# unfoldingWord Open Bible Stories — Kafa

- Language code: `kbr`
- Canonical page: https://openbiblestories.org/l/kbr/
- Stories in this file: 50 of 50
- Published by: DokuWiki
- Last release: 2026-10-27
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Kafa translation; it is not a translation of the whole Bible.

## 1. Halloo

https://openbiblestories.org/l/kbr/story-1/

![](https://cdn.door43.org/obs/jpg/360px/obs-en-01-01.jpg)

Hiniye desh no ciinemmo Yeeri bulli moyoon kottito bi tunooniye. Yeeri showoonaa bi maac beeti mooyiina'onon shiritte qemona halliye. Yeeri showoon bi hallitoye gubb showoo bi toomooch amoona aalli dunne manderoonaa shokkoonane. Bi maac batt amoona halleyaanbeetone. Tunebaani Yeeri ayaanoo aacina'o toommooch dogii beehe.

![](https://cdn.door43.org/obs/jpg/360px/obs-en-01-02.jpg)

Aroochee Yeeri bekko tunebe iye; bekkoo tunehe. Yeeriyoo bekko gaaweto bi tunoon ciinni'i areddoo ii shigiihe. Yeeri bekkoon manderooche barii'i manderoon xumo ii shigiihe. Yeeri batti batti qemooba bekkoon halliye.

![](https://cdn.door43.org/obs/jpg/360px/obs-en-01-03.jpg)

Guttinee qemooba Yeeri showooye damba beeti gumoon halliye. Ebina Yeeri aacoon gumooye bariihe.

![](https://cdn.door43.org/obs/jpg/360px/obs-en-01-04.jpg)

Keejjinnee qemooba aacoo shoowooche bi bariyemmon tuniihe. Yeeri shuu'i xaa'oon showoo, aaconoo baharoi'i shigiihe. Yeeriyo bi halliti mooyo gaaweto bi tunoon ciinniye.

![](https://cdn.door43.org/obs/jpg/360px/obs-en-01-05.jpg)

Aroochee Yeeri showoo michi yaroo bullinaa bechee yaroo bullinon colliibe iye. Ebiyoommono tunehe. Yeerio bi halliti mooyo gaaweto bi tunoon ciinniye.

![](https://cdn.door43.org/obs/jpg/360px/obs-en-01-06.jpg)

Awuddinnee qemi hallooba Yeeri aabeen, ageneenonaa xojjenena'on halliye. Yeeri areddoonaa xumoonon, natinaꞌonaa yemeeneenaꞌonon boonoshi barbariyemmon tuniihe. Yeerio bi halliti mooyo gaaweto bi tunoon ciinniye.

![](https://cdn.door43.org/obs/jpg/360px/obs-en-01-07.jpg)

Uuchinnee qemooba Yeeri aachi daggooch beetinaꞌonaa Yoobbereenaꞌo bullinon halliye. Yeeri ebi gaaweto bi tunoon ciinniye. Halleetina'onoo diiriye.

![](https://cdn.door43.org/obs/jpg/360px/obs-en-01-08.jpg)

Shirittinne qemooba Yeeri “Showoo kashechi halleenaꞌo” tunebeete iye. Yeeri gettitoommono tunehe. Ikkikkeena'o goyee gijjeena'o, ikkikkeena'o yuummerena'o, ikkikkeena'o kubbi cooxina'one. Yeeri ebi gaaweto bi tunoon ciinniye.

![](https://cdn.door43.org/obs/jpg/360px/obs-en-01-09.jpg)

Yeeri “Ashoon no malletoona, noon shaahoonoo tuniiree hallibone; bahareexi haasheenaꞌon, shimaayoona yoobbiibeeti yoobbereenaꞌon, gijjeenaꞌonaa cooxinaꞌonon, showoo toommona yuummiibeeti yuummere halleenaꞌo bullinoo hajjibeete” iye.

![](https://cdn.door43.org/obs/jpg/360px/obs-en-01-10.jpg)

Ebich Yeeri showoochee buttoon daamii'i ashoon hallii'i kashee hiinoon biich immiye. Ebi ashooyichi shigo Addaami getteehe. Yeeri Addaami beeti xaa'ooch bechoon bechii'i bi shiimeemoyich Addaamin arooch kotiihe.

![](https://cdn.door43.org/obs/jpg/360px/obs-en-01-11.jpg)

Bechee xaa'oochoo Yeeri gutte baribaritii mixina'on bechiye, eboshiyo kashee mixonaa gondoonaa deꞌoonon arichiibeeti mixonane. Yeeri Addaamin bechee xaa'ooch beeti gondoonaa deꞌoonon arichiibeeti michi aafooye bekk, bechee daggooch beeti michi aafoo bulliiche mamo bi hakkoon gettiye. Ebi gondoonaa deꞌoonon arichiibeeti michi aafoochee bi maahoba, iberoon qitemmo bi tunoon gettiye.

![](https://cdn.door43.org/obs/jpg/360px/obs-en-01-12.jpg)

Ebiye gubb Yeeri Addaamich asho ikkeeton bi beemo gaaweto toonoone ii gettiye. Gijjeena'o daggoochee ikkoona Addaamich gaacho tuno hakkaanoone.

![](https://cdn.door43.org/obs/jpg/360px/obs-en-01-13.jpg)

Yeeri Addaami toommooch magge tokketoon miinjjiye. Addaami tokketeechaa, bi naaboochee ikke shaawusheen waaxxii'i maachee tunii shuunee gawaatii'i Addaam waan deebiye.

![](https://cdn.door43.org/obs/jpg/360px/obs-en-01-14.jpg)

Addaami biin bi ciinihoba ishichiye:- “Hini taan shaahiyaane; asho waanee bi danetoyich, ashe getteebu” iye. Ebich asho bi nihoonaa bi indeenon qayiichi, bi mecheena tookki ikkoo tunemmone; gutteenaꞌoo ikke meeno tunemminaꞌone.

![](https://cdn.door43.org/obs/jpg/360px/obs-en-01-15.jpg)

Yeeri anaamonaa maacheenon bi malleetoona halliye. Yeerio boonoshin diirii'i ishichiye, “Shiijje shiijjerebote! Showoo bulliichoo ceenote!” iye.

![](https://cdn.door43.org/obs/jpg/360px/obs-en-01-16.jpg)

Shabaattinee qemooba Yeeri bi hallee shuunoon tacciye. Yeeri bi shuunoon shuunee bi taccitoyich, shabaattinnee qemooba shuunoo bulliichee kashehe. Ebich Yeeri shuuneebee bi echeti shuunoo bulliichee kashehe, shabaattinnee qemonoo diiriꞌi yaafiihe. Ebiyoo hini aabooba bi shuunoo bulliichee bi kashetoyichiye. Yeeri shimaayoonaa showoonon bi hallihoba , boonoshin bi hallito ebiyoommi gommonane.

*Yaafe macaafee kiino:- Halloo 1-2.*

## 2. Axaaxoo showee dagg gimo

https://openbiblestories.org/l/kbr/story-2/

![](https://cdn.door43.org/obs/jpg/360px/obs-en-02-01.jpg)

Addaaminaa bi mecheena Yeeri shuuneti bechee xaa'ooch boonoshi beehoba emirechina'one. Guttiyona shokkaachoon beeheete, tunebaani shokkaachoon boonoshi tunetoyich ikkoo barooyich yeelleeyaaneena'one. Ebiyoo axaaxoo showee took aalloo bi tunetoyichiye. Boonoshiyoo bechee daggooch sha'eebee Yeerina yibbaatee beeheete.

![](https://cdn.door43.org/obs/jpg/360px/obs-en-02-02.jpg)

Tunebaani gonde accechi dingeroo bechee maac beetone. “Iberoon Yeeri ‘Becheeti michi aafo bulliichee maayaahote!’ itone?”i'i ureen echehe.

![](https://cdn.door43.org/obs/jpg/360px/obs-en-02-03.jpg)

Ureyoo, “Hini becheeti mixinaꞌo bulli aafoochee mamo hakkiyone. Tunebani Yeeri ‘Ittoshi qitaachemmoyich, hini becheeti michi daggooch beeti, ikke michi aafoochee maayaahote! Bi achoochoo shaggaahote!’ itone” iyan.

![](https://cdn.door43.org/obs/jpg/360px/obs-en-02-04.jpg)

Dingeroo ureyich ishichiye:- “Iberoon qitaachote. Yeeri bi ishichito, aroochee ittoshi maahoba, biin shaahemmo ittoshi tunoon, ittoshi aafo qecheetaa, gondoonaa deꞌoonon ariyemmo ittoshi tunoonoo bi ariibeetoyichiye” iye.

![](https://cdn.door43.org/obs/jpg/360px/obs-en-02-05.jpg)

Ureyoo ebi michi aafo mamoyich shaawiibeeto, ciinoyich dakiibeeto, ariyoon imoyichoo gaaweto bi tunoon ciinnahan; ebi michi aafoochee daammaa maahan; wotta bi kenoyichoo immahan; aroo maahe.

![](https://cdn.door43.org/obs/jpg/360px/obs-en-02-06.jpg)

Gutteenaꞌochi aafo bekkech qecheehe. Shokkaachoo boonoshi tunoon ariiheete. Ebich balaasee waamon kuxxii kochiꞌi boonoshi achoon qeriyeete.

![](https://cdn.door43.org/obs/jpg/360px/obs-en-02-07.jpg)

Addaaminaa bi mecheena becheeti michi daggooch Doono Yeerichi shaꞌee qaaroon waayehee'i bi aafoochee aasheheete. Doono Yeeriyoo Addaamin ceeggiꞌi, “Aabiichiye ne beeto?” iye. Addaamiyoo wochiꞌi, “Michi daggoochaa ne shaꞌee qaaroon waayaꞌa, shokkaachoo ta tunetoyich, shattahoye; aashaanoo iyoye” iye.

![](https://cdn.door43.org/obs/jpg/360px/obs-en-02-08.jpg)

Doono Yeeriyoo “Shokkaachoo ne tunoon konine neech gettito? ‘Aroochee maayaahine!’ ta iti michi aafoochee maatine?” iye. Addaamiyoo “Taanna tookki bi tunemmoyich taach ne immeti ure, aree ebi michi aafoochee kuxxaꞌa bi imeenane ta maato” iye. Doono Yeeriyoo ureen “Ebi ne tuniiti mooyo, amoone?” iye. Ureyoo wochaꞌa, “Dingero taan dawusheenane ta maato” iyan.

![](https://cdn.door43.org/obs/jpg/360px/obs-en-02-09.jpg)

Doono Yeeriyoo dingeroyich ishichiye:- “Ebin ne tuniitoyich, neennaa ureena daggooch, ne yaroonaa bi yaroona daggoochoo kaaroon geddemmo taane; biyoo ne qelloon pharixxemmone; newoo bi shoqqoon baniyemmo neene” iye.

![](https://cdn.door43.org/obs/jpg/360px/obs-en-02-10.jpg)

Ureyichoo ishichiye:- “Ne xifehoba xuuxoon, bushoon ne shiyiyooboo maaxoon, oogichi neech woddiyemmo taane; ne qaatoo ne keno waan tunemmone; biyoo neyee damboo tunemmone” iye.

![](https://cdn.door43.org/obs/jpg/360px/obs-en-02-11.jpg)

Addaamichoo ishichiye:- “Ne mecheechi qaaroon waayaꞌa, ‘Aroochee maayaahine!’ ta iti michi aafoochee ne maatoyich, showoo ne naboona uppeto tunebe; ne kasho beemmi wottoon, aayiree aroochee maayemmo neene. Showoochee halleeto neene; ebich showooch wottemmo neene. Addaamiyoo bi mecheen kashechi asho bullich indee bi tunetoyich, Hewaani ii shigiihe. Ebiyoo kashoo immaabeeti gettone. Doono Yeeri Addaaminaa bi mecheenoyich gooqqoochee tahoon shuuneꞌi tajjiye.

![](https://cdn.door43.org/obs/jpg/360px/obs-en-02-12.jpg)

Aroochee Doono Yeeri ishichiye:- “Ebiyoche asho gondoonaa deꞌoonon ariyoona no daggoochee ikkoommon tunetone. Andoo bi kishoon yaggiree kashee michi aafoochee daami bi maataachemmoyich, maaree bulli yemeenoon kashecho tune bi beetaachemmoyich Addaaminaa Heewaaninon Edeni bechee daggoochee kichiye.” Aroochee kashee michi aafoochee koniyona daami bi maataachemoyich kashee mixo waan daammiibeeti gommon quyemmi giidechi maraakeena'on beche michi daggooch kotiihe.

*Yaafe macaafee kiino:- Halloo 3*

## 3. Aalliyee aaco

https://openbiblestories.org/l/kbr/story-3/

![](https://cdn.door43.org/obs/jpg/360px/obs-en-03-01.jpg)

Genjje yemeenoye gubb meeti asheena'o showee tookk beeheete. Boonoshiyoo gonedeena'onaa giidechina'ona tuneheete. Gondo woddee woddee bi hamona tiyitona, Yeeri aalliyee aacona showoon aalliya kuxiye.

![](https://cdn.door43.org/obs/jpg/360px/obs-en-03-02.jpg)

Tunebani Noohi Doono Yeerichi aafooch gidoon danehe. Noohi bi yemeenee shiijjeree daggoochee cadiqoonaa Yeerich deꞌa iibeetonane. Yeeriyoo deejjiya bi gabbiti aalliyee aachichon Noohich gettiye. Oogee markaboon bi shuunemmon Yeeri biich gettiye.

![](https://cdn.door43.org/obs/jpg/360px/obs-en-03-03.jpg)

Yeeriyoo Noohi markaboon bi shuunemmon gettiye. Ebi marikabee gidoo 140 meetiro, bi maaco 23 meetiro, bi neexoo 13 meetira qato tunebe iye. Noohi shuunemmi Marikabee, mixoochee shuuneeti tuneechi deshee kaama keejje tookki kuxechi, meeti gattechi, kechi aafechina, mallee kellechinane. Marikabe Noohinaa bi kechi asheena'on, showee tookk beeti gijjeena'o bullin aalliyee aacooche bi wodiiyemmoyich shuuneetine.

![](https://cdn.door43.org/obs/jpg/360px/obs-en-03-04.jpg)

Noohiyoo Yeeri getoyich de'a iye. Bi keejje bushiishoona tookkii Yeeri gettitoommona marikabeen shuuneheete. Marikabe oogeeti bi tunetoyich bi shuunoo meeti naton daamiye. Noohi woyemmi aalliyee aachichon meeqeqeebee Yeeri waan asheena'o wottemmon gettii beehe, tunebaani boonoshi biin gibenoona waayeyaanena'one.

![](https://cdn.door43.org/obs/jpg/360px/obs-en-03-05.jpg)

Yeeri bede maayoon boonoshi qellichinaa gijjeena'onoyich boonoshi kiciyemmon Noohinaa bi kechi asheena'onoyich gettiye. Bulli mooyo qannihoba Noohich, bi mecheech, bi keejje anaami bushiisheena'onaa boonoshi mecheena'onoyich marikabee maac boonoshi giyemmi deco shagoon Yeeri gettiye. Ebina shimite asheena'o marikabe maac giiheete.

![](https://cdn.door43.org/obs/jpg/360px/obs-en-03-06.jpg)

Yoobbereenaꞌon daakii'i gijjeenaꞌo bullichi anaamaa maachoon aalliyee aacoochee boonoshi woddiyemmoyich Yeeri Noohi waan daachiihe. Gijjeena'o bullinoochee deejjooch tunnemmi shabaatti shabaatte xalle anaamaa maacheena'on Noohi marikabooch daachiihe. Bulliyona marikabooch boonoshi giyihoba Yeeri bi qelloona marikabe kelloon hicciye.

![](https://cdn.door43.org/obs/jpg/360px/obs-en-03-07.jpg)

Aroochee amiyoo dihoo yechiye, shekireebee, shekireebee, shekireebee, 40 qemonaa xumoonon dihiye. Ooge aachi xuupho showoochee borihee beehe. Showee took beeti mooyo bulli aacona qereehe, genjjee guudina'oona aacona qereeheete.

![](https://cdn.door43.org/obs/jpg/360px/obs-en-03-08.jpg)

Marikabee maac beeti asheena'onaa gijjeena'onye besh showee toommooch beeti moyoo bulli qitiye. Marikabeyoo aachi toommooch tegabee bi maac beetina'o bullin woddiihan.

![](https://cdn.door43.org/obs/jpg/360px/obs-en-03-09.jpg)

Amiyoo dihoo bi neexetoye gubb marikabe uuche agenooyich aachi toommooch tegiyaan. Ebiyooba aaco shappoon yechiye. Ikke areddoon marikabe guudi shimbooch kotahan, tunebaani showoo andoo aacona qeree bi iyitoommoniye. Keejjee agenooye gubb guudi cilleena'o bekkeheete.

![](https://cdn.door43.org/obs/jpg/360px/obs-en-03-10.jpg)

Aabbe qemoyee gubb Noohi, aaco showee toommoochee shuuqii bi iyito gaata hami beegoi'i kurecheen kichii daachiihe. Kurecheyoo okk hach guuddaa yoobbaabee shuu'i showoo qaawaa dano mawiihan.

![](https://cdn.door43.org/obs/jpg/360px/obs-en-03-11.jpg)

Gubb Noohi uggeen daachiihe. Tunebaani ugge bi baatoon bi kotiyemmi xaaꞌoon muccaa'a Nooh waan wottaa waahan. Shabaatte qemoyee gubb uggeen wochinnoon kichii daachiihe. Uggeyoo yahee waajji nolloon bi gashoona shaaccaaꞌa wottahan. Aaco showee toommoochee bi shappitoyich bechee colloo kechibeehe.

![](https://cdn.door43.org/obs/jpg/360px/obs-en-03-12.jpg)

Noohi ikke shabaattoon yagiꞌi, uggeen keejjinnoon kichii daachiihe. Ebiyooba ugge bi koteemmi xaa'oon bi danetoyich wottaa waataaneene. Aacoo shuuqqii hammii beehe.

![](https://cdn.door43.org/obs/jpg/360px/obs-en-03-13.jpg)

Gutte agenooye gubb Yeeri Noohich ne, ne kechi ashoonaa gijjeena'ona bulla marikabooche keyote iye. Kechi asheena'oo marikabooche kechiyeete. Arooche meeti bushiisheena'onaa bushaa bushiisheena'onon shii showoona ceeniyeete.

![](https://cdn.door43.org/obs/jpg/360px/obs-en-03-14.jpg)

Noohi marikabooche bi kechitoye gubb deejjee gudo shuunee'i gijjoo bulliiche deejjooch giddi bedon Yeerich deejjiye. Yeeriyoo ebi deejjoona bi imiritoyich Noohinaa bi kechi asheena'onon diiriye.

![](https://cdn.door43.org/obs/jpg/360px/obs-en-03-15.jpg)

Yeeriyoo, “ashoo bi tuniibeeti gonde mooyoyich wochinnoon showoon ufaachemoyich wogoon giyemmo taane. Asheena'o boonoshi bushittinoochee tiijjii'i axaaxechina'o boonoshi tunetaanoona wochinnoon showoon aalliyee aacona aalliyaachemmo taane” iye.

![](https://cdn.door43.org/obs/jpg/360px/obs-en-03-16.jpg)

Yeeri bi wogoyich malleeto bi tunemmon batti batti ximbettoon qubee daggooch geddiye. Ximbettoo bulli aabo shimaayooch bekkeebeetone. Yeeriyoo ebi ximbettee naboona ashich bi giiti wogoon shalligiye.

*Yaafe macaafe kiino:- Halloo 6-8*

## 4. Yeeri Abrahaamina tookkii bi giiti wogo

https://openbiblestories.org/l/kbr/story-4/

![](https://cdn.door43.org/obs/jpg/360px/obs-en-04-01.jpg)

Aalliyee aaco besheti meeti natoye gubb asheena'o showee toommooch wottee meetiyeete. Bulliyoo ikke noonoona yibbaate beeheete. Yeeri boonoshich bi gettitoommon showoona ceenon qajjiichi ikke xaa'ooch kicee'i katamoon shuuneheete.

![](https://cdn.door43.org/obs/jpg/360px/obs-en-04-02.jpg)

Boonoshiyo oogeton geecechina'onaa Yeeri boonoshich gettiti mooyon aaxiyaane asheena'one. Ebiyeeno wotta shimaayooch shagonei'i genjje dilaaloonon shuunooch giyiheete. Yeeriyoo ebi asheena'o gondoon shuunoona boonoshi qaxiroon ciinniye. Ebiyee beshiti axaaxoono shuuno hakkii beeheete.

![](https://cdn.door43.org/obs/jpg/360px/obs-en-04-03.jpg)

Ebich Yeeri boonoshi noonoon bare meeti bariti noonooch shaddii'i showee toommo bulliich shaciye. Shuuneyaa boonoshi kottiti katamee shigo Baabiloon getteehe. Ebi shigee biishoo usheeto oohe tamboo getone.

![](https://cdn.door43.org/obs/jpg/360px/obs-en-04-04.jpg)

Balle natoye gubb Doono Yeeri Abrami getteeti ikke urooyich ishichiye:- “Ne showoochee, ne xibeenaꞌo waanee, ne nihoochi kexoochee keyiree, neech ta bekkiyemmi showooch hambe! Aroochaa neen diireemmo taane, oogeti aagetoon neen tuniyeemmo taane; ne shigoonoo aricheto tuniyemmo taane. Neen diirimmon diiremmo taane; neen uppimmon uppemmo taane;

![](https://cdn.door43.org/obs/jpg/360px/obs-en-04-05.jpg)

Abraamiyoo Yeerich de'ai'i bi mechee Saarayin, bi guuninaꞌo bullinaa bi yaappho bullinon yechiꞌi, Yeeri biich bekkiiti Kanaanee showooch hammiye.

![](https://cdn.door43.org/obs/jpg/360px/obs-en-04-06.jpg)

Abraami Kanaanee showooch bi shagihoba , Doono Yeeri Abraamich bekkeꞌi, “Hini showoon neennaa ne shiijjereenaꞌoyich immemmo taane” iye. Abraamiyoo arooch kotehe.

![](https://cdn.door43.org/obs/jpg/360px/obs-en-04-07.jpg)

Ikke areddoon Abraami Nuggushoo Yeerich maddeebeeti Meleekitsedeqi getteeti qaabbe Yeeri qeeshoon danehe. Biyoo ishichii Abraamin diiriye:- “Shimaayoonaa showoonon halliti, Beshi Nuggushoo Yeeri Abraamin diiribe. Abraamiyoo biich beeto bulliichee aashiroochee ikke kishoon Meleekitsedeqich immiye.

![](https://cdn.door43.org/obs/jpg/360px/obs-en-04-08.jpg)

Meeti nato bi beshetaanoona Abraaminaa Saraayina andoo bushoo shiyaanoon beeheete. Yeeri wochinnoon Abraamich bushoo shiyemmonaa bi yaroo shimaajji xojjenoyichoommon meettemmona bi tunoon gibenikkoon immiye. Abraamiyoo Yeeri immiti gibenikkoon iberiihe. Abraami Yeeri gibenikkoon bi iberiitoyich kaamoo tunee'i haddeehe.

![](https://cdn.door43.org/obs/jpg/360px/obs-en-04-09.jpg)

Yeeri Abraamina tookki wogoon giihe. Wogo gutte asheena'o daggooch tunee beeti gibenee qaaroone. Yeeri Abraamin ‹‹ne gutenoochee kechemmi, ne hajjee bushoon neech immemmo taane; ne yareena'oyichoo Kanaane showoon immemmo taane›› iye. Tunebaani ebiyooba Abraami bushaalloone.

*Yaafe macaafe kiino:- Halloo 11-15*

## 5. Gibenikkeeti bushoo

https://openbiblestories.org/l/kbr/story-5/

![](https://cdn.door43.org/obs/jpg/360px/obs-en-05-01.jpg)

Aashire natoye gubb Abraaminaa Sarayina Kanaane showooch shaggiyeete, ebiich bedaaha batt bushoo shiyaanena'one. Ebich Abraami mechee Saraayi, “Eke ikke mooyon neech getona. Ta shiyaachemmoyich, Doono Yeeri ta maacoon dookkitone. Ebich, ebi ta gonnee Haggaar waan gibe! Diqqich bi waanaa bushiishoo taach danemmo tunemmone” iyan.

![](https://cdn.door43.org/obs/jpg/360px/obs-en-05-02.jpg)

Abraamiyoo Haggaar waan giyihe; Haggaariyoo xifahan. Abraamich anaami bushoon shiyahan. Abraamiyoo ebi bushoon “Ishmaꞌeeli” ii shigiihe. Tunebaani Saarayi Haggaarin qanaatahan. Ishmaꞌeeli aaraa keejje nato bi tunehoba Yeeri Abraamin ishichiye.

![](https://cdn.door43.org/obs/jpg/360px/obs-en-05-03.jpg)

Yeeri Abraamin, “Beshe Hakkechi Nuggushoo taane. Neennaa taanna daggooch ta wogoon geddemmo taane” iye. Abraamiyoo bi baroona showooch guuppehe. Yeeriyoo biich ishichiye:- “Meeti aageteenaꞌoyich qaabbechi nihoon tunemmo neene. Ebi and dallaawoo tunaꞌa ne beeti Kanaanee showoo bullin, bulli yemeenoon ittoshi hajjoo bi tunemmoyich, neennaa neyee gubbi ne shiijjereenaꞌonoyich immemmo taane; boonoshichoo Nuggushoo tunemmo taane. Tawoo boonoshich bulli aabi Nuggushoo tunemmo taane. Newoo ne kexooch beeti anaaminaꞌo bulli dokireebeete” iye.

![](https://cdn.door43.org/obs/jpg/360px/obs-en-05-04.jpg)

Yeeriyoo, “Iberoon ne mechee Saarayi anaami bushoon neech shiyemmine. Bi shigoonoo Yisaaqi getiree shigiyemmo neene. Ta wogoon biinnaa biyee gubbi bi shiijjereenaꞌoyich bulli yemeenee wogoon tuniiree manjjiyemmo taane. Biyoo ooge aagetoon tunemmoen. Ishmaꞌeelinoo aricheti aagetoon tuniyemmo taane. Tunebaani ta wogoon ta manjjemmo Yisaaqichiye” iye. Yeeri Abramichi shigoon Abrahamii'i shaddiye, “ebiyoo meetina'ochi nihoo” getone. Andoo Yeeri Saarayichi shigoonoo “Saari”i'i shaddiye, ebiyoo “meetina'ochi indee” getone.

![](https://cdn.door43.org/obs/jpg/360px/obs-en-05-05.jpg)

Aroobee decon Abrahaami bi kexooch beeti anaamo bullin dokiriye. Ikke natoye gubb Abrahami 100 nato bi ceeniyoba, 99 nato ceenneti Saari Abrahamich anaami bushoon shiyahan. Yeeri boonoshich bi gettitoommon bushoo shigoon “Yisaaqi”i'i shigiiheete.

![](https://cdn.door43.org/obs/jpg/360px/obs-en-05-06.jpg)

Yisaaqi gurimaasho bi tunehoba Yeeri Abrahamin pphiree beegga, “Ikke mixxe ne bushoo Yisaaqin, deejjoon tuniiree michi taach deejjibe!” iye. Wochinnoon Abrahami Yeerich de'a getona bushoon deejjiya qanniihe.

![](https://cdn.door43.org/obs/jpg/360px/obs-en-05-07.jpg)

Abrahaminaa Yisaaqina deejjoo deejjeebeeti xaa'och batt Hammii boonoshi beetaa, Yisaaqi bi nihoo Abrahamin “Taabbo!” iye. Abrahamiyoo eekkeꞌi, “Ta bushoocho! Amoone?” iye. Yisaaqiyoo “Qaaqqoonaa mixona beete. Micciibeeti deejjoyich giddemmi bagochi, aaye?” iye. Abrahamiyoo, “Ta bushoocho! Yeeri bi alla micciibeeti deejjoyich giddemmi bagoon qanniyemmone” ii wochiye.

![](https://cdn.door43.org/obs/jpg/360px/obs-en-05-08.jpg)

Deejjee xaa'och boonoshi shaggihoba Abrahami, Yisaaqichi kishoonaa baatoonon cuchiꞌi, deejjee gudooch bi qeenniti michi toommooch qeejjiye. Abrahamiyoo bi bushoon guuriya shikkoon tiijjii yechiye. Ebiyooba Yeeri, “Bushoochi achooch shaggaahine! Bi toommooch amoonona halliyaahine! Ne bushoon, ikke mixxe ne bushoon, taach woonaano ne tunetoyich, Yeerin shattaabeeto ne tunoon and ariito taane” iye.

![](https://cdn.door43.org/obs/jpg/360px/obs-en-05-09.jpg)

Abrahamiyoo bi ciinooch tushooch qaroona yecheꞌi beeti, ikke bagee baaddoon beeggiye. Yeeri Yisaaqi keroon deejjoyich tunemmi bagoon qanniitone. Abrahami ebi bagoon emiroona deejjoo tunii'i giddiihe.

![](https://cdn.door43.org/obs/jpg/360px/obs-en-05-10.jpg)

Doono Yeeri Abrahamin:- “ikke mixxe ne bushoon, taach woonaano ne tunetoyich, ta ishichaꞌa taanna wogaabeeto taane. iberoon neen diiremmo taane; ne shiijjereenaꞌonoo shimaajji xojjenoochoommon, baharee gasheexi qacoochoommonoo meechemmo taane. Showee toommeexi aageteenaꞌo bulliyoo ne shiijjereenaꞌochi gommona diireyemminaꞌone. Ebi tunemmo, ta qaaroon ne waayetoyichiye” iye.

*Yaafe macaafe kiino:- Halloo 16-22*

## 6. Yeeri Yisaaqich mecheen qanniihe

https://openbiblestories.org/l/kbr/story-6/

![](https://cdn.door43.org/obs/jpg/360px/obs-en-06-01.jpg)

Abrahami oogeto geenee bi baayehoba Yisaaqichi eeno mechee shaagoch beddiye. Ebich Abrahami bi bushoo Yisaaqich mecheen bi deebemmoyich bi gaddireteena'o daggooche ikkoon bi xibeena'ochi showooch wochee daachiihe.

![](https://cdn.door43.org/obs/jpg/360px/obs-en-06-02.jpg)

Biyoo genjje gommon bi hammitoye gubb Abrahami xibeena'o beeti showooch shaggiye. Yeeriyo wochee hammiti gaddiretoon Ribiqi beeti xaa'och yaabi daamiye. Ribiqi Abrahami manoochi bushi busheene.

![](https://cdn.door43.org/obs/jpg/360px/obs-en-06-03.jpg)

Ribiqi bi xibeena'on qajjaa'a gaddiretoona tookaa Yisaaqi kexooch hamoyich mashaamiyaan. Yisaaqi kexooch bi shaggemona, Yisaaqi mecheen tunii biin shaaggiye.

![](https://cdn.door43.org/obs/jpg/360px/obs-en-06-04.jpg)

Abrahami qititi genjje decoyee gubb, Yeeri Abrahamich bi giyiiti gibenikkee wogo bulli Yisaaqi waan beshehe. Yeeri Abrahamich haddaa ciyaani yaroon immemmo bi tunoon gibenikkitone. Tunebaani Yisaaqi mechee Ribiqi bushoo shimo mawiihan.

![](https://cdn.door43.org/obs/jpg/360px/obs-en-06-05.jpg)

Yisaaqiyoo bi mechee bushoon shimo bi mawiitoyich, Doono Yeeri bi mecheech bushoon bi immemmoyich corootiye. Ebina Ribiqi mate bushiishoon bi xifemmon Yeeri daagiye. Gutte bushiisheena'o bi maacoochaa biinnaa biinna xuꞌee beeheete. Biyoo “Ebi amoyich ta toommooch tunehe?” iya Doono Yeerin echehan.

![](https://cdn.door43.org/obs/jpg/360px/obs-en-06-06.jpg)

Doono Yeeriyoo Ribiqich ishichiye:- “Ne maacoochee shiijjemmi, gutte aageteenaꞌo tunemmi bushiisheenaꞌo, gubb boonoshinaa boonoshina shixemmi aageteenaꞌon tunemminaꞌone; ikkoo baroyee beshe giidecho tunemmone; qaabboo guuchoyich hajjeyemmone” iye.

![](https://cdn.door43.org/obs/jpg/360px/obs-en-06-07.jpg)

Ribiqi bushiisheena'o boonoshi shiijjehoba qaaboo kaawoonaa bi ashittinoo eexxo bulletonane; ebich Eesayi getaa shigo kechiye. Guuche bushoo Eesayichi shoqqoon bi kishoona yechiꞌi shiijjehe; ebich Yaaqobi getaa shigehe.

*Yaafe macaafe kiino:- Halloo24:1-25, 26*

## 7. Yeeri Yaaqoobin diiriye

https://openbiblestories.org/l/kbr/story-7/

![](https://cdn.door43.org/obs/jpg/360px/obs-en-07-01.jpg)

Bushiisheenaꞌo diccii boonoshi oogetoyee gubb, Yaaqobi bi indeena tookii tunoon shunniye. Tunebaani Eesayi kubbooch heechiibeeti, aricheti aaddoo tunehe. Ribiqi Yaaqobin shunnahan; tunebaani Yisaaqi Eesayin shunniye.

![](https://cdn.door43.org/obs/jpg/360px/obs-en-07-02.jpg)

Ikke areddoon Eesayi kubbee wottee bi waahoba oogeton shaacehe. Eesayi Yaaqobin “Oogeton shaacaa maraateto taane. Kaateree ebi ne qanniiti maayoochee giishechoon taach ne imaa mamona” iye. Yaaqobiyoo “Shiichiree ne qaabbittinoon taach kemichibe!” iye. Ebich Eesayi wogeꞌi, bi qaabbittinoon Yaaqobich kemmiye. Arooba Yaaqobi Eesayich koshonaa michiyee woxoonon immiye.

![](https://cdn.door43.org/obs/jpg/360px/obs-en-07-03.jpg)

Yisaaqi diiroon Eesayich imma qaawiye. Tunebaani ebin bi tuniyooye aaf Ribiqinaa Yaaqoobina Yisaaqin mariyeete. Yaaqoobi Eesayin shaahii'i Yisaaq waan giddehe. Yisaaqi geene bi iitoyich bi aafo ciinon hakkaanoone. Ebich Yaaqoobi Eesayichi tahoon tahee'i, emishee gooqqoon bi qettoonaa bi kishoonooch geddii'i Yisaaqi waan giddee biin mariye.

![](https://cdn.door43.org/obs/jpg/360px/obs-en-07-04.jpg)

Yaaqobiyoo bi nihoo waan waa'i, “Taabbo!” iye. “Ta, ne gutenee bushoo Eesayi taane. Taan ne diiremmoyich waato taane” iye. Yisaaqi emishee eexon shafee'i, bi tahee cinnoono shiiqe'i Eesayinei'i diiriye.

![](https://cdn.door43.org/obs/jpg/360px/obs-en-07-05.jpg)

Eesayi bi qaabbitine wojjoonaa diiroonon bi daamitoyich, Yaaqoobin shixxiye, bi mulloona “Ta nihoo and qitiya bedditone. Eefoyee gubb ta manoo Yaaqobin wuxemmo taane” ii gabiye.

![](https://cdn.door43.org/obs/jpg/360px/obs-en-07-06.jpg)

Tunebaani Ribiqi Eesayi gabiton waayahan. Ebich biinaa Yisaaqina boonoshi xibeena'ona tookki bi beeyemmoyich wohi showooch Yaaqoobin daachiiheete.

![](https://cdn.door43.org/obs/jpg/360px/obs-en-07-07.jpg)

Yaaqoobi meeti naton Ribiqi xibeena'ona tookkii beehe. Ebiyooba mechee shaaggii'i 12 anaami bushiishoonaa 1 mache busheenon shiihe. Yeeri biin oogeton gaanniihe.

![](https://cdn.door43.org/obs/jpg/360px/obs-en-07-08.jpg)

Yaaqoobi Kanaani hiye naton bi kottetoye gubb bi kechi ashoona, bi maddechinaonaa bi gijjeena'o bullina tookki Kanaane showooch wotteya kuxxiye.

![](https://cdn.door43.org/obs/jpg/360px/obs-en-07-09.jpg)

Yaaqobi, Eesayi andoo taan wuxoyich gaboo qayaanoonei'i bi mulloona gabii shatiye. Ebich Eesayich wojjoo tunii'i meeti miimon daachiihe. Miimina'on deebiti Yaaqobi gaddireteena'o “Ne guuno Yaaqobi ebi miimina'on neech deejjitone, biyoo katinon woyemmone” iyeete.

![](https://cdn.door43.org/obs/jpg/360px/obs-en-07-10.jpg)

Eesayi batti wonna Yaaqoobin maarito bi tunetoyich wochinnon danoyich guttiyona emiriyeete. Yaaqobi Kanaane showooch digoona kottehe. Aroochee Yisaaqi qitaa Yaaqobinaa Eesayina biin duukkiyeete. Yeeri Abrahamich bi giiti gibenikkee wogo and Yisaaqi waane Yaaqobi waan beshehe.

*Yaafe macaafe kiino:- Halloo 25:27-33:20*

## 8. Yeeri Yoseefinaa bi kechi ashoonon woddihe

https://openbiblestories.org/l/kbr/story-8/

![](https://cdn.door43.org/obs/jpg/360px/obs-en-08-01.jpg)

Boonoshi niho Yaagobi Yoseefin bare bi bushiisheena'o bulliyee beshii'i shunni bi beetoonaa Yoseefiyoo boonoshi tomooch ukuroo bi tuneechi gumon bi maacitoyich bi maneena'o shixxiyeete. Yoseefi bi maneena'o waan bi waahoba yechii'i guuchi giixechina'ochi kemmiyeete.

![](https://cdn.door43.org/obs/jpg/360px/obs-en-08-02.jpg)

Meeti natoye gubb Yaaqobi bi geenehoba gijjoon quyeebeeti bi maneena'ochi diggittinoon bi beeggemmoyich bi shunniibeeti busho Yoseefin daachiihe.

![](https://cdn.door43.org/obs/jpg/360px/obs-en-08-03.jpg)

Yoseefi maneena'o kexooch boonoshi wotooye shiichii'i, ikke emmishoon guuri'i Yoseef kittoon damooch hacciyeete. Aroochee damooch hacceeti bi kittoon daammii boonoshi nihoyich bekkiiheete. Biyoo Yoseefin gonde cooxo maatonei'i oogeton ayiniye.

![](https://cdn.door43.org/obs/jpg/360px/obs-en-08-04.jpg)

Guuchi giixechina'o Yoseefin Gibits daamiyeete. Arooba Gibitsi Abbay aachi ga'ooch beeti oogetinaa giidechi aageteene. Guuchi giixechina'o gaanechi Gibitse ukkurooch Yoseefin guuno tunii'i kemmiyeete. Yoseefi biin hajjiti doonoyich gaawuchii'i maddehe. Yeeriyo Yoseefin diiriye.

![](https://cdn.door43.org/obs/jpg/360px/obs-en-08-05.jpg)

Yoseefin hajjiti doonochi mechee Yoseefina qeyemmoyich qaawiyan. Tunebaani Yoseefi Yeeri aafooch axaaxoon shuneyaachei'i qajjiye. Ureyo bi ippeetoyich kootoona Yoseefin bi kassitoyich yechee'i cuyee kexooch giihe. Cuyee kexoochaanoo Yeerich gibeneeto bi tunetoyich Yeeri biin diiriye.

![](https://cdn.door43.org/obs/jpg/360px/obs-en-08-06.jpg)

Yoseefi xalle asho bi tunetaanoona gutte nato beshetoyee gubb andoo cuyee kexooch beehe. Ikke xumoona Gibitsena'o ‘no taatoo’i'ibeeti Farooni oogeto biin keqqichiti gutte gumina'on beegiye. Bi mikkirechina'oochee koniyona ebi gummochi biishon imoo hakkaanena'one.

![](https://cdn.door43.org/obs/jpg/360px/obs-en-08-07.jpg)

Yeeri Yoseefich gumon biichi hakkoon immitone; ebich Farooni Yoseefin cuyee kexooche bi waan deebiihee. Yoseefi gumon biichii'i ishichiye. “Yeeri oogeti miyo tunemmi shabaatte naton deejjiyemmone. Ebichi hilloochoo shabaatte nati shaacoon deejjiyemmone” iye.

![](https://cdn.door43.org/obs/jpg/360px/obs-en-08-08.jpg)

Farooni Yoseefi mooyona oogeton worganehe, Gibitse showoo bullich bi hillooch guttinnee asho tunii'i ukuriihe.

![](https://cdn.door43.org/obs/jpg/360px/obs-en-08-09.jpg)

Yoseefi shabaate gaawe maayi natooba wodde maayoon gotooch boonoshi kicemmon asheena'oyich gettiye. Shabaate shaacee nato waahoba Yoseefi gotooche maayoon kichii bi kemmitoyich bedditi manjjemmi maayoon daneheete.

![](https://cdn.door43.org/obs/jpg/360px/obs-en-08-10.jpg)

Shaacoo Gibitse showooch baach tuneyaanoon, Yaaqobinaa bi kechi asheena'ona beeti Kanaane showoochoo kuppheto tunehe.

![](https://cdn.door43.org/obs/jpg/360px/obs-en-08-11.jpg)

Yaaqobi bi bushiisheena'on maayoon bonooshi kemmemoyich Gibits daachiihe. Yoseefi maneena'o maayee kemoyich hammii'i Yoseefi aafooch boonoshi neexehoba Yoseefin ariyaanena'one. Tunebaani Yoseefi boonoshin ariitone.

![](https://cdn.door43.org/obs/jpg/360px/obs-en-08-12.jpg)

Yoseefi bi maneena'on pphiree bi beegitoye gubb, boonoshi gaboon shadditina'o gaata ciinoyich ishichiye: "Shattaahote! Ta, ittoshi mano Yoseefi taane; ittoshi ta toommooch gondoon gabii'i guuchittinoyich taan kemmiyote; tunebaani Yeeri ebin de'e mooyooch shadditone. Andoo shattaahote! Waareesho Gibits showooch kotebote. Ittoshinaa ittoshi bushiisheena'onoyich qaawiibeeti mooyo bullin immemmo taane".

![](https://cdn.door43.org/obs/jpg/360px/obs-en-08-13.jpg)

Yoseefi maneena'o boonoshi showooch wottee'i, Yoseefi Gibitsee showooch kashoona beemon boonoshi nihoo Yaaqobich boonoshi getihoba Yaaqobi emiriye.

![](https://cdn.door43.org/obs/jpg/360px/obs-en-08-14.jpg)

Yaaqobi geene asho bi tunetaanona bi kechi ashoona tookki Gibitse showooch hammii arooch koteheete. Yaaqobi bi qitoyee shiichii'i bi bushiisheena'o bullin boonoshi ikkiikkoon diriye.

![](https://cdn.door43.org/obs/jpg/360px/obs-en-08-15.jpg)

Yeeri Abrahamich bi giyiti wogee gibenikko Yisaaqi waan beshehe. Arooche Yaaqobi waan, bi hillooch aaraa gutte Yaaqobi bushiisheena'onaa boonoshi kechi asheena'ona waan beshehe. Aaraa gutte bushiisheena'ochi yareena'o aaraa gutte Isra'eele yoodena'o tuneheete.

*Yaafe macaafe kiino:- Halloo 37-50*

## 9. Yeeri Muusin ceeggiye

https://openbiblestories.org/l/kbr/story-9/

![](https://cdn.door43.org/obs/jpg/360px/obs-en-09-01.jpg)

Yoseefi qititoyee gubb bi xibeena'o bulli Gibits kotee echeheete. Boonoshinaa boonoshi yareena'ona meeti naton arooch beemon yechiyeete, meeti bushiishoonoo shiiheete, eboshiyo Isra'eeleena'o gettee ceekkeheete.

![](https://cdn.door43.org/obs/jpg/360px/obs-en-09-02.jpg)

Meeti balle natoyee gubb Isra'eelna'ochi haddoo meetti, meetti waahe. Gibitseena'o Yoseefinaa boonoshi gaacheya bi tuniito bullinon batteheete. Isra'eeleena'o meettii, meettii boonoshi waatoyich Gibitseena'o boonoshin shattiyeete. Ebich arooba Gibitsin qeejjii beeti Farooni Isra'eeleena'on Gibitsena'oyich guuno tuniihe.

![](https://cdn.door43.org/obs/jpg/360px/obs-en-09-03.jpg)

Gibitseena'o Isra'eeleena'on giidoona dilaalo boonoshi shuunemmonaa katamoo bullin boonoshi haggemmonon tuunii beeheete. Shuunoo magge boonoshi kashoon du'iihe. Tunebaani Yeeri boonoshin bi diiritoyich meeti bushiishoo shiiheete.

![](https://cdn.door43.org/obs/jpg/360px/obs-en-09-04.jpg)

Farooni Isra'eeleena'o meeti duduqeena'o boonoshich beemon beeggiye. Ebich Isra'eeleena'o waane anaami bushiishoo shiijjemmona Abaay aacooch dufi boonoshi wuxemmon asheena'oyich gettiye.

![](https://cdn.door43.org/obs/jpg/360px/obs-en-09-05.jpg)

Ikke Isra'eeleche anaami bushoon shiyahan. Biinaa bi kenoona boonoshi hakkiti wotton bushoon aachiyeete.

![](https://cdn.door43.org/obs/jpg/360px/obs-en-09-06.jpg)

Bushoochi nihoonaa indeena bushoon aachoo hakkoo boonoshi mawiihoba bi qitaachemmoyich tegibeeti guubooch geddii'i Abay aachi gash beeti qiximmee daggooch kotiiheete. Bushoochi qaabbe maneyoo wokkaachaa bushoo toommooch tunemmon ciinnaa beehan.

![](https://cdn.door43.org/obs/jpg/360px/obs-en-09-07.jpg)

Faroonichi bushee guuboon ciinna'a bi maac beeti mooyon beeggahan. Nalleffon bi ciinihoba bi hajjee bushoo tuniyoyich daammahan. Biyoo bushoon shiime dichiyemmi Isra'eeleecheech gijjoo qoccahan. Ebi ure bushoochi indee bi tunoon ariyaaneene. Bushoo dicii'i bi indee xanon bi kuxihoba ure bushoon Farooni busheech wochiyan. Bushoono Muusii'i shigiiheete.

![](https://cdn.door43.org/obs/jpg/360px/obs-en-09-08.jpg)

Muusi bi diccitoye gubb ikke areddoon Gibisee asho Isra'eele ashoon xoobbii bi beetaa beeggii'i Isra'eele bi shiishoon degga qiiccehe.

![](https://cdn.door43.org/obs/jpg/360px/obs-en-09-09.jpg)

Muusi koniyona ciinaano biich shaahitoyich Gibitse ashoon wuxii'i duukkiye. Tunebaani Muusi tuniiton ikke asho beeggitone.

![](https://cdn.door43.org/obs/jpg/360px/obs-en-09-10.jpg)

Muusi tuniiton Farooni bi waayehoba wuxiya qaawiye. Tunebaani Muusi Farooni gine naayina'o kishooche bi kashoon bi wodiyemmi Gibitse barahooch maxxehe.

![](https://cdn.door43.org/obs/jpg/360px/obs-en-09-11.jpg)

Muusi Gibitsee wohi barahoochaa bage qiddecho tunehe. Are showoocheeno mecheen shaaggii'i gutte anaami bushiishoon shiihe.

![](https://cdn.door43.org/obs/jpg/360px/obs-en-09-12.jpg)

Ikke aaboon Muusi bagoon quyee bi beetaa qaaqqoo kuchoon yechii'i aaxxee bi beeta beeggiye. Tunebaani qaaqqoo kuchoon yechito bi tunetaanona micaanoone. Muusiyo gaawuchii ciinoch kuchoo waan giddehe. Micciibeeti kuchoo waan bi giddemmona Doono Yeeri biich “Muuso yaafeeti xaa'ooch ne neexetoyich, caammoon ne baatoochee kichibe!” iye.

![](https://cdn.door43.org/obs/jpg/360px/obs-en-09-13.jpg)

Doono Yeeriyoo, “Gibits beeti ta asheena'ochi xuuxoon beeggeto taane; Ebich neen Farooni waan daachiyemmo taane; Isra'eeleena'onoo guuchitinooche kichemmo neene. Aroochee Abrahamichi, Yisaaqinaa Yaaqobinoch immoyich ta gibenikkiti showoo Kanaanin boonoshich immemmo taane” iye.

![](https://cdn.door43.org/obs/jpg/360px/obs-en-09-14.jpg)

Muusiyoo asheena'o neen wocheto konine ii boonoshi taan eche gaata ama getteete ii Yeerin echehe. Doono Yeerio “Halla Taane getteebeeto ittoshi waan taan wochee deejjitone gete” iye.

![](https://cdn.door43.org/obs/jpg/360px/obs-en-09-15.jpg)

Muusi bi shattitoyich Farooni waan hamon qaawaanoone. Ebiyo yibbaatee hakkoo taach aalloonei'i bi gabitoyichiye. Ebich Yeeri Muusi mano Aarooni biinna tookki hammiree Muusin bi gaachemmoyich daachiihe. Farooni Isra'eeleena'on kixoon mawiree gajjeyemmo bi tunetoyich, Yeeri Aarooninaa Muusinon meeqeqiye.

*Yaafe macaafe kiino:- Keyi Macaafo 1-4*

## 10. Aashire Naxeena'o

https://openbiblestories.org/l/kbr/story-10/

![](https://cdn.door43.org/obs/jpg/360px/obs-en-10-01.jpg)

Muusinaa Aaroonina Farooni waan hammiyeete. Aroochee Faroonich, “Isra'eelee Nuggushoo Doono Yeeri ‘ta asheena'on gawukkibe!’ itone” iyeete. Farooni boonoshin waayo qajjiye. Isra'eeleena'on gawukko qajjiichi beshe magge shuunoon giidoona shuuniihe!

![](https://cdn.door43.org/obs/jpg/360px/obs-en-10-02.jpg)

Farooni andoo asheena'on gawukkaache getona manjjiye. Ebich Yeeri Gibitseena'o toommooch aashire naxeena'on deejjiye. Yeeri eboshi naxeena'ona Farooninaa Gibitse nuggusheena'o bullinoye beshe giidecho bi tunoon bekkiihe.

![](https://cdn.door43.org/obs/jpg/360px/obs-en-10-03.jpg)

Yeeri Abbay aacon damooch shaddiye, tunebaani Farooni andoo Isra'eeleena'on gawukkaanone.

![](https://cdn.door43.org/obs/jpg/360px/obs-en-10-04.jpg)

Yeeri Gibitse showoo bulli toommooch woqqeqqeena'on deejjiye. Farooni Muusi woqqeqqeena'on bi wokkiyeemmon qollehe. Woqqaqqeena'o bulliyoo qiti ciireheete. Andoo Farooni bi mulloon manjjii'i Isra'eeleena'o Gibitsee boonoshi kechemoyich gawukkon qajjiye.

![](https://cdn.door43.org/obs/jpg/360px/obs-en-10-05.jpg)

Ebich Yeeri shaacciibeeti shunneena'on deejjiye. Eboshi hillooch gamoon deejjiye. Farooni Muusinaa Aarooninon ceeggii'i naxoon boonoshi neechi gaata Isra'eeleena'o Gibitsee hammo hakkemmina'o boonoshi tunoon gettiye. Muusi corootii bi geta Yeeri gameena'on Gibitse showoo bulliichee aalliihe. Tunebaani Farooni bi mulloon manjjii'i asheena'on gawukkoo qajjiye.

![](https://cdn.door43.org/obs/jpg/360px/obs-en-10-06.jpg)

Ebichi hillooch Yeeri Gibitseena'ochi gijjeena'o biiye boonoshi qittemmon tuniihe. Andoo Farooni mulloon manjjii Isra'eeleena'on gawukkaanoone.

![](https://cdn.door43.org/obs/jpg/360px/obs-en-10-07.jpg)

Arooche Yeeri Farooni aafoochaa tulloon shimaajj bi shakkemmon Muusich gettiye. Tulloon bi shahihoba Gibitseena'o toommooch mayiibeeti gaaboo kechiye. Tunebaani ebi mayo Isra'eeleena'o toommooch keyaanoone. Yeeri Faroonichi mulloon manjjiihe, Farooniyoo Isra'eeleena'on gawukkaanone.

![](https://cdn.door43.org/obs/jpg/360px/obs-en-10-08.jpg)

Ebiyee gubb Yeeri Gibitse toommooch beeti wodde maayi colloon aalliitonaa maach daneti ashoo bullin wuxiti baderoon deejjiye. Farooniyoo Muusinaa Aarooninon ceeggii'i “Ittoshi Nuggushoo Doono Yeerichi toommooch axaaxoon shuuneto taane; ittoshinoo xuqqeto taane. Illa and hammon hakkiyote” iye. Muusiyoo Doono Yeerin qollehe. Baderoo shimaayooche bi kindoo neexehe.

![](https://cdn.door43.org/obs/jpg/360px/obs-en-10-09.jpg)

Tunebaani Farooni andoon axaaxoo shuunehe, bi mulloonoo manjjiihe. Isra'eeleena'onoo gawukkaanoone.

![](https://cdn.door43.org/obs/jpg/360px/obs-en-10-10.jpg)

Ebich Yeeri Gibitse toommooch gechee mattooni deejjiye. Eboshi gecheena'o baderoo yexaanoon echeti maayoon maa tongeheete.

![](https://cdn.door43.org/obs/jpg/360px/obs-en-10-11.jpg)

Ebichi hillooch Yeeri keejje qemi ceenon showoon manderiihe. Gibitsena'o boonoshi kexoochee boonoshi keyaachemmi wottoon oogetoon xumehe. Tunebaani Isra'eeleena'o beeti xaa'ooch mandereyaanoone.

![](https://cdn.door43.org/obs/jpg/360px/obs-en-10-12.jpg)

Eboshi yixiye naxeena'o tunetoye gubbona Farooni andoo Isra'eeleena'on gawukkaache iye. Farooni waayeyaano bi tunetoyich, Yeeri ikke ciire naxoon deejjoyich kuxxiye. Ebi naxo Farooni gaboon shaddemmone.

*Yaafe Macaafe Kiino:- Keyi Macaafo 5-10*

## 11. Beshee Baaro

https://openbiblestories.org/l/kbr/story-11/

![](https://cdn.door43.org/obs/jpg/360px/obs-en-11-01.jpg)

Isra'eeleena'on bi gawukkoo qayi gaata ashoonaa gijjoonochi qaabbe anaamo bullin wuxemmo bi tunoon Yeeri Faroonich meeqeqiye. Farooni ebin bi waayehoba, ando waayoonaa Yeerich de'a getonon qajjiye.

![](https://cdn.door43.org/obs/jpg/360px/obs-en-11-02.jpg)

Yeeri bi mulloon bi toommooch too'iiti ashi qabbe anaami bushoo bullin bi wodeemmi gommon qanniihe. Kechi asho bulli xalle bagee baaddoon kaacii'i guuriye.

![](https://cdn.door43.org/obs/jpg/360px/obs-en-11-03.jpg)

Yeeri Isra'eeleena'oyich bachaalli bagee baaddoochi damoon boonoshi kechi kellooch boonoshi huuttemmon, meenon shittoo giyaani koshonaa boonoshi kaate maayemmon gettiye. Wotta boonoshi maahoba Gibitse keyoyich boonoshi qanniyemmon gettiye.

![](https://cdn.door43.org/obs/jpg/360px/obs-en-11-04.jpg)

Isra'eeleena'o Yeeri boonoshich bi gettitoommon bulli mooyon tuniiheete. Xummi qeellimooch Yeeri Gibitse showoo bullina beshee'i anaamoo tunetii qaabbo bullin wuxiye.

![](https://cdn.door43.org/obs/jpg/360px/obs-en-11-05.jpg)

Isra'eeleena'o bullichi kello damoon huuttetone, ebich Yeeri kexina'on beshee hammiye. Kexooch beeti asho bulli wodiye. Isra'eeleena'o bagee baaddoochi damee naboona wodiyeete.

![](https://cdn.door43.org/obs/jpg/360px/obs-en-11-06.jpg)

Gibitsena'o Yeeri toommooch boonoshi mulloon too'iyaanena'one, bi getoonoo ceechaanena'one. Ebich Yeeri boonoshi kexon besheyaano bi tunetoyich Gibitse qaabbe anaamo bullin wuxiye.

![](https://cdn.door43.org/obs/jpg/360px/obs-en-11-07.jpg)

Cuye kexooch cuchetoochee tiijjii'i Faroon kexooch beddaaha beeti Gibitsee qaabbe anaamo bulli qitiye. Boonoshi muushenoochee tiyitona Gibits beeti meeti asheena'o eeppii cookkii beeheete.

![](https://cdn.door43.org/obs/jpg/360px/obs-en-11-08.jpg)

Aroobee xum Farooni Muusinaa Aarooninon ceeggii'i, “Isra'eelena'on yeshiree tiyi hambote!” iye.

*Yaafe Macaafe Kiino:- Keyi Macaafo 11:1-12:32*

## 12. Isra'eeleena'o Gibitse Keyo

https://openbiblestories.org/l/kbr/story-12/

![](https://cdn.door43.org/obs/jpg/360px/obs-en-12-01.jpg)

Isra'eeleena'o Gibitse boonoshi kechitoyich oogeton emiriyeete. Illa ebiye bekk guunina'o tooneena'one, gibenikkeeti showeechoo hammiibeetina'one! Gibitsena'o Isra'eeleena'oyich aachoona birewoona, bare aaxi qiiceena'onon geddi'i boonoshi echeti mooyo bullin boonoshi imma Gibitse kichiyeete. Yeeri toommooch boonoshi mulloon too'iiti bare yareena'o Isra'eeleena'ona tookkii kechiyeete.

![](https://cdn.door43.org/obs/jpg/360px/obs-en-12-02.jpg)

Yeeri areddoon boonoshi aaf hammibeeti genjje giimboomi quboona, xumoon boonoshi aaf hammibeeti genjje giimboomi qaaqqee bekkoona yaabiye. Yeeri bulli aaboon boonoshina tookkii bi tunetoyich boonoshi hammiibee goor yaabiye. Tuniyo boonoshin qaawiibeeti mooyo biin dabboo baachiye.

![](https://cdn.door43.org/obs/jpg/360px/obs-en-12-03.jpg)

Giishecho yagitoye gubb, Farooninaa bi ashena'ona boonoshi gaboon shaddii'i Isra'eeleena'o wochinnoon guuno boonoshi tunemmon qaawiyeete. Yeeri ikketi iberee Nuggushoo bi tunoon asheena'o boonoshi ciinnemoyich, wotta Doono Yeeri Farooninaa bi nuggusheena'onoye beshe giiddecho tunoon boonoshi xiishemmoyich Faroonichi gaboon manjjoo tuniihe.

![](https://cdn.door43.org/obs/jpg/360px/obs-en-12-04.jpg)

Ebich Faroonina bi gine naayina'ona wochinnoon Isra'eeleena'on guuno tuniyemmoyich dabbi yookkiyeete. Isra'eeleena'o Gibitse gine naayina'o wommon boonoshi ciinihoba, Farooni gine naayina'onaa Ceelle Bahare gutte dagg qoqqaanooch boonoshi gimon ariiheete. Oogeeton boonoshi shattitoyich, “Gibits showooch maasho aalleteenane barahoochaa no qitemmoyich noon ne deebeto?”i'i Muusi toomooch cookiyeete.

![](https://cdn.door43.org/obs/jpg/360px/obs-en-12-05.jpg)

Muusi Isra'eeleena'oyich “Shattaahote! Kuppheree neexebote! Doono Yeeri ittoshi qoodoon koyemmone;” iye. Arooche Doono Yeeri Muusich ishichiye:- “Asheena'o qaxiremmoyich baach gete! iye. Arooche Yeeri Gibitseena'o Isra'eeleena'on ciinon boonoshi hakkaachemoyich qubee giimboon Isra'eeleena'onaa Gibitseena'ona dagg geddiye.

![](https://cdn.door43.org/obs/jpg/360px/obs-en-12-06.jpg)

Yeeri Muusich bahare toommooch bi kishoon bi yaggemmonaa aacon bi qoodiyemmonoyich gettiye. Aroochee Yeeri baharee daggona shuu'e beshe woretoo tunemmoyich aacon yongoo yoochinaa qanninooch gabi bi neechemmon tuniihe.

![](https://cdn.door43.org/obs/jpg/360px/obs-en-12-07.jpg)

Isra'eeleena'o aaco boonoshi yoochinaa qanninooch duuhochoommon neexeechaa shuu'i showoona qaxiriyeete.

![](https://cdn.door43.org/obs/jpg/360px/obs-en-12-08.jpg)

Arooche Yeeri Isra'eeleena'o muriccii hammon Gibitseena'o beegemmoyich quboon boonoshi beshe woretoochee damba tiijjiye. Ebich Gibitseena'o gubbaa dabbi yookka kuxiyeete.

![](https://cdn.door43.org/obs/jpg/360px/obs-en-12-09.jpg)

Ebina baharee daggi shuu'i beshe woretoona Isra'eeleena'on dabbiyeete, tunebaani Yeeri Gibitseena'o boonoshi xuuxemmonaa boonoshi gaari gengeena'o showoona xaaqqeere cuchemmonon tuniihe. “Doono Yeeri Isra'eeleena'ochi qoodoon noonna koyeeniye bi beeto; ebich boonoshi waanee woci wohone” ii cookkeeheete.

![](https://cdn.door43.org/obs/jpg/360px/obs-en-12-10.jpg)

Isra'eeleena'o baharoon digoona boonoshi kimmitoye gubb Doono Yeeri Muusich bi kishoon baharee toommooch wochinnoon bi yaggemmon gettiye. Muusiyoo ebin bi tuniihoba aaco Gibitsee gine naayina'o toommooch wotte'i aafichoommon tunehe. Gibitsee ginechina'o toomooch aaco wottee guuppe'i bullin qooxxiye.

![](https://cdn.door43.org/obs/jpg/360px/obs-en-12-11.jpg)

Isra'eeleena'o Gibitseena'o qitoon boonoshi ciinihoba Doono Yeerin iberiiheete, Muusiyoo Yeeri keemecho bi tunoon iberiiheete.

![](https://cdn.door43.org/obs/jpg/360px/obs-en-12-12.jpg)

Wotta Yeeri Isra'eeleena'on qitoonaa guchitinonooche bi wodiitoyich oogeton emiriyeete! And Yeerich maddoyich biichetina'o tuneheete. Isra'eeleena'o Yeeri Gibitse ginechina'ooche boonoshin bi wodiitoyich andire boonoshi wudoon oogiyoonaa Yeerin galletoyich meeti shoddoon shoddeheete.

![](https://cdn.door43.org/obs/jpg/360px/obs-en-12-13.jpg)

Yeeri Gibitseena'o toommooch abichii'i wudoon bi immonaa guuno tunooche bi wodiyoonon boonoshi shalligemmoyich nati naton beshe baaroon boonoshi baariyemmon Isra'eelena'oyich gettiye. Bachaalli bagee baaddon guurii'i shito giyaani koshon mamona emiriyeete.

*Yaafe Macaafe Kiino:- Keyi Macaafo 12:33-15:21*

## 13. Yeeri Isra'eeleena'ona Tookki bi Giiti Wogo

https://openbiblestories.org/l/kbr/story-13/

![](https://cdn.door43.org/obs/jpg/360px/obs-en-13-01.jpg)

Yeeri Isra'eeleena'on Ceelle baharoona bi yaabitoye gubb, barahoona Siini getteebeeti guudoch daammiye. Ebiyo Muusi micciibeeti kuchoon bi beeggiti guudone. Asheena'o Guudi baata boonoshi duukkaanoon xogiyete.

![](https://cdn.door43.org/obs/jpg/360px/obs-en-13-02.jpg)

Yeeri “Taach de'a ittoshi geti gaata, ta wogoonoo ittoshi quye gaata Taatoo Yeeri taach maddebeeti, qeesheena'on, yaafeeti aagetoon tunemmo ittoshine”i'i Muusinaa Isra'eelee asheena'oyich gettiye.

![](https://cdn.door43.org/obs/jpg/360px/obs-en-13-03.jpg)

Asheena'o yaafittine gommona boonoshi qelloon boonoshi qanniiti keejjinnee qemoye gubb, Doono Yeeri xeeyoona, pphaqqoona, cufoona, oogeti tiree qaarona Siini guudi toomooch kindiye. Guudoch keyo daaggeeto Muusich baachiye.

![](https://cdn.door43.org/obs/jpg/360px/obs-en-13-04.jpg)

Aroochee Yeeri wogee qaaroon immona ishichi'i gettiye:- “Gibitsee showee guuchittinoochee neen kichiti, ne Nuggushoo, Doono Yeeri taane. Tayee besh bare nuggusheena'oyich goyinne maddeyaahine!”

![](https://cdn.door43.org/obs/jpg/360px/obs-en-13-05.jpg)

Shahalleena'on neech shuuniyaahine! Boonoshichoo goyinne maddeyaahine! Doono Yeeri ne Nuggushoo ta, qanaatechi Nuggushoo taane; Doono Yeeri ne Nuggushoo ta shigoon duuboon ceeggaahine! Shambatee aaboon yaafeeti aaboon tunii'i quyoon batteyaahine! Shiritte qemi daggooch ne shuunemmi shuunoo bullin shuunebe! Ebiyo Shambatee aabo ne kasheemmonaa taan ne shalligiyemmi aboonane.

![](https://cdn.door43.org/obs/jpg/360px/obs-en-13-06.jpg)

“Ne nihoonaa ne indeenon oogiibe! Ashoon wuxiyaahine! Shunoon maayaahine! Gaajjaahine! Asho konichi toommoochona kootoon miixeyaahine! Ashi kexon, ashi mecheen, ashicho tuneto amoonona qaatiyaahine!

![](https://cdn.door43.org/obs/jpg/360px/obs-en-13-07.jpg)

Arooche Yeeri eboshi ashire getena'on gutte yalle xaqqena'o toommooch koorii'i Muusich immiye. Ebiye wotta boonoshi dabbiyemmi bare meeti geteena'onaa qociyeena'onon boonoshich immiye. Asheena'o eboshi geteena'on boonoshi ceechi gaata Yeeri diiriyemmonaa quyemmona bi tunoon boonoshich gibenikkiye. Geteena'on ceechoo boonoshi qayi gaata Yeeri boonoshin naxehe.

![](https://cdn.door43.org/obs/jpg/360px/obs-en-13-08.jpg)

Wotta Yeeri boonoshi shuunemmoyich bi qaawibeeti duukaanee yawoon Isra'eeleena'oyich arichiihe. Ebiyoo danee duukkaano gettehe, ooge maccillaatoona qoodeeti gutte gatena'o biich beetina'one. Yeeri arooch bi beetoyich, maccillaatee gubb gimmo biich daaggeeto qeesheena'ochi ukkuroo baachiye.

![](https://cdn.door43.org/obs/jpg/360px/obs-en-13-09.jpg)

Yeeri getoon ceechaani asho bulli dane duukaanee aaf beeti deejjee gudooch Yeerich tunemmi gijjoon debo hakkiye. Qeeshoo gijjoon guurii'i deejjee gudee toommoochaa michii beehe. Guureeti gijjee damoo uroyichi axaaxoon qerii'i Yeeri aafoochaa biin xallii beehe. Yeeri qeeshoo boonoshi tunemmoyich Muusi mano Aaroonin, wotta Aaroonichi yareena'on kaciye.

![](https://cdn.door43.org/obs/jpg/360px/obs-en-13-10.jpg)

Asheena'o bulli Yeeri boonoshich immiti geteena'on ceechoyich, Yeerich baach goyinoyich, wotta bariti ashoon tunoyich de'a iyeete. Tunebaani Yeerichi getoon ceechiya de'a boonoshi iti giisheche wottoye gubb gonde axaaxoon shuneheete.

![](https://cdn.door43.org/obs/jpg/360px/obs-en-13-11.jpg)

Muusi Siini guudi toommoochaa meeti qemon Doono Yeerinaa tookkii yibbaateebeehe. Ebiyooba asheena'o biin quyoon taahiyeete. Ebich Haroon waan aachoon yechii waa'i Shaahalloon nooch shuunebe ii echeheete.

![](https://cdn.door43.org/obs/jpg/360px/obs-en-13-12.jpg)

Harooniyo maanjji shaahiyoona shaahalloon shuunehe. Asheena'o babberittinoona Shaahalloyich goyino yechiyeete, deejjoono deejjiyeete! Ebi boonoshi axaaxooyich Yeeri oogeton boonoshin kaarehe, aalliyeemmoyicho gabiye. Tunebaani Muusi Yeerich corootiye; Yeeriyoo bi corootoon waaye'i boonoshin aalliyoon qajjiye.

![](https://cdn.door43.org/obs/jpg/360px/obs-en-13-13.jpg)

Muusi guudi toommoochee kindii'i Shaahalloon bi beegihoba , oogeton kaaree'i Yeeri aashire geteena'on bi kooriti yalle xaqqeena'on buriciye.

![](https://cdn.door43.org/obs/jpg/360px/obs-en-13-14.jpg)

Aroochee Muusi ebi shaahalloon buriccii aachi toommooch shacii'i are aacon asheena'oyich uchiye. Yeeri asheena'o toommooch naxoon bi deejjitoyich meetina'o qitiyeete.

![](https://cdn.door43.org/obs/jpg/360px/obs-en-13-15.jpg)

Muusi wochinnoon guudi toommooch kechii'i Yeeri asheena'on bi maariyemmon qollehe. Yeeriyoo Muusin waayee'i asheena'on maariye. Muusi tiichiti yallee xaqqeena'ochi keroon Yeeri andire yalle xaqqeena'o toommooch ashire geteena'on kooriye.

![](https://cdn.door43.org/obs/jpg/360px/obs-en-13-16.jpg)

Aroochee Yeeri, Isra'eeleena'on Siini guudoche gibenikkeeti shwooch yaabiye.

*Yaafe Macaafe Kiino:- Keyi Macaafo 19-34*

## 14. Barahooch yall yallimmiyeete

https://openbiblestories.org/l/kbr/story-14/

![](https://cdn.door43.org/obs/jpg/360px/obs-en-14-01.jpg)

Yeeri boonoshich bi giiti wogee qaareena'o daggoochee ikko tuneti geteena'oyich de'a boonoshi gettemmon Muusi Isra'eelena'oyich bi gettitoye gubb, Siini guudochee tii hammiyeete. Yeeri asheena'on Siini guudoche tiijjii Kanaan getteyaabeeti gibenikkeeti showee waan yaabiye. Qubee giimbo boonoshi aaf aaf Kanaan woretoon yechii'i hammiye, boonoshiyoo biin dabbiyeete.

![](https://cdn.door43.org/obs/jpg/360px/obs-en-14-02.jpg)

Yeeri gibenikkeeti shoween boonoshi yareena'oyich immoyich Abrahamich, Yisaaqinaa Yaaqobinoyich wogo gedditone. Tunebaani and ebi are showeech meeti agetena'o beetina'one. Eboshiyo Kanaaneena'o gettee ceekkeheete. Kanaaneena'o Yeerich goyineyaanena'o oohe bi getoon waayeyaanena'one. Koote shaahalleena'oyich goyineheete, meeti mooyonoo tuniiheete.

![](https://cdn.door43.org/obs/jpg/360px/obs-en-14-03.jpg)

Yeeri Isra'eeleena'oyich ishichii'i gettiye, “gibenikkeeti showeech beeti Kanaaneena'o bullin aalliibote. Boonoshina yesheyaahote, shaagishoo gettaahote. Boonoshi shalleena'o bullin ciroona aalliibote. Taach de'a getto ittoshi qayi gaata ta keroon boonoshi shaahalleena'oyich goyinemmo ittoshine.”

![](https://cdn.door43.org/obs/jpg/360px/obs-en-14-04.jpg)

Isra'eeleena'o Kanaani danooch boonoshi shagihoba , Muusi Isra'eelee yoodo bulliichee Isra'eelee yoodo ikkikkoochee ikkikke ashoon kichii'i aaraa gutte asheena'on kaaciye. Arooche showee amoo bi shaahabeeto gaata boonoshi qiiddemmoyich daachiihe. Asheena'o kupphena'o oohe hakkaallena'o boonoshi tunoon beegoyich Kanaaneena'on qiido boonoshin qaawiihe.

![](https://cdn.door43.org/obs/jpg/360px/obs-en-14-05.jpg)

Aaraa gutte asheena'o Kanaane showooch aabbe qemmon guuddii beeggii'i wottee waaheete. “Showee oogeton qeemine, wodde maayoo beeti showeene!”i'i asheena'oyich gettiyeete. Tunebaani ebi ashire qiiddechina'o, “ebi showeech beeti asheena'o giidechina'one; katameena'oo xaqqoona gayeeti, ogooge katameena'one. Boonoshin no koyi gaata iberoon noon wuxiyemmina'one” iyeete.

![](https://cdn.door43.org/obs/jpg/360px/obs-en-14-06.jpg)

Bekkech bare gutte qiiddechina'o, Kaaleebinaa Yaasina “Kanaane asheena'o noyee beshe genjjeena'onaa kuppheena'ona boonoshi tuno iberoone, tunebaani xiishoona boonoshin koyi wochiyemmo noone! Yeeri no qoodoon koyemmone!” iyeete.

![](https://cdn.door43.org/obs/jpg/360px/obs-en-14-07.jpg)

Tunebaani asheena'o Kaaleebinaa Yaasinon waayeyaanena'one. Muusinaa Aaroonina toommooch kaaro tiijjii'i, “Sheefoona no dihemmoyich, Doono Yeeri ebi showooch noon daammii bi beeto amoyichiye? Ginoona no qitemmoye, no mecheena'onaa no bushiisheena'ona guuno boonoshi tunemmoye Gibits beemo nooch gaaweshone” iyeete. Arooche iitoo bulli boonoshin Gibits wochi daammemmi ukkuroon kaacca qaawiyeete.

![](https://cdn.door43.org/obs/jpg/360px/obs-en-14-08.jpg)

Yeeri oogeton kaaree'i dane duukkaanooch waahe. Ishichiino iye, “Ta toommooch hukkoo ittoshi tiijjitoyich, iitoo bulli barahooch yal yallimemmone. Yaasinaa Kaaleebinoye besh hiye natonaa aroyee damba tunetto bullina arooch qiti echeshani boonoshi gettemmo gibenikkeeti showeech giyaachemmina'one.”

![](https://cdn.door43.org/obs/jpg/360px/obs-en-14-09.jpg)

Iitoo ebin bi waayehoba axaaxoo boonoshi shuunetoyich ayiniyeete. Boonoshi ginee qiiceena'on yechii'i Kanaaneena'on koyoyich hammiyeete. Yeeri boonoshina tookki tuno bi qajjitoyich boonoshi hammaachemoyich Muusi meeqqeqiye. Tunebaani biin waayeyaanena'one.

![](https://cdn.door43.org/obs/jpg/360px/obs-en-14-10.jpg)

Yeeri boonoshina tookkii ginooch hammaanoone, ebich koyee wochoo mawiiheete, meeti asheena'oo qitiyeete. Arooche Isra'eeleena'o Kanaanee wottee'i barahooch aabbe naton yal yallimmiyeete.

![](https://cdn.door43.org/obs/jpg/360px/obs-en-14-11.jpg)

Isra'eelee asheena'o barahooch boonoshi yal yallimmiti aabbe natooch Yeeri boonoshin maanjjii beehe. Shimaayooche “mannoo” getteebeeti koshon boonoshich immiye. Wotta meeno boonoshi maayemmoyich boonoshi gafooch shawukkeena'on deejjiye. Ebi yemeenoo bullich Yeeri boonoshi tahoona caammona ciyaachemmon tuniihe.

![](https://cdn.door43.org/obs/jpg/360px/obs-en-14-12.jpg)

Yeeri gaakkechi shuunoon shuunoona aacon xaqqooche kichii immiye. Ebi bulli tuneechaa Isra'eelee asheena'o Yeerinaa Muusina toommooch guruuxiyeete. Tunebaani Yeeri Abrahamich, Yisaaqinaa Yaqoobinoch bi giyiti gibenikkooyich anddoo gibeneeto tunehe.

![](https://cdn.door43.org/obs/jpg/360px/obs-en-14-13.jpg)

Iito uchemmi aaco amoona aalleti bare aabooba Yeeri Muusich, “xaqqo aacon bi kichemmoyich gete! Xaqqoochee aacon boonoshich kichemmo neene” iye. Tunebaani Muusi, xaqqoyich geto qajjiichi gumboona gutte kaalloon bi yexxityoyich iito bulli aafoochaa Yeerin giishiihe. Asho bulli uchemmoyich aaco xaqqooche kechiye, tunebaani Yeeri Muusin kaaree'i “gibenikkeeti showeech giyaacheemmoneene” iye.

![](https://cdn.door43.org/obs/jpg/360px/obs-en-14-14.jpg)

Isra'eeleena'o aabbe naton barahooch boonoshi yal yallimmitoye gubb, Yeeri toommooch hukkoon tiijjitina'o bulli qitiyeete. Arooche Yeeri iitoo bullin gibenikkeeti showeechi gashooch yaabiye. Ebiyooba Muusi geenetone, ebich iitoon yaaboona biin bi gaachemmoyich Yeeri Yaasin biich kaaciye. Wotta Yeeri Muusiyoommi bare keemechon ikke aaboon deejjiyemmo bi tunoon Muusich gibenikkoon immiye.

![](https://cdn.door43.org/obs/jpg/360px/obs-en-14-15.jpg)

Aroochee Yeeri gibenikkeeti shoween ciino bi hakkeemmoyich guudi cillooch bi kechemmon Muusich gettiye. Muusi gibenikkeeti shoween beeggiye, tunebaani Yeeri arooch bi giyemmoyich daaggaanoone. Arooche Muusi qitiye, Isra'eeleena'oo shaashe qemmon biich mushaneheete. Yaasi boonoshi andire yaabecho tunehe. Yaasi Yeerin gibenetonaa biich de'a iitona bi tunetoyich gaawe yabechone.

*Yaafe Macaafe Kiino:- Keyi Macaafo 16-17; Haddee Macaafo 10-14, 20, 27; Yibbaatee Macaafo 34*

## 15. Gibenikkeeti Showee

https://openbiblestories.org/l/kbr/story-15/

![](https://cdn.door43.org/obs/jpg/360px/obs-en-15-01.jpg)

Ciiroochaa Isra'eeleena'o gibenikkeeti showee Kanaan boonoshi giyemmi aabo shaggiye. Yaasi kupphe dilallona quyeyaa'a beeti Kanaaneena'ochi katamee Yaarikin qiidotei'i gutte qiiddechina'on daachiihe. Are katamooch qiiddechina'on aachaa'a gubb murici boonoshi hammemmon gaacheti Rahaabi getteyaabeeti yahechi ure beehan. Aree Yeeri toommooch bi mulloon bi too'iitoyich ebin tuniihan. Qiiddechi Isra'eeleena'o Yaarikin boonoshi alliyeemmi aabooba Rahaabinaa bi kechi asheena'onon wodiyoyich gibenikkoon biich immiyeete.

![](https://cdn.door43.org/obs/jpg/360px/obs-en-15-02.jpg)

Isra'eeleena'o Yaarik gimmoyich Yoordanoosi aacon kimo boonoshin qaawiihe. Yeeri “shiichiree qeesheena'o kimbeete”i'i Yaasich gettiye. Qeesheena'o Yooridaanoosi aacooch boonoshi gimo yechimmona, Isra'eeleena'o shuu'i showoona kimo boonoshi hakkiyemmoyich wocciibeeti aaco timochee neexehe.

![](https://cdn.door43.org/obs/jpg/360px/obs-en-15-03.jpg)

Asheena'o Yooridaanoosi aacon boonoshi kimmitoye gubb, Yeeri giidechi Yaariki katameen aabicheree bi kochemmo gaata Yaasich gettiye. Asheena'o Yeerich de'a iyeete. Gine naayina'onaa qeesheena'ona qemi qemona ikke kaalloon shiritte qemoyich Yaariki katameen guuddiyeete.

![](https://cdn.door43.org/obs/jpg/360px/obs-en-15-04.jpg)

Arooche shabaattinne qemooba, Isra'eeleena'o katameen shabaate kaalloon guuddiyeete. Ciirooch katameen boonoshi guuddii beehoba gine naayina'o cookiyeete, qeesheena'oo boonoshi tiroon huggiyeete.

![](https://cdn.door43.org/obs/jpg/360px/obs-en-15-05.jpg)

Arooche Yaariki guudoona beeti xaqqee gayo dihiye! Yeeri gettitoommon Isra'eeleena'o katamee daggooch beeti mooyo bullin aalliiheete. Isra'eeli xibeena'o tuneti Rahaabinaa bi kechi asheena'onon baach wodiiheete. Kanaan beeti bare asheena'o Isra'eeleena'o Yaarikin aalliyoon boonoshi waayehoba, noonoo kochemmina'onei'i shattiyeete.

![](https://cdn.door43.org/obs/jpg/360px/obs-en-15-06.jpg)

Yeeri Kanaani beeti ashi yoodo bullina diggee wogo boonoshi giyemmon Isra'eeleena'on gettitone. Tunebaani Kanaane asheena'o daggoochee ikko tuneti Gibe'ooni asheena'o, Kanaane wohi showoochee waatina'o boonoshi tunoon kootii'i Yaasich gettiyeete. Aroochee boonoshina tookki diggee wogoon bi giyemmoyich echeheete. Gibe'oonena'o amoochee boonoshi waato gaata Yaasinaa Isra'eeleena'ona Yeerin echeyaanena'one. Ebich Yaasi boonoshina tookkii wogoon giihe.

![](https://cdn.door43.org/obs/jpg/360px/obs-en-15-07.jpg)

Isra'eeleena'o, Gibe'oonena'o boonoshin maroon boonoshi ariihoba ippeheete, tunebaani Yeeri afoochaa boonoshi giiti qaaro bi tunetoyich, boonoshina tookkii boonoshi giiti wogoon quyeheete. Giishecho yagii'i bare aaboon, Amooreena'o getteeti Kanaani beeti bare yoode taateena'o, Gibe'ooni asheena'o Isra'eeleena'ona tookkii diggee wogo boonoshi gimmon waayeheete. Ebich boonoshi gine naayina'on ikkochii'i Gibe'oonena'on kochiyeete. Gibe'oonena'o gaacho danoyich Yaasi waan wocho daachiiheete.

![](https://cdn.door43.org/obs/jpg/360px/obs-en-15-08.jpg)

Ebich Yaasi Isra'eeli gine naayina'on kicii'i Gibe'oonena'o waan shagoyich xumoona hammiyeete. Maadda diqq boonoshi ariyaanoon Amooree gine naayina'on kochiyeete.

![](https://cdn.door43.org/obs/jpg/360px/obs-en-15-09.jpg)

Arooba Yeeri Isra'eeleena'oyich koyehe. Amooreena'on shaawii'i ogooge baderoon deejjii'i meetina'on wuxiye.

![](https://cdn.door43.org/obs/jpg/360px/obs-en-15-10.jpg)

Wotta Yeeri Amooreena'on ciroona aalliyoyich deco boonoshich qaminaacheemmoyich aabee shimaayee daggooch ikke xaa'ooch bi yagemmon tuniihe. Arooba Yeeri Isra'eeleena'oyich oogeti wudoon immiye.

![](https://cdn.door43.org/obs/jpg/360px/obs-en-15-11.jpg)

Yeeri are gine naayina'on kochi bi wochitoye gubb, meeti Kanaane asheena'o Isra'eelin kocha ikke xaa'ooch kiceehete. Tunebaani, Yaasina bare Isra'eeleena'ona boonoshin kochii'i wochiyeete.

![](https://cdn.door43.org/obs/jpg/360px/obs-en-15-12.jpg)

Ebi ginoye gubb Yeeri ikkikke yoodoo bulliich gibenikkeeti showeechee biich shaggemi qoodoon immiye. Arooche Yeeri Isra'eelich bi daaro bulliich diggoon immiye.

![](https://cdn.door43.org/obs/jpg/360px/obs-en-15-13.jpg)

Yaasi bi geenehoba, Isra'eele asheena'o bullin ikke xaa'och ceeggiye. Arooche Yaasi Yeeri Siini guudochaa Isra'eeleena'ona tookkii bi giiti wogoyich boonoshi de'a gettemmon asheena'on shalligichiye. Asheena'oo Yeerich gibeneetina'o tuunee beemonaa bi geteena'on dabboonoyich wogo giiheete.

*Yaafe Macaafe Kiino:- Yaasi 1-24*

## 16. Guuchitinooche kichechina'o

https://openbiblestories.org/l/kbr/story-16/

![](https://cdn.door43.org/obs/jpg/360px/obs-en-16-01.jpg)

Yaasi qititoye gubb, Isra'eeleena'o Yeerich de'a getton qajjiyeete, echeti Kanaanena'on boonoshi daggoochee kichaanena'one oohe Yeerichi callooyich de'a getaanena'one. Isra'eeleena'o iberoo tuneti Doono Yeerich goyino qajjiichii Kanaane nuggusheena'oyich goyinooch giiheete. Ebiyooba Isra'eeleena'oyich taato alloone, ebich asho bi ikkikko biich tato shaahi bekketon shuunee beehe.

![](https://cdn.door43.org/obs/jpg/360px/obs-en-16-02.jpg)

Isra'eeleena'o Yeerich de'a getti qayona boonoshi manjjitoyich, Yeeri boonoshi etteena'o boonoshin kochemmon tuniihe. Ebi boonoshi ettteena'o Isra'eeleena'ochi qiico bullin gaajjiyeete, boonoshi gijjoono tulloo tunii meeti asheena'onoo wuxiyeete.

![](https://cdn.door43.org/obs/jpg/360px/obs-en-16-03.jpg)

Arooche Yeeri boonoshi etteena'oochee guuchitinoochee kichechi wodiyeechon boonoshich deejjiye. Showeecho diggoon deebiye. Tunebaani asheena'o andoo wottee Yeerin batteheete. Shaahalloyich goyinoochoo giiheete. Ebich Yeeri boonoshi katinooch beeti boonoshi etteena'o Midiyaamee asheenaꞌon tiijjii bi getaa boonoshin kochii wochiyeete.

![](https://cdn.door43.org/obs/jpg/360px/obs-en-16-04.jpg)

Midiyaamee asheenaꞌo Isra'eeleena'ochi maayo bullin shabaate natooch beddaaha daamiyeete. Midiyaamee asheenaꞌo oogeton boonoshi shattitoyich bamboonaa gofoonooch aashee boonoshi iyitoyich, Midiyaamee asheenaꞌo dano hakkaanena'one. Ciiroochaa boonoshin bi wodiyemmoyich Yeer waan cookiyeete.

![](https://cdn.door43.org/obs/jpg/360px/obs-en-16-05.jpg)

Ikke aaboon Geediyooni getteebeeti Isra'eelo, Midiyaamee asheenaꞌo bi maayoon boonoshi daamaachemmoyichi'i asheechii buchiibeehe. Yeeri maraako Geediyooni waan waa'i ishichiye, “giidechi ginee anaamo tuneti uroocho! Doono Yeeri neenna tookkii beetone. Ebi ooge ne giidoona hamiree, Isra'eeleena'on Midiyaameena'ochi kishoochee wodiibe! Neen wochaa daachiyabeeto ta qelloona taane” iye.

![](https://cdn.door43.org/obs/jpg/360px/obs-en-16-06.jpg)

Geediyooni niho shaahallooyich qanniti deejjee gudo biich beetone. Yeeri Geediyoonin are deejjee gudoon bi happemmon gettiye. Tunebaani Geediyooni asheena'on bi shattitoyich xum bedaaha quyehe. Arooche deejjee gudoon happii'i tiichii buriciye. Bi ga'oochoo Yeerich andire deejjee gudoon qanniihe. Bi hillooch Yeerich deejjoon deejjiye.

![](https://cdn.door43.org/obs/jpg/360px/obs-en-16-07.jpg)

Bi dechara maadda asheena'o ikke asho boonoshi deejjee gudoon bi happoon beegii'i oogichii ippeheete. Geediyoonin wuxoyich bi kexooch hammiyeete. Tunebaani Geediyooni niho “Ba'aalo iberoon nuggushoo bi gaata, ebi happeeto bi deejjee gudo bi tunetoyich, bi bi qellich taggebe” iye. Ishichii bi iitoch asheena'o Geediyoonin wuxaanena'one.

![](https://cdn.door43.org/obs/jpg/360px/obs-en-16-08.jpg)

Midiyaameena'o Isra'eeleena'on bogoyich wotee'i waaheete. Boonoshi haddo oogeti meeto bi tunetoyich koniyona boonoshin haddo hakkito alloone. Geediyooni Midiyaameena'on koyoyich Isra'eeleena'on ceeggiye. Geediyooni, Yeeri biina Isra'eeleena'on wodiyemmo bi tunoon xiishoyich, Yeeri waane gutte malleteena'on echehe.

![](https://cdn.door43.org/obs/jpg/360px/obs-en-16-09.jpg)

Batti batti malletoo, shidooch bi yaggiti qoreddee toommooch baach caagibano kindiichaa showoo bulli shuu'o tunebei'i bi echetone. Yeeriyoo ebiyoommon tuniihe. Wommika wotta Geediyoon Yeerin, showoo maadi caagibanoona shuxichaa qoreddo shuu'o tunebei'i echehe. Yeeriyoo ebiyoommon tuniihe. Eboshi gutte malleteena'o Yeeri biina Isra'eeleena'on, Midiyaameena'o kishoochee wodiyeemmo bi tunoyich miixoo tuneheete.

![](https://cdn.door43.org/obs/jpg/360px/obs-en-16-10.jpg)

32000 Isra'eelee gine naayina'o Geediyooni waan waaheete, tunebaani Yeeri boonoshi haddoo woddetone iye. Ebich Geediyooni koyoon shattiti 22000 gine naayina'on boonoshi kexooch wochii daachiihe. Andoo Yeeri gine naayina'o haddo woddoone iye. Ebich Geediyooni 300 gine naayina'on echiichii bareena'on boonoshi kexooch daachiihe.

![](https://cdn.door43.org/obs/jpg/360px/obs-en-16-11.jpg)

Aroobe xum Yeeri Geediyoonin “Kaamboon geddi'i boonoshi beeti xaa'ooch tiyi hambe, iibeeti boonoshi yibbaatoon ne waayegaata boonoshich shattaahine” iye. Ebich Geediyooni Midiyaameena'o Kaambooch aroobee xum tiyi hammiye. Ikke Midiyaamee gine naayo bi nuuchoyich gumona “Geediyooni gine naayina'o Midiyaame gine naayina'on kochi boonoshi wochoon ciinnete”,i'i maacii bi beetaa Geediyooni waaye'i, Doono Yeerich goyinnehe.

![](https://cdn.door43.org/obs/jpg/360px/obs-en-16-12.jpg)

Arooche Geediyooni bi gine naayina'o waan wottee'i boonoshi ikkikkoyich tiroon, qulloonaa ceechoonon immiye. Midiyaame gine naayina'o tokkotee boonoshi beetaa boonoshi gafiti kaamboon giichiyeete. Geediyooni 300 gine naayina'o qullee maacooch ceecho geddii yechitina'one, tunebaani Midiyaame gine naayina'o ceechoon ciino hakkaanena'one.

![](https://cdn.door43.org/obs/jpg/360px/obs-en-16-13.jpg)

Arooche Geediyooni gine naayina'o bulli ikke yeshoona boonoshi qulleena'on tiichii boonoshi getaa are ceechoo bekkech aaxee bekkehe. Boonoshi tiroon huggiibee “Doono Yeerinaa Geediyooninochi gine naayina'o” ii cookiyeete.

![](https://cdn.door43.org/obs/jpg/360px/obs-en-16-14.jpg)

Yeeriyo Midiyaameena'on shaawihe, ebich boonoshinaa boonoshina wuxee ciireheete. Bekkech boonoshi kexi kexooch beeti Isra'eeleena'o eeggee'i Midiyaameena'on yoohona gaacheeheete. Meetina'on wuxii echetina'onoo Isra'eelee showooche yookkiyeete. Ebiyooba 120000 Midiyaamee gine naayina'o qitiyeete. Yeeriyoo Isra'eelin wodiihe.

![](https://cdn.door43.org/obs/jpg/360px/obs-en-16-15.jpg)

Asheena'oo Geediyooni boonoshi taato bi tunemmon qaawiyeete. Geediyooni ebin boonoshi tuniyeemmon daaggoo qajjiye. Tunebaani boonoshi ikkikko Midiyaameena'o waane boonoshi daammiti aachee koliboon biich boonoshi deebemmon echehe. Asheena'o Geediyoonich dofee aachoon immiyeete.

![](https://cdn.door43.org/obs/jpg/360px/obs-en-16-16.jpg)

Geediyooniyoo aachoon ukkii'i qeeshee ukkuroo taheebeeti efoodoon shuuniihe. Tunebaani asheena'o ebi taheebeeti efoodoon shaahalloo tunii'i biich goyineheete. Ebina tiyiton Yeeri boonoshi etteena'o boonoshin koyi wochiyemmon tunii naxehe. Ciiroochaa asheena'o andoon Yeeri boonoshin wodiyemmon echeheete, Yeeriyoo bare wodiyechon deejjiye.

![](https://cdn.door43.org/obs/jpg/360px/obs-en-16-17.jpg)

Ebiyoommi mooyo meeti kaalloon wottee wottee tunehe. Isra'eeleena'o axaaxoon shuuneheete, Yeeri boonoshin naxehe, boonoshi gondoyich aynii wotteheete, Yeeri wotta boonoshin wodiyaa wodiyechon deejjiye. Meeti naton Yeeri Isra'eeleena'on wodiyoyich guuchitinooche kichechina'on deejjitone.

![](https://cdn.door43.org/obs/jpg/360px/obs-en-16-18.jpg)

Ciiroochaa, maccoo bare aageteena'och beetoommi taatoon boonoshi bi immemmon Yeerin echeheete. Ginooba boonoshin yaabemmo, genjjoonaa kupphona tuneti taato boonoshich bi beeyemmon qaawiyeete. Tunebaani Yeeri ebi boonoshi echoon shunaanoone, baach boonoshi qaawitoommon taatoon immiye.

*Yaafe Macaafe Kiino:- Isra'eelee Woraafeena'ochi Macaafo 1-5, 6-8*

## 17. Yeeri Daawitina tookkii bi giiti wogo

https://openbiblestories.org/l/kbr/story-17/

![](https://cdn.door43.org/obs/jpg/360px/obs-en-17-01.jpg)

Saa'ooli Isra'eeleena'ochi batti batti taatoone. Aroo asheena'o qaawitoommon genjjoonaa mallet gaawoonane. Saa'ooli Isra'eeleena'on bi qeejjiti batti batti giisheeche natina'ooch gaawe taatoo tunehe. Tunebaani arooye gubb Yeerich de'a getaani gonde asho tunehe, ebich Yeeri ikke areddoon Saa'ooli keroon taatoo tuneemmi bariti ashoon kaaciye.

![](https://cdn.door43.org/obs/jpg/360px/obs-en-17-02.jpg)

Yeeri Saa'ooliye gubb taatoo bi tunemmoyich Daawiti getteeti gurimaashe Isra'eele ashoon kaaciye. Daawiti Beet Lehemi katamee asho tuneti bagee qiddechone. Daawiti bi nihoochi bageena'on quyee bi beehoba bageena'on maaya waati daaheroonaa diiboonon meeti kaalloon wuxitone. Daawiti Yeerich de'a ii beeto, ga'i gaawoonaa cadiqoonane.

![](https://cdn.door43.org/obs/jpg/360px/obs-en-17-03.jpg)

Daawiti kupphe gine naayonaa yaabechona tunehe. Daawiti batt gurimaashoo bi beehoba Gooliyaadi getteebeeti gaakkechi uroona koyehe. Gooliyaadi doyiti gine naayo, kuppho, wotta bi neexo keejje meetir bedde ashoone. Tunebaani Yeeri Gooliyaadin wuxiire Isra'eeleena'on bi wodiyemmon Daawitin gaachehe. Arooye gubb Daawiti asheena'ona biin naadiiti meeti wudeena'on Isra'eeli ettena'o toommooch danehe.

![](https://cdn.door43.org/obs/jpg/360px/obs-en-17-04.jpg)

Saa'ooli asheena'o Daawitich boonoshi bekkiiti shunon ciinii'i qanaatehe. Saa'ooli meeti kaalloon Daawitin wuxiya bi qaawitoyich Daawiti Saa'ooli aafooche aashehe. Ikke areddoon Saa'ooli Daawitin wuxiya qaawiye. Daawiti aashee'i bi beeti gofooch hammiye, tunebaani ebiyooba, Daawiti Saa'ooli waan oogeto kattinii'i bi beemon Saa'ooli Daawitin beegaanoone. Daawiti, Saa'oolin wuxo hakkiibee wuxaano qajjiye. Daawiti taato tunoyicha iyii'i Saa'oolin wuxee bi qayon xiishiyoyich Saa'oolichi tahee caappon maacii daamiye.

![](https://cdn.door43.org/obs/jpg/360px/obs-en-17-05.jpg)

Ciiroochaa, Saa'ooli koyee daggoochaa qitiye, Daawitiyoo Isra'eelee taato tunehe. Daawiti gaawe taatoo bi tunetoyich asheena'o biin shuniyeete. Yeeri Daawitin diiriye, mooyo biich kaameto tuniihe. Daawiti meeti koyoon koyehe, Yeeriyoo Isra'eele eteena'on koyi bi wochiyemmon gaachehe. Daawiti Yerusalemin kochi wochii'i bi yechitoye gubb bi inde katameen tuniihe. Daawiti bi taatitene yemeenooba, Isra'eeli giidechinaa gaanechina tunahan.

![](https://cdn.door43.org/obs/jpg/360px/obs-en-17-06.jpg)

Daawiti Isra'eelena'o bulli Yeerich boonoshi goyinnemmonaa biich deejjoon boonoshi giddiyemmi Yaafe Kexon hagga qaawiye. Asheena'o 400 natti beddimmi yemeenoyich Muusi shuuniiti danee duukkaanoch Yeerich goyinnee, deejjoonoo giddii beeheete.

![](https://cdn.door43.org/obs/jpg/360px/obs-en-17-07.jpg)

Yeeri, “ne gine asho ne tunetoyich hini Yaafe Kexon taach haggaachine. Tunetaa ne keroon, ne taatee qeenooch ta kotiiyemmi ne bushoo ta shigoyich kexon haggemmone. Ebi tunetaanoona neen oogichi diiremmotaane. Ne yaroochee ikkoo ta asheena'o toommooch bulli yemeenooch taatemmone!” immi wochoon Naataanina yechii'i Daawitich daachiihe. Bulli yemeenooch taatemmi mixxe Daawiti yaroo Masiihine. Masiihi showee asheena'on boonoshi axaaxoochee wodiyeemmi Yeeri kaaccitone.

![](https://cdn.door43.org/obs/jpg/360px/obs-en-17-08.jpg)

Daawiti ebi yibbaatoon bi waayehoba, Yeeri ooge oogittinoonaa wodde diiroonon biich immoyich gibenikkoo bi giitoyich bekkech Yeerin galletee oogiihe. Daawiti, ebosh mooyina'on Yeeri aata bi tuniyemmo gaata ariyaanoone. Tunebaani Isra'eeleena'o Masiihi waammi wottoon 1000 naton quyoo boonoshich giddi tunetone.

![](https://cdn.door43.org/obs/jpg/360px/obs-en-17-09.jpg)

Daawiti tatoonaa gibenoona meeti naton qeejjiye, Yeeriyo biin diiriye. Tunebaani, bi eeno ciiroo waan gonde axaaxoon shuunehe.

![](https://cdn.door43.org/obs/jpg/360px/obs-en-17-10.jpg)

Ikke aaboon Daawiti bi gine naayina'o boonoshi kexoochee kechii hammii'i koyee boonoshi beeta, aro bi taate kexoye maach tuneechii ikke mallet gaawe ure bi achoon machaa bi beeta ciinniye. Ebi ure bi shigo Beerishaab getteehe.

![](https://cdn.door43.org/obs/jpg/360px/obs-en-17-11.jpg)

Daawiti bi aafoon bara wochoo qajjiichi ureen bi waan boonoshi deebemmoyich ashoon wochee daachiihe. Arooche biina tookkii bi qeyitoye gubb wochii bi kexooch daachiihe. Giisheche decoye gubb Beerishaabi xifetitaane iyaa'a Daawiti waan wochoo daachiihan.

![](https://cdn.door43.org/obs/jpg/360px/obs-en-17-12.jpg)

Uuriyi getteebeeti Beerishaab kenoo Daawitichi aricheti gine naayina'oochee ikkoone. Daawiti Uuriyin koyoochee ceekkii'i bi mecheena tookki bi tunemmon gettiye. Tunebaani Uuriyi echeti gine naayina'o koyooch boonoshi beeta kexooch hammaache iye. Ebich Daawiti Uuriyin koyooch wochii daachii'i bi wuxeyeemoyich ettoo kuppeti xaa'och Uuriyin aaf shiichi beshiibe iyii'i gine iraashooch gettiye.

![](https://cdn.door43.org/obs/jpg/360px/obs-en-17-13.jpg)

Uuriyi bi wuxeetoye gubb Daawiti Beerishaabin shaaggiye. Areyo gubb Daawitich anaami bushoon shiyahan. Yeeri, Daawiti tuniiti mooyoyich oogeton kaarehe. Daawitichi axaaxo am shaahoon gondo bi tuneto gaata bi gettemmoyich keemechi Naataanin Daawiti waan daachiihe. Daawitiyo bi axaaxoon aannii bi iyitoch Yeeri biin maariye. Daawiti gubbi bi eenooch kupphe mooyo bi toommooch waahoboona Yeerich de'ai'i biin waayehe.

![](https://cdn.door43.org/obs/jpg/360px/obs-en-17-14.jpg)

Tunebaani Daawiti bi shuuneti axaaxoyichi naxoona bi busho qitiye. Wotta ebiye gubbi bi beemooch bi kechi asheena'o daggooch koyo tunehe. Daawitichi hakkoo oogichii nirehe. Daawiti Yeerich gibeneyaano bi tunetaanoona, Yeeri andoo bi wogoyich gibeneetone. Gubb Daawitinaa Beerishaabina bare anaami bushoon shiiheete, bi shigoonoo Solomooni iyi'i shigiiheete.

*Yaafe Macaafe Kiino:- Saameelichi Ikkinee Macaafo 10:15-19, 24, 31, Saameelichi Guttinee Macaafo 5, 7, 11-12*

## 18. Gutta qoodeeti taatitino

https://openbiblestories.org/l/kbr/story-18/

![](https://cdn.door43.org/obs/jpg/360px/obs-en-18-01.jpg)

Meeti natoye gubb, Daawiti qitiye, bi bushoo Solomooniyoo Isra'eeli toommooch taatehe. Yeeri Solomoonin bulliye beshoon bi qaawiibeeto amoon gaata echehe. Solomooniyoo bi qaawiibeeto ariyoo tunoon bi getihoba, Yeeri biin showee tookk beeti asho bulliye beshe ariyechoon tuniihe. Daakkii'inoo Yeeri biin oogeti gaanech ashoon tuniihe.

![](https://cdn.door43.org/obs/jpg/360px/obs-en-18-02.jpg)

Bi nihoo yamitoommonaa qaawiibeeti mooyina'on bi kicitoommona Solomooni Yerusalem katamooch Yaafe Kexon shuunehe. Ebiyooba asheena'o danee dukkaanee keroon Yaafe Kechi daggooch Yeerich goyinnee deejjoonoo giddiiheete. Yeeriyoo Yaafe Kechi daggooch waa'i bi asheena'ona tookki beehe.

![](https://cdn.door43.org/obs/jpg/360px/obs-en-18-03.jpg)

Tunebaani Solomooni bare aagetee maacheena'on shunniye. 1000 beddimmi maacheena'on shaagona Yeerich de'a gettemmon qajjiye! Eboshi maacheena'oochee meetina'o maachi showooche waatina'one; boonoshina tookkii boonoshi deebiti shaahalleena'oyichoo goyinneheetee. Solomooni bi geenehoba, biyoo boonoshi shaahalleena'oyich goyinneheete.

![](https://cdn.door43.org/obs/jpg/360px/obs-en-18-04.jpg)

Yeeri Solomoonin kaaree'i bi qititoye gubb naxo bi tunemoyich Isra'eelee asheena'on gutte taatitinooch qoodiyemmo bi tunoon gettiye.

![](https://cdn.door43.org/obs/jpg/360px/obs-en-18-05.jpg)

Solomooni qititoye gubb bi busho Rehoboami taatehe. Rehoboami mullaalli ashoone. Bi taattitinoon iberii deqqa Isra'eelee asheena'o bulli kicee waaheete. Solomooni wodde magge shuunoon boonoshin bi shuuniyoonaa wodde gibiro bi qochiyoonona boonoshi ayinoon Rehoboamich gettiyeete.

![](https://cdn.door43.org/obs/jpg/360px/obs-en-18-06.jpg)

Rehoboami bi dookke mulloona ishichii'i boonoshich wochiye, “ta nihoo Solomoni magge shuunoon noon suuniite iyaa gabito ittoshine, tunebaani ta biyee beshiti magge shuunoon ittoshin shuuniyemmo taane, biye beshoonoo ittoshin naxemmo taane.”

![](https://cdn.door43.org/obs/jpg/360px/obs-en-18-07.jpg)

Ashire Isra'eele asheena'ochi yoodena'o Rehoboami toommooch hukkoo tiijjiyeete. Guttee yoodena'o baach biich geibenee'i biinna tookkii tuneheete. Eboshi gutte yoodeena'o Yihudee taatitinoon neechiyeete.

![](https://cdn.door43.org/obs/jpg/360px/obs-en-18-08.jpg)

Rehoboami toommooch hukkoo tiijjiti echeti aashire yoodeena'o Yeroboami getteeti uroon boonoshi taato tunii'i taatiiiheete. Showee dambi kuxooch boonoshi taatitinoon neechii'i Isra'eeli getaa ceekkeheete.

![](https://cdn.door43.org/obs/jpg/360px/obs-en-18-09.jpg)

Yeroboami Yeeri toommooch hukkee'i asheena'o axaaxoon boonoshi shuunemmon tuniihe. Yihudi taatitinooch beeti Yaafe Kexooch asho Yeerich goyinnoon qayichi shaahalleena'oyich bi goyinnemmon gutte shaahalleena'on shuunehe.

![](https://cdn.door43.org/obs/jpg/360px/obs-en-18-10.jpg)

Yihudinaa Isra'eelina taateena'o etteena'o tunee'i meeti kaalloon koyeheete.

![](https://cdn.door43.org/obs/jpg/360px/obs-en-18-11.jpg)

Andire Isra'eele taatitinooch beeti taateena'o bulli gondeena'one. Eboshi taateena'ochee meetina'o boonoshi keroon taateya qaawiti bare Isra'eelena'o wuxeeheete.

![](https://cdn.door43.org/obs/jpg/360px/obs-en-18-12.jpg)

Taateena'o bullinaa meeti Isra'eelee asheena'ona Shaahalloyich goyinneheete. Shaahalloyich boonoshi goyinneebeehoba meeti kaalloon qocaalli shuunoon shuuneebeeheete. Ebiyo goyinnee xaa'oochaa anaamonaa maacheena danee, ikkikke kaalloonoo bushiishoon deejjiibeeheete.

![](https://cdn.door43.org/obs/jpg/360px/obs-en-18-13.jpg)

Yihudi taateena'o Daawitichi yareena'one. Eboshi taateena'o daggoochee ikkikkeena'o maccoon tatoona qeejjiti Yeerichoo goyinneti de'e asheena'one. Tunebaani eboshi taateena'o daggoochee gondeena'onaa duubeena'ona, shaahallooyichoo goyinnetina'o meetina'one. Ikkikke taateena'o boonoshi bushiishoonona koote shaahalleena'oyich deejjitina'one. Wotta meeti Yihudee asheena'o Yeeri toommooch hukketee'i bare shaahalleena'oyich goyinnetina'one.

*Yaafe Macaafe Kiino:- Taateena'ochi Ikkinne Macaafo 1-6, 11-12*

## 19. Keemechina'o

https://openbiblestories.org/l/kbr/story-19/

![](https://cdn.door43.org/obs/jpg/360px/obs-en-19-01.jpg)

Yeeri Isra'eeleena'oyich, boonoshi kiinoo bulliich keemechina'on deejjitone. Keemechina'o Yeeri waane wochoon waaye'i asheena'oyich gettibeeheete.

![](https://cdn.door43.org/obs/jpg/360px/obs-en-19-02.jpg)

Akaabi Isra'eeli showooch bi taatehoba Eliyasi keemechone. Akaabi Ba'aali getteebeeti koote Shaahalloyich asheena'o goyinnemmon kupphiiti gonde ashoone. Eliyasi Akaabich “Amiyo dihemmoyich ta gettemmi wottoon, waabeeti natina'ooch amiyo, oohee doshoo beetaachemmone” iye. Ebi yibbaatoo Akaabin oogeton ippiihe.

![](https://cdn.door43.org/obs/jpg/360px/obs-en-19-03.jpg)

Yeeri biin wuxiya qaawiibeeti Akaabi waane murici barahooch beeti woce aacooch bi hammemmon Eliyaasich gettiye. Aroochaa maaddoonaa woymikkoona gaceena'o Elyaasich koshonaa meenon deebii beeheete. Akaabinaa bi gine naayina'ona Eliyaasin qaawiyeete, tunebaani dano hakkaanena'one. Showee shuu'o kupphee bi iyitoyich ciiroochaa woce aacina'o shuuqqiyeete.

![](https://cdn.door43.org/obs/jpg/360px/obs-en-19-04.jpg)

Ebich Eliyasi ikke giyooch beeti bare showooch tiyii hammiye. Are showooch beeti ikke xuume ureenaa bi bushoona shaacee naboona boonoshi maayo cimoyich beddiye. Tunebaani Eliyasin shiimoona yechiyeete. Ebina Yeeri buddino bi mollexoochee, zayitoo bi qondoochee ciyaachemmon tunii'i boonoshin bi maanjjitoyich ebi shaacee goorooba boonoshi bulli maayemmi maayo kuxeyaanoone. Eliyasi arooch meeti naton kotehe.

![](https://cdn.door43.org/obs/jpg/360px/obs-en-19-05.jpg)

Keejje nataa qatoye gubb amiyoon dichiyemmo bi tunoon Isra'eele showooch wotte hammire Akaabich bi gettemmon Yeeri Eliyasich gettiye. Akaabi Eliyasin bi ciinihoba, “Isra'eeleena'on du'iya beetocho! Ebi neene?” iye. Eliyasiyoo ishichii wochiye, “Isra'eeleena'on du'iya beeto, neene, ta toono taane. Ibere Nuggushoo Doono Yeerin qajjaa, Ba'aaloyich goyinneto neene. And Isra'eele taate asho bullin qerimeloos guudooch kicibe” iye.

![](https://cdn.door43.org/obs/jpg/360px/obs-en-19-06.jpg)

450 che Ba'aali keemechina'on geddii'i Isra'eele taate ashena'o bulli Qermeloosi guudoch waaheete. Eliyasi asheena'ochi aafooch waa'i, “Mulloon guttiyoona shaami ittoshi beeyemmo aati wottooniye? Nuggushoo, Doono Yeeri gaata, Doono Yeerich goyinne maddebote! Ba'aalo nuggushoo gaata, Ba'aaloyich goyinne maddebote!” iye.

![](https://cdn.door43.org/obs/jpg/360px/obs-en-19-07.jpg)

Arooche Eliyasi Ba'aaloyichi keemechina'oyich “Ikke wuroon bashiree deejjoo tunii giddiibote, tunebaani qaaqqoon aaxiyaahote. Tawoo ebiyemmon tuniyeemmo taane. Waaye'i qaaqqoon deejjimmi nuggushoo, aroo Nuggushoone” iye. Ebich Ba'aali qeesheena'o deejjoon qanniiheete, tunebaani qaaqqoon aaxiyaanena'one.

![](https://cdn.door43.org/obs/jpg/360px/obs-en-19-08.jpg)

Arooye gubb Ba'aali keemechina'o “Ba'aaloocho! No qolloon waayebe!” iyi'i Ba'aali waan qolleheete. Deco bullin cookkiyeete, arooche boonoshi achoon shikkoona maaciyeete. Tunebaani qollee wochoo waataanoone.

![](https://cdn.door43.org/obs/jpg/360px/obs-en-19-09.jpg)

Ciiroochaa, Eliyasi Yeerich deejjoo qanniihe. Arooche meeno, mexo, wotta deejjee gudee guudoona beeti showoo bulliyona bi shuxxemmi wotton awdde baaretee aacon deejjee toommooch boonoshi ukkiyemmon asheena'och gettiye.

![](https://cdn.door43.org/obs/jpg/360px/obs-en-19-10.jpg)

Arooche Eliyasi “Abrahamichi Nuggushoo, Yisaaqichi Nuggushoo, Isra'eelichi Nuggushoo Doono Yeero! Ne, Isra'eeleena'ochi toommooch Nuggushoo ne tuno, tawoo ne guuno ta tuno hanaach arichebe! Doono Yeero! Nuggushoo ne tunoon, hini asheena'o ariyemmoyich, ta qolloon waayebe! Ta Doono Yeero! Ta qolloon waayebe!” iye.

![](https://cdn.door43.org/obs/jpg/360px/obs-en-19-11.jpg)

Bekkech, qaaqqoo shimaayoochee kindii'i meenon, mixon, xaqqoon, showoonon maahe. Ebiyoommonoo deejjee gudee guudoona beeti aaconoo napphee shuukkiihe. Asheena'o bulli ebin beeggii'i, baroona guuppeechii, “Doono Yeeri, aroo Nuggushoone. Doono Yeeri, aroo Nuggushoone” iyeete.

![](https://cdn.door43.org/obs/jpg/360px/obs-en-19-12.jpg)

Arooche Eliyasi, “Ba'aali keemechina'on yeshote! Boonoshiichee ikkoona muriccaaye!” iye. Ebich asheena'o Ba'aali keemechina'on yechii'i daammii wuxiyeete.

![](https://cdn.door43.org/obs/jpg/360px/obs-en-19-13.jpg)

Arooye gubb Eliyasi taato Akaabich, “Ooge amichi qaaro taach bi waayee beetoyich, tiyiree damba hambe!” iye. Bekkech shimaayo manderehe, giidechi amiyoo dihiye. Doono Yeeri, showee shuu'on neechii'i ibere Nuggushoo bi tunoon bekkiihe.

![](https://cdn.door43.org/obs/jpg/360px/obs-en-19-14.jpg)

Eliyasi yemeenoye gubb, Yeeri keemecho bi tunemmoyich Elisayi getteeti uroon kaaciye. Yeeri Elisayina meeti gaakkechi mooyina'on shuunehe. Ebi mooyina'ooche ikkoo qeddee shaddee biiyechi ettee ginee iraashoo tuneti Na'imaani toommooch shaggiti mooyone. Na'imaani, Elisayi mooyon waayee'i bi waan haammii taan wodiibe ii echehe. Elisayi Hamiree Yooridanoosi aacoochaa shabaatte wottoon machebe ii gettiye.

![](https://cdn.door43.org/obs/jpg/360px/obs-en-19-15.jpg)

Batti battii Na'imaani ebi mooyo tuushe shuuno biich bi shaahitoyich kaaree'i Elisayi gettiton tuniyoo qajjiye. Tunebaani gubb bi gaboon shaddii'i Yooridanoosi aacooch, shabaatte wottoon giyii kechiye. Ciiroochaa aacooche bi kechimmona bi qeddo bulla wodiye.

![](https://cdn.door43.org/obs/jpg/360px/obs-en-19-16.jpg)

Yeeri bare meeti keemechina'on deejjiye. Boonoshi bulli Shaahalloyich goyinnoon boonoshi neechiyemmonaa tate nalloonaa ariqqoonon barena'oyich boonoshi bekkiyemmon asheena'oyich gettiye. Asheena'o gonde shuunoon neechoonaa Yeerich de'a gettonon tuniyoo boonoshi qayigaata, Yeeri boonoshi xu'oyich nalliyemmonaa naxemmona bi tunoon meeqqeqiyeete.

![](https://cdn.door43.org/obs/jpg/360px/obs-en-19-17.jpg)

Asheena'o meeti kaalloon Yeerich de'a getaanena'one. Meeti kaalloonoo keemechina'on shiimeyaanena'one, ikkikke kaalloonoo keemechina'on wuxiyeete. Ikke kaalloon keemechi Erimiyaasi shuu'i oppooch duppe'i bi qittemmon tunetone. Oppe duchooch beeti taappooch giihe, tunebaani arooba taatoo Erimiyaasich ariqqee'i oppoochee geechi boonoshi kichemmon bi aafe bushiisheena'oyich gettiye.

![](https://cdn.door43.org/obs/jpg/360px/obs-en-19-18.jpg)

Keemechina'o asheena'o boonoshin shixxitaanoo Yeerichon getton kuxaanena'one. Boonoshi axaaxee gommooche wottoo boonoshi qayigaata Yeeri boonoshin aalliyemmo tunoon asheena'on meeqqeqiyeete. Wotta Masiihi wommichon Yeeri bi immiti gibenikkoon asheena'on shalligichiyeete.

*Yaafe Macaafe Kiino:- Taateena'ochi Ikkinnee Macaafo 16-18, Taateena'ochi Guttinnee Macaafo 5፣ Erimiyaasi 38*

## 20. Keccoonaa Keccoochee wottoona

https://openbiblestories.org/l/kbr/story-20/

![](https://cdn.door43.org/obs/jpg/360px/obs-en-20-01.jpg)

Isra'eele taatoonaa Yihude taatoona guttiyona Yeeri toommooch axaaxoon shuuneheete. Yeeri boonoshina tookki Siini guudochaa bi giyiti wogoon happiyeete. Boonoshi gonde gommoochee wotteree biich boonoshi goyinnemmon boonoshi meeqqeqiyemmoyich bi keemechina'on wochee deejjiye, tunebaani boonoshi de'a gettemmon qajjiyeete.

![](https://cdn.door43.org/obs/jpg/360px/obs-en-20-02.jpg)

Ebich Yeeri boonoshi etteena'o boonoshin aalliyemmon daagii'i ebi gutte taateena'on naxehe. Giidechi, maac manjje showee Asoorichi taato Isra'eelin aalliihe, aaxxi mooyo bullin hokkii daamiye, gamini xaa'oono michiye.

![](https://cdn.door43.org/obs/jpg/360px/obs-en-20-03.jpg)

Asooree wulleena'on, gaanechina'on, wotta kishee ariyoo boonoshich beeti asheena'o bullin kicii'i Asooree showooch daammiyeete. Isra'eele showooch wuxeyaanoon echetina'o gitte girechina'o baachiye.

![](https://cdn.door43.org/obs/jpg/360px/obs-en-20-04.jpg)

Arooche Asooreena'o Isra'eele taato beeti showooch boonoshi beeyemmoyich dallaawe asheena'on deebiyeete. Dallaawe asheena'o happeeti katameena'on wochi shuunee'i arooch echeti Isra'eeleena'on shaaggiyeete. Ebi dallaawe asgeena'on shaaggiti Isra'eele asheena'o Shamaareena'o getaa ceekkee beeheete.

![](https://cdn.door43.org/obs/jpg/360px/obs-en-20-05.jpg)

Isra'eele taatittinooch beeti asheena'o boonoshi mulloon Yeeri toommooch too'iyoonaa Yeerich de'a getona boonoshi qajjitoyich Yeeri aabichii'i sheerito gaata asheena'o beeggiyeete. Ebi bulli bi tunetaanoona Yihude taatittine dech beeti asheena'o Kanaane asheena'ochi nuggusheena'onaa shahalleena'onoyich goyinneheete. Yeeriyo boonoshin meqqeqemmi keemechina'on bi dejjitaanoona waayemmon qajjeete.

![](https://cdn.door43.org/obs/jpg/360px/obs-en-20-06.jpg)

Asooreena'o Isra'eele taatittinoon boonoshi tiichiti 100 nat bedoye gubb Yeeri Yihude taatittinoon boonoshi kocheemmoyich Baabiloonena'on deejjiye. Baabilooni giidechi taate ageteene. Yihude taato Nabukadinasorich maddecho tunoyichinaa wodde gijjoo qoconoyich wogo geddiye.

![](https://cdn.door43.org/obs/jpg/360px/obs-en-20-07.jpg)

Tunebaani giisheche natoye gubb Yihude taato Nabukadinasori toommooch hukkoo tiijjiye. Ebich Baabiloonena'o wottee waa'i Yihude taatoon kochiyeete. Yerusalemi katameeno yechiyeete, Yaafe kexonoo happiyeete, ebiyee wotta Yaafe kechi kobaroo bullin daammiyeete.

![](https://cdn.door43.org/obs/jpg/360px/obs-en-20-08.jpg)

Yihude taato bi toommooch hukkoo bi tiijjitoyich sheeroo tuniyeemmoyich Nabukadinasori gine naayina'o taatoochi anaami bushiisheena'on bi aafoochaa wuxiyeete, bi aafoono opphii kichiyeete. Arooche taatoon Baabiloon cuye kexooch daammiyeete, biyoo aroochaa qitiye.

![](https://cdn.door43.org/obs/jpg/360px/obs-en-20-09.jpg)

Nabukadinasorinaa bi gine naayina'o goyo boonoshi gochemmon meeti girechi asheena'on baach echiichii, Yihude taate ashena'o bullin keccii Baabiloon daamiyeete. Yeeri asheena'o gibenikkeeti shoween duppi boonoshi hammiti ebi gooro kecco getaa ceekkehe.

![](https://cdn.door43.org/obs/jpg/360px/obs-en-20-10.jpg)

Yeeri keccooch daachii'i bi asheena'on boonoshi axaaxooyich bi naxetaanoona, boonoshinaa bi immiti gibenikkeena'on batteyaanoone. Ebich Yeeri bi asheena'on quyoonaa bi keemechina'ona yibaatiyoonon kuxaanoone. Shabe natoye gubb, gibenikkeeti showeech wochinnoon wottemmina'o boonoshi tunoyich gibenikkoo immiye.

![](https://cdn.door43.org/obs/jpg/360px/obs-en-20-11.jpg)

Shabe natti bedo bi tunetoye gubb, Faarsi taato Baabiloonin kochi yechiye, ebich Faarsi taatittino Baabiloone taatittinoon keeri neexehe. Ebi goor Isra'eeleena'o Yihudeena'o getaa ceekkee beeheete, boonoshi daggooche meetina'o Baabiloon bee echetina'one. Geeneti hadda guuteena'o baach Yihudi showoon shalligiyeete.

![](https://cdn.door43.org/obs/jpg/360px/obs-en-20-12.jpg)

Faarsi taatittino kuppho tuneechii tunebaani bi hajjiti asheena'on ariqqoona yechii beetone. Qiiroosi Faarseena'ochi taato bi tuneti giisheche gooroye gubb, Yihude showooch wottoo qaawiti Yihudo koniyona Faarsin gawuki Yihude showooch wotto bi hakkiyemmon getoon immiye. Yaafe kexon wochi boonoshi shuunemmonoo gijjee buushon immiye! Ebich keccooch boonoshi yagiti shabe natoye gubb, hadda guute asheena'o Yihude showooch beeti Yerusalem wotteheete.

![](https://cdn.door43.org/obs/jpg/360px/obs-en-20-13.jpg)

Asheena'o Yerusalem boonoshi shagihoba , Yaafe kexonaa katamee guudoona beeti gayoonon wochinnoon shuuneheete. Ebi daar beddaaha bare asheena'ona hajjeetina'o boonoshi tunetaanoona, wochinnoon gibenikkeeti showooch kotee'i Yaafe kexoochaanoo goyinneheete.

*Yaafe Macaafe Kiino:- Taateena'ochi Guttinnee Macaafo 17: 24-25; 2 Kiino 36; Izirichi Macaafo 1-10; Nehimiyichi Macaafo 1-13*

## 21. Yeeri Masiihichon Gibenikko Immiye

https://openbiblestories.org/l/kbr/story-21/

![](https://cdn.door43.org/obs/jpg/360px/obs-en-21-01.jpg)

Batti timmochee, Yeeri Masiihin deejjoyich yamiye. Batti batt Masiihichi gibenikko waato Addaaminaa Heewaanina waaniye. Yeeri dingeroyichi qelloon qiccemmo, Heewaanichi yaroo shiijjemmo bi tunoon gibenikko immiye. Heewaanin dawushiti dingero Sheexaanoone. Ebi gibenikkoo Masiihi Sheexaanoon ciroona koyi wochiyemmo bi tunoone.

![](https://cdn.door43.org/obs/jpg/360px/obs-en-21-02.jpg)

Biina showee tookki asheena'o bulli diiroon danemmina'o boonoshi tunoon, Yeeri Abrahamich gibenikko immiye. Ebi diiro gubb Masiihi waammona ceennemone. Masiiho showee tookk beeti ashi yaro bullichee ashoo bi wodiyemmon tuniyeemone.

![](https://cdn.door43.org/obs/jpg/360px/obs-en-21-03.jpg)

Yeeri, gubbich Muusiyoommi bare keemmochon tiijjemmo bi tunoon Muusich gibenikko immiye. Ebi yagiree gubb woyemmi Masiihichon icheti gibenikkoone.

![](https://cdn.door43.org/obs/jpg/360px/obs-en-21-04.jpg)

Bi yaroochee ikko Yeeri asheena'o toommooch taato tuneree bulli yemeenooch hajjemmo bi tunoon Yeeri Daawitich bare gibenikko immiye. Ebiyoo Masiihi Daawiti yaroochee ikkoo tunemmone getone.

![](https://cdn.door43.org/obs/jpg/360px/obs-en-21-05.jpg)

Yeeri andire wogoon giyemmo bi tunoon keemeechi Erimiyaasina gibenikko immiye. Tunebaani ebi wogo Yeeri siini guudochaa Isra'eeleena'ona tookki bi giyiti wogoommo toonone. Andire wogoona Yeeri bi geteena'on asheena'o mullooch kooriye, asheena'o boonoshi qelloona Yeerin ariiheete, bi asheena'o tuneheete, Yeeriyo boonoshi axaaxoon maariye. Masiihi andire wogoon kottemmone.

![](https://cdn.door43.org/obs/jpg/360px/obs-en-21-06.jpg)

Wotta Yeeri keemechina'o Masiihi keemecho, qeeshoonaa taatoona tunemmone iyeete. Keemecho Yeeri qaaroon waayee'i asheena'oyich wochii gettiibeeti ashoone. Yeeri deejjiya bi gibenikkiti keemecho hullimalli tato tuneemmone.

![](https://cdn.door43.org/obs/jpg/360px/obs-en-21-07.jpg)

Isra'eelee qeesheena'o, asheena'o axaaxoyich shaggemmi naxee qoodoyich deejjoon giddiiheete. Wotta qeesheena'o asheena'oyich Yeerin qolleheete. Masiihi bi qelloon hullimalli tate deejjoon tunii'i Yeerich giddiibeeti hullimalli tate qeeshee ukkuroo tunemmone.

![](https://cdn.door43.org/obs/jpg/360px/obs-en-21-08.jpg)

Taato bi taatittinnoon qeejjiibeeti, asheena'o toommoochoo nallibeeti ashoone. Masiihi bi nihaanihoo tuneti Daawiti qeenooch kottemmi hullimalli tate taatoo tunemmone. Bulli showee tookk bulli yemeenoon hajjiyemmone, wotta bulli aaboon kaamittinoona nalli tate maacoon tuniyemmone.

![](https://cdn.door43.org/obs/jpg/360px/obs-en-21-09.jpg)

Yeeri keemechina'o Masiihichon bare meeti mooyina'on keemmitina'one. Keemechi Milikiyaasi Masiihi womoyee aaf ooge keemecho woyemmo bi tunoon keemmiye. Masiihi ikke gidiire bushee waane shiijjemmo bi tunoon keemmitone. Andoo keemechi Mikiyaasi Masiihi Betilehem katamooch shiijjemmone iye.

![](https://cdn.door43.org/obs/jpg/360px/obs-en-21-10.jpg)

Keemechi Isiyaasi Masiihi Galiila beeyemmo bi tunoonaa, boonoshi mullo tiishetina'on guuccemmo, kecceetina'oyich gawukkeyoon, cuchetina'oyichoo biicheyoonon awaajjemmo bi tunoon keemmitone. Wotta keemechi Isiyaasi, Masiihi biiyetina'on; waayo, ciino, yibaato, oohe sha'o mawiitina'on wodiyeemmo bi tunoonoo keemmitone.

![](https://cdn.door43.org/obs/jpg/360px/obs-en-21-11.jpg)

Keemechi Isiyaasi Masiihi bi shuuneti gondo aalloon shichemmonaa xu'o bi toommooh shaggemmona tunoon keemmitone. Bare keemechina'o Masiihin wuxitina'o bi tahee qoodeyoyich ixo duppemmina'o boonoshi tunoonaa bi shunechina'o daggoochee ikkoo biin nookkemmo bi tunoon shiichii'i keemmitone.

![](https://cdn.door43.org/obs/jpg/360px/obs-en-21-12.jpg)

Wotta keemecho Masiihi aabichi bi qitemmo gaata gettitone. Isiyaasi asheena'o Masiihi toommooch cuddemmina'o, coqqiremmina'onaa biin yexxemmina'ona boonoshi tunoon keemmitone. Amee gondoonona hallaano bi tunetaanoona boonoshi koyi getaa oogeton qaaqqeere qitemmone.

![](https://cdn.door43.org/obs/jpg/360px/obs-en-21-13.jpg)

Keemechina'o Masiihi axaaxaalli hullimalli tato tunemmone iyeete. Bi qitito bare asheena'ochi axaaxoon mi'oyichiye. Bi naxeyoona, Yeerinaa asheena'ona daggooch digoon debemmone. Ebich naboyich Masiihi qaakkeyo Yeeri daagoo tunehe.

![](https://cdn.door43.org/obs/jpg/360px/obs-en-21-14.jpg)

Masiihi qitemmonaa Yeeri biin qitoochee tijjemmo tunoon keemechina'o shiichii'i gettitina'one. Yeeri, Masiihi qitoonaa qitoochee bi timona axaaxechina'on wodiyoyich bi yamiti gaboon ceechiree andire wogoon kottemmone.

![](https://cdn.door43.org/obs/jpg/360px/obs-en-21-15.jpg)

Yeeri Masiihichi wodde mooyon keemechina'oyich gallii bekkiihe, tunebaani Masiihi ebi keemechina'o kashoona beegoor ikkochi yemeenooboona waataanoone. Ebi keemena'o getteeti 400 natoye gubb, tate goorooba Yeeri Masiihin showee tookk deejjemmone.

*Yaafe Macaafe Kiino:- Halloo 3:15; 12:1-31, Yibaatee Macaafo 18:15; Saameelichi Guttinne Macaafo 7; Erimiyaasi 31; Isiyaasi 59:16; Daaneeli 7; Milikiyaasi 4:5; Isiyaasi 7:14; Mikiyasi 5:2; Isiyaasi 9:1-7; 35:3-51; 61:53; Shoddo 22:18; 35:19; 69:4; 41:9; Zakkaariyasi 11:12-13; Isiyaasi 50:6; Shoddo 16:10-11.*

## 22. Yowannis Shiijjo

https://openbiblestories.org/l/kbr/story-22/

![](https://cdn.door43.org/obs/jpg/360px/obs-en-22-01.jpg)

Yeeri shiichii'i bi asheena'oyich bi gettito bi maraakeena'onaa bi keemechina'onane. Tunebaani amoonona boonoshich bi getaanoon 400 nato beshehe. Diqqoona ikke maraakoo Zakkaariyasi getteebeeti ikke geeno waan Yeerichi wochoon yechii'i waahe. Zakkaariyasinaa bi michee Elsabeexina Yeerin shattiibeeti asheena'one, tunebaani Elsabeexi bushiishoon shimo hakkaaneene.

![](https://cdn.door43.org/obs/jpg/360px/obs-en-22-02.jpg)

Maraakoo Zakkaariyaasin, “Zakaariyaaso! Shattaahine! Yeeri ne corootiti corootoon waayetone. Ne mechee Elsabeexi anaami bushoon neech shemmine; bi shigoonoo <Yowannisi> getiree shigiiyemmo neene. Shiijjeyaanoon bi indee maacooch beechi, Yaafe Ayaanoona ceennemmone. Doono Yeerich maddeya beddimmi aagetoon qanniiyemmone” iye. Zakkaariyaasi, “Ebin amoona ariiyehote? Ta gaata geeneto taane; ta mecheyoo geenetine” iye.

![](https://cdn.door43.org/obs/jpg/360px/obs-en-22-03.jpg)

Maraakoo Zakkaariyaasich, “Hini mishiraachoon neech ta bechemmoyich Yeeri taan ne waan wochetone, ta getteti qaaroon iberiyaache ne itoyich, bushoo shiijjemmi wottoon yibbaatoon hakkaachemmo neene” iye. Zakkaariyaasi bekkech yibbaatoo mawiihe. Ebichi hillooch maraakoo Zakkaariyaasi waane bari'i hammiye. Zakkaariaasiyoo bi kexooch wottehe, bi mecheyo xifahan.

![](https://cdn.door43.org/obs/jpg/360px/obs-en-22-04.jpg)

Elsabeexi shiritte agene yeeqefee tunaa bi beehoba, aroobe maraako diqqoona Maariyami getteeti Elsabeexi xibee waan waa bekkehe. Maariyami gidiiree bi tunetoyich Yooseef getteeti uroyich maakkeehan. Maraakoo, “Maariyame! Ebin waayebe! Yeqqeferee anaami bushoon shiyemmi neene; bi shigoonoo Yesuusi getiree shigiiyemmi neene. Biyoo oogoo tunemmone; Beshoo Yeerichi Bushoo getteeyemmone; Biyoo bulli yemeenoon taatemmone” iye.

![](https://cdn.door43.org/obs/jpg/360px/obs-en-22-05.jpg)

Maariyami “anaamona danaa ariyaache; ebi aabichiree tunehe?” iya'a echahan. Maraakoo, “Yaafe Ayaano ne toommooch woyemmone; Beshoo Yeerichi giidoo ne toommooch yiiremmone; ebich wotta ne shiyemmi bushoo Yeerichi Bushoo getteeyemmone” iye. Maariyamiyoo ebi bi getoon iberiyaa'a deqqahan.

![](https://cdn.door43.org/obs/jpg/360px/obs-en-22-06.jpg)

Maraakoo Maariyamich bi yibbaattetoye gubb Maariyami bekkech Elisabeexin hammaa ciinnahan. Elisabeexi Maariyami diggiyoon bi waayehoba, Elisabeexichi bushoo bi maace daggoochaa capphiye. Gutteena'o Yeeri boonoshich shuuneti mooyoyich tookkii'i emiriyeete. Maariyami Elisabeexin keejje agenoon bi ciinnetoye gubb bi kexooch wottaa waahan.

![](https://cdn.door43.org/obs/jpg/360px/obs-en-22-07.jpg)

Elisabeexi bi anaami bushoon bi shiyetoye gubb, Zakkaariyaasinaa Elisabeexina maraakoo boonoshi gettitoommon gaggeroon Yowannisii'i shigiiheete. Arooba Yeeri Zakkaariyaasi noono wochinnon bi yibbaateemmon daaggiye. Arooba Zakaariyasi, “bi asheena'on bi gabitoyich Isra'eelee Nuggushoo Doono Yeeri galleteebe! Wotta hini gaggeroocho! Boonoshi axaaxoyich maaroon aabichi dano boonoshi hakkemmo gaata asheena'oyich gettemmi Beshoo Yeerichi keemecho getteeyemmo neene!” iye.

*Yaafe Macaafe Kiino:- Luqaasi 1*

## 23. Yesuusi Shiijjo

https://openbiblestories.org/l/kbr/story-23/

![](https://cdn.door43.org/obs/jpg/360px/obs-en-23-01.jpg)

Maariyami Yoseefi getteeti uroyich maakketine. Biin maakketi Yoseefi Maariyami xifeti tunoon bi waayehoba, gaggeroo biicho tunoo qayon ariihe. Maariyamin ashi aafooch yeelliyoon qaawaanoone, ebich cikkii'i biishoyich gabiye. Ebin bi tuniyooye shiichii'i maraakoo waa biich gumona gettiye.

![](https://cdn.door43.org/obs/jpg/360px/obs-en-23-02.jpg)

Maraakoo, “Yoseefo! Shaagga ne maakketi Maariyami yeqqefeto, Yaafe Ayaanoonane; ebich shattaahine! Shaage! Anaami bushoon shiyemmine; bi shigoon Yesuusi getiree shigiibe (ebichi biishoo Doono Yeeri wodiyechone getone), ebiyoo asheena'on boonoshi axaaxoochee wodiiyemmo bi tunetoyichiye” iye.

![](https://cdn.door43.org/obs/jpg/360px/obs-en-23-03.jpg)

Ebich Yoseefi Maariyamin shaaggii'i bi kexooch daammiye, tunebaani bi shiyemmi wottoon biina tookkii qeyaanoone.

![](https://cdn.door43.org/obs/jpg/360px/obs-en-23-04.jpg)

Maariyami shiyemmi deco shagihoba, Roomi taato asho bulli bi qaabbechina'ochi showooch hammiree bi haddeyeemmoyich getoon kichiye. Yoseefinaa maariyamina boonoshi beeti Naazireete tiyi Beet Lehemi beddaaha genjje gommon sha'eeheete. Ebiyoo boonoshi qaabbechi nihinihoo Daawiti shiijjeto Beet Lehemi bi tunetoyichiye.

![](https://cdn.door43.org/obs/jpg/360px/obs-en-23-05.jpg)

Beet Lehemi boonoshi shagihoba qemi xaa'oon muceheete. Boonoshi daneti qemi xaa'o miinjji magedo baachiye. Gaggeroo bi shiijjehoba boonoshi qeejjemmi qeeno alletoyich bi indee miimo maabeeti yegilee maacooch qeejjiyaan. Bushoochi shigoono Yesuusi ii shigiiheete.

![](https://cdn.door43.org/obs/jpg/360px/obs-en-23-06.jpg)

Aroobee xum katinooch beeti bakkooch boonoshi bageena'on quyeebeeti qiddena'o beeheete. Diqqoona boonoshi guudoona waccii maraakoo boonoshich bekkehe, boonoshiyo shatteete. Maraakoo, “shattaahote! Ittoshich mishiraachoon deebeto taane. Masiihi Doono Beet Lehemi katamooch ittoshich shiijjetone!” iye.

![](https://cdn.door43.org/obs/jpg/360px/obs-en-23-07.jpg)

“Hammiree gaggeroon qaawibote, buroomi qoreddoona caaccee'i, yegillooch tokkete'i beeton danemmo ittoshine.” Diqqoona shimaayoo maraakeena'ona ceenniye, boonoshiyoo Yeerin galleteebee “Shimaajji shimaayooch beeti Yeerich oogee yiiroo tunebe! Showoochoo Yeeri boonoshina emiriti asheena'oyich diggoo tunebe!” iyeete.

![](https://cdn.door43.org/obs/jpg/360px/obs-en-23-08.jpg)

Qiddeena'o Yesuusi beetooch kaate shaggii'i maraakoo gettitoommon gaggeroo gijjeena'o maabeeti yegillooch qeyii bi beetaa daneheete. Oogeton emiriyeete. Maariyamiyoo oogeton emiriyaan. Qiddeena'o boonoshi waayetonaa ciinnitono bullich Yeerin galleteebee, boonoshi bago beeti bakkooch wotteheete.

![](https://cdn.door43.org/obs/jpg/360px/obs-en-23-09.jpg)

Gisheche decoye gubb, aabi keyee wooch beeti ariyechina'o ikke bekkee ariyaani xojjenoon beeggiyeete. Andire Yihudee taato bi shiijjoon bekkiibeeto bi tunoon ariiheete. Ebich ebi taatoon ciinoyich genjje gommon sha'ee'i waaheete. Beet Lehemi shaggii'i Yesuusina bi indaanihoona beeti kexon daneheete.

![](https://cdn.door43.org/obs/jpg/360px/obs-en-23-10.jpg)

Ariyechina'o Yesuusin bi indeena tookki boonoshi beegihoba dihi goyinneheete. Yesuusichoo aaxxe mooyina'on immiyeete. Aroochee boonoshi showooch wotteheete.

*Yaafe Macaafe Kiino:- Maatiyoosi 1, Luqaasi 2*

## 24. Yowannisi Yesuusin Afaalliye

https://openbiblestories.org/l/kbr/story-24/

![](https://cdn.door43.org/obs/jpg/360px/obs-en-24-01.jpg)

Zakkaariyaasinaa Elisabeexina busho Yowannisi dicii'i keemecho tunehe. Barahoocho kotee'i, bobbiyee eeyona gechoonon maa beehe, gaale eexoochee shippeti tahoono tahee beehe.

![](https://cdn.door43.org/obs/jpg/360px/obs-en-24-02.jpg)

Meeti asheena'o Yowannisin waayeya barahooch waaheete. Biyoo, “Shimaajji taatittinee ittoshi kellooch shaggetine; ebich axaaxee gommoochee Yeer waan wottebote!” ii gettii beehe.

![](https://cdn.door43.org/obs/jpg/360px/obs-en-24-03.jpg)

Asheena'o Yowannisin gettiibeeton boonoshi waayehoba, meetina'o boonoshi axaaxoon aanniyeete, Yowannisiyo boonoshin afaalliye. Meeti hayimaanoote wulleena'o wotta Yowannisina afaalleya waaheete, tunebaani boonoshi gommon Yeer waan wochaaneena'o oohe boonoshi axaaxoon aannaanena'one.

![](https://cdn.door43.org/obs/jpg/360px/obs-en-24-04.jpg)

Yowannisi haymaanoote wulleena'oyich, “Hini xekereechi bushiisheena'ote! Axaaxee gommoochee Yeer waan wotteree ittoshi shuunoon shaddibote! De'e aafoon aafeyaani mixo bulli kucheree qaaqqee maac duppemmone” iye. Yowannisi keemechina'o, “Doonochi gommon qanniibote! Bi woretoonoo kaachi qaxxebote!” ii boonoshi gettiti qaaroon ceechiye.

![](https://cdn.door43.org/obs/jpg/360px/obs-en-24-05.jpg)

Ikkikke Yihudeena'o Massiiho bi tunoonaa tunee qayoni Yowannisin echeheete. Yowannisiyoo, “ta Massiihi toono taane, tunebaani tayee gubb woyemmi ikke asho beetone. Aroo bi caammee cuyoon biich ta bedaachemmi wottoon oogeti ashoone”.

![](https://cdn.door43.org/obs/jpg/360px/obs-en-24-06.jpg)

Bi dechara, Yesuusi Yowannisina afaalleya waahe. Yowannisi biin bi ciinihoba, “Ebiyoche, showee toommooch beeti asheena'ochi axaaxoon hidi wokkiiyemmi Yeerichi Bago!” iye.

![](https://cdn.door43.org/obs/jpg/360px/obs-en-24-07.jpg)

Yowannisi Yesuusin, “Neenna afaalleyoo taach qaawiihani, aabichaa'a taanna afaalleeya ta waan waane?” iye. Tunebaani, Yesuusi, “And qajje gettaaye! Ebin tuniyoona Yeerichi aafooch kaamo tuneto bullin shuuno nooch qaawiihe” iye. Ebich Yesuusi axaaxoo shuuneyaano bi tunetaanoona Yowannisi Yesuusin afaalliye.

![](https://cdn.door43.org/obs/jpg/360px/obs-en-24-08.jpg)

Yesuusi bi afaalleetoye gubb aacooche bi kechimmona Yaafe Ayaano uggeechoommon bekkee'i kindii bi toommooch kotehe. Ebiyooba Yeeri qaaro shimaayooche, “Biinna ta emiriti, ta shuni bushoo hinine” iye.

![](https://cdn.door43.org/obs/jpg/360px/obs-en-24-09.jpg)

Yeeri Yowannisich, “Yaafe Ayaano kindiree ne afaalliyaabeeti asho toommooch kotemmone. Ebi asho Yeeri bushoone”i'i gettitone. Ikke Nuggushoo baach beete. Tunebaani Yowannisi Yesuusin bi afaallihoba, Yeeri Niho bi yibbaateebeetaa waayehe, Bushoo Yeerin beeggiye, biyoo Yesuusine; ebiyoommon wotta Yaafe Ayaanoono beeggiye.

*Yaafe Macaafe Kiino:- Maatiyoosi 3, Maariqoosi 1:9-11, Luqqaasi 3:1-23*

## 25. Sheexaano Yesuusin Pphiree Beego

https://openbiblestories.org/l/kbr/story-25/

![](https://cdn.door43.org/obs/jpg/360px/obs-en-25-01.jpg)

Yesuusi bi afaalleetoye gubb bekkech, Yaafe Ayaano biin barahooch daammiye, aroochaanoo aabbe areddoonaa aabbe xumoonon coommiye. Aroochee Sheexaanoo Yesuusi waan waa'i axaaxoon bi shuunemmon pphirehe.

![](https://cdn.door43.org/obs/jpg/360px/obs-en-25-02.jpg)

“Yeerichi Bushoo ne gaata, hini xaqqeena'on koshon tunebote! gete!”i'i Sheexaanoo Yesuusin pphirehe.

![](https://cdn.door43.org/obs/jpg/360px/obs-en-25-03.jpg)

Yesuusiyoo, “Asho Yeerichi noonoochee kechii beeti qaaro bullinani, kosho ikkeetona beetaachemmone getaa Yaafe Macaafooch kooreetone”i'i wochiye.

![](https://cdn.door43.org/obs/jpg/360px/obs-en-25-04.jpg)

Aroochee Sheexaanoo Yesuusin Yaafe Kechi cillooch daamii'i, “Yeeri neen boonoshi quyemmoyich bi maraakeena'on ne waan deejjemmone; ne baatoonona xaqqo bi yexaachemmoyich, boonoshi kishoona neen tiijjemmina'one getaa Yaafe Macaafooch kooreetone. Ebich Yeerichi Bushoo ne gaata, eke, hiniichee dugulla awureeree kindibe!” iye.

![](https://cdn.door43.org/obs/jpg/360px/obs-en-25-05.jpg)

Tunebaani Yesuusi, Yeeri qaarooche kaacci getona Sheexaanooch “Hini Sheexaanoocho! Ta aafoochee wohe! Ne Doono Yeerich goyinnebe! Bi ikkeetoyich baach maddebe! getaa Yaafe Macaafooch kooreetone”i'i wochiye.

![](https://cdn.door43.org/obs/jpg/360px/obs-en-25-06.jpg)

Aroochee sheexaano Yesuusich “showee toommooch beeti aageteena'o bullinaa boonoshi oogee yiiroonon bekkii'i, taach yitta'a ne goyinne gaata, eboshi bullin neech immemmo taane” iye.

![](https://cdn.door43.org/obs/jpg/360px/obs-en-25-07.jpg)

Yesuusiyoo, “Hini Sheexaanoocho! Ta aafoochee wohe! Ne Doono Yeerich goyinnebe! Bi ikkeetoyich baach maddebe! getaa Yaafe Macaafooch kooreetone” iye.

![](https://cdn.door43.org/obs/jpg/360px/obs-en-25-08.jpg)

Yesuusi Sheexaanoochi pphiroyich womeeyaanone, ebich Sheexaanoo giisheche wottoyich Yesuusin qajjii hammiye. Arooye gubb maraakeena'o waa'i Yesuusich maddeheete.

*Yaafe Macaafe Kiino:- Maatiyoosi 4:1-11, Mariqoosi 1:12-13, Luqaasi 4:1-13*

## 26. Yesuusi bi Maddoon kottiye

https://openbiblestories.org/l/kbr/story-26/

![](https://cdn.door43.org/obs/jpg/360px/obs-en-26-01.jpg)

Yesuusi Sheexaanoochi pphiroon bi wochitoye gubb, bee bee bi echeti Galilee woraabooch Yaafe Ayaanee giidoona wottehe. Yesuusi showooche showooch guuddii dojjii beehe. Asheena'o bulli biichon de'oon yibbaatee beeheete.

![](https://cdn.door43.org/obs/jpg/360px/obs-en-26-02.jpg)

Yesuusi bushittinoona bee bee bi echeti Naazireet katamooch wottehe. Ikke Shambetee aabooba goyinnee xaa'ooch hammiye. Bi shemmemmoyich keemechi Isiyaasichi qode macaafoon biich immiyeete.

![](https://cdn.door43.org/obs/jpg/360px/obs-en-26-03.jpg)

Yesuusi, “Neexaa hajjeetina'oyich mishiraachoon ta gettemmoyich, keccetina'oyich gawukkeyoon, cuchetina'oyich biicheyoon ta awaajjemmoyich, Nuggushoo Doono Yeerichi Ayaano ta toommoochiye. Hini shucheti Doono Yeerichi natonaa no Nuggushoochi gagee gaacci aaboone,”i'i shemmehe.

![](https://cdn.door43.org/obs/jpg/360px/obs-en-26-04.jpg)

Aroochee Yesuusi kotehe. Asheena'o bulli biin katinni'i ciinniyeete. Bekkech arooba bi shemmeti Yeeri qaaro Masiihichon bekkii beetone. Yesuusiyoo, “Hanaach hini Yaafe Macaafee qaaro ittoshi waayeebeetaa ceennitone” iye. Asheena'o bulli bi noonoochee kechii beeti yibbaatee shaawon worigane'i, hini uro Yoseefichi bushoo toone? iyeete.

![](https://cdn.door43.org/obs/jpg/360px/obs-en-26-05.jpg)

Aroochee Yesuusi, “Iberoon ittoshich gettoye; amoommo tunetaa keemechochi yibbaatoon bi hajjee showee asheena'o waayeyaacheete; Tunebaani iberoon ittoshich gettoye; Eliyasichi yemeenooba keejje natonaa shiritte agenoonon Yeeri shimaayoon hicaa, amiyo dihoo qajjitoyich, showoo bulliich shaacoo giyihoba, Isra'eelee showooch meeti xuume maacheena'o beetina'one. Tunebaani Eliyasin bi deggemmoyich Yeeri biin wocheto ikke xuumee waanani, Isra'eelee xuume maacheena'ochi daggoochee koni waanona toonoone” iye.

![](https://cdn.door43.org/obs/jpg/360px/obs-en-26-06.jpg)

Yesuusi ishichii'i yibbaatoon yechiye, “Wotta keemechi Elsa'ichi yemeenooba Isra'eelee showooch meeti qeddee shaddee biiyechina'o beetina'one; tunebaani Sooriyee showeexi Na'imaaniyee damba boonoshiichee ikkoona Elsa'i waan waa'i wodito aalloone” iye. Yesuusin ellee beetina'o Yihudee asheena'o boonoshi tunetoyich, ebi bi yibbaatoon waayee'i ippeheete.

![](https://cdn.door43.org/obs/jpg/360px/obs-en-26-07.jpg)

Naazireeti asheena'o Yesuusin awure wuxiyemmoyich goyinnee xaa'oochee geechii'i guudi toommooch daammiyeete. Tunebaani Yesuusi ashi daggoona beshee'i Naazireeti katamooch hammiye.

![](https://cdn.door43.org/obs/jpg/360px/obs-en-26-08.jpg)

Arooche Yesuusi Galiilee woraabo bullich guuddiye, meeti asheena'oo bi waan waaheete. Ciino, sha'o, waayo, oohe yibbaato hakkaani asheena'on geddi'i meeti biiyechina'on oohe achoo duretina'on bi waan deebiyeete.

![](https://cdn.door43.org/obs/jpg/360px/obs-en-26-09.jpg)

Yinno yechiti meeti asheena'onoo Yesuusi waan deebiyeete. Yesuusi getoona Yinneena'o asheena'on gawukii hammiyeete. Meeti kaalloono, “Ne Yeerichi Bushoo neene!”i'i cookii beeheete. Asheena'o worigane'i Yeerich goyinneheete.

![](https://cdn.door43.org/obs/jpg/360px/obs-en-26-10.jpg)

Arooche Yesuusi dabbechina'o getteeti aaraa gutte asheena'on kaaciye. Boonoshiyoo Yesuusina tookki guuddiibee bi waane doyiyete.

*Yaafe Macaafe Kiino:- Maatiyoosi 4: 12-25; Maariqoosi 1:14-15, 35-39, 3:13-21; Luqaasi 4:14-30, 38-44*

## 27. De'e Shamaaree Ashi kiino

https://openbiblestories.org/l/kbr/story-27/

![](https://cdn.door43.org/obs/jpg/360px/obs-en-27-01.jpg)

Ikke aabo Ikke Yihude callee dojjecho Yesuusin muriciiya qaawii'i bi waan waa, “Dojjechocho, bulli yemeenee kashoon ta danemmoyich, amoon hallibote”i'i echehe. Yesuusiyoo, “Callee Macaafooch kooreeto amoone?”i'i echehe.

![](https://cdn.door43.org/obs/jpg/360px/obs-en-27-02.jpg)

Callee dojjechoo “Doono Yeeri ne Nuggushoon ne ceeni mulloona, ne ceeni kashoona, ne ceeni giidoona, ne ceeni shalligoona shune! Neenoommi ne manoon neenna tachiree shune!” ii beetone iye. Yesuusiyoo, “Iberoon gettetine; ebin ne tunii gaata, bulli yemeenee kashoon danemmo neene” iye.

![](https://cdn.door43.org/obs/jpg/360px/obs-en-27-03.jpg)

Tunebaani hini callee dojjecho cadiqo bi tunoon xiishooyich, “Ta manochi konine?”i'i echehe.

![](https://cdn.door43.org/obs/jpg/360px/obs-en-27-04.jpg)

Yesuusi kiinoon getona uroyich wochiye. “Ikke Yihude uro Yerusalemee Yaariki katamooch hammii bi beetaa, diqqoona boggechina'o biinna daneheete.

![](https://cdn.door43.org/obs/jpg/360px/obs-en-27-05.jpg)

“Biin boggi'i bi tahoon shoottiyeete; yexxiinoo iyeete; bi kasheyoo kecha bedaa qajji'i hammiyeete.”

![](https://cdn.door43.org/obs/jpg/360px/obs-en-27-06.jpg)

“Diqqoona ikke qeeshoo are gommona hammiibee, uro dihi'i beeti xaa'ooch shaggii beeggiichii gommon baqachi badd kuxxi'i beshehe.”

![](https://cdn.door43.org/obs/jpg/360px/obs-en-27-07.jpg)

Woddoo yiciyaanoon, “Wotta ikke Lewee asho (Leeweena'o Yaafe kexoochaa qeesheena'on gaacheebeeti Yihude yoodena'one) are uro dihi'i beeti xaa'ooch shaggii beeggiichii biyoo gommon baqachi badd kuxxi'i beshehe.”

![](https://cdn.door43.org/obs/jpg/360px/obs-en-27-08.jpg)

“Ebichi hillooch are gommona besheti ashoo ikke Shamaaree ashoone. (Shamaareena'o bare aagetee asheena'on shaaggiti Yihude yareena'one). Shamaareena'onaa Yihudeena'ona shixechina'one. Tunebaani ebi Shamaaree asho Yihudo tuneti uroon bi beegihoba oogeton ariqqeehe. Ebich zayitoonaa woyinee kiikkeroonon uroochi mayooch ukki'i kaappiye;”

![](https://cdn.door43.org/obs/jpg/360px/obs-en-27-09.jpg)

“Aroochee Shamaaree asho bi hajjee kuroon yebbii'i gijjoo qocaa qeyee beeti ikke iibbee kexooch daammiye; aroochaanoo shiimeebee qeyiye.”

![](https://cdn.door43.org/obs/jpg/360px/obs-en-27-10.jpg)

“Deco haraa gijjoon kichii iibbee kechi doonoyich immi'i, hini uroon gaawuchiree shiimebe! Hini ta immeti gijjoo bedo qayi gaata, ne kichito bullin ta wottehoba qoccemmo taane iichii hammiye.”

![](https://cdn.door43.org/obs/jpg/360px/obs-en-27-11.jpg)

Ebiye gubb Yesuusi callee dojjechon, “Illa hini keemina'oochee boggechina'o kishooch dihiti uroyich manoon tuneto neech aabi shaahii beete?” i'i echehe. “Ariqqee'i gaachetone” iye. Yesuusiyoo, “Ne wotta hamiree ebiyoommon tuniibe!” iye.

*Yaafe macaafee kiino:- Luqaasi 10:25-27*

## 28. Gaannechi Gurimaashoo

https://openbiblestories.org/l/kbr/story-28/

![](https://cdn.door43.org/obs/jpg/360px/obs-en-28-01.jpg)

Ikke areddoon ikke gaannech gurimaashoo Yesuus waan gidde'i, “Dojjechocho! Bulli yemeenee kashoon ta danemmoyich amee de'e shuunoon shuunebote?”i'i echehe. Yesuusiyoo, “De'e shuuneechon amoyich taan echaa beetine? De'o tuneto ikkeeti Yeeri baachiye. Bulli yemeenee kashoon danoon ne qaawi gaata, Yeerichi calloo gettibeeton ceechibe!” iye.

![](https://cdn.door43.org/obs/jpg/360px/obs-en-28-02.jpg)

“Bi gettitoochee aaboshiniye? iye. Yesuusi wochi'i, Wuxiyaahine! Shuno maayaahine! Gaajjaahine! Kootoon miixeyaahine! Ne nihoonaa ne indeenon oogiibe! Neenoommi ne manoon neenna tachiree shune!” ii beetoniye iye.

![](https://cdn.door43.org/obs/jpg/360px/obs-en-28-03.jpg)

“Gurimaashoo wochi'i, ta bushittinoochee tiijjaa'a eboshi bullin ceechito taane. Ebiye baroo ta shappiiti mooyo amoone?” iye. Yesuusiyo biin ciinnii shunniye.

![](https://cdn.door43.org/obs/jpg/360px/obs-en-28-04.jpg)

“Yesuusiyoo de'oon tuno ne shuni gaata, hamiree neech beeto bullin kemiree iriteetina'oyich imbe! Neech shimaajji kexooch kiceeree beeyemmone. Aroyee gubb waaree taan dabbibe!” iye.

![](https://cdn.door43.org/obs/jpg/360px/obs-en-28-05.jpg)

“Tunetaa are gurimaashoo wodde gijjoo biich beeto bi tunetoyich, ebin waaye'i tiyii ayiniibee wotte hammiye.” Yesuusi waane bi aafoon wochii'i hammiye.

![](https://cdn.door43.org/obs/jpg/360px/obs-en-28-06.jpg)

Arooba Yesuusi, “bi dabbeena'oyich ishichiye:- Iberoon ittoshich gettoye; gaannechoyich shimaajji taatittineech gimo oogeti iritoone. Gaalleyich nappee aahoona besho maggoone; tunebaani wotta gaannechi uroyich Yeerichi taatittineech gimo ebiyee beshoon maggoone” iye.

![](https://cdn.door43.org/obs/jpg/360px/obs-en-28-07.jpg)

Bi dabbeena'o ishin waaye'i oogichii woriganaabee, “Ishi gaata, konine wodoon hakkemmo?” iyeete.

![](https://cdn.door43.org/obs/jpg/360px/obs-en-28-08.jpg)

Yesuusi boonoshin ciinni'i, “Asho hini mooyon tuniyoo hakkaache; tunebaani Yeeri bulli mooyon tuniyoyich hakkechone” iye.

![](https://cdn.door43.org/obs/jpg/360px/obs-en-28-09.jpg)

Arooba Pheexiroosi wochi'i, “Illa bullin qajjaa'a neen dabbito noone. Ishi gaata, Yeer waanee no danemmo amooniye?” iye.

![](https://cdn.door43.org/obs/jpg/360px/obs-en-28-10.jpg)

Yesuusiyoo biich ishichii wochiye:- “Taachai'i bi kexon, oohee bi anaami maneena'on, oohee bi maache maneena'on, oohee bi indeen, oohee bi nihoon, oohee bi bushiishoon, oohee bi gochii beeti showoon qajjito bullich Yeeri eboshi bulliyee beshaa beshoon immemmone; wotta bulli yemeenee kashoon biich immemmone. Tunebaani and ‘Shiichitina'o’ getteetina'ochi daggoochee meetina'o arooba gubbechina'o tuneemmina'one; and ‘gubbechina'o’ getteetina'ochi daggoochee meetina'o arooba shiichitina'o’ tuneemmina'one” iye.

*Yaafe Macaafe Kiino:- Maatiyoosi 19: 16-30; Maariqoosi 10:17-31; Luqaasi 18:18-30*

## 29. Maaraalli Guunochi Kiino

https://openbiblestories.org/l/kbr/story-29/

![](https://cdn.door43.org/obs/jpg/360px/obs-en-29-01.jpg)

Arooba Pheexiroosi Yesuus waan gidde'i, “Ta Doonocho! Ta manoo taan bi xu'i gaata, ambiche wottooniye biin ta maaremmo? Shabaatte wottoon maaribota?” iye. Yesuusiyoo wochi'i ishichiye:- “Shabe wottaa shabaatte kaalloonani, ‘Shabaatte wottoon baach maaribe!’ getaache” iye. Yesuusi ebin bi iyito bulli aaboon no maaremmoyichiye. Arooche Yesuusi hini kiinoon gettiye.

![](https://cdn.door43.org/obs/jpg/360px/obs-en-29-02.jpg)

Yesuusi ishichiye, “Illa shimaajji taatittine bi gijjeechon bi ukkuriitina'on echeya qaawiti taatoommine. Boonoshi daggoochee ikkoo, aashire hum bede birewoon erettetone.

![](https://cdn.door43.org/obs/jpg/360px/obs-en-29-03.jpg)

Ebi uroo bi hiishoon qoco bi mawiitoyich, taatoo “Neennaa ne mecheena, ne bushiishoona, neech beeto bulli kecheeree hini ne maati gijjoon qoce!”i'i gettiye.

![](https://cdn.door43.org/obs/jpg/360px/obs-en-29-04.jpg)

“Ebich are uro taatoochi baatooch dihii'i, ‘Ta Doonocho! Haa'iibe! Bullin qoccemmo taane’ ii qollehe. Taatoo are uroyich oogichii ariqqee'i gawukkiye; bi eretteti gijjoonoo maarii qajjiye.”

![](https://cdn.door43.org/obs/jpg/360px/obs-en-29-05.jpg)

“Tunebaani are uro kechii hammii bi beetaa, bi waanee awudde agene damooz bede birewoon eretteti bi nuucheena'o daggooche ikkoon dane'i, ‘Ta hiishoon qoce!’i'i bi qettoona yechiye.”

![](https://cdn.door43.org/obs/jpg/360px/obs-en-29-06.jpg)

“Ebich bi nuuchoo bi baatooch dihii'i, ‘Haa'iibe! Bullin qoccemmo taane’ ii qollehe. Tunebaani aroo bi hiishoon bi qoccimmi wottoon cuyee kexooch cuchiihe.”

![](https://cdn.door43.org/obs/jpg/360px/obs-en-29-07.jpg)

“Bare nuucheena'o tuneti mooyon beeggii'i oogichii ayiniyeete; hammi'ino tuneti mooyo bullin taatoyich gettiyeete.”

![](https://cdn.door43.org/obs/jpg/360px/obs-en-29-08.jpg)

“Ebiyee gubb, taatoo are ukkuroon ceeggii'i ishichiye:- ‘Hini gonde ukkuroocho! Taan ne qolletoyich, ne eretteti gijjoo bullin neech qajja'a maaraano taane? Neen maaraa ta qayoommon, ne nuuchoo tuneti are ukkuroyich qayo neech qaawiyaache?’” iye. “Ebich taatoo ippee'i bi eretteti gijjoo bullin bi qoccimmi wottoon ebi are ukkuroon sheeremmina'oyich beshii'i immiye.”

![](https://cdn.door43.org/obs/jpg/360px/obs-en-29-09.jpg)

Aroochee Yesuusi ishichiye, “Illa ittoshi ikkiikkoo bi manoon bi mulloochee tiijjii'i maaroo qayi gaata, shimaayeexi ta nihoo ebiyoommon bi toommooch tuniiyemmone” iye.

*Yaafe Macaafe Kiino:- Maatiyoosi 18:21-35*

## 30. Yesuusi Uuche Hume Asheena'oyin Maanjjo

https://openbiblestories.org/l/kbr/story-30/

![](https://cdn.door43.org/obs/jpg/360px/obs-en-30-01.jpg)

Yesuusi mishiraachee qaaroon boonoshi gettemmoyich meeti gafeena'ooch bi dabbeena'o daachiihe. Yesuusi beetooch Boonoshi wotteehoba, boonoshi tuniiton biich gettiyeete. Arooye gubb baharoon kimiree cookoo aalli xaa'ooch biinna tookki boonoshi hammemmonaa giishechoon boonoshi kasheemmonoyich ataalliye. Ebich marikaboona baharoon kimmiiyeete.

![](https://cdn.door43.org/obs/jpg/360px/obs-en-30-02.jpg)

Tunebaani Yesuusinaa bi dabbeena'ona marikaboona boonoshi hammii beeta beeggitina'o meeti asheena'one. Eboshi asheena'o boonoshin shiichiya bahare gashoona woceheete. Ebich Yesuusinaa bi dabbeena'ona aachee baqach boonoshi shaggimmona, meeti asheena'o shiichii shaggii'i arooch quyee beeheete.

![](https://cdn.door43.org/obs/jpg/360px/obs-en-30-03.jpg)

Maachoonaa bushiishoona giyaanoon 5000'ye beshe anaamina'o arooch kiceeheete. Yesuusi asheena'oyich oogeton ariqqeehe. Yesuusich ebi asheena'o qiddaalli bagoommina'one. Ebich boonoshin dojjii boonoshi daggooch beeti biiyechina'onoo wodiihe.

![](https://cdn.door43.org/obs/jpg/360px/obs-en-30-04.jpg)

Aroobee xum bi dabbeena'o biich ishichii'i gettiyeete, “No beeto gafoo aalli xaa'oochiye; andoo showoo xumetone. Ebich hini dofee asheena'on boonoshi maayemmon boonoshi kememmoyich diggiiree daachiibe!” iyeete.

![](https://cdn.door43.org/obs/jpg/360px/obs-en-30-05.jpg)

Tunetaa Yesuusi wochi'i, “Hammaayeete; ittoshi maanjjibote!” iye. Boonoshiyoo, “Hiniich nooch beeto uuche xeke koshonaa gutte haashoona baachiye” iyeete.

![](https://cdn.door43.org/obs/jpg/360px/obs-en-30-06.jpg)

Aaachi aachoo tuneeree asheena'on gaddooch boonoshi kotiyeemmon bi dabbeena'oyich gettiye.

![](https://cdn.door43.org/obs/jpg/360px/obs-en-30-07.jpg)

Aroochee Yesuusi uuche xeke koshonaa gutte haashoonon tiijjii yechi'i, shimaajj ciinniichii Yeerin galletehe.

![](https://cdn.door43.org/obs/jpg/360px/obs-en-30-08.jpg)

Aroochee Yesuusi Koshonaa haashoonon tiichi'i bi dabbeena'oyich immiye. Boonoshiyoo daammi'i asheena'oyich qoomeheete. Asheena'o bulliyoo maa'i michiyeete.

![](https://cdn.door43.org/obs/jpg/360px/obs-en-30-09.jpg)

Aroochee bi dabbeena'o echeti kochi ooyoon aaraa gutte ogooge mokoona ceechi'i tiijjiyeete. Ebi bulli maayo bi abbeteto uuche koshonaa gutte haashoonoocheeniye.

*Yaafe Maacafe Kiino:- Maatiyoosi 14:13-21; Maariqoosi 6:31-44; Luqaasi 9:10-17; Yowannisi 6:5-15.*

## 31. Yesuusi Baharee Aachi Toommona Sha'o

https://openbiblestories.org/l/kbr/story-31/

![](https://cdn.door43.org/obs/jpg/360px/obs-en-31-01.jpg)

Arooche Yesuusi bi dabbeena'oyich ishichiye:- “Asheena'on ta deennemmi wottoon marikabooch giyiree baqach tayee shiichiree kimbote!”i'i gettiye. Yesuusi asheena'o bullin bi deennitoyee gubb, corootiya bi ikkeeto geppooch kechiye. Aroochaa xumi gutte qellimooch beddaaha corootiye.

![](https://cdn.door43.org/obs/jpg/360px/obs-en-31-02.jpg)

Ebiyooba Yesuusi bi dabbeena'oo marikaboona hammii beeheete. Xumi guttee qellimooch boonoshi shaggito qach bede gommoch baachiye. Arooba giidechi yongo marikaboyee aafaa tiyitoch, marikaboon boonoshi gasheto kupphe iritoonane.

![](https://cdn.door43.org/obs/jpg/360px/obs-en-31-03.jpg)

Are goor Yesuusi bi corootoon ciichii'i bi dabbeena'o waan hammiye. Baharee aachi toommona sha'eebee baharoon kuxii'i bi dabbeena'ochi marikabooch hammiye!

![](https://cdn.door43.org/obs/jpg/360px/obs-en-31-04.jpg)

Dabbeena'o Yesuusin boonoshi ciinihoba oogeton shattiyeete, ebiyo yoogoon ciinnitina'o boonoshich bi shaahitochiye. Yesuusi boonoshi shaton arii'i boonoshi waan ceeggii'i “Kupphebote! Taane; shattaahote!” iye.

![](https://cdn.door43.org/obs/jpg/360px/obs-en-31-05.jpg)

Arooba Pheexiroosi tiyi'i, “Ta Doonocho! Ne gaata, aachi toommona sha'aree ne waan ta woyemmoyich gete!” iye. Yesuusiyoo “Wobe!” iye.

![](https://cdn.door43.org/obs/jpg/360px/obs-en-31-06.jpg)

Ebich Pheexiroosi marikaboochee kindi'i aachi toommona sha'eebee Yesuus waan hammiye. Tunebaani giishechoon bi hammitoye gubb bi aafoon Yesuusi waane wochii'i aachi aayon ciinni, giidechi yongoono waayehe.

![](https://cdn.door43.org/obs/jpg/360px/obs-en-31-07.jpg)

Ebiyooba Pheexiroosi bi shattitoyich aaco biin qooxxon yechiye. “Ta Doonocho! Taan wodiibe!”i'i cookiye. Yesuusi bekkech bi kishoon yaggii'i Pheexiroosin yechiye. Aroochee, “Hini ne mulloon ta toommooch too'iyaanoocho! Ne mulloon amoyich guttiine?” iye.

![](https://cdn.door43.org/obs/jpg/360px/obs-en-31-08.jpg)

Pheexiroosinaa Yesuusina marikabe maac boonoshi giihoba, yongoo bekkech qajjii circikkiihe. Dabbeena'o woriganee'i “Iberoon Yeerichi Bushoo neene”i'i Yesuusich yittii goyinneheete.

*Yaafe Macaafe Kiino:- Maatiyoosi 14:22-23; Maariqoosi 6:45-52; Yowannisi 6:16-21*

## 32. Yesuusi Yinno Yechiti Uroonaa Biiyeti Ureenon Wodiyoo

https://openbiblestories.org/l/kbr/story-32/

![](https://cdn.door43.org/obs/jpg/360px/obs-en-32-01.jpg)

Ikke areddoon Yesuusinaa bi dabbeena'ona marikaboona baharoon kuxii'i Geraashee asheena'o beeti showooch hammiyeete.

![](https://cdn.door43.org/obs/jpg/360px/obs-en-32-02.jpg)

Baharoyee baqach boonoshi shaggihoba yinno bi toommooch beeti ikke uro Yesuusi waan woccii waahe.

![](https://cdn.door43.org/obs/jpg/360px/obs-en-32-03.jpg)

Ebi uro koniyona yechii neechoon hakkaani giidechi kupphoone. Asheena'o bi kishoonaa bi baatoonon sansalatoonaa qoqqaannoona boonoshi cuchiitaanoona, sansalatoon kuxxii qoqqaannoonoo tiichii beehe.

![](https://cdn.door43.org/obs/jpg/360px/obs-en-32-04.jpg)

Ebi uro are showee guudoona beeti maashooch beehe. Areddoonaa xumoononoo cookii beehe. Tahoon taheyaanoone. Bi achoonoo shaammoona maacii beehe.

![](https://cdn.door43.org/obs/jpg/360px/obs-en-32-05.jpg)

Yesuusi waan bi waahoba, bi aafooch dihii'i goyinnehe. Yesuusiyo “Hini yinnoocho! Uroochi toommoochee tibe!” iye.

![](https://cdn.door43.org/obs/jpg/360px/obs-en-32-06.jpg)

Ebich uro “Beshi Nuggushoo Yeerichi Bushoo Yesuuso! Ta mooyooch neen amo geddiye? ‘Taan yulliyaahine!’ iyii'i oogichii cookiye. Aroochee Yesuusi “Ne shigo konine?”i'i echehe. Biyoo, “Meeto no tunetoyich, ta shigo ‘Leegiyooni’ getteehe”i'i wochiye. (“Leegiyoon” meeti hume ginee naayina'on yechibeeti Roomi taate ginee guupphoone.)

![](https://cdn.door43.org/obs/jpg/360px/obs-en-32-07.jpg)

Yinneena'o Yesuusin “Hini showoochee noon yookkaahine!”i'i kupphii qolleheete. Are guudooch beeti geppee ga'ooch meeti gudichi goton qiddeena'o qiddee maanjjii beeheete. Ebich yinneena'o Yesuusin “Hini are gudichi toommooch hami no kotemmon daaggibe!”i'i qolleheete. Yesuusiyoo “Hamiree kotebote!” iye.

![](https://cdn.door43.org/obs/jpg/360px/obs-en-32-08.jpg)

Yinneena'o uroochi toommoochee tiyi'i are gudinina'ochi toommooch hammii koteheete. Aroochee gudinina'o ikkote'i giidechi qaa'oona gederee kindii'i baharee gejjoona manjjeeheete. Ebi gudichi goto 2000 bedoone.

![](https://cdn.door43.org/obs/jpg/360px/obs-en-32-09.jpg)

Gudinon qiddeebeetina'o woce'i katamoo hammii'i tuneti mooyon boonoshi daneti asho bullich gettiyeete. Katamee asheena'o waa'i yinneena'o yechiti uroon beeggiyeete. Biyoo tahoon tahe'i cikkii kotee beehee.

![](https://cdn.door43.org/obs/jpg/360px/obs-en-32-10.jpg)

Asheena'o oogichii boonoshi shattitoyich Yesuusin no showoochee keyei'i qolleheete. Ebich Yesuusi hamma marikabooch kechiye. Yinneena'o gawukkiti uro, neenna tookki hambonai'i qollehe.

![](https://cdn.door43.org/obs/jpg/360px/obs-en-32-11.jpg)

Tunebaani Yesuusi, “Hamaachine; ne kexooch hamiree ne kechi asheena'oyich Doono Yeeri neech am shaahe ooge mooyon bi tuniyoonaa neech bi ariqqeyoonon gete!” iye.

![](https://cdn.door43.org/obs/jpg/360px/obs-en-32-12.jpg)

Ebich uroo hammii'i, Yesuusi biich tuniiti mooyon bulli ashich gettiye. Mooyon waayeti asho bulli oogeton woriganehe.

![](https://cdn.door43.org/obs/jpg/360px/obs-en-32-13.jpg)

Yesuusi baharoyee baqach wottehe. Arooch bi shagihoba dofee asheena'o bi waan kicee'i biin xuuxiheete. Asheena'o daggooch aaraa gutte naton damoo ufaabeeti ikke ure beehan. Bi gijjoo bullin shaccaa bi ciichitaa, bi biiyoo beshiyani ketteyaanoone.

![](https://cdn.door43.org/obs/jpg/360px/obs-en-32-14.jpg)

Yesuusi biyechina'on bi wodiyoon waayaa'a, “Bi qoreddoon baach ta yeshi gaata, wodemmi taane” iya'a gabiyaan. Ebich gubbaa Yesuusichi qoreddoon yechahan. Yesuusichi qoreddoon bi yeshihoba, bekkech ufeebeeti bi damoo neexehe!

![](https://cdn.door43.org/obs/jpg/360px/obs-en-32-15.jpg)

Bekkech, Yesuusi giidoo bi achoochee keyon ariihe. Ebich asheena'o waan guuddii wotte'i, “Ta qoreddoon yechito konine?”i'i echehe. Bi dabbeena'o “Dofee asheena'o xu'eyoon beeggaabee, ‘Konine taan yechito?’ iya'a echenne?” iyeete.

![](https://cdn.door43.org/obs/jpg/360px/obs-en-32-16.jpg)

Aree gaata ure woditi bi tunoon ariya'a shattaa qewaabee, waa bi baatooch dihiyan. Aroochee bi tuniitonaa woditi bi tunoonon biich gettahan. Yesuusiyoo, “Wodiiyemmone iya'a ne mulloon ta toommooch ne too'iyoo neen wodiitone. Diggoona hambe!” iye.

*Yaafe Macaafe Kiino:- Maatiyoosi 8:26-34, 9:20-22; Maariqoosi 5:1-20; 5:24-34; Luqaasi 8:26-39, 8:42-48*

## 33. Gochechochi Kiino

https://openbiblestories.org/l/kbr/story-33/

![](https://cdn.door43.org/obs/jpg/360px/obs-en-33-01.jpg)

Ikke areddon Yesuusi bahare gashooch neexee'i meeti asheena'on dojjii beehe. Bi dojjii bee gor dofee asheena'o bi waan kiceetaa xaa'o xebbetoyich, xaa'oo danoyichi'i aachi gashooch beeti marikabooch kechii koteechii dojjiye.

![](https://cdn.door43.org/obs/jpg/360px/obs-en-33-02.jpg)

Yesuusi ebi shaahiyoon gettiye. “Yaree shookkecho shookka kechiye. Shookkii bi beetaa, ikkiikkoo gomi gashooch holliye. Ebinoo kafeena'o waa macii maaheete.

![](https://cdn.door43.org/obs/jpg/360px/obs-en-33-03.jpg)

“Baroo maacaa xaqqechi showooch holliye, tunebaani cammon wokkii awuro mawiihe. Aabe kechaa'a michimmona shoollii shuuqqiye.

![](https://cdn.door43.org/obs/jpg/360px/obs-en-33-04.jpg)

“Andoo baroo wotta angichi xuppo beetooch holliye. Aroochaa colloo yechiye, tunebaani are angichi xuppoo nocii kechi'i maahe. Ebich angichi daggooch colleto aafo amoonona immaano echehe.

![](https://cdn.door43.org/obs/jpg/360px/obs-en-33-05.jpg)

“Baroo wotta qeemi showooch holliye. Ebi yaroo collee diccii kechi'inoo ikkoo 30 aafoon, ikkoo 60 aafoon, ikkoo 100 aafoon aafehe. Waayeebeeti waajjecho waayebe” iye.

![](https://cdn.door43.org/obs/jpg/360px/obs-en-33-06.jpg)

Ebi shaahiyoo bi dabbeena'oyich giyemmon mawiyee. Ebich yesuusi ishichii'i birii arichiihe, “yaroo Yeerichi qaaroone. Gommi gashooch holliti yaroommo geto, Yeerichi qaaroon waayee beeti ashoone, tunebaani ebi qaaroon shalligaanoone, Daabiloosi waa'i bi mulloochee macii bi daammiti ashoone.

![](https://cdn.door43.org/obs/jpg/360px/obs-en-33-07.jpg)

“Wotta maacaa xaqqechi showooch holliti yaroommo geto, Yeerichi qaaroon waaye'i bekkech emiroona deqqi beeti ashoone. Tunebaani, iritoo oohe xuuxo bi toommooch shagihoba, mullee bi too'iyoon qajjii beetone.

![](https://cdn.door43.org/obs/jpg/360px/obs-en-33-08.jpg)

“Angichi xuppo beeti showooch holliti yaroommi asho geto, Yeerichi qaaroon waayee beetone. Tunebaani gubb, hini showee beemi gaboo, gaannoonaa mashaamiti beemona biich beeti shunoon kechii shuyochoommon maahe. Ebich bi waayeti qaaro aafoon aafeyaano getone.”

![](https://cdn.door43.org/obs/jpg/360px/obs-en-33-09.jpg)

“Wotta qeemi showooch holliti yaroommo geto, ibere gaawe mulloona Yeerichi qaaroon waaye'i ceechii beetonaa aafoon aafeebeetona getone”.

*Yaafe Macaafe Kiino:- Maatiyoosi 13:1-8, 18-23; Maariqoosi 4:1-8, 13-20; Luqaasi 8:4-15*

## 34. Yesuusi Bare Shahiyeena'on Dojjiye

https://openbiblestories.org/l/kbr/story-34/

![](https://cdn.door43.org/obs/jpg/360px/obs-en-34-01.jpg)

Yesuusi Yeeri taateechon bare meeti shaahiyeena'on dojjiye. Ishichiino iye, “Shimaajji taatittine ebiyoommine; asho bi goyooch shookkiti shanaafee aafoon shaahiyaane. Aree bare maayi yaroo bulliyee giishecheene.”

![](https://cdn.door43.org/obs/jpg/360px/obs-en-34-02.jpg)

“tunebaani shanaafee mixi bi dicihoba shimaayoona yoobbiibeeti kafeena'o waa'i bi atooch kotoon boonoshi hakkimmi wottoon daaddeexi maayeena'o bulliye beshe tunehane”.

![](https://cdn.door43.org/obs/jpg/360px/obs-en-34-03.jpg)

Yesuusi bare shaahiyoon ishichii gettiye:- “Shimaajji taatittine ikke ure bukoo tiyimmi wottoon daamma'a keejje qunnee buddinoona tookkaa xiriqqaa'a bi kotiiti bukee shittoon shaahiyaane”.

![](https://cdn.door43.org/obs/jpg/360px/obs-en-34-04.jpg)

“Wotta shimaajji taatittine ikke uro goyee daggoochee bi daneti aacheeti aaxxe qiicoommine. Bare uro ebi qiicoon danee'i wochii aachiye. Emiroona qitiibee hammii biich beeto bullin kemmi'i are goyoon kemehe.

![](https://cdn.door43.org/obs/jpg/360px/obs-en-34-05.jpg)

“Wotta shimaajji taatittine ikke giixecho kemeya qaawiti aaxxe gatiyechi macacikkiti inqoon shaahiyaane. Inqee giixecho bi danehoba hammii biich beeto bullin kemmi'i hini are inqoon kemehe.”

![](https://cdn.door43.org/obs/jpg/360px/obs-en-34-06.jpg)

Arooye gubb Yesuusi boonoshi de'e shuunoona yebanee bareena'on hoxeebeeti asheena'ochi mooyon gettiye. “Gutte asheena'o corootiya Yaafee Kexooch hammiyeete. Boonoshiyoo ikkoo Farisoo, ikkoo gabiyee guudoone” iye.

![](https://cdn.door43.org/obs/jpg/360px/obs-en-34-07.jpg)

“Farisoo Yaafee Kexooch neexeechii ishichi'i corootiye; ‘Yeero! Bare asho bullichoommon, boggecho, xumme moochechonaa shuni maayechona, oohee hini gabiyee guudoommonoo tuno ta qajjetoyich, neen galletehoye.”

![](https://cdn.door43.org/obs/jpg/360px/obs-en-34-08.jpg)

“Shabaattee daggooch gutte wottoon coomaa beeto taane; ta danaa beeto bulliichee aashire kishoochee ikke kishoon neech kichaa beeto taane”i'i corootiye.

![](https://cdn.door43.org/obs/jpg/360px/obs-en-34-09.jpg)

“Wotta hini are gabiyee guudo Yaafee Kexooch neexeebeetina'oyee wohooch neexehe. Bi aafoon kaama tiijji'i shimaajj ciinaanoone. Tunebaani bi getoon qicciibee, ‘Yeero! Axaaxechi taan maaribe!’ iibee Yeerin qollehe.”

![](https://cdn.door43.org/obs/jpg/360px/obs-en-34-10.jpg)

Aroochee Yesuusi ishichiye, “Iberoon ittoshich gettooye, Yeeri ohe gabiyee guudochi corootoon waayee'i cadiqo neene iye. Faarisoochi Corootoon shunaanoone. Yeeri bi qelloon oogii beeto bullin giishiihe; bi qelloon giishii beeto bullin oogiihe”.

*Yaafe Macaafe Kiino:- Maatiyoosi 13:31-33, 44-46; Maariqoosi 4:30-32; Luqaasi 13:18-21, 18:9-14*

## 35. Ariqqechi Nihoochi Mooyo

https://openbiblestories.org/l/kbr/story-35/

![](https://cdn.door43.org/obs/jpg/360px/obs-en-35-01.jpg)

Ikke areddoon Yesuusi meeti gabiyee guudena'onaa bi waane waayeya kiceeti bare axaaxechina'on dojjii beehe.

![](https://cdn.door43.org/obs/jpg/360px/obs-en-35-02.jpg)

Wotta arooch beeti ikkiikke Faariiseena'o Yesuusi axaaxechina'on bi shunechina'o tunii'i bi ciinon beeggiyeete, aroochee ikkotte'i bi toommmooch tiiheete. Ebich Yesuusi ebi shaahiyoon boonoshich gettiye.

![](https://cdn.door43.org/obs/jpg/360px/obs-en-35-03.jpg)

“Ikke uroyich gutte bushiisheena'o beeheete. Ikke areddoon guuche bushoo tiyi'i bi nihoon ‘Ta nihoocho! Ne gijjoochee ta qoodoon taach imbe!’ iye. Ebich nihoo biich beeti gijjoon gutte bi bushiisheena'oyich qoodiye.”

![](https://cdn.door43.org/obs/jpg/360px/obs-en-35-04.jpg)

“Are guuche bushoo bi gijjoo bullin kicii yechi'i wohi showooch hammiye; aroochaanoo bi mullo gabito bulliich gijjoon kichiibee shacci'i aalliihe.”

![](https://cdn.door43.org/obs/jpg/360px/obs-en-35-05.jpg)

“Bi gijjoo bullinoo ciichii bi iti xaa'ooch, gonde shaacoo are showoo bulliich giyihe; maayo bi kememmi gijjoono muccehe. Ebich dano bi hakkiti ikke mixxe gudini quyee shuunoon yechiye. Aroochaa gudinina'o maabeeti guudoochee maaya qaatiibee shaacoona xuuxee beehe;”

![](https://cdn.door43.org/obs/jpg/360px/obs-en-35-06.jpg)

“Batt ciiroochaa bi mullo yeshaa, ishichiye:- ‘Ambicha ta nihoochi gichechina'o maa michi'i boonoshi wochii beeti maayo beetaa, amoyichiye ta hiniich kotaachaa shaacoona qita'a gittaa ta beeto! Illa tiyi ta nihoo waan hamiree, ‘ne gichechina'ochi daggoochee ikkoommon taan tuniiree ciine!’ gettehe” iye.

![](https://cdn.door43.org/obs/jpg/360px/obs-en-35-07.jpg)

Ebich guuche bushoo bi niho waan wottee gommon yechiye. Batt wohooch bi beetaa, bi nihoo ciinni'i oogichii ariqqeehe; woccii hammii bi qettoona tiqqe'i shummiye.

![](https://cdn.door43.org/obs/jpg/360px/obs-en-35-08.jpg)

“Bushoo ‘Ta nihoocho! Yeerinoo neenoo xuqqeto taane; gubbichoo ne bushoo getteya bedaache’” iye.

![](https://cdn.door43.org/obs/jpg/360px/obs-en-35-09.jpg)

“Tunebaani nihoo bi aafee bushiisheena'ochee ikkoyich ishichiye:- ‘Kaateree bulliyee beshe gaaweti tahoon deebiree biich tajjibote! Bi kishoochoo axxaamittoon, bi baatoochoo caammoon deebiree gedote! Awujjiti gubbenoonoo deebiree bashibote! Mamone! Nooch emiroo tunebe! ‘Qititone’ iya'a ta gabiti ta bushoo kashoona wottetone; ‘Aallatone’ iya'a ta gabiti ta bushoo danetone” iye.

![](https://cdn.door43.org/obs/jpg/360px/obs-en-35-10.jpg)

“Ebich asheena'o emirooch giyiheete. Ebi emiree daggooch qaabbe bushoo goyooche wottee waa'i kexooch shagg bi beddaaha, kexeexi ximboonaa duubbi qaaroonon waayahe. Hini duubo ameechone?i'i woriganehe.”

![](https://cdn.door43.org/obs/jpg/360px/obs-en-35-11.jpg)

“Qaabbe bushoo bi manoo waatoyich boonoshi emiroon bi ariihoba, oogetoon kaare'i ‘Kexooch giyaache’ ii qajjiye.”

![](https://cdn.door43.org/obs/jpg/360px/obs-en-35-12.jpg)

Qaabbe bushoo wochi'i bi nihoon ‘Eke ebi shaahe meeti naton neech guunochoommon hajjeya'a shuuneto taane. Ne gettetoochee ikkoonona shappiyaano taane; tunebaani ta nuucheena'ona tookki ta emiremmoyich ikke emmishee baaddoonona taach imaano neene; tunetaa hini ne bushoo axaaxee shuunoona ne gijjoon aallii'i wottee bi waammona, awujjiti gubbenoon biich bashiihine” iye.

![](https://cdn.door43.org/obs/jpg/360px/obs-en-35-13.jpg)

“Nihoo wochi'i ‘Ta bushoocho! Ne bulli areddoon taanna tookkaaniye ne beeto; taacho tuneto bulli neechone. Tunabaani “Qititone; aalletone” iya'a ta gabiti hini ne manoo kashoona wotte'i danetone; ebichi gifiree maayoon gediree emiraanoon aabichiree qajjehone?>i'i gettiye”.

*Yaafe Macaafe Kiino:- Luqaasi 15:11-32*

## 36. Yesuusi Shaddeyo

https://openbiblestories.org/l/kbr/story-36/

![](https://cdn.door43.org/obs/jpg/360px/obs-en-36-01.jpg)

Ikke areddoon Yesuusi keejje bi dabbeena'o tuneti Pheexiroosin, Yaaqobinaa Yowannisinon yechii'i genje guudi toommooch kechiye. (Yowannisi getteeti dabboo Yesuusin afaallito toonone.)

![](https://cdn.door43.org/obs/jpg/360px/obs-en-36-02.jpg)

Yesuusi corootii bi beehoba bi aafo aabechoommon aaxxahe; bi taheti qoreddoo showee tookk beeti konaaketiyona xallayooni hakkaani wottoon oogichii naccee wac wacciye.

![](https://cdn.door43.org/obs/jpg/360px/obs-en-36-03.jpg)

Arooba Muusinaa keemechi Eliyasina bekkeheete. Ebi asheena'o meeti balle natoye aaf showee tookk beebe echetina'one. Boonoshiyoo Katinoon Yerusalemaa tuneemmi bi qiteechon Yesuusina tookki yibbaateheete.

![](https://cdn.door43.org/obs/jpg/360px/obs-en-36-04.jpg)

Muusinaa Eliyasina Yesuusina tookki boonoshi yibbaatee beetaa Ppheexiroosi, “Ta Doonocho! Hiniich beemo nooch gaawiye. Ne shuni gaata, hiniich keejje bashoon, ikkoon neech, ikkoonoo Muusich, ikkoonoo Eliyasich bashibone” iye. Ppheexiroosi bi yibbaatee beeton ariyaanoone.

![](https://cdn.door43.org/obs/jpg/360px/obs-en-36-05.jpg)

Ppheexiroosi ishin getooch bi beetaa, bekkech nacce huttoommi qubo shimaayoochee kindii'i boonoshin qeriye; qubee daggoochaa “Biinna ta emiriti ta shunnaabeeti ta bushoo ebine. Biin waayebote!” ii beeti qaaroon waayeehe. Ishin waayeti keejje bi dabbeena'o oogichi'i boonoshi keqqitoyich, baroona showooch guuppeheete.

![](https://cdn.door43.org/obs/jpg/360px/obs-en-36-06.jpg)

Aroochee Yesuusi boonoshi waan giddee shuurikki'i, “Tibote! Shattaahote!” iye. Damba kaame'i boonoshi ciinnimmona, Yesuusi ikkeetoyee besh koninona beegaaneena'one.

![](https://cdn.door43.org/obs/jpg/360px/obs-en-36-07.jpg)

Yesuusinaa keejje bi dabbeena'ona guudi toommoochee boonoshi kindii beetaa, Yesuusi “Ittoshi beeggiton konichona gettaahote! Ta katinoon qitemmo taane, aroochee wotte kashoona beeyemmo taane. Arooye gubb asheena'och geton hakkemmo ittoshine”i'i gettiye.

*Yaafe Macaafe Kiino:- Maatiyoosi 17:1-9; Maariqoosi 9:2-8; Luqaasi 9:28-36.*

## 37. Yesuusi Alazaarin Qitoochee Tiijjiye

https://openbiblestories.org/l/kbr/story-37/

![](https://cdn.door43.org/obs/jpg/360px/obs-en-37-01.jpg)

Ikke areddoon Alazaari oogichii biyetone immi wocho Yesuusi waan shaggiye. Alazaarinaa gutte bi maneena'o Maariyaminaa Maaritina Yesuusich katine xibeena'one. Yesuusi ebi woroon bi waayehoba, “Alazaari biiyeto, Yeerichi Bushoo hini bi biiyee naboona bi oogemmoyich Yeerichi oogoyichani hini biiyoona qitaachemmone” iye. Yesuusi bi xibeena'on shunnii beetone, tunebaani waataanoon bi beeti xaa'ooch gutte qemmon yagiye.

![](https://cdn.door43.org/obs/jpg/360px/obs-en-37-02.jpg)

Gutte qemo beshetoye gubb, Yesuusi bi dabbeena'oyich “Yihudee showooch wotteree hambone” iye. Bi dabbeena'o “Dojjechocho! Arooch beeti Ayihudeena'o giisheche aaboyee aaf neen xaqqoona yexi wuxiya qaawitina'one;” iyeete. Yesuusiyoo “No shunechi Alazaari tokketetone; tunebaani biin tokketoochee tiijjiya hammaabeeto taane” iye.

![](https://cdn.door43.org/obs/jpg/360px/obs-en-37-03.jpg)

Ebich bi dabbeena'o “Doonocho! Tokketoo biin yechito tunegaata, wodemmone” iyeete. Ebiyooba Yesuusi Alazaari “Qititone; ittoshi mulloon ta toommooch too'iyoona ittoshi kupphemmoyich, arooch ta beemi qayoyich emirihoye” iye.

![](https://cdn.door43.org/obs/jpg/360px/obs-en-37-04.jpg)

Yesuusi Alazaari shiijjeti katamooch bi shagihoba, Alazaari qitii bi duukketoye awudde qemo tunetone. Maariti Yesuusi womon waaya'a “Ta Doonocho! Hiniich ne beeto gaata, ta manoo qitaacheshone. Tunebaani Yeeri ne qollemmo bullin neech immemmo bi tunoon gibenehoye” iyan.

![](https://cdn.door43.org/obs/jpg/360px/obs-en-37-05.jpg)

Yesuusiyoo “Qitii duukketina'oyich kashoon imiree kichemmo taane. Bi mulloon ta toommooch too'ii beeto bi qititaanoona kashechon tunemmone; kashecho tune'i bi mulloon ta toommooch too'ii beeto bulli, bulli yemeenoon qitaachemmone. Ebin iberiinne?”i'i echehe. Maartiyoo “Eeha, ta Doonocho! Ne ‘Hini showee toommooch woyemmone’ getteeti Kiristoosi Yeerichi Bushoo ne tunoon iberiiti taane” iyan.

![](https://cdn.door43.org/obs/jpg/360px/obs-en-37-06.jpg)

Aroochee Maariyami Yesuusi beetooch waa biin ciinnaa bi baatooch dihaa'a, “Ta Doonocho! Hiniich ne beeto gaata, ta manoo qitaacheshone” iyan. Yesuusi, “Alazaarin aabiichiye?”i'i echehe. “Maashoochiye. Waaree beege” ii gettiyeete. Arooche Yesuusi eeppiye.

![](https://cdn.door43.org/obs/jpg/360px/obs-en-37-07.jpg)

Oppoo xaqqee kexone; kelloo xaqqoona keppheetone. Yesuusi maashooch bi shagihoba, “Xaqqoon tiijji bayote!” iye. Maarti “Ta Doonocho! Bi duukketo hanaach awudde qemone. Ebich hanaach beddaahaa shaa'o qayaachemmone” iyan.

![](https://cdn.door43.org/obs/jpg/360px/obs-en-37-08.jpg)

Yesuusi “ ‘Ta getteton ne iberii gaata, Yeerichi oogee yiiroon beeggemmi neene’ getaachote?” iye. Asheena'oo xaqqoon tiijjiyeete.

![](https://cdn.door43.org/obs/jpg/360px/obs-en-37-09.jpg)

Yesuusi kaama shimaayooch ciinnii'i, “Ta Nihoocho! Taachon ne waayaabeetoyich neen galletehoye. Bulli aaboon ne waayoon ariyaa beeto taane; tunebaani taan ne deejjoon boonoshi iberiyemmoyich, hini ta guudoona neexeti asheena'oyicha iya'a ishin gettahoye” iye. Aroochee Yesuusi, “Alazaaro! Waa keye!”i'i ceeggiye.

![](https://cdn.door43.org/obs/jpg/360px/obs-en-37-10.jpg)

Ebich qititi Alazaari bi duukketi kaafanoona tookkii tuneechii kechiye. Yesuusiyoo “Biishote! Hambe” iye. Ebi woriganikkiti moochi naboona, Ayihudeena'oochee meetina'o boonoshi mulloon bi toommooch too'iiheete.

![](https://cdn.door43.org/obs/jpg/360px/obs-en-37-11.jpg)

Tunebaani Ayihuude dojjechina'onaa wulleena'ona qanaateheete, ebich Yesuusinaa Alazaarinon aabichiree boonoshi wuxemmo gaata koceyooch ikke xaa'ooch kiceeheete.

*Yaafe Macaafe Kiino:- Yowannisi 11:1-46*

## 38. Yesuusi Beshitaa Ichehe

https://openbiblestories.org/l/kbr/story-38/

![](https://cdn.door43.org/obs/jpg/360px/obs-en-38-01.jpg)

Ayihudeena'ona nati natona beshee baaroon baarii beeheete. Ebi baaroo meeti balle natoye aaf Yeeri boonoshi qaabbech niheena'on Gibitsee guunittinoochee aabichii'i bi kichito gaata shalligichii beetone. Yesuusi kaamoona mishiraachoon getonaa dojjoononoyich bi giyimmi aafooch, ebi beshe baaroon boonoshina tookki baariya bi qaawoonaa aroye gubb wuxeyeemmo bi tunoonon bi dabbeena'oyich gettiye.

![](https://cdn.door43.org/obs/jpg/360px/obs-en-38-02.jpg)

Yesuusi dabbeena'oochee ikkko Yihudi getteeto beetone. Yihudi mishiraachechina'ochi gijjee ukkuroone. Tunebaani gijjoo shunni bi beetoyich meeti aaboon gijjoon kojjoochee gaajjii beehe. Yesuusinaa bi dabbeena'ona Yerusalem boonoshi shaggitoye gubb, Yihudi Ayihude wulleena'o waan hammii'i Yesuusin gijjoona beshii imma wogo geddiye. Ayihude wulleena'o aroo Yeerichi Masiihi bi tunoon boonoshi nookkoonaa biin wuxiya boonoshi koceyoonon Yesuusi ariihe.

![](https://cdn.door43.org/obs/jpg/360px/obs-en-38-03.jpg)

Ayihude wulleena'o qeeshee ukkuroona kocee'i, Yesuusin boonoshich beshii bi immemmoyich shaashe birewoon Yihudich qociyeete. Keemechina'o keemmitoommon ebi tunehe. Yihudi boonoshina mashaammii'i gijjoon yechii hammiye. Ebina Yesuusin boonoshi yechemmi gommon bi kaachiyemmi yawoon qaawoo yechiye.

![](https://cdn.door43.org/obs/jpg/360px/obs-en-38-04.jpg)

Yesuusi Yerusaleema bi dabbeena'ona tookkii beshee baaroon baariye. Beshee baare maahoba Yesuusi koshon tijjii tiichiye. Ishichiino iye, “Ha'ote, mamote! Hini ta meenone. ebinoo taan shalligeechon tuniibote!” iye. Ebina Yesuusi bi meeno boonoshi qoodoon deejjeyeemmo bi tunoon gettiye.

![](https://cdn.door43.org/obs/jpg/360px/obs-en-38-05.jpg)

Ebichi hillooch Yesuusi woyinee uyoon yechiti xoofoon tiijjii'i ishichiye:- “Ha'ote! Ebin shuuttebote! Hini woyinee uyo ittoshi axaaxoyich ufemmi ta damoone; ebiyoo Yeeri neechemmi andre wogee malletoone” iye.

![](https://cdn.door43.org/obs/jpg/360px/obs-en-38-06.jpg)

Aroochee Yesuusi bi dabbeena'oyich, “Iberoon ittoshich gettoye; ittoshi daggoochee ikkoo taan beshiiree immemmone” iye. Dabbeena'o keqqiyeete, eboommi mooyon kone halliyemmoi'i echeheete. Yesuusi “And dukkaree ta qapphiiyemmo taan beshi immeemmo aroone” iye. Aroochee dukke'i Asqorootechi Yihudich qapphiihe.

![](https://cdn.door43.org/obs/jpg/360px/obs-en-38-07.jpg)

Yihudi koshon bi qapphetoye gubb bekkech Sheexaano bi mullooch giyihe. Yihudi Ayihude ukkureena'o Yesuusin boonoshi yechemmon gaachoyich hammiye. Ebihoba deco xumetone.

![](https://cdn.door43.org/obs/jpg/360px/obs-en-38-08.jpg)

Yesuusinaa bi dabbeena'ona tookkii'i xumi maayoon boonoshi maatoye gubb Zayitee Michi guudoch hammiyeete. Aroochee Yesuusi, “hanaach xum ittoshi bulli taan qajjemmo ittoshine”. “Qiddoon xoobbemmo taane; bageena'oo shacemmina'one” getaa kooreetone iye.

![](https://cdn.door43.org/obs/jpg/360px/obs-en-38-09.jpg)

Arooba Pheexiroosi tiyi'i, “Bareena'o bulli neen boonoshi qayi gaatoona, ta neen cir qayaache” iye. Arooba Yesuusi Pheexiroosin ishichiye, “Sheexaanoo ittoshin daamma qaawiibeetone, tunebaani ta toommooch ne mullee too'iyoon ne qayaachemmoyich Yeerin qolleto taane. Ebi tunetaanoona hanaach xum baakkoo kuuhaan beetaa, keejje wottoon taan nookkemmo neene” iye.

![](https://cdn.door43.org/obs/jpg/360px/obs-en-38-10.jpg)

Ebiyooba Pheexiroosi, “Ta Doonocho! ta qittimmo gaatoona neen qayaache” iye. Bare dabbeena'o bulliyoo ishichiyeete.

![](https://cdn.door43.org/obs/jpg/360px/obs-en-38-11.jpg)

Aroyee gubb Yesuusi bi dabbeena'ona tookkii Getesemaana hammiye. Gondoochi nihoo dawushooch ittoshi giyaachemmoyich, kuppheree corootibote!i'i bi dabbeena'oyich gettiye. Arooche Yesuusi bi ikketoon corootiya hammiye.

![](https://cdn.door43.org/obs/jpg/360px/obs-en-38-12.jpg)

Yesuusi keejje kaalloon corootiye, “Taabo! Ta nihoocho! Hini xuuxee xoofoon ta waanee wokkiibe! Tunetaa ne daaggoo tunebaani, ta daaggoo tunaaye” iye. Biyoo oogichii xuuxehe; damee cotoommon caajjo bi achoochee showooch cotehe. Yeeri biin kupphiyaa maraakoon deejjiye.

![](https://cdn.door43.org/obs/jpg/360px/obs-en-38-13.jpg)

Corootii bi iti wotto bullin Yesuusi bi dabbeena'o waan wottee waa beehe, tunebaani boonoshi tokketetina'one. Keejjinnoo bi wottehoba, “Tibote! Hambone. Taan beshiiree immemmo and shaggitone” iye.

![](https://cdn.door43.org/obs/jpg/360px/obs-en-38-14.jpg)

Yihudi Ayihudee qeesheena'ochi ukkureena'ona, gine naayina'onaa dofee asheena'ona tookkii waahe. Goraadoonaa yeelloonon yechitina'one. Yihudi Yesuus waan gidde'i, “Dojjechocho! Diggoo neech tunebeei'i yechii shummiye”. Ebiyoo konin boonoshi yechemmo gaata Ayihude ukkureena'oyich malletoone. Aroochee Yesuusi, “Yihudo! Shumona taan beshiya'a immene?” iye.

![](https://cdn.door43.org/obs/jpg/360px/obs-en-38-15.jpg)

Gine naayina'o Yesuusin boonoshi yechimmona, Pheexiroosi bi cuyeti goraadoon kaacci'i qeeshee guudoochi guunon waamon karii kindiihe. Yesuusi Pheexiroosin “Ne goraadoon bi gonenooch wochibe! Ebiyoommo gaata, dofe maraakeena'on bekkech taach bi deejjiyemmoyich ta nihoon echo hakkiyooye” iye. Arooche Yesuusi uroochi waamon wodiihe. Yesuusi yechetoye gubb bi dabbeena'o bulli biin duppii aalleheete.

*Yaafe Macaafe Kiino:- Maatiyoosi 26:14-56; Maariqoosi 14:10-50; Luqaasi 22:1-53; Yowannisi 12:6, 18:1-11*

## 39. Nallachina'ochi Aafooch Yesuusi Neexehe

https://openbiblestories.org/l/kbr/story-39/

![](https://cdn.door43.org/obs/jpg/360px/obs-en-39-01.jpg)

And deco xumi gutte qeellimone. Aroochee Yesuusin bi echemmoyich gine naayina'o qeeshee guudo waan daammiyeete. Pheexiroosi wokkiibee gubbaa boonoshin dabbiye. Yesuusin kechi maac boonoshi giijjihoba, Pheexiroosi maach tuneechii qaaqqoon kachii beehe.

![](https://cdn.door43.org/obs/jpg/360px/obs-en-39-02.jpg)

Kechi daggaa Ayihude nallechina'o Yesuusin nallee gaberee aaf giddiiheete. Meeti koote miixeena'on bi toommooch neechiyeete. Tunebaani, boonoshi miixeti miixee qaaro ikkotteyaanoone. Ebich Ayihudee nallechina'o Yesuusi waanee yodoo dano hakko qajjiyeete.

![](https://cdn.door43.org/obs/jpg/360px/obs-en-39-03.jpg)

Ciiroochaa qeeshee guudo Yesuusin bi afooch ciinii'i, “Ne Masiihi Kiristoos neene?” iye.

![](https://cdn.door43.org/obs/jpg/360px/obs-en-39-04.jpg)

Yesuusi wochi'i, “Ne getteto neene; giidechi Yeerichi qanne badd ta kotetaa, wotta shimaajji qubee toommoochoo koteree ta waataa beeggemmo ittoshine” iye. Arooba qeeshee guudo bi tahoon keexxi'i, “Yeerin naaggitone; ebiyee damba amee miixoo qaawiihe? Yeerichi bushoo taane bi geton waayeto ittoshine. Illa ama getireeshiye ittoshi nallemmo?”i'i cookiye.

![](https://cdn.door43.org/obs/jpg/360px/obs-en-39-05.jpg)

Ayihudee ukkureena'o bulli, “Wuxeebe”i'i qeeshee guudoch wochiyeete. Arooba Yesuusi aafe toommooch cuddiyeete; biinoo tukeheete; bi aafoon kaappichii tappeebee, “Konine neen tappeto? Eke nooch gete!”i'i cooneheete.

![](https://cdn.door43.org/obs/jpg/360px/obs-en-39-06.jpg)

Pheexiroosi kechee maach quyee bi beetaa ikke shaajjete biin ciinnaa'a “Ne wotta hini uroochi dabbeena'o daggoochee ikkoo toon neene?” iyan. Pheexiroosi ebi bi getoon nookkehe. Aroyee gubb bare shaajjeteeyo ebin wochaa gettahan, Pheexiroosi ando wochii nookkehe. Ciiroochaa asheena'o ittoshi guttiyona Galiilee asho ittoshi tunetoyich ne Yesuusina tookkaa ne tunoon ariihone” iyeete.

![](https://cdn.door43.org/obs/jpg/360px/obs-en-39-07.jpg)

Tunebaani Pheexiroosi “Ne gettaabeeton ta ariyaa beeto gaata Yeeri ufo ta tommooch kindibe”i'i bi kashoon uppii wogehe. Bekkech baakkoo kuukkiye. Doono Yesuusiyoo gubb wotte'i Pheexiroosin ciinniye.

![](https://cdn.door43.org/obs/jpg/360px/obs-en-39-08.jpg)

Aree gaata Pheexiroosi maaxooch kechii'i tiittee eeppiye. Arooba Yesuusin beshii immiti Yihudi, Ayihude wulleena'o bi wuxeyeemmon Yesuus toommooch boonoshi nalloon beeggiye. Ebich ayinoona manjjee'i kechii hammii bi kishoona taaqqee qitiye.

![](https://cdn.door43.org/obs/jpg/360px/obs-en-39-09.jpg)

Dechara maaddoona qeesheena'ochi ukkureena'o, Yesuusin cuchii'i daammii Yihudee iraashoo Phelaaxoosi waan deebiyeete. Phelaaxoosi Yesuusin, hukkecho tunii nalliree qitoona sheeriyemmonei'i gibenee beeheete. Phelaaxoosiyoo Yesuusin “Ne Ayihudeena'ochi taatoo neene?”i'i echehe.

![](https://cdn.door43.org/obs/jpg/360px/obs-en-39-10.jpg)

Yesuusi ishichii'i wochiye, “Newona gettaabeetine, tunebaani ta taatittine hini showeexi tooneene. Hini showeexi bi tunetogaata, ta dabbeena'o koyeshina'one. Ta, ibereechon miixeya showee toommooch waato taane. Iberoochee tuneto bulli ta qaaroon waayemmone” iye. Phelaaxoosiyoo “Iberoo geto amoone?” iye.

![](https://cdn.door43.org/obs/jpg/360px/obs-en-39-11.jpg)

Phelaaxoosi biina bi yibbaatetoye gubb, maach kechi'i, “Ta bi toommoochee gondoon daneyaano taane” iye. Ayihude ukkureena'onaa asheena'ona “Yoode!” i'i cookeeheete. Phelaaxoosi “Ta bi toommoochee gondoon danetaano taane”i'i boonoshich wochiye. Tunebaani beshoon caagee cangecheheete. Aroochee Phelaaxoosi, keejjinoon “amee gondoonona bi toommooch daneyaan taane” iye.

![](https://cdn.door43.org/obs/jpg/360px/obs-en-39-12.jpg)

Phelaaxoosi asheena'o hukkoo tiijjemmina'onei'i shattiye, ebich Yesuusin boonoshi Yooddemmon bi gine naayina'oyich gettiye. Roomee gine naayina'o Yesuusin xoobbii boonoshi iyitoye gubb ceelle tahoon tajjiyeete; wotta angichi gubbichoon bi qellooch ukiiheete. Aroochee bi waan gidde'i, “Ayihudeena'ochi taatoocho!” iibee moo'ee diggiyoon diggiiheete.

*Yaafe Macaafe Kiino:- Maatiyoos 26:57-27, Maariqoosi 14:53-15, 15; Luqaasi 22:54-23:25; Yowannisi 18:12-19,16*

## 40. Yesuusi Yooddeehe

https://openbiblestories.org/l/kbr/story-40/

![](https://cdn.door43.org/obs/jpg/360px/obs-en-40-01.jpg)

Gine naayina'o Yesuusin boonoshi coonetoyee gubb, yoodoyich daammiyeete. Bi yooddeyeemmi masqaloon shaakkiiheete.

![](https://cdn.door43.org/obs/jpg/360px/obs-en-40-02.jpg)

Gine naayina'o “Qellee koofee xaa'oo” getteebeeti xaa'ooch Yesuusin daammii'i masqalee toommooch bi kishoonaa baatoonon xuuree xogoona xogii'i yooddiyeete. Tunebaani Yesuusi “Ta nihoocho! Boonoshin maaribe! Ebi boonoshi shuunee beeton ariyaaneena'one” iye. Phelaaxoosi wotta bi qellee took “Hini Ayihudeena'ochi taatoone” getaa kooreere bi xogeeyeemmon gettiye.

![](https://cdn.door43.org/obs/jpg/360px/obs-en-40-03.jpg)

Gine naayina'o Yesuusi tahee toommooch ixo duppiyeete. Ebin tuniyoona, “Ta taheena'on boonoshinaa boonoshina qoodeeheete; genjje ta tahoochoo ixoon duppiyeete” ii beeti keemee qaaroon ceechiyeete.

![](https://cdn.door43.org/obs/jpg/360px/obs-en-40-04.jpg)

Arooba Yesuusi gutte boggechina'o dagg yooddeeehe. Ikkoo biin naagiye, tunabaani bare ikkoo tiyi'i, “Yeerin amoyich shattaachine? Noona no shuunooniye no deqqaabeeto; hini uro bi shuuneti gonde mooyo amoona aalloone” iye. Aree hillooch Yesuusin “Doono Yesuuso! Ne taatittineech ne giyihoba, taan batteyaahine!” iye.

![](https://cdn.door43.org/obs/jpg/360px/obs-en-40-05.jpg)

Wotta qeesheena'ochi ukkureena'onaa bare asheena'ona Yesuusin cooneeheete. “Isra'eelee taatoo Kiristoosi bi gaata, eke and masqaloochee kindibe. Bi kindaa beegiree iberiibone” iyeete.

![](https://cdn.door43.org/obs/jpg/360px/obs-en-40-06.jpg)

Ebiyooba aredda shiritte saato tunee bi beechaa showoo ciroona xumehe. Shiritta saatoochee tiijji'i yiixiye saato beddimmi wottoon xumee bi iyitommona yagiye.

![](https://cdn.door43.org/obs/jpg/360px/obs-en-40-07.jpg)

Arooye gubb Yesuusi, “Mooyo bulli ceennitone! ta nihoocho! Ta kasheen ne kishooch beshiya'a immeto taane”i'i cookiye. Ebin bi gettaaha, bi kasho abbetehe. Bi qitihoba showee qewahan; Yaafee Kexooch tippeeti maccillaatoo dambee tiijji'i desh beddaahaa gutte badd kapphee'i keexee kechiye.

![](https://cdn.door43.org/obs/jpg/360px/obs-en-40-08.jpg)

Yesuusi bi qitoona asheena'o Yeeri waan boonoshi woyemmi gommon qechiye. Yesuusin quyeebeeti ginee iraashoo tuneti mooyon beeggi'i, “Iberoon hini uroyich gondoo aalloone. Aro Yeerichi Bushoone” iye.

![](https://cdn.door43.org/obs/jpg/360px/obs-en-40-09.jpg)

Arooba Yesuusi Masiihi bi tunoon mullooch too'iiti gutte Ayihudee Wulleena'o Yoseefinaa Niqoodimoosina, Yesuusichi cahoon nooch imbei'i Phelaaxoosin qolleheete. Bi cahoon kaafenoona kaappii'i xaqqee guudoochee gooshaa shuuneeti oppooch daammii duukkiyeete. Arooche ooge xaqqoon gediriki'i are oppee kelloon hicciyeete.

*Yaafe Macaafe Kiino:- Matiyoosi 27:27-61; Maariqoosi 15:16-47; Luqaasi 23:26-56; Yowannisi 19:17-42*

## 41. Yeeri Yesuusin Qitoochee Tiijjiye

https://openbiblestories.org/l/kbr/story-41/

![](https://cdn.door43.org/obs/jpg/360px/obs-en-41-01.jpg?direct&)

Gine naayina'o Yesuusin boonoshi yoodditoye gubb, bi toommooch mulloon too'iyaani Ayihude ukkureena'o Phelaaxoosich, “Hini kootechi Yesuusi, keejje qemoye gubb qitoochee tiyemmo taane iitone. Illa bi dabbeena'o bi cahoon boonoshi gaayaachemmonaa, qitii duukketina'o daggoochee kichitone boonoshi getaachemmon xiishoyich, oppoon ikke asho quyeebe” iyeete.

![](https://cdn.door43.org/obs/jpg/360px/obs-en-41-02.jpg?direct&)

Phelaaxoosi “Kellechina'on daami neechibote! Hamiree ittoshi hakkimmi wottoon quyiibote!” iye. Ebich oppee kello keppheeti xaqqee toommooch malletoon geddii manjii hicci'i cahoon koniyona bi gaayaachemmoyich arooch gine naayina'on neechiyeete.

![](https://cdn.door43.org/obs/jpg/360px/obs-en-41-03.jpg?direct&)

Yesuusi yooddeetoye gubb, bi hilleexi deco shambetoo tunehe. Ayihudena'o shambetoona arooch hamo boonoshich daaggeyaanoone. Ebich shambetooye gubb meeti maacheena'o kafee qaadooch cahee toommooch wuciya boonoshi qanniiti shittoon yechi'i Yesuusi duukketi maashooch hamma tiyiheete.

![](https://cdn.door43.org/obs/jpg/360px/obs-en-41-04.jpg?direct&)

Diqqoona oogeti showee qewo tunehe. Bi aafo xeeyoochoomon pphaqqibeeti Doono Yeerichi maraakoo shimaayoochee bekkehe. Oppee kelloon keppheti maashee xaqqoon gedirikkii'i aree toommooch kotehe. Maashee oppoon quyeebeeti gine naayina'o maraakoon beeggi'i oogichii shatona showooch dihii'i qititi ashoon shaahiyeete.

![](https://cdn.door43.org/obs/jpg/360px/obs-en-41-05.jpg?direct&)

Maacheena'o maashooch boonoshi shagihoba hini are maraakoo ishichiye:- “Haanoshite! Shattaahote! Yesuusi hiniich aalloone. Qitii duukketina'o daggoochee kechemmo taaneei'i bi gettitoommon kechitone! Bi cahoo qeyiti xaa'oon waaree beegote!”i'i gettiye. Bi cahoo arooche aalloone!

![](https://cdn.door43.org/obs/jpg/360px/obs-en-41-06.jpg?direct&)

Aroochee maraakoo maacheena'oyich, “hiniichee hamiree, Yesuusi qitii duukketina'o daggoochee kechitone; Galiilla ittoshiyee shiichiree hammemmone getiree bi dabbeena'oyich getote!” iye.

![](https://cdn.door43.org/obs/jpg/360px/obs-en-41-07.jpg?direct&)

Maacheena'oo oogeti emiroona ceeniyeete. Mishiraachoon Yesuusi dabbeena'oyich getta woceheete.

![](https://cdn.door43.org/obs/jpg/360px/obs-en-41-08.jpg?direct&)

Getta hammii boonoshi beetaa, Yesuusi boonoshich bekkehe, boonoshiyoo gidde'i biich goyinneheete. Aroochee Yesuusi “Shattaahote! Hamiree, Galiila beshebote getiree ta maneena'oyich getote! Aroochaa taan beeggemmina'one” iye.

*Yaafe Macaafe Kiino:- Maatiyoosi 27:62-28:15; Maariqoosi 16:1-11; Luqaasi 24:1-12; Yowannisi 20:1-18*

## 42. Yesuusi Shimaajj Wottehe

https://openbiblestories.org/l/kbr/story-42/

![](https://cdn.door43.org/obs/jpg/360px/obs-en-42-01.jpg)

Yesuusi qitoochee bi tiiti aabooba gutte bi dabbeena'o katinooch beeti katamooch hammii beeheete. Hammiibee Yesuusi toommooch tuneti mooyo bullin tiijji'i yibbaateheete. Aroo Masiihinei'i gibenee boonoshi beetaa wuxeehe. And wotta ikkikke maacheena'o Yesuusi wochinnoon kashecho tunetone iyeete. Ebosh gutte dabbeena'o boonoshi iberiyemmon tushiyeete.

![](https://cdn.door43.org/obs/jpg/360px/obs-en-42-02.jpg)

Yesuusi boonoshi waan giddee'i boonoshina tookkii hammo yechiye, tunebaani boonoshi biin ariyaanena'one. Amoon yibbaatee boonoshi beeto gaata echehe, boonoshiyoo besheti katinooch Yesuusi toommooch tuneti woriganikkiti mooyina'on gettiyeete. Yerusalem tuneti mooyon ariyaani dallaawoona yibbaatee beetina'o boonoshich shaahiye.

![](https://cdn.door43.org/obs/jpg/360px/obs-en-42-03.jpg)

Aroochee Yesuusi, Masiihichon Yeeri qaaro gettiibeeton boonoshich gallii arichiihe. Masiihi xuuxemmonaa wuxeyeemmona bi tunoon, tunebaani keejjinne qemmooba qitoochee bi tiyemmommon keemechina'o getton boonoshich shalligichiye. Ebi gutte asheena'o qeya boonoshi gabiti katamooch shagga boonoshi beddimmona showoo xumee hammiye.

![](https://cdn.door43.org/obs/jpg/360px/obs-en-42-04.jpg)

Gutte asheena'o boonoshina tookki bi qeyemmon qolleheete, biyoo boonoshi qolloon de'a iye. Xum maayo maaya boonoshi qannihoba Yesuusi koshoon tiijjii'i Yeerin galletehe, aroochee tiichiye. Ebi goor diqqoona Yesuusi bi tunoon ariiheete. Tunebaani aroo boonoshi aafoochee shiwirimmiye.

![](https://cdn.door43.org/obs/jpg/360px/obs-en-42-05.jpg)

Gutte asheena'o “Yesuusiyani! Yaafe Macaafooch kooreeton biichii nooch bi gettimmona, no mullo aaxxeto ebichiye!” iyeete. Bekkech Yerusalem wotteheete. Boonoshi shaggihoba dabbeena'oyich, “Yesuusi kashoona beetone! Biin beeggetonoone!” ii gettiyeete.

![](https://cdn.door43.org/obs/jpg/360px/obs-en-42-06.jpg)

Dabbeena'o yibbaatee boonoshi beetaa, diqqoona Yesuusi boonoshi daggooch bekkee'i, “Diggoo ittoshich tunebe!” iye. Tunabaani yoogo boonoshich bekketo shaahiye. Biyoo “Amoyichiye ittoshi keqqii beeto? Ittoshi mullo amoyichiye meeti gommooch shacee bi beeto? Yesuusi ta tunoon ta kishoonaa ta baatoonon beegote! Taalli, baroo toonoone; taan yeshi beegote! Ittoshi beeggii beetoommon taach meenonaa shaawushona beetone; yoogoyich meenonaa shaawushona aalloone” iye. Yoogo tunee bi qayon xiishi arichiyaa manjjemmi maayo biich boonoshi immemmoyich echehe. Boonoshiyoo micheeti haashooche immi boonoshi getaa maahe.

![](https://cdn.door43.org/obs/jpg/360px/obs-en-42-07.jpg)

Yesuusiyoo, “Yeeri qaarooch kooreeti ta mooyo bulli ceeno echeyaachemmone’ ta ito ebiniye” iye. Aree gaata Yaafe Macaafooch kooreeton boonoshi xiishemmoyich, boonoshi mulloon qechiye; aroochee, “Masiihi xuuxoon beeggemmonaa keejjinnee qemooba qitii duukkatina'o daggoochee kechemmo bi tuno genjje yemeenooye aff kooreetone” iye.

![](https://cdn.door43.org/obs/jpg/360px/obs-en-42-08.jpg)

Wotta dabbeena'o asheena'oyich “Axaaxee gommoochee Yeer waan wottebote! Yeeriyoo ittoshi axaaxoon maaremmone” getiree awaajjemmina'o boonoshi tuno Yaafe Macaafooch kooreetone. Boonoshiyo Yerusaleeme tiijjiree ebin tuniyeemmina'one. Aroochee bulli xaa'ooch beeti ashi yaroo waan hammemmina'one. Ittoshiyoo ebi mooyo bullich miixoo ittoshine.

![](https://cdn.door43.org/obs/jpg/360px/obs-en-42-09.jpg)

Yesuusi waammi aabbe qemooch bi dabbeena'oyich bekkehe. Ikke kaalloon 500 ye beshe asheena'oyich bekketone! Kashecho bi tunoon meeti gommona bi dabbeena'oyich manjjiihe. Yeerichi taatittineechon boonoshich dojjii beehe.

![](https://cdn.door43.org/obs/jpg/360px/obs-en-42-10.jpg)

Yesuusi bi dabbeena'oyich ishichii gettiye:- “Yeeri showoonaa shimaayoonooch beetina'o bullichi toommooch taan ukkuriitone. Illa tiyiree hambote! Aageteena'o bulliich beetina'on nihoo Yeeri, bushoo taannaa Yaafe Ayaanoonochi shigoona aacona afaalloonaa ‘Tuniibote!’ iya'a ittoshich ta getteto bullin boonoshich dojjoona ta dabbeena'on tuniibote! Illa yemeenee ciirooch beddaahaa bulli areddoon ta ittoshina tookkaa beeto taane” iye.

![](https://cdn.door43.org/obs/jpg/360px/obs-en-42-11.jpg)

Yesuusi maashoochee bi tiyiti aabbe qemoye gubb bi dabbeena'oyich, “Yeerichi Yaafe Ayaano ittoshi toommooch bi kindihoba , ta Nihoo giidoon ittoshich bi immimmi wottoon Yerusalem beebote” iye. Ebichi hillooch Yesuusi shimaajj kechiye; quboo boonoshi aafoochee biin qeriye. Yesuusi halloo bulli toommooch ukkureya Yeeri qannooch kotehe.

*Yaafe Macaafe Kiino:- Maatiyoosi 28:16-20; Maariqoosi 16:12-20; Luqaasi 24:13-53; Yowannisi 20:19-23; Mishiraachechina'ochi Shuuno 1:1-11*

## 43. Baare kexi kotteehan

https://openbiblestories.org/l/kbr/story-43/

![](https://cdn.door43.org/obs/jpg/360px/obs-en-43-01.jpg)

Yesuusi shimaajj bi wottetoye gubb bi dabbeena'o boonoshich bi gettitoommon Yerusalem tunee'i quyee beheete. Arooch beeti bi dabbeena'o kuxaanoon corootooyich kicee beeheete.

![](https://cdn.door43.org/obs/jpg/360px/obs-en-43-02.jpg)

Ayihudena'o beshe baaree aafooch aache qemon boonoshi baaribeeti baaraachoo getteebeeti ooge nati baaro beetone. Baaraachoo Ayihudeena'o maayi qecci baaro tunii'i boonoshi baariibeeti aaboone. Ayihudena'o baaraachoon ikkittinoona baaroyich showee tookkee bulla Yerusalem waabeeheete. Hini natooch baraachoo bi giito Yesuusi shimaajj bi wotteti shaabatta bedoye gubbiye.

![](https://cdn.door43.org/obs/jpg/360px/obs-en-43-03.jpg)

Yesuusichi asheena'o bulli ikkooch kicee'i boonoshi beetaa, diqqoona giidechi yongee qaaroommi qaaro shimaayoochee waayeehe; Aroochee Yesuusichi asheena'o qellee toommooch qaaqqee nalloommi mooyo bekkehe. Boonoshi bulli Yaafe Ayaanoona ceenniyeete; bekkech Yaafe Ayaano boonoshi ariyaani noonoona boonoshin yibbaatiihe.

![](https://cdn.door43.org/obs/jpg/360px/obs-en-43-04.jpg)

Arooba Yerusalem beeti asheena'o hini qaaroon waaye'i tuneti mooyon ariyoyich dofoo tunee'i waaheete. Boonoshi showi showee noonoona Yesuusichi asheena'o yibbaatoon boonoshi waayetoyich oogichii woriganeheete.

![](https://cdn.door43.org/obs/jpg/360px/obs-en-43-05.jpg)

Ikkikke asheena'o Yesuusichi asheena'o uchii mashe'iniye ii ittibateheete. Tunebaani Pheexiroosi neexe'i, ishichiye:- “taan elle waayebote! Hini asheena'o masheyaanena'one! Ebi tuneebeeto, keemechi Yoo'eelina, ‘ashi bushoo bullichi toommooch ta Ayaanoon ukkemmo taane’ getteeto ebina bi ceennitochiye iye.

![](https://cdn.door43.org/obs/jpg/360px/obs-en-43-06.jpg)

“Hini Isra'eeleena'ote! Ittoshi beeggitoommonaa shichaa'a ittoshi ariyaa beetoommonon, Yesuusi Yeerichi giidoona wodde gaakkechi shuunoon, woriganikkiti mooyonaa malletoonon tuniiti ashoone. Tunebaani ittoshi biin yooddiyote!”

![](https://cdn.door43.org/obs/jpg/360px/obs-en-43-07.jpg)

Yesuusi bi qititaanoona Yeeri biin duukketina'o daggoochee kichiye. Ebiyoo ‘maashee oppooch echeyaanoone; bi meenoo o'aanoone’ getteeti keemo bi ceennitochiye. Yeeri hini Yesuusin kashecho tunii'i bi kichoyich no miixoo noone.

![](https://cdn.door43.org/obs/jpg/360px/obs-en-43-08.jpg)

“And Yesuusi Yeerichi qanne badd oogoona kote'i beete. Wotta bi gibenikkiti Yaafe Ayaanoon deejjiitone. And ittoshi ciinniibeetonaa waayeebeetonon tuniito Yaafe Ayaanoone.

![](https://cdn.door43.org/obs/jpg/360px/obs-en-43-09.jpg)

“Hini Yesuusin yooddii'i wuxiihote. Tunebaani Yeeri hini ittoshi yoodditi Yesuusin Doononaa Masiihoonon bi tuniyoon xiishi ariibote!”

![](https://cdn.door43.org/obs/jpg/360px/obs-en-43-10.jpg)

Ppheexiroosin waayeebeeti asheena'o boonoshi mulloona xeejjii miijjiyeete. Ebich Pheexiroosinaa bare mishiraachechina'onon “No maneena'ote! Ebich and aabichibona?”i'i echeheete.

![](https://cdn.door43.org/obs/jpg/360px/obs-en-43-11.jpg)

Ppheexiroosiyoo, “Axaaxee gommoochee Yeer waan wottabote! Yeeri ittoshi axaaxoon bi maaremmoyich, ittoshi ikkikkoona Yesuusichi shigoona aacona afaalleebote! Yeeriyoo bi wojjoo tuneti Yaafe Ayaanoon ittoshich immemmone.”

![](https://cdn.door43.org/obs/jpg/360px/obs-en-43-12.jpg)

3000 bede asheena'o Ppheexiroosi gettiton waayee'i Yesuusi dabbeena'o tuneheete. Afaallee'iino Yerusalem beeti baarekechi gogechina'o tuneheete.

![](https://cdn.door43.org/obs/jpg/360px/obs-en-43-13.jpg)

Dabbeena'o kuxaanoon Yesuusichi asheena'o immiibeeti doyoon waayeheete, ikkottee'i tuneheete, tookkii maaheete, ikkoo barooyich corootiye. Ikkottee'i Yeerin galleteebee, boonoshich beeti mooyo bullin qoodeeheete. Asho bulli boonoshichon de'oona gabii beehe. Qemi qemona meeti asho dabboo tunehe.

*Yaafe Macaafe Kiino:- Mishiraachechina'o Shuunoo 3*

## 44. Pheexiroosinaa Yowannisina Boonoshin Qolleebeeti Ashoon Wdiiheete

https://openbiblestories.org/l/kbr/story-44/

![](https://cdn.door43.org/obs/jpg/360px/obs-en-44-01.jpg)

Ikke areddoon Pheexiroosinaa Yowannisina Yaafee Kexooch hammii beeheete. Yaafee Kechi kellooch boonoshi shaggihoba gijjoon qolleebeeti bi indee maacoochee baata yesho tunee shiijjeti ikke uroon beeggiyeete.

![](https://cdn.door43.org/obs/jpg/360px/obs-en-44-02.jpg)

Pheexiroosi baata yeshe uroon manjii ciinnii'i, “Neech ta immemmi gijjoo amoona aalloone; tunetaa taach beeton immemmo taane. Yesuus shigoona tiyiree sha'abe!” iye.

![](https://cdn.door43.org/obs/jpg/360px/obs-en-44-03.jpg)

Bekkech Yeeri baata yeshe uroon wodiihe, biyoo shaaddee, capphiibee Yeerin galleto yechiye. Yaafe kechi gayee dagg beeti asheena'o woriganeheete.

![](https://cdn.door43.org/obs/jpg/360px/obs-en-44-04.jpg)

Asheena'o woditi uroon beega bekkech waa kiceeheete. Ppheexiroosiyoo ishichiye, “Hini uro woditoyich amoyichiye ittoshi woriganeebeeto? No hajjee giidoona oohee no de'a shuunoona wodiyaano noone. Bekki hini uroon wodiito Yesuusi giidoonaa bi immiibeeti mullee too'iyoonane.”

![](https://cdn.door43.org/obs/jpg/360px/obs-en-44-05.jpg)

“Roome ukkurooyich Yesuusin bi wuxemmoyich gettito ittoshine. Kashee shimboon wuxiyote, tunetaa Yeeri biin qitii duukketina'o daggoochee kiche. Ittoshi tuniibee echeti mooyo ittoshich gimo bi qayenoona, Masiihi xuuxoon bi beeggemmonaa qitemmona bi tunoon shiichi'i keemechina'o gettito ittoshina ceenniye. Illa Yeeri ittoshi axaaxoon hidiree bi wokkiiyemmoyich, ittoshi axaaxee gommoochee and Yeer waan wottebote!”

![](https://cdn.door43.org/obs/jpg/360px/obs-en-44-06.jpg)

Yaafe kechi ukkureena'o Ppheexiroosinaa Yowannisina boonoshi yibbaatee beetona oogeton ippeheete. Ebich yechii'i cuyee kexooch gechiiheete. Tunebaani meeti asheena'o Ppheexiroosichi qaaroon waaye'i iberiiheete, boonoshi mulloon Yesuusi toommooch too'iitina'ochi haddoo uuche hum bedo tunehe.

![](https://cdn.door43.org/obs/jpg/360px/obs-en-44-07.jpg)

Dechara Ayihudee ukkureena'o, Pheexiroosinaa Yowannisinon bare ukkureena'o aafooch deebiyeete. Pheexiroosinaa Yowannisinon “koni giidoona oohee koni shigoonane hini bi baatoo yesheti uroon ittoshi wodiito?”i'i echeheete.

![](https://cdn.door43.org/obs/jpg/360px/obs-en-44-08.jpg)

Pheexiroosi ishichii wochiye:- “Hini uro Masiihi Yesuus shigoona wodi'i ittoshi aafooch neexetone. Ittoshi Yesuusin yooddihote, tunebaani Yeeri qitii duukketina'o daggoochee biin kichiye! Ittoshi bi waan wotteyaano ittoshine, tunebaani Yesuusi giidoona tuno qayigaata bare gommona wodo aalloone!”

![](https://cdn.door43.org/obs/jpg/360px/obs-en-44-09.jpg)

Pheexiroosinaa Yowannisina aafo kupphe'i boonoshi yibbaatoon beeggi'i keqqiyeete, ebiyoo bushittinooche doyo dane'i dicaanena'o boonoshi tunoon ciino boonoshi hakkitochiye. Tunebaani arooba hini asheena'o Yesuusina tookkii boonoshi beemoon shalligi daneheete. Pheexiroosinaa Yowannisina toommooch boonoshi miichetoye gubb gawukkii daachiiheete.

*Yaafe Macaafee Kiino:- Mishiraachechina'ochi Shuuno 3:1-4:22*

## 45. Filipphoosinaa Topphiyee Iraashoona

https://openbiblestories.org/l/kbr/story-45/

![](https://cdn.door43.org/obs/jpg/360px/obs-en-45-01.jpg)

Qaabbe baareekechi wulleena'o daggoochee Isxifaanoosi getteebeeti ikke uroo beehe. Aroo gaawe shigechonaa Yaafa Ayaanoonaa shalligoona ceenniti ashoone. Isxifaanoosi meeti woriganikkiti mooyina'on shuunetonaa asho Yesuusi toommooch bi mullon too'iyemmon tate naboon giddii beeti ashoone.

![](https://cdn.door43.org/obs/jpg/360px/obs-en-45-02.jpg)

Ikke areddoon Isxifaanoosi Yesuusichon dojjii bi beetaa, Yesuusi toommooch boonoshi mulloon too'iyaani ikkikkeena'o tiyi'i Isxifaanoosina taggeheete. Oogeton kaaree'i Ayihude wulleena'oyich koote mooyon tippiyeete. “Muusinochonaa Yeerinochonon gonde mooyo bi yibbaatee beetaa waayetone!” iyeete. Ebich Muusichi calle dojjechina'o Isxifaanoosin yechi'i, kiceeti qeeshee guudonaa Ayihudee nallechina'o waan deebiyeete. Aroochaano Isxifaanoosi toommooch bare koote miixeena'o miixeheete.

![](https://cdn.door43.org/obs/jpg/360px/obs-en-45-03.jpg)

Qeeshee guudo “Hini mooyo iberoone?” i'i Isxifaanoosin echehe. Isxifaanoosi Abrahami yemeenoochee tiijjii'i Yesuusi yemeenooch beddaaha Yeeri tuniiti meeti inde mooyina'on, wotta Yeeri asheena'o bi toommooch kuxaanoon hukkoo boonoshi tiijjoon shalligichii'i boonoshi echoon wochiye. Aroochee ishichiye, “Illa hini getaa waayeyaani, hukkechi ittoshi ittoshi, Yeerin xuqqiti, bi keemechina'on wuxiti ittoshi qaabbechina'oommon bulli aaboon Yaafe Ayaanoyich de'a getaachote. Tunebaani ittoshi boonoshiye beshe gondoon tuniitote. Masiihin wuxitote!

![](https://cdn.door43.org/obs/jpg/360px/obs-en-45-04.jpg)

Aree gaata Ayihudee nallechina'o ebin boonoshi waayehoba boonoshi boonoshi waamon boonoshi uppii'i qaaroon oogichi'i boonoshi cookimmi wottoon kaareheete. Isxifaanoosin geechii katamoyee maach kichii'i wuxemmoyich xaqqoona yexxiyeete.

![](https://cdn.door43.org/obs/jpg/360px/obs-en-45-05.jpg)

Isxifaanoosi xaqqoona yecheebee, “Ta Doono Yesuuso! Ta kasheen de'e” i'i cookiye. Gurete'i, “Ta Doonocho! hini axaaxoon boonoshi toommooch haddiyaahine!”i'i wochinnoon oogichii cookiye. Aroochee qitiye.

![](https://cdn.door43.org/obs/jpg/360px/obs-en-45-06.jpg)

Arooba Sawuli getteebeeti ikke gurimaashoo Isxifaanoosin wuxiti asheena'ona mashaamii'i boonoshi xaqqoona yexxiibee goor aroo boonoshi tahoon quyee beehe. Ebi arooba Yerusalem beeti meeti asheena'o Yesuusichi asheena'o toommooch oogeti du'on deebiyeete. Ebich Yesuusichi asheena'o bulli bare showooch shaceheete. Tunebaani boonoshi shacetaanoona boonoshi shaggito bullich Yeerichi qaaroon gettiyeete.

![](https://cdn.door43.org/obs/jpg/360px/obs-en-45-07.jpg)

Yerusalemee shacetina'o daggoochee ikkoo Filipphoosi getteebeeti ashoone. Shamaari katamooch hammii'i Kiristoosichon bi gettaa meeti asheena'o boonoshi mulloon Yesuus toommooch too'iiheete. Ikke areddoon Yeeri waanee wochee waati ikke maraakoo barahoo waan daamii beeti gommon yeshei'i Filipphoosich gettiye. Filipphoosiyoo ebi gommona hammii bi beetaa, gaarin yebbe'i hammiibeeti ikke Topphiyee ukkuroon beeggiye. Ebiyooba Filipphoosin Yaafe Ayaano “Gaari toommooch beeti uro waan gidderee biinna danebe!” iye.

![](https://cdn.door43.org/obs/jpg/360px/obs-en-45-08.jpg)

Filipphoosiyoo woccii hammi'i, uro keemechi Isiyasi kooriti macaafooche ikke haaroon bi shemmeebeetaa waayehe. Uro shemmeto, “Guureyemmi bagoyichommon biin gasheheete; bagoo cikkiimmoommon bi noonoon wochaanoone. Xu'ee nalloon bi toommooch nalliyeete; biin oogiyaanena'one. Bi kasho showee toommooch beeyaaye getaa bacheetone” ii beetoniye.

![](https://cdn.door43.org/obs/jpg/360px/obs-en-45-09.jpg)

Filipphoosi Topphiyee ashon “Iberoon ne shemmaabeeto ne mullooch giyiibeete?”i'i echehe. Topphiyee ashoo, “Taach kaachi gettemmi asho aalloon aabichiree ta mullooch giyehe?“ iye. Aroochee gaarin neechii'i, “Hini gaariich keyiree kotebe!”i'i Filipphoosin qollehe. Bekkech Filipphoosi are gaariich kechii kotehe. “Keemecho koniniye bi gettiibeeto? Biiniye, oohee barooniye bi gettiibeeto?” iye.

![](https://cdn.door43.org/obs/jpg/360px/obs-en-45-10.jpg)

Isiyasi koorito Yesuusichon bi tunoon Topphiyee ashoyich gaawuchii arichiihe. Wotta Filipphoosi Yesuusichon gettiibeeti mishiraachee qaaroon bare Yaafe Macaafoochee daakkii'i gettiye.

![](https://cdn.door43.org/obs/jpg/360px/obs-en-45-11.jpg)

Filipphoosinaa Topphiyee ashona gommo hammiibee aaco beetooch shaggiyeete. “Ebiyoche, hiniich aaco beetone; aacona ta afaalleyaachemmoyich, taan bajjemmi mooyo amoone?”i'i echehe. Gasheebeeton “Gaarin neechibote!” iye.

![](https://cdn.door43.org/obs/jpg/360px/obs-en-45-12.jpg)

Ebich gutte'i aacooch kindiyeete; Filipphoosiyoo Topphiyee ashoon aacona afaalliye. Aacoochee boonoshi kechimmona, Doono Yeerichi Ayaano Filipphoosin diqqoona tiijjii'i bare xaa'ooch daammiye. Yesuusichon asheena'oyich geton yechiye.

![](https://cdn.door43.org/obs/jpg/360px/obs-en-45-13.jpg)

Topphiyee ashoo Yesuusin bi ariitoyich emiriibee bi gommon yechiye.

*Yaafe Macaafe Kiino:- Mishiraachechina'o Shuunoo 6:8-8:5; 8:26-40*

## 46. Sawuli Yesuus waan Wotto

https://openbiblestories.org/l/kbr/story-46/

![](https://cdn.door43.org/obs/jpg/360px/obs-en-46-01.jpg)

Sawuli Isxifaanoosin wuxiti asheena'ochi tahoon quyeebee echeti gurimaashoone. Yesuusi toommooch bi mulloon too'iyaano bi tunetoyich Yesuusich asheena'on yookkii du'ii beehe. Anaamina'onaa maacheena'onon yeshi cuyee kexooch gechiyaa Yerusalemaa kexoochee kexooch guudii beehe. Ayihudee qeeshee guudo arooch beeti kittinneena'on bi yechemmonaa Yerusalem wochi bi deebemmonoyich Damaasiqi katamooch bi hammemmoyich daagoon immiye.

![](https://cdn.door43.org/obs/jpg/360px/obs-en-46-02.jpg)

Sawuli hammiibee Damaasiqa bi katinnihoba, diq xeeyo xeejjii'i bi waccoommon shimaayoochee bekko bi guudoona waccii aaxxehe. Biyoo bekkech showooch dihiye. Aroochee ikke asho “Sawulo! Sawulo! Amoyich taan du'iyabeetine?” ii bi getaa waayehe. Sawuliyoo, “Ta Doonocho! Ne koni neene?”i'i echehe. Doono biich wochi'i, “Ne du'iya beeti Yesuusi taane. Ne taan du'iyabeeto neene!”i'i wochiye.

![](https://cdn.door43.org/obs/jpg/360px/obs-en-46-03.jpg)

Sawuli showoochee bi tiyihoba, bi aafoon bi gaxxaa, ciinnemmon qajjiye. Ebich asheena'o bi kishoon yechi'i yaabiibee, Damaasiqa daammiyeete. Biyoo maataanoon, uyaanoon keejj qeyiye.

![](https://cdn.door43.org/obs/jpg/360px/obs-en-46-04.jpg)

Are Damaasiqa Hanaani getteebeeti ikke Yesuusichi asho beehe; Doono Yeeri Hanaanich “Sawuli getteebeeti, ikke uroon qaawibe! Wochinnoon bi ciinnemmoyich, ne kishoon bi shimbooch kotiibe” iye. Tunebaani Hanaani, “Ta Doonocho! Hini uro ne asheena'ochi toommooch ambiche gondoon bi shuuneto gaata waayeto taane” iye. Yeeri wochii'i, “Hini uro meeti aageteena'oyich, taateena'oyich, Isra'eeleena'oyichoo taachon bi miixemmoyich taach ta kaacceti qiicoone. Ebich bi waan hambe! Taachon miixeya ambiche xuuxoon bi beeggemmo gaata ta biich bekkiyemmo taane” iye.

![](https://cdn.door43.org/obs/jpg/360px/obs-en-46-05.jpg)

Ebich Hanaani Sawuli kexooch hammiye. Kishoon bi shimbooch kotii'i, “Ta manoo Sawulo! Hini katamooch ne waabeetaa, gommoochaa neech bekketi Yesuusi wochinnoon ne aafo ciinnemmonaa Yaafe Ayaanoona ne ceennemmonoyich, ne waan taan deejjitone” iye. Bekkech bi aafo ciinniye, Hanaaniyoo aacona biin afaalliye; maayoonoo maa'i kupphehe.

![](https://cdn.door43.org/obs/jpg/360px/obs-en-46-06.jpg)

Sawuli bekkech “Yesuusi Yeerichi Bushoone” iibee Damaasiqa beeti Ayihudeena'oyich Yesuusi aroo Kiristoosi bi tunoon xiishii arichiyo yechiye. Ayihudeena'o Yesuusichi asheena'on alliyaa qiiceti uro and Yesuusi toommooch mulloon bi too'iyoona woriganeheete! Sawuli Yesuusi Masiiho bi tunoon xiishoona Ayihudeena'o iberiyeemmon tuniihe.

![](https://cdn.door43.org/obs/jpg/360px/obs-en-46-07.jpg)

Meeti aaboyee gubb Ayihudeena'o Sawulin wuxiya echeeheete. Boonoshiyoo Sawulin wuxiya katamee kelloon quyeebeeti asheena'on daachiiheete. Tunebaani Sawuli boonoshi echeyoon waayehe, Yesuusichi asheena'oo bi muriccemmon gaacheheete. Ikke xumoon Sawulin daammi'i, mokkooch geddii xaqqee gayee gutte daggeexi aahoona beshii'i woderoona kindiiheete. Sawuli muriccii bi iitoye gubb, Yesuusichon geton yechiye.

![](https://cdn.door43.org/obs/jpg/360px/obs-en-46-08.jpg)

Sawuli Yerusalem beeti Yesuusichi asheena'ona daneya arooch hammiye, tunebaani boonoshi biin shattiyeete. Arooba Barinabaasi getteeti Yesuusi asho Sawulin mishiraachechina'o waan daammi'i, Damaasiqi katamoochaa aafoon kupphe'i Yesuusichon bi geton gettiye. Arooye gubb Yesuusi asheena'o de'ai'i Sawulin boonoshi dagg xa'iyeete.

![](https://cdn.door43.org/obs/jpg/360px/obs-en-46-09.jpg)

Yerusalemaa tiyiti du'oona shaceti ikkikke Yesuusichi asheena'o Antook beddaaha wokkii hammii'i Yeerichi qaaroon gettiyeete. Antook beeti meeti asheena'o Ayihudeena'o tooneete, tunebaani meeti asheena'o batti battich boonoshi mulloon Yesuusi toommooch too'ii'i Doono Yeer waan wotteheete.

![](https://cdn.door43.org/obs/jpg/360px/obs-en-46-10.jpg)

Antook beeti Yesuusi asheena'o Doono Yeerich coomii, corootii boonoshi beetaa, ikke areddoon Yaafa Ayaano “Barinabaasinaa Sawulinon ta ceeggeti shuunoyich bariibote!” iye. Ebich Antooki baarekexooch beeti maddechina'o Barinabaasinaa Sawulinoyich coomii, corootii boonoshi itoyee gubb, boonoshi shimbooch kishoon kotii'i ukkuriiheete. Aroochee bare meeti xaa'ooch Yesuusichi mishiraachoon boonoshi gettemmon daachiiheete. Barinabaasinaa Sawulina meeti yaroochee ashena'on dojjiyeete, meetina'oo boonoshi mulloon Yesuusi toommooch too'iiheete.

*Yaafe Macaafe Kiino:- Mishiraachechina'ochi Shuunoo 8:3, 9:1-31, 11:19-26, 13:1-3*

## 47. Phawuloosinaa Silaasina Filippisiyoosi Beechi

https://openbiblestories.org/l/kbr/story-47/

![](https://cdn.door43.org/obs/jpg/360px/obs-en-47-01.jpg)

Sawuli Roomi taatittine showoo bulliich bi hammii bee goor, Roomee noonoona “Phawuloosi” getteeti bi shigoona ceekkon yechiye. Ikke areddoon Phawuloosinaa bi nuucho Silaasina Yesuusich mishiraachoon getta Filippisiyoosi showooch hammiyeete. Asheena'o corootiya boonoshi kiceeti katamee maach aachi gash beeti xaa'ooch hammiyeete. Arooch Liidi getteyabeeti giixechi ureen daneheete. Aree Yeerin shunnaabeetinaa Yeerich goyinnaabeeti ureene.

![](https://cdn.door43.org/obs/jpg/360px/obs-en-47-02.jpg)

Arooba Phawuloosi gettiibeeton manjjiiree bi ellemmoyich, Yeeri bi mulloon qechiye. Biinnaa bi kechi asheena'ona aacona afaalleeheete, ta kexooch taanna tookki beebote iya'a Phawuloosinaa silaasinon manjjiya qollahan, ebich boonoshiyoo biinaa bi kechi asheena'ona tookkii beeheete.

![](https://cdn.door43.org/obs/jpg/360px/obs-en-47-03.jpg)

Phawuloosinaa Silaasina corootee xaa'och meeti aaboon ashoona danee beeheete. Bulli areddoon are corootee xaa'ooch boonoshi hammii beehoba, eqqaabeetinaa bi doonjjeena'oyich kaayaabee wodde gijjoon giijjaa beeti ikke keemech gonnee beehan.

![](https://cdn.door43.org/obs/jpg/360px/obs-en-47-04.jpg)

Areyoo boonoshi hammimmo bulliich dabbaabee, “Hini asheena'o ittoshi wodemmi gommon ittoshich gettiibeeti Beshe Nuggushoo Yeerichi wocheyechina'one!” iyaabee cookaa beehan. Phawuloosi iriteemmii wottoon ishichaa cookaa beehan.

![](https://cdn.door43.org/obs/jpg/360px/obs-en-47-05.jpg)

Ciiroochaa ikke areddoon keemech gonnee aafichoommon cookoon bi yechemmona Phawuloosi bi waan wotte'i, busheechi toommooch beeti eqqoon “Yesuus Kiristoosichi shigoona neen calleto taane; hini bushee toommoochee tibe!” iye. Eqqoo bekkech bi toommoochee tiyihe.

![](https://cdn.door43.org/obs/jpg/360px/obs-en-47-06.jpg)

Keemech gonneechi doonjjeena'o oogeton kaareheete. Eqqo bi toommoochee goojjitoye goonee asheena'oyichi gubbi mooyoon geto hakkaacheemmi bi tunoon ariiheete. Ebiyoo asheena'o toommooch shaggemmi mooyoon geto hakkaachemmi bi tunetoyich biich gijjoo qocaacheete getone.

![](https://cdn.door43.org/obs/jpg/360px/obs-en-47-07.jpg)

Ebich keemech gonneechi doonjjeena'o Phawuloosinaa Sillaasinon yechi daamii'i Roomechi ukkureena'o afooch giddiiheete. Boonoshiyoo boonoshin xoobbii tiyii cuyee kexooch geddiyeete.

![](https://cdn.door43.org/obs/jpg/360px/obs-en-47-08.jpg)

Cuyee kechi quyechina'oo Phawuloosinaa Sillaasinon kechi gatooch giijji'i, boonoshi baatoon giinde'i cuchiyeete. Tunetaa xumi gutte qeellimooch Phawuloosinaa Sillaasina corootiibee shoddoona Yeerin galletee beeheete.

![](https://cdn.door43.org/obs/jpg/360px/obs-en-47-09.jpg)

Arooba diq cuyee kexo shuurimmi wottoon, oogeti showee qewo tunehe! Bekkech cuyee kechi kelleena'o bulli qecheeheete, cuchetina'o bullichi cuyo biishehe.

![](https://cdn.door43.org/obs/jpg/360px/obs-en-47-10.jpg)

Cuyee kechi quyecho tokketoochee tii cuyee kechi kelleena'o qecheyoon beeggi'i keqqiye! Cuchetina'o aalletina'o biich shaahaa, bi kashoon aaliya sheefoon kaacciye. (Cuchetina'o muriccemmon bi tunii gaata Romee taatoo biin wuxemmo tunoon ariibeetone.) Tunetaa Phawuloosi ebin ciinnii'i bi qaaroon oogichii, “Ne toommooch gondoon shuuniyaahine! No bulli hiniich beeto noone!” ii cookiye.

![](https://cdn.door43.org/obs/jpg/360px/obs-en-47-11.jpg)

Cuyee kechi quyecho Phawuloosinaa Sillaasino waan qeweebee waa'i “Ta doonina'ote! Ta wodemmoyich aabichibote?”i'i echehe. Phawuloosiyoo “Ne mulloon Doono Yesuusichi toommooch too'iibe! Neennaa ne kechi asheena'ona wodemmo ittoshine” ii wochiye. Cuyee kechi quyecho bekkech xumoona boonoshin daammi'i, boonoshi mayoon aacona machiye. Phawuloosiyoo kechi dagg beeti ashena'o bullich Yesuusichi mishiraachee qaaroon gettiye.

![](https://cdn.door43.org/obs/jpg/360px/obs-en-47-12.jpg)

Aree hillooch cuyee kechi quyechonaa bi kechi asheena'o bullina boonoshi mulloon Yesuusi toommooch too'ii'i aacona afaalleeheete. Ebiyee gubb, Phawuloosinaa Sillaasinon bi kexooch daammi'i, maayoon boonoshich bi giddiitaa tookkii'i emiroona wucwucciheete.

![](https://cdn.door43.org/obs/jpg/360px/obs-en-47-13.jpg)

Dechara Roomechi nallechina'o Phawuloosinaa Sillaasinon cuyee kexoochee biichii'i Filipphisiyoosee boonoshi hammemmon gettiyeete. Phawuloosinaa Sillaasina, Liidinaa ikkiikke bare xibeena'on guudii ciinniichi katameen gawukkii hammiyeete. Yesuusichon getteebeeti mishiraacho gabinnii, bareekexoo dicii hammiyeete.

![](https://cdn.door43.org/obs/jpg/360px/obs-en-47-14.jpg)

Phawuloosinaa bare kittinnee wulleena'ona Yesuusichon mishiraachoon gettiibee, wottoo dojjiibee meeti katameena'ooch hammiyeete. Wotta kittinnee guupheena'ooch beeti Yesuuchi asheena'on kupphiyoonaa dojjoonoyich meeti korichoon kooriyeete. Eboshi koricheena'oochee ikkiikkeena'o Yaafe Macaafee dagg giitina'one.

*Yaafe Macaafee Kiino:- Mishiraachechina'o Shuunoo 16:11-40*

## 48. Yesuusi Gibenikkoona Icheti Masiihone

https://openbiblestories.org/l/kbr/story-48/

![](https://cdn.door43.org/obs/jpg/360px/obs-en-48-01.jpg)

Yeeri shoween bi hallihoba bulli mooyo hullimalli tatoone. Axaaxoo aalloone. Addaaminaa Hewaanina shuneebeeheete, Yeerinoo shunnii beeheete. Biiyoo oohe qitoo aalloone. Yeeri showee tunemmon bi qaawito ebiyoommoniye.

![](https://cdn.door43.org/obs/jpg/360px/obs-en-48-02.jpg)

Sheexaanoo Hewaanin muriciyaa dingeroona tunee'i biich yibbaatiihe. Aroochee biinaa Addaamina Yeeri toommooch axaaxoon shuuneheete. Axaaxoon boonoshi shuunee naboona showee tookk beeti ashoo bulli biiyehe, qitiino iye.

![](https://cdn.door43.org/obs/jpg/360px/obs-en-48-03.jpg)

Addaaminaa Hewaanina axaaxoon boonoshi shuunee naboona ebiye beshe gonde mooyoona tunetone. Ebiyo Yeerichi shixechina'o boonoshi tunoone. Ebina tiitona bulli asho aroobee tiijjii'i bi shiijjeebeeto axaaxechoonaa Yeerichi shixechona tune'iniye. Yeerinaa ashona dagg beeti shuno axaaxee naboona kuxehe. Tunebaani Yeeri ebi are shunoon wochooch gabo gedditone.

![](https://cdn.door43.org/obs/jpg/360px/obs-en-48-04.jpg)

Hewaani yareena'o daggooche ikkoo Sheexaanoochi qelloon bi qiccemmon, Sheexaanoo uroyichi xekkon bi mayiyeemmon Yeeri gibenikko immitone. Ebiyo Sheexaano Masiihin wuxiyemmo bi tunoone. Tunebaani Yeeri wochi biin tiijjemmo bi tunetoyich Masiihi Sheexaanoochi giidoon bulli yemeenoyich qiccemmone getone. Meeti natoye gubb Yeeri Masiihi Yesuusi bi tunoon gallii bekkiihe.

![](https://cdn.door43.org/obs/jpg/360px/obs-en-48-05.jpg)

Yeeri shoween Aallee aacona bi aallihoba, bi toommooch boonoshi mulloon too'iiti asheena'on wodiyooyich marikaboon qanniihe. Ebiyoomona asho bulli bi axaaxoona aalli bedo tunee bi beetaa, Yeeri bi toommooch boonoshi mulloon too'ii beetina'o bullin wodiyoyich Yesuusin immiye.

![](https://cdn.door43.org/obs/jpg/360px/obs-en-48-06.jpg)

Meeti balle natoyich qeesheena'o asheena'ochi axaaxooch shagg bede naxoon bekkiyoyich kuxaanoon asheena'oyichi keroon Yeerich deejjoon giddii beeheete. Tunebaani eboshi deejjeena'o boonoshi axaaxoon aalliyo hakkaanena'one. Yesuusi bulliye beshe qeeshee guudone. Biyoo bare qeesheena'oye bariti gommona showee tookk beeti asheena'ochi axaaxoon bayo hakkeemmi mixxe deejjoo tunii'i bi qelloon giddiihe. Yesuusi bulli asho shuuneti axaaxoo bullichi sheeroon bi deqqitoyich aroo qeeshee guudone.

![](https://cdn.door43.org/obs/jpg/360px/obs-en-48-07.jpg)

Yeeri Abrahamich, “showee toommooch beeti ashi yareenaꞌo bulli neenna diireyemminaꞌone”i'i gettiye. Yesuusi Abrahamichi yaroone. Biinna ashi yareena'o bulli diireetina'one. Ebiyoo Yesuusi toommooch bi mulloon too'ii beeti asho bi ikkiikkoona wodito bi tunetonaa Abrahamichi yaafe yaroo bi tunetonochiye.

![](https://cdn.door43.org/obs/jpg/360px/obs-en-48-08.jpg)

Yeeri Abrahamich bi bushoo Yisaaqin deejjoo tuniiree bi immemmon bi getihoba, Yeeri bi bushoo Yisaaqi keroon deejjee bagoon giddiihe. No bulliyona no axaaxoona qita bedehone! Tunebaani Yeeri no keroon deejjoo tuneree bi qitemmoyich Yeeri bago tuneti Yesuusin nooch immiye.

![](https://cdn.door43.org/obs/jpg/360px/obs-en-48-09.jpg)

Yeeri Gibitse showooch ciireexi naxoon bi deejjihoba bachaalli bage baaddoon boonoshi guuriyemmonaa bi damoon Kellee dambee shagoonaa gutte qoomoonooch boonoshi wucemmon Isra'eelee kechi asheena'oyich gettiye. Yeeri damoon bi ciinihoba kexina'on beshee'i hammiye, boonoshi qaabbe bushiishoono wuxaanoone. Ebi kiinechi doyoo beshee baaroo getaa arichetone.

![](https://cdn.door43.org/obs/jpg/360px/obs-en-48-10.jpg)

Yesuusi nooch no beshee baaree bagoone. Aroo hullimalli tatoonaa axaaxaalloone. Bi wuxeetoo beshee baaree aaboobane. Koniyona Yesuusi toommooch mulloon bi too'ihoba, Yesuusi damo are uroyich kere qoco tunehe, Yeeri naxoo are uron beshehe.

![](https://cdn.door43.org/obs/jpg/360px/obs-en-48-11.jpg)

Yeeri bi kaaciti bi asheena'o Isra'eelena'ona tookkii wogo giitone. Tunebaani and Yeeri ashoo bullich tuneemmi andire wogoon giihe. Ebi andire wogee naboona koni yaroocheenona tuneti asho mulloon Yesuusi toommooch bi too'ii gaata Yeerichi ashena'ochi ikkoo tunehe.

![](https://cdn.door43.org/obs/jpg/360px/obs-en-48-12.jpg)

Muusi Yeerichi qaaroon awaajjiti ooge keemechone. Tunebaani Yesuusi bulliye beshiti keemechone. Aroo Nuggushoone, ebich bi tuniiti mooyonaa bi gettiti mooyona bulli Yeerich shuunoonaa qaaroonane. Yesuusi Yeeri qaaroone bi gettee beeto ebichiye.

![](https://cdn.door43.org/obs/jpg/360px/obs-en-48-13.jpg)

Bi yareena'oochee ikkoo taato tuneree Yeeri asheena'o toommooch bulli yemeenoon hajjemmo bi tunoon Yeeri Dawitich gibenikkoo immiye. Yesuusi Yeeri bushoona Masiihoona bi tunetoyich, bulli yemeenooch hajjoon hakkiibeeti aricheti Dawitichi yaroone.

![](https://cdn.door43.org/obs/jpg/360px/obs-en-48-14.jpg)

Dawiti Isra'eelichi taatoone, tunebaani Yesuusi Halloo bullichi taatoone! Wotte waare bi taatittinoona tatoona digoona bulli yemeenooch hajjeemmone.

*Yaafe Macaafe Kiino:- Halloo 1-3, 6, 14, 22; Keyo 12, 20, 2 Saameeli 7, Hibree Macaafo 3:1-6, 4:14-5:10, 7:1-8:13, 9:11-10:18, Yaa'o 21*

## 49. Andire Yeerichi Wogo

https://openbiblestories.org/l/kbr/story-49/

![](https://cdn.door43.org/obs/jpg/360px/obs-en-49-01.jpg)

Ikke maraakoo Mariyami getteeti gidiireech Yeerichi bushoon shiyemmi bi tunoon gettiye. Ebich aree batt gidiiree beechaa anaami bushoon shiyaa'a bi shigoon Yesuusi iya shigiihan. Ebich Yesuusi ashoonoo Nuggushoono tunehe.

![](https://cdn.door43.org/obs/jpg/360px/obs-en-49-02.jpg)

Yesuusi aroo Nuggushoo bi tunoon xiishiimmi meeti woriganikkiti mooyina'on tuniitone. Aachi toommona hammite, aachi aayon cikkayite, meeti biiyechina'on iiwiite, yinneena'on ashi toommoochee yokkite, qititina'on tiijjite, wotta uuche koshonaa gutte haashoonon 5000'ye beshe asheena'oyich maanjjite.

![](https://cdn.door43.org/obs/jpg/360px/obs-en-49-03.jpg)

Wotta Yesuusi oogeti dojjechone, Yeeri bushoo bi tunetochoo hakkoona yibbaatetone.

![](https://cdn.door43.org/obs/jpg/360px/obs-en-49-04.jpg)

Aroo, ittoshi gijjoonaa bare mooyo bullinon ittoshi shunnii beetommon Yeerin shuno ittoshich qaawiihe i'i dojjiye.

![](https://cdn.door43.org/obs/jpg/360px/obs-en-49-05.jpg)

Yesuusi Yeeri taatittine showee tookk beeti mooyo bulliye oogeene iye. Konichona bulliye beshoo qaawiibeeti mooyo Yeerichi taatittinee gogecho tunoone. Yeeri taatittinooch gimoch ittoshi axaaxoochee wodoo ittoshich qaawiihe.

![](https://cdn.door43.org/obs/jpg/360px/obs-en-49-06.jpg)

Yesuusi ikkiikke asheena'o bi waan woteree boonoshi wodemmonaa bareena'o wotta wotteyaacheemina'o boonoshi tunoon dojjiyee. Ikkiikke asheena'o qeemi showoommina'one iye. Yesuusichi mishiraachoon deqqii'i wodiyeete. Bare asheena'o Yeeri qaaro gimo hakkaani, gommi gasheexi xaqqe showoommina'one. Eboshi Yesuusichon getteebeeti mishiraachee wochoon de'aanena'onaa Yeerichi taatittinooch giyaanena'one.

![](https://cdn.door43.org/obs/jpg/360px/obs-en-49-07.jpg)

Yesuusi Yeeri axaaxechina'on oogichi bi shunon dojjiye. Eboshin maaroonaa bi bushiisheena'o tuniyoonoch qaawiye.

![](https://cdn.door43.org/obs/jpg/360px/obs-en-49-08.jpg)

Wotta Yesuusi Yeeri axaaxoon bi shixon nooch gettite. Addaaminaa Hewaanina axaaxoo boonoshi shuunehoba, ebi axaaxoo boonoshi yaroo bullin qaaqqitone. Ebich showee tookk beeti ashoo bulli axaaxoon shuunehe, Yeeri waaneeno wokkiye. Ebich bulli asho Yeerina shixecho tunetone.

![](https://cdn.door43.org/obs/jpg/360px/obs-en-49-09.jpg)

Tunebaani Yeeri showee toommooch beeti asheena'on oogichii bi shunnitoyich ikke bi Bushoon immiye; hini ikke bi Bushoon bi immito, mulloon bi toommooch too'ii beeto bulli, bulli yemeenee kashoon bi danemmonaa shiweree qaaqqooch bi giyaachemmonoyichiye.

![](https://cdn.door43.org/obs/jpg/360px/obs-en-49-10.jpg)

Ittoshi axaaxee naboona xuqqito ittoshi tunetoyich ittoshi qitoo tatoone. Yeeri ittoshin kaari beddiye, tunebaani bi kaaroon ittoshi toommooch woniyo qajjiichi Yesuusi toommooch woniihe. Yesuusi masqale toommooch bi qitihoba ittoshi naxoon deqqiye.

![](https://cdn.door43.org/obs/jpg/360px/obs-en-49-11.jpg)

Yesuusi cir axaaxoon shuune ariyaanoone, tunebaani ittoshi axaaxoonaa showee tookk beeti asho bi ikkiikkoochi axaaxoonon echiyooyich naxoon mi'onaa ciroona deejjo tunoonoyich shunni'i daagiye. Yesuusi bi qelloon bi deejjitoyich, Yeeri axaaxoo taane ito bullin, gonde axaaxoona tune gaata maaroo hakkiye.

![](https://cdn.door43.org/obs/jpg/360px/obs-en-49-12.jpg)

De'e shuuneena'o ittoshin wodiyoo hakkaacheete. Yeerina ittoshi mashaameemmon tuniyo ittoshi hakkemmi mooyo amoona aalloone. Ittoshi axaaxoon mayo hakkemmo Yesuusi baachiye. Yesuusi Yeeri bushoo bi tunoon, ittoshi keroon masqale toommooch bi qitoon, Yeeriyoo biin qitoochee tiijjoon mulloona too'iyoo baach ittoshin qaawiihe.

![](https://cdn.door43.org/obs/jpg/360px/obs-en-49-13.jpg)

Yeeri bi mulloon Yesuusi toommooch too'ii beetonaa Yesuusin bi doono tuniibeeti asho koninona wodiihe. Gaannecho tunebot oohe girecho tunebot, anaamo tunebot oohe maache tunebot, geeno tunebot oohe gurimaashoo tunebot, oohe aabiichona beebot ebi iritaanoone. Yeeri biina manjje mashaamoo ittoshich bi tunemmoyich Yesuusi toommooch mulloon ittoshi too'iyemmon qaawiye.

![](https://cdn.door43.org/obs/jpg/360px/obs-en-49-14.jpg)

Yesuusi Ittoshi mulloon ittoshi too'iyemmonaa afaalleyeemmonon ataallii beetone. Yesuusi Masiiho, Yeerich mixxe bi bushoo tunooon iberiihote? Axaaxecho ittoshi tunoonaa Yeeri ittoshin bi naxo tato tunoon iberiibeetote? Yesuusi ittoshi axaaxoon aalliyooyich masqale toommoochaa bi qitoon iberiibeetote?

![](https://cdn.door43.org/obs/jpg/360px/obs-en-49-15.jpg)

Yesuusinaa aroo ittoshich bi shuuneti shuunoona toommooch mulloon ittoshi too'iito gaata kittinnoo ittoshine! Yeeri Sheexaanoonaa manderee bi taatittinoonoochee kichii'i Bi bekkee taatittinnooch ittoshin gedditone getone. Yeeri geenetoonaa axaaxechi ittoshi gommon aalliichii andirooonaa cadiqe gommon ittoshich immitone.

![](https://cdn.door43.org/obs/jpg/360px/obs-en-49-16.jpg)

Ittoshi kittinno ittoshine, Yesuusi shuuneti shuunee naboona Yeeri ittoshi axaaxoon maaritone. And Yeeri ittoshin bi ciinnii beeto katini bi xiboo tunii'iinani shixecho tunii'ii toonone.

![](https://cdn.door43.org/obs/jpg/360px/obs-en-49-17.jpg)

Yeerichi xiboonaa Doono Yesuusichi maddechina'ona ittoshi tune gaata, Yesuusi dojjiibeeton de'a gettii waayehote. Kittinnoo ittoshi tunetaanoona, andoo axaaxoon shuunoyich dakiyote. Tunebaani Yeeri gibeneeto bi tunetoyich ittoshi axaaxoon ittoshi aanni gaata maariye. Axaaxoon ittoshi wochemmi giidoon ittoshich immiye.

![](https://cdn.door43.org/obs/jpg/360px/obs-en-49-18.jpg)

Yeeri ittoshi corootemmon, bi qaaroon ittoshi doyiyemmon, bare kittinneena'ona tookki Yeerich ittoshi goyinnemmon, ittoshich bi tuniitonoo bareena'oyich ittoshi gettemmon qaawiye. Ebosh mooyina'o bulli biinnaa ittoshina daggooch kupphe yeshoon halliyeete.

*Yaafe Macaafe Kiino:- Roomi 3:21-26, 5:1-11; Yowannisi 3:16; Maariqoosi 16:16; Qolaasiyasi 1:13-14; Guttinnee Qorontoosi 5:17-21; Ikkinnee Yowannisi 1:5-10*

## 50. Yesuusi Wottemmone

https://openbiblestories.org/l/kbr/story-50/

![](https://cdn.door43.org/obs/jpg/360px/obs-en-50-01.jpg)

2000 natooch beddaaha showee tookk beeti asheena'o bulli Masiihi Yesuusichon gettiibeeti mishiraachoon waayeebee beetina'one. Baareekexiyoo diccaabee and beddetine. Yesuusi yemeene ciirooch wottemmo bi tuneechon gibenikko immitone. Batt wotteyaano bi tunetaanoona bi gibenikkoon quyehe.

![](https://cdn.door43.org/obs/jpg/360px/obs-en-50-02.jpg)

Yesuusi wottoon quyaa no bee goor, Yeeri yaafeetonaa biin oogiibeeti bemona no beeyemmon qaawiye. Wotta bi taatittinneechon bareena'oyich no gettemmon qaawiye. Yesuusi showee tookk bi bee goor, “Bi dabbeena'o Yeerichi taatittinee mishiraachee qaaron showee toommo bulliich gettemmina'one; arooba yemeenee ciiro woyemmone” itone.

![](https://cdn.door43.org/obs/jpg/360px/obs-en-50-03.jpg)

Meeti ashi yareena'o andoo Yesuusichon waayeyaanena'one. Yesuusi shimaayooch bi wottoye shiichii'i, kittinneena'o mishiraachee qaaron ciroona waayeyaanena'oyich boonoshi bechemmon gettitone. Yesuusi, “Illa tiyiree hambote! Aagateena'o bulliich beetina'on ta dabbeena'on tuniibote!” “qeco woddoone!” itone.

![](https://cdn.door43.org/obs/jpg/360px/obs-en-50-04.jpg)

Wotta Yesuusi ishichiye, “Guuno bi doonoyee beshaanoone. Hini showee ukkureena'o taan boonoshi shixxitoommon, ta naboona ittoshin du'ii wuxiyemmiina'one. Hini showee toommeexi asheena'o ittoshin du'iiyemmina'one; tunebani kupphabote! Ta hini shoween hajjiibeeti sheexaanoon kochaa wochito taane. Tunetaa mulloon ta toommooch too'iyaa'a ciirooch beddaahaa manjjaa ittoshi kupphe gaata ittoshin Yeeri wodiyemmone!”

![](https://cdn.door43.org/obs/jpg/360px/obs-en-50-05.jpg)

Yesuusi yemeene ciiro bi tunehoba, ashi toommooch shaggemmi moyoon gallii bekiyoyich bi dabbeena'oyich ikke kiinoon gettiye. Ikke gochecho bi goyooch gaawe yaroon shookkiye. Tokketee'i bi beetaa bi kaaracho waa'i tepphee daggooch dadaddoon shookkichii hammiye.

![](https://cdn.door43.org/obs/jpg/360px/obs-en-50-06.jpg)

“Teepphoo collee bi dicihoba goyee doonjjoyichi shuunechina'o waa'i, ‘Doonocho! De'e yaroon shoohaano neene? Dadaddochi amoochee waahe?’i'i echeheete. Biyoo, ‘Ta kaarachone shookkito’” iye.

![](https://cdn.door43.org/obs/jpg/360px/obs-en-50-07.jpg)

“Bi shuunechina'o ‘And hamiree waaxi no bayon qaawaabeetine?’ iyeete. Tunetaa teepphee Doono wochi'i, ‘Dadaddoon waaxii ittoshi beetaa teepphoo tookki waaxemmone; qayote! qecci goorooba qeccechina'on dadaddoon shiichiree macibote! Qiriree qaaqqoona michibote! Teepphoon wotta ta gotooch gedote gettemmo taane’ i'i gettiye” iye.

![](https://cdn.door43.org/obs/jpg/360px/obs-en-50-08.jpg)

Bi dabbeena'o ebi shaahiyoo boonoshich gimo qajjiye, ebich galli bi arichiyeemmon Yesuusin echeheete. Yesuusiyoo ishichiye, “Gaawe yaroon shookkito Masiihine. Goyo wotta hini showeene. Gaawe yaroo Yeeri taatittinne asheena'one.”

![](https://cdn.door43.org/obs/jpg/360px/obs-en-50-09.jpg)

“Dadaddoo gondoyichi naayina'o tuneti asheena'one. Dadaddoon shookkiti kaarechi Daabiloosine. Maaye qecoo ciire yemeenon bekkiihe, qeccechina'o wotta Yeerichi maraakeena'one.”

![](https://cdn.door43.org/obs/jpg/360px/obs-en-50-10.jpg)

“Yemeene ciirooba, maraakeena'o daabiloosichi naayina'o tuneti asheena'o bullin ikke xaa'ooch kiciree bobibeeti qaaqqooch duppemmina'one, boonoshiyoo aroochaa cookkemmina'one, boonoshi gashoonoo qaacheemmina'one. Arooba cadiqeena'o boonoshi nihoochi taatittinnoochaa aaboyichoommon bekkemmina'one.”

![](https://cdn.door43.org/obs/jpg/360px/obs-en-50-11.jpg)

Wotta yemeene ciiroye aaf Yesuusi showooch bi wottemmonoo gettiye. Bi hammiti yawoona wotte woyemmone, ebiyoo bekkeebeeti achoona shimaajji quboona wotte woyemmone. Yesuusi bi wottehoba qititi kittinnoo bulli tiyiree Yesuusina gumoochaa danemmone.

![](https://cdn.door43.org/obs/jpg/360px/obs-en-50-12.jpg)

Arooba batt kashoona beeti kittinnena'o, shimaajji gumooch shotteere qitoochee tiiti bare kittineena'ona xa'eyeemmina'one. Aroochaa boonoshi bulli Yesuusina tookki tunemmina'one. Arooye gubb Yesuusi bi asheena'ona tookki hullimalli tato tuneti digoonaa ikkittinoona bulli yemeenooch beyeemmone.

![](https://cdn.door43.org/obs/jpg/360px/obs-en-50-13.jpg)

Yesuusi mulloon bi toomooch too'iibeetina'o bullich gubbichoon immoyich gibeniko immitone. Boonoshiyoo bulli yemeenoyich hullimalli tato tuneti diggoona beeyemmina'one, taatesho gettemmina'one.

![](https://cdn.door43.org/obs/jpg/360px/obs-en-50-14.jpg)

Tunebaani Yeeri mulloon Yesuusi toommooch too'iyaanena'o bulli toommooch nalliyemmone. Bulli yemeenoon boonoshi eeppemmonaa gashoon boonoshi qaachemmi shiwerooch boonoshin duppeemmone. Ciroona tahaani qaaqqoo boonoshin mechemmone, hipperoo ciroona kuxaanoon boonoshin maayemmone.

![](https://cdn.door43.org/obs/jpg/360px/obs-en-50-15.jpg)

Yesuusi bi wottehoba Sheexaanoonaa bi taatittino bullin aalliyeemmone. Sheexaanoon, Yeerin qajjiichii biich de'a iyiti asheena'ona tookki bulli yemeenoyich shiwerooch duppemmone.

![](https://cdn.door43.org/obs/jpg/360px/obs-en-50-16.jpg)

Addaaminaa Hewaanina Yeerich de'a geto boonoshi qayonaa axaaxoon showee tookk boonoshi deebonoyich, Yeeri shoween uppii'i aalliyoyichoo kuxiye. Tunebaani ikke aaboon Yeeri hullimalli tato tunemmi andire shimaayoonaa andire showoonon halliyemmone.

![](https://cdn.door43.org/obs/jpg/360px/obs-en-50-17.jpg)

Yesuusinaa bi asheena'ona ebi andire showooch beeyemmina'one, beeto bulli toommoochoo bulli yemeenoon taatemmina'one. Aro acimo bullin hidiyemmone, ebiye bekk xuuxo, ayinoo, eefo, gondo, biiyo, oohe qito beetaachemmone. Yesuusi bi taatittinoon diggoonaa iberoona qeejjiyemmone, bulli yemeenoyichoo bi asheena'ona tookki tunemmone.

*Yaafe Macaafe Kiino:- Maatiyoosi 24፡14, 28፡18; Yowannisi 15: 20, 16: 33; Yaa'oo 2:10, Maatiyoosi 13:24-30, 36-42, Ikkinne Tasalooni 4:13-5:1; Yaaqoobi 1:12; Maatiyoosi 22:13; Yaa'oo 20:10, 21:1-22:21*