ा लै प्राथना कौरी। तिउंऐ मिलियौ परमेश्वरा री बौड़ाई कौरी ओर ज़ो कुछ़ भी तिउंरौ थौ तिउंऐ एकी दुज़ै आइलै बाटौं। इलाकै रै हर एक आदमी तिउंलै आच्छ़ौ विच़ार छ़ाड़ा थौ। ज़ादै कु ज़ादै लोग विशवासी बौणदै रौऐ।

*प्रेरितु रै काम 2 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_43_128kbps.m4a

## 44. पतरस और यूहन्ना एक भिखारी च़ागौं कौराई

https://openbiblestories.org/l/bfz/story-44/

![](https://cdn.door43.org/obs/jpg/360px/obs-en-44-01.jpg)

एकी दिनै, पतरस और यूहन्ना मंदिरा दी डै। तिऐ एक लौंगड़ौ आदमी भिखा मांगणा लै खौल़ै दी थौ बौशौ औन्दौ।

![](https://cdn.door43.org/obs/jpg/360px/obs-en-44-02.jpg)

पतरसै तेस लौंगड़ै आदमी भिलै देखौ और बोलौ, “मुके ताउंकै दैणा लै पैसै ता नाईं आसतै। पर ज़ो मुकै आसती सा तेस हाउं ताउंकै दिआऊ। यीशु रै नावां कु उठ और आंडदै लाग!"

![](https://cdn.door43.org/obs/jpg/360px/obs-en-44-03.jpg)

तेभी ई परमेश्वरै सेउ लौंगड़ौ आदमी च़ांगौ कौरी गौ। तिणीऐ ओरु-पोरु हाडंणौ और उछ़ुलणौ, और परमेश्वरा री स्तुति शुरू कौरी गौई। मंदिरा रै खौल़ा दी सारै लोग हैरान थै।

![](https://cdn.door43.org/obs/jpg/360px/obs-en-44-04.jpg)

फेटी ही लोगु री एक भीड़ तेस आदमी देखणा लै आशी ज़ो ठीक हुई गौ थौ। पतरसे तिउंलै बोलौ, “एउ आदमी ठीक आ, पर एज़ी बुशा माथै हैरान ना हुऔ। आमुऐ एउ आपणी शौक्ती कौरी ठीक नाईं कियौ, या एथलै नाईं की आमै परमेश्वरा रौ आदर कौरी सी। बल्की सेउ यीशु सा ज़ुणिऐ एउ आदमी आपणी शौक्ती कौरी ठीक कियौ आ, कैलैकी आमै यीशु माथै भरौसौ कौरी ई।"

![](https://cdn.door43.org/obs/jpg/360px/obs-en-44-05.jpg)

सै तुमै ई ज़ुणिऐ तेस रोमी राज्यपाला कै यीशु ज़ांगणा लै बोलौ थौ। तुमूऐ सेउ झ़ांगौ ज़ुण सारेउ कै ज़िदंगी दिया सा। पर परमेश्वरै सेउ ज़िउंदौ कियौ। तुमूऐ नाईं सौमझ़ौ की तुमै का ई कौरदै लागै औन्दै, पर ज़ेबी तुमै तिउं कामा कौरदै थै लागै औन्दै, ता ज़ो भविष्यद्वक्तुऐ बोलौ थौ सेऊ पुरौ हुऔ। तिउंऐ बोलौ थौ की मसीह दुख उठावा और मौरा सा। परमेश्वरै एऊ ईणै तरिकै कौरी हुणै दैऔ। एथीलै ऐबै, आपणै पाप मानौ और परमेश्वरा री भिलै फिरौ, ताकी सेउ तुमारै पाप धोइयौ माफ कौरा।

![](https://cdn.door43.org/obs/jpg/360px/obs-en-44-06.jpg)

ज़ेबी मंदिरा रै अगुवेउऐ पतरस और यूहन्ना शूणै, ता सै भौरी घौबराई गौऐ। एथीलै तिउंऐ सै पाकड़ियौ ज़ेलखानै दी पाई गौऐ। पर ज़ो पतरसै बोलौ थौ तेथ माथै भौरी का लोगुऐ विश्वास कियौ। यीशु माथै विश्वास कौरणै वाल़ैउ री गिणती तकरीबन पांज़ हज़ार हुई गौई।

![](https://cdn.door43.org/obs/jpg/360px/obs-en-44-07.jpg)

आगलै दिनै, तिऊं यहुदी अगुवेउवै पतरस और यूहन्ना महायाजक और दुज़ै धार्मिक अगुवेउ रै सामनै निऐ। सेउ आदमी भी आणौ ज़ो लौंगड़ौ थौ। तिउंऐ पतरस और यूहन्ना कु पुछ़ौ, “की केज़ै हौखा कौरी तुमुऐ एउ लौंगड़ौ आदमी च़ांगौ कियौ आ?"

![](https://cdn.door43.org/obs/jpg/360px/obs-en-44-08.jpg)

पतरसै ज़वाब दैऔ, “एउ आदमी ज़ो तुमूरै सामणै खौड़ौ सा एउ यीशु मसीह री शौक्ती कौरी ठीक कियौ आ। ज़ो तुमूऐ यीशु क्रुसा माथै च़ौढ़ाऔ, पर परमेश्वरै सेउ तौंई ज़िउंदौ कियौ! तुमूऐ सेउ नाईं मानौ, पर यीशु री शौक्ती रै अलावा उद्धार पाइणै री कौई दुज़ी बाट नाईं आसती!”

![](https://cdn.door43.org/obs/jpg/360px/obs-en-44-09.jpg)

सै अगुवे हैरान थै की पतरस और यूहन्नै भौरी हिम्मता कौरी बुशै लाई। तिउंऐ देखौ की इऐ मामुली मौरद थै ज़ो की अनपढ़ थै। पर तैबै तिउंकै याद आशौ की इऐ आदमी यीशु आइलै रौऐ थै। एथीलै इउंऐ तिउंलै बोलौ, “आमै तुमूलै भौरी बौड़ी सौज़ा देइ अगर तुमै एस आदमी यीशु रै बारै दी लोगु कै कोई औज़ौ खौबर शुणाउवाई।” इणी भौरी का बुशेऊ बोलणै रै बासिऐ, तिउंऐ पतरस और यूहन्ना डेउणै दै।

*प्रेरितों रु काम 3:1-4:22 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_44_128kbps.m4a

## 45. स्तिफनुस और फिलिप्पुस

https://openbiblestories.org/l/bfz/story-45/

![](https://cdn.door43.org/obs/jpg/360px/obs-en-45-01.jpg)

मसीह रै पैहलै अगुवे रै बिच़ाई स्तिफनुस नावां रौ एक आदमी थौ। सारै लोग तेसरौ आदर कौरा थै। पवित्र आत्मै तेसकै भौरी शौक्ती और बुध्दि थी देई ऐन्दी। स्तिफनुसे भौरी का चमत्कार किऐ थै। ज़ेबी तिणीऐ यीशु माथै भरोसौ कौरणै रै बारै दी शिक्षा देई ता भौरी का लोगुऐ तेथा माथी विश्वास कियौ।

![](https://cdn.door43.org/obs/jpg/360px/obs-en-45-02.jpg)

एकी दिनै, स्तिफनुस यीशु रै बारै दी शिक्षा देन्दै थौ लागौ औन्दौ, और कुछ़ इणै यहुदी आशै ज़ुणियै यीशु माथै बिश्वास नाईं कियौ थौ और तेस आइलै बोल-च़ाल कौरणौ शुरु कौरी गौ। सै भौरी रोशुइ गौऐ, एथीलै सै धौर्मा रै अगुवेउ काऐ डेइ गौऐ और तेसरै बारे दी झ़ूठ बोलौ। तिउंऐ बोलौ, “स्तिफनुस, मुसा और परमेश्वरा रै बारै दी बुरी बुशै बौलदै शुणै ई!" एथीलै धौर्मा रै अगुवेउऐ स्तिफनुस पाकड़ी गौ और सेउ महायाजक और यहुदी रै ओरी अगुवे रै सामणै नियौ। औज़ौ भी झ़ुठै गवाह आशै और तिउंऐ स्तिफनुसा रै बारै दी झ़ूठ बोलौ।

![](https://cdn.door43.org/obs/jpg/360px/obs-en-45-03.jpg)

महायाजकै स्तिफनुसा कु पुछ़ौ, “का इयै लोग तैरै बारै दी सौच़ौ ई लागै औन्दै बौलदै?" स्तिफनुसे महायाजका कै ज़वाब देणा लै भौरी का बुशैउ रौ बोलणौ शुरु कियौ। तिणीऐ बोलौ की अब्राहमा रै बौगता कू यीशु रै बौगता झ़ाऊं परमेश्वरै इस्राएला रै लोगु लै भौरी का नोखै काम किए ई। पर लोगुऐ सौदा परमेश्वरा री नाईं शुणी थी। स्तिफनुसै बोलौ, “तुमै लोग परमेश्वरा लै हठीलै और बुरौ कौरणै वाल़ै ई। तुमूऐ सौदा पवित्र आत्मा नाईं मानी, ज़िणौ की तुमारै स्याणेउऐ सौदा पवित्र आत्मा नाईं मानी थी और तेसरै भविष्यद्वक्तु रोज़ झ़ांगा थै। पर ज़ो तिउंऐ कियौ थौ तेथरी बराबरी दी तुमूऐ औज़ौ भी बुरौ कियौ सा! तुमूऐ मसीह ज़ांगौ!"

![](https://cdn.door43.org/obs/jpg/360px/obs-en-45-04.jpg)

ज़ेबी तिउं धौर्मा रै अगुवेउऐ शुणौ, ता सै एती रोशुई गौऐ की तिउंऐ आपणै कौन्थु बंद कौरी गौऐ और ज़ोरै च़िराडुऐ। तिउंऐ स्तिफनुस घिशिऔ इलाकै कु बाइरै नीं गौ और तेस ज़ागंणा लै ढोल़ियाउंदै लागै।

![](https://cdn.door43.org/obs/jpg/360px/obs-en-45-05.jpg)

ज़ेबी स्तिफनुस मौरदै थौ लागौ औन्दौ, सेउ ज़ोरै बोलदै लागौ, “औ यीशु, मेरी आत्मा सौम्भाल़!" तैबै सेउ आपणै घुंडै माथी धौनी पौड़ौ और तौइंऐ ज़ोरै बोलदै लागौ, “ओ प्रभु, एज़ौ पाप इउं माथै नाईं लाऐ।” तैबै सेउ मौरी गौ।

![](https://cdn.door43.org/obs/jpg/360px/obs-en-45-06.jpg)

सेज़ै दिनै, यरुशलेमा दी रौइणै वाल़ै भौरी का लोगुऐ यीशु मानणै वाल़ै लोग तंग कौरणै शुरु किऐ, एथीलै विश्वासी लोग दुजी ज़ागाह लै भागी गौऐ। पर एथरै बावज़ुद भी, ज़िऐ-किऐ भी सै डैऐ तिउंऐ यीशु रै बारै दी परच़ार कियौ।

![](https://cdn.door43.org/obs/jpg/360px/obs-en-45-07.jpg)

फिलिप्पुस नावा रौ यीशु रौ एक विश्वासी थौ। ज़िणौ की ओरी भौरी का विश्वासिउऐ कियौ थौ सेउ भी यरुशलेमा कू भागी गौ। सेउ सामरिया रै इलाके दी डेई गौ। तिऐ तिणिऐ लोगु कै यीशु रै बारै दी परच़ार कियौ। भौरी का लोगुऐ यीशु माथै विश्वास कियौ और छ़ुटकारौ पाऔ। एकी दिनै, फिलिप्पुसा काऐ परमेश्वरा री तौरफा कु एक स्वर्गदूत आशौ और तेसलै ज़ांगला दी डेउणा लै, और एक बाटा दी हाण्डणा लै बोलौ। फिलिप्पुस तिऐ डेई गौ। ज़ेबी सेउ तिऐं बाटा दी हाण्डदै थौ लागौ औन्दौ, ता तिणिऐ एक आदमी आपणै रौथा दी डैउंदै देखौ। एउ आदमी कूश देशा रौ एक खास आदमी थौ। पवित्र आत्मै फिलिप्पुसा लै बोलौ की डेइयौ तैस आदमी आइलै साथा-साथाइ हांड।

![](https://cdn.door43.org/obs/jpg/360px/obs-en-45-08.jpg)

एथीलै फिलिप्पुस रौथा रै नौज़दिक डैऔ। तिणिऐ शुणौ की सेउ कूशी परमेश्वरा रै वचन पौढ़दै थौ लागौ औन्दौ। ज़ो यशायाह भविष्यद्वक्ता रै थौ लिखौ औन्दौ कि, “तिउंऐ सेउ झ़ांगंणै वाल़ी भेरी ज़िणौ नीं गौ, और ज़िणौ एक गाबड़ू शांत हुआ सा, तिणी तिणिऐ भी एक बाच़ नाइ गाड़ी। तिउंऐ भी तेस आइलै बुरौ बर्ताव कियौ और तेसरी इज़्ज़त नांई की। तिउंऐ तेसरी ज़ान नीई आ।”

![](https://cdn.door43.org/obs/jpg/360px/obs-en-45-09.jpg)

फिलिप्पुसे तेस कुशी आदमी कु पुछ़ौ, “ज़ो तु पौढ़दै ई लागौ औन्दौ तु तेस सौमझ़ा भी?" तिणी ज़वाब दैऔ, “नांई। ज़ेबी झ़ाऊं कोई मुकै नाईं सौमझ़ावा लौ, तेबी झ़ाऊं हाऊं नाइ सौमझ़ी सौकदौ। महरबानी कौरीऐ मुकाऐ आशियौ बोश। यशायाह एस आपणै बारै दी थौ लिखदै लागौ औन्दौ या कास ओरी रै बारै दी?"

![](https://cdn.door43.org/obs/jpg/360px/obs-en-45-10.jpg)

फिलिप्पुस रौथा माथै च़ौढ़ियौ बौशी गौ। तैबै तिणिऐ तेस कुशी आदमी कै बोलौ ज़ो यशायाह भविष्यद्वक्तै यीशु रै बारै दी थौ लिखौ औन्दौ। फिलिप्पुसै परमेश्वरा रै वचना री भौरी का ओरी हिस्सै री भी बुशै-दाशै लाई। ईणै कौरी, तिणीऐ तेस आदमी कै यीशु रै बारै दी खुश-खौबर शुणाई।

![](https://cdn.door43.org/obs/jpg/360px/obs-en-45-11.jpg)

फिलिप्पुस और सेउ कुशी आदमी हान्डदी बारै पाणी काऐ आशै। तिणी कुशिऐ बोलौ, “देख! इदै पाणी सा! का हाउं बपतिस्मा नी सौका ऊ?" और तिणीऐ रौथा रोकणा लै बोलौ।

![](https://cdn.door43.org/obs/jpg/360px/obs-en-45-12.jpg)

तैबै सै पाणी दी डेई गौऐ, और फिलिप्पुसै तेस कुशी लै बपतिस्मा दैऔ। ज़ेबी सै पाणी कु बाइरै आशै, ता पवित्र आत्मै एकदम ही फिलिप्पुस उठाइयौ केज़ी दुजी ज़ागाह दी नींई गौ। तिऐ फिलिप्पुस लोगु कै यीशु रै बारै दी बोलदै थाकौ लागी।

![](https://cdn.door43.org/obs/jpg/360px/obs-en-45-13.jpg)

सेउ कुशी आदमी आपणै घौरा भिलै औंगाउ बौढ़ी गौ। सेउ खुश थौ की सेउ आबै यीशु ज़ाणा थौ।

*प्रेरितु रै काम 6:8-8:5; 8:26-40 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_45_128kbps.m4a

## 46. पौलुस मसीही विश्वासी बौणा सा

https://openbiblestories.org/l/bfz/story-46/

![](https://cdn.door43.org/obs/jpg/360px/obs-en-46-01.jpg)

शाऊल नावा रौ एक आदमी थौ ज़ुणिऐ यीशु माथै विश्वास नांई कियौ थौ। ज़ेबी सेउ ज़वान थौ, तेबी तिणिऐ स्तिफनुस ज़ागंणै वाल़ै लोगु रै जुड़केउ री देख भाल़ की थी। बासिऐ, तिणिऐ विश्वासी परेशान कियै थै। तिणिऐ यरुशलेमा रै घौरा-घौरा दी डेइयौ मौरद का छ़ेउड़ी दुइया पाकड़ियौ ज़ेला दी पाऐ थै। तैबै महायाजकै शाउला कै दमिश्क इलाकै दी डेउणै री इज़ाज़त देई। तिणिऐ तिदलै मसीहु पाकुड़णै और वापिस यरुशलेमा दी आणना लै शाऊला कै बोलौ।

![](https://cdn.door43.org/obs/jpg/360px/obs-en-46-02.jpg)

और शाउलै दमिश्का लै डेउणै रौ सफर शुरु कियौ। तेस इलाके दी पौउंच़णा कु थौड़ौ ई पैहलै, तेसरै च़ारौ तौरफा दी सौरगा कू एक प्याशौ च़ौमकौ, और सेउ धौतरी माथै धौनी पौड़ौ। शाऊलै कुण इणौ बोलदै शुणौ, “ओ शाऊल! ओ शाऊल! तु मुं परेशान कैलै कौराई?" शाउलै पुछ़ौ, “ओ प्रभु, तु कुण ई?" यीशुऐ तेसलै ज़वाब दैऔ, “हाऊं यीशु ऊ। तू मुं सौताउंदै ई लागौ औन्दौ!”

![](https://cdn.door43.org/obs/jpg/360px/obs-en-46-03.jpg)

ज़ेबी शाऊल उठौ ता सेउ देखी नाईं सौका थौ। तेसरै गौषटणुऐ सेऊ दमिश्का लै निऔ। शाऊलै च़ीना दिना झ़ाऊं कुछ़ भी ना खाऔ या पिऔ।

![](https://cdn.door43.org/obs/jpg/360px/obs-en-46-04.jpg)

दमिश्का दी हनन्याह नांवा रौ एक च़ेलौ थौ। परमेश्वरै तेसलै बोलौ, “तेस घौरा दी डेऊ ज़िऐ शाऊल आ रौऔ औन्दौ। आपणै हाथ तेस माथै छ़ाड़ ताकी सेउ दुज़ी भारै देखदै लागा।” पर हनन्याहै बोलौ, “ओ प्रभु, मुंइऐ शुणौ सा की इणी आदमिऐ विश्वासी भौरी परैशान किए ई।“ परमेश्वरै तेसलै ज़वाब देऔ, “डेउ! मुंइऐ सेऊ यहूदिउ दी और दूज़ी ज़ातिऊ दी मेरै नांवा री घौषणा कौरणा लै चुनी गौ आ। सेउ मैरै नांवा लै भौरी कौष्ट सौआ आ।”

![](https://cdn.door43.org/obs/jpg/360px/obs-en-46-05.jpg)

और हनन्याह शाऊला काऐ डैऔ, आपणै हाथ तेस माथै छ़ाड़ै, और बोलौ, “यीशुऐ, ज़ो इदै आशदी बारै तेरी बाटा दी ताऊं माथै परगट हुऔ थौ, हाऊं ताऊं काऐ छ़ाड़ौ ऊ ताकी तू तौइंऐ देखदै लागा, और पवित्र आत्मा ताऊं भौरा।” तेभी ई शाउल तौइंऐ देखदै लागौ, और हनन्यहै तेसलै बपतिस्मा दैऔ। तैबै शाऊलै रोटी खाई और तौइंऐ तागती वाल़ौ हुई गौ।

![](https://cdn.door43.org/obs/jpg/360px/obs-en-46-06.jpg)

तेबी कु, शाउलै दमिश्का दी रौइणै वाल़ै यहुदिऊ मांझ़िऐ परचार कौरणौ शुरु कियौ। तिणीऐ बोलौ, “यीशु ही परमेश्वरा रौ छ़ोहरु सा!" यहूदी लोग हैरान थै, कैलैकी शाऊलै ता विश्वासिउ झ़ांगणै री कोशिश की थी, पर ऐबै तिणीऐ यीशु माथै विश्वास कियौ थौ। शाऊलै यहूदीउ आइलै विबाद कियौ। तिणिऐ देखाऔ की यीशु ही मसीह थौ।

![](https://cdn.door43.org/obs/jpg/360px/obs-en-46-07.jpg)

भौरी दिना बासिऐ, यहूदिउऐ शाऊल झ़ांगणा री तरकीब च़ाणी। तिउंऐ तेस झ़ांगणा लै इलाकै री खोल़ी माथै लोग भेज़ै। की तेसरी देखरेख कौरा पर शाऊलै तिऐं तरकीबा रै बारै दी शुणौ, और तेसरै गौष्टणुऐ बौच़ीयौ निकुल़णै दी तेसरौ साथ देऔ। एकी राच़ीए तिउंऐ सेउ टोकरी दी बौशाल़ियौ इलाकै री द्वाली तौल़ै ऊछ़ाल़ौ। दमिश्का कु बौच़णै बासिऐ शाउलै यीशु रै बारै दी परच़ार कौरणौ ज़ारी छ़ाड़ौ।

![](https://cdn.door43.org/obs/jpg/360px/obs-en-46-08.jpg)

शाऊल खास च़ेलेऊ कु मिलणा लै यरुशलेमा लै डैऔ, पर सै तेसकु डौरा थै। तेबै बरनबास नावा रै एक विश्वासीऐ शाऊल खास च़ेलेऊ काऐ निंयौ। तिणीऐ तिउंलै बोलौ की शाऊलै किणौ बिणा डौरा कौरी दमिश्का दी परचार कियौ थौ। तेथ बासिऐ, तिऊं खास च़ेलेउऐ शाऊल अपणाऔ आ।

![](https://cdn.door43.org/obs/jpg/360px/obs-en-46-09.jpg)

कुछ़ विश्वासी ज़ो यरुशलेमा रै सौताव कु भागी गौए थै सै दुर अंताकिया इलाकै दी डेई गौऐ थै और यीशु रै बारै दी परच़ार कौरा थै। अंताकिया दी रौइणा वाल़ै लोग ज़ादै यहुदी नांई थै, पर पहली बारै, तिऊं मांझ़िया कु भोरी लोग विश्वासी बौणी गौऐ। बरनबास और शाऊल इऊं नौंऐ विश्वासीऊ कै यीशु रै बारै दी औज़ौ भी ज़ादौ शिखाउणा लै तिऐ डैवै और कलिसिया विश्वासा दी मज़बूत कौरी। यीशु माथै विश्वास कौरणै वाल़ै पहली बारै अंताकिया दी “मसीह” बौलुऐ।

![](https://cdn.door43.org/obs/jpg/360px/obs-en-46-10.jpg)

एकी दिनै, अंताकिया रै मसीह लोग उपवासा आइलै प्राथना कौरदै थै लागै औन्दै। पवित्र आत्मै तिउंलै बोलौ, “मू कालै बरनबास और शाऊल तेस कामा कौरणै लै औलग कौरौ ज़ास कौरणा लै मुंइऐ सै औटाऐ ई।” एथीलै अंताकिया री कलीसियाऐ बरनबास और शाऊला लै प्राथना की और तिऊं माथै आपणै हाथ छ़ाड़ै। तेबै तिउंऐ सै भौरी का ज़ागाह दी यीशु रै बारै दी आछ़ी खौबर शुणाउणा लै छ़ाड़ी गौऐ। बरनबास और शाऊलै औलग-औलग ज़ातिऊ रै लोगु कै शिक्षा देई, और भौरी का लोगुऐ यीशु माथै विश्वास कियौ।

*प्रेरितु रै काम 8:3; 9:1-31; 11:19-26; 13:1-3 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_46_128kbps.m4a

## 47. फिलिप्पी दी पौलुस और सीलास

https://openbiblestories.org/l/bfz/story-47/

![](https://cdn.door43.org/obs/jpg/360px/obs-en-47-01.jpg)

ज़ेबी शाऊल पूरै रोमी इलाकै दी घुमौ ता तिणिऐ आपणौ रोमी नाऊ “पौलुसा” रौ इस्तेमाल कौरणौ शुरु कौरी गौ। एकी दिनै, पौलुस और तेसरौ गौष्टण सीलास फलिप्पी इलाकै दी यीशु रै बारै दी आछ़ी खौबर शुणाउणा लै डै। सै इलाकै कु बाइरै नौंई रै डिका बाटिऐ एकी ज़गह दी डैवै ज़िऐ लोग प्राथना कौरणा लै कौठै थै। तिऐ सै लुदिया नांवा री एक छ़ेउड़ी कु मिलै ज़ो एक व्यापारी थी। सै परमेश्वरा कू प्यार कौरा थी और तेसरी आराधना कौरा थी।

![](https://cdn.door43.org/obs/jpg/360px/obs-en-47-02.jpg)

परमेश्वरै लुदिया यीशु माथै विश्वास कौरणा लै त्यार की। पौलुस और सिलासै तिंआलै और तिआंरै टौबरा लै बपतिस्मा दैऔ। तिंआऐ पौलुस और सिलास आपणै घौरा दी रौइणा लै औटाऐ, एथीलै सै तिऐ रौई गौऐ।

![](https://cdn.door43.org/obs/jpg/360px/obs-en-47-03.jpg)

पौलुस और सीलास लोगु कु कई बारै सेज़ी ज़गह दी मिला थै ज़िऐ यहुदी लोग प्राथना कौरा थै। हर दिनै ज़ेबी सै तिऐ डिआ थै ता एक नुकराणी छ़ोटुड़ ज़ो बुरी आत्मा कौरी परेशान थी तिउंरौ पिछ़ौ कौरा थी। इऐं बुरी आत्मा रै ज़ौरिऐ सै लोगु रौ भविष्य बौलणै वाल़ी रै रुपा दी आपणै मालिका लै भौरी धन कौमावा थी।

![](https://cdn.door43.org/obs/jpg/360px/obs-en-47-04.jpg)

तिउंरै डैउंदी भारै सै नुकराण छ़ोटुड़ बोला कौरा थी, “इयै आदमी परम परधान परमेश्वरा री सेवा कौरणै वाल़ै ई। इऐ तुमूकै छ़ुटकारै पाइणै री बाट बोलाई!" सै रोज़-रोज़ इणौ कौरा थी ज़ेथकु पौलूस नाराज़ हुइ गौ थौ।

![](https://cdn.door43.org/obs/jpg/360px/obs-en-47-05.jpg)

आखरी दी, एकी दिनै ज़ेबी तिऐं नुकराणी छ़ोटुड़िऐ बोलणौ शुरु कियौ, ता पौलुसे तिआं भिलै मुड़ियौ तिआं बितै री बुरी आत्मा लै बोलौ, “यीशु रै नांवा कु इंया कू बाइरै निकुल़।” तेभी तिंऐ बुरी आत्मै सै छ़ाड़ी गोई।

![](https://cdn.door43.org/obs/jpg/360px/obs-en-47-06.jpg)

तिएं नुकराणी छ़ोटुड़ी रै मालिक भोरी रोषुई गौऐ। तिउंकै पौतौ लागी गौ थौ की बिणा तिऐं बुरी आत्मा रै सै नुकराणी छ़ोटूड़ लोगु रौ भविष्य नाईं बोली सौका थी। एथरौ मतलब थौ की लोग आबै तिआंरै मालिका कै पैसै नाईं देन्दै की सै तिउंरौ भविष्य बोला की तिउं आइलै का हुआ।

![](https://cdn.door43.org/obs/jpg/360px/obs-en-47-07.jpg)

एथिलै तिऐं नुकराणी छ़ोटुड़ी रै मालिकै पौलुस और सिलास रोमी अधिकारिउ काऐ निंऐ। और तिउंऐ पौलुस और सीलास पिटै, और ज़ेला दी टाली गौऐ।

![](https://cdn.door43.org/obs/jpg/360px/obs-en-47-08.jpg)

तिउंऐ पौलुस और सीलास ज़ेला री इणी ज़ागाह दी छ़ाड़ै ज़िऐ सारेउ कू ज़ादै सिपाही थै। इदरा झ़ाऊं कि तिउंऐ तिउंरै बांगणै ज़ुखड़ा रै फाटै दी ज़ौड़ी गौऐ। पर पौलुस और सीलास आधी राच़ीऐ, परमेश्वरा री स्तुती रै गेत गाइन्दै थै लागै औन्दै।

![](https://cdn.door43.org/obs/jpg/360px/obs-en-47-09.jpg)

तेभी ई, एक भुइंच़ल़ पौड़ौ! और ज़ेला रै सारै दार खुली गौऐ, और सारै कैदिऊ री शांगल़ी खुलियौ छ़ुटी गोई।

![](https://cdn.door43.org/obs/jpg/360px/obs-en-47-10.jpg)

तैबै सेउ पहरेदार सिपाई ऊठी गौ। तिणिऐ देखौ की ज़ेला रै दार खुली गौऐ। तिणिऐ सुच़ौं की सारै कैदी बौच़ियौ भागी गौऐ ई। सेउ भौरी डौरी गौ की तिउंरै भागणै कू रोमी अधिकारी तेस झ़ांगाई, ऐथीलै सेउ आपू झ़ांगणा लै त्यार हुई गौ थौ ! पर पौलुस तेस देखियौ औटाऊऔ, “रुक! आपुलै नुकसान नाईं पौउंच़ाउ। आमै सारै ईदै ई।”

![](https://cdn.door43.org/obs/jpg/360px/obs-en-47-11.jpg)

तिणी पहरेदार सिपाईऐ कांबियौ पौलुस सीलासा काऐ आशियो पूछ़ौ, “छ़ुटकारै पाइणा लै हाऊं का कौरु लौ?" पौलुसै ज़्वाब दैऔ, “प्रभु यीशु माथै विश्वास कौर, ता तु और तैरौ सारौ खानदान उद्धार पाई सौका ई।” तैबै तिणी सिपाईऐ पौलुस और सीलास आपणै घौरै निंऐ और तिउंरै ज़खम धोए। पौलुसै तेसरै सारै घौरा रै सारै लोगू कै खुशी री खौबर शुणाई।

![](https://cdn.door43.org/obs/jpg/360px/obs-en-47-12.jpg)

सिपाई और तेसरै पूरै टौबरै यीशु माथै विश्वास कियौ, एथीलै पौलुस और सीलासै तिउंलै बपतिस्मौ दैऔ। तैबै सिपाईऐ पौलुस और सीलासा कु रोटी खौआई, और तिऊं सारेउऐ खूशी मौनाई।

![](https://cdn.door43.org/obs/jpg/360px/obs-en-47-13.jpg)

आगलै दिनै इलाके रै अगुवेउऐ पौलुस और सीलास ज़ेला कु छ़ाड़ी गौऐ। और फिलिप्पी कु डेउणा लै बोलौ। पौलुस और सीलास लुदिया और कुछ़ ओरी गौष्टणा कू मिलै और तेथ बासिऐ इलाकै कु निकल़ी गौऐ, और कलीसिया बौढ़दै थाकी लागी।

![](https://cdn.door43.org/obs/jpg/360px/obs-en-47-14.jpg)

पौलुस और ओर मसीही अगुवे भौरी इलाकेउ दी डै। तिउंऐ लोगु कै यीशु रै बारै दी खुश खौबरी शुणाई। तिउंऐ कलीसियाउ रै विश्वासी पाक्कै कौरणा लै और शिक्षा दैणा लै काई च़िट्ठी भी लिखी। इऊं मांझ़िया कु कुछ़ च़िट्ठी बाइबला री किताबी बौणी गोई।

*प्रेरितु रै काम 16:11-40 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_47_128kbps.m4a

## 48. यीशु ही वाइदौ किऔ औन्दौ मसीह आ

https://openbiblestories.org/l/bfz/story-48/

![](https://cdn.door43.org/obs/jpg/360px/obs-en-48-01.jpg)

ज़ेबी परमेश्वरै संसार च़ाणौ ता सारौ कु्छ़ आच्छ़ौ थौ। आदम और हव्वा एकी दुज़े कु प्यार कौरा थै, और सै परमेश्वरा कु प्यार कौरा थै। तेभी कोई बीमारी और मौउत नाईं थी। परमेश्वर इणौ ई संसार च़ाहा थौ।

![](https://cdn.door43.org/obs/jpg/360px/obs-en-48-02.jpg)

शैतानै सापा रै ज़ौरिऐ बौगिच़ै दी हव्वा आइलै बुशै लाई, कैलैकी सेऊ तिआंलै दोखौ दैणौ च़ाहा थौ। तैबै हव्वा और आदमै परमेश्वरा रै विरोधाई पाप कियौ। कैलैकी तिउंऐ पाप कियौ थौ एथीलै धौतरी माथै रौइणै वाल़ै सारै ज़ौणै मौराई।

![](https://cdn.door43.org/obs/jpg/360px/obs-en-48-03.jpg)

कैलैकी आदम और हव्वे पाप कियौ थौ, एथीलै कुछ़ औज़ौ भी बुरौ हुऔ कि सै परमेश्वरा रै दुश्मण बौणी गौऐ। ज़ेथरौ नौतिज़ौ तेभी कु हर एकीऐ पाप कियौ सा। हर एक ज़ौणौ ज़ौन्मा कु परमेश्वरा रौ दुश्मण आ। परमेश्वरा रै और लोगु रै बिच़ाई शान्ति नाईं थी। पर परमेश्वर शान्ति छ़ाड़णौ च़ाह थौ।

![](https://cdn.door43.org/obs/jpg/360px/obs-en-48-04.jpg)

परमेश्वरै वाइदौ कियौ की हव्वा रौ एक वंश शैताना रौ मूंड फैच़ा आ। तिणिऐ इणौ भी बोलौ शैतान तेसरौ फाइनौ टुका सा। मतलब, शैतान मसीह झ़ांगा आ, पर परमेश्वर तेस तौंइऐ ज़िउंदौ कौरा आ। तेथ बासिऐ, मसीह शैताना री शौक्ती हमेशा लै खातम कौरा। भौरी साला बासिऐ, परमेश्वरै परगट कियौ की सेउ मसीह यीशु सा।

![](https://cdn.door43.org/obs/jpg/360px/obs-en-48-05.jpg)

परमेश्वरै तिंऐ बाढ़ा कु आपणौ टौबर बौच़ाऔ ज़ास सेउ आणनेवाल़ौ थौ। नूहा लै एक बौड़ी किश्ती च़ाण्ना लै बोलौ। इणै कौरी परमेश्वरै सै लोग बौच़ाऐ ज़ो तेस माथै विश्वास कौरा थै। इणै कौरी, सै सारै रै सारै परमेश्वरा कौरी झ़ागंणा रै काबिल थै कैलैकी तिउंऐ पाप कियौ थौ। पर परमेश्वरै तिऊं सारेऊ बौच़ाउणा लै यीशु भेज़ौ ताकी ज़ुण तेस माथै विश्वास कौरालौ सेउ बौच़ा।

![](https://cdn.door43.org/obs/jpg/360px/obs-en-48-06.jpg)

सैकड़ों बौरशा झ़ाऊं, याजक परमेश्वरा लै बौल़िदान च़ौड़ाउंदै रौऐ। इणौ देखाल़णा लै कि लोगुऐ पाप कियौ, और परमेश्वरा रै ज़ौरिऐ तिउंलै सौज़ा मिलणी थी। पर सै बौल़िदान तिउंरै पाप माफ नाईं कौरी सौका थै। यीशु सारेऊ कु बौड़ौ महायाज़क आ। तिणीऐ सेउ कियौ ज़ो कोई नाईं कौरी सौका थौ। तिणिऐ एखुली आपणौ बल़िदान दैऔ ज़ो ओरीऊ रै पाप मिटाइ सौका आ। तिणिऐ मानौ की परमेश्वर लोगु रै पापा री सौज़ा तेसलै दिया सा। एज़ी तांइऐ, यीशु पाकौ महायाजक थौ।

![](https://cdn.door43.org/obs/jpg/360px/obs-en-48-07.jpg)

परमेश्वरै अब्राहमा लै बोलौ, “हाऊं तैरै ज़ौरीऐ संसारा रै सारै लोगु लै आशिश दिआ ऊ।” यीशु एसी अब्राहमा रौ वंश थौ। परमेश्वर अब्राहमा रै ज़ौरिऐ सारै लोगुलै आशीष दिया सा, कैलैकी ज़ुण यीशु माथै विश्वास कौरा सा परमेश्वर तिऊं सारेऊ पापा कु बौच़ावा सा। ज़ैबै इऐ लोग यीशु माथै विश्वास कौराई, ता परमेश्वर तिऊं अब्राहमा रै वंश माना सा।

![](https://cdn.door43.org/obs/jpg/360px/obs-en-48-08.jpg)

परमेश्वरै अब्राहमा लै बोलौ की सेउ आपणौ छ़ोहरु, तेसलै बल़िदान कौरा। पर तैबै परमेश्वरै इसहाका रै बौदल़ै बौल़ी कौरणा लै एक गाबड़ु रौ इंतज़ाम कियौ। आमै सारै आपणै पापा लै सौज़ा रै काबिल थै! पर परमेश्वरै आमारी ज़ागाह माथै मौरणा लै यीशु बौल़ी रै रुपा दी दैऔ। एज़ी बज़ह कु आमै यीशु लै परमेश्वरा रौ गाबड़ु बोली ई।

![](https://cdn.door43.org/obs/jpg/360px/obs-en-48-09.jpg)

ज़ेबी परमश्वरै मिस्रा माथै दु:ख भेज़ै ता तिणिऐ हर एक इस्त्राएली टौबरा लै बोलौ कि सै एक गाबड़ु री बौल़ी कौरा। तेस गाबड़ु दी कोई पाप ना च़ांई हुऔ, तैबै आपणै दारा री च़ोकटी माथै और ओरी-पौरी भिलै तैसरौ खुन लाइणौ थौ। ज़ेबी परमेश्वरै सेउ खुन देखौ ता तिउंरै घौरा कु औगांऊ बौढ़ी गौ और तिउंरै पहलै छ़ोहरु नाईं झ़ांगै। ज़ेबी एऊ हुऔ ता परमेश्वरै एथलै फसह रौ साज़ौ बोलौ।

![](https://cdn.door43.org/obs/jpg/360px/obs-en-48-10.jpg)

यीशु फसह रै साज़ै रै एक गाबड़ु ज़िणौ सा। तिणिऐ केभी भी पाप नाईं कियौ, एथीलै तेसदी कुछ़ भी गौलती नाईं आ। सेउ फसह रै साज़ै लै मौरौ। ज़ैबै कुण यीशु माथै विश्वास कौरा सा, तैबै यीशु रौ लोउ तेस आदमी रै पापा री किमत दिया सा। इणौ सा ज़िणौ परमेश्वर तेस आदमी कु औगाऊं बौड़ी गौ, कैलैकी सेउ तेसलै सौज़ा नाईं दैन्दौ।

![](https://cdn.door43.org/obs/jpg/360px/obs-en-48-11.jpg)

परमेश्वरै इस्त्राएली लोगु आइलै एक वाइदौ कियौ, कैलैकी सै इणै लोग थै ज़ो परमेश्वरै आपणै हुणा लै छ़ांटै थै। पर आबै परमेश्वरै इणौ वाइदौ कियौ आ ज़ो की आमु सारेउ लै आ। अगर केज़ी भी ज़ाती रौ केज़ौ भी ज़ौणौ एस नौंवौ वाइदौ माना सा, ता सेउ परमेश्वरा रै लोगु आइलै मिला सा। सेउ इणौ एथलै कौरा सा कैलैकी सैउ यीशु माथै विश्वास कौरा सा।

![](https://cdn.door43.org/obs/jpg/360px/obs-en-48-12.jpg)

मूसा एक भविष्यद्वक्ता थौ ज़ुणीऐ परमेश्वरा रै वच़न बौड़ी तागती कौरी परच़ार कियौ थौ। पर यीशु सारै भविष्यद्वक्ता दी सारेउ कु बौड़ौ सा। सेउ परमेश्वर आ, एथीलै ज़ो कुछ़ भी तिणीऐ कियौ और बोलौ आ सेउ परमेश्वरा रै काम और वचन थै। एथीलै पवित्र-शास्त्र यीशु लै परमेश्वरा रौ वचन बोला सा।

![](https://cdn.door43.org/obs/jpg/360px/obs-en-48-13.jpg)

परमश्वरै राज़ै दाउदा कु वाइदौ कियौ थौ की राज़ा रै रुपा दी तेसरौ एक वंश परमेश्वरा रै लोगा माथै सौदा लै राज़ कौरा। यीशु परमेश्वरा रौ छ़ोहरु और मसीह सा, एथीलै सेउ राज़ै दाउदा रौ वंश आ ज़ो सौदा लै राज़ कौरी सौका सा।

![](https://cdn.door43.org/obs/jpg/360px/obs-en-48-14.jpg)

दाउद ता इस्त्राएला रौ राज़ौ थौ, पर यीशु सारी दुनिया रौ राज़ौ सा! सेउ तौंइऐ आशा और सौदा लै फैसलै और शान्ती आइलै आपणै राज़्य माथै राज़ कौरा सा।

*उत्पत्ति 1-3, 6, 14, 22; निर्गमन 12, 20; 2 शमूएल 7; इब्रानियों 3:1-6, 4:14-5:10, 7:1-8:13, 9:11-10:18; प्रकाशितवाक्य 21 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_48_128kbps.m4a

## 49. परमेश्वरा रौ नौंवौ वाइदौ

https://openbiblestories.org/l/bfz/story-49/

![](https://cdn.door43.org/obs/jpg/360px/obs-en-49-01.jpg)

एकी स्वर्गदुतै एक ज़्वान छ़ोटूड़ मरियमा लै बोलौ की सै परमेश्वरा रै छ़ोहरु लै ज़ौन्म दिया। सै ईबी कुआरी थी, पर पवित्र आत्मा तिंया काऐ आशौ और सै गौरक्ड़ी हुई। तिंऐ एक छ़ोहरु लै ज़ौन्म दैऔ ज़ासरौ नांऊ तिंऐ यीशु छ़ाड़ौ, यीशु परमेश्वर और आदमी दुइया सा।

![](https://cdn.door43.org/obs/jpg/360px/obs-en-49-02.jpg)

यीशुऐ भौरी च़मत्कार किऐ ज़ेथ कौरी पौतौ लागा सा कि सेऊ परमेश्वर आ। सेऊ पाणी माथै हाण्डौ और भौरी भागुर शान्त किऐ। तिणिऐ भौरी सारै बिमार लोग च़ांगै किऐ और भौरी सारै लोगु कु बुरी आत्मा गाड़ी। तिणिऐ मौरै औन्दै लोग ज़िउंदै कौरी गौऐ, और तिणिऐ पांज़ रोटी और दुई माच्छ़ी पांज़ हज़ार लोगु लै खिलाई।

![](https://cdn.door43.org/obs/jpg/360px/obs-en-49-03.jpg)

यीशु एक महान गुरू भी थौ। ज़ो कुछ़ भी तिणिऐ शिखाऔ, सेऊ आच़्छ़ा कौरी शिखाऔ आ। ज़ो सेउ लोगु लै कौरणा लै बौला सा सेउ तिउंऐ कौरणौ च़ांई, कैलैकी सेउ परमेश्वरा रौ छ़ोहरु सा। तिणिऐ शिखाऔ की तुमुऐ ओरी लोगु आइलै तिणी ई प्यार कौरणौ च़ांई ज़िणौ तुमै आपु आइलै प्यार कौराई।

![](https://cdn.door43.org/obs/jpg/360px/obs-en-49-04.jpg)

तिणिऐ इणौ भी शिखाऔ की तुमू सारी च़िज़ा कु ज़ादौ और आपणी धन-ज़यदादा कु भी ज़ादौ परमेश्वरा आइलै प्यार कौरणौ च़ांई।

![](https://cdn.door43.org/obs/jpg/360px/obs-en-49-05.jpg)

यीशुऐ बोलौ की संसारा दी केज़ी भी च़िज़ पाइणै कु भौरी आच्छ़ौ सा परमेश्वरा रै राज़्य दी हुणौ। तैसरै राज़्य दी तुमारौ डैउणौ ज़ुरुरी सा की परमेश्वर तुमू तुमारै पापा कु बौच़ावा।

![](https://cdn.door43.org/obs/jpg/360px/obs-en-49-06.jpg)

यीशुऐ बोलौ की कुछ़ लोग तेस मानाई। परमेश्वर तिउं लोगु बौच़ावा। पर दुजै लोग तेस नाईं मानदै। तिणिऐ इणौ भी बोलौ की कुछ़ लोग इएं धौतरी रै ज़िणै ई, कैलैकी सै यीशु रै बारै दी आच्छ़ी खौबर नाईं मानदै, और परमेश्वर तिऊं बौच़ावा सा। पर कुछ़ लोग बाटा री काठै माटै बाशिऐ ई। परमेश्वरा रौ वचन बीज़ा रै ज़िणौ बाटा दी पौड़ा सा, पर तिऐ कुछ़ नाइ ज़ौमदौ। इऐ लोग यीशु रै बारै दी खुश-खौबरी नाईं मानदै। सै तेसरै राज़्य दी डेउणा लै इनकार कौराई।

![](https://cdn.door43.org/obs/jpg/360px/obs-en-49-07.jpg)

यीशुऐ शिखाऔ की परमेश्वर पापिऊ कु भौरी प्यार कौरा सा। सेउ तिउं माफ कौरणौ च़ाहा सा और तिऊं आपणी औलाद चाणनी च़ाहा सा।

![](https://cdn.door43.org/obs/jpg/360px/obs-en-49-08.jpg)

यीशुऐ इणौ भी बोलौ की परमेश्वर पापा कु नफरत कौरा सा। कैलैकी आदम और हव्वे पाप कियौ, एथीले तिउंरै सारै वंशजै पाप कियौ। एस संसारा दी रौइणै वाल़ौ हर एक आदमी पाप कौरा सा और परमेश्वरा कु दुर आ। हर एक आदमी परमेश्वरा रौ दुशमण आ।

![](https://cdn.door43.org/obs/jpg/360px/obs-en-49-09.jpg)

पर परमेश्वरै एस संसारा दी रौइणै वाल़ै हर एक आदमी कु इणौ प्यार कियौ: तिणिऐ आपणौ एकलौतौ छ़ौहरु देई गौ ताकी परमेश्वर तिउंलै सौज़ा ना दिया ज़ो तेस माथै विश्वास कौराई। एथरी बज़ाऐ, सै तेस आइलै सौदा लै रौआई।

![](https://cdn.door43.org/obs/jpg/360px/obs-en-49-10.jpg)

तुमै मौरणा रै लायक ई, कैलैकी तुमूऐ पाप कियौ आ। तुमु कु परमेश्वरा रौ नाराज़ हुणौ ठीक ही सा, एथारौ मतलब, सेउ यीशु माथै रोशिया। तिणिऐ यीशु लै क्रुसा री मौत देइऔ सौज़ा देई।

![](https://cdn.door43.org/obs/jpg/360px/obs-en-49-11.jpg)

यीशुऐ केबी पाप नाईं कियौ, पर तिणिऐ परमेश्वर तेसलै सौज़ा दैणै दैऔ। तिणिऐ मौरणौ मानौ। इणै कौरी, तुमारै पाप और एस संसारा दी रौइणै वाल़ै हर एक आदमी पाप उठाउणा लै सेउ एक पाक्कौ बौल़िदाण थौ। यीशुऐ आपु परमेश्वरा लै बौल़िदान कौरी गौ, एथीलै केज़ै भी पापा लै, इदरा झ़ाऊं की बौड़ौ पाप भी माफ कौरा सा।

![](https://cdn.door43.org/obs/jpg/360px/obs-en-49-12.jpg)

भलै ही तुमै भौरी का आछ़ै काम कौराई, तैबै भी एथ कौरी परमेश्वर तुमू नाइ बौच़ाउंदौ। तेसरौ गोष्टण बौणना लै इणौ कुछ़ भी नाईं आ ज़ो तुमै कौरी सौकाई। एथरौ मतलब, तुमूऐ विश्वास कौरणौ सा, और तुमारै बौदलै हाउं क्रुसा माथै मौरी गौ, और एऊ भी की परमेश्वरै सेउ तौंइऐ ज़िउंदौ कौरी गौ। अगर एथा माथै विश्वास कौरालै, ता परमेश्वर तुमारै पाप माफ कौरा सा।

![](https://cdn.door43.org/obs/jpg/360px/obs-en-49-13.jpg)

परमेश्वर तेस हर एक आदमी बौच़ावा ज़ो यीशु माथै विश्वास कौरा सा और तेस आपणौ प्रभु माना सा। पर सेउ तिऊं नाईं बौच़ाउंदौ ज़ो तेस माथै विश्वास नाईं कौरदै। एऊ कोई माइनै नाइ छ़ाड़दौ की तुमै आमीर ई या गरीब, आदमी हुआ या छ़ेउड़ी हुआ, बूढ़े हुआ या ज़वान हुआ, तुमै किऐ रौआई। परमेश्वर तुमु कु प्यार कौरा सा और च़ाहा सा की तुमै यीशु माथै विश्वास कौरौ की सेउ तुमारौ गौष्टण बौणी सौका।

![](https://cdn.door43.org/obs/jpg/360px/obs-en-49-14.jpg)

यीशु तुमू औटाउंदै लागौ औन्दौ कि तेस माथै विश्वास कौरौ और बपतिस्मा निंयौ। का तुमै विश्वास कौराई की परमेश्वरा रौ एकलौतौ छ़ौहरु, यीशु ही मसीह सा? का तुमै विश्वास कौराई कि तुमै एक पापी ई और इणौ की तुमै परमेश्वरा रै ज़ौरिऐ सौज़ा देणै रै लायक ई? का तुमै विश्वास कौराई की तुमारै पापा मिटाउणा लै यीशु क्रुसा माथै मौरौ?

![](https://cdn.door43.org/obs/jpg/360px/obs-en-49-15.jpg)

अगर तुमै यीशु माथै और ज़ो तिणिऐ तुमूलै कियौ सा तेस माथै विश्वास कौराइ सा, ता तुमै एक मसीह ई! शैतान आपणै इनारै रै राज़्य दी आबै तुमू माथै राज़ नाइ कौरदौ। आबै परमेश्वर आपणै प्याशै रै राज़्य दी तुमु माथै राज़ कौरा सा। तिणिऐ तुमै पाप कौरणै कु रोकी गौऐ ई, ज़ो तुमै कौरा थै। तिणिऐ तुमूलै एक नौईं, आछ़ी ज़िदंगी देई सा।

![](https://cdn.door43.org/obs/jpg/360px/obs-en-49-16.jpg)

अगर तुमै एक मसीह ता ज़ो यीशुऐ कियौ आ तेथरी बज़ह कू परमेश्वरै तुमारै पाप माफ कौरी गौऐ ई। आबै, परमेश्वर एक दुश्मणा ज़िणौ तुमू एक पाक्कौ दौस्त माना सा।

![](https://cdn.door43.org/obs/jpg/360px/obs-en-49-17.jpg)

अगर तुमै परमेश्वरा रै गौष्टण ई और प्रभु यीशु रै सेवा कौरणै वाल़ै ई ता तुमै तिउं बुशु मानणै री इच्छ़ा कौरालै ज़ो यीशु तुमुकै शिखावा सा। भलै ई तुमै एक मसीह ई, शैतान इभी भी पाप कौरणा लै तुमू औज़मांवा। पर परमेश्वर हमेशा तेस कौरा ज़ो सेउ बोला सा की सेउ कौरा। सेउ बोला सा की अगर तुमैं आपणै पाप मानौ, ता सेउ तुमु माफ कौरा। सेउ तुमु कु पापा रै विरोधा ई लौड़नै री तागत दिया सा।

![](https://cdn.door43.org/obs/jpg/360px/obs-en-49-18.jpg)

परमेश्वर तुमुलै प्राथना कौरणै और तेसरै वचन पौड़ना लै बोला सा। सेउ तुमू ओरी विश्वासीउ रै साथाई मिलियौ तेसरी आराधना कौरणा लै भी बोला सा। तुमू ओरी लोगु कै भी बोलणौ जा सा कि तिणिऐ तुमुलै का कियौ सा। अगर तुमै इउं सारै काम कौरा ई, ता तुमै तेसरै एक पाक्कै गौष्टण बौणाई।

*रोमियों 3:21-26, 5:1-11; यूहन्ना 3:16; मरकुस 16:16; कुलुस्सियों 1:13-14; 2 कुरिन्थियों 5:17-21; 1 यूहन्ना 1:5-10 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_49_128kbps.m4a

## 50. यीशु वापिस आशा सा

https://openbiblestories.org/l/bfz/story-50/

![](https://cdn.door43.org/obs/jpg/360px/obs-en-50-01.jpg)

लगभग दुई हज़ार साला कु संसारा दी सारी ज़ागाह माथै भौरी कू भौरी लोग मसीह यीशु रै बारै दी खुश-खौबरी शुणदै ई लागै औन्दै और कलिसिया तरक्की कौरदै आ लागी औन्दी। यीशुऐ वादौ कियौ कि सेउ संसारा रै आखरी दी वापिस आशा सा। अगर सेउ इबी झ़ाऊं नाईं आशौ, तेबै भी सेउ आपणौ वाइदौ पुरौ कौरा सा।

![](https://cdn.door43.org/obs/jpg/360px/obs-en-50-02.jpg)

ज़ैबै की आमै यीशु रै वापिस आशणौ ज़ागी ई, परमेश्वर आमु कु इणै कौरी ज़िउणै री इच्छ़ा कौरा सा की ज़ुण पवित्र ई और ज़ुण तेसरी ईज़्ज़त कौरा ई। ज़ेबी यीशु धौतरी माथै रौआ थौ तैबै तिणिऐ बोलौ, “मैरै च़ेलै संसारा री सारी ज़ागाह रै लोगु कै परमेश्वरा रै राज़्य रै बारै दी खुश-खौबरी रौ परच़ार कौराई, और तैबै आखरी बौगत आशा।”

![](https://cdn.door43.org/obs/jpg/360px/obs-en-50-03.jpg)

भौरी का ज़ातिउऐ इबी झ़ाऊं यीशु रै बारै दी नाईं शुणौ। सौरगा लै डेउणा कू पैहलै, यीशुऐ मसीह लोगु कु तिऊं लोगु कै खुश-खौबरी शुणाउणा लै बोलौ ज़ुणिऐ इए केबी नाईं शुणी। तिणिऐ बोलौ, “डैऔ और सारी ज़ातिऊ रै लोगु च़ेलै चाणौ!" और “फसल लौइणा लै डोखरै तैयार हुई गौऐ!"

![](https://cdn.door43.org/obs/jpg/360px/obs-en-50-04.jpg)

यीशुऐ इणौ भी बोलौ, “कास आदमी रौ नुकुर आपणै मालिका कु बौडौ नाईं औन्दौ। एस संसारा रै खास लोगुऐ मुकु नफरत कौरी, और मेरी बज़ह कु सै तुमु भी सौतावा और झ़ांगाई। एस संसारा दी तुमै दुखी हुआई, पर विश्वासा दी पाक्कै बौणौ, कैलैकि मुंइऐ शैतान हौराई गौ सा ज़ो एस संसारा माथै राज़ कौरा सा। अगर तुमै आखरी झ़ाउं मैरै विश्वासा दी बौणी रौआ लै, ता परमेश्वर तुमू बौच़ावा सा!"

![](https://cdn.door43.org/obs/jpg/360px/obs-en-50-05.jpg)

यीशुऐ आपणै च़ेलै इणै सौमझ़ाउणा लै एक काहणी शुणाई की ज़ेबी संसारा रौ अंत हुआ सा, ता लोगु आइलै का हुआ सा। तिणिए बोलौ, “केज़ै आदमिऐ आपणै डोखरा दी आच्छ़ौ बीज़ थौ बौ औन्दौ। ज़ेबी सेउ सुतौ औन्दौ थौ ता तेसरौ दुश्मण आशौ और गिऊं रै बिजा मांझ़िऐ ज़ांगली पौधै रौ बीज बौई गौऐ, और तैबै सेऊ डेई गौ।”

![](https://cdn.door43.org/obs/jpg/360px/obs-en-50-06.jpg)

“ज़ेबी पौधेउ दी आंगुरै आशै ता नुकरेवै तेस आदमी कै बोलौ, ओ मालिक, तुमुऐ ता आपणै डोखरा दी आच्छ़ौ बीज बौ थौ। ता एथदी ज़ांगली पौधै कैलै लागै ई?' तिणी ज़्वाब देऔ, सिर्फ मेरै दुश्मण ही तिऊं बौइणौ च़ाहा ई। एउ मैरौ केज़ौ दुश्मण आ ज़ुणिऐ इणौ कियौ सा।'"

![](https://cdn.door43.org/obs/jpg/360px/obs-en-50-07.jpg)

“तिऊं नुकरै आपणै मालिका कै ज़्वाब देऔ, का आमु ज़ांगली पौधे पोटणै च़ांई?' तिणी मालिकै बोलौ, नाईं अगर तुमै इणौ कौरालै ता तुमुकै कुछ़ गिऊं भी पौटीआई। लौइणै रै बौगता झ़ाऊं रुकौ। तैबै ज़ांगली पौधै कौठै कौरौ ताकी तुमै तिऊं ज़ाल़ी सौका। पर गिऊं आणौ मैरै कोठै दी।'"

![](https://cdn.door43.org/obs/jpg/360px/obs-en-50-08.jpg)

च़ेलेउऐ इऐं काहणी रौ मतलब नाईं सौमझ़ौ, एथीलै तिउंऐ यीशु लै बोलौ, कि आमु सौमझ़ाऔ, यीशुऐ बोलौ, “आच्छ़ौ बीज बौइणै वाल़ौ आदमी मसीह देखावा सा। डोखरौ संसार देखावा सा। आछ़ौ बीज परमेश्वरा रै लोग देखावा सा।”

![](https://cdn.door43.org/obs/jpg/360px/obs-en-50-09.jpg)

“ज़ांगल़ी पौधै तेस दुष्ट ज़ौणै, शैताना रै लोगु दैखावा सा। तेस आदमी रौ दुश्मण शैतान देखावा सा, ज़ुणीऐ ज़ांगल़ी पौधै बौऐ थै। कटाई ऐस संसारा रौ अंत देखावा सा, और कटाई कौरणै वाल़ै परमेश्वरा रै स्वर्गदुत देखावा सा।”

![](https://cdn.door43.org/obs/jpg/360px/obs-en-50-10.jpg)

“ज़ेबी संसारा रौ अंत हुआ लौ तेबी स्वर्गदुत तिऊं सारै लोगु कौठै कौराई ज़ो शैताना रै ई। सै स्वर्गदुत तिऊं एक भौरी ताती आगी दी शौटाई। तिदलै लोग भौरी सताव दी लैराई और आपणै दांद पिशाई। पर ज़ो लोग धौर्मी ई, ज़ो यीशु पिछ़ु हांडे ई, सै तिउंरै परमेश्वर बाबा रै राज़्य दी सुरज़ा रै ज़िणै च़ौमकाई।”

![](https://cdn.door43.org/obs/jpg/360px/obs-en-50-11.jpg)

यीशुऐ इणौ भी बोलौ की सेउ संसारा रौ अंत औणै कु पैहलै धौतरी माथै आशा सा। सेऊ तिणै कौरिऐ आशा सा ज़िणै कौरी सेउ डेऔ थौ। मतलब, तेसकै पैहलकै ज़िणौ शरीर हुआ, और सेउ सौरगा दी बादला माथै सवार हुइऔ आशा सा। ज़ेबी सेउ आशालौ, ता हर एक मसीह ज़ो मौरी गौऐ ई सै मौरै औन्दै मांझ़िया कु ज़िउंदै हुआई और तेसकु सौरगा दी मिलाई।

![](https://cdn.door43.org/obs/jpg/360px/obs-en-50-12.jpg)

तैबै ज़ो मसीह ऐबै भी ज़िउंदै ई सै सौरगा दी ज़िउंदै उठाईया ई और तिऊं दुज़ै मसीह आइलै मिलाई ज़ो मौरै औन्दै मांझ़िया कु ज़िउंदै हुआई। सै सारै तिऐ यीशु आइलै हुआई। तैथ बासिऐ, यीशु आपणै लोगु आइलै रौआ सा। ज़ेबी सै एकी साथाइ रौआई ता तिउंकै सौदा लै पुरी शान्ति हुआ।

![](https://cdn.door43.org/obs/jpg/360px/obs-en-50-13.jpg)

यीशुऐ तेथ माथै विश्वास कौरणै वाल़ै हर एक आदमी लै एक ताज देणै रौ वाइदौ कियौ औन्दौ। से सौदा लै परमेश्वरा आइलै हर एक च़िज़ा माथी राज़ कौराई। तिउंकै पुरी शान्ती हुआ।

![](https://cdn.door43.org/obs/jpg/360px/obs-en-50-14.jpg)

पर परमेश्वर तिउं सारेऊ रौ फैसलौ कौरा ज़ो यीशु माथै विश्वास नाईं कौरदै। सै तिऊं नौरका दी पाआ ई। तिऐ सै लेराई और दांद पिशाई और केभी ना इशणै वाल़ी आग तिऊं रोज़ ज़ाल़दै रौआ, और किड़ै तिऊं खाणै कु केबी नाईं रुकदै।

![](https://cdn.door43.org/obs/jpg/360px/obs-en-50-15.jpg)

ज़ेबी यीशु तौंइऐ आशा सा, ता सेउ आच़्छा कौरी शैतान और तेसरौ राज़ खात्म कौरा सा। सेउ शैतान नौरका दी पाआ सा। तिऐ शैतान सौदा लै ज़ौल़दै थाका लागी, तिऊं सारेऊ आइलै ज़ुणिऐ परमेश्वरा री बुशै मानणै री बज़ह शैताना पिछ़ु हाण्डणौ च़ुनौ थौ।

![](https://cdn.door43.org/obs/jpg/360px/obs-en-50-16.jpg)

कैलैकी आदम और हव्वे परमेश्वरा री नाईं शुणी थी और पाप एस संसारा दी आशौ थौ, परमेश्वरै तेसलै श्राप दैऔ और तेस झ़ांगणै रौ ठाणी गौ। पर केज़ै दिनै परमेश्वर एक नौंवौ सौरग और एक नौईं धौतरी च़ाणा आ ज़ो पाक्की हुआ।

![](https://cdn.door43.org/obs/jpg/360px/obs-en-50-17.jpg)

यीशु और तेसरै लोग तिऐं नौईं धौतरी दी रौआई, और सेउ सौदा लै सारी च़िज़ा माथै राज़ कौरा। लोगु री आखी कु हर एक आशु घुशा सा। आबै कोई भी बेदणौ या दुखी नाईं औन्दौ। सै लेरणै भी नाईं। सै बिमार नाईं हुआलै या मौरदै नाईं। और तिऐ कुछ़ भी बुराई नाईं हुआली। यीशु आपणै राज़्य माथै फैसलै आइलै और शान्ति आइलै राज़ कौरा सा। सेउ हमेशा लै आपणै लोगु आइलै रौआ सा।

*मत्ती 24:14; 28:18; यूहन्ना 15:20, 16:33; प्रकाशितवाक्य 2:10; मत्ती 13:24-30, 36-42; 1 थिस्सलुनीकियों 4:13-5:11; याकूब 1:12; मत्ती 22:13; प्रकाशितवाक्य 20:10, 21:1-22:21 कु बाइबला री एक काहणी*

Audio: https://git.door43.org/OBS-TLF/bfz_obs/releases/download/v1/bfz_obs_v1_50_128kbps.m4a