# unfoldingWord Open Bible Stories — Gade Lohar (Lohar, Gade)

- Language code: `gda`
- Canonical page: https://openbiblestories.org/l/gda/
- Stories in this file: 50 of 50
- Published by: OBS-TLF
- Last release: 2026-06-26
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Gade Lohar translation; it is not a translation of the whole Bible.

## 1. संसारर बणंइबा

https://openbiblestories.org/l/gda/story-1/

![](https://cdn.door43.org/obs/jpg/360px/obs-en-01-01.jpg)

होरा ठो मुंह्डा किंञ दी परमेश्वरे बदे चीज़ोर बणांया। परमेश्‍वरे छ़: दियोन संसारा कि होरेक ज़ेभि संसारन असे तेनो बदे चीज़ोर बणांया। ज़ेखेए परमेश्वरे संसारर बणांया, तेस मुके पृथ्वी पुटि अनारा ओ पृथ्वी शुंण्णा थिया, किसबोलि एबेंईं च़ेक परमेश्वरे तेतन खि बि चीज़र बणांओरा नोथा। पर परमेश्वरा आत्मा पांईं पुटि थिया।

![](https://cdn.door43.org/obs/jpg/360px/obs-en-01-02.jpg)

च़े परमेश्वरे लाई, “सर्गन प्रागा भो!” च़े प्रागा भुई गिया। परमेश्वरे कईया कि प्रागा रुठू असे च़े तेसर ‘दीया’ बोलिया। च़े परमेश्वरे प्रागेर अनारेंञ बिक्रे किया, ज़ेसर तेनी ‘रात’ बोलिया। परमेश्वरे संसारर बणईंबे मुहङ्क्वां दियन प्रागेर बणांया।

![](https://cdn.door43.org/obs/jpg/360px/obs-en-01-03.jpg)

संसार बणंइबे होर्दी परमेश्वरे बोलिया, ‘‘पांईं पुटि एक फर्क भो।” होरक एक फर्क भुई गिया। परमेश्वरे तेस फर्कर ‘सर्ग’ बोलिया।

![](https://cdn.door43.org/obs/jpg/360px/obs-en-01-04.jpg)

दुई दियो पिच़ंञ परमेश्वरे बोलिया, “पांईं एक्के ठारि ठोक्कन भुई ग होरक शुक्का धर्त कयो।” च़े परमेश्वरे शुक्के धर्तर ‘पृथ्वी’ बोलिया होरक पाईंर ‘समुंदर’ बोलिया। परमेश्वरे कईया कि ज़े तेनी बणांया से रुठू थिया।

![](https://cdn.door43.org/obs/jpg/360px/obs-en-01-05.jpg)

च़े परमेश्वरे बोलिया, “पृथ्वी पुटि पाठि–पाठि बुटो उब्‍ज़ा।” च़े होरि भूई गिया। परमेश्वरे कईया कि ज़े परमेश्वरे अपें बणांयाति से रुठू थिया।

![](https://cdn.door43.org/obs/jpg/360px/obs-en-01-06.jpg)

संसार बणंइबे त्राई दियो पिच़ंञ परमेश्वरे बोलिया, “सर्गा प्रागा भो।” च़े धुप, च़नी ओ तारे कऊए। परमेश्वरे तेनोर पृथ्वी पुटि प्रागा दीबे ओनि होरेक दिन-ओ रात, मौसम-ओ बर्षा बिच़ा फर्क पता च़लिबे ओनि बणांया।

![](https://cdn.door43.org/obs/jpg/360px/obs-en-01-07.jpg)

च़ोउर दियो पिच़ंञ परमेश्वरे बोलिया, “पाईं बिच़ा ज़ीने प्राणी भो होरेक सर्गा च़ई-च़करु फंज़ी करो।” एरा करि परमेश्वरे पाईंन तारि देने जीवोर–ओ च़ई-च़करुओर बणांया। परमेश्वरे कईया कि इ रुठू थिया च़े तेनोर आशीष दिता।

![](https://cdn.door43.org/obs/jpg/360px/obs-en-01-08.jpg)

संसार बणंइबे पन ध्‍याड़े पिचंञ परमेश्वरे बोलिया, “धरत्रि पुटि बेशने बदे पाठि जानवरो भो।” च़े परमेश्वरा बोलिबे मुताबिक भुई गिया। मिन जानवर जइबे ठो थिये, मिन धरत्रि पुटि छक्‍सल करने ठो, होरेक मिन ज़ेञ बंण जानवरो थिये। होरेक परमेश्वरे कईया कि इ बदे रुठू थिया।

![](https://cdn.door43.org/obs/jpg/360px/obs-en-01-09.jpg)

च़े परमेश्वरे बोलिया, “अयो अस्‍पीं मऊंर हईंपें रुपन होरेक हईंपाठो बणऊंले। तेने संसारा पुटि ओ बदे जानवरो पुटि राज करेले।”

![](https://cdn.door43.org/obs/jpg/360px/obs-en-01-10.jpg)

च़े परमेश्वरे ज़न लेई मुषुड्लेर बणांया होरेक तेसि अण्‍ङी जीवना-शा फुकिया। इस मऊं कि नाऊं आदम थिया। परमेश्वरे आदमर बेशिबोनि एक मोड़ा बगीचा बणांया होरेक तेस बगीचे देखभाला ओनि आदमर तेटि थेईया।

![](https://cdn.door43.org/obs/jpg/360px/obs-en-01-11.jpg)

तेस बागा बिच़ा परमेश्वरे दुई खास बुटो लवाये जीवना बुट-ओ रुठ मदम-आ कि ज्ञाना बुटो। परमेश्वरे आदमर बोलिया कि से तेस बगीचे की रुठ-मदमा ज्ञान-आ बुटर छ़ई कोसंञ भि बुटा फल खई बटल। अगर तेनी तेस बुटा फल खाया त से मरि गाल।

![](https://cdn.door43.org/obs/jpg/360px/obs-en-01-12.jpg)

च़े परमेश्वरे बोलिया, “मुषुड्ले कि एकेला बेशिबा रुठ नाईं।” पर कोसंञ भि जानवर आदम-आ साती भुई नोटिया।

![](https://cdn.door43.org/obs/jpg/360px/obs-en-01-13.jpg)

तेरे परमेश्वरे आदमर सर्सुत निन्‍द्रा बिज़ छ़ईया। च़े परमेश्वरे आदमा कि एक रिश्‍पा लेई तेटिंञ एक ज़लऊं बणाईं च़े तेसर आदम-आ कच़ा लेई आया।

![](https://cdn.door43.org/obs/jpg/360px/obs-en-01-14.jpg)

ज़ेखेंए आदम-ए तेसर कईया च़े तेनी बोलिया, “कम-से-कम इ त मेरि घाटे असे! इ ‘ज़लऊं’ गणेओलि, किसबोलि इ मुशुड्लेंञ बणांओरि भो।” इ बजे मुषुण्‍ला अपें या-बा-ओर छोड़ि अपें घर्नि सा भुई गाल।

![](https://cdn.door43.org/obs/jpg/360px/obs-en-01-15.jpg)

परमेश्वरे ज़लऊं ओ मुषुड्लेर अपें रुपन बणांया। परमेश्वरे तेनोर आशीष दिता होरेक तेनोर बोलिया, “मस्‍ह ओलादोर पोत्रे-पड़पोत्रे जाओ होरेक धत्रि पुटि भरुई गाओ!” होरेक परमेश्वरे कईया कि ज़े भि तेनी बणांओरा थिया मस्‍ह रुठ थिया, होरेक परमेश्‍वर इनो बदेओंञ खुश थिया। इ बदेदीर संसार बणईबे कि पन दियो पिच़ंञ भूरा थिया।

![](https://cdn.door43.org/obs/jpg/360px/obs-en-01-16.jpg)

ज़ेखेए छ़: दियो पिच़ंञा ध्‍याड़ा अपरिया त ज़ेभि परमेश्वर करला थिया तेनी से बदे कमर छ़ोई बिदा। तेनी छ़: दियो पिच़ंञा ध्‍याड़ेर आशीष दिता होरेक तेसर पवित्र ठेराया, किसबोलि परमेश्वरे बदे चीज़ोर बणंईं खोमसी कियाति। एरा करि परमेश्‍वरे संसारा कि होरेक ज़े भि तेतन असे तेनोर बणांया।

*संसार बणंइबे पाठ 1-2 बाइबला की एक कथा*

Audio: https://git.door43.org/OBS-TLF/gda_obs/releases/download/v1/gda_obs_v1_01_128kbps.m4a

## 2. पाप संसारन आया

https://openbiblestories.org/l/gda/story-2/

![](https://cdn.door43.org/obs/jpg/360px/obs-en-02-01.jpg)

आदम-ओ तेसि घर्न बंणते बगीचेन डरोंआं तुशी बेशने थिये। इ बगीचा परमेश्‍वरे तेन देओ ओनि बणांओरा थिया। तेन-देओ बिचंञ कऊं भि डबूं न लयोना थिया, फिरि भि इनि गप्‍पे तेन दुयोर शर्मिदा किउरा नोथा, किसबोलि संसारन पाप नोथा। तेने हमेशा तेस बगीचेन हंणला करने थिये होरेक परमेश्वरा सा गप्‍पा भि करला करने थिये।

![](https://cdn.door43.org/obs/jpg/360px/obs-en-02-02.jpg)

पर तेस बगीचेन एक लोड्लू थिया। से जट्ठे चलाक थिया। तेनी तेस ज़लऊंर पुछ़िया, “खि छ़ेच्‍चैईं कि परमेश्‍वरे तुसोर इस बगीचे कि कोसंञ भि बुटा फल खईबेर मना किउरा असे-आ?”

![](https://cdn.door43.org/obs/jpg/360px/obs-en-02-03.jpg)

तेनी ज़लवीं जुवाब दिता, “परमेश्‍वरे असोर बोलोरा असे कि असे रूठ-मदमा ज्ञाना कि बुटंञ अलावा कोसंञ भि बुटा फल खई बटले। परमेश्‍वरे असोर बोलोरा असे कि अगर तुसे एस फलर खाया या पछ़ भि दिता, त तुसे मरि गाओले।”

![](https://cdn.door43.org/obs/jpg/360px/obs-en-02-04.jpg)

तेनी लोड्लुई ज़लऊंर जुवाब दिता, “इ हफ़्‍सी भो! तुसे न मरोले। परमेश्‍वरर अपींर पता असे कि ज़ेरीई तुप्‍सीं इ फल खाओले, तुप्‍सीं परमेश्‍वरा एतेक भुई गाओले होरेक परमेश्‍वरा एतेक रूठ-मदमर बुज़िब ठारेओले।”

![](https://cdn.door43.org/obs/jpg/360px/obs-en-02-05.jpg)

ज़ेखेए तेनी ज़लवीं कईया कि तेस बूटा फल खईब ओनि रुठू होरक हेरिब ओनि सेमर रुठू च़ेयोना ठो थिया। से भि समझदार बणिंबा चाहनिति, तेरे तेनी फल त्रोई कर खई बिदा। च़े तेनी अपें घ्यातर भि से फल दिता ज़े तेस सा थिया होरेक तेनी भि खई बिदा।

![](https://cdn.door43.org/obs/jpg/360px/obs-en-02-06.jpg)

तेखैंईं, तेनो टीरा उगुई गिया, च़े तेनोर पता लगिया कि तेने नंञटे थिये। तेने लपोर टली तेनो कि डबूं बणईं एन्‍फेयों फुकर घटिबे कोशिश किया।

![](https://cdn.door43.org/obs/jpg/360px/obs-en-02-07.jpg)

च़े मुषुड्ले होरेक तेसी घर्नीं तेस बगीचेन परमेश्‍वरा कि हणिंबे च़ाला शुंईंया। तेने दुईयो ज़ेंञ परमेश्‍वरंञ युकुंई गे। च़े परमेश्‍वरे मुषुड्लेर हक दिता, “तू कोटि असे?” आदम-ए जुवाब दिता, “मैईं तपींर बगीचेन हणिंब शुईंया, होरेक हऊं डरि गियाति, किसबोलि हऊं नञंटा थिया। तेरे हऊं युकुंई गिया।”

![](https://cdn.door43.org/obs/jpg/360px/obs-en-02-08.jpg)

च़े परमेश्‍वरे पुछ़िया, “तूर केनी बोलिया कि तू नञंटा असे? खि तेईं से फल खाया-आ ज़ेसर खईबेर मैंईं तूर ठलोरा थिया?” मुषुड्ले जुवाब दिता, “तेपें ज़े मूर इ ज़लऊं दितोरि असे इनी-ए इ से फल मूर दिता।” च़े परमेश्‍वरे ज़लऊंर पुछ़िया, “तेईं इ खि किया?” से ज़लऊं बोलिब ठारूई, “लोड्लुई मूर बेकाया।”

![](https://cdn.door43.org/obs/jpg/360px/obs-en-02-09.jpg)

परमेश्‍वरे लोड्लुर बोलिया, “तु शापित भोई! तु तेपें पेटा बले छक्सल करल होरेक ज़न च़टल। तु-ओ इ ज़लऊं एन्‍फेयो बिच़ा नफरत करोले, होरेक तेरे मठे-ओ तेसी मठे भि एन्‍फेयो बिच़ा नफरत करेले। इस ज़लऊं कि मठे तेरे कपार घ्रेच़ेले, होरेक तु तेसी थुरिर कटल।”

![](https://cdn.door43.org/obs/jpg/360px/obs-en-02-10.jpg)

च़े परमेश्‍वरे ज़लऊंर बोलिया, “हऊं तेरे मठे भुईबे दुखंइर मस्‍स बढ़ऊं। तु तेपें घ्याता कि लालसा करिलि, होरेक से तू पूटि राज करल।”

![](https://cdn.door43.org/obs/jpg/360px/obs-en-02-11.jpg)

परमेश्‍वरे मुषुड्लेर बोलिया, “तेईं तेपीं घर्नि गप्‍पा शुईं मेरा आज्ञा न मनिया। तेरे धर्त शापित भुआ, तुर बगत उब्‍ज़ईबे ओनि मस्‍स मेहनत करिबे ज़रूरत भोल। हेबे तु मरि गाल, होरेक तेरा फुक ज़ना बिच़ा मिवीं गाल।” तेनी मुषुड्ल्‍ले अपीं घर्नि नाऊं हव्‍वा थेईया, ज़ेसी मतलब भो “जीवन देनी”, किसबोलि से बदे ज़ातिऊ कि या भोलि। होरेक परमेश्‍वरे आदम-ओ हव्‍वेर जानवरा खलंञ बणांओरे डबूं लवाये।

![](https://cdn.door43.org/obs/jpg/360px/obs-en-02-12.jpg)

च़े परमेश्‍वरे बोलिया, “हेबे रूठ-मदम प्रयांईबे सा मऊं हईंपा घाटे भुई गिउरा असे, तेरे तेनोर जीवना बुटाकि फलर खईब दीब नलोई कि एरा भोरा न लोई कि तेने से फल खाया होरेक तेने हमेशा कि ओनि ज़ीने छ़ुटि गे।” तेरे परमेश्‍वरे आदम-ओ हव्‍वेर तेस बगीचेंञ भइलिर खनि बिदा। परमेश्‍वरे तेस बगीचे द्वारन तागती स्‍वर्गदूतोर पारिबेर थेईया ताकि केन्‍नी भि तेस बुटा फलर खई बटोरा न लोई।

*उत्पत्ति पाठ 3 एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_02_128kbps.m4a

## 3. डढ़ा कि अईबा

https://openbiblestories.org/l/gda/story-3/

![](https://cdn.door43.org/obs/jpg/360px/obs-en-03-01.jpg)

एस्‍सी मुके पिच़ंञ, संसारन एस्‍सी मऊं बेशने थिये। तेने मस्‍स मदम-ओ झ़गड़ालू भुई गिउरे थिये। इ बदे एतेक मदम थिया कि परमेश्‍वरे इ आखरी फैसला लेईया कि इस पूरे संसारर डढ़ा-सा नाश करि बिज़ू।

![](https://cdn.door43.org/obs/jpg/360px/obs-en-03-02.jpg)

पर परमेश्‍वर नूह-सा खुश थिया। से एक धर्मी मऊं थिया, ज़े मदम मऊंओ बिच़ा बेशना थिया। परमेश्‍वरे नूहर बताया कि हऊं एक मोड्डा डढ़ अणिंब तियार असु। इ बजे, परमेश्‍वरे नूहर एक मोड्डा पाईं कि झाज बणइंबे ओनि बोलिया।

![](https://cdn.door43.org/obs/jpg/360px/obs-en-03-03.jpg)

परमेश्‍वरे नूहर मोड्डा पाईं कि झाज़र बणंईंबे ओनि बोलिया, ज़े लगभग शऊआ पुटि दुई बी मीटर लमा, बीओ त्राई मीटर बिल्‍ड्ला होरेक सढ़े तेराह मीटर उथा भोल। नूहे तेस मोड्डे पाईं कि झाज़र कठोआ सा बणंईबे थिया होरेक तेतन त्राई मंज़िला, केतिया पूरी, एक छपरा होरेक एक उंञूं बणंईबे थिया। से मोड्डा झाज़ नूह, तेसी परिवार, होरेक धरत्री पुटि पाठि-पाठि जानवरोर डढ़ंञ बच़ई थेली।

![](https://cdn.door43.org/obs/jpg/360px/obs-en-03-04.jpg)

नूहे परमेश्‍वरा आज्ञा मनिया। तेनी ओ तेसी त्राई कोए तेरी घाटे मोड्डा पाईं कि झाज़ बणांया ज़ेरा परमेश्‍वरे तेनोर बताओरा थिया। किसबोलि से झाज़ डरोआं मोड़ा थिया तेरे तेस बणइंबेर तेसर केतिया बरि लगिया। नूहे मऊंओर डढ़ अइब पाठि चेतावनी दिता होरेक तेनोर परमेश्‍वरारि पलाटुईबे ओनि बोलिया, पर तेने तेस पुटि विश्‍वास न किया।

![](https://cdn.door43.org/obs/jpg/360px/obs-en-03-05.jpg)

परमेश्‍वरे नूह होरेक तेसी टबरो ओनि-ओ जानवरो ओनि अन्‍न ठोक्‍कन करिबेर बी बोलिया। ज़ेखैईं बदे दिर तियार थिया, च़े परमेश्‍वरे नूहर बोलिया कि इ मोक्‍का तेसी, तेसी घर्नि कि, तेसी त्राई कोओ होरेक तेनो घर्निऊर मियंइकर अठ ज़ेईंयों मोड्डे पाईं कि झाज़ा पुटि गईबे कि थिया।

![](https://cdn.door43.org/obs/jpg/360px/obs-en-03-06.jpg)

परमेश्‍वरे पाठि-पाठि जानवरोर होरेक च़ई-च़करू-ओ कि ज़लऊं-मुषुड्लेर नूह कच़ा बिदा ताकि तेने मोड्डे पाईं कि झाज़न गई बटोरे लोई होरेक डढ़-आ मुके सही-सलामत बच़ोरे लोई। परमेश्‍वरे एरा पाठि–पाठि जानवरो कि सत मुषुड्ले होरेक सत ज़लऊंओर बिदा ज़ेनोर बलि च़ढ़इबोनि इस्‍तेमाल करि बटोरा लोई। ज़ेखेए तेने बदे मोड्डे पाईं कि झाज़न अपरे त अपीं परमेश्‍वरे मोड्डे पाईं कि झाज़ा कि द्वारर बंद करि बिदा।

![](https://cdn.door43.org/obs/jpg/360px/obs-en-03-07.jpg)

च़े सन्‍दा अइबा च़ुक्‍सी किया, सन्‍दा भुइला किया, भुईला किया। रूकिब मेतेंई दुई बी ध्‍याड़े च़ेक रात-दीन सन्‍दा भुइला किया। धत्रि अण्‍डीं किंञ पांईं निसिब ठारुआ। पूरा संसारा कि हर चीज़ इटि च़ेक कि उथे-उथे घऊओ च़ेक पांईंन डुबि गे।

![](https://cdn.door43.org/obs/jpg/360px/obs-en-03-08.jpg)

शुक्का धत्रि पुटि बेशने हर चीज़ मरि गे, पर ज़ेने मऊं होरेक जानवरो मोड्डे पाईं कि झाज़न थिये तेने बच़ि गे। से मोड्डा पाईं कि मोड्डा झाज़ पाईं पुटि तारि दीला छ़ुटा होरेक मोड्डे पाईं कि झाज़ा अण्‍डी हर चीज़र डुबिबेंञ बच़ई थेइया।

![](https://cdn.door43.org/obs/jpg/360px/obs-en-03-09.jpg)

संदा अइदा बंदुई पिच़ंञ, पन मां च़ेक मोड्डा पाईं कि झाज़ पाईं पुटि तारी दिला बेठा, होरेक तेस मुके पाईं थोड़ुईब ठारूआ। च़े एक झा से मोड्डा पाईं कि झाज़ घऊ-आ पुटि टिकिया, पर धरत अयता भि पाईं सा भरेओरा थिया। त्राई मां-ओ पिच़ंञ, घऊआ मुखो कविब ठारूए।

![](https://cdn.door43.org/obs/jpg/360px/obs-en-03-10.jpg)

च़े दुई-बी ध्‍याड़े पिच़ंञ, नूहे एक काउअर इ हेरिबेर भइलिर बिदा कि खि पाईं शुकि गिउरा थिया-आ या नोथा। से काऊ शुक्‍का धर्त लोईबे ओनि इसो-ओसो फंज़ी करला छ़ुठा, पर तेसर शुक्‍का ठार नाथुआ।

![](https://cdn.door43.org/obs/jpg/360px/obs-en-03-11.jpg)

च़े तेस पिच़ंञ नूहे एक घुघुटिर भइलिर बिदा। पर तेसर भि शुक्‍का धर्त नाथुआ, तेरे से नूह कच़ा पलाटुई गेई। एक हप्‍ते पिचंञ तेनी तेस घुघुटिर फिरि बिदा, च़े से अपें शुंटा मुख जैतून-आ कि लप लेई पलाटुई। पाईं थोड़ेओनाति, ओइरी फिरि उब्‍ज़िब लगोरे थिये।

![](https://cdn.door43.org/obs/jpg/360px/obs-en-03-12.jpg)

नूह-ए एक हफ्‍ता च़ेक च़ोखिकर दुई हफ्‍ते पिच़ंञ तेस घुघुटिर भइलि बिदा। इसंञ फेरा, तेसर बेशिबे ठार हतुई गिया च़े से न पलाटुई। पाईं शुकनाति।

![](https://cdn.door43.org/obs/jpg/360px/obs-en-03-13.jpg)

दुई माओ पिच़ंञ परमेश्‍वरे नूहर लाई, “हेबे तेरा-ओ तेरा टबर होरेक बदे जानबरो मोड्डे पाईं कि झाज़ंञ भइलि निसि अयो। मस्‍स ज़ेंञ ओलादो होरेक पोत्रे - पड़पोत्रे जाओ होरेक पृथ्वीन भरूई गाओ।” च़े नूह-ओ तेसि टबर मोड्डे पाईं कि झाज़ंञ भइलि निसि आये।

![](https://cdn.door43.org/obs/jpg/360px/obs-en-03-14.jpg)

नूह-आकि भइरीं निसि अई पिच़ंञ, तेनी एक बेदी बणांया होरेक बलि ओनि इस्‍तेमाल करि बटिबे ठो पाठि-पाठि जानवरो बिच़ंञ मिन ज़ेयुंर बलि चढ़ाया। परमेश्‍वर तेस बलिंञ खुश भुआ होरेक नूहो तेसी टबरोर आशीष दिता।

![](https://cdn.door43.org/obs/jpg/360px/obs-en-03-15.jpg)

परमेश्‍वरे बोलिया, “हऊं वायदा करनूं कि मऊंआं द्वारे किउरे मदम कमों कि बजे हऊं फिरि कदी धत्रि पुटि श्राप न देऊं या डढ़ा सा धत्रिर नाश न करू, हालांकि मऊं मठेन्‍ज़ेंञ दिए पापी भोन।

![](https://cdn.door43.org/obs/jpg/360px/obs-en-03-16.jpg)

च़े परमेश्‍वरे अपां किउरा वायदे कि चिन्‍हा रुपन पहला इन्‍द्रधनुषर बणांया। ज़ेखेंईं भि सर्गा इन्‍द्रधनुष कइना, च़े परमेश्‍वर हीत करल कि तेनी खि वायदा किऊरा असे होरेक तेरी तेसी मऊं भि हीत करेले।

*उत्पत्ति पाठ 6-8 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_03_128kbps.m4a

## 4. अब्रामा सा परमेश्‍वरा वाचा

https://openbiblestories.org/l/gda/story-4/

![](https://cdn.door43.org/obs/jpg/360px/obs-en-04-01.jpg)

डढ़ा केतेबा बरिओ पिच़ंञ, दुनियेन केतेक्बा मऊं बेशने थिये, होरेक तेने फिरि परमेश्‍वरा-ओ एम्‍फ्‍यो बिरोधन पाप किया। किसबोलि तेने एक्‍के भाषा बोलने थिये, तेरे तेने बदे ज़ेञं ठोक्‍कन भुए होरेक संसारन भरूई गईबे आदेशा बजाये एक नगर बणांया।

![](https://cdn.door43.org/obs/jpg/360px/obs-en-04-02.jpg)

तेने डरोआं मोड़ेओरे थिये, होरेक तेनोर केरा घाटे ज़िन्‍दगी ज़ीब लोई इस बारेन परमेश्‍वरा भाषे करिबा न चाहनेति। इटि च़ेक कि तेने एक एरा घाटे मीनार बणईंबा शुरू किया ज़े स्‍वर्गा च़ेक अपरल। परमेश्‍वरे कईया कि अगर एने बदे ज़ेंञ ठोक्‍कन भुई मदम-मदम करला बेशले, त केतेबा पाप-आ कमों करि बटेले।

![](https://cdn.door43.org/obs/jpg/360px/obs-en-04-03.jpg)

तेरे परमेश्‍वरे तेनो भाषेर केतेबा भाषेओ सा लेख्‍फी करि बिदा होरेक तेनो मऊंओर पूरा संसारन अपरई बिदा। ज़ेस नगरिर तेने बणंईब च़ुख्‍फी कियाति से बाबेल गणुआं, ज़ेसी मतलब भो “गड़बड़ी”।

![](https://cdn.door43.org/obs/jpg/360px/obs-en-04-04.jpg)

केतिबा शऊ बरिऊ पिच़ंञ, परमेश्‍वरे अब्राम नाऊं-आ कि एक मऊं सा गप्‍पा किया। परमेश्‍वरे तेसर बोलिया, “तेपें देश ओ नातियोर छोड़ि कर तेस देशारि उठि ग ज़े देश हऊं तूर हेरालू। हऊं तूर आशीष देऊं होरेक तूञं एक मोड़ा जाति बणऊं। हऊं तेरा नाऊं मोड़ा करू। ज़े तूर आशीष देल हऊं तेसर आशीष देऊं, होरक ज़े तूर श्राप देल तेसर हऊं श्राप देऊं। तेरा कारणें दुनिये बदे कुल आशीष लेई बटेले।”

![](https://cdn.door43.org/obs/jpg/360px/obs-en-04-05.jpg)

च़े अब्रामे परमेश्‍वरा गप्‍पा मनिया। तेनी अपें बदे परगरोर जायदाद-ओ अपीं घर्न सारैर लेई तेस देशारि कनानारि उठि गिया ज़े परमेश्‍वरे तेसर हेरालोरा थिया।

![](https://cdn.door43.org/obs/jpg/360px/obs-en-04-06.jpg)

ज़ेखैईं अब्राम कनान अपरिया त परमेश्‍वरे तेसर बोलिया, “तेपां च़ोउरो फेरे हेर। हऊं तूर इ बदे देश देऊं होरेक तेरा वंश हमेशा कि ओनि इस पुटि अधिकार थेले।” च़े अब्राम तेस देशा बसि गिया।

![](https://cdn.door43.org/obs/jpg/360px/obs-en-04-07.jpg)

मलिकिसिदक नाऊंआं कि एक मुषुड्ला थिया ज़े बदेओंञ महान परमेश्‍वरा कि यहूदी पुजारी थिया। एक झा ज़ेखेए अब्राम लड़ाई करि अइना थिया त से-ओ अब्राम हतुए। मलिकिसिदके अब्रामर आशीष दी बोलिया, “बदेओंञ महान परमेश्‍वर ज़े सर्गो दुनिये कि मालिक भो से तूर आशीष देल।” च़े अब्राम-ए लड़ाईन डक्‍शी किउरे चीजो कि दसवांश मलिकिसिदकर दिता।

![](https://cdn.door43.org/obs/jpg/360px/obs-en-04-08.jpg)

केत्‍तिया वर्ष भुई गिया, पर एबेईं च़ेक अब्राम-ओ सारैंञ कोई मठे नोथे। परमेश्‍वरे अब्रामा सा गप्‍पा किया होरेक फिरी वाईदा किया कि तेसर एक कोआ ज़मल ज़ेरा सर्गा तारे असुन तेरी तेसी मस्‍स बंशजो भोले। अब्रामे परमेश्‍वरा कि वाईदे पुटि विश्वास किया। परमेश्‍वरे घोषणा किया कि अब्राम एक धर्मी मऊं थिया किसबोलि तेनी परमेश्‍वराकि वाईदे पुटि विश्‍वास कियाति।

![](https://cdn.door43.org/obs/jpg/360px/obs-en-04-09.jpg)

च़े परमेश्‍वरे अब्रामर एक वाचा किया। आमतौरंञ, एक वाचा दुई झुंडा बिच़ा एम्‍फ्‍यो ओनि कमोर करिबे ओनि समझौता भुईबा। परमेश्‍वरे अब्रामा सा से वाईदा तेखेईं कियाति ज़ेखेए अब्राम सर्सुत निन्‍दरा थिया, पर से तेखेंई भि परमेश्‍वरर शुंईं बटना थिया। परमेश्‍वरे बोलिया, “हऊं तेरी घर्न सारैंञ तेरा ओनि कोए आशीष देऊं। हऊं तेरे वंशोर इ कनान देश देनूं।” पर अयता च़ेक अब्रामा कि कोई कोआ नोथा।

*उत्पत्ति पाठ 11-15 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_04_128kbps.m4a

## 5. वायदे कोआ

https://openbiblestories.org/l/gda/story-5/

![](https://cdn.door43.org/obs/jpg/360px/obs-en-05-01.jpg)

अब्राम ओ सारै कि कनान देशा अपरिबे कि दश बरिऊ पिच़ंञ, एबेंईं च़ेक भि तेनोंञ मठे नोथे। तेरे, अब्रामा घर्नि सारै तेसर बोलिया, “परमेश्‍वरे मूर एबेईं च़ेक मठे भुईब ज़ोगा किउरा नाई होरेक हेबे हऊं बई ज़मईबे ओनि बुवि गिउरि असु, हेरो, मेरि परगर हाजिरा इटि असे। तेस्सा भि ब्‍याह करि बिज़ कि तेनी मेरा ओनि बई जई बटोरा लोई।”

![](https://cdn.door43.org/obs/jpg/360px/obs-en-05-02.jpg)

च़े अब्रामे हाजिरे सा ब्‍या करि बिदा। हाजिरेर एक बई भुआ, होरेक अब्रामे तेसि नाऊं इश्‍माएल थैईया। पर सारै हाजिरे सा जेगदंञ करिब ठारूई। ज़ेखेंईं इश्‍माएल तेरहा बरिऊ कि थिआ, परमेश्‍वरे फिरि अब्राम सा गप्‍पा किया।

![](https://cdn.door43.org/obs/jpg/360px/obs-en-05-03.jpg)

परमेश्‍वरे बोलिया, “हऊं बदेओंञ मोड़ा परमेश्‍वर भोऊं। हऊं तू सा एक वाचा करू।” च़े अब्रामे फ्‍यक्‍स किया। परमेश्‍वरे अब्रामर इ भि बोलिया, “तु केतेक्‍बा जातिऊ कि बा भोल। हऊं तूर ओ तेरे बंशजोर तेनो एम्‍फां भुईबे ओनि कनान देशाकि जिमि दी बिज़ू होरेक हऊं हमेशा कि ओनि तेनो परमेश्‍वर भोऊं। तूर तेपें घराने कि बदे मुषुड्लेओ कि खतना करिब पड़ल।”

![](https://cdn.door43.org/obs/jpg/360px/obs-en-05-04.jpg)

“तेरि घर्न सारै एक कोआ जालि से वाईदे कोआ भोल। तेसी नाऊं इसहाक थेओ। हऊं तेस्‍सा मेपां वाचा बणईं थेऊं होरेक से एक मोड्डा जाति बणिं गाल। हऊं इश्‍माएलर भि एक मोड्डा जाति बणऊं, पर मेरा वाचा इसहाका सा भोल।” च़े परमेश्‍वरे अब्राम नाऊं लेख्‍फी करि अब्राहम करि बिदा, ज़ेसी मतलब भो “मस्‍ह ज़िऊं कि बा”। परमेश्‍वरे सारै नाऊं लेख्‍फी करि सारा करि बिदा ज़ेसी मतलब भो “बदेओ या”।

![](https://cdn.door43.org/obs/jpg/360px/obs-en-05-05.jpg)

तेस ध्‍याड़ेन अब्राहमे अपें घरे कि बदे मुषुड्लेओ कि खतना किया। लगभग एक बरी पिच़ंञ, ज़ेखैईं अब्राहम शऊ बरिऊ कि थिया होरेक सारा च़ोउर बीओ दश बरिओ थी, तेखेंए सारे अब्राहमा कोएर जाया। ज़ेरा परमेश्‍वरे तेनोर बोलोरा थिया तेने तेसी नाऊं इसहाक थैइया।

![](https://cdn.door43.org/obs/jpg/360px/obs-en-05-06.jpg)

ज़ेखेंईं इसहाक छ़ोकरा भुआ त परमेश्‍वरे इ बोलिकर अब्राहमा विश्‍वासाकि परीक्षा किया, “तेपें एकलौते कोएर लेई, होरेक तेसर मेरा ओनि बलि रूपन मारि बिज़।” फिरि अब्राहमे परमेश्‍वरा गप्‍पा मनिया होरेक अपें कोएर बलि दीबे ओनि छक्‍कन किया।

![](https://cdn.door43.org/obs/jpg/360px/obs-en-05-07.jpg)

ज़ेखेंई अब्राहम ओ इसहाक बलि चढ़इबे ठारियार गइला थिये तेखेंई इसहाके पुछ़िया, “हे बा, अस्‍प्‍यों कच़ा बलि चढ़इबे ओनि कठो त असुन, पर बलि करिबे ओनि छेड्ल्‍लू कोटि असे?” अब्राहमे जुवाब दिता, “हे मेरा कोआ, परमेश्‍वर बलि चढ़इबे ओनि छेड्ल्‍लू इन्‍तज़ाम करि बिज़ल।”

![](https://cdn.door43.org/obs/jpg/360px/obs-en-05-08.jpg)

ज़ेखेंईं तेने बलि चढ़इबे ठारि अपरि गे, च़े अब्राहमे इसहाकर बनि कर वेदी ठारि लेटई बिदा। से अपें कोएर मारिब तैयार थिया कि परमेश्‍वरे बोलिया, “च़ोख! कोएर नुक्‍सान म अपरा! हेबे मेंईं ज़ाईं बिदा कि तु मूं सा डरना किसबोलि तेंईं मेपें एकलौते कोएर भि मूंञ बच़ई न थैइया।”

![](https://cdn.door43.org/obs/jpg/360px/obs-en-05-09.jpg)

कच़ा ज़ेंञ अब्राहमे एक पेरूर कईया ज़े बोर्चेओ बिच़ा शतोरा थिया। इसहाका ठारि बलि ओनि परमेश्‍वरे पेरु कि इन्‍तज़ाम कियाति। अब्राहमे तुषिकर पेरूर बलि चढ़ई बिदा।

![](https://cdn.door43.org/obs/jpg/360px/obs-en-05-10.jpg)

च़े परमेश्‍वरे अब्राहमर बोलिया, “किसबोलि तु मेरा ओनि बदे दिर दिबे हीट लेओरा थिया, तेपें एकलौते कोएर भि, तेरे हऊं तूर आशीष दीबे वाइदा करनूं। तेरे वंशजो सर्गा तारेओंञ भि जादा भोले। किसबोलि तैंईं मेरा भाषे किउरा असे तेरे हऊं तेरे परिवारा द्वारे संसारा बदे कुलोर आशीष देऊं।”

*उत्पत्ति पाठ 16-22 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_05_128kbps.m4a

## 6. परमेश्वर इसहाकाओनि इन्‍तज़ाम करना असे

https://openbiblestories.org/l/gda/story-6/

![](https://cdn.door43.org/obs/jpg/360px/obs-en-06-01.jpg)

ज़ेखेए अब्राहम ऐस्‍सी बूउई गिउरा थिया च़ा तेसी कोआ, इसहाक, छ़ोकरा भूई गिउरा थिया। तेरे अब्राहम अपें एक परगरर अपें कोए इसहाका ओनि तेस देशंञ एक घर्न अणिबोनी बिदा ज़ेटी तेसी नाति बेशने थिये।

![](https://cdn.door43.org/obs/jpg/360px/obs-en-06-02.jpg)

ज़ेटी अब्राहमा नाति बेशने थिये तेस देशा गईबेर एक मस्‍स लमे सफरा पिचंञ परमेश्‍वरे तेस परगरा कि रिबकेसा गप्‍पा किवाया । से अब्राहमा भाई की पोत्री थी।

![](https://cdn.door43.org/obs/jpg/360px/obs-en-06-03.jpg)

रिबका अपें टबरर छोड़िकर तेस परगरा सा घरेआर पलाटुई गईबेओनि ईछ़ि गेयी। ज़ेरीई तेने घरे अपरे इसहाके तेस्‍सा ब्‍याह करि बिदा।

![](https://cdn.door43.org/obs/jpg/360px/obs-en-06-04.jpg)

केतोक्‍बा धियाड़े पिचंञ, अब्राहम मरि गिया। च़ा परमेश्‍वरे अब्राहमा कोआ इसहाकर, अब्राहमा सा किउरा वाचे बजे आशीष दिता। तेस वाचेंञ परमेश्‍वरा एक वायदा थिया कि अब्राहमा गणिब मेत्‍तेंईंठो औलादो भोले। पर इसहाका घर्न रिबके मठे नूए।

![](https://cdn.door43.org/obs/jpg/360px/obs-en-06-05.jpg)

इसहाके रिबके ओनि प्रार्थना किया, होरेक परमेश्‍वरे तेसर जोंडु बई भूईबेर आशीष दिता। ज़ेस मुके तेने बई रिबके पेटंञए थिये तेने एन्‍फेओ बीच़ा द्रड़ुईब ठारुए, तेरे ज़े भि भूईब लगोरा थिया रिबके से परमेश्‍वरर शप्‍पी करि बिदा।

![](https://cdn.door43.org/obs/jpg/360px/obs-en-06-06.jpg)

परमेश्‍वरे रिबकेर बोलिया, “तु दूई कोओर जालि। तेनो औलादोंञ दूई बिक्रे-बिक्रे ज़ाति बणेंले। तेने एन्‍फेयो बिच़ा द्रड़ेओले। पर ज़ेठे कोएंञ ज़मना ज़ातिर केंठे कोएंञ अईने ज़ाति की भाषे करिब पड़ल।”

![](https://cdn.door43.org/obs/jpg/360px/obs-en-06-07.jpg)

ज़ेखेंए रिबके कि बई ज़मे, त ज़ेठा कोआ रक्‍था-ओ शिकाला थिया, होरेक तेने तेसी नाऊं एसाव थैया। तेखेंए मठा कोआ एसावा थुरिर प्रई ज़मिया, होरेक तेने तेसी नाऊं याकूब थैया।

*उत्‍पत्‍ति पाठ 24:1-25:26 एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_06_128kbps.m4a

## 7. परमेश्‍वर याकूबर आशीष देना असे

https://openbiblestories.org/l/gda/story-7/

![](https://cdn.door43.org/obs/jpg/360px/obs-en-07-01.jpg)

ज़ेखेए तेने मठे मोड़े भूई गे त याकूबर घरे बेशिबा रूठ च़ेवा, पर एसावर बणां जीवोर मारिबा रूठ च़ेवा। रिबके याकूबा सा दा थैया, पर इसहाके एसावा सा दा थैया।

![](https://cdn.door43.org/obs/jpg/360px/obs-en-07-02.jpg)

एक झा, ज़ेखेए एसाव शिकार करि पलाटुआ त से मस्‍स भूकरे थिया। एसावे याकूबा सा बोलिया, “ज़े तेपें बणांउरा असे तेटिंञ अईदेक ज़ेंञ बगत मूर देओ।” याकूबे जुवाब दिता, “मुहंडा ई वाईदा कर कि ज़ेठा कोआ भूईबे बजहंञ हर एक चीज ज़े तपींर हतेओना, तेने बदे तपीं मूर देल।” इकरी एसावे तेने बदे चीजोर याकूबर दीबे वाईदा करि बिदा। च़ा याकूबे तेसर बगत दिता।

![](https://cdn.door43.org/obs/jpg/360px/obs-en-07-03.jpg)

इसहाक एसावर आशीष दीवा चाहन्‍नाति। पर इसि अगरंञ कि तेनी ऐरा किया, रिबका ओ याकूबे, याकूबा कका एसाव बणिंकर अपें बा सञींर धोखा दिता। इसहाक बूआ थिया होरेक हेबे हेरि नोटना थिया। तेरे याकूबे एसावा डबूं लवा होरेक छेड्ल्‍लु खलर अपें मूथू ओ हथा जिल्‍बी करि बिदा।

![](https://cdn.door43.org/obs/jpg/360px/obs-en-07-04.jpg)

याकूब इसहाका कच़ा आया होरेक बोलिया, “हऊं एसाव भोऊं। हऊं तेरे आओरा भोऊं ताकि तु मूर आशीष दे।” ज़ेखेंए इसहाके छेड्ल्‍लु खलर बुदा-होरेक डबूंओर शिञिंया, त तेनी च़ेता कि से एसाव भो होरेक तेसर आशीष दिता।

![](https://cdn.door43.org/obs/jpg/360px/obs-en-07-05.jpg)

एसावे याकूबा सा जेगदंञ किया किसबोलि याकूबे तेसी ज़ेठा कोए की अधिकारर होरेक साथे तेसी आशीषोर भि च़ोरी बिदाति। तेरे तेनी तेनो बा कि मरिबे पिच़ंञ याकूबर मारी बिज़िबे कि योजना बणांया।

![](https://cdn.door43.org/obs/jpg/360px/obs-en-07-06.jpg)

पर रिबके एसावा की योजनेर शुंईं बिदा। तेरे तेनी होरेक इसहाके याकूबर तेसी नातियो सा बेशिबे ओनि मस्‍स दूरेआर बिज़ छ़ईया।

![](https://cdn.door43.org/obs/jpg/360px/obs-en-07-07.jpg)

याकूब केतेक्‍बा बरियो च़ेक रिबके नातियो सा बेठा। तेस्‍से मुकेंञ तेनी ब्‍याह किया होरेक बारा कोओर होरेक एक कुईर जाया। परमेश्‍वरे तेसर डरूवां सउखार बणंईं बिदा।

![](https://cdn.door43.org/obs/jpg/360px/obs-en-07-08.jpg)

बी बरियो च़ेक कनान देशन अपें घरेंञ दूरे बेशि पिच़ंञ, याकूब अपें टबर, अपें परगरो, होरेक अपें जानवरो की बदे छुंडो सा तेसोरी पलाटुआ।

![](https://cdn.door43.org/obs/jpg/360px/obs-en-07-09.jpg)

याकूब तेरे मस्‍स डरोरा थिया किसबोलि तेनी च़ेता कि एसाव एबैईं भि तेसर मारि बिज़िबा चाहना थिया। तेरे तेनी तक्‍सा रूपन जानवरो की छुंडोर एसावा कच़ा बिदा। ज़ेने परगर तेने छुंडोर लेईकर गेति तेने बोलिया, “तेरा परगर याकूब, इने जानवरोर तूर देना। से यूरनाए अइला असे।”

![](https://cdn.door43.org/obs/jpg/360px/obs-en-07-10.jpg)

पर एसाव हेबे याकूबा कि नुक्‍सान न चाहनाति। इसी मुहन्दे, से तेसर एक फेरा फिरी हेरिकर मस्‍स तुठोरा थिया। तेस पिच़ंञ याकूब कनान देशन रूठू करि बेठा। च़ा इसहाक मरि गिया होरेक याकूबोर एसावे तेसर पथि बिदा। ज़े वाचे कि वाईदा परमेश्‍वरे अब्राहमा सा कियाति तेने हेबे इसहाकंञ याकूबा पूटि अई गिउरा थिया।

*उत्पत्ति पाठ 25:27-35:29 एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_07_128kbps.m4a

## 8. परमेश्‍वर यूसुफओ तेसी टबरर बच़ाना असे

https://openbiblestories.org/l/gda/story-8/

![](https://cdn.door43.org/obs/jpg/360px/obs-en-08-01.jpg)

केतिबा बरियो पिच़ंञ, ज़ेखेए याकूब बूआ भुई गिउरा थिया, च़ा तेनी अपें दईला कोआ यूसुफर तेसी भाईयो कि जांच करिबोनी बिदा ज़े जानवरो की छुंडो देखभाल करनेति।

![](https://cdn.door43.org/obs/jpg/360px/obs-en-08-02.jpg)

यूसुफा भाईठो तेस्‍सा मस्‍स जेग्‍दंञ करने थिए किसबोलि तेनो बा तेस्‍सा मस्स दा करना थिया होरेक तेरे भि कि यूसुफे सूईंया हैरियाति कि से तेनो शासक भूई गाल। ज़ेखेए यूसुफ अपें भाईऊ कच़ा आया त तेने तेसर कैदी बणईं बिदा होरेक तेसर परगरो की सौदा करने तेनोर बिक्रीं बिदा।

![](https://cdn.door43.org/obs/jpg/360px/obs-en-08-03.jpg)

घरे पलाटुइबे अगरंञ यूसुफा भाईए यूसुफा डबूंअर च़ीरीकर बकरी रतन सेलई बिदा। फिरि तेने से डबूं अपें बार हैरालिया ताकि से इ च़ेअल कि खि बणां जानवरे यूसूफर मारि बिदोरा असे। याकूब मस्‍स दु:खी थिया।

![](https://cdn.door43.org/obs/jpg/360px/obs-en-08-04.jpg)

परगरो सौदा करने तेने मऊंवी यूसुफर मिस्र देशारि लेई गे। नील नेई मुक्‍खीं बसोरा मिस्र एक मोड़ाओर तागतवर देश थिया। तेने परगरो की सौदा करने तेने यूसुफर एक सउकार सरकारी अधिकारिर परगरा रूपन बिक्रीं बिदा। यूसुफे अपें मालिका की रूठेआशी सेवा किया, होरेक परमेश्‍वरे यूसुफर आशीष दिता।

![](https://cdn.door43.org/obs/jpg/360px/obs-en-08-05.jpg)

तेसी मालिका घर्नीं यूसुफा सा ज़बरज़स्‍ती करिबे कोशिश किया, पर यूसुफे एरा ठो परमेश्‍वरा विरोधन पाप करिबेंञ मुकरि गिया। से रोशुई गेई होरेक यूसुफा पूटि हफ्‍सी कि इल्‍ज़ाम लवई बिदा, तेरे तेसर प्रई कर कैदन बिज़ छ़ईया। इटि च़ेक की कैदन भि, यूसुफ परमेश्‍वरा ओनि सच्‍च़ा बेठा, होरेक परमेश्‍वरे तेसर आशीष दिता।

![](https://cdn.door43.org/obs/jpg/360px/obs-en-08-06.jpg)

दूई बरियो पिच़ंञ, यूसुफ निर्दोष भूई भि कैदन थिया, एक राती, फिरौन, ज़ेरा कि मिस्रा मऊं अपें रज़्‍ज़ेर हक देने थिये, फिरौने दूई सुंइयां हैरिया ज़ेनि लेई से मस्‍स च़िनि गिया। तेसी केन्‍नी भि सलाहकारे तेसर तेने सुंइयों कि मतलब बतई नोटिया।

![](https://cdn.door43.org/obs/jpg/360px/obs-en-08-07.jpg)

परमेश्‍वरे यूसुफर सुंईयें मतलब बतईबे तागत दितोरा थिया, तेरे फिरौने यूसुफर जेलखानेंञ अपीं कच़ा बुलाया। यूसुफे तेसर तेने सुंये मतलब बताया होरेक बोलिया, “मिस्र देशन परमेँश्‍वर मस्‍स फसलो कि सत बरियो पिच़ंञ अकाला की सत बरी बिज़िब तियार असे।”

![](https://cdn.door43.org/obs/jpg/360px/obs-en-08-08.jpg)

फिरौनर यूसुफंञ एतेक असर भुआ कि तेनी तेसर मिस्र देशा कि अयक बदेओंञ तागतवर मऊं ठहरई बिदा।

![](https://cdn.door43.org/obs/jpg/360px/obs-en-08-09.jpg)

यूसुफे मऊंओंञ रूठू फसलों की सत बरियो दौरान मस्‍स बगतर ठोक्‍कन करिबेओनि बोलिया। ज़ेखेए सत बरियो अकाल आया तेखेए यूसुफे मऊंओर से बगत बिक्रिंयां ताकि तेनोर खईबोनि पूरेओरा लोई।

![](https://cdn.door43.org/obs/jpg/360px/obs-en-08-10.jpg)

से अकाल मिस्र देशन ज़ेत्‍ती नोथा, पर कनान देशन भि डरईब ज़ोगा थिया ज़ेटी याकूबोर तेसी टबर बेशने थिये।

![](https://cdn.door43.org/obs/jpg/360px/obs-en-08-11.jpg)

तेरे याकूबे अपें बदेओंञ ज़ेठे मठेओर बगत लेईबोनि बिदा। ज़ेखेए तेने बगत लेईबोनि यूसुफा समटे खा भुए त तेने भाई-ई यूसुफर न प्रांया। पर यूसुफे तेनोर प्रयांई बिदा।

![](https://cdn.door43.org/obs/jpg/360px/obs-en-08-12.jpg)

इ पता करिबोनि कि खि तेने बदली गेना तेनोर परखी पिच़ंञ, यूसुफे तेनोसा बोलिया, “हऊं तुइपां भाई यूसुफ भोऊं! डरो माओ। ज़ेखेए तुप्‍सें मूर परगरा रूपन बिक्रीं बिदाति त तुप्‍से मदम करिबे कि च़ेताति, पर परमेश्‍वरे तेस मदमर भलाई करिबेओनि इस्‍तेमाल किया! अयोहोर मिस्र देशन बेशो ताकि हऊं तुइपां होरेक तुइफे टबरोओनि बगता इंतज़ाम करि बटू।”

![](https://cdn.door43.org/obs/jpg/360px/obs-en-08-13.jpg)

ज़ेखेए यूसुफा भाई-ई घरेआरी पलाटुए होरेक अपें बा याकूबर बताया की यूसुफ एबैईं भि ज़ीना असे त से मस्‍स तुषि गिया।

![](https://cdn.door43.org/obs/jpg/360px/obs-en-08-14.jpg)

हालांकि याकूब एक बूआ मऊं थिया तांबी से अपें टंडे – टबरो सा मिस्र देशारि उठि गिया, होरेक तेने तेटी बसि गे। याकूबा मरिबे अगरंञ, तेनी अपें एकिकी मठेओर आशीष दिता।

![](https://cdn.door43.org/obs/jpg/360px/obs-en-08-15.jpg)

वाचे कि वाईदा ज़े परमेश्‍वरे अब्राहमा सा कियाति से इसहाका पुटि होरेक तेस पिच़ंञ याकूबोर, तेस पिच़ंञ तेसी बारा कोओर होरेक तेनोकि टबरो पुटि अई गिउरा थिया। तेने बारा मठेओ औलाद इस्राएला की बारा ज़ात बणिं गे।

*उत्‍पति पाठ 37-50 एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_08_128kbps.m4a

## 9. परमेश्‍वर मूसेर अई बोलना असे

https://openbiblestories.org/l/gda/story-9/

![](https://cdn.door43.org/obs/jpg/360px/obs-en-09-01.jpg)

यूसुफा मरिबे पिच़ंञ तेसी बदे नाति मिस्रन बसीगे। तेने होरेक तेनोकि बंशजो एस्‍सी बरियो च़ेक मिस्रनए बेठे होरेक तेने मस्‍स औलादो जाइये। तेने इस्राएली गणुंएं।

![](https://cdn.door43.org/obs/jpg/360px/obs-en-09-02.jpg)

केतिबा शऊ बरियो पिच़ंञ, इस्राएलिउ की मऊं मस्‍स बढ़ी गिउरे थिये। होरेक मिस्रा मऊं हेबे इने गप्‍पेयोर बिस्रुई गिउरे थिये कि तेनो साथि करिबेओनी यूसुफे मस्‍स खीं किउरा थिया। तेने इस्राएलिउंञ डरी गे किसबोली तेने मऊं तेनोंञ मस्‍स ज़ेंञ थिये। तेरे तेस मुके मिस्रा पुटि शासन करने फिरौने इस्राएलिउर मिस्रियो की परगर बणंईं बिदा।

![](https://cdn.door43.org/obs/jpg/360px/obs-en-09-03.jpg)

मिस्री इस्राएलिउर मस्‍स मोड़े इमारतो होरेक इटि च़ेक कि कई नगरिर बणंईबे ओनि मजबूर किया। तेस खरा क्रष्‍टे तेनोकि ज़िंदगीर मस्‍स दु:खी बणंईं बिदा, पर परमेश्‍वरे तेनोर आशीष दिता होरेक मस्‍स संतानों जाये।

![](https://cdn.door43.org/obs/jpg/360px/obs-en-09-04.jpg)

फिरौने कईया कि इस्राएलिउंञ मस्‍स संतानों भोनेति, तेरे तेनी अपें मऊंओर इस्राइलिउ की बदे मुषुड्ल मठेओर नील नेईन फटई कर मारि बिज़िबे कि हुकम दिता।

![](https://cdn.door43.org/obs/jpg/360px/obs-en-09-05.jpg)

एक ख़ास इस्राएली ज़लऊवीं एक मुषुड्ल मठेर जाया। तेनी होरक तेसी घ्याते ज़ेतेक तेनोंञ भूई बटिया तेस मठेर यूंकई थैया।

![](https://cdn.door43.org/obs/jpg/360px/obs-en-09-06.jpg)

ज़ेखेए तेस मठे की या-बाए तेसर होरक मस्‍स यूंकई नोटिया त, तेने तेसर मारिबेञ बच़ईबे ओनि एक तारी देनाठो बल्‍लीन नील नेई मुखा पुटि पांईं घा बीच़ा थैई बिदा। तेसी मोड़ी भैंईं-इ इ हैरिबेओनी तेसी निगरानी किया कि तेस्‍सा खि भोल।

![](https://cdn.door43.org/obs/jpg/360px/obs-en-09-07.jpg)

फिरौना कूई तेस बड्लिर हैरिकर तेस अंदर झांकिया। ज़ेखेए तेनी एक मठेर कईया त तेनी अपें मठे की रुपंञ लेई बिदा। तेनी एक इस्राएली ज़लऊंर तेसर दूध पिलईबेओनि कमन थैई बिदा, इ ज़ाईंब मेतेए कि से तेस मठे की असली या थी। ज़ेखेए से मठा एतोक मोड़ा भूई गिया कि हेबे तेसर अपीं या कि दूदा ज़रूरत नोथा, च़ा तेनी फिरौना कूई कच़ा तेसर पलाटेरी बिदा, तेसी नाऊं मूसा थैया।

![](https://cdn.door43.org/obs/jpg/360px/obs-en-09-08.jpg)

एक झा, ज़ेखेए मूसा मोड़ा भूई गिउरा थिया, च़ा तेनी कईया कि एक मिस्री एक इस्राएलिर कूटना। मूसे अपें साथि इस्राएलिर बच़ईबे कोशिश किया।

![](https://cdn.door43.org/obs/jpg/360px/obs-en-09-09.jpg)

ज़ेखेए मूसे च़ेता कि तेसर कन्‍नूई न हेरल त तेनी तेस मिस्रिर मारि बिदा होरेक तेसी फुकर पथि बिदा। पर मूसे ज़े कियाति तेसर केनियां कई बिदाति।

![](https://cdn.door43.org/obs/jpg/360px/obs-en-09-10.jpg)

फिरौनर पता लगि गिया कि मूसे खि किउरा असे। तेनी तेसर मारि बिज़िबे कोशिश किया, पर मूसा मिस्रंञ बणांरि नशि गिया। फिरौना सिपाहिए तेसर तेटि लोई नोटिया।

![](https://cdn.door43.org/obs/jpg/360px/obs-en-09-11.jpg)

मूसा मिस्र देशंञ एस्‍सी दूरे एक मिद्यान देशन बेशिब ठारुआ। तेटि तेनी एक मठी सा ब्‍याह करि बिदा होरेक दूई मठे जाये।

![](https://cdn.door43.org/obs/jpg/360px/obs-en-09-12.jpg)

मूसा अपें शोरे की पेरूओ कि छुंडो देखभाल करना थिया। एक झा, तेनी एक ज़न्‍ना छ़ोव्‍कर कया ज़े त्रईब मेतेए ज़न्नाति। तेसर हैरिबओनि से तेस छ़ोव्‍का कच़ा गिया। ज़ेखेए से तेसी मस्‍स कच़ा थिया त परमेश्‍वरे तेस सा गप्‍पा किया। परमेश्‍वरे बोलिया, “हे मूसा, तेपें बूटोर खोई बिज़। तु एक शुच़्‍चे ठारीन खा असे।”

![](https://cdn.door43.org/obs/jpg/360px/obs-en-09-13.jpg)

परमेश्‍वरे बोलिया, “मेईं मेपें मऊंओं की दु:खोर काओरा भो। हऊं तपींर फिरौना कच़ा बिज़ू ताकि तपीं इस्राएलिउर मिस्रा कि परगर भूईबे कमंञ भईरों खनी अणे। हऊं तेनोर कनान देश देऊं, से देश ज़ेसी मैईं अब्राहम, इसहाकोर याकूबा सा वाईदा किउरा असे।”

![](https://cdn.door43.org/obs/jpg/360px/obs-en-09-14.jpg)

मूसे पूछ़िया, “अगर मऊंवी ज़ाईंबा चाहिया कि मूर केनी बिदोरा भो त हऊं खि बोलू?” परमेश्‍वरे बोलिया, “ज़े हऊं भोऊं से हऊं भोऊं। तेनोर बोलो, ‘परमेश्‍वरे मूर तुप्‍सेयों कच़ा बिदोरा भो।’ तेनोसा इ भि बोलो, ‘हऊं तुप्‍सेयों पूर्वजो अब्राहम, इसहाक-ओ याकूबा परमेश्‍वर यहोवा भोऊं।’ मेरा इ नाऊं हमेशा कि भो।”

![](https://cdn.door43.org/obs/jpg/360px/obs-en-09-15.jpg)

मूसा डरना थिया होरेक फिरौना कच़ा गईबा न चाहनाति किसबोलि तेनी च़ेता कि से रूठू बोलि नोटल, तेरे परमेश्‍वरे मूसे भाई, हारूनर, तेसर साथि करिबे ओनि बिदा।

*निर्गमन पाठ 1-4 एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_09_128kbps.m4a

## 10. परमेश्‍वर मिस्र देशा पुटि दश संकटो बिज़ना असे

https://openbiblestories.org/l/gda/story-10/

![](https://cdn.door43.org/obs/jpg/360px/obs-en-10-01.jpg)

परमेश्‍वरे मूसाओर हारूनर चेतावनी दिता कि फिरौन ढीठ भूई गाल। ज़ेखेए तेने फिरौना कच़ा गे त तेने बोलिया, “इस्राएला परमेश्‍वर एरा बोलना असे, ‘मेरे मऊंओर गईब दे!’” पर फिरौने तेनो की न शुंयां होरेक इस्राएलिउर गईबेओनि अज़ाद करिबे मुंह्‍दे तेनी तेनोर होरक डरोंआ मेहनत करिबेओनि मजबूर किया।

![](https://cdn.door43.org/obs/jpg/360px/obs-en-10-02.jpg)

फिरौन तेनो मऊंओर गईब दिबेंञ लगातार मना करला बेठा, तेरे परमेश्‍वरे मिस्रा पुटि दश डरोंआ डरईब ज़ोगे संकटो बिदेन। इने संकटो द्वारे, परमेश्‍वरे फिरौनर हैरालिया कि से फिरौनओर मिस्रा कि देउओंञ मस्‍स तागतवर असे।

![](https://cdn.door43.org/obs/jpg/360px/obs-en-10-03.jpg)

परमेश्‍वरे नील नेई कि पाईंर रता ठो बणंईं बिदा, पर फिरौने एबैईं भि इस्राएलिउर गईब नेता।

![](https://cdn.door43.org/obs/jpg/360px/obs-en-10-04.jpg)

परमेश्‍वरे बदे मिस्रंञ मेंढको बिदे। फिरौने मेंढकोर दूरे करिबेओनि मूसेर ज़ी शबस किया। पर बदे मेंढको की मरि गई पिच़ंञ, फिरौने अपें सेमर मोड़ा करि बिदा होरक इस्राएलिउर मिस्रंञ निसिब नेता।

![](https://cdn.door43.org/obs/jpg/360px/obs-en-10-05.jpg)

तेरे परमेश्‍वरे च़च्‍ड़ो कि संकट बिदा। तेस पिच़ंञ तेनी माछ़िउ कि संकट बिदा। फिरौने मूसा होरेक हारूनर बुलाया होरेक तेनोसा बोलिया कि अगर तेने तेस संकटर रोकी बिज़ेले त इस्राएली मिस्रर छोड़ि कर गई बटेले। ज़ेखेए मूसे प्रार्थना किया त परमेश्‍वरे मिस्रा पुटिंञ माछ़िउर घिरई बिदा। पर फिरौने अपें सेमर मोड़ा करी बिदा होरेक तेने मऊंओर अज़ाद भूईकर गईबनेता।

![](https://cdn.door43.org/obs/jpg/360px/obs-en-10-06.jpg)

इसींञ अगरीं, परमेश्‍वरे मिस्‍त्रियो कि बदे जाओरे जानवरोर दुखिकर मरि गईब दिता। पर फिरौना सेम मोड़ा भूई गिउरा थिया होरेक तेनी इस्राएलिउर गईब नेता।

![](https://cdn.door43.org/obs/jpg/360px/obs-en-10-07.jpg)

च़ा परमेश्‍वरे मूसेसा फिरौना समटे बालूंन पठा फटईबेओनि बोलिया। ज़ेखेए तेनी एरा किया त मिस्रा मऊंओ कि त्रपी पुटि झ़केउंआं फोलो निसी आये, पर इस्राएलिउर खीं नूआं। परमेश्‍वरे फिरौना सेमर मोड़ा करि बिदा, होरेक फिरौने इस्राएलिउर अज़ाद भूईकर गईब नेता।

![](https://cdn.door43.org/obs/jpg/360px/obs-en-10-08.jpg)

इस पिच़ंञ, परमेश्‍वरे शरू झ़वाये होरेक मिस्रा कि मस्‍तज़ेंञ फसलोर नाश करि बिदा होरेक ज़ऊं कउंआं भि भईरों निथा तेसर मारि बिदा। फिरौने मूसाओर हारुनर बुलाया होरेक तेनोर बोलिया, “मेईं पाप किउरा असे। तुप्‍सीं गई बटोले।” तेरे मूसे प्रार्थना किया, होरक सरगंञ शरू झ़ईबा रूकि गिया।

![](https://cdn.door43.org/obs/jpg/360px/obs-en-10-09.jpg)

पर फिरौने फिरी पाप किया होरक अपें सेमर मोड़ा करि बिदा। तेनी इस्राएलिउर अज़ाद भूईकर गईब नेता।

![](https://cdn.door43.org/obs/jpg/360px/obs-en-10-10.jpg)

तेरे परमेश्‍वरे मिस्रा पुटि टिट्टो कि छुंडोर अईब दिता। इने टिट्टे तेने बदे फसलर खई बिदा ज़ेने फसलो शरूअंञ बच़ि गिउरा थिया।

![](https://cdn.door43.org/obs/jpg/360px/obs-en-10-11.jpg)

च़ा परमेश्‍वरे अनारा करि बिदा ज़े त्राई दियो च़ेक छ़ुटा। इ एतोक डरईब ज़ोगा थिया कि मिस्रि मऊं अपें घरेंञ निसी नोटेन। पर ज़ेटी इस्राएली मऊं बेशने थिये तेटी प्रागा थिया।

![](https://cdn.door43.org/obs/jpg/360px/obs-en-10-12.jpg)

इने नऊं संकटों पिच़ंञ भि, फिरौने इस्राएलिउर अज़ाद भूईकर गईबदिबेंञ मना करि बिदा। किसबोलि फिरौने न शुंयाति तेरे परमेश्‍वरे एक आखरी संकटर बिज़िबे योजना बणांया। इ फिरौना सेमर लेख्‍फि करि बिज़ल।

*निर्गमन पाठ 5-10 बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_10_128kbps.m4a

## 11. फसह कि त्‍योहार

https://openbiblestories.org/l/gda/story-11/

![](https://cdn.door43.org/obs/jpg/360px/obs-en-11-01.jpg)

परमेश्‍वरे मूसा ओ हारूनर फिरौना कच़ा इ बोलिबेर बिदा कि इस्‍त्राएलिओर गईब दे। तेने तेसर चिताया कि अगर तपीं एनोर गईब न देल त, परमेश्‍वर मिस्‍त्रा कि मऊंओर होरेक जानवरो कि मुंहड्‍क्‍वां मठेओर मारि बिज़ल। फिरौने इ शुंईकर भि परमेश्‍वरा पुटि विश्‍वास करिबेर-ओ परमेश्‍वरा गप्‍पा मनिबेंञ इन्‍कार करि बिदा।

![](https://cdn.door43.org/obs/jpg/360px/obs-en-11-02.jpg)

परमेश्‍वरे तेस पुटि विश्‍वास करनेओ ओनि तेनोर बच़इबे ओनि एक योजना बणांया। हर परिवारंञ एकिर निष्‍पाप उर्नू लेई तेस मारिबा या बलि दीबा थिया।

![](https://cdn.door43.org/obs/jpg/360px/obs-en-11-03.jpg)

परमेश्‍वरे इस्राएलिउर तेस उर्नू कि रतर मेपां-मेपां घरे लवईबेर बोलिया। तेनोर उर्नू मांसा त्राईबा थिया होरेक अखमीरी रोटि सा बल्‍ज़ि करि खईबा थिया। परमेश्‍वरे तेस बगतर खई पिच़ंञ तेरी मिस्र छोड़िबे ओनि तैयार बेशिबेर बोलिया।

![](https://cdn.door43.org/obs/jpg/360px/obs-en-11-04.jpg)

ज़ेरा करिबेर परमेश्‍वरे इस्राएलिउर आज्ञा दितोरा थिया तेने तेस हिसाबे बदे-दिर किया। आद राति परमेश्‍वर मुंहड्‍क्‍वां कोएर मारला मिस्र देशा बिच़ंञ भुई गिया।

![](https://cdn.door43.org/obs/jpg/360px/obs-en-11-05.jpg)

इस्राएलिउ कि बदेओ द्वारन रत लगोरा थिया, तेरे परमेश्‍वरे तेनो घरेर छोड़ि बिदा। तेत अण्‍डीं कि बदे मऊं बच़ोरे थिये। तेने उर्नू रता बजेहे बच़ि गेति।

![](https://cdn.door43.org/obs/jpg/360px/obs-en-11-06.jpg)

पर मिस्री संञ परमेश्‍वरा गप्‍पे पूटी भरोसा किउरा नोथा होरेक तेसिकी हुकुमोर न मनियाति। तेरे परमेश्‍वरे तेनो घरोर न छोड़िया। परमेश्‍वरे मिस्रिउ कि हर एक मुहंड्क्‍वें कोओर मारि बिदा।

![](https://cdn.door43.org/obs/jpg/360px/obs-en-11-07.jpg)

जेला ढप्‍योरे केदिओंञ दी, फिरौना मुहंड्क्‍वां मठेओ च़ेक, बदे मुंहड्क्‍वां मुशुल मठा मरि गिया। एम्‍फा गहरा दुखा बजेह मिस्रा मऊं डरोंआ रोलने थिये।

![](https://cdn.door43.org/obs/jpg/360px/obs-en-11-08.jpg)

तेस्से राति, फिरौने मूसा ओ हारूनर अई बोलि बोलिया, “इस्राएलिउर लेई इस्‍से मुके मिस्रंञ निसि गाओ!” मिस्री मऊंवीं भि इस्राएलिउर तेस्‍से मुके निसि गईबेर बोलिया।

*निर्गमन पाठ 11:1-12:32 अंञ एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_11_128kbps.m4a

## 12. इस्‍त्राएली मऊंओं कि मिस्र देशंञ निसिबा

https://openbiblestories.org/l/gda/story-12/

![](https://cdn.door43.org/obs/jpg/360px/obs-en-12-01.jpg)

इस्राएली मऊं मिस्र किन निसि डरोआं तुठोरे थिये। हेबे तेने परगरो नोथे, होरेक तेने वाइदा किऊरे देशार गाने थिये! ज़े भि इस्राएली गेठा, मिस्री से बदे तेनोर दिता, इटि च़ेक कि सोना रोपा होरेक ज़रूरी समानों च़ेक। अइक देशा कि मिन ज़ेंञ मऊंवीं परमेश्‍वरा पूटी विश्‍वास किया होरेक ज़ेखेए इस्राएली मऊं मिस्र किन निथे त तेने भि तेनो सा भुई गे।

![](https://cdn.door43.org/obs/jpg/360px/obs-en-12-02.jpg)

दिया मुके बदड़ा कि एक मोड्‍डा थम तेनो अगरीं-अगरीं हणिंया। होरेक राति मुके अगि थम बणि गिया। परमेश्‍वर ज़े अगि ओ बदड़ा थमन थिया, हमेशा तेनो सा थिया होरेक तेनी सफरा मुके तेनो अगुवाई किया। तेनोर सिर्फ एतेके करिबा थिया कि तेस पिच़-पिच़े हणोंरा लोई।

![](https://cdn.door43.org/obs/jpg/360px/obs-en-12-03.jpg)

मिन ध्‍याड़े पिच़ंञ, फिरौन ओ तेसी मऊंई अपें सेमर लेख्‍फी करि बिदा। से फिरि इस्राएलिउर अपां दास बणंइबा चाहना थिया। तेरे तेने इस्राएलिउ कि पीछा किया। इ परमेश्‍वरे थिया ज़ेनी तेनो सेमर लेख्‍फी करि बिदा। तेनी एरा तेरे किया किसबोलि से चाहनाति कि बदे इ प्रयानोरा लोई कि फिरौनंञ होरेक मिस्रियो कि बदे देवताओंञ, यहोवा परमेश्‍वर, मस्‍स तागतवर असे।

![](https://cdn.door43.org/obs/jpg/360px/obs-en-12-04.jpg)

ज़ेखेईं इस्राएली मिस्र कि सेनईर अइब कईया त तेनोर पता लगिया कि फिरौना सेना रख्‍ता समुन्‍दरा बिच़ा शच़ि गेन। तेने डरोंआं डरिकर रोलिब ठारूए, “असे मिस्रर किस छोड़ि बिदा? असे मरिब तियार असु।”

![](https://cdn.door43.org/obs/jpg/360px/obs-en-12-05.jpg)

मूसे इस्राएलिउर लाई, “डरिबा बंद करो! परमेश्‍वर अज़ तुईफा ओनि लड़ल होरेक तुसोर बच़ाल।” च़े परमेश्‍वरे मूसेर लाई, “इनों मऊंओर रख्‍ता समुन्‍दरारि अगलि बढ़िबेर बोल”।

![](https://cdn.door43.org/obs/jpg/360px/obs-en-12-06.jpg)

च़े परमेश्‍वरे तेस बदड़ा थमर लेई कर इस्राएलिउ ओ मिस्रिउ कि बिच़ा छ़ई छ़ईया ताकि मिस्री मऊंवी इस्राएलिउर कई बटोरा न लोई।

![](https://cdn.door43.org/obs/jpg/360px/obs-en-12-07.jpg)

परमेश्‍वरे मूसेंञ समुन्‍दरा पूटी अपां हथ बढ़ईबेर बोलिया। च़े परमेश्‍वरे ब्‍याने सा समुन्‍दरा पाईंर इसो-ओसो करि बिदा, ज़ेसी बजेहे समुन्‍दरा बिच़ंञ एक बत बणिं गिया।

![](https://cdn.door43.org/obs/jpg/360px/obs-en-12-08.jpg)

इस्राएली मऊं एम्‍फा दुईयो तरफे पाईं कि भिति सा शुक्‍का धर्ता पूटी समुन्‍दरंञ हणिब ठारूए।

![](https://cdn.door43.org/obs/jpg/360px/obs-en-12-09.jpg)

च़े परमेश्‍वरे तेस बतंञ बदड़र उछ़ुई बिदा ताकि मिस्री मऊंवी इस्राएलिउर बच़ि कर गईब काओरा लोई। मिस्रिए तेनोर प्रवईबे ओनि तेनोकी पिच्‍छ़ीं गईबे की फैंसला किया।

![](https://cdn.door43.org/obs/jpg/360px/obs-en-12-10.jpg)

च़े तेने समुन्‍दरा बते तेस बता पूटी इस्राएलिउ कि पीछा किया, पर परमेश्‍वरे मिस्रिउर डरई बिदा होरेक रथोर शच़ई बिदा। तेने बाकुईब ठारुए, “नशो! इस्राएलिउ तरफे परमेश्‍वर द्रड़ेओना!”

![](https://cdn.door43.org/obs/jpg/360px/obs-en-12-11.jpg)

बदे इस्राएली समुन्‍दरा कि अइक हारोरिंञ अपरि गे। च़े परमेश्‍वरे मूसेर लाई फिरि पांयांरि हथ अगलि कर। ज़ेखेए मूसे एरा किया, च़े पांईं मिस्री सेने पूटी आया होरेक फिरि तेरी-ई भुई गिया। मिस्रिउ कि पूरा सेना पाईंन डूबि गिया।

![](https://cdn.door43.org/obs/jpg/360px/obs-en-12-12.jpg)

ज़ेखेईं इस्राएली कईया कि मिस्री मरि गिउरे थिये च़े तेने परमेश्‍वरा पुटि विश्‍वास किया। तेने विश्‍वास किया कि मूसा परमेश्‍वरा तरफे बोलना थिया।

![](https://cdn.door43.org/obs/jpg/360px/obs-en-12-13.jpg)

इस्राएली मऊं तेरे भि डरोआं तुठोरे थिये किसबोलि परमेश्‍वरे तेनोर मरिबेंञो दास भुईबेंञ बच़ई बिदोरा थिया। हेबे तेने परमेश्‍वरा अराधना ओ तेसी भाषे करिबे ओनि आज़ाद थिये। इस्राएली एम्‍फां आज़ादी मनईबे ओनि परमेश्‍वरर महिमा दीबे ओनि केतिबा घीतोर बोलिया किसबोलि परमेश्‍वरे तेनोर मिस्रा कि सेने सा बच़ाओरा थिया।

![](https://cdn.door43.org/obs/jpg/360px/obs-en-12-14.jpg)

परमेश्‍वरे इस्राएलिउर बर्षोत एक त्‍योहार मनइबे हुकम दिता इ हीत करिबे ओनि कि केरा परमेश्‍वरे मिस्रिउर केरा डक्‍शी किवाया होरेक तेनोर परगर भुईबेंञ आज़ाद किया। इ फसह कि त्‍योहार गणुंआ। इ त्‍योहार मनईबे ओनि एक ठीक-ठाक उर्नु बलि करिबा थिया, तेसर चियइबा थिया, होरेक तेसर सुमा न गिउरा रोटि सा खईबा थिया।

*निर्गमन पाठ 12:33-15:21 अंञ एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_12_128kbps.m4a

## 13. इस्‍त्राएला मऊंओं सा परमेश्‍वरा कि वाचा

https://openbiblestories.org/l/gda/story-13/

![](https://cdn.door43.org/obs/jpg/360px/obs-en-13-01.jpg)

इस्राएलिउर रख्‍ता समुन्‍दरंञ पांरीं लेईकर गई पिच़ंञ, परमेश्‍वर तेनोर बंणंञ भूईकर सीनै बोलने घऊ आरी लेई गिया। इ सेए घऊ थिया ज़ेटी मूसे त्रन्‍णां बोर्च़ा कइयाति। तेने तेसे घऊआ पाई एम्‍फा तम्बू ठेरिया।

![](https://cdn.door43.org/obs/jpg/360px/obs-en-13-02.jpg)

परमेश्‍वरे मूसा ओ इस्राएला कि बदे मऊंओर बोलिया, “तुसोर हमेशा मेरे गप्‍पेयोर मनिबा असे होरेक ज़े वाचा हऊं तुसो सा बननूं तेसर बणंई थेईबा असे। अगर तुसे एरा करोले, त तुसे मेरा इनाम किमती धन, यहूदी पुजारी की राज्‍य, होरेक एक पवित्र जाति गणेंओले।”

![](https://cdn.door43.org/obs/jpg/360px/obs-en-13-03.jpg)

परमेश्‍वरा द्वारे तेस कच़ा अइबे ओनि मऊंवी त्राई दियो च़ेक एम्फेयोंर छक्‍कन किया। च़े परमेश्‍वर सीनै घऊआ पूटी ओथा। ज़ेखेईं परमेश्‍वर आया त तेटी भुंयोल आया, बिजली च़ल्‍की, धूं भुआ, होरेक रणंशिञों की ज़ोरे च़ाला खनिया। च़े मूसा अपीं तेस घऊआ पुटि चढ़ि गिया।

![](https://cdn.door43.org/obs/jpg/360px/obs-en-13-04.jpg)

च़े परमेश्‍वरे मऊंओ सा एक वाचा किया। परमेश्‍वरे बोलिया, “हऊं तुइफां परमेश्‍वर, यहोवा भोऊं। हऊं-ए भोऊं ज़ेनी तुसोर मिस्रा की परगर भुईबेंञ भइलि खनिया। केसोआ होरेक देऊ-आ की आराधना म करो।”

![](https://cdn.door43.org/obs/jpg/360px/obs-en-13-05.jpg)

मूर्ति म बणांओ होरेक तेनो आराधना म करो, किसबोलि हऊं, यहोवा, तुइफां एक्‍के परमेश्‍वर भोऊं। मदम गप्‍पेयो ओनि मेरा नाऊं म लेओ। सब्‍ता ध्‍याड़ेर पवित्र मनिबे ओनि हीत थेओ। बोलिबे मतलब, छ: दी पूरा तुइफां बदे कम करो, अइत्‍वार तुईफां नह्च़ि करिबे ओ मूर हीत करिबे ध्याड़ा भो।”

![](https://cdn.door43.org/obs/jpg/360px/obs-en-13-06.jpg)

“अपें या बा-ओ कि आदर करो। हत्‍या म करो। झ़केउंआं कम म करो। चोरी म करो। मेपें पड़ोसी कि घर्नि, तेसी घर, या तेसी कोसंञ भि समानर लेईबे हीट म थैओ।”

![](https://cdn.door43.org/obs/jpg/360px/obs-en-13-07.jpg)

परमेश्‍वरे तेने मऊंओर ज़े नियमों दितोरे थिये तेने तेनो नियमोंर मनिबे ओनि राजि भुए। तेने सिर्फ परमेश्‍वरा मऊं भुईबे ओ सिर्फ तेसी आराधना करिबे ओनि राजि भुए।

![](https://cdn.door43.org/obs/jpg/360px/obs-en-13-08.jpg)

परमेश्‍वरे इस्राएलिउर एक मोड्डा तम्‍बू बणंइबेर बोलिया ज़े मिलापा कि तंबू थिया। परमेश्‍वरे तेनोर हेरालि दिता की केरा बणंइबा असे, होरेक तेसी अण्‍डीं केनो चीजोर थेइबा असे। परमेश्‍वरे तेस तंबूर दूई पूरीउन बणंइबे ओनि एक डरोंआं मोड़ा पार्दा बणंइबोनि बोलिया। परमेश्‍वर तेस पार्दे कि पिच्‍छ़ी हारोरिंञ पूरीन अयल होरेक तेटी बेशल। ज़ेटी परमेश्‍वर थिया तेस पूरीन गइबे इजाज़त सिर्फ मोड़ा यहूदी पुजारिर थिया।

![](https://cdn.door43.org/obs/jpg/360px/obs-en-13-09.jpg)

तेनो मऊंओर तेस मिलापा तम्‍बू समटे एक बेदीर बणइंब पड़ल। कऊं भि ज़े परमेश्‍वरा कि व्‍यवस्‍था कि आज्ञा न मनल से तेस वेदी पूटी एक जानवर लेई अयल। च़े पुजारी तेसर बलि करल होरेक वेदी पूटी परमेश्‍वरा ओनि बलि रूपन ज़ाल। परमेश्‍वरे बोलिया कि तेस जानवरा रत तेस मऊं कि पापर घटि बिज़ल। एरा ठो, हेबे परमेश्‍वर तेस पापर न हेरल। से मऊं परमेश्‍वरा नज़रीन “शुच्‍चा” गणेओल। परमेश्‍वरे मूसे भाई हारूनर होरेक हारूना वंशजोर अपां याजक भूईबे ओनि चुनिया।

![](https://cdn.door43.org/obs/jpg/360px/obs-en-13-10.jpg)

च़े परमेश्‍वरे इने दश आज्ञा रूणांकि दूई पट्टी पूटी लिखीकर मूसे आरी दी बिदा। परमेश्‍वरे पालन करिबे ओनि मऊंओर केतेक्‍बा कानूनों दिता। अगर तेने इने बदे कानूनों भाषे किया त परमेश्‍वरे तेनोर आशीष दिबे ओ तेनोर बच़ई थैइबे कि वाईदा किया। पर परमेश्‍वरे बोलिया कि अगर तेने इनो गप्‍पेयो कि पालन न किया त परमेश्‍वर तेनोर सज़ा देल।

![](https://cdn.door43.org/obs/jpg/360px/obs-en-13-11.jpg)

एस्‍सी ध्‍याड़े च़ेक, मूसा सीनै घऊआ पूटी ए बेठा। से परमेश्‍वरा सा गप्‍पा करना थिया। पर मऊं तेसर च़ोखि-च़ोखि छपि करि गे। तेरे तेने हारूना कच़ा सोना लेई आये होरेक तेसर एक मूर्ति बणइबे ओनि बोलिया ताकि तेने परमेश्‍वरा ठारि तेसी आराधना करि बटोरा लोई। एरा ठो, तेने परमेश्‍वरा विरोधन पाप किया।

![](https://cdn.door43.org/obs/jpg/360px/obs-en-13-12.jpg)

हारूने बंगडे ठो एक सोने मूर्ति बणांया। तेने मऊंवीं तेस मुर्ति आराधना करिबा च़ुक्‍सी करि बिदा होरेक तेसर बलि चढ़ाया! तेनो पापा बजे परमेश्‍वर तेनो सा डरोंआ रोषुआति। परमेश्‍वर तेनोर नाश करि बिज़िबा चाहन्‍ना थिया। पर मूसे तेनोर न मारिबे ओनि परमेश्‍वरंञ प्रार्थना किया। परमेश्‍वरे तेसि शबस शुंईं तेनोर नाश न किया।

![](https://cdn.door43.org/obs/jpg/360px/obs-en-13-13.jpg)

तेस पिच़ंञ मूसा सीनै घऊआ पूटींञ बुलिर ओथा। से रूणां की दुई पटि लेओरा थिया ज़ेस पूटी परमेश्‍वरे दश आज्ञा लिखोरे थिये। च़े तेनी तेस मूर्तिर कईया। से एतेक रोषेओरा थिया कि तेनी तेने दुई पटि त्रोई बुस-बुस करि बिदे।

![](https://cdn.door43.org/obs/jpg/360px/obs-en-13-14.jpg)

च़े मूसे तेस मूर्तिर पींईं कर तेस बुर-बुर करि बिदा, होरेक तेसी से बुर-बुर किउरा तेसर पाईन मियंई तेसर तेनो मऊंओर पिलई बिदा। परमेश्‍वरे तेनो मऊंओं पूटी एक खरी बिदा होरेक तेनो बिच़ंञ केतेक्‍बा मऊं मरि गे।

![](https://cdn.door43.org/obs/jpg/360px/obs-en-13-15.jpg)

ज़ेनो पटिउर मूसे त्रोई बिदाति तेनो ठारि मूसे दश आज्ञाओं कि खर्के पटिउर बणांया। च़े से फिरि घऊआ पूटी चढ़ि गिया होरेक प्रार्थना किया कि परमेश्‍वर तेनोर माफ करल। परमेश्‍वरे मूसे कि शुंईया होरेक तेनोर माफ किया। खर्के पटिउ पूटी दश अज्ञाओर लेई मूसा घउअंञ बुलिर ओथा। च़े परमेश्‍वरे सीनै घउअंञ दी वईदा किउरा देशा च़ेक इस्राएलिऊ कि अगुवाई किया।

*निर्गमन पाठ 19-34 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_13_128kbps.m4a

## 14. बणां भटकिबा

https://openbiblestories.org/l/gda/story-14/

![](https://cdn.door43.org/obs/jpg/360px/obs-en-14-01.jpg)

इस्राएलिउर बदे कानूनों बतई पिच़ंञ परमेश्‍वरे सीनै घऊंअंञ बत हेरालिया। परमेश्‍वर तेनोर वाईदे देशन लेई गईबा चाहना थिया। इ देश कनान भि गणेओना थिया। परमेश्‍वर बदड़ा थम बणि तेनो अगरीं-अगरीं हणिंया, होरेक तेने तेस पिच़-पिच़े हणे।

![](https://cdn.door43.org/obs/jpg/360px/obs-en-14-02.jpg)

परमेश्‍वरे अब्राहम, इसहाक ओ याकूबा सा वाईदा कियाति कि से वाईदा किउरा देश तेनो वंशजोर देल, पर इस मुके तेटि केतेक्‍बा जाति मऊं बेशने थिये। तेने कनानी गणेओने थिये। इने कनानी मऊं परमेश्‍वरा आराधना करने नोथे होरेक परमेश्‍वरा आज्ञा मन्‍ने नोथे। तेने हफ्‍सी की देउओ की आराधना करने थिये होरक मदम-मदम कमों करने थिये।

![](https://cdn.door43.org/obs/jpg/360px/obs-en-14-03.jpg)

परमेश्‍वरे इस्राएलिउर बोलिया, “ज़ेखेईं तुसे तेस वाईदे कि देशन गाओले त तेटाकि बदे कनानिऊंञ छुटकारा लेई बिज़ो। तेनो सा म मिलो होरेक तेनो सा ब्‍या भि म करो। तुसोर तेनोकि बदे मूर्तिउर खतम करि बिज़िबा असे। अगर तुसे मेरा आज्ञा न मनोले त, च़े तुसे मेरे ठारि तेनो देउओ की आराधना करिब ठारेओले।”

![](https://cdn.door43.org/obs/jpg/360px/obs-en-14-04.jpg)

ज़ेखेए इस्राएली कनान ठारि कच़ा अपरे, मूसे इस्राएला कि हर जातिञ एक-एक करि बारा मुषुल्‍डेओर चुनिया। तेनी तेनोर गइकर तेस देशाकी भेद लेईबे आज्ञा दिता कि हेरो से देश केरा असे। तेनोर तेनो कनानिऊ की भेद भि लेइबा थिया कि तेने तागतबर असुना या कमज़ोर असुन।

![](https://cdn.door43.org/obs/jpg/360px/obs-en-14-05.jpg)

तेने बारा मुषुल्‍ड्ले पूरा कनान देशाकी दूई बी ध्‍याड़े च़ेक सफर करि पलाटुए। तेने मऊंओर बताया, “से देश उपजाऊ असे होरेक फसल भि मस्‍ह भोना!” पर दश भेदी लाई, “तेनो नगर डरोंआ मज़बूत असे होरेक तेने मऊं मोड्‍डे फुके असुन! अगर असे तेनो पूटी हमला करले त, अस्‍पीं पक्‍का यहर्ज़ि करि गऊंले होरेक तेने अस्‍प्‍योंर मारि बिज़ेले।”

![](https://cdn.door43.org/obs/jpg/360px/obs-en-14-06.jpg)

तेरी-इ कालेब ओ यहोशू होरेक दुई भेदीए बोलिया, “इ छेच्‍छ़ैईं भो कि कनाना मऊं लम्‍मे ओ तागतवर असुन, पर अस्‍पीं ज़रुर तेनोर यहर्बि करि बटले! परमेश्‍वर हईंपा ओनि लड़ल।”

![](https://cdn.door43.org/obs/jpg/360px/obs-en-14-07.jpg)

पर मऊंवीं कालेब ओ यहोशू कि न शुंईया। तेने मूसा ओ हारूना पूटी रोषुई बोलिया, “तुसे असोर एरा घाटे डरइबे ज़ोगा ठारि किस लेई आओरे असु? असोर मिस्रनए बेशिब ज़ोगा थिउरा भोसेक। अगर अस्‍पीं तेस देशन गऊंले त अस्‍पीं लड़ाईन मरि गऊंले, होरेक कनाना की मऊं हईंपीं घर्निउर-ओ मठेओर परगर बणंई बिज़ेले।” तेने मऊं तेनोर वापिस मिस्रारि लेईकर गइबे ओनि एक होरेक परधान चुनिबा चाहने थिये।

![](https://cdn.door43.org/obs/jpg/360px/obs-en-14-08.jpg)

ज़ेखेईं तेने मऊंवी पूरा बोलिया त परमेश्‍वर डरोंआ रोषुई गिउरा थिया। परमेश्‍वरे मिलापा तम्‍बून अइकर बोलिया, “तुसे मेरा विरोधन लड़ाई किया, तेरे तुसो बदेओर इस जंगला भटकिब पड़ल। हर एक मऊं ज़े भि बी बरियोंञ या तेसिंञ मस्‍ह उमरा भोल तेटि मरि गाल होरेक कद्‍दी भि तेस देशन अंडुई नोटे ज़े हऊं तुसोर देनूं। सिर्फ कालेब ओ यहोशू तेटि अंडेओले।”

![](https://cdn.door43.org/obs/jpg/360px/obs-en-14-09.jpg)

ज़ेखेईं मऊंवी परमेश्‍वरर एरा बोलिब शुंईया, त तेने दु:खी भुई गे किसबोलि तेने पाप किउरा थिया। तेरे तेने कनाना कि मऊंओ पूटी हमला करिबे फैंसला किया। मूसे तेनोर न गईबोनि चेतावनी दिता किसबोलि परमेश्‍वर तेनो सा न गाल, पर तेने तेसी न शुंईया।

![](https://cdn.door43.org/obs/jpg/360px/obs-en-14-10.jpg)

परमेश्‍वर इस लड़ाईन तेनो सा न गियाति, तेरे कनानिऊ सा तेने यहर्ज़ि करि गे होरेक तेनो बिच़ंञ केतेक्‍बा ज़िऊंर मारि बिदा। धले इस्राएली मऊं कनान किंञ पलाटुए। अइना दुई बी बरि च़ेक, तेने जंगला इसो-ओसो भटकेले।

![](https://cdn.door43.org/obs/jpg/360px/obs-en-14-11.jpg)

इस्राएलिऊ की जंगला भटकिबे दूई बी बरि पूरा, परमेश्‍वरे तेनो कि ज़रूरतोर पूरा किया। परमेश्‍वरे तेनोर स्‍वर्गंञ “मंण्‍णां” गणेयोना रोटि दिता। परमेश्‍वरे तेनोर मठे आकारा च़ई बिदे ताकि तेनोंञ खइबेर मांसा भूरा लोई। तेस मूके, परमेश्‍वरे तेनोकी डबूंओर बूटर च़ीरूइबेंञ बच़ई थैईया।

![](https://cdn.door43.org/obs/jpg/360px/obs-en-14-12.jpg)

इटि च़ेक कि परमेश्‍वरे तेनोर पीबे ओनि चमत्‍कारा-सा घऊअंञ पाईं च़ेक खनिया। पर इसी बावजूद, इस्राएली मऊंवी परमेश्‍वर ओ मूसे विरोधन शिकायत किया होरेक कुंण-कुंण किया। तांबी, परमेश्‍वर विश्‍वासा ज़ोगा थिया। तेनी ज़े वाईदा किउरा थिया कि से अब्राहम, इसहाक, होरेक याकूबा वंशजो ओनि करल से परमेश्‍वरे किया।

![](https://cdn.door43.org/obs/jpg/360px/obs-en-14-13.jpg)

एक मुके ज़ेखेंईं तेनो एटि पांईं नोथा, परमेश्‍वरे मूसेर बोलिया, “घऊआ सा गप्‍पा कर, होरेक तेटिंञ पांईं निसल।” पर मूसे घऊआ सा गप्‍पा न किया। इसी बजाए, तेनी लोऊई सा घऊअर दूई फेरा द्रल दिता। एरा करि तेनी परमेश्‍वरा निरादर किया। बदेओर पीबे ओनि घऊअंञ पांई त निसि आया, पर परमेश्‍वर मूसे सा रोषुआ। परमेश्‍वरे बोलिया, “किसबोलि तेईं एरा किया, तेरे तु वाईदा किउरे देशन अंडुई नोटे।”

![](https://cdn.door43.org/obs/jpg/360px/obs-en-14-14.jpg)

ज़ेखेईं इस्राएली मऊं दूई बी बरि च़ेक बणंन भटकि मुकोरे थिये, तेखेईं ज़ेने परमेश्‍वरा विरोधन लड़ाई कियाति तेने बदे मरि गे। च़े परमेश्‍वर तेनोर फिरि तेस वाईदे देशा कच़ा लेई गिया। हेबे मूसा मस्‍ह बूउवी गिउरा थिया, तेरे परमेश्‍वरे मऊंओर अगुवाई करिबे ओनि तेसर साथि यहोशू चुनिया। परमेश्‍वरे मूसेंञ इ वाईदा भि किउरा थिया की एक झा से तेनो मऊंओं कच़ा मूसे घाटे एक परमेश्‍वरा तरफे बोलनेर बिज़ल।

![](https://cdn.door43.org/obs/jpg/360px/obs-en-14-15.jpg)

च़े परमेश्‍वरे मूसेर एक घऊआ च़ोन्‍ज़े पूटी गईबे ओनि बोलिया ताकि तेनी वाईदे ठारिर हेरि बटोरा लोई। मूसे तेस वाईदे देशर कईया पर परमेश्‍वरे तेसर तेतन गइबे आज्ञा नेता। च़े मूसा मरि गिया, होरेक इस्राएली बीओ दश दी च़ेक शोक मनाया। यहोशू तेनोकि खर्का परधान बणिं गिया। यहोशू एक रूठू परधान थिया किसबोलि तेनी परमेश्‍वरा पुटि भरोसा किया होरेक तेसी गप्‍पेयोर मनिया।

*निर्गमन पाठ 16-17; गिनती 10-14; 20; 27; व्‍यवस्‍थाविवरण 34 अंञ एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_14_128kbps.m4a

## 15. वाईदे देश

https://openbiblestories.org/l/gda/story-15/

![](https://cdn.door43.org/obs/jpg/360px/obs-en-15-01.jpg)

पिच्‍छ़ों मुख्खा, हेबे से ध्याड़ा अई मुकोरा थिया कि इस्राएली मऊं वाइदे देश, कनानन गाले। तेस देशन यरीहो नाऊंआ की एक नगर थिया। तेसी सुरक्षा ओनि तेसी च़ोउरो कुणी पक्‍का ठो भित दितोरा थिया। यहोशूई तेस नगरी दूई भेदियोर बिदा। तेस नगरी राहाब नाउवां की एक झ़केवीं ज़लऊं बेशनिति। तेनी तेन दूई भेदियोर युंकाया, तेस पिच़ंञ तेनी तेनोर नगरींञ बच़ि निसिबे ओनि साथि किया। तेनी एरा तेरे किया किसबोलि से परमेश्‍वरा पुटि विश्‍वास करनिति। ज़ेस मुके इस्राएली मऊं यरीहोर नाश करले तेखेईं तेने राहाब होरेक तेसी टबरर बच़ईबे वाईदा कियाति।

![](https://cdn.door43.org/obs/jpg/360px/obs-en-15-02.jpg)

इस्राएली मऊंओंर वाईदे की देशन गईबे ओनि यरदन नाऊंआ ने टपिबा थिया। परमेश्‍वरे यहोशूर बोलिया, “यहूदी पुजारीओर एगीं गईबे दे।” ज़ेखेईं यहूदी पुजारी यरदन नेईन एन्‍फां पईरि थैया त पांईं की च़लिबा रूकी गिया, ज़ेनी लेई इस्राएली मऊं नेईं पांरि शुक्‍का धर्ति पुटि गई बटोरा लोई।

![](https://cdn.door43.org/obs/jpg/360px/obs-en-15-03.jpg)

ज़ेखैईं तेने मऊं यरदन ने टपि मुके त परमेश्‍वरे यहोशुर बोलिया कि यरीहो पूटी हमला करिबे ओनि छक्‍कन बेशो, हालांकि से नगर डरोंआ पक्‍का थिया। परमेश्‍वरे तेनो मऊंओर बोलिया कि तेनोकि यहूदी पुजारी होरेक सैनिकोर छ: दियो च़ेक तेस नगरी चोउरो फेरे किर्ज़ि करिबा असे। च़े यहूदी पुजारी ओ सैनिके तेरी-इ किया।

![](https://cdn.door43.org/obs/jpg/360px/obs-en-15-04.jpg)

च़े छ़: दियो पिच़ंञ, इस्राएली तेस नगरी कि च़ोउरो फेरे सत फेरा कोरो लवई पिच़ंञ, यहूदी पुजारी रणशिंञ फुकिया होरेक सैनिके ज़ोरे हक खनिया।

![](https://cdn.door43.org/obs/jpg/360px/obs-en-15-05.jpg)

च़े यरीहो कि च़ोउरो फेरे कि भित झ़ई गिया! ज़ेरा परमेश्‍वरे आज्ञा दिति इस्राएली नगरी कि हर चीज़र नाश करि बिदा। तेने सिर्फ राहाब ओ तेसी टबरर छोड़ि बिदा, ज़ेने इस्राएलिउ कि हिस्‍सा बणिं गेति। ज़ेखेंई कनानन बेशने होरेक मऊंवीं शुंईयां कि इस्राएली यरीहोर नाश करि बिदोरा असे त, तेने डरि गे कि इस्राएली तेनो पुटि भि हमला करेले।

![](https://cdn.door43.org/obs/jpg/360px/obs-en-15-06.jpg)

परमेश्‍वरे इस्‍त्राएलिओर आज्ञा दितोरा थिया कि कनानन बेशनि कोसंञ भि जाति सा शांति सा मिलिबा नाईं। पर गिबोनियों नाऊंआ कि एक कनानी जाति यहोशू सा हफ्‍सी बिच़ारोरा थिया कि तेने कनान किंञ दूरा अयक ठारि बेशने ठो भोन। तेने यहोशू सा तेनो सा शांति सा मिलि बेशिबे ओनि शबस किया। यहोशू ओ होरेक इस्‍त्राएली परधानेए परमेश्‍वरंञ न पुच्‍छ़िया कि तेनोर खि करिब लोइना भो। इसि बजाए तेने गिबोनियों सा शांति सा मिलि गे।

![](https://cdn.door43.org/obs/jpg/360px/obs-en-15-07.jpg)

त्राई दियो पिच़ंञ, इस्‍त्राएलिओर पता लगिया कि गिबोनी कनानने बेशने भोन। तेने रोषुए किसबोलि गिबोनी तेनोर धोखा दितोरा थिया। पर तेने तेनो सा शांति सा मिलि बेठे किसबोलि से परमेश्‍वरा समटे किउरा थिया। च़े मिन ध्‍याड़े पिच़ंञ, कनान बेशने एक अयक ज़ाति, एमोरियो कि रज्‍ज़े शुंईंया कि गिबोनिये इस्‍त्रालिओ सा शांति सा हतुई गेन, तेरे तेने अपुंण-पुंणा सैनिकोर एकु-कु करि एक मोड़ा सेना बणंई गिबोना पूटी हमला करि बिदा। गिबोनिये तेनोर साथि करिबे ओनि यहोशू कच़ा एक उज़ाब बिदा।

![](https://cdn.door43.org/obs/jpg/360px/obs-en-15-08.jpg)

च़े यहोशुई इस्‍त्राएली सैनिकोर ठोक्‍कन किया होरेक गिबोनिओ कच़ा अपरिबे ओनि रात पूरा च़ले। दोतेंईं राति तेने एमोनियो कि सैनिकोर हैरान करि बिदा होरेक तेनो पूटी हमला करि बिदा।

![](https://cdn.door43.org/obs/jpg/360px/obs-en-15-09.jpg)

तेस दिया परमेश्‍वर इस्रालिउ ओनि लड़िया। तेनी एमोरिओर डरई बिदा होरेक तेनी मोड़े-मोड़े शरू झ़वईकर मस्‍स ज़ेञ एमोरियोर मारि बिदा।

![](https://cdn.door43.org/obs/jpg/360px/obs-en-15-10.jpg)

परमेश्‍वरे धुपर भि सर्गा एक ठारि थमई बिदा ताकि इस्रालिउर एस्‍सी ध्‍याड़ा हतेओरा लोई ताकि तेने एमोरिओर यहर्बि करि बटोरा लोई। तेस दिया, परमेश्‍वर इस्रालिउ ओनि डक्‍शी कियाति।

![](https://cdn.door43.org/obs/jpg/360px/obs-en-15-11.jpg)

ज़ेखेईं परमेश्‍वर तेने सैनिकोर यहर्बि करि पिच़ंञ, केतेक्‍बा कनानी ज़ाति मऊं इस्रालिउ पुटी हमला करिबे ओनि ठोक्‍कन भोए। यहोशू ओ इस्राली हमला करि तेनोर नाश करि बिदा।

![](https://cdn.door43.org/obs/jpg/360px/obs-en-15-12.jpg)

इनो लड़ाई पिच़ंञ, परमेश्‍वरे इस्राएला कि हर एक जातिर वाईदा किउरा देशन तेनो हिस्‍सा दिता। च़े परमेश्‍वरे इस्रालिउर तेनोकी बदे दायरे पूटी शांति दिवाया।

![](https://cdn.door43.org/obs/jpg/360px/obs-en-15-13.jpg)

ज़ेखेईं यहोशू बूउवी गिया त तेनी इस्राएला कि बदे मऊंओर ठोक्‍कन भुई अयो बोलिया। च़े यहोशुई तेनो मऊंओर हीत किवाया कि तेने तेस वाचेर मनिबे वाइदा किउरा थिया ज़े परमेश्‍वरे तेनो सा सीनै घऊआ पूटी किउरा थिया। तेने मऊंवीं परमेश्‍वरा ओनि विश्‍वासा ज़ोगा बेशिबे होरेक तेसी कानूनाकि पालन करिबे वाईदा किया।

*यहोशू पाठ 1-24 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_15_128kbps.m4a

## 16. बच़ाना

https://openbiblestories.org/l/gda/story-16/

![](https://cdn.door43.org/obs/jpg/360px/obs-en-16-01.jpg)

यहोशू मरिबे पिच़ंञ इस्राएलिए परमेश्वरा कि आज्ञा न मनिया। तेने परमेश्‍वरा कि कानूनोर न मनिया, होरेक तेने तेस वाईदे देशंञ बच़ोरे कनानिउर भईलिर न खनिया। इस्रालिए एम्‍फां सच्‍च़ा परमेश्‍वर, यहोवार छोड़ि कनानिउ देउआ कि अराधना करिबा च़ुख्‍फि करि बिदा। इस्रालिउ कच़ा कोई रज्‍ज़ा नोथा, तेरे ज़े तेनोर ठीक च़ेयोना असे से तेने करने थिये।

![](https://cdn.door43.org/obs/jpg/360px/obs-en-16-02.jpg)

परमेश्‍वरा कि हुकुम न मनिबे द्वारे इस्राएलिए रिवाज़ा शुरुआत किया ज़ेसर केत्‍तिया फेरा दोहरायाति। इ रिवाज़ एरा ठो च़लिया, मिन बरिउ च़ेक इस्राएली परमेश्‍वरा हुकुम मन्‍ने नोथे, च़े परमेश्‍वर तेनोर तेनो बईरिउ सा यहर्बि करिबे द्वारे सज़ा देना थिया। इने बईरि इस्राएलिउंञ तेनोकि चीज़ोर च़ोरी बिज़ने थिये, तेनोकि जायदातर नाश करि बिज़ने ठो थिये, होरेक तेनो बिच़ंञ मस्स ज़ियोंर मारि बिज़ने थिये। फिरि ज़ेखैंईं इस्राएलिउ कि बईरि तेनो पुटि केत्‍तिया बरिउ च़ेक अत्‍याचार करने थिये, तेस पिच़ंञ इस्राएली एम्‍फां पापंञ पश्‍चाताप करने थिये होरेक परमेश्‍वरंञ तेनोर बच़ईबे ओनि प्रार्थना करने थिये।

![](https://cdn.door43.org/obs/jpg/360px/obs-en-16-03.jpg)

हर बार ज़ेखैंईं इस्राएली पश्‍चाताप करने थिये त परमेश्‍वर तेनोर बच़ाना थिया। से एक बच़ाने तेसी द्वारे एरा करना थिया। एक एरा घाटे मऊं ज़े तेनोकि बईरिउ कि खिलाफन लड़ना थिया होरेक तेनोर यहर्बि करि बिज़ना थिया। च़े देशन शान्‍ति भोना थिया होरेक से बच़ाना तेनो पुटि रुठू रीति सा शासन करना थिया। परमेश्‍वरे तेनो मऊंओर बच़ईबे ओनि केत्तिया ज़िञ बच़ानेओर बिदा। परमेश्‍वरे एरा फिरी तेखैईं किया ज़ेखैंईं तेनी मिद्यानियोर, ज़ेने कच़ा बईरि कि ज़ाति कि थिये, तेनोर इस्राएलिउर यहर्बि करिबे कि इज़ाज़त दिता।

![](https://cdn.door43.org/obs/jpg/360px/obs-en-16-04.jpg)

मिद्यानिए सत बरिउ च़ेक इस्राएलिउ कि फसलर लूटिया। इस्राएली मऊं डरोंआ डरि गिउरे थिये, होरेक तेने कूअन युंकूई गाने थिये ताकि मिद्यानी तेनोर लोई बटोरा न लोई। आखिरकार, तेनोर बच़ईबे ओनि तेने परमेश्‍वरर हक दिता।

![](https://cdn.door43.org/obs/jpg/360px/obs-en-16-05.jpg)

गिदोन नावां कि एक इस्राएली मुशुड्ला थिया। एक झा, से एक यूंकेउरा ठारि गेहूं ठुड़किला थिया ताकि मिद्यानी तेसर च़ोरी बटोरा न लोई। यहोवा कि स्‍वर्गदूते गिदोना कच़ा अईकर बोलिया, “हे ताग्‍ती सैनिका, परमेश्‍वर तु साथे असे। ग होरेक इस्राएलिउर मिद्यानिउंञ बच़ा।”

![](https://cdn.door43.org/obs/jpg/360px/obs-en-16-06.jpg)

गिदोना कि बा ए मूर्तिउ समटे बलिदान करिबे ओनि एक वेदी बणांयाति, बदेओंञ मुहंडा परमेश्‍वरे गिदोनर तेस वेदीर त्रोईबे ओनि बोलिया, पर गिदोन मऊंओं सा डरना थिया, तेरे से रात भुईबे ओनि च़ोखिया। च़े तेनी तेस वेदिर त्रोई बुस-बुस करि बिदा। तेनी परमेश्‍वरा ओनि एक खर्का वेदिर बणांया होरेक तेस पुटि परमेश्‍वरा ओनि बलि चढ़ाया।

![](https://cdn.door43.org/obs/jpg/360px/obs-en-16-07.jpg)

होर्दी दोतैंईं मऊंवी कया कि केन्‍या वेदिर त्रोईकर खण्‍णीं करि बिदोरा असे, तेरे तेने डरोंआं रोषुए। तेने गिदोनर मारि बिज़िबे ओनि तेसी घरे गे, पर गिदोना बाई लाई, “तुसे किस तुईंपे देउओ कि मदद करिबे कोशिश करनूं? अगर से देऊ भो त तेसर अपां बचाव अपींर करिब देओ!” किसबोलि तेनी एरा बोलिया तेरे मऊंवीं गिदोनर न मारिया।

![](https://cdn.door43.org/obs/jpg/360px/obs-en-16-08.jpg)

च़े इस्राएलिउर लूटिबे ओनि मिद्यानी मऊं फिरि आये। तेने एतेक बदे ज़ेञ थिये कि तेनोर गिणिं भि बटिबे नोथा। गिदोने तेनो खिलाफन लड़िबे ओनि इस्राएलिउर साथे बुलाया। गिदोने परमेश्‍वरंञ दूई चिन्‍ह गेठा ताकि ई पक्‍का भुई गिउरा लोई कि परमेश्‍वर छ़ेच्‍च़ैंई कि तेसर इस्राएलर बच़ईबे ओनि बोलना असे।

![](https://cdn.door43.org/obs/jpg/360px/obs-en-16-09.jpg)

मुहंडा चिन्‍हा ओनि, गिदोने पेरु कि उनर धरत्रि पुटि थेई परमेश्‍वरर बोलिया कि दोतैंईंक्‍वां ओसर सिर्फ पेरु कि तेस उना पुटि पड़ोरा लोई पर धरत्रि पुटि नूं। परमेश्‍वरे एरीई किया। होर्दी राति, तेनी परमेश्‍वरर बोलिया कि धरत अल्‍ला भूरा लोई पर पेरु उन शुक्‍का छ़ुटोरा लोई। परमेश्‍वरे एरा भि किया। इने दुई चिन्‍हो बजहे, गिदोने विश्‍वास किया कि परमेश्‍वर छ़ेच्‍चैईं चाहना कि तेनी इस्राएलिउर मिद्यानिउंञ बच़ाओरा लोई।

![](https://cdn.door43.org/obs/jpg/360px/obs-en-16-10.jpg)

च़े गिदोने सैनिकोर अपीं कच़ा बुलाया होरेक बीओ बारा हजार मुषुड्ले आये। पर परमेश्‍वरे तेस्‍सा लाई कि इने मस्‍स ज़ेंञ असुन। च़े गिदोने तेनो बदेओर बीओ दुई हजार ज़िउर घरेआर पलाटेरि बिदा ज़ेने लड़ाईंञ डरने थिये। परमेश्‍वरे गिदोना सा लाइ कि इने मुषुड्ले एबैंईं भि मस्‍स ज़ेंञ थिये। तेरे गिदोने त्राई शऊ सैनिकोञ अलावा तेनो बदेओर बिज़ छ़इया।

![](https://cdn.door43.org/obs/jpg/360px/obs-en-16-11.jpg)

तेस राति परमेश्‍वरे गिदोनर लाई, “मिद्यानिउ कि तम्‍बुन गईकर तेनोर गप्‍पा करिब शुंण। ज़ेखैंईं तु शुंणल कि तेने खि गप्‍पा करनेन त तु तेनो पुटि हमला करिबेंञ न डरल।” तेरे तेस राति, गिदोन बुन तेनोकी तम्‍बुन गिया होरेक तेनी एक मिद्यानी सैनिकर अपें साथिर गप्‍पा करिब शुंईयां ज़े तेनी सुंईंयेन काओरा थिया। तेस मुषुड्ले कि साथि लाई, “इस सुंईंये कि मतलब भो कि गिदोना सैना अस्‍पीं मिद्यानी सैनिकोर यहर्बि करि बिज़ल!” ज़ेखैंईं गिदोने इ शुंईंया त तेनी परमेश्‍वरा कि स्‍तुति किया।

![](https://cdn.door43.org/obs/jpg/360px/obs-en-16-12.jpg)

च़े गिदोन अपें सैनोको कच़ा पलाटुआ होरेक तेनो बिंच़ञ हर एकीर रणशिंञ, एक ज़ना बांण, होरेक एक मशाल दिता। तेने तेस तम्‍बुर घेरि बिदा ज़ेटि मिद्यानी सैनिक डेश किउरे थिये। गिदोना कि त्राई शऊ सैनिके एम्‍फा मशाला बांड़ घटोरा थिया तेरे मिद्यानी मऊंवीं तेस मशाले कि प्रागेर कई नोटिया।

![](https://cdn.door43.org/obs/jpg/360px/obs-en-16-13.jpg)

च़े गिदोना कि बदे सैनिके एम्‍फां भांणर साथे त्रोई कर अचानके मशालो कि अगिर प्रकट करि बिदा। तेने एम्‍फां रंणशिंञों फुकिया होरेक हल्‍ला किया, “यहोवा कि होरक गिदोना कि तलवार!”

![](https://cdn.door43.org/obs/jpg/360px/obs-en-16-14.jpg)

परमेश्‍वरे मिद्यानिउर डरई बिदा, तेरे तेने एम्‍फेओर मारिब-कटिब ठारुए। तेरीइ, गिदोने उज़ाबुओर मस्‍स ज़ेंञ इस्राएलिउर मिद्यानियों कि पीछा करिबेर तेनोकी मदद करिबेर बुलईबेर बिदा। तेने तेनो बिच़ंञ मस्‍स ज़ियुंर मारि बिदा होरेक छ़ुटोरे तेनोकि पीछा करि तेनोर इस्राएल देशंञ भईलिर खनि बिदा। तेस दिया एक लाख, बी हजार मिद्यानी मरि गे। होरा करि परमेश्‍वरे इस्राईलर बच़ाया।

![](https://cdn.door43.org/obs/jpg/360px/obs-en-16-15.jpg)

तेने मऊं गिदोनर एम्‍फां रज्‍ज़ा बणईबा चाहनेति, पर गिदोने तेनोर एरा करिब नेता, पर तेनी तेनोंञ ज़ेवरातो मञे ज़े तेनो बिच़ंञ हर एक मिद्यानिउंञ लूटि लेई गेति। तेने मऊंवीं डरोंआ मस्‍स सोना गिदोनर दिता।

![](https://cdn.door43.org/obs/jpg/360px/obs-en-16-16.jpg)

च़े गिदोने तेस सोनेंञ एक खास डबूं बणांया ज़ेरा कि मोड़े यहूदी पुजारी लयोने थिये। पर मऊंवीं तेसी अराधना करिबा च़ुख्‍फि करि बिदा ज़ेरा कि से एक मूर्ति भो।

![](https://cdn.door43.org/obs/jpg/360px/obs-en-16-17.jpg)

च़े परमेश्‍वरे फिरि इस्राएलर सज़ा दिता किसबोलि तेने मूर्ति कि अराधना कियाति। परमेश्‍वरे तेनोकि बईरिउर तेनोर यहर्बि करिब ज़ोगा बणांया। आखिरकार तेने फिरि परमेश्‍वरंञ मदद करिबे ओनि प्रार्थना किया, होरेक परमेश्‍वरे तेनो कच़ा तेनोर बच़इबे ओनि एक होरेक बच़ानेर बिदा। इए गप्‍पा केत्‍तिया फेरा भुआ, इस्राएली मऊं पाप करेले, परमेश्‍वर तेनोर सज़ा देल, तेने पश्‍चाताप करेले, होरेक परमेश्‍वर तेनोर बच़इबे ओनि केसोआरा बिज़ल। केत्‍तिया बरिउ च़ेक, परमेश्‍वरे मस्‍स ज़ेञ बच़ानेओर बिदा ज़ेने इस्रालिउर तेनोकी बईरिउंञ बच़ाया।

![](https://cdn.door43.org/obs/jpg/360px/obs-en-16-18.jpg)

आखिरकार, तेने मउंवीं होरेक देशो कि ठो परमेश्‍वरंञ एम्‍फा ओनि एक रज्‍ज़े कि मांग किया। तेने एक एरा घाटेक रज्‍ज़ा चाहनेति ज़े लमा ओ ताग्ती भुरा लोई, होरेक ज़ेनि लड़ाईन तेनोकि अगुवाई करि बटोरा लोई। परमेश्‍वरर इ विनती पसंद नाया, पर तेनी तेनोर तेरीइ घाटे रज्‍ज़ा दिता ज़ेरा तेने गेश्‍नेति।

*न्‍यायियों पाठ -1-3; 6-8; 1 शमूएल 1-10 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_16_128kbps.m4a

## 17. दाऊदा सा परमेश्‍वरा वाचा

https://openbiblestories.org/l/gda/story-17/

![](https://cdn.door43.org/obs/jpg/360px/obs-en-17-01.jpg)

शाऊल इस्राएलिउ कि मुहड्क्‍वां रज्‍ज़ा थिया। से सलाटा-ओ लमा थिया, ज़ेरा तेने मऊं चाहने थिये हो तेरा। इस्राएला मुहड्क्‍वां राज-आ मुके शाऊल एक रुठू रज्‍ज़ा थिया। पर पिच़ंञ से एक मदम मऊं बणि गिया ज़ेनी परमेश्‍वरा गप्‍प्‍योर न मनिया, तेरे परमेश्‍वरे एक अयक मऊंर चुनिया ज़े एक झा तेसी ठारि रज्‍ज़ा बणल।

![](https://cdn.door43.org/obs/jpg/360px/obs-en-17-02.jpg)

परमेश्‍वरे दाऊद नाऊंआ की एक छ़ोकरा मुषुल्‍लेर चुनिकर एक झा शाऊला ठारि रज्‍ज़ा भुइबे ओनि छक्‍कन करिबा च़ुक्‍फी किया। दाऊद बैतलहम नगरी कि पवाल थिया। केतिबा फेरा, दाऊदे शेर ओ भ्रबुर मारि बिदोरा थिया किसबोलि दाऊदा द्वारे पारिबे मुके तेसी बा-कि पेरुओ पूटी तेने हमला कियाति। दाऊद एक योंञीं-ओ धर्मी मऊं थिया। तेनी परमेश्‍वरा पूटी भरोसा किया होरेक तेसी गप्‍प्‍योर मनिया।

![](https://cdn.door43.org/obs/jpg/360px/obs-en-17-03.jpg)

ज़ेखेई दाऊद एक छ़ोकरा मुषुल्‍ला थिया, तेनी लमा-ओ बिल्‍ड्ला गोलियता सा लड़ाई कियाति। गोलियत एक तकड़ा सैनिक थिया। से डरोंआ तागती ओ लगभग त्राई मीटर लमा थिया! पर परमेश्‍वरे गोलियतर मारिबे होरेक इस्राएलिर बच़इबेर दाऊदर साति कियाति। पर पिच़ंञ, दाऊदे इस्राएला की बइरिओ पूटी केतिबा फेरा डक्‍शी किया। दाऊद एक मोड़ा सैनिक बणिं गिया, होरेक तेनी केतिबा लड़ाइन इस्राएली सैनिको कि अगुवाई किया। मऊंए तेसीकी मस्‍स तारिफ किया।

![](https://cdn.door43.org/obs/jpg/360px/obs-en-17-04.jpg)

मऊंवी दाऊदा सा एरा घाटे दा किया की शाऊल तेस सा ज़ेगदंञ करिब ठारुआ। शाऊल तेसर मारि बिज़िबा चाहना थिया, तेरे दाऊद तेस सा होरेक तेसी सैनिको सा युंकुइबे ओनि बणांरि नशि गिया। एक झा, ज़ेखेईं शाऊल ओ तेसी सैनिक दाऊदर लोण्‍णे थिये त शाऊल एक कू-अन उठि गिया। इ से-हे कू-उ थिया ज़ेतन दाऊद युंकेओरा थिया, पर शाऊले तेसर न कइया। दाऊद शाऊला पिच्‍छ़ीं तेसी कच्‍च़ा उठि गिया होरेक तेसी डबुंअंञ एक खण्‍णीं कटि लेईया। पिच़ंञ, ज़ेखेंई शाऊल तेस कूअंञ निथा त दाऊदे तेसर हक करि तेस प्रातोरे तेस डबूंअर हेरालिया। एरा ठो, शाऊले ज़ाई बिदा कि दाऊदे रज्‍ज़ा बणिंबे ओनि तेसर मारिबेंञ मना करि बिदोरा असे।

![](https://cdn.door43.org/obs/jpg/360px/obs-en-17-05.jpg)

मिन ध्‍याड़े पिच़ंञ, शाऊल लड़ाइन मारि गिया, होरेक दाऊद इस्‍त्राएला रज्‍ज़ा बणिं गिया। से एक रुठू रज्‍ज़ा थिया, होरेक मऊंवी तेस सा दा थैइया। परमेश्‍वरे दाउदर आशीष दिता होरेक तेसर सफल बणांया। दाऊदे केतेक्‍बा लड़ाई लड़े, होरेक परमेश्‍वरे इस्‍त्राएला की बइरिओर यह्र्र्बि करिबे ओनि तेसर साति किया। दाऊदे यरुशलेम नगरीर डक्‍शी करीकर अपां राजधानी बणांया, ज़ेटि से बेठा ओ राज किया। दाऊद दूवी बी बरि च़ेक रज्‍ज़ा बणि बेठा। इस मुके, इस्‍त्राएल तागती-ओ धनवान बणिं गिया।

![](https://cdn.door43.org/obs/jpg/360px/obs-en-17-06.jpg)

दाऊद एक मंदर बणंइबा चाहना थिया ज़ेटि बदे ज़ेंञ इस्राएली परमेश्‍वरा की अराधना करि बटोरा लोई होरेक परमेश्‍वरा ओनि बलिदान करि बटोरा लोई। लगभग च़ोउर शऊ बरिओंञ, तेने मऊं मूसे बणांओरा मिलापा तम्‍बुन परमेश्‍वरा अराधना करने थिये होरेक तेसी ओनि बलिदान चढ़ाने थिये।

![](https://cdn.door43.org/obs/jpg/360px/obs-en-17-07.jpg)

पर तेटि नातान नाऊंआ की एक परमेश्वरा तरफे बोलना मऊं थिया। परमेश्‍वरे तेसर दाऊदारि इ बोलिबे ओनि बिदा, “तेपें केतेक्‍बा मस्‍ह लड़ाई लड़ोरे असुन, तेरे तपीं मेरा ओनि मंदर न बणांल। तेरा कोआ इसर बणांल। तां-भि, हऊं तपींर मस्‍ह आशीष देऊं। तेपां एक वंश हमेशा कि ओनि मेरे मऊंओं पूटी रज्‍ज़े रुपन राज करल।” हमेशा कि ओनि राज करना से दाऊदाकी एक्‍के वंशज मसीह थिया। मसीह परमेश्‍वरा की चुनोरा मऊं थिया ज़े संसारा कि मऊंओर तेनो पापंञ बच़ाल।

![](https://cdn.door43.org/obs/jpg/360px/obs-en-17-08.jpg)

ज़ेखेईं दाऊदे नाताना कि संदेशर शुंईया त तेनी परमेश्‍वरर शबस किया होरेक तेसी महिमा किया। परमेश्‍वर तेसी इज्‍ज़तर बढ़ानाति होरेक तेसर मस्‍ह आशीष देनाति। बेशक, दाऊद न ज़ाण्‍णाति कि परमेश्‍वर इनो गप्‍प्‍योर केखेंई करल। इस मुके असे ज़ाऊं कि इस्राएलिउर केतेक्‍बा मुके च़ेक, लगभग एक हजार बर्षा च़ेक मसीह कि अइबेर च़ोखिब लगल।

![](https://cdn.door43.org/obs/jpg/360px/obs-en-17-09.jpg)

दाऊदे केतिबा बर्षा च़ेक न्‍याया सा अपें मऊंओं पूटी राज किया। तेनी बड़ा आज्ञा साथे परमेश्‍वरा कि गप्‍प्‍योर मनिया होरेक परमेश्‍वरे तेसर आशीषित किया। हालांकि, अपें ज़िन्‍दगी की अंता मुके तेनी परमेश्‍वरा कि विरोधन भयानक पाप किउरा थिया।

![](https://cdn.door43.org/obs/jpg/360px/obs-en-17-10.jpg)

एक झा दाऊदे अपें मेहलंञ भइलिर हेरिब होरेक एक सलाटि ज़लऊंर धोउइब कइया। से तेसर न प्रयांणाति, पर तेसर पता लगि गिया कि तेसी नाऊं बेतशेबा थिया।

![](https://cdn.door43.org/obs/jpg/360px/obs-en-17-11.jpg)

अइकियार फिरिबे ठारि, दाऊदे तेसर अपीं कच़ा अणिंबे ओनि केसोआरा बिदा। तेनि तेस सा डेश करि तेसर घरेआर बिज़ छ़ईया। मिन ध्‍याड़े पिच़ंञ बेतशेबे इ बोलिकर दाऊदा कच़ा उज़ाब बिदा कि से पेटाली असे।

![](https://cdn.door43.org/obs/jpg/360px/obs-en-17-12.jpg)

बतशेबे घ्याता नाऊं उरिय्‍याह थिया। से दाऊदा की रुठ सैनिको बिच़ंञ थिया। इस मुके से लड़ाई लड़िबे ओनि भइरीं गिउरा थिया। दाऊदे उरिय्‍याहर लड़ाईंञ अइ बोलिकर तेसर अपीं घर्नि सा बेशिबे ओनि बोलिया। पर होरेक ठो सैनिक लड़ाइन थिये तेरे उरिय्‍याहे घरेयारि घइबेंञ ठलि बिदा। च़े दाउदे उरिय्‍याहर लड़ाइन बिज़ छ़इया होरेक दाउदे मोड़े सैनिको अधिकारी उरिय्‍याहर एरा घाटे ठारि बिज़िबेर बोलिया ज़ेटि बइरि बदेओंञ जादा ताग्‍ती भूरे लोई ताकि से मरि गिउरा लोई। च़े एरा भुआ कि उरिय्‍याह लड़ाइन मरि गिया।

![](https://cdn.door43.org/obs/jpg/360px/obs-en-17-13.jpg)

उरिय्‍याह कि लड़ाइन मरि गई पिच़ंञ दाऊदे बेतशेबा सा ब्‍या करि बिदा। पिच़ंञ, तेनी दाऊदा कि कोएर जनम दिता। दाऊदे ज़े कियाति तेस बजेहे परमेश्‍वर तेस पूटी डरोंआ रोषेओरा थिया, तेरे परमेश्‍वरे नातान परमेश्‍वरा तरफे गप्‍पा करनेर दाऊदर इ बतइबे ओनि बिदा कि तेसी पाप केतेक मदम थिया। दाऊदे अपें पापाकि पश्‍चाताप किया होरेक परमेश्‍वरे तेसर माफ करि बिदा। अपां छ़ुटोरा जीवनन, अपां खरी मुके दाऊद परमेश्‍वरा पिच़-पिच़े च़लिया होरेक तेसी गप्‍प्‍योर मनिया।

![](https://cdn.door43.org/obs/jpg/360px/obs-en-17-14.jpg)

पर दाऊदा बई मरि गिया। एरा करि परमेश्‍वरे दाऊदर सज़ा दिता। इसिंञ अलावा, दाऊदा मरने च़ेक, तेसी परिवारा की मिन मऊंवीं तेसी विरोधन लड़ाई किया, होरेक दाऊदा की अपां शक्‍ति थोड़ुई गिउरा थिया। पर परमेश्‍वर विश्‍वासाज़ोगा थिया होरेक एबेंईं भि परमेश्‍वरे से-हे किया ज़े दाऊदा सा वाइदा किउरा थिया कि से करल, हालांकि दाऊदे परमेश्‍वरा की आज्ञा न मनियाति। पिच़ंञ, दाऊद-ओ बतशेबा कि अयक बई भुआ, होरेक तेने तेसी नाऊं सुलैमान थैइया।

*1 शमूएल पाठ 10; 15-19; 24; 31; 2 शमूएल 5; 7; 11-12 च़ेक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_17_128kbps.m4a

## 18. इस्राएला दुई हिस्सेन बण्‍णुईबा

https://openbiblestories.org/l/gda/story-18/

![](https://cdn.door43.org/obs/jpg/360px/obs-en-18-01.jpg)

दाऊद रज्‍ज़े दुई बी बरि च़ेक राज किया। च़े से मरि गिया, होरेक तेसी कोआ सुलैमाने इस्राएला पूटी राज करिबा च़ुख्‍फि किया। परमेश्‍वरे सुलैमाना सा गप्‍पा किया होरेक तेसिंञ पुच्‍छ़िया कि से बदेओंञ जादा खि चाहना कि परमेश्‍वरे तेसी ओनि किउरा लोई। सुलैमाने परमेश्‍वरंञ गेठा कि परमेश्‍वरे तेसर मस्‍स बुद्धि दितोरा लोई। इनि गप्‍पे परमेश्‍वरर खुश किया, तेरे परमेश्‍वरे सुलैमानर संसाराकि बदेओंञ बुद्धिमान मुषुल्‍ला बणंई बिदा। सुलैमान-ए मस्‍त गप्‍पयोर शिख्रिया होरेक से एक बुद्धिमान रज़्‍जा बणिया। परमेश्‍वरे तेसर मस्‍स टंगेटा बी बणंईं बिदोरा थिया।

![](https://cdn.door43.org/obs/jpg/360px/obs-en-18-02.jpg)

यरूशलेमन सुलैमाने तेस मंदरर बणांया ज़ेसी ओनि तेसी बा-ए योजना बणांओरा थिया होरेक समानर ठोक्‍कन किउरा थिया। हेबे मऊं मेल-मिलापा तंबू बजाए मंदरन परमेश्‍वरा अराधना करने थिये होरेक तेठा ओनि बलि च़ढ़ाने थिये। परमेश्‍वर अइकर मंदरा बेशना थिया, होरेक अपें मऊंओं सा बेशना थिया।

![](https://cdn.door43.org/obs/jpg/360px/obs-en-18-03.jpg)

पर सुलैमान-ए अयक देशाकि ज़लऊंओं सा दा थैया। तेनी मस्‍ह ज़ेंञ, लगभग हजार ज़लऊंओं सा ब्‍या करि परमेश्‍वरा कि आज्ञा त्रोया! इनो बिच़ंञ मस्‍ह ज़ेंञ ज़लऊं पराये देशंञ आये होरेक एम्‍फ्‍यों सा एम्‍फें देउओर लेई आये होरेक तेनो अराधना करिबा जारी थेईया। ज़ेखेंई सुलैमान बूउवी गिया त तेनी भि तेनो देउओ कि अराधना किया।

![](https://cdn.door43.org/obs/jpg/360px/obs-en-18-04.jpg)

इ बजहे परमेश्‍वर सुलैमाना सा रोषेओरा थिया। परमेश्‍वरे लाई कि इस्राएल देशर दुई राज्‍यन बण्‍णिं-कर सज़ा देऊं। परमेश्‍वर सुलैमाना कि मरिबे पिच़ंञ एरा करल।

![](https://cdn.door43.org/obs/jpg/360px/obs-en-18-05.jpg)

सुलैमाना कि मरिबे पिच़ंञ, तेसी तीसरा कोआ रहबाम रज़्‍जा बणिंया। इस्राएला बदे मऊं तेसर एम्‍फां रज़्‍जा मनिबे ओनी साथे ठोक्‍कन भुए। तेने रहबामा सा इ शिकायत किया कि सुलैमाने तेनोंञ मस्‍ह खरी कम किवाओरा थिया होरेक मस्‍ह कर लेओरा थिया। तेने रहबामर शबस करि बोलिया कि तेनोंञ थोड़ा कम करवाओ।

![](https://cdn.door43.org/obs/jpg/360px/obs-en-18-06.jpg)

पर रहबामे तेनोर बेकूफी सा जुवाब दिता, “तुसे बोलनूं कि मेरा बा सुलैमाने तुसोंञ खरी कम किवाया। पर हऊं तुसोंञ तेसींञ भि मस्‍स खरी कम करवऊं, होरेक हऊं तुसोर तेसिंञ भि जादा बर्दो देऊं।”

![](https://cdn.door43.org/obs/jpg/360px/obs-en-18-07.jpg)

ज़ेखेंई मऊंवी तेसर एरा बोलिब शुंईंया त तेनो बिच़ंञ केतिबा ज़ेईं तेसी विरोधन लड़ाई किया। दश गोत्रे तेसर छोड़ि बिदा; तेस सा हेबे सिर्फ दुईये ज़ाति छुटे। इने दुई ज़ाति एम्‍फ्‍योर यहूदा कि राज्‍य बोलिया।

![](https://cdn.door43.org/obs/jpg/360px/obs-en-18-08.jpg)

बाकि दश गोत्रे यरोबाम नाऊंआंकि एक मुषुल्‍डेर एम्‍फां रज़्‍जा बणंई बिदा। इनो ज़ाति मऊं उत्तर-पूर्वी लाके ठारि थिये। तेने एम्‍फ्‍योर इस्‍त्राएला राज्‍य बोलिया।

![](https://cdn.door43.org/obs/jpg/360px/obs-en-18-09.jpg)

पर यरोबामे परमेश्‍वरा विरोधन लड़ाई किया होरेक मऊंओंञ पाप किवाया। तेनी अपें मऊंओं द्वारे अराधना करिबे ओनि दुई दुई मूर्तिओर बणांया। हेबे तेने यहूदा कि राज्‍यन यरुशलेमन परमेश्‍वरा कि मंदरा तेसी अराधना करिबे ओनि न गे।

![](https://cdn.door43.org/obs/jpg/360px/obs-en-18-10.jpg)

यहूदा ओ इस्‍त्राएला कि राज्‍य बइरी बणिं गे होरेक खास एम्‍फ्‍यों बिच़ा द्रड़ुईब ठारुए।

![](https://cdn.door43.org/obs/jpg/360px/obs-en-18-11.jpg)

इस्‍त्राएला कि खर्का राज्‍यन, बदे रज़्‍जे मदम थिये। इनो बिच़ंञ कई रज़्‍जा तेनो ठारि रज़्‍जा बणिंबे हीट थेण्‍णें तेने होरेक इस्‍त्राएलिओ द्वारा मारि बिदोरे थिये।

![](https://cdn.door43.org/obs/jpg/360px/obs-en-18-12.jpg)

इस्राएल राज्‍य कि बदे रज़्‍जे होरेक मस्‍ह मऊंईं मूर्तिओ कि अराधना किया। ज़ेखेईं तेने एरा किया, च़े तेने खास झ़केंवीं ज़लऊं सा ढेश किये होरक इटि च़ेक कि केई फेरा मूर्तिओ अगरीं मठेओर बलि भि किया।

![](https://cdn.door43.org/obs/jpg/360px/obs-en-18-13.jpg)

यहूदा राज्‍य कि रज्‍ज़ा, दाऊदा कि वंशज थिये। इनो रज़्‍जेओ बिच़ंञ केतेक्‍बा ज़ेंञ रूठ मऊं थिये ज़ेने न्‍याया अनुसार राज किया होरेक परमेश्‍वरा अराधना किया। पर यहूदा कि मस्‍ह ज़ेंञ रज़्‍जे मदम थिये। तेने मदम तरीके सा राज किया, होरेक मूर्तिओ कि अराधना किया। इटि च़ेक कि इनो बिच़ंञ मिन रज़्‍जे हफ्‍सी कि देउओ अगरीं एम्‍फें मठेओर बलि करि बिदा। यहूदा कि मस्‍ह मऊंवी भि परमेश्‍वरा विरोधन लड़ाई किया होरेक बिक्रे देउओ कि अराधना किया।

*1 राजा पाठ 1-6; 11-12 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_18_128kbps.m4a

## 19. परमेश्‍वरा तरफे बोलना मऊं

https://openbiblestories.org/l/gda/story-19/

![](https://cdn.door43.org/obs/jpg/360px/obs-en-19-01.jpg)

परमेश्‍वर हमेशा इस्राएलिउ कच़ा परमेश्‍वरा तरफे बोलना मऊं बिज़ला करना थिया। परमेश्‍वरा तरफे बोलने तेने परमेश्‍वरंञ उज़ाबोर शुण्‍णे थिये, च़े तेस उज़ाबोर मऊंओर बताने थिये।

![](https://cdn.door43.org/obs/jpg/360px/obs-en-19-02.jpg)

ज़ेखेईं अहाब इस्राएल राज्‍य पूटी रज़्‍जा थिया त तेस मुके एलिय्‍याह परमेश्‍वरा तरफे बोलना थिया। अहाब एक मदम मऊं थिया। तेनि हफ्‍सी कि देउओ कि अराधना किवइबे ओनि मऊंओर मजबूर कियाति। तेरे एलिय्‍याहे अहाबर बोलिया कि परमेश्‍वर तेनो मऊंओर सज़ा दीब गाना थिया। तेनी तेसर लाई, “ज़ेखेईं च़ेक हऊं फिरि संदा भुइबे ओनि नोलू तेखेंईं च़ेक इस्राएला न संदा भोल होरेक न शरु झ़ाल।” इने गप्‍पे लेई अहाब डरोंआ रोषुई गिया तेनी एलिय्‍येर मारिबे फैंसला लेईया।

![](https://cdn.door43.org/obs/jpg/360px/obs-en-19-03.jpg)

तेरे परमेश्‍वरे एलिय्‍याहारि लाई कि तु बणंन गई अहाबंञ युंकुई बेश। एलिय्‍याह बणां तेस ठारि गिया ज़ेटि परमेश्‍वरे तेसर गइबेर लाईति। रोज दोतेंईं-पस्‍तेला, च़ई-एलिय्‍याह कि ओनि रोटि ओ मांसा लेइकर अइने थिये। इस मुके, अहाबा कि सेना एलिय्‍याहर लोइला छ़ुटे, पर तेने तेसर लोई नोटिया।

![](https://cdn.door43.org/obs/jpg/360px/obs-en-19-04.jpg)

संदा नुइबे मिन दियो पिच़ंञ से ठार शुकि गिया। तेरे एलिय्‍याह कच़ा देशारि उठि गिया। तेस देशा एक गरीब रण्‍णीं थी ज़ेसी एक कोआ थिया। तेनो एटी खर्च़ छ़ोउई गिउरा थिया किसबोलि तेटी फसल भूरा नोथा। पर फिरि भि, तेनी ज़लउंए एलिय्‍येर एक हफ्‍ते च़ेक थेइया, तेरे परमेश्‍वरे तेसी ओ तेसी कोए कि ज़रूरतर पूरा किया इ बजेहे तेसी कणका भाण-ओ तेला कुपी कदी शुण्‍णे नू-ए। तेस अकाला मुके तेनो एटि खर्च़ थिया। एलिय्‍याह मिन बरिउ च़ेक तेट्ठीं बेठा।

![](https://cdn.door43.org/obs/jpg/360px/obs-en-19-05.jpg)

त्राई ओ आद बरिउ पिच़ंञ, परमेश्‍वरे एलिय्‍याहर बोलिया कि हऊं फिरि संदा करु। परमेश्‍वरे तेसर फिरि इस्राएलर पलाटुई अहाबा सा गप्‍पा करिबे ओनि बोलिया। तेरे एलिय्‍याह अहाबा कच़ा गिया। ज़ेखेए अहाबे तेसर कईया त तेनी बोलिया, “अच्‍छा तु भोया, मुसीबत जई थेण्‍णा!” एलिय्‍याए जुवाब दिता, “ मुसीबत जाना त तु भोई! तेईं यहोवा परमेश्‍वरर छोड़ि बिदोरा असे, पर तु बाल देउआकि अराधना करना। हेबे तूर इस्राएल राज्‍य कि बदे मऊंओर कर्मेल घऊआ पूटी लेइकर अईबा असे।”

![](https://cdn.door43.org/obs/jpg/360px/obs-en-19-06.jpg)

च़े बदे मऊं कर्मेल घउआ पूटी गे। तेने मुषुल्‍ले भि आये ज़ेने बोलने थिये कि असे बाल देउआ कि उज़ाबर बोलने असु। इने बाल देउआ तरफे बोलने थिये। तेने बदे ज़ेंञ सड़े च़ोउर शऊ थिये। एलिय्‍याहए मऊंओर लाई, “केखैईं च़ेक तुसे तुईंफें सेमर पलाटी थेओले? अगर यहोवा परमेश्‍वर भो त तेसी आराधना करो! अगर बाल देउ परमेश्‍वर भो त तेसी आराधना करो!”

![](https://cdn.door43.org/obs/jpg/360px/obs-en-19-07.jpg)

च़े एलिय्‍याहे बाल देउआ कि तरफे बोलने तेनोर बोलिया, “एक बदेलर बलि करि तेसी मांसाइर बलिदान करिबे ओनि एक वेदी पूटी थेओ, पर अग म लवाओ। तेस पिच़ंञ हऊं भि तेरी करु, होरेक हऊं एक बिक्रे वेदी पूटी तेस मांसइर थेऊं। च़े अगर परमेश्‍वर वेदी पूटी अग झ़वाल त तुसे ज़ाईं बिज़ो कि सेहे सच्‍च़ा परमेश्‍वर भो।” च़े बाल देउआ कि तरफे बोलने तेने एक बलिर तियार किया पर अग न लवाया।

![](https://cdn.door43.org/obs/jpg/360px/obs-en-19-08.jpg)

च़े बाल देउआ कि तरफे बोलने-ए बालंञ प्रार्थना किया, “हे बाल देउआ, हईया शुंण!” दिया झा तेने प्रार्थना किया होरेक हउशुए होरेक एम्‍फ्‍योर चकुई लेई कटिया, पर बाल देउए ए जुवाब नेता, होरेक तेनी कोई अग न झ़वाया।

![](https://cdn.door43.org/obs/jpg/360px/obs-en-19-09.jpg)

बाल देउआकि तरफे बोलने-ए बालंञ प्रार्थना करिबे ओनि लगभग पूरा दीन लवाया। पिछ़ों मुखा तेने प्रार्थना करिबा बंद करि बिदा। च़े एलिय्‍याहे अयक बदेला मांसेर परमेश्‍वरा वेदी पूटी थेई थैइया। तेस पिच़ंञ, तेनी मऊंओर पांईं कि मोड़े-मोड़े भाणंर तेस बलिदाना पूटी तेखेंई च़ेक थोर्पि करिबेर बोलिबेर बोलिया ज़ेखैईं च़ेक मांसा, कठो, होरेक वेदी कच़ा लाके कि धर्त पूरा अल्‍लुई न गिया।

![](https://cdn.door43.org/obs/jpg/360px/obs-en-19-10.jpg)

च़े एलिय्‍याहे प्रार्थना किया, “हे यहोवा, अब्राहम, इसहाक, होरेक याकूबा परमेश्‍वर, असोर हेरालो कि तपीं इस्राएला परमेश्‍वर भोई होरेक इ कि हऊं तेपां परगर भोऊं। मूर जुवाब दे ज़ेनी लेई इने इ प्रियांई बिज़ले कि तपीं ए सच्‍च़ा परमेश्‍वर भोई।”

![](https://cdn.door43.org/obs/jpg/360px/obs-en-19-11.jpg)

तेरि, सर्गंञ अग झ़ईया होरेक तेनी मांसा, कठो, टिक्‍कीरो, ज़नो होरेक कच़ा लाके पाईंर च़ेक त्राई बिदा। ज़ेखैईं मऊंवी इ कईया, तेने धत्रि पूटी झ़ई गे होरेक बोलिब ठारुए, “यहोवा ए परमेश्‍वर भो! यहोवा ए परमेश्‍वर भो!”

![](https://cdn.door43.org/obs/jpg/360px/obs-en-19-12.jpg)

च़े एलिय्‍याहे बोलिया, “बाल देउआकि तरफे बोलना एक भि बच़ि कर गई बटोरा न लोई!” तेरे मऊंई बाल देउआकि तरफे बोलनेओर प्रई बिदा होरेक तेनोर तेटिंञ बिक्रे लेइ गे होरेक तेनोर मारि बिदा।

![](https://cdn.door43.org/obs/jpg/360px/obs-en-19-13.jpg)

च़े एल्‍लियाहे अहाब रज्‍ज़ेर बोलिया, “युहर्ना तेपें घरेआर नशि ग, किसबोलि संदा बज़िब तियार असे।” युहर्ना-ए क्रिट्‍ठा बदड़ अइ गिया, होरेक मस्‍ह संदा बज़िबा च़ुख्‍फि किया। यहोवा शुकोरा धरत अल्‍ला करनाति। इनी लेई पता च़लिया कि यहोवा-ए सच्‍च़ा परमेश्‍वर भो।

![](https://cdn.door43.org/obs/jpg/360px/obs-en-19-14.jpg)

ज़ेखेंई एलिय्‍याहए अपां कम मुकाया त, परमेश्‍वरे एलीशा नाऊंआ कि एक मुषुल्‍लेर अपां तरफे बोलनेर चुनिया। परमेश्‍वरे एलिशे द्वारे डरोंआ चमत्‍कार किया। एक चमत्‍कार नामाना सा भुआ। से एक बईरिऊ कि सैनिको कि सरदार थिया, पर तेसर त्रपी कि एक रोग भुई गिउरा थिया। नामाने एलीशे बारे शूंरा थिया, तेरे से एलीशे कच़ा आया होरेक तेसर ठीक करि बिज़ बोलि शबस किया। एलीशे नामानर बोलिया कि यरदन नाऊंआ कि नेईंन सत फेरा डुबकी लवा।

![](https://cdn.door43.org/obs/jpg/360px/obs-en-19-15.jpg)

नामान रोषुआ। तेनी एरा करिबेंञ इंकार करि बिदा, किसबोलि इ तेसर जल्‍लेओ कम च़ेओनाति। पर पिच़ंञ तेनी अपां सेम लेख्‍फि करि बिदा होरेक गइकर यरदन नेंइन पांईं बिच़ा सत फेरा डुबकी लवाया। ज़ेखेंईं पिछ़ों मुखा से पाईंञ भइलि निथा त परमेश्‍वरे तेसर ठीक करि बिदा।

![](https://cdn.door43.org/obs/jpg/360px/obs-en-19-16.jpg)

परमेश्‍वरे इस्राएला मऊंओं कच़ा होरेक केतेक्‍बा ज़ेंञ परमेश्‍वरा तरफे बोलनेओर बिदा। तेने बदे मऊंओर मूर्तिऊ कि अऱाधना बंद करिबे ओनि बोलिया। इसी बजहे, तेनोर एम्‍फ्‍यों बिच़ा न्‍याया सा व्‍यवहार करिब लोइना भो होरेक एक दूसरे पूटी दया करिब लोइना भो। तेने परमेश्‍वरा तरफे बोलने तेने मऊंओर चेतावनी दिता कि तेनोर मदम कम करिबा बंद करि बिज़िब लोइना भो इसी ठारि परमेश्‍वरा कि गप्‍प्‍योर मनिबा असे। अगर तेने मऊंई एरा न किया त परमेश्‍वर तेनोर दोषी मनि कर तेनो सा न्‍याय करल, होरेक तेनोर सज़ा देल।

![](https://cdn.door43.org/obs/jpg/360px/obs-en-19-17.jpg)

केतेक्‍बा च़ेक, तेने मऊंई परमेश्‍वरा कि आज्ञा न मनिया। तेने खास परमेश्‍वरा तरफे बोलनेओ सा मदम व्‍यवहार किया इटि च़ेक कि कांयां त तेनोर मारि भि बिदा। एक फेरा, तेने यिर्मयाह परमेश्‍वरा तरफे बोलनेर शुकोरा कुंएन फटई बिदा होरेक तेसर तेटि मारिबे ओनि छ़ई छ़इया। से कुंएन जकन शच़ि गिया। पर तेखेंई रज्‍ज़ेर तेस पूटी दया आया होरेक तेनी अपें सैनिकोर हुकुम दिता कि यिर्मयाह कि मरिबेंञ अगरंञ कुंएञ भइलिर तांईं बिज़ो।

![](https://cdn.door43.org/obs/jpg/360px/obs-en-19-18.jpg)

परमेश्‍वरा तरफे बोलने तेने, परमेश्‍वरा तरफे बोलिबा जारी थैइया बेशक मऊंए तेनोर नफरत किया। तेने मऊंओर चेतावनी दिता कि अगर तेने पश्‍चाताप न किया त परमेश्‍वर तेनोर नाश करि बिज़ल। तेने मऊंओर इ भि हीत किवाया कि परमेश्‍वरे तेनो कच़ा मसीहर बिज़िबे वाइदा किउरा असे।

*1 राजा पाठ 16-18; 2 राजा 5; यिर्मयाह 38 अंञ एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_19_128kbps.m4a

## 20. इस्राएला कि गुलाम बणंईंकर लेई गईबा होरेक पलाटुईबा

https://openbiblestories.org/l/gda/story-20/

![](https://cdn.door43.org/obs/jpg/360px/obs-en-20-01.jpg)

इस्राएला कि राज्‍य होरेक यहूदा कि राज्‍य दुइयो ज़ेईं-ईं परमेश्‍वरा विरोधन पाप किया। तेने तेस वायदेर त्रोई बिदा ज़े परमेश्‍वरे तेनो सा सीनै घउआ कियाति। परमेश्‍वरे तेनोर पश्‍चाताप करिबेरो होरेक फिरि अपां अराधना करिबे चेतावनी दीबेर परमेश्‍वरा तरफे बोलनेओर बिदा, पर तेने तेनो गप्‍पेयोर मनिबेंञ इंकार करि बिदा।

![](https://cdn.door43.org/obs/jpg/360px/obs-en-20-02.jpg)

च़े परमेश्‍वरे तेनो बइरिउर तेनोर नाश करिबे द्वारे दुइयो राज्‍योर दंडित किया। अश्‍शूर एक अयक देश थिया ज़े मस्‍ह शक्‍तिशाली थिया। से अयक देशो ओनि दा न लेओरा ठो थिया। तेने अइकर इस्राएला कि राज्‍यर नाश करि बिदा। अश्‍शूरी अइकर इस्राएल राज्‍य कि मस्‍ह ज़िंऊर मारि बिदा, ज़े चाहिया से लूटि बिदा, होरेक तेस देशाकि कई लाके त्राई बिदे।

![](https://cdn.door43.org/obs/jpg/360px/obs-en-20-03.jpg)

अश्‍शूरि-ए बदे परधाने-ए, टंगेटे मऊं, होरेक एरा घाटे मऊंओर ज़ेने कीमती सामानों बणंई बटने थिये साथे ठोक्‍कन करि तेनोर अश्‍शूर देशारि लेई गे। इस्राएला सिर्फ मिन गरीब ज़ेंञ इस्राएली छ़ुटे।

![](https://cdn.door43.org/obs/jpg/360px/obs-en-20-04.jpg)

च़े अश्‍शूरी मऊं तेस देशन बेशिबे ओनि विदेशिओर लेई आये। तेने विदेशी तेस नगरिर फिरि बणांया। ज़ेने इस्राएली तेटि बच़ोरे थिये तेनो सा तेने ब्‍या किया। इनो वंशज सामरी गणुंए।

![](https://cdn.door43.org/obs/jpg/360px/obs-en-20-05.jpg)

यहूदा कि राज्‍य कि मऊंईं कइया कि केरा परमेश्‍वरे तेस पूटी विश्‍वास न करिबे होरेक तेसी गप्‍प्‍योर न मनिबे बजे इस्राएल राज्‍य कि मऊंओर सज़ा दिताति। पर तेखेंईं भि तेने कनानियो कि देउओ कि मूर्तिओ कि अराधना किया। परमेश्‍वरे तेनोर चेतावनी दीबे ओनि परमेश्‍वरा तरफे बोलनेओर बिदा, पर तेने शुंईबेंञ इंकार करि बिदा।

![](https://cdn.door43.org/obs/jpg/360px/obs-en-20-06.jpg)

लगभग शऊ बरियो पिच़ंञ अश्‍शूरी इस्राएल कि राज्‍यर नाश करि बिदा। परमेश्‍वरे बेबीलोना कि रज्‍ज़ा, नबूकदनेस्‍सरर यहूदा कि राज्‍य पूटी हमला करिबे ओनि बिदा। बेबीलोन एक तागती देश थिया। यहूदा कि रज्‍ज़ा नबूकदनेस्‍सरा कि परगर बणिंबेर-ओ होरेक डरोंआ ढबोआ भुगतान करिबे ओनि राजी भुई गिया।

![](https://cdn.door43.org/obs/jpg/360px/obs-en-20-07.jpg)

पर केतेक्‍बा बर्षा पिच़ंञ, यहूदा कि रज्‍ज़े बेबीलोना विरोधन लड़ाई किया। बेबीलोनी पलाटुई यहूदा कि राज्‍य पूटी हमला करि बिदा। तेने यरुशलेम नगरा पूटी कब्‍ज़ा करि बिदा, मंदरर नाश करि बिदा, होरेक नगरी ओ मंदराकि खज़ानेर लूटि लेई गे।

![](https://cdn.door43.org/obs/jpg/360px/obs-en-20-08.jpg)

लड़ाई करिबे कारणें यहूदा कि रज्‍ज़ेर सज़ा दिबे ओनि, नबूकदनेस्‍सराकि सैनिके रज्‍ज़े कोऐर तेसी सामटे मारि बिदा होरेक तेसर कां करि बिदा। इस पिच़ंञ, तेने रज्‍ज़ेर लेइ गे ताकि से बेबीलोनाकि कैदखानेन मरि गिउरा लोई।

![](https://cdn.door43.org/obs/jpg/360px/obs-en-20-09.jpg)

नबूकदनेस्‍सर-ओ तेसी सेना यहूदेंञ बेबीलोन लेई गेई, सिर्फ बदेओंञ गरीब मऊंओर पिछ़लि छ़ई कर ताकि तेने बगि फसल बाओरा लोई। इ मोक्‍का गुलामी गणुंआ ज़ेतन परमेश्‍वरे मऊंओर वाइदे कि देशंञ निसि गइबे ओनि मजबूर किउरा थिया।

![](https://cdn.door43.org/obs/jpg/360px/obs-en-20-10.jpg)

बड़गे परमेश्‍वरे अपें मऊंओर तेनो पापा ओनि गुलामी लेई गइबे द्‍वारे सज़ा दिता, तांबि से तेनोर या अपें वाइदेओर न बिस्रुआति। परमेश्‍वरे अपें मऊंआ निगरानी करिबा जारी थैइया होरेक अपें परमेश्‍वरा तरफे बोलनेओ द्‍वारे तेनो सा गप्‍पा करला बेठा। परमेश्‍वरे वाइदा किया कि त्राई बीओ दश बरियो पिच़ंञ, तेने फिरि वाईदे कि देशन पलाटेओले।

![](https://cdn.door43.org/obs/jpg/360px/obs-en-20-11.jpg)

लगभग त्राई बीओ दश बरियो पिच़ंञ, फारसाकि रज्‍ज़ा कुस्रूई बेबीलोनर यहर्बि करि बिदा, तेरे बेबीलोन साम्राज्य बजाय फारसा कि साम्राज्‍ये केतेक्‍बा देशो पूटी शासन किया। इस्राएली मऊं हेबे यहूदी गणेंओनेति। तेनो बिच़ंञ मस्‍ह ज़ेईं अपां पूरा ज़िन्‍दगी बेबीलोनन बितई बिदोरा थिया। सिर्फ थोड़े ज़ेंञ बूए यहूदिउर-ए यहूदा कि देश हीत थिया।

![](https://cdn.door43.org/obs/jpg/360px/obs-en-20-12.jpg)

फारसी मऊं डरोंआ सामर्थी थिये, पर तेने अपें जीतोरे मऊंओं पूटी दया कियाति। फारसी मऊंओं कि रज्‍ज़ा बणिंबे कि मिन ध्‍याड़े पिच़ंञ, कुस्रूई हुकुम दिता कि कऊं भि यहूदी ज़े यहूदारि पलाटुइबा चाहना थिया, से फारसंञ निसि वापिस यहूदारि गई बटल। इटि च़ेक कि तेनी तेनोर फिरि मंदर बणंइबे ओनि ढबोआ भि दिता। च़े गुलामी कि त्राई बीओ दश बरियो पिच़ंञ, यहूदियो कि एक मठा छुंड यहूदान यरूशलेम नगरिआरि पलाटुए।

![](https://cdn.door43.org/obs/jpg/360px/obs-en-20-13.jpg)

ज़ेखेंई तेने मऊं यरुशलेम अपरे त तेने मंदरर होरेक नगरी च़ोउरो फेरे भितिर फिरि बणांया। फारसी मऊं एबेंई भि तेनो पूटी राज करने थिये पर एक फेरा फिरि तेने वाईदे कि देशन बेशने थिये होरेक मंदरन अराधना करने थिये।

*2 राजा पाठ 17; 24-25; 2 इतिहास 36;  एज़्रा 1-10; नहेम्‍याह 1-13 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_20_128kbps.m4a

## 21. परमेश्‍वर मसीह कि अईबे वाईदा करना असे

https://openbiblestories.org/l/gda/story-21/

![](https://cdn.door43.org/obs/jpg/360px/obs-en-21-01.jpg)

ज़ेखेए परमेश्‍वरे संसारा कि सृष्टि कियाति, से ज़ाण्‍णाति कि तेसर पिच़ंञ कांयां मसीहर बिज़िब पड़ल। तेनी आदम ओ हव्‍वे सा वाईदा किया कि से एरा करल। तेनी लाई कि हव्‍वेंञ एक मठा जयोल ज़े लोण्‍लू कि कपार घ्रेच़ल। ज़ेनी लोल्लूई हव्‍वेर धोखा दिता से छ़ेच्‍छ़ैईं कि शैतान थिया। परमेश्‍वरा मतलब थिया कि मसीह पूरा तरीके सा शैतानर यह्रर्बि करि बिज़ल।

![](https://cdn.door43.org/obs/jpg/360px/obs-en-21-02.jpg)

परमेश्‍वरे अब्राहमा सा वाईदा कियाति कि तेस्‍सा संसारा की बदे जाति आशीष हतेरले। परमेश्‍वर पिच़ंञ केसोआ मूके मसीहर बिज़िबे सा इस वायदेर पूरेरल। से मसीह संसारा कि हर एक जाति बिच़ंञ मऊंओर तेनोकी पापा सा छुड़ाल।

![](https://cdn.door43.org/obs/jpg/360px/obs-en-21-03.jpg)

परमेश्‍वरे मूसे सा वाईदा कियाति कि अईना ध्‍याड़ेन से मूसे बराबर एक अईक परमेश्‍वरा तरफे बोलनेर बिज़ल। इ परमेश्‍वरा तरफे बोलना मसीह भोल। एरी रीति सा, परमेश्‍वरे फिरी वाईदा किया कि से मसीहर बिज़ल।

![](https://cdn.door43.org/obs/jpg/360px/obs-en-21-04.jpg)

परमेश्‍वरे रज़्‍जा दाऊदा सा वाईदा कियाति कि तेसी एक वंश मसीह भोल। से रज़्‍जा भोल होरक परमेश्‍वरा मऊंओं पूटी हमेशा कि ओनि राज करल।

![](https://cdn.door43.org/obs/jpg/360px/obs-en-21-05.jpg)

परमेश्‍वरे यिर्मयाह परमेश्‍वरा तरफे बोलने सा गप्‍पा किया होरक लाई कि एक दिया से एक खरका वाचा करल। से खरका वाइदा इस्राएला साथे सीनै घउआ पूटी बनोरा पुरा वाचे ठो नूअल। ज़ेखेए मऊंओं सा से अपां खरका वाचा करल च़े से तेनो पूटी मपींर अपें रुपा सा प्रगट करल। हर एक मऊं तेस्‍सा दा थेल होरक तेसी नियमा भाषे करीबे की हीट थैल। परेमश्‍वरे लाई कि इ तेसीकी नियमा की तेनो हिरो पूटी लिखि बिज़िबेठो भोल। तेने तेसी मऊं भोले, होरक परमेश्‍वर तेनोकि पापोर माफ करल। से मसीह भोल ज़े तेनो सा तेस खरका वाचेर करल।

![](https://cdn.door43.org/obs/jpg/360px/obs-en-21-06.jpg)

परमेश्‍वरा कि तरफे बोलने इ बी लाई कि मसीह परमेश्‍वरा तरफे बोलना भोल। एक परमेश्‍वरा तरफे बोलना से मऊं भो ज़े परमेश्‍वराकि वचनोर शुण्‍ना असे होरेक फिरि मऊंओं पूटी परमेश्‍वरा कि खबरोर रुठू करि भुई गईबे ओनि बोलल। ज़ेसर बिज़िबे परमेश्‍वरे वाईदा कियाति से मसीह एक अपें आपन एक पूरा ठो परमेश्वरा तरफे बोलना भोल। इसी मतलब मसीह परमेश्‍वराकि खबरोर रुठू करि शुणल, होरेक मऊंओंर तेने उज़ाबोर रुठू करि शिख्राल।

![](https://cdn.door43.org/obs/jpg/360px/obs-en-21-07.jpg)

इस्राएलिउ पुजारीए मऊंओ ओनि परमेश्‍वरा अघरों बलिदान दीबा जारी थैया। इ बलिदान मऊंओं की पापा ओनि तेनोर परमेश्‍वरा सा सज़ा दीबे ठारी पुटी चढ़ायाति। इस्राएला पुजारिये मऊंओओनि प्रार्थना बी किया। पर, से मसीह सिद्ध इस्राएला कि मोड़ा पुजारी भोल ज़े परमेश्‍वरर दीबओनि एक सिद्ध बलि की रुपन मपींर च़ढ़ई बिज़ल। मतलब, से कद्‍दी पाप न करल, होरक ज़ेखेए से मपींर बलि भूईबे ओनि देल, त संसारा की कोसंञ भि अईक बलि ज़रुरत नूअल।

![](https://cdn.door43.org/obs/jpg/360px/obs-en-21-08.jpg)

मऊंओं की छुंडो पूटी रज़्‍जा होरक प्रधान शासन करने असुन, होरेक कायां-कायां तेने गलती करने असुन। रज़्‍जा दाऊदे सिर्फ इस्राएलिओ पूटी शासन किया, पर रज़्‍जा दाऊदा वशंज मसीह बदे संसारा पुटि राज करल, होरक हमेशा कि ओनि राज करल। इसिंञ इलावा, से हमेशा न्‍याय रीतिसा राज करल, होरक सई फैसले लेल।

![](https://cdn.door43.org/obs/jpg/360px/obs-en-21-09.jpg)

परमेश्‍वरा की तरफे बोलने मसीह की बारेन मस्‍स ज़ेञ गप्‍पेयोर लाई। उदारणा ओनि, मलाकी लाई कि मसीह की अईबे अगरंञ एक अईक परमेश्‍वरा तरफे बोलना अयल। से परमेश्‍वरा तरफे बोलना मस्‍स खास भोल। इसी इलावा, यशायाह परमेश्‍वरा तरफे बोलने लिखिया कि मसीह कुंवारिंञ ज़मल। होरक मीका परमेश्‍वरा तरफे बोलने लाई कि मसीह बैतलहम नगरीन ज़मल।

![](https://cdn.door43.org/obs/jpg/360px/obs-en-21-10.jpg)

यशायाह परमेश्‍वरा तरफे बोलने लाई कि मसीह गलील ठारीन बसल। ज़ेने मऊं मस्‍स दु:खी असून मसीह तेनोर सुकुन देल। से कैदियोर भि आज़ाद करल। मसीह दु:खोरेओर होरक ज़े शुंईं नोटनेन, हेरी नोटनेन, बोली नोटनेन, या हड़िं नोटनेन, तेनोर भि अईन करल।

![](https://cdn.door43.org/obs/jpg/360px/obs-en-21-11.jpg)

यशायाह परमेश्‍वरा तरफे बोलने इ भि बोलोरा थिया कि मऊं मसीह सा नफरत करेले होरक तेसर मनीबें इंकार करि बिज़ेले। होरेक ज़ेंईं परमेश्वरा तरफे बोलने-ए लाई कि मसीह की एक साति तेसी कि खिलाफन उठल। जकर्याह परमेश्‍वरा तरफे बोलने लाई कि तेसीकी इ साती एरा करिबेओनि होरकी मऊंओञ रोपे की बिओदश सिक्‍के लेल। इसी इलावा, केन्‍नयां परमेश्‍वरा तरफे बोलने-ए लाई कि मऊं मसीहर मारी बिज़ेले, होरक इ कि तेने तेसीकी डबुंओ ओनि जुआ खेड़ेले।

![](https://cdn.door43.org/obs/jpg/360px/obs-en-21-12.jpg)

परमेश्‍वरा तरफे बोलने-ए इ भि शप्‍पी किया कि मसीह केरा मूअल। यशायाहए भविष्‍यवाणी किया कि मऊं मसीह पूटी थूकेले, तेसर ज़उखाले, होरक तेसर द्रड़ेले। तेने तेसर प्रैगो सा खातर खनेले होरक से मस्‍स दुखईं होर बर्दो सा मरि गाल, जबकि तेनी खीं भि गलत किउरा नूअल।

![](https://cdn.door43.org/obs/jpg/360px/obs-en-21-13.jpg)

परमेश्‍वरा तरफे बोलने-ए इ भि शप्‍पी किया कि मसीह पाप न करल। से सिद्ध भोल। पर से तेरे मरल परमेश्‍वर तेसर होरकिऊ कि पापा बजेहंञ सज़ा देल। तेसी कि मरीबे सा मऊं परमेश्‍वरा साथे मेल करिब ज़ोगा भोले। इकरी परमेश्‍वर चाहना असे कि मसीह मूरा लोई।

![](https://cdn.door43.org/obs/jpg/360px/obs-en-21-14.jpg)

परमेश्‍वरा तरफे बोलने-ए इ भि शप्‍पी किया कि परमेश्‍वर मसीहर मूरेओंञ ज़िनेरल। इ हैरालना कि इने बदे खरका वाचा करिबे कि परमेश्‍वरा की योजना थिया, ताकि तेनि तेनो मऊंओर बच़ई बटोरा लोई ज़ेने तेसी खिलाफन पाप किउरा असे।

![](https://cdn.door43.org/obs/jpg/360px/obs-en-21-15.jpg)

परमेश्‍वरा तरफे बोलनेओ पुटि मसीह की बारेन मस्‍स ज़ेञ गप्‍पेयोर प्रकट किया, पर मसीह तेने परमेश्‍वरा तरफे बोलनेओ बिच़ंञ केसोआ कि भि उम्रीन नायाति। इने भविष्‍यवाणियो कि दीबे कि च़ौर शऊअंञ मस्‍स बरिउ पिच़ंञ, सही मूके पूटी, परमेश्‍वर मसीहर इस संसारन बिज़ल।

*उत्पत्ति 3:15; 12:1-3; व्यवस्थाविवरण 18:15; 2 शमूएल 7; यिर्मयाह 31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7; 35:3-5; 61; 53; भजन संहिता 22:18; 35:19; 69:4; 41:9; जकर्याह 11:12-13; यशायाह 50:6; भजन संहिता 16:10-11 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_21_128kbps.m4a

## 22. यूहन्‍ने ज़मिबा

https://openbiblestories.org/l/gda/story-22/

![](https://cdn.door43.org/obs/jpg/360px/obs-en-22-01.jpg)

इसींञ अगरंञ, परमेश्वरे अपें परमेश्‍वरे तरफे बोलनेओ सा गप्‍पा कियाति तेरे तेने मऊंओं सा गप्‍पा करि बटे। पर तेस मुकेञ दी फिरी च़ौउर शऊ बरिउ गाने च़ेक तेनी तेनोसा गप्‍पा न किया। च़े परमेश्‍वरे जकर्याह नाउवें परमेश्‍वरा तरफे बोलने कच़ा एक स्‍वर्गदूतर बिदा। जकर्याहओर तेसी घरन् एलीशिबा परमेश्‍वरा आदर करने थिये। तेने मस्‍स बूउवी गिउरे थिये, होरक तेनो खीन मठे भोरे नोथे।

![](https://cdn.door43.org/obs/jpg/360px/obs-en-22-02.jpg)

तेनी स्‍वर्गदूते जकर्याह सा लाई, “तेपीं घरनीञ एक मठा ज़मल। तु तेसी नाऊं यूहन्‍ना थे। परमेश्‍वर तेसर पवित्र आत्‍मेसा मस्‍स भरी बिज़ल, होरक यूहन्‍ना मऊंओर मसीहर अपनईबोनी छक्‍कन करल।” जकर्याहए जुवाब दिता, “हऊंओ मेरि घरन् मठा जाईबेओनि मस्‍स बूए असू! हऊं केर ज़ाईं बटू कि तपीं मू सा छेच्‍छैईं बोलना?”

![](https://cdn.door43.org/obs/jpg/360px/obs-en-22-03.jpg)

तेनी स्‍वर्गदूते जकर्याहर जुवाब दीता, “तु कच़ा इस रुठू खबरर अणिंबेओनि मूर परमेश्‍वरे बिदौरा भो। किसबोली तेइं मूं पूटी विश्‍वास न किया, इकरी बई की ज़मने च़ेक तु बोलिबे ज़ोगा नूअल।” तेखैंईए, जकर्याह बोलि नोटनाति। च़ा से स्‍वर्गदूत जकर्याह कच़ंञ उठि गिया। इस पिच़ंञ, जकर्याह घरे पलाटुई आया होरक तेसी घरन् पेटाली भूई।

![](https://cdn.door43.org/obs/jpg/360px/obs-en-22-04.jpg)

ज़ेखेईं एलीशिबा छ: माओ पेटाली थी, च़ा सेए स्‍वर्गदूत अचानका सा एलीशिबा की नाती पूटी प्रगट भोआ, ज़ेसी नाऊं मरियम थिया। मरियम कंवारी होरक ब्‍याह भूईबोनि यूसुफ नाउंवा मुशुण्‍ले सा तेसी मंगनी भूई मुकोरा थिया। स्‍वर्गदूते लाई, “तू पेटाली भोली होरक एक कोएर ज़मीली। तुर तेसी नाऊं यीशु थैइबा असे। से सर्व–शक्‍तिमान परमेश्‍वरा कोआ भोल होरक से हमेशा कि ओनि शासन करल।”

![](https://cdn.door43.org/obs/jpg/360px/obs-en-22-05.jpg)

मरियमे जुवाब दिता, “इ केरा भोल, किसबोलि हऊं ता कुंवारी भोऊं?” तेनी स्‍वर्गदूते समज़ाया, “पवित्र आत्‍मा तु पूटी अयल, होरक परमेश्‍वरा सामर्थ तू पूटी शेवारा करल। इकरी से बई पवित्र भोल, होरक से परमेश्‍वरा कोआ भोल।” ज़े तेनी स्‍वर्गदूते लाई तेस पूटी मरियमे विश्‍वास किया।

![](https://cdn.door43.org/obs/jpg/360px/obs-en-22-06.jpg)

इ भूईबे पिच़ंञ तेखैईं, मरियम गईकर एलीशिबे सा हतुई। ज़ेरी-ई मरियमें तेसर नमस्‍ते किया, एलीशिबे बई पेटन छवा दिता। तेनो ओनि परमेश्‍वरे ज़े कियाति तेसीकी बारेन तेने ज़लऊं एक साथे तुषी गे। एलीशिबे साथे त्राई माह बेशी पिच़ंञ, मरियम घरेआरी पलाटुई गेई।

![](https://cdn.door43.org/obs/jpg/360px/obs-en-22-07.jpg)

इस पिच़ंञ, एलीशिबे अपें बईर जाया। जकर्याहे होरेक एलीशिबे तेस बई की नाऊं यूहन्‍ना थैया, ज़ेरा कि स्‍वर्गदूते हुकुम दिताति। च़े परमेश्‍वरे जकर्याहर बोलिबे ज़ोगा किया। जकर्याहए लाई, “परमेश्‍वराकी स्‍तुति भोरा लोई, किसबोलि तेने अपें मऊंओं की मज़द करिबेर हीत थैया! हे मेरा कोआ, तपीं सर्वशक्तिमान परमेश्‍वरा की भविष्‍य हैरालना भोल। तु मऊंओर बताल कि तेने केरा अपें पापो ओनि माफी हतेरी बटेले!”

*लूका पाठ एकंञ बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_22_128kbps.m4a

## 23. यीशु ज़मिबा

https://openbiblestories.org/l/gda/story-23/

![](https://cdn.door43.org/obs/jpg/360px/obs-en-23-01.jpg)

यूसुफ नाउवां एक धर्मी मऊं सा मरियमा मंगनी भुई मुकोरा थिया। ज़ेखैंईं तेनी शुंईयां कि मरियम पेटाली असे त से ज़ान्‍नाति कि से तेसी बई नूं। पर, से मरियमर बदनाम करिबा न चाहनाति, तेनी तेस पुटि कृपा करिबे कि होरेक तेसर च़ुप्‍पी छोड़ि बिज़िबे सोचिया। पर तेसीकि एरा करिबे अगरंञ, एक स्‍वर्गदूते तेसी सुयें अईकर तेस्‍सा गप्‍पा किया।

![](https://cdn.door43.org/obs/jpg/360px/obs-en-23-02.jpg)

तेनी स्‍वर्गदूते लाई, “हे यूसुफा, मरियमर तेपीं घर्नि रुपन लेईकर अड़िबेंञ म डर। तेसी अंदर ज़े बई असे से पवित्र आत्‍मे तरफे भो। से एक मठेर जनम देली। तेसी नाऊं यीशु थे (ज़ेसी मतलब भो, ‘यहोवा बच़ाना असे’), किसबोलि से मऊंओर तेनोंकी पापा सा बच़ाल।”

![](https://cdn.door43.org/obs/jpg/360px/obs-en-23-03.jpg)

तेरे यूसुफे मरियमा सा ब्‍याह किया होरक तेसर अपीं घर्नि रुपन घरे लेई आया, पर तेसी बई ज़मने च़ेक से तेस्‍सा न बेठा।

![](https://cdn.door43.org/obs/jpg/360px/obs-en-23-04.jpg)

ज़ेखेईं मरियमा जन्‍म दिबे ध्‍याड़ा नींया थिया, त तेनी होरक यूसुफे बैतलहम गईबे एक लमा सफर किया। तेनोर तेटि गईबाए थिया किसबोलि रोमी अधिकारी इस्राएला बेशने तेनो बदे मऊंओर गंणिबा चाहनेति। तेने चाहनेति कि बदे मऊं तेटि गिउरे लोई ज़ेटि तेनो पूरशोई बेशने थिये। रज़्‍जा दाऊदा जनम बैतलहमन भुआति, होरक से मरियमोर यूसुफ दूईयो ज़िऊ कि पूरशोई थिया।

![](https://cdn.door43.org/obs/jpg/360px/obs-en-23-05.jpg)

मरियमो यूसुफ बैतलहम गे, पर तेटि जानवरोर थैण्‍ने तेस ठारि इलावा तेनोर बैशिबे ओनि खीं ठार नोथा। सेए ठार थिया ज़ेटि मरियमें अपें बईर जन्‍म दिता। तेनी तेसर कुरुलज़ेन लिटाया किसबोलि तेटी तेसी ओनि खीं बिछ़ा नोथा। तेने तेसी नाऊं यीशु थैया।

![](https://cdn.door43.org/obs/jpg/360px/obs-en-23-06.jpg)

तेस राती, तेटि कच़ाए बगिन पउवालो एम्‍फें पेरुओ की छुंडा की निगरानी करनेति। अचानके, एक च़ल्‍कोरा स्‍वर्गदूत तेनो पुटि प्रगट भोआ, होरक तेने डरि गे। तेनी स्‍वर्गदूते लाई, “म डरो, किसबोलि मूकींञ तुईफाओनि रुठू उज़ाब असे। अज़ दाऊदा नगरी बैतलहमन तुसो ओनि मुक्‍तिदाते कि जनम भुरा असे। होरेक सेऐ मसीह ओ प्रभु भो!”

![](https://cdn.door43.org/obs/jpg/360px/obs-en-23-07.jpg)

गईकर तेस बईर लोओ, होरक तुप्‍सीं तेसर डबुंन जिल्‍ज़ी किउरा होरक कुरुल्‍ज़ेन लेटोरा हथेरोले।” अचानके, सर्ग स्‍वर्गदूतो सा भरुई गिया। तेने परमेश्वरा स्‍तुति करनेति। तेने लाई, “बदे महिमा स्‍वर्गन मौजूद परमेश्‍वरर हतेउरा लोई। पृथ्वी पुटि तेनो मऊंओंञ शान्‍ति भुरा लोई ज़ेनोकि से च़िन करना असे!”

![](https://cdn.door43.org/obs/jpg/360px/obs-en-23-08.jpg)

च़ा स्‍वर्गदूतो उठि गे। तेने पउआलो भि एम्‍फे पेरुओर च़ारिबा छईकर बईर हैरिब गे। यूरनाए तेने तेस ठारी अपरे ज़ेटि यीशु थिया होरक तेने तेसर कुरुल्‍ज़ेन लेटाओरा कया, ज़ेरा कि तेनी स्‍वर्गदूते लाईति। तेने मस्‍स तुठोरे थिए। च़ा तेने पऊआलो फिरी तेटी पलाटुई गे ज़ेटि तेनोकि पेरु थिए। तेने ज़े भि शुयां होरक कइया तेनो बदेओ ओनि तेने परमेश्‍वराकि स्‍तुति करनेति।

![](https://cdn.door43.org/obs/jpg/360px/obs-en-23-09.jpg)

पूर्वन दूरे एक देशन मिन मुशुण्‍ड्ले थिये। तेनोर तारेओ ज्ञान थिया होरेक तेने मस्‍स शंञफो थिए। तेने एक बदेओंञ बिक्रे तारेर सर्गन कइया। तेने लाई कि इसी मतलब भो कि यहूदियो कि एक खरके रज़्‍जे जनम भुरा असे। तेरे करि तेने तेस बईर हैरिब ओनि अपें देशंञ सफर करिबे फैंसला किया। एक लम्‍मे सफरा पिच़ंञ, तेने बैतलहम आये होरक तेस घरेर हथेरिया ज़ेटि यीशु-ओ तेसीकि या-बा बेठोरे थिये।

![](https://cdn.door43.org/obs/jpg/360px/obs-en-23-10.jpg)

ज़ेखेए इने मुशुण्‍ड्ले यीशुर अपीं या सा कइया त तेने ज़ानू बले बेशिकर तेसीकि आराधना किया। तेने यीशुर मांञे तोहफे दिते। च़े तेने घरेआरी फिरि पलाटुई गे।

*मती पाठ एक; लूका दोआकि एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_23_128kbps.m4a

## 24. यूहन्‍ना यीशुर बपतिस्‍मा देना असे

https://openbiblestories.org/l/gda/story-24/

![](https://cdn.door43.org/obs/jpg/360px/obs-en-24-01.jpg)

एलीशिबा ओ जकर्याह कि कोआ यूहन्‍ना, मोड़ा भूईकर एक परमेश्‍वरा तरफे बोलना बणिं गिया। से बणंन बेशना थिया, होरक बणां मखीरो टिड्डोर खईला करनाति, होरक ऊंटंञ बणोंरा डबूं लवीला बेशना थिया।

![](https://cdn.door43.org/obs/jpg/360px/obs-en-24-02.jpg)

मस्‍स ज़ेञ मऊं यूहन्‍ने गप्‍पे शुंईबोनि बणां निसि आये। तेनी इ बोलिकर तेनोर प्रचार किया, “पश्‍चाताप करो, किसबोलि स्‍वर्गा राज्‍य नियां असे!”

![](https://cdn.door43.org/obs/jpg/360px/obs-en-24-03.jpg)

ज़ेखेए मऊंए यूहन्‍ने उज़ाबर शुंया, त तेनो बीच़ंञ मस्‍स ज़ेईं-ई अपें पापा सा पश्‍चाताप किया, होरक यूहन्‍ने तेनोर बपतिस्‍मा दिता। यूहन्‍नेर हैरिबोनि मस्‍स ज़ेञ यहूदी धार्मिक परधानो भि आए, पर तेने अपें पापंञ पश्‍चाताप न किया।

![](https://cdn.door43.org/obs/jpg/360px/obs-en-24-04.jpg)

यूहन्‍ने धार्मिक परधानों सा लाई, “हे ज़हरीले लोड्ल्‍लुओ! पश्‍चाताप करोओर अपें व्‍यवहारर लेख्‍फि करो। परमेश्‍वर हर तेस बुटर कटि बिज़ल ज़े रुठ फल न अण्‍णां, होरक से तेनोर अगिन छ़ई बिज़ल।” ज़े परमेश्‍वरा तरफे बोलने-ए लाइति यूहन्‍ने तेस पूरेरिया, “हेर, यूरनाए हऊं तेर अगरों मेपां उज़ाब देनेर बिज़ु ज़े तेपांओनि बत तियार करल।”

![](https://cdn.door43.org/obs/jpg/360px/obs-en-24-05.jpg)

मिन ज़ेञ धार्मिक परधाने यूहन्‍ने सा पुछ़िया कि खि से मसीह भोआ। यूहन्‍ने जुवाब दिता, “हऊं मसीह नूं, पर से मुं पिच़ंञ अईना। से एतोक महान असे कि हऊं तेसीकी बूटो तस्‍मा खोईबे ज़ोगा भि नूं।”

![](https://cdn.door43.org/obs/jpg/360px/obs-en-24-06.jpg)

होर्दी, यीशु बपतिस्‍मा लेईबोनि यूहन्‍ने कच़ा गिया। ज़ेखेए यूहन्‍ने यीशुर कईया, त तेनी लाई, “हेरो! परमेश्‍वरा छ़ेड्ल्‍लू ज़े संसारा की पापोर उछ़ुई कर लेई गाल।”

![](https://cdn.door43.org/obs/jpg/360px/obs-en-24-07.jpg)

यूहन्‍ने यीशु सा लाई, “हऊं तपींर बपतिस्‍मा दिबे ज़ोगा नूं। बजाए इसीकी ज़रुरी असे कि तपीं मूंर बपतिस्‍मा दे।” पर यीशुई लाई, “तु मूंर बपतिस्‍मा दे, किसबोलि रुठू कम इए भो।” तेरे यूहन्ने यीशुर बपतिस्‍मा दिता, जबकि यीशुई कदी पाप किउरा नोथा।

![](https://cdn.door43.org/obs/jpg/360px/obs-en-24-08.jpg)

बपतिस्‍मा दी पिच़ंञ ज़ेखेए यीशु पाईंञ निसीकर भईंरों आया त, परमेश्‍वरा आत्‍मा क्रिम्‍लो रुपन प्रगट भुआ होरक बुन अईकर तेस पुटि बेठा। तेस्‍से मुके, परमेश्‍वरे स्‍वर्गंञ गप्‍पा किया। तेनी लाई, “ई मेरा कोआ भो। हऊं तपींसा दा करना असू, होरक हऊं तपींसा मस्‍स तुठोरा भोऊं।”

![](https://cdn.door43.org/obs/jpg/360px/obs-en-24-09.jpg)

परमेश्‍वरे यूहन्‍ने सा लाईति, “पवित्र आत्‍मा बुन अईकर केसोआ पुटि बेशि गाल ज़ेसर तपीं बपतिस्‍मा देल।” सेए परमेश्‍वरा कोआ भो परमेश्‍वर एक्‍के भो। पर ज़ेखेए यूहन्‍ने यीशुर बपतिस्‍मा दिता, च़े तेनी परमेश्‍वर बार गप्‍पे करिब शुंयां, कोए परमेश्‍वरर कईया, ज़े यीशु भो, होरक यीशुई पवित्र आत्‍मेर कईया।

*मती पाठ 3; मरकुस 1:9-11; लूका 3:1 अंञ एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_24_128kbps.m4a

## 25. शैतान यीशु की इम्‍तिहान लेना असे

https://openbiblestories.org/l/gda/story-25/

![](https://cdn.door43.org/obs/jpg/360px/obs-en-25-01.jpg)

यीशु कि बपतिस्‍मा भूई तेखैईं ज़ेञे, पवित्र आत्‍मा यीशुर बणंन लेई गिया। यीशु तेटि दुई बी दी-ओ दुई बी रात च़ेक थिया। तेस मुके यीशुई व्रत किया, होरक शैताने यीशु कच़ा अईकर पाप करईबोनि तेसीकी इम्‍तिहान लैया।

![](https://cdn.door43.org/obs/jpg/360px/obs-en-25-02.jpg)

ज़ेखैईं प्रभु यीशुर भुकुर लगि त, शैताने यीशु सा लाई, “अगर तपीं परमेश्‍वरा कोआ भो त इने रुणोंर रोटि बणंई बिज़ ताकि तेपें खई बटोरा लोई!”

![](https://cdn.door43.org/obs/jpg/360px/obs-en-25-03.jpg)

पर यीशुई शैताना सा लाई, “परमेश्‍वरा वचनन इ लिखोरा असे, ‘ज़ीना बेशिबे ओनि मऊंर सिर्फ रोटि ज़रुरी नूईंबा, पर तेनोर हर तेस गप्‍पे ज़रुरत असे ज़े परमेश्‍वर तेनोसा बोलना असे!’”

![](https://cdn.door43.org/obs/jpg/360px/obs-en-25-04.jpg)

च़े शैतान यीशुर मंदरा की बदेओंञ उथे ठारि लेई गिया। शैताने यीशुसा लाई, “अगर तपीं परमेश्‍वरा कोआ भोई त इटिंञ बुन छ्वा दी बिज़, किसबोलि लिखोरा असे, ‘परमेश्‍वर तपींर उछ़ुईबोनि अपें स्‍वर्गदूतोर हुकुम देल ताकि तेपें खुरोर रुणांसा लगोरा न लोई।’”

![](https://cdn.door43.org/obs/jpg/360px/obs-en-25-05.jpg)

पर यीशुई से न किया ज़े शैताने यीशुसा करिबोनि लाईति। इसी बजाए, यीशुई लाई, “परमेश्‍वर हर एक मऊं सा बोलना असे, ‘तपीं प्रभु तेपें परमेश्‍वरा की इम्‍तिहान म करो।‘”

![](https://cdn.door43.org/obs/jpg/360px/obs-en-25-06.jpg)

च़ा शैताने यीशुर संसारा की बदे राज्‍य हेरालिए। शैताने यीशुर हैरालिया कि तेने केतोक तागतवर थिये, होरक तेने केतोक खुशहाल थिये। शैताने यीशु सा लाई, “हऊं तपींर इने बदेदीर दी बिज़ू अगर तपीं ज़ानू भारे अई मूर फ्‍यक्‍स करल त।”

![](https://cdn.door43.org/obs/jpg/360px/obs-en-25-07.jpg)

यीशुई जुवाब दिता, “हे शैताना, मू कच़ंञ उठि गा! परमेश्‍वरा वचनन यीशु मऊंओर हुकुम देना असे, ‘सिर्फ मेपें प्रभु परमेश्‍वरा आराधना करो। परमेश्‍वरा रुपन सिर्फ यीशु आदर करो।’”

![](https://cdn.door43.org/obs/jpg/360px/obs-en-25-08.jpg)

यीशुई शैताना इम्‍तिहाना सा हार न मनिया, तेरे-ए शैतान यीशु कच़ंञ उठि गिया। च़ा स्‍वर्गदूतो अईकर यीशु सेवा टहल करिब ठारुए।

*मती पाठ 4:1-11; मरकुस 1:12-13; लूका 4:1-13 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_25_128kbps.m4a

## 26. यीशु अपां सेवा करिबे शुरुआत करना असे

https://openbiblestories.org/l/gda/story-26/

![](https://cdn.door43.org/obs/jpg/360px/obs-en-26-01.jpg)

शैताना कि इम्‍तिहानोर मना करि पिच़ंञ, यीशु पलाटुई गलीला लाकेन आया। इए से ठार भो ज़ेटि यीशु बेशना थिया। पवित्र आत्‍मा यीशुर मस्‍स तागत देनाति, होरक यीशु एक ठारिंञ अईक ठारीआरी गिया होरक मऊंओर शिक्षा दिता। बदे यीशु बारेन रुठू गप्‍पे लाई।

![](https://cdn.door43.org/obs/jpg/360px/obs-en-26-02.jpg)

यीशु नासरत नगरीन गिया। इ से नगर भो ज़ेटि यीशु मठेन्‍ज़ेञंन बेशना थिया। नह्च़ि करिबे दिया, यीशु आराधना करिबे ठारि गिया। यहूदी परधाने-ए यीशुर यशायाह परमेश्‍वरा तरफे बोलने कि उज़ाबा एक कताब दिता। तेने चाहने थिये कि यीशुई से कताब पढ़ोरा लोई। तेरे यीशुई तेस कताबर खोईकर तेसी एक हिस्‍सेर मऊंवोओनि पढ़िया।

![](https://cdn.door43.org/obs/jpg/360px/obs-en-26-03.jpg)

यीशुई पढ़िया, “परमेश्‍वरे मूंर अपां आत्‍मा दितोरा भो ताकि हऊं गरीबोर रुठू खबर प्रचार करि बटू। तेनी मूंर तेरे बिदोरा भो ताकि कैदियोर आज़ाद करु, कां मऊंओर फिरी टीरा देऊं, होरक तेनोर छुटकारा देऊं ज़ेनोर होरेक मऊं च़िकनेन। इ से मुका भो ज़ेखेए परमेश्‍वर अस्‍प्यों पुटि मस्‍स दया करल होरक अप्‍सेयोंर मदद करल।”

![](https://cdn.door43.org/obs/jpg/360px/obs-en-26-04.jpg)

च़ा यीशु बेशी गिया। बदे मऊं तेसर बड़े ध्‍याना सा हेरनेति। तेने ज़ान्‍नेति कि पवित्रशास्‍त्रा ज़े हिस्‍सा यीशुई एबैईं पढ़ियाति। से मसीह बारेन थिया। यीशुई लाई, “ज़े गप्‍पे मैंईं एबैईं तुप्‍सेयो ओनि पढ़िया, से इस मुक्‍के भुइला असे।” बदे मऊं हैरान थिये। तेने मऊंवी लाई, “खि इ यूसुफा कोआ नूंआ?”

![](https://cdn.door43.org/obs/jpg/360px/obs-en-26-05.jpg)

च़ा यीशुई लाई, “इ छेछैईं भो कि मऊंए केसोआ एरा घाटे परमेश्‍वरा तरफे बोलनेर कद्‍दी अपनाया न घटि ज़े तेनो नगरीन मोड़ा भोरा भोल। एलिय्‍याह परमेश्‍वरा तरफे बोलने मुके, इस्राएलन मस्‍स ज़ेंञ रण्‍णीं ज़लऊं थिये। पर ज़ेखेऐ सढ़े त्राई वर्षा च़ेक संदा नूआ त परमेश्‍वरे एलिय्‍याहर इस्राएलन कऊंआ रण्‍णींर मदद करिबोनि न बिदा। इसी बजाए, एलिय्‍याहर कोठेआ होरक देशा रण्‍णीं कच़ा बिदा।”

![](https://cdn.door43.org/obs/jpg/360px/obs-en-26-06.jpg)

यीशुई बोलिबा जारी थैया, “होरक एलीशा परमेश्‍वरा तरफे बोलने मुके, इस्राएलन मस्‍स मऊं त्रपी रोगंञ दु:खोरे थिए। पर एलीशाए तेनो बिच़ंञ केस्‍सोर भि अईन न कियाति। तेनी इस्राएला दुश्‍मणा की सेनापति नामानर ज़ेत्‍ती अईन कियाति।” पर ज़े मऊं यीशुर शुण्‍नेति तेने यहूदी थिए। ज़ेखेए तेने यीशुर इ बोलिब शुंया त तेने यीशु पुटि रोशुए।

![](https://cdn.door43.org/obs/jpg/360px/obs-en-26-07.jpg)

नासरता मऊंए यीशुर प्रई बिदा होरक यीशुर आराधने ठारींञ द्रि कर भईंरों लेई गे। तेने यीशुर मारि बिज़िबे ओनि बुन फटईबेर एक टिकरी मुक्‍का लेई गे। पर यीशु भीड़ंञ निसि गिया होरक नासरत नगरीर छई उठि गिया।

![](https://cdn.door43.org/obs/jpg/360px/obs-en-26-08.jpg)

च़ा यीशु बदे गलीला ठारी गिया, होरक मस्‍स भीड़ तेसी कच़ा आई। तेने मस्‍स ज़ेंञ मऊंओर लेई आए ज़े दुखोरे ओ लट्टे थिए। तेनो बिच़ंञ मिन हेरी, हणीं, शुंई होरक बोली नोटने थिये, होरक यीशुई तेनोर अईन किया।

![](https://cdn.door43.org/obs/jpg/360px/obs-en-26-09.jpg)

इसी इलावा, मस्‍स ज़ेंञ एरे मऊं यीशु कच़ा आने ज़ेनोंञ मदम आत्‍माओ थिये। यीशुई मदम आत्‍माओर तेनोंञ निसि गईबे हुकुम दिता। तेने मदम आत्‍माओ हउशुए, “तपीं परमेश्‍वरा कोआ भो!” मस्‍स मऊं ठठ्ठ थिए, होरक तेने परमेश्‍वरा स्‍तुति किया।

![](https://cdn.door43.org/obs/jpg/360px/obs-en-26-10.jpg)

च़ा यीशुई बारा मुशुड्लेओर चुनिया ज़ेनोर तेनी अपें चेल्‍ले लाई। तेने चेल्‍ले यीशु सा सफर किया होरक यीशुंञ शिक्षा हथेरिया।

*मती पाठ 4:12-25; मरकुस 1:14-15, 35-39; 3:13-21; लूका 4:14-30, 38-44 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_26_128kbps.m4a

## 27. रुठू सामरी कथा

https://openbiblestories.org/l/gda/story-27/

![](https://cdn.door43.org/obs/jpg/360px/obs-en-27-01.jpg)

एक झा, यहूदी कानूना एक ज़ाणकार यीशु कच़ा आया। से बदेओर हैरालिबा चाहन्‍नाति कि यीशु गलत ढंगा सा शिक्षा देना। तेरे तेनी लाई, “हे गुरु, हमेशे जीवन हथेरिबोनि हऊं खि करु?” यीशुई जुवाब दिता, “परमेश्‍वरा कानूनन खि लिखोरा असे?”

![](https://cdn.door43.org/obs/jpg/360px/obs-en-27-02.jpg)

तेनी मऊवी लाई, “से बोलना असे कि मेपें परमेश्‍वरा सा तेपें पूरे सेम, जान, सामर्थ-ओ, बुद्धि सा दा थे। होरक तेपें पड़ोसी सा तेपां बराबर दा थैओ।” यीशुई जुवाब दिता, “तु एकदम सई भो! अगर तु एरा करल, त तुर हमेशे जीवन हथेओल।”

![](https://cdn.door43.org/obs/jpg/360px/obs-en-27-03.jpg)

पर से कानूनर ज़ाण्‍ना मऊंओर हैरालिबा चाहन्‍नाति कि तेसीकि जीवन ज़ीबे तरीका सई थिया। तेरे तेनी यीशुर पुछ़िया, “ठीक भो, च़ा मेरा पड़ोसी कऊं भो?”

![](https://cdn.door43.org/obs/jpg/360px/obs-en-27-04.jpg)

“यीशुई तेस कानूना ज़ाण्‍कारर एक कथाई द्वारे जुवाब दिता। “एक यहूदी मऊं थिया ज़े एक सड़केंञ भूईकर यरुशलेमंञ यरीहो कि सफर करनाति।”

![](https://cdn.door43.org/obs/jpg/360px/obs-en-27-05.jpg)

“पर केन्‍या डाकुए तेस कया होरक तेस पुटि हमला करि बिदा। तेने तेसीकी बदेदीर लेई बिदा होरक तेसर लगभग मारिब ज़ोगा द्रड़ी बिदा। च़ा तेने उठि गे।”

![](https://cdn.door43.org/obs/jpg/360px/obs-en-27-06.jpg)

“तेस पिच़ंञ तेखैईं ज़ेञ, एक यहूदी पुजारी तेस्‍से बते भूईकर गिया। तेनी यहूदी पुजारी तेस मऊंर बतन झ़ाओरा कया। ज़ेखैईं तेनी तेस कईया त से बतंञ अईक्‍यारिंञ गईकर अगलिरि उठि गिया। तेनी तेस मऊंर पूरा न कईबे ठो करि बिदा।”

![](https://cdn.door43.org/obs/jpg/360px/obs-en-27-07.jpg)

“इस पिच़ंञ मिन झाए पिच़ंञ, एक लेवी तेस्‍से बता आया। (लेवी यहूदियो की एक गोत्र थिया ज़ेने मन्‍दरन् यहूदी पुजारियो मदद कियाति) से लेवी भि बतंञ अईक्‍यारिंञ निसी उठि गिया। से भि तेस मऊंर गांण न छ़ई उठि गिया।”

![](https://cdn.door43.org/obs/jpg/360px/obs-en-27-08.jpg)

“अयक मऊं ज़े तेस बते आया से सामरिये कि एक मऊं थिया। (सामरीओ यहूदी एम्‍फेयों बिच़ा नफरत करने थिए।) तेनी सामरिए बतन तेस मऊंर कया। तेनी कईया कि से यहूदी थिया, पर फिरी भि तेनी तेस पुटि मस्‍स दया किया। तेरे से तेस कच़ा गिया तेसीकि ज़खमा पट्टी बनिया।”

![](https://cdn.door43.org/obs/jpg/360px/obs-en-27-09.jpg)

“च़ा तेनी सामरिए तेस मऊंर अपें कारे पुटि थेईया होरक तेसर सराएंन लेई गिया। ज़ेटि तेनी तेसी ख्‍याल थैया।”

![](https://cdn.door43.org/obs/jpg/360px/obs-en-27-10.jpg)

अगरीं दिया, तेस सामरीर अपां सफर करिबा ज़रुरी थिया। तेनी तेस सराएं ग्राखिर खीं ढबुआ दिता। तेनी तेस्‍सा लाई, “एस मऊंआ ख्‍याल थेओ। अगर इस ढबूए इलावा तेपां होरक ढबा खर्च भूई गाल त पलाटुईब साथे हऊं तेपां खर्चा दी बिज़ू।”

![](https://cdn.door43.org/obs/jpg/360px/obs-en-27-11.jpg)

च़ा यीशुई तेस कानूना ज़ाण्‍कारंञ पुछ़िया, “तु खि सोचना? इने त्राई मऊंओं बिच़ंञ कऊं तेस मऊंआं पड़ोसी भो ज़ेसर लूटिकर द्रड़ि बिदोरा थिया?” तेनी जुवाब दिता, “सेए ज़े तेस पुटि दयालु थिया।” यीशुई तेस्‍सा लाई, “तपीं गा होरक एरीए करो।”

*लूका पाठ 10:25-37 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_27_128kbps.m4a

## 28. टंगेटा छ़ोकरा शासक

https://openbiblestories.org/l/gda/story-28/

![](https://cdn.door43.org/obs/jpg/360px/obs-en-28-01.jpg)

एक झा, एक टंगेटा छ़ोकरा शासके यीशु कच़ा अईकर पुछ़िया, “हे बदेओंञ रुठू गुरु, हमेशे जीवन हथेरिबोनि मूंर खि करिब लोई?” यीशुई तेस्‍सा लाई, “तु मूंर ‘बदेओंञ रुठू’ किस बोलना? सिर्फ एक्‍के बदेओंञ रुठू भो होरक से परमेश्‍वर भो। पर अगर तु हमेशे जीवन हथेरिबा चाहना त परमेश्‍वरा कानूनर मन।”

![](https://cdn.door43.org/obs/jpg/360px/obs-en-28-02.jpg)

तेनी पुछ़िया, “मूंर कोसंञ-कोसंञ हुकमर मनिबे ज़रुरत असे?” यीशुई जुवाब दिता, “हत्‍या म करो। झकेउआं कम म करो। चोरी म करो। हफ्‍सी म बिच़ारो। मेपें बाओर याकी आदर करो, होरक मेपें पड़ोसी सा मेपें बराबर दा करो।”

![](https://cdn.door43.org/obs/jpg/360px/obs-en-28-03.jpg)

पर तेनी छ़ोकरे मुशुड्ले लाई, “हऊं मठेंनज़ंञ किनदीए इने बदे हुकुमोर मनला आओरा भोऊं। मूंर हमेशेओनि ज़ीना छ़ुटिबेर एबैईं भि खि करिबा ज़रूरी असे?” यीशुई तेसारि हेरिकर तेसर दा किया।

![](https://cdn.door43.org/obs/jpg/360px/obs-en-28-04.jpg)

यीशुई जुवाब दिता, “अगर तु महान भूईबा चाहना त गईकर तेपां बदेदीर बिक्रीं बिज़ होरक से ढबूआ गरीबोर बण्‍णीं बीज़, होरक तुर स्‍वर्गन ढबूआ हथेओल। च़ा अईकर मूं पिछ़ीं भूईगा।”

![](https://cdn.door43.org/obs/jpg/360px/obs-en-28-05.jpg)

ज़े यीशुई लाई ज़ेखेईं तेनी छ़ोकरे मुशुड्‍ले शुंया त से मस्‍स उदास भूई गिया, किसबोलि से मस्स टंगेटा थिया होरक से अपां बदे धन-दौलतर दीबा चाहना नोथा। से फिरिकर यीशु कच़ंञ उठि गिया।

![](https://cdn.door43.org/obs/jpg/360px/obs-en-28-06.jpg)

च़ा यीशुई अपें च़ेल्‍लेयो सा लाई, “परमेश्‍वरा राज्‍यन टंगेटे मऊंओ कि अईबा मस्‍स मुश्‍कुल असे! हां, एक टंगेटा मऊं कि परमेश्‍वरा राज्‍यन अईबेंञ करि केसोआ ऊंटा की सिनई खातरंञ निसी गईबा योच्‍ची असे।”

![](https://cdn.door43.org/obs/jpg/360px/obs-en-28-07.jpg)

ज़े यीशुई लाई ज़ेखेईं च़ेल्‍ले शुंया त तेने हैरान थिये। तेने लाई, “अगर इ एरा असे त परमेश्‍वर केसर बच़ाल?”

![](https://cdn.door43.org/obs/jpg/360px/obs-en-28-08.jpg)

“यीशुई च़ेल्‍लेयोर हैरिया होरक लाई, “मऊंआ ओनि मेपां उद्धार करिबा नामुमकिन असे। पर परमेश्‍वराओनि खीं भि करिबा नामुमकिन नाईं।”

![](https://cdn.door43.org/obs/jpg/360px/obs-en-28-09.jpg)

पतरसे यीशु सा लाई, “अप्‍सीं च़ेल्‍ले मेपां बदेदीर छ़ईकर तेपां पिछ़ीं भूई गिउरे असु। च़ा अप्‍सेयों इनाम खि भोल?”

![](https://cdn.door43.org/obs/jpg/360px/obs-en-28-10.jpg)

यीशुई जुवाब दिता, “हर एक मऊं ज़ेनी मेरे वजहंञ घरर, भाईर, भेईंर, बार, यार, मठेओर, या धन-दौलतर छोड़ोरा असे, से तेसींञ शऊ गुणा मस्स हथेरल होरक हमेशे ओनि जीवनर हथेरल। पर मस्स ज़ेञ ज़े अगरीं असुन तेने पिछ़ेओले, होरक मस्स ज़ेंञ ज़े पिछ़ेओरे असुन तेने अघरेओले।”

*मती पाठ 19:16-30; मरकुस 10:17-31; लूका 18:18-30 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_28_128kbps.m4a

## 29. दया मेतेईं परगरा कथा

https://openbiblestories.org/l/gda/story-29/

![](https://cdn.door43.org/obs/jpg/360px/obs-en-29-01.jpg)

एक झा, पतरसे यीशु सा पुछ़िया, “हे मालिका, मूंर अपें भाईर केतोक फेरा माफ करिब लोई ज़ेखेईं से मेरे खिलाफन पाप करना असे? खि सत फेरे च़ेका?” यीशुई लाई, “सत फेरा ना, पर सता की त्राई बीओ दश फेरे च़ेक!” इसी द्वारा, यीशु मतलब भो कि अप्‍सेयोर हमेशा माफ करिब लोई। च़े यीशुई ई कथा शुंणांया।

![](https://cdn.door43.org/obs/jpg/360px/obs-en-29-02.jpg)

यीशुई लाई, “परमेश्‍वरा राज्‍य एक रज्‍ज़े बराबर भो ज़े अपें परगरा सा लेखा लेईबा चाहन्‍नाति। तेसी एक परगर दूई लाख बरिउ मजदूरी कि एक मोड़े कर्ज़ा कि कर्ज़दार थिया।”

![](https://cdn.door43.org/obs/jpg/360px/obs-en-29-03.jpg)

पर तेनी परगरे अपां कर्ज़ दी नोटिया, इकरी रज्‍ज़े लाई, “इसी कर्ज़ मुकइबोनि इस मुशुड्लेर होरक इसी टबरोर परगर बणंई बिक्रीं बिज़ो।”

![](https://cdn.door43.org/obs/jpg/360px/obs-en-29-04.jpg)

“तेनी परगरे रज्‍ज़े समटे अपें ज़ानूओ बले झ़ईकर लाई, ‘शबस करि मू सा धीरज थे, होरक हऊं मेपें ऋणा कि बदे रकमर दी बिज़ू।’ रज्‍ज़े परगरा पुटि दया किया, तेरे तेनी तेसी बदे ऋणर माफ करि बिदा होरक तेस गईब दिता।”

![](https://cdn.door43.org/obs/jpg/360px/obs-en-29-05.jpg)

“पर ज़ेखेए से परगर रज्‍ज़े कच़ंञ भईरों गिया, त तेसर तेसीकि साति परगर हतुआ ज़े तेसीकि च़ौउर मांह कि मजदूरी कि ऋणीं थिया। तेनी परगरे अपें साति परगरर प्रई बिदा होरक लाई, ‘ज़े तु पुटि ऋण असे मूंर से पलाटेर!”

![](https://cdn.door43.org/obs/jpg/360px/obs-en-29-06.jpg)

“तेनी साति परगरे ज़ानुओ बले झ़ईकर लाई, ‘ज़ी मू सा धीरज थे, होरक हऊं मेपें ऋणां बदे रकमर दी बिज़ू।’ पर इसी बजाए, तेनी परगरे अपें साति परगरर कैदन छ़ई बिदा ज़ेखेईं च़ेक कि तेसर ऋण दी न बिज़ल।”

![](https://cdn.door43.org/obs/jpg/360px/obs-en-29-07.jpg)

“ज़े भि भुआति तेस होरक परगरे कया होरक तेने मस्स दुखी भोए। तेने रज्‍ज़े कच़ा गे होरक तेसर बदेदीर बतई बिदा।”

![](https://cdn.door43.org/obs/jpg/360px/obs-en-29-08.jpg)

“रज्‍ज़े तेस परगरर बुलईकर लाई, ‘हे मदम परगरा! मैईं तेरे ऋणर तेरे माफ कियाति किसबोलि तेईं मू सा विनती कियाति। तुर भि तेरीए करिब लोईनाति।’ रज्‍ज़ा एतोक रोशोरा थिया कि तेनी तेस मदम परगरर कैदन छ़ई बिदा ज़ेखेए च़ेक कि से अपें बदे ऋणर पलाटेरी न बिज़ल।”

![](https://cdn.door43.org/obs/jpg/360px/obs-en-29-09.jpg)

च़ा यीशुई लाई, “मेरा स्‍वर्गन बेठोरा बा तुप्‍सेयों बिच़ा हर एक मऊं सा एरी करल अगर तुप्‍सीं भाईर तुईपें सेमञ माफ करि न बिज़ोले।”

*मती पाठ 18:21-35 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_29_128kbps.m4a

## 30. यीशु पन हजार मऊंओर बगत देना असे

https://openbiblestories.org/l/gda/story-30/

![](https://cdn.door43.org/obs/jpg/360px/obs-en-30-01.jpg)

यीशुई अपें प्रेरितोर प्रचार करिबे ओ मऊंओर शिक्षा दिबोनि मस्स ज़ेञ पाटि-पाटि नगरियोन बिदा। ज़ेखेए तेने तेटी पलाटुए ज़ेटि यीशु थिया त तेने तेसर बताया कि तेने खि कियाति। च़ा यीशुई तेनोर झीला अईक्‍यारिंञ तेस्‍सा एक शान्‍त ठारि पुटि गईकर मिन झा नह्च़ि करिबोनि बुलाया। तेरे तेने एक कश्‍ती पुटि चढ़ी गे होरक झीला अईकारच़ी उठि गे।

![](https://cdn.door43.org/obs/jpg/360px/obs-en-30-02.jpg)

पर तेटि मस्स ज़ेञ एरा मऊं थिए ज़ेने यीशुओर च़ेल्‍लेओर कश्‍तीन गईबेंञ कयाति। इने मऊं तेनोंञ अगरीं झीला अईकारच़ी गईबोनि झीला मुखीं-मुखीं ज़रका देनेति। तेरे ज़ेखेए यीशुओर च़ेल्‍ले अपरे त मऊंओं कि एक मस्स छुंड तेनोर च़ोखि तेटि अगरंञे थिए।

![](https://cdn.door43.org/obs/jpg/360px/obs-en-30-03.jpg)

तेस भीड़न ज़लऊंओं होरक मठेओर न गणीं पन हजारंञ भि मस्स मुशुड्ले थिए। यीशुई तेनो मऊंओं पुटि मस्स दया किया। यीशुओनि तेने मऊं पउआला मेतेंईं पेरुओठो थिए। तेरे यीशुई तेनोर शिक्षा दिता होरक तेनो बिच़ा ज़ेने मऊं दुखोरे थिए तेनोर अईन किया।

![](https://cdn.door43.org/obs/jpg/360px/obs-en-30-04.jpg)

पसतेला ज़ेञ, च़ेल्‍ले यीशु सा लाई, “हेबे झा भूई गियाओर इसो-ओसो दूरे च़ेक नगरी भि नाईं। इनो मऊंओर बिदा कर ताकि इने गईकर खईबोनि खींया लेले।”

![](https://cdn.door43.org/obs/jpg/360px/obs-en-30-05.jpg)

पर यीशुई च़ेल्‍लेयो सा लाई, “तुसे इनोर खईबोनि खींया देओ!” तेने जुवाब दिता, “अप्‍से एरा केरा करि बटले? अप्‍सेयों कच़ा सिर्फ पन रोटि ओ दूई मठी मछ़ो असुन।”

![](https://cdn.door43.org/obs/jpg/360px/obs-en-30-06.jpg)

यीशुई अपें च़ेल्‍लेयोर लाई कि तेने भीड़ा मऊंओर घा पुटि दूई-बी-दश दूई-बी-दशा छुंडन बेशिबोनि बोलो।

![](https://cdn.door43.org/obs/jpg/360px/obs-en-30-07.jpg)

च़ा यीशुई पन रोटि दूई मछ़ोर लेईकर स्‍वर्गारी हेरिया, होरक तेस बगताओनि परमेश्‍वरा शबस किया।

![](https://cdn.door43.org/obs/jpg/360px/obs-en-30-08.jpg)

च़ते यीशुई रोटि ओ मछ़ोर खण्‍णि किया। यीशुई मऊंओर दीबोनि अपें च़ेल्‍लेयोर तेने खण्‍णि दी बिदे। च़ेल्‍ले तेस बगतर बण्‍णिला किया, होरक से कांई-भि न छ़ोवा! तेने बदे मऊं खई रज़ि गे।

![](https://cdn.door43.org/obs/jpg/360px/obs-en-30-09.jpg)

तेस पिच़ंञ, च़ेल्‍ले तेस बगतर ठोक्‍कन किया ज़ेस खाओरा नोथा होरक से बारा बल्‍लियोर भरिबोनि झोभी थिया! से बदे बगत तेने पन रोटि ओ दूई मछ़ोञ आयाति।

*मती पाठ 14:13-21; मरकुस 6:31-44; लूका 9:10-17; यूहन्‍ना 6:5-15 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_30_128kbps.m4a

## 31. यीशु पाईं पुटि हण्‍णा असे

https://openbiblestories.org/l/gda/story-31/

![](https://cdn.door43.org/obs/jpg/360px/obs-en-31-01.jpg)

पन हजार मऊंओर बगत खवई पिच़ंञ, यीशुई अपें चेल्‍लेओर पाईं कि किश्‍तीन चढ़िबेर बोलिया। यीशुई तेनोर झीला कि अइक हरोरिंञ उठि गईबेर बोलिया पर अपीं संञ तेट्ठीं बेठा। च़े च़ेल्‍ले उठि गे होरेक यीशुई मऊंओर बिदा किया, कि तेने एम्‍फ्‍यों घरेआरि उठि गाले। इस पिच़ंञ, यीशु प्रार्थना करिबे ओनी घउआरि ठो उठि गिया। तेटि अपीं एकेला थिया, होरेक तेनी तेटि रात पूरा प्रार्थना किया।

![](https://cdn.door43.org/obs/jpg/360px/obs-en-31-02.jpg)

तेस्से मुके, च़ेल्‍ले पांईं कि किश्‍तिर च़लइला गाने थिये, पर ब्‍याना तेनोआरि च़ल। मस्स राति च़ेक भि तेने झीला कि आद बताए अपरोरे थिये।

![](https://cdn.door43.org/obs/jpg/360px/obs-en-31-03.jpg)

तेस मुके यीशुई प्रार्थना करिबा छ़ोया होरेक अपें च़ेल्‍लेओ कच़ा गईबा च़ुक्‍फि किया। यीशु पांईं कि किश्‍तिआरि गईबे ओनि पांईं पुटि हणिंब ठारुआ।

![](https://cdn.door43.org/obs/jpg/360px/obs-en-31-04.jpg)

च़े च़ेल्‍ले तेसर कईया। तेने डरोंआ डरि गे किसबोलि तेने च़ेतोरा थिया कि से कऊंआ शैतान भोआ। यीशुर पता थिया कि तेने डरि गिउरे थिये, तेरे तेनी तेनोर हक दी बोलिया, “डरो मांओ, इ हऊं भोऊं!”

![](https://cdn.door43.org/obs/jpg/360px/obs-en-31-05.jpg)

च़े पतरसे यीशुआरि लाई, “हे प्रभु, अगर इ तपीं भोए त मूंर पांईं पुटि हणिं कर तपीं कच़ा अईबे हुकुम दे।” यीशुई पतरसर लाई, “अई!”

![](https://cdn.door43.org/obs/jpg/360px/obs-en-31-06.jpg)

च़े पतरसे पांईं कि किश्‍तिंञ ओसिकर यीशु कच़ा गईबे ओनि पांईं पुटि हणिबा च़ुक्‍फि किया। पर अइदा दूरे अपरि, तेनी अपां टीरा यीशुंञ घिरई बिदा होरेक पांईं कि छव्‍ली हेरिबा-ओ बालुंइर महसूस करिबा च़ुक्‍फि किया।

![](https://cdn.door43.org/obs/jpg/360px/obs-en-31-07.jpg)

च़े पतरस डरि गिया होरेक पांईंन डुबिब ठारुआ। से हऊशुआ, “हे प्रभु, मूंर बच़ा!” यीशुई तेस्‍से मुके हथ दी तेसर प्रई बिदा। च़े यीशुई पतरसारि लाई, “तेरा विश्‍वास डरोंआ थोड़ा असे! तूर बच़ई थेइबे ओनि तेंई मूं पुटि विश्‍वास किस न किया?”

![](https://cdn.door43.org/obs/jpg/360px/obs-en-31-08.jpg)

च़े यीशु ओ पतरस पांईं कि किश्‍ती पुटि चढ़ि गे, होरेक तेरी ब्‍याना च़लिबा बंदुई गिया। पांईं धिप्‍पन भुई गिया। च़ेल्‍ले हैरान भुइकर यीशु अगरीं ज़ानु बले अइ गे। तेने यीशु कि अराधना किया होरेक बोलिया, “छ़ेच्‍चेईं कि तपीं परमेश्‍वरा कोआ भोई।”

*मती पाठ 14:22-23; मरकुस 6:45-52; यूहन्‍ना 6:16-21 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_31_128kbps.m4a

## 32. यीशु मदम आत्‍मई चंगुलन थिउरे मऊंर-ओ एक दुखोरि ज़लऊंर अइन करना असे

https://openbiblestories.org/l/gda/story-32/

![](https://cdn.door43.org/obs/jpg/360px/obs-en-32-01.jpg)

यीशु ओ यीशु कि च़ेल्‍ले एम्‍फ्‍यों किश्‍तिन तेस ठारियार गे ज़ेटि गेरासेनी मऊं बेशने थिये। तेने तेस ठारि अपरि किश्‍तिंञ ओसि गे।

![](https://cdn.door43.org/obs/jpg/360px/obs-en-32-02.jpg)

तेटि एक मऊं थिया ज़े मदम आत्‍मे कि चंगुलन थिया।

![](https://cdn.door43.org/obs/jpg/360px/obs-en-32-03.jpg)

इ मऊं एरा घाटे ताग्‍ती थिया कि केनी भि तेसर थमई नोटोरा थिया। कैत्‍तिया फेरा मऊंए तेसी हथ खुरोर शंञीं सा बनिया, पर से शञिंयोंर भि त्रोई बिज़ना थिया।

![](https://cdn.door43.org/obs/jpg/360px/obs-en-32-04.jpg)

से मऊं तेस लाके मशंई लाके बेशना थिया। इ मऊं रात-दीन हउशुईला करना थिया। से डबूं न लयोना थिया होरेक खास अपींर रुणों सा घायल करना थिया।

![](https://cdn.door43.org/obs/jpg/360px/obs-en-32-05.jpg)

से मऊं द्रो दी यीशु कच़ा आया होरेक तेसि अगरों ज़ानुई बले आया। च़े यीशुई तेसी अण्‍डीं कि मदम आत्‍मई सा गप्‍पा किया, “इस मऊं अण्‍डीं किंञ भईरीं निसि अई!”

![](https://cdn.door43.org/obs/jpg/360px/obs-en-32-06.jpg)

से मदम आत्‍मा ज़ोरे हऊशुई, “हे यीशु, बदेओंञ मोड़ा परमेश्‍वरा कोआ, तेपां मूं सा खि कम? शबस करि मूर म सता!” च़े यीशुई तेस मदम आत्‍मइर पुछ़िया, “तेरा नाऊं खि भो?” तेनी जुवाब दिता, “मेरा नाऊं सेना भो, किसबोलि असे मस्‍स ज़ेंञ असु।” (रोमी सेनेन केत्‍तिया हजार सैनिको कि एक झुण्‍ड “सेना” भोना थिया।)

![](https://cdn.door43.org/obs/jpg/360px/obs-en-32-07.jpg)

तेने मदम आत्‍मये यीशुर विनती किया, “शबस करि असोर इस ठारिंञ भइलिरि म बिज़!” तेट्ठीं कच़ा लाके सुअरो झुण्‍ड च़रिला थिये। तेरे तेने मदम आत्‍मये यीशुर विनती किया कि, “शबस करि असोर तेनो सुअरो-आरि बिज़ छ़ा!” “यीशुई बोलिया, “ठीक भो, तेनोंन उठि गाओ!”

![](https://cdn.door43.org/obs/jpg/360px/obs-en-32-08.jpg)

च़े तेने मदम आत्‍मई तेस मऊंञ निसि तेनो सुअरो अण्‍डीं उठि गे। तेने सुअरो बदे घऊआ मुखंञ झीलन छ्व्‍वा दीकर मरि गे। तेस झुंडन केमेत दुई हजार सुअरो थिये।

![](https://cdn.door43.org/obs/jpg/360px/obs-en-32-09.jpg)

तेटि सुअरो कि टहल करने मऊं थिये। ज़ेभि भूरा थिया ज़ेखेंईं तेने कइया त तेने नगरियारि नशि गे। यीशुई ज़े कियाति तेटि तेने बदेयोर बताया। तेस नगरी मऊं भयरीं निसि आये होरेक तेस मऊंर हेरिया ज़ेसी अण्‍डीं मदम आत्‍मा थिया। से शान्‍ति सा, डबूं लवी, होरेक आम मऊंआ घाटे बेठोरा थिया।

![](https://cdn.door43.org/obs/jpg/360px/obs-en-32-10.jpg)

तेने मऊं डरोंआ डरोरे थिये होरेक तेने यीशुर उठि गईवे ओनि बोलिया। च़े यीशु पाईं कि किश्‍ती पुटि चढ़ि गिया। से मऊं ज़ेसी अण्‍डीं मदम आत्‍माओ थिए तेनी यीशु सा गईबे ओनि विनती किया।

![](https://cdn.door43.org/obs/jpg/360px/obs-en-32-11.jpg)

पर यीशुई तेसर लाई, “न। हऊं चाहनूं कि तु घरे गई बदेओर बोल कि परमेश्‍वरे तेरा ओनि खि किया। तेनोर बता कि केरा परमेश्‍वरे तू पुटि दया कियाति।”

![](https://cdn.door43.org/obs/jpg/360px/obs-en-32-12.jpg)

तेरे ए मऊं उठि गिया होरेक बत्‍तेयोर इस पाठि बताया ज़े यीशुई तेसी ओनि कियाति। तेसी कथा शुंईं बदे मऊं ठट्‌ट भुई गिउरे थिये।

![](https://cdn.door43.org/obs/jpg/360px/obs-en-32-13.jpg)

यीशु झीला कि पारलिर पलाटुई गिया। यीशु कि तेटि अपरि पिच़ंञ, एक मोड़ा झुंड तेसी कच़ा-कच़ा ठोक्‍कन भुई तेसर च़िकिब ठारुए। तेस भीड़न एक ज़लऊं थी ज़ेसर बारा बरिउंञ रत बहिबे बिमारी थिया। तेनी अपां बदे धन-दौलत इलाज करनेओर दी बिदोरा थिया ताकि तेने तेस ठीक करि बटोरा लोई, पर तेसी रोग होरेक भि बिगड़ि गिया।

![](https://cdn.door43.org/obs/jpg/360px/obs-en-32-14.jpg)

तेनी शूंरा थिया कि यीशुई केतेक्‍बा दुखोरे मऊंओर अइन किउरा थिया तेनी सोचिया, “मूंर पक्‍का पता असे कि अगर हऊं यीशु कि डबूंअरे छुंञूं त, हऊं अइन भूई गऊं!” तेरे से यीशु पिछ़ीं किंञ आई होरेक यीशु कि डबूंअर छ़ुञिंया। ज़ेरी तेनी डबूंअर पछ़ दिता, रत बहिबा बंदुई गिया।

![](https://cdn.door43.org/obs/jpg/360px/obs-en-32-15.jpg)

तेखैईं, यीशुई ज़ाईं बिदा कि तेसी अण्‍डीं किंञ सामर्थ निथा। तेरे यीशुई पिछ़लिर फिरि पूछ़िया, “मूंर केनी छ़ुञिंया?” च़ेल्‍ले जुवाब दिता, “इटि एतेक बदे मऊंई तपीं फेरे भीड़ लवाओरा असे, होरेक तपींर घेरी असुन। च़ तेपें केरा पुछ़िया कि मूंर केनी छ़ुञिंया?”

![](https://cdn.door43.org/obs/jpg/360px/obs-en-32-16.jpg)

से ज़लऊं यीशु समटे डकिला आई होरेक डरोंआ डरि कर ज़ानुई बले बेशि गेई। च़े तेनी बतई बिदा कि तेनी खि किया, होरेक इ भि कि से अइन भुई गेई। यीशुई तेसर लाई, “तेरा विश्‍वासे तुर अइन करि बिदा। शान्‍ति सा उठि ग।”

*मती पाठ 8:28-34; 9:20-22; मरकुस 5:1-20; 5:24b-34; लूका 8:26-39; 8:42b-48 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_32_128kbps.m4a

## 33. एक किसाना कथा

https://openbiblestories.org/l/gda/story-33/

![](https://cdn.door43.org/obs/jpg/360px/obs-en-33-01.jpg)

एक झा, यीशु झीला मुख्‍खीं कच़ा थिया। यीशु मऊंओं कि एक डरोंआं मोड़ा भीड़र शिक्षा दीला थिया। यीशुर शुंइबेर एतेक मस्‍स मऊं आये कि यीशु कच़ा तेनो बदेओ सा गप्‍पा करिबे ओनि ठार न बच़िया। तेरे यीशु पांईं कि किश्‍तीन चढ़ि गिया। तेटि यीशु बेशि गिया होरेक मऊंओर शिक्षा दिता।

![](https://cdn.door43.org/obs/jpg/360px/obs-en-33-02.jpg)

यीशुई तेनोर इ कथा शुंणांया, “एक किसान बेजा बइब भइरीं निथा। ज़ेखेईं से बेजा फटानाति मिन ज़ेंञ बेजे बता फटुए। पर च़ई-च़करुई अइकर तेने बदे बेजेओर खई बिदा।”

![](https://cdn.door43.org/obs/jpg/360px/obs-en-33-03.jpg)

“होरेक बेजे रुणाला धरत्रि पुटि झ़इया ज़ेटि ज़न थोड़ा थिया। रुणाला ठारि झाओरे बेजे युहरना उब्‍ज़िब ठारुए, पर तेने जड़े डुगे गई नोटिया। ज़ेखेंईं धुप निथा होरेक तता भुआता तेने ओइरि जोब-जोब भुई गे होरेक मरि गे।”

![](https://cdn.door43.org/obs/jpg/360px/obs-en-33-04.jpg)

“तांबि होरेक बेजे बोर्च़ेओ बिच़ा झ़इये। तेने बेजे मोडुइब ठारुए, पर कण्‍णे तेनोर च़िकि बिदा। तेरे कण्‍णेटे धरती पुटि झ़ाओरे बेजे-ओंञ निथोरे ओइरिउंञ खीं बी अन्‍न निसि नोटिया।”

![](https://cdn.door43.org/obs/jpg/360px/obs-en-33-05.jpg)

“होरेक बेजे रुठू धरत्रि पुटि झ़इये। तेने बेजे उब्‍ज़िब ठारुए ज़ेतेक बेजा बाओरा थिया तेनोंञ बीओ दश, त्राई बी, होरेक इटि च़ेक कि शऊ गुणा अनाज भुआ। ज़ऊं भि परमेश्‍वरा पिछ़ीं च़लिबा चाहना, से तेस गप्‍पे पुटि ध्‍यान दे ज़े हऊं बोल्‍ला असु!”

![](https://cdn.door43.org/obs/jpg/360px/obs-en-33-06.jpg)

इनी कथे च़ेल्‍लेओर उलझनन बिदा। तेरे यीशुई समझाया, “से बेजा परमेश्‍वरा वचन भो। से बत एक एरा मऊं भो ज़े परमेश्‍वरा वचनर शुण्‍णां असे, पर तेसर शुञंमि न करना। च़े शैतान तेसी कच़ंञ वचनर च़ोरी लेई गाना। मतलब कि शैतान तेसर वचनर शुंञमि करिबेंञ दूरा थेण्‍णा असे।”

![](https://cdn.door43.org/obs/jpg/360px/obs-en-33-07.jpg)

“से रुणाला धर्त एक एरा घाटे मऊं भो ज़े परमेश्‍वरा वचनर शुण्‍णा असे होरेक खुशी-खुशी तेसर अपनई बिज़ना असे। पर ज़ेखेंए खरी ध्‍याड़ा अयल त, या ज़ेखेंए होरेक मऊं तेसर कंग करेले त, से परमेश्‍वरंञ दूरा उठि गाना। मतलब कि से परमेश्‍वरा पुटि भरोसा करिबा बंद करि बिज़ना असे।”

![](https://cdn.door43.org/obs/jpg/360px/obs-en-33-08.jpg)

“से बोर्च़ाला धर्त एरा मऊं भो ज़े परमेश्‍वरा वचनर शुण्‍णा असे। पर से मस्‍स गप्‍पेयो ओनि च़िन करिबा च़ुख्‍फी करि बिज़ना असे, होरेक से मस्स ढबूआ कमईबे कोशिश करना असे, से मस्‍स चीज़ोर अपींयार करिबे कोशिश करना असे। मिन ध्‍याड़े पिच़ंञ, हेबे से परमेश्‍वरर दा करिबे हीटन नाईं। तेरे ज़े तेनी परमेश्‍वरा वचनंञ शिखरियाति से तेसर परमेश्‍वरर खुश करिबे ज़ोगा न थेण्‍णां। से गेऊं कि डंठला बराबर भो ज़े खीं पैदावार न देनी।”

![](https://cdn.door43.org/obs/jpg/360px/obs-en-33-09.jpg)

“पर रुठ धर्त से मऊं भो ज़े परमेश्‍वरा कि वचनर शुण्‍णां असे, तेस पुटि विश्‍वास करना असे, होरेक फल देना।”

*मत्ती पाठ 13:1-8, 18-23; मरकुस 4:1-8, 13-20; लूका 8:4-15 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_33_128kbps.m4a

## 34. यीशु होरेक कथाओ कि शिक्षा देना असे

https://openbiblestories.org/l/gda/story-34/

![](https://cdn.door43.org/obs/jpg/360px/obs-en-34-01.jpg)

यीशुई परमेश्‍वरा राज्‍य कि बारेन होरेक मस्‍स कथा शुणांया। उदाहरणा ओनि, यीशुई बोलिया, “परमेश्‍वरा राज्‍य एक शई बेजे बराबर भो ज़ेसर केनिया अपें बगि बइ बिदा। तुसे ज़ाऊं कि शई बेजा बदे बेजेओंञ मठा भुइबा।”

![](https://cdn.door43.org/obs/jpg/360px/obs-en-34-02.jpg)

“पर ज़ेखेंई शई बेजा मोड़ुई गाना असे से बाग बदेओंञ मोड़ा भुई गाना असे, एतेक मोड़ा कि च़ई-च़करुओ अई तेसि डई पुटि नहच़ि करनेन।”

![](https://cdn.door43.org/obs/jpg/360px/obs-en-34-03.jpg)

यीशुई एक अयक कथा शुणांया, “परमेश्‍वरा राज्‍य खमीरा बराबर भो ज़ेसर एक ज़लऊं बगज़नन मिंयई बिज़नी असे च़े से खमीर बणिं गाना असे।”

![](https://cdn.door43.org/obs/jpg/360px/obs-en-34-04.jpg)

“स्‍वर्गा राज्‍य तेस खज़ाने बराबर भो ज़ेसर केनिया बगि युंकई बिदा। केसोआरा होरेक मऊंर से खज़ाना हतुई गिया होरेक तेनी तेसर अपें थेइबे इच्‍छा किया। तेरे तेनी फिरि पथि बिदा। से एरा घाटे तुठोरा थिया कि तेनी गई कर अपां बदे-दिर बिक्रीं बिदा ताकि तेनी तेस बगिर लेई बटोरा लोई ज़ेटि से खज़ाना थिया।”

![](https://cdn.door43.org/obs/jpg/360px/obs-en-34-05.jpg)

“स्‍वर्गा राज्‍य एक डरोंआ किमती शुद्ध मुतिका बराबर भि भो। ज़ेखेंई कऊंआ मुतिको व्‍यापारी तेसर हासिल करि बिज़ना त से तेसर लेईबे ओनि अपां बदे-दिर बिक्रीं बिज़ना असे।”

![](https://cdn.door43.org/obs/jpg/360px/obs-en-34-06.jpg)

तेटि मिन ज़ेञ मऊं थिये ज़ेने सोचनेति कि परमेश्‍वर तेनोर तेरे स्‍वीकार करल किसबोलि तेने भला कम करनेन। इने मऊं एरा घाटे मऊंओर खीं मेतेंई च़ेण्‍णे थिये ज़ेने भलाई कि कमोर न करने थिये। तेरे यीशुई तेनोर इ कथा शुणांया, “दुई मुषुल्‍ले थिये होरेक दुइयो ज़ेञ प्रार्थना करिबे ओनि मंदरा गे। तेनो बिच़ंञ एक कर लेना थिया, होरेक अइक ज़ेंञ से एक यहूदी धार्मिक परधान थिया।”

![](https://cdn.door43.org/obs/jpg/360px/obs-en-34-07.jpg)

“तेनी धार्मिक परधाने एरा बोलि प्रार्थना किया, ‘हे परमेश्‍वर, तेपां धन्‍यवाद कि हऊं होरेक मऊंओ घाटे-ज़ेरा डाकू, अन्‍यायी मऊं, झ़केउआं कम करना या इटि च़ेक कि तेस कर लेना मऊं घाटे एक पापी नूं।’”

![](https://cdn.door43.org/obs/jpg/360px/obs-en-34-08.jpg)

“उदाहरणा ओनि, हऊं हर हफ्‍ते दूई फेरा व्रत थेण्‍णूं, होरेक हऊं मूर हतेओने ढबूएंञ होरेक समानाकि दसवां हिस्‍सा तपींर देनूं।”

![](https://cdn.door43.org/obs/jpg/360px/obs-en-34-09.jpg)

“पर कर लेना से मऊं तेस यहूदी धार्मिक परधानंञ एस्‍सी दूरा खा भुइ गिया। तेनी खइलिर टीरा च़ेक न उछ़ूया। इसी बजाए, तेनी अपां हते अपां याहका कुटिया होरेक प्रार्थना किया, ‘हे परमेश्‍वरा, शबस करि मूं पुटि दया कर किसबोलि हऊं एक पापी भोऊं।’”

![](https://cdn.door43.org/obs/jpg/360px/obs-en-34-10.jpg)

च़े यीशुई बोलिया, “हऊं तुसोर छ़ेच्‍च़ेंईं बोलनूं, परमेश्‍वरे तेस कर लेने कि प्रार्थनइर शुईंया होरेक तेसर धर्मी घोषित किया। पर तेनी तेस यहूदी धार्मिक परधाना कि प्रार्थनइर न शुईंया। परमेश्‍वर हर एक घमण्‍डी मऊं कि कपार बुल्‍लिर करल, पर परमेश्वर हर एक तेस मऊंर आदर देल ज़े अपींर नम्र करना।”

*मत्ती अध्याय 13:31-33, 44-46; मरकुस 4:30-32; लूका 13:18-21; 18:9-14 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_34_128kbps.m4a

## 35. दयालु बा कि कथा

https://openbiblestories.org/l/gda/story-35/

![](https://cdn.door43.org/obs/jpg/360px/obs-en-35-01.jpg)

एक झा, यीशु तेनो केतेक्‍बा मऊंओर शिक्षा देनाति ज़ेने यीशु कि शुंईंबेर ठोक्‍कन भुएति। इने मऊं कर लेने ओ होरेक मऊं भि थिये ज़ेने मूसे कि कानूनाकि भाषे करिबे कोशिश न कियाति।

![](https://cdn.door43.org/obs/jpg/360px/obs-en-35-02.jpg)

मिन यहूदी धार्मिक परधाने-ए कइया कि यीशु इनो मऊंओंञ एक साति ठो गप्‍पा करना थिया। तेरे तेने एम्‍फ्‍यो बिच़ा इ बोलिबा च़ुख्‍फी करि बिदा कि से गलत करना थिया। यीशुई तेनोर गप्‍पा करिब शुंईंया, तेरे तेनी तेनोर इ कथा शुणांया।

![](https://cdn.door43.org/obs/jpg/360px/obs-en-35-03.jpg)

“एक मऊं थिया ज़ेसी दुई कोए थिये। मठा कोए अपें बा सा बोलिया, ‘हे बा, मूर एब्‍बेंई मेरा हिस्‍सा लोई!’ च़े बाए अपें दुइयो कोओ बिच़ा अपां जायजाद बण्‍णिं बिदा।”

![](https://cdn.door43.org/obs/jpg/360px/obs-en-35-04.jpg)

“युहरनाए मठा कोआ अपां बदे-दिर ठोक्‍कन करि दूरे देशारि उठि गिया होरेक पापा जीवन ज़ीबेर अपां बदे धन-दौलत बर्बाद करि बिदा।”

![](https://cdn.door43.org/obs/jpg/360px/obs-en-35-05.jpg)

“इस पिच़ंञ, ज़ेटि मठा कोआ थिया तेस देशन डरोंआ मोड़ा अकाल पड़िया, होरेक तेसिंञ बगत लेई खइबेर च़ेक ढबुआ नोथा। तेरे तेसर ज़े कम हतुआ से सुअरो च़ारिबा थिया। से एतेक दुखी ओ भुक्‍राच़ेओरा थिया कि से सुअरो कि बगत खइबा चाहना थिया।”

![](https://cdn.door43.org/obs/jpg/360px/obs-en-35-06.jpg)

“पिछ़ों मुख्‍खा, तेनी मठा कोए अपीं सा बोलिया, “हऊं खि करला असु? मेरे बा-कि बदे परगरोंञ खइबे ओनि मस्‍स बगत असे, फिरि भि हऊं इटि भुखरे मरनूं। हऊं मेपें बा कच़ा पलाटेऊं होरेक मेपें बा-कि परगर बणिंबे ओनि विनती करु।’”

![](https://cdn.door43.org/obs/jpg/360px/obs-en-35-07.jpg)

“च़े तेनी मठा कोए पलाटुई अपें बा-कि घरेआर गइबा च़ुख्‍फी किया। एबेंई से दूरा ए थिया, तेसी बाए तेसर कइया होरेक तेस पुटि तरस खाया। से द्रो दी अपें कोए कच़ा गिया होरेक तेस कला दिता ओ पा किया।”

![](https://cdn.door43.org/obs/jpg/360px/obs-en-35-08.jpg)

“तेनी कोए बोलिया, ‘हे बा, मेंई परमेश्‍वरा होरेक तेपें खिलाफन पाप किया। हऊं तेपां कोआ बोलिबे ज़ोगा भि नूऊं।’”

![](https://cdn.door43.org/obs/jpg/360px/obs-en-35-09.jpg)

“पर बाए अपें एक परगरर लाई, ‘युहरना गइ बदेओंञ रुठू डबूं लेई अयो होरेक मेरे कोएर लवाओ! तेसी अउंलीन अउंठी होरेक तेसी खुरोन बुटो लवाओ। च़े बदेओंञ मोड़ा पेरु मारी च़े अस्‍पीं खई योन्‍द्रा करले, किसबोलि मेरा कोआ मरि गियाति, पर हेबे ज़ीना असे! से हरुई गियाति, पर हेबे से हतुई गिया!’”

![](https://cdn.door43.org/obs/jpg/360px/obs-en-35-10.jpg)

“च़े मऊंई योन्‍द्रा किया। अदा च़ोखि, मोड़ा कोआ बगि कम करि घरेआर आया। तेनी घीत ओ नच़िबे च़ाला शुईंया से हैरान भुई गिया च़ेता इ खि भोना।”

![](https://cdn.door43.org/obs/jpg/360px/obs-en-35-11.jpg)

“ज़ेखेंईं मोड़ा कोएर पता लगिया कि तेने तेरे योन्‍द्रा करनेति तेसी भाई घरेआर अइ गियाति, च़े से डरोंआ रोषुआ होरेक घरे अण्‍डीं नाया। तेसी बाए भइरों अई तेसर साथे योन्‍द्रा करिबे ओनि बोलिया, पर तेनी मना करि बिदा।”

![](https://cdn.door43.org/obs/jpg/360px/obs-en-35-12.jpg)

“तेनी मोड़ा कोए अपें बा-रि लाई, ‘एतेक बदे बरी मेईं तेपां ओनि एतेक मेहनता सा कम किया! कदी -भि तेपें गप्‍पेर न टालिया, पर तेपें मूर कदी भि एक मठी बकरि च़ेक न दिति ताकि मेंईं मेपें सातियो सा खई बटू। पर तेपां इनी कोए तेपां धन-दौलत पापी कमो करिबेर बर्बाद करि बिदोरा असे। होरेक एबेंईं ज़ेखेंईं आया त तेपें बदेओंञ मोड़ा पेरु कटि योन्‍दरा किया!”

![](https://cdn.door43.org/obs/jpg/360px/obs-en-35-13.jpg)

“बा-ई जुवाब दिता, ‘हे मेरा कोआ, तु हमेशा मूं सा असे, होरेक ज़े भि मेरा असे से बदे तेरा भो। पर हईंपा ओनि योन्‍द्रा करिबा ठीक भो किसबोलि तेरा भाई मरि गियाति, पर हेबे ज़ीना असे। से हरुई गियाति, पर हेबे हतुई गिया!’”

*लूका पाठ 15:11-32 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_35_128kbps.m4a

## 36. यीशु मसीह कि रुप लेख्‍फि करिबा

https://openbiblestories.org/l/gda/story-36/

![](https://cdn.door43.org/obs/jpg/360px/obs-en-36-01.jpg)

एक झा, यीशु अपें त्राई च़ेल्‍ले, पतरस, याकूब, होरेक युहन्‍नेर अपीं सा लेई गिया। (इ युहन्‍ना नाऊंआकि च़ेल्‍ला से-हे मऊं नूंऊं ज़ेनी यीशुर बपतिस्‍मा दिति।) तेने प्रार्थना करिबे ओनि एक उथे घउआ पुटि गे।

![](https://cdn.door43.org/obs/jpg/360px/obs-en-36-02.jpg)

ज़ेखेईं यीशु प्रार्थना करला थिया त यीशुकि मुंह धुपा ठो च़ल्‍कि गिया। तेसी डबूं प्रागे ठो शुके भुई गे, ज़ेरा कि पृथ्वी पुटि केनिया शुका करि बटोरा नुअल तेतेक शुका।

![](https://cdn.door43.org/obs/jpg/360px/obs-en-36-03.jpg)

च़े मूसा ओ एलिय्‍याह परमेश्‍वरा तरफे बोलना प्रगट भुआ। इने मुषुड्ले पृथ्वी पुटि इस मुकेंञ केतिबा शऊ बरिउंञ अगरंञ बेशने थिये। तेने यीशु सा तेसी मरिबे बारेन गप्‍पा किया, किसबोलि यीशु यरुशलेमन युहरनाए मरि गईब थिया।

![](https://cdn.door43.org/obs/jpg/360px/obs-en-36-04.jpg)

ज़ेखेंईं मूसा-ओ एलिय्‍याह यीशु सा गप्‍पा करला थिये तेखेंई पतरसे यीशुर लाई, “हईंया ओनि इटि भुइबा रुठ भो। अस्‍पीं त्राई मंडपोर बणंउले, एक तेपां ओनि, एक मूसे ओनि, होरेक एक एलिय्‍याह कि ओनि।” पर पतरस न ज़ाण्‍णां थिया कि से खि बोलना।

![](https://cdn.door43.org/obs/jpg/360px/obs-en-36-05.jpg)

ज़ेखेंई पतरस गप्‍पा करला थिया, च़े एक च़ल्‍कोरा बदड़ बुलिर ओसी तेनो पुटि फैलि गिया। च़े तेने बदड़ंञ एक शा अइब शुईंया। तेनी बोलिया, “इ मेरा कोआ भो ज़ेस सा हऊं दा करनूं। हऊं इस सा खुश असु। इसी शुंणों।” तेने त्रईयो च़ेल्‍ले डरि गे होरेक धर्त्रि पुटि लेटि गे।

![](https://cdn.door43.org/obs/jpg/360px/obs-en-36-06.jpg)

तेखेंईं यीशुई तेनोर हथ थेई बोलिया, “डरो माओ। उठि बिज़ो।” ज़ेखेईं तेने च़ोउरो फेरेआर हेरिया त, ज़े भि तेटि थिया से सिर्फ यीशु थिया।

![](https://cdn.door43.org/obs/jpg/360px/obs-en-36-07.jpg)

यीशु होरेक तेने त्राई च़ेल्‍ले घउआ पुटिंञ पलाटुई बुल्‍लिर ओसि आये। च़े यीशुई तेनोर लाई, “एबेंई ज़े इटि भुआ तेसी चर्चा केसोआ सा मकरो। हऊं युहरनाए मरिब तियार असू च़े फिरि ज़ीनुई गऊं। तेस पिच़ंञ, तुसे मऊंओर बोलि बटोले।”

*मत्ती अध्याय 17:1-9; मरकुस 9:2-8; लूका 9:28-36 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_36_128kbps.m4a

## 37. यीशु लाज़रर मरि गिउरिओंञ ज़ीनेरना असे

https://openbiblestories.org/l/gda/story-37/

![](https://cdn.door43.org/obs/jpg/360px/obs-en-37-01.jpg)

लाज़र नाऊंआ कि एक मऊं थिया। तेसी दुई भेंई थिये ज़ेनो नाऊं मरियमो मार्था थिया। तेने बदे यीशु कि जिगरी साहथि थिये। एक झा, केनिया यीशुर बताया कि लाज़र डरोंआ दुखोरा थिया। ज़ेखेंई यीशुई इ शुईंया त बोलिया, “इ रोग लाज़रा कि मरिबे सा न छ़ोयोल। इसी बजाए, इ मऊंओर परमेश्‍वरा कि आदर करिबे ओनि उत्‍साहित करिली।”

![](https://cdn.door43.org/obs/jpg/360px/obs-en-37-02.jpg)

यीशु अपें सातिउर दा करना थिया, पर ज़ेटि से थिया तेटि यीशु दुई दी च़ेक च़ोखिया। दुई दियो पिच़ंञ, यीशुई अपें च़ेल्‍लेओर बोलिया, “अयो, पलाटुई यहूदियारि गऊंले।” च़ेल्‍ले जुवाब दिता, “पर हे गुरु, अज़ी मिन ध्‍याड़ा अगरंञ तेठा मऊं तपींर मारि बिज़िबा चाहने थिये!” यीशुई लाई, “हईंपा साति लाज़र निन्‍दरा असे, होरेक मूर तेसर च़ेवइबा असे।”

![](https://cdn.door43.org/obs/jpg/360px/obs-en-37-03.jpg)

यीशु कि च़ेल्‍ले जुवाब दिता, “हे प्रभु, अगर लाज़र ढेश किउरा असे, त से ठीक भुइ गाल।” च़े यीशुई तेनोर साफ रुपन बोलि बिदा कि, “लाज़र मरि गिउरा असे। हऊं आनन्‍दित असु कि हऊं तेटि नोथा, ताकि तुसे मूं पुटि विश्‍वास करि बटो।”

![](https://cdn.door43.org/obs/jpg/360px/obs-en-37-04.jpg)

ज़ेखेंई यीशु लाज़रा नगरी अपरिया त लाज़रर मरि च़ोउर दी भुई मुकोरा थिया। मार्था यीशु सा हतुइब भइरों आई होरेक बोलिया, “हे प्रभु, अगर तपीं इटि भुयंञ त मेरा भाई मरिबे नोथा। पर हऊं विश्‍वास करनूं कि ज़े भि तू परमेश्‍वरंञ गेशल से तपींर देल।”

![](https://cdn.door43.org/obs/jpg/360px/obs-en-37-05.jpg)

यीशुई जुवाब दिता, “फिरि उठिबा ओ जीवन हऊं भोऊं। ज़ऊं भि मूं पुटि विश्‍वास करल अगर से मरि भि गाल च़े भि से ज़ियल। ज़ऊं भि मूं पुटि विश्‍वास करना से कदी न मरल। खि तु इस पुटि विश्‍वास करनिया?” मार्थे जुवाब दिता, “हे प्रभु, हऊं विश्‍वास करनूं कि तपीं परमेश्‍वरा कोआ मसीह भोई।”

![](https://cdn.door43.org/obs/jpg/360px/obs-en-37-06.jpg)

च़े मरियम आई। तेनी यीशु खुरोंञ झ़इकर बोलिया, “हे प्रभु, अगर तपीं इटि भुयंञ त मेरा भाई मरिबे नोथा।” यीशुई तेसर पुछ़िया, “तुसे लाज़रर कोटि थेओरा असे?” तेने यीशुर बताया, “कब्रन। अई कर हेर।” च़े यीशु रोलिब ठारुआ।

![](https://cdn.door43.org/obs/jpg/360px/obs-en-37-07.jpg)

से कब्र एक कू थिया ज़ेसी द्‍वारा एक रुण छ़ाओरा थिया। ज़ेखेंईं यीशु कब्रन अपरिया त तेनी बोलिया, “रुणर घिरई बिज़ो।” पर मार्थे बोलिया, “तेसर मरि कर च़ोउर दी भुई मुकोरा असे। तेसिंञ बास अइना भोल।”

![](https://cdn.door43.org/obs/jpg/360px/obs-en-37-08.jpg)

यीशुई जुवाब दिता, “खि मेंई तुसोर नोलियातिआ कि अगर तुसे मूं पुटि विश्‍वास करोले त परमेश्‍वरा सामर्थ हेरोले?” तेरे तेने रुणंर घिरई बिदा।

![](https://cdn.door43.org/obs/jpg/360px/obs-en-37-09.jpg)

च़े यीशुई खइलिर स्वर्गारि हेरिकर बोलिया, “हे बा, मेरा शुईंबे ओनि हऊं तेपां शबस करनूं। हऊं ज़ाऊं कि तपीं हमेशा मेरा शुण्‍णा, पर मेंईं इ इटि खा इनो बदे मऊंओर मदद करिबे ओनि बोलिया ताकि इने विश्‍वास किउरा लोई कि मूर तेपें बिदोरा भो।” च़े यीशुई हक दिता, “हे लाज़रा, भइलि निसि अइ!”

![](https://cdn.door43.org/obs/jpg/360px/obs-en-37-10.jpg)

च़े लाज़र भईरीं निसि आया! से एबेईं भि कफना बिच़ा जिलबी किउरा थिया। यीशुई तेसर लाई, “इस डबुंअर खनिबेर एसी मदद करो होरेक एसर आज़ाद करो।” इस चमत्‍कारा बजहे केतेक्‍बा यहूदिये यीशु पुटि विश्‍वास किया।

![](https://cdn.door43.org/obs/jpg/360px/obs-en-37-11.jpg)

पर यहूदियो कि धार्मिक परधानों ठो यीशु सा जेगदंञ करिब ठारुए, तेरे तेने योजना बणंइबे ओनि ठोक्‍कन भुए कि केरा यीशु ओ लाज़रर मारि बिज़ले।

*यूहन्‍ना 11:1-46 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_37_128kbps.m4a

## 38. यीशुर प्रवइबा

https://openbiblestories.org/l/gda/story-38/

![](https://cdn.door43.org/obs/jpg/360px/obs-en-38-01.jpg)

बर्षोत, यहूदी मऊं फसह कि त्‍योहार मनाने थिये। इ त्‍योहार इस बारेन थिया कि केतेबा शऊ बरीउ अगरंञ परमेश्‍वरे तेनो पूर्वजोर मिस्रा कि चंगुलंञ छुड़ायाति। लगभग त्राई वर्षा पिचंञ यीशुई बत्‍तेओ बिच़ा प्रचार करिबा होरेक शिक्षा दीबा च़ुख्‍फी किया। यीशुई अपें च़ेल्‍लेओर बताया कि यीशु अपीं तेनो सा यरुशलेमन फसह कि त्‍योहार मनइबा चाहना, होरेक इ भि कि तेने तेसर तेटि मारि बिज़ले।

![](https://cdn.door43.org/obs/jpg/360px/obs-en-38-02.jpg)

यीशु च़ेल्‍लेओ बिच़ा एक यहूदा नाऊंआ मऊं थिया। यहूदा प्रेरितो कि ढबूओ कि थैली थेण्‍णा थिया, पर कई फेरा से तेस थैलिंञ ढबूआ खनि बिज़ना थिया। यीशु कि च़ेल्‍लेओ कि यरुशलेमन अपरि पिच़ंञ यहूदा यहूदी परधानों कच़ा गिया। तेनी ढबूए ठारी यीशुर तेनो हथे प्रवइबे प्रस्‍ताव थैइया। से ज़ाण्‍णाति कि यहूदी परधानों स्‍वीकार करने नोथे कि यीशु-ए मसीह थिया। से ज़ाण्‍णा थिया कि तेने यीशुर मारिबा चाहने थिये।

![](https://cdn.door43.org/obs/jpg/360px/obs-en-38-03.jpg)

मोड़े पुजारी कि बोलिबे पुटि यहूदी परधाने-ए यीशुर प्रवइबे ओनि यहूदेर बीओ दश रोपे कि सिक्‍के दिते। इ तेरी भुआ ज़ेरा कि परमेश्‍वरा तरफे बोलने तेनी बोलियाति कि भोल। यहूदा मनि गिया होरेक ढबूआ लेई उठि गिया। से यीशुर प्रवइबे ओनि तेनोर मदद करिबे ओनि मौका लोइब ठारुआ।

![](https://cdn.door43.org/obs/jpg/360px/obs-en-38-04.jpg)

यरुशलेमन, यीशुई अपें च़ेल्‍लेओ सा फसह कि त्‍योहार मनाया। त्‍योहारा बगता मुके, यीशुई रोटि लेई खण्‍णीं किया। तेनी लाई, “इसर लेओ होरेक खाओ। इ मेरा फुक भो ज़े हऊं तुईंयां ओनि देनूं। इसर मेरे हीतन करो।” एरा करि, यीशुई बोलिया कि से तेनो ओनि मरि गाल, मतलब कि तेनो ओनि से अपें फुकर बलि दी बिज़ल।

![](https://cdn.door43.org/obs/jpg/360px/obs-en-38-05.jpg)

च़े यीशुई एक दाखा रसा प्‍याला लेइया होरेक बोलिया, “इसर पिओ। इ खर्का वाचे कि मेरा रत भो ज़े हऊं उण्‍डेलू ताकि परमेश्‍वर तुईंया पापोर माफ करल। हर फेरे इस पीबे मुके मूर हीत करो ज़े हऊं एबेंईं करला असु।”

![](https://cdn.door43.org/obs/jpg/360px/obs-en-38-06.jpg)

च़े यीशुई अपें च़ेल्‍लेओर बोलिया, “तुसो बिच़ंञ एक मऊं मूर प्रवाल।” च़ेल्‍ले ठट्ट भुई गे, होरेक पुछ़िया कऊं एरा कम करल। यीशुई लाई, “मूर प्रवाना मऊं से भो ज़ेसर हऊं इ रोटी खण्‍णीं देनूं।” च़े यीशुई से रोटी यहूदेर दिता।

![](https://cdn.door43.org/obs/jpg/360px/obs-en-38-07.jpg)

तेस रोटीर लेई पिच़ंञ, यहूदेन शैतान उठि गिया। यहूदा निसि कर यीशुर प्रवइबे ओनि यहूदी परधानों कि मदद करिबे ओनि उठि गिया। इ राति मुके थिया।

![](https://cdn.door43.org/obs/jpg/360px/obs-en-38-08.jpg)

बगत खई पिच़ंञ, यीशु ओ यीशु च़ेल्‍ले जैतून घउआरि उठि गे। यीशुई लाई, “तुसे बदे ज़ेंञ अज़ राति मूर छोड़ि बिज़ोले। इ लिखोरा असे, ‘हऊं पउआलर मारु होरेक बदे पेरु तितर-बितर भुई गाले।’”

![](https://cdn.door43.org/obs/jpg/360px/obs-en-38-09.jpg)

पतरसे जुवाब दिता, “बड़गे बाकी बदे ज़ेंञ तपींर छोड़ि बिज़ेले, पर हऊं न छोड़ू।” तेखेंईं यीशुई पतरसर लाई, “शैतान तुसो बदेओर लेई लेइबा चाहना, पर हे पतरस, मैंईं तेरा ओनि प्रार्थना किया कि तु विश्‍वासंञ न हटोरा लोई। फिरि भि, अज़क्‍वां राति, कुक्‍कुड़ा कि बांग दीबे अगरंञ तु त्राई फेरा मेरा इंकार करल कि तु मूर न प्रयांईं।”

![](https://cdn.door43.org/obs/jpg/360px/obs-en-38-10.jpg)

पतरसे तेखेंई यीशुर लाई, “बड़गे हऊं मरि भि गऊं, हऊं कदी भि तेपां इंकार न करु!” बाकि कि च़ेल्‍ले भि ई-ए लाई।

![](https://cdn.door43.org/obs/jpg/360px/obs-en-38-11.jpg)

च़े यीशु अपें च़ेल्‍लेओ सा गतसमनी नाऊंआ ठारि गिया। यीशुर अपें च़ेल्‍लेओर प्रार्थना करिबे ओनि बोलिया ताकि शैताने तेनो परीक्षा किउरा न लोई। च़े यीशु अपीं प्रार्थना करिबे ओनि उठि गिया।

![](https://cdn.door43.org/obs/jpg/360px/obs-en-38-12.jpg)

यीशुई त्राई फेरा प्रार्थना किया, “हे मेरा बा, अगर भुई बटिबे असे त इ दुखा प्‍याला मूर पीबे ओनि म दे। पर मऊंआ पाप माफ करिबे ओनि अयक बत नाई त, च़े तेपां-ए इच्‍छा पूरा भूरा लोई।” यीशु डरोंआ बेचैन थिया होरेक प्रसेत रता घाटे थिया। यीशुर सामर्थ दीबे ओनि परमेश्‍वरे एक स्‍वर्गदूतर बिदा।

![](https://cdn.door43.org/obs/jpg/360px/obs-en-38-13.jpg)

हर बार प्रार्थनई पिच़ंञ, यीशु अपें च़ेल्‍लेओ कच़ा पलाटुई आया, पर तेने ढेश करि बिदोरे थिये। ज़ेखेईं यीशु तीसरा फेरेर पलाटुआ त यीशुई लाई, “च़ेयो-ओ! मूर प्रवाना इट्ठीं असे।”

![](https://cdn.door43.org/obs/jpg/360px/obs-en-38-14.jpg)

यहूदी परधाने-ए सैनिको, होरेक एक मोड्डा भीड़ा सा यहूदा आया। तेनोंञ तलवार-ओ लठि थिये। यहूदे यीशु कच़ा अई बोलिया, “हे गुरु, नमस्‍ते,” होरेक तेसर पा किया। तेनी प्राने मऊंर यहूदी परधानोर हेरालिबे ओनि एरा कियाति। च़े यीशुई बोलिया, “हे यहूदा, खि तु एक पा करि मूर प्रवाना-आ?”

![](https://cdn.door43.org/obs/jpg/360px/obs-en-38-15.jpg)

ज़ेखेईं तेने सैनिक यीशुर प्रानेति, त पतरसे अपां तलवार खनि होरक यहूदी मोड़े पुजारी कि एक सेवका कन कटि बिदा। यीशुई लाई, “तलवारर दूरा थे! हऊं मेपां बचाव करिबे ओनि स्‍वर्गदूतो कि एक सेने ओनि विनती करि बटू। पर मूर मेपें बा कि गप्‍पा मनिबा असे।” च़े यीशुई तेस मऊं कि कनर अईन करि बिदा। च़े बदे च़ेल्‍ले नशि गे।

*मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_38_128kbps.m4a

## 39. यीशु पुटि मुकद्मा च़लना असे

https://openbiblestories.org/l/gda/story-39/

![](https://cdn.door43.org/obs/jpg/360px/obs-en-39-01.jpg)

हेबे इ आद रात थिया। तेने सैनिको यीशुर यहूदी मोड़े पुजारी घरे लेई आये, किसबोलि तेने यीशुर पुछ़िबा चाहने थिये। पतरस दूरेंञ तेनो पिछा करना थिया। ज़ेखेंईं सैनिक यीशुर घरे लेई गे, च़े पतरस भइरों च़ोखि कर अपींर अगि सा तच़इब ठारुआ।

![](https://cdn.door43.org/obs/jpg/360px/obs-en-39-02.jpg)

घरे अण्‍डीं, यहूदी परधाने-ए यीशु पुटि मुकद्मा च़लाया। तेने यीशु विरोधन हफ्‍सी गप्‍पे बोलिबे ओनि मस्‍स ज़ेंञ हफ्‍सी गवाहोर लेई आये। हालांकि, तेनो गप्‍पे एम्‍फ्‍यो सा न मिलनेति, तेरे यहूदी परधाने-ए इ साबित करि नोटिया कि यीशु खीं गप्‍पेयोन दोषी थिया। यीशुई खीं नोलिया।

![](https://cdn.door43.org/obs/jpg/360px/obs-en-39-03.jpg)

पिछ़ो मुख्‍खा, यहूदी मोड़ा पुजारीए सीद्दा यीशुर हेरिकर पुछ़िया, “असोर बता कि तपीं ज़ीना परमेश्वरा कोआ मसीह भोइया?”

![](https://cdn.door43.org/obs/jpg/360px/obs-en-39-04.jpg)

यीशुई लाई, “हऊं भोऊं, होरेक तुसे मूर परमेश्‍वरा सा बेठोरा स्‍वर्गंञ अइब भि काओले।” यहूदी मोड़ा पुजारी अपां डबूं च़ीरि बिदा किसबोलि ज़े यीशुई बोलियाति तेस गप्‍पे पुटि से डरोंआ रोषुआ। से होरेक परधानों पुटि हउशुआ, “असोर इ बतइबे ओनि केसोआ होरेक गवाह कि ज़रुरत नाईं कि इनी मऊंवी खि किउरा असे! तुसे एम्‍फें-ए इ बोलिब शुंईं बिदोरा असे कि यीशु परमेश्वरा कोआ भो। तेसी बारेन तुईंया खि फैसला असे?”

![](https://cdn.door43.org/obs/jpg/360px/obs-en-39-05.jpg)

“बदे यहूदी परधाने-ए यहूदी मोड़े पुजारीर जुवाब दिता, “से मारिब ज़ोगा भो!” च़े तेने यीशु कि टीरे पुटि पट्टी लवाया, तेस पुटि थुकिया, तेसर कुटिया, होरेक तेसी मज़ाक उड़ाया।

![](https://cdn.door43.org/obs/jpg/360px/obs-en-39-06.jpg)

होरेक पतरस, ज़ेखेंईं घरे भइरीं च़ोखी थिया। च़े एक परगर मठी तेसर कइया। तेनी तेसर लाई, “तु भि यीशु सा थिया-आ!” पतरसे मना करि बिदा। पिच़ंञ, अयक मठी भि होरी पुछ़िया, होरेक पतरसे फिरि मना करि बिदा। पिछ़ो मुख्‍खा, कोई मऊंवी लाई, “असे ज़ाऊं कि तु यीशु सा थिया किसबोलि तुसे दुइयो ज़ेंञ गलील किंञ भोऊ।”

![](https://cdn.door43.org/obs/jpg/360px/obs-en-39-07.jpg)

तेखेंईं पतरसे लाई, “अगर हऊं इस मऊंर प्रयाऊं त परमेश्‍वर मूर श्राप दे!” तेखैंईं तेसी पतरसा कि एरा सौगंद करि पिच़ंञ, एक कुक्‍कुड़े बांग दिता। यीशुई पिछ़लि फिरि पतरसर हेरिया।

![](https://cdn.door43.org/obs/jpg/360px/obs-en-39-08.jpg)

पतरस तेटिंञ उठि गिया होरेक फुटि-फुटि कर रोलिया। तेस्‍से मुके, यीशुर प्रवाने यहूदे कइया कि यहूदी परधाने यीशुर मारि बिज़िबे सज़ा दिता। यहूदा डरोंआ दुखी भुआ होरेक गई कर अपींर मारि बिदा।

![](https://cdn.door43.org/obs/jpg/360px/obs-en-39-09.jpg)

हेबे तेस देशाकि राज्‍यपाल पिलातुस थिया। से रोम कि ओनि कम करना थिया। यहूदी परधाने यीशुर तेस कच़ा लेई आये। तेने चाहनेति कि पिलातुसे यीशुर मारि बिज़िबे सज़ा दितोरा लोई। च़े पिलातुसे यीशुर पुछ़िया, “खि तु यहूदियो कि रज्‍ज़ा भोइया?”

![](https://cdn.door43.org/obs/jpg/360px/obs-en-39-10.jpg)

यीशुई जुवाब दिता, “तैईं छ़ेछ़ैईं बोलिया। पर मेरा राज्‍य पृथ्वी कि नूंऊं। अगर भुयंञ त मेरे दासे मेरा ओनि लड़ाई करिबे थिया। हऊं पृथ्वी पुटि परमेश्‍वरा बारेन सच बतइब आओरा भोऊं। हर एक मऊं ज़े सच्‍चाई सा दा करना से मेरा शुण्‍णां भो।” पिलातुसे लाई, “च़े सच़ खी भो?”

![](https://cdn.door43.org/obs/jpg/360px/obs-en-39-11.jpg)

यीशु सा गप्‍पा करि पिच़ंञ, पिलातुसे भइरीं भीड़ा कच़ा गइकर बोलिया, “मूर एरा घाटे कोई कारण नाथुआ कि इ मऊं मारि बिज़िब ज़ोगा असे।” पर यहूदी परधाने ओ भीड़न मऊंई ज़ोरे हउशुइला बोलिया, “तेसर क्रुसा पुटि चढ़ई बिज़ो!” पिलातुसे जुवाब दिता, “से खीं गलत करिबे दोषी नूऊं।” पर तेने होरेक भि ज़ोरे हऊशुइब ठारुए। च़े पिलातुसे तीसरा फेरा बोलिया, “से दोषी नूंऊं!”

![](https://cdn.door43.org/obs/jpg/360px/obs-en-39-12.jpg)

पिलातुस डरि गिया कि तेने दंगा न लोई च़ुख्‍फी किउरा, तेरे से अपें सैनिको द्वारे यीशुर क्रूसापुटि चढ़इबे ओनि मनि गिया। रोमी सैनिके यीशुर कोड़े लवाये, होरेक तेसर रज्‍ज़ेओ डबूं लवाया, होरेक यीशु कपा पुटि कण्‍णेओ कि ताज लवाया। च़े तेने इ बोलिकर यीशु कि मज़ाक उड़इब ठारुए, “हेरो, यहूदिउ कि रज्‍ज़ा!”

*मत्ती 26:57-27:26; मरकुस 14:53-15:15; लूका 22:54-23:25; यूहन्ना 18:12-19:16 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_39_128kbps.m4a

## 40. यीशुर क्रूसा पुटि चढ़इबा

https://openbiblestories.org/l/gda/story-40/

![](https://cdn.door43.org/obs/jpg/360px/obs-en-40-01.jpg)

यीशु कि ठट्टा करि पिच़ंञ, सैनिक यीशुर क्रूसा पुटि चढ़इब लेई गे। तेने तेस क्रूसर तेसिंञे उछ़ूइब किवाया ज़ेस पुटि यीशु मरल।

![](https://cdn.door43.org/obs/jpg/360px/obs-en-40-02.jpg)

तेने सैनिको यीशुर तेस ठारि लेइकर आये ज़े “खोपड़ी” गणेओना असे होरेक तेसी हथर ओ खुरोर क्रूसा पुटि टख्‍फी करि बिदा। पर यीशुई बोलिया, “हे बा, इनोर माफ कर, किसबोलि इने न ज़ाण्‍णेन कि इने खि करनेन।” तेने एक तख्‍तिर भि तेसी कपा पुटि टोमि करि बिदा। तेस पुटि लिखोरा थिया, “यहूदिउ कि रज्‍ज़ा।” पिलातुसे तेनोर इ लिखिबे ओनि बोलोरा थिया।

![](https://cdn.door43.org/obs/jpg/360px/obs-en-40-03.jpg)

च़े सैनिके यीशु डबुंआ ओनि डाक छ़इया। ज़ेखेंई तेने एरा किया त तेने भविष्‍यवाणिर पूरेरिया ज़े बोलनिति, “तेने मेरे डबुंओर बण्‍णिं बिदा, होरेक मेरे डबुंओं ओनि डाक छ़इया।”

![](https://cdn.door43.org/obs/jpg/360px/obs-en-40-04.jpg)

“तेटि दुई डाकू भि थिये, ज़ेनोर सैनिके तेस्‍से मुके क्रूसा पुटि चढ़ायाति। तेन दुयोर यीशु कि दुइयो आरच़ी थेओरा थिया। तेन दूयो बिच़ंञ एक डाकुई यीशु कि मज़ाक उड़ाया, पर अइकी लाई, “खि तुर डर नइना-आ कि परमेश्‍वर तुर सज़ा देल? अस्‍पीं मस्‍स मदम कमों करिबे ओनि दोषी असु, पर इ मऊं निर्दोष भो।” च़े तेनी यीशुर बोलिया, “ज़ेखेंई तपीं तेपें राज्‍यन गाल त मूर हीत थेओ।” “यीशुई जुवाब दिता, “अज्‍ज़े तु मूं सा स्वर्गा राज्‍यन भोल।”

![](https://cdn.door43.org/obs/jpg/360px/obs-en-40-05.jpg)

यहूदा परधाने ओ भीड़ा मऊंवीं यीशु कि मज़ाक उड़ाया। तेने तेस सा लाई, “अगर तपीं परमेश्‍वरा कोआ भोई त, क्रूसंञ ओसि बिज़ होरेक तपींर बच़ई बिज़! च़े असे तु पुटि विश्‍वास करले।”

![](https://cdn.door43.org/obs/jpg/360px/obs-en-40-06.jpg)

च़े तेस देशाकि पूरा सर्ग क्रिठुई गिया, से दिया कि मुके थिया। इ दिया मुके क्रिठुआति होरेक त्राई घण्‍टे च़ेक होरी छ़ुटाति।

![](https://cdn.door43.org/obs/jpg/360px/obs-en-40-07.jpg)

च़े यीशुई ज़ोरे हक खनि बोलिया, “पूरुआ! हे बा, हऊं मेपां आत्‍मा तेपें हथा सौंपनू।” च़े यीशुई अपां कपा झुकई प्राण त्‍यागि बिदा। ज़ेखेंई यीशु मरिया त एक भुंयोल आया। से मोड़ा पर्दा ज़े मऊंओर परमेश्‍वरंञ दूरा करना थिया बेयंञ बुल्‍लिर ठो च़ीरुई कर दुई खण्‍नी भुई गिया।

![](https://cdn.door43.org/obs/jpg/360px/obs-en-40-08.jpg)

अपां मरिबे द्वारे, यीशुई मऊंआ ओनि परमेश्‍वरा कच़ा अइबे ओनि बत खोई बिदा। ज़ेखेंई यीशु कि निगरानी करना एक सैनिके ज़े बी भुआति इ बदे कइया त तेनी बोलिया, “छ़ेछ़ेईं, इ मऊं निर्दोष थिया। इ परमेश्‍वरा कोआ भो।”

![](https://cdn.door43.org/obs/jpg/360px/obs-en-40-09.jpg)

च़े यूसुफ-ओ नीकुदेमुस नाऊंआ कि दुई यहूदी अगुवे आये। तेने विश्‍वास करने थिये कि यीशु-ए मसीह थिया। तेने पिलातुसंञ यीशु कि फुकर गेठा। तेने तेसी फुकर डबूंअन जिलबी किया। च़े तेने तेसर एक टिकरिंञ कटि कर बणांओरा कब्रन लेई गे होरेक तेसी अण्‍डीं छ़ई छ़ईया। च़े तेने तेस कब्रा द्वारर बंद करिबे ओनि एक मोड्डा रुण रुढ़ई बिदा।

*मत्ती 27:27-61; मरकुस 15:16-47; लूका 23:26-56; यूहन्ना 19:17-42 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_40_128kbps.m4a

## 41. परमेश्‍वर यीशुर मूरेओ बिच़ंञ ज़िनेरना असे

https://openbiblestories.org/l/gda/story-41/

![](https://cdn.door43.org/obs/jpg/360px/obs-en-41-01.jpg)

सैनिके यीशुर क्रूसा पुटि च़ढ़ई बिज़िबे पिच़ंञ, यहूदी परधाने पिलातुसा सा लाई, “तेनी हफ्‍साठू, यीशुई लाईति कि से त्राई दियो पिच़ंञ मरी कर ज़ीनुई गाल। केसोआरा इ पक्‍का करीबोनी कब्रा निगरानी करिब पड़ल ताकि यीशु च़ेल्‍ले यीशु फुकर च़ोरी कर लेई गिउरे न लोई। अगर तेने एरा करले त तेने बोलेले कि से मरी कर बी ज़ीनुई गिया।”

![](https://cdn.door43.org/obs/jpg/360px/obs-en-41-02.jpg)

पिलातुसे लाई, “मिन सैनिकोर लेई गाओ, होरक ज़ेरा तुप्‍सीं करि बटो तेरी कब्रा निगरानी करो।” तेरे तेने तेस कब्रन अण्‍डुइबे द्वारा कि रुणा पुटि एक मोहर लवई बिदा। तेने इ पक्‍का करिबोनी तेटी सैनिकोर बी बिठई बिदा कि केन्‍नी बी यिशु फुकर च़ोरी बटोरा न लोई।

![](https://cdn.door43.org/obs/jpg/360px/obs-en-41-03.jpg)

यीशु मरिबे होर्दी नह्च़ि करिबे धियाड़ा थिया। कन्‍नुई बी नह्च़ि करिबे धियाड़े कम करि नोटनाति, तेरे यीशु की कऊं बी साति कब्रन नायाति। पर नह्च़ि करिबे धियाड़े अघरीं दी, दोतैंई राती, मिन ज़लऊं ठो यीशु कब्रन गईबोनी छक्‍कन भूए। तेने यीशु फुका पुटि होरक बी मसालेर लवईबा चाहन्‍नेति।

![](https://cdn.door43.org/obs/jpg/360px/obs-en-41-04.jpg)

तेनो ज़लऊवों कि अपरिबे अगरंञे, कब्रा पुटि एक मोड़ा भूंयोल आया। स्‍वर्गंञ एक स्‍वर्गदूते अईकर तेस रुणर घिरई बिदा ज़े कब्रा कि अण्‍डुईबे द्वारन घटोरा थिया होरक तेस पुटि बेशी गिया। इ स्‍वर्गदूत प्रागेठो च़ल्‍कनाति। कब्रा पुटि ज़े सैनिको थिये तेने स्‍वर्गदूतोर कया। तेने एतोक डरि गेति कि मूरेओ ठो धरत्री पुटि झ़ई गे।

![](https://cdn.door43.org/obs/jpg/360px/obs-en-41-05.jpg)

ज़ेखैंई तेने ज़लऊं कब्रन अपरी त तेनी स्‍वर्गदूते तेनोसा लाई, “म डरो। यीशु इटि नाई। से मरि कर बी ज़िनुई गिउरा असे, ज़ेरा तेनी लाईति कि से ज़िनुई गाल! कब्रन लोओ होरेक इसो-ओसो हेरो।” तेने ज़लऊंवीं कब्रा अंदर ओर ज़ेटि यीशु कि फुक थैओर थिया तेटि लोया होरक हैरिया कि तेसी फुक तेटी नोथा!

![](https://cdn.door43.org/obs/jpg/360px/obs-en-41-06.jpg)

च़ा तेनी स्‍वर्गदूते तेनो ज़लऊंवों सा लाई, “गईकर तेसी च़ेल्‍लेओर बताओ, ‘यीशु मरि कर बी ज़िनुई गिउरा असे होरक से तुप्‍सेयों अघरीं-अघरीं गलीलारी गाल।’”

![](https://cdn.door43.org/obs/jpg/360px/obs-en-41-07.jpg)

तेने ज़लऊं ठट्ट भुए होरक मस्‍स तुषि गे। तेने च़ेल्‍लेओर इ रुठू खबर शुंड़ईबोनी द्रो दी गे।

![](https://cdn.door43.org/obs/jpg/360px/obs-en-41-08.jpg)

ज़ेखैई तेने ज़लऊं च़ेल्‍लेओर इ रुठू खबर बतईबोनी बत्ताए थिये, त यीशु प्रगट भूई गिया। तेने यीशु खुरोन झ़ई गे। च़ा यीशुई लाई, “म डरो। गईकर मेरे च़ेल्‍लेयो सा गलील गईबेर बोलो। तेने तेटी मूर हैरले।”

*मत्ती 27:62-28:15; मरकुस 16:1-11; लूका 24:1-12; यूहन्ना 20:1-18 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_41_128kbps.m4a

## 42. यीशु स्‍वर्गारी पलाटुई गाना असे

https://openbiblestories.org/l/gda/story-42/

![](https://cdn.door43.org/obs/jpg/360px/obs-en-42-01.jpg)

ज़ेस दिया परमेश्‍वरे यीशुर ज़ीना कियाति, यीशु कि दूई च़ेल्‍ले कच़ा कि नगरिन गानेति। हण्‍णें ज़ेंञ तेने यीशु सा ज़े भुआति। तेस बारेन गप्‍पे करनेति, तेनोर आस थिया कि से मसीह थिया, पर तेखैंई बी यीशुर मारी बिदोरा थिया। हेबे तेने ज़लऊं बोलनेन कि यीशु फिरी ज़ीनुई गिउरा असे। तेने ज़ाण्‍णे नोथे कि केस गप्‍पे पुटि विश्‍वास करीबा असे।

![](https://cdn.door43.org/obs/jpg/360px/obs-en-42-02.jpg)

यीशुई तेनो कच़ा अईकर तेनो सा हणिंबा च़ुख्‍सि किया, पर तेने यीशुर प्रियांयी नोटे। यीशुई पुछ़िया कि तेने केस बारेन गप्‍पा करनेति। तेने यीशुर फरकुंए धियाड़ेन यीशु सा भुरा बदे मामले बारेन बताया। तेने च़ेता कि तेने कउंआ परदेशी सा गप्‍पे करने थिये ज़े न ज़ाण्‍णेति कि यरुशलेमन खि भुआति।

![](https://cdn.door43.org/obs/jpg/360px/obs-en-42-03.jpg)

च़ा यीशुई तेनोर समझाया कि परमेश्‍वरा वचन मसीह बारेन खि बोलना असे। मस्‍स अघरंञ, परमेश्‍वरा तरफे बोलने-ए लाईति कि मदम मऊं मसीहर दु:ख देले होरेक मारी बिज़ेले। पर परमेश्वरा तरफे बोलने-ए इ बी लाईति कि से त्राई दिये ज़िनुई गाल।

![](https://cdn.door43.org/obs/jpg/360px/obs-en-42-04.jpg)

ज़ेखैईं तेने तेस नगरीन अपरे ज़ेटी तेने दूई मऊं बेशिबा चाहनेति, तेखैईं च़ेक लगभग सनुई गिउरा थिया। तेने यीशुर तेनौ सा बेशिबोनी बुलाया, तेरे करि से तेनो सा एक घरे आया। ब्‍याली खइबोनी तेने बेशी गे। यीशुई एक रोटीर लेईकर बगताओनी परमेश्‍वरर शबस किया, च़ा तेसर त्रोया। अचानके, तेने ज़ाईं बिदा कि से यीशु थिया। पर तेस्‍से मुके, यीशु तेनो सामटेंञ हरुई गिया।

![](https://cdn.door43.org/obs/jpg/360px/obs-en-42-05.jpg)

तेने दूई मऊंवीं एम्‍फेयों बिच़ा लाई, “से यीशु थिया! इनीकरी ज़ेखैंई तेनी अप्‍सेयोंर परमेश्‍वरा वचनर समझायाति त अप्‍सीं मस्स तुठोरे थिये!” तेखैईंए, तेने निसीकर पलाटुई यरुशलेमारी गे। ज़ेखैंई तेने अपरे त तेने च़ेल्‍लेयोर बताया, “यीशु ज़ीना असे! असे यीशुर कइया।”

![](https://cdn.door43.org/obs/jpg/360px/obs-en-42-06.jpg)

ज़ेखैंईं च़ेल्‍ले गप्‍पा करनेति, यीशु अचानके तेस पूरीन तेनो सा प्रगट भुआ। तेनो सा लाई, “तुप्‍सेयोंर शान्‍ति हतेओरा लोई!” च़ेल्‍ले च़ेता कि से कऊंआ शैतान थिया, पर यीशुई लाई, “तुसे किस डरनूं ? तुसे इ किस न च़ेण्‍नूं कि इ छ़ेछ़ैईं हऊं, यीशु भोऊं? मेरे हथो खुरोर हेरो। शैतानंञ एरा फूक नूईबा ज़ेरा मूकींञ असे।” इ हैरालिब ओनि कि यीशु कऊंआ शैतान नोथा, तेनी खईबोनी खींया गेठा। तेने तेसर मछ़ोकि एक खण्‍नी दिता, होरक यीशुई तेस खई बिदा।

![](https://cdn.door43.org/obs/jpg/360px/obs-en-42-07.jpg)

यीशुई लाई, “मू बारेन परमेश्‍वरा वचन ज़े खीं बी बोलना असे से भूई गाल। मेईं तुसोर बतई बिदाति कि इसी भूईबा ज़रुरी असे।” च़ा यीशुई तेनोर परमेश्‍वरा वचन रुठू करि समझ़ाया। यीशुई लाई, “मस्‍स अगरंञ परमेश्‍वरा तरफे बोलने तेने लिखियाति कि मूर, मसीहर दु:ख उछ़ुईबेर भोल, मरिबे भोल होरक फिरी त्राई दिये मूर मूरेओंञ ज़िनुईबा भोल।”

![](https://cdn.door43.org/obs/jpg/360px/obs-en-42-08.jpg)

“तेने परमेश्‍वरा तरफे बोलने-ए इ बी लिखियाति कि मेरे च़ेल्‍ले परमेश्‍वरा वचना घोषणा करेले। तेने हर एकीर पश्‍चाताप करिबोनी बताले। अगर तेने एरा करले त परमेश्‍वर तेनो पापर माफ करल। मेरे च़ेल्‍ले इस उज़ाबा प्रचार करिबा यरुशलेमंञ च़ुख्‍सी करेले। च़ा तेने बदे ठारी, बदे ज़ातियोन गाले। तुप्‍सीं मेरी हर एक गप्‍पेओ होरेक कमा गवाही भोऊ ज़े मैंईं लाई ओर किया, होरक तेस बदेओ की बी ज़े मू सा भोल।”

![](https://cdn.door43.org/obs/jpg/360px/obs-en-42-09.jpg)

अगरीं दूई बी धियाड़े दौरान, यीशु अपें च़ेल्‍लेयोर केतिया फेरा प्रगट भुआ। एक फेरा त यीशु एकी मुके पन शऊंअञ मस्‍स मऊंओर कउआ! तेनी अपें च़ेल्‍लेयो पुटि केई तरीको सा साबित किया कि यीशु ज़ीना थिया, होरक यीशुई तेनोर परमेश्‍वरा की राज्‍य बारेन शिक्षा दिता।

![](https://cdn.door43.org/obs/jpg/360px/obs-en-42-10.jpg)

यीशुई अपें च़ेल्‍लेयो सा लाई, “परमेश्‍वरे मूर स्‍वर्गा धरता की हर एक मऊं पुटि शासन करिबे अधिकार दितोरा असे। इकरी हेबे हऊं तुप्‍सेयों सा बोलनूं: गईकर बदे जातियो की मऊंओर च़ेल्‍ला बणाओ। एरा करिबेओनि, तुप्‍सेयोंर तेनोर बा, कोआ ओ पवित्र आत्मे नावां सा बपतिस्‍मा दिबा असे। ज़े खीं बी मैंई तुप्‍सेयोंर हुकुम दितोरा असे तेने बदे गप्‍पेयोर मनीबा बी तुप्‍सेयोंर तेनोर शिखरईबा असे। हित थेओ, हऊं हमेशा तुप्‍सेयों सा बेशू।”

![](https://cdn.door43.org/obs/jpg/360px/obs-en-42-11.jpg)

यीशु मूरेंञ ज़िनुई गईबे दूई बी धियाड़ेओ पिच़ंञ, यीशुई अपें च़ेल्‍लेओ सा लाई, “ज़ेखैंई च़ेक मेरा बा तुप्‍सेयोंर तागत दी न बिज़ल तेखैंईं च़ेक यरुशलेमन च़ोखि बेशो। बा तुप्‍सेयों पुटि पवित्र आत्‍मा बिज़िबेर एरा करल।” च़ा यीशु स्‍वर्गन उठि गिया, होरक बदड़े यीशुर तेनो टिरेओंञ युंकईं बिदा। स्‍वर्गन यीशु बदे चीजा पुटि शासन करिबेर परमेश्‍वरा सुचंञारिंञ बेशी गिया।

*मत्ती 28:16-20; मरकुस 16:12-20; लूका 24:13-53; यूहन्ना 20:19-23; प्रेरित 1:1-11 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_42_128kbps.m4a

## 43. कलीसिए कि शुरुआत भोना असे

https://openbiblestories.org/l/gda/story-43/

![](https://cdn.door43.org/obs/jpg/360px/obs-en-43-01.jpg)

यीशु स्‍वर्गारी पलाटुई गई पिच़ंञ, च़ेल्‍ले यरुशलेमनए च़ोखे ज़ेरा कि यीशुई तेनोर करीबे हुकुम दिताति। तेठा विश्‍वासी मऊं लगातार एक साथे प्रार्थना करिबोनी कठ्ठ भूईला करने थिये।

![](https://cdn.door43.org/obs/jpg/360px/obs-en-43-02.jpg)

हर वर्षा, फसह की त्‍यौहारा की दूई बीओ दश धियाड़ेओ पिच़ंञ, यहूदी मऊं पिन्‍तेकुस्‍त नावां की एक खास दीयर मनईला करने थिये। पिन्‍तेकुस्‍त से धियाड़ा थिया ज़ेखैंई यहूदी मऊं गेहूं लुईंबे धियाड़ा मनईला करने थिये। बदे संसारंञ यहूदी मऊं पिन्‍तेकुस्‍ता धियाड़ेर एक साथे मनईबोनी यरुशलेमन आओरे थिये। इस वर्षा, पिन्‍तेकुस्‍त मनईबे धियाड़ा यीशु की स्‍वर्गारी उठी गईबे की लगभग एक हफ्‍ते पिच़ंञ आओरा थिया।

![](https://cdn.door43.org/obs/jpg/360px/obs-en-43-03.jpg)

ज़ेस मुके बदे विश्‍वासी मऊं एक साथे कठ्ठ थिये, त ज़ेस घरे तेने थिये अचानके से घर मस्‍स बालुईं च़ाले सा भरुई गिया। च़ा अगी लारनि घाटे कईना बदे विश्‍वासियो कि कपा पुटि प्रगट भुआ। तेने बदे पवित्र आत्‍मेंञ भरुई गे होरक तेने अयक भाषेन परमेश्‍वरा स्‍तुति किया। इ तेने भाषाओ थिए ज़ेसर तेनोर पवित्र आत्‍मे बोलिब ज़ोगा कियाति।

![](https://cdn.door43.org/obs/jpg/360px/obs-en-43-04.jpg)

ज़ेखैंईं यरुशलेमन बेश्‍ने मऊंवी तेस हल्‍लेर शुंया, त तेने भीड़न इ हैरिबोनी कठ्‍ठ आए कि खी भोइब लगोरा थिया। तेने विश्‍वासियोर परमेश्‍वरे किउरा मोड़े-मोड़े कमो की एलान करने ज़ेञ शुंया। तेने ठट्ट थिये किसबोली तेने तेस कमोर अपांए भाषेन शुन्‍नेति।

![](https://cdn.door43.org/obs/jpg/360px/obs-en-43-05.jpg)

एनो बिच़ंञ कऊंआ मऊंवीं लाई कि तेने च़ेल्‍ले मतोरे थिये। पर पतरस खा भुआ होरक तेनोसा लाई, “मेरा गप्‍पा शुंणो! इने मऊं मतोरे नाईं! इसी बजाए, ज़े तुप्‍सीं हैरनू से सेए भो ज़े योएल परमेश्‍वरा तरफे बोलने तेनी लाईति कि भोल: परमेश्‍वरे लाई, ‘अंता मुके, हऊं मेपां आत्‍मा तुसो पुटि उंडेलू।’”

![](https://cdn.door43.org/obs/jpg/360px/obs-en-43-06.jpg)

“हे इस्राएली मुशुल्‍लेओ, यीशु एक एरा मऊं थिया ज़ेनी इ हैरालिबोनी कि से कऊं थिया मस्‍स अनोखे कमो किएति। तेनी परमेश्‍वरा सामर्था सा केतेक्‍बा अनोखे कमोर किएति। तुप्‍सीं इ ज़ान्‍ने भोऊ, किसबोली तुप्‍सें इने कमोर हैरोरा भो। पर तुप्‍सें यीशुर क्रूसा पुटि चढ़ई बिदा!”

![](https://cdn.door43.org/obs/jpg/360px/obs-en-43-07.jpg)

“यीशु मरि गिया पर परमेश्‍वरे यीशुर मूरेओ बिच़ंञ ज़िनेरी बिदा। इनी तेस गप्‍पेर पूरेरि बिदा ज़ेसर एक परमश्‍वरा तरफे बोलने लिखियाति: ‘तपीं अपें पवित्र मऊंर कब्रन त्रकिब न देल।’ अप्‍सीं गवाह भोऊं कि परमेश्‍वरे यीशुर फिरि ज़िनेरी बिदा।”

![](https://cdn.door43.org/obs/jpg/360px/obs-en-43-08.jpg)

“परमेश्‍वर बाए हेबे यीशुर अपां सुचंञारिंञ बिठईकर यीशुर आदर दितोरा असे। होरक यीशुई अप्‍सेयोंओनी पवित्र आत्‍मा बिदोरा असे ज़ेरा कि तेनी वाईदा कियाति कि से बिज़ल। पवित्र आत्‍मा तेने कमोर भुईब देना ज़ेनोर तुप्‍सीं हैरनुनहोर शुंन्‍नू।”

![](https://cdn.door43.org/obs/jpg/360px/obs-en-43-09.jpg)

“तुप्‍से तेस मऊं, यीशुर क्रूसा पुटी चढ़ई बिदा। पर पक्‍का ठो ज़ांई बिज़ो कि परमेश्‍वरे यीशुर बदे चीजो पुटि प्रभुहोर मसीह दूइयो ठहराओरा असे!”

![](https://cdn.door43.org/obs/jpg/360px/obs-en-43-10.jpg)

पतरसा की शुण्‍णेतेने मऊं पतरसे बोलोरे गप्‍पेओ सा अंदर च़ेक लुकी गिउरै थिये। इनीकरी तेने पतरसो तेने च़ेल्‍लेओ सा पूछ़िया, “हे भाइयों, अप्‍सेयोर खि करिबा लोई?”

![](https://cdn.door43.org/obs/jpg/360px/obs-en-43-11.jpg)

पतरसे तेनोर जुवाब दिता, ”तुसो बिच़ंञ हर एक मऊं मेपें पापोओनी पश्‍चाताप करो ताकि परमेश्‍वरे तुसो कि पापोर माफ किउरा लोई, होरक तुसे यीशु मसीह नाउवें बपतिस्‍मा लेउरा लोई। च़ा से तुसोर आशीषा रूपन पवित्र आत्‍मा बी देल।”

![](https://cdn.door43.org/obs/jpg/360px/obs-en-43-12.jpg)

पतरसे ज़े बोलिया तेस पुटी लगभग त्राई हजार मऊंवें विश्‍वास किया होरक यीशु च़ेल्‍ले बणी गे। तेने बपतिस्‍मा लैया होरक यरुशलेमा की कलीसिए हिस्‍सा बणीं गे।

![](https://cdn.door43.org/obs/jpg/360px/obs-en-43-13.jpg)

ज़ेखैंईं प्रेरिते तेनोर शिक्षा दिता त विश्‍वासिए लगातार शुंयां। तेने लगातार हतुईला करनेति होरक एके साथे बगत खईला करनेति, होरक तेने मस्स करि एन्‍फेयोओनी प्रार्थना किया। तेने मिलिकर परमेश्‍वरा की स्‍तुति किया होरक ज़े खिं बी तेनो कच़ा थिया तेने एन्‍फेयो बीच़ा बण्‍निया। नगरी हर एक मऊं तेनोओनी रुठू विचार थैण्‍णे थिये। रोज-रोज, केतोक्‍बा मस्‍स मऊं विश्‍वासी बण्‍ला गिए।

*प्रेरितो की कम 2 अंञ एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_43_128kbps.m4a

## 44. पतरस ओ यूहन्‍ना एक भिखारीर अईन करने असुन

https://openbiblestories.org/l/gda/story-44/

![](https://cdn.door43.org/obs/jpg/360px/obs-en-44-01.jpg)

एक झा, पतरस ओ यूहन्‍ना मंदरन गे। एक लट्टा मऊं भीख मंञीबोनी बैठोरा थिया।

![](https://cdn.door43.org/obs/jpg/360px/obs-en-44-02.jpg)

पतरसे तेस लट्टे मऊंआरी हैरियाओर लाई, “मूं कच़ा तपींर दीबोनी ढबुआ त नाईं। पर ज़े मूं कच़ा असे से हऊं तपींर देनूं। यीशु नाउवें, उठोर हण!”

![](https://cdn.door43.org/obs/jpg/360px/obs-en-44-03.jpg)

तेखैईं, परमेश्‍वरे तेस लट्टे मऊंर अईन करि बिदा। तेनी इसो-ओसो हणिबा ओ छवा दीबा, होरक परमेश्‍वरा स्‍तुति करिबा चुख्‍फी करि बिदा। मंदरा अंञान आओरे मऊं ठट्ट थिये।

![](https://cdn.door43.org/obs/jpg/360px/obs-en-44-04.jpg)

यूरनाए मस्‍स मऊं तेस मऊंर हैरिबोनी आये, ज़े अईन भुआति। पतरसे तेनोसा लाई, “इ मऊं अईन असे, पर इस गप्‍पे पुटि ठट्ट म भोओ असे इसर तागतासा अईन न किया, या तेरे न कि अप्‍सीं परमेश्‍वरा आदर करने असु। पर, से यीशु भो ज़ेनी इस मऊंर अपें तागता सा अईन किया, किसबोली असे यीशु पुटि भरोसा करने असु।”

![](https://cdn.door43.org/obs/jpg/360px/obs-en-44-05.jpg)

“से तुस्‍पीएं भोउ ज़ेने यीशुर रोमी राज्‍यपालर यीशुर मारि बिज़िबेर लाइति। तुसे तेस मारि बिदा ज़े बदेओर जीवन देना असे। पर परमेश्‍वरे यीशुर मूरेओंञ ज़ीना किया। तुप्‍सें न समझ़िया कि तुप्‍सीं खी करनेति, पर ज़ेखैंईं तुप्‍सीं तेनो कमोर करिब लगोरे थिये, च़ा ज़े भविष्‍यहैरालने लाईति से पूरुआ। तेने लाइति कि मसीह दु:ख उठाल होरक मरी गाल। परमेश्‍वरे इसर इस तरीके सा भूईब दिता। तेरे हेबे, पश्‍चाताप करो होरक परमेश्‍वरारी पलाटेओ, ताकि यीशुई तुईंफा पापोर धोई बिदोरा लोई।”

![](https://cdn.door43.org/obs/jpg/360px/obs-en-44-06.jpg)

ज़ेखैंईं मंदरा परधाने पतरसो यूहन्‍नेर शुंया, त तेने मस्‍स डरि गे। तेरे तेने तेसर प्रई कर कैदखानेन छई बिदा। पर ज़े पतरसे लाईति तेस पुटि मस्‍स ज़ेञ मऊंए विश्‍वास किया। यीशु पुटि विश्‍वास करने तेने बढ़िकर लगभग पन हजार भूई गे।

![](https://cdn.door43.org/obs/jpg/360px/obs-en-44-07.jpg)

होर्दी, तेने यहूदी परधाने पतरसो यूहन्‍नेर मोड़े यहूदी पुजारिओर होरक परधानों सामटे लेई आए। तेने तेस मऊंर बी लेई आये ज़े लट्टा थिया। तेने पतरसो यूहन्‍नेर पुछ़िया, “केस अधिकारा सा तुसे तेस लट्टे मऊंर अईन किया?”

![](https://cdn.door43.org/obs/jpg/360px/obs-en-44-08.jpg)

पतरसे जुवाब दिता, “इ मऊं ज़े तुप्‍सेयों सामटे खा असे तेसर यीशु मसीह कि तागते लेई अईन किउरा भो। तुप्सें यीशुर क्रूसा पुटि चढ़ईँ बिदा, पर परमेश्‍वरे यीशुर फिरी ज़ीना करि बिदा! तुप्‍सें तेसर न धिजिया, पर यीशु की सामर्थंञ इलावा मुक्‍ति हथेरिबे कि कोई अईक बत नाईं!”

![](https://cdn.door43.org/obs/jpg/360px/obs-en-44-09.jpg)

तेने यहूदी परधानो ठट्ट थिये कि पतरसोर यूहन्‍ने मस्‍स याउआसा गप्‍पा कियाति। तेने कईया कि इने सीद्दे ओ अनपढ़ मुशुड्ले थिये। पर फिरी तेनोर हीत आया कि इने मुशुल्‍ले यीशु सा बैठेति। तेरे तेने तेनोसा लाई, “असे तुसोर मस्‍स सज़ा देऊंले अगर तुसे यीशु बारेन मऊंओर खींया होरेक उज़ाब देले त।” एरा मस्‍स ज़ेञ गप्‍पे बोलिबे पिच़ंञ, तेने पतरसो यूहन्‍नेर गईब दिता।

*प्रेरितों की कम 3:1-4:22 अंञ एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_44_128kbps.m4a

## 45. स्‍तिफनुस ओ फिलिप्‍पुस

https://openbiblestories.org/l/gda/story-45/

![](https://cdn.door43.org/obs/jpg/360px/obs-en-45-01.jpg)

मुहंड्क्‍वां मसीही परधानों बिच़न स्‍तिफिनुस नाउवां एक मुशुल्‍ला थिया। बदे मऊं तेसी आदर करनेति। पवित्र आत्‍मे तेस मस्‍स तागतोर बुद्धि दितोरा थिया। स्‍तिफिनुसे केतेक्‍बा चमत्‍कारो कमो किएति। ज़ेखैंईं तेनी यीशु पुटि भरोसा करिवे बारेन तेनोर शिक्षा दिता त मस्‍स ज़ेंञ मऊंएं तेस पुटि विश्‍वास किया।

![](https://cdn.door43.org/obs/jpg/360px/obs-en-45-02.jpg)

एक झा, स्‍तिफिनुस यीशु बारेन शिक्षा देनाति, होरेक मिन ज़ेञ एरे यहूदी आयेन ज़ेने यीशु पुटि विश्‍वास न कियाति होरक तेस्‍सा बहस करिबा शुरु करि बिदा। तेने मस्‍स रोशूई गे, तेरे तेने धार्मिक परधानों कच़ा गे होरक तेसी बारेन हफ्‍सी लाई। तेने लाई, “असे स्‍तिफनुसर मूसाओ परमेश्‍वरा बारेन मदम गप्‍पे बोलिब शुंया!” तेरे धार्मिक परधाने स्‍तिफिनुसर प्रई बिदा होरक तेस मोड़े-पुजारिओ यहूदियो की अईक परधानों सामटे लेई आये। होरेक बी हफ्साटू ग्‍वाह आये होरक तेने स्‍तिफनुसा बारेन हफ्‍सी बोलिया।

![](https://cdn.door43.org/obs/jpg/360px/obs-en-45-03.jpg)

मोड़े यहूदी पुजारी स्‍तिफनुसर पुछ़िया, “खि इने मऊं तू बारेन छ़ेछ़ैंईं बोलनेना?” स्‍तिफनुसे मोड़े यहूदी पुजारीर जुवाब दीबोनी मस्‍स गप्‍पेओर बोलिबा च़ुक्‍फि करि बिदा। तेने लाई अब्राहमा धियाड़ेञदी यीशु धियाड़े च़ेक परमेश्‍वरे इस्राएला मऊंओओनी मस्‍ते अनोखे कमो किउरे असुन। पर मऊंवे हमेशा परमेश्‍वराकी भाषे न कियाति। स्‍तिफनुसे लाई, “तुप्‍सीं परमेश्‍वरा खिलाफन ज़िद्दीओ खूनखराब करनेठो भोऊ। तुप्‍सें हमेशा पवित्र आत्‍मेर न धिजिआ, ज़ेरा कि हईपे पूरशोईए हमेशा पवित्र आत्‍मेर न धिजियाति होरक हमेशा तेसी परमेश्‍वरा तरफे बोलनेओर मारि बिदाति। पर ज़े तेने कियाति तेसी मुकाबले तुसे होरेक बी मदम किउरा असे! तुप्‍सें मसीहर मारी बिदा!”

![](https://cdn.door43.org/obs/jpg/360px/obs-en-45-04.jpg)

ज़ेखैईं तेने धार्मिक परधाने इ शुंया, त तेने एतेक रोशूई गे कि तेने एम्‍फा कनोर बंद करि बिदा होरक उथा शा खनि हउशुए। तेने स्‍तिफनुसर ध्रीकर नगरिंञ भईंरो लेई गे होरक तेसर मारि बिज़िबेओनी तेसर रुणें बवाया।

![](https://cdn.door43.org/obs/jpg/360px/obs-en-45-05.jpg)

ज़ेखैंईं स्‍तिफनुस मरनाति, से हउशुआ, “हे यीशु, मेरे आत्‍मेर अपना!” च़ से अपें ज़ानुओ बले अई फिरी ज़ोरे बोलिब ठारुआ, “हे प्रभु, इ पाप तेनो पुटि म लवाओ।” च़ा से मरि गिया।

![](https://cdn.door43.org/obs/jpg/360px/obs-en-45-06.jpg)

तेस दिया, यरुशलेमन बेश्‍ने तेने मस्‍स ज़े मऊंए यीशु की च़ेल्‍लेओर सतईबा च़ुख्‍फि करि बिदा, तेरे विश्‍वासी मऊं होरक ठारीआरी नशि गे। पर इसी बावजूद बी, ज़ेस लाके बी तेने गे तेने यीशु बारेन प्रचार किया।

![](https://cdn.door43.org/obs/jpg/360px/obs-en-45-07.jpg)

फिलिप्‍पुस नाउवां यीशु कि एक विश्‍वासी थिया। ज़ेरा कि होरेक मस्‍सज़ेञ विश्‍वासिये कियाति से बी यरुशलेमञ नशी गिया। से सामरिया की देशन उठि गिया। तेटि तेनी मऊंओर यीशु बारेन प्रचार किया। मस्‍स ज़ेञ मऊंए यीशु पुटि विश्‍वास किया होरक मुक्‍ति हतेरिया। एक झा, फिलिप्‍पुसा कच़ा परमेश्‍वरा तरफे एक स्‍वर्गदूत आया होरक तेस्‍सा बणां गईबोनी, होरक एक बता पुटि हड़ीबोनी लाई। फिलिप्‍पुस तेटि उठि गिया। ज़ेखैंईं से तेस्‍सा बता पुटि हण्‍नाति, त तेनी एक मऊंर अपें रथन गईब कया। इ मऊं कूश देशा की एक मोड़ा अधिकारी थिया। पवित्र आत्‍मे फिलिप्‍पुसा सा लाई कि गईकर तेस मऊं की साथे-साथे हण।

![](https://cdn.door43.org/obs/jpg/360px/obs-en-45-08.jpg)

तेरे फिलिप्‍पुस रथा कच़ा गिया। तेनी शुंया कि से कूशी परमेश्‍वरा वचनर पढ़नाति। ज़े यशायाह परमेश्‍वरा तरफे बोलने लिखोरा थिया से तेस पढ़नाति। से पढ़नाति, “तेने तेसर मारिबे तियार पेरुठो लेई गे, होरक ज़ेरा एक छ़ेड्ल्‍लू शान्‍त भोना, तेनी एक शब्‍द बी न लाई। तेने तेस सा रुठ व्‍यवहार च़ेक न किया होरक आदर बी न किया। तेने तेसीकि जाह्न लेई बिदा।”

![](https://cdn.door43.org/obs/jpg/360px/obs-en-45-09.jpg)

फिलिप्‍पुसे तेस कूशीर पुछ़िया, “ज़े तु पढ़ला असे खि तु तेसर शुंञमि बी करना-आ?” तेनी कूशी जुवाब दिता, “न। ज़ेखैंईं च़ेक कऊंआ मूर इ शुंञमि करई न दे, तेखैईं च़ेक हऊं इ शुंञमि करि नोटु। शबस करि मूं कच़ा अई बेश। यशायाह इ अपां पाठि लिखनाति या केसोआ होरकिउ पाठि?”

![](https://cdn.door43.org/obs/jpg/360px/obs-en-45-10.jpg)

फिलिप्‍पुस रथा पुटि चढ़िकर बेशि गिया। च़े तेनी कूशी मऊंवे से बताया ज़े यशायाहे यीशु बारेन लिखोरा थिया। फिलिप्‍पुसे परमेश्‍वरा वचना बारेन होरेक बी मस्‍स चर्चा किया। एरा करि, तेनी तेस मऊंर यीशु बारेन रुठ खबर शुणांया।

![](https://cdn.door43.org/obs/jpg/360px/obs-en-45-11.jpg)

फिलिप्‍पुसो से कूशी हणला पाईं कच़ा आये। तेनी कूशी बोलिया, “हेर! इटि पाईं असे!” खि हऊं बपतिस्‍मा लेई बटुआ?” च़े तेनी रथ च़लानेर रथ चपि करिबोनी बोलिया।

![](https://cdn.door43.org/obs/jpg/360px/obs-en-45-12.jpg)

च़े तेने पाईंन उठि गे, फिलिप्‍पुसे तेस कूशिर बपतिस्‍मा दिता। ज़ेरी तेने पाईंञ भइलिर निथे, तेरी पवित्रात्‍मा अचानके फिलिप्‍पुसर उछ़ूई अयक ठारिआर लेई गिया। तेटि फिलिप्‍पुसे मऊंओर यीशु बारेन बतईबा जारि थैया।

![](https://cdn.door43.org/obs/jpg/360px/obs-en-45-13.jpg)

तेनी कूशी अपें घरेआरी गईबा जारी थैया। से तुठोरा थिया कि से हेबे यीशुर ज़ाण्‍णाति।

*प्रेरितो की कम 6:8-8:5; 8:26-40 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_45_128kbps.m4a

## 46. पौलुस मसीही विश्‍वासी बणिं गाना असे।

https://openbiblestories.org/l/gda/story-46/

![](https://cdn.door43.org/obs/jpg/360px/obs-en-46-01.jpg)

शाऊल नाउवां कि एक मऊं थिया ज़ेनी यीशु पुटि विश्‍वास किउरा नोथा। ज़ेखैंईं से छ़ोकरा थिया, तेखैंईं तेनी स्‍तिफनुसर मारने मऊंवों कि डबुआ निगरानी कियाति। पिच़ंञ, तेनी विश्‍वासिउर बर्दो दिती। तेनी यरुशलेमन घर-घरे गई ज़लऊं मुषुल्‍ड्लेओर गिरफ्‍तार करि कैदन ढपि बिदाति। तेखैंई मोड़ा यहूदी पुजारी शाऊलर दमिश्‍क नगरिआर गइब दिता। तेनी तेठा मसीही मऊंओर गिरफ्‍तार करि यरुशलेमार अणिबे ओनी शाऊलर बोलिया।

![](https://cdn.door43.org/obs/jpg/360px/obs-en-46-02.jpg)

च़े शाऊले दमिश्‍कारि गईबा च़ुख्‍फी किया। तेस नगरी अपरिबे अगरञ, तेसी फेरे सर्गंञ एक प्रागा च़ल्‍किया, च़ से धत्रि पुटि झ़ई गया। शाऊले केसोआरा बोलिब शुंईंया, “हे शाऊल! “हे शाऊल! तु मूर किस सताना?” शाऊले पुछ़िया, “हे प्रभु, तपीं कऊं भोई?” यीशुई तेसर जुवाब दिता, “हऊं यीशु भोऊं। तु मूंर सताना!”

![](https://cdn.door43.org/obs/jpg/360px/obs-en-46-03.jpg)

ज़ेखैंईं शाऊल खा भुआ च़े से हेरि नोटनाति। तेसी साथी ठो तेसर दमिष्‍कारि लेई गेति। शाऊले त्राई दियो च़ेक खीं खाओरा-पितोरा नोथा।

![](https://cdn.door43.org/obs/jpg/360px/obs-en-46-04.jpg)

दमिश्‍का हनन्‍याह नाऊंवा कि एक च़ेल्‍ला थिया। परमेश्‍वरे तेसर लाई, “तेस घरेआर ग ज़ेटि शाऊल च़ोखोरा असे। तेपें हथर तेस पुटि थे ताकि तेनी फिरि कई बटोरा लोई।” पर हनन्‍याहे लाई, “हे प्रभु मैईं शुंरा असे कि इनी मऊंवीं विश्‍वासिउर केरा घाटे सताओरा असे।” परमेश्‍वरे तेसर जुवाब दिता, “गा! मैंईं तेसर यहूदिउन ओ होरेक ज़ातिउ मऊंओ बिच़ा मेरे नाऊंवां कि घोषणा करिबेओनी चुनी बिदोरा असे। से मेरा नाऊंआ ओनी मस्‍स बर्दो ज़ख्‍फि करल।”

![](https://cdn.door43.org/obs/jpg/360px/obs-en-46-05.jpg)

च़े हनन्‍याह शाऊला कच़ा गिया, अपें हथर तेस पुटि थेई बोलिया, “यीशुई, ज़े तु अईबे मुके तू पुटि प्रकट भुआति, मूंर तु कच़ा बिदा ताकि तेईं फिरी कई बटोरा लोई, होरेक पवित्रात्‍मा तूर भरि बिज़ल।” तेरी शाऊल फिरि कईब ठारुआ, होरेक हनन्‍याहे तेसर बपतिस्‍मा दिता। च़े शाऊले बगत खाया होरेक फिरि तेतन जाह्न अई गिया।

![](https://cdn.door43.org/obs/jpg/360px/obs-en-46-06.jpg)

तेखेईंञ दी, शाऊले दमिश्‍कन बेश्ने मऊंओं बिच़ा प्रचार करिबा च़ुक्‍फी करि बिदा। तेनी बोलिया, “यीशुए परमेश्‍वरा कोआ भो!” यहूदी मऊं ठट्ट थिये, किसबोली शाऊले त विश्‍वासिउर मारि बिज़िबे कोशिश किउरा थिया, पर हेबे तेनी यीशु पुटि विश्‍वास कियाति। शाऊले यहूदिउ सा बहस किया। तेनी हेरालिया कि यीशुए मसीह थिया।

![](https://cdn.door43.org/obs/jpg/360px/obs-en-46-07.jpg)

एस्‍सी ध्‍याड़े पिच़ंञ, यहूदिये शाऊलर मारि बिज़िबे योजना बणांया। तेने तेसर मारि बिज़िबे ओनी नगरी अंडुईबे द्वारा मऊओर बिदा। कि तेसी निगरानी करेले पर शाऊले इस पाठि शुंई बिदा, होरेक तेसी साथी तेटिंञ बच़ि कर निसिबे ओनी तेसी मदद किया। एक राति तेने तेसर बल्‍ड्लिन बिठईकर नगरि भितिंञ बुल्‍लिर ओसालि बिदा। दमिश्‍कंञ बच़िकर निसि पिच़ंञ शाऊले यीशु बारेन प्रचार करिबा जारी थैया।

![](https://cdn.door43.org/obs/jpg/360px/obs-en-46-08.jpg)

शाऊल प्रेरितो सा हतुईब यरुशलेमारि गिया, पर तेने तेस सा डरने थिये। तेखैंई बरनबास नाऊंआ कि विश्‍वासी शाऊलर प्रेरितो कच़ा लेइकर गिया। तेनी तेनोर कया कि शाऊले केरा डरिब मेतेईं दमिश्‍का प्रचार कियाति। तेस पिच़ंञ, प्रेरिते शाऊलर अपनाया।

![](https://cdn.door43.org/obs/jpg/360px/obs-en-46-09.jpg)

मिन विश्‍वासी ज़ेने यरूशलेमा कि सतावंञ नशि गेति तेने अंताकिया नगरी उठि गेति होरेक यीशु बारेन प्रचार करनेति। अंताकिया बेशने मऊं यहूदी नोथे, पर पहली बार, तेनो बिच़ंञ मस्‍स ज़ेंञ मऊं विश्‍वासी बणिं गे। बरनाबास-ओ शाऊल खर्के विश्‍वासिउर यीशु बारेन होरेक बी मस्‍स शिख्रइबे-ओनी तेटि गे होरेक कलीसियेर मज़बूत किया। यीशु पुटि विश्‍वास करने मऊं पहली बार अंताकियान “मसीही” गणुंए।

![](https://cdn.door43.org/obs/jpg/360px/obs-en-46-10.jpg)

एक झा, अंताकिया की मसीही मऊं ब्रता सा प्रार्थना करला थिये। पवित्रात्‍मई तेनौ सा लाई, “मेरा ओनी बरनबासो शाऊलर तेस कमर करिबे ओनी बिक्रे करि बिज़ो ज़े करिबेर मैंईं तेन दुयोर बुलाओरा असे।” तेरे अंताकिया कि कलीसिये बरनाबासो शाऊला ओनी प्रार्थना किया होरक तेनो पुटि एम्‍फा हतर थैया। च़े तेने होरेक बी मस्‍स ठारियार यीशु बारेन रुठ खबराकि प्रचार करिबे ओनी बिज़ छ़ईया। बरनवासो शाऊले पाठि-पाठि ज़ाति मऊंओर शिक्षा दिता, होरेक मस्‍स ज़ेञ मऊंवीं यीशु पुटि विश्‍वास किया।

*प्रेरितों की कम 8:3; 9:1-31; 11:19-26; 13:1-3 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_46_128kbps.m4a

## 47. फिलिप्‍पीन पौलुसो सीलास

https://openbiblestories.org/l/gda/story-47/

![](https://cdn.door43.org/obs/jpg/360px/obs-en-47-01.jpg)

ज़ेखैईं शाऊले पूरा रोमी साम्राज्‍यन सफर किया त तेनी अपां रोमी नाऊं “पौलुसा” इस्‍तेमाल करिबा च़ुख्‍फि किया। एक झा, पौलुस-ओ तेसी साथी सीलास फिलिप्‍पी नगरीन यीशु बारेन रुठ खबर शुंणइब गे। तेने नगरी भईरीं नेंई मुखीं एक ठारि गे ज़ेटि मऊं प्रार्थना करिब ओनी ठोक्‍कन भूरे थिये। तेटि तेने लुदिया नाऊंआ कि एक ज़लऊं सा हतुए ज़े व्‍यापारी थी। से परमेश्‍वरर दा करनि थी होरेक परमेश्‍वरा कि आराधना करनिति।

![](https://cdn.door43.org/obs/jpg/360px/obs-en-47-02.jpg)

परमेश्‍वरे लुदियेर यीशु बारेन उज़ाबा पुटि विश्‍वास करिबे ज़ोगा किया। पौलुसे ओ सीलासे तेसर-ओ तेसी टबरर बपतिस्‍मा दिता। तेनी पौलुसर-ओ सीलासर अपें घरे अईकर बेशो बोलिया, तेरे तेने तेटि बेठे।

![](https://cdn.door43.org/obs/jpg/360px/obs-en-47-03.jpg)

पौलुस ओ सीलास मऊंओं सा ज्‍यातार तेस ठारि हतेओने थिये ज़ेटि यहूदी मऊं प्रार्थना करने थिए। रोज ज़ेखेंईं बी तेने ज़ेटि गानेति त एक दासी मठी ज़ेसर मदम आत्‍मा थिया से तेनोकि पिछा करनि थी। इस मदम आत्‍माए द्वारे से मऊंओर भविष्‍य बतानि ठो थी, एऱा ठो से भविष्‍य बतईकर अपें मालिको ओनी ढेर ढबुआ कमानि थी।

![](https://cdn.door43.org/obs/jpg/360px/obs-en-47-04.jpg)

तेनो गइबे मुके इ दासी मठी हउशेओनी थी, “इने मुशुड्ले परम प्रधान परमेश्‍वरा सेवा करने भोन। इने तुसोर मुक्‍ति हतेरिबे बत हेरालनेन!” से रोज एरा करनिथी ज़ेनी लेई पौलुस रुषि गिया।

![](https://cdn.door43.org/obs/jpg/360px/obs-en-47-05.jpg)

एक झा ज़ेखेंई तेनी दासी हउशुइबा च़ुख्‍फी किया, त पौलुसे तेसारि फिरिकर तेसी अण्‍डीं कि मदम आत्‍मईर बोलिया, “यीशु नाऊंवे एसी अण्‍डी किंञ निसि ग।” तेस्‍से मुके तेनी मदम आत्‍मई तेस छोड़ि बिदा।

![](https://cdn.door43.org/obs/jpg/360px/obs-en-47-06.jpg)

तेस मठी कि मालिको डरोंआ रोषुए। तेनोर पता लगि गिया कि इ मठी मदम आत्‍मई मेतैंईं भविष्‍य बतई नोटली। इसी मतलब थिया कि मऊं हेबे तेसी मालिकोर डबोआ न देले कि से तेनोर भविष्‍य बतालि कि तेनो सा खि भोल।

![](https://cdn.door43.org/obs/jpg/360px/obs-en-47-07.jpg)

तेरे तेस दासी मठी कि मालिके, पौलुसो सीलासर रौमि अधिकारिउ कच़ा लेई गे। तेने पौलुसो सीलासर कुटिया, होरेक कैदखानेन ढपि बिदा।

![](https://cdn.door43.org/obs/jpg/360px/obs-en-47-08.jpg)

तेने पौलुसो सीलासर कैदन एरा घाटे ठारि थैइया ज़ेटि बदेओंञ जादा सिपाही थिये। इटि च़ेक कि तेने तेनो ठुड़ु कठोआ सा बनि बिदा। पर पौलुसो सीलास आध राति मुके, परमेश्‍वरा स्‍तुति घीत बोल्‍ला थिये।

![](https://cdn.door43.org/obs/jpg/360px/obs-en-47-09.jpg)

अचानके, एक डरअईब ज़ोगा भुंयोल आया! कैदा कि बदे द्वारो उगुई गे, होरेक बदे कैदिउ कि ज़ंज़ीरो युह्प्‍सी करि गे।

![](https://cdn.door43.org/obs/jpg/360px/obs-en-47-10.jpg)

च़े से दरोगा च़ेवि गिया। तेनी कईया कि कैदा द्वारो उगेओरे थिये। तेनी च़ेता कि बदे कैदी नशि गे। से डरि गिया कि बदे कैदी नशिबे बजे रोमी अधिकारी मूर मारि बिज़ेले, तेरे से अपींर मारि बिज़िबेर तियारुआ! पर पौलुस तेसर हेरिकर हऊशुआ, “च़ोख! तपींर नुक्‍सान मा-अपरा। असे बदे ज़ेंञ इट्ठीं असु।”

![](https://cdn.door43.org/obs/jpg/360px/obs-en-47-11.jpg)

तेनी दरोगे डकिला पौलुसो सीलासा कच़ा अइकर पुछ़िया, “मुक्‍ति ओनी हऊं खि करु?” पौलुसे जुवाब दिता, “प्रभु यीशु पुटि विश्‍वास कर, चे तु ओ तेरा घराना मुक्‍ति हतेरले।” च़े से दरोगा पौलुसो सीलासर घरेआर लेई गिया होरेक तेनो ज़खमोर धोया। पौलुसे तेसी घरे तेनोर बदेओर यीशु कि रुठ खबर शुंणाया।

![](https://cdn.door43.org/obs/jpg/360px/obs-en-47-12.jpg)

दरोगे ओ तेसी पूरा टबरी यीशु पुटि विश्‍वास किया, तेरे पौलुसो सीलासे तेनोर बपतिस्‍मा दिता। च़े दरोगे पौलुसो सीलासर बगत दिता, होरेक तेने साथे खुशी मनाया।

![](https://cdn.door43.org/obs/jpg/360px/obs-en-47-13.jpg)

होर्दी नगरी परधाने पौलुसो सीलासर कैदंञ आज़ाद करि बिदा होरेक फिलिपींञ उठि गईबे ओनी बोलिया। पौलुसो सीलास लुदिया होरेक अपें साथिऊ सा हतुए तेस पिच़ंञ उठि गे। यीशु बारेन रुठ खबर अपरला किया, होरेक कलीसिया बढ़ला किया।

![](https://cdn.door43.org/obs/jpg/360px/obs-en-47-14.jpg)

पौलुस ओ होरेक मसीह परधाने केतेक्‍बा नगरिउ कि सफर किया। तेनो मऊंओर यीशु बारेन रुठ खबर शुंणाया। तेने कलीसिये कि विश्‍वासिउर होरेक बी जादा संगति करिबे ओनी केतेक्‍बा डाको लिखिये। इनो बिच़ंञ मिन डाक बाइबला कि कताबो बणिं गे।

*प्रेरितो की कम 16:11-40 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_47_128kbps.m4a

## 48. यीशु-ए वाइदे कि मसीह भो

https://openbiblestories.org/l/gda/story-48/

![](https://cdn.door43.org/obs/jpg/360px/obs-en-48-01.jpg)

ज़ेखेंईं परमेश्‍वरे संसारर बणांया त बदे-दिर रुठू थिया। खीं पाप नोथा। आदम ओ हव्‍वा एम्‍फी दुयोर दा करने थिये, होरक तेने परमेश्‍वरा सा दा करने थिये। ना बिमारी थिया ना मरिबा थिया। परमेश्‍वर एरी घाटे दुनियेर चाहना थिया।

![](https://cdn.door43.org/obs/jpg/360px/obs-en-48-02.jpg)

शैताने लोड्लू ज़रिये बगीचेन हव्‍वे सा गप्‍पा किया, किसबोली से तेसर धोखा दीबा चाहना थिया। तेखेंईं हव्‍वे ओ आदमे परमेश्‍वरा खिलाफन पाप किया। किसबोली तेने पाप कियाति तेरे पृथ्वी पुटि बेशने मऊं मरनेन।

![](https://cdn.door43.org/obs/jpg/360px/obs-en-48-03.jpg)

किसबोली आदम-ओ हव्‍वे पाप कियाति, तेरे होरेक बी खीं मदम भुआ। तेने परमेश्‍वरा बइरि बणिं गे। ज़ेसी बजे, तेखेंइंञ दी हर एक मऊंवीं पाप किया। हर एक मऊं ज़मिबेंञ दी परमेश्‍वरा बइरि भोन। परमेश्‍वर ओ मऊंओं बिच़ा शान्ति नोथा। पर परमेश्‍वर शांति बणंईं थैइबा चाहना थिया।

![](https://cdn.door43.org/obs/jpg/360px/obs-en-48-04.jpg)

परमेश्‍वरे वाइदा किया कि हव्‍वे बंश शैताना कपार घ्रेच़ल। परमेश्वरे इ बी लाई कि शैतान तेसी खुरोर डसल। एरा बी लाई, शैतान मसीहर मारि बिज़ल, पर परमेश्‍वर यीशुर फिरि ज़ीनेरल। इस पिच़ंञ, मसीह शैताना ताग्‍तर हमेशा कि ओनी खतम करि बिज़ल। केतेबा बरिउ पिच़ंञ, परमेश्‍वरे हेरालिया कि यीशुए मसीह भो।

![](https://cdn.door43.org/obs/jpg/360px/obs-en-48-05.jpg)

परमेश्‍वरे तेस डढ़ंञ अपें टबरर बच़ाया ज़ेसर से अन्‍नाति। नूहर एक पांईं कि झाज़ बणंईब ओनी बोलिया एरा ठो परमेश्‍वरे तेनो मऊंओर बच़ाया ज़े तेस पुटि विश्‍वास करने थिये। एरा ठो, तेने बदे परमेश्‍वरा द्वारा मारि बिज़िबे ज़ोगा थिये किसबोली तेने पाप कियाति। पर परमेश्‍वरे तेने बदेओर बच़ईब ओनी यीशुर बिदा ज़े तेस पुटि विश्‍वास करने असुन।

![](https://cdn.door43.org/obs/jpg/360px/obs-en-48-06.jpg)

केतिबा शऊ बरिऊ च़ेक, यहूदी पुजारी परमेश्‍वरा ओनी बलिदान चढ़ईला बेठे। इ दर्शाना असे कि मऊंए पाप किया, होरेक इ कि तेने परमेश्‍वरा द्वारा तेनोर सज़ा दिब ज़ोगे थिये। पर तेनो बलिदान तेनोकी पापर माफ करि नोटनाति। यीशु बदेओंञ मोड़ा यहूदी पुजारी भो। तेनी से किया ज़े कऊं बी यहूदी पुजारी करि नोटना थिया। तेनी से एक्‍के बलिदान भुईबे ओनी मपींर दी बिदा ज़े हर केसोआ पापोर मिटई बटना थिया। तेनी सवीकार किया कि परमेश्‍वर तेनो बदेओ की पापा ओनी तेसर सज़ा दितोरा लोई। इनी बजे, यीशु सिद्ध मोड़ा यहूदी पुजारी थिया।

![](https://cdn.door43.org/obs/jpg/360px/obs-en-48-07.jpg)

परमेश्‍वरे अब्राहमा सा लाई, “हऊं तेपें द्वारा संसारा की बदे कुलोर आशीष देऊं।” यीशु एस्‍से अब्राहमा वंशज थिया। परमेश्‍वर अब्राहमा द्वारा बदे कुलोर आशीष देना असे, किसबोली ज़े यीशु पुटि विश्‍वास करने असुन परमेश्‍वर तेनो बदेओर पापंञ बच़ाना असे। ज़ेखेंईं इने मऊं यीशु पुटि विश्‍वास करने असुन, त परमेश्‍वर तेनोर अब्राहमा वंशज मन्‍ना असे।

![](https://cdn.door43.org/obs/jpg/360px/obs-en-48-08.jpg)

परमेश्‍वरे अब्राहमर बोलिया कि से अपें कोएर, तेसी ओनी बलिदान करि बिज़। पर परमेश्‍वरे इसहाका मुंह्न्दे एक छ़ेल्‍ड्लू इंतज़ाम किया। अस्‍पीं बदे ज़ेंञ हईपा पापा बजे मारि बिज़िबे ज़ोगे थिये! पर परमेश्‍वरे हईंपा ठारि यीशुर बलिदाना रुपन दिता। इनी बजह तेरे अस्‍पीं यीशुर परमेश्‍वरा कि छ़ेड्ल्‍लू बोलनू।

![](https://cdn.door43.org/obs/jpg/360px/obs-en-48-09.jpg)

ज़ेखेंईं परमेश्‍वरे मिस्रा पुटि अखिरी विपति बिदा त परमेश्‍वरे हर-एक परिवारर बोलिया कि तुसे एकि-एकि छ़ेल्‍ड्लू बलि करो। तेस छ़ेल्‍ड्लुन न लोई खींए दोष भूरा। च़े तेनोर एम्‍फां-एम्‍फां द्वारन तेसी रत लवईबा थिया। ज़ेखेंईं परमेश्‍वरे तेनो द्वारन रत कईया त परमेश्‍वर अगलिर उठि गिया च़ परमेश्‍वरे तेनोकि मुहंड्क्‍वें कोओर न मारिया। इ भुइब मुके परमेश्‍वरे इसर फसह कि त्‍योहार बोलिया।

![](https://cdn.door43.org/obs/jpg/360px/obs-en-48-10.jpg)

यीशु फसह कि त्‍योहारा एक छ़ेल्‍ड्लू घाटे भो। तेनी कद्‍दी पाप न किया, तेरे तेतन खीं दोष नोथा। यीशु फसह कि त्‍योहारा मुके मरि गिया। ज़ेखेंए कऊं बि यीशु पुटि विश्‍वास करना असे, तेखेंइंए यीशु कि रत तेस मऊं कि पापा मुल चुकाना असे। इ एरा भो कि ज़ेरा परमेश्‍वर तेस मऊं कच़ंञ अगलि बढ़ि गिया, किसबोली परमेश्‍वर तेसर इ सज़ा दीबा न चाहन्‍ना थिया।

![](https://cdn.door43.org/obs/jpg/360px/obs-en-48-11.jpg)

परमेश्वरे इस्राएला मऊंओं सा चेक वायदा किया, किसबोली तेने मऊं परमेश्‍वरा कि चुनोरे थिये। पर परमेश्वरे हेबे एक एरा खर्का वाइदा किया ज़े बत्‍तेओ ओनी थिया। अगर कोसंञ बी ज़ाति मऊं इस खर्के वाईदेर अपनाल, त से परमेश्‍वरा मऊंओन शामिल भुई गाल। से एरा तेरे करना किसबोली से यीशु पुटि विश्‍वास करना असे।

![](https://cdn.door43.org/obs/jpg/360px/obs-en-48-12.jpg)

मूसा एक एरा घाटे परमेश्‍वरा तरफे बोलना थिया ज़ेनी परमेश्‍वरा कि वचनर बड़ा सामर्था सा प्रचार कियाति। पर यीशु बदे परमेश्‍वरा तरफे बोलनेओंञ मोड़ा भो। से परमेश्‍वर भो, तेरे ज़ेभि तेनी किया होरेक बोलिया से परमेश्‍वरा कम-ओ वचन थिये। तेरे पवित्रशास्‍त्र यीशुर परमेश्‍वरा कि वचन बोलना।

![](https://cdn.door43.org/obs/jpg/360px/obs-en-48-13.jpg)

परमेश्‍वरे दाऊद रज्‍ज़ेर वाइदा कियाति कि रज्‍ज़े रुपन तेसी एक वंशज परमेश्‍वरा मऊंओं पुटि हमेशा कि ओनी शासन करल। यीशु परमेश्‍वरा कोआ होरेक मसीह भो, तेरे से रज्‍ज़ा दाऊदा कि वंशज भो ज़े हमेशा कि ओनि राज्‍य करि बटल।

![](https://cdn.door43.org/obs/jpg/360px/obs-en-48-14.jpg)

दाऊद त इस्राएला रज्‍ज़ा थिया, पर यीशु पूरे संसारा रज्‍ज़ा भो! से फिरी अयल होरेक हमेशा कि ओनी न्‍याय ओ शान्‍ति सा अपें राज्‍यन शासन करल।

*उत्पत्ति 1-3, 6, 14, 22; निर्गमन 12, 20; 2 शमूएल 7; इब्रानियों 3:1-6, 4:14-5:10, 7:1-8:13, 9:11-10:18; प्रकाशितवाक्य 21 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_48_128kbps.m4a

## 49. परमेश्‍वरा खर्का वाचा

https://openbiblestories.org/l/gda/story-49/

![](https://cdn.door43.org/obs/jpg/360px/obs-en-49-01.jpg)

एक स्‍वर्गदूते एक छ़ोकरी मठी मरियम सा बोलिया कि तु परमेश्‍वरा कोएर जनम देली। से एबेंईं कुंवारी थी, पर पवित्रात्‍मा तेस कच़ा आया च़े से पेटाली भुई। तेनी एक कोएर जनम दिता ज़ेसी नाऊ यीशु थेइया। तेरे, यीशु परमेश्‍वर ओ मऊं दुइयो भो।

![](https://cdn.door43.org/obs/jpg/360px/obs-en-49-02.jpg)

यीशुई केतेक्‍बा चमत्‍कारो किये ज़ेने हेरालनेन कि से परमेश्‍वर भो। से पांई पुटि हणिंया होरेक अंधड़ ब्‍यानेर धिप्‍पन किया। यीशुई केतेक्‍बा दुखोरे मऊंओर अइन किया होरेक केतेक्‍बा मऊंओं अंडीकिंञ मदम आत्‍माओर खनिया। तेनी मूरे मऊंओर ज़ीनेरिया, होरेक तेनी पन रोटि ओ दुई मछ़ा सा पन हजार मऊंओंर भरपुर बगत खिलाया।

![](https://cdn.door43.org/obs/jpg/360px/obs-en-49-03.jpg)

यीशु एक महान मुंछी बी थिया। ज़े बी तेनी शिख्राया, से तेनी सिद्धांता सा शिख्राया। ज़े बी से मऊंओर करिबेर बोलना से तेनोर करिब लोईना भो, किसबोली से परमेश्‍वरा कोआ भो। उदाहरणा ओनी, यीशुई शिख्राया कि ज़ेरा तुसे तुस्‍प्‍योंर दा करनूं तेरी तुसोर होरिउ सा बी दा करिब लोईना भो।

![](https://cdn.door43.org/obs/jpg/360px/obs-en-49-04.jpg)

यीशुई इ बी शिख्राया कि तुप्‍सेयोंर बदे चीज़ंञ मस्‍स होरेक तुईंपां जायदादंञ बी मस्‍स परमेश्‍वरर दा करिब लोइना भो।

![](https://cdn.door43.org/obs/jpg/360px/obs-en-49-05.jpg)

यीशुई बोलिया कि संसारन कोसंञ बी चीजर हथेरिबेंञ करि मस्‍स रुठ असे परमेश्‍वरा कि राज्‍यन भूईबा। परमेश्‍वरा राज्‍यन गइबे ओनी ज़रुरी भो कि परमेश्‍वर तुसोर तुईयें पापंञ बच़ई थेल।

![](https://cdn.door43.org/obs/jpg/360px/obs-en-49-06.jpg)

यीशुई बोलिया कि मिन मऊं यीशुर अपनाले। परमेश्‍वर तेनो मऊंओर बच़ाल। पर होरेक ज़ेंञ मऊं तेसर अपनाले न। यीशुई इ बी बोलिया कि मिन मऊं रुठू धर्त्रि घाटे भोन, किसबोली तेने यीशु बारेन रुठ खबरर अपनई बिज़नेन, होरेक परमेश्‍वर तेनोर बच़ाना। पर मिन मऊं बता कि ट्क-ट्क धर्ति घाटे भोन। परमेश्वरा वचन बता बेजे ठो झ़ण्‍णां, पर तेटि खीं न उब्‍ज्‍ना। इने मऊं यीशु बारेन खबरर न अपनानेन। तेने तेसी राज्‍यन गईबेंञ इंकार करि बिज़नेन।

![](https://cdn.door43.org/obs/jpg/360px/obs-en-49-07.jpg)

यीशुई शिख्राया कि परमेश्‍वर पापीयो सा डरोंआ दा करना। परमेश्‍वर तेनोर माफ करिबा चाहना होरेक तेनोर अपां औलाद बणंइबा चाहना।

![](https://cdn.door43.org/obs/jpg/360px/obs-en-49-08.jpg)

यीशुई इ बी बताया कि परमेश्‍वर पापा सा नफरत करना। किसबोली आदम ओ हव्‍वे बी पाप किया, तेरे तेनो कि बदे वंशजे बी पाप किया। इस संसारन बेशना हर एक मऊं पाप करना होरेक परमेश्‍वरंञ दूरे असे। हर एक मऊं परमेश्‍वरा बईरी भोन।

![](https://cdn.door43.org/obs/jpg/360px/obs-en-49-09.jpg)

पर परमेश्‍वरे इस संसारन बेशने मऊओं सा एरा घाटे दा किया कि तेनी अपां एकलौता कोआ दी बिदा ताकि परमेश्‍वरे तेनोर सज़ा न लोई दितोरा ज़े तेस पुटि विश्‍वास करनेन। इसी बजाए, तेने हमेशा परमेश्‍वरा सा बेशेले।

![](https://cdn.door43.org/obs/jpg/360px/obs-en-49-10.jpg)

तुसे मरिब ज़ोगे भोउ, किसबोली तुसे पाप किउरा असे। तुसो पुटि परमेश्‍वरा रोषुइबा ठीक भो, इसी ठारी, परमेश्‍वर यीशु पुटि रोषुआ। परमेश्‍वरे यीशुर क्रूसा पुटि मरि गईबे सज़ा दिता।

![](https://cdn.door43.org/obs/jpg/360px/obs-en-49-11.jpg)

यीशुई कद्‍दी पाप न किया, पर तेनी परमेश्‍वरर सज़ा दीब दिता। तेनी मरि गईबा सवीकार किया। एरा करि, तुईंपा पापोर इस संसारन बेशने हर एक मऊंओं कि पापोर उछ़ुई लेई गईबे ओनी एक पूरा बलिदान थिया। यीशुई अपींर परमेश्‍वरा ओनी बलिदान करि बिदा, तेरे परमेश्‍वर कोसंञ बी पापर, इटि च़ेक कि डरोंआ मोड़े पापोर बी माफ करना।

![](https://cdn.door43.org/obs/jpg/360px/obs-en-49-12.jpg)

बड़गे त अगर तुसे डरोंआ रुठू कमोर करनूं, त इसी द्वारे परमेश्‍वर तुसोर न बच़ाल। तेसी साथी बणिंबे ओनी एरा खीं नांई ज़े तुसे मपींञ करि बटोले। इसी ठारि, तुसोर विश्‍वास करिबा असे कि यीशु परमेश्‍वरा कोआ भो, होरेक से तुयां ओनी क्रूसा पुटि मरि गिया, होरेक इ बी कि परमेश्‍वरे यीशुर फिरि ज़िनेरिया। अगर तुसे इस पुटि विश्‍वास करोले त, परमेश्‍वर तुईंया पापोर माफ करल।

![](https://cdn.door43.org/obs/jpg/360px/obs-en-49-13.jpg)

परमेश्‍वर हर एक तेस मऊंर बच़ाल ज़े यीशु पुटि विश्‍वास करना होरेक तेसर मेपां प्रभु सवीकार करना। पर से तेनोर न बच़ाल ज़ेने यीशु पुटि विश्‍वास न करनेन। इ खीं मायने न थेण्‍णां कि तुसे सउकार भोओ या गरीब, ज़लऊं भो या मुषुल्‍ड्ले, बुए भोउ या छ़ोकरे, या तुसे कोटि बेशनु। परमेश्‍वर तुसो सा दा करना होरेक चाहना कि तुसे यीशु पुटि विश्‍वास करो कि से तुईंया साथी बणिं बटोरा लोई।

![](https://cdn.door43.org/obs/jpg/360px/obs-en-49-14.jpg)

यीशु तुसोर बुलाना कि तेस पुटि विश्‍वास करो होरेक बपतिस्‍मा लेओ। खि तुसे विश्‍वास करनुआ कि परमेश्‍वरा एकलौता कोआ, यीशु-ए मसीह भो? खि तुसे विश्‍वास करनुंआ कि तुसे एक पापी भोऊ होरेक इ कि तुसे परमेश्‍वरा कि सज़ा हतेरिब ज़ोगे भोऊ? खि तुसे विश्‍वास करनुंआ कि तुईंया पापार दुशिब ओनि यीशु क्रूसा पुटि मरि गिया?

![](https://cdn.door43.org/obs/jpg/360px/obs-en-49-15.jpg)

अगर तुसे यीशु पुटि होरेक ज़े तेनी तुईयां ओनी किउरा असे तेसे पुटि विश्‍वास करोले त, च़े तुसे एक मसीही भोऊ! शैतान अपें अन्हारे राज्‍यन हेबे तुसो पुटि शासन न करना। हेबे परमेश्‍वर अपें प्रागाला राज्‍यन तुसो पुटि शासन करना असे। तेनी तुसोर पाप करिबेंञ रोकि बिदोरा असे, ज़ेसर तुसे करला करने थिये। तेनी तुसोर एक खर्का, सही जीवन दितोरा असे।

![](https://cdn.door43.org/obs/jpg/360px/obs-en-49-16.jpg)

अगर तुसे एक मसीही भोऊ त ज़े यीशुई किउरा असे तेसी बजहे परमेश्‍वरे तुईयां पापोर माफ करि बिदोरा असे। हेबे, परमेश्‍वर एक बईरी ठारि तुसोर अपां एक जिगरी साथी मन्ना।

![](https://cdn.door43.org/obs/jpg/360px/obs-en-49-17.jpg)

अगर तुसे परमेश्‍वरा साथी भोऊ होरेक प्रभु यीशु कि सेवक भोऊ त तुसे तेने गप्‍पयोर मनिबे कि इच्‍छा थेओले ज़े यीशु तुसोर शिख्राना। बड़गे तुसे एक मसीही भोऊ, शैतान अयता बी तुसोर पाप करिबे ओनी तुईंयां परीक्षा करल। पर परमेश्‍वर हमेशा से करना ज़े से बोलना कि से करल। परमेश्‍वर बोलना कि अगर तुसे तुईयां पापर मनि बिज़ो, च़े से तुसोर माफ करि बिज़ल। परमेश्‍वर तुसोर पापा विरोधन लड़िबे तागत देल।

![](https://cdn.door43.org/obs/jpg/360px/obs-en-49-18.jpg)

परमेश्‍वर तुसोर प्रार्थना करिबेर होरेक तेसी वचन पढ़िबेर बोलना। परमेश्‍वर तुसोर होरेक विश्‍वासिउ सा हतुई कर तेसी अराधना करिबेर बी बोलना। तुसोर होरेक मऊंओंर बी बतइबा असे कि तेनी तुसो ओनी खि किउरा असे। अगर तुसे इने बदे कमो करोले, त च़े तुसे परमेश्‍वरा कि पक्‍के साथी बणिं गाओले।

*रोमियों 3:21-26, 5:1-11; यूहन्ना 3:16; मरकुस 16:16; कुलुस्सियों 1:13-14; 2 कुरिन्थियों 5:17-21; 1 यूहन्ना 1:5-10 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_49_128kbps.m4a

## 50. यीशु पलाटेओना असे

https://openbiblestories.org/l/gda/story-50/

![](https://cdn.door43.org/obs/jpg/360px/obs-en-50-01.jpg)

लगभग दुई हजार बरिउंञ दी, संसारन हर ठारि मस्‍स मऊं यीशु बारेन रुठ खबरर शुण्‍णेन। कलीसिया अगलिर बढ़ना। यीशुई बाईदा किउरा असे कि अंता मुके यीशु फिरि अयल। पर एबेंईं यीशु नये, तां बी प्रभु अपां वाईदेर पूरेरल।

![](https://cdn.door43.org/obs/jpg/360px/obs-en-50-02.jpg)

जब कि अस्‍पीं यीशु कि अइबे ध्‍याड़ेर च़ोखि असू, परमेश्‍वर अस्‍प्‍योंर एरा घाटे जीवन ज़िवे इच्‍छा थेण्‍णां ज़े पवित्र भो ज़े तेसी आदर करना। ज़ेखेंईं यीशु पृथ्वी पुटि बेशनाति तेखेंईं तेनी बोलिया, “मेरे च़ेल्‍ले संसारा हर ठारि मऊंओर परमेश्‍वरा राज्‍य बारेन रुठू खबराकि प्रचार करले, च़े तेखेंईं अंत अइ गाल।”

![](https://cdn.door43.org/obs/jpg/360px/obs-en-50-03.jpg)

केतेक्‍बा जाति मऊंवीं एबेंईं च़ेक यीशु बारेन न शुंइया। स्‍वर्गारी गईबेंञ अगरंञ, यीशुई मसीह मऊंओर रुठू खबर शुणंइबे ओनी बोलोरा असे ज़ेने कायां शुंरा नाईं। तेनी बोलिया, “गाओ होरेक बदे ज़ातिउ मऊंओर च़ेल्‍ला बणांओ!” होरेक “लुंईबे ओनी बगि फसल तियार असे!”

![](https://cdn.door43.org/obs/jpg/360px/obs-en-50-04.jpg)

यीशुई इ बी बोलिया, “कऊं बी मऊं कि सेवक अपें मालिकंञ मोड़ा नुइबा। इस संसारा कि खास मऊंवीं मूर नफरत किया, होरेक मेरा बजहे तेने तुसोर बी सताले होरेक मारि बिज़ेले। इस संसारन तुसोर बर्दो भोल, पर ढक्‍कन बेशो, किसबोली मेंई शैतानर यह्र्बि करि बिदोरा असे ज़े इस संसारा पुटि शासन करना। अगर अंता च़ेक तुसे विश्‍वासा ज़ोगे बणिं बेशोले त, परमेश्‍वर तुसोर बच़ाल!”

![](https://cdn.door43.org/obs/jpg/360px/obs-en-50-05.jpg)

यीशुई अपें च़ेल्‍लेओर इ समझ़ईबे ओनी एक कथा शुणांया कि ज़ेखेंई संसारा अंत भोल त मऊंओं सा खि भोल। तेनी लाई, “केनिआ मऊंवीं अपें बगि एक रुठू बेजा बाया। ज़ेखेंईं से निन्‍दरा थिया तेखेईं तेसी बइरि आया होरेक गेऊं कि बेजे बिच़ा जंगली बेजेओर बई बिदा, च़े से उठि गिया।”

![](https://cdn.door43.org/obs/jpg/360px/obs-en-50-06.jpg)

“ज़ेखेईं ओईरी उब्‍दे त सेवके तेस मऊं सा लाई, ‘हे मालिका, तेपें त अपें बगिन रुठ बेजा बायाति। त च़ते इतन जंगली पौधे किस असुन?’ तेनी मऊंईं जुवाब दिता, ‘सिर्फ मेरे बईरि ए तेनोर बईबा चाहले। इ मेरे कऊंआ बईरि भो ज़ेनी एरा किउरा असे।”

![](https://cdn.door43.org/obs/jpg/360px/obs-en-50-07.jpg)

“तेने सेवके एम्‍फ्‍यों मालिकर जुवाब दिता, ‘खि असोर जंगली ओइरिउर उपटि बिज़िब लोईना भोआ?’ तेनी मालिके बोलिया, ‘न। अगर तुसे एरा करोले त गेऊंर बी उपटि बिज़ोले। लुंइंबे मुके च़ेक च़ोखि बेशो। च़े जंगली घा कि पुल्‍टु ठोक्‍कन करि बिज़ो ताकि तुसे तेनोर त्राई बटोरा लोई। पर गेहूंर मेरे डाठेन लेई अयो।”’

![](https://cdn.door43.org/obs/jpg/360px/obs-en-50-08.jpg)

च़ेल्‍ले इस कथई कि मतलब शुंञमि न किया, तेरे तेने यीशुर इसी मतलब शुंञमि करईबेर बोलिया। यीशुई लाई, “रुठू बेजा बाना प्रभु यीशु मसीहर हेरालना। बग संसारर हेरालना। रुठू बेजा परमेश्‍वरा कि राज्‍य कि मऊओर हेरालना।”

![](https://cdn.door43.org/obs/jpg/360px/obs-en-50-09.jpg)

“जंगली ओईरि तेस मदम शैताना मऊंओर हेरालने असुन। तेस मऊं कि बईरि शैतानर हेरालना, ज़ेनी जंगली बेजेर बई बिदाति। लुंईबा इस संसार कि अंता ध्‍याड़ा हेरालना, होरेक लुंण्‍ने तेने परमेश्‍वरा कि स्‍वर्गदूतोर हेरालनेन।”

![](https://cdn.door43.org/obs/jpg/360px/obs-en-50-10.jpg)

“ज़ेखेंई संसारा कि अंत भोल तेखेंई स्‍वर्गदूत तेनो बदे मऊंओर साथे ठोक्‍कन करेले ज़ेने शैताना भोन। तेने स्‍वर्गदूतो तेनोर डरोंआ गिठा अगिन फटई बिज़ेले। तेठा मऊं डरोंआ बर्दो सा रोलेले होरेक एम्‍फा दन च़िकेले। पर ज़ेने मऊं धर्मी भोले, ज़ेने यीशु गप्‍पे मनेले, तेने एम्‍फां परमेश्‍वर बा कि राज्‍य धुपा घाटे च़ल्‍केले।”

![](https://cdn.door43.org/obs/jpg/360px/obs-en-50-11.jpg)

यीशुई इ बी बोलिया कि से संसारा अंत भुइबेंञ अगरंञ पृथ्वी पुटि अयल। से तेरी ठो अयल ज़ेरा से गियाति। मतलब, तेसिंञ रत मांसई फुक भोल, होरेक से सर्गा बदड़ा पुटि सवार भुई अयल। ज़ेखेंई यीशु पलाटेओल, च़े हर एक मसीह मऊं ज़ेने मरि गिउरे असुन ज़ीनुई गाले होरेक यीशु सा स्वर्गा हतेओले।

![](https://cdn.door43.org/obs/jpg/360px/obs-en-50-12.jpg)

च़े ज़ऊं मसीही एबेंईं बी ज़ीने असुन तेनोर सर्गारि उछ़ुई बिज़ेले च़े होरेक मसिही मऊंओ सा शामिल भुई गाले ज़ेने मरि गिउरेओंञ ज़ीनेओरे भोले। तेने बदे ज़ेञ तेटि यीशु सा भोले। तेस पिच़ंञ, यीशु अपें मऊंओं सा बेशल। ज़ेखेंईं तेने साथे बेशेले त तेनो कच़ा हमेशे ओनी शान्‍ति भोल।

![](https://cdn.door43.org/obs/jpg/360px/obs-en-50-13.jpg)

यीशुई तेस पुटि विश्‍वास करने तेनोर एक मुकुट दिबे वाईदा किउरा असे। तेने हमेशा कि ओनी परमेश्‍वरा साथे हर एक चीज़ा पुटि शासन करेले। तेनो कच़ा हमेशा शान्‍ति भोल।

![](https://cdn.door43.org/obs/jpg/360px/obs-en-50-14.jpg)

पर परमेश्‍वर तेनो बदेओ कि न्‍याय करल ज़ेने यीशु पुटि विश्‍वास न करनेन। से तेनोर नर्कन छ़ई बिज़ल। तेटि तेने रोलेले होरेक दन पींह्ले, होरेक तेने हमेशा बर्दोन बेशेले। कद्‍दी न हिशेओना अग हमेशा तेनोर त्राइला थेल, होरेक जीवो तेनोर हमेशा खईला करेले।

![](https://cdn.door43.org/obs/jpg/360px/obs-en-50-15.jpg)

ज़ेखेंईं यीशु अयल, च़े से पूरा रीति सा शैतान ओ तेसी राज्‍यर नाश करि बिज़ल। यीशु शैतानर नर्कन छ़ई बिज़ल तेटि शैतान हमेशा कि ओनी त्रइला छ़ुटल, तेनो बदेओर ज़ेने परमेश्‍वरा गप्‍पयोर मनिबे थुस शैताना पिच्‍छ़ीं हणिंबे चुनाव कियाति।

![](https://cdn.door43.org/obs/jpg/360px/obs-en-50-16.jpg)

किसबोली आदम ओ हव्‍वे परमेश्‍वरा कि गप्‍पा न मनियाति होरेक पापर इस संसारन लेइकर आयेति, परमेश्‍वरे तेसर श्राप दिता होरेक नाश करिबे कि ठानिया। पर एक झा परमेश्‍वर एक खर्का स्‍वर्गो खर्का पृथ्वी बणांल ज़े सिद्ध भोल।

![](https://cdn.door43.org/obs/jpg/360px/obs-en-50-17.jpg)

यीशु ओ तेसी मऊं तेस खर्के पृथ्वीन बेशेले, होरेक तेने हमेशा कि ओनी बदे चीज़ो पुटि शासन करेले। यीशु मऊंओं कि टीरेंञ हर आंखु दूशि बिज़ल। हेबे कऊं भि बर्दोन नुअल। तेने न रोलेले। तेने न दुखेले होरेक मरेले बी न। होरेक तेटि खीं बुराइ नुअल। यीशु अपें राज्‍य पुटि न्‍याया सा, होरेक शान्‍ति सा शासन करल। से हमेशा कि ओनी अपें मऊंओं सा बेशल।

*मत्ती 24:14; 28:18; यूहन्ना 15:20, 16:33; प्रकाशितवाक्य 2:10; मत्ती 13:24-30, 36-42; 1 थिस्सलुनीकियों 4:13-5:11; याकूब 1:12; मत्ती 22:13; प्रकाशितवाक्य 20:10, 21:1-22:21 च़ेक एक बाइबला कथा*

Audio: https://git.door43.org/OBS-TLF/gda_obs/releases/download/v1/gda_obs_v1_50_128kbps.m4a