# unfoldingWord Open Bible Stories — Aché

- Language code: `guq`
- Canonical page: https://openbiblestories.org/l/guq/
- Stories in this file: 50 of 50
- Published by: Door43-Catalog
- Last release: 2026-07-24
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Aché translation; it is not a translation of the whole Bible.

## 1. Bue wywy djapopapyregi

https://openbiblestories.org/l/guq/story-1/

![](https://cdn.door43.org/obs/jpg/360px/obs-en-01-01.jpg)

Go nonga bue wywy ekõmbawe djypyware. Wachapa kreybu, Apã Wachu djapowe krey endarã ywadji, kowe ywy, bue wywy kowe ywy llabuwa emi. Gobu Apã Wachu ywy djapobu, chãwã wywy, emi bue wywy rõ ĩllã wyche. Bue wywy djapollã wyche. Apã Wachu Krei Gatu rõ wewe nonga ekõ y llabu.

![](https://cdn.door43.org/obs/jpg/360px/obs-en-01-02.jpg)

Gobu Apã Wachu inama: „Bype wachu ga mondo.“ Gobu Apã Wachu wechãma, bype gatu, gobu go bype gatupe inama „Krey’y“. Idja bowoma mondo kowe bype chãwãndji. Etakrã inambyre „Krey’y“, duwegi inambyre „Chãwã“. Apã Wachu djapowe kowe bype wachu go etakrã kreybu, bue wywy djapopa endawe djypybu.

![](https://cdn.door43.org/obs/jpg/360px/obs-en-01-03.jpg)

Go mirõ kreybu, Apã Wachu bue wywy djapopa endawe djypybu, djawuma, krey endarã ywadji djapowã ywy llabu. Djapoma kowe krey endarã y bowowã byche rupi, y krey llabuwa udjallãwã duwe y krey wydjiwa.

![](https://cdn.door43.org/obs/jpg/360px/obs-en-01-04.jpg)

Go brewipychã kreybu Apã Wachu djawuma, bowowã y endarã duwe rekuaty, ywy piryllã endarã emi duwe rekuaty. Gobu ywy piryllãngi inama „Ywy“, go ype inama „Y Wachu“. Gobu Apã Wachu wechãma dja djapowe rõ kbegatu.

![](https://cdn.door43.org/obs/jpg/360px/obs-en-01-05.jpg)

Gobu Apã Wachu inama: “Wyra wywy, puty wywy emi yma ga mondo ywy llabu.” Gobu ekõma go nonga. Gobu Apã Wachu wechãma dja djapowe rõ kbegatu.

![](https://cdn.door43.org/obs/jpg/360px/obs-en-01-06.jpg)

Go chengypychã kreybu, Apã Wachu bue wywy djapopabu, djawuma krendy wachu kreydjiwagi, djachy, tata gatu wywy emi ĩwã. Go nonga Apã Wachu djapoma, bue krendy chapiwã kowe ywype, gobu emi kreydjiwagi chãwãndjiwa bowowã, nãndje kua gatuwã krey tãrãmbu wywy, ruy tãrãmbu wywy emi. Gobu Apã Wachu wechãma idja djapowe rõ kbegatu.

![](https://cdn.door43.org/obs/jpg/360px/obs-en-01-07.jpg)

Go ipo kreybu Apã Wachu djawuma, bue ype ekõngi wywy ĩwã, gobu kuyra wywy emi. Apã Wachu wechãma dja djapowe rõ kbegatu, gobu kuwẽ gatupa roma mondo dja djapowegi wywype.

![](https://cdn.door43.org/obs/jpg/360px/obs-en-01-08.jpg)

Go wachapa kreybu Apã Wachu inama: “We wywy mĩmbamami kowe ywy llabu.” Gobu ekõma Apã Wachu inawe nonga. Ekõma we djõrape ekõwãngi, duwegi rõ kradjiwa matãngi ywy llabu, duwe we rõ kadjiwa ekõwãngi emi. Gobu Apã Wachu wechãma we wywy rõ kbegatu.

![](https://cdn.door43.org/obs/jpg/360px/obs-en-01-09.jpg)

Gobu Apã Wachu inama: “Nandje djapowerã ache nandje nonga, gogi rõ nandje nonga ekõwerã. Gogi chidjawerã kowe ywydji, duwe we wywydji emi.”

![](https://cdn.door43.org/obs/jpg/360px/obs-en-01-10.jpg)

Go nonga Apã Wachu dja ipope kawãma ywy kui’i, godji etakrã ache djapoma. Gobu dja gua’a pedjuma mondo achepe. Go ache bykuapyre rõ Adam. Gobu Apã Wachu bue ã’ã pechema ka gatupe, gope Adam ekõ gatuwã. Apã Wachu Adampe mĩma ka gatupe, ka gatudji warõ gatuwã.

![](https://cdn.door43.org/obs/jpg/360px/obs-en-01-11.jpg)

Ka gatu byche pua Apã Wachu pechema mirõ wyra lla’a: Etakrã rõ go wyra manollãndydjiwagi, duwe wyra rõ bue gatu kuawãngi, emi bue buchã kuawãngi. Apã Wachu kiuma Adampe, wyra lla gatugi wywy ka gatu pua uwã. Go wyra lla bue gatu kuawãngi, emi bue buchã kuawãngi ullãwã. Kiuma Adampe, go wyra lla ubu, manowerã.

![](https://cdn.door43.org/obs/jpg/360px/obs-en-01-12.jpg)

Gobu Apã Wachu inama: “Kbegatullã kowe kbe’e idja etakrã ekõmbu.” Duwe we wywy bychepe ĩllã buare Adam djãwẽwãrãngi.

![](https://cdn.door43.org/obs/jpg/360px/obs-en-01-13.jpg)

Go buare Apã Wachu ikẽ wachu roma mondo Adampe, manowe nonga. Gobu Apã Wachu bowo mondo etakrã Adam djukã. Gobu djukã bowopyredji djapo mondo kudjã, emi eruma idjape.

![](https://cdn.door43.org/obs/jpg/360px/obs-en-01-14.jpg)

Gobu Adam kudjã wechãmbu, inama: “Kowegi rõ cho nonga! Go pukapyrã rõ kudjã, go kbe’edji djapopyredjiwa.” Go buare kbe’e wedjawerã dja apã, emi dja ai’i, dja brekodji ekõwã etakrã nonga.

![](https://cdn.door43.org/obs/jpg/360px/obs-en-01-15.jpg)

Apã Wachu djapowe kbe’e, kudjã emi dja nonga. Gogi wywype kuwẽ gatupa roma mondo. Gobu inama: “Pendje ray tãrã, pendje kmino tãrã emi reko ga mondo, pendje tãrã buchã ga mondo kowe ywype!” Gobu Apã Wachu wechãma dja bue djapopawe wywy rõ kbegatueche, gobu ury gatuma bue wywydji. Kowegi ekõmbawe wachapa krey rupi bue wywy djapopa endawe.

![](https://cdn.door43.org/obs/jpg/360px/obs-en-01-16.jpg)

Go djypetã kreybu, Apã Wachu bitawe wywy krãpĩma. Go nonga Apã Wachu bue djapollãma go kreybu, idja djapowe nonga go duwe wachapa krey puku rupi. Kuwẽ gatupa roma mondo go djypetã kreybu, inama go krey rõ kbegatu, dja llapo emi. Go djypetã kreybu dja bue djapollãwe, ury gatu reko dja djapowe wywydji.

*Kiupyre Moise parawe Génesis, djawupuku 1-2, Biblia parapyrepe*

## 2. Bue buchã ikẽma kowe ywype

https://openbiblestories.org/l/guq/story-2/

![](https://cdn.door43.org/obs/jpg/360px/obs-en-02-01.jpg)

Adam, dja breko emi ury gatu ekõawe go ka gatuechepe Apã Wachu djapowe idja puarã. Pypyllãwe tyru dja eche pechewã. Go nongabu djepe krymballã rekollã, bue buchã ĩllã buare kowe ywype. Kreybu wywy wata gatu ekõ ka gatupe, djawu reko Apã Wachudji emi.

![](https://cdn.door43.org/obs/jpg/360px/obs-en-02-02.jpg)

Go ka gatupe rõ ekõawe membo kabewãwãngi. Djawuma kudjãndji: „Apã Wachu ko kiuare dje ullãwã wyra lla wywy kowe ka gatupe?“

![](https://cdn.door43.org/obs/jpg/360px/obs-en-02-03.jpg)

Gobu kudjã inama: „Apã Wachu kiuwe orepe, ore wyra lla wywy upawã. Ãwe wyra lla bue gatu kuawãngi, bue buchã kuawãngi emi idja orepe ukallã. Apã Wachu orepe kiuma: Dje go wyra lla ubu, emi go lla pokobu, manowerã.“

![](https://cdn.door43.org/obs/jpg/360px/obs-en-02-04.jpg)

Membo rõ djawu pepyma kudjãpe: „ Apã Wachu kainawe pendjepe! Pendje manollãwerã. Apã Wachu kua gatu, pendje go wyra lla ubu, ekõwerã Apã Wachu nonga. Bue gatu wywy pendje kuawerã, bue buchã wywy emi, idja kuaty nonga.“

![](https://cdn.door43.org/obs/jpg/360px/obs-en-02-05.jpg)

Gobu kudjã maĩ reko wyra lladji, wechãma kbegatu, ẽ gatu mirõrã. Gogi bue kua gatu djue emi. Go buare wyra lla matãma, uma emi. Mẽ bitallãma dja imepe, dja djawẽwatygipe. Gobu gogi uma emi.

![](https://cdn.door43.org/obs/jpg/360px/obs-en-02-06.jpg)

Gobu dja chã owoma, wechãma, go rõ echeche. Gobu peche djue dja eche, djapoma wyra odji, dja eche pechewã.

![](https://cdn.door43.org/obs/jpg/360px/obs-en-02-07.jpg)

Gobu kbe’e emi dja breko wendubu, manonga Apã Wachu wata ekõ ka gatupe, djemima Apã Wachu idjape wechãllãwã. Gobu Apã Wachu pukama achepe: “Adam, maty rõ dje enda?” Gobu Adam inama: “Cho wenduma, manonga dje wata ekõ ka gatupe. Gobu cho krymballãma, cho tyrullã buare. Go buare cho djemima.”

![](https://cdn.door43.org/obs/jpg/360px/obs-en-02-08.jpg)

Gobu Apã Wachu inama: “Awa rõ djepe kiuare dje rõ echeche? Dje ko uma wyra lla, cho inawe dje ullãwã?” Kbe’e djawu pepyma: “Dje chope meare kowe kudjã. Gogi rõ mewe chope wyra lla’a.” Gobu Apã Wachu djawuma kudjãpe: “ Bue rõ dje djapowe?” Gobu kudjã djawu pepyma: “Membo rõ chope kainare.”

![](https://cdn.door43.org/obs/jpg/360px/obs-en-02-09.jpg)

Apã Wachu membope buema mondo ĩ buchãwã: “Dje kra matã ekõwerã, ywy kui dje uwerã. Dje emi kudjã, edji byllã buchãwerã. Gobu emi dje tay wywy dja memby wywy emi, edji byllãwerã. Etakrã dja irõndy rõ biriwerã dje tõpe, dja pychã atape emi dje chuwerã.”

![](https://cdn.door43.org/obs/jpg/360px/obs-en-02-10.jpg)

Gobu Apã Wachu inama kudjãpe: “Cho djapowerã, dje memby opobu, dje achy buchãwã. Dje kuarawerã dje imepe, dje ime rõ chidjawerã djedji.“

![](https://cdn.door43.org/obs/jpg/360px/obs-en-02-11.jpg)

Apã Wachu inama kbe’epe: “Dje wendu buare dje breko djawu, dje wendullãma cho djawu. Kowebu rõ ywy buchãmbawerã. Dje ywy tyrõ puy ekõwerã pendje bue uwã rekowã. Gobu dje manowerã, dje echedji rõ ekõwerã ywy.“ Gobu kbe’e dja brekope bykuama Ewa. Go rõ inambyty “Mẽwãngi ache wywype ekõwã”, idja rõ ache wywy ai’idjiwa. Gobu Apã Wachu we piredji djapoma tyru Adam emi Ewa puarã.

![](https://cdn.door43.org/obs/jpg/360px/obs-en-02-12.jpg)

Gobu Apã Wachu inama: “Kowebu ache nandje nonga roma ekõ go lla u buare, bue gatu kuapama, bue buchã emi. Gogi ullãwerã wyra lla manollãndydjiwagi, go rupi go rãwe manollãwã.“ Go nonga Apã Wachu buema mondo Adam emi Ewape ka gatu puare. Gobu Apã Wachu mĩma dja buepytygi chidjaechegi ka gatu ikẽ lluãndype, warõ rekowã, duwegi go wyra lla manollãndydjiwa ullãwã.

*Kiupyre Moise parawe Génesis, djawupuku 3, Biblia parapyrepe*

## 3. Y pirã wachu

https://openbiblestories.org/l/guq/story-3/

![](https://cdn.door43.org/obs/jpg/360px/obs-en-03-01.jpg)

Tãrã ruy wachabu, ache tãrã ekõawe kowe ywy llabu. Prandjã buchã wywy. Bue buchã djapo ekõ, pichadji pycho reko. Ywy puagi djembi buchã wywy, go buare Apã Wachu inama idja etakrãpe, bue ekõngi wywy pachopa djonowã, bue wywy kowe ywype buchãmbawã y pirã wachu rupi.

![](https://cdn.door43.org/obs/jpg/360px/obs-en-03-02.jpg)

Noedji rõ Apã Wachu ury gatu. Go rõ praru gatu, ekõ ache wywy djembi buchã bychepe. Apã Wachu kiuma Noepe, y pirã wachu idja bue mondowerã ywy llabu. Kiuma emi Noepe wyra kara wachu djapowã.

![](https://cdn.door43.org/obs/jpg/360px/obs-en-03-03.jpg)

Apã Wachu kiuma Noepe dja endarã wyra kara wachu go nonga djapowã: puku rekuaty 140 metro, chepe rekuaty 23 metro, gobu buwy rekuaty 13.5 metro. Kiuma Noepe, wyra kara wachu djapowã wyradji, djapowã emi ywy chepe nongadji brewipychã llabu, gobu emi djapowerã djãwã tãrã endarã, emi wyra kara llabuwa pechewã, emi etakrã djãwã minĩ. Go wyra kara wachu rupi Noe, dja tay wywy, emi dja breko wywy, emi we wywy ywy llabuwa ekõngi, manollãwerã, go y pirã wachu ekõmbu.

![](https://cdn.door43.org/obs/jpg/360px/obs-en-03-04.jpg)

Noe wendu gatu Apã Wachu djawu. Go dja tay brewipychãndji djapopama wyra kara wachu Apã Wachu inawe nonga. Wyra kara rõ neina wachu, go buare bita reko tãrã ruybu, djapopawã. Noe kiu reko ache wywype y pirã wachu ekõwerã, kiu emi gogi wywype bue buchã wedjapawã, Apã Wachu rupi mudjãwã. Gogi wywy rõ wendu djuellã, kua djuellã Apã Wachu djawuwe.

![](https://cdn.door43.org/obs/jpg/360px/obs-en-03-05.jpg)

Apã Wachu kiuma emi Noepe, dja tay wywype emi, dja bue uwã wywy noãwã, we wywy puarã emi. Bue djapopabu, Apã Wachu kiuma Noepe, dja breko, dja tay wywy dja brekodji: „Kowebu pendje ike kua wyra kara wachu djãwãpe.“ Go rõ chantapa ache.

![](https://cdn.door43.org/obs/jpg/360px/obs-en-03-06.jpg)

Apã Wachu buema mondo we wywydji, etakrã chuegi emi dja breko, kuyra wywydji, etakrã chuegi emi dja breko, wyra kara djãwãpe ikewã, manollãwã y pirã wachu rupi. Apã Wachu buema mondo djypetã chuegi, djypetã waimipurã emi, go we kbegatu wywydji Apã Wachu puarã keĩmbyrã. Gogi wywy wyra kara wachu djãwãpe ĩmbabu, Apã Wachu rõ peche roma mondo wyra kara djãwã.

![](https://cdn.door43.org/obs/jpg/360px/obs-en-03-07.jpg)

Gobu ekõma baky, baky wachu. Baky wachu krãpĩllã chengypychã tapa krey, chengypychã tapa chãwã emi. Y ywy wyrydjiwa owo roma emi, wẽ roma ywy llabu. Bue wywy kowe ywype llabuwagi pechepa roma mondo y pirã wachu rupi, kuã wachu wywy pechepa roma emi.

![](https://cdn.door43.org/obs/jpg/360px/obs-en-03-08.jpg)

Bue ekõngi wywy ywy piryllã llabu manomba roma. Ache wywy, emi we wywy wyra kara wachupe ĩngi, manollã. Wyra kara wachu wewo y pirã llabu. Go nonga kuwẽmbyre bue wywy dja djãwãpe ĩngi manollãwã ype.

![](https://cdn.door43.org/obs/jpg/360px/obs-en-03-09.jpg)

Gobu baky krãpĩmbu, wyra kara wachu wewo wyche y pirã wachu llabu ipo djachy manombu. Go krey rãwe y pirã wachu edjyma o. Gobu duwe kreybu, wyra kara wachu wapyma kuã wachu chepe llabu. Y wachu rõ ĩ wyche ywy llabu. Brewipychã djachy manombu, wechãma duwe kuã’ã emi.

![](https://cdn.door43.org/obs/jpg/360px/obs-en-03-10.jpg)

Chengypychã tapa kreybu wyche, Noe buema mondo tokape kuyra taydjã nongagi, wechãwã y pirã kadjã mombo. Taydjã wewe ekõ duwe rekuaty wywy, ywy piryllã kuarawã. Gobu rõ ĩllã wyche.

![](https://cdn.door43.org/obs/jpg/360px/obs-en-03-11.jpg)

Gobu Noe buema mondo waruku. Gogi rõ dorollã emi ywy piryllã. Go buare ekõma emi Noe endape. Djypetã kreybu, buema mondo emi waruku, gobu go ekõma emi, wyra o „oliva“ eruma dja djurupe. Y pirã wachu edjyma o, wyra wywy oky gatupa roma, emi yma gatu!

![](https://cdn.door43.org/obs/jpg/360px/obs-en-03-12.jpg)

Duwe djypetã kreybu Noe warõ wyche, gobu emi brewipychãndjiwa buema mondo waruku. Gobu rõ dja pychã endarã ĩma, go buare ekõllã emi wyra karape. Y pirã kadjã roma djo!

![](https://cdn.door43.org/obs/jpg/360px/obs-en-03-13.jpg)

Mirõ djachy manombu, Apã Wachu djawuma Noepe: “Amaty kua wyra kara djãwã puare, dje brekodji, dje tay, dja brekodji emi, we wywy emi wẽ kua wyra kara puare kowebu. Pendje tay tãrã, pendje tay kudjã tãrã emi ga mondo, pendje kmino tãrã emi, kowe ywy pendje tãrã buchãwã.” Go nonga Noe emi dja djãwẽwatygi wywy tokape wẽma o wyra kara djãwã puare.

![](https://cdn.door43.org/obs/jpg/360px/obs-en-03-14.jpg)

Gobu Noe edjyma wyra kara djãwã puare, we keĩ endaty djapoma. Gobu eruma tãrãllã we adjullã gatugi, Apã Wachupe keĩmbyrã. Apã Wachu ury gatu we keĩmbyredji, gobu Noepe, dja breko emi dja tay wywype kuwẽ gatupa roma.

![](https://cdn.door43.org/obs/jpg/360px/obs-en-03-15.jpg)

Apã Wachu inama: “Cho mẽma cho djawu go nonga: Cho bue bechewerã bue buchã kowe ywype, bue buchã ache djapowedjiwa. Cho buchã bechewerã ywy y pirã wachu rupi, ache djã buchãmbu djepe go krumi rãwe, go chuebu emi.”

![](https://cdn.door43.org/obs/jpg/360px/obs-en-03-16.jpg)

Gobu Apã Wachu mĩma membo ruchu kreydji, ache wywy wechãwã, Apã Wachu djapowerã idja inawe nonga. Membo ruchu kreydji wechãmbu, Apã Wachu kua rekowerã ache wywydji, idja inawe nonga.

*Kiupyre Moise parawe Génesis, djawupuku 6-8, Biblia parapyrepe*

## 4. Apã Wachu djawu membyre Abrahamdji

https://openbiblestories.org/l/guq/story-4/

![](https://cdn.door43.org/obs/jpg/360px/obs-en-04-01.jpg)

Y pirã wachu krãpĩmbu, tãrã ruy wachabu, ache tãrã rõma djo emi kowe ywype, gogi wywy etakrã djawu reko endawe. Apã Wachu idjape kiubu djepe kowe ywype duwe rekuaty ekõawã, etakrã endape noãmba endawe, gope djapo endawe tapy tãrã.

![](https://cdn.door43.org/obs/jpg/360px/obs-en-04-02.jpg)

Ka chidja buã wywy, chingaruwyllã Apã Wachu inawedji. Gobu buãma emi djapowã tapy ywa puku, wẽwã ywadji. Apã Wachu wechãma, gogi wywy ury gatupe go rãwe bita rekobu, bue buchã djapowã, go nonga tãrã bue buchã djapowerã wyche.

![](https://cdn.door43.org/obs/jpg/360px/obs-en-04-03.jpg)

Gobu Apã Wachu ruwama ache wywy djawu, idja bychepe duwe djawu wywy ĩwã, emi buema idjape duwe rekuaty wywy. Go tapy tãrã dja djapowe rõ pukapyty „Babel“. Go rõ inambyty: „Djueipyre“.

![](https://cdn.door43.org/obs/jpg/360px/obs-en-04-04.jpg)

Tãrã wachu ruy wachabu, Apã Wachu djawuma etakrã kbe’epe, idja bykuapyre rõ Abram. Apã Wachu inama idjape: „Wedja ga mondo dje ekõandy, wẽ kua dje irõndy byche puare emi. Amaty kua duwe rekuaty, gope dje wechãwerã go ywy cho inawegi. Cho kuwẽ gatu rekowerã djepe. Cho dje rupi djapowerã ekõandy wachu. Dje bykuapyre neina wachuwerã. Cho kuwẽ gatuwerã go djedji djawu gatugipe, buewerã bue buchã emi go djedji djawu buchãngipe. Dje rupi duwe irõndy wywy kuwẽ gatupawerã kowe ywy llabu.“

![](https://cdn.door43.org/obs/jpg/360px/obs-en-04-05.jpg)

Gobu Abram wendu gatu Apã Wachu inawe. Rama dja breko Sarai, dja buepytygi wywy, emi dja llapo wywy, gobu watama o go ywy, Apã Wachu idjape inawe rekuaty. Go ywy rõ Kanaan.

![](https://cdn.door43.org/obs/jpg/360px/obs-en-04-06.jpg)

Gobu Abram ekõandy Kanaanpe wẽmbu, Apã Wachu inama idjape: „Mai gatu ga reko dje ruwa mama byre rupi. Cho mẽwerã djepe, dje irõndy wywype emi kowe ywy, dje wechãngi, dje llaporã. Gobu Abram ekõma go ywype.

![](https://cdn.door43.org/obs/jpg/360px/obs-en-04-07.jpg)

Etakrã kreybu Abram doroma Melkisedek, Apã Wachu ywadjiwaty pa’i. Melkisedek kuwẽ gatu mẽma Abrampe, inama idjape: „Apã Wachu ywadjiwatygi, ywy emi ywadjiwa Rekoatygi, ga kuwẽ gatu reko Abrampe.“ Gobu Abram mẽma idjape go diemo bue wywy dja rekogidji.

![](https://cdn.door43.org/obs/jpg/360px/obs-en-04-08.jpg)

Tãrã ruy wachama djepe, Abram emi Sarai rekollã wyche dja memby. Apã Wachu inama Abrampe, mẽma emi idja djawu, go rekowerã dja tay, emi tãrãwerã idja irõndy, tata tãrãeche nonga ywadji. Abram kua gatu Apã Wachu djawu mẽwe. Apã Wachu djawu gatuma Abramdji, go rõ djã praru gatugi, kua gatu buare Apã Wachu djawu mẽwe.

![](https://cdn.door43.org/obs/jpg/360px/obs-en-04-09.jpg)

Gobu Apã Wachu djawu mẽma Abrampe. Djawu mẽmbyre rõ kua gatu rekowã edji. Apã Wachu inama: “Cho djepe mẽwerã dje tay dje rupi, dje breko Sarai rupi emi. Cho mẽwerã djepe, emi dje irõndy wywype kowe ekõandy Kanaan.” Abram rõ rekollã wyche dja tay.

*Kiupyre Moise parawe Génesis, djawupuku 11-15,                                                        Biblia parapyrepe*

## 5. Go tay djawu membyredjiwa

https://openbiblestories.org/l/guq/story-5/

![](https://cdn.door43.org/obs/jpg/360px/obs-en-05-01.jpg)

Etakrãtapa ruybu, Abram emi Sarai ekõmbu Kanaanpe, rekollã wyche dja tay. Gobu Abram breko Sarai inama: “Apã Wachu chope mẽllã cho membyrã, gobu emi cho waĩmipurãma, cho memby machĩwã. Kowepe ĩ cho buetygi kudjã Agar. Reko ga mondo idjape dje breko nonga, go rekowã dja memby kbe’e cho endawepe.”

![](https://cdn.door43.org/obs/jpg/360px/obs-en-05-02.jpg)

Go nonga Abram rekoma Agarpe idja breko nonga. Agar memby machĩma kbe’e, gobu Abram idjape bykuama Ismael. Sarai rõ ka tã buchã reko Agardji. Gobu Ismael etakrã brewipychã ruy rekobu, Apã Wachu djawuma reko emi Abramdji.

![](https://cdn.door43.org/obs/jpg/360px/obs-en-05-03.jpg)

Apã Wachu inama: “Cho rõ Apã Wachu chidjaechegi. Cho djawu mewerã djepe.” Gobu Abram kmarã roma ywydji Apã Wachu chã ruwa. Gobu Apã Wachu inama emi Abrampe: “Dje rõ tãrãeche ekõandy apãrã. Cho mewerã djepe, dje irõndy wywype emi go ywy Kanaan pendje llaporã. Cho etakrã rõ gorãwe pendje Apã Wachu. Mondo ga mondo krumi kbe’epurãngi wywy tawa pire, kbe’e wywy dje tapy pua ekõngi emi.”

![](https://cdn.door43.org/obs/jpg/360px/obs-en-05-04.jpg)

“Dje breko Sarai memby machĩwerã kbe’epurã. Go rõ go djawu membyredjiwa tay. Idjape bykua ga mondo Isaak. Cho djawu mewerã idjape, emi idjadji wẽwerã ekõandy wachu. Cho mewerã Ismaelpe emi, duwe ekõandy wachu idjadji wẽwã. Cho djawu membyregi rõ Isaakdji.” Gobu Apã Wachu ruwama Abram bykuapyre, idjape bykuama Abraham, go rõ inambyty: “Ache tãrã apã.” Gobu emi Apã Wachu ruwama Sarai bykuapyre, idjape bykuama Sarah. Go rõ inambyty: “Ymachidja wachu tay kudjã.”

![](https://cdn.door43.org/obs/jpg/360px/obs-en-05-05.jpg)

Go kreybu Abraham mondoma kbe’e wywy dja tapy pua ekõngi tawa pire. Gobu etakrã ruy wachabu, Abraham etakrã tapa tapa ruy rekobu, Sarah tõwachu tapa ruy rekobu, Sarah memby machĩma kbe’epurã, Abraham tay. Idjape bykuama Isaak, Apã Wachu inawe nonga.

![](https://cdn.door43.org/obs/jpg/360px/obs-en-05-06.jpg)

Isaak kbuchuwebu, Apã Wachu buãma Abrahampe, wechãwã idjadji mudjã gatu ko. Go buare inama: “Ra ga mondo Isaak, dje tay etakrãeche, pycho ga mondo we keĩmbyre nonga chope mẽwã.” Duwebu emi Abraham wendu gatu Apã Wachu djawu, djapo djue go inawe nonga. Kowebu rõ bue wywy mĩ gatuma dja tay pychowã we keĩmbyre nonga Apã Wachupe mewã.

![](https://cdn.door43.org/obs/jpg/360px/obs-en-05-07.jpg)

Abraham, Isaak e rupi watabu we keĩmbyty endaty rekuaty, Isaak kua djue: “Cho apã, nandje reko kowepe chakã we keĩmbyrãngi. Maty rõ ĩ wachupurã?” Gobu Abraham inama: “Apã Wachu mewerã nandjepe wachupurã we keĩmbyrã, cho tay.”

![](https://cdn.door43.org/obs/jpg/360px/obs-en-05-08.jpg)

Gobu gogi ekõmbu we keĩmbyty endatype, Abraham dja tay Isaakpe muchãma, djonoma we keĩ endaty llabu. Go dja tay pycho rawebu, Apã Wachu pukama: “Djapoeme! Pychoeme kbuchuwepe! Kowebu cho kua gatuma, dje rõ mudjã gatu cho rupi, emi dje krymballãpe ekõ dje tãllã dje tay etakrãndji, chope mẽwã.”

![](https://cdn.door43.org/obs/jpg/360px/obs-en-05-09.jpg)

Abraham dja djãwẽ wechãma wachupurã chue’e dja achĩndji pãwe djupikãndji. Apã Wachu rõ meare wachupurã keĩmbyrã Isaak endawepe. Ury gatupe Abraham pychoma wachupurã Apã Wachupe mewã.

![](https://cdn.door43.org/obs/jpg/360px/obs-en-05-10.jpg)

Gobu Apã Wachu kiu gatu Abrahampe: “Dje djã echedji me buare chope bue wywy rekogi, dje tay etakrãeche emi, cho mema djepe cho djawu, djedji kuwẽ gatuwã. Dje irõndy wywy tãrã buchãwerã tata ywadjiwa tãrã buchã nonga. Dje rõ cho djawu wendu gatu emi djapo gatu buare, ache wywy kowe ywy llabuwa kuwẽmbyrã dje irõndy wywy rupi.”

*Kiupyre Moise parawe Génesis, djawupuku 16-22,                                                        Biblia parapyrepe*

## 6. Apã Wachu bue me gatu Isaakpe

https://openbiblestories.org/l/guq/story-6/

![](https://cdn.door43.org/obs/jpg/360px/obs-en-06-01.jpg)

Abraham chuepurãmbu, dja tay kbuchuwe Isaak yma wachu roma. Go buare Abraham buema mondo etakrã dja buetygi, owã emi dja irõndy wywy ekõandype, gope eruwã dja tay Isaak brekorã.

![](https://cdn.door43.org/obs/jpg/360px/obs-en-06-02.jpg)

Go buetygi wata tãrãmbu, wẽma Abraham irõndy ekõandype. Gobu Apã Wachu idjape ra gatuma Rebeka endape. Go rõ etakrã Abraham pawe kmino kudjã.

![](https://cdn.door43.org/obs/jpg/360px/obs-en-06-03.jpg)

Rebeka inama, wedjawerã dja pawe wywy, Abraham buetygi rupi owã emi Isaak chupape. Gobu Isaak llambatype wẽmbu, go warõllã, idjape idja breko rekowã.

![](https://cdn.door43.org/obs/jpg/360px/obs-en-06-04.jpg)

Tãrã ruy wachabu, Abraham manoma. Gobu Apã Wachu djawu mewe, emi djawu membyre Abrahampe, wachama Isaakpe. Apã Wachu inawe Abrahampe, dja irõndy tãrã buchãwerã. Isaak breko Rebeka rõ memby machĩllã.

![](https://cdn.door43.org/obs/jpg/360px/obs-en-06-05.jpg)

Isaak Rebekadji krandobuãma, gobu brawoma. Apã Wachu idjape mema krumi tãrã. Go tãrãngi djuka reko edji, dja ai’i krape ĩmbu wyche. Go buare Rebeka inama Apã Wachupe, bue buare go nonga ekõ.

![](https://cdn.door43.org/obs/jpg/360px/obs-en-06-06.jpg)

Apã Wachu kiuma Rebekape: “Go mirõ krumi dje kra pua wẽwerã mirõ ekõandy, edji djuka rekowerã. Go dorogi rõ dja pawe tywypurãngi buetygiwerã.”

![](https://cdn.door43.org/obs/jpg/360px/obs-en-06-07.jpg)

Rebeka memby kbe’e machĩmbu, go dorogi rõ eche pirã, eche a’a emi. Idja pawe tywypurã opobu, kawãma dorogi pychã atadji, go buare dja apã, dja ai’i idjape bykuama Jakob.

*Kiupyre Moise parawe Génesis, djawupuku 24:1-25:26,                                          Biblia parapyrepe*

## 7. Apã Wachu kuwẽ gatu Jakobpe

https://openbiblestories.org/l/guq/story-7/

![](https://cdn.door43.org/obs/jpg/360px/obs-en-07-01.jpg)

Go mirõ krumi yma rabu, Jakob prawo gatu chupa pua, Esau rõ ka’a prawo bereka djuedjiwa. Rebeka by gatu Jakobpe, Isaak rõ by gatu Esaupe.

![](https://cdn.door43.org/obs/jpg/360px/obs-en-07-02.jpg)

Duwe kreybu berekawe ekõmbu, Esau llellã buchã. Gobu Esau inama Jakobpe: „Ichakrã dje bakuwe chope me, cho uwã.“ Gobu Jakob inama: “Dje u nondje, me ga chope, cho ekõwã dorogi nonga. Nandje apã manobu, Apã Wachu kuwẽ gatu cho rekowã.” Go nonga Esau mema Jakobpe dorogi nonga ekõwã. Gobu Jakob idjape mema ichakrã dja bakuwe.

![](https://cdn.door43.org/obs/jpg/360px/obs-en-07-03.jpg)

Gobu Isaak me djue Esaupe Apã Wachu kuwẽ gatu. Go djapo nondje, Rebeka emi Jakob kabewãma Isaakpe, bue mĩ gatupama, Isaak Apã Wachu kuwẽ gatu mewã Jakobpe, Esau endawepe. Isaak chuepurãma, wechã bechema. Go buare Jakob pypyma Esau tyru gatuechegi, gobu pechema bechepe pirewe dja rupydji emi dja ipodji.

![](https://cdn.door43.org/obs/jpg/360px/obs-en-07-04.jpg)

Gobu Jakob oma Isaak endape, inama: “Cho rõ Esau. Cho ekõma, dje chope mewã dje kuwẽ gatu.” Isaak bechepe pirewe pokobu, Esau tyru wenobu, idja djãpe inama, go rõ Esau. Gobu mema idjape dja kuwẽ gatu.

![](https://cdn.door43.org/obs/jpg/360px/obs-en-07-05.jpg)

Gobu Esau byllã buchã Jakobdji, go narõ buare dorogi nonga ekõwã, narõma emi Apã Wachu kuwẽ gatu. Gobu dja djãpe djawuma, dja apã manombu, Jakobpe pychowerã.

![](https://cdn.door43.org/obs/jpg/360px/obs-en-07-06.jpg)

Go Rebeka wenduma, Esau djawu, idja pawe pychowã. Go buare Rebeka emi Isaak buema mondo Jakobpe budjakrãpe, Rebeka pawe ekõandype.

![](https://cdn.door43.org/obs/jpg/360px/obs-en-07-07.jpg)

Tãrã ruybu Jakob ekõma dja ai’i pawe ekõandype, gope rekoma emi dja breko, etakrã mirõ tay emi etakrã tay kudjã. Apã Wachu idjape kuwẽ gatu, go buare idja rõ bue tãrã rekogi.

![](https://cdn.door43.org/obs/jpg/360px/obs-en-07-08.jpg)

Go mirõtapa ruybu Jakob ekõma budjakrã puare dja ekõandy Kanaanpe. Gobu Jakob djewy roma bu. Dja breko, dja tay wywy, dja buetygi wywydji, emi dja we wywy erupama emi.

![](https://cdn.door43.org/obs/jpg/360px/obs-en-07-09.jpg)

Jakob krymballã buchã, kuabu, dja pawe kieypurã Esau idjape pycho djuedjiwa. Go buare buema mondo we tãrã Esaupe mewã. Buetygi, we eruwegi, kiuma Esaupe: “Dje buetygi Jakob djepe me djue kowe we wywy. Idja ekõwerã wyche.”

![](https://cdn.door43.org/obs/jpg/360px/obs-en-07-10.jpg)

Esau chingadjeky emi kuwẽma Jakobpe, ury gatuma wechãmbu edji. Gobu Jakob okryra gatupe ekõ ekõandy Kanaanpe. Isaak manombu, Jakob emi Esau pechema dja echewe. Gobu Apã Wachu djawu mewe Abrahampe emi djawu membyre Abrahampe kowebu wachama Isaak rupi emi Jakobpe.

*Kiupyre Moise parawe Génesis, djawupuku 25:27-33:20,                                           Biblia parapyrepe*

## 8. Apã Wachu kuwẽ gatu Josepe, dja pawe wywype emi

https://openbiblestories.org/l/guq/story-8/

![](https://cdn.door43.org/obs/jpg/360px/obs-en-08-01.jpg)

Tãrã ruy wachabu, Jakob chuepurãmbu, buema mondo dja tay Josepe. Gogipe rõ idja by gatueche. Buema wechãwã dja pawe wywy, go rõ warõ reko wachupurãndji.

![](https://cdn.door43.org/obs/jpg/360px/obs-en-08-02.jpg)

Jose pawe wywy rõ byllãeche Josedji, dja apã by gatuechedjiwa idjape, emi Jose ikẽ pou rupi wechã buare idja ymachidjawerã dja pawe wywydji. Jose dja pawe endape wẽmbu, gogi wywy idjape pychyma, emi mema bue pepyatygipe, rekopytygi nonga ekõwã.

![](https://cdn.door43.org/obs/jpg/360px/obs-en-08-03.jpg)

Jose pawe wywy djewy nondje dja chupape, wiroma Jose tyruwe llabuwagi, emi mĩma bechepe pirãpe. Gobu rama dja apãpe wechãwã, gobu dja apã inawã, we djarõ Josepe porõma. Gobu Jakob uryllãechema, chinga tãrãma.

![](https://cdn.door43.org/obs/jpg/360px/obs-en-08-04.jpg)

Go bue pepyatygi wywy rama Josepe Egiptope. Egipto rõ etakrã ekõandy neina wachu, chidjaechegi, go rõ ypurã Nilo embedjiwa. Bue pepyatygi Josepe pepyma butadji etakrã kbe’e ymachidja buta tãrãngipe, rekopytygi ekõwã. Jose bita gatu ekõ dja rekoatygi chupape, gobu Apã Wachu kuwẽ gatu reko Josedji.

![](https://cdn.door43.org/obs/jpg/360px/obs-en-08-05.jpg)

Dja rekoatygi breko pukama Josepe idja djãwẽ djenowã. Jose rõ djapo djuellã bue buchã Apã Wachu chã ruwa. Go kudjã prandjã buchã Josedji, idjape kaina emi mĩ buchãma, idjape pychywã emi pypywã tapy djãwãllãpe. Tapy djãwãllãpe ĩmbu djepe, Apã Wachu kuere wedjallã. Gobu Apã Wachu idjape kuwẽ gatu reko.

![](https://cdn.door43.org/obs/jpg/360px/obs-en-08-06.jpg)

Mirõ ruy wachabu, Jose ĩ wyche tapy djãwãllãpe, bue buchã djapollãmbu djepe. Etakrã chãwãmbu faraon, go Egipto pua wywy pukaty nonga ymachidjawachugi, go ikẽ poubu mirõ bue wechãma. Gobu okryrallã buchã roma ĩ. Ĩllã go bue kua gatugi wywy bychepe kiuwã ikẽ poudjiwa, bue idja wechãwe kua gatugi.

![](https://cdn.door43.org/obs/jpg/360px/obs-en-08-07.jpg)

Apã Wachu Josepe mẽwe, kiu gatuwã, bue rõ inambyty ikẽ poudjiwa. Go buare faraon pukama Josepe tapy djãwãllã puare. Gobu Jose djawuma idjape, bue rõ bue ikẽ poudjiwa inambyty. Gobu inama: „Apã Wachu buewerã djypetã ruybu bue ã’ã pechepyregi wẽ gatuwã. Gobu Apã Wachu buewerã emi djypetã ruybu, bue uwã ĩllã bechewerã.“

![](https://cdn.door43.org/obs/jpg/360px/obs-en-08-08.jpg)

Gobu faraon chã opoma Josedji. Go buare idjape mĩma, ekõandy Egiptope ymachidja mirõngi.

![](https://cdn.door43.org/obs/jpg/360px/obs-en-08-09.jpg)

Jose inama Egipto pua wywype bue ã’ã tãrã noãwã, mĩmbawã emi tapy wachupe djypetã ruybu tãrã bue uwã ĩmbuare. Gobu Jose bue uwã mema Egipto puagipe djypetã ruy llellã wachubu. Go nonga bue upyrã go pua wywy rekopama.

![](https://cdn.door43.org/obs/jpg/360px/obs-en-08-10.jpg)

Bue uwã ĩllãmbu ekõandy Egiptope, ĩllã emi Kanaanpe, Jakob emi dja tapy puagi wywy ekõandype.

![](https://cdn.door43.org/obs/jpg/360px/obs-en-08-11.jpg)

Go buare Jakob buema mondo dja tay kieypurãngi wywype Egiptope, bue uwã pepywã butadji. Gogi wywy Jose chã ruwa ekõmbu bue uwã pepywã butadji, kuallã idjape. Jose rõ kua gatu dja pawe wywype.

![](https://cdn.door43.org/obs/jpg/360px/obs-en-08-12.jpg)

Go buãma dja pawe wywype, kua djue, ekõ buchã wyche ko. Gobu rõ Jose gogi wywype inama: „Cho rõ pendje pawe Jose! Krymballãeme, pendje chope reko buchã buare, mewe rekopytygi nonga. Apã Wachu rõ bue buchãndji djapoma bue gatu. Pendje wẽ ga bu, Egiptope ekõwã, cho rõ kuwẽwã pendjepe emi pendje tapy puagi wywype.

![](https://cdn.door43.org/obs/jpg/360px/obs-en-08-13.jpg)

Gobu Jose pawe obu dja chupape, kiuma dja apã Jakobpe, Jose manollã wyche, gobu gogi ury gatu roma.

![](https://cdn.door43.org/obs/jpg/360px/obs-en-08-14.jpg)

Jakob chuepurãmbu djepe, oma Egiptope dja tapy puagi wywydji, gope ekõwã. Idja mano nondje, Jakob mema dja kuwẽ gatu dja tay wywype.

![](https://cdn.door43.org/obs/jpg/360px/obs-en-08-15.jpg)

Djawu mewe emi Apã Wachu djawu membyre Abrahampe emi membyre Isaakpe, gobu Jakobpe, gobu membyre go etakrã mirõ Jakob tay wywype, dja tapy puagi wywype emi. Go etakrã mirõ tay tapy puagi wywydji wẽma go etakrã mirõ Israel irõndy.

*Kiupyre Moise parawe Génesis, djawupuku 37-50,                                                        Biblia parapyrepe*

## 9. Apã Wachu puka Moisepe

https://openbiblestories.org/l/guq/story-9/

![](https://cdn.door43.org/obs/jpg/360px/obs-en-09-01.jpg)

Gobu Jose manombu, dja pawe wywy ekõ Egiptope. Gogi dja irõndy wywydji ekõ wyche gope ruy tãrã wachubu, gobu tãrã buchã roma djo dja tay wywy. Gogi wywype pukapyty Israel puaty wywy.

![](https://cdn.door43.org/obs/jpg/360px/obs-en-09-02.jpg)

Gobu tãrã buchã ruy wachabu, Israel irõndy tãrã buchãeche roma. Egipto puatygi wywy kua djuellãma Josedji, kuallãma emi dja bue gatu djapowedji, idjape wywy kuwẽwã. Gogi wywy krymballã buchã roma Israel irõndy wywydji, tãrã buchãndjiwa. Go buare faraon, ymachidja buare go krey rupiwe Egipto ekõandy wywy rupi, mĩma Israel irõndy wywype, Egipto pua wywy idjape rekowã rekopytygi.

![](https://cdn.door43.org/obs/jpg/360px/obs-en-09-03.jpg)

Egipto puagi wywy bita puy wachu reko Israel irõndy wywydji, djapowã tãrã tapy wachu emi tapy tãrã. Israel irõndy wywy djuei buchã ekõ go bita puy wachudjiwa, Apã Wachu rõ kuwẽ gatu reko gogi wywype. Go buare machĩma emi tay tãrã.

![](https://cdn.door43.org/obs/jpg/360px/obs-en-09-04.jpg)

Faraon wechãma, Israel irõndy wywy tay tãrã roma, go buare inama dja irõndy wywype, pacho djonowã Israel irõndy memby kbe’e wywy, ity mondo ypurã Nilope.

![](https://cdn.door43.org/obs/jpg/360px/obs-en-09-05.jpg)

Gobu etakrã Israel pua kudjã kbe’epurã machĩma. Gogi emi dja imedji krumi pou djemi reko tãrã kreybu. Gobu rõ djueima, krumipe djemiwã.

![](https://cdn.door43.org/obs/jpg/360px/obs-en-09-06.jpg)

Gobu krumi apã emi dja breko kuallãma, idjape djemiwã. Go buare idjape raity wachupe djenomami, gobu mĩma ypurã Nilo embedji, raity wachu wewowã y llabu kuando bychepe. Go nonga djapo, krumipe kuwẽwã, duwegi idjape pachollãwã. Dja pawe kudjã kieypurãngi maĩ reko, wechãwã, bue rõ ekõwerã idjadji.

![](https://cdn.door43.org/obs/jpg/360px/obs-en-09-07.jpg)

Faraon tay kudjã wechãma raity wachu, gobu maĩma djãwãpe. Go krumipe wechãmbu, idjape rekoma dja memby nonga. Idja pukama etakrã kudjã Israel pua, krumipe kã mẽwã, idja rõ kuallã go kudjã rõ krumi ai’i. Go krumi yma rabu, kã tykullãmbu, dja ai’i rama faraon tay kudjãpe. Go idjape bykuama Moise.

![](https://cdn.door43.org/obs/jpg/360px/obs-en-09-08.jpg)

Go duwe kreybu, Moise ymabu, wechãma, manonga etakrã Egipto puagi pacho reko kbe’e Israel pua. Moise kuwẽ djue dja Israel irõndype.

![](https://cdn.door43.org/obs/jpg/360px/obs-en-09-09.jpg)

Moise djã djawubu, duwegi idjape wechãllã kura, pacho bro djono Egipto puagipe, gobu pechema dja echewe. Duwegi rõ wechãma Moise djapowe.

![](https://cdn.door43.org/obs/jpg/360px/obs-en-09-10.jpg)

Gobu faraon Moise djapowe kuabu, kuarama idjape pychowã. Gobu Moise kadjã roma djo ekõandy Egipto puare, owã ka irõllãpe. Gope ĩllã ape, faraon tõallãngi idjape pychywã.

![](https://cdn.door43.org/obs/jpg/360px/obs-en-09-11.jpg)

Moise ekõma wachupurã warõandygi ka irõllãpe, budjakrã ĩ Egiptodji. Gope rekoma dja breko emi mirõ dja tay.

![](https://cdn.door43.org/obs/jpg/360px/obs-en-09-12.jpg)

Etakrã kreybu, Moise warõ rekobu wachupurãndji, wechãma djupĩkã endy wachugi. Djupĩkã endybu djepe, keĩpallã. Moise oma go rekuaty, wechã gatuwã. Moise djupĩkã djãwẽ ĩmbu, Apã Wachu pukama idjape, inama: “Moise, dje pychãmbire bui mondo, go ywy dje pyrõngi rõ cho llapo kbegatueche.”

![](https://cdn.door43.org/obs/jpg/360px/obs-en-09-13.jpg)

Gobu Apã Wachu inama idjape: “Cho wechãma, manonga cho irõndy wywy djuei buchãpe ĩ’ĩ. Cho djepe buewerã faraon endape, matãwã Israel irõndy wywy Egipto ekõandy puare, go puagi idjape rekollãwã rekopytygi. Cho mewerã gogi wywype ywy Kanaan, go ywy cho djawu mewe nonga Abraham, Isaak, emi Jakobpe.

![](https://cdn.door43.org/obs/jpg/360px/obs-en-09-14.jpg)

Moise inama: “Israel irõndy wywy kua djuebu, awa rõ chope bueare, bue rõ cho inawerã?” Gobu Apã Wachu inama: “CHO RÕ, GUEI’I CHO. Kiu mondo gogi wywype: CHO RÕ bueare chope pendje endape. Gobu emi kiu mondo gogi wywype: CHO RÕ, Apã Wachu, pendje djypywaregi Abraham, Isaak, emi Jakob Apã Wachu. Kowe rõ cho bykuapyre gorãwe ĩwerã.”

![](https://cdn.door43.org/obs/jpg/360px/obs-en-09-15.jpg)

Moise krymballã buchã, o djuellã faraon endape, dja djã djawuma, idja rõ djawu gatullã. Go buare Apã Wachu buema mondo Moise pawe Aaronpe, idjape kuwẽwã. Apã Wachu kiuma Moise emi Aaronpe, faraon djã rõ krere buchã.

*Kiupyre Moise parawe Éxodo, djawupuku 1-4, Biblia parapyrepe*

## 10. Etakrãtapa bue buchãndjiwa

https://openbiblestories.org/l/guq/story-10/

![](https://cdn.door43.org/obs/jpg/360px/obs-en-10-01.jpg)

Moise emi Aaron oma faraon endape. Gogi inama idjape: „Go nonga Apã Wachu djawuma djepe: Wedja ga mondo cho irõndy wywy owã dje ekõandy puare.“ Faraon rõ wendu djuellã. Wedja djuellã Israel irõndy owã okryra gatupe. Go buare biri puy wachu reko gogi wywype, bita chidja wapyllãechewã.

![](https://cdn.door43.org/obs/jpg/360px/obs-en-10-02.jpg)

Go wyche faraon wedja djuellã Israel irõndy wywype. Go buare Apã Wachu buema mondo etakrãtapa bue buchã ekõandy Egipto llabu. Bue buchã rupi, wechãma mondo faraonpe, idja rõ chidjaeche faraondji, idja rõ chidjaeche emi duwe Egipto pua apã nonga wywydji.

![](https://cdn.door43.org/obs/jpg/360px/obs-en-10-03.jpg)

Apã Wachu ruwama ypurã Nilo pirãndji. Faraon rõ wedja djuellã, Israel irõndy wywy owã.

![](https://cdn.door43.org/obs/jpg/360px/obs-en-10-04.jpg)

Gobu Apã Wachu buema breke tãrã ekõandy Egiptope. Gobu faraon pukama Moisepe, breke matãmbawã. Breke wywy manombabu djepe, faraon djã rõ krere buchã wyche, wedjallã Israel irõndy wywy wẽwã ekõandy Egipto puare.

![](https://cdn.door43.org/obs/jpg/360px/obs-en-10-05.jpg)

Gobu Apã Wachu buema chikõ tãrã, emi buema beru tãrã buchã. Faraon pukama Moise emi Aaronpe, djawuma idjape, bue buchã krãpĩmbu, Israel irõndy wywy wẽ kua Egipto puare. Moise pukabu, Apã Wachu matãmbama beru wywy Egipto puare. Go wyche faraon djã rõ krere buchã, wedjallã Israel irõndy wywy owã dja ipo wyrydjiware.

![](https://cdn.door43.org/obs/jpg/360px/obs-en-10-06.jpg)

Gobu Apã Wachu buema mondo achy buchã Egipto pua we wywy llabu, gobu manombama. Faraon djã rõ krere buchã mĩmbyre. Gobu wedjallã wyche Israel irõndy wywy owã.

![](https://cdn.door43.org/obs/jpg/360px/obs-en-10-07.jpg)

Gobu Apã Wachu kiuma Moisepe, djapi mondowã krembo ywadji faraon chã ruwa. Go nonga djapobu, wẽma bu kaita buchã Egipto pua wywydji, Israel irõndy rõ eche gatu wywy. Apã Wachu rõ faraon djã krereare, gobu faraon wedjallã wyche Israel irõndy wywy owã dja ipo wyrydjiware.

![](https://cdn.door43.org/obs/jpg/360px/obs-en-10-08.jpg)

Gobu Apã Wachu buema mondo baky ã’ã, go buchãma bue pechepyre wywy ekõandy Egiptope, emi pachopa djono toka puagi wywy. Gobu faraon pukama Moisepe, Aaronpe emi, inama: “Cho djãpã buchã pendje Apã chã ruwa. Pendje wẽ kua cho ekõandy puare kowebu.” Gobu Moise puka Apã Wachupe, gobu baky ã’ã kadjãmbama.

![](https://cdn.door43.org/obs/jpg/360px/obs-en-10-09.jpg)

Faraon rõ bue buchã djapoma emi, dja djã rõ krere buchã. Wedjallã wyche Israel irõndy wywy owã dja ipo wyrydjiware.

![](https://cdn.door43.org/obs/jpg/360px/obs-en-10-10.jpg)

Gobu Apã Wachu buema mondo tãrã buchã beky Egiptope. Beky upama bue pechepyre baky ã’ã pachollãwegi.

![](https://cdn.door43.org/obs/jpg/360px/obs-en-10-11.jpg)

Gobu Apã Wachu buema mondo chãwã wachu brewipychã krey puku rãwe. Chãwã wachudjiwa, Egipto puagi wywy dja tapy puare wẽllã tokape. Israel irõndy llambatype rõ bype gatu.

![](https://cdn.door43.org/obs/jpg/360px/obs-en-10-12.jpg)

Go tõwachu bue buchã krãpĩmbu, faraon wedja djuellã wyche, Israel irõndy wywy owã idja ipo wyrydjiware. Faraon wendu djuellã buare Apã Wachu inawe, Apã Wachu buewerã wyche bue buchã, go rupi rõ krãpĩwerã. Go bue buchã rupi faraon djã djawu duwe nongawerã.

_Kiupyre nonga Moise parawepe, Éxodo pukapyty, djawupuku 5-10,_

*Bibliape*

## 11. Pakua pukapyty ury wachu

https://openbiblestories.org/l/guq/story-11/

![](https://cdn.door43.org/obs/jpg/360px/obs-en-11-01.jpg)

Apã Wachu kiuma faraonpe, go Israel irõndy wywy wedjallãmbu owã, pacho djonowerã Egipto pua tay dorogi wywy, emi we tay dorogi wywy. Faraon kowegi wendubu, kua djuellã wyche Apã Wachu kiuwe, djapo djuellã emi Apã Wachu inawe nonga.

![](https://cdn.door43.org/obs/jpg/360px/obs-en-11-02.jpg)

Apã Wachu wechãma mondo Israel puagi wywype, idjadji kua gatugipe, mawe nonga dorogi wywype kuwẽmbyrã, manollãwã. Go tapy wywy rupi gogi wywy rõ prawowerã wachupurã memby kbegatugi, idja djukawã.

![](https://cdn.door43.org/obs/jpg/360px/obs-en-11-03.jpg)

Apã Wachu kiuma Israel wywype, kytywã wachupurã memby pirã ichakrã idja tapy djãwã ikẽlluãndydji, gobu wachupurã o keĩwerã, bitallãpe uwerã wikytã choullãngidji. Gobu kiuma emi, dja bue wywy mĩ gatuwã, bue u rekobu wyche ekõandy Egipto puare owã.

![](https://cdn.door43.org/obs/jpg/360px/obs-en-11-04.jpg)

Israel irõndy wywy djapopama Apã Wachu kiuwe nonga djapowã. Chãwã byche rupi Apã Wachu wachama Egipto ekõandy wywy rupi, pachopama djono dorogi wywype.

![](https://cdn.door43.org/obs/jpg/360px/obs-en-11-05.jpg)

Go dja tapy ikẽlluãndydji wywy Israel pua rekoma pirã. Go buare Apã Wachu go tapy rupi wachabu, pokollã go tapy pua wywydji. Go tapy pua wywy rõ kuwẽmbyre, wachupurã memby pirãndjiwa kuwẽ gatupyre.

![](https://cdn.door43.org/obs/jpg/360px/obs-en-11-06.jpg)

Egipto puagi wywy rõ kua djuellã Apã Wachudji, emi djapo djuellã idja kiuwe nonga. Go buare Apã Wachu go tapy rupi wachabu, pachoma Egipto pua kbe’e dorogi wywype.

![](https://cdn.door43.org/obs/jpg/360px/obs-en-11-07.jpg)

Egipto pua kbe’e dorogi wywy manombama, manoma emi kbe’e tapy djawãllã pua tay dorogi emi faraon tay dorogi. Ekõandy Egiptope go pua wywy chĩnga tãrã, achĩllara uryllãechedjiwa.

![](https://cdn.door43.org/obs/jpg/360px/obs-en-11-08.jpg)

Go chãwãpe faraon pukama Moise emi Aaronpe, inama: „Pendje ra ga mondo Israel irõndy wywy, bitãllãpe wẽ kua ekõandy Egipto puare.” Egipto puagi wywy emi puka o matã Israel irõndy wywy wẽwã dja ekõandy puare.

*Kiupyre nonga Moise parawepe, Éxodo pukapyty, djawupuku 11:1-12:32, Bibliape*

## 12. Egipto puare Israel irõndy wywy wẽma o

https://openbiblestories.org/l/guq/story-12/

![](https://cdn.door43.org/obs/jpg/360px/obs-en-12-01.jpg)

Israel irõndy wywy wẽma o ury gatupe Egipto puare. Ekõllãwerãma rekopytygi nonga, emi owerã go ekõandy Apã Wachu mewãngipe! Go Egipto puagi mẽmbama idjape bue wywy go Israel wywy pukapawegi, tãrã ita biri buchãngi, ita idju, emi duwe bue gatu wywy. Duwe ekõandy pua emi kua gatuma Apã Wachudji, oma emi Israel irõndy rupi, gogi Egipto wedjabu.

![](https://cdn.door43.org/obs/jpg/360px/obs-en-12-02.jpg)

Apã Wachu matãma ra gogi wywype bakyrei puãmbyre rupi. Go oma gogi wywy chã ruwa krey puku rupi. Chãwãmbu rõ puãmbyre tata endy gatu. Apã Wachu rõ idja djãwẽwaty, Israel irõndy wata obu. Gogi wywy rõ mudjã reko bakyrei rupi.

![](https://cdn.door43.org/obs/jpg/360px/obs-en-12-03.jpg)

Gobu rõ, ikẽ tãrãllãmbu, faraon emi dja irõndy wywy djã djawu duwe nongama, Israel irõndy wywype pychy djue, ekõwã rekopytygi nonga emi. Apã Wachu faraon djã krerema, duwe ywy puagi wywy wechã gatuwã, Apã Wachu etakrã rõ Apã chidja echegi, emi Apã kainallãndygi. Gobu kua gatuwã emi, go Jahwe rõ chidja eche faraondji, emi dja apã chã nonga wywydji.

![](https://cdn.door43.org/obs/jpg/360px/obs-en-12-04.jpg)

Go buare faraon, emi dja tõallãngi wywy mudjãma Israel irõndy wywype, gogi wywype rekowã rekopytygi nonga emi. Israel irõndy wywy wechãma, mawe nonga Egipto tõallãngi wywy rypyllã roma bu. Wechãmbu emi, y wachu pirã ĩma dja chã ruwa, tõallãngi wywy ĩma dja kuere rekuaty, krymballã buchã, emi puka roma: “Bue buare ko nandje Egipto puare wẽma? Nandje wywy manombawerã!”

![](https://cdn.door43.org/obs/jpg/360px/obs-en-12-05.jpg)

Gobu Moise inama Israel irõndy wywype: “Krymballãeme! Kowe kreybu Apã Wachu tõ mumbuwerã pendje endawepe, pendjedji kuwẽ gatuwerã.” Gobu Apã Wachu inama Moisepe: “Kiu ga mondo Israel puagi wywype wata owã y wachu pirã rekuaty.”

![](https://cdn.door43.org/obs/jpg/360px/obs-en-12-06.jpg)

Gobu Apã Wachu ruwama bakyrei puãmbyre, Israel irõndy emi Egipto pua wywy bychepe. Go nonga Egipto puagi wechãllãma Israel irõndy wywype.

![](https://cdn.door43.org/obs/jpg/360px/obs-en-12-07.jpg)

Apã Wachu inama Moisepe, dja ipo upiwã y wachu pirã llabu, go nonga y wachu bowowã byche rupi. Gobu Apã Wachu buema wytu chidja, y mĩwã llachu rekuaty emi llu rekuaty, go nonga ĩwã ape y wachu byche rupi.

![](https://cdn.door43.org/obs/jpg/360px/obs-en-12-08.jpg)

Gobu Israel irõndy wywy watama o y wachu rupi ywy piryllãpe. Y wachu rõ peche tykõmbyre nonga llu rekuaty, emi llachu rekuaty.

![](https://cdn.door43.org/obs/jpg/360px/obs-en-12-09.jpg)

Gobu Apã Wachu kuerama mondo ywadji bakyrei puãmbyregi, go nonga ape wechãmbyrã emi. Gobu Egipto puagi wechãma, mawe nonga Israel irõndy wywy kadjãma o y wachu byche rupi. Gobu Egipto pua wywy mudjãma dja kuere rupi idjape pychywã.

![](https://cdn.door43.org/obs/jpg/360px/obs-en-12-10.jpg)

Gobu gogi wywy mudjãma Israel irõndy wywype go ape y wachu byche rupi. Apã Wachu rõ mẽma krymballã buchã Egipto pua wywype, emi dja wyra watagi wywy buchãmbama. Gobu Egipto puagi achĩ buchã roma: “Myrõ kua! Apã Wachu tõ mumbu reko, Israel irõndy wywype kuwẽwã!”

![](https://cdn.door43.org/obs/jpg/360px/obs-en-12-11.jpg)

Gobu Israel irõndy wywy duwe y wachu embedji ĩmbu, Apã Wachu inama Moisepe, dja ipo upiwã emi. Go Apã Wachu inawe djapobu, y wapama Egipto tõ allãngi wywy llabu, y ĩma emi idja endawepe. Egipto tõ allãngi wywy tõwemba roma ype.

![](https://cdn.door43.org/obs/jpg/360px/obs-en-12-12.jpg)

Israel irõndy wywy wechãmbu, Egipto puagi wywy manombawe, kua gatuma Apã Wachudji, emi kuama Moise rõ Apã Wachu profeta.

![](https://cdn.door43.org/obs/jpg/360px/obs-en-12-13.jpg)

Gobu Israel irõndy wywy ury gatupe ekõ, Apã Wachu idjape kuwẽ gatu buare manollãwã, emi ekõllãwã rekopytygi nonga. Kowebu gogi wywy ekõllãwerã rekopytygi nonga, mudjã gatuwã Apã Wachupe. Go Israel puagi wywy pre tãrãma Apã Wachudji, emi kmarã reko Apã Wachupe, go idjape matã buare ekõllãwã rekopytygi nonga. Gobu emi ury gatu mẽma Apã Wachupe, go idjape kuwẽ buare Egipto pua tõallãngi wywydji.

![](https://cdn.door43.org/obs/jpg/360px/obs-en-12-14.jpg)

Apã Wachu kiuma Israel irõndy wywype, djapowã Pakua pukapyty ury wachudjiwa ruybu wywy. Go nonga kua rekowerã, mawe nonga Apã Wachu chidja rekowe Egipto puagidji, emi Israel irõndy wywype kuwẽwe ekõllãwã rekopytygi nonga. Gogi wywy go ury wachu djapobu, pychoty wachupurã memby kbegatugi, emi uty wikytã choullãngi.

*Kiupyre nonga Moise parawepe, Éxodo pukapyty, djawupuku 12:33-15:21, Bibliape*

## 13. Apã Wachu djawu mẽwe Israel irõndy wywype

https://openbiblestories.org/l/guq/story-13/

![](https://cdn.door43.org/obs/jpg/360px/obs-en-13-01.jpg)

Gobu Apã Wachu Israel irõndy wywype matãmbu y wachu byche rupi, idjape matãma ra ka irõllã rupi kuãmbuku Sinai rekuaty. Go kuãmbukupe Moise wechã endawe djupikã endygi. Israel puagi wywy mĩma dja tapy we piredjiwa go kuãmbuku djawẽ.

![](https://cdn.door43.org/obs/jpg/360px/obs-en-13-02.jpg)

Apã Wachu inama Moisepe, Israel irõndy wywype emi: „Pendje wendu gatubu, emi djapo gatubu cho djawu mẽwe, ekõwerã cho llapo kbegatuechegi, cho pa‘i wywy chidja llambaty, ekõwerã emi cho chupa kbegatugi.“

![](https://cdn.door43.org/obs/jpg/360px/obs-en-13-03.jpg)

Go brewipychã krey wachabu, Israel puagi wywy kuchĩ gatubu idja eche, idja tyru, idja djã‘ã emi, Apã Wachu edjyma bu kuãmbuku Sinai llabu chono weradji, emi tachĩndji, mimby chidja roma emi. Moise etakrãpe rõ inambyre djopiwã kuãmbuku llabu.

![](https://cdn.door43.org/obs/jpg/360px/obs-en-13-04.jpg)

Gobu Apã Wachu idjape mẽma dja djawu gatu. Go nonga inama: „Guei’i cho Jahwe, pendje Apã Wachu, pendje kuwẽaregi Egipto puare, ekõllãwã rekopytygi nonga. Pukaeme duwe apã nongagi wywype.“

![](https://cdn.door43.org/obs/jpg/360px/obs-en-13-05.jpg)

„Djapoeme pendje apã chã nonga, pukaeme gogipe. Cho rõ Jahwe, pendje Apã tãechegi. Ka buãeme cho bykuapyre. Kua ga reko go djypetã kreybu, krey kbegatu eche nonga. Pendje bita ga reko wachapa kreybu. Go krey djypetã rõ bue djapoeme, pendje chodji kua rekowã go kreybu.”

![](https://cdn.door43.org/obs/jpg/360px/obs-en-13-06.jpg)

"Dje apã djawu wendu gatu, emi dje ai'i djawu. Pychoeme pichape. Menoeme picha breko. Narõeme emi. Kainaeme. Reko djueme dje tapy djãwẽwagi breko, dja tapy, dja bue rekopawe wywy".

![](https://cdn.door43.org/obs/jpg/360px/obs-en-13-07.jpg)

Gobu Apã Wachu parama go etakrãtapa djawu mirõ ita chepedji, mema emi Moisepe. Apã Wachu mema wyche tãrã djawu gatu, idja inawe nonga djapo gatuwã. Israel irõndy wywy wendu gatubu dja djawu wedjawe, djapo gatuwã, Apã Wachu dja djawu mema, kuwẽ gatuwãndjiwa, emi djepy gatuwã Israel irõndy wywype. Dja djawu wendu djuellãmbu, Apã Wachu idjape pacho puywerã.

![](https://cdn.door43.org/obs/jpg/360px/obs-en-13-08.jpg)

Emi Apã Wachu kiu gatuma Israel irõndy wywype, mawe nonga djapo gatuwerã tapy wachu tyru wachudjiwa. Go rõ inambyty “noã endaty”. Go tapy rekoma mirõ djãwã bowopyre tyru pukudji. Pa’i ymachidjagi etãkrã rõ ikẽlluawã go djãwãpe tyru puku pychety, gope rõ Apã Wachu ekõandy.

![](https://cdn.door43.org/obs/jpg/360px/obs-en-13-09.jpg)

Ache wywy Apã Wachu djawu djapollãregi, eruwerã we go we keĩ endaty djãwẽ noã endaty ruwa, keĩmbyrã Apã Wachupe. Etakrã pa’i we pychowerã, gobu keĩmba djonowerã we keĩ endaty llabu. We keĩmbyre pirã pechewerã ache bue buchã djapopawe. Go nonga dja djã adjullãwerã Apã Wachu chã ruwa. Apã Wachu prawoma Moise pawe Aaronpe, dja tay wywype emi, ekõwã dja pa’i nonga.

![](https://cdn.door43.org/obs/jpg/360px/obs-en-13-10.jpg)

Israel wywy dja djawu mẽma, djapowerã Apã Wachu djawu membyre wywy, emi kmarãwerã Apã Wachu etakrãpe, dja chupa prawopyregi ekõwã. Dja djawu Apã Wachupe membu, tãrãllã ikẽ wachabu rõ, djãpã buchãma.

![](https://cdn.door43.org/obs/jpg/360px/obs-en-13-11.jpg)

Tãrã ikẽ wachabu Moise ĩma kuãmbuku llabu, djawu rekowã Apã Wachudji. Warõ tarãmbu djepe Israel irõndy wywy, Moise ekõmbeche. Gobu Israel irõndy wywy praruma, warõ djuellãma. Go buare ita biri buchãngi rama Aaronpe, inama idjape djapowã apã chã nonga idja puarã!

![](https://cdn.door43.org/obs/jpg/360px/obs-en-13-12.jpg)

Gobu Aaron djapoma achĩpurã memby ita biri buchãngidji. Kbe’e wywy, kudjã wywy emi pre chidja reko dja apã nonga chã ruwa, emi pychoma we idjape mewã! Gobu Apã Wachu gogi wywydji prandjã buchã roma. Bue buchã djapo buare, Apã Wachu djã djawuma, pacho djonowã gogi wywype. Moise puka roma Apã Wachupe, pachollãwã. Gobu Apã Wachu wendu gatu Moise pukawe, gogi wywype pachollãma.

![](https://cdn.door43.org/obs/jpg/360px/obs-en-13-13.jpg)

Moise edjybu kuãmbuku llabuware, go apã chã nonga wechãmbu, prandjã buchãpe go ita chepe mirõngi ityma mondo, go rõ go etakrãtapa Apã Wachu djawu parapyre.

![](https://cdn.door43.org/obs/jpg/360px/obs-en-13-14.jpg)

Gobu Moise apã nonga pacho, emi kuichopa mondo. Gobu kui’i ityma ype, Israel irõndy wywy tykuwã. Apã Wachu buema mondo bue buchã Israel irõndy wywy llabu, gobu tãrã go pua manoma.

![](https://cdn.door43.org/obs/jpg/360px/obs-en-13-15.jpg)

Gobu Moise djapoma duwe mirõ ita chepe pou, parawã emi go etakrãtapa Apã Wachu djawu parapyre. Gobu djopima emi kuãmbuku llabu, pukama Apã Wachupe, Israel irõndy wywy bue buchã djapowedjiwa kuallãwã. Apã Wachu wendu gatuma Moise pukabu, gobu kuallãma Israel puagi wywy djãpãwe. Gobu Moise edjyma kuãmbuku llabuware, rama emi go etakrãtapa ita chepe pou llabu Apã Wachu djawu parapyre. Gobu Apã Wachu matãma ra Israel irõndy wywy kuãmbuku Sinai puare go ywy membyrãngi rekuaty.

*Kiupyre nonga Moise parawepe, Éxodo pukapyty, djawupuku 19-34, Bibliape*

## 14. Ka wata ury ka irõllã rupi

https://openbiblestories.org/l/guq/story-14/

![](https://cdn.door43.org/obs/jpg/360px/obs-en-14-01.jpg)

Gobu Apã Wachu inambu Israel pua wywype djapo gatuwã dja djawu membyre wywy, go djawu edji mẽmbyre, wedjama kuãmbuku Sinai. Apã Wachu matãma ra Israel irõndy wywype go ywy mẽmbyrã rekuaty, go pukapyre emi „Kanaan“. Bakyrei puãmbyre oma go wywy ruwa Kanaan rekuaty, gogi wywy rõ mudjãma go rupi.

![](https://cdn.door43.org/obs/jpg/360px/obs-en-14-02.jpg)

Apã Wachu dja djawu mẽwe Abrahampe, Isaakpe emi Jakobpe, dja irõndy wywype mewã go ekõandy Kanaan dja llaporã. Kowebu rõ tãrã duwe irõndy ekõma gope. Gogi rõ pukapyty Kanaan puagi. Go Kanaan puagi wywy wendullã Apã Wachu djawu, kmarãllã emi dja chã ruwa. Gogi wywy pre reko apã chã nongape, emi bue buchã tãrã djapo ury.

![](https://cdn.door43.org/obs/jpg/360px/obs-en-14-03.jpg)

Apã Wachu inama Israel irõndy wywype: „Pendje buchãmba ga mondo Kanaan puagi wywype go ywy membyrãngipe. Ekõeme okryra gatupe edji, godji rekoeme pendje udja. Dja apã chã nonga wywy pende buchãmba ga mondo. Pendje cho inawe wendullãmbu, kmarãwerã emi dja apã nonga wywy chã ruwa cho endawepe.“

![](https://cdn.door43.org/obs/jpg/360px/obs-en-14-04.jpg)

Israel irõndy wywy Kanaan embedji wẽmbu, Moise pukama etakrã mirõ kbe’epe, etakrã kbe’e go etakrã mirõ Israel irõndy wywy byche pua. Go kbe’e wywype inama, ekõandy Kanaanpe owã, djemipe wechãwã mawe nonga ekõandy pou. Djemi rupi wechã rekowerã Kanaan pua wywydji, maĩ gatuwã gogi wywy chidja ko, praru ko.

![](https://cdn.door43.org/obs/jpg/360px/obs-en-14-05.jpg)

Go etakrã mirõ kbe’e wachama o ekõandy Kanaan rupi chengypychã tapa kreybu, gobu ekõma emi. Kiuma Israel irõndy wywype: „Go ywy kbegatueche, wẽ gatu bue ã’ã wywy!“ Etakrãtapa go maĩaregi byche pua rõ inama: “Tapy tãrã wywy rõ chidjaeche, emi Kanaan pua wywy rõ yma puku wachu wywy! Nandje idjadji tõ mumbubu, gogi wywy chidjawerã nandjedji, emi nandjepe pacho djonopawerã.“

![](https://cdn.door43.org/obs/jpg/360px/obs-en-14-06.jpg)

Gobu bitallãpe Kaleb emi Josue, go duwe mirõ maĩaregi inama: „Kainallãpe Kaanan puagi wywy rõ yma puku wachu wywy, chidjaeche emi. Nandje rõ chidjaechewerã idjadji! Apã Wachu nandjepe kuwẽwerã, tõ mumbuwerã nandje endawepe!”

![](https://cdn.door43.org/obs/jpg/360px/obs-en-14-07.jpg)

Israel irõndy wywy rõ wendu djuellã Kaleb, emi Josue djawu, prandjã buchã Moise emi Aarondji. Inama: „Bue buare pendje eruma orepe kowe enda buchãechepe? Ore ekõ gatuwe Egiptope. Kowepe rõ ore manombawerã tõ mumbupe. Gobu ore breko wywy, ore krumi wywy emi ekõwerã rekopytygi nonga.” Israel irõndy wywy prawo djuema duwe ymachidjagipe, matã rawã emi gogi wywype Egipto rekuaty.

![](https://cdn.door43.org/obs/jpg/360px/obs-en-14-08.jpg)

Gobu Apã Wachu prãndjã buchãpe ekõma go noã endatype. Inama: “Pendje ka chidja buã buare chodji, Israel irõndy wywy ka wata urywerã ka irõllã rupi. Kbe’e emi kudjã wywy, mirõtapa ruy djiwe, manombawerã gope, wẽ bechewerã go ywy mẽmbyrãngipe. Josue emi Kaleb rõ manollãwerã".

![](https://cdn.door43.org/obs/jpg/360px/obs-en-14-09.jpg)

Gobu Israel irõndy wywy go djawu wendubu, uryllãma, djãpã buchãndjiwa chĩnga ruwy. Rama idja tõ mumbuatygi wywy, tõ mumbuwã Kanaan puagi wywydji. Moise rõ kiu gatuma gogi wywype ollãwã, Apã Wachu godji ĩllãwerã. Gogi wywy rõ wendu djuellã.

![](https://cdn.door43.org/obs/jpg/360px/obs-en-14-10.jpg)

Apã Wachu ollã gogi wywydji tõ mumbupe, go buare Israel irõndy wywy chidjallãma Kanaan pua wywydji, emi tãrã kbe’epe bropama djono. Gobu Israel irõndy wywy oma emi Kanaan puare, emi ka wata ury ka irõllã rupi chengypychã tapa ruybu.

![](https://cdn.door43.org/obs/jpg/360px/obs-en-14-11.jpg)

Go chengypychã tapa ruybu, Israel irõndy wywy ka wata urybu ka irõllã rupi, Apã Wachu kuwẽ gatu gogi wywype. Idjape mẽma, wikytã ywadjiware, pukapyty “Mana”. Emi buema mondo tãrã nambu, go chupa wywy rupi, gogi wywy rekowã nambu o’o uwã. Go ruy tãrãmbu, Apã Wachu kuwẽ gatu, dja tyru wywy emi dja pychãmbire buchãllãwã.

![](https://cdn.door43.org/obs/jpg/360px/obs-en-14-12.jpg)

Wechãllãmbytydji Apã Wachu mema gogi wywype go itadji y gatu. Bue gatu tãrã wechãmbu djepe, Israel irõndy wywy djawu buchã ekõ Apã Wachudji, prãndjã reko emi Moisedji. Go nongabu djepe, Apã Wachu wedjallã dja djawu mewe Abaham, Isaak, emi Jakobpe.

![](https://cdn.door43.org/obs/jpg/360px/obs-en-14-13.jpg)

Go etakrã kreybu Israel irõndy wywy y rekollã. Gobu Apã Wachu inama Moisepe: “Djawu ga mondo itape, gobu idjadji wẽwerã y.” Moise rõ wendullã Apã Wachu inawe Israel irõndy wywy chã ruwa. Mirõpe pachoma wyrape go itadji djawu endawepe. Gobu wẽma go itadji y gatu tykupyrã. Apã Wachu rõ prãndjãma Moisedji, inama idjape: “Dje emi wẽllãwerã go ywy gatu cho mewãngipe.”

![](https://cdn.door43.org/obs/jpg/360px/obs-en-14-14.jpg)

Gobu Israel irõndy wywy ka wata ekõmbu chengypychã tapa ruy ka irõllã rupi, manombama go kbe’e emi kudjã wywy ka chidja buãregi Apã Wachudji. Gobu Apã Wachu matãma ra emi Israel irõndy wywype ywy membyrã embepe. Kowebu rõ Moise chuepurãma. Go buare Apã Wachu prawoma Josuepe, idjape kuwẽwã, Israel irõndy wywy ra gatuwã. Apã Wachu mema dja djawu Moisepe, mawembu buewerã duwe Apã Wachu profeta dja nonga.

![](https://cdn.door43.org/obs/jpg/360px/obs-en-14-15.jpg)

Gobu Apã Wachu inama Moisepe, djopiwã kuãmbuku wachu llabu, idja wechãwã go ywy membyrãngi. Moise wechãma go ywy membyrãngi, Apã Wachu rõ idjape wedjallã wẽwã gope. Gobu Moise manoma, Israel irõndy wywy rõ chinga idjadji brewipychã tapa kreybu. Gobu Josue rõ ymachidja pougi. Josue rõ etakrã ymachidja gatugi, go kua gatu emi wendu gatu Apã Wachu djawu.

_Kiupyre Moise parawe Éxodo djawupuku 16-17; Números djawupuku 10-14; 20; 27; Deuteronomio djawupuku 34,_

*Biblia parapyrepe*

## 15. Go ywy membyrãngi

https://openbiblestories.org/l/guq/story-15/

![](https://cdn.door43.org/obs/jpg/360px/obs-en-15-01.jpg)

Go krampĩpe wẽma, Israel pua wywy ikẽwã ekõandy Kanaanpe, go ywy membyrãngipe. Gobu Josue buema mondo mirõ kbe'e, djemi rupi maĩwã go tapy tãrã Kanaan pua Jerikodji. Go tapy tãrã pechepyre krere ywa puku wachu mamambyre. Gope ekõma etakrã kudjã djãwechegi, dja bykuapyre rõ Rahab. Go djemima buepyregipe djemi rupi maĩwegipe, gobu kuwẽma gogipe kadjãwã. Go nonga djapoma, kua gatudjiwa Apã Wachudji. Go mirõ kbe’e dja djawu mema, idjape kuwẽwã dja tapy puagi wywype emi, Israel pua wywy buchãmbabu Jeriko.

![](https://cdn.door43.org/obs/jpg/360px/obs-en-15-02.jpg)

Israel pua wywy wachawerã wyche ypurã Jordan rupi, ywy membyrãngipe wẽwã. Apã Wachu inama Josuepe: „Kiu mondo go pa’i wywype, idja rawẽ owã duwegi wywy chã ruwa.“ Pa’i wywy wẽmbu ypurã Jordanpe, go y ywadjiwa wẽllãma pechepyre nonga. Gobu Israel pua wywy wachama duwe ypurã embe rekuaty ywy piryllã rupi.

![](https://cdn.door43.org/obs/jpg/360px/obs-en-15-03.jpg)

Israel pua wywy ypurã Jordan rupi wachabu, Apã Wachu kiuma Josuepe, manonga tapy tãrã chidja Jerikodji tõ mumbuwã. Israel iroändy wywy wendu gatu, djapopa Apã Wachu inawe nonga. Tõ allãngi wywy emi pa’i wywy etakrã djere reko tapy tãrã Jerikodji wachapa kreybu.

![](https://cdn.door43.org/obs/jpg/360px/obs-en-15-04.jpg)

Gobu go djypetã kreybu Israel puagi wywy djypetã djere reko tapy tãrãndji. Djerepabu go djypetãndjiwa, tõ allãngi wywy puka chidja emi pa’i wywy mimbyma idja mimbyatygi.

![](https://cdn.door43.org/obs/jpg/360px/obs-en-15-05.jpg)

Gobu Jeriko pechepyre krere ywa puku wachu mamambyre wapama! Israel irondy wywy buchãmbama bue wywy tapy tãrãpe ĩngi, Apã Wachu inawe nonga. Rahab rõ, emi dja tapy puagi wywy kuwẽmbyre manollãwã. Gobu gogi wywydji wẽma Israel pua emi. Duwe Kanaan pua wywy wendubu, Israel pua wywy buchãmbama Jeriko, krymballã buchã, Israel pua wywy tõ mumbuwerã idjadji emi.

![](https://cdn.door43.org/obs/jpg/360px/obs-en-15-06.jpg)

Apã Wachu kiu mondo Israel pua wywype ekõllãwã okryra gatupe duwe chupa Kanaan pua wywydji. Etakrã Kanaan chupa rõ, Gabaon pua wywy, kaina Josuepe. Inama, dja ekõandy rõ buchakrã Kanaandji. Pukama Josue dja djawu mẽwã, tõ mumbullãwã idjadji, emi ekõ gatuwã edji. Josue emi Israel pua wywy djawullã Apã Wachudji, kuawã, maty rõ Gabaon pua ekõandy. Go buare Josue gogi wywype mema dja djawu, ekõ gatuwã edji okryra gatupe.

![](https://cdn.door43.org/obs/jpg/360px/obs-en-15-07.jpg)

Israel pua wywy rõ prandjãma, kuabu Gabaon pua kabewãma idjape. Go nongabu djepe warõ dja djawu mewe, edji ekõ gatuwã, go dja djawu me buare Apã Wachu chã ruwa. Mawembu duwe ymachidjagi Kanaan chupa pua, Amorreo wywy, wenduma, Israel irõndy wywy dja djawu mewe Gabaon puape, tõ mumbullãwã idjadji. Go buare noãmbama dja tõ allãngi wywy, tõ mumbuwã Gabaon puagidji. Gobu Gabaon pua djawu rama, pukawã Josuepe idjape kuwẽwã.

![](https://cdn.door43.org/obs/jpg/360px/obs-en-15-08.jpg)

Gobu Josue noãma Israel pua tõ allãngi wywy, gobu watama o chãwã puku rupi, wẽwã Gabaon pua llambatype. Koẽpadjebu wama Amorreo pua tõ allãngi wywy llabu, idjadji tõ mumbuwã.

![](https://cdn.door43.org/obs/jpg/360px/obs-en-15-09.jpg)

Go kreybu Apã Wachu tõ mumbuma Israel pua wywy endawepe, djueipama Amorreo pua wywype, gobu buema baky ã’ã wachu, go pacho djono tãrã Amorreo puape.

![](https://cdn.door43.org/obs/jpg/360px/obs-en-15-10.jpg)

Gobu emi Apã Wachu kawãma krey dja endape ywadji, wychollãwã, go nonga Israel pua wywy buchãmbawã Amorreo pua wywype. Go kreybu Apã Wachu mema Israel irõndy wywype chidja gatuwã dja byllãndygidji.

![](https://cdn.door43.org/obs/jpg/360px/obs-en-15-11.jpg)

Apã Wachu chidjabu go tõ allãngi wywydji, tãrã Kanaan chupa pua noãma, Israel pua wywydji tõ mumbuwã. Josue emi Israel pua wywy chidjama idjadji, gobu buchãmbama gogi wywype.

![](https://cdn.door43.org/obs/jpg/360px/obs-en-15-12.jpg)

Go tõ mumbu krãpĩmbu, Apã Wachu mema Israel pua wywype dja llambarã go ywy membyrepe. Gobu Apã Wachu warõ gatu Israel ekõandy embe wywy rupi, gogi wywy ekõ gatuwã okryrape.

![](https://cdn.door43.org/obs/jpg/360px/obs-en-15-13.jpg)

Gobu Josue chuepurãmbu, pukama Israel pua wywype noãwã. Gobu kuama reko Israel pua wywydji, wendu gatuwã Apã Wachu djawu, djapo gatuwã emi Apã Wachu djawu mewe kuãmbuku Sinaipe. Gobu picha wywy mema dja djawu, mudjã gatuwã Apã Wachudji, djapo gatuwã emi dja inawe nonga.

*Kiupyre Josue parawe djawupuku 1-24,                      Biblia parapyrepe*

## 16. Go kuwẽandygi wywy

https://openbiblestories.org/l/guq/story-16/

![](https://cdn.door43.org/obs/jpg/360px/obs-en-16-01.jpg)

Go Josue manombu, Israel puagi wywy wendu gatullã Apã Wachu djawu, duwe Kanaan puagi wywype, gope ekõngi wyche, djapillã tokape dja byche puare, djapollã emi Apã Wachu djawu Moise parawe nonga. Israel irõndy wywy kmarã Kanaan apã nonga wywy chã ruwa, Jahwe dja Apã Wachu endawepe. Israel pua wywy rekollã ymachidjagi, go buare gogi wywy bue djapoma, dja djã djawuty nonga, kbegatu idja puarã.

![](https://cdn.door43.org/obs/jpg/360px/obs-en-16-02.jpg)

Israel pua wywy mudjã gatullãmbu Apã Wachudji, go buema dja byllãndygi wywy pacho puy wachuwã gogi wywype, djuei buchãmbawã emi. Go dja byllãndygi wywy narõmba bue Israel pua rekowegi, buchãmbama emi dja chupa wywy, emi tãrã Israel puape pychoma. Tãrã ruybu, Israel irõndy wywy wendu gatullã Apã Wachu djawu, emi dja byllãndygi idjape biri buchã. Gobu rõ Israel irõndy wywy wedjama dja bue buchã djapowe, pukama Apã Wachupe idjape kuwẽwã.

![](https://cdn.door43.org/obs/jpg/360px/obs-en-16-03.jpg)

Gobu Apã Wachu buema etakrã kuwẽandygi, idjape kuwẽwã dja byllãndygidji, emi mewã gogi wywy ekõ gatuwã okryrape. Gobu rõ Israel irõndy wywy kuallãma Apã Wachudji, kmarã emi apã chã nonga chã ruwa. Go buare Apã Wachu wedjama, Madian wywy, dja byllãndygi rypyllã ekõngi, chidjawã idjadji.

![](https://cdn.door43.org/obs/jpg/360px/obs-en-16-04.jpg)

Djypetã ruydjiwe, Madian pua wywy narõ reko bue pechepapyre wywy Israel pua tyrõwepe. Israel pua wywy krymballã buchã, go buare djemima ita ikuape, Madian pua idjape dorollãwã. Go krãpĩmbu pukama Apã Wachupe idjape kuwẽwã.

![](https://cdn.door43.org/obs/jpg/360px/obs-en-16-05.jpg)

Etakrã kreybu, etakrã kbe’e Israel pua, dja bykuapyre rõ Gedeon, djemi rupi wawa reko trigo ã’ã, Madian pua narõllãwã. Jahwe buewegi oma Gedeon endape, inama idjape: „Apã Wachu rõ dje djãwẽwaty, dje rõ kbe’e chidjagi emi krymba gatugi. Amaty kua Israel irõndy wywype kuwẽwã Madian wywy ipodji.“

![](https://cdn.door43.org/obs/jpg/360px/obs-en-16-06.jpg)

Gedeon apã rekoma we keĩ endaty, prewã apã chã nongadji. Apã Wachu inama Gedeonpe, go we keĩ endaty buchãmbawã. Gedeon rõ krymballã duwegidji, go buare warõma go chãwãpe. Gobu itypama mondo we keĩ endaty, go ita wywy wapama. Gobu djapoma we keĩ endaty pou Apã Wachu puarã go apã chã nonga we keĩ endaty endawepe. Gobu we keĩma, Apã Wachupe mewã.

![](https://cdn.door43.org/obs/jpg/360px/obs-en-16-07.jpg)

Duwe koẽmbu, Israel pua wechãma, duwegi itypama we keĩ endaty, gobu prandjã buchã. Opama Gedeon tapype, idjape pychowã. Gedeon apã rõ inama: „Bue buare pendje kuwẽ djue pendje apã chã nongape? Go apã chidjabu, wedja go idjadji kuwẽwã.” Idja go nonga ina buare, duwegi wywy pychollã Gedeonpe.

![](https://cdn.door43.org/obs/jpg/360px/obs-en-16-08.jpg)

Gobu Madian wywy ekõma emi Israelpe, bue narõwã. Tãrã buchã go pua ekõma, go buare ĩllã kuawã mawe nonga gogi wywy ĩ. Gobu Gedeon pukama Israel pua wywype, noãwã, idjadji tõ mumbuwã. Gedeon pukama mirõ bue wechãllãmbyty Apã Wachupe, idja kua djue djiwa, Apã Wachu ko idjape buema, Israel irõndype kuwẽwã.

![](https://cdn.door43.org/obs/jpg/360px/obs-en-16-09.jpg)

Go etakrã bue wechãllãmbytype, Gedeon djonomami tyru ywype, gobu pukama Apã Wachupe, wawã chapy koẽpadjebu tyru llabu, emi wallãwã ywype. Apã Wachu djapoma dja pukawe nonga. Duwe chãwãmbu Gedeon pukama, ywy pirypawã, go tyru rõ piryllãwã. Apã Wachu djapoma emi go nonga. Go mirõ bue wechãllãmbytygi rupi Gedeon kuama, Apã Wachu idjape buewe, Israel pua wywype kuwẽwã Madian pua wywydji.

![](https://cdn.door43.org/obs/jpg/360px/obs-en-16-10.jpg)

32.000 Israel pua tõallãngi ekõma Gedeon endape. Gobu Apã Wachu inama idjape, go rõ tãrã buchãma. Go buare Gedeon buema mondo emi dja chupape 22.000 tõ mumbudji krymballãngi. Apã Wachu rõ inama Gedeonpe tãrã buchã wyche. Gobu Gedeon buema mondo emi kbe’e wywy dja chupape, 300 tõallãngi rõ ĩ wyche idjadji.

![](https://cdn.door43.org/obs/jpg/360px/obs-en-16-11.jpg)

Go chãwãmbu Apã Wachu inama Gedeonpe: “Amaty kua Madian pua chupape. Dje wendubu dja djawu, dje krymba gatuwerã.” Go chãwãmbu Gedeon edjyma o Madian pua chupape, gobu wenduma, manonga etakrã Madian tõallãngi kiu dja bygatutygipe, dja ikẽ pouwe. Go dja bygatutygi inama: “Kowe ikẽ poudjiwa inambyty, Gedeon tõallãngi wywy buchãmbawerã Madian tõallãngi wywype!” Gedeon kowegi wendubu, kmarãma Apã Wachu chã ruwa.

![](https://cdn.door43.org/obs/jpg/360px/obs-en-16-12.jpg)

Gedeon oma emi dja tõallãngi endape, membama etakrã mimbyatygi, etakrã kara mo’odjiwa djapopyre, emi tata endy. Gobu djerema Madian pua chupa, tõallãngi wywy ikẽwe rupi. Go 300 Gedeon tõallãngi mĩma dja tata endy go kara djãwãpe, Madian pua wywy wechãllãwã tata endygi.

![](https://cdn.door43.org/obs/jpg/360px/obs-en-16-13.jpg)

Gobu Gedeon tõallãngi wywy pachoma dja kara wywy, go nongabu wechãma tata endy wywy. Gobu mimbypa dja mimbyatygi wywy, emi puka chidja roma: “ Go pẽ buku Jahwe emi Gedeon llapo!”

![](https://cdn.door43.org/obs/jpg/360px/obs-en-16-14.jpg)

Gobu Apã Wachu djueipama mondo Madian pua wywype. Go buare gogi wywy tõ mumbu reko edji emi pycho reko edji. Gobu go Israel pua pukama dja irõndy wywype chupa pua ĩngipe, ekõwã, idjape djepywã, emi owã Madian pua wywy kuere rupi. Gobu pychopama djono gogi wywype, emi djapipama mondo tãrãllã go pua Israel ywy puare. 120.000 Madian manoma go kreype. Apã Wachu kuwẽ gatuma Israel wywype.

![](https://cdn.door43.org/obs/jpg/360px/obs-en-16-15.jpg)

Gobu Israel pua mĩ djue Gedeonpe dja ymachidjagi ĩwã. Gedeon rõ wedjallã go nonga djapowã. Go rõ pukama Israel pua wywype, idjape mewã ipo beta ita biridjiwa, Madian puare erupyre. Gobu gogi wywy Gedeonpe mema tãrãeche ita biri buchãndjiwa.

![](https://cdn.door43.org/obs/jpg/360px/obs-en-16-16.jpg)

Gobu Gedeon djapoma go ita biri buchãndji etakrã tyru gatueche, pa’i ymachidjagi pypyty nonga. Dja irõndy wywy rõ kmarãma go tyrudji, apã nonga chã ruwa kmarãndy nonga. Go buare Apã Wachu pacho puy Israel pua wywype, kmarã buare apã nonga chã ruwa. Apã Wachu buema dja byllãndygipe, idjape djuei buchãmbawã. Go krãpĩpe gogi wywy pukama emi Apã Wachupe, idjape kuwẽwã. Gobu Apã Wachu buema duwe kuwẽwãngipe.

![](https://cdn.door43.org/obs/jpg/360px/obs-en-16-17.jpg)

Kowe nonga djiwa tãrã ekõ wyche: Israel pua wywy bue buchã djapobu, Apã Wachu idjape pachoma. Israel pua wywy bue buchã djapowe wedjapabu, Apã Wachu idjape buema etakrã kuwẽwãngipe. Tãrã ruybu Apã Wachu buema tãrã kuwẽwãngi, Israel puape kuwẽ gatuwã dja byllãndygidji.

![](https://cdn.door43.org/obs/jpg/360px/obs-en-16-18.jpg)

Go krãpĩpe Israel irõndy pukama Apã Wachupe, mewã emi rekowã ymachidjagi, duwe ekõandy wywy reko nonga. Gogi wywy pukama yma puku wachu, emi chidjaechegi, dja kuere rupi rawã tõ allãngi wywype. Apã Wachu uryllãmbu djepe go pukawedji, mema idjape ymachidjagi dja pukawe nonga.

*Kiupyre Jueces parawe, djawupuku 1-3; 6-8, Biblia parapyrepe*

## 17. Apã Wachu djawu mewe Dawidpe

https://openbiblestories.org/l/guq/story-17/

![](https://cdn.door43.org/obs/jpg/360px/obs-en-17-01.jpg)

Saul rõ ĩmbywe ymachidjagi Israelpe. Gogi rõ kbe’e ymambuku emi krymbaeche, Israel pua wywy pukawe nonga. Saul ymachidja gatu ekõ Israel pua wywy bychepe tãrãllã ruybu. Gobu rõ duwe kbe’e nongama, djembi buchã, wendullãma Apã Wachu djawu. Go buare Apã Wachu prawoma duwe kbe’epe, ekõwã ymachidjagi dja endawepe mawembu.

![](https://cdn.door43.org/obs/jpg/360px/obs-en-17-02.jpg)

Apã Wachu prawoma kbuchuwe Israel pua, dja bykuapyre Dawid, ekõwã ymachidjagi Saul endawepe. Dawid rõ wachupurã warõndygi tapy tãrã Belenpe. Go warõ ekõmbu dja apã wachupurãndji, Dawid broma djuku, emi etakrã chery wachu, go wachupurãpe porõ djuebu. Dawid rõ kbe’e praru gatugi emi ekõ gatugi. Idja rõ kua gatu emi Apã Wachudji, dja kuere rupi mudjã gatu reko.

![](https://cdn.door43.org/obs/jpg/360px/obs-en-17-03.jpg)

Dawiddji wẽma etakrã tõallã chidjaechegi emi ymachidja wachugi. Dawid kbuchu poubu wyche, tõ mumbuma ymambuku wachudji, dja bykuapyre Goliat. Goliat rõ tõ mumbuaty, kbe’e chidjaechegi emi. Idja ymambuku wachu rõ 3 metro! Apã Wachu rõ kuwẽ gatuma Dawidpe, Goliatpe browã emi kuwẽwã Israel pua wywype. Gobu Dawid chidjama tãrã Israel byllãndygidji. Go buare dja irõndy wywy idjadji pre reko.

![](https://cdn.door43.org/obs/jpg/360px/obs-en-17-04.jpg)

Saul ka tã buchã reko, Israel pua wywy by gatudjiwa Dawidpe. Tãrãma Saul pycho djue idjape, go buare Dawid kadjãma Saul djãwẽware. Etakrã kreybu Saul kuara reko Dawidpe, idjape pychowã. Saul wẽma go ita ikua djãwãpe, Dawid djemiwe endape. Saul rõ idjape wechãllã. Dawid ĩma Saul djãwẽ, idjape bro djonowã. Gobu idjape bro djuellã. Gope rõ Dawid kichima ichakrã Saul tyru, idja wechãwã, bro djuellã idjape, go ymachidja ekõwã dja endawepe.

![](https://cdn.door43.org/obs/jpg/360px/obs-en-17-05.jpg)

Gobu Saul manoma tõ mumbupe, emi Dawid ekõma Israel ymachidja wachugi. Go rõ ymachidja kbegatugi, dja irõndy wywy by gatu idjape. Apã Wachu kuwẽ gatu Dawidpe, gobu bue wywy wẽ gatuma idjape. Dawid tõ mumbu tãrã reko, emi Apã Wachu idjape kuwẽ gatuma, Israel byllãndygi wywype buchãmbawã. Gobu Dawid chidjama tapy tãrã Jerusalemdji, mawembu go rõ tapy tãrã wachu. Dawid ymachidja wachubu, Israel pua wywy chidjaeche, emi bue tãrã reko.

![](https://cdn.door43.org/obs/jpg/360px/obs-en-17-06.jpg)

Dawid djapo djue prellambaty, Israel pua wywy Apã Wachu chã ruwa kmarãwã, we keĩmbyre idjape mewã emi. 400 ruy tarãmbu Israel pua wywy prewe Apã Wachudji, emi we keĩmbyre idjape mewe noã llambaty, Moise djapowepe.

![](https://cdn.door43.org/obs/jpg/360px/obs-en-17-07.jpg)

Apã Wachu rõ buema profeta Natan Dawid endape, go nonga idjape inawã: “Dje rõ kbe’e tõ mumbuatygi, go buare djapollãwerã go cho prellambaty. Dje tay djapowerã. Djepe rõ cho mewerã kuwẽ gatudjiwa. Etakrã dje irõndy ymachidja wachuwerã cho irõndy chupa wywydji gorãwe!” Dawid irõndy etakrãeche, go Mesia rõ ymachidjawerã gorãwe. Go Mesia rõ Apã Wachu prawowegi, ache wywy go ywy pua kuwẽwã idja bue buchã djapowedji.

![](https://cdn.door43.org/obs/jpg/360px/obs-en-17-08.jpg)

Dawid go djawu wendubu, warõllã mewã ury gatu Apã Wachupe. Go kmarã emi Apã Wachu chã ruwa, go idjape djawu mewedjiwa, me djue dja kuwẽ gatu emi bue gatu tãrã. Dawid kuallã mawe nongabu Apã Wachu djapowerã dja inawe. Gobu rõ Israel pua wywy warõ reko tãrã ruybu, 1.000 ruybu wyche, go Mesia ekõwã.

![](https://cdn.door43.org/obs/jpg/360px/obs-en-17-09.jpg)

Tãrã ruybu Dawid ymachidja gatuma djãpãllãndjiwa, emi bue djapo gatu wywy, gobu Apã Wachu idjape mema kuwẽ gatu. Go nongabu djepe, dja ruy krãpĩ rabu, go bue buchãeche djapoma Apã Wachu chã ruwa.

![](https://cdn.door43.org/obs/jpg/360px/obs-en-17-10.jpg)

Etakrã kreybu, Dawid tõallãngi wywy ĩma rypype dja tapydji, tõ mumbuwã. Dawid rõ mai reko dja tapy wachudjiwe, gobu wechãma kudjã gatu, y djobu. Dja bykuapyre rõ Betsabe.

![](https://cdn.door43.org/obs/jpg/360px/obs-en-17-11.jpg)

Dawid maillã duwe rekuaty, buema duwegipe, go kudjã eruwã dja endape. Djenoma idjadji, gobu buema emi dja tapype. Go krey tãrãllãmbu Betsabe kiuma mondo Dawidpe, idja rõ brawoma.

![](https://cdn.door43.org/obs/jpg/360px/obs-en-17-12.jpg)

Betsabe ime bykuapyre rõ Uria. Go rõ etakrã Dawid tõallã gatuechegi. Dawid pukama Uriape tõ mumbu puare ekõwã, dja brekodji ĩwã. Uria rõ o djuellã dja tapype, tõallãngi wywy tõ mumbu rekobu. Go buare Dawid buema emi Uriape tõ mumbupe. Gobu inama tõallãngi ymachidjagipe, Uriape mĩwã dja byllãndygi krymbaechegipe, idjape browã.

![](https://cdn.door43.org/obs/jpg/360px/obs-en-17-13.jpg)

Gobu Uria manombu, Dawid rama Betsabepe dja brekorã. Go mawembu memby machĩma kbe’epurã, Dawid tay. Apã Wachu rõ prandjã buchã Dawid djapowedji. Go buare buema profeta Natanpe, Dawidpe inawã: “Dje bue djapowe rõ buchãeche.” Dawid chingama dja bue buchã djapowedji, gobu Apã Wachu idjape kuwẽma. Go ruy tãrãmbu Dawid ekõ wyche, mudjã gatu Apã Wachudji, emi wendu gatu dja djawu, djuei wẽmbu djepe.

![](https://cdn.door43.org/obs/jpg/360px/obs-en-17-14.jpg)

Apã Wachu Dawidpe pachoma, bue buchã djapo buare, go buare dja tay manoma, emi Dawid tapy puagi wywy djuka reko edji, Dawid ekõmbu wyche. Gobu emi Dawid praru roma djo. Dawid mudjã gatullãmbu djepe, go wyche Apã Wachu chingadjeky reko dja dawu mewedjiwa. Gobu Dawid emi Betsabe rekoma duwe tay, idjape bykuama Salomon.

*Kiupyre Etakrã Samuel parawe, djawupuku 10; 15-19; 24; 31; Mirõ Samuel parawe, djawupuku 5; 7; 11-12,                                               Biblia parapyrepe*

## 18. Chidja llambaty bowopyregi

https://openbiblestories.org/l/guq/story-18/

![](https://cdn.door43.org/obs/jpg/360px/obs-en-18-01.jpg)

Tãrã ruy wachabu, Dawid manoma, gobu dja tay Salomon ymachidjama Israelpe. Apã Wachu djawuma Salomondji, emi inama idjape, bue rõ idja puka djue. Salomon pukabu, tõ gatuwã, Apã Wachu ury gatuma idjadji, emi mema idjape ekõwã kbe’e bue kua gatuechegi duwe kbe’e wywydji kowe ywype. Salomon bue tãrã kua gatuma emi ymachidja ekõ tõ gatupe. Apã Wachu mema idjape bue tãrã rekowã emi.

![](https://cdn.door43.org/obs/jpg/360px/obs-en-18-02.jpg)

Go Jerusalem tapy tãrãpe Salomon apã Dawid bue mĩ gatuwe emi bue tãrã noãwe prellambaty puarã. Gobu Salomon djapoma go prellambaty. Go nonga Israel pua wywy kmarãma Apã Wachu chã ruwa emi mema idjape we keĩmbyre prellambatype djapo endawepe noã llambatype. Apã Wachu wẽma bu prellambatype ekõwã, emi ĩwã dja irõndy wywy bychepe.

![](https://cdn.door43.org/obs/jpg/360px/obs-en-18-03.jpg)

Salomon rõ prawo ury kudjã duwe rekuatywa. Go wendu gatullã Apã Wachu djawu, dja breko tãrã buchã reko buare. 1.000 kudjã rekoma! Tãrã go kudjã wywy bychepe ekõma duwetywa ekõandy wywy pua, eruma dja apã chã nonga wywy go pua, gobu wedjallã emi dja apã chã nongadji prewã. Chuepurãmbu, Salomon emi prema apã chã nonga duwetywagipe.

![](https://cdn.door43.org/obs/jpg/360px/obs-en-18-04.jpg)

Gobu Apã Wachu prãndjãma Salomondji, emi pacho puy idjape, go wedja buare dja kuere. Dja djawu mema, Israel ekõandy bowowerã mirõ chidja llambatype, Salomon manombu.

![](https://cdn.door43.org/obs/jpg/360px/obs-en-18-05.jpg)

Gobu Salomon manombu, dja tay Roboam ymachidjama. Go rõ kbe’e tõ gatullãngi. Israel pua wywy noãma, idjape mĩwã ymachidjagi. Djaka chidja Roboamdji, go Salomon idjape bita puy wachu mondowe wywy, emi pukawe buta tãrã mewã.

![](https://cdn.door43.org/obs/jpg/360px/obs-en-18-06.jpg)

Roboam tõ gatullãpe gogi wywype djawu pepyma: “Pendje djã djawu ko, cho apã Salomon pendjepe bita puy wachu rekowe? Cho rõ pendjepe bita puy wachuechewerã, idja pendjepe bitawe nonga; cho emi pendjepe pacho puyechewerã, idja pendjepe pachowe nonga.”

![](https://cdn.door43.org/obs/jpg/360px/obs-en-18-07.jpg)

Gobu etakrãtapa Israel irõndy ekõandy pua byllãma Roboamdji. Mirõ irõndy ekõandy pua rõ ĩ wyche idjadji. Go mirõ irõndydji wẽma go Juda chidja llambaty.

![](https://cdn.door43.org/obs/jpg/360px/obs-en-18-08.jpg)

Go duwe etakrãtapa Israel irõndy ekõandy pua, go Roboamdji byllãwegi, mĩma duwe kbe’epe ymachidjawã, go bykuapyre rõ Jeroboam. Gogi wywy rekoma dja chidja llambaty go ywy Israel krey wẽ llu rekuaty, emi pukapyre Israel chidja llambaty.

![](https://cdn.door43.org/obs/jpg/360px/obs-en-18-09.jpg)

Jeroboam mudjã djuellã Apã Wachudji, emi bue mĩma Israel puagi wywy bue buchã djapowã. Djapoma mirõ apã chã nonga, Israel puagi wywy kmarãwã apã nonga chã ruwa, kmarã endawepe Apã Wachudji go chidja llambaty Juda prellambatype.

![](https://cdn.door43.org/obs/jpg/360px/obs-en-18-10.jpg)

Go Juda chidja llambaty emi Israel chidja llambaty edji byllãma reko, emi tãrãma tõ mumbu edji.

![](https://cdn.door43.org/obs/jpg/360px/obs-en-18-11.jpg)

Go Israel chidja llambaty poupe go ymachidjagi wywy djembi buchã wywy. Tãrã ymachidjagi go pua bropyre duwe Israel pua wywy rupi, go ĩ djuedjiwa ymachidjagi go endawepe.

![](https://cdn.door43.org/obs/jpg/360px/obs-en-18-12.jpg)

Go ymachidjagi wywy emi tãrã Israel chidja llambaty pua pre reko apã chã nongadji. Apã chã nongadji kmarãmbu, gope meno reko edji, gobu emi mema dja tay apã chã nongape keĩmbyrã.

![](https://cdn.door43.org/obs/jpg/360px/obs-en-18-13.jpg)

Go Juda ymachidjagi wywy rõ Dawid irõndy wywy. Tãrãllã go pua kbe’e praru gatugi, ymachidjama tõ gatupe, emi mudjã gatuma Apã Wachudji. Tãrã Juda ymachidjagi rõ bue buchã djapoty, ka djawu gatu buã’ã pichadji, emi kmarã apã chã nongadji. Tãrãllã go pua mema emi dja tay apã chã nongape keĩmbyrã. Tãrã ache Juda pua byllãmbama Apã Wachupe, emi prema apã chã nongadji.

*Kiupyre Etakrã Reyes djawupuku 1-6; 11-12,              Biblia parapyrepe*

## 19. Profeta wywy

https://openbiblestories.org/l/guq/story-19/

![](https://cdn.door43.org/obs/jpg/360px/obs-en-19-01.jpg)

Israel pua wywydjiwa kiupyre puku rupi, Apã Wachu buema profeta wywy. Profeta wywy wenduwe Apã Wachu djawu, gobu kiu gatuma dja irõndy wywype Apã Wachu inawe.

![](https://cdn.door43.org/obs/jpg/360px/obs-en-19-02.jpg)

Elia rõ etakrã profeta, Akab ymachidjabu Israel chidja llambatype. Akab rõ kbe’e djembigi. Go mĩma, Israel pua wywy prewã apã chã nonga Baalpe. Elia inama Akabpe: “Bakyllãwerã emi ĩllãwerã chapy Israel chidja llambatype, cho inambu.” Go inawedji Akab prandjã buchãma.

![](https://cdn.door43.org/obs/jpg/360px/obs-en-19-03.jpg)

Akab Eliape pycho djue buare, Apã Wachu inama idjape, owã ka irõllãpe y tuwy embedji djemiwã. Gorãwe koẽmbu emi krey wychobu wywy, kuyra eruma idjape wikytã emi we o’o. Akab dja tõallãngi wywydji kuara tãrã reko Eliape, dorollã idjape. Tãrã krey bakyllã buare, go y tuwy typama.

![](https://cdn.door43.org/obs/jpg/360px/obs-en-19-04.jpg)

Go buare Elia oma duwe ekõandype Israel ywy djãwẽ. Go ekõandype ĩma etakrã kudjã prowegi dja memby kbe’edji. Gogi reko wyche ichakrã bakupyrã, bue uwã ĩllã buare. Gogi kuwẽ gatuma Eliape, gobu Apã Wachu bue uwã mema idjape. Tãrã kreybu ĩ wyche trigo dja karape, emi ĩ wyche tapia dja baydjape. Idja rekoma bue uwã go llellã wachu ekõmbu. Elia ekõma gope tãrãllã ruybu.

![](https://cdn.door43.org/obs/jpg/360px/obs-en-19-05.jpg)

Gobu brewipychã ruy bychebu, Apã Wachu inama Eliape, owã emi Israel chidja llambatype, djawuwã Akabdji, go buewerã baky gobu. Akab Eliape wechãmbu, inama: “Dje ekõma ko, bue buchã djapoaregi!” Elia rõ djawu pepyma: “Dje rõ bue buchã djapoaty. Dje rõ mudjã djuellã go Rekoatygipe, Apã Wachu kainallãndype, gobu emi dje pre reko Baalpe. Noãmba ga mondo Israel chidja llambaty pua wywype kuãmbuku Carmelope.”

![](https://cdn.door43.org/obs/jpg/360px/obs-en-19-06.jpg)

Gobu Israel chidja llambaty pua wywy, go 450 Baal profeta emi, djopima kuãmbuku Carmelope. Elia inama Israel pua wywype: “Mawe nongabu rõ pendje ruwawerã djã djawu buchã ekõwã mirõ apepe? Jahwe rõ Apã Wachubu, mudjã idjadji! Go Baal apãmbu, mudjã idjape!”

![](https://cdn.door43.org/obs/jpg/360px/obs-en-19-07.jpg)

Gobu Elia inama Baal profeta wywype: “Pycho mondo achĩpurã tay, mĩ gatu mondo pendje apãpe mewã, tata rõ mendyllãwerã. Cho djapowerã go nonga emi. Go apã tata ywadji itygi rõ Apã Wachu kabewãllãngi.” Gobu Baal pa’i wywy we keĩmbyrã djonoma, tata rõ mendyllã.

![](https://cdn.door43.org/obs/jpg/360px/obs-en-19-08.jpg)

Gobu Baal profeta wywy pukama Baalpe: “Baal wendu gami!” Krey puku rupi puka ekõ, emi puka chidja reko, dja pire emi bowopama kychĩpe, ĩllã go idja pukawe wendugi.

![](https://cdn.door43.org/obs/jpg/360px/obs-en-19-09.jpg)

Go krey krãpĩmbu Elia mĩma we keĩmbyrãngi Apã Wachupe. Gobu inama Israel wywype, chengypychã kara embepawã ydji, emi kawowã we keĩmbyrã llabu. Go nonga emi we o, chakã wywydji, emi ywy we keĩ endaty wywydji pirypa djono.

![](https://cdn.door43.org/obs/jpg/360px/obs-en-19-10.jpg)

Gobu Elia krandobuãma: “Jahwe, Abraham, Isaak emi Jakob Apã Wachu, wechã orepe kowe kreybu, dje rõ Israel Apã Wachu, emi cho rõ dje buetygi. Djawu gami chope, go Israel pua wywy kua gatuwã, dje rõ Apã Wachu kainallãngi.”

![](https://cdn.door43.org/obs/jpg/360px/obs-en-19-11.jpg)

Gobu bitallãpe tata wama ywadjiware, keĩpama we o’o, chakã, ita wywy, ywy emi y we keĩ endaty ruwa ĩwegi. Israel pua wywy kowegi wechãmbu, kmarã roma ywydji emi inama: “Jahwe rõ Apã Wachu! Jahwe rõ Apã Wachu!”

![](https://cdn.door43.org/obs/jpg/360px/obs-en-19-12.jpg)

Gobu Elia inama gogi wywype: “Wedjaeme, Baal profeta wywy kadjãwã!” Gobu Israel irõndy wywy pychyma Baal profeta wywype, rama, gobu emi pychopama djono.

![](https://cdn.door43.org/obs/jpg/360px/obs-en-19-13.jpg)

Gobu Elia inama ymachidjagi Akabpe: “Bitaeme owã tapy tãrãpe, baky wachuwerã.” Gobu bakyrei ño wachu roma, gobu baky wachuma. Jahwe chidja rupi krãpĩma go bakyllã wachu, emi go wechãma, idja rõ Apã Wachu kainallãndygi.

![](https://cdn.door43.org/obs/jpg/360px/obs-en-19-14.jpg)

Gobu Elia ĩllã buare, Apã Wachu prawoma duwe kbe’epe profeta ekõwã. Go bykuapyre rõ Eliseo. Apã Wachu djapoma tãrã bue gatu wechãllãndy Eliseo rupi. Bue wechãllãndy rupi kuwẽmbyre Naaman, etakrã tõallãngi ymachidjagi Israel byllãndy pua. Dja rõ eche kaita buchã. Go wenduma Eliseodji, gobu oma dja endape emi pukama Eliseo idjape kuwẽwã. Eliseo inama idjape, y djowã djypetãndjiwa Jordan ypurãpe.

![](https://cdn.door43.org/obs/jpg/360px/obs-en-19-15.jpg)

Go ina buare, Naaman prandjãma go nonga djapowã, ka djawu kura idjape. Gobu rõ ruwama dja djã djawu duwe nonga, gobu y djoma djypetãndjiwa Jordan ypurãpe. Y djopabu, tokape wẽmbu dja eche kaita kadjãmbama. Apã Wachu idjape kuwẽma.

![](https://cdn.door43.org/obs/jpg/360px/obs-en-19-16.jpg)

Apã Wachu buema duwe profeta tãrã. Gogi wywy inama Israel pua wywype, kmarãllãwã apã chã nongagi chã ruwa, emi edji bue djapo gatuwã praru gatupe. Profeta wywy kiuma Israel pua wywype, gogi wedjallãmbu bue buchã, emi wendu djuellãmbu Apã Wachu djawu, Apã Wachu urybechewerã idjadji, emi pacho puywerã gogi wywype.

![](https://cdn.door43.org/obs/jpg/360px/obs-en-19-17.jpg)

Tãrãma Israel pua wywy djapo djuellã Apã Wachu djawu. Djueima reko profeta wywype, tãrãllã profetape pychoma emi. Profeta Jeremia itypyre ywy wykopyrepe, gope manowã. Go mo’o wykopyre krãpĩpe ikẽ roma djo. Gobu ymachidjagi idjadji chingadjeky, inama dja buepytygipe, Jeremiape matawã ywy wykopyre puare, manollãwã.

![](https://cdn.door43.org/obs/jpg/360px/obs-en-19-18.jpg)

Israel pua wywy idjape byllã buchãmbu djepe, profeta wywy djawu reko Apã Wachudjiwa. Gogi kiu reko Israel puape, Apã Wachu gogi wywype buchãmbawerã, wedjallãmbu bue buchã. Gobu emi kua reko Israel irõndy wywy Apã Wachu inawedji, go Mesia ekõwerã.

_Kiupyre Etakrã Reyes djawupuku16-18;_

_Mirõ Reyes djawupuku5;_

*Jeremia djawupuku 38,                                             Biblia parapyrepe*

## 20. Israel budjakrã dja ekõandydji, gobu ekõ emi dja ywype

https://openbiblestories.org/l/guq/story-20/

![](https://cdn.door43.org/obs/jpg/360px/obs-en-20-01.jpg)

Go mirõ chidja llambatype ekõngi, Israel emi Juda llambaty pua wywy bue buchã djapo ury Apã Wachu chã ruwa. Gogi wywy wedjapama Apã Wachu djawu membyre go kuãmbuku Sinaipe. Apã Wachu buema dja profeta wywy, Israel pua wywype kiuwã, wedjawã bue buchã djapoty, prewã emi Apã Wachudji. Gogi wywy rõ wendu djuellã, emi djapo djuellã Apã Wachu inawe nonga.

![](https://cdn.door43.org/obs/jpg/360px/obs-en-20-02.jpg)

Go buare Apã Wachu pacho puy go mirõ chidja llambaty pua wywype, dja byllãndygi buchãmbawã gogi wywype. Go Asirio chidja llambaty pua, etakrã irõndy prandjã buchã emi chidja reko, buchãmbama Israel chidja llambaty. Go Asirio pua wywy pychoma tãrã Israel chidja llambaty puape, rapama emi bue biri buchã, gobu mendyma go ekõandy.

![](https://cdn.door43.org/obs/jpg/360px/obs-en-20-03.jpg)

Go Asirio pua noãmbama yma kua gatugipe, emi bue tãrã rekogipe emi ache tõngatugipe, gobu rapama Asirio chidja llambatype. Go Israel pua bue rekollãngi emi pychollãmbyregi rõ ekõ wyche Israel chidja llambatype.

![](https://cdn.door43.org/obs/jpg/360px/obs-en-20-04.jpg)

Gobu Asirio pua eruma duwe ekõandy pua, ekõwã go Israel ywype. Go ache wywy djapoma emi tapy tãrã buchãmbambyregi. Kbe’e wywy budjakrã pua rekoma dja breko Israel pua bychepe. Gobu Israel pua emi ache budjakrã pua udjabu, emi kmino tãrã rekobu, go rõ pukapyty Samaria pua.

![](https://cdn.door43.org/obs/jpg/360px/obs-en-20-05.jpg)

Juda chidja llambaty pua wechãma, manonga Apã Wachu pachowe Israel llambaty pua wywype, kua gatullã buare Apã Wachudji, mudjã gatullã buare emi idjape. Go nongabu djepe gogi wywy pre reko wyche apã chã nongadji, go Kanaan irõndy apã chã nonga wywydji emi. Apã Wachu buema profetape, djawu chidjawã gogipe, gogi wywy rõ djawu wendu djuellã.

![](https://cdn.door43.org/obs/jpg/360px/obs-en-20-06.jpg)

Etakrã tapa tapa (100) ruybu, Asirio pua buchãmbabu Israel chidja llambaty, Apã Wachu buema Nabukodonosor, go Babilonia ymachidjagi, tõ mumbuwã Juda chidja llambaty pua wywydji. Babilonia rõ etakrã chidja llambaty neina wachugi. Juda ymachidjagi dja dawu mema, ekõwã Nabukodonosor buepytygi. Gobu mema idjape tãrã buchã buta ruybu wywy.

![](https://cdn.door43.org/obs/jpg/360px/obs-en-20-07.jpg)

Gobu tãrãllã ruybu Juda ymachidjagi ĩ djuellãma Babiloniadji. Go buare Babilonia pua wywy wẽma emi, tõ mumbuwã Juda chidja llambaty puadji. Gogi chidjama tapy tãrã Jerusalemdji, buchãmbama prellambaty, emi rama bue biri buchãngi wywy tapy tãrã puare emi prellambaty puare.

![](https://cdn.door43.org/obs/jpg/360px/obs-en-20-08.jpg)

Juda ymachidjagi ĩ djuellã buare Babiloniadji, Nabukodonosor tõallãngi pacho puy idjape. Go buare bropama djono ymachidjagi tay wywype dja chã ruwa, gobu dja chã mumbuma. Gobu rama go ymachidjagipe, manowã tapy djãwãllãpe Babioniape.

![](https://cdn.door43.org/obs/jpg/360px/obs-en-20-09.jpg)

Nabucodonosor emi dja tõallãngi wywy rama tãrã Juda chidja llambaty pua Babiloniape, wedjama tãrãllã Juda pua bue rekollãngipe, ywy tyrõwã emi bue ã’ã pechewã. Go ruy wywybu, Apã Wachu chupa pua chidjape rapabu, ekõwã budjakrãpe go dja ywy membyregidji, pukapyty Exilio.

![](https://cdn.door43.org/obs/jpg/360px/obs-en-20-10.jpg)

Apã Wachu dja chupa pua pacho puyma, bue buchã djapo buare, rama gogi wywype budjakrãpe dja ywydji. Go nongabu djepe, kua reko idjadji, emi dja djawu membyredji. Apã Wachu kuwẽ reko dja chupa pua wywydji, emi djawuma gogi wywype dja profeta rupi. Gobu idja inawe, djypetãtapa ruybu, owerã wyche emi go ywy membyrepe.

![](https://cdn.door43.org/obs/jpg/360px/obs-en-20-11.jpg)

Djypetãtapa ruy wachabu, Ciro, go rõ Persa pua ymachidjagi, buchãmbama Babilonia chidja llambaty, gobu Persa chidja llambaty ĩma Babilonia chidja llambaty endawepe. Go Israel pua wywy kowebu pukapyre Juda, emi tãrãma ekõ Babiloniape. Tãrãllã chuepurãngi Juda pua kua reko ywy Judadji.

![](https://cdn.door43.org/obs/jpg/360px/obs-en-20-12.jpg)

Go Persa chidja llambaty rõ chidjabu djepe, go pua chingadjeky reko go ache chidjape rapyregidji. Tãrãllã kreybu, Ciro ymachidjabu Persa pua wywydji, mema dja djawu go Juda pua o djuegi emi ekõandy Judape, wedjawerã Persia owã Juda rekuaty. Go mema emi buta tãrã djapowã prellambaty! Go nonga djypetãtapa ruybu budjakrã dja ekõandydji, tãrãllã Juda pua noãma, owã emi tapy tãrã Jerusalempe ekõandy Judape.

![](https://cdn.door43.org/obs/jpg/360px/obs-en-20-13.jpg)

Gobu Juda pua wẽmbu Jerusalempe, djapoma prellambaty, gobu emi pechema tapy tãrã. Duwe ache idjadji ymachidjabu djepe, ekõ wyche go ywy membyrepe, emi kmarã reko Apã Wachu chã ruwa prellambatype.

_Kiupyre Mirõ Reyespe, djawupuku 17; 24-25; Mirõ Cronikas, djawupuku 36;_

_Esdra, djawupuku 1-10;_

_Nehemia, djawupuku 1-13,_

*Biblia parapyrepe*

## 21. Apã Wachu djawu mewe go Mesia djiwa

https://openbiblestories.org/l/guq/story-21/

![](https://cdn.door43.org/obs/jpg/360px/obs-en-21-01.jpg)

Go djypydjiwe Apã Wachu inama go Mesia ekõwerã. Apã Wachu inawe go Mesiadji Adam emi Ewape. Apã Wachu inawe, etakrã Ewa irõndy memby machĩwerã, gobu biriwerã membo tõpe. Go membo Ewape kabewãregi rõ Andjãwe. Apã Wachu djawu mewe inambyty go Mesia buchãmbawerã Andjãwepe.

![](https://cdn.door43.org/obs/jpg/360px/obs-en-21-02.jpg)

Apã Wachu dja djawu mewe Abrahampe, idja rupi duwe irõndy wywy kowe ywype kuwẽ gatupapyrã. Go kuwẽ gatudjiwa wẽwerã, go Mesia ekõmbu etakrã kreype go ekõwerãndjiwa. Go rõ djapowerã ache irõndy wywy, go ywy pua, idja bue buchã djapowedjiwa kuwẽmbapyrã.

![](https://cdn.door43.org/obs/jpg/360px/obs-en-21-03.jpg)

Apã Wachu dja djawu mewe Moisepe, mawembu puãwerã duwe profeta Moise nonga. Go rõ duwe djawu mewe go Mesia ekõwerãndjiwa gobu.

![](https://cdn.door43.org/obs/jpg/360px/obs-en-21-04.jpg)

Apã Wachu dja djawu mewe ymachidja wachugi Dawidpe, etakrã dja irõndy ymachidja wachuwerã Apã Wachu irõndy wywydji gorãwe. Go nonga kiuwe, go Mesia rõ etakrã kbe’e Dawid irõndydjiwa.

![](https://cdn.door43.org/obs/jpg/360px/obs-en-21-05.jpg)

Profeta Jeremia rupi Apã Wachu inawe, mewerã etakrã djawu pou membyre. Go djawu pou membyre rõ duwe nonga go djawu Israelpe membyregidji kuãmbuku Sinaipe. Go djawu pou membyre rupi Apã Wachu mĩwerã dja djawu parapyre Israel pua wywy djãpe. Israel pua wywy kua gatuwerã Apã Wachupe, emi go rõ dja chuparã, gobu emi Apã Wachu kuwẽwerã gogi wywype dja bue buchã djapowedji. Go Mesia buãwerã go djawu pou membyre.

![](https://cdn.door43.org/obs/jpg/360px/obs-en-21-06.jpg)

Emi go profeta wywy inama go Mesia rõ etakrã profeta, pa’i emi ymachidja wachugi. Etakrã profeta wenduty Apã Wachu djawu, gobu kiu gatuma Apã Wachu chupa pua wywype. Go Mesia, Apã Wachu buewerãngi, rõ go profeta kbegatuechegi.

![](https://cdn.door43.org/obs/jpg/360px/obs-en-21-07.jpg)

Go pa’i Israel pua wywy keĩndy we wywy Apã Wachupe Israel pua wywy bykuapyrepe. Go we pachopyre picha bue buchã djapowedjiwa. Go pa’i wywy krandobuã emi Israel pua wywydji Apã Wachu chã ruwa. Go Mesia rõ go pa’i ymachidja kbegatuechegi, go mewerã idja eche manowã we keĩmbyre kbegatuechegi nonga Apã Wachupe.

![](https://cdn.door43.org/obs/jpg/360px/obs-en-21-08.jpg)

Etakrã ymachidja wachugi rõ ymachidjaty etakrã chidja llambatydji emi djawu gatu buãndy pichadji. Go Mesia rõ go ymachidja wachu kbegatuechegi, wapywerã go djypywaregi David wapytype. Go ymachidjawerã kowe ywy llabu wywy gorãwe, djawu gatu buãwerã pichadji kabewãllãpe, emi bue wywy djapowerã tõ gatupe.

![](https://cdn.door43.org/obs/jpg/360px/obs-en-21-09.jpg)

Go profeta wywy kiuma duwe bue tãrã go Mesiadjiwa. Go profeta Malaquia kiuma go Mesia ekõ nondjebu, etakrã profeta chidjagi ekõwerã. Go profeta Isaia kiuma, go Mesia opowerã etakrã daregi kbe’e pokollãndy rupi. Go profeta Miquea kiuma, go Mesia opowerã tapy tãrã Belempe.

![](https://cdn.door43.org/obs/jpg/360px/obs-en-21-10.jpg)

Go profeta Isaia inama, go Mesia ekõwerã chupa Galileape, go djawu gatu mewerã uryllãpe ekõndygi wywype, puiwerã bue buchã djapotygi wywype emi tapy djãwãllãpe ekõngipe. Gobu emi inama, go Mesia kuwẽwerã eche achygipe, emi chãllãngipe, pychallãngipe, djawullãngipe emi watallãngipe.

![](https://cdn.door43.org/obs/jpg/360px/obs-en-21-11.jpg)

Go profeta Isaia kiuma emi, go Mesia byllã rekopyrã bue buchã djapollãmbu djepe, emi ache djapiwerã idjape dja byche puare. Duwe profeta wywy inama, go Mesiape pychowãngi buã rekowerã butadji, idja tyruwe rekowã, emi etakrã dja bygatutygi ka mewerã idjape. Go profeta Sakaria inama, etakrã dja bygatutygipe membyrã brewipychã tapa buta itadji, go kamewã Mesiape.

![](https://cdn.door43.org/obs/jpg/360px/obs-en-21-12.jpg)

Go profeta wywy inama emi, mawe nonga go Mesia manowerã. Isaia kiuma, duwe ache wywy rywõwerã emi djudja rekowerã idjadji, gobu pachowerã go Mesiape. Gogi pychowerã idjape, gobu go manowerã djuei buchãpe, bue buchã djapollãmbu djepe.

![](https://cdn.door43.org/obs/jpg/360px/obs-en-21-13.jpg)

Profeta wywy inama emi, go Mesia kbegatuechewerã, go rõ bue buchã djapollãwerã. Dja manowerã rupi pepywerã ache bue buchã djapopawedjiwa. Go pachopyrã rupi Apã Wachu emi ache wywy ekõ gatuwerã okryra gatupe. Go buare Apã Wachu prawoma, Mesiape mĩ buchãmbawã.

![](https://cdn.door43.org/obs/jpg/360px/obs-en-21-14.jpg)

Profeta wywy kiuma, go Mesia manowerã, gobu Apã Wachu idjape puã mondowerã manowegi byche puare. Go Mesia manombu, emi wẽmbu manowe byche puare, Apã Wachu djapopawerã dja prawodjiwa, bue buchã djapogi wywype kuwẽwã, emi go djawu pou membyre buãwã.

![](https://cdn.door43.org/obs/jpg/360px/obs-en-21-15.jpg)

Apã Wachu wechãma profeta wywype bue tãrã go Mesiadjiwa. Go Mesia rõ ekõllã wyche go ruy tãrãpe go profeta wywy ekõmbu. Apã Wachu buewerã Mesiape kowe ywype go ruy tãrã chengypychã tapa tapa (400) wachabu, go djawu wywy membapyre Mesiadjiwa. Gobu Apã Wachu bue mondowerã go Mesiape, go krey idja inawe nongaeche wẽmbu.

_Kiupyre Genesis djawupuku 3:15; 12:1-3; Deuteronomio djawupuku 18:15;_

_Mirõ Samuel parawe djawupuku 7;_

_Jeremia djawupuku 31;_

_Isaia djawupuku 59:16; Daniel djawupuku 7; Malakia djawupuku 4:5;_

_Isaia djawupuku 7:14; Mikea djawupuku 5:2; Isaia djawupuku 9:1-7; 35:3-5; 61; 53; Salmo djawupuku 22:18; 35:19; 69:4; 41:9; Sakaria djawupuku 11:12-13;_

_Isaia djawupuku 50:6;_

*Salmo djawupuku 16:10-11,                          Biblia parapyrepe*

## 22. Juan opo buare

https://openbiblestories.org/l/guq/story-22/

![](https://cdn.door43.org/obs/jpg/360px/obs-en-22-01.jpg)

Nondjebu Apã Wachu djawu endawe dja chupa puape dja buetygi emi dja profeta wywy rupi. Gobu wacha endawe chengypychã tapa tapa (400) ruy, go djawullãma gogi wywype. Gobu rõ etakrã Apã Wachu buetygi wẽma bu, kiuwã Apã Wachu inawe etakrã pa’i chuepurãngipe, go bykuapyre rõ Sakaria. Sakaria emi dja breko Elisabet bue buchã djapollãndy, idja rõ rekollã idja tay.

![](https://cdn.door43.org/obs/jpg/360px/obs-en-22-02.jpg)

Apã Wachu buetygi inama idjape: „Sakaria, dje breko memby machĩwerã kbe’e. Idjape bykua ga mondo Juan. Go embe gatuwerã Apã Wachu Krei Gatudji, emi bue mĩ gatupawerã, Israel pua wywy inawã go Mesiape: Ekõ gatu!“ Sakaria djawu pepy: „Cho breko rõ djarypurãma, cho emi chuepurãma, ore tay rekowã. Manonga cho kuawerã, kowegi wẽwerã?“

![](https://cdn.door43.org/obs/jpg/360px/obs-en-22-03.jpg)

Apã Wachu buetygi inama Sakariape: „Apã Wachu chope buewe, djepe kiuwã kowe djawu gatu. Dje chope wendu djuellã buare rõ, dje djawullãwerã go krumi opo nondje.“ Gobu Sakaria djawubechema, emi Apã Wachu buetygi wedjama idjape. Sakaria oma idja tapype, gobu dja breko brawoma.

![](https://cdn.door43.org/obs/jpg/360px/obs-en-22-04.jpg)

Elisabet brawo reko wachapa djachy manombu, kowe Apã Wachu buetygi wẽma bu etakrã Elisabet tuty kudjã chã ruwa. Go bykuapyre rõ Maria. Go rõ dare kbe’e pokollãndygi, emi idja djawu mewe udjawã kbe’edji, go bykuapyre rõ Jose. Go buetygi inama idjape: “Dje brawowerã emi dje memby machĩwerã kbe’e. Dje bykuawerã idjape Jesu. Gogi rõ Apã Wachu Tay emi ymachidja wachuwerã gorãwe.”

![](https://cdn.door43.org/obs/jpg/360px/obs-en-22-05.jpg)

Maria djawu pepy: “Mawe nongawerã kowe? Cho rõ daregi kbe’e pokollãndygi?” Go buetygi kiuma idjape: “Apã Wachu Krei Gatu ekõwerã dje djãwẽ, emi Apã Wachu chidja ekõwerã dje llabu. Go nonga go krumi pou kbegatuechewerã, go Apã Wachu Tay.” Maria kua gatuma go buetygi inawe idjape.

![](https://cdn.door43.org/obs/jpg/360px/obs-en-22-06.jpg)

Tãrãllã kreybu, go Apã Wachu buetygi Mariape djawubu, gogi oma Elisabet endape. Elisabet wendubu Maria djawu, dja memby kuerama dja krape. Go mirõ kudjã ury gatu ekõ, Apã Wachu bue wachu idjadji djapo buare. Maria ĩma Elisabetdji brewipychã djachy manombu, gobu oma emi dja tapype.

![](https://cdn.door43.org/obs/jpg/360px/obs-en-22-07.jpg)

Gobu Elisabet memby machĩmbu kbe’e, Sakaria emi Elisabet bykuama idjape Juan, Apã Wachu buewegi inawe nonga. Gobu Apã Wachu kuwẽma Sakariape, djawuwã emi. Sakaria inama: “Ury gatu ga mondo Apã Wachudji, go kua reko buare dja chupa puagidji! Dje cho tay, pukapyrã Apã Wachu chidjagi profeta. Dje kiuwerã achepe, mawe nonga Apã Wachu kuwẽ gatu mewerã, idja bue buchã djapopawedjiwa kuallãwã.

*Kiupyre Luka djawu gatu 1,                      Biblia parapyrepe*

## 23. Jesu opo buare

https://openbiblestories.org/l/guq/story-23/

![](https://cdn.door43.org/obs/jpg/360px/obs-en-23-01.jpg)

Maria djawu mewe udjawã etakrã kbe’e praru gatugidji, go bykuapyre rõ Jose. Go wendubu, Maria brawodjiwa, kua gatuma go krumi rõ dja tayllã. Idja djawu buchã djuellã Mariadji, go buare idja djã djawuma, wedjawã Mariape, duwe ache kuallãmbu. Idja djapo nondje go nonga, Apã Wachu buewegi wẽma bu, emi djawuma idjape ikẽ poubu.

![](https://cdn.door43.org/obs/jpg/360px/obs-en-23-02.jpg)

Apã Wachu buewegi inama idjape: “Jose, krymballãeme rekowã Mariape dje brekorã. Go krumi dja kra pua rõ Krei Gatudjiware. Opowerã krumi kbe’e. Bykua ga mondo idjape Jesu (go inambyty: Jahwe kuwẽndy), go rõ kuwẽwerã achepe bue buchã djapowedjiwa.”

![](https://cdn.door43.org/obs/jpg/360px/obs-en-23-03.jpg)

Gobu Jose rekoma Mariape dja brekorã, emi idjape rama dja tapype. Go rõ dja eche pokollã, go dja memby kbe’e opo nondje.

![](https://cdn.door43.org/obs/jpg/360px/obs-en-23-04.jpg)

Go krey ekõmbu, Maria memby kbe’e machĩwã, ymachidjagi Roma pua inama ache wywype owã go tapy tãrãpe, djypywaregi wywy ekõawepe. Gope mĩmbawerã dja bykuapyre wywy go ymachdjagi parapyrepe. Gobu Jose emi Maria owerã go dja tapy tãrã Nasare puare duwe tapy tãrã Belem rekuaty. Go djypywaregi rõ Dawid my, emi Dawid opo endawe tapy tãrã Belempe.

![](https://cdn.door43.org/obs/jpg/360px/obs-en-23-05.jpg)

Go Belempe wẽmbu, ĩllã dja ikẽ endarã. Go dja endarã rõ djuma etakrã we llambatype. Krumi pou opoma gope, gobu dja ai’i djenoma we u endatype, ĩllã buare duwe ikẽ endaty. Jose emi Maria idjape bykuama Jesu.

![](https://cdn.door43.org/obs/jpg/360px/obs-en-23-06.jpg)

Go chãwãmbu tãrãllã wachupurã warõandygi ĩma tapy tãrã Belem djãwẽ, dja wachupurãndji warõ reko. Gobu wẽma bu Apã Wachu buetygi bype gatupe. Gobu gogi wywy krymballã buchã roma. Go buetygi inama: “Krymballãeme, cho reko djawu gatu, pendjepe kiuwã. Go Mesia, go Rekoatygi, opoma tapy tãrã Belempe!”

![](https://cdn.door43.org/obs/jpg/360px/obs-en-23-07.jpg)

“Amaty kua, krumi poupe wechãwã. Gobu pendje dorowerã idjape, tyrudji djuwãmbyre emi djeno ĩ we u endatype.” Gobu ywadji embepama Apã Wachu buetygi wywy, gogi pre reko Apã Wachudji, inama: “Apã Wachu rõ neina wachueche ywadji. Apã Wachu mẽwerã go ache idja bygatutygipe okryra kuwẽ gatudjiwa kowe ywype!”

![](https://cdn.door43.org/obs/jpg/360px/obs-en-23-08.jpg)

Go wachupurã warõandygi wẽma Jesu endape, emi idjape doroma we u endatype, Apã Wachu buewegi kiuwe nonga. Gogi wywy rõ chã opo roma. Gobu wachupurã warõandygi oma emi dja wachupurã endape, emi ury gatu mema Apã Wachupe, bue wywy wendupawe emi wechãmbawegidjiwa.

![](https://cdn.door43.org/obs/jpg/360px/obs-en-23-09.jpg)

Go ikẽ tãrãllãmbu kbe’e tõngatugi wywy ekõandy buchãkrã pua krey wẽ rekuatywa wechãma tata duwe nonga ywadji. Go nonga kuama, go Juda pua ymachidja wachurãngi opoma. Go buare watama o tãrã kreybu, go ymachidjarãngipe wechãwã. Gobu wẽma Belempe, emi doroma go tapype Jesu, dja ai’i emi dja imedji gope.

![](https://cdn.door43.org/obs/jpg/360px/obs-en-23-10.jpg)

Go kbe’e tõngatugi wywy wechãmbu Jesupe dja ai’idji, kmarãma dja chã ruwa emi prema idjape. Idjape mema tãrã bue biribuchãngi. Gobu oma emi dja ekõandype.

_Kiupyre Mateo djawu gatu 1;_

*Luka djawu gatu 2,                                                              Biblia parapyrepe*

## 24. Juan Jesupe y tõ pypyma

https://openbiblestories.org/l/guq/story-24/

![](https://cdn.door43.org/obs/jpg/360px/obs-en-24-01.jpg)

Juan go Sakaria emi Elisabet memby ymambu, go rõ profeta. Go ekõandy rõ ka irõllãpe, idja uty mynga ka pua emi beky. Dja tyru rõ bepurã wachu a’adji djapopyre.

![](https://cdn.door43.org/obs/jpg/360px/obs-en-24-02.jpg)

Ache tãrã watama o ka irõllãpe, Juan djawu wenduwã. Go Apã Wachu djawu kiuma gogi wywype, inama: “Wedjapa ga mondo pendje bue buchã djapoty, rypyllãma Apã Wachu chidja llambaty!”

![](https://cdn.door43.org/obs/jpg/360px/obs-en-24-03.jpg)

Ache wywy Juan djawu wendubu, tãrã go pua wedjama dja bue buchã djapoty, mudjã gatuwã Apã Wachupe. Gobu Juan ype tõ pypyma gogi wywype. Emi tãrã ymachidjagi Apã Wachu djawu kuatygi ekõma, Juan idjape ype tõ pypywã. Gogi rõ wedja djuellã dja bue buchã djapoty, mudjã gatuwã Apã Wachu kuere rupi.

![](https://cdn.door43.org/obs/jpg/360px/obs-en-24-04.jpg)

Juan inama ymachidjagi Apã Wachu djawu kuatygi wywype: “Pendje rõ membo nonga! Wedjapa ga mondo bue buchã, emi djewy kua pendje ape buchãndji. Wyra wywy lla gatullãngi djuapapyrã emi djapipyrã tatape.” Juan rupi wẽma go profeta wywy inawe nonga: “Cho buewerã dje chã ruwa cho djawu meandygi, go mĩwerã ape gatu dje lluawã.”

![](https://cdn.door43.org/obs/jpg/360px/obs-en-24-05.jpg)

Tãrãllã Juda pua inama Juandji, gogi mirõrã go Mesia. Juan rõ djawu pepy: “Cho rõ Mesiallã. Gobu rõ ekõwerã etakrã kbe’e cho kuere rupi. Go rõ neina wachu. Cho rõ kbegatullã, idja pychãmbire ichã djurawã.”

![](https://cdn.door43.org/obs/jpg/360px/obs-en-24-06.jpg)

Go duwe kreybu, Jesu ekõma, Juan idjape y tõ pypywã. Juan idjape wechãmbu, inama: “Kowegi rõ Apã Wachu wachupurã tay go matãmbawãngi ache wywy bue buchã djapoty.”

![](https://cdn.door43.org/obs/jpg/360px/obs-en-24-07.jpg)

Juan inama Jesupe: “Cho rõ kbegatullã, djepe y tõ pypywã. Go endawepe, dje chope y tõ pypy ga mondo.” Jesu rõ inama: “Dje chope y tõ pypywerã. Kbegatu, go nonga djapobu.” Go buare Juan y tõ pypyma idjape, Jesu bue buchã djapollãmbu djepe.

![](https://cdn.door43.org/obs/jpg/360px/obs-en-24-08.jpg)

Jesu y tõ pypypabu, emi y puare wẽmbu, Apã Wachu Krei Gatu wẽma bu waruku nonga, edjyma idja llabu. Gobu emi Apã Wachu djawuma ywadji, inama: “Dje rõ cho tay, cho by gatugi. Cho rõ ury gatuma djedji.”

![](https://cdn.door43.org/obs/jpg/360px/obs-en-24-09.jpg)

Apã Wachu inama Juanpe: “Cho Krei Gatu edjywerã emi wapywerã etakrã kbe’e llabu, dje ype tõ pypybu. Go kbe’e rõ Apã Wachu Tay.” Etakrã Apã Wachu rõ ĩ. Juan Jesupe ype tõ pypybu, wenduma Apã Wachu djawu, wechãma Apã Wachu Tay, go rõ Jesu, emi wechãma Apã Wachu Krei Gatu.

_Kiupyre Mateo djawu gatu 3;_

*Marko djawu gatu 1:9-11;                                                            Luka djawu gatu 3:1-23,                                   Biblia parapyrepe*

## 25. Andjãwe buãma Jesupe

https://openbiblestories.org/l/guq/story-25/

![](https://cdn.door43.org/obs/jpg/360px/obs-en-25-01.jpg)

Gobu, Jesu y tõ pypypabu, Krei Gatu Jesupe rama ka irõllãpe. Gope idja bue ullãeche chengypychã tapa krey emi chãwãmbu. Gobu Andjãwe Jesu djãwẽ roma bu emi buãma idjape, kabewã djue idjape, bue buchã djapowã.

![](https://cdn.door43.org/obs/jpg/360px/obs-en-25-02.jpg)

Andjãwe mĩma mundje Jesu ruwa, inama: „Dje Apã Wachu Taybu, djapo kowe ita wywydji wikytã, dje uwã!“

![](https://cdn.door43.org/obs/jpg/360px/obs-en-25-03.jpg)

Jesu djawu pepyma idjape: „Apã Wachu djawu parapyrepe ina: GO WIKYTÃ RÕ ACHE WYWY UBU, EKÕ GATULLÃWERÃ. APÃ WACHU DJAWU ACHE WYWY WENDUBU, EKÕ GATUWERÃ!“

![](https://cdn.door43.org/obs/jpg/360px/obs-en-25-04.jpg)

Gobu Andjãwe rama Jesupe prellambaty ywa puku llabu, emi inama idjape: “Dje Apã Wachu Taybu, wa kua ywype. Parapyrepe rõ ina: APÃ WACHU BUEWERÃ DJA BUETYGI WYWYPE DJEPE KUWẼWÃ, DJE WALLÃWÃ ITA LLABU.”

![](https://cdn.door43.org/obs/jpg/360px/obs-en-25-05.jpg)

Jesu rõ Andjãwepe djawu pepyma, kiuma emi Apã Wachu djawu parapyre, inama: “Apã Wachu djawu parapyrepe go djawuma dja chupa pua wywype: KABUÃEME DJE REKOATYGI APÃ WACHUDJI.”

![](https://cdn.door43.org/obs/jpg/360px/obs-en-25-06.jpg)

Gobu Andjãwe Jesupe inama, wechãmbawã chidja llambaty wywy kowe ywy llabuwa, emi bue gatu wywy go pua. Gobu inama: “Kowegi wywy cho mewerã djepe, dje kmarãmbu cho chã ruwa, emi pre rekobu chodji.”

![](https://cdn.door43.org/obs/jpg/360px/obs-en-25-07.jpg)

Jesu djawu pepyma: “Amaty kua, Andjãwe! Apã Wachu djawu parapyrepe go djawuma dja chupa pua wywype: APÃ WACHU, DJE REKOATYGI ETAKRÃPE GA KMARÃ, IDJA ETAKRÃPE GA MUDJÃ.”

![](https://cdn.door43.org/obs/jpg/360px/obs-en-25-08.jpg)

Jesu wallãma Andjãwe mundjepe, go buare Andjãwe wedjama idjape. Gobu Apã Wachu buetygi ekõma, idjape kuwẽwã.

_Kiupyre Mateo djawu gatu 4:1-11;_

_Marko djawu gatu 1:12-13;_

*Luka djawu gatu 4:1-13, Biblia parapyrepe*

## 26.  Jesu kiuma Apã Wachu djawu

https://openbiblestories.org/l/guq/story-26/

![](https://cdn.door43.org/obs/jpg/360px/obs-en-26-01.jpg)

Gobu Andjãwe mundjepe wallãmbu, Jesu ekõma emi Krei Gatu chidja rupi chupa Galileape, idja ekõawepe. Gobu wata reko go chupa wywy rupi, Apã Wachu djawu kiuwã. Ache wywy djawu gatu reko idjadji.

![](https://cdn.door43.org/obs/jpg/360px/obs-en-26-02.jpg)

Gobu Jesu oma tapy tãrã Nasarepe, idja krumi endawepe. Go bue djapollãndy kreybu ikema o Sinagogape. Gope ĩngi mema idjape Isaia djawu parapyre, godji djawu kiuwã. Gobu Jesu pekama parapyre, emi kiuma ache wywype tãrãllã djawupapĩ gope inawe nonga.

![](https://cdn.door43.org/obs/jpg/360px/obs-en-26-03.jpg)

Jesu inama: “Apã Wachu chope mewe dja Krei, cho kiuwã djawu gatu bue rekollãngi wywype, puiwã bue buchã djapotygi wywype, chãllãngi wywy wechãwã, emi djuei buchãngi wywype puiwã. Kowebu rõ go Rekoatygi praru gatudjiwa ruy.”

![](https://cdn.door43.org/obs/jpg/360px/obs-en-26-04.jpg)

Gobu Jesu wapyma. Ache wywy maĩ gatu reko idjadji. Gogi wywy kuama, go djawu parapyre Jesu inawegi, kiuwe go Mesiadjiwa. Gobu Jesu inama: “Go djawu wywy parapyre pua, cho inawe nonga pendjepe, wẽma kowebu.” Gobu gogi wywy chã opo roma, inama: “Gogi ko Jose tay?”

![](https://cdn.door43.org/obs/jpg/360px/obs-en-26-05.jpg)

Gobu Jesu inama: “Ĩllã profeta bygatupytygi tapy tãrã idja opo endawepe. Go krey wywy rupi profeta Elia ĩmbu, tãrã kudjã prowegi ekõwe Israelpe. Bakyllãmbu rõ brewipychã ruy bychebu, Apã Wachu buellãwe Eliape, kuwẽwã etakrã kudjã prowegi Israel puape. Go buema mondo idjape etakrã kudjã prowegi duwe ekõandy pua endape.”

![](https://cdn.door43.org/obs/jpg/360px/obs-en-26-06.jpg)

Jesu ina wyche: “Go krey wywy rupi profeta Eliseo ĩmbu, tãrã ache eche kaitagi ekõwe Israelpe. Eliseo rõ kuwẽllãwe gogi wywype. Go kuwẽwe etakrã kbe’e Naaman eche kaitagipe. Gogi rõ Israel byllãndygi tõallãngi ymachidjagi.” Ache wywy Jesu inawe wendugi rõ Juda pua wywy. Go buare dja djawu wendubu, prandjã buchã roma ni idjadji.

![](https://cdn.door43.org/obs/jpg/360px/obs-en-26-07.jpg)

Ache wywy Nasare pua nuema mondo Jesupe sinagoga puare, emi rama idjape ywy kuambuku embepe, idjape ity rawe ywype, go manowã. Gobu rõ Jesu wata roma djo ache wywy byche rupi, emi wẽma o tapy tãrã Nasare puare.

![](https://cdn.door43.org/obs/jpg/360px/obs-en-26-08.jpg)

Gobu Jesu wata reko chupa wywy Galilea pua rupi, emi tarã buchã ache ekõma dja endape. Go eruma tarã eche achygipe emi djuei buchãngipe. Go wywy bychepe ĩ emi chãllãngi, watallãngi, pychallãngi, emi djawullãngi. Gobu Jesu kuwẽmba roma gogi wywype.

![](https://cdn.door43.org/obs/jpg/360px/obs-en-26-09.jpg)

Gobu eruma emi Jesu endape tãrã ache krei buchã rekogi. Jesu inambu, krei buchã wywy wẽma o achedjiware, emi puka chidjama: „Dje rõ Apã Wachu Tay!“ Ache wywy chã opo roma, emi pre gatuma Apã Wachupe.

![](https://cdn.door43.org/obs/jpg/360px/obs-en-26-10.jpg)

Gobu Jesu prawoma etakrã mirõ kbe’epe. Gogi pukapyty dja apostol wywy. Go apostol wywy watama o Jesu rupi emi kuama dja kiuwe nonga.

_Kiupyre Mateo djawu gatu 4:12-25;_

_Marko djawu gatu 1:14-15, 35-39;_

*Luka djawu gatu 4:14-30, 38-44,                                         Biblia parapyrepe*

## 27. Djawu Samaria pua praru gatudjiwa

https://openbiblestories.org/l/guq/story-27/

![](https://cdn.door43.org/obs/jpg/360px/obs-en-27-01.jpg)

Etakrã kreybu, etakrã kbe’e Moise parawe kiuatygi ekõma Jesu endape idjape buãwã, inama: “Kiuatygi, bue rõ cho djapowerã, ekõwã ywadji gorawẽ?” Gobu Jesu djawu pepyma: “Bue rõ Apã Wachu djawu parapyrepe ina?”

![](https://cdn.door43.org/obs/jpg/360px/obs-en-27-02.jpg)

Go Moise parawe kiuatygi inama, Apã Wachu djawu parapyrepe go nonga ina: “BY GATU GA REKO DJE REKOATYGI APÃ WACHUPE DJE DJÃECHEDJI, DJE DJÃWÃECHEDJI, DJE CHIDJAECHEDJI, DJE TÕ GATUECHEDJI; EMI BY GATU GA REKO PICHAPE DJE ECHE BY GATUTY NONGA.” Gobu Jesu inama idjape: “Dje djawu gatuma! Go nonga dje djapobu, gorawẽ ekõwerã.”

![](https://cdn.door43.org/obs/jpg/360px/obs-en-27-03.jpg)

Go Moise parawe kiuatygi rõ wechã djue, idja rõ kbe’e kbegatugi, go buare inama: “Awa rõ go cho picha cho by gatuwã?”

![](https://cdn.door43.org/obs/jpg/360px/obs-en-27-04.jpg)

Gobu Jesu djawu pepyma go Moise parawe kiuatygipe kowe djawu nonga rupi: “Etakrã kbe’e Juda pua wẽma o Jerusalem puare, owã Jeriko rekuaty.”

![](https://cdn.door43.org/obs/jpg/360px/obs-en-27-05.jpg)

“Go kbe’e wata obu, tãrãllã narõngi idjape pychyma. Gogi wywy rapama dja bue rekowegi, emi idjape pacho buchãma mano ruwy roma. Gobu myrõma o.”

![](https://cdn.door43.org/obs/jpg/360px/obs-en-27-06.jpg)

“Gobu etakrã pa’i Juda pua watama o go ape rupi. Go Apã Wachu djawu kuatygi wechãmbu go bue matãmbyregipe emi pachopyregipe, oma duwe ape embe rekuaty. Wechã djuellã go kbe’e pachopyregipe, idjape kuwẽ djuellã. Gobu wyro roma djo.”

![](https://cdn.door43.org/obs/jpg/360px/obs-en-27-07.jpg)

“Gobu rõ etakrã Lewi pua ekõma go ape rupi (Go Lewi pua wywy rõ etakrã Israel irõndy Israel pua wywy bychepe. Gogi wywy kuwẽndy pa’i wywype prellambatype). Go Lewi pua watama emi duwe ape embe rekuaty, wechã djuellã go kbe’e pachopyregipe.”

![](https://cdn.door43.org/obs/jpg/360px/obs-en-27-08.jpg)

Duwe kbe’e edjyma o go ape rupi. Go rõ etakrã kbe’e Samaria pua. (Go Samaria pua wywy rõ Israel pua udjawegi ache duwe ekõandy puadji. Go Samaria pua wywy emi Juda pua wywy byllãeche edji.) Go kbe’e Samaria pua rõ wechãmbu go kbe’e Juda puape, chingadjeky roma idjadji. Go buare kuwẽma gogipe, muchã gatuma dja pachopyre wywy.”

![](https://cdn.door43.org/obs/jpg/360px/obs-en-27-09.jpg)

“Gobu go Samaria pua upima ra go kbe’epe idja bepurã iro kryta llabu, rama duwe tapype, gope kuwẽ gatuwã idjadji.”

![](https://cdn.door43.org/obs/jpg/360px/obs-en-27-10.jpg)

“Duwe kreybu, go kbe’e Samaria pua o djuema. Go buare mema go tapy warõandygipe buta, emi inama idjape: Kuwẽ gatu ga reko idjadji. Go buta rõ ichakrã djepe idjape kuwẽwã, cho mewerã wyche buta, cho ekõmbu.”

![](https://cdn.door43.org/obs/jpg/360px/obs-en-27-11.jpg)

Gobu Jesu inama go Moise parawe kiuatygipe: “Bue rõ dje kua kowedji? Awa rõ go brewipychã kbe’e bychepe go picha kbe’e pachopyregi puarã?” Gogi djawu pepyma: “Go rõ go kbe’e idjadji chingadjekyaregi.” Gobu Jesu inama idjape: “Amaty kua go nonga djapowã emi.”

_Kiupyre Luka djawu gatu 10:25-37,_

*Biblia parapyrepe*

## 28. Kbuchuwe bue tãrã rekogi

https://openbiblestories.org/l/guq/story-28/

![](https://cdn.door43.org/obs/jpg/360px/obs-en-28-01.jpg)

Duwe kreybu, etakrã kbuchuwe bue tãrã rekogi, emi Apã Wachu djawu parapyre kua gatugi ekõma Jesu endape, inama: „Kiuatygi kbegatugi, bue rõ cho djapowerã ekõawã gorãwe ywadji?“ Jesu inama idjape: „Bue buare dje chope ina, cho rõ kbegatu? Ĩ etakrãeche kbegatugi, go rõ Apã Wachu. Dje rõ ekõ djuebu gorãwe ywadji, djapo ga mondo Apã Wachu djawu parapyrepe inawe nonga.“

![](https://cdn.door43.org/obs/jpg/360px/obs-en-28-02.jpg)

“Bue rõ cho djapowerã?” inama. Gobu Jesu djawu pepyma: “Picha djukaeme. Picha brekodji pokoeme. Picha llapo narõeme. Kadjawueme pichadji. By gatu ga reko dje apãpe, emi dje ai’ipe. By gatu ga reko emi pichadji, dje by gatuty nonga dje echedji.”

![](https://cdn.door43.org/obs/jpg/360px/obs-en-28-03.jpg)

Go kbuchuwe rõ inama: “Kowe djawu parapyre cho djapopawe cho krumidjiwe. Bue rõ cho djapowerã wyche, gorãwe cho ekõwã krãpĩllãwã ywadji?” Gobu Jesu maĩ reko idjadji, emi by gatu idjape.

![](https://cdn.door43.org/obs/jpg/360px/obs-en-28-04.jpg)

Gobu Jesu inama: “Bue wywy dje djapo gatu djuebu, amaty kua, dje bue rekopawegi membawã butadji. Gobu go buta me ga mondo bue rekollãngipe. Go nonga dje rekowerã bue biribuchãngi ywadji. Gobu edjo, cho kuere rupi mudjãwã.”

![](https://cdn.door43.org/obs/jpg/360px/obs-en-28-05.jpg)

Go kbuchuwe Jesu inawe wendubu, uryllã buchã roma, dja rõ bue tãrã rekodjiwa, emi wedja djuellã bue wywy idja rekogi. Gobu go djerema o, emi wedjama Jesupe.

![](https://cdn.door43.org/obs/jpg/360px/obs-en-28-06.jpg)

Gobu Jesu inama dja kuere mudjãndygi wywype: “Djuei buchã, bue tãrã rekogi ikẽwã Apã Wachu chidja llambatype. Djueillã bepurã wachu ikẽwã pidju djãwã rupi. Picha bue tãrã rekogi rõ djuei buchã, Apã Wachu chidja llambatype ikẽwã.

![](https://cdn.door43.org/obs/jpg/360px/obs-en-28-07.jpg)

Go Jesu kuere mudjãndygi wywy wendubu Jesu djawu, chã opo roma, emi inama: “Go nongabu, awa rõ kuwẽmbyrã, ĩwã Apã Wachu chidja llambatype?”

![](https://cdn.door43.org/obs/jpg/360px/obs-en-28-08.jpg)

Gobu Jesu maĩ reko dja kuere mudjãndygi wywydji, emi inama: “Ache wywype rõ djuei buchã idjape kuwẽwã, Apã Wachupe rõ djueillã. Go rõ bue wywy djapo kua gatu.”

![](https://cdn.door43.org/obs/jpg/360px/obs-en-28-09.jpg)

Gobu Pedro inama Jesupe: “Ore wedjapawe bue wywy ore llapo, dje kuere rupi mudjãwã. Bue rõ orepe membyrã?”

![](https://cdn.door43.org/obs/jpg/360px/obs-en-28-10.jpg)

Gobu Jesu djawu pepyma: “Ache wywy dja tapy wedjagi, dja pawe wywype wedjagi emi, dja apã emi dja ai’ipe wedjagi, dja tay emi dja tay kudjãpe wedjagi, dja bue rekowe wedjagi emi, cho kuere rupi mudjã buare, rekowerã bue tãrã etakrã tapa tapadji (100), gobu ekõwerã ywadji gorãwe. Go kowebu chidja rekogi gobu chidjallãwerã. Go kowebu rõ chidja rekollãngi gobu chidjawerã.”

_Kiupyre Mateo djawu gatu 19:16-30;_

_Marko djawu gatu 10:17-31;_

*Luka djawu gatu 18:18-30,                                                          Biblia parapyrepe*

## 29. Go kbe’e buepytygi chingadjekyllãndjiwa

https://openbiblestories.org/l/guq/story-29/

![](https://cdn.door43.org/obs/jpg/360px/obs-en-29-01.jpg)

Etakrã kreybu Pedro inama Jesupe: „Kiuatygi, mawe nongabu cho kuallãwerã cho pawe bue buchã djapobu chodji? Dypetãmbu ko cho kuallãwerã?” Jesu inama: “Go nongallã! Dje kuallãwerã dja bue buchã djapowe djypetã tapa djypetãmbu emi.” Kowegi djawubu, Jesu ina djue, nandje kuallãwerã bue buchã djapowe kreybu wywy. Gobu Jesu kiuma idjape djawu nonga.

![](https://cdn.door43.org/obs/jpg/360px/obs-en-29-02.jpg)

Jesu inama: “Apã Wachu chidja llambaty rõ ymachidja wachu nonga, idja buepytygi wywype puka, gogi wywy idjape mewã emi go buta membapyregi. Go pukama etakrã idja buepytygi, go dja buta tãrã mẽwegipe, 200.000 ruy bitawedjiwa nonga.”

![](https://cdn.door43.org/obs/jpg/360px/obs-en-29-03.jpg)

„Go buepytygi bue rekollã idjape pepywã go buta tãrã buchã idjape membyregi. Go buare ymachidjagi inama: Me ga mondo go kbe’epe butadji, dja brekope emi dja tay wywype rekopytygi nonga. Go nonga ĩwerã, go dja buta tãrã membapyregi pepywã emi.”

![](https://cdn.door43.org/obs/jpg/360px/obs-en-29-04.jpg)

“Go buepytygi kmarãma ymachidjagi chã ruwa, emi inama: Chingadjeky gami chodji, cho pepypawerã djepe go buta dje chope mewegi. Go ymachidjagi chingadjeky roma buepytygidji, go buare kuallãma go buta idjape membawegi. Gobu wedjama idjape owã.”

![](https://cdn.door43.org/obs/jpg/360px/obs-en-29-05.jpg)

“Go buepytygi rõ wẽ obu ymachidjagi llambaty puare, doroma etakrã dja buetygipe. Gogipe mewe buta tãrãllã chengypychã djachy bitawedjiwa nonga. Go buepytygi pychyma duwe kbe’epe, inama idjape: “Chope memba go buta cho djepe mewegi!”

![](https://cdn.door43.org/obs/jpg/360px/obs-en-29-06.jpg)

“Go buetygi kmarã roma dja chã ruwa emi inama: Chingadjeky gami chodji, cho pepypawerã djepe go buta dje chope mewegi. Go kbe’e rõ chingadjeky djuellã, buema mondo dja buetygipe tapy djãwãllãpe, go buta membyregi membawã emi idjape.”

![](https://cdn.door43.org/obs/jpg/360px/obs-en-29-07.jpg)

“Go duwe ymachidja buepytygi wywy wechãma go kbe’e djapowe, gobu uryllãma. Oma ymachidjagi endape, idjape kiupawã.”

![](https://cdn.door43.org/obs/jpg/360px/obs-en-29-08.jpg)

“Go ymachidjagi pukama mondo go buepytygipe, inama idjape: Dje rõ buepyty djembigi! Cho kuallãwe buta tãrã buchã djepe cho mewegi, dje chope puka omatã buare. Dje rõ djapo rawe go nonga emi. Go ymachidjagi rõ prandjã buchã roma, go buare buema mondo buepyty djembigipe tapy djãwãllãpe, buta membyregi pepypawã emi.”

![](https://cdn.door43.org/obs/jpg/360px/obs-en-29-09.jpg)

Gobu Jesu inama: “Go nonga cho Apã ywadjiwa djapowerã pendje wywydji, pendje kuallãmbu pendje pawe bue buchã djapowe pendje djãechedjiwe.”

_Kiupyre Mateo djawu gatu 18:21-35,_

*Biblia parapyrepe*

## 30. Jesu mema bue uwã ipo wachu (5.000) achepe

https://openbiblestories.org/l/guq/story-30/

![](https://cdn.door43.org/obs/jpg/360px/obs-en-30-01.jpg)

Jesu buema mondo dja kuere mudjãndygi wywype, djawu kiu rekowã achepe tãrã chupa rupi. Gogi wywy ekõmbu emi Jesu endape, kiuma dja bue djapowe. Gobu Jesu inama gogi wywype, owã idjadji duwe rekuaty, ĩ gatuwã ache wywy ĩllãpe, owã duwe ypa embe rekuaty, gope wapywã. Go buare gogi wywy djopima wyrakarape duwe ypa embe rekuaty owã.

![](https://cdn.door43.org/obs/jpg/360px/obs-en-30-02.jpg)

Tãrã ache rõ wechãma, manonga Jesu dja kuere mudjãndygi wywydji djopiwe wyrakarape. Go ache wywy myrõma o ypa embe rupi, ĩwã duwe ypa embepe gogi wywy ekõ nondje. Gobu Jesu dja kuere mudjãndygidji wẽmbu, ache wywy noã wachu roma gope, warõmbama idja ekõwãpe.

![](https://cdn.door43.org/obs/jpg/360px/obs-en-30-03.jpg)

Gope noãma tãrãeche ipo wachu (5.000) kbe’edji, gobu buãllãmbyre wyche kudjã emi krumi wywy. Jesu chingadjeky reko ache wywydji. Jesu wechãma ache wywy rõ wachupurã nonga, dja warõandygi rekollã. Go buare djawu kiu reko gogi wywype, emi kuwẽ eche achygipe gogi wywy bychepe.

![](https://cdn.door43.org/obs/jpg/360px/obs-en-30-04.jpg)

Krey wychobu Jesu kuere mudjãndygi wywy inama idjape: “Chãwãwerã, emi ĩllã kowepe tapy tãrã. Buepa mondo ache wywype, bue uwã kuarawã.”

![](https://cdn.door43.org/obs/jpg/360px/obs-en-30-05.jpg)

Gobu Jesu inama dja kuere mudjãndygi wywype: “Pendje me ga mondo, gogi wywy uwã!” Gogi rõ djawu pepyma: “Manonga ore djapowerã go nonga? Kowepe ore reko wyche ipo wikytã emi mirõ pira.”

![](https://cdn.door43.org/obs/jpg/360px/obs-en-30-06.jpg)

Gobu Jesu inama dja kuere mudjãndygi wywype, ache wywy wapywã djõrã wywy rupi, ipo tapa ache kowepe, ipo tapa ache gope, ipo tapa ache duwe rekuaty wywy.

![](https://cdn.door43.org/obs/jpg/360px/obs-en-30-07.jpg)

Gobu Jesu kawãma dja ipope go ipo wikytã emi go mirõ pira, gobu maĩma ywadji, emi ury gatu mema Apã Wachupe go bue uwãndjiwa.

![](https://cdn.door43.org/obs/jpg/360px/obs-en-30-08.jpg)

Gobu Jesu bowoma wikytã emi pira. Gobu mema wikytã emi pira idja kuere mudjãndygi wywype, ache wywype mewã. Dja kuere mudjãndygi wywy me ruwiallã, go wikytã rõ krãpĩbeche. Ache wywy upama, gobu epoma.

![](https://cdn.door43.org/obs/jpg/360px/obs-en-30-09.jpg)

Gobu rõ Jesu kuere mudjãndygi wywy noãmbama wikytã ullãmbyregi, go nonga embepamami etakrã mirõ nokõ! Go bakupyre wywy wẽmbawe ipo wikytãndji emi mirõ piradji.

*Kiupyre Mateo djawu gatu 14:13-21;       Marko djawu gatu 6:31-44;                      Luka djawu gatu 9:10-17;                                   Juan djawu gatu 6:5-15,                         Biblia parapyrepe*

## 31. Jesu watama y llabu

https://openbiblestories.org/l/guq/story-31/

![](https://cdn.door43.org/obs/jpg/360px/obs-en-31-01.jpg)

Gobu Jesu inama dja kuere mudjãndygi wywype, djopiwã wyrakarape emi owã duwe ypa embe rekuaty, go buepabu ache wywype. Jesu buepabu gogi wywype, djopima djo etakrã kuãmbuku llabu krandobuãwã. Jesu ĩma gope idja etakrãpe, emi chãwã mbuku rawẽ krandobuã reko Apã Wachupe.

![](https://cdn.door43.org/obs/jpg/360px/obs-en-31-02.jpg)

Gobu rõ Jesu kuere mudjãndygi wywy paydjã rekobu djepe wyrakara, chãwã wachubu ĩ wyche ypa bychepe. Gogi wywy paydjã reko djuei buchãpe, wytu chidja ekõ buare idja lluãwã rekuaty.

![](https://cdn.door43.org/obs/jpg/360px/obs-en-31-03.jpg)

Gobu Jesu krandobuãmbabu, watama o dja kuere mudjãndygi wywy rekuaty. Go watama o y llabu, ypa wachu rupi wyrakara lluãwã rekuaty!

![](https://cdn.door43.org/obs/jpg/360px/obs-en-31-04.jpg)

Jesu kuere mudjãndygi wywy krymballã roma, Jesupe wechãmbu. Gogi wywy djã djawuma, wechãma etakrã krei buchã. Jesu kuama, gogi wywy krymballã, go buare pukama, emi inama: „Krymballãeme. Guei cho!“

![](https://cdn.door43.org/obs/jpg/360px/obs-en-31-05.jpg)

Gobu Pedro inama Jesupe: „Kiuatygi, gueibu dje, puka chope cho owã y llabu dje rekuaty.” Jesu inama Pedrope: “Edjo!”

![](https://cdn.door43.org/obs/jpg/360px/obs-en-31-06.jpg)

Gobu Pedro edjyma o wyrakara puare emi buãma watawã y llabu Jesu rekuaty. Gobu rõ idja wata obu, maĩllãma Jesudji, gobu wechãma y prandjã emi wytu chidja.

![](https://cdn.door43.org/obs/jpg/360px/obs-en-31-07.jpg)

Gobu Pedro krymballãma emi ype tõwe roma djo. Gobu puka chidjama: ”Cho Rekoatygi, chope kuwẽ gami!” Gobu bitallãpe Jesu ekõma idja djãwẽ, emi kawãma idja ipodji. Gobu inama Pedrope: “Dje rõ kbe’e kua gatullãngi. Bue buare rõ dje djã djonomballã wyche Apã Wachu ipope?”

![](https://cdn.door43.org/obs/jpg/360px/obs-en-31-08.jpg)

Gobu Pedro emi Jesu djopibu wyrakarape, bitallã roma wytu chidja kadjãmbama emi y prandjãllãma. Gobu Jesu kuere mudjãndygi wywy chã opopa roma, emi kmarãma idja chã ruwa, inama: “Kainallãpe, dje rõ Apã Wachu Tay.”

_Kiupyre Mateo djawu gatu 14:22-33;_

_Marko djawu gatu 6:45-52;_

*Juan djawu gatu 6:16-21, Biblia parapyrepe*

## 32. Jesu kuwẽma etakrã kbe’e krei buchã rekogipe, emi etakrã kudjã achygipe

https://openbiblestories.org/l/guq/story-32/

![](https://cdn.door43.org/obs/jpg/360px/obs-en-32-01.jpg)

Etakrã kreybu Jesu emi dja kuere mudjãndygi wywy wachama o wyrakarape ypa wachu rupi go gadara pua ekõandy rekuaty.

![](https://cdn.door43.org/obs/jpg/360px/obs-en-32-02.jpg)

Ypa ruwa wẽmbu, etakrã kbe’e krei buchã rekogi myrõma bu Jesu rekuaty.

![](https://cdn.door43.org/obs/jpg/360px/obs-en-32-03.jpg)

Go kbe’e rõ chidja buchã, go buare ĩllã duwe ache idjape pychywã. Duwegi wywy muchãmbabu djepe dja ipodji emi dja pychãndji tykõ wachupe, go rõ mondopa roma mondo tykõ wywy.

![](https://cdn.door43.org/obs/jpg/360px/obs-en-32-04.jpg)

Go kbe’e rõ ekõandy kuarewe wywy rupi, idja rõ puka chidjaty kreybu emi chãwãmbu. Idja rõ tyru pypyllãndy, emi tãrãma dja eche bowo ita ĩmbipe.

![](https://cdn.door43.org/obs/jpg/360px/obs-en-32-05.jpg)

Go kbe’e ekõmbu Jesu endape, kmarã idja chã ruwa. Jesu inama krei buchãpe: „Wẽ kua go kbe’edjiware!“

![](https://cdn.door43.org/obs/jpg/360px/obs-en-32-06.jpg)

Go kbe’e krei buchã rekogi puka chidjama: „Bue rõ dje reko chodji Jesu, Apã Wachu ywadjiwaty Tay? Cho puka djepe, chope reko buchãeme!“ Gobu Jesu inama krei buchãpe: „Mawe nonga dje bykuapyre?“ Go djawu pepyma: „Cho bykuapyre rõ Legion, ore rõ tãrã buchãndjiwa.“ (Etakrã „legion“ rõ tãrã buchã tõallãngi Roma pua noãndy wachu, go rõ wachapa wachu 6.000 kbe’e.)

![](https://cdn.door43.org/obs/jpg/360px/obs-en-32-07.jpg)

Go krei buchã wywy puka omatã Jesupe: „Orepe djapieme kowe ekõandy puare!“ Gope ĩwe chachupurã tãrã bue u rekogi kuã wachu djãwẽ. Go buare krei buchã wywy pukama Jesupe: „Ore puka omatã, kbegatu, dje orepe buebu ikẽwã chachupurã djãwãpe!“ Gobu Jesu ina: „Amaty kua chachupurã djãwãpe!“

![](https://cdn.door43.org/obs/jpg/360px/obs-en-32-08.jpg)

Gobu go krei buchã wywy wẽma djo go kbe’e puare, emi ikẽmbama chachupurã djãwãpe. Go chachupurã wywy myrõmba roma djo ypa rekuaty, gobu wapama o ype, go nonga manombama. Go chachupurã wywy ĩwe mirõ wachu (2.000) nonga we’e.

![](https://cdn.door43.org/obs/jpg/360px/obs-en-32-09.jpg)

Go chachupurã warõandygi wywy wechãmbu, bue rõ ekõ gope, myrõma o tapy tãrãpe, Jesu djapowe kiuwã duwegi wywype. Go tapy tãrã pua wywy ekõma wechãwã go kbe’e krei buchã rekowegipe. Okryrape wapy ni, tyru pypyma, emi bue djapoma tõ gatupe.

![](https://cdn.door43.org/obs/jpg/360px/obs-en-32-10.jpg)

Ache wywy krymballã buchã, emi puka omatã Jesupe, owã duwe rekuaty. Go buare Jesu djopima wyrakara djãwãpe, duwe rekuaty owã. Gobu go kbe’e krei buchã rekowegi pukama Jesupe erupi owã.

![](https://cdn.door43.org/obs/jpg/360px/obs-en-32-11.jpg)

Jesu rõ inama idjape: „Go nongallã! Cho ina djepe, owã dje tapype, emi kiupa ga mondo dje bygatutygi emi dje tapy pua wywype, bue wywy Apã Wachu djapowe djedji, emi mawe nonga Go chingadjeky reko djedji.”

![](https://cdn.door43.org/obs/jpg/360px/obs-en-32-12.jpg)

Go buare go kbe’e oma, duwegi wywype kiuwã bue wywy Jesu idjape djapowe. Ache wywy dja kiuwe wendubu, chã opo roma.

![](https://cdn.door43.org/obs/jpg/360px/obs-en-32-13.jpg)

Jesu oma emi duwe ypa ruwa. Gope wẽmbu, tãrã buchã ache noã wachuma idja djãwẽ, emi eche djuwy reko idjape. Go pua wywy bychepe ĩma etakrã kudjã djuei buchãpe endawe. Etakrã mirõ ruybu dja pirã kandjãllãndy. Gogi membama dja buta achy kuwẽandygi wywype, gogi idjape kuwẽwã. Go nongabu djepe achy buchãeche roma djo.

![](https://cdn.door43.org/obs/jpg/360px/obs-en-32-14.jpg)

Go wenduwe, Jesu tãrã kuwẽare eche achygipe, gobu idja djã djawuma: “Cho kuagatuma, cho pokobu Jesu tyrudji, cho eche gatuwerã emi!” Go buare go ekõma Jesu pyche rekuaty, dja tyrudji pokowã. Jesu tyru pokobu, idja pirã wachu kandjã roma djo!

![](https://cdn.door43.org/obs/jpg/360px/obs-en-32-15.jpg)

Gobu Jesu kuama dja chidja wẽma o idjadji. Go buare maĩma idja pychety emi inama: “Awa rõ chodji pokoare?” Gobu dja kuere mudjãndygi wywy djawu pepyma: “Ache tãrã ĩma dje ruwa, emi djepe biri reko. Bue buare dje kua djue, awa rõ djepe pokoare?”

![](https://cdn.door43.org/obs/jpg/360px/obs-en-32-16.jpg)

Go kudjã ryry buchã emi kmarãma Jesu chã ruwa krymballãpe. Gobu kiupama idjape idja djapowe, emi manonga idja eche gatuma. Gobu Jesu inama: “Dje djã djono buare Apã Wachu ipope, dje eche achy kuwẽmbyre. Amaty kua okryra gatupe.”

_Kiupyre Mateo djawu gatu 8:28-34; 9:20-22; Marko djawu gatu 5:1-20; 5:24b-34;_

*Luka djawu gatu 8:26-39; 8:42b-48,                           Biblia parapyrepe*

## 33. Go bue ã djapiatygidjiwa djawu

https://openbiblestories.org/l/guq/story-33/

![](https://cdn.door43.org/obs/jpg/360px/obs-en-33-01.jpg)

Etakrã kreybu Jesu kiu reko tãrã achepe ypa embe djãwẽ. Tãrã buchã ache ekõma, go buare Jesu djopima wyrakarape, ĩwã rypy prowi ypa embedji. Go nonga ĩma, ache wywype djawuwã. Jesu wapy roma wyrakarape, gobu bue kiu reko ache wywype.

![](https://cdn.door43.org/obs/jpg/360px/obs-en-33-02.jpg)

Go nonga Jesu gogi wywype kiu reko: „Etakrã kbe’e ywy tyrõandygi oma bue ã’ã djapiwã. Kbe’e bue ã’ã djapi rekobu dja ipo puare, tãrãllã ã’ã wama ape rupi. Gobu kuyra wywy ekõma, emi upama go ã’ã wywy.“

![](https://cdn.door43.org/obs/jpg/360px/obs-en-33-03.jpg)

„Duwe ã’ã wama ita tãrã bychepe, gope ywy gatullã. Go ã’ã ita bychepe wawegi wẽ bitallã, idja apo rõ pukullã ywype. Go krey wẽmbu emi krey chã akubu, go lly‘y piandjã roma djo gobu manoma.“

![](https://cdn.door43.org/obs/jpg/360px/obs-en-33-04.jpg)

“Duwe ã’ã wama djupikã bychepe. Go ã’ã wẽmbu, djupikã pechepa roma. Go buare go bue ã’ã wawegi djupikã bychepe wẽmbu djepe, llallãma.”

![](https://cdn.door43.org/obs/jpg/360px/obs-en-33-05.jpg)

Duwe ã’ã wama ywy gatupe. Go bue ã’ã wẽ gatu roma djo, gobu lla gatuma emi. Etakrã ã pechepyregidji wẽ roma etakrã tapa tapa lla’a. Duwe ãndji wẽ roma wachapa tapa lla’a. Duwe ãndji wẽ roma brewipychã tapa lla’a. Go pycha rekogi, wendu pyry ga mondo!”

![](https://cdn.door43.org/obs/jpg/360px/obs-en-33-06.jpg)

Go Jesu kuere mudjãndygi wywype djueima, go djawu nonga kuawã. Go buare Jesu kiu gatu reko gogi wywype. “Go bue ã’ã go rõ Apã Wachu djawu. Go ape go rõ ache wenduatygi Apã Wachu djawu. Gobu rõ kua gatullã bue rõ inambyty, emi Andjãwe matãma go djawu gatu dja djã puare.”

![](https://cdn.door43.org/obs/jpg/360px/obs-en-33-07.jpg)

“Go ywy ita tãrã go rõ ache ury gatupe wenduatygi Apã Wachu djawu. Go ekõmbu djuei buchã, emi idjape pachobu Apã Wachu djawu wendu buare, mudjã djuellãma Apã Wachu kuere rupi.”

![](https://cdn.door43.org/obs/jpg/360px/obs-en-33-08.jpg)

"Go ywy djupikã tãrãpe go rõ ache Apã Wachu djawu wenduatygi. Gobu rõ tãrã krey wachabu, chingaruwype ekõmbu, emi idja bue gatu tãrã reko djuedjiwa, bue kowe ywy puagidji ury djue emi. Go buare byllãma Apã Wachupe. Go nonga go djawu gatu idja wenduwegidji wẽllãma lla’a.”

![](https://cdn.door43.org/obs/jpg/360px/obs-en-33-09.jpg)

"Go ywy gatu rõ go rõ ache wendu gatugi Apã Wachu djawu, emi kuama godji, gobu rekoma lla’a.”

*Kiupyre Mateo djawu gatu 13:1-8, 18-23; Marko djawu gatu 4:1-8, 13-20;               Luka djawu gatu 8:4-15,                                             Biblia parapyrepe*

## 34. Jesu kiuma duwe djawu nonga

https://openbiblestories.org/l/guq/story-34/

![](https://cdn.door43.org/obs/jpg/360px/obs-en-34-01.jpg)

Jesu kiuma duwe djawu nonga tãrã Apã Wachu chidja llambatydjiwa. Go inama: „Go Apã Wachu chidja llambaty go rõ motasa ã’ã nonga, etakrã ache pechewe dja ywype. Pendje kuama go motasa ã’ã ichakrãeche duwe ã’ã wywydji.“

![](https://cdn.door43.org/obs/jpg/360px/obs-en-34-02.jpg)

„ Go motasa ã’ã yma rabu rõ, neina wachueche duwe wyra wywydji. Go neina wachu buare, kuyra wywy ekõma, djapowã dja aity go wyra akãndji.”

![](https://cdn.door43.org/obs/jpg/360px/obs-en-34-03.jpg)

Gobu Jesu kiu reko duwe djawu nonga: “Go Apã Wachu chidja llambaty go rõ chouatygi nonga, etakrã kudjã djonoma tãrã trigo kuidji choupawã.”

![](https://cdn.door43.org/obs/jpg/360px/obs-en-34-04.jpg)

“Gobu emi Apã Wachu chidja llambaty go rõ bue gatu biri buchãngi nonga, etakrã kbe’e djemiwe ywype. Duwe kbe’e djuma go bue gatu biri buchãngi, gobu pechema emi. Go kbe’e ury gatudjiwa, oma butadji mewã idja bue wywy rekogi. Gobu go butadji kawãma go ywy.”

![](https://cdn.door43.org/obs/jpg/360px/obs-en-34-05.jpg)

“Go Apã Wachu chidja llambaty go rõ emi perla kbegatueche, biri buchãngi nonga. Etakrã kbe’e perla kawãndygi go djubu, mẽma butadji dja bue wywy rekogi. Gobu go butadji kawãma go perla.”

![](https://cdn.door43.org/obs/jpg/360px/obs-en-34-06.jpg)

Gobu Jesu kiuma djawu nonga tãrãllã achepe, idja djã djawu rekogi, dja bue gatu djapoty rupi ikẽwerã Apã Wachu chidja llambatype. Gogi emi byllã reko duwegi wywype. Jesu inama: “Mirõ kbe’e oma prellambatype krandobuãwã. Etakrã kbe’e go rõ buta matãndygi, duwegi rõ pa’i ymachidjagi.”

![](https://cdn.door43.org/obs/jpg/360px/obs-en-34-07.jpg)

“Go pa’i ymachidjagi krandobuãma go nonga: Cho ury gatu mema djepe, Apã Wachu, cho rõ bue buchã djapollãndy duwegi wywy nonga, go narõndygi wywy nonga, ache djãwã buchãngi nonga, emi picha breko pokogi nonga, gobu emi go kbe’e buta matãndygi nonga.”

![](https://cdn.door43.org/obs/jpg/360px/obs-en-34-08.jpg)

“Cho bue ullã mirõ kreybu djypetã krey tãrãmbu, buta emi bue wywy chope membyregidji cho mendy djepe go diemo.”

![](https://cdn.door43.org/obs/jpg/360px/obs-en-34-09.jpg)

“Go kbe’e buta matãndygi rõ ĩma rypy go pa’i ymachidjagidji, emi maĩ djuellã ywadji. Go endawepe idja ipope pachoma idja chape emi pukama: Apã Wachu, chingadjeky ga reko chodji, cho rõ bue buchã djapotygi.”

![](https://cdn.door43.org/obs/jpg/360px/obs-en-34-10.jpg)

Gobu Jesu inama: “Cho kainallã pendjepe, Apã Wachu wendu gatu go buta matãndygi pukabu emi kuwẽma idjape. Gobu uryllã go pa’i ymachidjagi pukawedji. Apã Wachu chidja mẽllãwerã ache kachidja buãngipe, emi mewerã ache praru gatugipe etakrã chidja gatuwã.”

_Kiupyre Mateo djawu gatu 13:31-33,44-46; Marko djawu gatu 4:30-32;_

_Luka djawu gatu 13:18-21; 18:9-14,_

*Biblia parapyrepe*

## 35. Tupurã praru gatugidjiwa djawu

https://openbiblestories.org/l/guq/story-35/

![](https://cdn.door43.org/obs/jpg/360px/obs-en-35-01.jpg)

Etakrã kreybu Jesu kiu reko tãrã kbe’e buta matãndygipe, emi duwe bue buchã djapotygipe. Gogi wywy noãwe idja djawu wenduwã.

![](https://cdn.door43.org/obs/jpg/360px/obs-en-35-02.jpg)

Tãrãllã pa’i ymachidjagi ĩma emi gope. Gogi wywy wechãma, manonga Jesu ekõ gatu bue buchã djapoatygi bychepe. Gobu djawu buchãma Jesudji. Go buare Jesu kiuma gogi wywype djawu nonga:

![](https://cdn.door43.org/obs/jpg/360px/obs-en-35-03.jpg)

„Etakrã kbe’e rekoma mirõ tay. Go pytawegi inama idja apãpe: Cho apã! Chope me gami dje bue rekogidji cho llaporã kowebu. Go buare dja apã bowoma dja bue rekogi wywy, dja mirõ taype mewã.”

![](https://cdn.door43.org/obs/jpg/360px/obs-en-35-04.jpg)

“Gobu go tay tywypurãngi rapama bue wywy rekogi emi oma budjakrãpe. Gope bue buchã djapo rekobu, krãpĩma dja buta tãrã rekowegi.”

![](https://cdn.door43.org/obs/jpg/360px/obs-en-35-05.jpg)

“Idja buta rekollãmbu, bue uwã ĩllãechema go ekõandype tay pytawegi o endawepe. Gobu idja rekollãma buta, bue upyrã kawãwã. Go buare kuara reko, bue djapowã, gobu duwegi idjape buema, mewã bakupyre chachupurãpe. Djuei buchãpe ekõmbu, emi llellã buchãmbu, idja u djuema chachupurã utygi.”

![](https://cdn.door43.org/obs/jpg/360px/obs-en-35-06.jpg)

“Krãpĩpe go tay pytawegi inama idja etakrãpe: Bue rõ cho djapo kowepe? Cho apã ywy tyrõandygi wywy tãrã reko bakupyre. Cho rõ kowepe manowerã llellã buchãndjiwa. Cho owerã emi cho apã endape, gobu cho pukawerã idjape, cho ekõwã etakrã dja ywy tyrõandygi nonga.”

![](https://cdn.door43.org/obs/jpg/360px/obs-en-35-07.jpg)

“Go nonga go tay pytawegi oma ape rupi dja apã tapy rekuaty. Go buchakrãpe wyche ĩmbu, idja apã wechãma idjape emi chingadjekyma idjadji. Gobu myrõma o idja tay rekuaty, eche djuwyma idjape emi cheypy pychema.”

![](https://cdn.door43.org/obs/jpg/360px/obs-en-35-08.jpg)

“Go tay inama: Cho apã, cho djãpãma Apã Wachu chã ruwa, dje chã ruwa emi. Cho rõ kbegatullãma, dje pukawã chope dje tay.”

![](https://cdn.door43.org/obs/jpg/360px/obs-en-35-09.jpg)

“Dja apã rõ inama etakrã dja buepytygipe: Wewe kua, eruwã tyru kbegatuechegi, cho taydji pypywã. Djono emi dja ipodji ipo beta, pypy emi dja pychãndji pychãmbire. Gobu pycho ga mondo achĩpurã memby kyra gatugi, nandje ury gatuwã. Cho tay rõ manowe djepe, kowebu ekõ wyche. Gogi rõ kandjãwe, kowebu djupyre!”

![](https://cdn.door43.org/obs/jpg/360px/obs-en-35-10.jpg)

“Go nonga ache wywy go pua ury gatupama. Gobu go kbe’e tay dorogi ywy tyrõmbabu, ekõma dja tapype. Go wendubu pre’e, emi pychã pambu reko, idja djã djawuma, buedjiwa rõ kowe.”

![](https://cdn.door43.org/obs/jpg/360px/obs-en-35-11.jpg)

“Gobu go tay dorogi wendubu, duwegi wywy ury gatu ekõ, dja pawe wẽ buare emi idja tapype, prandjã buchã roma, emi ikẽ djuellã tapy djãwãpe. Gobu dja apã wẽma o tokape, emi pukama idjape, ikẽwã emi urywã edji. Gogi rõ ikẽ djuellã.”

![](https://cdn.door43.org/obs/jpg/360px/obs-en-35-12.jpg)

“Go tay dorogi inama dja apãpe: Ruy tãrãma cho bue bitaty dje puarã. Dje djawu cho wendu gatuty. Dje rõ chope mellãechema bechepe memby, cho urywã cho bygatutygi wywydji. Go dje tay rõ kamembawe buta, bue buchã djapo rekowã. Go ekõmbu rõ, dje djukama achĩpurã memby kyra gatugi idja puarã!”

![](https://cdn.door43.org/obs/jpg/360px/obs-en-35-13.jpg)

“Dja apã djawu pepyma: Cho tay, dje rõ cho djãwẽwaty, bue wywy cho rekogi rõ dje llapo wywy emi. Kbegatu rõ, nandje ury gatu, dje pawe rõ manowe djepe, ekõ wyche kowebu. Gogi kandjãwe djepe, kowebu djupyre!”

_Kiupyre Luka djawu gatu 15:11-32,_

*Biblia parapyrepe*

## 36. Jesu eche mimbi duwe nonga roma

https://openbiblestories.org/l/guq/story-36/

![](https://cdn.door43.org/obs/jpg/360px/obs-en-36-01.jpg)

Etakrã kreybu Jesu rama idjadji brewipychã dja kuere mudjãndygi, go rõ Pedro, Santiago emi Juan. (Go Jesu kuere mudjãndygi Juan go rõ Jesupe y tõ pypyllãregi.) Gogi wywy djopima kuãmbuku llabu, krandobuãwã.

![](https://cdn.door43.org/obs/jpg/360px/obs-en-36-02.jpg)

Go Jesu krandobuãmbu, dja chã mimbi gatu roma krey nonga, emi dja tyru idju gatu roma djo bype gatudjiwa, idju gatueche ĩmbeche picha go nonga djapowã kowe ywype.

![](https://cdn.door43.org/obs/jpg/360px/obs-en-36-03.jpg)

Gobu Moise emi profeta Elia wẽma bu. Go mirõ kbe’e ekõawe kowe ywype tãrã buchã ruybu, kowegi wẽ nondjebu. Go mirõngi djawu reko Jesudji, mawe nonga idja manowerã Jerusalempe.

![](https://cdn.door43.org/obs/jpg/360px/obs-en-36-04.jpg)

Moise emi Elia Jesudji djawu rekobu, Pedro inama Jesupe: “Kbegatu nandje ĩmbu kowepe. Dje inambu, ore djapowerã brewipychã tapy djõrãndji, etakrã dje endarã, duwe Moise endarã, duwe rõ Elia endarã emi.” Pedro kuallã, bue rõ idja inawe.

![](https://cdn.door43.org/obs/jpg/360px/obs-en-36-05.jpg)

Pedro djawubu wyche, etakrã bakyrei mimbi edjyma bu emi pechema gogi wywype. Gobu go bakyreidji djawuma: “Kowegi rõ cho Tay cho by gatutygi. Cho ury gatu idjadji. Wendu ga idjape.” Go brewipychã Jesu kuere mudjãndygi krymballã buchãndjiwa, wama emi dja uwa budjama ywydji.

![](https://cdn.door43.org/obs/jpg/360px/obs-en-36-06.jpg)

Gobu Jesu pokoma gogi wywydji, inama emi: “Krymballãeme. Puã kua.” Gobu gogi wywy maĩmbu idja ruwa, Jesu etakrã roma ni gope.

![](https://cdn.door43.org/obs/jpg/360px/obs-en-36-07.jpg)

Jesu emi go brewipychã dja kuere mudjãndygi edjyma kuãmbukudjiware. Gobu Jesu inama gogi wywype: “Kiueme duwegi wywype bue rõ pendje wechãwe kowepe. Tãrãllã krey wachabu, cho manowerã, gobu cho wẽwerã manowe byche puare. Cho manowedji puãmbu, kiu ga mondo ache wywype.”

_Kiupyre Mateo djawu gatu 17:1-9;_

_Marko djawu gatu 9:2-8;_

_Luka djawu gatu 9:28-36,_

*Biblia parapyrepe*

## 37. Jesu Lasarope puãma manowe byche puare

https://openbiblestories.org/l/guq/story-37/

![](https://cdn.door43.org/obs/jpg/360px/obs-en-37-01.jpg)

Etakrã kreybu Jesu djawu wenduma, Lasaro rõ achy buchã roma ni. Lasaro dja pawe kudjã mirõngi Maria emi Marta go rõ Jesu bygatutygi wywy. Jesu wendubu go Lasaro djiwa djawu, inama: “Kowe achy rupi Lasaro manollãwerã, kowe achy rupi ache wywy wechãwerã, Apã Wachu chidja gatu.” Jesu by gatubu djepe dja bygatutygi wywype, warõ wyche mirõ krey idja ĩ endawepe.

![](https://cdn.door43.org/obs/jpg/360px/obs-en-37-02.jpg)

Go mirõ krey wachabu, Jesu inama dja kuere mudjãndygi wywype: “Nandje owerã emi Judea rekuaty.” Dja kuere mudjãndygi wywy rõ djawu pepyma: “Kiuatygi, tãrãllã kreybu go Judea pua djepe pycho djuewe.” Jesu inama: “Nandje bygatutygi Lasaro ikẽwe, cho owerã idjape mumbawã.”

![](https://cdn.door43.org/obs/jpg/360px/obs-en-37-03.jpg)

Jesu kuere mudjãndygi wywy inama: “Kiuatygi, Lasaro ikẽmbu, eche gatuwerã.” Gobu Jesu kiu gatuma gogi wywype: “Lasaro manoma. Cho ury gatu, cho ĩllã buare gope, pendje kua gatuwã chodji.”

![](https://cdn.door43.org/obs/jpg/360px/obs-en-37-04.jpg)

Jesu wẽmbu go chupa Lasaro opo endawepe, chengypychã krey wachama Lasaro manowe. Marta wẽma o tokape, Jesupe dorowã, gobu inama idjape: “Cho Rekoatygi, dje ĩmbu kowepe, cho pawe manollã rawe. Cho kua gatu rõ, Apã Wachu djepe mẽwerã bue wywy dje pukabu.”

![](https://cdn.door43.org/obs/jpg/360px/obs-en-37-05.jpg)

Jesu djawu pepyma idjape: “Cho rupi manowegi puãwerã, emi cho rupi manowegi manobechewerã. Go chodji kua gatugi, manobechewerã. Dje ko kua gatuma kowegi?” Marta inama: “Go nonga, cho Rekoatygi. Cho kua gatuma, dje rõ go Mesia, Apã Wachu Tay.”

![](https://cdn.door43.org/obs/jpg/360px/obs-en-37-06.jpg)

Gobu Maria ekõma. Go wama kmarãwã Jesu pychãndji, emi inama idjape: “Cho Rekoatygi, dje ĩmbu kowepe, cho pawe manollã rawe.” Jesu kua djue: “Maty rõ pendje djonowe Lasaro echewe?” Gogi wywy inama: “Go kuarewepe. Dje ore kuere rupi edjo wechãwã.” Gobu Jesu chingama.

![](https://cdn.door43.org/obs/jpg/360px/obs-en-37-07.jpg)

Go kuarewe go rõ etakrã ita ikua. Go djãwã pechepyre ita wachupe. Jesu go kuarewepe wẽmbu, inama: “Matã ga mondo go ita wachu.” Marta inama: “Go mano endawe chengypychã kreyma. Ine buchãma enda.”

![](https://cdn.door43.org/obs/jpg/360px/obs-en-37-08.jpg)

Jesu djawu pepyma: “Cho inallã ko djepe, dje wechãwerã Apã Wachu chidja gatu, dje kua gatubu chodji?” Gobu duwegi wywy matãma ita wachu.

![](https://cdn.door43.org/obs/jpg/360px/obs-en-37-09.jpg)

Gobu Jesu maĩma ywadji, emi inama: “Cho apã, cho ury gatuma, dje wendu buare cho puka. Cho kua gatu, dje wenduaty cho pukabu. Cho inama go nonga, ache wywy kowepe ĩngi ekõ gatuwã, emi kua gatuwã dje chope bueare.” Gobu Jesu puka chidjama: “Lasaro, wẽ kua tokape!”

![](https://cdn.door43.org/obs/jpg/360px/obs-en-37-10.jpg)

Go nonga Lasaro wẽma bu tokape! Dja eche djuwãmbyre wyche tyru pukudji. Gobu Jesu inama gogi wywype: “Kuwẽ ga idjape, emi djurapa ga mondo muchãmbyre, kawãeme idjape.” Tãrã Judea pua kua gatuma Jesudji, go djapo buare kowe bue gatu.

![](https://cdn.door43.org/obs/jpg/360px/obs-en-37-11.jpg)

Go pa’i ymachidjagi wywy rõ djembi reko Jesudji. Go buare noãma, djawu rekowã, manonga djukawã Jesupe emi Lasarope.

_Kiupyre Juan djawu gatu 11:1-46,_

*Biblia parapyrepe*

## 38. Jesu kamembyre dja byllãndygi ipope

https://openbiblestories.org/l/guq/story-38/

![](https://cdn.door43.org/obs/jpg/360px/obs-en-38-01.jpg)

Ruybu wywy Judio pua wywy djapoty ury wachu go Pakua pukapyty. Go nonga djapoty, kua rekowã, mawe nonga Apã Wachu kuwẽare dja nondjewaregi wywype ekõllãwã rekopytygi nonga Egiptope nondjechebu. Brewipychã ruyma Jesu buãmbu djawu gatu kiuwã ache wywype, Jesu inama dja kuere mudjãndygi wywype, djapo djue go ury wachu Pakua pukapytydjiwa edji Jerusalempe. Kiuma emi idja manowerã gope.

![](https://cdn.door43.org/obs/jpg/360px/obs-en-38-02.jpg)

Etakrã Jesu kuere mudjãndygi go rõ kbe’e pukapyty Juda. Juda rõ apostol wywy buta warõandygi. Go buta reko djuedjiwa, go rõ narõandy buta noãmbyregi. Jesu dja kuere mudjãndygi wywydji wẽmbu Jerusalempe, Juda oma Judio pa’i ymachidjagi endape emi inama gogi wywype, mewerã Jesu dja ipope, gogi idjape buta membu. Go kuama Judio ymachidjagi wywy kua djuellã, Jesu rõ go Mesia. Gobu emi kuarama idjape djukawã.

![](https://cdn.door43.org/obs/jpg/360px/obs-en-38-03.jpg)

Judio ymachidjagi wywy ĩ wyche pa’i ymachidja wachugi ipo wyrydji. Gogi wywy mema Judape brewipychã tapa buta ita, Jesupe kamewã dja ipope. Kowegi wẽma, profeta wywy kiuwe nonga. Judape rõ kbegatu, gobu rama buta ita emi wẽma tokape. Gobu kuarama, manonga gogi wywype ape mĩwerã, Jesupe pychywã.

![](https://cdn.door43.org/obs/jpg/360px/obs-en-38-04.jpg)

Jerusalempe Jesu dja kuere mudjãndygi wywydji u reko Pakuadjiwa. Gogi Pakuadjiwa bakupyre ubu, Jesu pychyma wikytã choullãngi emi kioma. Gobu inama: “Pychy ga kowe, emi u mondo. Kowegi rõ cho eche nonga, pendje pepy membyrã. Djapo ga mondo go nonga, chodji kua rekowã.” Go nonga Jesu kiuma, dja eche membyrã we keĩmbyre nonga ache wywy pepy.

![](https://cdn.door43.org/obs/jpg/360px/obs-en-38-05.jpg)

Gobu Jesu kawãma etakrã baydja kytã emi inama: “Tyku gami kowegi. Go rõ cho pirã nonga, go rõ Apã Wachu djawu pou membyre. Cho pirã kawopyrã, ache wywype kuwẽwã bue buchã djapowedji. Go nonga djapo ga mondo, chodji kua rekowã, pendje y pirã tyku rekobu baydja kytã puare.”

![](https://cdn.door43.org/obs/jpg/360px/obs-en-38-06.jpg)

Gobu Jesu inama dja kuere mudjãndygi wywype: ”Etakrã pendje byche pua chope kamewerã cho byllãndygi ipope.” Go dja kuere mudjãndygi wywy uryllã roma, emi kua djue, awa rõ djapowerã kowe nonga. Jesu inama: “Go kbe’epe cho mewerã kowe wikytã. Gogi rõ chope kamewerã.” Gobu mema wikytã Judape.

![](https://cdn.door43.org/obs/jpg/360px/obs-en-38-07.jpg)

Juda go wikytã ubu, Andjãwe ikẽma idja djãwãpe. Gobu Juda wẽma o tokape, Judio ymachidjagi wywype ape mĩwã, Jesupe pychywã. Gobu chãwãma.

![](https://cdn.door43.org/obs/jpg/360px/obs-en-38-08.jpg)

Gogi wywy bakupyre upabu, Jesu dja kuere mudjãndygidji wẽma djo Oliwo kuãmbuku rekuaty. Gobu Jesu inama: “Pendje wywy chope wedjapawerã kowe chãwãmbu. Apã Wachu djawu parapyre inawe nonga: Cho bro djonowerã wachupurã warõandygipe, gobu wachupurã wywy kandjãmbawerã.”

![](https://cdn.door43.org/obs/jpg/360px/obs-en-38-09.jpg)

Gobu Pedro inama: “Duwegi wywy djepe wedjabu, cho wedjabechewerã djepe.” Gobu Jesu inama Pedrope: “Andjãwe kowebu pendje wywype reko djuema. Cho rõ pukama Apã Wachupe, Pedro, dje prarullãwã Apã Wachu kuere rupi. Go nongabu djepe kowe chãwãmbu urupurã chue chinga nondje, brewipychãmbu dje kainawerã, chope kuallãndjiwa.”

![](https://cdn.door43.org/obs/jpg/360px/obs-en-38-10.jpg)

Gobu Pedro inama Jesupe: “Cho manombu djepe, cho kainabechewerã djepe kuallãndjiwa.” Duwe Jesu kuere mudjãndygi wywy inama emi go nonga.

![](https://cdn.door43.org/obs/jpg/360px/obs-en-38-11.jpg)

Gobu Jesu dja kuere mudjãndygi wywydji oma go enda pukapyty Getsemanipe. Jesu inama dja kuere mudjãndygi wywype, krandobuãwã, Andjãwe buãllãwã gogi wywype. Gobu Jesu oma, krandobuãwã idja etakrãpe.

![](https://cdn.door43.org/obs/jpg/360px/obs-en-38-12.jpg)

Gobu Jesu krandobuã brewipychãma: “Cho Apã, ĩmbu ape, matã gami chodjiwa, go baydja kytã djuei buchã djiwa cho tykullãwã. Ĩllãmbu rõ duwe ape, ache wywype kuwẽwã idja bue buchã djapowedjiwa, go dje inawe nonga wẽwã.” Jesu uryllã buchã, emi dja pia upubu, wama ywype pirã buy kytã nonga. Gobu Apã Wachu buema mondo dja buetygi, idjape chidja mewã.

![](https://cdn.door43.org/obs/jpg/360px/obs-en-38-13.jpg)

Brewipychãpe Jesu krandobuãmbu, emi brewipychãpe Jesu oma dja kuere mudjãndygi endape. Gogi rõ ikẽmba ĩ. Idja krandobuã krãpĩmbu, Jesu ekõma, emi inama: “Puã kua! Go chope kamewãngi ĩma kowepe.”

![](https://cdn.door43.org/obs/jpg/360px/obs-en-38-14.jpg)

Gobu Juda wẽ roma bu Judio ymachidjagi wywydji, go tõallãngi wywy emi ache tãrãndji. Gogi wywy rekoma pẽmbuku emi djapẽ. Juda ekõma Jesu djãwẽ emi inama: “Kiuatygi, manonga rõ dje ĩ?” Gobu idja cheypy pychema. Go nonga Judio ymachidjagi wechãma, awape rõ pychywã. Gobu Jesu inama: “Juda, cheypy pyche rupi ko dje ka mewerã chope cho byllãndygi ipope?”

![](https://cdn.door43.org/obs/jpg/360px/obs-en-38-15.jpg)

Tõallangi wywy Jesupe pychybu, Pedro matãma dja pẽmbuku, gobu piama mondo pa’i ymachidjagi buetygi nambi. Jesu rõ inama Pedrope: “Pypy emi dje pẽmbuku dja endawepe! Cho pukabu cho Apãpe, idja buewerã tãrã buchã dja buetygi chope djepywã. Cho rõ djapowerã Cho Apã inawe nonga.” Gobu Jesu kuwẽma go kbe’e nambi. Jesu pychypyrebu, dja kuere mudjãndygi wywy kandjãmba roma djo.

*Kiupyre Mateo djawu gatu 26:14-56;                 Marko djawu gatu 14:10-50;                                 Luka djawu gatu 22:1-53;                       Juan djawu gatu 12:6; 18:1-11,                             Biblia parapyrepe*

## 39.Jesupe rapyre go Judio ymachidjagi noãndy wachu chãruwa

https://openbiblestories.org/l/guq/story-39/

![](https://cdn.door43.org/obs/jpg/360px/obs-en-39-01.jpg)

Gobu chãwã byche roma. Go tõallãngi wywy rama Jesupe pa’i ymachidja wachugi tapype, go pa’i ymachidja wachugi bue pranduwã Jesupe. Rypydjiwe Pedro wata ekõ gogi wywy rupi. Jesupe rõ rapyre tapy djãwãpe, gobu Pedro wapyma tokape, tata djãwẽ idja eche akuwã.

![](https://cdn.door43.org/obs/jpg/360px/obs-en-39-02.jpg)

Tapy djãwãpe Judio ymachidjagi wywy noãma, Jesupe mĩ buchãwã. Gogi eruma tãrã kbe’e kaina buchãngi, djawu buchãwã Jesudji. Idja djawuwe rõ e nongallã wywy. Go buare ĩllã go Judio ymachidjagi wywy mĩ buchãwã Jesupe bue buchã djapoaregi nonga. Jesu rõ djawubeche.

![](https://cdn.door43.org/obs/jpg/360px/obs-en-39-03.jpg)

Krãpĩpe go pa’i ymachidja wachugi maĩ reko Jesudji emi inama: „Kiu ga bu orepe. Guei ko dje go Mesia, go Apã Wachu Manollãndygi Tay?“

![](https://cdn.door43.org/obs/jpg/360px/obs-en-39-04.jpg)

Gobu Jesu inama: “Guei cho, gobu pendje wechãwerã cho wapy ĩmbu Apã Wachu djãwẽ emi cho ekõmbu ywadjiware.” Gobu pa’i ymachidja wachugi doroma mondo dja tyru prandjãndjiwa, emi puka chidjama duwe pa’i ymachidjagi wywype: ”Nandje pukallãwerã duwe bue buchã wechãregipe. Pendje wenduma, kowe kbe’e inawe, go rõ Apã Wachu Tay. Bue rõ pendje inawerã?”

![](https://cdn.door43.org/obs/jpg/360px/obs-en-39-05.jpg)

Go pa’i ymachidjagi wywy inama pa’i ymachidja wachugipe: “Djuka ga mondo idjape!” Gobu gogi wywy pechema tyrupe Jesu chã’ã, rywõma idjadji, idja chãpe pachoma, emi djudja reko idjadji.

![](https://cdn.door43.org/obs/jpg/360px/obs-en-39-06.jpg)

Pedro wapybu tokape, etakrã kudjã buepytygi wechãma idjape, gobu inama: “Dje rõ emi Jesu djãwẽwaty!” Pedro kainama, kuallã Jesupe. Gobu duwe kudjã inama emi go nonga, emi Pedro kainama. Gobu rõ duwegi wywy inama: “Dje emi Jesu pendje rõ Galilea pua, go buare ore kua gatuma, dje ĩwe emi Jesudji.”

![](https://cdn.door43.org/obs/jpg/360px/obs-en-39-07.jpg)

Gobu Pedro djawu buchãma: “Apã Wachu chope pacho puywerã, cho kuabu go kbe’epe.” Go rupiwe, etakrã urupurã chue chingama, gobu Jesu djerema, Pedro rekuaty maĩwã.

![](https://cdn.door43.org/obs/jpg/360px/obs-en-39-08.jpg)

Pedro rõ wẽma o tokape, emi chinga wachu roma. Gobu Juda, go Jesupe kamearegi, wechãma, Judio ymachidjagi wywy Jesupe djukawerã. Gobu uryllã buchãma, emi oma dja kuetã djuwy mano endarãpe.

![](https://cdn.door43.org/obs/jpg/360px/obs-en-39-09.jpg)

Go duwe koẽpadjebu Judio ymachidjagi wywy rama Jesupe Pilato endape, go rõ Roma pua ymachidjagi. Gogi wywy djã djawuma, Pilato inawerã Jesu rõ bue buchã djapoatygi. Go buare pychowerã. Pilato inama Jesupe: “Guei ko dje Judio wywy ymachidja wachugi?”

![](https://cdn.door43.org/obs/jpg/360px/obs-en-39-10.jpg)

Jesu djawu pepyma: “Dje inawe nonga, guei cho. Cho chidja llambaty rõ kowe ywy pua chidja llambaty nongallã. Cho ache nonga ymachidjabu, cho buetygi wywy djepy rawe, chope mellãwã pendje ipope. Cho opo endawe kowe ywype, kiuwã Apã Wachu kainallãndjiwa. Go kainallãndjiwa prawogi wywy, cho djawu wenduwerã.” Pilato inama: “Bue rõ go kainallãndydjiwa?”

![](https://cdn.door43.org/obs/jpg/360px/obs-en-39-11.jpg)

Pilato Jesudji djawupabu, wẽma o duwegi wywy endape, emi inama: “Cho wechãllã kowe kbe’edji bue buchã djapobu.” Go pa’i ymachidjagi wywy rõ puka chidja reko: “Djuka ga mondo wyra wachapyredji!” Pilato djawu pepyma: “Cho pychollãwerã.” Gogi wywy rõ puka ruwiallã reko. Gobu rõ brewipychãpe Pilato inama: “Gogi bue buchã djapollãwe, idjape djukawã!”

![](https://cdn.door43.org/obs/jpg/360px/obs-en-39-12.jpg)

Pilato krymballãma, ache wywy noãwerã. Go buare djapo djuema dja pukawe, mema Jesupe tõallãngi wywy ipope, idjape pychowã. Roma pua tõallãngi pachoma Jesupe, emi pypyma idjadji tyru ymachidjagi nonga, emi mima dja tõndji bue achĩ djapopyre. Gobu djudja reko idjadji, emi inama: “Wechã ga mondo, go Judio wywy ymachidja wachugi!”

_Kiupyre Mateo djawu gatu 26:57-27:26;_

_Marko djawu gatu 14:53-15:15;_

_Luka djawu gatu 22:54-23:25;_

_Juan djawu gatu 18:12-19:16,_

*Biblia parapyrepe*

## 40. Jesu djukapyre wyra wachapyredji

https://openbiblestories.org/l/guq/story-40/

![](https://cdn.door43.org/obs/jpg/360px/obs-en-40-01.jpg)

Tõallãngi wywy djudja rekopabu Jesudji, rama idjape djukawã wyra wachapyredji. Gogi wywy chidjape mema idjape, rawã wyra wachapyre dja mano endarã.

![](https://cdn.door43.org/obs/jpg/360px/obs-en-40-02.jpg)

Tõallãngi wywy Jesupe rama etakrã endape, go pukapyty „Golgota“. Gobu pychoma beta dja ipo emi pychãndji, idjape upiwã wyra wachapyredji. Jesu rõ inama: „Cho Apã, kuwẽ gami gogi wywype, kuallã buare bue rõ go djapo reko.“ Pilato inama, parawã etakrã wyra chepe minidji „Judio wywy ymachidja wachugi“, emi miwã wyra wachapyredji Jesu tõ llabu.

![](https://cdn.door43.org/obs/jpg/360px/obs-en-40-03.jpg)

Gobu tõallãngi wywy buã reko, kuawã awa rõ Jesu tyruwe rawerã. Go nonga djapobu, wẽma go profeta djawuwe nonga: „Gogi wywy bowoma cho tyruwe, emi buã reko edji cho tyruwe rekowã.“

![](https://cdn.door43.org/obs/jpg/360px/obs-en-40-04.jpg)

Jesu wyra wachapyredji ĩma mirõ kbe’e narõngi bychepe. Go etakrãngi djudja reko Jesudji, duwegi rõ inama: “Dje rõ krymbaeche ko Apã Wachudji? Nandjepe pepyma bue buchã nandje djapowedjiwa, go kbe’e rõ bue buchã djapollãndy.“ Gobu inama Jesupe: „Kua ga reko chodji dje chidja llambatype ĩmbu.“ Jesu djawu pepyma idjape: „Kowe kreybu, dje ĩwerã cho djãwẽ ywadji.“

![](https://cdn.door43.org/obs/jpg/360px/obs-en-40-05.jpg)

Go Judio ymachidjagi wywy emi ache wywy go pua djudja reko Jesudji. Inama idjape: “Dje rõ Apã Wachu Taybu, edjy kua wyra wachapyredjiware, emi kuwẽ gami djedji! Go nongabu, ore djedji kua gatuwerã.”

![](https://cdn.door43.org/obs/jpg/360px/obs-en-40-06.jpg)

Gobu krey ywabu djepe, chãwã roma djo go ywy llabu. Chãwãma krey ywabu, emi chãwãma brewipychã krey wata rupi.

![](https://cdn.door43.org/obs/jpg/360px/obs-en-40-07.jpg)

Gobu Jesu puka chidjama: “Cho djapopama Apã Wachu inawe nonga! Cho Apã, dje ipope cho krei djonoma.” Gobu dja tõ wychoma, emi manoma. Go manobu, ywy kuerapa roma. Emi prellambatype ĩma tyru puku wachu ache wywy endaty emi Apã Wachu ekõandy bychepe. Go ochoma byche rupi ywadji ywypema ra.

![](https://cdn.door43.org/obs/jpg/360px/obs-en-40-08.jpg)

Idja manowe rupi Jesu pekama ape, ache wywy owã Apã Wachu endape. Go tõallãngi, Jesudji warõndygi, bue wywy wechãmbu, inama: “Kainallãpe, kowe kbe’e bue buchã djapollãndy. Guei kowegi Apã Wachu Tay.”

![](https://cdn.door43.org/obs/jpg/360px/obs-en-40-09.jpg)

Ĩ endawe mirõ Judio ymachidjagi, go kua reko, Jesu rõ go Mesia, go bykuapyre rõ Jose emi Nikodemo. Gogi wywy pukama Pilatope, idjape mewã Jesu echewe. Gobu djuwyma dja echewe tyru wachupe emi djonoma kuarewe ita ikua wykopyrepe. Gobu gogi wywy pechema mondo ita ikua djãwã ita wachupe.

_Kiupyre Mateo djawu gatu 27:27-61;_

_Marko djawu gatu 15:16-47;_

_Luka djawu gatu 23:26-56;_

_Juan djawu gatu 19:17-42,_

*Biblia parapyrepe*

## 41. Jesupe Apã Wachu puãma manowe byche puare

https://openbiblestories.org/l/guq/story-41/

![](https://cdn.door43.org/obs/jpg/360px/obs-en-41-01.jpg)

Go tõallãngi wywy Jesupe djukabu wyra wachapyredji, go Judio ymachidjagi wywy, Jesudji kuallãngi, inama Pilatope: „Go kainangi Jesu inawe, manombu puãwerã brewipychã kreybu. Duwegi warõ ga reko go kuarewe wykopyre djãwẽ, go nonga nandje kua gatuwerã, dja kuere mudjãndygi narõllãwã dja echewe. Gobu inawerã mirõrã, gogi puãma manowegi wywy byche puare.“

![](https://cdn.door43.org/obs/jpg/360px/obs-en-41-02.jpg)

Pilato inama: „Ra ga mondo tãrãllã tõallãngi, emi warõ gatu ga reko go kuarewe wykopyredji, go pendje kuaty nonga.“ Gobu gogi wywy mi wyche bykuapyre budjapyregi go ita kuarewe djãwã pechepyregidji. Gobu wedjama gope tõallãngi wywy, duwegi go echewe narõllãwã.

![](https://cdn.door43.org/obs/jpg/360px/obs-en-41-03.jpg)

Go Jesu pechepyre krey krãpĩmbu, duwe kreybu go rõ bue djapollãndy krey. Judio wywy ollãwerã etakrã kuarewepe go kreybu. Go buare go bue djapollãndy krey krãpĩmbu, duwe koẽpadjebu tãrãllã kudjã inama, owã Jesu kuarewepe, bue teiwu gatu piywã Jesu echewedji.

![](https://cdn.door43.org/obs/jpg/360px/obs-en-41-04.jpg)

Gobu ywy kuera chidja roma. Etakrã Apã Wachu buewegi mimbi gatu chono wera nonga wẽma bu ywadji. Gogi matãma go ita wachu go kuarewe pechewegi, emi wapyma go ita llabu. Go tõallãngi wywy kuarewedji warõwegi krymballã buchãndjiwa wama ywype kbe’e manowe nonga.

![](https://cdn.door43.org/obs/jpg/360px/obs-en-41-05.jpg)

Go kudjã wywy kuarewepe wẽmbu, Apã Wachu buewegi inama gogi wywype: „Krymballãeme! Jesu ĩllãma kowepe. Gogi wẽma manowe byche puare, idja inawe nonga. Wechã kuarewe emi mai gami.“ Kudjã wywy maĩma kuarewe djãwãpe, emi wechãma Jesu eche endawe. Dja echewe ĩllãma gope!

![](https://cdn.door43.org/obs/jpg/360px/obs-en-41-06.jpg)

Gobu go Apã Wachu buewegi inama kudjã wywype: „Amaty kua Jesu kuere mudjãndygi wywy endape, emi kiu mondo gogi wywype: Jesu wẽma o manowe byche puare. Gobu owerã pendje nondje Galilea rekuaty.“

![](https://cdn.door43.org/obs/jpg/360px/obs-en-41-07.jpg)

Kudjã wywy krymballã buchã, ury gatuma emi. Gogi myrõma o, Jesu kuere mudjãndygi wywype kiuwã go djawu gatu.

![](https://cdn.door43.org/obs/jpg/360px/obs-en-41-08.jpg)

Kudjã wywy obu, djawu gatu kiuwã Jesu kuere mudjãndygi wywype, Jesu wẽma bu idja chã ruwa. Gobu gogi wywy kmarãma idja chã ruwa. Jesu rõ inama: “Krymballãeme. Amaty kua emi kiu mondo cho kuere mudjãndygi wywype, owã Galilea rekuaty. Gope gogi wywy chope wechãwerã.”

_Kiupyre Mateo djawu gatu 27:62-28:15;_

_Marko djawu gatu 16:1-11;_

_Luka djawu gatu 24:1-12;_

*Juan djawu gatu 20:1-18,                                       Biblia parapyrepe*

## 42. Jesu oma emi ywadji

https://openbiblestories.org/l/guq/story-42/

![](https://cdn.door43.org/obs/jpg/360px/obs-en-42-01.jpg)

Go kreybu Jesu manowe byche puare puãmbu, mirõ dja kuere mudjãndygi oma etakrã chupa rypyllã rekuaty. Gogi wywy wata obu, djawu reko edji bue wywy Jesupe wẽmbawegidjiwa. Gogi warõ endawe idja rõ go Mesia. Gobu, mawe nonga duwegi wywy idjape pychoma djono? Kowebu kudjã wywy kiuma, idja rõ manowe puare wẽ roma djo. Go mirõ kbe’e kua gatullã, godjiwa kainallã ko.

![](https://cdn.door43.org/obs/jpg/360px/obs-en-42-02.jpg)

Jesu wẽma bu gogi wywy djãwẽ, emi watama o idja rupi, gogi rõ kuallã idjape. Jesu pranduma, bue rõ djawu reko, gobu gogi kiuma idjape bue gatu wywy wẽmbawegi Jesudjiwa go krey wywy nondjebu. Gogi djã djawuma, bue kiuma etakrã kbe’e budjakrã puape, kuallã kura bue wywy Jerusalempe wẽmbawegidji.

![](https://cdn.door43.org/obs/jpg/360px/obs-en-42-03.jpg)

Gobu Jesu kiu gatuma idjape wywy, bue rõ Apã Wachu djawu parapyre inawe go Mesiadji. Go kua reko profeta wywy inawedji, go Mesia reko buchãmbyrã emi pychopyrã, gobu rõ puãwerã emi manowe byche puare brewipychã kreybu. Gobu gogi wywy wẽma go chupa dja ĩ endarãpe. Gope chãwã roma.

![](https://cdn.door43.org/obs/jpg/360px/obs-en-42-04.jpg)

Go mirõ kbe’e pukama Jesupe, ikẽwã tapy djãwãpe gogi wywy djãwẽ, gobu Jesu djapoma idja pukawe nonga. Gogi wywy u djuebu bakupyre, Jesu pychyma wikytã, mema ury gatu Apã Wachupe, gobu bowoma. Gope rõ gogi wywy kuama, go rõ Jesu. Gobu Jesu kandjãma djo idja chã ruwa.

![](https://cdn.door43.org/obs/jpg/360px/obs-en-42-05.jpg)

Go mirõ kbe’e djawuma edji: „Gogi rõ Jesu! Go buare nandje djãwãpe poko roma, idja nandjepe kiu rekobu Apã Wachu djawu!“ Gobu myrõma o emi Jerusalempe. Gope wẽmbu, inama Jesu kuere mudjãndygi wywype: „Jesu wẽma manowedjiware! Ore wechãma idjape!“

![](https://cdn.door43.org/obs/jpg/360px/obs-en-42-06.jpg)

Go mudjãndygi wywy djawu rekobu, Jesu wẽma bu gogi wywy chã ruwa go tapy djãwãpe, gobu inama: „O kryra gatu ga mondo!“ Go dja kuere mudjãndygi wywy rõ djã djawuma, go rõ kreiwe kura. Jesu rõ inama: „Bue buare pendje krymballã emi pendje djãwãpe ina: Go rõ Jesullã? Maĩ cho ipo emi cho pychã. Kreiwe wywy eche rekollã, cho eche reko nonga.” Gobu pukama bakupyre, gogi wywype wechãwã, go rõ kreillã. Gobu mẽma idjape pira keĩmbyre, emi idja uma.

![](https://cdn.door43.org/obs/jpg/360px/obs-en-42-07.jpg)

Inama Jesu: “Cho inawe, bue wywy chodjiwa parapyre Apã Wachu djawupe, wẽmbawerã.” Gobu gogi wywype mema tõ gatu, kua gatuwã Apã Wachu djawu parapyre. Go inama: “Tãrã ruybu parapyrepe inawe, go Mesiape reko buchãmbyrã, go manowerã emi puãwerã manowedji brewipychã kreybu.”

![](https://cdn.door43.org/obs/jpg/360px/obs-en-42-08.jpg)

“Parapyrepe inawe emi, cho kuere mudjãndygi wywy kiu rekowerã ache wywype, wedjawã ape buchã, Apã Wachu gogi wywype kuwẽwã dja bue buchã djapowedji. Go nonga buãwerã Jerusalempe, gobu owerã ache wywy endape duwe rekuaty wywy. Pendje rõ bue wywy wechãmbaregi.”

![](https://cdn.door43.org/obs/jpg/360px/obs-en-42-09.jpg)

Gobu chengypychã tapa kreybu tãrãma Jesu wẽma idja kuere mudjãndygi wywy djãwẽ. Duwebu emi wẽma bu tãrã ache ipo tapa tapa (500) chã ruwa. Tãrã dja kuere mudjãndygi wywy wechãma, idja manowedji puãwe, emi kiu reko gogi wywype Apã Wachu chidja llambatydjiwa.

![](https://cdn.door43.org/obs/jpg/360px/obs-en-42-10.jpg)

Jesu inama dja kuere mudjãndygi wywype: “Chope membapyre chidja wachu ywadji emi ywype. Go buare amaty kua, kiu gatuwã ache wywype, cho kuere rupi mudjãwã. Y tõ pypy ga mondo gogi wywype Apã Wachu bykuapyrepe, dja Tay emi Krei Gatu bykuapyrepe. Kiu ga reko gogi wywype, djapo gatuwã bue wywy cho kiuwe nonga pendjepe. Pendje kua ga reko, cho ĩwerã pendje djãwẽ kreybu wywy, ywy krãpĩpe emi.

![](https://cdn.door43.org/obs/jpg/360px/obs-en-42-11.jpg)

Chengypychã tapa krey krãpĩmbu, Jesu puãmbu manowe byche puare, inama dja kuere mudjãndygi wywype: “Pendje warõ gami Jerusalempe. Cho Apã pendjepe mewerã chidja, go Krei Gatu ekõmbu pendje llabu.” Gobu oma ywadji, emi etakrã bakyrei pechema idjape, gogi wywy idjape wechãllãwã. Gobu Jesu wapyma Apã Wachu llu rekuaty, bue wywydji ymachidjawã.

_Kiupyre Mateo djawu gatu 28:16-20;_

_Marko djawu gatu 16:12-20;_

_Luka djawu gatu 24:13-53;_

_Juan djawu gatu 20:19-23;_

_Apostol wywy djapowe 1:1-11,_

*Biblia parapyrepe*

## 43. Jesu kuere mudjãndygi noãndy wẽma

https://openbiblestories.org/l/guq/story-43/

![](https://cdn.door43.org/obs/jpg/360px/obs-en-43-01.jpg)

Jesu obu ywadji, dja kuere mudjãndygi wywy warõ reko Jerusalempe, Jesu inawe nonga gogi wywype. Gope Jesudji kua gatu rekogi wywy noãndy, krandobuãwã.

![](https://cdn.door43.org/obs/jpg/360px/obs-en-43-02.jpg)

Ruybu wywy, ipo tapa (50) kreybu ury wachu Pakuadjiwa wachawepe, Judio wywy rekoma duwe krey gatu, pukapyty Pentekote. Go krey Pentekotedjiwape Judio wywy ury gatuty bue ã trigo noãmbyredji. Duwe ekõandy wywy puare tãrã Judio wẽma Jerusalempe, go Pentekotedjiwa ury gatuwã. Go ruybu ury wachu Pentekotedjiwa wẽma etakrã tapa (10) kreybu, Jesu o buare ywadji.

![](https://cdn.door43.org/obs/jpg/360px/obs-en-43-03.jpg)

Jesudji kua gatutygi wywy noã rekobu, go tapy dja enda embepa roma wytu chidja pambu wachu nongadji. Gobu bue tata endy nonga ĩmba roma Jesudji kua gatutygi wywy tõ llabu. Go Krei Gatu embepa roma gogi wywype, gobu buã roma, djawuwã duwe djawu wywype.

![](https://cdn.door43.org/obs/jpg/360px/obs-en-43-04.jpg)

Go ache wywy Jerusalem pua go bue pambu wachu wendubu, noãma wechãwã bue rõ kowegi. Ache wywy wendubu, manonga Jesudji kua gatutygi wywy kiu reko Apã Wachudjiwa bue gatu wywy, chã opoma. Gogi wywy wenduma bue wywy dja djawueche rupi.

![](https://cdn.door43.org/obs/jpg/360px/obs-en-43-05.jpg)

Tãrãllã ache inama Jesu kuere mudjãndygi wywydji, gogi wywy rõ ytata chã watawe mekã. Pedro rõ puãma emi inama gogi wywype: “Wendu cho inawerãngi! Go ache ytata tykullãwe! Go nonga wẽma Apã Wachu inawe nonga go profeta Joel rupi: Krey krãpĩ ruwybu, cho kawowerã cho Krei’i.”

![](https://cdn.door43.org/obs/jpg/360px/obs-en-43-06.jpg)

“Kbe’e Israel pua wywy, Jesu rõ etakrã kbe’e tãrã bue wechãllãndy djapoaregi Apã Wachu chidja gatu rupi, pendje wechãwe emi kua gatu nonga. Pendje rõ pychowe idjape wyra wachapyredji!”

![](https://cdn.door43.org/obs/jpg/360px/obs-en-43-07.jpg)

“Jesu manombu djepe, Apã Wachu puãma mondo idjape manowe byche puare. Go nonga wẽma profeta djawuwe nonga: Dje wedjallãwerã, dje prawowegi echewe achopawã kuarewepe. Ore wechãma Apã Wachu Jesupe puãwe manowe byche puare.”

![](https://cdn.door43.org/obs/jpg/360px/obs-en-43-08.jpg)

“Kowebu Jesupe rapyre ywadji ĩwã Apã Wachu llu rekuaty. Emi Jesu buema mondo go Krei Gatu, idja inawe nonga. Go Krei Gatu djapoma bue wywy, pendje wechãma emi wenduma.”

![](https://cdn.door43.org/obs/jpg/360px/obs-en-43-09.jpg)

“Pendje pychowe wyra wachapyredji kowe kbe’e Jesupe! Pendje rõ kua gatu ga mondo, Apã Wachu mima Jesupe ymachidja wachugi emi Mesia!”

![](https://cdn.door43.org/obs/jpg/360px/obs-en-43-10.jpg)

Ache wywy Pedro djawu wendubu, okryrallã buchã roma idja djawuwe rupi. Go buare pranduma Pedrope emi Jesu kuere mudjãndygi wywype: “Ore pawe wywy, bue rõ ore djapowerã?”

![](https://cdn.door43.org/obs/jpg/360px/obs-en-43-11.jpg)

Pedro djawu pepyma: “Pendje wywy wedja ga mondo bue buchã pendje djapoty wywy, djewy kua Apã Wachu rekuaty, emi y tõ pypy ga mondo Jesukrito bykuapyrepe, Apã Wachu pendjepe kuwẽwã pendje bue buchã djapowedji. Gobu gogi mewerã pendjepe dja Krei Gatu.”

![](https://cdn.door43.org/obs/jpg/360px/obs-en-43-12.jpg)

Brewipychã wachu (3.000) ache kua gatuma Pedro djawuwe rupi, gogi wywy kowebu Jesu kuere mudjãndygi. Y tõ pypypapyre emi ĩma Jesu kuere mudjãndygi noãndype Jerusalempe.

![](https://cdn.door43.org/obs/jpg/360px/obs-en-43-13.jpg)

Jesu kuere mudjãndygi wywy wendu gatu go apostol wywy kiuwe kreybu wywy, emi noã reko, u reko edji, emi edji krandobuã reko Apã Wachupe. Gogi wywy edji ury gatu reko, pre gatu mema Apã Wachupe, emi bue wywy, dja llapo wywy, rekopa edji. Duwegi wywy djã djawu gatu reko gogi wywydji. Go krey wywype tãrã ache wẽma Jesudji kua gatuwã.

_Kiupyre Apostol djapowe djiwa 2,_

*Biblia parapyrepe*

## 44. Pedro emi Juan kuwẽma etakrã kbe’e watallãngipe

https://openbiblestories.org/l/guq/story-44/

![](https://cdn.door43.org/obs/jpg/360px/obs-en-44-01.jpg)

Etakrã kreybu Pedro emi Juan oma prellambatype. Gogi ĩmbu rypyllã prellambaty pecheaty djãwẽ, wechãma etakrã kbe’e watallãngipe, go buta puka rekobu.

![](https://cdn.door43.org/obs/jpg/360px/obs-en-44-02.jpg)

Pedro maĩ reko watallãngidji, gobu inama: “Cho rekollã buta, djepe mewã. Cho mẽwerã djepe cho bue rekogi. Jesu bykuapyrepe puã emi wata kua!”

![](https://cdn.door43.org/obs/jpg/360px/obs-en-44-03.jpg)

Bitallãpe, Apã Wachu kuwẽma go kbe’e watallãngipe, gobu gogi wata roma emi prema Apã Wachupe. Ache wywy go prellambaty toka pua chã opo roma.

![](https://cdn.door43.org/obs/jpg/360px/obs-en-44-04.jpg)

Ache tãrã wywy ekõma, go kbe’e kuwẽmbyregipe wechãwã. Pedro inama gogi wywype: “Buerã pendje chã opo cherã, go kbe’epe kuwẽ buare? Ore idjape kuwẽllãwe ore chidja rupi emi bue djapo gatu rupi. Go nongallã, Jesu chidja rupi emi gogi kua gatu buare Jesudji, go kbe’epe kuwẽmbyre.”

![](https://cdn.door43.org/obs/jpg/360px/obs-en-44-05.jpg)

“Pendje rõ inama Roma ymachidjagipe, Jesupe pychowã. Pendje rõ djukama go manollãndy meandygipe, Apã Wachu rõ puãma idjape manowe byche puare. Pendje kuallãmbu djepe, pendje djapowe rupi wẽma Apã Wachu inawe nonga profeta wywy kiupawepe, go Mesia reko buchãmbyrã emi manowerã. Go buare kowebu wedja ga mondo pendje bue buchã djapowe, emi djewy Apã Wachu rekuaty, pendje bue buchã djapowedji kuwẽmbyrã.”

![](https://cdn.door43.org/obs/jpg/360px/obs-en-44-06.jpg)

Go prellambaty ymachidjagi wywy prandjã buchã Pedro emi Juan djawuwedji. Go buare pychyma go mirõngipe emi pypyma tapy djãwãllãpe. Tãrã ache rõ kua gatuma Pedro kiuwe. Go kbe’e wywy rõ ipo wachu (5.000) ache tãrã Jesu kuere mudjãndygi kowebu.

![](https://cdn.door43.org/obs/jpg/360px/obs-en-44-07.jpg)

Duwe kreybu go Judio ymachidjagi wywy eruma Pedro emi Juanpe go pa’i ymachidja wachugi emi duwe pa’i ymachidjagi wywy chã ruwa. Gogi pranduma Pedro emi Juanpe: “Mawe nonga chidja rupi pendje kuwẽma go kbe’e watallãngipe?”

![](https://cdn.door43.org/obs/jpg/360px/obs-en-44-08.jpg)

Pedro djawu pepyma: ”Go kbe’e pendje chã ruwa kuwẽmbyre Jesu chidja rupi. Go rõ go Mesia! Pendje rõ pychoare Jesupe wyra wachapyredji, Apã Wachu rõ puawe emi idjape manowe byche puare! Pendje rõ kua djuellã idjadji. Ĩllã duwe ape, Jesu etakrãeche chidja rupi rõ ache wywype kuwẽmbyrã!”

![](https://cdn.door43.org/obs/jpg/360px/obs-en-44-09.jpg)

Go ymachidjagi wywy chã opoma, go Pedro emi Juan djawu buare krymba gatupe. Gogi wywy kua gatuma, go mirõ kbe’e rõ kbe’e bue parapyredji kuallãndy. Go wywy kuama, go mirõngi rõ Jesu kuere mudjãre. Gogi wywy djawu puybu Pedro emi Juanpe, wedjama owã.

_Kiupyre Apostol djapowedjiwa 3:1-4:22,_

*Biblia parapyrepe*

## 45. Felipe emi kbe’e ymachidjagi Etiopia pua

https://openbiblestories.org/l/guq/story-45/

![](https://cdn.door43.org/obs/jpg/360px/obs-en-45-01.jpg)

Go Jesu kuere mudjãndygi noãndype ĩ endawe etakrã kbe’e, go bykuapyre rõ Estebam. Duwegi wywy djawu gatu reko idjadji. Go rõ tõ gatugi emi embe gatupama Krei Gatudji. Estebam djapoma tãrã bue wechãllãndy, emi kiu gatu reko tõ gatuechepe ache wywype, kua gatuwã Jesudji.

![](https://cdn.door43.org/obs/jpg/360px/obs-en-45-02.jpg)

Etakrã kreybu, Estebam kiu reko Jesudji, gobu tãrãllã Juda pua, Jesudji kua gatullãngi, djaka reko Estebamdji. Gogi wywy prandjã buchã roma, emi kainama Estebamdjiwa pa’i ymachidjagi wywype. Gogi wywy inama: “Ore wenduma, idja djawu buchãmbu Moisedji emi Apã Wachudji!” Go buare go pa’i ymachidjagi wywy pychyma Estebampe, gobu rama idjape pa’i ymachidja wachugi chã ruwa emi duwe Juda pua ymachidjagi wywy endape. Gope tãrãeche kbe’e kaina buchãngi djawu buchã Estebamdji.

![](https://cdn.door43.org/obs/jpg/360px/obs-en-45-03.jpg)

Go pa’i ymachidja wachugi inama Estebampe: “Kowe nonga ko?” Estebam djawu pepyma, emi kiu gatu reko gogi wywype bue wachu wywydji, Apã Wachu djapowe go Abrahamdjiwe emi Jesu krey pewe. Kiuma emi, manonga ache wywy go kreybu wywy djapo djuellã Apã Wachu inawe. Gobu inama: “Pendje rõ djembigi emi djã krere buchãngi, gorãwe pendje wendu djuellã Krei Gatu inawe, pendje nondjewaregi my wendu djuellã nonga emi. Gogi wywy prawollãwe Apã Wachupe emi pachowe dja profeta wywype. Pendje rõ djapoma bue buchãeche gogi wywydji! Pendje pychoma Mesiape!”

![](https://cdn.door43.org/obs/jpg/360px/obs-en-45-04.jpg)

Go pa’i ymachidjagi wywy kowegi wendubu, prãndjã buchãma, emi pycha pechema mondo, wendu djuellãndjiwa. Gobu Estebampe matãma ra tokape go tapy tãrã puare, emi idjape djapima reko itape, go manowã.

![](https://cdn.door43.org/obs/jpg/360px/obs-en-45-05.jpg)

Estebam mano ruwybu, puka chidjama: “Jesu, dje ipope cho mĩma cho krei’i.” Gobu wama, gope kmarãma emi pukama: “Cho Rekoatygi, kowe bue buchã djapo buare, pachoeme gogi wywype.” Gobu manoma.

![](https://cdn.door43.org/obs/jpg/360px/obs-en-45-06.jpg)

Gope ĩma etakrã kbuchuwe, idja bykuapyre rõ Saulo. Gogi etakrã djawupe ĩma Estebampe pachoaregidji, emi warõ reko dja tyru wywydji, gogi wywy ita djapi rekobu. Go kreybu wywy tãrã ache Jerusalem pua djueipa roma mondo Jesu kuere mudjãndygi wywype. Go buare go Jesudji kua gatugi wywy kandjãma djo duwe rekuaty wywy. Go nongabu djepe, gogi wywy kiuma Jesudjiwa chupa idja owe rupi.

![](https://cdn.door43.org/obs/jpg/360px/obs-en-45-07.jpg)

Ĩ endawe etakrã Jesu kuere mudjãndygi, idja bykuapyre rõ Felipe. Gogi kandjãma djo duwe Jesudji kua gatugi wywydji, Jerusalempe djuei wachu buare. Gogi oma chupa Samariape, Jesudjiwa kiuwã. Gobu tãrã ache kuwẽmbyre dja bue buchã djapowedji. Gobu, etakrã kreybu Apã Wachu buetygi inama Felipepe, owã go ape ka irõllã pua rupi. Go ape rupi wata obu, wechãma etakrã kbe’e ymachidjagi Etiopia pua, wapy ĩ dja wyrawatape. Go Krei Gatu inama Felipepe, go djãwẽ owã emi djawuwã go kbe’edji.

![](https://cdn.door43.org/obs/jpg/360px/obs-en-45-08.jpg)

Go wyrawata djãwẽ obu, Felipe wenduma, manonga go Etiopia pua djawu reko profeta Isaia parawedji. Go kbe’e djawuma: “Gogi wywy rama idjape wachupurã pychowã nonga, emi wachupurã nonga achĩmbeche dja a’a kichi rekobu, go djawu pepybeche emi. Gogi wywy mĩ buchãma idjape, bue buchã djapollãmbu djepe, emi djawu buchãma idjadji. Gobu pychoma idjape.”

![](https://cdn.door43.org/obs/jpg/360px/obs-en-45-09.jpg)

Felipe pranduma go Etiopia puape: “Dje kua gatu ko go djawu parapyre dje maĩ rekogi?” Go Etiopia pua djawu pepyma: “Cho kuallã, ĩllã buare chope kiuwãngi. Djopi ga bu, wapywã cho djãwẽ. Isaia parawe duwedjiwa ko, idjadjiwa mirõrã?”

![](https://cdn.door43.org/obs/jpg/360px/obs-en-45-10.jpg)

Gobu Felipe kiuma go Etiopia puape, Isaia parawe Jesudjiwa. Gobu Felipe buãma emi duwe Apã Wachu djawu parapyre, idjape kiuwã go djawu gatu Jesudjiwa.

![](https://cdn.door43.org/obs/jpg/360px/obs-en-45-11.jpg)

Felipe emi go Etiopia pua wata obu go ape rupi, wẽma o go ype. Go Etiopia pua inama: “ Maĩ! Kowepe ĩ y ichakrã! Dje chope y tõ pypywerã ko?” Gobu go dja wyrawatatygipe inama mondo kawãwã.

![](https://cdn.door43.org/obs/jpg/360px/obs-en-45-12.jpg)

Gobu go edjyma djo ype, emi Felipe y tõ pypyma go Etiopia puape. Mirõngi y puare wẽmbu, go Krei Gatu rama Felipepe duwe rekuaty. Go rupi wachama o emi, djawu gatu kiuwã Jesudjiwa ache wywype.

![](https://cdn.door43.org/obs/jpg/360px/obs-en-45-13.jpg)

Go Etiopia pua rõ o wyche ape rupi dja ekõandy rekuaty. Go ury gatuma, Jesudji kua gatu buare.

_Kiupyre Apostol djapowedjiwa 6:8-8:5;_

_8:26-40,_

*Biblia parapyrepe*

## 46. Pablo Jesu kuere mudjãndygima

https://openbiblestories.org/l/guq/story-46/

![](https://cdn.door43.org/obs/jpg/360px/obs-en-46-01.jpg)

Saulo rõ go kbuchuwe warõwegi go Estebam pachoaregi tyru wywydji. Go kuallã Jesudji, go buare djueipa roma mondo Jesu kuere mudjãndygi wywype. Jerusalem tapy wywy rupi ikẽmba roma djo, pychywã kbe’e emi kudjã wywype, pypywã tapy djãwãllãpe. Go pa’i ymachidja wachugi inama idjape, tapy tãrã Damaskope owã, go pua Jesu kuere mudjãndygi wywype pychywã emi eruwã Jerusalempe.

![](https://cdn.door43.org/obs/jpg/360px/obs-en-46-02.jpg)

Saulo obu Damasko ape rupi, etakrã bue endy chapi wachu wẽma bu ywadjiware mama roma idja ruwa. Gobu Saulo wama ywype emi wenduma etakrã djawu: „Saulo, Saulo! Bue buare dje kuara bue buchã djapowã chodji?” Saulo djawu pepyma: “Awa rõ dje, kiuatygi?” Jesu inama: “Cho rõ Jesu. Dje rõ chope mĩ buchã djue.”

![](https://cdn.door43.org/obs/jpg/360px/obs-en-46-03.jpg)

Saulo puãmbu, chãllãma. Gobu dja bygatutygi wywy rama idjape Damaskope. Saulo rõ bakupyre ubeche emi y tykubechema brewipychã krey pukubu.

![](https://cdn.door43.org/obs/jpg/360px/obs-en-46-04.jpg)

Damaskope ĩ etakrã Jesu kuere mudjãndygi, idja bykuapyre rõ Anania. Apã Wachu inama idjape: “Amaty kua go tapy Saulo ĩngipe. Djono dje ipo idja llabu, idja wechãwã emi.” Anania rõ inama: “Cho Rekoatygi, cho wenduma, mawe nonga kowe kbe’e bue buchã djapowe dje kuere mudjãndygi wywype.” Apã Wachu djawu pepy idjape: “Amaty kua! Cho prawoma idjape, kiu gatuwã cho bykuapyre Juda pua wywype emi duwe ache wywype. Go wachawerã tãrã djuei’i rupi cho bykuapyredjiwa.”

![](https://cdn.door43.org/obs/jpg/360px/obs-en-46-05.jpg)

Go buare Anania oma Saulo endape, djonoma dja ipo idja llabu emi inama: “Jesu, go wẽaregi dje chã ruwa ape rupi, chope buema dje endape, dje wechãwã emi, gobu dje embepawã Krei Gatudji.” Gope rõ, Saulo wechã gatuma, emi Anania y tõ pypyma idjape. Gobu Saulo bakupyre uma, go nonga dja eche chidja gatuma emi.

![](https://cdn.door43.org/obs/jpg/360px/obs-en-46-06.jpg)

Gobu Saulo buã reko kiu gatuwã Juda pua wywype Damaskope, emi inama: “Jesu rõ Apã Wachu Tay!” Go Juda pua wywy chã opopama. Go kbe’e Jesu kuere mudjãndygi wywype reko buchãregi kua gatuma kowebu Jesudji! Saulo djawu reko Juda pua wywydji emi djawu gatuma mondo, Jesu go rõ go Mesia.

![](https://cdn.door43.org/obs/jpg/360px/obs-en-46-07.jpg)

Tãrã krey wachubu, Juda pua wywy djawuma reko Saulope pacho djonowã. Gogi buema mondo kbe’e warõ rekowã go tapy tãrã ikẽ lluandype, idjape pachowã. Saulo wenduma gogi wywy djapo djuegi. Gobu dja bygatutygi wywy kuwẽma idjape kadjãwã. Etakrã chãwãmbu rudjyma mondo idjape raity wachupe tapy tãrã pechepyre ruwa. Saulo Damasko puare kadjãmbu, buãma kiu rekowã Jesudjiwa.

![](https://cdn.door43.org/obs/jpg/360px/obs-en-46-08.jpg)

Gobu Saulo oma Jerusalempe, wechãwã Jesu kuere mudjãndygi wywype. Gogi wywy rõ krymballã idjadji. Gobu etakrã kbe’e Jesudji kua gatugi, idja bykuapyre rõ Bernabe, rama Saulope apostol wywy endape, emi kiuma, manonga Saulo kiu rekowe krymba gatupe Damaskope. Gobu Jesu kuere mudjãndygi wywy ĩma Saulodji emi.

![](https://cdn.door43.org/obs/jpg/360px/obs-en-46-09.jpg)

Go djuei wachu wẽmbu Jerusalempe, tãrãllã Jesudji kua gatugi kadjãwe emi oma budjakrãpe tapy tãrã Antiokiape. Gope kiu reko Jesudjiwa. Tãrã Antiokia pua go rõ Juda puallã. Go nongabu djepe tãrã go pua wedjama bue buchã idja djapowe, Jesu kuere rupi mudjãwã. Gobu Bernabe Saulodji oma gope, Jesudjiwa kiu gatuwã Jesudji kua pougi wywype, emi Jesu kuere mudjãndygi noãndype kuwẽwã chidja gatu rekowã. Antiokiape rõ go Jesudji kua gatugi wywype pukapyare “Krito mudjãndygi”.

![](https://cdn.door43.org/obs/jpg/360px/obs-en-46-10.jpg)

Etakrã kreybu go Krito mudjãndygi wywy Antiokia pua krandobuãmbu bue ullãpe, go Krei Gatu inama gogi wywype: “Matã ga mondo pendje byche puare Bernabe emi Saulope, cho inawerã gogipe dja djaporãngi.” Go buare go Jesu kuere mudjãndygi wywy Antiokia pua krandobuãma Bernabe emi Saulodji, emi djonoma dja ipo idja llabu. Gobu buema mondo, djawu gatu kiuwã Jesudjiwa duwe rekuaty wywy. Bernabe emi Saulo kiu gatu reko duwe ache wywype, gobu tãrã ache kua gatuma Jesudji.

*Kiupyre Apostol djapowedjiwa 8:3; 9:1-31; 11:19-26; 13:1-3, Biblia parapyrepe*

## 47. Pablo emi Sila tapy tãrã Filipope

https://openbiblestories.org/l/guq/story-47/

![](https://cdn.door43.org/obs/jpg/360px/obs-en-47-01.jpg)

Saulo wata obu Roma chidja llambaty wywy rupi, buãma gope dja bykuapyre Roma pua djawupe, “Pablo”. Etakrã kreybu Pablo emi dja bygatutygi Sila oma tapy tãrã Filipope, kiuwã djawu gatu Jesudjiwa. Gogi wẽma o tapy tãrã puare ypurã embe rupi, ache wywy krandobuã endatype. Gope doroma etakrã kudjã, dja bykuapyre Lidia. Go rõ butadji bue meandygi, by gatu Apã Wachupe emi pre gatu idjadji.

![](https://cdn.door43.org/obs/jpg/360px/obs-en-47-02.jpg)

Apã Wachu pokoma dja djãpe, go kua gatuwã Jesudjiwa djawu, gobu go dja tapy puagi wywydji y tõ pypypama. Go pukama Pablo emi Silape, owã idja rupi ikẽwã dja tapype. Gobu gogi ikẽma Lidia emi dja tapy puagi wywydji.

![](https://cdn.door43.org/obs/jpg/360px/obs-en-47-03.jpg)

Pablo emi Sila noã tãrãma go ache wywydji go krandobuã endatype. Kreybu wywy gogi gope obu, etakrã rekopyty daregi, krei buchã rekogi oty gogi rupi. Go krei buchã rupi kiuma achepe bue ekõwãngi. Go nonga noãndy tãrã buta dja rekoatygipe etakrã bue wywy kuatygi nonga.

![](https://cdn.door43.org/obs/jpg/360px/obs-en-47-04.jpg)

Go mirõngi wata obu, go rekopyty daregi oma idja kuere rupi, emi puka chidjama: ”Kowe kbe’e wywy rõ go Apã Wachu ywadjiwa buetygi. Gogi kiu reko pendjepe go ape, pendje bue buchã djapowedjiwa kuwẽmbyrã!” Go nonga djapoma tãrã kreybu, go buare Pablo uryllãma.

![](https://cdn.door43.org/obs/jpg/360px/obs-en-47-05.jpg)

Duwe kreybu rõ, go rekopyty daregi puka chidjabu emi, Pablo djerema idja rekuaty, gobu inama go krei buchã dja eche pua ĩngipe: “Jesu bykuapyrepe, wẽ kua.” Gope rõ go krei buchã wedjama idjape.

![](https://cdn.door43.org/obs/jpg/360px/obs-en-47-06.jpg)

Gobu go dare rekoatygi wywy prandjã buchãma! Wechãma go krei buchã ĩllambu daregi echepe, gogi bue wẽwãngi wywy kuallãwerã. Go nonga ache wywy mẽllãwerã buta go dare rekoatygi wywype, gogi idjape kiuwã, bue rõ idjape wẽwerã mawembu.

![](https://cdn.door43.org/obs/jpg/360px/obs-en-47-07.jpg)

Go buare go dare rekoatygi wywy rama Pablo emi Silape go Roma pua ymachidjagi chã ruwa. Gogi wywy rõ pacho tãrãma idjape emi pypyma mondo tapy djãwãllãpe.

![](https://cdn.door43.org/obs/jpg/360px/obs-en-47-08.jpg)

Gogi wywy pypyma mondo Pablo emi Silape go tapy djãwãllã krãpĩpe, emi muchãma dja pychã tykõ wachupe. Go nongabu djepe, chãwã byche rupi Pablo emi Sila pre’e reko Apã Wachupe.

![](https://cdn.door43.org/obs/jpg/360px/obs-en-47-09.jpg)

Gope rõ ywy ryry chidja roma! Tapy djãwãllã ikẽ lluandy wywy pekapa roma, emi go kbe’e pychypyregi tykõ wywy wapama ywype.

![](https://cdn.door43.org/obs/jpg/360px/obs-en-47-10.jpg)

Go tapy djãwãllã warõandygi puãma, gobu wechãmbu tapy ikẽ lluandy wywy pekapama, krymballã buchã! Idja djã djawuma, kbe’e pychypyregi wywy kandjãmba roma. Go buare idja pycho rawe idjadji pẽ akuape. (Go kua gatuma, Roma pua ymachidjagi idjape pychowerã, gogi wedjabu kbe’e tapy djãwãllã puagi wywy kandjãwã.) Pablo rõ wechãma idjape emi puka chidjama: “Go nonga djapoeme! Ore wywy ĩ wyche kowepe!”

![](https://cdn.door43.org/obs/jpg/360px/obs-en-47-11.jpg)

Go tapy djãwãllã warõandygi ryry buchã roma emi ekõma Pablo, Sila endape, gobu inama: “Bue rõ cho djapowerã, cho kuwẽwã?” Pablo djawu pepyma: “Kua ga mondo go Rekoatygi Jesudji, gobu Jesu kuwẽwerã djepe emi dje tapy pua wywype.” Gobu go tapy djãwãllã warõandygi rama Pablo emi Silape dja tapype, kuchĩwã dja eche pachopyregi. Pablo kiu gatu reko go djawu gatu Jesudjiwa idjape emi dja tapy puagi wywype.

![](https://cdn.door43.org/obs/jpg/360px/obs-en-47-12.jpg)

Go tapy djãwãllã warõandygi emi dja tapy puagi wywy kua gatuma Jesudji, emi y tõ pypyma. Gobu go tapy djãwãllã warõandygi mema bakupyre Pablo emi Silape, gobu ury gatuma edji.

![](https://cdn.door43.org/obs/jpg/360px/obs-en-47-13.jpg)

Duwe kreybu, go ymachidjagi wywy tapy tãrã pua puima Pablo emi Silape tapy djãwãllã puare, emi pukama wedjawã tapy tãrã Filipo. Gobu Pablo emi Sila oma, wechãwã Lidiape emi duwe dja bygatutygi wywype. Gobu wẽma o go tapy tãrã puare. Tãrã ache go pua wendu wyche go djawu gatu Jesudjiwa, emi tãrãma go Jesu kuere mudjãndygi noãndype.

![](https://cdn.door43.org/obs/jpg/360px/obs-en-47-14.jpg)

Pablo emi duwe Jesukrito mudjãndygi ymachidjagi wywy watama o tãrã tapy tãrã rupi, kiuwã ache wywype go djawu gatu Jesudjiwa. Gogi wywy parama emi tãrã parapyre, kiu gatuwã emi chidja mewã go Jesudji kua gatugi wywype go noãndy wywy rupi. Tãrãllã dja parawe nandje doroma Biblia parapyrepe.

_Kiupyre Apostol djapowedjiwa 16:11-40,_

*Biblia parapyrepe*

## 48. Jesu rõ go Mesia Apã Wachu mewegi

https://openbiblestories.org/l/guq/story-48/

![](https://cdn.door43.org/obs/jpg/360px/obs-en-48-01.jpg)

Apã Wachu djapobu kowe ywy, bue wywy kbegatueche endawe. Ĩllãwe bue buchã. Adam emi Ewa by gatu reko edji, emi by gatu Apã Wachupe. Ĩllãwe ywype eche achy, ĩllãwe emi mano. Apã Wachu by gatu, kowe ywype bue wywy go nonga ĩmbawã.

![](https://cdn.door43.org/obs/jpg/360px/obs-en-48-02.jpg)

Andjãwe rõ djawuwe membo rupi Ewape ka gatupe, idjape kabewãwã. Gobu gogi emi Adam bue buchã djapowe Apã Wachu chã ruwa. Go mirõngi bue buchã djapo buare, ache wywy kowe ywy llabu eche achy, emi go buare ache wywy manoma.

![](https://cdn.door43.org/obs/jpg/360px/obs-en-48-03.jpg)

Adam emi Ewa bue buchã djapo buare, wẽma bu duwe bue buchãeche. Go mirõngi byllãma Apã Wachupe. Go buare go kreydjiwe ache wywy opobu, by gatuma bue buchã djapowã, emi byllãma Apã Wachupe. Bue buchã rupi ache wywy emi Apã Wachu ekõ gatullãma okryrape. Apã Wachu rõ mima ape, ekõ gatuwã emi ache wywydji.

![](https://cdn.door43.org/obs/jpg/360px/obs-en-48-04.jpg)

Apã Wachu inawe, etakrã Ewa irõndy memby biriwerã membo tõpe, emi Andjãwe dja pychã atape chuwerã. Go djawu inambyty Andjãwe pychowerã go Mesiape, Apã Wachu rõ idjape puãwerã, manollãwã emi. Gobu go Mesia chidjawerã Andjãwedji gorãwe. Tãrã ruy wachabu, Apã Wachu buema Jesupe, ache wywy wechãwã, go rõ go Mesia.

![](https://cdn.door43.org/obs/jpg/360px/obs-en-48-05.jpg)

Apã Wachu buchãmbabu go ywy y pirã wachu rupi, mewe etakrã wyrakara, kuwẽwã go ache idjadji kua gatugipe. Go nonga ache wywy djuei buchã rawe dja bue buchã djapowedjiwa, Apã Wachu rõ buema mondo Jesupe, kuwẽwã go idjadji kua gatugi wywype.

![](https://cdn.door43.org/obs/jpg/360px/obs-en-48-06.jpg)

Tãrã ruybu pa’i wywy keĩ endawe we’e Apã Wachupe ache wywydjiwarã, gogi wywy wechãwã go idja bue buchã djapowedjiwa pacho puy wachuwerã. Ĩllã rõ ape we keĩmbyre wywy rupi ache bue buchã djapowe matãmbawã. Jesu rõ go pa’i ymachidja wachugi. Go rõ mewe dja eche we keĩmbyre etakrãeche nonga, ache kowe ywy pua wywy bue buchã djapowe matãmbawã. Go rama dja echedji bue buchã djapowedjiwa pacho puy wachu.

![](https://cdn.door43.org/obs/jpg/360px/obs-en-48-07.jpg)

Apã Wachu inama Abrahampe: “Duwe irõndy wywy kowe ywype kuwẽ gatupapyrã dje rupi.” Jesu rõ etakrã Abraham irõndy. Duwe irõndy wywy kuwẽ gatupapyrã idja rupi. Jesu kuwẽma ache idjadji kua gatugi wywype dja bue buchã djapowedji. Go nonga gogi wywy ekõwerã Abraham irõndy nonga.

![](https://cdn.door43.org/obs/jpg/360px/obs-en-48-08.jpg)

Apã Wachu inambu Abrahampe, dja tay Isaakpe pychowã we keĩmbyre nonga, mewe go wachupurã chue’e pychowã we keĩmbyre nonga dja tay Isaak endawepe. Nandje wywy manombawerã nandje bue buchã djapowedjiwa! Apã Wachu rõ mewe Jesupe, Apã Wachu wachupurã, manowã we keĩmbyre nonga nandje endawepe.

![](https://cdn.door43.org/obs/jpg/360px/obs-en-48-09.jpg)

Apã Wachu buebu go bue buchã krãpĩ pua Egipto llabu, inawe Israel tapy pua wywype, pychowã wachupurã memby kbegatugi, gobu kytywã go pirã dja tapy djãwã ikẽ lluandy wywydji. Apã Wachu go pirã wechãmbu, pokollãwe go tapy wywydji, dorogi wywype go pua pachollãwã. Kowegi ekõmbu, pukapyre Pakua.

![](https://cdn.door43.org/obs/jpg/360px/obs-en-48-10.jpg)

Jesu rõ go wachupurã nonga Pakuape pychopyregi. Go rõ kbegatueche, bue buchã djapollãndy, emi pachopyre go ury wachu Pakuape. Ache wywy Jesudji kua gatubu, Jesu pirã pepywerã dja bue buchã djapowedji. Gobu Apã Wachu pacho puy wachu wallãwerã idja llabu.

![](https://cdn.door43.org/obs/jpg/360px/obs-en-48-11.jpg)

Apã Wachu dja djawu mewe Israel pua wywype. Gogi wywy rõ dja chupa prawopyre. Kowebu rõ Apã Wachu mema djawu pou duwe ache kowe ywy pua wywy puarã. Go djawu pou rupi ĩma ape, ekõwã Apã Wachu chupa prawopyre nonga, ache wywy Jesudji kua gatubu.

![](https://cdn.door43.org/obs/jpg/360px/obs-en-48-12.jpg)

Moise rõ etakrã profeta wachu, Apã Wachu djawu kiuwegi. Jesu rõ go profeta wachueche duwe profeta wywydji. Go rõ Apã Wachu. Go nonga bue wywy idja djapowe emi inawe, Apã Wachu djapowe emi inawe. Go buare Jesupe pukapyty Apã Wachu Djawu.

![](https://cdn.door43.org/obs/jpg/360px/obs-en-48-13.jpg)

Apã Wachu inawe ymachidja wachugi Dawidpe, etakrã dja irõndy ymachidjawerã Apã Wachu chupadji gorãwe. Jesu rõ Apã Wachu Tay emi go Mesia, idja rõ Dawid irõndy gorãwe ymachidjawã.

![](https://cdn.door43.org/obs/jpg/360px/obs-en-48-14.jpg)

Dawid ymachidja endawe Israel pua wywydji, Jesu rõ ymachidjawerã ache wywydji emi bue wywydji kowe ywype! Go ekõwerã wyche, gobu ymachidjawerã dja chidja llambatype okryrape, emi djawu gatu buãwerã pichadji gorãwe.

_Kiupyre Moise parawe Génesis 1-3, 6,14,22; Exodo 12, 20; Mirõ Samuel parawe 7;_

_Parawe Hebreo puarã 3:1-6, 4:14-5:10, 7:1-8:13, 9:11-10:18;_

_Apokalisi 21_

*Biblia parapyrepe*

## 49. Apã Wachu djawu pou membyre

https://openbiblestories.org/l/guq/story-49/

![](https://cdn.door43.org/obs/jpg/360px/obs-en-49-01.jpg)

Etakrã Apã Wachu buetygi inawe go daregi kbe’e pokollãndygi Mariape, idja memby machĩwerã Apã Wachu Tay. Mariape kbe’e pokollãwe, go Krei Gatu ekõwe idja llabu, gobu idja brawoma. Gobu memby machĩma kbe’e, emi idjape bykuama Jesu. Go nonga Jesu rõ Apã Wachu, emi Jesu rõ kbe’e.

![](https://cdn.door43.org/obs/jpg/360px/obs-en-49-02.jpg)

Jesu djapowe tãrã bue wechãllãndygi, wechãwã, go rõ Apã Wachu. Go watawe y llabu, kawãwe wytu wachu, kuwẽwe tãrã ache eche achygipe, djapiwe tãrã krei buchã, manowegipe puãwe ekõwã emi, gobu ipo wikytãndji emi mirõ piradji mewe bue uwã ipo wachu (5.000) achepe.

![](https://cdn.door43.org/obs/jpg/360px/obs-en-49-03.jpg)

Emi Jesu rõ etakrã djawu kiuaty chidjaechegi. Go rõ Apã Wachu Taydjiwa, chidja gatu rupi djawuwe. Go kiuwe, nandje prawowã duwegi wywype, nandje prawoty nonga nandje eche.

![](https://cdn.door43.org/obs/jpg/360px/obs-en-49-04.jpg)

Go kiuwe emi, nandje prawo gatuechewã Apã Wachupe duwe bue wywydji, emi nandje bue tãrã rekogidji.

![](https://cdn.door43.org/obs/jpg/360px/obs-en-49-05.jpg)

Jesu inawe, Apã Wachu chidja llambaty rõ kbegatueche duwe bue wywydji kowe ywype. Go bue wachueche ache wywy puarã go rõ gogi wywy ĩwã Apã Wachu chidja llambatype. Ikẽ lluãwã Apã Wachu chidja llambatype, Jesu djepe kuwẽwerã dje bue buchã djapowedji.

![](https://cdn.door43.org/obs/jpg/360px/obs-en-49-06.jpg)

Jesu kiuwe, tãrãllã ache kua gatuwerã idjadji, emi kuwẽmbyrã, duwegi rõ kuallãwerã idjadji. Go inawe, tãrãllã ache go rõ ywy gatu nonga. Gogi wendu gatu go djawu gatu Jesudjiwa, go buare kuwẽmbyrã. Duwe ache go rõ ywy krere nonga ape rupi. Gope Apã Wachu djawu ã’ã ikẽllãwerã, gobu wẽllãwerã lla’a noãwã. Kowe ache wendu djuellã Jesu kiuwe emi ikẽllãwerã dja chidja llambatype.

![](https://cdn.door43.org/obs/jpg/360px/obs-en-49-07.jpg)

Jesu kiuwe, Apã Wachu by gatu bue buchã djapotygi wywype. Go kuwẽ djue gogi wywype dja bue buchã djapowedji, gobu djapo djue idjadji dja tay wywy.

![](https://cdn.door43.org/obs/jpg/360px/obs-en-49-08.jpg)

Jesu inawe emi, Apã Wachu byllã buchã bue buchã. Adam emi Ewa bue buchã djapowedjiwa dja irõndy wywy djueima. Go buare ache wywy kowe ywy pua bue buchã djapoty emi ekõ gatullã Apã Wachudji. Go nonga ache wywy rõ Apã Wachu byllãndygi wywy.

![](https://cdn.door43.org/obs/jpg/360px/obs-en-49-09.jpg)

Apã Wachu rõ by gatu buare ache wywype, buema mondo dja tay etakrãeche, ache wywy dja kuere rupi mudjãndygipe pacho puy wachullãwã dja bue buchã djapowedjiwa. Go nonga ekõ gatuwerã gorãwe Apã Wachu djãwẽ.

![](https://cdn.door43.org/obs/jpg/360px/obs-en-49-10.jpg)

Dje bue buchã djapowedjiwa, pachopyrã emi manowerã. Apã Wachu prandjã buchã rawe djedji. Gobu rõ prãndjã buchã endawepe djedji, Jesu llabu djonoma dja prandjã. Jesu manobu wyra wachapyredji, idja rama dje pacho puy wachu idjadji.

![](https://cdn.door43.org/obs/jpg/360px/obs-en-49-11.jpg)

Jesu bue buchã djapollãndy. Go rõ prawoma go pacho puy wachu rawã dja llabu emi pychopyre we keĩmbyre kbegatugi nonga, dje bue buchã djapowe matãwã, emi ache wywy kowe ywy llabuwa bue buchã djapowe matãwã. Jesu manodjiwa we keĩmbyre nonga, Apã Wachu kuallãwerã bue buchã djapowe wywy emi go bue buchãeche wywy.

![](https://cdn.door43.org/obs/jpg/360px/obs-en-49-12.jpg)

Kuwẽllãwerã djepe dje bue gatu djapowe wywy. Ĩllã bue’e dje djapowe ekõ gatuwã Apã Wachudji. Jesu etakrãeche djepe kuchĩwerã dje bue buchã djapowedji. Dje kua gatu ga mondo, Jesu rõ Apã Wachu Tay, emi idja manowe wyra wachapyredji dje endawepe, gobu Apã Wachu puãma idjape manowe byche puare, ekõwã emi.

![](https://cdn.door43.org/obs/jpg/360px/obs-en-49-13.jpg)

Apã Wachu kuwẽwerã ache wywy Jesudji kua gatugipe emi idjape prawowegipe dja rekoatygi. Idja rõ kuwẽllãwerã go ache idjadji kua djuellãngipe. Dje bue tãrã rekobu djepe emi bue tãrã rekollãmbu djepe, dje kbe’ebu djepe emi kudjãmbu djepe, dje kbuchuwebu djepe emi chuepurãmbu djepe, ĩllã duwe ape. Apã Wachu djepe by gatu emi inama dje mudjã gatuwã Jesudji. Go nonga idjadji dje ekõ gatuwerã.

![](https://cdn.door43.org/obs/jpg/360px/obs-en-49-14.jpg)

Jesu pukama nandje mudjã gatuwã dja kuere rupi emi y tõ pypywã. Dje kua gatuma ko, Jesu rõ go Mesia, Apã Wachu Tay etakrãeche? Dje kua gatuma ko, dje rõ etakrã bue buchã djapoatygi, emi Apã Wachu djepe pacho puy wachuwerã? Dje kua gatuma ko, Jesu manowe wyra wachapyredji, matãwã dje bue buchã djapowe wywy?

![](https://cdn.door43.org/obs/jpg/360px/obs-en-49-15.jpg)

Dje kua gatubu Jesudji, emi dje kua gatubu bue rõ djedji djapowe, dje rõ etakrã Krito mudjãndygi! Apã Wachu djepe matãma Andjãwe chidja llambaty chãwã puare, emi rama djepe Apã Wachu chidja llambaty bype gatupe. Apã Wachu matãma djedji, dje bue wywy djapowã nondjeware nonga, emi mema djepe, ape pou wata gatuwã djapãllãpe.

![](https://cdn.door43.org/obs/jpg/360px/obs-en-49-16.jpg)

Dje rõ Krito mudjãndygibu, Apã Wachu kuallãma dje bue buchã djapowe wywy, Jesu djapowedjiwa. Kowebu Apã Wachu puarã dje rõ etakrã dja bygatutygi, idja rõ rypyllãeche dje djãwẽ. Dje ekõllãma dja byllãndygi nonga.

![](https://cdn.door43.org/obs/jpg/360px/obs-en-49-17.jpg)

Dje ekõmbu Apã Wachu bygatutygi, emi ekõmbu nandje Rekoatygi Jesu buepytygi, dje djapo djue Jesu kiuwe nonga. Dje ekõmbu djepe Krito mudjãndygi, buãwerã wyche, dje bue buchã djapowã. Apã Wachu rõ dja djawu djapowerã emi inama, dje kiubu dje bue buchã djapowe wywy, go djepe kuwẽwerã. Gobu chidja mewerã djepe, dje chidjawã bue buchãndji.

![](https://cdn.door43.org/obs/jpg/360px/obs-en-49-18.jpg)

Apã Wachu inama djepe, dje krandobuãwã, dje maĩ rekowã dja djawu parapyredji, dje prewã idjape duwe Krito mudjãndygi wywydji, emi kiuwã duwegipe bue rõ Apã Wachu djedji djapowe. Dje kowegi djapo gatubu, ekõ gatuwerã Apã Wachudji.

_Kiupyre Roma puagi 3:21-26, 5:1-11;_

_Juan 3:16; Marko 16:16; Kolosa puagi 1:13-14; Mirõ Korinto puagi 5::17-21;_

_Etakrã Juan 1:5-10_

*Biblia parapyrepe*

## 50. Jesu ekõwerã wyche

https://openbiblestories.org/l/guq/story-50/

![](https://cdn.door43.org/obs/jpg/360px/obs-en-50-01.jpg)

Mirõ wachu (2.000) ruybu tãrã tãrãeche ache kowe ywype wenduma go djawu gatu Jesudjiwa, go rõ go Mesia. Jesudji kua gatugi noãndy neina wachueche roma. Jesu inawe, ekõwerã wyche, kowe ywy krãpĩmbu. Go ekõllãmbu djepe, djapowerã dja djawu mewe nonga.

![](https://cdn.door43.org/obs/jpg/360px/obs-en-50-02.jpg)

Nandje warõmbu wyche, Jesu ekõwã, Apã Wachu by gatu, nandje ekõ gatuwã emi pre gatuwã idjadji. Idja by gatu emi, nandje djawu gatuwã duwegipe dja chidja llambatydji. Jesu ekõmbu kowe ywype, inama: “Cho kuere mudjãndygi wywy kiuwerã go djawu gatu Apã Wachu chidja llambatydjiwa ache wywype kowe ywy llabu. Gobu krãpĩwerã kowe ywy.”

![](https://cdn.door43.org/obs/jpg/360px/obs-en-50-03.jpg)

Tãrã irõndy wendullã wyche Jesudjiwa. Djopi nondjebu ywadji, Jesu inama dja kuere mudjãndygi wywype, kiuwã go djawu gatu go ache wywy wendullãngipe. Go inama: “Amaty kua, pukawã irõndy wywype, mudjãwã cho kuere rupi!”, “Go bue ã’ã pechepyre kypepama noãmbawã.”

![](https://cdn.door43.org/obs/jpg/360px/obs-en-50-04.jpg)

Jesu inama emi: “Ĩllã buepytygi chidja rekogi, dja rekoatygi rõ chidjaechewe. Kowe ywype ymachidjagi wywy chope byllãre, go nonga emi pendjepe reko buchãmbyrã emi pachopyrã chodjiwa. Pendje djuei buchãmbu djepe kowe ywype, krymba gatu ga mondo, cho chidja rekowe Andjãwedji, go ymachidjagi kowe ywype. Pendje wywy mudjã gatubu cho kuere rupi go krãpĩ pewe, Apã Wachu pendjepe kuwẽwerã!”

![](https://cdn.door43.org/obs/jpg/360px/obs-en-50-05.jpg)

Jesu kiuma dja kuere mudjãndygi wywype djawu nonga, gogi wywy kua gatuwã, bue rõ wẽwerã ache wywype, kowe ywy krãpĩmbu. “Etakrã kbe’e djapima bue ã’ã gatu dja ywype. Go ikẽmbu, dja byllãndygi ekõma bue ã buchãngi djapiwã trigo ã bychepe, gobu oma.”

![](https://cdn.door43.org/obs/jpg/360px/obs-en-50-06.jpg)

“Go bue ã’ã lla’abu, go kbe’e buetygi wywy inama idjape: Rekoatygi, dje djapiwe bue ã’ã gatu go ywype. Bue buare wẽwe achĩ buchã ywydji? Dja rekoatygi djawu pepyma: Etakrã chope byllãndygi djapiwe mekã.”

![](https://cdn.door43.org/obs/jpg/360px/obs-en-50-07.jpg)

“Go buetygi wywy inama dja rekoatygipe: Ore matãwerã ko bue achĩ wywy? Dja rekoatygi rõ inama: Go nongallã. Pendje bue achĩ matãmbu, matãwerã emi tãrãllã trigo lla’a. Warõ ga mondo noã kreybu, gobu noãwã bue achĩ wywy mendypyrã. Go trigo rõ eru ga mondo, djonowã cho tapy bue ã’ã djono endatype.”

![](https://cdn.door43.org/obs/jpg/360px/obs-en-50-08.jpg)

Jesu kuere mudjãndygi kuallãma, bue rõ inambyty kowe djawu nonga, go buare pukama Jesupe, gogi wywype kiu gatuwã. Jesu inama: “Go kbe’e bue ã’ã gatu djapiaregi go rõ go Mesia. Go ywy rõ kowe ywy puagi nonga. Go bue ã’ã gatu go rõ ache Apã Wachu chidja llambaty pua nongagi.”

![](https://cdn.door43.org/obs/jpg/360px/obs-en-50-09.jpg)

“Go bue ã’ã buchãngi go rõ ache djembigi wywy nonga. Go bue ã’ã buchã djapiaregi go rõ Andjãwe. Go noã kreybu rõ kowe ywy krãpĩndjiwa, emi go kbe’e trigo noãndygi go rõ Apã Wachu buetygi wywy.”

![](https://cdn.door43.org/obs/jpg/360px/obs-en-50-10.jpg)

“Kowe ywy krãpĩmbu, Apã Wachu buetygi wywy noãwerã ache Andjãwe mudjãndygi wywype emi djapiwerã tata wachupe. Gope gogi wywy chingawerã, emi dja ã’ã aypãwerã djuei buchãpe. Gobu ache gatugi wywy chapiwerã krey nonga Apã Wachu, dja apã, chidja llambatype.”

![](https://cdn.door43.org/obs/jpg/360px/obs-en-50-11.jpg)

Jesu inama emi, go ekõwerã wyche kowe ywype, kowe ywy krãpĩ nondjebu. Go ekõwerã, idja owe nonga. Kowegi inambyty, Jesu ekõwerã dja echedji emi ekõwerã bakyreidji. Jesu ekõmbu, manombawegi wywy Krito mudjãndygi puãwerã manowe byche puare, gobu Jesupe dorowerã ywadji.

![](https://cdn.door43.org/obs/jpg/360px/obs-en-50-12.jpg)

Gobu Krito mudjãndygi wywy ekõngi wyche djopiwerã ywadji. Gope gogi emi go duwe Krito mudjãndygi manowe puare puãwegi wywy noãwerã edji. Gogi wywy ĩwerã Jesu djãwẽ. Gobu Jesu ekõwerã okryra gatupe dja mudjãndygi wywydji gorãwe.

![](https://cdn.door43.org/obs/jpg/360px/obs-en-50-13.jpg)

Jesu inawe, mewerã etakrã awã ymachidjagi nonga go idjadji kua gatugi wywype. Gogi wywy ymachidjawerã Apã Wachudji okryra gatuechepe gorãwe.

![](https://cdn.door43.org/obs/jpg/360px/obs-en-50-14.jpg)

Apã Wachu rõ pacho puy wachuwerã go ache wywy Jesudji kuallãngipe. Go itywerã gogi wywype tata wachupe, gope gogi chingawerã emi dja ã’ã aypãwerã djuei buchãpe gorãwe. Etakrã tata uwellãndygi kaipawerã gogi wywype kreybu emi chãwãmbu wywy, acho wywy uwerã gogi wywype emi wedjallãwerã.

![](https://cdn.door43.org/obs/jpg/360px/obs-en-50-15.jpg)

Jesu ekõmbu, buchãmbawerã Andjãwe emi dja chidja llambaty. Go itywerã idjape tata wachupe, gope kaipawerã gorãwe. Gope kaipawerã emi ache wywy go prawowegi Andjãwepe, dja kuere rupi mudjãwã, wendullãwã Apã Wachu djawu.

![](https://cdn.door43.org/obs/jpg/360px/obs-en-50-16.jpg)

Adam emi Ewa djapollã buare Apã Wachu djawu, emi eru buare bue buchã kowe ywype, Apã Wachu djawu buchãwe kowe ywydji, emi buchãwerã kowe ywy. Duwe kreybu rõ Apã Wachu djapowerã etakrã ywa pou emi etakrã ywy pou. Gogi rõ kbegatuechewerã.

![](https://cdn.door43.org/obs/jpg/360px/obs-en-50-17.jpg)

Jesu emi dja kuere mudjãndygi wywy ekõwerã go ywy poupe, emi Jesu ymachidjawerã bue wywydji gorãwe. Go chãry wywy piypawerã. Gope djuei buchã ĩllãwerãma, ury gatu ĩwerã, chinga ĩmbechewerã, bue buchã ĩllãwerãma, ache wywy eche achy bechewerã emi mano ĩmbechewerã. Jesu ymachidjawerã dja chidja llambatype okryra gatupe, emi djawu gatu buãwerã pichadji. Gobu ĩwerã dja kuere mudjãndygi wywy djãwẽ gorãwe.

_Kiupyre Mateo 24:14, 28:18; Juan 3:16;_

_Juan 15:20, 16:33; Apokalisi 2:10;_

_Mateo 13:24-30,36-42;_

_Etakrã Tesalonika puagi 4:13-5:10;_

_Santiago 1:12; Mateo 22:13;_

*Apokalisi 20:10, 21:1-22:21 Biblia parapyrepe*