# unfoldingWord Open Bible Stories — Churahi

- Language code: `cdj`
- Canonical page: https://openbiblestories.org/l/cdj/
- Stories in this file: 50 of 50
- Published by: OBS-TLF
- Last release: 2026-06-26
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Churahi translation; it is not a translation of the whole Bible.

## 1. सृष्टिरी कहानी

https://openbiblestories.org/l/cdj/story-1/

![](https://cdn.door43.org/obs/jpg/360px/obs-en-01-01.jpg)

ऐनि हिसाबै परमेश्वरै शुरू मझ सारी सृष्टि बंणाय। परमेश्वरै छियां धियाड़िया मझ संसार जां जै किछ संसारा मझ आ सै सभ किछ बंणाउ। जेख्णी परमेश्वरै धरती बंणाय, तेख्णी धरती पन अंधारू जां खाली थी, केईनी कि हालै तेईनी परमेश्वरै तैस मझ कौ बि चीज ना थी बंणाउरी। पण परमेश्वरेरा आत्मा पांणी पन घुमता थ्या।

![](https://cdn.door43.org/obs/jpg/360px/obs-en-01-02.jpg)

फिरी परमेश्वरै बोलु, “प्रगड़ु भुईया!” जां प्रगड़ु भौ गियु। परमेश्वरै हैरू कि प्रगड़ु बधिया आ जां परमेश्वरै प्रगड़ुनि “धियाड़ि” बोलु। जां तेठां बाद परमेश्वरै प्रगड़ु अंधारू किना अलग कियु, जां परमेश्वरै अंधारूनि “रात” बोलु। परमेश्वरै सृष्टि बणांणा किना पेहिलै धियाड़ी जां प्रगड़ु बंणाउ।

![](https://cdn.door43.org/obs/jpg/360px/obs-en-01-03.jpg)

सृष्टि बंणाणा किना दुईं धियाड़ी परमेश्वरै बोलु, “पांणी मझ अक ऐतिया फर्क भुईया कि पांणी हेट जां प्रन दुवां हिस्सा मझ बंडि गहिया।” जां ऐहीं भौ गियु। परमेश्वरै प्रनियें हिस्सैनि “असमांण” बोलु।

![](https://cdn.door43.org/obs/jpg/360px/obs-en-01-04.jpg)

फिरी त्रीं धियाड़ी परमेश्वरै बोलु, “पांणी ऐकि जगाय किट्ठु भौ गहिया जां शुक्की जमीन लाधी ऐईछिया।” परमेश्वरै शुक्की जमीनिनी “धरती” जां पांणिनी “समुद्र” बोलु। परमेश्वरै हैरू कि जै बंणाउ सै बधिया आ।

![](https://cdn.door43.org/obs/jpg/360px/obs-en-01-05.jpg)

फिरी परमेश्वरै बोलु, “धरती पन हर प्रकारेरै फुल जां बुट्टै लगी पुईया।” जां तिहींयें भौ गियु। परमेश्वरै हैरू कि जै बंणाउ सै बधिया आ।

![](https://cdn.door43.org/obs/jpg/360px/obs-en-01-06.jpg)

फिरी चोउथी धियाड़ि परमेश्वरै बोलु, “असमांणा मझ अलग-अलग ज्योती बंणी गहिया।” जां तिहींयें असमांणा मझ सूरज, चद्रमां जां तारै बंणी गियै। परमेश्वरै सैक्यै धरती पन प्रगड़ु दींणेरै तेईनी जां धियाड़ी जां रात, मौसमा जां साला केरी पछियांण कांनेरै तेईनी बंणाय।

![](https://cdn.door43.org/obs/jpg/360px/obs-en-01-07.jpg)

फिरी पंजवी धियाड़ी परमेश्वरै बोलु,“पांणी मझियें रींहणार जींतै प्रांणी जां असमांणा मझ उडरनार सारै पंछी बंणी गहिया।” ऐनि हिसाबै परमेश्वरै पांणी मझ तारी दींणार जींतै प्रांणी जां असमांणा मझ उडरनार सारै पंछी बंणाय। परमेश्वरै हैरू कि जै किछ बि बंणाउ सै सभ बधिया आ जां तैन्हांनि आशीष दित्ती।

![](https://cdn.door43.org/obs/jpg/360px/obs-en-01-08.jpg)

फिरी छट्ठी धियाड़ी परमेश्वरै बोलु, “धरती पन रींहणार सारै जानवर बंणी गहिया।” परमेश्वरै जिहीं बोलु तिहींयें भौ गियु। तैन्हां मझ किछ पालतु जानवर, किछ धरती पन पैटेरै भारै चलणार, जां किछ जंगली जानवर थ्यै। परमेश्वरै हैरू कि जै बंणाउ सै बधिया आ।

![](https://cdn.door43.org/obs/jpg/360px/obs-en-01-09.jpg)

फिरी परमेश्वरै बोलु, “आईछा असै मैहणु अपड़ै स्वरूपा मझ बंणातै। सै धरती पन जां सारा जानवरा पन अपड़ा हक रखिया।”

![](https://cdn.door43.org/obs/jpg/360px/obs-en-01-10.jpg)

तैठां किना बाद परमेश्वरै कितु कियु कि धरती पना मिट्टी लैई जां तेनी मिट्टी ला मैहणु बंणा जां तैस मझ जिंदगिरा श्वांस पा दित्ता, जां सै जींता मैहणु बंणी गिया। परमेश्वरै तैस मैहणुरू नाँ आदम रखु। परमेश्वरै आदमेरै रींहणेरै तेईनी अक अदनेरा बड़ा बडा बगीचा बंणा जां तेसैरी देखभाल कांनेरै तेईनी आदम तैठि रखि छडा।

![](https://cdn.door43.org/obs/jpg/360px/obs-en-01-11.jpg)

तैस बगीचेरै मझाटै परमेश्वरै दो खास बुट्टै लाई, अक जीवनेरू बुट जां अक भलै जां बुरै ज्ञानेरू बुट थियु। परमेश्वरै आदमा सिंउ बोलु कि तु ऐस बगीचेरै जीवनेरै बुट्टा जां भलै जां बुरै ज्ञाने बाऐ बुट्टा केरै फला छडि करी होरै कौस बि बुट्टेरै फल खा सकता। अगर तीं तैस बुट्टेरै फल खाय ता तु पक्का मरि गांहणा।

![](https://cdn.door43.org/obs/jpg/360px/obs-en-01-12.jpg)

फिरी परमेश्वरै बोलु, “मड़देरू अकैलु रींहणु ठीक ना।” पण कौ बि जानवर आदमेरा साउगी ना बणा, जै तैस सिंउ मेल खईया।

![](https://cdn.door43.org/obs/jpg/360px/obs-en-01-13.jpg)

ऐठणीरै तेईनी परमेश्वरै आदम गैहरी निंदरै मझ झुलियांणी छडा। फिरी परमेश्वरै आदमेरी अक पसली कढी करी तेनी ला अक जनानी बंणाय जां तैस आदमा किनी लै या।

![](https://cdn.door43.org/obs/jpg/360px/obs-en-01-14.jpg)

जेख्णी आदमै सै जनानी हैरी ता तेनी बोलु, “सच्च मझ ऐ ता मूं ऐ सैयि आ! ऐ जनेनिरै नाँईयें जांणियूणी, केईनी कि ऐ मड़दा मझां बंणाईयोरी आ।” ऐनि वजही सिंउ मड़द अपड़ै मयि-बबा छडि करी, अपड़ी लाड़ी सिंउ अक भौ करी रींहथा।

![](https://cdn.door43.org/obs/jpg/360px/obs-en-01-15.jpg)

परमेश्वरै मड़द जां जनानी अपड़ै स्वरूपा मझ बंणाय। तेनी तैन्हांनि आशीष दित्ती जां तैन्हां सिंउ बोलु, “बड़ै सारै बच्चै जां पौत्रै-पड़पौत्रै पेईदा करा, जां धरती भरी दिया।” जां परमेश्वरै हैरू कि जै किछ बि तेनी बंणाईथ्यु सै बड़ु बधिया आ, जां सै तैस सारू किना बड़ा खुश भुवा। ऐ सभ किछ सृष्टी बंणाणा किना छट्ठी धियाड़ी भुईथ्यु।

![](https://cdn.door43.org/obs/jpg/360px/obs-en-01-16.jpg)

जेख्णी सत्तवीं धियाड़ी यैई ता जै किछ परमेश्वर बंणाता थ्या तेनी सै सारा कम पूरा करी आराम केया। तेनी सत्तवीं धियाड़िनी आशीष दित्ती जां सै पवित्र बंणाय, केईनी कि तैस धियाड़ी तेनी सारी चीजै बंणा करी अपड़ा कम पूरा केईथ्या। ऐनि हिसाबै परमेश्वरै संसार जां जै किछ तैस मझ आ सभ किछ बंणाउ।

*उत्पत्ति अध्याय 1-2 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_01_128kbps.m4a

## 2. पापेरू संसारा मझ ऐईंणु- कहानी

https://openbiblestories.org/l/cdj/story-2/

![](https://cdn.door43.org/obs/jpg/360px/obs-en-02-01.jpg)

आदम जां तेसैरी लाड़ी परमेश्वरै जरियै तैन्हेरै तेईनी बंणाउरै तैस सुंदर बगीचै मझ बड़ै खुश थ्यै। तैन्हां दोईयो मझ कौ बि लिकड़ै ना लाईंथ्यै, फिरी बि तैन्हां दोईयो ऐस गल्लैरी कोई शर्म ना थी, केईनी कि तैस टैंमा संसारा मझ पाप ना थ्या। सैक्यै हमेशा तैस बगीचै मझ घुमतै रिहींथ्यै जां परमेश्वरा सिंउ गल्लै कातै रिहींथ्यै।

![](https://cdn.door43.org/obs/jpg/360px/obs-en-02-02.jpg)

पण तैस बगीचै मझ अक कीड़ा थ्या, जां सै बड़ा चलाक थ्या। तेनी तैस जनेनी किना पुच्छु, “क्या परमेश्वरै सच्चौ तुहांनि बोलौरू आ कि ऐस बगीचेरै कौस बि बुट्टेरै फल मेईं खांतै?”

![](https://cdn.door43.org/obs/jpg/360px/obs-en-02-03.jpg)

तेनि जनेनी जवाब दित्ता, “परमेश्वरै असुवां सिंउ बोलौरू आ कि असै तैस भलै जां बुरै बुट्टेरै फलेरै अलावा कौस बि बुट्टेरै फल खा सकतै। परमेश्वरै असु सिंउ बोलौरू आ कि तुवै ऐस बुट्टेरै फल खालै या ऐक्यै छुत्तै बि, ता तुवै मरी गांहणै।”

![](https://cdn.door43.org/obs/jpg/360px/obs-en-02-04.jpg)

तेनि कीड़ै जनेनी सिंउ बोलु, “ऐ सच्च ना! तुवै ना मरनै। परमेश्वर जांणता कि जिहीं तुवै तैस बुट्टेरै फल खालै, ता तुवै परमेश्वरा सैयि भौ गांहणै जां जिहीं भला जां बुरा ज्ञान परमेश्वर समझता, तिहींयें तुहां बि समझणा लगि पूंणु।”

![](https://cdn.door43.org/obs/jpg/360px/obs-en-02-05.jpg)

तेनि जनेनी तकाउ कि सै फल बड़ु स्वादिष्ट जां तकांणुनी बड़ु छै थ्यु लगतु। सै बि अक्लमंद बंणना चांहथी थी, ऐठणीरै तेईनी तेनि सै फल त्रौड़ी करी खा लियु। फिरी तेनि अपड़ै लाड़ेनी बि जै तैस सेईतै थ्या सेहै फल दित्तु जां तेनि बि सै फल खा लियु।

![](https://cdn.door43.org/obs/jpg/360px/obs-en-02-06.jpg)

फिरी कितु भू कि तैस बुट्टेरै फल खांणा किना बाद तैन्हेरै टीरै इकदम खुलि गियै, जां तैन्हां पता लगि गिया कि असै ता नग्गै थ्यै। तैठां किना बाद तैन्हैं कितु कियु कि अपड़ा शरीर ढकणेरै तेईनी पतरै जौड़ी-जौड़ी करी अपड़ै तेईनी लिकड़ै बंणाणैरी कोशिश की।

![](https://cdn.door43.org/obs/jpg/360px/obs-en-02-07.jpg)

तां तेनि मड़दै जां तैसेरी लाड़ी बगीचै मझ परमेश्वरेरी चलणैरी आवाज शुणी। सैक्यै दोईयो परमेश्वरा किना छपि गियै। तां परमेश्वरै मड़दनी आवाज दित्ती, “तु कोठी आ?” आदमै बोलु, “मीं बगीचै मझ तुवाड़ै चलणैरी आवाज शुणीं, जां आंउ डरि गिया, केईनी कि आंउ नग्गा थ्या। ऐठणीरै तेईनी आंउ छपि गिया।“

![](https://cdn.door43.org/obs/jpg/360px/obs-en-02-08.jpg)

फिरी परमेश्वरै पुच्छु, “ताउनि कुनि बोलु कि तु नग्गा आ? क्या तीं सै फल ता ना खाउ जैस खांणनी मीं ताउनि नंमा थ्या कियौरा?” मड़दै जवाब दित्ता, “ तुहैं जै ऐ मूनी जनानी दितौरी आ तेनियैं मूनी ऐ फल खांणुनि दित्तु।” तां परमेश्वरै जनेनी किना पुच्छु, “तीं ऐ कितु कियु?” तेनि जनेनी बोलु, “कीड़ै मूंनी धौखा दित्ता।”

![](https://cdn.door43.org/obs/jpg/360px/obs-en-02-09.jpg)

परमेश्वरै कीड़ैनि बोलु, “ताउनि श्राप आ! तु अपड़ै पैटेरै भारै चलेला जां मिट्टी चटैला। तु जां ऐ जनानी योकिया सिंउ नफरत करेलै, जां तिंडी आउलाद जां ऐसेरी आउलाद बि योकिया सिंउ नफरत करेली। ऐस जनेनिरा वंश तिंडु मुंडक पायिड़ा हैट प्रिंचैला, जां तु तेसैरै पायिड़ डंसैला।”

![](https://cdn.door43.org/obs/jpg/360px/obs-en-02-10.jpg)

तां परमेश्वरै जनानी सिंउ बोलु, “मूं तिंडै बच्चै जंमणेरै टैंमा ताउनि बड़ी पीड़ै दींणी। तिंडा लगाव तिंडै लाड़ै सिंउ भूंणा, जां तैस ताउ पन अपड़ा हक रखणा।”

![](https://cdn.door43.org/obs/jpg/360px/obs-en-02-11.jpg)

परमेश्वरै आदमनी बोलु, “तीं अपड़ी लाड़िरी गल्ल मंनी जां मिंडै हुक्मेरा पालन ना केया। ऐठणीरै तेईनी धरती श्रपित भौरी आ, जां ताउ अपड़ु पैट भरनेरै तेईनी तकड़ी मैहनत कांनी पूंणी। फिरी तु मरि गांहणा, जां तिंडा शरीर मिट्टी मझ मिलि गांहणा।” तेनि आदमै अपड़ी लाड़िरू नाँ हव्वा रखु, जेठणीरा मतलब आ, “जीवन दींणै बाई“, केईनी कि सै सारी मानव जातिया केरी माँ भूंणी। जां परमेश्वरै आदमनी जां हव्वाएनि जानवरा केरी खल्लिरै लिकड़ै बंणा करी लवाय।

![](https://cdn.door43.org/obs/jpg/360px/obs-en-02-12.jpg)

फिरी परमेश्वरै बोलु, “अबै मैहणु भलु जां बुरू जांणी करी मूं सैयि भौ गिया, ऐठणीरै तेईनी ऐंन्हैरू ऐस बगीचै मझ रींहणु ठीक ना, किहीं क्यै ऐहीं ना भुईया कि सै तैस जीवनेरू बुट्टैरू फल खा करी हमेशा तेईनी जींता रिय्हा।” ऐठणीरै तेईनी परमेश्वरै आदम जां हव्वा तैस बगीचै किना भेईर कढि दित्तै। जां परमेश्वरै कौसनि बि तैस जीवनेरू बुट्टैरू फल खांणा किना रौकणैरै तेईनी तैस बगीचेरै प्रवेश दुवारा पनि ताकतवर स्वर्गदूता केरा पैहरा ला दित्ता।

*उत्पत्ति अध्याय 3 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_02_128kbps.m4a

## 3. बाढ़िरी कहानी

https://openbiblestories.org/l/cdj/story-3/

![](https://cdn.door43.org/obs/jpg/360px/obs-en-03-01.jpg)

अक टैंम ऐतिया या कि संसारा मझ बड़ै सारै मैहणु रिहींथ्यै। सै बड़ै बुरै जां खून-खराबा कांनार भौ थ्यै गियौरै। ऐस टैंमा मैहणु यौउतै बुरै भौ थ्यै गियौरै कि सै कौस हैरी बिना डरींथ्यै। ऐन्हां मैहणुवां तका करी परमेश्वरै अक फैसला लिया कि ऐ पूरा संसार खततनाक बाढ़ी ला खत्म करी दींणा।

![](https://cdn.door43.org/obs/jpg/360px/obs-en-03-02.jpg)

पण परमेश्वरेरी नजर नूह पन पैई। सै बुरै मैहणुवां मझ रींहणार अक धर्मी मैहणु थ्या। तां परमेश्वरै तैस बाढ़िरै बारै मझ नूहा सिंउ बोलु, कि मूं खतरनाक बाढ़िरै जरियै ऐ धरती खत्म करी दींणी। ऐठणीरी वजही सिंउ परमेश्वरै नूहानि अक बड़ा बडा जहाज बंणाणैरै तेईनी बोलु।

![](https://cdn.door43.org/obs/jpg/360px/obs-en-03-03.jpg)

परमेश्वरै नूहानि बोलु, कि तु ऐस नापेरै जरियै लकड़िरा समुंद्री जहाज बंणाय, तैस जहाजेरी लम्बाई 140 मीटर, चौड़ाई 23 मीटर जां ऊंचाई 13.5 मीटर भूंणी चेहिंथी। फिरी परमेश्वरै नूहा सेईतै बोलु, जहाजा मझ अक्कै खिड़की अक्कै दुवार जां अक्कै छत बंणाय, जां जहाजा अंदर त्रा कमरै बंणाय। फिरी परमेश्वरै नूहानि बोलु, जेख्णी मूं ऐस धरती पन झड़ी बरसांणी, ता तु अपड़ै परिवारा सेईतै जहाजा मझ चलि गहि, जां सारा जींता प्राणियां जां पंछिया जां जानवरा केरा अक-अक जौढ़ा जहाजा मझ रखै।

![](https://cdn.door43.org/obs/jpg/360px/obs-en-03-04.jpg)

नूहैं परमेश्वरैरी आज्ञा मंनी। नूहै जां तेसैरै पुत्रै तेतिया ऐ जहाज बंणा जेतिया परमेश्वरै बोलौरा थ्या। केईनी कि सै जहाज बड़ा बडा थ्या ऐठणीरै तेईनी तैस जहाजा बणांणनी बड़ै साल लग्गै। नुहैं मैहणुवंनी ऐईंणै बाई बाढ़िरै बारै मझ चेतावनी दित्ती, जां बोलु, कि परमेश्वरा पन विश्वास करा जां तेसैरै सामणै अपड़ै पापा केरा पश्चाताप करा, पण तैन्हैं नूहेरी गल्लै पन कोई ध्यान ना दित्ता, जां बुरा कंमा मझ ऐ जीवन जींतै रिय्है।

![](https://cdn.door43.org/obs/jpg/360px/obs-en-03-05.jpg)

परमेश्वरै नूहानि जां तेसैरै परिवारानि अपड़ै तेईनी जां सारा जानवरा केरै तेईनी खांणा किट्ठा कांनेरा आदेश दित्ता। जेख्णी सभ किछ तियार भौ गियु, तेख्णी परमेश्वरै नूहानि बोलु, कि अबै तु अपड़ी लाड़ी, त्रियां पुत्रा जां तैन्हेरिया लाड़िया समैत जहाजा मझ चलि गा। सैक्यै सारै मिलाकरी अट्ठ जंणै थ्यै।

![](https://cdn.door43.org/obs/jpg/360px/obs-en-03-06.jpg)

परमेश्वरै सारै जानवर, जीव जन्तु जां पक्षिया केरै नर जां मादा नूहा सेईतै जहाजा मझ अंदर कियै, ताकि सै नूहा सेईतै जहाजा मझ बाढ़ी किना बचि सकिया। परमेश्वरै हर किस्मेरै जानवरा केरै सत्त मादाय जां सत्त नर जहाजा मझ अंतरैरी दित्तै, जैन्हां केरा इस्तेमाल बलिदान कांनेरै तेईनी करी सकिया। जेख्णी सै सारै जहाजा अंदर चलि गियै, तेख्णी परमेश्वरै जहाजेरू दुवार बंद करी दित्तु।

![](https://cdn.door43.org/obs/jpg/360px/obs-en-03-07.jpg)

तां झड़ी लगि पैई, जां झड़ी बिना रूकणै चाही धियाड़ि चाही राती लगौरी रैय्ही, धरती पन यौउती झड़ी पैई कि पांणी ऐ पांणी भरी गियु जां सभ किछ पांणी मझ डुबि गियु।

![](https://cdn.door43.org/obs/jpg/360px/obs-en-03-08.jpg)

बाकी धरती पन रींहणार सारै पक्षी जां जानवर जां सारै मैहणु मरि गियै, सिर्फ जै जहाजा मझ थ्यै सेहै जींतै बचै। जां जहाज पांणी प्रंना तैरना लगि पिया।

![](https://cdn.door43.org/obs/jpg/360px/obs-en-03-09.jpg)

झड़ी रुकणा किना बाद, जहाज पंज महीनै पांणीऐ मझ तैरता रिय्हा, जां जेख्णी पांणी घटणा लगि पियु, तेख्णी अक धियाड़ी जहाज पहाड़ा पन टिकि गिया। पण संसार हालै तेईनी बि पांणी मझ ढकियोरा थ्या। त्रियैं महीनै बाद, पहाड़ा केरी चोट्टी लाधी लगि पेई ऐईंणा।

![](https://cdn.door43.org/obs/jpg/360px/obs-en-03-10.jpg)

फिरी चाहिया धियाड़िया किना बाद, नुहैं अक का ऐ तकांणैरै तेईनी जहाजा किना भेईर उडारा कि क्या पांणी शुकि गियौरू आ। का शुक्की जमीन तोपता-तोपता ओरि-परि उडरता रिय्हा, पण तैसनी कोट्ठी बि शुक्की जमीन ना मैयि।

![](https://cdn.door43.org/obs/jpg/360px/obs-en-03-11.jpg)

फिरी नूहैं बाद मझ अक कबूतरी जहाजा मझां भेईर उडारी। पण तैसनी बि कोई शुक्की जमीन ना मैयि, ऐठणीरै तेईनी सै वापस जहाजा मझ नूहा किनी अईछी गैई। ऐकि हफ्तै बाद तेनि सै कबूतरी फिरी जहाजा मझां भेईर उडारी, जां तेनि अपड़ु मुँहा मझ जैतूनेरी अक डाई पकड़ी करी लै अंणी। ऐनि ला नूहा पता चलि गिया कि धरती पनि पांणी घटतु आ। जां बुट्टै फिरी जंमणा लगि थ्यै पियौरै।

![](https://cdn.door43.org/obs/jpg/360px/obs-en-03-12.jpg)

नूहै सत्त धियाड़ी हौरा इन्तजार केया, जां त्रीं बारी फिरी सै कबूतरी जहाजा किना भेईर उडारी, इस बारी तैसनी भेईर बेशणनी जगा मैई गैई जां सै वापस ना यैई। केईनी कि सारी धरती पनि पांणी शुकतु थ्यु।

![](https://cdn.door43.org/obs/jpg/360px/obs-en-03-13.jpg)

दो महीने बाद परमेश्वरै नूह सिंउ बोलु, "अबै तु जां तिंडा परिवार जां सारै जानवर जहाजा मझां भेईर निकोहि अईछा। बड़ी सारी आउलाद जां पौत्रै-पड़पौत्रै पेईदा करा जां धरती पन खिलरी गहा।” तां नूह जां तेसैरा परिवार जहाजा किना भेईर निकोही या।

![](https://cdn.door43.org/obs/jpg/360px/obs-en-03-14.jpg)

नूहै जहाजा भेईर अईछी करी, सभनियां पेहिलै अक वेदी बंणाय जां तैन्हां जानवरा मझां किछ जानवर परमेश्वरेरै तेईनी बलिदान कांनेरै तेईनी बलि करि दित्तै। परमेश्वर ऐनि बलिदानै ला बड़ा खुश भुवा जां नूहानि जां तेसैरै परिवारानि आशीष दित्ती।

![](https://cdn.door43.org/obs/jpg/360px/obs-en-03-15.jpg)

फिरी परमेश्वरै बोलु, "आंउ तुहां सिंउ वायदा काता कि मैहणुरै जरियै भूंणारै बुरै कंमा केरै कारण मूं फिरी कदि धरतिनी श्राप ना दींणा जां बाढ़ी ला संसार खत्म ना कांना, हालांकि मैहणु अपड़ै बचपणेरै टैंमा किना ऐ पापी आ।

![](https://cdn.door43.org/obs/jpg/360px/obs-en-03-16.jpg)

फिरी परमेश्वरै बोलु, मीं अपड़ै वायदेरै चिन्हेरै रूपा मझ पेहिला मेघ धनुष बंणा। जेख्णी बि असमांणा मझ मेघ धनुष लाधी ऐईंता, ता परमेश्वर याद करेला कि तेनि कितु वायदा कियौरा, जां तिहीयें तेसेरै मैहणु बि याद करेलै।

*उत्पत्ति अध्याय 6-8 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_03_128kbps.m4a

## 4. अब्राहमा सेईतै परमेश्वरेरा वायदा- कहानी

https://openbiblestories.org/l/cdj/story-4/

![](https://cdn.door43.org/obs/jpg/360px/obs-en-04-01.jpg)

बाढ़ ऐईंणा किना मत्तै साल बाद, इस संसारा मझ बड़ै मैहणु रिहींथ्यै, जां सारै संसारा मझ अक्कै भाषा जां अक्कै बौली थी। जां फिरी तैन्हैं परमेश्वरेरै जां योकिया केरै खिलाफ पाप केया। ऐठणीरै तेईनी सैक्यै सारै योकिया सिंउ किट्ठै भुवै जां संसारा मझ खिलरी गांहणेरै परमेश्वरेरै आदेशेरै वजाय सैक्यै अक शहर बंणाणा लगै।

![](https://cdn.door43.org/obs/jpg/360px/obs-en-04-02.jpg)

सै बड़ै घमन्डी थ्यै, जां तैन्हां केतिया जीवन जींणा चेहिंथा ऐस बारै मझ सै परमेश्वरेरै आदेशेरा पालन काना ना थ्यै चांहथै। यो तेईनी कि तैन्हैं अक ऐतैई ईमारत बंणाणी शुरू करि दित्ती जै स्वर्गा तेईनी पुजि गहिया। परमेश्वरै तकाउ कि अगर ऐक्यै योकिया सेईतै मिलिकरी बुराई कातै रैहलै, ता सै बड़ै भारी पापी कंम करि सकतै।

![](https://cdn.door43.org/obs/jpg/360px/obs-en-04-03.jpg)

ऐठणीरै तेईनी परमेश्वरै तैन्हेरी भाषा जां बोली बदली दित्ती जां सैक्यै मैहणु सारै संसारा मझ फैलाय दित्तै। जै शहर तैन्हैं बंणाणा शुरू कियौरा थ्या तैस शहरैरू नाँ बेबीलोन रखु, जेसैरा मतलब आ “गड़बड़ी”।

![](https://cdn.door43.org/obs/jpg/360px/obs-en-04-04.jpg)

मत्तै साला बाद, परमेश्वरै अब्राहम नाँईयेरै ऐकि मैहणु सेईतै गल्ल की। परमेश्वरै तैस सेईतै बोलु, “अपड़ै दैशा जां अपड़ै परिवारा छडि करी तैस दैशानि चलि गा जै मूं ताउनि लुहाना। आंउ ताउनि आशीष दैला जां ताउ किना अक बड़ी बडी जाति बंणाला। मूं तिंडु नाँ महांन कांनु। जै ताउनि आशीष दैला मूं तेसनी आशीष दींणी, जां जै ताउनि श्राप दैला मूं तेसनी श्राप दींणा। तिंडै जरियै संसारेरै सारै कुल आशीष पालै।“

![](https://cdn.door43.org/obs/jpg/360px/obs-en-04-05.jpg)

परमेश्वरेरै वचनेरै मुताबिक अब्राहम सभ किछ छडि करी चलि गिया। अब्राहम अपड़ै सारा सेवका जां अपड़ी सारी धन-दौलती समैत जां अपड़ी लाड़ी साराय सेईतै कनान दैशानि चलि गिया जै परमेश्वरै तैसनी लुहाऔरा थ्या। अब्राहम तैठि मत्तै साल रिय्हा, फिरी परमेश्वरै अब्राहमा सेईतै वायदा किया।

![](https://cdn.door43.org/obs/jpg/360px/obs-en-04-06.jpg)

जेख्णी अब्राहम कनान दैशा मझ पुज्जा तां परमेश्वरै तैस सेईतै बोलु, “अपड़ै चोउवो पासै नजर मार। मूं ताउनि ऐ सारा दैश दींणा जां तिंडा वंश हमेशा तेईनी ऐस दैशा पन अधिकार रखैला।” तां अब्राहम तैस दैशा मझ बसि गिया।

![](https://cdn.door43.org/obs/jpg/360px/obs-en-04-07.jpg)

मलिकिसिदक नाँईयेरा अक मड़द थ्या जै सर्वशक्तिमान परमेश्वरैरा याजक थ्या। अक धियाड़ी जेख्णी अब्राहम युद्ध कांना किना बाद वापस ऐईंता थ्या तां सै जां अब्राहम मिल्लै। मिलिकिसिदके अब्रामनी आशीष दित्ती जां बोलु, "सर्वशक्तिमान परमेश्वर जै स्वर्गेरा जां धरतिरा मालिक आ सै ताउनि आशीष दैला।" फिरी अब्राहमै युद्धा मझ जितोरी सारिया चीजा केरा दशवांश यानि दशुवां हैसा मलिकिसिदकनी दित्ता।

![](https://cdn.door43.org/obs/jpg/360px/obs-en-04-08.jpg)

मत्तै साल बिरती गियै, पण हालै तेईनी बि अब्राहमेरी जां सारेरी कोई आउलाद ना भुई। परमेश्वरै अब्राहमा सिंउ गल्ल की जां फिरी वायदा केया कि तैसेरी लाड़ी साराय किना अक पुत्र पेईदा भूंणा, जां जिहीं असमांणा मझ तारै अत्तै तिहींयें तिंडा वंश बि भूंणा। अब्राहमै परमेश्वरेरै वायदै पन विश्वास केया। परमेश्वरै घोषणा की कि अब्राहम अक धर्मी मैहणु आ केईनी कि तेनि परमेश्वरेरै वायदै पन विश्वास केईथ्या।

![](https://cdn.door43.org/obs/jpg/360px/obs-en-04-09.jpg)

तां परमेश्वरै अब्राहमा सिंउ अक वायदा केया। शांत तरीकै सेईतै, अक वायदा दुवां गुट्टा केरै बिच योकिया केरै कंम कांनेरा अक समझौता भूंता। परमेश्वरै अब्राहमा सेईतै सै वायदा तेख्णी केईथ्या जेख्णी अब्राहम झुलौरा थ्या, पण सै तां बि परमेश्वरेरी गल्लै शुणी सकींथ्या। परमेश्वरै बोलु, “मूं तिंडै शरीरा किना पेईदा करि करी ताउनि अक पुत्र दींणा। आंउ तिंडै वंशानि ऐ कनान दैश दींता।” पण हालै तेईनी बि अब्राहमेरा कोई पुत्र ना भुआ।

*उत्पत्ति अध्याय 11-15 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_04_128kbps.m4a

## 5. वायदेरा पुत्र- कहानी

https://openbiblestories.org/l/cdj/story-5/

![](https://cdn.door43.org/obs/jpg/360px/obs-en-05-01.jpg)

अब्राहम जां सारा कनान दैशा मझ पुजणा किना दस साल बाद, हालै तेईनी बि तैन्हैरी कोई आउलाद ना भुई। ऐठणीरै तेईनी अब्राहमेरी लाड़ी साराय तैस सिंउ बोलु, “यानि कि परमेश्वरै हालै तेईनी बि मूंनी आउलादिरा सुख ना दित्ता अबै आंउ बच्चा जंमणैरै तेईनी बड़ि बुढी आ, तका, मिंडी दासी हाजिरा ऐठी आ। तैस सिंउ बि ब्याह करी लै कि सै मिंडै तेईनी आउलाद पेईदा करी सकिया।

![](https://cdn.door43.org/obs/jpg/360px/obs-en-05-02.jpg)

फिरी अब्राहमै हाजिराय सिंउ ब्याह करी लिया। हाजिराय अक पुत्र जम्मा, जां अब्राहमै तेसैरू नाँ इश्माएल रखु। पण सारा हाजिराय किना जलन कांना लगी। जेख्णी इश्माएल तैराह सालेरा थ्या, तां परमेश्वरै अब्राहमा सेईतै फिरी गल्ल की।

![](https://cdn.door43.org/obs/jpg/360px/obs-en-05-03.jpg)

परमेश्वरै बोलु, “आंउ सर्वशक्तमान परमेश्वर आ। मूं ताउ सिंउ अक वायदा कांना।” तां अब्राहमै धरती पन पैई करी परमेश्वरानि प्रणाम किया। परमेश्वरै अब्राहमा सिंउ ऐ बि बोलु, “तु बड़ि सारी जातिया केरा पिता भूंणा। आंउ ताउनि जां तिंडै वंशानि तैन्हैरी जमीन भूंणेरै तैईनी कनान दैश दैला जां आंउ हमेशा तेईनी तैन्हैरा परमेश्वर भूंणा। तांउ अपड़ै घरानेरै हर मड़देरा खतना काना।"

![](https://cdn.door43.org/obs/jpg/360px/obs-en-05-04.jpg)

"तिंडि लाड़ी साराय ऐकि पुत्रानि जन्म दींणा, सै वायदेरा पुत्र भूंणा। तेसैरू नाँ इसहाक रखै। मिंडा वायदा तैस सेईतै बि बंणी रैहला, जां तैस किना अक बड़ि बडी जाति बंणी गाहली। मूं इश्माएला किना बि अक बड़ि बडी जाति बंणाणी, पण मिंडा वायदा इसहाका सेईतै बंणी रैहला।” तां परमेश्वरै अब्रामेरू नाँ बदली करी अब्राहम रखी दित्तु, जेसैरा मतलब आ “मूलपिता” यानि बड़ा सारा केरा पिता। परमेश्वरै सारैरू नाँ बदली करी सारा करि दित्तु, जेसैरा मतलब आ “मूलमाता”।

![](https://cdn.door43.org/obs/jpg/360px/obs-en-05-05.jpg)

तैस धियाड़ी अब्राहमै अपड़ै सारै घरानेरै मड़दा केरा खतना केया। लगभग अक साल बाद, जेख्णी अब्राहम 100 सालेरी उम्रिरा थ्या जां सारा 90 सालेरी थी, तेख्णी साराय अब्राहमेरै पुत्रानि जन्म दित्ता। जिहीं परमेश्वरै तैन्हांनि बोलौरू थियु तैन्हैं तेसैरू नाँ इसहाक रखु।

![](https://cdn.door43.org/obs/jpg/360px/obs-en-05-06.jpg)

जेख्णी इसहाक जुवान भुवा ता परमेश्वरै ऐ बोलि करी अब्राहमेरै विश्वासैरी परख की, कि “अपड़ै इकलौतै पुत्रा लै जां तैस मिंडै तेईनी बलिदानेरै रूपा मझ मारी दै। ”फिरी अब्राहमै परमेश्वरेरै ऐस आदेश पालन केया, जां अपड़ै पुत्र इसहाकेरा बलिदान कांनेरै तेईनी तियार भौ गिया।

![](https://cdn.door43.org/obs/jpg/360px/obs-en-05-07.jpg)

जेख्णी अब्राहम जां इसहाक बलिदान चाढ़नेरी जगाय धेरै गांहणा लगै तां इसहाकै पुच्छु, ”हे पिता, असुवां किनि बलिरै तेईनी छिड़ी ता अत्ती, पण बलिदान कांनेरै तेईनी भेडैरा बच्चा कोठि आ?” अब्राहमै जवाब दित्ता, “हे मिंडै पुत्र, परमेश्वर बलिदान कांनेरै तेईनी भ्रेडैरै बच्चैरा इन्तजाम करैला।”

![](https://cdn.door43.org/obs/jpg/360px/obs-en-05-08.jpg)

जेख्णी अब्राहम जां इसहाक बलिदान चाढ़नेरी जगाय पुजि गियै, तां अब्राहमै वेदी बंणाय जां छिड़ी चिणीं करी इसहाकेरै हत्थ पैयिड़ बन्हीं करी वेदी पनि लमैरी दित्ता। सै अपड़ै पुत्रा मांनै बाऐ थ्या तां परमेश्वरै तेसनी बोलु, “रुकि गा! पुत्रानि किछ मेयिं करै! अबै आंउ बुझि गिया कि तु मिंडा डर मंनता, केईनी कि तीं अपड़ा इकलौता पुत्र बि मूं किना बचा करी ना रखा।”

![](https://cdn.door43.org/obs/jpg/360px/obs-en-05-09.jpg)

तां फिरी अब्राहमै तैठि अक भ्रेडैरा बच्चा झिल्हा मझ फसौरा लधा। अब्राहमै गहि करी सै भ्रेडैरा बच्चा अंणा, जां परमेश्वरेरै तेईनी खुश भौ करी बलिदान करी दित्ता। इसहाकेरै बदलै परमेश्वरै तैठि तैन्हैरै तेईनी भ्रेडैरै बच्चैरा इन्तजाम केईथ्या। परमेश्वर सिर्फ अब्राहमेरी परख कांना चांहथा थ्या।

![](https://cdn.door43.org/obs/jpg/360px/obs-en-05-10.jpg)

तेख्णी परमेश्वरै अब्राहमा सेईतै बोलु, “तु मिंडै तेईनी सभ किछ दींणानि तियार भौ गिया, यो तेईनी कि अपड़ा इकलौता पुत्र बि ना छडा, ऐठणीरै तेईनी आंउ ताउनि आशीष दींणैरा वायदा काता। तिंडा वंश असमांणेरै तारा किना बि जादा भूंणा। केईनी कि तीं मिंडै आदेशैरा पालन केया ऐठणीरै तेईनी मूं तिंडै परिवारेरै जरियै संसारेरी सारी जातियानि आशीष दींणी।”

*उत्पत्ति अध्याय 16-22 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_05_128kbps.m4a

## 6. परमेश्वररैरा इसहाकेरै तेईनी इन्तजाम- कहानी

https://openbiblestories.org/l/cdj/story-6/

![](https://cdn.door43.org/obs/jpg/360px/obs-en-06-01.jpg)

जेख्णी अब्राहम बड़ा बुढा भौ थ्या गियौरा तेख्णी तेसैरा पुत्र, इसहाक जुवान भौ थ्या गियौरा। ऐठणीरै तेईनी अब्राहमै अपड़ा अक दास अपड़ै पुत्रा इसहाकनी लाड़ी अणनेरै तेईनी तैस दैशानि भेईजा जेठि तेसैरै रिश्तैदार रिहींथ्यै।

![](https://cdn.door43.org/obs/jpg/360px/obs-en-06-02.jpg)

अक लम्मा सफर कांना किना बाद, अब्राहमेरा दास तैस शहरा मझ पुजि गिया जेठि अब्राहमेरै रिश्तैदार रिहींथ्यै, तां परमेश्वरै तैस दासेरा सामना रिबकाय सिंउ करा। सै अब्राहमेरै भाईरी पौत्री थी।

![](https://cdn.door43.org/obs/jpg/360px/obs-en-06-03.jpg)

रिबका अपड़ै परिवारा छडि करी,अब्राहमेरै दासा सेईतै इसहाकेरै घरै गांहणनी तेयार भौ गैई। रिबका तैठि पुज्जी ता इसहाकै तैस सेईतै ब्याह करी लिया।

![](https://cdn.door43.org/obs/jpg/360px/obs-en-06-04.jpg)

अक लम्मै टैंम बाद, अब्राहम मरी गिया। तां परमेश्वरै अब्राहमा सेईतै जै वायदा कियौरा थ्या तेठणीरै मुताबिक, परमेश्वरै इसहाकनी आशीष दित्ती। पण इसहाकेरी लाड़ी रिबकैनी कोई आउलाद ना भुई। इसहाक मतिया जातिया केरा पिता ना बंणी सकींथ्या अगर तैस किनि अक बि बच्चा ना भूंता।

![](https://cdn.door43.org/obs/jpg/360px/obs-en-06-05.jpg)

इसहाकै रिबकेरै तेईनी प्रार्थना की, परमेश्वरै तेसैरी प्रार्थना शुणी जां तेसनी तैसै टैंमा जुड़वा बच्चा केरी आशीष दित्ती। जैस टैंमा सै बच्चै रिबकेरै पैटा ऐ मझ थ्यै, सै योकिया मझ भिड़ियूंणा लगै, ऐठणीरै तेईनी जै किछ बि भूंतु थ्यि रिबकै सै सभ किछ परमेश्वरा सिंउ बौलि दितु।

![](https://cdn.door43.org/obs/jpg/360px/obs-en-06-06.jpg)

परमेश्वरै रिबकै सिंउ बौलु, “ताउ दुवां पुत्रानि जन्म दींणा। तैन्हेरै वंश दो अलग-अलग जाति बंणेलै। तैन्हां योकिया सिंउ भिड़ियूंणु। पण बड्डै पुत्रा किना पेईदा भूंणारी जाति, हल्कै पुत्रा किना भूंणारी जातिरी आज्ञा मंनणी पूंणी।”

![](https://cdn.door43.org/obs/jpg/360px/obs-en-06-07.jpg)

जेख्णी रिबकेरै बच्चा केरा जन्म भुवा, ता बड्डा पुत्र लाल जां शिरवाऐशा थ्या, जां तैन्हैं तेसैरू नाँ एसाव रखु। तां हल्का पुत्र एसावेरी पेहिंण पकड़ी करी जम्मा, जां तैन्हैं तेसैरू नाँ याकूब रखु।

*उत्पत्ति अध्याय 24:1-25:26 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_06_128kbps.m4a

## 7. परमेश्वर याकूबनी आशीष दींता

https://openbiblestories.org/l/cdj/story-7/

![](https://cdn.door43.org/obs/jpg/360px/obs-en-07-01.jpg)

जेख्णी सैक्यै बच्चै बड्डै भौ गियै ता याकूबा घरै बेशणु खरू लगु, पण एसावा जानवरा केरा शिकार कांना खरा लगा। रिबका याकूबा सिंउ बड़ा लाड़ प्यार करींथी, पण इसहाक एसावा सिंउ बड़ा लाड़ प्यार करींथ्या।

![](https://cdn.door43.org/obs/jpg/360px/obs-en-07-02.jpg)

अक धियड़ी, जेख्णी एसाव शिकार करी वापिस या ता तैस बड़ी भ्रुख थी लगौरी। एसावै याकूबा सेईतै बोलु, “जै तीं खांणा बंणाउरा तैत मझां थोड़ा तिया मूंनि दै।” याकूबै जवाब दित्ता, “ पेहिलै तु मूं सिंउ वायदा कर कि जैठा पुत्र भूंणेरी वजहि सिंउ हर चीज जै ताउनि मेईंणी चेहिंथी, तैस सारूरा हक तु मूंनि दैला।” तेसै टैंमा एसावै अपड़ा जैठा भूंणैरा सारा हक याकूबानि दींणैरा वायदा करी दित्ता। तैठां बाद याकूबै एसावनी थौड़ा खांणा दित्ता।

![](https://cdn.door43.org/obs/jpg/360px/obs-en-07-03.jpg)

इसहाक एसावनी आशीष दींणा चांहथा थ्या। पण ऐहीं कांना किना पेहिलै रिबकाय जां याकूबै एसाव पीछै करि-करी तैसनी धौखा दी करी याकूब ऐपु इसहाकेरै आघै चलि गिया। इसहाक बुढा भौ थ्या गियौरा जां तेसैरी नजर बड़ी घट थी। ऐठणीरै तेईनी याकूबै एसावेरै लिकड़ै लाय जां बकरिरी खल अपड़े गआ जां हत्था पन लपैटी लैई।

![](https://cdn.door43.org/obs/jpg/360px/obs-en-07-04.jpg)

याकूब इसहाका किनी या जां बोलु, “आंउ एसाव आ। आंउ ऐठणीरै तेईनी या कि तु मूंनि आशीष दिया।’ जेख्णी इसहाकै बकरिरै शिरवा महसूस कियै जां लिकड़ा केरी मुसक सुंघी, ता तेनि सौचु कि ऐ ता एसाव ऐ आ जां तैसनी आशीष दित्ती।

![](https://cdn.door43.org/obs/jpg/360px/obs-en-07-05.jpg)

एसाव याकुबेरी ऐस हरकति हैरी करी बड़ा दुखी भौ गिया, केईनी कि याकुबे एसावेरा जैठा भूंणैरा हक जां तैसेरी सारी आशीषै पा लेई। फिरी एसावै सौचु कि बबा मरना किना बाद मूं याकूब जांनी किना खत्म करी दींणा।

![](https://cdn.door43.org/obs/jpg/360px/obs-en-07-06.jpg)

पण रिबकाय एसावेरी योजना शुणी लैई। तां तेनि जां इसहाकै याकूब तेसैरै रिश्तैदारा सेईतै रींहणेरै तेईनी बड़ा दूर भेईजी दित्ता।

![](https://cdn.door43.org/obs/jpg/360px/obs-en-07-07.jpg)

याकूब केही साल अपड़ै रिश्तैदारा सेईतै रिय्हा। तेसै टैंमा तेनि ब्याह करि ल्या जां बाराह पुत्र जां अक छोकरी पेईदा कराय। परमेश्वरै सैक्या बड़ा शैठ बंणा छडा।

![](https://cdn.door43.org/obs/jpg/360px/obs-en-07-08.jpg)

20 साला तेईनी कनान मझ अपड़ै घरा किना दूर रींहणा किना बाद, याकूब अपड़ै परिवारा सेईतै, अपड़ा दासा सेईतै जां अपड़ा जानवरा केरै सारा झुंडा समैत वापिस अपड़ै घरेनि चलि या।

![](https://cdn.door43.org/obs/jpg/360px/obs-en-07-09.jpg)

याकूब हालै बि बड़ा थ्या डरौरा, केईनी कि तेनि सौचु कि एसाव हालै बि मूं खत्म काना चांहथा। एठणीरै तेईनी तेनि अपड़ै मतै जानवरा केरा झुंड एसावा किनि भेईजा। जै दास तैन्हां झुंडा लै करी गियौरै थ्यै तैन्हैं बोलु, “तिंडा दास याकूब, ऐन्हां जानवरा केरै झुंडा ताउनि दींता। सै बड़ा जल्दी वापिस ऐईंता आ।

![](https://cdn.door43.org/obs/jpg/360px/obs-en-07-10.jpg)

पण एसाव अबै याकूबनी माफ करी थ्या बेठौरा, सै तैस अक बारी फिरी तका करी बड़ा खुश भुईथ्या। तैठां किना बाद याकूब कनान दैशा मझ शांति सेईतै रिय्हा। फिरी इसहाक मरी गिया जां याकुबै जां एसावै सै दबा। वायदै जै परमेश्वरै अब्राहमा सेईतै कियौरै थ्यै सै अबै इसहाका किना याकूबा किनि आईछी थ्यै गियौरै।

*उत्पत्ति अध्याय 25:27-35:29 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_07_128kbps.m4a

## 8. परमेश्वर यूसुफा जां तेसैरै परिवारा बचांता- कहानी

https://openbiblestories.org/l/cdj/story-8/

![](https://cdn.door43.org/obs/jpg/360px/obs-en-08-01.jpg)

केहिया साला बाद, याकूब बुढा भौ थ्या गियौरा, ता तेनि अपड़ा प्यारा पुत्र यूसुफ तेसैरै भाईया केरी जांच पड़ताल कांनेरै तेईनी भेईजा जै जानवरा केरै झुंडा केरी देखभाल थ्यै कातै।

![](https://cdn.door43.org/obs/jpg/360px/obs-en-08-02.jpg)

यूसुफेरै भया तैस सिंउ बैर रखींथ्यै केईनी कि तेन्हैरा बब यूसुफा सिंउ बड़ा प्यार करींथ्या, ऐठणीरै तेईनी बि कि यूसुफै सुपना हैरा कि सै तैन्हां पन राज करैला। जेख्णी यूसुफ अपड़ै भाईया किनि या ता तैन्हैं सै बंदी बंणा करी दासा केरा व्यापार कांनारानि बैची दिता।

![](https://cdn.door43.org/obs/jpg/360px/obs-en-08-03.jpg)

घरै वापिस ऐईंणा किना पेहिलै यूसुफेरै भाईयै यूसुफेरै लिकड़ै फाड़ी करी बकरिरै खूना मझ मिला दित्तै। फिरी तैन्हैं सै लिकड़ै अपड़ै बाबेनि लुहाई करी बोलु कि जंगली जानवरै तिंडा छौकरा यूसुफ खा छडा। ऐस गल्लै शुणी करी याकूब बड़ा उदास भौ गिया।

![](https://cdn.door43.org/obs/jpg/360px/obs-en-08-04.jpg)

दासा केरा व्यापार कांनारै मैहणुवें यूसुफ मिस्र दैशानि लै नियां। नील नदिरै किनारै बसौरा मिस्र दैश बड़ा बडा जां ताकतवर थ्या। तैन्हैं व्यापारियै यूसुफ एकि अमीर सरकारी अधिकारिनी गुलामेरै रूपा मझ बैचि दित्ता। यूसुफै अपड़ै मालिकेरी बड़ै प्यार सिंउ सेवा की, जां परमेश्वरै यूसुफनी आशीष दित्ती।

![](https://cdn.door43.org/obs/jpg/360px/obs-en-08-05.jpg)

तैठां किना बाद ऐहीं भू कि तेसैरै मालिकेरी लाड़ी यूसुफनी बोलु, “मूं सेईतै झुल, पण यूसुफ मुकरि गिया जां बोलु, आंउ परमेश्वरेरै खिलाफ यौउता बड्डा पाप ना करि सकता।” ऐठणीरै तेईनी सै गुस्सै भौ गैई जां तेनि यूसुफा पनि झूठा आरोप ला दित्ता, ऐठणीरै तेईनी सै पकड़ी करी जैल्ही मझ बंद करी दित्ता। यो तेईनी कि जेलखाने मझ बि, यूसुफ परमेश्वरेरै प्रति सच्चा रिय्हा, जां परमेश्वरै तैसनि आशीष दित्ती।

![](https://cdn.door43.org/obs/jpg/360px/obs-en-08-06.jpg)

दुवां साला तेईनी यूसुफ बेकसूर भूंणेरै बावजूद बि जैल्ही मझ थ्या। अक रात मिस्र देशेरै राजै, जेसैरू नाँ फिरौन थियु, तेनि राती दो सुपनै तकाय जैन्हैं सै बड़ा भारी परैशान करी छडा। जै तेनि सुपनै तकाय तेठणीरा मतलब शुणांणार कौ बि ना थ्या।

![](https://cdn.door43.org/obs/jpg/360px/obs-en-08-07.jpg)

परमेश्वरै यूसुफनी सुपना केरा मतलब शुणांणेरी काबलियत दितौरी थी, ऐठणीरै तेईनी फिरौने यूसुफ जैल्ही मझां ऐपु किनि शदा। यूसुफै तैसनी तैन्हां सुपना केरा मतलब शुणा जां बोलु, “सारै मिस्र दैशा मझ सत्त साल बड़ि फसल भूंणी, जां फिरी अगलै सत्त साल अकाल पूंणा।”

![](https://cdn.door43.org/obs/jpg/360px/obs-en-08-08.jpg)

फिरौन यूसुफा किना बड़ा खुश भुवा कि तेनि सैक्या मिस्र देशैरा दुवां ताकतवर मैहणु चुणां।

![](https://cdn.door43.org/obs/jpg/360px/obs-en-08-09.jpg)

यूसुफै मैहणुवंनी सत्ता सालानि बड़ि जादी फसल जां खांणै बाई चीजै किट्ठी कांननी बोलु, सत्त साल अकाल पेया तेख्णी यूसुफै मैहणुवंनी सै अनाज बैचु ताकि तैन्हां किनि खांणुनि पूरू भौ गहिया।

![](https://cdn.door43.org/obs/jpg/360px/obs-en-08-10.jpg)

सै अकाल सिर्फ मिस्र दैशा मझ ऐ ना, पण कनान दैशा मझ बि बड़ा थ्या पियौरा, जेठि याकूब जां तेसैरा परिवार रिहींथ्या।

![](https://cdn.door43.org/obs/jpg/360px/obs-en-08-11.jpg)

ऐठणीरै तेईनी याकूबै अपड़ा सभनियां बडा पुत्र अनाज खरीदणैरै तेईनी मिस्र दैशानि भेईजा। जेख्णी सै अनाज खरीदणेरै तेईनी यूसुफेरै सामणै खड़ै भुवै ता तैन्हैं भाईयै यूसुफ ना पछियांणा। पण यूसुफै सैक्यै पछियांणी लियै।

![](https://cdn.door43.org/obs/jpg/360px/obs-en-08-12.jpg)

यूसुफै ऐ जांणनेरै तेईनी कि क्या मिंडै भाईयै अपांणा बदलौरा कि ना, तैन्हां परखणा किना बाद, यूसुफै तैन्हां सिंउ बोलु, “आंउ तुवाड़ा भया यूसुफ आ! डरा मेईं। जेख्णी तुहैं आंउ गुलाम भूंणेरै तेईनी बेचथिया ता तुहैं बुरू कांनेरी सोचथी, पण परमेश्वरै तैस बुराईरै बदलै मूं सिंउ भलाई की! तुवै बि अईछी करी मिस्र दैशा मझ रिय्हा ताकि आंउ तुवाड़ै तेईनी जां तुवाड़ै परिवारेरै तेईनी अनाजेरा इन्तजाम करी सकिया।“

![](https://cdn.door43.org/obs/jpg/360px/obs-en-08-13.jpg)

जेख्णी यूसुफेरै भया अपड़ै घरै वापिस कनान दैशा मझ चलि यै जां अपड़ै बाबै याकूबनी शुणांउ कि यूसुफ तिंडा पुत्र हालै बि जींता ता ऐस गल्लै शुनी करी यूसुफ बड़ा ज्यादा खुश भुईथ्या।

![](https://cdn.door43.org/obs/jpg/360px/obs-en-08-14.jpg)

हालाँकि याकूब तैस टैंमा बड़ा बुढा भौ थ्या गियौरा तां बि सैक्या अपड़ै पूरै परिवारै समैत मिस्र दैशानि चलि गिया, जां सै तैठियै बसि गियै। याकूबै मरना पेहिलै हरेक पुत्रानिआशीर्वाद दित्ता।

![](https://cdn.door43.org/obs/jpg/360px/obs-en-08-15.jpg)

परमेश्वरै जै वायदा अब्राहमा सिंउ कियौरा थ्या सैक्या वायदा इसहाका पन जां तैठां किना बाद याकूबा पन, जां तैठां बाद बाराह पुत्रा केरै वंश इस्राएलेरै बाराह गौत्रा पन अईछी गिया। तैन्हां बाराह पुत्रा केरै वंश इस्राएलेरै बाराह गौत्र बंणी गियै।

*उत्पत्ति अध्याय 37-50 किना अक बिइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_08_128kbps.m4a

## 9. परमेश्वर मूसै शदांता- कहानी

https://openbiblestories.org/l/cdj/story-9/

![](https://cdn.door43.org/obs/jpg/360px/obs-en-09-01.jpg)

यूसुफेरै मरना किना बाद तेसैरै सभ रिश्तैदार मिस्र दैशा मझ बसि गियै। सै जां तेसैरा वंश केहिया साला तेईनी मिस्र दैशा मझ ऐ रिय्है जां तैन्हैं बड़ी आउलाद पेईदा की। जां फिरी सै सारै इस्राएली भौ गियै।

![](https://cdn.door43.org/obs/jpg/360px/obs-en-09-02.jpg)

मत्तै साल बाद, इस्राएलिया केरी गिणती बधी गियौरी थी। जां मिस्र देशैरै मैहणु अबै ऐस गल्लै भुलि थ्यै गियौरै कि तैन्हैरी मजत कांनेरै तेईनी यूसुफै बड़ु किछ कियौरू थियु। मिस्र देशैरै मैहणु इस्राएलिया किना डरींथ्यै केईनी कि सै गिणती मझ बड़ै ज्यादै थ्यै। ऐठणीरै तेईनी तैस टैंमा मिस्र दैशा पनि अधिकार कांनारै फिरौन राजै इस्राएली मैहणु मिस्री मेहणुवां केरै गुलाम बंणा दित्तै।

![](https://cdn.door43.org/obs/jpg/360px/obs-en-09-03.jpg)

मिस्र देशैरै मेहणुवें इस्राएली मैहणुवां पनि अत्याचार करि करी हर कंम कांनेरै तेईनी मजबूर कियै। तैस कठिन मैहनतिरी वजहि सिंउ तैन्हैरा जीवन बड़ा दुखी भौ गिया, पण परमेश्वरै तैन्हांनि अशीष दित्ती जां तैन्हैरै होरी जादी आउलाद पेईदा भुई।

![](https://cdn.door43.org/obs/jpg/360px/obs-en-09-04.jpg)

जेख्णी फिरौन राजै तकाउ कि इस्राएली मैहणुवां केरी बड़ी जादी आउलाद पेईदा भूंती आ, तां फिरौन राजै सारी प्रजाईरै मैहणुंनी हुक्म दित्ता, इस्राएली मैहणवां केरै जैत्थरै बि बच्चै भौरै अत्तै तैन्हां सारा नील नदी मझ सुट्टी करी मारी दिया।

![](https://cdn.door43.org/obs/jpg/360px/obs-en-09-05.jpg)

तैस टैंमा एकि खास इस्राएली जनेनी ऐकि छोकरूनि जन्म दित्ता। तेनि जां तेसैरै लाड़ै तैन्हैरै बोलै ज्यौतु भूंतु थियु सैक्या बच्चा छपा करी रखा।

![](https://cdn.door43.org/obs/jpg/360px/obs-en-09-06.jpg)

जेख्णी तेसैरै मयि-बबै सै बच्चा होरा ज्यादा टैंम ना छपाईया, ता तैन्हैं सै मारी छडणेरै डरा किना ऐकि टोकरी मझ नील नदिरै किनारै सरकंडा केरै बिच रखि दित्ता। तैस बच्चेरी बड्डी भींणी ऐ तकांणेरै तेईनी दूर खड़ी करी तेसैरी देख-रेख की कि तैस बच्चै सेईतै कितु भौलु।

![](https://cdn.door43.org/obs/jpg/360px/obs-en-09-07.jpg)

तां फिरौन राजेरी छोकरी नय्हूंणेरै तेईनी तैस नदी मझ यैई, जां नदिरै ब्रक्खै बतै सरकण्डेरू घहा मझ फसोरी टौकरी लधि, तेनि अपड़ी दासी सै टौकरी अंणनेरै तेईनी भेईजी, जां तैन्हैं तैस टोकरी मझ अक बच्चा लधा, तां तेसै बच्चै पन दया की जां सै अपड़ा बच्चा बंणा लिया। फिरी तेनि अक इस्राएलैरी जनानि तैस बच्चैनि दुध पिवांणेरै तेईनी कंमा पनि रखि लैई पण फिरौन राजेरी छोकरी ना थ्या पता कि सै जनानि तैस बच्चैरी सक्की माँ आ। जेख्णी सै बच्चा बडा भौ गिया कि तैस अपड़ी मायरू दुधैरी जरूरत ना थी, ता तेनि सै बच्चा राजै फिरौनेरी छोकरी किनि वापिस पुजा दित्ता, तैन्हैं तेसैरू नाँ मूसा रखु।

![](https://cdn.door43.org/obs/jpg/360px/obs-en-09-08.jpg)

अक धियाड़ी, जेख्णी मूसा जुवान भौ गिया, ता तेनि हैरू कि ऐकि मिस्र देशैरा मैहणु ऐकि इस्राएली मैहणु पनि बजौरी आ। मूसै अपड़ा साउगी जै इस्राएल देशैरा थ्या तैस बचांणैरी कोशिश की।

![](https://cdn.door43.org/obs/jpg/360px/obs-en-09-09.jpg)

तां मूसै सौचु कि सै कौस ना लांहणा तां तेनि सै मिस्र देशैरा मैहणु मारी छडा जां तेसैरी लास दबि छडी। पण मूसै जै कियौरू थ्यु सै सभ किछ कुनिक्यै हैरी थियु लियौरू।

![](https://cdn.door43.org/obs/jpg/360px/obs-en-09-10.jpg)

जेख्णी फिरौन राजै ऐ पता लगि गिया कि मूसै कितु कियौरू आ। राजै फिरौनै मूसै खत्म कांनेरी कोशिश की, पण मूसा मिस्र दैशा किना बंणा मझ नशि गिया। फिरौने राजेरै सिपाहियै बि सैक्या बंणा मझ ना तोपिया।

![](https://cdn.door43.org/obs/jpg/360px/obs-en-09-11.jpg)

मूसा मिस्र दैशा किना दूर बंणा मझ मिद्दान दैशा मझ अक पुव्हाल बंणी थ्या गियौरा। तेनि तैठि ऐकि छोकरी सिंउ ब्याह करि लिया जां तैस सिंउ दो पुत्र पेईदा भुवै।

![](https://cdn.door43.org/obs/jpg/360px/obs-en-09-12.jpg)

मूसा तैठि अपड़ै शोहुरेरी भ्रैडा कैरी देखभाल करींथ्या। मूसैरा शोहुरा तैस देशैरा याजक थ्या। अक धियाड़ी, मूसा जेख्णी अपड़िया भ्रैडा केरी देखभाल काता थ्या तैठि तेनि अक जअतु झिल्ह हैरू जै फुकियूंणै बिना जऔरू थियु। तैस तकांणेरै तेईनी मूसा तैस झिल्हा नीड़ गिया। जेख्णी सैक्या तैस झिल्हा नीड़ पुज्जा ता परमेश्वरै मूसै सिंउ गल्ल की। “हे मूसा, अपड़ै बूट उतारी दै। तु ऐकि पवित्र जगाय पनि खड़ा आ।”

![](https://cdn.door43.org/obs/jpg/360px/obs-en-09-13.jpg)

परमेश्वरै बोलु, “मीं अपड़ै मैहणुवां केरा दुख लधौरा। मूं तु फिरौन राजै किनि भेईजणा ताकि तु इस्राएली मैहणुवां मिस्र दैशेरी गुलामी किना कढि अणियां। मूं तैन्हांनि कनान दैश दींणा, सैक्या दैश जेठणीरा मीं अब्राहमनी, इसहाकनी जां याकूबानि दींणैरा वायदा कियौरा।”

![](https://cdn.door43.org/obs/jpg/360px/obs-en-09-14.jpg)

मूसै बोलु, “अगर मैहणु पुछणा लगै कि आंउ कुनि आ भेईजौरा ता मूं तैन्हां मैहणुवंनी कितु बौलणु?” परमेश्वरै मूसेनी बोलु, “जै आंउ आ सै आंउ आ। तैन्हां सिंउ बोला, मीं ऐ तु तुहां किनि भेईजौरा। तैन्हां सिंउ ऐ बि बोलै, आंउ तुवाड़ै पूर्वजा केरा यानि अब्राहमेरा जां इसहाकेरा जां याकूबेरा परमेश्वर यहोवा आ। मिंडा ऐ नाँ हमेशा तेईनी आ।"

![](https://cdn.door43.org/obs/jpg/360px/obs-en-09-15.jpg)

मूसा फरौन राजै किनि गांहणा किना डरींता थ्या, केईनी कि सै अटकि-अटकि करि बोलींथ्या, ऐठणीरै तेईनी परमेश्वरै मूसैरा भाई, हारून तेसैरी मजत कांनेरै तेईनी भेईजा।

*निर्गमन अध्याय 1-4 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_09_128kbps.m4a

## 10. दश मुसीबती- कहानी

https://openbiblestories.org/l/cdj/story-10/

![](https://cdn.door43.org/obs/jpg/360px/obs-en-10-01.jpg)

परमेश्वरै मूसै जां हारूननी चेतावनी दित्ती कि फिरौन राजै ढींठ भौ गांहणु। जेख्णी सै फिरौन राजै किनि गियै ता तैन्हैं बोलु, “इस्राएलेरा परमेश्वर ऐहीं बौलता, मिंडै मैहणुवां गांहणा दै।” पण फिरौन राजै तैन्हैरी ना शुणी जां तैन्हांनि बोलु, कि मूं इस्राएली मैहणु ना छडणै, फिरौन राजै सैक्यै मैहणु तकड़ी मैहनत कांननी मजबूर कियै।

![](https://cdn.door43.org/obs/jpg/360px/obs-en-10-02.jpg)

फिरौन राजा हौरा ढींठ भौ गिया, जां तैन्हां मैहणुवां ना थ्या छडणा चांहथा, ऐठणीरै तेईनी परमेश्वरै मिस्र दैशा पन दश खतरनाक मुसीबती भेईजी। ऐन्हां मुसीबतिया केरै जरियै परमेश्वर शुणांणा चांहथा थ्या, कि सै फिरौन राजै किना जां मिस्र देशेरै दैवता किना ज्यादा ताकतवर आ।

![](https://cdn.door43.org/obs/jpg/360px/obs-en-10-03.jpg)

परमेश्वरै नील नदिरू पांणी खुना सैयि बदली दित्तु, पण फिरी बि फिरौन राजा इस्राएली मैहणुवां छडणा ना थ्या चांहथा।

![](https://cdn.door43.org/obs/jpg/360px/obs-en-10-04.jpg)

परमेश्वरै पूरै मिस्र दैशा मझ गोहि भेईजी। फिरौन राजै गोहिया दूर कांनेरै तेईनी मूसै सिंउ विनती की। जेख्णी फिरौन राजै हैरू कि सारी गोहि मरी गेई, तां तेनी अपड़ा मंन होरा कठोर करी लिया जां इस्राएली मैहणु ना छड्डै।

![](https://cdn.door43.org/obs/jpg/360px/obs-en-10-05.jpg)

ऐठणीरै तेईनी परमेश्वरै खतरनाक टिड्डिया केरी मुसीबत भेईजी। तैठां किना बाद परमेश्वरै खून चूसणै बाई मेछी भेईजी। फिरौन राजै मूसा जां हारून शदाय जां तैन्हां सिंउ बोलु, अगर सैक्यै तैस मुसीबती रौकी दैलै ता इस्राएली मैहणु मिस्र दैश छडि करी गही सकतै। जेख्णी मूसै प्रार्थना कि ता परमेश्वरै मिस्र दैशा किना खून चूसणै बाई मेछी दूर करी दित्ती। फिरौन राजै फिरी अपड़ा मंन कठोर करी दित्ता जां सैक्यै मैहणु फिरी ना छड्डै।

![](https://cdn.door43.org/obs/jpg/360px/obs-en-10-06.jpg)

ऐठां किना बाद, परमेश्वरै मिस्रिया केरै सारै पालतु जानवर बिमार करी मारी छडै। पण फिरौन राजैरा मंन होरा कठोर भौ गिया जां तेनि इस्राएली मैहणु ना छड्डै।

![](https://cdn.door43.org/obs/jpg/360px/obs-en-10-07.jpg)

तेख्णी परमेश्वरै मूसेनी बोलु, हत्था धूड़ लै जां तैस फिरौन राजेरै सामणै असमांणा धेरै सुट। जेख्णी तेनि ऐहीं कियु ता मिस्र देशैरा मैहणुवां जां जानवरा केरै शरीरा पनि बडै-बडै दर्दनाक गंडै भौ गियै, पण इस्राएली मैहणुवंनी किछ ना भू। तेख्णी परमेश्वरै फिरौन राजैरा मंन कठोर करी दित्ता। फिरौन राजै इस्राएली मैहणु फिरी ना छड्डै।

![](https://cdn.door43.org/obs/jpg/360px/obs-en-10-08.jpg)

ऐठां किना बाद, परमेश्वरै मिस्र दैशा पन बडि-बडि अशण सुट्टी, जां अशणी ला सारी फसल बर्बाद भौ गैई, जां जै कौ घरा किना भेईर निकौथा सै मारी दित्ता। फिरौन राजै मूसा जां हारून शदाय जां तैन्हांनि बोलु, “मीं पाप कियौरा, तुवै सारै मैहणु गहि सकतै।“ मूसै प्रार्थना की जां असमांणा किना अशण पूंणी बंद भौ गैई।

![](https://cdn.door43.org/obs/jpg/360px/obs-en-10-09.jpg)

पण फिरौन राजै फिरी पाप केया जां अपड़ा मंन फिरी कठोर करी लिया। तेनि इस्राएली मैहणु ना छड्डै।

![](https://cdn.door43.org/obs/jpg/360px/obs-en-10-10.jpg)

फिरी परमेश्वरै मिस्र दैशा मझ टिट्टा केरी मुसीबत भेईजी। ऐन्हैं टिट्टै मिस्र देशैरी सारी फसल खा लैई जै अशणी किना बर्बाद भूंणा किना बचौरी थी।

![](https://cdn.door43.org/obs/jpg/360px/obs-en-10-11.jpg)

फिरी परमेश्वरै त्रा धियाड़ी मिस्र दैशा मझ चणपट्ट अंधारू करी छडु। ऐ अंधारू यौउतु काउ थियु कि मिस्र देशैरै मैहणुवां केरै बोलै भेईर ना निकोहियु। पण जेठि इस्राएली मैहणु रिहींथ्यै तैठि प्रगड़ु थियु।

![](https://cdn.door43.org/obs/jpg/360px/obs-en-10-12.jpg)

ऐन्हां नउवा मुसीबतिया किना बाद बि, फिरौन राजै इस्राएली मैहणु ना छड्डै जां छडणा किना नंमा केया। केईनी कि फिरौन राजै ना थियु शुणौरू, ऐठणीरै तेईनी परमेश्वरै अक लाष्ट मुसीबत भेईजणैरी योजना बंणाई। ऐनि मुसीबती ला फिरौन राजैरा मंन बदली गांहणा।

*निर्गमन अध्याय 5-10 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_10_128kbps.m4a

## 11. फसहैरा त्यौव्हार- कहानी

https://openbiblestories.org/l/cdj/story-11/

![](https://cdn.door43.org/obs/jpg/360px/obs-en-11-01.jpg)

परमेश्वरै मूसा जां हारून फिरौन राजै किनि ऐ बौलणेरै तेईनी भेईजै कि इस्राएली मैहणुवां छडि दै। तैन्हैं तैसनी चेतावनी दित्ती कि अगर तु ऐन्हां मैहणुवां ना छडैला, ता परमेश्वरा मिस्र देशैरै मैहणुवां केरै जां जानवरा केरै जैठै पुत्र मारी दींणै। फिरौन राजै ऐ शुणी करी बि परमेश्वरा पन विश्वास काना किना जां तेसैरी गल्ल मंनणा किना नंमा करि दित्ता।

![](https://cdn.door43.org/obs/jpg/360px/obs-en-11-02.jpg)

फिरी परमेश्वरै बोलु, कि आंउ, तैस मैहणु जै मूं पनि विश्वास करैला तेसैरै जैठै पुत्रा बचा लैला। जां हर परिवार ऐकि शुद्ध निष्कलंक उरनुरा बलिदान दैला।

![](https://cdn.door43.org/obs/jpg/360px/obs-en-11-03.jpg)

परमेश्वरै इस्राएली मैहणुवां सिंउ तैस उरनुरा खून अपड़ै दुवारेरै चौगटा पनि लांणेरै तेईनी बोलु, जां तैन्हां तेसै राति तैस उर्नुरु मास भुनि करी बिना खमीर बाई रोटिया सेईतै छुईं खांणु थियु। परमेश्वरै ऐ बि बोलु कि रोटि खांणा किना बाद छुईं-छुईं मिस्र देशैरै मैहणुवां छडणानि बि तियार बेशै।

![](https://cdn.door43.org/obs/jpg/360px/obs-en-11-04.jpg)

जिहीं कांननी परमेश्वरै इस्राएली मैहणुवंनी बोलौरू थियु तैन्हैं तेठणीरै मुताबिक सभ किछ कियु। “परमेश्वरै बोलु, कि तेसै राति अधरातै मूं मिस्र देशैरै मझम्मैं बतै गांहणु, जां मिस्र देशैरै हर मैहणुरै जां जानवरेरै जैठै बच्चै मारी छडणै।”

![](https://cdn.door43.org/obs/jpg/360px/obs-en-11-05.jpg)

इस्राएली मैहणुवां केरै हरेक दुवारा पनि उरनुरा खून लगौरा थ्या, ऐठणीरै तेईनी परमेश्वरै सैक्यै घरै छडि दित्तै। तैन्हां घरा अंतरियें सारै मैहणु सलामत थ्यै। सैक्यै सारै मेम्नेरै मतलब उरनुरै खूनेरी वजहि सिंउ बचि गेईथ्यै।

![](https://cdn.door43.org/obs/jpg/360px/obs-en-11-06.jpg)

पण मिस्री मैहणुवें परमेश्वरा पनि विश्वास ना केया जां तेसैरी गल्ल ना मंनी। ऐठणीरै तेईनी परमेश्वरै तैन्हैरै घरै ना छड्डै। परमेश्वरै मिस्री मैहणुवां केरै सारै परिवारेरै सारै जैठै बच्चै मारी छडै।

![](https://cdn.door43.org/obs/jpg/360px/obs-en-11-07.jpg)

जैल्हिरै केईदिया केरै जैठै पुत्रा किना लै करी फिरौन राजेरै जैठै पुत्रा तेईनी, हरेक जैठा पुत्र मरी गिया। ऐस गहरी घटनाय तका करी मिस्र देशैरै मैहणु रूंणा जां हिक पिटणा लगै।

![](https://cdn.door43.org/obs/jpg/360px/obs-en-11-08.jpg)

तां तेसै राती, फिरौन राजै मूसा जां हारून शदाय जां बोलु, “तुवै इस्राएली मैहणुवां लैकरी झटपट मिस्र दैशा किना चलि गहा।” मिस्र देशैरै मैहणुवें बि इस्राएली मैहणुवंनि बोलु, कि छंदै तुवै झटपट ऐठां किन निकोही गहा।

*निर्गमना अध्याय 11:1-12:32 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_11_128kbps.m4a

## 12. इस्राएली मैहणुवां केरू मिस्र दैशा किना चलि गांहणु (निर्गमन) –कहानी)

https://openbiblestories.org/l/cdj/story-12/

![](https://cdn.door43.org/obs/jpg/360px/obs-en-12-01.jpg)

मिस्र दैशा किना निकोही करी इस्राएली मैहणु बड़ै खुश थ्यै। सै अबै गुलाम ना थ्यै, जां सैक्यै वायदै बाऐ दैशानि गांहथै थ्यै! जै किछ बि इस्राएली मैहणुवें मगथियु, मिस्री मैहणुवें सै सभ किछ दित्तु, यो तेईनी कि सुन्ना, चाँदी जां केही मेंहगी चीजै बि दी दित्ती। होरै देशेरै किछ मैहणुवें परमेश्वरा पन विश्वास केया जां जेख्णी इस्राएली मैहणु मिस्र दैशा किना चलि पियै ता सै बि तैन्हां साउगा चलि पियै।

![](https://cdn.door43.org/obs/jpg/360px/obs-en-12-02.jpg)

परमेश्वरै धियाड़िरै टैंमा तैन्हानि बत्त शुणांणेरै तेईनी बदऐरा भयांकर खम्बा तैन्हेरै आघै-आघै चला। जां रातिरै टैंमा ऐ खम्बा आगिरा खम्बा बणी गिया। परमेश्वर जै कि तैस बदऐरै खम्बै जां आगिरै खम्बै मझ थ्या, हमेशा तैन्हां साउगा थ्या जां यात्राय मझ तैन्हैरी अगुवाई की। तैन्हां सिर्फ तैस खम्बेरै पीछै-पीछै चलणु थियु।

![](https://cdn.door43.org/obs/jpg/360px/obs-en-12-03.jpg)

थोड़ै टैंम बाद, फिरौन राजै जां तेसैरै अधिकारियै अपड़ा मंन बदलि दित्ता। सै इस्राएली मैहणुवां फिरी अपड़ा गुलाम बंणाणा चांहथै थ्यै। ऐठणीरै तेईनी तैन्हैं इस्राएली मैहणुवां केरा पीछा केया। ऐ परमेश्वरै थ्या जेनि तैन्हैरै मंन बदली दित्तै। परमेश्वरै ऐ ऐठणीरै तेईनी कियु कि सै ऐ चांहथा थ्या कि हर मैहणु ऐ पता लगि गहिया कि फिरौन राजै किना जां मिस्री मैहणुवां केरै दैवता किना, यहोवा परमेश्वर सभनियां ज्यादा ताकतवर आ।

![](https://cdn.door43.org/obs/jpg/360px/obs-en-12-04.jpg)

जेख्णी इस्राएली मैहणुवें मिस्र देशैरी सैना ऐईंती तकाय ता तैन्हां पता लगा कि सै फिरौन राजैरी सैना आ जै तैन्हैरा पीछा काती आ जां सैक्यै फिरौनेरी सैना जां लाल समुंद्रा बिच फसि गियौरै अत्तै। सै बड़ै डरि गियै जां रूंणा लगै, “कि असै मिस्र दैश केईनी छड्डा? अबै असुवां मरना किना कौ ना बचा सकता।

![](https://cdn.door43.org/obs/jpg/360px/obs-en-12-05.jpg)

मूसै इस्राएली मैहणुवां सेईतै बोलु, “डरा मेईं! परमेश्वर आज तुवाड़ै तेईनी लड़ैला जां तुहां बचाला।” तां परमेश्वरै मूसै सिंउ बोलु, “ऐन्हां मैहणुवंनी लाल समुन्द्रा पार गांहणेरै तेईनी बोल।”

![](https://cdn.door43.org/obs/jpg/360px/obs-en-12-06.jpg)

तां परमेश्वरै बदऐरा खम्बा लैकरी इस्राएली मैहणुवां जां मिस्री मेहणुवां केरै बिच रखि दित्ता ताकि मिस्री सैना इस्राएली मैहणुवां ना हैरी सकिया।

![](https://cdn.door43.org/obs/jpg/360px/obs-en-12-07.jpg)

तां परमेश्वरै मूसै सिंउ बोलु, “समुन्द्रा पारियें पासै धेरै अपड़ा हत्थ बढ़ा जां तिहींयें मूसै अपड़ा हत्थ पार धेरै केया फिरी समुन्द्रेरै दो हैसै भौ गियै जां तेदि बतै गांहणेरै तेईनी बत्त बणीं गैयि।

![](https://cdn.door43.org/obs/jpg/360px/obs-en-12-08.jpg)

इस्राएली मैहणु समुन्द्रा बिच शुक्की जमीनि पनि चलणा लगै, जां समुन्द्रा पार टपि गियै।

![](https://cdn.door43.org/obs/jpg/360px/obs-en-12-09.jpg)

तां परमेश्वरै सैक्या बदअ बत्तै किना प्रन चुकि लिया ताकि मिस्री सैना इस्राएली मैहणुवां समुन्द्र पार कातै हैरी लिया। मिस्री सैनाय तैन्हां पकड़नेरै तेईनी तेन्हैरा पीछा कांनेरा फैसला लिया।

![](https://cdn.door43.org/obs/jpg/360px/obs-en-12-10.jpg)

ऐठां किना बाद ऐहीं भू कि मिस्री मैहणुवें समुन्द्रेरी बिच्च बाई बत्तै बतै इस्राएली मैहणुवां केरा पीछा केया, पण परमेश्वरै मिस्री सैना डरा दित्ती जां तैन्हेरै रत्थ फसाय दित्तै। सै चिंडै दींणा लगै, “नशा! इस्राएलिया केरी तरफों परमेश्वर आ लड़ता!”

![](https://cdn.door43.org/obs/jpg/360px/obs-en-12-11.jpg)

सारै इस्राएली मैहणु समुन्द्रेरै होरै पासै पुजि गियै। तां परमेश्वरै मूसै सिंउ बोलु कि समुन्द्रा धेरै हत्थ कर, जेख्णी मूसै ऐहीं कियु तां पांणी मिस्री सैनाय पनि अईछी पियु, जां पेहिलै सैयि भौ गियु। सारी मिस्री सैना डुबि गैई।

![](https://cdn.door43.org/obs/jpg/360px/obs-en-12-12.jpg)

जेख्णी इस्राएली मैहणुवें हैरू कि मिस्री मैहणु मरि गियौरै अत्तै ता तैन्हैं परमेश्वरा पनि विश्वास केया कि मूसा परमेश्वरेरी तरफों भविष्यवक्ता थ्या।

![](https://cdn.door43.org/obs/jpg/360px/obs-en-12-13.jpg)

इस्राएली मैहणु ऐठणीरै तेईनी बड़ै खुश थ्यै केईनी कि परमेश्वरै सैक्यै मरना किना जां गुलाम भूंणा किना बचा लियौरै थ्यै। अबै सै परमेश्वरैरी पूजा कांननी जां तैसेरी आज्ञायरा पालन कांननी आजाद थ्यै। इस्राएली मैहणुवें अपड़ी आजादिरा त्यौव्हार मनांणेरै तेईनी जां परमेश्वरैरी महिमा कांनेरै तेईनी मतै गीत लाय। केईनी कि परमेश्वरै सैक्यै मैहणु मिस्री सैनाय किना बचाउरै थ्यै।

![](https://cdn.door43.org/obs/jpg/360px/obs-en-12-14.jpg)

परमेश्वरै इस्राएलियानि हर साल अक त्यौव्हार मनांणनि आदेश दित्ता, ऐस गल्लै याद कांनेरै तेईनी कि किहीं परमेश्वरै मिस्री मैहणु हारा दित्तै जां सैक्यै गुलाम भूंणा किना आजाद कियै। ऐस त्यौव्हारेरू नाँ फसाहेरा त्यौव्हार रखी गियु। ऐस त्यौव्हारा मझ सैक्यै खुशी मनांणेरै तेईनी ऐकि तकड़ै उरनुरा बलिदान करिया। जां भुनि करी बिना खमीर बाईया रोटिया सेईतै खईया। ऐस त्यौव्हारानि फसाहेरा त्यौव्हार बि बौलतै।

*12:33-15:21 किना बाइबल की कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_12_128kbps.m4a

## 13. इस्राएली मैहणुवां सेईतै परमेश्वरैरा वायदा- कहानी

https://openbiblestories.org/l/cdj/story-13/

![](https://cdn.door43.org/obs/jpg/360px/obs-en-13-01.jpg)

परमेश्वरै इस्राएली मैहणुवां किना लाल समुन्द्र पार करवा, तां परमेश्वर तैन्हां बणां मझीं सीनै पहाड़ा पर्वता पनि लै गिया। ऐ सेहै पर्वत थ्या जेठि मूसै जअतु झिल्ह हेथियु। तैन्हैं मैहणुवें तैस पर्वता हैट अपु बेशणैरै तेईनी तम्बु बंणा दित्तै।

![](https://cdn.door43.org/obs/jpg/360px/obs-en-13-02.jpg)

परमेश्वरै मूसै जां सभनियां इस्राएली मैहणुवां सिंउ बोलु, “तुवै हमेशा मिंडी गल्लैरा पालन करियां करा जां जै वायदा आंउ तुहां सेईतै काता तैस वायदै पनि टिकि रिय्हा। अगर तुवै ऐहीं कातै, ता तुवै मिंडै खास मैहणु भूंणै, ऐ सारी धरती मिंडी आ, जां तुवै मिंडी नजरी मझ याजका केरा राज्य जां अक पवित्र जाति बंणेलै।”

![](https://cdn.door43.org/obs/jpg/360px/obs-en-13-03.jpg)

परमेश्वरा ऐईंणेरै तेईनी तैन्हैं मैहणुवें त्रा धियाड़ी अपांणा बिल्कुल तियार केया। तां परमेश्वर सीनै पहाड़ेरी चोट्टी पनि हैट उतरा, जेख्णी सै या ता भुन्जल भुवा, बिजई चमकणां लगी, काहिया केरी भयांकर आवाज भुई। तां मूसा ऐपु, पिच्चु पर्वता पनि चढ़ि गिया। सिर्फ मूसैनी ऐ पहाड़ा पनि ऐईंणैरी इजाजत थी।

![](https://cdn.door43.org/obs/jpg/360px/obs-en-13-04.jpg)

तां परमेश्वरै मैहणुवां सिंउ अक वायदा केया, जां बोलु, “आंउ तुवाड़ा परमेश्वर यहोवा आ। आंउ ऐ आ जेनि तुवै मिस्र दैशेरी गुलामी किना छडाई। जां मूं छडि करी अबै कौसक्यै होरै दैवतैरी पुजा मेईं कातै।”

![](https://cdn.door43.org/obs/jpg/360px/obs-en-13-05.jpg)

"तु अपड़ै तेईनी कोई मूर्ती मेईं बणांय, ना मूर्तिया केरी पुजा करै, केईनी कि आंउ तुवाड़ा सिर्फ अक्कै परमेश्वर आ। तु अपड़ै परमेश्वरैरू नाँ बेकार मझ मेईं लींता। तु आराम धियाड़ी पवित्र मंनणेरै तेईनी याद रखै। तु छी धियाड़ी अपड़ा कंम करै, सत्तवीं धियाड़ि तुवाड़ै तेईनी आराम कांनेरी जां मिंडी भक्ति कांनेरै तेईनी आ।”

![](https://cdn.door43.org/obs/jpg/360px/obs-en-13-06.jpg)

“तु अपड़ै मयि-बबैरा आदर करै। तु कोसकैरा खून मेईं काता। तु व्याभिचार मेईं काता, ना चोरी करै, तु कोसकेरै खिलाफ झूठी गवाहि मेईं दींता, तु कौसेरै बि घरैरा लालच मेईं काता, जिहीं कि अपड़ै ग्रँवालेरी लाड़िरा, तेसैरै घरैरा, तैसेरिया चीजा केरा लालच मेईं काता।”

![](https://cdn.door43.org/obs/jpg/360px/obs-en-13-07.jpg)

तां परमेश्वरै ऐक्यै दश हुक्म घौड़ेरै दुवां सलैटा पन लिखि करि मूसैनि दित्तै। फिरी परमेश्वरै मैहणुवंनी पालन कांनेरै तेईनी होरै बि मतै सारै नीति-नियम दित्तै। फिरी परमेश्वरै बोलु, “जै बि मैहणु ऐन्हां नीति-नियमा केरा पालन करैला ता परमेश्वरा अपड़ै वायदेरै मुताबिक तैन्हां मैहणुवंनी आशीष जां सुरक्षा प्रदान कांनी। परमेश्वरै ऐ बि बोलु कि अगर जै ऐन्हां नीति-नियमा केरा पालन ना करैला ता सैक्यै सजाहिरै हकदार भूंणै।

![](https://cdn.door43.org/obs/jpg/360px/obs-en-13-08.jpg)

परमेश्वरै इस्राएली मैहणुवंनी अक बड़ा बड्डा तम्बु बंणाणेरै तेईनी बोलु, ऐस तम्बुनी मिलाप बाआ तम्बु बोलु। परमेश्वरै तैन्हांनि ठीक-ठीक शुणांउ कि ऐ तम्बु तुहां किहीं बंणाणा, जां तैस अन्दर ताउ केणुहीं चीजै रखणी अत्ति। परमेश्वरै तैन्हांनि बोलु, कि तैस तम्बुरै दो कमरै बंणाणेरै तेईनी अक बड्डा पड़दा ला दैई। सिर्फ महांयाजकानि ऐ तैन्हां कमरा मझ गांहणैरी इजाजत थी केईनी कि परमेश्वर तैस मझ रिहींथ्या।

![](https://cdn.door43.org/obs/jpg/360px/obs-en-13-09.jpg)

परमेश्वरै तैन्हां मैहणुवंनी मिलाप बाऐ तम्बुरै सामणै अक वेदी बंणाणेरै तेईनी बोलु, ऐ एठणीरै तेईनी बंणाणी कि जै कोई परमेश्वरेरै नीति-नियमा केरा पालन ना करैला ता सै अपड़ै पापेरी माफिरै तेईनी तैस वेदी पनि ऐकि जानवरा अणिकरी याजका किनि लै आईछिया जां याजका सै जानवर परमेश्वरेरै तेईनी बलि दी करी वेदी पनि फुकि दींणा। परमेश्वरै बोलु कि तैस जानवरेरै खूना तैस मैहणुरै पापा साफ करी दींणै। ऐनि हिसाबै परमेश्वरा तैस मैहणुरै पाप ना तकांणै। सै मैहणु परमेश्वरेरी नजरी मझ शुद्ध भूंणा। परमेश्वरै मूसेरा भाई हारून जां हारूनेरा वंश अपड़ै याजक भूंणेरै तेइनी चुणी लियै।

![](https://cdn.door43.org/obs/jpg/360px/obs-en-13-10.jpg)

परमेश्वरै तैन्हां मैहणुवंनी जै नीति-नियम दितौरै थ्यै सै तैन्हां नीति-नियमा कांनेरै तेईनी राजी भौ गियै। सै सिर्फ परमेश्वरेरै मैहणु भूंणेरै तेईनी जां सिर्फ तेसैरी ऐ आराधना कांनेरै तेईनी राजी भुवै। परमेश्वरेरै वायदै काना किना कुछ टैंम बाद तैन्हैं मैहणुवें बड़ै बुरै पाप कियै।

![](https://cdn.door43.org/obs/jpg/360px/obs-en-13-11.jpg)

केहिया धियाड़िया तेईनी, मूसा सीनै पहाड़ेरी चोट्टी ऐ पनि रिय्हा। सै परमेश्वरा सेईतै गल्लै काता रिय्हा। पण मैहणु मुसै भातै-भातै खिज्जी गियै। ऐठणीरै तेईनी सै हारूना किनी सुन्ना लै करी यै जां तैसनि बोलु कि असैड़ै तेईनी अक मूर्ती बंणा, ताकि सै परमेश्वरेरी जगाई तैस मूर्तिरी भक्ति करी सकिया। ऐनि हिसाबै, तैन्हैं परमेश्वरेरै खिलाफ बड़ा बुरा पाप केया।

![](https://cdn.door43.org/obs/jpg/360px/obs-en-13-12.jpg)

हारूने सुन्नेरै बछड़ैरी अक मूर्ति बंणाई। फिरी तैन्हैं मैहणुवें तैस मूर्तिरी पूजा कांनी शुरू करी दित्ती जां तैसनी बलि चाढ़ना लगै। तैन्हेरै पापेरी वजहि सिंउ परमेश्वर तैन्हां पन बड़ा गुस्सै भौ गिया जां तैन्हैरा नाश कांना चांहथा थ्या। पण मूसै परमेश्वरा किनि प्रार्थना की जां परमेश्वरै तेसैरी प्रार्थना शुणी जां सैक्यै नाश ना कियै।

![](https://cdn.door43.org/obs/jpg/360px/obs-en-13-13.jpg)

तैठां किना बाद मूसा सीनै पहाड़ा पना हैट उतरी या। सै तैन्हां दुवां घौड़ेरा सलैटा अपड़ै हत्था पकड़ी करी लै या जैन्हां पनि परमेश्वरै दश आज्ञाय लिखोरी थी। फिरी तेनि सैकेई मूर्ती हैरी, तैस मूर्ती हैरी करी सै बड़ा गुस्सै भौ गिया जां तेनि सै सलैट जैन्हां पनि सै दश आज्ञाय लिखोरी थी सै चकनाचूर करी दित्तै। केईनी कि जै तैन्हैं मैहणुवें कियु सै परमेश्वरेरी आज्ञायरै खिलाफ थियु।

![](https://cdn.door43.org/obs/jpg/360px/obs-en-13-14.jpg)

तां मूसै सैकेई मूर्ती आगी मझ फुकि करी तेसैरी धूड़ बंणा दित्ती, जां सै धूड़ पांणी मझ मिला करी सै पांणी तैन्हां मैहणुवंनी पिवा दित्तु। परमेश्वरै तैन्हां मैहणुवां पनि अक बड़ी बड्डी मुसीबत भेईजी, जैसेरी वजहि सिंउ बड़ै सारै मैहणु मरी गियै।

![](https://cdn.door43.org/obs/jpg/360px/obs-en-13-15.jpg)

तां मूसा फिरी तैस पहाड़ा पनि चढ़ी गिया जां प्रार्थना की, “हे परमेश्वर ऐन्हां मैहणुवां केरै पाप माफ करी दै। परमेश्वरै मूसैरी प्रार्थना शुणी जां तैन्हां मैहणुवां केरै पाप माफ करी दित्तै। तां मूसै जै सलैट भनौरै थ्यै तैन्हां सैयि तेनि नवें सलैट बंणा दित्तै।

*निर्गमन अध्याय 19-34 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_13_128kbps.m4a

## 14. बणां मझ भटकणु- कहानी

https://openbiblestories.org/l/cdj/story-14/

![](https://cdn.door43.org/obs/jpg/360px/obs-en-14-01.jpg)

सीनै पहाड़ा पनि परमेश्वरा सेईतै वायदा कांना किना बाद, परमेश्वरै इस्राएली मैहणुवां केरी अगुवाई वायदेरै देशा कनान तेईनी की। परमेश्वरै बदऐरै खम्बै ला तैन्हां केरी अगुवाई की, जां सैक्यै तेसैरै पीछै-पीछै चलै।

![](https://cdn.door43.org/obs/jpg/360px/obs-en-14-02.jpg)

परमेश्वरै अब्राहम, इसहाक जां याकूबा सेईतै वायदा कियौरा थ्या कि सै वायदेरा सै देश तेन्हैरै वंशानि दैला, पण ऐस टैंमा तैठि बड़िया जातिया केरै मैहणु रिहींथ्यै। तैन्हां मैहणुवंनी कनानी जातिरै मैहण बोलींथ्यै। ऐ कनानी मैहणु परमेश्वरैरी भक्ति ना करींथ्यै जां तेसैरी आज्ञा ना मनींथ्यै। सै झूठा दैवता केरी भक्ति करींथ्यै जां बड़ै भारी बुरै कंम करींथ्यै।

![](https://cdn.door43.org/obs/jpg/360px/obs-en-14-03.jpg)

परमेश्वरै इस्राएली मैहणुवां सिंउ बोलु, “जेख्णी तुवै तैस वायदेरै देशा मझ गाहलै ता तेठणीरै सारा कनानियां मैहणुवां किना छुटकारा पा लैई। तैन्हां सेईतै यारी कारी मेईं लांतै जां तैन्हां सिंउ ब्याह बि मेईं कातै। तुहां तैन्हेरी मूर्ती पूरी तराहि सिंउ नष्ट करि दींणी। अगर तुवै मिंडै आदेशैरा पालन ना करेलै, जां मिंडै बदलै तेन्हैरै दैवता केरी भक्ति करेलै ता तुवै सजायरै हकदार भूंणै।”

![](https://cdn.door43.org/obs/jpg/360px/obs-en-14-04.jpg)

जेख्णी इस्राएली मैहणु कनान दैशेरी सीमाय पन पुज्जै, तां मूसै इस्राएली मैहणुवां केरै गौत्रा मझां अक-अक करि करी बाराह मड़द चुणै। तेनि तैन्हां मड़दानि आदेश दित्ता कि गहा तैस दैशेरा पता करा जां तका करि अईछा कि सै केतिया दैश आ। सैक्यै ऐठणीरै तेईनी बि भेईजै कि सै पता ला लिया कि कनानी मैहणु कियौतै ताकतवर जां कियौतै कमजौर अत्तै।

![](https://cdn.door43.org/obs/jpg/360px/obs-en-14-05.jpg)

तैन्हैं बारहै मड़दै कनान दैशा मझ चाही दियाड़ी सफर केया, जां फिरी सै वापिस अईछी गियै। तैन्हैं मैहणुवंनी शुणांउ, कि “तेठणिरी जमीन बड़ी उपजाउ आ जां तैठि बड़ि भारी फसलि अत्ति!” पण दश भेदियै बोलु, “तैन्हेरै नगरै बड़ै दृढ़ै अत्तै जां सैक्यै मैहणु बड़ै लम्मै-झम्मै अत्तै! अगर असै तैन्हां पन हमला कातै ता तैन्हां असै जरूर हारयांणी दींणै जां असै तैन्हां मारी छडणै।“

![](https://cdn.door43.org/obs/jpg/360px/obs-en-14-06.jpg)

तां इकदम कालेब जां यहोशू जां होरनियें दुवें भेदियै बोलु, “ऐ सच आ कि कनान दैशेरै मैहणु लम्मै-झम्मै जां ताकतवर अत्तै, पण असै तैन्हां जरूर हारियांणी सकतै! परमेश्वर असेड़ै तेईनी लड़ैला।”

![](https://cdn.door43.org/obs/jpg/360px/obs-en-14-07.jpg)

पण मैहणुवें कालेब जां यहोशुरी गल्लै ना शुणी। सै मूसै जां हारूना पन गुस्सै भौ गियै जां बोलु, “तुहैं असै ऐस खतरनाक जगाय पन केईनी अंणै? असुवां मिस्र दैशा मझ ऐ रींहणु चेहिंथु थियु। अगर असै तैस दैशा मझ गांहथै ता असै लड़ाई मझ मरि गांहणै, जां कनानेरा मैहणुवां असेड़ी लाड़ी जां बच्चै गुलाम बंणा लींणै।” सैक्यै मैहणु तैन्हां मिस्र दैशानि वापिस गांहणेरै तेईनी अक अगुवा चुणना चांहथै थ्यै।

![](https://cdn.door43.org/obs/jpg/360px/obs-en-14-08.jpg)

जेख्‍णी तैन्हैं मैहणुवें ऐहीं बोलु ता परमेश्वर बड़ा गस्सै भौ गेईथ्या। सै मिलाप बाऐ तम्बू मझ या जां बोलु, “तुहैं मिंडै खिलाफ बगावत की, ऐठणीरै तेईनी तुहां सभनियां ऐस बणां मझ भटकणु पूंणु। हरेक जणा जै बिहा सालैरा या तैठां जादी उम्रिरा आ सै तैठियै मरी गांहणा जां कदि बि तैस दैशा मझ गहि ना सकैला जै आंउ तुहांनि दींता आ। सिर्फ कालेब जां यहोशू तैस दैशा मझ पुजेलै।”

![](https://cdn.door43.org/obs/jpg/360px/obs-en-14-09.jpg)

जेख्णी मैहणुवें परमेश्वरा किना ऐहीं शुणु, ता सै बड़ै दुखी भौ गियै केईनी कि तैन्हैं पाप थ्या कियौरा। ऐठणीरै तेईनी तैन्हैं कनान दैशेरै मैहणुवां पन हमला कांनेरा फैसला केया। मूसै तैन्हांनि चेतावनी दित्ती कि यहोवा परमेश्वर तुहां साउगा ना, मेईं गहा, तुवै दुशमणां किना हारी गांहणै, पण तैन्हैं मूसेरी गल्लै ना शुणी।

![](https://cdn.door43.org/obs/jpg/360px/obs-en-14-10.jpg)

परमेश्वर ऐस लड़ाई मझ तैन्हां साउगा ना थ्या, ऐठणीरै तेईनी कनानी मैहणुवें सै हारियांणी दित्तै जां तैन्हां मझां बड़ै भारी ता मरि गियै। तां इस्राएली मैहणु कनान दैशा किना वापिस हठि यै। जां इस्राएली मैहणु चाहिया साला तेईनी सै बणां मझ भटकतै रिय्है।

![](https://cdn.door43.org/obs/jpg/360px/obs-en-14-11.jpg)

इस्राएली मैहणु चाहिया साला केरै दौरान बणां मझ भटकतै रिय्है, तां बि परमेश्वरै तैन्हेरी जरूरतिया केरा इन्तजाम केया। तेनि तैन्हांनि स्वर्गा किना रोटि दित्ती जैसनि “मन्ना” बौलतै। परमेश्वरै तैन्हेरै तम्बुनि बटेर नैँईयेरै पंछी भेईजै ताकि तैन्हेरै तेईनी खांणुनि मास बि भुईया। परमेश्वरै ऐन्हां चाहिया साला मझ ना ता कौसकेरै लिकड़ै फटणा दित्तै जां ना ऐ बूट फटणा दित्तै।

![](https://cdn.door43.org/obs/jpg/360px/obs-en-14-12.jpg)

यो तेईनी कि परमेश्वरै चमत्कार करी करि तैन्हेरै तेईनी पींणेरै तेईनी शपड़ा मझां पंणी कढु। पण यौउतु सभ किछ कांनेरै वाबजूद, इस्राएली मैहणु परमेश्वरेरै जां मूसेरै खिलाफ बुड़बुणांतै रिय्है। फिरि बि, परमेश्वर अपड़ै वायदेरै मुताबिक विश्वासयोग्य बंणी रिय्हा, जै वायदा तेनि अब्राहम, इसहाक जां याकूबेरै वंशजा केरै तेईनी कियौरा थ्या सै तेनि पूरा केया।

![](https://cdn.door43.org/obs/jpg/360px/obs-en-14-13.jpg)

अक टैंम होरा या जेख्णी इस्राएली मैहणुवां किनि पींणुनि पांणी ना थियु, तां परमेश्वरै मूसैनि बोलु, “जेख्णी तु शपड़ानि पांणिरै तेईनी बोलेला, तेख्णी तैस शपड़ा किना अपड़ै आप पांणी निकूंणा लगि पूंणु।” पण मूसै शपड़ा सेईतै कोई गल्ल ना की। ऐठणिरी वजाय तेनि शपड़ा पनि दो बार शोठि ला बहि, ऐनि हिसाबै तेनि परमेश्वरेरै आदेशैरा पालन ना केया। सभनियांनि शपड़ा मझां पांणी ता पीणुनि निकोहि गियु, पण परमेश्वर मूसै सिंउ बड़ा गुस्सै भौ गिया। तेनि बोलु, “तीं मिंडै आदेशैरा पालन ना केया, ऐठणीरै तेईनी तु वायदेरै दैशा मझ ना पुजेला।”

![](https://cdn.door43.org/obs/jpg/360px/obs-en-14-14.jpg)

जेख्णी इस्राएली मैहणु बणां मझ चाहिया साला तेईनी भटकी रिय्हौरै थ्यै, तेख्णी जैन्हैं परमेश्वरेरै खिलाफ बगावत कियौरी थी सै सारै मरि थ्यै गियौरै। तां परमेश्वरै फिरी सैक्यै मैहणु वायदेरै दैशा मझ भेईजै जां तेन्हैरी अगुवाई की। अबै मूसा बड़ा बुढा भौ थ्या गियौरा, ऐठणीरै तेईनी परमेश्वरै तैन्हां मैहणुवां केरी अगुवाईरै तेईनी जां तेसैरी मजत कांनेरै तेईनी यहोशू चुणि लिया। परमेश्वरै मूसै सिंउ वायदा केया कि अक धियाड़ी सै तैन्हां मैहणुवां किनि मूसै सैयि भविषयवक्तै भेईजैला।

![](https://cdn.door43.org/obs/jpg/360px/obs-en-14-15.jpg)

तां परमेश्वरै मूसैनि ऐकि पहाड़ेरी चोट्टी पनि गांहणेरै तेईनी बोलु ताकि सै वायदेरै तैस दैशा हैरी सकिया। मूसै वायदेरा दैश हैरा पण परमेश्वरै मूसैनि तैस दैशा मझ गांहणैरी इजाजत ना दित्ती। तेठां बाद मूसा मरि गिया, जां इस्राएली मैहणुवें 30 धियाड़िया तेईनी शौक मना। यहोशू तैन्हैरा नवाँ अगुवा बंणी गिया। यहोशू अक बधिया अगुवा थ्या केईनी कि तेनि परमेश्वरा पनि विश्वास केया जां तेसैरै आदेशैरा पालन केया।

*निर्गमन अध्याय 16-17; गिनती 10-14; 20; 27; व्यवस्थाविवरण 34 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_14_128kbps.m4a

## 15. वायदेरा देश- कहानी

https://openbiblestories.org/l/cdj/story-15/

![](https://cdn.door43.org/obs/jpg/360px/obs-en-15-01.jpg)

अन्त मझ, अबै सै टैंम अईछी गियौरा थ्या कि इस्राएली मैहणु वायदेरै देशा, कनान मझ गहि सकींथ्यै। तैस देशा मझ यरीहो नाँईयेरा अक शहर थ्या। तैसेरी सुरक्षायरै तेईनी तेसैरै चोउवो पासै बड़ि बड्डी मजबूत कंथी थी, यहोशु अन्त मझ तैस शहरा मझ दो भेदियै भेइजै। तैस शहरा मझ राहाब नाँईंयेरी अक वेश्या रिहींथी, तेनि सैक्यै भेदियै अपड़ै घरा मझ छपा छडै, जां फिरी बाद मझ तेनि तैन्हैरी तैस शहरा किना नशणानि मजत की। तेनि ऐहीं ऐठणीरै तेईनी कियु कि सेकैई परमेश्वरा पनि विश्वास करींथी। तैन्हैं कसम खाउरी थी कि इस्राएली मैहणु जेख्णी यरीहो शहरैरा नाश करेलै तेख्णी राहबेरी जां तेसैरै परिवारैरी रक्षा करेलै।

![](https://cdn.door43.org/obs/jpg/360px/obs-en-15-02.jpg)

इस्राएली मैहणुवां वायदेरै देशा गांहणानि यरदन नदी पार कांनी पेईथी। परमेश्वरै यहोशु सेईतै बोलु, ‘याजका पेहिलै गांहणा दै।” जेख्णी याजकै यरदन नदी मझ अपड़ा पैयिड़ रखा ता पांणिरी छाली रुकि गेई, जेनि ला कि इस्राएली मैहणु नदिरै पारियैं पासै शुक्की जगाय पुजि सकिया।

![](https://cdn.door43.org/obs/jpg/360px/obs-en-15-03.jpg)

जेख्णी तैन्हैं मैहणुवें यरदन नदी पार करी लैई, तां परमेश्वरै यहोशु सिंउ बोलु, कि यरीहो शहरा पन हमला कांनेरै तेईनी तैयार रैय्ही, बल्कि सै शहर बड़ा मजबूत थ्या। परमेश्चरै तैन्हां मैहणुवां सिंउ बोलु कि याजका जां सैनिका छियां धियाड़िया तेईनी तैस शहरेरै चोउवो पासै चक्कर लांणा। फिरी याजकै जां सैनिकै तिहींयें कियु।

![](https://cdn.door43.org/obs/jpg/360px/obs-en-15-04.jpg)

फिरी सत्तवीं धियाड़ी, इस्राएली मैहणुवें तैस शहरेरै चोउवो पासै सत्त बारी होरै चक्कर लाय। जेख्णी सैक्यै शहरेरै चोउवो पासै सत्त चक्कर ला बेठै, ता याजकै अपड़ी काही बजाई जां सैनिकै जौरदार नारहै लाय।

![](https://cdn.door43.org/obs/jpg/360px/obs-en-15-05.jpg)

तां यरीहो शहरेरी चोउवो पासेरी मजबूत कंथी छिढी गेई! फिरी इस्रएली मैहणुवें परमेश्वरेरै हुक्मेरै मुताबिक, जै किछ तैस शहरा मझ थियु सै सभ किछ नष्ट करी दित्तु। तैन्हैं सिर्फ राहब जां तेसैरा परिवार छडि दित्ता, केईनी कि सै इस्राएली मैहणुवां मझ किठी गेईथ्यै। जेख्णी कनान देशा मझ रींहणरै होरनियें मैहणुवें शुणु कि तैन्हैं यरीहो शहर नष्ट करी दित्ता, ता सै डरी गियै कि इस्राएली मैहणुवां तैन्हां पनि बि हमला कांना।

![](https://cdn.door43.org/obs/jpg/360px/obs-en-15-06.jpg)

परमेश्वरै इस्राएली मैहणुवंनी हुक्म दितौरा थ्या कि कनान देशा मझ रींहणारी कौस बि जाति सेईतै यारी-दोस्ती मेईं लांतै। पण कनान देशा मझ रींहणारी गिबोनियो नाँईयेरी एकि जाति यहोशु सेईतै झूठ बोलु कि असै कनान देशा किना दूर रींहणारै मैहणु अत्तै। तैन्हैं यहोशु सेईतै बोलु, कि तुवै असुवां सेईतै यारी-दोस्ती बणा लेया। पण यहोशु जां इस्राएली मैहणुवें परमेश्वरा किना ना पुच्छु कि सै गिबोनी मैहणु कोठां किना अत्तै। तैन्हैं गोबोनियां सेईतै यारी-दोस्ती ला लैई।

![](https://cdn.door43.org/obs/jpg/360px/obs-en-15-07.jpg)

त्रियां धियाड़िया किना बाद, इस्राएली मैहणुवां पता लगा कि गिबोनी मैहणु कनान देशा मझ ऐ रिहींथ्यै। सै बड़ै गुस्सै भौ गियै केईनी कि गिबोनियें तैन्हानि धौखा दित्थिया। पण इस्राएली मैहणुवें गिबोनियां सेईतै यारी-दोस्ती बंणा रखी केईनि कि सै तैन्हैं परमेश्वरेरै सामणै बंणाउरी थी।

![](https://cdn.door43.org/obs/jpg/360px/obs-en-15-08.jpg)

तां कुछ टैंम बाद, कनान देशा मझ रींहणारी एकि होरी जाति जां एमोरिया केरै राजै शुणु कि गबोनी मैहणुवें इस्राएली मैहणुवां सेईतै यारी-दोस्ती ला लैई, ऐठणीरै तैईनी तैन्हैं अपड़ि-अपड़ि सैना किट्ठी की जां अक बड़ि बड्डी सैना बंणाई जां गिबोनी मैहणुवां पनि हमला करि दित्ता। गिबोनी मैहणुवें यहोशुनी बिषैक भेईजा कि असैड़ी मजत कर।

![](https://cdn.door43.org/obs/jpg/360px/obs-en-15-09.jpg)

ऐ गल शुणी करी यहोशु इस्राएली सैना किट्ठी की जां गिबोनी मैहणुवां केरी मजत कांनेरै तेईनी तैन्हैं पूरी रात सफर केया। भियगा पिचारि सिंउ तैन्हैं एमोरिया केरी सैना हैरान करी छडि जां तैन्हां पनि हमला करि दित्ता।

![](https://cdn.door43.org/obs/jpg/360px/obs-en-15-10.jpg)

तैस धियाड़ी परमेश्वर इस्राएली मैहणुवां केरै तेईनी लड़ा। तेनि एमोरी मैहणु उलझनी मझ पा दित्तै जां बड़ै-बड़ै अशणिरै दांणै बरसाय जां एमोरी मैहणु मारी छडै।

![](https://cdn.door43.org/obs/jpg/360px/obs-en-15-11.jpg)

परमेश्वरै दीह असमाणां मझ एकि जगाय रौकि दित्तु ताकि इस्राएली मैहणुवंनी एमोरिया हारियांणनेरै तेईनी ज्यादा टैंम मैई सकिया। तैस धियाड़ी, परमेश्वरै इस्राएलिया केरै तेईनी अक बड़ि बड्डी जीत हासिल कांनानि मजत की। जेख्णी परमेश्वरै एमोरी सैना हारियांणी दित्ती, ता बड़ै सारै कनानी जातिरै मैहणुवें किठी करि इस्राएली मैहणुवां पनि हमला करि दित्ता। यहोशु जां इस्राएली मैहणुवें बि तैन्हां पनि हमला करि दित्ता जां सैक्यै सारै मरी छडै।

![](https://cdn.door43.org/obs/jpg/360px/obs-en-15-12.jpg)

ऐन्हां लड़ाईया किना बाद, परमेश्वरै इस्राएलेरै सारा गौत्रानि सारा दैश दी दित्ता, जेसैरा दींणैरा वायदा तैन्हैरै पूर्वजा सेईतै कियौरा थ्या। फिरी सै तैस देशेरै अधिकारी बंणी करि रीहणा लगै। तां फिरी परमेश्वरै इस्राएलानि तेसैरै पूरै लाकैनि शांति दित्ती।

![](https://cdn.door43.org/obs/jpg/360px/obs-en-15-13.jpg)

जेख्णी यहोशु बुढा भौ गिया ता तेख्णी तेनि सारै इस्राएली मैहणु किट्ठै कियै। तां यहोशु इस्राएली मैहणुवंनी सैक्या वायदा याद करा जै तैन्हैं परमेश्वरा सेईतै सीनै पहाड़ पर्वता पनि कियौरा थ्या, कि सै तैस वायदेरा पालन करिया। इस्राएली मैहणुवें वायदा केया कि सै परमेश्वरेरै सामणै ईमानदार बंणी रैहलै जां तेसैरै हुक्मेरा पालन करेलै।

*यहोशु अध्याय 1-24 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_15_128kbps.m4a

## 16. छडांणार- कहानी

https://openbiblestories.org/l/cdj/story-16/

![](https://cdn.door43.org/obs/jpg/360px/obs-en-16-01.jpg)

यहोशू मरना किना बाद इस्राएली मैहणुवें परमेश्वरेरै हुक्मेरा जां नीति-नियमा केरा पालन ना केया, जां तैन्हैं तैस वायदेरै देशा किना जै बचि गियौरै कनानी मैहणु थ्यै सैक्यै भेईर ना कढै। इस्राएली मैहणुवें अपड़ै सच्चै परमेश्वर, यहोवा छडि करी कनानी मैहणुवां केरै दैवता केरी भक्ति कांनी शुरू करी दित्ती। इस्राएलिया किनी कोई राजा ना थ्या, ऐठणीरै तेईनी हर कोई तिहींयें काता थ्या जिहीं तैन्हां खरू लगतु थियु।

![](https://cdn.door43.org/obs/jpg/360px/obs-en-16-02.jpg)

केईनी कि इस्राएली मैहणु लगातार परमेश्वरैरा अपमान कातै थ्यै, ऐठणीरै तेईनी परमेश्वरैरा कौप तैन्हां पन भड़कि पेया, जां सैक्यै दुशमणा केरै आधीन करी दित्तै; जां फिरी तैन्हेरै बोलै अपड़ै दुश्मणा केरै सामणै ना टिकियु। ऐन्हैं दुश्मणै इस्राएली मैहणुवां कैरी चीजै लुटि लेई, जां तैन्हैरी धन-दौलत नाश करी दित्ती, जां बड़ै भारी इस्राएली मैहणु मरी गियै। तैठां बाद, मत्तै साला बाद इस्राएली मैहणुवें अपड़ै पापा केरा पश्चाताप केया जां परमेश्वरा किना प्रार्थना की कि सै असु बचाईया।

![](https://cdn.door43.org/obs/jpg/360px/obs-en-16-03.jpg)

हर बार परमेश्वर इस्राएली मैहणुवां केरी शुणींथ्या जां तैन्हां बचांणेरै तेईनी मतै सारै छडांणै बाऐ भेईजै। पण मैहणु परमेश्वरा भुलणा लगै जां होरनियां केरै दैवता केरै पीछै चलिकरी तैन्हैरी भक्ति कांना लगै। तां परमेश्वरै एकि दुश्मणा केरी जातिनी मिघानी मैहणुवंनी इजाजत दित्ती कि सै इस्राएली मैहणुवां हारा दिया।

![](https://cdn.door43.org/obs/jpg/360px/obs-en-16-04.jpg)

मिघानियें सत्ता साला तेईनी इस्राएली मैहणुवां केरी फसल लुट्टि। इस्रएली मैहणु बड़ै डरि गियै, जां सैक्यै गुफाईया मझ छपि गियै ताकि मिघानी मैहणु तैन्हां तौपि ना सकिया। आखिर मझ, तैन्हैं परमेश्वरा किनि विंनति की कि सै असुवां बचाईया।

![](https://cdn.door43.org/obs/jpg/360px/obs-en-16-05.jpg)

गिदोन नाँईयेरा अक इस्राएली मैहणु थ्या। अक धियाड़ि सै एकि शांत जगाय किणक फंडता थ्या, ताकि मिघानी मैहणु तैस चौरी ना सकिया। यहोवा परमेश्वरेरा स्वर्गदूत गिदोना किनि या जां तैसनि बौलु, “हे शूरवीर सूरमा, परमेश्वर ताउ सेईतै आ। गा जां इस्राएली मैहणुवां मिघानियां किना बचा।“

![](https://cdn.door43.org/obs/jpg/360px/obs-en-16-06.jpg)

परमेश्वरै गिदोनानि तैस वेदी भुणां छिढांणानि जां भनणानि बोलु। पण गिदोन मैहणुवां हैरी डरींता थ्या, ऐठणीरै तेईनी तेनि रात भूंणा दित्ती। जेख्णी राती गियु तेख्णी सै गिया जां तेनि सै वेदी भन्नि छडि। तेनि परमेश्वरेरै तेईनी अक होरी वेदी बंणाई जां तैस पनि परमेश्वरेरै तेईनी बलि चाढ़ी।

![](https://cdn.door43.org/obs/jpg/360px/obs-en-16-07.jpg)

दुईं दिहा मैहणुवें हैरू कि कुनिक्यै वेदी भन्नि करी टुकड़ै-टुकड़ै करि छडोरी आ, ऐठणीरै तेईनी सै बड़ै गुस्सै भुवै। सै गिदोना मांनेरै तेईनी तेसैरै घरै गियै, पण गिदोनेरै बाबै बोलु, “तुवै केईनी अपड़ै दैवतै बचांणैरी कोशिश कातै अतै? अगर सै दैवता, ता तैस अपड़ा बचाव ऐपु काना देया। ऐ गल्ल शुणि करी तैन्हैं गिदोन ना मारा।

![](https://cdn.door43.org/obs/jpg/360px/obs-en-16-08.jpg)

तां इस्राएली मैहणुवां लुटणेरै तेईनी मिघानी मैहणु फिरी आईछि गियै। सै यौउतै जादै थ्यै कि तैन्हैरी गिणति ना करि सकींथ्यै। गिदोनै तैन्हेरै खिलाफ लड़नेरै तेईनी इस्राएली मैहणु किठियूंणेरै तेईनी शदाय। गिदोनै परमेश्वरा किना दुवां चिन्हां केरी मांग की ताकि तैस विश्वास भौ गहिया कि परमेश्वर सच्च मझ तैसनि इस्राएली मैहणुवां बचाणानि बौलता।

![](https://cdn.door43.org/obs/jpg/360px/obs-en-16-09.jpg)

पेहिलै चिन्हेरै तेईनी, गिदोनै भ्रैडेरी उन्नै जमीनि पनि रखि करी परमेश्वरा सेईतै बोलु, भियागेरी औश सिर्फ भ्रैडेरी तैस उन्नै पनि पुईया जां भुणा ना पुईया। परमेश्वरै ऐहियें कियु। दुईं राति, तेनि परमेश्वरा सिंउ बोलु कि जमीन बिल्ही भौ गहिया पण भ्रैडेरी उन्न शुक्की रिय्हा। परमेश्वरै ऐहीं बि कियु। ऐन्हां दुवां चिन्हां केरी वजहि सिंउ, गिदोने विश्वास केया कि परमेश्वर सच्च मझ चांहथा कि सै इस्राएली मैहणुवां मिघानियां मैहणुवां किना बचाईया।

![](https://cdn.door43.org/obs/jpg/360px/obs-en-16-10.jpg)

तेख्णी बत्ती हजार मैहणु गिदोना किनी यै, पण परमेश्वरै बोलु कि ऐ ता बड़ै जादै अत्तै। तेख्णी गिदोने 2200 मैहणु वापस घरेनी भेईजी दित्तै जै लड़ाई काना किना डरींतै थ्यै।परमेश्वरै गिदोना सेईतै बोलु, कि ऐक्यै मैहणु हालै बि बड़ै जादै थ्यै। ऐठणीरै तेईनी गिदोनै 300 सैनिका छडि करी बाकी सारै घरैनि वापस भेईजी दित्तै।

![](https://cdn.door43.org/obs/jpg/360px/obs-en-16-11.jpg)

तैस राती परमेश्वरै गिदोना सेइतै बोलु, “मिघानियां केरै डैरै गा जां शुणता रैही कि सैक्यै कितु गल-बात कातै अत्तै ता तु तैन्हां पन हमला काना हैरी मेईं डरींता।” ऐठणीरै तेईनी तैस राती गिदोन हैट तैन्हेरै डैरै गिया तां तेठि अक सैनिक मिघानी सैनिका सिंउ अपड़ै सुपनेरै बारै मझ शुणाता थ्या। सै अपड़ा साउगियानि शुणांता थ्या, “ऐस सुपनेरा मतलब ऐ भुवा कि गिदोनेरी सैनाय मिघानियां केरी सैना हारा दींणी।“ जेख्णी गिदोने ऐ शुणु ता तेनि परमेश्वरेरी स्तुति की।

![](https://cdn.door43.org/obs/jpg/360px/obs-en-16-12.jpg)

तेख्णी गिदोन अपड़ै डैरैनि वापस चलि गिया जां तेनि हर एकिनि अक-अक नरसिंगा, अक मिट्टिरा घड़ा, जां अक मशाल दित्ती। तैन्हैं मिघानी सैनिका केरा डैरा चुतरफा घैरी लिया जैठि मिघानी सैनिक झुलोरै थ्यै। गिदोनेरै 300 सैनिकै अपड़ी मशाली घड़ै मझ ढकोरी थी ऐठणीरै तेईनी मिघानी मैहणुवें तैन्हां मशालिया केरी लौ ना थी लधौरी।

![](https://cdn.door43.org/obs/jpg/360px/obs-en-16-13.jpg)

तां गिदोनेरै सारै सैनिकै अपड़ै घड़ै भनि दित्तै, जां इकदम मशालिया मझां आग निकूंहणा लगी। तैन्हैं अपड़ै नरसिंगै बजाय जां जौरै चिंडै दींणा लगै, “यहोवा परमेश्वरैरी जां गिदोनेरी तलवार!”

![](https://cdn.door43.org/obs/jpg/360px/obs-en-16-14.jpg)

परमेश्वरै मिघानी मैहणु हक्कै- बक्कै करी छडै, ऐठणीरे तेईनी तैन्हैं योकिया पनि बजि बारी जां यौउख बढणां लगि पियै। तैठां बाद, बाकि इस्राएली मैहणु बि तैन्हेरै डैरै किना शदा लियै ताकि मिगानी मैहणुवां केरा पीछा करि सकिया। तैन्हैं मतै सैरै मारी छडै। जां बाकि बचौतरै मिघानी मैहणु इस्राएल देशानि दाउड़ा लाय। तैस धियाड़ी बाराह हजार सैनिक मारी छडै। परमेश्वरै इस्राएली मैहणु बचा लियै।

![](https://cdn.door43.org/obs/jpg/360px/obs-en-16-15.jpg)

तां इस्राएली मैहणुवें गिदोना सेईतै बोलु, कि तु असैड़ा राजा बंणी गा। पण गिदोने बोलु आंउ तुवाड़ा राजा ना बंणी सकता, पण आंउ तुहां किना किछ मगणा चांहथा कि तुवै तैन्हां गैहणा मूंनी दी दिया जै तुहैं मिघानी मैहणुवां किना लुटौरै अतै, तैन्हैं मैहणुवें बड़ा भारी गिदोनानि सुन्ना दी दित्ता।

![](https://cdn.door43.org/obs/jpg/360px/obs-en-16-16.jpg)

तां गिदोने तेनि सुन्नै ला ऐपुनि खास कपड़ै बंणा लियै जेतियै मिघानी मैहणुवां केरा राजा लाईंथ्या। पण मैहणुवें तेसैरी भक्ति कांनी शुरू करी दित्ती जिहीं कि सै कोई मूर्ती आ। तां परमेश्वरै फिरी इस्राएली मैहणुवंनी सजा दित्ती केईनी कि तैन्हैं मूर्तिरी भक्ति की। परमेश्वरै तैन्हेरै दुश्मणानि इजाजत दित्ती कि सै इस्राएली मैहणुवां हारा दिया। आखिर मझ तैन्हैं फिरी क बारी परमेश्वरा किना मजतिरै तेईनी प्रार्थना की, जां परमेश्वरै तैन्हां बचांणेरै तेईनी अक छडांणै बा भेईजा।

![](https://cdn.door43.org/obs/jpg/360px/obs-en-16-17.jpg)

ऐ गल्लै मतै बारी भुई कि इस्राएली मैहणु पाप करेलै, जां परमेश्वर तैन्हांनि सजा दैला, जां तैन्हां अपड़ा पापा किना पश्चाताप काना जां परमेश्वरा तैन्हां छडांणेरै तेईनी केणुक्या भेईजणा। मतै साला तेईनी, परमेश्वरै मतै छडाणै बाऐ भेईजै जैन्हैं इस्राएली मैहणु तैन्हेरै दुशमणां किना बचाय।

![](https://cdn.door43.org/obs/jpg/360px/obs-en-16-18.jpg)

आखिर मझ, तैन्हैं मैहणुवें परमेश्वरा किना प्रार्थना की कि असुवां बि होरनियां देशा सैयि राजा चेहिंथा। जै तकांणनि लम्मा जां ताकतवर भुईया, जां जै लड़ाईया मझ असैड़ी अगुवाई करि सकिया। परमेश्वरा तैन्हैरी ऐ प्रार्थना मंजूर ना थी, पण परमश्वरै तैन्हांनि तेत्तिया ऐ राजा दित्ता जेतिया सै चांहथै थ्यै।

*न्यायियों अध्याय 1-3; 6-8; 1 शमूएल 1-10 किना अक बाईबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_16_128kbps.m4a

## 17. दाउदा सेईतै परमेश्वरैरा वायदा- कहानी

https://openbiblestories.org/l/cdj/story-17/

![](https://cdn.door43.org/obs/jpg/360px/obs-en-17-01.jpg)

शाऊल इस्राएल देशैरा पेहिला राजा थ्या। सै लम्मा जां छै थ्या, जेतिया इस्राएली मैहणु चांहथै थ्यै बिल्कुल तेत्तिया थ्या। शाऊलै इस्राएल देशा मझ अक अच्छा राजा बणी करी अपड़ा योगदान दित्ता। पण बाद मझ सै बुरा मैहणु बणी गिया जां तेनि परमेश्वरेरै हुक्मेरा पालन ना केया, ऐठणीरै तेईनी परमेश्वरै तैसेरी जगाय अक होरा मैहणु चुणा जै अक धियाड़ी तैसेरी जगाय राजा बणना।

![](https://cdn.door43.org/obs/jpg/360px/obs-en-17-02.jpg)

शाऊलेरी जगाय पनि परमेश्वरै अक जुवान इस्राएली मैहणु चुणा जेसैरू नाँ दाऊद थियु। दाऊद बैतलहम शहरैरा अक पुव्हाल थ्या। सै अपड़ै बाबेरी भ्रैडा केरी रखवाली करींथ्या, केही बारी दाऊदै शैर जां रिक्ख मारै केईनी कि सैक्यै भ्रैडा पनि हमला करींथ्यै। दाऊद अक नम्र जां धर्मी मैहणु थ्या। तेनि परमेश्वरा पनि विश्वास केया जां तेसैरै हुक्मेरा पालन केया।

![](https://cdn.door43.org/obs/jpg/360px/obs-en-17-03.jpg)

जेख्णी दाऊद हालै जुवान मड़द थ्या, तेनि लम्मैं-चौड़ै फलिस्तीन सैनिक गोलियतेरै खिलाफ लड़ाई की। गोलियत अक बड़ा खतरनाक सैनिक थ्या। सै बड़ा तकतवर जां लगभग त्रा मीटर लम्मा थ्या। पण परमेश्वरै गोलियता मारना जां इस्राएली मैहणुवां बचांणानि दाऊदेरी मजत की। ऐठां बाद, दाऊदै इस्राएल देशैरै दुश्मणा पनि केही बारी जीत हासिल की। दाऊद अक बड़ा बड्डा सैनिक बणी गिया, जां तेनि मतिया लड़ाईया मझ इस्राएली सैनायरी अगुवाई की। इस्राएली मैहणुवें तेसैरी बड़ी तारीफ की।

![](https://cdn.door43.org/obs/jpg/360px/obs-en-17-04.jpg)

इस्राएली मैहणु दाऊदा सिंउ बड़ा प्यार करींथ्यै ऐस गल्लै पनि शाऊल तैस सिंउ जलन रखणा लगा। शाऊलै दाऊदा मांनेरी मति बारी कोशिश की, ऐठणीरै तेईनी दाऊद तैस किना जां तेसैरै सैनिका किना बचणैरै तेईनी बणां मझ नशि गिया। अक धियाड़ि, जेख्णी शाऊल जां तेसैरै सैनिक दाऊदा तौपतै थ्यै तां शाऊल तैस तौपता एकि गुफाय मझ गिया। ऐ सैहै गुफा थी जैस मझ दाऊद छपौरा थ्या, पण शाऊलै सै ना लधा। दाऊद शाऊलेरै पीछै नीड़ ऐ थ्या जां तैस मारी सकींथ्या पण तेनि ऐहीं ना कियु। पण दाऊदै पीछै किना आईछी करी शाऊलेरै कपड़ेरा अक टुकड़ा कटि लिया, जेनि ला सै शाऊलानि शुणा सकिया कि सै राजा बणनेरै तेईनी तैस मांना ना थ्या चांहथा।

![](https://cdn.door43.org/obs/jpg/360px/obs-en-17-05.jpg)

कुछ टैंम बाद, शाऊल लड़ाई मझ मरि गिया, जां दाऊद इस्राएलेरा राजा बंणी गिया। सै अक अच्छा राजा थ्या, जां मैहणु तैस सिंउ बड़ा प्यार करींथ्यै। परमेश्वरै दाऊदानि आशीष दित्ती जां सैक्या कामयाब बणा। दाऊदै केही लड़ाई लड़ि, जां परमेश्वरै इस्राएलेरै दुश्मणा हारांणेरै तेईनी दाऊदेरी मजत की। दाऊदै यरूशलेम शहर जिति लिया जां सै इस्राएल देशैरी राजधानी बणा ली, जेठि सै रिय्हा जां शासन केया। दाऊद चाहिया साला तेईनी राजा रिय्हा। दाउद राजेरै टैंमा, इस्राएल दैश ताकतवर जां अमीर बणी गिया।

![](https://cdn.door43.org/obs/jpg/360px/obs-en-17-06.jpg)

दाऊद अक मंदिर बणांणा चांहथा थ्या जेठि सारै इस्राएली मैहणु परमेश्वरैरी आराधना करी सकिया जां तेसैरै तेईनी बलिदान चाढ़ी सकिया। लगभग 400 साला किना, सैक्यै मैहणु मूसेरै बंणाउरै तम्बू मझ परमेश्वरैरी आराधना जां बलिदान चढाईंथ्यै।

![](https://cdn.door43.org/obs/jpg/360px/obs-en-17-07.jpg)

पण तैठि नातान नाँईंयैरा अक भविष्यवक्ता थ्या। परमेश्वरै सै दाऊदा किनि ऐ बोलणेरै तेईनी भेईजा, कि “तीं बड़ी लड़ाई लड़ोरी अत्ती, ऐठणीरै तेईनी ताउ मिंडै तेईनी ऐक्या मंदिर ना बणांणा। तिंडा पुत्र ऐस मंदिरा बंणाला। पण मूं ताउनी बड़ी जादी आशीष दींणी। तिंडै वंशा मझां कोई अक राजा मिंडै मैहणुवां पनि हमेशा तेईनी राज करैला। जां मसीह बि तिंडै वंशैरा भौला।” मसीह परमेश्वरैरा चुणौरा अक मैहणु थ्या जै ऐस संसारैरा मैहणुवां तैन्हैरै पापा किना बचाला।

![](https://cdn.door43.org/obs/jpg/360px/obs-en-17-08.jpg)

जेख्णी दाऊदै नातान भविष्यवक्तैरा संदेश शुणा ता तेनि परमेश्वरैरा धन्यवाद केया जां तेसैरी स्तुति की। परमेश्वर तेसैरा आत्म-सम्मान बधींता थ्या जां तेसनी बड़ी भारी आशीष दींता थ्या। बेशक, दाऊदा ना थ्या पता कि परमेश्वरा ऐकेई गल्लै केख्णी पूरी कानी। इस टैंमा असै मैहणु जांणतै कि इस्राएली मैहणुवां हजार साल तेईनी मसीहरा इन्तजार कांना पेईथ्या।

![](https://cdn.door43.org/obs/jpg/360px/obs-en-17-09.jpg)

दाऊदै मतै साला तेईनी बड़ै ईमानदारी सिंउ मैहणुवां पन राज केया, जां बड़ै प्यार सिंउ परमेश्वरेरै हुक्मेरा पालन केया जां परमेश्वरै तैसनि आशीष दित्ती। पण दाऊदै अपड़ि जिन्दगिरै आखरी टैंमा मझ परमेश्वरेरै खिलाफ बड़ा बड्डा पाप करी दित्ता।

![](https://cdn.door43.org/obs/jpg/360px/obs-en-17-10.jpg)

अक धियाड़ी, जेख्णी दाऊदेरै सारै सैनिक लड़ाई काना गियौरै थ्यै तां दाऊद अपड़ै मैहला भेईर या। तां तेनि अक छै जनानी छत्ती पनि नहयूंती हैरी, तेनि तैस पना अपड़ी नजर ना हठाय। सै तैस ना जाणींथ्या, पण बाद मझ तेनि पता करि लेया कि तेसैरू नाँ बतशेबा आ।

![](https://cdn.door43.org/obs/jpg/360px/obs-en-17-11.jpg)

दाऊदै अपड़ी नजर तैस पना हठांणेरी वजाय, अपड़ा अक सैनिक तैस जनानी अणनेरै तेईनी भेईजी दित्ता। दाऊद तैस जनानी सिंउ झुल्ला जां सैकेई वापिस घरैनि भेईजी दित्ती। कुछ धियाड़ी बाद बतशेबाय दाऊद राजेनी ऐक्या बिशैक भेईजा कि आंउ दुपरांणी आ।

![](https://cdn.door43.org/obs/jpg/360px/obs-en-17-12.jpg)

बतशेबायरै लाड़ैरू नाँ ऊरिय्याह थियु। सै दाउदैरा अक खास सैनिक थ्या। तैस टैंमा सै लड़ाई कांना गियौरा थ्या। दाऊदै ऊरिय्याह लड़ाई किना वापिस शदा लिया जां तैसनि बोलु अपड़ि लाड़ी सेईतै बेश। पण होरै सैनिक लड़ाई मझ थ्यै ऐठणीरै तेईनी ऊरिय्याह घरै गांहणानि मुकरी गिया। तां दाऊदै ऊरिय्याह वापिस लड़ाई मझ भेईजी दित्ता, फिरी दाऊदै योआब सैनापति सेईतै बोलु, कि ऊरिय्याहै खतरनाक दुश्मणा बिच छडि करी वापिस चलि आईछा ताकि सै लड़ाई मझ मरी गहिया। तां ऐहीं भू कि ऊरिय्याह लड़ाई मझ मरी गिया।

![](https://cdn.door43.org/obs/jpg/360px/obs-en-17-13.jpg)

ऊरिय्याह लड़ाई किना मरी गांहणा किना बाद, दाऊदै बतशेबाय सिंउ ब्याह करी लिया। बाद मझ तेनि दाऊदेरै पुत्रानि जन्म दित्ता। दाऊदै जै किछ बि कियु तेनि ला परमेश्वर तैस पनि बड़ा भारी गुस्सै भुवा। ऐठणीरै तेईनी परमेश्वरै नातान भविष्यवक्ता ऐ शुणांणेरै तेईनी दाऊदा किनि भेईजा कि तेसैरा पाप कियौता बड्डा जां बुरा आ। दाऊदै अपड़ै पापा किना पश्चाताप केया जां परमेश्वरै तेसैरा पाप माफ करि दित्ता। फिरी दाऊदै अपड़ी बाकि जिन्दगिरै बुरै हालाता मझ बि परमेश्वरा पनि विश्वास केया जां तेसैरै हुक्मेरा पालन केया।

![](https://cdn.door43.org/obs/jpg/360px/obs-en-17-14.jpg)

ऐन्हां पापा केरी वजाहि सिंउ दाऊदेरा पुत्र मरी गिया। ऐनि हिसाबै परमेश्वरै दाऊदानि सजा दित्ती। ऐठणीरै अलावा, दाऊदा मरना तेईनी, तेसैरै अपड़ै परिवारेरै कुछ मैहणुवें तेसैरै खिलाफ लड़ाई की, जां दाऊद ताकती बतै कमजौर भूंता गिया। पण दाऊद परमेश्वरै सामणै विश्वासयोग्य बणी ना रिय्हा, फिरी बि परमेश्वर अपड़ै वायदै पन कायम रिय्हा। तैठां किना बाद, दाऊदैरा जां बतशेबायरा दुवां पुत्र पेईदा भुवा, जां तैन्हैं तेसैरू नाँ सुलैमान रखु।

*1 शमूएल अध्याय 10; 15-19; 24; 31; 2 शमूएल 5,7; 11-12 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_17_128kbps.m4a

## 18. योकिया मझ बंडियोरा प्रदेश- कहानी

https://openbiblestories.org/l/cdj/story-18/

![](https://cdn.door43.org/obs/jpg/360px/obs-en-18-01.jpg)

दाऊद राजै चाहिया साला तेईनी राज केया। फिरी सै मरि गिया, जां तेसैरै पुत्रै सुलैमानै इस्राएल देशा पन राज काना शुरू करि दित्ता। परमेश्वरै सुलैमाना सिंउ बात-चीत की जां तैस किना पुच्छु कि,”तु कितु चांहथा कि आंउ तिंडै तेईनी करिया। सुलैमानै परमेश्वरा किना मग्गु कि सै तेस बड़ै बुद्धीमान बंणा दिया। ऐकैई गल्लै शुणी करी परमेश्वर बड़ा खुश भुवा, ऐठणीरै तेईनी परमेश्वरै सुलैमान संसारा मझ सभनियां जादा बुद्धीमान मड़द बंणा दित्ता। सुलैमानै बड़ी सारी गल्लै शिख्री जां सैक्या अक बुद्धीमान राजा बंणि गिया जां परमेश्वरै सैक्या बड़ा अमीर मैहणु बंणा दित्थिया।

![](https://cdn.door43.org/obs/jpg/360px/obs-en-18-02.jpg)

यरूशलेम शहरा मझ सुलैमानै सैक्या मंदिर बंणा जेसैरी योजना तेसैरै बाबै दाउदै बंणाउरी थी जां तेस मंदिरा बंणाणेरै तेईनी समान किट्ठा कियौरा थ्या। अबै मैहणु मिलाप बाऐ तम्बुरी जगाय किना तेस मंदिरा मझ परमेवरैरी भक्ति करींथ्यै जां बलिदान चढ़ाईंथ्यै। परमेश्वर तेस मंदिरा मझ जां अपड़ै मैहणुवां सेईतै रिहींथ्या।

![](https://cdn.door43.org/obs/jpg/360px/obs-en-18-03.jpg)

पण सुलैमान होरनियां दैशेरी जनेनियां सिंउ प्यार करींथ्या। तेनि परमेश्वरेरै हुक्मेरा पालन ना केया जां लगभग 1,000 जनानियां सेईतै ब्याह करी लिया। ऐन्हां मझां बड़ी सारी जनानी होरनियां देशा किना योउरी थी जां ऐपु सेइतै अपड़ै दैवतै बि लैई थ्यै अंणौरै जां तैन्हेरी भक्ति करियां करींथी। जेख्णी सुलैमान बुढा भौ गिया ता तेनि बि तैन्हां केरै दैवता केरी भक्ति की।

![](https://cdn.door43.org/obs/jpg/360px/obs-en-18-04.jpg)

ऐनि वजाहि सिंउ परमेश्वर सुलैमाना पन गुस्सै भुवा। परमेश्वरै बोलु कि मूं तिंडै मरना किना बाद इस्राएल देश दुवां हिस्सा मझ बंडि दींणा।

![](https://cdn.door43.org/obs/jpg/360px/obs-en-18-05.jpg)

सुलैमाना मरना किना बाद, तेसैरा पुत्र रहबाम तैस देशैरा राजा बंणी गिया। रहबाम अक नासमझ मैहणु थ्या। इस्राएल देशेरै सारै मैहणु किट्ठै भुवै जां तैन्हैं अक फैसला लिया कि सेहै असैड़ा राजा बणियां। फिरी सै रहबामा किनि सुलैमानेरी शिकायत करी बोलणा लगै, “तिंडै बाबै सुलैमानै असुवां किना बड़ी मजूरी करवाउरी थी जां मतै सारै कर बसूल करींथ्या। तैन्हैं रहबामा सिंउ विंनति की कि असेड़ा कम घट कर।”

![](https://cdn.door43.org/obs/jpg/360px/obs-en-18-06.jpg)

पण रहबामै तैन्हांनि नासमझी बा जवाब दित्ता जां बोलु कि, “तुवै बौलतै अत्तै कि मिंडै बाबै तुहां किना बड़ी तकड़ी मजूरी करावाई। पण मूं तुहां किना तैठां किना बि बड़ी तकड़ी मजूरी करांणी, जां मूं तुवै तैठां बि जादै दुखी कांनै।”

![](https://cdn.door43.org/obs/jpg/360px/obs-en-18-07.jpg)

जेख्णी मैहणुवें सै ऐहीं बौलता शुणा, ता तैन्हां मझां दसा गौत्रा केरै मैहणु तेसैरै खिलाफ थ्यै, सिर्फ दो गौत्र तेस सिंउ सेहमत थ्यै। ऐ दो गौत्र यहूदेरा प्रदेश बंणी गिया।

![](https://cdn.door43.org/obs/jpg/360px/obs-en-18-08.jpg)

बाकि दशै गोत्रै यारोबाम नाँईयेरा अक मड़द अपड़ा राजा बंणा लिया। ऐ गौत्र देशेरी उत्तरी दिशाय मझ थ्यै। तैन्हैं तैस इलाकेनी जां अपांणैनी इस्राएलैरा प्रदेश बोलु।

![](https://cdn.door43.org/obs/jpg/360px/obs-en-18-09.jpg)

पण यारोबामै परमेश्वरेरै खिलाफ बगावत की जां मैहणुवां किना पाप करवा। तेनि अपड़ै मैहणुवां केरै जरियै भक्ति कांनेरै तेईनी दो मूर्ती बंणाई। सैक्यै अबै यहूदेरै प्रदेशा यरूशलेम शहरा मझ परमेश्वरेरै मंदिरा मझ तेसैरी भक्ति कांनेरै तेईनी ना गियै।

![](https://cdn.door43.org/obs/jpg/360px/obs-en-18-10.jpg)

यहूदा जां इस्राएल योकिया केरै दुश्मण बंणी गियै जां योकिया केरै खिलाफ लड़ाई कांना लगै।

![](https://cdn.door43.org/obs/jpg/360px/obs-en-18-11.jpg)

इस्राएल देशैरै नवें प्रदेशा मझ, जैत्थरै बि राजै यै सै सारै बुरै थ्यै। मतै सारै राजै तैन्हां होरनियां इस्राएली मैहणुवां केरै जरियै मारै गियै जै राजा बणना चाहथै थ्यै।

![](https://cdn.door43.org/obs/jpg/360px/obs-en-18-12.jpg)

इस्राएल देशैरै सारै राजै जां मतै सारै मैहणुवें मूर्तिया केरी भक्ति की। जेख्णी तैन्हैं ऐहीं कियु, ता तैन्हैं ज्यादातर वैश्या सेईतै नाजायज रिश्ता रखा, जां यो तेईनी कि मतै बारी मूर्तिया केरै सामणै बच्चा केरी बलि बि की।

![](https://cdn.door43.org/obs/jpg/360px/obs-en-18-13.jpg)

यहूदा प्रदेशेरै राजै, दाऊदेरै वंशेरै थ्यै। ऐन्हां राजा मझां किछ भलै मैहणु थ्यै जैन्हैं ईमानदारी सिंउ राज केया जां परमश्वरेरी भक्ति की। पण यहूदा प्रदेशेरै मतै सारै राजै बुराई करी- करी राज केया जां मूर्तिया केरी भक्ति की। तैन्हां मझियें कुछ राजै झूठा दैवता केरै तेईनी अपड़ै बच्चा केरी बलि चाढ़ी। यहूदा प्रदेशेरै मतै सारै मैहणुवें परमेश्वरेरै खिलाफ बगावत की जां होरनियां दैवता केरी भक्त की।

*1 राजा अध्याय 1-6; 11-12 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_18_128kbps.m4a

## 19. भविष्यवक्ता (परमेश्वरेरी तरफों बोलणै बा)- कहानी

https://openbiblestories.org/l/cdj/story-19/

![](https://cdn.door43.org/obs/jpg/360px/obs-en-19-01.jpg)

परमेश्वर हमेशा इस्राएलिया किनि भविष्यवक्ता भेईजता रिहींथ्या। भविष्यवक्ता परमेश्वरेरै संदेश शुणी करी मैहणुवंनी शुणांईथ्यै।

![](https://cdn.door43.org/obs/jpg/360px/obs-en-19-02.jpg)

जेख्णी अहाब इस्राएल देशैरा राजा थ्या ता तैस टैंमा एलिय्याह भविष्यवक्ता थ्या। अहाब अक बुरा मैहणु थ्या। तेनि झूठै बाल दैवतेरी भक्ति कांनानि मैहणु मजबूर करी दित्तै। ऐठणीरै तेईनी एलिय्याहे अहाब राजै सिंउ बोलु कि परमेश्वर तैन्हां मैहणुवंनी सजा दींणार आ। तेनि तैस सिंउ बोलु, “जेख्णी तेईनी आंउ झड़ि पूंणेरै तेईनी ना बोलूं तियो तेईनी इस्राएल देशा मझ झड़ि ना पूंणी जां ना ऐ औश पूंणी।“ ऐनि गल्लै ला अहाब राजै बड़ा गुस्सा या जां तेनि एलिय्याह मारी छडणैरा फैसला लिया।

![](https://cdn.door43.org/obs/jpg/360px/obs-en-19-03.jpg)

ऐठणीरै तेईनी परमेश्वरै एलिय्याह सिंउ बोलु कि तु बणां मझ गहि करी छपि बेश, केइनी कि अहाब राजा ताउ मांनेरी ताकि मझ आ। एलिय्याह ऐस गल्लै शुणि करी बणां मझ तैस सुदली किनि गिया जेठि गांहणेरै तेईनी परमेश्वरै तैसनि बोलोरू थियु। कईयै हर रौज भ्यगा जां सन्नहीं एलिय्याहनि रोट्टी जां मीट लै आईछींथ्यै। अहाब राजा जां तेसैरै सैनिक एलिय्याहै तौपतै थ्यै, पण तैन्हेरै बोलै सै ना तोपिया। थोड़ी धियाड़ी बाद झड़ि ना ऐईंणेरी वजही सिंउ सैकेई सुदल शुकि गैई।

![](https://cdn.door43.org/obs/jpg/360px/obs-en-19-04.jpg)

तां एलिय्याह नीड़ियें एकि देशानि चलि गिया। तैस देशा मझ अक गरीब विधवा थी जेसैरा अक पुत्र थ्या। अकाल पूंणेरी वजही सिंउ तैन्हां किनी लगभग दुवां त्रियां धियाड़िरा राशन थ्या बचौरा। सै दो जंणै थोड़ै धियाड़ी ऐ अपड़ु पैट भरि करी जींतै रैय्ही सकींथ्यै। पण फिरी बि तेनि जनेनी एलिय्याहेरी तैस टैंमा मजत की। ऐठणीरै तेईनी परमेश्वरै तैन्हेरै घड़ै मझियुं अट्टु जां कुप्पिया मझियां तैल मुकणा ना दित्ता। पूरै अकाला मझ बि तैन्हांनि राशनेरी कोई कमि ना भुई जां एलिय्याह तेठि कुछ साल रिय्हा।।

![](https://cdn.door43.org/obs/jpg/360px/obs-en-19-05.jpg)

साढ़ै त्रियां साला बाद, परमेश्वरै एलिय्याह सिंउ बोलु कि मूं फिरी झड़ि भेईजणी तु इस्राएल देशानि वापस गा, जां अहाब राजै सिंउ मिल। ऐठणीरै तेईनी एलिय्याह अहाब राजै किनी गिया, जेख्णी अहाब राजै सै लधा ता तेनि बोलु, “अच्छा तु आ, मुसीबत पेईदा कांने बा! तु सच्चै सर्वशक्तिमान यहोवा पमेश्वरा छडि करी मामूली बाल देवतैरी भक्ति काता।” तेख्णी अहाब राजै सारै इस्राएली मैहणु शदाय जां सैक्यै सारै मैहणु कर्मेल पहाड़ा पनि किट्ठै कियै।

![](https://cdn.door43.org/obs/jpg/360px/obs-en-19-06.jpg)

सारै इस्राएली मैहणुवां समैत जां बाल दैवतेरै 450 भविष्यवक्ता कर्मेल पहाड़ा पनि किट्ठै कियै। एलिय्याहै मैहणूवां सिंउ बोलु, “केख्णी तेईनी तुवै अपड़ै पापा किना मंन फिरालै? जै यहोवा परमेश्वर आ तेसैरी भक्त करा। अगर बाल परमेश्वर आ ता तेसैरी भक्ति करा।”

![](https://cdn.door43.org/obs/jpg/360px/obs-en-19-07.jpg)

तां एलिय्याहै बाल दैवतेरै भविष्यवक्ता सेईतै बोलु, “एकि जानवरेरी बलि करि-करी तेसैरू मास बलिदान कांनेरै तेईनी वेदी पनि रखा, पण आग मेईं लांतै। तेठां बाद मूं बि तिहीयें कांनु, जां एकि अलग वेदी पन तैस मासा रखैला। तेख्णी अगर परमेश्वर वेदी पनि आग सुटैला तां तुहां पता लगि गांहणा कि सै सच्चा परमेश्वर आ।” तां बालेरै भविष्यवक्तै अक बलि वेदी पनि रखी पण आग ना लाय।

![](https://cdn.door43.org/obs/jpg/360px/obs-en-19-08.jpg)

तां बाल देवतेरै भविष्यवक्तै बाला किना प्रार्थना की, “हे बाल देवता, असैड़ी शुण!” पूरी धियाड़ी तैन्हैं प्रार्थना की जां जौरै-जौरै चिंडै दींणा लगै जां यो तेईनी कि तैन्हैं अपांणा बि चाकु ला बढि दित्ता, पण बाल देवतै तैन्हैरी ना शुणी, जां तेनि कोई आग ना सुट्टी।

![](https://cdn.door43.org/obs/jpg/360px/obs-en-19-09.jpg)

पूरी धियाड़ी प्रार्थना कांना किना बाद बाल देवतेरै भविष्यवक्तै प्रार्थना कांनी बंद करि दित्ती। तैठां किना बाद जेख्णी एलिय्याहै होरै जानवरेरू मास वेदी पन रखि दित्तु, फिरी तेनि मैहणुवां सिंउ बोलु, बड़ै-बड़ै भांडै पांणी ला भरा जां ऐस बलिदना पनि तियो तेईनी डोलतै रिय्हा ज्यो तेईनी मास, छिड़ी जां वेदिरै चोउवो पासैरी जमीन धिकि ना गांहथी।

![](https://cdn.door43.org/obs/jpg/360px/obs-en-19-10.jpg)

फिरी एलिय्याहै प्रार्थना की, “हे यहोवा, अब्राहम, इसहाक, जां याकूबेरै परमेश्वर, असुनि लुहा कि तु इस्राएलेरा परमेश्वर आ जां ऐ कि आंउ तिंडा दास आ। हे यहोवा परमेश्वर मिंडि शुण, ताकि ऐन्हां मैहणुवां पता लगि गहिया कि तु ऐ सच्चा परमेश्वर आ।”

![](https://cdn.door43.org/obs/jpg/360px/obs-en-19-11.jpg)

तिहिंयो इकदम, असमांणा किना आग छुड़खी जां तेनि मास, छिड़ि, घौड़, मिट्टी समैत सब किछ फुकि दित्तु जां वेदिरै चोउवो पासै जै चिक्खर थी सै सारी फुकि छडि। जेख्णी मैहणुवें ऐ सभ किछ हैरू, ता सैक्यै जमीनी पनि जेणुवां केरै भारै पैई करी बोलणा लगै, “यहोवा ऐ परमेश्वर आ! यहोवा ऐ परमेश्वर आ!”

![](https://cdn.door43.org/obs/jpg/360px/obs-en-19-12.jpg)

तां एलिय्याह बोलणा लगा, “बाल देवतेरा अक बि भविष्यवक्ता बचि ना सकिया!” ऐठणीरै तेईनी मैहणुवें बालेरै भविष्यवक्तै पकड़ी करि तैन्हां तेठां किना अलग लै गियै जां सैक्यै मारी छडै।

![](https://cdn.door43.org/obs/jpg/360px/obs-en-19-13.jpg)

तां एलिय्याहै अहाब राजै सिंउ बोलु, “छुईं-छुईं अपड़ै घरैनि नशी गा, केईनि कि झड़ी पूंणारी आ।” थोड़ी देर बाद अम्बर बिल्कुल काआ भौ गिया जां भयांकर झड़ी पूंणी शुरू भौ गैई। यहोवा परमेश्वरै सैकेई शुहाई मुका दित्ती जां ऐ साबित करि दित्तु कि सेहै सच्चा परमेश्वर आ।

![](https://cdn.door43.org/obs/jpg/360px/obs-en-19-14.jpg)

जेख्णी एलिय्याह अपड़ा कंम पूरा करि बेठा, फिरी परमेश्वरै एलीशा नाँईयेरा अक मड़द चुणी लिया। परमेश्वरै एलीशायरै जरियै मतै चमत्कार कियै। अक चमत्कार नामान नाँईयेरै अकि मैहणु सेईतै भुवा। सै एकि दुश्मणेरी सेनायरा सरदार थ्या, जां तैसनि कौढ़ थ्या। नामाने एलीशेरै बारै मझ शुणोरू थियु, ऐठणीरै तेईनी सै एलीशाय किनी या जां तेनि तैस किना ठीक भूंणैरी अरदास की। एलीशाय नामान कोढ़ी सिंउ बोलु कि गहि करी यरदन नदी मझ सत्त बारी डुबकी मार।

![](https://cdn.door43.org/obs/jpg/360px/obs-en-19-15.jpg)

नामान ऐस गल्लै पन गुस्सै भौ गिया। तेनि ऐहीं काना किना नंमा करि दित्ता, केईनी कि तैसनि विश्वास ऐ ना थ्या भूंता कि ऐहीं काने ला सै ठीक भौ सकता, तैसनि ऐ मूर्खताय बाई गल्ल लगी। पण बाद मझ तेनि अपड़ा मंन बदलि दित्ता जां गहि करी यरदन नदी मझ सत्त बारी डुबकी मारी। जेख्णी सै सत्तवीं डुबकी मारी करी पांणी मझां भेईर निकौथा ता परमेश्वरै सैक्या कौढ़ेरी बिमारी किना बिल्कुल ठीक करी दित्ता।

![](https://cdn.door43.org/obs/jpg/360px/obs-en-19-16.jpg)

परमेश्वरै ऐनि हिसाबै इस्राएली मैहणुवां किनि मतै सारै भविष्यवक्ता भेईजै, जां तैन्हां मैहणुवां सिंउ बोलु कि मूर्तिया केरी भक्ति कांनी बंद करि दिया, जां होरनियां मैहणुवां सिंउ खरा बर्ताव जां दया कातै रिय्हा। तैन्हैं भविष्यवक्तै मैहणुवंनी चेतावनी दित्ती कि बुरै कंम कानै छडि देया जां परमेश्वरेरै हुक्मेरा पालन करा। फिरी ऐ बि बोलु, “जै तुवै ऐहीं ना करेलै ता परमेश्वरा तुवै दोषी समझी करी तुवाड़ा न्याय कांना जां तुहांनि सजा दींणी।”

![](https://cdn.door43.org/obs/jpg/360px/obs-en-19-17.jpg)

बड़ै बारी मैहणुवें परमेश्वरेरै हुक्मेरा पालन ना केया, जां घड़ि-घड़ि तैन्हैं भविष्यवक्ता सिंउ बुरा बर्ताव केया, जां यो तेईनी कि केख्णी-केख्णी ता सै मारी बि छडै। अक बारी, तैन्हैं यिर्मियाह भविष्यवक्ता शुक्कै कुवें मझ सुटि दिता जां सैक्या तेठि मरनानि छडि छडा। कुवें मझ पाणी ना थियु सिर्फ चिक्खर थी यिर्मियाह तैस चिक्खरै मझ फसि गिया। पण राजै तैस पन दया यैई जां तेनि अपड़ै सेवकानि हुक्म दित्ता कि यिर्मियाह मरना किना पेहिलै तैस कुवें मझां भेईर छिकि लिया।

![](https://cdn.door43.org/obs/jpg/360px/obs-en-19-18.jpg)

भविष्यवक्तै परमेश्वरेरै बारै मझ मैहणुवंनी लगातार बोलतै रिय्है चाहे मैहणु तैन्हां सिंउ नफरत कातै थ्यै। तैन्हैं मैहणुवंनी चेतावनी दित्ती कि अगर तुवै अपड़ै पापा किना पश्चाताप ना करेलै ता परमेश्वरा तुवाड़ नाश करी दींणा। तैन्हैं मैहणुवंनी परमेश्वरेरा सैक्या वायदा याद करवा कि मसीह छुईं ऐईंणै बाआ।

*1 राजा अध्याय 16-18; 2 राजा 5; यिर्मियाह 38 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_19_128kbps.m4a

## 20. बंधुआई (यानि गुलामी जां वापसी)- कहानी

https://openbiblestories.org/l/cdj/story-20/

![](https://cdn.door43.org/obs/jpg/360px/obs-en-20-01.jpg)

इस्राएल देशै जां यहूदा देशै परमेश्वरेरै खिलाफ पाप केया। तैन्हैं तैस वायदेरा पालन ना केया जै परमेश्वरै तैन्हां सेईतै सीनै पहाड़ पर्वता पनि कियौरा थ्या। परमश्वरै बड़ै सारै भविषयवक्ता भेईजै कि सैक्यै तैन्हांनि चेतावनी दिया जा सैक्यै मैहणु अपड़ै पापा कना पश्र्चाताप किरिया जां परमेश्वरेरी आराधना करिया। पण तैन्हैं भविष्यवक्ता केरी गल्लै मनणा किना नंमा करि दित्ता।

![](https://cdn.door43.org/obs/jpg/360px/obs-en-20-02.jpg)

तां फिरी परमेश्वरै तैन्हां दोईयो देशानि सजा दित्ती जां तैन्हेरै दुश्मणानि इजाजत दित्ती कि सै तैन्हां दोईयो देशा नाश करी दिया। अश्शूर देश अक ताकतवर देश थ्या, सैक्यै होरनियां देशा केरै प्रति बड़ै निर्दयी थ्यै। तैन्हैं आईछी करी इस्राएल देशैरा नाश करी दित्ता, जां अश्शूरी मैहणुवें इस्राएल देशैरै मतै सारै मैहणु मारी छडै, तैन्हेरी सारी चीजै लुटि नी, जां इस्राएल देशैरै मतै सारै इलाकै फुकि छडै।

![](https://cdn.door43.org/obs/jpg/360px/obs-en-20-03.jpg)

अश्शूरी मैहणुवें इस्राएल देशैरै सारै अगुवे, अमीर मैहणु जां कारीगर मैहणु किट्ठै कियै जां सै तैन्हां अश्शूर देशानि लै गियै। इस्राएल देशा मझ सिर्फ कुछ गरीब इस्राएली मैहणु ऐ बचौरै थ्यै।

![](https://cdn.door43.org/obs/jpg/360px/obs-en-20-04.jpg)

फिरी अश्शूरी मैहणुवें इस्राएल देशा मझ रींहणेरै तेईनी विदेशी मैहणु लै अंणै। तैन्हैं विदेशी मैहणुवें इस्राएल देशैरै नाश कियौरै शहर फिरी बसाय लियै। जै इस्राएली मैहणु बचौरै थ्यै तैन्हां सिंउ अश्शूरी मैहणुवें ब्याह करी लियै। ऐन्हैरा जै वंश भुवा तैन्हांनि सामरी नाँ दी दित्तु।

![](https://cdn.door43.org/obs/jpg/360px/obs-en-20-05.jpg)

यहूदा देशैरै मैहणुवें हैरू कि किहीं परमेश्वरै तैस पन विश्वास ना कानेरी वजहि सिंउ जां तेसैरै हुक्मेरा पालन ना कानेरी वजहि सिंउ इस्राएल देशैरै मैहणुवंनी सजा दित्थी। पण फिरी बि तैन्हैं कनानी मैहणुवां केरै दैवता केरी भक्ति की। परमेश्वरै तैन्हांनि चेतावनी दींणेरै तेईनी भविष्यवक्तै भेईजै, पण तैन्हैं तैन्हेरी गल्लै अशुणी करि दित्ती।

![](https://cdn.door43.org/obs/jpg/360px/obs-en-20-06.jpg)

अश्शूरी मैहणुवां केरै जरियै इस्राएल देशैरा नाश काना किना लगभग 100 साल बाद, परमेश्वरै बेबीलोन देशैरा राजा नबूकदनेस्सर यहूदा देशा पन हमला कानेरै तेईनी भेईजा। बेबीलोन देश अक ताकतवर देश थ्या। यहूदा देशैरा राजा नबूकदनेस्सरेरा दास बंणी करी हर साल मत्ती धन-दौलत दींणेरै तेईनी राजी भौ गिया।

![](https://cdn.door43.org/obs/jpg/360px/obs-en-20-07.jpg)

पण कुछ साल बाद, यहूदा देशैरै राजै बेबीलोन देशैरै खिलाफ बगावत की। बेबीलोन देशैरै मैहणुवें फिरी वापस आईछी करी यहूदा देशा पन हमला करि दित्ता। तैन्हैं यरूशलेम शहरा पन कब्जा करी लिया, मंदिर नष्ट करी दित्ता जां शहरैरा जां मंदिरैरा खजाना लुटि करी लै गियै।

![](https://cdn.door43.org/obs/jpg/360px/obs-en-20-08.jpg)

बेबीलोन देशैरै खिलाफ बगावत कानेरी वजहि सिंउ यहूदा देशैरै राजैनि सजा दित्ती जां नबूकदनेस्सरेरै सैनिकै तेसैरा पुत्र मारी छडा जां तेठां बाद राजा अंधा करि दित्ता। तेठां बाद, सैक्यै राजै लै गियै ताकि सै बेबीलोनेरी जैल्ही मझ मरी गहिया।

![](https://cdn.door43.org/obs/jpg/360px/obs-en-20-09.jpg)

नबूकदनेस्सर जां तेसैरी सैनाय यहूदा देशैरै लगभग सारै मैहणु बेबीलोन देशानि लै नियें, सिर्फ तैस देशैरै गरीब मैहणु छडि दित्तै ताकि सै खेती बाड़ी करि-करी फसल बईया। ऐस दोरानेरै टैंमानि बंधुआई यानि देश निकाला नाँ दियु जैस मझ परमेश्वरेरै, मैहणु वायदेरै देशा किना निकोहि गांहणेरै तेईनी मजबूर केईथ्यै।

![](https://cdn.door43.org/obs/jpg/360px/obs-en-20-10.jpg)

बेशक परमेश्वरै अपड़ै मैहणुवंनी तैन्हेरै पापा केरै तेईनी सजा दित्ती, तैन्हैरा देश निकाला भूंणा किना बाद बि, परमेश्वर तैन्हां जां अपड़ै वायदै ना थ्या भुलोरा। परमेश्वर लगातार अपड़ै मैहणुवां तकांता रिय्हा, जां अपड़ै भविष्यवक्ता केरै जरियै तैन्हां सेईतै गल्लै काता रिय्हा। परमेश्वरै वायदा केया कि, 70 साल बाद सैक्यै फिरी वायदेरै देशा मझ वापिस ऐईलै।

![](https://cdn.door43.org/obs/jpg/360px/obs-en-20-11.jpg)

लगभग 70 साला बाद, कुस्रु जै फारस देशैरा राजा बणा, तेनि बेबीलोन देश हारा दित्ता, ऐठणीरै तेईनी बेबीलोन देशेरी वजाय फारस देशै केहिया देशा पनि राज केया। इस्राएली मैहणुवंनी अबै यहूदी बोलींथ्यै। जां तैन्हैं अपड़ी सारी जिन्दगी बेबीलोन देशा मझ कट्टी। सिर्फ कुछ पुरांणै यहूदी मैहणुवां यहुदा देश याद रिय्हा।

![](https://cdn.door43.org/obs/jpg/360px/obs-en-20-12.jpg)

फारसी मैहणु बड़ै सामर्थी थ्यै, पण तैन्हैं हारोरै मैहणुवां पन दया की। फारसी मैहणुवां केरा राजा बणना किना कुछ टैंम बाद, कुस्रु अक हुक्म दित्ता कि कोई बि यहूदी जै यहूदा देशानि गांहणा चांहथा ता सै फारस देशा छडि करि यहूदा देशानि वापिस गहि सकता। तेनि तैन्हांनि मंदिर बणांणेरै तेईनी धन-दौलत बि दित्ती, गुलामिरै 70 साल बाद, यहूदी मैहणुवां केरी अक टोली यरूशलेम शहरानि वापिस चलि यैई।

![](https://cdn.door43.org/obs/jpg/360px/obs-en-20-13.jpg)

जेख्णी यहूदी मैहणु येरूशलेम शहरा मझ पुज्जै ता तैन्हैं मंदिर जां शहरेरी चोउवो पासेरी कंथि फिरी दुबारै बंणाय। फारसी मैहणु हालै तेईनी बि तैन्हां पन राज करींथ्यै, पण अक बारी फिरी सैक्यै वायदै बाऐ देशा रींहथै थ्यै जां मंदिरा मझ आराधना कातै थ्यै।

*2 राजा अध्याय 17; 24-25; 2 इतिहास 36; एज्रा 1-10; नहेम्याह 1-13 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_20_128kbps.m4a

## 21. परमेश्वर मसीहरै ऐईंणैरा वायदा काता- कहानी

https://openbiblestories.org/l/cdj/story-21/

![](https://cdn.door43.org/obs/jpg/360px/obs-en-21-01.jpg)

जेख्णी परमेश्वरै संसारैरी रचना की, ता तैस पता थ्या कि तैस बाद मझ अक धियाड़ी जरूर मसीह भेईजणा पूंणा। तेनि आदमा जां हव्वाय सिंउ वायदा केया कि तैस ऐहियें कांनु। परमेश्वरै बोलु कि हव्वाय किना एकि मैहणु जन्म लींणा जैस कीड़ैरू मुंडक प्रिंचि छडणु। जेनि कीड़ै हव्वाय किना धौखै मझ सै फल खलाईथ्यु सै बिल्कुल शैतान थ्या। परमेश्वरेरै वायदेरा मतलब ऐ थ्या कि मसीह पूरी तराहि सेईतै शैतान हारियांणी दींणा।

![](https://cdn.door43.org/obs/jpg/360px/obs-en-21-02.jpg)

परमेश्वरै अब्राहमा सेईतै वायदा कियौरा थ्या कि तेसैरै जरियै संसारेरिया सारिया जातियानि आशीष मेईंणी। परमेश्वरा अक धियाड़ि मसीह भेईजी करि ऐक्या वायदा पूरा कांना। सैक्या मसीह संसारेरी सारिया जातिया केरै मैहणुवां तैन्हेरै पापा किना बचाला।

![](https://cdn.door43.org/obs/jpg/360px/obs-en-21-03.jpg)

परमेश्वरै मूसै सिंउ वायदा कियौरा थ्या कि ऐईंणै बाऐ टैंमा मझ मूसै सैयि अक होरा भविष्यवक्ता भेईजेला। ऐ भविष्यवक्ता मसीह भूंणा। ऐनि हिसाबै, परमेश्वरै फिरी वायदा केया कि सै मसीह भेईजैला।

![](https://cdn.door43.org/obs/jpg/360px/obs-en-21-04.jpg)

परमेश्वरै दाऊद राजै सेईतै वायदा कियौरा थ्या कि तेसैरै वंशा मझां अक मसीह भूंणा। सेहै राजा भूंणा जां परमेश्वरेरै मैहणुवां पनि महेशा तेईनी राज करैला।

![](https://cdn.door43.org/obs/jpg/360px/obs-en-21-05.jpg)

परमेश्वरै यिर्मियाह भविष्यवक्ता सेइतै गल्ल की जां बोलु कि अक धियाड़ि तैस नवाँ वायदा कांना। पण सै तैस वायदै सैयि ना भूंणा जै परमेश्वरै इस्राएली मैहणुवां सेईतै सीनै पहाड़ा पनि कियौरा थ्या। जै नवाँ वायदा मूं तैन्हां धियाड़िया मझ तैन्हां सिंउ कांना, सै ऐ आ कि आंउ अपांणा तैन्हां पन प्रकट करेला।हर मैहणु तैस सेईतै प्यार रखेला जां तेसैरै नियमा केरा पालन कांनेरी इच्छा रखेला। परमेश्वरै वायदा केया कि आंउ तैन्हेरै दिल्ला पनि लिखेला कि सैक्यै मिंडै मैहणु भौलै, जां सै परमेश्वरा जांणेलै जां परमेश्वर तैन्हेरै पाप माफ करेला। सेहै मसीह भूंणा जै तैन्हां सेईतै तैस नवें वायदै करेला।

![](https://cdn.door43.org/obs/jpg/360px/obs-en-21-06.jpg)

परमेश्वरेरै भविष्यवक्तै ऐ बि बोलु कि मसीह अक भविष्यवक्ता भूंणा। अक भविष्यवक्ता सै मैहणु आ जै परमेश्वरेरै वचन शुणता जां फिरी परमेश्वरेरा संदेश मैहणुवंनी शुणांता। जैस भेईजणैरा परमेश्वरै वायदा कियौरा थ्या सैक्या मसीह अक सिद्ध भविष्यवक्ता भूंणा। मतलब तैस मसीह परमेश्वरेरा संदेश शुणना जां मैहणुवंनी सै संदेश अच्छी तराहि सिंउ शिख्रांणा।

![](https://cdn.door43.org/obs/jpg/360px/obs-en-21-07.jpg)

इस्राएली याजकै मैहणुवां केरै पापा केरै तेईनी परमेश्वरानि बलिदान चाढ़नै जारी रखै। ऐ बलिदान मैहणुवां केरै पापा केरै तेईनी परमेश्वरेरी सजाय किना बचणेरै तेईनी चाढ़ींथ्यै। याजकै मैहणुवां केरै तेईनी प्रार्थना बि की। पण, सैक्या मसीह सिद्ध महायाजक भूंणा जै संसारेरै मैहणुवां केरै पाप ऐपु पनि लै करि अपांणा परमेश्वरानि दींणेरै तेईनी बलिदान करेला। मतलब, तैस कदि पाप ना काना, जां जेख्णी सै अपांणा बलिदान कांनेरै तेईनी दी दैला, ता संसारैरा मैहणुवां केरै पापा केरै तेईनी कोई बि बलिदान जरूरी ना भूंणा।

![](https://cdn.door43.org/obs/jpg/360px/obs-en-21-08.jpg)

राजा सै भूंता जै मैहणुवां पन राज काता, जां मैहणुवां केरा न्याय काता, जां कदि- कदि सै गलती कातै। दाऊद राजै सिर्फ इस्राएली मैहणुवां पन राज केया, पण दाऊद राजेरा वंश मसीह पूरै संसारा पन राज करेला। सै हमेशा तेईनी राज करेला, हमेशा सच्चाई सिंउ न्याय करेला जां सही फैसला करेला।

![](https://cdn.door43.org/obs/jpg/360px/obs-en-21-09.jpg)

परमेश्वरेरै भविष्यवक्तै मसीहरै बारै मझ बड़ि जादा भविष्यवांणी कियोरी थी। उदाहरणेरै तेईनी, मलाकी नाँईयेरै भविष्यवक्तै अपड़ि किताबी मझ बोलोरू थियु कि मसीहरै ऐईंणा किना पेहिलै अक भविष्यवक्ता ऐईला। सै मसीहरै ऐईंणेरै तेईनी मैहणुवां केरै मंना तियार करेला।ऐठणीरै अलावा, यशायाह भविष्यवक्तै अपड़िया किताबिया मझ लिखोरू आ कि मसीह ऐकि कुवांरी छोकरी किना जन्म लींणा। जां मीका भविष्यवक्तै बि अपड़िया किताबिया मझ जिक्र केया कि मसीह बैतलहम ग्राँईया मझ जन्म लैला।

![](https://cdn.door43.org/obs/jpg/360px/obs-en-21-10.jpg)

यशायाह भविष्यवक्तै ऐ बि लिखु कि मसीह गलील प्रदेशेरै इलाकै मझ वास करेला। जै मैहणु बड़ै दुखी अत्तै मसीह तैन्हांनि शांति दैला। सै केईदिया बि आजाद करेला। मसीह बिमार मैहणुवां जां जै टांउणै अत्तै जां जै कांणै अत्तै, जै टट्टै अत्तै या जै लट्टै अत्तै तैन्हां बि ठीक करेला।

![](https://cdn.door43.org/obs/jpg/360px/obs-en-21-11.jpg)

यशायाह भविष्यवक्तै ऐ बि लिखु कि मैहणुवां मसीह सिंउ नफरत कांनी जां तैन्हां सैक्या ना मंनणा। होरनियें भविष्यवक्तै बि बोलु कि मसीहरा अक साउगी तेसेरै खिलाफ भूंणा जां तैन्हां तेसेरै लिकड़ा केरै तेईनी जुआ खेलणा। जकर्याह भविष्यवक्तै बि अपड़ि किताबिया मझ लिखोरू आ कि मसीहरै ऐकि साउगी होरनियां मैहणुवां किना चांदिरै सिक्कै लींणै जां सै पकड़वा दींणा जां मारी छडवांणा।

![](https://cdn.door43.org/obs/jpg/360px/obs-en-21-12.jpg)

भविष्यवक्तै ऐ बि बोलोरू आ कि मसीह किहीं मरनु। यशायाहै भविष्यवाणी की कि मैहणुवां मसीह पन थुकणु, तेसैरा मजाक उडांणा, जां सै चुथणा। तैन्हां सैक्या घ्रुंचि करी बिन्हीं दींणा जां तैस बड़ा भारी दुख जां कष्ट सैहन करि करी मरि गांहणु, जबकि तेनि किछ बि गलत ना कियोरू।

![](https://cdn.door43.org/obs/jpg/360px/obs-en-21-13.jpg)

भविष्यवक्तै ऐ बि बोलु कि मसीह महान भूंणा जेनि कोई पाप ना भूंणा कियौरा। सै संसारेरै सारा मैहणुवां केरै पापा केरी वजहि सिंउ मारियूंणा। तेसेरै मरने ला परमेश्वरा जां मैहणुवां बिच मेल मिलाप भौ गाहला। ऐठणीरै तेईनी परमेश्वर चांहथा कि मसीह मरिया।

![](https://cdn.door43.org/obs/jpg/360px/obs-en-21-14.jpg)

भविष्यवक्तै ऐ बि बोलु कि परमेश्वरा मसीह मौरा मझां जींता कांना। मसीहरी मोऊत जां दुबारै जींतै भूंणु ऐ साबित काता कि संसारेरा मैहणुवां सिंउ नवाँ वायदा कांना परमेश्वरेरी अक योजना थी, ताकि सै संसारेरा मैहणुवां बचा सकिया जैन्हैं तेसेरै खिलाफ पाप कियौरा।

![](https://cdn.door43.org/obs/jpg/360px/obs-en-21-15.jpg)

परमेश्वरै मसीहरे बारै मझ भविष्यवक्तानि बड़ी सारी गल्लै शुणाउरी थी, पण मसीह ऐन्हां मझां कौस बि भविष्यवक्ता केरै जीवन काला मझ ना या। ऐन्हां भविष्यवाणियां शुणांणा किना लगभग 400 साल बाद, सही टैंमा पनि, परमेश्वरै मसीह इस संसारा मझ भेईजा।

*उत्पत्ति अध्याय 3:15; 12:1-3; व्यवस्थाविवरण 18:15; 2 शमूएल 7; यिर्मयाह 31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7; 35:3-5; 61; 53; भजन संहिता 22:18; 35:19; 69:4; 41:9; जकर्याह 11:12-13; यशायाह 50:6; भजन संहिता 16:10-11 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_21_128kbps.m4a

## 22. यूहन्ना बपतिस्मा दींणै बाऐरा जन्म- कहानी

https://openbiblestories.org/l/cdj/story-22/

![](https://cdn.door43.org/obs/jpg/360px/obs-en-22-01.jpg)

पुरांणै टैंमा मझ परमेश्वर अपड़ै मैहणुवां सेईतै स्वर्गदूता जां भविष्यवक्ता केरै जरियै गल्लै करींथ्या। पण तैस टैंमा किना लैकरी फिरी 400 साल बिरतणा तेईनी परमेश्वरै तैन्हां सेईतै गल्ल ना की। तां परमेश्वरै जकर्याह नाँईयेरै भविष्यवक्ता किनी अक स्वर्गदूत भेईजा। जकर्याह जां तेसैरी लाड़ी इलीशिबा परमेश्वरैरा आदर करींथ्यै। सैक्यै बड़ै बुढी थ्यै गियौरै, जां तैन्हांनी कोई बि आउलाद ना थी भोरी।

![](https://cdn.door43.org/obs/jpg/360px/obs-en-22-02.jpg)

अक धियाड़ी जकर्याह अपड़ी मंडली सेईतै परेश्वरेरै सामणै याजकेरा कम काता थ्या। याजका केरी रीतिरै मुताबिक तेसैरै नाँ पनि चिट्ठी निकोथी कि प्रभुरै मंदरा मझ गहि करी धूप जा। धुप जातै टैंमा आराधना कांनारै मैहणुवां केरी सारी मंडली मंदरेरै आंगणा मझ प्रार्थना काती थी। तां तेनि परमेश्वरेरा अक स्वर्गदूत धूप जानै बाई वेदिरै सुमलै पासै खड़ियोउरा लधा। जकर्याह तैस हैरी करी बिजी गिया जां बड़ा डरींणा लगा।पण स्वर्गदूतै तैस सिंउ बोलु, ‘हे जकर्याह, डरै मेईं केईनी कि परमेश्वरै तिंडी प्रार्थना शुणी लियौरी आ, जां तिंडी लाड़ी इलीशिबाय किना तिंडै तेईनी अक पुत्र पेईदा भूंणा, जां तु तेसैरू नाँ यूहन्ना रखै। तेसैरै पेईदा भूंणै ला तुवै ता खुश भौ गांहणै, पण होरनियां मैहणुवां बि खुश भौ गांहणु। तां जकर्याहै स्वर्गदूता किना पुच्छु, “ऐस गल्लै आंउ किहीं सच्ची मनि लियुं, केईनी कि आंउ जां मिंडी लाड़ी ता बड़ै बुढै भौ गियौरै अत्तै।“

![](https://cdn.door43.org/obs/jpg/360px/obs-en-22-03.jpg)

तेनि स्वर्गदूतै जकर्याहैनि जवाब दित्ता, “मिंडु नाँ जिब्राईल आ, जै परमेश्वरेरै सामणै खड़ा रींहथा। परमेश्वरै आंउ ताउ किनी ऐक्या शुभ संदेश शुणांणेरै तेईनी भेईजौरा। तका जेउ तेईनी ऐ गल्लै पूरी ना भौ गाहली, तेउ तेईनी तु टट्टा रींहणा जां किछ बि बिचारी ना सकता, केईनी कि तीं मिंडी गल्ला केरा विश्वास ना केया, जै कि अपड़ै टैंमा पनि पूरी भूंणी।” जै मैहणु मंदरेरै आंगणा मझ जकर्याह भातै थ्यै सै सौचणा लगै जकर्याह मंदरा मझ यौउती देर कितु काता? जेख्णी सै भेईनी या, ता सै तैन्हांनि इशारा मझ बोलणा लगा, केईनी कि तेसैरी जुबान बंद थी सै बिचारी ना सकींथ्या, सै सभ मंदरा भेईर खड़ियोरै मैहणु बुझि गियै कि मंदरा मझ जरूर ऐसनी कोस्केरै दर्शन भुवै।जेख्णी तेसैरी सेवा कांनेरी धियाड़ी पुरी गेई, तां जकर्याह यरूशलेम शहर छडी करी अपड़ै घरैनि वापस चलि गिया। कुछ धियाड़ी बाद तेसैरी लाड़ी इलीशिबा दुपराणी भुई; पण पंज महीनै सै अपड़ै घरै रैहि। जां सै अपड़ै मंना मझ सौचणा लगी कि, “मैहणुवां मझ मिंडी बदनामी दूर कांनेरै तेईनी, परमेश्वरै ऐन्हां धियाड़िया मझ मूं पन दया की।”

![](https://cdn.door43.org/obs/jpg/360px/obs-en-22-04.jpg)

जेख्णी इलीशिबाय छट्ठा महीना लगा, तां परमेश्वरै जिब्राईल स्वर्गदूत, गलील प्रदेशेरै नासरत शहरा मझ, मरियम नाँईयेरी एकि कुँवारी छोकरी किनि भेईजा; मरियमेरी मगणी यूसुफ नाँईयेरै एकि मैहणु सिंउ भौ थी गियौरी, जै कि राजै दाऊदेरै खनदानेरा थ्या। स्वर्गदूतै तैस किनी गहि करि बोलु, “मरियम ताउनी मिंडा नमस्कार। ताउ पनि परमेश्वरैरी दया भौरी आ जां सै ताउ सेईतै आ।” स्वर्गदूतेरी ऐसै गल्लै शुणी करी मरियम डरी गैई, जां सौचणा लगी कि ऐस गल्लैरा कितु मतलब आ?स्वर्गदूतै तेस सिंउ बोलु, “हे मरियम; डरै मेईं, केईनी कि परमेश्वरेरी दया ताउ पन भौरी आ, जां शुण, “तु दुपराणी भूंणी, ताउ अक पुत्र पेईदा काना; तु तेसैरू नाँ यीशु रखै। सै महान भूंणा, जां परम प्रधान परमेश्वरैरा पुत्र भूंणा जां हमेशा तेईनी राज करैला।”

![](https://cdn.door43.org/obs/jpg/360px/obs-en-22-05.jpg)

तां मरियम स्वर्गदूता सिंउ बोलणा लगी, “ऐ किहीं भौ सकतु, केईनी कि आंउ ता कुँवारी आ?“ स्वर्गदूतै तैसनी जवाब दित्ता, “पवित्र आत्मा जां तेसैरी सामर्थ ताउ पनि बंणी रींहणी; ऐठणीरै तेईनी जै बच्चा ताउ किना पेईदा भूंणा, सै पवित्र जां परमेश्वरैरा पुत्र भुंणा।“ जै तेनि स्वर्दूतै बोलु तैस पनि मरियमै विश्वास केया।

![](https://cdn.door43.org/obs/jpg/360px/obs-en-22-06.jpg)

ऐ भूंणा किना थोड़ै टैंम बाद, मरियम इलीशिबाय सिंउ मिलणा गैई जिहीं मरियमै तैसनि नमस्कार कियु, तिहीयें बच्चा तेसैरै पैटा मझ उटका, जां इलीशिबा पवित्र आत्माय ला भरी गैई। परमेश्वरै जै किछ तैन्हेरी जिन्दगी मझ कियु तैस हैरी करी बाकी जनेनी बड़ी खुश भुई। त्रा महीनै मरियम इलीशिबाय किनी रैहि करी अपड़ै घरैनि वापस चलि गैई।

![](https://cdn.door43.org/obs/jpg/360px/obs-en-22-07.jpg)

ऐठां किना बाद, इलीशिबाय बच्चैनि जन्म दित्ता। जकर्याहै जां इलीशिबाय तैस बच्चैरू नाँ यूहन्ना रखु, जिहीं तेनि स्वर्गदूतै तैस सिंउ बोलोरू थियु। तां परमेश्वरै जकर्याहैनि इजाजत दित्ती कि सै फिरी बिचाना लगी पुईया। जकर्याहै बोलु, परमेश्वरैरी स्तुति भुईया, केईनी कि तेनि अपड़ै मैहणुवां पनि दया की, जां बोलु, ऐ जै मिंडा पुत्र आ सै सर्वशक्तमान परमेश्वरैरा भविष्यवक्ता भूंणा। जां तैस मैहणुवंनी शुणांणु कि किहीं सैक्यै अपड़ै पापा किना माफी प्राप्त करी सकतै!”

*लूका अध्याय 1 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_22_128kbps.m4a

## 23. यीशुरा जन्म- कहानी

https://openbiblestories.org/l/cdj/story-23/

![](https://cdn.door43.org/obs/jpg/360px/obs-en-23-01.jpg)

यूसुफ नाँईयेरै एकि मैहणु सेईतै मरियमेरी मगणी भौ थी गियौरी। जेख्णी यूसुफै शुणु कि मरियम दुपरांणी आ ता तैस पता थ्या कि सै तेसैरा बच्चा ना। पण, यूसुफ मरियमै बदनाम ना थ्या कांना चांहथा, ऐठणीरै तेईनी तेनि तैस पनि रहम करि-करी चुपचाप छडि दींणैरै बारै मझ सौच-विचार केया। पण ऐहीं कांना किना पेहिलै, एकि स्वर्गदूतै सुपनै मझ आईछी करी तैस सिंउ गल-बात की।

![](https://cdn.door43.org/obs/jpg/360px/obs-en-23-02.jpg)

तेनि स्वर्गदूतै यूसुफा सिंउ बोलु, “हे यूसुफ, अबै तु अपड़ी भूंणै बाई लाड़ी मरियमै ऐपु सेईतै रखणा हैरी मेईं डरियै। केईनी कि जै तेसैरै पैटा मझ बच्चा आ सै पवित्र आत्मायरी तरफों आ। तैस एकि पुत्रानि जन्म दींणा तेसैरू नाँ यीशु रखै (जेठणीरा मतलब आ यहोवा बचांणार आ), केईनी कि तैस मैहणु तैन्हैरै पापा किना बचांणै।”

![](https://cdn.door43.org/obs/jpg/360px/obs-en-23-03.jpg)

तां यूसुफ निंदर करि-करी बियुझी गिया जां प्रभुरै स्वर्गदूतेरै हुक्मेरै मुताबिक अपड़ी भूंणै बाई लाड़ी मरियमै अपड़ै घरै लै या। जां ज्यो तेईनी मरियमै बच्चैनि जन्म ना दित्ता त्यो तेईनी यूसुफ अपड़ी लाड़ी सिंउ ना झुल्ला।

![](https://cdn.door43.org/obs/jpg/360px/obs-en-23-04.jpg)

जेख्णी मरियमैरा लुखियूंणैरा टैंम निड़ी या, तेख्णी औगुस्तुस कैसरै ऐ हुक्म दित्ता कि सारै रोमी सम्राज्येरै मैहणुवां केरी गिणती करियो जां तैन्हेरै नाँ लिखियो। तां मरियम जां यूसुफ बि अक लम्मा सफर करि-करी नासरत शहरेरै यहूदिया प्रदेशा मझ दाऊदेरै शहरा बैतलहम ग्राँईयानि गियै।।

![](https://cdn.door43.org/obs/jpg/360px/obs-en-23-05.jpg)

जेख्णी मरियम जां यूसुफ बैतलहम शहरा मझ पुज्जै, तैन्हांनि रींहणेरै तेईनी कोई जगा ना मैई पण सैक्यै तैठि जेठि जानवर रिहींथ्यै तैठि रिय्है। सै जगा थी जेठि मरियमै अपड़ै बच्चैनि जन्म दित्थिया। तेनि सैक्या बच्चा फालड़ी मझ लपैटी करी जानवरा केरी चरनी मझ रखी दित्ता। तैन्हैं तेसैरू नाँ यीशु रखु।

![](https://cdn.door43.org/obs/jpg/360px/obs-en-23-06.jpg)

तैस राती, तैठि सेईते एकि पट्टी मझ कुछ पुव्हाल अपड़िया भ्रैडा केरी कन्निरी देखभाल कातै थ्यै। अचानक परमेश्वरैरा अक चमकदार स्वर्गदूत तैन्हां किनी आईछी करी खड़ी गिया जां सैक्यै बड़ै डरी गियै। तां तेनि स्वर्गदूतै बोलु, “डरा मेईं, केईनी कि मूं किनी तुहांनि शुणांणेरै तेईनी बड़ी बधिया खुशखबरी आ। बैतलहम शहरा मझ मसीह, स्वामिरा जन्म भुवा सेहै मसीह प्रभु आ!”

![](https://cdn.door43.org/obs/jpg/360px/obs-en-23-07.jpg)

गहि करी तैस बच्चैरी तौप करा, जां तुहां सैक्या बच्चा फालड़ी मझ लपैटौरा चरनी मझ रखौरा मेईंणा। तां अचानक असमांण स्वर्गदूतै ला भरी गिया, सै परमेश्वरैरी स्तुति कातै थ्यै। तैन्हैं बोलु, “सारी महिमा स्वर्गा मझ विराजमान परमेश्वरानि मेईया। धरती पनि तैन्हां मैहणुवां मझ शांति भुईया जैन्हेरी सै चिंता काता!”

![](https://cdn.door43.org/obs/jpg/360px/obs-en-23-08.jpg)

तां स्वर्गदूत चलि गियै। सैक्यै पुव्हाल बि अपड़िया भ्रैडा छडि करि तैस बच्चै तकांणा बैतलहम शहरानि चलि गियै। तैन्हैं गहि करी मरियम जां यूसुफ, जां यीशु चरनी मझ झुलौरै तकाय, जिहीं तेनि स्वर्गदूतै बोलौरू थियु। सै बड़ै खुश थ्यै। तां फिरी सैक्यै पुव्हाल तैठां किना अपड़िया भ्रैडा किनि चलि गियै। तैन्हैं जै किछ बि शुणु जां हैरू तैस सारूरै तेईनी परमेश्वरैरी स्तुति कातै थ्यै।

![](https://cdn.door43.org/obs/jpg/360px/obs-en-23-09.jpg)

पूर्व दिशाय किना कुछ मड़द यै जैन्हां तारा केरा भैद शुणाणैरा ज्ञान थ्या जां सैक्यै बड़ै बुद्धिमान थ्यै। तैन्हैं अक अदभुत तारा असमांणा मझ लधा। तैन्हैं बोलु कि ऐस तारै लेहिंणैरा मतलब ऐ आ कि यहूदिया केरा अक नवाँ राजा पेईदा भौरा। ऐठणीरै तेईनी तैन्हैं तैस बच्चै तकांणेरै तेईनी अपड़ै दैशा किना यात्रा कांनेरा फैसला केया। लम्मा सफर कांना किना बाद सैक्ये बैतलहम शहरा मझ पुज्जै जां सै तैस घरा मझ यै जेठी यीशु जां तेसैरै माँ-बब बेठौरै थ्यै।

![](https://cdn.door43.org/obs/jpg/360px/obs-en-23-10.jpg)

जेख्णी ऐन्हैं मड़दै यीशु अपड़ी मायि सेईतै लधा ता तैन्हैं जेणु टंकी करी तैसनी प्रणाम कियु, जां तेसैरी आराधना की। तैन्हैं यीशुनी कीमती चीजै यानि, सुन्ना, मुर्र, लोबान भेंट चाढ़ी। फिरी सै घरैनि वापस चलि गियै।

*मत्ती अध्याय 1; लूका अध्याय 2 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_23_128kbps.m4a

## 24. यूहन्ना यीशुनि बपतिस्मा दींता- कहानी

https://openbiblestories.org/l/cdj/story-24/

![](https://cdn.door43.org/obs/jpg/360px/obs-en-24-01.jpg)

इलीशिबा जां जकर्याहैरा पुत्र यूहन्ना, बड्डा भौ करी अक भविष्यवक्ता बंणी गिया। सै बणां मझ एकि सुनसान जगाय रिहींथ्या, जां जंगली मखीर जां टिड्डिया खाईंथ्या, जां सै ऊंटेरै शिरवा केरै लिकड़ै बंणा करी लाईंथ्या जां अपड़ी कमरी पनि चमड़ैरा पट्टा बन्ही रखींथ्या।

![](https://cdn.door43.org/obs/jpg/360px/obs-en-24-02.jpg)

बड़ै सारै मैहणु यूहन्नेरी गल्लै शुणनेरै तेईनी बणां मझ सुनसान जगायनी आईछी गियै। यूहन्नै तैन्हांनि बोलु, “अपड़ै मंन बदला जां अपड़ै पापा केरै तेईनी पश्चाताप करा केईनी कि स्वर्गैरा राज्य निड़ी यौउरा।“

![](https://cdn.door43.org/obs/jpg/360px/obs-en-24-03.jpg)

जेख्णी मैहणुवें यूहन्नैरा संदेश शुणा, ता तैन्हां मझां मतै सारै मैहणुवें पश्चाताप केया जां अपड़ै पापा किना मंन फैरा, जां यूहन्नै तैन्हांनि बपतिस्मा दित्ता। युहन्नै तकांणानि बड़ै सारै धार्मिक अगुवै बि यै, पण तैन्हैं अपड़ा मंन ना बदला जां अपड़ै पापा किना पश्चाताप ना केया।

![](https://cdn.door43.org/obs/jpg/360px/obs-en-24-04.jpg)

यूहन्नै यहूदी अगुवो सिंउ बोलु, “हे कीड़ै सैयि जैहरीलै मैहणुवो, अपड़ै पापा किना पश्चाताप करा जां अपड़ै मंन बदला। अबै परमेश्वर हरेक मैहणुनी जै अपड़ै पापा किना पश्चाताप ना कांना चांहथा, तैसनि सजा दींणैरै तैईनी बिल्कुल तैयार आ। ठीक तिहींये जिहीं कोई बुट बधिया फल ना दींतु, ता तैस बढी करी आगी मझ फुकि छडतै।”यूहन्नै सै पूरू कियु जै यशायाह भविष्यवक्तेरी किताबी मझ लिखौरू थियु, “तका, मूं बड़ी जल्दी ताउ किना पेहिलै अपड़ा संदेश दींणै बा भेईजणा, जै तिंडै तेईनी मैहणुवां केरै मंना त्यार करैला।”

![](https://cdn.door43.org/obs/jpg/360px/obs-en-24-05.jpg)

कुछ धार्मिक अगुवो युहन्नै किना पुच्छु क्या तु सै मसीह आ। यूहन्नै जवाब दित्ता, “आंउ मसीह नां, पण जै मूं बाद ऐईंणै बा आ, सै मूं किना बड़ा सामर्थी आ। आंउ तैसेरी जुत्ती चुकणेरै काबिल बि ना।”

![](https://cdn.door43.org/obs/jpg/360px/obs-en-24-06.jpg)

दुवें रौजै, यीशु गलील प्रदेशा मझ यरदन नदिरै किनारै बपतिस्मा लींणा या। जेख्णी युहन्नै सैक्या लधा ता तेनि बोलु, “तका, ऐ परमेश्वरैरा मेम्‍ना जै अपड़ा बलिदान दी करी संसारैरा पाप ऐपु पनि लै लींता।”

![](https://cdn.door43.org/obs/jpg/360px/obs-en-24-07.jpg)

पण यूहन्ना ऐ बोलि करी तैस रौकणा लगा, ‘मूं ता तिंडै हत्थै बपतिस्मा लींणैरी जरूरत आ, जां तु मूं किनि या?” यीशु तैस सिंउ बोलु, ‘ ऐम्हीं ता मूं ताउ किना बपतिस्मा लींणा, केईनी कि असुवां ऐम्हीं परमेश्वरैरी ईच्छा पूरी कांनी आ।” तां यूहन्नै तेसनी बपतिस्मा दित्ता, जबकि यीशु कोई पाप ना थ्या कियौरा।

![](https://cdn.door43.org/obs/jpg/360px/obs-en-24-08.jpg)

बपतिस्मा लींणा किना बाद जेख्णी यीशु पांणी किना निकोही करि भेईर या, ता परमेश्वरैरा आत्मा कबूतरेरै रूपा मझ उतरी करि तैस पनि पैई गिया। तेसै टैंमा परमेश्वरै स्वर्गा किना गल्ल की जां बोलु, “तु मिंडा प्यारा पुत्र आ। आंउ ताउ सिंउ प्रेम काता, जां आंउ ताउ किना बड़ा खुश आ।”

![](https://cdn.door43.org/obs/jpg/360px/obs-en-24-09.jpg)

परमेश्वरै यूहन्नै सिंउ बोलोरू थियु, “पवित्र आत्माय हैट उतरी करी कोसक्यै पनि पैई गांहणु जैसनि ताउ बपतिस्मा दींणा।” सेहै परमेश्वरैरा पुत्र आ परमेश्वर अक्कै आ। पण जेखणी यूहन्नै यीशुनि बपतिस्मा दित्ता, ता तेनि पिता परमेश्वर गल्लै काता शुणा, पुत्र परमेश्वर लधा, जै कि यीशु आ, जां तेनि पवित्र आत्मा लधौरा।

*मत्ती अध्याय 3; मरकुस 1:9-11; लूका 3:1 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_24_128kbps.m4a

## 25. शैतानेरै जरियै यीशुरी परीक्षा- कहानी

https://openbiblestories.org/l/cdj/story-25/

![](https://cdn.door43.org/obs/jpg/360px/obs-en-25-01.jpg)

यीशुरा बपतिस्मा भूंणा किना बाद, पवित्र आत्मा यीशु बणां मझ एकि सुनसान जगायनी लै गिया।तैस जगाय यीशु चाही धियाड़ी चाही राती रिय्हा। चाही रात-धियाड़ी यीशु किछ बि ना खाउ केईनी कि तेनि उपवास थ्या रखोरा, तां शैतान यीशुरी परीक्षा कांना या।

![](https://cdn.door43.org/obs/jpg/360px/obs-en-25-02.jpg)

यीशुनि भ्रुख लगी, तां शैतान परखणेरै तेईनी तैस सिंउ बोलणा लगा, “अगर तु परमेश्वरैरा पुत्र आ ता ऐन्हां घौड़ा केरी रोट्टी बंणा दै, ताकि तु खा सकिया!”

![](https://cdn.door43.org/obs/jpg/360px/obs-en-25-03.jpg)

पण यीशु शैताना सिंउ बोलु, ‘परमेश्वरेरै वचना मझ ऐ लिखोरू आ, जींतै रींहणानि सिर्फ रोट्टिरी ऐ जरूरत ना भूंती, पण हर एकि वचना पनि जै परमेश्वरेरै मुहां किना निकूंथा, जै तैस पनि चलैला सै जींता रैहला।”

![](https://cdn.door43.org/obs/jpg/360px/obs-en-25-04.jpg)

तां शैतान यीशु मंदरेरी चोट्टी पनि लै गिया जां सै मंदरेरी चुमांमणी पनि खड़ैरी दित्ता। जां तैस सिंउ बोलणा लगा, “अगर तु परमेश्वरैरा पुत्र आ ता ऐठां किना थल्लैनि छा मारी दै, केईनी कि पवित्र शास्त्रा मझ परमेश्वरैरा वचन बोलता कि: ‘परमेश्वर ताउ बचांणेरै तेईनी अपड़ै स्वर्गदूतानि हुक्म दैला, जां तैन्हां तु हत्था पनि चुकि लींणा। जां ऐहीं भूंणु कि तिंडै पायड़ानि घौड़ै ला ठौकर बि ना लगणी।”

![](https://cdn.door43.org/obs/jpg/360px/obs-en-25-05.jpg)

पण यीशु ऐहीं ना कियु जै शैतानै तैसनि कांनानि बोलु। ऐठणीरी वजाय, यीशु तैस सिंउ बोलु, “पवित्र शास्त्रा मझ परमेश्वर बोलता, कि तु प्रभु अपड़ै परमेश्वरा मेईं परखै।”

![](https://cdn.door43.org/obs/jpg/360px/obs-en-25-06.jpg)

फिरी शैतान यीशु बड़ै बड्डै जां उथड़ै पहाड़ा पनि लै गिया जां सारै संसारैरा राज-पाठ जां सारी धन-दौलतिरा रुतबा लुहाई करि, तैस सिंउ बोलणा लगा, “जै अगर तु जेणुं टंकी करी मिंडा आदर जां मिंडी भक्ति करैला, ता मूं ऐ सभ किछ ताउनि दी दींणु।”

![](https://cdn.door43.org/obs/jpg/360px/obs-en-25-07.jpg)

तां यीशु तैस सिंउ बोलु, “हे शैतान दूर भौई गा, केईनी कि पवित्र शास्त्रा मझ परमेश्वरैरा वचन बौलता कि तु प्रभु अपड़ै परमेश्वरैरा झुकि करी आदर कर, जां सिर्फ तेसैरी ऐ भक्ति कर।”

![](https://cdn.door43.org/obs/jpg/360px/obs-en-25-08.jpg)

यीशु शैतानेरी परीक्षाय किना हार ना मंनी, ऐठणीरै तेईनी शैतान तैठां किना चलि गिया। तां स्वर्गदूत आईछी करी तेसैरी सेवा कांना लगै।

*मत्ती अध्याय 4:1-11; मरकुस 1:12-13; लूका 4:1-13 किना अक बाइबलिरी कहानीमत्ती अध्याय 4:1-11; मरकुस 1:12-13; लूका 4:1-13 से एक बाइबल की कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_25_128kbps.m4a

## 26. यीशु अपड़ा सेवा कार्य शुरू काता- कहानी

https://openbiblestories.org/l/cdj/story-26/

![](https://cdn.door43.org/obs/jpg/360px/obs-en-26-01.jpg)

शैतानेरी परीक्षाईया केरा नंमा काना किना बाद, यीशु वापिस गलील इलाकै मझ या। ऐहै सै जगा आ जेठि सै रिहींथ्या। पवित्र आत्मा तैसनि बड़ी सामर्थ दींता थ्या, जां यीशु एकि जगाय किना होरी जगायनी गिया जां मैहणुवंनी शिक्षा दित्ती। सभनियें तेसैरै बारै मझ अच्छी गल्लै बोलि।

![](https://cdn.door43.org/obs/jpg/360px/obs-en-26-02.jpg)

यीशु नासरत नगरा मझ गिया। ऐ सै ग्राँ आ जेठि सै अपड़ै बचपणा मझ रिहींथ्या। आरामेरी धियाड़ी, सै आराधना कांनेरी जगाय गिया। अगुवो तेसनी यशायाह भविष्यवक्ता केरै संदेशैरी अक किताब दित्ती। सै चांहथै थ्यै कि सै तैस किताबि मझां पढ़िया। फिरी यीशु सैकेई किताब खौली करी तैस मझां अक भाग तैन्हां मैहणुवां केरै तेईनी पढ़ा।

![](https://cdn.door43.org/obs/jpg/360px/obs-en-26-03.jpg)

यीशु तैस किताबि मझां पढ़ना लगा “परमेश्वरै मूंनि अपड़ा आत्मा दितौरा ताकि आंउ कंगाला मझ खुशखबरिरा प्रचार करि सकूं। तेनि आंउ ऐठणीरै तेईनी भेईजौरा कि जै गुलाम अत्तै तैन्हां आजाद करूं, जै कांणै अत्तै सै दुबारै फिरी तका सकिया, जां जैन्हां मैहणु दबांतै अत्तै तैन्हांनि छुटकारा दियुं। ऐ सै टैंम भूंणा जेख्णी परमेश्वर असु पनि दयालु भूंणा जां असैड़ी मजत करैला।”

![](https://cdn.door43.org/obs/jpg/360px/obs-en-26-04.jpg)

फिरी यीशु बेशी गिया। सारै मैहणु तैस बड़ै ध्यान सिंउ तकांतै थ्यै। तैन्हां पता थ्या कि पवित्र शास्त्रेरा जै भाग तेनि ऐम्हीं पढ़ा सै मसीहरै बारै मझ थ्या। यीशु बोलु, “जै वचन ऐम्हीं मीं तुवाड़ै तेईनी पढ़ा, सै घटनाय इस टैंमा भूंती अत्ती।” सारै मैहणु हैरान थ्यै। तैन्हैं बोलु, “क्या ऐ यूसुफेरा पुत्र ना?”

![](https://cdn.door43.org/obs/jpg/360px/obs-en-26-05.jpg)

तां यीशु बोलु, “ऐ सच्च आ कि मैहणु ऐतियै भविष्यवक्तै ना मंनतै जै ग्राँ मझ पआ मोटियोरा भुईया। एलिय्याह भविष्यवक्तेरै टैंमा मझ, इस्राएल देशा मझ बड़ी विधवाय थी। पण जेख्णी साढ़ै त्रा साल झड़ी ना पेयि ता परमेश्वरै एलिय्याह इस्राएल मझ कोसक्यै विधवाईरी मजत कांनेरै तेईनी ना भेईजा। ऐठणीरी वजाय, तेनि एलिय्याह कोसक्ये होरै देशेरी विधवाय किनि भेईजा।”

![](https://cdn.door43.org/obs/jpg/360px/obs-en-26-06.jpg)

यीशु बोलणु जारी रखु, “जां एलीशा भविष्यवक्तेरै टैंमा मझ, इस्राएल देशा मझ बड़ै सारै मैहणु कौढ़ेरी बिमारी ला दुखी थ्यै। पण एलीशाय तैन्हां मझां कौ बि ठीक ना केया। तेनि सिर्फ इस्राएलेरै दुश्मणा केरा सेनापति नामान ठीक केया।” पण जै मैहणु यीशुरी गल्लै शुणतै थ्यै सै यहूदी थ्यै। ऐठणीरै तेईनी जेख्णी तैन्हैं सैक्या ऐ बौलता शुणा ता सैक्यै तैस पनि बड़ै गुस्सै भुवै।

![](https://cdn.door43.org/obs/jpg/360px/obs-en-26-07.jpg)

नासरतेरै मैहणुवें यीशु पकड़ी लिया जां तैस आराधना कांनेरी जगाय किना ध्रीड़ी करी भेईनी लै गियै। सैक्यै तैस खत्म कांनेरै तेईनी तैस छिढांणेरै तेईनी एकि शपड़ेरै शिरा पनि लै गियै। पण यीशु भीड़ी मझां निकोही गिया जां नासरत नगरा छडि करी चलि गिया।

![](https://cdn.door43.org/obs/jpg/360px/obs-en-26-08.jpg)

फिरी यीशु सारै गलील इलाकै मझ गिया, जां अक बड़ी बड्डी भीड़ तैस किनि यैई। सैक्यै ऐतियै बड़ा सारा मैहणुवां लै करि यै जै बड़ै बिमार जां अपंग थ्यै। तैन्हां मझां किछ मैहणु कांणै, किछ लट्टै किछ टांउणै जां किछ टट्टै थ्यै, जां यीशु मसीह सैक्यै सारै ठीक कियै।

![](https://cdn.door43.org/obs/jpg/360px/obs-en-26-09.jpg)

ऐठणीरै अलावा, बड़ै सारै ऐतियै मैहणु यीशु मसीह किनि अंणै जैन्हां मझ बुरी आत्माय थी। यीशु मसीह बुरी आत्माईयानि तैन्हां मझां निकोही गांहणैरा हुक्म दित्ता। सै बुरी आत्माय जौरै-जौरे बोलणा लगी, “तु परमेश्वरैरा पुत्र आ!” भीड़िरै मैहणु हैरान थ्यै जां तैन्हैं परमेश्वरैरी स्तुति की।

![](https://cdn.door43.org/obs/jpg/360px/obs-en-26-10.jpg)

फिरी यीशु बाराह मड़द चुणै जैन्हांनि तेनि अपड़ै खास चेलै बोलु। तैन्हैं खास चेलै तैस सेईतै यात्रा की जां तैस किना शिक्षा हासिल की।

*मत्ती अध्याय 4:12-25; मरकुस 1:14-15, 35-39; 3:13-21; लूका 4:14-30, 38-44 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_26_128kbps.m4a

## 27. दयालु सामरिरी कहानी

https://openbiblestories.org/l/cdj/story-27/

![](https://cdn.door43.org/obs/jpg/360px/obs-en-27-01.jpg)

अक धियाड़ी, यहूदी व्यवस्थायरा अक खास जानकार यीशु किनि या। सै सभनियांनी ऐ लुहाना चांहथा थ्या कि यीशु गलत रीति सिंउ शिक्षा दींता थ्या। ऐठणीरै तेईनी तेनि बोलु, “हे गुरू, अनन्त जीवन पांणेरै तेईनी मूं कितु कांनु?” यीशु जवाब दित्ता, “परमेश्वरेरी व्यवस्थाय मझ कितु लिखोरू आ?”

![](https://cdn.door43.org/obs/jpg/360px/obs-en-27-02.jpg)

तेनि मैहणु बोलु, “परमेश्वरैरी व्यवस्था बोलती कि अपड़ै परमेश्वरा सिंउ अपड़ै पूरै मंन सिंउ, प्रांण, सामर्थ, जां बुद्धी सिंउ प्रेम रख।” यीशु जवाब दित्ता, “तु इकदम सही आ! अगर तु ऐहीं करिया ता ताउनी जरूर अनन्त जीवन मेईंणा।“

![](https://cdn.door43.org/obs/jpg/360px/obs-en-27-03.jpg)

पण सै व्यस्थायरा खास जानकार मैहणुवंनी लुहाना चांहथा थ्या कि तेसैरा जीवन जींणैरा तरीका सही थ्या। ऐठणीरै तेईनी तेनी यीशु किना पुच्छु, “ठीक आ, ता मिंडा पड़ोसी केणु आ?”

![](https://cdn.door43.org/obs/jpg/360px/obs-en-27-04.jpg)

यीशु तैस व्यव्थायरै खास जानकारानि अक कहानी शुणाय जां कहानिरै जरियै तैसनी जवाब दित्ता। “अक यहूदी मैहणु थ्या जै एकि सिड़की बतै यरूशलेम किना यरीहो धेरै यात्रा काता थ्या।”

![](https://cdn.door43.org/obs/jpg/360px/obs-en-27-05.jpg)

“किछ डाकुवै सैक्या लधा जां तैस पनि हमला करि दित्ता। तैन्हैं तेसैरू सभ किछ लै लियु जां तैन्हैं सैक्या यौउता मारा कि सै मरनेरी हालती मझ भौ गिया। तां फिरी सैक्यै चलि गियै।”

![](https://cdn.door43.org/obs/jpg/360px/obs-en-27-06.jpg)

"तैस हादसै किना बाद, तेख्णी ऐ तेनि बत्तै अक यहूदी याजक ऐईंता। तेनि याजकै सैक्या मैहणु सिड़की पनि पियौरा हैरा। जेख्णी तेनि सैक्या मैहणु लधा ता सैक्या सिड़कै किना मुड़ि करी होरी बत्तै चलि गिया। तेनि सैक्या मैहणु जै सिड़कै मझ घायल पियौरा थ्या सै पूरी तराहि सिंउ अंणलधा करी छडा।”

![](https://cdn.door43.org/obs/jpg/360px/obs-en-27-07.jpg)

"ऐठां किना कुछ टैंम बाद, अक लेवी तेसै सिड़कै बतै या। (लेवी यहूदिया केरा अक गौत्र थ्या जैन्हैं मंदिरा मझ याजका केरी मजत केईथी।) सै लेवी बि सिड़केरी होरी बत्तै निकोही गिया। तेनि बि सैक्या मैहणु अंणलधा करी दित्ता।”

![](https://cdn.door43.org/obs/jpg/360px/obs-en-27-08.jpg)

“होरा जंणा जै तैस सिड़कै पनि या सैक्या सामरियैरा अक मड़द थ्या। (सामरी जां यहूदी योकिया सिंउ नफरत करींथ्यै।) तेनी सामरी सिड़कै पनि सैक्या मैहणु लधा। तेनी हैरू कि सै यहूदी थ्या, पण फिरी बि तेनि तैस पनि बड़ा तरस खा। जां सैक्या तैस किनि गिया जां तेसैरै जख्मा पनि पट्टी बन्हीं।”

![](https://cdn.door43.org/obs/jpg/360px/obs-en-27-09.jpg)

“फिरी तेनी सामरी सैक्या मैहणु अपड़ै गधै पनि रखा जां सैक्या तैस सिड़कै किना एकि सरांय मज लै गिया। जेठि तेनि तेसैरी देखभाल कांनी जारी रखी।”

![](https://cdn.door43.org/obs/jpg/360px/obs-en-27-10.jpg)

दुईं धियाड़ि, तैस सामरी अपड़ी यात्रा जारी रखणी जरूरी थी। तेनि तैस सरांयरै चोकीदारानि किछ धन दित्ता। तेनि तैस सेईतै बोलु, “ऐस मैहणुरी देखभाल करै। अगर ऐस धंनेरै अलावा तिंडा कुछ होरा धन खर्च भुवा ता वापिस ऐईछी करी मूं तिंडै तैन्हां खर्चा केरा भुगतान करी दींणा।

![](https://cdn.door43.org/obs/jpg/360px/obs-en-27-11.jpg)

फिरी यीशु तैस व्यवस्थायरै खास जांणकारा किना पुच्छु, “तुवै कितु सौचतै? ऐन्हां त्रियां मैहणुवां मझां केणुहां मैहणु ऐस मैहणुरा पड़ोसी आ जै मैहणु लुटौरा जां चुत्थौरा थ्या?” तेनी जवाब दित्ता, “ सेहै जै तैस पनि दयालु थ्या।” यीशु तैस सेईतै बोलु, “तु बि गा जां ऐतियु ऐ कर।”

*लूका अध्याय 10:25-37 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_27_128kbps.m4a

## 28. धनी जुवान राजा- कहानी

https://openbiblestories.org/l/cdj/story-28/

![](https://cdn.door43.org/obs/jpg/360px/obs-en-28-01.jpg)

अक धियाड़ि, एकि धनी जुवान राजै यीशु किना आईछी करी पुच्छु, “हे उत्तम गुरू, अनन्त जीवन पांणेरै तेईनी मूं कितु कांनु चेहिंथु?” यीशु तैस सिंउ बोलु, “तु मूंनि उत्तम केईनी बौलता? सिर्फ अक्कै उत्तम आ जां सैक्या परमेश्वर आ। पण अगर तु अनन्त जीवन पांणा चांहथा ता परमेश्वरेरी व्यवस्थायरा पालन कर।”

![](https://cdn.door43.org/obs/jpg/360px/obs-en-28-02.jpg)

तेनि राजै पुच्छु, मूं केणुहीं-केणुहीं अज्ञाईया केरा पालन कांनेरी जरूरत आ?” यीशु जवाब दित्ता, “खून मेईं काता, व्याभिचार मेईं काता(मतलब कोसक्यै जनेनी सिंउ शारीरिक सम्बन्ध मेईं बंणाता), चोरी मेईं काता, झूठ मेईं बोलता। अपड़ै मयि-बबैरा आदर करै, जां अपड़ै पड़ोसी सिंउ ऐपु समान प्यार करै।”

![](https://cdn.door43.org/obs/jpg/360px/obs-en-28-03.jpg)

पण तेनि जुवान मड़दै बोलु, “आंउ अपड़ै बचपणा किना ऐ ऐन्हां सभनियां अज्ञाईया केरा पालन काता यौउरा। मूं हमेशा जींतै रींहणेरै तेईनी अबै बि कितु कांनेरी जरूरत आ?“ यीशु तैस धेरै नजर की जां तैस सिंउ प्रेम केया।

![](https://cdn.door43.org/obs/jpg/360px/obs-en-28-04.jpg)

यीशु जवाब दित्ता, “अगर तु सिद्ध भूंणा चांहथा ता गहि करी अपड़ु सभ किछ बैचि दै जां सै पेईंसा गरीबा मझ बंडी दै, जां ताउनी स्वर्गा मझ धन मेईंणा। तां फिरी मूं पीछै आईछी गहि।”

![](https://cdn.door43.org/obs/jpg/360px/obs-en-28-05.jpg)

जै गल्लै यीशु तैस जुवान राजैनि बोली तैन्हां शुणी करी सै जुवान राजा बड़ा उदास भौ गिया, केईनी कि सै बड़ा शैठ थ्या जां सै अपड़ी सारी धन-दौलत दींणी ना थ्या चांहथा। सै मुड़ी करी यीशु किना चलि गिया।

![](https://cdn.door43.org/obs/jpg/360px/obs-en-28-06.jpg)

तां यीशु अपड़ै चैला सिंउ बोलु, “परमेश्वरेरै राज्य मझ शैठा मैहणुवां केरू गांहणु बड़ु जादा मुश्किल आ! हाँ, एकि शैठा मड़दानि परमेश्वरेरै राज्य मझ गांहणु तियौतु मुश्किल आ जिहीं कि सिन्हांणिरै पहेनै बतै ऊंटैरू निकूंहणु मुश्किल आ।”

![](https://cdn.door43.org/obs/jpg/360px/obs-en-28-07.jpg)

जै यीशु बोलु सैकियु चेलै शुणु ता सैक्यै हैरान रैहि गियै। तैन्हैं बोलु, “अगर ऐ ऐंहीं आ ता परमेश्वरा केणु बचांणा?”

![](https://cdn.door43.org/obs/jpg/360px/obs-en-28-08.jpg)

यीशु चैला पनि नजर दित्ती जां बोलु, “मैहणुवां केरै तेईनी अपांणैरा उद्धार कांना असम्भव आ। पण परमेश्वरेरै तेईनी कुछ बि कांनु असम्भव ना।”

![](https://cdn.door43.org/obs/jpg/360px/obs-en-28-09.jpg)

पतरसै यीशु सिंउ बोलु, “असै चैलै अपड़ु सभ किछ छडि करी ताउ पीछै चलि यौउरै अत्तै। ता असैड़ा ईनाम कितु भूंणा?”

![](https://cdn.door43.org/obs/jpg/360px/obs-en-28-10.jpg)

यीशु जवाब दित्ता, “हरेक मैहणु जेनि मिंडी वजाहि सिंउ घर, भाई, भींण, माँ बब या सम्पत्ति छडौरी आ, सैकियु तैसनि तैठां किना शाउ गुणा जादु मेईंणु, जां अनन्त जीवन बि मेईंणा। पण बड़ै सारै जै पेहिलै अत्तै सैक्यै पिछलै भूंणै जां बड़ै सारै जै पिछलै अत्तै सैक्यै पेहिलै भूंण।”

*मत्ती अध्याय 19:16-30; लूका 18:18-30 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_28_128kbps.m4a

## 29. निर्दयी दासेरी कहानी

https://openbiblestories.org/l/cdj/story-29/

![](https://cdn.door43.org/obs/jpg/360px/obs-en-29-01.jpg)

अक धियाड़ी, पतरसै यीशु किना पुच्छु, “हे स्वामी, मूं अपड़ै भाईनी कियोती बार माफ कांनु चेहिंथु, जेख्णी सै मिंडै खिलाफ पाप काता? क्या सत्त बार माफ कांनु चेहिंथु?” यीशु बोलु, “सत्त बारी ऐ ना, पण सत्थर बार माफ कर!” ऐठणीरे जरियै यीशुरा मतलब ऐक्या आ कि असुवां हमेशा माफ कांनु चेहिंथु। तेठणीरै तेईनी यीशु ऐकैई कहानी शुणांई।

![](https://cdn.door43.org/obs/jpg/360px/obs-en-29-02.jpg)

यीशु बोलु, “परमेश्वरैरा राज्य एकि राजै समान आ जै अपड़ै दासा किना लेखा लींणा चांहथा। तेसैरा अक दास 2,00,000 चाँदिरै सिक्का केरा अक बड़ा बड्डा कर्जदार थ्या।”

![](https://cdn.door43.org/obs/jpg/360px/obs-en-29-03.jpg)

पण तेनि दासै अपड़ा कर्ज ना चुकाईया, ऐठणीरै तेईनी राजै बोलु, “ऐसैरा कर्ज चुकता कांनेरै तेईनी ऐस मड़दा जां ऐसैरै पुरै परिवारा दासेरै रूपा मझ बैची दिया।”

![](https://cdn.door43.org/obs/jpg/360px/obs-en-29-04.jpg)

फिरी सैक्या दास राजेरै सामणै जेणुवां केरै भारै पेया जां बोलु, “छंदै मूं पनि रैहम कर, आंउ अपड़ै कर्जैरी पूरी रकमिरा भुगतान करी देला। राजै तैस दासा पनि दया की, ऐठणीरै तेईनी राजै तेसैरा सारा कर्ज माफ करि दित्ता जां सै दास गांहणा दित्ता।”

![](https://cdn.door43.org/obs/jpg/360px/obs-en-29-05.jpg)

पण जेख्णी सै दास राजै किना मिलि करी भेईनी गिया, ता तैसनी तेसैरा अक साउगी दास मेआ जै तेसेरै चोउवा महीनैरी मजदूरिरा कर्जदार थ्या। तेनि दासै सै अपड़ा साउगी दास पकड़ी लिया जां बोलु, “जै ताउ पनि मिंडा कर्जा आ तेसैरा मूनि भुगतान कर!”

![](https://cdn.door43.org/obs/jpg/360px/obs-en-29-06.jpg)

“ सैक्या साउगी दास जेणुवां केरै भारै पेया जां बोलु, “छंदै मूं पनि रैहम कर, आंउ अपड़ै कर्जैरी पूरी रकमिरा भुगतान करी देला। पण ऐठणीरी वजाय, तेनी दासै अपड़ा साउगी जैलखानै मझ सुटि दित्ता जेख्णी तेईनी सै तैस कर्जैरा भुगतान ना करी दिया।”

![](https://cdn.door43.org/obs/jpg/360px/obs-en-29-07.jpg)

“जै किछ बि तैठि भूं तैस हैरी करी सेक्यै होरै दास बड़ै परैशान भौ गियै। सैक्यै राजै किनी गियै जां तैसनी सभ किछ शुणां दित्तु।”

![](https://cdn.door43.org/obs/jpg/360px/obs-en-29-08.jpg)

“राजै सैक्या दास शदा जां तेसनी बोलु, “हे दुष्ट दास! मीं तिंडा कर्जा ऐठणीरे तेईनी माफ केईथ्या केईनी कि तीं मूं सिंउ छन्दै केईथ्यै। ताउ बि तिहीयें कांनु चेहिंथु थियु। राजा यौउता गुस्सै थ्या कि तेनि सैक्या दास जैलखानै मझ सुटि दित्ता जेख्णी तेईनी सैक्या अपड़ै सारै कर्जैरा भुगतान ना करी दिया।”

![](https://cdn.door43.org/obs/jpg/360px/obs-en-29-09.jpg)

तां यीशु बोलु, “मिंडा पिता जै स्वर्गा मझ विराजमान आ तुहां सभनियां सिंउ ऐहिंयो करेला अगर तुवै अपड़ै भाईनी अपड़ै दिल्ला किना माफ ना कातै।”

*मत्ती अध्याय 18:21-35 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_29_128kbps.m4a

## 30. यीशु पंजा हजारा मैहणुवंनी रोट्टी खलांता- कहानी

https://openbiblestories.org/l/cdj/story-30/

![](https://cdn.door43.org/obs/jpg/360px/obs-en-30-01.jpg)

यीशु अपड़ै खास चेलै प्रचार कांननी जां मैहणुवंनी शिक्षा दींणेरै तेईनी अलग-अलग ग्राँनि भेईजै। जेख्णी सैक्यै तैठि वापस पुज्जै जेठि यीशु थ्या ता तैन्हैं तैसनि शुणांउ कि तैन्हैं कितु केईथ्यु। तां यीशु सैक्यै सारै ऐपु सेइतै झीलिरै होरै पासै एकि शांत जगायनी कुछ टैंम सेईतै बेशणेरै तेईनी शदाय। फिरी सैक्यै एकि किश्ती पनि चढ़ी करी झीलिरै होरै पासै चलि गियै।

![](https://cdn.door43.org/obs/jpg/360px/obs-en-30-02.jpg)

पण तैठि बड़ै सारै ऐतियै मैहणु थ्यै जैन्हैं यीशु जां तेसैरै चेलै किश्ती पनि गांहथै लधै। तैन्हैं मैहणुवें तैन्हां आघै झीलि पार पुजणेरै तेईनी झीलिरै ब्रखै-ब्रखै दाउड़तै रिय्है। फिरी जेख्णी यीशु जां तेसैरै चेलै झीली पार पुज्जै ता मैहणुवां केरी अक बड़ी बड्डी भीड़ तैन्हां पेहिलै तैठि भाती थी।

![](https://cdn.door43.org/obs/jpg/360px/obs-en-30-03.jpg)

तैस भीड़ी मझ जनेनियां जां बच्चा छडी करि लगभग पंजा हजारा किना जादै मड़द थ्यै। यीशु तैन्हां मैहणुवंनी बड़ी भारी तरस यैई। यीशुरै तेईनी सैक्यै मैहणु तैन्हां भ्रैडा सैयि थ्यै जैन्हैरा कोई पुव्हाल ना थ्या। ऐठणीरै तेईनी यीशु तैन्हांनी शिक्षा दित्ती जां तैन्हां मझ जै बिमार मैहणु थ्यै सैक्यै सारै ठीक कियै।

![](https://cdn.door43.org/obs/jpg/360px/obs-en-30-04.jpg)

सन्हेरै टैंमा, चेलै यीशु सिंउ बोलु, “अबै बड़ी हांण भौ गैई जां अढा-बढा कोई ग्राँ बि ना। ऐन्हां मैहणुवां ऐठां किना विदा कर ताकि ऐक्यै गहि करी खांणेरै तेईनी किछ लै लिया।”

![](https://cdn.door43.org/obs/jpg/360px/obs-en-30-05.jpg)

पण यीशु चैला सिंउ बोलु, “तुवै ऐन्हांनि खांणेरै तेईनी देया!” तैन्हैं जवाब दित्ता, “असै ऐहीं किहीं करी सकतै? असुवां किनी सिर्फ पंज रोट्टी जां दो मछली ऐ अत्ती।”

![](https://cdn.door43.org/obs/jpg/360px/obs-en-30-06.jpg)

यीशु अपड़ै चैला सिंउ बोलु कि तुवै भीड़िरा मैहणुवां पंजाह-पंजाह जंणा घहा पनि पांती ला करी बेशाई देया।

![](https://cdn.door43.org/obs/jpg/360px/obs-en-30-07.jpg)

तां फिरी यीशु सैकेई पंज रोट्टी जां दो मछली लेई जां स्वर्गा धेरै हैरू, जां तैन्हां रोट्टिया केरै तेईनी परमेश्वरैरा धन्यवाद केया।

![](https://cdn.door43.org/obs/jpg/360px/obs-en-30-08.jpg)

फिरी यीशु तैन्हां रोट्टिया जां मछलिया केरै भन्नी-भन्नी करि टुकड़ै कियै। तेनि मैहणुवंनी दींणेरै तेईनी अपड़ा चैला धेरै सैक्यै टुकड़ै दी दित्तै। चेलै तैन्हां रोट्टिया जां मछलिया बंडतै रिय्है, सारै मैहणु खा करी रज्जी गियै, पण तांबी सैकेई रोट्टी ना मुक्की।

![](https://cdn.door43.org/obs/jpg/360px/obs-en-30-09.jpg)

तैठां बाद, चेलै सैकेई रोट्टी जां मछली किट्ठी की जै बचि गेईथी, जां तैन्हां बचोरिया रोट्टियै ला बाराह टोकरी होरी भरी गेईथी! सैकेई सारी रोट्टी जां मछली तैन्हां पंजा रोट्टिया जां दुवां मछलिया किना येईथी।

*मत्ती अध्याय 14:13-21; मरकुस 6:31-44; लूका 9:10-17; यूहन्ना 6:5-15 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_30_128kbps.m4a

## 31. यीशु पांणी पनि चलता- कहानी

https://openbiblestories.org/l/cdj/story-31/

![](https://cdn.door43.org/obs/jpg/360px/obs-en-31-01.jpg)

पंजा हजारा मैहणुवंनी रोट्टी खलांणा किना बाद, यीशु अपड़ै चैलानि किश्ती मझ गांहणेरै तेईनी बोलु। तैन्हांनि तेनि बोलु तुवै झीलिरै होरै पासैनि चलि गहा जबकि सैक्या थौड़ै टैंमेरै तेईनी तैठिऐ रुकि गिया। फिरी चेलै चलि गियै जां यीशु सैकैई मैहणुवां केरी भीड़ विदा की, कि सैक्यै अपड़ै-अपड़ै घरैनि चलि गहिया। ऐठां किना बाद, यीशु प्रार्थना कांनेरै तेईनी ऐकि पर्वता पनि चलि गिया। तैठि से अकेला थ्या, जां तेनि राती बड़ी हांण तेईनी प्रार्थना की।

![](https://cdn.door43.org/obs/jpg/360px/obs-en-31-02.jpg)

तैस टैंमा, चेलै अपड़ी किश्ती बहांतै चलौरै थ्यै, पण हवा तैन्हां धेरै बड़ी जौर सिंउ चलौरी थी। रात बड़ी भौ थी गियौरी सैक्यै हालै तेईनी झीली बिच मझ पुजौरै थ्यै।

![](https://cdn.door43.org/obs/jpg/360px/obs-en-31-03.jpg)

तैस टैंमा यीशु प्रार्थना कांनी खत्म की जां अपड़ा चैला किनी वापिस चलि पेया। सै किश्ती धेरै गांहणेरै तेईनी पांणी बेहीं चलणा लगा।

![](https://cdn.door43.org/obs/jpg/360px/obs-en-31-04.jpg)

तां चेलै सैक्या लधा। सैक्यै बड़ै डरी गियै, केईनी कि तैन्हैं सौचु कि सै कोई भूत आ। यीशु पता थ्या कि सै बड़ै डरी गियै, ऐठणीरै तेईनी तेनि हक दी करी बोलु, “ डरा मेईं आंउ यीशु आ!”

![](https://cdn.door43.org/obs/jpg/360px/obs-en-31-05.jpg)

तां पतरसै यीशु सिंउ बोलु, “हे प्रभु, अगर ऐक्या जै पांणी बेहीं चलता सै सच्च मझ तु आ ता मूंनि बि पांणी बेहीं चलि करी ऐपु किनि ऐईंणैरा हुक्म दै।” यीशु पतरसा सिंउ बोलु, “आ!“

![](https://cdn.door43.org/obs/jpg/360px/obs-en-31-06.jpg)

फिरी पतरस किश्ती पना उतरी गिया जां यीशु किनि गांहणेरै तेईनी पांणी बेहीं चलणा लगा। पण थौड़ा आघै गहि करी, तेनि अपड़ा टीरा केरी नजर यीशु किना फैरी ली जां पांणिरी छाल्ही जां तैज हवा महसूस कांनी शुरू करि दित्ती।

![](https://cdn.door43.org/obs/jpg/360px/obs-en-31-07.jpg)

तां पतरस तैन्हां छाल्हिया जां तैज हवाय धेरै डरि गिया जां पांणी मझ डुबणां लगि पेया जां चिंडै दींणा लगा, “हे प्रभु, मूं बचा!” यीशु तेसै टैंमा अपड़ा हत्थ आघै केया जां सैक्या पकड़ी लिया। तां तेनि पतरसा सिंउ बोलु, “तिंडा विश्वास बड़ा घट आ! तीं सही सलामत मूं किनि पुजणेरै तेईनी मूं पनि भरौसा किना केया?”

![](https://cdn.door43.org/obs/jpg/360px/obs-en-31-08.jpg)

तां यीशु जां पतरस किश्ती पनि चढ़ी गियै, तां इकदम हवा चलणी बंद भौ गैयि। पांणी शांत भौ गियु। चेलै हैरान भौ करी यीशु आघै जेणुवां केरै भारै पैई गियै। तैन्हैं यीशुरी आराधना की जां तैस सिंउ बोलु, “सच मझ तु परमेश्वरैरा पुत्र आ।”

*मत्ती अध्याय 14:22-33; मरकुस 6:45-52; यूहन्ना 6:16-21 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_31_128kbps.m4a

## 32. यीशु बुरी आत्माय किना पीड़ित मैहणु जां एकि बिमार जनेनी ठीक काता- कहानी

https://openbiblestories.org/l/cdj/story-32/

![](https://cdn.door43.org/obs/jpg/360px/obs-en-32-01.jpg)

यीशु जां तेसैरै चेलै अपड़ी किश्ती मझ तैस इलाकैनि गियै जेठि गिरासेनी मैहणु रिहींथ्यै। सैक्यै तैस इलाकै मझ पुज्जै जां किश्ती मझां उतरी गियै।

![](https://cdn.door43.org/obs/jpg/360px/obs-en-32-02.jpg)

तैठि अक मैहणु थ्या जै बुरी आत्माय किना पीड़ित थ्या।

![](https://cdn.door43.org/obs/jpg/360px/obs-en-32-03.jpg)

ऐस मैहणु मझ यौउता जौर थ्या कि ऐस कोई बि काबु ना करि सकींथ्या। केही बारी ता मैहणुवें ऐसेरै हत्थ जां पायड़ शंगऐ ला बि बन्हैं, पण सै तैन्हां बि त्रौड़ी छडींथ्या।

![](https://cdn.door43.org/obs/jpg/360px/obs-en-32-04.jpg)

सैक्या मैहणु तैस इलाकै मझ कब्रिया मझ रिहींथ्या। ऐक्या मैहणु पूरी रात पूरी धियाड़ी चिंडै दींता रिहींथ्या। सै लिकड़ै ना लाईंथ्या जां रौज अपांणा घौड़ै ला घायल करींथ्या।

![](https://cdn.door43.org/obs/jpg/360px/obs-en-32-05.jpg)

सैक्या मैहणु दाउड़ी करी यीशु किनि या जां जेणु टंकि दित्तै। तां यीशु तैस मैहणु अंतरी बुरी आत्माय सिंउ गल्ल की जां बोलु, “ऐस मैहणु मझां भेईर निकोही आ!”

![](https://cdn.door43.org/obs/jpg/360px/obs-en-32-06.jpg)

तेनि बुरी आत्माय जौरै चिंड दित्ती, “हे यीशु, परम प्रधान परमेश्वरेरै पुत्र, तिंडा मूं सिंउ कितु कंम? छंदै मूं मेईं सताय!” तां यीशु तैस बुरी आत्माय किना पुच्छु, “तिंडु नाँ कितु आ?” तेनि जवाब दित्ता, “ मिंडु नाँ सैना आ, केईनी कि असै बड़ी अत्ती।” (रोमी सैनाय मझ केही हजार सैनिका केरा अक झुन्ड अक “सैना“ भुईंथी।)

![](https://cdn.door43.org/obs/jpg/360px/obs-en-32-07.jpg)

तैन्हैं बुरी आत्माईयै यीशु सिंउ विंनती की, “छंदै असुवां ऐस इलाकै किना भेईर मेईं भेईजै!” तैठि नीड़ ऐ पहाड़ा पनि सूंरा केरा अक झुंड चरता थ्या। ऐठणीरै तेईनी बुरी आत्माईयै यीशु सिंउ विंनति की, “छंदै असुवां ऐन्हां सूंरा मझ भेईजी दै!” यीशु बोलु, “ठीक आ, ऐन्हां मझ चलि गहा!”

![](https://cdn.door43.org/obs/jpg/360px/obs-en-32-08.jpg)

फिरी सैकेई बुरी आत्माय तेस मैहणु मझां निकोही करी तैन्हां सूंरा केरे झुन्डा मझ चलि गेई। सै सूंर दाउड़ी करी एकि टिल्लै पना झीली मझ पैई गियै जां सारै डुबि करी मरी गियै। तैस झुन्डा मझ लगभग 2,000 सूंर थ्यै।

![](https://cdn.door43.org/obs/jpg/360px/obs-en-32-09.jpg)

तैठी तैन्हां सूंरा केरी देखभाल कांनारै मैहणु थ्यै। तैठि जै किछ बि भूं तैन्हैं सै सभ हैरू जां सैक्यै नगरानि नशी गियै। यीशु तैठि जै किछ बि केईथ्यु नगरा गहि करी तैन्हैं सभनियांनि शुणाउ। तैस नगरेरै मैहणु निकोही यै जां सैक्या मैहणु लधा जैस मझ बुरी आत्माय थी। सै शांति सिंउ, लिकड़ै लाउरै, जां एकि आम मैहणुरै व्यवहारा सैयि बेठौरा थ्या।

![](https://cdn.door43.org/obs/jpg/360px/obs-en-32-10.jpg)

सैक्यै मैहणु बड़ै डरौरै थ्यै जां यीशुनि चलि गांहणानि बोलु। फिरी यीशु किश्ती पनि चढ़ी गिया। सैक्या मैहणु जैस मझ बुरी आत्माय थी तेनि यीशु सिंउ बोलु, छंदै मूं बि ऐपु सेईतै ऐईंणा दै।

![](https://cdn.door43.org/obs/jpg/360px/obs-en-32-11.jpg)

पण यीशु तैस सिंउ बोलु, “नहीं। आंउ चांहथा कि तु घरै गहि करी सभनियांनि शुणा कि परमेश्वरै तिंडै तेईनी कितु कियु। तैन्हांनि शुणा कि किहीं परमेश्वरै ताउ पनि दया केईथी।

![](https://cdn.door43.org/obs/jpg/360px/obs-en-32-12.jpg)

ऐठणीरै तेईनी सै मैहणु चलि गिया जां सभनियांनि ऐठणीरे बारै मझ शुणांउ जै यीशु तेसैरै तेईनी केईथ्यु। तेसैरी कहानी शुणी करी हर मैहणु शुश्त भौ गेईथ्या।

![](https://cdn.door43.org/obs/jpg/360px/obs-en-32-13.jpg)

यीशु झीलिरी होरै पासै वापस चलि या। तेसैरै तैठि पुजणा किना बाद, अक बड़ि बड्डी भीड़ तेसैरै चोउवो पासै किट्ठी भौ गैयि जां तैस दबांणा लगि पैयि। तैस भीड़ी मझ अक जनानी थी जैसनी बाराह साला किना खून चलणैरी बिमारी थी, सेकैई ऐस बिमारी किना बड़ी दुखी थी। तेनि अपड़ा सारा पेईंसा डाक्टरी इलाजा पनि ला थ्या दितौरा ताकि सै तैस बिमारी किना ठीक भौ सकिया, पण तेसैरी बिमारी होरी बि बिगड़ी गैयि।

![](https://cdn.door43.org/obs/jpg/360px/obs-en-32-14.jpg)

तेनि जनेनी शुणौरू थियु कि यीशु केही बिमार मैहणु ठीक केईथ्यै, “तेनि मंना मझ ठांनी लियु कि अगर आंउ सिर्फ यीशुरै लिकड़ै ऐ छू लियुं ता आंउ ठीक भौ गांहणी!” ऐठणीरै तेईनी सेकैई यीशु पीछै यैई जां तेसैरा कपड़ा छू लिया। जिहीं ऐ तेनि यीशुरा कपड़ा छुत्ता, तेख्णी ऐ खून चलणा बंद भौ गिया।

![](https://cdn.door43.org/obs/jpg/360px/obs-en-32-15.jpg)

इकदम ऐ, यीशु पता लगि गिया कि तेस मझां सामर्थ नकौथी। ऐठणीरै तेईनी तेनी पीछै मुड़ि करि पुच्छु, ‘आंउ कुनि छुत्ता?” चेलै जवाब दित्ता, “ऐठि यौउतै सारै मैहणुवें तिंडै चोउवो पासै भीड़ लाउरी आ, जां ताउ शिंडै पूंते अत्तै। ता तीं केईनी पुच्छु कि आंउ कुनि छुत्ता?”

![](https://cdn.door43.org/obs/jpg/360px/obs-en-32-16.jpg)

सेकैई जनानी यीशुरै सामणै कंपती जां बड़ी जादी डरौरी अपड़ा जेणुवां केरै भारै बेशि गैयि। तां तेनि तैसनि शुणा दित्तु कि तेनि कितु कियु, जां ऐ बि कि सै ठीक भौ गैयि। यीशु तैस जनेनी सिंउ बोलु, “तिंडै विश्वासै तु ठीक की। शांति सिंउ गा।”

*मत्ती अध्याय 8:28-34; 9:20-22; मरकुस 5:1-20; 5-24-34 लूका 8: 26-39; 8:42-48 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_32_128kbps.m4a

## 33. एकि किसानैरी कहानी

https://openbiblestories.org/l/cdj/story-33/

![](https://cdn.door43.org/obs/jpg/360px/obs-en-33-01.jpg)

अक धियाड़ि, यीशु झीलिरै किनारै थ्या। सै मैहणुवां केरी एकि बड़ि बड्डी भीड़ीनि शिक्षा थ्या दींता। तैस शिक्षाय शुणना ऐत्थरै सारै मैहणु यै कि यीशु किनी तैन्हां सभनियां सिंउ गल्ल कांनेरै तेईनी जगा ऐ ना बची। ऐठणीरे तेईनी सै पांणी मझ खड़ियोउरी किश्ती पनि चढ़ी गिया। तैठि सै बेशि गिया जां मैहणुवंनी शिक्षा दींणा लगा।

![](https://cdn.door43.org/obs/jpg/360px/obs-en-33-02.jpg)

यीशु तैन्हांनि ऐकैई कहानी शुणांई, “अक किसान बी बाणांनि भेईर निकौथा। जेख्णी सै हत्थै ला बी उशाता थ्या ता किछ बी बत्तै मझ पै गियु। पण पक्षियै सै सारू बी जै बत्तै मझ पियौरू थ्यु सभ खा लियु।”

![](https://cdn.door43.org/obs/jpg/360px/obs-en-33-03.jpg)

“कुछ बी घोड़ूली जमीनी पनि पियु जेठि बड़ि घट मिट्टी थी। घोड़ूली जमीनी पनि जै बी पियु सै बड़ी जल्दी जमीं गियु, पण तैन्हेरी जै सीरै थी तैन्हांनी मिट्टी मझ गांहणानि बारा ना थ्या। ऐठणीरी वजाय सिंउ जेख्णी दीह निकोथु जां गर्मी भुई ता सैकेई बुट्टी मुरझाय गेई जां शुकि गेई।”

![](https://cdn.door43.org/obs/jpg/360px/obs-en-33-04.jpg)

“ता किछ बी झिल्हा केरै बिच पियु। सैकियु बी जै झिल्हा मझ पियु सै मोटियूंणु शुरू भौ गियु, पण फिरी झिल्हा मझ सै खड़ु ना निकोथु सै बी झिल्है दबा लियु। ऐठणीरै तेईनी जै झिल्है बाई जमीनी मझ बी बाउरू थ्यु तैन्हां बुट्टा पना कोई बि फसल पेईदा ना भुई।”

![](https://cdn.door43.org/obs/jpg/360px/obs-en-33-05.jpg)

“होरू बी बधिया जमीनी पनि पियु। सै बी मोटियु जां जेत्थरू बी बाउरू थ्यु तैन्हां किना 30 गुणा, 60 गुणा, जां यो तेईनी कि 100 गुणा अनाज पेईदा भूं। जै कोई बि परमेश्वरेरै पीछै चलणा चांहथा, सै तैस गल्लै पनि ध्यान देया जै आंउ बोलता!”

![](https://cdn.door43.org/obs/jpg/360px/obs-en-33-06.jpg)

ऐनि कहानी चेलै उलझनी मझ बारी छडै। ऐठणीरे तेईनी यीशु तैन्हांनि ऐस कहानिरा मतलब शुणां, “बी जै आंउ तुहांनी शुणाता, सै बी परमेश्वरैरा वचन आ। सै बत्त अक ऐतिया मैहणु आ जै परमेवरैरा वचन शुणता, पण तैस समझता ना। तां शैतान तैस किना तैस वचना चौरी नींता। मतलब शैतान तैस वचना समझणां किना दूर रखता।”

![](https://cdn.door43.org/obs/jpg/360px/obs-en-33-07.jpg)

“सेकैई घोड़ूली जमीन ऐतिया मैहणु आ जै परमेश्वरेरा वचन ता शुणता जां खुशी सेईतै तैस मंनि लींता। पण जेख्णी परैशानी बा टैंम ऐईंता, या जेख्णी होरै मैहणु तैस सतांतै, ता सै परमेश्वरा किना दूर भौ गांहथा। मतलब सै परमेश्वरा पनि भरौसा कांना बंद करि दींता।”

![](https://cdn.door43.org/obs/jpg/360px/obs-en-33-08.jpg)

“सै झिल्है बाई जमीन ऐतिया मैहणु आ जै परमेश्वरैरा वचन ता शुणता, पण सै बड़ि सारिया गल्ला केरी चिंता कांनि शुरू करि दींता, जां सै बड़ा जादा पेईंसा कमूंणैरी कोशिश काता, जां सै बड़ी सारी चीजै हासिल कांनेरी कोशिश काता। कुछ टैंम बाद, अबै सैक्या परमेश्वरा सिंउ प्रेम कांनेरै काबिल ना। ऐठणीरै तेईनी जै तेनि परमेश्वरेरै वचना किना शिख्रोरू थियु सै तैस परमेश्वरा खुश कांनेरे काबिल ना काता। ऐठणीरै तेईनी सै फलवंत ना भूंता।”

![](https://cdn.door43.org/obs/jpg/360px/obs-en-33-09.jpg)

“पण बधिया जमीन सै मैहणु आ जै परमेश्वरैरा वचना शुणता, तैस पनि विश्वास काता, जां केही गुणा फल पेईदा काता।”

*मत्ती अध्याय 13:1-8, 18-23; मरकुस 4:1-8 13-20; लूका 8-4-15 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_33_128kbps.m4a

## 34. यीशु होरनियां कहानियां केरी शिक्षा दींता- कहानी

https://openbiblestories.org/l/cdj/story-34/

![](https://cdn.door43.org/obs/jpg/360px/obs-en-34-01.jpg)

यीशु मसीह परमेश्वरेरै राज्यरै बारै मझ होरी बि बड़ी कहानी शुणांई। उदाहरणेरै तेईनी तेनि बोलु, “परमेश्वरैरा राज्य एकि राईरै बीआ सैयि आ जै कुनिक्यै अपड़ी पट्टी मझ बा दित्तु। तुहां पता कि राईरू बी सारा बीआ मझ सभनियां हल्कु आ।”

![](https://cdn.door43.org/obs/jpg/360px/obs-en-34-02.jpg)

“पण जेख्णी राईरू बी मोटि गांहथु ता सै बगीचै मझ सारा बुट्टा मझ सभनियां बड्डु भौ गांहथु, यौउतु बड्डु कि पक्षी आईछी करी तैसेरी डाईया पनि आराम कातै।”

![](https://cdn.door43.org/obs/jpg/360px/obs-en-34-03.jpg)

यीशु अक होरी कहानी शुणाय, “परमेश्वरैरा राज्य खमीरा सैयि आ जैस अंणि करि अक जनानी अट्टु मझ मिला दींति जां फिरी सै सारू अट्टु मझ फैली गांहथा।”

![](https://cdn.door43.org/obs/jpg/360px/obs-en-34-04.jpg)

स्वर्गैरा राज्य तैस खजाने सैयि आ जै कुनिक्यै पट्टी मझ छपा दित्ता। कौसक्यै होरै मैहणु सैक्या खजाना मैयि गिया जां तेनि तैस हासिल कांनेरी बड़ी ईच्छा की। ऐठणीरै तेईनी तेनि सै फिरी दबि छडा। सैक्या यौउता खुश थ्या कि तेनि गहि करि अपड़ु सभ किछ बैचि दित्तु ताकि सैक्या तैस पट्टी खरीदि सकिया जेठि सैक्या खजाना थ्या।”

![](https://cdn.door43.org/obs/jpg/360px/obs-en-34-05.jpg)

“स्वर्गैरा राज्य एकि बड़ै कीमती शुद्ध मोतिरै समान बि आ। जेख्णी कौ मोतिरा व्यापारी तैस हासिल करि लींता ता सै तैस खरीदणेरै तेईनी अपड़ु सभ किछ बैचि दींता।”

![](https://cdn.door43.org/obs/jpg/360px/obs-en-34-06.jpg)

तैठि किछ मैहणु थियै जै सोचींथ्यै कि परमेश्वर तैन्हां ऐठणीरे तेईनी स्वीकार करैला कि सैक्यै भलै कंम कातै अतै। ऐक्यै मैहणु तैन्हां मैहणुवां तुच्छ समझींथ्यै जै ऐन्हां कंमा ना करींथ्यै। ऐठणीरै तेईनी यीशु तैन्हांनि ऐकैई कहानी शुणांय: “दो मड़द थ्यै जां दोईयो प्रार्थना कांनेरै तेईनी मंदरा गियै। तैन्हां मझां अक चुंगी लींणार थ्या जां दुवां धार्मिक अगुवा थ्या।”

![](https://cdn.door43.org/obs/jpg/360px/obs-en-34-07.jpg)

“तेनि धार्मिक अगुवे ऐकैई प्रार्थना की कि, “हे परमेश्वर, तिंडा धन्यवाद भुईया कि आंउ होरनियां मैहणुवां सेयि डाकू, अन्याय कांनार मैहणु, जां व्याभिचारी जां यो तेईनी कि ऐठि बेठौरै ऐस चुंगी लींणारै सैयि अक पापी ना।”

![](https://cdn.door43.org/obs/jpg/360px/obs-en-34-08.jpg)

“उदाहरणेरै तेईनी, आंउ हर हफ्तै दो बारी उपवास रखता, जां जै मूंनि धन जां समान मेईंता तेठणीरा दसुवां हिस्सा ताउनि दींता।”

![](https://cdn.door43.org/obs/jpg/360px/obs-en-34-09.jpg)

“पण सैक्या चुंगी लींणै बा तैस धार्मिक अगुवे किना बड़ा दूर खड़ा भौ गिया। तेनि स्वर्गा धेरै हैरू बि ना। ऐठणीरी बजाए, तेनि अपड़ि मुट्ठि ला अपड़ि छाति पिट्टी जां प्रार्थना की, ‘हे परमेश्वर, कृपा करि करी मूं पनि दया कर केईनी आंउ अक पापी आ।’”

![](https://cdn.door43.org/obs/jpg/360px/obs-en-34-10.jpg)

फिरी यीशु बोलु, “आंउ तुहां सिंउ सच बौलता, परमेश्वरै तैस चुंगी लींणै बाऐरी प्रार्थना शुणी जां सैक्या धर्मी घोषित केया। पण तेनि तैस धार्मिक अगुवेरी प्रार्थना पसंद ना की। परमेश्वरा हरेक घमंडिरू शिर झुकांणु, पण तैस हर तैस मैहणुनि आदर दींणा जै अपांणा नम्र काता।”

*मत्ती अध्याय 13:31-33, 44-46; मरकुस 4:30-32; लूका 13:18-21; 18:9-14 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_34_128kbps.m4a

## 35. दयालु बाबेरी कहानी

https://openbiblestories.org/l/cdj/story-35/

![](https://cdn.door43.org/obs/jpg/360px/obs-en-35-01.jpg)

अक धियाड़ि, यीशु तैन्हां बड़ा सारा मैहणुवंनी शिक्षा दींता थ्या जै तैसेरी गल्लै शुणनेरै तेईनी किट्ठै भौरै थ्यै। ऐक्यै मैहणु चुंगी लींणै बाऐ जां तैन्हां साउगा होरै बि बड़ै मैहणु थ्यै जैन्हैं मूसेरी व्यवस्थायरा पालन कांनेरी कोशिश ना केईथी।

![](https://cdn.door43.org/obs/jpg/360px/obs-en-35-02.jpg)

कुछ धार्मिक अगुवो हैरू कि यीशु ऐन्हां मैहणुवां सिंउ एकि दोस्ता सैयि गल्लै काता थ्या। ऐठणीरै तेईनी तैन्हैं योकिया सिंउ ऐकियु बोलणु शुरू करि दित्तु कि सै गलत काता थ्या। यीशु सैक्यै गल्लै कातै शुणि लियै, ऐठणीरै तेईनी तेनि तैन्हांनि ऐकैई कहानी शुणाई।

![](https://cdn.door43.org/obs/jpg/360px/obs-en-35-03.jpg)

“अक मैहणु थ्या जेसैरै दो पुत्र थ्यै। तैन्हां मझां हल्कै पुत्रै अपड़ै बबा सिंउ बौलु, हे बाबा, जै हिस्सा मिंडा बंणता सै ऐम्हीं मूंनी दी दै। बाबै दोईयो पुत्रा मझ अपड़ि धन संम्पति बंडि दित्ती।”

![](https://cdn.door43.org/obs/jpg/360px/obs-en-35-04.jpg)

“जां अबै किछ ऐ धियाड़ि भोरी थी कि हल्का पुत्र अपड़ि संम्पतिरा हैसा बैचि करि पेईंसै लैई करि दूर देशानि चलि ग्या, जां तेदि कुकर्मा मझ अपड़ि संम्पति उड़ा दित्ती।”

![](https://cdn.door43.org/obs/jpg/360px/obs-en-35-05.jpg)

“ऐठां किना बाद, जेठि हल्का पुत्र थ्या तैस देशा मझ अक बड़ा बडा अकाल पेया, जां तैस किनि खांणुनि बि किछ ना बचु। ऐठणीरै तेईनी सै तैस देशेरै रींहणारै एकि मैहणुरै कंम काना ग्या, तेनी मैहणु सैक्या अपड़ि पट्टि मझ सूंर चाननी भेईजा। जां तैस योउती भ्रुख लगौरी थी, कि सै तैन्हां रोटिया खांणनी बि खुश थ्या, जै सूंर खईंथियै। कि तेनी ला अपड़ु पैट भरिया।”

![](https://cdn.door43.org/obs/jpg/360px/obs-en-35-06.jpg)

“जेख्णी सै होशी मझ या ता अपड़ै मंना मझ सौचणा लगा, आंउ कितु आ काता? मिंडै बाबेरै घरा मझ योउतै मजदूर अत्तै जैन्हांनि खांणिनी योउती रजि रोटी मेईंती, पण आंउ ऐठि भ्रुख्णां मरता आ। मूं ऐबै उठिकरि अपड़ै बाबै किनि गांहणु जां तैस सिंउ बौलणु, मूं अपड़ै एकि सेवका समझि करि रखि लै।”

![](https://cdn.door43.org/obs/jpg/360px/obs-en-35-07.jpg)

“तां सै उठिकरि तैस देशा छडि करि अपड़ै बाबै किनि चलि ग्या, सै हालै दूर ऐ थ्या कि, तेसैरै बाबै सै लहि ल्या, जां तैस पन तरस खा करि दाउड़ी करि तेसनी कला दित्ती जां फोकु दींणा लगा।”

![](https://cdn.door43.org/obs/jpg/360px/obs-en-35-08.jpg)

“तेनि पुत्रै बोलु, “हे बाबा, मीं परमेश्वरेरै जां तिंडै खिलाफ पाप कियौरा आ। ऐबै आंउ तिंडा पुत्र बंणनेरै लायक ना।”

![](https://cdn.door43.org/obs/jpg/360px/obs-en-35-09.jpg)

“पण बाबै अपड़ै दासा सिंउ बौलु, “झटपट छै किना छै लिकड़ै कढि करि ऐसनि लुवा! जां ऐसेरै हत्थेरी उंगलि पन अंगुठी जां पैयिड़ा पन बूट लुवा। फिरी सभनियां बधिया बकरा बढा जां अक बड्डी धाम तियार करा, ताकि धाम खा करि असै खुशी मनांईया। केईनी कि मीं समझोरू थियु कि मिंडा ऐ पुत्र मरि गियौरा भूंणा, पण ऐ जींता आ; हराई गियौरा थ्या, आज फिरी असुनि मेयि ग्या!”

![](https://cdn.door43.org/obs/jpg/360px/obs-en-35-10.jpg)

“ऐठणीरै तेईनी मैहणुवें जशन मनांणा शुरू करी दित्ता। कुछ टैंम बाद, बडा पुत्र पट्टि किना कंम करि वापस घरेनी ऐईंता थ्या जां घरा नींड़ बि पुज्जा, तां तेनी गांणै जां नचणैरा हूला शुणा जां हैरान भौ गिया तेनी अक दास शदा करि पुच्छा, “ऐ कितु आ भूंतु?

![](https://cdn.door43.org/obs/jpg/360px/obs-en-35-11.jpg)

“जेख्णी बड्डै पुत्रा पता लगा कि सैक्यै ऐठणीरै तेईनी जशन मनांतै अत्तै केईनी कि तेसैरा भाई घरै वापस आईछी गियौरा, ऐ शुणि करि तैस बड़ा गुस्सा या, जां सै अंदर ना ग्या, पण तेसैरा बाबा भेईर अईछी करि तैस अंदरैनि लै गांहणैरै तेईनी मनांणा लगा, पण तेनि नमां करि दित्ता।”

![](https://cdn.door43.org/obs/jpg/360px/obs-en-35-12.jpg)

“तेनी बड्डै पुत्रै अपड़ै बाबेनी जवाब दित्ता, कि तका आंउ ऐत्थरै साला किना तिंडि सेवा काता आ, जां कदि बि तिंडि कौ गल ना टायि, पण तीं मिंडै तेईनी कदि बि बकरा ना बढा जां धाम ना दित्ती, कि आंउ अपड़ा दोस्ता सिंउ खुशी मनांउ। पण जेख्णी तिंडा ऐकिया पुत्र अपड़ा सारा पेईंसा वैश्या मझ उडा करि या, ता तु तेसैरै तेईनी बडी धाम बंणा करि खुशी मंनाता।”

![](https://cdn.door43.org/obs/jpg/360px/obs-en-35-13.jpg)

“बबै पुत्रा सिंउ बौलु, मिंडै पुत्र, तु हमेशा मूं सेईतै आ, जां जै किछ मिंडु आ सै सभ किछ तिंडु ऐ आ। पण अबै आनंद कांना जां खुश भूंणु चेहिंथु, “केईनी कि मीं समझोरू थियु कि तिंडा ऐ भाई मरि गियौरा भूंणा, पण ऐक्या जींता आ; ऐ हराई गियौरा थ्या, अबै फिरी असुवांनि ऐक्या मेयि ग्या।”

*लूका अध्याय 15:11-32 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_35_128kbps.m4a

## 36. यीशुरा रूप बदलियूंणा- कहानी

https://openbiblestories.org/l/cdj/story-36/

![](https://cdn.door43.org/obs/jpg/360px/obs-en-36-01.jpg)

एकि हफ्तै बाद यीशु, पतरस जां याकूब जां तेसैरा भाई यूहन्ना सेईतै लियै,(ऐक्या यूहन्ना नाँईयेरा चैला सैक्या मैहणु ना जेनि यीशुनि बपतिस्मा दितौरा थ्या।) जां तैन्हां एकांत मझ कोसक्यै उथड़ै पहाड़ा पन लै ग्या।

![](https://cdn.door43.org/obs/jpg/360px/obs-en-36-02.jpg)

जेख्णी यीशु प्रार्थना काता थ्या ता तेसैरा चैहरा दिहा सैयि प्रगड़ा भौ गिया। तेसैरै लिकड़ै लाईटी सैयि हच्छै भौ गियै, जिहीं धरती पनि कोई रंग करि सकिया तैस किना बि बधी करी हच्छै।

![](https://cdn.door43.org/obs/jpg/360px/obs-en-36-03.jpg)

तां मूसा जां एलिय्याह भविष्यवक्ता प्रकट भुवै। ऐक्यै मड़द इस धरती पनि ऐस टैंमा किना इस साला किना केही शाउ साल पेहिलै रिय्हां करीथ्यै। तैन्हैं यीशु सिंउ तैसेरी मोउतिरै बारै मझ गल्ल की, केईनी कि तैस तुरन्त यरूशलेम मझ मरि गांहणु थियु।

![](https://cdn.door43.org/obs/jpg/360px/obs-en-36-04.jpg)

जेख्णी मूसा जां एलिय्याह यीशु सिंउ गल्लै कातै थ्यै तेख्णी पतरसै यीशु सिंउ बोलु, “असेड़ै तेईनी ऐठि भुणु भलु आ। असै त्रा मंडप बणांतै, अक तिंडै तेईनी, अक मूसेरै तेईनी, जां अक एलिय्याहेरै तेईनी।” पण पतरसा ना थ्या पता कि सै कितु आ काता।

![](https://cdn.door43.org/obs/jpg/360px/obs-en-36-05.jpg)

जेख्णी पतरस गल्लै काता थ्या, ता ऐकि चमकदार बदऐ हैट आईछी करि सेक्यै ढकि लियै। फिरी तैन्हैं बदआ मझां अक आवाज शुणी। तेनि बोलु, “ऐक्या मिंडा पुत्र आ जैस सिंउ आंउ प्रेम काता। आंउ ऐस किना खुश आ। तेसैरी शुणा।” सैक्यै त्राईयो चेलै डरि गियै जां धरती पनि लेमि गियै।

![](https://cdn.door43.org/obs/jpg/360px/obs-en-36-06.jpg)

तां यीशु सै छुत्तै जां बौलु, “डरा मेईं। उट्ठी गहा।” जेख्णी तेन्है चौउवो पासै तकांउ, ता सै जै तेड़ी थ्या सै सिर्फ यीशु थ्या।

![](https://cdn.door43.org/obs/jpg/360px/obs-en-36-07.jpg)

यीशु जां सै त्राइयो चेलै पहाड़ा पना हेट उतरी यै। तां यीशु तेन्हा सिंउ बौलु, “एमियां जै ऐठी भूं तेठणिरी चर्चा कौस सिंउ बि मेईं कातै। मुं जल्दी ऐ मरी गंहणु जां फिरी जींती गंहणु। तेड़ा बाद तुहै मेहणुवां सिंउ बौलि सकतै।”

*मत्ती अध्याय 17:1-9; मरकुस 9:2-8; लूका 9:28-36 से एक बाइबल की कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_36_128kbps.m4a

## 37. यीशु लाजरा मौरा मझां जींतैता- कहानी

https://openbiblestories.org/l/cdj/story-37/

![](https://cdn.door43.org/obs/jpg/360px/obs-en-37-01.jpg)

लाजर नाँईयैरा अक मैहणु थ्या। तैसेरी दो भींणी थी जैन्हैरू नाँ मरियम जां मार्था थियु। सै सारै यीशुरै बड़ै अच्छै मित्र थ्यै। अक धियाड़ि, कुनिक्यै यीशु सिंउ बोलु कि लाजर बड़ा बिमार थ्या। जेख्णी यीशु ऐ शुणु ता तेनि बोलु, “ऐ बिमारी लाजरेरै मरनै ला खत्म ना भूंणी। ऐठणीरी वजाय, लाजरा मैहणु परमेश्वरैरा आदर कांनेरे तेईनी तियार कांनै।”

![](https://cdn.door43.org/obs/jpg/360px/obs-en-37-02.jpg)

यीशु अपड़ै मित्रा सिंउ प्रेम करींथ्या। पण जेठि सै थ्या तेठि सै दुवां धियाड़िया तेईनी भाता रिय्हा। तैन्हां दुवां धियाड़िया किना बाद, तेनि अपड़ै चैला सिंउ बोलु, “आईछा,वापिस यहूदियैनि गांहथै।” चेलै जवाब दित्ता, “पण हे गुरू, ऐम्हीं कुछ टैंम पेहिलै तेठणीरै मैहणु ताउ मारी छडणां चांहथै थ्यै! असैड़ा मित्र लाजर झुलि गियौरा, जां मूं सैक्या ब्यौल्हणा।”

![](https://cdn.door43.org/obs/jpg/360px/obs-en-37-03.jpg)

यीशुरै चेलै जवाब दित्ता, “हे प्रभु, अगर लाजर झुलौरा ता सै ठीक भौ गांहणा।” तां यीशु तैन्हां सिंउ खुलि करी बोलि दित्तु, कि “लाजर मरि आ गियौरा। आंउ खुश आ कि आंउ तेठि ना थ्या, ताकि तुवै मूं पनि विश्वास करि सकिया।”

![](https://cdn.door43.org/obs/jpg/360px/obs-en-37-04.jpg)

जेख्णी यीशु लाजरेरै ग्राँ पुज्जा ता लाजरा मौरै चोऊर धियाड़ी भौ थी गियोरी। मार्था यीशु सिंउ मिलणा भेईर यैई जां बोलु, “हे प्रभु, अगर तु ऐठि भूंता ता मिंडा भया ना थ्या मरना। पण आंउ विश्वास काती कि जै किछ तु परमेश्वरेरै नाँ किना मगता सै ताउनि मैयि गांहथु।”

![](https://cdn.door43.org/obs/jpg/360px/obs-en-37-05.jpg)

यीशु जवाब दिता, पुनरूत्थान जां जीवन आंउ आ। जै कोई मूं पन विश्वास काता अगर सै मरि बि गहिया ता सै मरि करि बि जींता रींहणा। जां जै कौ जींता आ जां मूं पन विश्वास रखता सै अनंतकाल तेईनी ना मरना। क्या तु ऐस गलै पन विश्वास काती?” मार्थाय जवाब दित्ता, “हे प्रभु, आंउ विश्वास काती कि तु परमेश्वरैरा पुत्र मसीह आ।”

![](https://cdn.door43.org/obs/jpg/360px/obs-en-37-06.jpg)

तां मरियम यैई। तेनि यीशुरै पैयिड़ा पैई करि बोलु, “हे प्रभु अगर तु इठि भूंता ता मिंडा भया ना थ्या मरना।” यीशु तैस किना पुच्छु, “तुहैं लाजर कोठि आ रखौरा?” तैन्हैं तैसनि शुणांउ, “कब्री मझ। आ जां तका लै।” तां यीशु रूंणा लगा।

![](https://cdn.door43.org/obs/jpg/360px/obs-en-37-07.jpg)

सै कब्र अक गुफा थी जेसैरै दुवारा पनि अक बड़ा बड्डा घौड़ थ्या छडौरा। जेख्णी यीशु कब्री पनि पुज्जा तां तेनि बोलु, “ऐस घौड़ा हठाय दिया।” पण मार्थाय बोलु, “लाजरा मौरै चोऊर धियाड़ी भौ गियोरी अत्ति। तैस किना ता अबै शणिंध ऐईंता भूंणा।”

![](https://cdn.door43.org/obs/jpg/360px/obs-en-37-08.jpg)

यीशु जवाब दित्ता, “क्या मीं तुहां सिंउ बोलोरू ना थियु कि अगर तुवै मूं पनि विश्वास करेलै ता परमेश्वरैरी सामर्थ तकालै?” ऐठणीरै तेईनी तैन्हैं घौड़ हठाय दित्ता।

![](https://cdn.door43.org/obs/jpg/360px/obs-en-37-09.jpg)

तां यीशु खड़ु स्वर्गा धेरै तका करि बौलु, “हे पिता परमेश्वर आंउ तिंडा धन्यवाद काता; कि तीं मिंडी गल शुणि लैई। जां मूं पता थ्या, कि तु सदा मिंडी शुणता, पण मीं ऐठि ऐकियु ऐन्हां मैहणुवां केरी मजत कांनेरै तेईनी बोलु ताकि ऐ मैहणु विश्वास करिया कि तीं आंउ भेईजौरा आ।” ऐ बौलि करि तेनी जौरै हक दी करि बौलु, “हे लाजर, भेईर निकोहि आ।”

![](https://cdn.door43.org/obs/jpg/360px/obs-en-37-10.jpg)

फिरी लाजर भेईर चलि या, तेसैरै हत्थ जां पैयिड़ हालै बि कफणै ला बंन्हौरै थ्यै जां तेसैरू मुहां पन कफण पलैटोरू थियु। यीशु मैहणुवां सिंउ बौलु, “ऐस कफणा खौलणेरै तेईनी ऐसैरी मजत करा।” ऐस चमत्कारेरी वजाहि सिंउ बड़ै सारै यहूदियै यीशु पनि विश्वास केया।

![](https://cdn.door43.org/obs/jpg/360px/obs-en-37-11.jpg)

पण यहूदिया केरै धार्मिक अगुवै यीशु सिंउ जलन रखणा लगै, ऐठणीरै तेईनी सैक्यै सारै किठियै जां अक योजना बंणाणा लगै कि किही यीशु जां लाजर मारी छडियो।

*यूहन्ना 11:1-46 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_37_128kbps.m4a

## 38. यीशु पकड़वाई गांहथा- कहानी

https://openbiblestories.org/l/cdj/story-38/

![](https://cdn.door43.org/obs/jpg/360px/obs-en-38-01.jpg)

हर साल, यहूदी मैहणु फसह नाँईंयेरा अक त्यौव्हार मनांईथ्यै। ऐस त्यौव्हारा ऐस खुशी मझ मनांईथ्यै कि केही सदी पेहिलै परमेश्वरै यहूदिया केरै पूर्वज मिस्र दैशेरी गुलामी किना छडाउरै थ्यै। लगभग त्रा साल बाद यीशु खुलै आम प्रचार कांना शुरू केया। यीशु अपड़ा चैला सिंउ बोलु कि सै तैन्हां सिंउ यरूशलेम मझ फसहेरा त्यौव्हार मंनाणा चांहथा, जां ऐ बि कि सै तैठि मारियूंणा।

![](https://cdn.door43.org/obs/jpg/360px/obs-en-38-02.jpg)

यीशुरै चैला मझ अक यहूदा नाँईयेरा मैहणु थ्या। यहूदा खास चैला केरी पेईंसा केरी थेईली रखणार थ्या, पण हर बार सैक्या तैस थेईली मझां पेईंसै कढि लिईंथ्या। यीशु जां तेसैरै चेलै यरूशलेम शहरा मझ पुजणा किना बाद यहूदा यहूदी अगुवो किनि गिया। तेनि पेईंसा पनि यीशुरा तैन्हेरै हत्था पकड़वांणेरा साउदा केया। तैस पता थ्या कि यहूदी अगुवे ना मनींथ्यै कि यीशु ऐ मसीह आ। तैस ऐ बि पता थ्या कि सैक्यै ऐस मरी छडणा चांहथै थियै।

![](https://cdn.door43.org/obs/jpg/360px/obs-en-38-03.jpg)

महांयाजकेरै बौलणा पनि यहूदी अगुवौऐ यहूदैनी तीह चांदिरे सिक्कै दित्तै कि ताउ यीशु असेड़ै हत्था पकड़वांणा। ऐ बिल्कुल तिहीयें भू जिहीं भविष्यवक्तै बोलोरू थियु। यहूदा मनि गिया जां पेईंसै लै करी चलि गिय। सैक्या यीशु पकड़वांणेरे तेईनी तैन्हैरी मजत कांनेरै तेईनी कौठिक्यां मौकेरी तलाश कांना लगा।

![](https://cdn.door43.org/obs/jpg/360px/obs-en-38-04.jpg)

यरूशलेम शहरा मझ यीशु अपड़ै चैला सिंउ फसहैरा त्यौव्हार मना। फसहेरी धामिरै दौरान, यीशु रोट्टी लै करि भन्नी। तेनि बोलु, “ऐस लेया जां खा। ऐक्या मिंडा शरीर आ जै आंउ तुवाड़ै तेईनी दींता। ऐस मिंडि यादी मझ करै।” ऐनि हिसाबै, यीशु बोलु कि मूं तुवाड़ै तेईनी मरि गांहणु, मतलब तैन्हेरै तेईनी तैस अपड़ै शरीरैरा बलिदान चढ़ाय दींणा।

![](https://cdn.door43.org/obs/jpg/360px/obs-en-38-05.jpg)

फिरी यीशु अक दाखरसैरा प्याला लेया जां बोलु, “ऐस पी लेया। ऐ नवें वायदैरा मिंडा खून आ जै कि मूं डौलणा ताकि परमेश्वर तुवाड़ै पाप माफ करिया। हर बार ऐस पींतै टैंमा मिंडी यादी मझ ऐहीं करै जै आंउ ऐम्हीं काता आ।”

![](https://cdn.door43.org/obs/jpg/360px/obs-en-38-06.jpg)

तां यीशु अपड़ै चैला सिंउ बोलु, “तुहां मझां एकि जणैं आंउ पकड़वांणा।” चेलै शुश्त भौ गियै, जां पुछणा लगै ऐतिया कंम केणु करैला। यीशु बोलु, “मूं पकड़वांणार मैहणु सैक्या भूंणा, जैसनि मूं ऐक्या रोट्टिरा टुकड़ा दींणा।” तां तेनि सैक्या रोट्टिरा टुकड़ा यहूदैनि दित्ता।

![](https://cdn.door43.org/obs/jpg/360px/obs-en-38-07.jpg)

तैस रोट्टी लींणा किना बाद, यहूदा मझ शैतान चलि गिया। यहूदा तेख्णी ऐ निकोही करी यीशु पकड़वांणनी यहूदी अगुवो केरी मजत कांनेरै तेईनी चलि गिया। ऐक्या रातिरा टैंम थ्या।

![](https://cdn.door43.org/obs/jpg/360px/obs-en-38-08.jpg)

रोट्टी खाना किना बाद, यीशु जां तेसैरे चेलै जैतून पहाड़ा पनि चलि गियै। यीशु बोलु, “तुहां सभनियां आज राती मिंडा साउग छडि दींणा। ऐ लिखौरू आ, कि मूं पुव्हाल मांना जां सारी भ्रेडै तित्तर-भित्तर भौ गांहणी।”

![](https://cdn.door43.org/obs/jpg/360px/obs-en-38-09.jpg)

पतरसै जवाब दित्ता, “बेशक बाकि ताउ सभ छडि दिया, पण मूं तिंडा साथ ना छडणा!” तां यीशु पतरसा सिंउ बोलु, “शैतान तुहां सभनियां लै लींणा चांहथा, पण हे पतरस, मीं तिंडै तेईनी प्रार्थना की कि तु विश्वासा मझ पीछै ना हठि गहिया। फिरी बि, अजकि राती कुख्ड़ैरी ल्यौ दींणा किना पेहिलै ताउ त्रा बारी नंमा काना कि तु मूं ना जांणता।”

![](https://cdn.door43.org/obs/jpg/360px/obs-en-38-10.jpg)

पतरसै फिरी यीशु सिंउ बोलु, “चाहे आंउ मरि बि गहूँ, तां बि मूं कदि तिंडा नंमा ना कांना कि आंउ ताउ ना जांणता!” बाकि चेलै बि ऐहिंयो ऐ बोलु।

![](https://cdn.door43.org/obs/jpg/360px/obs-en-38-11.jpg)

तां यीशु अपड़ा चैला सेईतै गतसमनी नाँईयेरी एकि जगायनी गिया। यीशु अपड़ै चैला सिंउ प्रार्थना कांनेरै तेईनी बोलु ताकि शैतान तैन्हैरी परीक्षा ना करिया। तां यीशु ऐपु प्रार्थना कांननी चलि गिया।

![](https://cdn.door43.org/obs/jpg/360px/obs-en-38-12.jpg)

यीशु त्रा बारी प्रार्थना की, “है मिंडै पिता, अगर भौ सकिया ता छंदै ऐक्या दुखैरा प्याला पींणेरै तेईनी मूंनि मेंई दैई। पण अगर मैहणुवां केरै पाप माफ कांनेरै तेईनी अगर होरा कोई चारा ना ता, तिंडीऐ मर्जी पूरी भुईया।” यीशु बड़ा भारी दुखि थ्या जां तेसैरा पसीना खूनेरिया बूंदा सैयि थ्या। तैसनि सामर्थ दींणेरै तेईनी परमेश्वरै अक स्वर्गदूत भेईजा।

![](https://cdn.door43.org/obs/jpg/360px/obs-en-38-13.jpg)

हर बारी प्रार्थना कांना किना बाद, यीशु अपड़ा चैला किनि वापिस या, पण सैक्यै झुलि थियै गियौरै। जेख्णी यीशु त्रीं बारी वापिस या तां यीशु बोलु, “बियुझी गहा! मूं पकड़वांणै बा इट्ठि आ।”

![](https://cdn.door43.org/obs/jpg/360px/obs-en-38-14.jpg)

यहूदी अगुवो सेईतै, जां सैनिका सेईतै जां एकि बड्डी भीड़ी सेईतै यहूदा आईछी पिया। तैन्हैं तलवारी जां शौठै लियौरै थियै। यहूदै यीशु किनि आईछी करि तेसनि बोलु, “हे गुरू, नमस्कार, “जां तैसनि फोक्कु दित्ता। तेनि यहूदी अगुवोनि बोलौरू थियु कि जैसनि मूं फोक्कु दींणा तैस तुवै पकड़ी लैई। तां यीशु बोलु, “हे यहूदा, क्या तु मूं फोक्कु दी करि पकड़वांणा चांहथा?”

![](https://cdn.door43.org/obs/jpg/360px/obs-en-38-15.jpg)

जेख्णी सैक्यै सैनिक यीशु पकड़तै थ्यै, तां पतरसै अपड़ि तलवार पकड़ी जां महांयजकेरै एकि सेवका पनि बहि दित्ती जां तेसैरा अक कंन ऐ बढि दित्ता। यीशु बोलु, “तलवार दूर कर! आंउ अपड़ै बचावेरै तेईनी परमेश्वरा किना एकि स्वर्गदूता केरी सैनायरी विंनती करि सकता। पण मूं अपड़ै पिताऐरी गल्ल मनणी आ।”तां यीशु तैस मैहणुरा कंन ठीक करि दित्ता। तां फिरी सारै चेलै नशि गियै।

*मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_38_128kbps.m4a

## 39. यीशु पनि मुकद्दमा चलता- कहानी

https://openbiblestories.org/l/cdj/story-39/

![](https://cdn.door43.org/obs/jpg/360px/obs-en-39-01.jpg)

अबै ऐक्या अधि रातिरा टैंम थ्या। सैक्यै सैनिक यीशु महायाजकेरै घरै लैई यै, केईनी कि सै यीशु किना स्वाल कांना चांहथा थ्या। पतरस दूरां किना तैन्हैरा पीछा काता थ्या। जेख्णी सैनिक यीशु घरा मझ लै गियै, तां पतरस रुकि गिया जां आग सैकणा बेशि गिया।

![](https://cdn.door43.org/obs/jpg/360px/obs-en-39-02.jpg)

घरा अंतर, यहूदी अगुवो यीशु पनि मुकद्दमा चला। सैक्यै तेसैरै खिलाफ झूठी गल्ला केरा दोष लांणेरै तेईनी बड़ै झूठै गवाह लै करि यै। हालाँकि, तैन्हेरी गल्लै योकिया मझ सहमत ना थी, ऐठणीरै तेईनी यहूदी अगुवे ऐकियु साबित ना करियु कि सेक्या कौसक्यै गल्लैरा दोषी थ्या। यीशु किछ बि ना बोलु।

![](https://cdn.door43.org/obs/jpg/360px/obs-en-39-03.jpg)

अंत मझ, महायाजकै सिद्धै यीशु धेरै तका करि बोलु, “ असुनि शुणा कि क्या तु ऐ जीवित परमेश्वरैरा पुत्र मसीह आ?”

![](https://cdn.door43.org/obs/jpg/360px/obs-en-39-04.jpg)

यीशु बोलु, “आंउ आ, जां तुहां आंउ परमेश्वरा सिंउ बेठौरा जां स्वर्गा किना ऐईंता बि तकांणा।” महायाजकै अपड़ै लिकड़ै फाड़ी छडै केईनी कि जै यीशु बोलु सैक्या तैस गल्लै पनि बड़ा गुस्सै थ्या। सैक्या होरै अगुवो पनि क्रिज्जा, “असुवां ऐकियु शुणांणेरे तेईनी होरै गवाहिरी जरूरत ना कि ऐनि मैहणु कितु कियौरू आ! तुहैं ऐपुऐ सैक्या ऐ बोलता शुणौरा कि सै परमेश्वरेरा पुत्र आ। तेसैरै बारै मझ तुवाड़ा कितु विचार आ?”

![](https://cdn.door43.org/obs/jpg/360px/obs-en-39-05.jpg)

सारै यहूदी अगुवो महायाजकानि जवाब दित्ता, “सैक्या मरनेरै काबिल आ!” तां तैन्हैं यीशुरै टीरा पनि पट्टी बन्हीं दित्ती, तैस पनि थुक्कु, सैक्या मारा, जां तेसैरा मजाक उड़ा।

![](https://cdn.door43.org/obs/jpg/360px/obs-en-39-06.jpg)

जां पतरस, जेख्णी सैक्या घरा भेईर भाता थ्या। तां एकि नौकरेणी छोकरी सैक्या लधा। तेनि तैस सिंउ बोलु, “तु बि यीशु सेईतै थ्या!” पतरसै नंमा करि दित्ता। बाद मझ, एकि होरी छोकरी ऐकैई ऐ गल्ल बोलि, जां पतरसै फिरी नंमा करि दित्ता। अंत मझ, किछ मैहणुवें बोलु, “असुवां पता कि तु यीशु सेइतै थ्या केईनी कि तुवै दोईयो गलील किना अत्तै।”

![](https://cdn.door43.org/obs/jpg/360px/obs-en-39-07.jpg)

तां पतरसै बोलु, “अगर आंउ ऐस मैहणु जांणता ता परमेश्वर मूंनि श्राप दिया!” पतरसै इकदम ऐ कसम बि खाई तां एकि कुख्ड़ै ल्यौ बि दित्ती। यीशु पीछै मुड़ि करि पतरसा धेरै तकाउ।

![](https://cdn.door43.org/obs/jpg/360px/obs-en-39-08.jpg)

पतरस तैठां किना चलि गिया जां हिक पिटणां जां रूंणा लगा। तेसै टैंमा,यीशु पकड़वांणै बाऐ यहूदै तकाउ कि यहूदी अगुवो यीशुनि मोउतिरी सजा दित्ती। यहूदा बड़ा दुखि भौ गिया जां तेनि आत्म हत्या करि दित्ती।

![](https://cdn.door43.org/obs/jpg/360px/obs-en-39-09.jpg)

अबै तैस देशैरा राज्यपाल पिलातुस थ्या। सैक्या रोम देशेरै तेईनी कंम करींथ्या। यहूदी अगुवे यीशु तैस किनि लै करि यै। सै चांहथै थ्यै कि पिलातुस तैसनि मोउतिरी सजा दिया जां तैस मरी छडिया। तां पिलातुसै यीशु किना पुच्छु, “क्या तु यहूदिया केरा राजा आ?”

![](https://cdn.door43.org/obs/jpg/360px/obs-en-39-10.jpg)

यीशु जवाब दित्ता, “तीं सच्चै बोलु। पण मिंडा राज्य ऐठि धरतिरा ना। अगर भूंता ता मिंडै दासा मिंडै खिलाफ युद्ध थ्या कांना। आंउ धरती पनि परमेश्वरेरै बारै मझ सच्च शुणांणा यौउरा। हरेक मैहणु जै सच्चा सिंउ प्रेम काता सै मिंडि शुणता।” पिलातुसै बोलु, ता सच्च कितु आ?”

![](https://cdn.door43.org/obs/jpg/360px/obs-en-39-11.jpg)

यीशु सिंउ बात-चीत काना किना बाद, पिलातुसै भेईर भीड़ी किनि गहि करि बोलु, “मूं ऐस मझ ऐतिया कोई दोष ना बुझियूंता कि ऐसनि कोई सजा ना दियो कि ऐक्या मारी छडणेरै काबिल भुईया।” पण यहूदी अगुवो जां भीड़ी जौरै हक्क दी करि बोलु, “ तैस क्रूसा पनि चाढ़ी दिया!” पिलातुसै जवाब दित्ता, “सैक्या किछ बि गलत कांनैरा दोषी ना।” पण सैक्यै होरै बि जौरै- जौरै चिंड्डै दींणा लगै। तां पिलातुसै त्रीं बारी बोलु, “सैक्या दोषी ना!”

![](https://cdn.door43.org/obs/jpg/360px/obs-en-39-12.jpg)

पिलातुस डरि गिया कि तैस भीड़ि दंगै शुरू करि दींणै, ऐठणीरै तेईनी सै अपड़ै सैनिका केरै जरियै यीशु क्रूसा पनि चाढ़नेरै तेईनी मंनि गिया। रोमी सैनिकै यीशुनि कौड़ै लवाई, जां तैसनि राजै बाऐ लिकड़ै लवाई; जां तेसैरै शिरा पनि कंडा केरू बंणौरू मुकुट रक्खु। तां सैक्यै ऐ बोलि करि तेसैरा मजाक उडांणा लगै, “तका यहूदिया कैरा राजा!” “तका, यहूदिया केरा राजा!” पिलातुस डरि ग्या कि तैसै भिड़ी दंगे शुरु करि दिणै, एठणिरै तैईनि सै अपड़ा सैनका केरै जरियै यीशु क्रूसा पनि चड़नानि मनि ग्या। रोमी सैनकै यीशुनि कोड़ै लई, जां तेसनि राजेरै कपड़ै लुवाऐ, जां तेसेरै शिरा पनि कंडा केरु बणोरू मुकुट रखु। तां सै ऐ बोलि करि तैसेरा मजाक उड़ाणा लगै, “तका यहूदिया कैरा राजा!"

*मत्ती 26:57- 27:26; मरकुस14:53-15:15; लूका 22:54-23:25; यूहन्ना 18:12-19:16 किना अक बाइबलिरी कहानी।*

Audio: https://git.door43.org/OBS-TLF/cdj_obs/releases/download/v1/cdj_obs_v1_39_128kbps.m4a

## 40. यीशु क्रूसा पनि चाढ़ना- कहानी

https://openbiblestories.org/l/cdj/story-40/

![](https://cdn.door43.org/obs/jpg/360px/obs-en-40-01.jpg)

यीशुरा मजाक उडांणा किना बाद, सैनिक तैस क्रूसा पनि चाढ़नेरै तेईनी लै गियै। तैन्हैं सैक्या क्रूस तैसै किना चुका जैस पनि सैक्या मरना थ्या।

![](https://cdn.door43.org/obs/jpg/360px/obs-en-40-02.jpg)

सैक्यै सैनिक यीशु तैस जगाय लै करि यै जैसनी खोपड़िरी जगा बोलींथ्यै जां तेसैरै हत्थ जां पैयिड़ क्रूसा पनि बिन्हीं दित्तै। पण यीशु बोलु, “हे पिता, ऐन्हांनि माफ कर, केईनी कि ऐन्हां ना पता कि ऐक्यै कितु कातै अत्तै।” तैन्हैं अक पट्टी बि तेसैरै शिरा प्रन टंगि दित्ती। तैस पनि लिखोरू थियु, “यहूदिया केरा राजा।” पिलातुसै तैन्हांनि ऐहै लिखणेरै तेईनी बोलौरू थियु।

![](https://cdn.door43.org/obs/jpg/360px/obs-en-40-03.jpg)

तां सैनिकै यीशुरै लिकड़ा केरै तेईनी पर्ची सुट्टी। जेख्णी तैन्हैं ऐतियु कियु ता तैन्हैं सैकेई भविष्यवाणी पूरी की जैन्हां मझ लिखौरू थियु, “तैन्हैं तेसैरै लिकड़ै योकिया मझ बंडि लियै, जां तेसैरै लिकड़ा केरै तेईनी पर्ची सुट्टी।”

![](https://cdn.door43.org/obs/jpg/360px/obs-en-40-04.jpg)

तैठि दो डाकु बि थ्यै, सैक्यै दोईयो डाकु सैनिकै तेसै टैंमा क्रूसा पनि चाढ़थियै। तैन्हैं सैक्यै यीशुरै दोईयो पासै रखौरै थ्यै। तैन्हां मझां एकि डाकु यीशुरा मजाक उड़ा, पण होरै डाकु बोलु, “क्या ताउ डर ना लगता कि परमेश्वरा ताउनि सजा दींणी? असै बड़ै सारै बुरै कंमा केरै दोषी अत्तै, पण ऐक्या मैहणु निर्दोष आ।” फिरी तेनि यीशु सिंउ बोलु, “जेख्णी तु अपड़ै राज्य मझ ऐईला ता छंदै मूं याद रखै।” यीशु जवाब दित्ता, “आजै तु मूं साउगा स्वर्गलोका मझ भूंणा।”

![](https://cdn.door43.org/obs/jpg/360px/obs-en-40-05.jpg)

यहूदी अगुवो जां भीड़ी मझां केहियै मैहणुवें यीशुरा मजाक उड़ा। तैन्हैं यीशु सिंउ बोलु, “अगर तु परमेश्वरैरा पुत्र आ, ता क्रूसा पना हैट उतरी आ जां अपांणा बचा लै! तां असै ताउ पनि विश्वास करेलै।”

![](https://cdn.door43.org/obs/jpg/360px/obs-en-40-06.jpg)

तां तैस पूरै दैशैरा असमांण पूरी तराहि सिंउ काआ भौ गिया, बेशक सैक्या धियाड़िरा टैंम थ्या। ऐक्या धियाड़िरै टैंमा काआ भुईथ्या जां त्रियां घण्टा तेईनी ऐत्तिया ऐ रेहिथ्या।

![](https://cdn.door43.org/obs/jpg/360px/obs-en-40-07.jpg)

तां यीशु हक्क दी करी बोलु, पूरू भू! हे पिता, आंउ अपड़ि आत्मा तिंडै हत्था दींता।” तां तेनि अपड़ु मुंडक उन्धु कियु जां अपड़ै प्रांण त्यागी दित्तै। जेख्णी सै मुआ ता अक बड़ा बड्डा भुन्जल भुआ। सैक्या बड्डा पड़दा जै परमेश्वरेरी उपस्थिति किना मैहणुवां अलग करींथ्या प्रन किना हैट तेईनी फटि करी दो भाग भौ गिया।

![](https://cdn.door43.org/obs/jpg/360px/obs-en-40-08.jpg)

अपड़ी मोउतिरै जरियै, यीशु मैहणुवां केरै तेईनी परमेश्वरा किनी ऐईंणैरी बत्त खौली दित्ती। जेख्णी यीशुरी निगरानी कांनारै एकि सैनिकै जै किछ भुईथियु सै सभ किछ तकाउ तां तेनि बोलु, “पक्का, ऐक्या मैहणु निर्दोष थ्या। जां ऐक्या परमेश्वरैरा पुत्र आ।”

![](https://cdn.door43.org/obs/jpg/360px/obs-en-40-09.jpg)

तां यूसुफ जां नीकुदेमुस नाँईयेरै दो यहूदी अगुवे यै। सैक्यै विश्वास करींथ्यै कि यीशु ऐ मसीह थ्या। तैन्हैं पिलातुसा किना यीशुरा शरीर मग्गा। फिरी तैन्हैं तेसैरा शरीर कपड़ै मझ लपैटा। तां तैन्हैं सैक्या एकि शप्पड़ा मझ कौरोरी कब्रि मझ लै नियां जां तैस अंतर रखि दित्ता। तां तैन्हैं तैस कब्रिरू दुवार बंद कांनेरै तेईनी अक बड़ा बड्डा घौड़ खिसकाय छडा।

*मत्ती 27:27-61; मरकुस 15:16-47; लूका 23:26-56; यूहन्ना 19:17-42 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_40_128kbps.m4a

## 41. परमेश्वर यीशु मौरा मझां जींतैता- कहानी

https://openbiblestories.org/l/cdj/story-41/

![](https://cdn.door43.org/obs/jpg/360px/obs-en-41-01.jpg)

सैनिका केरै जरियै यीशु क्रूसा पनि चाढ़ना किना बाद, यहूदी अगुवो पिलातुसा सिंउ बोलु, “तेनि झूठै, यीशु बोलोरू थियु कि तैस त्रा धियाड़ी बाद मौरा मझां जींती गांहणु। कौसक्यै ऐठणीरी सही तरीकै सिंउ निगरानी कांनी पूंणी किहीं कियै तेसैरै चेलै तेसैरी लास चौरी करी लै ना गहिया। अगर तैन्हैं ऐहीं कियु ता तैन्हां बोलणु सैक्या ता मौरा मझां जींती आ गियौरा।”

![](https://cdn.door43.org/obs/jpg/360px/obs-en-41-02.jpg)

पिलातुसै बोलु, “कुछ सैनिका लै गहा, जां बड़ी हौश हवासी मझ जिहीं तुहां सही लगतु कब्रिरिरी निगरानी करा।“ ऐठणीरै तेईनी तैन्हैं तैस कब्रिरू दुवारा पनि जै घौड़ रखोरा थ्या तेस पनि अक मौहर ला छडी। तैन्हैं ऐ पक्का कांनेरै तेईनी तैठि सैनिक बेठाय दित्तै कि कोई बि तैसेरी लास चौरी ना सकिया।

![](https://cdn.door43.org/obs/jpg/360px/obs-en-41-03.jpg)

यीशुरै मरना किना बाद सब्तेरी मतलब आरामेरी धियाड़ी थी। कोई बि आरामेरी धियाड़ी कंम ना करि सकींथ्या, ऐठणीरै तेईनी यीशुरा कोई बि मित्र कब्रि पनि ना या। पण आरामेरी धियाड़ी बाद दुईं धियाड़ी, भियगा पिचारी सिंउ, कुछ जनेनी यीशुरी कब्री पनि गांहणानि तियार भुई। सै तेसैरै शरीरा पनि होरै बि मसालै लांणा चांहती थी।

![](https://cdn.door43.org/obs/jpg/360px/obs-en-41-04.jpg)

तैन्हां जनेनियां पुजणा किना पेहिलै, कब्री पनि अक बड़ा बड्डा भुन्जल भुवा। स्वर्गा किना अक स्वर्गदूत या जां तेनि सैक्या घौड़ जै कब्रिरू दुवारा पनि थ्या जेनि ला कब्र ढकौरी थी सैक्या हठाय दित्ता जां तैस पनि बेशि गिया। ऐक्या स्वर्गदूत चमकीलु प्रगड़ु सैयि थ्या। कब्रि पनि जै सैनिक बेठौरै थ्यै तैन्है सैक्या लधा। सै यौउतै डरि गियै कि मौरा मैहणुवां सैयि जमीनि पनि पैयि गियै।

![](https://cdn.door43.org/obs/jpg/360px/obs-en-41-05.jpg)

जेख्णी सै जनेनी कब्रि पनि पुज्जी ता तेनि स्वर्गदूतै तैन्हां सिंउ बोलु, “मेईं डरा। यीशु ऐठि ना। सैक्या मौरा मझां जींति गियौरा, जिहीं तेनि बोलोरू थियु कि मूं जींति गांहणु! कब्रि अंतर तैस तौपा जां तका।” तैन्हैं जनेनियें कब्रि नीड़ जां जेठि यीशुरा शरीर रखौरा थ्या तैठि तौपा जां तकाउ कि तेसैरा शरीर तैठि ना थ्या!

![](https://cdn.door43.org/obs/jpg/360px/obs-en-41-06.jpg)

तां तेनि स्वर्गदूतै तैन्हां जनेनियां सिंउ बोलु, “गहि करी तेसैरै चेलानि बोला, ‘यीशु मौरा मझां जींति गियौरा जां तैस तुहां आघै-आघै गलील प्रदेशानि गांहणु।’”

![](https://cdn.door43.org/obs/jpg/360px/obs-en-41-07.jpg)

सै जनेनी हरशुन भुई जां बड़ी भारी खुश भुई। सै चैलानि ऐक्या शुभ संदेश शुणांणेरै तेईनी दाउड़ी।

![](https://cdn.door43.org/obs/jpg/360px/obs-en-41-08.jpg)

जेख्णी सै जनेनी ऐक्या शुभ संदेश शुणांणेरै तेईनी हालै तेईनी बत्तै मझ थी, तां यीशु तैन्हांनि प्रकट भुवा। सैकेई तेसैरै पैयिड़ा पनि पैयि गेई। तां यीशु बोलु, “मेईं डरा। गहि करी मिंडा चैलानि गलील प्रदेशानि गांहणानि बोला। तैन्हां आंउ तैठि तकांणा।”"

*मत्ती 27:62, 28:15, मरकुस 16:1-11; लूका 24:1-12; यूहन्ना 20:1-18, किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_41_128kbps.m4a

## 42. यीशु स्वर्गानि वापस चलि गांहथा- कहानी

https://openbiblestories.org/l/cdj/story-42/

![](https://cdn.door43.org/obs/jpg/360px/obs-en-42-01.jpg)

जैस धियाड़ी परमेश्वरै यीशु मौरा मझां जींता केईथ्या, तेसैरै दो चेलै तैठि नीड़ होरै गाँनि गांहथै थ्यै। गांहथै-गांहथै सैक्यै यीशु सेईतै जै भौरू थियु तेठणीरै बारै मझ गल्ल बात थियै कातै, तैन्हां आशा थी कि सैक्या मसीह थ्या, पण तां बि सैक्या मारी छडथिया। अबै सै जनेनी बोलति अत्ती कि सैक्या फिरी जींती गियौरा। तैन्हां ना थ्या पता कि कौस गल्लै पनि विश्वास कांना।

![](https://cdn.door43.org/obs/jpg/360px/obs-en-42-02.jpg)

यीशु तैन्हां किनी आईछी करि तैन्हां सेईतै चलणां लगि पेया, पण तैन्हैं सैक्या पछियांणा ना, तेनि तैन्हां किना पुच्छु कि तुवै कौस बारै मझ गल-बात कातै थ्यै। तैन्हैं तैस सिंउ यीशुरै बारै मझ जै घटना भौरी थी तैठणीरै बारै मझ सभ किछ शुणांउ। तैन्हैं सौचु कि सै कौसक्यै परदेशी सिंउ गल्ल कातै थ्यै जैस कोई पता ना थ्या कि यरूशलेम मझ कितु भौरू थियु।

![](https://cdn.door43.org/obs/jpg/360px/obs-en-42-03.jpg)

तां यीशु तैन्हांनि समझाउ कि परमेश्वरैरा वचन मसीहरै बारै मझ कितु बौलता। बड़ै टैंम पेहिलै, भविष्यवक्तै बोलौरू थियु कि बुरै मैहणुवां मसीह दुखी कांना जां मारी छडणा। पण भविष्यवक्तै ऐ बि बोलौरू थियु कि सैक्या त्रीं धियाड़ि जींती गांहणा।

![](https://cdn.door43.org/obs/jpg/360px/obs-en-42-04.jpg)

जेख्णी सैक्यै तैस नगरा मझ पुज्जै जेठि सैक्यै दो जणै रुकणा चांहथै थियै, तियो तेईनी लगभग संन्हैरा भौ थ्या गियौरा। तैन्हैं यीशुनि बोलु कि तु असुवां सिंउ बेशि गा, फिरी यीशु तैन्हां सेईतै एकि घरा मझ गिया। सन्हीं सैक्यै रोट्टी खांणा बेशि गियै। यीशु अक रोट्टि लैई जां तैस रोट्टिरै तेईनी परमेश्वरैरा धन्यवाद केया जां फिरी सेकैई भन्नी। तां अजाग्गै तैन्हां पता लगि गिया कि सैक्या यीशु थ्या। पण तेसै टैंमा सै तैन्हेरी नजरी किना गायब भौ गिया।

![](https://cdn.door43.org/obs/jpg/360px/obs-en-42-05.jpg)

तैन्हैं दुवें जणै योकिया सिंउ बोलु, “सैक्या यीशु थ्या! ऐठणीरै तेईनी तेख्णी तेनि असुनी परमेश्वरैरा वचन समझाईथ्या ता असै बड़ै खुश थियै!” तां इकदम सैक्यै निकोहि करी यरूशलेमनी चलि गियै। जेख्णी सैक्यै यरूशलेम पुज्जै ता तैन्हैं चैलानि शुणांउ, कि “यीशु जींता आ! असुवें सै लधा!”

![](https://cdn.door43.org/obs/jpg/360px/obs-en-42-06.jpg)

जेख्णी चेलै योकिया मझ गल-बात थ्यै कातै तां यीशु इकदम तैस कमरै मझ तैन्हां किनी प्रकट भुवा। तेनि बोलु, “तुहांनि शांति मेईया!” चेलै सौचु कि सैक्या कोई भूत आ, पण यीशु बोलु, “तुवै केईनी अत्तै डरींतै? तुवै ऐहीं किना सौचतै कि ऐ सच मझ आंउ आ, यीशु आ? मिंडै हत्थ जां पैयिड़ तका। भूता किनि ऐतिया शरीर ना भूंता जेतिया मूं किनि आ।” ऐ लुहांनेरै तेईनी कि सैक्या कोई भूत ना, तेनि खांणुनि किछ मग्गु। तैन्हैं तैसनि मछलिरा अक टुकड़ा दित्ता, जां तेनि सैक्या खा लेया।

![](https://cdn.door43.org/obs/jpg/360px/obs-en-42-07.jpg)

यीशु बोलु, “मिंडै बारै मझ परमेश्वरैरा वचन जै किछ बि बौलता सै पूरू भूंणु। मीं तुहांनि शुणां थियु दितौरू कि ऐ पूरू भूंणु जरूरी आ।” तां यीशु तैन्हांनि परमेश्वरारा वचन बड़ै अच्छै तरीकै सिंउ समझा। तेनि बोलु, “बड़ै पेहिलै भविष्यवक्तै लिखौरू थियु कि मूं, यानि मसीह दुख सहन कांना पूंणा, मरनु पूंणु जां त्रीं धियाड़ी मौरा मझां जींति गांहणु पूंणु।”

![](https://cdn.door43.org/obs/jpg/360px/obs-en-42-08.jpg)

“तैन्हैं भविष्यवक्तै ऐ बि लिखौरू थियु कि मिंडै चैला परमेश्वरेरै वचनेरी घोषणा कांनी। तैन्हां हर मैहणुनि पश्चाताप कांनानि बोलणु। अगर सै ऐहीं कातै ता परमेश्वरा तैन्हेरै पाप माफ कांनै। मिंडा चैला ऐस खुशखबरिरा प्रचार यरूशलेम किना शुरू कांना। तां तैन्हां संसारा मझ सारी जगाय सारी जातिया मझ गांहणु। तुवै मैहणु मिंडि हरेक गल्लेरै जां कंम्मेरै गवाह अत्तै जै मीं बोलु जां कियौरू थियु, जां तैस सारूरै गवाह अत्तै जै मूं सिंउ भूं।”

![](https://cdn.door43.org/obs/jpg/360px/obs-en-42-09.jpg)

होरिया चाहिया धियाड़िया केरै दौरान, यीशु अपड़ै चैलानि केही बार प्रकट भुवा। अक बार ता सैक्या एकि ऐ टैंमा पनि पंजा शाउवा किना जादा मैहणुवां पनि प्रकट भुवा! तेनि अपड़ै चैला पनि केहियै तरीकै ला साबित कियु कि सै जींता थ्या, जां तेनि तैन्हांनि परमेश्वरेरै राज्यरै बारै मझ शिक्षा दित्ती।

![](https://cdn.door43.org/obs/jpg/360px/obs-en-42-10.jpg)

यीशु अपड़ै चैला सिंउ बोलु, “परमेश्वरै मूंनि स्वर्गा जां धरती पनि हर एकि पनि शासन कांनेरा अधिकार दितौरा। ऐठणीरै तेईनी अबै आंउ तुहां सिंउ बौलता: गहि करि सारी जातिया केरै मैहणुवां चैला बंणा। ऐतियु कांनेरै तेईनी, तुहां तैन्हांनि पिता, पुत्र, जां पवित्र आत्मायरै नाँ किना बपतिस्मा दींणा। जै किछ बि मीं तुहांनि आज्ञा दितौरी आ सैकेई सारी आज्ञाय मंनणी बि तुहां तैन्हांनि शिख्रांणी। याद रखा, मूं हमेशा तुहां सेईतै रीहणुं।”

![](https://cdn.door43.org/obs/jpg/360px/obs-en-42-11.jpg)

यीशुरू मरनु जां फिरी मौरा मझां दुबारै जींतियूंणा किना बाद, तेनि अपड़ा चैला सिंउ बोलु, “ज्यो तेईनी कि मिंडा पिता तुहांनि सामर्थ ना दींता तियो तेईनी तुवै यरूशलेम मझ ऐ बेशा। तैस तुहां पनि पवित्र आत्मा भेईजणा जां तुहांनि तैस सामर्थ दींणी।” तां यीशु स्वर्गानि चलि गिया, जां एकि बदऐ सैक्या तैन्हेरी नजरी किना छपा लिया। स्वर्गा मझ यीशु सारिया चीजा पनि शासन कांनानि परमेश्वरेरै देहिंणै पासै बेशि गिया।

*मत्ती 28:16-20; मरकुस 16:12-20; लूका 24:13-53; यूहन्ना 20:19-23; खास चैला केरै कंम 1:1-11 किना अक बाइबलिरी कहानी।*

Audio: https://git.door43.org/OBS-TLF/cdj_obs/releases/download/v1/cdj_obs_v1_42_128kbps.m4a

## 43. कलीसियैरी शुरूआत भूंती- कहानी

https://openbiblestories.org/l/cdj/story-43/

![](https://cdn.door43.org/obs/jpg/360px/obs-en-43-01.jpg)

यीशुरू स्वर्गा गांहणा किना बाद, चेलै यरुशलेम शहरा मझ रूकि गियै जिहीं यीशु तैन्हांनी कांनेरा हुक्म दितौरा थ्या। तेठणीरै विश्वासी मैहणु लगातार सेईतै प्रार्थना कांनानि किट्टै भुईयां करींथ्यै।

![](https://cdn.door43.org/obs/jpg/360px/obs-en-43-02.jpg)

हर साल, फसह नामक त्यौव्हारेरै 50 धियाड़ी बाद, यहूदी मैहणु पिन्तेकुस्त नाँईयेरी अक खास धियाड़ी मनाईंथ्यै। पिन्तेकुस्त सैक्या टैंम थ्या जेख्णी यहूदी मैहणु किंणक बढणेरै टैंमा मनाईंथ्यै। सारै संसारा किना यहूदी मैहणु पिंतेकुस्तेरी धियाड़ि सेईतै मनाणेरै तेईनी यरूशलेम शहरा मझ यौउरै थ्यै। इस साला, पिंतेकुस्त मनाणैरा टैंम यीशुरू स्वर्गा गांहणा किना लगभग एकि हफ्तै बाद येईथ्या।

![](https://cdn.door43.org/obs/jpg/360px/obs-en-43-03.jpg)

जैस टैंमा सारै विश्वासी मैहणु सेईतै किट्ठै थ्यै, तां जैस घरा मझ सैक्यै थ्यै अचानक सै तैज हवाय ला भरी गियु। तां आगिरै लवाट्टै जेतियु किछ लाधी यू जां किछ विश्वासिया केरै शिरा पनि प्रकट भौ गियु। सैक्यै सारै पवित्र आत्माय ला भरी गियै जां अलग-अलग भाषाईया मझ परमेश्वरैरी स्तुति की। ऐन्हां भाषाईया बौलणेरै तेईनी सैक्यै पवित्र आत्माय तैयार केईथ्यै।

![](https://cdn.door43.org/obs/jpg/360px/obs-en-43-04.jpg)

जेख्णी यरूशलेम शहरा मझ रींहणारै मैहणुवें ऐक्या हूला शुणा, ता तैन्हैरी अक भीड़ ऐ तकांणेरै तेईनी सेईतै किट्ठी यैई कि कितु थियु भूंतु। तैन्हैं विश्वासी मैहणु परमेश्वरेरै जरियै जै बड़ै-बड़ै कंम भुवै तैन्हैरी घोषणा कातै शुणै। सैक्यै हैरान थ्यै केईनी कि सैक्यै तैन्हां कंमा केरी घोषणा अपड़ी ऐ भाषाय मझ शुणतै थ्यै।

![](https://cdn.door43.org/obs/jpg/360px/obs-en-43-05.jpg)

ऐन्हां मझ किछ मैहणुवें बोलु कि सैक्यै चेलै नशै मझ थ्यै। पण पतरस खड़ा भुवा जां तैन्हां सिंउ बोलु, “मिंडि गल शुणा! ऐक्यै मैहणु नशै मझ नत्तै! ऐठणिरी बजाए, जै तुवै तकांतै अत्तै ऐ सेहै आ जै योएल भविश्यवक्तै बोलौरू थियु कि भूंणु: परमेश्वरै बोलु, ‘अंत मझ मूं अपड़ा आत्मा तुहां पनि उधैंना।‘”

![](https://cdn.door43.org/obs/jpg/360px/obs-en-43-06.jpg)

“हे इस्राएली मड़दो, यीशु अक ऐतिया मैहणु थ्या जेनि ऐ लुहानेरै तेइनी कि सैक्या केणु थ्या बड़ै जादै अनोखै कंम केईथ्यै। तेनि परमेश्वरेरी सामर्थी ला बड़ै जादै अदभुत कंम केईथ्यै। तुवै ऐ जांणतै, केईनी कि तुहैं ऐक्यै कंम लधौरै अतै। पण तुहैं सैक्या क्रूसा पनि चाढ़ी दित्ता!”

![](https://cdn.door43.org/obs/jpg/360px/obs-en-43-07.jpg)

यीशु मरि गिया पण परमेश्वरै सैक्या मौरा मझां जींता करि दित्ता। ऐनि सैकेई गल्ल पूरी करि दित्ती जै एकि भविष्यवक्तै लिखौरू थियु: ‘तु अपड़ै पवित्र जना शड़ना ना दैला।’ असै गवाह अत्तै कि परमेश्वरै यीशु दुबारै फिरी जींतैरी दित्ता।।

![](https://cdn.door43.org/obs/jpg/360px/obs-en-43-08.jpg)

“पिता परमेश्वरै अबै यीशु अपड़ै देहिंणै पासै बेशाय करि तैसनि आदर दित्ता। जां यीशु असेड़ै तेईनी पवित्र आत्मा भेईजा जिहीं तेनि वायदा कियौरा थ्या कि सै भेईजैला। पवित्र आत्मा ऐ तैन्हां कंमा भूंणा दींता जैन्हां तुवै तकांतै अत्तै जां शुणतै अत्तै।”

![](https://cdn.door43.org/obs/jpg/360px/obs-en-43-09.jpg)

“तुहैं सैक्या मैहणु, यीशु क्रूसा पनि चाढ़ी दित्ता। पण सच्च मझ जांणी लिया कि परमेश्वरै यीशु सारिया चीजा पनि प्रभु जां मसीह दोईयो ठैहराय दितौरा!”

![](https://cdn.door43.org/obs/jpg/360px/obs-en-43-10.jpg)

पतरसेरी गल्लै शुणने बाऐ मैहणु तैसेरी बोलोरिया गल्लै ला अंतर तेईनी पूरै हिलि गेईथ्यै। ऐठणीरै तेईनी तैन्हैं पतरसा जां चैला किना पुच्छु, “हे भाईयो, असुवां कितु कांनु चेहिंथु?”

![](https://cdn.door43.org/obs/jpg/360px/obs-en-43-11.jpg)

पतरसै तैन्हांनि जवाब दित्ता, “तुहां मझियां हर मैहणु अपड़ै पापा किना पश्चाताप करिया, जां यीशु मसीहरै नाँ किना बपतिस्मा लिया। तां तैस तुहांनि वरदाना मझ पवित्र आत्मा दींणा।”

![](https://cdn.door43.org/obs/jpg/360px/obs-en-43-12.jpg)

पतरसै जै बोलु तैस पनि लगभग 3000 मैहणुवें विश्वास केया जां यीशुरै चेलै बंणि गियै। तैन्हैं बपतिस्मा लेया जां यरूशलेमेरी कलीसियेरै हिस्सा बंणि गियै।

![](https://cdn.door43.org/obs/jpg/360px/obs-en-43-13.jpg)

जेख्णी खास चेलै तैन्हांनि शिक्षाय दित्ती ता विश्वासियै लगातार शुणि। सैक्यै हर बारी मिलींथ्यै जां साउगा रोट्टी खाईंथ्यै, जां तैन्हैं हर बारी योकियानि प्रार्थना की। तैन्हैं मिलिकरी परमेश्ववरैरी स्तुति की जां जै किछ बि तैन्हां किनि थियु सै सभ किछ तैन्हैं योकिया मझ बंडि चुंडि कियु। नगरैरा हर मैहणु तैन्हेरै तेईनी अच्छु ऐ बोलींथ्यै। हर रौज, जादै किना जादै मैहणु विश्वासी बंणतै गियै।

*खास चैला केरै कंम अध्याय 2 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_43_128kbps.m4a

## 44. पतरस जां यूहन्ना एकि भिखारी ठीक कातै- कहानी

https://openbiblestories.org/l/cdj/story-44/

![](https://cdn.door43.org/obs/jpg/360px/obs-en-44-01.jpg)

अक धियाड़ी, पतरस जां यूहन्ना मंदिरा गियै। तैन्हैं अक अपंग मैहणु भीख मगता पाटका पनि बेठौरा लधा।

![](https://cdn.door43.org/obs/jpg/360px/obs-en-44-02.jpg)

पतरसै तैस लट्टै मैहणु धेरै तकाउ जां बोलु, “मूं किनि ताउनी दींणैनि पेईंसै ता नत्तै। पण जै मूं किनि आ आंउ तैस तुहांनि दींता। यीशुरै नाँईयां किना, उठ जां चल-फिर!”

![](https://cdn.door43.org/obs/jpg/360px/obs-en-44-03.jpg)

तां इकदम, परमेश्वरै सैक्या लट्टा मैहणु ठीक करि दित्ता। तेनि ओरि-परी चलणु जां छाऐ दींणी शुरू करि दित्ती, जां परमेश्वरैरी स्तुति कांना लगि पेया। मंदिरेरै आंगणा मझ बेठौरै मैहणु हरशुन भौ गेईथ्यै।

![](https://cdn.door43.org/obs/jpg/360px/obs-en-44-04.jpg)

तेख्णी ऐ मैहणुवां केरी अक भीड़ तैस मैहणु तकांणा यैई जै ठीक भौ थ्या गियौरा। पतरसै तैन्हां सिंउ बोलु, “ऐक्या मैहणु ठीक आ, पण ऐस गल्लै पनि हैरान मेईं भुवा। असुवें ऐ अपड़ी शक्ति ला ठीक ना केया, जां ऐठणीरै तेईनी ना कि असै परमेश्वरैरा आदर कातै। बल्कि, सैक्या यीशु आ जेनि अपड़ि शक्ति ला ठीक केया, केईनी कि असै यीशु पनि भरौसा कातै।”

![](https://cdn.door43.org/obs/jpg/360px/obs-en-44-05.jpg)

“सै तुवै ऐ अत्तै जैन्हैं तैस रोमी राज्यपालानि यीशु मारी छडणानि बोलौरू थियु। तुहैं सै मारी छडा जै जीवन दींता। पण परमेश्वरै सैक्या मौरा मझां जींता केया। तुहैं ना समझु कि तुवै कितु थ्यै कातै, पण जेख्णी तुवै तैन्हां कंमा कातै थ्यै, ता जै भविष्यवक्तै बोलौरू थियु सै पूरू भू। तैन्हैं बोलौरू थियु कि मसीह दुख उठांणा जां मरि गांहणा। परमेश्वरै ऐ सभ किछ ऐहिंयैं भूंणा दित्तु। ऐठणीरै तेईनी, पश्चाताप करा जां परमेश्वरा धेरै फिरा, ताकि सै तुवाड़ै पाप धौ करि साफ करि दिया।”

![](https://cdn.door43.org/obs/jpg/360px/obs-en-44-06.jpg)

जेख्णी मंदिरेरै अगुवो पतरस जां यूहन्नेरी अवाज शुणी, ता सैक्यै बड़ै डरि गियै। ऐठणीरै तेईनी तैन्हैं सैक्यै पकड़ि लियै जां जैल्ही मझ सुटि दित्तै। पण जै पतरसै बोलौरू थियु तैस पनि बड़ै सारै मैहणुवें विश्वास केया। यीशु पनि विश्वास कांनारै मैहणुवां केरी गिणती लगभग 5000 भौ गैई।

![](https://cdn.door43.org/obs/jpg/360px/obs-en-44-07.jpg)

दुईं धियाड़ी, सैक्यै यहूदी अगुवे पतरसा जां यूहन्नै महायाजका जां होरा धार्मिक अगुवो केरै सामणै लैकरी यै। सैक्यै तैस मैहणु बि लै करि यै जै अपंग थ्या। तैन्हैं पतरसा जां यूहन्नै किना पुच्छु, “कि कुनि अधिकारै ला तुहैं सैक्या अपंग मैहणु ठीक केया?”

![](https://cdn.door43.org/obs/jpg/360px/obs-en-44-08.jpg)

पतरसै जवाब दित्ता, “ऐक्या मैहणु जै तुवाड़ै सामणै खड़ा आ सैक्या यीशु मसीहरी सामर्थी ला ठीक कियौरा आ। तुहैं यीशु क्रूसा पनि चाढ़ी दित्ता, पण परमेश्वरै सैक्या फिरी जींता करि दित्ता! तुहैं सैक्या अस्वीकार करि दित्ता, पण यीशुरी सामर्थिरै अलावा उद्धार पांणैरा कोई होरा उपाय ना!”

![](https://cdn.door43.org/obs/jpg/360px/obs-en-44-09.jpg)

सैक्यै अगुवे हैरान थ्यै कि पतरसै जां यूहन्नै बड़ि हिम्मती सिंउ गल्ल बात केईथी। तैन्हैं हैरू कि सैक्यै साधारण मड़द थ्यै जै कि अनपढ़ थ्यै। पण फिरी बि तैन्हां मैहणुवां याद यैई कि ऐक्यै मड़द यीशु साउगा थ्यै। ऐठणीरै तेईनी तेन्हैं तैन्हां सिंउ बोलु, “असुवां तुहांनि बड़ी जादी सजा दींणी, अगर तुवै इस संसारेरै मैहणुवां सेईतै ऐस मैहणुरै बारै मझ यानि कि यीशुरै बारै मझ कोई होरा संदेश दींतै।”ऐतेई बड़ी सारी गल्लै भूंणा किना बाद, तैन्हैं पतरस जां यूहन्ना गांहणा दित्तै।

*खास चैला केरै कंम 3-1–4:22 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_44_128kbps.m4a

## 45. स्तिफनुस जां फिलिप्पुसैरी- कहानी

https://openbiblestories.org/l/cdj/story-45/

![](https://cdn.door43.org/obs/jpg/360px/obs-en-45-01.jpg)

पेहिलै मसीही अगुवो मझ स्तिफनुस नाँईयेरा अक मड़द थ्या। सारै मैहणु तेसैरा आदर करींथ्यै। पवित्र आत्माय तैसनि बड़ि सामर्थ जां बुद्धी प्रदान केईथी। स्तिफनुसै बड़ै सारै चमत्कार कियौरै थ्यै। जेख्णी तेनि यीशु पनि भरौसा कांनेरै बारै मझ तैन्हांनि शिक्षा दित्ती ता बड़ै सारै मैहणुवें तैस पनि विश्वास केया।

![](https://cdn.door43.org/obs/jpg/360px/obs-en-45-02.jpg)

अक धियाड़ी स्तिफनुस यीशुरै बारै मझ शिक्षा दींता थ्या, जां किछ ऐतियै यहूदी यै जैन्हैं यीशु पनि विश्वास ना थ्या कियौरा, तैन्हैं तैस सिंउ विवाद कांना शुरू करि दित्ता। सैक्यै बड़ै गुस्सै भौ गियै, ऐठणीरै तेईनी सैक्यै धार्मिक अगुवो किनि गियै जां तेसैरै बारै मझ झूठ बोलु। तैन्हैं बोलु, “असुवें स्तिफनुस मूसेरै जां परमेश्वरेरै बारै मझ गल्लै काता शुंणोरा!” ऐठणीरै तेईनी धार्मिक अगुवोऐ स्तिफनुस गिरफ्तार करि लिया जां सै तैस महांयाजका जां यहूदिया केरै होरै अगुवो केरै सामणै लैई यै जां होरै बि झूठै गवाहि यै जां तैन्हैं बि स्तिफनुसेरै बारै मझ झूठ बोलु।

![](https://cdn.door43.org/obs/jpg/360px/obs-en-45-03.jpg)

महायाजकै स्तिफनुसा किना पुच्छु, “क्या ऐ मैहणु तिंडै बारै मझ सच्च अत्तै बौलतै?” स्तिफनुसै महायाजकानि जवाब दींणेरै तेईनी बड़ि भारी गल्लै बोलणी शुरू करि दित्ती। तेनि बोलु कि अब्राहमेरै टैंमा किना लैकरि यीशुरै टैंमा तेईनी परमेश्वरै इस्राएलेरै मैहणुवां केरै तेईनी बड़ै भारी अनोखै कंम कियौरै अत्तै। पण मैहणुवें हमेशा परमेश्वरेरी आज्ञायरा पालन ना केया। स्तिफनुसै बोलु, “तुवै मैहणु परमेश्वरेरै खिलाफ हठीलै जां उपद्रव कांनारै अत्तै। तुहैं हमेशा पवित्र आत्मा अस्वीकार केया, जिहीं कि असेड़ै पूर्वजै हमेशा पवित्र आत्मा अस्वीकार केईथ्या जां हमेशा तेसैरै भविष्यवक्तै मारी छडथियै। पण जै तैन्हैं कियौरू थियु तेसेरी तुलनाय मझ तुहैं होरू बि बुरू कियौरू आ! तुहैं मसीह मारी छडा!”

![](https://cdn.door43.org/obs/jpg/360px/obs-en-45-04.jpg)

जेख्णी तैन्हैं धार्मिक अगुवो ऐ शुणु, ता सैक्यै यौउतै गुस्सै भुवै कि तैन्हैं अपड़ै कन्न बंद करि दित्तै जां जौरै-जौरै चिन्डै दींणा लगै। तैन्हैं स्तिफनुस ध्रीड़ी करि नगरा किना भेईर लै नियां जां तैस खत्म कांनेरै तेईनी तैस पनि घौड़तिया बज्जी।

![](https://cdn.door43.org/obs/jpg/360px/obs-en-45-05.jpg)

जेख्णी स्तिफनुस मरता थ्या, तेनि जौरै हक दित्ती, “हे यीशु नासरी, मिंडि आत्मा ग्रहण कर!” तां सैक्या अपड़ै जेणुवां केरै भारै पैयि गिया जां फिरी दुबारै बोलु, “हे प्रभु ऐक्या पाप तैन्हां पनि मेईं लांता।” तां फिरी सै मरि गिया।

![](https://cdn.door43.org/obs/jpg/360px/obs-en-45-06.jpg)

तैस धियाड़ी, यरूशलेम शहरा मझ रींहणारै बड़ै मैहणुवें यीशुरै चैलै सतांणै शुरू करि दित्तै, ऐठणीरै तेईनी विश्वासी मैहणु होरिया जगाईयानि नशि गियै। पण ऐठणीरै बावजूद बि, जेठि-कोठि बि सैक्यै गियै तैन्हैं यीशुरै बारै मझ प्रचार केया।

![](https://cdn.door43.org/obs/jpg/360px/obs-en-45-07.jpg)

फिलिप्पुस नाँईयेरा अक मैहणु यीशु मसीहरा विश्वासी थ्या। जिहीं होरनियें बड़ै सारै विश्वासियै केईथियु तिहींये सैक्या बि यरूशलेम शहरा किना नशि गिया। सैक्या सामरियेरै लाकैनि चलि गिया।तैठि तेनि मैहणुवां मझ यीशुरै बारै मझ प्रचार केया। बड़ै सारै मैहणुवें यीशु पनि विश्वास केया जां उद्धार पा लेया। अक धियाड़ि, फिलिप्पुसा किनि परमेश्वरेरी तरफों अक स्वर्गदूत या जां तेनि तैसनि बणां मझ गांहणेरै तेईनी जां एकि सिड़कै पनि चलणेरै तेईनी बोलु। फिलिप्पुस तेदि चलि गिया। जेख्णी सैक्या तैस सिड़कै पनि चलौरा थ्या, ता तेनि अक मैहणु रत्था पनि गांहथा लधा। ऐक्या मैहणु कूश देशैरा अक बड़ा खास अधिकारी थ्या। पवित्र आत्माय फिलिप्पुसा सिंउ बोलु कि गहि करि तैस मैहणु सेईतै-सेईतै चल।

![](https://cdn.door43.org/obs/jpg/360px/obs-en-45-08.jpg)

ऐठणीरै तेईनी फलिप्पुस तैस रत्था किनि गिया। तेनि शुणु कि सैक्या कूश देशैरा मैहणु परमेश्वरैरा वचन आ पढ़ता। जै यशायाह भविष्यवक्तै अपड़ि किताबी मझ परमेश्वरैरा वचन लिखौरा थ्या सैक्या तैस पढ़ता थ्या। सैक्या पढ़ता थ्या, “सैक्यै तैस बढियोरी भ्रेडै सैयि लै गियै, जां जिहीं अक मेम्‍ना (मतलब भ्रडैरा बच्चा) शांत भूंता, तिहींये तेनि बि अक शब्द ना बोला। तैन्हैं तैस सिंउ बड़ा ऐयिड़ा बर्ताव केया, जां तेसैरा बड़ा अनादर केया। तैन्हैं तेसैरै प्रांण लै लियै।

![](https://cdn.door43.org/obs/jpg/360px/obs-en-45-09.jpg)

फिलिप्पुसै तैस कूशी मैहणु किना पुच्छु, “जै तु पढ़ता क्या तु तैस समझता बि आ?” तेनि कूशी मैहणु जवाब दित्ता, “नहीं। जियो तेईनी केणुक्या मूनि ना समझाईया, तियो तेईनी आंउ ऐस ना समझि सकता। छंदै मूं किनि आईछि करि बेश। फिरि तेनि बोलु, यशायाह ऐ अपड़ै बारै मझ थ्या लिखता कि कौसक्यै होरेरै बारै मझ?”

![](https://cdn.door43.org/obs/jpg/360px/obs-en-45-10.jpg)

फिलिप्पुस रत्था पनि चढ़ि करि बेशि गिया। तां तेनि तैस कूश देशैरै मैहणुनि सै शुणांउ जै यशायाह भविष्यक्तै यीशुरै बारै मझ थियु लिखौरू। फिलिप्पुसै परमेश्वरेरै वचना मझां होरनियां वचना केरी बि तेस सिंउ चर्चा की। ऐनि हिसाबै, फिलिप्पुसै तैस कूशी मैहणुनी यीशु मसीहरै बारै मझ शुभ संदेश शुणां।

![](https://cdn.door43.org/obs/jpg/360px/obs-en-45-11.jpg)

फिलिप्पुस जां सैक्या कूशी मैहणु चलतै-चलतै पांणी किनि यै। फिरि तेनि कूशी मैहणु बोलु, “तका! ऐठि पांणी आ! क्या अबै आंउ बपतिस्मा लै सकता?” जां तेनि रत्थ चलांणारै सिंउ रत्थ रौकणेरै तेईनी बोलु।

![](https://cdn.door43.org/obs/jpg/360px/obs-en-45-12.jpg)

फिरी सैक्यै पांणी मझ चलि गियै, जां फिलिप्पुसै तैस कूशी मैहणुनी बपतिस्मा दित्ता। जेख्णी सैक्यै पांणी मझां भेईर यै, ता पवित्र आत्माय अचानक फलिप्पुस चुक्की करि होरि जगाय पुजा छडा। तैठि फिलिप्पुसै मैहणुवां सिंउ यीशुरै बारै मझ बौलणु जारी रखु।

![](https://cdn.door43.org/obs/jpg/360px/obs-en-45-13.jpg)

सैक्या कूशी मैहणु यात्रा काता अपड़ै घरैनि चलि गिया। सैक्या बड़ा खुश थ्या कि सै अबै यीशु मसीह जांणीथ्या।

*खास चैला केरै कंम अध्याय 6:8; 8:5; 8:26-40 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_45_128kbps.m4a

## 46. पौलुस मसीही विश्वासी बंणि गांहथा- कहानी

https://openbiblestories.org/l/cdj/story-46/

![](https://cdn.door43.org/obs/jpg/360px/obs-en-46-01.jpg)

शाऊल नाँईयेरा अक मैहणु थ्या जेनि यीशु मसीह पनि विश्वास ना केईथ्या। जेख्णी सै जुवान थ्या, तेख्णी तेनि स्तिफनुसा मांनारै मैहणुवां केरै लिकड़ा केरी देखभाल केईथी। बाद मझ, तेनि विश्वासी मैहणु सताईथ्यै। तेनि यरूशलेम शहरा मझ घर-घर गहि करी मड़द जाँ जनानी दोईयो पकड़ि करी जेलखाने मझ सुटि दित्थियै। तां महायाजकै शाऊलानि दमिश्क नगरा मझ गांहणैरी अनुमति दित्ती। तेनि तेठणीरै मसीहियानि गिरफ्तार कांनानि जां तैन्हां वापिस यरूशलेम अणनेरै तेईनी शाऊलानि बोलु।

![](https://cdn.door43.org/obs/jpg/360px/obs-en-46-02.jpg)

फिरी शाऊलै दमिश्क गांहणेरी यात्रा शुरू की। तैस नगरा पुजणा किना पेहिले, तेसैरै चोऊवो पासै अक तैज प्रगड़ु चमकु, जां सै जमीनी पनि पैई गिया। शाऊलै केणुक्या बौलता शुणा, “हे शाऊल! हे शाऊल! तु मूं केईनी आ सतांता?” शाऊलै पुच्छु, “हे प्रभु, तु केणु आ?” यीशु जवाब दित्ता, “आंउ यीशु आ। जैस तु सतांता!”

![](https://cdn.door43.org/obs/jpg/360px/obs-en-46-03.jpg)

जेख्णी शाऊल उठा ता तैस किछ बि ना थियु लेहिंथु। तेसैरै मित्र तैस दमिश्क मझ लै करि गियौरै थ्यै। शाऊलै त्रा धियाड़ी ना किछ खाउ ना पित्तु।

![](https://cdn.door43.org/obs/jpg/360px/obs-en-46-04.jpg)

दमिश्क मझ हनन्याह नाँईयेरा अक चैला थ्या। परमेश्वरै तैस सिंउ बोलु, “तैस घरा मझ गा जेठि शाऊल रुकौरा। अपड़ा हत्थ तैस पनि रख ताकि तेसैरी नजर खुलि गहिया जां सै फिरी हैरी सकिया।” पण हनन्याहै बोलु, “हे प्रभु, मीं शुणोरू आ कि ऐनि मैहणु विश्वासी किहीं सताउरै अत्तै।” परमेश्वरै तैसनि जवाब दित्ता, “गा! मीं सैक्या यहूदिया मझ जां होरनियां जातिया केरै मैहणुवां मझ मिंडै नाँईयेरी घोषणा कांनेरै तेईनी चुणि लियौरा। तैस मिंडै नाँईयेरै तेईनी बड़ा कष्ट सैहन कांना।”

![](https://cdn.door43.org/obs/jpg/360px/obs-en-46-05.jpg)

फिरी हनन्याह शाऊला किनि गिया, अपड़ा हत्थ तैस पनि रखा, जां बोलु, “यीशु मसीहै, जै इदि ऐईंतै टैंमा ताउनि बत्तै मझ प्रकट भुईथ्या, तेनि आंउ ताउ की भेईजौरा ताकि तु फिरी हैरि सकिया, जां पवित्र आत्माय ला तु पूरी रीति सिंउ भरि गहिया।” तेख्णी ऐ शाऊलैरी नजर दुबारै वापिस चलि यैई जां सै फिरी हैना लगि पेया, जां हनन्याह तैसनि बपतिस्मा दित्ता। तां शाऊलै रोट्टी खाई जां फिरी हट्टा-कट्टा भौ गिया।

![](https://cdn.door43.org/obs/jpg/360px/obs-en-46-06.jpg)

तेख्णी ऐ किना शाऊलै दमिश्क मझ रींहणारै यहूदिया मझ प्रचार कांना शुरू करि दित्ता। तेनि बोलु, “यीशु ऐ परमेश्वरैरा पुत्र आ!” यहूदी मैहणु हैरान थ्यै, केईनी कि शाऊल ता हमेशा विश्वासी मैहणुवां मानेरी कोशिश करींथ्या, पण अबै तेनि यीशु मसीह पनि विश्वास केईथ्या। शाऊलै यहूदिया सेईतै वाद-विवाद केया। तेनि लुहाउ कि यीशु ऐ मसीह थ्या।

![](https://cdn.door43.org/obs/jpg/360px/obs-en-46-07.jpg)

बड़ै धियाड़ी बाद, यहूदियै शाऊला मांनेरी सकीम बंणाय। तैन्हैं तैस मांनेरै तेईनी फाटका पनि मैहणु भेईजै, कि तेसैरी निगरानि करिया पण शाऊलै तैन्हेरी सकीमिरै बारै मझ शुणि लियु, जां तेसैरै मित्रै तैठां बचांणेरै तेईनी तेसैरी बड़ि मजत की। अक रात तैन्हैं सैक्या टोकरी मझ रखा जां नगरेरी चार दिवारी बतै सैक्या हैट उतारी दित्ता। दमिशक किना बचि करि निकूंहणा किना बाद शाऊलै यीशुरै बारै मझ प्रचार कांना जारी रखा।

![](https://cdn.door43.org/obs/jpg/360px/obs-en-46-08.jpg)

शाऊल खास चैला सिंउ मिलणेरै तेईनी यरूशलेम मझ गिया, पण सैक्यै तैस हैरी डरींथ्यै। तां बरनबास नाँईयैरा अक विश्वासी शाऊला खास चैला किनि लै गिया। तेनि तैन्हांनि शुणांउ कि शाऊलै किहीं हिम्मति सिंउ दमिश्क मझ प्रचार केईथ्या। तैठां किना बाद, खास चैलै शाऊल साउगैरी लेया।

![](https://cdn.door43.org/obs/jpg/360px/obs-en-46-09.jpg)

कुछ विश्वासी जै यरूशलेमेरै सतावेरी वजाहि सिंउ नशि थ्यै गियौरै ऐक्यै दूर अंताकिया नगरा मझ चलि गेईथ्यै जां यीशुरै बारै मझ प्रचार करींथ्यै। अंताकिया मझ रींहणार मैहणु ज्यादातर यहूदी ना थ्यै, पण पेहिली बारी, तैन्हां मझां बड़ै सारै मैहणु विश्वासी बंणि गेईथ्यै। बरनवास जां शाऊल ऐन्हां विश्वासियानि यीशुरै बारै मझ होरू जादु शिख्रांणेरै तेईनी तैठि गियै जां तैन्हैरा विश्वास होर पक्का केया। यीशु पनि विश्वास कांनारैनि पेहिली बार अंताकिया मझ “मसीही“ बोलु।

![](https://cdn.door43.org/obs/jpg/360px/obs-en-46-10.jpg)

अक धियाड़ि, अंताकियेरै मसीही मैहणु उपवास करि करी प्रार्थना थ्यै कातै। पवित्र आत्माय तैन्हां सिंउ बोलु, “मिंडै तेईनी बरनवासा जां शाऊला सैक्या कम कांनेरै तेईनी अलग करि देया जैस कांनेरै तेईनी मीं सैक्यै शदाउरै अत्तै।” ऐठणीरै तेईनी अंताकियेरी विश्वासी मैहणुवें बरनवास जां शाऊलेरै तेईनी प्रार्थना की जां तैन्हां पनि अपड़ै हत्थ रखै। तां तैन्हैं सैक्यै होरिया बड़िया जगाईयानि यीशु बारै मझ शुभ संदेशेरा प्रचार कांनेरै तेईनी भेईजी दित्तै। बरनवासै जां शाऊलै अलग-अलग जातिया केरै मैहणुवंनी शिक्षा दित्ती जां बड़ै सारै मैहणुवें यीशु मसीह पनि विश्वास केया।

*खास चैला केरै कम अध्याय 8:3, 9:1-31; 11:19-26; 13:1-3 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_46_128kbps.m4a

## 47. फिलिप्पी शहरा मझ पौलुस जां सीलास- कहानी

https://openbiblestories.org/l/cdj/story-47/

![](https://cdn.door43.org/obs/jpg/360px/obs-en-47-01.jpg)

जेख्णी शाऊलै पूरै रोमी साम्राज्य मझ यात्राय की ता तेनि अपड़ु रोमी नाँ “पौलुस” रखि दित्तु। अक धियाड़ि, पौलुस जाँ तेसैरा मित्र सीलास फिलिप्पी शहरा मझ यीशुरै बारै मझ शुभ संदेश शुणांणेरै तेईनी गियै। सैक्यै नगरा भेईर नदिरै पासै एकि जगाईनि गियै जेठि मैहणु प्रार्थना कांनेरै तेईनी किट्टै थ्यै। तैठि सैक्यै लूदिया नाँईयेरी एकि जनानी सिंउ मिलै जै अक व्यापारी थी। सेकैयि परमेश्वरा सिंउ प्रेम करींथी जां तेसैरी आराधना करींथी।

![](https://cdn.door43.org/obs/jpg/360px/obs-en-47-02.jpg)

परमेश्वरै लूदिया यीशुरे बारै मझ संदेशा पनि विश्वास कांनेरै तेईनी तैयार की। पौलुस जां सीलासै तैसनि जां तेसैरै पूरै परिवारानि बपतिस्मा दित्ता। तेनि पौलूस जां सीलासानि अपड़ै घरा मझ बेशणेरै तेईनी बोलु, ऐठणीरै तेईनी सैक्यै तैठि रुकि गियै।

![](https://cdn.door43.org/obs/jpg/360px/obs-en-47-03.jpg)

पौलुस जां सीलास ज्यादातर तैस जगाय मिलींथ्यै जेठि यहूदी मैहणु प्रार्थना करींथ्यै। हर रौज जेख्णी सैक्यै तैठि गहींथ्यै ता अक दासी छोकरी जै बुरी आत्मायरै वशा मझ थी तैन्हैरा पीछा करियां करींथी। ऐस बुरी आत्मायरै सहारै सिंउ सेकैयि मैहणुवां केरै भविष्येरै बारै मझ शुणांईथी, ऐनि धन्धै ला सेकैयि अपड़ै मालिकानि बड़ा भारी पेईंसा कमोईयां करींथी।

![](https://cdn.door43.org/obs/jpg/360px/obs-en-47-04.jpg)

पौलुसेरै जां सीलासेरै गांहथै टैमां ऐकैई दासी छोकरि जौरै-जौरै हक्कै दियां करींथी, “ऐक्यै मड़द परम प्रधान परमेश्वरेरै सेवक अत्तै। ऐक्यै तुहांनि उद्धारेरी बत्त शुणांतै अत्तै!” सैकेयि हर रौज ऐहिं कियां करींथी जेनि ला कि पौलुस नाराज भौ गेया।

![](https://cdn.door43.org/obs/jpg/360px/obs-en-47-05.jpg)

लाष्टी, अक धियाड़ि जेख्णी तेनि दासी छोकरी जौरै- जौरै हक्कै दींणी शुरू की, तां पौलुसै तैस धेरै मुड़ि करि तैस अंतर जै बुरी आत्मा थी तैसनि बोलु, “यीशुरै नाँ किना ऐस छोकरी मझां निकोहि गा।” तेसै टैंमा सै बुरी आत्मा तैस मझां निकोहि करि चलि गैयि।

![](https://cdn.door43.org/obs/jpg/360px/obs-en-47-06.jpg)

तैस दासी छोकरिरै मालिक बड़ै गुस्सै भौ गियै। तैन्हां पता लगि गिया कि बिना तेनि बुरी आत्माय सेकैई छौकरि मैहणुवां केरा भविष्य ना शुणां सकींथी। ऐठणीरा मतलब थ्या कि मैहणुवां अबै तेसैरै मालिकानि पेईंसै ना दींणै जियो तेईनी सेकैई तैन्हेरै भविष्येरै बारै मझ ना शुणांती कि तैन्हां सिंउ कितु भूंणु।

![](https://cdn.door43.org/obs/jpg/360px/obs-en-47-07.jpg)

ऐठणिरै तेईनी तैस दासी छोकरिरै मालिकै पौलुस जां सीलास रोमी अधिकारिया किनि लै नियैं। तैन्हैं पौलुस जां सीलास मारै, जां सैक्यै जेलखानै मझ सुट्टि दित्तै।

![](https://cdn.door43.org/obs/jpg/360px/obs-en-47-08.jpg)

तैन्हैं पौलुस जां सीलास जैल्हिरै ऐतियै हिस्सै मझ रखै जेठि सभनियां जादै सिपाहि थ्यै। यो तेईनी कि तैन्हैं तैन्हेरै पैयिड़ लकड़ेरै टुकड़ा सिंउ बन्हीं दित्तै। पण पौलुस जां सीलास अधरातै, परमेश्वरेरी स्तुतिरै गीत लांतै थ्यै।

![](https://cdn.door43.org/obs/jpg/360px/obs-en-47-09.jpg)

तां अचानक, अक बड़ा भुन्जल भुवा! जैल्हिरै सारै दुवारै खुलि गियै, जां सारा केईदिया केरी जंजीरै खुलि करि छुड़खि गेई।

![](https://cdn.door43.org/obs/jpg/360px/obs-en-47-10.jpg)

तां जैल्हिरा ठांणैदार बियुझि गिया। तेनि हैरू की जैल्हिरै दुवारै सारै खुल्लै अत्तै। तेनि सौचु कि सारै केईदी बचि करि नशि गियै। सैक्या डरि गिया कि तैन्हेरै नशि गांहणेरी वजाहि सिंउ रोमी अधिकारिया सैक्या मारी छडणा, ऐठणिरै तेईनी सैक्या आत्म हत्या कांनेरै तेईनी तैयार भौ गिया! पण पौलुसै तैस हैरी जौरै हक्क दित्ती, “रुकि गा! अपड़ि जानिनी चौट मेईं लायि। असै सारै ऐठि अत्तै।”

![](https://cdn.door43.org/obs/jpg/360px/obs-en-47-11.jpg)

तेनि ठांणेदारै डरौरै पौलुसा जां सीलासा किना पुच्छु, “उद्धार पांणेरै तेईनी मूं कितु कांनु?” पौलुसै जवाब दित्ता, “प्रभु यीशु मसीह पनि विश्वास कर, ता ताउ जां तिंडै पूरै घरानेनी उद्धार मेईंणा।” तां सैक्या ठांणैदार पौलुसा जां सीलासा अपड़ै घरै लै गिया जां तैन्हेरै जख्म धोत्तै। पौलुसै तेसैरै घरेरै सारा मैहणुवंनी प्रभु यीशु मसीहरै बारै मझ शुभ संदेश शुणां।

![](https://cdn.door43.org/obs/jpg/360px/obs-en-47-12.jpg)

ठांणैदारै जां तेसैरै पूरै परिवारे यीशु मसीह पनि विश्वास केया, ऐठणीरे तेईनी पौलुसै जां सीलासै तैन्हांनि बपतिस्मा दित्ता। तां ठांणैदारै पौलुस जां सीलासानि रोट्टी खलाई, जां सैक्यै यौकिया मझ बड़ै खुश भुवै।

![](https://cdn.door43.org/obs/jpg/360px/obs-en-47-13.jpg)

दुईं धियाड़ी नगरेरै अगुवोऐ पौलुस जां सीलास जैल्ही किना आजाद करि दित्तै जां फिलिप्पी शहरा किना चलि गांहणानि बोलु। पौलुस जां सीलास लूदिया जां कुछ होरा मित्रा सिंउ मिलै जां तैठां किना बाद सैक्यै नगरा किना निकोहि गियै। यीशुरै बारै मझ शुभ संदेश फैलता गिया, जां कलीसिया बधति गैयि।

![](https://cdn.door43.org/obs/jpg/360px/obs-en-47-14.jpg)

पौलुसै जां होरै बड़ै मसीही अगुवोऐ बड़ा सारा नगरा केरी यात्रा की। तैन्हैं मैहणुवंनी यीशुरै बारै मझ खुशखबरी शुणांय। तैन्हैं कलीसियेरै विश्वासियानि खुश कांनेरै तेईनी जां शिक्षा दींणेरै तेईनी केही चिट्ठी बि लिखि। ऐन्हां मझां किछ चिट्ठी बाइबलिरी किताबी बंणि गेई।

*खास चैला केरै कंम अध्याय 16:11-40 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_47_128kbps.m4a

## 48. यीशुऐ वायदै बा मसीह आ- कहानी

https://openbiblestories.org/l/cdj/story-48/

![](https://cdn.door43.org/obs/jpg/360px/obs-en-48-01.jpg)

जेख्णी परमेश्वरै संसार बंणा ता सभ किछ बधिया थियु। कोई पाप ना थ्या। आदम जां हव्वा योकिया सिंउ बड़ा प्रेम करींथ्यै। जां सैक्यै परमेश्वरा सिंउ प्रेम करींथ्यै। कोई बिमारी जां मोऊत ना थी। परमेश्वर ऐतियै संसारा बणांणा चांहथा थ्या।

![](https://cdn.door43.org/obs/jpg/360px/obs-en-48-02.jpg)

शैतानै कीड़ेरै जरियै बगीचै मझ हव्वाय सिंउ गल्ल की, केईनी कि सै तैसनि धौखा दींणा चांहथा थ्या। तेख्णी हव्वाय जां आदमै परमेश्वरेरै खिलाफ पाप केया। केईनी कि तैन्हैं पाप केईथ्या ऐठणीरे तेईनी धरती पन रींहणारै सारै जणै मरि गांहथै।

![](https://cdn.door43.org/obs/jpg/360px/obs-en-48-03.jpg)

केईनी कि आदम जां हव्वाय पाप कियौरा थ्या, ऐठणीरे तेईनी किछ होरू बि बुरू भू। सैक्यै परमेश्वरेरै दुश्मण बंणि गियै। जेठणिरी वजाहि सेईतै, तेख्णी किना हरेक मैहणु पाप केया। हरेक मैहणु जन्मा किना ऐ परमेश्वरैरा दुश्मण आ। परमेश्वरा जां मैहणुवां केरै बिच कोई शांति ना थी। पण परमेश्वर शांति स्थापित कांना चांहथा थ्या।

![](https://cdn.door43.org/obs/jpg/360px/obs-en-48-04.jpg)

परमेश्वरै वायदा केया कि हव्वायरा वंश शैतानेरू मुंडका पायड़ा हैटां प्रिंचैला। तेनि ऐ बि बोलु कि शैतान तेसैरै पायड़ानि डंस दैला, पण परमेश्वरा सैक्या फिरी जींता करि दींणा। ऐठां किना बाद, मसीही शैतानेरी शक्ति हमेशा के लिए खत्म करि दींणी। केहिया साला बाद, परमेश्वरै लुहाउ कि सैक्या मसीह यीशु आ।

![](https://cdn.door43.org/obs/jpg/360px/obs-en-48-05.jpg)

परमेश्वरै तेनि बाढ़ी ला अपड़ा परिवार बचा जैस सैक्या अंणनार थ्या। नूहा सिंउ अक किश्ती बंणाणनि बोलु, कि तैस ऐनि हिसाबै परमेश्वरेरै मैहणु बचांणै जै तैस पनि विश्वास करींथ्यै। ऐनि हिसाबै, सैक्यै सारै परमेश्वरेरै जरियै मारी दींणेरे काबिल थियै केईनी कि तैन्हैं पाप कियौरा थ्या। पण परमेश्वरै तैन्हां सभनियां बचांणेरै तेईनी यीशु भेईजा जै तैस पनि विश्वास कातै।

![](https://cdn.door43.org/obs/jpg/360px/obs-en-48-06.jpg)

केहिया साला तेईनी, याजक परमेश्वरेरै तेईनी बलिदान चाढ़तै रिय्है। ऐ ऐठणीरै तेईनी करींथ्यै कि मैहणुवें पाप कियौरा थ्या, जां सैक्यै परमेश्वरा किना सजायरै काबिल थ्यै। पण सै बलिदान तैन्हेरै पाप माफ ना करी सकींथ्या। यीशु सभनियां बड्डा महायाजक आ। तेनि सै कियु जै कौ याजक ना करि सकींथ्या। तेनियें सिर्फ अक ऐतिया बलिदान दींणेरै तेईनी अपांणा दैयि दित्थिया जै हरेक मैहणुरै पापा माफ करी सकींथ्या। तेनि मनि लियु कि परमेश्वर सारा केरै पापा केरै तेईनी सिर्फ तैसनि ऐ सजा दिया। ऐनि कारणै, यीशु सिद्ध महायाजक बंणि गिया।

![](https://cdn.door43.org/obs/jpg/360px/obs-en-48-07.jpg)

परमेश्वरै अब्राहमा सिंउ बोलु, “आंउ तिंडै जरियै संसारेरै सारा कुलानि आशीष दैला।” यीशु मसीह ऐसै अब्राहमेरा वंशज थ्या। परमेश्वर अब्राहमेरै जरियै सारा कुलानि आशीष दींता, केईनी कि जै यीशु मसीह पनि विश्वास कातै परमेश्वर तैन्हां सभनियां पापा किना बचांता। जेख्णी ऐक्यै मैहणु यीशु मसीह पनि विश्वास कातै, ता परमेश्वर तैन्हां अब्राहमेरै वंशज मनता।

![](https://cdn.door43.org/obs/jpg/360px/obs-en-48-08.jpg)

परमेश्वरै अब्राहमा सिंउ बोलु कि तु अपड़ै सक्कै पुत्रा मिंडै तेईनी बलिदान करि दै। पण फिरी परमेश्वरै इसहाकेरी जगाय बलि कांनेरै तेईनी मेम्ना दी दित्ता। असै सारै अपड़ै पापा केरै तेईनी मारी छडणेरै काबिल थ्यै! पण परमेश्वरै असेड़ि जगाय मरनेरै तेईनी यीशु बलिदानेरै रूपा मझ दी दित्ता। ऐनि वजाहि ला असै यीशुनि परमेश्वरैरा मेम्ना बोलतै।

![](https://cdn.door43.org/obs/jpg/360px/obs-en-48-09.jpg)

जेख्णी परमेश्वरै मिस्र देशा पनि मुसीबत भेईजी ता तेनि हर इस्राएली परिवारानि बोलु कि सै एकि मेम्नेरी बलि करिया। तैस मेम्ने मझ कोई दोष ना भूंणा चेहिंथा। फिरी अपड़ै दुवारा केरै चौखटा पनि जां अड्ढा-बड्ढा तेसैरा खून लांणा थ्या। जेख्णी परमेश्वरै सैक्या खून लधा ता सै तैन्हेरै घरा किना आघै चलि गिया जां तैन्हेरा जैठा पुत्र ना मारा। जेख्णी ऐहिं भूं ता परमेश्वरै ऐसनी फसहैरा त्यौव्हार बोलु।

![](https://cdn.door43.org/obs/jpg/360px/obs-en-48-10.jpg)

यीशु फसहेरै त्यौव्हारेरै एकि मेम्ने सैयि आ। तेनि कदि बि पाप ना केया, ऐठणीरे तेईनी तैस मझ किछ बि गलत ना थियु। सैक्या फसहेरै त्यौव्हारा मझ मुआ। जेख्णी केणुक्या यीशु मसीह पनि विश्वास काता, तेख्णी यीशु मसीहरा खून तैस मैहणुरै पापा केरी कीमत चुकांता। ऐ ऐतियु आ कि परमेश्वर तैस मैहणु किना आघै चलि गिया, केईनी कि सै तैसनी सजा ना दींता।

![](https://cdn.door43.org/obs/jpg/360px/obs-en-48-11.jpg)

परमेश्वरै इस्राएली मैहणुवां सिंउ अक वायदा केया, केईनी कि सैक्यै एतियै मैहणु थ्यै जै परमेश्वरै अपड़ै भूंणेरै तेईनी चुणौरै थ्यै। पण परमेश्वरै अक ऐतिया वायदा केयौरा जै कि सभनियां केरै तेईनी आ। अगर कौस बि जातिरा कौ बि मैहणु ऐस नाउवें वायदै मनि लींता, ता सैक्या परमेश्वरेरै मैहणुवां मझ शामिल भौ गांहथा। सैक्या ऐ ऐठणीरै तेईनी काता केईनी कि सैक्या यीशु पनि विश्वास काता।

![](https://cdn.door43.org/obs/jpg/360px/obs-en-48-12.jpg)

मूसा अक ऐतिया भविष्यवक्ता थ्या जेनि परमेश्वरेरै वचनेरा बड़ी सामर्थ सिंउ प्रचार केईथ्या। पण यीशु सभनियां भविष्यवक्ता मझ सभनियां बड्डा आ। सैक्या परमेश्वर आ, ऐठणीरै तेईनी जै किछ बि तेनि कियु जां बोलु सै परमेश्वरेरै कंम जां वचन थ्यै। ऐठणीरै तेईनी पवित्र-शास्त्र यीशु मसीहनी परमेश्वरेरा वचन बौलता।

![](https://cdn.door43.org/obs/jpg/360px/obs-en-48-13.jpg)

परमेश्वरै राजै दाऊदा सिंउ वायदा केईथ्या कि राजेरै रूपा मझ तेसैरा अक वंश परमेश्वरेरै मैहणुवां पनि हमेशा राज करैला। यीशु परमेश्वरेरा पुत्र जां मसीह आ, ऐठणीरै तेईनी सैक्या राजै दाऊदेरा वंशज आ जै हमेशा तेईनी राज करि सकता।

![](https://cdn.door43.org/obs/jpg/360px/obs-en-48-14.jpg)

दाऊद ता इस्राएलेरा राजा थ्या, पण यीशु सारै संसारैरा राजा आ! तैस फिरी ऐईंणु जां हमेशा तेईनी सच्चाई जां शांति सिंउ अपड़ै राज्य पनि शासन कांना।

*उत्पत्ति अध्याय 1-3, 6, 14, 22; निर्गमन 12, 20; 2 शमूएल 7; इब्रानियों 3:1-6, 4:14-5:10, 7:1-8:13, 9:11-10:18; प्रकाशितवाक्य 21 किना अक बाईबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_48_128kbps.m4a

## 49. परमेश्वरेरा नवाँ वायदा- कहानी

https://openbiblestories.org/l/cdj/story-49/

![](https://cdn.door43.org/obs/jpg/360px/obs-en-49-01.jpg)

एकि स्वर्गदूतै एकि जुआन छोकरी मरियमै सिंउ बोलु कि सै परमेश्वरेरै पुत्रानि जंन्म दैली। सै हालै तेईनी कुंवारी थी, पण पवित्र आत्मा तैस किनि या जां सैकेई दुपरांणी भुई। तेनि एकि पुत्रानि जन्म दित्ता जेसैरू नाँ तेनि यीशु रखु। ऐठणीरै तेईनी यीशु परमेश्वर जां मैहणु दोईयो आ।

![](https://cdn.door43.org/obs/jpg/360px/obs-en-49-02.jpg)

यीशु मसीह बड़ै भारी चमत्कार कियै जै ऐ साबित कातै कि सै परमेश्वर आ। सै पांणी बेहीं चला जां पांणी शांत कियु। तेनि बड़ै सारै बिमार मैहणु ठीक कियै जां बड़ा सारा मैहणुवां मझां बुरी आत्माय कढी। तेनि मौरै मैहणु बि जींतै करि दित्तै, जां तेनि चमत्कार करि करी पंजा रोट्टिया जां दुवें मछलियै ला 5000 मैहणुवंनी भरपूर टोट्टी खलाईथी।

![](https://cdn.door43.org/obs/jpg/360px/obs-en-49-03.jpg)

यीशु अक महान शिक्षक बि थ्या। जै किछ बि तेनि शिख्राउ, सै तेनि सिद्धताय सिंउ शिख्राउ। जै सै मैहणुवंनि कांनानि बौलता सै तैन्हां कांनु चेहिंथु केईनी कि सैक्या परमेश्वरैरा पुत्र आ। उदाहरण तौर पनि, तेनि शिख्राउ कि तुहां होरनियां मैहणुवां सिंउ बि तेनि ऐ हिसाबै सिंउ प्रेम कांनेरी जरूरत आ जिहीं तुवै अपांणै सिंउ प्रेम कातै।

![](https://cdn.door43.org/obs/jpg/360px/obs-en-49-04.jpg)

तेनि ऐ बि शिख्राउ कि तुहां सारिया चीजा किना जादा जां अपड़ी संपत्ति किना बि जादा परमेश्वरा सिंउ प्रेम कांना चेहिंथा।

![](https://cdn.door43.org/obs/jpg/360px/obs-en-49-05.jpg)

यीशु बोलु कि संसारा मझ कोई बि चीज हासिल कांना किना जादु बधिया आ परमेश्वरेरै राज्य मझ ऐईंणु। तेसैरै राज्य मझ तुवाड़ै ऐईंणेरै तेईनी जरूरी आ कि परमेश्वर तुहां तुवाड़ै पापा किना बचाईया।

![](https://cdn.door43.org/obs/jpg/360px/obs-en-49-06.jpg)

यीशु बोलु कि कुछ मैहणुवां सै मनि लींणा। परमेश्वरा सैक्यै मैहणु बचांणै। पण होरनियां मैहणुवां सैक्या ना मनणां। तेनि ऐ बि बोलु कि कुछ मैहणु बधिया जमीनि सैयि अत्तै, केईनी कि सैक्यै यीशुरै बारै मझ शुभ संदेश मनिं लींतै, जां परमेश्वर तैन्हां बचा लींता। पण कुछ मैहणु बत्तेरी सैट्ट जमीनि सैयि अत्तै। परमेश्वरैरा वचन बीआ सैयि बत्तै पूंता, पण तैठि सै जमतुऐ ना। ऐतियै मैहणु परमेश्वरैरा वचन ना मनतै। सैक्यै तेसैरै राज्य मझ ऐईंणानि नमा करि दींतै।

![](https://cdn.door43.org/obs/jpg/360px/obs-en-49-07.jpg)

यीशु शिख्राउ कि परमेश्वर पापिया सिंउ बड़ा प्रेम काता। सैक्या तैन्हांनि माफ कांना चांहथा जां तैन्हां अपड़ि आउलाद बणांणा चांहथा।

![](https://cdn.door43.org/obs/jpg/360px/obs-en-49-08.jpg)

यीशु ऐ बि बोलु कि परमेश्वर पापा सिंउ नफरत काता, केईनी कि आदमै जां हव्वाय पाप केया, ऐठणीरै तेईनी तैन्हेरै सारै वंशै पाप केया। इस संसारा मझ रींहणार हरेक मैहणु पाप काता जां परमेश्वरा किना दूर आ। हर मैहणु परमेश्वरैरा दुशमण आ।

![](https://cdn.door43.org/obs/jpg/360px/obs-en-49-09.jpg)

पण परमेश्वरै इस संसारा मझ रींहणारा हरेक मैहणु सिंउ ऐनि हिसाबै प्रेम केया: तेनि अपड़ा इकलौता पुत्र कुर्बान करि दित्ता ताकि परमेश्वर तैन्हांनि सजा ना दिया जै तैस पनि विश्वास कातै। ऐठणिरी बजाय, सैक्यै तैस सैईतै हमेशा रींहणै।

![](https://cdn.door43.org/obs/jpg/360px/obs-en-49-10.jpg)

तुवै मरनेरै काबिल अत्तै, केईनी कि तुहैं पाप कियौरा। तुहां सिंउ परमेश्वरैरू गुस्सै भूंणु ठीकै आ, ऐठणिरी वजाय सै यीशु पनि गुस्सै भुवा। तेनि यीशुनि क्रूसेरी मोऊतिरी सजा दित्ती।

![](https://cdn.door43.org/obs/jpg/360px/obs-en-49-11.jpg)

यीशु कदि पाप ना केया, पण तेनि ऐपु पनि ऐस सजाहिरै तेईनी परमेश्वरानि नमा ना केया। तेनि मरि गांहणु सवीकार कियु। ऐनि हिसाबै, तुवाड़ै पाप जां इस संसारा मझ रींहणारा हरेक मैहणुरै पाप चुकि लींणानि सैक्या अक सिद्ध बलिदान थ्या। यीशु अपांणा परमेश्वरेरै तेईनी बलिदान करि दित्ता, ऐठणीरै तेईनी परमेश्वर कौस बि पापा, यो तेईनी कि भयांकर पाप बि माफ काता।

![](https://cdn.door43.org/obs/jpg/360px/obs-en-49-12.jpg)

बेशक तुवै बड़ै भारी अच्छै कंम कातै, ता ऐन्हैं ला परमेश्वरा तुवै ना बचांणै। तेसैरा मित्र बणनेरै तेईनी ऐतियु किछ बि ना जै तुवै करि सकतै। ऐठणिरी वजाय, तुहां विश्वास कांना कि यीशु परमेश्वरैरा पुत्र आ, जां सैक्या तुवैड़ै बदलै क्रूसा पनि मरि गिया, जां ऐ बि कि परमेश्वरै सैक्या फिरी जींता करि दित्ता। अगर तुवै ऐस पनि विश्वास करा ता परमेश्वरा तुहांनि तुवाड़ै पापा किना माफी दी दींणी।

![](https://cdn.door43.org/obs/jpg/360px/obs-en-49-13.jpg)

परमेश्वरा सैक्या हर मैहणु बचांणा जै यीशु पनि विश्वास काता जां तैस अपड़ै प्रभु स्वीकार काता। पण तैस सैक्यै ना बचांणै जै तैस पनि विश्वास ना कातै। ऐ कोई मायनै ना रखतु कि तुवै शैठ अत्तै कि गरीब अत्तै, जनानी आ कि मड़द आ, या तुवै कोठि रींहथै। परमेश्वर तुहां सिंउ प्रेम काता जां सै चांहथा कि तुवै यीशुनि पनि विश्वास करिया कि सै तुवाड़ा मित्र बंणि सकिया।

![](https://cdn.door43.org/obs/jpg/360px/obs-en-49-14.jpg)

यीशु तुहां शदांता कि तैस पनि विश्वास करा जां बपतिस्मा लिया। क्या तुवै विश्वास कातै कि परमेश्वरैरा पुत्र, यीशु ऐ मसीह आ? क्या तुवै विश्वास कातै कि तुवै पापी अत्तै जां ऐ कि तुवै परमेश्वरेरी तरफों सजाईरै काबिल अत्तै? क्या तुवै विश्वास कातै कि तुवाड़ै पाप मिटांणेरै तेईनी यीशु क्रूसा पनि मुआ?

![](https://cdn.door43.org/obs/jpg/360px/obs-en-49-15.jpg)

अगर तुवै यीशु पनि जां जै तेनि तुवाड़ै तेईनी कियौरू आ तैस पनि विश्वास कातै, ता तुवै मसीही अत्तै! शैतान अपड़ै अंधकारेरै राज्य मझ अबै तुहां पनि शासन ना काता। अबै परमेश्वर अपड़ै प्रकाश बाऐ राज्य मझ तुहां पनि शासन काता। तेनि तुवै पाप कांना किना रौकि दित्तै, जैन्हां तुवै करींथ्यै। तेनि तुहांनि अक नवाँ सही जीवन दितौरा।

![](https://cdn.door43.org/obs/jpg/360px/obs-en-49-16.jpg)

अगर तुवै मसीही अत्तै ता जै यीशु कियौरू आ तेनि कारणै परमेश्वरै तुवाड़ै पाप माफ करि दित्तै। अबै, परमेश्वर एकि दुशमणेरी वजहि तुहां एकि बड़ै खास मित्रा मनता।

![](https://cdn.door43.org/obs/jpg/360px/obs-en-49-17.jpg)

अगर तुवै परमेश्वरेरै मित्र अत्तै जां प्रभु यीशुरै सेवक अत्तै ता तैन्हां गल्ला मंनणेरी ईच्छा करेलै जै यीशु तुहांनि शिख्रांता। भले ही तुवै मसीही किना भुईया, शैताना हालै बि पाप कांनेरै तेईनी तुवाड़ी परीक्षा कांनी। पण परमेश्वर हमेशा सेहै काता जै सै कांनानि बौलता जां सै काता। सै बौलता कि अगर तुवै अपड़ै पाप मनि लिया, ता तैस तुहांनि माफ करि दींणु। तैस तुहांनी पापेरै खिलाफ लड़नेरी शक्ति दींणी।

![](https://cdn.door43.org/obs/jpg/360px/obs-en-49-18.jpg)

परमेश्वर तुहांनि प्रार्थना कांनानि जां तेसैरै वचन पढ़नेरै तेईनी बौलता। सै तुहांनि होरनियां विश्वासिया सिंउ मिलिकरी तेसैरी आराधना कांनेरै तेईनी बि बौलता। तुहां होरनियां मैहणुवंनी बि शुणांणु कि तेनि तुवाड़ै तेईनी कितु कियौरू आ। अगर तुवै ऐन्हां कंमा करिया ता तुवै तेसैरै पक्कै मित्र बंणि गांहणै।

*रोमियो अध्याय 3:21-26, 5:1-11; यूहन्ना 3:16; मरकुस 16:16; कुलुस्सियों 1:13-14; 2 कुरिन्थियों 5:17-21; 1 यूहन्ना 1:5-10 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_49_128kbps.m4a

## 50. यीशु वापस ऐईंता-कहानी

https://openbiblestories.org/l/cdj/story-50/

![](https://cdn.door43.org/obs/jpg/360px/obs-en-50-01.jpg)

लगभग 2000 साला किना, संसारा मझ सारा जगाईया पनि मतै सारै मैहणु यीशु मसीहरै बारै मझ शुभ संदेश शुणतै अत्तै। जां कलीसिया बधति आ। यीशु ऐ वायदा कियौरा कि तैस संसारेरै अंत मझ वापिस ऐईंणु। केईनी कि सै हालै तेईनी वापिस ना या, तां बि तैस अपड़ा वायदा पूरा कांना।

![](https://cdn.door43.org/obs/jpg/360px/obs-en-50-02.jpg)

जबकि असै यीशुरी वापस ऐईंणेरी भाय मझ अत्तै, परमेश्वर असु किना ऐनि हिसाबै जीवन जींणैरी ईच्छा काता जै पवित्र आ जां जै तेसैरा आदर काता। जेख्णी यीशु धरती पन रिहींथ्या तां तेनि बोलु, “मिंडै चैलै संसारा मझ सारा जगाईया केरै मैहणुवंनी परमेश्वरेरै राज्यरै बारै मझ खुशखबरिरा प्रचार करेलै, जां तेख्णी अंत आईछि गांहणा।”

![](https://cdn.door43.org/obs/jpg/360px/obs-en-50-03.jpg)

बड़ि सारियै जातियै हालै तेईनी यीशुरै बारै मझ ना शुणोरू। स्वर्गानि गांहणा किना पेहिलै, यीशु मसीहिया मैहणुवां सिंउ तैन्हां मैहणुवंनी खुशखबरी शुणांणनी बोलु जैन्हैं ऐ कदि ना शुणोरी। तेनि बोलु, “गहा जां सारिया जातिया केरै मैहणुवां चेलै बंणा!” जां “कटाईरै तेईनी पट्टी बिल्कुल तियार भौ गियोरी अत्ती!”

![](https://cdn.door43.org/obs/jpg/360px/obs-en-50-04.jpg)

यीशु ऐ बि बोलु, “कौस बि मैहणुरा सेवक तैस किना बड्डा ना भूंता। इस संसारेरै खास मैहणुवें मूं सिंउ नफरत की, जां मिंडि वजाहि सिंउ तैन्हां तुवै बि सतांणै जां मारी छडणै। इस संसारा मझ तुवै दुखी भूंणै, पण मजबूत बंणा, केईनी कि मीं शैतान हारियांणी छडौरा जै इस संसारा पनि राज्य काता। अगर तुवै अंत तेईनी मिंडै विश्वासेरै काबिल बणि रिय्हा, ता परमेश्वर तुहां बचाला!”

![](https://cdn.door43.org/obs/jpg/360px/obs-en-50-05.jpg)

यीशु अपड़ै चैलानि ऐ समझांणेरै तेईनी अक कहानी शुणांई कि जेख्णी संसारैरा अंत भूंता ता मैहणुवां सिंउ कितु भुंणु। तेनि बोलु, “एकि मैहणु अपड़ि पट्टी मझ बधिया बी बाउ। जेख्णी सैक्या झुलौरा थ्या ता तेसैरा दुशमण या जां किणकेरू बीआ मझ जंगली बी बा छडु, जां फिरी सै चलि गिया।”

![](https://cdn.door43.org/obs/jpg/360px/obs-en-50-06.jpg)

“जेख्णी सै बी लुंगि गियु ता सेवकै तैस मैहणु सिंउ बोलु, ‘हे स्वामी तीं ता अपड़ी पट्टी मझ बधिया बी थियु बाउरू, ता फिरी ऐस मझ जंगली बुट्टै किहीं लगै?’ तेनि मैहणु जवाब दित्ता, ‘सिर्फ मिंडै दुशमन ऐ ऐनि हिसाबै चांहथै। ऐक्या मिंडा कोई दुश्मण आ जेनि ऐहिं कियु।’”

![](https://cdn.door43.org/obs/jpg/360px/obs-en-50-07.jpg)

“तैन्हैं सेवकै अपड़ै स्वामिनी जवाब दित्ता, ‘क्या असु जंगली बुट्टी पुटि छडणी चेहिंथी?’ तेनि स्वामी बोलु, ‘नहीं। अगर तुवै ऐहीं करेलै ता तुहां कुछ बुट्टी किणकिरी बि पुटि दींणी। बढतै तेईनी ऐन्हां रीहणा देया। फिरी जंगली बुट्टी पुटि करी किट्ठी करि-करी सैकेई दट्ठै बंणा करि तुवै फुकि छडै। पण किणक अंणि करी किट्ठी करि-करी मिंडी तूणियां मझ भरी दिया।’”

![](https://cdn.door43.org/obs/jpg/360px/obs-en-50-08.jpg)

चैलै ऐस कहानिरा मतलब ना समझा, ऐठणीरै तेईनी तैन्हैं यीशुनि बोलु कि छंदै असुनि ऐस कहानिरा मतलब दुबारी समझाय दै। यीशु बोलु, “बधिया बी बांणै बा मैहणु मसीहरै बारै मझ शुणांता। पट्टी संसारेरै बारै मझ शुणांता। बधिया बी परमेश्वरेरै राज्यरै मैहणुवां केरै बारै मझ शुणांता।

![](https://cdn.door43.org/obs/jpg/360px/obs-en-50-09.jpg)

“जंगली बी शैतानेरै मैहणुवां केरै बारै मझ शुणांतै। तैस मैहणुरा दुशमण, जेनि तैसेरी पट्टी जंगली बी बाईथियु सै शैतानेरै बारै मझ शुणांता। जां बढणार परमेश्वरेरै स्वर्दूता केरै बारै मझ शुणांतै।”

![](https://cdn.door43.org/obs/jpg/360px/obs-en-50-10.jpg)

“जेख्णी संसारैरा अंत भूंणा तेख्णी स्वर्गदूता सैक्यै सारै मैहणु किट्ठै कांनै जै शैतानेरै अत्तै। तैन्हां स्वर्गदूता सैक्यै एकि बड़ी गर्म आगी मझ सुटि दींणै। तैठि तैन्हां मैहणुवां भयांकर सतावेरी वजाहि सिंउ लैरी दींणी जां दंत चापणै। पण जै मैहणु धर्मी अत्तै, जैन्हैं यीशु पनि विश्वास कियौरा, सैक्यै अपड़ै पिता परमेश्वरेरै राज्य मझ दिहा सैयि चमकणै।”

![](https://cdn.door43.org/obs/jpg/360px/obs-en-50-11.jpg)

यीशु ऐ बि बोलु कि तैस संसारैरा अंत भूंणा किना पेहिलै धरती पनि वापस ऐईंणु। तैस तेनिऐं हिसाबै वापिस ऐईंणु जिहीं सैक्या गियौरा थ्या। मतलब, तैस किनि तेसैरा असली शरीर भूंणा, जां तैस असमांणा मझ बदआ पनि सवार भौकरी ऐईंणु। जेख्णी यीशु मसीह वापस ऐईंला, ता हर अक मसीही जै मरि गियौरै अत्तै तैन्हां मौरा मझां जींति गांहणु जां तैस सिंउ असमांणा मझ मिलणु।

![](https://cdn.door43.org/obs/jpg/360px/obs-en-50-12.jpg)

तां जै मसीही हालै बि जींतै अत्तै सैक्यै असमांणा मझ चुकी गांहणै जां तैन्हां होरनियां मसीहिया सेईतै किठी गांहणु जै मौरा मझां दुबारै जींती गियौरै भूंणै। सै सारै तैठि यीशु सेईतै भूंणै। तैठां किना बाद, यीशु अपड़ै मैहणुवां सेईतै रींहणु। जेख्णी सैक्यै साउगा रींहथै ता तैन्हां किनी हमेशा के लिए पूरी शांति भूंणी।

![](https://cdn.door43.org/obs/jpg/360px/obs-en-50-13.jpg)

यीशु तैस पनि विश्वास कांनारानि हरेक मैहणुनि अक मुकुट दींणैरा वायदा कियौरा। तैन्हां हमेशा के लिए परमेश्वरा सिंउ हरेक चीजै पनि शासन कांना। तैन्हां किनी सिद्ध शांति भूंणी।

![](https://cdn.door43.org/obs/jpg/360px/obs-en-50-14.jpg)

पण परमेश्वरा तैन्हां सभनियां केरा न्याय कांना जै यीशु पनि विश्वास ना कातै। तैस सैक्यै नरका मझ सुटि दींणै। तैठि तैन्हां रूंणु जां अपड़ै दंत चापणै, जां सैक्यै हमेशा दुखी रींहणै। कदि ना हिशणै बाई आगी सैक्यै हमेशा फुकियां कांनै, जां कीड़ा सैक्यै ध्रड़ियां कांनै।

![](https://cdn.door43.org/obs/jpg/360px/obs-en-50-15.jpg)

जेख्णी यीशु वापस ऐईंता, ता तैस पुरै तरीकै सिंउ शैतान जां तेसैरा राज्य खत्म करि दींणा। तैस शैतान नरका मझ सुटि दींणा। तैठि शैताना हमेशा तेईनी फुकियुंतै रींहणु, तैन्हां सभनियां सेईतै जैन्हैं परमेश्वरैरी गल्लै मनणेरी वजाय शैताना पिचोरै चलणैरा चुनाव केईथ्या।

![](https://cdn.door43.org/obs/jpg/360px/obs-en-50-16.jpg)

केईनी कि आदम जां हवाय परमेश्वरेरी अज्ञायरा पालन ना केईथ्या जां पाप इस संसारा मझ लै करि येईथ्यै, परमेश्वरै तेसनी श्राप दित्ता जां तैस नष्ट कांनेरा फैसला केया। पण कौसक्यै धियाड़ी परमेश्वरा एकि नवें स्वर्गेरी जां एकि नवीं धरतिरी रचना कांनी जै सिद्ध भूंणै।

![](https://cdn.door43.org/obs/jpg/360px/obs-en-50-17.jpg)

यीशु जां तेसेरै मैहणुवां तैस नवीं धरती पनि रींहणु, जां तैस हमेशा के लिए सभनियां चीजा पनि राज्य काना। तैस मैहणुवां केरै हर आशु पूंछी दींणै। अबै कोई बि दुखी जां परैशान ना भूंणा। तैन्हां रूंणु ना। सैक्यै बिमार ना भूंणै या मरने ना। जां तैठि किछ बि बुराई ना भूंणी। यीशु अपड़ै राज्य पनि न्यायपूर्वक जां शांति सिंउ शासन काना। तैस हमेशा के लिए अपड़ै मैहणुवां सिंउ रींहणु।

*मत्ती अध्याय 24:14; 28:18; यूहन्ना 15:20, 16:33; प्रकाशितवाक्य 2:10; मत्ती 13:24-30, 36-42; 1 थिस्सलुनीकियों 4:13-5:11; याकूब 1:12; मत्ती 22:13; प्रकाशितवाक्य 20:10, 21:1-22:21 किना अक बाइबलिरी कहानी*

Audio: https://git.door43.org/OBS-TLF/cdj_obs/releases/download/v1/cdj_obs_v1_50_128kbps.m4a