# unfoldingWord Open Bible Stories — Mag-Indi Ayta (Ayta, Mag-Indi) - Language code: `blx` - Canonical page: https://openbiblestories.org/l/blx/ - Stories in this file: 50 of 50 - Published by: DokuWiki - Last release: 2026-10-27 - License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org - Illustrations: © Sweet Publishing, CC BY-SA 3.0 unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Mag-Indi Ayta translation; it is not a translation of the whole Bible. ## 1. Ya Pinangubatan Kaganawan https://openbiblestories.org/l/blx/story-1/ ![](https://cdn.door43.org/obs/jpg/360px/obs-en-01-01.jpg) Paradi ya umpisan kaganawan. Ya nunan dinyag Bapan Namalyari, sabay ya babun luta. Nuwa sa panawun na abaytu, ayin kapun dakun sabêt ta makitan sa babun luta, ta pawan lanêm buy nadêglêm. Nuwa ya Ispiritun Bapan Namalyari, idi yina sa babun lanêm. (Genesis 1:1-2) ![](https://cdn.door43.org/obs/jpg/360px/obs-en-01-02.jpg) Amêsên, sinabin Bapan Namalyari, “Mabiyan sawang.” Kabay sinumawang yabay. Sên nakit Bapan Namalyari ya dinyag na, natula ya. Kabay inpapawa nay sawang sa nadêglêm. Ya sawang, binêg nan “allu.” Ya nadêglêm, binêg nan “yabi”. Abiin na dinyag na sa nunan allu. (Genesis 1:3-5) ![](https://cdn.door43.org/obs/jpg/360px/obs-en-01-03.jpg) Sa ikaluway allu, sinabin Bapan Namalyari, “Mipapaway lanêm. Ya kapaka, milaku ya sa têngêl amên pakadyag ulap. Buy ya kapaka êt, milaku ya sa aypa amên pakadyag dagat.” (Genesis 1:6-8) ![](https://cdn.door43.org/obs/jpg/360px/obs-en-01-04.jpg) Sa ikatluy alluy na êt taman, inpapawan Bapan Namalyari ya luta buy lanêm. Ya luta, binêg nan “luta”. Ya lanêm, binêg nan “dagat.” Sên nakit Bapan Namalyari ya dinyag na, natula ya. (Genesis 1:9-10) ![](https://cdn.door43.org/obs/jpg/360px/obs-en-01-05.jpg) Pamakayari, sinabin Bapan Namalyari, “Tumubu sa babun lutay kaganawan kalasin puun kayu buy tanaman.” Parabaydu yabay ya nalyari. Sên nakit Bapan Namalyari ya dinyag na, natula ya. (Genesis 1:11-13) ![](https://cdn.door43.org/obs/jpg/360px/obs-en-01-06.jpg) Sa ikaapat ta allu, sinabin Bapan Namalyari, “Mabiyan allu, buwan, buy bêtêwên sa langit ya mam-in sawang sa babun luta.” Kabay nadyag yabay. Sa kapamilatan abiin sila, matandan tamu nu allu o yabi, buy matandan tamu êt nu mapupus say buwan o tawun. Sên nakit Bapan Namalyari ya dinyag na, natula ya. (Genesis 1:14-19) ![](https://cdn.door43.org/obs/jpg/360px/obs-en-01-07.jpg) Sa ikalimay allu, sinabin Bapan Namalyari, “Mabiyan magmikakalasi ya kênan lanêm, mangaragul buy nangabêlêng. Buy mabiyan êt magmikakalasi ya manuk.” Kabay nadyag yabay. Sên nakit Bapan Namalyari ya dinyag na, natula ya. Pinagpala na buy pinalakêy mani ayup pa dinyag na amên matpêlan na babun luta. (Genesis 1:20-23) ![](https://cdn.door43.org/obs/jpg/360px/obs-en-01-08.jpg) Sa ikaanêm ma allu, sinabin Bapan Namalyari, “Mabiyan kaganawan kalasin ayup sa luta.” Kabay nabiyan yabay. Sên nakit Bapan Namalyari ya dinyag na, natula ya. (Genesis 1:24-25) ![](https://cdn.door43.org/obs/jpg/360px/obs-en-01-09.jpg) Amêsên, sinabin Bapan Namalyari, “Manyag kitamun mani tawu. Daygên tamu silan kaparisu tamu. Sabay silay mamaala sa babun luta buy sa kaganawan ayup.” (Genesis 1:26a) ![](https://cdn.door43.org/obs/jpg/360px/obs-en-01-10.jpg) Kabay nangwan luta si Bapan Namalyari. Dinyag nan liyaki ya ati. Pamakayari, kinayupan nay balungus. Kabay nabyay ya. Binêg nan Adan na liyaki. Nanyag êt si Bapan Namalyarin gisay panamnan amên baydu manugêl si Adan. Saba siyay manaysay sa panamnan. (Genesis 1:27-30) ![](https://cdn.door43.org/obs/jpg/360px/obs-en-01-11.jpg) Sa libutad un panamnan, dilag luway puun kayu. Ya gisa, mam-in biyay. Ya gisa êt taman, mam-i yan kabiyasnan tungkul sa mangêd buy nadawak. Amêsên, sinabin Bapan Namalyari kan Adan, “Si tagêy un mani kayu baydi, malyari mun kanên, maliban tana sa tagêy un kayuy mam-in kabiyasnan tungkul sa mangêd buy nadawak. Ta nu kanên muy abiin, mati ka.” (Genesis 2:16-17) ![](https://cdn.door43.org/obs/jpg/360px/obs-en-01-12.jpg) Amêsên, sinabi Bapan Namalyari, “Asê mangêd da kay gigisay tawu.” Sinabi nay abiin, ta ayin mapagkaawyun si Adan sa mani ayup. (Genesis 2:18) ![](https://cdn.door43.org/obs/jpg/360px/obs-en-01-13.jpg) Kabay, pinabêlêw Bapan Namalyari si Adan. Kaban maêlêk yan bêlêw, kingwan Bapan Namalyari ya tagyang na buy dinyag nan gisay babayi. Pamakaimatan Adan, nakitan nay dilag ginan kaawyun. (Genesis 2:21-22) ![](https://cdn.door43.org/obs/jpg/360px/obs-en-01-14.jpg) Pamakakit Adan sa babayi, natula-tula ya. Sinabi na, “Salamat ta dilag gakinan mapagkaawyun na kaparisu ku. Bêgên ku yan ‘babayi’.” Ati ya sangkan panlakwan liyaki sa mangatwa na, ta kilaku ya sa asawa na buy pakadyag silan gigisa. (Genesis 2:23-24) ![](https://cdn.door43.org/obs/jpg/360px/obs-en-01-15.jpg) Dinyag Bapan Namalyari ya liyaki buy babayi un kaparisu na. Pinagpala silan Bapan Namalyari buy sinabi na kallay, “Manganak kaw malakê angga sa mapapnuy tawuy babun luta.” Sên nakit Bapan Namalyari ya kaganawan dinyag na, sadyay tula na. Abiin na nalyari sa ikaanêm ma allu. (Genesis 1:27-28, 31) ![](https://cdn.door43.org/obs/jpg/360px/obs-en-01-16.jpg) Sên niras say ikapituy allu, nayari naynan Bapan Namalyari ya kaganawan dinyag na. Kabay nagpaynawa ya buy pinagpala nay ikapituy allu buy dinyag nan banal. Parabaysên dinyag Bapan Namalyari ya kaganawan bagay. (Genesis 2:2-3) *Nakasulat sa Sabin Bapan Namalyari: Genesis 1-2* ## 2. Ya Nunan Tawuy Nangasalanan https://openbiblestories.org/l/blx/story-2/ ![](https://cdn.door43.org/obs/jpg/360px/obs-en-02-01.jpg?direct&) Sadyay tulan Adan buy asawa na. Nanugêl sila sa mangêd da panamnan ya dinyag Bapan Namalyari para kalla. Ayin silan yaming, nuwa paraman baydu, a sila madêng-êyan, gawan ayin pun kasalanan sa babun luta. Pawa silan maglimbun sa panamnan buy pawa lan mapagkasabi si Bapan Namalyari. ![](https://cdn.door43.org/obs/jpg/360px/obs-en-02-02.jpg?direct&) Nuwa si Satanas ya magpagtalipanpan, nagtarayi yan utan ya idi sa panamnan. Gisay allu, pinatang nay babayi, “Pêtêg nayin sinabin Bapan Namalyari kamuyuy ‘Agana yu kanên na kaganawan tagêy puun kayu diyê’?” (Genesis 3:1) ![](https://cdn.door43.org/obs/jpg/360px/obs-en-02-03.jpg?direct&) Nakitbay ya babayi, “Te asê! Malyari yan kanên na kaganawan tagêy puun kayu diyê, alwa ta dayin tagêy puun kayuy mam-in kabiyasnan tungkul sa mangêd buy nadawak. Sinabin Bapan Namalyari kanyan, ‘Agana yu kanên na abitu, o talanên, ta mati kaw.’” (Genesis 3:2-3) ![](https://cdn.door43.org/obs/jpg/360px/obs-en-02-04.jpg?direct&) Nakitbay ya utan, “Te, agana kaw makipapaniwala baydu! A kaw mati. Kay a na labay ipakan kamuyuy tagêy ya abitu, tagawan nu kanên yuy abitu, matandan yu nu sabêt ta mangêd buy nadawak kaparisun Bapan Namalyari.” (Genesis 3:4-5) ![](https://cdn.door43.org/obs/jpg/360px/obs-en-02-05.jpg?direct&) Amêsên, labay-labay yan babayin matawayan na tagêy gawan mangêd êlêwên na ati. Kalabay ya êt mabiyasa. Kabay pinuti nay tagêy buy kinisab na. Binyanan na êt ta asawa na buy nangan ya êt. (Genesis 3:6) ![](https://cdn.door43.org/obs/jpg/360px/obs-en-02-06.jpg?direct&) Sa dinyag lan abaytu, nakitan la tanay ayin silayna awêd yaming. Kabay si dinyag la, nangwa silan bulun kayu buy pilalanib la, ta sabay ya panakêp lan lawini la. (Genesis 3:7) ![](https://cdn.door43.org/obs/jpg/360px/obs-en-02-07.jpg?direct&) Sên nalêngên miasaway mamita si Bapan Namalyari sa panamnan, nagtagu sila. Binêg Bapan Namalyari ya liyaki, “Antu kay nay Adan?” Nakitbay si Adan, “Nalêngê kuy mamita ka sa panamnan. Nalimu waku kamu, gawan ayin nakun yaming. Kabay nagtagu waku.” (Genesis 3:8-10) ![](https://cdn.door43.org/obs/jpg/360px/obs-en-02-08.jpg?direct&) Pinatang yan Bapan Namalyari, “Aw indi! Sisabêt ta nagsabin ayin kan yaming? Nangan ka lawês tagêy ya pan-ibawal kun kanên yu ta?” Nakitbay si Adan, “Awu, nangan naku yabay. Ta pinakan nakun babayi ya indin mu kangku.” Kabay pinatang Bapan Namalyari ya babayi, “Alwa ta dinyag mu yay abitu ta?” Nakitbay ya babayi, “Nadyag kuy abitu gawan tinalipanpanan nakun utan.” (Genesis 3:11-13) ![](https://cdn.door43.org/obs/jpg/360px/obs-en-02-09.jpg?direct&) Sinabin Bapan Namalyari sa utan, “Gawan sa dinyag mu, pan-isumpa kata. Dumakap ka buy si ulu mu, pawan idi sa abu. Pagkatubag muy babayi. Buy ya mani anak mu buy ya mani anak na, mitubag êt. Ya anak un gisay babayi, sabay ya mallasaw ulu mu. Sika êt ta manuktuk buwê na.” (Genesis 3:14-15) ![](https://cdn.door43.org/obs/jpg/360px/obs-en-02-10.jpg?direct&) Sinabin Bapan Namalyari sa babayi, “Nu manganak ka, masakit ta matanam mu. Labay mu, sikay sunulên asawa mu, nuwa asawa muy manakup kamu.” (Genesis 3:15a, 16) ![](https://cdn.door43.org/obs/jpg/360px/obs-en-02-11.jpg?direct&) Sinabi yaman Bapan Namalyari sa liyaki, “Gawan sinunul muy asawa mu kaysa kangku, isumpa kuy luta. Magkasakit kay na pun bayu ka mamupul intanêm mu. Buy nu mati ka, mag-udung sa lutay lawini mu.” Ebay inbêg na sa asawa na. Ya labay sabin Eba, “mam-in biyay” gawan si Ebay mapag-indun kaganawan tawu. Binyanan naman Bapan Namalyarin yaming si Adan buy si Eba ya dinyag na ubat sa balat ayup. (Genesis 3:17-21) ![](https://cdn.door43.org/obs/jpg/360px/obs-en-02-12.jpg?direct&) Sinabin Bapan Namalyari, “Kaparisu tamina amêsên na mani tawu. Tanda lay nay mangêd buy nadawak. Dapat a silay na makaêkan tagêy puun kayuy mam-in biyay ta dat a silay na mati.” Kabay inpatas Bapan Namalyari si Adan buy si Eba sa mangêd da panamnan. Nam-i ya êt mangaragul buy nangapas-êy ya mani ang-el sa dadanan palaku sa panamnan amên asê makasun na mani tawu baydu buy a sila makaêkan tagêy puun kayuy mam-in biyay. (Genesis 3:22-24) *Nakasulat sa Sabin Bapan Namalyari: Genesis 3* ## 3. Ya Lanab https://openbiblestories.org/l/blx/story-3/ ![](https://cdn.door43.org/obs/jpg/360px/obs-en-03-01.jpg) Pamakayarin makarang nga panawun, kaban mallumakêy mani tawu sa babun luta, suspu silan dinumawak. Kabay nasabin Bapan Namalyari, “Sirên kinay buun babun luta sa kapamilatan bapan dagul lanab.” (Genesis 6:5-7) ![](https://cdn.door43.org/obs/jpg/360px/obs-en-03-02.jpg) Nuwa dilag gisay liyaki ya kapapaidu kan Bapan Namalyari. Si lagyu na, Noe. Gisa yan mapanunul kan Bapan Namalyari. Sinabin Bapan Namalyari kan Noe, “Noe ya, lanabên kuy buun babun luta. Kabay manyag kan maragul la barku.” (Genesis 6:8-9, 13-14) ![](https://cdn.door43.org/obs/jpg/360px/obs-en-03-03.jpg) Sinabin Bapan Namalyari kan Noe, “Ya sukad barkuy daygên mu, dinalan buy apattapuy metru ya karang, luwampu buy tatluy metru ya lapad, buy labin tatlu buy kapakay metru ya tag-ay na. Dyag sa kayuy barkuy daygên mu. Daygên mun tatluy palapag ga ati, malakêy kuwartu, buy gisay bubung.” (Genesis 6:14b-16) Abiin na planuy indin Bapan Namalyari kan Noe. Kabay sa kapamilatan maragul la barkun ati, miligtas sa pamilyan Noe buy ya kaganawan kalasin ayup. (Genesis 6:18) ![](https://cdn.door43.org/obs/jpg/360px/obs-en-03-04.jpg) Dinyag yabay Noe ya in-utus Bapan Namalyari kana. Sinawpan yan tatluy anak nay lawyaki amên masunul la pan-ipadyag Bapan Namalyari kana. Kaban pandaygên lay barku, sinabin Noe sa mani tawu, “Dilag lumatêng nga bapan dagul lanab. Sêpat kaw manyawad tawad kan Bapan Namalyari.” Nuwa asê naniwala kanay mani tawu. Gawan kakaragulan barku, dakun umnuy tawun na nilabas bayu nayari ya barku. (Genesis 6:22; 2 Pedru 2:5) ![](https://cdn.door43.org/obs/jpg/360px/obs-en-03-05.jpg) In-utus êt Bapan Namalyari kallan Noe ya, “Manipun kaw malakêy kanên para kamuyu buy para sa mani ayup.” (Genesis 6:21) Sên nakal-an nay kaganawan, sinabin Bapan Namalyari kan Noe, “Noe ya, sumun kay na sa barku, kaawyun muy asawa mu buy ya tatluy anak mu buy mani asawa la.” Para yabay bayduy dinyag la. Wawalu silay sinumun sa barku. (Genesis 7:1, 5-7) ![](https://cdn.door43.org/obs/jpg/360px/obs-en-03-06.jpg) Impalakun Bapan Namalyari sa barkun Noe ya kaganawan kalasin ayup buy uybun manuk, liyaki buy babayi. Impalaku êt Bapan Namalyari ya ti-pituy lawyaki buy ti-pituy babayi sa kaganawan kalasin ayup pa malyarin iandug kana. (Genesis 7:8-9) Sên nakasun nay kaganawan, in-saray nan Bapan Namalyari ya pasbul barku. (Genesis 7:16b) ![](https://cdn.door43.org/obs/jpg/360px/obs-en-03-07.jpg) Pamakayarin anêm ma allu, nanguran sadyay lakas. Asê tinunggên na uran sa lalên apattapuy allu buy apattapuy yabi. Buy alwa pun êt kay abiin, ta dilag êt lanêm ma naubat sa lalên luta. Kabay inlanab ba buun babun luta buy inlumbug ga mani tawugtug. (Genesis 7:11-12, 17-20) ![](https://cdn.door43.org/obs/jpg/360px/obs-en-03-08.jpg) Nangamamati ya kaganawan tawu buy ayup. Si nitagan tanay nabyay, abitu silay idi sa lalên barkun Noe. Lêpaw-lêpaw wa barkun Noe sa lanab. Si kaganawan nakasakay baydu, niligtas sa bapan dagul lanab. (Genesis 7:22-23) ![](https://cdn.door43.org/obs/jpg/360px/obs-en-03-09.jpg) Sên tinunggên nay uran, limay buwan pun bayu inyumupay lanab. Gisay allu, nisadsad da barkun Noe sa gisay matag-ay ya bung-uy. Nuwa matag-ay pun na lanêm sa kaatag ga lugal sa babun luta. Tatluy buwan pun na nilabas bayu nakitan lan Noe ya tawugtug mani bung-uy. (Genesis 8:2-4) ![](https://cdn.door43.org/obs/jpg/360px/obs-en-03-10.jpg) Pamakalibas sa êt apattapuy allu, nipalpad gisay uwak si Noe amên matandan na nu namalay nay luta. Kapanlimbadlimbad uwak, nuwa ayin yan nakitan na namalay luta. (Genesis 8:6-7) ![](https://cdn.door43.org/obs/jpg/360px/obs-en-03-11.jpg) Asê naêpêng, namipalpad da êt gisay patipati si Noe. Nuwa nangamut nag-udung nga ati kan Noe gawan ayin yan nakitan na sangan kayuy mapag-ugpan na. Sên nilabas sa pituy allu, namipalpad da êt si Noe un patipati. Asê naêpêng, nag-udung yan nigêgtan bulung kayu. Natula si Noe gawan natandan nay manyumêpay nay lanêm buy mantumubuy nan manguman na mani tanaman. (Genesis 8:6-11) ![](https://cdn.door43.org/obs/jpg/360px/obs-en-03-12.jpg) Namalibas sa êt gisay duminggu si Noe bayu wi na êt namipalpad patipati. Nuwa asina nag-udung nga patipati kana. Kabay naisip Noe, “Ah, dilag gina lawês napag-ugpan! Ya labay sabin, marani yan mamalay luta!” (Genesis 8:12) ![](https://cdn.door43.org/obs/jpg/360px/obs-en-03-13.jpg) Pamakalibas luway buwan, sinabin Bapan Namalyari kan Noe, “Noe ya, malyari kaw nan umawas sa barku. Paawasên mu êt ta pamilya mu buy kaganawan ayup. Pakapnun yun tawu buy ayup pa buun babun luta.” Inumawas sabay sa barku silan Noe. (Genesis 8:13-18) ![](https://cdn.door43.org/obs/jpg/360px/obs-en-03-14.jpg) Pamakaawas lan Noe sa barku, nanyag yan gisay pamiandugan. Namiandug yan dakun umnuy ayup sa kaganawan kalasin ayup pa malyarin iandug kan Bapan Namalyari. Natula si Bapan Namalyari sa mani in-andug Noe. Kabay pinagpala na si Noe buy pamilya na. (Genesis 8:20; 9:1) ![](https://cdn.door43.org/obs/jpg/360px/obs-en-03-15.jpg) Sinabin Bapan Namalyari kan Noe, “Noe ya, pan-ipangaku ku kamuy a kina umanên lanabên na buun babun luta. A kina sirên na buun luta sa kapamilatan lanab agyan makasalanan pun na mani tawu.” (Genesis 8:21-22) ![](https://cdn.door43.org/obs/jpg/360px/obs-en-03-16.jpg) Pamakayari, namipakit si Bapan Namalyari un buwangaw kan Noe bilang tanda' sa pangaku na. Kabay balang magpakit ta buwangaw, maganakan Bapan Namalyari buy mani tawuy pangaku na. (Genesis 8:12-16) *Nakasulat sa Sabin Bapan Namalyari: Genesis 6-8* ## 4. Ya Pangakun Bapan Namalyari https://openbiblestories.org/l/blx/story-4/ ![](https://cdn.door43.org/obs/jpg/360px/obs-en-04-01.jpg) Malakêy tawun na inlumibas pamakayarin bapan dagul lanab. Inlumakêy nan manguman na mani tawu sa babun luta. Buy awlagi kay gigisay sabi ya panggamitin la. Nuwa imbis saman sunulên lay utus Bapan Namalyari ya pakapnun lan mani tawuy babun luta, niaawyun silay naman buy nag-umpisan nipaydêng gisay balayan. ![](https://cdn.door43.org/obs/jpg/360px/obs-en-04-02.jpg) Mapagpapadayêw wa mani tawu awlagi. Ayin silan pakyalam sa pansabin Bapan Namalyari. Nag-umpisan namipaydêng gisay tore ya mani tawu. Sinabi la, “Isadsad tamuy ati angga sa langit ta amên makilala kitamun malakêy tawu.” Nakitan Bapan Namalyari ya nu pawan miaawyun na mani tawu, mas malakêy madyag lay nangadadawak. (Genesis 11:4-6) ![](https://cdn.door43.org/obs/jpg/360px/obs-en-04-03.jpg) Pikakaatag Bapan Namalyari ya sabi la ta amên a sila nikakaintindi. Sa pakapakun baydu, a la maisunduy panyag lan tori buy balayan ya binêg Babel. Ya labay sabin Babel, “asê nikakaintindi”. Kabay nangapikikyat ya mani tawu sa babun luta. (Genesis 11:7-9) ![](https://cdn.door43.org/obs/jpg/360px/obs-en-04-04.jpg) Sa kinakarangan na tawun na inlumibas, pinakisabyan Bapan Namalyari ya gisay liyaki. Si lagyu na, Abram. Sinabin Bapan Namalyari kan Abram, “Abram ma, lakwanan muy lugal mu buy mani kamag-anak mu. Maku ka sa gisay lugal la ipakit ku kamu. Pagpalên kata. Daygên katan gisay maragul la bansa. Makilala ka sa magmikakanayun na lugal. Ya manawup kamu, pagpalên ku ya, nuwa ya makipati kamu, isumpa ku ya. Buy sa kapamilatan mu, pagpalên kuy kaganawan tawu sa buun babun luta.” (Genesis 12:1-3) ![](https://cdn.door43.org/obs/jpg/360px/obs-en-04-05.jpg) Sinunul Abram si Bapan Namalyari. Pikilaku nay asawa nay si Sarai. Pikilaku na êt ta mani ipus na. Gintan lay kaganawan pibandiyan la. Naku sila sa lugal la inturun Bapan Namalyari kalla. Ya lagyun lugal la abaytu, Canaan. (Genesis 12:4-5) ![](https://cdn.door43.org/obs/jpg/360px/obs-en-04-06.jpg) Pamakalatêng Abram sa Canaan, sinabin Bapan Namalyari kanay, “Mangêlêw ka sa palitêng mu. Ya kaganawan lutay makitan mu, idin ku kamu buy sa mani layi mu.” Kabay nanugêl lina baydu si Abram. (Genesis 12:6) ![](https://cdn.door43.org/obs/jpg/360px/obs-en-04-07.jpg) Gisay allu, nakitan Abram si Melquizedek. Gisa yan parin Bapan Namalyari ya Makapangyarian sa Kaganawan. Pinagpalan Melquizedek si Abram. Sinabi na, “Pagpalên kan Bapan Namalyari ya Makapangyarian sa Kaganawan ya sabay ya magbandin langit buy luta.” Indin Abram kan Melquizedek ya ikamapuy baagin pibandiyan na ya nagtan na. (Genesis 14:18-20) ![](https://cdn.door43.org/obs/jpg/360px/obs-en-04-08.jpg) Malakê pun na tawun na inlumibas, nuwa si Abram buy si Sarai, ayin sila pun êt anak. Nanguman nagsabi si Bapan Namalyari kan Abram, “Makaanak kan liyaki buy ya maapu mu, kasin lakên bêtêwên sa langit.” Naniwala yabay si Abram sa pangakun Bapan Namalyari. Kabay napakadyag yan matinêk sa pangêlêw Bapan Namalyari. (Genesis 15:1-2, 5-6) ![](https://cdn.door43.org/obs/jpg/360px/obs-en-04-09.jpg) Pamakayari, nanyag kasunduwan si Bapan Namalyari kan Abram. Sinabin Bapan Namalyari kana, “Abram ma, biyan katan anak ka liyaki ya paubat sa layi mu. Idin ku kamu buy sa maapu muy lugal un Canaan.” Nuwa sa panawun na abitu, ayin pun êt anak si Abram. (Genesis 15:4) *Nakasulat sa Sabin Bapan Namalyari: Genesis 11-15* ## 5. Ya Impangakuy Anak https://openbiblestories.org/l/blx/story-5/ ![](https://cdn.door43.org/obs/jpg/360px/obs-en-05-01.jpg) Mapuy tawun na inlumibas, nuwa si Abram buy si Sarai, ayin sila pun êt anak. Kabay sinabin Sarai kan Abram, “Abram ma, gawan a ku pambiyan Bapan Namalyarin anak buy tuwa kina, labay kuy tangênên muy ipus ku ya si Agar amên maanakan mu ya para kangku.” (Genesis 16:2a) ![](https://cdn.door43.org/obs/jpg/360px/obs-en-05-02.jpg) Kabay tinangên nabay Abram si Agar. Liyaki ya anak la. Ismael la impalagyu la sa kulaw. Nuwa nangimun naman si Sarai kan Agar. Sên labintatluy tawun nan Ismael, nanguman pinagkasabin Bapan Namalyari si Abram. (Genesis 16:2b, 17:1) ![](https://cdn.door43.org/obs/jpg/360px/obs-en-05-03.jpg) Sinabin Bapan Namalyari kan Abram, “Siku si Bapan Namalyari ya Pinakamakapangyarian. Mangaku waku kamun asê mitas sa impangaku ku kamu.” Kabay nanduku si Abram buy sinabin Bapan Namalyari kana, “Abram ma, pakadyag kan bapan malakêy bansa. Idin ku sa maapu muy lugal Canaan. Siku êt ta kilalanên lan Bapan Namalyari la kanuman.” (Genesis 17:2-4, 8) ![](https://cdn.door43.org/obs/jpg/360px/obs-en-05-04.jpg) Sinabi pun êt Bapan Namalyari kan Abram, “Makaanak si Sarai. Ya anak na, sabay ya impangakun anak. Bêgên mu yan Isaac. Tuparên ku kanay inpangaku ku kamu. Maubat kan Isaac ka maragul la bansa. Para êt baydu kan Ismael. Nuwa kan Isaac ku tuparên na inpangaku ku kamu.” Pamakayari, pinalitan Bapan Namalyari ya lagyun Abram un Abraham. Ya labay sabin ati, “Bapan malakê”. Pinalitan êt Bapan Namalyari ya lagyun Sarai un Sara. Ya labay sabin êt ati, “Prinsesa”. (Genesis 17:5, 15-16) ![](https://cdn.door43.org/obs/jpg/360px/obs-en-05-05.jpg) Pamakalibas gisay tawun, nanganak ka si Sara. Isaac ka impalagyu la sa anak la kaparisun sinabin Bapan Namalyari kalla. Sa panawun na abaytu, dinalan nanay tawun Abraham buy si Saray naman, siyam mapuy tawun nayna. (Genesis 21:1-3) ![](https://cdn.door43.org/obs/jpg/360px/obs-en-05-06.jpg) Sên dinumagul lana si Isaac, sinubukan Bapan Namalyari ya paniwalan Abraham kana. Sinabi na kan Abraham, “Sa pangulimên mu kangku, pakilaku mu si Isaac ya kakaidwan mun anak buy iandug mu ya kangku.” Nanguman nanunul si Abraham sa utus Bapan Namalyari. (Genesis 22:1-3) ![](https://cdn.door43.org/obs/jpg/360px/obs-en-05-07.jpg) Kaban mamita silan Abraham buy si Isaac papakun sa lugal la pamiandugan, sinabin Isaac, “Bapay, dilag kitay nan kayu para sa pamiandug, nuwa ayin kita pun iandug.” Nakitbay si Abraham, “Indi, agana kay nan migaganaka anak ku, ta si Bapan Namalyari naman na mam-i.” (Genesis 22:4-8) ![](https://cdn.door43.org/obs/jpg/360px/obs-en-05-08.jpg) Pamakalatêng la sa lugal la lakwên la, in-is-êl Abraham si Isaac buy impakalêk na ya sa pamiandugan. Iandug ga dayin Abraham si Isaac. Nuwa sinabin Bapan Namalyari kanay, “Abraham ma, agana minay patin ya anak mu! Tanda kinay manunul ka kangku, ta a mu in-imut kangkuy anak mu.” (Genesis 22:9-12) ![](https://cdn.door43.org/obs/jpg/360px/obs-en-05-09.jpg) Nakitan Abraham ma gisay liyakin tupa ya nakasaêt ta sungay sa sangan kayuy nayêpa. Sabay ya abituy indin Bapan Namalyari ya iandug la. Kaban pan-iandug lay tupa, sadyay tulan Abraham. (Genesis 22:13-14) ![](https://cdn.door43.org/obs/jpg/360px/obs-en-05-10.jpg) Pamakayari, sinabin Bapan Namalyari kan Abraham, “Gawan nakal-an kan idin kangkuy kaganawan, pati yay anak muy liyaki, pan-ipangaku ku kamu, pagpalên kata. Buy si maapu mu, pakadyag kasin lakên bêtêwên sa langit. Buy gawan sinunul mu ku, ya kaganawan pamilya mu sa babun luta, pagpalên ku sa kapamilatan layi mu.” (Genesis 22:15-18) *Nakasulat sa Sabin Bapan Namalyari: Genesis 16-22* ## 6. Binyanan Bapan Namalyarin Asawa si Isaac https://openbiblestories.org/l/blx/story-6/ ![](https://cdn.door43.org/obs/jpg/360px/obs-en-06-01.jpg) Sên tuway na si Abraham, bayintawuy nay naman si Isaac. Kabay in-utus Abraham ya ipus nay maku sa lugal mani kamag-anak na amên mangkap mapag-asawan Isaac. (Genesis 24:1-4) ![](https://cdn.door43.org/obs/jpg/360px/obs-en-06-02.jpg) Sên dakun umnuy allun nakasakay ipus sa kamelyu papakun sa lugal la sinabi kana, nakakit yan lib-ung buy tinunggên ya baydu. Sên kaawat tana, nipanlumatêng bayduy mani babayi amên mangasuy. Nanalangin na ipus kan Bapan Namalyari, ya sinabi na, “Bapan kun Namalyari, sawpan mu ku kayêk. Idi yaku baydi sa danin lib-ung ya pangasuyan mani dalaga. Manyawad dakun palatandaan kamu. Si dalagay mamaynêm kangku buy sa mani kamelyu ku, saba siyay nay pan-idin mu kangku ya pag-asawan Isaac.” Kaban manalangin ya pun, dilag inlumatêng bayduy naiduy babayi. Rebeccay lagyu na. Si Apu na, si lakay Nahor ya patêl nan Abraham. Si Rebecca, pinaynêm nay ipus buy pinaynêm na êt ta kamelyu na. (Genesis 24:10-21) ![](https://cdn.door43.org/obs/jpg/360px/obs-en-06-03.jpg) Sên pamakayarin pinaynêm Rebeccay ipus, nuli ya. Buy nakilaku êt kanay ipus. Pamakalatêng ipus sa balin Rebecca, pikisabyan nay pamilyan Rebekah, “Nu malyari dayi kayêk, kilaku kangku si Rebecca ta amên pag-asawa yan Isaac ya anak un amung ku.” Pinatang si Rebecca un indu na, “Rebecca, kilaku ka nayi kana o asê?” Nakitbay si Rebecca, “Awu, kilaku waku kana.” Sên inlumatêng silay na sa balin Abraham, nakit Isaac si Rebecca buy tinanggap yan Isaac pag-asawa na. (Genesis 24: 22-49, 57-58, 67) ![](https://cdn.door43.org/obs/jpg/360px/obs-en-06-04.jpg) Sên nilabas sa malakêy tawun, nati yana si Abraham. Ya kaganawan impangakun Bapan Namalyari sa kasunduwan la, impangaku na êt kan Isaac. Impangaku êt Bapan Namalyari kan Isaac ka makaanak yan bapan lakê, agyan layus si Rebecca. ![](https://cdn.door43.org/obs/jpg/360px/obs-en-06-05.jpg) Nanalangin si Isaac para kan Rebecca. Sinabi na, “Bapa, nu kalabayan mun kayêk, makaanak kay.” Indin naman Bapan Namalyari ya inyawad na, ta nangalêk si Rebecca buy kambal pun êt ta anak la. Nuwa kaban idi sila pun sa bitukan indu la, mipapati silay na. Kabay nanalangin si Rebecca, “Bapa kun Namalyari, sabêt ta ata malyarin sa maanak ku?” (Genesis 25:21-22) ![](https://cdn.door43.org/obs/jpg/360px/obs-en-06-06.jpg) Nakitbay si Bapan Namalyari kan Rebecca, “Magin luway maragul la bansay mani anak mu. Nuwa si bungsu, sabay ya pagsuywan panganay.” (Genesis 25:23) ![](https://cdn.door43.org/obs/jpg/360px/obs-en-06-07.jpg) Inlumatêng nganay allun panganak Rebecca. Naudit buy masabut ta balat panganay. Pinalagyunan lan Esau wa kulaw. Ya bungsuy naman, nakatalan ya sa bitis Esau. Jacob ya impalagyu la sa bungsu. (Genesis 25:24-26) *Nakasulat sa Sabin Bapan Namalyari: Genesis 24:1-25:26* ## 7. Pinagpalan Bapan Namalyari si Jacob https://openbiblestories.org/l/blx/story-7/ ![](https://cdn.door43.org/obs/jpg/360px/obs-en-07-01.jpg) Kaban mandumagul la anak lan Isaac buy si Rebecca, mas kakaidwan Rebecca si Jacob ta labay labay nay mapalingun sa kaganawan. Buy kaidwan naman êt Isaac si Esau ta labay labay yaman êt Esau wa mapanulipêt. (Genesis 25:27-28) ![](https://cdn.door43.org/obs/jpg/360px/obs-en-07-02.jpg) Gisay allu, sên nuli si Esau ubat sa panulipêtan, nalayang-layang ya. Kabay sinabi na kan Jacob, “Patêl kuway, biyan muku watin kanên na inlutu mu.” Nakitbay si Jacob, “Patêl kuway, biyan katan kanên, nuwa idin mu kangkuy pangapanganay mu.” Indin na man Esau ya pangapanganay na. Kabay binyanan yan kanên un Jacob. (Genesis 25:29-34) ![](https://cdn.door43.org/obs/jpg/360px/obs-en-07-03.jpg) Sên tuway na si Isaac, labay nan manyawad yan kangêdan kan Bapan Namalyari para kan Esau gawan siyay panganay. Nuwa bayu na nadyag ga abitu, nalinlang nginan Rebecca buy si Jacob. Gawan a sina makitan Isaac ka kasabi na, nagtalingkayu si Jacob ya sabay siya si Esau. Insulud nay yaming Esau buy binyanan nan balat kambing ya bêng na buy takyay na. (Genesis 27:1-10, 14-17) ![](https://cdn.door43.org/obs/jpg/360px/obs-en-07-04.jpg) Pamakadanin Jacob kan Isaac, sinabi na, “Siku si Esau. Naku waku di amên pagpalên mu.” Indap Isaac si Esau ya kasabi na, gawan natalan nay sabut kambing sa takyay Jacob. Nadêp na êt ta yaming Esau ya insulud Jacob. Kabay pinagpalan Isaac si Jacob. (Genesis 25:19-29) ![](https://cdn.door43.org/obs/jpg/360px/obs-en-07-05.jpg) Natubag tubag si Esau sa dinyag nan Jacob. Kabay sinabi na, “Kingwa nayna bayna kangkuy pangapanganay ku. Amêsên kingwa na pun êt ta kangêdan ya para kangku!” Impalanun Esau ya nu mati yay bapa la, patin na si Jacob. (Genesis 25:41) ![](https://cdn.door43.org/obs/jpg/360px/obs-en-07-06.jpg) Nuwa natandan Rebeccay palanun Esau. Kabay inpalakun Isaac buy si Rebecca si Jacob sa balin mani kamag-anak Rebecca sa marayuy lugal. (Genesis 27:41-28:5) ![](https://cdn.door43.org/obs/jpg/360px/obs-en-07-07.jpg) Kaban manugêl baydu si Jacob sa kamag-anak Rebecca, nakapag-asawa ya buy nakaanak yan labinluway anak ka lawyaki buy gisay babayi. Buy pinabandi yan Bapan Namalyari. (Genesis 29:1-43) ![](https://cdn.door43.org/obs/jpg/360px/obs-en-07-08.jpg) Pamakalibas luwampuy tawun, mag-udung ngana si Jacob sa Canaan. Pikilaku nay pamilya na, mani ipus buy mani saysay na. (Genesis 31:17) ![](https://cdn.door43.org/obs/jpg/360px/obs-en-07-09.jpg) Nuwa malimu si Jacob gawan sabaytun idi ya baydu sa Canaan, labay yan patin Esau. Kabay si dinyag na, namipagtan yan mani ayup kan Esau. Kaban pan-idin mani in-utus Jacob ba mani ayup, sinabi la, “Kakay, ya mani ayup pa ati, ubat kan Jacob ba ipus mu. Marani minan makit ta patêl mu.” (Genesis 32:1-5) ![](https://cdn.door43.org/obs/jpg/360px/obs-en-07-10.jpg) Nuwa manay nan pinatawad Esau si Jacob. Kabay sên napikakit silan manguman, sadyay tula la. Napatêtbêk kay biyay Jacob sa Canaan. Sên nati si Isaac, in-ilbêng yan Esau buy si Jacob. Buy ya pangakun Bapan Namalyari sa kasunduwan na kallan Abraham buy kan Isaac, impangakuy naman êt Bapan Namalyari kan Jacob. (Genesis 33:1-17, 37:1) *Nakasulat sa Sabin Bapan Namalyari: Genesis 25:27-33:20* ## 8. Inligtas Bapan Namalyari si Jose buy Pamilya na https://openbiblestories.org/l/blx/story-8/ ![](https://cdn.door43.org/obs/jpg/360px/obs-en-08-01.jpg) Gisay allu, sên tuway na si Jacob, in-utus nay kakaidwan nay anak ya naglagyun Jose. Sinabi na kana, “Anak kuway, lakwên mun êlêwên na mapatêl muy magpastul ayup.” (Genesis 37:12-14) ![](https://cdn.door43.org/obs/jpg/360px/obs-en-08-02.jpg) Kakasakitan yan nakêm mapatêl na si Jose, gawan tanda lay mas yan kakaidwan bapa la buy tanda lay taynêp Jose ya sabay siyay mag-ari kalla. Kabay sên nakitan la si Jose, dinakêp la ya buy insaliw sa mani manaliw ipus. (Genesis 37:3-11, 17-28) ![](https://cdn.door43.org/obs/jpg/360px/obs-en-08-03.jpg) Bayu sila nuli, kingwa lay yaming Jose, gininit lay ati buy insawsaw sa dayan kambing. Buy impakit lay ati sa bapa la buy sinabi la, “Bapay, êlêwên muy yaming nga ati nu sabay ya yaming Jose.” Sên nakitan Jacob ba yaming na, sinabi na, “Pata indukudu! Sabay ya yaming Jose ya ati! Napati yina lawês mangatubag ga ayup!” Kabay sadyay lungkut Jacob. (Genesis 37:31-35) ![](https://cdn.door43.org/obs/jpg/360px/obs-en-08-04.jpg) Pakan sa a na tanda, gintan naman sa Egiptu si Jose un mani nakasaliw kana. Maragul buy makapangyarian na bansay Egiptu. Insaliw la si Jose sa gisay mabandi ya manungkulan sa gubernu. Mapanunul si Jose sa amung na. Kabay pinagpala yan Bapan Namalyari. (Genesis 37:36; 39:1-6) ![](https://cdn.door43.org/obs/jpg/360px/obs-en-08-05.jpg) Kalabay makikanayun kanay asawan amung na. Nuwa asê nalabay si Jose gawan kasalanan sa Bapan Namalyari ya abitu. Kabay nanubag kanay asawan amung na. Sinangkanan na si Jose un alwan pêtêg. Kabay gawan di, dinakêp si Jose buy insukul. Nuwa agyan idi sa sukulan si Jose, pawa ya pun êt tapat kan Bapan Namalyari. Kabay pinagpala yan Bapan Namalyari. (Genesis 39:6-23) ![](https://cdn.door43.org/obs/jpg/360px/obs-en-08-06.jpg) Pamakalibas dakun umnuy tawun, nakasukul pun êt si Jose agyan ayin yan kasalanan. Gisay yabi, nanaynêp pa Arin Egiptu. Katilwan nanaynêp pa Ari buy migaganaka ya, ta ayin naman mamipaintindi kana nu sabêt ta labay sabin mani nataynêp na. (Genesis 41:1-8) ![](https://cdn.door43.org/obs/jpg/360px/obs-en-08-07.jpg) Kabay inpabêg Ari si Jose, gawan nabalitan nay dilag kaagyuan si Jose un mamipaintindi nu sabêt ta labay sabin panaynêp. Sen idi ya si Jose sa arapan Ari, sinabin Ari kana, “Jose ya, ipaintindi mu kangkuy labay sabin nataynêp ku.” Sinabin Jose kana, “Panggalangên na Ari, inpatandan Bapan Namalyari ya labay sabin nataynêp mu. Ati ya labay sabin nataynêp mu. Mamipagtan si Bapan Namalyari un pituy tawun ya malakêy pupul, nuwa pamakayarin pituy tawun, pituy tawun êt layang buy ayin pupulun.” (Genesis 41:14-36) ![](https://cdn.door43.org/obs/jpg/360px/obs-en-08-08.jpg) Sên inpatanda nay labay sabin nataynêp na, dinayêw Ari si Jose. Kabay dinyag na yan mamaala sa buun Egiptu. Buy sabay siyay ikalway pinakamatag-ay sa Arin Egiptu. (Genesis 41:37-40) ![](https://cdn.door43.org/obs/jpg/360px/obs-en-08-09.jpg) In-utus Jose ya mani tawu baydu, “Sa lalên pituy tawun malakêy pupul, manipun kitamun kanên amên nu lumatêng nga pituy tawun na ayin pupul, dilag kitamun kanên.” (Genesis 41:46-49) ![](https://cdn.door43.org/obs/jpg/360px/obs-en-08-10.jpg) Alwan kay Egiptuy nakadanas un layang, nun a ya pamilya êt Jacob ya manugêl sa Canaan. (Genesis 41:57; 42:1) ![](https://cdn.door43.org/obs/jpg/360px/obs-en-08-11.jpg) Kabay sinabin Jacob sa mani anak nay lawyaki ya, “Maku kaw manaliw kanên sa Egiptu.” Pamakalatêng la baydu, a la tanday si Jose ya mamisaliw kanên kalla. Nuwa nakilala silan Jose. (Genesis 42:1-20) ![](https://cdn.door43.org/obs/jpg/360px/obs-en-08-12.jpg) Sên napaptêgan nay nagbayuy nay ugalin mapatêl na, nagpakilala ya kalla, sinabi na, “Siku si Jose ya patêl yu! Agana kaw malimu! Agyan nadawak ka palanu yu kangku sabitun insaliw yu ku amên magin ipus, mangêd da man na dinyag Bapan Namalyari kangku! Manugêl kaw na baydi kaawyun ku amên mabiyan kataw kanên buy pamilya yu.” (Genesis 42:21-24; 45:3-15) ![](https://cdn.door43.org/obs/jpg/360px/obs-en-08-13.jpg) Pamakaulin mapatêl na, sinabi la sa bapa la, “Bapay nabyay pun awêd si Jose buy labay nan manugêl kitamu sa Egiptu kaawyun na!” Sên natandan Jacob ba ati, natula-tula ya. (Genesis 45:25-28) ![](https://cdn.door43.org/obs/jpg/360px/obs-en-08-14.jpg) Kabay agyan tuway na si Jacob, naku ya pun êt sa Egipto, kaawyun nay pamilya na. Nanugêl silay na baydun kaganawan. Buy bayu ya nati, inyawad na kan Bapan Namalyari ya kangêdan para sa kaganawan anak na. (Genesis 46:1; 49:1-28) ![](https://cdn.door43.org/obs/jpg/360px/obs-en-08-15.jpg) Kabay ya inpangakun Bapan Namalyari kan Abraham, para êt baydu kan Isaac, kan Jacob, buy sa labinluway anak Jacob êt buy sa pamilya la. Buy ya layin mani anak la, sabay ya napakadyag labinluway layin Israel buy angga amêsên, idi sila pun sa lugal la inpangakun Bapan Namalyari kalla. *Nakasulat sa Sabin Bapan Namalyari: Genesis 37-50* ## 9. Binêg Bapan Namalyari si Moises https://openbiblestories.org/l/blx/story-9/ ![](https://cdn.door43.org/obs/jpg/360px/obs-en-09-01.jpg?direct&) Agyan nati yana si Jose, nanugêl pun êt sa Egiptuy mani layi na sa malakêy tawun. Buy baydu silay na inlumakê. Binêg silan Israelita. (Exodo 1:6-7) ![](https://cdn.door43.org/obs/jpg/360px/obs-en-09-02.jpg?direct&) Pamakalibas bay-in apatta ralan na tawun, nalitêpan mani Egiptu buy ari la nu parasaantu silan inligtas Jose. Nalimu sila sa mani Israelita gawan mas malakêy Israelita kaysa kalla. Kabay si dinyag la, inipus lay mani Israelita. (Exodo 1:8-11) ![](https://cdn.door43.org/obs/jpg/360px/obs-en-09-03.jpg?direct&) Pinilit mani Egiptun mag-ubray mani Israelita para kalla. Pinapaydêng la silan mangaragul la bali buy mani balayan. Sadyay lungkut mani Israelita gawan masakit ta pan-ipadyag kalla. Nuwa pinagpala silan Bapan Namalyari buy kapanlulumakê la. (Exodo 1:11-14) ![](https://cdn.door43.org/obs/jpg/360px/obs-en-09-04.jpg?direct&) Natandan êt arin Egiptuy kapanlulumakên mani Israelita. Kabay in-utus nay mani tawu na, “Ya kaganawan kulaw wa lawyakin Israelita, isamwag yu sila sa Ilug Nilo amên mati sila.” (Exodo 1:22) ![](https://cdn.door43.org/obs/jpg/360px/obs-en-09-05.jpg?direct&) Amêsên, dilag gisay Israelitay babayi ya nanganak un gisay kulaw wa liyaki. (Exodo 2:1-2) ![](https://cdn.door43.org/obs/jpg/360px/obs-en-09-06.jpg?direct&) Sên alay na maitaguy kulaw, nangisip silan paralan amên asê mati ya anak la. Indin la sa gisay basket ta kulaw buy impalpaw lay basket sa agid un Ilug Nilo. In-utus lay kaka na, “Maku ka sa ilug ta bantayan muy patêl mu.” (Exodo 2:3-4) ![](https://cdn.door43.org/obs/jpg/360px/obs-en-09-07.jpg?direct&) Amêsên, naku sa ilug ya anak ka babayin ari buy nakit nay basket. Impakwa nay ati buy sên indin na kanay basket, nakitan nay kulaw wa idi sa lalê. Buy intuwad nan anak nay ati. Nangwa yan babayin Israelita amên saysayên na sa bali nay kulaw. A na tanday si kingwa nay manaysay kulaw, sabay awêd da namteg indun kulaw. Sên asina manusuy kulaw, in-udung nginan indu na sa anak ari. Moises ya impalagyu kanan ari. (Exodo 2:5-10) ![](https://cdn.door43.org/obs/jpg/360px/obs-en-09-08.jpg?direct&) Gisay allu, sên bayintawuy na si Moises, nakit nay gisay Israelitay ipus ya dinugêdugên gisay Egiptu. Sinubukan Moises ya iligtas nay Israelita. (Exodo 2:11-12) ![](https://cdn.door43.org/obs/jpg/360px/obs-en-09-09.jpg?direct&) Indap Moises ayin nakakit kana. Kabay si dinyag na, pinati nay Egiptu buy in-ilbêng nay ati. Pakan sa a na tanda, dilag awêd nakakit kana buy impatanday dinyag na sa Ari. (Exodo 2:12-15) ![](https://cdn.door43.org/obs/jpg/360px/obs-en-09-10.jpg?direct&) Sên natandan Ari ya dinyag Moises, inpalanu nay ipapati na si Moises. Tinumakas si Moises buy naku ya sa kakyangan amên a ya mapatin mani sundalus Ari. (Exodo 2:15) ![](https://cdn.door43.org/obs/jpg/360px/obs-en-09-11.jpg?direct&) Nagpastul un tupa si Moises sa kakyangan. Bayduy na êt nag-asawa buy nakaanak yan luway liyaki. (Exodo 2:21-22; 3:1) ![](https://cdn.door43.org/obs/jpg/360px/obs-en-09-12.jpg?direct&) Pamakalibas 40 tawun, gisay allu, kaban magpastul mani tupa si Moises, nakakit yan gisay nayêpay kayuy magdêkêt-dêkêt. Nuwa asê maulam ma kayu. Nagdani ya sa nayêpay kayu amên makitan nan mangêd da ati. Nuwa kaban magdani ya, nagsabi si Bapan Namalyari kana, “Moises, itas muy isteping mu, ta idi ka sa Banal la lugal.” (Exodo 3:1-5) ![](https://cdn.door43.org/obs/jpg/360px/obs-en-09-13.jpg?direct&) Sinabi pun êt Bapan Namalyari kan Moises, “Nakit kuy kasakitan mani Israelita ya mani tawu ku. Kabay palakwên kata sa Arin Egiptu amên ibus muy mani Israelita sa pangaipus la baydu. Idin ku sa mani Israelitay lugal un Canaan, ya lutay impangaku ku kallan Abraham, Isaac, buy Jacub.” (Exodo 3:6-10) ![](https://cdn.door43.org/obs/jpg/360px/obs-en-09-14.jpg?direct&) Nakitbay si Moises, “Parasaantu nu patangên nakun mani tawu nu sisabêt ta namiutus kangku? Sabêt ta ipakitbay ku kalla?” Sinabin Bapan Namalyari, “Sabin mu kallay ‘Siku wi Sikuy Bapan Namalyarin namiutus kamu ya Namalyari ya pan-ulimênên mani ninunu yu ya silan Abraham, Isaac, buy Jacub.’ Abiin na lagyu ku kanuman.” (Exodo 3:11-14) ![](https://cdn.door43.org/obs/jpg/360px/obs-en-09-15.jpg?direct&) Nuwa asê kalabay maku si Moises sa Arin Egiptu, gawan malimu ya buy pan-isipin nay asê masalaysay ya maisabi na. Kabay in-utus êt Bapan Namalyari ya patêl nay si Aaron amên sawpan na ya. Sinabi êt Bapan Namalyari kalla, “Agyan nakdêy ya ulun Arin Egiptu, agana kaw mangaynay nakêm.” (Exodo 4:10-17) *Nakasulat sa Sabin Bapan Namalyari: Exodo 1-4* ## 10. Ya Mapuy Pamasakit https://openbiblestories.org/l/blx/story-10/ ![](https://cdn.door43.org/obs/jpg/360px/obs-en-10-01.jpg?direct&) Naku si Moises buy si Aaron sa arin Egiptu buy sinabi la, “In-utus kay Bapan Namalyari ya sabin kamuy ati, ‘Sêpat mun ibus sa mani Israelita ta sabay ya mani tawu ku.’” Nuwa kay kinaliyan silayna man ari, ya sinabi na, “Ti, a ku kalabay, ta a ku kakilalay abiin na Namalyari yu.” A na imbus sa mani Israelita, nun a lakwas na pun pinabayat ta ubra la! (Exodo 5:1-14) ![](https://cdn.door43.org/obs/jpg/360px/obs-en-10-02.jpg?direct&) Pawan pansabin arin Egiptuy, “A ku ibus ya mani Israelita.” Kabay namipadanas si Bapan Namalyarin mapuy pamasakit sa Egiptu. Sinabi na, “Sa kapamilatan mani pamasakit ta ati, ipakit kuy makapangyarian naku pun sa arin Egiptu buy sa mani diyusdiyusan la.” (Exodo 6:1) ![](https://cdn.door43.org/obs/jpg/360px/obs-en-10-03.jpg?direct&) Ya nunan pamasakit, dinyag Bapan Namalyarin dayay Ilug Nilo. Nuwa agyan parabaydu pun na dinyag na, sinabi yaman ari, “A ku ibus ya mani Israelita.” (Exodo 7:14-24) ![](https://cdn.door43.org/obs/jpg/360px/obs-en-10-04.jpg?direct&) Namipagtan naman si Bapan Namalyarin sadyay lakên tugak sa buun Egiptu. Nakisabi ya ari kan Moises, “Ipatas muy mani tugak.” Sên ayin nay mani tugak, sinabi ya man Ari ya, “A ku ibus ya mani Israelita.” (Exodo 8:1-15) ![](https://cdn.door43.org/obs/jpg/360px/obs-en-10-05.jpg?direct&) Namipagtan na êt balikatu si Bapan Namalyari. Pamakayarin balikatu, langêw wa êt. Kabay sinabin ari, “Nu ipatas yuy mani langêw, ibus kataw na.” Nanalangin si Moises buy intas Bapan Namalyari ya mani langêw sa buun Egiptu. Nuwa sên ayin na êt ta langêw, sinabi ya êt ari, “A ku ibus ya mani Israelita.” (Exodo 8:16-32) ![](https://cdn.door43.org/obs/jpg/360px/obs-en-10-06.jpg?direct&) Pamakayari, namipagtan na êt si Bapan Namalyarin sakit sa mani ayup mani Egiptu. Nati ya mani ayup, nuwa sinabi ya êt ari, “A ku ibus sa mani Israelita.” (Exodo 9:1-7) ![](https://cdn.door43.org/obs/jpg/360px/obs-en-10-07.jpg?direct&) Sinabin Bapan Namalyari kan Moises, “Manakmal kan abu buy isamwag mu sa angin sa arap arin Egiptu.” Sên dinyag Moises sa abitu, inlusuy mani Egiptu, nuwa ayin naman na mani Israelita. Nuwa sinabi ya êt ari, “A ku ibus ya mani Israelita.” (Exodo 9:8-12) ![](https://cdn.door43.org/obs/jpg/360px/obs-en-10-08.jpg?direct&) Namauran na êt elu si Bapan Namalyari. Nasiray malakêy gitnan mani Egiptu buy nati ya mani tawuy nipag-awas sa bali. Inpabêg ari silan Moises buy si Aaron. Sinabi na, “Nangasalanan naku. Dali! Malyari kawnan mita.” Kabay nanalangin si Moises buy tinunggên na panguran elu. (Exodo 9:13-32) ![](https://cdn.door43.org/obs/jpg/360px/obs-en-10-09.jpg?direct&) Nuwa paramanbaydu, nangasalanan manguman na ari. Nakdêy pun êt ta ulu na buy pansabin na pun êt ta, “A ku ibus ya mani Israelita.” (Exodo 9:33-35) ![](https://cdn.door43.org/obs/jpg/360px/obs-en-10-10.jpg?direct&) Namipagtan na êt sadyay lakên durun si Bapan Namalyari sa buun Egiptu. Si abituy kaganawan gitnay asê nasira sabitun nanguran elu, kinnan naman mani durun. (Exodo 10:1-20) ![](https://cdn.door43.org/obs/jpg/360px/obs-en-10-11.jpg?direct&) Pamakayari, pinadiglêm ma man Bapan Namalyari ya buun Egiptu sa tatluy allu. Kabay asê nakaawas sa bali ya mani Egiptu. Nuwa nasawang ngaman sa lugal buun Israelita. (Exodo 10:21-26) ![](https://cdn.door43.org/obs/jpg/360px/obs-en-10-12.jpg?direct&) Agyan siyam may pamasakit ta nadanasan mani Egiptu, pansabin na pun êt ta, “A ku ibus ya mani Israelita.” Gawan asê kalabay mallêngêy ari, namipagtan na êt si Bapan Namalyarin ikamapuy pamasakit buy sabay yay ati ya mamibayun isip ari. (Exodo 10:27; 11:1) *Nakasulat sa Sabin Bapan Namalyari: Exodo 5-10* ## 11. Ya Pallumibas ang-el Bapan Namalyari https://openbiblestories.org/l/blx/story-11/ ![](https://cdn.door43.org/obs/jpg/360px/obs-en-11-01.jpg?direct&) Sinabin Bapan Namalyari kan Moises, “Nu asê pun êt ibus arin Egiptuy mani Israelita, patin kuy kaganawan panganay ya lawyaki sa Egiptu, tawu man o ayup.” Sên natandan ari ya ati, sinabi na pun êt ta, “A ku ibus sa mani Israelita.” (Exodo 11:4-8) ![](https://cdn.door43.org/obs/jpg/360px/obs-en-11-02.jpg?direct&) Sinabin Bapan Namalyari kan Moises, “Isabi mu sa mani tawuy manampalataya kangkuy mamili silan gisay tupa o kambing nga mamangêd.” (Exodo 12:21) ![](https://cdn.door43.org/obs/jpg/360px/obs-en-11-03.jpg?direct&) Sinabi pun êt Bapan Namalyari ya, “Patin lay tupa o kambing buy si dayan ati, ikuskus la sa pasbul la amên asê mati ya panganay lay lawyaki. Itêktêk lay karnin ayup buy kêna lay ati. Mangan sila êt tinapay ya ayin pamalbag. Kaylangan silan maglêan sa pamita sa Egiptu.” (Exodo 12:3-13) ![](https://cdn.door43.org/obs/jpg/360px/obs-en-11-04.jpg?direct&) Sinunul mani Israelitay kaganawan in-utus Bapan Namalyari kalla. Sên limbanakan yabi, pinatin Bapan Namalyari ya kaganawan panganay ya lawyaki sa buun Egiptu. (Exodo 12:29-30) ![](https://cdn.door43.org/obs/jpg/360px/obs-en-11-05.jpg?direct&) Nuwa ya kaganawan balin Israelita, kinuskusan lan daya. Kabay inlibasan silan ang-el Bapan Namalyari. Sa pakapakun baydu, ayin nati sa mani panganay la buy niligtas sila gawan sa dayan tupay nakakuskus. (Exodo 12:27-28) ![](https://cdn.door43.org/obs/jpg/360px/obs-en-11-06.jpg?direct&) Nuwa taganan asê naniwalay mani Egiptu kan Bapan Namalyari. A la sinunul la sinabin Bapan Namalyari. Kabay asê inlibasan ang-el Bapan Namalyari ya bali lay ayin daya. Pinatin ang-el Bapan Namalyari ya kaganawan panganay lay lawyaki buy ya mani panganay lay ayup. (Exodo 12:29) ![](https://cdn.door43.org/obs/jpg/360px/obs-en-11-07.jpg?direct&) Nati ya kaganawan panganay lay lawyakin Egiptu, agyan na mani idi sa sukulan buy ya anak ka panganay un ari. Sa yabin abitu, sadyay panangis mani Egiptu gawan sa lungkut la. (Exodo 12:30) ![](https://cdn.door43.org/obs/jpg/360px/obs-en-11-08.jpg?direct&) Amêsên, impabêg ari silan Moises buy si Aaron. Sinabi na kalla, “Pakilaku yinay mani Israelita. Mita kaw na baydi.” Para êt bayduy sinabin mani Egiptu kalla. (Exodo 12:31-32) *Nakasulat sa Sabin Bapan Namalyari: Exodo 11:1-12:32* ## 12. Ya Paglipay mani Israelita sa Naudit ta Dagat https://openbiblestories.org/l/blx/story-12/ ![](https://cdn.door43.org/obs/jpg/360px/obs-en-12-01.jpg?direct&) Natula tulay mani Israelita gawan mita silay na sa Egiptu. A silay na ipus. Maku silay na sa lugal la impangakun Bapan Namalyari sa layin Abraham. Indin mani taga Egiptuy kaganawan inyawad mani Israelita, agyan na mani gintu, pilak, o maulagay gamit. Dilag dakun umnuy tawuy taga kaatag êt ta lugal ya nakilaku sa mani Israelita sa pamita la sa Egiptu gawan nanampalataya sila êt kan Bapan Namalyari. (Exodo 12:33-36) ![](https://cdn.door43.org/obs/jpg/360px/obs-en-12-02.jpg?direct&) Sa pamitan mani Israelita, pawa silan pan-awyunan buy panbantayan Bapan Namalyari. Nuna ya kalla sa kapamilatan matag-ay ya ulap ya sabay ya pansunulun la. Nu yabi yana, pakadyag yan apuy ya ati. Si kay sêpat lan daygên, sumunul sila kan Bapan Namalyari. (Exodo 13:21-22) ![](https://cdn.door43.org/obs/jpg/360px/obs-en-12-03.jpg?direct&) Asê namanan, nagbayuy isip arin Egiptu buy mani tawu na. Labay lan paudungun na mani Israelita buy manguman lan daygên ipus. Nalyari ya ati amên ipakit Bapan Namalyari ya mas makapangyarian ya kaysa sa arin Egiptu buy sa mani diyusdiyusan la. (Exodo 14:5) ![](https://cdn.door43.org/obs/jpg/360px/obs-en-12-04.jpg?direct&) Kabay tinagal un ari buy mani sundalus nay mani Israelita amên manguman nan daygên ipus. Sên nakit mani Israelitay mani sundalus, nalimu sila. Nasipit sila sa mani sundalus buy sa Dagat ta Naudit. Kabay nakatangis sila. Si sinabi la, “Uysiyan namita kay yapun sa Egiptu ta? Pakan kay mati kay awêd baydi!” (Exodo 14:6-12) ![](https://cdn.door43.org/obs/jpg/360px/obs-en-12-05.jpg?direct&) Sinabin Moises sa mani tawu, “Agana kaw malimu, ta si Bapan Namalyari ya makilaban para kantamu.” Sinabi yaman Bapan Namalyari kan Moises, “Sabin mu sa mani tawuy isusundu lay pamita la sa Naudit ta Dagat.” (Exodo 14:13-16) ![](https://cdn.door43.org/obs/jpg/360px/obs-en-12-06.jpg?direct&) Nagpabunak ka ulap sa mani Egiptu buy sa mani Israelita. Kabay asê nakitan mani sundalus Egiptuy mani Israelitay pantagalên la. (Exodo 14:19-20) ![](https://cdn.door43.org/obs/jpg/360px/obs-en-12-07.jpg?direct&) Sinabin Bapan Namalyari kan Moises, “Itag-ay muy gamêt mu sa dagat buy miatag ga lanêm.” Nanunul si Moises. Nanyupyup pa malakas sa angin buy niatag ga lanêm. Kabay napakadyag dan ya bunak dagat. (Exodo 14:21) ![](https://cdn.door43.org/obs/jpg/360px/obs-en-12-08.jpg?direct&) Kabay nakadan na mani Israelita sa namalay luta. (Exodo 14:22) ![](https://cdn.door43.org/obs/jpg/360px/obs-en-12-09.jpg?direct&) Sên ayin nay ulap, nakit mani taga Egiptuy mamwayuy nay mani Israelita. Kabay tinagal la sila. (Exodo 14:23) ![](https://cdn.door43.org/obs/jpg/360px/obs-en-12-10.jpg?direct&) Dinuman sila êt sa dinanan mani Israelita, nuwa gawan sa dinyag Bapan Namalyari, nilêmlêm ya mani sakayan la sa burak. A lay na tanda nu sabêt ta daygên la buy nipan-angaw sila tana, “Muwayu kitamina! Ya Bapan Namalyarin mani Israelitay mallumaban kantamu!” (Exodo 14:24-25) ![](https://cdn.door43.org/obs/jpg/360px/obs-en-12-11.jpg?direct&) Sên nakalipay yay mani Israelita, in-utus Bapan Namalyari si Moses, “Ipaktang muy gamêt mu sa dagat.” Sên dinyag nay abitu, niuman na lanêm buy natugpawan na mani taga Egiptu. Nalumud da kaganawan sundalus Egiptu. (Exodo 14:26-28) ![](https://cdn.door43.org/obs/jpg/360px/obs-en-12-12.jpg?direct&) Sên nakitan mani Israelitay nati yay mani Egiptu, nanampalataya sila kan Bapan Namalyari. Naniwala sila êt ta prupetan Bapan Namalyari si Moises. (Exodo 14:31) ![](https://cdn.door43.org/obs/jpg/360px/obs-en-12-13.jpg?direct&) Nagsayay mani Israelita, gawan inligtas silan Bapan Namalyari. A sila nati buy a silay na ipus! Malaya silay nan maglingkud kan Bapan Namalyari. Malakêy ingkanta la sa pagpasalamat la sa pangabus la. Nagkanta silan mani pangulimên gawan inligtas silan Bapan Namalyari. (Exodo 15:1-21) ![](https://cdn.door43.org/obs/jpg/360px/obs-en-12-14.jpg?direct&) In-utus Bapan Namalyari kallay, “Balang tawun, magkalutu kaw sa buwan ati. Mangwa kaw gisay tupay mangêd buy ilutu yuy ati. Pamakayari, kêna yu kaawyun na tinapay ya ayin pamalbag. Daygên yuy abiin bilang pangganaka yu sa pamiligtas ku kamuyu sa Egiptu.” (Exodo 12:1-20) *Nakasulat sa Sabin Bapan Namalyari: Exodo 12:33-15:21* ## 13. Ya kasunduwan Bapan Namalyari buy mani Israelita https://openbiblestories.org/l/blx/story-13/ ![](https://cdn.door43.org/obs/jpg/360px/obs-en-13-01.jpg?direct&) Sên nailipay yan Bapan Namalyari ya mani Israelita sa Dagat ta Naudit, inawyunan nay mani Israelita sa pamita la papakun sa Bung-uy Sinai. Sabitun nuna, baydu êt nakitan Moises ya nayêpay kayuy magdêkêt-dêkêt. Ninggat ya mani Israelita sa aypan bung-uy. (Exodo 19:1-2) ![](https://cdn.door43.org/obs/jpg/360px/obs-en-13-02.jpg?direct&) Sinabin Bapan Namalyari kan Moises buy sa kaparisu nan mani Israelita, “Nu sunulun yu ku buy ya pikasunduwan tamu, kay sikaw nay mani tawu ku ya magsuyu kangku.” (Exodo 19:5-6) ![](https://cdn.door43.org/obs/jpg/360px/obs-en-13-03.jpg?direct&) Pamakalibas tatluy allu, pamakayarin paglêan mani tawu, nagtabuy si Bapan Namalyari sa Bung-uy Sinai. Nangilat, nangimat, nag-asuk sa bung-uy buy dilag silan nalêngêy mamasnêg ga sênêg patutut. Nanginagin ya mani tawu gawan sa limu la. Nuwa kay si Moises ya tinulutan Bapan Namalyarin sinumukpa sa bung-uy. (Exodo 19:14-19) ![](https://cdn.door43.org/obs/jpg/360px/obs-en-13-04.jpg?direct&) Impatandan Bapan Namalyari kan Moises sa dilag yan kasunduwan sa mani Israelita. Sinabi na, “Siku si Yahweh, ya Bapan Namalyari yu. Buy sikuy niligtas kamuyu ubat sa Egiptu. Kabay agana kaw mangulimên sa kaatag.” (Exodo 20:1-3) ![](https://cdn.door43.org/obs/jpg/360px/obs-en-13-05.jpg?direct&) “Agana kaw manyag mani ribultuy ulimênên yu. Mangimun naku nu daygên yuy abitu. Agana yu gamitin na lagyu ku un ayin panggalang. Ituwad yun banal la ikapituy allu, ta abituy Allun Pagpaynawa. Mag-ubra kaw sa anêm ma allu. Nuwa sa ikapituy allu, magpaynawa kaw amên maganaka yu ku.” (Exodo 20:4-11) ![](https://cdn.door43.org/obs/jpg/360px/obs-en-13-06.jpg?direct&) “Galangên yuy mani mangatwa yu. Agana kaw mamati. Agana kaw makikanayun. Agana kaw manakaw. Agana kaw maglaram. Agana yu pagnasên na asawan kaparisu yu o bali na o sabêt man na pibandiyan na.” (Exodo 20:12-17) ![](https://cdn.door43.org/obs/jpg/360px/obs-en-13-07.jpg?direct&) Insulat Bapan Namalyari ya mani utus sa ati sa luway bis-il batu buy indin kan Moises. Dilag pun êt kaatag ga mani utus ya indin si Bapan Namalyari amên sunulun mani Israelita. Nu sunulun mani Israelitay mani utus sa ati, impangakun Bapan Namalyari ya pagpalên na sila buy allu-allun. Nuwa nu a lay naman sunulun na ati, parusan silan Bapan Namalyari. (Exodo 31:18) ![](https://cdn.door43.org/obs/jpg/360px/obs-en-13-08.jpg?direct&) Nagpadyag êt si Bapan Namalyarin gisay karagulan tolda. Binêg lay atin Toldan Pagtipunan. Dilag luway parti ya toldan ati. Gisay maragul la kurtinay pisaêtan sa luway partin ati. Ayin malyarin sumun sa ikaluway parti liban tana sa pinakapuun pari, gawan idi baydu si Bapan Namalyari. (Exodo 26:1-37) ![](https://cdn.door43.org/obs/jpg/360px/obs-en-13-09.jpg?direct&) Nu sisabêt man na asê manunul sa utus Bapan Namalyari, kaylangan yan mag-andug ayup sa arapan Toldan Pagtipunan. Patin pari ya ayup buy sêlbên nay ati sa pamiandugan. Ya dayan in-andug ga ayup, sabay ya mananip kasalanan buy mallinis kana sa arapan Bapan Namalyari. Pinilin Bapan Namalyari si Aaron, ya kakan Moises buy mani anak na amên silay magin pari. (Exodo 27:1-8; 28:1) ![](https://cdn.door43.org/obs/jpg/360px/obs-en-13-10.jpg?direct&) Nangakuy mani Israelita, ya sinabi la, “Sunulun yan na mani utus Bapan Namalyari ya kay si Bapan Namalyari ya ulimênên yan. Buy sikay ya mani tawu na.” Nuwa pamakalibas dakun umnuy allun pangaku la, nanabyat ta kasalanan la kan Bapan Namalyari. (Exodo 24:3; 32:1) ![](https://cdn.door43.org/obs/jpg/360px/obs-en-13-11.jpg?direct&) Dakun umnuy allun Moises sa bung-uy ya makisabi kan Bapan Namalyari. Asê nakaêtêng nga mani tawu kana. Kabay gintan lay gintu la kan Aaron, ta impadyag lan diyusdiyusan la amên ulimênên la. (Exodo 32:3) ![](https://cdn.door43.org/obs/jpg/360px/obs-en-13-12.jpg?direct&) Nanyag gabay si Aaron un gisay gintuy diyusdiyusan la kalupan gisay nabêlêng nga baka. Inulimên mani Israelitay diyusdiyusan buy namiandug sila baydu. Natubagtubag si Bapan Namalyari sa dinyag la buy labay na dayin patin na kaganawan Israelita. Nuwa nanalangin si Moises para kalla, ya sinabi na, “Bapan Namalyari, agana mu sila dayi patin!” Kabay a sila pinatin Bapan Namalyari. (Exodo 32:4, 6, 9-14) ![](https://cdn.door43.org/obs/jpg/360px/obs-en-13-13.jpg?direct&) Pamakalunsan Moises sa bung-uy, nakitan na mismuy mangulimên sa diyusdiyusan ya mani Israelita. Kabay nanubag ya buy imbundag nay luway bis-il la batuy pinisulatan mani utus Bapan Namalyari. (Exodo 32:19) ![](https://cdn.door43.org/obs/jpg/360px/obs-en-13-14.jpg?direct&) Pamakayari, inmêmêkmêk Moises ya diyusdiyusan buy indin na sa lanêm buy inpaynêm na sa mani tawu. Buy si Bapan Namalyari yaman, namipadanas yan pamasakit kalla. Kabay nati ya malakê kalla. Nanguman sinumukpa si Moises sa bung-uy. Nanalangin yan patawarên Bapan Namalyari ya mani tawu. Pinatawad daman Bapan Namalyari ya mani tawu. In-uman insulat Moises sa bayun batuy mani utus na. Pamakayari, nanguman inawyunan Bapan Namalyari ya mani Israelita sa pamita la papakun sa lugal la impangakun Bapan Namalyari kalla. (Exodo 32:20, 31-35; 34:4-7) *Nakasulat sa Sabin Bapan Namalyari: Exodo 19-34* ## 14. Kinabitan tan mani Israelitan mamita sa kakyangan https://openbiblestories.org/l/blx/story-14/ ![](https://cdn.door43.org/obs/jpg/360px/obs-en-14-01.jpg?direct&) Sên natanggap pa man mani Israelitay mani utus Bapan Namalyari, inawyunan na sila sa pamita la papakun sa lugal la impangaku na kalla. Buy idi ya êt sa ulap pa mumuna kalla. (Exodo 40:36-38) ![](https://cdn.door43.org/obs/jpg/360px/obs-en-14-02.jpg?direct&) Sabitun nuna, impangakun Bapan Namalyari kallan Abraham, Isaac buy Jacob ya idin nay lugal Canaan kalla buy sa mani layi la. Nuwa dilag mani tawuy manugêl baydu ya pambêgen lan Cananeo. Si ati silay mani Cananeo, a sila maniwala kan Bapan Namalyari, ta si pan-ulimênên la, mani diyus-diyusan buy kaatag ga mani bagay. (Deuteronomy 34:4) ![](https://cdn.door43.org/obs/jpg/360px/obs-en-14-03.jpg?direct&) Sinabin Bapan Namalyari sa mani Israelita, “Kaylangan ipatas yuy mani Cananeo sa lugal la abitu. Agana kaw makipagkasundu kalla. Agana yu sila pag-asawa. Kaylangan sirên yuy mani diyusdiyusan la. Nu a yu sunulên na utus ku kamuyu, ulimênên yinay mani diyusdiyusan la. Sa parabaydu, alway nan sikuy pan-ulimênên yu.” (Exodo 34:11-16) ![](https://cdn.door43.org/obs/jpg/360px/obs-en-14-04.jpg?direct&) Sên nadani yay mani Israelita sa Canaan, namili si Moises un tisay lawyaki ya ubat sa labinluway layin Israel. In-utus silan Moises, ya sinabi na, “Maku kaw sa lugal Canaan, nuwa a kaw magpakit. Elêwên yuy lugal nu mangêd o asê. Buy êlêwên yu êt ta mani tawuy manugêl baydu nu mangêd silan makilaban o asê.” (Bilang 13:1-20) ![](https://cdn.door43.org/obs/jpg/360px/obs-en-14-05.jpg?direct&) Si mani in-utus Moises, binuyan lay lugal la Canaan un apattapuy allu. Pamakaudung la, sinabin mapu, “Baydu sa Canaan, mangêd da luta buy malakêy inggitnay maêkan! Nuwa a kitamu malyarin makilaban kalla, tagawan napas-êy ya mani balayan baydu. Mangatag-ay ya mani tawuy manugêl baydu! Nu lumaban kitamu kalla, kay mati kitamu!” (Bilang 13:21-29, 31) ![](https://cdn.door43.org/obs/jpg/360px/obs-en-14-06.jpg?direct&) Nuwa dilag pun êt luway katawuy naku baydu ya si Caleb buy si Josue. Sinabi la, “Pêtêg ga mangatag-ay buy nikapapas-êy ya mani tawuy manugêl baydu, nuwa agyu tamu silan sambutên, ta si Bapan Namalyari ya lumaban kalla para kantamu.” (Bilang 13:30) ![](https://cdn.door43.org/obs/jpg/360px/obs-en-14-07.jpg?direct&) Nanubag ga mani tawu kallan Moises buy kan Aaron. Sinabi la, “Uy siyan gintan yu kay yadi ta? Mangêd pun na idi kay sa Egiptu kaysa mati kay baydi buy mani asawa yan buy maanak yan.” Nuwa si Moises, Aaron, Josue, buy Caleb, nakilunuslunus sila sa mani Israelita, ya sinabi la, “Agana kaw manalungat kan Bapan Namalyari!” Nuwa sinabin mani tawu, “A yan labay ya sikaw wa mamunu kanyan. Patin yan kaw buy mamili kay bayun mamunu kanyan amên miudung kay sa Egiptu.” (Bilang 14:1-4) ![](https://cdn.door43.org/obs/jpg/360px/obs-en-14-08.jpg?direct&) Kabay nanubag si Bapan Namalyari sa mani Israelita. Mamakuni bengat tan sinumawang sa Tolday Pagtipunan ya sawang Bapan Namalyari. Sinabi na kan Moises, “Kay silan Caleb buy si Josue ya makasun sa lugal la impangaku ku kamuyu. Buy ya kaganawan nag-idad da luwampu patag-ay, kinabitan la tanan mita sa kakyangan angga sa mati sila. A sila makasun sa lugal la impangaku ku kamuyu.” (Bilang 14:10, 27-35) ![](https://cdn.door43.org/obs/jpg/360px/obs-en-14-09.jpg?direct&) Sên nalêngên mani tawuy abiin, nalungkut sila gawan nangasalanan sila. Kingwa lay mani almas la ta amên maku sa Canaan buy makilaban. Nuwa sinabin Moises kalla, “Agana kaw maku baydu, ta a kaw sawpan Bapan Namalyari!” Nuwa a sila nallêngê kan Moises. (Bilang 14:39-44) ![](https://cdn.door43.org/obs/jpg/360px/obs-en-14-10.jpg?direct&) Nasambut sila buy malakêy nati kalla, gawan a sila sinawpan Bapan Namalyari. Kabay sa lalên apattapuy tawun, ya nitagan kalla, nag-udung sila buy kinabitan lan mamita sa kakyangan. (Bilang 14:44-45) ![](https://cdn.door43.org/obs/jpg/360px/obs-en-14-11.jpg?direct&) Agyan idi sila sa kakyangan, indin Bapan Namalyari ya mani kaylangan la. Allu-allu pambiyan silan Bapan Namalyari un tinapay ya naubat sa langit. “Manna” ya impalagyu la sa tinapay. Binyanan sila êt Bapan Namalyarin puyu amên makaêkan silan karni. Sa lalên apattapuy tawun, asê nasiray yaming la buy isteping, gawan sa pallingun Bapan Namalyari kalla. (Exodo 16:12-15, 35; Deutoronomy 8:3-4) ![](https://cdn.door43.org/obs/jpg/360px/obs-en-14-12.jpg?direct&) Agyan idi sa kakyangan ya mani Israelita, binyanan silan Bapan Namalyarin lanêm. Nuwa si ati silay mani Israelita, nagdiklamu sila pun êt kan Bapan Namalyari buy kan Moises. Pakan tuparên naman Bapan Namalyari ya mani impangaku na kallan Abraham, Isaac, buy kan Jacob. (Bilang 20: 2-7) ![](https://cdn.door43.org/obs/jpg/360px/obs-en-14-13.jpg?direct&) Gisay allu, ayin mainêm ma mani tawu. Kabay sinabin Bapan Namalyari kan Moises, “Pakisabyan muy batu buy dilag mag-awas sa lanêm ma maubat baydu.” Nuwa asê sinunul Moises ya sinabin Bapan Namalyari kana, ta katilwa nan binarug têkên nay batu buy a nay naman pikisabyan na ati. Dilag inumawas sa lanêm ya naubat sa batu, nuwa nanubag si Bapan Namalyari sa dinyag Moises. Sinabin Bapan Namalyari kana, “Gawan a mu sinunul la sinabi ku kamu, a ka makasun sa lutay impangaku ku.” (Bilang 20:8-12) ![](https://cdn.door43.org/obs/jpg/360px/obs-en-14-14.jpg?direct&) Pamakayarin apattapuy tawun, si kaganawan mani tawuy nanubag kan Bapan Namalyari, nati yana sa kakyangan. Nilatêng sila sa danin lugal la impangakun Bapan Namalyari. Sa panawun na abitu, tuway na si Moises. Kabay pinilin Bapan Namalyari si Josue amên sabay siyay mangawyun sa mani tawu. (Deuteronomy 34:9; 18:15) ![](https://cdn.door43.org/obs/jpg/360px/obs-en-14-15.jpg?direct&) Pinasukpan Bapan Namalyari si Moises sa gisay kakatag-ayan na bung-uy amên mabatsawan nay lugal la impangaku na kalla. Nuwa si si Moises, a ya nidaus baydu, ta nati yina sa bung-uy. Kabay nalungkut ta mani tawu sa tatlumpuy allu. Pamakayarin paglungkut la, si Josue yay mamunu kalla. Nagin mangêd da pinunu si Josue gawan manampalataya ya buy manunul ya kan Bapan Namalyari. (Deuteronomy 34:1-9) *Nakasulat sa Sabin Bapan Namalyari: Exodo 16-17; Bilang 10-14; 20; 27; Deuteronomio 34* ## 15. Ya Lugal la Impangakun Bapan Namalyari https://openbiblestories.org/l/blx/story-15/ ![](https://cdn.door43.org/obs/jpg/360px/obs-en-15-01.jpg?direct&) Amêsên, ati yay panawun na maglipay yay mani Israelita sa Ilug Jordan amên sumun sila sa lugal la impangakun Bapan Namalyari kalla. Kabay si si Josue, namili yan luway liyaki buy sinabi na kalla, “Maglipay kaw na sa ilug buy maku sa balayan Jericu. Magdakêy kaw sa bakud balayan un ayin makatanda amên matandan tamu nu napas-êy ya kapati tamu o asê.” Pamakalatêng la baydu, nakitan lay napas-êy ya bakud Jericu. Natbêng lay gisay babayi ya mangabyayan sa kapamilatan lawini na. Rahab ba lagyu na. Agyan parabayduy pangababayi na sabitun nuna, amêsên manampalatayay na kan Bapan Namalyari. Kabay sinawpan nay luway Israelita buy ati silay luway Israelita, nangaku sila kana, “Nu duyungun yan na ati, a ka malimu. Ta a ka dakun mapakun buy pamilya mu.” (Josue 2:1) ![](https://cdn.door43.org/obs/jpg/360px/obs-en-15-02.jpg?direct&) Nu sumun na mani Israelita sa lugal la impangakun Bapan Namalyari kalla, ayin silan kaatag ga danan nun a lipayên na Ilug Jordan. Sinabin Bapan Namalyari kan Josue, “Paunên muy mani pari.” Sên nagturak ka mani pari sa lanêm, bêngat tan tinunggên na agus ilug. Kabay nakalipay sila sa ilug un namalay dinanan la. (Josue 3:1-4, 14-17) ![](https://cdn.door43.org/obs/jpg/360px/obs-en-15-03.jpg?direct&) Sên nakalipay yay mani Israelita sa Ilug Jordan, sinabin Bapan Namalyari kan Josue, “Duyungun yinay balayan Jerico. Si muna mun daygên, iutus muy mani sundalus buy mani pari ya magdurut sila sa balayan Jericu, tisa sa gisay allu, sa anêm ma allu.” Sinunul lay sinabin Bapan Namalyari kalla. (Josue 6:1-14) ![](https://cdn.door43.org/obs/jpg/360px/obs-en-15-04.jpg?direct&) Sa ikapituy allu, makatapitun nagdurut sa balayan na mani Israelita. Sa ikapituy pagdurut la, kaban pangkayupan malakêy pari ya mani patutut la, nipan-angaw wa malakêy sundalus. (Josue 6:15-16) ![](https://cdn.door43.org/obs/jpg/360px/obs-en-15-05.jpg?direct&) Kaban man-angaw buy pangkayupên mani Israelitay patutut la, nalasak ka bakud Jericu gawan sa sawup Bapan Namalyari! Inlasak mani Israelitay kaganawan nakit la sa balayan, kaparisun in-utus Bapan Namalyari kalla. Nuwa kay si Rahab buy ya pamilya na, a sila dakun napakun. Kabay ubat ta baydu, sisi Rahab buy ya pamilya na, nakiawyun silay na sa mani Israelita. Sên nabalitan kaatag pun na manugêl sa Canaan ya dinyag malakêy Israelita sa balayan Jerico, nalimu sila. (Josue 6:20-25, 27) ![](https://cdn.door43.org/obs/jpg/360px/obs-en-15-06.jpg?direct&) In-utus Bapan Namalyari sa mani Israelitay, “Agana kaw makipagkaluguran sa mani tawun Canaan.” Nuwa a la sinunul si Bapan Namalyari. Dilag mani taga Gibeon ya nagsabin a pêtêg kan Josue. Sinabi la, “Naubat kay pun kayêk sa marayuy lugal.” Pakan si pêtêg, kay nadani ya balayan la sa Jericu. Sinabi la pun êt ta, “Kabay kalabay kay makipagkaluguran kamuyu.” Agyan asê pun nanalangin kan Bapan Namalyari si Josue buy malakêy Israelita nu sabêt ta sêpat lan daygên, tambêng silay nay naman nakipagkaluguran. (Josue 6:3-15) ![](https://cdn.door43.org/obs/jpg/360px/obs-en-15-07.jpg?direct&) Sên natandan kaatag ga malakêy tawuy manugêl sa Canaan ya nakipagkaluguran na malakêy taga Gibeon sa malakêy Israelita, nibêbêtêk sila buy inlabanan lay mani taga Gibeon. Namiutus saman na mani taga Gibeon un dakun umnuy tawu amên maku kan Josue buy sabin lay, “Sawpan yu kay makilaban!” (Josue 10:3-6) ![](https://cdn.door43.org/obs/jpg/360px/obs-en-15-08.jpg?direct&) Amêsên, sên natandan Josue ya kay nadani awêd da lugal malakêy taga Gibeon, nanubag ya gawan alwan pêtêg ga sinabi la. Nuwa inisip Josue, “Agyan parabayduy dinyag la kantamu, sawpan tamu sila gawan nakipagkaluguran sila kantamu.” Kinawasakan, tambêng lan dinuyung nga malakêy kalaban lay sabay ya tawun Canaan. (Josue 10:7-9) ![](https://cdn.door43.org/obs/jpg/360px/obs-en-15-09.jpg?direct&) Binulakat Bapan Namalyari ya pangisip tawun Canaan. Sên tinumakas sila, si dinyag Bapan Namalyari, namauran yan malakêy mangaragul la elu sa malakêy tawun Canaan. Kabay nangamamati sila. (Josue 10:10-11) ![](https://cdn.door43.org/obs/jpg/360px/obs-en-15-10.jpg?direct&) Kaban asê pun nasambut mani Israelitay kapati la, pinatgên Bapan Namalyari ya mamut. Asê pun pinatanglêw Bapan Namalyari ya mamut. Gawan sa sawup Bapan Namalyari, nanambut ta malakêy Israelita. (Josue 10:12-14) ![](https://cdn.door43.org/obs/jpg/360px/obs-en-15-11.jpg?direct&) Pamakayarin abitu, si mani tawun Canaan na nitagan, a la natanggap ya nasambut sila. Kabay nanguman silay na êt nibêbêtêk amên makilaban na êt sa malakêy Israelita. Nuwa nasambut silay na êt Josue buy mani sundalus na. (Josue 11:1-22) ![](https://cdn.door43.org/obs/jpg/360px/obs-en-15-12.jpg?direct&) Pamakayarin laban, indakaydakay Bapan Namalyari sa balang tribun Israel ya lugal un Canaan ya impangaku na kalla. Kabay si dinyag Bapan Namalyari, binyanan nan kapatêtbêkan na malakêy Israelita sa malakêy tawuy idi sa palitêng la. (Josue 11:23) ![](https://cdn.door43.org/obs/jpg/360px/obs-en-15-13.jpg?direct&) Sên tuway na si Josue, tinipun nay mani Israelita buy impaganaka na kallay utus buy pangaku ya sinabin Bapan Namalyari kalla sabitun idi sila sa Bung-uy Sinai. Pamakayari, nangakuy balang gisa, “Manugêl kay tapat kan Bapan Namalyari buy manunul kay sa mani pan-ipadyag na kanyan.” (Josue 24:1-27) *Nakasulat sa Sabin Bapan Namalyari: Josue 1-24* ## 16. Ya mani Mamitanggul Israel https://openbiblestories.org/l/blx/story-16/ ![](https://cdn.door43.org/obs/jpg/360px/obs-en-16-01.jpg) Kaban nabyay pun si Josue, manunul la malakêy Israelita kan Bapan Namalyari. Nuwa sên nati ya si Josue, a layna sinunul la utus Bapan Namalyari buy a lay na intabi ya malakêy tribuy manugêl pun baydu sa Canaan. Kabay si nalyari, nag-umpisan nangulimên na malakêy Israelita sa diyusdiyusan un malakêy tribuy idi baydu, alwaynan si Bapan Namalyari ya in-ulimên la. Buy sa panawun na abitu, ayin sila pun ari. Kabay si pandaygên mani Israelita, kay abituy kalabayan sarili la. (Mamitanggul 2:10-12) ![](https://cdn.door43.org/obs/jpg/360px/obs-en-16-02.jpg) Gawan sa a la panunul, si dinyag Bapan Namalyari, pinasawan na silan masakup malakêy kapati la. Si kaatag ga pibandiyan, tinakaw buy si kaatag êt, inlasak malakêy kapati la. Buy si dakun umnuy Israelita, pinati la. Kabay mamakapalunus sa biyay malakêy Israelita angga sa inlumatêng nga panawun na nasabi lay, “Bapan Namalyari, magsisi kay yana. Kabay idukuduku yan kamuy iligtas mu kay dayi sa mani kapati yan!” (Mamitanggul 2:13-16) ![](https://cdn.door43.org/obs/jpg/360px/obs-en-16-03.jpg) Gawan sa sinabin mani Israelita, nabêgbêg ga nakêm Bapan Namalyari. Kabay namili yina êt gisay tawuy midêng amên mamitanggul kalla. Sa pakapakun baydu, masambut lay mani kapati la buy magin napatêtbêk ka biyay la. Nuwa nalitêpan lay na êt mangulimên kan Bapan Namalyari buy nanguman silayna êt nangulimên sa mani diyusdiyusan. Kabay pinasawan silay na êt Bapan Namalyarin masambut malakêy taga Midian. (Mamitanggul 3:9, 15; 6:1) ![](https://cdn.door43.org/obs/jpg/360px/obs-en-16-04.jpg) Nasakup tribun Midian ya malakêy Israelita sa lalên pituy tawun buy kay silay magnabang un kaganawan pupul malakêy Israelita. Buy gawan sa limun malakêy Israelita, nagtagu sila sa lêyang amên a sila makitan un malakêy tribun Midian. Sa katatawliyan, nanguman silayna êt nakidukuduku kan Bapan Namalyari, ya sinabi la, “Bapa yan na Namalyari, magsisi kay yana. Iligtas mu kay dayi sa mani kapati yan!” (Mamitanggul 6:1-7) ![](https://cdn.door43.org/obs/jpg/360px/obs-en-16-05.jpg) Gisay allu, in-utus Bapan Namalyari ya ang-el na sa gisay liyaki ya maglagyun Gideon. Nalatêng ang-el si Gideon ya nakatagu un manara' amên a ya makitan tribun Midian. Sinabin ang-el kana, “Gideon na, napas-êy ka sundalus, inawyunan kan Bapan Namalyari. Pinili na kan mamitanggul sa mani Israelita.” (Mamitanggul 6:11-15) ![](https://cdn.door43.org/obs/jpg/360px/obs-en-16-06.jpg) Sinabin ang-el, “Pan-iutus Bapan Namalyari kamuy lasakên muy diyusdiyusan bapa mu.” Nuwa malimu si Gideon sa malakêy tawu. Kabay si dinyag na, nagpayabi ya pun. Sa yabin abitu, intugawtugaw buy tinudaktudakan nay diyusdiyusan bapa na. Pamakayari, namipaydêng yan pamiandugan para kan Bapan Namalyari buy nag-andug ya baydu. (Mamitanggul 6:25-27) ![](https://cdn.door43.org/obs/jpg/360px/obs-en-16-07.jpg) Sên pamakamaranun, nakit malakêy tawuy nangayayapung ngay diyusdiyusan la. Kabay nasuluksuluk sila. Si dinyag malakêy tawu, inlaku la si Gideon, ta labay la yan patin. Nuwa pamakalatêng la baydu, sinabin bapan Gideon kalla, “Uysiyan pansawupan yinay namalyari ta? Nu pêtêg yana Namalyari ya, paulayan yu ya ta agyu nan itanggul la sarili na!” Kabay sa pakapakun baydu, naligtasan Gideon. (Mamitanggul 6:28-31) ![](https://cdn.door43.org/obs/jpg/360px/obs-en-16-08.jpg) Sadyay lakên Midian na nag-udung amên manakaw sa mani Israelita. Kabay sinagyat Gideon na malakêy Israelita amên mibêtêk silan lumaban sa malakêy Midian. Nuwa bayu sila inlumaban, nanyawad yan luway tanda' kan Bapan Namalyari nu saba siyay pinili nan mamitanggul sa malakêy Israelita. (Mamitanggul 6:33-36) ![](https://cdn.door43.org/obs/jpg/360px/obs-en-16-09.jpg) Si nuna nan dinyag, kingwa nay êwês buy in-amak na sa luta. Buy sinabi na kan Bapan Namalyari ya, “Nu saba sikuy pinili mu, bas-ên muy êwês ku, nuwa ya palitêng na, nayangu.” Dinyag yabay Bapan Namalyari ya inyawad na. Sên gisay na êt ta yabi, in-amak nayna êt manguman na êwês na sa luta buy inyawad nayna êt kan Bapan Namalyari ya, “Nu saba sikuy pinili mu, bas-ên muy palitêng êwês ku, nuwa nayangu ya êwês ku.” Kabay dinyag êt Bapan Namalyari ya inyawad Gideon. (Mamitanggul 6:36-40) ![](https://cdn.door43.org/obs/jpg/360px/obs-en-16-10.jpg) Dilag 32,000 ya sundalus Israelita ya naku kan Gideon. Nuwa sinabin Bapan Namalyari kanay, “Baw-asên muy sundalus mu, ta malakê kaw.” Kabay sinabin Gideon sa malakêy sundalus na, “Sisabêt kamuyuy malimun lumaban sa mani Midian?” “Sikay,” abiin na pakitbay 22,000 sundalus. Kabay pinauli na silayna. Nuwa sinabi ya êt Bapan Namalyari kanay, “Baw-asên mu pun êt, ta malakê kaw pun.” Kabay impauli ya êt Gideon na kaatag angga sa 300 tay sundalus sa nitagan. (Mamitanggul 7:2-8) ![](https://cdn.door43.org/obs/jpg/360px/obs-en-16-11.jpg) Sa yabin abitu, sinabin Bapan Namalyari kan Gideon, “Maglimêd kan maku sa kampun mani Midian. Nu malêngê muy pansabin la, a kay na malimu.” Kabay naku si Gideon sa kampun malakêy kapati la. Pamakalatêng na baydu, nalêngê nay sinabin gisay sundalus tungkul sa taynêp na. Buy sinabin kaluguran abituy sundalus, “Ya labay sabin taynêp mu, sambutun kitamun Gideon.” Pamakalêngên Gideon, nangulimên ya kan Bapan Namalyari. (Mamitanggul 7:9-15) ![](https://cdn.door43.org/obs/jpg/360px/obs-en-16-12.jpg) Pamakayari, nag-udung si Gideon sa mani 300 sundalus na buy binyanan na silan tisa-tisay patutut, banga, buy atang. Sa uras sa abitu, kaban mamabêlêw pun na mani kapati la, pinalitêngan mani sundalus Israelitay kampu la. Nuwa ya atang la, tinugpawan lan banga amên a sila makitan kapati lay nakapalitêng silay na awêd. (Mamitanggul 7:16) ![](https://cdn.door43.org/obs/jpg/360px/obs-en-16-13.jpg) Sên nakapalitêng ngay mani sundalus Israelita, piaagnan laynan binalbal la banga buy kinayupan lay patutut buy insaway lay, “Ya laban na ati, para kan Bapan Namalyari buy para kan Gideon! Kaksaw kaw na!” (Mamitanggul 7:17-18) ![](https://cdn.door43.org/obs/jpg/360px/obs-en-16-14.jpg) Sên nimatay mani Midian, binulakat Bapan Namalyari ya isip la. Kabay sa pakapakun baydu, kay sila-sila tanay naman na nangapitatabtab. Kabay nangamamati sila buy si kaatag, nipagbating. Nuwa kinamat sila pun êt mani Israelita angga sa napati lay malakê. Sa uras sa abitu, ya bilang mani Midian na nati, 120,000. Ya mani nitagan, intabin mani Israelita sa kaatag ga lugal. Sa pakapakun baydu, inligtas Bapan Namalyari ya mani Israelita. (Mamitanggul 7:19-25) ![](https://cdn.door43.org/obs/jpg/360px/obs-en-16-15.jpg) Sa nalyarin abitu, sinabin mani Israelita kan Gideon, “Labay yan na sikay magin ari yan.” Nuwa sinabi yaman Gideon kalla, “Biyan yu ku tanan gintuy ya nakwa tamu sa mani kapati tamu.” Kabay malakê yabay ya kwaltay indin kana. (Mamitanggul 8:22-26) ![](https://cdn.door43.org/obs/jpg/360px/obs-en-16-16.jpg) Amêsên, nanyag si Gideon asê mangêd sa pangêlêw Bapan Namalyari. Ta pamakayari nan nangwan gintu, dinyag nan yaming ya sabay ya ulimênên mani tawu. Gawan sa dinyag Gideon, pinagbukutan êt mani Israelita si Bapan Namalyari, ta nakiêmên sila kan Gideon na mangulimên sa diyusdiyusan. (Mamitanggul 8:27) ![](https://cdn.door43.org/obs/jpg/360px/obs-en-16-17.jpg) Gawan sa dinyag la, pinarusan silan Bapan Namalyari. Kabay nasambut silay naman sa kapati la. Nakidukuduku silay na êt kan Bapan Namalyari, ya sinabi la, “Bapa yan na Namalyari, magsisi kay yana. Iligtas mu kay dayi sa mani kapati yan!” Kabay namiutus sa êt si Bapan Namalyarin kaatag ga mamitanggul sa mani Israelita. Ati ya pawan pandaygên mani Israelita. Mangasalanan sila, pamparusan sila, magsisi sila, buy pan-iligtas silan Bapan Namalyari. Abiin na piuman-uman lan pandaygên. ![](https://cdn.door43.org/obs/jpg/360px/obs-en-16-18.jpg) Sa kapupusan, nanyawad da mani Israelita kan Bapan Namalyari. Sinabi la, “Ya mani tribuy nakapalitêng kanyan, dilag silan ari. Kabay si labay yan dayi, biyan mu kay êt ari. Nu malyari dayi, matag-ay ya, napas-êy buy makapamunu ya kanyan sa laban.” Nuwa sinabin Bapan Namalyari kallay, “A ku labay ya panyawadên yu. Nuwa paraman baydu, idin ku kamuyuy panyawadên yu.” (1 Samuel 8:6-22) *Nakasulat sa Sabin Bapan Namalyari: Hukom 1-3; 6-8* ## 17. Ya Kasunduwan Bapan Namalyari buy si David https://openbiblestories.org/l/blx/story-17/ ![](https://cdn.door43.org/obs/jpg/360px/obs-en-17-01.jpg) Dilag gisay liyaki sa Israel. Si lagyu na, Saulu. Sabay ya nunan ari sa Israel. Matag-ay ya buy mamangêd da pangaliyaki na. Sa nuna nan pamunu, mangêd da dinyag na. Nuwa sa kinakadangan na panawun, dinumawak ka pamunu na buy a nayna pansunulun na kalabayan Bapan Namalyari. Kabay si dinyag Bapan Namalyari, namili yan gisay liyaki ya sabay ya isagili na kana. (1 Samuel 8:19-9:2) ![](https://cdn.door43.org/obs/jpg/360px/obs-en-17-02.jpg) Si David da napilin Bapan Namalyarin kasagilin Saulu. Kay gisa yan magpastul tupa. Nuwa bayu ya nag-ari sa Israel, paradi ya nalyari kana. Kaban magpastul yan tupa, dinuyung mani matubag ga ayup pa mani tupa na. Kabay si dinyag David, pinati nay mani matubag ga ayup. Si si David, nayêpay nakêm na, matinêk, buy manampalataya ya kan Bapan Namalyari. (1 Samuel 16:7-13; 17:34-37) ![](https://cdn.door43.org/obs/jpg/360px/obs-en-17-03.jpg) Sabitun bayintawu pun si David, inlabanan nay gisay iganti ya sabay si Goliat. Si Goliat, magaling yan sundulas, matapang buy napas-êy, buy 3 metrun tag-ay na! Nuwa napatin David si Goliat sa kapamilatan tirador buy sa sawup Bapan Namalyari. Kabay niligtas sa mani Israelita. (1 Samuel 17:1-56) ![](https://cdn.door43.org/obs/jpg/360px/obs-en-17-04.jpg) Amêsên, si Arin Saulu, kinasêman na si David buy labaylabay na yan patin. Gisay allu, nakun nanuday si Saulo sa lêyang nga pagtagwan David. Asê nakitan Saulo si David, nuwa sisi David, nakitan na si Saulo. Kaban magpaynawa si Saulo, pakanawan nagdani kana si David. Ta sa uras sa abitu, nu labay na ya dayin patin si Saulo, mapati na ya. Nuwa si dinyag na tana, nangginit yatan pêrad yaming Saulo gawan a na labay magin ari ya sa parabayduy paralan. (1 Samuel 18:5-16; 24:1-21) ![](https://cdn.door43.org/obs/jpg/360px/obs-en-17-05.jpg) Sa kapupusan, nati si Saulo sa gisay laban. Sa pakapakun baydu, si David da nagin ari sa Israel. Sisi David, mangêd yan ari buy labaylabay yan mani tawu. Pinagpala yan Bapan Namalyari buy malakêy laban ya nanambut ya gawan sa sawup Bapan Namalyari kana. Buy si balayan Jerusalem sabay ya nagin capitulyu un Israel. Sa panawun pag-arin David, nagin mabandi buy mapas-êy ya buun Israel. (1 Samuel 31:3-6; 2 Samuel 5:1-5) ![](https://cdn.door43.org/obs/jpg/360px/obs-en-17-06.jpg) Sa lalên 400 na tawun na nilibas, pigêgtan mani Israelitay Tabirnakulu, ta abiin na panggamitin lan pangulimênan buy pamiandugan lan mani pan-idin la kan Bapan Namalyari. Nuwa amêsên, labay Arin David da mamipaydêng yan maragul la Templu sa Jerusalem ta amên mangulimên buy mag-andug sila baydu. (2 Samuel 7:1-2) ![](https://cdn.door43.org/obs/jpg/360px/obs-en-17-07.jpg) Nuwa impalakun Bapan Namalyari si prupeta Natan kan David. Sinabi na, “Paradi ya pan-ipasabin Bapan Namalyari kamu. Gawan gisa kan sundalus buy malakêy napati mu, alwan sikay manyag Templu, nun a anak mina man. Nuwa paraman baydu, pagpalên kata pun êt. Buy alwan kay abiin, ta si mani layi mu, pawa silan miknu sa trunu bilang ari sa Israel. Buy maubat êt sa layi muy Mamiligtas sa lumatêng!” (2 Samuel 7:5-16) ![](https://cdn.door43.org/obs/jpg/360px/obs-en-17-08.jpg) Sên nalêngên David ya sinabin Natan, tambêng yan nagpasalamat kan Bapan Namalyari gawan para kana, kangêdan buy karangalan na impangakun Bapan Namalyari. Nuwa ya mani Israelitay nay naman, mangêtêng sila pun 1,000 tawun bayu lumatêng nga Mamiligtas. (2 Samuel 7:18-29) ![](https://cdn.door43.org/obs/jpg/360px/obs-en-17-09.jpg) Mangêd da pag-arin David buy pinagpala yan Bapan Namalyari. Nuwa sa kapupusan, nakadyag yan mabayat ta kasalanan sa pangêlêw Bapan Namalyari. (2 Samuel 8:1-15) ![](https://cdn.door43.org/obs/jpg/360px/obs-en-17-10.jpg) Gisay allu, kaban mallumaban na mani sundalus na, nagbabang-uwan naman mamabêlêw si David sa bali na. Pamakaimata na, nakitan nay gisay babayi ya magpaluyuy naidu-idu. Si lagyu na, Batseba. (2 Samuel 11:1-3) ![](https://cdn.door43.org/obs/jpg/360px/obs-en-17-11.jpg) Imbis saman ipakarayu nay pangêlêw na, si dinyag na, impabêg na ya. Pamakalatêng Batseba, ginêtan na ya buy impauli na ya. Pamakalibas dakun umnuy duminggu, impasabin Batseba kan David da siyay bapan inbuktut na. (2 Samuel 11:4-5) ![](https://cdn.door43.org/obs/jpg/360px/obs-en-17-12.jpg) Sisi Batseba, dilag yan asaway gisa sa mani magaling nga sundalus David. Si lagyu na, Urias. Impabêg David si Urias ubat sa laban. Sên inlumatêng ngina, sinabin David kana, “Muli kayna pun, ta gêtan muy asawa mu.” Nuwa sinabin Urias sa sarili na, “A ku kalabay, ta kapalunus ya mani kaawyun kun sundalus sa laban.” Kabay a ya nuli. Si dinapat taman David, sinulatan nay pinunun mani sundalus ya ipagtan si Urias sa nangapapas-êy ya kalaban amên mati yina. Sinunul laman pinunun mani sundalus ya sinabin David. Kabay nati si Urias, agyan magaling yan sundalus. (2 Samuel 11:6-17) ![](https://cdn.door43.org/obs/jpg/360px/obs-en-17-13.jpg) Sên nati ya si Urias, si dinyag Arin David, tinangên na si Batseba. Pamakalibas dakun umnuy buwan, in-anak Batsebay gisay kulaw wa liyaki. Nuwa ya pamikikanayun David kan Batseba sabaytun nabiyay pun si Urias buy ya pamipapati na kan Urias, sabay ya ingkatubag Bapan Namalyari kana. Kabay impalakun Bapan Namalyai si prupeta Natan kan David. Sinabi na, “David day, nangasalanan ka kan Bapan Namalyari.” Pamakalêngên David sa sinabin Natan, nagsisi ya buy pinatawad ya êt Bapan Namalyari sa kasalanan na. Paubat ta baydu, agyan malakê pun na kasakitan na mangadanasan na, nanampalataya ya pun êt kan Bapan Namalyari. (2 Samuel 11:26-12:15) ![](https://cdn.door43.org/obs/jpg/360px/obs-en-17-14.jpg) Nuwa bilang parusa sa kasalanan na, si nalyari, nati ya anak David kan Batseba buy nasiray pamibêbêtêk pamilya na buy asêy na napas-êy ya pag-ari na. Nuwa agyan nakadyag gan kasalanan si Arin David, pawan napas-êy ya pangakun Bapan Namalyari kana. Amêsên, nakaanak si Batseban gisay liyaki ya pinaglagyunan nan Solomon. (2 Samuel 12:17, 24) *Nakasulat sa Sabin Bapan Namalyari: 1 Samuel 10; 15-19; 24; 31; 2 Samuel 5; 7; 11-12* ## 18. Niatag ga Kaarian https://openbiblestories.org/l/blx/story-18/ ![](https://cdn.door43.org/obs/jpg/360px/obs-en-18-01.jpg) Sabitun nati yina si David, si nanagili kana bilang ari, saba si Solomon na anak na. Pinatang Bapan Namalyari si Solomon, “Sabêt ta labay mun idin ku kamu?” Sinabin Solomon na, “Labay kuy biyan mu kun kabisyasnan.” Gawan sa sinabin Solomon, natula si Bapan Namalyari kana. Kabay binyanan yan Bapan Namalyarin kabiyasnan buy siyay pinakabiyasay tawu sa buun babun luta. Binyanan ya êt Bapan Namalyarin malakêy pibandiyan. (1 Ari 3:3-15) ![](https://cdn.door43.org/obs/jpg/360px/obs-en-18-02.jpg) Impaydêng Arin Solomon na Templu sa Jerusalem. Sinunul nay palanuy dinyag bapa na ya saba si David. Amêsên, sa panawun na ati, ayin nay Tabirnakuluy impadyag Moises awlagi. Kabay sa Templuy na mangulimên buy mag-andug ga mani tawu. Paway nan idi sa Templu si Bapan Namalyari buy allu-allu yinan kaawyun mani tawu. (1 Ari 6:1-38) ![](https://cdn.door43.org/obs/jpg/360px/obs-en-18-03.jpg) Nuwa si Solomon, malakêy babayi ya kinaidwan nay ubat sa magmikakanayun na bansa. Niras gisay libuy napag-asawa na. Sa pakapakun baydu, a nayna sinunul la utus Bapan Namalyari ya agana mag-asawan malakê. Malakêy napag-asawa nay nantan mani diyusdiyusan la. Sên natuwa nan Solomon, nangulimên ya êt sa mani diyusdiyusan mani napag-asawa na. (1 Ari 11:1-8) ![](https://cdn.door43.org/obs/jpg/360px/obs-en-18-04.jpg) Gawan sa dinyag Solomon, nanubag si Bapan Namalyari kana. Kabay bilang parusa sa dinyag na, sinabin Bapan Namalyari kana, “Nu mati kay na, ya Israel, miatag sa luway kaarian.” (1 Ari 11:9-13) ![](https://cdn.door43.org/obs/jpg/360px/obs-en-18-05.jpg) Sabitun nati si Arin Solomon, si nanagili kana bilang ari, si Rehoboam ya anak na. Sabitun nuna, pangkilalanên buun Israel ya saba si Rehoboam ya ari la. Nuwa amêsên, nititipun sila amên magriklamu sa bayun ari ya sabay si Rehoboam. Sinabi la, “Sabitun nabyay pun na bapa mu, magkasakit kay sa pan-ipadyag na kanyan. Matag-ay êt ta pan-pabayad na kanyan. Nuwa nu asê masakit ta ipadyag mu kanyan, magpasakup kay kamu.” (1 Ari 11:41-12:4) ![](https://cdn.door43.org/obs/jpg/360px/obs-en-18-06.jpg) Nuwa ayin naman kapukatan ya pikitbay Arin Rehoboam. Sinabi na, “Para kamuyuy masakit tay impadyag bapa ku kamuyu. Amêsên, mas masakit pun ya ipadyag ku kamuyu buy lakwas pun mabayat ta parusay idin ku kamuyu!” (1 Ari 12:13-14) ![](https://cdn.door43.org/obs/jpg/360px/obs-en-18-07.jpg) Gawan sa kadawakan pag-arin Rehoboam, nagpapaway mapuy layin Israel kan Rehoboam. Kabay luway layi ya nitagan kana. Si ata luway tribu, pambêgên kaarian un Juda. (1 Ari 12:16-20) ![](https://cdn.door43.org/obs/jpg/360px/obs-en-18-08.jpg) Si abituy mapuy layi ya nagpapawa kan Arin Rehoboam, si nagin ari la sabay si Jeroboam. Si ata mapuy layi, pambêgên silan kaarian un Israel. (1 Ari 12:20) ![](https://cdn.door43.org/obs/jpg/360px/obs-en-18-09.jpg) Si Jeroboam ya ari sa kaarian Israel, pambênbênan nay mani tawuy kalabay maku sa kaarian Juda amên mangulimên kan Bapan Namalyari sa Templu baydu. Kabay si dinyag na, nanyag yan luway rebultu sa kaarian na amên akayên nay mani tawun mangulimên sa mani rebultuy dinyag na. Sa pakapakun baydu, mabayat ta kasalanan na buy kasalanan mani tawu kan Bapan Namalyari. (1 Ari 12:28-33) ![](https://cdn.door43.org/obs/jpg/360px/obs-en-18-10.jpg) Kabay asê nikasunduy Israel buy Juda buy pawa silan mipapati. ![](https://cdn.door43.org/obs/jpg/360px/obs-en-18-11.jpg) Awlagi, sa kaarian Israel, nangadadawak ka kaganawan ari. Malakêy mani ari ya pinatin mani kaparisu lan Israelitay kalabay magin ari. ![](https://cdn.door43.org/obs/jpg/360px/obs-en-18-12.jpg) Ya kaganawan ari sa Israel buy mani Israelitay mangulimên sa mani ribultu. Alwan kay abiin, ta makikanayun sila êt buy pan-iandug la pun êt ta sarili lan anak sa mani ribultu bilang andug sa mani diyusdiyusan. ![](https://cdn.door43.org/obs/jpg/360px/obs-en-18-13.jpg) Naubat sa layin David da nagin mani ari sa Juda. Dilag mangêd da nagin ari kalla ya mangulimên kan Bapan Namalyari. Nuwa malakê êt sa mani nagin ari ya nangadadawak ka dyag. Matubag sila buy mangulimên sa mani ribultu. Ya dakun umnu kalla, mamiandug pun êt sarili lan anak sa mani ribultu. Ya mani tawu sa Juda, asê nanunul kan Bapan Namalyari ta pan-ulimênên layna man na diyusdiyusan. *Nakasulat sa Sabin Bapan Namalyari: 1 Hari 1-6; 11-12* ## 19. Ya Mani Prupeta https://openbiblestories.org/l/blx/story-19/ ![](https://cdn.door43.org/obs/jpg/360px/obs-en-19-01.jpg) Paubat sabaytun nunan panawun, namiutus si Bapan Namalyarin malakêy prupetay sabay ya mamipatanda nu sabêt ta labay sabin Bapan Namalyari sa mani tawu. ![](https://cdn.door43.org/obs/jpg/360px/obs-en-19-02.jpg) Sabitun panawun Arin Ahab, si Elias sa prupeta sa Israel. Nadawak ka ari si Ahab, ta tinurwanan nan mangulimên kan Baal ya mani tawu. Alwan pêtêg ga namalyari si Baal. Kabay sinabin Elias kan Arin Ahab, “Asê manguran o mangambun sa buun Israel anggan a ku pansabin.” Parabaydu yabay ya nalyari. Kabay sadyay tubag Arin Ahab kana. (1 Ari 16:29-33; 17:1) ![](https://cdn.door43.org/obs/jpg/360px/obs-en-19-03.jpg) Tingkap mani sundalus Arin Ahab si Elias. Nuwa a la ya nakitan tagawan in-utus Bapan Namalyari si Elias un magtagu sa gisay lugal la nadani sa gisay libun. Balang maranun, dilag mani uwak ka mantan tinapay buy kêna kan Elias. Nuwa ya libun na panginêman Elias, natiktik kana gawan ayin uran. (1 Ari 17:2-6) ![](https://cdn.door43.org/obs/jpg/360px/obs-en-19-04.jpg) Kabay impalakun Bapan Namalyari si Elias sa gisay nadani ya lugal la sakup sa kaatag ga bansa. Dilag bal-u sa lugal la abitu ya dilag gisay anak ka liyaki. Marani yan maubus sa kanên la, gawan ayin uran. Nuwa agyan parabaydu, pinakan la pun êt si Elias. Kabay si dinyag Bapan Namalyari, bengat tan kapanlulumakên kanên la sa pamyanan la ta amên agyan mamanan Elias baydu, asê maubus sa kanên la. (1 Ari 17:7-16) ![](https://cdn.door43.org/obs/jpg/360px/obs-en-19-05.jpg) Pamakalibas tatlu buy kapakay tawun, sinabin Bapan Namalyari kan Elias, “Mag-udung kay na sa Israel buy sabin mu kan Arin Ahab ba mamauran nakinan manguman.” Nuwa sên nakitan Arin Ahab si Elias, sinabi na, “Kay idi ka awêd baysên ya manggulun Israel.” Nakitbay si Elias, “Sikay naman na manggulu sa Israel! Ta inliwan muy pêtêg ga Namalyari buy si Baal la pan-ulimênên mu. Kabay amêsên, ipalaku muy mani tawu sa Bung-uy un Carmelo.” (1 Ari 18:1, 16-19) ![](https://cdn.door43.org/obs/jpg/360px/obs-en-19-06.jpg) Kabay naku si Arin Ahab buy mani tawu sa bung-uy, kaawyun na apat taralan buy limampuy prupetan Baal. Sinabin Elias sa kaganawan, “Anggan makanu kaw pun pabayu-bayuy isip? Nu si Bapan Namalyari ya pêtêg ga Namalyari, sabay siyay pagsuyuwan yu. Nuwa nu si Baal la pêtêg ga Namalyari, sabay siyay pagsuyuwan yu.” (1 Ari 18:19-20) ![](https://cdn.door43.org/obs/jpg/360px/obs-en-19-07.jpg) Pamakayari, sinabin prupetan Elias sa mani prupetan Baal, “Patin yuy baka buy iandug yu kan Baal, nuwa agana yu pagkêtan. Para êt bayduy daygên ku. Nu sisabêt ta makaslêb sa in-andug, sabay siyay pêtêg ga Namalyari.” Kabay parabaydu yabay ya dinyag mani prupetan Baal. (1 Ari 18:22-26) ![](https://cdn.door43.org/obs/jpg/360px/obs-en-19-08.jpg) Nanalangin na mani prupetan Baal, “Baal lay, lêng-ên mu kay!” Mamapatingapun naman na panalangin buy pan-angaw la. Pan-iwên la pun êt ta lawini la ta amên mam-i dayin tanda' si Baal, nuwa ya nam-in tanda'. (1 Ari 18:27-29) ![](https://cdn.door43.org/obs/jpg/360px/obs-en-19-09.jpg) Sên marani yay ikatlun kaawat, nag-andug si Elias kan Bapan Namalyari. Impabulug na pun êt labinluway tapayan un lanêm ma andug na. Kabay ya mani kayu buy agid andug na, nabasabasa. (1 Ari 18:30-35) ![](https://cdn.door43.org/obs/jpg/360px/obs-en-19-10.jpg) Pamakayarin abitu, nanalangin si Elias, “Bapan Namalyari ya Namalayarin mani ninunu yan ya silan Abraham, Isaac, buy si Jacob, ipakit mu amêsên na sabay sikay pêtêg ga Namalyarin Israel buy sikuy lingkud mu. Mam-i kan tanda' ya sabay sikay pêtêg ga Namalyari.” (1 Ari 18:36-37) ![](https://cdn.door43.org/obs/jpg/360px/obs-en-19-11.jpg) Kabay tambêng nam-in tanda' si Bapan Namalyari ya bêngat tan naubat sa langit ta apuy. Kabay naulam ma baka, kayu, buy mani batu. Buy nayangu êt ta luta sa agid pamiandugan. Sên nakitan mani tawuy abitu, nanduku sila buy sinabi la, “Taganan si Bapan Namalyari ya pêtêg Namalyari!” (1 Ari 18:38-39) ![](https://cdn.door43.org/obs/jpg/360px/obs-en-19-12.jpg) In-utus Elias sa mani tawu, “Dakpên yuy mani prupetan Baal! Agana yu sila êt paulayan mitakas!” Kabay dinakêp yabay mani tawuy mani prupetan Baal buy pinati. (1 Ari 18:40) ![](https://cdn.door43.org/obs/jpg/360px/obs-en-19-13.jpg) Sinabin Elias kan Arin Ahab, “Mangamut kan mag-udung sa balayan, ta abiin nay sadyay uran.” A naêpêng, dinumêglêm ma langit buy namagyu. Kabay gawan sa apuy ya ubat sa langit buy sa sadyay uran, natandan la nu sisabêt ta pêtêg ga Namalyari. (1 Ari 18:41,45) ![](https://cdn.door43.org/obs/jpg/360px/obs-en-19-14.jpg) Pamakayarin dakun umnuy tawun, asê nati si Elias ta bêngat yatan idi sa langit. Pamakayari, si nanagili kana bilang prupeta, si Eliseo. Malakêy mamakaupapas sa dinyag Bapan Namalyari sa kapamilatan Eliseo. Ya gisa sa mani mamakaupapas sa dinyag na, abituy pamaiyul na kan Naaman ya kapitan un mani sundalus ya kalaban bansa la. Dilag yan malalay sakit sa balat. Nabalitan nay tungkul kan Eliseo. Kabay inyawad na kan Eliseoy, “Labay ku dayin paiyulun mu ku.” Kabay sinabin prupeta Eliseo kanay, “Ilêmlêm mun makatapituy lawini mu sa Ilug Jordan.” (1 Ari 19:16; 2 Ari 4:8-37; 5:1-10) ![](https://cdn.door43.org/obs/jpg/360px/obs-en-19-15.jpg) Sabitun nuna, nanubag si Naaman. A ya kalabay maglêmlêm sa ilug, nuwa sa katatawliyan, nagbayuy isip na buy sinunul nay sinabin Eliseo kana. Kabay sa ikapituy paglêmlêm Naaman buy pagsalwang na sa lanêm, pinaiyul linan Bapan Namalyari. (2 Ari 5:11-14) ![](https://cdn.door43.org/obs/jpg/360px/obs-en-19-16.jpg) Malakê pun na mani prupeta. Ya kaganawan kalla, impatanda la sa mani tawuy kay si Bapan Namalyari ya ulimênên la buy dapat silan manawup sa kaparisu la. Buy pan-isabi la sa mani tawuy, “Magsisi kaw na buy itgên yinay pangulimên sa mani diyusdiyusan. Ta nu a kaw bumyay matinêk buy nu a kaw manunul sa mani utus Bapan Namalyari, parusan na kaw.” ![](https://cdn.door43.org/obs/jpg/360px/obs-en-19-17.jpg) Nuwa a la sinunul la mani impatandan mani prupeta kalla. Nu minsan, pampatin lay mani prupeta. Si kaatag êt taman, pampasakitin la kaparisun prupeta Jeremias ya in-nabu la sa balun na ayin lanêm. Sên milêbêg ga sa burak si Jeremias, inlakwanan lay na baydu amên mati ya. Nuwa nalunus kanay ari. Kabay niutus yan mamipaawas kan Jeremias. (Jeremias 38:1-13) ![](https://cdn.door43.org/obs/jpg/360px/obs-en-19-18.jpg) Agyan manubag ga mani tawu sa mani prupeta, insundun la pun êt ta pangaral la. Pan-isabi la sa mani tawu, “Nu a kaw magsisi sa mani kasalanan yu, parusan kaw Bapan Namalyari.” Pan-isabi la êt sa mani tawuy, “Isipin yuy mani pangakun Bapan Namalyari ya dilag yan iutus ya Mamiligtas kantamu.” *Nakasulat sa Sabin Bapan Namalyari: 1 Hari 16-18; 2 Hari 5; Jeremias 38* ## 20. Pamipatas buy Pag-udung https://openbiblestories.org/l/blx/story-20/ ![](https://cdn.door43.org/obs/jpg/360px/obs-en-20-01.jpg) Ya mani tawu sa kaarian Israel buy kaarian Juda, parisu silan nangasalanan kan Bapan Namalyari. A la tinupad ya kasunduwan Bapan Namalyari kalla sa Bung-uy Sinai. Kabay nangasalanan sila kan Bapan Namalyari. Niutusan mani prupeta si Bapan Namalyari amên mamipatanda kalla, nuwa siyan a sila pun êt nanlêngê. (2 Ari 17:7-17) ![](https://cdn.door43.org/obs/jpg/360px/obs-en-20-02.jpg) Bilang parusan Bapan Namalyari sa mani Israelita, nasambut silan taga Asiria. Matubag ga mani Asiria. Kabay malakêy pinati lay mani Israelita. Kingwa lay pibandian mani tawu buy inulam lay malakê sa lugal mani Israelita. (2 Ari 17:18-23) ![](https://cdn.door43.org/obs/jpg/360px/obs-en-20-03.jpg) Pamakayari, tingkap lay mani tawuy pinunu, mabandi, buy mangabibiyasay tawu. Ta pakilaku la silan papakun sa Asiria. Si mani nalakwanan tana sa Israel, kay mani tawuy kalulu. (2 Ari 15:29) ![](https://cdn.door43.org/obs/jpg/360px/obs-en-20-04.jpg) Ya mani Asiria, inutus lay mani kaparisu lan Asiria ya manugêl sa Israel. Inturêk lan manguman na mani naulam ma balayan. Kabay nakapag-asaway nan mani Israelitay kaatag kalla buy nakaanak silay na. Samaritanuy pamêg sa mani nagin anak la. (2 Ari 17:24-26) ![](https://cdn.door43.org/obs/jpg/360px/obs-en-20-05.jpg) Ya mani tawu sa Juda, nakitan la nu parasaantun pinarusan Bapan Namalyari ya mani Israelita gawan a sila manampalataya buy manunul kana. Nuwa agyan nakitan lay abitu, pan-isundu lay pangulimên la sa mani ribultun mani tawu sa Canaan. Namiutus si Bapan Namalyarin mani prupeta amên mamipatanda kalla, nuwa a sila pun êt nallêngê. ![](https://cdn.door43.org/obs/jpg/360px/obs-en-20-06.jpg) Dinalan nay tawun na inlumabas sabitun nalasak ka kaarian Israel. Amêsên, inutus Bapan Namalyari si Arin Nabukadnezar ya arin Babilonia buy mani sundalus na amên labanan lay kaarian Juda. Sên nasambut Arin Nabukadnezar ya kaarian Juda, nakikasunduy arin Juda ya magin ipus sila buy mamayad ta silan malakêy buwis sa Babilonia tinawun-tawun. (2 Ari 24:8-17) ![](https://cdn.door43.org/obs/jpg/360px/obs-en-20-07.jpg) Nuwa asê naêpêng, inlumaban ya mani tawu sa Juda, ta a silay na kalabay mamayad buwis sa Babilonia. Kabay si dinyag mani taga Babilonia, nag-udung silan nakilaban sa mani tawu sa Juda. Sinakup lay balayan Jerusalem, sinira lay Templu, buy kingwa lay mani pibandian mani tawu baydu. (2 Ari 24:18-25:21) ![](https://cdn.door43.org/obs/jpg/360px/obs-en-20-08.jpg) Gawan sa pamakilaban arin Juda sa mani taga Babilonia, ya dinyag mani sundalus Arin Nabukadnezar, pinati lay mani anak arin Juda sa arapan na buy tinlês ya mata na. Pamakayari, insukul lay arin Juda angga sa bayduy na nati. (2 Ari 25:7) ![](https://cdn.door43.org/obs/jpg/360px/obs-en-20-09.jpg) Intas Arin Nabukadnezar buy mani sundalus nay kaganawan tawu sa Juda liban ta sa mani kaluluy tawuy manggitna. “Pamipatas” ya pamêg sa nalyari sa mani taga Juda. (2 Ari 25:8-12) ![](https://cdn.door43.org/obs/jpg/360px/obs-en-20-10.jpg) Ya pamipatas kalla, parusa êt Bapan Namalyari kalla gawan sa kasalanan la. Nuwa agyan paraman baydu, asê nalitêpan Bapan Namalyari ya pangaku na sa mani taga Juda. Panbantayan na pun êt sila buy magsabi ya êt sa kapamilatan mani prupeta. Impangaku na kallay, “Pamakalibas pitumpuy tawun, iudung kataw sa Canaan.” (Ezekias 37:24-28) ![](https://cdn.door43.org/obs/jpg/360px/obs-en-20-11.jpg) Si mani taga Juda, nanugêl sila sa Babilonia sa lalên pitumpuy tawun. Malakêy nalyari buy nibayu kalla. Amêsên, sisi Ciro, sabay ya Ari sa Persia. Sinambut nay mani tawu sa Babilonia. Kabay nasakup pa mani taga Juda sa bansan Persia. Buy ya mani taga Juda, pambêgên silaynan Judiu. Kabay sa kinakarangan na tawun na panugêl la baydu sa Babilonia, dakun umnu kallay a layna tanday lugal Juda. (2 Cronicas 36:22-23) ![](https://cdn.door43.org/obs/jpg/360px/obs-en-20-12.jpg) Asê pun naêpêng nga pag-arin Ciru, sinabi nay nay, “Ya mani Judiuy kalabay mag-udung sa Juda, malyari kaw nan muli sa Juda. Ipaydêng yun manguman na nalasak ka Templun Bapan Namalyari.” Binyanan nan peray mani Judiu ta amên ipaydêng lan manguman na Templu. Pamakayarin pitumpuy tawun baydu, dilag dakun umnuy mani Judiuy nag-udung nga sa Jerusalem. (Ezras 1-2; 2 Cronicas 36:2) ![](https://cdn.door43.org/obs/jpg/360px/obs-en-20-13.jpg) Pamakalatêng la sa Jerusalem, impaydêng lan manguman na Templu buy bakud balayan. Agyan pansakupên silan mani tawu ubat sa mangarayuy lugal, manugêl pun sila sa Canaan na lugal la inpangakun Bapan Namalayri kalla buy mangulimên sila pun êt sa pêtêg ga Bapan Namalyari baydu sa Templuy dinyag la. (Ezras 3-10; Nehemias 1-13) *Nakasulat sa Sabin Bapan Namalyari: 2 Hari 17; 24-25; 2 Cronica 36; Ezra 1-10; Nehemias 1-13* ## 21. Ya Mamiligtas ya impangakun Bapan Namalyari https://openbiblestories.org/l/blx/story-21/ ![](https://cdn.door43.org/obs/jpg/360px/obs-en-21-01.jpg) Awlagi pun, palanuy nan Bapan Namalyari ya mamiutus yan gisay Mamiligtas sa mani tawu. Sabitun nangasalanan silan Adan buy si Eva, impangakuy nan Bapan Namalyari ya ati. Sinabi na sa utan, “Dilag gisay anak ka babayi ya mallasaw ulu mu buy tuktukun mina man na buwê na.” Si abituy utan ya nallinlang kan Eva, saba siya si Satanas. Ya labay sabin Bapan Namalyari, dilag ianak ka manambut kan Satanas. (Genesis 3:15) ![](https://cdn.door43.org/obs/jpg/360px/obs-en-21-02.jpg) Impangaku êt Bapan Namalyari kan Abraham, “Sa kapamilatan mu, pagpalên kuy kaganawan tawu sa buun babun luta.” Ya pagpapalan ati, sabay ya panlumatêng Mamiligtas. (Genesis 12:1-3) ![](https://cdn.door43.org/obs/jpg/360px/obs-en-21-03.jpg) Impangakuy naman Bapan Namalyari kan Moises, “Dilag lumatêng nga gisay prupetay kaparisu mu.” Ya prupetan ati, sabay ya Mamiligtas ya lumatêng. (Deuteronomy 18:15) ![](https://cdn.door43.org/obs/jpg/360px/obs-en-21-04.jpg) Impangaku êt Bapan Namalyari kan Arin David, “Ya impangaku ku kan Adan buy Eva, Abraham buy Moises, sabay êt ta impangaku ku kamu, ta maubat sa layi muy Mamiligtas sa lumatêng.” (2 Samuel 7:12-16) ![](https://cdn.door43.org/obs/jpg/360px/obs-en-21-05.jpg) Sa kapamilatan prupeta Jeremias, impangaku êt Bapan Namalyari, “Manyag gakun Bayun Kasunduwan sa mani tawu. Ya manan kasunduwan ku sa mani Israelita sabitun nuna, insulat kuy mani utus ku sa mani batu. Nuwa sa Bayun Kasunduwan, isulat ku sa bêkên mani tawuy labay kun daygên la. Ya mani tawuy mangilala kangku, kangku silayna buy patawarên kuy mani kasalanan la.” Sa pallumatêng Mamiligtas, mag-umpisay nay Bayuy Kasunduwan. (Jeremias 31:31-34) ![](https://cdn.door43.org/obs/jpg/360px/obs-en-21-06.jpg) Sinabi êt mani prupeta ya si Mamiligtas ya lumatêng, magin yan prupeta, pari buy ari. Ya prupeta, sabay silay mani tawuy mallêngê sa pansabin Bapan Namalyari buy pan-isabi la êt ta ati sa mani tawu. Buy parabaysên êt ta daygên Mamiligtas ya lumatêng, ta sabay siyay ganap pa prupeta. (Deutereonomy 18:15) ![](https://cdn.door43.org/obs/jpg/360px/obs-en-21-07.jpg) Ya Mamiligtas sa lumatêng, pari êt. Ya parin Judiuy naman, sabay ya mag-andug para sa pamatawad Bapan Namalyari sa kasalanan mani tawu. Pan-ipanalangin la êt ta mani tawu. Kabay iandug êt Mamiligtas sa lumatêng nga sarili na para sa pamatawad Bapan Namalyari sa kasalanan tawu, ta sabay siyay ganap pa pari. (Psalmo 110:4) ![](https://cdn.door43.org/obs/jpg/360px/obs-en-21-08.jpg) Ya Mamiligtas ya lumatêng, ari êt. Ya mani ari yaman, sabay silay mamunu sa kaarian buy saba sila êt ta mangatul sa mani tawu nu ustu o asêy dinyag la. Para êt baysên na daygên Mamiligtas sa lumatêng. Siyay mamisundu sa pag-arin Arin David buy mag-ari ya sa buun babun luta. Pan-atulan nay mani pandaygên mani tawu buy makatuynungan na pangatul na, ta sabay siyay ganap pa ari. (Isaias 32:1) ![](https://cdn.door43.org/obs/jpg/360px/obs-en-21-09.jpg) Bayu inlumatêng nga Mamiligtas, insabi ya pun mani prupeta ya malakêy bagay ya malyari sa biyay na. Sinabin Malakias sa, “Dilag gisay makapangyarian ya prupeta ya muna sa Mamiligtas.” Sinabi yaman êt Isaias ya, “Si Mamiligitas sa lumatêng, ianak yan gisay dalaga.” Sinabi yaman êt Mikas, “Ianak sa balayan Betlehem ma Mamiligtas.” (Malakias 3:1; Isaias 7:14; Mica 5:2) ![](https://cdn.door43.org/obs/jpg/360px/obs-en-21-10.jpg) Sinabi êt Isaias nu parasaantuy magin biyay Mamiligtas, “Si Mamiligtas, manugêl ya sa prubinsyan Galilea. Samungun nay mani malungkut. Ipatanda nay mibus say mani inipus buy mani nakasukul.” Sinabi na êt ta, “Paiyulun Mamiligtas sa mani nipagsakit, mani asê kalêngê, asê makakit, asê makapagsabi buy asê makabita.” (Isaias 9:1-2; 61:1-3) ![](https://cdn.door43.org/obs/jpg/360px/obs-en-21-11.jpg) Sinabi êt Isaias sa, “Manubag ga kaatag ga tawu sa Mamiligtas buy a la ya paniwalan.” Sinabi pun êt kaatag ga prupeta ya, “Ya mani tawuy mamati sa Mamiligtas, pisugalên lay yaming na.” Sinabi la pun êt, “Gisa sa mani kaluguran nay mamipakadawak kana.” Sinabin prupeta Zakarias, “Si bayad sa pamipakadawak kanay tatlumpuy peran pilak.” (Psalmo 69:4; 22:18; Zekarias 11:12) ![](https://cdn.door43.org/obs/jpg/360px/obs-en-21-12.jpg) Sinabi yanan mani prupeta nu parasaantun mati ya Mamiligtas. Sinabin Isaias, “Tupayan ya, kalyan ya, buy dugên la ya. Pamakayari, ipaku la ya sa krus angga sa mati ya.” (Isaias 50:6; Psalmo 22:6; Deuteronomy 21:23) ![](https://cdn.door43.org/obs/jpg/360px/obs-en-21-13.jpg) Ayin kasalanan ya Mamiligtas. Nuwa danasan nay kasakitan na sabay ya parusay para sa mani kasalanan mani tawu. Kabay gawan sa parusay madanasan Mamiligtas, miudung nga pamikiawyun mani tawu kan Bapan Namalyari. (Isaias 53:5-6, 10) ![](https://cdn.door43.org/obs/jpg/360px/obs-en-21-14.jpg) Alwan kay mati ya Mamiligtas nun a sinabin mani prupetay mabyay yan manguman. Buy gawan sa pangamati buy pangabyay nan manguman, matupad day palanun Bapan Namalyari ya iligtas sa mani tawu sa kasalanan. Buy nag-umpisay Bayun Kasunduwan Bapan Namalyari buy mani tawu. (Psalmo 16:10; Jeremias 31:31-34) ![](https://cdn.door43.org/obs/jpg/360px/obs-en-21-15.jpg) Impakit Bapan Namalyari sa mani prupetay malakêy bagay tungkul sa Mamiligtas sa lumatêng. Nuwa apattaralan na tawun pun na inlumibas bayu in-utus Bapan Namalyari ya Mamiligtas baydi sa babun luta, ta iutus Bapan Namalyari ya Mamiligtas sa panawun na intakda na. (Galacia 4:4) *Nakasulat sa Sabin Bapan Namalyari: Genesis 3:15; 12:1-3; Deuteronomio 18:15; 2 Samuel 7; Jeremias 31; Isaias 59:16; Daniel 7; Malakias 4:5; Isaias 7:14; Mikas 5:2; Isaias 9:1-7; 35:3-5; 61; 53; Salmo 22:18; 35:19; 69:4; 41:9; Zacarias 11:12-13; Isaias 50:6; Salmo 16:10-11* ## 22. Ya Pamianak kan Juan na Mamawtismu https://openbiblestories.org/l/blx/story-22/ ![](https://cdn.door43.org/obs/jpg/360px/obs-en-22-01.jpg) Sabitun nuna, nakisabi si Bapan Namalyari sa mani tawu sa kapamilatan mani ang-el buy mani propeta. Nuwa amêsên, sa lalên apatta ralan na tawun, a sila pinagkasabin Bapan Namalayari. Pamakayarin abiin, pinagkasabi na si Zacarias ya gisay tuway parin Judiu. Si si Zacarias buy ya asawa nay si Elisabet, parisu silan mapanunul kan Bapan Namalyari, nuwa ayin sila pun anak. ![](https://cdn.door43.org/obs/jpg/360px/obs-en-22-02.jpg) Gisay allu, sabitun sinumun si Zacarias sa templu amên mamadêp kan Bapan Namalyari, pinagkasabi yan ang-el. Sinabi na kana, “Manganak ka asawa mu un gisay liyaki. Si ipalagyu mu kana, Juan. Matupus yan Ispiritun Bapan Namalyari buy il-an nay bêkên mani tawu sa pallumatêng Mamiligtas.” Nakitbay si Zacarias, “Parasaantun malyari ya abiin na pansabin mu, ta taganan tuwa kina. Para êt bayduy asawa ku. Parasaantu kay pun makaanak?” ![](https://cdn.door43.org/obs/jpg/360px/obs-en-22-03.jpg) Nakitbay ya ang-el kan Zacarias, “Impalaku wakun Bapan Namalyari baydi amên sabin kamuy abiin na mangêd da balita. Nuwa gawan a ka naniwala, paubat amêsên, a kayna makapagsabi anggan asê pun ianak si Juan.” Sa uras êt ta abitu, asina nakapagsabi si Zacarias. Sên namitay nay ang-el, nuli yana si Zacarias. Asê nabuyutan, nabuktut tabay ya asawa na. ![](https://cdn.door43.org/obs/jpg/360px/obs-en-22-04.jpg) Sabitun anêm may buwan buktut Elisabet, pinagkasabi yaman ang-el si Maria ya kamag-anak Elisabet. Si si Maria, dalaga ya pun buy nakal-an ninan tangênên Jose. Sinabin ang-el kana, “Mangalêk kay Maria buy manganak kan gisay liyaki. Si ipalagyu mu kana, Jesus. Bêgên yan Anak Bapan Namalyari ya Katatag-ayan buy mag-ari ya kanuman.” ![](https://cdn.door43.org/obs/jpg/360px/obs-en-22-05.jpg) Nakitbay si Maria, “Parasaantun malyari kangkuy abiin, pakan dalaga ku pun.” Sinabin ang-el kana, “Mabuktut ka sa kapamilatan kapangyarian Ispiritun Bapan Namalyari. Kabay banal la ianak mu, ta Anak yan Bapan Namalyari.” Naniwala si Maria buy tinanggap nay sinabin ang-el kana. ![](https://cdn.door43.org/obs/jpg/360px/obs-en-22-06.jpg) Asê nabuyutan, naku si Maria kan Elisabet. Sên nalêngên Elisabet ta pangumustan Maria, nagkimit ta kulaw sa bitukan Elisabet. Kaban pisasabyan lay dinyag Bapan Namalyari sa biyay la, sadyay tula la. Pamakalibas tatluy buwan, nuli yana si Maria. ![](https://cdn.door43.org/obs/jpg/360px/obs-en-22-07.jpg) Sên in-anak kan Elisabet ta kulaw, Juan na impalagyu la kana, kaparisun sinabin ang-el kalla. Nakapagsabi yana si Zacarias. Sinabi na, “Ulimênên na Bapan Namalyari, ta naganaka nay mani tawu na. Sikay anak ku, bêgên kan propetan Bapan Namalyari ya Katatag-ayan! Sikay mamisabi sa mani tawu nu parasaantu lan matanggap pa pamatawad sa mani kasalanan la.” *Nakasulat sa Sabin Bapan Namalyari: Lucas 1* ## 23. Ya Pamianak kan Jesus https://openbiblestories.org/l/blx/story-23/ ![](https://cdn.door43.org/obs/jpg/360px/obs-en-23-01.jpg) Si si Maria, nakatakday nan itangên sa mangêd da liyaki ya sabay si Jose. Sên natandan Jose ya bêngat tan nabuktut si Maria, naisip nay, "Alwa kun anak ka abitu." Nuwa gawan a na labay mipakadêng-êy si Maria, idi ta sa nakêm nay isyay na tana si Maria un ayin magtanda. Nuwa bayu na pun daygên na palanu na, pinagkasabi yinan ang-el sa kapamilatan taynêp. ![](https://cdn.door43.org/obs/jpg/360px/obs-en-23-02.jpg) Sinabin ang-el kan Jose, “Agana ka malimun tangênên si Maria, ta nabuktut ya sa kapamilatan kapangyarian Ispiritun Bapan Namalyari. Liyaki ya ianak na buy si ipalagyu mu kana, Jesus, (ya labay sabin 'Yahweh ya mamiligtas'), ta sabay siyay mamiligtas un mani tawu sa mani kasalanan la.” ![](https://cdn.door43.org/obs/jpg/360px/obs-en-23-03.jpg) Kabay tinangên Jose si Maria buy pikilaku na ya sa bali la. Nuwa a na ya tinakês anggan asê pun in-anak Mariay kulaw. ![](https://cdn.door43.org/obs/jpg/360px/obs-en-23-04.jpg) Sên madani yan manganak si Maria, in-utus manungkulan Roma sa kaganawan tawu ya maku sila sa balayan mani ninunu la amên miawyun sila sa sensus. Kabay namita si Jose buy si Maria ubat sa Nazaret nu saantu sila manugêl. Namita sila papakun sa Betlehem agyan madayu, tagawan baydu nanugêl si David da ninunu la. ![](https://cdn.door43.org/obs/jpg/360px/obs-en-23-05.jpg) Pamakalatêng la sa Betlehem, ayin silan matugêlan. Si kay nakit la, tutugêlan mani saysay. Buy baydu naynan naianak ka kulaw. Impakalêk lay kulaw sa pamakanan mani saysay, ta ayin silan makit ta pipakalêkan kana. Si impalagyu la sa kulaw, Jesus. ![](https://cdn.door43.org/obs/jpg/360px/obs-en-23-06.jpg) Sa yabi êt abitu, dilag magpastul ya madani baydu ya manaysay mani tupa la. Mamakun ni bêngat tanan nagpakit kallay gisay ang-el la mamakasilêw. Kabay nalimu sila. Nuwa sinabin ang-el, “Agana kaw malimu, ta dilag gakun mangêd da ibalita para kamuyu. In-anak kana sa Betlehem ya Mamiligtas ya sabay ya Panginuun!” ![](https://cdn.door43.org/obs/jpg/360px/obs-en-23-07.jpg) “Maku kaw amên têkapên yuy kulaw buy makit yu yay nakapunggus lampin buy nakakalêk sa pamakanan mani saysay.” Mamakun ni bêngat tan nagpakit ta sadyay lakên ang-el. Mangulimên sila kan Bapan Namalyari. Sinabi la, “Ulimênên si Bapan Namalyari ya idi sa langit. Buy dilag gan kapatêtbêkan ya mani tawuy idi sa babun luta ya kapapidu kana.” ![](https://cdn.door43.org/obs/jpg/360px/obs-en-23-08.jpg) A nabuyutan, inlumatêng nga mani magpastul nu saantu in-anak si Jesus. Nakit lay kulaw wa nakakalêk sa pamakanan mani saysay kaparisun sinabin ang-el kalla. Sadyay tula la sa mani nalêngê buy nakitan la. Kaban mag-udung silayna sa mani saysay lay tupa, mangulimên sila kan Bapan Namalyari. ![](https://cdn.door43.org/obs/jpg/360px/obs-en-23-09.jpg) Pamakalibas dakun umnuy panawun, dilag gaman inlumatêng sa Jerusalem ya mangabiyasay tawu. Gawan dilag silan nakit sa langit ya ayin kaparisuy bêtêwên, tanda lay labay sabin ya dilag in-anak ka kulaw ya sabay ya bayuy arin mani Judiu. Kabay naku sila amên makit ta ari, agyan bapan dayuy bitên la. Nilatêng sila sa Betlehem buy nakit lay bibiyan Jesus buy mangatwa na. ![](https://cdn.door43.org/obs/jpg/360px/obs-en-23-10.jpg) Sên nakitan la si Jesus ya awyun indu na, nanduku sila buy nangulimên kana. Binyanan la ya êt maulagay degalu buy pamakayari, nuli silayna. *Nakasulat sa Sabin Bapan Namalyari: Mateo 1; Lucas 2* ## 24. Binawtismuwan un Juan si Jesus https://openbiblestories.org/l/blx/story-24/ ![](https://cdn.door43.org/obs/jpg/360px/obs-en-24-01.jpg?direct&) Sên dinumagul la si Juan, napakadyag yan propeta. Manugêl ya sa kakyangan. Si pangkanên na, durun buy pulut panilan. Ya yaming na, dyag sa sabut kamelyu. ![](https://cdn.door43.org/obs/jpg/360px/obs-en-24-02.jpg?direct&) Malakêy tawuy mamaku kan Juan sa kakyangan amên mallêngê sa pansabin na. Pawa nan pansabin na paradi, “Pagsisyan yu buy lakwanan yuy mani kasalanan yu tagawan madani yay pag-arin Bapan Namalyari.” ![](https://cdn.door43.org/obs/jpg/360px/obs-en-24-03.jpg?direct&) Sên nalêngê lay pansabin Juan, malakêy tawuy nagsisi sa mani kasalanan la buy nagpabawtismu. Malakê êt ta mani pinunu buy mani parin Judiu ya naku baydu amên magpabawtismu. Nuwa a la insabi ya mani kasalanan la buy a sila nagsisi. ![](https://cdn.door43.org/obs/jpg/360px/obs-en-24-04.jpg?direct&) Kabay sinabin Juan kalla, “Sikaw wa nangadadawak buy mapagtalingkayu kaparisun utan! Magsisi kawna buy ibayu yinay ugali yu gawan putusun buy ulamên Bapan Namalyari ya kaganawan puun kayuy asê managêy.” Dinyag gan Juan na mani insabin prupeta ya paradi, “Dilag gakun iutus sa gisay prupeta ya muna kamu buy mil-an bêkên mani tawu amên mallenge kamu.” ![](https://cdn.door43.org/obs/jpg/360px/obs-en-24-05.jpg?direct&) Pinatang dakun umnuy Judiu si Juan, “Sika nayi ya Mamiligtas sa lumatêng?” Nakitbay si Juan, “Alwan sikuy Mamiligtas, nuwa dilag gisay lumatêng nga mas makapangyarian pun kangku. A ku sêpat magin ipus na buy a ku sêpat mangaswag sêêl isteping na.” ![](https://cdn.door43.org/obs/jpg/360px/obs-en-24-06.jpg?direct&) Pamakawasak, inlakun Jesus si Juan amên magpabawtismu. Sên nakitan Juan si Jesus, sinabi na sa mani tawu, “Elêwên yu. Abiti yay Tupan Bapan Namalyari ya sabay ya mamitas kasalanan kaganawan tawu.” ![](https://cdn.door43.org/obs/jpg/360px/obs-en-24-07.jpg?direct&) Sinabin Juan kan Jesus, “Alwan sikuy sêpat mamawtismu kamu. Sikay naman na sêpat mamawtismu kangku.” Nakitbay si Jesus, “Kaylangan mu kun bawtismuwan, gawan abituy sêpat malyari.” Kabay binawtismuwan yan Juan agyan ase nangasalanan si Jesus kanuman. ![](https://cdn.door43.org/obs/jpg/360px/obs-en-24-08.jpg?direct&) Sên nabawtismuwan na si Jesus, nag-awas ya sa lanêm. Buy nag-ugpa kanay Ispiritun Bapan Namalyari ya nanuwad gisay pati-pati buy dilag êt gisay tunuy ya ubat sa langit ya nagsabin, “Ati ya anak kuy kakaidwan ku buy kapapaidu kangku.” ![](https://cdn.door43.org/obs/jpg/360px/obs-en-24-09.jpg?direct&) Bayu pun magpabawtismu si Jesus kan Juan, sinabi yan Bapan Namalyari kanay, “Magtabuy ya Ispiritun Bapan Namalyari buy mag-ugpa ya sa gisay bawtismuwan mu. Sabay siyay Anak Bapan Namalyari.” Gigisay Bapan Namalyari, nuwa sên binawtismuwan Juan si Jesus, nakit nay Bapan Namalyari sa tatluy pangatawu. Nalêngê nay nagsabi si Bapan Namalyari, nakit nay Anak Bapan Namalyari ya si Jesus, buy nakit nay Ispiritun Bapan Namalyari ya nag-ugpa kana. *Nakasulat sa Sabin Bapan Namalyari: Mateo 3; Marcos 1:9-11; Lucas 3:1-23* ## 25. Tinuksun Satanas si Jesus https://openbiblestories.org/l/blx/story-25/ ![](https://cdn.door43.org/obs/jpg/360px/obs-en-25-01.jpg) Pamakayarin nabawtismuwan Jesus, tambêng yan pikilakun Ispiritun Bapan Namalyari sa kakyangan. Nag-ayunu ya baydu un apattapuy allu buy apattapuy yabi. Inlumatêng baydu si Satanas amên tuksun ya dayi. ![](https://cdn.door43.org/obs/jpg/360px/obs-en-25-02.jpg) Sinabin Satanas, “Nu sikay nabay ya Anak Bapan Namalyari, daygên mu wati bay kanên na mani batun ati.” ![](https://cdn.door43.org/obs/jpg/360px/obs-en-25-03.jpg) Nakitbay si Jesus, “Idi sa kasulatan, ‘Alwan kay sa kanên mabyay ya tawu nun a sa balang sabin Bapan Namalyari.”’ ![](https://cdn.door43.org/obs/jpg/360px/obs-en-25-04.jpg) Pamakayari pikilaku yan Satanas sa têngêl templun Jerusalem. Sinabi na, “Nu sikay nabay ya Anak Bapan Namalyari, magnabu kati. Ta idi sa kasulatan, ‘Iutus Bapan Namalyari ya mani ang-el na ta sal-un laka amên asê midumpul la bitis mu sa batu.”’ ![](https://cdn.door43.org/obs/jpg/360px/obs-en-25-05.jpg) Nuwa nakitbay si Jesus, “Idi sa kasulatan, ‘Gana mu subukun na Panginuun mun Namalyari.”’ ![](https://cdn.door43.org/obs/jpg/360px/obs-en-25-06.jpg) Pamakayari, pikilaku yan Satanas sa matag-ay ya bung-uy buy impakit kanay kaganawan bansa buy kangêdan mani ati. Sinabi na, “Idin ku kamuy kaganawan abiin, nu manduku ka buy mangulimên kangku.” ![](https://cdn.door43.org/obs/jpg/360px/obs-en-25-07.jpg) Nakitbay si Jesus, “Magtas kay Satanas! Gawan idi sa kasulatan, ‘Kay Panginuun mun Bapan Namalyari ya sambên buy suywan mu.”’ ![](https://cdn.door43.org/obs/jpg/360px/obs-en-25-08.jpg) Asê natuksu si Jesus sa mani panuksun Satanas kana. Kabay inlakwanan yan Satanas. Pamakayari, inlumatêng ngaman na ang-el Bapan Namalyari buy nagsuyu kan Jesus. *Nakasulat sa Sabin Bapan Namalyari: Mateo 4:1-11; Marcos 1:12-13; Lucas 4:1-13* ## 26. Naglingkud si Jesus sa mani Tawu https://openbiblestories.org/l/blx/story-26/ ![](https://cdn.door43.org/obs/jpg/360px/obs-en-26-01.jpg) Pamakayarin nanambut Jesus sa panuksun Satanas kana, nakapag-udung ya sa Galilea un idi kanay Ispiritun Bapan Namalyari. Naku ya sa magmikakanayun lugal amên mangaral tungkul kan Bapan Namalyari buy nangulimên kanay kaganawan tawu. ![](https://cdn.door43.org/obs/jpg/360px/obs-en-26-02.jpg) Amêsên, nuli ya si Jesus sa lugal la kinaragulan na sa balayan Nasaret. Sên Alluy nan Pagpaynawa, sinumun ya sa balin pagtipunan mani Judiu. In-gawang kanay pinisulatan sabin prupeta Isaias ya nakatilitil. Intiknal nay ati buy binasa na sa mani tawu ya dakun umnuy nakasulat baydu. ![](https://cdn.door43.org/obs/jpg/360px/obs-en-26-03.jpg) Paradi ya binasan Jesus, “Ya Ispiritun Panginuun, idi ya kangku, gawan pinili na ku amên mangaral Mangêd da Balita sa mani kalulu. In-utus na kun mipatanda sa mani nadakêp pa mibus silay na buy sabin sa mani bulag ga makakit silay na. In-utus na ku êt amên mibus sa mani pampasakitin. Buy ati yay panawun amên madanasan mani tawuy kangêdan Bapan Namalyari. ![](https://cdn.door43.org/obs/jpg/360px/obs-en-26-04.jpg) Pamakayari niknu si Jesus. Nakaêlêw kanay kaganawan idi baydu. Tanda lay si binasan Jesus sabay ya tungkul sa lumatêng nga Mamiligtas. Kabay sinabin Jesus, “Ya binasa ku kamuyu amêsên, malalyari yana.” Nakaupapas sa kaganawan tawuy idi baydu buy sinabi la, “Alwa nayin kay anak yan Jose ya kabaryu tamu?” ![](https://cdn.door43.org/obs/jpg/360px/obs-en-26-05.jpg) Pamakayari sinabin Jesus, “Pakalêng-ên yuy ati. Ayin prupetay pantanggapên sa sarili nan lugal. Ganakên yuy nalyari sabitun panawun prupeta Elias. Sa panawun abitu, malakêy bal-u sa Israel. Nuwa sabitun asê namauran si Bapan Namalyari sa lalên tatluy tawun buy kapaka, alwan bal-u sa Israel ya sinawpan Elias nun a impalakun Bapan Namalyari si Elias sa gisay bal-uy idi sa kaatag ga lugal amên sawpan ya.” ![](https://cdn.door43.org/obs/jpg/360px/obs-en-26-06.jpg) Insundun Jesus ya pagsabi na, “Sabitun nabyay pun si propeta Eliseu, malakê êt ta nagketung sa Israel. Nuwa agyan gisa kalla, ayin pinaiyul si Eliseu. Si kay pinaiyul na si Naaman na kapitan mani sundalus ya kapatin Israel.” Sên nalêngên mani Judioy sinabin Jesus, nanubag sila. ![](https://cdn.door43.org/obs/jpg/360px/obs-en-26-07.jpg) Intabi la si Jesus sa balayan la buy impalaku la ya sa bung-uy ya pinipaydêngan lan balayan la amên inabu la ya dayi sa bêngaw. Nuwa dinuman si Jesus sa pibunakan la buy namita sa Nasaret. ![](https://cdn.door43.org/obs/jpg/360px/obs-en-26-08.jpg) Inlakun Jesus ya malakêy lugal sa Galilea buy malakêy tawuy nipamaku kana. Pan-ilaku la kan Jesus ya mani nipagsakit, asê makakit, asê makabita, asê makalêngê, buy asê makapagsabi. Buy pinaiyul silan kaganawan Jesus. ![](https://cdn.door43.org/obs/jpg/360px/obs-en-26-09.jpg) Dilag êt malakêy tawuy sinêdakan nadawak ka ispiritu ya pan-ilaku kan Jesus. Buy kaban pan-itabin Jesus sa nadawak ka ispiritu, man-angaw sila. Si pansabin la, “Sika ya Anak Bapan Namalyari!” Gawan sa nalyarin abiin, nakaupapas sa mani tawu buy nangulimên sila kan Bapan Namalyari. ![](https://cdn.door43.org/obs/jpg/360px/obs-en-26-10.jpg) Pamakayari, namili si Jesus un labinluway lawyaki buy binêg na silan apostul. Si abitu silay mani apostul, mamikilalaku sila kan Jesus buy nabiyasa sila kana. *Nakasulat sa Sabin Bapan Namalyari: Mateo 4:12-25; Marcos 1:14-15, 35-39; 3:13-21; Lucas 4:14-30, 38-44* ## 27. Ya Kwentu tungkul sa Mangêd da Dyag Samaritanu https://openbiblestories.org/l/blx/story-27/ ![](https://cdn.door43.org/obs/jpg/360px/obs-en-27-01.jpg) Gisay allu, dilag gisay manurun kautusan ya namatang kan Jesus amên subukan ya. Sinabi na, “Manuru, sabêt ta sêpat kun daygên amên mabiyan nakun biyay ya ayin katganan?” Nakitbay si Jesus, “Sabêt ta nakasulat sa kautusan Bapan Namalyari?” ![](https://cdn.door43.org/obs/jpg/360px/obs-en-27-02.jpg) Nakitbay ya manurun kautusan, “Kaidwan muy Panginuun mun Bapan Namalyari un buun bêkê, buun kaladwa, buun pas-êy, buy buun isip. Buy idun muy kaparisu mu kaparisun pangidu mu sa sarili mu.” Sinabin Jesus kana, “Ustuy pikitbay mu. Daygên muy abiin ta amên mabiyan kan biyay ya ayin katganan.” ![](https://cdn.door43.org/obs/jpg/360px/obs-en-27-03.jpg) Nuwa labay manurun kautusan na papêtgan nay matinêk ya. Kabay pinatang na si Jesus, “Nu parabaydu, sisabêt ta kaparisu kun tawu?” ![](https://cdn.door43.org/obs/jpg/360px/obs-en-27-04.jpg) Gisay kwentuy impakitbay Jesus kana. “Dilag gisay Judiuy liyaki ya mamita sa gisay dan ubat sa balayan Jerusalem papakun sa balayan Jerico.” ![](https://cdn.door43.org/obs/jpg/360px/obs-en-27-05.jpg) “Kaban mamita ya, inapat yan mani tulisan. Kingwa lay kaganawan pibandiyan na. Pinatukpatuk la ya buy inlakwanan lay nan paran nati.” ![](https://cdn.door43.org/obs/jpg/360px/obs-en-27-06.jpg) “Asê naêpêng, dilag pari un mani Judiu ya nidan baydu. Sên nakitan nay liyaki ya pinatuk buy pinanakawan, inlibasan naya. Buy insundu nay pamita na.” ![](https://cdn.door43.org/obs/jpg/360px/obs-en-27-07.jpg) “Pamakayari, dilag êt nidan bayduy gisay liyaki ya Levita ya ubat sa layin Levi. (Ya mani Levita, gisay layin mani Judiu ya manawup sa mani pari ya maglingkud sa Templu). Buy sên nakitan nay gisay liyaki ya pinatuk buy pinanakawan, inlibasan na ya êt.” ![](https://cdn.door43.org/obs/jpg/360px/obs-en-27-08.jpg) Amêsên, dilag gisay tawuy Samaritanuy nidan baydu. (Ya mani Samaritanu, layi silan mani Judiuy nakapag-asawan kaatag ga bansa. Mitubag ga mani Judiu buy mani Samaritanu). Nuwa sên nakitan nay Judiuy liyaki ya pinatuk, kinalunusan na ya. Inuyasan nan alak buy laruy mani nuka na bayu na binêdbêdan. ![](https://cdn.door43.org/obs/jpg/360px/obs-en-27-09.jpg) “Insakay nay liyaki sa asnu na buy gintan sa gisay bali ya pan-upan amên saysayên na baydu.” ![](https://cdn.door43.org/obs/jpg/360px/obs-en-27-10.jpg) “Pamakawasak, kaylangan isundun Samaritanuy pamita na. Kabay binyanan nan peray magbandin bali ya pan-ipaupa. Sinabi na, ‘Saysayên mu ya buy nu kulang pun na abiin na magastus mu kana, bayaran kata sa pag-udung ku.’” ![](https://cdn.door43.org/obs/jpg/360px/obs-en-27-11.jpg) Amêsên, pinatang Jesus ya manurun kautusan, sinabi na, “Sa êlêw mu, sisabêt sa tatluy nidan ya pêtêg nangidu sa kaparisu nan tawuy pinatuk mani tulisan?” Nakitbay ya manurun kautusan, “Sa êlêw ku, abituy nalunus kana.” Kabay sinabin Jesus kana, “Dali ka. Para êt bayduy daygên mu.” *Nakasulat sa Sabin Bapan Namalyari: Lucas 10:25-37* ## 28. Ya Liyaki ya Mabandi https://openbiblestories.org/l/blx/story-28/ ![](https://cdn.door43.org/obs/jpg/360px/obs-en-28-01.jpg) Gisay allu, dilag gisay mabandi ya pinunu ya nagdani kan Jesus buy namatang, “Mangêd da Manuru, sabêt ta sêpat kun daygên amên mabiyan nakun biyay ya ayin katganan?” Nakitbay si Jesus, “Siyan binêg muku yan mangêd ta? Ayin kaatag ga mangêd, nun a kay si Bapan Namalyari. Nu labay mun mabiyan kan biyay ya ayin katganan, sunulun muy mani utus Bapan Namalyari.” ![](https://cdn.door43.org/obs/jpg/360px/obs-en-28-02.jpg) Namatang manguman na liyaki, “Sabêt ta mani utus sa sêpat kun sunulun?” Nakitbay si Jesus, “Agana ka mamati, agana ka makikanayun, agana ka manakaw, agana ka êt papêtêg sa ayin kapêtêgan, galangên muy bapa buy indu mu, buy idun muy kaparisu mu kaparisun pangidu mu sa sarili mu.” ![](https://cdn.door43.org/obs/jpg/360px/obs-en-28-03.jpg) Nuwa sinabin mabandi ya pinunu, “Sinunul kinay kaganawan abiin ubat pun sabitun anak kaku. Sabêt pun êt ta sêpat kun daygên amên mabiyan nakun biyay ya ayin katganan?” Kaban pan-êlêwên Jesus sa mabandi ya pinunu, nalunus ya kana. ![](https://cdn.door43.org/obs/jpg/360px/obs-en-28-04.jpg) Nakitbay si Jesus, “Nu labay mun magin pêtêg sa arapan Bapan Namalyari, isaliw muy kaganawan pibandiyan mu. Buy si naabli muy pera, idin mu sa mani kalulu. Sa kapamilatan abiin, mabiyan kan pibandiyan sa langit. Pamakayari, mag-udung ka buy sumunul kangku.” ![](https://cdn.door43.org/obs/jpg/360px/obs-en-28-05.jpg) Nuwa sên nalêngên liyaki ya abitu, namita yan malungkut gawan malakêy pibandiyan na buy a na labay matasan yan pibandiyan. Kabay nagpabukut ya kan Jesus buy inlakwanan na ya. ![](https://cdn.door43.org/obs/jpg/360px/obs-en-28-06.jpg) Kabay sinabin Jesus sa mani tagasunul na, “Ya mani tawuy mabandi, masakit silan misun sa pag-arin Bapan Namalyari. Tambêng pun misun na gisay kamelyu sa lubut kadayum, kaysa magpasakup pa mabandi sa pag-arin Bapan Namalyari.” ![](https://cdn.door43.org/obs/jpg/360px/obs-en-28-07.jpg) Nakaupapas sa mani tagasunul na. Kabay namatang sila, “Nu parabaydu, sisabêt ta miligtas?” ![](https://cdn.door43.org/obs/jpg/360px/obs-en-28-08.jpg) Nangêlêw si Jesus kalla buy sinabi na, “Asê madyag tawuy iligtas sa sarili na, nuwa si Bapan Namalyari, madyag nay kaganawan.” ![](https://cdn.door43.org/obs/jpg/360px/obs-en-28-09.jpg) Sinabin Pedru kan Jesus, “Parasaantu kay yaman na tagasunul mu? Inlakwanan yan nay kaganawan amên sumunul kamu. Sabêt ta gantimpala yan?” ![](https://cdn.door43.org/obs/jpg/360px/obs-en-28-10.jpg) Nakitbay si Jesus, “Nu sisabêt man na mallakwan bali' na, mapatêl na, mangatwa na, o maanak na gawan sa pag-arin Bapan Namalyari, mabiyan yan igit pun kaysa inlakwanan na sa panawun amêsên. Buy sa panawun na lumatêng, makatanggap ya êt biyay ya ayin katganan. Nuwa malakêy mipaubatan ya miuna buy malakêy miuna ya mipaubatan.” *Nakasulat sa Sabin Bapan Namalyari: Mateo 19:16-30; Marcos 10:17-31; Lucas 18:18-30* ## 29. Ya Kwentu tungkul sa Ipus ya a kalabay Mamatawad https://openbiblestories.org/l/blx/story-29/ ![](https://cdn.door43.org/obs/jpg/360px/obs-en-29-01.jpg) Gisay allu, namatang si Pedru kan Jesus, “Panginuun, katiumnu kun patawarên na patêl kuy pawan manyag kasalanan kangku? Makatapitu nayi?” Nakitbay si Jesus kana, “Alwan kay pitu nun a pitumpu ya tipitu.” Ya labay sabin Jesus, pawa yan mamatawad. Kabay ingkwentun Jesus kanay, ![](https://cdn.door43.org/obs/jpg/360px/obs-en-29-02.jpg) “Ya pag-arin Bapan Namalyari, maiparisu ya sa pag-arin gisay ari ya nipabêg sa mani ipus na amên singilin sa mani nautang la. Dilag gisay ipus ya nakautang kaalagan upan gisay tawu sa lalên luwan dalan na libuy tawun.” ![](https://cdn.door43.org/obs/jpg/360px/obs-en-29-03.jpg) “Gawan a ya makabayad, sinabin ari, ‘Isaliw yu silan mipapamilya buy kaganawan pibandiyan la amên mabayaran nay utang na kangku.’ ” ![](https://cdn.door43.org/obs/jpg/360px/obs-en-29-04.jpg) “Kabay nakilunuslunus sa ipus sa ari buy nakisabi, ‘Ari kuway biyan mu ku pun kayêk panawun amên mabayaran kuy kaganawan utang ku.’ Kabay nalunus kanay ari buy a nayna impabayad da utang na buy tinulutan naynan namita. ![](https://cdn.door43.org/obs/jpg/360px/obs-en-29-05.jpg) “Nuwa pamakabitan ipus, natbêng nay gisay kaparisu nan ipus ya nakautang kaalagan apat ta buwan upa. Dinagus na ya buy ginêyêk. Sinabi na, “Mamayad kaynan utang mu kangku!” ![](https://cdn.door43.org/obs/jpg/360px/obs-en-29-06.jpg) “Nanduku kanay kaparisu nan ipus buy nakisabi, ‘Biyan muku pun kayêk panawun amên mabayaran kuy kaganawan nautang ku kamu.’ Nuwa a ya nakalabay, nun a impasukul nay kaparisu nan ipus kaban a ya pun makabayad kana.” ![](https://cdn.door43.org/obs/jpg/360px/obs-en-29-07.jpg) “Dilag dakun umnuy ipus sa nakakit sa dinyag na. Kabay nalungkut sila buy naku sila sa ari amên ipatanda lay kaganawan dinyag abituy ipus.” ![](https://cdn.door43.org/obs/jpg/360px/obs-en-29-08.jpg) “Impabêg amêsên ari ya ipus buy sinabi kana, ‘Ipus, sadyay dawak nakêm mu! A ku impabayad da utang mu gawan nakilunuslunus ka kangku. Siyan a ka ya nalunus sa kaparisu mun ipus kaparisun pallunus ku kamu ta?’ Gawan sa tubag ari, impasukul nay nadawak ka ipus kaban a ya pun makabayad sa kaganawan utang na.” ![](https://cdn.door43.org/obs/jpg/360px/obs-en-29-09.jpg) Pamakayari, sinabin Jesus, “Parabaysên êt ta daygên Bapa kuy idi sa langit sa sisabêt man ya asê katandan mamatawad un buun bêkê.” *Nakasulat sa Sabin Bapan Namalyari: Mateo 18:21-35* ## 30. Pinakan Jesus sa Limay Libuy lawyaki https://openbiblestories.org/l/blx/story-30/ ![](https://cdn.door43.org/obs/jpg/360px/obs-en-30-01.jpg) In-utus Jesus sa mani tagasunul na sa magmikakanayun na lugal amên mangaral buy manuru sa mani tawu. Sên nag-udung silayna kan Jesus, ingkuwentu la kanay kaganawan dinyag la. Pamakayari insagyat silan Jesus, "Maglipay kitamu pun sa lipay dagat ta amên magpaynawa sa gisay napatêtbêk ka lugal." Kabay nagsakay silayna sa bangka buy namita. ![](https://cdn.door43.org/obs/jpg/360px/obs-en-30-02.jpg) Nuwa malakêy nakakit buy nakatandan pamita la. Kabay nagpupwayu ya mani tawu sa agid dagat amên milatêng sila sa lipay dagat. Sên nagtabuy si Jesus sa bangka, timbêng silan sadyay lakên tawu. ![](https://cdn.door43.org/obs/jpg/360px/obs-en-30-03.jpg) Si bilang mani lawyaki, maygit liman libu buy asê pun nakabilang nga mani babayi buy mani anak baydu. Nalunus kalla si Jesus gawan para silan tupay ayin magpastul. Kabay tinurwanan silan Jesus buy pinaiyul nay nipagsakit kalla. ![](https://cdn.door43.org/obs/jpg/360px/obs-en-30-04.jpg) Sên mamayabiyabi yana, nagdani kan Jesus ya mani tagasunul na buy sinabi la, “Payabi yana buy idi kitamu sa madayuy lugal buy ayin panaliwan. Pabitên yinay mani tawun maku sa mani balayan amên mangkap silan maêkan la.” ![](https://cdn.door43.org/obs/jpg/360px/obs-en-30-05.jpg) Nuwa sinabin Jesus kalla, “A silay na kaylangan mita. Sikaw wa mamakan kalla.” Nakitbay sila, “Parasaantuy daygên yan? Pakan kay lilima yabay ya tinapay tamu buy kay luluway kênan lanêm.” ![](https://cdn.door43.org/obs/jpg/360px/obs-en-30-06.jpg) Binêg Jesus sa mani tawu buy in-utus na sa mani tagasunul nay, "Paiknun yu sila sa têmak buy ipustu yu silan tilimampu." ![](https://cdn.door43.org/obs/jpg/360px/obs-en-30-07.jpg) Pamakayari, kinwan Jesus ya limay tinapay buy luway kênan lanêm. Naningla ya sa langit buy impasalamat na kan Bapan Namalyari ya kanên. ![](https://cdn.door43.org/obs/jpg/360px/obs-en-30-08.jpg) Pamakayari binis-ilbis-il nay tinapay buy mani kênan lanêm buy indin na sa mani tagasunul na. Indin êt taman mani tagasunul na sa mani tawu. Nakaêkan na kaganawan buy nabsuy, nuwa dilag pun êt nitagan na kanên. ![](https://cdn.door43.org/obs/jpg/360px/obs-en-30-09.jpg) Pamakayari, tinipun mani tagasunul nay nitagan na kanên buy napakapnu la pun êt ta labinluway salikap. Ya kaganawan kanên, kay naubat sa limay tinapay buy sa luway kênan lanêm. *Nakasulat sa Sabin Bapan Namalyari: Mateo 14:13-21; Marcos 6:31-44; Lucas 9:10-17; Juan 6:5-15* ## 31. Namita si Jesus sa Babun Lanêm https://openbiblestories.org/l/blx/story-31/ ![](https://cdn.door43.org/obs/jpg/360px/obs-en-31-01.jpg) Pamakayarin nangaral Jesus, sinabi na sa mani tagasunul na, "Kaban pan-ipauli kuy mani tawu, magsakay kaw na sa bangka amên muna kaw sa Betsaida." Sên naipauli nay nay mani tawu, sinumukpa si Jesus sa gisay bung-uy amên kakapad nay manalangin. Buy nanalangin ya anggan pabunak yabi. ![](https://cdn.door43.org/obs/jpg/360px/obs-en-31-02.jpg) Sên idi yana sa bunak dagat ya bangkan mani tagasunul na, magkasakit silay na sa pagsagwan, gawan salungat sila sa masikan na bagyu. ![](https://cdn.door43.org/obs/jpg/360px/obs-en-31-03.jpg) Pamakayarin nanalangin Jesus, inlaku nay mani tagasunul nan mamita ya sa babun lanêm. ![](https://cdn.door43.org/obs/jpg/360px/obs-en-31-04.jpg) Sên nakitan mani tagasunul nay dilag mamita sa babun lanêm, kinêdêsan sila gawan sa sadyay limu la. Kabay nakaangaw silan paradi, “Anitu!” Tandan Jesus ya malimu sila. Kabay nagbêg ya, “Agana kaw malimu, ta sikuy ati!” ![](https://cdn.door43.org/obs/jpg/360px/obs-en-31-05.jpg) Sinabin Pedru kan Jesus, “Panginuun, nu sabay sikay abiin, ipalaku muku baysên un mamita êt sa babun lanêm.” Nakitbay si Jesus, “Kaksaw ka!” ![](https://cdn.door43.org/obs/jpg/360px/obs-en-31-06.jpg) Kabay nagtabuy si Pedru sa bangka buy namita sa babun lanêm papakun kan Jesus. Nuwa sên katiumnuy nan nagtakbang Pedro, nangawing ya sa palitêng na buy natanam nay malakas say angin buy nakit nay sadyay lakas allun. ![](https://cdn.door43.org/obs/jpg/360px/obs-en-31-07.jpg) Gawan baysên, nalimwan Pedru buy pakanawa yan nilêbêg. Nan-angaw ya, “Panginuun, iligtas muku!” Tambêng yan sinagêp Jesus buy sinabi na, “Nabêlêng yay panampalataya mu ta! Buy siyan magmitalisa yay nakem mu ta?” ![](https://cdn.door43.org/obs/jpg/360px/obs-en-31-08.jpg) Pamakasakay lan Jesus buy si Pedru sa bangka, tambêng tinunggên na malakas sa angin buy napatêtbêk ka lanêm. Inulimên yan mani tagasunul na buy sinabi la, “Pêtêg yabay ya sikay Anak Bapan Namalyari!” *Nakasulat sa Sabin Bapan Namalyari: Mateo 14:22-33; Marcos 6:45-52; Juan 6:16-21* ## 32. Pinaiyul Jesus ya liyaki ya sinêdakan nadawak ka ispiritu https://openbiblestories.org/l/blx/story-32/ ![](https://cdn.door43.org/obs/jpg/360px/obs-en-32-01.jpg) Gisay allu, nagsakay sa bangka si Jesus buy mani tagasunul na buy inlumipay sila sa dagat Galilea papakun sa lugal mani Gerasenu. ![](https://cdn.door43.org/obs/jpg/360px/obs-en-32-02.jpg) Sên nilatêng silay na sa lipay dagat, dilag baydun gisay liyaki ya sinêdakan nadawak ka ispiritu ya mamwayun mambêng kan Jesus. ![](https://cdn.door43.org/obs/jpg/360px/obs-en-32-03.jpg) Sadyay pas-êy liyaki. Kabay ayin makabênbên kana, agyan kay gisa. Agyan ikadena pun êt mani tawuy gamêt buy bitis na, pawa na pun êt mabuytu. ![](https://cdn.door43.org/obs/jpg/360px/obs-en-32-04.jpg) Manugêl la liyakin ati madani sa pamilbêngan. Buy pawa yan man-angaw. A ya magyaming buy pansugatên nan batuy lawini na. ![](https://cdn.door43.org/obs/jpg/360px/obs-en-32-05.jpg) Sên nidani ya kan Jesus, nanduku ya sa arapan na. Sinabin Jesus sa nadawak ka ispiritu, “Magtas ka sa tawun abiin!” ![](https://cdn.door43.org/obs/jpg/360px/obs-en-32-06.jpg) Kabay nan-angaw yan masnêg, “Jesus sa Anak Bapan Namalyari ya makapangyarian, sabêt ta daygên mu kangku? Makisabi yaku kamu, agana mu ku pasakitan.” Pinatang yan Jesus, “Sabêt ta lagyu mu?” Nakitbay ya nadawak ka ispiritu, “Pulutung, gawan malakê kay.” (Pulutung ya pamêg sa libulibuy sundalus Romano.) ![](https://cdn.door43.org/obs/jpg/360px/obs-en-32-07.jpg) Nakilunuslunus kan Jesus ya mani nadawak ka ispiritu, “Agana mu kay ipatas sa lugal la ati!” Sa madani baydu, dilag malakêy babuy ya manabêl sa agid bung-uy. Kabay nakisabi ya mani nadawak ka ispiritu kan Jesus, “Paulayên mu kay sumun sa malakêy babuy!” Sinabin Jesus kalla, “Dali, magsêdak kaw na!” ![](https://cdn.door43.org/obs/jpg/360px/obs-en-32-08.jpg) Inumawas sa mani nadawak ka ispiritu sa liyaki buy nagsêdak sila sa mani babuy buy nuwayun nagtabuy papakun sa bêtlay bêngaw. Kabay nangananabu sila sa dagat buy nangalulumud. Ya bilang mani babuy ya abitu, luway libu. ![](https://cdn.door43.org/obs/jpg/360px/obs-en-32-09.jpg) Nuwayuy mani manaysay babuy papakun sa balayan buy imbalita lay mani dinyag Jesus sa mani tawuy matbêng la. Pamakalatêng mani tawu ubat sa balayan nakit lay liyaki ya ubatan nadawak ka ispiritu ya mamangêd day isip buy nakaiknu winan nakayaming. ![](https://cdn.door43.org/obs/jpg/360px/obs-en-32-10.jpg) Nuwa nalimwan mani tawu sa dinyag Jesus. Kabay pikisabyan la yan mita sa lugal abitu. Kaban maglêan nan magsakay si Jesus sa bangka, nakisabi yaman na liyaki ya ubatan nadawak ka ispiritu, “Kilaku waku dayi kamuy Jesus.” ![](https://cdn.door43.org/obs/jpg/360px/obs-en-32-11.jpg) Nuwa sinabin Jesus kana, “Agana kayna kilaku. Muli ka tana sa pamilya mu buy mani kamag-anak mu amên maibalita mu kallay dinyag Panginuun kamu buy nu parasaantu yan nalunus kamu.” ![](https://cdn.door43.org/obs/jpg/360px/obs-en-32-12.jpg) Kabay nuli ya liyaki buy imbalita na sa kaganawan tawu nu parasaantu yan kinalunusan Jesus. Nakaupapas sa kaganawan nakalêngê sa kwentu. ![](https://cdn.door43.org/obs/jpg/360px/obs-en-32-13.jpg) Nag-udung si Jesus sa lipay dagat buy malakêy tawuy nipipiitan kana. Dilag gisay babayi bayduy mapu buy luway tawun nan pandayên. Naubus say kaganawan pibandiyan na sa pamayad sa pagpaêlêw na sa mani mangulu. Nuwa a ya napaiyul, nun a naluyung pun na sakit na. ![](https://cdn.door43.org/obs/jpg/360px/obs-en-32-14.jpg) Nabalitan nay mamaiyul si Jesus. Kabay naisip nay “Agyan kay madukpan kuy yaming Jesus, umiyul lakina.” Kabay naku ya kan Jesus. Sên madani yina sa bukutan na, dinukpan nay yaming Jesus. Pamakadukpa na, tambêng yan inumiyul. ![](https://cdn.door43.org/obs/jpg/360px/obs-en-32-15.jpg) Tambêng natanam Jesus ya dilag nag-awas sa kapangyarian ubat kana. Kabay nangawing ya buy namatang, “Sisabêt ta nandukpa kangkun ah?” Nakitbay ya mani tagasunul na, “Manuru, tanda muy malakêy tawuy nakapalitêng nga nipipiitan amên midani kamu. Uysiyan mamatang ka ya pun nu sisabêt ta nandukpa kamu ta?” ![](https://cdn.door43.org/obs/jpg/360px/obs-en-32-16.jpg) Nandukuy babayi sa arapan Jesus ya manginagin sa limu. Insabi nay dinyag na buy nu parasaantu yan inumiyul. Kabay sinabin Jesus kana, “Patêl la, inumiyul ka gawan sa panampalataya mu kangku. Kabay muli kaynan napatêtbêk ka nakêm.” *Nakasulat sa Sabin Bapan Namalyari: Mateo 8:28-34; 9:20-22; Marcos 5:1-20; 5:24b-34; Lucas 8:26-39; 8:42b-48* ## 33. Ya Kwentu tungkul sa Manggitna https://openbiblestories.org/l/blx/story-33/ ![](https://cdn.door43.org/obs/jpg/360px/obs-en-33-01.jpg) Gisay allu, nangaral si Jesus madani sa agid dagat buy malakêy tawuy nititipun sa palitêng na. Kabay nagsakay ya sa gisay bangka buy niknu ya baydun nangaral. ![](https://cdn.door43.org/obs/jpg/360px/obs-en-33-02.jpg) Paradi ya ingkwentun Jesus kalla, “Dilag gisay manggitnay namibulaglag bini. Sa pamibulaglag na, dilag bini ya nangananabu sa dan. Inlumatêng nga mani uybun manuk buy tinuktuk lay mani bini. ![](https://cdn.door43.org/obs/jpg/360px/obs-en-33-03.jpg) Dilag mani bini ya nanabu sa mabatuy luta ya ayin mayngan luta. Tambêng tinumubuy bini gawan nalayab ba luta. Nuwa sên naputakan mamut ta ati, nawangêy sila, gawan ayin silan pukat pagyamutan. Kabay nangamamati sila. ![](https://cdn.door43.org/obs/jpg/360px/obs-en-33-04.jpg) Dilag mani kaatag bini ya nanabu sa lutay pantubwanan têmak ka madiwi. Tinumubuy bini buy tinubuy êt ta diwi nuwa asê dinumagul la bini buy asê nanagêy gawan nakulaputan yan diwi. ![](https://cdn.door43.org/obs/jpg/360px/obs-en-33-05.jpg) Ya kaatag gaman nanabu sa mangêd da luta. Tinumubu buy dinumagul la mani ati buy nanagêy. Si kaatag, nanagêy titlumpu buy si kaatag tianêmmapu buy si kaatag êt dinalan na lasi. Sikaw wa mallêngê, pakaisipin yuy abiin!” ![](https://cdn.door43.org/obs/jpg/360px/obs-en-33-06.jpg) Asê napukatan mani tagasunul ya ingkwentun Jesus. Kabay impatanda na nu sabêt ta labay sabin kwentu, “Ya bini, sabay ya sabin Bapan Namalyari. Ya dan nu saantu nanabuy dakun umnuy bini, sabay ya mani tawuy nallêngên sabin Bapan Namalyari nuwa a la napukatan. Kabay inlumatêng si Satanas buy intas na sa nakêm lay sabin Bapan Namalyari. ![](https://cdn.door43.org/obs/jpg/360px/obs-en-33-07.jpg) Ya mabatuy luta nu saantu nanabuy kaatag ga mani bini, sabay ya mani tawuy nakalêngên sabin Bapan Namalyari buy matula lan tinanggap pa ati. Nuwa sên nakadanas silan kasakitan buy pangusig, asê napêng nga panampalataya la. ![](https://cdn.door43.org/obs/jpg/360px/obs-en-33-08.jpg) Ya lutay dilag têmak ka madiwi nu saantu nangananabuy kaatag bini, sabay ya mani tawuy nakalêngên sabin Bapan Namalyari, nuwa sên napêng ngana, nasambut silaynan pangganaken sa biyay la, pibandiyan buy panunul sa kalabayan lawini la. Kabay asê nanagêy ya sabin Bapan Namalyari gawan asê mangakit sa biyay la. ![](https://cdn.door43.org/obs/jpg/360px/obs-en-33-09.jpg) Nuwa ya mangêd da luta nu saantu nangananabuy bini, sabay ya mani tawuy nallêngê buy naniwala sa sabin Bapan Namalyari. Buy nanagêy ya sabin Bapan Namalyari gawan mangakit sa biyay la. *Nakasulat sa Sabin Bapan Namalyari: Mateo 13:1-8, 18-23; Marcos 4:1-8, 13-20; Lucas 8:4-15* ## 34. Ya Kaatag pun na Kwentun Jesus https://openbiblestories.org/l/blx/story-34/ ![](https://cdn.door43.org/obs/jpg/360px/obs-en-34-01.jpg) Malakê pun na ingkwentun Jesus tungkul sa pag-arin Bapan Namalyari. Sinabi na, “Ya pag-arin Bapan Namalyari maiparisu ya sa gisay but-un mustasa ya intanêm sa panggitnan. Tanda yuy si but-un mustasa, sabay ya pinakanabêlêng sa kaganawan but-u.” ![](https://cdn.door43.org/obs/jpg/360px/obs-en-34-02.jpg) Nuwa nu tumubuy na, pakadyag yan gisay kayu. Kabay ya sangan ati, mapanyagan salay uybun manuk.” ![](https://cdn.door43.org/obs/jpg/360px/obs-en-34-03.jpg) Dilag pun ingkwentu si Jesus. Sinabi na, “Ya pag-arin Bapan Namalyari, maiparisu ya sa pamalbag ga pikisukit gisay babayi sa ginêmês sa arina angga sa mapalbag nay arina ya pandaygên tinapay.” ![](https://cdn.door43.org/obs/jpg/360px/obs-en-34-04.jpg) “Ya pag-arin Bapan Namalyari maiparisu êt sa gisay pibandiyan na nakakali sa gisay panggitnan. Sên nakitan gisay liyaki ya ati, ingkali nan manguman. Matula-tula ya. Kabay insaliw nay kaganawan pibandiyan na buy sinaliw nay panggitnan na abitu.” ![](https://cdn.door43.org/obs/jpg/360px/obs-en-34-05.jpg) “Ya pag-arin Bapan Namalyari, maiparisu ya êt sa gisay mangalakal mani perlas. Mangkap yan mamangêd da perlas ya makamalkamal. Sên nakitan nay perlas ya pantêkapên na, insaliw nay kaganawan pibandiyan na buy sinaliw nay abituy perlas.” ![](https://cdn.door43.org/obs/jpg/360px/obs-en-34-06.jpg) Ingkwentu êt Jesus ya tungkul sa mani tawuy magtiwala sa mangangêd da diyag la buy pandustakên na kaatag tawu. “Dilag luway liyaki ya naku sa Templu amên manalangin. Maningil buwis sa gisa. Si gisa, pinunu sa simbaan.” ![](https://cdn.door43.org/obs/jpg/360px/obs-en-34-07.jpg) “Nanalangin na pinunu sa simbaan, ‘Bapan Namalyari, magpasalamat taku kamu tagawan a ku makasalanan kaparisun mani manakaw, mamurayit buy makikanayun o kaparisun ati ya maningil buwis.’” ![](https://cdn.door43.org/obs/jpg/360px/obs-en-34-08.jpg) Alimbawa sa gisay duminggu, katilwa kun mag-ayunu buy mam-i yaku êt ikapu sa kaganawan naupa ku. ![](https://cdn.door43.org/obs/jpg/360px/obs-en-34-09.jpg) Nuwa si abituy maningil buwis, nakaidêng ya sa madayu buy nanalangin. Sa dêng-êy na, a ya makaêlêw sa langit. Kabay pan-apuapun nay pagaw na. Si pansabin na, ‘Bapan Namalyari, malunus ka kangku, ta gisa kun makasalanan.’ ![](https://cdn.door43.org/obs/jpg/360px/obs-en-34-10.jpg) “Pamakayari sinabin Jesus ‘Pansabin ku kamuyu. Inlêngên Bapan Namalyari ya panalangin maningil buwis buy matinêk kina sa pangêlêw na. Nuwa si pinunu sa simbaan, asê inlêngên Bapan Namalyari ya panalangin na. Iyêpan Bapan Namalyari ya mapagmatag-ay buy itag-ay nay mapagpayêpay nakêm.”’ *Nakasulat sa Sabin Bapan Namalyari: Mateo 13:31-33, 44-46; Marcos 4:30-32; Lucas 13:18-21; 18:9-14* ## 35. Ya Kwentu tungkul sa Bapay Mapangidu https://openbiblestories.org/l/blx/story-35/ ![](https://cdn.door43.org/obs/jpg/360px/obs-en-35-01.jpg) Gisay allu, panturwanan Jesus ya mani maningil buwis buy mani tawuy makasalanan ya niaawyun amên lêng-ên ya. ![](https://cdn.door43.org/obs/jpg/360px/obs-en-35-02.jpg) Idi êt bayduy dakun umnuy pinunu sa simbaan. Nakitan lay si mani makasalanan intuwad Jesus kaluguran. Kabay inuyam laya. Gawan sa panguyam la kana, ingkwentu nay ati. ![](https://cdn.door43.org/obs/jpg/360px/obs-en-35-03.jpg) “Dilag gisay bapay nag-anak luway liyaki. Amêsên, sinabin bungsu sa bapa na, ‘Bapay, idin mina kangkuy atag ku sa mani pibandiyan mu!’ Kabay si kaganawan pibandiyan bapa la, indakay nay na sa luway anak na.” ![](https://cdn.door43.org/obs/jpg/360px/obs-en-35-04.jpg) “Sên nakway nan bungsuy dakay na, naku ya sa marayuy lugal. Baydu na ginastus sa pera na sa ayin kapukatan na pamibiyaybiyay na.” ![](https://cdn.door43.org/obs/jpg/360px/obs-en-35-05.jpg) “Pamakayarin abitu, sadyay layang nga nadanasan mani tawu sa binyanan abituy bungsuy anak. Ayin ninan peran panaliw kanen na. Kabay nakiipus ya tanan mamakan babuy. Sa sadyay kasakitan buy layang, labay nayna dayin kanen na pan-ipakan sa babuy.” ![](https://cdn.door43.org/obs/jpg/360px/obs-en-35-06.jpg) “Sên naisip-isip nay kaganawan dinyag na, sinabi na sa sarili na, ‘Du kanyan naman ni agyan na ipus bapa kuy malakêy maêkan buy subra pun êt kalla. Nuwa sikina man, mati yan layang baydi. Mag-udung ngaku tana sa bapa ku buy makisabi yaku kanan ibilang naku sa mani ipus na.” ![](https://cdn.door43.org/obs/jpg/360px/obs-en-35-07.jpg) Idi yapun sa madayu, nakitan ninan bapa na. Sa lunus bapa na kana, ginanagan nayan tinakês buy dinêp.” ![](https://cdn.door43.org/obs/jpg/360px/obs-en-35-08.jpg) Sinabi na sa bapa na, “Bapay nangasalanan naku kamu buy kan Bapan Namalyari. A kina sêpat bêgên mun anak.” ![](https://cdn.door43.org/obs/jpg/360px/obs-en-35-09.jpg) “Nuwa sinabin bapa na sa mani ipus na, ‘Parasên yu! Kêwên yuy pinakamangêd da yaming buy ipayaming yu kana. Pasingsingan yu ya buy pasapatusan. Buy mangwa kaw nabêlêng nga bakay impataba. Patin yuy ati ta mangan kitamu buy magsaya! Gawan nabyay ya anak ku, ya indap kun nati! Indap ku êt nu nabating, pakan nakitan nana!’ ![](https://cdn.door43.org/obs/jpg/360px/obs-en-35-10.jpg) “Kabay nagsayay mani tawu. Asê napêng, nuli ya panganay ubat sa panggitnan. Nalêngê nay tigtigan buy talêkan. Inisip na nu sabêt ta nalyari sa bali la.” ![](https://cdn.door43.org/obs/jpg/360px/obs-en-35-11.jpg) “Sên natandan nay kasayaan na abitu, para sa pag-udung bungsuy patêl na, nanubag ya. A ya kalabay sumun sa lalên bali la. Kabay nagsalwang nga bapa na buy pikisabyan yan makiawyun sa kasayaan, nuwa a ya nakalabay.” ![](https://cdn.door43.org/obs/jpg/360px/obs-en-35-12.jpg) “Sinabin panganay sa bapa na, ‘Bapay, sa makarang nga panawun, para kun ipus sa manunul sa kaganawan pan-iutus mu. Nuwa agyan misan, a mukuta binyanan agyan kay gisay nabêlêng nga kambing ta amên makapagsaya ku kaawyun mani kaluguran ku. Nuwa sên inlumatêng nga anak muy bungsu ya nangubus nanggastus pibandiyan mu sa mani babayi ya pambayaran, impatyan mu ya pun êt impatabay baka!’ ” ![](https://cdn.door43.org/obs/jpg/360px/obs-en-35-13.jpg) “Kabay nakitbay ya bapa na, ‘Pakan pawa kata yan kayêk pagkaawyun na anak kuta buy ya kaganawan pibandiyan kuy kay kamu. Nuwa sêpat kitamun magsaya gawan si patêl muy indap tamu nu nati yana, pakan nabyay awêd. Indap tamu êt nu nabating ngana, pakan nakitan tamina.’ ” *Nakasulat sa Sabin Bapan Namalyari: Lucas 15:11-32* ## 36. Nagbayuy lupan Jesus https://openbiblestories.org/l/blx/story-36/ ![](https://cdn.door43.org/obs/jpg/360px/obs-en-36-01.jpg) Gisay allu, pikilakun Jesus ya tatluy tagasunul na, si Pedru, buy ya mipatêl la silan Santiagu buy si Juan. (Si Juan na pantukuyun baydi alwan si Juan na namawtismu kan Jesus). Kay kakapad lay sinumukpa sa matag-ay ya bung-uy amên manalangin. ![](https://cdn.door43.org/obs/jpg/360px/obs-en-36-02.jpg) Kaban manalangin si Jesus, sinumawang nga lupa nan nanuwad mamut buy ya yaming na, pinupumutin nanuwad sawang nga ayin kaparisu baydi sa babun luta. ![](https://cdn.door43.org/obs/jpg/360px/obs-en-36-03.jpg) Pamakayari bêngat tan nagpakit si Moises buy si Elias ya makisabi kan Jesus. Nabyay ya luway liyakin ati sa babun luta dakun umnuy nay dinalan na tawun na inlumibas bayu pun malyari ya ati. Nakisabi sila kan Jesus tungkul sa kamatyan nay madani yan malyari sa Jerusalem. ![](https://cdn.door43.org/obs/jpg/360px/obs-en-36-04.jpg) Kaban makisabi si Moises buy si Elias kan Jesus, sinabin Pedru kan Jesus, “Panginuun, mangêd da idi kay baydi. Nu labay mu, manyag kay tatluy sawung: gisa kamu, gisa kan Moises buy gisa êt kan Elias.” Nasabin Pedruy abiin gawan natalbakan na. ![](https://cdn.door43.org/obs/jpg/360px/obs-en-36-05.jpg) Kaban magsabi pun si Pedru, natugpawan buy napalitêngan silan mamakasilêw wa ginêm. Dilag tunuy ya ubat sa ginêm ya magsabin, “Ati ya kakaidwan kun Anak ya lubus kapapaidu kangku. Mallêngê kaw kana!” Gawan sa limun mani tagasunul nipaglukub sila sa luta. ![](https://cdn.door43.org/obs/jpg/360px/obs-en-36-06.jpg) Tinalan silan Jesus buy sinabi na kalla, “Agana kaw malimu. Midêng kaw.” Sên nangêlêw sila sa palitêng la, kay si Jesus tanay nakitan la. ![](https://cdn.door43.org/obs/jpg/360px/obs-en-36-07.jpg) Inlumunsan na si Jesus buy mani tagasunul na ubat sa bung-uy. Sinabin Jesus kallay, “Gana yu sabin agyan kansabêt man na nakitan yu. Madani yakinan mati nuwa manguman nakun mabyay. Nu nalyari yay sinabi ku, malyari yinan ikuwentu. *Nakasulat sa Sabin Bapan Namalyari: Mateo 17:1-9; Marcos 9:2-8; Lucas 9:28-36* ## 37. Pinabyay Jesus si Lazaru https://openbiblestories.org/l/blx/story-37/ ![](https://cdn.door43.org/obs/jpg/360px/obs-en-37-01.jpg) Gisay allu, nabalitan Jesus ya nagsakit si Lazaru ya kaluguran na un asina maulwanan. Si ati si Lazaru, dilag yan luway patêl la babayi, si Marta buy si Maria, ya kaluguran êt Jesus. Sên natandan Jesus sa ati, sinabi na, “Ya sakit ta idi kana alwan kamatyan na kayaryan na, nun a abiin na magin sangkan amên maulimên mani tawu si Bapan Namalyari.” Kaidwan Jesus ya mani kaluguran na, nuwa nabuyutan nan luway allu bayu na nalaku si Lazaru. ![](https://cdn.door43.org/obs/jpg/360px/obs-en-37-02.jpg) Pamakayarin luway allu, sinabin Jesus sa mani tagasunul na, “Mag-udung kitamina sa prubinsyan Judea.” Nakitbay ya mani tagasunul na, “Manuru, sabêt pun na labay mun udungun sa Judea pakan labay kan patin mani Judiu baydu!” Sinabin Jesus, “Ya kaluguran tamuy si Lazarus, mamabêlêw ya, nuwa kaylangan ku yan pêwên.” ![](https://cdn.door43.org/obs/jpg/360px/obs-en-37-03.jpg) Sinabin mani tagasunul Jesus, “Panginuun, nu kay mamabêlêw ya, umiyul ya pun.” Kabay sinabi yan Jesus, “Nati ya si Lazaru. Nuwa magpasalamat takun ayin naku baydu amên sa kapamilatan daygên ku, luyang kaw pun maniwala kangku.” ![](https://cdn.door43.org/obs/jpg/360px/obs-en-37-04.jpg) Pamakalatêng Jesus sa balayan lan Lazaru, apatta allu naynan nati. Timbêng yan Marta buy sinabi na, “Panginuun, nu idi kata dayi baydi, asê dayi nati si Lazaru ya patêl yan. Nuwa paraman baydu, agyan amêsên, tanda kuy agyan sabêt man na yawadên mu kan Bapan Namalyari, idin na kamu.” ![](https://cdn.door43.org/obs/jpg/360px/obs-en-37-05.jpg) Nakitbay si Jesus, “Sikuy mam-in biyay buy sikuy mamabyay manguman sa mani nati. Ya kaganawan nangamamati ya nanampalataya kangku, manguman silan mabyay. Ya kaganawan nabyay ya nanampalataya kangku, a sila mati. Maniwala ka nayi sa sinabi ku?” Nakitbay si Marta, “Awuy Panginuun, maniwala kun sikay Mamiligtas ya Anak Bapan Namalyari.” ![](https://cdn.door43.org/obs/jpg/360px/obs-en-37-06.jpg) Pamakayari inlumatêng ngaman si Maria. Nanduku ya sa arapan Jesus buy sinabi nay, “Panginuun, nu idi kata dayi baydi, asê dayi nati ya patêl yan.” Pinatang silan Jesus, “Antuy pinilbêngan yu kan Lazaru?” Nakitbay sila, “Baydu sa pamilbêngan. Kaksaw ka amên makitan mu ya.” Nakatangis si Jesus. ![](https://cdn.door43.org/obs/jpg/360px/obs-en-37-07.jpg) Ya pinilbêngan kan Lazarus, gisay lêyang nga nagtakêp maragul la batu. Pamakalatêng Jesus baydu, sinabi nay, “Itulin yuy batu.” Nuwa nakitbay si Marta, “Dat nabatay na ta apatta allu naynan nakalbêng.” ![](https://cdn.door43.org/obs/jpg/360px/obs-en-37-08.jpg) Sinabin Jesus kalla, “Alwa nayin sinabi ku kamuy makitan muy kapangyarian Bapan Namalyari nu maniwala ka kangku?” Kabay intulin lay batu. ![](https://cdn.door43.org/obs/jpg/360px/obs-en-37-09.jpg) Pamakayari naningla sa langit si Jesus buy sinabi na, “Bapa, magpasalamat taku kamu, gawan inlêngê muku. Tanda kuy pawa kan mallêngê kangku, nuwa pansabin kuy ati para sa ikakangêd mani idi sa palitêng ku amên maniwala silan sikay namiutus kangku.” Buy masnêg binêg Jesus si Lazaru, “Lazaru, mag-awas ka!” ![](https://cdn.door43.org/obs/jpg/360px/obs-en-37-10.jpg) Nagsalwang yabay si Lazaru ya nakabêlêbêl pun telay paglêbêng. Kabay sinabin Jesus kalla, “Itas yuy telay nakabêlêbêl kana amên makabita ya.” Sen nakitan malakêy Judiuy dinyag Jesus, naniwala sila kana. ![](https://cdn.door43.org/obs/jpg/360px/obs-en-37-11.jpg) Nuwa kinasêman mani pinunu sa simbaan si Jesus. Kabay nisasabi silan namalanu nu parasaantu lan ipapati si Jesus buy si Lazaru. *Nakasulat sa Sabin Bapan Namalyari: Juan 11:1-46* ## 38. Nakisupakat si Judas sa mani kapatin Jesus https://openbiblestories.org/l/blx/story-38/ ![](https://cdn.door43.org/obs/jpg/360px/obs-en-38-01.jpg) Tinawun tawun magkalutuy mani Judiu sa Pestan Kaligtasan bilang pangganaka sa pamiligtas Bapan Namalyari sa mani ninunu la, dinadinalan nay tawun na inlumibas sabitun inipus sila sa Egiptu. Amêsên madani yay Pestan Kaligtasan. Kabay sinabin Jesus sa mani tagasunul nay labay kun miaawyun kitamun magkalutu sa Pestan Kaligtasan sa Jerusalem. Tandan Jesus ya ipapati laya sa Jerusalem. ![](https://cdn.door43.org/obs/jpg/360px/obs-en-38-02.jpg) Dilag gisa sa mani tagasunul Jesus ya manalan pera sabay si Judas. Pawa yan manakaw sa peray pantalanên na, gawan lupa yan pera. Pamakalatêng Jesus buy mani tagasunul na sa Jerusalem, nagdani ya si Judas sa pinunun mani Judiu. Tandan Judas sa asê kalabay maniwalay mani pinunun mani Judiu ya si Jesus ya lumatêng nga Mamiligtas buy impalanu la pun êt nu parasaantu yan ipapati. Gisay allu, naku si Judas sa mani pinunun mani Judiu buy nakisawupan ya kalla nu parasaantun madakêp si Jesus. ![](https://cdn.door43.org/obs/jpg/360px/obs-en-38-03.jpg) Namayad sila kan Judas tatlumpuy pilak pera amên isupakat na si Jesus. Nalyari ya ati kaparisun sinabin mani propeta. Nakalabay si Judas buy namita yan gintan nay pera. Nangkap yan paralan nu parasaantu nan maipadakêp si Jesus. ![](https://cdn.door43.org/obs/jpg/360px/obs-en-38-04.jpg) Kaawyun Jesus ya mani tagasunul na sabitun nagkalutu sila sa Pestan Kaligtasan. Kaban mangan sila, kingwan Jesus ya tinapay buy binis-il. Sinabi na, “Kêwên yu buy kanên na tinapay ya ati. Ati ya lawini kuy idin ku kamuyu. Daygên yuy ati bilang pangganaka kangku.” Sa paradi ya paralan pan-isabin Jesus kallay idin nay sarili na para kalla. ![](https://cdn.door43.org/obs/jpg/360px/obs-en-38-05.jpg) Pamakayari, kingwan Jesus ya alak buy sinabi na, “Inêmên yuy ati. Ati ya daya kuy mibulug amên mapatawad da mani kasalanan tawu ya sabay êt ta mamaptêg sa Bayuy Kasunduwan. Balang inêmên yuy ati, daygên yu bilang pangganaka kangku.” ![](https://cdn.door43.org/obs/jpg/360px/obs-en-38-06.jpg) Pamakayari, sinabin Jesus sa mani tagasunul na, “Gisa kamuyuy mamisupakat kangku.” Nakatêgag ga mani tagasunul na buy nipapatang sila nu sisabêt kallay manyag parabaydu. Sinabin Jesus, “Si tawuy biyan kun ati ya tinapay sabay ya mamisupakat kangku.” Pamakayari, binyanan nan tinapay si Judas. ![](https://cdn.door43.org/obs/jpg/360px/obs-en-38-07.jpg) Pamakakwan Judas sa tinapay, nasakup pinan kapangyarian Satanas. Namita ya buy nakisawupan ya sa mani pinunun mani Judiu amên madakêp la si Jesus. Yabi yanay abitu. ![](https://cdn.door43.org/obs/jpg/360px/obs-en-38-08.jpg) Pamakayari lan nangan, naku si Jesus buy mani tagasunul na sa Bung-uy mani Ulibu. Sinabin Jesus, “Sa yabin ati lakwanan yuku kaparisun nakasulat sa Sabin Bapan Namalyari, ‘Patin kuy magpastul buy mikyat ta mani tupa.’” ![](https://cdn.door43.org/obs/jpg/360px/obs-en-38-09.jpg) Nakitbay si Pedru, “Agyan lakwanan kaw kaganawan, a kataw lakwanan!” Sinabin Jesus kan Pedru, “Labay Satanas ya kêwên nakaw kaganawan, nuwa manalangin naku para kamuy Pedru amên asê mitas sa panampalataya mu. Paraman baydu, sa yabin ati bayu mangkati ya manuk, katitlu mun ipuglaw wa a muku kilala.” ![](https://cdn.door43.org/obs/jpg/360px/obs-en-38-10.jpg) Sinabi pun êt Pedruy, “Agyan mati yaku, a kata ipuglaw.” Para êt bayduy sinabin kaatag pun na mani tagasunul na. ![](https://cdn.door43.org/obs/jpg/360px/obs-en-38-11.jpg) Naku si Jesus buy mani tagasunul na sa lugal la pambêgên Getsemani. Sinabin Jesus kalla, “Manalangin kaw amên a kaw matuksun Satanas.” Pamakayari, namita ya amen makapanalangin yan kay kakapad na. ![](https://cdn.door43.org/obs/jpg/360px/obs-en-38-12.jpg) Katitlun nanalangin si Jesus, “Bapa ku, nu malyari, itas mu dayi kangkuy mani kasakitan na lumatêng. Nuwa nu kay ati ya paralan amên mapatawad da mani kasalanan mani tawu, daygên mu nu sabêt ta ustu.” Gawan sa sadyay kapigaganakan Jesus nantuluy sayngit nan paray nan daya. Kabay namiutus si Bapan Namalyarin mani ang-el amên papas-êyên na nakêm na. ![](https://cdn.door43.org/obs/jpg/360px/obs-en-38-13.jpg) Balang mayarin manalangin si Jesus, mag-udung ya sa mani tagasunul na buy makitan nan kay pawa silan mamabêlêw. Sa katitlun pag-udung na, sinabi na kallay, “Mimata kaw! Abiti yay tawuy mamisupakat kangku.” ![](https://cdn.door43.org/obs/jpg/360px/obs-en-38-14.jpg) Kaawyun inlumatêng Judas ya mani pinunun mani Judiu, mani sundalus buy malakêy tawu ya dilag gêgtan na kêya buy pamatuk. Nagdani si Judas kan Jesus buy sinabi na, “Mangêd da yabi kamuy, Manuru”, agnan pandêp na kan Jesus. Ati ya tanda' amên matandan mani kaawyun na nu sisabêt ta dakpên. Sinabin Jesus kana, “Judas, pandêp nayi ya gamitin mu amên isupakat taku?” ![](https://cdn.door43.org/obs/jpg/360px/obs-en-38-15.jpg) Sên dinakêp mani sundalus si Jesus, nanganus kêya si Pedru buy pinutus nay têk ipus puun pari. Sinabin Jesus, “Isakêb muy abiin na kêya mu! A mu nayi tanday agyu kun yawadên sa Bapa kuy miutus yan libulibuy ang-el amên itanggul laku? Nuwa kaylangan kun sunulun na kalabayan Bapa ku.” Pamakayari, pinaiyul Jesus ya têk ipus. Dinakep layna si Jesus buy nipamwayuy mani tagasunul na buy inlakwanan laya. *Nakasulat sa Sabin Bapan Namalyari: Mateo 26:14-56; Marcos 14:10-50; Lucas 22:1-53; Juan 12:6; 18:1-11* ## 39. Inlitis si Jesus https://openbiblestories.org/l/blx/story-39/ ![](https://cdn.door43.org/obs/jpg/360px/obs-en-39-01.jpg) Bunak kan yabi ya abitu sabitun gintan mani sundalus si Jesus sa balin puun pari amên litisin laya baydu. Nanunul kana si Pedru nuwa idi ya sa marayu. Sên idi ya sa balin puun pari si Jesus, nalakwan si Pedru sa lawasan. Nakiawyun ya sa mani mag-atug amên mimudu. ![](https://cdn.door43.org/obs/jpg/360px/obs-en-39-02.jpg) Sa lalên bali, inlitis mani puun Judiu si Jesus. Dilag silan mani kaawyun na mangalaram ma magpapêtêg pakan asê pariparisuy pansabin la. Kabay asê napagpapêtgan mani pinunun Judiuy taganan nagkasalanan si Jesus. Pakatêwêk kaman si Jesus. ![](https://cdn.door43.org/obs/jpg/360px/obs-en-39-03.jpg) Sa katatalwiyan, pinatang ngan puun pari si Jesus, “Sabin muti kanyan nu sikay nay Mamiligtas sa lumatêng ya Anak Bapan Namalyari ya nabyay?” ![](https://cdn.door43.org/obs/jpg/360px/obs-en-39-04.jpg) Nakitbay si Jesus, “Sikuwi Sikina buy makitan mukun nakaiknu sa êtêb panabtab Bapan Namalyari buy mallumatêng ubat sa langit.” Sa tubag puun pari, gininit nay yaming na. Nan-angaw ya, “A tamina kaylangan na magpapêtêg. Nalêngê yinay sinabi na ya sabay siya kanuy Anak Bapan Namalyari. Amêsên sabêt ta iatul yu kana?” ![](https://cdn.door43.org/obs/jpg/360px/obs-en-39-05.jpg) Nakitbay ya mani pinunun Judiu, “Sêpat yan mati!” Tinakpan lay matan Jesus tinupayan, dinugê buy dinustak. ![](https://cdn.door43.org/obs/jpg/360px/obs-en-39-06.jpg) Kaban mangêtêng si Pedru sa lawasan bali, nakitan yan gisay babayi ya ipus. Sinabin babayi kan Pedruy, “Alwa nayin sabay sikay pagkaawyun Jesus!” Nuwa impuglaw waman Pedruy a na kilala si Jesus. Asê naêpêng dilag ga êt kaatag ga babayi ya namatang kana, nuwa impuglaw wa êt Pedruy a na kilala si Jesus. Sa katatalwiyan, sinabin kaatag ga idi baydu, “Kaawyun ka yabay Jesus ta parisu kaw taga Galilea.” ![](https://cdn.door43.org/obs/jpg/360px/obs-en-39-07.jpg) Insumpan Pedruy, “Parusan nakun Bapan Namalyari nu kilala kuy liyakin abitu!” Tambêng nangkati ya manuk, agnan inawing Jesus si Pedru. ![](https://cdn.door43.org/obs/jpg/360px/obs-en-39-08.jpg) Nagpakadayu si Pedru buy nanangis ya gawan sa sadyay sakit nakêm. Si si Judas ya namisupakat kan Jesus, nakitan nay inatulan kamatyan si Jesus. Nalungkut ya buy namita yan nagpakamati. ![](https://cdn.door43.org/obs/jpg/360px/obs-en-39-09.jpg) Pamakamaranun, gintan mani puun Judiu si Jesus kan Gubernadur Pilatu. Labay lan atulan kamatyan si Jesus. Pinatang Pilatu si Jesus, “Sika nayi ya arin mani Judiu?” ![](https://cdn.door43.org/obs/jpg/360px/obs-en-39-10.jpg) Nakitbay si Jesus, “Sikay nay nagsabi, nuwa alwan baydi sa babun lutay kaarian ku. Gawan nu baydi sa babun luta, intanggul lakina dayin mani tagasunul ku. Naku waku baydi sa babun luta amên sabin sa mani tawuy kapêtêgan tungkul kan Bapan Namalyari. Mallêngê kangkuy kaganawan tawuy mangidu sa kapêtêgan.” Sinabin Pilatu, “Sabêt ta kapêtêgan?” ![](https://cdn.door43.org/obs/jpg/360px/obs-en-39-11.jpg) Pamakayarin pikisabyan Pilatu si Jesus, nagsalwang si Pilatu buy inarap nay mani tawu. Sinabi na, “Ayin nakun makitan na kasalanan sa tawun ati.” Nuwa nipan-angaw wa pinunun mani Judiu buy mani tawu, “Ipaku ya sa krus!” Inuman sinabin Pilatu, “Ayin yabay kasalanan!” Nuwa ingkakadus lan nan-angaw. Inuman na êt sinabin Pilatu, “Ayin yan kasalanan!” ![](https://cdn.door43.org/obs/jpg/360px/obs-en-39-12.jpg) Nuwa nalimwan Pilatu dat maguluy mani tawu sa Jerusalem. Kabay pinaulayan nan ipakun mani sundalus si Jesus sa krus. Inlatiku yan mani sundalus buy pinayamingan la yan yaming ari. Impakuruna la kanay dyag sa diwi. Dinustak la si Jesus buy sinabi la, “Elêwên yuy Arin mani Judiu!” *Nakasulat sa Sabin Bapan Namalyari: Mateo 26:57-27:26; Marcos 14:53-15:15; Lucas 22:54-23:25; Juan 18:12-19:16* ## 40. Impaku si Jesus sa krus https://openbiblestories.org/l/blx/story-40/ ![](https://cdn.door43.org/obs/jpg/360px/obs-en-40-01.jpg) Pamakayarin dinustak mani sundalus si Jesus, pinabita laya kaban nakabakay kanay krus ya pipakwan kana. ![](https://cdn.door43.org/obs/jpg/360px/obs-en-40-02.jpg) Gintan mani sundalus si Jesus sa gisay lugal la pambêgên “Bungu”. Kaban pan-ipaku lay gamêt buy bitis Jesus sa krus, sinabi na, “Bapay patawarên mu sila ta a la tanday pandaygên la.” Dilag impapaku si Gubernador Pilatu sa ugtun ulun Jesus. Paradi ya nakasulat, “Ati ya Arin mani Judiu.” ![](https://cdn.door43.org/obs/jpg/360px/obs-en-40-03.jpg) Nibabagutan na mani sundalus amên matandan la nu sisabêt ta makakwan yaming Jesus. Sa a la tanda sa pandaygên lan abiin, natupad laynay idi sa kasulatan ya, “Pinidadakayan lay mani yaming ku buy pinibabagutan la.” ![](https://cdn.door43.org/obs/jpg/360px/obs-en-40-04.jpg) Dilag êt luway kaawyun si Jesus ya nakapaku sa krus. Si gisa, idi sa êtêb panabtab na buy si gisa êt, idi sa udi na. Sinabin idi sa udin Jesus, “Uysiyan a mu ya iligtas sa sarili mu buy sikay ta?” Nuwa sinabyanan yan gisa pun na manakaw, “A ka nayi malimu kan Bapan Namalyari? Makasalanan kita, nuwa siya ayin yan kasalanan.” Buy nakisabi ya kan Jesus, “Ganakên muku nu mag-ari kay na.” Nakitbay si Jesus, “Amêsên êt, makaawyun kata sa Paraisu.” ![](https://cdn.door43.org/obs/jpg/360px/obs-en-40-05.jpg) Dinustak êt mani pinunun Judiu buy kaatag tawu si Jesus. Sinabi la kana, “Nu taganan Anak kan Bapan Namalyari, magtabuy ka sa kurus buy iligtas muy sarili mu. Nu madyag muy abiin, maniwala kay kamu!” ![](https://cdn.door43.org/obs/jpg/360px/obs-en-40-06.jpg) Ugtuy mamut ta abitu, nuwa bêngat tan dinumiglêm sa palitêng la. Nabuyutan tatluy uras ya nadiglêm. ![](https://cdn.door43.org/obs/jpg/360px/obs-en-40-07.jpg) Sinabin Jesus, “Bapay nayari kinay impadyag mu kangku! Pan-idin kina kamuy ispiritu ku.” Pamakayari nidêngdêng nga si Jesus buy nabuytuwan ninan inawanên. Bêngat tan nangayun buy ya maragul la kurtinay idi sa lalên templu napiatag sa bunak paubat sa babu angga sa aypa. Ya kurtinan abitu sabay ya nipapawa sa mani tawu kan Bapan Namalyari. ![](https://cdn.door43.org/obs/jpg/360px/obs-en-40-08.jpg) Sa kapamilatan pangamatin Jesus, makapagdani yay mani tawu kan Bapan Namalyari. Si sundalus sa mamantay kan Jesus, nakitan nay kaganawan nalyari buy nasabi nay, “Taganan ayin yabay kasalanan na tawun ati. Pêtêg awêd da Anak yan Bapan Namalyari.” ![](https://cdn.door43.org/obs/jpg/360px/obs-en-40-09.jpg) Pamakayari, dilag luway liyaki ya pinunun mani Judiu ya si Jose ya taga Arimatea buy si Nicodemo. Si ati ya luway pinunu, maniwala silan sabay si Jesus ya Mamiligtas. Inyawad lay bangkay Jesus kan Pilatu. Impunggus lan telay pallêbêng nga lawinin Jesus buy impasun sa lêyang nga pamilbêngan. Pamakayari, tinakpan lan maragul la batuy pamilbêngan. *Nakasulat sa Sabin Bapan Namalyari: Mateo 27:27-61; Marcos 15:16-47; Lucas 23:26-56; Juan 19:17-42* ## 41. Pinabyay Bapan Namalyari si Jesus https://openbiblestories.org/l/blx/story-41/ ![](https://cdn.door43.org/obs/jpg/360px/obs-en-41-01.jpg) Pamakayarin impakun mani sundalus si Jesus sa kurus, sinabin mani asê maniwalay pinunun mani Judio kan Pilatu, “Gobernador, naganaka yan na kalaraman tawun abiin sabitun nabyay yapun. Sinabi nay pamakayarin tatluy allu mabyay yan manguman. Kaylangan ipabantay ya pinilbêngan kana amên mapilmiyan tamuy asê malimêd mani tagasunul nay lawini na buy a sila makadyag kwentuy nabyay yan manguman.” ![](https://cdn.door43.org/obs/jpg/360px/obs-en-41-02.jpg) Pikitbayan silan Pilatu, “Mipikilaku kaw dakun umnuy mani sundalus buy papakabantayan yun mangêd da pinilbêngan kana.” Kabay pinigtan lan pamigtay maragul la batuy pinanakêp la sa lubut lêyang buy impabantay sa mani sundalus amên mapilmiyan na ayin makalimêd sa lawinin Jesus. ![](https://cdn.door43.org/obs/jpg/360px/obs-en-41-03.jpg) Pamakayarin in-ilbêng si Jesus pamakawasak, Alluy nan Pagpaynaway abitu. Sa Allun Pagpaynawa, pan-ibawal mani Judiuy maku sa pamilbêngan. Kabay asê nilakuy mani tagasunul na sa pamilbêngan. Pamakamaranun Duminggu nakuy mani babayi sa pinilbêngan kan Jesus amên punwan pabangi ya lawini na. ![](https://cdn.door43.org/obs/jpg/360px/obs-en-41-04.jpg) Kaban papakun sila sa pinilbêngan, bêngat tan nangayun. Gisay ang-el Panginuun ya nagtabuy ubat sa langit. Nanuwad yan kimat ta mamakasilêw. Intulin nay batuy pinanakêp sa pinilbêngan buy niknu ya sa batu. Sa sadyay limun mani sundalus, nabungsul sila. ![](https://cdn.door43.org/obs/jpg/360px/obs-en-41-05.jpg) Pamakalatêng mani babayi sa pamilbêngan, sinabin ang-el kallay, “Agana kaw malimu. Ayin na baydi si Jesus. Nabyay yinan manguman kaparisun sinabi na. Elêwên yuy pinilbêngan kana.” Inêlêw wabay mani babayi ya pinikalêkan kan Jesus. Ayin nabay baydu si Jesus! ![](https://cdn.door43.org/obs/jpg/360px/obs-en-41-06.jpg) Sinabin ang-el sa mani babayi, “Mita kawna buy ipatanda yu sa mani tagasunul la nabyay yan manguman si Jesus buy muna yina kalla sa Galilea.” ![](https://cdn.door43.org/obs/jpg/360px/obs-en-41-07.jpg) Limu buy sayay matanam mani babayi. Nuwayu sila papakun sa mani tagasunul amên ikwentu lay mangêd da balita. ![](https://cdn.door43.org/obs/jpg/360px/obs-en-41-08.jpg) Kaban papakun na mani babayi sa mani tagasunul Jesus amên sabin na mangêd da balita, nagpakit kalla si Jesus buy inulimên laya. Sinabin Jesus, “Agana kaw malimu. Mita kawna buy ipatanda yu sa mani tagasunul kuy maku sila sa Galilea buy makitan lakina baydu.” *Nakasulat sa Sabin Bapan Namalyari: Mateo 27:62-28:15; Marcos 16:1-11; Lucas 24:1-12; Juan 20:1-18* ## 42. Nag-udung si Jesus sa Langit https://openbiblestories.org/l/blx/story-42/ ![](https://cdn.door43.org/obs/jpg/360px/obs-en-42-01.jpg) Sa allun pangabyay Jesus, dilag luway tagasunul nay naku sa gisay madani ya baryu. Kaban mamita sila, pisasabyan lay pangamatin Jesus buy abituy sinabin mani babayi kallay nanguman nabyay si Jesus. Man-umasa silan si Jesus sa Mamiligtas, nuwa pinati laya. Sabitun sinabin mani babayi ya nanguman nabyay si Jesus, magmitalisay ya nakêm la gawan a la tanda nu sabêt ta paniwalan la. ![](https://cdn.door43.org/obs/jpg/360px/obs-en-42-02.jpg) Nakiagnan si Jesus sa pamita la, nuwa a la ya nakilala. Pinatang silan Jesus, “Sabêt ta pisasabyan yu?” Kabay ingkwentu la kan Jesus ya kaganawan nalyari sa dakun umnuy alluy inlumibas. Indap la dayuan si Jesus buy ayin tanda tungkul sa nalyari. ![](https://cdn.door43.org/obs/jpg/360px/obs-en-42-03.jpg) Impaintindin Jesus kallay Sabin Bapan Namalyari tungkul sa Mamiligtas. Impaganakan Jesus kallay sinabin mani propeta ya magkasakit buy mati ya Mamiligtas. Nuwa manguman yan mabyay sa ikatluy allu. Mamayabiyabi yana bayu sila nilatêng sa baryun Emaus buy baydu tana sila mamalibas yabi. ![](https://cdn.door43.org/obs/jpg/360px/obs-en-42-04.jpg) Kabay sinagyat luway tagasunul si Jesus amên kilaku kalla buy nakilaku yabay kalla. Bayu sila nangan, nangwan tinapay si Jesus buy impasalamat kan Bapan Namalyari. Sên binis-il naynay tinapay, tambêng lan nakilala si Jesus, nuwa bêngat yatan napanat. ![](https://cdn.door43.org/obs/jpg/360px/obs-en-42-05.jpg) Nisabi ya luway liyaki, “Si Jesus awêd da abitu! Kabay awêd natanam tay paran mana taynan pagkaawyun kaban pakisabyan na kita sa dan buy pan-ipaintindi na kantay sabin Bapan Namalyari.” Namaras silan naku sa Jerusalem. Pamakalatêng la baydu, ingkwentu la sa kaatag tagasunul ya mani nalyari, “Nabyay si Jesus! Nakitan yan ya!” ![](https://cdn.door43.org/obs/jpg/360px/obs-en-42-06.jpg) Kaban misasabi ya mani tagasunul, bêngat tan nagpakit kalla si Jesus buy sinabi nay, “Mapakamuyuy kapatêtbêkan!” Indap mani tagasunul, anito ya. Kabay nakitbay si Jesus, “Uysiyan malimu buy magluway nakêm yuta? Elêwên yuy gamêt buy bitis ku. Ayin lawini ya anito nuwa siku, dilag.” Kabay nanyawad yan kanên amên papêtgan nay alwa yan anitu. Buy binyanan layabay si Jesus un intêktêk ka kênan lanêm buy kinnan nay ati. ![](https://cdn.door43.org/obs/jpg/360px/obs-en-42-07.jpg) Sinabin Jesus, “Sinabi kina kamuyuy matupad da kaganawan nakasulat sa Sabin Bapan Namalyari tungkul kangku sa lumatêng nga panawun.” Pamakayari impaintindin Jesus sa mani tagasunul nay nakasulat sa Sabin Bapan Namalyari. Sinabi na pun êt, “Sabitun nuna pun, nakasulat tay magkasakit buy mati ya Mamiligtas, nuwa sa ikatluy allu, manguman yan mabyay.” ![](https://cdn.door43.org/obs/jpg/360px/obs-en-42-08.jpg) “Nakasulat êt ta iaral mani tagasunul kuy kaylangan magsisi ya kaganawan tawu amên mapatawad da mani kasalanan la. Buy mag-umpisa sila sa balayan Jerusalem buy pamakayari sa kaganawan layi sa buun babun luta.’” ![](https://cdn.door43.org/obs/jpg/360px/obs-en-42-09.jpg) Sa lalên apattapuy allu, magpakit si Jesus sa mani tagasunul na. Katamisan na êt nagpakit sa maygit liman dalan na tawu. Pinagpapêtgan na sa mani tagasunul na sa malakêy paralan ya pêtêg yan nabyay. Tinurwanan na êt sila tungkul sa pag-arin Bapan Namalyari. ![](https://cdn.door43.org/obs/jpg/360px/obs-en-42-10.jpg) Sinabin Jesus sa mani tagasunul na, “Indin na kangkuy kaganawan kapangyarian sa langit buy sa luta. Kabay lakwên yuy mani tawu sa kaganawan bansa buy daygên yu silan mani tagasunul ku. Bawtismuwan yu sila sa lagyun Bapa, Anak, buy sa Ispiritu. Buy turwanan yu silan manunul sa kaganawan mani in-utus ku kamuyu. Tandanên yu, pawa yukun mapagkaawyun.” ![](https://cdn.door43.org/obs/jpg/360px/obs-en-42-11.jpg) Inlumibas sa apattapuy allu sabitun nanguman nabyay si Jesus. Sinabi na sa mani tagasunul nay, “Manugêl kaw sa Jerusalem anggan a yu pun natanggap pa kapangyarian Bapa ku sa pallumatêng Ispiritun Bapan Namalyari.” Kapantutumag-ay yan Jesus sa langit buy natêmpanan ninan ulap angga sa a layna nakit. Niknu si Jesus sa êtêb panabtab Bapan Namalyari amên mamaalay na sa kaganawan bagay. *Nakasulat sa Sabin Bapan Namalyari: Mateo 28:16-20; Marcos 16:12-20; Lucas 24:13-53; Juan 20:19-23; Gawa 1:1-11* ## 43.Ya pag-umpisan Manampalatayay Miaawyun https://openbiblestories.org/l/blx/story-43/ ![](https://cdn.door43.org/obs/jpg/360px/obs-en-43-01.jpg) Sên nag-udung nga si Jesus sa langit, nanugêl pun sa Jerusalem ma mani tagasunul na tagawan abiin na intipan kallan Jesus. Pawa silan miaawyun manalangin. ![](https://cdn.door43.org/obs/jpg/360px/obs-en-43-02.jpg) Tinawun tawun pamakalibas limampuy allu pamakayarin Pestan Kaligtasan, pan-ikalutun mani Judiuy maulagay pesta ya pambêgên lan Pentecostes. Magkalutu sila gawan namupul silay nan trigu. Kabay mamakuy kaganawan Judiu sa Jerusalem amên miaawyun silan magkalutu sa pesta. Amêsên, pamakalibas gisay duminggu sabitun nag-udung nga si Jesus sa langit, panawun êt Pentecostes sa abitu. ![](https://cdn.door43.org/obs/jpg/360px/obs-en-43-03.jpg) Gisay allu, miaawyun na mani tagasunul Jesus. Mamakun ni nakalêngê silan sênêg sa buun bali ya pagtipunan la. Ya sênêg ga ati, nanuwad malakas sa angin. Dilag silan nakit ta paran apuy ya nanuwad dila ya nag-ugpa sa balang gisa kalla. Pamakayari, natupus silan Ispiritun Bapan Namalyari buy bêngat ta silan nakapagsabin magmikakanayun na sabi. ![](https://cdn.door43.org/obs/jpg/360px/obs-en-43-04.jpg) Sên nalêngên idi baydu sa Jerusalem ya magsabi silan magmikakanayun na sabi, nititipun na mani tawu ta labay lan matandan nu sabêt ta nalyari. Sên nalêngê lay pansabin mani tagasunul nu sabêt ta mangangêd da dinyag Bapan Namalyari, nakaupapas sila. ![](https://cdn.door43.org/obs/jpg/360px/obs-en-43-05.jpg) Dilag dakun umnu bayduy nagsabin, “Kay malasing nga mani tawun abiin!” Nuwa nidêng si Pedru buy sinabi na kalla, “Mallêngê kaw kangku! Asê malasing nga mani tawun ati nun a natupad amêsên na inpasulat Bapan Namalyari kan Propeta Joel, ‘Sa tawlin mani allu, idin kuy Ispiritu ku sa mani tawu.’” ![](https://cdn.door43.org/obs/jpg/360px/obs-en-43-06.jpg) “Mani Israelita, si Jesus, gisa yan tawuy manyag malakêy mamakaupapas buy imala sa kapamilatan kapangyarian Bapan Namalyari kaparisun tanda yu buy nakitan yu, nuwa impapaku yu ya pun êt sa krus!” ![](https://cdn.door43.org/obs/jpg/360px/obs-en-43-07.jpg) “Nuwa pinabyay yan manguman Bapan Namalyari. Kabay natupad da kanay pansabin sa kasulatan, ‘A mu paulayan bumata sa pamilbêngan na Banal mun Anak.’ Sikay taganay magpapêtêg ga pinabyay Bapan Namalyari si Jesus.” ![](https://cdn.door43.org/obs/jpg/360px/obs-en-43-08.jpg) “Amêsên nakaiknuy na si Jesus sa êtêb panabtab Bapa tamun Namalyari. Buy indin Jesus ya Ispiritun Bapa na kaparisun impangaku na. Ya kaganawan mangaakit buy mangalêngê yu, Ispiritun Bapan Namalyari ya nanyag.” ![](https://cdn.door43.org/obs/jpg/360px/obs-en-43-09.jpg) “Sêpat yun mapukatan ya si Jesus ya impapaku yu sa krus, sabay siyay dinyag Bapan Namalyarin Panginuun buy Mamiligtas!” ![](https://cdn.door43.org/obs/jpg/360px/obs-en-43-10.jpg) Sadyay lungkut mani tawuy nallêngê sa mani sinabin Pedru. Kabay namatang sila kan Pedru buy sa mani tagasunul, “Mani mapatêl, sabêt ta sêpat yan daygên?” ![](https://cdn.door43.org/obs/jpg/360px/obs-en-43-11.jpg) Nakitbay si Pedru, “Magsisi kaw buy magpabawtismu sa lagyun Jesu Cristu amên patawarên Bapan Namalyari ya mani kasalanan yu. Buy idin na êt kamuyuy Ispiritun Bapan Namalyari.” ![](https://cdn.door43.org/obs/jpg/360px/obs-en-43-12.jpg) Tatluy libuy tawuy naniwala sa sinabin Pedru buy nagin tagasunul silan Jesus. Kabay nagpabawtismu sila buy nakiaawyun sila sa mani manampalatayay miaawyun sa Jerusalem. ![](https://cdn.door43.org/obs/jpg/360px/obs-en-43-13.jpg) Ya mani bayun nanampalataya kan Jesus, pawa silan mamaku sa mani apostul amên mallêngê sa mani pan-iaral la. Pawa silan miaawyun bilang mipapatêl sa panampalataya. Pawa silan miaawyun mangan tinapay bilang pangganaka la sa dinyag Jesus buy pawa silan manalangin. Matula silan miaawyun mangulimên kan Bapan Namalyari buy nu sabêt ta idi kalla, mipam-i sila sa balang gisa. Mangêd da pangêlêw kaatag tawu kalla. Buy allu allun mallumakêy manampalataya. *Nakasulat sa Sabin Bapan Namalyari: Gawa 2* ## 44. Pinaiyul Pedru buy si Juan ya lumpu https://openbiblestories.org/l/blx/story-44/ ![](https://cdn.door43.org/obs/jpg/360px/obs-en-44-01.jpg) Gisay allu, naku si Pedru buy si Juan sa templu. Kaban mamadanidani sila sa susunan sa templu, dilag silan naakit ta gisay lumpuy liyaki ya magpalimus. ![](https://cdn.door43.org/obs/jpg/360px/obs-en-44-02.jpg) Pinakaêlêw yan Pedru buy sinabi na, “Ayin nakun peray maidin, nuwa dilag gakun idin kamu. Sa lagyun Jesu Cristu ya taga Nazaret, midêng ka buy mita ka!” ![](https://cdn.door43.org/obs/jpg/360px/obs-en-44-03.jpg) Tambêng pinaiyul Bapan Namalyari ya liyaki ya lumpu. Nakabita buy kapag-ukdu-ukduy nan nangulimên kan Bapan Namalyari. Nakaupapas ya mani tawuy nakakit kana ya idi sa lawasan templu. ![](https://cdn.door43.org/obs/jpg/360px/obs-en-44-04.jpg) Tambêng nakuy mani tawu amên êlêwên na tawuy lumpu ya inumiyul lana. Sinabin Pedru sa mani tawuy mititipun, “Mapatêl kun Israelita, uy siyan nakaupapas kaw ya sa nalyari ta? Buy papakaêlêwên yu kay yata? Indap yu nayi nu sikay ya nakapaiyul sa tawun ati gawan sa sarilin yan kapangyarian o kangedan yan? Asê! Inumiyul ya gawan sa kapangyarian Jesus buy sa panampalataya na kana.” ![](https://cdn.door43.org/obs/jpg/360px/obs-en-44-05.jpg) Sikaw wa nipapati kan Jesus kan gobernador Pilatu. Impapati yuy pangubatan biyay ya ayin katganan, nuwa pinabyay yan Bapan Namalyari. Ayu tanda nu sabet ta nadyag yu nuwa ginamit Bapan Namalyari ya abitu amen matupad da ula tungkul sa Mamiligtas ya pasakitin buy mati ya. Kabay magsisi kaw na buy mag-udung kaw kan Bapan Namalyari amên patawarên nay mani kasalanan yu.” ![](https://cdn.door43.org/obs/jpg/360px/obs-en-44-06.jpg) Nanubag ga mani pinunun Judiu kan Pedru buy kan Juan. Kabay impadakêp lay luwa buy impasukul. Paraman baydu, malakêy tawuy naniwala sa pangaral la buy nanampalataya sila kan Jesus. Kabay niras limay libuy lawyaki ya nanampalataya kan Jesus. ![](https://cdn.door43.org/obs/jpg/360px/obs-en-44-07.jpg) Pamakawasak, gintan mani pinunun mani Judiu si Pedru buy si Juan sa pinakapuun pari buy sa kaatag pun na pinunun Judiu. Pinatang la silan Pedru buy si Juan, “Sabet ta kapangyarian na ginamit yu amen paiyulun na lumpu?” ![](https://cdn.door43.org/obs/jpg/360px/obs-en-44-08.jpg) Nakitbay si Pedru, “Inumiyul la liyakin abitu gawan sa kapangyarian Jesus ya Mamiligtas. Sabay siyay impaku yu sa krus, nuwa inuman yan pinabyay Bapan Namalyari! A yu ya tinanggap nuwa ayin kaatag ga paralan amen miligtas nun a sa kapamilatan kapangyarian Jesus.” ![](https://cdn.door43.org/obs/jpg/360px/obs-en-44-09.jpg) Sên natandan mani pinunun Judiu ya kay nayêpay pangatawu lan Pedru buy si Juan buy a sila nag-aral, nakaupapas sila sa kapas-êyan nakêm lan magsabi. Nuwa naisip lay sabay sila bay-in na pagkaawyun Jesus. Kabay pinalimu la si Pedru buy si Juan bayu la impatas. *Nakasulat sa Sabin Bapan Namalyari: Gawa 3:1-4:22* ## 45. Si Felipe buy ya nagtungkulan sa Etiopia https://openbiblestories.org/l/blx/story-45/ ![](https://cdn.door43.org/obs/jpg/360px/obs-en-45-01.jpg) Si Esteban gisa ya sa mani pinunun nunan manampalatayay miaawyun. Pikatandan yan mangêd da tawu, biyasa ya buy pan-awyunan yan Ispiritun Bapan Namalyari. Malakêy nay dinyag Esteban ya mamakaupapas. Pawa nan pansabin sa mani tawuy kaylangan lan manampalataya kan Jesus. ![](https://cdn.door43.org/obs/jpg/360px/obs-en-45-02.jpg) Gisay allu, kaban pan-iturun Esteban ya tungkul kan Jesus, nakisubakan kanay dakun umnuy Judiu ya asê maniwala kan Jesus. Sa tubag la kan Esteban, indawak lay sinabi na. Sinabi la, “Nalêngê yan yay magsabin nadawak tungkul kan Moises buy tungkul kan Bapan Namalyari!” Kabay impadakêp la si Esteban buy gintan la ya sa pinakapuun pari buy sa mani pinunun mani Judiu. Idi êt bayduy malakêy mamipakadawak laban kan Esteban. ![](https://cdn.door43.org/obs/jpg/360px/obs-en-45-03.jpg) Pinatang puun pari si Esteban, “Pêtêg nayi ya pansabin la tungkul kamu?” Sinabin Esteban ya mamakaupapas sa dinyag Bapan Namalyari sabitun panawun Abraham angga sa panawun Jesus buy nu parasaantun asê pansunulun mani tawu si Bapan Namalyari. Buy sinabi na, “Mangakdêy ya ulu yu. A kaw kalabay manunul kan Bapan Namalyari buy pawa yun asê pantanggapên na pangawyun Ispiritun Bapan Namalyari. Kaparisu kaw mani ninunu yu ta pampatin yuy mani propetan Bapan Namalyari. Nuwa sikaw, mas nadawak pun na dinyag yu kaysa kalla gawan agyan na Mamiligtas sa in-utus Bapan Namalyari, impapati yu êt.” ![](https://cdn.door43.org/obs/jpg/360px/obs-en-45-04.jpg) Sên nalêngên mani tawuy ati, natubag-tubag sila. Kabay tinumpanan lay mani têk la buy nan-angaw silan masnêg. Ginuluy la si Esteban paawas sa balayan buy binatwan angga sa napati laya. ![](https://cdn.door43.org/obs/jpg/360px/obs-en-45-05.jpg) Nuwa bayu nati si Esteban, nanalangin ya, “Jesus tanggapên muy kaladwa ku.” Pamakayari nanduku ya buy nanalangin, “Panginuun, agana mu sila parusan sa nadawak ka dinyag la kangku.” Pamakasabi na, nati yina. ![](https://cdn.door43.org/obs/jpg/360px/obs-en-45-06.jpg) Dilag gisay liyaki bayduy nakiayun sa pamati kan Esteban. Binantayan nay yaming mani tawuy namati kan Esteban. Si lagyu na, Saulo. Sabitun panawun abitu, malakêy nay mani tawuy kalabay mamati sa mani manampalataya. Kabay malakêy manampalatayay nagtas sa tutugêlan la buy naku sa magmikakanayun na balayan. Nuwa agyan dakun antuy lakwên la, pan-iaral la sa mani tawuy makilala la ya tungkul kan Jesus. ![](https://cdn.door43.org/obs/jpg/360px/obs-en-45-07.jpg) Si Felipe gisa ya sa mani tagasunul Jesus. Sabitun panawun na pampasakitin na mani manampalataya, namita si Felipe sa Jerusalem. Naku ya sa Samaria buy baydu nan in-aral ya tungkul kan Jesus. Malakêy nanampalataya kan Jesus sa Samaria. Gisay allu, in-utus ang-el Panginuun si Felipe, “Maku ka sa dan papakun sa kakyangan.” Buy naku ya. Kaban mamita ya, nakitan nay gisay nagtungkulan ubat sa Etiopia ya nakasakay sa kalesa na. Sinabin Ispiritun Bapan Namalyari kan Felipe ya magdani ya buy pakisabyan nay nagtungkulan. ![](https://cdn.door43.org/obs/jpg/360px/obs-en-45-08.jpg) Sên marani ya si Felipe sa kalesa, nalêngê nay nagtungkulan na mamasan librun propeta Isaias. Paradi ya pambasen na “Gintan la yan paran tupay nakal-an patin. Kaparisu ya êt tupay pan-urugun ya ayin tarit. Dinustak la ya buy asê ustuy pangatuynungan kana. Pinati laya êt.” ![](https://cdn.door43.org/obs/jpg/360px/obs-en-45-09.jpg) Pinatang Felipe ya nagtungkulan, “Mapukatan mu nayin kayêk ka pambasên mu?” Nakitbay ya nagtungkulan, “A ku yabay mapukatan na pambasên ku nu ayin mamipapukat kangku. Kaksaw ka magsakay ka baydi sa dani ku. Sa êlêw mu, sisabêt ta pantukuyun Isaias? Kaatag tawu nayi o sarili na?” ![](https://cdn.door43.org/obs/jpg/360px/obs-en-45-10.jpg) Impapukat Felipe sa nagtungkulan ya si pantukuyun Isaias sabay si Jesus. Nanggamit pun êt si Felipe un kaatag pun na kasulatan amên sabin kanay Mangêd da Balita tungkul kan Jesus. ![](https://cdn.door43.org/obs/jpg/360px/obs-en-45-11.jpg) Kaban mamita si Felipe buy ya nagtungkulan, nipadan sila sa gisay lugal la dilag lanêm. Sinabin nagtungkulan kan Felipe, “Atuwe! Naglanêm baydu! Malyari yakina nayin magpabawtismu?” Buy inpapatgên nay pagsakayan nay kalesa. ![](https://cdn.door43.org/obs/jpg/360px/obs-en-45-12.jpg) Nakuy nagtungkulan buy si Felipe sa lanêm. Baydu yan binawtismuwan Felipe. Pamakayari nan binawtismuwan na nagtungkulan, gintan Ispiritun Bapan Namalyari si Felipe sa kaatag ga lugal. Baydu insundun Felipe ya pangaral na tungkul kan Jesus. ![](https://cdn.door43.org/obs/jpg/360px/obs-en-45-13.jpg) Buy nuli yaman na nagtungkulan sa Etiopia. Matula-tula ya gawan nakilala na si Jesus. *Nakasulat sa Sabin Bapan Namalyari: Gawa 6:8-8:5; 8:26-40* ## 46. Nagin manampalataya si Pablu https://openbiblestories.org/l/blx/story-46/ ![](https://cdn.door43.org/obs/jpg/360px/obs-en-46-01.jpg) Si Saulo ya bayintawuy namantay sa yaming mani namati kan Esteban. A ya maniwala kan Jesus buy pampasakitin nay mani manampalataya. Naku ya sa imbali-bali, pandakpên nay mani manampalataya, liyaki man o babayi, buy pan-isukul. Tinulutan yan pinakapuun pari ya maku sa Damasco amên dakpên nay mani manampalataya baydu buy ipasukul sa Jerusalem. ![](https://cdn.door43.org/obs/jpg/360px/obs-en-46-02.jpg) Kaban papakun si Saulu sa Damascu, nagpakit si Jesus kana. Nakitan Sauloy mamakasilaw wa sawang ya nakapalitêng kana. Nagpalukub ya buy dilag yan nalêngêy nagsabi kanan, “Saulu! Saulu! Uysiyan pan-usigin muku yata?” Nakitbay si Saulu, “Sisabêt kan kayêk?” Nakitbay si Jesus, “Siku si Jesus ya pan-usigin mu.” ![](https://cdn.door43.org/obs/jpg/360px/obs-en-46-03.jpg) Pamakaidêng Saulu, ayina makakit. Kabay tinambay yatan mani kaawyun na papakun sa Damascu. A ya nangan o ninêm agyan dakun sabet sa lalên tatluy allu. ![](https://cdn.door43.org/obs/jpg/360px/obs-en-46-04.jpg) Dilag gisay manampalatayay naglagyun Ananias. Pikisabyan yan Bapan Namalyari, “Maku ka sa bali ya tutugêlan Saulu buy ipaluntu muy gamêt mu kana amên makakit yan manguman.” Nuwa nakitbay si Ananias, “Panginuun, nabalitan kuy pampasakitin nay mani manampalataya.” Sinabin Bapan Namalyari kan Ananias, “Lakwên mu ya ta siyay pinili ku amên makilala kun mani Judio buy kaatag pun mani tawu. Gawan kangku, malakêy kasakitan na madanasan na.” ![](https://cdn.door43.org/obs/jpg/360px/obs-en-46-05.jpg) Kabay inlakun Ananias si Saulo buy impaluntu nay gamêt na. Sinabi na, “Si Jesus ya nagpakit kamu sa dan impalaku naku baydi kamu amên makakit kan manguman buy amên tanggapên na Ispiritun Bapan Namalyari.” Nakakit yabay si Saulo buy binawtismuwan yan Ananias. Baydu yapun nakaêkan buy nanguman pinumas-êy. ![](https://cdn.door43.org/obs/jpg/360px/obs-en-46-06.jpg) Tambêng nangaral si Saulu sa mani tawu. Sinabi na, “Si Jesus sabay ya Anak Bapan Namalyari!” Nagtakay mani Judiu gawan sabitun nuna pampasakitin Sauloy mani manampalataya nuwa amêsên gisa yina sa mani manampalataya. Nakisubakan êt si Saulu sa kaatag mani Judiu buy impapêtêg na kallay sabay si Jesus ya Mamiligtas. ![](https://cdn.door43.org/obs/jpg/360px/obs-en-46-07.jpg) Pamakalibas dakun umnuy allu, impalanun mani Judiuy patin si Saulo. In-utus lay dakun umnuy mani tawu amên magbantay sa mani pasbul balayan buy apatan si Saulo amên patin. Nuwa natandan Sauloy palanu la. Gisay yabi, ingkulsug yan mani kaluguran na sa maragul la basket buy intabuy ya sa lawasan bakud balayan. Kabay nakatakas si Saulo buy insundu nay pangaral na tungkul kan Jesus. ![](https://cdn.door43.org/obs/jpg/360px/obs-en-46-08.jpg) Naku si Saulo sa Jerusalem amên makasabi nay mani tagasunul Jesus, nuwa malimu sila kana. Kay si Bernabe, ya gisay manampalataya ya nangawyun kana sa mani apostul. Ingkwentun Bernabe kalla nu parasaantun kapas-ey mangaral si Pablu sa Damascu. Pamakayarin abitu, tinanggap pinan mani tagasunul Jesus. ![](https://cdn.door43.org/obs/jpg/360px/obs-en-46-09.jpg) Ya dakun umnuy mani manampalataya, namita sila sa Jerusalem gawan sa pamasakit buy naku sa Antioquia. Baydu la in-aral la tungkul kan Jesus. Malakêy mani tawu bayduy alwan mani Judio nuwa malakê kallay nagin manampalataya. Naku baydu si Saulo buy si Bernabe amên turwanan pun êt ta mani bayuy manampalataya tungkul kan Jesus amên luyang sila pun pumas-êy sa panampalataya la. Sa Antioquia nunan bineg ga mani Kristiyanuy manampalataya kan Jesus. ![](https://cdn.door43.org/obs/jpg/360px/obs-en-46-10.jpg) Gisay allu, kaban manalangin buy mag-ayunuy mani manampalataya sa Antioquia, sinabin Ispiritun Bapan Namalyari kallay, “Italaga yu kangku silan Bernabe buy si Saulo, ta dilag gakun ipadyag kalla.” Kabay nanalangin na mani manampalataya para kalla. Impaluntu la êt ta gamêt la kan Saulo buy kan Bernabe. Buy in-utus lay luwa amên iaral la Mangêd da Balita tungkul kan Jesus sa malakêy lugal. Naku sila sa magmikakanayun na lugal buy nangaral sa magmikakanayun na layi. Gawan sa pangaral lan Pablu buy si Bernabe malakêy nanampalataya kan Jesus. *Nakasulat sa Sabin Bapan Namalyari: Gawa 8:3; 9:1-31; 11:19-26; 13:1-3* ## 47. Pablo buy Silas sa Filipos https://openbiblestories.org/l/blx/story-47/ ![](https://cdn.door43.org/obs/jpg/360px/obs-en-47-01.jpg) Kaban mamita si Saulu sa sakup Roma, si lagyuy ginamit na Pablu. Gisay allu, pikilakun Pablu si Silas ya kaluguran na papakun sa Filipus amên iaral la bayduy Mangêd da Balita tungkul kan Jesus. Naku sila sa gisay lugal la madani sa ilug. Mamakuy mani tawu baydu amên manalangin. Napagkaluguran la êt bayduy gisay babayi ya naglagyun Lydia ya gisay magtindan telay nagbatêk muradu. Mangidu buy mangulimên ya kan Bapan Namalyari. ![](https://cdn.door43.org/obs/jpg/360px/obs-en-47-02.jpg) Sên napukatan Lydiay mensayi tungkul kan Jesus, nagpabawtismu ya buy buun pamilya na. Sinagyat na êt silan Pablu buy si Silas amên patugêlan na pun baydu sa bali na. Kabay nanugêl sila yabay baydu. ![](https://cdn.door43.org/obs/jpg/360px/obs-en-47-03.jpg) Pawan mamaku silan Pablu buy si Silas sa mani tawu sa lugal la panalanginan sa Filipus. Allu-allu makitan la bayduy gisay ipus sa anak ka babayi ya kilalaku kalla. Ya babayin abiin, nasêdakan yan nadawak ka ispiritu. Dilag yan kabiyasnan manuga sa kapamilatan nadawak ka ispiritu. Kabay maragul la panakitan mani amung na. ![](https://cdn.door43.org/obs/jpg/360px/obs-en-47-04.jpg) Nu makitan na si Pablu buy si Silas, pikilalakwan na sila buy masnêg nan pan-isabi ya, “Si mani tawun ati, lingkud silan Bapan Namalyari ya Katatag-ayan! Pan-iaral la kamuyu nu parasaantu kaw iligtas Bapan Namalyari!” Piuman-uman nan pansabin na abiin. Kabay nasulukan Pablo. ![](https://cdn.door43.org/obs/jpg/360px/obs-en-47-05.jpg) Gisay allu, masnêg ga êt magsabi ya babayi. Nagsuluk ka si Pablu kana. Kabay pinag-arapan yan Pablu buy intabi nay nadawak ka ispiritu sa lawinin anak, “Sa lagyun Jesus, magtas ka sa anak.” Sa uras êt ta abitu, nagtas sa nadawak ka ispiritu sa anak. ![](https://cdn.door43.org/obs/jpg/360px/obs-en-47-06.jpg) Sadyay tubag amung anak. Tandan lay nu ayin nay nadawak ka ispiritu sa anak, ayina makapanuga sa mani tawu buy gawan di, ayin nan panakitan na amung babayi. ![](https://cdn.door43.org/obs/jpg/360px/obs-en-47-07.jpg) Kabay ginuluy amung babayi si Pablu buy si Silas papakun sa mani manungkulan Roma. Dinugê lay luwa bayu la insukul. ![](https://cdn.door43.org/obs/jpg/360px/obs-en-47-08.jpg) Indin silan Pablu sa nalalêlalêy sukulan buy masipit lan impabantay. Binyanan êt kayuy bitis la amên a sila mibita. Nuwa pamakayabi, agyan idi sila sa nadawak ka kabilyan, nagkanta sila pun êt pangulimên kan Bapan Namalyari. ![](https://cdn.door43.org/obs/jpg/360px/obs-en-47-09.jpg) Bêngat tan nangayun malakas. Nibuklat ta mani pasbul sukulan buy naaswag ga kaganawan kadenan mani nakasukul. ![](https://cdn.door43.org/obs/jpg/360px/obs-en-47-10.jpg) Sên nipaimatay magbantay, nakitan nay nibuklat ta mani pasbul sukulan. Magpakamati yina dayi gawan indap na nitakas say mani nakasukul. Gawan nu nalyari ya abitu, tanda nay ipapati yan mani nipagtungkulan. Nuwa nakitan yan Pablu. Kabay sinabi na, “Agana ka magpakamati, ta abiti kay kaganawan!” ![](https://cdn.door43.org/obs/jpg/360px/obs-en-47-11.jpg) Kaban magdani kan Pablu buy kan Silas ya magbantay, manginagin ya sa limu buy pinatang na sila, “Sabêt ta sêpat kun daygên amên miligtas saku?” Sinabin Pablu, “Manampalataya ka sa Panginuun Jesus amên miligtas ka buy pamilya mu.” Pikilaku na silan Pablu buy si Silas sa bali na buy inuyasan nay mani nuka la. In-aral Pabluy Manged da Balita tungkul kan Jesus sa kaganawan tawuy idi baydu. ![](https://cdn.door43.org/obs/jpg/360px/obs-en-47-12.jpg) Sên nanampalatayay na kan Jesus ya magbantay buy pamilya na, binawtismuwan silaynan Pablu. In-il-an lan kanên si Pablu buy si Silas buy niaawyun silan nagsaya. ![](https://cdn.door43.org/obs/jpg/360px/obs-en-47-13.jpg) Pamakawasak, imbus san mani pinunun balayan silan Pablu buy si Silas. Pikisabyan lay luway mitay na sa balayan Filipus. Nuwa bayu sila namita, naku sila pun kan Lydia buy sa kaatag mani kaluguran la. Niwagaw wa Mangêd da Balita tungkul kan Jesus buy kapanlulumakê êt manampalatayay miaawyun. ![](https://cdn.door43.org/obs/jpg/360px/obs-en-47-14.jpg) Sa pamakun Pablu buy kaatag pun na mamunu sa manampalataya sa magmikakanayun na lugal, in-aral lay tungkul kan Jesus. Nanulat sila êt sa mani manampalatayay miaawyun amên papas-êyên lay nakêm mani manampalataya. Ya kaatag sulat ta ati nagin baagin Bibilya. *Nakasulat sa Sabin Bapan Namalyari: Gawa 16:11-40* ## 48. Si Jesus sa impangakun Mamiligtas https://openbiblestories.org/l/blx/story-48/ ![](https://cdn.door43.org/obs/jpg/360px/obs-en-48-01.jpg) Sabitun dinyag Bapan Namalyari ya babun luta, mangêd da kaganawan buy ayin pun kadawakan sa babun luta. Mipangidu si Adan buy si Eba buy kaidwan la êt si Bapan Namalyari. Sabitun nuna, ayin pun kamatyan buy sakit gawan parabaysên na labay Bapan Namalyari sa babun luta. ![](https://cdn.door43.org/obs/jpg/360px/obs-en-48-02.jpg) Sa kapamilatan utan pikisabyan Satanas si Eba sa hardin Eden amên tuksun. Kabay nangasalanan si Adan buy si Eba kan Bapan Namalyari. Gawan sa pangasalanan la, ya kaganawan tawu sa babun luta, magsakit buy mangamati yana. ![](https://cdn.door43.org/obs/jpg/360px/obs-en-48-03.jpg) Gawan sa pangasalanan Adan buy si Eba, sadyay dawak nalyari ta nasiray pamikibêtêk tawu kan Bapan Namalyari. Kabay paubat sabitun nuna, si kaganawan pan-ianak mangasalanan nana buy magin kapatin Bapan Namalyari. Nuwa dilag palanu si Bapan Namalyari amên maiudung nga mangêd da pamakibêtêk mani tawu kan Bapan Namalyari. ![](https://cdn.door43.org/obs/jpg/360px/obs-en-48-04.jpg) Sabitun nuna, impangakun Bapan Namalyari kan Ebay gisa sa mani layi nay mallasaw sa ulun utan. Nuwa sugatên naman Satanas sa buwên ati. Labay sabin, mapatin Satanas ya Mamiligtas nuwa pabyayên yan Bapan Namalyari. Gawan di, masiray kaganawan kaagyuwan Satanas kanuman. Pamakalibas malakêy tawun ipakit Bapan Namalyari si Jesus ya Mamiligtas. ![](https://cdn.door43.org/obs/jpg/360px/obs-en-48-05.jpg) Sabitun siniran Bapan Namalyari ya babun luta sa kapamilatan maragul la lanab, nipadiyag si Bapan Namalyari kan Noe un gisay maragul la barku. Ati ya nagin paralan amên miligtas silan Noe buy pamilya na tagawan naniwala sila kana. Para êt bayduy dinyag Bapan Namalyari kantamu. Agyan sêpat kitamun mati gawan sa mani kasalanan tamu, nanyag ya pun êt paralan amên miligtas sa kaganawan manampalataya kan Jesus. ![](https://cdn.door43.org/obs/jpg/360px/obs-en-48-06.jpg) Sa lalên dinadinalan na tawun, pawan mag-andug ga mani pari kan Bapan Namalyari bilang pallangad sa parusan kasalanan mani tawu nuwa asê makapitas sa abiin sa kasalanan mani tawu. Si Jesus sa Katatag-ayan buy Dakilay Pari. A ya kaparisun kaatag pari gawan in-andug nay sarili na ya sabay ya makapitas sa kaganawan kasalanan tawu sa babun luta. Sabay si Jesus sa ganap pa pinakapuun pari ta inaku nay parusa sa kasalanan kaganawan. ![](https://cdn.door43.org/obs/jpg/360px/obs-en-48-07.jpg) Sinabin Bapan Namalyari kan Abraham, “Pagpalên kuy kaganawan bansa sa kapamilatan mu.” Si Jesus naubat ya sa layin Abraham. Pinagpalay kaganawan sa kapamilatan Abraham gawan na kaganawan nanampalataya kan Jesus niligtas sa kasalanan buy sabay silay nagin layin Abraham. ![](https://cdn.door43.org/obs/jpg/360px/obs-en-48-08.jpg) Sên sinabin Bapan Namalyari kan Abraham ya iandug nay anak na ya si Isaac, nam-i tanan tupa si Bapan Namalyari bilang kasagilin Isaac. Sêpat dayin sikitamuy mati gawan sa kasalanan tamu! Nuwa nam-i si Bapan Namalyarin andug ga kasagili tamu, sabay si Jesus. ![](https://cdn.door43.org/obs/jpg/360px/obs-en-48-09.jpg) Sabitun impagtan Bapan Namalyari ya tawlin salut sa Egiptu, sinabi na sa mani tawuy mangwa silan biserun tupay liyaki. Patin lay ati buy punwan lan dayay mani pasbul bali la. Nu makitan Bapan Namlyari ya daya, libasan nay balin abitu buy a na patin na panganay sa pamilyay abitu. Si pamêg di, “Pallumibas mani Ang-el.” ![](https://cdn.door43.org/obs/jpg/360px/obs-en-48-10.jpg) Para êt baydu si Jesus ya nagin tupay andug para kantamu amên miligtas kitamu. Ayin maakit ta nadawak kana buy matinêk ya. Pinati ya sabitun magkalutu sa “Pallumibas Ang-el.” Nu manampalatayay gisay tawu kan Jesus, ya daya na sabay ya magin bayad sa kasalanan tawun abitu buy a ya miawyun sa parusan Bapan Namalyari. ![](https://cdn.door43.org/obs/jpg/360px/obs-en-48-11.jpg) Sabitun nuna nanyag kasunduwan si Bapan Namalyari sa mani pinili na ya sabay ya mani Israelita. Amêsên nanyag gina êt Bayuy Kasunduwan amên agyan sisabêt man manampalataya kan Jesus, miawyun sila sa mani tawuy pinili na. ![](https://cdn.door43.org/obs/jpg/360px/obs-en-48-12.jpg) Si si Moises, gisa yan dakilay propetay mamipatandan Sabin Bapan Namalyari. Si Jesus, propeta ya êt kaparisun Moises, nuwa si Jesus alwa yan kay dakilay propeta, nun a sabay siyay pinakadakilay propeta. Sabay siya êt ta Namalyari. Kabay ya kaganawan pansabin buy pandaygên na, pansabin buy pandaygên Bapan Namalyari. Gawan baysên pambêgên Sabin Bapan Namalyari si Jesus. ![](https://cdn.door43.org/obs/jpg/360px/obs-en-48-13.jpg) Impangakun Bapan Namalyari kan David da maubat sa layi nay gisay ari ya mamunu sa mani anak Bapan Namalyari kanuman. Gawan si Jesus ya Anak Bapan Namalyari buy Mamiligtas, sabay siyay pantukuyun Bapan Namalyari sa pangakun ati. ![](https://cdn.door43.org/obs/jpg/360px/obs-en-48-14.jpg) Si Jesus, gisa yan ari kaparisun David, nuwa si Jesus ari ya sa kaganawan! Mag-udung ya buy mag-ari yan dilag katuynungan buy kapatêtbêkan kanuman. *Nakasulat sa Sabin Bapan Namalyari: Genesis 1-3, 6, 14, 22; Exodo 12, 20; 2 Samuel 7; Hebreo 3:1-6, 4:14-5:10, 7:1-8:13, 9:11-10:18; Pahayag 21* ## 49. Ya Bayuy Kasunduwan Bapan Namalyari buy mani Tagasunul Na https://openbiblestories.org/l/blx/story-49/ ![](https://cdn.door43.org/obs/jpg/360px/obs-en-49-01.jpg) Gisay ang-el ya nagsabi sa gisay dalagay maglagyun Maria ya mianak yan gisay anak ka liyaki buy bêgên yan Anak Bapan Namalyari. Kabay nabuktut yabay si Maria gawan sa kapangyarian Ispiritun Bapan Namalyari. Agyan pun dalaga ya, nakaanak yan kulaw wa liyaki ya pinalagyunan nan Jesus. Labay sabin, si Jesus tawu ya buy Namalyari ya. ![](https://cdn.door43.org/obs/jpg/360px/obs-en-49-02.jpg) Malakêy mamakaupapas sa dinyag Jesus ya magpapêtêg ga sabay siyay Namalyari. Agyu nan mita sa babun lanêm. Agyu nan patgênên na bagyu. Namaiyul ya êt nipagsakit, nipatas yan nadawak ka ispiritu sa lawinin tawu, buy pinabyay na êt ta mani nati. Pinakan na êt ta maygit limay libuy tawu sa kapamilatan kay lilimay tinapay buy luluway kênan lanêm. ![](https://cdn.door43.org/obs/jpg/360px/obs-en-49-03.jpg) Biyasan manuru si Jesus, makapangyarian na sabi na gawan Anak yan Bapan Namalyari. Inturu nay sêpat tamun kaidwan na kaparisu tamu kaparisun pangidu tamu sa sarili tamu. ![](https://cdn.door43.org/obs/jpg/360px/obs-en-49-04.jpg) Inturu na êt ta sêpat mun kaidwan na Bapan Namalyari un igit sa kaganawan buy igit pun sa pibandiyan mu. ![](https://cdn.door43.org/obs/jpg/360px/obs-en-49-05.jpg) Sinabi pun êt Jesus ya kaarian Bapan Namalyari, mas maulaga pun sa dakun sabêt ta bagay baydi sa babun luta. Ya pinakamaulaga para sa gisay tawu, ya miawyun sa kaarian Bapan Namalyari. Nu miawyun sa kaarian Bapan Namalyari, kaylangan mu pun miligtas ubat sa mani kasalanan mu. ![](https://cdn.door43.org/obs/jpg/360px/obs-en-49-06.jpg) Nanuru êt si Jesus sa kaatag ga tawu buy tinanggap la ya buy niligtas kaban si kaatag gaman, malyarin asê. Sinabin Jesus ya kaatag tawu maiparisu sa mangêd da luta. Tinanggap lay Mangêd da Balitan Jesus buy niligtas sila. Ya kaatag tawu, maiparisu sa nakdêy ya luta sa dadanan, nu saantu asê makapagyamut ya sabin Bapan Namalyari buy asê makapanagêy. Sabay silay mani tawuy asê kalabay mananggap sa mensayi tungkul kan Jesus buy a sila miawyun sa kaarian Bapan Namalyari. ![](https://cdn.door43.org/obs/jpg/360px/obs-en-49-07.jpg) Inturun Jesus ya kakaidwan Bapan Namalyari ya mani makasalanan. Labay na silan patawarên buy maibilang na sila sa mani anak na. ![](https://cdn.door43.org/obs/jpg/360px/obs-en-49-08.jpg) Sinabi êt Jesus kantamu ya nasulapu si Bapan Namalyari sa kasalanan. Sên nangasalanan si Adan buy si Eva, agyan na mani kaapu-apuan la, nidamay yana. Gawan baysên ya balang tawu sa babun luta mangasalanan buy nipapawa kan Bapan Namalyari. Kabay ya kaganawan tawu nagin kapatin Bapan Namalyari. ![](https://cdn.door43.org/obs/jpg/360px/obs-en-49-09.jpg) Nuwa gawan kakaidwan Bapan Namalyari ya kaganawan tawu sa babun luta, indin nay kagisagisay Anak na amên nu sisabêt man na manampalataya kana, a ya mipakabili sa ayin katganan na kaparusan nun a mabiyan yan biyay ya ayin katganan. ![](https://cdn.door43.org/obs/jpg/360px/obs-en-49-10.jpg) Gawan sa mani kasalanan mu, sêpat kan mati. Sêpat dayin manubag si Bapan Namalyari kamu, nuwa impawês na tanay tubag na kan Jesus ya sêpat dayin sikay katubagan na. Sabitun nati si Jesus sa krus, tinanggap nay pamarusa ya sêpat dayi kamu. ![](https://cdn.door43.org/obs/jpg/360px/obs-en-49-11.jpg) Asê nangasalanan si Jesus, nuwa pinili nan maparusan buy mati bilang ganap pa andug amên mapatawad da mani kasalanan mu buy kasalanan kaganawan tawu baydi sa babun luta. Gawan indin Jesus sa sarili na, patawarên Bapan Namalyari ya agyan parasaantu pun kadawak ka kasalanan mu. ![](https://cdn.door43.org/obs/jpg/360px/obs-en-49-12.jpg) A ka mailigtas mangangêd da diyag mu. Ayin kan madiyag amên mabiyan kan pamikibêtêk kan Bapan Namalyari. Kay si Jesus ya makapitas kasalanan mu. Sêpat kan maniwala ya Anak Bapan Namalyari si Jesus. Sêpat dayin sikay mati, nuwa siyay nati sa krus para kamu buy pinabyay yan manguman Bapan Namalyari. ![](https://cdn.door43.org/obs/jpg/360px/obs-en-49-13.jpg) Iligtas Bapan Namalyari ya kaganawan manampalataya buy mananggap kan Jesus bilang Panginuun nuwa a na iligtas ya asê manampalataya kana. Asê maulaga nu mabandi ka o kalulu, liyaki o babayi, anak o tuwa, o agyan antuy tutugêlan mu. Kaidwan kan Bapan Namalyari buy labay nan manampalataya ka kan Jesus amên magin mangêd da pamikiawyun mu kana. ![](https://cdn.door43.org/obs/jpg/360px/obs-en-49-14.jpg) Pansagyatên kan Jesus ya manampalataya ka kana buy magpabawtismu. Maniwala ka nayin si Jesus ya Mamiligtas, ya kagisa-gisay Anak Bapan Namalyari? Maniwala ka nayin makasalanan ka buy sêpat kan parusan Bapan Namalyari? Maniwala ka nayin nati si Jesus sa krus amên itas sa mani kasalanan mu? ![](https://cdn.door43.org/obs/jpg/360px/obs-en-49-15.jpg) Nu nanampalataya kayna kan Jesus buy sa dinyag na para kamu, gisa kaynan manampalataya! Inligtas kay nan Bapan Namalyari sa kadlêman Satanas buy gintan na kay na sa kaarian sawang. Intas san Bapan Namalyari ya manan pamibiyay-biyay muy makasalanan buy binyanan na kan bayuy pamibiyay-biyay ya matinêk. ![](https://cdn.door43.org/obs/jpg/360px/obs-en-49-16.jpg) Nu manampalataya kayna, pinatawad dan Bapan Namalyari ya mani kasalanan mu gawan sa dinyag Jesus. Amêsên, kaluguran kaynan Bapan Namalyari, alwa na kaynan kapati. ![](https://cdn.door43.org/obs/jpg/360px/obs-en-49-17.jpg) Buy bilang kaluguran Bapan Namalyari buy lingkud Jesus ya Panginuun mu, labay minan sunulun na mani pan-ituru na kamu. Agyan manampalataya kayna, mangatuksu ka pun êt mangasalanan, nuwa tapat si Bapan Namalyari. Kabay sinabi na nu isabi muy mani kasalanan mu kana, patawarên na ka. Biyan na kan pas-êy amên malabanan muy kasalanan. ![](https://cdn.door43.org/obs/jpg/360px/obs-en-49-18.jpg) Pansabin Bapan Namalyari kamuy pawa kan manalangin, mamasan Sabi na buy ulimênên ya kaawyun na mani kaatag ga manampalataya buy isabi sa kaatag ya mani dinyag na para kamu. Ya kaganawan ati, makasawup kamu amên pumas-êy ya pamikibêtêk mu kan Bapan Namalyari. *Nakasulat sa Sabin Bapan Namalyari: Roma 3:21-26, 5:1-11; Juan 3:16; Marcos 16:16; Colosas 1:13-14; 2 Corinto 5:17-21; 1 Juan 1:5-10* ## 50. Ya pag-udung Jesus https://openbiblestories.org/l/blx/story-50/ ![](https://cdn.door43.org/obs/jpg/360px/obs-en-50-01.jpg) Sa lalên luway libuy tawun, kapallulumakên mani tawu sa buun babun luta ya mallêngê sa Mangêd da Balita tungkul kan Jesus ya Mamiligtas. Kabay ya mani manampalataya kapallulumakêy na. Impangakun Jesus ya mag-udung ya sa katganan babun luta. Agyan aya pun mag-udung amesen, tanda tamuy tuparên nay impangaku na. ![](https://cdn.door43.org/obs/jpg/360px/obs-en-50-02.jpg) Kaban pan-êtêngên tamuy pag-udung Jesus, si labay Bapan Namalyari sêpat kitamun bumyay matinêk amên ulimênên la si Bapan Namalyari. Buy si labay na iaral tamuy tungkul pag-ari na. Sabitun idi pun baydi sa babun luta si Jesus, sinabi nay, “Iaral mani tagasunul kuy Mangêd da Balita tungkul sa pag-arin Bapan Namalyari sa kaganawan tawu baydi sa babun luta buy pamakayari, lumatêng ngay katganan babun luta.” ![](https://cdn.door43.org/obs/jpg/360px/obs-en-50-03.jpg) Malakê pun na mani tawuy asê magtanda tungkul kan Jesus. Kabay bayu ya mag-udung sa langit, in-utus nay mani manampalatayay iaral lay Mangêd da Balita sa mani tawuy asê magtanda. Sinabin Jesus, “Lakwên yuy mani tawu sa kaganawan bansa buy daygên yu silan mani tagasunul ku” ta “nakal-an nay pamupul!” ![](https://cdn.door43.org/obs/jpg/360px/obs-en-50-04.jpg) Sinabi êt Jesus, “Mas matag-ay ya amung kaysa sa ipus. Kaparisun mamunu baydi sa babun luta ya pangkasulapwan naku buy para et baysen na daygen la kamuyu ta pasakitan la kaw buy patin gawan kangku. Agyan makadanas kaw malakêy kasakitan baydi sa babun luta, papas-êyên yuy nakêm yu gawan nasambut kinay mamunu baydi sa babun luta ya sabay si Satanas! Nu manugêl kaw tapat kangku angga sa katganan babun luta, iligtas kaw Bapan Namalyari. ![](https://cdn.door43.org/obs/jpg/360px/obs-en-50-05.jpg) Nagkwentu êt si Jesus sa mani tagasunul na amên ipapukat kalla nu sabêt ta malyari sa mani tawu sa katganan babun luta. Sinabi na, “Nananêm mangangêd da bini ya gisay tawu sa panggitnan. Kaban mamabêlêw ya, naku sa panggitnan nay kapati na buy nananêm lamun baydu sa pinigitnan nan mangêd da bini bayu ya namita. ![](https://cdn.door43.org/obs/jpg/360px/obs-en-50-06.jpg) “Sên nipantumubuy nay mani bini, sinabin mani ipus, “Amung yan nay, alwa nayin mangangêd da bini ya impatanêm mu sa panggitnan mu? Uysiyan nabiyan yan mani lamun ta?” Nakitbay ya amung la, “Pilmin intanêm kapati tamuy abiin.” ![](https://cdn.door43.org/obs/jpg/360px/obs-en-50-07.jpg) “Nakitbay ya mani ipus sa amung la, “Labay mu nayin lamunun yan na lamun?” Sinabin amung, “Agana ta dat mapikilamun yuy trigu. Etêngên tamu tay pamupul bayu tamu ipapawan ulamên na lamun buy ya trigu, idin yu sa budega ku.” ![](https://cdn.door43.org/obs/jpg/360px/obs-en-50-08.jpg) Asê napukatan mani tagasunul Jesus nu sabêt ta labay sabin kwentu. Kabay sinabi la kan Jesus ya ipapukat na kallay labay sabin kwentu. Nakitbay si Jesus, “Si liyaki na nananêm mangangêd da bini sabay ya Mamiligtas. Si panggitnan sabay ya babun luta. Buy si mangangêd da bini sabay ya mani tawu sa kaarian Bapan Namalyari. ![](https://cdn.door43.org/obs/jpg/360px/obs-en-50-09.jpg) “Ya mani lamun sabay ya mani tawuy sakup Satanas, buy ya kapati ya nananêm lamun sabay si Satanas. Ya pamupul sabay ya katganan babun luta, buy si mani mamupul sabay ya mani angel. ![](https://cdn.door43.org/obs/jpg/360px/obs-en-50-10.jpg) “Sa katganan babun luta, tipunun mani ang-el ya mani sakup Satanas buy isamwag sa magdêkêtdêkêt ta apuy. Buy sa sadyay pamasakit kalla, mingêngêt ta bêbêy la buy mipanangis sila baydu. Ya mani tawuy matinêk kaman, sumawang silan paran sawang allu baydu sa kaarian Bapan lan Namalyari.” ![](https://cdn.door43.org/obs/jpg/360px/obs-en-50-11.jpg) Buy sinabi êt Jesus ya mag-udung ya baydi sa babun luta bayu miras sa katganan babun luta. Nu parasaantu yan namita baydin dilag lawini, para ya êt baydun mag-udung buy makitan tamu yan nakasakay sa ulap. Buy sa pag-udung na, si kaganawan manampalatayay nati, bumyay sila buy têgmên la si Jesus sa langit. ![](https://cdn.door43.org/obs/jpg/360px/obs-en-50-12.jpg) Pamakayari ya mani manampalatayay nabyay, maku sila êt sa langit buy makaawyun lay mani manampalatay binumyay ubat sa kamatyan. Makaawyun la baydun kaganawan si Jesus. Pamakayari bumyay kitamu kaawyun si Jesus un dilag kapatêtbêkan buy pamibêbêtêk kanuman. ![](https://cdn.door43.org/obs/jpg/360px/obs-en-50-13.jpg) Impangakun Bapan Namalyari ya mam-i yan kurona sa kaganawan manampalataya kana. Mag-ari sila kaawyun si Bapan Namalyari un dilag ganap pa kapatêtbêkan kanuman. ![](https://cdn.door43.org/obs/jpg/360px/obs-en-50-14.jpg) Nuwa ya mani tawuy asê manampalataya kan Jesus, atulan silan Bapan Namalyari buy isamwag sa impernu. Baydu sa impernu, mitatangis sila buy mingêngêt ta bêbêy la sa sadyay pamasakit ta madanasan la kanuman. Buy maulam sila sa apuy ya asê mangapalêng buy ase mati ya mani ewel la mangan kalla. ![](https://cdn.door43.org/obs/jpg/360px/obs-en-50-15.jpg) Sa pag-udung Jesus, taganan sambutun na si Satanas buy ya mani sakup na. Isamwag Jesus si Satanas sa impernu buy maulam ya baydu kanuman kaawyun na mani manunul kana gawan alwan si Bapan Namalyari ya sinunul na. ![](https://cdn.door43.org/obs/jpg/360px/obs-en-50-16.jpg) Sabitun nangasalanan si Adan buy si Eba gawan a sila nanunul kan Bapan Namalyari, nabiyan kasalanan na babun luta. Kabay insumpan Bapan Namalyari ya babun luta buy labay nan sirên na ati. Nuwa lumatêng lanuy alluy manyag yan bayuy langit buy bayuy luta ya ganap ya asina masira. ![](https://cdn.door43.org/obs/jpg/360px/obs-en-50-17.jpg) Manugêl si Jesus buy mani tawu na sa bayuy lutay dinyag na buy siyay nay mag-ari sa kaganawan mambumyay. Mitas say kamatyan, kasakitan, kalungkutan, tangisan, buy sakit ta mamakamati. Mag-ari si Jesus un napatêtbêk buy makatuynungan kaawyun nay mani tagasunul na kanuman. *Nakasulat sa Sabin Bapan Namalyari: Mateo 24:14; 28:18; Juan 15:20, 16:33; Pahayag 2:10; Mateo 13:24-30, 36-42; 1 Tesalonica 4:13-5:11; Santiago 1:12; Mateo 22:13; Pahayag 20:10, 21:1-22:21*