# unfoldingWord Open Bible Stories — Konso

- Language code: `kxc`
- Canonical page: https://openbiblestories.org/l/kxc/
- Stories in this file: 50 of 50
- Published by: DokuWiki
- Last release: 2026-10-27
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Konso translation; it is not a translation of the whole Bible.

## 1. ኡመተ

https://openbiblestories.org/l/kxc/story-1/

![](https://cdn.door43.org/obs/jpg/360px/obs-en-01-01.jpg?direct&)

አሬ ከሞፐኸተ ዋን ቶይነ አክመ ዋቀ ፓዮተ ዌ ፕሰ ኮዴ፡፡ ሴመለ ዋቀ ፒታ ከ ዋ ፒተ ከረ ቻኤ ሌተ ሌህፐ ኡሜ፡፡ ዋቀ አፒተ ኡሜ ከመዬ፥ ፒተ ቱከንተ፤ ኡመ ዌ ተከን ኔፎ ቀረዬ እንቻን፤ ኡመ ስትይ ዋ ከረ ቸ ተከን ኔፎ እንኡመሜ፡፡ መ ኾር ሀፑረ ዋቀኤ ፕሸ ቀረ ካተውን፡፡

![](https://cdn.door43.org/obs/jpg/360px/obs-en-01-02.jpg?direct&)

ሴከመዬ ዋቀከ ክዴ፥ ‹‹ለአይተ አኮዶ›› ለአይተከ ኮዴ፡፡ ዋቀከ ለአይተሴ አክመ ፐቃር አኬ፤ ከ ክዴ፥ ‹‹ኩያተ›› ከ ሀሌ፡፡ ዋቀከ ኩያተ ከ ቱከንተ ኦልኬለ ሬኼ፥ ከ ቱከንተ ክዴ፥ ‹‹ሀልኬተ›› ከ ሀሌ። ዋቀከ ኩያተ ፓዮታት ለአይተ ኡሜ።፡፡

![](https://cdn.door43.org/obs/jpg/360px/obs-en-01-03.jpg?direct&)

ዋቀከ ኩያተ ለመታትይ፥ ዋ ፒተ ቀሮፔለ ቸ ሞንተ ኡሜ። ከ ፖረ አሴ ፐሆን ፕሸ ከ ሞንተ ኦልኬለ ሬኼ፡፡

![](https://cdn.door43.org/obs/jpg/360px/obs-en-01-04.jpg?direct&)

ኩያተ ሴሰታትይ፥ ዋቀከ ፕሸ ከ ፖረ ኮኬ አከ ኦልኬለ ሬኸመኔ ኮዴ፡፡ ዋቀከ ፖሮሴ ኮኬት ክዴ፥ ‹‹ፒተ›› ከ ፕሸ ክዴ፥ ‹‹ፐከቴተ›› ከ ሀሌ፡፡ ዋቀከ ዋ ኡሜ አከ ፐቃር አኬ፡፡

![](https://cdn.door43.org/obs/jpg/360px/obs-en-01-05.jpg?direct&)

ሴከመዬ ዋቀከ ክዴ፥ ‹‹ፒተ አቆረ ከ ድሽመደ እከ ሌከየ ዴህሶ፤›› እከ ቀረ ኮድቴ። ዋቀከ ዋ ኡሜ አከ ፐቃር አኬ፡፡

![](https://cdn.door43.org/obs/jpg/360px/obs-en-01-06.jpg?direct&)

ኩያተ ኡመተ አአርፈታትይ፥ ዋቀከ ፒርቶተ ከ ሌየ እሾ ሂከ ኡሜ፡፡ ዋቀከ ኩያተ ከ ሀልኬተ ከ ኤተደ ከ ፐረደ አከ ኦልኬለ ሬኸመኔ ኮዴ፡፡ ዋቀከ ዋ ኡሜ አከ ፐቃር አኬ፡፡

![](https://cdn.door43.org/obs/jpg/360px/obs-en-01-07.jpg?direct&)

ኩያተ ኬነታትይ ዋቀከ ዋ ፕሸ ከረ ከላነ እሾ ኸምፕረ ፕሰ ኡሜ። ዋቀከ ሴዴ አከ ፐቃር አኬ። ከ ዋ ኡመሜት ሰኬ፡፡

![](https://cdn.door43.org/obs/jpg/360px/obs-en-01-08.jpg?direct&)

ኩያተ ሌሀታትይ፥ ዋቀከ ክዴ፥ ‹‹ፒተ ቀረንዴሰ ፕናነ ፒሰ አኡመሜን፡፡›› እከ አከ ዋቀ ክዴ ቀረ ኮዴን፡፡ ሴኔፐዬ አዴሞ፥ ሆሬተ፥ አዴሞ አፒተን ዴሰ ትትመነ፥ አዴሞ ፕናነ ከፕነኤ ኮዴን፡፡ ዋቀከ ሴዴ አከ ፐቃር አኬ፡፡

![](https://cdn.door43.org/obs/jpg/360px/obs-en-01-09.jpg?direct&)

ዋቀከ ክዴ፥ ‹‹አከ ፐሃነኖ ከ አፕሰይኖ ምነ ነመ ኡመ፤ እሾነከ ፒተ ፕሰ ከ ፕናነ ፕሰ ቀረ ኡኩሜተ ሙክሰ ቀፕናዴን፡፡››

![](https://cdn.door43.org/obs/jpg/360px/obs-en-01-10.jpg?direct&)

ሴመለ ዋቀከ ፒተ ኩሴ ከ ነመ ኮዴ ከ ሀርምሼ፥ ከ ኔሰ ቻተ ዳኖ እሽ ዳሼ፡፡ መኸ ነሞሴትከ አታም ክደሜ፡፡ ዋቀከ ፖሮሴ አአታም እሽ ከሎኤ፥ ቆረ ሉከተ ድሼ ከ አከ ቶይቶኤ ኤዬኤው እሸ ኻዬ፡፡

![](https://cdn.door43.org/obs/jpg/360px/obs-en-01-11.jpg?direct&)

ከ ድሽመዶሴን አሉከተ ከረኤ ቆረ ኸውዴሰ ቸ ለክ ድሼ፤ ቆሮሴን ቆረ ኡፕነ፥ እሾነ ኔፎ፥ ቆይረ ቻተ ዳኖ ከ ቆይረ ዋ ፐቃረ ከ አኔቀ ኦልኬለ ኡፕነኖ፡፡ ዋቀከ አከ አታም ድሽመዶሴን አሉከተ ኦፐዬ ቆይረሴ አኡፕነ እሳሴ ዋ ፐቃረ ከ አኔቀ ኦልኬለ ኡፕነኖ መልይ፥ አከ ድሽመደ አሉከተ አአተ ሀሴ ፕሰ ደሞኤ እሽ ሌሌ። መ ኾር ኦቶን ቆይረሴ ዋ ፐቃረ ከ አኔቀ ኦልኬለ ኡፕነኖ ደመዬ፥ አክመ ቶኦ እሽ ሌሌ።

![](https://cdn.door43.org/obs/jpg/360px/obs-en-01-12.jpg?direct&)

ዋቀከ አከ ነመ ኸዋትይ ከላተድ እንፐቃርን እሽ ሌሌ፡፡ ፕናነፐዬ አአተም ቃርቃሰ ኮደ/ቃርቃረ ተከ ኔፎ እንቻኔይ፡፡

![](https://cdn.door43.org/obs/jpg/360px/obs-en-01-13.jpg?direct&)

ዋቀከ ሙክተ ኩተ አታም ቀረ ከቴ፤ ከ ኤቴ ሙኬዬ፥ ቅናድፐ ለፍተ ተከ ቄዴ ከ እስከቴተ ኮዴ ከ አታም ከፖፐን ዴኤ፡፡

![](https://cdn.door43.org/obs/jpg/360px/obs-en-01-14.jpg?direct&)

አታምከ ኤቴ እሼተ አኬዬ ክዴ፥ ‹‹እን አነው ፐሀተ፤ ሀማፐ ቴየቴይ፥ አእስከቴተ ክደምቶ፡፡›› ሴመለ ነመ ኣፐይሾ ከ ኣየሶኤ ዲሸ ከ እስከቴታድ ኦል ተከ ኮደ፡፡

![](https://cdn.door43.org/obs/jpg/360px/obs-en-01-15.jpg?direct&)

ዋቀከ ዲርተ እሾ እስከቴተ ፐሀነ አመታድትን ኡሜ፡፡ ከ እሾነ ሰኬ፤ ከ ክዴ፥ ‹‹ሄለ ሌከየ ከ ኦፐደ ከሱ ቀፕናደ፤ ከ ፒተ ቀረ እመከ።›› ዋቀከ ዋ ኮዴ አከፈየ ፐቃር አኬ፡፡ ከ ዌ ፕሰን ኸሶዴ። ሴዴ ፕሰከ ኩያተ ሌህ ከረ ኮድቴ፡፡

![](https://cdn.door43.org/obs/jpg/360px/obs-en-01-16.jpg?direct&)

ኩያተ ሌሀታትይ፥ ዋቀከ ኮደ ኡመተ ድክሼ። ከ ኩያተ ተፐታትይ ኮዳሴ አኮኖ ፕሰ ኬለዬ ኔሰዴ፤ ከ ሴመለ ኩያታሴ አተፐታት ሰኬ ከ ቁልቁለይሼ፡፡ ማነ መለ፥ ኩያሴ ኦፐዬ ኮዳድ ፕሰ ኬለዬ ኔሰዴይ፡፡ ዋቀ አሞንተ ከ ፒተ ከ ዋ ኦፐዬ ቸ ኡሞዬ፥ ፖረ አሴ ፐሆኔ ኮደሜን፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 1-2፡፡*

## 2. ጩፖተ ፒተ ቀሮፐ ከሌ

https://openbiblestories.org/l/kxc/story-2/

![](https://cdn.door43.org/obs/jpg/360px/obs-en-02-01.jpg)

አአታም እሾ እስከቴታድ ፖረሴ አድሽመደ አዋቀ እሾነ ኮዴ ከረ ከላኔዬ፥ አከተን ኸሶለየ። ለከንትይ ሉሌት ቻን፤ መ ኾር ሉሌት ቻተይሾ አከ ኦል ፎክሰደኔን ኮኔ፤ ማነ መለ፥ ጩፖተ ፒተ ቀረን ክቶይ፡፡ እሾነ ኔፎከ ድሽመደሴኔ አሉካተ ከረንዴሰ ፖረ ትትታውን ከ ዋቀ ኦል ቶረን፡፡

![](https://cdn.door43.org/obs/jpg/360px/obs-en-02-02.jpg)

ማ ኾር እለተይተ ኔቀ አማከኤ ድሽሞሴ ከረ ቸ። ከ እስከቴተሴ ካሰዴ ከ ክዴ፥ ‹‹ሄለ ዋቀ ኬቶ ሉከተ ድሽመዶሴን አሬ ከረ ቸ ፕሰ አከ አደምን እሽነ ሌሌ?››

![](https://cdn.door43.org/obs/jpg/360px/obs-en-02-03.jpg)

እስከቴተሴከ ኪቴ፣ ‹‹ዋቀ፥ ድሽመዶሴን አሉከተ ኦፐዬ ቆይረሴ አኡፕነ እሳሴ ዋ ፐቃረ ከ አኔቀ ኦልኬለ ኡፕነኖ መልይ፥ አከን ድሽመደ አሉከተ አአተ ሀሴ ፕሰ ደሞኤ እኖ ሌሌ፡፡ መ ኾር ኦቶን ቆይረሴ ዋ ፐቃረ ከ አኔቀ ኦልኬለ ኡፕነኖን ደመዬ ታክ ቁደ ኔፎ ከይናዬ፥ እቶተኔ እኖ ክዴ፡፡››

![](https://cdn.door43.org/obs/jpg/360px/obs-en-02-04.jpg)

ማከከ እስከቴተሴት ኦርሼ ከ ክዴ፥ ‹‹ሴዴ ዱካተን፥ እሽነ አቶተን፤ ኦቶን ሉከቶሴ ደምተኔዬ፥ አክመ እልዳስን ፐነመን አከ ዋ ኔቀ ከ አፐቃረ ኡፕነተኔ አከ ዋቀ ፐሀነተን ቆተ ዋቀ ኡፖ መለ፥ እንደመን እሽነ ኪን፡፡››

![](https://cdn.door43.org/obs/jpg/360px/obs-en-02-05.jpg)

እስከቴተሴ ኤቴ ሉከተ ቆይረሴ ደምተ ፐቃር፥ ከ እልተ ኬለ ነመ ኸሰንቶ ከ ኡፕነ አከተኤ ነመ ሰትንቶ ቶይቴዬ፥ ሉከተሴኤ ቄቴ ከ ደምቴ፡፡ ከ ዲርተሴ እሼተ ኦል ቾ ኩል ዳሴ፡፡ እሸከ ሉከተ ቆይረሴት ደሜ፡፡

![](https://cdn.door43.org/obs/jpg/360px/obs-en-02-06.jpg)

ኤኖው እልዳሶ ለክከ ፐነሜን፡፡ ከ አክመ ሉሌት ቻን ኡፕናዴን፤ ከ ሃሸ አከ ኦሀተ ምነ ሄድሰዴን ከ እስቁደን ዴከ ኤከይሼን፡፡

![](https://cdn.door43.org/obs/jpg/360px/obs-en-02-07.jpg)

አታም ከ እስከቴታድ፥ አከ ኔሰ ዋቀ ቆረሴኔ አድሽመደ ከረንዴሰ አአኖ ደከዬን ከ ፕሰን ዋቀ ቱረ ዴዴከዴን፡፡ ዋቀከ አታም ሀሌ ከ ክዴ ‹‹አይሸዬ ክተ?›› አታምከ ኦርሼ ከ ክዴ፥ ‹‹አከ ፖረሴ አድሽመ ከረንዴሰ አአንቶን ደከዬ፥ ከ ቆተን ሉሌት ቾ መለ ፉሬ ከ ዴከዴ፡፡››

![](https://cdn.door43.org/obs/jpg/360px/obs-en-02-08.jpg)

ዋቀከ እሽ ክዴ፥ ‹‹አከ ሉሌ ክቶ አይኖ ኬ ሌሌ? ሄለ ቆይረሴ አንኬ አጨጬ ከ ክዴ፥ <እንደመኔ> ደምቴ?›› አታምከ ክዴ፥ ‹‹እስከቴተሴ አአት አከ አነ ኦል ከላቶ አነ ዳሴ፥ እሼነ ሉከተ ቆይሮሴት አነ ዳሼ አንከ ደሜ፡፡›› ዋቀከ እስከቴተሴ ካሰዴ ከ ክዴ፥ አተ ሴኔ ማነ ኮቴ?›› እስከቴተሴከ ኪቴ፥ ‹‹ማከ አነ ሰሰፐዴ አንከ ደሜ፡፡››

![](https://cdn.door43.org/obs/jpg/360px/obs-en-02-09.jpg)

ዋቀከ ማከ ክዴ፥ ‹‹አጪጨሜ ኮድተ፤ ከ ከርተን ትትመተ፥ ከ ፒተ ሀይተ፤ ኬ እሾ እስከቴቶሴ ፓርከለ ኦል ኮድተን፤ ሄላት እሾ ሄላድከ አሴው ፓርከለ ኮደን፤ ሰኜተ እስከቴቶስት፥ መታይት ቱምተ፤ አትከ ከመንታድ ቆምተ፡፡››

![](https://cdn.door43.org/obs/jpg/360px/obs-en-02-10.jpg)

ዋቀከ እስከቴተሴት ክዴ፥ ‹‹ኦቶ ኻይንቶዬ፥ ሱሩምታይትን ኮፕሸ፤ አከ ዲርታይት ቁዶፐው ዴሀተ ሄነተ፤ እሸከ ኬ ቀሮፔለ ቻደ፡፡››

![](https://cdn.door43.org/obs/jpg/360px/obs-en-02-11.jpg)

ዋቀከ አታም ክዴ፥ ‹‹ዴሀምተ እስከቴታይትእ ደከይቴ ከ ቆይረ ሉከተሴ እንኬ አጨጬ ከ ክዴ፥ <እንደመን> ደምቴይ፥ ፒተ ኬ ምነኔ አጪጨምቶ፡፡ ሀከ ክቶዬ ፕሰ እያልተከ ኦፐዬ ደምተ ያለይት ቴይተ፡፡ ሴከመዬ እቶተ፤ አፒተይ ፒቶፖፐዌ ኦርተ፡፡›› አታምከ እስከቴታድ ቆተ ኣየ ኦረ ፕሰ ኮድቴ መለ፥ ‹‹ሄዋን›› ክዴ ከ ሀሌ፤ ሄዋን ክዴተ፥ ‹‹አቻተ ዳኖ ክዴተ።›› ዋቀከ ኮከ አፕነንተ ሀርምሼ ከ አታም እሾ ሄዋን ቁደ ከልሼ፡፡

![](https://cdn.door43.org/obs/jpg/360px/obs-en-02-12.jpg)

ዋቀከ ክዴ፥ ‹‹አመ ነመ ዋ ፐቃረ ከ አኔቀ ኡፕናተኔ እኖፐ ተከ ኮዴ፤ አመ ኔፎ አከ ቆይረሴ ቻተ ዳኖ ቀረ ሉከተ እንምተንን ከ እንደምን ከ ሀከ ፐረፐራት እንከላንን።›› ከ ኦር አታም እሾ ሄዋን ፖረሴ አድሽመ ፐኻረ ከራዬ አሌ እሾተ ዳኔ፡፡ ከ ሴከመዬ፥ አከ ፖራሴ ቆይረ ቻተ ዳኖ ኦፐ አኖ ቶይተኔኤ፥ ነመ ተከ ኔፎከ ሉከተ ቆይሮሴ ቻተ ዳኖ እንምተንን ከ እንደምንእ ፖሮሴ አድሽመ ከረ ኤርከምፐቶወ ኮኮኮከ ኻዬ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 3*

## 3. ፕሸ ፐቴተ

https://openbiblestories.org/l/kxc/story-3/

![](https://cdn.door43.org/obs/jpg/360px/obs-en-03-01.jpg)

ኬልተደ ሌከየ ከመዬ፥ ሰመይተ ኩተይተ ፒተ ቀረ ከላን፡፡ እሾተ ኔፎ አከተን ኡኩቶወ ከ ኝረመየ፡፡ ኔቁምታይሾ ቆተ አከተ ኮፐን አንቴ መለ፥ ዋቀከ ፒሰዴ ከ ክዴ፥ ‹‹ፒተ ፕሰን ፕሸ ፐቴተ አኦረ ቀረ ፕራትን ፐሸ፡፡››

![](https://cdn.door43.org/obs/jpg/360px/obs-en-03-02.jpg)

ኖሄ ኾር፥ ፉለ ዋቀ ቱረኤ አጫለተሜ ኮዴ፡፡ ኖሄ ኦረ ኼልታድፐ ቾ ፕሰ ቀሮፔለ ሀንቄለይተ ከ ነመ ደፐ ከፐ ሴካዴ፡፡ ዋቀከ ቆተ ፕሸሴኔ አፐቴተ አኤርከ ድከዴት ዴሰ እሽ ሌሌ፡፡ ዋቀከ አከ ኖሄ መርከፐ አከተ ኩተ ኮዶኤ እሽ ሌሌ፡፡

![](https://cdn.door43.org/obs/jpg/360px/obs-en-03-03.jpg)

ዋቀከ አከ ኖሄ መርከፐ ኮዶኤ እሽ ሌሌ፡፡ ዴሩምተ መርከፖሴት ዱንዱመ ድፐ ሴሰ (ሜትሬተ 140)፥ ፐልዱማድ ዱንዱመ ኩንደ ኬን (ሜትሬተ 23)፤ ቀአንታድ ዱንዱመ ኩንደ ሴሰ (ሜትሬተ 13.5) አኮድቶ ክዴ፡፡ መርከፖሴ አኖሄ ኮኖ፥ ቆራፐ ኮደምቴ ከ ኦልቀረሌለ ፎቄተ ሴሰ፥ ከ ካተደ ሌከየ ከ አፍተደ እሾ መስኮቴወ ቀፐ፤ መርከፖሴ ኔፎ አከ ኖሄ ከ ቶላድ፥ ከ ፕናነ እከ ሌከየ አፒተ ቀረ ቸ አከ ፕሸ ፐቴተ ኬለ ቶይቶኤ እሽ ሌሌ፡፡

![](https://cdn.door43.org/obs/jpg/360px/obs-en-03-04.jpg)

ኖሄከ ዋቀ አጨጨመኔ፥ አከ ዋቀ እሽ ሌሌ ቀረኤ ሄላድ ሴሰ ኦልን መርከፖሴ ኮዴን፡፡ መርከፖሴ ቆተ አከተ ኩት መለ፥ ኮዳኤ ፐረደ ሌከየ ፕረ፡፡ ኖሄ ፕሾሴን አፐቴተ ዴናት ዴሰ ሰመይተ ኮኮነን ከ አከ ዋቆፐ ቲተወኔ እሾነ ሌል፤ መ ኾር እሸ ቀረን ቴየኔ/እሸን አመኔ፡፡

![](https://cdn.door43.org/obs/jpg/360px/obs-en-03-05.jpg)

ዋቀከ ኖሄ እሾ ቶላድ አከ ደምተ እሾነ ከ ፕናነ ከይቶ ሀርምሰደኔ አጨጬ። ከ ኤቴ ዌ ፕሰ ሀርምሰዴኔዬ፥ ክሴተ አኦፐዬ ኖሄ ከ እስከቴታድ፥ ከ ሄላድ አዲረ ሴሰ እሾ ሃንቶዋሶ መርከፐ ከሮፐ ኩለን አከ ከይቴ እሽ ሌሌ። ነመ ሴቴከ መርከፐሴ ከሮፐ ከሌ፡፡

![](https://cdn.door43.org/obs/jpg/360px/obs-en-03-06.jpg)

ዋቀከ አከ ፕሸ ፐቴተ ኬለ ቶይተመኔኤ/ፐሀኔኤ ኸምፕረ እሾ ፕናነ ፕሶፐዬ ኾርመ ከ አኮቴተ ኖሄ ከፖፐ ኤርኬ። ከ ፕናነ ከልሶተ ከለ/ኮድነ ኦፐዬ፥ ኾርመ ከ አኮቴተ ተፐ ተፐ ፕናነ ፕሶፐዬ መርከፐ ኖሄ ከሮፐ ኤርኬ፡፡ ኤቴ ፕሰን መርከፐ ከሮፐ ኩሌን ከመዬ፥ ዋቀ እሸ መታድ ኻረ መርከፐሴት ዱፌ፡፡

![](https://cdn.door43.org/obs/jpg/360px/obs-en-03-07.jpg)

ሴከመዬ ሮፐከ ሮፐ ፓዬ፤ ከ ሮፔ ከ ሮፔ ከ ሮፔ ከ አኦልከመን ምትንን መል ኩያተ ከ ሀልኬተ ኩንደ አፉር (40) ሮፔ፡፡ ዋ ፒተ ቀረንዴሰ ቸ ፕሰከ ፕሸን ቀረ ፕረሜን፤ እሮወ ዴዴረ ከሱከ አንሀስንን መል ፕሸን ቀረ ፕረሜን፡፡

![](https://cdn.door43.org/obs/jpg/360px/obs-en-03-08.jpg)

ኦረ እሾ ፕናነ አመርከፐ ከረ ቸ መልይ፥ ዋ ፒተ ቀረ ቸ ፕሰከ ሌኤን፤ መርከፐሴከ ፕሸ ቀረንዴሰ አን ከ ነፕሴወ አከረ ቸ ፕሰን ፐሄ፡፡

![](https://cdn.door43.org/obs/jpg/360px/obs-en-03-09.jpg)

ኤቴ ሮፐ ቃትሼ ከመዬ፥ መርከፐሴከ ሌየ ኬን ምነ ክቶ ፕሸሴኔ ቀረ ጨሬ። ስትይ፥ ፕሸሴኔከ ኬላወ ፓዬን፡፡ ኩያተ ተከዬ፥ መርከፐሴከ ኩተ እሮተ ቀረ ኩትኤ፤ አኮድቶመ እክትእ ከስኬለ ፕሰ ፕሸኔ እመካዴን፡፡ ሌየ ሴሰ ከመዬ፥ ኩተደ እሮወከ አካተ ፓዬን፡፡

![](https://cdn.door43.org/obs/jpg/360px/obs-en-03-10.jpg)

ኩያተ ኩንደ አፉር ከመዬ፥ ኖሄ አከ ፕሸ ፒተ ቀረ ኮኬን ታክ እንኮክንን አከ ቶዮኤ ቁሩፐይተ ኤርኬ። ቁሩፐይተከ አሬፐ ከ ኤፐ ፖረ ኸኻአን ከ ፒተ ኮክቴ ፈድን፥ መ ቴየን ኤተንኔ፡፡

![](https://cdn.door43.org/obs/jpg/360px/obs-en-03-11.jpg)

ከመዴሰው ኖሄከ ኤሌለ ኤርኬው፡፡ አኮድቶመ ቆተ ፖረ ኦፐ ኩትኦ ደፔ መለ፥ ኖሄ ከፖፐ አሌ ቲተዌ ቶርፓ ተከን ከመዬ፥ ኖሄከ አመ ኤሌለሴ ኤርኬው፡፡ እሸከ ሃሸ ቆይረ አኤኬርተ አፋፐ ቀፐዴ ከ እሽን ኦሬ። ቆተ ፕሸ ኩአ ቀረ ቻን መለ፥ ቆረ ከሱከ ዴሀ ፓዬን፡፡

![](https://cdn.door43.org/obs/jpg/360px/obs-en-03-12.jpg)

ኖሄከ ቶርፐ ተከን ፕሬው ከ ኤሌለሴ አሴሰታት ኤርኬው፤ ስትይ ቆተ ፖረ ኦፐ ኩትኦ ቴዬ መለ፥ እሸ ከፖፐ እንቲተውኔ። ፕሸ ከሱከ ኮከ ቀረ ቻዴን፡፡

![](https://cdn.door43.org/obs/jpg/360px/obs-en-03-13.jpg)

ሌየ ለክ ከመዬ፥ ዋቀከ ኖሄ ክዴ፥ ‹‹ ኬ ከ ቶላይት እሾ ፕናነ ፕሰ መርከፐ ከረ ሶከ።›› ቶላድከ መርከፐሴ ከረ ሶኬ፡፡ ከ ሄለ እሾ ኦፐደ ሌከየ ኻየዴን፤ ከ ፒተ ቀረ እመኬን፡፡

![](https://cdn.door43.org/obs/jpg/360px/obs-en-03-14.jpg)

ኖሄ ኤቴ መርከፐ ከረ ሶኬዬ፥ ፖረ ከልሶተኤ ኮዴ ከ ፕናነ ፕሶፐዬ አከልሶተ ዴሀተ ፐርፓችስንቶ ቄዴከ ከልሶተ ዋቀ ከልሼ። ዋቀከ ከልሶቶሴትን ኸሶዴ ከ ኖሄ እሾ ቶላድ ሰኬ።

![](https://cdn.door43.org/obs/jpg/360px/obs-en-03-15.jpg)

ዋቀከ ኸኸዴ ከ ክዴ፥ ‹‹ኔቁምተ ኦረ ኮኖ መለ፥ አሬፐ ዴሰ ፐከነኤ ፒተ አንጪጮ፡፡ ነመ ከደ ፑኑ አሸክ ፓዬው ጩፖለይተ ኮዴ ኔፎዬ፥ ለመተ ፕሸ ፐቴታትን እሸ አንፐሾ፡፡››

![](https://cdn.door43.org/obs/jpg/360px/obs-en-03-16.jpg)

ዋቀከ አከ ኮደይቴሴ ኻድእ ምልክተ ኮድቶኤ፥ ፐንካለተ አፓዮተ ኮዴ፡፡ አውተ ፕሰ ፐንካለተሴከ ሞንተ ቁዳዬ አካን፡፡ ዋቀከ ፐንካለቶሴ ቁደን ኮደይቴተሴ አሰመይተ ከሌ መቴ ኦርሰን፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 6-8*

## 4. ኮዴተ አዋቀ አፕርሃም ኦል ኮደዴ

https://openbiblestories.org/l/kxc/story-4/

![](https://cdn.door43.org/obs/jpg/360px/obs-en-04-01.jpg)

አፕሸ ፐቴተ ትርፔን ፐረ ሌከየ ከመዬ፥ ኦረከ ፒተ ቀረ አመ ኮፔው። ከ ፕሰንትይ አፋ ተከኔው ሃሰወን። ከ አከ ዋቀ እሾተ አጨጬ ቀረኤ ፒተ ቀረ እመከ ከፐዬ፥ ኦሎፐ ተከ ኦሬን ከ ከተመ ቁፐዴን፡፡

![](https://cdn.door43.org/obs/jpg/360px/obs-en-04-02.jpg)

እሾተ ኔፎ ከምቶለየ፥ ከ ዋ ዋቀ እሾተ ሃሰወዴ ከሱ ቶይተንንክንን፡፡ ከ ላድ ቁፔተ ሌቶፐ ከይቶ ቁፔተ ፓዬን፡፡ ዋቀከ ኦሮሴ ኤዬ ቾ አከ ኮደ ኔቀ ኮኖ ከ ከመው ቻኖ አኬ፡፡ ከ አከ ጩፖተ ሴዴ ቀረን ቀፕቶ ከሱ ኮደ ኤተንሸን አኬ።

![](https://cdn.door43.org/obs/jpg/360px/obs-en-04-03.jpg)

ሴመለ ዋቀከ አፋሶ ኦልኬለን ደፔ ከ አፈደ ሌከያፐ ኦርሼ ከ ፒተ ፕሰ ቀረ ሰመይሴ ፐስሼ፡፡ ከተሞሴን አቁፔተ ፓዬኔ ኔፎ መኻይሾ፥ ‹‹ፓፕሎን›› ክደም፡፡ ሴ ክዴሴ ኔፎ፥ ዋ ኦልን ለሀሜ ታክ ቱረ ሉልሸ/ዋ ቱረ ሉሌ ክዴተ፡፡

![](https://cdn.door43.org/obs/jpg/360px/obs-en-04-04.jpg)

ፐረ ድፐ ከመዬ፥ ዋቀከ ነመ ተከ አፕራም ክደሞ ሃሰወዴ፡፡ ከ አሴ እሸ ክዴ፥ ‹‹ፒተይት ከ ቶለይሽን ዲሼ ከ ፒተን አንት ኬ አክኖ ኦፐ ኣኔ፡፡ አንት ኤዬኤን ኬ ሰከ፣ ሰመይተ ኩተኤን ኬ ኮደ ከ መኻይት ከሱ ኩትሸ፤ ከ አኬ ሰክኖት ሰከ፣ ከ አኬ ጪጭኖ ጪጨ፤ ኬ ምነን ኦረ ፒተ ቀረ ቾ ፕሰከ ሰከመ፡፡

![](https://cdn.door43.org/obs/jpg/360px/obs-en-04-05.jpg)

አፕራምከ ዋቀ አጨጨሜ፤ ከ እስከቴታድ ሶረ ከ ኦርኸያድ ፕሰ እሾ ዋ ቀፐ ፕሰ ቄዴ ከ ፒተሴ አዋቀ እሽ አክሼ አኬኔአን ኦፐ ኣኔ፡፡

![](https://cdn.door43.org/obs/jpg/360px/obs-en-04-06.jpg)

አፕራም ኤቴ ኬኔኣን ከዬዬ፥ ዋቀ እእሽ ክዴ፥ ‹‹ዋ ኬ ከፐንዴሰ ቻ ፕሰ ቶዬ፤ ፒቶሴ አአክንቶ ፕሰን ኬ ከ ሰኜታይትእን ኮዴተ ኮደ ከ ዳሸ።›› አፕራምከ ፒቶሴ ኦፐ ኩትኤ፡፡

![](https://cdn.door43.org/obs/jpg/360px/obs-en-04-07.jpg)

ኩያተ ተከዬ፥ አፕራምከ ቄስተሴ አዋቀ ኩተ ሜልኬሴዴቅ ክደሞ አኬ፡፡ ሜልኬሴዴቅከ አፕራም ሰኬ፤ ከ ክዴ፥ ‹‹ፖቀላሴኔ አፒተ ከ አሞንተ፥ ዋቀሴ ኩተ አአፕራም ሰኮ።›› አፕራምከ ዋ ቀፐ ፕሰ ቀረዬ ኩመ ኩንደተ ሜልኬሴዴቅ ዳሼ።

![](https://cdn.door43.org/obs/jpg/360px/obs-en-04-08.jpg)

ከደ ፑኑ ፐራ ሌከዬ ተርፔኔዬ፥ አፕራም እሾ ሶረ እክእ እነ እንቀፐን፡፡ ዋቀከ ኦፐ ኦሬከ አፕራምእ ክፔተ ዳሼ፤ ከ አከ እነ ቀፕናዶ፥ ሰኜታድከ አሂከ ሞንተ ምነ ሌካቶ እሽ ሌሌ፡፡ አፕራምከ ክፔተሴ አዋቀ ዱከይሰዴ፡፡ አፕራም ቆተ ክፔተ ዋቀ ዱከይሰዴ መለ፥ ሀንቄለይተኤ ድከሜ፡፡

![](https://cdn.door43.org/obs/jpg/360px/obs-en-04-09.jpg)

ዋቀከ አፕራም ኦል ኮደይቴተ ኮደዴ፡፡ ኮደይቴተ፥ ኦልከለይተ አርተ ነመ ለክ ከረ ኮደምቶ፡፡ ዋቀከ አፕራም ክዴ፥ ‹‹እነ ኩፔታይትፐ ሶኬኤን ኬ ዳሸ፡፡›› ከ ክዴዌ፥ ‹‹ሰኜታይት ኔፎኤን ፒተ ኬኔኣን ዳሸ፡፡›› አፕራም ኾር ስትይ እነን ቀፖ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 11-15*

## 5. እነ ክፔተ

https://openbiblestories.org/l/kxc/story-5/

![](https://cdn.door43.org/obs/jpg/360px/obs-en-05-01.jpg)

ፐረ ኩደን ከመዬ፥ አፕራም እሾ ሶረከ ኬኔኣን ከዬን፣ ኡመ ሀከስትእ እነን ቀፐን፡፡ ሴመለ እስከቴታድ ሶረከ አፕራም ኪቴ፥ ‹‹ቆተ ዋቀ አከን ሄለ አንቀፕናንን አነ ደውሬ አንት ኔፎከ ኬሬ መለ፥ ትን አሬ ኦርኸይቴትዮ አካር አሬ ክተይ ሄሜ፤ ከ እነ አነ ኻዬ።››

![](https://cdn.door43.org/obs/jpg/360px/obs-en-05-02.jpg)

ሴመለ አፕራምከ አካር ሄሜ፡፡ አካርከ እነ ዲርተ እሽ ኻይቴ፡፡ አፕራምከ መኸ እሽ ኮዴ ከ ክዴ፥ ‹‹እስማኤል>›› አኮድቶመ፥ ሶረ አካር ቀሬ ዮተን ኻቴ፤ ኤቴ እስማኤል ፐረ ኩደንከ ሴሰ ከዬዬ፥ ዋቀ አፕራምእ አሴ ክዴ፡፡

![](https://cdn.door43.org/obs/jpg/360px/obs-en-05-03.jpg)

ዋቀ አፕራምእ ክዴ፥ ‹‹አንት አንዋቀ ዌ ፕሰ ኤተንኖይ፥ ኮደይቴተን ኬ ኦል ኮደደ።›› አፕራምከ ሚንተ ፒተን ከዬ። ዋቀከ አፕራም ክዴ፥ ‹‹አት ኣፖፐ ሰመይተ ሌከኤ ኮድተ፡፡ ፒተ ኬኔኣንእን ኬ ከ ሰኜታይት ኮዴተ ኮደ ከ ዳሸ፤ ከ ሀከ ፐረፐራት ዋቀይሽን ኮደ፤ አት ከሱ ዲርተ አቶላይትፐ ቾ ፕሰኤ ደውረ ቀረ ሙርሲሴ።››

![](https://cdn.door43.org/obs/jpg/360px/obs-en-05-04.jpg)

ዋቀከ እሽ ክዴ፥ ‹‹እስከቴታይት ሶረ እነ ዲርተኤ ኻይተ፤ እሸ ኔፎ እነሴኔ አክፔተኤ ኮደ፤ አከ መኸ እሽ ኮተ ከ ኪተ፥ <ይስሀቅ> አንተከ ኮደይቴትዮ እሸ ኦል ኮደደ፡፡ እሸ ኔፎከ ሰመይተ ኩተ ኮደ፡፡ ከ እስማኤል ሰመይተ ኩታት ኮደ፤ ማ ኾር፥ ኮደይቴትዮ ይስሀቅ ኦልን ኮደደ።›› ዋቀከ መኸ አፕራም ፑርሼ ከ ክዴ፥ ‹‹አፕርሃም።›› ሴዴ ክዴተ፥ ‹‹ኣፖፐ ሰመይተ ሌከ›› ክዴተ። ዋቀከ መኸ ሶረ ከሱ ቱርሼ ከ ክዴ፥ ‹‹ሳረ።›› ሴዴ ክዴተ፥ ‹‹ኣየፐ ሰመይተ ሌከ›› ክዴተ።

![](https://cdn.door43.org/obs/jpg/360px/obs-en-05-05.jpg)

ኩያሴትይው፥ አፕርሃምከ አቶላድፐ ዲርተ ኮዴ ፕሰኤ ደውረ ቀረ ሙረችሴ፡፡ ፐረ ተከ ከመዬ፥ ኤቴ አፕርሃም ፐረ ድፐ (100) ከዬዬ፥ ሳረከ ፐረ ኩንደ ሰከል ሰከል ከይቴዬ፥ እነ ዲርተኤ አፕርሃም ኻይቴ፤ ከ አከ ዋቀ እሾተ ክዴ ቀረኤ መኸ እነ ኮዴን ከ ክዴኔ፥ ‹‹ይስሀቅ፡፡››

![](https://cdn.door43.org/obs/jpg/360px/obs-en-05-06.jpg)

ይስሀቅ ኤቴ ኸዮዴዬ፥ ዋቀከ አመንቴተ አፕርሃም ኤከይሰዴ ከ እሽ ክዴ፥ ‹‹እነሴኔ ኻይት ተከን ቄዴ ከ ከልሶተ ኮዴ ከ አነ ከልሼ።›› አፕርሃምከ አመ ኔፎ ዋቀ አጨጨሜ ከ እናድ ከልሶተ ኮደ ሀርምሼ፡፡

![](https://cdn.door43.org/obs/jpg/360px/obs-en-05-07.jpg)

ኤቴ አፕርሃም እሾ ይስሀቅ ፖረሴ አእሽ ከልሶተ ኮደምቶፐ አንተ ፓዬኔዬ፥ ይስሀቅ እኣፐይሾት ክዴ፥ ‹‹ኣፖ! ትን አሬ ቆረ አከልሶተ እንቀፕነመ፥ ኸው ላሀ አይሸዬ ቻ?›› አፕርሃምከ እሽ ኦርሼ ከ ክዴ፥ ‹‹እናዮ! ላሀ ከልሶተ ዋቀ ሀርምሸ።››

![](https://cdn.door43.org/obs/jpg/360px/obs-en-05-08.jpg)

ኤቴ ፖረሴ አከልሶተ ከዬኔዬ፥ አፕርሃም እናድ ይስሀቅ ህዴ ከ ፖረሴ አከልሶተ ቀረ ሙክሼ፡፡ አፕርሃምከ እናድ ቀለኤ ፕለ ሀርኮፖፐ ቴየዴ፤ ዋቀከ እሽ ክዴ፥ ‹‹አሌ ዲሼ፥ ኡመ እናት ቀረኤ ረኮተ ተከ ኔፎን ቄደን፤ አክመ አነ ፉርቶ ከ ከ እናት ተከን አቀፕተ አነ ዳሸኤ አሱረይሰንን፥ አመ እንኡፕናዴ፡፡

![](https://cdn.door43.org/obs/jpg/360px/obs-en-05-09.jpg)

አፕርሃምከ ፖረ አእሸ ከፐ ዴሀ ከፐኤ፥ ላሀ አሙሮፐ ህደሜ አኬ፡፡ ዋቀ፥ ላሀ ፐከ ይስሀቅ ኦፐ ከልሶተ ኮዶ ሀርምሼ። አፕርሃምከ ኸሰን ላሀሴ ከልሶተ ኮዴ ከ ዴሀይሼ፡፡

![](https://cdn.door43.org/obs/jpg/360px/obs-en-05-10.jpg)

ዋቀከ አፕርሃም ክዴ፥ ‹‹እናት ተከን ከሱከ ዋ አቀፕተ ፕሰ አነ ዳሰተኤ ጫለቴይ፥ እንኬ ሰከ፡፡ ሰኜታይት አሂከ ሞንተ ቀረን ቀፕቶኤ ሌካተ፤ ቆተ አነ አጨጨምቴ መለ፥ ሰመይተ ፒተ ፕሰ ኬኔ ሰከመ፡፡››

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 16-22፡፡*

## 6. ዋቀ ይስሀቅእ ሃንቶተ ሀርምሼ

https://openbiblestories.org/l/kxc/story-6/

![](https://cdn.door43.org/obs/jpg/360px/obs-en-06-01.jpg)

አፕርሃም ኤቴ አከተ ኬሬዬ፥ ይስሀቅ እኸዮዴከ ሄምተ ከዬ፡፡ ሴመለ አፕርሃምከ አከ ሰኜታይሾ ኦፐ ይስሀቅ ሃንቶተ ቅንሰዶኤ ኦርኸያድፐ ተከ ፒተ አኦፐ ደለዴፐ ኤርኬ።

![](https://cdn.door43.org/obs/jpg/360px/obs-en-06-02.jpg)

እሸከ ፒተሴ ሴከ አሰኜተሴ አአፕርሃም እሽ ከልቶፐ ኣኔ ከ ኤዬ ከዬ፡፡ ዋቀከ ኦርኸይተሴ አአፕርሃም ኤርኬ ቅንደ ርፕቀ ኦፐ ቀጬልሼ፡፡ ርፕቀ ኤኔንተ አኦፍተ አእናፐ አፕርሃም፡፡

![](https://cdn.door43.org/obs/jpg/360px/obs-en-06-03.jpg)

ርፕቀከ ቶላይሾ አሌ ዲሴ ከ ኦርኸይተሴ ኦልይ ትከ ይስሀቅፐ አንተ ኦውሰቴ፡፡ ኤቴ ዴሰ ከይቴዬ፥ ይስሀቅከ እሼነ ሄሜ፡፡

![](https://cdn.door43.org/obs/jpg/360px/obs-en-06-04.jpg)

ክሴተ ኩተ ከመዬ፥ አፕርሃምከ ቶኤ፤ ኮደይቴተሴ አክፔተ አዋቀ አአፕርሃም ኦል ኮደዴ ፕሰከ ይስሀቅፐ ቱልቴ፡፡ ዋቀ፥ አፕርሃም አከ ሰኜተ ድከመን ኤተንንን ቀፕናዶኤ ክፔተ እሽ ዳሼ። አኮድቶመ፥ እስከቴተ ይስሀቅ ርፕቀ ሄለ ኻይንንክቶ፡፡

![](https://cdn.door43.org/obs/jpg/360px/obs-en-06-05.jpg)

ይስሀቅከ ርፕቀ ቅንሰዴ፤ ዋቀከ አከ ሄለ ሰለሀመ ህቶኤ ኦፐ ሰሌ። ሄለሴኔ ከርተ ርፕቀ ከረ ቸ ለክከ ፖረ ኦል ቱክን። ርፕቀከ ዋ ምነን ዋ አሴ ፐሀ ከርታድ ከረ ኮድናን ዋቀ ቀረ ካሰቴ።

![](https://cdn.door43.org/obs/jpg/360px/obs-en-06-06.jpg)

ዋቀከ ርፕቀ ክዴ፥ ‹‹ሄሎስን ከርታይት ከረ ቸ ለክ ኦፓዬ፥ ሰመይተ ለክ ሶከ፤ እሾተከ ኦል ሶተን፥ ቃርተከ ኩስተ ፕደመ።››

![](https://cdn.door43.org/obs/jpg/360px/obs-en-06-07.jpg)

ሄለ ርፕቀ ኤቴ ደለዴኔዬ፥ እነ ኩተ አኸተ ፕኤ እቲም ከ ቁደንዴለ ኝርፈ ቀፐን፤ እከ መኸ እሽ ኮዴን ከ ክዴኔ፥ ‹‹ኤሳው።›› ኩስተው ኤቴ ደለኖዬ፥ ከምንተ ኤሳው ከመ ቀፔ፤ እከ መኸ እሽ ኮዴን ከ ክዴኔ፥ ‹‹የእቆፕ።››

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 24፡1-25፤ 26፡፡*

## 7. ዋቀ የእቆፕእ ሰኬ

https://openbiblestories.org/l/kxc/story-7/

![](https://cdn.door43.org/obs/jpg/360px/obs-en-07-01.jpg)

ሄላሴኔ ኤቴ ኩኩተዴኔዬ፥ የእቆፕ ኣየሶ ኦልይ ትኮፐ ተዌተ ጫለን፡፡ ኤሳው ኾር፥ ኩተይመ ጫለን፡፡ ርፕቀከ የእቆፕ ጫለን፣ ይስሀቅ ኾር ኤሳው ጫለን፡፡

![](https://cdn.door43.org/obs/jpg/360px/obs-en-07-02.jpg)

ኩያተ ተከዬ፥ ኤሳው ኤቴ ኩተነ ኬለ ከሎዬ፥ አከተ ዶኼ፡፡ ኤሳውከ የእቆፕ ክዴ፥ ‹‹ሰክኔ ደምታይት ቁደ ሸከይቴተ አነ ዳሼ።›› የእቆፕከ እሽ ኦርሼ ከ ክዴ፥ ‹‹ፓዮተኤ መፕቴተ ቃርቱመይት አነ ዳሼ፡፡›› ሴመለ ኤሳውከ መፕቴተ ቃርቱማድ የእቆፕ ዳሼ፤ ሴከመዬ፥ የእቆፕከ ደምተሴ አኮዴ ቁዳዬ እሽ ዳሼ፡፡

![](https://cdn.door43.org/obs/jpg/360px/obs-en-07-03.jpg)

ይስሀቅከ ሰካድ ኤሳው ዳሼተ ፈዴ፡፡ መ ኾር አሴዴን ኮንን ቱረኔ፥ ርፕቀ እሾ የእቆፕከ ይስሀቅ ሰሰፐዴን፡፡ የእቆፕ ኤሳው ፐሃነዴከ ይስሀቅ ከፖፐ ዴሃዴ፡፡ ይስሀቅ ስትይ አከተ ኬሬ፥ ኡመ ፓተ አክንንቾ፡፡ ሴመለ የእቆፕ ሜሀደ ኤሳው ከልሰዴ ከ ኦይሌተ አቴለ ኾልመ እሾ ሀርከ ቁደ ኮደዴ ከ ኣፐይሾ ይስሀቅ ከፖፐ ዴሃተን እሸ ሰሰፐዴ፡፡

![](https://cdn.door43.org/obs/jpg/360px/obs-en-07-04.jpg)

የእቆፕከ ኤሳው ከፖፐ ዴኤ ከ እሽ ክዴ፥ ‹‹አንት አን ኤሳው፤ እንዴኤይ አነ ሰከ እኤተንሰ።›› ይስሀቅከ ኦይሌተሴ አቴለ ቀፐዴ ከ ሜሀዳድ አለይሰዴ ከ አከ ኤሳው ኮዴ ድከዴ ከ እሽ ሰኬ።

![](https://cdn.door43.org/obs/jpg/360px/obs-en-07-05.jpg)

የእቆፕ ቆተ መፕቴተ ቃርቱማድ እሾ አሰካድ ሰሰፐን ቀረዬ ቴየዴ መለ፤ ኤሳው የእቆፕ ኔደዴ፤ ከ ኦቶ ኣፐይሾ ቶኦ ከመዬ፥ እሸ እሸተ ኩል ድከዴ፡፡

![](https://cdn.door43.org/obs/jpg/360px/obs-en-07-06.jpg)

መ ኾር ርፕቀ ዋ ኤሳው ድከዴኤ ደከይቴ፡፡ ሴመለ እሼተ እሾ ይስሀቅከ አከ ሰኜታይሾ ከፐ ከላዶኤ፥ ፒተ ሴከ ኦፐ የእቆፕ ኤርኬን፡፡

![](https://cdn.door43.org/obs/jpg/360px/obs-en-07-07.jpg)

የእቆፕከ ፐራ ሌከየ ሰኜተ ኦፐ ርፕቀ ከፐ ከላዴ፡፡ ስትይ እሄሜ ከ ሄለ ዲረ ኩደንከ ለክ (12) እሾ ኤኔንተ ተከ (1)ኻየዴ፡፡ ዋቀከ አከተ እሸ ቴየንተይሼ፡፡

![](https://cdn.door43.org/obs/jpg/360px/obs-en-07-08.jpg)

አፒተ ሞሶፕተምያት ከላዴ ፐረ ኩንደ ለክ (20) ከመዬ፥ የእቆፕ ቶላድ ከ ኦርኸያድ እሾ ሆሬታድ አቀፖ ፕሰኔ ፒተ ኬኔኣን ኦፐ ኦረ ፒሰዴ።

![](https://cdn.door43.org/obs/jpg/360px/obs-en-07-09.jpg)

የእቆፕ ቆተ ከርተ ከረንኸተ ድከኖ ከኖ ከ ኪኖ ኤሳው አመ ኔፎ አነ እከሰን ዲሾ መለ፥ አከተ ፉሬ፡፡ ከ ሴመለው ሀርከ ፖርነይሸኤ ሆሬቶፐ ኼሎተ ኩተይቴተ ሬኼ ከ ቱረንዴሰ አረይተ ኤሳው ኤርኬ፡፡ ኦርኸያሴኔ አየይቆፕ ሆሬተን እሽ ዴኤከ ኤሳው ክዴኔ፥ ‹‹ኦርኸይታይት የእቆፕ ሆሬሴኤ ኬ ኤርኬ፤ እሸ ኔፎ፥ ክሴተ ዴሀ ኦፐኤ ዴአ።››

![](https://cdn.door43.org/obs/jpg/360px/obs-en-07-10.jpg)

ኤሳው ኾር ቆተ ዴዮኤው የእቆፕ ደፓድ ዲሼ መለ፥ አመ ከሱ ኸሰኔ እሸ ቴየዴ፡፡ የእቆፕከ ፒተ ኬኔኣንት ነከይተን ከላዴ። ሴከመዬ፥ ይስሀቅከ ቶኤ፤ የእቆፕ እሾ ኤሳውከ እሸ ሀውላዴን። ክፔተሴ አኮደይቴተ አዋቀ አፕርሃም ዳሼከ አመ ይስሀቅ ዴሰ የእቆፕ ኦፐ ቱልቴ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 25፡27-33፡20፡፡*

## 8. ዋቀ ዮሴፍ እሾ ቶለይሾኤ ድንሼ

https://openbiblestories.org/l/kxc/story-8/

![](https://cdn.door43.org/obs/jpg/360px/obs-en-08-01.jpg)

ቆተ የእቆፕ ሄላድ ፕሰ ቀረን ቀፕቶኤ አከተ ዮሴፍ ጫለኖ መለ፥ ከ ኦልሰ አክመ ሳረይሾ ኮዶኤ ኦልሶዴ ቀረን ኻቴኤ፥ ሄላሶ ፕሰ ዮሴፍ ኔደን። ከ ኤቴ ዮሴፍ ሄላሶ ከፖፐ ዴኤዬ፥ ቀፔን ከ ኦረ ከርፕሸደ ነከኖ ከቴን፡፡

![](https://cdn.door43.org/obs/jpg/360px/obs-en-08-02.jpg)

ፐራደ ሌከየ ከመዬ የእቆፕ ኤቴ ኬሬዬ፥ አከ ሄላሶ አሆሬተ ስክነ ዋ ኦፐ ቻኔ ካሰዶኤ እናሴኔ አጫለነ ዮሴፍ ኤርኬ፡፡

![](https://cdn.door43.org/obs/jpg/360px/obs-en-08-03.jpg)

ሄላፐ ዮሴፍ አትኮፐን ከልን ቱረኔ ሜሀደ ዮሴፍ ቁደ ከካኤን ከ ዲከ ቆልፐይታትን ለሄን። ከ ሴከመዬ፥ ሜሀዳሴኔ አዮሴፍ ዲከን ለሀሜ ኣፐይሾት አክሼን፡፡ የእቆፕከ ድከዴ ከ ክዴ፥ ፕነንተ እናዮ ዮሴፍ እሼ፤ ከ አከተ ኛረሄ፡፡

![](https://cdn.door43.org/obs/jpg/360px/obs-en-08-04.jpg)

ነከቴዋሴኔ አከርፕሸደከ ዮሴፍ ቄዴን ከ ፒተ ክፕስ ኦፐን ኣኔን፡፡ ስትይ ክፕስ ፒተ ኩተ ከ ኮኮከ ከ ክረ አፐይ ከፐ ክተ። ነከቴዋሴኔ አከርፕሸደከ ኣፐ ተከ ቴየንቶለይተ ኮዴ ከ ስልታነ መንክስቴተ ቀፖኤ ዮሴፍ ከርፕሹመ ከቴን። ዮሴፍከ ፖቀላድ ኬለ ፈየ ኮደ ኮን፡፡ ዋቀከ ዮሴፍ ሰኬ፡፡

![](https://cdn.door43.org/obs/jpg/360px/obs-en-08-05.jpg)

እስከቴተ አፖቀላድከ ዮሴፍ ኦል አልመሉመ ኤከሴ፡፡ ዮሴፍ ኾር ፉለ ዋቀ ቱረ ጩፖተ አንኮዶ ክዴ ከ ቀረ ቲቴ፡፡ እሼተ ቆተ ቀረ ሚሮቴ መለ፥ ደርተኔ እሸ ኸሰስቴ እከ ቀፐሜ ከ ትከ ህደ ኦፐ ቄደሜ። ትከ ህደ ኔፎ ከረዬው፥ ቆተ ዋቀኤ አአመነሜ ኮዴ መለ፥ ዋቀከ እሸ ሰኬ፡፡

![](https://cdn.door43.org/obs/jpg/360px/obs-en-08-06.jpg)

ከደ ፑኑ ዮሴፍ ደፐን ቀፕንን ኔፎዬ፥ ፐረ ለክ ከመዬ ከሱ ትከ ህደ ከረዬው ቸ። ሀልኬተ ተከዬ፥ አኦረ ክፕስ እሽ ኪኖ፥ ‹‹ኑቆስኖ›› ፌርኦን ኦልሰ አከተ እሸ ፉርሼ ለክ ኦልሶዴ፡፡ ኡመ ኦካድ ኦፐዬ ተከ ኔፎ ኦልሶስን እሽ ፉረ እንኤተንኔ፡፡

![](https://cdn.door43.org/obs/jpg/360px/obs-en-08-07.jpg)

ዋቀ ኦልሰ ፉሬተኤ ኤተንሰ ዮሴፍ ዳሼ፤ ሴመለ ፌርኦንከ ትከ ህደ ከረዬ ዮሴፍ እስከፖፐ ሀላችሴ፡፡ ዮሴፍከ ኦልሳሴኔ እሽ ፉሬ ከ ክዴ፥ ‹‹ዋቀ ፐራ ሂረ ተፐ ኤርከ፣ ከመኤው ፐራ ሎተ ተፐ ዴአ።››

![](https://cdn.door43.org/obs/jpg/360px/obs-en-08-08.jpg)

ፌርኦንከ ዋ ዮሴፍፐ አከተ ቀዋዌ፣ ከ ፒተ ክፕስ ቀረኤ እሸ ከመኤ ነመ ስልታነ ቀፖ አለመታት ኮዴ ከ ሹሜ።

![](https://cdn.door43.org/obs/jpg/360px/obs-en-08-09.jpg)

ዮሴፍከ አከ ሰመይተ ፐራዶሴን አሂረ ፐቃረ ኦፐዬ ኡንተ ኩተይቴተ ኮሰደ ከሮፐ ከልሾኤ ሌሌ። ኤቴ ፐራደሴኔ አሎተ ተፐ ከይቴዬ፥ ዮሴፍከ ኡንተሴ ኮሰደ ከረ ክቶ ሰመይተ ከቴ፤ እከ ዋ ደመኔ ፈየ ቴዬን፡፡

![](https://cdn.door43.org/obs/jpg/360px/obs-en-08-10.jpg)

ሎቶሴ ኮኮከ ፒተ ክፕስ ፐተ ከረኤን ዴኔመ፥ ፒተ የእቆፕ እሾ ቶለድ እሽ ከሎ አኬኔኣን ከሱ ሎሶዴ፡፡

![](https://cdn.door43.org/obs/jpg/360px/obs-en-08-11.jpg)

የእቆፕከ ሄላድ አከ አናን ከ ፒተ ክፕስት ኡንተ ፕደኔ ኤርኬ፡፡ ሄላፐ ዮሴፍ ኤቴ ኡንተ ፕደ ኣኔን ከ እሸ ቱረ ቀቀአዴኔዬ፥ አከ ዮሴፍ ኮዴ እንኡፕናኔ፥ ዮሴፍ ኾር እእሾተ ኡፕናዴ፡፡

![](https://cdn.door43.org/obs/jpg/360px/obs-en-08-12.jpg)

ዮሴፍ ኤቴ ሄላሶ ኤከይሰዴ ከመዬ፥ ድከተይሾ አከ ፑርሰሜ ኡፕናተኤ እሾተ ክዴ፥ ‹‹እንፉረን! አንት አንእናስን አንዮሴፍ፤ አውተ ከርፕሹመ አነ ከንተኔዬ፥ ኔቁምተ አነ ቀረ ኮደ ድከቴን፤ መ ኾር ዋቀ ኔቁምተ ፐኻሩምቶፐ ፑርሼይ ኾየ ከ ክፕስ ከረ ከላደ፥ አንት ኔፎ ዋ እሽን እሾ ቶለስነ ፐርፓችስነኤን እሽነ ዳሸይ፡፡››

![](https://cdn.door43.org/obs/jpg/360px/obs-en-08-13.jpg)

ሄላፐ ዮሴፍ ኤቴ ፒተይሾ ኦፐ ቲተዌንከ አከ ዮሴፍ ቾ ኣፐይሾ የእቆፕ ሌሌኔዬ፥ የእቆፕ አከተ ኸሶዴ፡፡

![](https://cdn.door43.org/obs/jpg/360px/obs-en-08-14.jpg)

ከደ ፑኑ የእቆፕ ነመ ኬሬ ኮዴ ኔፎዬ፥ ቶላድ ፕሰ ኦልን ፒተ ክፕስ ኦፐ ኣኔ ከ ኤዬ ከላዴ፡፡ የእቆፕ አእንቶንን ቱረኔ መተ ምነኤ ሄላድ ፕሰ ሰኬ፡፡

![](https://cdn.door43.org/obs/jpg/360px/obs-en-08-15.jpg)

ኮደይቴተሴ አክፔተ አዋቀ አፕርሃም ዳሼከ ይስሀቅፐ ቱልቴ፤ ከ ከመዬ የእቆፕፐ፥ ከ ከመኤው ሄለ አየእቆፕ ኩደንከ ለክ እሾ ቶለዳሶ ኦፐ ቱልቴው፡፡ ሰኜሴ አሄሎስን ኩደንከ ለክከ ከፈደ አእስረኤል ኩደንከ ለክ ኮዴን፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 37-50፡፡*

## 9. አክመ ዋቀ ሙሴ ሀሌ

https://openbiblestories.org/l/kxc/story-9/

![](https://cdn.door43.org/obs/jpg/360px/obs-en-09-01.jpg)

አዮሴፍ ቶኤ ከመዬ፥ ሰኜታድ ፕሰ ፒተ ክፕስ ከረኤ ሀሴ፡፡ እሾተ ከ ሰኜዋሶከ ፐራደ ሌከየ ኤዬ ክፕስ ከረኤው ከላን፤ ከ ሄለ ሌከየ ኻየዴን፤ እሾነከ እስረኤሌተ ክደሜን ከ ሀላሜን፡፡

![](https://cdn.door43.org/obs/jpg/360px/obs-en-09-02.jpg)

ፐረደ ድፐደ ከመዬ፥ ሌኩምተ እስረኤሌተከ ኮፐን አንቴ፡፡ ክፕሴተከ ወ ዮሴፍ እሾነ ቃርቃረ ኮዴ ፕሰ ቴይምቴ። ቆተ እስራኤሌተ ኮፐኔው አንቶ መለ፥ ክፕሴተከ እሾነ ፉርቴ፡፡ ሴመለ ፌርኦኔሴ ስትይ ክፕሴተ ሙክኖከ እስረኤሌተ አክመ ከርፕሸደ ክፕሴተ ኮድቶ ኮዴ፡፡

![](https://cdn.door43.org/obs/jpg/360px/obs-en-09-03.jpg)

ክፕሴተከ አክመ እስራኤሌተ ከወየ ደውቶ፥ ከ ከተመደ ቁፕቶኤ እሬተን እሾነ ክተችስን፡፡ ኮዶሴ ኮኮከ ከ ከላተይሾ ምድን፡፡ ዋቀ ኾር እሾነኤ ሰኬ፥ እከ ሄላ ሌከየ ኻየዴን፡፡

![](https://cdn.door43.org/obs/jpg/360px/obs-en-09-04.jpg)

ፌርኦንከ አከ እስራኤሌተ ሄላ ሌከየ ኻየቴ አኬ፤ ከ ሴመለ ኦቶ ሄላ ዲረ አእስራኤል ደለደኔዬ፥ አከ ክራ አፐይ ከሮፐ ደከን እከ ሌአኔ ሰመይተ አጨጬ፡፡

![](https://cdn.door43.org/obs/jpg/360px/obs-en-09-05.jpg)

እስከቴተ ተከ አእስራኤልከ እነ ዲርተ ኻይቴ፤ እሼነ እሾ ዲርታድከ አኤተንነን ምነ ክቶ እነሴኔ ጩቴን፡፡

![](https://cdn.door43.org/obs/jpg/360px/obs-en-09-06.jpg)

ቶሎፐ አእነ ኤቴ እነሴኔ ኻይሾ ጩተ መላሌኔዬ፥ አከን ቶንን ከ ፐሀኔኤ ሰተረ አጭምንንክንን ከረ ሙክሼን ከ ከምከመ ክራ አፐይ ከፐኤ ኻሸ ከረ ፕሸሴኔ አክራ ቀረ ኻዬን፡፡ ኤኔንታይሾ አኩተከ ወ እሸ ቀረ ከየ ቶየኤ ከፐንዴሰ ቻን፡፡

![](https://cdn.door43.org/obs/jpg/360px/obs-en-09-07.jpg)

ኤኔንተ ፌርኦንከ ሰተረሴኔ ቶየቴ ከ ዋ ከረ ቸ አክቴ፡፡ ኤቴ እነሴኔ ከረ አክቴዬ፥ አከ እናድ ምነኤ ቴየቴ። እሼነከ አከ እነሴኔ ቆሆቶኤ እስከቴተ ተከ አእስራኤል ኻየቴ፡፡ እስከቴተ አኻየቴ ኔፎ አክመ ኣየ ኦፐ እናሴኔ ኮድቴ እንኡፕናኔ፡፡ ኤቴ እነሴኔ ኩተዴን እከ አመ ኩሼን ከመዬ፥ እስከቴሴከ እነሴኔ ኤኔንተ ፌርኦን ኦርሴ። እከ መኸ እሽ ኮዴን ከ ክዴኔ፥ ‹‹ሙሴ።››

![](https://cdn.door43.org/obs/jpg/360px/obs-en-09-08.jpg)

አሙሴ ኩተዴ ከመ ኩያተ ተከዬ፥ ክፕስተ ተከ አኦርኸይተ እስረኤል ቂኖ አኬ። ሙሴከ እስራኤልተሴ ነማይሾ ኮዴን ፐሄ፡፡

![](https://cdn.door43.org/obs/jpg/360px/obs-en-09-09.jpg)

ሙሴ አነመ እሸን አክንን እሽ ፐሀናቴ እከ ክፕስተሴ እሼ ከ ሀውሌ፡፡ መ ኾር ነመ ተከ ዋ ሙሴ ኮዴ አኬ ቸ፡፡

![](https://cdn.door43.org/obs/jpg/360px/obs-en-09-10.jpg)

ፈርኦን ኤቴ ዋ ሙሴ ኮዴ ደከዬዬ፥ እሸ እከሰ ፈዴ፡፡ ሙሴ ኾር ፎልሴተ አፌርኦን ኬለ እስን ፐሀኤ ክፕስ ከረዬ አሌ ኮመይቶፖፐ ቀሄ፡፡

![](https://cdn.door43.org/obs/jpg/360px/obs-en-09-11.jpg)

ሙሴከ ኮመይተ አከተ ክፕስ ከፐ ሴካትይ ስክመምፐይተ አከሀረ ኮዴ፡፡ ከ ፒስትይ እስከቴተ ሄሜ ከ ሄለ ዲረ ለክ ኻየዴ።

![](https://cdn.door43.org/obs/jpg/360px/obs-en-09-12.jpg)

ኩያተ ተከዬ አሙሴ ከሀረ ስክሰ ቀረ ቾዬ፥ ሁጭተ አከረ አፕተ ኦፐይኖ አኬ፤ መ ኾር ሁጭቶሴ እንኩፐኔ። ሙሴከ ሁጭተሴ ፈየ ቶየኤ ከፖፐ ዴሰ ሄቄ፡፡ ኤቴ ዋቀ አክመ ሙሴ ሁጭተሴ ከፖፐ ዴሰ ሄቅኖ አኬዬ፥ እእሽ ሃሰወዴ ከ ክዴ፥ ‹‹ሙሴ! ፖረ ቁልቁላዌ ኦፐኤ ቀአቴይ፥ ኾፓት እስኬለ ሶክሼ።››

![](https://cdn.door43.org/obs/jpg/360px/obs-en-09-13.jpg)

ዋቀከ እሽ ክዴ፥ ‹‹አንት ረኮተ አሰመይትዮ እንአኬይ፥ ፌርኦን ከፖፐን ኬ ኤርከ፤ አከ እስራኤሌተ ከርፕሹመ ክፕስ ኬለ ነተ ሶክሰ፡፡ አንከ ፒተሴ አን አፕርሃም ከ ይስሀቅ እሾ የእቆፕ ክፔተ ዳሼ አኬኔኣን እሽነ ዳሸ፡፡››

![](https://cdn.door43.org/obs/jpg/360px/obs-en-09-14.jpg)

ሙሴከ ዋቀ ካሰዴ ከ ክዴ፥ ‹‹ኦቶ ሰመይተ አነ ካሰኖ ከ ኪኖ፥ አይኖ ኬ ኤርኬዬ፥ ማነን እሾነ ክደ?›› ዋቀከ ሙሴ ክዴ፥ ‹‹አንት እሳሴ ቾ ከ ከላኖ፤ ሴመለ ‹አቾ ከ ካላኖ› አነ ኤርኬ ክዴ ከ እሾነ ሌሌ።››

![](https://cdn.door43.org/obs/jpg/360px/obs-en-09-15.jpg)

ሙሴ ቆተ ፉሬ መለ፥ ፌርኦን ከፖፐ አንተ እንሄነኔ፡፡ ማነ መለ፥ እሸ እድከዴ ከ ክዴ፥ አንት ኤተንሰ ሃሰ አንቀፖ፡፡ ሴመለ ዋቀከ አከ እናፐ ሙሴ አሮን እሸ ኦል ኣኖ ከ ሙሴ ቃርቃሮ ኤርኬ፡፡ ዋቀከ አክመ ፌርኦን ከርታድ ኮኮነይሾ ከ ሰመይተ አንዲሾ ክዶ አከ ኡፕናደኔኤ ሙሴ እሾ አሮን ኡፕነይሼ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ሶከተ 1-4፡፡*

## 10. ዐሥሩ መቅሠፍቶች

https://openbiblestories.org/l/kxc/story-10/

![](https://cdn.door43.org/obs/jpg/360px/obs-en-10-01.jpg)

ሙሴ እሾ አሮንከ ፌርኦን ከፖፐ ኣኔን፡፡ ከ እሽ ክዴኔ፥ ‹‹ዋቀ እስራኤል እኬ ኪን፥ ‹ሰመይትዮ ዲሼ!››› ፌርኦን ኾር እሾነኤን ደከይኔ፡፡ ከ ላድ አእስራኤሌተ ነተ ሶክቶ ከ አንቶ ከፐዬ፥ አከ ኮደ ኮኮከ አቀረን ቀፕቶ ኮቶ ክቴሴ።

![](https://cdn.door43.org/obs/jpg/360px/obs-en-10-02.jpg)

ፌርኦንከ ሰመይተ አንዲሾ ክደ ከመው ቻዴ፣ ሴመለ ዋቀከ ክፕስ ቀሮፐ ኤርከናተ ኩደን ኤርኬ፡፡ ዋቀከ ኤርከነዎሴን ቁደኔ አክመ ፌርኦን እሾ ክለነደ አክፕስ ፕሰ ቀሮፐ ሁፕነ ቀፖ ፌርኦን አክሼ፡፡

![](https://cdn.door43.org/obs/jpg/360px/obs-en-10-03.jpg)

ዋቀከ ፕሸ ክራ አፐይ ዲኮፐ ፑርሼ፣ መ ኾር ፌርኦን አመ ከሱ እስራኤሌተን ዲኔ፡፡

![](https://cdn.door43.org/obs/jpg/360px/obs-en-10-04.jpg)

ዋቀከ ፒተ ክፕስ ፕሰ ቀሮፐ ሞኮወ ኤርኬ፡፡ ፌርኦንከ አከ ሙሴ ሞኮዎሴን አሌ ተውሾኤ እሸ ቅንሰዴ፡፡ ሞኮዋሴኔ ፕሰከ ሌኤን፡፡ ፌርኦን ኾር ከርታድ ኮኮነይሼ ከ አከ እስራኤሌተ ፒተ ክፕስ ከረ ሶክቶ እንዲንን፡፡

![](https://cdn.door43.org/obs/jpg/360px/obs-en-10-05.jpg)

ሴመለ ዋቀከ ኩኜተ አኦረ ቆምቶ ኤርኬው፡፡ ከ ከመኤ ኻጨ አኦረ ቆሞ ኤርኬው፡፡ ፌርኦንከ ሙሴ እሾ አሮን ሀላችሴ ከ ኦቶን ኤርከናቶሴኤ ቃትንይ አክመ እስራኤሌተ ክፕስ ከረ ሶኬተ ኤተንሶ እሾተ ሌሌ፡፡ ኤቴ ሙሴ ቅንሰዴዬ፥ ዋቀከ ኻጨሴ ፕሰ ክፕስ ከረ አሌ መይሼ፡፡ መ ኾር ፌርኦን ከርታድ ኮኮነይሼ ዲሼይ ሰመይሴ አሌኤን ዲኔ፡፡

![](https://cdn.door43.org/obs/jpg/360px/obs-en-10-06.jpg)

ከመዬ፥ ዋቀከ አከ ሆሬተ ክፕስ ፕሰ ፓቅቶ ከ ቶቶ ኮዴ፡፡ መ ኾር ፌርኦን ከርታድ ኮኮነይሼ ከ እስረኤሌተ አሌኤን ዲንን፡፡

![](https://cdn.door43.org/obs/jpg/360px/obs-en-10-07.jpg)

ሴከመዬ ዋቀ፥ አከ ሙሴ ፉለ ፌርኦን ቱረ ተረ ሞንተንዴለ ፑሎ እሽ ሌሌ። ኤቴ ተረሴ ፑሌዬ፥ ክፕሴተ ቁደኤ ፈይክቴተ ሱረውንቶከ ሶክቴ፣ እስራኤሌተ ቁደኤ ኾር ፈይክቴሴ እንሶክኔ፡፡ ዋቀከ ከርተ ፌርኦን ኮኮነይሼ፤ ፌርኦንከ እስራኤሌተ እንዲንን፡፡

![](https://cdn.door43.org/obs/jpg/360px/obs-en-10-08.jpg)

ሴከመዬ ዋቀከ ድሽመ ክፕስ ከረ ቾ ቁደ ከረ ኩተ ፐሼ፤ ከ አፕቴንተ ነመ ትኬዬ ለከ ቱለ ቾ ፕሰ ሌይሼ ኤርኬ፡፡ ፌርኦንከ ሙሴ እሾ አሮን ሀለችሴ ከ እሾነ ክዴ፥ ‹‹እን እሽን ደፔይ፥ ሶከ እኤተንሰን፡፡›› ሴመለ ሙሴከ ቅንሰዴ፣ አፕቴንተሴከ ሞንቴ ኸተ ሮፐ ቃትሴ፡፡

![](https://cdn.door43.org/obs/jpg/360px/obs-en-10-09.jpg)

መ ኾር ፌርኦን አመ ኦፐ ኦሬው ከ ጩፖተ ኮዴ፤ ከ ከርታድ ኮኮነይሼ፡፡ ኡመ እስራኤሌተን ዲኔ፡፡

![](https://cdn.door43.org/obs/jpg/360px/obs-en-10-10.jpg)

ሴመለ ዋቀከ ክፕስ ቀሮፐ ኼሎተ ቶረይተ ቄዴ፡፡ ቶረይቶሴከ ድሽመ አፕቴንተ ኬለ ሀሴ ፒሰ ደሜ፡፡

![](https://cdn.door43.org/obs/jpg/360px/obs-en-10-11.jpg)

ሴከመዬ ዋቀከ ቱከንተ አሌተ ሴሰ ፕርቴ ኤርኬ፡፡ ሀከ ክፕሴተ ትካሶ ከረ ሶከ መላልቶኤ ቱከንሴ አከተ ነን ኪቴ፡፡ ቅንደ እስራኤሌተ እሽ ከልቶ ኾር ለአይተ ቸ፡፡

![](https://cdn.door43.org/obs/jpg/360px/obs-en-10-12.jpg)

ኤርከነዎሴን ኩደን ከመዬ ኔፎ ፌርኦን እክእ እስራኤሌተን ዲኔ፡፡ ፌርኦን ቆተ ደከይንንክንን መለ፥ ዋቀ ኤርከናተ አፕራምፕረ ተከ ኤርከ ፒሰዴ፡፡ ሴዴ ከርተ ፌርኦን ፑርሰይ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ሶከተ 5-10፡፡*

## 11. ፋስከ

https://openbiblestories.org/l/kxc/story-11/

![](https://cdn.door43.org/obs/jpg/360px/obs-en-11-01.jpg)

ኦቶን እስራኤሌተ እንዲንንይ፥ ዋቀ አከ ቃረመ አኦረ እሾ አሆሬተ አፓዮተ ዴለዴ ፕሰ ሌይሾኤ ፌርኦን ሌሌ። ፌርኦን ኤቴ ሴዴ ደከዬዬ፥ አመ ከሱ አመነ ከ ዋቀ አጨጨመ እቲቴ፡፡

![](https://cdn.door43.org/obs/jpg/360px/obs-en-11-02.jpg)

ዋቀከ ነመ እሽ አመኔ አይኖ ኔፎ ኮድቴ እነ ዲርተ አቃርተ አቀፖ አከ ድነኔኤ ሳንተ ሀርምሼ፡፡ ቶለከ መተ ምነኤ ላሀ ቀጨን ቀፕንን ሬኼ ከ ቀሌ፡፡

![](https://cdn.door43.org/obs/jpg/360px/obs-en-11-03.jpg)

ዋቀከ እስራኤሌተ አከ ዲከ ላሆሴት ኻረ ትካይሾ ቱረ ዳተን ከ ሶአድ ኔፎ ዋተን ከ ላቆተ ኦፐ ሀደየን ቀፕንንን ጨርጨርተን ደመኔ እሾተ ሌሌ። ከ አሴው ኦቶ ደመኔዬ፥ ፒተ ክፕስ ከረ ሶከ ሀርምሰደኔ ሌሌ፡፡

![](https://cdn.door43.org/obs/jpg/360px/obs-en-11-04.jpg)

እስራኤሌተከ አከ ዋቀ እሼተ አጨጬ ቀረ ዌ ፕሰ ኮቴ፡፡ ኦልቆተ ሀልኬተ ቀረዬ፥ ዋቀከ ክፕስፐን ተርፔ ከ ቃረደ አዲረ ኮዴ ፕሰ ሌይሼ፡፡

![](https://cdn.door43.org/obs/jpg/360px/obs-en-11-05.jpg)

ኻረደ ትከ እስራኤሌተ ፕሰ ዲከኔ ዳተሜን፣ ሴመለ ዋቀከ ትካሶ ከፐን ተርፔ፡፡ ኦራ ትኮሴን ከረ ቾ ፕሰከ ፐሄ፡፡ እስራኤሌተከ ዲከ ለሆሴት ምነን ድንቴ፡፡

![](https://cdn.door43.org/obs/jpg/360px/obs-en-11-06.jpg)

ክፕሴተ ኾር ዋቀኔን አመኔ፣ ኡመ አጨጫድ ኮደ ቀረን ነከኔ፡፡ ሴመለ ዋቀ ትካሶ ከፐኔን ተርፕኔ፡፡ ዋቀከ ቃረመ ዲረ ኮዴ አክፕሴተ ፕሰ አሌ ፕሬ፡፡

![](https://cdn.door43.org/obs/jpg/360px/obs-en-11-07.jpg)

ቃርተ ትከ ህደ ከረ ቾ ፐያቴ ሀከ ቃርተ ፌርኦንትእ ዲርተ ቃርተ ኮዴ አክፕስ ፕሰከ ፕረሜ። ኘረሀታይሾ አድኬ ኩተ ቀረን ኻቴኤ፥ ኦረ ክፕስ ከረ ቾ ሌከይተከ ፖይን ከ ፖረ ኡሉፕን፡፡

![](https://cdn.door43.org/obs/jpg/360px/obs-en-11-08.jpg)

ሀልኬስትይው፥ ፌርኦንከ ሙሴ እሾ አሮን ሀላችሴ ከ እሾተ ክዴ፥ ‹‹እስራኤሌተ ቄደ ከ አመሴዬ እሽን ሶከ!››

*መታፈ ቁልቁሎተ ከረ ፖረ ቀረ አካንቶ፡- መታፈ ሶከተ 11፡1-12፡32፡፡*

## 12. አክመ እስራኤሌተ ክፕስ ከረ ሶክቴ

https://openbiblestories.org/l/kxc/story-12/

![](https://cdn.door43.org/obs/jpg/360px/obs-en-12-01.jpg)

እስራኤሌተ ቆተ ክፕስ ከረ ሶክቴ መለ፥ አከተ ኸሶቴ፡፡ አሬፐዴሰ ከርፕሸደን፣ ፒተሴ አክፔተ ኦፐ ኔፎ አንተ ቀረ ቻን። ክፕሴተከ ወርቄተ ከ ደከረ ፕሬተ እሾ ዋ ሄረን ኮኮኮከ አእስረኤሌተ እሾነ ቀረ ካሰቴ ፕሰ እሾተ ዳሴ፤ ኤቴ ክፕስ ከረ ሶክናኔዬ፥ ሰኜወ ኦረ ፒተ ፕል ኮዴ ተከ ተከከ ዋቀ አመኔን ከ እስራኤሌተ ኦል ኣኔን፡፡

![](https://cdn.door43.org/obs/jpg/360px/obs-en-12-02.jpg)

ዋቀከ ኩያቴዬ፥ ቱደ ዴረ አኦረርተ ከ ሀልኬቴዬ ቱደ ዴረ አአፒተ አእሾነ ቱረንዴሰ አኖን እሾነ መረኤ። ዋቀ አውተ ፕሰ እሾነ ኦል ቻዴ ከ ፖረይሾ ኦፐ እሾነ መረኤ፡፡ ዋ ኮደ እሾነ ፐርፓችስነ እሸ ከመ አንተ ፐተ፡፡

![](https://cdn.door43.org/obs/jpg/360px/obs-en-12-03.jpg)

ክሴተ ሸከይቴተ ከመዬ፥ ፌርኦን እሾ ሰመይተከ ድከታይሾ ፑርሼን ከ አከ እስራኤሌተ አመ ከሱ ከርፕሸዳሶ ኮድቶ ፈዴን፡፡ ዋቀ አከ እሸ ፐተ ዋቀ ዱካተ ኮዴ ሰመይተ አከ አኮኤ፥ ከ አሴው እሸ አከ ዋቀ ቾ ከ ከላኖ (ያህዌ) ኮዴ፥ ከ ፌርኦን እሾ ክለነዳድ ቀሮፐ ሁፕነ አኩተ ቀፖ አከ ኡፕናደኔኤ ከርተ ፌርኦን ኮኮነይሼ፡፡

![](https://cdn.door43.org/obs/jpg/360px/obs-en-12-04.jpg)

ሴመለ ፌርኦን እሾ ኼላድ አኦረነከ አመ ከሱ ከርፕሸደ እሾነ ኮደተኤ እስራኤሌተ ከመ አውሌን፡፡ እስራኤሌተ ኤቴ ኼለ አኦረነ አክፕስ አክቴዬ፥ አክመ አርተ ኼለ ፌርኦን አኦረነ እሾ አፐካቴተ ቲመ ከረ ቻኔ ኡፕናቴ። ከ ቆተ አከተ ፉሬን መለ ኡሉፔን ከ ክዴኔ፥ ‹‹ማነኤን ክፕስ ከረ ሶክኔ? ሀ እንፕረሜ!››

![](https://cdn.door43.org/obs/jpg/360px/obs-en-12-05.jpg)

ሙሴከ እስራኤሌተ ሌሌ ከ ክዴ፥ ‹‹እንፉረን! አዌ ዋቀ እሽነ ቶርፐ ከ እሽን ድንሸ።›› ሴከመዬ ዋቀከ ሙሴ ክዴ፥ ‹‹አከ ፐከቴተ ቲመ ከሮፐ ኣነኔኤ ሰመይተ ሌሌ።›› ሴከመዬ ዋቀከ አከ ክፕሴተ እስራኤሌተ ኦልን አክንንእ ቱደሴ አኦራርተ ኦተንተ እስራኤሌተ እሾ አክፕሴተ ኦፐ ቃትሼ፡፡

![](https://cdn.door43.org/obs/jpg/360px/obs-en-12-06.jpg)

ዋቀከ አከ ሙሴ ሀርካድ ፐከቴተ ቀሮፐ ዴረይሾ ከ ፕሸሴኔ ቆቶኤ እሽ ሌሌ፡፡ ሴከመዬ ዋቀከ አከ ፐከቴተ ከረንዴሰ ፖረ ኦፐን ተርፐን ቻዶኤ፥ አከ ኸይኸይተ ፕሸሴኔ ቅንደ አክተ ከ አፕትተ ኦፐ ቅሾ ኮዴ፡፡

![](https://cdn.door43.org/obs/jpg/360px/obs-en-12-07.jpg)

እስራኤሌተከ ፕሸሴኔ ቅንደ አክተ እሾ አፕትታን ከወተ እሾነ ኮዴ፥ ፐከቴሴ ከረንዴሰ ፒተ ኮክቴ ኦፐን ተርፕቴ፡፡

![](https://cdn.door43.org/obs/jpg/360px/obs-en-12-08.jpg)

ሴከመዬ ዋቀከ አክመ እስረኤሌተ እሾነ ኬለ ፐሀቴ አከ ክፕሴተ አክቶ ኮዳኤ፥ ኡራተሴ ፖሮፐ አሌ መይሼ። ክፕሴተከ እሾነ ከመ ዳነ ፒሰቴ፡፡

![](https://cdn.door43.org/obs/jpg/360px/obs-en-12-09.jpg)

ከ ሴመለ ፐከቴሴ ከረንዴሰ እስረኤሌተ ከመ ኩልቴ፣ መ ኾር ዋቀ አከ ክፕሴተ ርሪከውቶ፥ ሰረኬላሶከ ቀቀፐመኔ ኮዴ። እከ ኡሉፔን ከ ክዴኔ፥ ‹‹ዋቀ እስራኤሌተ ቶርፕንይ፥ አሌ ቀሀነ!››

![](https://cdn.door43.org/obs/jpg/360px/obs-en-12-10.jpg)

እስራኤሌተ ኤቴ ፐከቴሴ ከረን ነከይተን ቱልቴ ከመዬ፥ ዋቀ አከ ሙሴ ኦፐ ኦሮ ከ ሀርካድ ፐከቴሴ ቀሮፐ ዴረይሾኤ እሽ ሌሌ፡፡ ኤቴ እሸ ዋቀ አጨጨሜዬ፥ ፕሸሴኔከ ኼለ ኦረነ አክፕስ ቀሮፐ ኦሬን ከ እሳሴኔ አኸተ ምነ ኮዴን፡፡ ኼለ አኦረነ አክፕስ ፕሰከ ቀረ ፕረሜ፡፡

![](https://cdn.door43.org/obs/jpg/360px/obs-en-12-11.jpg)

እስራኤሌተ ኤቴ አከ ክፕሴተ ሌቴ አክቴዬ፥ ዋቀ አመንቴ ከ አከ ሙሴ ኹመምፐይተ ዋቀ ኮዴ ከሱ አመንቴ፡፡

![](https://cdn.door43.org/obs/jpg/360px/obs-en-12-12.jpg)

ከ አሴው ቆተ ዋቀ ቶተ ከ ከርፕሹመ ኬለ እሾነን ፐሄ መለ፥ ኸሰ ኩተከ እሾነ ደካዴ! አመ ኦር ዋቀ ኮደ ኮደኤ ነተ ሶኬን፡፡ እስራኤሌተከ ቆተ እሸ ኼለ አኦረነ አክፕስ ኬለ እሾነ ድንሼ መለ፥ አከ ነተ ሶኬን ኡልፌሰኤ ከ ዋቀ ከለተይሰተኤ፥ መስሙሬወ ሌከየ ደወዴን፡፡

![](https://cdn.door43.org/obs/jpg/360px/obs-en-12-13.jpg)

አተ አከ ዋቀ ክፕሴተ ቀረኤ ፑተይመ እሾነ ዳሼ ከ ከርፕሹመ ኬለ እሾነን ፐሄ አከ መቴ ኦርሰደኔኤ፥ አፐረ ኦሮ ምነኤ አከ ፋስከ ኡልፌሰኔኤ እስረኤሌተ አጨጬ። እሾነከ ላሀ ቀጨን ቀፕንን ቀለዴን ከ ላቆተ አንፑኬሰምን ኦልን ደምተን ኸሶዴን፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ሶከተ 12፡33-15፡21፡፡*

## 13. ኮደይቴተ አዋቀ እስራኤሌተ ኦል ኮደዴ

https://openbiblestories.org/l/kxc/story-13/

![](https://cdn.door43.org/obs/jpg/360px/obs-en-13-01.jpg)

ኤቴ ዋቀ እስራኤሌተ ቅንደ ፐከቴተ ቲማትን መረኤ ከመዬ፥ ቅንደ ኮመይታትን እሮተ ሲነ ክደምቶፐ እሾነ ቄዴ፡፡ ሴዴ ኔፎ እሮተሴ አሙሴ ሁጭተሴ ኩፐኖ ቀረ አኬ፡፡ ሰመይተከ እሮተሴ ኬለንዴሰ ቱከናሶ ዳፐዴ፡፡

![](https://cdn.door43.org/obs/jpg/360px/obs-en-13-02.jpg)

ዋቀከ ሙሴ እሾ ሰመይተ እስረኤልት ሌሌ ከ ክዴ፥ ‹‹ኦቶን አነኤ አጨጨምተኔዬ ከ ኮደይቴትዮ ቶይትተኔዬ፥ ቆቶተ ኡልፌሰምቴ፥ ቄሴወ አኑቁሰ፥ ከ አሴው ሰመይተ ቁልቁላዌ አነ ኮድተን።››

![](https://cdn.door43.org/obs/jpg/360px/obs-en-13-03.jpg)

አሰመይተ ቻተድ ሀርምሼ ኩያተ ሴሰተ ከመዬ፥ ዋቀከ ኽረረ ከ ቀቀወኔ ከ ቀየኔ ከ አሴው ካሰ ኔሰ ኩተን ደወሞኔ እሮተ ሲነ ቀረ ሌከዴ፡፡ አከ እሮቶሴ ቀሮፐ ፈየዶ አእሽ ክደምቴ ሙሴ ፐተ፡፡

![](https://cdn.door43.org/obs/jpg/360px/obs-en-13-04.jpg)

ሴከመዬ ዋቀከ ኮደይቴተ እሾነ ዳሼ ከ ክዴ፥ ‹‹አንት አን ዋቀ ቾ ከ ከላኖ (ያህዌ)፥ አከርፕሹመ ክፕስ ኬለ እሽን ሶክሼ። ሴመለ አነ መልይ ዋቀደ አፕለኤን ቀፕናደን፡፡››

![](https://cdn.door43.org/obs/jpg/360px/obs-en-13-05.jpg)

‹‹ክሎወን ኮደደን ከ እሾነኤን ሰከተደን፤ ማነ መለ፥ አንት ዋቀሴ ቾ ከ ከላኖ (ያህዌ) አን ዮአምፐይተ ዋቀኤይ፡፡ መኽዮ ፐተኤን ኻሸን፣ ኩያተ አኔሱመ ዋቀ ቁልቁለይሼ ከ ኡልፌሴ፡፡ ሴዴ ኔፎ ኮዳይት ፕሰ ኩያተ ሌህ ከረ ኮደዶ፣ ማነ መለ፥ ኩያተ ተፐተ ኩያተ አኦፐ ኔሰቶ ከ አነ መቴ ኦርሰቶይ፡፡››

![](https://cdn.door43.org/obs/jpg/360px/obs-en-13-06.jpg)

‹‹ኣፐይሽን ከ ኣየስን ኡልፌሴ፡፡ እንእሸን፡፡ እንደሀለን ኡመ እንደሀልሰደን፡፡ እንሀተን፡፡ ደርተን ኮደን፡፡ እስከቴተ ነመ ፕላት፥ ከ ትካድ ታክ ወ ኻድ ኮዴ ተከ ኔፎ ቄደተ እንኸጬለን፡፡››

![](https://cdn.door43.org/obs/jpg/360px/obs-en-13-07.jpg)

ሴከመዬ ዋቀከ አጨጨዶሴን ኩደን ሽለለ ቀቃሀ ለክ ቀረ ታፌ ከ ሙሴ ዳሼ፡፡ ዋቀከ አሴው ሴራ እሾ ታንቴወ አፕለ አቶይተደኔ ሌከየ እሾነ ዳሼ፡፡ ኦቶን ሰመይተ ሴሮሴን ቶይተደዬ፥ ዋቀ አክመ እሾነ ሰኮ ከ እሾነ ቶይቶኤ ክፔተ ዳሼ፡፡ ኦቶን ሴሮሴኔ ቶይተተ ዲሸኔዬ ኾር፥ ዋቀ እሾነ ቀተአ፡፡

![](https://cdn.door43.org/obs/jpg/360px/obs-en-13-08.jpg)

ከ አሴው ቱከነ አሄኖ አእስረኤሌተ ኮደ እሾነ ፐርፓችስንቶት ዴሰ፥ አኬከ እሾነ ዳሼ፡፡ እሸ ኔፎ ቱከነ አከረ ኦል አኬተኤ ክደም። ከ ካተ ካረንተ ኩኩተ ለክን ቆተምቴ ቀፐ፡፡ ዋቀ ከሱ ኤዬ ከረኤ ከላን፤ ካተ ካረንተ ከመ ቸ ከሮፐ አኩሌተ ኤተንኖ ሳረ ቄሴወ ፐተ፡፡

![](https://cdn.door43.org/obs/jpg/360px/obs-en-13-09.jpg)

ነመ ሴረ ዋቀ ቄፕሼ አይኖ ኔፎ አኮድቶ፥ ፖረ ከልሶተ አቱከኖሴ አዋቀ ቱረ ቾ ቱሮፐ ሆሬተ አዋቀ ከልሶተ እሽን ዴኖን ዴነ እኤተንሸ፡፡ ቄስተከ ሆሬሴ ቀልከ ፖሮሴ አከልሶተ ቀረ ኩፕን፡፡ ዲከ ሆሬሴ ከልሶተ ዴሀቴከ ጩፖተ ነሞሴት ቀረ ዴክን ከ ነሞሴ ፉለ ዋቀ ቱረ ቁልቁለን፡፡ ዋቀከ አከ ቄሴዋድ ኮደኔኤ እናፐ ሙሴ አሮን፥ ከ አክሞሴ ምነኤው ሰኜተ አአሮን ሬኼ፡፡

![](https://cdn.door43.org/obs/jpg/360px/obs-en-13-10.jpg)

ሰመይተ ፕሰከ ሴራ አዋቀ ዳሼ ቶይተኤ፥ ከ ዋቀ ፐተ ዋቁምሰተኤ፥ ከ ሰመይተ አኸው ሬኸሜ ኮደኤ ኦፐ ሰሌ። መ ኾር ዋቀ አጨጨመኤ አኦፐ ሰሌን ከመዬ አንጨርን መልይ፥ ጩፖተ ኔቀ ኮዴን፡፡

![](https://cdn.door43.org/obs/jpg/360px/obs-en-13-11.jpg)

ሙሴ ኩያወ ሌከየ ኩተ እሮተ ሲነ ቀረዬ ዋቀ ኦል ቶራን፡፡ ሰመይተከ ሀከ ቲተውኖ ከረኤ እሸ ምነ አሰተ መላሌ፡፡ ከ ሴመለ አሮንፐ ወርቄተን ዴኤን ከ አከ ክሎተ ኮዶ እሸ ካሰዴን።

![](https://cdn.door43.org/obs/jpg/360px/obs-en-13-12.jpg)

አሮንከ ፐሀነ ኑናትን ክሎተ ወርቄተ ኮዴ፡፡ ሰመይተከ ሳንተ ከመ ደፕቴን ክሎተሴ ዋቀይሰተ ፓዬ፤ ከ ከልሶተ ከሱ እሽ ከልሼ። ጩፖታይሾ ምነን ዋቀከ አከተ እሾተ ሚሮዴ፤ ከ እሾተ ፐትሰ ድከዴ፡፡ መ ኾር ሙሴ ዋቆፐ እሾነ ቅንሰዴ፣ ዋቀከ ቅንሴታድ ደከዬ፥ ኡመ እሾነን ፐትኔ፡፡

![](https://cdn.door43.org/obs/jpg/360px/obs-en-13-13.jpg)

ሙሴ ኤቴ እሮተ ቀረ ሌከዴዬ ከ ክሎተሴ አኬዬ፥ አከተ ሚሮዴ ከ ሽለላሴኔ ቀቃሀ አዋቀ ቀረ ሴረሴ ኩደን ታፌ መማጬ፡፡

![](https://cdn.door43.org/obs/jpg/360px/obs-en-13-14.jpg)

ሴከመዬ ሙሴከ ክሎተሴ ዮቄ፥ ከ ፕሸ ቀረንዴሰ ፍዴ፤ ከ ሰመይተ ከሮፐ እክሼ፡፡ ዋቀከ ሰመይተ ቀሮፐ ኤርከናተ ኤርኬ፥ ኦረ ሌከይተከ ሌኤ። ፡

![](https://cdn.door43.org/obs/jpg/360px/obs-en-13-15.jpg)

ሙሴከ አመ እሮተ ቀሮፐ ፈየዴው ከ አከ ዋቀ ሰመይተ ዲሰተ ኮዶ ቅንሰዴ፡፡ ዋቀከ ሙሴ ደከዬ ከ እሾነ ዲሼ። ሙሴከ ፐከ ሽለላሴኔ አመመጬ ኦፐኤ ሽለለ አቀቃሀ ሃረየ ቀረኤ ሴረሴ ኩደን ታፌው፡፡

![](https://cdn.door43.org/obs/jpg/360px/obs-en-13-16.jpg)

ሴከመዬ ዋቀከ እስራኤሌተ እሮተ ሲነ ከፐ ቄዴ ከ ፒተሴ አኸሰ ኦፐ እሾነ መረኤ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ሶከተ 19-34፡፡*

## 14. አከ ኮመይቶፐ ረራተዌን

https://openbiblestories.org/l/kxc/story-14/

![](https://cdn.door43.org/obs/jpg/360px/obs-en-14-01.jpg)

ኤቴ ዋቀ አከ እስረኤሌተ ኮደይቴተሴ አእሾነ ኦል ኮደዴ ሴረሴኔት አጨጨመን እሾነ ሌሌ ከመዬ፥ እሮተ ሲነት ኼን። ዋቀከ ሰመይሴ እሮተ ሲነት ዴሰ ፒተሴ ኬኔኣን ክደምቶ አክፔተ ዳሼ ኦፐ እሾነ መረአ ፓዬ። ቱደሴ አኡረተከ እሾነ ቱረንዴሰ ኬኔኣንፐ አን፣ እሾነከ ከመ ኦሬን፡፡

![](https://cdn.door43.org/obs/jpg/360px/obs-en-14-02.jpg)

ዋቀ አከመ ፒተሴ አክፔተ ሰኜዋሶት ዳሾኤ አፕርሃም ከ ይስሀቅ እሾ ያእቆፕ ኸሰ ከሌ፣ መ ኾር ስትይ፥ ሰመይተ ኩተይተ አፒቶሴ ከረዬ ከላኖ ቸ፡፡ እሾነ ኔፎ ኬኔኣኔተ ክደም፡፡ ከኔኣኔተ ዋቀ ዋቀይሰንንክቶ ኡመ እሽ አጨጨምንክቶ፡፡ ዋቀደ አደርተኤ ሰክሰዴን ከ ዌ ሌከየ ኮዴን፡፡

![](https://cdn.door43.org/obs/jpg/360px/obs-en-14-03.jpg)

ዋቀከ እስራኤሌተ ሌሌ ከ ክዴ፥ ‹‹ኬኔኣኔተ አፒተሴ አክፔተ ኦፐ ክቶ ፕሰ አሌ ፕረ፡፡ እሾተ ኦል ነከይተን ኮደደን፥ ኡመ እሾቶፐን ሄመን፡፡ ከ ክለነዳሶ ፕሰ አሌ ፐሸ። ኦቶን አነኤ አአጨጨም አክንንይ፥ ፐክዮፐኤ ክሎዋሴኔ ኻይሾ ሰክሰተን፡፡››

![](https://cdn.door43.org/obs/jpg/360px/obs-en-14-04.jpg)

ኤቴ እስራኤሌተ ኼለ ፒተሴ አክፔተ ኦፐ ከይቴዬ፥ ሙሴ ከፈሴኔ አእስራኤል ኩደንከ ለክ ኦፐዬ ነመ ተከ ተከ ሬኼ፡፡ ከ አከ ኣነን ከ ፒቶሴ አተ አከ ፐሀቶ ሌትሸኔ እሾነ ኤርኬ። ኦሮሴ አኬኔኣን ኦቶን ፑኑ እኮኮክ ታክ እኑኩል ኡፕናተኤ እሾነ ሌትሰ ፐርፓችስቴ፡፡

![](https://cdn.door43.org/obs/jpg/360px/obs-en-14-05.jpg)

ነሞሴ ኩደንከ ለክከ ኩያተ ኩንደ አፉር ኬኔኣን ከረ ኣኔን ከ ቲተዌን። ከ ሰመይተ ሌሌን ከ ክዴኔ፥ ‹‹ፒቶሴ አከተን ከፐተይቴተ፥ ኡንታድ ኔፎ እንፕረምቶ!›› ሌትሰምፐያሴኔ ኩደን ኾር እክዴኔ፥ ‹‹ከተማሶ አከተ ከፐ ኦኽናሜን፥ ኦራይሾ ኔፎ እሬለየ! ኦቶን እንቶርፕነዬ፥ ዱካተኔ እኖ ፑተን ከ እኖ ሌይሸን!››

![](https://cdn.door43.org/obs/jpg/360px/obs-en-14-06.jpg)

ሌትሰምፐያሴኔ ኦፐዬ እያሱ እሾ ካሌፕ ኤኖው ክዴኔ፥ ‹‹ኦሮሴ አኬኔኣን አክመ ዴዴር ከ ኮኮክ ዱካተ፣ መ ኾር እኖ ዱካተኔን እሾተ ፑነ! ዋቀ እኖ ቶርፐይ!››

![](https://cdn.door43.org/obs/jpg/360px/obs-en-14-07.jpg)

ሰመይተ ኾር ካሌፕ እሾ እያሱን ደከይኔ፡፡ ከ ሙሴ እሾ አሮን ቀረ ሚሮዴን ከ ክዴኔ፥ ‹‹ማነ መለ ፖሮሴ አሬ ቾ ኔቀ ኦፖፐ እኖን ዴቴን? አን ኦረነን ፕረሞ፥ እስከትኖ እሾ ሄላኖከ ከርፕሸደ ኮደን ከፐዬ፣ ከድን ክፕስ ከረ ተውኔ እኖ ዌይ።›› ሰመይተከ ሳረ ፕለይተ አክፕስፐ እሾነ መረኦ ሬኸተ ፈዴ፡፡

![](https://cdn.door43.org/obs/jpg/360px/obs-en-14-08.jpg)

ዋቀከ አከተ ሚሮዴ ከ ቱከናድ ኬሎፐ ዴኤ፡፡ ከ አሴ ክዴ፥ ‹‹እሽነ ቆተ አነ ቀረ ኻቴን መለ፥ ሰመይተ ፕሰ ኮመይቶፐ ፖረ ረራተወ፡፡ እያሱ እሾ ካሌፕ መልይ፥ ኦረ አፐራይሾ ኩንደ ለክ ከ ቀሮፔለ ቾ ፕሰ ኤዬኤ ሌአ ዲሼይ ፐከነ ፒተሴ አክፔተ ኦፖፐ እንከሎ፡፡››

![](https://cdn.door43.org/obs/jpg/360px/obs-en-14-09.jpg)

ሰመይተ ኤቴ ሴዴ ደከዬዬ፥ ጩፖተ አኮዴ ምነኔ ኘረሄ፡፡ ከ ሜሀዳሶ አኦረነ ቀፐዴን ከ ኬኔኣኔተ ቶርፐ ኣኔን፡፡ ሙሴከ ቆተ ዋቀ እሾነ ኦልን ክንን መለ፥ አከን አንን እሾነ ደውሬ፤ እሾነ ኾር እሽእን ደከይኔ፡፡

![](https://cdn.door43.org/obs/jpg/360px/obs-en-14-10.jpg)

ዋቀ እሾተ ኦል ኦረነኤን አኔ፤ ሴመለ እከ ፑተሜን፥ ኦረ ሌከይተከ ሌኤ፡፡ ሴከመዬ፥ እስራኤሌተከ ኬኔኣንይ አሌ ቲተውቴ ከ ኮመይቶፐ ፐረ ኩንደ አፉር ረራተውቴ፡፡

![](https://cdn.door43.org/obs/jpg/360px/obs-en-14-11.jpg)

ፐሮሴን ኩንደ አፉር አእስረኤሌተ ኮመይቶፐ ረራተውቴ ከረኤ፥ ዋቀከ እሾተ ደምሼ። ከ ሞንቴ ኸተ ደምተ ‹‹ሜነ›› ክደምቶ እሾተ ዳሼ፡፡ ከ አሴው አከ ሶአ ደመኔኤ፥ ሰፈራይሾ ኦፖፐ ፑርክደ ኤርኬ፡፡ ክሴሴ ፕሰ ከረኤ ዋቀከ አከ ሜሀዳሶ እሾ ኾፓሶ እንኬርንን ኮዴ።

![](https://cdn.door43.org/obs/jpg/360px/obs-en-14-12.jpg)

ዋቀ ሳንተ ኦረ ቀወኖኔ ሽለ ከሱ ከረ ፕሸ እሾተ ዳሼ፡፡ መ ኾር አሴዴ ፕሰ ኮድቴ ኔፎዬ፥ ሰመይተ እስራኤል ዋቀ እሾ ሙሴ ቀረኤ ሞሞኤን ከ ኾምኾሜን፡፡ አኮድቶመ፥ ክፔተሴ አዋቀ አፕርሃም ከ ይስሀቅ እሾ የእቆፕ ዳሼኤ አመ ከሱ አአመነሜው።

![](https://cdn.door43.org/obs/jpg/360px/obs-en-14-13.jpg)

ክሴተ አፕለ አሰመይተ ፕሸ አፋፐ ኾጰ ደፔዬ፥ ዋቀ እሙሴ ክዴ፥ ‹‹ሽለ ቶራዶ፤ ፕሸ ከረዬ ሶከይ።›› መ ኾር ቆተ ሙሴ ሽለ ቶራተ ከፐዬ ኡሌተን ለክን ሽለሴ ደይሼ መለ፥ ፉለ ሰመይተ ቱረኤ ዋቀ ቱፈዴ፡፡ አከ ነመ ፕሰ እኮኤ፥ ፕሸከ ሽለሴ ከረ ሶኬን፤ አኮድቶመ ዋቀ ሙሴ ቀረኤ ሚሮዴ ከ ክዴ፥ ‹‹ፒተሴ አክፔተ ኦፖፐ አከልቶ።››

![](https://cdn.door43.org/obs/jpg/360px/obs-en-14-14.jpg)

እስራኤሌተ ኤቴ ፐረ ኩንደ አፉር ኮመይቶፐ ረራተውቴ ከመዬ፥ እሳሴኔ ዋቀ ቀረ ኝረሙመን ኸኤ ፕሰከ ፕረሜን፡፡ ሴከመዬ ዋቀከ ሰመይሴ ኼለ ፒተሴ አክፔተ ከፖፐ አመ መረኤው፡፡ አመ ኦር ሙሴ እኬሬ፤ ሴመለ አከ ሰመይሴ መረአን እሸ ቃርቃሮኤ፥ ዋቀከ እያሱ ሬኼ፡፡ ዋቀ፥ ኩያተ ተከዬ አክመ ኹመምፐይተ አፕለ አሙሴ ፐሆ ኤርኮኤ ሙሴ ክፔተ ዳሼ።

![](https://cdn.door43.org/obs/jpg/360px/obs-en-14-15.jpg)

ሴከመዬ አከ ፒተሴ አክፔተ አከ ኤተንሾኤ፥ አከ ሙሴ ኩተ እሮተ ቀሮፐ ፈየዶኤ ዋቀ እሽ ሌሌ፡፡ ሙሴከ ፒተሴ አክፔተ አኬ፤ መ ኾር አከ ኦፖፐን ከልንእ ዋቀ እሽእን ፈቀኔ፡፡ ሴከመዬ ሙሴከ ቶኤ፤ እስራኤሌተከ ኩያተ ኩንደ ሴሰ እሸ ፖይቴ። እያሱከ መርታይሾ አሃረየ ኮዴ፡፡ እያሱ ቆተ ዋቀ አመኔ ከ እሽ አጨጨሜ መለ፥ መርተ አፈየ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ሶከተ 16-17፤ መታፈ ሌኩምተ 10-14፤ 20፤ 27፤ መታፈ ኦፐ ኦሬተ 34፡፡*

## 15. ፒተሴ አክፔተ

https://openbiblestories.org/l/kxc/story-15/

![](https://cdn.door43.org/obs/jpg/360px/obs-en-15-01.jpg)

ፕራምፕረ ቀረዬ፥ ክሴተ አእስራኤሌተ ፒተሴ አክፔተ አኬኔኣን ኦፖፐ ከልቶከ ከይቴ፡፡ እያሱከ ከተማሴኔ አኬኔኣን እያርኮ፥ አኦኽንተ ከወታትን ፈየ ከፐ ቆረሜ ኦፐ ሌትሰምፐየ ለክ ኤርኬ፡፡ ከተሞሴን ኦፐዬ፥ አልመልቴተ ተከ አእስከቴተ ሬአፕ ክደምቶ ከ ሌትሰምፐዮስን ጩቴ ከ አከ ኬለ ተወኔ ኮቴ፡፡ እሼተ ቆተ ዋቀ አመንቴ መለ ሴዴ ኮቴ፡፡ ሌትሰምፐየሴኔከ ኦቶ እስራኤሌተ እያርኮ ፐትንቶዬ፥ አክመ ሬአፕ እሾ ቶለይሾትን ፐሀኔኤ እሽ ኸኸዴን።

![](https://cdn.door43.org/obs/jpg/360px/obs-en-15-02.jpg)

እስራኤሌተ ፒተሴ አክፔተ ኦፖፐ ከልተኤ፥ ክረ ዩርታኖስ ቱሌተ እሾተ ፐርፓችስን፡፡ ዋቀከ እያሱ ሌሌ ከ ክዴ፥ ‹‹ፓዮተኤ አከ ቄሴወ ቱለኔ ኮዴ፡፡›› ኤቴ ቄሴወ ክራ ዩርታኖስ ኦፖፐ ሌከተ ፓዬኔዬ፥ አከ እስራኤሌተ ፒተ ኮክቴ ኦፐን ቱለ ኤተንሶኤ፥ ፕሸሴኔ እልኸተ ዴነከ ኡርቀ ዲሼን፡፡

![](https://cdn.door43.org/obs/jpg/360px/obs-en-15-03.jpg)

ኤቴ ሰመይተ ክራ ዩርታኖስ ቱሌ ከመዬ፥ ዋቀ አተ አከ ከተማሴኔ ኮኮከ አእያርኮ ቶርፐ እሸ ፐርፓችስኖ እያሱ ሌሌ፡፡ ሰመይተ ከሱከ ዋቀ አጨጨሜ፡፡ ኼለ አኦረነ እሾ ቄሴወከ አከ ዋቀ እሾነ ሌሌ ቀረኤ ሀከ ኩያተ ሌህእ ኩያቶፐ ተከ ተከን ከተመ እያርኮ ከፐ ቲተይሼን፡፡

![](https://cdn.door43.org/obs/jpg/360px/obs-en-15-04.jpg)

ሴከመዬ ኩያተ ተፐታትይ፥ እስራኤሌተከ ተፐን ከተማሴኔ ከፐ ቲተውቴ፡፡ ኤቴ አፕረምፕራት ከተሞሴን ከፐ ቲተናኔዬ፥ ኼለ አኦረነ ከ ኡሉፔ፤ ቄሴወከ ካሰዳሶ ደዌን፡፡

![](https://cdn.door43.org/obs/jpg/360px/obs-en-15-05.jpg)

ሴከመዬ፥ ኦኽንተሴ አከወተከ ቁደ ቅትቅቴ! እስረኤሌተከ አከ ዋቀ እሾነ አጨጬ ቀረኤ ወ ከተሞሴን ከረ ቸ ፕሰ ፕርቴ፡፡ ከ እሳሴኔ ከፈ እስረኤሌ ቁደ ኮዴ ሬአፕ እሾ ቶለይሾ ፐተን ፐሀቴ፡፡ ሰመይተ አፕለ አኬኔኣን ከረ ከሎ፥ ኤቴ አከ እስራኤሌተ እያርኮ ፐትሴ ደከዬዬ፥ እድከዴ ከ ክዴኔ፥ እስራኤሌተ እኖ ከሱ ቶርፐን ዲሶ ከ ፉሬ፡፡

![](https://cdn.door43.org/obs/jpg/360px/obs-en-15-06.jpg)

ዋቀ አክመ እስረኤሌተ ሰመይተ ኬኔኣን ከረ ከሎ አይኖ ኔፎ ኦልይ ኮድቴ አከ ኡለተ ነከይተ እንኮደንን ቱረኔው እሾነ አጨጬ፡፡ መ ኾር ኦረ ሰመይተ ኬኔኣን ኦፐዬ ተከን ኬፐኦኔተ ክደመ፥ ደርተ ኮዴን ከ አክመ ፒተ ኬኔኣን ከፐ ፖረ ሴካዬ ዴኤን እያሱ ሌሌን። ከ አከ እያሱ እሾነ ኦልይ ኡለተ ነከይተ ኮደዶኤ እሸ ካሰዴን፡፡ እያሱ እሾ እስራኤሌተ ኬፐኦኔቶሴ አይሸዬ አክመ ዴቴ ዋቀ ቀረዬ እንካሰኔ፡፡ ከ ሴመለ እያሱከ እሾነ ኦልይ ኡለተ ነከይተ ኮደዴ፡፡

![](https://cdn.door43.org/obs/jpg/360px/obs-en-15-07.jpg)

እስረኤሌተ አክመ ኬፐኦኔተ እሾተ ሰሰፐቴ ኤቴ ኡፕናቴዬ፥ እሚሮቴ፤ መ ኾር ቆተ ፉለ ዋቀ ቱረ ኦል ከሌን መለ፥ ኡለተሴ አነከይተ አእሾነ ኦል ኮደዴኔ ቶይቴን፡፡ አጨረምቴ ከመዬ ክሴተ ፕላትይ፥ መንክስቴወ ፒተ ኬኔኣን አፕለ ኦፐዬ አሞረተ፥ አክመ ኦረ ኬፐኦን እስራኤሌተ ኦል ኡለተ ነከይተ ኮደዴ ደከይቴ። ከ ሴመለ ኼላይሾ አኦረነ ኦሎፐ ኦርሼን ከ ኬፐኦኔተ ቶርፔን፡፡ ኬፐኦኔተከ ቃርቃርሰ ካሰተኤ እያሱ ከፖፐ ኦረ ኤርክቴ።

![](https://cdn.door43.org/obs/jpg/360px/obs-en-15-08.jpg)

ሴመለ እያሱከ ኼለ አኦረነ አእስራኤል ኦሎፐ ኦርሼ ከ ኬፐኦኔተ ቀቀፕሰተኤ ሀልኬተ ኩመ አውሌን፡፡ ከ ፐራፐኔ አእስቀረን ኡፕንን መልይ፥ ኼለ አኦረነ አአሞረተ ቶርፔን።

![](https://cdn.door43.org/obs/jpg/360px/obs-en-15-09.jpg)

ኩያሴትይ ዋቀከ እስራኤሌተ ቶርፔ፡፡ ከ አሞረተ ርርከይሼ፥ ከ ደከደ ኩኩተ አአፕቴንተ ኤርኬ ከ አሞረተ ኦፐዬ ኦረ ኩተይተ ሌይሼ፡፡

![](https://cdn.door43.org/obs/jpg/360px/obs-en-15-10.jpg)

ዋቀከ አከ እስራኤሌተ ክሴተ አኦፐ አሌ አሞረተ ኬለዬ ፕርቶ ቴይቶኤ፥ አከ ፒርቶተ ሞንተ ቁደ ፖረ ተኮፐ ቀአቶ ኮዴ፡፡ ኩያሴትይ ዋቀከ ፑተይመ ኩተ እስራኤሌተ ዳሼ፡፡

![](https://cdn.door43.org/obs/jpg/360px/obs-en-15-11.jpg)

ኤቴ ዋቀ ኼሎሴ አኦረነ ፑቴ ከመዬ፥ ሰመይተ ሰኜተ ኬኔኣኔተ ኮዴ ኩተይተከ እስራኤሌተ ቶርፐ ኦሎፐ ኾሬ፡፡ እያሱ እሾ እስራኤሌተ አአተ ሀሴከ እሾተ ቶርፔን ከ ፑቴን፡፡

![](https://cdn.door43.org/obs/jpg/360px/obs-en-15-12.jpg)

ኦረኖሴን ከመዬ፥ ዋቀከ ፒተሴ አኸሰ ከረዬ መተ ምነኤ ቆቶተ ከፈ ከይንቶ እሾነ ዳሼ። ሴከመዬ ዋቀከ ኼለ እስራኤል ፕሰኤ ነከይተ ዳሼ፡፡

![](https://cdn.door43.org/obs/jpg/360px/obs-en-15-13.jpg)

እያሱ ኤቴ ኬሬዬ፥ ሰመይተ አእስራኤል ፕሰ ኦሎፐ ሀሌ፡፡ ከ ሴከመዬ አከ ኮደይቴተሴ አዋቀ እሮተ ሲነ ቀረዬ እስረኤሌተ ኦል ኮደዴት አጨጨመኔኤ ከ ወ ሰመይተ ቀረ ፈደማት ዴሰ መቴ እሾነ ኦርሼ፡፡ ሰመይተከ አከ ዋቀኤ አአመነሜ ኮዶ ከ ከላዶኤ ከ ሴራድ ከመ ኣኖኤ ኸሰ ከሌ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ እያሱ 1-24፡፡*

## 16. ነተ ሶክሰምፐየ

https://openbiblestories.org/l/kxc/story-16/

![](https://cdn.door43.org/obs/jpg/360px/obs-en-16-01.jpg)

አእያሱ ቶኤ ከመዬ፥ እስራኤሌተ ዋቀኤን አጨጨሜ፤ ኡመ ኬኔኣኔተ እስፐዬን ሶክኔ ኡመ ሴራ ዋቀትእን አጨጨሜ፡፡ እስራኤሌተ እሳሴ ዋቀ አዱካታ ኮዴ ያህዌ ዋቀይሰተ ከፐዬ ዋቀደሴኔ አኬኔኣኔታት ሰክሰተ ፓይቴ። ስትይ እስራኤሌተ ኑቁሰን ቀፕቶ፤ ሴመለ ነመከ ዋ እሽ ቀጬሌ ፐሀ ፕሰ ኮን።

![](https://cdn.door43.org/obs/jpg/360px/obs-en-16-02.jpg)

እስራኤሌተ ቆተ ዋቀ አጨጨመ ቲተ ከመው ቻቴ መለ፥ ዋቀ አከ ፓርከለዳሶ እሾነ ቶርፐኔኤ ኮዴ፡፡ ፓርከለዳሴኔ ኻይሾከ ሜሀደ እስራኤሌተ ፕሰ ሰሬን፥ ከ ወ ቀፐኔ ፕሰ ፐሼን፤ ከ እሾቶፐዬ ከረ ኩተ ሌይሼን፡፡ እስራኤሌተ ኤቴ ኼልተደ ሌከየ ዋቀ አጨጨመ ቲተ ከ ፓርከለደ ምድመተን ፕርቴ ከመዬ፥ አራረኤ ከልቴ ከ አከ ዋቀ ፓርከለዳድ ኬለዬ እሼተን ፐሆ ካሰቴ፡፡

![](https://cdn.door43.org/obs/jpg/360px/obs-en-16-03.jpg)

ሴከመዬ ዋቀከ ነመ ፓርከለዳድ ኬለዬ እሼተን ፐሆ ከ ነተ እሼነ ሶክሾ ኤርኬ፥ እከ ፒተይሾፐ ነከይተ ቄዴ፡፡ መ ኾር ሰመይተከ ኦፐ ኦሬው ከ ዋቀ ቴይሜው፡፡ ከ ክለነደ ሰክሰተ ፓዬው፤ ሴመለ ዋቀከ ፓርከላሶ አእሾነ ከፐ ዴሀ ምትያሜተ እሾነ ቀረ ኻሼ፥ እከ እሾነ ፑቴን፡፡

![](https://cdn.door43.org/obs/jpg/360px/obs-en-16-04.jpg)

ምትያሜተከ ሃከ ፐረ ተፓት ኡንታይሾ ፕሰ ቄደቴ፡፡ እስራኤሌተከ አከተ ፉርቴ፤ ከ ቆተ ናጰ እሾ ረሀነ ከረ ዴዴከዴን መለ፥ ምትያሜተ እሾተ ቴየን ኤተንኔ፡፡ ከ ፕራምፕረ ቀረዬ፥ አከ እሾተ ድንሾኤ ዋቆፐ ኡሉፔን፡፡

![](https://cdn.door43.org/obs/jpg/360px/obs-en-16-05.jpg)

ኩያተ ተከዬ፥ እስረኤልተ ተከ ኬትዎን ክደሞ፥ አከ ምትያሜተ ኡንታድ እሸ ቱረን ቄንንእ ዴከዴ ከ ኡንተ ቱመን፡፡ ኤርከምፐቶተ ዋቀከ ኬትዎን ከፖፐ ዴቴ ከ እሽ ኪቴ፥ ‹‹አት ኬ አቶርፐምፐይተ ኮኮከ ኮዴ፥ ዋቀ ኬ ኦል ቸ፡፡ ኣኔከ ምትያሜተ ኬለ እስራኤሌተን ፐሄ፡፡››

![](https://cdn.door43.org/obs/jpg/360px/obs-en-16-06.jpg)

ኣፖፐ ኬትዎን ፖረ አከልሶተ አክሎተ ሰክሰተ ሀርምሰምቴ ቀፐ፡፡ ዋቀከ አከ ኬትዎን ፖሮሴ አከልሶተ ቅትቅሾኤ እሽ ሌሌ፡፡ መ ኾር ኬትዎን ቆተ ሰመይተ ፉሬ መለ፥ ሀከ ሌተ ሽሽጵንቶ አሴ፡፡ ከ ሴከመዬ፥ ፖረሴ አከልሶተ ቅትቅሼ ከ ኦፐ ሞጬ ከ ዳመ ኮዴ፡፡ ከ ከፐኤ ፖረ አከልሶተ ሃረየ ዋቀ ሀርምሼ፡፡ ከ ቀረኤ ከልሶተ ዋቀ ዴሀይሼ፡፡

![](https://cdn.door43.org/obs/jpg/360px/obs-en-16-07.jpg)

ፐረይታድይ ቴይከንተ ከረኔ፥ ሰመይተከ አከ ነመ ተከ ፖራይሾ አከልሶተ ቅትቅሼ አኬ ከ አከተ ሚሮዴ፡፡ ከ ኬትዎን እከሰኤ ትካድፐ ኣኔ፡፡ መ ኾር ኣፖፐ ኬትዎን እእሾነ ክዴ፥ ‹‹ማነ መለ ዋቀይሽን ቃርቃረ ኤከንተን? ኦቶን እሸ ዋቀዬ፥ አመታድ እሸ ኦል ኤከይሼን!›› ቆተ አሴ ክዴ መለ፥ ሰመይተ ኬትዎንን እከኔ፡፡

![](https://cdn.door43.org/obs/jpg/360px/obs-en-16-08.jpg)

ምትያሜተከ አመ እስራኤሌተ ሰረ ዴቴው፡፡ ቆተ ሌኩምታይሾ አከተ ኩት መለ፥ ነመ እሾተ ድከ ኤተንንቾ፡፡ ኬትዎንከ አከ ምትያሜተ ቶርፐኔኤ እስራኤሌተ ኦሎፐ ሀሌ፡፡ ኬትዎንከ አከ ዋቀ እሸ ቁደን ኮዶ ከ እስረኤሌተን ፐሀ ኤተንሾ ኡፕናተኤ፥ ዋቀ ቀረዬ ምልክተ ለክ ካሰዴ፡፡

![](https://cdn.door43.org/obs/jpg/360px/obs-en-16-09.jpg)

ምልክተ አፓዮተ ኔፎ፥ አከ ጨፐረ ፒቶፐ ኻዮ ተደሀተ ቴይከንተከ ጨፐረ ፐተ ቀረ ቸቶ ዲሼይ ፒቶፐ አከን ቻንንእ ካሰዴ፡፡ ዋቀከ ሴዴ ቀረ ኮዴ፡፡ ኬትዎንከ ሀልኬተ ከመ ዴንቶዬ ዋቀ ካሰዴ ከ ክዴ፥ ‹‹ፒተ አከ ተደሀተ ቴይከንታትን ቆየቶ፥ መ ኾር ጨፐረ አከ ኮኮ ኮዴው።›› ዋቀከ አክሞሴ ምነ ኮዴው፡፡ ምልክተዶሴን ለክከ አከ ዋቀ እሸ ቁደን ኮዶ ከ ምትያሜተ ኬለ እስረኤሌተ ድንሾኤ፥ ኬትዎን ማኩመ ኮዴን፡፡

![](https://cdn.door43.org/obs/jpg/360px/obs-en-16-10.jpg)

ኼለ አኦረነ ነመ ኩመ ኩንደ ሴሰ ለክ (32,000) ከ ኬትዎን ከፖፐ ዴኤን፤ መ ኾር ዋቀ አከ ሌኩምታይሾ ኩት እሽ ሌሌ፡፡ ሴመለ ኬትዎንከ ኼለ አኦረነ አቶርፐነ ፉሬ፥ ነመ ኩመ ኩንደ ለክ ለክ (22,000) አሌ ትካሶ ኦፐ ከልሼ፡፡ ዋቀከ ኬትዎን ክዴዌ፥ ‹‹አመ ኔፎ ሌኩምቶሴ አኼለ ኦረነ እኮፕቴ፡፡›› ሴዴ ቀረን ኻቴኤ ኬትዎንከ ኼለ አኦረነ ነመ ድፐ ሴሰ (300) ፐተ ሀትሼ ከ አታከኔ አሌ ትካሶ ኦፐ ከልሼ፡፡

![](https://cdn.door43.org/obs/jpg/360px/obs-en-16-11.jpg)

ሀልኬስትይ ዋቀከ ኬትዎን ክዴ፥ ‹‹ሰፈረ ምትያሜተ ኦፖፐ ሌከዶ፤ ከ ኦቶ ወ ክዴኔ ደከይቶዬ፥ ፐከነ እሾተን ፉረን።›› ሴመለ ኬትዎንከ ሀልኬስትይው ሰፈረ ምትያሜተ ኦፖፐ ሌከዴ፤ ኼለ ምትያምፐዬ፥ ነመ ተከ አኦልሰ ኦልሶዴ ከ ኼልታድ ቶርኖ ከ ኪኖ፥ ‹‹ሀ ኼለ አኦረነ አኬትዎን አምትያሜተኤ ፑቴ›› ደከዬ፡፡ ኬትዎን ኤቴ ሴዴ ደከዬዬ፥ ዋቀኤ ሰከተዴ፡፡

![](https://cdn.door43.org/obs/jpg/360px/obs-en-16-12.jpg)

ሴከመዬ ኬትዎንከ ኼላድ አኦረነ ከፖፐ ቲተዌ ከ መተ ነመ ምነኤ ካሰ አደውናን ከ ኦክተ እሾ ሉደ አፕተ ዳሼ፡፡ አኼለ አኦረነ አምትያም ሙክታፐ ቾዬ፥ እከ ፖረ አኦፐ ሰፈሬን ከፐ ሙሬን፡፡ ኼለ አኦረነ አኬትዎን ነመ ድፐ ሴሰ (300) ኦክተ ከረኤ ሉደ አፕተ ቀፐዴ፤ ኼለ አኦረነ አምትያም ኾር ለአይተ ሉዶሴት አከ እንኤተንኔ፡፡

![](https://cdn.door43.org/obs/jpg/360px/obs-en-16-13.jpg)

ሴከመዬ ኼለ አኦረነ አኬትዎን ፕሰከ ፖረ ተከኤ ኦኮቶዋሶ መማጬ፤ ኤኖው ለአይተሴ አሉደከ ቱርቱፓተ ለአዬ፡፡ እከ ካሰዳሶ ደዌን ከ ኡሉፔን ከ ክዴኔ፥ ‹‹ኼለ አኦረነ አዋቀ እሾ አኬትዎን!››

![](https://cdn.door43.org/obs/jpg/360px/obs-en-16-14.jpg)

ዋቀከ ምትያሜተ ተሉልሼ፤ እከ ኦል ሌይሼን፡፡ እስረኤሌተ ትካፐ ሀስቴ ከ እረ ቀረ ሀላምቴ፤ ከ ምትያሜተ ከመ ዳነኤ ኦል ቃርቃሬን፡፡ ከ ኩተየ ኦፐ ሌይሼን ከ አአተ ሀሴ ፒተ እስራኤል ኦፐ አሌ ዳኔን፡፡ ስትይ፥ ኼለ አኦረነ አምትያም ነመ ኩመ ድፐ ኩንደ ለክ (120,000) ሌኤ፡፡ ዋቀከ እስራኤልን ፐሄ፡፡

![](https://cdn.door43.org/obs/jpg/360px/obs-en-16-15.jpg)

ሰመይተከ አከ ኬትዎን ኑቁሳይሾ ኮዶ ፈዴ፡፡ ኬትዎን ኾር አከ አሴ ኮደኔኤ እሾተኤን ፈቀኔ፤ መ ኾር አከ መተ ነመ ምነኤ ጭፌተ አወርቄተ አምትያሜተ ቀረ ፖጬኔን ዴአኔ እሾተ ካሰዴ፡፡ ሰመይተከ ኬትዎንእ ወርቄተ አከተ ኩተ ዳሼ፡፡

![](https://cdn.door43.org/obs/jpg/360px/obs-en-16-16.jpg)

ኬትዎንከ ወርቄቶሴ ሊልሼ ከ ሜሀደ አቄስተሴ ኩተ ከልሰነ ምነኤ ሜሀደ ኸው ዴሰ ቻት ኮዴ ከ ኮደቺሴ፡፡ መ ኾር ሰመይተ ሜሀዶሴን ኤዬ ቻትእ አከ አክሎተ ምነ ሰከተተ ፓዬ፡፡ ሴዴ ቀረን ኻቴኤ፥ ዋቀከ አከ ፓርከላሶ እሾተ ፑተኔ ኮዴ ከ ቀተኤ፡፡ ፕራምፕረ ቀረዬ ሰመይተከ አከ ዋቀ አመ ከሱ እሾተን ፐሆኤ ካሰዴ፤ ዋቀከ ነመ እሾተን ፐሆ አፕለ ኤርኬው፡፡

![](https://cdn.door43.org/obs/jpg/360px/obs-en-16-17.jpg)

ዋ አሴ ፐሀከ አሌካትን ኮዴን፡፡ እስራኤሌተ ጩፖተ ኮን፥ ዋቀከ እሾተ ቀተን፤ እከ ቀረ ኦርው ከ አረረ ከል፣ ዋቀከ አከ እሾተን ፐሆኤ ነመ እሾተ ኤርክን፡፡ ኼልተደ ሌከያፐዬ፥ ዋቀ እስራኤልን ፐሄተኤ ነተ ሶክሰምፐየ እሾተ ኤርኬ፡፡

![](https://cdn.door43.org/obs/jpg/360px/obs-en-16-18.jpg)

ፕራምፕረ ቀረዬ፥ ሰመይተከ አከ ኦረ አፕለ ዋቀ አመንንክንን ምነኤ፥ ኑቁሰ እሾተ ዳሾኤ ዋቀ ካሰዴ፡፡ እሾተ ኑቁሰ አዴረ ከ ኮኮከ ከ ክሴተ አኦረናት እሾተ መረኦ ቀፕናተ ፈዴን፡፡ ዋቀ ኾር ካሱሞሴን ኻይሾ እንጫለኔ፤ መ ኾር አከ ሄነሶት ቀረኤ ኑቁሰ እሾተ ዳሼ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ታኘደ 1-5፣ 6-8፡፡*

## 17. ኮደይቴተ አዋቀ ታውት ኦል ኮደዴ

https://openbiblestories.org/l/kxc/story-17/

![](https://cdn.door43.org/obs/jpg/360px/obs-en-17-01.jpg?direct&)

ሳኦል ኑቁሰ አእስራኤል አፓዮተ፡፡ እሸ አሱ አከ ሰመይተ ሄኖ ቀረኤ እዴር ከ አሬን ኸርጨልተ፡፡ ፐራደ አፓዮተ ለመየ አሳኦል እስራኤል ቀረ ኑቁሱሜ ከረኤ ኑቁሰ አፈየኤ ኮዴ፡፡ ሴከመዬ ኾር፥ ኡኩቶተ ነመ አዋቀ አጨጨመ ቲቴ ኮዴ። ሴመለ ዋቀከ ኩያተ ተከዬ፥ ነመ ፐከ ሳኦልፐ ኑቁሱሞ አፕለ ሬኼ፡፡

![](https://cdn.door43.org/obs/jpg/360px/obs-en-17-02.jpg?direct&)

ዋቀከ ሳኦል ከመዬ ፥ አከ ኑቁሰ ኮዶኤ ኸዮለይተ ተከ አእስረኤሌተ ታውት ኪነን ሬኼ፡፡ ታውት ነመ አከተመ ፔቴልሄም ከ ከሀራ ስክን፡፡ አታውት ከሀራ ኣፐይሾት ስክኖዬ፥ ክሴተ ሌከይቴተ ከርመ ከ ትፔተ አከሀራ ደመ ዴነ ሌይሼ፡፡ ታውት ነመ ዋቀ አመኖ ከ እሽ አጨጨሞ፥ ናለይተ ከ ሀንቄለይተ፡፡

![](https://cdn.door43.org/obs/jpg/360px/obs-en-17-03.jpg?direct&)

ታውትከ ኾርመ ኦረነ ከ መርተ ኩተ ኮዴ። ታውት አኸዮፐ ቾዬ፥ ነመ ተከ አከተ ኩተከ ኮልያት ክደሞ ኦል ቶርፔ።፡ ኮልያት ኦከ ቶርፐምፐይተ፥ አአከተ ኮኮከ፥ ዴሩምታድ ኔፎ ድክለ ሌህ (ሜቴሬተ ሴሰ) ከይን። መ ኾር ዋቀ፥ አከ ኮልያት እሾ ከ እስራኤልን ፐሆኤ ታውት ቃርቃሬ፡፡ ሴከመዬ ታውትከ ፑተይመ አእሽን ሰመይተ ከፐ ከለተይሰሜ ሌከየ ፓርከለደ አእስረኤል ቀረ አካዴ፡፡

![](https://cdn.door43.org/obs/jpg/360px/obs-en-17-04.jpg?direct&)

ሳኦልከ ጫለለ አሰመይተ ታውት ቀፖ መለ፥ ዮተ ኔቀ ዮኤ። ሳኦልከ ሌከይቴተን ታውት እሸተ ኤከይሼ፤ ሴመለ ታውትከ ሳኦል ቱረ አሌ ዴከዴ፡፡ ኩያተ ተከዬ፥ ሳኦል ታውት እሸተኤ ፖረ እሸ ፋን፡፡ ሳኦልከ ረሀነሴ አታውት ከረ ዴከኖፐ ኣኔ፤ መ ኾር ሳኦል እሸን አክኔ፡፡ ታውትከ አከተ ሳኦል ቁዶፐ ዴሀዴከ እሸ ከሱ እከሰ ኤተንን ሄኔ፤ መ ኾር እንእከኔ፡፡ ሴዴ ከፐዬ፥ ታውት አክመ ኑቁሰ ኮደ መለ እሸን እከንን ሳኦል ኡፕነሰኤ ኦሀተ ሳኦል ቁደ ከይለ ሙሬ።

![](https://cdn.door43.org/obs/jpg/360px/obs-en-17-05.jpg?direct&)

ፕራምፕረ ቀረዬ፥ ሳኦልከ ኦረናፐ ቶኤ፤ ታውትከ ኑቁሰ አእስራኤል ኮዴ፡፡ ታውት ኑቁሰ አፈየ፥ ሰመይተ ኔፎከ እሸ ጫለዴ፡፡ ዋቀከ ታውት ሰኬ፥ እከ ኦልኬለ እሽ ቴይቴ፡፡ ታውት ኦረነ ሌከየ ቶርፔ፥ ዋቀከ አከ ፓርከለደ አእስራኤል ፑቶኤ እሸ ቃርቃሬ፡፡ ታውትከ ዩርሳለም ፑቴ ከ ቀረ ፕሬ፥ ከ ከተማድ አኩታት ኮደዴ፡፡ ክሴተ አታውት ኑቁሱሜ ከረኤ፥ እስራኤል እኮኮናቴ ከ ቴየንቶለይቴተ ኮድቴ፡፡

![](https://cdn.door43.org/obs/jpg/360px/obs-en-17-06.jpg?direct&)

ታውትከ ትከ ቁልቁሎተ አእስራኤሌተ ፕሰ ኬለ ዋቀ ዋቁምሰቶ ከ እሽ ከልሶወ ከልሶ ቁፐ ፈዴ፡፡ ሰመይተ ሀከ ፐራ ድፐ አፉርትእ (400) ቱከነሴ አኬለ ኦል አኬተ አሙሴ ኮዴ ኬለኤ ዋቀ ዋቁምሰን ከ እሽ ከልሶወ ከልን፡፡

![](https://cdn.door43.org/obs/jpg/360px/obs-en-17-07.jpg?direct&)

መ ኾር ዋቀ ኤርከኖሴኔ ኹመምፐይተ ናተን ዳሼ ከ ታውት ከፖፐ እሸ ኤርኬ ከ እሽ ክዴ፥ ‹‹ዋቀ እኪን፥ ‹አት ቆተ ነመ ኦረነ ኮድቴ መለ፥ ትከ ቁልቁሎተ አነኤ አቁፕቶ፡፡ እናት ቁፐ፡፡ መ ኾር አከተን ኬ ሰከ፡፡ ሰኜታይትፐ ተከ፥ ሰመይትዮ ቀረኤ ኑቁሰ ኮደ ከ ሀከ ፐረፐራት ሙክሸ! ሰኜተሴ አታውት አእስ ፐተን ሀከ ፐረፐራት ሙክሾ ኔፎ ድንሸምፐይተ፡፡ ድንሸምፐይቶሴ ኔፎ እሳሴ ዋቀን ሬኸሜ አጩፖተ ሰመይተ ፒተ ኬለ እሾነ ድንሾ፡፡› ››

![](https://cdn.door43.org/obs/jpg/360px/obs-en-17-08.jpg?direct&)

ታውት ኤቴ ኔሶሴ ደከዬዬ፥ ቆተ ዋቀ ኡልፌኖሴ ኩተ ከ ሰኮሴ እሽ ዳሰተ ኸሰ ከሌ መለ፥ ኤኖው ዋቀ ከለተይሰዴ ከ ሳርሼ፡፡ ታውት ዎሴን ኤዬ ቸ ዋቀ አይተም አከ ኮዶ እንኡፕናኔ፡፡ መ ኾር ዱካተኔ፥ ሀከ ድንሸምፐይቶሴ ዴኖኤ፥ እስረኤሌተ ክሴተ ዴረ ሸክ ኩት ሀከ ፐረ ኩማትእ (1000) አሰተ እሾተ ፐርፓችስቴ፡፡

![](https://cdn.door43.org/obs/jpg/360px/obs-en-17-09.jpg?direct&)

ታውትከ ሙረ ዱካተ እሾ አመነመኔ ፐራ ሌከየ ሙክሼ፤ ዋቀከ እሽ ሰኬ፡፡ አኮድቶመ ከላታድ አፕራምፕረ ቀረዬ፥ ዋቀ ቀረኤ ጩፖተ ኔቀ ኮዴ፡፡

![](https://cdn.door43.org/obs/jpg/360px/obs-en-17-10.jpg?direct&)

ኩያተ ተከዬ፥ አኼለ ኦረነ አታውት ፕሰ ትካሶ ኦፐ ቱሌን ከ ኦረነ ቶርፕናኔዬ፥ እሸ ትካድ አኑቁሰ ቱሮፐ ሶኬ ከ እስከቴተ ተከ ፐቃረ አደክንተ ጨቀንቶ አኬ፡፡ መኻድ ኔፎ፥ ፔርሰፔህ ክደም፡፡

![](https://cdn.door43.org/obs/jpg/360px/obs-en-17-11.jpg?direct&)

ታውት አሌ ሚንተ ቱረ ቁአ ከፐዬ፥ አከ እሸ ከፖፐ እሼተን ዴኦኤ ነመ ከመ ኤርኬ፡፡ ከ እሼተ ኦል ሙኬ ከ ኦር አሌ ትካድፐ ኤርኬ፡፡ ክሴተ ለመይቴተ ከመዬ፥ ፔርሰፔህ ታውትእ ኤርከነ ኤርክቴ ከ ኪቴ ሀ እንህቴ!፡፡

![](https://cdn.door43.org/obs/jpg/360px/obs-en-17-12.jpg?direct&)

ነመ ኦርዮ ክደሞ ዲርተ ፔርሰፔህ፥ ቶርፐምፐየ ኮኮኮከ አታውትፐ ተከ፡፡ ታውትከ ፖረ ኦረና ኦፐ ኦርዮ ሀላችሴ ከ አከ እስከቴታድ ከፖፐ ከሎኤ እሽ ሌሌ፡፡ መ ኾር ኦርዮ፥ አኼለ ኦረነ አአተ ሀሴ ኦረናፐ ቾዬ፥ አንት ትኮፐ አንከሎ ክዴ፡፡ ሴመለ ታውትከ አከ ኦርዮ ፖረ ኦረና ኦፐ ቲተዎ ኤርኬ፤ ከ አከ ቶኦኤ ፖረ ኦፐ ኦረነ ኮኮከ ቻን ኦፐኤ አከ እሸ ኽቶኤ ሳረ አኼለ ኦረናት ሌሌ፡፡

![](https://cdn.door43.org/obs/jpg/360px/obs-en-17-13.jpg?direct&)

ኤቴ ኦርዮ ቶኤ ከመዬ፥ ታውትከ ፔርሰፔህ ሄሜ፡፡ እሼተከ ኩል እነ ዲርተ ታውት ኻይቴ፡፡ ዋቀከ ዋ ታውት ኮዴ መለ አከተ ሚሮዴ፤ ከ አከ ጩፖታድ አከተ ኔቅ አከ ታውት ሌሎኤ ኹመምፐይተሴ ናተን ኪነን ኤርኬ፡፡ ታውትከ ጩፖታድፐ አረረ ከሌ፥ ዋቀከ እሽ ዲሼ፡፡ ታውት ፐራደ አአተ ሀሴ አከላዴ ኦፐዬ፥ ክሴተ አረኮታት ከሱይ ዋቀ ከመ ኣኔ ከ እሽ አጨጨሜ፡፡

![](https://cdn.door43.org/obs/jpg/360px/obs-en-17-14.jpg?direct&)

መ ኾር ጩፖተ አታውት ኮዴ መለ፥ እነ ቀተአሜ ከ ቶኤ፡፡ ከ አሴው ፐራደ አአተ ሀሴ አከላዴ ኦፐዬ፥ አርተ ቶላ ታውት ከረኤ ኦረነ ቻዴ፤ ሁፕነ ታውት ኔፎከ አከተ ኑኩላዴ፡፡ ከደ ፑኑ ታውት ዋቀኤ እንአመነምን ኔፎዬ፥ ዋቀ እክእ ኸሰ አዳሼት አአመነሜ፡፡ ከመዬ ታውት እሾ ፔርሰፔህከ እነ ፕለ አዲርተ ኻየዴን፣ ከ መኸ እሽ ኮዴን ከ ሴሌሞን ክዴን፡፡

*መታፈ ቁልቁሎተ ከረ ፖረ ቀረ አካንቶ፡- ሰሙ. አ1ተ 10፡15-19፤ 24፤ 31፤ ሰሙ. አ2ተ 5፤ 7፤ 11-12፡፡*

## 18. መንክስቴተሴ ቆተምቴ

https://openbiblestories.org/l/kxc/story-18/

![](https://cdn.door43.org/obs/jpg/360px/obs-en-18-01.jpg)

ፐራ ሌከየ ከመዬ፥ ታውትከ ቶኤ፤ እናድ ሴሌሞንከ እስራኤል ሙክሰ ፓዬ፡፡ ዋቀከ ሴሌሞን ኦል ቶራዴ ከ ዋ አከተ ፋነ ቀረዬ ካሰዴ፡፡ ኤቴ ሴሌሞን ኦኩመ ካሰዴዬ፥ ነመ ፒተ ቀረ አከተ ኦከይተ ኮዴኤ እሸ ኮዴ፡፡ ሴሌሞንከ ዌ ሌከየ ኮለዴ ከ ኦከ አከተ ዱካተ ሙሮ ኮዴ፡፡ ዋቀከ አሴው አከተ ቴየንቶለይተ እሸ ኮዴው፡፡

![](https://cdn.door43.org/obs/jpg/360px/obs-en-18-02.jpg)

ሴሌሞንከ ዋ ኣፐይሾ ታውት ዩርሳለም ከረ ኮደ ድከዴ ከ ሜሀ ቁፔተ ፐርፓችስኖ አኦሎፐ ፖሆኔ ትከ ቁልቁሎተ ቁፔ። አመ ኦር ሰመይተከ ፐከ ቱከነሴ አኦል አኬተ ኦፐኤ ትከ ቁልቁሎተ ኬለኤ ዋቀ ዋቁምሰዴ ከ ከልሶተ እሽ ዴሀይሼ፡፡ ዋቀከ ዴኤ ከ ትከ ቁልቁሎተ ኬለ አካዴ። ከ ኤዬኤ ሰመይተ ኦል ከላዴ፡፡

![](https://cdn.door43.org/obs/jpg/360px/obs-en-18-03.jpg)

መ ኾር ሴሌሞን እስከተ አፒተደ ፕለኤ ጫለዴ፡፡ ሸክ ኩት እስከተ ሌከይተ አኩመ ተከ (1000) ከይኖ ሄሜ፤ ከ ዋቀኤን አጨጨምን! እስከቶሴ ኦፐዬ፥ ከረ ኩተ ፒተ ሀፕታት ዴኤ፤ ከ ክለነዳሶትን ዴአዴን ከ እሾነ ሰከተተ ከመ ቻዴን፡፡ ሴሌሞን ኤቴ ኬሬዬ፥ እሸ ከሱ ክሎዋሴኔ ኻይሾትእ ሰከተዴ፡፡

![](https://cdn.door43.org/obs/jpg/360px/obs-en-18-04.jpg)

ዋቀከ ሴሌሞን ቀረ ሚሮዴ፤ ሴሌሞን ቆተ አመነመ ዲሼ መለ፥ ኤቴ ቶኤ ከመዬ አከ ቅታቴተ ምነኤ፥ ዋቀ አከ ሰመይተ እስራኤል መንክስቴተ ለክ ኦፐ ቆቶ ሃሰወዴ፡፡

![](https://cdn.door43.org/obs/jpg/360px/obs-en-18-05.jpg)

ኤቴ ሴሌሞን ቶኤ ከመዬ፥ እናድ ሮፕአምከ ፐከድፐ ኑቁሱሜ፡፡ ሮፕአም ኤፐ፡፡ ሰመይተ እስራኤል ፕሰከ ኑቁሱማድ እሽ ኩትሰኤ እሸ ከፖፐ ኦሎፐ ዴኤ፡፡ ከ አከ ሴሌሞን ኮደ ሁፕነ እሾተ ኮደቺሴ ከ ክፕረ ኩተይተ ቀረ ኸፈልሲሰዴ ሮፕአም ከፐ ሌለዴ፡፡

![](https://cdn.door43.org/obs/jpg/360px/obs-en-18-06.jpg)

ሮፕአምከ ኤፑመን እሾተ ኦርሼ ከ ክዴ፥ ‹‹ኣፕኖ ሴሌሞን ኮደ ሁፕነኤ እኖ ኮደቺሴ ኪቴን ከ ድከቴን፤ መ ኾር አንት አኻድ ቀረን ቀፕቶኤን ኮደ ሁፕነ እሽን ኮደቺሰ፤ ከ አኻድ ቀረን ቀፕቶኤ ፈየ እሽን ቀተአ፡፡››

![](https://cdn.door43.org/obs/jpg/360px/obs-en-18-07.jpg)

ከፈ ሰመይተ እስራኤል ኩደንከ ሮፕአም ቀረ ትየን ኸኤ፡፡ ከፈ ለክ ፐተከ እሽ አመነመ ከመ ቻዴ፡፡ ከፎሴን ለክከ መንክስቴተ ዩሁተ ኮዴን፡፡

![](https://cdn.door43.org/obs/jpg/360px/obs-en-18-08.jpg)

ከፈሴኔ አሰመይተ እስራኤል ኩደን አፕለ፥ አሮፕአም ቀረ ትየን ኸኤከ ነመ እዮርፕአም ክደሞ ኑቁሳይሾት ኮደዴን ከ ሹመዴን፡፡ ከ ሀምንተ ቅንደ ቁተታትን ቾት መንክስቴተ ቃትሰዴን፤ ከ መንክስቴተ አእስረኤል ክደሜን ከ ሀላሜን፡፡

![](https://cdn.door43.org/obs/jpg/360px/obs-en-18-09.jpg)

እዮርፕአምከ ዋቀ ቀረ ትየን ኸኤ ከ አከ ሰመይተ ጩፖተ ኮዶ ኮዴ። ከ ትካሴ አቁልቁሎተ መንክስቴተ አዩሁተ ከረ ክቶ ኬለኤ ዋቀ ዋቁምሰተ ከፐዬ፥ አከ ሰመይተ እሾተ ዋቀይሰዶኤ ክለነደ ለክ እሾተ ኮዴ፡፡

![](https://cdn.door43.org/obs/jpg/360px/obs-en-18-10.jpg)

መንክስቴተ አዩሁተ እሾ አእስራኤልከ ፓርከለደ ኦል ኮዴን ከ ሌከይቴተን ኦል ቶርፔን፡፡

![](https://cdn.door43.org/obs/jpg/360px/obs-en-18-11.jpg)

መንክስቴተሴ አእስራኤል ሃረየ ከረዬ፥ ኑቁሰዳይሾ ፕሰ ኡኩቶወው፡፡ ኑቁሰዶሴን ኦፐዬ፥ ከረ ኩተ እስረኤሌተ አፕለ አፐከይሾ ኦፐ ኑቁሰ ኮደ ሄንቶኔ ሌይሰሜን፡፡

![](https://cdn.door43.org/obs/jpg/360px/obs-en-18-12.jpg)

ኑቁሰደ ፕሰ ከ ሰመይተ አመንክስቴተ እስረኤል ቁደ ከረ ኩተከ ክሎወ ሰክሰዴን፡፡ ሰክሰታይሾ አክሎወ ኔፎ፥ ከረ ኩተ አልመሉመ አደሀልሰተከ አደሃለ እሾ ክሴተ ተከ ተከዬው ሄለ ከልሶተ ኮደ ከ ዴሀሰ ከሱ ኦፐዬ ቸ፡፡

![](https://cdn.door43.org/obs/jpg/360px/obs-en-18-13.jpg)

ኑቁሰደ አዩሁተ፥ ሰኜተ አታውት፡፡ ኑቁሰዶሴን ኦፐዬ፥ ተከ ተከ አሳንተ ፈየትን ሙክሼ ከ ዋቀ ዋቁምሰዴ አፈየኤ ቸ፡፡ መ ኾር ኑቁሰደፐዬ ከረ ኩተ ኡኩቶወ ከ አኘፐሌ፣ ከ ክለነደ ከሱ ዋቀይሰን፡፡ ኑቁሰደ አዴሞው፥ ሄላሶ ከሱ ክለነደ አደርታት ከልሶተ ከልሼን፡፡ አክሞሴ ምነኤው፥ ሰመይተ አዩሁተ ከረ ኩተ ዋቀ ቀረኤ ትየን ኸኤ ከ ዋቀደ አፕለ ዋቀይሰዴ፡፡

*መታፈ ቁልቁሎተ ከረ ፖረ ቀረ አካንቶ፡- ኑቁ. አ1ተ 1-6፤ 11-12፡፡*

## 19. ኹመምፐየ

https://openbiblestories.org/l/kxc/story-19/

![](https://cdn.door43.org/obs/jpg/360px/obs-en-19-01.jpg)

ዋቀ ቶራ አእስራኤሌተ ፕሰ ከረዬ፥ ኹመምፐየ እሾነ ኤርኬ፡፡ እከ ዋቀ ቀረ ኤርከነ ደከዬን፥ ከ ሴከመዬ ኤርከኖሴን አዋቀ ቱረዬ ሰመይተ ሌሌን፡፡

![](https://cdn.door43.org/obs/jpg/360px/obs-en-19-02.jpg)

አአክአፕ መንክስቴተ እስራኤል ቀረ ኑቁሱሜዬ፥ ኤልያስ ስትይ ኹመምፐይተ፡፡ አክአፕ ኡኩቶተ አነመ፥ እሸ አከ ሰመይተ ክሎተ ፐኣል ክደምቶ አደርተ ዋቀይሰዶኤ እሾተ መኸኙምሼ፡፡ ኤልያስከ አክአፕ ክዴ፥ ‹‹ሀከን አንት ሃሰወዶ መልይ፥ እስራኤል ከረኤ ሮፐ ታክ ተደሀተ እንቻቶ።›› ሴዴከ አከተ አክአፕ ሚረሴ፡፡

![](https://cdn.door43.org/obs/jpg/360px/obs-en-19-03.jpg)

ዋቀከ አክአፔሴ እሸ እከሰ ፋኖ ቱረዬ አከ ክራ ኮመይቶፐ ቾፐ ኣኖ ከ ዴከዶኤ እሽ ሌሌ፡፡ ቴይከንቴ እሾ ከለከላዬ፥ ኸምፕረከ ላቆተ ከ ሶአን እሽ ዴን፡፡ አክአፕ እሾ ኼላድ አኦረነከ ኤልያስ ፈዴን፤ መ ኾር እሸ ቴየን ኤተንኔ፡፡ ፖነከ አከተ ኦልን ኮፔ፥ ፕራምፕረ ቀረዬ ክራሴከ ኮኬ፡፡

![](https://cdn.door43.org/obs/jpg/360px/obs-en-19-04.jpg)

ሴመለ ኤልያስከ ፒተ ከንትቴተ ኮድቴፐ ኣኔ፡፡ ፒቶሴትይ፥ ዶኸ ቀረን ኻቴኤ እስከቴተ አዲርተ ቀረ ቶኤ እሾ እናድ፥ ደምተ አቀፐንከ ፕረመ ቀረ ከይቴ፡፡ መ ኾር፥ ኤልያስ ቀረ ቶዬን፤ ዋቀከ አከ ዳመይሾ ታረ ኬለ፥ ሰይቴታይሾከ ሙደ ኬለን ፕረምን ኮዴ ከ እሾተ ደምሼ። እከ ክሴተሴ አሎተ ፕሰ ከረ ወ ደመኔ ቀፕናዴን፡፡ ኤልያስከ ኤዬኤ ፐረደ ሌከየ ከላዴ፡፡

![](https://cdn.door43.org/obs/jpg/360px/obs-en-19-05.jpg)

ፐረ ሴሰከ ፐከ ከመዬ፥ ዋቀከ አከ ሮፐ ሮፕሾ እከ መንክስቴተሴ አእስራኤልፐ ቲተዎ ከ ሴዴ አክኣፕ ሌሎኤ ኤልያስ ሌሌ፡፡ አክኣፕ ኤቴ ኤልያስ አኬዬ እእሽ ክዴ፥ ‹‹ኬ አረኮተ ኮኖ፥ እዴቴ ፐሀተ!›› ኤልያስከ እሽ ኦርሼ ከ ክዴ፥ ‹‹አረኮተ ኮኖ ኬ! ዋቀሴ አዱካተ ያህዌ አሌ ዲሴ፤ ከ ፐኣል ዋቀይሰቴ። አመ ሰመይተ መንክስቴተ አእስራኤል ፕሰ እሮተ ቄርሜሎስ ቀሮፐ ኦሎፐ ሀሌ፡፡››

![](https://cdn.door43.org/obs/jpg/360px/obs-en-19-06.jpg)

ሰመይተሴ አመንክስቴተ እስራኤል ፕሰ እሾ ኹመምፐያሴኔ አፐኣል ድፐ አፉር ኩንደ ኬን (450) ከሱከ እሮተ ቄርሜሎስ ቀሮፕ ዴኤን፡፡ ኤልያስከ ሰመይሴት ክዴ፥ ‹‹ሀከ አይተምት ከርተ ለክ ኮደተን? ኦቶን ዋቀ ፖቀለን ዋቀዬ፥ እሽ ኮደ ኮደ! ኦቶን ፐኣልን ዋቀዬ እሽ ኮደ ኮደ!››

![](https://cdn.door43.org/obs/jpg/360px/obs-en-19-07.jpg)

ሴከመዬ ኤልያስከ ኹመምፐየ ፐኣልት ክዴ፥ ‹‹ኾርመ ተከ ቀለ ከ ከልሶተ ኮደከ ዴሀይሸ፤ መ ኾር አፕተ ኬለኤን ቀፐን፡፡ አንት ኔፎ አሴዌን ኮደይ፡፡ ዋቀ አፕተን ኦርሾ፥ እሸን ዋቀ ዱካተ።›› ሴመለ ኹመምፐየ አፐኣልከ ከልሶተ ሀርምሼን፥ መ ኾር አፕተ ኬለኤን ቀፕኔ፡፡

![](https://cdn.door43.org/obs/jpg/360px/obs-en-19-08.jpg)

ሴከመዬ፥ ኹመምፐየ ፐኣልከ ፐኣልፐ ቅንሰዴን ከ ክዴኔ፥ ‹‹ኦ ፐኣል፥ እኖ ደከዬ!›› ከ ኩያተ ኩመ ቅንሰዴን ከ ኡሉፔን፤ ከ ደክንታይሾ ኩል ፕለወን ሀጬን፤ መ ኾር መልሴተን ክቶ፡፡

![](https://cdn.door43.org/obs/jpg/360px/obs-en-19-09.jpg)

ፕራምፕረ ቀረዬ፥ ኤልያስከ ከልሶተ ዋቀ ሀርምሼ፡፡ ከ ሴከመዬ አከ ሰመይተ እስረኤል ሶአ ከ ቆረ ከ አሴው ፒተሴ ፖረሴ አከልሶተ ከፐንዴሰ ክቶ ፕሰ ከሱ ሀከ ቆየንቶኤ፥ ፕሸ ኦኮተ ኩደንከ ለክ እመኮተ ፖረሴ አከልሶተ ቀረ ቱቱቀኔ ሌሌ፡፡

![](https://cdn.door43.org/obs/jpg/360px/obs-en-19-10.jpg)

ሴከመዬ ኤልያስከ ቅንሰዴ ከ ክዴ፥ ‹‹ያህዌ፣ ዋቀ አፕርሃም ከ አይስሀቅ እሾ አየእቆፕ፥ አት አከ ዋቀ እስራኤል ኮድቴ አንትእው አከን ኦርኸይታይት ኮዴ አዌ እኖ አክሼ፡፡ አት አከ ዋቀ ዱካተ ኮድቴ ሰመይሴ አከ ኡፕናዶኤ፥ አነ ደከዬ፡፡››

![](https://cdn.door43.org/obs/jpg/360px/obs-en-19-11.jpg)

ኤኖው አፕተከ ሞንቴ ሌከዴ ከ ሶአሴኔ ከ ቆረሴኔ ከ ደከደ ከ ሚሰ እሾ ፕሸሴኔ ፖረ አከልሶተ ከፐንዴሰ ቸ ፒሰ ኩፔ፡፡ ሰመይተሴ ኤቴ ሴዴ አኬዬ፥ ፒቶፐ ሴሄ ከ ክዴ፥ ‹‹ያህዌን ዋቀ! ያህዌን ዋቀ!››

![](https://cdn.door43.org/obs/jpg/360px/obs-en-19-12.jpg)

ሴከመዬ ኤልያስከ ክዴ፥ ‹‹ኹመምፐየ ፐኣልፐ ተከ ኔፎ እንተውንን!›› ሴመለ ሰመይተከ ኹመምፐያሴኔ አፐኣል ቀቀፔ ከ እሽን ኣኔ ከ ሌይሼ፡፡

![](https://cdn.door43.org/obs/jpg/360px/obs-en-19-13.jpg)

ሴዴ ከመዬ፥ ኤልያስከ ኑቁሰ አክአፕ ክዴ፥ ‹‹ሮፐ ዴንይ፥ ጨርጨሬከ ከተማፐ ቲተዌ።›› ኤኖው ሞንተከ ኦራሮቴ፥ ሮፐ ኩተይተከ ሮፐ ፓዬ፡፡ ያህዌከ ፖነሴ ቃትሼ ከ አከ ዋቀ ዱካተ ኮዴ ኡፕነይሼ፡፡

![](https://cdn.door43.org/obs/jpg/360px/obs-en-19-14.jpg)

ኼልተ ኤልያስ ከመዬ፥ ዋቀከ አከ ኹመምፐይተ ኮዶኤ ነመ ኤልሰእ ክደሞ ሬኼው፡፡ ዋቀከ ኤልሰእ ቁደኔ ደኾወ ሌከየ ኮዴ። ደኾዎሴን ኦፐ ተከከ ነመ ሳረ አኼለ ኦረነ አፓርከለ ኮዴከ ቆሸ ደክንተ ቀፖከ ንእማን ክደሞ ቀረ ከይቴ፡፡ እሸ ቆተ ኤልሰእ ዴሰ ደከዬ፤ ከ ሴመለ አከ እሸ ድንሾኤ ኤልሰእ ከፖፐ ኣኔ ከ እሸ ካሰዴ፡፡ ኤልሰእከ አከ ክራ ዩርታኖስ ከሮፐ ኣኖ ከ ተፐን ጭሞከ ከረ ሶኬኤ ንእማን ሌሌ፡፡

![](https://cdn.door43.org/obs/jpg/360px/obs-en-19-15.jpg)

ንእማን ፓዮተ ቀረዬ እሚሮዴ ከ ቆተ ኤፑመ እሽ ፐሀናቴ መለ፥ ወ ኤልሰእ እሽ ክዴ እንኮንን። መ ኾር ኩልእ ኦፐ ድከዴ ከ ክራሴ አዩርታኖስ ከረኤ ተፐን ጭሜ ከ ከረ ሶኬ፡፡ ድከተ ቀረዬ ኤቴ ክራሴ ከረ ሶኬዬ፥ ደክንታድ ፈየኤ ድንቴ! ዋቀከ እሸ ድንሼ፡፡

![](https://cdn.door43.org/obs/jpg/360px/obs-en-19-16.jpg)

ዋቀ ኹመምፐየ አፕለ ሌከየ ኤርኬ፡፡ እከ አከ ሰመይተ ፕሰ ክለነደ ዋቀይሰተ ዲሾ ከ ኦረ አፕላት ሙረ ዱካተ ሙሮ ከ ዲሰተ አክሰ ፓዮ ሌሌን፡፡ ኹመምፐየከ ኦቶን ኔቁምተ ኮደ ቃትሰ ዲሸን ከ ዋቀ አጨጨመን ፓይንንይ፥ አከ ዋቀ ደፐይሾ ምነን ቀረ ፈረቶ ከ እሾተ ቀተኦ ሰመይተ ኮኮነይሼን ከ ሌሌን፡፡

![](https://cdn.door43.org/obs/jpg/360px/obs-en-19-17.jpg)

ከረ ኩተ ሰመይተ ዋቀኤን አጨጨሜ፡፡ ኡመ ከረ ኩተ ሳንተ ፈያትን ኹመምፐየ ቀፐንንቻን፤ ኦፐ ዴሰ እሾተ ከሱ ሌን፡፡ ክሴተ ተከዬ፥ ኹመምፐይተሴ ኤርምያስ አከ ቶኦኤ ቃወ ፕሸ አኮኬ ከሮፐ ከተሜ ከ ከረ ዲሰሜ፡፡ እከ ዶቄተሴ ኬለ ክቶ ከሮፐ ተዌ፤ መ ኾር ስትይ ኑቁሰከ እሸ ሱረይሰዴ፥ እከ አንቶንን ቱረን አከ ኦርኸያድ ቃወሴ ከረ እሸ ትተኔ አጨጬ፡፡

![](https://cdn.door43.org/obs/jpg/360px/obs-en-19-18.jpg)

ከደ ፑኑ ሰመይተ ኹመምፐየ ኔደዴ ኔፎዬ፥ እሾነ ቆተ ዋቃት ዴሰ ሃሰወተ ከመዬው ቻዴን፡፡ ከ ኦቶን አረረኤ እንከልን፥ አክመ ዋቀ እሾተ ፐሾ ሰመይተ ኮኮነይሼን፡፡ ከ አክሞሴ ምነኤው፥ ኸሰሴ አድንሸምፐይተሴ አዋቀ ዴኦት ዴሰ ዳሼ ሰመይተ መቴ ኦርሼን፡፡

*መታፈ ቁልቁሎተ ከረ ፖረ ቀረ አካንቶ፡- ኑቁ. አ1ተ 16-18፤ ኑቁ. አ2ተ 5፤ ኤርምያስ 38፡፡*

## 20. ፖጨሜተ ከ ፖጨምተ ኬለ ኦሬተ

https://openbiblestories.org/l/kxc/story-20/

![](https://cdn.door43.org/obs/jpg/360px/obs-en-20-01.jpg)

መንክስቴተ አእስራኤል እሾ መንክስቴተ አዩሁተ፥ ለክ ፕሰከ ዋቀ ቀረ ጩፖተ ኮዴን፡፡ ከ ኮደይቴተሴ አዋቀ እሮተ ሲነ ቀረ እሾተ ኦል ኮደዴ ፖቴን፡፡ ዋቀከ አከ አረረ ከለን ከ አመ ኦረን ከ እሸ ዋቀይሰደኤኔ አከ ኮኮነይሸንከ ሌለኔ ኹመምፐየ ኤርኬ፤ እሾተ ኾር አንአጨጨሞ ክዴን፡፡

![](https://cdn.door43.org/obs/jpg/360px/obs-en-20-02.jpg)

ሴመለ ዋቀከ አከ ፓርከለዳሶ እሾተ ፐሸኔኤ ፈቀቴ ከ መንክስቴዎሴን ለክ ቀተኤ፡፡ ፒተሴ አኑቁሰ አሶር ኮኮከ ከ ኝረመይቴተ ኮድቴከ መንክስቴተ አእስራኤል ፐትሴ፤ ከ ወ ሄረን ኮኮከ ፕሰ ቄደቴ፤ ከ ፒተድ ከረ ኩተ ኩፕቴ፡፡

![](https://cdn.door43.org/obs/jpg/360px/obs-en-20-03.jpg)

አሶረተከ ሳራ ከ ቴየንቶለየ ከ አሴው ኦረ ኮደ ሀርሙመ ሰሆ ፕሰ ኦሎፐ ኦርሴከ አሶርፐን ከለቴ፡፡ እስረኤሌተ ቴከኔ ህዩምቴ ከ ቶተ ኬለ ሀሴ ፐተከ መንክስቴተ አእስረኤል ከረ ሀስቴ፡፡

![](https://cdn.door43.org/obs/jpg/360px/obs-en-20-04.jpg)

ሴከመዬ አሶረተከ አከ ፒተሴ አመንክስቴሴ አእስራኤል ኦፐ ከላደኔኤ ሀፕተን ዴቴ፡፡ ሀፕተሴከ ከተመደሴኔ ቅትቅቴ አመ ፒቴዬ ቁፔ ከ እስረኤሌተ ኤዬ ሀስቴፐዬ ሄሄሜን፡፡ ሰኜተሴ እስራኤሌተ ኮድቴ ከ ኦረ ሀፕተ ሄምቴ፥ ሳምረተ ክደም ከ ሀላም፡፡

![](https://cdn.door43.org/obs/jpg/360px/obs-en-20-05.jpg)

ሰመይተ አመንክስቴተ እስራኤል ቆተ ዋቀን አመንን ከ እሽእን አጨጨምን መለ፥ አክመ ዋቀ እሾተ ቀተኤ ሰመይተ አመንክስቴተ ዩሁታት ቾከ አኬ። መ ኾር አሴዴ ኡፐን ከፐዬ፥ ሰመይተ አመንክስቴተ ዩሁተ፥ ዋቀደ አፒተ ኬኔኣኔተ መልይ ክለነደ ዋቀይሰዴን፡፡ ዋቀከ አከ ቀረ ኦረኔ እሾተ ሌለኤ ኹመምፐየ ኤርኬ፤ እሾተ ኾር አንደከይኖ ክዴን፡፡

![](https://cdn.door43.org/obs/jpg/360px/obs-en-20-06.jpg)

አአሶረተ መንክስቴተ አእስራኤል ፐትሴ ፐረ ድፐ (100) ከፐንዴሰ ከመዬ፥ ዋቀ አከ መንክስቴተ ዩሁተ ቶርፐኔኤ ፐፕሎኔተ ኤርኬ፡፡ ፐፕሎን ስትይ መንክስቴተ አከተ ኮኮከ፡፡ ኑቁሰ ዩሁተከ አከ ኦርኸይተ ነፑኬቴነሶር ኮዶ ከ ፐረ ዴኖ ምነኤ ፕሬወ ኩተየ እሽ ኸፈሎኤ ኦፐ ኦውሰዴ፡፡

![](https://cdn.door43.org/obs/jpg/360px/obs-en-20-07.jpg)

መ ኾር ፐረ ለመየ ከመዬ፥ ኑቁሰ ዩሁተከ ፐፕሎን ቀረ ትየን ኸኤ፡፡ ሴመለ ፐፕሎኔተከ ኦርቴ ከ መንክስቴተ አዩሁተ ቶርፕቴ፡፡ ከ ከተመ ዩርሳለም ቀረ ፕርቴ፤ ከ ትከ ቁልቁሎተ ቅትቅትሴ፤ ከ መስከፐደ አከተመ እሾ አትከ ቁልቁሎተ ፕሰ ቄደቴ፡፡

![](https://cdn.door43.org/obs/jpg/360px/obs-en-20-08.jpg)

ቆተ ኑቁሰ ዩሁተ ትየን እሸ ቀረ ኸኤ መለ፥ ነፑኬቴነሶር እሸ ቀተአኤ አከ ኼላድ አኦረነ ሄለ ዲረ አኑቁሰ ዩሁተ እልዳድፐ ዴሰ ቱረ ሌይሸኔ ኮዴ፤ ከ እሸ ኔፎ ከረ እልደ ጮልሼን፡፡ ከ ሴከመዬ፥ አከ ትከ ህደ ከረ ቶኦኤ ፐፕሎንፐ ኑቁሰን ከሌን፡፡

![](https://cdn.door43.org/obs/jpg/360px/obs-en-20-09.jpg)

ነፑኬቴነሶር እሾ ኼላድ አኦረነከ አከ ዱለ ቆተኔኤ ኦረ ቴከን ህዩሜ ፐተ ኤዬ ዲሼ ከ ከረ ኩተ ሰመይተ አመንክስቴተ ዩሁተ ፕሰ ፖጬን ከ ፐፕሎንፐን ከሌን፡፡ ሰፐኖሴ አኦፐ ሰመይተ ዋቀ ፒተሴ አክፔተ እሬተን ዲሼን፥ ክሴተ ፖጨምተኤ ክደም ከ ሀላም፡፡

![](https://cdn.door43.org/obs/jpg/360px/obs-en-20-10.jpg)

ከደ ፑኑ ዋቀ ጩፖታይሾ ቀረን ኻቴኤ ፖጨምተ እሾተ ዳሼ ከ ቀተኤ ኔፎዬ፥ እሾተ እሾ ክፔተሴ አዳሼ እንቴይምኔ፡፡ ዋቀከ ሰመይታድ ቶይቴተ ከ ኹመምፐየ ቁደን እሾተ ሃሰወተ ከመ ቻዴ፡፡ ፐረ ኩንደ ተፐ ከመዬ፥ አክመ አመ ፒተሴ አክፔተ ኦፐ ኦረኔኤ ክፔተ ዳሼ፡፡

![](https://cdn.door43.org/obs/jpg/360px/obs-en-20-11.jpg)

ፐረ ኩንደ ተፐ ከመዬ፥ ኑቁሰ አፋርሴተከ ፐፕሎኔተ ፑቴ፤ ሴመለ ሙክሰ ኑቁሰ አፈርስከ ፐከ ሙክሰ ኑቁሰ አፐፕሎንፐ ኮዴ። እስራኤሌተከ አይሁቴተ ክደምቴ ከ ሀላምቴ። እሾቶፐ ከረ ኩተ ፒተ ፐፕሎን ፐተ ከረኤ ከላዴን፡፡ አይሁቴተ አከተ ኬርቴ ለመየ ፐተ ፒተ ዩሁተ መቴ ቀፐ፡፡

![](https://cdn.door43.org/obs/jpg/360px/obs-en-20-12.jpg)

ሙክሰ ኑቁሰ ፋርስ አከተ ኮኮክ፥ መ ኾር ሰመይተ እሾተ ኬለ ቾ እሱረይሰን፡፡ ቅሮስ አኑቁሰ ፋርሴተ ኮዴ ክሴተ ለመይቴተ ከመዬ፥ ነመ አይሁትተ ኮዴከ ፒተ ዩሁተ ኦፐ ኦረ ፋኖ አይኖ ኔፎ ኮድቴ፥ ፋርስ ዲሰተ ከ ዩሁቶፐ ከልተ አክመ ኤተንሾኤ አጨጨ ዳሼ። ከ አከ አመ ፒቴዬ ትከ ቁልቁሎተ ቁፐ ኤተንሸኔኤ ቃርቃርሰ እሾተ ኮዴ። ሴመለ ፐረ ኩንደ ተፐ አፖጨምቶፐ ፕሬን ከመዬ፥ ክተ አአይሁቴተ ለመየከ ከተማሴኔ ዩሁተ ከረ ቸ ዩርሳለምፐ ቲተዌን፡፡

![](https://cdn.door43.org/obs/jpg/360px/obs-en-20-13.jpg)

ሰመይተ ኤቴ ዩርሳለም ከዬዬ፥ ትከ አቁልቁሎተ ከ ኦኽንተሴ ከተመ ቁደ ክቶ ኦፐ ኦሬን ከ አመ ፒቴ ቁፔን፡፡ ከደ ፑኑ ሀከ አመት ሰመይተ ፕላትን ፕደሜን ኔፎዬ፥ አመ ኦሬን ከ ፒተሴ አክፔተ ኦፐ ከላዴን፤ ከ ትከ ቁልቁሎተ ኬለ ዋቁምሰዴን፡፡

*መታፈ ቁልቁሎተ ከረ ፖረ ቀረ አካንቶ፡- ኑቁ. አ2ተ 17፤ 24-25፤ ኦቶ. አ2ተ 36፤ እስረ 1-10፤ ነህምያ 1-13፡፡*

## 21. ድንሸምፐይተሴ አዋቀ ክፔተ ዳሼ

https://openbiblestories.org/l/kxc/story-21/

![](https://cdn.door43.org/obs/jpg/360px/obs-en-21-01.jpg)

ዋቀ፥ ኸተ ፓዮተኤው ድንሸምፐይተ ኤርከ ድከዴ፡፡ ክፔቶሴ አድንሸምፐይተከ ፓዮተኤ አታም እሾ ሄዋን ከፖፐ ዴኤ፡፡ ዋቀ፥ አመተ ማከ ቱሞ፥ አከ ሰኜተ ሄዋንፐ ዴለዶኤ ክፔተ ዳሼ፡፡ ማከሴ ሄዋን ሰሰፐዴ፥ ሴተነ፡፡ ክፔቶሴ ኔፎ፥ ድንሸምፐይቶሴ ሴተነ አሌ ፑተ ክዴተ፡፡

![](https://cdn.door43.org/obs/jpg/360px/obs-en-21-02.jpg)

ዋቀ አከ ሰመይተ ፒተ ፕሰ አፕርሃም ቁደን ሰከ አካዶኤ እሸ ክፔተ ዳሼ፡፡ ሰኮሴ ኤዬ ቾ፥ ኦቶ እቱሮፐ ድንሸምፐይቶሴ ዴኦዬ ድከደ፡፡ እሸከ ኦረ ፒተ ቀረ ቾ፥ ሰመይተ አሰኜተ ፒሰ አከ ድኖ ኮደ፡፡

![](https://cdn.door43.org/obs/jpg/360px/obs-en-21-03.jpg)

እቱሮፐ አከ ኹመምፐይተ አሙሴ ፐሆ አፕለ ኻሾኤ ዋቀ ሙሴ ክፔተ ዳሼ። ሴዴ ኔፎ ክፔተሴ አፕለ አድንሸምፐይተሴ ኦቶ ጨሮ ከመዬ ዴኦ ዴሰ ዳሰምቴ፡፡

![](https://cdn.door43.org/obs/jpg/360px/obs-en-21-04.jpg)

ሰኜታድ ኦፐዬ ተከ አከ ሰመይተ ዋቀ ቀረ ኑቁሰ ኮዶ ከ ሀከ ፐረፐራት ሙክሾኤ ዋቀ ክፔተ ኑቁሰ ታውት ዳሼ፡፡ ሴዴ ኔፎ፥ ድንሸምፐይቶሴ ሰኜተ ታውትፐዬ ተከ ኮደ ክዴተ፡፡

![](https://cdn.door43.org/obs/jpg/360px/obs-en-21-05.jpg)

ዋቀ አከ ኮደይቴተ ሃረየ ኮዶኤ ኹመምፐይተሴ ኤርምያስ ቁደን ክፔተ ዳሼ፤ ኮደይቴሴ ኤዬ ክቶ ኾር፥ ኮደይቴተሴ አዋቀ ሲነ ቀረ እስራኤል ኦል ኮደዴን ፐሀቶ፡፡ ኮደይቴቶሴ ሃረየኔ፥ ዋቀ ሰታተ ሰመይተ ቀረኤ ሴራድ ታፈ፤ ሰመይተከ መተ ምነኤ ዋቀ ኡፕናደ፤ ከ ሰመይታድ ኮደ፤ ዋቀከ ጩፖታይሾ እሾነ ዲሸ፡፡ ድንሸምፐይቶሴከ ኮደይቴቶሴ ሃረየ ፓየ፡፡

![](https://cdn.door43.org/obs/jpg/360px/obs-en-21-06.jpg)

ኹመምፐየ አዋቀ ኩልከ አሴው ድንሸምፐይቶሴ አከ ኹመምፐይተ ከ ቄስተ ከ ኑቁሰ ኮደ ሌሌን፡፡ ኹመምፐይተ፥ ነመ ኔሰ አዋቀ ደከይኖ፥ ከ ሴከመዬ ኔሶሴ አዋቀ ሰመይተ ተፐርኖ ክዴተ፡፡ ድንሸምፐይቶሴ አዋቀ ኤርኬተ ክፔተ ዳሼ፥ ኹመምፐይተ አዱካተኤ ኮደ፡፡

![](https://cdn.door43.org/obs/jpg/360px/obs-en-21-07.jpg)

ቄሴወ አእስራኤሌተ ቆተ ጩፖተይሾ አምነን ቅታቴተ እሾነ ቀረ ከይንቶ ከፐኤ፥ ከ ፐከ ሰመይተ ኦፐኤ ዋቀ ከልሶወ ዴሀይሼን፡፡ ቄሴወከ አሴው ቆተ ሰመይተ መለ ዋቆፐ ቅንሰዴን፡፡ ድንሸምፐይቶሴ ቄስተ ኩተ አእስ እመኮተን ዋቀ ከልሶተ ዴሀኖ ኮደ፡፡

![](https://cdn.door43.org/obs/jpg/360px/obs-en-21-08.jpg)

ኑቁሰ፥ ነመ መንክስቴታድ አሙክኖ እሾ ሰመይታድ ቀረ ፈረትኖ፡፡ ድንሸምፐይቶሴ፥ አአልከ ኣከይሾ አታውት ቀረ ኩትኦ ከ እመኮተን ኑቁሰ ኮዶ፡፡ ከ ከስኬለ ፕሰ ቀረ ሀከ ፐረፐራት ፕዶ፤ ከ አክሞሴ ምነኤው አውተ ፕሰ ሀንቄሉመን ፈረተ ከ ሙረ ዱካተ ዳሸ፡፡

![](https://cdn.door43.org/obs/jpg/360px/obs-en-21-09.jpg)

ኹመምፐየ አዋቀ ቆተ ድንሸምፐይቶሴት ዴሰ ዋ ፕለ ሌከየ ከሱ ኹሜን፡፡ ኹመምፐይተሴ ምልክያስ አድንሸምፐይቶሴ እንዴንን ቱረኔ ኹመምፐይተ ኩተ አክመ ዴኦ ዴዮኤው ኹሜ፡፡ ድንሸምፐይቶሴ አከ ኤኔንተ ተከ እስን ክቶፐ ዴለዶ፥ ኹመምፐይተሴ እሰያስ እኹሜ፡፡ ኹመምፐይተሴ ምክያስ ድንሸምፐይቶሴ ከተመ ፔቴልሄም ኦፐኤ ደለደ ክዴ፡፡

![](https://cdn.door43.org/obs/jpg/360px/obs-en-21-10.jpg)

ኹመምፐይተሴ እሰያስ ድንሸምፐይቶሴ ኬልለኤ ከላደ፤ ከ ኦረ ከርታይሾ ቄፔ ኮኮነይሸ፤ ከ አሴው ኦረ ፖጨሜት ነተ ሶኬተ ከ አህዳሜት ፉረምተ ሰልሸ፡፡ ኹመምፐይሴኤውከ አከ ድንሸምፐይቶሴ ሰመይተ አፓቅኖ ከ ደከየ ከ አአኬተ ከ ሃሰወተ ታክ አንተ ኤተንንክንን ድንሾ ኹሜ፡፡

![](https://cdn.door43.org/obs/jpg/360px/obs-en-21-11.jpg)

ኹመምፐይተሴ እሰያስከ ድንሸምፐይቶሴ አከ ፐተ ቁደ ኔደተሞ ከ አከ ትየን ቀረ ኸአምቶ ኹሜ፡፡ ኹመምፐየ አፕልእው እሳሴኔ ኹመምፐይተሴ እሼ አከ ሜሀዳድ ቀረ ቆይርተ ከተደን፥ ሞታድከ እሸ መርመዶ ቱረኔው ኹሜን፡፡ ኹመምፐይተሴ ሰካርያስእው፥ ሞተሴ አድንሸምፐይቶሴትእ አክመ ፕሬተ ኩንደ ሴሰ ኸፈለኔ ኹሜ፡፡

![](https://cdn.door43.org/obs/jpg/360px/obs-en-21-12.jpg)

ኹመምፐይሴከ ቶተ አድንሸምፐይቶሴት ዴሰ አሴው ኹሜ፡፡ እሰያስ ኦረ አክመ ድንሸምፐይቶሴ ቀረ ቱፈዶ፥ ከ ቀረ ሴሶ ከ ቅዶኤ ኹሜ፡፡ ከደ ፑኑ ደፐ ተከ ኔፎ እንኮንን ከሱይ፥ እሸ ዶተን እከ ሱሩምተ ኩተ እሾ ረኮተን ቶአ፡፡

![](https://cdn.door43.org/obs/jpg/360px/obs-en-21-13.jpg)

ከ አሴው ኹመምፐየከ ድንሸምፐይቶሴ አጩፖተን ቀፕንን ዱከለይተ ኮደ ክዴን፡፡ እሸ ጩፖተ ኦረ ፕለ መለ ቅተቴተ ቴየተኤ ቶኤ፡፡ ቅተቴታድከ አርተ ዋቀ እሾ አኦረ ከረኤ ነከይተ ዴእሰ፡፡ ሴዴ ምነን ድንሸምፐይቶሴ ዮቄተ፥ ፌቃተ ዋቀኤ ኮድቴ፡፡

![](https://cdn.door43.org/obs/jpg/360px/obs-en-21-14.jpg)

ኹመምፐየ ድንሸምፐይቶሴ አከመ ቶኦ ዋቀ ኔፎከ ቶቶፐ እሸ ኻሾ፥ ቱረኔው ኹሜን፡፡ ዋቀከ ቶተ ከ ኻነ ኹመምፐይቶሴ ምነን ጩፖለየ ድንሰኤ ድከተ ቀፖ ድክሸ ከ ኮደይቴተሴ ሃረየ ፓየ፡፡

![](https://cdn.door43.org/obs/jpg/360px/obs-en-21-15.jpg)

ዋቀ ቆተ ድንሸምፐይቶሴት ዴሰ ዌ ሌከየ ኹመምፐየ አክሼ፤ መ ኾር ክሴተ አኹመምፐዮሴኔት ኦፐ አተከ ኔፎፐኤ ድንሸምፐይቶሴ እንዴኔ፡፡ ኹመዶሴን ኤዬ ቸ ኦፐዬ ኹመ አድከተ አኹመሜ ፐረ ድፐ አፉር (400) ከመዬ ፥ ልኬተ ክሴታድ አቀፐምቴ ኦፐኤ፥ ዋቀከ ድንሸምፐይተሴ ፒተ ቀሮፐ ኤርከ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 3፡15፤ 12፡1-3፤ መታፈ ኦፐ ኦሬተ 18፡15፤ ሰሙ. አ2ተ 7፤ ኤርምያስ 31፤ እሰያስ 59፡16፤ ታንኤል 7፤ ምልክያስ 4፡5፤ እሰያስ 7፡14፤ ምክያስ 5፡2፤ እሰያስ 9፡1-7፤ 35፡3-5፤ 61፡53፤ መታፈ አመስሙሬተ 22፡18፤ 35፡19፤ 69፡4፤ 41፡9፤ ሰካርያስ 11፡12-13፤ እሰያስ 50፡6፤ መታፈ አመስሙሬተ 16፡10-11፡፡*

## 22. ደሎተ ዮሀንስ

https://openbiblestories.org/l/kxc/story-22/

![](https://cdn.door43.org/obs/jpg/360px/obs-en-22-01.jpg)

ዋቀ ቱረንዴሰው ኤርከምፐቶዋድ እሾ ኹመምፐያድ ቁደን ሰመይተ ሃሰወዴ። መ ኾር ፐረደ እሾተኤን ሃሰወንን ድፐ አፉርከ (400) ተርፔን፡፡ አእስቀረን ኡፕንን መልይ፥ ኤርከምፐቶተ ተከከ ቄስተ ቅሜ ከ ሰከርያስ ክደሞኤ ኤርከነ ዋቀትን ዴቴ፡፡ ሰከርያስ እሾ እስከቴታድ ኤልሳፔት ኦረ ዋቀ ፉሮ፤ መ ኾር እሼነ ሄለ ኻየን ኤተንኔ፡፡

![](https://cdn.door43.org/obs/jpg/360px/obs-en-22-02.jpg)

ኤርከምፐቶተሴከ ሰከርያስ ኪቴ፥ ‹‹እስከቴታይት እነ ዲርተኤ ኻይተ፡፡ አከ ዮሀንስ ኪተ ከ ሀሌተ፤ ሀፑረ ቁልቁሎተኔ እመካደ፤ ከ ሰመይተ ድንሸምፐይቶሴት ሀርምሸ!›› ሰከርያስከ ኦርሼ ከ ክዴ፥ ‹‹እስከቴትዮ እሾ አነ ድኬን ቅሜይ፥ ሴዴ አከ ኮድቶ ማነኔን ኡፕናተ ኤተንሸ?››

![](https://cdn.door43.org/obs/jpg/360px/obs-en-22-03.jpg)

ኤርከምፐቶተሴከ ሰከርያስ ኦርሴ ከ ኪቴ፥ ‹‹አከን ኦቶቶሴ አፈያትን እሽነ ዴኦኤ ዋቀ አነ ኤርኬ፡፡ መ ቆተ አነ አአመንን መለ፥ ሀከ እኖሴን ዴለናኔትእ ሃሰ አኤተንሶ፡፡›› ኤኖው ሰከርያስከ ሃሰ መላሌ፡፡ ሴከመዬ ኤርከምፐቶተሴከ ሰከርያስ ከፐ ፑርሰምቴ፡፡ ሰከርያስከ ትኮፐ ቲተዌ፥ እስከቴታድ ኔፎከ እነ ህቴ፡፡

![](https://cdn.door43.org/obs/jpg/360px/obs-en-22-04.jpg)

አኤልሳፔት እነ ሌየ ሌህ ከርቶፐ ቀፕቶዬ፥ ኤርከምፐቶቶሴኤውከ አእስቀረን ኡፕንን መልይ፥ ኤኔንተ ተከ ፍሮፐ ኤልሳፔት ኮድቴ ከ ማርያም ክደምቶ አካቴው፡፡ እሼነ ኤኔንተ እስን ክቶከ ነመ ተከ ዮሴፍ ክደሞት ሄምተ ዳሰምቴ፡፡ ኤርከምፐቶተከ እሽ ኪቴ፥ ‹‹እህተ፥ ከ እነ ዲርተ ኻይተ፡፡ ከ መኻድ ኔፎ የሱስ ኪተ ከ ሀሌተ፡፡ እሸ ነመ ኩተ አእነ ዋቀኤ ክደመ ከ ሀከ ፐረፐራት ኑቁሱመ፡፡››

![](https://cdn.door43.org/obs/jpg/360px/obs-en-22-05.jpg)

ማርያምከ ኦርሴ ከ ኪቴ፥ ‹‹አንት ቆተን እስን ቾ መለ፥ ሴዴ አተ ኮድተ?›› ኤከምፐቶተከ ኦልኬለ እሽ ለአሴ ከ ኪቴ፥ ‹‹ሀፑረ ቁልቁሎተኤ ኬፐ ዴአ፤ ሁፕነ ዋቀሴ ዌ ፕሰ ኡኩሞከ ኬ ቀረ ሌከደ፡፡ ሴመለ እኖሴን ቁልቁልተ እነ ዋቀኤ ኮደን፡፡›› ማርያምከ አመንቴ፥ ከ ዋ ኤርከምፐቶተ ኪቴ ቴየቴ፡፡

![](https://cdn.door43.org/obs/jpg/360px/obs-en-22-06.jpg)

ኤቴ ኤርከምፐቶተ ማርያም ሌልቴ ከመዬ፥ እሼተ ኤኖው ኤልሳፔት ቶዬተ አንቴ፡፡ ኤልሳፔት ኤቴ ኔሰሴ አማርያም አፓንተ ደከይቴዬ፥ እነሴኔ አኤልሳፔት ከርቶፐ ቀፕተከ ከሀዴን፡፡ እሾተከ ዋ ዋቀ እሾተ ኮዴ መለ፥ ኦልን ኸሶዴን፡፡ ማርያም ኤቴ ሌየ ሴሰ ኤልሳፔት ከፐ ጨርቴ ከመዬ፥ ትካድፐ ከልቴ፡፡

![](https://cdn.door43.org/obs/jpg/360px/obs-en-22-07.jpg)

ኤልሳፔት ኤቴ እነ ዲርተ ኻይቴ ከመዬ፥ ሰከርያስ እሾ እሼተ አከ ኤርከምፐቶተ አጨጭቴ ቀረኤ መኸ እነሴኔት ዮሀንስ ክዴን ከ ሀሌን፡፡ ስትይ ዋቀከ አከ ሰከርያስ አለመታት ሃሰወዶ እሽ ፈቀቴ፡፡ ሰከርያስከ ክዴ፥ ‹‹ሰመይታድ ቶየዴይ፥ ዋቀ አከለተይሰሞ! አት ኔፎ እናዮ፥ ኹመምፐተይተሴ ኩተ አዋቀ እሳሴ አከ ሰመይተ ጩፖታድፐ ዲሰተ ቴየ ኤተንሾ አእሾተ ሌሎ ክደምተ!››

*መታፈ ቁልቁሎተ ከረ ፖረ ቀረ አካንቶ፡- ሉቃስ 1፡፡*

## 23. ደሎተ የሱስ

https://openbiblestories.org/l/kxc/story-23/

![](https://cdn.door43.org/obs/jpg/360px/obs-en-23-01.jpg)

ማርያም ሀንቄለይተ ተከ ዮሴፍ ክደሞኤ ሄምተ ዳሰምቴ፡፡ ዮሴፍሴ አእሽ ሄምተ ዳሰምቴ ኤቴ አከ ማርያም ህቴ ደከዬዬ፥ እኖሴን አከ ኻድን ኮድንን ኡፕናዴ፡፡ ኡመ ማርያም ጬርሰን ፋኔ፤ ሴመለ ጨው ክዴተ ከ አሌ እሼተ ዲሰተ ድከዴ፡፡ አሴዴን ኮንን ቱረኔ፥ ኤርከምፐቶተከ ዴቴ ከ ኦልሰን እሽ ሃሰወቴ፡፡

![](https://cdn.door43.org/obs/jpg/360px/obs-en-23-02.jpg)

ኤርከምፐቶተከ እሽ ኪቴ፥ ‹‹ዮሴፍ! ማርያምሴ ኬ ዳሰምቴ ሄሜተን ፉረን፡፡ እነ ከርቶፐ ቀፕተ ሀቱረ ቁልቁሎታትን ህቴይ፡፡ እነ ዲርተኤ ኻይተ፡፡ መኻድ ኔፎ ዬሱስ ኪተከ ሀሌተ (እን ክዴተ፥ ‹ያህዌ እድንን› ክዴተ)፤ ማነ መለ፥ ኦራድ ጩፖታይሾ ኦፐ ድንሸይ፡፡››

![](https://cdn.door43.org/obs/jpg/360px/obs-en-23-03.jpg)

ሴመለ ዮሴፍከ ማርያም ሄሜ ከ አከ እስከቴታድ ኮድቶኤ ትካድፐ ቴየዴ፤ መ ኾር ሀከ ኻይንቶኤ እሼተ ኦል እንሙክኔ፡፡

![](https://cdn.door43.org/obs/jpg/360px/obs-en-23-04.jpg)

ማርያም ኤቴ ክሴታድ አኻየ ከይቴዬ፥ ስትይ መንክስቴተ ሮም አከ ነመ ፕሰ ከተመ ኣከዳሶ ኦፐ ከላዴን ኦፐ ኣኖ ከ ድከሞ ሌልቴ፡፡ ዮሴፍ እሾ ማርያምከ ከተማሴኔ አእሽ ከለን ናስሬት ዴሰ ፔቴልሄምሴ አንተ ሴከ ኦፐ ኣኔን፤ ማነ መለ፥ ከተመ ፔቴልሄምእ ኣከሴ ኻይሾ ታውት ኤዬ ዴለዴይ፡፡

![](https://cdn.door43.org/obs/jpg/360px/obs-en-23-05.jpg)

ኤቴ ፔቴልሄም ከዬኔዬ፥ ፖረ ምክተኤ ደፔን፡፡ ፖረ አቴዬን ኔፎ፥ ሞነ ሎአለ ፐተ። ኤቴ እነ ዴለዴኔዬ ሎሸ አቀረ ሙክሸን ቆተን ክንን መለ፥ ኣየሶ ታማረፔ ሙክሴ፡፡ ከ መኻድ ዬሱስ ክዴን፡፡

![](https://cdn.door43.org/obs/jpg/360px/obs-en-23-06.jpg)

ሀልኬስትይ፥ ስክመየ ለኮፐዬ ሆሬተ ስክነ ለመየ ፖረ ዴሆፐዬ ቸ፡፡ አእስቀረን ኡፕንን መልይ፥ ኤርከምፐቶተ ለአይንቶከ እሾነ አካቴ፤ እሾተከ ፉሬን፡፡ ኤርከምፐቶተከ እሾተ ኪቴ፥ ‹‹እንፉረን! ማነ መለ፥ አንት ኦቶተ ፈየኤን እሽነ ቀፐይ፡፡ ድንሸምፐይተ፥ ፖቀለ ፔቴልሄም ደለዴይ!››

![](https://cdn.door43.org/obs/jpg/360px/obs-en-23-07.jpg)

‹‹ኣነከ እኖሴን ፈደ፤ አኦሀተን መሬን ከ ሞነ ከረዬ ታማረ ከረ ሙክሼኔኤ አክተን፡፡›› ኤኖው ሞንተከ ኤርከምፐቶወን እመካቴ፤ እከ ዋቀ ከለተይሰዴን ከ ክዴኔ፥ ‹‹ሞንተኤ፥ ዋቀ አኡልፌሰሞ፥ ፒተኤ ኦረ አዋቀ እሾተ ጫለኖት ነከይተ አኮዶ!››

![](https://cdn.door43.org/obs/jpg/360px/obs-en-23-08.jpg)

ስክመየከ ፖረ ዬሱስ እሽ ቾፐ ጨርጨርተን ኣኔን ከ አከ ኤርከምፐቶተ እሾነ ሌልቴ ቀረኤ እነ ሞነ ሆሬተ ከረዬ ታማረፐ ሙክሼኔ አኬን፡፡ ከ አከተ ኸሶዴን፡፡ ማርያም ኔፎከ አከተ ኸሶቴ፡፡ ስክመየከ ዋ ደከዬኔ ከ አኬኔ ፕሰ ዴሰ ዋቀ ከለተይሰተን ለከሴ አሆሬታይሾ እሽ ክቶፐ ቲተዌን፡፡

![](https://cdn.door43.org/obs/jpg/360px/obs-en-23-09.jpg)

ክሴተ ለመይቴተ ከመዬ፥ ቶየምፐያሴኔ አህከ አፒተ ቅንደ ፒርቶቴዬ ከለ፥ ሞንተ ቁደኤ ህክተ ፕለይተ አኬን፡፡ እከ አከ ዴሎተ ኑቁሰ አይሁት ሃረየ አክኖ እሾተ ከልቴ፡፡ ሴመለ ኑቁሶሴ ቶየኤ ፖረ አከተ ሴካዬ ዴኤን፡፡ ከ ፔቴልሄም ከዬን፥ ከ ትከ ዬሱስ እሾ ቶለይሾ እሽ ቾ አኬን፡፡

![](https://cdn.door43.org/obs/jpg/360px/obs-en-23-10.jpg)

ኦከሴኔ አቶየምፐየከ ኤቴ ዬሱስ ኣየሶ ኦልን አኬኔዬ፥ እክልፔፔን ከ እሽ ሰከተዴን፡፡ ከ ዬሱስ ዳሰወ ሄረን ኮኮኮከ ዳሼን፡፡ ከ ሴከመዬ ፒታይሾፐ ቲተዌን፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 1፤ ሉቃስ 2፡፡*

## 24. ዮሀንስ ዬሱስ ፕሸን ጨቄ

https://openbiblestories.org/l/kxc/story-24/

![](https://cdn.door43.org/obs/jpg/360px/obs-en-24-01.jpg)

እነ ሴከርያስ እሾ አኤልሳፔት ዮሀንስከ ኩተዴ ከ ኹመምፐይተ ኮዴ፡፡ ከ ኮመይቶፐ ከላዴ፤ ከ ኤዬኤ ተክመ ቶለ እሾ ቶረይተ ደሜ፤ ከ ሜሀደ ኝርፈ ካለ ኦፐ ኮደሜ ከልሰዴ፡፡

![](https://cdn.door43.org/obs/jpg/360px/obs-en-24-02.jpg)

ኦረ ኩተይተከ ዮሀንስ ደከይሰተኤ ኮመይቶፖፐ ዴን፡፡ እሸከ እሾተ ቶርን ከ ኪን፥ ‹‹መንክስቴተ አሞንተ እዴሀቴይ፥ ጩፖታይሽን ኦፐዬ አሌ ኦረ።››

![](https://cdn.door43.org/obs/jpg/360px/obs-en-24-03.jpg)

ሰመይተ ኤቴ ኤርከነሴኔ አዮሀንስ ደከዬዬ፥ ከረ ኩተ ጩፖታድፐ አረረ ከሌ፤ ዮሀንስከ ፕሸን እሾተ ጨቄ፡፡ ሳራ አመንቴወ ሌከየ ከሱከ ዮሀንስ ከፖፐ ፕሸ ጨቀተ ዴን፤ መ ኾር ጩፖታይሾ ኦፐዬን ኦሬ ታክ አረረኤን ከሌ፡፡

![](https://cdn.door43.org/obs/jpg/360px/obs-en-24-04.jpg)

ዮሀንስከ ሳራ አመንቴዋት ክዴ፥ ‹‹እሽነ ሄለ ፑቶታት! ጩፖታይሽን ኦፐ ኦረ ከ ኮዳይሽን ሀርምሸ፡፡ ቆይረ ደልተ ፈየ ደልንንክንን ፕሰ አሌኤ ሙረመ ከ አፕቶፖፐ ከተመ፡፡›› ዮሀንስከ እሳሴ አኹመምፐየ ሃሰወዴን ከ ክዴኔ፥ ‹‹ትን፥ አፖረይት ሀርምሾ፥ ኤርከመምፐይትዮን ኬ ቱረ ዴሰ ኤርከ›› ከ ድከቴ፡፡

![](https://cdn.door43.org/obs/jpg/360px/obs-en-24-05.jpg)

ኦረ አይሁት ተከ ተከ ዮሀንስ ካሰዴ ከ ክዴ፥ ‹‹ሄለ አት አድንሸምፐይተ?›› ዮሀንስከ እሾተ ኦርሼ ከ ክዴ፥ ‹‹አንት አንድንሸምፐይተን፤ መ ኾር፥ ነመ አነ ከመ ዴሰ ዴኦ ተከ ቸ፡፡ እሸ አከተ አነ ቀረ ቀፐ፥ አንተ ኸተ ክዴተ ከ ኾፓድ ፉሬተ ምቸ አንኤተንሾ፥ ፡››

![](https://cdn.door43.org/obs/jpg/360px/obs-en-24-06.jpg)

ፐረይታድይ፥ ዬሱስከ አከ ዮሀንስ ፕሸን እሸ ጨቆኤ ከፖፐ ኣኔ፡፡ ዮሀንስ ኤቴ እሸ አኬዬ፥ እክዴ፥ ‹‹ቶየ! ትን፥ ላሀሴ አዋቀ አጩፖተ ፒተ ፕሰ ፐሾ።››

![](https://cdn.door43.org/obs/jpg/360px/obs-en-24-07.jpg)

ዮሀንስከ ዬሱስ ክዴ፥ ‹‹አንት ፕሸን ኬ ጨቀ ምነኤ አንቀኔ፡፡ መ ከፐዬ፥ ኬ አነ ፕሸን ጨቀ።›› ዬሱስ ኾር እእሽ ክዴ፥ ‹‹ዋ ኮደመ ፐርፓችስነ አፈየኤ ኮንይ፥ አት ፕሸን አነ ጨቀ እኤተንሰ።›› ሴመለ ከደ ፑኑ ዬሱስ አፐር ጩፖተን ኮንን ኔፎዬ፥ ዮሀንስ ዬሱስ ፕሸን ጨቄ፡፡

![](https://cdn.door43.org/obs/jpg/360px/obs-en-24-08.jpg)

ዬሱስ ኤቴ ፕሸሴኔ ጨቀዴ ከመዬ፥ ሶከ ፕሻፐ ሶኬኔ፥ ሀፑረ ዋቀከ ኤሌለ ፐሀናዴ ከ አካዴ ከ ሌከዴ ከ እሸ ቀረ ኩትኤ፡፡ ስትይው፥ ኔሰ ዋቀ አኪኖ፥ ‹‹አት እነሴኔ ኸዮ አንጫለነ፥ ምክቴን ኬን ኸሶዴ›› ከ ሞንቴ ኸተ ደካዴ፡፡

![](https://cdn.door43.org/obs/jpg/360px/obs-en-24-09.jpg)

ዋቀ ዮሀንስእ ሌሌ ከ ክዴ፥ ‹‹ሀፑረ ቁልቁሎተኤ ሌከደ ከ ነመሴ አአት ፕሸን ጨቅንቶ ቀረ ኩትአ፡፡ ነሞሴ ኔፎ እነ ዋቀ።›› ዋቀ ተከይተ ፐተ ቸ፡፡ መ ኾር አዮሀንስ ዬሱስ ፕሸን ጨቄዬ፥ ዋቀ ኣፐ አሃሰወኖዬ ደከዬ፤ ከ ዋቀ እነ አኬ፥ እሸ ኔፎ ዬሱስ፤ ከ አሴው ሀፑረ ቁልቁሎተ አኬ፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 3፤ መርቆስ 1፡9-11፤ ሉቃስ 3፡1-23፡፡*

## 25. ሴተነ ዬሱስ ኤከይሰዴ

https://openbiblestories.org/l/kxc/story-25/

![](https://cdn.door43.org/obs/jpg/360px/obs-en-25-01.jpg)

አዬሱስ ፕሸን ጨቀሜ ከመዬ፥ ኤኖው ሀፑረ ቁልቁሎተከ ኮመይቶፖፐ እሸ ቄዴ፤ እከ ኤዬኤ ኩያተ ኩንደ አፉ ከ ሀልኬተ ኩንደ አፉር ደምተ ሙሰዴ፡፡ ሴከመዬ ሴተነ ዬሱስ ከፖፐ ዴኤ ከ አከ ጩፖተ ኮዶኤ እሸ ኤከይሰዴ፡፡

![](https://cdn.door43.org/obs/jpg/360px/obs-en-25-02.jpg)

ሴተነከ ዬሱስ ኤከይሰዴ ከ ክዴ፥ ‹‹ኦቶን አእነ ዋቀትይ፥ አከ ደምተ ኤተንሶኤ ደከዶሴን አሬ ቸ ደማፐ ኦርሼ።››

![](https://cdn.door43.org/obs/jpg/360px/obs-en-25-03.jpg)

ዬሱስከ እሽ ኦርሼ ከ ክዴ፥ ‹‹ ‹ቃሌተ አዋቀ ኦፐ እታፈምቴ ከ ኪን፥ ኦረ ከላተኤ፥ ደመ ፐተ እሾነ ፐርፓችስንንቻን፥ መ ኾር ሃሰ አዋቀ ሃሰወነ ፕሰ እሾተ ፐርፓችስን!›› ›

![](https://cdn.door43.org/obs/jpg/360px/obs-en-25-04.jpg)

ሴከመዬ ሴተነከ ኩተ ትከ ቁልቁሎተ ቀሮፐ ዬሱስ ቄዴ ከ ክዴ፥ ‹‹ኦቶን አእነ ዋቀትይ፥ እስቱፐኸተ እስ ሹሌ፤ ማነ መለ እታፈምቴ ከ ኪን፥ ‹አከ ሎቃትን ኬሀንንእ፥ ዋቀ ኤርከምፐቶዋድ አጨጨ እከ ኬ ቀፐኔይ።› ››

![](https://cdn.door43.org/obs/jpg/360px/obs-en-25-05.jpg)

መ ኾር ዬሱስ ቃሌተ ዋቀ ኦፐዬ ቄዴ ከ እሽ ኦርሼ ከ ክዴ፥ ‹‹ቃሌተ ዋቀ ሰመይታድ አጨጭን ከ ኪን፥ ‹ዋቀ ፖቀላትን ኤከይሰደን።› ››

![](https://cdn.door43.org/obs/jpg/360px/obs-en-25-06.jpg)

ሴከመዬ ሴተነከ መንክስቴወ ፒተ ከ ኡልፌናይሾ ፕሰ እሽ አክሼ ከ ክዴ፥ ‹‹ከድ ክልፔፐተ ከ አነ ሰከተተዬ፥ ሴዴ ፒሰን ኬ ዳሸ።››

![](https://cdn.door43.org/obs/jpg/360px/obs-en-25-07.jpg)

ዬሱስከ እሽ ክዴ፥ ‹‹አት ሴተኖ ኣኔ! ዋቀ ቃሌታድን ሰመይታድ አጨጬ ከ ክዴ፥ ‹ዋቀ ፖቀላት ሰከተዶ፥ ከ እሸ ፐተው ዋቁምሰዶ።› ››

![](https://cdn.door43.org/obs/jpg/360px/obs-en-25-08.jpg)

ዬሱስ ኤከይሱመ ሴተነትን እንፑተሜ፤ ሴመለ ሴተነከ ኬሎ ዴሰ አሌ እሸ ዲሼ፡፡ ሴከመዬ ኤርከምፐቶወከ ዴኤን ከ ዬሱስ ቀረ ቶዬን፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 4፡1-11፤ መርቆስ 1፡12-13፤ ሉቃስ 4፡1-13፡፡*

## 26. ዬሱስ ኮዳድ ፓዬ

https://openbiblestories.org/l/kxc/story-26/

![](https://cdn.door43.org/obs/jpg/360px/obs-en-26-01.jpg)

ኤቴ ዬሱስ ኤከይሱመ ሴተነ ፑቴ ከመዬ፥ ሁፕነ ሀፑረ ቁልቁሎታትን እመካዴ ከ አውረጨሴኔ አኬልለ አኦፐ ከለ ኦፐ ቲተዌ፡፡ ዬሱስከ ፖረ ተከዬ ዴሰ ፖረ አፕለ ኦፐ አአን ከ ኮልን፡፡ ነመ ፕሰከ ቆታድ ዴሰ ዋ ፐኻረ ሃሰወን፡፡

![](https://cdn.door43.org/obs/jpg/360px/obs-en-26-02.jpg)

ዬሱስከ ከተማሴኔ አኦፐ ኩተዴ አናስሬት ኦፐ ቲተዌው፡፡ ከ ሰንፐተ አአይሁትትይ ትከ ቅንሴተ ኦፐ ኣኔ፡፡ እከ አከ አነፐፖኤ መታፈሴ ኦሎፐ መረሞ አኹመ እሰያስ እሽ ዳሼን፡፡ ዬሱስከ ታፌሴ ኦሎፐ መረምቴ ፐኔ ከ ኦፐዬ ለመይቴተ ሰመይተ አነፐፔ፡፡

![](https://cdn.door43.org/obs/jpg/360px/obs-en-26-03.jpg)

ዬሱስከ ፖሮሴ ቀረ አነፐፔ ከ ክዴ፥ ‹‹አከን ኦቶተሴ አፈየ ቴኮለየ ቶሮ፥ ከ አፖጨሜት ነተ ሶኬተ ቶሮ፥ ከ አእልደን ቀፕንን አከ አከኔ ሰልሾ፥ ከ አህደሜ አከ ፉረመን ቶሮኤ ዋቀ ሀፑራድ አነ ዳሼ፡፡ ሀ ሴዴ ፐረሴ ጫለተሜ አዋቀ።››

![](https://cdn.door43.org/obs/jpg/360px/obs-en-26-04.jpg)

ሴከመዬ ዬሱስከ ኩትኤ፡፡ ኦረ ፕሰከ ከፐዴሰ ዴሃዴከ እሸው ቶይን፡፡ ፖሮሴ አቃሌተ ዋቀ አመ ቀረ አነፐፔ ከሱ፥ ድንሸምፐይተሴኤ አክን፡፡ ዬሱስከ ክዴ፥ ‹‹ቃሌሴ አን እሽነ አነፐፔ፥ አመ ድከተ ቀረ ክተ።›› ሰመይተ ፕሰከ ኦፐ ቀዋዌ፡፡ ከ ኪን፥ ‹‹እን እነ ዮሴፍን?››

![](https://cdn.door43.org/obs/jpg/360px/obs-en-26-05.jpg)

ሴከመዬ ዬሱስከ ክዴ፥ ‹‹ኹመምፐይተ አከ ፒታድ ኦፐ ኡልፌሰምንንክንን ዱካተ፤ ኼልተ ኹመምፐይተ ኤልያስይ፥ ፒተ እስራኤልትይ እስከተ አኣፐዳሶ ቀረ ሌኤኔ ሌከየ ቸ፡፡ መ ኾር፥ ሀከ ፐረ ሴሰከ ሌየ ሌህትእ ኤቴ ሮፐ ደፐዴዬ፥ ዋቀ እአከ ህይቴተ አፒተ ፕላ ቃርቃሮኤ ኤልያስ ኤርኬ ዲሼይ ህዬቴተ አእስራኤል ከረ ከልቶ አከ ቃርቃሮ እንኤርክኔ፡፡››

![](https://cdn.door43.org/obs/jpg/360px/obs-en-26-06.jpg)

ዬሱስከ ቶራ ከመው ቻዴ ከ ክዴ፥ ‹‹ኼልተ ኹመምፐይተ ኤልሰእ ኔፎዬ፥ ኦረ እስራኤል ከረዬ፥ ኦረ ፓቀ ቆሸትን ቀፐሜ ሌከይተ ቸ፡፡ መ ኾር፥ ኤልሰእ ነመ ተከ ኔፎን ድንኔ፡፡ ንእማኔሴ ሳረ ፓርከለ እስራኤል ኮዴ ፐተ ቆሸ ደክንታድ ኦፐ ድንሼ፡፡›› ሰመይተ አዬሱስ ደከይሰተ ቀረ ቾ ኔፎ፥ አይሁታተ፡፡ ሴመለ ኤቴ ሴዴ ሃሰወኖ እከ ደከዬኔዬ፥ ቀረኤ ሚሮዴን፡፡

![](https://cdn.door43.org/obs/jpg/360px/obs-en-26-07.jpg)

ሰመይተ አናስሬትከ ፖረሴ አቅንሴተ ኦፐ ዬሱስ ትቴን ከ አሌ ከመ ኸተ ቱቁረ ከ እሼተኤ ኩተ እሮተ ቀሮፐ እሽን ኣኔን፡፡ መ ኾር ዬሱስ ኦተንተ ሰመይተ ኦፐኔ ተርፔ ከ ከተመ ናስሬት ኦፐ ኣኔ፡፡

![](https://cdn.door43.org/obs/jpg/360px/obs-en-26-08.jpg)

ሴከመዬ ዬሱስ አውረጨደ አኬልለ ፕሶፐ ትቲተዌ፤ ሰመይተ ኩተይተከ እሸ ከፖፐ ዴኤ፡፡ እከ ኦረ እልደን ቀፕንን፥ አአንተ ኤተንንክንን፥ አደኮዴ፥ አሃሰወተ ኤተንንክንን መልይ ፓቆለየ ሌከየ ከ ቶጰየ እሸ ከፖፐን ዴኤን፡፡

![](https://cdn.door43.org/obs/jpg/360px/obs-en-26-09.jpg)

ከ አሴው ኦረ ሀፑረ ኔኔቀ ቀፖ ሌከይተ ዬሱስ ከፖፐን ዴኤን፡፡ አጨጨ ዬሱስን ሀፑረ ኔኔቀከ ኦሮሴ ከረ ሶኬን፤ ከ ክሴተ ሌከይቴተ ኡሉፔን ከ ክዴኤ፥ ‹‹ሀ አት አእነ ዋቀ!›› ሰመይተከ ኦፐ ቀዋዌ ከ ዋቀ ዋቀይሰዴ፡፡

![](https://cdn.door43.org/obs/jpg/360px/obs-en-26-10.jpg)

ሴከመዬ ዬሱስከ እሳሴኔ ተማሬዋድ ክደሜ ነመ ኩድንከ ለክ ሬኼ፡፡ ኮደምፐዮስንከ ዬሱስ ኦል ፖረ ኣኔን ከ እሸ ኬለ ኮለዴን፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 4፡12-25፤ መርቆስ 1፡14-15፣ 35-39፤ 3፡13-21፤ ሉቃስ 4፡14-30፣ 38-44፡፡*

## 27. ቶራ ሾሮክተሴ አፒተ ሰማርየ

https://openbiblestories.org/l/kxc/story-27/

![](https://cdn.door43.org/obs/jpg/360px/obs-en-27-01.jpg)

ኩያተ ተከዬ፥ ኮልሰምፐይተ ተከ አሴረ አይሁት፥ እሸ ኤከይሰተኤ ዬሱስ ከፖፐ ዴኤ ከ እሽ ክዴ፥ ‹‹ኮልሰምፐይቶ፥ ቻተ ፐረፐረ አከተኤ ማነ ኮደ አነ ፋን?›› ዬሱስከ እሽ ኦርሼ ከ ክዴ፥ ‹‹ሴረ ዋቀ ኦፐ ማነ ታፈሜ?››

![](https://cdn.door43.org/obs/jpg/360px/obs-en-27-02.jpg)

ኮልሰምፐይተሴ አሴረ ከ ኦርሼ ከ ክዴ እኪን፥ ‹‹ዋቀ ፖቀላት ከርታይት ፕሰን ከ ነፕሴታይት ፕሰን ከ ሁፕናይት ፕሰን ከ ድከታይት ፕሰን ጫለዶ፡፡ ከ አከመ እስ ጫለንቶ ምነኤ፥ ኼልታይት ጫለዶ።›› ዬሱስከ ክዴ፥ ‹‹ዱካተ ሌልቴ! ሴዴው ኮዴ፥ ቻተ ፐረፐረኤ አከተይ፡፡››

![](https://cdn.door43.org/obs/jpg/360px/obs-en-27-03.jpg)

መ ኾር ኮልሰምፐይቶሴ አሴረ አከ ሀንቄለይተ ኮዴ ኡፕናተ ፈዴ፤ ከ ሴመለ ካሰዴ ከ ክዴ፥ ‹‹ኼልትዮ አይኖ?››

![](https://cdn.door43.org/obs/jpg/360px/obs-en-27-04.jpg)

ዬሱስከ ቶራ እሽ ቶረኔ፥ ኮልሰምፐይቶሴ አሴራት ኦርሼ ከ ክዴ፥ ‹‹አይሁትተ ተከ ዩርሳለም ኸተ እያርኮፐ አን፡፡››

![](https://cdn.door43.org/obs/jpg/360px/obs-en-27-05.jpg)

‹‹አፖሮፐ አንተ ቀረ ቾዬ፥ ኾልመ ቶመደከ እሸ ቀፔን፡፡ ከ ዋ ቀፐ ፕሰ ቁደ ቄዴን ከ ሀከ ቶተ ፎልሰኖት ቅዴን። ከ ሴከመዬ አሌ ከፐ ተዌን፡፡››

![](https://cdn.door43.org/obs/jpg/360px/obs-en-27-06.jpg)

ኤኖው ከመዴሰ ቄስተ ተከ አአይሁትከ ፖሮሴት ኸተ ዴኤ፡፡ ነሞሴ ሳረ አመንቴወ ኮዴ፥ ኤቴ ነሞሴ ሴረሜ ከ ቅደሜ አኬዬ፥ ቅንደ ፕለትን ዴሰ ከፐ መቄ፥ ከ ነመሴ እቃርቃርሰ እሸ ፐርፓችስኖ አሌ ዲሼ ከ ከፐ ተዌ፡፡››

![](https://cdn.door43.org/obs/jpg/360px/obs-en-27-07.jpg)

ሴከመዬ አንጨርን መልይ፥ ሌውተ ተከከ ዴኤ፡፡ (ሌዋተ፥ ሰኜተ አይሁት አትከ ቁልቁሎተ ኬለዬ ቄሴወ ቃርቃረ፡፡) ሌውተሴ ኔፎከ ከ ነሞሴ ሴረሜ ከ ቅደሜ አሌ ዲሼ ከ ቅንደ ፕላትን ዴሰ ከፐ መቄ፡፡››

![](https://cdn.door43.org/obs/jpg/360px/obs-en-27-08.jpg)

ነመ ከመዴሰ ፖሮሴት ኸተ ዴኖ ነመ ፒተ ሰማርየ፡፡ (ሳምሬተ፥ ኦረ ሰኜተ አይሁት ኮዴ ከ ኦረ ፒተ ፕለ ሄሜ፡፡ ሳምሬተ እሾ አይሁታተከ ኦል ኔድተ፡፡) መ ኾር ሳምርቶሴ ኤቴ አይሁይትተሴ አኬዬ፥ አከተ እሽ ኘረሄ፡፡ ከ ሴመለ ወ እሽ ፐርፓችስነ ኮዴ ከ ፈይክቴታድ ቀረ እሽ ህዴ፡፡››

![](https://cdn.door43.org/obs/jpg/360px/obs-en-27-09.jpg)

‹‹ሴከመዬ ሳምርተሴከ ነመሴ ኤለ ኻሼ ከ ሀሬታድ ቀረ ኩትሼ ከ ትከ አኸይክተ እሽ ሙክኖፐን ኣኔ ከ ወ እሽ ፐርፓችስነ ኮዴው፡፡››

![](https://cdn.door43.org/obs/jpg/360px/obs-en-27-10.jpg)

‹‹ፐረይታድይ፥ ሳምርቶሴ ቆተ ከልተ እሸ ፐርፓችስኖ መለ፥ ኣፐ ትከሴ አኸይክታት ፕሬወ ለመየ ዳሼ ከ ክዴ፥ ‹‹ነሞሴ አነ አዴ፥ ከ ኦቶን ካጮስን ቀሮፔለ ከመ ሶክንይ፥ ኦን ኦሮዬን ኬ ኦርሸይ፡፡››

![](https://cdn.door43.org/obs/jpg/360px/obs-en-27-11.jpg)

ሴከመዬ ዬሱስከ ኮልሰምፐይተሴ አሴረ ካሰዴ ከ ክዴ፥ ‹‹ማነ ድከን? ኦሮሴ ሴሳፐዬ፥ አነሞሴ ሴረሜ ከ ቅደሜት ኼልተ ኮዴ አይኖ?›› እሸከ ኦርሼ ከ ክዴ፥ ‹‹ነሞሴ እሸ ሱረይሰዴኔ!›› ዬሱስከ እሽ ሌሌ ከ ክዴ፥ ‹‹አት ኔፎ ኣኔከ አሴው ኮዴው።››

*መታፈ ቁልቁሎተ ከረ ፖረ ቀረ አካንቶ፡- ሉቃስ 10፡25-37፡፡*

## 28. ቴየንቶለይተ ተከ አኸዮለይተ

https://openbiblestories.org/l/kxc/story-28/

![](https://cdn.door43.org/obs/jpg/360px/obs-en-28-01.jpg)

ኩያተ ተከዬ፥ ቴየንቶለይተ ተከ አኸዮለይተ ዬሱስ ከፖፐ ዴኤ ከ እሸ ካሰዴ ከ ክዴ፥ ‹‹ኮልሰምፐይቶ፥ ሾሮክቶ! አከን ቻተ ፐረፐረ አከዶኤ፥ ማነ ኮዴተ አነ ፋን?›› ዬሱስከ እሽ ክዴ፥ ‹‹ማነኤ ‹ሾሮክተ› አነ ኪት? ሾሮክተ ተከ ፐተ ቸ፤ እሸ ኔፎ ዋቀ፡፡ መ ኾር አት ኦቶን ቻተ ፐረፐኤ አከተ ፋንይ፥ ሴረ ዋቀት አጨጨሜ።››

![](https://cdn.door43.org/obs/jpg/360px/obs-en-28-02.jpg)

እከ ካሰዴ ከ ክዴ፥ ‹‹አኻሜኔትን አጨጨመ?›› ዬሱስከ እሽ ኦርሼ ከ ክዴ፥ ‹‹እንእሸን፡፡ እንሸርሙቱመን፡፡ እንሀተን፡፡ ደርተን ማኩመን፡፡ ኣፐይሽን ከ ኣየስን ኡልፌሴ። አእስ ጫለንቶ ምነ ኼልታይት ጫለዶ፡፡››

![](https://cdn.door43.org/obs/jpg/360px/obs-en-28-03.jpg)

መ ኾር ኸዮለይተሴ እክዴ፥ ‹‹አንሸክ ዴሰ ፓየቴን ሴሮሴን ፕሰ ቶይቴ፡፡ ቻተ ፐረፐረ አከተኤ ወ ፕለ ማነ ኮዴተ አነ ፐርፓችስን?›› ዬሱስከ እሸ ቁደ ቶዬ ከ እሸ ጫለዴ፡፡

![](https://cdn.door43.org/obs/jpg/360px/obs-en-28-04.jpg)

ዬሱስከ እሽ ኦርሼ ከ ክዴ፥ ‹‹ኦቶን ቀጨ መል ቻተ ፋንይ፥ ዋ ቀፕተ ፕሰ ከቴ ከ ካጮሴን ቴኮለየ ቆቴ፤ ቴየንተ ሞንቴዬ አከተይ፡፡ ከ ሴከመዬ አነ ከመ ኾዬ።››

![](https://cdn.door43.org/obs/jpg/360px/obs-en-28-05.jpg)

ኸዮለይተሴ ኤቴ ወ ዬሱስ ክዴ ደከዬዬ፥ ቆተ ቴየንተ ኩተ ቀፖ ከ ወ ቀፐ ፕሰ ዳሰተን ፋንን መለ፥ አከተ ኘረሄ፡፡ ከ ቱልተ ዬሱስ ከቴ ከ አሌ ኣኔ፡፡

![](https://cdn.door43.org/obs/jpg/360px/obs-en-28-06.jpg)

ስትይ ዬሱስከ ተማሬዋድ ክዴ፥ ‹‹ቴየንቶለየኤ መንክስቴተ አዋቀ ኦፐ ከልተ፥ አከተን ረኮተ! ኣ! አቴየንቶለይተ መንክስቴተ ዋቀ ኦፖፐ ከሎ ከፐዬ፥ ካለ ቃወ መርፌተ ከረን ኩለ ከ ተርፐ፡፡››

![](https://cdn.door43.org/obs/jpg/360px/obs-en-28-07.jpg)

ተማሬወከ ኤቴ ዋ ዬሱስ ክዴ ደከዬኔዬ፥ ተመቄን ከ ክዴኔ፥ ‹‹ከ ኩል አሴዬ፥ አይኖ ድኔተ ኤተንሸ?››

![](https://cdn.door43.org/obs/jpg/360px/obs-en-28-08.jpg)

ዬሱስከ ተማሬዋድ ቶየዴ ከ ክዴ፥ ‹‹ነመ ሴዴ ኤተንንቾ፥ መ ዋቀ ኾር ዌ ፕሰ ኤተንን።››

![](https://cdn.door43.org/obs/jpg/360px/obs-en-28-09.jpg)

ፔትሮስከ ዬሱስ ክዴ፥ ‹‹እኖ ዌ ፕሰን ዲኔ ከ ኬ ከመ ዴኔይ፥ ኩል ማነን አከነ?››

![](https://cdn.door43.org/obs/jpg/360px/obs-en-28-10.jpg)

ዬሱስከ እሽ ኦርሼ ከ ክዴ፥ ‹‹ነመ አነ መለ፥ ትካድ ከ ሄላሶ ከ ቱፐራሶ ከ ኣፐይሾ ከ ኣየሶ ታክ ወ ቀፐ ዲሼ ፕሰ፥ ሀርከ ድፐ አከደ፤ ከ ቻተ ፐረፐረ ከሱ ሌሃደ፡፡ መ ኾር፥ ኦረ ቱረ ቀቴ ኩተይተ ከሞፐ ኦረ፤ ኦረ አከመ ቀቴ ኩተይተከ ቱሮፐ ኦረ፡፡››

*መታፈ ቁልቁሎተ ከረ ፖረ ቀረ አካንቶ፡- ማትዮስ 19፡16-30፤ መርቆስ 10፡17-31፤ ሉቃስ 18፡18-30፡፡*

## 29. ቶራ ኦርኸይተ ዲሰተ መላሌት

https://openbiblestories.org/l/kxc/story-29/

![](https://cdn.door43.org/obs/jpg/360px/obs-en-29-01.jpg)

ኩያተ ተከዬ፥ ፔትሮስ ዬሱስ ካሰዴ ከ ክዴ፥ ‹‹ኮልሰምፐይቶ፥ ኦ እናኖ አነ ምህናኔዬ፥ ሜቀኔን እሽ ዲሸ? ሄለ ተፐኔን እሽ ዲሻ?›› ዬሱስከ እሽ ክዴ፥ ‹‹ተፐ ፐተኔን መ፥ ኩንደ ተፐን ፖረ ኩንደ ተፐፐኤ እሽ ዲሼ።›› ዬሱስ ኦቶ ሴዴ ኪኖዬ፥ አውተ ፕሰ ዲሰተ ኮዴተ እኖ ፋን ክዴታድ፡፡ ሴከመዬ ዬሱስከ ቶሮሴን አሬ ቸ ሃሰወዴ፡፡

![](https://cdn.door43.org/obs/jpg/360px/obs-en-29-02.jpg)

ከ ክዴ፥ ‹‹መንክስቴተ ዋቀ ኑቁሰ ተከ ካጨ ኦርኸያድ ቀረ ቀፐ ድከ ፋኖ ፐሀተ፡፡ ኦርኸያድፐ ተከ እተ ኩተ አፕሬተ ኩመ ኩደን (10,000) ምነ ቻኤ ቀረ ቸ፡፡››

![](https://cdn.door43.org/obs/jpg/360px/obs-en-29-03.jpg)

ኦርኸይሴ ቆተ እታድ ኸፈለ መላሌ መለ፥ ኑቁሰ እክዴ፥ ‹‹አከ እታድ ኸፈሎኤ፥ ነሞሴ ኤዬ ቾ እሾ ቶለድ ከፐ ከተ።››

![](https://cdn.door43.org/obs/jpg/360px/obs-en-29-04.jpg)

‹‹ኦርኸይሴ ኾር ሎቀ ኑቁሰ ኬለኤ ፕኤ ከ ክዴ፥ ‹አተረ አነ ቀአዶ፤ እተ አነ ቀረ ቸ ፕሰ እንኬ ኸፈለይ።› ኑቁሰከ ኦርኸይሴ ሱረይሰዴ፥ ከ እተሴኔ ቀረ ቸ ፕሰ እሽ ዲሼ ከ አከ ኣኖ ከመዴሰ ዲሼ፡፡››

![](https://cdn.door43.org/obs/jpg/360px/obs-en-29-05.jpg)

‹‹መ ኾር ኦርኸይሴ ኤቴ ኑቁሰ ከፐኸተ ሶኬ ከመዬ፥ ኼልያሴኔ ኻድ አኦርኸየ ኦፐዬ ተከ አቀረዬ እተ ሙሸረ ሌየ አፉር ቾ አኬ፡፡ ኦርኸይሴከ ኼልተሴ ኻድ ኦርኸይተ ኮዴ ቀፔ ከ እሽ ክዴ፥ ‹እታት ኸፈሌ!›››

![](https://cdn.door43.org/obs/jpg/360px/obs-en-29-06.jpg)

‹‹ኼልተሴ ኻድ አኦርኸይተከ ሎቃድ ኬለ ፕኤ ከ ክዴ፥ ‹አተረ አነ ቀአዶ፤ እተ አነ ቀረ ቸ ፕሰ እንኬ ኸፈለይ።› መ ኾር ሴዴ ከፐዬ ሀከ ኼልተሴ ኻድ አኦርኸይተ እተሴኔ አኦርኸይተሴት ኸፈሎኤ ትከ ህደ ኬለ እሸ ህደቺሴ፡፡››

![](https://cdn.door43.org/obs/jpg/360px/obs-en-29-07.jpg)

‹‹ኦርኸየደ አፕለከ ወ ኮዴ አኬን ከ አከተ ኘረሄን፡፡ ከ ኑቁሰ ከፖፐ ኣኔን ከ ወ ኮዴ ፕሰ እሽ ቶሬን፡፡››

![](https://cdn.door43.org/obs/jpg/360px/obs-en-29-08.jpg)

‹‹ኑቁሰከ ኦርኸይተሴ ሀለቺሴ ከ እሽ ክዴ፥ ‹አት አኦርኸይተ ኔቀ! ቆተ አነ ቅንሰቴ መለ፥ እታት እንኬ ዲሼ፡፡ አት ኔፎ አሴው ኮደ ኬ ፐርፓችስን ሄኔ።› ኑቁሰከ አከተ ሚሮዴ ከ ሀከ እታሴኔ ፕሰ ኸፈሎኤ ኦርኸይተሴ ኔቀ ትከ ህደ ከረ ህደቺሴ፡፡››

![](https://cdn.door43.org/obs/jpg/360px/obs-en-29-09.jpg)

ሴከመዬ ዬሱስከ አሴ ክዴ፥ ‹‹እሽነ ተከ ተከዬ፥ ኦቶን እናስነኤ አዲንንይ፥ ኣፕኖ አሞንተ አሴው እሽን ቀረ ኮደ፡፡››

*መታፈ ቁልቁሎተ ከረ ፖረ ቀረ አካንቶ፡- ማትዮስ 18፡21-35፡፡*

## 30. ዬሱስ ነመ ኩመ ኬን ደምሼ

https://openbiblestories.org/l/kxc/story-30/

![](https://cdn.door43.org/obs/jpg/360px/obs-en-30-01.jpg)

ዬሱስ አከ ኮደምፐየ ፐሌወ ሌከያፐ ኣነን ከ ቶራን ከ ኦራ ኮልሸኔኤ እሾተ ኤርኬ፡፡ እሾተ ኤቴ ፖረ ዬሱስ እሽ ቾ ኦፐ ቲተዌኔዬ፥ ዋ ኮዴኔኤ ሌሌን፡፡ ሴከመዬ ዬሱስከ አከ ፐከቴተ ቱለን ከ ፖረሴ ቶርኬ ቾ ኦፐ እሸ ኦል ኣነን ከ ሸከይቴተ ኔሰደኔኤ እሾተ ሌሌ፡፡ ሴመለ እከ ኮንካፐ ፈየዴን ከ ፐከቴሴ ቱሌን፡፡

![](https://cdn.door43.org/obs/jpg/360px/obs-en-30-02.jpg)

መ ኾር አኮንካፐ አናኔዬ፥ ኦረ ኩተይተ ዬሱስ እሾ ተማሬዋድ አኬ፡፡ ኦሮሴ ኤዬ ቾከ እሾተ ቀተኤ ከምከመ ፐከቴተ ቁደንኸተ ህሬ፡፡ ሴመለ ኤቴ ዬሱስ እሾ ተማሬወ አፈ ድስ ኦፐ ቱሌኔዬ፥ ኦረ አከተ ኩተ ኤዬ እሾተ ቀቴ ከ እሾተ ምነ አሰን፡፡

ሰመይቶሴ ኤዬ ቾ አእስከተ እሾ ሄለን ድከምን መልይ ዲራ ነመ ኩመ ኬን (5000) ቀሮፔለ ቻን፡፡ ዬሱስከ አከተ ሰመይቶስት ኘረሄ፡፡ ዬሱስእ ሰመይሴ ኤዬ ቾ፥ አከ ከሀረ ስክመምፐይተ ደፔ ምነ፡፡ ሴመለ እከ እሾነ ኮልሼ ከ ፓቆለየ እሾቶፐ ቸ ድንሼ፡፡

![](https://cdn.door43.org/obs/jpg/360px/obs-en-30-03.jpg)

ኤቴ ዱምቴዬ ተማሬዋከ ዬሱስ ሌሌን ከ ክዴኔ፥ ‹‹ሌተ እዱምቴ ኡመ ከተማደ አሬከፐንዴሰ እንቻኔይ፥ አከ ዋ ደመኔ ፕደደኔኤ ሰመይሴ እስቀረ ኻሼ፡፡››

![](https://cdn.door43.org/obs/jpg/360px/obs-en-30-04.jpg)

ዬሱስ ኾር እተማሬዋ ክዴ፥ ‹‹እሽነ ዋ ደመኔ እሾተ ዳሸ!›› እሾተከ ኦርሼን ከ ክዴኔ፥ ‹‹አተን ሴዴ ኮደ ኤተንነ? ላቆተ ኬን ከ ሙርኩጨ ለክ ፐተን ቀፕነይ።››

![](https://cdn.door43.org/obs/jpg/360px/obs-en-30-05.jpg)

ዬሱስከ አከ ሰመይተ ሌለን ከ ነመ ኩንደ ኬን ኬን ማንቶፐ ኩትሸኔኤ ተማሬዋድ ሌሌ፡፡

![](https://cdn.door43.org/obs/jpg/360px/obs-en-30-06.jpg)

ሴከመዬ ዬሱስከ ላቆተሴ ኬን እሾ ሙርኩጨሴ ለክ ቄዴ ከ ሞንተሌለ ቶየዴ፤ ከ ደምቶሴ መለ ዋቀ ከለተይሰዴ፡፡

![](https://cdn.door43.org/obs/jpg/360px/obs-en-30-07.jpg)

ሴከመዬ ዬሱስከ ላቆሴ እሾ ሙርኩጨሴ ኦፐ ሞሴ፡፡ ከ አከ ሰመይተ ቆተኔኤ ተማሬወ ዳሼ፡፡ ተማሬወከ ደምተሴ ቆተ ከመ ቻዴን፤ ኡመ እንፕረሜ! ሰመይተ ፕሰከ ደሜ ከ ዱተኔ፡፡

![](https://cdn.door43.org/obs/jpg/360px/obs-en-30-08.jpg)

ሴከመዬ ተማሬወከ ሞሶወ ደምተሴ ኬለ ሀሴ ኦሎፐ ፖሄን፤ እከ ሰተረ ኩንደከ ለክ እመኮተ ከዬን! ደምቶሴ ፕሰ ላቆሴ ኬን እሾ ሙርኩጨሴ ለክፐ ዴቴ፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 14፡13-21፤ መርቆስ 6፡31-44፤ ሉቃስ 9፡10-17፤ ዮሀንስ 6፡5-15፡፡*

## 31. ዬሱስ ፕሸ ቀረንዴሰ ኣኔ

https://openbiblestories.org/l/kxc/story-31/

![](https://cdn.door43.org/obs/jpg/360px/obs-en-31-01.jpg)

ሴከመዬ ዬሱስከ ሀከ ሰመይሴ እስቀረ ኸእኖ ከረኤ፥ አከ ተማሬዋድ ኮንከ ከሮፐ ፈየደን ከ ፐከቴተ አፈ ድስ ኦፐ ቱለኔ እሾተ ሌሌ፡፡ ዬሱስ ኤቴ ሰመይሴ እስቀረ ኻሼ ከመዬ፥ እሮተ ቀሮፐ ቅንሴተ ፈየዴ፡፡ ፖሮሴ ኦፐዬ ዬሱስ ኸዋት ቸ፤ ከ ሀከ ኦል ቆተ አሀልኬታት ቅንሰዴ፡፡

![](https://cdn.door43.org/obs/jpg/360px/obs-en-31-02.jpg)

ስትይ፥ ተማሬዋድ ፐከቴተ ቀረ ኮንከ ፑንቁለን ከ አን፤ ኤቴ ኦልቆተ ሀልኬተ ከይቴዬ እከ ፐከቴተ ኦተንቶፐ ከዬን፡፡ ቆተ ፑፔተ አከተ እሾተ ቀረ ፑፕንቶ መለ፥ ረኮተ ኩተትን ኮንከሴኔ ፑንቁለን፡፡

![](https://cdn.door43.org/obs/jpg/360px/obs-en-31-03.jpg)

ስትይ ዬሱስ ቅንሴተ ድክሼ ከ ተማሬወ ከፖፐ ኣኔ፡፡ ከ ፕሸ ቀረንዴሰ ሎቀን ፐከቴተ ለክ ምቴ ከ ኮንከሴኔ ኻይሾ ከፖፐ ዴኤ።

![](https://cdn.door43.org/obs/jpg/360px/obs-en-31-04.jpg)

ተማሬወ ኤቴ ዬሱስ አኬኔዬ፥ አከተ ፉሬን፤ ማነ መለ፥ አካረየ አኬኔ እሾተ ፐሀናቴ፤ ዬሱስከ አከ ተመቄን ኡፕናዴ። ከ ሴመለ እሾተ ሀሌ ከ ክዴ፥ ‹‹እንፉረን፡፡ አነይ!››

![](https://cdn.door43.org/obs/jpg/360px/obs-en-31-05.jpg)

ስትይ ፔትሮስከ ዬሱስ ክዴ፥ ‹‹ኮልሰምፐይቶ፥ ኦቶን ኬዬ አከን ፕሸ ቀረንዴሰ ኬ ከፖፐ ዴኦኤ አጨጬ።›› ዬሱስከ ፔትሮስ ክዴ፥ ‹‹ኾዬ!››

![](https://cdn.door43.org/obs/jpg/360px/obs-en-31-06.jpg)

ሴመለ ፔትሮስከ ኮንከሴኔ ከረኸተ ሌከዴ ከ ፕሸ ቀረንዴሰ ዬሱስ ከፖፐ አንተ ፓዬ፡፡ መ ኾር ኤቴ ሸከይቴተ ፐተ ኣኔ ከመዬ፥ እልዳድ ዬሱስ ቁደ አሌ መይሼ ከ ፑፔተሴ አከ ፓዬ፥ የቅያቅተ ኩተከ እሽ ደካተ ፓዬ፡፡

![](https://cdn.door43.org/obs/jpg/360px/obs-en-31-07.jpg)

ስትይ ፔትሮስ እተመቄ ከ ፕሸ ከሮፐ ተወ ፓዬ፡፡ ከ ኡሉቴ ከ ክዴ፥ ‹‹ኮልሰምፐይቶ፥ አነን ፐሄ!›› ዬሱስከ ኤኖው ሀርካድ ዴረይሼ ከ እሸ ቀፔ፡፡ ከ ሴከመዬ ፔትሮስ ክዴ፥ ‹‹ኬ አአመንቴተ ኬ ቀጭቴ፥ ማነኤ ኦፐ ድከቴ?››

![](https://cdn.door43.org/obs/jpg/360px/obs-en-31-08.jpg)

ኤቴ ፔትሮስ እሾ ዬሱስ ኮንከ ከሮፐ ፈየዴኔዬ፥ ፑፔተሴ ኤኖው ቀአቴ ከ ጨው ኪቴ፡፡ ተማሬወከ ኦፐ ቀዋዌን፡፡ ከ እሽ ሰከተዴን ከ ክዴኔ፥ ‹‹አት ዱካተኔ አእነ ዋቀ።››

*መታፈ ቁልቁሎተ ከረ ፖረ ቀረ አካንቶ፡- ማትዮስ 14፡22-23፤ መርቆስ 6፡45-52፤ ዮሀንስ 6፡16-21፡፡*

## 32. ዬሱስ ነመ ሀፑረ ኔቀን ቀፐሜ እሾ እስከቴተ ፓቅንቶ ድንሼ

https://openbiblestories.org/l/kxc/story-32/

![](https://cdn.door43.org/obs/jpg/360px/obs-en-32-01.jpg)

ኩያተ ተከዬ ዬሱስ እሾ ተማሬዌድ ኮንከኔ ፐከቴተ ቱሌን ከ ፖረ ኦፐ ኦረ ኬርኬሴኖን ከሎ ኦፐ ኣኔን፡፡

![](https://cdn.door43.org/obs/jpg/360px/obs-en-32-02.jpg)

ኤቴ ፐከቴቴ አፈ ድስ ከዬኔዬ፥ ነመ ተከ ሀፑረ ኔቀን ቀፐሜከ ኬሬ ከ ዬሱስ ከፖፐ ዴኤ፡፡

![](https://cdn.door43.org/obs/jpg/360px/obs-en-32-03.jpg)

ነሞሴ ኤዬ ቾ፥ ነመ አከተ ኮኮከ አነመ ተከ ኔፎ እሸ ቀፐ ኤተንንንክንን፡፡ ኦረ ሀርካድ እሾ ሎቃድ ኔፎ ሰንሰላተን ሂን፤ መ ኾር ሰንሰላተሴ አሌ ሜን፡፡

![](https://cdn.door43.org/obs/jpg/360px/obs-en-32-04.jpg)

ነሞሴ ሀውለለ ፒቶሴ ከፐንዴሰ ቸ ከረ ከላን፡፡ ነሞሴ ኤዬ ቾ፥ ሀልኬተ እሾ ኩያተ ፕሰ ፖረ ኡሉፕን፡፡ ኡመ ሜሀደ ከልሰንንቾ፤ ከ ደክንታድ ኔፎ ኦፐ ኦኦርከ ደከደን ቱቅን፡፡

![](https://cdn.door43.org/obs/jpg/360px/obs-en-32-05.jpg)

ነሞሴ ኤቴ ዬሱስፐ ዴኤዬ፥ ሎቃድ ኬለኤ ፕኤ ከ እሽ ሰከተዴ፡፡ ዬሱስከ ሀፑሮሴ ኔቃት ክዴ፥ ‹‹ነሞሴ ከረዬ ሶኬ!››

![](https://cdn.door43.org/obs/jpg/360px/obs-en-32-06.jpg)

ነሞሴ አሀፑረ ኔቀ ከረ ቾከ ኔሰ ሞንቶፔለ ቄዴ ከ ኡሉፔ ከ ክዴ፥ ‹‹ዬሱስ አት አእነ ዋቀሴ ዌ ፕሰ ኡኩሞት፥ ማነ አነ ቀረ ፋን? አተረ አነን ረከቺሰን!›› ሴከመዬ ዬሱስከ ሀፑረሴ ኔቀ ካሰዴ ከ ክዴ፥ ‹‹መኻይት አይኖ?›› እሸከ ኦርሼ ከ ክዴ፥ ‹‹ቆተን ሌክኖ መለ፥ መኽዮ ሌክዎን።›› (‹‹ሌክዎን›› ኼለ ኦረነ አሮም ኦፐዬ፥ ክተ ሌክነ አቶርፐምፐየ ኩመደ ቀፐቴ፡፡)

![](https://cdn.door43.org/obs/jpg/360px/obs-en-32-07.jpg)

ሀፑራሴኔ ኔኔቀከ ዬሱስ ቅንሰዴን ከ ክዴኔ፥ ‹‹አተረ ፖሮሴ አሬ ቾ ከፐ እኖን ሴከይሸን!›› ፖረ ዴሆፐዬ፥ ኼሎተ ቱዮተ አተኬለ ቁደ ዴተ ዴንቶ ቸ፡፡ ሴመለ ሀፑራሴኔ ኔኔቀከ ዬሱስ ቅንሰዴን ከ ክዴኔ፥ ‹‹አተረ ከፓዬ ቱዮዎሴን ከሮፐ እኖ ኤርኬ።›› ዬሱስከ እሾተ ክዴ፥ ‹‹ኣነ!››፡

![](https://cdn.door43.org/obs/jpg/360px/obs-en-32-08.jpg)

ሀፑራሴኔ ኔኔቀከ ነመሴ ከረ ሶኬን ከ ቱዮዋሴኔ ከሮፐ ከሌን፡፡ ቱዮዋሴኔከ ተኬለ ቁደኸተ ቀሄን ከ ፐከቴተ ከሮፐ ሴሄን፡፡ ኼሎቶሴ አቱዮተ ኩመ ለክ (2,000) ምነኤ ክተ፡፡

![](https://cdn.door43.org/obs/jpg/360px/obs-en-32-09.jpg)

ስክመየ አቱዮወሴኔትከ ኦር ኤቴ ዋ ኮዴ አኬኔዬ፥ ከተማፐ ቀሄን ከ ዋ ዬሱስ ኮዴ ነመ አኬን ፕሰ ቶሬን፡፡ ኦረ ከተሞሴኔትከ ዴኤ ከ ነመሴ ሀፑረ ኔቀን ቀፐሜ አኬን፡፡ እሸ ኔፎ ሜሀደ ከልሰዴ ከ አከ ነመ ድኔ ምነ ጨው ክዴከ ኤዬ ቃኤ፡፡

![](https://cdn.door43.org/obs/jpg/360px/obs-en-32-10.jpg)

ኦሮሴ ቆተ አከተ ፉሬ መለ፥ አከ ዬሱስ አሌ ኣኖኤ እሸ ቅንሰዴን፡፡ ሴመለ ዬሱስከ ኮንከ ከሮፐ ፈየዴከ አንተ ኸኤ፡፡ ነመሴ አሀፑረ ኔቀ ከረ ሶኬከ ዬሱስ ቅንሰዴ ከ ክዴ፥ ‹‹አነ ኬ ኦል ዴኦ።››

![](https://cdn.door43.org/obs/jpg/360px/obs-en-32-11.jpg)

መ ኾር ዬሱስ እእሽ ክዴ፥ ‹‹እንዴአን፥ መ አከ ትኮፐ ከልቶ ከ ዋ ዋቀ ኬ ኮዴ ፕሰ ከ አተ አከ ኬ ሱረይሰዴ ኼልያት እሾ ቶላይሽነ ቶርቶን ሄነ።››

![](https://cdn.door43.org/obs/jpg/360px/obs-en-32-12.jpg)

ሴመለ ነሞሴከ ኣኔ ከ ዋ አዬሱስ እሽ ኮዴት ዴሰ ነመ ፒሰ ቶሬ፡፡ ነመ ቶሮሴን ደከዬ ፕሰከ ኦፐ ቀዋዌ፡፡

![](https://cdn.door43.org/obs/jpg/360px/obs-en-32-13.jpg)

ዬሱስከ ፐከቴቴ አፈ ድስ ኦፐ ቲተዌ፡፡ ኤቴ ኤዬ ከዬዬ፥ ኦረ ኩተይተ ከፖፐ ኾሬ ከ እሸ ቱክን፡፡ ሰመይተሴ ከረዬ እስከቴተ ተከ ፐረ ኩደንከ ለክ ዲከ ኡርቅሰን ፐየሀቴ ቸ፡፡ ከ አከ እሼተ ድንሸኔኤ ካጨ አቀፕተ ፕሰ አክሜተ ኬለ ፕረቴ፤ መ ላድ ቀረኤ ኦልን ኮፕቴ፡፡

![](https://cdn.door43.org/obs/jpg/360px/obs-en-32-14.jpg)

ዬሱስ አከ ፓቆለየ ሌከየ ድንሼ ደከይቴ ከ ድከቴ ከ ኪቴ፥ ‹‹ኦቶን አሱ ኦሃተ ዬሱስ ፐተ ቁደን ቀፐዳዬ፥ ስትይ አንት አከን ድኖ እንአመን!›› ከ ሴመለ ዬሱስ ከመ ዴሰ ዴሃቴ ከ ኦሀታድ ቁደ ቀፐቴ፡፡ ኤቴ ኦሀታድ ቀፐቴዬ፥ ዲከሴ ኻድከ ኤኖው ቀአዴ!

![](https://cdn.door43.org/obs/jpg/360px/obs-en-32-15.jpg)

ኤኖው፥ ዬሱስከ አከ ሁፕነ እሸ ከረ ሶኬ ኡፕናዴ፡፡ ከ ሴመለ እስከመንኸተ ቲተዌ ከ ካሰዴ ከ ክዴ፥ ‹‹አይኖ አነ ቀፐዴ?›› ተማሬዋድከ እሽ ኦርሼን ከ ክዴኔ፥ ‹‹ኦረ ኬ ከፖፐ ኾሬ ከ ኬ ቱክኖ እሌክይ፥ ማነኤ ካሰን ከ ኪን፥ ‹አይኖ አነ ቀፐዴ?› ››

![](https://cdn.door43.org/obs/jpg/360px/obs-en-32-16.jpg)

እስከቴሴከ ኸር ከ ዴቴከ ፉረ ኩተን ሎቀ ዬሱስ ኬለ ፕእቴ፡፡ ከ ሴከመዬ ዋ ኮቴ ከ አከ ድንቴ እሽ ሌልቴ፡፡ ዬሱስከ እሽ ክዴ፥ ‹‹አመንቴታይት ኬ ድንሼይ፥ ነከይተን ከሌ።››

*መታፈ ቁልቁሎተ ከረ ፖረ ቀረ አካንቶ፡- ማትዮስ 8፡28-34፤ 9፡20-22፤ መርቆስ 5፡1-20፤ 5፡24-34፤ ሉቃስ 8፡26-39፤ 8፡42-48፡፡*

## 33. ቶራ ቆተምፐይተ ተከ

https://openbiblestories.org/l/kxc/story-33/

![](https://cdn.door43.org/obs/jpg/360px/obs-en-33-01.jpg)

ኩያተ ተከዬ፥ ዬሱስ ከምከመ ፐከቴተ ከፐዬ ሰመይተ ኩተይተ ኮልን፡፡ ዬሱስ ቆተ ሰመይተ ኩተ እሸ ደከይሰተ ከፖፐ ዴኤ መለ፥ ፖረ አኦፐኸተ እሾተ ቶሮ አካተኤ ኮንከ ፕሻዬ ቅንደ ቁደ ቸ ከሮፐ ፈየዴ፡፡ ከ ከረ ቃኤ ከ ሰመይተ ኮልሼ፡፡

![](https://cdn.door43.org/obs/jpg/360px/obs-en-33-02.jpg)

ዬሱስከ ቶሮሴን አሬ ቸ እሾተ ሌሌ ከ ክዴ፥ ‹‹ቆተምፐይተ ተከ አይላኤ ሶከዴ፡፡ ኤቴ ኾተ ቁፕኖዬ፥ አዴሞ ፖረ ከፔ ሴሄን፤ ኸምፕረከ ዴኤን ከ ኾተሴኔ ፕሰ ፖሀዴን፡፡››

![](https://cdn.door43.org/obs/jpg/360px/obs-en-33-03.jpg)

‹‹ኾተ ዴሞው፥ ኮኮሆተ ፖረ ኦፐ ፒተ አኩተ እንክንን ቀረኤ ሴሄን፤ መ ኾር ፒተ ኬሎፐ ህትነ ከተተ እንኤተንኔ፡፡ ኤቴ አቶተ አውድቴዬ፥ ሰከተሴ እኩፐዴ ከ ቶኤ፡፡››

![](https://cdn.door43.org/obs/jpg/360px/obs-en-33-04.jpg)

‹‹ኾተ ዴሞው፥ ቄየ ከረኤ ሴሄን፡፡ ኾቶሴንከ ዴሀ ፓዬን፤ መ ኾር ቄየሴኔከ ቀረ ፕሬን፡፡ ሴመለ ኾቶሴን ቄየ ከረ ዴሄ፥ ዌ ተከን ኔፎ እንደሌ፡፡››

![](https://cdn.door43.org/obs/jpg/360px/obs-en-33-05.jpg)

‹‹ኾተ አፕለኤው፥ ፒተ ፈየ ኦፐኤ ሴሄን፡፡ ኾቶሴን ከ ሰከቴን፤ ተከንከ ሀርከ ኩንደ ሴሰ (30) ፐሌን፥ ተከንከ ሀርከ ኩንደ ሌህ (60) ፐሌን፥ ተከኔኤውከ ሀርከ ድፐ ፐሌን፡፡ አነፐሀተ ቀፖ አደከዮ!››

![](https://cdn.door43.org/obs/jpg/360px/obs-en-33-06.jpg)

ቶሮሴን ኤሬ ቸከ ተማሬወኤን ከልን፡፡ ሴመለ ዬሱስከ ኦልኬለ እሾነ ለአይሼ ከ ክዴ፥ ‹‹ኾቶሴን ቃሌተ ዋቀ፡፡ ኾቶሴን ፖረ ከፐ ሴሄ፥ ነመ ቃሌተ ዋቀ ደከይኖ፥ መ ኾር መቴ ቀፕናንቾ፤ ሴተነከ ቃሌሴ አይለምቴ ከረዬ ቄን፡፡››

![](https://cdn.door43.org/obs/jpg/360px/obs-en-33-07.jpg)

‹‹ኾተ ኮኮሆተ ቀረ ሴሄ፥ ነመ ቃሌተ ዋቀ ደከይኖ ከ ኸሰን ቴየኖ ሌል፡፡ መ ኾር ኦቶን ረኮተ ታክ ዳነመ ቃሌሴ ምነን ቀረ ከይንይ፥ አመንቴታድ አሌ ዲን፡፡››

![](https://cdn.door43.org/obs/jpg/360px/obs-en-33-08.jpg)

‹‹ኾተሴኔ ቄየ ከረ ሴሄኤው፥ ነመ ቃሌተ ዋቀ ደከይኖ፤ መ ኾር ድከተ ፒተ ከ ቴየንተ እሾ ኸሰ ከርታድ ከረ ቾ፥ ጫለለሴኔ አዋቀ ቀፐ ቀረ ፕር፡፡ ሴዴ ቀረን ኻቴኤ፥ ቃሌሴ አደከዬ ደልተ ደልንክቶ፡፡

![](https://cdn.door43.org/obs/jpg/360px/obs-en-33-09.jpg)

‹‹ኾተሴኔ ፖረ ፈየ ኦፐ ሴሄ፥ ነመ ቃሌተ ዋቀ ደከይኖ ከ አመኖ ከ ደልተ ደሎ ሌል፡፡››

*መታፈ ቁልቁሎተ ከረ ፖረ ቀረ አካንቶ፡- ማትዮስ 13፡1-8፣ 18-23፤ መርቆስ 4፡1-8፣ 13-20፤ ሉቃስ 8፡4-15፡፡*

## 34. ዬሱስ ቶራደ አፕላኤ ኮልሼ

https://openbiblestories.org/l/kxc/story-34/

![](https://cdn.door43.org/obs/jpg/360px/obs-en-34-01.jpg)

ዬሱስ ቆተ መንክስቴተ አሞንታት ዴሰ ቶራደ አፕለ ሌከየ ኮልሼ፡፡ ፐሀነኤ አሴ ክዴ፥ ‹‹መንክስቴተ አዋቀ፥ ነመ ዱላድፐ ኡቅንቴተ ሌየ አይላዴ ፐሀተ፡፡ እሼተ ኾተ አይላመ ፕሰ ኬለኸተ ሸክ፡፡››

![](https://cdn.door43.org/obs/jpg/360px/obs-en-34-02.jpg)

‹‹መ ኾር ኾቶሴን አሌየ ኦቶ ዴሀን ከመዬ፥ እኩተን ከ ቆረ ከፐንዴሰ ቸ ፕሰ ቀረ ጫል፥ ኸምፕረ ኔፎከ ቀረ ሳተ ሳተን፡፡

![](https://cdn.door43.org/obs/jpg/360px/obs-en-34-03.jpg)

ዬሱስከ ቶራ አፕለ ሌሌው ከ ክዴ፥ ‹‹መንክስቴተ ዋቀ ሀደየ አእስከቴተ ተከ ቄቴ ከ አክመ ፑሎተ ፐለይሸኔኤ ዳመ ኦልን ፖርጭቴኤ ፐሀተ፡፡

![](https://cdn.door43.org/obs/jpg/360px/obs-en-34-04.jpg)

‹‹ከ አሴው መንክስቴተ ዋቀ፥ ነመ አቴየንተ ዱሎፐ ጩቴ ፐሀተ፡፡ ነመ አፕለከ ቴየንቶሴ ቀረ ከዬ ከ ኤኖው ቀሮፐ ፒት ኦርሼ፡፡ ቆተ አከተ ኸሶዴ መለ፥ እኣኔ ከ ዋ ቀፐ ፕሰ ከትከቴ ከ ካጨሴኔትን ዱለሴ ፕደዴ፡፡››

![](https://cdn.door43.org/obs/jpg/360px/obs-en-34-05.jpg)

‹‹ከ አሴው መንክስቴተ ዋቀ፥ ፉሮተ ሄረን አከተ ኮኮከኤ ፐሀተ፡፡ ነካትተ ፉሮተከ ኤቴ አኬዬ፥ ዋ ቀፐ ፕሰ ከትከቴ ከ ፉሮተሴትን ፕዴ፡፡››

![](https://cdn.door43.org/obs/jpg/360px/obs-en-34-06.jpg)

ሴከመዬ ዬሱስከ ቶራ ኦረ ተከ ተከ አኮዳይሾ አፐኻረትን አንሀንቄለየ ኪኖ ከ ኦረ ፕለ ፑየኖት ዴሰ ሃሰወዴ፡፡ ከ ክዴ፥ ‹‹ነመ ለክ ትከ ቁልቁሎተ ኬሎፐ ቅንሴተ ኣኔ፡፡ ተከ ነመ ቀረተ ቀረትኖ፤ ተከኤው ሳረ አአመንቴተ።››

![](https://cdn.door43.org/obs/jpg/360px/obs-en-34-07.jpg)

‹‹ሳረሴ አአመንቴተ እቅንሰዴ ከ ክዴ፥ ‹ዋቆ፥ አንት ቆተን አኦረ ፕለ ምነ ዮዮመይተ ከ ኝረመይተ እሾ አልመልተ አንኮድንን መለ፥ ከ ነሞሴ ቀረተ ቀረትኖ አንፐሀንን መለ፥ እንኬ ከለተይሰን፡፡››

![](https://cdn.door43.org/obs/jpg/360px/obs-en-34-08.jpg)

‹‹ፐሀነኤ፥ አንት ቶርፓፐ ኩየተ ለክን ደምተ ሙሰን፤ ከ ካጨ እሾ ዋን ቀፐ ፕሰ ቀረዬ ኩመ ኩንደተ ኬ ከልን፡፡› ››

![](https://cdn.door43.org/obs/jpg/360px/obs-en-34-09.jpg)

‹‹ነመሴ ቀረተ ቀረትኖ ኾር፥ ሳረሴ አአመንቴተ ከፐዬ ለከዴሰ ቀአዴ፤ ኡመ ሞንቶፔለ ኔፎን ቶየኔ፡፡ ሴዴ ከፐዬ፥ ኬሶፐ ቶቶመዴ ከ ክዴ፥ ‹ዋቆ፥ ቆተን ጩፖለይተ ኮዴ መለ፥ አተረ አነ ሱረይሰዶ፡፡›››

![](https://cdn.door43.org/obs/jpg/360px/obs-en-34-10.jpg)

ሴከመዬ ዬሱስከ አሴ ክዴ፥ ‹‹ዱካተን እሽነ ኪን፥ ዋቀ ቅንሴተ ነሞሴ ቀረተ ቀረትኖትእ ደከዬ ከ አሀንቄልተ እሽ ክዴ፡፡ ኾር ቅንሴተ ሳረ አአመንቴተ እንጫለኔ፡፡ ዋቀ፥ ነመ ሞንቶፔለ እስ ኩትኖ ፕሰ ኸተ ሸክሸ፤ ነመ መታድ ሸክኖ ኾር ሞንቶፔለ ኩትሸ፡፡››

*መታፈ ቁልቁሎተ ከረ ፖረ ቀረ አካንቶ፡- ማትዮስ 13፡31-33፣ 44-46፤ መርቆስ 4፡30-32፤ ሉቃስ 13፡18-21፤ 18፡9-14፡፡*

## 35. ቶራ ሱረይሰተምፐይተ ተከ አኣፐ

https://openbiblestories.org/l/kxc/story-35/

![](https://cdn.door43.org/obs/jpg/360px/obs-en-35-01.jpg)

ኩያተ ተከዬ፥ ዬሱስ ኦረ ቀረተ ቀረትኖ ሌከይተ እሾ ጩፖለየ አፕለ አእሸ ደከይሰተ ኦሎፐ ዴኤ ኮልን፡፡

![](https://cdn.door43.org/obs/jpg/360px/obs-en-35-02.jpg)

ኦረ ስትይ ኤዬ ቾ ኦፐዬ፥ ሳራ አመንቴወ ኦፐ ተከ ተከከ አዬሱስ ጩፖለየ ሞቱምሰኖ ከ እሾተ ቴየኖ አኬ፤ ከ እሸ ቀረ ቆጭቆጨ ፓዬ፡፡ ሴመለ ዬሱስከ ቶሮሴን አሬ ቸ እሾተ ሌሌ፡፡

![](https://cdn.door43.org/obs/jpg/360px/obs-en-35-03.jpg)

ከ ክዴ፥ ‹‹ኣፐ ተከ ሄለ ለክ ቀፖ ቸ፡፡ ኩስተከ ኣፐይሾት ክዴ፥ ‹ኣፖ፥ ካጨት ቁደ ቆትዮ አአነ ከይኖ አመ አነ ዳሼ!› ሴመለ ኣፐይሾከ ካጨሴኔ ኻድ ሄላድ ለክ ኦፐ ቆቴ፡፡››

![](https://cdn.door43.org/obs/jpg/360px/obs-en-35-04.jpg)

‹‹ኩስትከ ኤኖው ዋ ቀፐ ፕሰ ኦሎፐ ኦርሰዴ ከ ፒተ ሴከ ኦፐ ኣኔ ከ ጩፖተን ከላተኔ ካጨሴኔትን ከሀዴ ከ ፕሬ፡፡

![](https://cdn.door43.org/obs/jpg/360px/obs-en-35-05.jpg)

‹‹ሴከመዬ ፒተሴ አኩስተ እሽ ከሎፐ ሎተ ከ ዴቴ፤ ኡመ ካጨ አእሽን ላተ ፕደደ እንቀፖ፡፡ ሴመለ ዋ ኮደኤ ደፔ ከ ስክመይተ አቱዮወ ኮዴ፡፡ ከ ሀርሞ ኞርፔ ከ ቆተ ዶኽኖ መለ፥ ዋ ቱዮዋሴኔ ደማኔ ደምተ ኸጬል፡፡››

![](https://cdn.door43.org/obs/jpg/360px/obs-en-35-06.jpg)

‹‹ፕራምፕረ ቀረዬ፥ ኩስተሴከ እስ ክዴ፥ ‹አተ ማነን ኮን? ኦርኸየ አኣፕኖ ፕሰ ደምተ አደመኔ ኩተይቴተ ቀፐን፤ አንት ኾር ዶኸኔን ቶን፡፡ ኣፕኖ ከፖፐን ቲተወ ከ አከ ኦርኸያድፐ ነመ ተከ ከፐ አነ ድኮ እሸ ቅንሰደ፡፡››

![](https://cdn.door43.org/obs/jpg/360px/obs-en-35-07.jpg)

ሴመለ ኩስተሴከ ትከ ኣፐይሾት ኦፐ ቲተወ ኸኤ፡፡ ኣፐይሾከ ለከ ዴሰ እሸ አኬ ከ እሸ ሱረይሰዴ፡፡ ከ ቱሮፐ ኬሬ ከ ሀዱኔ ከ እሸ ድንኬ፡፡

![](https://cdn.door43.org/obs/jpg/360px/obs-en-35-08.jpg)

እንሴኔከ ክዴኔ፥ ‹‹ኣፖ፥ ዋቀ እሾ ኬ ቱረኤን እሽን ደፔ፡፡ እናት ክደመ ኔፎ አነ ፐርፓችስንንክቶ፡፡››

![](https://cdn.door43.org/obs/jpg/360px/obs-en-35-09.jpg)

‹‹መ ኾር ኣፐይሾ ኦርኸያድፐዬ ተከ ሌሌ ከ ክዴ፥ ‹ጨርጨርተን ኣኔ ከ ሜሃደ ፐቃረ ቄዴ ከ እናዮ ቁደ ከልሼ! ከ ጭፌተ ቁፕታድ ቁደ ከልሼ፥ ከ ኾፐ ሎቀ ኬለ እሽ ከልሼ፡፡ ሴከመዬ፥ አከን ደሞ ከ ኸሶኖኤ ሜርተ ቄደ ከ ቀለ፤ ማነ መለ፥ እኖሴን ኸዮ እቶኤን ከ አመ ቻዴኔይ! እፐቴን፤ አመ ኾር እአካዴኔይ!› ››

![](https://cdn.door43.org/obs/jpg/360px/obs-en-35-10.jpg)

‹‹ሴመለ ነመ ፕሰከ ኸሶተ ፓዬ፡፡ አአኩታትእን ጨርን መልይ፥ ቃርተከ ዱለሴ አኦፐ ሶከዴዬ ዴሰ ትኮፐ ከሌ፡፡ ከ ኔሰ አኬሀይተ እሾ አኦረ ክርፕኖ ደከዬ፤ ከ ኦፐ ቀዋዌ ከ ክዴ፥ ‹ካተ ማነ ኮድተ?› ››

![](https://cdn.door43.org/obs/jpg/360px/obs-en-35-11.jpg)

‹‹ቃርተ ኤቴ አከ እናሶ ከሌ እከ መለ አሴ ኸሶነን ደከዬዬ፥ አከተ ሚሮዴ ከ ትከ ከሮፐ ኔፎ ኩለ ቲቴ፡፡ ኣፐይሾከ ኻሮፖፐ ሶኬ ከ አከ ኩሎ ከ እሾተ ኦል ኸሶዶ ናፐዴ፤ እሸ ኾር እቲቴ፡፡››

![](https://cdn.door43.org/obs/jpg/360px/obs-en-35-12.jpg)

ቃርተከ ኣፐይሾት ክዴ፥ ‹‹ፐሮሴን ፕሰን አመነመን ኬ ኬለ ኮደ ኮዴ! ኡመ አፐር አጨጫይት ቀረኔ አንተርፕኔ፤ ኡመ ሀከ አመትእ አከን ኼልያዮ ኦል ኸሶዶኤ፥ እነየ ቆልፐይተ ተከን ኔፎ አነኤ አዳኔ፡፡ መ ኾር እናሴኔ ኻይት ጩፖተ ኮደን ካጨሴኔ ኻይት ፕሬ ኤቴ ትኮፐ ከሌኔዬ፥ ሜርተ እሽ ቀልቴ!››

![](https://cdn.door43.org/obs/jpg/360px/obs-en-35-13.jpg)

‹‹ኣፐከ እሽ ኦርሼ ከ ክዴ፥ ‹እናዮ፥ አት አውተ ፕሰ አሬ አነ ኦል ክተ፤ ዋን ቀፐ ፕሰከን ኸይትው፡፡ ሀ ኸሶትኖ ፈያፐ ቸ፤ ማነ መለ፥ እኖሴን ኻይሽን እቶኤን ከ አመ ቻዴን፤ እፐቴን፤ አመ ኾር እአካዴን!››

*መታፈ ቁልቁሎተ ከረ ፖረ ቀረ አካንቶ፡- ሉቃስ 15፡11-32፡፡*

## 36. ፕሰ ዬሱስ አከ ፑርሰሜ

https://openbiblestories.org/l/kxc/story-36/

![](https://cdn.door43.org/obs/jpg/360px/obs-en-36-01.jpg)

ኩያተ ተከዬ ዬሱስ ተማሬዋድ ሴሰ ፔትሮስ ከ የእቆፕ እሾ ዮሀንስ እስቁደ ቄዴ ከ እሮተ ተከ ቀሮፐ ቅንሴተ ፈየዴ፡፡ (ተማርቶሴ ዮሀንስ ክደሜ እሳሴ ዬሱስ ፕሸን ጨቄን፡፡)

![](https://cdn.door43.org/obs/jpg/360px/obs-en-36-02.jpg)

አዬሱስ ቅንሴተ ቀረ ቾዬ፥ ፕሰ ፉላድከ አከ ፒርቶተ ምነ ኦፐዬ፤ ሜሀዳድከ አከ አቶተ ምነ አታዴን፤ አነመ ፒተ ቀረ ቾ አይኖ ኔፎ ኮድቴ፥ አተሰን ኤተንንን ቀሮፔለ አከተ ወርወር፡፡

![](https://cdn.door43.org/obs/jpg/360px/obs-en-36-03.jpg)

ስትይ ሙሴ እሾ ኹመምፐይተሴ ኤልያስከ አካዴን፡፡ ኦሮሴ ኤዬ ቾ፥ ኦረ ፐራደ ድፐደ ቱሮፐ ፒተ ቀረ ከላዴ፡፡ ክሴተ ዴሀ ኦፐኤ፥ ዩርሳሌም ከረኤ ቆተ ቶታድት ዴሰ ወ ኮደኤ ዬሱስ ኦል ሃሰወን፡፡

![](https://cdn.door43.org/obs/jpg/360px/obs-en-36-04.jpg)

አሙሴ እሾ ኤልያስ ኦል ቶራተ ቀረ ቻኔዬ ፔትሮስ እዬሱስ ክዴ፥ ‹‹አሬ ተዌተ እእኖ ፐኻርይ፥ ሻከ ሴሰ ቁፐነ፤ ተከን ኻይት፥ ተከን አሙሴ፤ ከ አሴው ተከን አኤልያስ ኮደን።›› ፔትሮስ ስትይ ዋ ሃሰወነ እንኡፖ፡፡

![](https://cdn.door43.org/obs/jpg/360px/obs-en-36-05.jpg)

አፔሮስ ሃሰወተፐ ቾዬ፥ ኡረተ አአተ ዴኤ ከ እሾተ ቀረ ልጵሼ። ኡረተ ከረዴሰ ኔሰ ከ ክዴ፥ ‹‹እን እናዮ አን እሽን ኻሶነ አንጫለነኤይ፥ እሽ ደከየ።›› ተማሬዋሴኔ ሴሰከ ፉሬን ከ ፒቶፐ ሴሄን፡፡

![](https://cdn.door43.org/obs/jpg/360px/obs-en-36-06.jpg)

ስትይ ዬሱስከ እሾተ ቁደ ቀፐዴ ከ ክዴ፥ ‹‹እንፉረን፥ ኸአ!›› ኤቴ እስከፐንዴሰ ቶይናኔዬ፥ ዬሱስ መልይ ነመ ተከ ኔፎ እንቾ፡፡

![](https://cdn.door43.org/obs/jpg/360px/obs-en-36-07.jpg)

ዬሱስ እሾ ተማሬዋሴኔከ እሮተ ቀረ ሌከዴን፡፡ ስትይ ዬሱስከ እሾተ ክዴ፥ ‹‹ወ አሬ ቀረ ኮዴ፥ አመዴሰ ነመ ተከ ኔፎኤን ሌለን፡፡ አንት እረ ቀረን ቶአ፥ ከ ቶቶፐ ኸአ፡፡ አውሴ ከመዬ፥ ኦረ ሌሌተ እኤተንሰን፡፡››

*መታፈ ቁልቁሎተ ከረ ፖረ ቀረ አካንቶ፡- ማትዮስ 17፡1-9፤ መርቆስ 9፡2-8፤ ሉቃስ 9፡28-36፡፡*

## 37. ዬሱስ አልአሳር ቶቶፐ ኻሼ

https://openbiblestories.org/l/kxc/story-37/

![](https://cdn.door43.org/obs/jpg/360px/obs-en-37-01.jpg)

ኩያተ ተከዬ፥ ዬሱስ ከመኤ ኔሰ ኤርኬን ከ ክዴኔ፥ ‹‹አልአሳር አከተ ፓቅን።›› አልአሳር እሾ ቱፐራሶ ለክ ማርያም ከ ማርተ፥ ሞተደ ዬሱስ ቁደ ዴሀ፡፡ ዬሱስ ኤቴ ኔሶሴ ደከዬዬ፥ እክዴ፥ ‹‹ፓቆሴ ኤዬ ቾ ኡልፌነ ዋቀት ኮደ ዲሼይ፥ አእሸ እከሶን።›› ዬሱስ ሞተዳድ እጫለን፤ መ ኾር ፖረ ኦፐ ቾ ኦፐኤው ኩያተ ለክ ፕሬ፡፡

![](https://cdn.door43.org/obs/jpg/360px/obs-en-37-02.jpg)

ኤቴ ኩያተ ለክ ፕሬ ከመዬ፥ ዬሱስ እተማሬዋድ ክዴ፥ ‹‹ፒተ ዩሁተ ኦፐ አነ።›› ተማሬዋድ ኾር እእሽ ክዴኔ፥ ‹‹ኮልሰምፐይቶ፥ አመ አዴሀትይ ሰመይሴ ኤዬ ቾ ኬ እከሰ ፖረ ኬ ፋን፡፡›› ዬሱስከ እሾተ ክዴ፥ ‹‹ሞተሴ ኸኖ አልአሳር እሙኬይ፥ እንኣነከ ሙክታፐ ኻሸ።››

![](https://cdn.door43.org/obs/jpg/360px/obs-en-37-03.jpg)

ተማሬወ ዬሱስከ እሽ ኦርሼን ከ ክዴኔ፥ ‹‹ፖቀለይ፥ ኦን እሙኬዬ፥ እኸአ።›› ስትይ ዬሱስከ ኦልኬለ እሾተ ለአይሼ ከ ክዴ፥ ‹‹አልአሳር እቶኤ፡፡ እሽነ አከ አነ አመንተኔኤ፥ ሴዴን አንት ኤዬ ደፐዴ ፈየኤ አነ ኸሰሴ፡፡››

![](https://cdn.door43.org/obs/jpg/360px/obs-en-37-04.jpg)

ኤቴ ዬሱስ ከተማሴኔ አአልአሳር ኦፐ ደለዴ ከዬዬ፥ አልአሳር አሀውለሜ ዴሰ ሌተ አፉር ፕሬ፡፡ ማርተከ ዬሱስ ኦካድሰኤ ቱሮፐ ሶክቴ ከ እሽ ኪቴ፥ ‹‹ፖቀለይ፥ ከትን ኬ አሬ ቸ ኪቴዬ እናኖ ቶንን ሄኔ፡፡ መ ኾር ወ ቅንሰንተ ፕሰ ዋቀ አክመ ኬ ዳሾ እንአመን፡፡››

![](https://cdn.door43.org/obs/jpg/360px/obs-en-37-05.jpg)

ዬሱስከ እሽ ኦርሼ ከ ክዴ፥ ‹‹ቶቶፐ ኻነ ከ ቻተ አነ፡፡ ነመ አነ አመኖ ፕሰ ከ ፑኑ ቶአዬ እቻደ፡፡ ነመ አነ አመኖ ፕሰ ፐከነ እንቶኦ፡፡ ሴዴ እአመን? ማርተከ እሽ ኦርሴ ከ ኪቴ፥ ‹‹ኣ፥ ፖቀለይ! አት አክመ ድንሸምፐይተ እነ ዋቀ ኮድቴ እንአመን።››

![](https://cdn.door43.org/obs/jpg/360px/obs-en-37-06.jpg)

ሴከመዬ ማርያምከ ዴቴው፡፡ ከ ሎቀ ዬሱስ ኬለኤ ፕእቴ ከ ኪቴ፥ ‹‹ፖቀለይ፥ ከትን አሬ ክተ ኪቴ፥ እናኖ ቶንን ሄኔ።›› ዬሱስከ ካሰዴ ከ ክዴ፥ ‹‹አይሸኤ አልአሳር ሀውልቴን?›› እሾተከ ክዴኔ፥ ‹‹ሀውለ ከረ ቻይ፥ ኾዬ ከ ቶዬ።›› ሴከመዬ ዬሱስከ ፖዬ፡፡

![](https://cdn.door43.org/obs/jpg/360px/obs-en-37-07.jpg)

ሀውለሴ ኔፎ ረሀነ፤ ኦፍንከ ደከ ቱረ ዱፌን፡፡ ኤቴ ዬሱስ ሀውለሴ ከፐ ከዬዬ፥ እእሾተ ሌሌ ከ ክዴ፥ ‹ደኮሴ አሌ ቱረ መይሸ።› ›› መ ኾር ማርተ እኪቴ፥ ‹‹አቶኤ ዴሰ ኩያተ አፉር፡፡ ሀ አመ እኸቸደ።››

![](https://cdn.door43.org/obs/jpg/360px/obs-en-37-08.jpg)

ዬሱስከ እሽ ክዴ፥ ‹‹አንኬ አንሌሌ ከ አንኪኔ፥ ‹ኦን እአመንይ› ኡልፌነ ዋቀኤ አክተ?›› እከ ሴመለ ደካሴ ቱረ መይሼን፡፡

![](https://cdn.door43.org/obs/jpg/360px/obs-en-37-09.jpg)

ሴከመዬ ዬሱስከ ሞንተንዴለ ቶየዴ ከ ክዴ፥ ‹‹ኣፖ ኸኖ፥ ቆተ አነ ደከይቴ መለ፥ እንኬ ከለተይሰን፡፡ አክመ አውተ ፕሰ አነ ደከይንቶ እንኡፐ፤ መ ኾር ኦሮሴ አሬፐ ቀቀአዴ አክመ አት አነ ኤርክቴ አከ አመኖኤ፥ ቆተይሾት ሴዴን ኪን።›› ከ ሴከመዬ ኡሉፔ ከ ክዴ፥ ‹‹አልአሳር፥ ለኮፐ ሶኬ!››

![](https://cdn.door43.org/obs/jpg/360px/obs-en-37-10.jpg)

ሴመለ አልአሳርከ ሶኬ። ከ አክመ ህዴኔን ቸ፡፡ ዬሱስከ ክዴ፥ ‹‹ቁደ ፉረ ከ ቱፐዴሰ ዲሸ እከ ኣኖ!›› ኦረ አይሁት ኦፐ ሌከይተከ ደኾሴ ምነን ዬሱስ አመኔ፡፡

![](https://cdn.door43.org/obs/jpg/360px/obs-en-37-11.jpg)

መ ኾር፥ ሳራ አመንቴተ አአይሁት፥ ዮተ ኔቀኤ ዮኤን፤ ከ ሴመለ ሳንተ አእሽን ዬሱስ እሾ አልአሳር እሸን ኩርፓተኤ ኦሎፐ ኦሬን፡፡

*መታፈ ቁልቁሎተ ከረ ፖረ ቀረ አካንቶ፡- ዮሀንስ 11፡1-46፡፡*

## 38. ዬሱስ ቶተኤ ዳሰሜ

https://openbiblestories.org/l/kxc/story-38/

![](https://cdn.door43.org/obs/jpg/360px/obs-en-38-01.jpg)

አይሁታተ ፐረ ኦሮ ፓሌተ ፋስከ ኡልፌስን፡፡ ፓሌሴ ኤዬ ክቶ፥ ኼልተደ ኸተ ቱረኔ ክሴተ ኣከዳት ዋቀ አተ አከ ከርፕሹመ ክፕስ ኬለ እሾተን ፐሄ መቴ ኦርሰተኤ ኡልፌሰም፡፡ ዬሱስ አፓዮተ ፉሌ ዴሰ ቶሬተ ከ ኮልሰ ፓዬ ፐረ ሴሰ ከመዬ፥ ፓሌሴ አፋስከኤ እሾተ ኦል ዩርሳሌም ከረ ኡልፌሰ ፈዴ፤ ከ ኤዬኤ አክመ ቶኦ ተማሬዋድ ሌሌ፡፡

![](https://cdn.door43.org/obs/jpg/360px/obs-en-38-02.jpg)

ተማሬወ አዬሱስፐ ነመ ተከ ዩሁተ ክደም ከ ሀላም ቸ፡፡ ዩሁተ ሳረ ኮደምፐየ ካጨ ቀፕኖት ኮዴ፤ መ ኾር ቆተ ካጨ ጫለኖ መለ፥ ከረ ኩተ ጮረ ከረዬ ካጨ ሀን፡፡ አዬሱስ እሾ ተማሬዋድ ዩርሳለም ከዬን ከመዬ፥ ዩሁተ ሳራ አይሁት ከፖፐ ኣኔ ከ ካጨን ዬሱስ እሾተ ተርፕሰ ከ ዳሰተ ኦውሰዴ፡፡ ከ አሳራ አይሁት ዬሱስ አክመ ድንሸምፐይተ ኮዴ መርመዴን ከ እሸ ከሱ እከሰ ሱለነን ኡፕናዴ፡፡

![](https://cdn.door43.org/obs/jpg/360px/obs-en-38-03.jpg)

አክመ ሳረ ቄሴወ ሳራ አይሁት ቱረ ቀቶ፥ እሸከ ዬሱስ እሾተ ተርፕሾ ከ ዳሾኤ ፕሬተ ኩንደ ሴሰ ዩሁተ ዳሼን፡፡ እከ አከሴ ኹመምፐየ ኹሜን ቀረ ኮድቴ፡፡ ዩሁተከ ኦፐ ሰሌ፤ ከ ካጨሴኔ ቴየዴ ከ ተዌ፡፡ ከ አሮተ እሽን እሾተ ቃርቃሮ እከ ዬሱስ ቀፐን ፈደ ፓዬ፡፡

![](https://cdn.door43.org/obs/jpg/360px/obs-en-38-04.jpg)

ዬሱስከ ዩርሳለምእ ተማሬዋድ ኦል ፋስከ ኡልፌሴ፡፡ ክሴተ ኤቶተ ፋስከትይ፥ ዬሱስ ላቆተ ቄዴ ከ ኦፐ ሞሴ፡፡ ከ ክዴ፥ ‹‹ህንደ ከ ሴዴ ደመ፡፡ ሴዴ ደክንተሴ ኸዮ እሽን መለ ዳሰምቴ፡፡ ሴዴን መቴ አነ ኦርሰደ፡፡›› ሳንቶሴትን ዬሱስ አከ ደክንታድ እሾተ መለ ዳሾ እሾተ ሌሌ፡፡

![](https://cdn.door43.org/obs/jpg/360px/obs-en-38-05.jpg)

ሴከመዬው ዬሱስ ኩፐየ ቄዴው ከ ክዴ፥ ‹‹ሴዴ እከ፡፡ እን ዲከሴ ኸዮ አኮደይቴተ ሃረየ አዲሰተ ጩፖተ መለ ቱቀሞ፡፡ ኦቶ ሴዴ እክተኔዬ፥ አውተ ፕሰ ሴዴን መቴ አነ ኦርሰደ፡፡››

![](https://cdn.door43.org/obs/jpg/360px/obs-en-38-06.jpg)

ሴከመዬ ዬሱስከ ተማሬዋድ ክዴ፥ ‹‹እሽን ኦፐዬ ተከ አነ ቶተ ተርፕሸ ከ ዳሸ።›› ተማሬዋሴኔከ ተተመቄን፤ ከ ካሰዴን ከ ክዴኔ፥ ‹‹አይኖ ዋ አሴ ፐሀ ኮደ?›› ዬሱስከ ክዴ፥ ‹‹ነመን ሞሶተ ላቆተ እሽ ዳኖ፥ እሸ አነ ተርፕሸ ከ ዳሸ።›› ከ ሴከመዬ ላቆተ ዩሁተ ዳሼ፡፡

![](https://cdn.door43.org/obs/jpg/360px/obs-en-38-07.jpg)

ዩሁተ ኤቴ ላቆተሴ ቴየዴ ከመዬ፥ ሴተነ እሸ ከሮፐ ኩሌ፡፡ ዩሁተከ አከ ዬሱስ ቀፐኔኤ ሳራ አይሁት ቃርቃረ ኣኔ፡፡ ሌተ ኔፎ ሀልኬተ፡፡

![](https://cdn.door43.org/obs/jpg/360px/obs-en-38-08.jpg)

ዬሱስ እሾ ተማሬዋድ ኤቴ ኤቶተ ደሜን ከመዬ፥ ቴፕሬሴይትፐ ኣኔን፡፡ ዬሱስከ ክዴ፥ ‹‹አዌ ሀልኬቴ ፕሰንት አሌ አነ ዲሰን፡፡ እታፈምቴ ከ ኪን፥ ‹ስክመይተን እሸ፥ ከሀረ ፕሰከ ፐሰን፡፡› ››

![](https://cdn.door43.org/obs/jpg/360px/obs-en-38-09.jpg)

ፔትሮስ ኾር እኦርሼ ከ ክዴ፥ ‹‹ከደ ፑኑ ፕሰ ኬ ዲሸኔዬ፥ አንተ ኾር አንኬ አንዲሾ!›› ስትይ ዬሱስከ ፔትሮስ ክዴ፥ ‹‹ሴተነ እሽን ፕሰ ቴየተ ሄነ፤ መ ኾር ፔትሮስ፥ አንተ አከ አመንቴታይት እኑኩላንንእን ኬ ቅንሰዴ፡፡ አኮድቶ መ፥ አዌ ሀልኬሴ ኦፐዬ አሉከልተን እይንን ቱረኔ፥ ነመ አነን ኡፕንን ምነኤ ሴሰን አነ መርመተ፡፡››

![](https://cdn.door43.org/obs/jpg/360px/obs-en-38-10.jpg)

ስትይ ፔትሮስከ ዬሱስ ክዴ፥ ‹‹ከደ ፑኑ ቶተ ኮድንተ ኔፎዬ፥ ፐከነ አንኬ አንመርመዶ።›› ተማሬወሴኔ ፕሰከ አሴው ክዴን፡፡

![](https://cdn.door43.org/obs/jpg/360px/obs-en-38-11.jpg)

ሴከመዬ ዬሱስከ ተማሬዋድ ኦል ፖረ ተከ ኬቴሴማኔ ክደሞፐ ኣኔን፡፡ ዬሱስከ ተማሬዋድ አከ ዋ ኔቀ ኦፖፐ እንከልን ከ ቅንሰደኔ እሾተ ሌሌ፡፡ ሴከመዬ ዬሱስከ ኸዋት ቅንሰተ ኣኔ፡፡

![](https://cdn.door43.org/obs/jpg/360px/obs-en-38-12.jpg)

ዬሱስከ ሴሰን ቅንሰዴ ከ ክዴ፥ ‹‹ኣፖ፥ ኦን እኮድንይ ኩፐዮስን አረኮተ አከን አንእክንን ኮዴ፡፡ መ ኾር ኦቶን ሳንተ እሽን ጩፖተ ኦረ ዲሰምቶ አፕል እንክንንይ፥ አኻይት ቀረ ኮድቶ፡፡›› ዬሱስከ ድኬ ኘራሄ፥ ዲትተከ አከ ዲከ ምነ ቀረ ተጭተጭን፡፡ ዋቀከ እሸ ኮኮነሰኤ ኤርከምፐቶተ ኤርኬ፡፡

![](https://cdn.door43.org/obs/jpg/360px/obs-en-38-13.jpg)

ዬሱስ ቅንሴተ አቅንሰኖ ፕሰ ከፐኤ ተማሬዋድ ከፖፐ አን፤ እሾተ ኾር እሙኬን፡፡ ኤቴ አሴሰታት እሾተ ከፖፐ ኦሬዬ ኾር፥ እክዴ፥ ‹‹ኸአ! አአነ ተርፕሾ ከ ዳሾ እዴሰ ከዬይ።››

![](https://cdn.door43.org/obs/jpg/360px/obs-en-38-14.jpg)

ዩሁተከ ሳራ አይሁት ከ ፎልሶወ እሾ ሰመይተ ኩተይተ ኦልን ዴኤ፡፡ እሾተ ኮረቴወ እሾ ኩመየ ቀፐዴን፡፡ ዩሁተከ ዬሱስ ከፖፐ ዴሃዴ ከ እሽ ክዴ፥ ‹‹ኮልሰምፐይቶ! ነከይተ አኬ ኮዶ።›› ከ እሸ ድንኬ፡፡ ሴዴ ኔፎ ሳራ አይሁት አይኖ አከ ቀፐኔኤ ምልክተ ዳሼ፡፡ ሴከመዬ ዬሱስከ ክዴ፥ ‹‹ዩሁተ፥ ድንክተኔ አነ ተርፕን ከ ዳን?››

![](https://cdn.door43.org/obs/jpg/360px/obs-en-38-15.jpg)

ኤቴ ፎልሶወ ዬሱስ ቀፔኔዬ፥ ፔትሮስ ኮራቴተ ዩከዴ ከ ኦርኸይተ ተከ አቄስተ ኩተ ቁደ ነፐሀተ ሙሬ፡፡ ዬሱስከ እሽ ክዴ፥ ‹‹ኮራቴታይት ኮርኮርታድ ከሮፐ ኦርሼ! አከ አነ ቀረ ኦርሸኔኤ ኣፕኖ አከ ኼለ ኤርከምፐቶወ አነ ኤርኮኤ ካሰንን ሄኔ።›› ሴከመዬ ዬሱስከ ነፐሀተ አነመሴት ድንሼ፡፡ አዬሱስ ቀፐሜ ከመዬ፥ ተማሬወ ፕሰከ አሌ ቀሄን፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 26፡14-56፤ መርቆስ 14፡10-50፤ ሉቃስ 22፡1-53፤ ዮሀንስ 12፡6፤ 18፡1-11፡፡*

## 39. ዬሱስ ፍርቴተኤ ዴሃዴ

https://openbiblestories.org/l/kxc/story-39/

![](https://cdn.door43.org/obs/jpg/360px/obs-en-39-01.jpg)

አመ ሌተ ሀልኬተ ኦልቆተ ኦፐ ክተ፡፡ ፎልሶወከ አከ ቄስተ ኩተ እሸ ቆሮኤ ዬሱስ ቄዴን ከ ትከ ቄስተ ኩተ ኦፐን ኣኔን፡፡ ፔትሮስ ለኬ ዴሰ እሾተ ከመ ኣኔ፡፡ ኤቴ ዬሱስ ትከ ከሮፐ ኩልሼን ከመዬ፥ ፔትሮስ ለኮፐዬ አፕተ አውሰን፡፡

![](https://cdn.door43.org/obs/jpg/360px/obs-en-39-02.jpg)

ትከ ከረዬ፥ ሳራ አይሁትከ ዬሱስ ፍርቴተ ዴሀይሼን፡፡ ከ አከ ማክየ ሌከየ እሸ ቀረ ደርተን ማኩመኔኤ እሽን ዴኤን፡፡ አኮድቶመ፥ አፋሶ ኦልቀረኤን ከሌ፤ ሴመለ ሳራ አይሁት አከ ዬሱስ ዌ ተከን ኔፎን ደፐምፐይተ ኮዴ ኡፕነሰን እንኤተንኔ፡፡

![](https://cdn.door43.org/obs/jpg/360px/obs-en-39-03.jpg)

ፕራምፕረ ቀረዬ፥ ቄስተሴ ኩተከ ኤለ ኸኤ ከ ዬሱስፐ ቶየዴ ከ ካሰዴ ከ ክዴ፥ ‹‹አት ኬቶ አድንሸምፐይተ፥ አእነ ዋቀ አቻተምፐይተኤ?››

![](https://cdn.door43.org/obs/jpg/360px/obs-en-39-04.jpg)

ዬሱስከ ክዴ፥ ‹‹ኣ! አነ፤ አሴው ኦቶን ኣፕኖ ኦል ኩትኦ ከ ሞንቴ ኸተ ዴኖ አክተ።›› ቄስተሴ ኩተከ ሚረን ሜሀዳድ አከልሰዴ እስቁደ ካኤ ከ ኡሉፔ ከ ሳራሴኔ አአመንቴተ አኤዬ ቸ አፕላት ክዴ፥ ‹‹ማክየ አፕለ እንፐርፓችስኔ! አን እነ ዋቀ አከ ክዴ እደከይቴን፡፡ ፍርቴታይሽን ማነ?››

![](https://cdn.door43.org/obs/jpg/360px/obs-en-39-05.jpg)

ሳራ አይሁት ፕሰከ ቄስተሴ ኩተ ኦርሼን ከ ክዴኔ፥ ‹‹ቶተ እሸ ፐርፓችስን!›› ሴከመዬ እከ እልደ ቀረ ዬሱስ ዴኬን፤ ከ ቀረ ቱፈዴን፤ ከ ኦፐ ቅዴን፤ ከ ኮጬሴን፡፡

![](https://cdn.door43.org/obs/jpg/360px/obs-en-39-06.jpg)

አፔትሮስ ለከ ቱለ ወ ኮዴ አሰተ ቀረ ቾዬ፥ ኦርኸይቴተ ተከ ፔትሮስ አክቴ ከ እሽ ኪቴ፥ ‹‹አት ከሱ ዬሱስ ቁዳዌ ክተ!›› ፔትሮስከ ዋ እሼተ ኪቴ መርመዴ፡፡ ሴከመዬ ኦርኸይቴተ አፕለከ አሴ እሽ ኪቴ፤ ፔትስከ አለመታት መርመዴ፡፡ ፕራምፕረ ቀረዬ ሰመይተከ እሽ ክዴ፥ ‹‹ቆተ እሽነ ለከንት ኦረ ኬልለ ኮድቴን መለ፥ አት አከ ዬሱስ ቁደ ክቶ እንኡፕነ።››

![](https://cdn.door43.org/obs/jpg/360px/obs-en-39-07.jpg)

ሴከመዬ ፔትሮስከ ኸኸዴ ከ ክዴ፥ ‹‹ኦቶን ነሞሴ ኤዬ ቾን ኡፓዬ፥ አጪጨ ዋቀ አነ ቴዬን!›› ኤኖው ሉከልተከ እዬ፤ ዬሱስከ ቲተዌ ከ ፔትሮስ ቶየዴ፡፡

![](https://cdn.door43.org/obs/jpg/360px/obs-en-39-08.jpg)

ፔትሮስከ አሌ ሶኬ ከ ድኬ ኘረሄ፡፡ አሴዴ አሴ ኮድቴዬ፥ ዩሁተሴ ዬሱስ ተርፕሼ ከ ዳሼ፥ አክመ ሳራ አይሁት ዬሱስ አከ ቶኦኤ ቀረ ፈረቴኔ አኬ፡፡ ዩሁተከ ኘረሄ ከ ኣኔ ከ እስ እሼ፡፡

![](https://cdn.door43.org/obs/jpg/360px/obs-en-39-09.jpg)

ፐረይታድ ጨምጨመይተኔ፥ ሳራ አይሁትከ ዬሱስ ቄዴን ከ ሙክሰምፐይተሴ አሮም ፕለቶስ ቱሮፐ ዴሀይሼን፡፡ እሾተ ፕላቶስ ዬሱስእ ክደ አደፐምፐይተ ከ ቀረ ፈረተ ከ አከ ቶኦ ኮደ ክዴን ከ ክፐዴን፡፡ ፕላቶስከ ዬሱስ ካሰዴ ከ ክዴ፥ ‹‹ሄለ ኬን ኑቁሰ አይሁትእ?››

![](https://cdn.door43.org/obs/jpg/360px/obs-en-39-10.jpg)

ዬሱስከ እሽ ኦርሼ ከ ክዴ፥ ‹‹ኬው ክዴ፤ መ ኾር መንክስቴትዮ መንክስቴተ ፒተ ቀረኤን፡፡ ከድን አፒተ ኪቴዬ፥ ኦርኸያዮ አነ ቶርፕን ሄኔን፡፡ ቆተ ዋቀት ዴሰ ዱካተ ማኩመኤን ፒተ ቀሮፐ ዴኤ፡፡ አዱካተ ጫለኖ ፕሰ አነ ደከይን፡፡›› ፕላቶስከ ክዴ፥ ‹‹አተ ዱካተ ማነ?››

![](https://cdn.door43.org/obs/jpg/360px/obs-en-39-11.jpg)

ፕላቶስ ኤቴ ዬሱስ ኦል ቶራዴ ከመዬ፥ ሰመይተ ቱሮፐ ሶኬ ከ ክዴ፥ ‹‹አንት ደፐ ተከ ኔፎ ነሞሴ ቀረኤ አንአክኔ።›› ሳራ አይሁት እሾ ሰመይተሴ ኾር እኡሉፔ ከ ክዴ፥ ‹‹ፈንሴ!›› ፕላቶስከ እሾተ ኦርሼ ከ ክዴ፥ ‹‹ሀ ደፐን ቀፖ!›› እሾተ ኾር አቀረን ቀፕቶኤ ኡሉፔን፡፡ ሴከመዬ ፕላቶስከ አሴሰታት ክዴ፥ ‹‹ሀ ደፐን ቀፖ!››

![](https://cdn.door43.org/obs/jpg/360px/obs-en-39-12.jpg)

ፕላቶስከ ከ ፉሬ ከ ክዴ ሰመይቶሴ ሆረይተ ኻሸ፤ ከ ሴመለ አከ ዬሱስ ፈንሰኔኤ ፎልሶዋድ አጨጬ፡፡ ኼለ ፎልሶወ አሮምከ ዬሱስ ቅዴን ከ ሜሃደ ቲመ ቁደ ከልሼን፤ ከ አሴው ቄየ አኸላለ ምነ መተ ቀረ እሽ መሬን፡፡ ከ ሴከመዬ ኮጬሴን ከ ክዴኔ፥ ‹‹ትን፥ ኑቁሰ አይሁት!››

*መታፈ ቁልቁሎተ ከረ ፖረ ቀረ አካንቶ፡- ማትዮስ 26፡57-27፡26፤ መርቆስ 14፡53-15፡15፤ ሉቃስ 22፡54-23፡25፤ ዮሀንስ 18፡12-19፡16፡፡*

## 40. ዬሱስ እፈንሰሜ

https://openbiblestories.org/l/kxc/story-40/

![](https://cdn.door43.org/obs/jpg/360px/obs-en-40-01.jpg)

ኤቴ ፎልሴወ ዬሱስ ኮጬሴን ከመዬ፥ ፈንሰኤ እሸ ቄዴን፡፡ ከ ወ አቀረ ቶአ አከ ሃዶ ኮዴን፡

![](https://cdn.door43.org/obs/jpg/360px/obs-en-40-02.jpg)

ፎልሶወከ ፖረሴ ‹‹መተ ነመ›› ክደሞፐ ዬሱስን ኣኔን ከ ሀርካድ እሾ ሎቃድ መስቀለ ቀረ ምስማረን ቶቶሜን፡፡ ዬሱስ ኾር እክዴ፥ ‹‹ኣፖ፥ ወ ኮነኔ እንኡፐኔይ፥ እሾነ ዲሼ።›› ፕላቶስከ አከ ምልክተ ቀረ ታፈን ከ ክደኔ፥ ‹ኑቁሰ አይሁት›› ከ መተ ዬሱስ ቀሬለ መስቀለ ቀረ ረከኔ እሾነ አጨጬ፡፡

![](https://cdn.door43.org/obs/jpg/360px/obs-en-40-03.jpg)

ፎልሶወከ ሜሀደ አዬሱስ ቀረ ቆይርተ ከተዴን፡፡ ክሴተ አሴዴ ኮዴኔዬ፥ ኹመሴ ኪኖኤ፥ ‹‹ሜሀዳዮ አንከልሰነኤ ቆተዴን፥ ከ ቀረ ቆይርተ ከተዴኔ›› ድክሼን፡፡

![](https://cdn.door43.org/obs/jpg/360px/obs-en-40-04.jpg)

ዬሱስከ ኬሬወ ለክይ ኦተንተ ከረ ፈንሰሜ፡፡ ተከከ ኦፐዬ ዬሱስ ቁኤ፤ አፕለ ኾር እእሽ ክዴ፥ ‹‹አት ዋቀ አፉርቶ? እኖ ደፐን ኮኔ፤ ነሞሴ ኾር ደፐን ቀፖ።›› ከ ሰከመዬ ዬሱስ ክዴ፥ ‹‹አተረ፥ መንክስቴታይትይ መቴ አነ ኦርሰዶ።›› ዬሱስከ እሽ ኦርሼ ከ ክዴ፥ ‹‹አዌሴዬ አነ ኦልይ ኬኔት ከላተ።››

![](https://cdn.door43.org/obs/jpg/360px/obs-en-40-05.jpg)

ሳራ አይሁት እሾ ኦረ ፕለ ተከ ተከ አሰመይቶሴ ኦፐዬ ቾ፥ ዬሱስ ኮጬሴን፡፡ ከ እሽ ክዴኔ፥ ‹‹ኦቶን አእነ ዋቀትይ፥ መስቀለ ቀረ ሌከዶ ከ እስ ድንሼ! ሴከመዬ እንኬ አመነይ።››

![](https://cdn.door43.org/obs/jpg/360px/obs-en-40-06.jpg)

ስትይ ከደ ፑኑ ኦልቆተ አኩያተ ኮድቴ ኔፎዬ፥ ፒተ ፕሰከ ኦፐንዴለ ዱምቴ ከ ቱከንታውቴ፡፡ ከ ሀከ ኦልቆተ ኩያተት ፐየቴ ሀከ ሳቴተ ሰከልት ቱከንታወ ቁደ ቻቴ፡፡

![](https://cdn.door43.org/obs/jpg/360px/obs-en-40-07.jpg)

ሴከመዬ ዬሱስከ ኡሉፔ ከ ክዴ፥ ‹‹እድከቴ! ኣፖ፥ ሀርካትፐኤን ነፕሴትዮ ዲን።›› ከ ሴከመዬ፥ መታድ ራእሼ ከ ኔሰ ዲሼ፡፡ ኤቴ ቶኤዬ፥ ፒተከ ሌሌህቴ፤ ካረንተሴ ኩተ ትከ ቁልቁሎተ ኬላዬ ክቶ ከ ሰመይተ ክናተ ዋቀ ከፐ ፑርሴከ እል ኸተ ፓይቴ ከ ለክ ካመቴ ከ ኸተ ከይቴ፡፡

![](https://cdn.door43.org/obs/jpg/360px/obs-en-40-08.jpg)

ዬሱስከ ቶታድን አከ ኦረ ዋቆፐ ዴኦኤ ሳንተ እሾነ ፐኔ፡፡ ፎልስተሴ ዬሱስ ቶይትኖ ኤቴ ዋ ኮዴ ፕሰ አኬዬ፥ እክዴ፥ ‹‹ነሞሴ ኬቶን ሀንቄለይተ፡፡ እሸ እነ ዋቀ።››

![](https://cdn.door43.org/obs/jpg/360px/obs-en-40-09.jpg)

ስትይ ሳራ አይሁት ኦፐዬ አከ ዬሱስ ድንሸምፐይተ ኮዴ አአመኔ ነመ ለክ፥ ዮሴፍ እሾ ንቆትሞስከ አከ ፑከ ዬሱስ እሾተ ዳሾኤ ፕላቶስ ቅንሰዴን፡፡ ከ ኦሃተን ቁደ መሬን ከ ህዴን ከ ሀውለ ተከ ሽለ ከረንዴለ ቆቴን ከረ ሀውሌን፡፡ ከ ሴከመዬ፥ ሽለ ኩተ ሱክሼን ከ ሀውለሴ ቱረ ዱፌን፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 27፡27-61፤ መርቆስ 15፡16-47፤ ሉቃስ 23፡26-56፤ ዮሀንስ 19፡17-42፡፡*

## 41. ዋቀ ዬሱስ ቶቶፐ ኻሼ

https://openbiblestories.org/l/kxc/story-41/

![](https://cdn.door43.org/obs/jpg/360px/obs-en-41-01.jpg)

ኤቴ ፎልሶወ ዬሱስ ፈንሴን ከመዬ፥ ሳራሴኔ አአይሁት አመንንክንን ፕላቶስ ከፖፐ ኣኔን ከ እሽ ክዴኔ፥ ‹‹ደርተምፐይተሴ ዬሱስ ኩያተ ሴሰ ከመዬ ቶቶፐ እንኻ ክዴ፡፡ ሴመለ አከ ተማሬዋድ ፑካድን ሀንን ከን ኪንን፥ ‹ቶቶፐ እኼ› ኡፕናተኤ፥ ነመ ተከ አከ ሀውሎሴ ቶይቶ ኮደ እፐርፓችስን።››

![](https://cdn.door43.org/obs/jpg/360px/obs-en-41-02.jpg)

ፕላቶስከ ክዴ፥ ‹‹ፎልሶወ ተከ ተከ ቄደከ አከ ኤተንንተን ቀረ ቶይተቺሰ።›› ሴመለ እከ ኩለይሱመ አሀውለ ቱረዬ ደካሴ ቀረ ኮጴተ ቶሜን፤ ከ አከ ነመ ፑካድን ሀንን ኡፕናተኤ ኤዬ ፎልሶወ ቃትሼን፡፡

![](https://cdn.door43.org/obs/jpg/360px/obs-en-41-03.jpg)

ኩያተ አዬሱስ ሀውላሜ ከመ ቀቴ ሰንፐተ አአይሁት፡፡ ኦረ አይሁት ኩያሴትይ አከ ፖረ ሀውለለ ኦፐ ኣነኔኤ እሾተ ፈቀተምንክቶ፡፡ ሴመለ ኩያተሴ አሰንፐተ አአይሁት ከመ ቀቴዬ፥ ቴይከንተ ከረኔ እስከተ ሌከይተ ፑከ ዬሱስ ቁደ ሽቶተ አፕለ ዳተ ሀርምሰዴ ከ ሀውላሴ አዬሱስፐ አንተ ኸኤ፡፡

![](https://cdn.door43.org/obs/jpg/360px/obs-en-41-04.jpg)

ቱርቱፓተኤ ፒተከ አከተ ሌሌህቴ፡፡ ኤርከምፐቶተ አሀንካደ ምነ ለአይንቶ ከ ሞንተ ቁደ አካቴ። ከ ደከሴ ኩለይሱመ ሀውለ ቱረ ዱፌን አሌ ሱክሴ ከ ቀረ ኩቲቴ፡፡ ፎልሶዋሴኔ ሀውለ ቶይትነከ ፉሬን ከ አክመ ኦረ ሌኤ ምነ ፒተ ሴሄን፡፡

![](https://cdn.door43.org/obs/jpg/360px/obs-en-41-05.jpg)

እስከተሴ ኤቴ ሀውለሴ ከፐ ከዬዬ፥ ኤርከምፐቶተሴ እሾተኤ ሌልቴ ከ ኪቴ፥ ‹‹እንፉረን! ዬሱስ አሬዬን ቾ፡፡ አክመ ክዴ ቶቶፐ እንኸአ ምነኤ፥ ቶቶፐ እኸኤ! ሀውላድ ኔፎ ኾየ አሬ ቶየ።›› እስከተሴከ ሀውለሴ ከረንዴለ ቶዬ ከ ፖረሴ አፑከ ዬሱስ ኦፐ ኻዬን ከሱ አኬ፡፡ ፑካድ ኾር ኤዬን ቾ!

![](https://cdn.door43.org/obs/jpg/360px/obs-en-41-06.jpg)

ሴከመዬ ኤርከምፐቶተሴከ እስከተሴት ሌልቴ ከ ኪቴ፥ ‹‹ኣነ ከ ተማሬወ ሌለ ከ ክደ፥ ‹ዬሱስ ቶቶፐ እኸኤ፥ ፒተ ኬልለ ኦፐ እሽን ቱረ ቀተ።› ››

![](https://cdn.door43.org/obs/jpg/360px/obs-en-41-07.jpg)

እስከተሴከ ፉረ እሾ ኸሰ ኩተን እመካዴ፡፡ ከ ኦቶቶሴ አፈየ ተማሬወ ቶሬተ ጨርጨርተን ህሬ፡፡

![](https://cdn.door43.org/obs/jpg/360px/obs-en-41-08.jpg)

አእስከተሴ ኦቶተሴ አፈየ ተማሬወ ሌለ አንተ ቀረ ቾዬ፥ ዬሱስከ እሾተ አካዴ፤ እሾተከ እሽ ሰከተዴን፡፡ ዬሱስከ እሾተ ክዴ፥ ‹‹እንፉረን፡፡ አከ ኬልለ ኦፐ ዴአኔኤ ተማሬዋዮ ሌለ፡፡ ኤዬኤ አነ አከኔይ።››

*መታፈ ቁልቁሎተ ከረ ፖረ ቀረ አካንቶ፡- ማትዮስ 27፡62-28፡15፤ መርቆስ 16፡1-11፤ ሉቃስ 24፡1-12፤ ዮሀንስ 20፡1-18፡፡*

## 42. ዬሱስ ሞንቶፐ ቲተዌ

https://openbiblestories.org/l/kxc/story-42/

![](https://cdn.door43.org/obs/jpg/360px/obs-en-42-01.jpg)

ኩያተ ዬሱስ ቶቶፐ ኸኤዬ፥ ተማሬዋድፐ ነመ ለክ ከተመ እሾነ ከፐ ዴሀ ኦፐ ከል። አአንተ ቀረ ቻኔዬ፥ ዋ ዬሱስ ቀረ ከዬት ዴሰ ቶራን፡፡ እሸ አክመ ድንሸምፐይተ ኮዴ ክፐዴን፤ መ ኾር እሸ ስትይ እቶኤ፡፡ አመው እስከተሴ ቶቶፐ እኸኤ ክዴን፡፡ ተማሬዎሴን ለክ ዋ አመናኔ እንኡፕናኔ፡፡

![](https://cdn.door43.org/obs/jpg/360px/obs-en-42-02.jpg)

ዬሱስከ እሾተ ከፖፐ ዴሃዴ ከ እሾተ ኦል አንተ ፓዬ፤ እሾተ ኾር እሸን ኡፕናኔ፡፡ እከ ቆተ ዋ ኦፐ ቶረናኔት ዴሰ እሾተ ካሰዴ፤ እሾተከ ኩያዎሴን ለመየ ተርፔ ኦፐዬ፥ ቆተ ዬሱስ ዴሰ ዋ ኮዴ ከ ኦረ ቀወነ ፕሰ እሽ ሌሌን፡፡ ከ አከ ነመ ኸይክተ ኮዴ ከ ዋ ዩርሳለም ከረ ኮዴ እንኡፕንን ኦል ቶራነን ምነ እሸ ድኬን፡፡

![](https://cdn.door43.org/obs/jpg/360px/obs-en-42-03.jpg)

ሴከመዬ ዬሱስከ ቆተ ድንሸምፐይቶሴት ዴሰ ቃሌተ ዋቀ ዋ ኪንተ እሾተ ኦልኬለ ለአይሼ፡፡ ድንሸምፐይቶሴ አከ ረኮተ ቴየዶ ከ ቶኦ፤ መ ኾር ኩያተ አሴሰታት አክመ ኸኦ፥ ዋ ኹመምፐየ ሃሰወዴኔ ከሱ መቴ እሾተ ኦርሼ፡፡ ኤቴ ነመሴ ለክ ከተማሴኔ አኦፐ ከለን ከዬኔዬ፥ ሌተ ዱማቶፐ አን፡፡

![](https://cdn.door43.org/obs/jpg/360px/obs-en-42-04.jpg)

ነመሴ ለክከ አከ እሾተ ከፐ ሙኮ ካሰዴን፤ እሸከ ኦውሰዴ፡፡ ኤቴ ኤቶተ ዴሀቴዬ፥ ዬሱስ ላቆተ ቄዴ ከ ቀረ ዋቀ ከለተይሰዴ፤ ከ ኦፐ ሞሴ፡፡ እከ ኤኖው አከ ዬሱስ ኮዴ ኡፕናዴን፡፡ መ ኾር ስትይ ኤኖው እሾተ ቱረ ፐቴ፡፡

![](https://cdn.door43.org/obs/jpg/360px/obs-en-42-05.jpg)

ነመሴ ለክከ ኦል ክዴኔ፥ ‹‹ሀ ዬሱስ! ሀ ቱሩ ሴመለ አቃሌተ ዋቀ እኖ ለአኖዬ፥ ቃሌታድ ከርቶፐ እኖ ቀፐን!›› ከ ኤኖው ኸኤን ከ ዩርሳለምፐ ቲተዌን፡፡ ኤቴ ኤለ ከዬኔዬ ተማሬወኤ ሌሌን ከ ክዴኔ፥ ‹‹ዬሱስ እኸኤ! አንከ አክኔ።››

![](https://cdn.door43.org/obs/jpg/360px/obs-en-42-06.jpg)

አተማሬወ ሴዴ ቶራተ ቀረ ቻኔዬ፥ አእሾተ እስቀረን ኡንን መልይ አትከ ከረ ቻኔዬ፥ ዬሱስከ ኦተንታይሾ ኦፐ አካዴ፤ ከ እሾተ ክዴ፥ ‹‹ነከይተ አእሽነ ኮዶ!›› ተማሬወከ አካርየ አኬን እሾተ ፐሀናቴ፤ ዬሱስ ኾር እእሾነ ክዴ፥ ‹‹ማነኤ ፉርተን፥ ከ አነ ዱከይሰተ መላልቴን? ሀርካዮ እሾ ሎቃዮ ቶየ፡፡ ሀፑራ ኸየ ምነ ደክንተን ቀፐኔይ፡፡ ከ አከ ሀፑረን ኮድንን አከ ዱከይሰደኔኤ፥ አከ ዋ ደመ እሽ ዳሸኔኤ እሾተ ካሰዴ፡፡ እሾተከ ሙርኩጨ አዋቴን ሸከይተ እሽ ዳሼን፤ እከ ደሜ፡፡

![](https://cdn.door43.org/obs/jpg/360px/obs-en-42-07.jpg)

ዬሱስከ እሾተ ክዴ፥ ‹‹እንእሽነ ሌሌ ከ ክዴ፥ ‹ቆትዮ ዴሰ አቃሌተ ዋቀ ቀረ ታፈምቴ ፕሰ ኮደ ከ ድከተ እሾተ ፋን።› ›› ስትይ አከ ቃሌተ ዋቀ እሾነ ከልቶኤ ኡፕነ እሾተ ዳሼ፡፡ ከ እሾነ ክዴ፥ ‹‹ድንሸንፐይተ አክመ ረከዶ፥ ከ ቶኦ፥ ከ ኩያተ ሰሰታትይ ቶቶፐ ኸኦ፥ ኸተው ቱረን ታፈምቴ።››

![](https://cdn.door43.org/obs/jpg/360px/obs-en-42-08.jpg)

‹‹ከ አሴው መታፈ ቀረኤ፥ አከ ኦረ ፕሰ ጩፖቶፐ ዲሰተ ቴዮኤ ከ አከ አረረ ከሎኤ ተማሬዋዮ አክመ ሰልሸኔ ታፈምቴ፡፡ እሾነከ ዩርሳለም ፓየን ከ ሴዴ ኮደን፤ ከ ከመዬ ፖረ ፕሶፐ ፖረ ኦፐ ሰመይተ ቾ ፕሶፐ ኣነን፡፡ እሽነ ሴ ፕሰኤ አማክየ፡፡

![](https://cdn.door43.org/obs/jpg/360px/obs-en-42-09.jpg)

ኩያዋ ከመ ቸ ኩንደ አፉር ከረኤ ዬሱስከ ከረ ኩተ ተማሬዋድ አካዴ፡፡ ተከዬ ነመ ድፐ ኬን (500) ቀሮፐ ቾ ቱረኤ ፖረ ተከ አካዴ። ከ አከ ቻተምፐይተ ኮዴ ቅንደ ሌከይተን ተማሬዋድ ኡፕነይሼ፤ ከ ቆተ መንክስቴተ ዋቀት ዴሰ ኩል እሾነ ኮልሼ፡፡

![](https://cdn.door43.org/obs/jpg/360px/obs-en-42-10.jpg)

ዬሱስከ ተማሬዋድ ክዴ፥ ‹‹ሁፕነ ኡኩሜተ ፕሰ ፒቴዬ እሾ ሞንቴዬ እአነ ዳሰሜ፡፡ ሴመለ ኣነ ከ ኦረ ፒተ ፕሰ መኸ አኣፐ ከ አእነ ከ አሀፑረ ቁልቁሎታትን ክርስትነ ኻሸ፤ ከ ዋን አንት እሽን አጨጬ ፕሰ አከ ቶይተኔኤ እሾተ ኮልሸ ከ ተማሬዋዮ ኮደ፡፡ ከ አከን አንት አውተ ፕሰ እሽን ኦል ቻኖ መቴ ኦርሰደ፡፡››

![](https://cdn.door43.org/obs/jpg/360px/obs-en-42-11.jpg)

አዬሱስ ቶቶፐ ኸኤ ኩያተ ኩንደ አፉር ከመዬ፥ እተማሬዋድ ክዴ፥ ‹‹ኦቶ ሀፑረ ቁልቁሎተ እሽን ቀረ ሌከዶዬ፥ ሀከ ኣፕኖ ሁፕነ እሽነ ዳኖ ከረኤ ዩርሳለም ከረ ተወ።›› ሴከመዬ ዬሱስከ ሞንቶፐ ፈየዴ፤ ኡረተከ አቶይናኔዬ እሸ ቄዴ ከ ቱረ ዴኬ፡፡ ዬሱስከ ኡመተ ፕሰ ሙክሰኤ ሀርከ ዋቀት አክቴ ኩትኤ፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 28፡16-20፤ መርቆስ 16፡12-20፤ ሉቃስ 24፡13-53፤ ዮሀንስ 20፡19-23፤ ኮደ ኮደምፐየ 1፡1-11፡፡*

## 43. አክመ ትከ ክርስታነ ፓየቴ

https://openbiblestories.org/l/kxc/story-43/

![](https://cdn.door43.org/obs/jpg/360px/obs-en-43-01.jpg)

ኤቴ ዬሱስ ሞንቶፐ ፈየዴ ከመዬ፥ ተማሬወከ አከ ዬሱስ እሾተ አጨጬ ምነኤ ዩርሳለም ከረ ጨሬን። ኦረ ዋቀ አመኖ አኤዬ ቾከ ሌተ ምነ ቅንሴተ ኦሎፐ አን፡፡

![](https://cdn.door43.org/obs/jpg/360px/obs-en-43-02.jpg)

አይሁታተ ፐረ ኦሮ ምነኤ ፈስከ ከመዬ ኩያተ ኩንደ ኬነታት ፓሌተ ፔንቴቆስቴ ክደምቶ ኩያሴትይ ኡልፌስን፡፡ ፔንቴቆስቴ ኩያተ ኦፐ አይሁታተ ፓሌተ አፌረ ኡልፌስንቶ፡፡ አይሁታተ ፓሌሴ አፌረ ፖረ ተከ ኡልፌሰኤ ፒተ ፕሶፐ ዩርሳለም ከሮፐ ኦሎፐ ዴን፡፡ ፐሮሴ ኦፐዬ፥ አዬሱስ ሞንቶፐ ኣኔ ቶርፐ ተከን ምነ ክቶ ከመዬ፥ ክሴሴ አፔንቴቆስቴሴ ከይቴ፡፡

![](https://cdn.door43.org/obs/jpg/360px/obs-en-43-03.jpg)

አኦረ ዋቀ አመኖ ፕሰንተ ፖረ ተኮፐ ኦልን ቾዬ፥ አእስቀረን ኡፕንን መል ኔሰ አፑፔተ ምነ ኩምኖከ ትከሴ አኬለ ቻን ኬለ እመኬ፡፡ ሴከመዬ ዋ አኦፐየ አፕተ ፐሀከ መተደ ኦረሴ ዋቀ አመኖ ፕሰ ቀረ አካዴን፡፡ እከ ፕሰንት ሀፑረ ቁልቁሎታትን እመካዴን ከ አፈደ ፕለ አሌካትን ሃሰወተ ፓዬን፡፡

![](https://cdn.door43.org/obs/jpg/360px/obs-en-43-04.jpg)

ኦረ አዩርሳለም ከረ ቾ፥ ኤቴ ኔሶሴ ደከዬዬ፥ ሰመይተ ኩተይተከ ዋ ኮድነ ቶየ ኦሎፐ ዴኤ፡፡ ኤቴ ኦረ ዋቀ አመኖ ኮደደ አዋቀ አኦረ ቀወነ ሃሰወነን እከ ደከዬኔዬ፥ ቆተ ዎሴን ኤዬ ቸ አፈዳሶ አሃሰወናኔትን ደከዬን መለ፥ ኦፔ ቀዋዌን፡፡

![](https://cdn.door43.org/obs/jpg/360px/obs-en-43-05.jpg)

ኦረ ተከ ተከ ተማሬወ እማሾዴኔ ክዴ ከ እሾተ ወቀሴን፡፡ መ ኾር ፔትሮስ ኤለ ቀአዴ ከ እሾተ ክዴ፥ ‹‹ደከይሰደ! ኦሮሴ አሬ ቾ እንማሾኔ! እሳሴ አዋቀ ኹመምፐይተሴ እዩኤል ቁደን ኹሜ ከ ክዴ፥ ‹ኩያወ ፕራምፕረትይ ሀፑርዮን ኦረ ቀረ ቱቀ!› ሴዴ ድከን፡፡

![](https://cdn.door43.org/obs/jpg/360px/obs-en-43-06.jpg)

‹‹ሰመይተ እስረኤልትይ፥ አክመ አክቴን ከ ቱረኔው ኡፕተን ምነኤ፥ ዬሱስ ሁፕነ ዋቀትን ወ ኦረ ቀወነ እሾ ምልክተደ ኩኩተ ኦተንታይሽን ኦፐ ኮዴ፡፡ መ ኾር እሽነ እፈንስቴን!››

![](https://cdn.door43.org/obs/jpg/360px/obs-en-43-07.jpg)

‹‹ዬሱስ ከደ ፑኒ ቶኤዬ፥ ዋቀ ቶቶፐ እሸ ኻሼ፡፡ ሴዴ ኔፎ ኹመሴ ኪኖ፥ ‹ፑከ ቁልቁልታይት አከ ጨፕጨፖ አኮቶ› ድከዴ፡፡ ዋቀ አክመ ዬሱስ ቻተምፐይተ ኮዴ ከ ቶቶፐ ኻሼ እኖ አማክየ፡፡››

![](https://cdn.door43.org/obs/jpg/360px/obs-en-43-08.jpg)

‹‹ዬሱስ አመ ሀርከ አክተ አዋቀት ኡልሴሰሜ፡፡ ዬሱስከ አክመ ኸሰ ዳሼ ምነኤ ሀፑረ ቁልቁሎተ ኤርኬ፡፡ ሴዴ አአመ አክንተን ከ ደከይንተን ሀፑሮሴ አቁልቁሎተኤ ኮዴ፡፡

![](https://cdn.door43.org/obs/jpg/360px/obs-en-43-09.jpg)

‹‹እሽነከ ዬሱስ ፈንስቴን፡፡ መ ኾር፥ አከ ዋቀ ዬሱስ ፖቀለ እሾ ድንሸምፐይተ ኮዴ፥ ዱካተን ኡፕናደ!››

![](https://cdn.door43.org/obs/jpg/360px/obs-en-43-10.jpg)

ኦረ ፔትሮስ ደከይሰኖ፥ ወ ሃሰወዴት ዴሰ ከርታይሾ ምክቴ ቀፐተሜ፡፡ ሴመለ እከ ፔትሮስ እሾ ተማሬወ ካሰዴን ከ ክዴኔ፥ ‹‹ኮያለኖ፥ ከ ኩል ማነን ኮነ?››

![](https://cdn.door43.org/obs/jpg/360px/obs-en-43-11.jpg)

ፔትሮስከ እሾተ ኦርሼ ከ ክዴ፥ ‹‹አከ ዋቀ ጩፖታይሽን እሽነ ዲሾኤ፥ መተ ምነኤ አረረ ከለ ከ መኸ ዬሱስን ክርስትነ ኸአ፡፡ ሴከመዬ እሸ ዳሰተ ሀፑረ ቁልቁሎተ ከሱ እሽነ ዳሸ፡፡››

![](https://cdn.door43.org/obs/jpg/360px/obs-en-43-12.jpg)

ነመ ኩመ ሴሰ (3000) ምነ ቾከ ዋ ፔትሮስ ሃሰወዴ ዱከይሰዴ ከ ተማሬወ አዬሱስ ኮዴ፡፡ እሾተከ ክርስትነ ኸኤን ከ ማፐረ አመንቴተ አዩርሳለም ቾ ኦፖፐ ፐዳወሜን፡፡

![](https://cdn.door43.org/obs/jpg/360px/obs-en-43-13.jpg)

ተማሬዎሴንከ ወ ኮደምፐየ እሾተ ኮልናኔ ደከይሰን። ከ ኦልን ከላን ከ ደም፤ ከ ኦል ቅቅንሰን፡፡ ከ ኦልን ዋቀ ከለተይሰን፤ ከ ዋ ቀፐኔ ፕሰ ኦልቱረ ሞሰን፡፡ ነመ ፕሰከ ቆታይሾት ዴሰ ወ ፈየ ድከን፡፡ ኩያተ ምነ ኦረ ኩተይተከ ዋቀ አመን፡፡

*መታፈ ቁልቁሎተ ከረ ፖረ ቀረ አካንቶ፡- ኮደ ኮደምፐየ 2፡፡*

## 44. ፔትሮስ እሾ ዮሀንስ ቅንሰቶለይተ ተከ ድንሼን

https://openbiblestories.org/l/kxc/story-44/

![](https://cdn.door43.org/obs/jpg/360px/obs-en-44-01.jpg)

ኩያተ ተከዬ፥ ፔትሮስ እሾ ዮሀንስ ትከ ቁልቆሎተ ኦፐ አን፡፡ ኤቴ ኩለይሱመ ኻረ ከፐ ከይናኔዬ፥ ቶነይተ ተከ ኮደቴተ ቅንሰኖ አኬን፡፡

![](https://cdn.door43.org/obs/jpg/360px/obs-en-44-02.jpg)

ፔትሮስከ ቶነይሴ ቶየዴ ከ ክዴ፥ ‹‹አንት ካጨ አንኬ ዳሸ አንቀፖ፡፡ መ ዋን ቀፐኤን ኬ ዳሸ፡፡ መኸ ዬሱስን ኸኤ ከ ፖረ ኣኔ!››

![](https://cdn.door43.org/obs/jpg/360px/obs-en-44-03.jpg)

ኤኖው ዋቀከ ቶነይተሴ ድንሼ፤ እሸከ ፖረ አንተ ከ ሾሾረ ከ ዋቀ ከለተይሰተ ፓዬ፡፡ ኦረ ትከ ቁልቁሎተ ከረ ቾከ ኦፐ ቀዋዌ፡፡

![](https://cdn.door43.org/obs/jpg/360px/obs-en-44-04.jpg)

ኦረከ ነመሴ ድኔ ቶየኤ ህርተን ኦሎፐ ኾሬ፡፡ ፔትሮስከ እሾተ ክዴ፥ ‹‹ቆተ ነሞሴ ድኔ መለ፥ ማነኤ ኦፐ ቀወውንተን? እኖ ሁፕንኖን ታክ ቁልቁሉማኖን ነሞሴ አንድንኔ፡፡ መ ዋ ነሞሴ ድንሼ፥ ሁፕነ ዬሱስ እሾ አመንቴተ አዬሱስ ዳኖ፡፡››

![](https://cdn.door43.org/obs/jpg/360px/obs-en-44-05.jpg)

‹‹አከ ዬሱስ እሸቺሶኤ አቄዴ ከ ፕደምፐይተ ሮምት ሌሌ እሽነ፡፡ እሳሴ ፓደ ቻተ ኮዴ እከሴን፤ ዋቀ ኾር ቶቶፐ እሸ ኻሼ፡፡ ከደ ፑኑ ዋ አኮንተኔ አኡፕንንይ፥ ኹመዳሴኔ አከ ድንሸምፐይቶሴ ረኮተ ቴየዶ ከ ቶኦ ሌለሜ ድክሰኤ ዋቀ ኮዳይሽን ኦፐን ኮዴ፡፡ ሴመለ አከ ጩፖተይሽን እሽነ ጨቀምቶኤ አመ አረረ ከለ ከ ዋቆፐ ኦረ፡፡››

![](https://cdn.door43.org/obs/jpg/360px/obs-en-44-06.jpg)

ሳራ አትከ ቁልቁሎተከ ዋ ፔትሮስ እሾ ዮሀንስ ሃሰወዴኔ ምነን ኻቴ አከተ ሚሮዴን፡፡ ከ ሴመለ እሾተ ቀፔን ከ ትክ ህደ ከሮፐ ከልሼን፡፡ መ ኾር ሃሶሴን አፔትሮስ ቶሬ ምነን ኦረ ሌከይተ አመኔ፤ ሌኩምተ ኦረ አዬሱስ አመኔ ከ ሀከ ኩመ ኬን (5,000) ምነ ቾ ከይቴ፡፡

![](https://cdn.door43.org/obs/jpg/360px/obs-en-44-07.jpg)

ፐረይታድይ፥ ሳራ አይሁትከ ፔትሮስ እሾ ዮሀንስ ቄዴን ከ ቄስተሴ ኩተ እሾ ሳራ አመንቴወ አፕለ ቱሮፐን ኣኔን፡፡ እከ ፔትሮስ እሾ ዮሀንስ ካሰዴን ከ ክዴኔ፥ ‹‹ሁፕነ አይኖኔ ቶነይሴ ኤዬ ቾ ድንሴን?››

![](https://cdn.door43.org/obs/jpg/360px/obs-en-44-08.jpg)

ፔትሮስከ እሾነ ኦርሼ ከ ክዴ፥ ‹‹ነሞሴ ኤዬ ቾ፥ ሁፕነ ድንሸምፐይተሴ አዬሱስን ድኔ ከ ፉለይሽን ቱረ ቀአዴ፡፡ እሽነ ዬሱስ እከሴን፤ ዋቀ ኾር ቶቶፐ እሸ ኻሼ! እሽነ እሸ አቴየኔ፤ መ ኾር ሁፕነ መኸ ዬሱስ ፐተኔ ዲሼይ፥ ፖረ ፕለ አድነ እንቾ!››

![](https://cdn.door43.org/obs/jpg/360px/obs-en-44-09.jpg)

ፔትሮስ እሾ ዮሀንስ ቆተ መኸኙመ አኩታተን ሃሰወዴን መለ፥ ሳሮሴን ኤዬ ቸ እፉሬን፤ ማነ መለ፥ ኦሮሴ ኤዬ ቾ አከን ተማርን ከ ኡፕነን ቀፕንን ኡፕናዴኔይ፡፡ መ ኾር ስትይ ኦሮሴ አከ ዬሱስ ኦል ቻኔ መቴ ኦርሰዴን፡፡ ከ ኤቴ ፔትሮስ እሾ ዮሀንስ ፉፉርሼን ከመዬ፥ አከ ኣነኔኤ ቱፐዴሰ እሾተ ዲሼን፡፡

*መታፈ ቁልቁሎተ ከረ ፖረ ቀረ አካንቶ፡- ኮደ ኮደምፐየ 3፡1-4፡22፡፡*

## 45. ፊልጶስ እሾ ቶጵተ ተከ ስልታነ ቀፖ

https://openbiblestories.org/l/kxc/story-45/

![](https://cdn.door43.org/obs/jpg/360px/obs-en-45-01.jpg)

መሬወ ትከ ክርስታነ አኸተ ከረ ቸ ኦፐዬ ነመ ተከ እስትፋኖስ ክደሞ ቸ፡፡ እሸ ነመ መኸ ፈየ ቀፖ፥ አሀፑረ ቁልቁሎተ እሾ ኦኩመን አመካዴ፡፡ እስትፋኖስ ነመ ዋ ኦረ ቀወነ ሌከየ ኮዴ ከ አከ ኦረ ዬሱስ አመኖኤ ወ ኦረ አመንሲስነ ኦረ ዴሀኖ፡፡

![](https://cdn.door43.org/obs/jpg/360px/obs-en-45-02.jpg)

ኩያተ ተከዬ አእስትፋኖስ ቆተ ዬሱስ ዴሰ ኮልኖዬ፥ አይሁታተ ተከ ተከ አዬሱስን አመንን እሸ ኦል ሺሸ ፐዬ፡፡ ከ አከተ ሚሮዴ ከ ቆተ እስትፋኖስ ዴሰ ሳራ አመንቴወ ቱረ ደርተ ኮዴ፡፡ ከ ክዴ፥ ‹‹ቆተ ሙሴ እሾ አዋቀት ዴሰ ወ ኔቀ ሃሰወን አንከ ደከይኔ።›› ሴመለ ሳራ አአመንቴወከ እስትፋኖስ ቀፔን ከ ኦረ ቀረ ደርተ ማኩሞ አፕለ ቄዴን ከ ቄስተሴ ኩተ አቱረን እስትፋኖስ ቱሮፐ ዴሃይሼን ከ ቀረ ደርተ ኮዴን እሾ ሳራ አአይሁት አፕለ ቱሮፐ ዴሃይሼኔው፡፡

![](https://cdn.door43.org/obs/jpg/360px/obs-en-45-03.jpg)

ቄስተሴ ኩተከ እስትፋኖስ ካሰዴ ከ ክዴ፥ ‹‹ሄለ ኩል ዎሴን ዱካተ?›› እስትፋኖስከ ኮደደ ኩኩተ አዋቀ ኼልተ አፕርሃምይ ፓዬ ከ ሀከ ኼልተ ዬሱስት ኮዴ፤ ከ አሴው አከ ሰመይተ ዋቀ እሸ ቀረ ኦልከመ ትየን ኸኤ መቴ ኦርሰን መልሴተ እሽ ኦርሼ፡፡ ከ ሴከመዬ ክዴዌ፥ ‹‹እሽነ ከምቶለየ ኦረትይ፥ እሽነ አከርታይሽን ኮኮክ፥ አከመ ኣፐዳስን ዋቀ ቀረ ኸኤን ከ ኹመምፐየ ሌይሼን ምነኤ አውተ ፕሰ ሀፑረ ቁልቁሎተ ኔድንተን፡፡ እሽነ ኾር አኻይሾ ቀረን ቀፕቶኤ ዋ ኔቀ ኮቴን። ከ ድንሸምፐይተሴ እከሴን!››

![](https://cdn.door43.org/obs/jpg/360px/obs-en-45-04.jpg)

ሳራሴኔ አአመንቴተ ኤቴ ሴዴ ደከዬኔዬ፥ ሀከ ነፓሶ ቀረ ቀቀፐነን ከ አከተ ኔሰ ኩተን ኡሉፕነኔኤ አከተ ሚሮዴን፡፡ ከ እስትፋኖስ ከተማፐ አሌ ለኮፐ ትቴን ከ እሸተኤ ደከደን ደኬን፡፡

![](https://cdn.door43.org/obs/jpg/360px/obs-en-45-05.jpg)

እስትፋኖስ አቶተ ቀረ ቾዬ፥ እኡሉፔ ከ ክዴ፥ ‹‹ዬሱስ፥ ነፕሴትዮ ቴየዶ።›› ከ ሴከመዬ ክልፔፔ ከ አለመታት ኡሉፔ ከ ክዴ፥ ‹‹ፖቀላዮ፥ ጩፖሴ እሾነ ቀረኤን ድከን።›› ከ ኦር ቶኤ፡፡

![](https://cdn.door43.org/obs/jpg/360px/obs-en-45-06.jpg)

ኸዮለይተ ተከ ሳውል ክደሞ ኦረ እስትፋኖስ እሼ ኦል ከሌ ከ አደከደን እሸ ደክናኔዬ፥ ኬሎ ሜሀዳሶ ቶይትን፡፡ አውሴትይ፥ ኦረ ዩርሳለም ከረ ቾ ሌከይተከ አዬሱስ ከመ አነ ፖረ ዳነ ፓዬን፤ ሴመለ ኦረ አመኖከ ፖራ አፕለ ኦፐ አሌ ቀሄ፡፡ ከደ ፑኑ ፖረ ዳነምተ ክተ ኔፎዬ፥ ፖረ ኦፖፐ ኣኔን ፕሰዬ ቆተ ዬሱስ ዴሰ ኦረ ቶሬን፡፡

![](https://cdn.door43.org/obs/jpg/360px/obs-en-45-07.jpg)

ተማሬወ አዬሱስፐ ተከ ፊልጶስ ክደሞ፥ ክሴተሴ አዳነምታት ኦረ አመኔ ከ ዩርሳለም ከረ አሌ ቀሄ ኦፐ እሸ ተከ፡፡ እሸ ከተመ ሰማርየ ኦፐ ኣኔ ከ ቆተ ዬሱስ ዴሰ ቶሬ፥ ኦረ ሌከይተከ ድኔ፡፡ ሴከመዬ ኩያተ ተከዬ፥ ኤርከምፐቶተከ አከ ፊልጶስ ፖረ ተከ ኮመይቶፐ ቾ ኦፐ ኣኖ እሽ ሌልቴ፡፡ ፊልጶስ አፖሮሴ ኦፐ አንተ ቀረ ቾዬ፥ ቶጵተ ተከ ኡፕነይሰሜ ከ ስልታነ ቀፖ አሰረኬለ ቀረ ኩትኤ ከ አኖ አኬ፡፡ ሀፑረ ቁልቁሎተከ አከ ፊልጶስ ነሞሴ ከፖፐ ኣኖ ከ እሸ ሃሰውሲሶ እሽ ሌሌ፡፡

![](https://cdn.door43.org/obs/jpg/360px/obs-en-45-08.jpg)

ኤቴ ፊልጶስ ሰረኬላሴኔ ከፖፐ ዴሃዴዬ፥ ቶጵተሴ መታፈሴ አኹመምፐይተ አእሰየስ ታፈ ኦፐዬ ፖረ ተኮፐ አነፐፕን፡፡ ነመሴከ አነፐፔ ከ ክዴ፥ ‹‹አከ ላሀ ምነኤ ቀሎተ ቁለሜ፣ ከ አከ ላሀ ጨው ኪኖ ምነኤ፥ አፋድ ቆጭ ምጨን ኪኔ፡፡ ደፐ ቀረ ሙራኔ ቄደሜ፤ ኡመ እሸን ኡልፌስኔ፡፡ ከ አሌ ነፕሴታድ ፒተ ቀረ ፐሼን፡፡››

![](https://cdn.door43.org/obs/jpg/360px/obs-en-45-09.jpg)

ፊልጶስከ ቶጵተሴ ካሰዴ ከ ክዴ፥ ‹‹ሄለ ዌሴን አአነፐፕንተ እኬ ከል?›› ቶጵተሴከ ክዴ፥ ‹‹እነ! አነመ ኦልኬለ አነ ለአይሾ ክናዶ መልይ፥ አነ ከለ እንኤተንሶ፡፡ አተረ ኾዬ ከ አነ ከፐ ኩትኤ፡፡ ሄለ እሰያስ ቆተድ ዴሰ ታፌም ሞን ቆተ ነመ ፕላት ዴሰ ታፌ?››

![](https://cdn.door43.org/obs/jpg/360px/obs-en-45-10.jpg)

ፊልጶስከ አከ እሰያስ ቆተ ዬሱስ ዴሰ ታፌ ቶጵተሴት ኦልኬለ ለአይሼ፡፡ ፍልፖስከ ቆተ ዬሱስ ዴሰ ፖረሴ ኦቶተ ፈየ ቶርንቶ ከ ቃሌተ ዋቀ ቀረ ክቶ ኦፐዬ ፖረደ ፕለ ቀረ እሽ ሌሌው፡፡

![](https://cdn.door43.org/obs/jpg/360px/obs-en-45-11.jpg)

ፊልጶስ እሾ ቶጵተሴከ ኦልን ኣኔን ከ ፖረ ፕሸ ቻን ከፐ ከዬን፡፡ ቶጵተሴከ ክዴ፥ ‹‹ትን፥ አሬ ፕሸ ቻይ፥ ክርስትነ እንኻአ? ከ አከ ቁለምፐይተ ሰረኬለ ቃትሾ ሌሌ፡፡

![](https://cdn.door43.org/obs/jpg/360px/obs-en-45-12.jpg)

ከ ሴመለ ኦልን ፕሻፖፐ ሌከዴን፤ ፊልጶስከ ቶጵተሴ ክርስትነ ኻሼ፡፡ ኤቴ ፕሻፐ ሶኬን ከመዬ፥ ሀፑረ ዋቀከ ኤኖው ፊልጶስ ፖረ ፕለ ኦፐ ቄዴ፤ እከ ቆተ ዬሱስ ዴሰ ኦረ ቶረ ከመ ቻዴ፡፡

![](https://cdn.door43.org/obs/jpg/360px/obs-en-45-13.jpg)

ቶጵተሴከ አእቆተ ዬሱስ ዴሰ ኡፕናዴ መለ፥ ኸሶተን ፒተድፐ ከሌ፡፡

*መታፈ ቁልቁሎተ ከረ ፖረ ቀረ አካንቶ፡- ኮደ ኮደምፐየ 6፡8-8፡5፤ 8፡26-40፡፡*

## 46. ጳውሎስ ክርስታነ ኮዴ

https://openbiblestories.org/l/kxc/story-46/

![](https://cdn.door43.org/obs/jpg/360px/obs-en-46-01.jpg)

ሳውል ኸዮለይተሴ ክሴተ አኦረሴ እስትፋኖስ እሼዬ ሜሀዳሶ ቶይትኖ፡፡ ስትይ ዬሱስን አመኔ፤ ከ ሴመለ ክርስታነ ከመ ፖረ ዳን፡፡ ከ ሀምየ ከ እስከተ ቀቀፐ ከ ትከ ህደ ከሮፐ ከልሰኤ፥ ዩርሳለምይ ትከ ተከ ዴሰ አፕለ ኦፐ አአን፡፡ ቄስተሴ ኩተከ አከ ከተመ ተማስቆ ኦፐ ኣኖ ከ ክርስታነ ቀቀፖ ከ ዩርሳለምፐን ዴኦኤ ፌቃተ ሳውል ዳሼ፡፡

![](https://cdn.door43.org/obs/jpg/360px/obs-en-46-02.jpg)

ሳውል አተማስቆፐ አንተ ቀረ ቾዬ፥ ለአይተ ሞንቴ ኸተ እሸ ፕሰ ከፐንዴሰ ለአዬ፤ እሸከ ፒቶፐ ፕኤ፡፡ ከ ነመ ተከ አእሽ ኪኖ፥ ‹‹ሳውል! ሳውል! ማነኤ አነ ቶር?›› ደከዬ፡፡ ሳውልከ ካሰዴ ከ ክዴ፥ ‹‹አተ ፖቀለይ፥ አት አአይኖ?›› ዬሱስከ እሽ ኦርሼ ከ ክዴ፥ ‹‹አንት አን ዬሱስ፡፡ ሀ አት አነ ቶር!››

![](https://cdn.door43.org/obs/jpg/360px/obs-en-46-03.jpg)

ሳውል ኤቴ ኤለ ኸኤዬ፥ ፓተ አከ እመላሌ፡፡ ሞተዳድከ ሀርከ ቱፐ ቀፔን ከ ተማስቆፐ እሸን ከሌን፡፡ ሳውል ሀከ ሌተ ሴሳትእ ዌኤን ደሜ ኡመ ዌኤን እክኔ፡፡

![](https://cdn.door43.org/obs/jpg/360px/obs-en-46-04.jpg)

ከተመ ተማስቆ ከረ፥ ተማርተ ተከ ሀናንየ ክደሞ ቸ፡፡ ዋቀከ ሀናንየ ክዴ፥፣ ‹‹ትከ ሳውል እሽ ቾፐ ኣኔ፡፡ ከ አከ ለመተ ፓተ አኮኤ እሸ ቀረ ሀርካይት ቀፐዶ።›› ሀናንየ ኾር እክዴ፥ ‹‹ፖቀላዮ፥ ነሞሴ ኤዬ ቾ አክመ ክርስታነ ከመ ፖረ ዳኖ እንደከዬ።›› ዋቀከ እሽ ክዴ፥ ‹‹ኣኔ! አክመ አይሁታተ እሾ ኦረ ኦረ አይሁት እንኮድንን አፕላት ከሱ መኽዮ ኦተይሾኤን እሸ ሬኻዴይ፡፡ እሸ መኽዮ መለ ረኮተ ኩተ ቴየደ።››

![](https://cdn.door43.org/obs/jpg/360px/obs-en-46-05.jpg)

ሴመለ ሀናንየከ ሳውል ከፖፐ ኣኔ፡፡ ከ ቀረ ሀርካድ ቀፐዴ፤ ከ እሽ ክዴ፥ ‹‹ፖረሴ አአሬፐ ዴንቶፐዬ አኬ ቱረ አካዴ፥ ሀ ዬሱስ፤ አከ ለመተ ፓተ አክቶኤ ከ ሀፑረ ቁልቁሎተከ ኬ ከረ እመካዶኤ ኬ ከፖፐ አነ ኤርኬ፡፡›› ሳውልከ ኤኖው ፓተ አኬተ ፓዬ፤ ሀናንየከ ክርስትነ እሸ ኻሼ፡፡ ሴከመዬ ሳውልከ ደምተ ደሜ ከ ኮኮናዴ፡፡

![](https://cdn.door43.org/obs/jpg/360px/obs-en-46-06.jpg)

ሳውልከ ኤኖው አይሁታተ ከተመ ቴማስቆ ከረ ክቶ ቶራ ፓዬ ከ ኪን፥ ‹‹ዬሱስ እነ ዋቀ!›› አይሁታተከ አነመሴ ኦረ ዬሱስ አመኖ አሌ ፐትሰ ከመ አኖ፥ ከ አመ ዴሰ ኦሬ ከ ዬሱስ አመኔ መለ ኦፐ ቀዋውቴ! ሳውልከ አከ ዬሱስ ድንሸምፐይተ ኮዴ አከ ዱከይሰደኔኤ አይሁታተ አመንሲሴ፡፡

![](https://cdn.door43.org/obs/jpg/360px/obs-en-46-07.jpg)

ኩያወ ሌከየ ከመዬ፥ አይሁታተከ ሳውል እከሰ ሱለቴ፡፡ ከ አከ እሸ እሸኔኤ ኦረ ኻረ ከተመ ከፐ እሸ ቱረ አሰዶ ኤርክቴ፡፡ መ ኾር ሳውል ሱላተሴ ኻይሾኤእ ደከዬ፤ ሞተዳድከ አከ ኬለ መያቆ እሸ ቃርቃሬን፡፡ ከ ሀልኬተ ተከዬ ኡንኩለን ኦኽንተ ቀረን እሸ ሌክሼን፡፡ ሳውል ኤቴ ተማስቆ ከረ መያቄ ከመዬ፥ ቆተ ዬሱስ ዴሰ ቶሬተ ከመው ቻዴ፡፡

![](https://cdn.door43.org/obs/jpg/360px/obs-en-46-08.jpg)

ሳውልከ ተማሬወ ኦል አካኤ ዩርሳለምፐ ኣኔ፤ እሾተ ኾር እሸ ፉሬን፡፡ ስትይ ክርስታንተ ተከ ፐርነፓስ ክደሞ፥ ሳውል ቄዴከ ኮደምፐየ ከፖፐን ኣኔ ከ አከ ሳውል ተማስቆ ከረዬ ፉረ መልይ ቶሬ እሾነ ሌሌ፡፡ ሴከመዬ ተማሬወከ ሳውል ቴየዴን፡፡

![](https://cdn.door43.org/obs/jpg/360px/obs-en-46-09.jpg)

ኦረ ረኮተ አዩርሳለም ከረ ዴቴ ምነን ቀሄ ተከ ተከ ከ ፒተ አንሶክየ ኦፐ ሴካዴ ከ ኣኔ ከ ቆተ ዬሱስ ዴሰ እሾተ ቶሬ፡፡ ኦረ አንሶክየ ከረ ቾ ከረ ኩተ፥ ኦረ ኦረ አይሁትእን ኮድንንእ ከረ ሌክ፤ መ ኾር ፓዮተኤ፥ እሾቶፐዬ ኦረ ሌከይተከ አመኔ፡፡ ፐርነፓስ እሾ ሳውልከ ኦሮሴ ሃረየ አመ አመኔኤ፥ ቆተ ዬሱስ ዴሰ ቀረ ፐዳዌተከ እሾነ ኮልሰኤ ከ ትከ ክርስታነ ኮኮነሰኤ ኤፐ ኣኔን፡፡ ኦረ ዬሱስ አመኔ አፓዮተከ ፒሴ አአንሶክየ ከረኤ፥ ‹‹ክርስታነ›› ክደሜ፡፡

![](https://cdn.door43.org/obs/jpg/360px/obs-en-46-10.jpg)

ኩያተ ተከዬ፥ ክርስታነ አንሶክየ ከረ ቾ፥ አደምተ ሙሰተ ከ ቅንሴተ ቀረ ቾዬ፥ ሀፑረ ቁልቁሎተከ እሾነ ክዴ፥ ‹‹ኮዳሴ አንመለ እሾነ ሀላዴ መለ፥ ፐርነፓስ እሾ ሳውል አነ ሬኸ።›› ሴመለ ትከ ክርስታነ አአንሶክየከ ፐርነፓስ እሾ ሳውል ቅንሰቴ፤ ከ ሀርካሶ እሾነ ቀረ ቀፐዴን፡፡ ከ ሴከመዬ አከ ኣነን ከ ቆተ ኦቶተሴ አፈየ አዬሱስ ዴሰ ፖራ አፕለ አሌካት ቶራኔኤ እሾነ ኤርኬን፡፡ ፐርነፓስ እሾ ሳውልከ ኦረ ፒተደ እከ ሌከይተ ኮልሼን፤ ኦረ ሌከይተከ ዬሱስ አመኔ፡፡

*መታፈ ቁልቁሎተ ከረ ፖረ ቀረ አካንቶ፡- ኮደ ኮደምፐየ 8፡3፤ 9፡1-31፤ 11፡19-26፤ 13፡1-3፡፡*

## 47. ጰውሎስ ከ ስላስ ፍልጵስዩስይ

https://openbiblestories.org/l/kxc/story-47/

![](https://cdn.door43.org/obs/jpg/360px/obs-en-47-01.jpg)

ሳውል ኦቶ ፒተሴ አኑቁሰ አሮም ሙክኖ ፕሰ ኦፐ አኖዬ፥ መኸሴ ኻድ አሮምተ ‹‹ጰውሎስ›› ክደሞኔ ሀላመ ፓዬ። ኩያተ ተከዬ ጰውሎስ እሾ ሞታድ ስላስ፥ ኦቶተሴ አፈየ አዬሱስ ዴሰ ሌልቶ ቶራኤ ከተመ ፍልጵስዩስ ኦፐ ኣኔን፡፡ ከ ፖረ ኦፐ ኦራ ኦሎፐ ቅንሴተ ኣኔ ፖረሴ ከተማዬ ለኮፐ ክራ ከፐ ቾ ከፖፐ ኣኔን፡፡ ከ ኤዬኤ እስከቴተ ተከ ነከንቶ አእሽ ልትየ ኪነን አኬን፡፡ እሼተ ዋቀ ጫለን ከ እሸ ዋቀይሰን፡፡

![](https://cdn.door43.org/obs/jpg/360px/obs-en-47-02.jpg)

አከ ኤርከኖስን አዬሱስ ሌለመ ቴየቶኤ፥ ዋቀከ ከርተ ልትየ ፐኔ፤ እሼተ እሾ ቶላድ ከ ክርስትነ ኻኤን፤ እከ አከ ትካድይ እሼተ ከፐ ከላደኔኤ ጰውሎስ እሾ ስላስ ካሰቴ፤ ሴመለ እሾነከ እሼተ እሾ ቶላድ ከፐ ከላዴን፡፡

![](https://cdn.door43.org/obs/jpg/360px/obs-en-47-03.jpg)

ጰውሎስ እሾ ስላስ ፖረ ቅንሴተ ኦፐኤ ኦረ ሌከይተ ኦል አክን፡፡ ኦቶ አውተ ፕሰ ፖሮሴ አቅንሴተ ኦፐ አናኔዬ፥ ከርፕችቴተ ተከ አኤነንተ ሀፑረ ሴተነ ቀፕቶከ እሾነ ከመ ፖረ ዴን፡፡ እሼተከ ሀፑሮሴ አሴተነትን ዋ እቱሮፐ ኮዳት ዴሰ ኦረ ሱመ ሶን፤ ሴመለ እሼተከ ኦሮሴ አኬለ ከልቶኤ ሱሞሴ ኻድን ካጨ ኩተየ ከልን፡፡

![](https://cdn.door43.org/obs/jpg/360px/obs-en-47-04.jpg)

ሼቴሴ አኤነንተ ኦቶ እሾተ ፖረ አናኔዬ፥ ከመኤ ኦር ከ ፖረ ኡሉፕን ከ ኪን፥ ‹‹ኦሮሴ ኦርኸየ አዋቀሴ ዌ ፕሰ ቀረ ቀፖት፡፡ ከ ሳንተ ድነ እሽነ ቶራን!›› ሀከ ጰውሎስ ሚሮኖኤ ሌተ ሌከይቴተ አሴ ኮደን፡፡

![](https://cdn.door43.org/obs/jpg/360px/obs-en-47-05.jpg)

ፕራምፕረ ቀረ፥ ኩያተ ተከዬ፥ ኤቴ ሼቴሴ አኦርኸይቴተ ኡሉፐ ፓይቴዬ፥ ጰውሎስ እሼቶፐ ዴሰ ቲተዌ ከ ሀፑረሴ አሴተነ እሼተ ከረ ቾት ክዴ፥ ‹‹መኸ ዬሱስን እሼተ ከረ ሶኬ!›› ሀፑረሴ አሴተነከ ኤኖው እሼተ ዲሼ ከ ሶኬ፡፡

![](https://cdn.door43.org/obs/jpg/360px/obs-en-47-06.jpg)

ኦራሴ አሼቴሴ አኤነንተ ኬለ ከልቶ ከ አከተ ሚሮዴ! ኤነንቶሴ ሀፑሮሴ አሴተነ መልይ ዋ እቱሮፐ ኮዳት ዴሰ አከ ኦረ ሃሰወተን ኤተንን ኡፕናዴኔይ፡፡ ሴዴ ኔፎ ዋ እቱሮፐ ኦረ ቀረ ከያት ዴሰ ቆተ ሃሰወተን ኤተንን መለ፥ ካጨ አኦሮሴ አኬለ ከልቶ አካነን እደፔን ክዴተ፡፡

![](https://cdn.door43.org/obs/jpg/360px/obs-en-47-07.jpg)

ሴመለ ኦራሴ አሼቴሴ አኤነንተ ኬለ ከልቶከ ጰውሎስ እሾ ስላስ ቀፔን ከ ሳራ አሮም ቱሮፐ እሾነ ዴሀይሰዴን፤ እሾተከ ኦፐ ቅዴን ከ ትከ ህደ ኬሎፐ እሾተ ከልሼን፡፡

![](https://cdn.door43.org/obs/jpg/360px/obs-en-47-08.jpg)

እሾተከ ጰውሎስ እሾ ስላስ ቄዴን ከ ትከ ህዳት ካተ ከሮፐ እሾተ ከልሼን፤ ከ ሎቃሶ ቆይረ ለክይ ኦተንተ ከረ ቀንሼን ከ ህዴን፡፡ አኮድቶመ፥ ሀልኬተ ኦል ቆታትይ፥ መስሙሬተ ከለተኤ ዋቀ ደወዴን፡፡

![](https://cdn.door43.org/obs/jpg/360px/obs-en-47-09.jpg)

አኦፍን እስቀረን ኡፕንን መልይ፥ ፒተከ ሀርሞ ሌሌህቴ! ኻረደ ትከ ህደ ፕሰከ ፐፐነሜን፤ ሰንሰላተደከ ኦረ ህደሜ ፕሰ ቁዳዬ ሴሄን፡፡

![](https://cdn.door43.org/obs/jpg/360px/obs-en-47-10.jpg)

ኣፐሴ ኦረ ህደሜ ቶይትኖከ ሙክታፐ ኸኤ፤ ከ ኤቴ አከ ኻረደ ትከ ህደ ፕሰ ፐፐነሜን አኬዬ፥ ፉሬ! አኦረሴ አህደ ቀሄ እሽ ፐሀናቴ፤ እከ ሴመለ እስ እከሰ ድከዴ፡፡ (ኦቶን ኦሮሴ ህደሜ እሸ ኬለ መያቀዬ፥ አክመ ሳራ አሮም እሸ እሸኔ ኡፕናዴ፡፡) መ ኾር ጰውሎስ እሸ አኬ ከ ኡሉፔ ከ ክዴ፥ ‹‹ዲሼ! እስቀረ ረኮተን ቄደን፡፡ እኖ ፕሰንትን አሬዬ ክነይ።››

![](https://cdn.door43.org/obs/jpg/360px/obs-en-47-11.jpg)

ቶይተምፐይተሴ አትከ ህደ ኬሎ እኸር ከ ጰውሎስ እሾ ስላስ ከፖፐ ኣኔ ከ ካሰዴ ከ ክዴ፥ ‹‹አከን ድኖኤ፥ ማነ ኮዴተ አነ ፋን?›› ጰውሎስከ እሽ ኦርሼ ከ ክዴ፥ ‹‹ፖቀለ ዬሱስ አመኔ፤ ኬ እሾ ቶለይት እድንተኔይ።›› ሴከመዬ ቶይተምፐይተሴ አትከ ህደ ጰውሎስ እሾ ስላስ ትካድፐ ቄዴ ከ ፈይካሶ ቀረ እሾነ ጨቄ፡፡ ጰውሎስከ ነመ ትካድ ከረ ቾ ፕሰኤ፥ ኦቶተሴ አፈየ አዬሱስ ዴሰ ሃሰወንቶ እሾነ ቶሬ፡፡

![](https://cdn.door43.org/obs/jpg/360px/obs-en-47-12.jpg)

ቶይተምፐይተሴ አትከ ህደ እሾ ቶለድ ፕሰከ ዬሱስ አመኔ ከ ክርስትነ ኻኤ፡፡ ሴከመዬ ቶይተምፐይተሴ አትከ ህደከ ጰውሎስ እሾ ስላስ ደምተ ዴሃይሼ እከ ኦልን ኸሶዴን፡

![](https://cdn.door43.org/obs/jpg/360px/obs-en-47-13.jpg)

ፐራይታድይ፥ ሳራ ፒተ ፍልጵስዩከስ ጰውሎስ እሾ ስላስ ትከ ህደ ከረ ሶክሼን ከ አከ ፒተ ፍልጵስዩስ ከረ አሌ ኣነኔ እሾተ ካሰዴን፡፡ ጰውሎስ እሾ ስላስከ ልትየ ከ ኦረ አሞተዳሶ ኮዴ ተከ ነከይተ ኦርሼን ከ ከተሞሴን ኦፐ አሌ ሶኬን፡፡ ኦቶተሴ አፈየ አዬሱስ ዴሰ ቶራምቶከ ፐልደተን አንቴ፥ ትከ ክርስታነ ኔፎከ ኩቱመን አንተ ከመ ቻቴ፡፡

![](https://cdn.door43.org/obs/jpg/360px/obs-en-47-14.jpg)

ጰውሎስ እሾ መሬወ አፕለ አትከ ክርስታነከ ኦቶተሴ አፈየ አዬሱስ ዴሰ ሃሰወንቶ ሀከ ቶርናን ከ ኮልናን ቁደ ከተማደ ሌከያፐ ኣኔን፡፡ ከ አክሞሴ ምነኤው ኦረ ትከ ክርስታነ ከረ ቾ አከ እሾነ ኮኮነይሸን ከ ኮልሸኔኤ ኤርከነደ ሌከየ ታፌን፡፡ ኤርከነዶሴን ኦፐዬ አዴሞ መታፎሴን መታፈ ቁልቁሎተ ከረ ቸኤ ኮዴን፡፡

*መታፈ ቁልቁሎተ ከረ ፖረ ቀረ አካንቶ፡- ኮደ ኮደምፐየ 16፡11-40፡፡*

## 48. ዬሱስ ድንሸምፐይተ አእሽ ክፔተ ዳሰምቴ

https://openbiblestories.org/l/kxc/story-48/

![](https://cdn.door43.org/obs/jpg/360px/obs-en-48-01.jpg)

ዋቀ አፒተ ኡሜዬ፥ ዌ ፕሰ አከተ ፐቃር፡፡ ኡመ ጩፖተን ክቶ፡፡ አታም ከ ሄዋን ኔፎ እኦል ጫለን፤ ከ ዋቀ ከሱ ጫለን፡፡ ፓቀ ታክ ቶተ እንክቶ፡፡ ዋቀ ኔፈይተ አከ ፒተ አሴ ፐሀነቶ ፈዴ፡፡

![](https://cdn.door43.org/obs/jpg/360px/obs-en-48-02.jpg)

ሴተነ አከ ኬኔት ከረ ሄዋን ሰሰፐዶኤ ማከ ቁደን ኮዴ ከ ሃሰወዴ፡፡ ሴከመዬ እሼተ እሾ አታምከ ዋቀ ቀረ ጩፖተ ኮዴን፡፡ ጩፖተ አእሾተ ኮዴን ቀረን ኻቴኤ ነመ ፒተ ቀረ ቾ ፕሰከ ፓቅን ከ ቶን፡፡

![](https://cdn.door43.org/obs/jpg/360px/obs-en-48-03.jpg)

ጩፖተ አአታም ከ ሄዋን ኮዴን ቀረን ኻቴኤ፥ ዋ ሴዴ ቀረ ቀፐ ከ አከተ ኔቀ ከሱከ ኮዴን፡፡ እሾተከ ፓርከለ ዋቀ ኮዴን፡፡ ሴዴ ቀረን ኻቴኤ፥ አውሴት ዴሰ ፓየቴ፥ ነመ ፕሰከ ቀልፔተ ጩፖታትን ደለዴ ከ ፓርከለ ዋቀ ኮዴ፡፡ ኦል አኬተሴ አርተ ነመ እሾ አዋቀ ከረ ክቶከ ጩፖተ ምነን ሀሴ፡፡ መ ኾር ዋቀ፥ ኦልአኬቶሴ አከ ሳንታድ ቀሮፐ ኦርቶኤ ድከዴ፡፡

![](https://cdn.door43.org/obs/jpg/360px/obs-en-48-04.jpg)

ዋቀ ሰኜተ ሄዋን ኦፐዬ ተከ አከ መተ ማከ ቱሞ፥ ሴተነው አከ ከምንታድ ቆሞኤ ክፔተ ዳሼ፡፡ ሴዴ ኔፎ ሴተነ ድንሸምፐይቶሴ እሸ፤ መ ኾር ዋቀ ቶቶፐ እሸ ኻሸ ክዴተ፤ ሴከመዬ ድንሸምፐይቶሴከ ሁፕነ ሴተነ ሀከ ፐረፐራት ዮቀ፡፡ ኼልተደ ሌከየ ከመዬ፥ ዋቀ ድንሸምፐይቶሴ አከ ዬሱስ ኮዴ ኡፕነይሼ፡፡

![](https://cdn.door43.org/obs/jpg/360px/obs-en-48-05.jpg)

ክሴተ አዋቀ ፒተ ፕሰ ፕሸ ፐቴታትን ፐሼዬ፥ ኦረ እሽ አመኔ ድንሰኤ መርከፐ ዴሃይሼ፡፡ ፖረ አሴ ፐሆኔ፥ ነመ ፕሰ ጩፖታድ ቀረን ኻቴኤ ፐቴተ እሸ ፐርፓችስን፤ መ ኾር ዋቀ፥ ነመ እሽ አመኖ ፕሰ ድንሰኤ ዬሱስ ዳሼ፡፡

![](https://cdn.door43.org/obs/jpg/360px/obs-en-48-06.jpg)

ሀከ ፐራደ ድፐደ ሌከያትእ፥ ቄሴወ ቅታቴተ ጩፖተ ሰመይታት ፐርፓችስንቶ አክሰኤ፥ እሾተ መለ አኦልከመን ምትንን መል ከልሶተ ዋቀ ዴሀይሼን፡፡ መ ኾር ከልሶዎሴን ኤዬ ቸ፥ ጩፖታይሾ ሀትሰ እንኤተንኔ፡፡ ዬሱስ ቄስተ ኩተ፡፡ ከ ቄሴወ አፕለ ከፐዬ ኸው ዴሰ፥ አከ ጩፖተ ኦረ ፒተ ፕሰ አሌ ፐትሰ ኤተንሶኤ ከልሶተ ኸወይቴተ እስ ኮዴ ከ ዴሀይሼ፡፡ ዬሱስ ቆተ ቅታቴተ ጩፖተ አነመ መተ ምነ ኮዴ ፕሰ ቄደዴ መለ፥ ቄስተ ኩተ አዱካተ፡፡

![](https://cdn.door43.org/obs/jpg/360px/obs-en-48-07.jpg)

ዋቀ አፕርሃምእ ሌሌ ከ ክዴ፥ ‹‹ኬ ምነን ሰመይተ ፒተ ፕሰከ ሰከመ።›› ዬሱስ ሰኜተ አፕርሃምፐ ደለዴ ፡፡ እሸ ምነን ሰመይተ ፒተ ፕሰከ ሰከሜ፤ ማነ መለ፥ ነመ ዬሱስ አመኔ ፕሰ ጩፖቶፐ እድኔይ፤ ከ አሴው ቅንደ ሀፑረትን ሰኜተ አፕርሃም ኮደ፡፡

![](https://cdn.door43.org/obs/jpg/360px/obs-en-48-08.jpg)

ኤቴ ዋቀ አፕርሃም አከ እናድ ይስሀቅ ከልሶተ ኮዶ ከ ዴሃይሾ እሽ ሌሌዬ፥ ዋቀ ፐከ እናድ አይስሀቅ ኦፐኤ ላሀ ከልሶተ ዴሀይሼ፡፡ እኖ ፕሰንት ጩፖትኖ ምነን ቶተ አኖ ፐርፓችስን! መ ኾር ዋቀ አከ ፐክኖፐ ከልሶተ ኮዶ ከ ቶኦኤ፥ እሳሴ ላሀ ዋቀ ኮዴ ዬሱስ ዳሼ፡፡

![](https://cdn.door43.org/obs/jpg/360px/obs-en-48-09.jpg)

ኤቴ ዋቀ ክፕስ ቀረኤ ኤርከናተ ፕራምፕረ ኤርኬዬ፥ አከ ላሀ ቀጨን ቀፕንን ቀለን ከ ዲከድ ኻረ እሾ መንቱረይተ ቁደ ፍደኔኤ ቶለ እስራኤልት ሌሌ፡፡ ኤቴ ዋቀ ዲኮሴ አኬዬ፥ ትኮሴን ከፐኔ ተርፔ ከ ኣኔ ኡመ ቃረደ ሄላሶት እንእከኔ፡፡ ኮዶሴ ኤዬ ቾ ኮደሜከ ፋስከ ክደሜ፡፡

![](https://cdn.door43.org/obs/jpg/360px/obs-en-48-10.jpg)

ዬሱስ ላሀ ፋስክኖ፡፡ እሸ ቁልቁልተ ከ ጩፖተ መል ቸ፥ ከ ክሴተ ፓሌተ ፋስከት እሸሜ፡፡ ነመ አይኖ ኔፎ ኮዴቴ፥ ኦቶን ዬሱስ አመነዬ፥ ዲከ ዬሱስ ጩፖተ ነሞሴት ኸፈለም፤ ቅታቴተ ዋቀከ ነሞሴ ከፐን ተርፕን፡፡

![](https://cdn.door43.org/obs/jpg/360px/obs-en-48-11.jpg)

ዋቀ ሰመይተሴ ኻድ ሬኸሜ አእስራኤል ኦልይ ኮደይቴተ ኮደዴ፡፡ መ ኾር አመ፥ ዋቀ ኮደይቴተ ሃረየ አነመ ፕሰ ቀረ ከይቶ ኮዴ፡፡ ኮደይቴሴ አሬ ክቶ ሃረየ ምነን፥ ከፈ ሰመይተ ፒተ ፕሰ ኦፐዬ አይኖ ኔፎ ኮድቶ ዬሱስ አመነኔ፥ ከፈ ሰመይተ ዋቀ ኮደ እኤተንሸ፡፡

![](https://cdn.door43.org/obs/jpg/360px/obs-en-48-12.jpg)

ሙሴ ኹመምፐይተ ኩተ አቃሌተ ዋቀ ሰልሼ፡፡ ዬሱስ ኾር፥ ኹመምፐይተ ፕሰ ቀሮፔለ ቀፖ፡፡ እሸ ዋቀ፤ ሴመለ ዋ እሸ ኮዴ ከ ሃሰወዴ ፕሰ ኮደ ዋቀ ከ ቃሌተ ዋቀ፡፡ ሴመለ ዬሱስ ቃሌተ ዋቀ ክደም ከ ሀላም፡፡

![](https://cdn.door43.org/obs/jpg/360px/obs-en-48-13.jpg)

ዋቀ ሰኜተ ኑቁሰ አታውትፐ ተከ አከ ኑቁሰ ኮዶ ከ ሰመይተ ዋቀ ቀረኤ ሀከ ፐረፐራት ኑቁሱሞኤ ክፔተ ዳሼ፡፡ ዬሱስ ቆተ ድንሸምፐይተ እነ ዋቀ ኮዴ መለ፥ ኸውዴሰ አሰኜሴ አታውትፐ አሀከ ፐረፐራት ኑቁሱመ ኤተንሾ እሸ፡፡

![](https://cdn.door43.org/obs/jpg/360px/obs-en-48-14.jpg)

ታውት ኑቁሰ እስራኤል፤ ዬሱስ ኾር ኑቁሰ ኡመተ ፕሰ! እኦረ ከ ዴአ ከ ሙረ ዱካተ እሾ ነከይተኔ መንክስቴታድ ሀከ ፐረፐራት ሙክሸ፡፡

*መታፈ ቁልቁሎተ ከረ ፖረ ቀረ አካንቶ፡- መታፈ ኡመተ 1-3፤ 6፤ 14፤ 22፤ መታፈ ሶከተ 12፣ 20፤ ሰሙ. አ2ተ 7፤ እፕ. 3፡1-6፤ 4፡14-5፡10፤ 7፡1-8፡13፤ 9፡11-10፡18፤ ኬሌ. 21፡፡*

## 49. ኮደይቴተሴ ሃረየ አዋቀ

https://openbiblestories.org/l/kxc/story-49/

![](https://cdn.door43.org/obs/jpg/360px/obs-en-49-01.jpg)

ኤርከምፐቶተ ተከ፥ ኤነንተ ተከ እስን ክቶ ከ ማርያም ክደምቶ አከ እነ ዋቀ ኸይቶ እሽ ሌሌ፡፡ ሴመለ እሼተ አእስን ክቶዬ እነ ዲርተ ኻይቴ ከ ዬሱስ ኪቴ ከ ሀሌቴ፡፡ ሴመለ ዬሱስ ዋቀ ከ አሬን ነመ፡፡

![](https://cdn.door43.org/obs/jpg/360px/obs-en-49-02.jpg)

ዬሱስ አከ ዋቀ ኮዴ ዱከይሰተኤ፥ ደኾወ ሌከየ ኮዴ፡፡ ፕሸ ቀረንዴሰ እኣኔ፤ ፑፔተ እጨው ኪሼ፤ ፓቆለየ ሌከየ ድንሼ፤ ሴተነ እሶክሼ፤ አሌኤ እኻሼ፤ ከ አሴው ላቆተ ኬን እሾ ሙርኩጨ ሸሸከ ለክ አከ ነመ ኩመ ኬን (5,000) ቀሮፔለ ቾ ቀረ ከይቶ ኮዴ፡፡

![](https://cdn.door43.org/obs/jpg/360px/obs-en-49-03.jpg)

ዬሱስ ኔፎ ኮልሰምፐይተ ኩተ፤ ቆተ እነ ዋቀ ኮዴ መለ፥ ኡኩሜተኔ ሃሰወዴ፡፡ አከ እስ ጫለንተን ምነኤ ኦረ ፕለ ከሱ አሴው ጫለደ ክዴ ከ ኮልሼ፡፡

![](https://cdn.door43.org/obs/jpg/360px/obs-en-49-04.jpg)

እሸ አከ ቴየንታይሽን እሾ ዋ ቀፕተኔ ፕሰ ጫለንተን ምነኤ ዋቀ ጫለተ እሽን ፐርፓችስን ክዴ ከ ኮልሼ፡፡

![](https://cdn.door43.org/obs/jpg/360px/obs-en-49-05.jpg)

ዬሱስ፥ መንክስቴተ ዋቀ ወ ፒተ ቀረ ቸ ፕሰ ቀሮፔለ አኡልፌሰምቴ ክዴ፡፡ ነመ ፕሰኤ ዋ ድኬት አከተ ፐርፓችስነ፥ ከፈ መንክስቴተ አዋቀ ኮዴተ፡፡ መንክስቴተ ዋቀ ኦፐ ከልተኤ፥ ጩፖታይሽን ኦፐ ድኔተ እሽን ፐርፓችስን፡፡

![](https://cdn.door43.org/obs/jpg/360px/obs-en-49-06.jpg)

ዬሱስ ኦረ ዴሞ አክመ እሸ ቴየዶ ከ ድኖ፤ አፕለኤው ኾር አክመ እሸን ቴየንን ኮልሼ፡፡ ኦረ ዴሞ አክመ ፒተ ፈየ ምነ ክዴ፡፡ ኦቶተሴ አፈየ አዬሱስ ቴየደን ከ ድነን፡፡ ኦረ ዴሞ ኾር አክመ ፒተ ኮኮህተ አኾተ ቃሌተ ዋቀ ከሮፐ ኩልንንክንን እከ ደልተ ተከ ኔፎ ደልንክንን ምነ፡፡ ኦሮሴ ኤዬ ቾ፥ ኦረ አኤርከነ ዬሱስ ዴሰ ሌለመ ቴየንንክንን ከ መንክስቴታድ ኦፖፐ እንከልን፡፡

![](https://cdn.door43.org/obs/jpg/360px/obs-en-49-07.jpg)

ዬሱስ፥ አክመ ዋቀ አከተ ጩፖለየ ጫለኖ ኮልሼ፡፡ እሾተ ዲሰተ ኮዴተ ከ ሄላድ ኮደተ ፋን፡፡

![](https://cdn.door43.org/obs/jpg/360px/obs-en-49-08.jpg)

ዬሱስእው አክመ ዋቀ ጩፖተ ኔዶ እኖ ሌሌ፡፡ ክሴተ አታም ከ ሄዋን ጩፖተ ኮዴኔዬ፥ ጩፖሴ ሰኜታይሾ ፕሰ ምድቴ፡፡ ሴዴ ቀረን ኻቴኤ፥ ነመ ፒተ ቀረ ቾ ፕሰከ ጩፖተ ኮን፤ ከ ዋቀ ኔፎ ከፐ ፑርሰም፡፡ ሴመለ ነመ ፕሰ ፓርከለ ዋቀኤ ኮዴ፡፡

![](https://cdn.door43.org/obs/jpg/360px/obs-en-49-09.jpg)

መ ኾር፥ ዋቀ ቆተ ድኬት ኦረ ፒተ ጫለዴ መለ፥ እናድ ተከኔ ዳሼ። ሴዴ ኔፎ ነመ እኖሴን ኻድ አመኖ ፕሰ፥ አከ ቻተ ፐረፐረ አከዶ ዲሼይ፥ አከ ፐቶ መለን፡፡

![](https://cdn.door43.org/obs/jpg/360px/obs-en-49-10.jpg)

ጩፖታይሽን ምነኔ አደፐምፐየይ ቶተ እሽን ፐርፓችስን፡፡ ዋቀ እሽን ቀረ ሚሮተ እሸ ፋን ሄኔ፤ መ ኾር፥ እሽነ ቀረ ሚሮተ ከፓዬ፥ ዬሱስ ቀረ ሚሮዴ፡፡ አዬሱስ መስቀለ ቀረ ቶኤዬ፥ ቅታቴተይሽነ ቴየዴ፡፡

![](https://cdn.door43.org/obs/jpg/360px/obs-en-49-11.jpg)

ዬሱስ ፐከነ ጩፖተን ኮኔ፤ መ ኾር፥ ጩፖታይሽን ከ ጩፖተ አፒተ ቀረ ክቶ አእነ ነመ መተ ምነኤ አሌ ፐትሰኤ፥ ቀተአመ ከ ከልሶተ ዱካተ ኮደ ከ ቶተ ጫለዴ፡፡ ዬሱስ ቆተ ከልሶተ እስ ኮዴ ከ ዳሼ መለ፥ ዋቀ ጩፖተ ፕሰ፤ ጩፖተ አከተ ኔቀ ከሱእ ዲሰተ ኮደ እኤተንሸ፡፡

![](https://cdn.door43.org/obs/jpg/360px/obs-en-49-12.jpg)

ኮደዳስን አፐቃረ እሽን ድንሰ እንኤተንሸን፡፡ ዋቀ ኦል አኬተኤ ዋ ኮደ ኤተንሰኔ ተከን ኔፎ እንቻን፡፡ ዬሱስ ፐተ ጩፖታይሽን እሽነ ጨቀ ኤተንሸ፡፡ ዬሱስ አክመ እነ ዋቀ ኮዴ፥ ከ ፐከይሽን ኦፐ መስቀለ ቀረ ቶኤ፥ ዋቀከ ቶቶፐ እሸ ኻሼ አመኔተ ፐተ እሽን ፐርፓችስን፡፡

![](https://cdn.door43.org/obs/jpg/360px/obs-en-49-13.jpg)

ዋቀ ነመ ዬሱስ አመኖ ከ ፖቃላድ ኮደኖ ከ ቴየኖ፥ አይኖ ኔፎ አኮድቶ እድንን፡፡ ቴየንቶለየ ኮድቴ ታክ ቴኮለየ፥ ዲርተ ኮድቴ ታክ እስከተ፥ ነመ ቅም ኮድቴ ታክ ኸዮለይተ፥ ታክ ፒተ ሄንቴ ከላንተኔዬ፥ ሴዴ ዌኤን፡፡ ዋቀ እሽን ቁዶፐ ዴሃተ አከ ኤተንሾኤ እሽን ጫለን፤ ከ አከ ዬሱስ አመንተኔ ፋን፡፡

![](https://cdn.door43.org/obs/jpg/360px/obs-en-49-14.jpg)

ዬሱስ አከ አመንተን ከ ክርስትነ ኻተኔ እሽን ካሰን፡፡ ዬሱስ አከ ድንሸምፐይተ፥ እነ ዋቀ ተከን ኮዴ እአመንተኔ? አከ ጩፖለየ ኮድቴን፥ ከ ከድ ዋቀ እሽን ቀታነዬ አክመ ፐርፓችስንቶ እአመንተኔ? ዬሱስ ጩፖታይሽን ፐተሰ መለ፥ አከ መስቀለ ቀረ ቶኤ እአመንተኔ?

![](https://cdn.door43.org/obs/jpg/360px/obs-en-49-15.jpg)

ኦቶን ዬሱስ እሾ ኮደ እሸ እሽነ ኮዴኔ አመንተኔዬ፥ እሽነ አክርስታነ! ዋቀ ሴተነ እሾ መንክስቴተ ቱከንተ ከረ እሽን ሶክሼከ መንክስቴተ አለይተ ዋቀ ከረ እሽን ኻዬ፡፡ ዋቀ ሳንተሴ ኻይሽን ኬርቴ እሾ አጩፖተ አእሽን ፓተ ኮደንተኔ አሌ ፐሼ ከ ሳንተ ሃረየ አቁልቁሉመ እሽነ ዳሼ፡፡

![](https://cdn.door43.org/obs/jpg/360px/obs-en-49-16.jpg)

እሽነ አክርስታነ፤ ኮደ አዬሱስ ኮዴ ምነን፥ ዋቀ ጩፖታይሽን እእሽነ ዲሼ፡፡ አመ ኦር ፓርከለ ዋቀ ኮደ ከፐዬ፥ አከ ሞተዳድ አቁደ ዴሀ ኮድቴን ምነኤ እሽን ድከ፡፡

![](https://cdn.door43.org/obs/jpg/360px/obs-en-49-17.jpg)

ኦቶን ሞተደ ዋቀ ከ ኮደምፐየ አዬሱስ ኮድቴኔዬ፥ ዋ ዬሱስ እሽን ኮልናትእ አጨጨምተን፡፡ ከደ ፑኑ ክርስታነ ኮድቴን ኔፎዬ፥ አመ ኩል ጩፖተ ኮዳኤ ኤከይሰተምተን፡፡ መ ኾር ዋቀ አአመነሜይ፥ ኦቶ ጩፖታይሽን ኦፐ አረረ ከልተኔዬ፥ እንእሽነ ዲሸ ኪን፡፡ ከ ሁፕነ አእሽን ጩፖተ ሺሽተን እሽነ ዳሸ፡፡

![](https://cdn.door43.org/obs/jpg/360px/obs-en-49-18.jpg)

ዋቀ አከ ቅንሰተን፥ ከ ቃሌታድ ኮለተን፥ ከ ክርስታነ አፕለ ኦል እሸ ዋቁምሰተን፥ ከ ዋ እሽነ ኮዴ ኦረ ፕላት ሌልተኔኤ እሽን ካሰን፡፡ ዎሴን ፕሰ አከ እሸ ቁዶፐ ዴሃተን ከ ኦል አክተኔ እሽን ቃርቃረን፡፡

*መታፈ ቁልቁሎተ ከረ ፖረ ቀረ አካንቶ፡- ሮም 3፡21-26፤ 5፡1-11፤ ዮሀንስ 3፡16፤ መርቆስ 16፡16፤ ቆለስያስ 1፡13-14፤ ቆሮ. አ2ተ 5፡17-21፤ ዮሀ. አ1ተ 1፡5-10፡፡*

## 50. ዬሱስ እኦረ

https://openbiblestories.org/l/kxc/story-50/

![](https://cdn.door43.org/obs/jpg/360px/obs-en-50-01.jpg)

ሀከ ፐረ ኩም ለክ (2,000) ምነ ቾኤ፥ ኦረ ፒተ ቀረ ቾ ሌከይተ፥ ኦቶተሴ አፈየ አቆተ ድንሸምፐይተሴ አዬሱስ ዴሰ ቶረምቶ ደከየ ቱፐ ቻን፡፡ ትከ ክርስታነ ኔፎ ኩተተኔ ከላቴ፡፡ ዬሱስ ኦቶ ፕራምፕረ ከይቶዬ፥ አክመ ኦሮ ክፔተ እእኖ ዳሼ፡፡ እሸ ከደ ፑኑ አመ እንኦርን ኔፎዬ፥ ክፔታድ እቶይትን፡፡

![](https://cdn.door43.org/obs/jpg/360px/obs-en-50-02.jpg)

አንዴነ ዬሱስ አሰተ ቀረ ክኖዬ፥ ዋቀ አክመን ሳንተ ቁልቁሎታትን እሾ አእሸ ኡልፌስኖን ከላኖ ፋን። ከ አሴው አከን ቆተ መንክስቴታድት ዴሰ ኦረ ፕላት ቶርኖ ከሱ ፋን፡፡ አዬሱስ ፒተ ቀረ ቾዬ እክዴ፥ ‹‹ተማሬዋዮ፥ ኦቶተሴ አፈየ ቆተ መንክስቴተ ሞንታት ዴሰ ሃሰወንቶ ፒተ ፕሰ ቀረኤ፥ ኦረ ፖረ ፕሰ ኦፐ ቾት ቶራን፤ ስትይ ፕራምፕረ ከ ኮደ።››

![](https://cdn.door43.org/obs/jpg/360px/obs-en-50-03.jpg)

አመ ኔፎ ኦረ ፒተ ሌከይተ ቆተ ዬሱስ ዴሰ እንደከይኔ፡፡ አዬሱስ ሞንቶፐን ኦርን ቱረኔ፥ አከ ክርስታነ ኦቶተሴ አፈየ ኦረ ፐከነኤን ደከይንን ቶራኔ እሾተ ሌሌ፡፡ ከ ክዴ፥ ‹‹ኣነ ከ ኦረ ፒተ ፕሰ ተማሬዋዮ ኮደ!›› ‹‹ፌረ ኔፎ እከይቴይ!››

![](https://cdn.door43.org/obs/jpg/360px/obs-en-50-04.jpg)

ዬሱስከ አሴ ክዴው፥ ‹‹ኦርኸይተ ፖቀላድ ቀረን ቀፖ፡፡ አክመ ሙክሰምፐየ ፒስት አነ ኔደዴን ምነኤ፥አነ ምነኔው ረኮተ እሽን ቀረ ቄደን ከ እሽን ሌይሸን፡፡ ከደ ፑኑ ፒተ ቀረ ረኮተ ቴየንተን ኔፎዬ፥ እንፉረን፤ ማነ መለ፥ አንት ሴተነሴ ፒሴ ፕድኖ እንፑቴይ፡፡ እሽነ ኦቶ አነ አመንተን ከ ሀከ ፕረምፕራት ኮኮነተኔዬ፥ ስትይ ዋቀ እእሽን ድንሸ።››

![](https://cdn.door43.org/obs/jpg/360px/obs-en-50-05.jpg)

ዬሱስ ኦቶን ፕራምፕረ ከይንይ፥ ዋ ኦረ ቀረ ከያት ዴሰ ተማሬዋድ ኦልኬለ ለአሰኤ ቶራ ተከን እሾተ ሌሌ፡፡ ከ ክዴ፥ ‹‹ነመ ተከ ዱላድፐ ከፐ ፈየ አይላዴ፡፡ አሙኬዬ፥ ፓርከለከ ዴኤን ከ ከፐሴ ኦፐንዴሰ ዬቶተ ቁፔን ከ ኬለ ተዌን፡፡››

![](https://cdn.door43.org/obs/jpg/360px/obs-en-50-06.jpg)

‹‹ኤቴ ከፐሴ አይለሜ ዴሄዬ፥ ኦርኸየ ኣፐሴትከ እሸ ካሰዴን ከ ክዴኔ፥ ‹ፖቀለይ፥ ዱሎሴ ኦፐኤ ከፐ ፈየኤ አይልቴ፡፡ አተ ኸው ዬቶተ አይሼዬ ኦፖፐ ዴቴ?› ፖቀለሴሴከ እሾተ ኦርሼን ከ ክዴኔ፥ ‹ፓርከለ ኦፐ ቁፔ።› ››

![](https://cdn.door43.org/obs/jpg/360px/obs-en-50-07.jpg)

ኦርኸያሴኔከ እሽ ኦርሼን ከ ክዴኔ፥ ‹‹እንዬቶሴ አሌ ሹክነ?›› ፖቀላሶከ ክዴ፥ ‹‹እነ! ኦቶን እሹክተኔዬ፥ ከፐሴ ኩል ኦፐ ሹክተኔይ፥ ሀከ ፌረ ከይንቶ አሰ ከ ኦሎፐ ሹከ ከ አሌ ኩፐ፤ መ ኾር ከፐሴ ኮሳፖፐ አነ ከልሸ፡፡›››

![](https://cdn.door43.org/obs/jpg/360px/obs-en-50-08.jpg)

ቶሮሴን ኾር ተማሬወኤን ከሌ፤ ሴመለ አከ ኦልኬለ እሾተ ለአይሾኤ ዬሱስ ካሰዴን፡፡ ዬሱስከ እሾተ ክዴ፥ ‹‹ነሞሴ ከፐ ፈየ አይሌ፥ ድንሸምፐይተሴ ምነ፡፡ ዱለው ፒሴ አሬ ክቶ ምነ፡፡ ከፐሴ አፈየ ኔፎ፥ ኦረሴ አመንክስቴተ ዋቀ ምነ፡፡››

![](https://cdn.door43.org/obs/jpg/360px/obs-en-50-09.jpg)

‹‹ዬቶተው፥ ኦረሴ ፐርከ ኔቀ ኮዴ ምነ፡፡ አዬቶተ አይሌ፥ ፓርከለሴኔ ሴተነ፡፡ ፌረ ኔፎው፥ ፕራምፕረ ፒሴት። ፌረምፐየ ኤርከምፐቶወ አዋቀ፡፡

![](https://cdn.door43.org/obs/jpg/360px/obs-en-50-10.jpg)

‹‹ፕራምፕረ ፒተትይ፥ ኤርከምፐቶወ ኦረ ፐርከ አሴተነ ኮዴ ፕሰ ፖረ ተኮፐ ኦሎፐ ኦርሸን ከ ኩፓነ አፕተ ኦፖፐ እሾተ ደከን፤ እከ ፖሮሴ ኦፐዬ ፖረ ኡሉፐን፥ ከ ሱሩምተ ኩታትን እልከ ኦልን ቆመን፡፡ ስትይ ቁልቁሎወከ መንክስቴተ ኣፐይሾትይ አከ ፒርቶተ ምነ ለአየን፡፡››

![](https://cdn.door43.org/obs/jpg/360px/obs-en-50-11.jpg)

ዬሱስከ ፕራምፕረ ፒተ ቱረኔ አክመ ፒሴ ቀሮፐ ኦሮ ሌሌ፡፡ አክሞሴ አኣኔ ምነኤ ኦረ፤ እን ኔፎ፥ ደክንተ ሶአኤ ቀፕናደ፣ ከ ሞንቴ ኡረቶፐ ዴአ፡፡ ዬሱስ ኦቶ ኦሮዬ፥ ነመ ክርስታነ ኮዴ ከ ቶኤ ፕሰ ቶቶፐ ኸአ ከ ሞንቴ እሸ ከፖፐ ኣነ፡፡

![](https://cdn.door43.org/obs/jpg/360px/obs-en-50-12.jpg)

ስትይ ክርስታነ አሌንን ሞንቶፐ ቄደመ ከ እሳሴኔ ክርስታነ ኮዴ ከ ሌኤ አፕለ ኦል አከን፡፡ ከ ኤዬኤ ፕሰንት ዬሱስ ኦል ክናደን፡፡ ሴከመዬ፥ ዬሱስከ ሰመይታድ ኦልይ ነከይተ እመኮተ እሾ ተኩምተን ሀከ ፐረፐራት ከላደ፡፡

![](https://cdn.door43.org/obs/jpg/360px/obs-en-50-13.jpg)

ዬሱስ አእሽ አመኔ ፕሰንተኤ ኩሌተ ኡልፌነ ዳሰተ ኸሰ ከሌ፡፡ እሾነከ ነከይተ እመኮተን ዋቀ ኦልይ ሀከ ፐረፐራት ከላደን ከ ኑቁሱመን፡፡

![](https://cdn.door43.org/obs/jpg/360px/obs-en-50-14.jpg)

መ ኾር ዋቀ፥ አዬሱስ እንአመንን ፕሰ ቀረኤ ፈረተ፡፡ ከ ስኦልሴ አሀከ ፐረፐራት ከረ ፖየን ከ ሱሩምተን እልካሶ ኦልን ቆመን ከሮፐ እሾነ ደከ፡፡ አፕተ አፐከነ ልጰን ሰሀንንከ እሾነ ኩፐ ቁደ ተወ፤ ኡመ እስከ ፐከነ እሾነ ደመ እንቃትሸን፡፡

![](https://cdn.door43.org/obs/jpg/360px/obs-en-50-15.jpg)

ዬሱስ ኦቶ ኦሮዬ፥ ሴተነ እሾ መንክስቴታድ ፕሰ ተከ አሌ ፐሸ፡፡ ከ ሴተነ እሾ ኦረ ዋቀ አጨጨመ ከፐዬ እሸ ከመ አንተ ሬኸዴ ፕሰ ኦልይ ስኦልሴ አኦፐ ሀከ ፐረፐራት ኩፐደን ከሮፐ ደከ፡፡

![](https://cdn.door43.org/obs/jpg/360px/obs-en-50-16.jpg)

አታም እሾ ሄዋን ቆተ ዋቀ አጨጨመ ዲሼን ከ ጩፖተ ፒሴ ቀሮፐ ቄዴን መለ፥ ዋቀ ፒሴ ጪጬ ከ ፐትሰ ፒሰዴ፡፡ መ ኾር ኩያተ ተከዬ ዋቀ፥ ሞንተ ሃረየ እሾ ፒተ ሃረየ ኡመ፡፡

![](https://cdn.door43.org/obs/jpg/360px/obs-en-50-17.jpg)

ዬሱስ እሾ ሰመይታድከ ፒሴ ሃረየ ኦፐ ከላደን፤ ከ ዋ ቸ ፕሰ ቀረ ሀከ ፐረፐራት ኑቁሱመን፡፡ እሸ እልማመ ፕሰ እልደ ኬለ ሀቀ፤ አሬፐ ዴሰ ረኮተ፥ ኘረሀተ፥ ፖይተ፥ ኔቁምተ፥ ሱሩምተ፥ ታክ ቶተ እንቻቶ፡፡ ዬሱስከ መንክስቴታድ ነከይተ ከ ሙረ ዱካተትን ሙክሸ፤ ከ ሀከ ፐረፐራት ሰመይታድ ኦል ክናደ፡፡

*መታፈ ቁልቁሎተ ከረ ፖረ ቀረ አካንቶ፡- ማትዮስ 24፡14፤ 28፡18፤ ዮሀንስ 15፡20፤ 16፡33፤ ኬሌ. 2፡10፤ ማትዮስ 13፡24-30፤ 36-42፤ ቴሴ. አ1ተ 4፡13-5፡11፤ የይቆፕ 1፡12፤ ማትዮስ 22፡13፤ ኬሌ. 20፡10፤ 21፡1-22፡21፡፡*