# unfoldingWord Open Bible Stories — گویش دزفولی (Dezfuli)

- Language code: `def`
- Canonical page: https://openbiblestories.org/l/def/
- Stories in this file: 50 of 50
- Published by: fa_gl
- Last release: 2023-11-08
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the گویش دزفولی translation; it is not a translation of the whole Bible.

## 1. 1- 1-	خِلقت

https://openbiblestories.org/l/def/story-1/

![](https://cdn.door43.org/obs/jpg/360px/obs-en-01-01.jpg)

اَوّلِ کار، خدا هَمَه چی‌یَه ای‌طور آفِرید. دُیُنا و کلّ جوندارونَه مِی شیش روز دُرُس کُورد. بعد اَ خِلقتِ زِمین هیچ کَس نبید و هَمَه جا توریک و پَتی بید اما روح خدا ری اُو بید.

![](https://cdn.door43.org/obs/jpg/360px/obs-en-01-02.jpg)

بَعد خُدا گف: «رووش‌نُویی بُوَ» و رووش‌نُویی بی‌یِس. خدا سِیل کُورد دید رووش‌نُویی پِسَندیدَس اسمشَ وند "روز" خدا ظُلماتَ اَ رووش‌نُویی جُدا کُورد و نومِشَ وند "شو" خدا رووش‌نُویی‌یَ روزَ اول آفِرید.

![](https://cdn.door43.org/obs/jpg/360px/obs-en-01-03.jpg)

روزِ دویّوم خدا گف: «فَلَکِی بالا اُو عَمَل آیَه» و ای‌طور بی‌یِس. خدا اسمِشَ وَند آسُمون.

![](https://cdn.door43.org/obs/jpg/360px/obs-en-01-04.jpg)

روز سویّوم خدا گف: «هر چِی اُو زیر آسُمون هی، یَه جا آیِن تا خشکی عَمَل آیَه.» نومِ خُشکیَه وَند "زِمین"، نومِ اُووَ وَند "دَریا". خدا سِیلی کُورد و کار خودِشَ پَسَندید.

![](https://cdn.door43.org/obs/jpg/360px/obs-en-01-05.jpg)

بعدِش خدا گف: «دارِ درخت می زِمین وا آیَه» و ای‌طور بی‌یِس. خدا سِیلی کُورد و دید هر چِی آفِریدَه خوبِن.

![](https://cdn.door43.org/obs/jpg/360px/obs-en-01-06.jpg)

روز چُهارُم خِلقَت خدا گف: «می آسُمون رُووش‌نویی عمل آیَه» ای‌طور بی‌یِس که خُدا عفتو، مَه و آسارانَ آفِرید تا زِمینَ رُووش‌نا کُنَ. پَه روز و شو دُرُس بی‌یِس و سالا و فَصلا اَ هَم جُدا بی‌سِن. خدا سِیلی کُورد و کار خودِشَ پسند کورد.

![](https://cdn.door43.org/obs/jpg/360px/obs-en-01-07.jpg)

روز پِنجُم خدا گف: «جونِورون اُووِی مِی دریا عَمَل آین و باهِندون می آسُمون پِرِن.» ای‌طور بید که موهیون و باهِندونَه آفِرید. خدا دید هَر چِی کِه آفِریدَه پسندیدَس و بَرکَت می هُنون وند.

![](https://cdn.door43.org/obs/jpg/360px/obs-en-01-08.jpg)

روز شیشوم خِلقَت خدا گف: «زِمینْ پُرِ جَک و جونِوَرون بووَه.» هر چی خدا گفت اوطور بی‌یِس. او جونورون، حیوونا وحشی، خَزَندون (مِلث مار و گژدم) و پَخشون بیدِن. خدا دید هر چی آفِریدَه خوبن و اَ خلقتش خوشحال بی‌یِس.

![](https://cdn.door43.org/obs/jpg/360px/obs-en-01-09.jpg)

بعد خدا گف: «آدَمی وا مِلثِ خودُم سازُم تا ری زمین وَر خَلایِق حکومَت کُنَه.»

![](https://cdn.door43.org/obs/jpg/360px/obs-en-01-10.jpg)

خدا کُتِی خاک گِرُفت مِلاتِی دُرُس کُورد و لِفِ آدَم عَمَل ووردِش و بعدش آدَمَ زِندی دا. خدا نومِشَ آدَم وَند و باغ گَپِی سی‌یِش دُرُس کُورد که اونجونْ مَنَه و باغَه پایَه.

![](https://cdn.door43.org/obs/jpg/360px/obs-en-01-11.jpg)

خدا دو درخت مخصوص مِی او باغ وَند، یکیشون به نوم "حیات یا زندی" و اُو یکی به اسم درخت "آمُختنِ خوب و گَند". خدا به آدم گف: «تَری اَ میوه هَمه ای درختونِ باغ خُوَری بِجُز درخت "آمُختَنِ خوب و گند" که اَر اَزِش خُوَردی بِمیری.»

![](https://cdn.door43.org/obs/jpg/360px/obs-en-01-12.jpg)

بعد خدا گف: «خوبْ‌نی آدَمْ تِینا مَنَه «سی‌ایان که حیوِنون نَتَرِن هُمدُنگ خوبِی سی‌یِش بُووِن.

![](https://cdn.door43.org/obs/jpg/360px/obs-en-01-13.jpg)

سی‌ایان خدا آدمَ بِه خُو سَنگینِی بُورد، بعد یِکِی اَ دِنداشَ کَند و اَ اُو، زونَنَه آفِرید و فِرسنیدش پیش آدم.

![](https://cdn.door43.org/obs/jpg/360px/obs-en-01-14.jpg)

وَختی کِه آدَم او مُوجودَه دید گف: «ایان ملثِ مُنَه، نومشَ زونَه بِ‌وَنوم چون اَ میرَه گِرُفتَه بیسَه.» سی‌ایانَ که مِیره اَ بووَه مارِش جدا بِ‌بُووَه و پِی زُونَه همنشینِ بُووَه و دوتا یکی بِ‌بُووِن.

![](https://cdn.door43.org/obs/jpg/360px/obs-en-01-15.jpg)

خدا میرَه و زونَنَه لِف خودش آفِرید و برکَت داشون. بعد فرمایش کُورد: «زاد و وَلَد کُنی و اَ تُخمِ‌ تَلَکَتون زمینَ پُر کُنی.» و خدا سِیل کُورد دید هر چی کِه آفِریدَه خوب بیدنَ و خوشحال بی‌یِس. کُلّ ای خِلقَتْ می شیش روز دُرُس بی‌یِس.

![](https://cdn.door43.org/obs/jpg/360px/obs-en-01-16.jpg)

روز هفتم که اُومَّه، خدا خِلقَتَه تَموم کُورد، روزِ هَفتُمَه بَرکت دا و مقدّس بُنگِش کُورد، سی‌ایان که روزی بید که خُدا کارِ خلقَتَه تَموم کُورد و دِگَه آروم گِرُفت. ای‌طور بید که خدا دُیُنا و خلایِقَ آفِرید.

*مَتَلِی اَ کِتابِ مقدّس  کتاب پیدایش فصل ۱ و ۲*

## 2. ۲- اُومِّیَنِ گناه مِی جهان

https://openbiblestories.org/l/def/story-2/

![](https://cdn.door43.org/obs/jpg/360px/obs-en-02-01.jpg)

آدم وا زُنَش می باغِ قَشَنگی کِه خدا سیشون دُرُس کورد بید، پِی خُوَشی زِندی بْ‌کُوردِن. اَر چِه ایشون لُخت بیدِن، اَما اَ لُخت بیدَن حیا نَم‌کُوردِن سی‌ایان کِه هَنی گناه مِی دُیُنا نَ‌اُومه بید. اوشون بیشَتَرِش مِی باغ رَه بِرَفتِن و پِی خدا قِصَّه بْ‌کُوردِن.

![](https://cdn.door43.org/obs/jpg/360px/obs-en-02-02.jpg)

اما یَ مارِ مُحیل مین باغ بید. او مار اَ زُونه پرسید: «راسَه کِه خدا گُفتِتونَه اَ هیچکون اَ میوا دَرَختا باغ نَخُوَرِی؟»

![](https://cdn.door43.org/obs/jpg/360px/obs-en-02-03.jpg)

زونَه مارَ گُفتِش: «اُمونْ تَریم اَ میوِی کُلِّ دِرَختا باغ اِلا میوه درخت شناخت نیک و بد خُوَریم.» خُدا اُمونَه گُفتَه: «اَر شُمونْ اَ میوِی او دِرَخت خُوَرِی و یا دَس وَرِش زَنِی، بِمیرِی.»

![](https://cdn.door43.org/obs/jpg/360px/obs-en-02-04.jpg)

مار زونَنَه گُفت: «ای‌یان دُرُس نی! شُمون نَمْ‌میری. خدا دُونه مُعادی کِه شُمون اَ میوه او دِرَخت خُوَرِی دِگَه لِف خودش خوبَ اَ بَد تَرِی سوا کُنِی!»

![](https://cdn.door43.org/obs/jpg/360px/obs-en-02-05.jpg)

زونَه دید کِه میوِی دِرَخت قَشَنگَه و مَری خوشمِزَس. او کِه مَخاس هَمَه چِی‌یَه دونِس‌سَه بُووَه، میوِی اَ او دِرَخت چِند و خُوَرد. بَعدِش اَ او میوَه یِکِی هَم بِه میرَش دا و او وَم خُوَرد.

![](https://cdn.door43.org/obs/jpg/360px/obs-en-02-06.jpg)

یَکِتی تیاشون گُشِهِس و فَـمیدِن کِه لُختِن. آدم و زونَه‌ش تَشْ‌تَقلّا کُوردِن کِه خُوشونَه پِی بَرگا دِرَختا پوشِنِن.

![](https://cdn.door43.org/obs/jpg/360px/obs-en-02-07.jpg)

بَعدِش آدم و زونَش صدا خُدانَه کِه مِی باغ رَه بِرَفت فَـمیدِن .اوشون خوشونَه اَ خُدا قایوم کوردِن. خُدا بُنگْ کورد: «آدم کُجویِی؟» آدم جُواب دا: «صِداتَه کِه اَ مِی باغ فَهمیدوم ترسیدوم، سی‌ایان کِه لُخت بیدوم، گُرُختُم.»

![](https://cdn.door43.org/obs/jpg/360px/obs-en-02-08.jpg)

خدا پُرسیدِش: «کی گُفتِتَه لُختی؟ مَر اَ او میوَه کِه گُفتُمِت مَخور، خُوَردی؟» آدم جُواب دا: «ای زُونَه کِه دویی‌مَه اَ او میوَه بِه مو داس.» اوسون خدا اَ زونَه َپُرسید: «ای‌یان چِه کاری بیدْ کِه کوردی؟» زُونَه گُف: «مار فِرِیونیدوم.»

![](https://cdn.door43.org/obs/jpg/360px/obs-en-02-09.jpg)

خُدا مارَ گف: «تو ملعونی. ری اِشکَمِت وا سُلنی و خاکانَه خُوَری. تو و زُونَه اَ یَکِ‌دو بدتونِ میا و بینِ نَسلِ تو و نَسلِ زُونَه دِشمِنِی بِ‌وَنوم. کَسِی اَ نَسلِ زُونَه سَرِتَه بِ‌کُووَه و تونَم گِندیکِشَه بِزَنی.»

![](https://cdn.door43.org/obs/jpg/360px/obs-en-02-10.jpg)

بَعد خُدا بِه زُونَه گف: «دردِ وِسْ‌سَن بیسَنِتَه خِیلِی بیشتَرِ کُنُم. تَشِ تو سی میرَتَه و اُو وَم هِی سَرِتْ سُوارَه.»

![](https://cdn.door43.org/obs/jpg/360px/obs-en-02-11.jpg)

خدا بِه میرَه گف: «سی‌ایان کِه بِه قِصّا زونَه‌ت گوش دویِی و اَ مو نافَرمونی کُوردی، زِمین لعنَتِ بُووَه و تو پِی غَشقِ زیادِی وا نون دِروری. آخِر سَری هم بِمیری و جَسدِت بِه خاکِ وِرگَردَه.» آدم زونَشَه حوا نوم وَند کِه یعنِی زِندی‌دِه، سی‌ایان کِه حوا واسکِی مارِ کُلِ آدمون بُووَه. خُدا اوشونَه پِی رَختایِی اَ پوسِ حیوِنون پوشِنید.

![](https://cdn.door43.org/obs/jpg/360px/obs-en-02-12.jpg)

بَعد خدا گف: «ایسون کِه آدم مِثل اُومونْ بیسَه و خوبَه اَ گَند تَرَه فَـمَه، نَوا هِلِیمِش اَ میوِه‌ دِرَختِ حیات خَوَرَه و تا اَبد زِندَه مَنَه.» سی‌ایان خدا اوشونَه اَ مِی او باغِ خوشکِل بِس دَر. او جُفتِ دَرِ ورودِیِ باغ، مِلاکونِ زوردارِی وَند تا اَ خُوَردَنِ میوِه دِرَختِ حیات مانِع بووِن.

*مَتَلِی اَ کِتابِ مقدّس:  کتاب پیدایش فصل ۳*

## 3. ۳- او زیودی

https://openbiblestories.org/l/def/story-3/

![](https://cdn.door43.org/obs/jpg/360px/obs-en-03-01.jpg)

بَعدِ سالا زیادِی، آدمونِ ری زِمین زیاد بیسِن. اوشون اَقدَر قُش‌شَه و زَبین بیسِن کِه خُدا بَنا وَند کُلِ دُیُنانَه پِی اوزیودی گَپِی وِردارَه.

![](https://cdn.door43.org/obs/jpg/360px/obs-en-03-02.jpg)

اما خُدا اَ نوح روضی بید. او پیا با انصافِی بید کِه مِی آدمونِ زَبین زِندی بْ‌کُورد. خُدا نوحَ اَ بَرنامِه خودِش سی او زیودیِ گَپ با خَبر کُورد. او بِه نوح فرمایِش کُورد کِه کَشتی گَپِی دُرُس کُنَه.

![](https://cdn.door43.org/obs/jpg/360px/obs-en-03-03.jpg)

خُدا بِه نوح فرمایِش کُورد کِه کَشتیَه وا بِه دِروزی صَدِ‌چِل مِتر، پَنی بیسِ‌سو مِتر و بُلِندی سیزَه و نیم مِتر سازَه. نوح واسکِی ای کَشتِی سو طَبَقَنَه پِی چو سرو بِساختِش. هموگِری کَشتی واسکِی سَقف و تووا زیادِی پِی دریزَه داشتَه بووَه. کَشتی سی‌ایان بِ‌سازِهِس تا نوح، خونه‌وادَشه و حیوِنونِ خوشکیَه اَ اُو زیادی نِگَه کُنَه.

![](https://cdn.door43.org/obs/jpg/360px/obs-en-03-04.jpg)

نوح اَ خدا فرمونبَری کُورد. او پِی سو کووَکِش کَشتیَه هموطور کِه خُدا فرمون دا بید، ساختِن. چون او کَشتی خیلِی گَپ بید، چَن سال طول بورد تا سازَهَه. نوح مَردُمَه موعِظَه کورد کِه او زیودِی مِی‌یا و مَردُم وا ریشونَ اَلا خُدا کُنِن. اما اوشون قِصّا نوحَ بُووَر نَداشتِن.

![](https://cdn.door43.org/obs/jpg/360px/obs-en-03-05.jpg)

خُدا هَمیطور فرمون دا کِه نوح پِی بَچونِش نون و مِی نون چَنْدَه خوشون و حیوِنونِشون گِرد کُنِن. مُعادِی کِه هَمَه چِی آمادَه بی‌یِس، خُدا بِه نوح گُفت: زَمونِش اُومَسَه تا او هَش نَفَر یعنِی او، زونَه‌ش، سو کووَکِش و بِی‌یونِش سُوار کَشتی بووِن.

![](https://cdn.door43.org/obs/jpg/360px/obs-en-03-06.jpg)

خدا اَ هَر نوع حیوون و باهِندَه، جفتِی نر ما اَلا نوح فِرِسنید تا مِی کَشتی رووِن و سَر بَندِ او زیودی سالوم مَنِن. همیطور خدا، هَف جف نَرْ ما اَ کُلِ حیونونِی کِه سی قربانی خوب بیدِن فِرسنید. مُعادِی کِه کل اُومُّن مِی کَشتی خُدا دَرِ کَشتیَه بَس.

![](https://cdn.door43.org/obs/jpg/360px/obs-en-03-07.jpg)

بَعدْ، چِل روز پُش‌سَر‌یَک بارون زَه و اُو اَ مِی زِمین بالا لُقِ زَه کِه هَمَه چِی‌یَه، حتا کُه‌ها بُلِندَه هَم پوشِنید.

![](https://cdn.door43.org/obs/jpg/360px/obs-en-03-08.jpg)

کلِ جوندارونِی کِه ری خُشکی زندی بْ‌کوردِن، جز آدمون و حیوِنونِ مِی کَشتی، هَلاک بیسِن. کَشتی ری او شِنووَر بید و هَمَه چِی کِه مِینِش بید اَ غرق بیسَن در اَمون موندِن.

![](https://cdn.door43.org/obs/jpg/360px/obs-en-03-09.jpg)

بعدَ بِناشتَنِ بارون، کَشتی پِن ماه ری اُو شِنووَر بید و مِی ای مُدّت سطحِ اُو دُومِنتَرِ رَفت. آخِر سر یَه روز کَشتی ری کُهِی ویسید .اما دُیُنا هَنی زِیرِ اُو بید. بَعدِ سو ماه، بلِندی کُه‌ها دیار دان.

![](https://cdn.door43.org/obs/jpg/360px/obs-en-03-10.jpg)

بعدَ گذشتِ چِل روز، نوح قَلاقِیَه سی جُسَّنِ زِمینِ خُشک فِرِسنید دَر. قَلاق پِرِس اما خُشکیَه پیدا نَکورد.

![](https://cdn.door43.org/obs/jpg/360px/obs-en-03-11.jpg)

اَندو کموتَرِی فِرِسنید. اما کموتَرَم نَتَرِس زِمینِ خُشکَه جورَه .پَ اَلا نوح وِرگشت. هَفتِی بَعد، اَندو کموتَرَ فرسنید و کموتر پِی بَرگِی اَ زیتون اَلا کَشتی وِرگَشت. اُو تَه نِشین بی‌یِس بید و سوزی‌یا ری زِمین دِرومِن بید.

![](https://cdn.door43.org/obs/jpg/360px/obs-en-03-12.jpg)

نوح یَه هَفتَه بِناشت و کِتِه دِگَه کموتَرَه سی رَه سو رَهی فِرِسنید .ای رَه کموتَر نَه اُومَه وادوما. اُو تَه نِشین بی‌یِس بید و کموتَر جایِی سَر خُشکِی جُس بید.

![](https://cdn.door43.org/obs/jpg/360px/obs-en-03-13.jpg)

دو ماه بَعد خُدا بِه نوح فرمایِش کورد: «پِی بَچون و حیوِنون اَ کَشتی رووِی دَر. زادِ وَلَد کُنِی، بَچَه دار بووِی و زِمینَه پُر کُنِی.» پَه نوح و بَچونِش اَ کَشتی اُومِن دَر.

![](https://cdn.door43.org/obs/jpg/360px/obs-en-03-14.jpg)

نوح بَعدِ دَر اُومِیَّن اَ کَشتی، قربانگاهی دُرُس کورد و اَ حیوِنونِی کِه سی ای‌کار گِرد کورد بید، قربانی کُورد .خُدا اَ ای کارِ نوح خوشحال بی‌یِس و طایُفَشَه برکَت دا.

![](https://cdn.door43.org/obs/jpg/360px/obs-en-03-15.jpg)

بَعد خدا ای‌طور قول دا :«دِگَه زِمینَ سی دِل خاطِری کارا زَبینِ آدمون، پِی او زیودی، نُفرین و نابود نَم‌کُنُم، هَر چَن دِلِ آدم اَ بَچی گناه باره.»

![](https://cdn.door43.org/obs/jpg/360px/obs-en-03-16.jpg)

آخِر سَر خُدا سی تیرنِشونِ قولِ خودِش اولی رَنگین‌کَمونَ مِی آسمون عَمَل اووُورد. هَر زَمون کِه رَنگین‌کَمون مِی آسمون دیوری بْ‌دا، خدا و قومِش قولِشَه به یادِ وُوردِن.

*مَتَلِی اَ کِتابِ مقدّس: کتاب پیدایش فصل ۶ تا ۸*

## 4. ۴- عَهدِ خدا پِی ابراهیم

https://openbiblestories.org/l/def/story-4/

![](https://cdn.door43.org/obs/jpg/360px/obs-en-04-01.jpg)

سالای زیادِی اَ طوفان نوح گذشت بید و آدمون تعدادشون هَنی بیشترِ بی‌یِس. اوشون اَندو نسبَت به خدا و یَکِ‌دو گناهِ کوردِن، و چون کِه کُلِّشون به یَه زبون قصَّه بْ‌کوردِن، اَ جا فرمونبری اَ خُدا و پَخش و پِلا بیسَن مِی زِمین، یَ جا ویسیدِن و شروع به ساختن شَــرِی سی خوشون کوردِن.

![](https://cdn.door43.org/obs/jpg/360px/obs-en-04-02.jpg)

هُنون آدمونِ مغروری بیدِن و نخاسِن مُطابق چی کِه خدا گُفتَه زندی کُنِن. و حتّا ساختُمونِ بُلِندِی ساختِن که تا آسُمون بالا رَفت بید. خدا دید اَر هِلَشون به هَمی شِکل بِه کارا گَندِشون ادامَه دِهِن بیشتَر گناه بارِه بووِن.

![](https://cdn.door43.org/obs/jpg/360px/obs-en-04-03.jpg)

سی‌ایان خدا زبونشونَه به چَن‌تا زبون جاگُرون کُورد و مِی کل دُیُنا پَخش پِلاشون کورد. اُو شَــرِی که آدمون ساختِن بید اِسمِش "بابِل" بید کِه معنی‌یِ "آشُفتَه" بْ‌دَهَه.

![](https://cdn.door43.org/obs/jpg/360px/obs-en-04-04.jpg)

بَعدَ چَن صد سال خدا پِی پیایی به نامِ اَبرام قصّه کورد. خُدا به او فرمایش کورد: «وِلات و خونِی بووَتَ هِل و بِه جایی کِه بِفرِسْنُمِت رو. مو به تو بَرکَت بِداهام و اَ تُخمِ تَلکِه تو قوم گپی عَمَلِ میارُم. نومِتَ گَپِ کُنُم، کسونِی که به تو برکت دِهِن برکَت بِه داهامشون و کسونِی کِه تُنَه لعنت کنِن لعنِ نُفرینِ کُنُم. کلّ قوم و قبیلونْ مِی زِمین اَ او ری خیرِت برکت پیدا بِکُنِن.»

![](https://cdn.door43.org/obs/jpg/360px/obs-en-04-05.jpg)

اَبرام اَ خُدا فَرمونبری کورد. زونَه‌شْ سارا، خادُمون و هَر چِی کِه داشت وِرداشت و به سَرزِمینِ کنعون که خُدا به او نشون دا بید رفت.

![](https://cdn.door43.org/obs/jpg/360px/obs-en-04-06.jpg)

زَمونِی که ابرام به کنعون رَسید خدا فرمایش کورد: «دورِ بَرِتَ سیل کُن. کُلّ این سَرزِمینَ کِه بِبینی به تو و اولادِت بِه داهام.» بعدِش ابرام می او زِمین ساکن بی‌یِس.

![](https://cdn.door43.org/obs/jpg/360px/obs-en-04-07.jpg)

اونجون پیایی به نام ملکیصِدِق ویستَه بید که کاهِنِ خُدا بید. اَبرام اووَه بعدِ یکی اَ جنگاش دید. مِلکیصِدِق، ابرامَ بَرکَت دا و گُف: «خُدای متعال کِه صاحاب آسُمون و زِمینَ اَبرامَ برکَت داها.» بعد ابرام دَه یک غنایم جَنگیَه به ملکیصدق دا.

![](https://cdn.door43.org/obs/jpg/360px/obs-en-04-08.jpg)

چَن سال گُذشت ولی ابرام و سارا هَنی بَچِه نَداشتِن. خُدا پی اَبرام قصّه کورد و اَندِبارتَه وعدَ دا کِه کُوَکِی به ایشونِ دَهَ و اَ نسلِ او اولادِ زیادِی عَمل میان که مثل آسارا آسُمون زیادِن. خُدا گُف ابرام پیا عادِلیَ سی‌ایانْ‌که او وَعدِی خدانَه بُووَر کوردَه.

![](https://cdn.door43.org/obs/jpg/360px/obs-en-04-09.jpg)

اوسون خدا پِی اَبرام پِیمونِی بَس. به طور معمول پیمون توافُقِی دو طرَفَه‌س کِه طِبق اُوان دو طرف بِه یَکِ‌دو قولِ دِهِن تا کاری سی یَک اَنجُوم دِهِن، اَما ای توافُق مابین خُدا و اَبرام معادِی بید که اَبرام مِی خو سَنگینِی بید اَما تَرِس صِدا خُدانَه فَـمَ. خُدا گُف: «مو اَ جونِ خودِت کَوَکِی بِداهامِت و سَرزِمینِ کنعون به اولادِ تو بِ‌بَخشوم.» اما اَبرام هَنی کوَکِی نداشت.

*مَتَلِی اَ کِتابِ مقدّس: کتاب پیدایش فصل ۶ تا۸*

## 5. ۵- کووَکِ وَعدَه

https://openbiblestories.org/l/def/story-5/

![](https://cdn.door43.org/obs/jpg/360px/obs-en-05-01.jpg)

ده سال اَ کَشتُرِ اَبرام و سارا به کنعون گذشت بید اَما هَنی بَچِه نَداشتِن. پَه سارا زونِه اَبرام بِه او گف: «ایسون که خدا نَخو مو بَچَه داشتَه بووُم و سی وِس‌سَن بیسَن خِیلِی پیرُم پی نوکرِمون هاجر عروسی کُن مَر او سیمون بَچِه آرَه.»

![](https://cdn.door43.org/obs/jpg/360px/obs-en-05-02.jpg)

پَه اَبرام پی هاجر عروسی کُورد. هاجر اَزِش کُوَکِی عَمَل اُومَه کِه اَبرام نومِشَه اسماعیل وَند. اَما سارا به هاجَر حسیدی بْ‌کورد. مُعادِی که اسماعِیل سیزَه سالِش بی‌یِس، خُدا یَه رَه دِگَه پِی اَبرام قصّه کورد.

![](https://cdn.door43.org/obs/jpg/360px/obs-en-05-03.jpg)

خُدا فرمایش کورد: «مو خُدای قادِرِ مُطلقُم و پی تو عَهدِ بَندُم.» اَبرام اُونجون پیشِ خُدا سَجدَه کورد. خُدا به اَبرام گف: «تو جَدِ تیرَه تَبار گَپی بِ‌بُووی، مو زِمینِ کنعون بِه تو و اولادِتْ بِداهام و تا قیوم قیومَت خُداشون هیسُم. تو هَم وا کلّ کُووَکُونتونَه خَندَه کُنی.»

![](https://cdn.door43.org/obs/jpg/360px/obs-en-05-04.jpg)

«زونَه‌تْ سارَه، کُوَکِی بِه زایَه. کِه بَچِه وَعدَمونَه. اسمِشَه اسحاق وَن. مُو پِی او عهدِ بَندُم که نسلِ گَپِی اَزش عَمل آرُم. اَ اسماعیل هَم تیرَه تبارِ گَپِی بسازُم ولی عَهدُم پِی اسحاقَ.» بَعدْ خُدا نومِ اَبرامَ ابراهیم یعنی بوُوِه طایُفا گَپ کورد. خُدا نومِ سارانَ به سارَه بَدل کورد که معنی‌یِ «شازدَه» بِدَهَه.

![](https://cdn.door43.org/obs/jpg/360px/obs-en-05-05.jpg)

او روز ابراهیم کُل کُووَکونِ طایُفَشَ خَندَه کُوردْ. بَعدَ نِزیکِ یَه سال، که ابراهیم صد سال و ساره نود سالِش بید، سارَه کُووَکِی به دُیُنا اُووُورد. هَموطور که خدا مَخاس اسمِشَ اسحاق وَندِن.

![](https://cdn.door43.org/obs/jpg/360px/obs-en-05-06.jpg)

وقتِی کِه اسحاق جَوُون بی‌یِس خُدا ایمانِ اِبراهیمَ اِمتِحون کورد و گف :«تینا کُووَکِتْ اسحاقَ سی مو قربانی کُن.» ابراهیم کِتِه دِگَه اَ خُدا فرمونبری کُورد و آمادَه بی‌یِس تا کُووَکِشَ قربانی کُنَه.

![](https://cdn.door43.org/obs/jpg/360px/obs-en-05-07.jpg)

زَمونی کِه ابراهیم و اسحاق اَلا قربانگاه بِ‌رَفتِن. اسحاق گف: «بووَه خیمَه سی قربانی داریم، اَما کُووَه کجاس؟» ابراهیم گف: «رولَه، خُدا کُووَنَه خودش جورِه کُنَه.»

![](https://cdn.door43.org/obs/jpg/360px/obs-en-05-08.jpg)

مُعادِی کِه به محلِ قربانی رسیدِن، ابراهیم کُووَکِشَ پی طَنافی بَس و سر مَحَلِ قربانی وَند. ابراهیم کِه مَخاس کُووَکْشَ قربانی کُنَه، خدا فرمایِش کورد: «ویسَک! دَس وَر کُووَکْ مَزَن. ایسون فَـمیدُم کِه تو مِی دِلِت اَ مو بِه تَرسی. چون تینا کووَکِتَه اَ مو دریغ نَ‌کُوردی.»

![](https://cdn.door43.org/obs/jpg/360px/obs-en-05-09.jpg)

ابراهیم اُونجون مِیشِی دید که مِی خارا گیر کُورد بید. خُدا مِیشَه اَ جا اسحاق سی قربانی فِرِسنید بید. ابراهیم خوشحال بی‌یِس و مِیشَه سی خُدا قربانی کُورد.

![](https://cdn.door43.org/obs/jpg/360px/obs-en-05-10.jpg)

خُدا به ابراهیم گف: «اَ اُونجون کِه تو قَبول کُوردی هَمَه چِیتَه، حتّا بَچَتَه به مو بخشی، مُنَم قولِ داهام کِه تُنَه برکَت داهام. نَسلِ تو اَ آسارا آسُمون بیشتَر بِه بُووِن. سی‌ایان کِه اَ مو فرمونبری کُوردی کُلّ خونَه‌وادا می زِمین، اَ خونَه‌وادِی تو برکت پیدا بِ‌کُنِن.»

*مَتَلِی اَ کِتابِ مقدّس: کتاب پیدایش فصل ۱۶-۲۲*

## 6. ۶- خدا سی اسحاق دُرُسِه کُنَه

https://openbiblestories.org/l/def/story-6/

![](https://cdn.door43.org/obs/jpg/360px/obs-en-06-01.jpg)

زَمونِی کِه ابراهیم پیر بی‌یِس کُووَکِش اسحاق جَوون بید. ابراهیم یکی از نوکرونْشَه به محل تولد و وِلاتِ طایُفَش فِرِسنید تا سی اسحاق زُونِه آرَه.

![](https://cdn.door43.org/obs/jpg/360px/obs-en-06-02.jpg)

بَعدْ اَ سفر دور و دراز به وِلاتِی کِه قومونِ ابراهیم اُونجون بیدِن، خُدا نوکرِ ابراهیمَ اَلا رِبِکا، که نوِه برارِ ابراهیم بید رَهنِمونی کورد.

![](https://cdn.door43.org/obs/jpg/360px/obs-en-06-03.jpg)

رِبِکا قبول کُورد که قومونشَه وِل کُنَه و پِی او نوکَر به خُونِه‌ اسحاق رُووَه. همو دَم بعدِ رَسیدنْ، اسحاق پی‌یِش عروسی کُورد.

![](https://cdn.door43.org/obs/jpg/360px/obs-en-06-04.jpg)

بعدَ مدّتی، ابراهیم مُورد و خدا طِبق عَهدِی که پی ابراهیم بَس بید، اسحاقَ برکَت دا. یکِی اَ وَعدا خُدا اِیان بید که ابراهیم اولاد زیادی داشتَه بُووَه. اما ربِکا زُونِه اسحاق نَتَرِس بَچَه دار بُووَه.

![](https://cdn.door43.org/obs/jpg/360px/obs-en-06-05.jpg)

خدا هِشتْ پِی دعا اسحاق، ربکا دوقلو وِس‌سَن بُووهَ. او دو بَچَه نُها دُیُنا اُومی‌یَن می اشکَمِ مارشون دعوا بْ‌کوردِن. ربکا اَ خُدا دلیِلْشَه پرسید.

![](https://cdn.door43.org/obs/jpg/360px/obs-en-06-06.jpg)

خدا به ربکا گف: «تو دو کُووَک به دُیُنا میوری. اَ هَردونشون دو جَرگِه جُداکار عمل مِیایه، که هِی پی‌یَک جنگِ دعوا دارِن. اما طایُفِی بِرارِ گَپ مطیعِ طایُفِی برارِ کُچُک بِ‌بُووِن.»

![](https://cdn.door43.org/obs/jpg/360px/obs-en-06-07.jpg)

بچونِ ربکا که دُیُنا اُومِن، اولی سُرخِ سَفید و مِلو بید، اسمِشَه عیسو وَندِن. کُووَکِ دُیّم که دُیُنا اُومَه گِندیکِ پا عیسووَ می دَسِش داشت، نومِشَه یعقوب وَندِن.

*مَتَلِی اَ کتابِ مقدس: کتاب پیدایش فصل ۲۴ آیات ۱-۲۵ و فصل ۲۶*

## 7. ۷- خُدا یعقوبَ برکَتِ دَهَ

https://openbiblestories.org/l/def/story-7/

![](https://cdn.door43.org/obs/jpg/360px/obs-en-07-01.jpg)

او دو کُووَک گَپ بیسِن. عیسو دوسْ داشت به شکار رووَه اَما یعقوب خونَه نِشین بید. سی رِبِکا یعقوب عزیزَناز بید ولی عیسو سی اسحاق عزیز تر بید.

![](https://cdn.door43.org/obs/jpg/360px/obs-en-07-02.jpg)

روزی عیسو اَ شکار بِ‌وَرگشت و خیلی گُسنَش بید. عیسو به یعقوب گف: «بی زحمت کُتی اَ غذاتَه دام.» یعقوب در جُوابِش گف: «اول وا بِه مو قُول دیهی هر چی کِه سی نُوری بیدَنْ گیرِتْ می‌یا به مو دیهی.» پَه عیسو قول دا که کُلّ چیایِی کِه اَ نُوری بیدَنْ گیرِشِ می‌یا به یعقوب بَخشَه. بَعد یعقوب کُتِی اَ غذاش بِه عیسو دا.

![](https://cdn.door43.org/obs/jpg/360px/obs-en-07-03.jpg)

مُعادی که اسحاق مَخاسْ بَرکَتْشَه به عیسو دَهَ، رِبِکا پِی مُحیلی یعقوبَ به جا عیسو مِی تُوو اسحاق فِرِسنید. اسحاق پیر بید و دِگَه نَتَرِس خوب بینَه. یعقوب رخَتا عیسووَ وَرِش کُورد و گردِن و دَساشَ پی پُوسِ بُز پوشِنید.

![](https://cdn.door43.org/obs/jpg/360px/obs-en-07-04.jpg)

یعقوب پیش بُووَش اُومَه و گف: «مو عیسو هِیسُم و اُومَه‌مَه تا مُنَه برکَت دیهی.» اسحاق مِی بُزَ پی دساش حس کُورد و بو بُزَ که فَـمید، مَرِس عیسو پیشِ‌شَه و اووَه برکَت دا.

![](https://cdn.door43.org/obs/jpg/360px/obs-en-07-05.jpg)

عیسو پی یعقوب لَج بید، سی‌ایان کِه حق گَپِی و برکَتَه اَزِش دُزید بید. و بَرنامِه رِخت که بعدَ اسحاق، یعقوبَ کُشَه.

![](https://cdn.door43.org/obs/jpg/360px/obs-en-07-06.jpg)

اما ربِکا فَـمید و پی اسحاق، یعقوبَ جا دیری پیشِ قومونِ ربکا فِرِسنیدِن.

![](https://cdn.door43.org/obs/jpg/360px/obs-en-07-07.jpg)

یعقوب سالای زیادِی پیشِ قومونِ ربکا وِیسید. اُونجون عروسی کُورد و دُوزَ کُووَک و یَه دختر اَزِش عمَل اُومَه. خُدا یعقوبَ مال زیادی دا.

![](https://cdn.door43.org/obs/jpg/360px/obs-en-07-08.jpg)

بعدَ بیس سال دیری از خُونَه، یعقوب پی بَچونِش و نوکرون و گوسفندون به کنعون وِرگشت.

![](https://cdn.door43.org/obs/jpg/360px/obs-en-07-09.jpg)

یعقوب خیلی بِترسید، چون مَرِس هَنی عیسو مَخو کُشَش. پَه او خیلی از حیوونا گلَه‌شَ سی پِیش کَشی سی عیسو فرسنید. نوکری کِه حیوِنونَه سی عیسو بِ‌بورد ای‌طور گف: «یِی حیوِنونَه نوکَرِت یعقوب به تو داس و یِی‌دَم بِه اِینْجونِ رَسَه.»

![](https://cdn.door43.org/obs/jpg/360px/obs-en-07-10.jpg)

عیسو که دِگَه نَخاس یعقوبَ زَنَه، اَ دیدنش خوشحال بی‌یِس. یعقوب بی دردسر می کنعون زندی کُورد. اسحاق که مُورد، یعقوب و عیسو پی‌یَک خاکِش کُوردِن. عهدی که خُدا پِی ابراهیم بَس‌بید، بَعدِ اسحاق به یعقوب رَسید.

*َمَتَلِی اَ کِتابِ مقدس: کتاب پیدایش فصل ۲۵ آیات ۲۷-۳۵ و فصل ۲۹*

## 8. ۸- خُدا یوسف و بچونِشَ نجاتِ دَهَ

https://openbiblestories.org/l/def/story-8/

![](https://cdn.door43.org/obs/jpg/360px/obs-en-08-01.jpg)

بَعدِ سالای زیادی، زَمونِی کِه یعقوب پیا گَپْ‌سالِی بید، کُووَکِ عَزیزَنازِش یوسُفَ فِرِسنید تا اَ سلامتی بِرارُونش که گَلَه‌نَه سی چَردَن بُوردن بید خَبر آرَ.

![](https://cdn.door43.org/obs/jpg/360px/obs-en-08-02.jpg)

بِرارونِ یوسُف اَزِش بدشونِ میُومَه سی‌ایان کِه بُووَشون، یوسُفَ بیشتر مَخاس و یوسُف مِی خو دید بیدْ که بِه برارونِش حکومَتِ کُنَه. مُعادِی کِه یوسف پیش برارونِش رفت، برارونْ دُزیدِنش و به تاجرون بَردَه فُرُختِن.

![](https://cdn.door43.org/obs/jpg/360px/obs-en-08-03.jpg)

نُها ایان کِه بِرارونِ یوسُف رَسِن خُونه، قَباشَ دِردِن و ری قَبا خینِ بُز تِشکنیدِن. بعد قَبانَه به یَعقوب نِشون دان تا مَرِسَّه بووَه حیوُونِ وَحشی‌یِ یوسُفَ کُشتَه. یعقوب خِیلِی عاجِز بی‌یِس.

![](https://cdn.door43.org/obs/jpg/360px/obs-en-08-04.jpg)

تاجرونِ بَرده، یوسفَ پی خوشون بوردِن مصر. مصر سرزِمین گپ و زور دارِی بید و نِهِنگِ روخونِه نیل سازِس بید .برارونِش اووَه به یکی اَ گَپونِ مایَه‌دارِ مصری فُرُختِن .یوسُف آغاشَه به خُوَشی خدمتِ کُورد و خُدا هم برکَت بِداش.

![](https://cdn.door43.org/obs/jpg/360px/obs-en-08-05.jpg)

زُونه او مَقامِ دولَتی زورِ زَه تا پِی یوسف خُفتَه، اما یوسف قَبول نَ‌کُورد که نِسبَت بِه خدا گناه بار بُووَه. زونَه اَ جِری خودِش به یوسُف توم بَس و یوسُفَ گِرُفت و بِس‌سِش زندون. اما یوسف مِی زندون هم خُدانَه اَ یاد نَبورد و خُدا هم اووَه برکَتِ دا.

![](https://cdn.door43.org/obs/jpg/360px/obs-en-08-06.jpg)

بعدِ چَن سال، اَر چِه یوسف بی گناه بید اما مِی زِندون موند بید. یَه شو فرعون (مصریون پاتِشا خوشونَه فرعونْ بُنگِ کوردِن)، دو خو عجیب دید کِه لَحشَه‌دار بِی‌یِس. هیچ کو اَ مُباشرونِ فرعون نَ‌تَرِسِّن فَـمِن که تعبیرِ خُووِش چیَه.

![](https://cdn.door43.org/obs/jpg/360px/obs-en-08-07.jpg)

چون خدا علمِ تعبیرِ خُووَ به یوسُف دا بید، فرعون گفت یوسُفَ بیاری تا خُووَ تعبیر کُنَ. یوسُف گفتِش: «خدا هَف سال زیودِیِ زِراعَتِ دَهَه و دُماش هَفت سال قحطی میایَه.»

![](https://cdn.door43.org/obs/jpg/360px/obs-en-08-08.jpg)

فرعون اَ چن اَ یوسُف خوشِش اُومَّه بید، یوسُفَ دویمین شخص مصر کورد.

![](https://cdn.door43.org/obs/jpg/360px/obs-en-08-09.jpg)

یوسُف به مردُم گف که وا می هفت سال زیودی، زراعَتانَه اَمبار کُنِن. مُعادِی کِه هفت سال قحطی اومَّه، یوسُف زراعَتانَه به مردُمِ فرُخت تا در حد کفاف چِی سی خُوَردَن داشتَه بووِن.

![](https://cdn.door43.org/obs/jpg/360px/obs-en-08-10.jpg)

قحطی تینا می مصر نبید بلکِه بِه سرزِمینِ کنعون هم رَسیدْ بید. جایی کِه یعقوب پی بَچونِش زِندی بْ‌کورد.

![](https://cdn.door43.org/obs/jpg/360px/obs-en-08-11.jpg)

یعقوب کُوَکونِ گَپشَ به مصر فرسنید تا غذا و چِی پیدا کُنن. معادِی کِه برارون نُها یوسف ویسیدِن تا اَزِش نون خِرِن نَ‌اِشناختِنِش، اما یوسف اوشونَه اِشناخت.

![](https://cdn.door43.org/obs/jpg/360px/obs-en-08-12.jpg)

یوسف بعدَ ایان کِه برارونشَ امتحون کُورد گفتشون که: «مو یوسف بِرارِتونم، مَترسِی. شمون در حق مو بدی کُوردی، اما خُدا بَدی شمونَ پی خوبی جاگُرون کُورد. بیایی می مصر زِندی کُنِی مو تَرُم هَمَه چی اینجون سیتون جور کُنُم.»

![](https://cdn.door43.org/obs/jpg/360px/obs-en-08-13.jpg)

زمونِی کِه بِرارون یوسُف وِرگشتن خونَه و بَراتِ زنده بیدَن یوسُفَ به بُووشون یعقوب دان، یعقوب خیلی خوشحال بی‌یِس.

![](https://cdn.door43.org/obs/jpg/360px/obs-en-08-14.jpg)

اَر چِه یعقوب پیا گَپْ‌سالِی بید، اما پی بَچونِش به مصر کَشتُر کُورد و همَه‌شون اُونجون پیش یَکِ‌دو زِندی کُوردن. یعقوب نُها مُوردَن، کُلّ بچونشَ برکت دا.

![](https://cdn.door43.org/obs/jpg/360px/obs-en-08-15.jpg)

او عَهدِی کِه خُدا پی ابراهیم بَس‌ بید، بعدَ اسحاق به یعقوب و دُماش به دُوزَ کووَک و بَچونِ اُوشون رَسید. اَ نَسل دُوزَ کووَکِ یعقوب، دُوزَ قبیلِه بنی اسروئیل عَمَل اوُمَّه.

*مَتَلِی اَ کِتابِ مقدس، پیدایش: ۳۷ – ۵۰*

## 9. ۹- خُدا موسانَ بُنگِ کُنَه

https://openbiblestories.org/l/def/story-9/

![](https://cdn.door43.org/obs/jpg/360px/obs-en-09-01.jpg)

بَعدِ موردَنِ یوسُف کُلِّ قومونِش مِی مصر موندِن. اُوشون و اُولادشون سی سالای زیادِی اُونجون زِندی کُوردن و اُولادشون زیاد بی‌یِس. مصریون هُنونَ اسروئیلی بْ‌گُفتِن.

![](https://cdn.door43.org/obs/jpg/360px/obs-en-09-02.jpg)

چندْ قَرْن که گذشت، تعدادِ اسروئیلیون خِیلی زیاد بی‌یِس بید. مصریون دِگَه یوسُف و کاراشَه مِی مِصر اَ یاد بُوردِن بید. اُوشون اَ اسروئیلیونْ بِ‌ترسیدِن، چون جَرگِه گَپی بیدِن. فرعون کِه می مصر حکومَتِ کورد، اسروئیلیونَه نوکَرِ مصریون کُورد بید.

![](https://cdn.door43.org/obs/jpg/360px/obs-en-09-03.jpg)

مصریون اسروئیلیونَه مَجبور بِه ساختِ عمارَت و شَـرای زیادِی کوردِن. کارا سَختْ، زِندی‌یَه سیشون تَحْل کُورد بید، اما خُدا برکَت داشون و بَچونشونْ روزبِ‌روز بیشتر بِ‌بی‌سِن.

![](https://cdn.door43.org/obs/jpg/360px/obs-en-09-04.jpg)

فرعون دید که اسروئیلیون زیاد تُخمِ تَلَکَه بْ‌کُنن، به قومونش فرمون دا کِه کُلِّ بچونِ کُووَکِ اسروئیلیونَه مِی رودِ نیل بِهِن و کُشِنْ‌شون.

![](https://cdn.door43.org/obs/jpg/360px/obs-en-09-05.jpg)

تا زَمونی کِه یَه زُونِه اسروئیلی بَچِه کُووَکِی بار وَند. اووُ مِیرَش تا تَرِس‌سِن بَچَنَه وَر داشتِن.

![](https://cdn.door43.org/obs/jpg/360px/obs-en-09-06.jpg)

زَمونِی کِه مار و بُووِه بَچَه، دِگَه نَترِس‌سِن بچَنَه وَردارِن، سی‌ایان کِه کُشتَه نَ‌بُووَه، بَچَنَه می سَلِه شِنُووَرِی ری اُو نیل، مِنجا نیزارا وَندِن. خارِ گَپِش، کُووَکَه اَ دیر بِ‌پویید تا بینَه کِه چِه سرگُمارِشِ میا.

![](https://cdn.door43.org/obs/jpg/360px/obs-en-09-07.jpg)

دُختَر فرعون که سَلَنَه دید سِیلی می سَلَه کُورد دید بَچِه مِینِشَه. بَچَه‌نَه لِفْ کُووَکِش قبول کُورد. او دایِه اسروئیلی‌یِ گِرُفتْ تا موسانَ شیر دَهَه. تو مَگو کِه ایان مارِ بَچَه‌س. مُعادِی کِه مارِ‌کُووَک، بَچَه‌نَه اَ شیر گِرُفت، بَچَه‌نَه بِه دختر فرعون دا و اسمشَه موسی وندِن.

![](https://cdn.door43.org/obs/jpg/360px/obs-en-09-08.jpg)

یَه روز معادِی کِه موسی گَپْ بی‌یِس بید، یَه مصری‌یَه دید کِه نوکِر اسروئیلی‌یَه بْ‌زَنَه. موسی تَش‌تَقَلّا کُورد که بِرارِ اسروئیلی‌شَه نجات دَهَه.

![](https://cdn.door43.org/obs/jpg/360px/obs-en-09-09.jpg)

موسی مَرِس کَسی نَم‌بینَش و مصری‌یَنَه کُشت و جَسَدْشَ جایی وَرداشت. اما کَسی موسانَ دیدْ بید.

![](https://cdn.door43.org/obs/jpg/360px/obs-en-09-10.jpg)

مُعادِی کِه فرعون اَ کارِ موسی با خبر بی‌یِس، مَخاس موسانَ کُشَه، اما موسی اَ مِصر به بیابون گُرُخت و سربازونِ فرعون نَ‌ترِس‌سِن پیداش کُنِن.

![](https://cdn.door43.org/obs/jpg/360px/obs-en-09-11.jpg)

موسی مِی بیابونِیْ دیر اَ مصر به چوپونی مشغول بی‌یِس. او پِه دُختری اَ او سَرزِمین عروسی کُورد و دو کُووَک ازشون عَمَل اُومَّه.

![](https://cdn.door43.org/obs/jpg/360px/obs-en-09-12.jpg)

یَه روز معادِی کِه موسی گَلِه عُمُوشَه بِه پُویید، چَپِه خار دید کِه تَش گِرُفتِنَه اما نَم‌سُختِن. نِهِنگِ تَش رفت تا فَـمَه چِه خَبرَه. مُعادِی کِه موسا بِه چَپِه خار نِزیک بی‌یِس، خُدا اَ مِی خارا بُنگ کورد: «کوشاتَه اَ پاتْ دِرار چون جایِی کِه ویستی مقدّسَه.»

![](https://cdn.door43.org/obs/jpg/360px/obs-en-09-13.jpg)

خُدا فرمایش کورد: «مُو دَردا بَندَه‌گُونْ‌مَه می مصر دیدومَه. مو تُنَه پیشِ فرعونِ فِرسنُم تا جَرگَمَه اَ نوکَری مصر، دِرُوری. مو سرزِمینِ کنعون به اُوشونِ داهام، سرزِمینِی که وَعدَشَه به ابراهیم، اسحاق و یعقوب دام بید.»

![](https://cdn.door43.org/obs/jpg/360px/obs-en-09-14.jpg)

موسی گف: اَر قومون ازُم پُرسِن کِه کی فِرِسنیدِتَه چِه گوُوُم؟ خدا فرمود: «"هستم آنکه هستم" به اُوشون گو کِه "هَستم" مونَه پیشِتون فرسنیدَه. و گوشون کِه مو یَهوَه خُدای بُووُونتونْ یعنی ابراهیم، اسحاق و یعقوبُم. اسمُم تا قیوم قیومت هَمی ایانَه.»

![](https://cdn.door43.org/obs/jpg/360px/obs-en-09-15.jpg)

موسی نَخاس کِه پیشِ فرعون رُووَه، چون بِ‌ترسید که نَ‌تَرِس‌سَه بُووَه خوب قِصّه کُنَه. پَه خُدا بِرارِ موسی یعنی هارونَ فِرِسنید تا حِماش کُنَه.

*مَتَلِی اَ کِتابِ مقدس: خروج ۱ – ۴*

## 10. ۱۰ - ده بلا

https://openbiblestories.org/l/def/story-10/

![](https://cdn.door43.org/obs/jpg/360px/obs-en-10-01.jpg)

خدا بِه موسی و هارون گف که حَواستون بُووَه فرعون آدَمِ سَرخودیَه. موسی و هارون اَلا فِرعون رَفتِن و گفتِن: «ای بُنگَه خدایِ اسروئیل به تو داس: "قومِ مُنَه هِل رُووِن".» فرعون مَحَل وَرشون نَوَند و اَ جا ایان‌کِه بنی اسروئیلَه هِلَه رُووِن، مجبورِشون کُورد بیشتر کار کُنِن.

![](https://cdn.door43.org/obs/jpg/360px/obs-en-10-02.jpg)

فرعون هَنی نَم‌هِشت کِه بنی اسروئیل رُووِن. سی‌ایان خُدا دَه بلای گَپ سَرِ مصر اُووُورد. پِی او بلاها، خُدا به فرعون نشون دا کِه زورِش اَ فرعون و هَمِه خُدایونِ مصر بیشتَرَه.

![](https://cdn.door43.org/obs/jpg/360px/obs-en-10-03.jpg)

خُدا اُو روخُونِه نیلَه خین کُورد. اما فرعون هَنی، بنی اسروئیلَه نَم‌هِشت رُووِن.

![](https://cdn.door43.org/obs/jpg/360px/obs-en-10-04.jpg)

خُدا کُلِّ سرزِمینِ مِصرَ پُرِ بَق کُورد. فرعون اَ موسی مَخاس کِه بقونَه اَ مِی ولاتِشون دیر کُنَه،اما بعدَ اِیان‌کِه بقون اَ بین رَفتِن، دِل فرعون سِنگ‌تر بی‌یِس و نَهِشت اَ مِی مصر رُووِن.

![](https://cdn.door43.org/obs/jpg/360px/obs-en-10-05.jpg)

بَعدِش خُدا بَلا پَخشون و بلا پَخشَه کُورکونَه نازل کورد. فرعون به موسی و هارون گف: اَر ای بَلانَه دیر کُنِن، بِ‌هِلَشون کِه اَ مِی مصر رُووِن. بعدِ دعا موسی، خُدا اِی بَلانَه هَم دیر کُورد، اما فرعون دِلِش سِنگ‌تر بی‌یِس و اندو هم نَهِشت اَ مِی مِصر رُووِن.

![](https://cdn.door43.org/obs/jpg/360px/obs-en-10-06.jpg)

بَعد خُدا کاری کورد که هَمِه حیوِنُون مصری مریض بُووِن و میرن. اما فرعون کِه دِلِش اَ سِنگ بید اِی‌رَه هَم نَهِشت کِه رُووِن.

![](https://cdn.door43.org/obs/jpg/360px/obs-en-10-07.jpg)

خدا به موسی گف: که چَپِه اَ خاکِشتَر می دَسِش پُر کُنَه و نُها فرعون به هوا تیچِنَه. مُعادِی که موسی ای‌کارَه کُورد، کُلّ مصریون بجز اسروئیلیون دون دِروُوردِن. اَما خدا دلِ فرعونَ سنگ‌تر کُورد و فرعون نَهِشتْ که اسروئیلیون رُووِن.

![](https://cdn.door43.org/obs/jpg/360px/obs-en-10-08.jpg)

بعدِش خدا بَلا تِگِرگَه نازِل کُورد و بیشتَرِ زراعَتا و هر جونِوَری کِه زیر آسمون بیدِنْ اَ بین بورد. بعد فرعون، موسی و هارونَ بُنگ کُورد و گف: «مو اِی‌رَه گناه بارُم، شُمون آزادِی که رُووِی.» بعدِش موسی دعا کُورد و تِگِرگ وِیسید.

![](https://cdn.door43.org/obs/jpg/360px/obs-en-10-09.jpg)

اما فرعون ای‌رَه هَم گناه کورد و دِلِش سِنگ‌تر بی‌یِس و نَهِشتْ کِه اسروئیلیون آزاد بُووِن.

![](https://cdn.door43.org/obs/jpg/360px/obs-en-10-10.jpg)

دُماش خُدا بافِی اَ کُلُّو اَلا سرزِمین مصر فِرِسنید. کُلُّو‌وونْ هر زِراعَتِی کِه اَ بلا تِگِرگ مُوند بید، خُوَردِن.

![](https://cdn.door43.org/obs/jpg/360px/obs-en-10-11.jpg)

بَعد خدا بَلا توریکیَه فِرِسنید کِه سو روز طول کَشید. همَه جا توریک بی‌یِس طوری کِه هیچ مصری‌یِ نَتَرِس اَ مِی خونَش آیَه در. اَما جایِی که اسروئیلیون بیدِن، رُووش‌نُویی بید.

![](https://cdn.door43.org/obs/jpg/360px/obs-en-10-12.jpg)

حتّا بعدِ ای نو بَلا هم فرعون نَهِشتْ اسروئیلیون رُووِن. اَ اُونجون کِه فرعون گوشِ شنوا نداشت، خُدا بناوند که آخِرین بَلانَه فِرِسنَه. ای بَلا نَظَر فرعونَ عَوض کُورد.

*مَتَلِی اَ کتابِ مقدس: کتاب خروج ۵ – ۱۰*

## 11. ۱۱- عید پِسَخ

https://openbiblestories.org/l/def/story-11/

![](https://cdn.door43.org/obs/jpg/360px/obs-en-11-01.jpg)

خدا موسی و هارونَ اَلا فرعون فِرِسنید تا گُووِنِش کِه بنی اسروئیلَه آزاد کُنَه. اُوشون به فرعون گُفتِن که اگَر بنی اسروئیلَه نَهِلَه، خُدا هر چی کُووَکِ نُورِی می مصر هِه وا حیوِنونَ اَ بینِ بَرَه. مُعادِی کِه فرعون ایانَ فَـمید، باور نَ‌کُورد و اَندو مَحَل ور قصّا خُدا نَوَند.

![](https://cdn.door43.org/obs/jpg/360px/obs-en-11-02.jpg)

سی کَسونِی کِه بِه موسی اعتقاد داشتِن، خُدا رَهی ناها پاشون وَند تا بَچونِ نُوریشون، اَ ای بلا خلاص بُووِن. هر خونَه واسکی کُووِه بِی‌عِیبِی پیدا کُنَه و قربانی دَهَه.

![](https://cdn.door43.org/obs/jpg/360px/obs-en-11-03.jpg)

خُدا به بنی اسروئیل گُف تا خینِه بَرَنَه ری دَرا خوناشون سایِن. هموگِری بنی اسروئیل واسکِی گوشت کُووَنَه بریزِن و پِی نونِ بی‌خمیرمایَه تُندِی بْ‌خُوَردِن. خُدا گفتِشون بَعدِ خُوَردنْ آمادَه بُووِن تا مِصرَ هِلِن و رُووِن.

![](https://cdn.door43.org/obs/jpg/360px/obs-en-11-04.jpg)

اسروئیلیون کُلِّ فرمونا خُدانَ دقیق اَنجام دان. مِنجا هَمو شو، خُدا اَ مِی مِصر رَفت و کُلِّ کُووَکونِ گَپِ مِصریونَ اَ بین بورد.

![](https://cdn.door43.org/obs/jpg/360px/obs-en-11-05.jpg)

خُدا اَ دَرِ کُلِّ خُونا بَنی اسروئیل کِه نشونِ خین وَر دَراشون بید گُذَر کُورد. هَر کسِی کِه مینِ او خُونا حاضِر بیدِن، سی‌دلِ خینِ کُووَه دَر اَمون بیدِن.

![](https://cdn.door43.org/obs/jpg/360px/obs-en-11-06.jpg)

اَما خُدا اَ نِهِنگِ خُونا مِصریونِی کِه وَرِش ایمان نداشتِن و فَرمون بَری نَمْ‌کوردِن گُذَر نَم‌کُورد و کُلِّ کُووَکونِ گَپِ او خُونانَه کُشت.

![](https://cdn.door43.org/obs/jpg/360px/obs-en-11-07.jpg)

کُووَکونِ گَپِ کُلِّ مصریون کشتَه بیسِن. اَ کُووَکِ گَپِ فرعون گِر تا کُووَکِ گَپِ نوکری کِه مِی زندون بید. دو بَـرِ مردُمِ مصر اَ کَمِ یِی مُصیبتاشون بِگریوِس‌سِن.

![](https://cdn.door43.org/obs/jpg/360px/obs-en-11-08.jpg)

فرعون هَمو شو، موسی و هارونَ بُنگ کُورد و گفت: «بنی اسروئیلَه اَ اِینجون وِردارِه و زیتَری اَ می مصر رُووِه.» مصریونَم گُفتِن که هر‌چی گَه‌تَر اِینْجونَه هِلِه و کَشتُر کُنِه.

*مَتَلِی اَ کتابِ مقدس: کتاب خروج، فصل ۱۱: ۱-۱۲ و فصل ۱۲*

## 12. ۱۲-  دَرْ رَفتن

https://openbiblestories.org/l/def/story-12/

![](https://cdn.door43.org/obs/jpg/360px/obs-en-12-01.jpg)

بنی اسروئیل خِیلی ذوقِ‌زِن کِه اَ مصر به دَرِ رُووِن. اوشون دِگَه بَرده نبیدِن و اَلا سرزِمینِ موعود بِ‌رَفتِن. مصریون هر‌چِی کِه اسروئیلیون اَزْشون مَخاسِن مثل نقره، طِلا و چیایِی کُه ارزِش دارَنَه دانشون. بعضی اَ طایُفایی کِه تازه خُدانَه قبول کُوردِن بید هم پِی اسروئیلیون مِصرَ هِشتِن و رفتِن.

![](https://cdn.door43.org/obs/jpg/360px/obs-en-12-02.jpg)

سُتینِی اَ اُور مِی روز و سُتینِی اَ تَش مِی شو بِرابَرِ اسروئیلیون حرکَتِ کُورد. خُدا مِی سُتینِ اُور و تَش پِی‌شونْ بید و هِی اِیشونَه مِی یِی سَفَر رَهنُمونی بْ‌کورد. تینا کاری که ایشون واسکِی اَنجُوم دِهِن ایان بید کِه تُرَ گِرِن و رُووِن.

![](https://cdn.door43.org/obs/jpg/360px/obs-en-12-03.jpg)

بَعدَ مُدّتِی فرعون و قومونِش اَ کارِشون پَشیمون بِیِس‌سِن و دُما اسروئیلیون رَفتِن تا اَندو بِه بَردَگی گِرنشون. خُدا بید که نَظرشونَه عَوَض کورد بید تا فَـمونَشون که خُدای واقِعی اووَه و مَردُم حُولی بُووِن کِه یَهوَه اَ خُدا مصریون زوردار تَرَه.

![](https://cdn.door43.org/obs/jpg/360px/obs-en-12-04.jpg)

مُعادِی کِه اسروئیلیون مِصریونَ دیدِن، فَـمیدِن کِه مابینِ دریا سُرخ و لَشکَرِ فرعون گیر اُفتیدِنَه. اُوشون خیلی تَرسیدِن و داد زَندِن: «اَ کَمِ چِه مصرَه هِشتیم؟»، «هَمَمُون یِی دَمِ میریم.»

![](https://cdn.door43.org/obs/jpg/360px/obs-en-12-05.jpg)

موسی به اسروئیلیون گف: «مَترسِه. خدا اَمروز سی شمون بِ‌جَنگَه و نِجاتِتونِ دَهَه.» بَعد خدا به موسی فرمایش کورد: «به بنی‌اسروئیل گو کِه اَلا دریا سُرخ رُووِن.»

![](https://cdn.door43.org/obs/jpg/360px/obs-en-12-06.jpg)

بَعدْ خُدا سُتینِ اُورانَه حرکت دا و مابینِ بنی اسروئیل و لَشکَرِ فرعون وادونید تا سپاهیونِ مصری نَترِسَّه بُووِن اُوشونَه بینِن.

![](https://cdn.door43.org/obs/jpg/360px/obs-en-12-07.jpg)

خُدا به موسی فرمایش کُورد کِه دسشَه ری اُو بُلِند کُنَه، بَعدْ خُدا بادِی فِرِسنید کِه اُو دریانَه به چَپ و راس جاگُرون کُورد، طوری کُه تُرِی مِی دریا گُشِهِس.

![](https://cdn.door43.org/obs/jpg/360px/obs-en-12-08.jpg)

بعد بنی اسروئیل مِی یِی حال کِه ایلا اولاشون دیوارِی اَ اُو بید، مِنجا دریا تُرَه گِرُفتِن و رَفتِن.

![](https://cdn.door43.org/obs/jpg/360px/obs-en-12-09.jpg)

بعدِش، خُدا سُتینِ اورانَه وَرداشت تا مِصریون تَرِس‌سَه بُووِن گُرُختَنِ اسروئیلیونَه بینِن. اَخیر مصریون بَناوندِن که رُووِن دُماشون.

![](https://cdn.door43.org/obs/jpg/360px/obs-en-12-10.jpg)

هَمُوگِری اُوشون دُما اسروئیلیون مِنجا دریا رَفتِن. اما خدا مصریونَ ترسونید و کاری کورد که اَراباشون مِنجا خَـرا گیر کُنِن. اُوشون دادِ زِن: «گُروزِه، خُدا سی اسروئیلیون بِ‌جَنگَه.»

![](https://cdn.door43.org/obs/jpg/360px/obs-en-12-11.jpg)

بَعدَ ایان‌کِه بنی‌اسروئیل به سلامتی رَسیدِن اولا دریا، خُدا به موسی فرمود: «اَندو دَسِتَه اَلا دریا بُلِند کُن.» زمونِی که یِی کارَه کورد، اُو سرِ مصریون توفِس و اَراباشونْ اَ بین رَفتِن و هَمَه‌شون مِی دریا غرق بیسِن.

![](https://cdn.door43.org/obs/jpg/360px/obs-en-12-12.jpg)

زمونِی کِه اسروئیلیون اَ بین رَفتَنِ لشکرِ مصرَ دیدِن، به خُدا اعتماد کُوردِن و فَـمیِدن که موسی پیغمبرِی اَ طرفِ خُداست.

![](https://cdn.door43.org/obs/jpg/360px/obs-en-12-13.jpg)

بنی‌اسروئیل خِیلِی خوشحال بیدِن، سی‌ایان کِه خدا اُوشونَه اَ بردگی و مُوردَن نِجات دا بید. ایسون ایشون آزاد بیدِن کِه خُدانَه پِرَستِن و اَزِش فرمون بری کنِن. اسروئیلیون شِعرا زیادِی سی اُوزودی‌شون ساختِن و خدانَه بِ‌پِرَستیدِن کِه ایشونَه اَ دَس لشکَرِ مصر خلاص کُوردَه.

![](https://cdn.door43.org/obs/jpg/360px/obs-en-12-14.jpg)

خُدا به بنی‌اسروئیل دستور دا کِه هر سال، دَعوَتِی گِرِن و یادِشون آیَه کِه خُدا چطور مصریونَ اِشکِنید و بنی اسروئیلَه اَ بردَگی آزاد کورد. ای جَشنَ "پِسَخ" بُنگِ کُنِن. اُوشون هَر سال ای مُعاد پِی قربانی کُوردَن کُووه و بِرِشتَنِش پِی نونِ فطیر، او روزَه جَشنِ گِرِن.

*مَتَلِی اَ کتابِ مقدس: خروج ۱۲: ۳۳ تا ۱۵: ۲۱*

## 13. ۱۳- عهدِ خُدا پِی اسروئیل

https://openbiblestories.org/l/def/story-13/

![](https://cdn.door43.org/obs/jpg/360px/obs-en-13-01.jpg)

بعدَ گُذرِ قوم اسروئیل اَ دریا سرخ، خُدا اُوشونَه اَلا کُهِ سینا رهنُمونی کُورد. همو کُهی کِه موسی خارا گُلنیدنَه اُونجون دید بید. بنی‌اسروئیل پا او کُه خیمَه زَندِن.

![](https://cdn.door43.org/obs/jpg/360px/obs-en-13-02.jpg)

خدا به موسی و قومِ اسروئیل گفت: «شُمون وا اَ مو فرمون برِی کُنِه و پا عَهدِی کِه پی شُمونِ بَندُم ویسِی. اَر ای کارَه کُنِه، شمون سی مو مِلک خاص، مَملِکتِی اَ کاهنون و طایُفِه مقدّس بِ‌مَنِی.»

![](https://cdn.door43.org/obs/jpg/360px/obs-en-13-03.jpg)

مردم مِی سو روز خُوشونَه سی دیدَنِ خُدا آمادَه کوردِن .خُدا پِی تَشِ بِرق، دی و صِدا شیپور، سَر بُلِندیْ کُه سینا نازل بی‌یِس. موسی تِینُویی بالا کُه رَفت.

![](https://cdn.door43.org/obs/jpg/360px/obs-en-13-04.jpg)

بعد خُدا پِیشون عَهد بس و گف: «مو هستم یَهوَ، خدای تو، کِه تُونَه اَ اَسیری و نوکری مِصر آزاد کُورد. جز مو خُدایی مَپَرَست.

![](https://cdn.door43.org/obs/jpg/360px/obs-en-13-05.jpg)

بُت مَساز و مَپَرَستِشون، سی‌ایان کِه مو یَهوَه وا تینا خُدای تو بُووم. به نُوموم بِی‌حُرمَتی مَکُن. روزِ "شباتَه" مُقدّس دونِسَّه باد .کُلّ کاراتَه مِی شیش روز اَنجُوم دِه چون روز هَفتُم روزیَه کِه وا مِی او روز بِنُوری و مُنَه یاد کُنی.»

![](https://cdn.door43.org/obs/jpg/360px/obs-en-13-06.jpg)

بُووَه و مارِتَه اِحتِروم کُن، کَسی‌یَه مَکُش، زَنا مَکُن، دُزی مَکُن، دُرو مَدِه، تی‌یَه وَر مال و زُونِه هَمسات مَوَن.

![](https://cdn.door43.org/obs/jpg/360px/obs-en-13-07.jpg)

قُوم کُلِشون قبول کُوردِن کِه اَ قانونایِی کِه خُدا سیشون وَندْ بید فرمونبری کُنِن. اُوشون قبول کُوردِن کِه تِینا مال خُدا بُووِن و تِینا اووَه پِرَستِن.

![](https://cdn.door43.org/obs/jpg/360px/obs-en-13-08.jpg)

خُدا به مردُم اسروئیل گف که خِیمِه گَپِی بَنا وَنِن کِه نُومِش خِیمِه ملاقات بید و نَقشِه خیمَنَه هَم پِی جزئیاتِش و هر چی وا مِی او خیمَه بُووَه هَم داشون. خُدا دَسُور دا کِه پَردِه گَپِی سازن کِه خِیمَنَه دو شَقَه کُنَه. خُدا مِی توو پُشتِ پَردَه بِ‌ویسید و تِینا کاهِن اعظم تَرِس مِی او توو پیشِ خُدا رُووَه.

![](https://cdn.door43.org/obs/jpg/360px/obs-en-13-09.jpg)

بنی اسروئیل واسکی جایِی سی قربانی نُها خِیمِه ملاقات دُرُس کُنِن. هر کَه کِه اَ شریعَتِ خُدا بِ‌وِرگَشت، واسکِی حیوونِی بِه قربانگاه آرَه. کاهنِی وا او حیوونَه کُشَه و او حیوونَه به اسمِ قربانی سی خُدا، بالا قُربونگَه سوزِنَه .خُدا فرمایش کُورد کِه خینِ حیوونِ قربانی، گناه گناه‌کارَه بِپوشِنَه. هموگِری ای‌طور خُدا گناههَ نادیدَه بِ‌گِرُفت و او شَخص سی خدا پاک بِحسابِ میُومَه. خُدا بِرارِ موسی، هارون و اولادِشَه سی کاهِنی انتخاب کورد.

![](https://cdn.door43.org/obs/jpg/360px/obs-en-13-10.jpg)

بَعد خُدا ده فرمان، سَرِ دو لوحِ بَرد نوشت و به موسی دا .خُدا همیطور به بنی اسروئیل قانونا دِگِه دا تا عَمَل کُنِن .خُدا وعدَه دا کِه اَر اَ ای قانونا فرمونبری کُنِن بَرکتِ دَهَشون و اَزِشون حمایتِ کنَه. اَما اَر بِه قانونا عَمَل نَکُنِن اُوشونَ مجازاتِ کُنَه.

![](https://cdn.door43.org/obs/jpg/360px/obs-en-13-11.jpg)

موسی روزا زیادِی بالا کُهِ سینا موند و پِی خُدا قصّه کُورد. مَردم اَ تی‌یَه رَه بیدَن سی وِرگَشتَنِش مَندَه بیسِن. پَه طِلاها زیادِی پیش هارون اُووُوردِن و اَزِش مَخاسِن تا سیشون بُتِی سازَه تا اَ جا خُدا پِرَستِنِش؛ ای‌طور بید کِه گناه وَحشتناکِی دَر حقِ خدا اَنجُوم دان.

![](https://cdn.door43.org/obs/jpg/360px/obs-en-13-12.jpg)

هارون بُتِی ملثِ گوسالِه ساخت. مردم لِفِ وَحشیُون بُتَه پِرَستیدِن و سی‌یش قربانی کُوردِن. خُدا اَ کارِشون خیلِی جِر بی‌یِس .خُدا به موسی گف که مَخو اُوشونَه اَ بین بَرَه. اَما موسی اَ خُدا مَخاس که ای کارَه نکُنَه. خُدا دعا مُوسانَه اِشنید و اَ بین نبوردِشون.

![](https://cdn.door43.org/obs/jpg/360px/obs-en-13-13.jpg)

مُعادی کِه موسی اَ کُهِ سینا اُومَه زِیر، دو لوحِه بَردَه کِه خدا ده فرمانه سَرشون نِوِشت بید می دَسِش داشت، تا بُتَه دید اَ چَن جِر بی‌یِس لوحانَه زَند زِمین که اِشکَسِن.

![](https://cdn.door43.org/obs/jpg/360px/obs-en-13-14.jpg)

بَعد بُتَه سوزِنید و خُووردِش کُورد، طوری که مِلث گَرتْ بی‌یِس .گَرتانَه می اُو رِخت و مردُمَه مجبور کُورد اُووَه خُوَرِن .خُدا بلایِی سَر مَردُم اُووُورد کِه دو بَـرِشون مُوردِن.

![](https://cdn.door43.org/obs/jpg/360px/obs-en-13-15.jpg)

موسی اَ جا لوحا بَردْ کِه اِشکنیدْ بید، لوحا دِگِه سی ده فرمان ساخت. بَعد اَندُو بالا کُه رَفت و سی بخشیدَن گناها قُومِش دعا کُورد. خُدا دعاها موسانَ اِشنید و بَخشیدِشون. موسی پی ده فرمان کِه خُدا رِی لوحا تازَه نوشتْ بید، اَ کُه اومَه زیر .بَعد خُدا بنی‌اسروئیلَه اَ کُهِ سینا، اَ لا سرزِمینِی کِه وَعدَه دا بید رَهنُمونی کورد.

*مَتَلِی اَ کِتابِ مقدس: کتاب خروج، ١٩-٣٤*

## 14. ۱۴- ویلون بیسن مِی بیابون

https://openbiblestories.org/l/def/story-14/

![](https://cdn.door43.org/obs/jpg/360px/obs-en-14-01.jpg)

بَعدَ ایان کِه خُدا قُومَه پِی قانونا شریعَتْ حُولی کُورد، اُوشونَه اَلا کُهِ سینا فِرِسنید. اوشون واسکِی سی عَهدِی کِه به خُدا دانْ بید اَ قانونا شریعَتْ فرمُونبری کُنِن. خُدا مَخاس که به سرزِمینِ کنعون رَسِن. خُدا نُهاشون مِی سُتینِ اور بِرَفت و مردُمَم دُماشِه رَفتِن.

![](https://cdn.door43.org/obs/jpg/360px/obs-en-14-02.jpg)

خُدا به ابراهیم، اسحاق و یعقوب قول دا بید کِه سرزِمینِ موعودَه به بَچونشون دَهَه، اَما اِیسون طایُفایِ زیادِی اُونجون زِندی بْ‌کوردِن کِه نومِشون کنعونیون بید. کنعونیون اَ خُدا فرمونبری نَم‌کُوردِن و اووَه نَم‌پِرَستیدِن. اُوشون خُداهای دُرووَه بِ‌پرَستیدِن و کارا گَندِی بِ‌کوردِن.

![](https://cdn.door43.org/obs/jpg/360px/obs-en-14-03.jpg)

خدا به بنی‌اسروئیل گف: «بعدَ رَسیدَن به سرزِمین موعود، شُمون وا خُوتونَه اَ شَرِ کنعونیون خَلاص کُنِی. پِیشون صلح و عروسی مَکُنِه. شُمون وا بُتاشونَه اَ بین بَرِی. اَر اَ مو فرمُونبری نَکُنِه، بُتاشونَه اَ جا مو بِ‌پِرَستِی.»

![](https://cdn.door43.org/obs/jpg/360px/obs-en-14-04.jpg)

مُعادِی کِه اسروئیلیون به حِدِّه سرزِمینِ کنعون رَسیدِن، موسی اَ هر طایُفَه یَه نَفَرَه بِزنید. موسی یادِشون دا چِطور چِلْ‌چول‌بَری کُنِن. وَ اَزِشون مَخاس کِه فَـمِن کَنعونیون تَرِن اَ جُوارِشون یا نَه.

![](https://cdn.door43.org/obs/jpg/360px/obs-en-14-05.jpg)

او دوزَه نَفَر چِل روز مِی سرزِمینِ کنعون سفر کُوردِن و بعد وِرگَشتِن. اُوشون به قومُونِشون گفتِن: «زِمینِ بایاریَه و زِراعَتاشون زیادِن.» اما دَه نَفر اَ او دوزَه چِلْ‌چول‌بَر گُفتِن: «شَـراشون گَپِن و مردُمونِ لَکَنتِی دارِن. اَر وَرشون هُجِیم بَریم، بِ‌اِشکِنِنمون و بَعدِش کُشتَه بِ‌بوویم.»

![](https://cdn.door43.org/obs/jpg/360px/obs-en-14-06.jpg)

اَما دو تا اَ او چِل‌چول‌بَرون کِه نومِشون کالیب و یوشَع بیدْ گفتِن: «اَر چِه کنعونیون اَ اُومون گَفتَرِن، اَما تَریم اَ جُوارِشون، خُدا سی اُمونِ جَنگَه.»

![](https://cdn.door43.org/obs/jpg/360px/obs-en-14-07.jpg)

اَما اسروئیلیون به قِصّا یوشَع و کالیب مَحَل نَوَندِن و اَ دَس موسی و هارون جِر بیسِن و گفتِن: «اَ کَمِ چِه اُمونَه اِینجون وُوردِی‌یَه؟ اُمون واسکِی مِی مِصر مُوندیِمِه. اَر به او سرزِمین رُو وِیم می جَنگ کُشتَه بِ‌بُووِیم و زونَه بَچَمونَه به فَحلَگی بِ‌بَرِن.» اُوشون مَخاسِن گَپِ دِگِه سی خُوشون پیدا کُنِن تا وِرگردونَشون مِصر.

![](https://cdn.door43.org/obs/jpg/360px/obs-en-14-08.jpg)

خُدا اَ یِی قِصّا مردُم خِیلِی جِر بی‌یِس و بِه خیمِه مُلاقات اومَه و فرمایِش کُورد: «شُمون سی مو سَرِخود بیسِی‌یَه، پَه هَمَتون مِی بیابون وِیلونِ بُووِه. کُلِّ آدمونِ بیسْ سال به بالا بِجز کالیب و یوشع می بیابونِ میرِن و هیچْ‌وَخ پاشونَه مِی سرزِمین موعود نَم‌وَنِن.»

![](https://cdn.door43.org/obs/jpg/360px/obs-en-14-09.jpg)

مُعادِی کِه مردُم ای قِصّا خدانَه اِشنیدِن اَ گناه‌شون پَشِیمون بیسِن و مَخاسِن بِه کنعون حملَه کُنِن. موسی گُفتِشون کِه مَرووِی، چون خُدا پِیشون نَبیدْ، اَما بِه قصّا موسی مَحَل نَوَندِن.

![](https://cdn.door43.org/obs/jpg/360px/obs-en-14-10.jpg)

خُدا می او جَنگِ جدال پیشون نَبید، پَه اَ کَنعونیون شکست خُوردِن و خیلیاشون کُشِس‌سِن. بَعد بنی اسروئیل اَ سرزِمینِ کَنعون وِرگَشتِن و سی چِل سال مِی بیابونا وِیلون بیسِن.

![](https://cdn.door43.org/obs/jpg/360px/obs-en-14-11.jpg)

مِی ای چِل سال کِه اسروئیلیون مِی بیابون ولْ وِدِه بیدِن، خُدا چیایِی کِه مَخاسِن سیشون مُهیّا بِ‌کورد. خُدا اَ آسُمون نونِی به اسمِ "مَنّا" بِ‌داشون. خُدا سیشون گَلِه بلدرچین بِفِرسنید تا گوشت سی خُوَردَن داشتَه بُووِن. مِی کُلِّ او مدّت خُدا نَهِشت رَختا و کوشاشون کُونَه بُووِن.

![](https://cdn.door43.org/obs/jpg/360px/obs-en-14-12.jpg)

خدا مُعجِز کُورد و اَ مِنجا کَمَرْ اُو خُوَردَن داشون. اَما بنی‌اسروئیل پِی هَمِه ای نعمتا اَ خُدا و موسی گِلِّی‌بْ‌کوردِن و بِ‌غُمنیدِن. مِی ای وضع، خدا سَرِ عهدِش کِه پِی ابراهیم، اسحاق و یعقوب بِسْ بید وفادار بید.

![](https://cdn.door43.org/obs/jpg/360px/obs-en-14-13.jpg)

یَه رَه دِگَه مُعادِی کِه مردُم اُو سی خُوردَن نداشتِن، خُدا به موسی گفت: «به کمَر گو تا اُو اَ مینِش آیَه.» اما موسی اَ جا ایان‌کِه به کمَر فرمون دهَه، پِی عصا دو کِتَه به کَمَر زَه و پِی یِی کارِش به خدا بی احترومی کُورد. اُو چَندَشونْ، سی هَمَه اَ مِنجا کَمَر اومَه، اما خُدا اَ موسی جِر بی‌یِس و گف: «تو پاتَه مِی سرزِمین موعود نَم وَنی.»

![](https://cdn.door43.org/obs/jpg/360px/obs-en-14-14.jpg)

بَعدِ چِل سال کِه بنی اسروئیل مِی بیابون وِیلون بیدِن، کُلِّ کَسُونِی کِه نُها خُدا وِیسیدِن و شَرِ شور کُوردِن بیدْ، مُوردِن. بعد خُدا دَفعِه دِگَه قُومَه اَلا حِدِّه سرزِمینِ موعود رَهنُمونی کُورد. سی‌ایان کِه موسی پیا گَپْ‌سالِی بی‌یِس بید، خدا یوشَعَ سی رهنمونی قوم انتخاب کُورد. خُدا به موسی قول دا کِه روزِی پیغَمبَری لِف او سی مردُم بِفِرِسنَه.

![](https://cdn.door43.org/obs/jpg/360px/obs-en-14-15.jpg)

خدا به موسی گف تا بالا کُهِ بُلِندی رووَه تا اَ اُونجون سرزِمینِ موعودَه بینَه. موسی سَرزِمین موعودَه دید اما خُدا نَهِشتِش تا وارِدِ اُونجون بووَه. بَعد موسی به رحمت خُدا رَفْ و بنی‌اسروئیل سی روز سی‌یِش عزادوری کُوردِن، یوشع گَپِ بنی‌اسروئیل بی‌یِس. او پیا خوبِی بید، چون به خُدا اعتماد داشت و اَ او فرمُونبری بِ‌کورد.

*مَتَلِی اَ کِتابِ مقدس:  خروج ۱۶ و ۱۷، اعداد ۱۰ تا ۱۴، تثنیه ۳۴*

## 15. ۱۵ - سرزمین موعود

https://openbiblestories.org/l/def/story-15/

![](https://cdn.door43.org/obs/jpg/360px/obs-en-15-01.jpg)

آخِر سَر زمونِی رَسید کِه بنی اسروئیل واردِ سرزِمینِ موعود یعنِی کنعون بُووِن. اُونجون شَـری به نومِ اَریحا بید که دور تا دورِشَه پِی دیوارا سفتِ سَختِی بَسِن بید. یوشَع دو چِل‌چول‌بَر اَلا او شَـر فِرِسنید. اُونجون زُونِه خَرابِی به نومِ راحاب زِندی ب‌کورد. او چِل‌چول‌بَرونَ پیشِ خودِش وِرداشت و کُمکشون کُورد کِه اَ شَـر گُروزِن. او ای کارَه سی خُدا اَنجُوم دا بید سی‌ایان کِه بِه خُدا اِتِقاتْ داشت. چِل‌چول‌بَرون بِه راحاب قول دان کِه وَقتِی اَریحانَ اَ بین بَرِن اَ او و خُونه‌وادَش حِما کُنِن.

![](https://cdn.door43.org/obs/jpg/360px/obs-en-15-02.jpg)

سی رَسیدَن به سرزِمین موعود اسروئیلیون واسکِی اَ روخونِه اُردُن گَذَردِن. خُدا به یوشَع گف: «کاهنونَ نُها فِرِسن.» وَقتِی کِه کَفِ پا کاهنون به اُو روخونِه اُردن رَسید، اُو روخونَه ویسید و اسروئیلیون تَرِس‌سِن ری زِمینِ خُشک تا اولا روخونَه گُذَردِن.

![](https://cdn.door43.org/obs/jpg/360px/obs-en-15-03.jpg)

بَعدِ اِیانْ کِه بَنی اسروئیل اَ روخونَه گُذَشتِن، خُدا یوشَعَ گف کِه سی هُجِیم به شـَرِ اَریحا مهیّا بُووِن. خُدا به مَردُم گف: کاهنون و سربازون وا شیش روز، روزِی یَه رَه دور تا دورِ شَـر گَردِن. پَه کاهنون و سربازون ای کارَه کوردِن.

![](https://cdn.door43.org/obs/jpg/360px/obs-en-15-04.jpg)

سربَندِ روزِ هفتم، اسروئیلیون واسکِی هَف رَه شَـرَه دور زَنِن .بَعد کاهنون واسکِی شیپور زَنِن و همِه مَردم غِرغو کُنن. اُوشون ای کارَه اَنجوم دان.

![](https://cdn.door43.org/obs/jpg/360px/obs-en-15-05.jpg)

اوسون بید کِه دیوارا دور تا دورِ اَریحا رُمِس‌سِن. اسروئیلیون طِبق گُفتِه خُدا هَمَه چِی مِی شَـرَ اَ بین بوردِن. تِینا راحاب و خونه‌وادَش کِه پِی اسروئیلیون بیدِن سالُم موندِن. مَردُمِی دِگَه کِه می سرزِمینِ کنعون زِندی ب‌کوردِن، فَـمیدِن کِه اسروئیلیون اَریحانَ دَمبَر کوردِنَه. ایشون تَرسیدِن کِه یَه رَه بنی اسروئیل وَرشون هُجِیم نَ‌آرِن.

![](https://cdn.door43.org/obs/jpg/360px/obs-en-15-06.jpg)

خُدا به بَنی اسروئیل فرمُون دا کِه پِی هیچ کو اَ قیلْ قبیلونِ کنعون پیمونِ اُوشتی نَبَندِن. اَما یکِی اَ قبیلا اُونجون به نومِ جبعونیون بِه یوشَع دُرو گُفتِن کِه اَ جا دیرِی اَ کنعون اُومِنَه. یوشع و گَپونِ اسروئیل بی‌دُنگِ خُدا پِی جبعونیون صلح کوردِن.

![](https://cdn.door43.org/obs/jpg/360px/obs-en-15-07.jpg)

سو روز اَ سر بَند او صلح، اسروئیلیون فَـمیدِن کِه جبعونیون در اَصل مالِ کنعونِن و اَ فِرِیبْ‌نیدَنِشون جِر اومِن. اَما صُلحَ پِی ایشون نَ‌اِشکنیدِن، چون ای صُلحَه نُها خُدا بَسِن بید. چند روز بَعد، پاتِشاهونِ قبیلِه دِگِه اَ کنعونیون به نوم اموریون وقتِی فَـمیدِن کِه جبعونیون پِی بنی اسروئیل صلح کوردِنَه، پی یَکِ‌دو لَشکَرِی گِرد کُوردِن و به جبعونیون هُجِیم اُووُوردِن. جبعونیون هَم اَ یوشع مَخاسِن کُمَکشون کُنَه.

![](https://cdn.door43.org/obs/jpg/360px/obs-en-15-08.jpg)

یوشع لَشکر بنی اسروئیلَه گِرد کُورد. اُوشون کُلّ شو مِی رَه بیدِن تا به جبعون رَسیدِن و سَحَری گَه اموریونَه خِف‌گِر کُوردِن و وَرشون هُجِیم وُوردِن.

![](https://cdn.door43.org/obs/jpg/360px/obs-en-15-09.jpg)

خُدا او روز سی اسروئیل جنگید. اموریونَه گِیز کُورد و تِگرگا گَپِی اَ آسُمون بُورید و خیلِی اَ اموریونَه کُشت.

![](https://cdn.door43.org/obs/jpg/360px/obs-en-15-10.jpg)

خُدا کارِی کُورد کِه عَفتو مِی آسمون اَ حَرکت ویسَه تا سربازون اسروئیلی بُر کُنِن تا اموریونَه کامل اِشکِنِن. خُدا مِی او روز سی اسروئیلیون بُردی گَپِی عَمَل اُووُورد.

![](https://cdn.door43.org/obs/jpg/360px/obs-en-15-11.jpg)

اَ سَر بَندِ ایان کِه خُدا او لَشکَرَه اِشکِنید، خِیلِی اَ قیلِ قَبیلونِ کنعونی سی حملَه به اسروئیل پِی یکَ مُتَّحِد بیسِن. یوشع و اسروئیلیون وَرشون هُجِیم اُووُوردِن و اَ بین بُوردِنشون.

![](https://cdn.door43.org/obs/jpg/360px/obs-en-15-12.jpg)

بعدِ ای جَنگِ دعواها، خُدا بَـرِ هَر قبیلَنَه اَ سرزِمینِ موعود بِه ایشون بَـرِ بِدا کُورد. بعدِش خُدا صلحَه مِی کُلّ حِدّا اسروئیل بِناشت.

![](https://cdn.door43.org/obs/jpg/360px/obs-en-15-13.jpg)

مُعادِی کِه یوشع پیا گَپْ‌سالِی بی‌یِس، همِه بنی اسروئیلَه دورِ خودِش گِرد کُورد. بَعدْ مردُمَه یادشون اُووُورد کِه اَ عَهدِی کُه پِی خدا مِی کُهِ سینا بَسِنَه فرمُون بری کُنِن. مردُم قول دان تا پِی خُدا مَنِن و اَ شریعَتِ خُدا اطاعت کُنِن.

*مَتَلِی اَ کتاب مقدس: کتاب یوشع ۱ تا ۲۴*

## 16. ۱۶- ِنِجات دِهَندون

https://openbiblestories.org/l/def/story-16/

![](https://cdn.door43.org/obs/jpg/360px/obs-en-16-01.jpg)

بَعدِ مُوردَنِ یوشَع، بنی اسروئیل اَ فَرمونا خُدا فرمونبَری نَ‌کوردِن و اهل کنعون کلَّن اَ مِی سَرزِمینِ مُوعود نَبِسْ‌سِن دَر. وَ اَ جا پِرَستیدَنِ یَهُوَه کِه خُدا اصلی بید، به پِرَستیدَنِ بُتا کنعونیون ری اووُوردِن. هَمْچِه وختِی اسروئیلیون پاتِشوهِی نَداشتِن، پَه هَر کَه هَر چِی مَخاس اَنجُومِ دا.

![](https://cdn.door43.org/obs/jpg/360px/obs-en-16-02.jpg)

سَرِ‌خود بیدَنِ قومِ اسروئیل سیشون غَشقایی عَمَل وُورد کِه ای بلاها چَن رَه سَرشون اُومَه. ای غَشقا هَمچِه چیایی بیدِن: قُومِ اسروئیل چَن سال اَ خُدا فرمُونبَری نَم‌کُوردِن وَ خُدا هَم سی مجازاتِشون بِهِشت تا دِشمِنونشون سَرشون سُوار بُووِن. دِشمنون مال و مِنالِشونَه بِه بُوردِن وَ جَمِی اَزِشونَ بِه کُشتِن. بَعدِ ایان‌کِه چَن سال زِیرِ آزارِ دِشمِنون بیدِن، بِ‌وِرگشتِن و توبَه بِ‌کوردِن وَ اَ خُدا مَخاسِن اَ دَسِ دِشمِنون خَلاصِشون کُنَه.

![](https://cdn.door43.org/obs/jpg/360px/obs-en-16-03.jpg)

هَر کِتَه کِه توبَه بِ‌کوردِن خُدا نِجات دِهِندِه بِفِرسنید تا نِجاتِشون دَهَه. او نِجات دِهِندَه پِی دِشمِنون جِدالِ کُورد و بِ‌اِشکِنیدِشون. ای‌طور صلح مِی وِلاتِشون میومَه، و او نِجات دِهِندَه بِه خوبی سَرشون حُکومَتِ کورد. خُدا نِجات دِهَندونِ زیادِی سی بنی‌اسروئیل فرسنید تا نجاتِشون دَهَه. بَعدِ ایان‌کِه خُدا هِشت یِکِی اَ دِشمِنونِشون بِه نُوم مدیان قُوم اسروئیلَه اِشکِنَه، اندو سیشون کَسِی فِرِسنید تا خلاصِشون کُنَه.

![](https://cdn.door43.org/obs/jpg/360px/obs-en-16-04.jpg)

مدیانیون هَف سال، زِراعَتا بَنی‌اسروئیلَه غارَتِ کوردِن. بَنی‌اسروئیل اَقدَر تَرسیدِن بید کِه مِی کَتا بِگُرُختِن تا مبادا مدیانیون اُوشونَه پیدا کُنِن. آخِر سَر اَ خُدا مَخاسِن تا نِجاتِشون دَهَه.

![](https://cdn.door43.org/obs/jpg/360px/obs-en-16-05.jpg)

روزِی پیایِی اَ اسروئیل به نومِ جِدعون، بی دُنگَکی مشغول یَردَنِ گَنُم بید تا مدیانیون نَتَرِسَه بُووِن گَنُمانَ دُزِن. هَمچِه مُعادِی مِلاکِه یَهُوَه وَرِش نازِل بی‌یِس و گف: «ای پیا جَنگی، ای پَـلُون، خُدا پِی تونَه. بیو رو اسروئیلَه اَ دَسِ مدیانیون نِجات دِه.»

![](https://cdn.door43.org/obs/jpg/360px/obs-en-16-06.jpg)

بُووِه جِدعون قربانگاهی داشت کِه وَقفِ بُتِی کُورد بید. اولینْ چِی کِه خُدا اَ جِدعون مَخاس دَمبَر کوردَنِ ای قربونگا بید. جِدعون کِه اَ مَردُمِ تَرسید تا نِصفِ شو ویسید. بَعد قربونگانَه رُمنید و خَراب کورد. او نِهِنگِ اُونجون قربونگا تازِی سی خُدا ساخت و سیْ‌یِش قربانی کورد.

![](https://cdn.door43.org/obs/jpg/360px/obs-en-16-07.jpg)

سُبا سحر مُعادِی کِه مَردُم دیدِن قربانگاه دَمبَر بیسَه خِیلی جِر بیسِن. اُوشون اَلا خونِه جِدعون رَفتِن تا کُشِنِش، اما بُووِه جِدعون گف: «سی چِه شُمون مَخِه بِه خُداتون کمک کُنِه؟ اَر او خُداس، هِلِه خودش اَ خودِش دفاع کُنَه.» مَردم سی قِصِّه کِه او گف، اَ کُشتَنِ جدعون گُذَشتِن.

![](https://cdn.door43.org/obs/jpg/360px/obs-en-16-08.jpg)

دُما ایانْ اَندو مدیانیون اوُمِّن تا بنی اسروئیلَه غارَت کُنِن .اُوشون اَقدَر زِیاد بیدِن کِه کَسِی نَتَرِس شُمارَشون. جِدعون تَمومِ قُومَه سی جَنگ پِی مدیانیون بُنگ کُورد. جِدعون اَ خُدا دو نشونَه خاس تا اِتّقات کُنَه کِه خُدا اَ او مَخووَه اسروئیلَه نِجات دَهَ.

![](https://cdn.door43.org/obs/jpg/360px/obs-en-16-09.jpg)

سی اوّلی نِشونَه، جِدعون کُتِی اَ پوسِ گوسفِندَه سَر زِمین وَند و اَ خُدا مَخاس کِه فقط سرِ پوسِ کُووَه، نَم نِشینَه اَما زِمین خُشک مَنَه. خُدا ای کارَه سی‌یِش کُورد. سُباش جدعون اَ خُدا مَخاس تا زِمین خیس بُووَه و پوسِ کُووَه خُشک مَنَه، خُدا هَم ای کارَه کورد .ای دو تیرنِشون جِدعونَ فَـموند کِه خُدا اَزِش مَخو اسروئیلَه اَ دَسِ مدیانیون خَلاص کُنَه.

![](https://cdn.door43.org/obs/jpg/360px/obs-en-16-10.jpg)

۳۲۰۰۰ سرباز اسروئیلی پیشِ جِدعون اُومِّن، اما خُدا گف هِنون خیلِی زیادِن، پَه ۲۲۰۰۰ تا اَزشونَه کِه اَ جنَگِ ترسیدِن بِه خونَه فِرِسنید. خُدا اَندِبارتَه بِه جدعون گف ای تعداد زیادِن. جِدعون اَندو هَمَشونَه بجز سیصد نَفر بِه خوناشون فِرِسنید.

![](https://cdn.door43.org/obs/jpg/360px/obs-en-16-11.jpg)

هَمو شو خُدا به جِدعون گف: «بی دُنگَکی به خیما مدیانیون رو، مُعادِی کِه قِصّاشونَ فَـمی دِگَه اَ هُجِیم وُوردَن نَم‌ترسی.» جِدعون بِه خیماشون رَف و اِشنید کِه یکی اَ سربازونِ مدیونی خُوشَه سی رَفیقِش دارَه تعریفِ کُنَه. رَفیقِش گف: «معنی خُووِت اِیانَه کِه لَشکَرِ جِدعون لَشکَرِ اُمونَه بِ‌اِشکِنَه.» مُعادِی کِه جدعون ایانَه اِشنید اَ خُدا مَمنون‌دار بی‌یِس.

![](https://cdn.door43.org/obs/jpg/360px/obs-en-16-12.jpg)

جِدعون اَلا سربازونِش وِرگَشت و هَرکونشونَه یَه شیپور و یَه کیزِه سُفولی‌یِ دا کِه مَشعَلِی مینِش بید. اُوشون دور تا دورِ اردوگا دِشمِنَه وَقتِی کِه سربازونِ مدیونی خُو بیدِن، محاصِرَه کُوردِن. سیصد سربازِ جِدعون مشعَلاشونَه مِی کیزَه وَندِن بید تا مدیانیون نَترِسَه بُووِن نورِشونَه بینِن.

![](https://cdn.door43.org/obs/jpg/360px/obs-en-16-13.jpg)

بَعد سربازونِ جِدعون هَمِه کیزانَه اِشکِنیدِن و نورِ مَشعَلا دِیار دا .سربازون شیپورِ زَندِن و بُنگِ کوردِن: «شمشِیلا سی یَهوَه و جِدعون»

![](https://cdn.door43.org/obs/jpg/360px/obs-en-16-14.jpg)

خُدا اوطور مدیانیونَ گِیز کُورد بید که وَر یَک هُجِیم اُووُوردِن و یَکِ‌دوَ کُشتِن. جِدعون همو دَم باقِی بَنی اسروئیلَه اَ خوناشون بُنگ کُورد تا اَ دُما مدیانیون وَنِن. بنی اسروئیل خیلی اَ مدیانیونَ کُشتِن و باقِیشونَه اَ وِلاتِ اسروئیل کُوردِن دَر. او روز ۱۲۰۰۰۰ نفر اَ مدیانیون کَشتَه بی‌یِس. ای‌طور بید کِه خُدا بنی اسروئیلَه نِجات دا.

![](https://cdn.door43.org/obs/jpg/360px/obs-en-16-15.jpg)

مَردم مَخاسِن تا جدعونَ پاتِشا خوشون کُنِن. جِدعون نَهِشتِشون ای کارَه کُنِن، اَما اَزشون مَخاس کُتِی اَ او حَلقا طِلا که اَ مدیانیون گِرُفتِنَه بِه او دِهِن. مردم خِیلی طِلا به جِدعون دان.

![](https://cdn.door43.org/obs/jpg/360px/obs-en-16-16.jpg)

بَعد جِدعون پِی او طلاها، جِلیزْقِه لِفِ جِلیزْقِه کِه گَپِ کاهِنونِ پوشَه، دُرس کُورد. اما مردُم مِلثِ بُت، او جِلیزْقَنَه کِه جِدعون ساختْ بید بپِرَستیدِن. پَه خُدا اَندو بَنی اسروئیلَه غشقِ وِلا دا، سی ایان‌کِه رَهِی دِگَه به بُتون ری اُووُوردِنَه. خُدا دِشمِنونِشونَه هِشت تا بنی اسروئیلَه اِشکِنِن. اَندو اُوشون اَ خدا مَخاسِن کمکشون کُنَه و خُدا هَم نِجات دِهِندِه دِگَه سیشون فِرسنید.

![](https://cdn.door43.org/obs/jpg/360px/obs-en-16-17.jpg)

ای قَضِیَه چَن رَه تکرار بی‌یِس. قُومِ اسروئیل گناه بِه کُوردِن و خُدا عاجِزشونِ کُورد، اُوشون توبَه بِ‌کوردِن و خُدا سیشون نِجات دِهِندِه بِفِرسنید تا نِجاتشون دَهه. مِی سالا زِیادِی خُدا خیلیانَه سی نِجاتِ بنی اسروئیل اَ دَسِ دِشمِنون فِرِسنید.

![](https://cdn.door43.org/obs/jpg/360px/obs-en-16-18.jpg)

اَخیر قُومِ اسروئیل اَ خُدا مَخاسِن تا لِفِ باقِی مَردُم، یَه پاتِشا دَهَشون. اُوشون پاتِشا لَکَنت و زور دارِی مَخاسِن کِه تَرِس‌سَه بُووه مِی دَعواها سیشون گَپی کُنَه. خُدا اَ ای چِی کِه ایشون مَخاسِن خوشحال نبید، اما هموطور کِه بنی اسروئیل مخاسِن پاتِشاهی داشون.

*مَتَلِی اَ کِتاب مقدس:  کتاب داوران فصل ۱ تا ۳ و ۶ تا ۸؛ کتاب اول سموئیل فصل ۱ تا ۱۰*

## 17. ۱۷- عَهدِ خُدا پِی داوود

https://openbiblestories.org/l/def/story-17/

![](https://cdn.door43.org/obs/jpg/360px/obs-en-17-01.jpg)

شائول اوَّلی پاتِشا اسروئیل بید. او هموطور کِه مَردُم مَخاسِن لَکَنت و قشنگ بید. شائول مِی سالا اول حکومتِش، پاتِشا خوبِی بید اما بَعدِ مدّتِی آدمِ شرورِی بی‌یِس کِه اَ خُدا فرمونبری نَم‌‌کورد. پَه خدا کَسِی دِگَه انتخاب کُورد تا روزِی اَ جاش پاتِشا بُووَه.

![](https://cdn.door43.org/obs/jpg/360px/obs-en-17-02.jpg)

خُدا یَه جَوونِ اسروئیلی به نُومِ داوودَ انتخاب کُورد تا بعدِ شائول پاتِشا، آمادَش کُنَه. داوود، چوپونی اَ مَـنطَقِه بیت لحم بید. او مِی دو زمونِ جِداکار، مُعادِی کِه گوسفِندونِ بُووَشَه بِه پویید گَـلَه‌نَه اَ هُجِیمِ خرس و شیر نِجات دا و حیوِنون وحشیَه کُشت .داوود آدم مَردُم دار و مُتواضِعِی بید او به خُدا اِتّقات داشت و ازِش فرمُونبری بِ‌کورد.

![](https://cdn.door43.org/obs/jpg/360px/obs-en-17-03.jpg)

سَر بَندِی کِه داوود پیا جَوونِی بید پِی پیا لَکَنتِی به اسمِ جُلیات دعوا کُورد. جُلیات سربازِ زِتِ‌زِرنگ و زوردارِی بید که قَدش نِهِنگِ سو متر بید. اَما خُدا به داوود کمک کُورد تا جُلیاتَ کُشَه و اسروئیلَه نجات دَهَه. بَعد داوود چَن رَه دِشمنونِ اسروئیلَه اِشکنید. او سربازِ قابِلِی بید و مِی جِدالا سی اسروئیل گَپِی بِ‌کورد. کُلِ مردُم اَزِش تعریفِ دان.

![](https://cdn.door43.org/obs/jpg/360px/obs-en-17-04.jpg)

محبّت مَردُم وَر داوود طورِی بید کِه شائول وَرِش حسیدی بِ‌کورد. شائول بَناوَند تا داوودَ کُشَه اَما داوود به بیابون جِس و خودِشَه اَ دَسِ شائول و سربازونِش قایُوم کورد. یَه روز وَقتِی کِه شائول و سربازونِش دُما داوودِ گَشتِن، شائول نَدونِسَه مِی کَتِی رَفت کِه داوود اُونجون گُرُخت بید. شائول کِه اَ مِی کَت اُومَه دَر داوود بُنگِش کُورد و قَلِی اَ رَختا شائولَه نِشونِش دا. ای‌طور بید که شائول فَـمید داوود نَخو پِی کُشتَنِش پاتِشا بُووَه.

![](https://cdn.door43.org/obs/jpg/360px/obs-en-17-05.jpg)

آخِر سَر شائول مِی جَنگِی کُشتَه بی‌یِس و داوود به پاتِشوهی رَسید. او پاتِشا خوبِی بید و مَردُم مَخاسِنِش. خُدا به داوود بَرکَت دا و مِی هَمِه کاراش بختی‌یار بید. داوود مِی جنگا زیادِی ویستَه بید و پِی یوری خُدا دِشمنونِ اسروئیلَه اِشکِنید. داوود اُورشَلیمَه گِرُفت و اُونجونَ پاتَختِ خُودِش کُورد. داوود همُونجون ویسید تا مُورد و اُونجون دفنِش کُوردِن. او چِل سال پاتِشا بید و مِی حکومتِش، اسروئیل خیلی زوردار و مالدار بی‌یِس.

![](https://cdn.door43.org/obs/jpg/360px/obs-en-17-06.jpg)

داوود مَخاس مَعبَدِی دُرُس کُنَه کِه کُل مردمِ اسروئیل تَرِس‌سَه بُووِن اُونجون خُدانَه پِرَستِن و سی‌یِش قربانی کُنِن. سی نِزیکِ چارصد سال مَردُم مِی جایِی دعا و قربانی بِ‌کوردِن کِه خیمِه ملاقات نُومِش بید و موسی اُووانَه ساخت بید.

![](https://cdn.door43.org/obs/jpg/360px/obs-en-17-07.jpg)

خُدا پیغَمبَرِی به نوم ناتان پیشِ داوود فرسنید و بِه او گف: «سی‌ایان کِه تو مِی خِیلِی اَ جنگا بیدیَه، تو مَعبَدَه سی مو نَتَری سوزی، اما کُووَکِت اُووانَه بَنا بِ‌وَنَه. اَما مو تُنَه خِیلِی برکتِ داهام. کَسِی اَ نَسلِت تا اَبَد سرِ قُومِ مو حکومَتِ کُنَه.» تینا کَسِی کِه تَرِسَ اَ نَسلِ داوود تا اَبد سلطنت کُنَه مَسیح بید. «مَسیح او نِشون کُوردِی خدا بید کِه دُیُنانَه اَ گناها مردم نجاتِه دَهَه.»

![](https://cdn.door43.org/obs/jpg/360px/obs-en-17-08.jpg)

داوود کِه ای کَلُومَ فَهمید، شُکرِ خدانَه کُورد و پِرَستیدِش و خُدا هم اووَه عزّت دا و بَرکتِ زیادِی وَرِش بَخشید. داوود نَدونِس کِه، کِی وعدا خُدا عَمَلی بِه بُووِن اما الان دُونِیم کِه بنی اسروئیل واسکی اَ سربَندِ داوود، تقریبن هزار سال سی اوُمِّی‌یَنِ مَسیح تی‌یَه رَه بُووِن.

![](https://cdn.door43.org/obs/jpg/360px/obs-en-17-09.jpg)

داوود سالا زیادِی عادلانَه حکومَت کُورد. او مُطِیعِ خُدا بید و خُدا هم اووَه برکَت دا. اما مِی آخِر عمرِش گناه گَپِی بِرابَرِ خُدا مرتکب بی‌یِس.

![](https://cdn.door43.org/obs/jpg/360px/obs-en-17-10.jpg)

یَه روز وَقتِی کِه تموم سربازون داوود سی جَنگ رَفتِن بید دَر، اَ ری‌بونِ کاخِش سیلِی اَلا دَر کُورد و زونِه قَشنگی‌یَه دید کِه دارَه حمومِ کُنَه. او زُونَنَه نم‌اِشناخت اما فَـمید نُومِش بَتشِبَعَ.

![](https://cdn.door43.org/obs/jpg/360px/obs-en-17-11.jpg)

اَ جا ایان‌کِه اَ وَسوَسَه دیری کُنَه، داوود کَسِی پیشِ زونَه فِرِسنید تا زونَنَه پیشِش آرَه. او پِی زونَه خُفتید و بَعد فِرسنیدِش خُونَه‌شون. بَعدَ مدّتِی بتشِبَع سی داوود پیغُوم فِرسنید کِه وسَّن بیسَه.

![](https://cdn.door43.org/obs/jpg/360px/obs-en-17-12.jpg)

میرِی بتشَبَع نومِش اوریا بید. او یکی اَ سربازونِ قابِلِ داوود بید. اوریا او زَمون دیر اَ خونَه‌شون مِی جَنگ بید. داوود بُنگِش کُورد و گُفتِش کِه رُووَه خُونَه‌شون و پیشِ زونَه‌ش مَنَه. اما اوریا قبول نَ‌کُورد کِه وَقتِی باقِی سربازون مِی جَنگِن، ای خونَه وِرگَردَه. آخِر سر داوود، اوریانَه فرسنید جَنگ و اَ گَپونِ لَشکَر مَخاس تا اوریانَه صف اول جنگ‌کُنون وَنِن تا کشتَه بُووَه. ای‌طور بید کِه اوریا کُشتَه بی‌یِس.

![](https://cdn.door43.org/obs/jpg/360px/obs-en-17-13.jpg)

بَعدِ مُوردَنِ اوریا، داوود پِی بتشبَع عروسی کُورد و او سی‌یِش کُووَکِی اووُورد. خُدا اَ کارِی کِه داوود کُورد بید جِر بید، پَه ناتانِ نَبی‌یَه فرسنید تا کار زَبینِ داوودَ یادِش آرَه. داوود هم بِه گناهش اعتراف کُورد و خُدا بَخشیدِش. داوود باقِی عُرْمِ‌ش، مِی سخت‌ترین وضع، خُدانَه فرمُونبَری کُورد.

![](https://cdn.door43.org/obs/jpg/360px/obs-en-17-14.jpg)

اَ کَمِ گناهی کِه داوود کُورد بید، کُووَکِش مُورد. همیطور خِیلِی اَ قومُونِش ری‌بری داوود ویسیدِن و زور داوود خِیلِی کَم بی‌یِس. اما خُدا مِی ای وَضع هَم سرِ قولِش پِی داوود موند و بِه نتیجَه‌ش رَسوند. بَعدِ مدِتِی کُووَکِی اَ داوود و بتشِبَع عَمَل اومَّه کِه نومِشَه سلیمون وَندِن.

*مَتَلِی اَ کِتابِ مقدس: کتاب اوّل سموئیل، فصل ۱۰؛ و فصل ۱۵ تا ۱۹و ۲۴ و ۳۱؛  کتاب دوم سموئیل فصل  ۵ و  ۷ و ۱۱ و۱۲*

## 18. ۱۸- دو شـِلاق بیسَنِ پاتِشوهی اسروئیل

https://openbiblestories.org/l/def/story-18/

![](https://cdn.door43.org/obs/jpg/360px/obs-en-18-01.jpg)

داوودِ پاتِشا چِل سال حکومَت کُورد. بَعدِ مُوردَنِش کُووَکِش سلیمون به پاتِشوهی قومِ اسرائیل رَسید. خُدا پِی سُلیمون قِصَّه کُورد و اَزِش پرسید: «اَ مو چِه مَخی تا داهامت؟» سلیمون اَ خدا خاس تا بِه او دُونویی دَهَه. ای چِی کِه سلیمون مَخاس باعث خوشحولی خُدا بی‌یِس و اووَه دُوناتَرین پیا ری زِمین کُورد. سلیمون چیا زیادِی یاد گِرُفت و پاتِشاهِ فَـمیدِه بید. خدا هَم سلیمونَ پیلدار کُورد.

![](https://cdn.door43.org/obs/jpg/360px/obs-en-18-02.jpg)

سلیمون مِی اورشلیم معبَدِی بَناوَند کِه داوود مِی فِکرِش بید و نَقشَشَه کَشیدْ بید و مِصالِحِشَه گِرد کُورد بید. ایسون مَردُم تَرِسْ‌سِن اَ جا خیمِه ملاقات، اُونجون خُدانَه پِرَستِن و قربانی سی‌یِش کُنِن. خُدا بِه مَعبَد نازِل بی‌یِس و اُونجون حاضِر بید و پِی قومِش زِندی بِ‌کورد.

![](https://cdn.door43.org/obs/jpg/360px/obs-en-18-03.jpg)

اَما سلیمون بِه زَنونِ طایُفا دِگَه دِل دا بید و اَ اوشون زُونَه اوسوند. او نِزیکِ هَزار زُونَه اوسوند و ای‌طور اَ خُدا وِرگَشتْ بید. خِیلِی اَ او زَنون، اَ وِلاتا غریب اومِن بید و پِی خوشون بُت داشتِن تا پِرَستِن. مُعادِی کِه سلیمون پِیا گَپْ‌سالِی بی‌یِس، او هَم بُتا زنونِشَه بِ‌پِرَستید.

![](https://cdn.door43.org/obs/jpg/360px/obs-en-18-04.jpg)

ای‌طور بید کِه خُدا اَ دَسِ سلیمون جِر اومَّه وَ گُف کِه اَ کَمِ ای نافَرمونی‌یِش، پاتِشوهی اسروئیلَه بَعدِ مُوردَنِ سلیمون دو شِلاقِ کُنَه.

![](https://cdn.door43.org/obs/jpg/360px/obs-en-18-05.jpg)

بعدِ سلیمون کُوَکِش رِحُبعام اَ جاش نِشِس. کل قومِ اسروئیل گِرد بیْسِن تا اووَه به عنوان پاتِشا قبول کُنِن. اوشون بِه رِحُبعام شکایت بُوردِن کِه سلیمون اَ ایشون زیاد کار کَشیدَه و مَجبور بیدِنَ مالیات زیادِی دِهِن. اوشون اَ رحبعام مَخاسِن کِه لِف بُووَش وَرشون سَخت نَ‌گِرَه.

![](https://cdn.door43.org/obs/jpg/360px/obs-en-18-06.jpg)

اما رِحُبعام جوابِ احمقانِی داشون و گف: «شُمون مَرِی بُووَم سلیمون سخت بِ‌گِرُفت، اما مو اَ شمون بیشتر کارِ کَشوم و بیشتَرَ او عاجِزِتونِ کُنُم.»

![](https://cdn.door43.org/obs/jpg/360px/obs-en-18-07.jpg)

بَعدِ ای قِصّاش، دو بَرِ مَردُم نُهاش وِرسیدِن. دَه قبیلَه اَ اسروئیل جِدا بی‌یِس. اما دو قبیلَه مُطیعِش موندِن و نومِ خوشونَه یَهودا وَندِن.

![](https://cdn.door43.org/obs/jpg/360px/obs-en-18-08.jpg)

او دَه قبیلَه پیایِی بِه نومِ یِرُبعامَه پاتِشا کُوردِن. اوشون شمالِ اسروئیل زِندی بْ‌کوردِن و خوشونَه پاتِشوهی اسروئیل، نوم وَندِن.

![](https://cdn.door43.org/obs/jpg/360px/obs-en-18-09.jpg)

یرُبعام مطیعِ خُدا نبید و ای‌طور بی‌یِس کِه مَردُم ری بِه گناه اُووُوردِن. او دو بت ساخت و اَ مَردُم مَخاس کِه بُتونَه پِرَستِن .اوشون دِگَه سی دُعا به اورشلیم کِه مِی حکومَتِ یَهودا بید نَم‌رَفتِن.

![](https://cdn.door43.org/obs/jpg/360px/obs-en-18-10.jpg)

پاتِشوهیِ یهودا و اسروئیل دِشمِنِ یَک بیدِن و هِی پِی یَک جنگ داشتِن.

![](https://cdn.door43.org/obs/jpg/360px/obs-en-18-11.jpg)

مِی ای پاتِشوهی جدیدِ اسروئیل، کُلِ پاتِشاهون زَبین بیدِن .خِیلِی اَ پاتِشاهون بِه دَسِ کَسونِی کِه مَخاسِن پاتِشوهی‌یَه واگِر کُنِن کُشتَه بی‌سِن.

![](https://cdn.door43.org/obs/jpg/360px/obs-en-18-12.jpg)

هَمِه او پاتِشاهون و بیشتَرِ مردُمِ اسروئیل به پِرستیدَنِ بُتون ری کُوردِن. اوشون مُعادِی کِه بُتونَ بِپِرَستیدِن پِی زَنونِ خراب بِخُفتیدِن و بَچونِشونَه هَم سی بُتون قربانی بِ‌کوردِن.

![](https://cdn.door43.org/obs/jpg/360px/obs-en-18-13.jpg)

پاتِشاهونِ یَهودا اَ نَسلِ داوود بیدِن. بَعضِی اَ ای پاتِشاهون آدمونِ خوبِی بیدِن و با انصاف حکومَتِ کُوردن، و خُدانَه بِپِرَستیدِن .اَما دوبَـرِه پاتِشاهونِ یَهودا زَبین بیدِن. بَعضیاشون بَچونِ خوشونَه هَم سی بُتون قربانی بِ‌کوردِن. دو بَـرِ مَردُمِ یهودا نُها خدا ویسیدِن و خُداهونِ دِگِه‌یَه بِپِرَستیدِن.

*مَتَلِی اَ کِتابِ مقدس: کتاب اول پادشاهان فصل ۱ تا ۶ و ۱۱ و ۱۲*

## 19. ۱۹- پیغمبَرون

https://openbiblestories.org/l/def/story-19/

![](https://cdn.door43.org/obs/jpg/360px/obs-en-19-01.jpg)

مِی کُلّ تاریخِ اسروئیل، خدا پیغَمبَرونِی سیشون فِرِسنید. ای پیغَمبَرون اَ جانُبِ خدا پیغومایِی بِ‌گِرُفتِن و بِه مَردُم بِ‌گُفتِن.

![](https://cdn.door43.org/obs/jpg/360px/obs-en-19-02.jpg)

ایلیا پیغَمبَرِی بید کِه مِی زَمونِ پاتِشوهی اَخاب زِندی بْ‌کورد .اَخاب پیا زَبینِی بید کِه مردمَه بِه پِرَستیدَنِ بت بَعَل تَشوِیقِ کُورد .ایلیا اَخابَ گُف کِه خدا مجازاتِشِ کُنَه. او به اخاب گف :«مِی وِلاتِ اسروئیل، بی فَرمونِ مو، هیچ بارون یا شُونَمِی سر زِمین نَم‌نِشینَه.» اَخاب اَ ای قصِّه ایلیا جِر اومَّه و بَنا به کُشتَنِ ایلیا وَند.

![](https://cdn.door43.org/obs/jpg/360px/obs-en-19-03.jpg)

خُدا به ایلیا گف کِه اَ لا بیابون رُووَه و اونجون اَ اَخاب خُوشَه قایوم کُنَه. ایلیا به بیابون رَفت و کِنار نَخلِی کِه خُدا نشونِش دا بید جاگِر بی‌یِس. هر روز سَحَر و پَسین، باهِندون سی‌یِش نون و گوشت میووُوردِن. مِی ای مدت، اَخاب و لَشکرِش دُما ایلیا بِگَشتِن، اما نَتَرِس‌سِن جُورِنِش.

![](https://cdn.door43.org/obs/jpg/360px/obs-en-19-04.jpg)

بارون کِه نَم‌زَه بَعدِ مُدَّتِی او نَهر خشک بی‌یِس. ایلیا به وِلاتِ دِگِه رفت کِه نِهنگِ اونجون بید. مِی او وِلات زُونِه فقیرِی پِی کُووَکِش زندی بْ‌کورد وَ آذوقَشونْ سی دِلِ بی‌بارونی تموم بی‌یِس بید. اَما پِی ای وَضع زُونَه ایلیانَ بیدارِ بی‌یِس و خُدا هم نیازا او وُ کُووَکِشَه سی‌یِش آمادَه بِ‌کورد. توپو آردِش و روغَنِش هیچ وَقت پَتی نَم‌بی‌یِس و مِی کُلّ زَمونِ خشکسولِی چِی سی خُوَردَن داشت. ایلیا چَنْ سو سال اونجون موند.

![](https://cdn.door43.org/obs/jpg/360px/obs-en-19-05.jpg)

بَعدِ سو سال و نیم، خُدا به ایلیا گف اندو بارونِه زَنَه .خدا اَ ایلیا مَخاس تا به پاتِشوهی اسروئیل وِرگَردَه و پِی اَخاب قِصّه کُنَه. مُعادِی کِه اخاب ایلیانَ دید، گُفتِش: «کُلِ ای غَشقا زِیرِ سرِ تُنِن.» ایلیا هَم جُواب دا: «کُلِ ای دَردِسرا سی دِل تونِن. تو یَهوَنَه هِشتِیَه. او خُدا اَراسی‌نیَه اَما تو بَعَلَه بِپِرَستی. کلّ بنی اسروئیلَه اَلا کُهِ کَرمِل بیار.»

![](https://cdn.door43.org/obs/jpg/360px/obs-en-19-06.jpg)

کل اسروئیل و پیغَمبرونِ بَعَل کِه چارصدِ پنجا نفر بیدِن به کُهِ کَرمِل اومَّن. ایلیا گف: «تا کِی مَخِه دو بِشَک مَنِه؟ اَر یَهووَه خُداس، اووَه پِرَستِی اَر بَعَل خُداس هم اووَه فرمونبَری کُنِی.»

![](https://cdn.door43.org/obs/jpg/360px/obs-en-19-07.jpg)

بَعد ایلیا ری بِه پیغَمبرونِ بَعَل کُورد و گف: «گو نَرِی قربانی کُنِه، گوشتِشَه قَل قَل کنِه و ری قربونگا وَنِه اما تَشِش مَزَنِه .مُنَم مِی قربونگا دِگِه ای کارَه بِکُنُم. خُدایِی کِه سی قربانگاه تَش فِرِسنَه خُدا اَراسی‌نَه. «پَه کاهنونِ بُتِ بَعَلْ، قربانیه آمادَه کوردِن، اما تَشِی روشِن نَ‌کُوردِن.

![](https://cdn.door43.org/obs/jpg/360px/obs-en-19-08.jpg)

بَعدْ اوشون رِی اَلا بُتِ بَعَل دُعا کوردِن: «اِی بَعَل، بُنگمونَ فَـماد!» اوشون کُلّ روز مشغولِ دُعا، غِرغُو و خینی کُوردَنِ خوشون پِی چَقو بیدِن. اما هیچ نشونِی اَ جانِب بَعَل نَه اومَّه و تَشِی هَم نازِل نَ‌بی‌یِس.

![](https://cdn.door43.org/obs/jpg/360px/obs-en-19-09.jpg)

پیغَمبَرونِ بَعَل بَعدِ ایانْ‌کِه کُلِ روزَ دُعا کُوردِن مَندَه بی‌سِن و دُعا کُوردَنَه هِشتِن. بَعد ایلیا گُو نَرِ دِگِه سی قربانی ری قربونگا وَند و بِه مَردُم گف کِه دُوزَه خُمبِ گَپِ اُو ری قربونگا ریزِن طورِی کِه گوشتِ گُو، چُو و مَذبَح و زِمینِ دورِ قربونگا کُلَن خیس بُووِن.

![](https://cdn.door43.org/obs/jpg/360px/obs-en-19-10.jpg)

بَعد ایلیا ایطور دُعا کُورد: «ای یَهُوَه، ای خدا ابراهیم، اسحاق و یعقوب، اَمروز بِه اُمون نِشون دِه کِه تو خُدا اسروئیلی و مو خادِمِتُم. دُعا مُنَه اِجابَت کُن تا ای قوم دونِسَه بُووِن تو خُدا اَراسی‌نِیی.»

![](https://cdn.door43.org/obs/jpg/360px/obs-en-19-11.jpg)

همو دَم تَشِی اَ آسمون نازِل بی‌یِس و گوشت، خیما، بَردا، خاک و حتا اُو دورِ قربونگانَه هم بِرِشت. مَردُم تا ایانَ دیدِن زِمین اُفتیدِن و گفتِن :«یَهوَه خُداست! یَهوَه خُداست»

![](https://cdn.door43.org/obs/jpg/360px/obs-en-19-12.jpg)

بَعد ایلیا گف: «مَهِلِه حتّا یَه نَفَر اَ پیغَمبَرونِ بُتِ بَعَل گُروزِن.» پَه مَردُم پیغَمبَرونِ بَعلَ گِرُفتِن و همَشونَه اَ اُونجون بُوردِن و کُشتِن.

![](https://cdn.door43.org/obs/jpg/360px/obs-en-19-13.jpg)

بَعدِش ایلیا بِه اَخابِ پاتِشا گف: «زیتَرِی اَلا خُونَه‌ت وِرگَرد چون الان بارونِه میا.» هَمِیْی مُعادْ بید کِه اُورا سیَه آسمونَه گِرُفتِن و بارون شِلَق لَقی بَناوَند. یَهُوَه قحطیَه تَموم کُورد و پِی ای کار نشون دا کِه تینا او خدا اَراسی‌نَه.

![](https://cdn.door43.org/obs/jpg/360px/obs-en-19-14.jpg)

بَعدِ ایان‌کِه ایلیا کارِش تَموم بی‌یِس، خُدا پیایِی به نُومِ اِلیشَع بِه پیغَمبری انتخاب کُورد. خُدا معجِزا زیادِی پِی الیشَع اَنجُوم دا .یِکِی اَ ای معجِزا سی نَعَمان پِیش اومَّه، کِه اَ گپونِ لَشکَرِ دِشمِن بید. او بِه مرِیضی پوسیِ کَسْ‌مَبینایِی مُفتِلا بید. نَعَمان فَـمیدْ بیدْ کِه اِلیشَع چِه کارایی بِکُنَه، پَه پیشِش رَفْ و ازِش شَفا مَخاس. الیَشع به نعمان گف کِه خودِتَه هَفْ رَه مِی اُو روخونِه‌ اردُن زیرِ اُو بَر.

![](https://cdn.door43.org/obs/jpg/360px/obs-en-19-15.jpg)

اولِ‌کارْ نَعمان اَ ای قِصَه جِر اومَّه و سی ایانْ‌کِه ای کارَه نادونِی بدونِسْ، نَخاس بَناوَنَه. اما بَعد پَشِیمون بی‌یِس و هَف رَه خوشَه مِی روخونِه اردن شُشت. کِتِه هَفتُم کِه اَ اُو اومَّه دَر، کُلَّن شفا گِرُفْ بید! خدا اووَه شفا دا.

![](https://cdn.door43.org/obs/jpg/360px/obs-en-19-16.jpg)

خُدا سی قومِ اسروئیل پیغَمبرونِ زیادِ دِگِه هَم فِرسنید. هَمَه‌شون مَردُمَه هُشدارِ دان کِه اَ پِرَستِشِ بُتون دَس کَشِن. پِی یَکِ‌دو انصاف داشتَه بُووِن و بِه هَم رَحم کُنِن. اُوشون مَردُمَه هُشدارِ دان کِه اَ کارا زَبین دیری کُنِن و اَ خُدا فرمونبَری کُنِن. اَر ای کارانَه نَکُنِن گناه بارِ بُووِن و خُدا مُجازاتِشونِ کُنَه.

![](https://cdn.door43.org/obs/jpg/360px/obs-en-19-17.jpg)

خِیلِی اَ وَقتا، مَردُم خُدانَه فرمونبَری نَم‌کوردِن. اوشون پِی پیغَمبَرون خوب تا نَم‌کوردِن و بَعضِی وَقتا بِکُشتِنشون. یَه رَه اَرمیانَ مِی چَهِی بِسْ‌سِن و اُونجون هِشتِنِش تا میرَه. اَرمیا مِی تَهِ چَه مِی خَرا گیر کُورد. اما بَعدِش، پاتِشا وَرِش رَحم کُورد و بِه نوکَرونِش گف نُها ایانْ‌کِه میرَه اَ مِی چَه دِرارِنِش.

![](https://cdn.door43.org/obs/jpg/360px/obs-en-19-18.jpg)

اَر چِه مَردُم اَ پیغَمبَرون بَدشونِ میومَّه، اما اُوشون پِی مردُم اَ خُدا بِ‌گُفتِن. ایشون مَردُمَه هشدارِ دان کِه اَر تُوبَه نَکُنِن اَ بینِ رُووِن .اوشون همیطور وعدِه خُدانَه هَم یادِ مَردُم بِ‌وُوردِن کِه هموگِری فِرِسنیدَنِ مسیح بید.

*مَتَلِی اَ کِتابِ مقدس: کتاب اول پادشاهان فصل ۱۶ تا ۱۸؛ کتاب دوم پادشاهان فصل ۵؛ کتاب ارمیا فصل ۳۸*

## 20. ۲۰- تَبعید و وِرگَشتَن

https://openbiblestories.org/l/def/story-20/

![](https://cdn.door43.org/obs/jpg/360px/obs-en-20-01.jpg)

حکومتِ اسروئیل و حکومتِ یهودا هَر دوتاشون نُها خُدا ویسیدِن و گناه‌بار بیدِن. اوشون عَهدی‌یَه کِه پِی خُدا می کُهِ سینا بَسِنْ بید، اِشکَسِن. خُدا پِی خِیلِی اَ پیغَمبرون مُوعِظَشون کُورد تا توبَه کُنِن و اَندو خُدانَه پِرَستِن، اَما اوشون اَ خُدا فرمونبَری نَ‌کوردِن.

![](https://cdn.door43.org/obs/jpg/360px/obs-en-20-02.jpg)

آخِر سَر خُدا اُوشونَه مُجازات کُورد و هِشْ تا دِشمنونِشون، اَ بین بَرِنْشون. سر بَندِ ای قَضِیَه قومِ دِگِه به نُومِ آشور بید کِه خیلی زور داشتِن. آشوریون اَ باقِی طایُفا خِیلِی بِی رَحم‌تَر بیدِن. حکومَتِ اسروئیل پِی آشوریون اَ بین رَفت. آشوریون خِیلِی اَ مردُمِ اسروئیلَه کُشتِن، هَر چی مَخاسِن بُوردِن و دوبَـرِ وِلاتِ اسروئیلَه تَش دان.

![](https://cdn.door43.org/obs/jpg/360px/obs-en-20-03.jpg)

آشوریون گَپونْ، دولَه‌مَندون و هَر کَه کِه چی بَلد بیدْ پِی خوشون بِه آشور بوردِن. فقط تیکِ تاکِی اَ آدمونِ فقیر بیچارَه مِی اسروئیل مُوندِن.

![](https://cdn.door43.org/obs/jpg/360px/obs-en-20-04.jpg)

بَعد آشوریون، غریبونَه بِه اسروئیل اُووُوردِن کِه اُونجون زِندی کُنِن. غریبون شَـرا دَمبَر بیسَنَه آباد کوردِن و پِی باقِی اسروئیلیون کِه اُونجون موندِنْ بید وَصلَت کُوردِن. اولادِی کِه اَ ای وَصلَت عَمَل اومِّن، سامِری بُنگِشونِ کُوردِن.

![](https://cdn.door43.org/obs/jpg/360px/obs-en-20-05.jpg)

مردُمِ یَهودا دیدِن کِه خُدا اسروئیلیونَ سی دِلِ بی ایمانی و سرخود بیدَن مجازات کُورد، اما هَنی ایشون بُتا و خُداهونِ کنعانیونَ بِپِرَستِن. خُدا پیغَمبرونِی فِرِسنید تا فَـمونَشون، اما ایشون هَنی دُما ای کارا بیدِن.

![](https://cdn.door43.org/obs/jpg/360px/obs-en-20-06.jpg)

نِزیکِ صد سال اَ سربَندِ اَ بین رفتَنِ اسروئیل پِی آشوریون، خدا نِبوکَدنِصَّرَه کِه پاتِشا بابِلْ بید فرسنید تا اَلا پاتِشوهی یهودا هُجِیم بَره. بابِلیون آدمونِ زوردارِی بیدِن. پاتِشا یَهودا قَبول کُورد کِه نوکَرِ نِبوکَدنِصَّر بُووَه و هَر سال پیلِ گَپِی دَهَش.

![](https://cdn.door43.org/obs/jpg/360px/obs-en-20-07.jpg)

اَما بَعدِ چَن سال، پاتِشا یَهودا نُها بابِل ویسید. سی‌دِلِ‌ایان بابِلیون وِرگَشتِن و اندو به یَهودا هُجِیم وُوردِن. بابِلیون اورشلیمَ واگِر کُوردِن، هیکَلَ اَ بین بُوردِن و هَر چِی مِی شَـر و هیکَل بِ‌اَرزید پِی خوشون بُوردِن.

![](https://cdn.door43.org/obs/jpg/360px/obs-en-20-08.jpg)

اَ کَمِ عاجِز کُوردَنِ پاتشا یهودا، سربازونِ نِبوکَدنِصَّر کُووَکونِشَه نُهاش کُشتِن و تیاشَه کور کُوردِن. بَعدَ اِیان، اوشون پاتِشانَه پِی خوشون بوردِن بابِل تا مِی زندونِ بابِل میرَه.

![](https://cdn.door43.org/obs/jpg/360px/obs-en-20-09.jpg)

نِبوکَدنِصَّر و لَشکَرِش تقریبن همِه مَردُمِ یَهودانَه پِی خوشون به اسیری بُوردِن بابِل، و تینا فقیرونَ هِشتِن اُونجون تا زِراعَت کُنِن .ای روزِگارَه کِه قومِ خُدا وادار به هِشتَنِ سرزِمینِ موعود بیسِنَه تبعیدِ گُووِن.

![](https://cdn.door43.org/obs/jpg/360px/obs-en-20-10.jpg)

اَر چِه خُدا پِی تبعیدِ قومِش، خُوشَه عاجِز کُورد، اَما اوشونَه وُ وَعدایِی کِه داشون بیدَه اَ یاد نَبورد. خُدا دِلشَه ورشونِ‌دا و پِی فِرسنِیدَنِ پیغَمبرونِش پِیْشون قِصَه بِ‌کورد. خُدا وَعدَه دا کِه بعدِ هفتاد سال اَندو قومِ اسروئیلَه بِه سرزِمینِ موعود وِرگردونَه.

![](https://cdn.door43.org/obs/jpg/360px/obs-en-20-11.jpg)

بَعدِ هفتاد سال، کوروش پاتِشا پارسیون، بابِلَه شکست دا و ای‌طوری پاتِشوهی گَپِ پارسیون بِه جا پاتِشوهی بابِلی سَرِ خیلِی اَ مردم حکومَت کُورد. مردم اسروئیلَه مِی ای زَمونْ، یهودی بُنگِ کُوردِن و دوبَـرِشون کُلِ عمرِشونَ مِی بابِل زندیْ کُوردِن بید .فقط تیکِ تاکِی اَ پیاهونِ گَپْ‌سال بیدِن، کِه تَرِسْ‌سِن سرزِمینِ یَهودانَ بِه یاد آرِن.

![](https://cdn.door43.org/obs/jpg/360px/obs-en-20-12.jpg)

پارسیون هَم زوردار بیدِن، و هَم پِی رحم و محبَّت پِی قومونِ زِیرْدَسِشونْ قِصَه بِ‌کُوردِن. بَعدِ زَمونِ کَمِی کوروش به پاتِشوهی پارس رَسید، او فرمون دا کِه هَر یَهودی‌یِ کِه مَخو به وِلاتِ یَهودا وِرگَردَه، تَرَه پارسَ هِلَه و رُووَه. او حتا پیل داشون تا هیکَلَ مِی اورشَلیم اَندو سازِن. پَه، هفتاد سال بَعدِ تبعید، تینا تیکِ تاکِی اَ یهودیون بِه اورشلیم مِی وِلاتِ یَهودا وِرگَشتِن.

![](https://cdn.door43.org/obs/jpg/360px/obs-en-20-13.jpg)

وَقتِی بَنی اسروئیل به اورشَلیم رَسیدِن، هیکل و دیوارِ دورِشَه تِکِه تَعمیر کُوردِن. پارسیون هَنی بالاسرشون حکومتِ کُوردِن اما یَهودیون اَندو مِی سرزِمینِ موعود ویستَه بیدِن و تَرِسْ‌سِن خدانَه مِی هیکَل عبادَت کُنِن.

*مَتَلِی اَ کِتابِ مقدس: کتاب دوم پادشاهان فصل ۱۷ و ۲۴ و ۲۵*

## 21. ۲۱- خُدا وَعدِه اومِّی‌یَنِ مسیحَ بِدَهَه

https://openbiblestories.org/l/def/story-21/

![](https://cdn.door43.org/obs/jpg/360px/obs-en-21-01.jpg)

اَ هَمو اول، اَ سَربَندِی کِه خُدا دُیُنانَه آفِریدْ، دونِس کِه بعدِ مُدّت زیادِی مسیحِ موعودَه بِفِرِسنَه. او بِه آدم و حوّا وَعدَه دا بید کِه ای کارَه اِلْلَن بِکُنَه. خُدا وَعدَه دا کِه اَ نَسلِ حوّا کَسِی میا کِه سَرِ مارَه بِه تیچِنَه. مارِی کِه حوّانَه فِرِیبْنید همو شیطان بید. عَهد هَم ایان بید کِه مسیح، شیطانه اَ بینِ بَرَه.

![](https://cdn.door43.org/obs/jpg/360px/obs-en-21-02.jpg)

خُدا بِه ابراهیم وَعدَه دا بید کِه پِی او هَمِه مَردُمِ دُیُنا برکَتِ بینِن .خُدا ای وعدَنَه بعدِ مدّتِی پِی فِرِسنیدَنِ مسیح عَمَلی کُورد .مَسیح واسکِی مَردُمِ دُیُنانَه اَ هَر تیرِ طایُفِی که بُووِن اَ گناه نِجات دَهَه.

![](https://cdn.door43.org/obs/jpg/360px/obs-en-21-03.jpg)

خُدا بِه موسی گفْ بید کِه پیغَمبَرِی لِفِ او بِفِرسنَه .ای پِیغَمبَر هموگِری مَسیحِ موعود بید. ای‌طور بید کِه خُدا اَندو وَعدِه اومی‌یَنِ مَسیحَ دا.

![](https://cdn.door43.org/obs/jpg/360px/obs-en-21-04.jpg)

خُدا داوودَ گفْ بیدْ کِه کَسِی اَ نَسلِش پاتِشا بِ‌بُووَه و تا اَبَد سَرِ قومِ خُدا سلطَنَتِه کُنَه. ایان یعنِی کِه مَسیح اَ نَسلِ داوود عَمَلِه میا.

![](https://cdn.door43.org/obs/jpg/360px/obs-en-21-05.jpg)

پِی ارمیایِ نَبی خُدا وَعدَه دا بیدْ کِه عَهدِ جَدیدی بَنا بِوَنَه، اَما نَه مِلثِ عَهدِی کِه خُدا پِه مَردُم مِی کُهِ سینا بَسْ بید .مِی ای عهدِ جدید، خُدا شریعَتِشَه سرِ دِلِ مَردُم بِنِویسَه. مَردُم خوشون اووَه بِ‌اِشناسِن و وَرِش محبَّتِ کُنِن و اَ شریعَتِش فرمونبَری بِکُنِن. مَسیح کَسی بید کِه ای عهد جدیدَه پِی مَردُمِ بَندَه. ایشون قومِ او بِ‌بُووِن و خُدا گناهاشونَه بِ‌بَخشَه.

![](https://cdn.door43.org/obs/jpg/360px/obs-en-21-06.jpg)

پیغَمبَرونِ خُدا هَم گُفتِن کِه مَسِیح موعود، نَبی، کاهن و پاتِشا بِ‌بُووَه. پیغَمبَر کَسی‌یَه کِه کلُومِ خُدانَه بِفَـمَه و سی مردُم بِ‌گُووَش .مَسیحِ موعودِ خُدا، پیغَمبَرِ کاملِی هِی سی‌ایان کِه پیاما خُدانَه کامِل بِفَـمَه وَ هُنونَه سی مردُم طورِی کِه کُلْلَن فَـمِن بِ‌گُووَه.

![](https://cdn.door43.org/obs/jpg/360px/obs-en-21-07.jpg)

کاهنونِ یَهودی اَ جانُبِ مردم سی خُدا قربانی بِ‌کُنِن کِه هموگِری اَ کَمِ مجازاتِ گناهایِی بید کِه کُوردِن بید. همیطور کاهنون سی مردُم پیشِ خُدا دُعا بِ‌کُوردِن. اما بَنا بید کِه مسیحِ موعودْ کاهِنِ گَپِی بُووَه کِه خوشَه لِفِ قربانی کامِلِی تقدیمِ خُدا بِ‌کُنَه. یَعنِی او اصلَن گناه نَم‌کُنَه و مُعادِی کِه خوشَه اَ کَمِ قربانی تقدیمِ کُنَه، احتیاجِی وَر قربانی‌یِه دِگِه سی گناه نِی.

![](https://cdn.door43.org/obs/jpg/360px/obs-en-21-08.jpg)

پاتِشاهون و رَییسونْ سَرِ جَمعِی اَ مردُم حکومَتِ کُنِن و بَعضِی وَقتا خِنگ هَم بِ‌زَنِن. داوودِ پاتِشا تینا سَرِ اسروئیلیون حکومَتْ کُورد. اما مَسیحِ موعود کِه اَ نَسلِ داوودِ میا، سَرِ کُلِ دُیُنا تا اَبد حکومَتِ کُنَه. او عادِلانَه حکومَتِ کُنَه و تصمیما صافِی بِ‌گِرَه.

![](https://cdn.door43.org/obs/jpg/360px/obs-en-21-09.jpg)

پیغَمبَرونِی کِه اَ جانُب خُدا فِرِسنیدَه بِه بُووِن، پیشگویی‌های زیادِی سی مَسیح کُوردِنْ بید. مِلاکِه نَبی گُف بید کِه نُها ایان کِه مَسیح آیَه، پیغَمبَرِ گَپِ دِگِه میا. اِشعیا گُف بید کِه مَسیحِ موعود اَ دُختَرِی باکِرَه متولدِ بُووَه. میکاه نَبی هَم گُف بید کِه او مِی شَـرِ بیت لحم دُیُنا میا.

![](https://cdn.door43.org/obs/jpg/360px/obs-en-21-10.jpg)

اِشعیا نَبی گُف بید کِه مَسیح مِی جلیل خیمَه بْ‌وَنَه. او آدَمونِ دِل اِشکِنیدَنَه آروُومِ کُنَه و اسیرونَه آزودی بِ‌دَهَه. او همیطور پِیش بینی کُورد کِه مَسیحِ موعود، مَریضونْ یعنِی کُورون، شُلون، کَرون و گُنگونَ شفا بِدَهَه.

![](https://cdn.door43.org/obs/jpg/360px/obs-en-21-11.jpg)

اشعیای نَبی گف بید کِه مَردُم اَ مَسیحِ موعود خوشِشون نَمیا و قبولِش نَم‌کُنِن. پیغَمبَرونِی دِگَه هَم پِیش گویی کُوردِن بیدْ یکِی اَ رفیقونِ مَسیح وَرِش خیانَتِ کُنَه. زَکریا پِیش بینی کُورد بید کِه ای رَفیقِ مَسیح سَرِ سی سِکِّه نقرَه وَر مَسیح خیانَتِ کُنَه .پیغَمبَرونِ دِگَه پِیش گویی کُوردِن بید کِه مسیحَ کَسونِی بِکُشِن کِه سَرِ رَختاش قمارِ کُنِن.

![](https://cdn.door43.org/obs/jpg/360px/obs-en-21-12.jpg)

همیطور پیغَمبَرونْ سَرِ چِطور بیدَنِ مُردَنِش نَظر دانْ بید .اشعیای نبی گف بید کِه مَردُم سَرِش تُفِ شونِن و کُتَکشِ زَنِن و دَنگِ دِرارِن. بَعد جِسمِ جونِشَه سیلا بِکُنِن تا پِی غَشقِ وِلا میرَه اما دونِن کِه هیچ کارِ زَبینِی نَ‌کُوردَه.

![](https://cdn.door43.org/obs/jpg/360px/obs-en-21-13.jpg)

پیغَمبَرون گفتِن بید کِه مَسیحِ موعود وا آدمِ کامل و بِی هیچْ گناهی بُووَه. او وا میرَه اَ کَمِ ایان کِه اووَه خُدا اَ جا گناها کُلِّ مردُمِ دُیُنا مجازاتِ کُنَه. مجازاتِ او باعِثِ بُووَه کِه آخِر سَر بینِ آدمون و خُدا آرامِش و صلح آیَه. سی ایان خُدا مَخاس تا مَسیحْ خینی و کُشتَه بُووَه.

![](https://cdn.door43.org/obs/jpg/360px/obs-en-21-14.jpg)

پیغَمبَرون پِیش گویی کُوردِن بید کِه خُدا مَسیحَ بَعدِ مُوردَنْ اَندو بِه وِرسونَه. پَه پِی مُوردَن و وِرسونِیدَنِش بَعدِ مُوردَن، خُدا مَخو کِه برنامِه نجاتِ گناه‌کارونَه کامِل کُنَه و عَهدِ نُووِی پِه مردم بَنا وَنَه.

![](https://cdn.door43.org/obs/jpg/360px/obs-en-21-15.jpg)

خدا چیا گَپِی در موردِ اومِّی‌یَنِ مَسیح به پیغَمبَرون گف. اما مسیح مِی زمونِ هیچ کو اَ ای پیغَمبَرون نَ‌اومَّه بید. بیشتَر اَ چارصد سال اَ آخِریْ پِیش گویی، زَمونِی کِه موعِدِش رَسید، خُدا مَسیحَ به دُیُنا فِرِسنید.

*مَتَلِی اَ کِتابِ مقدس: کتاب پیدایش  فصل ۳ آیه ۱۵، فصل ۱۲ آیه ۱ تا ۳، کتاب تثنیهفصل ۱۸ آیه ۱۵، کتاب دوم سموئیل فصل ۷، کتاب ارمیا فصل ۳۱، کتاب اشعیا فصل ۵۹ آیه ۱۶، کتاب دانیال فصل ۷، کتاب ملاکی فصل ۴ آیه ۵،  کتاب اشعیا فصل ۷ آیه ۱۴، کتاب میکا فصل ۵ آیه ۲، کتاب اشعیا فصل ۹ آیه ۱ تا ۷ و فصل ۳۵ آیه ۳ تا ۵ و فصل ۵۳،کتاب مزامیر فصل ۲۲ آیه ۱۸ و فصل ۳۵ آیه ۱۹ و فصل ۶۹ آیه ۴ و فصل ۴۱ آیه ۹، کتاب زکریا فصل ۱۱ آیه ۱۲ و ۱۳،  کتاب اشعیا فصل۵۰ آیه ۶، کتاب مزامیر فصل ۱۶ آیه ۱۰ و ۱۱*

## 22. ۲۲- به دُیُنا اومِّی‌یَنِ یوحنای تعمید دَهندَه

https://openbiblestories.org/l/def/story-22/

![](https://cdn.door43.org/obs/jpg/360px/obs-en-22-01.jpg)

اَ قدیم خدا اَ رَه پیغَمبرونِش پِه قومِ خودِش قصّه بِ‌کورد .اَما بعدِ چارصد سال کِه خدا پِه قومِش قصه نَ‌کُورد بید، یَکِتی ملاکِه خُدا به کاهِن گپ سالِی به نوم زکریا خوشَه دیوری دا. او و زونَشْ الیزابت، آدمونِ خدا پِرَستِی بیدِن. اوشون پیر بیدِن و الیزابِت هَم اُجاقِش کور بید.

![](https://cdn.door43.org/obs/jpg/360px/obs-en-22-02.jpg)

مِلاکِه خدا زکریانَ گف: «زُونِه تو کُووَکِی میارَه. نومِشَه یوحنا بِوَنی. خُدا اووَ اَ روحِش پُرِ کُنَه و یوحنا مردُمَه سی اومِی‌یَنِ مَسیح آمادَه بِکُنَه.» زَکریا گف: «مونو زونَم سی بَچَه‌دار بیسَن خِیلِی پیرِیم. چطور دونِس‌سَه بُووُم کِه راسِشَه بِه مو بِ‌گووی؟»

![](https://cdn.door43.org/obs/jpg/360px/obs-en-22-03.jpg)

مِلاکِه خُدا زَکریانَه گف: «مو اَ جانُب خُدا فرسنیدَه بیسمَه کِه ای براتَه به تو رَسونُم. ایسون کِه قصّامَه بُووَر نَم‌کُنی، تا بَچَت دُیُنا آیَه نَتَری قِصّه کُنی.» اَ هَمو دَم زکریا نَتَرِس قصّه کُنَه. بَعد مِلاکِه خُدا زکریانَ هِشت و رَفت. زکریا کِه وِرگَشت خونَه خِیلی طول نَکشید کِه زونَش وِسَّن بی‌یِس.

![](https://cdn.door43.org/obs/jpg/360px/obs-en-22-04.jpg)

زَمونِی کِه الیزابت شیش مَه باردار بید، همو مِلاکه بِه یکِی اَ قومونِ الیزابِت کِه نومِش مریم بید خوشَه دیوری دا. مریم باکِرَه بید و نشونْ کُوردِه پیایِی به نومِ یوسف بید. مِلاکَه گفتِش: «تو وسَّنِ بُووی و کووَکِی بِ‌زویی کِه نومِشَه عیسی بِوَنی. او پسرِ خُداسْ و سَلطنَتش تا قیوم قیومت مُوندنیَه.»

![](https://cdn.door43.org/obs/jpg/360px/obs-en-22-05.jpg)

مریم گف: «چطور بِ‌بُووَه وقتی مو هَنی باکِرَم؟» ملاکَه گف: «روح القدس وَرِت نازِلِ بُووَه و قُوَتِ خُدا سَرِت سایَه بِ‌بَهَه. هموگِری او کُووَک، قدوس و پسرِ خُدای متعال نوم دارَه.» مریم بِه قصّا او مِلاکَه ایمان اووُورد و هر چِی او گف، قبول کُورد.

![](https://cdn.door43.org/obs/jpg/360px/obs-en-22-06.jpg)

اَ سَر بَندِ ای جَریُون خیلی نَگُذشت بید کِه مریم اَلا خونِه الیزابت رَف. الیزابت تا صدا مریمَ اِشنید، بَچَه مِی اِشکَمِش جُمنید .اوشون سی دِل کارایِی کِه خُدا سیشون کُورد بیدْ خیلی سر کیف بیسِن. مریم سو ماه پیشِ الیزابت موند و بَعد به خونَه‌ش وِرگشت.

![](https://cdn.door43.org/obs/jpg/360px/obs-en-22-07.jpg)

بَعدِ ای جَریون الیزابت کووکِی بِه دُیُنا اووُورد. او و زکریا نومِ بَچَنَه هموطور کِه مِلاکَه گف بید یوحنا وَندِن. بَعد خُدا اَندو زونِ زکریانَ گُشید و گف: «اَ خدا ممنونم سی‌ایان کِه بِه کمَکِ مردُمِش اومَسَه. و ای کووَک! تو پیغَمبَرِ خُدا بِ‌بُووی و بِه‌ آدمونْ بِ‌گُووی کِه چطور تَرِن اَ خدا مَخاسَه بُووِن گناهاشونَه بَخشَه!».

*مَتَلِی اَ کِتابِ مقدس: کتاب پیدایش فصل ۳ آیه ۱۵ و فصل ۱۲ آیه ۱ تا ۳، کتاب تثنیه فصل ۱۸ آیه ۱۵، کتاب دوم سموئیل  فصل ۷، کتاب ارمیا فصل ۳۱، کتاب اشعیا فصل ۵۹ آیه ۱۶، کتاب دانیال فصل ۷، کتاب ملاکی فصل ۴ آیه ۵، کتاب اشعیا فصل ۷ آیه ۱۴، کتاب میکا فصل ۵ آیه ۲، کتاب اشعیا*

## 23. ۲۳- به دُیُنا اومی‌یَنِ عیسی

https://openbiblestories.org/l/def/story-23/

![](https://cdn.door43.org/obs/jpg/360px/obs-en-23-01.jpg)

مریَم پِی پِیا خوبِ با انصافِی، به نومِ یوسُف نشون وَنِس بید .مُعادِی کِه یوسُف فَـمید مریم وِسَّنَه، دونِس کِه بَچَه اَ او نِی .یوسُف نَخاس کِه آبرو مَریَمَ بَرَه و بَناوَند کِه بی سَر صِدا هِلَش .اَما نُها ایان کِه ای کارَه کُنَه، مِلاکِه مِی خُووِش اومَّه.

![](https://cdn.door43.org/obs/jpg/360px/obs-en-23-02.jpg)

مِلاکَه بِه یوسُف گف: «اَ وَصلَت پِی مریم مَترس، بَچِی کِه مِی اِشکَمِشَه اَ روح القُدُسَه. مریَم کُووَکِی میارَه کِه نومِشَه عیسی (یعنی یَهوَه نِجاتِ دَهَه) وَن، سی‌ایان کِه او مَردُمَه اَ گناهاشون خَلاصِ کُنَه.»

![](https://cdn.door43.org/obs/jpg/360px/obs-en-23-03.jpg)

آخِر سَر یوسُف پِی مریَم عروسی کُورد و بُوردِش خونَه‌شون .اما تا مُعادِی کِه بَچَه دُیُنا نَ‌اومِّی‌یَه بید، پِی مَریَم نَخُفتید.

![](https://cdn.door43.org/obs/jpg/360px/obs-en-23-04.jpg)

مِی روزا آخِر وِسَّن بیدَنِ مریم، امپراطور روم فرمون دا کِه سی سرشُموری، هَر کَه وا وِلاتِ آباء و اجدودی خودِش وِرگَردَه .یوسُف و مَریَم واسکِی رَه دیرِی اَ ناصِرَه تا بیت‌لَحِم رووِن، چون جدِشون داوود پاتِشا و شهرشون بیت‌لَحِم بید.

![](https://cdn.door43.org/obs/jpg/360px/obs-en-23-05.jpg)

وَقتِی مَریم و یوسُف بِه بیت‌لَحِم رَسیدِن، جایی سی خُفتیدَن نَداشتِن. تینا جایِی کِه اونجون تَرِس‌سِن مَنِن، مِی طویلَه بید .مَریم اونجون باروَند و بَچَنَه مِی طویلَه خفتونید، چون سی او جا خووِی نداشتِن. اوشون نومِشَه عیسی وَندِن.

![](https://cdn.door43.org/obs/jpg/360px/obs-en-23-06.jpg)

او شُو، چوپونون مِی صحرا گَلاشونَ بِ‌پوییدِن. یَکِتی مِلاکِه اومَّه و اونجونَ روشنا کُورد. چوپونون جِگَرِشون بُرِسْ بید. مِلاکَه گفتِشون مَتَرسِی. سیتون بَراتِی اووُوردُمَه. مسیحِ موعود کِه خُداس مِی بیت‌لَحِم دُیُنا اومَّسَه.

![](https://cdn.door43.org/obs/jpg/360px/obs-en-23-07.jpg)

«رووِی و دُما او بَچَه گَردِی. بَچِه مِی قماط پیچِنیدَه و مِی طویلَه خفتونیدَه پیدا بِ‌کُنِی.» یَه کِتی حِلمِی اَ مِلاکون پیش او مِلاکَه اومِّن. اوشون خُدانَه ستایِشِ کُوردِن و بِ‌گُفتِن: «خُدا مِی آسمون جِلال و عِزّتِش زیادِ بُووَه و مِی زِمین هم صلح و سازِش سی مردُمِی کِه خُدا وَرِشون نَظر دارَه!»

![](https://cdn.door43.org/obs/jpg/360px/obs-en-23-08.jpg)

مِلاکون کِه اَ اونجون رَفتِن. چوپونونَم گَلاشونَه هِشتِن و اَلا جایِی کِه عیسی ویستَه بید رَسیدِن و بَچِه دیدِن کِه مِی طویلَه خفتیدَه، هَموطور بید کِه او مِلاکَه گف بید. اوشون خِیلی خوشحال بیسِن. چوپونون پیشِ گَلا خوشونْ وِرگَشتِن و خُدانَه سی او چِی کِه دیدِن و فَـمیدِن بید شُکر و ستایِش کُوردِن.

![](https://cdn.door43.org/obs/jpg/360px/obs-en-23-09.jpg)

بعدَ ای جَریون، چَنْ نَفر اَ گَپونِ وِلاتا مَشرق کِه آسارانَه بِ‌اِشناختِن و آدمونِ فَـمیدِه بیدِن، آسارِه مِی آسُمون دیدِن. اوشون فَـمیدِن کِه پاتِشایِی اَ یهودیون اومَس دُیُنا. پَه سی دیدَنِ یِی کُووَک اَ وِلاتِ خوشون کِه خِیلی دیر بید وَندِن رَه. اوشون اَلا بیت‌لَحِم اومِّن و خونِه کِه عیسی و بُووَه مارِش ویستَه بیدِنَه، پیدا کُوردِن.

![](https://cdn.door43.org/obs/jpg/360px/obs-en-23-10.jpg)

وَقتِی او پیاهونِ دونِسمَند عیسانَ پِی مارِش دیدِن، سَرِ زونیاشون نِشِس‌سِن و عیسانَ پِرَستیدِن. اوشون سی پِیش کَشی چیا گِرونِی بِه عیسی دان و بَعدِش وِرگَشتِن خونَه‌شون.

*مَتَلِی اَ کِتابِ مقدس: انجیل متی فصل ۱ و انجیل لوقا فصل ۲*

## 24. ۲۵- یوحنّا عیسانَ تعمید بِدَهَه

https://openbiblestories.org/l/def/story-24/

![](https://cdn.door43.org/obs/jpg/360px/obs-en-24-01.jpg)

یوحنّا کُووَکِ زکریا و الیزابت، گَپ بی‌یِس و به پیغَمبری رَسید. او مِی صحرا زندی بِ‌کورد، و عسل بیابون و کولْلُو بِ‌خَورد، و جومِی اَ پَشمِ شتر وَرِش بِ‌کورد.

![](https://cdn.door43.org/obs/jpg/360px/obs-en-24-02.jpg)

خِیلی اَ مردم اَلا صَحرا پیشِ یوحنّا میُومِن و بِه قصّاش گوشِ دان. او سیشون موعِظَه بِ‌کورد و بِ‌گفت: «توبَهْ‌کار بُووِه سی‌ایان کِه حکومَتِ خُدا نِهِنگَه.»

![](https://cdn.door43.org/obs/jpg/360px/obs-en-24-03.jpg)

مُعادِی کِه مردُم قصِّه یوحنّانَ بِفَـمیدِن، خِیلِی ازشون توبَهْ‌کارِه بی‌سِن و یوحنا پِی اُو اوشونَه تعمیدِ دا. خِیلِی اَ گَپونِ دین هم پیشِ یوحنا میومِّن، اما گناهاشونَ نَم‌گُفتِن و توبَه نَم‌کوردِن.

![](https://cdn.door43.org/obs/jpg/360px/obs-en-24-04.jpg)

یوحنّای تعمید دَهَندَه بِه گَپونِ دینی گف: «ای مارای زَردار! توبَه کُنِی و رَفتارِتونَ عَوَض کُنِی. خُدا هَر دِرَختِیَه کِه خوب بَر نَدَهَه، بِبُرَش و مِی تَش بِبَهَه.» یوحنا پیش گویِی‌های پیغَمبَرونَ تموم کُورد کِه گفتِن بید: «سیل کن! ایسون مو پیغَمبَرُومَ نُهاتِ فِرِسنُم تا رَه‌نَ سی‌یِت گُشَه.»

![](https://cdn.door43.org/obs/jpg/360px/obs-en-24-05.jpg)

بَعضِی اَ گَپونِ دینی اَ یوحنا پُرسیدِن کِه: «تو مسیح هیسی؟» یوحنا گف: «مو مسیح نیسُم، اما کَسِی بَعدِ مو مِیا کِه جاش اَ مو بالاتَرَه. اوطور کِه مو اَقدَر نیسُم کِه بندِ کوشِشَه گُشُم.»

![](https://cdn.door43.org/obs/jpg/360px/obs-en-24-06.jpg)

سوباش، عیسی سی تعمید پیشِ یوحنای تعمید دَهَندَه اومَّه .یوحنا تا دیدِش گف: «ایان همو کُووِه خُداس کِه گناها کلّ دُیُنانَه بِ‌وِردارَه.»

![](https://cdn.door43.org/obs/jpg/360px/obs-en-24-07.jpg)

یوحنای تعمید دَهندَه عیسانَ گف: «مو اَقدَر نیسُم کِه تونَه تعمید داهام. تو وا مونَه تعمید دیهی.» اما عیسی گف: «مونَه تعمید دِه، چون کارِ صاف ایانَه.» آخِر سری یوحنّا عیسانَ تعمید دا اَر چِه عیسی اَتَّه گناهی نداشت.

![](https://cdn.door43.org/obs/jpg/360px/obs-en-24-08.jpg)

وَقتِی کِه عیسی بَعدِ تعمید، اَ اُو اومَّه دَر، روح خُدا چی کموتَرِی خوشَه دیُوری دا و اومَّه دومِن و سَرِ عیسی نشِس و همو دَم خُدا اَ آسمون بُنگ کورد کِه: «اِیان پسرِ مُونَه کِه مَخُومِش و اَزِش روضیوم.»

![](https://cdn.door43.org/obs/jpg/360px/obs-en-24-09.jpg)

خدا یوحنّانَ گف بید: «روح‌القدس بِه کَسِی کِه تَعمیدِشِ دِیهی نازِلِ بُووَه، او شَخص پسرِ خُداس.» خُدا یِکی‌یَه اما مُعادِی کِه یوحنّا عیسانَ تعمید دا، بُنگِ خُدایِی کِه بُووَه بیدَ فَهمید، خُدای پسر یعنِی عیسانَ دید و روح القُدُسَه هَم تَرِس بینَه.

*مَتَلِی اَ کِتاب مقدس: انجیل متی فصل ۳، انجیل مرقس فصل ۱ آیه ۹ تا ۱۱، انجیل لوقا فصل ۳ آیه ۱ تا ۲۳*

## 25. ۲۵- شیطان عیسانَ وَسوَسَه بِکُنَه

https://openbiblestories.org/l/def/story-25/

![](https://cdn.door43.org/obs/jpg/360px/obs-en-25-01.jpg)

بَعدِ تعمیدِ عیسی، روحِ خدا همو دَم عیسانَ اَلا بیابون بُورد، جایِی کِه چِـل شو و روز، روزَه گِرُفت. اوسون شیطان اَلا عیسی اومَّه و اووَ وسوسَه کُورد تا گناه‌بار بُووَه.

![](https://cdn.door43.org/obs/jpg/360px/obs-en-25-02.jpg)

شیطان عیسانَ وسوسه کُورد و گف: «اَر تو پسرِ خُدایی، بِه ای بَردا گو کِه نون بُووِن تا تَرِس‌سَه بُووی خُوَری!»

![](https://cdn.door43.org/obs/jpg/360px/obs-en-25-03.jpg)

عیسی گف: «مِی کتابِ خُدا نوشتَه بیسَه، «آدم سی زندَه مُوندَن تینا نون نَخو، بلکِی بِه هَر لُغَتِی کِه اَ دونِ خُدا میا دَر محتاجَه!»

![](https://cdn.door43.org/obs/jpg/360px/obs-en-25-04.jpg)

بَعد شیطان عیسانَ بِه بُلِندْتَرین جا معبَد بُورد و گف: «اَر تو پسرِ خُدایی، خوتَه اَ اینجون بِی زِیر، چون کتابِ مقدّس بِفَرمایَه: «خُدا بِه مِلاکون فرمونْ داس تا تونَه کَشتُر کُنِن، مَبادا پاتَ بِه بَردِی زَنی.»

![](https://cdn.door43.org/obs/jpg/360px/obs-en-25-05.jpg)

اما عیسی او چی‌یَه کِه شیطان گف بیدْ عَمَل نَ‌کُورد و گف: «خدا مِی کلُومِش به قومِ خودِش فرمون داس: «خداوند! خداتونَه اِمتِحون مَکُنِه.»

![](https://cdn.door43.org/obs/jpg/360px/obs-en-25-06.jpg)

بَعد شیطان عیسانَ بالا کُهِ بُلِندِی بُورد و کُلّ کشورا دُیُنانَه و زور و سرمایشونَه نشونِش دا. و گف: «اَر سی مو زُونی زَنی و مُونَه پِرَستی، کل هِنونَه بِه تو بِداهام.»

![](https://cdn.door43.org/obs/jpg/360px/obs-en-25-07.jpg)

عیسی گفت: «اَ مو دیر بات، ای شیطان! مِی کلُومِ خدا، او به قومِش فرمونْ داس که: «فقط خداوند، خدانَه پِرَست و تینا اووَ خِدمَت کُن.»

![](https://cdn.door43.org/obs/jpg/360px/obs-en-25-08.jpg)

عیسی بِه تَلِه وَسوَسا شیطان گیر نَ‌اوفتید، پَه شیطان هِشتِش و رَفت و مِلاکون اومِّن و عیسانَ خدمَت کُوردِن.

*مَتَلِی اَ کِتابِ مقدس: انجیل متی فصل ۴ آیه ۱ تا ۱۱، انجیل مرقس فصل ۱ آیه ۱۲ و ۱۳، انجیل لوقا فصل ۴ آیه ۱ تا ۱۳*

## 26. ۲۶- اول کارِ خِذمتِ عیسی

https://openbiblestories.org/l/def/story-26/

![](https://cdn.door43.org/obs/jpg/360px/obs-en-26-01.jpg)

بَعدِ سُوار بیسَن وَرِ وسوَسا شیطان، عیسی بِه جا سکونَتِش یعنِی جلیل وِرگَشت. روح‌القُدُس قُوَتِ زیادِی بِداش و او تَرِس اَ جایِی بِه جایِی دِگَه رووَه و مردُمَه تعلیمِ دا و هَمَه هَم ازِش بِه خوبی یادِ کُوردِن.

![](https://cdn.door43.org/obs/jpg/360px/obs-en-26-02.jpg)

عیسی به ناصره، دُهاتِی کِه زَمونِه بَچی اونجون بید رَفت. مِی روزِ شبات، اَلا پِرَستِشگا رفت. گَپونِ دینی نُسخِه اَ کِتابِ اشعیای نَبی‌یَه دانِش تا اَ ری‌یِش خونَه. عیسی طومارَه گُشید و کُتِی اَزِش سی مردُم خوند.

![](https://cdn.door43.org/obs/jpg/360px/obs-en-26-03.jpg)

او ایطور خوند: «خُدا روحِشَه مِی مو وَندَه تا بَراتِی سی فقیرون آروم. او مونَه فِرِسنیدَه تا اسیرونَه آزودی، کُورونَه بینویی و جفاکَشونَه خَلوصی داهام. چون زَمونِ رَحمَتِ خُدا بِه آدَم رَسیدَه.»

![](https://cdn.door43.org/obs/jpg/360px/obs-en-26-04.jpg)

بَعدِش عیسی نِشِس. همَه پِی کنجکووی وَرِش سیلِ کُوردِن. کُل دونِس‌سِن کِه او‌چِی‌کِه اَ کِتابِ مقدّس خُوندَه، وَر مَسیحِ موعود اشارَه بِ‌کُنَه. عیسی گف: «کَلُومِی کِه سیتون خوندُم، ایسون دارَه ری بِ‌بُووَه.» کُلِ مردم تعجب کُوردن و پُرسیدِن: «مَر ای کَس کُووَکِ یوسُف نِی؟»

![](https://cdn.door43.org/obs/jpg/360px/obs-en-26-05.jpg)

بعدِش عیسی فرمایِش کُورد: «هموگِری یَه پِیغَمبَرَه مِی وطنِش قبول نَم‌کُنِن. سَر بَندِ ایلیای نَبی کِه مدت سو سالِ نیم بارون نَزَه، اَر چِه بیوَه زنونِ زیادِی مِی اسروئیل بید، اما خُدا ایلیانَ کُمَکِ زونِه بیوِه کِه مِی وِلاتِ دِگِه زِندی بِ‌کورد، فِرسنید.»

![](https://cdn.door43.org/obs/jpg/360px/obs-en-26-06.jpg)

و ای‌طور ادامَه دا: «مِی زَمونِ الیشَع نَبی، آدمونِ زِیادِی مریضیِ پُوسی داشتِن، اما الیشع هیچ کونشونَه شَفا ندا. او تینا نَعَمانِ سوری، فرماندِه دِشمِن اسروئیلَه اَ او مَرِیضی شَفا دا.» کَسونِی کِه ای قِصّانَه گوشِ دان یهودی بیدِن و وقتِی ای قِصّانَه فَـمیدِن، اَ دَسِش جِر اومِّن.

![](https://cdn.door43.org/obs/jpg/360px/obs-en-26-07.jpg)

مردم ناصِرَه عیسانَ اَ مِی عبادَتگاه کُوردِن دَر، و رُو کَمَرِی بُوردِن تا اَ اونجون بِهِنِش زِیر و کُشِنِش. اما عیسی اَ مِینِشون گُذَشت و شَـرِ ناصِرَنَه هِشت و رَف.

![](https://cdn.door43.org/obs/jpg/360px/obs-en-26-08.jpg)

بَعد عیسی دور تا دورِ جلیلَ گَشت. خِیلِی اَ مردُم دُماشِ میومِّن و مَریضونِ زیادِی هَم پِی خوشونِه اُووُوردِن. مِینِشون تعدادِی معلول، کُور و کَر هَم بید. ازشون هَم نَتَرِس‌سِن رَه رُووِن و قصَّه کُنِن اَما عیسی اوشونَه شَفا بِدا.

![](https://cdn.door43.org/obs/jpg/360px/obs-en-26-09.jpg)

همیطور خیلِیانَه کِه گرفتارِ روحِ پَلید بیدِن پیشِ عیسی بِه اُووُوردِن. بِه دَستورِ عیسی ارواحِ پلید اَ می مَردُم بِ‌جِسِّن دَر. اوشون بِگُفتِنِش: «تو پسر خُدایِی!» و مردمِی کِه متعجّب بیسنْ بید خدانَه ستایِشِ کُوردِن.

![](https://cdn.door43.org/obs/jpg/360px/obs-en-26-10.jpg)

عیسی اَ مِی شاگردونِش دوزَه نَفَرَه بِزنید و نومِشونَه رسُولون وَند .ای رَسولون پِی عیسی بِه مسافِرَتِ رَفتِن و اَزِش چِی بِ‌آمُختِن.

*مَتَلِی اَ کِتابِ مقدس: انجیل متی فصل ۴ آیه های ۱۲ تا ۲۵، انجیل مرقس فصل های ۱ تا ۳، انجیل لوقا فصل ۴*

## 27. ۲۷ - مَتَلِ سامِریِ خوب

https://openbiblestories.org/l/def/story-27/

![](https://cdn.door43.org/obs/jpg/360px/obs-en-27-01.jpg)

روزِی یِکِی اَ گَپونِ دینیِ یهود پیشِ عیسی اومَّه. او مَخاس ثابت کُنَه کِه تعالیم عیسی غلطِن. او پُرسید: «اُسا، آدم چِه وا کُنَه کِه مَمیر بُووَه؟ عیسی جُواب دا: «مِی کتاب تورات سی ایان چِه نِوِشتَه بیسَه؟»

![](https://cdn.door43.org/obs/jpg/360px/obs-en-27-02.jpg)

او پیا گف: «خدا! خداتَه پِه جونِ دل، پِه کُلِ وجودِت، پِه کُلِ زورِت و کُلِّ فِکرِت مَخاسَه باد. همساتَه هَم مِلثِ خودِت دوس داشتَه باد.» بَعد عیسی فرمایِش کُورد: «راسِه گُووی! تو هَم ای‌طور کُن تا مَمیر بُووی.»

![](https://cdn.door43.org/obs/jpg/360px/obs-en-27-03.jpg)

اما او گَپِ دینی کِه مَخاس خوشَه آدم خوبِی نِشون دَهَه، اَندو پرسید: «هَمسا مو کی‌یَه؟»

![](https://cdn.door43.org/obs/jpg/360px/obs-en-27-04.jpg)

عیسی پِی مَتَلِی جُوابِ او گَپِ مذهبی‌یَه دا: «پیایِی یَهودی اَ اورشَلیم اَلا اریحا مِی سَفَر بید.

![](https://cdn.door43.org/obs/jpg/360px/obs-en-27-05.jpg)

مِی رَه دُزون وَرِش هُجیم اووُوردِن و هَر چِی داشتْ اَزِش گِرُفتِن، زَندِنِش و نیمَه جون نِهِنگ جعدَه وِلِش کُوردِن.

![](https://cdn.door43.org/obs/jpg/360px/obs-en-27-06.jpg)

بَعدِ ای جریُون، کاهِنِ یهودی‌یِ اَ اونجونِ گُذَشت. وَقتِی او میرَنَه مِی جعدَه دید کِه اُفتیدَه، اَ اولا جعدَه رَشَه گِرُفت و رَفت و مَحَل وَر او پیا نَوَند.

![](https://cdn.door43.org/obs/jpg/360px/obs-en-27-07.jpg)

کُتِی بَعد یَه لاوی اَ رَه رَسید. (لاویون، طایُفِه اَ اسروئیل بیدِن کِه کُمَک حالِ کاهِنونِ مَعبَد بیدِن) او هَم، او سِیْتِ تُرَه گِرُفت و مَحل وَرِ پیا نَوَند.

![](https://cdn.door43.org/obs/jpg/360px/obs-en-27-08.jpg)

بَعد پیایِی دِگَه کِه سامِری بید اومَّه. (سامِریون و یهودیون پِی یَکِ‌دو تِک بیدِن) وَقتِی دید کِه پیا زَخمی‌یَه یَهودی‌یَه، اَما دِلِش سی پیا سُخت و زَخماشَه شُشت، مَرحَم زَ وَرشون و بَسِش.

![](https://cdn.door43.org/obs/jpg/360px/obs-en-27-09.jpg)

بَعد پیا سامری او میرَنَه سُوارِ خَرِش کُورد و اَلا میمونْ‌خونِه بُورد و اونجون هَم بیدارِش بی‌یِس.

![](https://cdn.door43.org/obs/jpg/360px/obs-en-27-10.jpg)

سوباش، او پیا سامِری واسکِی سَفَرِشَه ادامَه دَهَه. کُتِی پیل به صاحابِ میمون‌خونَه دا و گف: "ای پیانَه بیدار با و اَر بیشتَر خَرجِش کُوردی، مُعادِی کِه وِرگَشتُم بِداهامِت."»

![](https://cdn.door43.org/obs/jpg/360px/obs-en-27-11.jpg)

عیسی اَ او گَپِ دینی پُرسید: «ایسون مَری کونشون اَ او سو نَفَر، هَمسا او پیایِی بیدِن کِه اَزِش دُزی بی‌یِس بید و زِنِش بید؟» او گَپِ دینی جُواب دا: «اُوان کِه سی‌یِش دِل بِسوزِنَه.» عیسی جُواب دا: «تُنَم رو ای کارَه کُن.»

*مَتَلِی اَ کِتابِ مقدس: انجیل لوقا فصل ۱۰ آیه های ۲۵ تا ۳۷*

## 28. ۲۸- جَوونِ مایَه‌دار

https://openbiblestories.org/l/def/story-28/

![](https://cdn.door43.org/obs/jpg/360px/obs-en-28-01.jpg)

روزِی یِکِی اَ گپونِ مایَه‌دار پیشِ عیسی اومَّه و اَزِش پُرسید :«اُسا خوب، چِه وا کُنُم کِه زندی ابدی‌یَه بِه دَس آرُوم؟» عیسی فرمایِش کُورد: «سی‌چِه مُونَه بِگُووی خوب؟ چون جز خدا کَسِی خوبْ نِی. اَر مَخی زندیِ ابَدی داشتَه بُووی، فرمونا خُدانَه وا عَمل کُنی.»

![](https://cdn.door43.org/obs/jpg/360px/obs-en-28-02.jpg)

او پُرسید: «کو دَستورَه وا فَرمونبَری کُنُم؟» عیسی جُواب دا: «کَسِیَه مَکُش، زِنا مَکُن، دُزی مَکن، دُرو مَدِه، به بُووَه و مارِت احترام وَن و هَمساتَه مِلثِ خودِت دوس داشتَه بات.»

![](https://cdn.door43.org/obs/jpg/360px/obs-en-28-03.jpg)

اما او پیا جَوون گف: «مو اَ بَچی کُلِ ای فرمونانَه اَنجُوم دامَه، ایسون چِه وا کُنُم تا زندِی اَبَدی داشتَه بووُم؟» عیسی پِی محبّت وَرِش سیل کورد.

![](https://cdn.door43.org/obs/jpg/360px/obs-en-28-04.jpg)

و جُواب دا: «اَر مَخی خِیلِی خوبی کُنی، رو و هَر چِی دوری فروش و پیلِشَه بِه فقیرون دِه تا گَنجِت مِی آسُمون بُووَه نَه ری زِمین !اوسون بیو و اَ مو فرمونبری کُن.»

![](https://cdn.door43.org/obs/jpg/360px/obs-en-28-05.jpg)

مُعادِی کِه او پیا جَوون ای قصّا عیسانَ فَـمید، خِیلِی مَغمینْ بی‌یِس سی‌ایان‌کِه مایَه‌دار بید و نَخاس هَر چِی دارَه و گِرد کُوردَه اَ دَس دَهَه .او ریشَه اولا کُورد و اَ پیشِ عیسی رَفت.

![](https://cdn.door43.org/obs/jpg/360px/obs-en-28-06.jpg)

بَعد عیسی بِه شاگِردونِش فرمود: «ایانَه دونِس‌سَه بایِه کِه وارد بیسَنِه یَه مایَه‌دار مِی پاتِشوهِی خُدا خیلِی سَخَتَه .اَندو بِگووُم، گُذَشتَنِ شتُرِی اَ مِی سیلا سیزَن راحت تَرَه تا گُذشتَنِ یَه آدَمِ مایَه‌دار مِی پاتِشوهِی خُدا!»

![](https://cdn.door43.org/obs/jpg/360px/obs-en-28-07.jpg)

شاگِردون اَ فَـمیدَنِ ای قصِّه عیسی تَعَجُب کُوردِن و پُرسیدِن: «پَه کی تَرَه نجات پیدا کُنَه؟»

![](https://cdn.door43.org/obs/jpg/360px/obs-en-28-08.jpg)

عیسی وَر شاگِردونِش سیلِی کُورد و فرمایِش کورد: «آدَم نَتَرَه خودِشَه نجات دَهَه، اَما پِیشِ خُدا هَمَه چِی ممکِنَه.»

![](https://cdn.door43.org/obs/jpg/360px/obs-en-28-09.jpg)

پِترُس عیسانَ گُف: «امون هَمَه چِیمونَ هِشتِیمَه تا دُمات آیِیم، ایسون پاداشُمون چِه بِه بُووَه؟»

![](https://cdn.door43.org/obs/jpg/360px/obs-en-28-10.jpg)

عیسی جُواب دا: «هَر کَه سی مو اَ برار و خار، اَ بُووَه و مار و بَچَش، اَ خونَه و زِمین گُذَردَه، صد مطابِق بیشتَر گیرِشِه مِیا و زِنْدی اَبدی پِیدا بِکُنَه .اما خِیلِیا کِه اوّلِن آخِرِه بُووِن و خیلیا کِه آخِرِن اوّلِه بُووِن.»

*مَتَلِی اَ کِتابِ مقدس: انجیل متی فصل ۱۹ آیه های ۱۶ تا ۳۰، انجیل مرقس فصل ۱۰ آیه های ۱۷ تا ۳۱، انجیل لوقا فصل ۱۸ آیه های ۱۸ تا ۳۰*

## 29. ۲۹- داستان نوکَرِ سِنگدِل

https://openbiblestories.org/l/def/story-29/

![](https://cdn.door43.org/obs/jpg/360px/obs-en-29-01.jpg)

یَه روز پِترُس اَ عیسی پرسید: «اُسّا، برارِیَه کِه بِه مو بَدی کُنَه، چَن رَه وا بَخشُم؟ هَف رَه؟» عیسی فرمایِش کُورد: «هَف کِتَه نَه، بَلکِی هفتادْ تا هَفْ رَه.» عیسی مَخاس فَـمونَش کِه اُمون وا هَمیشَه یَکِ‌دوَ بَخشِیم. بَعد ای داستانَه گف.

![](https://cdn.door43.org/obs/jpg/360px/obs-en-29-02.jpg)

او فرمود: «پاتِشوهِی خُدا حکایتِ پاتِشایی‌یَه کِه مَخاس پِه نوکَرونِش حساب کتاب کُنَه. بدهی یِکِی اَ نوکَرونِش مطابِق ماجُبِ دُویس هزار سال کار بید.»

![](https://cdn.door43.org/obs/jpg/360px/obs-en-29-03.jpg)

اَ اونجون کِه نوکَر نَتَرِس ای بِدهی‌یَه دَهَه، پاتِشا فرمون دا مطابِق او بِدهی، او و زونَه بَچونِش و کلِ دارِ ندارِشَه فروشِن.

![](https://cdn.door43.org/obs/jpg/360px/obs-en-29-04.jpg)

اما او پیا خوشَه ری پا پاتِشا بِس و التماس کُورد و گفت: «ای پاتِشا، اَزِت مَخُم مُونَه وَقت دِیهی تا کُلِ بدهی‌مَه تا آخِر داهام.» پاتِشا دِلِش سی‌یِش سُخت، پَه آزادِش کُورد و کُل بِدهی‌شَه بَخشید.

![](https://cdn.door43.org/obs/jpg/360px/obs-en-29-05.jpg)

اما مُعادِی کِه او نوکَر اَ پیشِ پاتِشا اومَّه دَر، یِکی اَ همکارونِ‌شَه دید کِه چَن مِزِ چـار ماه بِدِه‌کارِش بید. پَه گُلیشَه گِرُفت و گف: «بدهی‌تْ بِه مونَه، وا دیهی»

![](https://cdn.door43.org/obs/jpg/360px/obs-en-29-06.jpg)

رَفیقِ بِدهکارِش سرِ پاهاش اوفتید و گف: «التماسِتِ کُنُم مولَتی دام تا کلِ بدیهی‌مَه داهام.» اما طلبکار روضی نَ‌بی‌یِس و همکارِشَه تا دایَنِه هَمِه بِدِهی بِس زِندون.

![](https://cdn.door43.org/obs/jpg/360px/obs-en-29-07.jpg)

وَقتی رَفیقونِ او پیا ای جریونَه فَـمیدِن، خِیلی عاجِز بیسِن و پیشِ پاتِشا رَفتِن و قَضی‌یَنَه بِه گوشِ پاتِشا رَسوندِن.

![](https://cdn.door43.org/obs/jpg/360px/obs-en-29-08.jpg)

پاتِشا همو دَم او پیانَه مَخاس و گف: «ای خادم زَبین! مو سی دِل خاطری التِماسِی کِه کُوردِی او بِدهی گَپَه وَرِتْ بَخشیدوم. تونَم واسکِی هَمی کارَه پی همکارِت بِ‌کوردی؟» پاتِشا جر اومَّه و فرمون دا بِهِنِش زِندون و تا کلِ بِدِهی‌یَه نَدَهَه وِلِش نَکُنِن.

![](https://cdn.door43.org/obs/jpg/360px/obs-en-29-09.jpg)

بَعدِش عیسی فرمود: «اَر شُمونْ برارِتونَه اَ تَه دِلتون نَبَخشِی، پدر آسمونِیِ مونَم پِی شُمون ای‌طور برخوردِ کُنَه.»

*مَتَلِی اَ کِتابِ مقدس: انجیل متی فصل ۱۸ آیه های ۲۱ تا ۳۵*

## 30. ۳۰- عیسی مَسیح بِه پِنْ هَزار نَفَر غذا بِ‌دَهَه

https://openbiblestories.org/l/def/story-30/

![](https://cdn.door43.org/obs/jpg/360px/obs-en-30-01.jpg)

عیسی رسولونِشَه سی بشارَت و یاد دایَن بِه داهاتا زیادِی فِرِسنید .بَعدِ وِرگَشتَن، اوشون عیسانَ اَ کارایِی کِه کُوردِن بید با خبَر کُوردِن. بَعد عیسی اوشونَه جا خَلوَتِی نِهِنگِ دریاچَه بُورد تا کَمِی مَندی وَنِن. پَه هَمَه‌شون داخِلِ یَه قایُقِی بیسِن و اَلا اودَس روخونَه رَفتِن.

![](https://cdn.door43.org/obs/jpg/360px/obs-en-30-02.jpg)

مُعادِی کِه مَردم دیدِن عیسی و شاگِردونِش سُوارِ قایُق بیسِنَه و دارِن بِ‌رووِن، کِنارِ دَریا بَنا بِه دووِس‌سَن وَندِنْ تا نُها اوشون بِه او دَس دریا رَسِن. هموگِری وَقتِی کِه عیسی و شاگِردونِش اونجون رَسیدِن، جَمِی اَ مردم اونجون بندیرشون بیدِن و ازِشون استقبالِ کُوردِن.

![](https://cdn.door43.org/obs/jpg/360px/obs-en-30-03.jpg)

جَمعیَّتشون بجز زنون و بَچون نِهِنگِ پِنْ هَزار پیا بید. دِلِ عیسی مَسیح سیشون سُخت، چون لِفِ بَرونِ بی چوپون بیدِن. پَه بَنا بِه یادْ دایَنِشون وَند و کَسونیَه کِه مَرِیض بیدِن، شفا دا.

![](https://cdn.door43.org/obs/jpg/360px/obs-en-30-04.jpg)

شو کِه بی‌یِس، شاگِردون پیشِ عیسی اومِّن و گفتِن: «ای اُسّا، مَردُمَه فِرِسنِشون سی خوشون تَهیِی نون کُنِن، چون اینجون جا دیری‌یَه و چِی سی خُوردَن پِیدا نَم‌بووَه.»

![](https://cdn.door43.org/obs/jpg/360px/obs-en-30-05.jpg)

اما عیسی بِه شاگِردونِش گف: «خوتون بِه ایشون نون دِهِی.» اوشون جُواب دان: «چِطور تَرِس‌سَه بُووِیم ای هَمَه مردُمَه سِیر کُنِیم؟ امون تینا پِن نون و دو موهی کُچُک دارِیم و بَس.»

![](https://cdn.door43.org/obs/jpg/360px/obs-en-30-06.jpg)

عیسی بِه شاگِردونِش فرمایِش کُورد تا بِه مَردُم گُووِن کِه مِی دَسا پَنجا نَفَری ری عَلُفا نِشینِن.

![](https://cdn.door43.org/obs/jpg/360px/obs-en-30-07.jpg)

بَعد عیسا پِن نون و دو موهی‌یَه مِی دَسِش گِرُفت، بِه آسمون سیل کُورد و خدانَه سی غَذا شُکر کُورد و اوانَه بَرکَت دا.

![](https://cdn.door43.org/obs/jpg/360px/obs-en-30-08.jpg)

بَعد عیسا نونا و موهیونَ تیکه تیکَه کورد و هُنونَ بِ شاگِردونِش دا تا بینِ مردُم بَرِ بَخش کُنِن. شاگِردون بِ مَردم چِی بِدان و هَمَ خُوَردِن و سِیر بیسِن، اَما چِی اَ او غَذاها کَسر نَم بی یِس.

![](https://cdn.door43.org/obs/jpg/360px/obs-en-30-09.jpg)

بَعد شاگِردونْ تَه‌موندِه غَذاهانَه گِرد کُوردِن و ای‌طور اَ باقِیْ او پِن نون و دو موهی، دوزَه سَلَه پُر بی‌یِس.

*مَتَلِی اَ کِتابِ مقدس: انجیل متی فصل ۱۴ آیه های ۱۳ تا ۲۱ ، انجیل مرقس فصل ۶ آیه های ۳۱ تا ۴۴، انجیل لوقا فصل ۹ آیه های ۱۰ تا ۱۷، انجیل یوحنا فصل ۶ آیه های ۵ تا ۱۵*

## 31. ۳۱- عیسی ری اُو رَه بِ‌رووَه

https://openbiblestories.org/l/def/story-31/

![](https://cdn.door43.org/obs/jpg/360px/obs-en-31-01.jpg)

بَعدَ ایان‌کِه عیسی بِه جمعیت چِی سی خُوَردَن دا، شاگِردونِشَه گف کِه سوارِ قایُق بُووِن و رُووِن اودَسِ دریاچَه، اما خودِش سی مدت کمِی اونجون موند. پَه شاگِردون وَندِن رَه و عیسی هم بَعدَ ایان کِه مردُمَه فِرِسنید، بالا کُهِی رَفت تا دعا کُنَه. او اونجون تینا بید و تا مِنجا شو دُعا بِ‌کورد.

![](https://cdn.door43.org/obs/jpg/360px/obs-en-31-02.jpg)

مِی ای مِندو، شاگِردون مِی قایُق داشتِن پارو بِزَندِن اما بادِی اَ نُهاشون میومَّه و تا مِنجا شو تینا تَرِس‌سِن نِصفِ دریاچَنَه جِلو رُووِن.

![](https://cdn.door43.org/obs/jpg/360px/obs-en-31-03.jpg)

ایسون بید کِه عیسی دُعاشَه تَموم کُورد و دیارِ شاگِردون رَف .او اَلا قایُقِ‌شون وَند رَه و ری اُو رَه رَفت.

![](https://cdn.door43.org/obs/jpg/360px/obs-en-31-04.jpg)

تا شاگِردون عیسانَ دیدِن خِیلِی تَرسیدِن، چون مَرِس‌سِن روحی‌یَه. عیسی دونِس کِه اوشون جِگَرِشون بُرِس‌سَه، پَه ری کُورد الاشون و فرمود: «مَتَرسِی مونُوم!»

![](https://cdn.door43.org/obs/jpg/360px/obs-en-31-05.jpg)

بَعد پِترُس بِه عیسی گف: «آقا! اَر تونی، فَرما تا مونَم ری اُو آیُم پیشِت.» عیسی بِه پِترُس فرمایِش کُورد: «بیو»

![](https://cdn.door43.org/obs/jpg/360px/obs-en-31-06.jpg)

پَه پِترُس اَ قایُق اومَّه دَر و ری اُو رَه رَفت و اَلا عیسی حَرکَت کُورد. اَما بَعَدِ ایان‌کِه کُتِی رَه رَفت، ریشَه اَ عیسی وِرگَردونید و سیلِ طافا گَپ کُورد و زورِ باد گَپَه حِس کُورد.

![](https://cdn.door43.org/obs/jpg/360px/obs-en-31-07.jpg)

یَکِتی پِترُس تَرسید و مِی‌ای‌مِندو کِه زیرِ اُو بِ‌رَفت، بُنگ کُورد :«آقا، نجاتوم دِه!» عیسی همو دَم دَسِشَه دِراز کُورد و اووَ اَ اُو دِروُورد. بَعد عیسی بِه پِترُس فرمایِش کورد: «ای کم‌ایمان، سی چِه وَرُوم اعتماد نَکُوردی تا سالوم مَنی؟»

![](https://cdn.door43.org/obs/jpg/360px/obs-en-31-08.jpg)

مُعادِی کِه عیسی و پِترُس سُوارِ قایُق بیسِن، یَکِتی باد ویسید و اُو بَند اومَّه. شاگِردون کِه وَم‌زَشونْ بید، اَ عیسی تَعریف دان و گفتِن :«تو پسرِ اَروسینِ خُدویی.»

*مَتَلِی اَ کِتابِ مقدس انجیل متی فصل ۱۴ آیه های ۲۲ تا ۳۳؛ انجیل مرقس فصل ۶ آیه های ۴۵ تا ۵۲؛ انجیل یوحنا فصل ۶ آیه های ۱۶ تا ۲۱*

## 32. ۳۲- عیسی، یَه پیا دِیو زِیِ‌یَه و زونِه مَریضیَه شَفا بِدَهَه

https://openbiblestories.org/l/def/story-32/

![](https://cdn.door43.org/obs/jpg/360px/obs-en-32-01.jpg)

یَه روز عیسی وا شاگِردونِش پِی قایُق اولا دَریاچَه بِه وِلاتِ جَدَریون رَفتِن. اوشون بِه خشکی رَسیدِن و اَ قایُق اومِّن دَر.

![](https://cdn.door43.org/obs/jpg/360px/obs-en-32-02.jpg)

پیایِی اونجونْ بید کِه اَسیرِ ارواح گَندِی بید.

![](https://cdn.door43.org/obs/jpg/360px/obs-en-32-03.jpg)

او پِیا اَقدَه زور داشت کِه هیچْ‌کَه نَتَرِس رومِش کُنَه. چَنْ‌رَه بِه زَنجیر بَ‌سِنِش بید، اما او زَنجیرانَه کُت کُتْ کُورد بید.

![](https://cdn.door43.org/obs/jpg/360px/obs-en-32-04.jpg)

او پیا مِی قَبرِسُّونِ او مَنطَقَه زِندی بِ‌کورد. او شو وِ روز چیک بِزَه .چِی وَرِش نبید و خوشَه پِی بَردا تِیز زخمی بِ‌کورد.

![](https://cdn.door43.org/obs/jpg/360px/obs-en-32-05.jpg)

مُعادِی کِه پیشِ عیسی رَسید، نُها عیسی زونی زَه. عیسی بِه او دِیو فرمون دا: «اَ ای پِیا بیو دَر!»

![](https://cdn.door43.org/obs/jpg/360px/obs-en-32-06.jpg)

دِیو چیکِ بُلِندِی کَشید و گف: «ای عیسی، پسر خدای متعال، چِه اَ جُونُم مَخی؟ التماسِتِه کُنُم مُنَه عاجِز مَکُن.» پَه عیسی اَ دِیو پرسید: «نومِت چیَه؟» او جُواب دا: «نوموم لژیونَ، چون امون خِیلِی هِیسیم.» (لِژیون جَرگِه گَپِی شامِلِ چَن هَزار سرباز مِی اَرتَشِ روم بید.)

![](https://cdn.door43.org/obs/jpg/360px/obs-en-32-07.jpg)

دِیوا اَ عیسی مَخاسِن: «اومونَه اَ ای وِلاتْ مَکُن دَر» اونجون گَلِی اَ گُرازا سَرِ تَپِه بیدِن کِه او نِهِنگی داشتِن چَرا بِ‌کُوردِن. ارواحِ زَبین به عیسی التماس کُوردِن و گفتِن: «پَه اومونَه مِی ای خوکا فِرِسن.» عیسی هِشتشون و فرمایِش کُورد: «رُووِه».

![](https://cdn.door43.org/obs/jpg/360px/obs-en-32-08.jpg)

دیوا اَ مِی او پِیا اومِّن دَر و مِی خوکا رَفتِن. هَمِه او گَلَه کِه نِهِنگِ دوهَزار تا خوک بیدِن، اَ سرزِیری تَپَه مِی دریاچَه پِرِس‌سِن و غَرق بیسِن.

![](https://cdn.door43.org/obs/jpg/360px/obs-en-32-09.jpg)

خوکْ‌پاهون کِه او گَلَه‌نَه بِ‌پوییدِن، تا ای جریونَه دیدِن اَلا شَـر رَفتِن و مَردُمَه اَ کارِی کِه عیسی کُورد بید با خَبر کُوردِن. مَردمِ شـر اومِّن و او پِیا دِیو زِیَ‌نَه دیدِن کِه آروم ویسیدَه، رَخت وَرِش کُوردَه و عاقِل نِشِس‌سَه.

![](https://cdn.door43.org/obs/jpg/360px/obs-en-32-10.jpg)

مردم کِه جِگرِشون بُرِس بید، اَ عیسی مَخاسِن اَ اونجون رُووَه .پَه عیسی سُوارِ قایُق بی‌یِس. اَما او پِیا کِه نُهاتَر اَسیرِ دِیو بید اَ عیسی مَخاس کِه پِی‌یِش آیَه.

![](https://cdn.door43.org/obs/jpg/360px/obs-en-32-11.jpg)

اما عیسی گُفتِش: «وِرگَرد خونَه‌تون و هَمَنَه گو کِه خُدا چِه سی‌یِت کُوردَه و چِطور خدا وَرِت رَحم کُوردَه.»

![](https://cdn.door43.org/obs/jpg/360px/obs-en-32-12.jpg)

پَه او پِیا رَفت و هَر کَنَه بِ‌دید بِ‌گفت کِه عیسی سی‌یِش چِه کُوردَه. هَر کَه کِه مَتَلِ ای پیانَه بِ‌فَـمید، تعجّبِ کُورد.

![](https://cdn.door43.org/obs/jpg/360px/obs-en-32-13.jpg)

عیسی اولا دریاچَه وِرگَشت. بَعدِ ایان‌کِه رَسید اونجون، جَرگِه گَپِی دورِش جعمْ بیسِن و هُلُک دُلُکِش بِ‌کوردِن .مِی او جمعیت، زُونِه بید کِه دوزَه سال خینْ‌رِیزِی عاجِزِش کُورد بید. او کُلِ دارِ نَدارِشَه سی دَرمونِ خُودِش بِه حَکیمونْ دا بید، اما حالِش بَتَرَمْ بی‌یِس بید.

![](https://cdn.door43.org/obs/jpg/360px/obs-en-32-14.jpg)

او فَـمید بید کِه عیسی خِیلی اَ مَریضونَه شَفا داس، پَه پِی خودِش گف: «بُووَر دارُوم کِه اَر تینا دسام وَر رَختا عیسی رَسِن، مونَم شَفا پیدا بِکُنُم.» او زُونَه خوشَه اَ مِنجا مَردُم بِه پشت عیسی رَسوند و قَبا عیسانَ گِرفت. تاکِه جُومِه عیسانَ گِرفت، خینْ‌ریزِی‌یِش ویسید.

![](https://cdn.door43.org/obs/jpg/360px/obs-en-32-15.jpg)

همو دَم عیسی فَـمید کِه کُتِی اَ قُووَتِش رَفتَه دَر. پَه وِرگَشت و پُرسید: «کِی رَختِ مونَه گِرُفتَه؟» شاگِردون جُواب دان: «خِیلِی اَ مردم اَ ایلا اولا وَرِت زور اووُوردِنَه، سی‌چِه بِ‌پُرسی «کِی وَرُم دس زَس؟»

![](https://cdn.door43.org/obs/jpg/360px/obs-en-32-16.jpg)

او زُونَه مِی حالِ تَرسِ لَرز، نُها عیسی زونی زَه. بَعد بِه او گُف کِه چِه کُوردَه و چطور شَفا گِرُفتَه. عیسی گُفتِش: «ایمانی کِه دوشتِی تونَه شَفا دا! رو بِه خیریَت.»

*مَتَلِی اَ کِتابِ مقدس انجیل متی فصل ۸ آیه های ۲۸ تا ۳۴؛ فصل ۹: آیه های ۲۰ تا ۲۲؛ انجیل مرقس فصل ۵؛ انجیل لوقا فصل ۸ آیه های ۲۶ تا ۴۸*

## 33. ۳۳- مَتَلِ زِراعَت‌کار

https://openbiblestories.org/l/def/story-33/

![](https://cdn.door43.org/obs/jpg/360px/obs-en-33-01.jpg)

یَه روز عیسی نِهِنگ دریاچَه سرگرمِ یاد دایَن بِه جَرگِه گَپِی اَ مردم بید. تعدادِشون اَقدَر زیاد بید کِه عیسی جا مِناسُبِی سی قِصَّه کُوردَن پِیشون نَداشت. پَه سُوارِ قایُقِی نِزیکِ اُو بی‌یِس و اونجون نِشِس تا مَردُمَه چِی یاد دَهَه.

![](https://cdn.door43.org/obs/jpg/360px/obs-en-33-02.jpg)

عیسی ای مَتَلَه سی مَردم گف: «زراعَت‌کارِی سی کاشتَنِ دونْ دَر رَفت بید. وَقتِی کِه داشت دونانَ ایلا اولا بِپُوشِنید کُتِی اَ دونا مِی رَه اُفتید و باهِندونْ اومِّن و هَمَشونَه خُوَردِن.

![](https://cdn.door43.org/obs/jpg/360px/obs-en-33-03.jpg)

کُتِی اَ دونا ری بَردا اُفتید بید کِه کمِی خاک هَم سرشون بید. دونا ری او خاکِ تُنُک، خِیلِی گَه تُک زِن. اما ریشاشون نَتَرِس‌سِن مِی خاک رُووِن. پَه مُعادِی کِه عَفتو زورْدارِی وَرشون زَه، کُل سُختِن و اَ بین رَفتِن.

![](https://cdn.door43.org/obs/jpg/360px/obs-en-33-04.jpg)

کُتِی اَ دونا هَم مِنجا خارا اُفتیدِن. خارا و دونا پِی یَک بالا اومِّن و ساقا نُووِ علُفا، زِیر زورِ خارا خَفَه بیسِن و هیچ زراعَتِی عَمَل نَ‌اووُوردِن.

![](https://cdn.door43.org/obs/jpg/360px/obs-en-33-05.jpg)

کُتِی اَ او دونا هَم ری خاکِ خوبِی اُفتیدِن، و اَ هَر دونِه سی، شص، و یا صد مطابِق بَر دان. پَه هَرکَه مَخو اَ خُدا فرمونْبَری کُنَه بِه قِصّا مو گوش دَهَه.»

![](https://cdn.door43.org/obs/jpg/360px/obs-en-33-06.jpg)

شاگِردون اَ فَـمیدَنِ ای داستان گِیز بیسِن. پَه عیسی هَم بِه اوشون ای‌طور گف: «دون، کلُومِ خُداس. تُرِه رَه، او کَسی‌یَه کِه کلُومِ خُدانَه بِفَـمَه وَلی حولی‌یِش نَم‌بُووَه و شیطان کلُومَه اَزِش بِدُزَه. هَموگِری شیطان اووَ نَم‌هِلَه تا کلُومِ خُدانَه فَـمَه.

![](https://cdn.door43.org/obs/jpg/360px/obs-en-33-07.jpg)

زِمینِ پُر بَرد، آدمیَه کِه تا پیغومِ خُدانَه بِفَـمَه پِی شودِی قَبولِشِه کُنَه، اَما مِی تَنگی یا مُعادِی کِه مَردُم عاجِزِشِه کُنِن، اَ خُدا بِه وِرگَردَه. یَعنِی اَ اعتماد وَر خُدا بِه وِرگَردَه.

![](https://cdn.door43.org/obs/jpg/360px/obs-en-33-08.jpg)

زِمینِی کِه اَ خارا پوشِنیدَس، کَسی‌یَه کِه پیغامَه بِفَـمَه اما فِکرِ زُونَه و مَخاسَنِ پیل و به دَس اُووُوردَنِ چیا دِگَه، بَعدِ مدّتِی اووَ اَ دوسْ داشتَنِ خُدا مانِعِه بُووَه. پَه او چِه کِه اَ کلامِ خُدا فَـمِسْ بید، بِه او زُور نَم‌دَهَه تا خُدانَه روضی کُنَه. او لِفِ گَنُمی‌یَه کِه بَر نَم‌دَهَه.

![](https://cdn.door43.org/obs/jpg/360px/obs-en-33-09.jpg)

اَما زِمینِ خوب، آدمی‌یَه کِه پیغومِ خُدانَه بِ‌فَـمَه، با وَرشِه کُنَه و بَرِ دَهَه.»

*مَتَلِی اَ کِتابِ مقدس: انجیل متی فصل ۱۳ آیه های ۱ تا ۸؛ فصل ۱۳ آیه های ۱۸ تا ۲۳؛ انجیل مرقس فصل ۴ آیه های ۱ تا ۸؛ فصل ۴: آیه های ۱۳ تا ۲۰؛ انجیل لوقا فصل ۸ آیه های ۴ تا ۱۵*

## 34. ۳۴- عیسی مَتَلا دِگِه یادِه دَهَه

https://openbiblestories.org/l/def/story-34/

![](https://cdn.door43.org/obs/jpg/360px/obs-en-34-01.jpg)

عیسی مَتَلا زِیادِ دِگِه هَم سی پاتِشوهِیِ خدا گف .سی نمونَه ای‌طور گف: «پاتِشوهِیِ خدا مِلثِ دُونِ خَردَلی‌یَه کِه کَسِی مِی زِمینِش کاشتَه. شُمون خُوب دُونِه کِه دونِ خَردَل اَ کُچُکتَرین دونا س.

![](https://cdn.door43.org/obs/jpg/360px/obs-en-34-02.jpg)

اما مُعادِی کِه دونِه خَردَل رُشدِ کُنَه، اَ کُلِ علُفا دِگَه گَفتَرِه بُووَه. اَقدَر کِه باهِندون مِی شاخاش مَندی بِ‌وَنِن.»

![](https://cdn.door43.org/obs/jpg/360px/obs-en-34-03.jpg)

عیسی مَتَلِه دِگِه ذِکر کُورد و گف: «پاتِشوهِی خدا لِفِه خَمیرْ مایِی‌یَه کِه زُونِه اُوانَه پِه آردْ یَکشِه زَنَه تا مِی کُلِ خَمیر قوطی بُووَه.

![](https://cdn.door43.org/obs/jpg/360px/obs-en-34-04.jpg)

پاتِشوهِی خُدا لِفِ گَنجی‌یَه کِه کَسی اُوانَه مِی صحرایِی وِرداشتَه. کَسِی دِگَه اُوانَه جُس و اَندو زِیرِ خاکا وِرداشتِش و اَ ذوقِش هَر چِی داشت فُرُخت تا پیلِ مِناسُبِی گیرِش آیَه و او صحرایِی کِه گنج مینِشَه، خِرَه.

![](https://cdn.door43.org/obs/jpg/360px/obs-en-34-05.jpg)

پاتِشوهِی خدا، لِفِ مرواریدِ خِیلِی قَشَنگیَه کِه خِیلِی بِ‌اَرزَه و پِیا تاجِرِی او مُرواریدَه بِ‌جورَه و هَر چِی داشت، فُرُخت تا پِی پیلِش اُوانَه خِرَه.»

![](https://cdn.door43.org/obs/jpg/360px/obs-en-34-06.jpg)

اونجون کَسونِی بیدِن کِه مَرِس‌سِن سی کارایِ خوبِشون خُدا قبولِشون دارَه. اوشون باقِی‌یَه کِه کارِ خوب نَم‌کوردِن کُچُک دونِس‌سِن. پَه عیسی سیشون ای مَتَلَه تَعریف کُورد: «دو نَفَر رَفتِن مَعبَد تا دعا کُنِن. یِکِیشون گَپِ مذهبی‌یِه بید و او یِکِی باجگِر بید.

![](https://cdn.door43.org/obs/jpg/360px/obs-en-34-07.jpg)

او گَپِ مَذهبی ویسید و ای‌طور دُعا کورد: "ای خدا! تونَه شُکرِ کُنُم کِه لِف باقِی مَردم، گناه‌کار، دُز، ظالم، زناکار و حتا لِف ایان باجگِر نِیسُم.

![](https://cdn.door43.org/obs/jpg/360px/obs-en-34-08.jpg)

مِی هَفتَه دو کِتَه روزَه بِگِرُم و اَ کُلِ پیلا و ماجُبُم، یَه دَهِ‌شَه بِه تو بِداهام."

![](https://cdn.door43.org/obs/jpg/360px/obs-en-34-09.jpg)

اما او باجگِر دیرتَر اَ او گَپِ مَذهبی ویسید و مُعادِ دعا، سَرِشَه بِه آسمون بُلِند نَ‌کورد، بَلکِی پِی گُرمُچ بِه سینَش زَه، و گُف: "خُدایا وَرُم رَحم کُن، اَ کَمِ ایان‌کِه گناه بارُم."»

![](https://cdn.door43.org/obs/jpg/360px/obs-en-34-10.jpg)

بَعدِش عیسی ادامَه دا: «راسِشَه بِه شُمونِ گووُم؛ خُدا دُعا او باجگِرَه فَـمید و اووَ آدمِ مُنصِفِی دونِس. خُدا هَر کَنَه کِه خودپِسَند بُووَه زَبینِشِ کُنَه و هَر کَنَه کِه خوشَه افتادَه‌تَر گِرَه، سربُلِندِه کُنَه.»

*مَتَلِی اَ کِتابِ مقدس:  انجیل متی فصل ۱۳ آیه های ۳۱ تا ۴۶؛ انجیل مرقس فصل ۴ آیه های ۲۶ تا ۳۴؛ انجیل لوقا فصل ۱۳ آیه های ۱۸ تا ۲۱؛ فصل ۱۸ آیه های ۹ تا ۱۴*

## 35. ۳۵- مَتَلِ بُووِه دلسوز

https://openbiblestories.org/l/def/story-35/

![](https://cdn.door43.org/obs/jpg/360px/obs-en-35-01.jpg)

روزِی عیسی خِیلِی اَ مَردمَه کِه دورِش گِرد بیسِنْ بید تا اَزِش چِه فَـمِن، چِه یادِ دا. دوبَـرِشون باجگِرون و مَردُمِی بیدِن کِه نَخاسِن شَرِیعَتِ موسانَ فرمونبری کُنِن.

![](https://cdn.door43.org/obs/jpg/360px/obs-en-35-02.jpg)

اما گَپونِ دینی کِه اونجون بیدِن، بِ‌دیدِن کِه عیسی چِطور پِه گناه‌کارون لِفِ رَفیقونِ نِزیک طا بِکُنَه. پَه بِه یَکِ‌دو بِ‌گُفتِن کِه عیسی کارِ غَلَطِی بِ‌کُنَه. مُعادِی کِه عیسی قِصّاشونَه فَـمید، ای مَتَلَه سیشون گف.

![](https://cdn.door43.org/obs/jpg/360px/obs-en-35-03.jpg)

«پِیایِی بید کِه دو کُووَک داشت. یَه روز کووَکِ کُچُکتَری بِه بُووَه گف: "بُووَه! مو ارثومَه الان مَخوم!" پَه بُووَه اَ مالِش سَهمِشَه دا.

![](https://cdn.door43.org/obs/jpg/360px/obs-en-35-04.jpg)

خِیلِی نَگُذشت کِه کُووَکِ کُچُکتَری هَر چِی داشت گِرد کُورد و بِه وِلاتِ دیرِی رَفت و اونجون کلِ مالِشَه مِی زِندِگی‌یِه گناه‌بارِی اَ بین بُورد.

![](https://cdn.door43.org/obs/jpg/360px/obs-en-35-05.jpg)

خِیلِی نَ‌گذشت کِه قحطی سَختِی مِی جایِی کِه او کُووَک اونجون بیدْ اومَّه طورِی‌کُه دِگَه چِی هَم سی خُوَردَن نَداشت .پَه اَ سَرِ مَجبوری بِه تینا کارِی کِه اَزِش عَمَل میومَّه یَعنِی پُوییدَنِ خوکا مشغول بی‌یِس و اَقدَر بَخْ‌سُختَه و گُسنَه بید کِه پِی غذا خوکا اِشکَمِشَه سِیرِ کُورد.

![](https://cdn.door43.org/obs/jpg/360px/obs-en-35-06.jpg)

آخِر سَر روزِی کُووَکِ کُچُک پِی خودِش گف: "مو اینجون چِه بْ‌کُنُم؟ کُلِ نوکَرونِ بُووَم نونِ زیادِی سی خُوَردَن دارِن، اما مو اینجون اَ گُسنی دارُم بِ‌میرُم. پَه پیشِ بُووَم بِ‌وِرگَردوم و اَزِش مَخوم کِه یِکِی اَ نوکَرونِش بُووُم."

![](https://cdn.door43.org/obs/jpg/360px/obs-en-35-07.jpg)

بَعد اَلا خُونِه بُووَش حَرکَت کُورد. هَنی اَ خُونَه دیر بید کِه بُووَش دیدِش و دِلِش سی‌یِش سُخت و پِی دُو اَلاش رَف، و بَغَلِش کُورد و بوسیدِش.

![](https://cdn.door43.org/obs/jpg/360px/obs-en-35-08.jpg)

کُووَک بُووَنَه گف: "بُووَه! مو دَر حقِ تو و خُدا گناه کُوردُمَه، و دِگَه لاقُمْ‌نِی کِه کُووَکِت بُووُم."

![](https://cdn.door43.org/obs/jpg/360px/obs-en-35-09.jpg)

اما بُووَش بِه یِکی اَ نوکَرون گف: "یَلا رُووِه و جومِه خوبِی اَ خونَه بیارِی و وَرِ کُووَکُم کُنِی. انگُشتَرِی وَنِه مِی دَسِش و کوشِی هَم پاش کُنِه و گوسالِ خوبَکِی بیارِی سَر بُرِه تا جَشنِی گِرِیم و شُودی کُنِیم. چون ای کووَک مُوردَه بید و ایسون زِندَه بیسَه. وِل بی‌یِس بید و ایسون اَندو پِیداش کُوردُمَه."

![](https://cdn.door43.org/obs/jpg/360px/obs-en-35-10.jpg)

پَه هَمَه‌شون جَشنِ گَپِی سی‌یِش گِرُفتِن. هَنِی خیلی نَ‌گذشت بید کِه کُووَکِ گَفتَری کِه اَ کار مِی صَحرا بِ‌وِرگَشت صدا دِنگِ دال و چیکِ چِرنَ‌نَه فَـمید و فضولی کُورد تا بینَه کِه چِه خَبَرَه. مُعادِی کِه کُووَکِ گَپ فَـمید ای چیکِ چِرنَه سی وِرگَشتَنِ برارِش بِه خونَه‌س، جِر اومَّه و نَخاس کِه مِی خونَه رُووَه. بُووَش اومَّه دَر و اَزِش مَخاس کِه آیَه خونَه و مِی میمونِی وِیسْتَه بُووَه، اَما او خاستِ بُووَنَه رَد کُورد.

![](https://cdn.door43.org/obs/jpg/360px/obs-en-35-11.jpg)

مُعادِی کِ کووَک گَپ فَهمید ای چیکِ چِرنَه سی وِرگَشتَنِ برارِش بِ خونَس، جِر اوم مَه و نَخاس کِ مِی خونَه رووَه. بووَش اوم مَه دَر و اَزِش مَخاس کِ آیَه خونَه و مِی میمونِی وِیستَه بووَه، اَما او خاستِ بووَنَه رَد کورد.

![](https://cdn.door43.org/obs/jpg/360px/obs-en-35-12.jpg)

کووَکِ گَفْ‌تَر بِه بُووَش گف: "کُلِ ای سالا پِی وفادوری وَرِت خدمَت کُوردُمَه. اَتَّه اَ قِصات نافَرمونِی نَ‌کُوردُمَه و مِی کل ای مدت، حتا یَه بُز هَم بِه مو نَدویی‌یَه تا تَرِس‌سَه بُووُم پِی رَفیقونُم جَشنِی گِرُم. اما ای کُووَکِت، دارِ نَدارِتَه مِی رَه گَندِی هَدَر داس و ایسون وِرگَشتَه خونَه، بِخْتَرین گوسالَه سی‌یِش سر بُریدی‌یَه تا جَشنِی گِری."

![](https://cdn.door43.org/obs/jpg/360px/obs-en-35-13.jpg)

بُووَش گف: "رولَه! تو هِی پیشُم وِیستی و هَر چِی دارُم سی تُنَه. اما بِخْترین کار ایانَه کِه ایسون جَشنِی گِرِیم و شُودی کُنِیم، سی‌ایانْ‌کِه بِرارِت مُوردَه بیدَه و ایسون زِندَه بیسَه. وِل بِیْیِس بید و ایسون پِیداش داس."»

*مَتَلِی اَ کِتابِ مقدس: انجیل لوقا فصل ۱۵ آیه های ۱۱ تا ۳۲*

## 36. ۳۶- چَپِه‌ری بیسَنِ ری‌یِ مسیح

https://openbiblestories.org/l/def/story-36/

![](https://cdn.door43.org/obs/jpg/360px/obs-en-36-01.jpg)

یَه روز، عیسی سُو تا اَ شاگردونِشْ یَعنِی پتروس، یعقوب وُ یوحنانَ وِرداشت و بُورد سَرِ تِکِ کُهِ گَپی که پِه هم دعا کُنِن. (یوحنا که عیسانَ تعمید دا کسی دِگَس.)

![](https://cdn.door43.org/obs/jpg/360px/obs-en-36-02.jpg)

سَرِ موقعِ دعا، ری عیسی لِفِ اَفتو بِرچه دا وُ جُومَش لِفِ نورِ اِسپِیدی بیِس، طوری اِسپِید بِیْیِس که ری زِمینْ لِفِش پِیدا نَم‌دا .

![](https://cdn.door43.org/obs/jpg/360px/obs-en-36-03.jpg)

او سون موسی وُ ایلیایِ نبی ظاهر بییِس‌سِن. ای پیاهون، صدها سال نُها ای جریون ری زِمین زندیْ بِ‌کُوردن . هُنون پِی عیسی اَ مُوردن او که زیتری مِی اورشلیم پیشِ میا قِصَه بِ‌کوردن .

![](https://cdn.door43.org/obs/jpg/360px/obs-en-36-04.jpg)

اوسون که موسی وُ ایلیا پِه عیسی قِصَه بْ‌کُوردِن ،پترس بِه عیسی گُف: «چَقزَه خوبَه که اُمون اینجون هِیسِیم. هِل امون سُو تا سایَه‌بون سازِیم؛ یکی سی تو، یکی سی موسی وُ یکی هم سی ایلیا.» پترس نَدونِس که چِه بِگووَه.

![](https://cdn.door43.org/obs/jpg/360px/obs-en-36-05.jpg)

هَنی قِصه پتروس تموم نَ‌بِییِس بید اُوری کِه بِرقِه دا اومَّه زِیر وُ دُورشونَه گِرُفت و صدایی اَ مِی اوان گف که: «ایان کووَکِ عزیزَه‌نازُمَه که اَزِش روضیوم. وَرِ قِصَه‌ش گوش دِیهِی.» سُو شاگرد اَ تَرس ری زِمین اُفتیدِن.

![](https://cdn.door43.org/obs/jpg/360px/obs-en-36-06.jpg)

عیسی دَس زَه وَرشون و گُف: «وِرسِی وُ مَ‌لَرزِی.» اوسون که اوشون ایلا اولاشونَه سِیل کُوردِن، غِیرَ عیسی کَسِی دِگَه اونجون نَدیدِن.

![](https://cdn.door43.org/obs/jpg/360px/obs-en-36-07.jpg)

عیسی وُ او سُو شاگِرد وِرگَشتِن زِیرِ کُه. اوسون عیسی به اوشون فرمود: «ایسون اَ چِی کِه دیدِی‌یَه به کسی دُی مَ‌دِیهِی. مُو زیتری بِ‌میرُم وُ اَندو زِنده بِ‌بوُم. بَعدَ اوان تَرِه به بَقیهَ گُووِه که چِه دیدِی‌یَه.»

*مَتَلِی اَ کِتابِ مقدس: انجیل  متی فصل ۱۷ آیه های ۱ تا ۹، انجیل مرقس فصل ۹ آیه های ۲ تا ۸، انجیل لوقا فصل ۹ آیه های ۲۸ تا ۳۶*

## 37. ۳۷- عیسی ایلعازَرَ زندَه بْ‌کُنَ

https://openbiblestories.org/l/def/story-37/

![](https://cdn.door43.org/obs/jpg/360px/obs-en-37-01.jpg)

پیایِی بید به نُوم ایلعازَر،که خوشُ و دو خارِش، مریم و مرتا اَ دُوسونِ نزیک و جور عیسی بیدن. یه روز، عیسی فَـمید کِه الیعازَر خِیلِی مریضْ بیسَه. موقِعْ که ای خبر به گوشش رسید، گف: «یِی مریضی باعث مُوردنش نَم‌بُووَه، بلکی گَپی و جلال خدا سی باقِی، مینِش دیارِه دَهَه.»

![](https://cdn.door43.org/obs/jpg/360px/obs-en-37-02.jpg)

عیسی اَر چِه اوشونَه دوس داشت، دو روز دگه هم اونجون موند. بعدِ دو روز عیسی به شاگردونِش گفت: «بیایِه ورگردِیم یهودیه.» اما شاگردونِش گفتِن: «ای اُسا، هَمِی چن روز نُهاتَر بید که مردم یهودیه مَخاسِن تُنَه کُشِن!.» عیسی سی جُوابشون گفت: «رَفیقمون ایلعازَر خُفتیدَه و مو وا بیارش کُنُم.»

![](https://cdn.door43.org/obs/jpg/360px/obs-en-37-03.jpg)

شاگردونِ عیسی گُفتن: «خداوندا! ار او خُفتیدَه خوبِه بُووَه.» اوسون عیسی خیلی سادَه گفت: «ایلعازَر مُوردَه. زوقِ زَنُم که اونجون نبیدم تا شمون ترِس‌سَه بُووِی وَرُم ایمان آرِه.»

![](https://cdn.door43.org/obs/jpg/360px/obs-en-37-04.jpg)

مُعادِی که عیسی رَسید به شهری که الیعازَر مینِش زندی بِ‌کورد، اَ مُوردَن الیعازَر چار روز گُذَشتَه بید. مرتا نُها عیسی رفت و گف: «آقام! اَر اینجون بیدی، برارُم نَم‌مُورد. اما مو ایمان دارُم که تو هر چی اَ خدا خاسه بُووی، بِ‌دهَت.»

![](https://cdn.door43.org/obs/jpg/360px/obs-en-37-05.jpg)

عیسی جُواب دا: «مو قیامت و حیاتم. هرکَه وَم ایمان آرَه،حتا اَر میرَه، زندَه بِ‌بُووَه. هر کَه وَم ایمان آرَه هیچوختْ نَم‌میرَه. شمون وَر ای قِصِّه مو ایمان دارِی؟» مرتا جُواب دا: «آ اُسا! مو ایمان دارم که تو مسیح پسر خدویی.»

![](https://cdn.door43.org/obs/jpg/360px/obs-en-37-06.jpg)

بعدش مریم اومَّه پیش عیسی، خُودشَه بِس سَر پاهاش و گفتش: «آقام! اَر اینجون بیدی، برارُم نَم‌مورد.» عیسی ازشون پرسید: «کجا خاکش کُوردِی‌یَه؟» اوشون جُواب دان: «مِی یَه قبری. بیو بینش.» اوسون عیسی گریوِس .

![](https://cdn.door43.org/obs/jpg/360px/obs-en-37-07.jpg)

قبر ایلعازَر کَتی بید که بَردِ گَپی دم درش وندِن بید. مُعادِی که عیسی به مقبَرَه رسید به اوشون گفت: «بَردَه وِردارِی.» اَما مرتا گفت: «چار روز اَ مُوردَنِش گذشته. ایسون دگه جَسَدِش بو گِرُفته.»

![](https://cdn.door43.org/obs/jpg/360px/obs-en-37-08.jpg)

عیسی جواب دا: «مَر نگفتم اَر وَر مو ایمان آرِه جلال خدانَه بِ‌بینه؟» پَه اوشون بَردَه وِرداشتِن.

![](https://cdn.door43.org/obs/jpg/360px/obs-en-37-09.jpg)

اُسون عیسی به آسمون سیل کُورد و گف: «پدر! تونَه شُکرِ کُنُم که صدامَه بِفَـمی.» دونم که هِی به مو گوشِ دیهی، اما ایانَه سی دلِ کسونی گفتم که اینجونن، تا ایمان آرِن که تو مُونَه فرسنیدی‌یَه.» اُوسون بُنگ کُورد و پِی صِدا بُلِند فرمود: «ایلعازَر، بیو در!»

![](https://cdn.door43.org/obs/jpg/360px/obs-en-37-10.jpg)

ایلعازَر، مِی وَضعِی کِه لارِش پِی کفن لِیفِنیدَه بید، اَ قَبر اومَّه دَر. عیسی به اوشون گف: «گُشی‌یِش که تَرِس‌سَه بُووَه رَه رُووَه.» خیلِی اَ یهودیون که ای مُعجِزَنَه دیدن، وَر عیسی ایمان اووُوردِن.

![](https://cdn.door43.org/obs/jpg/360px/obs-en-37-11.jpg)

اما گپونِ دینی یهود حسیدیشون بی‌یِس، بعدش یَه‌گِر کُوردن تا نقشِه کُشتَن عیسی و الیعازَرَ کَشِن.

*متلی  اَ کتاب مقدس:  انجیل یوحنا فصل ۱۱ آیه های ۱ تا ۴۶*

## 38. ۳۸- خیانت وَر عیسی

https://openbiblestories.org/l/def/story-38/

![](https://cdn.door43.org/obs/jpg/360px/obs-en-38-01.jpg)

یهودیون هرسال عید پِسَخَ جشنِ گِرُفتِن. ای جشن سی‌ایان بید که فَمِن چطور خدا صدسال پِیش اجدادشونَه اَ نوکَریِ مصر نجات دا بید. نِهِنگِ سو سال بعدِ ایان‌که عیسی موعظه و یادْ داین هَمَنَه بَنا وَند، به شاگِردونِش گف کِه مخو عید پسخ پِی ایشون مِی اورشلیم جشن گِرَه‌َ. همی‌طور گف که مِی اونجون کشته بِ‌بُووَه.

![](https://cdn.door43.org/obs/jpg/360px/obs-en-38-02.jpg)

یهودا یک‍‍‍ی اَ شاگِردونِ عیسی وُ خزینه‌دارِ جَرگِه شاگِردون بید. خیلی وقتا هَم اَ او پِیل بِ‌دُزید. بعدِ ایان که عیسی و شاگِردونِش به اورشَلیم رَسیدِن، یهودا پیش گَپِ کاهنونِ اعظمِ یهود رفت و پیشنهاد فُرُختن عیسانَ اَ جا گرُفتن پیل به اوشون دا. او دونس که گپون یهود، مسیح بیدن عیسانَ قبول ندارن و مَخِن که او کشته بُووَه.

![](https://cdn.door43.org/obs/jpg/360px/obs-en-38-03.jpg)

گپونِ دینی یهود به کایِدی‌یِ کاهن گَپ، سی خیانت یهودا و تحویل دایَنِ عیسی به اوشون، سی سکِّه نقرَه دانِش. مُطابِقِ چِی که پِیغَمبرون پیش بینی کُوردِن بید. یهودا قبول کُورد و پیلَ گرُفت و رفت. اَ اوسون دُما وَقتِی بید تا عیسانَ بِه ایشون تحویل دَهَه.

![](https://cdn.door43.org/obs/jpg/360px/obs-en-38-04.jpg)

عیسی مِی اورشلیم، عید پسخَ پِی شاگِردونِش جشن گرُفت. مُعادِ خُوَردَنِ شومِ پِسَخ، عیسی نونَ گرفت، قَلِش کُورد و گف: «گِرِه خُوَرِه، ایان لارِ مُنَه کِه سی شمون دایَه بِ‌بُووَه. ایانَه به یاد مو انجوم دِهِی.» همی‌طور، عیسی گف که سی‌شون جونِشَه بِدَهَه و لارِش سی دِلِ اوشون قربانی بِ‌بووَه.

![](https://cdn.door43.org/obs/jpg/360px/obs-en-38-05.jpg)

بعدِ ایان عیسی جُومِ شرابَه گرُفت و گفتشون: «اِیانَه خین مو مِی ای عَهدِ جدیدَه که سی بخشیدَنِ گناهاتون رِخته بِ‌بُووَه، اَزش سرکَشِه. و ای کارَه بعدا به یاد مو انجوم دِهِی.»

![](https://cdn.door43.org/obs/jpg/360px/obs-en-38-06.jpg)

بعدش عیسی به شاگردونِش گف: «یکی اَ شُمون بِه مو خیانتِ کُنَه.» شاگِردون تعجب کُوردِن و پُرسیدِن کی همچِه کاری بِ‌کُنَه؟ عیسی گف: «اوان که ای تیکَنَه اَ مو بِ‌گِرَه، خائنَه.» بعد نُونَ به یهودا دا.

![](https://cdn.door43.org/obs/jpg/360px/obs-en-38-07.jpg)

بعدِ ایان‌که یهودا نونَ وَرداشت، شیطان مِی جِلدِش رَفت. او پیشِ گَپون یهود رفت تا اوشونَه سی گرُفتَنِ عیسی کمَک کُنَه. ای جریونا هَمَشون مِی شو پِیش اومَّه.

![](https://cdn.door43.org/obs/jpg/360px/obs-en-38-08.jpg)

بعد خَوردن غذا، عیسی و شاگِردونِش اَلا کُهِ زیتون رفتِن. عیسی گف: «اَمشو همِه شُمون مُنَه تینا بِهِلِه. سی‌ایان‌کِه نوشته بیسه: «چوپونَه بِ‌زَنُم و همِه بَرون تیچِ تاچِ بُووِن.»

![](https://cdn.door43.org/obs/jpg/360px/obs-en-38-09.jpg)

پتروس گف: «اَر همه تُنَه ول کنن، مو ای کاره نَم‌کُنُم.» عیسی گُفتِش: «شیطان مَخُوَه هَمِه شُمونَه اَ خودِش کُنه اما مو سی تو دعا کُوردمه تا ایمانت اَ بین نَ‌رووَه. اما، اَمشو، نُها بُنگِ خروس، تو سو کِتَه حاشا بِ‌کنی که مُونَه بِ‌اِشنوسی.»

![](https://cdn.door43.org/obs/jpg/360px/obs-en-38-10.jpg)

پتروس به عیسی گف: «اَر میرُم، تُنَه انکار نم‌کنم.» باقِی شاگِردونَم همی‌یانَه گُفتِن.

![](https://cdn.door43.org/obs/jpg/360px/obs-en-38-11.jpg)

بعدش عیسی و شاگردونِش مِی باغ جتسیمانی رفتِن. عیسی گفتشون دعا کنن تا شیطان نترِس‌سَه بُووَه ایشونَه وسوسه کنه .پَه ایشونه هِشت و به خلوت رفت تا دعا کنه.

![](https://cdn.door43.org/obs/jpg/360px/obs-en-38-12.jpg)

عیسی سُو کِتَه ای‌طور دعا کورد. «ای پدرِ مو، اَر بِ‌بُووَه، به مو اجازه دِه تا اَ ای جومِ رَنج نَ‌خَورُم. اما اَر رهی دگه سی بخشش گناها بشر نِی، په هر چه تو اراده کُنی سَرِ گِرَه.» عیسی اِقذَه دِلِش اَسَر رَفْ بید که عرقش مِث تُکْ‌کا خین بید. خدا مِلاکِه فِرِسنید کِه اُووَ قُوَه دَهَه.

![](https://cdn.door43.org/obs/jpg/360px/obs-en-38-13.jpg)

دُما هر کِتَه دعا، عیسی پیش شاگردونِش بِ‌وِرگشت. اما اوشونَه مِی خُو بِدید. کِتِی سووُّم که وِرگشت، گف: «ورسِه، او شاگِردِ خیانت کار اینجونس.»

![](https://cdn.door43.org/obs/jpg/360px/obs-en-38-14.jpg)

یهودا پِی گَپونِ یهود، قشون و جماعتِ گَپی اومَّه. اوشون پیشون شِمشِیل و گُرز داشتِن. یهودا اومه پیش عیسی و گف: «سلام اُسا» و اووَ بوسید. ایان تیرنِشونِی بید تا عیسانَ بِه گپون یهود، سی گرُفتنِش نشونْ دهَه. عیسی گفتِش: «یهودا! چا پِی بوسِی بِه مو خیانَتِ کُنی؟»

![](https://cdn.door43.org/obs/jpg/360px/obs-en-38-15.jpg)

مُعادِی که سربازون عیسانَ گِرُفتِن، پترس شِمشِیلِشَ کَشید و گوش نوکر کاهن گَپَه بُرید. عیسی گُفتِش: «شِمشِیلِتَه غلاف کُن. مو ترم اَ پدرُم خاسَه بُووم که دَسِه اَ مِلاکون فرسنَه کمکم. اما وا اَ پدرُم اطاعت کُنُم.» بعدش عیسی گوش او پیانَه شفا دا و کل شاگِردونِشْ جس‌سِن.

*متلی اَ کتاب مقدس : انجیل متی فصل ۲۶ آیه های ۱۴ تا ۵۶، انجیل لوقا فصل ۲۲ آیه های ۱ تا ۵۳، انجیل یوحنا فصل ۱۸ آیه های ۱ تا۱۱*

## 39. ۳۹- محاکمِه عیسی

https://openbiblestories.org/l/def/story-39/

![](https://cdn.door43.org/obs/jpg/360px/obs-en-39-01.jpg)

مِی مِنجا شو، سربازون عیسانَ بُوردِن خونِه کاهنِ گپ تا اَزِش بازجویی کُنِن. پترسَم اَ دیر دُماشونه میومَه. اوسون که عیسانَ مِی خونَه بُوردِن، پتروس دَمِ دَر پیش تَش وِیسید تا گرم بُووَه.

![](https://cdn.door43.org/obs/jpg/360px/obs-en-39-02.jpg)

مِی خونَه، گپون یهود اَ عیسی بازجویی کُوردن. اوشون خِیلِی شاهدونِ دُرودِه اُووُوردن که تومِه الکی به عیسی زَنِن. اما قصاشون پِی یک جور نبید، سی‌دِل‌ایان گپون یهود نَ‌تَرِس‌سِن گناهی وَرِش ثابت کُنِن. عیسی هم هیچ قِصّه نَ‌کُورد.

![](https://cdn.door43.org/obs/jpg/360px/obs-en-39-03.jpg)

بعدش، کاهن گَپ به عیسی سِیل کُورد. گف: «به امون گو، تو مسیح پسر خدای زنده هِیسی؟»

![](https://cdn.door43.org/obs/jpg/360px/obs-en-39-04.jpg)

عیسی گف: «آ هیسُم، و یه روز مونَه بِ‌بینِی که دسْ راسِ خدا نِشسومَه واَ آسمون به زمین بِ‌ورگردُم.» کاهن گپ، که اَ قصا عیسی جِر اومَه بید، جومِه خوشَه دِرد و پِی هو و قی‌یَه به باقِی گپون مذهبی گفت: «اُمون شاهدونِ دِگِه نَخِیم. کُل فـمیدِی که گف مو پسر خدا هِیسُم. چه حُکمِی بِدِهِه؟»

![](https://cdn.door43.org/obs/jpg/360px/obs-en-39-05.jpg)

گپونِ یهود کُل درجواب کاهن گَپ گُفتن: «او لاق مُوردَنَه» اودَم تیا عیسانَ بَسِن، مِی ری‌یِش تُف بِس‌سِن، زَندِنِش و وَرِش دَنگ دِروُوردِن.

![](https://cdn.door43.org/obs/jpg/360px/obs-en-39-06.jpg)

پترس در خونَه وِیسته بید. کنیزِی دیدِش گفتِش: «تُنَم پِی عیسی بیدی.» پترس مُنکر بی‌یِس. کُتی بعد کنیزِی دِگَه همو قصه‌نَه وَرِش کُورد. پترس اَندو منکِر بی‌یِس. بعدش، کَسونی که اونجون وِیسته بیدِن گُفتِنِش: «دُونِیم که تو یکی اَ شاگردونِ عیسی هِیسی، سی‌ایان‌کِه تونَم جلیلی هِیسی.»

![](https://cdn.door43.org/obs/jpg/360px/obs-en-39-07.jpg)

اوسون پترس قسم خوَرد و گف: «خدا مُنَه لعنت کُنه اَر مو ای پیانَه اِشناسوم.» همو دَم خروس بُنگ کُورد و عیسی وِرگَشت و بِه پتروس سِیل کُورد.

![](https://cdn.door43.org/obs/jpg/360px/obs-en-39-08.jpg)

پترس رفت و خیِلِی گِریوس. مِی هَمو دَم، یهودای خائنْ دید که گَپون یهود عیسانَ بِه مرگ محکوم کُوردِنَه. خِیلِی مَغمین بی‌یِس، و رفت تا خودکشی کُنَه.

![](https://cdn.door43.org/obs/jpg/360px/obs-en-39-09.jpg)

مِی ای روزا پیلاتس فرمانده رومی وَر یهودا حکومتِ کُورد. گَپون یهود عیسانَ بُوردِن پیشش. خاستَه‌شون ایان بید که پیلاتس عیسانَ به مُوردن محکوم کُنه. پیلاتس اَ عیسی پرسید: «تو پاتِشاه یهود هِیسی؟»

![](https://cdn.door43.org/obs/jpg/360px/obs-en-39-10.jpg)

عیسی فرمود: «راسِ گویی. اما پاتشوهی مُو زِمینی نِی. اَر ای‌طور بید، پیروانُم سی مُو بِ‌جنگیدِن. اما مُو به این دُیُنا اومَّه‌مَه تا حقیقتِ خدانَه بِه کُل گُووُم. هرکَه حقیقتَه دوس داشتَه بُووَه وَرُم گوشِ دَهَه.» پیلاتس گُفت: «حقیقت چیَه؟»

![](https://cdn.door43.org/obs/jpg/360px/obs-en-39-11.jpg)

پیلاتس بعد قصَه کُوردَن پِی عیسی پیش جمعیت رفت و گف: «مُو گناهی مِی ای پیا نَدیدُمْ که سزاوار مُوردَن بُووَه.» اما گپون یهود و جمعیت دادِ زَندِن: «مصلوبِش کُن.» پیلاتس گفت: «او گناه‌کار نِی.» اما اوشون ای رَه پِی صدا بُلِندتَرِی دادِ زَندِن. بعدش پیلاتس سی رَه سُیّم گفت: «او گناه‌کار نِی.»

![](https://cdn.door43.org/obs/jpg/360px/obs-en-39-12.jpg)

پیلاتس اَ تَرس ایان‌کِه شورش نَ‌بُووَه، قبول کُورد و عیسانَ دا به سربازونش تا به صلیب کَشِنِش. سربازون رومی عیسانَ تَرکه زَندِن و عبا سلطنتی‌یِ وَرش کُوردِن و تاجی اَ خار وَندِن سرش. اُوسون به مسخره بِ‌گُفتِن: «زِندَه با پاتِشاه یهود.»

*مَتَلِی اَ کِتابِ مقدّس:   انجیل متی فصل ۲۶ آیه ۵۷ و فصل ۲۷ آیه ۲۶، انجیل مرقس فصل ۱۴ آیه ۵۳ و فصل ۱۵، انجیل لوقا فصل ۲۲ آیه ۵۴ و فصل ۲۳ آیه ۲۵، انجیل یوحنا فصل ۱۸ آیه ۱۲ و فصل ۱۹ آیه ۱۶*

## 40. ۴۰- عیسی مصلوب بی‌یِس

https://openbiblestories.org/l/def/story-40/

![](https://cdn.door43.org/obs/jpg/360px/obs-en-40-01.jpg)

بعدَ ایان که سربازون عیسانَ مَسخِرَه کُوردِن، بُوردنِش در، تا به صلیب کَشِنِش. اُوشون مجبورِش کُوردن تا صلیبِشَ پِی خودش بَرَه.

![](https://cdn.door43.org/obs/jpg/360px/obs-en-40-02.jpg)

سربازون عیسانَ بُردن جایی که جُلجُتا (یعنی جمجمِه سر) بِگُفتِنش. دَسْ پاشَه ور صلیب پِی مِیخ کُفتِن. اما عیسی فرمود: «اِی پدر! یِی مردمَه بَخش، سی‌ایان که نَدونِن چِه بِ‌کُنِن». به فَرمونِ پیلاتس بالا سَرِش کتیبه وَندِن که ریِ‌یِش نِوِشتَه بید: ایانَه پاتِشاه یهودَه.

![](https://cdn.door43.org/obs/jpg/360px/obs-en-40-03.jpg)

بعدِش سربازون سر جومِه عیسی شرط بَسِن. پِی ای کار پیش بینی کتاب مقدس جور درومهَ که بِگُفت: «جومامَه بینِ خوشون بَـرِ کُنِن و سر عبای مو شرطِ بَندِن».

![](https://cdn.door43.org/obs/jpg/360px/obs-en-40-04.jpg)

سربازون همو دَم دو دُز هم مصلوب کُوردِن و عیسانَ پِی صلیب مِنجاشون وَندِن. یکیشون ور عیسی دَنگِ دِروُورد، اما او یکی گف: «تو اَ خدا نَم‌تَرسی؟ اُومون گناه‌کارِیم اما ای پیا بِی گناهَه.» اوسون به عیسی گفت: اِی عیسی! مونَه مِی پاتِشوهی‌یِت یاد بیار.» عیسی جُواب داش: «تو همی امروز پِی مو مِی بهشتِ میویِی.»

![](https://cdn.door43.org/obs/jpg/360px/obs-en-40-05.jpg)

گپونِ دینی یهود و مردُمِی که اونجون بیدِن عیسانَ مسخِرَه کُوردِن و بِ‌گُفتِن: «اَر تو پسر خدویی اَ صلیب بیو زِیر و خوتَه نجات دِه! اوسون اُمون وَرِت ایمان میارِیم.»

![](https://cdn.door43.org/obs/jpg/360px/obs-en-40-06.jpg)

اَر چِه ظُور بید، اما آسُمونِ کُلِ او محل توریک بی‌یِس. ای توریکی چَن سو ساعت طول کَشید.

![](https://cdn.door43.org/obs/jpg/360px/obs-en-40-07.jpg)

بعدش عیسی داد زَند: «تموم بی‌یِس. ای پدر، روح خومَه به دَسِ تو بِ‌داهام.» اوسون سرِ خوشَه اُووُورد زِیر و روحِشَه تسلیم کُورد. او دَم که جون دا زمین به لَرزه افتید و پردِه گَپ معبد، که مردمه اَ حضور خدا جدا بِ‌کورد (قدس القداس)، اَ بالا تا زیر دو قَل بی‌یِس.

![](https://cdn.door43.org/obs/jpg/360px/obs-en-40-08.jpg)

عیسی پِی مُوردنِش رَهی گُشید تا مردم تَرِس‌سهَ بُوون پیشِ خدا آیِن. مُعادِی که پاسبونِ رومی ای جریونانَه دید گف: «اَراسینْ که ای پیا بی گناه بید. او پسر خدا بید.»

![](https://cdn.door43.org/obs/jpg/360px/obs-en-40-09.jpg)

بعدش دو تا اَ گَپون یهود، نیقودیموس و یوسف کِه ایمان داشتِن عیسی همو مسیحِ موعودَه، پیش پیلاتس رفتن و مَخاسِن جسد عیسانَ تحویل گِرن. اوشون جسدَ پِی پارچِه کتون پِیچِنیدن و مِی مقبَرِه سِنگی‌یِ وندنش و بَردِ گَپی دم درِ قبر وَندِن تا بَسَه بُووَه.

*مَتَلِی اَ کِتابِ مقدّس:   کتاب انجیل متی باب ۲۷ آیه‌های ۲۷ تا ۶۱، کتاب انجیل مرقس باب ۱۵ آیه‌های ۱۶ تا ۴۷، کتاب انجیل لوقا باب ۲۳ آیه‌های ۲۶ تا ۵۶، کتاب انجیل یوحنا باب ۱۹ آیه‌های ۱۷ تا ۴۲*

## 41. ۴۱- خدا عیسانَ اَ مِی مُوردون راسِه کُنَه

https://openbiblestories.org/l/def/story-41/

![](https://cdn.door43.org/obs/jpg/360px/obs-en-41-01.jpg)

بعدِ ایانْ که سربازون عیسانَ مصلوب کُوردِن، گَپونِ قومِ یهود پیش پیلاتس رَفتِن و گفتِن: «عیسی اَ دُرو گف که بعدَ سو روز اَ مِی مُوردون بِ‌ورسَه. سی ایانْ‌که شاگردونِش نَتَرِس‌سَه بُووِن جسدِشَه دُزِن، وا کَسی‌یَه وَنِیم تا سو روز اَ قبر پاسَبونی کُنه. اَر تَرِس‌سِن جسدَ دُزِن، اوسون تَرن ادعا کُنن که اَ مِی مُوردون وِرسیدَه.»

![](https://cdn.door43.org/obs/jpg/360px/obs-en-41-02.jpg)

پیلاتس گف: «سربازونِی پِی خُتون بَرِه و تا جایِی کِه تَرِه قبرَه حفظ کُنِه.» پَه اوشون بَردِ دَرِ قَبرَه مُـرِ موم کُوردِن و سربازونِی مِی اونجون سی پاسبونی وَندِن، تا کَسِی نتَرِس‌سَه بُووَه جَسَدَ دُزَه.

![](https://cdn.door43.org/obs/jpg/360px/obs-en-41-03.jpg)

سی‌ایانْ‌کِه روزبعدِ دَفنِ عیسی، یَعنِی روز شَبات کار کُوردَن ممنوع بید، هیچ کُو اَ رَفِیقونِ عیسی نَتَرِس‌سِن سر قبر رُووِن. اما دَمِ سَحَرِ روزِ بَعد، چندتا اَ زَنونْ آمادَه بیِس‌سِن تا سر قبر عیسی رُووِن و جَسَدِ عیسانَ خوشبو کُنِن.

![](https://cdn.door43.org/obs/jpg/360px/obs-en-41-04.jpg)

نُها ایانْ‌که زَنونْ اونجون رَسِن، وَر قبرْ زمینْ‌جُمبِه گَپِی اومَّه. مِلاکِه اَ آسمون زِیر اومَّه، سِنگِ دَرِ قَبرَ هُلُک دا کِنار و سَرِش نِشِس. او مِلاکَه مثِ تَشِ‌بِرقِ آسُمون روشنا بید. پاسَبونونْ پِی دیدَنِش اَقزَه تَرسیدِن که ملثِ مُوردَه سَرِ زِمین اُفتیدِن.

![](https://cdn.door43.org/obs/jpg/360px/obs-en-41-05.jpg)

وختِی که زَنونْ سَرِ قبرْ رَسیدِن، ملاکه به اوشون گف: «نَتَرسِی! عیسی اینجون نِی. او هموطور که قول دا بیدْ اَمِی مُوردون وِرسیدَه. مِی قَبرَ سِیل کُنِی بینِه.» زَنونْ مِی قَبرَ سِیل کُوردِن و جایی که جسدِ عیسانَ مِینِش وَندِن بید دیدِن، اما جسدی پیدا نَکُوردِن.

![](https://cdn.door43.org/obs/jpg/360px/obs-en-41-06.jpg)

اوسون ملاکه به زنون گف: «رُووِه بِه شاگِردون گُووِه کِه عیسی اَ مِی مُوردون وِرسیدَه وَ نُها شُمون بِه جلیل بِ‌رُووَه.»

![](https://cdn.door43.org/obs/jpg/360px/obs-en-41-07.jpg)

زَنونْ ای‌طور کِه خوشحال و وَم‌زِی‌یَه بیدِن، اَلا شاگردون رَفتِن تا خَبَرِ خُوشَه به اوشون رَسونِن.

![](https://cdn.door43.org/obs/jpg/360px/obs-en-41-08.jpg)

زمونِی که زَنونْ بِ‌‌دُووِس‌سِن کِه ای خبرِ خوشَه به شاگردون دِهِن، یَکِتی عیسی وَرشون ظاهر بی‌یِس. اوشون نُهاش زونی زِن. عیسی بِه اوشون گف: «نَ‌تَرسِی! رُووِه و شاگردونُمَه گُووه کِه بِه جلیل رُووِن و مُنَه مِی اونجونِ بینِن.»

*مَتَلِی اَ کِتابِ مقدّس:   کتاب انجیل متی باب ۲۷ آیه ۶۲ تا باب ۲۸ آیه ۱۵؛ کتاب انجیل مرقس باب ۱۶ آیه‌های ۱ تا ۱۱؛ کتاب انجیل لوقا باب ۲۴ آیه‌های ۱ تا ۱۲؛ کتاب انجیل یوحنا باب ۲۰ آیه‌های ۱ تا ۱۸*

## 42. ۴۲- ورگَشتَنِ عیسی بِه آسمون

https://openbiblestories.org/l/def/story-42/

![](https://cdn.door43.org/obs/jpg/360px/obs-en-42-01.jpg)

روزِی کِه خدا عیسانَ اَ مِی مُوردون راس کُورد، دو تا اَ شاگردونِش مُعادِ رَفتَن بِه یکی اَ شـرا نِزیک، اَ چیایی کِه سرِ عیسی اومَّه بید قِصَه بِ‌کوردِن. اوشون امید داشتِن کِه عیسی هَمو مسیح موعود بُووَه، اما او کُشته بی‌یِس بیدْ. ایسون زَنونْ بِ‌گُووِن اَندو زندَه بی‌یِس‌سَه، اما شاگردون نَدونِس‌سِن چیه قَبول کُنِن.

![](https://cdn.door43.org/obs/jpg/360px/obs-en-42-02.jpg)

عیسی بِه شاگردون نِزیک بی‌یِس و پِیشون قصه کُورد اما اوشون نَ‌اِشناختِنِش. عیسی اَزشون پرسید اَ چِه چِی قصه بِ‌کُنِن؟ بِه عیسی گفتِن کِه قصاشون اَ چیایی‌یَه که مِی ای چنْ روز، سی عیسی اتفاق اُفتیدَ. اوشون فکرِ کُوردِن کِه عیسی غریبِی‌یَه کِه اَ جریونا اورشلیم بِی خَبَرَه.

![](https://cdn.door43.org/obs/jpg/360px/obs-en-42-03.jpg)

بعدِش عیسی سیشون گف که کلام خدا سی مسیح چِه گُفتَه. خیلِی نُهاتَر پِیغمبرون گُفتن بید کِه بَدْ‌کارون مسیحَ غَشقِ وِلا بِدِهِن و بِکُشِنِش، اما او مِی روز سویُّم زندَه بِ‌بُووهَ.

![](https://cdn.door43.org/obs/jpg/360px/obs-en-42-04.jpg)

موقِعْ کِه او دو پیا بِه جایی کِه مَخاسن رَسیدِن، تقریبن شو بی‌یِس بید. اوشون اَ عیسی دعوت کُوردِن کِه شو پِیشِشون مَنَه، اووَم پِیشون واردِ خونَه بی‌یِس. مُعادِی کِه سَرِ سفره شوم نِشِس‌سِن، عیسی نونَه وِرداشت و شُکر کُورد و نونَه تیکه تیکه کُورد. یَکِتی تییاشون گُشِس‌سِن و همو دَم اُووَ اِشناختِن. اما عیسی همو دَم اَ نُهاشون غیب بی‌یِس.

![](https://cdn.door43.org/obs/jpg/360px/obs-en-42-05.jpg)

دوتاشون بِه یَکِ‌دو گُفتِن: «ایان عیسی بید، سی اِیان بیدْ مُعادِی کِه مطالب کتاب مقدَّسَه سیمون توضیح بِ‌دا، دل مِی دلمون نبید.» بَعد همو دَم به اورشلیم ورگَشتِن و وقتی رَسیدِن، بِه شاگِردون گُفتِن: «عیسی زِندَس! اُمون اووَ دیدیمَه.»

![](https://cdn.door43.org/obs/jpg/360px/obs-en-42-06.jpg)

مِی همون موقَعْ که مشغولِ قصه بیدِن، یَکِتی عیسی مِنجاشون ظاهر بی‌یِس و فرمود: «سالُم بایِه!» شاگردون فکر کُوردِن روحِی بِ‌بینِن، اما عیسی گف: «اَچه تَرسیدِی‌یَه! شَک دارِی کِه مو عیسی هیِسوم؟ بِه دَسِ پام سیِل کُنِه، ارواح ملث مو لار ندارِن.» و سی ایان کِه وَرشون نِشون دَهَه که روح نِی، ازشون مَخاس چِی دِهِنِش تا خُوَرَه. اوشون تیکه مُوهی دانِش و عیسی اوانَه خُوَرد.

![](https://cdn.door43.org/obs/jpg/360px/obs-en-42-07.jpg)

عیسی گف: «مو به شُمون گفتم کِه هر چِی مِی کلُوم خدا سی مُو گفتَه بیسَه، وا پِیش آیَه.» اُوسون عیسی کُمکشون کُورد کِه کلُوم خدانَه بِختر فَـمِن. او فرمود: «اَ زَمونا خیلی دیر مِی کتابا پِیغَمبرون نوشته بی‌یِس بید کِه مسیح موعود وا درد و عذابه بینه، میرَه و روز سُیوم اَ مِی مُوردون راس کُنَه.»

![](https://cdn.door43.org/obs/jpg/360px/obs-en-42-08.jpg)

پیغمبرون همیطور نوشتِنَه کِه شاگردونُم کلُوم خدانَه اعلُومِ کُنِن و بِه همه بِگووِن کِه وا توبَه کُنن. هر کَه توبه کُنَه، خدا گناهاشَه ببخشه. شاگردونِ مو اعلُوم ای پیامَه اَ اورشلیم شروعِ کُنِن، بعدش مِی هَمِه اقوام و مِی هَمَه جا بِ‎رُووِن. شُمون شاهدِ قِصّام، رفتار و کلِ چیایِی هِی‌سی کِه سَروم اُومَّه.»

![](https://cdn.door43.org/obs/jpg/360px/obs-en-42-09.jpg)

عیسی مِی چِل روز بعد اَ زنده بیسَن اَ مِی مُوردون، چَن کِتَه خوشَه بِه شاگردونِش نِشون دا. او حتا یه رَه خوشَه مِی یَه وَخْت بِه بیشتَرِ ۵۰۰ نفر ظاهر کُورد. او پِی رَها مختَلِفِی بِه شاگردونش ثابت کُورد کِه زندَس و بِه اوشون اَ پاتشاهی خدا چِی یادِ دا .

![](https://cdn.door43.org/obs/jpg/360px/obs-en-42-10.jpg)

عیسی بِه شاگردونِش فرمود: «خدا کلِ اختیارات زمین و آسمونَه بِه مو داس. پَه رووِه و کل اقوامَه شاگِردِ مو کُنِه و ایشونَه بِه نومِ پدر، پسر و روح القدس تعمید دیهِی و به اوشون یاد دیهِی کِه چطوری کل دستوراتی‌یَه کِه به شُمون دامه اطاعت کُنن. یادتون بُووَه کِه مو هِه پِه شُمونُم.»

![](https://cdn.door43.org/obs/jpg/360px/obs-en-42-11.jpg)

چل روز بعد ایان که عیسی اَ مِی مُوردون ورسید بِه شاگردونِش ای‌طور فرمود: «مِی اورشلیم مَنِه تا پدر مو پِی فرسنیدن روح القدس بِه شمون قدرت دهَه.» بعدَ اُوان، عیسی نُها تیا ایشون اَلا آسُمون بالا رفت و مِی اُوری ول بی‌یِس. عیسی دَس راس خدا نِشِس تا ور هَمَه چی حکومت کُنَه.

*مَتلی اَ کتاب  مقدس: کتاب متی باب ۲۸ آیه‌های ۱۶ تا ۲۰؛ کتاب مرقس باب ۱۶ آیه‌های ۱۲ تا ۲۰؛ کتاب لوقا باب ۲۴ آیه‌های ۱۳ تا ۵۳؛ کتاب یوحنا باب ۲۰ آیه‌های ۱۹ تا ۲۳؛ کتاب اعمال باب ۱ آیه‌های ۱ تا ۱۱*

## 43. ۴۳- بَناوندَنِ کلیسا

https://openbiblestories.org/l/def/story-43/

![](https://cdn.door43.org/obs/jpg/360px/obs-en-43-01.jpg)

بعد اِیان کِه عیسی بِه آسُمون وِرگَشت، شاگردون هَموجوری کِه عیسی فرمون دا بید، مِی اورشلیم موندِن. ایمان دارون بِه طور مرتب پِی هم گِردِ بیسِن تا دعا کُنِن.

![](https://cdn.door43.org/obs/jpg/360px/obs-en-43-02.jpg)

یهودیون هرسال روز مهمّی به نوم پنتیکاستَ جشن بِ‌گرُفتِن کِه برابر بید پِی پنجاهمین روز بعد عید پسخ. پنتیکاست جشن یهودیون سی دِروْ زراعتِ گَنُم بید. اوشون اَ کل دُیُنا بِه اورشلیم میومِن تا ای جشنَه پِی هم گرِن. مِی او سال، جشن پنتیکاست، حدود یَه هفته بعد اَ رفتن عیسی بِه آسمون بید.

![](https://cdn.door43.org/obs/jpg/360px/obs-en-43-03.jpg)

معادِی که کل ایماندارون دورِ هم جعم بیسِن بید، یَکِتی صدایی ملث صدای وزِّه باد تند فَـمیدِن. بعدش یَه چِی ملثِ گُله تَش سر کل هنون گُلِس. اُوسون کلشون اَ روح‌القدس پُر بیِس‌سِن و خدانَه بِه زبونایِی کِه نَ‌دونِس‌سِن پِرَستش کُوردِن. روح‌القدس قدرت قصه کُوردَنَه به اوشون دا بید.

![](https://cdn.door43.org/obs/jpg/360px/obs-en-43-04.jpg)

مُعادِی که آدمونی که بِه اورشلیم اومِّن بید، ای صدانَه فـمیدِن، دورِ هم گِرد بِیْیِس‌سِن کِه بینِن چِ بیسَه. اوشون فـمیدِن کِه ایماندارون کارا گَپِ خدانَه اعلُومِ کُنن. اوشون اَ ای جریون وَم‌زَشونْ بید، سی‌ایانْ‌کِه تَرِس‌سِن قصاشونَه حولی بُووِن. مِی کشور اوشون مردم زبونِ دِگِه داشتِن. شاگردون اَ اسروئیل بیدِن و تَرِس‌سِن فقط بِه زبونا آرامی، عبرانی و یا یونانی قصه کُنِن. اما هنون فـمیدن که شاگردون بِه زبون مادری شون کارا خدانَه اعلُومِ کُنِن.

![](https://cdn.door43.org/obs/jpg/360px/obs-en-43-05.jpg)

بعضیا هم گفتِن کِه شاگردون مَسْ بیسِنَه. اما پترُس وِیسید و بِه اوشون گُف: «گوش کُنِه! ای مردم مَس نِیسِن! بلکِی ایانَه همو پیشگویی یوئیل نبی‌یَه کِه خدا گُفْ بید: "مِی روزا آخِر، مُو روح خودُمَ وَر کل آدَمون بِه ریزُوم."

![](https://cdn.door43.org/obs/jpg/360px/obs-en-43-06.jpg)

ای قومِ اسروئیل، عیسی آدمی بید کِه کارا عجیبی بِ‌کُورد تا خُوشَه وَر اُومون شناسونَه. او پِی قدرت خدا کارا عجیبْ‌غریبی بِ‌کُورد. شومون ایانَه دونِی، سی‌ایان‌کِه شاهد کارا او بیدِی‌یَه. اما اووَ بِه صلیب کَشیدِی.

![](https://cdn.door43.org/obs/jpg/360px/obs-en-43-07.jpg)

عیسی مُورد، اما خدا اووَ اَ مِی مُوردون وِرسونید. ایانَه راسْ بیدَنِ پیشگویی او پیغمبرَ کِه گف: تو نَم‌هلی کِه لارِ بَچِه مقدست مِی قبر گندَه بُووَه. اومون شاهد ایان هِیسِیم که خدا عیسانَ اَ مِینِ مُوردون وِرسونید.

![](https://cdn.door43.org/obs/jpg/360px/obs-en-43-08.jpg)

خدای پدر، ایسون عیسانَ مِی بُلِندْترین جا آسُمون یعنی دَس راس خودش نشوندَه. عیسی هموطور کِه وعده دا بید روح‌القدسَ سی اُومون فرِسنید. ای کارا که اَمروز بِ‌بینِی و بِ‌فَـمِی روح‌القدس انجومِ دَهَه.

![](https://cdn.door43.org/obs/jpg/360px/obs-en-43-09.jpg)

شمون عیسانَ مصلوب کُوردِی، اما باوَر کُنِی کِه خدا اووَ، خداوند و مسیح، تعیین فرمودَه.»

![](https://cdn.door43.org/obs/jpg/360px/obs-en-43-10.jpg)

قصا پترس خِیلِی سَرِ مردم اثَر وَند. سی‌ایانَه اَ او و شاگِردونِه دِگَه پرسیدِن: «اِ بِرارون، ایسون تکلیف چیَه؟»

![](https://cdn.door43.org/obs/jpg/360px/obs-en-43-11.jpg)

پتروس جُواب دا: «کُلتون بِه آمرزِش اَ گناهان نیاز دارِی. پَه توبَه کُنِی و بِه نومِ عیسی مَسیح تعمید گِرِی. اوسون خدا پِیشْ‌کَشِ روح‌القدسَه هَم بِه شمون بِه دَهَه.»

![](https://cdn.door43.org/obs/jpg/360px/obs-en-43-12.jpg)

حدود ۳۰۰۰ نفر بِه قصا پترس ایمان اووُوردِن و شاگردِ عیسی بیسِن. اوشون تعمید اُو گِرُفتِن و بِه جَرگِه ایماندارون مِی کلیسا اورشلیم درومِن.

![](https://cdn.door43.org/obs/jpg/360px/obs-en-43-13.jpg)

ایماندارون مرتب بِه تعلیمات رسولون گوش بِ‌دان. دور یَکِ‌دو گرد بیسِن، پِی یَک غذا بِ‌خوردِن و دعا بِ‌کُوردِن. اوشون مِی جعم خدانَه بِ‌پِرَستیدِن و هر چِی داشتِن سر هَمِ وَندِن. مردم ازشون بِه خوبی یادِ کُوردِن و هر روز تعداد بیشتَرِی ایمان بِه اووُوردِن.

*مَتَلِی اَ کِتابِ مقدّس:  کتاب اعمال رسولان فصل 1 آیه ۱۲ تا ۱۴ و فصل ۲*

## 44. ۴۴- شفای پیا گَدا بِه دَسِ پتروس و یوحنا

https://openbiblestories.org/l/def/story-44/

![](https://cdn.door43.org/obs/jpg/360px/obs-en-44-01.jpg)

یه روز پترس و یوحنا اَلا عبادتگاه بِ‌رفتن. جفتِ دروازه پیا لَسمی‌یَه دیدن کِه گَدویی بْ‌کورد.

![](https://cdn.door43.org/obs/jpg/360px/obs-en-44-02.jpg)

پترس بِه او پیا لَسم سیلِی کُورد و گف: «مو هیچ پیلی نَ‌دارم کِه به تو داهام. اَما هر چِی دارم، بِه تو بِ‌داهام. بِه نُومِ عیسی وری رَه رو.»

![](https://cdn.door43.org/obs/jpg/360px/obs-en-44-03.jpg)

خدا هَمو دَم او پیانَه شفا دا و او بَنا بِه ره رفتن وَند و دورِشون شُودی بِ‌کورد و خدانَه بِ‌پِرَستید. آدَمونی کِه مِی حُوشِ پرستشگاه بیدن وَم‌زَشون.

![](https://cdn.door43.org/obs/jpg/360px/obs-en-44-04.jpg)

جماعت زیادی تُندی گِرد بیسِن تا او پیانَه که شَفا دید بید بینن. پترس بِه او جماعت گف: «اَ دیدنِ شفا ای پیا وَم‌زِی‌یَه مَبایِه. اُمون ای پیانَه پِی قدرت یا سی دلِ دیندوری خومون شفا نَ‌دایِمهَ، بلکِی ایان قدرت عیسی بیدَه کِه اووَ شفا داس، سی‌دل‌ایان کِه وَش ایمان دارِیم.

![](https://cdn.door43.org/obs/jpg/360px/obs-en-44-05.jpg)

شُمون کسونیِ هیسِی کِه اَ فرموندار رومی مَخاسِی کِه عیسانَ کُشَه. شمون کَسی‌یَه کِه بِه کُلْ جونِه دا کُشتِی، اما خدا اووَ اَ مِی مُوردون زندَه کُورد. اَر چِه شُمون نَدونِس‌سِی چِه بْ‌کُنِی، اما پیشگویی پیغمبرونَه عملی کُوردِی کِه گفتِن بیدْ مسیح وا غَشقِ ولا بُووَه و میرَه. خدا مخاس کِه ای‌طور بُووَه. پَه توبَه کُنِه و ری بِه خدا وِرگَردِه تا اووَم گناهاتونَه پاک کُنَه.»

![](https://cdn.door43.org/obs/jpg/360px/obs-en-44-06.jpg)

موقِعی کِه گپونِ پرستشگاه قِصا پتروس و یوحنانَ فَـمیدِن خِیلی جِر اومِّن. پَه اوشونَه گِرفتن و زندون بِس‌سِن‌شون. اما خیلی اَ اوشون کِه پِیغومِ پتروسَ فَـمیدِن، ایمان اووُوردن و تعداد ایماندارون بِه پِنْ هَزار نَفَر رَسید.

![](https://cdn.door43.org/obs/jpg/360px/obs-en-44-07.jpg)

سوباش، گپون یهود، پترس و یوحنانَ پِی پیا لَسم بِه خدمتِ کاهن گَپ و گپون مذهبی اووُوردن. اوشون اَ پترس و یوحنا پُرسیدِن: «پِی چه قدرتِی ای پیا لَسمَه شَفا دایِی یَه؟»

![](https://cdn.door43.org/obs/jpg/360px/obs-en-44-08.jpg)

پتروس جُواب دا: «ای پیا کِه نُهاتون ویسْتَس بِه قدرتِ عیسی مسیح شَفا پِیدا کُوردَه. شُمون عیسانَ بِه صلیب کشیدِه، اما خدا اُووَ اَندو زندَه کُورد! شُمون اووَ رَد کُوردِه، اما رَه نجاتِ دِگِه نِی، بِ‌غِیرَ قدرت عیسی!»

![](https://cdn.door43.org/obs/jpg/360px/obs-en-44-09.jpg)

گَپون دینی دلِ‌جرأتِ پتروس و یوحنانَ کِه دیدِن وَم‌زَشون، سی‌دل‌ایان کِه اوشون آدَمونی بِی‌سواد و عادی بیدن. اُسون یادشون اومَّه کِه ای پیاهون پِی عیسی بیدنَه. پَه بِه اوشون گفتِن: «اَر اَندو پِی مردم اَ عیسی قصه کُنِه شمونَه بدجُوری غَشقِ دِهِیم.» اوشون بعدِ ایان که پتروس و یوحنانَ ترسوندِنُ وِلشُون کُوردِن.

*مَتَلِی اَ کتاب  مقدس: کتاب اعمال رسولان فصل ۳ و فصل ۴ آیه ۲۲*

## 45. ۴۵- استیفان و فیلیپس

https://openbiblestories.org/l/def/story-45/

![](https://cdn.door43.org/obs/jpg/360px/obs-en-45-01.jpg)

یکی اَ گَپونِ کلیسا اولیه، کَسِی بِه نومِ اِستیفان بیدْ کِه کُل وَرِش احترامِ وَندِن. روح‌القدوس بِه او قدرت بدنی و دونُویی دا بید. استیفان معجزا زیادِی نِشونه دا و خیلیا پِی قصا او به عیسی ایمان اووُوردِن.

![](https://cdn.door43.org/obs/jpg/360px/obs-en-45-02.jpg)

یه روز که اِستیفان مشغول یاد دایَن اَ عیسی بید، بعضی اَ یهودیون که بِه عیسی ایمان نداشتِن، شروع به جَر پِی اِستیفان کُوردِن. اوشون خیلی جِر اومِّن و بِه گَپونِ دینی اَ اِستیفان الکی گفتِن: «امون فَـمیدِیمَه که او اَ موسی و خدا، قصا گَندِی بِ‌گف.» پَه گَپون دینی، استیفانَ گرفتن و اووَ پیش کاهن گپ و بقیه گَپونِ یهودی بُوردِن. بعدش شاهدون الکی زیادی اومِن و اَ او دُرو گفتِن.

![](https://cdn.door43.org/obs/jpg/360px/obs-en-45-03.jpg)

کاهن گپ اَ اِستیفان پرسید: «هرچِی ای آدمُون درمورد تو بِ‌گُووِن حقیقت داره؟» استیفان سی جواب به ای سئوال، قِصّا زیادی به کاهن گپ گف. او گف که خدا اَ زمون ابراهیم تا دورِه عیسی، کارا گَپِ زیادی سی یهودیون کُوردَه، اما یِی قوم هر دم اَ او نافرمونی کُوردِنَه. استیفان بِه اوشون گفت: «شُمون قومی هیسی کِه سخت ناها خدا نافرمونی بِ‌کُنِی. شمون هِی روح‌القدسَه رد کُوردِی‌یَه، دقیقن هموطور کِه اجدادمون هِی خُدانَه رد کُوردِنَه و پیغمبرونشَه کُشتِنَه. اما شمون کاری بَتَر اَ اُوان کُوردِی‌یَه، شمون مسیحَ کُشتِی‌یَه!»

![](https://cdn.door43.org/obs/jpg/360px/obs-en-45-04.jpg)

مُعادِی کِه گَپونِ دینی ای قصانَ فهمیدِن خیلی جِر اومِّن، گوشاشونَه گرفتِن و داد زَندِن. اوشون استیفانَ اَ شـر به دَر بُوردِن و سِنگسارِش کُوردِن تا میرَه.

![](https://cdn.door43.org/obs/jpg/360px/obs-en-45-05.jpg)

استیفان مِی حالی که داشت جونِه کَند، داد زَه : «اِی عیسی! روح مُونَه گِر.» اوسون سرِ زونِی ویسید و اندو داد زَه: «اِی خدا! ای گناهَه پا ایشون حساب مَکُن.» و بَعدش جونْ دا.

![](https://cdn.door43.org/obs/jpg/360px/obs-en-45-06.jpg)

او روز خیلی اَ مردوم اورشلیم شروع به اذیت و آزارِ پیروان عیسی کُوردِن و ایماندارون به ولاتا دِگَه گُرُختِن. اما پِی هَمِه ای چیا، اوشون به هرجا کِه بِ‌رَفتِن اَ عیسی قصّه بِ‌کُوردِن.

![](https://cdn.door43.org/obs/jpg/360px/obs-en-45-07.jpg)

یکی اَ شاگردونِ عیسی به نوم فیلیپُس پِی خِیلِی دِگَه اَ ایماندارون، می وقت سَختی اَ اورشلیم گُرُختِن بید. او اَلا سامره رفْ بید، مِی اونجون سی عیسی موعظه کُورد و خِیلِی اَ مَردُمِ اونجون نجات یافتِن. بعدِش یَه روز، ملاکه اَ طرف خدا به فیلیپُس فَرمون دا تا به جعدِی مِی بیابون رووَه. مُعادِی که او مِی او جعدَه بید، یکی اَ گَپونِ مهم حبشه‌نَه دید کِه پِی درشکش مسافرتِ کُورد. روح‌القدس به فیلیپُس فرمایِش کُورد تا پیش او پیا رُووَه و پی‌یِش قصّه کُنَه.

![](https://cdn.door43.org/obs/jpg/360px/obs-en-45-08.jpg)

مُعادِی کِه فیلیپُس بِه درشکَه نِزیک بی‌یِس، فَـمید کِه او پیا حبشی قسمتی اَ کتاب اشعیای نبی‌یَه بِ‌خونَه. اونجونی کِه بِ‌گُووَه: «لِف کُووِه که سی قربانی بِبَرِن و بَرِه که پیش پشم چِنون ساکِتَه، هیچ قِصّه نگف. پِی‌یِش ناعادلانَه رفتار کُوردِن و وَش احتروم نَ‌وندِن. اوشونْ جونِشَه گِرُفتِن.»

![](https://cdn.door43.org/obs/jpg/360px/obs-en-45-09.jpg)

فیلیپُس اَ پیا حبشی پرسید: «تری فَـمی او چِی کِه بْ‌خونی چِه معنی‌یِه بِ‌دَهَه؟»حبشی جُواب دا: «نه. مو نترم فَـمُم مگر کسی سیوم توضیح دَهه. بی زَحمَت بیو جُفت مو نِشین. اشعیا ایانَه اَ خودش یا کسی دگه بِ‌گووَه؟»

![](https://cdn.door43.org/obs/jpg/360px/obs-en-45-10.jpg)

فیلیپُس مِی دُرشکَه رفت و جفتش نِشِس، بعد سی حبشی توضیح دا که اشعیا او تیکَه‌نَه سی عیسی نوشته. فیلیپُس خیلی اَ قسمتا کلُوم خدانَه سی او شرح دا و پیغومِ انجیل عیسانَ وَرِش رَسوند.

![](https://cdn.door43.org/obs/jpg/360px/obs-en-45-11.jpg)

مِی وَضعِی که فیلیپُس و پیا حبشی داشتِن جلو بِ‌رَفتِن، به یَه استخرِ اُووی رَسیدِن. پیا حبشی گفت: «سیل کُن اینجون اُو هِی! مُمکِنَه مو تعمید گِرُم؟» و به نوکر خودش فرمون دا که درشکَنَه وادونَه.

![](https://cdn.door43.org/obs/jpg/360px/obs-en-45-12.jpg)

پَه اوشون مِی اُو رفتِن و فیلیپُس پیا حبشی‌یَه تعمید دا .مُعادِی کِه اَ اُو دِرومِن دَر، یَکِتی روح‌القدس فیلیپُسَ مِی جایی دِگه بُورد. فیلیپُس مِی اونجون بِه موعظه اَ عیسی ادامَه دا.

![](https://cdn.door43.org/obs/jpg/360px/obs-en-45-13.jpg)

پیا حبشی به سفر خودش اَلا خونَه‌ش ادامه دا. او اَ اِیانْ کِه عیسانَ اِشناختْ بید خوشحال بید.

*مَتَلِی اَ کِتابِ مقدّس:   کتاب اعمال رسولان باب ۶ تا ۸*

## 46. ۴۶- پولس مسیحی بِ‌بُووَه

https://openbiblestories.org/l/def/story-46/

![](https://cdn.door43.org/obs/jpg/360px/obs-en-46-01.jpg)

پیایِی بید به نوم سولُس که مِی جَوُونی معادِ کُشتن استیفان، رَختا یهودیونَه بِ‌پویید و وَر عیسی ایمان نداشت. او مسیحیونَه آزارِ دا و مِی اورشلیم اَ ای حوش بِه او حوش بِ‌رفت تا مِیرون و زَنونَه گِرَه و مِی زندون بَهَ. کاهن گَپ گفتِش کِه به شَـرِ دمشق رُووَه تا مسیحیونِ اونجونَه گِرَه وَ بِه اورشلیم وِرگَردونه.

![](https://cdn.door43.org/obs/jpg/360px/obs-en-46-02.jpg)

پَه سی‌ایان سولس اَلا دَمشق رَفت. نُها رَسیدن به اونجون، نور براقی اَ آسمون ایلا اولاشَه گِرُفت و بِه زِمین اُفتید. سولُس صدایی فَـمید که گفتِش: شائول، شائول، سی چه وَر مو آزارِ رَسونی؟ سولس پرسید: «آقا، تو کی هیسی؟» عیسی بِه او جُواب دا: «مو عیسی هِیسوم. هَموان که عاجِزِش بِ‌کُنی!»

![](https://cdn.door43.org/obs/jpg/360px/obs-en-46-03.jpg)

مُعادِی کُه سولُس اَ جاش وِرسید، تیاش نَم‌دیدِن. رَفیقونِش اووَ اَلا دمشق رَهنُمونی کُوردِن. سولُس مدت سو روز، غذا و اُو نَ‌خوَرد.

![](https://cdn.door43.org/obs/jpg/360px/obs-en-46-04.jpg)

مِی ولات دمشق، شاگِردِی به نوم حنانیا زِندی بِ‌کُورد. خدا بِه او فرمود: مِی حوشی رو که سولُس مینِش وِیستَس. دَسا خوتَه وَن وَرِش تا اَندو تیاش روشنا بُووِن.» اما حنانیا گفت: «خداوندا! مُو فَـمیدُمَه که ای پیا چطور وَر ایماندارون آزارِ رَسونَه.» خدا در جُوابش گف: «رو! مو ایانَه بِزنیدُمَه تا نوم مونه به یهودیون و قبیلا دِگَه اعلُوم کُنَه. او سی‌دل نوم مو، خِیلِی غَشقِ وِلا بِ‌بُووَه.»

![](https://cdn.door43.org/obs/jpg/360px/obs-en-46-05.jpg)

پَه حنانیا پیش سولُس رفت ودساشَه وَرش وند و گف:«همو عیسی که مِی رَه وَرِت ظاهر بی‌یِس، مونه فرسنید تا روشنویی تیاتَه اَندو بِدَس اُوری و اَ روح‌القدس پُر بُووی.» سولُس یکتی تَرِس اَندو بینه و حنانیا اووَ تعمید دا. اوسون سولُس چِی خورد و زورش وِرگشت.

![](https://cdn.door43.org/obs/jpg/360px/obs-en-46-06.jpg)

سولُس تندی، موعظه سی یهودیون دمشقَ شروع کورد و بِ‌گفت: «عیسی پسر خداست!» یهودیون وَم‌زَشون بید، سی‌ایان‌که پیایِی کِه مَخاس ایماندارونَه اَ بین بَره، ایسون خودش به عیسی ایمان اووُورده! سولُس پِی یهودیون یَکِ‌دو کُورد. او ثابت کُورد که عیسی همو مسیحَه.

![](https://cdn.door43.org/obs/jpg/360px/obs-en-46-07.jpg)

بعد چن روز، یهودیون کمر به کُشتَن سولُس بَسِن. اوشون کَسونیه فِرِسنیدن تا اووَ مِی دروازا شَـر جورِن و کُشِن. اما سولُس اَ برنامَه‌شون با خبر بی‌یِس و رفیقونِش کمکش کُوردِن تا گُروزَه. یَه شو وندِنِش مِی سَلِی وَ اَ دیوارا شَهر فرسنیدنِش زِیر. بعد ایانْ کِه سولُس اَ دمشق گُرُخت، به موعظه اَ عیسی ادامَه دا.

![](https://cdn.door43.org/obs/jpg/360px/obs-en-46-08.jpg)

سولُس به اورشلیم رف تا پِی رسولون دیدار کُنَه، اما اوشون اَزِش ترسیدِن. اوسون یَه ایماندار به نوم برنابا، سولُسَ پیش رسولون بُورد. او سیشون گف که چطوری سولُس، پِی شجاعت مِی دمشق موعظه کُورد بید. بعدِ ایان بید که رسولون، سولُسَ قبول کُوردِن.

![](https://cdn.door43.org/obs/jpg/360px/obs-en-46-09.jpg)

بعضی اَ ایماندارون که اَ سُتَمِ شَـرِ اورشلیم گرُختِن بید، به شَـرِی دیر به نوم انطاکیه رفتِن و اَ عیسی موعظه بِ‌کُوردِن. خیلی اَ مَردُمِ انطاکیه یهودی نبیدِن، اما سی رَه اول ایمان اووُوردِن. برنابا و سولُس به اونجون رَفتن تا بِه ایماندارون جدید، اَ عیسی بیشتر یاد دِهن و کلیسانَه تقویت کُنن. مِی انطاکیه بید که ایماندارون به مسیح، سی ره اول «مسیحی» نومدار بیسِن.

![](https://cdn.door43.org/obs/jpg/360px/obs-en-46-10.jpg)

یه روز مسیحیون انطاکیه مَشغولِ دعا و روزَه بیدن که روح‌القدس وَرشون فرمود: «برنابا و سولُسَ سی کاری که اوشونَه سی انجومش خُوندُمَه، جداکُنِی.» اوسون کلیسا انطاکیه دسا خوشونَه ری برنابا و سولُس وَندِن و سیشون دعا کُوردِن. بعدِش اوشونَه فرسنیدِن تا براتِ (خبر خوش) عیسانَ مِی جاها دِگِه موعظه کُنِن. برنابا و سولُس به مردم زیادی اَ طایُفا دِگِه یاد دان و خیلِیا وَر عیسی ایمان اووُوردن.

*متَلی  اَ کتاب مقدس: کتاب اعمال رسولان باب ۸ آیه ۳؛ باب ۹ آیه ۱ تا ۱۳؛ باب ۱۱ آیه‌های ۱۹ تا ۲۶؛ باب ۱۳ آیه‌های ۱ تا ۳*

## 47. ۴۷- پولِس و سیلاس مِی فیلیپی

https://openbiblestories.org/l/def/story-47/

![](https://cdn.door43.org/obs/jpg/360px/obs-en-47-01.jpg)

سولُس مُعادِی کِه مِی دور تا دورِ امپراتوری روم مسافرتِ کُورد، بَنا وَند کِه اَ نُوم رومی خودش کِه پولُس بید، استفادَه کُنَه. یَه روز پولُس و رفِیقش سیلاس اَلا شهر فیلیپی رَفتن تا خبر خوشِ عیسانَ اعلُوم کُنِن. اوشون بِه کِنار روخونِه‌ کِه اَ شهر دَر بید رَفتن. مردم مِی اونجون گِرد بیسِن بید تا دعا کُنن. اوشون اونجون یَه زونِه بِه نومِ لیدیه‌نَه دیدِن، کِه تاجِری بید. او خدانَه دوسْ داشت وَ اووَ بِ‌پِرَستید.

![](https://cdn.door43.org/obs/jpg/360px/obs-en-47-02.jpg)

خدا لیدیانَ قوت دا تا بِه عیسی ایمان آرَه. پولُس و سیلاس اووَ پِی خونوادش تعمید دان. بعدش او، پولُس وسیلاسَ دعوت کُورد تا مِی خونه‌ش مَنن و اوشون هم پیشش مُوندِن.

![](https://cdn.door43.org/obs/jpg/360px/obs-en-47-03.jpg)

پولُس و سیلاس خِیلِی اَ وَختا مِی جایی کِه یهودیون دعا بْ‌کوردن بِ‌دیدَنِ مردم بِ‌رَفتن. اونجون کنیزِی بید کِه روح گَندِی داشت و هر روز دُماشون میومه. او پِی کمک ای روحِ گَند، آیندَه‌نَه سی مردم پیش بینی بِ‌کورد و ای‌طور بید کِه بِه نومِ غیب‌گو، سود گَپِی نصیب سرورونِش بِ‌کورد.

![](https://cdn.door43.org/obs/jpg/360px/obs-en-47-04.jpg)

او کنیز مُعادِی کِه هُنون رَه بِ‌رَفتن پی غِرغو بِ‌گف: «ای پیاهون نوکرونِ خدای متعال هِیسِن. ایشون رَه نِجاتَه بِه شُمون نِشونِ دِهن.» او روزا زیادی ای‌طور کُورد تا ایان‌کِه حوصله پولُس سر رَفت.

![](https://cdn.door43.org/obs/jpg/360px/obs-en-47-05.jpg)

آخِر سَر یَه روز مُعادِی کِه او کنیز داد بزَه، پولُس بِه او ری کُورد و بِه روحِ گَندِی کِه مِینِش بید گف: «بِه نُومِ عیسی اَ جِلد ای موهینَه بیو در.» روحِ گَند هَمو دَم اووَ وِل کُورد.

![](https://cdn.door43.org/obs/jpg/360px/obs-en-47-06.jpg)

مُعادِی کِه اربابونِ کنیز، دیدِن چِه پِیش اومَسَه، خِیلی جِر اومِن. ایانْ نشونِ دا کِه مردم دِگَه بِه اربابون او دختر پیل نَم‌دِهِن. سی‌ایان‌کِه فَـمیدِن بید کِه بِی او روح گَند، کنیز دگَه نتَرَه پیش گویی کُنَه.

![](https://cdn.door43.org/obs/jpg/360px/obs-en-47-07.jpg)

پَه اربابونِ او کنیز، پولُس و سیلاسَ پیش مقاماتِ رومی بُوردِن. اوشون پولُس و سیلاسَ کُتک زَندن و بِه زندون بِس‌سِن.

![](https://cdn.door43.org/obs/jpg/360px/obs-en-47-08.jpg)

هُنون پولُس و سیلاسَ بِه جایی اَ زندون کِه خِیلِی پاسَبون داشت بِس‌سِن. اوشون همیطور پاها ایشونَه پِی تیکا گَپِ چو بَسِن. پِی یِی وَضع اوشون مِنجا شو، اشعارِی سی تعریف دایَن اَ خدا و پِرَستِش او بِ‌خوندِن.

![](https://cdn.door43.org/obs/jpg/360px/obs-en-47-09.jpg)

یَکتی زمینْ‌جُنبِش گَپِی، اومَه! کل درا زندون گُشِس‌سن و زنجیلا کُل زندونیون اَ هَم جِدا بیسِن.

![](https://cdn.door43.org/obs/jpg/360px/obs-en-47-10.jpg)

بعدش پاسَبون بیار بی‌یِس و دید دَرا زِندون گُشیدِن. او مَرِس کِه کُل زندونیون گُرُختِنَه و اَ ترس مجازات مُوردن بِه دَسِ گَپونِ حکومَتِ روم، بَناوَند خوشَه کُشَه، اما پولُس اووَ دید و داد زَه: «خوتَه اَ بین مَبَر! کُلمون اینجونِیم.»

![](https://cdn.door43.org/obs/jpg/360px/obs-en-47-11.jpg)

پاسَبون پِی ترسِ لَرز اَلا پولُس و سیلاس اومَه و پُرسید: «چِه وا کنم کِه نِجات پیدا کُنُم؟» پولُس جُواب دا: «بِه عیسی خداوند، ایمان بیار بعدش خوتو خونوادَت نجات پیدا بِ‌کُنِی.» اوسون پاسَبون پولُس و سیلاسَ خونِه خودش بُورد و زخماشونَه شُشت. پولُس خبرِ خوشِ عیسانَ سی همه کسونی کِه مِی خونه‌ش بیدِن گف.

![](https://cdn.door43.org/obs/jpg/360px/obs-en-47-12.jpg)

او پاسَبون و کل خونوادش بِه عیسی ایمان اووُوردن و پولُس و سیلاس اوشونَه تعمید دان. اوسون پاسبون بِه پولُس و سیلاس غذا دا و پِی یَک جشن گِرُفتن.

![](https://cdn.door43.org/obs/jpg/360px/obs-en-47-13.jpg)

سوباش، گپون شهر پولُس و سیلاسَ اَ زندون آزاد کُوردن و ازشون مَخاسِن کِه فیلیپی‌یَه هِلِن و رووِن. پولُس و سیلاس بِه دیدن لیدیه و چندْتا اَ رفیقونشون رفتِن و دُماش اَ شَـر رَفتِن. خبر خوشِی کِه اَ عیسی بید پخشِ بی‌یِس و کلیسا داشتْ گَپِ بی‌یِس.

![](https://cdn.door43.org/obs/jpg/360px/obs-en-47-14.jpg)

پولُس و گَپونِ دگِه مسیحی به خیلی اَ شَـرا مسافرت کُوردن. اوشون بِه یاد داین و موعظه سی خبر خوشِ عیسی سرگرم بیدِن. اوشون همیطور خیلی نُومَه نوشتن تا ایماندارونَه مِی کلیساها یاد دِهن و تشویقشون کُنن. بعضی اَ یِی نُومِه‌ها بعدَن عَوَضِ کتابایِی اَ کِتابِ مقدس اومِّن.

*متَلی  اَ کتاب مقدس:  کتاب اعمال رسولان فصل ۱۶ آیه های ۱۱ تا ۴۰*

## 48. ۴۸- عیسی مَسیحِ موعودَه

https://openbiblestories.org/l/def/story-48/

![](https://cdn.door43.org/obs/jpg/360px/obs-en-48-01.jpg)

مُعادِی کِه خدا دُیُنانَه آفِرید، کلِ چیا کامل بیدن و گناه نبید. آدم و حوا یَکِ‌دووَه دوس داشتِن و بِه خدا دِل دان بید. هیچ مریضی یا مُوردَنِی نبید. ایانَه همو دُیُنایی بید که خدا مَخاس.

![](https://cdn.door43.org/obs/jpg/360px/obs-en-48-02.jpg)

شیطان پِی ماری کِه مِی باغ بید، پِی حوا قصَّه بِ‌کورد. سی‌ایان‌کِه مَخاس اووَ فِرِیبنَه. بعدِش آدم و حوا گناه کُوردِن. سی دِلِ نافرمونِی اوشون، هَمِه آدمون محکوم بِه مُوردَنِن .

![](https://cdn.door43.org/obs/jpg/360px/obs-en-48-03.jpg)

حتا سی دِلِ گناه آدم و حوا اتفاقِ کَسْ‌مَبینایِی سیشون پِیش اومَّه. اوشون دِشمِنون خدا بیسِن. سی‌دِل‌ایان اَ او زمون تا ایسون، کُل گناه کُوردنَه. هر کَه اَ موقِعْ کِه بِدُیُنا میا دِشمِنِ خداس. بِینِ خدا و بشر ارتباطِ خوبِی نَبیدَه، اما خدا مَخاس تا صلح بُووَه.

![](https://cdn.door43.org/obs/jpg/360px/obs-en-48-04.jpg)

خدا قول دا کِه کَسِی اَ نسل حوا مِی سرِ شیطان بِ‌کُووَه و شیطان هَم گِندیکِشَه بِگَزهَ. بِه ای معنی کِه شیطان مَسیحَ بِ‌کُشَه. اما خدا اندو اووَ جونِ دَهَه. اوسون مسیح موعود سی هَمیشَه قدرت شیطانه اَ بِینِ بَرَه. بعدَ سالا زیادِی خدا معلوم کُورد کِه عیسی، همو مسیح موعودَه.

![](https://cdn.door43.org/obs/jpg/360px/obs-en-48-05.jpg)

خدا بِه نوح فرمون دا کِه کَشتی‌یِ سازَه تا خونوادَشَه اَ طوفونی که بفرسنَه نجات دهَه. ای‌طور خدا کسونی‌یَه کِه وَرِش ایمان داشتن نجات دا. ایطوری‌یَه کِه هَمِه آدمون سی دِل گناهاشون محکوم بِه مُوردَن اَ جانُبِ خدا هِیسِن. اما خدا عیسانَ فرسنید، تا هر کَه وَرِش ایمان آرَه نجات پیدا کُنَه.

![](https://cdn.door43.org/obs/jpg/360px/obs-en-48-06.jpg)

سی چَن صد سال، کاهنون سی دِلِ آدمون مِی درگاه خدا قربانی بْ‌کوردِن. ای کار بِه مَردم نِشونِ دا که گناه بارِن، و اَ کَمِ‌ایان خدا غَشقِ وِلاشونِ کُنَه. اما او قربانیون نترس‌سِن مایِه بخشِش گناهان آدمون بُووِن. عیسی کاهن گَپَه. او کاری کُورد که کاهنون نتَرِس‌سِن کُنِن. او خوشَه اَ بین بُورد تا قربانی‌یِ سی نسل بشر آمادَه کُنَه. او قبول کُورد کِه سی دِل گناهان کُل آدمون، مجازات بُووهَ. سی‌ایان عیسی کاهن گَپَه.

![](https://cdn.door43.org/obs/jpg/360px/obs-en-48-07.jpg)

خدا بِه ابراهیم گفْ بید: «بِه دَسِ تَو کُلِ قبیلا دُیُنانَه برکتِ داهام.» عیسی اَ نَسلِ ابراهیم بید. خدا هَمِه قوما دُیُنانَه به دَسِ ابراهیم برکت بِ‌دهه، سی ایان کِه هر کَه وَر عیسی ایمان میارَه، اَ گناه نجات پیدا بِ‌کُنَه. مُعادِی کِه ای مردُم وَر عیسی ایمان میارِن، خدا اوشونَه اَ نَسلِ ابراهیم دونَه.

![](https://cdn.door43.org/obs/jpg/360px/obs-en-48-08.jpg)

خدا بِه ابراهیم فرمون دا تا کووَکِشْ اسحاقَ سی‌یِش قربانی کُنَه، اما خدا کُووِه اَ جا اسحاق آمادَه کُورد. تا قربانی بُووَه. کُل اُمون اَ کَمِ گناهامون محکوم بِه مُوردنِیم. اما خدا عیسانَ بِه دُیُنا بَخشید تا اَ کَمِ اُمون قربانی بُووَه و میرَه. سی دل ایان عیسانَ کُووِه خدا بِ‌گُووِیم.

![](https://cdn.door43.org/obs/jpg/360px/obs-en-48-09.jpg)

مُعادِی کِه خدا بلا آخِرَه سَرِ مصر اووُورد، بِه هر خونوادِی اسروئیلی فرمود تا یَه بَرَه کُشَه. ای بَرَه واسکِی بی عیب بُووَه. بعدش اوشون واسکِی خین اوانَه وَر بالا و کِنارا چار چو درِ خونَه تِشکِنِن. موقِعْ کِه خدا او خینَه بدید، اَ حوشا اوشون رَدِ بی‌یِس و کووَکِ نُوری او خونَه‌نَه نَم‌کُشت. مُعادِی کِه ای قضیه پِیش اومَه، خدا اوانَه پِسَخ نوم وَند.

![](https://cdn.door43.org/obs/jpg/360px/obs-en-48-10.jpg)

عیسی مِث کُووِه عید پِسَخَه. او اَتَّه اشتباهی نَ‌کُورد بید و اتَّه گناهی نَ‌کُورد. او مِی همو روزا عید پِسَخ مُورد. مُعادِی کِه کَسی بِه عیسی ایمان میارَه، خینِ عیسی، کَفاره گناه او شخصْ حسابِ بُووَه. تو گو خدا، پِی مجازات نَ‌کُوردَن او، اَ او رَدِ بُووَه.

![](https://cdn.door43.org/obs/jpg/360px/obs-en-48-11.jpg)

خدا پِی بنی اسروئیل پیمون بَس، سی‌ایان‌کِه اوشون قومِی بیدِن کِه او انتخابشون کُورد بید تا مال او بُووِن، اما ایسون خدا پیمونِ تازِه اووُوردَه کِه دَمِ دَسِ هر آدمی هِی. هر کَه از هر قوم یا طایُفِه، اگر یِی پیمونَه قَبول کُنَه، بِه قوم خدا اضافِ بُووَه. او اَ کَمِ ایمان بِه عیسی بِه قوم خدا اضافِ بُووَه.

![](https://cdn.door43.org/obs/jpg/360px/obs-en-48-12.jpg)

موسی پیغمبرِی بیدْ کِه کلُومِ خُدانَه پِی قدرت زیادِی اعلُومِ کُورد. اما عیسی گَفترین پیغمبرونَه .او خداست، پَه هَر چِه او بِ‌کُورد و گُف کارا و قِصّا خدا بیدِن. سی ایانَه کِه کتاب مقدس عیسانَ، کلمِه خدا بِ‌خونَه.

![](https://cdn.door43.org/obs/jpg/360px/obs-en-48-13.jpg)

خدا بِه داوود پاتِشاه وَعدَه دا کِه کَسِی اَ نَسلِ او بِه نومِ پاتِشا تا ابد وَر قوم خدا حکومتِ بِ‌کنَه. عیسی پسرِ خدا و مسیحای موعودَه و او اَ نَسلِ داوودَ کِه تَرَه تا اَبد پاتِشوهی کُنَه.

![](https://cdn.door43.org/obs/jpg/360px/obs-en-48-14.jpg)

داوود پاتِشاه قوم اسروئیل بید، اما عیسی پاتِشاه کُل دُیُناس! او اَندو میایَه و پِی انصاف و صلح تا ابد پاتِشوهی بِ‌کُنَه.

*مَتلی  اَ  کتاب مقدس: کتاب پیدایش فصل ۱؛ فصل ۳؛ فصل ۶؛ فصل ۱۴؛ فصل ۲۲؛ کتاب خروج فصل ۱۲؛ فصل ۲۰؛ کتاب دوم سموئیل فصل ۷؛ کتاب عبرانیان فصل ۳ آیه های ۱ تا ۶؛ فصل ۴ آیه ۱۴؛ فصل ۵ آیه ۱۰؛ فصل ۷ آیه ۱؛ فصل ۸ آیه ۱۳؛ فصل ۹ آیه ۱۱؛ فصل؛ کتاب مکاشفه فصل ۲۱*

## 49. ۴۹- پیمونِ تازِه خُدا

https://openbiblestories.org/l/def/story-49/

![](https://cdn.door43.org/obs/jpg/360px/obs-en-49-01.jpg)

ملاکِه به دختر جَوونی به نومِ مریم گف که او پسر خُدانَه به دُیُنا میارَه. مُعادِی که مریم هَنی باکرَه بید، روح‌القدس مِی او دمید و وِس‌سَن بی‌یِس. او کووَکِی اووُورد دُیُنا که نومشَه عیسی وند. اَ کَمِ ایان، عیسی هم خدا و هَم آدمَه.

![](https://cdn.door43.org/obs/jpg/360px/obs-en-49-02.jpg)

عیسی معجِزا زِیادِی انجوم دا که ثابت کُنَه او خداسْ. او ری اُو رَه ‌رَفت، طوفونَه آرُوم کُورد، مریضونِ زیادیَه شَفا دا، اَ آدما زیادی ارواحِ گندَه خارج کُورد، مُوردونَه زنده کُورد و پِنْ نون و دو تا موهی کوچُکَه برکت دا و به غذایِ خوبِی سی سِیر کُوردَنِ بیشتر اَ ۵۰۰۰ آدم جاگُرون کُورد.

![](https://cdn.door43.org/obs/jpg/360px/obs-en-49-03.jpg)

عیسی معلم گپی هم بید. کُل چیایِی کِه یادِ دا اَراسین بیدِن. مَردُم هر چِی کِه او بِ‌گُف واسکی انجوم دِهن، سی‌ایان‌کِه او پسر خدا بید. سی نمونَه او یاد دا که وا پِی بقیه مِثِ خومونْ محبت کُنِیم.

![](https://cdn.door43.org/obs/jpg/360px/obs-en-49-04.jpg)

او همیطور به اوشون یاد دا که خدانَه وا بیشتر اَ هر چِی، حتا اَ مال خوشون دوسْ داشتَه بُووِن.

![](https://cdn.door43.org/obs/jpg/360px/obs-en-49-05.jpg)

عیسی گف که بِیدَن مِی پاتشوهی خدا، با ارزِشتَرْ اَ هر چِی مِی یِی دُیُناسْ. سی رَفتَن مِی پاتِشوهی خدا، ‌او تُنَه وا اَ گناهات خَلاص کُنَه.

![](https://cdn.door43.org/obs/jpg/360px/obs-en-49-06.jpg)

عیسی گف بعضی اَ آدمون اووَه بِ‌پذیرن، بعدش خدا اوشونَه نِجاتِ دهَه؛ اما کُل اووَ قبول نَم‌کُنِن. او همیطور ایانَه گف که بعضی اَ آدمون لِفِ خاکِ خوبْ هِیسِن، وَقتِی کِه خبر خوشِ عیسانَ قبول کُنِن و خدا اوشونَه خلاصِ کُنَه. دَسِه دِگَه هَم مِث خاکِ سِفْت و سخت وَر جعدَه هیسِن. کلُومِ خدا مِثِ هَمو بذری‌یه که ری او زمین بِ‌اُفته، اما هیچ ثمرِی نَم‌دَهَه. هنون کسونِی هِیسِن که پیغومِ عیسانَ قَبول نَم‌کُنِن و نَخِن مِی پاتِشوهی خدا آیِن.

![](https://cdn.door43.org/obs/jpg/360px/obs-en-49-07.jpg)

عیسی به هنون یاد دا که خدا گناه‌کارونه خیلی دوسْ داره. او مَخو که اوشونَه بَخشَه و بَچون خودِش کُنَه.

![](https://cdn.door43.org/obs/jpg/360px/obs-en-49-08.jpg)

عیسی همیطور به اوشون گف که خدا اَ گناه بَدِش میا. سی دلِ گناه آدم و حوا، کل نسل اوشونَم گناه بِ‌کُنِن. در کل هر کَسِی مِی دُیُنا گناهِ کُنَه و اَ خدا جدا بیسه، کل دشمن خدا هِیسِن.

![](https://cdn.door43.org/obs/jpg/360px/obs-en-49-09.jpg)

اما خدا کل مردمِ دُیُنانَه ای‌طور محبت کُورد که تِینا کُووَکِ خودِش عیسانَ دا، تا هر که وَر او ایمان آرَه اَ کَمِ گناهاش مجازات نَ‌بُووَه، بَلکِی تا ابد پِی خدا زندی کُنَه.

![](https://cdn.door43.org/obs/jpg/360px/obs-en-49-10.jpg)

شمون اَ کَمِ انجومِ گناه، مستحقّ مرگِی. خدا حق داره که اَزِتون جِر بُووَه، اما عیسی پِی رفتن ری صلیب و مُوردَنِش، مِجازات گناها اومونَه به خودِش گرُفت.

![](https://cdn.door43.org/obs/jpg/360px/obs-en-49-11.jpg)

عیسی اَتَّه گناهی نَ‌کُورد بید، اما قبول کُورد که سی گناها آدمون مجازات بُووَه. او حتا سختْ‌ترین مجازاتَه که مُوردَن بید قبول کُورد. ای‌طور او قربانی کامِلِی بید تا گناها شمونَه و هر کَسِ دِگَه‌نَه که مِی دُیُنا بیدَ پاک کُنَه. سی ایان کِه عیسی خوشَه به عنوان قربانی به خدا پِیشْ‌کَش کُورد، پَه خدا هَم کُل گناهانه، حتا گناهان خیلی گَندِ کسونی‌یَه که وَر او ایمان میارِنَه بِ‌بَخشَه.

![](https://cdn.door43.org/obs/jpg/360px/obs-en-49-12.jpg)

حتا کارا خوبِ شمون نَتَرَه نِجاتِتون دَهَه. کارِی نِی کِه پِی انجومِش ترس‌سَه بُووِه پِی او رابطِه رفاقتی بَنا وَنِه. اَ جا اُووانَه وا ایمان آرِه که عیسی پسر خداسْ و جا شُمون سرِ صلیب مُورد و خدا اندو اووَ اَ مرگ وِرسوند. اَر وَر ای حقیقت ایمان آرِه خدا هم کُل گناهان شمونَه بِ‌بَخشه.

![](https://cdn.door43.org/obs/jpg/360px/obs-en-49-13.jpg)

خدا هَرکه‌نَه که وَر عیسی ایمان آرَه و اووَ اَ کَمِ خدا خودش قَبول کُنَه، نجاتِ دهَه. اما خدا کَسونی‌یَه که وَر او ایمان نَ‌آرِن، نجات نَم‌دهَ. مهم نِی فقیر یا مایَه دار، میرَه یا زونَه، پیر یا جَوون یا ایان کِه مالِ کجا بُووَه. خدا شمونه دوسْ داره و مخو وَر عیسی ایمان آرِه تا او تَرِس‌سَه بُووَه پِی شمون رابطه رفاقتی داشته بُووَه.

![](https://cdn.door43.org/obs/jpg/360px/obs-en-49-14.jpg)

عیسی شُمونَه دعوتِ کنه تا وَرِش ایمان آرِه و تعمید گِرِه. ایسون ایمان دارِه که عیسی هَمو مسیحایِ موعودَه و تِینا پسرِ خداسْ؟ ایمان دارِه کِه گناه کارِه و مستحق مجازات خدا هِیسِی؟ ایمان دارِه که عیسی سرِ صلیب مُورد تا گناها شُمونَه پاک کُنَه؟

![](https://cdn.door43.org/obs/jpg/360px/obs-en-49-15.jpg)

اَر وَر عیسی و هر چِی کِه او سی تون انجام داس ایمان دارِی، پَ شمون مسیحی هِیسِی! اَ ایسون به بَعد شِیطون مِی پاتشاهی تُوریکِ خودِش وَرتون حکومت نَمکُنه. ایسون خدا مِی پاتشاهی روشناش وَر شُمون حکومت بکنه. خدا شُمونَه قُوَه داس تا مثِ نُهاتَرا گُنَه نَکُنِی و وَر شمون رَه صاف زندی کُوردَنَه یاد داس.

![](https://cdn.door43.org/obs/jpg/360px/obs-en-49-16.jpg)

اَر مسیحی هِیسِی، خدا گُنَها شُمونَه سی دِل کاری کِ عیسی کورد بَخشیدَه. ایسون خدا شُمونَه دوسِ نِزیکِ خودِش دونَه نَ دِشمِنِش.

![](https://cdn.door43.org/obs/jpg/360px/obs-en-49-17.jpg)

اَر دوسِ خدا و نوکَرِ عیسی خدا هِیسِی، دوسْ دارِه دُما چیایِی کِه عیسی یادِ دا رووِه. اَر چِه شُمونْ یَه مسیحی هِیسِی، شیطان هَنی شُمونَه وَسوَسَه بِ‌کُنَه تا گناه کُنِه، اما خدا هِی به قولاش وفا بِ‌کُنَه. او بِفَرمایَه اَر وَر گناهاتون اعتراف کُنِه، شُمونَه بِ‌بَخشَه و به شُمون قوَه بِ‌دَهَه تا پِی گناه جَنگ کُنِه.

![](https://cdn.door43.org/obs/jpg/360px/obs-en-49-18.jpg)

خدا بِه شُمونْ بِ‌گُووَه که دعا کُنِی و کلُومِشَه خونِه. او همیطور بِه شُمون بِ‌گُووَه تا پِی مسیحیونِ دِگَه اووَ پِرَستِی و بِه بقیه هم گُووِه که سی شُمون چِه کُوردَه. اَر کلِّ هنونَه انجوم دِهِه، رِفاقَتِ قُوَتْ دارِی بینِ شمون و خدا عمَلِ مِیا.

*مَتَلِی اَ کِتابِ مقدّس:   رساله پولس به رومیان باب آیه ۲۱ تا ۲۶؛ باب ۵ آیه ۱ تا ۱۱؛ کتاب انجیل یوحنا باب ۳ آیه ۱۶؛ کتاب انجیل متی باب ۱۶ آیه ۱۶؛ رساله پولس به کولسیان باب ۱ آیه ۱۳ تا ۱۴؛ رساله دوم پولس به تسالونیکیان باب ۵ آیه ۱۷ تا ۲۱؛ رساله اول یوحنا باب ۱ آیه ۵ تا ۱۰*

## 50. ۵۰- عیسی بِ‌وِرگَردَه

https://openbiblestories.org/l/def/story-50/

![](https://cdn.door43.org/obs/jpg/360px/obs-en-50-01.jpg)

نِزیکِ دو هَزار سالَه کِه آدمونِ زیادِی مِی دُیُنا، خبر خوشِ انجیلِ عیسی مسیحَ بِفَـمِن. کلیسا در حال گَپ بیسَن بیدَه. عیسی وعدَه داس که مِی آخِر دُیُنا بِ‌وِرگَردَه. هَر چَن عیسی هَنی نَ‌اومَسه، اما بِه قولِش وَفا بِ‌کُنه.

![](https://cdn.door43.org/obs/jpg/360px/obs-en-50-02.jpg)

خدا اَ اومون مَخو مِی حالی که منتظر وِرگَشتَنِ مسیح هِیسِیم، یَه جوری زندی کُنِیم که مقدس بُویم و اووَ احتروم کنِیم. او همیطور اَ امون مخو کِه سی پاتِشوهی او پِی باقِی مَردُم قصَّه کُنِیم. مُعادِی کِه مسیح هَنی ری زمین زِندی بْ‌کورد، ای‌طور فرمود: «شاگردونِ مو خبر خوشِ پاتِشوهی خدانَه مِی کل دُیُنا موعظه بِ‌کُنِن، اوسون آخِرِش بِ‌رَسَه.»

![](https://cdn.door43.org/obs/jpg/360px/obs-en-50-03.jpg)

اقوام زیادِی هِیسِن که هَنی اَ عیسی چِی نَفَـمیدِنَه. نُها وِرگَشتَنِ مسیح بِه آسُمون، او به مسیحیون فرمود تا ای خَبرِ خوَشَه به کلِّ کَسونِی که او خبرَه اتَّه نفَـمیدِنَه اعلُوم کُنِن. عیسی فرمود: «رُووِه و کل ولاتانَه شاگردونِ مو کُنِه، سی‌ایا‌ن‌کِه دلا لِفِ زراعَتا سی دِرو آمادِن.»

![](https://cdn.door43.org/obs/jpg/360px/obs-en-50-04.jpg)

عیسی ایانَ هَم فرمود که: «نوکَر اَ آقای خودِش سَر‌تَر نِی.‌ هموطور که اربابونِ ای دُیُنا، اَ مو بدشونِ میومَه، شُمونَم سی‌دِلِ مو شکنجه بِ‌کُنِن و بِ‌کُشِن. مِی یِی دُیُنا سَختی بِ‌کَشِه اما دِلتون قُرصِ بُووَه؛ سی‌ایان‌کِه مو، شیطانه که حاکم ای دُیُناست اِشکِنیدُمَه. اَر تا تَهِش وَرُم وَفادار مَنِه، اوسون خدا شمونَه نِجاتِ دَهَه!»

![](https://cdn.door43.org/obs/jpg/360px/obs-en-50-05.jpg)

عیسی سی شاگردونِش مَتَلِی تعریف کُورد، تا سیشون توضیح دَهَه مِی آخِر دُیُنا چِه سَرِ مردُمِ میایَه. او گف: «پیایِی مِی زِمینِش دونِ خوبِی کاشت. مُعادِی کِه هَنی خو بید، دِشمِنِش اومَه و لا دونِ گَنُم، تخمِ علُفِ هَرز کاشت و رَفْ.

![](https://cdn.door43.org/obs/jpg/360px/obs-en-50-06.jpg)

مَعادِی کِه دونا تُک زِن، کارگَرون او پیا گفتِن: «آقا، شُمون دونِ خوب مِی یِی زِمین کاشتِی‌یَه! اَ چِه لا هُنون علُفِ هَرز سوز کُوردَه؟» او پیا گف: «ایان تِینا تَرَه کارِ دِشمِنونُم بُووَه که هنونَه کاشتِنَه. یکی اَ دِشمِنونُم ای کارَه کُوردَه.»

![](https://cdn.door43.org/obs/jpg/360px/obs-en-50-07.jpg)

کارگَرون در جُواب آقاشون گُفتِن: «یعنِی وا عَلُفانَه کَشِیم دَر؟» آقا گف: «نَه. اَر ای کارَه کُنِه، بعضی اَ گنُمانَم پِیشون بِ‌کَشِی در. تا مُعادِ دِرو بِنارِه وَ دُماش عَلُفانَه کَنِه و سُوزنِه، اما گَنُمانَه بِه انبارِ مو بیارِی.»

![](https://cdn.door43.org/obs/jpg/360px/obs-en-50-08.jpg)

شاگردون مُلتَفِتِ معنیِ ای مَتَل نبیسِن و اَ مسیح مَخاسِن تا ای مَتَلَه سیشون بیشتَر گُشَه. عیسی گف: «پیایِی که دونِ خوبَه کاشت، هموگِری مسیحَ. زِمینَم ای دُیُناسْ و دونِ خوبَم لِفِ مردُمی‌یَه کِه مِی پاتِشوهی خدا هِیسِن.»

![](https://cdn.door43.org/obs/jpg/360px/obs-en-50-09.jpg)

علُف هرز کَسونِی هِیسِن که مالِ شیطانن، یعنِی زَبینِن. دِشمِن او پیا یَعنِی کَسِی که علُفا هرزَه کاشت، همو ابلیسَه. فصل درو، آخِر دُیُناسْ، و دروگرون مِلاکونِن.

![](https://cdn.door43.org/obs/jpg/360px/obs-en-50-10.jpg)

مُعادِی کِه دُیُنا بِه آخِرِش بِ‌رَسَه، ملاکون کُل آدمونی‌یَ کِه مالِ ابلیسِن، اَ کُل دُیُنا گِردِ کُنِن و بِه دریاچِه تَش بِ‌بِهِن. جایی که اوشون پِی درد و مصیبت گَپِی بِ‌گِریوِن وَ دِندون کروچَه بِ‌کُنِن. اما عادِلونِی که عیسانَ پیروی کُوردِنَه لِفِ عَفتو مِی پاتشوهی پدر خود، خدا، بِدِرَخشِن.

![](https://cdn.door43.org/obs/jpg/360px/obs-en-50-11.jpg)

عیسی ایانَه هم گف که نُها آخِر دُیُنا به زمین بِ‌وِرگَردَه‌. او همیطور کِه زمینَه تَرکِ کُنَه بِ‌وِرگَردَه، یَعنِی یَه لارِی دارَه و مِی آسُمون ری اُورا بِه میایَه. مُعادِی کِه عیسی وِرگَردَه، هر مَسیحی‌یِ که مُوردَه، اَ مِی مُوردون بِ‌وِرسَه و مِی آسُمون یَکِ‌دووَه بِ‌بینِن.

![](https://cdn.door43.org/obs/jpg/360px/obs-en-50-12.jpg)

دُماش مسیحیونی که هَنی زِندِن، بِه آسُمون بالا بِ‌رووِن و بِه بقیه مسیحیونی اِضافِ بُووِن کِه اَ مِی مُوردون وِرسِیدِنَه. کل هنون پِی عیسی مِی اونجون هِیسِن و عیسی پِی قومِ خودِش زِندی بِ‌کُنَه. اوشون مِی صلحِ ابدی پِی یَکِ‌دو زِندی بِ‌کُنِن .

![](https://cdn.door43.org/obs/jpg/360px/obs-en-50-13.jpg)

عیسی قول دا وَر هرکه وَر او ایمان داره، تاجِی بَخشه. اوشون پِی خدا تا اَبد وَر هَمَه چِی حکومتِ کُنِن و پِی یَک بِ‌بنارِن.

![](https://cdn.door43.org/obs/jpg/360px/obs-en-50-14.jpg)

اما خدا کَسونی‌یَه که وَر عیسی ایمان نَ‌آرِن، داوری بِ‌کُنَه .او هُنونَه بِه جهنمِ بَهَ. اونجون جایی‌یَه کِه اوشون تا ابد بِ‌گِریوِن و دندون کروچَه بِ‌کُنِن وَ دَردِ کَشِن. تَشِی که اتَّه خُو نَم‌رووَه هنونَه بِ‌سوزِنَه و کرمونْ اَ خُوَردَنشون نَم‌وِیسِن.

![](https://cdn.door43.org/obs/jpg/360px/obs-en-50-15.jpg)

اوسون که عیسی بِ‌وِرگَردَه، شیطان و حکومَتِش کلَّن بِه وارَه. شیطان تا ابد پِی کُلِ کَسونِی که اَ جا اطاعت اَ خدا، اَ او فرمونْ‌بَری کوردِنَه مِی اونجون بِسوزِن.

![](https://cdn.door43.org/obs/jpg/360px/obs-en-50-16.jpg)

سی نافرمونی آدم و حوا و اووُوردَنِ گناه مِی یِی دُیُنا، خدا دُیُنانَه لعنت کُورد و تَصمیم به وارُندَنِش گِرُفت. اما یَه روز خدا آسمون و زمینِ نُووِی بِ‌آفِرَه که کامِلِن.

![](https://cdn.door43.org/obs/jpg/360px/obs-en-50-17.jpg)

عیسی وَ قومش مِی زِمینِ تازَه زِندی بِ‌کُنِن، و او تا ابد وَر هَر چِی کِه هِی سلطنتِ کُنَه. او هر عَرْسِی‌یَه اَ تیا مردم پاکِ کُنَه. دِگَه غَمِی نِی وَ هیچ کَه دَرد نَم‌کَشَه. اوشون اصلن دگَه نَم‌گِریوِن، دِگَه کَسِی مَرِیض نَم‌بُووَه و نَم‌میرَه. وَ هیچ چِی بَدِی مِی اونجون نِی و عیسی پِی صلح و عدالت مِی پاتِشوهی خودِش حکومَتِ کُنَه. بعد اُوان، او پِی قومِش تا ابد بِ‌ویسَه.

*مَتَلِی اَ کِتابِ مقدّس:  کتاب انجیل متی باب ۲۴ آیه ۱۴؛ باب ۲۸ آیه ۱۸؛ کتاب انجیل یوحنا باب ۱۵ آیه ۲۰؛ باب ۱۶ آیه ۳۳؛ کتاب مکاشفه باب ۲ آیه ۱۰؛ کتاب انجیل متی باب ۱۳ آیه ۲۴ تا ۳۰؛ باب ۱۳ آیه ۳۶ تا ۴۲؛ رساله اول پولس به تسالونیکیان باب ۴ آیه ۱۳ و باب ۵*