# unfoldingWord Open Bible Stories — Aheri Gondi

- Language code: `gon-x-aheri`
- Canonical page: https://openbiblestories.org/l/gon-x-aheri/
- Stories in this file: 50 of 50
- Published by: translationCore-Create-BCS, OBS-TLF
- Last release: 2026-07-28
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Aheri Gondi translation; it is not a translation of the whole Bible.

## 1. दुनियाता पुट्मळ

https://openbiblestories.org/l/gon-x-aheri/story-1/

![](https://cdn.door43.org/obs/jpg/360px/obs-en-01-01.jpg)

इल्‍हा पेन मोदाला अन्नि वस्‍तुकुन पुटिस्‍ता. हारूं रोजकुने दुनियातुन आनि अव्टे मनना अन्निट्तुन पुटिस्‍ता. पेन बूमितुन तयार कीतस्‍के अव्टे हीकटा आनि अद रिकम मत्‍ता. बारित्‍ते अदवेरदाका पेन अव्टे बतलतुने तयार कियाका मत्‍ता. गानि पेनदा आत्मा मात्रम येतापोर्रो तिरियसेके मत्‍ता.

![](https://cdn.door43.org/obs/jpg/360px/obs-en-01-02.jpg)

अस्‍के पेन, “वेल्‍गु आम!” इत्‍तस्‍के, वेल्‍गु आता. पेन वेल्‍गुन हूळतस्‍के दानकु बेस अन्पिच्‍चि, पेन दान, “रोजु” इंचि इत्‍ता. पजा पेन वेल्‍गुन हीकटताल वेरे कीसि हीकटतुन “नर्का” इंचि इत्‍ता. दुनियातुन पुट्टिचना कबळता मोदाटा रोजुने पेन मोट्टा मोदाला वेल्‍गुन तयार कीता.

![](https://cdn.door43.org/obs/jpg/360px/obs-en-01-03.jpg)

दुनियातुन पुटिस्‍तस्‍केटा रोडोंव रोजुने पेन, “येतापोर्रो उंदि अंतर आयिकांटि!” इत्‍ता. आनि उंदि अंतर तयार आता. आ अंतरतुन पेन, “मब्‍बु” इत्‍ता.

![](https://cdn.door43.org/obs/jpg/360px/obs-en-01-04.jpg)

मूडोव रोजुने पेन, “येर उंदि जेगाते जमा आसि, वत्‍तुता जेगा दिस्‍सिकांटि,” इत्‍ता. अस्‍के पेन, आ वत्‍तुता जेगातुन, “बूमि” आनि येतुन बारे, “समुद्रम” इत्‍ता. पजा पेन अद कीतदुन हूळसि बेस मंता इंचि इत्‍ता.

![](https://cdn.door43.org/obs/jpg/360px/obs-en-01-05.jpg)

पजा पेन, “बूमितुना! निमे अन्‍नि तीरकुना मराकु-पोर्कां पुट्टागोट्‍टा,” इत्‍तस्‍के, अल्‍हेने आता. पजा पेन अद कीतदुन हूळसि, बेस मंता इत्‍ता.

![](https://cdn.door43.org/obs/jpg/360px/obs-en-01-06.jpg)

नालूंगो रोजुने पेन, “मब्‍बुने वेल्‍गु हिय्यानव आयिं,” इत्‍ता. अस्‍के पोळ्‍दु, वेळसि आनि सुक्‍कां दिस्‍सालय दल्‍गतां. पेन अवुन बूमिपोर्रो वेल्‍गु हिय्यालय, नर्का-पिय्यल आयालय आनि कालाल्‍क, वर्साने परक हुप्‍सानाहाटीं कीता.

![](https://cdn.door43.org/obs/jpg/360px/obs-en-01-07.jpg)

हेय्युंगो रोजुने पेन, “येते जिवरासिं तयार आयिं आनि मब्‍बुने पिट्टें परयिंकांटि,” इत्‍ता. इल्‍हा पेन येते ईदाना अन्‍नि जिवरासिं आनि पिट्टेन कीता. पेन अवुन हूळसि बेस मंता इंचि अवुंक आसिर्वाद हीता.

![](https://cdn.door43.org/obs/jpg/360px/obs-en-01-08.jpg)

दुनियातुन पुटिस्‍ता हारुंगो रोजुने पेन, “बूमिपोर्रो मननाहाटीं अन्नि रकाल्‍कुना जिवरासिं आयिं,” इत्‍ता. अस्‍के पेन इत्‍तापे जर्गता. अव्टे कोन्नि जिवरासिं पोस कियानव मत्‍तां, कोन्नि बेंगानव आनि कोन्नि बारे केडा जिवरासिं मत्‍तां. अवुन पेन हूळतस्‍के बेस मंता इत्‍ता.

![](https://cdn.door43.org/obs/jpg/360px/obs-en-01-09.jpg)

पेन मर्रा, “सरे, इंदके मना रूपमते आनि मनालेसींगे मनना मनकन कीकोम. ओर बूमिपोर्रो आनि अन्नि जिवरासिनपोर्रो अदिकार ताकसंतोर,” इत्‍ता.

![](https://cdn.door43.org/obs/jpg/360px/obs-en-01-10.jpg)

पजा पेन तोळितोनि मनकन तयार कीसि, ओनव्टे जीवाता ऊपिरि उह्‍कुता. आ मनकना पोरोल आदाम. आदामुंक मननाहाटीं पेन उंदि पेद्‍दे तोटा तयार कीता आनि दान बेस हूळकुननाहाटीं ओन अव्टे इरता.

![](https://cdn.door43.org/obs/jpg/360px/obs-en-01-11.jpg)

आ तोटाता नट्‍टा नड्डुम पेन रोंडु विसेस मराकुन पुटिस्‍ता. उंदि पिस्वरता मरा आनि इंकुंदि बारे मंचि-सेड्डाता तेल्‍वि हिय्याना मरा. पजा,, “तोटाते मनना अन्‍नि मराकुना पंडिं निमे तिना परांतिन, गानि पिस्वरता मरा आनि मंचि-सेड्डाता तेल्‍वि हिय्याना मराता पंडि तिनुमा. आ मराकुना पंडिं तित्‍ते निमे हासि दांतिन” इंचि पेन आदामुंक वेहता.

![](https://cdn.door43.org/obs/jpg/360px/obs-en-01-12.jpg)

पेन मर्रा, “मांडसा वरोरे मनमळ बेस आयो,” इंचि इत्‍ता. गानि बवे जिवरासिं ओना दंटा आया पर्राहिल्‍लें.

![](https://cdn.door43.org/obs/jpg/360px/obs-en-01-13.jpg)

अदुनहाटीं आदामुन पेन गट्टि निद्राते वाटता. पजा पेन ओना उंदि बरबद्‍दा बोक्‍का तेंडसि आ बोक्‍कातोनि उंदि मुरतटुन तयार कीता. कीसि अदुन आदामुनगा ओता.

![](https://cdn.door43.org/obs/jpg/360px/obs-en-01-14.jpg)

आदाम आ मुरतटुन हूळतस्‍के, “इद अय्ते नालेसींगे मंता. दीनु मुरतळ इनानुर, बारित्‍ते इदुन मांडसाताल तयार कियमळ जर्गता,” इंचि इत्‍तोर. इदुनहाटींगे, मांडसा ओना तल्‍लुर-बाबोन होळसिसि ओना मुत्‍तोनतोनि उंदासि मनांतोर.

![](https://cdn.door43.org/obs/jpg/360px/obs-en-01-15.jpg)

मांडसातुन आनि मुरतटुन पेन दाना सतता रूपमते तयार कीता. पजा ओर्कु आसिर्वाद हीसि, ओर्कुन इल्‍हा इत्‍ता, “वेल्‍लेन पिलाल्‍कुन कंचि, ई पूरा बूमिअंता निंडसोंटु.” पजा अद तयार कीतदुन हूळसि, “वेल्‍लेन बेस मंता,” इत्‍ता. आनि पेन इरगा कूस आता. इदंता दुनियातुन पुटिस्‍ता हारूंगो रोजुने जर्गता.

![](https://cdn.door43.org/obs/jpg/360px/obs-en-01-16.jpg)

एडुंगो रोजुननाड, पेन इदवेरदाका बव कबाह्‍क कीसेके मत्‍तानो अवुनंता पुरागा कीता. आ एडुंगो रोजुन पेन आसिर्वाद हीसि, पवित्र कीता, बारित्‍ते आ एडुंगो रोजुननाडु पेन अन्‍निटतुन तयार कियाना कबाटुन महाता. इल्‍हा पेन दुनियातुन आनि अव्टे मनना अन्निटवुन पुटिस्‍ता. उत्‍पत्‍ति पुस्‍तकता अद्याय 1-2 ताल ई वेसुडि येतमळ जर्गता.

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_01_192kbps.mp3

## 2. दुनियाते पापम होळियंता.

https://openbiblestories.org/l/gon-x-aheri/story-2/

![](https://cdn.door43.org/obs/jpg/360px/obs-en-02-01.jpg)

पेन तयार कीता आ सक्‍कटा तोटाते आदाम आनि ओना मुत्‍तो वेल्‍लेन कूस मत्‍तुर. ओर इव्‍वुरगुडा कपडिं केर्राकोंदुर. अयनागानि ओर बस्‍केने सिग्‍गु अर्राकोंदुर. बारित्‍ते दुनियाते पापम हिलाका मत्‍ता. आदाम ओना मुत्‍तो आ तोटाते तिरियसेके, पेनतोनि वळ्‍कसेके मनुंदुर.

![](https://cdn.door43.org/obs/jpg/360px/obs-en-02-02.jpg)

गानि आ तोटाते उंदि तरास मत्‍ता. अद वेल्‍लेन बदमास मत्‍ता. आ तरास वासि आ मरतटुन, “ई तोटाते मनना मराकुनाल बद्‍दना मराता पंडिं तिनामन्नि इंचि पेन मीकु निजमे वेहतना?” इंचि पूसकीता.

![](https://cdn.door43.org/obs/jpg/360px/obs-en-02-03.jpg)

अस्‍के आ मुरतळ, “मंचि-सेड्डाता तेल्‍वि हियाना मराता पंडिं होळसि, कळमा अन्नि मराकुना पंडिं मोमोट तिना पर्रांतोम, इंचि पेन वेहता. अचोने आयाका, ओक्‍कला आ पंडितुन तिन्निना, इट्टिनागानि मिमेट हासि दांतिर, इंचिगुडा पेन वेहता” इत्‍ता.

![](https://cdn.door43.org/obs/jpg/360px/obs-en-02-04.jpg)

अस्‍के आ तरास मुरतळ्‍क इल्‍हाँ जवाब हीता: “इद निजम आयो, मिमेट हायिर. गानि मिमेट आ पंडितुन तिननय्ते पेनदालेसीं मिमेटगुडा मंचि-सेड्डातुन एरपाट कियापर्रांतिट आनि पेनदालेसीं आंतिर, इद पेनदुक एरपाट मंता.”

![](https://cdn.door43.org/obs/jpg/360px/obs-en-02-05.jpg)

आ मुरतळ आ पंडिहेके हूळता अय्ते, आ पंडि दानकु, सक्‍कगा आनि वेल्‍लेन रुसि मत्‍ताप दिसता. दानकुगुडा तेल्‍विगल्‍लद आयाना मत्‍ता. अदुनहाटीं आ मुरतळ आ पंडितुन कोय्‍सि तित्‍ता. अचोने आयाका दानतोनि मत्‍ता दान मुय्‍दोंकगुडा हीता अय्ते ओरगुडा तित्‍तोर.

![](https://cdn.door43.org/obs/jpg/360px/obs-en-02-06.jpg)

अस्‍के अचानक ओरा कळ्‍कु बय्यर आतां, अस्‍के ओर कुळकें मंतुर इंचि ओर्कु तेळियता. अस्‍के ओर आकिं उंदांकु-उंदि कुट्‍सि अवुना कपडिं तयार कीसि ओरा मेंदुल्तुन मुच्‍चाना कोसिस कीतुर.

![](https://cdn.door43.org/obs/jpg/360px/obs-en-02-07.jpg)

अस्‍के आ मांडसा आनि ओना मुत्‍तो तोटाते तिरियसेके पेनदा लेंगुन केंजतुर. ओर इव्‍वुरगुडा पेनदुक दिस्‍साकोंटा मक्‍कुतुर. अस्‍के, “निमे बगा मंतिन?” इंचि पेन आ मांडसातुन केयता. अय्ते, “नना तोटाते तिरियनेंके नीवा लेंग केंजतन. नना कुळकें मत्‍तन इंचि नीवा लेंग केंजसि, वेरियसि, मक्‍कुतन,” इंचि आदाम इत्‍तोर.

![](https://cdn.door43.org/obs/jpg/360px/obs-en-02-08.jpg)

मर्रा पेन इल्‍हा पूसकीता, “निमे कुळकें मंतिन इंचि नीकु बोर वेहतोर? नना तिनुमा इत्‍ता पंडितुनगिंटा निमे तित्‍तिना?” अस्‍के आ मांडसा मनकल इल्‍हा जवाब हीतोर, “निमे नाकु हीता ई मुरतळे नाकु आ पंडि तच्‍चि हीता.” अस्‍के, “निमे इल्‍हा बारि कीतिन,” इंचि पेन मुरतटुन पूसकीता. अस्‍के आ मुरतळ, “तरास नाकु दोका हीता.” इंचि जवाब हीता.

![](https://cdn.door43.org/obs/jpg/360px/obs-en-02-09.jpg)

अस्‍के पेन आ तरासुंक इल्‍हा सापनेम हीता, “निमे सापनेम दल्‍गतदुन आंद. निमे तोळि तिंचेके पीटपोर्रो बेंगसेके ताककिन. निमे आनि ई मुरतळ मिमेट इव्‍वुर वरोंक-वरोर हय्‍साकोंटा आंतिर. अचोने आयाका नीवा पिलाल्‍क, ई मुरतटा पिलाल्‍कगुडा वरोंक-वरोर अर्राकोंटा आंतुर. ई मुरतटा वंसमतोर नीवा तल्‍लातुन पिच्‍चि-पिच्‍चि कींतुर, निमे बारे ओरा मळमेतुन कस्‍ककिन,” इंचि पेन इत्‍ता.

![](https://cdn.door43.org/obs/jpg/360px/obs-en-02-10.jpg)

पजा पेन मुरतटुन इल्‍हा इत्‍ता, “निमे पिलाल्‍क कनानेंके नीकु वेल्‍लेन तकलिप आयागोटंतन. नीवा मनसु बस्‍केळ्‍क नीवा मुय्‍दोनहेकेन मनागोटंतन आनि ओर नीवापोर्रो अदिकारम हुप्‍सानुर,” इंचि पेन इत्‍ता.

![](https://cdn.door43.org/obs/jpg/360px/obs-en-02-11.jpg)

पजा मांडसातुन पेन इल्‍हा इत्‍ता, “निमे नावा पोल्‍ले केंजाकोंटा, नीवा मुत्‍तोना पोल्‍ले केंजतिन. इंदके बूमिकगुडा सापनेम दल्‍गता. अदुनहाटीं पंटा पंडसानाहाटीं नीकु इंदके इरगा कस्‍टम कियापींता. इंका निमे हाकिन अस्‍के नीकुन ई तोळितेन कल्‍पमळ जर्गार,” इंचि पेन इत्‍ता. आ मांडसा ओना मुत्‍तोंकु हव्‍वा इंचि पोरोल दोसतोर. ई पोरोलता अर्तम, “पिस्वर हियनदु” इल्‍हा आंदु. बारित्‍ते अद अन्‍नि जातिनोर्कु तल्‍लुर आयार. पजा पेन आदाम, हव्‍वांकु जिवरासिना तोलुनतोनि तयार कीता कपडिं केराहता.

![](https://cdn.door43.org/obs/jpg/360px/obs-en-02-12.jpg)

पजा पेन इल्‍हा इत्‍ता, “इंदके मनकल मंचि-सेड्डातुन एरपाट कींतोर, दीनहेंदाल ओर मनालेसीं आतोर. अदुनहाटीं ओन इंदके आ पिस्वर हियाना मराता पंडितुन तिना हियानायो, अदुन तिनानय्ते ओन्‍कु बस्‍केने हामुर वायो.” अदुनहाटीं पेन आदामुन आनि हव्‍वान आ तोटाताल पलाते पेचाहता. आनि आ तोटाताल बोरे आ पिस्वर हियाना मराता पंडितुन तिनामन्‍नि इंचि तोटाता गलमातगा वेल्‍लेन बलमाता पेनदा दूतन कावेल इरता. बायबलता उत्‍पत्‍ति पुस्‍तकताल अद्याय 3 नाल ई वेसुडि येतमळ जर्गता.

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_02_192kbps.mp3

## 3. कम्मुड

https://openbiblestories.org/l/gon-x-aheri/story-3/

![](https://cdn.door43.org/obs/jpg/360px/obs-en-03-01.jpg)

वेल्‍लेन वर्सां आतस्‍के, दुनियाते वेल्‍लेन लोकुल्‍क आतुर. ओर वेल्‍लेन पापि आनि बदमास आसि मत्‍तुर. ओर इच्‍चोन हेळसोत्‍तुर गदा, पेन उंदि पेद्‍दा कम्मुड वायागोटसि पूरा दुनियातुने नासडेम कियाना निरनायम येतता.

![](https://cdn.door43.org/obs/jpg/360px/obs-en-03-02.jpg)

गानि नोहा इनना मनकनतोनि पेन वेल्‍लेन कूस मत्‍ता. ओर हेळसोत्‍ता लोकुल्‍कुना नड्‍डुम मंचिगुडा नीतिमंतुड मत्‍तोर. ‘नना उंदि पेद्‍दा कम्मुड वायागोटंतन, अदुनहाटीं निमे उंदि पेद्‍दा डोंगा तयार कीम,” इंचि पेन नोहांकु वेहता.

![](https://cdn.door43.org/obs/jpg/360px/obs-en-03-03.jpg)

140 मीटर्कुना पोडगु, 23 मीटर्कुना नेरवु, आनि 13.5 मीटर्कुना एत्‍तु मनना उंदि डोंगा तयार कियालय पेन नोहांकु वेहता. नोहांकु आ डोंगा कट्टेतोनि तयार कियानद मत्‍ता. अव्टे मूडु अंतराल्‍क, वेल्‍लेन अर्रां, उंदि एनागर्रा आनि उंदि किडकि इर्रानद मत्‍ता. आ डोंगा नोहाल, ओना परिवातोर आनि बूमिपोर्रो मनना अन्नि तीरकुना जिवरासिन कम्मुडताल पिसागोटालय तयार कियमळ जर्गता.

![](https://cdn.door43.org/obs/jpg/360px/obs-en-03-04.jpg)

नोहाल पेनदा पोल्‍ले केंजतोर. नोहाल आनि ओना मर्कु कलियसि पेन वेहतापे डोंगा तयार कीतुर. अद वेल्‍लेन पेद्दा डोंगा मत्‍ताहटीं अदुन तयार कियालय वेल्‍लेन वर्सां दल्‍गतां. वायाना कम्मुडता बारेमते नोहाल लोकुल्‍कुंक वेहतोर, पेनदाहेके वायालय वेहतोर, गानि आ लोकुल्‍कु ओना पोल्‍लेतुन नम्मा हिल्‍लुर.

![](https://cdn.door43.org/obs/jpg/360px/obs-en-03-05.jpg)

‘नीकु, नीवा परिवातोर्कु आनि जिवरासिंक हालानच्‍चो तिंडि-मेता निमे जमा कीकुन्नु,’ इंचि पेन नोहांकु वेहचि मत्‍ता. अन्नि तयार आसि, वेला वातस्‍के, नोहाल, ओना मुत्‍तो, ओना मुव्‍वुर मर्कु-कोडियाह्‍कु इल्‍हा एनमिदि मंदि आ डोंगाते होळियानद मत्‍ता.

![](https://cdn.door43.org/obs/jpg/360px/obs-en-03-06.jpg)

कम्मुड वातस्‍के अन्‍नि जिवरासिनाल, पिट्टेनाल उंदि तल्‍लुर, उंदि पोतु कम्मुडताल पिसागोम इंचि पेन आ जिवरासिन, पिट्टेन डोंगाते होळियालय नोहानगा लोहता. इल्‍हा मोक्‍कुंकु ओज्‍जानालायकतव हरेक जिवरासिनाल एडुं तल्‍लुर जिवरासिन आनि एडुं पोतु जिवरासिन पेन नोहानगा लोहता. अव अन्निगुडा डोंगाते होळियतस्‍के पेन कुद्दु आ डोंगाता तल्‍पुन बंद कीता.

![](https://cdn.door43.org/obs/jpg/360px/obs-en-03-07.jpg)

अस्‍के पिर्रु वायालय सुरुव आता, वासेकेन होत्‍ता, वासेकेन होत्‍ता. इल्‍हा आगाकोंटा नल्‍पै रोजकु, नल्‍पै नर्कां उंदितीर वासेकेन मत्‍ता. दुनियाता हरेक वस्‍तु, एत्‍तु-एत्‍तु गुट्टांगुडा आ येते मुळ्‍गिसि होत्‍तां

![](https://cdn.door43.org/obs/jpg/360px/obs-en-03-08.jpg)

डोंगाते होळियता मत्‍ता मनकालोर आनि जिवरासिं तप्‍पा बूमिपोर्रो मत्‍तव अन्निगुडा हासोत्‍तां. आ डोंगा येतपोर्रो तेलसेके मत्‍ता, दानहेंदाल अव्टे मत्‍ता हरेक वस्‍तु, मनकल आनि जिवरासि बतले तकलिप हिलाकोंटा मत्‍ता.

![](https://cdn.door43.org/obs/jpg/360px/obs-en-03-09.jpg)

पिर्रु मग्‍गुतस्‍के, हेय्युं नेल्‍कुनदाका आ डोंगा येतपोर्रो तेलसेके मत्‍ता. आ हेय्युं नेल्‍कुना लोप्‍पो येरगुडा तक्‍को आसेके मत्‍ता. उंदि रोजु आ डोंगा उंदि गुट्टाता कोस्‍सक होंचि आगुता. गानि दुनिया मात्रम इंकागुडा येतेन मुळ्‍गिसि मत्‍ता. मूळ नेल्‍क आतस्‍के गुट्टाना कोस्‍सा कोड्डिं दिसालय दल्‍गतां.

![](https://cdn.door43.org/obs/jpg/360px/obs-en-03-10.jpg)

नल्‍पै रोजकु आतस्‍के, येर पुरागा वत्‍तुताना हिल्‍लेना कनकुनालय उंदि काकडतुन नोहाल पलाते लोहतोर. आ काकड वत्‍तुता बूमिहाटीं हेके-हीके तिरियता गानि दानकु बग्‍गेने वत्‍तुता बूमि दोर्काहिल्‍ले.

![](https://cdn.door43.org/obs/jpg/360px/obs-en-03-11.jpg)

पजा उंदि रोजु नोहाल उंदि पावरेमतुनगुडा पलाते लोहतोर. गानि दानकुगुडा बग्‍गेने वत्‍तुता बूमि दोर्कुवाहेंका अद मल्‍सि नोहानगेन वाता. उंदि वारम आतस्‍के नोहाल अदे पावरेमतुन मर्रा पलाते लोहतोर. अस्‍के अदु दाना तोळ्‍दे जय्तुन मराता उंदि आकि पीकुंचि वाता. येर तक्‍को आसेके मत्‍ता, मराकुना मोल्‍कां मर्रा मोलियालय दल्‍गतां.

![](https://cdn.door43.org/obs/jpg/360px/obs-en-03-12.jpg)

नोहाल इंकुंदि वारमदाका एदुर हूळसि, अद पावरेमतुन मूडोव मल्‍का पलाते लोहतोर. दानकु वत्‍तुता जेगा दोर्काहेंके अद ई मल्‍का मात्रम मल्‍सि वायाहिल्‍ले. येर वत्‍सोंचेके मत्‍ता.

![](https://cdn.door43.org/obs/jpg/360px/obs-en-03-13.jpg)

रोंडु नेल्‍क आतस्‍के पेन नोहानतोनि इल्‍हा इत्‍ता, “इंदके निमे, नीवा परिवार आनि अन्नि जिवरासिं डोंगाताल पलाते पेय्‍सि वटु. वेल्‍लेन मर्क-मियाह्‍कुन, तंग मर्क-मियाह्‍कुन कंचि, बूमिपोर्रो निंडसि होंटु.” अस्‍के नोहाल आनि ओना परिवारतोर डोंगाताल पलाते वातुर.

![](https://cdn.door43.org/obs/jpg/360px/obs-en-03-14.jpg)

नोहाल डोंगाताल पलाते वासि, उंदि गद्दे कीतोर. कीसि मोक्‍कुलायक मत्‍ता जिवरासिनाल कोन्नि जिवरासिना मोक्‍कु हीतोर. पेन आ मोक्‍कुनाहेंदाल कूस आसि नोहांक आनि ओना परिवारतोर्क आसिर्वाद हीता.

![](https://cdn.door43.org/obs/jpg/360px/obs-en-03-15.jpg)

पजा पेन इल्‍हा इत्‍ता, “मनकल ओना सिन्नास्‍केटाले पापि आंदुर. आयिना नना मर्रा बस्‍केन ओर कियाना तप्‍पुड कबाह्‍कुनाहाटीं बूमिकु सापनेम हिय्योन आनि कम्मुड वायागोटसि दुनियातुन नासडेम किय्योन इंचि ओट्टु तिंतन.”

![](https://cdn.door43.org/obs/jpg/360px/obs-en-03-16.jpg)

पजा पेन अद हीता पोल्‍लेता चिन्‍ह इंचि मोट्‍टा मोदाला सिंगिडि तयार कीता. बस्‍के-बस्‍के अय्ते मब्‍बुने सिंगिडि दिस्‍सार, अस्‍के पेन अद तित्‍ता ओट्टुन मति कींता आनि दाना लोकुल्‍कगुडा मति कींतुर. बायबलता उत्‍पत्‍ति पुस्‍तकताल अद्याय 6-8 ताल ई वेसुडि येतमळ जर्गता.

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_03_192kbps.mp3

## 4. अब्राहामुनतोनि पेन करार कींता

https://openbiblestories.org/l/gon-x-aheri/story-4/

![](https://cdn.door43.org/obs/jpg/360px/obs-en-04-01.jpg)

कम्मुड वासि वेल्‍लेन वर्सां आतंका, दुनियाते वेल्‍लेन लोकुल्‍क आतुर. ओर पेनदा विरोदमते आनि ओर-ओरा विरोदमते मर्रा पापम कीतुर. बारित्‍ते ओर अंटोर उंदे बासा वळ्‍कुंदुर. अदुनहेंदाल ओर अंटोर उंदासि, पेन वेहाकोन्ना गानि दुनियातुन निहानाहाटीं उंदि सहर उपिस्‍तुर.

![](https://cdn.door43.org/obs/jpg/360px/obs-en-04-02.jpg)

ओर्कु इरगा गर्रा मत्‍ता. पिस्वर बल्‍हा पिस्‍साना? इदुना बारेमते पेन वेहता आदेसकुन पीसि ताकमळ ओर्कु इस्‍टम मनाहिल्‍ले. अचोने आयाका स्वर्गमदाका एव्‍वानाहाटीं ओर उंदि पेद्‍दा गोपुरम दोहालय सुरुव कीतुर. पेन हूळसि, ‘ईर अंटोर कलियसि पापम कीसेके होत्‍ते, वेल्‍लेन पापि कबाह्‍क कींतुर,’ इंचि इत्‍ता.

![](https://cdn.door43.org/obs/jpg/360px/obs-en-04-03.jpg)

अदुनहाटीं पेन ओरा बासातुन वेल्‍लेन बासाने मारियागोटता आनि ओर्कुन अंटोर्कुन पूरा दुनियाते पैलांचता. ओर बद सहरतुन अय्ते उपिच्‍चालय सुरुव कीसि मत्‍तुरो, अदुन बेबिलोन इंतुर. आ पोरोलता अर्तम, ‘गयबेत’ इंचि मंता.

![](https://cdn.door43.org/obs/jpg/360px/obs-en-04-04.jpg)

कोन्नि नुह्‍कुना वर्सां आतस्‍के, अब्राम इनना वरोर मनकनतोनि पेन वळ्‍कता. पेन ओन इल्‍हा इत्‍ता, “नीवा देसेम आनि नीवा परिवारतुन होळसि, नना हुप्‍साना देसेम निमे पेय्‍सि होन. अस्‍के नना नीकु आसिर्वाद हींतन, नीहेंदाल उंदि पेद्दा जातितुन तयार कींतन. नीवा पोरोलतुन पेद्दा कींतन, नीकु आसिर्वाद हियानोंक नना आसिर्वाद हींतन, नीकु सापनेम हियानोंक नना सापनेम हींतन. नीहेंदाल दुनियाता अन्नि जातिनोर्क आसिर्वाद दोर्कार.”

![](https://cdn.door43.org/obs/jpg/360px/obs-en-04-05.jpg)

अय्ते अब्राम पेनदा पोल्‍ले केंजतोर. ओर ओना अंटोर सेवाकुल्‍कुन, ओना संपत्‍तितुन आनि ओना मुत्‍तो सारान पीकुंचि, पेन हुपिस्‍ता कनाना इनना देसेम पेय्‍सि होत्‍तोर.

![](https://cdn.door43.org/obs/jpg/360px/obs-en-04-06.jpg)

अब्राम कनान देसेमते येवतस्‍के पेन ओन इल्‍हा इत्‍ता, “नालुं मूलां तिरियसि हूळा! नना नीकु ई देसेमतुन पुरागा हींतन. नीवा वंसमतोर अंटोरगुडा ई देसेमपोर्रो अदिकार ताकसानुर.” अस्‍के अब्राम अदे देसेमते जेगा आतोर.

![](https://cdn.door43.org/obs/jpg/360px/obs-en-04-07.jpg)

अन्‍निटकन्ना पेद्‍दा पेनदा वरोर पेर्मल मत्‍तोर, ओन पोरोल मल्‍किसेदेक. उंदि रोज अब्राम लडाइ कीसि मल्‍सि वायनेंके ओर अब्रामुंक कलियतोर. अस्‍के मल्‍किसेदेक अब्रामुंकु आसिर्वाद हीसि, “स्वर्ग आनि बूमिता मालक आता आ अन्‍निटकन्ना पेद्दा पेन नीकु आसिर्वाद हिय्यि,” इंचि इत्‍तोर. अस्‍के अब्राम लडाइते गेल्‍सता अन्निटवुना पदोव बागम मल्‍किसेदेकुंक हीतोर.

![](https://cdn.door43.org/obs/jpg/360px/obs-en-04-08.jpg)

वेल्‍लेन वर्सां आसोत्‍तां, गानि अब्राम आनि सारांक मात्रम इदवेरदाकागुडा मर्क-मियाह्‍क पुट्टाहिल्‍लुर. ‘नीकु वरोर मर्रि पुट्‍टांतोर. मब्‍बुने मनना सुक्‍कां मत्‍ताप ओना वंसमतोर पुट्‍टानुर.’ इंचि पेन अब्रामुंक मर्रुंदि मल्‍का पोल्‍ले हीता. पेन हीता पोल्‍लेपोर्रो अब्राम विस्वासम कीतोर. अब्राम वरोर बेस नीतिमंतुड इंचि पेन गवाइ हीता. बारित्‍ते ओर पेन हीता पोल्‍लेपोर्रो विस्वासम कीतोर.

![](https://cdn.door43.org/obs/jpg/360px/obs-en-04-09.jpg)

अस्‍के पेन अब्रामुनतोनि उंदि करार कीता. उंदि करार इत्‍ते, बोरन्ना इव्वुर नड्डुम जर्गाना कबाह्‍कुन कियानाहाटीं जर्गंता. पेन अय्ते अब्राम मींडसि मननेंके ओनतोनि करार कीता. गानि अब्राम मींडसिगुडा पेनदा पोल्‍ले केंजसेके मत्‍तोर. पेन इत्‍ता, “नना नीवा मेंदुल्ताल नीवा सतता मर्रिन नीकु हींतन. नीवा वंसमतोर्क ई कनान देसेमतुन हींतन.” अयनागानि अब्रामुंकु इंका मर्क-मियाह्‍क हिल्‍लुर. बायबलता उत्‍पत्‍ति पुस्‍तकताल अद्याय 11-15 ताल ई वेसुडि येतमळ जर्गता.

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_04_192kbps.mp3

## 5. हीता पोल्‍ले परकारम पुट्ता मर्रि

https://openbiblestories.org/l/gon-x-aheri/story-5/

![](https://cdn.door43.org/obs/jpg/360px/obs-en-05-01.jpg)

अब्राम आनि सारै कनान देसेमते होंचि पदि(10) वर्सां आतां, गानि ओर्कु इंका मर्क-मियाह्‍क आयाहिल्‍लुर. अदुनहाटीं अब्रामुना मुत्‍तो सारै, ओन इल्‍हा इत्‍ता, “पेन नाकुन पिलाल्‍क कननालायक कियाहिल्‍ले. ननागुडा इंदके मातरिन आतन, नना पिलाल्‍क कनापर्रोन. अय्ते नावा दासि हाजिरान निमे मरमिं आम, अस्‍के अद नावाहाटीं वरोर पेडन कनंता.”

![](https://cdn.door43.org/obs/jpg/360px/obs-en-05-02.jpg)

पजा अब्राम हाजिरानतोनि मरमिं आतस्‍के अद वरोर पेडन कंता, अब्राम आ पेडन पोरोल इस्माएल दोसतोर. गानि सारै मात्रम हाजिरानपोर्रो अळुंदु. इस्‍माएल पदामूडु(13) वर्सानोर आतस्‍के पेन अब्रामुनतोनि मर्रा वळ्‍कता.

![](https://cdn.door43.org/obs/jpg/360px/obs-en-05-03.jpg)

पेन इत्‍ता, “नना वेल्‍लेन ताकतवार पेनदुन आंदुन. नना नीतोनि उंदि करार कींतन.” अस्‍के अब्राम बूमिपोर्रो अर्सि पेनदुक जोहार कीतोर. पेन इल्‍हागुडा इत्‍ता, “निमे वेल्‍लेन जातिनोर्क बाबो आकिन. नना नीकु आनि नीवा वंसमतोर्क कनान देसेमतुन पुरागा हींतन. हमेसाताहाटीं नना मीवा पेन आसि मनंतन. नीकु नीवा लोता हरेक मांडसा मनकना कतना कियापींता.”

![](https://cdn.door43.org/obs/jpg/360px/obs-en-05-04.jpg)

“नीवा मुत्‍तो सारै वरोर पेडन कनंता, ओर हीता पोल्‍ले परकारम पुट्ता मर्रि आयानुर. ओना पोरोल इसहाक इंचि इर्रा. नना ओनतोनि कीता करारतुन बस्‍केळताहाटीं इर्रंतन, ओनाहेंदाल उंदि पेद्‍दा जाति तयार आयार. नना इस्माइलुनहेंदालगुडा उंदि पेद्‍दा जाति तयार कींतन, गानि नावा करार मात्रम इसहाकुनतोने बस्‍केळ्‍क मनंता." पजा पेन अब्रामुना पोरोल बदलांचि अब्राहाम इंचि कीता. आ पोरोलता अर्तम, “वेल्‍लेटोर्कुंक बाबो” आंद. सारैना पोरोलगुडा पेन बदलांचि सारा इंचि कीता. आ पोरोलता अर्तम, “मोदाटा तल्‍लुर” आंद.

![](https://cdn.door43.org/obs/jpg/360px/obs-en-05-05.jpg)

अद रोज अब्राहाम ओना लोतोरा अंटोर मांडसाता कतना कीतोर. पजा एडादि पेय्‍सतस्‍के, इत्‍ते अब्राहामुना वय्‍सु नूर(100) आनि साराना वय्‍सु टोंबै(90) मत्‍ता, अस्‍के अब्राहामुनाहेंदाल साराल मर्रिन कंता. पेन वेहतापे अब्राहाम आ पेडाना पोरोल इसहाक इरतोर.

![](https://cdn.door43.org/obs/jpg/360px/obs-en-05-06.jpg)

इसहाक लेय्योड आतस्‍के, पेन अब्राहामुना विस्वासमता पट्टु हूळालय, “निमे नीवा वरोरे आता मर्रिन, नावाहाटीं मोक्‍कु इंचि बलि हीम.” इंचि इत्‍ता. मर्रागुडा अब्राहाम पेनदा पोल्‍ले केंजतोर आनि ओना मर्रिन मोक्‍कु हियालय तयार कीतोर.

![](https://cdn.door43.org/obs/jpg/360px/obs-en-05-07.jpg)

अब्राहाम आनि इसहाक मोक्‍कु हियाना जेगाहेके होननेंके इसहाक इल्‍हा इत्‍तोर, “बाबा, मोक्‍कुनाहाटीं मनागा कट्टें अय्ते मंतां, गानि बलि हियालय मनागा गोर्रे बगा मंता?” इत्‍तोर. अस्‍के अब्राहाम, “कोको, बलि हियालय पेन गोर्रेतुन दोर्किचंता,” इंचि जवाब हीतोर.

![](https://cdn.door43.org/obs/jpg/360px/obs-en-05-08.jpg)

मोक्‍कु हियाना जेगातगा येवतस्‍के, अब्राहाम इसहाकुन दोहचि मोक्‍कु गद्‍देपोर्रो मींडिस्‍तोर. ओर ओना मर्रिन हव्‍कानदे मत्‍ता, अचोटेन पेन, “आगा, पेडन हव्‍कुमा. निमे नीवा वरोरे आता मर्रिनगुडा नहगाटाल मक्‍किचि इर्राहिल्‍लिन, निमे नाकु निजमे वेरियंतिन, इंचि नाकु तेळियसोत्‍ता,” इंचि पेन इत्‍ता.

![](https://cdn.door43.org/obs/jpg/360px/obs-en-05-09.jpg)

अचोटेन दग्‍गेरेन हाह्‍कुना पोदाते उंदि गोर्रे पोतु हिरकिसि मत्‍तद अब्राहाम हूळतोर. इसहाकुन बलि हियाना जेगाते बलि हियालय पेन गोर्रे पोतुन दोर्किच्ता. पजा अब्राहाम वेल्‍लेन कूस आसि आ गोर्रे पोतुन बलि हीतोर.

![](https://cdn.door43.org/obs/jpg/360px/obs-en-05-10.jpg)

अस्‍के पेन अब्राहामुन इल्‍हा इत्‍ता, “निमे नावाहाटीं अन्नि हियालय तयार आतिन, नीवा वरोरे आता मर्रिनगुडा नावाहाटीं हियालय तयार आतिन. नना नीकु आसिर्वाद हींतन इंचि पोल्‍ले हीसेके मंतन. नीवा वंसमतोर मब्‍बुने मनना सुक्‍कांकन्ना एक्‍को आयानुर. निमे नना वेहताप ताकतिन इंचि नीवा परिवारहेंदाल नना ई दुनियाते मनना अन्नि जातिनोर्कु आसिर्वाद हींतन. बायबलता उत्‍पत्‍ति पुस्‍तकताल अद्याय 16-22 ताल ई वेसुडि येतमळ जर्गता.

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_05_192kbps.mp3

## 6. पेन इसहाकुनाहाटीं व्यवस्‍ता कींता

https://openbiblestories.org/l/gon-x-aheri/story-6/

![](https://cdn.door43.org/obs/jpg/360px/obs-en-06-01.jpg)

अब्राहाम वेल्‍लेन मातरल आतस्‍के, इसहाकगुडा बेस लेय्योड आतोर. अदुनहाटीं अब्राहाम इसहाकुनाहाटीं मुत्‍तोन पीसि वायालय ओना वरोर सेवाकुन अब्राहामुना जीवातोर मनना देसेमकु लोहतोर.

![](https://cdn.door43.org/obs/jpg/360px/obs-en-06-02.jpg)

अब्राहामुना जीवातोर मनना देसेम वेल्‍लेन लक्‍कु मत्‍ता. अगा होनालय वेल्‍लेन रोजकु दल्‍गतां. पजा पेन आ सेवाकुन उंदि रेबेका इनना पेगिटा लोन ओता. आ पेगिड अब्राहामुना तम्मुना तंगमिय्यड आंद.

![](https://cdn.door43.org/obs/jpg/360px/obs-en-06-03.jpg)

रेबेकालगुडा दाना परिवारतुन होळसि आ सेवाकुनतोनि होनालय ओप्‍कुत्‍ता. अद इसहाकुना लोन एव्ता एव्‍वुडे इसहाक दान मरमिं आतोर.

![](https://cdn.door43.org/obs/jpg/360px/obs-en-06-04.jpg)

वेल्‍लेन कालम पेय्‍सोत्‍ता पजा, अब्राहाम हासोत्‍तोर. अस्‍के पेन अब्राहामुनतोनि कीता करारताहाटीं, इसहाकुंक आसिर्वाद हीता. आ करारते, अब्राहामुनाहेंदाल लेक्‍का परवच्‍चो वंसमतोर आयानुर. इंचि पेन पोल्‍ले हीसि मत्‍ता. गानि रेबेकांक मात्रम पिलाल्‍क आयाहिल्‍लुर.

![](https://cdn.door43.org/obs/jpg/360px/obs-en-06-05.jpg)

इसहाक रेबेकानाहाटीं पारतना कीतोर अय्ते पेन रेबेकाना पीटे एमडाल्‍कुन वाटसीता. आ पिलाल्‍क रेबेकाना पीटे मननेंकेन लोप्‍पोटद लोप्‍पेन जगडाल्‍क आयुंदुर, अदुनहाटीं रेबेकाल जर्गनंता पेनदुक वेहसीता.

![](https://cdn.door43.org/obs/jpg/360px/obs-en-06-06.jpg)

अस्‍के पेन रेबेकान इल्‍हा इत्‍ता, “निमे इव्‍वुर मर्कुन कनकिन, ओर इव्‍वुर वेरे-वेरे जातिनोर आयानुर. ओर्क वरोनद वरोंक अर्रो. गानि नीवा पेद्‍दा मर्रिनाहेंदाल पुट्‍टना जातितोर्कु, नीवा सिन्‍ना मर्रिनाहेंदाल पुट्‍टना जातितोरा पोल्‍ले पोर्रो ताका पिय्यार.”

![](https://cdn.door43.org/obs/jpg/360px/obs-en-06-07.jpg)

रेबेकाल मोदाटा मर्रिन कंता. ओर एर्रगा आनि केल्‍कु पीसि पुट्तोर. ओर ओनकु एसाव इंचि पोरोल दोसतुर. पजा ओरा सिन्‍ना मर्रि एसावुना मडमेतुन पीसि पुटतोर. ओना पोरोल याकोब इंचि इरतुर.

*उत्पत्ति अध्याय 24:1-25:26 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_06_192kbps.mp3

## 7. पेन याकोबुंक आसिर्वाद हींता

https://openbiblestories.org/l/gon-x-aheri/story-7/

![](https://cdn.door43.org/obs/jpg/360px/obs-en-07-01.jpg)

आ पिलाल्‍क पेद्‍दागा आतस्‍के, याकोबुंक लोन मनमळे पसंद वाता. गानि एसावुंक मात्रम जिवरासिना सिकार कियमळ पसंद वाता. रेबेकाल याकोबुन बेस हूळुंदु. गानि इसहाक एसावुन बेस हूळुंदुर.

![](https://cdn.door43.org/obs/jpg/360px/obs-en-07-02.jpg)

उंदि रोजु एसाव सिकार कीसि लोन वातस्‍के, ओन्‍कु इरगा कर्वेस्‍सि मत्‍ता. अस्‍के ओर याकोबुन, “निमे बतल अय्ते अट्तिनो, अव्टेटाल गोडच्‍चो गाटो नाकु हीम,” इत्‍तोर. अस्‍के याकोब ओनकु इल्‍हाँ जवाब हीतोर, “नना नीकन्ना पेद्‍दोन आंदुन. अदुनहाटीं नीकु दोर्कना हरेक वस्‍तुकु नाकु हींतन, इंचि निमे मोदाला पोल्‍ले हीम,” इत्‍तोर. अय्ते एसाव अन्नि वस्‍तुकु याकोबुंक हींतन इंचि पोल्‍ले हीतोर. अस्‍के याकोब ओनकु गोडच्‍चो गाटो हीतोर.

![](https://cdn.door43.org/obs/jpg/360px/obs-en-07-03.jpg)

इसहाक एसावुंक आसिर्वाद हियालय हूळुंदुर. गानि ओर आसिर्वाद हिय्याका मुन्नेन रेबेकाल आनि याकोब इव्‍वुर कलियसि एसाव आयाना नाटकम कीसि इसहाकुंकु दोका कीतुर. इसहाक वेल्‍लेन मातरल मत्‍तोर, ओनकु कळ्‍कु दिस्‍साकोंदुं. अय्ते याकोब एसावुना कपडिं केरसि, एटिता तोल ओना बोंडंगे आनि कयकुंक हुटकुत्‍तोर.

![](https://cdn.door43.org/obs/jpg/360px/obs-en-07-04.jpg)

पजा याकोब इसहाकुनगा वासि, “नना एसावुन आंदुन, निमे नाकु आसिर्वाद हीम इंचि, नना निहगा वातन,” इत्‍तोर. अस्‍के इसहाक एटि बूरातुन आनि कपडिन मूसकिसि हूळतोर, अस्‍के ओनकु एसाव अनपिच्‍चि ओर याकोबुंक आसिर्वाद हीतोर.

![](https://cdn.door43.org/obs/jpg/360px/obs-en-07-05.jpg)

एसाव याकोबुनपोर्रो होंग आतोर. बारित्‍ते याकोब एसावुना जेस्‍टम पालुना अदिकार आनि ओनकु दोर्काना आसिर्वादतुनगुडा दोंगा कीतोर. पजा ओर ओना बाबो हातस्‍के याकोबुन हव्‍काना पिलान कीतोर.

![](https://cdn.door43.org/obs/jpg/360px/obs-en-07-06.jpg)

गानि रेबेकाल एसावुना पिलानुन केंजता. अदुनहाटीं रेबेकाल आनि इसहाक इव्‍वुर कलियसि याकोबुन रेबेकाना जीवातोराहेके होंचि मनालय लक्‍कु लोहचीतुर.

![](https://cdn.door43.org/obs/jpg/360px/obs-en-07-07.jpg)

याकोब वेल्‍लेन वर्सानदाका रेबेकाना जीवातोरगा मत्‍तोर. अल्‍हा मननेंके ओर मरमि आसि ओनकु पन्‍नेंड(१२) मर्कु आनि उंदि मिय्यळ पुटता. पेन ओन वेल्‍लेन सिरमंत कीता.

![](https://cdn.door43.org/obs/jpg/360px/obs-en-07-08.jpg)

इरवै वर्सानदाका ओना जीवातोरागटाल लक्‍कु कनान देसेमते मत्‍ता पजा, ओर ओना परिवारतोर्कुन, ओना सेवाकुल्‍कुन आनि ओना जिवरासिना मंदान पीकुंचि मल्‍सि वातोर.

![](https://cdn.door43.org/obs/jpg/360px/obs-en-07-09.jpg)

एसाव इंदकेगुडा हव्‍कांतोर बारे इनकुंचि याकोब इरगा वेरियसि मत्‍तोर. अदुनहाटीं उंदि इनाम लेह्‍का जिवरासिना मंदातुन याकोब एसावुनगा लोहतोर. आ मंदातुन पीकुंचि होत्‍ता सेवाकुल्‍कु इल्‍हा इत्‍तुर, “नीवा दासुड याकोब ई जिवरासिन नीकु हीतोर, ओर बिरानेन वांतोर.”

![](https://cdn.door43.org/obs/jpg/360px/obs-en-07-10.jpg)

गानि एसाव मात्रम याकोबुंक बदे नुकसान कियाना विचारम किया हिल्‍लोर. दाना बदुलते याकोबुन मर्रुंदि मल्‍का हूळसि वेल्‍लेन कूस आतोर. पजा याकोब कनान देसेमते इरगा सांतिते मनालय दल्‍गतोर. पजा इसहाक हातस्‍के याकोब आनि एसाव ओना गति कीतुर. पेन अब्राहामुंक हीता पोल्‍लें आनि करार इंदके इसहाकुनाहेंदाल याकोबुनपोर्रो वाता.

*उत्पत्ति अध्याय 25:27-35:29 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_07_192kbps.mp3

## 8. युसुप आनि ओना परिवारतुन पेन पिसागोटंता

https://openbiblestories.org/l/gon-x-aheri/story-8/

![](https://cdn.door43.org/obs/jpg/360px/obs-en-08-01.jpg)

वेल्‍लेन वर्साना पज्‍जो याकोब मातरल आतस्‍के, ओना पावरमगल्‍ला मर्रि युसुपुन ओना कळमता तम्मुह्‍कुनहेके ओर्कुन हूळसि वायालय लोहतोर. ओर जिवरासिना मंदाता कावेल कीसेके मत्‍तुर.

![](https://cdn.door43.org/obs/jpg/360px/obs-en-08-02.jpg)

युसुपना तम्मुह्‍क ओन हय्‍साकोंदुर. बारित्‍ते ओरा बाबाल युसुपुन एक्‍को पावरम कियुंदुर. अचोने आयाका युसुप ओना तम्मुह्‍कुनपोर्रो अदिकार तकसंतोर इंचि युसुपुंक कला वासि मत्‍ता. युसुप ओना तम्मुह्‍कुनगा वातस्‍के ओर ओन दोर्कापीतुर. आनि दासुल्‍कुना व्यापारम कियानोर्कुंकु अम्मुकुत्‍तुर.

![](https://cdn.door43.org/obs/jpg/360px/obs-en-08-03.jpg)

लोन मल्‍सि वायाकामुन्‍ने युसुपुना तम्मुह्‍कु ओना अंगितुन हारहाचि दान एटिता नेत्‍तुरते नाह्तुर. बदो उंदि जिवरासि युसुपुन हव्‍कुता इंचि ओरा बाबान नम्मिचनाहाटीं ओर आ अंगितुन ओना बाबांक तच्‍चि हुपिस्‍तुर. याकोब अदुनहाटीं वेल्‍लेन नाराज आतोर.

![](https://cdn.door43.org/obs/jpg/360px/obs-en-08-04.jpg)

दासुल्‍कुना व्यापारम कियाना लोकुल्‍कु युसुपुन इजिप्‍त देसेम ओतुर. नील इनना बेरेटा ओड्डुनपोर्रो मनना ई इजिप्‍त देसेम पेद्देद आनि ताकतवार देसेम मत्‍ता. दासुल्‍कुना व्यापारम कियाना आ लोकुल्‍कु ई युसुपुन, दासुड आसि मननाहाटीं वेल्‍लेन सिरमंत मत्‍ता वरोर सरकारि मनकंक अम्मुतुर. अस्‍के युसुप ओना मालकुना बेस सेवा कीतोर. आनि पेन युसुपुंक आसिर्वाद हीता.

![](https://cdn.door43.org/obs/jpg/360px/obs-en-08-05.jpg)

मालकुना मुत्‍तो युसुपुनतोनि मींडाना कोसिस कीता, गानि पेनदा विरोदमते इसोंटा पापम किय्योन इत्‍तोर. दानहेंदाल मालकुना मुत्‍तो युसुपुनपोर्रो आबद्दम कसुर वाटसि ओन जेलने वाटा वेहता. युसुप जेलनेगुडा पेनदा विरोदमते होनाहिल्‍लोर. अदुनहाटीं पेन ओनकु आसिर्वाद हीता.

![](https://cdn.door43.org/obs/jpg/360px/obs-en-08-06.jpg)

युसुप बतले तप्‍पु कियाकोन्ना गानि रोंडु वर्सानाल जेलने मत्‍तोर. रोंड वर्साना पज्‍जो, उंदि नर्का पिरोन (इजिप्‍त देसेमता लोकुल्‍कु ओरा राजान इद पोरोलते केयुंदुर) पिरोन राजाल, रोंडु कलां हूळतोर, अवुनहेंदाल ओर वेल्‍लेन परेसान मत्‍तोर. ओना बोरे मंत्रि ओनकु आ कलाना अर्तम वेहा पर्राहिल्‍लुर.

![](https://cdn.door43.org/obs/jpg/360px/obs-en-08-07.jpg)

आ कलाना अर्तम वेहाना ताकत पेन युसुपुंक हीता. अदुनहाटीं पिरोन राजाल युसुपुन जेलनाल ओनगा केया वेहतोर. युसुप ओनकु आ कलाना अर्तम वेहचि ओन इल्‍हा इत्‍तोर, “एडुं वर्सनदाका बेस पंटां पंडतस्‍के, एडुं वर्साना पज्‍जो मर्रा एडुं वर्सानाहाटीं पेन कर्वु अरहंता,” इंचि वेहतोर.

![](https://cdn.door43.org/obs/jpg/360px/obs-en-08-08.jpg)

युसुपना पोल्‍लें केंजसि पिरोन राजाल इरगा कूस आतोर. आसि इजिप्‍त देसेमता रोंडो ताकतवार मनकल इंचि युसुपन पेरतोर.

![](https://cdn.door43.org/obs/jpg/360px/obs-en-08-09.jpg)

बेस पंटा पंडाना एडुं वर्साने वेल्‍लेन गाटो जमा कीसि इर्राना इंचि युसुप लोकुल्‍कुंक वेहतोर. पजा एडुं वर्सानाहाटीं कर्वु अर्तस्‍के युसुप आ गाटोतुन लोकुल्‍कुंक अम्मुतोर. दानहेंदाल लोकुल्‍कुंक तिनालय बतल तक्‍को होनाहिल्‍ले.

![](https://cdn.door43.org/obs/jpg/360px/obs-en-08-10.jpg)

आ कर्वु सिराप इजिप्‍त देसेमतेन अर्राहिल्‍ले, याकोब आनि युसुपना परिवार मनना कनान देसेमतेगुडा अरता.

![](https://cdn.door43.org/obs/jpg/360px/obs-en-08-11.jpg)

अदुनहाटीं याकोब ओना पेद्दा मर्कुन गाटो अस्‍सि तर्रानाहाटीं इजिप्‍त देसेम लोहतोर. गाटो अस्‍सालय ओर बस्‍के अय्ते युसुपना मुन्‍ने निलतुर, अस्‍के ओर युसुपुन एरपाट कियाहिल्‍लुर गानि युसुप ओर्कुन एरपाट कीतोर.

![](https://cdn.door43.org/obs/jpg/360px/obs-en-08-12.jpg)

ओरालोप्‍पो गोडचन्ना मार्पु वातना इंचि परमेरका कीसि हूळतोर. पजा युसुप ओर्कुन इल्‍हा इत्‍तोर, “मिमेट वेरियमट, नना मीवा तम्मुन आंदुन. नाकुन तकलिप कियाना उद्देसमते मिमेट नाकुन दासुड इंचि अमतिर. गानि पेन आ तकलिपतुन गुडा बेसताहाटीं वापर कीता. वटु, वासि इजिप्‍तते मंटु, नना मीवाहाटीं आनि मीवा परिवारतोरहाटीं गाटोता व्यवस्‍ता कींतन,” इत्‍तोर.

![](https://cdn.door43.org/obs/jpg/360px/obs-en-08-13.jpg)

युसुपना दादालोर लोन मल्‍सि वासि, युसुप इंकागुडा पिस्‍से मंतोर इंचि याकोबुंक वेहतस्‍के, याकोब इरगा कूस आतोर.

![](https://cdn.door43.org/obs/jpg/360px/obs-en-08-14.jpg)

याकोब वेल्‍लेन मातरल आतोर. अयना ओर ओना पूरा परिवारतुन पीकुंचि इजिप्‍त होंचि अग्‍गेन जेगा आतुर. याकोब हायाका मुन्‍ने ओर ओना अंटोर मर्कुंक आसिर्वाद हीतोर.

![](https://cdn.door43.org/obs/jpg/360px/obs-en-08-15.jpg)

पेन अब्राहामुंक हीता पोल्‍लें आनि करार अब्राहामुनाहेंदाल इसहाकुनपोर्रो, इसहाकुनाहेंदाल याकोबुनपोर्रो, याकोबुनहेंदाल ओना पन्नेंड मर्कु आनि ओरा परिवारकुनपोर्रो होत्‍ता. आ पन्नेंड मर्कुना वंसमतोर मुन्‍ने होंचि इस्राएलना पन्नेंड गोत्राल्‍कुनोर आतुर.

*उत्पत्ति अध्याय 37-50 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_08_192kbps.mp3

## 9. पेन मूसान केयंता

https://openbiblestories.org/l/gon-x-aheri/story-9/

![](https://cdn.door43.org/obs/jpg/360px/obs-en-09-01.jpg)

युसुप हासोत्‍तस्‍के ओना अंटोर जीवातोर, इजिप्‍त देसेमतेन जेगा पीतुर. ओर आनि ओरा वंसमतोर बच्‍चुंगो वर्सनदाका इजिप्‍त देसेमतेन मत्‍तुर. ओर वेल्‍लेन पिलाल्‍कुन कंतुर, ओर्कु इस्राएलतोर इंचि पोरोल अरता.

![](https://cdn.door43.org/obs/jpg/360px/obs-en-09-02.jpg)

दग्‍गेर-दग्‍गेरा नूर वर्सां आतस्‍के, इस्राएलतोर वेल्‍लेन आतुर. आनि युसुप माकु सहायम कियानाहाटीं वेल्‍लेन बेस कबाह्‍क कीतोर इंचि इजिप्‍त लोकुल्‍कु कूस मनाहिल्‍लुर. इस्राएल लोकुल्‍कु ओरकन्ना वेल्‍लेन आतुर इंचि ओर वेरियकुत्‍तुर. अदुनहाटीं अद कालमते इजिप्‍त देसेमते राज्येम कीसेके मत्‍ता पिरोन राजाल इस्राएल लोकुल्‍कुन इजिप्‍ततोरा दासुल्‍क कीतोर.

![](https://cdn.door43.org/obs/jpg/360px/obs-en-09-03.jpg)

इजिप्‍त लोकुल्‍कु, इस्राएल लोकुल्‍कुनाहेंदाल वेल्‍लेन बंगला आनि पेद्‍दे-पेद्‍दे सहरकु दोहा वेहतुर. आ कस्‍टाल्‍कुनाहेंदाल इस्राएल लोकुल्‍कुना पिस्वर वेल्‍लेन दुक्‍कमते अरता. गानि पेन ओर्कु आसिर्वाद हीता, अदुनहेंदाल ओर्कु इंका वेल्‍लेन पिलाल्‍क आतुर.

![](https://cdn.door43.org/obs/jpg/360px/obs-en-09-04.jpg)

इस्राएल लोकुल्‍कुंक वेल्‍लेन पिलाल्‍क आयानदुन पिरोन राजाल हूळतोर, अदुनहाटीं इस्राएल लोकुल्‍कुना मांडसा पिलाल्‍कुन नील बेरेटे पोहचि हव्‍कट इंचि ओर ओना इजिप्‍त लोकुल्‍कुंक आदेस हीतोर.

![](https://cdn.door43.org/obs/jpg/360px/obs-en-09-05.jpg)

उंदि इस्राएल मुरतळ, वरोर पेडन कंता. आ पेडन ओना तल्‍लुर-बाबो बच्‍चोनो मक्‍किचि इरतुर.

![](https://cdn.door43.org/obs/jpg/360px/obs-en-09-06.jpg)

आ पेडन इंका मुन्ने मक्‍किच्‍चि इर्रुड कुदुरो इंचि तल्‍लुर-बाबोंक अनपिस्‍तस्‍के, आ पेडन बल्‍हानना कापाळगोम इत्‍ता उद्देसमते, ओर आ पेडन तेलाना उंदि तट्टाते वाटसि, नील बेरेटे पोदाना नड्डुम इरतुर. आ पेडन बोरन्ना बतलन्ना कींतुरा बतला इंचि ओना पेद्दा अक्‍कल लक्‍कुटाल हूळसेके मत्‍ता.

![](https://cdn.door43.org/obs/jpg/360px/obs-en-09-07.jpg)

पिरोन राजाना मिय्यळ आ तट्टातुन हूळसि अव्टे बतल मंता इंचि माळकिसि हूळता. अव्टे दानकु पेडल दिसतोर अय्ते अद आ पेडन दाना मर्रि इंचि येतकुत्‍ता. आ पेडांक पालु उहानाहाटीं अद उंदि इस्राएल मुरतटुन इरता. अल्‍हा इर्राका मुन्‍ने, आ इरता मुरतळ आ पेडाना निजम तल्‍लुरा-आयोना इंचिगुडा परमेरका कीसि हूळा हिल्‍ले. आ पेडल पेद्दोड आतोर, ओनकु इंका तल्‍लुना पालुना अवसरम हिल्‍ले. अस्‍के अद ओन पिरोन राजाना मिय्यळकु वापस हीता. ओना पोरोल मूसाल.

![](https://cdn.door43.org/obs/jpg/360px/obs-en-09-08.jpg)

मूसाल पेद्दागा आतस्‍के, उंदि रोजु वरोर इजिप्‍त मनकल इंकावरोर इस्राएल मनकन तनानदुन हूळतोर. हूळसि ओर ओना दंटाता इस्राएल मनकन कापाळना कोसिस कीतोर.

![](https://cdn.door43.org/obs/jpg/360px/obs-en-09-09.jpg)

ओन बोरे हूळसेक हिल्‍लुर इंचि मूसांक अन्‍पिस्‍तस्‍के, ओर आ इजिप्‍त मनकन हव्‍किसि ओना सेत्‍तातुन बोंदा दोसतोर. गानि मूसाल कीतदुन बोरो हूळतोर.

![](https://cdn.door43.org/obs/jpg/360px/obs-en-09-10.jpg)

मूसाल हव्‍कतदुना बारेमते पिरोनुंक तेळियता, अस्‍के ओर मूसन हव्‍कालय हूळतोर, गानि मूसाल इजिप्‍त देसेमता केडाते पेय्‍सि वितुतोर. पिरोनुना सिपाइल्‍क ओन पह्‍का पर्राहिल्‍लुर.

![](https://cdn.door43.org/obs/jpg/360px/obs-en-09-11.jpg)

इजिप्‍तताल वेल्‍लेन लक्‍कुने मूसाल वरोर मेहानोनलेसीं पिस्‍सेके मत्‍तोर. अगा ओर उंदि मुरतटुन मरमि आतोर. अद इव्‍वुर मर्कुन कंता.

![](https://cdn.door43.org/obs/jpg/360px/obs-en-09-12.jpg)

मूसाल ओना मामाना गोर्रे मेहचेके मनुंदुर. उंदि रोजु, उंदि पोदा तळमि अंटसि पोतसंता गानि अद वेसि बूळ्‍दि आसेके हिल्‍ले, असोंटा पोदातुन मूसाल हूळतोर. अदुन दग्‍गेटाल हूळानाहाटीं मूसाल आ पोदाता दग्‍गेर्क होतोर. ओर पोदाक दग्‍गेरा होत्‍तस्‍के पेन ओन इल्‍हा इत्‍ता, “ए मूसा, नीवा काल्‍कुना हेरपुह्‍क तेंडा, निमे उंदि पवित्र जेगाते मंतिन,” इत्‍ता.

![](https://cdn.door43.org/obs/jpg/360px/obs-en-09-13.jpg)

पेन मर्रा इल्‍हा इत्‍ता, “नना नावा लोकुल्‍कुना दुक्‍कमतुन हूळतन. अदुनहाटीं, इस्राएल लोकुल्‍कुन गुलामगिरिताल पलाते पीसि वायानाहाटीं नना नीकुन पिरोनुनगा लोहंतन. अब्राहाम, इसहाक आनि याकोबुंक बद देसेम हींतन इंचि अय्ते नना पोल्‍ले हीतनो आ कनान देसेम ओर्कु नना हींतन.” इत्‍ता.

![](https://cdn.door43.org/obs/jpg/360px/obs-en-09-14.jpg)

अस्‍के, “नाकुन बोर लोहतोर इंचि लोकुल्‍कु जानकारि पूसकियानय्ते नना बतल वेहकन?” इंचि मूसाल इत्‍तोर, अस्‍के पेन, “नना बोन आंदुनो, ओने आंदुन, ‘ननाने आंदुन इनानोर’ नाकुन मिहगा लोहतोर,’ इंचि ओर्कु वेहा, ओर्कु इल्‍हागुडा वेहा गदा, ‘नना मीवा एनकटा अब्राहाम, इसहाक, याकोबना पेनदुन आंदुन,’ नावा पोरोल हमेसाताहाटीं मंता.”

![](https://cdn.door43.org/obs/jpg/360px/obs-en-09-15.jpg)

मूसाकुं पिरोनुनगा होनमळ पसंद मनाहिल्‍ले. ओर वेरियुंदुर. बारित्‍ते, ओनकु बेस वळकुमळ वायो इंचि मूसांकु अनपिच्‍चुंदु. अदुनहाटीं पेन ओना दंटाकु, ओना तम्मुर हारूनुन ओनकु सहायम कियालय लोहता.

*निर्गमन अध्याय 1-4 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_09_192kbps.mp3

## 10. पदि (10) तिप्‍पल्‍क

https://openbiblestories.org/l/gon-x-aheri/story-10/

![](https://cdn.door43.org/obs/jpg/360px/obs-en-10-01.jpg)

पिरोन राजाल हेक्‍कड आंतोर इंचि पेन मूसाल आनि हारूनुंकु वेहचि मत्‍ता. पजा ओर पिरोनुनगा होंचि, “नावा लोकुल्‍कुन होनाहीम इंचि, इस्राएलतोरा पेन वेहंता,” इंचि इत्‍तुर. गानि पिरोन ओरा पोल्‍ले केंजा हिल्‍लोर. उलटा इस्राएल लोकुल्‍कुन होना हियाकोंटा इरसि ओर्कु इंका एक्‍को कस्‍टम कियालय वेहतोर.

![](https://cdn.door43.org/obs/jpg/360px/obs-en-10-02.jpg)

इस्राएल लोकुल्‍कुन बस्‍के होळसा इनिनागानि पिरोन ओर्कुन होळसोन इनुंदुर. अदुनहाटीं पेन इजिप्‍त देसेमतोरपोर्रो पदि कतरनाक तिप्‍पल्‍क लोहता. आ तिप्‍पल्‍क लोहचि पेन पिरोनुंक हुपिस्‍ता गदा, इस्राएलतोरा पेन इजिप्‍ततोरा पेनकुंकन्ना एक्‍को ताकतवार मंता इंचि.

![](https://cdn.door43.org/obs/jpg/360px/obs-en-10-03.jpg)

नील बेरेटुन पेन नेत्‍तुरते मारियागोटता. अयनागानि पिरोन इस्राएल लोकुल्‍कुन होना हियाहिल्‍लोर.

![](https://cdn.door43.org/obs/jpg/360px/obs-en-10-04.jpg)

पूरा इजिप्‍त देसेमते पेन पन्नेन लोहता. आ पन्नेन ओरागटाल लक्‍कु कियानाहाटीं पिरोन मूसांक विनंति कीतोर. गानि अन्नि पन्नें हासोत्‍तस्‍के पिरोन मर्रा ओना मनसुन हेक्‍कड कीकुत्‍तोर. आनि इस्राएलतोर्कुन ओरा देसेम पेय्‍सि होना हियाहिल्‍लोर.

![](https://cdn.door43.org/obs/jpg/360px/obs-en-10-05.jpg)

अदुनहाटीं पेन कुटकिना तिप्‍पलतुन लोहता. दाना पज्‍जो नुल्‍लेना तिप्‍पलतुन लोहता. अस्‍के पिरोन मूसान आनि हारूनुन केयसि, ‘ई तिप्‍पल्‍कुन आपानय्ते इस्राएलतोर इजिप्‍त देसेमतुन होळसि होना परांतुर,’ इंचि ओर्कुन इत्‍तोर. मूसाल पारतना कीतस्‍के पेन नुल्‍लेना तिप्‍पलतुन होनागोटता. गानि पिरोन मात्रम ओना मनसुन मर्रा हेक्‍कड कीसि, इस्राएलतोर्कुन अगटाल पेय्‍सि होना हियाहिल्‍लोर.

![](https://cdn.door43.org/obs/jpg/360px/obs-en-10-06.jpg)

पजा, पेन इजिप्‍त देसेमतोरा अन्नि जिवरासिन रोगम वायागोटसि हासि होनागोटता. गानि पिरोन मात्रम ओना मनसुन हेक्‍कड कीसि, ओर इस्राएलतोर्कुन पेय्‍सि होना हियाहिल्‍लोर.

![](https://cdn.door43.org/obs/jpg/360px/obs-en-10-07.jpg)

पजा पिरोनुना मुन्ने वळिते बूळ्‍दि विसरालय पेन मूसांक वेहता. मूसाल पेन वेहताप कीतस्‍के, इजिप्‍त देसेमता अंटोर लोकुल्‍कुना मेंदुलपोर्रो वेल्‍लेन बादा आयानसोंटा पुनकु आतां, गानि इस्राएलतोर्कुंक मात्रम बतले आयाहिल्‍ले. पेन पिरोनुना मनसुन हेक्‍कड कीसि इरता, आनि पिरोन बारे इस्राएलतोर्कुन पेय्‍सि होना हियाहिल्‍लोर.

![](https://cdn.door43.org/obs/jpg/360px/obs-en-10-08.jpg)

पजा पेन इरगा बंडां अराहचि इजिप्‍त देसेमतोरा वेल्‍लेन पंटातुन नासडेम कीता आनि बोर अय्ते अव्टेटाल पलाते अरतुर ओर्कुन हव्‍किसि पोहता. अस्‍के पिरोन मूसान आनि हारूनुन केय्‍सि इल्‍हा इत्‍तोर, “नना पापम कीतन, मिमेट होना पर्रांतिर,” इंचि इत्‍तोर. पजा मूसाल पारतना कीतस्‍के, मब्‍बुनाल बंडां अरमळ आगिसोत्‍ता.

![](https://cdn.door43.org/obs/jpg/360px/obs-en-10-09.jpg)

गानि पिरोन मर्रा पापम कीसि, ओना मनसुन हेक्‍कड कीकुत्‍तोर. ओर इस्राएल लोकुल्‍कुन पेय्‍सि होना हियाहिल्‍लोर.

![](https://cdn.door43.org/obs/jpg/360px/obs-en-10-10.jpg)

पजा पेन इजिप्‍त देसेमते गोल्‍लाबामाना मंदान लोहता. अव वासि बंडां अरतस्‍के नासडेम आयवा पंटातुन तिंचि नासडेम कीतां.

![](https://cdn.door43.org/obs/jpg/360px/obs-en-10-11.jpg)

पजा पेन मूड रोजकुनदाका हिर्रू हीकट कीसि इरता. आ हीकट इच्‍चोन कतरनाक मत्‍ता गदा, मूड रोजकुनदाका इजिप्‍त लोकुल्‍कु ओरा लोह्‍कुनाल पलाते पेय्‍सा पर्राहिल्‍लुर. गानि इस्राएल लोकुल्‍कु मत्‍तागा मात्रम वेल्‍गु मत्‍ता.

![](https://cdn.door43.org/obs/jpg/360px/obs-en-10-12.jpg)

ई तोम्मिदि (9) तिप्‍पल्‍क वासि होनिनागानि पिरोन मात्रम इस्राएलतोर्कुन पेय्‍सि होना हियाहिल्‍लोर. बारित्‍ते पिरोन बच्‍चोन वेहिनागानि केंजाहिल्‍लोर. अदुनहाटीं पेन इंकुंदि आकिर तिप्पलतुन लोहना पिलान कीता. आ पिलान पिरोनुना मनसुन मारियागोटंता.

*निर्गमन अध्याय 5-10 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_10_192kbps.mp3

## 11. दाटसि होनना पंडुगु

https://openbiblestories.org/l/gon-x-aheri/story-11/

![](https://cdn.door43.org/obs/jpg/360px/obs-en-11-01.jpg)

इस्राएल लोकुल्‍कुन होनाहीम इंचि वेहालय पेन मूसान आनि हारूनुन पिरोनुनगा लोहता. ओर होंचि, ‘निमे इस्राएल लोकुल्‍कुन होना हियाकोंटे इजिप्‍त देसेमता लोकुल्‍कुना आनि ओरा जिवरासिना तोल्‍सूर पुटतदुन पेन हव्‍कंता,’ इंचि ओनकु वेर्रे वेहतुर. अल्‍हा वेहिनागानि ओर पेनदापोर्रो विस्वासम इर्रा हिल्‍लोर, ओरा पोल्‍ले केंजा हिल्‍लोर.

![](https://cdn.door43.org/obs/jpg/360px/obs-en-11-02.jpg)

पेन दानापोर्रो विस्वासम इर्रानोर ओर बोरे आयिर ओरा तोल्‍सूर पुटतोन कापाळनाहाटीं उंदि उपायम कीता. दानहाटीं हरेक परिवारतोर दोसेम हिलुवा उंदि गोर्रेतुन बलि हियाना मत्‍ता.

![](https://cdn.door43.org/obs/jpg/360px/obs-en-11-03.jpg)

आ बलि हीता गोर्रेता नेत्‍तुरतुन ओरा लोह्‍कुना दारसाकांकु होकाना इंचि पेन इस्राएल लोकुल्‍कुंक वेहता. इंका आ गोर्रेता हव्‍वितुन बोळसि पुल्‍लगा आयवा पिंडिता हारिनतोनि तिनना मत्‍ता. पजा ओरा तिनुड आतस्‍के इजिप्‍त होळसि होननाहाटींगुडा तयार मनालय वेहता.

![](https://cdn.door43.org/obs/jpg/360px/obs-en-11-04.jpg)

पेन बल्‍हा अय्ते कियालय आदेस हीतानो अल्‍हेन इस्राएल लोकुल्‍कुगुडा बोत्‍तिगा तयारिं कीतुर. नडजाम नर्का आतस्‍के, पेन हरेक तोलसूर मर्रिन हव्‍कसेके इजिप्‍तता नड्डुमताल पेय्‍सि होत्‍ता.

![](https://cdn.door43.org/obs/jpg/360px/obs-en-11-05.jpg)

इस्राएल लोकुल्‍कुना हरेक लोता गलमाकु नेत्‍तुर होकिसि मत्‍ता, अदुनहाटीं पेन ओरा लोह्‍कुन होळसीता. ओरा लोह्‍कुना लोप्‍पो मत्‍तोर्कु बोर्के बतले आयाहिल्‍ले. गोर्रे नेत्‍तुर होकताहेंदाल ओर पिस्‍तुर.

![](https://cdn.door43.org/obs/jpg/360px/obs-en-11-06.jpg)

गानि इजिप्‍त लोकुल्‍क मात्रम पेनदापोर्रो विस्वासम कियाहिल्‍लुर, दाना आदेसकुन परकारम ताका हिल्‍लुर. अदुनहाटीं पेन ओरा लोह्‍कुन होळसा हिल्‍ले, ओरा हरेक लोता तोल्‍सूर मर्रिन पेन हव्‍कुता.

![](https://cdn.door43.org/obs/jpg/360px/obs-en-11-07.jpg)

जेलने मत्‍ता कैदिल्‍कुना तोल्‍सूर मर्कुनगटाल अय्ते, पिरोनुना तोल्‍सूर मर्रिनदाका, हरेक तोल्‍सूर मर्रि हासोत्‍तोर. वेल्‍ले बादा अन्‍पिच्‍चि इजिप्‍त लोकुल्‍कु इरगा अळसेके, मोत्‍कुंचेके मत्‍तुर.

![](https://cdn.door43.org/obs/jpg/360px/obs-en-11-08.jpg)

अदे नर्का, मूसान आनि हारूनुन पिरोन केयतोर. केय्‍सि, “इस्राएल लोकुल्‍कुन पीसि इजिप्‍तताल बिराना पेय्‍सि होंटु,” इंचि इत्‍तोर. इजिप्‍त लोकुल्‍कुगुडा इस्राएल लोकुल्‍कुन बिराना पेय्‍सि होनालय विनंति कीतुर.

*निर्गमन अध्याय 11:1-12:32 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_11_192kbps.mp3

## 12. पेय्‍सि होनमळ

https://openbiblestories.org/l/gon-x-aheri/story-12/

![](https://cdn.door43.org/obs/jpg/360px/obs-en-12-01.jpg)

इस्राएल लोकुल्‍कु इजिप्‍त देसेमताल पलाते पेय्‍सि इरगेन कूस मत्‍तुर. ओर इंदके दासुल्‍क आयुर, पेन ओर्कु पोल्‍ले हीसि हींतन इत्‍ता देसेमताहेके ओर होनालय दल्‍गतुर. इस्राएल लोकुल्‍क तल्‍कता अन्निगुडा इजिप्‍त लोकुल्‍कु ओर्कु हीतुर. एंडि-बंगाराल्‍क आनि एक्‍को दराता वेल्‍ले वस्‍तुल्‍कगुडा हीतुर. वेरे देसेल्‍कुना इच्‍चुर लोकुल्‍कुगुडा पेनदापोर्रो बरोसा कीतुर. इस्राएल लोकुल्‍कु इजिप्‍त देसेमताल पेय्‍सि होनालय दल्‍गतस्‍के ओरगुडा इस्राएल लोकुल्‍कुनतोनि होनालय पेय्‍सतुर.

![](https://cdn.door43.org/obs/jpg/360px/obs-en-12-02.jpg)

पोद्दाला वेलाते मब्‍बु तेर्पेता उंदि पेद्दा कंबा ओरा मुन्ने-मुन्ने ताकुंदु. आनि नर्कडकु अद तळमिता कंबा आयुंदु. पेन आ मब्‍बु तेर्पेता कंबाते आनि तळमिता कंबाते मंचेके बस्‍केळ्‍क ओरातोने मनुंदु. ओरा पय्‍नेमते ओरा मुन्ने अर्रुंदु. ओर्कु सिराप पेनदा पज्‍जो ताकाना कबळे मत्‍ता.

![](https://cdn.door43.org/obs/jpg/360px/obs-en-12-03.jpg)

कोद्दि सेप आतस्‍के, पिरोन आनि ओना लोकुल्‍कु ओरा मनसु मार्सकुत्‍तुर. मर्रा ओर इस्राएल लोकुल्‍कुन ओरा दासुल्‍क कियाना विचारम कीतुर. अदुनहाटीं ओर इस्राएल लोकुल्‍कुना पज्‍जो होत्‍तुर. ओरा मनसुनगुडा पेने मार्सस्‍ता. पेन अल्‍हा बारि कीता इत्‍ते, पिरोन आनि ओरा अन्नि पेनकुंकन्ना यहोवा पेन वेल्‍लेन ताकतवार मंता इत्‍ता पोल्‍ले हरेक मनकंक तोळियगोम इंचि पेनदा इच्‍चा मत्‍ता.

![](https://cdn.door43.org/obs/jpg/360px/obs-en-12-04.jpg)

इजिप्‍त सिपाइल्‍क वायानद इस्राएल लोकुल्‍क हूळतुर. हूळसि, ‘मनम इंदके पिरोनुना सिपाइल्‍क आनि एर्रा समुद्रम नड्डुम हिर्कतोम,’ इंचि ओर्क अनपिस्‍ता. ओर इरगा वेरियकुत्‍तुर. “मनम इजिप्‍त बारि होळसि वातोम? मनम इंदके हांतोम,” इंचि अळालय दल्‍गतुर.

![](https://cdn.door43.org/obs/jpg/360px/obs-en-12-05.jpg)

अस्‍के मूसाल इस्राएल लोकुल्‍कुन इल्‍हा इत्‍तोर, “वेरियमट! इय्याला मीवाहाटीं पेन लडाइ कीसि मीकुन कापाळंता,” इत्‍तोर. पजा पेन मूसान, “ई लोकुल्‍कुन एर्रा समुद्रमताहेके मुन्नेळ्‍क होनालय वेहा,” इंचि इत्‍ता.

![](https://cdn.door43.org/obs/jpg/360px/obs-en-12-06.jpg)

अस्‍के पेन, इजिप्‍त सिपाइल्‍क, इस्राएल लोकुल्‍कुन हूळामन्नि इंचि, आ मब्‍बु तेर्पेता कंबातुन इस्राएल लोकुल्‍क आनि इजिप्‍त सिपाइल्‍कुना नड्डुम इरता.

![](https://cdn.door43.org/obs/jpg/360px/obs-en-12-07.jpg)

‘समुद्रमपोर्रो नीवा कय हहा,’ इंचि पेन मूसान इत्‍ता. पजा पेन वळितोनि समुद्रमता एतुन, डेमेर्गु सगोम, तिनेर्ग सगोम कीता. दानहेंदाल समुद्रमताल होनालय उंदि हर्रि तयार आता.

![](https://cdn.door43.org/obs/jpg/360px/obs-en-12-08.jpg)

इस्राएल लोकुल्‍कु ओरा रोंडु बाजकुने एता गूरेनाल वत्‍तुता बूमिपोर्रो, समुद्रमताल ताकसेके मुन्नेळ्‍क होनालय दल्‍गतुर.

![](https://cdn.door43.org/obs/jpg/360px/obs-en-12-09.jpg)

पजा, इजिप्‍त सिपाइल्‍क, इस्राएल लोकुल्‍क पेय्‍सि होनानद हूळगोम इंचि, पेन आ मब्‍बु तेर्पेता कंबातुन अगटाल तेंडता. इस्राएल लोकुल्‍कुन दोर्का पियागोम इंचि इजिप्‍त सिपाइल्‍क निरनायम कीतुर.

![](https://cdn.door43.org/obs/jpg/360px/obs-en-12-10.jpg)

कीसि, समुद्रम नड्डुमताल ओर होत्‍ता हर्रि पीसि इस्राएल लोकुल्‍कुना पज्‍जो इजिप्‍त सिपाइल्‍क होत्‍तुर. गानि पेन ओरा रताल्‍कुन नड्डुम हिरकिच्‍चि, ओर्कुन वेराहता. अस्‍के ओर, “इगेटाल पजोळ्‍क वितट रो! इस्राएल लोकुल्‍कुनाहेंदाल पेन लडाइ कीसंता,” इत्‍तुर.

![](https://cdn.door43.org/obs/jpg/360px/obs-en-12-11.jpg)

अंटोर इस्राएल लोकुल्‍कु समुद्रमता हब्‍बेटा ओड्डुंक एव्तुर. अस्‍के पेन मूसान मर्रा, ‘निमे एतापोर्रो मर्रा कय हहा,’ इत्‍ता. मूसाल अल्‍हा कीतस्‍के एर इजिप्‍त सिपाइल्‍कुनपोर्रो अरसि, ओर अव्टेन मुळगिसि होत्‍तुर. समुद्रम बल्‍हा मत्‍तद अल्‍हेन आता.

![](https://cdn.door43.org/obs/jpg/360px/obs-en-12-12.jpg)

इजिप्‍त सिपाइल्‍क अंटोर हासोत्‍तद, इस्राएल लोकुल्‍कु हूळसि ओर पेनदुन विस्वासम कीतुर. इंका मूसाल पेनदाहेंदाल वाता कबुरतोर आंदुर इंचिगुडा ओर विस्वासम कीतुर.

![](https://cdn.door43.org/obs/jpg/360px/obs-en-12-13.jpg)

पेन इस्राएल लोकुल्‍कुन हामुरताल आनि गुलामगिरिताल कापाळता इंचि ओर इरगा कूस मत्‍तुर. इंदके ओर पेनदा आरादना कियालय आनि पेन वेहताप ताकालय पिरि आतुर. इस्राएल लोकुल्‍कु गुलामगिरिताल पलाते अर्ता कुसिते पंडुगु कियानाहाटीं आनि पेनदा स्‍तुति कियानाहाटी बच्‍चुंगो पाटां पारतुर. बारित्‍ते पेन ओर्कुन इजिप्‍त सिपाइल्‍कुनाल कापाळता.

![](https://cdn.door43.org/obs/jpg/360px/obs-en-12-14.jpg)

पेन बल्‍हा इजिप्‍ततोर्कुन ओळागोटता आनि इस्राएल लोकुल्‍कुन ओरा गुलामगिरिताल पलाते पेचाह्ता? इदुन मति कियानाहाटीं पेन इस्राएल लोकुल्‍कुन एडादिक उंदि मल्‍का उंदि पंडुगु कियालय आदेस हीता. आ पंडुगुन दाटसि होनना पंडुगु इंतुर. आ पंडुगु कियानाहाटीं ओर उंदि मंचि गोर्रेतुन बलि हीसि, दान बेस बोळसि, पुल्‍लगा आयवा पिंडिता हारिनतोनि दान तिनना मत्‍ता.

*निर्गमन अध्याय 12:33-15:21 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_12_192kbps.mp3

## 13. इस्राएलतोरतोनि पेनदा करार

https://openbiblestories.org/l/gon-x-aheri/story-13/

![](https://cdn.door43.org/obs/jpg/360px/obs-en-13-01.jpg)

इस्राएल लोकुल्‍कुन पेन एर्रा समुद्रम दाटिस्‍ता पजा, अद ओर्कुन केडा हर्रिपीसि सिनाइ इनना गुट्‍टाहेके ओता. मूसाल बद गुट्टापोर्रो अय्ते पोत्‍ताना पोदातुन हूळतोरो, अद इदे गुट्टा आंद. आ लोकुल्‍कु अद गुट्‍टा हिळु ओरा डेरां निल्‍हातुर.

![](https://cdn.door43.org/obs/jpg/360px/obs-en-13-02.jpg)

पजा मूसल आनि इस्राएल लोकुल्‍कुन पेन इल्‍हा इत्‍ता, “मिमेट बस्‍केळ्‍क नना वेहता पोल्‍लेनपोर्रो ताकाना आनि नना मीतोनि कियाना करारतुन हमेसा पीसि मनागोम. ओक्‍कला मिमेट नना वेहताप कियानय्ते, मिमेट नाहाटीं इनामते हियाना विलुवाता दनम, पेर्मालोरा राज्येम आनि उंदि पवित्र जातितोर आकिर,” इत्‍ता.

![](https://cdn.door43.org/obs/jpg/360px/obs-en-13-03.jpg)

पेनदाहेंदाल ओरा दग्‍गेरा वायालय इस्राएल लोकुल्‍कु मूड रोजकुनदाका सतातुन तयार कीतुर. अस्‍के पेन सिनाइ गुट्टाता कोस्‍सा कोड्डिपोर्रो हिळु रेय्ता. अद रेय्तस्‍के, बूकंपाल्‍क आतां, जगाजगा मेर्समळ जर्गता, इरगा पोयां पेय्‍सतां आनि वेल्‍लेन पेद्दा आवाजते तूरिलाता लेंग केंजावाता. अस्‍के मूसाल कुद्दु आ गुट्‍टापोर्रो एक्‍किसि होत्‍तोर.

![](https://cdn.door43.org/obs/jpg/360px/obs-en-13-04.jpg)

अस्‍के पेन लोकुल्‍कुनतोनि उंदि करार कीता. अद इत्‍ता, “नना मीवा पेन, यहोवान आंदुन. ननाने मीकुन इजिप्‍तता गुलामगिरिताल पेचाहतन. मिमेट वेरे बदे पेनदुन मोळमटु.”

![](https://cdn.door43.org/obs/jpg/360px/obs-en-13-05.jpg)

“बोम्मां कियमटु आनि अवुन मोळ्‍कमटु, बारित्‍ते, नना यहोवान, ननाने मीवा पेनदुन आंदुन. तप्‍पुड तरिकाते मिमेट नावा पोरोलता उपयोग कियमट. नोमकेम रोजुन पवित्र इर्रालय मति मर्गमटु. इत्‍ते, हारूं रोजकु मिमेट मीवा अन्नि कबाह्‍क कीम्टु, एडुंगो रोजु आराम कियानद आनि नावा मति कियाना रोजु आंदु.”

![](https://cdn.door43.org/obs/jpg/360px/obs-en-13-06.jpg)

“मिमेट मीवा तल्‍लुर-बाबोना कदर कीम्टु. बोर्कुन हव्‍कमटु. व्यबिचारम कियमटु, दोंगातनम कियमटु, मीवा पक्‍का लोतोना मुत्‍तो आयि, ओना लोन आयि हिलाकोंटे इंका बदे सामान आयि, येतकुनालय आसे पडमटु.”

![](https://cdn.door43.org/obs/jpg/360px/obs-en-13-07.jpg)

ई पदि आदेसकुन पेन उंदि बंडापोर्रो रोंड बाजकुने रासि मूसांक हीता. लोकुल्‍कु पीसि ताकानाहाटीं पेन इंका वेरे वेल्‍लेन नियमाल्‍क ओर्क हीता. ओक्‍कला लोकुल्‍कु पेन हीता आ नियमाल्‍कुन बरोबर पीसि ताकानय्ते अद ओर्क आसिर्वाद हीसि, ओर्कु बतले आयाकोंटा कापाळंतन इंचि पेन ओर्कु पोल्‍ले हीता. गानि ओक्‍कला ओर नना वेहताप ताकाकोंटे ओर्कु नना सिक्‍सा हींतन, इंचि वेहता.

![](https://cdn.door43.org/obs/jpg/360px/obs-en-13-08.jpg)

इस्राएल लोकुल्‍कुन उंदि पेद्दा डेरा निल्‍हाट इंचि पेन वेहता, दान कलियाना डेरा इंतुर. आ डेरातुन बल्‍हा निल्‍हाना? अदुनालोप्‍पो बव वस्‍तुकुन इर्राना? इल्‍हा अन्नि पोल्‍लें पेन ओर्कु बरोबर वेहता. आ डेरातुन रोंड अर्रां कियालय उंदि पेद्दा परदा तयार कियानाहाटींगुडा पेन ओर्क वेहता. पेन आ डेराता पज्‍जोटा परदाते वासि अगा मनंता. बगाय्ते पेन वासि मनंता, अगा सिराप पेद्दा पेर्माले होना परांतोर.

![](https://cdn.door43.org/obs/jpg/360px/obs-en-13-09.jpg)

ओर लोकुल्‍कुंक आ कलियाना डेराता मुन्‍ने उंदि गद्‍दे तयार कियापींता. पेनदा अपमानम कियानोर बोरे आयिर, ओर उंदि जिवरासितुन आ गद्‍देतगा पीसि वायगोम. अस्‍के पेर्मल अदुन बलि हीसि आ गद्दे पोर्रो पेनदुक बलि इंचि अदुन बोळ्‍सानुर. आ जिवरासिता नेत्‍तुर आ मनकना पापाल्‍कुन मुच्‍चंता इंचि पेन वेहता. इल्‍हा, पेन मर्रा आ पापमतुन हूळो. अस्‍के आ मनकल पेनदा नदरते “सुद्द” इनमळ जर्गंता. मूसाना दादाल हारूनुन आनि ओना वंसमतोर्कुन पेन दाना पेर्मल आयानाहाटीं पेरकुत्‍ता.

![](https://cdn.door43.org/obs/jpg/360px/obs-en-13-10.jpg)

पेन आ लोकुल्‍कुंक हीता नियमकुना पालन कियालय ओर ओप्‍कुत्‍तुर. ओर सिराप पेनदा लोकुल्‍के आसि मननाहाटीं आनि दानदे आरादना कियानाहाटीं तयार आतुर.

![](https://cdn.door43.org/obs/jpg/360px/obs-en-13-11.jpg)

बच्‍चुंगो रोजकुनदाका मूसाल सिनाइ गुट्टापोर्रेन मत्‍तोर. ओर पेनतोनि वळ्‍कसेके मत्‍तोर. गानि लोकुल्‍कु मात्रम मूसाना एदुर हूळसि-हूळसि लंडुंक हेळतुर. अदुनहाटीं ओर हारूननगा बंगारम पीसि वासि उंदि बोम्मा किया वेहतुर. बारित्‍ते बोम्मा तयार आतास्‍के ओर्क अंटोर्क पेनदुन होळसि आ बोम्मातुन मोळ्‍काना मत्‍ता. इल्‍हा ओर लोकुल्‍कु पेनदा विरोदमते पेद्दा पापम कीतुर.

![](https://cdn.door43.org/obs/jpg/360px/obs-en-13-12.jpg)

हारून बंगारमतोनि कुर्रा रूपमते उंदि बोम्मा तयार कीतोर. लोकुल्‍क आ बोम्माकु मोळ्‍कमळ सुरुव कीतुर. दाना मुन्ने बलिं हियमळ सुरुव कीतुर. ओर पापम कीताहाटीं पेन ओरपोर्रो वेल्‍लेन होंगुक वाता. पेन ओर्कुन नासडेम कियाना विचारम कीता. गानि मूसाल ओर्कुन हव्‍कामनि इंचि पेनदुक विनंति कीतोर. पेन ओना विनंतितुन केंजसि ओर्कुन नासडेम कियाहिल्‍ले.

![](https://cdn.door43.org/obs/jpg/360px/obs-en-13-13.jpg)

आकिरते मूसाल सिनाइ गुट्‍टापोर्रोटाल हिळु रेय्‍सि वातोर. पेन बव बंडाना पाटिनपोर्रो अय्ते पदि आदेसकु रासता आ बंडाना पाटिन पीकुंचि ओर वातोर. पजा ओर आ बोम्मातुन हूळतोर. हूळसि ओन्‍कु इरगा होंग वाता. आ होंगुने ओर तत्‍ता आ पाटिन पय्‍हाचि तुकडां-तुकडां कीतोर.

![](https://cdn.door43.org/obs/jpg/360px/obs-en-13-14.jpg)

पजा आ बोम्मातुन पय्‍हाचि दुब्‍बा कीतोर आनि आ दुब्‍बातुन एते कल्‍पिसी आ एतुन आ लोकुल्‍कुंक उहातोर. पेन ओरपोर्रो उंदि गत्‍तरा लोहता, दानहेंदाल ओराव्टेटाल वेल्‍लेन लोकुल्‍क हातुर.

![](https://cdn.door43.org/obs/jpg/360px/obs-en-13-15.jpg)

बव पाटिन अय्ते मूसाल पय्‍हातोरो अवुना जेगाते आ पदि आदेस रासि मत्‍ता बंडाना पाटिनसोंटवे पाटिं तयार कीतोर. पजा ओर मर्रा गुट्टापोर्रो एकतोर. अगा होंचि पेन ओर्कुन मापि किय्यिकांटी इंचि पेनदुक पारतना कितोर. पेन मूसाना पारतना केंजसि ओर्कुन मापि कीता. पूना पाटिनपोर्रो पदि आदेस रासकुंचि मूसाल गुट्टापोर्रोटाल हिळु रेय्‍सि वातोर. अस्‍के सिनाइ गुट्टातगटाल अय्ते पेन हींतन इत्‍ता देसेमदाका होनालय पेन इस्राएल लोकुल्‍कुना मुन्ने ताकता.

*निर्गमन अध्याय 19-34 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_13_192kbps.mp3

## 14. केडाते तिरियमळ

https://openbiblestories.org/l/gon-x-aheri/story-14/

![](https://cdn.door43.org/obs/jpg/360px/obs-en-14-01.jpg)

पेन कीता करार परकारम बव नियमकुना पालन अय्ते इस्राएल लोकुल्‍क कियाना मत्‍तानो, अवुन पेन ओर्कु वेहामळ महाता. मर्रा पेन सिनाइ गुट्‍टातगटाल मुन्नेळ्‍क होनालय ओरा मुन्ने ताकता. पेन ओर्क हींतन इत्‍ता देसेमते अद ओर्कुन होयाना विचारमते मत्‍ता. आ देसेमतुन कनान इंचिगुडा इंतुर. मब्‍बुना कंबाते पेन ओरा मुन्ने-मुन्ने ताकसेके मत्‍ता आनि ओर दाना पज्‍जो-पज्‍जो ताकसेके मत्‍तुर.

![](https://cdn.door43.org/obs/jpg/360px/obs-en-14-02.jpg)

पेन अब्राहाम, इसाक, याकोबुनतोनि, अद ओरा वंसमतोर्क हींतन इत्‍ता देसेमतुन ओर्क हींतन इंचि पोल्‍ले हीसि मत्‍ता, गानि अद वेलाते अगा वेल्‍लेन जातिना लोकुल्‍कु मनुंदुर. ओर्कुन कनानि इंचि इनुंदुर. आ कनानि लोकुल्‍क पेनदा आरादना कियाकोंदुर आनि दाना आदेसकुना पालनगुडा कियाकोंदुर. ओर आबद्दम पेनकुना पूजा कीसेके वेल्‍लेन कराब कबाह्‍क कियुंदुर.

![](https://cdn.door43.org/obs/jpg/360px/obs-en-14-03.jpg)

पेन इस्राएल लोकुल्‍कुन इल्‍हा इत्‍ता, “मिमेट मीकु दोर्कना देसेमते होत्‍तास्‍के अगाटा अंटोर कनानि लोकुल्‍कुनाल मुक्‍ति दोर्किच्‍कुंटु. ओरतोनि हेळमि कल्‍पकुनमट आनि ओरतोनि मरमिंगुडा आयमट. ओरा अन्नि बोम्मान मिमेट नासडेम कीसि पोहाटु. मिमेट नना वेहता आदेसकुना पालन कियाकोंटे मिमेटगुडा ओरा पेनकुने मोळ्‍कालय दल्‍गंतिर."

![](https://cdn.door43.org/obs/jpg/360px/obs-en-14-04.jpg)

बस्‍के अय्ते इस्राएल लोकुल्‍कु कनान देसेमता सर्दुनगा एव्तुर, अस्‍के मूसाल इस्राएल लोकुल्‍कुना हरेक गोत्रताल वरोर-वरोर इल्‍हा पन्नेंड मंदि मांडसातुन पेरतोर. पजा ओर्कुन, “मिमेट होंचि अद देसेम बसंटदो, अगाटा कनानि लोकुल्‍कु ताकतवार का मरि लंडोर्का? हूळसि वटु,” इंचि लोहतोर.

![](https://cdn.door43.org/obs/jpg/360px/obs-en-14-05.jpg)

आ पन्नेंड मंदि मांडसा मनकालोर पूरा कनान देसेमते नल्‍पै रोजकु तिरियसि मल्‍सि वातुर. वासि ओर लोकुल्‍कुंक इल्‍हा वेहतुर, “अद देसेम वेल्‍लेन बेस मंता अगा इरगा पंटा पंडंता.” गानि पदि मंदि बारे, “अद देसेम वेल्‍लेन गट्टिगा मंता, अगाटा लोकुल्‍क एत्‍तुंक-एत्‍तु मंतुर. ओक्‍कला मनम ओरतोनि लडाइ कियानय्ते तप्‍पाकोंटा ओळांतोम, अस्‍के ओर मनाकुन हव्‍कांतुर.” इंचि इत्‍तुर.

![](https://cdn.door43.org/obs/jpg/360px/obs-en-14-06.jpg)

होंचि वातोराव्टेटाल कालेब, यहोसु आनि इंकिव्‍वुर अस्‍केन इल्‍हा इत्‍तुर, “हाँ, कनान देसेमता लोकुल्‍कु निजमे एत्‍तुंक एत्‍तु, ताकतवार मंतुर, गानि मनम ओर्कुन गेल्‍सा परांतोम, पेन मनाहाटीं ओरतोनि लडाइ कींता.” इत्‍तुर.

![](https://cdn.door43.org/obs/jpg/360px/obs-en-14-07.jpg)

गानि लोकुल्‍क मात्रम कालेब, येहोशुना पोल्‍ले केंजाहिल्‍लुर. ओर मूसाल आनि हारूनुनपोर्रो होंगुक वासि इल्‍हा इत्‍तुर, “मिमेट माकुन इसोंटा कतरनाक जेगाते बारि पीसि वातिर? मनम इजिप्‍ततेन मनना मत्‍ता. मनम अद देसेमते होनानय्ते लडाइते हासि दांतोम, आ कनानि लोकुल्‍कु मना मुत्‍तोह्‍कुन, पिलाल्‍कुन ओरा दासुल्‍क कीकुंतुर." इत्‍तुर. आ लोकुल्‍क ओर्कुन इजिप्‍त देसेमते वापस ओयानाहाटीं वेरे इंकावरोन पेर्राना विचारमते मत्‍तुर.

![](https://cdn.door43.org/obs/jpg/360px/obs-en-14-08.jpg)

बस्‍के अय्ते आ लोकुल्‍क अल्‍हा इत्‍तुर, अस्‍के पेनदुक ओरपोर्रो इरगा होंग वाता. अद कलियाना डेराते वासि इल्‍हा इत्‍ता, “मिमेट ना विरोदमते निरनायम कीतिट, अदुनहाटीं मिमेट अंटोर इद केडाते तिरियमळ गावाले. इरवै वर्सां इरवै वर्सांकन्ना एक्‍को वयमतोर हरेक मनकल अगेन हायानुर आनि ओर बस्‍केन नना हींतन इत्‍ता देसेमते होळिया पर्रोर. सिराप कालेब आनि यहोसु ईरे अव्टे होळिया परांतुर.” इत्‍ता.

![](https://cdn.door43.org/obs/jpg/360px/obs-en-14-09.jpg)

लोकुल्‍क पापम कीसि मत्‍तुर, अदुनहाटीं पेन अल्‍हा इत्‍तद केंजसि ओर्क अंटोर्क दुक्‍कम वाता. इंचि ओर कनानि लोकुल्‍कुनतोनि लडाइ कियाना निरनायम कीतुर. मूसाल ओर्कुन होनमट इंचि वेर्रे वेहतोर, बारित्‍ते पेन ओरतोनि होंचेक हिल्‍ले, गानि ओर मात्रम मूसाना पोल्‍ले केंजाहिल्‍लुर.

![](https://cdn.door43.org/obs/jpg/360px/obs-en-14-10.jpg)

इद लडाइते पेन ओरतोनि लडाइ कियालय होनाहिल्‍ले इंचि कनानि लोकुल्‍क अद लडाइ गेल्‍सतुर आनि ओराव्टेटाल वेल्‍लेन मंदितुन हव्‍कतुर. अस्‍के इस्राएल लोकुल्‍क कनानताल मल्‍सि वातुर. मुन्ने नलपै वर्सानदाका केडाते ओर हेके-हीके तिरियसेके मत्‍तुर.

![](https://cdn.door43.org/obs/jpg/360px/obs-en-14-11.jpg)

नलपै वर्सानदाका इस्राएल लोकुल्‍कु केडाते तिरियसेके मत्‍तुर, अव रोजकुने पेन ओरा अन्नि अवराल्‍क तीरसता. ओर्कु “मन्ना” इनना हारि पेन स्वर्गमताल हीता. ओर्कु हव्‍विं तिनालय दोर्कागोम इंचि पेन बटेरा इनना पिट्टेनगुडा ओरा डेराने लोहता. ओरा पूरा कालमते पेन ओरा कपडिं, हेरपुह्‍क हर्राकोंटा इरता.

![](https://cdn.door43.org/obs/jpg/360px/obs-en-14-12.jpg)

अचोने आयका ओराहाटीं उनालय एरगुडा पेन उंदि बंडाताल पेचहाता. अद उंदि इचंत्रमाता कबळ आंद. गानि अवन्नि कीसिगुडा इस्राएल लोकुल्‍कु पेनदा विरोदमते आनि मूसाना विरोदमते वळ्‍कतुर, गुल्‍गतुर. अयनागानि पेन विस्वासमगल्‍लद आंद. अद अब्राहाम, इसाक आनि याकोबुना वंसमतोर्क बतल अय्ते कींतन इंचि पोल्‍ले हीता, अद अन्निगुडा कीता.

![](https://cdn.door43.org/obs/jpg/360px/obs-en-14-13.jpg)

उंदि मल्‍का लोकुल्‍कुनगा एर मनाहिल्‍ले, अस्‍के पेन मूसान इत्‍ता, “बंडातोनि वळ्‍का, अस्‍के अव्टेटाल एर पेय्‍संता.” इत्‍ता. गानि मूसाल वळ्‍काहिल्‍लोर, दाना बदुलते दुड्डुने रोंड मल्‍का बंडापोर्रो तंतोर. इल्‍हा ओर पेनदा कदर रेहतोर. उनालय अंटोराहाटीं बंडाताल एर अय्ते पेय्‍सता, गानि पेन मूसानपोर्रो होंग आता. अद इल्‍हा इत्‍ता, “निमे इल्‍हा कीतिन, अदुनहाटीं हींतन इत्‍ता देसेमते निमे होळिया पर्रिन.” इत्‍ता.

![](https://cdn.door43.org/obs/jpg/360px/obs-en-14-14.jpg)

बस्‍के अय्ते इस्राएल लोकुल्‍कु नल्‍पै वर्सानदाका केडाते तिरियमळ मारता, अस्‍के बोर लोकुल्‍क अय्ते पेनदा विरोदमते ताकाना निरनायम कीतुर, ओर अंटोर हासोत्‍तुर. अस्‍के पेन मर्रा आ लोकुल्‍कुन हींतन इत्‍ता देसेमता दग्‍गेर्क ओता. मूसाल अदवेरदाका बागेन मातरल आतोर, अदुनहाटीं लोकुल्‍कुना मुन्ने अर्रालय ओना सहायमताहाटीं पेन यहोसुन पेरता. मूसानसंटोन वरोन पेनदा कबुरतोन ओना लोकुल्‍कुनगा लोहंतन इंचि पेन मूसांक पोल्‍लेगुडा हीसि मत्‍ता.

![](https://cdn.door43.org/obs/jpg/360px/obs-en-14-15.jpg)

पजा पेन ओर्क हींतन इत्‍ता देसेमतुन हूळालय, पेन मूसान उंदि गुट्टाता कोस्‍सापोर्रो होनालय वेहता. पेन हींतन इत्‍ता आ देसेमतुन मूसाल हूळळ अय्ते हूळतोर, गानि अव्टे होळियालय पेन ओन्‍कु अदिकारम हियाहिल्‍ले. पजा मूसाल हासोत्‍तोर, ओनाहाटीं इस्राएल लोकुल्‍कु मुप्‍पै रोजकुनदाका दुक्‍कमते मत्‍तुर. इंदके यहोसु ओरा पूना नेताल आतोर. यहोसु पेनदापोर्रो विस्वासम इरतोर, दाना हरेक पोल्‍ले परकारम ताकतोर, अदुनहाटीं बेस नेताल आतोर.

*निर्गमन अध्याय 16-17; गिनती 10-14; 20; 27; व्यवस्थाविवरण 34 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_14_192kbps.mp3

## 15. पेन हींतन इत्‍ता देसेम

https://openbiblestories.org/l/gon-x-aheri/story-15/

![](https://cdn.door43.org/obs/jpg/360px/obs-en-15-01.jpg)

आकिरते पेन इस्राएल लोकुल्‍कुंक हींतन इत्‍ता देसेमते इत्‍ते, कनान देसेमते ओर होळियाना वेला वाता. अद देसेमते यरिहो इनना उंदि सहर मत्‍ता. दाना लोप्‍पो बोरे होळियाकोंटा मननाहाटीं दाना सुट्‍टु गट्टि कंटेगूरें दोहचि मत्‍ता. येहोसु अद सहरता लोप्‍पो इव्‍वुर जाडागाह्‍कुन लोहतोर. अद सहरते रहाब पोरोलता उंदि बोगमोतड मनुंदु. अद ई जाडागाह्‍कुन दानागा मक्‍किचि इरता, आनि पजा ओर्कुन अद सहरताल पिस्‍सि पेय्‍सि होनालय ओर्कु सहायमगुडा कीता. अद पेनदुन नम्मुंदु इंचि अद अल्‍हा कीता. यरिहो सहरतुन नासडेम कियानस्‍के रहाब आनि दाना लोतोर्कुन नासडेम किय्योम इंचि आ जाडागाह्‍कु दानकु पोल्‍ले हीतुर.

![](https://cdn.door43.org/obs/jpg/360px/obs-en-15-02.jpg)

पेन हींतन इत्‍ता देसेमते इस्राएल लोकुल्‍कु होनागोम इत्‍ते ओर्कु योर्दन इनना बेरेड दाटाना मत्‍ता. पेन येहोसुन, “पेर्मालोर्कुन मुन्ने होना हीम,” इत्‍ता. पेर्मालोर योर्दन बेरेटे अळगु वाटतुर अय्ते पोंगाना बेरेड अग्‍गेने आगता, दानहेंदाल इस्राएल लोकुल्‍कु बेरेटा हब्‍बेटा बाजुना बूमिते होना परतुर.

![](https://cdn.door43.org/obs/jpg/360px/obs-en-15-03.jpg)

यरिहो सहर वेल्‍लेन गट्टि सहर मत्‍ता. अयना इस्राएल लोकुल्‍कु योर्दन बेरेड दाटतस्‍के पेन येहोसुन, “यरिहो सहरपोर्रो लडाइ कियालय तयार आम्टु,” इंचि इत्‍ता. ‘मीवा पेर्मालोर आनि मीवा सिपाइल्‍कु हारूं रोजकुनदाका आ सहर सुट्‍टु तिरियसेके मनना,’ इंचि पेन इस्राएल लोकुल्‍कुंक वेहता. पेन वेहतापे आ पेर्मालोर आनि सिपाइल्‍क कीतुर.

![](https://cdn.door43.org/obs/jpg/360px/obs-en-15-04.jpg)

पजा एडुंगों रोजुननाडु, इस्राएल लोकुल्‍कु आ सहरता सुट्टु मर्रा एडूं मल्‍का तिरियतुर. ओरा सहर सुट्टु एडूं मल्‍का तिरियमळ आतस्‍के, पेर्मालोर ओरा तूरिलां उह्‍कतुर आनि सिपाइल्‍क पेद्दा आवाज कीतुर.

![](https://cdn.door43.org/obs/jpg/360px/obs-en-15-05.jpg)

अस्‍के यरिहो सहरता सुट्‍टु मत्‍ता अन्नि कंटेगूरे कूल्‍सि अर्तां. पजा इस्राएल लोकुल्‍कुंक पेन आदेस हीतस्‍के ओर आ सहरता हरेक वस्‍तुकुन नासडेम कीतुर. गानि इस्राएल लोकुल्‍कुने कलियसोत्‍ता आ रहाब आनि दाना परिवारतोर्कुन मात्रम नासडेम किया हिल्‍लुर. यरिहो सहरतुर इस्राएल लोकुल्‍क नासडेम कीतुर इंचि कनान देसेमते मत्‍ता कळमाता लोकुल्‍कुंक तेळियतस्‍के, इस्राएल लोकुल्‍कु ओरपोर्रोगुडा लडाइ कींतुर इंचि ओर इरगा वेरियतुर.

![](https://cdn.door43.org/obs/jpg/360px/obs-en-15-06.jpg)

कनान देसेमते मनना बदे जातिता लोकुल्‍कुनतोनि मंचिपोल्‍ले आयानायो इंचि पेन इस्राएल लोकुल्‍कुंक आदेस हीसि मत्‍ता. गानि गिबोनि इनना उंदि कनानि जातिता लोकुल्‍कु, ‘मोमोट कनान देसेमताल वेल्‍लेन लक्‍कु वेरे जेगाते मनांतोम,’ इंचि येहोसुनतोनि आबद्दम वळ्‍कतुर. ओर येहोसुनतोनि मंचिपोल्‍ले आयालय इरगा बतिमलाडतुर. असोंटस्‍के, येहोसु आनि इस्राएल लोकुल्‍कुना कळमाता नेतालोर, बल्‍हा बतल कियाना इंचि पेनदुन तल्‍कागुडा तल्‍का हिल्‍लुर. ओर गिबोनि लोकुल्‍कुतनोनि मंचिपोल्‍ले आतुर.

![](https://cdn.door43.org/obs/jpg/360px/obs-en-15-07.jpg)

मूड रोजकु आतस्‍के, गिबोनि लोकुल्‍कु कनान देसेमतेन मनुंदुर इंचि इस्राएल लोकुल्‍कुंक तेळियसोत्‍ता. गिबोनि लोकुल्‍कु ओर्कु दोका कीतुर इंचि इस्राएल लोकुल्‍कु इरगा होंगुंक वातुर. अयना इस्राएल लोकुल्‍कु पेनदा मुन्नेन गिबोनि लोकुल्‍कुनतोनि मंचिपोल्‍ले आताहाटीं ओर अदुन नेम्‍हा हिल्‍लुर. कोन्‍नि रोजकु आतस्‍के, गिबोनि लोकुल्‍कु इस्राएल लोकुल्‍कुनतोनि मंचिपोल्‍ले आतुर इंचि, कनान देसेमते मनना एमोरि इनना इंकुंदि जातिता राजालोर केंजतुर. अदुनहाटीं ओर ओरा वरोर-वरोर सिपाइन जमा कीसि पेद्दा सैनम कीतुर, पजा गिबोन पोर्रो लडाइ कीतुर. सहायताहाटीं गिबोनि लोकुल्‍कु येहोसुंक कबुर लोहतुर.

![](https://cdn.door43.org/obs/jpg/360px/obs-en-15-08.jpg)

अस्‍के येहोसु इस्राएलतोरा सैनमतुन जमा कीसि गिबोनि लोकुल्‍कुनगा होनालय नर्का-पल्‍हिं ताकतुर. हक्‍केरे पंगाय्‍नेंके ओर एमोरि लोकुल्‍कुना सैनमतुन इचंत्रमते अराहचि ओरपोर्रो लडाइ कीतुर.

![](https://cdn.door43.org/obs/jpg/360px/obs-en-15-09.jpg)

अद रोजु पेन इस्राएल लोकुल्‍कुनाहाटीं लडाइ कीता. अद एमोरि लोकुल्‍कुन वेराहता. पेद्दा-पेद्दा बंडां अराहचि वेल्‍लेन मंदि एमोरि लोकुल्‍कुन हव्‍कुता.

![](https://cdn.door43.org/obs/jpg/360px/obs-en-15-10.jpg)

इस्राएल लोकुल्‍कु एमोरि लोकुल्‍कुन पुरागा गेल्‍सगोम इंचि पेन पोळ्‍दुनगुडा मब्‍बुने उंदि जेगाते आपिसि इरता. अद रोज पेन इस्राएल लोकुल्‍कुनाहाटीं उंदि पेद्दे गेल्‍पु गेल्‍सि हीता.

![](https://cdn.door43.org/obs/jpg/360px/obs-en-15-11.jpg)

पेन ओरा सैनमतुन ओळिच्तस्‍के, कनान जातिता वेल्‍लेन लोकुल्‍कु इस्राएल लोकुल्‍कुनपोर्रो लडाइ कियालय उंदगा जमा आतुर. अस्‍के येहोसु आनि इस्राएल लोकुल्‍कु ओरपोर्रो लडाइ कीसि ओर्कुन नासडेम कीतुर.

![](https://cdn.door43.org/obs/jpg/360px/obs-en-15-12.jpg)

इव लडाइं आसोत्‍तस्‍के, इस्राएल लोकुल्‍कुना हरेक गोत्रमतोर्क पेन हींतन इत्‍ता देसेमता ओरा बागम ओर्क हीसीता. पजा पेन इस्राएलतोर्कुना हरेक सर्दुनपोर्रो सांति हीता.

![](https://cdn.door43.org/obs/jpg/360px/obs-en-15-13.jpg)

येहोसु मातरल आतस्‍के इस्राएलता अंटोर लोकुल्‍कुन उंदे मल्‍का ओनगा केयतोर. वातस्‍के, सिनाइ गुट्टापोर्रो पेन ओरतोनि कीता करार परकारम ताकंतोम इंचि ओर पोल्‍ले हीतदुन इस्राएल लोकुल्‍कुंक मति कीसि वेहतोर. अस्‍के ओर पेनतोनि विस्वासमलायक मंचेके, दाना हरेक नियमतुन पीसि ताकंतोम इंचि पोल्‍ले हीतुर.

*यहोशू अध्याय 1-24 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_15_192kbps.mp3

## 16. कापाळनोर

https://openbiblestories.org/l/gon-x-aheri/story-16/

![](https://cdn.door43.org/obs/jpg/360px/obs-en-16-01.jpg)

येहोसु हासोत्‍तस्‍के इस्राएल लोकुल्‍कु पेनदा कदर इर्रा हिल्‍लुर. ओर पेनदा नियमाल्कुन पीसि ताकाहिल्‍लुर. पेन हींतन इत्‍ता देसेमते मय्‍सि मत्‍ता कनानि लोकुल्‍कुन अद देसेमताल पलाते पेच्‍हा हिल्‍लुर. इस्राएल लोकुल्‍कु ओरा सत्‍तेम यहोवा पेनदुन होळसि, कनानि लोकुल्‍कुना पेनकुन मोळ्‍कमळ सुरुव कीतुर. इस्राएल लोकुल्‍कुनपोर्रो बोरे राजाल मनवाहेंका, बोरा मनसुंक वाताप ओर कियालय दल्‍गतुर.

![](https://cdn.door43.org/obs/jpg/360px/obs-en-16-02.jpg)

पेनदा आदेसतुन केंजाकोंटा इस्राएल लोकुल्‍कु उंदि रिवाजतुन बच्‍चुंगो मल्‍का कीतुर. अद रिवाज इल्‍हा मुन्ने ताकता: कोन्नि वर्सनदाका इस्राएल लोकुल्‍कु पेनदा आदेसतुन केंजाकोंटा आंतुर, अस्‍के अद ओर्कुन ओरा पगातोरा कय्‍दे ओळागोटसि ओर्कु सिक्‍सा हींता. ई पगातोर इस्राएल लोकुल्‍कुनगटाल ओरा वस्‍तुकुन दोसकुंतुर, ओरा संपत्‍तितुन नासडेम कींतुर, ओरा लोप्‍पोटाल वेल्‍लेन मंदितुन हव्‍कांतुर. पजा इस्राएल लोकुल्‍कुना पगातोर, ओरपोर्रो बच्चुंगो वर्सनदाका अन्‍यायम कीतस्‍के, इस्राएल लोकुल्‍कु ओर कीता पापाल्‍कुनाल मनसु मार्सकुंतुर आनि ओर्कुन कापाळनाहाटीं पेनदुक पारतना कींतुर.

![](https://cdn.door43.org/obs/jpg/360px/obs-en-16-03.jpg)

इस्राएल लोकुल्‍कु बस्‍के-बस्‍के मनसु मार्सकुंतुर अस्‍के-अस्‍के पेन ओर्कुन कापाळंता. अद वरोर कापाळनोनहेंदाल अल्‍हा कींता. ओर इसंटोर गदा, ओर इस्राएल लोकुल्‍कुना पगातोरा विरोदमते लडाइ कीसि ओर्कुन गेल्‍संतोर. अस्‍के देसेमते सांति वांता आनि आ कापाळनोर इस्राएल लोकुल्‍कुनपोर्रो मंचिगा राज्येम कींतोर. आ लोकुल्‍कुन पिसागोटनाहाटीं पेन बचटूरो कापाळनोर्कुन लोहता. ओरा दगेटदे मिद्यानि इनना उंदि पगा जातितोरा कय्‍दे पेन इस्राएल लोकुल्‍कुन ओळागोटसि मर्रा अल्‍हा कीता.

![](https://cdn.door43.org/obs/jpg/360px/obs-en-16-04.jpg)

मिद्यानि लोकुल्‍कु एडूं वर्सनदाका इस्राएल लोकुल्‍कुना पंटातुन दोसकुंचेके मत्‍तुर. इस्राएल लोकुल्‍कु इरगा वेरियसि मिद्यानि लोकुल्‍कुंक दोर्कामन्नि इंचि गुट्‍टा सोर्रेने होंचि मकतुर. आकिरते ओर्कुन कापाळनाहाटीं पेनदुने केयतुर.

![](https://cdn.door43.org/obs/jpg/360px/obs-en-16-05.jpg)

गिदोन पोरोलतोर वरोर इस्राएली मनकल मत्‍तोर. मिद्यानि लोकुल्‍कु गोह्‍कु दोसकुना मन्नि इंचि ओर मक्‍किसि उंदि जेगाते गोह्‍कु साप कीसेके मत्‍तोर. यहोवा पेनदा उंदि दूता ओनगा वासि, “ए लडाइते गेल्‍सना तेल्‍विगल्‍ला मनका, पेन नीतोनि मंता. होन, होंचि मिद्यानि लोकुल्‍कुना कय्‍दाल इस्राएल लोकुल्‍कुन कापाळा,” इंचि इत्‍ता.

![](https://cdn.door43.org/obs/jpg/360px/obs-en-16-06.jpg)

गिदोनना बाबानगा बोम्माहाटीं कीता उंदि गद्दे मत्‍ता. पेन मोट्टा मोदाला गिदोनुंक गद्देतुन कुल्‍हाना कबळ वेहता. गानि गिदोन लोकुल्‍कुन हूळसि वेरियुंदुर, अदुनहाटीं ओर हीकट आयानदाका एदुर हूळतोर. पजा आ गद्देतुन कुल्‍हाचि तुकड़ां-तुकडां कीतोर. ओर पेनदाहाटीं उंदि पूना गद्दे वाटतोर, वाटसि दानपोर्रो पेनदाहाटीं मोक्‍कु हीतोर.

![](https://cdn.door43.org/obs/jpg/360px/obs-en-16-07.jpg)

इंकुंदि रोज हक्‍केरा, बोरो गद्देतुन कुल्‍हाचि तुकडां-तुकडां कीतद लोकुल्‍क हूळतुर अस्‍के ओर इरगा होंगुक वातुर. गिदोनुन हव्‍कालय ओर ओना लोन होत्‍तुर, गानि गिदोनुना बाबाल, “मिमेट बारि मीवा पेनदा सहायम कियाना कोसिस कीसंतिर? अदगिंटा निजमे पेन आयानय्ते अद सतातुन कापाळकुन्निकांटी,” इंचि इत्‍तोर. ओर अल्‍हा इत्‍तोर इंचि लोकुल्‍कु गिदोनुन हव्‍का हिल्‍लुर.

![](https://cdn.door43.org/obs/jpg/360px/obs-en-16-08.jpg)

अस्‍के इस्राएल लोकुल्‍कुन दोसकुनालय मिद्यानि लोकुल्‍कु मर्रा वातुर. ओर इच्‍चोन वेल्‍ले मत्‍तुर गदा, ओर्कुन लेक्‍कालयगुडा कुदरा हिल्‍ले. ओरा विरोदमते लडाइ कियालय गिदोन अंटोर इस्राएल लोकुल्‍कुन उंदगा केयतोर. पेन निजमे इस्राएल लोकुल्‍कुन कापाळनाहाटीं गिदोनुंक वेहचंतना इत्‍ता पोल्‍लेपोर्रो विस्वासम आयालय, गिदोन पेनदुन रोंडु चिन्‍हां तल्‍कतोर.

![](https://cdn.door43.org/obs/jpg/360px/obs-en-16-09.jpg)

मोदाटा चिन्‍हाहाटीं गिदोन गोर्रे बूरातुन बूमिपोर्रो तारतोर, तारसि, “हक्‍केटा मच्‍चु सिराप ई गोर्रे बूरापोर्रेन अर्रागोम, बूमिपोर्रो अर्रामन्नि,” इंचि पेनदुन इत्‍तोर. पेन अल्‍हेन कीता. इंकुंदि नर्का गिदोन पेनदुन, “बूमि पदन आयिकांटी गानि गोर्र बूरा पदन आयानायो,” इंचि इत्‍तोर. पेन अल्‍हेन कीता. ई रोंडु चिन्‍हानाहेंदाल, पेन निजमे इस्राएल लोकुल्‍कुन मिद्यानि लोकुल्‍कुना कय्‍दाल कापाळना इन्‍कुंचंता इंचि गिदोनुंकु विस्वासम आता.

![](https://cdn.door43.org/obs/jpg/360px/obs-en-16-10.jpg)

अस्‍के गिदोन सिपाइल्‍कुन केयतोर अय्ते मुप्‍पै रोंडु वेय्‍कुना (32000) मांडसा वातुर. अस्‍के पेन ओन, “ईर वेल्‍लेन मंदि आतुर,” इत्‍ता. अदुनहाटीं बोर अय्ते लडाइ कियालय वेरियुंदुर असोंटा इरवै रोंड वेय्‍कुना (22000) मंदितुन गिदोन लोन वापस लोहतोर. अयना, ‘ईर इंका वेल्‍लेन मंतुर’ इंचि पेन इत्‍ता. अदुनहाटीं गिदोन, मूड नुह्‍कुना (300) सिपाइल्‍कुन इरसि कळमातोर्कुन अंटोर्कुन वापस लोन लोहचीतोर.

![](https://cdn.door43.org/obs/jpg/360px/obs-en-16-11.jpg)

अद नर्का पेन गिदोनुन इल्‍हा इत्‍ता, “मिद्यानि लोकुल्‍कुना कँपने होन्नु, होंचि ओर बतल वळ्‍कंतुरो, ओरा पोल्‍लें केंजा. ओक्‍कला ओर वळ्‍काना पोल्‍लें निमे केंजानय्ते ओरपोर्रो लडाइ कियालय निमे वेरियिन.” अदुनहाटीं अद नर्का गिदोन मिद्यानि लोकुल्‍कुना कँपने होत्‍तोर. होंचि वरोर मिद्यानि सिपाइ ओर कलाते हुळतदुन ओना वरोर दंटागानकु वेहानद ओर केंजतोर. अस्‍के आ सिपाइना दंटागाल, “गिदोनुना सैनम मना मिद्यानि सैनमतुन ओळिचंता इंचि ई कलाता अर्तम आंदु,” इंचि इत्‍तोर. अद पोल्‍ले गिदोन केंजतस्‍के ओर पेनदा स्‍तुति कीतोर.

![](https://cdn.door43.org/obs/jpg/360px/obs-en-16-12.jpg)

अस्‍के गिदोन ओना सिपाइल्‍कुनगा मल्‍सि होत्‍तोर, होंचि हरेक सिपाइंक उंद-उंदि तूताकोम, उंदि तोळिता सिप्‍पा आनि उंदि दिव्टि हीतोर. पजा ओर मिद्यानि सिपाइल्‍क मींडसि मत्‍ता कँपता सुट्टु आतुर. गिदोनुना मूड नुह्‍कुना (300) मंदि सिपाइल्‍क ओरा दिव्टिन तोळिता सिप्‍पने मुच्‍चिसि मत्‍तुर. अदुनहाटीं मिद्यानि लोकुल्‍कु ओरा दिव्टिना वेलगुन हूळा पर्राहिल्‍लुर.

![](https://cdn.door43.org/obs/jpg/360px/obs-en-16-13.jpg)

अस्‍के गिदोनुना अंटोर सिपाइल्‍क ओरगा मत्‍ता तोळिता अन्नि सिप्‍पान उंदे मल्‍का पय्‍हाचि अचानक तळमिता पेद्दा वेलगु कीतुर. ओर ओरा तूताकोम्‍कु उह्‍कुसेके, “यहोवा पेनदा आनि गिदोनुना कसेर!” इंचेके इरगा मोत्‍कुत्‍तुर.

![](https://cdn.door43.org/obs/jpg/360px/obs-en-16-14.jpg)

पेन मिद्यानि लोकुल्‍कुन वेराहता, अदुनहाटीं ओर वरोंक-वरोर हव्‍कुड-कोय्युड कियालय दल्‍गतुर. अस्‍के मिद्यानि लोकुल्‍कुनतोनि लडाइ कियालय ओर्कु सहायम कियालय कळमता इस्राएल लोकुल्‍कुन केयालय गिदोन बिराना कबुरतोर्कुन लोहतोर. वेल्‍लेन मिद्यानि लोकुल्‍कुन हव्‍कमळ जर्गता आनि मिगिल्‍सि मत्‍तोर्कुन ओरा पज्‍जो-पज्‍जो होंचि ओर्कुन इस्राएल देसेमताल पलाते पेच्‍हामळ जर्गता. उंदि लक्‍से इरवै वेय्‍कुना (1,20,000) मिद्यानिर्क हातुर. इल्‍हा इस्राएल लोकुल्‍कुन पेन कापाळता.

![](https://cdn.door43.org/obs/jpg/360px/obs-en-16-15.jpg)

ओर लोकुल्‍कु गिदोनुन ओरा राजाल कियालय हूळतुर, गानि गिदोन अल्‍हा जर्गा हिय्या हिल्‍लोर. गानि मिद्यानि लोकुल्‍कुनाहेंदाल दोसकुंचि तत्‍ता बंगारमता अन्‍नि नगां मात्रम गिदोन इस्राएल लोकुल्‍कुनाहेंदाल तल्‍कतोर. आ लोकुल्‍कु गिदोनुंक वेल्‍लेन बंगारम हीतुर.

![](https://cdn.door43.org/obs/jpg/360px/obs-en-16-16.jpg)

अस्‍के गिदोन आ बंगारमतोनि पेद्दा पेर्माल केर्रानसोंटद उंदि विसेस अंगि तयार कीतोर. लोकुल्‍कु दानगुडा उंदि बोम्माकु मोळ्‍कताप मोळ्‍कालय दल्‍गतुर. अल्‍हा कीताहाटीं पेन मर्रा इस्राएल लोकुल्‍कुंक सिक्‍सा हीता, बारित्‍ते ओर बोम्माकु मोळ्‍कतुर. इस्राएल लोकुल्‍कुन गेल्‍सानाहाटीं पेन ओरा पगातोर्कुन इरगा मजबूत कीता. गानि इस्राएल लोकुल्‍कु आकिरते मर्रा ओर्कु सहायम कियाना इंचि पेनदुक पारतना कीतुर. अस्‍के ओर्कुन कापाळनाहाटीं पेन मर्रा इंकावरोन कापाळनोन ओरगा लोहचीता.

![](https://cdn.door43.org/obs/jpg/360px/obs-en-16-17.jpg)

इदे पोल्‍ले बच्‍चुंगो मल्‍कां आसेके मत्‍ता: इस्राएल लोकुल्‍कु पापम कींतुर, पेन ओर्कु सिक्‍सा हींता, ओर मनसु मार्सकुंतुर, ओर्कुन कापाळनाहाटीं पेन बोनना लोहंता. बच्‍चुंगो वर्सनदाका पेन इस्राएल लोकुल्‍कुन कापाळनाहाटीं बचटूरो कापाळनोर्कुन लोहता, ओर इस्राएल लोकुल्‍कुन ओरा पगातोरा कय्‍दाल कापाळतुर.

![](https://cdn.door43.org/obs/jpg/360px/obs-en-16-18.jpg)

आकिरते, वेरे देसेल्‍कुनोरलेसीं इस्राएल लोकुल्‍कुगुडा ओराहाटीं राजाल गावाले इंचि पेनदुन तल्‍कतुर. बोर अय्ते एत्‍तु, ताकतवार मंतोर, आनि ओरा मुन्ने अरसि ओर्कुन ताकसा पर्रांतोर, असोंटा राजाल इस्राएल लोकुल्‍क कोरसेके मत्‍तुर. पेनदुक मात्रम ओर तल्‍कता पोल्‍ले नच्‍चा हिल्‍ले, गानि ओर तल्‍कतसोंटा राजाल पेन ओर्कु हीता.

*न्यायियों अध्याय 1-3; 6-8; 1 शमूएल 1-10 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_16_192kbps.mp3

## 17. दाऊदुनतोनि पेनदा करार

https://openbiblestories.org/l/gon-x-aheri/story-17/

![](https://cdn.door43.org/obs/jpg/360px/obs-en-17-01.jpg)

साउल इनानोर इस्राएल देसेमता मोदाटा राजाल मत्‍तोर. लोकुल्‍कुंक बल्‍हा अय्ते गावाले मत्‍तानो अल्‍हेन ओर एत्‍तु, हूळालय सोकु मत्‍तोर. इस्राएल देसेमपोर्रो राज्येम कियनेंकेटा मोदाटा इच्‍चुं वर्साने साउल वरोर बेस राजाल मत्‍तोर. पजा ओर हेळसोंचि पेनदा पोल्‍लेपोर्रो ताकाकोंटा आतोर. अदुनहाटीं ओना जेगाते राजाल कियानाहाटीं पेन इंकावरोन मनकन पेरता.

![](https://cdn.door43.org/obs/jpg/360px/obs-en-17-02.jpg)

पेन दाऊद पोरोलता वरोर इस्राएल देसेमता लेय्योन पेरसि, ओन साउल राजाना जेगाते राजाल कियानाहाटीं ओन तयार कियालय सुरुव कीता. दाऊद बेतलहेम इनना नाटेना वरोर गोर्रें मेहानोर मत्‍तोर. उंदि मल्‍का दाऊद गोर्रें मेहनेंके ओना बाबाना गोर्रेन सिंह आनि एड्‍जु कोरकिसि मत्‍ता, अदुनहाटीं ओर सिंह आनि एड्‍जु रोंडुनगुडा हव्‍किसि मत्‍तोर. दाऊद सादा-सिंपल आनि नीतिमंतुड मत्‍तोर. ओर पेनदुन नम्मिसि दाना पोल्‍ले परकारम ताकुंदुर.

![](https://cdn.door43.org/obs/jpg/360px/obs-en-17-03.jpg)

दाऊद लेय्योड आसेकेन मत्‍तोर, अव रोजकुने ओर वरोर एत्‍तुंक एत्‍तु मत्‍ता गोलियत इनना मनकनतोनि लडाइ कीसि मत्‍तोर. गोलियत वरोर वेल्‍लेन बेस सिपाइ मत्‍तोर. ओर गट्‍टिगा आनि दग्‍गेर-दग्‍गेरा मूड मीटर्क एत्‍तुर मत्‍तोर. गानि गोलियतुन हव्‍किसि इस्राएल देसेमतुन कापाळमळते पेन दाऊदुंक सहायम कीता. पजा बच्‍चुंगो मल्‍कां दाऊद इस्राएल देसेमता पगातोर्कुन ओळिच्तोर. इल्‍हा दाऊद वरोर पेद्दा सिपाइ आतोर. ओर वेल्‍लेन वेल्‍लेन लडाइने इस्राएल सेनाता नेताल आसि मुन्ने अर्तोर.

![](https://cdn.door43.org/obs/jpg/360px/obs-en-17-04.jpg)

लोकुल्‍क दाऊदुंक वेल्‍लेन दग्‍गेर आतुर, अदुन हूळसि साउलना कळ्‍क पोत्‍तालय दल्‍गतां. आकिरते साउल दाऊदुन हव्‍काना विचारम कीतोर. अदुनहाटीं दाऊद आनि ओना सिपाइल्‍क साउलनाल मक्‍कालय केडाते वितुतुर. उंदि मल्‍का साउल आनि ओना सिपाइल्‍क दाऊदुन पह्‍कालय होत्‍तस्‍के साउल उंदि सोर्रेते मत्‍तोर. अदे सोर्रेते दाऊदगुडा मक्‍किसि मत्‍तोर, गानि साउल ओन हूळा हिल्‍लोर. दाऊद ओना पज्‍जो दग्‍गेरे होंचि ओना कप्‍पिडता कोंगुन कोय्तोर. पजा साउल अद सोर्रेताल पलाते पेय्‍सतस्‍के दाऊद, साउलुन केय्‍सि ओर कोय्ता आ कप्‍पिड गंडातुन हुपिस्‍तोर. इल्‍हा, दाऊद राजाल आयानाहाटीं ओन (साउलुन) हव्‍काना विचारमते हिल्‍लोर इंचि साउल तेल्‍पिच्‍कुत्‍तोर.

![](https://cdn.door43.org/obs/jpg/360px/obs-en-17-05.jpg)

कोन्नि रोजकु आतस्‍के, उंदि लडाइते साउल हासोत्‍तोर, पजा दाऊद इस्राएल देसेमता राजाल आतोर. दाऊद बेस राजाल मत्‍तोर, लोकुल्‍कुगुडा ओन पावरम किय्युंदुर. पेन ओन्‍कु आसिर्वाद हीसि अन्निट्ते बरकत हीता. दाऊद बच्‍चुंगो लडाइं गेल्‍सतोर, इस्राएलतोरा पगातोर्कुन ओळिच्‍चालय पेन ओन्‍कु सहायम कीता. दाऊद येरुसलेम सहरतुन गेल्‍सि अदुन इस्राएल देसेमता राजधानी कीतोर, कीसि ओर अग्‍गेन मंचि राज्येम ताकसुंदुर. दाऊद नल्‍पै वर्सनदाका राजाल मत्‍तोर. अव रोजकुने इस्राएल देसेम वेल्‍लेन ताकतवार आनि सिरमंत आता.

![](https://cdn.door43.org/obs/jpg/360px/obs-en-17-06.jpg)

इस्राएलता अंटोर लोकुल्‍कु उंदागा कलियसि पेनदुन आरादना कियानाहाटीं आनि दानकु मोक्‍कुल्‍कु हिय्याना इंचि दाऊद उंदि गुळि दोहाना विचारम कीतोर. दग्‍गेर-दग्‍गेरा नालूं नुह्‍कुना (400) वर्सानाल इस्राएल लोकुल्‍कु, मूसाल कीता कलियाना डेरातेन पेनदा आरादना कियमळ आनि दानाहाटीं मोक्‍कुल्‍कु हीसेके मत्‍तुर.

![](https://cdn.door43.org/obs/jpg/360px/obs-en-17-07.jpg)

अगा वरोर नातान पोरोलता पेनदा कबुरतोर मत्‍तोर. पेन दाऊदुंक इद पोल्‍ले वेहालय ओनगा लोहता: “निमे वेल्‍लेन लडाइं कीतिन, अदुनहाटीं निमे नाहाटीं गुळि दोहापर्रिन, नीवा मर्रि गुळि दोहांतोर. अयना नना नीकु वेल्‍लेन आसिर्वाद हींतन. नीवा उंदि वंसम बस्‍केळ्ताहाटीं नावा लोकुल्‍कुनपोर्रो राजाल आसि राज्येम किय्यार.” आ बस्‍केळ्ताहाटीं राज्येम कियानोर इत्‍ते, दाऊदना उंदे-उंदि वंसमतोर किरिस्‍तु आंदुर. दुनियाता लोकुल्‍कुन ओरा पापाल्‍कुनाल पिसागोटनाहाटीं पेन किरिस्‍तुन पेरसि मत्‍ता.

![](https://cdn.door43.org/obs/jpg/360px/obs-en-17-08.jpg)

दाऊद ई कबुर केंजसि, पेनदुक दन्‍यवाद वेहचि, दाना स्‍तुति कीतोर. पेन दाऊदुन बेस बेरसागोटसेके ओन्‍कु इरगा आसिर्वाद हीसेक मत्‍ता. गानि पेन अव अन्नि पोल्‍लें बस्‍के किय्यार इंचि दाऊदुंक मात्रम बिल्‍कुल तेळियाहिले. गानि इंदके मनाकु अय्ते एरपाट, इस्राएल लोकुल्‍कुंक दग्‍गेर-दग्‍गेरा वेय (1000) वर्सनदाका किरिस्‍तुना एदुर हूळसेके मनापींता इंचि.

![](https://cdn.door43.org/obs/jpg/360px/obs-en-17-09.jpg)

दाऊद बचुंगो वर्सनदाका ओना लोकुल्‍कुनपोर्रो बेस न्‍यायमते राज्येम कीतोर. ओर वेल्‍लेन बरोसाते पेनदा पोल्‍लेन विस्‍वासम कीतोर आनि पेनगुडा ओन्‍कु आसिर्वाद हीता. गानि ओना पिस्वरता आकिरते मात्रम पेनदा विरोदमते वेल्‍लेन पेद्दा पापम कीतोर.

![](https://cdn.door43.org/obs/jpg/360px/obs-en-17-10.jpg)

उंदि रोज दाऊद ओना वाडाताल पलाते माळकिस हूळतोर. अस्‍के ओन्‍कु उंदि सक्‍कटा सोक मत्‍ता मुरतळ एर तुंगनेंके दिसता. दान ओर एरपाट कियाहिल्‍लोर, पजाटाल दाना पोरोल बेतसेबा इंचि तेल्‍पिच्‍कुत्‍तोर.

![](https://cdn.door43.org/obs/jpg/360px/obs-en-17-11.jpg)

दाऊद ओना नदरतुन मल्‍सकुना मत्‍ता, गानि ओर अल्‍हा कियाका दान ओनगा पीसि वायालय वेरेतोन दानगा लोहतोर. ओर दानतोनि मींडतोर आनि मर्रा लोन वापस लोहतोर. कोन्नि रोजकु आतस्‍के, बेतसेबाल नेला तपता इंचि दाऊदुंक कबुर लोहता.

![](https://cdn.door43.org/obs/jpg/360px/obs-en-17-12.jpg)

बेतसेबाना मुय्‍दोन पोरोल उरियाल. ओर दाऊदना सिपाइल्‍कुनाल वरोर मत्‍तोर. इद वेलाते ओर लडाइ कियानाहाटीं पलाते होंचि मत्‍तोर. दाऊद उरियान लडाइताल वापस केयसि ओर ओना मुत्‍तोनतोनि लोने मनालय वेहतोर. गानि कळमता सिपाइल्क लडाइते मत्‍तुर, अदुनहाटीं ओर लोन मल्‍सि वायोन इत्‍तोर. अय्ते दाऊद उरियान मर्रा लडाइते लोहतोर. लोहचि, लडाइते बगा अय्ते एक्‍को ताकतवार सिपाइ मनांतोर असोंटा जेगाते ओन निल्‍हालय दाऊद ओना सेनापतिंक वेहतोर, बारित्‍ते आ पगाता सिपाइ उरियान हव्‍कागोम इंचि दाऊद अल्‍हा कीतोर. इल्‍हा उरियाल लडाइते हासोत्‍तोर.

![](https://cdn.door43.org/obs/jpg/360px/obs-en-17-13.jpg)

लडाइते उरियाल हासोत्‍तस्‍के दाऊद बेतसेबानतोनि मरमिं आतोर. पजा दानकु दाऊदतोनि वरोर मर्रि पुटतोर. दाऊद इल्‍हा कीतदुनहेंदाल पेन ओनपोर्रो इरगा होंग आसि मत्‍ता. दाऊद कीता पापम बच्‍चोन वेल्‍ले पेद्देदो वेहनाहाटीं पेन नातान इनना पेनदा कबुरतोन ओनगा लोहता. दाऊद ओर कीता पापम ओप्‍कुत्‍तोर, पेन ओन मापि कीता. ओर पिस्‍सि मत्‍ता कळमता रोजकुने दाऊद बच्‍चोन तिप्‍पल्‍क वायिनागानि ओर पेनतोने ताकुंदुर, दाना पोल्‍लेने नम्मुंदुर.

![](https://cdn.door43.org/obs/jpg/360px/obs-en-17-14.jpg)

गानि दाऊदना पेडल हासोत्‍तोर. इल्‍हा पेन दाऊदुंक सिक्‍सा हीता. इच्‍चोने आयाका दाऊदुंक हामुर वायनदाका, बचुटूरो ओना संतमता लोकुल्‍के ओना विरोदमते लडाइं कीतुर. दाऊदना ताकतगुडा तक्‍को आसि मत्‍ता. गानि पेन मात्रम विस्वासमगल्‍लद, दाऊद दाना पोल्‍लेक विरोदमते ताकतोर, अयिना, अद दाऊदुंक बतल अय्ते कींतन इंचि पोल्‍ले हीसि मत्‍तानो, अदुन कीता. पजा दाऊद आनि बेतसेबांक रोंडो संतानम दोर्कता. ओर ओना पोरोल सुलेमान इंचि दोसतुर.

*1 शमूएल अध्याय 10; 15-19; 24; 31; 2 शमूएल 5; 7; 11-12 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_17_192kbps.mp3

## 18. वेरे कीता राज्येल्‍क

https://openbiblestories.org/l/gon-x-aheri/story-18/

![](https://cdn.door43.org/obs/jpg/360px/obs-en-18-01.jpg)

दाऊद राजाल नल्‍पै (40) वर्सनदाका राज्येम कीतोर. पजा ओर हासोत्‍तस्‍के ओना मर्रि सुलेमान राज्येम कियालय दल्‍गतोर. “नना नीहाटीं बतल कियाना इंचि नीवा मनसु मंता,” इंचि पेन सुलेमानुन पूसकीता. अस्‍के ओर पेन ओनु वेल्‍लेन बुद्दिमंतुड किय्यि इंचि ओर कोरतोर. सुलेमानुना ई पोल्‍ले पेनदुन कूस कीता, अदुनहाटीं पेन ओन इद दुनियाते अंटोर्कुंकन्ना एक्‍को बुद्दिमंतुड कीता. ओर वेल्‍लेन पोल्‍लें करियसि वरोर बेस बुद्दिमान राजाल आतोर. पेन ओनकु वेल्‍लेन दनम हीसि ओन पेद्दा सिरमंत कीता.

![](https://cdn.door43.org/obs/jpg/360px/obs-en-18-02.jpg)

येरुसलेमते ओना बाबाल बद गुळि दोहाना बारेमते अय्ते पिलान कीसि मत्‍तोरो, अद गुळितुन सुलेमान दोहातोर, अन्नि सामानगुडा जमा कीतोर. इंदके लोकुल्‍क, कलियाना डेरातुन होळसिसि गुळिते पेनदा आरादना कियमळ, पेनदुक मोक्‍कुल्‍क हियमळ सुरुव कीतुर. पेन आ गुळिते वासि, दाना लोकुल्‍कुनतोनि कलियसि मनुंदु.

![](https://cdn.door43.org/obs/jpg/360px/obs-en-18-03.jpg)

गानि सुलेमान वेरे देसेमता मुरताह्‍कुनतोनि सुटिर्कोम कीतोर. ओर दग्‍गेर-दग्‍गेरा वेय (1000) मुरताह्‍कुनतोनि मरमिं आसि पेनदा पोल्‍लेतुन नेम्‍हातोर. आ मुरताह्‍कुनाल वेल्‍ले मुरताह्‍क वेरे देसेमताल वातव मत्‍तां, अव वायनेंके अवुना पेनकुनगुडा पीकुंचि वासि, अवुना पूजेंगुडा कीसेक मत्‍तां. सुलेमान मातरल आतस्‍के ओरगुडा आ पेनकुने मोळ्‍कालय दल्‍गतोर.

![](https://cdn.door43.org/obs/jpg/360px/obs-en-18-04.jpg)

अदुनाहाटीं पेन सुलेमानुनपोर्रो इरगा होंग आता. इस्राएल देसेमतुन रोंडु राज्येल्‍कुने वेरे-वेरे कीसि ओनकु सिक्‍सा हियाना इंचि पेन इत्‍ता. अद सुलेमान हासोत्‍तस्‍के अल्‍हा किय्यार.

![](https://cdn.door43.org/obs/jpg/360px/obs-en-18-05.jpg)

सुलेमान हासोत्‍तस्‍के ओना जेगाते रहोबाम राजाल आतोर. इस्राएल देसेमता अंटोर लोकुल्‍कु रहोबामुन ओरा राजाल इंचि ओप्‍कुननाहाटीं उंदासि जमा आतुर. सुलेमान ओराहेंदाल इरगा कस्‍टमाता कबाह्‍क किया वेहतोर आनि ओराहेंदाल वेल्‍लेन कर वसूल कीतोर इंचि इस्राएल लोकुल्‍कु रहोबामुनगा वेहतुर. रहोबाम ओराहेंदाल तक्‍को कबळ किया वेहिर इंचि इस्राएल लोकुल्‍कु रहोबामुंकु विनंति कीतुर.

![](https://cdn.door43.org/obs/jpg/360px/obs-en-18-06.jpg)

गानि रहोबाम मुर्कल हियानसोंटा जवाब ओर्कु हीतोर, “नावा बाबाल सुलेमान मीकुन इरगा कस्‍टम किया वेहतोर इंचि मिमेट वेहचंतिर, गानि ओर किया वेहतादानकन्ना एक्‍को कस्‍टम मीकुन नना किया वेहंतन, ओनकन्ना एक्‍को मीकुन नना परेसान कींतन,” इत्‍तोर.

![](https://cdn.door43.org/obs/jpg/360px/obs-en-18-07.jpg)

ओर इल्‍हा इनानद केंजतस्‍के, आ लोकुल्‍कुनाल वेल्‍लेटुर लोकुल्‍कु ओना विरोदमते तिरियतुर. पदि गोत्राल्‍कुनोर ओन होळसीतुर, ओनतोनि सिराप रोंडे गोत्राल्‍कुनोर मत्‍तुर. आ रोंडु गोत्राल्‍कुनोर ओरद ओर मोमोट यहुदा राज्येमतोरम इंचि वेहकुत्‍तुर.

![](https://cdn.door43.org/obs/jpg/360px/obs-en-18-08.jpg)

मय्ता पदि गोत्राल्‍कुनोर यारोबाम इनना वरोर मनकन ओरा राजाल कीतुर. ई गोत्राल्‍कुनोर देसेमता पोळ्‍द पेय्‍सना बाजू आनि उत्‍तेरा बाजुनेके मत्‍तुर. ओर सतातुन इस्राएल राज्येमतोरम इंचि वेहकुत्‍तुर.

![](https://cdn.door43.org/obs/jpg/360px/obs-en-18-09.jpg)

गानि यारोबाम मात्रम पेनदा विरोदमते तेदतोर, तेदसि लोकुल्‍कुनाहेंदाल पापि कबाह्‍क किया वेहतोर. लोकुल्‍कुन मोळ्‍का वेहालय ओर रोंडु बोम्मां किया वेहतोर. अस्‍के ओर लोकुल्‍कु पेनदा आरादना कियालय यहुदा राज्येमता येरुसलेमते मनना पेनदा गुळिते होना हिल्‍लुर.

![](https://cdn.door43.org/obs/jpg/360px/obs-en-18-10.jpg)

यहुदा आनि इस्राएल राज्येल्‍क वरोंक-वरोर पगातोर आतुर. अस्‍के-अस्‍के ओर्क ओर्के लडाइंगुडा आयुंदु.

![](https://cdn.door43.org/obs/jpg/360px/obs-en-18-11.jpg)

इस्राएलता पूना राज्येमते मनना अंटोर राजालोर बदमास मत्‍तुर. ओराव्टेटाल बचटूरो ओरा जेगाते राजाल आयालय कोरसि वेरे इस्राएल लोकुल्‍कुनाहेंदाल हासोत्‍तुर.

![](https://cdn.door43.org/obs/jpg/360px/obs-en-18-12.jpg)

इस्राएल राज्येमता अंटोर राजालोर आनि वेल्‍लेन मंदि लोकुल्‍कु बोम्मांके मोळ्‍कुंदुर. ओर बच्‍चुंगो मल्‍कां बोगमोताह्‍कुनतोनि मीळुंदुर, अचोने आयाका बोम्माना मुन्ने पिलाल्‍कुना बलिंगुडा हिय्युंदुर.

![](https://cdn.door43.org/obs/jpg/360px/obs-en-18-13.jpg)

यहुदा राज्येमता राजालोर दाऊदना वंसमताल मत्‍तुर. ओराव्टेटाल इच्‍चुर राजालोर इमानदार मत्‍तुर, ओर बेस न्‍यायमते राज्येम कीतुर आनि पेनदा आरादनागुडा कीतुर. गानि वेल्‍लेटूर राजालोर बदमास मत्‍तुर. ओर बदमास कबाह्‍क कीसेके राज्येम किय्युंदुर, बोम्मांकु मोळ्‍कुंदुर. अचोने आयाका ओराव्टेटाल बचटूरो राजालोर अय्ते आबद्दम पेनकुना मुन्ने ओरा पिलाल्‍कुनगुडा बलि हीतुर. यहुदा राज्येमता वेल्‍लेटूर लोकुल्‍कगुडा पेनदा विरोदमते तेदतुर आनि वेरे-वेरे पेनकुन मोळ्‍कतुर.

*1 राजा अध्याय 1-6; 11-12 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_18_192kbps.mp3

## 19. पेनदा कबुरतोर

https://openbiblestories.org/l/gon-x-aheri/story-19/

![](https://cdn.door43.org/obs/jpg/360px/obs-en-19-01.jpg)

पेन हमेसा इस्राएल लोकुल्‍कुनगा दाना कबुरतोर्कुन लोहुंदु. पेनदा कबुरतोर पेनदा कबुह्‍कुन केंजुंदुर आनि वासि लोकुल्‍कुंक वेहुंदुर.

![](https://cdn.door43.org/obs/jpg/360px/obs-en-19-02.jpg)

अहाब इनना राजाल इस्राएल राज्येमपोर्रो राज्येम कियनेंकेटा कालमते अगा एलियाह पोरोलतोर वरोर पेनदा कबुरतोर मत्‍तोर. अहाब बदमास मनकल मत्‍तोर. बाल इनना उंदि आबद्दम पेनदुन मोळ्‍काहाटीं ओर लोकुल्‍कुन जबरदस्‍ति कीसि मत्‍तोर. अदुनहाटीं पेन आ लोकुल्‍कुन सिक्‍सा कियाना मंता इंचि एलियाह इनना पेनदा कबुरतोर अहाबुंक वेहतोर. इंका एलियाहल, “मर्रा पिर्रु वायिकांटी इंचि नना बदवेरदाका अय्ते वेहोनो अदवेरदाका इस्राएल राज्येमते पिर्रु वायो, मच्‍चुगुडा अर्रो,” इंचि इत्‍तोर. ई पोल्‍लेहेंदाल अहाब इरगा होंगुंक वातोर. होंगुंक वासि ओर एलियाहन हव्‍काना निरनायम कीतोर.

![](https://cdn.door43.org/obs/jpg/360px/obs-en-19-03.jpg)

अदुनहाटीं पेन एलियाहन, “अहाबुंक दोर्काकोंटा केडाते होंचि मक्‍का,” इंचि वेहता. पेन एलियाहंक केडाते बद ऊटातगा होन इंचि अय्ते वेहतानो, ओर अदे ऊटातगा होत्‍तोर. रोज हक्‍केरा, पोळ्‍द होंचि पिट्टें एलियाहनाहाटीं हारिं आनि हव्‍विं पीसि वायुंदुं. इद वेलाते नर्का-पल्‍हिं अहाब आनि ओना सिपाइल्‍क एलियाहन पह्‍कसेके मनुंदुर, गानि ओर एलियाहन दोर्का पिया पर्राहिल्‍लुर.

![](https://cdn.door43.org/obs/jpg/360px/obs-en-19-04.jpg)

पिर्रु वायुवाहेंका कोन्नि रोजकु आतस्‍के आ ऊटा इनकिसि होत्‍ता. अदुनहाटीं एलियाहल दग्‍गेटा उंदि देसेमते होत्‍तोर. अद देसेमते उंदि मुंडामोस्‍ता गरीब मुरतळ मत्‍ता, दानकु वरोर मर्रि मत्‍तोर. बेस पंटा पेय्‍सुवाहेंका दानगा मत्‍ता तिंडिगुडा दग्‍गेर-दग्‍गेरा मारसे मत्‍ता. अयिनागानि आ मुरतळ एलियाह्‍न बेस हूळकुत्‍ता, अदुनहाटीं पेन आ मुरतळ आनि दाना मर्रिना अन्नि अवसराल्‍कुन पुरागा कीता, दाना पिंडिता डब्‍बा आनि नियदा कीसा बस्‍केन रिकम आयाहिल्‍ले. कर्वु अरसि मत्‍ता अन्नि रोजकुनेगुडा दानगा पिरनिंडा तिंडि मत्‍ता. एलियाहल कोन्नि वर्सनदाका अगा मत्‍तोर.

![](https://cdn.door43.org/obs/jpg/360px/obs-en-19-05.jpg)

मूडुननर्रा वर्साना पज्‍जो, मर्रा पिर्रु वायागोटंतन इंचि पेन एलियाहनतोनि वेहता. मर्रा इस्राएल देसेम मल्‍सि होंचि अहाबुनतोनि वळ्‍का इंचि पेन एलियाहंक वेहता. अदुनहाटीं एलियाहल अहाबुनगा होत्‍तोर. अहाब एलियाहन हूळतस्‍के, “ओहो, तिप्‍पल्‍क पुटिच्‍चानोन निमेन गदा!” इंचि इत्‍तोर. अस्‍के एलियाहल, “तिप्‍पल्‍क पुटिच्‍चानोन निमे आंदिन, सत्‍तेम पेन यहोवा पेने आंद, दान होळसिसि निमे बाल इनना पेनदुन मोळ्‍संतिन. इंदके निमे इस्राएल राज्येमते मनना अंटोर लोकुल्‍कुन पीसि कार्मेल गुट्टापोर्रो होनापींता.” इंचि इत्‍तोर.

![](https://cdn.door43.org/obs/jpg/360px/obs-en-19-06.jpg)

अय्ते अंटोर लोकुल्‍कु कार्मेल गुट्टापोर्रो होत्‍तुर. बाल इनना पेनदा कबुह्‍कुन मोमोट वेहांतोम इंचि वेहकुनना मांडसागुडा अगा वातुर. ओर बाल पेनदा कबुरतोर आंदुर. ओर अंटोर नालुं नुह्‍कुना एबै (450) मंदि मत्‍तुर. अस्‍के एलियाहल लोकुल्‍कुन, “इंका बदवेरदाका मिमेट मनसु तिरहाचि मनांतिर? ओक्‍कला यहोवाले पेन आते दाना आरादना कीम्टु, हिलाकोंटे ओक्‍कला बाल पेन आते दानके मोळ्‍काटु,” इंचि इत्‍तोर.

![](https://cdn.door43.org/obs/jpg/360px/obs-en-19-07.jpg)

पजा एलियाहल बाल पेनदा कबुरतोर्कुन इल्‍हा इत्‍तोर, “उंदि कोंदातुन बलि हीसि दाना हव्‍विन मोक्‍कुहाटीं उंदि गद्देपोर्रो इर्राट, गानि तळमिते वाटमट. ननागुडा अल्‍हे कींतन, नना वेरे उंदि गद्देपोर्रो आ हव्‍विन इर्रांतन. अस्‍के आ गद्देपोर्रो ओक्‍कला पेन तळमि अराहनय्ते अद सत्‍तेम पेन इंचि मीकु तेळियार,” इत्‍तोर. अस्‍के आ बाल पेनदा कबुरतोर उंदि मोक्‍कु तयार कीतुर गानि तळमि अंटाबेट्टा हिल्‍लुर.

![](https://cdn.door43.org/obs/jpg/360px/obs-en-19-08.jpg)

पजा ओर, “ए बाल पेनदुना, निमे मावा पोल्‍ले केंजा,” इंचि उंदि रोजमेड ओरा बाल पेनदुक पारतना कीतुर, मोत्‍कुत्‍तुर, अचोने आयाका ओरद ओरे कसेरतोनि कोयकुत्‍तुर. गानि ओरा बाल पेन मात्रम ओर्कु बतले जवाब हिया हिल्‍ले, तळमिगुडा अरहा हिल्‍ले.

![](https://cdn.door43.org/obs/jpg/360px/obs-en-19-09.jpg)

बाल पेनदा कबुरतोर दग्‍गेर-दग्‍गेरा उंदि पूरा रोजमेड पारतना कीतुर. पजा ओर पारतना कियमळ आपतुर. अस्‍के, एलियाहल वेरे कोंदाता हव्‍विन पेनदा गद्देपोर्रो इरतोर. पजा आ मोक्‍कुनपोर्रो पेद्दा पेरपुकुने एर निह्‍चि आ गद्देपोर्रोटा हव्‍विं, कट्टें आनि गद्दे दग्‍गेटा बूमि पुरागा नांदनदाका एर वळियसेकेन मंटु इंचि लोकुल्‍कुंक वेहतोर.

![](https://cdn.door43.org/obs/jpg/360px/obs-en-19-10.jpg)

अस्‍के एलियाहल इल्‍हा पारतना कीतोर, “ए यहोवा पेनदुना, अब्राहाम, इसाक, याकोबुना पेनदुना, नना नीवा दासुन आंदुन, निमे इस्राएलतोरा पेनदुन आंदिन इंचि निमे माकु हुपिच्‍चा. निमेने सत्‍तेम पेनदुन आंदिन इंचि ई लोकुल्‍कुंक तेळियानाहाटीं निमे नाकु जवाब हीम,” इत्‍तोर.

![](https://cdn.door43.org/obs/jpg/360px/obs-en-19-11.jpg)

अल्‍हा इत्‍ता इनुडे मब्‍बुनाल तळमि अरता, अरसि हव्‍विन, कट्टेन, बंडान, तोळितुन आनि गद्देता दग्‍गेरा पकापीसि मत्‍ता एतुनगुडा बोळ्‍सि पोहता. अल्‍हा आतदुन लोकुल्‍कु हूळसि बूमिपोर्रो हिळ अरतुर, अरसि, “यहोवाले पेन आंद, यहोवाले पेन आंद,” इंचि इत्‍तुर.

![](https://cdn.door43.org/obs/jpg/360px/obs-en-19-12.jpg)

अस्‍के एलियाहल, “बाल पेनदा वरोरगुडा कबुरतोर पिस्‍सि होनामन्‍नि,” इंचि इत्‍तोर. अदुनहाटीं लोकुल्‍क बाल पेनदा कबुरतोर्कुन दोर्का पीतुर आनि अगाटाल पकाक ओसि ओर्कुन हव्‍किसि पोहतुर.

![](https://cdn.door43.org/obs/jpg/360px/obs-en-19-13.jpg)

अस्‍के एलियाहल, “निमे बिराना नीवा लोन होन, जेरासेप अय्ते पिर्रु वायनद मंता,” इंचि अहाब राजांक वेहतोर. बिरानेन इरगा मब्‍बु आसि, इरगा पिर्रु वायालय दल्‍गता. पदन हिलाकोंटा मत्‍तदुन पेन पदन कीसि समस्यातुन महता.

![](https://cdn.door43.org/obs/jpg/360px/obs-en-19-14.jpg)

एलियाहल ओना कबळतुन महातस्‍के, एलिसा इनना वरोर मनकन पेन दानाहाटीं कबुरतोर आयानाहाटीं पेरता. एलिसानाहेंदाल पेन बच्‍चुंगो अद्‍बूताल्‍क कीता. उंदि अद्‍बूतम नामान इनानोना पिस्वरते जर्गता. ओर वरोर पगातोना सेनाते अदिकारि मत्‍तोर, गानि ओना मेंदुल्‍कु उंदि कराब बिमारि आसि मत्‍ता. ओर नामानुना पोरोल केंजसि मत्‍तोर, अदुनहाटीं ओर एलिसानागा वासि, ओन बेस कियानाहाटीं बतिमलाडतोर. अस्‍के एलिसाल ओन्‍कु योर्दन बेरेटे होंचि एडुं मल्‍का मुळगिसि तेदा इंचि वेहतोर.

![](https://cdn.door43.org/obs/jpg/360px/obs-en-19-15.jpg)

नामानुंक इरगा होंग वाता. अल्‍हा कियमळ इत्‍ते पिसातनम आंद इंचि ओन्‍क अन्‍पिस्‍ता, अदुनहाटीं ओर अल्‍हा किय्योन इत्‍तोर. गानि पजा ओर मनसु मार्सकुंचि, योर्दन बेरेटा एते होंचि एडुं मल्कां मुळगिसि तेलतोर. ओर आकिर मल्‍काते मुळगिसि तेदतस्‍के पेन ओन बेस कीता.

![](https://cdn.door43.org/obs/jpg/360px/obs-en-19-16.jpg)

पेन बचटूरो कबुरतोर्कुन इस्राएल लोकुल्‍कुनगा लोहता. ओर अंटोरगुडा लोकुल्‍कुन बोम्मांक मोळ्‍कमळ बंद कीम्टु इंचि वेहतुर. वरोनतोनि वरोर बेस न्‍यायमते कलियसि मंटु, वरोंक-वरोर दया कींकुटु, इंचि ओर वेहतुर. अचोने आयाका आ कबुरतोर, “मिमेट तप्‍पुड कबाह्‍क कियमळ होळसिसि पेनदा पोल्‍लेन परकारम ताकागोम. अल्‍हा कियाकोंटे पेन मीवा न्‍यायम कीसि मीकुन दोसिर्क कीसि मीकु सिक्‍सा हींता,” इंचि लोकुल्‍कुंक वेर्रे वेहतुर.

![](https://cdn.door43.org/obs/jpg/360px/obs-en-19-17.jpg)

वेल्‍लेन मल्‍कां आ लोकुल्‍कु पेनदा आदेसकु मत्‍ताप ताकाकोंदुर. ओर पेनदा कबुरतोर्कुन वेल्‍लेन तकलिपगुडा कीतुर आनि बच्‍चुंगो मल्‍कां अय्ते ओर्कुन हव्‍कुतुरगुडा. उंदि मल्‍का अय्ते ओर लोकुल्‍कु यिर्मयाह इनना कबुरतोन एर हिलुवा कुहिते वाटसि, ओन अग्‍गेन हायालय होळसीतुर. कुहिता अळगुने मत्‍ता बुर्दाते ओर दिगाबळसोत्‍तोर. गानि राजांकु ओनपोर्रो दया वाताहाटीं, ओर हायाका मुन्‍नेन ओन कुहिताल पलाते तेंडालय राजाल ओना सिपाइल्‍कुंक आदेस हीतोर.

![](https://cdn.door43.org/obs/jpg/360px/obs-en-19-18.jpg)

लोकुल्‍कु पेनदा कबुरतोर्कुन हय्‍साकोन्ना गानि ओर मात्रम पेनदा पोल्‍लें वेहचेकेन मत्‍तुर. “मिमेट ओक्‍कला मनसु मार्सकुनाकोंटे पेन मीकुन नासडेम कींता,” इल्‍हा ओर लोकुल्‍कुंक वेर्रे वेहुंदुर. पेन ओर्कुन पिसागोटनाहाटीं ओरगा वरोर पिसागोटनोन लोहंता इंचि पेन हीता पोल्‍लेतुनगुडा ओर लोकुल्‍कुंक मति कीसि वेहुंदुर.

*1 राजा अध्याय 16-18; 2 राजा 5; यिर्मयाह 38 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_19_192kbps.mp3

## 20. गुलामगिरिते अरमळ आनि पेय्‍समळ

https://openbiblestories.org/l/gon-x-aheri/story-20/

![](https://cdn.door43.org/obs/jpg/360px/obs-en-20-01.jpg)

इस्राएल राज्येमतोर आनि यहुदा राज्येमतोर इव्‍वुरगुडा पेनदा विरोदमते पापम कीतुर. सिनाइ गुट्‍टापोर्रो पेन ओरतोनि कीता करारतुन ओर नेम्‍हातुर. कीता पापाल्‍कुनाल मनसु मार्सकुननाहाटीं आनि मर्रा पेनदा आरादना कियानाहाटीं ओर्कु वेर्रे वेहालय पेन दाना कबुरतोर्कुन ओरगा लोहता, गानि ओर मात्रम कबुरतोर वेहता पेनदा पोल्‍लेन परकारम ताकालय ओप्‍कुना हिल्‍लुर.

![](https://cdn.door43.org/obs/jpg/360px/obs-en-20-02.jpg)

इल्‍हा पेन ओर्कुन नासडेम कियालय ओरा पगातोर्कुन गट्‍टिगा कीसि ओर्कु सिक्‍सा हीता. अस्‍सुर इनना उंदि देसेम मत्‍ता, अद वेल्‍लेन ताकतवार आसि मत्‍ता. वेरे देसेल्‍कुनपोर्रो आ देसेमतोर असले दया हुप्‍साकोंदुर. ओर वासि इस्राएल राज्येमतुन नासडेम कीतुर. अस्‍सुर लोकुल्‍कु वासि इस्राएल राज्येमतोर्कुन वेल्‍लेन मंदितुन हव्‍कतुर, ओरा मनसुंक वातवुन दोसकुत्‍तुर, देसेमता कोन्‍नि एरियान बोळ्‍सतुर.

![](https://cdn.door43.org/obs/jpg/360px/obs-en-20-03.jpg)

अस्‍सुर लोकुल्‍कु इस्राएलता अंटोर नेतालोर्कुन, सिरमंत लोकुल्‍कुन आनि वेल्‍लेन दरातां आनि विलुवाता वस्‍तुक कियाना लोकुल्‍कुन उंदगा जमा कीसि ओरा अस्‍सुर देसेमते पीसि ओतुर. इस्राएलते सिराप इच्‍चुर गरीब लोकुल्‍के मिगिल्‍सि मत्‍तुर.

![](https://cdn.door43.org/obs/jpg/360px/obs-en-20-04.jpg)

अस्‍सुर लोकुल्‍कु मर्रा अद देसेमते मनालय वेरे देसेमतोर्कुन पीसि वातुर. आ वेरे देसेमता लोकुल्‍कु कूलसोत्‍ता सहरकुन मर्रा निल्‍हातुर. अगा मिगिल्‍सि मत्‍ता इस्राएलतोरतोनि आ लोकुल्‍कु मरमिं आतुर. आ लोकुल्‍कुन सामरि लोकुल्‍कु इंचि इत्‍तुर.

![](https://cdn.door43.org/obs/jpg/360px/obs-en-20-05.jpg)

इस्राएल लोकुल्‍कु पेनपोर्रो विस्वासम कियाकोंटा, अद वेहता पोल्‍ले परकारम ताकवाहेंका इस्राएल राज्येमता लोकुल्‍कुंक पेन बल्‍हा सिक्‍सा हीता अदुन यहुदा राज्येमता लोकुल्‍कु हूळतुर. अल्‍हा हूळसिगुडा ओर लोकुल्‍कु कनानि लोकुल्‍कुना पेनकुना बोम्मांकु मोळ्‍कतुर. ओर्कु वेर्रे वेहालय पेन दाना कबुरतोर्कुन लोहता, गानि ओर केंजालय ओप्‍कुना हिल्‍लुर.

![](https://cdn.door43.org/obs/jpg/360px/obs-en-20-06.jpg)

दग्‍गेर-दग्‍गेरा नूर (100) वर्सां आतस्‍के अस्‍सुर लोकुल्‍कु इस्राएल राज्येमतुन नासडेम कीतुर. बेबिलोनता राजाल नबुकदनेस्‍सर इनानोन पेन यहुदा राज्येमपोर्रो लडाइ कियालय लोहता. बेबिलोन उंदि पेद्‍दा ताकतवार देसेम मत्‍ता. नबुकदनेस्‍सर राजाना गुलाम आयालय आनि एडादि-एडादिक ओन्‍कु वेल्‍लेन दनम हियालय यहुदाता राजाल ओप्‍कुत्‍तोर.

![](https://cdn.door43.org/obs/jpg/360px/obs-en-20-07.jpg)

गानि कोन्‍नि वर्सां आतस्‍के, यहुदाता राजाल बेबिलोनता राजाना विरोदमते तिरियतोर. अस्‍के बेबिलोनता लोकुल्‍कु वासि यहुदा राज्येमपोर्रो लडाइ कीतुर. ओर यरुसलेम सहरपोर्रो कब्‍जा कीतुर. गुळितुन नासडेम कीतुर, सहरता आनि गुळिता कजानातुन दोसकुत्‍तुर.

![](https://cdn.door43.org/obs/jpg/360px/obs-en-20-08.jpg)

यहुदाता राजाल विरोदमते तिरियताहाटीं ओन्‍कु सिक्‍सा हियालय नबुकदनेस्‍सर राजाना सिपाइल्‍क यहुदाता राजाना मर्रिन ओना मुन्‍नेन हव्‍कतुर आनि ओन बारे गुड्‍डोड कीतुर. पजा आ राजान बेबिलोनता जेलने वाटसि ओर अग्‍गेन हायगोम इंचि ओन पीसि ओतुर.

![](https://cdn.door43.org/obs/jpg/360px/obs-en-20-09.jpg)

नबुकदनेस्‍सर आनि ओना सिपाइल्‍क यहुदा राज्येमता अंटोर लोकुल्‍कुन बेबिलोनते ओतुर, गानि नेलि कियानाहाटीं बोर अय्ते इरगा गरीब मत्‍तुरो, सिराप ओर्कुने अगा होळ्‍सतुर. इद कालमतुन गुलामगिरिता कालम इत्‍तुर. इद कालमते पेनदा लोकुल्‍कुन ओर्कु हींतन इत्‍ता देसेमताल पेय्‍सि होनालय ओर्कुन परेसान कियमळ जर्गता.

![](https://cdn.door43.org/obs/jpg/360px/obs-en-20-10.jpg)

पेन दाना लोकुल्‍कु पापम कीताहाटीं ओर्कु सिक्‍सा कियानाहाटीं ओर्कुन गुलामगिरिते लोहता. अयना अद ओर्कु हीता दाना पोल्‍लेन मात्रम मति मर्गाहिल्‍ले. पेन दाना लोकुल्‍कुनपोर्रो नदर वाटसि ओर्कुन कापाळसेकेन मत्‍ता. दाना कबुरतोर्कुन ओरगा लोहचेके ओरतोनि वळ्‍सेके मनुंदु. डेब्‍बै वर्सां आतस्‍के, अद मर्रा ओर्कुन अद हींतन इत्‍ता देसेमते ओंतन इंचि मर्रा पोल्‍ले हीता.

![](https://cdn.door43.org/obs/jpg/360px/obs-en-20-11.jpg)

दग्‍गेर-दग्‍गेरा डेब्‍बै वर्सां आतस्‍के, पारस देसेमता कुस्रु इनना राजाल बेबिलोन देसेमतुन ओळागोटतोर. अदुनहेंदाल बेबिलोन देसेमता राजांकन्‍ना पारस देसेमता राजाले वेल्‍ले देसेल्‍कुनपोर्रो राज्येम कीतोर. इस्राएल देसेमता लोकुल्‍कु इंदके यहुदि लोकुल्‍कु आतुर. ओराव्टेटाल वेल्‍ले मंदि लोकुल्‍कु ओरा पूरा पिस्वर बेबिलोनतेन पिस्तुर. सिराप इच्‍चुरे मातिर यहुदिल्‍कुंक यहुदा देसेमता मति मत्‍ता.

![](https://cdn.door43.org/obs/jpg/360px/obs-en-20-12.jpg)

पारस देसेमता लोकुल्‍कु वेल्‍लेन ताकतवार मत्‍तुर, गानि ओर गेल्‍सकुंचि तत्‍ता लोकुल्‍कुनपोर्रो ओर दया कीतुर. कुस्रु इनानोर पारस देसेमता राजाल आता कोन्‍नि रोजकुंक, आ राजाल, बोरे यहुदि आयिर ओर ओक्‍कला पारस देसेम होळसि मर्रा यहुदा देसेमते दांतन इनकुननाय्ते ओर होना पर्रांतोर, इंचि हुकुम पेच्‍हातोर. अचोने आयाका मर्रा गुळि दोहानाहाटीं आ राजाल ओर्कु कोत्‍तांगुडा हीतोर. इल्‍हा गुलामगिरिता डेब्‍बै वर्सां पुरागा आतस्‍के, यहुदिल्‍कुना उंदि सिन्‍ना गुंपु यहुदा देसेमता येरुसलेम सहरते वापस होत्‍तुर.

![](https://cdn.door43.org/obs/jpg/360px/obs-en-20-13.jpg)

ओर येरुसलेम एवतस्‍के, अगाटा गुळि आनि सहरता सुट्‍टु मत्‍ता गूरेतुन मर्रा दोहतुर. पारस देसेमता लोकुल्‍कु अदवेरदाकागुडा ओरपोर्रो राज्येम कीसेकेन मत्‍तुर, गानि यहुदिल्‍क मात्रम मरुंदि मल्‍का ओर्कु पेन हींतन इत्‍ता देसेमते मंचेके अगाटा गुळिते आरादना कीसेके मनुंदुर.

*2 राजा अध्याय 17; 24-25; 2 इतिहास 36; एज़्रा 1-10; नहेम्याह 1-13 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_20_192kbps.mp3

## 21. किरिस्‍तुन हींतन इंचि पेन पोल्‍ले हींता

https://openbiblestories.org/l/gon-x-aheri/story-21/

![](https://cdn.door43.org/obs/jpg/360px/obs-en-21-01.jpg)

पेन बस्‍के अय्ते ई दुनियातुन कीता, अस्‍के दानकु तेळियसे मत्‍ता, बस्‍के अयना बस्‍के इद दुनियाते किरिस्‍तुन लोहापींता इंचि. इतद कींतन इंचि पेन आदम आनि हव्‍वांक पोल्‍ले हीसि मत्‍ता. हव्‍वानाहेंदाल उंदि वंसम पुट्टंता, ओर तरासुना तल्‍लातुन पिच्‍चि-पिच्‍चि कींतोर. हव्‍वांकु दोका कीता तरास देय्यम आंद, इव्टे बतलेनमानम हिल्‍ले. पेन वेहता पोल्‍लेना अर्तम बतल इत्‍ते किरिस्‍तु देय्यमतुन पुरागा ओळिचंतोर.

![](https://cdn.door43.org/obs/jpg/360px/obs-en-21-02.jpg)

अब्राहामुनाहेंदाल दुनियाता अन्नि जातिनोर्कु आसिर्वाद दोर्कार इंचि पेन ओनकु पोल्‍ले हीसि मत्‍ता. अवसरमाता वेलाते पेन किरिस्‍तुन लोहचि अद हीता पोल्‍लेतुन पुरागा कींता. आ किरिस्‍तु दुनियाता अंटोर लोकुल्‍कुन ओरा पापमताल पिसागोटंतोर.

![](https://cdn.door43.org/obs/jpg/360px/obs-en-21-03.jpg)

वायाना रोजकुने मूसानसंटोन वरोन वेरे कबुरतोन लोहंतन इंचि पेन मूसांकु पोल्‍ले हीसि मत्‍ता. आ कबुरतोर इत्‍तेने किरिस्‍तु आंदुर. इल्‍हा पेन मरुंदि मल्‍का किरिस्‍तुन लोहंतन इंचि पोल्‍ले हीता.

![](https://cdn.door43.org/obs/jpg/360px/obs-en-21-04.jpg)

दाऊद राजाना वंसमताल वरोर किरिस्‍तु वायानुर इंचि पेन ओनकु पोल्‍ले हीसि मत्‍ता. आ किरिस्‍तु राजाल आसि पेनदा लोकुल्‍कुन पोर्रो बस्‍केळ्ताहाटीं राज्येम कियानुर.

![](https://cdn.door43.org/obs/jpg/360px/obs-en-21-05.jpg)

यिर्मयाह इनना कबुरतोनतोनि पेन वळ्‍किसि, उंदि रोजु उंदि पूना करार कींतन इंचि ओनकु वेहचि मत्‍ता. आ पूना करार इस्राएल देसेमता सिनाइ गुट्‍टापोर्रो जर्गता पडाना करारलेसीं मन्नो. पेन बस्‍के अय्ते दाना लोकुल्‍कुनतोनि पूना करार किय्यार अस्‍के अद कुद्दु दाना लोकुल्‍कुंक दिस्‍सार. हरेक मनकल दान पावरम कियानुर आनि दाना नियमाल्‍कुना परकारम ताकालय तयार आयानुर. दाना नियमाल्‍कु दाना लोकुल्‍कुना गुंडे पोर्रो रासताप मनानुं इंचि पेन वेहचि मत्‍ता. ओर लोकुल्‍कु दानोर्क आयानुर आनि पेन ओरा पापाल्‍कुन मापि किय्यार. ओरतोनि आ करार कियानोर इत्‍ते किरिस्‍तु आंदुर.

![](https://cdn.door43.org/obs/jpg/360px/obs-en-21-06.jpg)

वायाना किरिस्‍तुगुडा पेनदा कबुरतोरे मनांतोर इंचि पेनदा कबुरतोरगुडा वेहचि मत्‍तुर. वरोर पेनदा कुबरतोर बतल कींतोर इत्‍ते, ओर पेनदा पोल्‍लेन मुन्ने केंजांतोर, केंजसि आ पोल्‍लेन लोकुल्‍कुंक वेहांतोर. पेन लोहना कबुरतोर ओर वरोर अन्निटते पुरागा आसि मत्‍ता कबुरतोर मनांतोर. इत्‍ते आ किरिस्‍तु पेनदा पोल्‍लेन बेस केंजसि अवुन लोकुल्‍कुंक बेस तेळियानाल तेल्‍पिच्‍चि वेहानुर.

![](https://cdn.door43.org/obs/jpg/360px/obs-en-21-07.jpg)

इस्राएलता पेर्मालोर लोकुल्‍कुनाहाटीं पेनदा मुन्ने मोक्‍कुल्‍कु हीसेकेन मत्‍तुर. आ मोक्‍कुल्‍कु लोकुल्‍कुना पापाल्‍कुनाहाटीं ओर्कु सिक्‍सा हियाना जेगाते ओर हीसेके मत्‍तुर. लोकुल्‍कुनाहाटीं पेर्मालोर पारतनागुडा कीतुर. गानि आ किरिस्‍तु अन्निटते पुरागा आसि मत्‍ता पेद्दा पेर्मल आसि पेनदुक मोक्‍कु आयानालायक मनना बलिलेसीं ओर पेनदाहाटीं ओनद ओरे मोक्‍कु आयानुर. इत्‍ते ओर बस्‍केने पापम किय्योर. आनि ओर बस्‍के अय्ते ओनद ओर मोक्‍कु आयानुर, अस्‍के दुनियाता बदे बलिता अवसरम मन्नो.

![](https://cdn.door43.org/obs/jpg/360px/obs-en-21-08.jpg)

लोकुल्‍कुना मंदानपोर्रो राजाल आनि पेद्दा मनकालोर राज्येम कींतुर, ओरगुडा बस्‍के-बस्‍केनो तप्‍पुल्‍क कींतुर. दाऊद राजाल अय्ते सिराप इस्राएल लोकुल्‍कुना पोर्रो राज्येम कीतोर, गानि दाऊद राजाना वंसमते पुट्टाना किरिस्‍तु मात्रम पूरा दुनियापोर्रो राज्येम कियानुर. अचोने आयका ओर बस्‍केळ्‍क न्‍यायमतेन राज्येम कींतोर, बस्‍केळ्‍क बेसता निरनायाल्‍क येतंतोर.

![](https://cdn.door43.org/obs/jpg/360px/obs-en-21-09.jpg)

पेनदा कबुरतोर किरिस्‍तुना बारेमते वेल्‍लेन पोल्‍लें वेहतुर. उदाहरनते, मलाकि, “किरिस्‍तु वायाका मुन्ने वरोर वेरे कबुरतोर वायानुर. ओना वायमळकु वेल्‍लेन महत्‍त्‍व मनंता,” इंचि वेहतोर. इच्‍चोने आयाका, यसायाह इनना कबुरतोर, “उंदि मरमिं आयवा लेय्यडकु किरिस्‍तु पुट्टंतोर,” इंचि रासतोर. मीका इनना कबुरतोर, “किरिस्‍तु बेतलहेम इनना सहरते पुट्टंतोर,” इंचि वेहतोर.

![](https://cdn.door43.org/obs/jpg/360px/obs-en-21-10.jpg)

यसायाह इनना कबुरतोर, “किरिस्‍तु गालिल एरियाते मनांतोर, इरगा दुक्‍कमते मनना लोकुल्‍कुंक ओर सांति हींतोर. जेलने बंद कीसि मत्‍तोर्कुन ओर होळसंतोर. बिमार मत्‍तोर्कुन, सेव्टोर्कुन, गुड्डोर्कुन, मूकालोर्कुन अल्‍हेने कुंटोर्कुन ओर बेस कियानुर,” इंचि वेहतोर.

![](https://cdn.door43.org/obs/jpg/360px/obs-en-21-11.jpg)

अचोने आयका, “लोकुल्‍कु किरिस्‍तुन हय्‍सुर, ओन ओप्‍कुन्नुर,” इंचिगुडा यसायाह इनना कबुरतोर वेहतोर. इंका वेरे कबुरतोर, “किरिस्‍तुना वरोर दंटातोर ओना विरोदमते तेदानुर,” इंचि वेहतोर. जकर्याह इनना कबुरतोर, “किरिस्‍तुना विरोदमते तेदाना ओना दंटातोर, ओनकु दोका कियालय वेरेतोरागटाल मुप्‍पै एंडि कलदार्क येतंतोर,” इंचि वेहतोर. इंका इच्‍चुर कबुरतोर अय्ते, “लोकुल्‍कु किरिस्‍तुन हव्‍किसि ओना कपडिन सिट्टिं वाटसि पंचकुंतुर,” इंचि वेहतुर.

![](https://cdn.door43.org/obs/jpg/360px/obs-en-21-12.jpg)

अचोने आयका, किरिस्‍तुंक हामुर बल्‍हा वांता? इदगुडा पेनदा कबुरतोर वेहतुर. किरिस्‍तु बतले तप्‍पु कियाकोन्‍ना गानि, लोकुल्‍कु किरिस्‍तुन पोर्रो उस्‍कानुर, ओन कारेडाल्‍क कियानुर, ओन तनानुर, ओन कोह्‍कानुर. ओन इरगा तकलिप्‍क वासि ओर जीवा होळ्‍सानुर, इंचि वेहातुर.

![](https://cdn.door43.org/obs/jpg/360px/obs-en-21-13.jpg)

किरिस्‍तु बस्‍केन पापम किय्योर, ओर अन्निटते पुरागा आसि मनांतोर. गानि लोकुल्‍कुना पापाल्‍कुनाहाटीं पेन ओनकु सिक्‍सा हींता, ओना हामुरताहेंदाल लोकुल्‍कु पेनतोनि कलियानालायक आंतुर, इदुनाहाटींगे किरिस्‍तु हायागोम इंचि पेनदा इच्‍चा मंता. इल्‍हागुडा पेनदा कबुरतोर वेहतुर.

![](https://cdn.door43.org/obs/jpg/360px/obs-en-21-14.jpg)

इंका पेन किरिस्‍तुन हातोराव्टेटाल मर्रा जीवाते तेहंता. दीनहेंदाल पेन पूना करार कियानाहाटीं उंदि पिलान कीता इंचि तेळियंता. इल्हा बोर अय्ते दाना विरोदमते पापम कीतुर ओर्कुन अद पिसागोटंता.

![](https://cdn.door43.org/obs/jpg/360px/obs-en-21-15.jpg)

किरिस्‍तुना बारेमते पेन दाना कबुरतोर्कु वेल्‍लेन पोल्‍लेन हुपिस्‍ता, गानि किरिस्‍तु मात्रम आ कबुरतोर्कु पिस्‍सि मत्‍तास्‍के वायाहिल्‍लोर. ई कबुरतोर वेहता पोल्‍लेना नालूं नुह्‍कुना (400) वर्साना पज्‍जो पेन निरनायम कीता वेलाक अद किरिस्‍तुन इद दुनियाते लोहंता.

*उत्पत्ति 3:15; 12:1-3; व्यवस्थाविवरण 18:15; 2 शमूएल 7; यिर्मयाह 31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7; 35:3-5; 61; 53; भजन संहिता 22:18; 35:19; 69:4; 41:9; जकर्याह 11:12-13; यशायाह 50:6; भजन संहिता 16:10-11 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_21_192kbps.mp3

## 22. योहानुना पुटमळ

https://openbiblestories.org/l/gon-x-aheri/story-22/

![](https://cdn.door43.org/obs/jpg/360px/obs-en-22-01.jpg)

सुरुवने पेन दाना कबुरतोरतोनि वळ्‍कुंदु, अदुनहाटीं लोकुल्‍कुनतोनि ओर वळ्‍का परतुर. गानि अद कालमताल अय्ते दग्‍गेर-दग्‍गेरा नालुं नुह्‍कुना (400) वर्सनदाका पेन कबुरतोरतोनि वळ्‍काहिल्‍ले. अस्‍के जकर्याह इनना वरोर पेर्मानगा पेन दाना दूतातुन लोहता. जकर्याहल आनि ओना मुत्‍तो एलिसिबाल पेनदुक बेस कदर हिय्युंदुर. ओर इरगेन मातिर आसि मत्‍तुर, ओर्कु संतानमगुडा हिलाका मत्‍ता.

![](https://cdn.door43.org/obs/jpg/360px/obs-en-22-02.jpg)

पेनदा आ दूता जकर्याहन इल्‍हा इत्‍ता, “नी मुत्‍तो वरोर मर्रिन कनंता, निमे ओन्‍कु योहान इंचि पोरोल दोस्‍सा. पेन ओन पवित्र आत्माते पुरागा कींता, लोकुल्‍कु किरिस्‍तुन विस्वासम कियालय योहान ओर्कुन तयार कींतोर,” इत्‍ता. अस्‍के जकर्याहल, “नना, नावा मुत्‍तो मोमोट इव्‍वुरोमगुडा मातिर आतोम, मोमोट संतानम कना पर्रोम! अयना निमे निजम वेहचंतिन नना बल्‍हा नम्मुकन?” इंचि जवाब हीतोर.

![](https://cdn.door43.org/obs/jpg/360px/obs-en-22-03.jpg)

अस्‍के आ दूता, “नीकु ई बेसता कबुर वेहालय पेने नाकुन निहगा लोहता, गानि निमे नापोर्रो विस्वासम किया हिल्‍लिन, अदुनहाटीं मीकु मर्री पुट्‍टनदाका नीकु वळ्‍कालय तोड्‍डि वायो,” इंचि जकर्याहंकु जवाब हीता. अस्‍केटद अस्‍केन जकर्याहल वळ्‍का पर्राकोंटा आतोर. अस्‍के आ दूता जकर्याहनगटाल पेय्‍सि होत्‍ता. पजा जकर्याहल लोन वातोर, ओना मुत्‍तो नेला तप्‍ता.

![](https://cdn.door43.org/obs/jpg/360px/obs-en-22-04.jpg)

एलिसिबाल नेला तप्‍सि हारूं नेल्‍क(6) आतस्‍के, अदे दूता एलिसिबाना उंदि जीवातद मरियम पोरोलता मुरतळ्‍कु दिसता. आ मरियम इंका मरमिं आयाहिल्‍ले, गानि योसेप इनानोनतोनि एर्राबोट्‍टु आसि मत्‍ता. आ दूता मरियमुन, “निमे नेला तप्‍सि वरोर मर्रिन कनंतिन, निमे ओना पोरोल येसु इर्रा. ओर अन्‍निट्‍कन्‍ना पेद्‍दा पेनदा मर्रि आयानुर, ओर हमेसाताहाटीं राज्येम कियानुर,” इंचि इत्‍ता.

![](https://cdn.door43.org/obs/jpg/360px/obs-en-22-05.jpg)

अस्‍के मरियम, “नना अय्ते मरमिं आयाहिल्‍लेन, इद बल्‍हा आया पर्रंता?” इंचि जवाब हीता. अस्‍के आ दूता, “पवित्र आत्मा नीपोर्रो वांता, पेनदा ताकत नीपोर्रो नीडा किय्यार. इंचि आ पुट्‍टाना पेडल पवित्र मनंतोर, ओर पेनदा मर्रि आयानुर,” इंचि तेल्‍पिच्‍चि वेहता. आ दूता वेहतादुन मरियम नम्मुता.९३७०६२४१०६

![](https://cdn.door43.org/obs/jpg/360px/obs-en-22-06.jpg)

इल्‍हा जर्गतस्‍के, मरियम बिराना होंचि एलिसिबांक कलियता. मरियम एलिसिबांक जोहार वेहता वेहुडे, एलिसिबाना पीटे मत्‍ता पिंडेम मेसुल्ता. पेन आ मुरताह्‍कुनाहाटीं कीतदुन पीसि आ मुरताह्‍क अंटव कलिसयि आनंदम कीतां. मरियम एलिसिबानगा मूड नेल्‍क(3) मंचि, पजा अद दाना लोन मल्‍सि होत्‍ता.

![](https://cdn.door43.org/obs/jpg/360px/obs-en-22-07.jpg)

पजा एलिसिबाल वरोर पेडन कंता. पेनदा दूता वेहताप, जकर्याहल आनि एलिसिबाल आ पेडाना पोरोल योहान इंचि इरतुर. अस्‍के पेन जकर्याहन वळ्‍कानाल कीता. अस्‍के जकर्याहल, “पेनदुक दन्‍यवाद, अद दाना लोकुल्‍कुंक सहायम कियमळ मति मर्गाहिल्‍ले! नावा मर्रिना, निमे अन्‍निट्‍कन्‍ना ताकतवार पेनदा कबुरतोन आकिन. लोकुल्‍कु ओरा पापाल्‍कुनाल बल्‍हा मापि दोर्किच्‍कुना पर्रांतुर इत्‍ता पोल्‍ले निमे ओर्कु वेहानोन आकिन,” इंचि इत्‍तोर.

*लूका अध्याय 1 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_22_192kbps.mp3

## 23. येसुना पुटमळ

https://openbiblestories.org/l/gon-x-aheri/story-23/

![](https://cdn.door43.org/obs/jpg/360px/obs-en-23-01.jpg)

योसेप इनना वरोर नीतिमंतुनतोनि मरियमुना एर्राबोट्‍टु आसि मत्‍ता. मरियम नेला तप्‍सि मंता इंचि ओन्‍कु तेळियता, पीटे मनना पिंडेम ओनद आयो इंचि ओन्‍कु एर्के मत्‍ता. गानि ओर मरियमुन बदनाम कियालय हूळा हिल्‍लोर. दानपोर्रो दया हुपिच्‍चि बोर्के तेळियाकोंटा दानकु सोडसिट्‍टि हिय्याना विचारमते मत्‍तोर. ओर अल्‍हा कियाका मुन्‍नेन पेनदा उंदि दूता ओना कलाते वासि ओनतोनि वळ्‍कता.

![](https://cdn.door43.org/obs/jpg/360px/obs-en-23-02.jpg)

आ दूता इल्‍हा इत्‍ता, “ए योसेप, मरियमुन नीवा मुत्‍तो इंचि तरकुनालय निमे वेरियमा. दाना पीटे मनना पेडल पवित्र आत्माताहेंदाल वातोर आंद. अद वरोर मर्रिन कनंता, निमे ओना पोरोल येसु इंचि इर्रा. (ई पोरोलकु अर्तम, यहोवा पेन पिसागोटंता), बारित्‍ते ओर, लोकुल्‍कुन ओरा पापाल्‍कुनाल पिसागोटंतोर,” इत्‍ता.

![](https://cdn.door43.org/obs/jpg/360px/obs-en-23-03.jpg)

इल्‍हा योसेप मरियमुनतोनि मरमिं आसि दान ओनगा पीसि वातोर, गानि अद मर्रिन कननदाका ओर दानतोनि मींडा हिल्‍लोर.

![](https://cdn.door43.org/obs/jpg/360px/obs-en-23-04.jpg)

मरियमुना एरपूराना रोजकु दग्‍गेर एव्तस्‍के, मरियम आनि योसेप वेल्‍लेन लक्‍कु मनना बेतलहेम सहर होत्‍तुर. ओर्क अगा होनानदे मत्‍ता, बारित्‍ते इस्राएल देसेमते मनना अंटोर लोकुल्‍कुना लेक्‍का रोम सरकारुंक कियाना मत्‍ता. अदुनहाटीं आ लोकुल्‍कुना पेद्‍दाल्‍क बगा मत्‍तुरो अग्‍गेन ओर्कुन होनालय रोम सरकार वेहता. दाऊद राजाल बेतलहेम सहरतेन पुटतोर, अग्‍गेन मरियम आनि योसेपुना पेद्‍दाल्‍क मत्‍तुर.

![](https://cdn.door43.org/obs/jpg/360px/obs-en-23-05.jpg)

मरियम आनि योसेप बेतलहेम अय्ते होत्‍तुर, गानि ओर्कु अगा मनालय गोळ्‍कुना कोळका तप्पा इंका वेरे बदे जेगा दोर्काहिल्‍ले. मरियम आ कोळकातेन पेडन कंता. अगा आ पेडन मींडिच्‍चालय वेरे जेगा हिलुवाहेंका अद आ पेडन कोंदां मेयाना जेगाते इरता. ओर आ पेडन पोरोल येसु इंचि इरतुर.

![](https://cdn.door43.org/obs/jpg/360px/obs-en-23-06.jpg)

अद नर्का दग्‍गेटा नेलिने इच्‍चुर गोर्रें मेहानोर ओरा गोर्रेना कावेल कीसेके मत्‍तुर. अचानक पेनदा उंदि दूता ओरगा जग्‍गरा आसि ओर्कु दिसता, ओर इरगा वेरियतुर. अस्‍के आ पेनदा दूता, “वेरियमट, मीकु वेहनाहाटीं नहगा उंदि बेसता कबुर मंता, अद बतल इत्‍ते, बेतलहेमते किरिस्‍तु, सामि पुटतोर.

![](https://cdn.door43.org/obs/jpg/360px/obs-en-23-07.jpg)

होंचि आ पेडन पहकटु, मीकु ओर उंदि कप्‍पिड गंडाते हुट्‍टिसि, कोंदां मेयाना जेगाते मींडसि दोर्कंतोर,” इंचि वेहता. अचानक मब्‍बु पुरागा पेनदा दूतानतोनि निंडिसि होत्‍ता. “स्वर्गमते मनना पेनदुके पूरा महिमा दोर्किकांटि, बूमिते मनना बा लोकुल्‍कुना चिंता पेन कींतानो, आ लोकुल्‍कुंक सांति दोर्किकांटि,” इल्‍हा इंचेके आ दूतां पेनदा स्‍तुति कीसेके मत्‍तां.

![](https://cdn.door43.org/obs/jpg/360px/obs-en-23-08.jpg)

पजा पेनदा दूतां अगाटाल होत्‍तां. आ गोर्रें मेहानोर ओरा गोर्रेन अग्‍गेन होळसिसि पेडन पह्‍कालय होत्‍तुर. ओर बिरानेन येसु मत्‍ता जेगाते होत्‍तुर. अगा होत्‍तस्‍के, ओर्कु पेनदा दूता बल्‍हा अय्ते वेहतानो अल्‍हेन, येसु कोंदां मेयाना जेगाते मींडसि मत्‍तद दिसतोर. ओर वेल्‍लेन कुसिते मत्‍तुर. पजा ओर ओरा गोर्रें मत्‍ता जेगाते मल्‍सि होत्‍तुर. ओर बतल अय्ते हूळतुर, केंजतुर, अदुन पीसि ओर पेनदा स्‍तुति कीसेके मत्‍तुर.

![](https://cdn.door43.org/obs/jpg/360px/obs-en-23-09.jpg)

पोळ्‍द पेय्‍साना दिक्‍कुनेके लक्‍कु उंदि देसेमते इच्‍चुर मांडसा मत्‍तुर. ओर वेल्‍लेन तेल्‍विगल्‍लोर्क मत्‍तुर, सुक्‍काना बारेमते ओर बेस करियसि मत्‍तुर. मब्‍बुने ओर उंदि स्‍पेसल सुक्‍कातुन हूळतुर. हूळसि, यहुदिल्‍कुनाहाटीं वरोर पूना राजाल पुटतोर इंचि, ओर आ सुक्‍काता अर्तम कीकुत्‍तुर. अदुनहाटीं ओर आ पेडन हूळाना इन्‍कुंचि ओरा देसेमताल पय्‍नेम पेय्‍साना निरनायम कीतुर. वेल्‍लेन रोजकु पय्‍नेम कीसि बेतलहेम इनना सहरते एव्तुर. अगा बगा अय्ते येसु आनि ओना यावल-बाबाल मत्‍तुर, अद लोतुन ओर दोर्किच्‍कुत्‍तुर.

![](https://cdn.door43.org/obs/jpg/360px/obs-en-23-10.jpg)

आ मांडसा, येसुन ओना यावानगा हूळतस्‍के ओर ओरा टोंगरां ऊनसि आ पेडाना आरादना कीतुर. एक्‍को दराता वस्‍तुकु ओर येसुंक हीतुर. पजा ओर ओरा लोह्‍कुने मल्‍सि होत्‍तुर.

*मत्ती अध्याय 1; लूका 2 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_23_192kbps.mp3

## 24. येसुंकु योहान बापतिस्मा हींतोर

https://openbiblestories.org/l/gon-x-aheri/story-24/

![](https://cdn.door43.org/obs/jpg/360px/obs-en-24-01.jpg)

एलिसिबाल आनि जकर्याहना मर्रि योहान, पेद्‍दागासि पेनदा कबुरतोर आतोर. ओर केडाते मंचेके, हुर्वे निय आनि गोल्‍लाबामां तिनुंदुर, लोटापेटा बूरातोनि तयार कीता कपडिं केर्रुंदुर.

![](https://cdn.door43.org/obs/jpg/360px/obs-en-24-02.jpg)

योहानुना पोल्‍लें केंजानाहाटीं वेल्‍लेन लोकुल्‍कु केडाते होत्‍तुर. योहान लोकुल्‍कुंक, “मनसु मार्सकुंटु, पेनदा राज्येम दग्‍गेर्क एव्ता,” इंचेके वेहुंदुर.

![](https://cdn.door43.org/obs/jpg/360px/obs-en-24-03.jpg)

योहान वेहता पोल्‍लें केंजसि वेल्‍लेटुर लोकुल्‍कु ओरा पापाल्‍कुनाल मनसु मार्सकुत्‍तुर आनि योहान ओर्कु बापतिस्मा हीतोर. योहानुन हूळालय पंडितुल्‍कगुडा वातुर, गानि ओर ओरा पापाल्‍कुनाल मनसु मार्सकुना हिल्‍लुर, ओप्‍कुना हिल्‍लुर.

![](https://cdn.door43.org/obs/jpg/360px/obs-en-24-04.jpg)

अस्‍के योहान आ पंडितुल्‍कुन इल्‍हा इत्‍तोर, “अरे ए विसम तरासुरिटा! मनसु मार्सकुंचि, मीवा वागनुकतुन मार्सकुंटु. बद मरा अय्ते बेस पंडि हादोनो आ हरेक मरातुन पेन नर्किसि तळमिते वाटाना मंता,” इंत्‍तोर. पेनदा कबुरतोर योहानुना बारेमते बतल अय्ते वेहचि मत्‍तुरो, ओर अद पुरागा कीतोर, “हुळा, बिरानेन नीवा मुन्‍ने नना वरोर कबुरतोन लोहंतन, ओर नीवाहाटीं हर्रि तयार कींतोर,” इंचि आ कबुरतोर वेहचि मत्‍तुर.

![](https://cdn.door43.org/obs/jpg/360px/obs-en-24-05.jpg)

‘निमे किरिस्‍तुन आंदिना?’ इंचि इच्‍चुर पंडितुल्‍क योहानुन पूसकीति मत्‍तुर. अस्‍के योहान, “नना किरिस्‍तुन आयोन, ओर पजोटाल वायाना मंतोर, ओना काल्‍कुना हेरपुह्‍कुन इट्‍टानच्‍चोन विलुवागुडा नाकु हिल्‍ले,” इंचि ओर्कु जवाब हीतोर.

![](https://cdn.door43.org/obs/jpg/360px/obs-en-24-06.jpg)

इंकुंदि रोजु येसु बापतिस्मा येतानाहाटीं योहानुनगा वातोर. योहान ओन हूळतोर अस्‍के, “हुळाट! पेनदा गोर्रे पोरि, दुनियातोरा पापाल्‍कुन तेहकुंचि ओयालय वासंतोर,” इंचि इत्‍तोर.

![](https://cdn.door43.org/obs/jpg/360px/obs-en-24-07.jpg)

योहान येसुन इल्‍हा इत्‍तोर, “नना नीकु बापतिस्मा हिय्याना लायक हिल्‍लेन, निमेन नाकु बापतिस्मा हीते बेस मनंता,” इत्‍तोर. गानि, “निमेन नाकु बापतिस्मा हीम, बारित्‍ते इदे बेस आंद,” इंचि येसु योहानुन इत्‍तोर. येसु बस्‍केन पापम किया हिल्‍लोर, अयना योहान येसुंकु बापतिस्मा हीतोर.

![](https://cdn.door43.org/obs/jpg/360px/obs-en-24-08.jpg)

बापतिस्मा येतसि येसु एताल पलाते पेय्तस्‍के, पेनदा आत्मा उंदि पावरेम पिट्‍टेलेसीं आसि ओनपोर्रो वासि रेयता. अदे वेलाते पेन स्वर्गमताल इल्‍हा वळ्‍कता, “निमे नावा मर्रिन आंदिन, नना नीकुन पावरम कींतन, नना नीतोनि वेल्‍लेन कूस मंतन,” इंचि इत्‍ता.

![](https://cdn.door43.org/obs/jpg/360px/obs-en-24-09.jpg)

पेन योहानुन इल्‍हा इत्‍ता, “पेनदा आत्मा हिळु वासि बोन पोर्रो अय्ते रेय्यंता, निमे ओन्‍कु बापतिस्मा हीकिन, ओरे पेनदा मर्रि आंदुर, पेन उंदे आंद.” गानि योहान येसुंकु बापतिस्मा हीतस्‍के पेन बाबाल वळकानद ओर केंजतोर. मर्रि आता येसु, पेनदुन हूळतोर. आनि ओर पवित्र आत्मातुन हूळतोर.

*मत्ती अध्याय 3; मरकुस 1:9-11; लूका 3:1 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_24_192kbps.mp3

## 25. देय्यम येसुना पट्‍टु हूळंता

https://openbiblestories.org/l/gon-x-aheri/story-25/

![](https://cdn.door43.org/obs/jpg/360px/obs-en-25-01.jpg)

येसुना बापतिस्मा आता आयुडे, पवित्र आत्मा ओन केडाते ओता. येसु अगा नल्‍पै रोजकु आनि नल्‍पै नर्कां मत्‍तोर. अगा मत्‍ताचुं रोजकु येसु उपासम मत्‍तोर, देय्यम ओन पापमते अराहनाहाटीं ओना दग्‍गेर्क वासि ओना पट्‍टु हूळता.

![](https://cdn.door43.org/obs/jpg/360px/obs-en-25-02.jpg)

मोदाला देय्यम, “निमे ओक्‍कला पेनदा मर्रिन आते, निमे तिननाहाटीं ई बंडान हारिने मार्सा,” इंचि येसुन इत्‍ता.

![](https://cdn.door43.org/obs/jpg/360px/obs-en-25-03.jpg)

गानि येसु, “मनकल पिस्‍सि मननाहाटीं ओन्‍कु सिराप हारिना अवसरमे हिल्‍ले, पेन ओन्‍कु वेहना हरेक पोल्‍लेता अवसरम ओन्‍कु मनंता, इंचि पेनदा पुस्‍तकमते रासि मंता,” इंचि देय्यमतुन इत्‍तोर.

![](https://cdn.door43.org/obs/jpg/360px/obs-en-25-04.jpg)

अस्‍के देय्यम, येसुन गुळिता कोस्‍सा कोड्‍डिपोर्रो एत्‍तु जेगाते ओता. अगा ओसि, “निमे पेनदा मर्रिन आते, इग्‍गेटाल हिळु दुनका, बारित्‍ते, नीवा काल्‍कुंक नोप्‍पि आयाकोंटा नीकुन पोर्रेन पीकुनालय पेन दाना दूतान लोहंता इंचि पेनदा पुस्‍तकमते रासि मंता,” इंचि येसुन इत्‍ता.

![](https://cdn.door43.org/obs/jpg/360px/obs-en-25-05.jpg)

गानि येसु मात्रम देय्यम वेहता बदे कबळ किया हिल्‍लोर. अल्‍हा कियाकोंटा ओर देय्यमतुन, “पेन अंटोरतोनि वेहंता, निमे नीवा सामि आता पेनदा पट्‍टु हूळमा,” इंचि इत्‍तोर.

![](https://cdn.door43.org/obs/jpg/360px/obs-en-25-06.jpg)

पजा देय्यम दुनियाता अन्‍नि देसेल्‍कुन येसुंकु हुपिस्‍ता. अव देसेल्‍क बचोन बेस आनि ताकतवार मंतां इत्‍ताप देय्यम ओन्‍कु हुपिस्‍ता. अद येसुन, “निमे टोंगरां ऊनसि नाकुन मोळ्‍कानाय्ते नना इवन्‍नि नीकु हींतन,” इत्‍ता.

![](https://cdn.door43.org/obs/jpg/360px/obs-en-25-07.jpg)

अस्‍के येसु, “ए देय्यमतुना, निमे नहागटाल लक्‍कु होन! पेनदा पोल्‍ले अंटोर्कुंक वेहंता गदा, ‘सिराप निमे नीवा सामि आता पेनदुने मोळ्‍काना, सिराप पेनदुने कदर कियाना,’” इंचि देय्यमकु जवाब हीतोर.

![](https://cdn.door43.org/obs/jpg/360px/obs-en-25-08.jpg)

देय्यम बच्‍चूं तीरकुने येसुना पट्‍टु हूळिनागानि येसु वेरियाहिल्‍लोर, अदुनहाटीं देय्यम ओनागटाल पेय्‍सोत्‍ता. अस्‍के पेनदा दूतां वासि येसुना सेवा कियालय दल्‍गतां.

*मत्ती अध्याय 4:1-11; मरकुस 1:12-13; लूका 4:1-13 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_25_192kbps.mp3

## 26. येसु सेवा कबळ सुरुव कींतोर

https://openbiblestories.org/l/gon-x-aheri/story-26/

![](https://cdn.door43.org/obs/jpg/360px/obs-en-26-01.jpg)

देय्यमताहेंदाल पट्‍टु हूळमळ आतस्‍के, येसु मर्रा मल्‍सि गालिल एरियाते वातोर. येसु इदे एरियाते मनुंदुर. पवित्र आत्मा ओन्‍कु इरगेन ताकत हिय्युंदु, ओर उंदि जेगाताल इंकुंदि जेगाक होंचि लोकुल्‍कुंक पेनदा पोल्‍लें कराहुंदुर. ओना बारेमते अंटोर बेस वळ्‍कुंदुर.

![](https://cdn.door43.org/obs/jpg/360px/obs-en-26-02.jpg)

येसु नासरेत सहरते वातोर. येसु सिन्‍नगा मत्‍तास्‍के इदे नाटे मनुंदुर. नोमकेम रोजुननाडु ओर आरादना कियाना जेगाते होत्‍तोर. अगाटा पेद्‍दाल्‍क ओन्‍कु यसायाह इनना वरोर पेनदा कबुरतोर रासता उंदि पुस्‍तकम हीतुर. येसु अव्टेटाल हद्‍वाना इंचि ओर आ पुस्‍तकम ओन्‍कु हीतुर. अय्ते येसु अद पुस्‍तकमताल उंदि बागम तेंडसि लोकुल्‍कुनाहाटीं हद्‍वुतोर.

![](https://cdn.door43.org/obs/jpg/360px/obs-en-26-03.jpg)

अद इल्‍हा मत्‍ता, “नना गरिबोरा नड्‍डुम होंचि बेसता कबुर वेहाना इंचि पेन नाकु दाना आत्मातुन हीता. बोर अय्ते जेलने मंतुर, ओर्कुन इळबळचाहाटीं, गुड्‍डोर्कुंक कळ्‍कु दिस्‍सागोटनाहाटीं आनि वेरेतोरा कय हिळु दबावते मनानोर्कुन मुक्‍ति हियानाहाटीं अद नाकु लोहचीता. पेन मनापोर्रो कुरपा कीसि सहायम कियाना इद वेला आंदु.”

![](https://cdn.door43.org/obs/jpg/360px/obs-en-26-04.jpg)

पजा येसु हिळु उदतोर. अंटोर लोकुल्‍कु ओन बेस हूळसेके मत्‍तुर. दर्मसास्‍त्रमताल इंदके हद्‍वुता बागम किरिस्‍तुना बारेमते मंता इंचि ओर्क एर्के मत्‍ता. अस्‍के येसु, “नना मीवाहाटीं इंदके हद्‍वुता पोल्‍लें इद वेलाते जर्गसेक मंतां,” इत्‍तोर. अस्‍के अंटोर लोकुल्‍कु इचंत्रंम आसि, “ईर अय्ते योसेपुना मर्रिए गदा?” इत्‍तुर.

![](https://cdn.door43.org/obs/jpg/360px/obs-en-26-05.jpg)

अस्‍के येसु मर्रा इल्‍हा इत्‍तोर, “बोर कबुरतोर अय्ते ओना सतता नाटे सिन्‍नास्‍केटाल बेर्सि पेद्‍दागा आतोर, असोंटा कबुरतोन लोकुल्‍कु ओप्‍कुन्‍नुर. एलियाह इनना वरोर पेनदा कबुरतोना कालमते इस्राएल देसेमते वेल्‍लेन मुंडामोस्‍ता मुरताह्‍क मत्‍तां. गानि मूडुनर्रा वर्सनदाका पिर्रू वायवस्‍के पेन एलियाहन, बदन्‍ना मुंडामोस्‍ता मुरतळ्‍कु सहायम कियालय इस्राएल देसेमते लोहाहिल्‍ले. दाना बदुलते एलियाहन बदो वेरे देसेमते उंदि मुंडामोस्‍ता मुरतटागा लोहता.”

![](https://cdn.door43.org/obs/jpg/360px/obs-en-26-06.jpg)

येसु वळ्‍कसेकेन मत्‍तोर, “एलिसा इनना वरोर पेनदा कबुरतोना कालमते वेल्‍लेन लोकुल्‍कुंक तोल रोगम वासि मत्‍ता. गानि एलिसल मात्रम ओराव्टेटाल वरोनगुडा बेस कियाहिल्‍लोर. ओर सिराप इस्राएलतोरा पगातोरा सेनापति नामान इनानोने बेस कीतोर.” येसुना पोल्‍लें केंजानोर अंटोरगुडा यहुदि लोकुल्‍कु मत्‍तुर, अदुनहाटीं येसुना इसोंटा पोल्‍लें केंजसि ओर ओनपोर्रो इरगा होंगुंक वातुर.

![](https://cdn.door43.org/obs/jpg/360px/obs-en-26-07.jpg)

नासरेत सहरता लोकुल्‍कु येसुन दोर्का पीसि आरादना कियाना जेगाताल इग्‍गिसि पलाते ओतुर. ओन पोर्रोटाल हिळु दोब्‍बिसि हव्‍कानाहाटीं ओन उंदि पेद्‍दा पर्पु बंडापोर्रो ओतुर. गानि येसु आ लोकुल्‍कुनाल तप्‍पिच्‍कुंचि नासरेत नाटुन होळसि होत्‍तोर.

![](https://cdn.door43.org/obs/jpg/360px/obs-en-26-08.jpg)

पजा येसु पूरा गालिल एरियाते होत्‍तोर, वेल्‍लेन लोकुल्‍कु ओनगा वातुर. ओनगा पीसि वाता लोकुल्‍कुनाल वेल्‍ले मंदि बिमार मत्‍तुर, अपंग मत्‍तुर. ओराव्टेटाल वेल्‍लेन मंदि गुड्‌डोर्क, कुंटोर्क, सेव्टोर्क, मूकालोर मत्‍तुर. येसु ओर अंटोर्कुन बेस कीतोर.

![](https://cdn.door43.org/obs/jpg/360px/obs-en-26-09.jpg)

अचोने आयाका ओरव्टे वेल्‍लेन मंदि देय्यम पीतोरगुडा मत्‍तुर. येसु ओराव्टेटाल आ देय्याल्‍कुन पेय्‍सि होनना आदेस हीतोर. आ देय्याल्‍क पेय्‍सि होननेंके, “निमे पेनदा मर्रिन आंदिन,” इंचि मोत्‍कुंचेके होनुंदु. लोकुल्‍कुंक इचंत्रम आसि ओर पेनदा स्‍तुति कियुंदुर.

![](https://cdn.door43.org/obs/jpg/360px/obs-en-26-10.jpg)

पजा येसु पन्‍नेंड मंदि मांडसातुन पेर्सि ओर्कुन प्रेरित इंचि पोरोल दोसतोर. आ प्रेरितुल्‍कु येसुनतोनि होंचेके, मंचेके ओनाहेंदाल करियतुर.

*मत्ती अध्याय 4:12-25; मरकुस 1:14-15, 35-39; 3:13-21; लूका 4:14-30, 38-44 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_26_192kbps.mp3

## 27. बेसता सामरि मनकना वेसुडि

https://openbiblestories.org/l/gon-x-aheri/story-27/

![](https://cdn.door43.org/obs/jpg/360px/obs-en-27-01.jpg)

उंदि रोजु, यहुदिल्‍कुना रिवाजकु बेस तेळियसि मत्‍तोर वरोर मनकल येसुनगा वातोर. येसु तप्‍पुड पोल्‍लें कराहचंतोर इंचि लोकुल्‍कुंक वेहना उद्देसमते ओर वातोर. अदुनहाटीं ओर, “गुरु, बस्‍केळ्‍क पिस्‍सना पिस्वर दोर्किच्‍कुननाहाटीं नना बतल कीकन?” इंचि येसुन पूसकीतोर. अस्‍के येसु, “पेनदा नियमाल्‍कुने बतल रासि मंता?” इत्‍तोर.

![](https://cdn.door43.org/obs/jpg/360px/obs-en-27-02.jpg)

आ मनकल इल्‍हा वेहतोर, “अद इल्‍हा वेहंता, निमे नीवा पेनदुन नीवा पूरा मनसुनाल, पूरा ताकतते आनि पूरा बुद्‍दिते पावरम कीम. आनि नीवा पक्‍कातोन नीवाच्‍चोन पावरम कीम.” अस्‍के येसु, “निमे बरोबर वेहतिन, निमे इल्‍हा कियानय्ते नीकु बस्‍केळ्‍क पिस्‍सना पिस्वर दोर्कंता,” इत्‍तोर.

![](https://cdn.door43.org/obs/jpg/360px/obs-en-27-03.jpg)

आ मनकल ओर पिस्‍सना पिस्वरे बरोबर मंता इंचि लोकुल्‍कुंक हुप्‍साना विचारमते मत्‍तोर. अदुनहाटीं ओर, “सरे! अय्ते नावा पक्‍कातोर बोर मरि?” इंचि पूसकीतोर.

![](https://cdn.door43.org/obs/jpg/360px/obs-en-27-04.jpg)

अस्‍के येसु आ मनकंक उंदि वेसुडि वेहासेके इल्‍हा जवाब हीतोर, “वरोर यहुदि मनकल हर्रि पीसि येरुसलेमताल यरिहो ताकसि पय्‍नेम होंचेके मत्‍तोर.”

![](https://cdn.door43.org/obs/jpg/360px/obs-en-27-05.jpg)

“गानि नड्‍डुम हर्दे बोरो दोंगाल्‍क ओन दोर्कापीसि इरगा तंतुर, ओनगा मत्‍तव अन्‍नि सामानतुन दोसकुत्‍तुर आनि ओर डुक्‍कुने मननेंके अग्‍गेन होळसि होत्‍तुर.”

![](https://cdn.door43.org/obs/jpg/360px/obs-en-27-06.jpg)

“जेरासेप आतस्‍के अदे हर्रि पीसि वरोर यहुदि पेर्मल होत्‍तोर. आ पेर्मल अगा मनकल हिळु अरसि मत्‍तद हूळसि वेरे हर्रि पीसि मुन्‍नेळ्‍क पेय्‍सि होत्‍तोर. आ पेर्मल आ हिळु अरसि मत्‍ता मनकन हूळसिगुडा हूळवाप होत्‍तोर.”

![](https://cdn.door43.org/obs/jpg/360px/obs-en-27-07.jpg)

“पजा जेरासेप आतस्‍के, वरोर लेवी मनकल अदे हर्रि पीसि वातोर. (लेवी इदु यहुदिल्‍कुना उंदि गोत्रम आंदु, गुळिते ईर पेर्मालोर्कुंक सहायम कींतुर.) आ लेवीगुडा वेरे हर्रि पीसि पेय्‍सि होत्‍तोर. ओरगुडा हिळ अरसि मत्‍ता मनकन हूळसिगुडा हूळवाप होत्‍तोर.”

![](https://cdn.door43.org/obs/jpg/360px/obs-en-27-08.jpg)

“ओना पज्‍जो अद हर्रि पीसि वरोर सामरिया एरियाता मनकल वातोर. (यहुदि लोकुल्‍कु सामरि लोकुल्‍कुन हय्‍साकोंदुर) आ सामरि मनकल हर्दे हिळु अरसि मनना मनकन हूळतोर. हुळसि हिळु अरसि मनना मनकल यहुदि आंदुर इंचि ओर एरपाट कीतोर, अयना आ सामरि मनकंक ओनापोर्रो दया वाता. पजा ओर आ हिळ अरसि मत्‍ता मनकानगा वासि ओना पुनकुन साप कीसि पट्‍टि दोहतोर.”

![](https://cdn.door43.org/obs/jpg/360px/obs-en-27-09.jpg)

“पजा आ सामरि मनकल, आ हिळ अरसि मत्‍ता मनकन ओना गाळदि पोर्रो वाट्सि अदे हर्रि पीसि उंदि लाजुने ओतोर. अगागुडा ओन ओर बेस हूळकुत्‍तोर.”

![](https://cdn.door43.org/obs/jpg/360px/obs-en-27-10.jpg)

इंकुंदि रोजु आ सामरि मनकंक पय्‍नेम होनना मत्‍ता. अस्‍के आ सामरि मनकल आ लाजुना मेनेंजरुंकु इच्‍चुं कोत्‍तां हीसि इल्‍हा वेहतोर, “ई मनकन बेस हूळकुन. नना हीता ई कोत्‍तां हालाका नीवा कोत्‍तांगिंटा कर्च आयानय्ते नना मल्‍सि वातस्‍के नीकु वापस हींतन,” इंचि वेहतोर.

![](https://cdn.door43.org/obs/jpg/360px/obs-en-27-11.jpg)

पजा नियमाल्‍कु बेस तेळियता आ मनकन येसु, “अय्ते निमे बतल इंतिन वेहा, आ मुव्‍वुर लोप्‍पोटाल, आ हिळ अरसि डुक्‍कुने मत्‍ता मनकना पक्‍कातोर बोर आंदुर?” इंचि पूसकीतोर. अस्‍के आ मनकल, “बोर अय्ते ओनपोर्रो कुरपा कीतोर ओर आंद,” इत्‍तोर. अस्‍के, “अय्ते निमेगुडा होंचि अल्‍हे कीम,” इंचि येसु इत्‍तोर.

*लूका अध्याय 10:25-37 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_27_192kbps.mp3

## 28. सिरमंत लेय्या अदिकारि

https://openbiblestories.org/l/gon-x-aheri/story-28/

![](https://cdn.door43.org/obs/jpg/360px/obs-en-28-01.jpg)

उंदि रोजु, वरोर सिरमंत लेय्या अदिकारि येसुनगा वासि, “गुरु, निमे अंटोर्कन्‍ना बेसतोन आंदिन. नाकु बस्‍केळ्‍क पिस्‍सना पिस्वर गावाले इत्‍ते नना बतल कीते बेस?” इंचि पूसकीतोर. येसु ओन्‍कु इल्‍हा वेहतोर, “निमे नाकुन अंटोर्कन्‍ना बेसतोर इंचि बारि इंतिन? सिराप पेन उंदे अंटोर्कन्‍ना बेसतद आंद. गानि नीकु ओक्‍कला बस्‍केळ्‍क पिस्‍सना पिस्वर गावाले मत्‍ते, निमे पेनदा नियमाल्‍कुने वेहताप ताका,” इंचि वेहतोर.

![](https://cdn.door43.org/obs/jpg/360px/obs-en-28-02.jpg)

“नना बव-बव आदेसकुना परकारम ताकते बेस मनंता?” इंचि ओर पूसकीतोर. अस्‍के येसु, “बोने हव्‍कुमा, व्यबिचारम कियमा, दोंगातनम कियमा, आबद्‍दम वळ्‍कुमा, नीवा तल्‍लुर-बाबोना कदर कीम आनि नीवद निमे पावरम कीताप नीवा पक्‍कातोनगुडा अच्‍चोने पावरम कीम,” इंचि वेहतोर.

![](https://cdn.door43.org/obs/jpg/360px/obs-en-28-03.jpg)

गानि आ लेय्‍योड, “नना अय्ते नावा सिन्‍नास्‍केटाले इव अन्‍नि आदेसकुन पीसि ताकसेके वातन. अय्ते नाकु बस्‍केळ्‍क पिस्‍सना पिस्वर गावाले इत्‍ते इंका वेरे बतल किया पिय्यार?” इंचि पूसकीतोर. येसु ओन बेस हूळसि ओन पावरम कीतोर.

![](https://cdn.door43.org/obs/jpg/360px/obs-en-28-04.jpg)

येसु ओन्‍कु इल्‍हा जवाब हीतोर, “नीकु ओक्‍कला पुरागा आयाना मनसु मत्‍ते, निमे होंचि नीवा दनम-संपत्‍तितुनंता अम्मिसि वाता कोत्‍तन गरिबोर्कुंक पंचि हीम, अस्‍के नीकु स्वर्गमते दनम दोर्कंता. पजा वासि नावा पज्‍जो ताका,” इत्‍तोर.

![](https://cdn.door43.org/obs/jpg/360px/obs-en-28-05.jpg)

येसु इल्‍हा वेहतदुन केंजसि आ लेय्योड इरगा नाराज आतोर, बारित्‍ते ओर वेल्‍लेन सिरमंत मत्‍तोर, ओना दनम-संपत्‍तितुन बोर्के हियमळ ओन्‍कु इस्‍टम हिलाका मत्‍ता. अदुनहाटीं ओर येसुनगटाल तिरियसि मल्‍सि होत्‍तोर.

![](https://cdn.door43.org/obs/jpg/360px/obs-en-28-06.jpg)

अस्‍के येसु ओना सिस्युल्‍कुन इल्‍हा इत्‍तोर, “सिरमंत लोकुल्‍कु पेनदा राज्येमते होळियमळ इत्‍ते वेल्‍लेन कस्‍टम मंता. हाँ, वरोर सिरमंत मनकल पेनदा राज्येमते होळियमळ कन्‍ना सूदी बोंगाताल उंदि लोटापेटा होळियमळे अल्‍कगा मनंता,” इत्‍तोर.

![](https://cdn.door43.org/obs/jpg/360px/obs-en-28-07.jpg)

येसु वेहतदुन केंजसि सिस्युल्‍कुंक इचंत्रम आता, अदुनहाटीं ओर, “अय्ते, पेन बोर्कुन पिसागोट्‍टार मरि?” इंचि इत्‍तुर.

![](https://cdn.door43.org/obs/jpg/360px/obs-en-28-08.jpg)

येसु सिस्युल्‍कुनहेके हूळसि, “मनकल ओनद ओरे मुक्‍ति दोर्किच्‍कुनमळ बस्‍केन आयापर्रो. गानि पेन मात्रम अन्‍नि किया पर्रंता,” इंचि इत्‍तोर.

![](https://cdn.door43.org/obs/jpg/360px/obs-en-28-09.jpg)

अस्‍के पत्रु, “नीवा सिस्युल्‍क आता मोमोट, मावा अन्‍निट्तुन होळसि नी पज्‍जो वातोम, अय्ते माकु बतल दोर्कार मरि?” इंचि इत्‍तोर.

![](https://cdn.door43.org/obs/jpg/360px/obs-en-28-10.jpg)

येसु इल्‍हा जवाब हीतोर, “नाहाटीं बोर अय्ते ओना लोन, दादाल-तम्मुह्‍कुन, अक्‍कल-सेल्‍लेन, तल्‍लुर-बाबोन, पिलाल्‍कुन इंका दनम-संपत्‍तितुन होळ्‍सतोर, ओन्‍कु ओर होळ्‍सीता दानकन्‍ना नूर अंताल्‍क एक्‍को दोर्कार आनि ओन्‍कु बस्‍केळ्‍क पिस्‍सना पिस्वरगुडा दोर्कार. गानि बोर अय्ते इंदके मुन्‍ने मंतोर, ओर अस्‍केळ्‍क पज्‍जो अर्रानुर आनि बोर इंदके पज्‍जो मंतोर ओर अस्‍केळ्‍क मुन्‍ने अर्रानुर,” इत्‍तोर.

*मत्ती अध्याय 19:16-30; मरकुस 10:17-31; लूका 18:18-30 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_28_192kbps.mp3

## 29. दया हिलुवा जितागाना वेसुडि

https://openbiblestories.org/l/gon-x-aheri/story-29/

![](https://cdn.door43.org/obs/jpg/360px/obs-en-29-01.jpg)

उंदि रोजु पत्रु, “सामि, नावा तम्मुर नावा विरोदमते पापम कियानाय्ते, नना ओन बच्‍चुं मल्‍कां मापि कीकन? एडुं मल्‍कांगा?” इंचि येसुन पूसकीतोर. अस्‍के येसु, “एडुं मल्‍कांगे आयो गानि एडुना डेब्‍बै मल्‍कां मापि कीम,” इंचि इत्‍तोर. दीनहेंदाल येसु बतल वेहांतोर इत्‍ते, मनम बस्‍केळ्‍क मापि कियागोम. अस्‍के येसु इद उंदि वेसुडि वेहतोर.

![](https://cdn.door43.org/obs/jpg/360px/obs-en-29-02.jpg)

येसु इल्‍हा वेहतोर, “पेनदा राज्येम वरोर राजानालेसीं मंता, बोर अय्ते ओना जीतागानाहेंदाल लेक्‍का वसूल कियाना विचारम कींतोर. ओना वरोर जीतागाड 2,00,000 वर्साना कूलिता बाकि तेंडकुंचि वेल्‍लेन बाकिते अरतोर.”

![](https://cdn.door43.org/obs/jpg/360px/obs-en-29-03.jpg)

गानि आ जीतागाड बाकि दोहा पर्राहिल्‍लोर, अदुनहाटीं राजाल ओन, “इना बाकि नेम्‍हानाहाटीं ईन आनि ईना परिवारतोर्कुन दासुल्‍क आयानाहाटीं अम्माटु,” इत्‍तोर”

![](https://cdn.door43.org/obs/jpg/360px/obs-en-29-04.jpg)

“आ जीतागाड राजाना मुन्‍ने ओना काल्‍कुनपोर्रो अरसि, “कुरपा कीसि कोन्‍नि रोजकु आगा, नीवा बाकितुन नना पुरागा नेम्‍हांतन,” इंचि इत्‍तोर. राजांक ओनपोर्रो दया वासि ओर आ जीतागाना पूरा बाकितुन मापि कीसि ओन होना वेहतोर.”

![](https://cdn.door43.org/obs/jpg/360px/obs-en-29-05.jpg)

“गानि आ जीतागाड राजानागटाल होत्‍तस्‍के, ओना दंटाता वरोर जीतागाड ओन्‍कु कलियतोर. आ जीतागाड राजांकु नालूं नेल्‍कुना कूलिता बाकि मत्‍तोर. आ जीतागाड ओना दंटाता जीतागान दोर्का पीसि, “नाकु निमे हिय्याना बाकि दोहा,” इंचि इत्‍तोर.”

![](https://cdn.door43.org/obs/jpg/360px/obs-en-29-06.jpg)

“आ रोंडोव जीतागाड मोदाटा जीतागाना काल्‍कुनपोर्रो अरसि, ‘कुरपा कीसि कोन्‍नि रोजकु आगा, नना नीवा पूरा बाकि नेम्‍हांतन,’ इंचि इत्‍तोर. गानि आ जीतागाड ओन मापि किय्याका ओना दंटाता जीतागान जेलने वाटसि पूरा बाकि नेम्मानादाका ओन पलाते वायाहिय्या हिल्‍लोर.”

![](https://cdn.door43.org/obs/jpg/360px/obs-en-29-07.jpg)

“अगा बतल अय्ते जर्गता, अदुनंता कळमता जीतागाह्‍क हूळसि परेसान आतुर, पजा ओर राजानगा होंचि जर्गतदंता वेहतुर.”

![](https://cdn.door43.org/obs/jpg/360px/obs-en-29-08.jpg)

“राजाल आ जीतागान केय्‍सि इल्‍हा पूसकीतोर, ‘अरे मुर्का जीतागा! निमे नाकु विनंति कीतस्‍के नना नीवा बाकितुन मापि किया हिल्‍लेना? निमेगुडा अल्‍हे कियामत्‍तिन.’ राजांक आ जीतागानपोर्रो इरगा होंग वासि, ओर आ जीतागान जेलने वाटसीतोर. ओर ओना बाकि पुरागा नेम्‍हानादाका ओन जेलनाल पलाते वायाहिल्‍लोर.”

![](https://cdn.door43.org/obs/jpg/360px/obs-en-29-09.jpg)

अस्‍के येसु, “मिमेट मीवा दादन-तम्मुन मनसुनाल मापि कियाकोंटे, स्वर्गमते मनना नावा पेनबाबाल मीलोप्‍पोटा हरेक मनकनगुडा अल्‍हेन कींतोर.’’

*मत्ती अध्याय 18:21-35 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_29_192kbps.mp3

## 30. हेय्युं वेय्‍कुना मंदिकु येसु तिंडि दोस्‍सा वेह‍ंतोर

https://openbiblestories.org/l/gon-x-aheri/story-30/

![](https://cdn.door43.org/obs/jpg/360px/obs-en-30-01.jpg)

येसु ओना सिस्युल्‍कुन पेनदा पोल्‍लें कराहलय आनि वेहालय वेरे-वेरे नाह्‍कुने लोहतोर. ओर येसुनगा मल्‍सि वातुर अस्‍के, ओर होंचि बतल-बतल कीतुरो अन्‍नि वेहतुर. अस्‍के येसु ओर्कुन सेरवुना हब्‍बेरे उंदि सांत जेगाते जेरासेपताहाटीं ओनतोनि आराम कियालय ओतोर. इल्‍हा ओर अंटोर उंदि डोंगाते एक्‍किसि सेरवुना हब्‍बेटा बाजुंक होत्‍तुर.

![](https://cdn.door43.org/obs/jpg/360px/obs-en-30-02.jpg)

गानि येसु आनि ओना सिस्युल्‍कु डोंगाते उदसि होननेंके हूळतोर अगा वेल्‍लेन मंदि लोकुल्‍कु मत्‍तुर. आ लोकुल्‍कु ओरकन्‍ना मुन्‍ने सेरवुना हब्‍बेटा बाजुंक होनालय ओड्‍डु पीसि वित्‍तालय दल्‍गतुर. येसु आनि ओना सिस्युल्‍क सेरवुना हब्‍बेटा बाजुंक एवतस्‍के, अगा लोकुल्‍कुना उंदि पेद्‍दा मंदा ओरा एदुर हूळसेके मत्‍ता.

![](https://cdn.door43.org/obs/jpg/360px/obs-en-30-03.jpg)

आ मंदाते पिलाल्‍क आनि मुरताह्‍कुन होळसि, हेय्युं वेय्‍कुंकन्‍ना (5000) एक्‍को मंदि मांडसे मत्‍तुर. ओर्कुन हूळसि येसुंक पापम अन्‍पिस्‍ता. येसुना नदरते आ लोकुल्‍कु मेहानोर हिलुवा गोर्रेनालेसीं आसि मत्‍तुर. अदुनहाटीं येसु ओर्कु पेनदा पोल्‍लें कराहतोर, ओरालोप्‍पो बिमार मत्‍तोर्कुन बेस कीतोर.

![](https://cdn.door43.org/obs/jpg/360px/obs-en-30-04.jpg)

पोळ्‍द होनना वेलाक सिस्युल्‍क येसुन इल्‍हा इत्‍तुर, “इंदके वेल्‍लेन आल्‍सेम आता, ई जेगाक दग्‍गेरा बद नारगुडा हिल्‍ले. अदुनहाटीं ईर्कुन होनालय वेहा, अस्‍के ओर होंचि ओराहाटीं तिंडि तरकुंतुर.” इत्‍तुर.

![](https://cdn.door43.org/obs/jpg/360px/obs-en-30-05.jpg)

गानि येसु, “ओर्कु तिनालय मिमेटे बतलन्‍ना हीम्टु,” इंचि इत्‍तोर. अस्‍के सिस्युल्‍क, “महगा अय्ते सिराप हेय्युं(5) हारिं आनि रोंडु(2) जिम्मां मंतां, मोमोट बल्‍हा ओर्कु तिनालय हिय्या पर्रांतोम?” इंचि जवाब हीतुर.

![](https://cdn.door43.org/obs/jpg/360px/obs-en-30-06.jpg)

अस्‍के येसु, “लोकुल्‍कुन एबै-एबै(50-50) मंदि कीसि जाडि पोर्रो उद्‍दा वेहाट,” इंचि ओना सिस्युल्‍कुंक वेहतोर.

![](https://cdn.door43.org/obs/jpg/360px/obs-en-30-07.jpg)

अस्‍के येसु आ हेय्युं हारिं(5) आनि रोंडु(2) जिम्मान पीसि स्वर्गमतेके हूळतोर, हूळसि अवुनाहाटीं पेनदुक दन्‍यवाद वेहतोर.

![](https://cdn.door43.org/obs/jpg/360px/obs-en-30-08.jpg)

पजा येसु आ हारिन आनि जिम्मान तुकडां कीतोर. कीसि अवुन लोकुल्‍कुंक हीम्टु इंचि येसु ओना सिस्युल्‍कुंक वेहतोर. सिस्युल्‍कु आ तुकडन लोकुल्‍कुंक वाटसेकेन होत्‍तुर गानि आ तुकडां मारेन हिल्‍लें. लोकुल्‍कु पीरनिंडा तित्‍तुर.

![](https://cdn.door43.org/obs/jpg/360px/obs-en-30-09.jpg)

अद आता पजा, मिगुल्ता तिंडितुन सिस्युल्‍क जमा कीतुर अय्ते अव दग्‍गेर-दग्‍गेरा पन्‍नेंड तट्‍टां निंडानच्‍चोन मय्‍सि मत्‍तां. आ पूरा तिंडिअंता सिराप हेय्युं हारिं आनि रोंडु जिम्मानाहेंदाले आता.

*मत्ती अध्याय 14:13-21; मरकुस 6:31-44; लूका 9:10-17; यूहन्ना 6:5-15 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_30_192kbps.mp3

## 31. येसु एतापोर्रो ताकंतोर

https://openbiblestories.org/l/gon-x-aheri/story-31/

![](https://cdn.door43.org/obs/jpg/360px/obs-en-31-01.jpg)

हेय्युं वेय्‍कुना मंदिकु तिंडि दोसमळ आता पजा, येसु ओना सिस्युल्‍कुन डोंगाते होंचि उद्‍दालय वेहतोर. ओर्कुन सेरवुना हब्‍बेटा बाजुंक होनालय वेह्‍चि ओर मात्रम जेरासेपताहाटीं अग्‍गेन आगतोर. सिस्युल्‍क पेय्‍सि होत्‍तुर, येसु लोकुल्‍कुना मंदातुन लोन होनालय वेहतोर. पजा येसु पारतना कियानाहाटीं उंदि गुट्‍टापोर्रो एक्‍किसि होत्‍तोर. अगा ओर वरोरे मत्‍तोर, वेल्‍लेन नर्का आयनदाका ओर अगा पारतना कीतोर.

![](https://cdn.door43.org/obs/jpg/360px/obs-en-31-02.jpg)

सिस्युल्‍कु ओरा डोंगातुन ताकिच्‍चेके होंचेके मत्‍तुर, गानि वळि मात्रम ओरा अड्‍डमते इरगा वासेके मत्‍ता. अदुनहेंदाल वेल्‍लेन नर्का आयिनागानि ओर सेरवुना नड्‍डुमे मत्‍तुर.

![](https://cdn.door43.org/obs/jpg/360px/obs-en-31-03.jpg)

अद वेलाते येसु ओना पारतना कियमळ महाचि, मल्‍सि ओना सिस्युल्‍कुनेके होनालय पेय्‍सतोर. डोंगातेके होनालय येसु एतापोर्रो ताकसेके पेय्‍सतोर.

![](https://cdn.door43.org/obs/jpg/360px/obs-en-31-04.jpg)

अस्‍के सिस्युल्‍कु येसुन हूळतुर. बूतम वासंता इनकुंचि ओर इरगा वेरियतुर. ओर वेरियतुर इंचि येसुंक तेळियता, अदुनहाटीं ओर सिस्युल्‍कुंक आवाज हीसि, “वेरियमट, ननाने आंदुन,” इत्‍तोर.

![](https://cdn.door43.org/obs/jpg/360px/obs-en-31-05.jpg)

अस्‍के पत्रु येसुन, “सामि, ओक्‍कला निमेन आयानय्ते, नाकुन एतपोर्रो ताकसेके निहगा वायाना आदेस हीम,” इंचि इत्‍तोर. अस्‍के, “अय्ते वा,” इंचि येसु इत्‍तोर.

![](https://cdn.door43.org/obs/jpg/360px/obs-en-31-06.jpg)

अय्ते पत्रु डोंगाताल रेय्‍सि एतपोर्रो ताकसेके येसुनगा होनालय पेय्‍सतोर. गानि इच्‍चुर लक्‍कु होत्‍त‍स्‍के पत्रु, येसुनाहेंदाल नदर तप्‍पिच्‍चि, तडानाहेके आनि इरगा वायाना वळिताहेके तिराहतोर.

![](https://cdn.door43.org/obs/jpg/360px/obs-en-31-07.jpg)

अस्‍के पत्रु वेरियसि एते मुळ्‍गालय दल्‍गतोर. “सामि, नाकुन कापाळा,” इंचि मोत्‍कुनालय दल्‍गतोर. येसु अस्‍केन कय हाह्‍चि ओन अंदकुत्‍तोर. पजा येसु ओन, “निहगा विस्वासम वेल्‍लेन तक्‍को मंता, नना नीकुन कापाळा परांतन इंचि, निमे नापोर्रो बारि विस्वासम कियाहिल्‍लिन?” इंचि इत्‍तोर.

![](https://cdn.door43.org/obs/jpg/360px/obs-en-31-08.jpg)

पजा येसु आनि पत्रु डोंगाते एकतुर आनि अस्‍केटद अस्‍केन वायाना वळिगुडा आगता, एरगुडा सांत आता. सिस्युल्‍कु इचंत्रम आसि येसुना मुन्‍ने टोंगरां ऊनसि, ओना आरादना कीतुर, कीसि, “निमे निजमे पेनदा मर्रिन आंदिन,” इंचि इत्‍तुर.

*मत्ती अध्याय 14:22-33; मरकुस 6:45-52; यूहन्ना 6:16-21 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_31_192kbps.mp3

## 32. वरोर देय्यम पीता मनकन आनि उंदि बिमार मुरतटुन येसु बेस कींतोर

https://openbiblestories.org/l/gon-x-aheri/story-32/

![](https://cdn.door43.org/obs/jpg/360px/obs-en-32-01.jpg)

येसु आनि ओना सिस्युल्‍क डोंगाते उद्‍दिसि, गिरासेनि इनना लोकुल्‍कु मनना एरियाते होत्‍तुर. अद एरियाते एव्‍सि अगा डोंगाताल रेयतुर.

![](https://cdn.door43.org/obs/jpg/360px/obs-en-32-02.jpg)

देय्यम पीतोर अगा वरोर मनकल मत्‍तोर.

![](https://cdn.door43.org/obs/jpg/360px/obs-en-32-03.jpg)

आ मनकल वेल्‍लेन ताकतवार मत्‍तोर, ओन बोरे पिय्या पराकोंदुर. बच्‍चुं मल्‍कां लोकुल्‍कु ओना कय्‍क-काल्‍कुंक गोल्‍सुक दोह्तुर. गानि ओर अवुन नेम्‍हाचि पोहुंदुर.

![](https://cdn.door43.org/obs/jpg/360px/obs-en-32-04.jpg)

आ मनकल अद एरियाते बोंदानगा मनुंदुर. ओर नर्का-पल्‍हिं मोत्‍कुंचेके मनुंदुर. ओर कपडिं केर्राकोंदुर, बच्‍चुंगो मल्‍कां ओनद ओरे बंडाने तंचि नोप्‍पि कीकुनुंदुर.

![](https://cdn.door43.org/obs/jpg/360px/obs-en-32-05.jpg)

आ मनकल येसुनगा विच्‍चि वासि, येसुना मुन्‍ने टोंगरां ऊनतोर. अस्‍के आ मनकन पीसि मत्‍ता देय्यमतोनि येसु वळ्‍कतोर. वळ्‍किसि, “ई मनकना लोप्‍पोटाल पेय्‍सि होन,” इत्‍तोर.

![](https://cdn.door43.org/obs/jpg/360px/obs-en-32-06.jpg)

अस्‍के आ देय्यम, “ए येसु, अन्‍निटकन्‍ना पेद्‍दा पेनदा मर्रिना, नीकु नातोनि बतल कबळ मंता? कुरपा कीसि नाकु तकलीप हियमा!” इंचि लगांचि मोत्‍कुत्‍ता. अस्‍के येसु, “नी पोरोल बतल?” इंचि दान पूसकीतोर. अस्‍के अद, “ना पोरोल सैनम आंद, मोमोट वेल्‍लेन मंदि मंतोम,” इंचि जवाब हीता. (रोमि सरकारते बच्‍चुंगो वेय्‍कुना मंदि कलियसि उंदि सैनम आंतुर.)

![](https://cdn.door43.org/obs/jpg/360px/obs-en-32-07.jpg)

आ देय्याल्‍क येसुन, “कुरपा कीसि माकुन इद एरियाताल पलाते लोह्‍चीयमा!” इंचि विनंति कीतां. अगा दग्‍गेरा गुट्‍टापोर्रो पद्‍दिना उंदि मंदा मेयसेके मत्‍ता. अदुनहाटीं आ देय्याल्‍क येसुन, “कुरपा कीसि माकु आ पद्‍दिने लोह्‍चीम,” इंचि विनंति कीतां. अस्‍के येसु, “सरे! अवने होंटु,” इंचि इत्‍तोर.

![](https://cdn.door43.org/obs/jpg/360px/obs-en-32-08.jpg)

अल्‍हा इत्‍तस्‍के देय्याल्‍क आ मनकानाल पेय्‍सि पद्‍दिने होंचि होळियतां. अस्‍के आ पद्‍दिं पोर्रोटाल हिळु वित्‍तिसि होंचि सेरवुने अरसि हासोत्‍तां. अद मंदाते दग्‍गेर-दग्‍गेरा रोंड वेय्‍कुना(2000) पद्‍दिं मत्‍तां.

![](https://cdn.door43.org/obs/jpg/360px/obs-en-32-09.jpg)

अगा आ पद्‍दिना कावेल कियानोरगुडा मत्‍तुर. अगा बतल अय्ते जर्गता, अदुन हूळतस्‍के ओर सहरतेके वितुतुर. येसु कीतद‍अंता अंटोर्क वेहातुर. अस्‍के आ सहरतोर अंटोर लोकुल्‍कु वासि, देय्याल्‍क पीसि मत्‍ता मनकन हूळतुर. आ मनकल कपडिं केरसि, बेस सांतिते, बेस मनकनलेसीं सक्‍कगा उद्‍दिसि मत्‍तोर.

![](https://cdn.door43.org/obs/jpg/360px/obs-en-32-10.jpg)

आ लोकुल्‍कु इरगा वेरियसि मत्‍तुर, ओर अगाटाल येसुन पेय्‍सि होन इंचि इत्‍तुर. अय्ते येसु डोंगाते एकतोर. देय्याल्‍क पीसि मत्‍ता मनकलगुडा येसुनतोनि वांतन इंचि ओन्‍कु विनंति कीतोर.

![](https://cdn.door43.org/obs/jpg/360px/obs-en-32-11.jpg)

गानि येसु, “मन्‍नि. निमे लोन होंचि, पेन नीहाटीं बतल कीता अदुन अंटोर्कु वेहा. पेन नीपोर्रो बल्‍हा दया कीता अद ओर्कु वेहा,” इंचि ओन इत्‍तोर.

![](https://cdn.door43.org/obs/jpg/360px/obs-en-32-12.jpg)

अदुनहाटीं आ मनकल होंचि, ओनाहाटीं येसु बतल-बतल कीतोर अदंता अंटोर्क वेहतोर. ओर वेहतद केंजता हरेक मनकल इचंत्रमते अरतुर.

![](https://cdn.door43.org/obs/jpg/360px/obs-en-32-13.jpg)

येसु सेरवुना हब्‍बेटा बाजुंक मल्‍सि होत्‍तोर. ओर अगा एव्तस्‍के, लोकुल्‍कुना उंदि पेद्‍दा मंदा येसुनगा जमा आसि गर्दि कीसेके मत्‍तुर. आ गर्दिते, पन्‍नेंड वर्सानाल(12) कप्‍पिड होनना बिमारि आसि मत्‍ता उंदि मुरतळ मत्‍ता. दान बिमारताल बेस कियानुर इंचि दानगा मत्‍ता कोत्‍तांअंता अद वैदकुल्‍कुंक हीसि महाता, गानि अद रोगम बेस आयाका एक्‍को आसेके होत्‍ता.

![](https://cdn.door43.org/obs/jpg/360px/obs-en-32-14.jpg)

येसु वेल्‍लेन बिमार मनकालोर्कुन बेस कीतोर अले इंचि अद केंजसि मत्‍ता. अस्‍के अद, “येसुना कप्‍पिडतुन इट्‍टिनागानि नना बेस आंतन,” इंचि अद विचारम कीता. अदुनहाटीं अद येसुना पज्‍जोटाल वासि ओना कप्‍पिडतुन इट्‍ता. अद ओना कप्‍पिडतुन इट्ता इट्‍टुडे दाना कप्‍पिड होनमळ आगसोत्‍ता.

![](https://cdn.door43.org/obs/jpg/360px/obs-en-32-15.jpg)

अस्‍केटद अस्‍केन, ओना लोप्‍पोटाल ताकत पलाते वाता इंचि येसुंक तेळियसोत्‍ता. अदुनहाटीं ओर पजोळ्‍क तिरियसि, “नाकुन बोर इट्तुर?” इंचि पूसकीतोर. अस्‍के, “इग्‍गे इच्‍चोन वेल्‍ले मंदि नी सुट्‍टु गर्दि कीसंतुर, नीकुन दोबसेके होंचंतुर, अयना निमे ‘नाकुन बोर इट्‍तुर’ इंचि बारि पूसकींतिन?” इंचि सिस्युल्‍क जवाब हीतुर.

![](https://cdn.door43.org/obs/jpg/360px/obs-en-32-16.jpg)

आ मुरतळ इरगा वेरियसि वनकुसेके, येसुना मुन्‍ने वासि टोंगरां ऊनसि उद्‍दुता. अस्‍के अद बतल कीतानो अदंता वेहता, इंका अद बेस आतदगुडा वेहता. अस्‍के येसु दान, “नीवा विस्वासमे नीकुन बेस कीता, निमे सांतिते होन,” इंचि इत्‍तोर.

*मत्ती अध्याय 8:28-34; 9:20-22; मरकुस 5:1-20; 5:24b-34; लूका 8:26-39; 8:42b-48 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_32_192kbps.mp3

## 33. वरोर कास्‍तकारि मनकाना वेसुडि

https://openbiblestories.org/l/gon-x-aheri/story-33/

![](https://cdn.door43.org/obs/jpg/360px/obs-en-33-01.jpg)

उंदि रोजु येसु सेरवु ओड्‍डुनगा मत्‍तोर. अगा वेल्‍लेन मंदिकु येसु पेनदा पोल्‍लें कराहसेके मत्‍तोर. ओर वेहानद केंजालय अगा इच्‍चोर वेल्‍ले लोकुल्‍क जमा आतुर गदा, ओर लोकुल्‍कु नित्‍तालय येसुनगा जेगागुडा हालाकोंटा आता. अदुनहाटीं येसु एते मत्‍ता उंदि डोंगाते एकतोर. अगा उद्‍दिसि येसु लोकुल्‍कुंक कराहसेके मत्‍तोर.

![](https://cdn.door43.org/obs/jpg/360px/obs-en-33-02.jpg)

लोकुल्‍कुंक येसु अगा ई वेसुडि वेहतोर, “वरोर कास्‍तकरि मनकल विज्‍जा दोस्‍सालय पलाते पेय्‍सतोर. ओर ओना कय्‍दे विज्‍जां वीतनेंके इच्‍चुं विज्‍जां होंचि हर्दे अरतां, अवुन पिट्‍टें वासि पेरसि तित्‍तां.”

![](https://cdn.door43.org/obs/jpg/360px/obs-en-33-03.jpg)

“इंकिच्‍चुं विज्‍जां बंडाना गेर्सेपोर्रो अरतां, अगा गिचच्‍चेन तोळि मत्‍ता, बंडाना गेर्सेपोर्रो अरता विज्‍जां बिरानेन मोलिय्‍तां गानि अवुना हिह्‍कु एक्‍को लोतु होना पराहिल्‍लें, अदुनहाटीं पोळ्‍द पेय्‍सतस्‍के एद्‍दि दल्‍गिसि आ मोल्‍कां वत्‍सोंचि हासोत्‍तां.”

![](https://cdn.door43.org/obs/jpg/360px/obs-en-33-04.jpg)

“इंकिच्‍चुं विज्‍जां हाह्‍कुना पोदाने अरतां. अवगुडा मोलिय्‍सि बेर्सालय दल्‍गतां गानि हाह्‍कु अवुन बेर्सा हिय्याहिल्‍लें. अदुनहाटीं हाह्‍कुना पोदाने अरता बवे विज्‍जां मोलिय्‍सि बेस पंटा हिय्याहिल्‍लें.”

![](https://cdn.door43.org/obs/jpg/360px/obs-en-33-05.jpg)

इंकिच्‍चुं विज्‍जां बेसता बूमिते अरतां. अव बेस बेर्सतां. बेर्सि, वीतुता विज्‍जांकन्‍ना एक्‍को मुप्‍पै, अरवै, नूर अंताल्‍क पंटा पंडता. पेनदा पोल्‍ले पोर्रो ताकंतन इनना हरेक मनकल नना वेहना पोल्‍लेन बेस केंजट,” इंचि येसु वेहतोर.

![](https://cdn.door43.org/obs/jpg/360px/obs-en-33-06.jpg)

ई वेसुडि सिस्युल्‍कुन परेसानते अराहता. अदुनहाटीं येसु ओर्कु दाना अर्तम वेहतोर, “आ विज्‍जां इत्‍ते पेनदा पोल्‍ले आंद. आ हर्रि इत्‍ते वरोर मनकल, बोर मनकल अय्ते पेनदा पोल्‍ले केंजांतोर गानि तेल्‍पिच्‍कुन्‍नोर, अस्‍के देय्यम वासि ओनगटाल पेनदा पोल्‍लेतुन दोसकुंता. इत्‍ते देय्यम ओन पेनदा पोल्‍लेतुन तेळियाकोंटा कींता.”

![](https://cdn.door43.org/obs/jpg/360px/obs-en-33-07.jpg)

“बंडाना गेर्से इत्‍ते इसोंटा मनकल आंदुर गदा, ओर पेनदा पोल्‍ले कुसिते केंजांतोर, आनि ओप्‍कुंतोरगुडा. गानि तिप्‍पल्‍क वातस्‍के, वेरे लोकुल्‍कु ओन तकलीप कीतस्‍के, ओर पेनदागटाल लक्‍कु दांतोर. इत्‍ते ओर पेनपोर्रो विस्वासम होळसंतोर.”

![](https://cdn.door43.org/obs/jpg/360px/obs-en-33-08.jpg)

“हाह्‍कुना पोदाना जेगा इत्‍ते, इसोंटा मनकल गदा, ओर पेनदा पोल्‍ले अय्ते केंजांतोर, गानि ओर इंका वेरे-वेरे पोल्‍लेना बारेमते रंदि कींतोर, वेल्‍लेन दनम संपालिचालय हूळांतोर, इंका वेल्‍लेन पोल्‍लें गावाले इंतोर. कोन्‍नि रोजकु आतस्‍के ओर पेनदुन पावरम कियमळते कमजोर आंतोर. अदुनहेंदाल ओर पेनदा पोल्‍लेनाल बतल अय्ते करियतोर अव ओन पेनदुक दग्‍गेरा आयालय सहायम किय्यों. ओर पेडेक पिय्युवा तुट्रानसंटोर आंतोर.”

![](https://cdn.door43.org/obs/jpg/360px/obs-en-33-09.jpg)

“गानि बेसता बूमि इत्‍ते आ मनकल आंदुर, बोर अय्ते पेनदा पोल्‍ले केंजसि, विस्वासम कींतोर कीसि बेस पलम हींतोर.”

*मत्ती अध्याय 13:1-8, 18-23; मरकुस 4:1-8, 13-20; लूका 8:4-15 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_33_192kbps.mp3

## 34. येसु वेरे वेसुडिं वेहचि कराहंतोर

https://openbiblestories.org/l/gon-x-aheri/story-34/

![](https://cdn.door43.org/obs/jpg/360px/obs-en-34-01.jpg)

पेनदा राज्येम बारेमते येसु इंका वेरे-वेरे वेसुडिं वेहतोर. उदाहरनते, ओर इल्‍हा इत्‍तोर, “बोरो वरोर मनकल उंदि आवाल्‍कुना पेडेतुन ओना तोटाते वाटतोर, आ आवाल्‍कुना पेडेलेसीं पेनदा राज्येम मंता. मीक एरपाट, आवाल्‍कुना पेडे अन्‍नि पेडेकुंकन्‍ना सिन्‍नगा मनंता.”

![](https://cdn.door43.org/obs/jpg/360px/obs-en-34-02.jpg)

“गानि अद बेरस्‍तस्‍के, आ तोटाता कळमाता मराकुंकन्‍ना एक्‍को पेद्‍दागा आंता. अद इच्‍चोन पेद्‍दागा आंता गदा, पिट्‍टें वासि दाना पंगानापोर्रो आराम कींतां.”

![](https://cdn.door43.org/obs/jpg/360px/obs-en-34-03.jpg)

येसु इंकुंदि वेसुडि वेहतोर, “पेनदा राज्येम आ तोळ पिंडिलेसीं मंता, बदुन अय्ते उंदि मुरतळ ओसि वेरे पिंडिते कल्‍पते, आ पिंडिअंता पुल्‍लगा आंता.”

![](https://cdn.door43.org/obs/jpg/360px/obs-en-34-04.jpg)

“पेनदा राज्येम आ कजानातालेसीं मंता, बदुन अय्ते बोरो मनकल ओसि ओना नेदे मक्‍किच्तोर. वेरे बोनको आ कजाना दोर्कंता आनि दान दक्‍किच्‍कुनालय ओर बच्‍चोनो कोसिस कींतोर. अदुनहाटीं ओर दान मर्रा पोक्‍काते इर्रांतोर. ओर इच्‍चोन कूस आंतोर गदा, होंचि ओर ओनगा मत्‍तद-हिल्‍वद अन्‍नि अमकुंचि आ कजाना मत्‍ता नेदुन अस्‍साना विचारम कींतोर.”

![](https://cdn.door43.org/obs/jpg/360px/obs-en-34-05.jpg)

“स्वर्ग राज्येम उंदि वेल्‍लेन दराता मुच्येमलेसींगुडा मंता. मुच्याल्‍कुना व्यापारम कियानोंक अद दोर्कते ओर दान असकुननाहाटीं ओनगा मत्‍तद-हिल्‍वद अन्‍नि अमकुंतोर.

![](https://cdn.door43.org/obs/jpg/360px/obs-en-34-06.jpg)

बेसता कबाह्‍क कीते पेन माकुन स्वीकार कींता इंचि इनकुनानोर इच्‍चुर लोकुल्‍क अगा मत्‍तुर. आ लोकुल्‍कु, ओर कियाना बेसता कबाह्‍क कियुवा लोकुल्‍कुन ओर हय्‍साकोंदुर. अदुनहाटीं येसु ओर्कु ई वेसुडि वेहतोर: “इव्‍वुर(2) मनकालोर मत्‍तुर, ओर इव्‍वुरगुडा पारतना कियालय गुळिते होत्‍तुर. ओरा लोप्‍पोटाल वरोर कर वसूल कियानोर आनि इंकावरोर नीतिमंतुड मत्‍तोर.”

![](https://cdn.door43.org/obs/jpg/360px/obs-en-34-07.jpg)

“आ नीतिमंतुड इल्‍हा पारतना कीतोर, ‘पेनदुना, नना वेरे लोकुल्‍कुनालेसीं इत्‍ते, वरोर दोंगा, अन्‍याय कियाना मनकल, व्यबिचारम कियाना मनकल, इचोने आयाका आ कर वसूल कियानोनलेसीं पापिन आयोन, इंचि नीकु दन्‍यवाद वेहचंतन.’”

![](https://cdn.door43.org/obs/jpg/360px/obs-en-34-08.jpg)

उदाहरनते, नना वार-वारम रोंड मल्‍कां उपासम मनंतन, नना संपलिच्ता दनम आनि सामानताल पदोव बागमगुडा नीकु हींतन.”

![](https://cdn.door43.org/obs/jpg/360px/obs-en-34-09.jpg)

“गानि आ कर वसूल कियाना मनकल, आ नीतिमंतुनाल वेल्‍लेन लक्‍कु निल्‍सि मत्‍तोर. ओर पोर्रो स्वर्गमतेके ओना नदरगुडा तेहचि हूळा हिल्‍लोर. ओर पिळकिल्ते ओना सातितुन तनकुंचेके इल्‍हा पारतना कीतोर, “पेनदुना, नना पापिन आंदुन, कुरपा कीसि नापोर्रो दया हुप्‍सा.”

![](https://cdn.door43.org/obs/jpg/360px/obs-en-34-10.jpg)

पजा येसु इल्‍हा इत्‍तोर, “नना निजम वेहांतन, पेन आ कर वसुल कियानोना पारतना केंजसि ओन नीतिमंतुड इंचि वेहता. गानि आ नीतिमंतुना पारतना पेनदुक नच्‍चाहिल्‍ले. गर्रा किय्याना हरेक मनकन पेन वरहंता. गानि सादा-सिंपल मनना हरेक मनकन पेन बेस हूळकुंता.”

*मत्ती अध्याय 13:31-33, 44-46; मरकुस 4:30-32; लूका 13:18-21; 18:9-14 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_34_192kbps.mp3

## 35. बेसता बाबोना वेसुडि

https://openbiblestories.org/l/gon-x-aheri/story-35/

![](https://cdn.door43.org/obs/jpg/360px/obs-en-35-01.jpg)

उंदि रोजु येसु, ओना पोल्‍लें केंजालय ओनगा जमा आता लोकुल्‍कुंक पेनदा पोल्‍लें कराहसेके मत्‍तोर. ओरा लोप्‍पो कर वसुल कियानोर आनि मूसाना नियम वेहताप ताकाना कोसिस कियवा वेरे लोकुर मत्‍तुर.

![](https://cdn.door43.org/obs/jpg/360px/obs-en-35-02.jpg)

येसु ओरतोनि दंटातोर मत्‍ताप मनानद, इच्‍चुर नीतिमंतुल्‍क हूळतुर. अदुनहाटीं ओर वरोनतोनि वरोर, येसु तप्‍पु कीसंतोर इंचि वळ्‍कमळ सुरुव कीतुर. येसु ओर अल्‍हा वळ्‍कानेंके केंजतोर, अदुनहाटीं ओर्क ई वेसुडि वेहतोर.

![](https://cdn.door43.org/obs/jpg/360px/obs-en-35-03.jpg)

“वरोर मनकांकु इव्‍वुर मर्क मत्‍तुर. सिन्‍ना मर्रि ओना बाबोन, ‘बाबा, नावा पालु नाकु इंदके हीम,’ इत्‍तोर. अय्ते बाबाल ओना इव्‍वुर मर्कुंक ओना संपत्‍तितुन सेरसगोम पंचि हीतोर.”

![](https://cdn.door43.org/obs/jpg/360px/obs-en-35-04.jpg)

“सिन्‍ना मर्रि बिरानेन ओना पालुंक वातदुन जमा कीकुंचि बदो लक्‍कु देसेम पेय्‍सि होत्‍तोर. होंचि पापि पिस्वर पिसमळते ओना अन्‍नि संपत्‍तितुन पाड कीकुत्‍तोर.”

![](https://cdn.door43.org/obs/jpg/360px/obs-en-35-05.jpg)

“कोन्‍नि रोजकु आतस्‍के, आ सिन्‍ना मर्रि मत्‍ता देसेमते पेद्‍दा करवु अरता. तिंडि अस्‍सि तिनालय ओनगा कोत्‍तांगुडा हिलाकोंटा आतां. अदुनहाटीं ओन्कु पद्‍दिं मेहाना उंदि कबळ दोर्कता. ओर इच्‍चोन करवुने आनि दुक्‍कमते मत्‍तोर गदा, पद्‍दिं तिनना तिंडि तिंचि ओर पीर निहुंदुर.”

![](https://cdn.door43.org/obs/jpg/360px/obs-en-35-06.jpg)

“आकिरते, आ सिन्‍ना मर्रि ओनद-ओर इल्‍हा इत्‍तोर, ‘असल नना बतल कीसंतन? ना बाबानगा कबळ कियाना जीतागाह्‍कुनगा अय्ते तिनालय वेल्‍लेन तिंडि मंता, गानि नना अय्ते इग्‍गे इरगा करवुंक हासंतन. नना ना बाबानगा मल्‍सि दांतन, होंचि ओना वरोर जीतागानलेसीं नाकुन इर्रा इंचि विनंति कींतन.’”

![](https://cdn.door43.org/obs/jpg/360px/obs-en-35-07.jpg)

“अय्ते आ सिन्‍ना मर्रि ओना बाबाना लोताहेके वायालय पेय्‍सतोर. ओर इंका लोन एव्‍वानदे मत्‍तोर, गानि ओना बाबाल ओन लक्‍कुटाले हूळसि ओन्‍कु मर्रिनपोर्रो दया वाता. ओर वित्‍सि होंचि मर्रिन सातिकु अदुमकुंचि ओन पावरमते बुरतोर.”

![](https://cdn.door43.org/obs/jpg/360px/obs-en-35-08.jpg)

“आ मर्रि, ‘बाबा, नना नी विरोदमते आनि पेनदा विरोदमते पापम कीतन. नीवा मर्रि इंचि वेहकुनना लायकगुडा नना हिल्‍लेन,’ इंचि इत्‍तोर.”

![](https://cdn.door43.org/obs/jpg/360px/obs-en-35-09.jpg)

“गानि बाबो मात्रम वरोन जीतागान केय्‍सि, “बिराना होंचि बेसता कपडिं पीसि तच्‍चि ना मर्रिंकु केरहट, ओना वेलुंकु उंगरम आनि काल्‍कुंक हेरपुह्‍क केरहट. पजा उंदि मंचिगा बल्‍स्‍ता कुर्रातुन कोय्‍सि मनम अंटोरम कुसिते तिंचेके पंडुगु कीकोम, बारित्‍ते ना मर्रि हासोंचि मत्‍तोर, गानि इंदके ओर जीवाते मंतोर, ओर तप्‍सोंचि मत्‍तोर गानि इंदके ओर माकु दोर्कतोर,’ इंचि वेहतोर.’’

![](https://cdn.door43.org/obs/jpg/360px/obs-en-35-10.jpg)

“अस्‍के लोकुल्‍कु पंडुगु कियालय दल्‍गतुर. जेरासेप आतस्‍के, पेद्‍दा मर्रि नेदाल कबळ कीसि लोन वातोर. ओर अगा पाटां, एगराना सप्‍पुड केंजसि ‘इगे बतल जर्गसंता? इंचि इचंत्रम आतोर.”

![](https://cdn.door43.org/obs/jpg/360px/obs-en-35-11.jpg)

“पजा, ओना तम्मुर लोन वापस वाताहेंका ई पंडुगु जर्गसंता इंचि आ पेद्‍दा मर्रिंक तेळियतस्‍के ओनकु इरगा होंग वासि ओर लोप्‍पो होळिये हिल्‍लोर. ओना बाबाल पलाते वासि अंटोरतोनि कलियसि पंडुगु कीम इंचि ओन बतिमलाडतोर, गानि ओर केंजाहिल्‍लोर.”

![](https://cdn.door43.org/obs/jpg/360px/obs-en-35-12.jpg)

“आ पेद्‍दा मर्रि ओना बाबान इल्‍हा इत्‍तोर, ‘इच्‍चुं वर्सानाल नना नीहाटीं इमानदारते कबळ कीतन. निमे वेहता हरेक पोल्‍ले केंजतन. गानि निमे मात्रम, नना नावा दंटातोरतोनि कलियसि पार्टि कियालय, नाकु बस्‍केन उंदि सिन्‍ना एटि पोरिगुडा हिय्या हिल्‍लिन. गानि नीवा ई मर्रि नीवा दनमतुनंता पापि कबाह्‍कुने पोळागोटसि वाते, निमे ओनाहाटीं पंडुगु कियालय अन्‍निटकन्‍ना बेस बल्‍स्‍ता कुर्रातुन कोयतिन!’”

![](https://cdn.door43.org/obs/jpg/360px/obs-en-35-13.jpg)

“अस्‍के बाबाल इल्‍हा जवाब हीतोर, ‘कोको! निमे बस्‍केळ्‍क नातोने मत्‍तिन, बतल अय्ते नावद, अद अन्‍नि नीवदे आंद. गानि नी तम्मुर हासि मत्‍तोर, ओर इंदके जीवाते मंतोर, ओर तप्‍सोंचि मत्‍तोर, गानि इंदके ओर मनाकु दोर्कतोर, अदुनहाटीं मनम पंडुगु कियमळते तप्‍पु हिल्‍ले.’’’

*लूका अध्याय 15:11-32 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_35_192kbps.mp3

## 36. मारियमळ

https://openbiblestories.org/l/gon-x-aheri/story-36/

![](https://cdn.door43.org/obs/jpg/360px/obs-en-36-01.jpg)

उंदि रोजु येसु, पत्रु, याकोब आनि योहानुन ई ओना मुव्‍वुर सिस्युल्‍कुन ओनतोनि पीसि ओतोर.(इव्टे मनना योहान, येसुंकु बापतिस्मा हीता योहान आयोर.) पारतना कियानाहाटीं ओर उंदि एत्‍तु गुट्‍टापोर्रो एक्‍किसि होत्‍तुर.

![](https://cdn.door43.org/obs/jpg/360px/obs-en-36-02.jpg)

अगा येसु पारतना कियनेंके ओना मोकोम पोळ्‍दुनालेसीं जग्‍गरा आता. बूमिपोर्रो बोरे अच्‍चोन तेल्‍लगा किया पर्रोर अल्‍हा ओना कपडिं वेलगुनालेसीं तेल्‍लगा आतां.

![](https://cdn.door43.org/obs/jpg/360px/obs-en-36-03.jpg)

अस्‍के अगा मूसाल आनि एलियाहल ई पेनदा कबुरतोर दिसतुर. बच्‍चुंगो नुह्‍कुना वर्साना मुन्‍ने ई मनकालोर बूमिपोर्रो मत्‍तुर. येसुना हामुरता बारेमते ओर ओनतोनि वळ्‍कतुर. बारित्‍ते बिरानेन येसु येरुसलेमते हायाना मत्‍तोर.

![](https://cdn.door43.org/obs/jpg/360px/obs-en-36-04.jpg)

मूसाल आनि एलियाहल येसुनतोनि वळ्‍कसेके मननेंके पत्रु येसुन, “मनम इग्‍गेन मत्‍ते बच्‍चोनो बेस मनंता, मोमोट मना मुव्‍वुराहाटीं इग्‍गे मूड गुळसें वाटंतोम, उंदि नीहाटीं, उंदि मूसानाहाटीं आनि उंदि एलियाहनाहाटीं,” इंचि इत्‍तोर. गानि पत्रु बतल वळ्‍संतोरो ओनद-ओनके तेळिया हिल्‍ले.

![](https://cdn.door43.org/obs/jpg/360px/obs-en-36-05.jpg)

पत्रु वळ्‍कसेकेन मत्‍तोर, अच्‍चोटेन उंदि मब्‍बु तेर्पे वासि ओरपोर्रो नीडा कीता. अस्‍के मब्‍बुनाल उंदि अल्‍किर वातद ओर केंजतुर. आ अल्‍किर इल्‍हा मत्‍ता, “ईर नावा मर्रि आंदुर, नना ईन पावरम कींतन. नना ओनतोनि कूस मंतन. ओर वेहानद केंजट,” इत्‍ता. अद केंजसि ओर मुव्‍वुर सिस्युल्‍कगुडा वेरियसि हिळ अरतुर.

![](https://cdn.door43.org/obs/jpg/360px/obs-en-36-06.jpg)

अस्‍के येसु ओर्कुन इट्‍सि, “वेरियमट, तेदट,” इंचि ओर्कुन तेहतोर. ओर तेदसि नालुं मूलां हूळते ओर्कु सिराप अगा येसु वरोरे दिसतोर.

![](https://cdn.door43.org/obs/jpg/360px/obs-en-36-07.jpg)

पजा येसु आनि ओना मुव्‍वुर सिस्युल्‍कु गुट्‍टापोर्रोटाल हिळु रेय्‍सि वातुर. अस्‍के येसु ओर्कुन, “इंदके इग्‍गे बतल अय्ते जर्गतानो, अदुना बारेमते मिमेट बग्‍गेने वळ्‍कानायो. नना बिरानेन हासि दांतन, आनि मर्रा जीवाते तेदांतन. अस्‍के मिमेट लोकुल्‍कुंक वेहा पर्रांतिट,” इंचि इत्‍तोर.

*मत्ती अध्याय 17:1-9; मरकुस 9:2-8; लूका 9:28-36 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_36_192kbps.mp3

## 37. लाजरुन येसु हातोरव्टेटाल जीवाते तेहांतोर

https://openbiblestories.org/l/gon-x-aheri/story-37/

![](https://cdn.door43.org/obs/jpg/360px/obs-en-37-01.jpg)

लाजर पोरोलतोर वरोर मनकल मत्‍तोर. ओनकु रोंड अक्‍काह्‍क मत्‍तां, उंदान पोरोल मरियम, इंकुंदान पोरोल मार्ता. ओर अंटोर येसुना बेस दंटातोरे मत्‍तुर. उंदि रोजु, लाजर इरगा बिमार मत्‍तोर इंचि बोरो येसुंक वेहतुर. येसु अद केंजसि, “लाजरुना आ बिमारि ओना हामुरतोने मारो गानि दानहेंदाल लोकुल्‍कु पेनदा कदर कियालय सहायम आंता,” इत्‍तोर.

![](https://cdn.door43.org/obs/jpg/360px/obs-en-37-02.jpg)

येसु ओना दंटातोर्कुन वेल्‍लेन पावरम कियुंदुर. गानि ओर अद वेलाते बगा अय्ते मत्‍तोर रोंड रोजकुनदाका अग्‍गेन आगतोर. आ रोंड आतस्‍के, “वटु, मनम मर्रा यहुदिया मल्‍सि दाकोम,” इंचि ओना सिस्युल्‍कुन इत्‍तोर. गानि सिस्युल्‍कु, “गानि गुरु, दीनकन्‍ना मुन्‍नेन अगाटा लोकुल्‍कु नीकुन हव्‍कालय हूळसेके मत्‍तुर गदा!” इंचि जवाब हीतुर. अस्‍के येसु, “ना दंटातोर लाजर निद्रा होंचंतोर, नाकु ओन तेहाना मंता,” इंचि इत्‍तोर.

![](https://cdn.door43.org/obs/jpg/360px/obs-en-37-03.jpg)

अस्‍के सिस्युल्‍कु, “सामि, ओक्‍कला लाजर निद्रा होननय्ते ओर बेस आयानुर,” इंचि इत्‍तुर. अस्‍के मात्रम येसु ओर्कु किलियर वेहतोर, “लाजर हासोत्‍तोर. मिमेट नापोर्रो विस्वासम इर्रागोम इंचि नना अगा हिल्‍लेन, इदुनपीसि नना कूस मंतन,” इत्‍तोर.

![](https://cdn.door43.org/obs/jpg/360px/obs-en-37-04.jpg)

येसु लाजरना नार एवतस्‍के, अदवेरदाकेन ओर हासि नालुं रोजकु आसि मत्‍ता. मार्ताल येसुंक कलियालय पलाते वासि, “सामि, ओक्‍कला निमे इग्‍गे मंचि मत्‍ते, नावा तम्मुर हायाकोन्‍नेर. गानि निमे पेनदुन बतल तल्‍किना अद नीकु हींता इंचि नना नम्मंतन,” इंचि इत्‍ता.

![](https://cdn.door43.org/obs/jpg/360px/obs-en-37-05.jpg)

अस्‍के येसु इल्‍हा जवाब हीतोर, “हातोर्कुन तेहानोन आनि पिस्वर ननाने आंदुन, बोर अय्ते नापोर्रो विस्वासम इर्रांतोर, ओर हायिनागानि पिस्‍से मनांतोर. नापोर्रो विस्वासम इर्रानोर ओर बस्‍केन हायोर, निमे इदुन विस्वासम कींतिना?” इत्‍तोर. अस्‍के मार्ताल, “सामि, निमेन पेनदा मर्रि किरिस्‍तुन आंदिन, इंचि नना विस्वासम कींतन,” इंचि जवाब हीता.

![](https://cdn.door43.org/obs/jpg/360px/obs-en-37-06.jpg)

अस्‍के मरियम वासि येसुना काल्‍कुनपोर्रो अरसि, “सामि, ओक्‍कला निमे इग्‍गे मंचि मत्‍ते ना तम्मुर हायाकोन्‍नेर,” इंचि इत्‍ता. अस्‍के येसु, “मिमेट लाजरुन बगा इरतिर?” इंचि दान पूसकीतोर. अस्‍के, “बोंदाते इरतोम, वा, हूळा वा!” इंचि अद वेहता. अस्‍के येसु अळालय दल्‍गतोर.

![](https://cdn.door43.org/obs/jpg/360px/obs-en-37-07.jpg)

आ बोंदा उंदि बंडा सोर्रे आंद, दानकु उंदि बंडा अड्‍डम दोब्‍बिसि मत्‍ता. येसु आ बोंदातगा येव्‍सि, “बंडातुन पक्‍काक कीम्टु,” इंचि इत्‍तोर. गानि मार्ताल, “ओर हासि नालुं रोजकु आसंतां, अव्टेटाल कराब गब्‍बु वायार बारे,” इंचि इत्‍ता.

![](https://cdn.door43.org/obs/jpg/360px/obs-en-37-08.jpg)

येसु ओर्कुन, “मिमेट ओक्‍कला नापोर्रो विस्वासम इर्रानय्ते, पेनदा ताकततुन हूळकिर इंचि, नना मीकु वेहा हिल्‍लेना?” इंचि इत्‍तोर. अदुनहाटीं ओर आ बंडातुन तेंडतुर.

![](https://cdn.door43.org/obs/jpg/360px/obs-en-37-09.jpg)

अस्‍के येसु पोर्रो स्वर्गमतेके हूळसि इल्‍हा इत्‍तोर, “पेनबाबा, नाकुन केंजताहाटीं नना नीकु दन्‍यवाद कींतन. निमे नाकुन बस्‍केळ्‍क केंजांतिन इंचि नाक एर्के मंता. गानि इग्‍गे निल्‍सि मनना ई अंटोर लोकुल्‍कुंक सहायम कियानाहाटीं नीकुन केयतन. ईर हूळसि, नाकुन निमेन लोहतिन इंचि विस्वासम कियाना इंचि केयतन,” इत्‍तोर. पजा येसु, “ए लाजर, पलाते पेय्‍सि वा!” इंचि केयतोर.

![](https://cdn.door43.org/obs/jpg/360px/obs-en-37-10.jpg)

अस्‍के लाजर पलाते पेय्‍सि वातोर. ओर इंकागुडा कपिडतेन हुट्‍सि मत्‍तोर. पजा येसु, “ई कप्‍पिडतुन तेंडसि ओन अव्टेटाल इळबडालय ओनकु सहायम कीम्टु,” इंचि वेहतोर. आ चमत्‍कारमतुन हूळसि वेल्‍लेन मंदि यहुदिल्‍क येसुनपोर्रो विस्वासम कीतुर.

![](https://cdn.door43.org/obs/jpg/360px/obs-en-37-11.jpg)

गानि यहुदि नीतिमंतुल्‍कुना नेतालोर मात्रम येसुनपोर्रो अळुंदुर. ओन आनि लाजरुन बल्‍हा हव्‍काना इंचि पिलान कियालय ओर उंदगा जमा आतुर.

*यूहन्ना 11:1-46 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_37_192kbps.mp3

## 38. येसुंक दोका हियमळ

https://openbiblestories.org/l/gon-x-aheri/story-38/

![](https://cdn.door43.org/obs/jpg/360px/obs-en-38-01.jpg)

यहुदि लोकुल्‍कु एटा दाटसि होनना पंडुगु कियुंदुर. बच्‍चुंगो नुह्‍कुना वर्सानामुन्‍ने ओरा एनकटा पेद्‍दाल्‍कुन पेन इजिप्‍त देसेमता गुलामगिरिताल पेचाह्ता. अदुना मतिते ई पंडुगु यहुदिल्‍क कियुंदुर. दग्‍गेर-दग्‍गेरा मूड वर्सां आसोत्‍तस्‍के येसु कुल्‍ला-कुल्‍ला कराहमळ, वेहामळ सुरुव कीतोर. येरुसलेम होंचि दाटसि होनना पंडुगु कियाना इच्‍चा मंता इंचि येसु ओना सिस्युल्‍कुंक वेहतोर. अचोने आयका अगा ओन हव्‍कंतुर इंचिगुडा वेहतोर.

![](https://cdn.door43.org/obs/jpg/360px/obs-en-38-02.jpg)

येसुना सिस्युल्‍कुना लोप्‍पो यहुदा पोरोलतोर वरोर मनकल मत्‍तोर. यहुदल प्रेरितुल्‍कुना कोत्‍ताना जोरा इर्राना कबळ कियुंदुर, अस्‍के-अस्‍के ओर आ जोराताल कोत्‍तांगुडा तेंडकुनुंदुर. येसु, ओना सिस्युल्‍कु येरुसलेम एव्तस्‍के, यहुदुल अगाटा यहुदिरा नेतालोरगा होत्‍तोर. कोत्‍तां हीते, येसुन ओरा कय्‍दे पीसींतन इंचि ओर ओरतोनि करार कीतोर. येसुए किरिस्‍तु आंदुर इंचि यहुदि नेतालोर ओप्‍कुन्‍नुर इंचि ओनकु एरपाटे मत्‍ता. ओर येसुन हव्‍कालय पिलान कीसंतुर इंचिगुडा ओन एर्के मत्‍ता.

![](https://cdn.door43.org/obs/jpg/360px/obs-en-38-03.jpg)

पेद्‍दा पेर्मल वेहताहेंका यहुदि नेतालोर येसुन ओरा कय्‍दे पीसि हिय्यानाहाटीं यहुदांकु मुप्‍पै(30) एंडि बंडिं हीतुर. पेनदा कबुरतोर येसुना बारेमते मुन्‍ने वेहतापे जर्गता. यहुदल ओप्‍कुंचि एंडि रूपें पीसि होत्‍तोर. येसुन दोर्का पिय्यालय यहुदिर्क सहायम कियानाहाटीं, रकारकाल्‍कुना मोकां ओर पह्‍कसेके मत्‍तोर.

![](https://cdn.door43.org/obs/jpg/360px/obs-en-38-04.jpg)

येसु ओना सिस्युल्‍कुनतोनि कलियसि येरुसलेमते दाटसि होनना पंडुगु कीतोर. पंडुगुना गाटो तिननेंके येसु हारि पीसि दान तुकडा कीतोर. कीसि, “इद येतसि तिंटु, मीहाटीं नना हियाना नावा मेंदुल आंद, नावा मतिते मिमेट दीन कीम्टु,” इंचि इत्‍तोर. इल्‍हा येसु ओराहाटीं हायाना मंता इंचि वेहतोर, इत्‍ते, ओराहाटीं येसु ओना मेंदुलतुन बलि हींतोर.

![](https://cdn.door43.org/obs/jpg/360px/obs-en-38-05.jpg)

पजा येसु, अंगुर पंडिना पानकमता उंदि गिलास पीसि, “इदुन उंटु, पेन मीवा पापाल्‍कुन मापि कियाना इंचि, नना मीहाटीं पोंगागोटना, पूना करारता नावा नेत्‍तुर आंद. मिमेट बस्‍के अय्ते इदुन उंटिरो, अस्‍के नावा मतिते, नना इंदके कियानदुन मिमेट कीम्टु,” इंचि इत्‍तोर.

![](https://cdn.door43.org/obs/jpg/360px/obs-en-38-06.jpg)

अस्‍के येसु ओना सिस्युल्‍कुनतोनि, “मी लोप्‍पोटाल वरोर नाकुन पीसि हियानोर मंतोर,” इत्‍तोर. सिस्युल्‍क अदुल्‍कुत्‍तुर, अदुल्‍कुंचि अल्‍हा कियानोर बोर आंदुर? इंचि वरोंक वरोर पूसकियालय दल्‍गतुर. “नना ई हारि तुकडा बोन्‍क अय्ते हींतानो ओरे नाकुन पीसि हियानोर आंदुर,” इत्‍तोर. आनि आ हारि तुकडा यहुदांक हीतोर.

![](https://cdn.door43.org/obs/jpg/360px/obs-en-38-07.jpg)

आ हारि तेंडकुत्‍तस्‍के यहुदाना लोप्‍पो देय्यम होळियता. यहुदल अगाटाल पेय्‍सि येसुन दोर्का पीसि हिय्यालय यहुदि नेतालोर्क सहायम कियालय ओरगा होत्‍तोर. अद नर्कटा वेला आंद.

![](https://cdn.door43.org/obs/jpg/360px/obs-en-38-08.jpg)

गाटो तिनुड आतस्‍के, येसु आनि ओना सिस्युल्‍क जय्तुन मराकुना गुट्‍टापोर्रो होत्‍तुर. अस्‍के येसु, “इय्याला नर्कडकु मिमेट अंटोर नाकुन होळसंतिर. बारित्‍ते, ‘नना मेहानोन हव्‍कांतन, गोर्रें अन्‍नि सिल्‍लर आसि वित्‍तंता,’ इंचि रासि मंता,” इत्‍तोर.

![](https://cdn.door43.org/obs/jpg/360px/obs-en-38-09.jpg)

जवाबुने पत्रु, “अंटोर होळसिना गानि नना मात्रम नीकुन होळसोन,” इंचि इत्‍तोर. अस्‍के येसु ओन, “देय्‍यम मीकुन अंटोर्कुन येतकुनालय हूळसंता, गानि ए पत्रु, निमे मात्रम विस्वासमताल अर्राकोंटा मनना इंचि नना नीहाटीं पारतना कीतन. अयना इय्याला नर्का, मोदाटा गोगोड कूसाका मुन्‍ने निमे नाकुन एरपाट किय्योन इंचेके मूड मल्‍कां इनकिन,” इत्‍तोर.

![](https://cdn.door43.org/obs/jpg/360px/obs-en-38-10.jpg)

अस्‍के पत्रु, “नाकु हामुर वायिनागानि, नना नीकुन एरपाट किय्योन इंचि बस्‍केन इन्‍नोन,” इंचि इत्‍तोर. कळमाता सिस्युल्‍कगुडा अल्‍हे इत्‍तुर.

![](https://cdn.door43.org/obs/jpg/360px/obs-en-38-11.jpg)

पजा येसु ओना सिस्युल्‍कुनतोनि गेतसेमनि इनना तोटातगा होत्‍तोर. देय्यम सिस्युल्‍कुना पट्‍टु हूळामन्‍नि इंचि येसु ओर्कु पारतना कियालय वेहतोर. आनि ओर कुद्‍दु पारतना कियालय वेरे जेगाते होत्‍तोर.

![](https://cdn.door43.org/obs/jpg/360px/obs-en-38-12.jpg)

येसु मूड मल्‍कां पारतना कीतोर, “ए नावा बाबा, ओक्‍कला कुदुरते ई दुक्‍कमतोनि निंडिसि मत्‍ता गिलास नाकु हियमा. गानि लोकुल्‍कुना पापाल्‍क मापि आयानाहाटीं वेरे बदे हर्रि हिलाकोंटे नीवा इच्‍चाए पुरा आयि,” इंचि इत्‍तोर. येसु वेल्‍लेन बादाते मत्‍तोर, ओना सेमटा नेत्‍तुरलेसीं आसि पोंगसेके मत्‍ता. ओनकु ताकत हिय्यालय पेन उंदि दाना दूतातुन लोहता.

![](https://cdn.door43.org/obs/jpg/360px/obs-en-38-13.jpg)

ओर पारतना कियुड आतस्‍केनना ओर ओना सिस्युल्‍कुनगा मल्‍सि वातोर, ओर बस्‍के वायिना, अस्‍के सिस्युल्‍कु मींडसे मत्‍तुर. येसु मूडोव मल्‍का वातस्‍के, “निद्राताल तेदट! नाकुन पीसि हियानोर इग्‍गे वातोर,” इंचि इत्‍तोर.

![](https://cdn.door43.org/obs/jpg/360px/obs-en-38-14.jpg)

यहुदिल्‍कुना नेतालोर, सिपाइल्‍क आनि वेल्‍लेन मंदितुन पीकुंचि यहुदल अगा वातोर. ओर तलवार्कु आनि गुत्‍पां पीसि मत्‍तुर. यहुदल येसुनगा वासि, “गुरु, जोहार,” इंचि ओन बुरतोर. येसुन दोर्का पियानोर्कु गुर्तु इंचि इल्‍हा कींतन इंचि वेहचि मत्‍तोर. अस्‍के येसु, “यहुदा, उंदि मुद्‍दु बुरसि नाकुन दोर्का पीसि हीसंतिना?” इत्‍तोर.

![](https://cdn.door43.org/obs/jpg/360px/obs-en-38-15.jpg)

आ सिपाइल्‍क येसुन दोर्का पीसेके मननेंके पत्रु ओनगा मत्‍ता तलवार तेंडसि पेद्‍दा पेर्माना वरोन सिपाइना केव्‍दुन नेम्‍हातोर. अस्‍के येसु, “नीवा तलवार पजोळ्‍क कीम, नना इनकुत्‍ते नावा सहायम कियालय नावा बाबानाहेंदाल दूताना गँगुन लोहा इंचि विनंति किया परांतन, गानि नाकु नावा बाबाना पोल्‍ले केंजाना मंता,” इंचि इत्‍तोर. पजा येसु आ सिपाइना केव्‍दुन बेस कीतोर, अस्‍के अंटोर सिस्युल्‍क तेगा विततुर.

*मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_38_192kbps.mp3

## 39. येसुनपोर्रो कारवाई आंता

https://openbiblestories.org/l/gon-x-aheri/story-39/

![](https://cdn.door43.org/obs/jpg/360px/obs-en-39-01.jpg)

अद नडजाम नर्कटा वेला मत्‍ता. येसुन सवाल्‍क पूसकियाना मत्‍ताहाटीं, आ सिपाइल्‍क ओन पेद्‍दा पेर्माना लोन ओतुर. पत्रु लक्‍कुटाल येसुना पज्‍जो-पज्‍जो होंचेके मत्‍तोर. सिपाइल्‍क येसुन लोतालोप्‍पो ओतस्‍के, पत्रु पलाते तळमि सेका कासेके मत्‍तोर.

![](https://cdn.door43.org/obs/jpg/360px/obs-en-39-02.jpg)

लोतालोप्‍पो, यहुदि नेतालोर येसुनपोर्रो कारवाई कीतुर. येसुना विरोदमते आबद्‍दम गवाइ वेहानाहाटीं आ नेतालोर बचटूरो गवाइदार्कुन पीसि वातुर. अयना वाता आ गवाइदारकुना पोल्‍लें वरोनद-वरोंक कलिया हिल्‍लें. अदुनहाटीं येसु दोसि इंचि यहुदि नेतालोर रुजुव कीसि हुप्‍सा पर्राहिल्‍लुर. गानि येसु बतले वळका हिल्‍लोर.

![](https://cdn.door43.org/obs/jpg/360px/obs-en-39-03.jpg)

आकिरते, कुद्‍दु पेद्‍दा पेर्मले येसुन, “अय्ते माकु वेहा, जीवाते मनना पेनदा मर्रि, किरिस्‍तुन निमेन आंदिना?” इंचि पूसकीतोर.

![](https://cdn.door43.org/obs/jpg/360px/obs-en-39-04.jpg)

अस्‍के येसु, “ननाने आंदुन, इंका नाकुन पेनदा पक्‍काते उद्‍दिसि मत्‍तद आनि स्वर्गमताल वायनद मिमेट हूळकिर,” इंचि इत्‍तोर. येसु वळ्‍कता पोल्‍ले पेद्‍दा पेर्मंक नच्‍चुवाहेंका इरगा होंग वासि, ओर ओना कपडिं हराहकुत्‍तोर. पजा, “ईर मनकल बतल कीतोर इंचि इंका वेरे गवाइदारकु वेहना अवसरम मनाकु हिल्‍ले! ओर कुद्‍दे पेनदा मर्रि आंदुर इंचि वेहानेंके मिमेट अंटोरगुडा केंजतिर, अय्ते ईना बारेमते मीवा निरनायम बतल मंता?” इंचि पेद्‍दा पेर्मल वेरे नेतालोरा पोर्रो मोत्‍कुत्‍तोर.

![](https://cdn.door43.org/obs/jpg/360px/obs-en-39-05.jpg)

अस्‍के यहुदिल्‍कुना अंटोर नेतालोर, “ओर हामुर सिक्‍साता लायक मंतोर,” इंचि पेद्‍दा पेर्मांक जवाब हीतुर. अस्‍के ओर येसुना कळकुंक पट्‍टि दोहातुर, ओनपोर्रो उस्‍कुतुर, ओन तंतुर, आनि ओना कारेड्‍डाल्‍क कीतुर.

![](https://cdn.door43.org/obs/jpg/360px/obs-en-39-06.jpg)

लोता पलाताल पत्रु एदुर हूळसेके मत्‍तोर. अस्‍के उंदि दासि पोरि ओन हूळसि, “निमेगुडा येसुनतोनि मत्‍तिन,” इंचि इत्‍तास्‍के पत्रु, “नना मनाहिल्‍लेन,” इत्‍तोर. पजा इंकुंदि बदो पोरिगुडा अदे पोल्‍लेतुन इत्‍ता, अस्‍केगुडा पत्रु नना मनाहिल्‍लेन इत्‍तोर. आकिरते, इच्‍चुर लोकुल्‍कगुडा, “निमे येसुनतोनि मत्‍तिन, माक एरपाटे, बारित्‍ते मिमेट इव्‍वुरगुडा गालिलतोरे आंदिर,” इत्‍तुर.

![](https://cdn.door43.org/obs/jpg/360px/obs-en-39-07.jpg)

अस्‍के पत्रु, “ओक्‍कला ननागिंटा ई मनकन एरपाट कियानय्ते पेन नाकु सिक्‍सा हिय्यिकांटी!” इंचि इत्‍तोर. पत्रु अल्‍हा इत्‍ता इनुडे उंदि गोगोड कूसता. अस्‍के येसु पजोळ्‍क तिरियसि पत्रुनेके हूळतोर.

![](https://cdn.door43.org/obs/jpg/360px/obs-en-39-08.jpg)

पत्रु अगाटाल पलाते होंचि इरगा अळतोर. अदे वेलाते, यहुदि नेतालोर येसुंक हामुर सिक्‍सा हीतुर इंचि, येसुन दोर्का पियालय सहायम कीता यहुदल हूळतोर. यहुदांक इरगा दुक्‍कम वाता, अस्‍के ओर होंचि ओनद-ओरे हासोत्‍तोर.

![](https://cdn.door43.org/obs/jpg/360px/obs-en-39-09.jpg)

अस्‍के अद देसेमते पिलातुस इनानोर राज्यपाल मत्‍तोर. ओर रोम सरकारहाटीं कबळ किय्युंदुर. यहुदि नेतालोर येसुन ओनगा पीसि ओतुर. पिलातुस येसुंक हामुर सिक्‍सा हीसि ओन हव्‍कागोम इंचि ओरा मनसु मत्‍ता. अस्‍के पिलातुस येसुन, “निमे यहुदिरा राजान आंदिना?” इंचि पूसकीतोर.

![](https://cdn.door43.org/obs/jpg/360px/obs-en-39-10.jpg)

अस्‍के येसु इल्‍हा जवाब हीतोर, “निमे निजमे इत्‍तिन. गानि इग्‍गे बूमिपोर्रो ना राज्येम हिल्‍ले. ओक्‍कला मंचि मत्‍ते नावा दासुल्‍क नाहाटीं लडाइ कीसि मन्‍नेर. पेनदा बारेमते सत्‍तेम वेहालय नना ई बूमिपोर्रो वातन. सत्‍तेमतुन पावरम कियाना हरेक मनकल नना वेहातदुन केंजंतोर,” इत्‍तोर. “अय्ते सत्‍तेम बतल मरि?” इंचि पिलातुस इत्‍तोर.

![](https://cdn.door43.org/obs/jpg/360px/obs-en-39-11.jpg)

येसुनतोनि वळ्‍कमळ आतस्‍के, पिलातुस पलाते लोकुल्‍कुना गर्दितगा होचिं, “ई मनकंक हामुर सिक्‍सा हियानालायक, ईनगा बतल कारनम नाकु दोर्काहिल्‍ले,” इंचि इत्‍तोर. गानि यहुदि नेतालोर आनि लोकुल्‍कु, “ओन कुस्रुनपोर्रो वेलाड वाटा,” इंचि मोत्‍कुत्‍तुर. अय्ते पिलातुस, “ओर बतले तप्‍पु कियाहिल्‍लोर गदा,” इंचि इत्‍तोर. अयनागानि ओर इंका पेद्‍दा आवाजते मोत्‍कुंचेके मत्‍तुर. अस्‍के पिलातुस, “ओर बतल दोसेम कियाहिल्‍लोर,” इंचि मूडोव मल्‍का इत्‍तोर.

![](https://cdn.door43.org/obs/jpg/360px/obs-en-39-12.jpg)

लोकुल्‍कु इंका गडबड कियानुर बारे इनकुंचि पिलातुस वेरियतोर, अदुनहाटीं ओर ओना सिपाइल्‍कुनहेंदाल येसुन क्रुसुनपोर्रो वेलाड वाटालय ओप्‍कुत्‍तोर. रोमि सिपाइल्‍क येसुन मोल्‍लाना पोट्‍टेते तंतुर, ओनकु राजाल केर्राना अंगि केराहतुर आनि ओना तल्‍लक हाह्‍कुना किरिटम कडाह्तुर. पजा ओर, “हुळाट, यहुदिल्‍कुना राजाल!” इंचि कारेडाल्‍क कियालय दल्‍गतुर.

*मत्ती 26:57-27:26; मरकुस 14:53-15:15; लूका 22:54-23:25; यूहन्ना 18:12-19:16 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_39_192kbps.mp3

## 40. येसुन क्रुसुनपोर्रो वेलाड वाटंतुर

https://openbiblestories.org/l/gon-x-aheri/story-40/

![](https://cdn.door43.org/obs/jpg/360px/obs-en-40-01.jpg)

येसुन कारेडाल्‍क कियमळ आतस्‍के, सिपाइल्‍क ओन क्रुसुनपोर्रो वेलाड वाटालय ओतुर. येसु बद क्रुसुनपोर्रो अय्ते हायाना मत्‍तानो अद क्रुसुन, सिपाइल्‍क ओनतोने कांजा वेहतुर.

![](https://cdn.door43.org/obs/jpg/360px/obs-en-40-02.jpg)

सिपाइल्‍क, “तल्‍ला बोरसेम” इनना जेगातगा येसुन पीसि ओतुर. ओसि क्रुसुनपोर्रो ओना काल्‍क-कय्‍कुन कोह्‍कतुर. गानि येसु, “पेनबाबा, ईर बतल कीसंतुरो ईरके तेळियो, अदुनहाटीं ईर्कुन मापि कीम,” इंचि इत्‍तोर. ओर उंदि पाटिगुडा येसुना तल्‍लाता पोर्रो वेलाड वाटतुर. दानपोर्रो, “यहुदिल्‍कुना राजाल” इंचि रासि मत्‍ता. पिलातुस अल्‍हेने रासा वेहतोर.

![](https://cdn.door43.org/obs/jpg/360px/obs-en-40-03.jpg)

पजा सिपाल्‍कु येसुना कपडिनाहाटीं सिट्‍टिं वाटतुर. सिपाइल्‍क अल्‍हा कीतस्‍के, “ओर नावा कपडिन पंचकुत्‍तुर, नावा कपडिनाहाटीं ओर सिट्‍टिं वाटतुर” इंचि पेनदा कबुरतोर वेहता पोल्‍ले निजम आता.

![](https://cdn.door43.org/obs/jpg/360px/obs-en-40-04.jpg)

अगा इव्‍वुर दोंगाल्‍क मत्‍तुर, सिपाइल्‍क ओर्कुनगुडा अदे वेलाते क्रुसुनपोर्रो वेलाड वाटतुर. ओर्कुन येसुना रोंड बाजकुने वेलाड वाटतुर. ओरव्टेटाल वरोर येसुन कारेडाल्‍क कीतोर, गानि इंकावरोर, “पेन नीकु सिक्‍सा हींता इंचि निमे वेरियिना? मनम वेल्‍लेन कराब कबाह्‍क कीसि दोसिर्क आतोम, गानि ई मनकल अय्ते बतले तप्‍पु कियाहिल्‍लोर,” इंचि इत्‍तोर. पजा ओर येसुन, “निमे नीवा राज्येमते वातस्‍के दया कीसि नाकुन मतिते इर्रा,” इंचि इत्‍तोर. अस्‍के येसु, “निमे इय्यालेन नातोनि स्वर्गमते मनांतिन,” इंचि जवाब हीतोर.

![](https://cdn.door43.org/obs/jpg/360px/obs-en-40-05.jpg)

यहुदि नेतालोर आनि लोकुल्‍कुना मंदाता लोप्‍पोटोर इच्‍चुर लोकुल्‍कु येसुन, “निमे ओक्‍कला पेनदा मर्रि आते, क्रुसुन पोर्रोटाल हिळु रेय्‍सि वासि, नीवद निमे कापाळकुन, अस्‍के मोमोट नीकुन नम्मंतोम,” इंचि कारेड्‍डाल्‍क कीतुर.

![](https://cdn.door43.org/obs/jpg/360px/obs-en-40-06.jpg)

अस्‍के, पिय्यल पोळ्‍द मननेंकेगुडा, आ पूरा देसेमते मब्‍बु कर्रेगा आता. पिय्यटिल कर्रेगासि मूड एगनदाका अल्‍हेन मत्‍ता.

![](https://cdn.door43.org/obs/jpg/360px/obs-en-40-07.jpg)

अस्‍के येसु, “पुरागा आता! बाबा, नना नावा आत्मा नी कय्‍दुक अप्‍पजेप्पंतन,” इंचि वरगेय्‍सि इत्‍तोर. पजा तला हिळु वराहचि जीवा होळसीतोर. येसु जीवा होळ्‍सतस्‍के उंदि बूकंपम आता. अस्‍के गुळिते लोकुल्‍कुंक आनि पेनदुक अड्‍डम मत्‍ता पेद्‍दा पर्दा पोर्रोटाल हिळुदाका हरसि रोंड तुकडां आता.

![](https://cdn.door43.org/obs/jpg/360px/obs-en-40-08.jpg)

येसु ओना हामुरताहेंदाल, लोकुल्‍कु पेनदागा होनालय हर्रि तयार कीसि हीतोर. येसुनगा कावेल कीसेके मत्‍ता वरोर सिपाइ अगा जर्गतदंता हूळतोर अय्ते ओर, “निजमे, ईर मनकल बतले तप्‍पु कियाहिल्‍लोर. ईर पेनदा मर्रि आंदुर,” इंचि इत्‍तोर.

![](https://cdn.door43.org/obs/jpg/360px/obs-en-40-09.jpg)

अस्‍के योसेप आनि निकोदेमस इनना इव्‍वुर यहुदि नेतालोर अगा वातुर. येसे किरिस्‍तु आंदुर इंचि ओर नम्मुंदुर. पिलातुसनगा होंचि ओर येसुना मेंदुलतुन तल्‍कतुर. तल्‍किसि ओना मेंदुलतुन उंदि कप्‍पिडते हुटतुर. हुट्‍सि उंदि बंडातुन तुल्‍हाचि कीता सोर्रेते ओन ओसि इरतुर. अद सोर्रेता हरदुन मुच्‍चनाहाटीं ओर उंदि पेद्‍दा बंडातुन सोर्रेक अड्‍डम दोसतुर.

*मत्ती 27:27-61; मरकुस 15:16-47; लूका 23:26-56; यूहन्ना 19:17-42 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_40_192kbps.mp3

## 41. हातोर लोप्‍पोटाल पेन येसुन जीवाते तेहंता

https://openbiblestories.org/l/gon-x-aheri/story-41/

![](https://cdn.door43.org/obs/jpg/360px/obs-en-41-01.jpg)

सिपाइल्‍क येसुन क्रुसुन पोर्रो वेलाड वाटता पजा, यहुदि नेतालोर पिलातुसनगा वासि, “हासि मूड रोजकुने मर्रा जीवाते तेदांतन इंचि, आ आबद्‍दम येसु वेहचि मत्‍तोर. ओना मेंदुलतुन दोंगातनमते ओयालय ओना सिस्युल्‍क वाया पर्रंतुर, अदुन नदर वाटालय बोंदातगा कावेल इर्रागोम. ओक्‍कला ओर अल्‍हा कियानय्ते, अद हुळा येसु जीवाते तेदसि होत्‍तोर इंचि इना पर्रांतुर,” इंचि इत्‍तुर.

![](https://cdn.door43.org/obs/jpg/360px/obs-en-41-02.jpg)

अस्‍के, “इच्‍चुर सिपाइल्‍कुन ओसि मीकु बल्‍हा अनपिस्‍ते अल्‍हा बोंदातगा कावेल इर्राट,” इंचि पिलातुस वेहतोर. अदुनहाटीं आ बोंदा सोर्रेता हर्दुक अड्‍डम मत्‍ता बंडाक उंदि सिक्‍का तंतुर. अदुन हूळसि अगा सिपाइल्‍कगुडा कावेल कीसेके मंतुर इनकुंचि बोरे येसुना मेंदुलतुन ओयुर इंचि हुप्‍सालय अल्‍हा कीतुर.

![](https://cdn.door43.org/obs/jpg/360px/obs-en-41-03.jpg)

येसुना हामुरता इंकुंदि रोजु नोमकेम रोजु मत्‍ता. नोमकेम रोजुने बोरे बतले कबळ किया पर्रुर, अदुनहाटीं येसुनोर बोरे दंटागाह्‍क बोंदातगा वायाहिल्‍लुर. गानि नोमकेमता पलविसि रोजु, हक्‍केरेन, मुसा-मुसा मननेंकेन इच्‍चुं मुरताह्‍क येसुना बोंदातगा होनालय तयार आतां. अव येसुना मेंदुलकु इंकिच्‍चो वस्‍तुकु होकाना विचारमते मत्‍तां.

![](https://cdn.door43.org/obs/jpg/360px/obs-en-41-04.jpg)

अव मुरताह्‍क अगा एव्‍वाका मुन्‍ने, बोंदातगा उंदि पेद्‍दा बुकंप आता. स्वर्गमताल पेनदा उंदि दूता वासि बोंदा हर्दुक अड्‍डम मत्‍ता बंडातुन पक्‍काक दोब्‍सि दानपोर्रो उदता. आ पेनदा दूता वेलगुनालेसीं मेरसेके मत्‍ता. बोंदातगा मत्‍ता सिपाइल्‍क अदुन हूळतूर. हूळसि ओर इच्‍चोन वेरियतुर गदा, हातोरलेसीं आसि बूमिपोर्रो ओर अड्‍डम अरतुर.

![](https://cdn.door43.org/obs/jpg/360px/obs-en-41-05.jpg)

आ मुरताह्‍क बोंदातगा एव्तस्‍के, आ पेनदा दूता अवुन इल्‍हा इत्‍ता, “वेरियमट, येसु इग्‍गे हिल्‍लोर. हासि मर्रा जीवाते तेदांतन इंचि ओर मुन्‍ने वेहताप, ओर हातोरव्टेटाल जीवाते तेदतोर. बोंदातुन मिमेटे बेस हूळट,” इत्‍ता. अस्‍के अव मुरताह्‍क बोंदा लोप्‍पो होंचि येसुना मेंदुलतुन इरता जेगाते हूळते अगा ओना मेंदुल हिल्‍ले.

![](https://cdn.door43.org/obs/jpg/360px/obs-en-41-06.jpg)

अस्‍के आ पेनदा दूता अवुन, “होंटु, होंचि ओना सिस्युल्‍कुंक वेहाट, येसु हातोरव्टेटाल मर्रा जीवाते तेदतोर इंचि! ओर मी मुन्‍ने-मुन्‍ने गालिलते दांतोर,” इंचि इत्‍ता.

![](https://cdn.door43.org/obs/jpg/360px/obs-en-41-07.jpg)

आ मुरताह्‍कुंक इरगा इचंत्रम आता, अव वेल्‍लेन कूस आतां. ई बेसता कबुर सिस्युल्‍कुंक वेहालय अव वित्‍तालय दल्‍गतां.

![](https://cdn.door43.org/obs/jpg/360px/obs-en-41-08.jpg)

ई बेसता कबुर सिस्युल्‍कुंक वेहालय आ मुरताह्‍क वितसेके मननेंकेन, हर्दे अवुंक येसु दिसतोर. अव ओना काल्‍कुनपोर्रो अरतां. अस्‍के येसु, “वेरियमट, होंचि ना सिस्युल्‍कुन गालिल होंटु इंचि वेहाट, अगा ओर नाकुन हूळानुर,” इत्‍तोर.

*मत्ती 27:62-28:15; मरकुस 16:1-11; लूका 24:1-12; यूहन्ना 20:1-18 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_41_192kbps.mp3

## 42. येसु स्वर्गमते मल्‍सि दांतोर

https://openbiblestories.org/l/gon-x-aheri/story-42/

![](https://cdn.door43.org/obs/jpg/360px/obs-en-42-01.jpg)

पेन येसुन हातोरव्टेटाल मर्रा जीवाते तेहता रोजु, ओना इव्‍वुर सिस्युल्‍कु दग्‍गेटा उंदि नार होंचेके मत्‍तुर. ताकसि होननेंके येसुनतोनि बल्‍हा बतल आता इत्‍ता बारेमते वळ्‍कसेके होंचंतुर. येसुए किरिस्‍तु आंदुर इंचि ओर्कु आसे मत्‍ता, अयनागानि ओन हव्‍कमळ जर्गता. अव्टेने आ मुरताह्‍क येसु मर्रा जीवाते तेदतोर इंचि वेहचंतां. इसोंटस्‍के बद पोल्‍लेतुन नमते बेस इत्‍तद ओर्कु तेळिया हिल्‍ले.

![](https://cdn.door43.org/obs/jpg/360px/obs-en-42-02.jpg)

येसु ओरा दग्‍गेरा वासि ओरतोनि कलियसि ताकालय दल्‍गतोर, गानि ओर येसुन एरपाट किया हिल्‍लुर. बदुना बारेमते वळ्‍कसंतिर इंचि येसु ओर्कुन पूसकीतोर. कोन्‍नि रोजकु मुन्‍ने येसुनतोनि जर्गता अन्‍नि गटनना बारेमते ओर येसुंक वेहतुर. ईर बोरो पराय देसेमता मनकल आंद, येरुसलेमते जर्गतद ईनकु बतले तेळियो इंचि ओर इनकुत्‍तुर.

![](https://cdn.door43.org/obs/jpg/360px/obs-en-42-03.jpg)

अस्‍के येसु ओर्कु, किरिस्‍तुना बारेमते पेनदा पोल्‍ले बतल वेहंता इत्‍तद बेस तेळियागोटसि वेहतोर: ‘पापि लोकुल्‍कु किरिस्‍तुन बदनाम कीसि ओन हव्‍कंतुर. गानि ओर हासि मूड रोजकुने मर्रा जीवाते तेदंतोर’ इंचि पेनदा कबुरतोर एनकटा बस्‍केनो वेहचि मत्‍तुर.

![](https://cdn.door43.org/obs/jpg/360px/obs-en-42-04.jpg)

ओर इव्‍वुर बद नाटे अय्ते आगाना मत्‍तुरो, अद नाटे ओर एव्तुर, अद वेलाक पोळ्‍द अर्रालय आता. अदुनहाटीं ओर येसुनगुडा ओरतोनि आगालय वेहतुर, अस्‍के येसु ओरतोनि अद लोते होत्‍तोर. नर्कटा गाटो तिनालय ओर अंटोर उदतुर. येसु उंदि हारि पीतोर आनि पेनदुक दन्‍यवाद वेहचि उराहतोर. अस्‍के अचानक ईर येसु आंदुर इंचि ओर्क तेळियता. गानि अस्‍केटद अस्‍केन येसु ओरा कळ्‍कुंक दिस्‍साकोंटा आतोर.

![](https://cdn.door43.org/obs/jpg/360px/obs-en-42-05.jpg)

अस्‍के ओर इव्‍वुर, “ओर येसे आंदुर! अदुनहाटींगे मरि, ओर मनाकु पेनदा पोल्‍ले वेहानेंके मनम इरगा आनंदमते मत्‍तोम,” इंचि वरोंक-वरोर वेहकुत्‍तुर. ओर बिरानेन अगाटाल मल्‍सि येरुसलेम होत्‍तुर. ओर अगा एव्‍सि, “येसु जीवातेन मंतोर, मोमोट ओन हूळतोम,” इंचि सिस्युल्‍कुंक वेहतुर.

![](https://cdn.door43.org/obs/jpg/360px/obs-en-42-06.jpg)

ओर वळ्‍कसेकेन मत्‍तुर, अचानक अद अर्राते येसु ओरगा दिसतोर. दिस्‍सि, “मीक अंटोर्क सांति दोर्कि!” इंचि इत्‍तोर. इद बदो बूतम आंद इंचि सिस्युल्‍क इनकुत्‍तुर. गानि येसु, “अरे मिमेट वेरियंतिर बारि? नना निजमते येसुने आंदुन इंचि मिमेट बारि विचारम किय्यिर? इद हुळाट, नावा काल्‍क, कय्‍क! ना मेंदुल मत्‍ताप बूताल्‍कुंक मेंदुल मन्‍नो,” इंचि इत्‍तोर. ओर बूतम आयोर इंचि ओर्कु वेहालय, तिनालय बतलन्‍ना हीम्टु इंचि ओर्कुन तल्‍कतोर, अस्‍के ओर जिम्माता उंदि तुकडा हीते, अदुन येसु तित्‍तोर.

![](https://cdn.door43.org/obs/jpg/360px/obs-en-42-07.jpg)

पजा येसु, “ना बारेमते पेनदा पोल्‍ले बतल अय्ते वेहंता अद जर्गंता. इल्‍हा जर्गमळ अवसरम मंता इंचि नना मीकु वेहचि मत्‍तन,” इंचि इत्‍तोर. अस्‍के येसु ओर्कु पेनदा पोल्‍ले बेस तेळियागोटसि वेहतोर, “एनकटा बस्‍केनो, ‘नना, किरिस्‍तुंक वेल्‍लेन तिप्‍पल्‍क अर्रापींता, नाकु हायापींता आनि हासि मर्रा जीवाते तेदापींता, इंचि पेनदा कबुरतोर रासि मत्‍तुर.”

![](https://cdn.door43.org/obs/jpg/360px/obs-en-42-08.jpg)

“अचोने आयाका ना सिस्युल्‍कु पेनदा पोल्‍लेना प्रचार कींतुर इंचिगुडा आ पेनदा कबुरतोर रासि मत्‍तुर. ओर हरेक मनकंक मनसु मार्सकुनालय वेहांतुर. ओक्‍कला लोकुल्‍कु अल्‍हा कियानय्ते पेन ओरा पापाल्‍कुन मापि कींता. ना सिस्युल्‍कु ई कबुरतुन प्रचार येरुसलेमताल सुरुव कींतुर, ओर अन्‍नि जेगाने अन्‍नि जातिनोरा लोप्‍पो दांतुर. नना कीता हरेक कबळ, नना वळ्‍कता हरेक पोल्‍लेकु आनि नातोनि जर्गतादानकु मिमेट गवाइतोर आकिट.”

![](https://cdn.door43.org/obs/jpg/360px/obs-en-42-09.jpg)

मुन्‍ने इंका नल्‍पै रोजकुनदाका येसु ओना सिस्युल्‍कुंक बच्‍चुंगो मल्‍कां दिसतोर. उंदि मल्‍का अय्ते हेय्युं नुह्‍कुंकन्‍ना(500) एक्‍को मंदिकु दिस्‍सि मत्‍तोर. ओर जीवातेन मंतोर इंचि बच्‍चुंगो मल्‍कां येसु ओना सिस्युल्‍कुंक रुजुव कीसि हुपिस्‍तोर. पेनदा राज्येमता बारेमते येसु ओर्कु बेस कराहतोर.

![](https://cdn.door43.org/obs/jpg/360px/obs-en-42-10.jpg)

येसु ओना सिस्युल्‍कुंक वेहतोर गदा, “स्वर्गम आनि बूमिपोर्रोटा अन्‍निटपोर्रो अदिकार ताकसाना अदिकारम पेन नाकु हीता. अदुनहाटीं नना मीकु वेहचंतन, होंटु, होंचि दुनियाते मनना अन्‍नि जातिनोर्कुन सिस्युल्‍क कीम्टु. ओर्कु बाबाल, मर्रि, पवित्र आत्माता पोरोलते बापतिस्मा हीम्टु. नना मीकु बव पोल्‍लें कियालय अय्ते आदेस हीतानो, अव पोल्‍लेन परकारम ताकालय मिमेट ओर्क कराहटु. उंदि पोल्‍ले मिमेट मति इर्राट, नना बस्‍केळ्‍क मीकु तोळ मनंतन.”

![](https://cdn.door43.org/obs/jpg/360px/obs-en-42-11.jpg)

येसु हातोरव्टेटाल मर्रा जीवाते तेदसि नल्‍पै(40) रोजकु आसोत्‍तस्‍के, येसु ओना सिस्युल्‍कुन, “नावा बाबाल मीकु ताकत हिय्यनदाका मिमेट येरुसलेमतेन आगिसि मंटु. ओर मीपोर्रो पवित्र आत्मातुन लोहचि मीकु ताकत हींतोर,” इंचि वेहतोर. अस्‍के उंदि मब्‍बु तेर्पे ओनपोर्रो वासि नीडा कीतस्‍के, येसु स्वर्गमते मल्‍सि होत्‍तोर. अन्‍नि वस्‍तुकुनपोर्रो अदिकारम ताकसानाहाटीं येसु स्वर्गमते होंचि पेनदा तिना बाजुंक उदतोर.

*मत्ती 28:16-20; मरकुस 16:12-20; लूका 24:13-53; यूहन्ना 20:19-23; Acts 1:1-11 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_42_192kbps.mp3

## 43. कलिसियाता सुरुवात

https://openbiblestories.org/l/gon-x-aheri/story-43/

![](https://cdn.door43.org/obs/jpg/360px/obs-en-43-01.jpg)

येसु स्वर्गमते मल्‍सि होत्‍तस्‍के, ओना सिस्युल्‍कुंक ओर हीता आदेस परकारम ओर येरुसलेमतेन आगिसि मत्‍तुर. अगाटा विस्वासुल्‍कु बस्‍केळ्‍क पारतना कियालय अंटोर उंदगा जमा आयुंदुर.

![](https://cdn.door43.org/obs/jpg/360px/obs-en-43-02.jpg)

दाटसि होनना पंडुगुना एबै रोजकु आसोत्‍तस्‍के, एटा-एटा यहुदि लोकुल्‍कु पेंतेकोस्‍तु इनना उंदि मुक्‍केमाता रोजुन नोमुंदुर. ई पेंतेकोस्‍तु रोजु, यहुदि लोकुल्‍कु गोह्‍कु कोय्याना वेलाते वायुंदु. ई पेंतेकोस्‍तु रोजुन कलियसि नोमानाहाटीं यहुदि लोकुल्‍कु दुनियाते बगा मनिनागानि येरुसलेमते वायुंदुर. ई वर्सा मात्रम पेंतेकोस्‍तु नोमाना रोजु, येसु स्वर्गमते होत्‍ता उंदि वारम रोजकुंक वाता.

![](https://cdn.door43.org/obs/jpg/360px/obs-en-43-03.jpg)

अद वेलाते विस्वासुल्‍क बा लोते अय्ते जमा आसि मत्‍तुरो, अद लोते अचानक उंदि पेद्‍दा वळिता आवाज निंडसोत्‍ता. तळमिता पेद्‍दा-पेद्‍दा मिनगुल्‍कुनसोंटव बतांगो अंटोर विस्वासुल्‍कुना तल्‍लनपोर्रो वासि दिसतां. अस्‍के विस्वासुल्‍क अंटोर पवित्र आत्माते निंडसोत्‍तुर आनि वेरे-वेरे बासाने पेनदा स्‍तुति कियालय दल्‍गतुर. आ अन्‍नि बासान वळ्‍कालय विस्वासुल्‍कुंक पवित्र आत्मा ताकत हीता.

![](https://cdn.door43.org/obs/jpg/360px/obs-en-43-04.jpg)

विस्वासुल्‍क लोल्‍लि कियानद येरुसलेमते मत्‍ता वेरे लोकुल्‍कु केंजसि, बतल जर्गसंता इंचि हूळालय अंटोर अगा जमा आतुर. पेन कीता पेद्‍दा-पेद्‍दा कबाह्‍कुना बारेमते विस्वासुल्‍क वेहानेंके आ लोकुल्‍कु केंजतुर. विस्वासुल्‍क वेहना कबाह्‍कुन आ लोकुल्‍कु ओरा बासातेन केंजतुर इंचि, ओर पेद्‍दा इचंत्रमते अरतुर.

![](https://cdn.door43.org/obs/jpg/360px/obs-en-43-05.jpg)

आ लोकुल्‍कुना लोप्‍पोटाल इच्‍चुर लोकुल्‍कु अय्ते, ‘ई सिस्युल्‍कु रिम्मा आतुर’ इंचि इत्‍तुर. गानि पत्रु नित्‍सि इल्‍हा इत्‍तोर, “नना वेहानद केंजट! ई लोकुल्‍कु रिम्मा आयाहिल्‍लुर! मिमेट बतल अय्ते हूळसंतिरो, अदुना बारेमते योएल इनना वरोर पेनदा कबुरतोर अस्‍के वेहचि मत्‍तोर अदे जर्गसंता. ओर वेहतोर गदा, ‘पेन वेहता, आकिरता रोजकुने नना नावा आत्मा कुम्मरिच्‍चंतन.’’’

![](https://cdn.door43.org/obs/jpg/360px/obs-en-43-06.jpg)

“ए इस्राएल लोकुरिटा, येसु इसोंटा मनकल मत्‍तोर गदा, ओर बोर आंदुर इंचि रुजुव कियानाहाटीं वेल्‍लेन अद्‍बूतमाता कबाह्‍क कीसि हुपिस्‍तोर. ओर पेनदा सहायमतोनि वेल्‍लेन अद्‍बूतमाता कबाह्‍क कीतोर. अव कबाह्‍कुन मिमेट हूळतिर, मीकु एर्केगुडा. गानि मिमेट ओन क्रुसुनपोर्रो वेलाड वाटतिर.”

![](https://cdn.door43.org/obs/jpg/360px/obs-en-43-07.jpg)

“येसु हासोत्‍तोर गानि पेन ओन हातोरव्टेटाल मर्रा जीवाते तेहता. ‘निमे नीवा पवित्र मनकन बोंदाते मुर्गाहिय्यिन,’ इंचि पेनदा वरोर कबुरतोर रासता पोल्‍लेतुन येसु पुरागा कीसि हुपिस्‍तोर. पेन येसुन मर्रा जीवाते तेहता इनना पोल्‍लेकु मोमोटे गवाइ मंतोम.”

![](https://cdn.door43.org/obs/jpg/360px/obs-en-43-08.jpg)

“पेनबाबाल इंदके येसुन ओना तिना बाजुंक उप्‍पिचि ओनकु कदर हीतोर. आनि येसु मनाहाटीं पवित्र आत्मातुन लोहंतन इंचि पोल्‍ले हीता परकारम ओर पवित्र आत्मातुन लोहतोर. मिमेट हूळानव आनि केंजानव ई अन्‍नि कबाह्‍क अंता पवित्र आत्माहेंदाले जर्गसंतां.”

![](https://cdn.door43.org/obs/jpg/360px/obs-en-43-09.jpg)

“मिमेट आ मनकन इत्‍ते, येसुन क्रुसुनपोर्रो वेलाड वाटतिर. गानि पेन येसुन अन्‍नि वस्‍तुकुनपोर्रो सामि आनि किरिस्‍तु इंचि अदिकारम हीसि निल्‍हाता, इद मिमेट तेल्‍पिच्‍कुंटु.”

![](https://cdn.door43.org/obs/jpg/360px/obs-en-43-10.jpg)

पत्रु वेहता पोल्‍लें केंजतोर लोकुल्‍कु अंटोर अदुल्‍कुत्‍तुर. अदुनहाटीं ओर पत्रु आनि सिस्युल्‍कुन, “अय्ते मोमोट बतल कीते बेस वेहट दादा?” इंचि पूसकीतुर.

![](https://cdn.door43.org/obs/jpg/360px/obs-en-43-11.jpg)

पत्रु ओर्कु इल्‍हा जवाब हीतोर, “मिमेट अंटोर मीवा पापाल्‍कुनाल मनसु मार्सकुंटु, अस्‍के पेन मीवा पापाल्‍कुन मापि कींता, पजा मिमेट येसु किरिस्‍तुना पोरोलते बापतिस्मा येतुते पेन मीकु पवित्र आत्माता वरम हींता.”

![](https://cdn.door43.org/obs/jpg/360px/obs-en-43-12.jpg)

पत्रुना वेहतद केंजसि दग्‍गेर-दग्‍गेरा मूड वेय्‍कुना(3000) मंदि विस्वासम कीतुर आनि येसुना सिस्युल्‍क आतुर. ओर बापतिस्मा येतसि येरुसलेमता कलिसियाता मेंबर्क आतुर.

![](https://cdn.door43.org/obs/jpg/360px/obs-en-43-13.jpg)

प्रेरितुल्‍क ओर्कु पेनदा पोल्‍लें कराहतस्‍के ओर बेस मनसु दोस्‍सि केंजतुर. ओर बस्‍केळ्‍क अंटोर कलियसि गाटों तिनुंदुर, वरोनाहाटीं वरोर पारतनां किय्युंदर. अंटोर कलियसि पेनदुक दन्‍यवाद वेहुंदुर आनि ओरगा बतल मनिना दान वरोनद वरोंक हीकुनुंदुर. सहरता अंटोर लोकुल्‍कगुडा विस्वासुल्‍कुना बारेमते बच्‍चोनो बेस विचारम कियुंदुर. दररोज बच्‍चुरो मंदि पेनदुन विस्वासम कियुंदुर.

*प्रेरितों के काम 2 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_43_192kbps.mp3

## 44. पत्रु आनि योहान कलियसि वरोर बिच्‍चागान बेस कींतुर

https://openbiblestories.org/l/gon-x-aheri/story-44/

![](https://cdn.door43.org/obs/jpg/360px/obs-en-44-01.jpg)

उंदि रोजु, पत्रु आनि योहान गुळितगा होत्‍तुर. अगा वरोर ताका पर्रुवा मनकल बिच्‍चोम तल्‍कालय गलमातगा उद्‍दिसि मत्‍तोर.

![](https://cdn.door43.org/obs/jpg/360px/obs-en-44-02.jpg)

पत्रु आ कुंटि मनकन हूळसि, “नीकु हियालय नहगा अय्ते कोत्‍तां हिल्‍लें, गानि नहगा बतल अय्ते मंता अद नना नीकु हींतन, येसुना पोरोलते निमे तेदसि ताका!” इंचि इत्‍तोर.

![](https://cdn.door43.org/obs/jpg/360px/obs-en-44-03.jpg)

अस्‍केटद अस्‍केन पेन आ कुंटि मनकन बेस कीता. अय्ते ओर हीके-हेके ताकुड, दुनकुड आनि पेनदुन तल्‍सकुनमळ सुरुव कीतोर. अद वेलाते गुळिते मत्‍ता लोकुल्‍क अंटोर इचंत्रम आतुर.

![](https://cdn.door43.org/obs/jpg/360px/obs-en-44-04.jpg)

बिरानेन लोकुल्‍कुना उंदि पेद्‍दा मंदा आ बेस आता मनकन हूळालय अगा वातुर. अस्‍के पत्रु ओर्कुन इल्‍हा इत्‍तोर, “ई मनकल बेस मंतोर इंचि मिमेट इचंत्रम आयमटु. मोमोट ई मनकन मावा ताकततोनि बेस कीतोमो, हिलाकोंटे मोमोट पेनदा कदर कींतोम इंचो ईर बेस आयाहिल्‍लोर. कुद्‍दु येसु ओना ताकततोनि ई मनकन बेस कीतोर. बारित्‍ते मोमोट येसुनपोर्रो बरोसा कींतोम.”

![](https://cdn.door43.org/obs/jpg/360px/obs-en-44-05.jpg)

“येसुन हव्‍का इंचि रोम सरकारता राज्यपालनगा वेहतोर मिमेटे आंदिर. अंटोर्कु पिस्वर हिय्यानोन मिमेट हव्‍कतिर. गानि पेन ओन हातोरव्टेटाल मर्रा जीवाते तेहता. मिमेट बतल कीसेके मत्‍तिरो अद मीकु तेळियाहिल्‍ले, गानि मिमेट अव कबाह्‍क कियनेंके मात्रम पेनदा कबुरतोर बस्‍केनो वेहता पोल्‍लें पुरागा आतां. किरिस्‍तुंकु तिप्‍पल्‍क वासि, ओर हायानुर इंचि ओर वेहचि मत्‍तुर, अदुनहाटीं पेन इल्‍हा जर्गा हीता. अदुनहाटीं इंदके मिमेट मनसु मार्सकुंचि पेनदाहेके तिरियट, अस्‍के पेन मीवा पापाल्‍कुन नोर्सि मीकुन साप कींता.”

![](https://cdn.door43.org/obs/jpg/360px/obs-en-44-06.jpg)

पत्रु आनि योहान वेहता पोल्‍लें आ गुळिता नेतालोर केंजसि इरगा वेरियकुत्‍तुर. अदुनहाटीं ओर पत्रुन आनि योहानुन दोर्कापीसि जेलने वाटतुर. गानि पत्रु वेहता पोल्‍लेन केंजतोर वेल्‍लेन मंदि विस्वासम कीतुर. येसुनपोर्रो विस्वासम कियाना लोकुल्‍कु बेरसि ओर दग्‍गेर-दग्‍गेरा हेय्युं वेय्‍क(5000) आतुर.

![](https://cdn.door43.org/obs/jpg/360px/obs-en-44-07.jpg)

इंकुंदि रोजु, आ यहुदि नेतालोर, पत्रु आनि योहानुन पेद्‍दा पेर्मल आनि इंका वेरे नीतिमंतुल्‍कुना मुन्‍ने पीसि ओतुर. आ काल्‍क वायवा मनकनगुडा अगा ओतुर. अगा ओर पत्रु आनि योहानुन, “बद अदिकारते मिमेट आ कुंटि मनकन बेस कीतिर?” इंचि पूसकीतुर.

![](https://cdn.door43.org/obs/jpg/360px/obs-en-44-08.jpg)

अस्‍के, “मी मुन्‍ने निल्‍सि मनना ई मनकन येसु किरिस्‍तुना ताकतहेंदाल बेस कियमळ जर्गता. मिमेट येसुन क्रुसुनपोर्रो वेलाड वाटतिर, गानि पेन ओन मर्रा जीवाते तेहाता! मिमेट ओन ओप्‍कुनाहिल्‍लिर, गानि मुक्‍ति दोर्कालय येसुना ताकत तप्‍पा वेरे बद्‍दे हर्रि हिल्‍ले,” इंचि पत्रु जवाब हीतोर.

![](https://cdn.door43.org/obs/jpg/360px/obs-en-44-09.jpg)

पत्रु आनि योहान वेल्‍लेन दैरनेमते वळ्‍कतुर इंचि आ नेतालोर परेसान आतुर. ओर अय्ते मामुल मनकालोरे, सदवुगुडा करियसि मनाहिल्‍लुर, इंचि नेतालोर्क तेळियसि मत्‍ता. गानि पज्‍जो ओर्कु मति वाता गदा, ओर ई मनकालोर येसुनतोनि मत्‍तुर इंचि. अदुनहाटीं ओर, “ओक्‍कला मिमेट येसुना बारेमते लोकुल्‍कुंक वेहानय्ते, मोमोट मीकु इरगा सिक्‍सा हींतोम,” इंचि वेराहतुर. इल्‍हा वेल्‍लेन पोल्‍लें पत्रु आनि योहानुन वेहचि, ओर्कुन होळसीतुर.

*प्रेरितों के काम 3:1-4:22 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_44_192kbps.mp3

## 45. स्‍टिपन आनि पिलिप

https://openbiblestories.org/l/gon-x-aheri/story-45/

![](https://cdn.door43.org/obs/jpg/360px/obs-en-45-01.jpg)

मोट्‍टा मोदाटा विस्वासी नेतालोरा लोप्‍पो स्‍टिपन इनानोर वरोर मनकल मत्‍तोर. अंटोर ओन्‍कु बेस कदर हिय्युंदुर. पवित्र आत्मा ओनकु बेस बुद्‍दि आनि ताकत हीसि मत्‍ता. स्‍टिपन वेल्‍लेन चमत्‍काराल्‍क कीसि मत्‍तोर. येसुन नम्मना बारेमते ओर लोकुल्‍कुंक कराहतस्‍के, वेल्‍लेन लोकुल्‍कु ओन नमतुर.

![](https://cdn.door43.org/obs/jpg/360px/obs-en-45-02.jpg)

उंदि रोजु, स्‍टिपन येसुना बारेमते लोकुल्‍कुंक कराहसेके मत्‍तोर. अगा येसुन नम्मुवा इच्‍चुर यहुदिल्‍क वासि ओनतोनि लोल्‍लि कियालय दल्‍गतुर. ओर इरगा होंगुक वातुर. अस्‍के ओर ओरा नेतालोरगा होंचि, “मना पेन आनि मूसाना बारेमते स्‍टिपन तप्‍पुड पोल्‍लें वळ्‍कानेंके मोमोट केंजतोम,” इंचि ओना बारेमते आबद्‍दम वेहतुर. अदुनहाटीं ओरा नेतालोर स्‍टिपनुन दोर्कापीसि ओन पेद्‍दा पेर्मल आनि कळमाता ओरा यहुदि नेतालोरा मुन्‍ने पीसि ओतुर. बचटूरो आबद्‍दम वळ्‍काना गवाइदार्क वातुर, वासि स्‍टिपनुना बारेमते आबद्‍दम वळ्‍कतुर.

![](https://cdn.door43.org/obs/jpg/360px/obs-en-45-03.jpg)

पजा पेद्‍दा पेर्मल स्‍टिपनुन, “नीवा बारेमते ई लोकुल्‍क वेहानद निजमे ना?” इंचि पूसकीतोर. पेद्‍दा पेर्मांक जवाब हिय्याना उद्‍देसमते स्‍टिपन वेल्‍लेन पोल्‍लें वेहालय सुरुव कीतोर. ओर इत्‍तोर, ‘अब्राहामुना कालमताल अय्ते येसुना कालमदाका पेन इस्राएल लोकुल्‍कुनाहाटीं बच्‍चुंगो अद्‍बूतमाता कबाह्‍क कीता. गानि लोकुल्‍क मात्रम पेनदा पोल्‍ले पोर्रो ताकाहिल्‍लुर.’ पजा स्‍टिपन इल्‍हा इत्‍तोर, “मिमेट पेनदा विरोदमते गडसुतनम कीसि, बदनाम कियानोर आंदिर. मावा एनकटा पेद्‍दाल्‍क बल्‍हा पवित्र आत्मा वेहतदुन बस्‍केन ओप्‍कुनाकोंटा पेनदा कबुरतोर्कुन हव्‍कतुर, मिमेटगुडा ओरालेसींगे पवित्र आत्मा वेहतदुन बस्‍केने ओप्‍कुना हिल्‍लिर. गानि ओर कीतादुंकन्‍ना मिमेट ओरकन्‍ना एक्‍को तप्‍पु कीतिर, मिमेट किरिस्‍तुन हव्‍कतिर!” इत्‍तोर.

![](https://cdn.door43.org/obs/jpg/360px/obs-en-45-04.jpg)

ओना इसोंटा पोल्‍लें केंजसि आ नेतालोर इच्‍चोन होंगुक वातुर गदा, ओर ओरा केव्‍कुन मुच्‍कुंचि बतले केंजाकोंटा इरगा मोत्‍कुत्‍तुर. स्‍टिपनुन इग्‍गिसेके सहरता पलाते ओतुर, ओसि ओन हव्‍कालय ओन बंडाने तंतुर.

![](https://cdn.door43.org/obs/jpg/360px/obs-en-45-05.jpg)

स्‍टिपन जीवा होळसानेंके, “ए येसु, ना आत्मातुन निमे स्वीकार कीम,” इंचि केयतोर. पजा टोंगरन पोर्रो कूलाबडसि मर्रुंदि मल्‍का, “हे सामि, ई पापम ओरापोर्रो मोपमा,” इंचि जीवा होळ्‍सतोर.

![](https://cdn.door43.org/obs/jpg/360px/obs-en-45-06.jpg)

अद रोजनाल, येरुसलेमते मनना वेल्‍लेन मंदि लोकुल्‍कु येसुन विस्वासम कीतोर्कुन तिप्‍पल्‍क कियमळ सुरुव कीतुर, अदुनहाटीं विस्वासुल्‍क अगटाल वेरे जेगाने पेय्‍सोत्‍तुर. अयनागानि ओर बगा होत्‍ते अगा, अगाटा लोकुल्‍कुंक येसुना बारेमते वेहतुर.

![](https://cdn.door43.org/obs/jpg/360px/obs-en-45-07.jpg)

पिलिप पोरोलतोर वरोर विस्वासि मत्‍तोर. अंटोर विस्वासुल्‍क येरुसलेम होळसि होत्‍ताप ओरगुडा येरुसलेमताल पेय्‍सि होत्‍तोर. ओर सामरिया इनना एरियाते होत्‍तोर. अगा ओर येसुना बारेमते लोकुल्‍कुंक वेहतोर. वेल्‍लेन लोकुल्‍कु ओर वेहतदुन विस्वासम कीसि, मुक्‍ति दोर्किच्‍कुत्‍तुर. उंदि रोज, पेनदा उंदि दूता पिलिपुनगा वासि, ओन केडाते होंचि उंदि हर्रिपीसि ताकालय वेहता. अस्‍के ओर अगा होत्‍तोर. ओर आ हर्रिपीसि होंचेके मननेंके वरोर मनकल ओना रतमते उद्‍दिसि होननेंके पिलिपुंक दिसतोर. आ मनकल कूस इनना देसेमते पेद्‍दा अदिकारि मत्‍तोर. ओनगा होंचि ओनतोनि कलियसि ताका इंचि पवित्र आत्मा पिलिपुंक वेहता.

![](https://cdn.door43.org/obs/jpg/360px/obs-en-45-08.jpg)

अदुनहाटीं पिलिप रतमता दग्‍गेरा होत्‍तोर. अस्‍के आ मनकल कूस देसेमता पेनदा पोल्‍लें हद्‍वानद ओर केंजतोर. यसायाह इनना वरोर पेनदा कबुरतोर रासता पोल्‍लें ओर हद्‍वुसेके मत्‍तोर. अव पोल्‍लें इल्‍हा मत्‍तां, “ओर ओन बलि हियालय ओयाना गोर्रेतुन ओताप ओतुर. गोर्रे बल्‍हा सांत मनंता, अल्‍हेन ओरगुडा बतले वळ्‍काकोंटा चुपचाप मत्‍तोर. ओर लोकुल्‍कु ओनतोनि तप्‍पुड व्यवहार कीतुर, ओना कदर इर्राहिल्‍लुर, ओन हव्‍कतुर.”

![](https://cdn.door43.org/obs/jpg/360px/obs-en-45-09.jpg)

अस्‍के पिलिप आ कूस देसेमता मनकन, “निमे हद्‍वाना पोल्‍लें नीकु अर्तम आतांगा?” इंचि पूसकीतोर. अस्‍के, “हिल्‍ले. बोरन्‍ना नाकु इवुना अर्तम तेळियागोटसि वेहाकोंटे नाकु इवुना अर्तम तेळियो, कुरपा कीसि नहगा वासि उद्‍दा. उद्‍सि, यसायाहल सतता बारेमते वेहचंतोरा मरि वेरे बोना बारेमते अय्‍ना वेहचंतोरा नाकु वेहा,” इंचि आ मनकल इत्‍तोर.

![](https://cdn.door43.org/obs/jpg/360px/obs-en-45-10.jpg)

पिलिप रतमते एक्‍किसि उदतोर. आनि यसायाहल येसुना बारेमते रासता पोल्‍लें ओनकु वेहतोर. पेनदा वेरे वेल्‍लेन पोल्‍लेंगुडा पिलिप आ मनकंक वेहतोर. इल्‍हा पिलिप आ कूस देसेमता मनकंक येसुना बारेमता बेसता कबुर वेहतोर.

![](https://cdn.door43.org/obs/jpg/360px/obs-en-45-11.jpg)

पिलिप आनि आ मनकल इव्‍वुरगुडा ताकसेके एतागा एव्तुर. अस्‍के आ कूसी मनकल, “हुळा! अगा एर मंता, इंदके नना बापतिस्मा येतावच्‍चा? इंचि इत्‍तोर. आनि रतम ताकसानोन रतम आपा वेहतोर.

![](https://cdn.door43.org/obs/jpg/360px/obs-en-45-12.jpg)

पजा ओर इव्‍वुर एते होत्‍तुर, पिलिप आ कूसी मनकंक अगा बापतिस्मा हीतोर. ओर एताल बल्‍हा अय्ते पलाते पेय्‍सतुर, अल्‍हेन पवित्र आत्मा पिलिपुन बदो वेरे जेगाते तेहकुंचि ओता. पिलिप अगागुडा लोकुल्‍कुंक येसुना बारेमते वेहामळ सुरुवे इरतोर.

![](https://cdn.door43.org/obs/jpg/360px/obs-en-45-13.jpg)

आ कूसी मनकलगुडा ओना लोताहेके होनालय मुन्‍नेळ्‍क पेय्‍सतोर. ओर येसुन एरपाट कीताहाटीं वेल्‍लेन कूस मत्‍तोर.

*प्रेरितों के काम 6:8-8:5; 8:26-40 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_45_192kbps.mp3

## 46. पौलुस किरिस्‍तुन विस्वासम कींतोर

https://openbiblestories.org/l/gon-x-aheri/story-46/

![](https://cdn.door43.org/obs/jpg/360px/obs-en-46-01.jpg)

साऊल पोरोलतोर वरोर मनकल मत्‍तोर, ओर येसुन विस्वासम कीसि मनाहिल्‍लोर. ओना लेय्यातनमते, स्‍टिपनुन हव्‍काना लोकुल्‍कुना कपडिंकु ओर कावेल मत्‍तोर. पजा ओर विस्वासुल्‍कुन तिप्‍पल्‍क कियुंदुर. येरुसलेमते ओर लोन-लोन होंचि मुरतळ-मांडसा इनाका इव्‍वुर्कुनगुडा दोर्कापीसि जेलने वाटतोर. अस्‍के पेद्‍दा पेर्मल साऊलुन दमिस्‍क सहर होनालय वेहतोर. अगा होंचि अगाटा विस्वासुल्‍कुन दोर्कापीसि ओर्कुन येरुसलेम वापस पीसि वा इंचि पेर्मल साऊलुंक वेहतोर.

![](https://cdn.door43.org/obs/jpg/360px/obs-en-46-02.jpg)

अय्ते साऊल दमिस्‍क होनालय पेय्‍सतोर. ओर दमिस्‍क एव्‍वका मुन्‍नेन गिचचो लक्‍कु मननेंके अचानक ओना सुट्‍टु मब्‍बुनाल तेल्‍लगा वेलगु आता, ओर बूमिपोर्रो कूलाबडतोर. अस्‍के बोरो, “ए साऊल, ए साऊल निमे नाकुन बारि तकलीप कीसंतिन?” इंचि इनानद साऊल केंजतोर. अस्‍के साऊल, “ए सामि, निमे बोन आंदिन?” इंचि पूसकीतोर. अस्‍के येसु, “नना येसुन आंदुन, निमे नाकुन तकलिप कीसंतिन,” इंचि इत्‍तोर.

![](https://cdn.door43.org/obs/jpg/360px/obs-en-46-03.jpg)

पजा साऊल तेदसि निलतोर अय्ते ओनकु कळ्‍कु दिसाकोंटा आतां. ओना दंटातोर ओन दमिस्‍क पीसि ओतुर. मूड रोजकुनदाका साऊल बतले तिनाहिल्‍लोर, उनाहिल्‍लोर.

![](https://cdn.door43.org/obs/jpg/360px/obs-en-46-04.jpg)

दमिस्‍कते हन्‍यना पोरोलतोर वरोर सिस्युड मत्‍तोर. पेन ओन, “निमे साऊल मनना लोते होंचि ओन इट्‍टा, अस्‍के ओर मर्रा हूळापर्रांतोर,” इंचि वेहता. गानि हन्‍यनाल मात्रम, “सामि, ओर विस्वासुल्‍कुन वेल्‍लेन तिप्‍पल्‍क कीतोर इंचि नना केंजतन,” इत्‍तोर. अस्‍के जवाबुने पेन, “निमे होन! यहुदिल्‍क आनि वेरे जातिता लोकुल्‍कुना नड्‍डुम ओन नना नावा पोरोलतुन वेहालय पेरतन. नावा पोरोलतुन वेहालय ओर वेल्‍लेन कस्‍टाल्‍क अर्रंतोर,” इंचि इत्‍ता.

![](https://cdn.door43.org/obs/jpg/360px/obs-en-46-05.jpg)

अय्ते हन्‍यनाल साऊलनगा होत्‍तोर, होंचि साऊलुन पोर्रो ओना कय इरसि, “निमे इग्‍गे वायनेंके नीकु हर्दे दिसता येसु, नीकुन मर्रा हूळानालायक कियालय आनि निमे पवित्र आत्माते निंडालय, नाकुन निहगा लोहतोर,” इंचि इत्‍तोर. अस्‍केटद अस्‍केन साऊल हूळा परतोर आनि हन्‍यनाल ओनकु बापतिस्मा हीतोर. पजा साऊल गाटो तिंचि मर्रा हुसार आतोर.

![](https://cdn.door43.org/obs/jpg/360px/obs-en-46-06.jpg)

अस्‍केटाल, दमिस्‍कते मनना यहुदिल्‍कुंक साऊल येसुना बारेमते वेहामळ सुरुव कीतोर. “येसे पेनदा मर्रि आंदुर,” इंचि ओर वेहुंदुर. इद केंजसि यहुदिल्‍कुंक इचंत्रम आयुंदु, बारित्‍ते, साऊल विस्वासुल्‍कुन हव्‍कालय हूळुंदुर, गानि इंदके ओर येसुन विस्वासम कीतोर. ओर यहुदिल्‍कुनतोनि वळ्‍किसि-वळ्‍किसि, येसे किरिस्‍तु आंदुर इंचि रुजुव कीसि हुपिस्‍तोर.

![](https://cdn.door43.org/obs/jpg/360px/obs-en-46-07.jpg)

वेल्‍लेन रोजकु आसोत्‍तस्‍के, यहुदिल्‍क साऊलुन हव्‍काना पिलान कीतुर. ओनपोर्रो नदर वाटसि, ओन हव्‍कानाहाटीं यहुदिल्‍क सहरता गेटुनगा लोकुल्‍कुन लोहतुर. गानि ओरा पिलानता बारेमते साऊलुंकु तेळियसि ओर ओना दंटातोरा सहायमतोनि अगाटाल तप्‍पिच्‍कुंचि पेय्‍सि होत्‍तोर. उंदि नर्का ओना दंटातोर, ओन तट्‍टाते उपिच्‍चि गूरे पोर्रोटाल हब्‍बेरा रेहतुर. दमिस्‍कताल तप्‍पिच्‍कुंचि पेय्‍सि होत्‍तस्‍के, साऊल येसुना बारेमते वेहामळ सुरुवे इरतोर.

![](https://cdn.door43.org/obs/jpg/360px/obs-en-46-08.jpg)

साऊल प्रेरितुल्‍कुंक कलियालय येरुसलेम होत्‍तोर, गानि प्रेरितुल्‍क मात्रम ओनकु वेरियुंदुर. अय्‍ते बरनाबास पोरोलतोर वरोर विस्वासि, साऊलुन प्रेरितुल्‍कुनगा ओतोर. साऊल बच्‍चोनो गट्‍टि दैरनेमते दमिस्‍कते येसुना बारेमते वेहतोर इंचि बरनाबास प्रेरितुल्‍कुंक वेहतोर. अस्‍के प्रेरितुल्‍क ओन ओप्‍कुत्‍तुर.

![](https://cdn.door43.org/obs/jpg/360px/obs-en-46-09.jpg)

तिप्पल्‍कुंक आगा पर्रका, येरुसलेमताल इच्‍चुर विस्वासुल्‍क अंताकिया इनना सहरते पेय्‍सि विततुर. अगा ओर येसुना बारेमते वेहासेके मत्‍तुर. अंताकियाता लोकुल्‍कु वेल्‍ले मंदि यहुदिल्‍क आयुर. गानि ओरव्टेटाल वेल्‍ले मंदि पूनें-पूनें येसुन नम्मिसि विस्वासुल्‍क आतुर. आ पूना विस्वासुल्‍कुंक येसुना बारेमते इंका बेस कराहचि अगाटा कलिसियातुन विस्वासमते गट्‍टि पळसानाहाटीं बरनाबास आनि साऊल अगा होत्‍तुर. येसुन विस्वासम कियानोर्कुन मोट्‍टा मोदाला अंताकियातेन ‘किरिस्‍तुनोर’ इंचि केयमळ जर्गता.

![](https://cdn.door43.org/obs/jpg/360px/obs-en-46-10.jpg)

उंदि रोज, अंताकियाता विस्वासुल्‍क ओक्‍कापोद्‍दु इरसि पारतना कीसेके मत्‍तुर. अस्‍के पवित्र आत्मा ओर्कुन, “बरनाबास आनि साऊलुन बद कबळ कियालय अय्ते नना केया वेहतानो, अद कबळ कियानाहाटीं ओर्कुन मिहागटाल वेरे कीम्टु,” इंचि वेहता. अदुनहाटीं अंताकियाता कलिसियातोर बरनाबास आनि साऊलुनपोर्रो कय इरसि पारतना कीतुर. पजा ओर्कुन वेरे वेल्‍लेन जेगाने येसुना बारेमते बेसता कबुर वेहालय लोहचीतुर. अस्‍के बरनाबास आनि साऊल वेरे-वेरे जातिना लोकुल्‍कुंक येसुना बारेमते कराहतुर आनि बच्‍चुरो लोकुल्‍क ओरा पोल्‍लेन नम्मिसि येसुनपोर्रो विस्वासम इरतुर.

*प्रेरितों के काम 8:3; 9:1-31; 11:19-26; 13:1-3 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_46_192kbps.mp3

## 47. पिलिपि सहरते पौलुस आनि सिलास

https://openbiblestories.org/l/gon-x-aheri/story-47/

![](https://cdn.door43.org/obs/jpg/360px/obs-en-47-01.jpg)

रोम सरकार बच्‍चोन एरियाते राज्येम कींतानो, अद पूरा एरियंता साऊल पय्‍नेम कीतोर, अस्‍के ओर ओना “पौलुस” इनना रोमि पोरोल दोसकुत्‍तोर. उंदि रोज, पौलुस आनि ओना दंटाता सिलास ईर इव्‍वुर पिलिपि सहरते येसुना बारेमता बेसता कबुर वेहालय होत्‍तुर. सहरता पलाते बेरेड ओड्‍डुनगा, उंदि जेगाते पारतनाहाटीं लोकुल्‍क जमा आसि मत्‍तुर, अगा ओर इव्‍वुर होत्‍तुर. अगा ओर लुदिया पोरोलता उंदि व्यापारम कियाना मुरतळ्‍कु कलियतुर. अद पेनदुन पावरम कियुंदु, पेनदा आरादना कियुंदु.

![](https://cdn.door43.org/obs/jpg/360px/obs-en-47-02.jpg)

पेन आ लुदियान, येसुना बारेमता बेसता कबुरतुन विस्वासम कियालय दानकु सहायम कीता. पौलुस आनि सिलास, लुदियांक आनि दाना परिवारतोर्क बापतिस्मा हीतुर. पजा पौलुस आनि सिलासुन, अद दाना लोन आगालय विनंति कीता अय्ते ओर अग्‍गेन आगतुर.

![](https://cdn.door43.org/obs/jpg/360px/obs-en-47-03.jpg)

पौलुस आनि सिलास एक्‍कोते-एक्‍को यहुदिल्‍क पारतना कियाना जेगातेन लोकुल्‍कुंक कलियुंदुर. दररोज ओर अगा बस्‍के अय्ते होनंदुर अस्‍के, देय्यमता कय्‍दा हिळु मत्‍ता उंदि दासि पोरि ओरा पज्‍जो-पज्‍जो होनुंदु. आ देय्यमता सहायमतोनि अद लोकुल्‍कुंक बविस्यवानि वेहुंदु, इल्‍हा अद उंदि बविस्य वेहाना मुरतळ आसि, दाना मालकुल्‍कुनाहाटीं वेल्‍लेन कमय कीसि हिय्युंदु.

![](https://cdn.door43.org/obs/jpg/360px/obs-en-47-04.jpg)

ओर होननेंके आ दासि पोरि, “ई मनकालोर अन्‍निटकन्‍ना पेद्‍दा पेनदा सेवाकुल्‍क आंदुर. ईर मीकु मुक्‍तिता हर्दा बारेमते वेहचंतुर,” इंचि दररोज मोत्‍कुनुंदु, अदुनहाटीं पौलुस नाराज आसि मत्‍तोर.

![](https://cdn.door43.org/obs/jpg/360px/obs-en-47-05.jpg)

आकिरते, उंदि रोज आ दासि पोरि मोत्‍कुनालय दल्‍गतस्‍के, पौलुस आ पोरिनाहेके तिरियसि, दानालोप्‍पो मत्‍ता देय्यमतुन, “येसुना पोरोलते निमे दाना लोप्‍पोटाल पेय्‍सि होन,” इंचि इत्‍तोर. अल्‍हा इत्‍ता इनुडे आ देय्यम आ पोरिन होळसि होत्‍ता.

![](https://cdn.door43.org/obs/jpg/360px/obs-en-47-06.jpg)

अस्‍के आ दासि पोरिना मालकुल्‍कुंक इरगा होंग वाता. आ देय्यमता सहायम हिलाकोंटा आ दासि पोरि बविस्यवानि वेहापर्रो इंचि ओर्कु तेळियसोत्‍ता. इंदके लोकुल्‍कु ओरा बारेमते बविस्यवानि वेहालय आ पोरिना मालकुल्‍कुंक कोत्‍तां हिय्युर.

![](https://cdn.door43.org/obs/jpg/360px/obs-en-47-07.jpg)

अदुनहाटीं आ दासि पोरिना मालकुल्‍क, पौलुस आनि सिलासुन रोम सरकारता अदिकारिल्‍कुनगा ओतुर. ओर पौलुस आनि सिलासुन इरगा तंचि ओर्कुन जेलने वाटतुर.

![](https://cdn.door43.org/obs/jpg/360px/obs-en-47-08.jpg)

जेलने बगा अय्ते एक्‍को सिपाइल्‍क कावेल कीसेके मनंतुरो, अगा ओर पौलुस आनि सिलासुन इरतुर. अचोने आयाका ओरा काल्‍कुंक कट्‍टेता बल्‍ला कळाहतुर. अयना पौलुस आनि सिलास नडजाम नर्का आतस्‍के, पेनदा स्‍तुति कियाना पाटां पारसेके मत्‍तुर.

![](https://cdn.door43.org/obs/jpg/360px/obs-en-47-09.jpg)

अस्‍के अचानक उंदि पेद्‍दा बूकंप आता. जेलनव अन्‍नि तल्‍पुक पेय्‍सतां, जेलने मत्‍तोरा अंटोरा बेडीं नेम्‍सि हिळ अरतां.

![](https://cdn.door43.org/obs/jpg/360px/obs-en-47-10.jpg)

अस्‍के दरोगाल निद्राताल तेदसि हूळते जेलनव अन्‍नि तल्‍पुक पेय्‍सि मंतां. अय्ते अंटोर कैदिर्क जेलनाल पेय्‍सि विततुर, ओर पेय्‍सि वितुताहाटीं रोम सरकारता अदिकारिल्‍क नाकुन हव्‍कांतुर इंचि आ दरोगाल इनकुत्‍तोर. अदुनहाटीं ओनद ओरे हव्‍ककुनालय तयार आतोर. गानि पौलुस, “आगा, अल्‍हा नुकसान कीकुनमा! मोमोट अंटोरम इग्‍गेन मंतोम,” इंचि इत्‍तोर.

![](https://cdn.door43.org/obs/jpg/360px/obs-en-47-11.jpg)

आ दरोगाल इरगा वनकुसेके पौलुस, सिलासुनगा वासि, मुक्‍ति दोर्किच्‍कुनालय नना बतल कीकन?” इंचि पूसकीतोर. अस्‍के ओर, “सामि येसुनपोर्रो विस्वासम कीम, निमे, नीवा परिवारतोर्क मुक्‍ति दोर्कंता,” इंचि जवाब हीतोर. अस्‍के आ दरोगाल, पौलुस, सिलासुन ओना लोन ओसि, ओरा पुनकुनंता नोर्सि साप कीतोर. पौलुसगुडा दरोगाना लोतोर अंटोर्क येसुना बारेमता बेस कबुर वेहतोर.

![](https://cdn.door43.org/obs/jpg/360px/obs-en-47-12.jpg)

अस्‍के दरोगाल आनि ओना लोतोर अंटोर येसुनपोर्रो विस्वासम इरताहाटीं पौलुस, सिलास ओर्कु बापतिस्मा हीतुर. पजा पौलुस, सिलास दरोगाना लोने गाटो तित्‍तुर, इल्‍हा अंटोर कलियसि कूस आतुर.

![](https://cdn.door43.org/obs/jpg/360px/obs-en-47-13.jpg)

इंकुंदि रोजु, अद सहरता नेतालोर पौलुस, सिलासुन जेलनाल होळसीतुर आनि पिलिपिताल पेय्‍सि होंटु इंचि वेहतुर. पजा पौलुस आनि सिलास, लुदियांक आनि इंकिच्‍चुर दंटातोर्क कलियसि अगाटाल पेय्‍सि होत्‍तुर. येसुना बारेमता बेसता कबुर पैलांच्‍सेके होत्‍ता, कलिसियांगुडा बेर्सेके होत्‍तां.

![](https://cdn.door43.org/obs/jpg/360px/obs-en-47-14.jpg)

पौलुस आनि वेरे विस्वासि नेतालोर कलियसि बच्‍चुंगो सहरकुने होत्‍तुर. होंचि अगाटा लोकुल्‍कुंक येसुना बारेमता बेसता कबुर वेहतुर. कलिसिया आनि अगाटा विस्वासुल्‍क विस्वासमते गट्‍टि पडानाहाटीं आनि ओर्कु पेनदा पोल्‍लें कराहनाहाटीं ओर बच्‍चुंगो सिट्‍टिंगुडा रासि लोहतुर. ओरा सिट्‍टिनाल कोन्‍नि सिट्‍टिं बाइबलते पुस्‍तकाल्‍क आतां.

*प्रेरितों के काम 16:11-40 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_47_192kbps.mp3

## 48. हीता पोल्‍ले परकारम वाता किरिस्‍तु येसे आंदुर

https://openbiblestories.org/l/gon-x-aheri/story-48/

![](https://cdn.door43.org/obs/jpg/360px/obs-en-48-01.jpg)

पेन इद दुनियातुन कीतास्‍के अन्‍नि बेसे मत्‍ता, बतले पापम मनाहिल्‍ले. आदम, हव्‍वाल वरोंक-वरोर पावरम कीयुंदुर, इंका पेनदुन पावरम कियुंदुर. बतले बिमारि, हामुर मनाहिल्‍ले. पेनदा इच्‍चागुडा अल्‍हे मत्‍ता.

![](https://cdn.door43.org/obs/jpg/360px/obs-en-48-02.jpg)

हव्‍वांक दोका हिय्याना उद्‍देसमते देय्यम तरासुनाहेंदाल तोटाते होळियता. अस्‍के हव्‍वाल आनि आदम पेनदा विरोदमते पापम कीतुर. ओर पापम कीताहाटींगे बूमिपोर्रो मनकालोर हासंतुर.

![](https://cdn.door43.org/obs/jpg/360px/obs-en-48-03.jpg)

ओर पापम कीताहेंका इंका वेल्‍लेन तप्‍पु जर्गता. आदम, हव्‍वाल पापम कीताहाटीं ओर पेनदा पगातोरगुडा आतुर. ओर पापम कीताहाटींगे, अस्‍केटाल हरेक मनकल पापम कीसंतोर. हरेक मनकल पुटतस्‍केटाल पेनदा पगातोर आसि पुट्‍संतोर. पेन आनि लोकुल्‍कुना नड्‍डुम सांति मनाहिल्‍ले. गानि पेन मात्रम सांति तर्राना आसेते मत्‍ता.

![](https://cdn.door43.org/obs/jpg/360px/obs-en-48-04.jpg)

हव्‍वाना उंदि वंसमतोर देय्यमता तल्‍लातुन जारानुर इंचि पेन पोल्‍ले हीता. आनि देय्यम दाना कादुन कसकार इंचिगुडा पेन वेहता. दीना अर्तम बतल इत्‍ते, देय्यम किरिस्‍तुन हव्‍कंता, गानि पेन ओन मर्रा जीवाते तेहंता. अद आता पजा, किरिस्‍तु हमेसाताहाटीं देय्यमता ताकततुन कतम कींतोर. बच्‍चुंगो वर्साना पजा, पेन ओर किरिस्‍तु आंदुर इंचि हुपिस्‍ता.

![](https://cdn.door43.org/obs/jpg/360px/obs-en-48-05.jpg)

पेन अद पीसि वायाना दाना परिवारतुन कम्मुडताल कापाळता. पेन नोहान उंदि डोंगा तयार कीम इंचि वेहाचि, दानपोर्रो विस्वासम कियानोर्कुन कम्मुडताल कापाळता. गानि कळमातोर अंटोरगुडा पापम कीसि पेनदाहेंदाल हामुरलायक आसि मत्‍तुर, गानि ओर्कुन कापाळनाहाटीं पेन येसुन लोहचि, ओनपोर्रो विस्वासम कियानोर्कुन अंटोर्कुन कापाळता.

![](https://cdn.door43.org/obs/jpg/360px/obs-en-48-06.jpg)

बच्‍चुंगों वर्सनदाका पेर्मालोर पेनदाहाटीं मोक्‍कुल्‍क हीसेके मत्‍तुर. दीना अर्तम बतल इत्‍ते, लोकुल्‍कु पापम कीसि, पेनदाहेंदाल ओर्कु सिक्‍सा दोर्कानालायक ओर आसि मत्‍तुर. गानि ओर हिय्याना मोक्‍कुल्‍कु ओरा पापाल्‍कुन मापि किया पर्राहिल्‍लें. येसु अंटोर्कन्‍ना पेद्‍दा पेर्मल आंदुर. इदवेरदाका बोरे किया पर्रुवदुन ओर कीतोर. अंटोरा पापाल्‍कु मापि कियागोटनसोंटा उंदे-उंदि मोक्‍कुताहाटीं येसु कुद्‍दु मोक्‍कु आयालय तयार आसि वातोर. अंटोरा पापाल्‍कुन पोळागोटनाहाटीं पेन ओनकु सिक्‍सा हिय्यिकांटी इंचि ओर ओप्‍कुत्‍तोर. इदुनाहाटींगे ओर अंटोर्कन्‍ना पेद्‍दा पेर्मल आतोर.

![](https://cdn.door43.org/obs/jpg/360px/obs-en-48-07.jpg)

“नना नीवा वंसमताहेंदाल दुनियाता अन्‍नि कुलमतोर्कुन आसिर्वाद हींतन,” इंचि पेन अब्राहामुंक वेहचि मत्‍ता. येसु ई अब्राहामुना वंसमताले मत्‍तोर. अब्राहामुनाहेंदाल पेन अन्‍नि कुलमतोर्कु आसिर्वाद हींता, बारित्‍ते, बोरय्ते येसुन पोर्रो विस्वासम कींतोर पेन ओर अंटोर्कुन पापमताल पिसागोटंता. लोकुल्‍कु बस्‍के अय्ते येसुन विस्वासम कींतुर, अस्‍के पेन ओर्कुन अब्राहामुना वंसमतोर इंचि इंता.

![](https://cdn.door43.org/obs/jpg/360px/obs-en-48-08.jpg)

पेन अब्राहामुन, ओना सतता मर्रिन दानाहाटीं मोक्‍कु हीम इंचि मत्‍ता. गानि पेन मर्रा इसाहाकुना जेगाते मोक्‍कु हिय्यानाहाटीं उंदि गोर्रेतुन हीता. मनम अंटोरमगुडा मनम कीता पापाल्‍कुनहेंका हामुर सिक्‍सातालायक मत्‍तोम. गानि मनम हायाना जेगाते पेन येसुन मोक्‍कु आयालय हीसीता. इदुनाहाटींगे मनम येसुन पेनदा गोर्रे पोरि वेहांतोम.

![](https://cdn.door43.org/obs/jpg/360px/obs-en-48-09.jpg)

इजिप्‍त देसेमपोर्रो पेन आकिरता गत्‍तरा लोहतस्‍के, अद इस्राएलतोर्कुंक, ओर उंदि दोसेम हिलुवा गोर्रेतुन मोक्‍कु हिय्याना इंचि वेहता. मोक्‍कु हीसि दाना नेत्‍तुरतुन ओरा गलमाना दारसाकांकु होकाना मत्‍ता. पेन आ नेत्‍तुरतुन हूळतस्‍के, अद ओरा लोह्‍कुन दाटसि मुन्‍नेळ्‍क होत्‍ता आनि ओरा तोल्‍सूर मर्कुन हव्‍काहिल्‍ले. इदंता आसोत्‍तस्‍के, पेन इदुन दाटसि होनना पंडुगु इत्‍ता.

![](https://cdn.door43.org/obs/jpg/360px/obs-en-48-10.jpg)

येसु आ दाटसि होनना पंडुगुना गोर्रतालेसीं मंतोर. ओर बस्‍केने पापम कियाहिल्‍लोर, ओनालोप्‍पो बतले तप्‍पु मनाहिल्‍ले. ओरगुडा दाटसि होनना पंडुगुना वेलातेन हासोत्‍तोर. बस्‍के अय्ते वरोर मनकल येसुनपोर्रो विस्वासम इर्रांतोर, अस्‍के येसुना नेत्‍तुर आ मनकाना पापमता बाकि नेम्‍हंता. अद बल्‍हा इत्‍ते, पेन आ मनकाना दग्‍गेटाल मुन्‍नेळ्‍क पेय्‍सि होत्‍ता, बारित्‍ते पेनदुक आ मनकंक सिक्‍सा हिय्याना हिल्‍ले.

![](https://cdn.door43.org/obs/jpg/360px/obs-en-48-11.jpg)

इस्राएल लोकुल्‍कुन पेन दाना लोकुल्‍क आयालय पेरसि मत्‍ताहाटीं अद ओरतोनि उंदि करार कीसि मत्‍ता. गानि इंदके पेन दुनियाता अंटोराहाटीं उंदि करार कीता. दुनियाता बोरे मनकल आयिर, ओर ई करारतुन स्वीकार कियानय्ते ओर पेनदा लोकुल्‍कुने कलियंतोर. ओर येसुन पोर्रो विस्वासम इरमळताहेंदाल अल्‍हा आंतोर.

![](https://cdn.door43.org/obs/jpg/360px/obs-en-48-12.jpg)

पेनदा पोल्‍लेतुन वेल्‍लेन ताकततोनि अंटोर्क वेहता, पेनदा कबुरतोर इत्‍ते मूसाल आंदुर. गानि येसु अंटोर पेनदा कबुरतोर्कुंकन्‍ना पेद्‍दोड आंदुर. ओर कुद्‍दु पेन आंदुर, अदुनहाटीं ओर बतल किय्यिना, वेहिना अद पेनदा पोल्‍लेताहाटींगे मत्‍ता. अदुनाहाटींगे दर्मसास्‍त्रम येसुन ‘पेनदा पोल्‍ले’ इंचि वेहंता.

![](https://cdn.door43.org/obs/jpg/360px/obs-en-48-13.jpg)

पेन दाऊद राजांक उंदि पोल्‍ले हीसि मत्‍ता गदा, ओना वंसमताल वरोर राजाना रूपमते, पेनदा लोकुल्‍कुनपोर्रो बस्‍केळ्ताहाटीं राज्येम कींतोर इंचि. येसु पेनदा मर्रि, किरिस्‍तु आनि दाऊद राजाना वंसमते पुटतोर आंदुर, अदुनहाटीं ओर बस्‍केळ्ताहाटीं राज्येम कींतोर.

![](https://cdn.door43.org/obs/jpg/360px/obs-en-48-14.jpg)

दाऊद अय्ते सिराप इस्राएल देसेमता राजाल मत्‍तोर, गानि येसु अय्ते पूरा दुनियाता राजाल आंदुर. ओर मर्रा वायाना मंता. वासि बस्‍केळ्ताहाटीं सांतिते ओना लोकुल्‍कुनपोर्रो राज्येम कियानुर.

*उत्पत्ति 1-3, 6, 14, 22; निर्गमन 12, 20; 2 शमूएल 7; इब्रानियों 3:1-6, 4:14-5:10, 7:1-8:13, 9:11-10:18; प्रकाशितवाक्य 21 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_48_192kbps.mp3

## 49. पेनदा पूना करार

https://openbiblestories.org/l/gon-x-aheri/story-49/

![](https://cdn.door43.org/obs/jpg/360px/obs-en-49-01.jpg)

पेनदा उंदि दूता, मरियम पोरोलता लेय्यातगा वासि, “निमे पेनदा मर्रिन कनांतिन,” इंचि वेहता. अद इंका मरमिं आयाकेन मत्‍ता, गानि पवित्र आत्मा दानागा वासि अद नेला तप्‍ता. अद वरोर मर्रिन कंचि ओना पोरोल येसु इंचि इरता. अदुनहाटीं येसु पेनगुडा आंदुर, मनकलगुडा आंदुर.

![](https://cdn.door43.org/obs/jpg/360px/obs-en-49-02.jpg)

येसु बच्‍चुंगो चमत्‍काराल्‍क कीतोर, अदुनाहेंदाल ओर पेन आंदुर इंचि मनाकु तेळियंता. ओर वेल्‍लेन मंदितुन रोगाल्‍कुनाल बेस कीतोर, वेल्‍लेन मंदिताल देय्याल्‍कुन पेचाह्‍चि गेदुमतोर, हातोर्कुन जीवाते तेहतोर. हेय्युं रोटें(5) आनि रोंडु(2) जिम्मनाहेंदाल हेय्युं वेय्‍कुना(5000) मंदिकु हालानाल तिंडि तयार कीतोर.

![](https://cdn.door43.org/obs/jpg/360px/obs-en-49-03.jpg)

येसु वरोर बेस गुरुगुडा मत्‍तोर. ओर बतल अय्ते कराहतोरो अद ओर पूरा मनसुनाल कराहतोर. येसु पेनदा मर्रि आंदुर, अदुनहाटीं लोकुल्‍कुंक ओर बतल कियालय वेहते, लोकुल्‍कु अद कियागोम. उदाहरनते, मीवद मिमेट बल्‍हा पावरम कींतिरो, अल्‍हेन वेरे लोकुल्‍कुनगुडा पावरम कियागोम इंचि ओर उंदि मल्‍का कराहचि मत्‍तोर.

![](https://cdn.door43.org/obs/jpg/360px/obs-en-49-04.jpg)

अचोने आयाका, बवे वस्‍तुकंकन्‍ना, सतता दनम-संपतिकन्‍ना मिमेट पेनदुन एक्‍को पावरम कियागोम इंचिगुडा ओर कराहचि मत्‍तोर.

![](https://cdn.door43.org/obs/jpg/360px/obs-en-49-05.jpg)

दुनियाते बतल दोर्किच्‍कुनिनागानि, दानकन्‍ना एक्‍को पेनदा राज्येमतुन दोर्किच्‍कुनमळे बच्‍चोनो बेस इंचि ओर वेहचि मत्‍तोर. पेन मीवा पापाल्‍कुन मिहागटाल तेंडसि मीकुन पिसागोटतेन मिमेट ओना राज्येमते होळिया पर्रांतिट.

![](https://cdn.door43.org/obs/jpg/360px/obs-en-49-06.jpg)

येसु इल्‍हा वेहचि मत्‍तोर, इच्‍चुर लोकुल्‍क ओन स्वीकार कियानुर आनि पेन ओर्कुन पिसागोट्‍टार. गानि वेरे लोकुल्‍कु ओन स्वीकार किय्युर. इंका येसु इल्‍हागुडा वेहचि मत्‍तोर, इच्‍चुर लोकुल्‍कु बेस बूमितसंटोर आंदुर, ओर येसुना बारेमता बेसता कबुरतुन स्वीकार कींतुर, पेन ओर्कुन पिसागोटंता. गानि इच्‍चुर लोकुल्‍कु हर्दा पक्‍काता बंडाना गेर्से बूमितसंटोर आंदुर. पेनदा पोल्‍ले पेडेतालेसीं हर्दापोर्रो अर्रंता, गानि अगा बतले पुट्‍टो. ईर लोकुल्‍कु येसुना बारेमता कबुरतुन स्वीकार किय्युर. ओर येसुना राज्येमते होळियालय विरोद कींतुर.

![](https://cdn.door43.org/obs/jpg/360px/obs-en-49-07.jpg)

पेन पापि लोकुल्‍कुन वेल्‍लेन पावरम कींता. अद ओर्कुन मापि कीसि दाना संतानम कीकुनना दाना मनसु मंता. इंचि येसु कराहतोर.

![](https://cdn.door43.org/obs/jpg/360px/obs-en-49-08.jpg)

पापमतुन पेन हय्‍सो इंचिगुडा येसु वेहचि मत्‍तोर. बारित्‍ते आदम, हव्‍वाल पापम कीताहेंका ओरा पूरा वंसमतोर पापम कीतुर. इद दुनियाते मनानोर हरेक मनकल पापम कीसि पेनदाल लक्‍कु आसि मंतोर. हरेक मनकल पेनदा पगातोर आसि मंतोर.

![](https://cdn.door43.org/obs/jpg/360px/obs-en-49-09.jpg)

गानि पेन मात्रम ई दुनियाते मनना हरेक मनकन बच्‍चोनो पावरम कीता: अदुनहाटीं अद दाना वरोरे आता मर्रिन इद दुनियातोराहाटीं हीता. ओनपोर्रो बोर अय्ते विस्वासम इर्रांतुर ओर्कु पेन सिक्‍सा हिय्यो. गानि ओर हमेसाताहाटीं ओनतोनि कलियसि मनांतुर.

![](https://cdn.door43.org/obs/jpg/360px/obs-en-49-10.jpg)

तुम मरने के योग्य हो, क्योंकि तुमने पाप किया है। तुम से परमेश्वर का क्रोधित होना उचित ही है, इसकी अपेक्षा, वह यीशु पर क्रोधित हुआ। उसने यीशु को क्रूस की मृत्यु देकर दण्ड दिया।

![](https://cdn.door43.org/obs/jpg/360px/obs-en-49-11.jpg)

येसु बस्‍केन पापम किया हिल्‍लोर, अयना पेन ओनकु हीता सिक्‍सातुन ओर येतकुत्‍तोर. हायमळतुन स्वीकार कीतोर. इल्‍हा ओर मी पापाल्‍कुन आनि इद दुनियाते मनानोरा अंटोरा पापाल्‍कुन ओना पोर्रो येतकुंचि ओयालय उंदि सक्‍कटा मोक्‍कु आतोर. येसु कुद्‍दु पेनदाहाटीं ओनद-ओर मोक्‍कु आतोर. अदुनहाटीं बदे पापम आयि, अद बच्‍चोन वेल्‍ले कतरनाक पापम आयिनागानि पेन मापि कींता.

![](https://cdn.door43.org/obs/jpg/360px/obs-en-49-12.jpg)

मिमेट बच्‍चोन बेसता कबाह्‍क किय्यिनागानि पेन मीवा कबाह्‍कुनपोर्रोटाल मीकुन पिसागोट्‍टो. पेनदा दंटातोर आयालय मिमेट कियानद वेरे बतले हिल्‍ले. सिराप मिमेट, ‘येसु पेनदा मर्रि आंदुर, मिमेट हायाना जेगाते ओर क्रुसुनपोर्रो हासोत्‍तोर, गानि पेन ओन मर्रा जीवाते तेहता’ इंचि नम्मिसि विस्वासम किय्याना. ओक्‍कला मिमेट विस्वासम कियानय्ते पेन मीवा पापाल्‍कुन मापि कींता.

![](https://cdn.door43.org/obs/jpg/360px/obs-en-49-13.jpg)

बोर मनकल अय्ते येसुनपोर्रो विस्वासम इरसि, ओन ओना सतता सामि इंचि ओप्‍कुंतोरो, आ हरेक मनकन पेन पिसागोटंता. गानि येसुनपोर्रो विस्वासम इर्रुवा मनकन मात्रम पेन पिसागोट्‍टो. इव्टे मिमेट सिरमंता गरिबा, मुरतळा मांडसाना, मातरला लेय्योडा? इंका मिमेट बतल कींतिर इत्‍तदगुडा इग्‍गे लेक्‍का हिल्‍ले. पेन अंटोर्कुन पावरम कींता, मिमेट अंटोर येसुनपोर्रो विस्वासम कीसि ओना दंटातोर आयगोम इंचि दाना इच्‍चा मंता.

![](https://cdn.door43.org/obs/jpg/360px/obs-en-49-14.jpg)

मिमेट येसुनपोर्रो विस्वासम इरसि बापतिस्मा येतालय, येसुन मीकुन केयसंतोर. पेनदा वरोरे आता मर्रि येसुए किरिस्‍तु इंचि मिमेट विस्वासम कींतिरा? मिमेट पापिर्क आनि पेनदाहेंदाल वायाना सिक्‍साता लायक मंतिर इंचि मिमेट विस्वासम कींतिरा? मीवा पापाल्‍कुन मिहागटाल लक्‍कु कियानाहाटींगे येसु क्रुसुनपोर्रो हातोर इंचि मिमेट विस्वासम कींतिरा?

![](https://cdn.door43.org/obs/jpg/360px/obs-en-49-15.jpg)

ओक्‍कला मिमेट येसु आनि ओर बतल अय्ते कीतोरो अदुन पोर्रो विस्वासम कियानय्ते, मिमेट किरिस्‍तुनोर आंतिर. देय्यम दाना हीकट राज्येमतुन मीपोर्रो ताकसा पर्रो. पेन दाना वेलगुना राज्येमतुन मीपोर्रो वाटसि राज्येम कींता. मिमेट मुन्‍ने कीता पापाल्‍क मर्रा कियाकोंटा अद मीकुन आपिसि इर्रंता. येसुनाहेंदाल अद मीकु पूना आनि बेसता पिस्वर हीता.

![](https://cdn.door43.org/obs/jpg/360px/obs-en-49-16.jpg)

ओक्‍कला मिमेट किरिस्‍तुनोर आयानय्ते, येसु बतल अय्ते कीतोरो, अदुन पीसि पेन मीवा पापाल्‍कुन मापि कीता. इंदके पेन मीकुन दाना पगातोर इनाका, दाना दग्‍गेटा दंटातोर इंता.

![](https://cdn.door43.org/obs/jpg/360px/obs-en-49-17.jpg)

ओक्‍कला मिमेट पेनदा दंटातोर आनि येसु सामिना सेवक आयानय्ते, येसु मीकु बव पोल्‍लें अय्ते कराहतोरो अवे पोल्‍लेना परकारम ताकाना विचारम मिमेट कींतिर. मिमेट इंदके किरिस्‍तुनोर आयिनागानि देय्यम मात्रम मीकुन पापमते अराहलय मीवा पट्‍टु हूळसेकेन मनंता. गानि पेन अद बतल अय्ते कींतन इंता, अदुन अद तप्‍पकोंटा कींता. ‘मिमेट मीवा पापाल्‍कुन ओप्‍कुननाय्ते, नना मीकुन मापि कींतन’ इत्‍ता. पापमता विरोदमते ताकालय अद मीकु ताकत हींता.

![](https://cdn.door43.org/obs/jpg/360px/obs-en-49-18.jpg)

पेन मीकु, पारतना कियालय आनि दाना पोल्‍लेन हद्‍वालय वेहचंता. वेरे विस्वासुल्‍कुनतोनि कलियसि मिमेट दाना आरादना कियालयगुडा अद मीकु वेहचंता. पेन मीहाटीं बतल अय्ते कीतानो अदुन मिमेट वेरतोर्कगुडा वेहागोम. ओक्‍कला मिमेट इव कबाह्‍कुन कियानय्ते, मिमेट पेनदुक बेस दंटातोर आकिर.

*रोमियों 3:21-26, 5:1-11; यूहन्ना 3:16; मरकुस 16:16; कुलुस्सियों 1:13-14; 2 कुरिन्थियों 5:17-21; 1 यूहन्ना 1:5-10 से एक बाइबल की कहानी*

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_49_192kbps.mp3

## 50. येसु मर्रा मल्‍सि वांतोर.

https://openbiblestories.org/l/gon-x-aheri/story-50/

![](https://cdn.door43.org/obs/jpg/360px/obs-en-50-01.jpg)

येसु मर्रा मल्‍सि वांतोर. दग्‍गेरा-दग्‍गेरा रोंडु वेय्‍कुना(2000) वर्सानाल दुनियाता वेरे-वेरे जेगाने बचटूरो लोकुल्‍कु किरिस्‍तु येसुना बारेमता बेसता कबुरतुन केंजसंतुर. कलिसियांगुडा बेस बेरसंतां. दुनियाता आकिर आयाना रोजकुने मर्रा मल्‍सि वांतन इंचि येसु पोल्‍ले हीसि मत्‍तोर. इदवेरदाका अय्ते येसु मल्‍सि वायाहिल्‍लोर, गानि हीता पोल्‍लेतुन मात्रम ओर पुरागा कींतोर.

![](https://cdn.door43.org/obs/jpg/360px/obs-en-50-02.jpg)

येसु मल्‍सि वांतोर इंचेके मनम एदुर हूळसेके मंतोम. इसोंटस्‍के, मनम मना पिस्वरतुन पवित्र इरसेके पेनदुक कदर दोर्काना पिस्वर पिसगोम इंचि पेन मनाहेंदाल आसे पळसंता. येसु इद बूमिपोर्रो मननेंके, “नावा सिस्युल्‍कु दुनियाते अन्‍नि जेगाने होंचि पेनदा राज्येम बारेमता बेसता कबुरतुन वेहानुर, अस्‍के दुनियाता आकिर आंता,” इंचि वेहचि मत्‍तोर.

![](https://cdn.door43.org/obs/jpg/360px/obs-en-50-03.jpg)

बच्‍चुंगो जातिना लोकुल्‍कु मंतुर, ओर इदवेरदाकागुडा येसुना बारेमते केंजाहिल्‍लुर. येसु स्वर्गमते होनाका मुन्‍ने, ‘बोर अय्ते बेसता कबुर केंजाहिल्‍लुरो, असोंटा लोकुल्‍कुंक बेसता कबुर वेहाट,’ इंचि येसु ओना विस्वासुल्‍कुंक वेहतोर. “होंटु, होंचि अन्‍नि जातिना लोकुल्‍कुन विस्वासुल्‍क कीम्टु, पंटा कोताक वासि मंता,” इंचि येसु वेहचि मत्‍तोर.

![](https://cdn.door43.org/obs/jpg/360px/obs-en-50-04.jpg)

येसु इल्‍हागुडा वेहचि मत्‍तोर, “वरोर सेवक ओना मालकुंकन्‍ना पेद्‍दा आयोर. ई दुनियाता कोन्‍नि पेद्‍दा लोकुल्‍कु नाकुन हय्‍साहिल्‍लुर, आनि नाहाटीं मीकुनगुडा ओर तिप्‍पल्‍क कीसि हव्‍कानुर. इद दुनियाते मिमेट परेसान आकिट, गानि गट्‍टिगा मंटु, बारित्‍ते इद दुनियापोर्रो राज्येम कियाना देय्यमतुन नना गेल्‍सतन. ओक्‍कला मिमेट आकिरदाका विस्वासमते निल्‍सि मनानय्ते, पेन मीकुन पिसागोटंता,” इत्‍तोर.

![](https://cdn.door43.org/obs/jpg/360px/obs-en-50-05.jpg)

दुनियाता आकिर रोज वातस्‍के, लोकुल्‍कुना गति बतल आयार? इनना पोल्‍लेतुन ओना सिस्युल्‍कुंक बेस तेळियागोटसि वेहालय येसु ई वेसुडि वेहतोर. ओर इत्‍तोर, “बोरो मनकल ओना नेदे बेस पेडेक वीततोर. उंदि नर्का ओर निद्राते मननेंके ओना पगातोर वासि आ गोह्‍कुना पेडेकुने, केडा गोह्‍कुना पेडेक वीत्‍सि होत्‍तोर.”

![](https://cdn.door43.org/obs/jpg/360px/obs-en-50-06.jpg)

“अव पेडेक मोलिय्तस्‍के, ओना जीतागाह्‍क हूळसि, ‘सामि, निमे अय्ते नीवा नेदे बेसता पेडेक वीत्‍सि मत्‍तिन. अयते इव्टे ई केडा गोह्‍कु बगाटाल वांता?’ इंचि पूसकीतुर. अस्‍के आ मालक, ‘बोरो नावा पगातोरे इल्‍हा किया पर्रांतोर, बोरो गानि ना पगातोर मंतोर,’ इंचि वेहतोर.”

![](https://cdn.door43.org/obs/jpg/360px/obs-en-50-07.jpg)

“अस्‍के ओना जीतागाह्‍कु, ‘अय्‍ते मरि आ केडा गोह्‍कुना मोल्‍कन पीकिसि पोह्‍कोमा?’ इंचि इत्‍तास्‍के, मालक, ‘मन्‍नि! मिमेट अल्‍हा कियानय्ते अवुनतोनि गोह्‍कुना मोल्‍कनगुडा पीकंतिर. कोताक वायानदाका आगाट, कोयनेंके बोळसि पोहानाहाटीं आ केडा गोह्‍कुना मोल्‍कन उंदि जेगाते जमा कीम्टु आनि गोह्‍कुन बारे नावा गुम्मिते दोस्‍सट, इंचि इत्‍तोर.”

![](https://cdn.door43.org/obs/jpg/360px/obs-en-50-08.jpg)

सिस्युल्‍कुंक इद वेसुडि तेळियाहिल्‍ले, अदुनहाटीं तेल्‍पिच्‍चि वेहा इंचि ओर विनंति कीतुर. अस्‍के येसु ओर्कु इल्‍हा वेहतोर. “बेसता पेडेक वीताना मनकल किरिस्‍तुना कबळ कियानोर आंद. नेली इत्‍ते दुनिया आंद. बेसता पेडेक इत्‍ते पेनदा राज्येमता लोकुल्‍कु आंद.”

![](https://cdn.door43.org/obs/jpg/360px/obs-en-50-09.jpg)

“केडा गोह्‍कुना पेडेक इत्‍ते, आ पापि देय्यमता लोकुल्‍क आंद. आ मनकना पगातोर इत्‍ते, देय्यम आंद. ओर केडा गोह्‍कुना पेडेक वीत्‍सि मत्‍तोर. कोयमळ इत्‍ते ई दुनियाता आकिर आंद. आनि कोय्यानोर इत्‍ते पेनदा दूतां आंद.”

![](https://cdn.door43.org/obs/jpg/360px/obs-en-50-10.jpg)

“दुनियाता आकिर रोजु वातस्‍के, बोर अय्ते देय्यमतोर मंतुर, ओर्कुन अंटोर्कुन पेनदा दूतां उंदगा जमा कींतां. पेनदा दूतां ओर्कुन उंदि बगा-बगा पोत्‍तना तळमिते वाटसींतां. अगा ओर इरगा तकलीपते पल्‍कु कोर्कसेके मनांतुर. गानि बोर अय्ते नीतिमंतुल्‍क मंतुर, येसुन पोर्रो विस्वासम कींतुर ओर पेनबाबाना राज्येमते पोळ्‍दुनालेसीं मेरसेके मनंतुर.”

![](https://cdn.door43.org/obs/jpg/360px/obs-en-50-11.jpg)

दुनियाता आकिर रोजु वायाका मुन्‍नेन नना बूमिपोर्रो मल्‍सि वांतन इंचिगुडा येसु वेहतोर. ओर बल्‍हा अय्ते स्‍वर्गमते होत्‍तोर, अल्‍हेने ओर मल्‍सि वांतोर. इत्‍ते, ओनकु मेंदुल मनंता, मब्‍बुने, मब्‍बु तेर्पेनपोर्रो उद्‍दिसि ओर वायानुर. येसु मल्‍सि वातस्‍के, हासोत्‍ता हरेक विस्वासि, हातोरा लोप्‍पोटाल मर्रा जीवाते तेदानुर आनि मब्‍बुने होंचि येसुंक कलियानुर.

![](https://cdn.door43.org/obs/jpg/360px/obs-en-50-12.jpg)

येसु वातस्‍के, बोर अय्ते विस्वासुल्‍क जीवाते मनंतुर, ओर अंटोर, हातोरव्टेटाल जीवाते तेदता विस्वासुल्‍कुने होंचि कलियांतुर. ओर अंटोरगुडा येसुनतोनि मनंतुर. अदंता आसोत्‍तस्‍के, येसु ओना लोकुल्‍कुनतोनि मनंतोर. ओर अंटोर कलियसि मनानय्ते ओरगा बस्‍केळ्ताहाटीं पुरागा सांति मनंता.

![](https://cdn.door43.org/obs/jpg/360px/obs-en-50-13.jpg)

येसु ओनपोर्रो विस्वासम कीता हरेक मनकंक उंदि किरिटम हींतन इंचि पोल्‍ले हीसि मत्‍तोर. ओर बस्‍केळ्ताहाटीं पेनतोनि कलियसि हरेक वस्‍तुनपोर्रो राज्येम कींतुर. ओरगा पुरागा सांति मनंता.

![](https://cdn.door43.org/obs/jpg/360px/obs-en-50-14.jpg)

गानि बोर अय्ते येसुनपोर्रो विस्वासम किय्युरो, ओर अंटोरद मात्रम पेन न्‍यायम कींता. ओर्कुन पेन नरकमते वाटसींता. अस्‍के ओर अगा बस्‍केळ्‍क अळसेके, पल्‍कु कोर्कसेके, तकलीप अरसेके मनानुर. बस्‍केन पिर्रुवा तळमि ओर्कुन बोळ्‍सेके मनंता आनि पुळ्‍कु ओर्कुन बस्‍केळ्‍क कोर्कसेके मनंतां.

![](https://cdn.door43.org/obs/jpg/360px/obs-en-50-15.jpg)

येसु मल्‍सि वातस्‍के, ओर देय्यमता राज्येमतुन पुरागा नासडेम कींतोर. देय्यमतुन नरकमते वाटसींतोर. बोर अय्ते पेनदा पोल्‍लेन पोर्रो ताकाकोंटा, देय्यमता पज्‍जो होनमळतुन पेरकुत्‍तुर, ओर अंटोरतोनि देय्यम नरकमते बस्‍केळ्‍क वेसेके मनंता.

![](https://cdn.door43.org/obs/jpg/360px/obs-en-50-16.jpg)

बारित्‍ते आदम, हव्‍वाल पेनदा पोल्‍लेता विरोदमते ताकिसि, पापमतुन इद दुनियाते तत्‍तुर. पेन ओर्कु सापनेम हीसि ओर्कुन नासडेम कियाना निरनायम कीता. गानि बदो उंदि रोजु पेन, पूना स्वर्गम आनि पूना बूमितुन तयार कींता, अव बस्‍केळ्ताहाटीं मनंतां. येसु आनि ओना लोकुल्‍कु आ पूना बूमिपोर्रो मंचेके, ओर बस्‍केळ्ताहाटीं अगाटा अन्‍निटवुनपोर्रो राज्येम कींतुर. येसु अंटोर लोकुल्‍कुना कळ्‍कुना एर उसमंतोर. इंका मुन्‍ने बोरे दुक्‍कमते आनि तिप्‍पल्‍कुने मन्‍नुर. ओर्कु अळा वायो, ओर बिमार अर्रुर, हायुर, अगा बतले तप्‍पुड कबाह्‍क जर्गों. येसु ओना राज्येमपोर्रो पुरागा न्‍यायमते, सांतिते राज्येम कींतोर. येसु बस्‍केळ्ताहाटीं ओना लोकुल्‍कुनतोने मनंतोर. मत्‍तयाल रासता बेसता कबुर पुस्‍तकता अद्याय 24:14, 28:18, 13:24-30, 36-42, 22:13; योहान रासता बेसता कबुर पुस्‍तकता अद्याय 15:20, 16:33; प्रकासित वाक्य पुस्‍तकता अद्याय 2:10, 20:10, 21:1-22:21; 1 तेसलोनि पुस्‍तकता अद्याय 4:13-5:11; याकोब पुस्‍तकता अद्याय 1:12 ताल ई वेसुडि येतमळ जर्गता.

Audio: https://git.door43.org/translationCore-Create-BCS/gon-x-aheri_obs/releases/download/v1/gon-x-aheri_obs_v1_50_192kbps.mp3