# unfoldingWord Open Bible Stories — لُری (Luri, Northern)

- Language code: `lrc`
- Canonical page: https://openbiblestories.org/l/lrc/
- Stories in this file: 50 of 50
- Published by: fa_gl
- Last release: 2023-11-08
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the لُری translation; it is not a translation of the whole Bible.

## 1. آفَرینِش

https://openbiblestories.org/l/lrc/story-1/

![](https://cdn.door43.org/obs/jpg/360px/obs-en-01-01.jpg)

دِ اَوَل، خدا هَمَه چی‌نِه اِیطوری خَلق کِرد: او دُنیا ئو هَمَه موجودیانِ دِ شیش روز خَلق کِرد. دِما دُرِس کِردِن زِمی، سی‌یَه‌کِه خدا هَنی هیچ چی‌نِه شکل نَدِئَه بی، هَمَه جا تاریک ئو حالی بی. اَما روحِ خدا وِ ریی آویا بی.

![](https://cdn.door43.org/obs/jpg/360px/obs-en-01-02.jpg)

اوسِه خدا گُت: « روشْنایی بووَه » ئو روشْنایی بی. خدا دیی روشْنایی خوئَه ئو نُومِش نیا وِ "روز". ئو خدا تاریکی‌نِه دِ روشْنایی جِگا کِرد ئو نُومِش نیا وِ "شُو". خدا روشْنایی‌نِه دِ روزِ اَوَل خَلق کِرد.

![](https://cdn.door43.org/obs/jpg/360px/obs-en-01-03.jpg)

دِ روز دوئِمِ آفرینش، خدا گُت: «فِلَکی وِ بالا آویا بیا وِ وجود» ئو چِنی بی. خدا نُوم اُو فِلَکِه نیا وِ آسِمُو.

![](https://cdn.door43.org/obs/jpg/360px/obs-en-01-04.jpg)

دِ روز سِئِم خدا گُت: «آویا زیر آسِمُو دِ یِه جا جَم بان تا حُشکی پیا با.» او نُوم حُشکی‌‌نِه نیا وِ «زِمی» ئو نُوم آویانِه نیا وِ «دَریا». خدا دیی هَرچی کِه خَلق کِردَه خوئَه.

![](https://cdn.door43.org/obs/jpg/360px/obs-en-01-05.jpg)

اوسِه خدا گُت: «هَمَه جور گیا ئو دِرَختی وِ ریی زِمی سُوز بَکَن» ئو چِنی بی. خدا دیی هَرچی کِه خلق کِردَه خوئَه.

![](https://cdn.door43.org/obs/jpg/360px/obs-en-01-06.jpg)

دِ چهارِمی روزِ آفرینِش، خدا گُت: « دِ آسِمُو روشْنایی پیا با.» ئو وِ چِنی خدا اَفتاو، ماه ئو آسارَه‌یانِه خَلق کِرد تا وِ زِمی روشْنایی بِئَن پَس روز، شُو، فَصل‎یا ئو سال‎یا دِ یَک جِگا بین. خدا دیی هَرچی کِه خلق کِردَه خوئَه.

![](https://cdn.door43.org/obs/jpg/360px/obs-en-01-07.jpg)

دِ روزِ پَنجِم، خدا گُت: «ماهی‌یا، دَریانِه پُر بَکَن ئو پَرَندیا دِ آسِمُو پِر بِیرَن». وِ چِنی او تَمُومِ ماهی‌یا ئو پَرَندیانِه خَلق کِرد. خدا دیی هَرچی کِه خَلق کِردَه، خوئَه ئو وِشُو برکت دَ.

![](https://cdn.door43.org/obs/jpg/360px/obs-en-01-08.jpg)

دِ شیشِمی روزِ آفرینِش، خدا گُت: « زِمی دِ هَمَه جور جُونِوَری پُر با» ئو هَرچی خدا گُت اَنجُوم بی. اُو حِیوُن‎یا، جُونِوَریا، خَزندَیا ئو حَشَرَیا بین. خدا دیی هَرچی خلق کِردَه خوئَه ئو راضی بی.

![](https://cdn.door43.org/obs/jpg/360px/obs-en-01-09.jpg)

اوسِه خدا فرمایش کِرد: «آیمِ چی خُم بَسازِم تا وِ زِمی ئو جُونِوَریاش فرمُونروایی بَکَه.»

![](https://cdn.door43.org/obs/jpg/360px/obs-en-01-10.jpg)

اوسِه خدا کَمی خاک گِرِت، وَنِه وِ شِکلِ آیم دِراُوِرد ئو دِش زِنِئی هَمیشه‎ئِی دَمَن. خدا نُومِ اونِه نیا وِ آدم ئو باغ گَپی سیش آمادَه کِرد تا دِ اوچِه زِنِئی بَکَه ئو ویردارِش با.

![](https://cdn.door43.org/obs/jpg/360px/obs-en-01-11.jpg)

خدا دو تا درختِ خاصِ نیا دِ مین اُو باغ، یَکی درختِ زِنِئی همیشه‎ئی ئو اُو یَکی درختِ شناختِ خو ئو گَن. خدا وِ آیِم گُت کِه می‌تُونَه دِ میوَه هَمَه درخت‎یا باغ بُحُورَه بِه‌جُز میوَه درختِ شِنَخت خو ئو گَن. اَر او دِ میوَه اُو درخت می‌حَرد، می‌مُرد.

![](https://cdn.door43.org/obs/jpg/360px/obs-en-01-12.jpg)

اوسِه خدا گُت: « خو نیسا کِه آیِم تَنیا بَمُونَه.» سی‌یَه‌کِه حِیوُن‎یا نِمی‌تُونِسِن هُمدَم خوئِی سی آیِم بووَن.

![](https://cdn.door43.org/obs/jpg/360px/obs-en-01-13.jpg)

وِ ای خاطِر خدا آدمِه بُرد دِ خاوِ سَنینِی. اوسِه یَکی دِ دِنَیاشِه گِرِت ئو دِش، زینَن خَلق کِرد ئو اُوِردِش وِ تِه آدم.

![](https://cdn.door43.org/obs/jpg/360px/obs-en-01-14.jpg)

وَختی آدم اونِه دیی، گُت: « ای موجود دِ طُور مِنَه. نُومِش مینِم وِ زَن، سی‌یَه‌کِه دِ پیا گیرِس.» وِ ای خاطِرَه کِه پیا دِ بُوئَه ئو دا خُش جِگا مووَه ئو وا زینَش یکاگیر می‎کَن ئو دِ وَ وا دِما، اُو دُو تا، مووَن وِ یَکی.

![](https://cdn.door43.org/obs/jpg/360px/obs-en-01-15.jpg)

خدا پیا ئو زِینَن چی خُش خلق کِرد. او اونُونِه برکت دَ ئو فرمایش کِرد: «بارور بایت، بَچُونی بیاریت ئو زِمینِه پُر بَکیت.» ئو خدا دیی هرچی کِه خلق کِردَه خوئَه ئو راضی بی. هَمَه یِنُو دِ روز شیشِم پیش اُما.

![](https://cdn.door43.org/obs/jpg/360px/obs-en-01-16.jpg)

وا رَسِسِن روز هَفتِم، خدا کارِ آفرینِشِ تَمُوم کِرد، روز هَفتِمِ برکت دَ ئو وِش مقدس گُت؛ سی‌یَه‌کِه روزی بی کِه خدا دِما تَمُوم بی‎یِن کارِ آفرینش، آرُوم گِرِت. وِ ای طُوری خدا دُنیا ئو تَمُومِ مَخلوق‎یانِه خلق کِرد.

*مَتَلِی گِرِتِسَه دِ کِتآو مقدس ( کِتآو پیدایش فصل 1 ئو 2)*

## ۲. اُمایِن گناه وِ دُنیا

https://openbiblestories.org/l/lrc/story-2/

![](https://cdn.door43.org/obs/jpg/360px/obs-en-02-01.jpg)

آیِم ئو زینَش دِ باغ قِشَنگی کِه خداوند سی‌شُو دُرِس کِردی، وا خوشی زِنِئی می‌کِردِن. وا یکه لُخت بی‎ین، شَرمی دِش ناشدِن سی‌یَه‌کِه هَنی گناه وِ دُنیا نیومائه بی. اونُو بیشتِر دِ باغ قِدَم میزَن ئو وا خدا صُبَت می‌کِردِن.

![](https://cdn.door43.org/obs/jpg/360px/obs-en-02-02.jpg)

َما مارِ حُقَه بازی دِ مین اُو باغ بی. اُو مار دِ زینَه پُرسی: «حقیقت دارَه کِه خدا شِمانِه دِ حَردِن میوَه تَمُومِ درخت‎یا باغ مَنع کِردَه؟»

![](https://cdn.door43.org/obs/jpg/360px/obs-en-02-03.jpg)

زینَه جِوُو دَ: «اِیما اِجازَه داریم دِ میوَه هَمَه درخت‎یا بِه‌جُز میوَهِ درختِ شِنَخت خو ئو گَن بُحُوریم. خدا وِ اِیما گُتَه: «اَر شِما دِ میوَه اُو درخت بُحُوریت ئو یا حتی وِش دَس بَزِنیت، می‌میریت.»

![](https://cdn.door43.org/obs/jpg/360px/obs-en-02-04.jpg)

مار وِ زینَه گُت: «یِنَه دُرس نیسا! شِما نِمی‌میریت. خدا دُونَه زِمُونی کِه شِما دِ میوَه اُو درخت بُحُوریت، چی خدا خونِه دِ گَن می‎شناسیت.»

![](https://cdn.door43.org/obs/jpg/360px/obs-en-02-05.jpg)

زینَه دیی کِه میوَه اُو درخت قِشَنگَه ئو وِ نظر طُوم‌دار میا. او کِه می‌حاست هَمَه چین دُونِسوئَه، میوِه دِ درخت چی ئو حَرد. اوسِه دِ اُو میوَه وِ میرَش هَم دَ ئو او هَم حَرد.

![](https://cdn.door43.org/obs/jpg/360px/obs-en-02-06.jpg)

ِهُو، چَش‎یاشُو واز بی ئو دِ لُختی خُشُو خَوَردار بین. آدم ئو زینَش تَقِلا کِردِن تا وا بَلگ درخت‎یا، لُختی خُشُونِه بَپوشَن.

![](https://cdn.door43.org/obs/jpg/360px/obs-en-02-07.jpg)

اوسِه آدم ئو زینَش دَنگِ خدانِه شِنَفتِن کِه دِ مین باغ رَه میرَت. اونُو خُشُونِه دِ خدا قایِم کِردِن. خدا گُت: «آدم هیسی کجا؟» آدم جِوُو دَ: «دَنگ تونِه دِ مینِ باغ شِنَفتِم ئو سی‌یَه‌که لُخت بیم زَلَم رَت، خُمِه قایِم کِردِم.»

![](https://cdn.door43.org/obs/jpg/360px/obs-en-02-08.jpg)

اوسِه خدا پُرسی: «کی وِت گُت لُختی، دِ میوَه اُو دِرختی کِه منع کِردَه بیم حَردی؟» آدم جِوُو دَ: «ای زینِه کِه وِ مِ بَخشَنی، دِ اُو میوَه وِ مِ دَ.» اوسِه خدا دِ زینَه پُرسی: «یَه چِه کاری بی کِه کِردی؟» زینَه گُت: «مار مِنِه گول زَه.»

![](https://cdn.door43.org/obs/jpg/360px/obs-en-02-09.jpg)

خدا وِ مار گُت: «تو مَلعون هیسی. دَ وِ ریی گییَت می‎سُری ئو خاک مُحُوری. تو ئو زینَه دَ دِ یَکتِری نِفرَت داریت ئو دِ بِئن نسلِ تو ئو نسلِ زن دشمنی مینِم. کَسی دِ نسلِ زینَه، سَرِتِه می‌کوئَه ئو تو پَسَه پا اونِه میزِنی.»

![](https://cdn.door43.org/obs/jpg/360px/obs-en-02-10.jpg)

اوسِه خدا وِ زینَه گُت: «دَرد زایِمُون تونِه خیلی زیاد می‌کِم. شوق تو هِه وا لا میرَتَه ئو او هِه وِ تو زور دارَه.»

![](https://cdn.door43.org/obs/jpg/360px/obs-en-02-11.jpg)

خدا وِ پیا گُت: «سی‌یَه‌کِه وِ حرف زینَت گوش دِئِی ئو دِ مِ سَرپیچی کِردی، زِمی زیرِه لَنَت مِی‌رَه ئو تو وا زَمَت زیاد، غذا جور میکی. آخِرِش می‌میری ئو بَدَنِت وِرمیگَردَه وِ خاک.» آدم نُوم زینَشِه نیا وِ حوا کِه وِ مَعنی زِنِئی بَخشَه؛ سی‌یَه‌کِه او بایس وِ دا هَمَه آیِم‎یا بووَه. خدا اونونِه وا جُمَه‎یائی دِ پوسِ حِیوُن‎یا پوشِنا.

![](https://cdn.door43.org/obs/jpg/360px/obs-en-02-12.jpg)

اوسِه خدا گُت: «اِیسِه کِه آیم بی‎یَه چی اِیما ئو خونِه دِ گَن تشخیص مِئَه، نباید هِیشت کِه دِ میوَه درختِ زِنِئی هَمیشه‎ئِی هَم بُحُورَه ئو تا ابد زِنَه بَمُونَه.» وِ ای خاطر خدا اونُونِه دِ اُو باغ قِشَنگ وَن وِ دَر. او دَم دِراغِل باغ، فِرشتَه‎یا قَوی‌ئی نیا تا نِیلَن دِ میوَه درختِ زِنِئی هَمیشه‎ئِی بُوحُورَن.

*َتَلِی گِرِتِسَه دِ کِتآو مقدس: ( کِتآو پیدایش فصل ۳)*

## ۳. سِیل

https://openbiblestories.org/l/lrc/story-3/

![](https://cdn.door43.org/obs/jpg/360px/obs-en-03-01.jpg)

دِما سال‎یا زیادی، آیِم‎یا ریی زِمی زیاد بی‎ین. اونُو اُوقَه تُن ئو تیز ئو شَرآشو بی‎یِن کِه خدا حاست همه دُنیانِه وا سِیل گَپی دِ بی‎ین بوره.

![](https://cdn.door43.org/obs/jpg/360px/obs-en-03-02.jpg)

اَما خدا دِ نوح راضی بی. او پیا عادلی بی کِه دِ مین شَرآشویا زِنِئی می‌کِرد. خدا نوحِ دِ حاسته خُش دِبارَه اُو سِیل گَپ خَوَردار کِرد. او وِ نوح فرمایش کرد تا کشتی گَپی بَسازَه.

![](https://cdn.door43.org/obs/jpg/360px/obs-en-03-03.jpg)

خدا وِ نوح فرمایش کِرد کِه کشتی‌نِه‌ وِ درازی ۱5۰ متر، پهنا 25 متر ئو بُلِنی 15 متر بَسازَه. نوح بایس ای کشتی سِه طَبَقَه‌نِه وا چو سَرو می‌ساخت. کشتی ‌بایس تاق میاشت. ئو اُتاق‎یا زیاد ئو پَنجرِه داشتَه با. کشتی وِ ای خاطِر ساختَه مِوی تا نوح، عیالش ئو حِیوُن‎یا حُشکی‌نِه دِ سِیل ویرداری بَکَه.

![](https://cdn.door43.org/obs/jpg/360px/obs-en-03-04.jpg)

نوح دِ خدا فِرمُونبَری کِرد. او ئو سِه کُرِش کشتی‌نِه هِه اُو طور کِه خدا فِرمُون دِئی، ساختِن. سی‌یَه‌کِه اُو کشتی خیلی گَپ بی، سال‎یا زیادی طول کَشی تا ساختَه با. نوح وِ مَردِم هُشدار دَ کِه سِیل میا ئو اونُو بایس وِرگَردَن وا لا خدا. اَما اونُو حَرفِ نوحِ باور نَکِردِن.

![](https://cdn.door43.org/obs/jpg/360px/obs-en-03-05.jpg)

ئو خدا فِرمُون دَ کِه نوح ئو عِیالِش غذا و اندازه سی خُشُو ئو حِیوُن‎یا جَم بَکَن. وَختی هَمَه چی آمادَه بی، خدا وِ نوح گُت زِمُونِش رَسِسَه تا اُو هشت نفر یعنی او، زینَش، سِه کُر ئو بِیی‎یاش رُوئَن دِ مین کشتی.

![](https://cdn.door43.org/obs/jpg/360px/obs-en-03-06.jpg)

خدا دِ هَر جور حِیوُن ئو بالِنَه، یِه جُفت نَر ئو ما فِرسَن وا لا نوح تا رُوئَن دِ مین کشتی ئو دِ مُوقَه سِیل دِ اَمون بان. ئو خدا، هَفت جُفت نَر ئو ما دِ تَمُوم حِیوُن‎یائی کِه سی قربانی کِردن خو بین، فِرسَن. وَختی هَمَه رَتِن دِ مین کشتی، خدا دَرِ کشتی‌نِه بَست.

![](https://cdn.door43.org/obs/jpg/360px/obs-en-03-07.jpg)

اوسِه بارُون چهل رو بی‌ اَمُون بارِس ئو آو دِ زِمی چِنُو می‌جوشِس کِه هَمَه چی، حتی کُوه‌یا بُلِن هَم، واش پوشِس.

![](https://cdn.door43.org/obs/jpg/360px/obs-en-03-08.jpg)

هَمَه موجودیائی کِه وِ ریی حُشکی زِنِئی می‌کِردِن، بِه‌جُز آیِم‎یا ئو حِیوُن‎یا مین کشتی، هلاک بین. کشتی ریی آو شناور بی ئو هَمَه چیا مینِش دِ غرق بی‎یِن دِ اَمُون مَن.

![](https://cdn.door43.org/obs/jpg/360px/obs-en-03-09.jpg)

دِما تَمُوم بی‎یِن بارُن، کشتی پنج ماه مَن وِ ریی آو ئو دِ ای زمون ریی آو شُرو کِرد وِ هار رَتِن. اوسِه یِ روز کشتی وِ ریی کُوهی دِ حرکت هِسا. اما دُنیا هَنی دِ زیر آو بی. دِما دِ سِه ماه تُک کُوه‌یا دیاری بی.

![](https://cdn.door43.org/obs/jpg/360px/obs-en-03-10.jpg)

دِما گذشت چهل رو، نوح قِلائی سی جُستِن زِمی حُشکی فِرسَن وِ دَر. قِلا پِر گِرِت اما حُشکی‌نِه پیا نَکِرد.

![](https://cdn.door43.org/obs/jpg/360px/obs-en-03-11.jpg)

دِما وَ نوح کَموتَری فِرسَن. اما کَموتَر هَم نَتُونِس زِمی حُشکی پیا بَکَه، اوسِه وِرگَشت وا لا نوح. دِما ی هَفتَه، کَموتَرِه یِه دَفَه هَنی فِرِسَن ئو کَموتَر وا بَلگی دِ زیتون وِ کشتی وِرگَشت! آو دَ نِشِسی ئو گیایا سُوز کِردَه بی‎ین.

![](https://cdn.door43.org/obs/jpg/360px/obs-en-03-12.jpg)

نوح یِه هَفتَه هَنی چَش وِ رَه مَن ئو کَموتَرِه سی دَفَه سِئِم فِرسَن. ای گِل کَموتَر وِرنَگَشت. آو رَتی وِ هار ئو کَموتَر جائی وِ ریی حُشکی پیا کِردی.

![](https://cdn.door43.org/obs/jpg/360px/obs-en-03-13.jpg)

دو ماه بَد خدا وِ نوح فرمایش کِرد: «وا عیالِت ئو حِیوُن‎یا دِ کشتی بَکیت وِ دَر. بارور بوئِیت، بَچُونی بیاریت ئو زِمینِه پُر بَکیت.» اوسِه نوح ئو عیالِش دِ کشتی اُمان وِ دَر.

![](https://cdn.door43.org/obs/jpg/360px/obs-en-03-14.jpg)

نوح دِما وِ دَر کِردِن دِ کشتی، قربانگاهی دُرس کِرد ئو دِ حِیوُن‎یائی کِه وِ ای خاطِر اُوِردی، قربانی کِرد. خدا دِ ای کارِ نوح راضی بی ئو دویِمُونِش برکت دَ.

![](https://cdn.door43.org/obs/jpg/360px/obs-en-03-15.jpg)

اوسِه خدا چِنی قول دَ: «دَ زِمینِ وِ خاطر شَرآشوئِی آیِم، وا سِیل، لَنَت یا نابود نِمی‌کِم؛ هَر چَن دِل آیِم‌ دِ بَچِه‌ای گناهکارَه.»

![](https://cdn.door43.org/obs/jpg/360px/obs-en-03-16.jpg)

اوسِه خدا وِ نِشُونَ قول خُش، اَوَلی سُوزِه‌‌سیلِه دِ آسِمُو دُرس کرد. هَر زِمُون سُوزِه‌سیل دِ آسِمُو دیاری مُوئِی، خدا ئو قومِش قولِ اونِه می‌اُوِردِن وِ ویر.

*مَتَلِی گِرِتِسَه دِ کِتآو مقدس: (کِتآو پیدایش فصل ۶ تا ۸)*

## ۴. عَد خدا وا ابراهیم

https://openbiblestories.org/l/lrc/story-4/

![](https://cdn.door43.org/obs/jpg/360px/obs-en-04-01.jpg)

سال‎یا زیادی دِما توفان زِمُونِ نوح، آیِم‎یا هَنی هَم زیاد بی‎ین. اونُو دُوارَه دِ بِرآوَر خدا ئو یَکتِری گُناه می‌کِردِن ئو سی‌یَه‌کِه هَمَه وِ یِه زِوُن حَرف میزَن، دِ جا فِرمُونبَری دِ فِرمُونِ خدا ئو تیچسِن ئو پُر کِردِن زِمی، دِ یِ جا وِ دُور یَک جَم بی‎ین ئو دَس وِ کارِ دُرس کردنِ شهری سی خُشُو بی‎ین.

![](https://cdn.door43.org/obs/jpg/360px/obs-en-04-02.jpg)

اونُو آیِم‎یا خیلی قورتی بین ئو نِمی‌حاستِن وِ ریی فِرمُون‎یا خدا زِنِئی بَکَن ئو حتی شُرو وِ دُرس کردنِ بُرج بُلِنی بی‎ین کِه سَر وِ آسِمُو می‌کَشی. خدا دیی کِه اَر اونُو وِ شَرآشوئِی‎شُو اِدامَه بِئَن، باعث کاریا گُناه آلود زیادی مووَن.

![](https://cdn.door43.org/obs/jpg/360px/obs-en-04-03.jpg)

وِ ای خاطِر خدا زِوُن اونُونِه وِ زِوُن‎یا جور وا جور عوض کِرد ئو اونُونِه دِ کُل دُنیا تیچنا. شهری کِه آیِم‎یا شُرو کِردین وِ دُرس کردنش، نُومِش نِرِس وِ بابِل کِه وِ معنی «آشُفتا».

![](https://cdn.door43.org/obs/jpg/360px/obs-en-04-04.jpg)

خدا دِما صدها سال وا پیائی وِ نُوم اَبرام حَرف زَه. خدا وِ او فَرمایش کِرد: «ولات ئو حُونَه بُوئَه خُتِه بِیل ئو رُو وِ ولاتی کِه مِ تُونِه وِ اوچِه رَمُونی می‌کِم. مِ تُونِه برکت مِئِم ئو دِ تو قومِ گَپی دُرس می‌کِم. مِ نُوم تُونِه گَپ می‌کِم. کَسُونی کِه وِ تو برکت بِئَن، برکت مِئِم ئو اونُونی کِه تُونِه لَنَت بَکَن، لَنَت می‌کِم. هَمَه خانِوادَیا ریی زِمی وِ خاطِر تو برکت پیا می‌کَن.»

![](https://cdn.door43.org/obs/jpg/360px/obs-en-04-05.jpg)

اَبرام هَم دِ خدا فِرمُونبَری کِرد. او زینَش سارای، خدمتکاریا ئو دارایی خُشِه وِرداشت ئو وا لا ولات کنعان کِه خدا وِش نِشُو دِئی، رَت.

![](https://cdn.door43.org/obs/jpg/360px/obs-en-04-06.jpg)

وَختِی اَبرام وارد کنعان بی، خدا فَرمایش کِرد: «سِیل دُور ئو وَر خُت بَکُو. تَمُومِ ای ولاتی کِه مِئینی، وِ تو ئو بَچُونِت می‎وَخشِنِم.» اوسِه اَبرام دِ اُو زِمی، مَن.

![](https://cdn.door43.org/obs/jpg/360px/obs-en-04-07.jpg)

دِ اوچِه پیائِی وِ نُوم مِلکی‎صِدِق بی کِه کاهن خدای متعال بی. اَبرام اونِه دِ آخِرِ یَکی دِ جَنگ‎یاش دیی. مِلکی‎صِدِق، اَبرامِ برکت دَ ئو گُت : «خدای متعال کِه صِحآوِ آسِمُون‎یا ئو زِمینَه، اَبرامِ برکت بِئَه.» اوسِه اَبرام ده یک غنائم جنگی‎نِه وِ مِلکی‎صِدِق بَخشَن. ‌

![](https://cdn.door43.org/obs/jpg/360px/obs-en-04-08.jpg)

سال‎یا گذشت، اما اَبرام ئو سارای، هَنی بَچِه ناشدِن. خدا وا اَبرام حَرف زَه ئو دُوارَه وَعدَه دَ کِه وِ اونُو کُری می‎وَخشِنَه ئو دِ پشتش بَچُونِه زیادی وِ دی میان کِه چی آسارَیا آسِمُو زیاد مووَن. خدا اَبرامِ عادل دُنس، سی‌یَه‌کِه او وَعدَه خدانِه باوَر کِردی.

![](https://cdn.door43.org/obs/jpg/360px/obs-en-04-09.jpg)

اوسِه خدا وا اَبرام پِیمُونی بَست. پِیمُون عَدی دُو طِرَفِه‎ئَه کِه وِ ریی وَ، هَر دُو طِرَف تَهُد مِئَن تا کاری سی یَکتِرِی اَنجُوم بِئَن. اما دِ بارَه اَبرام، خدا زِمُونی ای پِیمُونِ بَست کِه اَبرام دِ خآو سنینی بی. وا ای حال اَبرام می‌تُونِس دَنگ خدانِ بَشنَوَه. خدا گُت : « مِ دِ پشتِ خُت کُری وِت میوَخشِم ئو سَرزِمینِ کنعانِه مِئِم وِ دویمون تو.» اَما اَبرام هَنی کُری ناشت.

*مَتَلِی گِرِتِسَه دِ کِتآو مقدس: (کِتآو پیدایش فصل ۱۱ تا ۱۵)*

## ۵. کُر وَعدَه

https://openbiblestories.org/l/lrc/story-5/

![](https://cdn.door43.org/obs/jpg/360px/obs-en-05-01.jpg)

دَه سال دِما بار کِردِن وِ ولاتِ کنعان، اَبرام ئو سارای هَنی بَچِه ناشدِن. اوسِه سارای زینَه ابرام وِش گُت: «اِیسِه کِه خدا اِجازَه نَدَه تا مِ بَچِه داشتوئِم ئو اِیسِه کِه مِ سی باردار بی‎یِن خیلی پیرِم، وا کلفتِ مِ هاجر دُوئَت بَکُو تا او بَتُونَه بَچِه سی مِ بیارَه.»

![](https://cdn.door43.org/obs/jpg/360px/obs-en-05-02.jpg)

اوسِه ابرام وا هاجر دُوئَت کِرد. هاجر کُری اُوِرد وِ دیی ئو ابرام نُومِش نیا وِ اسماعیل. اَما سارای وِ هاجر حَسیدی می‌کِرد. وَختِی کِه اسماعیل سیزَه سالِش بی ، خدا یِه دَفَه هَنی وا ابرام حرف زَه.

![](https://cdn.door43.org/obs/jpg/360px/obs-en-05-03.jpg)

خدا فرمایش کِرد: «مِ خدای قادر همیشه‎ئی‎م ئو وا تُو عَدی می‌وَنِم.» اوسِه ابرام وِ درگاه خدا سر اُوِرد وِ هار. ئو خدا وِ ابرام فرمایش کرد: «تو بُوئَه قوم‎یا زیادی موئی. مِ ولاتِ کنعانِ سی ارث، وِ تو ئو نسل تو مِئِم ئو همیشَه خدا اونُو موئِم. تُو هَم بایس هَمَه کُریا دویمون خُتِه خَتِنَه بَکی.»

![](https://cdn.door43.org/obs/jpg/360px/obs-en-05-04.jpg)

زینَت سارای، کُری میارَه کِه مووَه وِ بَچَه وَعدَه. نُومِش بَنی اسحاق. مِ وا او عَد می‌وَنِم ئو دِ او نسل گَپی دُرس میکم. دِ اِسماعیل هَم قومِ گَپی می‌سازِم، اَما پِیمُونِ مِ وا اِسحاقَه.» اوسِه خدا نُوم ابرامِ وِ ابراهیم، یعنی بُوئَه قوم‎یا زیاد، عَوَض کِرد. ئو خدا نُومِ سارایِه وِ سارَه عَوَض کِرد کِه وِ معنی «شازایه» هیسا.

![](https://cdn.door43.org/obs/jpg/360px/obs-en-05-05.jpg)

اُو روز اِبراهیم هَمَه کُریا دویِمُون خُشِه خَتِنَه کِرد. دِما حدودِ ی سال، زِمُونی کِه ابراهیم صد ئو سارَه نَوَد سالَه بی، سارَه کُری وِ دیی اُوِرد. هِه اُو طُوری کِه خُدا حاستی، اونُو نُومِش نیان وِ اِسحاق.

![](https://cdn.door43.org/obs/jpg/360px/obs-en-05-06.jpg)

وَختی کِه اِسحاق بی وِ پِیا جِوُنی، خدا ایمان اِبراهیمِ اِمتِحُون کِرد ئو گُت: «تَنیا کُرِت اِسحاقِ سی مِ قربانی بَکُو». ابراهیم یِه دَفَه هَنی دِ خُدا فِرمُونبَری کِرد ئو آمادَه بی تا کُرِشِه قربانی بَکَه.

![](https://cdn.door43.org/obs/jpg/360px/obs-en-05-07.jpg)

وَختی کِه ابراهیم ئو اسحاق می‌رَتِن وا لا قربانگاه ، اسحاق پُرسی: «بُوئَه، هیمَه سی قربانی آمادَه هیسا، اما بِرَه قربانی ها کُجا؟» ابراهیم جِوُو دَ: «کُرِم، خدا بِرَه قربانی‌نِه آمادَه می‌کَه.»

![](https://cdn.door43.org/obs/jpg/360px/obs-en-05-08.jpg)

وَختی کِه اونُو رَسِسِن وِ قربانگاه، ابراهیم کُرِش اسحاقِ وا قَرسی بَست ئو اونِه نیا ریی قربانگاه. ابراهیم می‌حاست کُرِشِه قربانی بَکَه کِه خدا فرمایش کِرد: «بیل وا رآو! کُرِ کلِ‎لا نَکُ! اِیسِه دُونِسِم کِه تُو تَرسِ مِنِه دِ دِل خُت داری، سی‌یَه‌کِه تَنیا کُرِت دِ مِ دَریغ نَکِردی.»

![](https://cdn.door43.org/obs/jpg/360px/obs-en-05-09.jpg)

ابراهیم دِ اُو نِزیکی، قوچی دیی کِه دِ مین بُوتِه گیر کِردی، خدا قوچِه دِ جا اسحاق سی قربانی آمادَه کِردی. ابراهیم وا شادی قوچِه سی قربانی وِ خدا پیش‌کَش کِرد.

![](https://cdn.door43.org/obs/jpg/360px/obs-en-05-10.jpg)

اوسِه خدا وِ ابراهیم گُت: «دِ اوچِه کِه تو حاضِر بیئی تا هَمَه چِی خُتِه، حتی یِه دُونَه کُرت وِ مِ بَوَخشی، مِ هَم قول مِئِم تونِه برکت بِئِم. نسل تو بیشتِر دِ آسارَه‌یا آسِمُو مووَه. دِ اوچِنی کِه دِ مِ فِرمُونبَری کِردی، هَمَه خانِوادَیا زِمی دِ تُرّ عیال تو برکت پیا می‌کَن.»

*مَتَلِی گِرِتِسَه دِ کِتآو مقدس: (کِتآو پیدایش فصل ۱۶ تا ۲۲)*

## ۶. خدا سی اسحاق آمادَه می‌کَه

https://openbiblestories.org/l/lrc/story-6/

![](https://cdn.door43.org/obs/jpg/360px/obs-en-06-01.jpg)

زِمُونی کِه ابراهیم وِ پیری ئو کُرِش اسحاق وِ جِوُنی رَسِسَه بی، ابراهیم یَکی دِ خدمتکاریا خُشِه وِ اوچنی که دِش و دیی اُمایَه بی ئو ولاتِ اِیلِش فِرسَن تا دِ اوچِه سی اسحاق زینِه‎ی بیارَه.

![](https://cdn.door43.org/obs/jpg/360px/obs-en-06-02.jpg)

دِما سفری دراز وِ وِلاتی کِه فامیلا ابراهیم دِش زِنِئی می‌کِردِن، خدا اُو خدمتکارِه وا لا رِبکا کِه نَوَه بِرار ابراهیم بی رَمُونی کِرد. او کُرزا بِرارِ ابراهیم بی.

![](https://cdn.door43.org/obs/jpg/360px/obs-en-06-03.jpg)

رِبکا قَبول کِرد کِه دِ تِه خانواده اش رُوئَه ئو وا اُو خدمتکار رُوئَه وِ حُونَه اسحاق. دَرجا دِما رَسِسِنِش، اسحاق واش دُوئَت کِرِد.

![](https://cdn.door43.org/obs/jpg/360px/obs-en-06-04.jpg)

دِما مُدَت زیادی، ابراهیم مُرد ئو خدا وِ خاطِر پِیمُونی کِه وا ابراهیم بَستی، اسحاقِ برکت دَ. یَکی دِ وَعدیا خدا دِ اُو پِیمُون یَه بی کِه ابراهیم، دویمون زیادی داشتوئَه. اما ربکا زینَه اسحاق نِمی‌تُونِس بَچَه دار با.

![](https://cdn.door43.org/obs/jpg/360px/obs-en-06-05.jpg)

خدا هیشت وا دُعا اسحاق، ربکا لِفونَه آوِس بووَه. اُو دو بَچَه، وِرَز وِ دیی اُمایِن، دِ مینِ رحم ربکا، وا یَک قی می‌کِردِن ئو سی یه ، ربکا علتش دِ خدا پُرسی.

![](https://cdn.door43.org/obs/jpg/360px/obs-en-06-06.jpg)

خدا وِ ربکا گُت: «تو دو کُر میاری وِ دیی. دِ هَر دک‎شُو دویمونِ جورواجوری دُرس موئه. اونُو هَمیشَه وا یَک هان دِ قی، اما دویمونِ کُر گَپ‌تِر دِ دویمونِ کُر کُچِک‎تِر فِرمُونبَری می‌کَه.»

![](https://cdn.door43.org/obs/jpg/360px/obs-en-06-07.jpg)

وَختی کِه کُریا ربکا اُمان وِ دیی ، کُر اَوَل، ریش سُور بی ئو لآری پُر دِ می داشت، اونُو نومِش نیان وِ عیسو. اوسِه کُر دوئِم دِ حالی کِه پَسَه پا عیسونِه گِرِتی دِ مین دَسِش اُما وِ دیی ، نُومِ اونِه نیان وِ یعقوب.

*مَتَلِی گِرِتِسَه دِ کِتآوِ مقدس (کِتآوِ پیدایش فصل ۲۴ آیَه‌یا ۱ تا ۲۵ ئو فصل ۲۶)*

## ۷.خدا یعقوبِه برکت مِئَه

https://openbiblestories.org/l/lrc/story-7/

![](https://cdn.door43.org/obs/jpg/360px/obs-en-07-01.jpg)

اُو دو کُر گَپ بین. عیسو دوس داشت رُوئَه شکار اَما یعقوب پیا حُونَه نِشینی بی. رِبکا یعقوبِ دوس داشت اَما اسحاق عیسونِه دوس داشت.

![](https://cdn.door43.org/obs/jpg/360px/obs-en-07-02.jpg)

یِ رو وَختی کِه عیسو خیلی گُسنَش بی دِ شِکار وِرگَشت. عیسو وِ یعقوب گُت: «بی زَمَت کَمِی دِ غذاتِه بِه وِ مِ.» یعقوب دِ جِوُوِش گُت: «اَوَل وِ مِ قول بِه کِه هَر چی وِ خاطِر پیشِه‌زایی وِ تو می‌رَسَه وِ مِ بَوَخشِنی.» اوسِه، عیسو قول دَ کِه هَمَه چیا ارزش‎دار پیشِه‌زایی خُشِه وِ یعقوب بَوَخشِنَه. اوسِه یعقوب کَمی غذا وِ عیسو دَ.

![](https://cdn.door43.org/obs/jpg/360px/obs-en-07-03.jpg)

وَختی اسحاق می‌حاست کِه برکت خُشِه وِ عیسو بِئَه، ربکا وا حُقَه بازی یعقوبِ دِ جا عیسو فِرسَن وِ اُتاقِ اسحاق. اسحاق پیر بیئی ئو دَ نِمی‌تُونِس خو بِئی‎نَه. یعقوب جُومَه عیسونِه پوشی ئو مِل ئو دَس‎یا خُشِه وا پوس بُز پوشِنا.

![](https://cdn.door43.org/obs/jpg/360px/obs-en-07-04.jpg)

یعقوب اُما وِ تِه بُوئَه‌ش ئو گُت: «مِ عیسوِم ئو اُمامَه تا مِنِه برکت بِئی.» وَختی کِه اسحاق دَس زَه وِ می بُز ئو جُومَه‎نِه بو کِرد، گِمُو کِرد کِه عیسو اُمایَه وِ تِئش ئو اونِه برکت دَ.

![](https://cdn.door43.org/obs/jpg/360px/obs-en-07-05.jpg)

عیسو فره بدِش دِ یعقوب میُوما، سی‌یَه‌کِه او حَق پیشِه‌زایی ئو برکت اونِه وِراقَنی. وِ ای خاطِر نَقشَه کَشی کِه دِما مُردِنِ اسحاق، یعقوبِ بَکُشَه.

![](https://cdn.door43.org/obs/jpg/360px/obs-en-07-06.jpg)

اَما ربکا ای جریانِه فَمِس. او ئو اسحاق، یعقوبِ وِ جا دیری وِ تِه فامیل‎یا رِبِکا فِرسَنِن.

![](https://cdn.door43.org/obs/jpg/360px/obs-en-07-07.jpg)

یعقوب سال‎یا زیادی وِ تِه فامیل‎یا ربکا زِنِئی کِرد. دِ اُو دُورُو، او دُوئَت کِرد ئو وِ صِحآو دُوزَه کُر ئو یِه دُختِر بی. خدا وِ یعقوب مالِ زیادی بَخشَن.

![](https://cdn.door43.org/obs/jpg/360px/obs-en-07-08.jpg)

دِما بیس سال دیری دِ حُونَش دِ کنعان، یعقوب وا عیالش، نوکَریاش ئو کُل گَلَه‌ خُش وِرگَشت وِ اوچِه.

![](https://cdn.door43.org/obs/jpg/360px/obs-en-07-09.jpg)

وا ای حال یعقوب خیلی هِراسُو بی، سی‌‍یَه‌کِه گِمُو می‌کِرد کِه عیسو هَنی میحا اونِه بَکُشه. سی یِنَه بُرّی دِ حِیوُن‎یا گَلَه‌شِه سی پیش‌کَشی‌ فِرسَن سی عیسو. نوکری کِه اُو حِیوُن‎یانِه بُردی سی عیسو ، وِش گُت: «ای حِیوُن‎یانِه نوکَرِت یعقوب وِ تو پیش‌کَش می‌کَه. او وِ ای زیئی می‌رَسَه وِ ایچِه.»

![](https://cdn.door43.org/obs/jpg/360px/obs-en-07-10.jpg)

اما عیسو دَ قصدِ صِدَمَه زَئِن وِ یعقوبِه ناشت ئو دِ دی‎یِن او خیلی خوشحال بی. یعقوب دِ صلح ئو آرُومی دِ کنعان زِنِئی می‌کِرد. اوسِه اسحاق مُرد ئو یعقوب ئو عیسو نیانِش دِ خاک. پِیمُونی کِه خدا وا ابراهیم بَستی، دِما اسحاق وِ یعقوب رَسِس.

*مَتَلِی گِرِتِسَه دِ کِتآو مقدس: (کِتآو پیدایش فصل ۲۵ آیَه‌یا ۲۷ تا ۳۵ ئو فصل ۲۹)*

## ۸. خدا یوسف ئو دویِمُونِشِ نجات مِئَه

https://openbiblestories.org/l/lrc/story-8/

![](https://cdn.door43.org/obs/jpg/360px/obs-en-08-01.jpg)

دِما سال‎یا، زِمُونی کِه یعقوب بی وِ پیا پیری، کُرِی که دوس داشتینش، یوسفِ فِرِسَن تا دِ سلامتی بِراریاش کِه سَرگَرم چَرَنِن گَلَه بی‎یِن خَوَر بیارَه.

![](https://cdn.door43.org/obs/jpg/360px/obs-en-08-02.jpg)

بِراریا یوسف دِ او بَدِشُو میوما، سی‌یَه‌کِه یعقوب اونِه بیشتِر دوس داشت ئو یوسف هَم دِ خآو دیئی کِه وِ اونُو حکومت می‌کَه. اوسه وَختی یوسف رَت وِ تِه بِراریا خُش، اونُو اونه وراقنین ئو وِ تاجریا بَردَه، فِرُوختِن.

![](https://cdn.door43.org/obs/jpg/360px/obs-en-08-03.jpg)

وِرَز رَسسَن بِراریا یوسف وِ حُونَه، اونُو چوغا یوسفِ دِرّین ئو خین بُز پاشین وِ ریش. چوغانِه وِ بُوئَه خُشُو نِشُو دَن تا خیال بَکَه حِیوُن وحشی‎ئی یوسفِه کُشتَه. اوسِه یعقوب فره ناراحت بی.

![](https://cdn.door43.org/obs/jpg/360px/obs-en-08-04.jpg)

تاجریا بَردَه، یوسفِ بُردِن وِ مصر. مصر ولاتِ گَپ ئو زورداری بی کِه دِ رُونَه رو نیل بی. اونُو اونِه وِ یِه کَسِ دُولَمَن دولتِ مصر فِرُوختِن. یوسف وِ اَربآو خُش وِ خویی خدمت ‌کِرد ئو خدا هَم اونِه برکت ‌دَ.

![](https://cdn.door43.org/obs/jpg/360px/obs-en-08-05.jpg)

زینَه اُو مقومِ دولتی تَقِلا می‌کِرد کِه وا یوسف هُمبستر با، اما یوسف قَبول نَکِرد کِه نسبت وِ خدا گناه بَکَه. پس اُو زینَه عَصَبُونی بی ئو تُمَت ناروائی وِ یوسف زَه. او دَسگیر بی ئو اُفتا دِ زِندُون. اما یوسف دِ زِندُون هَم وِ خدا وفادار مَن ئو خدا اونِه برکت دَ.

![](https://cdn.door43.org/obs/jpg/360px/obs-en-08-06.jpg)

دِما چَن سال، یوسف هَنی هَم دِ زِندُون بی، دِ حالی کِه بی گناه بی. یِه شُو فرعون (مصری‌یا وِ پادشایا خُشُو فرعون می‌گُتِن)، دو تا خآو دیی کِه خیلی اونِه دِ رآو بُردی. هیچ‌کُوم دِ هُوم شُوریا فرعون نَتُونِسین خآویا اونِه تعبیر بَکَن.

![](https://cdn.door43.org/obs/jpg/360px/obs-en-08-07.jpg)

سی‌یَه‌کِه خدا تونایی خآو مانئ کردنِ وِ یوسف دِئه بی، فرعون اونِه دِ زِندُون اُوِرد وِ تِه خُش تا خآوِشِه معنئ بَکَه. یوسف وِ او گُت: «خداوند هفت سال ثمر زیادی مِئَه اما دِما وَ، هفت سال قحطی مووَه. »

![](https://cdn.door43.org/obs/jpg/360px/obs-en-08-08.jpg)

فرعون چِنُو تحت تاثیر شخصیتِ یوسف قِرار گِرِت کِه اونِه نیا دِ جا دُوئِمی کسِ قدرتمن مصر.

![](https://cdn.door43.org/obs/jpg/360px/obs-en-08-09.jpg)

یوسف وِ مَردِم گُت کِه دِ مینِ هفت سال‌ فِراوُنی، ثمر‎یا غذایی‌نِه اَمار بَکَن. اوسِه زِمُونی کِه هفت سال قحطی شُرو بی، یوسف اُو ثمر‎یانِه می‌فِرُوخت وِ مَردِم تا غذا وِ اندازَه داشتَه بان.

![](https://cdn.door43.org/obs/jpg/360px/obs-en-08-10.jpg)

قحطی ئو حُشکسالی شدید نَه هِه مصر بلکه ولاتِ کنعان، جائِی کِه یعقوب ئو عیالش زِنِئی می‌کِردِن هَم گِرِتی دِ وَر.

![](https://cdn.door43.org/obs/jpg/360px/obs-en-08-11.jpg)

وِ ای خاطِر یعقوب کُریا گَپ‌تِر خُشِه فِرِسَن وِ مصر تا غذا ئو آذوقه جور بَکَن. وَختی اونُو دِ بِراوَر یوسف هیسان تا غذا دِش بَخَرَن، اونِه نَشنَختِن. اما یوسف اونُونِ اشنخت.

![](https://cdn.door43.org/obs/jpg/360px/obs-en-08-12.jpg)

یوسف سی دی‎یِن تغییر دِ بِراریاش اونُونِه اِمتِحُو کِرد. اوسِه گُت: «مِ یوسف، بِرار شِمانِم، زَلَه‎تُو نَرُوئَه. شِما دِ حق مِ گَنی کِردیت، اما خدا گَنی شِمانِ کِرد وِ خویی. بیایت ئو دِ مصر زِنِئی بَکیت ئو مِ می‌تُونِم دِ اِیچِه هَمَه‌چی سی شِما ئو عیالِ‎تو جور بَکِم.»

![](https://cdn.door43.org/obs/jpg/360px/obs-en-08-13.jpg)

بِراریا یوسف وِرگَشتِن وِ حُونَه، خَوَر زِنَه بی‎یِن یوسفِ سی بُوئَه خُشُو یعقوب تَریف کِردِن، او خیلی شاد بی.

![](https://cdn.door43.org/obs/jpg/360px/obs-en-08-14.jpg)

هَرچَن یعقوب بیئی وِ پیا پیری‌، وا دویمونش بار کِرد وِ مصر، ئو دِ تِه یَک دِ اوچِه زِنِئی کِردِن. یعقوب وِرَز مُردِن خُش، هَمَه کُریاشِه برکت دَ.

![](https://cdn.door43.org/obs/jpg/360px/obs-en-08-15.jpg)

عَد ئو پیمُونی کِه خداوند وا ابراهیم بَستی، دِما اسحاق وِ یعقوب ئو اوسِه وِ دُوزَه کُرِش ئو دویمونشو رَسِس. دِ پُشت دُوزَه کُرِ یعقوب، دُوزَه طایِفَهِ ،قومِ اسرائیل وِ وجود اُما.

*مَتَلِی گِرِتِسَه دِ کِتآو مقدس،: (کِتآو پیدایش فصل ۳۷ تا ۵۰)*

## ۹. خدا هِنا موسی می‌کَه

https://openbiblestories.org/l/lrc/story-9/

![](https://cdn.door43.org/obs/jpg/360px/obs-en-09-01.jpg)

دِما مُردِنِ یوسف هَمَه فامیل‎یاش مَنِن دِ مصر. سی سال‎یا آزگار اونُو ئو بَچُونِشُو دِ اوچِه وِ زِنِئی خُشُو اِدامَه دَن ئو صحآو بَچُون زیادی بی‎یِن. مصری‎یا وِ اونُو اسرائیلی می‌گُتِن.

![](https://cdn.door43.org/obs/jpg/360px/obs-en-09-02.jpg)

دِما صدیا سال، شمار اسرائیلی‎یا فره بی‎ین. مصری‎یا دَ یوسف ئو کمک‎یاشِه وِ ویر ناشدِن. اونُو دِ اسرائیلی‎یا می‌تَرسِسِن سی‌یَه‌کِه شمارشُو فره بی. وِ ای خاطِر فرعونی کِه دِ اُو زِمُون وِ مصر حکومت می‌کِرد، اسرائیلی‎یانِه کِرد وِ بَردَه مصری‎یا.

![](https://cdn.door43.org/obs/jpg/360px/obs-en-09-03.jpg)

مصری‎یا، اسرائیلی‎یانِه مَجبور وِ دُرس کردنِ ساختِمُون‎یا ئو شهریا زیادی ‌کِردِن. کاریا سخت، زِنِئی‌نِه سی اونُو تَل کِردی، اَما خدا اونُونِه برکت دَ ئو وِ صحآو بَچُونِه بیشتِری بی‎یِن.

![](https://cdn.door43.org/obs/jpg/360px/obs-en-09-04.jpg)

فرعون دیی کِه اسرائیلی‎یا بَچَون زیادی میارَن، وِ ای خاطِر وِ قُومِش فِرمُو دَ کِه تَمُومِ بَچُونِه اونُو کِه کُر بی‎یِن بُونَن دِ مین رو نیل ئو بَکُشَن.

![](https://cdn.door43.org/obs/jpg/360px/obs-en-09-05.jpg)

تا یَه کِه یِه زینَه اسرائیلی کُری اُوِرد وِ دیی. او ئو میرَش تا زِمُونی کِه می‌تُونِسِن، بَچَنِه قایِم کِردِن.

![](https://cdn.door43.org/obs/jpg/360px/obs-en-09-06.jpg)

وَختی کِه بُوئَه ئو دا بَچَه، دَ نِمی‌تُونِسِن قایِمِش بَکَن، سی‌یَه‌کِه نِیلَن اونِه بَکُشَن، بَچَنِه نیان مین سَلِه وِ ریی آو دِ مین نِی‌یا دِ لارُونَه رو نیل. اَما خُوَئر گَپَش دِ دیر سِیل می‌کِرد تا بِئی‎نَه چِه پیش اُمائی سیش مُوفتَه.

![](https://cdn.door43.org/obs/jpg/360px/obs-en-09-07.jpg)

دُختِر فرعون سَلَه‎نِه دیی ئو سِیل مینِش کِرد. وَختِی بَچَنِه دیی، اونِه وِ جا کُرِش قَبول کِرد. او یِه زینَه اسرائیلی‌نِه گِرِت تا بَچَه‌نِه شیر بِئَه. بی خَور دِ یَه کِه اُو زینَه دا هِه اُو بَچَه بی. وَختی داش بَچَه‌نِه شیر بُر کرد، اونِه وِرگَردَن وِ تِه دُختِر فرعون. او نُومِ بَچَه‌نِه نیا وِ موسی.

![](https://cdn.door43.org/obs/jpg/360px/obs-en-09-08.jpg)

زِمُونی کِه موسی گَپ بی، یِه مصری‌نِه دیی کِه بَردَه اسرائیلی‌نِه می‌زِنَه. موسی تَقِلا کِرد بِرار اسرائیلی‎شِه نجات بِئَه.

![](https://cdn.door43.org/obs/jpg/360px/obs-en-09-09.jpg)

موسی وا ای گِمُو کِه کَسی اونِه نِمِئی‎نَه، اُو مصری‌نِه کُشت ئو لَشِش قایم کِرد. اما یَکی ای کارِ موسی‎نِه دیی.

![](https://cdn.door43.org/obs/jpg/360px/obs-en-09-10.jpg)

فرعون دِ ای کارِ موسی خَوَر دار بی ئو تَقِلا کِرد موسی‎نِه بَکُشَه. اما موسی دِ مصر جیست وِ بیابُو ئو سَروازیا فرعون نَتُونِسِن اونِه دِ اوچِه پیا بَکَن.

![](https://cdn.door43.org/obs/jpg/360px/obs-en-09-11.jpg)

موسی دِ بیابُونی دیر دِ مصر شُرو کِرد وِ چوپُونی. او وا زَنی دِ اُو وِلات دُوئَت کِرد ئو بی وِ صحآو دُو کُر.

![](https://cdn.door43.org/obs/jpg/360px/obs-en-09-12.jpg)

یِ رو، وَختی موسی ویردار گَلَه میشُو بُوئَه زینَش بی، بُوتِهِ دیی کِه بِلیز بی اما نِمی‌سُخت. اوسه رَت وا نِزیکِش تا علتِشِه بَفَمَه. وَختی موسی وِ بوتَه بلیز بیه نِزیک بی، خدا دِ مین بوتَه هِنا کِرد: « کالَه‌یاتِه دِ پا دِرار، سی‌یَه‌کِه جائی کِه ریش هِسائی‎یَه مُقدَسَ.»

![](https://cdn.door43.org/obs/jpg/360px/obs-en-09-13.jpg)

اوسِه خدا گُت: « مِ رنج ئو عذاوِ قومِ خُومِ دِ مصر دیمَه. مِ تونِه می‌فرِسِم وِ تِه فرعون تا قُومِ مِنِه دِ بردِه‎ایی مصر دِراری. مِ ولاتِ کنعانِه مِئِم وِ اونُو، ولاتی کِه وَعدَشِه دَمی وِ ابراهیم، اسحاق ئو یعقوب.»

![](https://cdn.door43.org/obs/jpg/360px/obs-en-09-14.jpg)

موسی گُت: «اَر قوم دِ مِ بَپُرسَن کِه کی مِنِه فِرسَنَه، وِشُو چی بُوئِم؟» خدا فَرمایش کِرد: «هستم آنکه هستم. وِ اونُو بُو "هستم" مِنِه فِرسَنَه تِه شِما. ئو وِشُو بُو کِه مِ یَهُوَه خدا بُوئَه‌یاتو ابراهیم، اسحاق ئو یعقوبِم. نُومِ مِ تا ابد هِه یِنا.

![](https://cdn.door43.org/obs/jpg/360px/obs-en-09-15.jpg)

موسی نِمی‌حاست رُوئَه وِ تِه فرعون، سی‌یَه‌که می‌تَرسِس نَتُونَه خو صُبَت بَکَه، وِ ای خاطِر خدا بِرارِ موسی، هارونِ فِرسَن تا وِش کمک بَکَه.

*مَتَلِی گِرِتِسَه دِ کِتآو مقدس: (کِتآو خروج فصل ۱ تا ۴)*

## 10. ۱۰ - ده بلا

https://openbiblestories.org/l/lrc/story-10/

![](https://cdn.door43.org/obs/jpg/360px/obs-en-10-01.jpg)

خدا وِ موسی ئو هارون ای هُشدارِه دَ کِه فِرعون یِه‎گَرَه. موسی ئو هارون رَتِن وِ تِه فِرعون ئو گُتِن: «یَه پیومِ خدا اسرائیلَه سی تو: قومِ مِنِه وِل کُو تا رُوئَن.» فِرعون مَحلی وِ حَرف اونُو نَنیا ئو وِ جا وِل کِردِن قومِ بنی اسرائیل، اونُون مَجبور کِرد تا سَخت‎تِر دِ زی تِری کار بَکَن.

![](https://cdn.door43.org/obs/jpg/360px/obs-en-10-02.jpg)

فِرعون هَنی دِ وِل کِردِن قومِ اسرائیل تفره می‌رت. وِ ای خاطِر خدا دَه بِلا وَحشتناکِ وِ مصر نازِل کِرد. دِ تُرّ اُو بِلایا، خدا وِ فِرعون نِشُو دَ کِه قُوَتِ او دِ فِرعون ئو هَمَه خدایا مصر بیشتِرَه.

![](https://cdn.door43.org/obs/jpg/360px/obs-en-10-03.jpg)

خدا آو رو نیلِ کِرد وِ خین. اَما فِرعون هَنی، قومِ اسرائیلِ وِل نَکِرد.

![](https://cdn.door43.org/obs/jpg/360px/obs-en-10-04.jpg)

خدا تَمُومِ وِلاتِ مصرِه پُر کِرد دِ قُوروآق. فِرعون دِ موسی حاست کِه قُوروآق‌یانِه دِ وِلاتِ اونُو دیر بَکَه. اَما دِما یَه کِه قُوروآق‌یا دِ بِئن رَتِن، دِل فِرعون سَخت‌تِر بی ئو اِجازَه وِ دَر کِردِن دِ مصرِه وِ اونُو نَدَه.

![](https://cdn.door43.org/obs/jpg/360px/obs-en-10-05.jpg)

اوسه خدا بِلا پَشخَه کورَ‌یا ئو دِما وَ بِلا پَشخَه‌یانِه فِرسَن. فِرعون وِ موسی ئو هارون گُت کِه اَر ای بِلانِه دیر بَکَن، وِشُو اِجازَه مِئَه تا دِ مصر بَکَن وِ دَر. دِما دُعا موسی، خدا ای بِلایانِه دیر کِرد، اَما فِرعون قَلب خُشِه سَخت کِرد ئو هَنی هَم وِ اونُو اِجازَه نَدَه دِ مصر بکن و دَر.

![](https://cdn.door43.org/obs/jpg/360px/obs-en-10-06.jpg)

دِما وَ، خدا کاری کِرد تا هَمَه حِیوُن‎یا مصری‎یا مریض بان ئو بَمیرَن. اَما قلبِ فِرعون سَخت بیئی ئو ای دَفَه هَم وِ اونُو اِجازَه رَتِن نَدَه.

![](https://cdn.door43.org/obs/jpg/360px/obs-en-10-07.jpg)

خدا وِ موسی گُت تا مُشت‌یا خُشِه پُر بَکَه دِ خاکِسَر ئو وِنُون دِ ری‌وِری فِرعون بَپاشَه وِ هَوا. وَختی موسی ای کارِ کِرد، تَمُومِ مَردِم مصر بِه‌جُز اسرائیلی‎یا دُچار دُمَل‌یا دردناک بی‎یِن. اَما خدا قلبِ فِرعون سَخت کِرد ئو فِرعون اِجازَه نَدَه کِه اونُو رُوئَن.

![](https://cdn.door43.org/obs/jpg/360px/obs-en-10-08.jpg)

اوسِه خدا بِلا تگرگِه فِرسَن ئو بیشتِر ثمر‎یا ئو هَر جُونِوَری کِه دِ دَر بی‎یِن دِ بِئن بُرد. اوسِه فِرعون، موسی ئو هارونِ هِنا کِرد ئو گُت: «مِ ای دَفَه گناه کِردِمَ، شِما آزادیت کِه رِیت.» اوسِه موسی دُعا کِرد ئو بارِسِن تگرگ تَمُوم بی.

![](https://cdn.door43.org/obs/jpg/360px/obs-en-10-09.jpg)

اَما فِرعون هَنی گناه کِرد ئو قلبِ خُشِه سَخت کِرد ئو نِهیشت کِه اسرائیلی‎یا آزاد بان.

![](https://cdn.door43.org/obs/jpg/360px/obs-en-10-10.jpg)

وِ ای خاطِر خدا قَری دِ قُلَه‌یانِه وِ وِلاتِ مصر فِرسَن. اونُو تَمُومِ ثمریایی کِه دِ بِلا تگرگ مَنه بی‎ین، حَردِن.

![](https://cdn.door43.org/obs/jpg/360px/obs-en-10-11.jpg)

اوسِه خدا بِلا تاریکی‌نِه فِرسَن کِه وِ مُدَت سِه روز طول کَشی. هَمَه جا چِنو تاریک بیئی کِه مصری‎یا‌ نِمی‌تُونِسِن دِ حُونَه بَکَن وِ دَر. اَما دِ جائی کِه اسرائیلی‎یا زِنِئی می‌کِردِن، روشْنایی بی.

![](https://cdn.door43.org/obs/jpg/360px/obs-en-10-12.jpg)

دِما ای نُه بِلا، فِرعون نِهیشت اسرائیلی‎یا رُوئَن. دِ اوچِه کِه فِرعون مَگر گوش بی ، خدا حاست تا آخِری بِلانِه هَم بَفرِسنَه. ای بِلا باعث مووَه کِه فِرعون حاسته خُشِه عَوَض بَکَه.

*مَتَلِی گِرِتِسَه دِ کِتآو مقدس: (کِتآو خروج فصل ۵ تا۱۰)*

## ۱۱. عِد پِسَخ

https://openbiblestories.org/l/lrc/story-11/

![](https://cdn.door43.org/obs/jpg/360px/obs-en-11-01.jpg)

خدا موسی ئو هارونِ فِرسَن وا لا فِرعون کِه وِش بُوئَن تا اسرائیلی‎یانِه آزاد بَکَه. اونُو وِ فِرعون اِخطار دَن کِه اَر قومِ اسرائیلِه وِل نَکَه، خدا تَمُوم پیشِه‌زایا کُر ئو حَتی حِیوُن‎یا مصرِه نابود می‌کَه. وختی کِه فِرعون یَنِه شِنَفت، باوَر نَکِرد ئو هَنی هَم دِ فِرمُونِ خدا نافِرمُونی کِرد.

![](https://cdn.door43.org/obs/jpg/360px/obs-en-11-02.jpg)

خدا سی کَسُونی کِه وِش ایمان داشتِن، رَهی جور کِرد تا پیشِه‌زایا کُر اونُو دِ ای بِلا نِجات پیا بَکَن. هَرعیال‎ بایس بِرَه‌ بی‌عِوی جِگا می‎کِرد ئو قربانیش می‎کِرد.

![](https://cdn.door43.org/obs/jpg/360px/obs-en-11-03.jpg)

خدا وِ قوم اسرائیل فرمایش کِرد تا خین بِرَه‌نِه دِ دُور ئو وَر دَر حُونَه‌یاشو بَمالَن. ئو اونُو بایس گوشت اُو بِرَه‌نِه کَوآو می‌کِردِن ئو وا نُو بی خمیرتُرش آزِه می‌حَردِن. ئو خدا وِ اونُو فرمایش کِرد تا آمادَه بان کِه دِما حَردِنِش، زیی مصر ترک بَکَن .

![](https://cdn.door43.org/obs/jpg/360px/obs-en-11-04.jpg)

اسرائیلی‎یا تَمُوم فِرمُون‎یا خدانِه وِ دقت اَنجُوم دَن. هِه اُو نِصمِه شُو، خدا دِ مصر رَد بی ئو تَمُوم کُریا گَپ مصری‎یانِه دِ بِئن بُرد.

![](https://cdn.door43.org/obs/jpg/360px/obs-en-11-05.jpg)

خدا دِ تَمُوم حُونَه‎یا قوم اسرائیل کِه نِشُون خینِه وِ لا دَریاشُو داشتِن رَد مِوی .تَمُوم کَسُونی کِه دِ اُو حُونَه‌یا بی‎یِن، وِ خاطِر خین بِرَه دِ اَمُون بی‎یِن.

![](https://cdn.door43.org/obs/jpg/360px/obs-en-11-06.jpg)

اَما خداوند دِ لا حُونَه مصری‎یائی کِه وِ خداوند ایمان ناشدِن ئو دِ فِرمُون‌یا او فِرمُونبَری نَکِردِن رَد نِمِوی ئو تَمُوم کُریا گَپ اونُونِه کُشت.

![](https://cdn.door43.org/obs/jpg/360px/obs-en-11-07.jpg)

پیشِه‌زایا کُر هَمَه مصری‎یا کُشِسِن. دِ کُر گَپ فِرعون گِرِتَه تا کُر گَپ نوکری کِه دِ زِندُون بی. خیلی دِ مَردِم مصر وِ خاطِر ناراحتی زیاد خُشُو، روآرو میگِریوِسِن.

![](https://cdn.door43.org/obs/jpg/360px/obs-en-11-08.jpg)

فِرعون هِه دِ اُو شُو، هِنا موسی ئو هارون کِرد ئو گُت: «قوم اسرائیلِه وِرداریت ئو دَرجا دِ مصر بَکیت وِ دَر.» مصری‎یا هَم وِ اونُو جُرِسِن کِه هَرچی زیتِر، دِ اُو وِلات بَکَن وِ دَر.

*مَتَلِی گِرِتِسَه دِ کِتآو مقدس: (کِتآو خروج، فصل ۱۱ آیه ۱ تا ۱۲ ئو فصل ۳۲)*

## 12. ۱۲ - خروج

https://openbiblestories.org/l/lrc/story-12/

![](https://cdn.door43.org/obs/jpg/360px/obs-en-12-01.jpg)

اسرائیلی‎یا خیلی خوشحال بی‎یِن کِه دِ مصر می‌کِردِن وِ دَر. اونُو دَ بَردَه نِوین ئو می‌رَتِن وا لا سَرزِمین موعود. مصری‎یا هَرچی کِه اسرائیلی‎یا حاستِن، مِثِ نُقرَه، طِلا ئو چیا قیمَتی‎شُونِه وِشُو بَخشین. قَری دِ قوم‎یا هَنی هَم کِه وِ خدا ایمان اُوِردین، وا اونُو دِ مصر کِردِن وِ دَر.

![](https://cdn.door43.org/obs/jpg/360px/obs-en-12-02.jpg)

سِتینی دِ اُر دِ روز ئو سِتینی دِ تَش دِ شُو، دِ نِهاشُو حَرکت می‌کِرد. بی‎یِن خدا دِ سِتین اُر ئو تَش واشُو بی ئو هَمیشَه اونُونِه دِ ای سَفر رَمونی می‌کِرد. تَنیا کاری کِه اونُو بایس اَنجُوم می‌دَن، یَه بی کِه دِ دُم او رُوئَن.

![](https://cdn.door43.org/obs/jpg/360px/obs-en-12-03.jpg)

دِما مُدَت کَمی فِرعون ئو قومِش، دِ کار خُشُو پَشیمُو بین ئو اُفتان دِ دُم اسرائیلی‎یا، تا دُوارَه اونُونِه وِ بردِه‌ای خُشُو دِرارَن. خدا نَظر اونُونِه عَوَض کِردی تا نِشُو بِئَه کِه تَنیا او خدای حقیقی‎یَه، ئو مَردِم بَفَمَن کِه یَهُوَه، قوی‌تِر دِ فِرعون ئو خدایا مصرَه.

![](https://cdn.door43.org/obs/jpg/360px/obs-en-12-04.jpg)

وَختی اسرائیلی‎یا قُشون مصرِه دییِن، فَمِسِن کِه دِ بِئن دریای سُر ئو قُشون فِرعون اُفتانَه دِ دُوم. اونُو خیلی تَرسِسِن ئو هِنا کِردِن: «سی‌چی دِ مصر کِردیم وِ دَر؟» «هَمَه اِیما وِ زیئی می‌میرِیم!»

![](https://cdn.door43.org/obs/jpg/360px/obs-en-12-05.jpg)

موسی وِ اسرائیلی‎یا گُت: «زَلَه‎تُو نَرُوئَه! خدا ایمرو سی شِما می‌جنگَه ئو نِجات پیا میکیت. اوسِه خدا وِ موسی فرمایش کِرد: «وِ قوم اسرائیل بُو کِه حرکت بَکَن وا لا دریای سُر.»

![](https://cdn.door43.org/obs/jpg/360px/obs-en-12-06.jpg)

اوسِه خدا سِتین اُرِه حرکت دَ ئو وَنِه نیا دِ بِئن بنی اسرائیل ئو قشونِ فِرعون، تا سَروازیا مصری دَ نَتُونَن اونُونِه بِئی‎نَن.

![](https://cdn.door43.org/obs/jpg/360px/obs-en-12-07.jpg)

خدا وِ موسی فِرمُون دَ کِه دَس خُشِه وِ بالا دریا بُلِن بَکَه. اوسِه خدا بادی فِرسَن کِه آو دریانِه وِ چپ ئو راس بُرد، وِ طُوری ‌کِه رَهی دِ دریا واز بی.

![](https://cdn.door43.org/obs/jpg/360px/obs-en-12-08.jpg)

اوسِه قومِ اسرائیل دِ حالِی کِه دِ هَر دو لاشُو دیواری دِ آو بی، دِ مین دریا وِ رَه خُشُو اِدامَه دَن.

![](https://cdn.door43.org/obs/jpg/360px/obs-en-12-09.jpg)

دِما وَ، خدا سِتین اُرِه زَه وا لا تا مصری‎یا بَتُونَن جیستِن اسرائیلی‎یانِه بِئی‎نَن. اوسِه مصری‎یا قصد کِردِن کِه وِ دُم اونُو رُوئَن.

![](https://cdn.door43.org/obs/jpg/360px/obs-en-12-10.jpg)

وِ ای خاطِر اونُو وِ دُم اسرائیلی‎یا رَتِن دِ مین دریا، اَما خدا مصری‎یانِه وَن دِ هُول ئو کاری کِرد کِه گاری‌یاشُو گیر بَکَه دِ خَرَه. اونُو قارِنن: « بَجی‎ئِیت! سی‌یَه‌کِه خدا سی اسرائیلی‎یا می‌جنگَه.»

![](https://cdn.door43.org/obs/jpg/360px/obs-en-12-11.jpg)

دِما وَ کِه قوم اسرائیل وِ سلامت وِ اولانِه دریا رَسِس، خدا وِ موسی فرمایش کِرد: «یِه گِل هَنی دَس خُتِه وا لا دریا دراز بَکُو.» زِمُونی کِه او ای کارِه کِرد، آو ریخت وِ سَر مصری‎یا ئو گاری‌یاشُو ئو هَمَه‌شُو دِ دریا غَرق بی‎یِن.

![](https://cdn.door43.org/obs/jpg/360px/obs-en-12-12.jpg)

وَختِی اسرائیلی‎یا نابودی کامل قشون مصرِه دییِن، وِ خدا اِطمینُو کِردِن ئو وِ ای باور رَسِسِن کِه موسی، پِیُمبَری دِ لا خدائَه.

![](https://cdn.door43.org/obs/jpg/360px/obs-en-12-13.jpg)

قوم اسرائیل خیلی هوس کردن؛ سی‌یَه‌کِه خدا اونُونِه دِ برده‎ایی ئو مرگ نِجات دِئی. اِیسِه اونُو آزاد بی‎یِن کِه خدانِه بَپِرَسَن ئو دِ او فِرمُونبَری بَکَن. اسرائیلی‎یا سِرویا زیادی سی آزادی خُشُو گُتِن ئو خدانِه ستایش کِردِن، کِه اونُونِه دِ دَس قشونِ مصر نِجات دِئی.

![](https://cdn.door43.org/obs/jpg/360px/obs-en-12-14.jpg)

اوسِه خدا وِ قوم فِرمُون دَ، کِه هَر سال ای اتفاقِه جَشن بیرَن ئو وِ ویر بیارَن کِه خدا چِطُوری مصری‎یانِه شِکَس دا ئو قوم اسرائیلِه‎ دِ برده‎ایی آزاد کِردَه. نُوم ای جشن نِرِس وِ پسَخ. اونُو هَر سال وا کواو کردن بِرَه‌ قربانی وا نُونِ فَطیر، وَنِه جَشن می‌گِرِتِن.

*مَتَلِی گِرِتِسَه دِ کِتآو مقدس: (کِتآو خروج فصل ۱۲ آیه ۳۳ تا فصل ۱۵ آیه ۲۱)*

## ۱۳. عَد خدا وا اسرائیل

https://openbiblestories.org/l/lrc/story-13/

![](https://cdn.door43.org/obs/jpg/360px/obs-en-13-01.jpg)

دِما رَد بی‎یِن قومِ اسرائیل دِ دریای سُر، خدا اونُونِه وا لا کُوه سینا رَمُونی کِرد. یَعنِی هِه اُو کُوهی کِه موسی بُوتَه بِلیزِه وِ سَرِش دیئی. اوسِه قوم وِ پا اُو کُوه اُردی زَن.

![](https://cdn.door43.org/obs/jpg/360px/obs-en-13-02.jpg)

خدا وِ موسی ئو قوم اسرائیل فرمایش کِرد: «شِما بایس هَمیشَه دِ مِ فرمُونبرداری بَکیت ئو وِ عَدی کِه وا شِما می‌وَنِم وفادار بَمُونیت. اَر ای کارِه بَکیت، سی مِ مُلکِ خاص، مملکتی دِ کاهن‌یا ئو امتی مقدس موئیت.»

![](https://cdn.door43.org/obs/jpg/360px/obs-en-13-03.jpg)

مَردِم وِ مدت سِه روز خُشُون آمادَه دییِن خدا کِردِن. اوسِه خداوند وا تَش بِریق، دیی ئو دَنگ بُلِن شیپور، وِ ریی تُکِ کُوه سینا اُما وِ هار. موسی وِ تَنیایی رَت بالا کُوه.

![](https://cdn.door43.org/obs/jpg/360px/obs-en-13-04.jpg)

اوسِه خدا وا اونُو پِیمُونی بَست ئو گُت: «من هستم یَهُوَه خدات، کِه تُونِه دِ اسیری ئو بَنه‌ایی مصر آزاد کِرد. خدائی هَنی بِه‌جُز مِ پرستش نَکُو.»

![](https://cdn.door43.org/obs/jpg/360px/obs-en-13-05.jpg)

«بُت نَساز ئو وَنِه پرستش نَکُو؛ سی‌یَه‌کِه مِ یَهُوَه، بایس یگانَه خدا تو بام. نُوم مِنِه بی‌حُرمَت نَکُو ئو روز شباتِه مقدس دُونِسو. هَمَه کاریا خُتِه دِ شیش روز اَنجُوم بِه، سی‌یَه‌کِه تو بایس دِ روز هَفتِم آرُوم بِیری ئو مِنِه وِ ویر بیاری.»

![](https://cdn.door43.org/obs/jpg/360px/obs-en-13-06.jpg)

بُوئَه ئو داتِه عزتشونِ داشتو قتل نَکُو، زِنا نَکُو، دُوزی نَکُو ئو دِرو نُو. چَشِ طمع وِ مال ئو زینَه هُومسات ناشتَه با.

![](https://cdn.door43.org/obs/jpg/360px/obs-en-13-07.jpg)

قوم قَبول کِردِن دِ قانون‌یائی کِه خداوند وِشُو دِئی فِرمُونبَری بَکَن. اونُو قَبول کِردِن کِه مالِ خدا بووَن ئو تَنیا اونِه بَپِرَسَن.

![](https://cdn.door43.org/obs/jpg/360px/obs-en-13-08.jpg)

ئو خدا وِ مَردِمِ اسرائیل فرمایش کِرد کِه دُوآر گَپی (دُوآر ملاقات) بَسازَن. او فِرمُون ساختِن دُوآرِ‌نِه وا هَمَه ریزَه کاری‎یا ئو هَرچی کِه بایس دِش قِرار بِیرَه، وِشُو دَ. او فِرمُو دَ تا پَردَه گَپی بَسازَن کِه دُوآرِنِه بَکَه وِ دو جا. خداوند دِ اُتاق پُشت پَردَه حاضر ئو دِ اوچِه می‎مَن. تَنیا کاهن گَپ اِجازَه داشت کِه وِ اُو اُتاق، وِ حضور خدا وارِد بووَه.

![](https://cdn.door43.org/obs/jpg/360px/obs-en-13-09.jpg)

قوم هَم بایس جا قُربانی دِ جلو خِیمَه(خِمَه) ملاقات ره بُونَن. هَرکَس کِه دِ شریعت خدا سرپیچی می‌کِرد، بایس حِیوُنی بیارَه وِ تِه قُربانگاه. کاهِنی بایس اُو حِیوُنِه بَکُشَه ئو وَنِه وِ عنوان قربانی سی خدا، وِ ریی قُربانگاه ‌بَسوزِنَه. خداوند گُت کِه خین حِیوُنِه قربانی بی‎یَه، گناه شخصِه می‌پوشِنَه. وِ ای طُوری خداوند گناه اونِه نِئی‎یَه می‌گِرِت ئو اُو شَخص دِ نَظَر خدا پاک وِ حِساو می‌اُما. خدا بِرار موسی، هارون ئو نسل اونِه انتخاب کِرد تا کاهن‎یا او بووَن.

![](https://cdn.door43.org/obs/jpg/360px/obs-en-13-10.jpg)

اوسِه خدا ده فرمانِ وِ ریی دو لوح بَردی نوشت ئو دَ وِ موسی. ئو خداوند همچنین وِ قوم قانون‌یائی هَنی دَ تا دِشو فِرمُونبَری بَکَن. خدا وَعدَه دَ، اَر دِ اُو قانون‌یا اطاعت بَکَن اونُونِه برکت بِئَه ئو ویردارِشُو با، اَما اَر سرپیچی بَکَن اونُونِه مجازات می‌کَه.

![](https://cdn.door43.org/obs/jpg/360px/obs-en-13-11.jpg)

موسی روزیا زیادی مَن بالا کُوه سینا ئو وا خدا صُبَت کِرد. مَردِم دِ چَش وِ رَه مَنِن سی وِرگَشتِن او شَکَت بی‎یِن. اوسِه طِلایا زیادی اُوِردِن وِ تِه هارون ئو دِش حاستِن کِه سی‌شُو بُتی بَسازَه، تا وِ جا خدا بَپِرَسَن. وِ چِنی دَس وِ گناه وحشتناکی دِ حقِ خدا زَن.

![](https://cdn.door43.org/obs/jpg/360px/obs-en-13-12.jpg)

هارون بُت طِلائی‎ئِی دِ طُور گوسال دُرِس کِرد. مَردِم وحشی‎یُونَه شُرو وِ پِرَسِش بُت کِردِن ئو سیش قربانی کِردِن! خدا وِ خاطر گناه اونُو خیلی دِ دَسِه‌شُو عَصَبُونی بی ئو وِ موسی گُت کِه قصد نابودی‌شُو کِردَه. اَما موسی دِ خدا حاست کِه ای کارِه اَنجُوم نِئَه. خدا دُعا موسی‌نِه شِنَفت ئو اونُونِه دِ بِئن نُوِرد.

![](https://cdn.door43.org/obs/jpg/360px/obs-en-13-13.jpg)

وَختی کِه موسی دِ کُوه سینا اُما وِ هار، دو لوح بَردی‌نِه کِه خدا ده فرمانِ وِ ریشُو نوشتی دِ دَس داشت. هی‌یَه‌کِه بُتِه دیی، چِنو عَصَبُونی بی کِه لوح‌یانِه کُفت وِ زِمی ئو اِشکِنا.

![](https://cdn.door43.org/obs/jpg/360px/obs-en-13-14.jpg)

اوسِه بُتِه سُختِنا ئو حیردِش کِرد، دِ طُور گَرت دِراُوِرد. گَرتِنِه ریخت دِ آو ئو مَردِمِه وادار وِ حَردِنِش کِرد. خدا بِلائی وِ مَردِم نازل کِرد ئو خیلی دِشُو مُردِن.

![](https://cdn.door43.org/obs/jpg/360px/obs-en-13-15.jpg)

موسی وِ ‌جا لوح‌یا بَردی کِه خُش اِشکِنائی‌شُو، لوح‌یائی هَنی سی ده فرمان تِراشی. اوسِه دُوارَه رَت بالا کُوه ئو سی بخشش گناه‌یا قوم دُعا کِرد. خدا دُعایا موسی‌نِه شِنَفت ئو اونُونِه بَخشَن. موسی وا دَه فرمان کِه خدا ریی لوح‌یا تازَه نِوشتی، دِ کُوه اُما وِ هار. اوسِه خدا اونُونِه دِ کُوه سینا وِ لا سَرزِمینِ موعود رَمُونی کِرد.

*َتَلِی گِرِتِسَه دِ کِتآو مقدس: (کِتآو خروج فصل ١٩ تا٣٤)*

## ۱۴. سَرگَردُونی دِ بیابُو

https://openbiblestories.org/l/lrc/story-14/

![](https://cdn.door43.org/obs/jpg/360px/obs-en-14-01.jpg)

دِما یَه کِه خدا قومِه دِ قانون‎یا شریعت با خَوَر کِرد، اونُونِه وا لا کُوه سینا رَمُونی کِرد. اونُو بایس وِ خاطِر عَدی کِه وا خدا بَستین، دِ قانون‎یا شریعت فِرمُونبَری می‎کِردِن. خواست خدا یَه بی کِه اونُو وِ سَرزِمین موعود، یَعنِی کنعان بَرَسَن. خداوند وا نِها اونُو دِ سِتین اُر می‌رَت ئو مَردِم هَم وِ دُمِش می‌رَتِن.

![](https://cdn.door43.org/obs/jpg/360px/obs-en-14-02.jpg)

خدا وِ ابراهیم، اسحاق ئو یعقوب قول دِئی کِه سَرزِمین موعودِه مِئَه وِ بَچُون اونُو. اَما دِ اُو زِمُون طایفه‌یا زیادی دِ اوچِه زِنِئی می‌کِردِن کِه اونُونِه کنعانی‎یا هِنا می‌کِردِن. کنعانی‎یا پیرو خدا نِوین ئو اونِه پرَستش نِمی‌کِردِن. اونُو خدایا دِروئی‎نِه می‌پِرَسین ئو کاریا گَنِ زیادی اَنجُوم می‌دَن.

![](https://cdn.door43.org/obs/jpg/360px/obs-en-14-03.jpg)

خدا وِ قوم اسرائیل فرمایش کِرد: «دِما رَسِسِن وِ سَرزِمین موعود، بایس خُتُونِه دِ شَر کنعانی‎یائی کِه هان اوچِه رِها بَکیت. وا اونُو صلح(دوستی) ئو دُوئَت نَکیت. شِما بایس هَمَه بُت‌یا اونُونِه نابود بَکیت. نتیجَه نافِرمُونی دِ ای فِرمُون‎یا، پرستش پَرَسین بُت‌یا اونُو دِ جا مِ مووَه.»

![](https://cdn.door43.org/obs/jpg/360px/obs-en-14-04.jpg)

وَختی اسرائیلی‎یا رَسِسِن وِ مَرزِ سَرزِمین کنعان ، موسی دِ هَر طایفِه یِه نَفَر، یَعنی دُوزَه پیا جِگا کِرد. او وِ اونُو رَه کاریائی سی مُخبِری دِ سرزِمینِ کنعان دَ. ئو دِشُو حاست تا بِئینَن کِه آیا کنعانی‎یا زوردارَن یا بی‎زور.

![](https://cdn.door43.org/obs/jpg/360px/obs-en-14-05.jpg)

اُو دُوزَه پیا چهل روز دِ سَر تا سَر کنعان سفر کِردِن ئو دِما وَ وِرگَشتِن. اونُو وِ قوم گُتِن: «زِمی حاصلخیزَه ئو ثَمَر زیاد دارَه.» اَما دَه نفر دِ اُو مُخبِر‎یا گُتِن: «شهرِیا مُحکَمَن اما مَردِم اوچِه زوردار ئو هیکلی‌ئَن. اَر وِ اونُو یورِش بُریم، بی‌گِمُو شِکَس مُحُریم ئو وِ دَس اونُو کُشتَه موئِیم.»

![](https://cdn.door43.org/obs/jpg/360px/obs-en-14-06.jpg)

اوسِه دو مُخبِرهَنی کِه نُوم‌یاشُو کالیب ئو یوشع بی، گُتِن: «دُرسَه کِه مَردِم‎یا کنعان دِ اِیما بُلِن‌تِر ئو زوردار‌تِرَن، اَما بی‌شِک اِیما می‌تُونیم اونُونِه شِکَس بِئِیم! سی‌یَه‌کِه خدا سی اِیما می‎جَنگَه.»

![](https://cdn.door43.org/obs/jpg/360px/obs-en-14-07.jpg)

اَما قوم وِ حرف‎یا یوشع ئو کالیب گوش نَدَن ئو وا خِز وِ موسی ئو هارون گُتِن: «سی‌چی اِیمانِه وِ ای جا وحشتناک اُوِردیت؟ اِیما بایس دِ مصر می‌مَنیم. اَر وِ اُو سَرزِمین وارد بوئِیم، دِ جَنگ کشتَه موئِیم ئو زَن‎یا ئو بَچُون اِیما وِ بَردِه‎ایی می‌رَن.» اونُو حاستِن رَبَری هَنی بِیرَن تا اونُونِه وِرگَردِنَه وِ مصر.

![](https://cdn.door43.org/obs/jpg/360px/obs-en-14-08.jpg)

خدا دِ ای حَرفِ مَردِم خیلی عَصَبُونی بی ئو دِراُما وِ دُوآر ملاقات ئو گُت: «شِما دِ بِراوَر مِ سرکَش بی‎ئیت، پَس هَمَه‌تُو دِ بیابُو سَرگردُون موئیت. هَمَه آیِم‎یا بیس سال وِ بالا، بِجُز کالیب ئو یوشع، دِ بیابُو می‌میرَن ئو هرگز واردِ سَرزِمین موعود نِمووَن.»

![](https://cdn.door43.org/obs/jpg/360px/obs-en-14-09.jpg)

وَختِی مَردِم ای حرف خدانِه شِنَفتِن، دِ گناه خُشُو پشیمُو بی‎یِن ئو وِ یَه بین کِه وِ کنعانی‎یا یورِش بُورَن. موسی وِشُو هُشدار دَ کِه نَرُوئَن، سی‌یَه‌کِه خدا وا اونُو نِوی، اَما اونُو وِ موسی گوش نَدَن.

![](https://cdn.door43.org/obs/jpg/360px/obs-en-14-10.jpg)

خدا دِ اُو جنگ وا اونُو نِوی. وِ ای خاطِر دِ کنعانی‎یا شِکَس حَردِن ئو خیلی دِشُو کشتَه بی‎یِن .اوسِه قومِ اسرائیل دِ سَرزِمینِ کنعان وِرگَشتِن ئو سی چهل سال دِ بیابُو سَرگَردُون مَنِن.

![](https://cdn.door43.org/obs/jpg/360px/obs-en-14-11.jpg)

دِ چهل سالی کِه اسرائیلی‎یا دِ بیابُو سَرگَردُون بی‎یِن، خدا نیازیا اونُونِه جور می‎کِرد. او دِ آسِمُو وِشُو نُونی دَ کِه نُومِش «مَنّا» بی. ئو او سی‌شُو کُوکَر‌یائی می‌فِرسَن تا گوشت هَم سی حَردِن داشتَه بان. دِ تَمومِ اُو مُدت خدا نِهیشت کالَه ئو جُمَه‌شُو کُنَه با.

![](https://cdn.door43.org/obs/jpg/360px/obs-en-14-12.jpg)

خدا دِ طُور معجزِه‌ دِ مین کَمَر، آو سی حَردِن وِشُو ‌دَ. اَما وا ای هَمَه، قومِ اسرائیل دِ خدا ئو دِ موسی ناراضی بی‎یِن ئو غُر می‌زَن. وا وجود یَه، خدا هَنی وِ عَدی کِه وا ابراهیم، اسحاق ئو یعقوب بَستی، وفادار مَن.

![](https://cdn.door43.org/obs/jpg/360px/obs-en-14-13.jpg)

یِه دَفَه هَنی وَختی ‌کِه مَردِم آو سی حَردِن ناشدِن، خدا وِ موسی فرمایش کِرد: «وِ کَمَر بُو کِه آو دِش بَکَه وِ دَر.» اَما موسی وِ ‌جا وَ کِه وِ کَمَر فِرمُون بِئَه، وا موزبِرَه، دو دَفَه زَش ئو وا ای کار وِ خدا بی‌احترامی کِرد. آو وِ اندازَه کافی سی هَمَه دِ دلِ کَمَر کِرد وِ دَر، اَما خدا دِ موسی خِیزش گرت ئو گُت: «تو وِ سَرزِمین موعود وارد نِموئی.»

![](https://cdn.door43.org/obs/jpg/360px/obs-en-14-14.jpg)

دِما چهل سال کِه قومِ اسرائیل دِ بیابُو سَرگَردُون بی‎یِن، هَمَه وِنُونی کِه وِ ضد خدا شورش کِردین، مُردِن. اوسِه خدا قومِه یِه گِل هَنی وِ نِزیکی مرزیا سَرزِمین موعود رَمُونی کِرد. سی‌یَه‌کِه موسی خیلی پیر‌ بیئی، خدا یوشع‌نِه سی رَبَری قوم پَسَن کرد. خدا وِ موسی قول دَ کِه یِه ‌روز، پِیُمبَری چی او سی مَردِم می‌فِرسَه.

![](https://cdn.door43.org/obs/jpg/360px/obs-en-14-15.jpg)

خدا وِ موسی‌ فِرمُون دَ رُوئَه بالا کُوه بُلِنی تا دِ اوچِه بَتُونَه سَرزِمین موعودِه بِئی‎نَه. موسی سَرزِمین موعودِه دیی، اَما خدا وِش اِجازَه ورود نَدَه. اوسِه موسی مُرد ئو قومِ اسرائیل سی روز سیش پُرس گِرِتِن. یوشع بی وِ رَبَرشُو. او رَبَر خوئی بی، سی‌یَه‌کِه وِ خدا اِطمینُو داشت ئو دِ او فِرمُونبَری می‌کِرد.

*مَتَلِی گِرِتِسَه دِ کِتآو مقدس: (کِتآو خروج فصل ۱۶ ئو ۱۷،کِتآو اعداد فصل ۱۰ تا ۱۴،کِتآو تثنیه فصل ۳۴)*

## ۱۵.  سرزمین موعود

https://openbiblestories.org/l/lrc/story-15/

![](https://cdn.door43.org/obs/jpg/360px/obs-en-15-01.jpg)

آخِر، زِمُونِ وَ رَسِس کِه قومِ اسرائیل روئن وِ سَرزِمینِ موعود، یَعنی کنعان . دِ اوچِه شهری وِ نُومِ اریحا بی کِه دُور تا دُورِش وِ وَسیلَه دیواریا مُکَمی ویرداری مِوی. یوشع دو مُخبِر فِرسَن وِ اُو شهر. دِ اوچِه فاشِه‌ وِ ‌نُوم راحاب زِنِئی می‌کِرد. او مُخبِر‎یانِه قایِم کِرد وِ تِه خُش، کُمَکِشُو کِرد کِه دِ شهر بَجی‎ئَن. او سی‌یَه‌کِه وِ خدا ایمان داشت ای کارِه اَنجُوم دَ. مُخبِر‎یا وِ راحاب قول دَن کِه وَختی اریحانِه نابود کِردِن، ویردار او ئو خانِوادَه‌ش بووَن.

![](https://cdn.door43.org/obs/jpg/360px/obs-en-15-02.jpg)

سی اُومایِن وِ سَرزِمینِ موعود، اسرائیلی‌یا بایس دِ رو اردن کِل مِوین. خداوند وِ یوشع گُت: «کاهن‌یانِه وا نِها بَفِرِس.» وَختی کَف پا کاهن‌یا وِ آو رو اردن رَسِس، حرکتِ آو بَن اُما ئو اسرائیلی‎یا تُونِسِن وِ ریی زِمی حُشک، وِ اولا رو کِل بووَن.

![](https://cdn.door43.org/obs/jpg/360px/obs-en-15-03.jpg)

دِما وَ کِه قوم دِ رو اردن کِل بی‎، خدا وِ یوشع گُت کِه سی یورِش وِ شهر قدرتمَن اریحا، آمادَه بووَه. خدا وِ مَردِم گُت: کاهن‌یا ئو سَروازیا بایس شیش روز، روزِی یِه‌ گِل دُور شهر رَه رُوئَن. اوسِه کاهن‌یا ئو سَروازیا ای کارِه اَنجُوم دَن.

![](https://cdn.door43.org/obs/jpg/360px/obs-en-15-04.jpg)

دِ روز هَفتِم، اسرائیلی‎یا بایس هَفت گِل شهرِه دُور بَزِنَن، اوسِه کاهن‌یا پُف بَکَن دِ شیپور خُشُو ئو هَمَه مَردِم بَقارِنَن. اونُو ای کارِه اَنجُوم دَن.

![](https://cdn.door43.org/obs/jpg/360px/obs-en-15-05.jpg)

اوسِه دیواریا دُور تا دُور اریحا ریختِن. اسرائیلی‌یا هَمَه چیا مین شهرِه، وِ ریی فِرمُون خدا نابود کِردِن. تَنیا راحاب ئو خانوادَه‌ش کِه وِ اسرائیلی‎یا اضافَه بین، مَنِن دِ اَمُون. وَختی قوم‎یائی هَنی دِ سَرزِمینِ کنعان، فَمِسِن کِه اسرائیلی‎یا اریحانِه ویرُون کِردِنَه، اُفتان دِ هُول کِه نَکَه قومِ اسرائیل وِ اونُو هَم یورِش بُورَن.

![](https://cdn.door43.org/obs/jpg/360px/obs-en-15-06.jpg)

خدا وِ قومِ اسرائیل فِرمُون دِئی کِه وا هیچ طایفِه‌ دِ کنعان، پیمُون دوسی نَوَنَن. اَما یَکی دِ طایِفَه‌یا کنعانی وِ ‌نُوم جبعونی‎یا، وِ یوشع دِرو گُتِن ئو اِدا کِردِن کِه دِ جائِی دیر دِ کنعان اُمانَه. اونُو دِ یوشع حاستِن تا واشُو پیمُون دوسی بَوَنَه. یوشع ئو بَقیَه رَبَریا اسرائیل، بی شُور وا خدا، وا جبعونی‎یا پیمُونِ صُلح، دوسی بَستِن.

![](https://cdn.door43.org/obs/jpg/360px/obs-en-15-07.jpg)

دِما سِه روز، اسرائیلی‎یا فَمِسِن کِه جبعونی‎یا دِ راسی مالِ کنعانَن. وِ ای خاطِر، دِ حُقَه بازی اونُو عَصَبُونی بی‎یِن . اَما پِیمُون صُلحِه واشُو نَشکِنان، سی‌یَه‌کِه اُو پِیمُون دِ تِی خدا بَستَه بیئی. قَری دِما وَ، پادشایا طایفِه ی هَنی دِ کنعانی‎یا وِ ‌نُوم اموری‎یا، وَختی شِنَفتِن کِه جبعونی‎یا وا بنی‌اسرائیل پِیمُون صُلح بَستِنَه، وا یَکتِری هُم پِیمُون بین، قُشون خُشُون جَم کِردِن ئو یورش بُردن وِ جبعونی‎یا. جبعونی‎یا دِ یوشع کمک حاستِن.

![](https://cdn.door43.org/obs/jpg/360px/obs-en-15-08.jpg)

یوشع قوشن اسرائیلِ جَم کِرد. اونُو تَمُومِ شُو دِ رَه بی‎یِن تا رَسِسِن وِ جبعون. صُو زیی اموریانِه غافلگیر کِردِن، وِشُو یورِش بُردِن.

![](https://cdn.door43.org/obs/jpg/360px/obs-en-15-09.jpg)

خدا اُو‌ روز سی اسرائیل جَنگِس. او اموری‎یانِه سرتپ وشو شیون، تِگر‌یا گَپی دِ آسِمُو بارَن ئو خیلِی دِ اموری‎یانِه کُشت.

![](https://cdn.door43.org/obs/jpg/360px/obs-en-15-10.jpg)

ئو خدا کاری کِرد کِه اَفتاو دِ آسِمُو دِ حرکت بِئسَه، تا سَروازیا اسرائیلی زِمُونِ کافی سی شِکَس کاملِ اموری‎یا داشتَه بان. خدا دِ اُو روز پیروزی، بُرد گَپی سی اسرائیلی‎یا جور کِرد.

![](https://cdn.door43.org/obs/jpg/360px/obs-en-15-11.jpg)

دِما یَه کِه خدا اُو لشکری‎یانِه شِکَس دَ، خیلی دِ طایفه‌یائی هَنی دِ کنعانی‎یا، سی یورِش وِ اسرائیلی‎یا وا یَکتِری هُم شُور بین. یوشع ئو اسرائیلی‎یا وِ اونُو یورِش بُوردِن ئو نابودِشُو کِردِن.

![](https://cdn.door43.org/obs/jpg/360px/obs-en-15-12.jpg)

ِما ای جنگ‌یا، خدا بَر هَر طایفِه دِ اسرائیلِه دِ سَرزِمینِ موعود وِشُو بَخشَن. اوسِه خداوند آرُومِشِه دِ تَمُومِ مرزیا اسرائیل بَرقِرار کِرد.

![](https://cdn.door43.org/obs/jpg/360px/obs-en-15-13.jpg)

چون یوشع پیر بی، هَمَه قوم بنی‌اسرائیلِه جَم کِرد وِ دُور یَک. اوسِه او اُوِرد وِ ویر مَردِم کِه اونُو قول دِئین، دِ عَدی کِه خدا وِ ریی کُوه سینا واشُو بَستی، فِرمُونبَری بَکَن. مَردِم قول دَن کِه وِ خدا وفادار بَمُونَن ئو دِ شریعتِ او فِرمُونبَری بَکَن.

*مَتَلِی گِرِتِسَه دِ کِتآو مقدس:  (کِتآو یوشع فصل ۱ تا ۲۴)*

## ۱۶. رهانَندیا

https://openbiblestories.org/l/lrc/story-16/

![](https://cdn.door43.org/obs/jpg/360px/obs-en-16-01.jpg)

دِما مُردِنِ یوشع، قومِ اسرائیل دِ فِرمُون‎یا خدا سرپیچی کِردِن(تَفرَه رَتِن) ئو هَمَه کنعانی‎یانِه دِ سرزِمینِ موعود نَوَنِن وِ دَر. ئو اونُو دِ جا یَهُوَه خدا راسی ریی اُوِردِن وِ پرسِش بُت‎یا کنعانی‎یا. دِ اُو زِمُون، قوم اسرائیل پادشاهی ناشدِن، پس هَر کَس اُو چی‎ئی کِه فِکر می‌کِرد دُرسَه، اَنجُوم می‎دَ.

![](https://cdn.door43.org/obs/jpg/360px/obs-en-16-02.jpg)

نافِرمُونی قوم اسرائیل باعث وِ وجود اُومایِن اِتفاق‎یائی بی کِه زیاد دِ زِنِئی قوم اسرائیل تِکرار بی. ای اتفاق‎یا وِ ای طور بی: قوم اسرائیل چَن سال وِ نافِرمُونی دِ خدا ادامَه می‌دَن. اوسِه خدا سی مجازات اونُو، وِ دشمن‎یاشُو اِجازَه می‎دَ تا وِ اونُو پیروز بان. دشمن‎یاشُو مال اونُونِه غارت ئو نابود می‌کِردِن ئو قری زیادی دِشُو می‌کُشتِن. اوسِه دِما یَه کِه سال‎یا زیادی موردِ آزار دشمن‎یا قِرار می‌گِرِتِن، وِ تِه خدا توبَه می‌کِردِن ئو دِش می‌حاستِن تا اونُونِه دِ دَس دشمن‎یاشُو رها بَکَه.

![](https://cdn.door43.org/obs/jpg/360px/obs-en-16-03.jpg)

هَر گِل کِه اونُو توبَه می‌کِردِن، خدا وا فِرِسَنِن نجات دهندِه اونُونِه رها می‌کِرد. اُو کَس وا دشمن‎یا اونُو می‌جَنگِس ئو شِکَسِه‌شُو می‎دَ. وِ ای طوری آرُومِش دِ سرزِمین اونُو برقِرار مِوی ئو کَس نجات دهندَه وِ خوئی وِشُو حکومت می‌کِرد. خدا رهانندیا زیادی سی رهایی قومِ اسرائیل فِرسَن. دِما یَه کِه خدا اجازَه دَ تا بُری دِ دشمن‎یاشُو وِ نُوم مدیان قوم اسرائیلِه شِکَس بِئَه، یِه گِل هَنی نجات دیی سی‎شُو فِرسَن.

![](https://cdn.door43.org/obs/jpg/360px/obs-en-16-04.jpg)

مدیانی‎یا سی هفت سال، محصول‎یا قوم اسرائیلِ غارت کِردِن. قوم اسرائیل دِ تَرسِشُو دِ غاریا قایِم مِوین تا نَکَه مدیانی‎یا اونُونِه پیا بَکَن. آخِر اونُو دِ خدا حاستن تا نجاتِشُو بِئَه.

![](https://cdn.door43.org/obs/jpg/360px/obs-en-16-05.jpg)

یِه روز پیا اسرائیلی‎ئی وِ نُوم جِدعون، قایِمَکی داشت گَنِم میکُفتِ تا مدیانی‎یا نَتُونَن اونِه غارت بَکَن. هِه اُو مُوقَه فرشتَه یَهُوَه وِش دِراُما ئو گُت: «اِ جَنگجوئِه نترس، خدا ها وا تو. رُو ئو اسرائیلِه دِ چِنگ مدیانی‎یا رها بَکُو.»

![](https://cdn.door43.org/obs/jpg/360px/obs-en-16-06.jpg)

بُوئَه جِدعون، قربانگاهِشِه وِ یِه بُت پیش‎کَش کِردی. اولین درخواستِ خدا دِ جدعون ویرُون کِردِن اُو قربانگاه بی. اَما سی‎یَه‎کِه جدعون دِ مَردِم زَلَش می‎رَت تا نِصمِه شُو چَش وِ رَه مَن. اوسِه قربانگانِه اِشکِنا ئو حیردِش کِرد. او دِ نِزیکی اُو جا، قربانگاهی هَنی سی خدا دُرِس کِرد ئو وِ ریش قربانی کِرد.

![](https://cdn.door43.org/obs/jpg/360px/obs-en-16-07.jpg)

صُو روز بَد مَردِم دِ دییِن یَه کِه کَسی قربانگانِه اِشکِنائَه ئو نابودِش کِردَه خیلی عَصَبُونی بی‎یِن. اونُو رَتِن وا لا حُونَه جِدعون تا اونِه بَکُشَن، اَما بُوئَه جدعون گُت: «سی‌چی شِما می‌حایت وِ خدا خُتُو کمک بَکیت؟ اَر او خدائَه، بِیلیت ویردار خُش با.» اونُو وِخاطِر اُو چی‎ئی کِه او گُت، دِ کُشتِن جدعون پَشیمُو بی‎یِن.

![](https://cdn.door43.org/obs/jpg/360px/obs-en-16-08.jpg)

دِما وَ مدیانی‎یا هَنی هَم اُمان تا قومِ اسرائیلِه غارت بَکَن. قریشُو اُوقَه زیاد بی کِه و شِمار نِمی‎اُمان. جِدعون تَمُوم قومِن سی جَنگ وا مدیانی‎یا هِنا کِرد. جِدعون دِ خدا دو نِشُونَه حاست تا اِطمینُو پیا بَکَه کِه خدا وِ راسی دِ او حاستَه تا اسرائیلِه نجات بِئَه.

![](https://cdn.door43.org/obs/jpg/360px/obs-en-16-09.jpg)

سی اولین نِشُونَه، جِدعون تیکِه ی دِ پوس میش نیا وِ ریی زِمی ئو دِ خدا حاست کِه هِه ریی پوس، شُونِم بَشی‎نَه اَما زِمی حُشک بَمُونَه. خدا ای کارِه اَنجُوم دَ. روزِ بَد او دِ خدا حاست کِه زِمی تَر با، اَما پوس حُشک بَمُونَه، خدا ای کارِه هَم کِرد. ای دو نِشُونَه، جِدعونِه راضی کِرد کِه خدا دِ او میحا تا اسرائیلِه دِ دَس مدیانی‎یا رها بَکَه.

![](https://cdn.door43.org/obs/jpg/360px/obs-en-16-10.jpg)

۳۲۰۰۰ سَرواز اسرائیلی اُمان وِ تِه جِدعون ، اَما خدا و او گُت کِه تعدادِشُو خیلی زیادَه. وِ ای خاطِر جِدعون ۲۲۰۰۰ سَروازِه کِه دِ جنگ زَلَه‎شُو می‎رَت فِرسَن وِ حُونَه. خدا دُوارَه وِ جِدعون گُت کِه ای تعداد(اِیقَه آیِم) هَم زیادَه، اوسِه جدعون هَمَه شُونِه بِه‌جُز ۳۰۰ نفر وِرگَردَن وِ حُونَه.

![](https://cdn.door43.org/obs/jpg/360px/obs-en-16-11.jpg)

هِه ‌اُو شُو خدا وِ جِدعون گُت: «قایمَکی رُو وِ جا اُردی مدیانی‎یا، وَختی حرف‎یا اونُونِه بَشنَوی دِ یورِش وِ اونُو دَ زَلَت نِمیرَه.» جدعون رَت وِ اردوگاه اونُو ئو شِنَفت کِه یِه سَرواز مدیانی اُو چِی‌ئی کِه دِ خآو دیئی سی دوسِش تَریف می‌کِرد. دوسِش وِش گُت: «معنی خآو تو یِنا کِه قشون جدعون قشون اِیما مدیانی‎یانِه شِکَس مِئَه.» وَختی جدعون یَنِه شِنَفت خدانِه ستایش کِرد.

![](https://cdn.door43.org/obs/jpg/360px/obs-en-16-12.jpg)

جِدعون وِرگَشت وا لا سَروازیاش ئو وِ هَر کُوم دِشُو یِه شیپور ئو یِه کیزَه گِلی دَ کِه مشعلی دِ مینِش بی. اونُو وِ دُور جا اُردی دشمن وَختی کِه سَروازیا مدیانی دِ خآو بی‎یِن، چاتمَه زَن. ۳۰۰ سَرواز جِدعون مَشعل‎یا خُشُونِه نیانی دِ مین کیزَه تا مدیانی‎یا نَتُونَن نور مَشعل‎یانِه بِئی‎نَن.

![](https://cdn.door43.org/obs/jpg/360px/obs-en-16-13.jpg)

اوسِه هَمَه سَروازیا جِدعون، هُم زِمُون کیزَیانِه اِشکِنان ئو نور مَشعل‎یا دیاری بی. ئو دِ حالی کِه پُف می‌کِردِن دِ شیپوریاشُو، می‎قارَنِن: «شِمشیر سی یَهُوَه ئو جدعون.»

![](https://cdn.door43.org/obs/jpg/360px/obs-en-16-14.jpg)

خدا چِنُو مدیانی‎یانِه پَریشُو کِرد کِه شُرو کِردِن وِ یورِش ئو کُشتِن یَکتِری. جدعون دَرجا بَقیَه قومِ اسرائیلِه دِ حُونَه‌یاشُو هِنا کِرد تا سی رَتِن وِ دُم مدیانی‎یا بیان وِ کُمَکِشُو. اونُو بُر زیادی دِ مدیانی‎یانِه کُشتِن ئو بَقیَه‌نِه دِ سرزمین اسرائیل وَنِن وِ دَر. اُو روز ۱۲۰۰۰ نفر دِ مدیانی‎یا کُشتَه بی‎یِن. وِ چِنی، خدا قوم اسرائیلِه نجات دَ.

![](https://cdn.door43.org/obs/jpg/360px/obs-en-16-15.jpg)

مَردِم حاستِن جِدعونِه بَکَن وِ پادشاه خُشُو. او وِ اونُو اِجازَه نَدَه ای کارِه اَنجُوم بِئَن، اَما دِشُو حاست کِه کَمِی دِ حلقَه‌یا طِلائی‌نِه کِه دِ مدیانی‎یا وِ دَس اُوِردین وِ او تحویل بِئَن. مَردِم طِلا زیادی وِ جِدعون دَن.

![](https://cdn.door43.org/obs/jpg/360px/obs-en-16-16.jpg)

اوسِه جِدعون وا اُو طِلایا، جلیقِه چی اُو چی‎ئی کِه رئیس کاهن‌یا می‌پوشی، دُرِس کِرد. اَما مَردِم چی بُت، وِ پرستش جلیقِه کِه ساختَه بیئی سرگرم بی‎یِن. وِ ای خاطِر، خدا دُوارَه قوم اسرائیلِه تنبیه کِرد، سی‌یَه‌کِه ریی اُوِردین وِ پرسِش بُت‎یا ئو وِ دشمن‎یاشُو اِجازَه دَ تا اونُونِه شِکَس بِئَن. آخِرِش اونُو هَنی دِ خدا کمک حاستِن ئو خدا نجات دهندِه هَنی سی‌شُو فِرسَن.

![](https://cdn.door43.org/obs/jpg/360px/obs-en-16-17.jpg)

ای چرخه هی تکرار مِوی: قوم اسرائیل گناه می‌کِردِن، خدا تنبیه‌شُو می‌کِرد، اونُو توبَه می‌کِردِن ئو خدا رهانندِه سی‌شُو می‌فِرسَن. دِ طول سال‎یا درازی، خدا آیِم‎یا زیادی سی رهایی قوم اسرائیل دِ دَس دشمن‎یاشُو، فِرسَن.

![](https://cdn.door43.org/obs/jpg/360px/obs-en-16-18.jpg)

آخِر قوم اسرائیل دِ خدا حاستِن کِه چی ملت‎یائی هَنی یِه پادشاهی وِشُو بِئَه. اونُو پادشاه بُلن قَد ئو قوی‌ئی می‌حاستِن کِه بَتُونَه دِ جَنگ‎یا رَبَری‌شُو بَکَه. خدا دِ ای درخواس راضی نِوی، اَما هِه‌ اُو طور کِه حاستین، پادشاهی وِ اونُو بَخشَن.

*مَتَلِی گِرِتِسَه دِ کِتآو مقدس: (کِتآو داوران فصل ۱ آیه ۳ ئو ۶ تا ۸؛ کِتآو اول سموئیل فصل ۱ آیه ۱۰)*

## ۱۷. عَد خدا وا داود

https://openbiblestories.org/l/lrc/story-17/

![](https://cdn.door43.org/obs/jpg/360px/obs-en-17-01.jpg)

شائول اَوَلی پادشاه اسرائیل بی. هِه اُو طور کِه مَردِم می‌حاستِن، بُلن قد ئو خوش قیافَه بی. او دِ اَوَل‎یا حکومت خُش، پادشاه خوئی بی اَما یَواش یَواش بی وِ پیا شَرآشوئی کِه دِ خدا فِرمُونبَری نمی‌کِرد. وِ ای خاطِر خدا پیائی هَنی وِ جا او سی پادشاهی پَسن کرد.

![](https://cdn.door43.org/obs/jpg/360px/obs-en-17-02.jpg)

خدا یِه جِوُو اسرائیلی وِ نُوم داود پَسن کرد تا اونِه سی جانشینی شائول پادشاه آمادَه بَکَه. داود، چوپُونی دِ مَردِم بیت لحم بی. او دِ حالی کِه سرگرم نگه‌بُونی دِ دُنیایا بُوئَش بی، گَلَنِه دو دَفَه دِ یورِش خرس ئو شیر نجات دَ ئو وِنُونِه کُشت. داود پیا اُفتادَه ئوعادلی بی. او وِ خدا اِطمینُو داشت ئو دِ او فِرمُونبَری می‌کِرد.

![](https://cdn.door43.org/obs/jpg/360px/obs-en-17-03.jpg)

زِمُونی کِه داود هَنی پیا جِوُونی بی وا جلیات هیکلی که سِه متر قد داشت ئو چیرَه‌دَس ئو قوی بی، جَنگِس. اَما خدا وِ داود کمک کِرد تا جُلیاتِه بَکُشَه ئو اسرائیلِه نجات بِئَه. دِما وَ داود چَن دَفَه وِ دشمن‎یا اسرائیل بُرد. او بی وِ سَرواز زِبَردَسی ئو دِ خیلی دِ جَنگ‎یا قوم اسرائیلِه رَبَری کِرد. هَمَه مَردِم خیلی دِ او تَریف می‌کِردِن.

![](https://cdn.door43.org/obs/jpg/360px/obs-en-17-04.jpg)

محبت مَردِم نسبت وِ داود باعث حَسیدی شائول بی. آخِر شائول قَصد کِرد کِه داودِ بَکُشَه، اَما او جیست وِ بیابُو ئو خُشِه قایِم کِرد. یِه روز وَختی کِه شائول ئو سَروازیاش وِ دُم داود می‌گَشتِن، شائول نُوهَلمُونَه اوما دِ غاری کِه داود دِش قایِم بیئی. شائول داودِه نِئی. داود خیلی وِ شائول نِزیک بی ئو تیکِه دِ جُومَه شائولِه بُرّی. وَختی شائول دِ غار کِرد وِ دَر داود قارِنا ئو تیکَه جُومَه شائولِه وِش نِشُو دَ. وِ ای طور وِ شائول ثابت بی کِه داود نِمی‎حا وا کُشتِن او وِ پادشاهی بَرَسَه.

![](https://cdn.door43.org/obs/jpg/360px/obs-en-17-05.jpg)

آخِر، شائول دِ جنگی کُشتَه بی ئو داود وِ پادشاهی اسرائیل رَسِس. او پادشاه خوئی بی ئو مَردِم دوسِش داشتِن. خدا وِ داود برکت دَ ئو اونِه دِ هَمَه کاریاش موفق کِرد. داود دِ جَنگ‎یا زیادی بیی ئو وا کمک خدا دشمن‎یا اسرائیلِه شِکَس دَ. داود اورشلیمِ گِرِت ئو کِردِش وِ پایتختِ خُش. داود هِه دِ اوچِه زِنِئی کِرد ئو دِ اوچِه خاک بی. او وِ مدتِ ۴۰ سال پادشاه بی ئو دِ ای مدت، اسرائیل قوی ئو دُولَمَن بی.

![](https://cdn.door43.org/obs/jpg/360px/obs-en-17-06.jpg)

داود می‌حاست معبدی بَسازَه کِه هَمَه قومِ اسرائیل بَتُونَن دِش خدانِه بَپِرَستَن ئو سیش قربانی بَکَن. سی حدود ۴۰۰ سال، مَردِم دِ جائی عبادت ئو قربانی می‌کِردِن کِه نُومِش دآوار ملاقات بی ئو موسی وَنِه ساختَه بی.

![](https://cdn.door43.org/obs/jpg/360px/obs-en-17-07.jpg)

اَما خدا پِیُمبَری وِ نُوم ناتان فِرسَن وا لا داود ئو وِش گُت: «سی‌یَه‌کِه تو دِ جَنگ‎یا زیادی بیئی‎یَه، معبدِه سی مِ نِمی‎سازی بلکه کُرِت وَنِه می‎سازَه. وا ای وجود مِ تونِه خیلی برکت مِئِم. کَسی دِ پُشت تو تا وِ ابد وِ قومِ مِ پادشاهی می‌کَه.» تَنیا کَسی دِ پُشت داود کِه می‌تُونِس تا ابد سلطنت بَکَه مسیح بی. مسیح اُو برگزیدَه خدا بی کِه جهانِه دِ گناه‎یاشُو نجات می‎دَ.»

![](https://cdn.door43.org/obs/jpg/360px/obs-en-17-08.jpg)

وَختی داود ای کَلُومِه شِنَفت، خدانِه شکر ئو ستایش کِرد. خدا هَم اونِه سَربُلِن کِرد ئو برکت زیادی بَخشَن. البته داود دِ زِمُونِ اتفاق اُفتایِن وَعدَه‌یا خدا خَوَر ناشت. اَما ایسِه دُونیم کِه قوم اسرائیل بایس، دِ زِمُون داود، حدود هزار سال سی اُمایِن مسیح چَش وِ رَه بان.

![](https://cdn.door43.org/obs/jpg/360px/obs-en-17-09.jpg)

داود سال‎یا زیادی وا عدالت حکومت کِرد. او مطیع خدا بی ئو خدا هَم اونِه برکت می‎دَ. وا ای حال دِ آخِریا عمر دچار گناه گَپی دِ بِراوَر خدا بی.

![](https://cdn.door43.org/obs/jpg/360px/obs-en-17-10.jpg)

یِه روز، وَختی تَموم سَروازیا داود سی جنگ وِ دَر بی‎یِن، او دِ پُشت بُون کاخ خُش سِیلی دِ دَر کِرد ئو زینَه قِشَنگی دیی کِه مُوفتا دِ آو. او اُو زینَن نِمی‌شِنَخت اَما فَمِس کِه نُومِش بَتشِبَع اَ.

![](https://cdn.door43.org/obs/jpg/360px/obs-en-17-11.jpg)

وِ جا یَه کِه دِ وَسوَسَه دیری بَکَه، داود کَسی‎نِه فِرسَن تا اُو زِینَه‌نِه بیارَه وِ تِش. او وا اُو زینَه حوفتی ئو اوسِه فِرسَنِش وِ حُونَه‌ش. دِما مدت کَمی بَتشِبَع پیغومی سی داود فِرسَن ئو گُت کِه آووِس بی‎یَه.

![](https://cdn.door43.org/obs/jpg/360px/obs-en-17-12.jpg)

میرَه بَتشِبَع کِه اوریا نُومِش بی، یَکی دِ بهترین سَروازیا داود بی. اوریا دِ اُو مُوقَه دیر دِ حُونَه ئو دِ جنگ بی. داود اونِه حاست ئو وِش گُت کِه رُوئَه وِ حُونَه ئو وِ تِه زینَش با. اَما اوریا قبول نَکِرد دِ حالی کِه بَقیَه سَروازیا دِ مِیدُون جنگ بی‎یِن، وِرگَردَه وِ حُونَه. وِ ای خاطِر داود، دُوارَه اوریانِه فِرسَن وِ مِیدُون جنگ ئو دِ فَرمُوندَیا حاست تا اونِه دِ جنگ وا نِها هَمه بَنَن تا کُشتَه با. ئو چِنی بی کِه اوریا دِ جَنگ کُشتَه بی.

![](https://cdn.door43.org/obs/jpg/360px/obs-en-17-13.jpg)

دِما کُشِسِن اوریا، داود وا بَتشِبَع دُوئَت کِرد ئو او سی داود کُرِی اُوِرد وِ دیی. خدا دِ کاری کِه داود کِردی عَصَبُونی بی، وِ ای خاطِر ناتان نبی‌نِه فِرسَن تا گنی گناه داودِه وِش بوئه .داود وِ گناه خُش اِتِراف کِرد ئو خدا اونِه بَخشَن. داود دِ بَقیَه سالیا زِنِئی خُش، حتی دِ سخت ترین مُوقَه‌یا، دِ دم خدا بی ئو اونه فِرمُونبَری ‌کِرد.

![](https://cdn.door43.org/obs/jpg/360px/obs-en-17-14.jpg)

وِ خاطِر مجازات گناه، کُر داود مُرد. ئو خیلی دِ آیِم‎یا طایِفَش، دِ بِراوَر او نافرمونی کِردِن ئو قدرتِش خیلی کَم بی. اَما وا حال نافرمونی داود، خدا هَنی هَم وِ عَدی کِه واش بَستی وفادار بی ئو وَنِه انجُوم دَ. بَدیا داود ئو بَتشِبَع بی‎یِن وِ صاو کُرِی کِه نُومِش نیان وِ سلیمان.

*مَتَلِی گِرِتِسَه دِ کِتآو مقدس: ( کِتآو اول سموئیل، فصل ۱۰؛ ئو فصل ۱۵ تا ۱۹ ئو ۲۴ ئو ۳۱؛ کِتآو دوئِم سموئیل فصل ۵ ئو ۷ ئو ۱۱ ئو ۱۲)*

## ۱۸. بَر بی‎یِن پادشاهی اسرائیل

https://openbiblestories.org/l/lrc/story-18/

![](https://cdn.door43.org/obs/jpg/360px/obs-en-18-01.jpg)

داود پادشاه ۴۰ سال سلطنت کِرد. دِما مُردِنِش، کُرِش سلیمان وِ پادشاهی قوم اسرائیل رَسِس. خدا وا سلیمان صُبَت کِرد ئو دِ او پُرسی: «دِ مِ چی میحای تا وِت بِئِم؟.» سلیمان دِ خدا حاست تا وِش حکمت بِئَه، حاستِ سلیمان بائث شادی خدا بی ئو اونِه وِ دُناترین پیا ریی زِمی کِرد. سلیمان چیا زیادی یاد گِرِت ئو پادشاه خیلی دُنائی بی. ئو خدا سلیمانِ خیلی دُولَمَن کِرد.

![](https://cdn.door43.org/obs/jpg/360px/obs-en-18-02.jpg)

سلیمان دِ شهر اورشلیم معبدی دُرِس کِرد کِه داود وَنِه برنامَه‌ریزی ئو مَصالَح‎شِه جَم کِردی. دِ اُو زِمُون، مَردِم می‌تُونِسِن وِ جا دآوار ملاقات، دِ اوچِه خدانِه عبادت بَکَن ئو قربانی پیش‎کَش بَکَن. خدا دِ معبد حاضر بی ئو وا قوم خُش زِنِئی می‌کِرد.

![](https://cdn.door43.org/obs/jpg/360px/obs-en-18-03.jpg)

اَما سلیمان وِ زَن‎یائی دِ قوم‌یائی هَنی دل بَست ئو اونُونِه حاست. او حدوداً وا ۱۰۰۰ زینَه دُوئَت کِرد ئو وِ چِنی دِ خدا نافِرمُونی کِرد. بُر زیادی دِ اُو زَن‎یا، دِ وِلات‎یا غریوه اُمایَه بی‎یِن ئو سی پرستش وا خُشُو بُت‎یائی داشتِن. وَختی کِه سلیمان وِ سنِ پیری رَسِس، او هَم بُت‎یا زَن‎یا خُشِه می‌پَرَستی.

![](https://cdn.door43.org/obs/jpg/360px/obs-en-18-04.jpg)

هِه وِ ای خاطِر خداوند دِ سلیمان عَصَبُونی بی ئو وِ او گُت کِه سی تَقاص ای نافِرمُونی، پادشاهی اسرائیلِن دِما مُردِنِش می‎کَه وِ دو بَر.

![](https://cdn.door43.org/obs/jpg/360px/obs-en-18-05.jpg)

دِما مُردِنِ سلیمان، کُرِش رِحُبعام وِ جا او بی وِ پادشاه. هَمَه قوم اسرائیل جَم بی‎یِن تا اونِه وِ عنوان پادشاه خُشُو قبول بَکَن. اونُو وِ رِحُبعام شِکائَت، کِردِن کِه سلیمان زیاد دِ اونُو کار می‌کَشی ئو مجبور بی‎یِن خراج زیادی بِئَن. اونُو دِ رِحُبعام حاستِن کِه چی بُوئَش سختگیر نوئَه.

![](https://cdn.door43.org/obs/jpg/360px/obs-en-18-06.jpg)

اَما رِحُبعام جِوُو خُومی وِ اونُو دَ ئو گُت: «شِما فکر میکیت کِه بُوئَم سلیمان سختگیری می‌کِرد، اَما مِ شِمانِه بیشتِر وادار وِ کار می‌کِم ئو عَذآووِتُو مِئِم.»

![](https://cdn.door43.org/obs/jpg/360px/obs-en-18-07.jpg)

دِما شِنَفتِن حرف‎یا او، خیلی دِ مَردِم وِ ضِدِش شورش کِردِن. دَه طایفه دِ طایفَه‌یا اسرائیل دِ او جِگا بی‎یِن. هِه دو طایفَه وِ او وفادار مَنِن ئو اونُو نُوم خُشُو نیان وِ پادشاهی یهودا.

![](https://cdn.door43.org/obs/jpg/360px/obs-en-18-08.jpg)

ده طایفه هَنی پیائی وِ نُومِ یِرُبعامِ کِردِن وِ پادشاه خُشُو کِه دِ جایا شمالی اُو وِلات ساکن بین ئو وِ خُشُو پادشاهی اسرائیل ‌گُتِن.

![](https://cdn.door43.org/obs/jpg/360px/obs-en-18-09.jpg)

یِرُبعام فرمونبرِ خدا نِوی ئو بائث بی مَردِم رُوئَن وا لا گناه. او دو تا بُت دُرِس کِرد ئو دِ مَردِمِ حاست کِه وِنُون بَپِرستن. اونُو دَ سی پرستش وِ اورشلیم کِه دِ پادشاهی یهودا بی، نِمی‌رَتِن.

![](https://cdn.door43.org/obs/jpg/360px/obs-en-18-10.jpg)

پادشاهی یهودا ئو پادشاهی اسرائیل دشمن یَکتِری بی‎یِن ئو بیشتِر وختیا وا یَکتِری دِ حالِ جَنگ بی‎یِن.

![](https://cdn.door43.org/obs/jpg/360px/obs-en-18-11.jpg)

دِ پادشاهی جدید اسرائیل، هَمَه پادشایا شَرآشو بی‎یِن. بیشتِر اونُو وِ وِ دَس کَسُونی کِه می‌حاستِن وِ صِحاو پادشاهی بوئَن، کُشتَه ‌بی‎یِن.

![](https://cdn.door43.org/obs/jpg/360px/obs-en-18-12.jpg)

هَمَه اُو پادشایا ئو بیشتِر مَردِم اسرائیل وِ عبادت بُت‎یا سَرگَرم بی‎یِن. دِ مُوقَه پرستش بُت‎یا، وا زَن‎یا فاشَه مُحُوفتی‎یِن ئو حتی بَچُونِه سی بُت‌یا قربانی می‌کِردِن.

![](https://cdn.door43.org/obs/jpg/360px/obs-en-18-13.jpg)

پادشایا یهودا دِ نسل(پشت) داود بی‎یِن. قَری دِ ای پادشایا آیِم‎یا خوئی بی‎یِن، وا عدالت حکومت می‌کِردِن ئو خدانِه می‌پرستین. اَما بیشتِر پادشایا یهودا، شَرآشو بی‎یِن. بَضی دِ اونُو حتی بَچَه‌یا خُشُون سی بُت‎یا قربانی می‌کِردِن. بیشتِر مَردِم یهودا هَم وِ ضد خدا وِریسان ئو خدایائی هَنی پرستش کِردِن.

*مَتَلِی گِرِتِسَه دِ کِتآو مقدس: ( کِتآو اول پادشایا فصل ۱ تا ۶ ئو ۱۱ ئو ۱۲)*

## ۱۹. پِیُمبَریا

https://openbiblestories.org/l/lrc/story-19/

![](https://cdn.door43.org/obs/jpg/360px/obs-en-19-01.jpg)

دِ طول تاریخ اسرائیل، خدا پِیُمبَریائی سی اونُو فِرسَن. پِیُمبَریا دِ خدا پیغوم‌یائی می‌گِرِتِن ئو وَنِه سی مَردِم می‎گُتِن.

![](https://cdn.door43.org/obs/jpg/360px/obs-en-19-02.jpg)

ایلیا پِیُمبَری بی کِه دِ زِمُون پادشاهی آخاب زِنِئی می‌کِرد. اَخاب پیا شرآشوئی بی کِه مَردِمِه داو می‎دَ تا بُت بَعَلِه پرستش بَکَن. ایلیا وِ اَخاب گُت کِه خدا اونِه مجازات می‌کَه. ئو او وِ اخاب گُت: «دِ قلمرو اسرائیل، بی فِرمُون مِ، هیچ بارُو یا شُونِمی وِ زِمی نِمی‌بارَه.» آخاب دِ حرف ایلیا چِنُو عَصَبُونی بی کِه قصد کِرد اونِه بَکُشَه.

![](https://cdn.door43.org/obs/jpg/360px/obs-en-19-03.jpg)

خدا وِ ایلیا گُت کِه رُوئَه وِ بیابُون ئو خُشِه دِ اَخاب قایِم بَکَه. ایلیا رَت وِ بیابُو ئو دِ لارُونَه جوئِی کِه خدا وِش نِشُو دِئی، مَن. هَر روز صُو ئو اِیوارَه، قِلایا سی او نُون ئو گوشت می‌اُوِردِن. دِ طول ای مدت، اَخاب ئو قُشونِش وِ دُم ایلیا می‌گَشتِن، اَما نمی‌تُونِسِن اونِه پیا بَکَن.

![](https://cdn.door43.org/obs/jpg/360px/obs-en-19-04.jpg)

سی‎یَه‎کِه بارُونی نِمی‌بارِس، دِما مدتی اُو جو حُشک بی. وِ ای خاطِر ایلیا رَت وِ وِلاتی هَنی کِه دِ اُو نِزیکی بی. دِ اُو وِلات زینَه فقیری وا کُرِش زِنِئی می‌کِرد کِه خوراک اونُو وِ خاطِر حُشکسالی تَمُوم بیئی. وا ای حال اُو زینَه ویردار ایلیا مِوی ئو خدا هَم نیازیا او ئو کُرِشِه جور می‌کِرد.تاپو آرد ئو رِغُو او هیچ وخت حالی نِوی ئو دِ تمُومِ مدت حُشکسالی، غذا سی حَردِن داشت.ایلیا وِ مدت سِه سال مَن اوچِه.

![](https://cdn.door43.org/obs/jpg/360px/obs-en-19-05.jpg)

دِما سِه سال ئو نیم، خدا وِ ایلیا گُت کِه دُوارَه بارُو می‌بارَه. خدا دِ ایلیا حاست تا وِرگَردَه وِ قلمرو پادشاهی اسرائیل ئو وا اَخاب صُبَت بَکَه. وَختی اَخاب ایلیانِه دیی وِش گُت: «تونی کِه هَمَه ای مُشکِل‎یانِه وِ وجود اُوِردی‎یَه!» ایلیا دِ جِوُو او گُت: «هَمَه ای مُشکِل‎یا وِ خاطِر تُونَه! تو یَهُوَه‌نِه کِه خدا راسی‎یَه هِیشتی‎ئَه ئو بَعَلِ پرستش میکی. هَمَه قومِ اسرائیلِ وِ کوه کَرمِل بیار.»

![](https://cdn.door43.org/obs/jpg/360px/obs-en-19-06.jpg)

هَمَه اسرائیل هِه وا پِیُمبَریا بَعَل کِه شِمارِشُو وِ 450 نفر می‌رَسِس اُمان وِ کوه کَرمِل. ایلیا گُت: «تا کِی میحایت دو دل بَمُونیت؟ اَر یَهُوَه خدائَه، اونِه بَپرستیت ئو اَر بَعَل خدائَه دِ او فِرمُونبَری بَکیت.»

![](https://cdn.door43.org/obs/jpg/360px/obs-en-19-07.jpg)

اوسِه ایلیا وِ پِیُمبَریا بُت بَعَل گُت: «یِه گآو نَری قربانی بَکیت، گوشتِش تیکَه تیکَه بَکیت ئو بَنیت وِ ریی قربانگاه، اَما تَشِش نَزِنیت. مِ هَم وِ ریی قربانگاهی هَنی هِه ای کارِه می‌کِم. خدائی کِه سی قربانگاه تَش بَفرسنَه، خدا راسی‎یَه.» وِ ای خاطِر پِیُمبَریا بُت بَعَل، قربانی‌نِه جور کِردِن، اَما تَشی روشِه نَکِردِن.

![](https://cdn.door43.org/obs/jpg/360px/obs-en-19-08.jpg)

اوسِه اونُو ریی وِ بُت بَعَل دُعا کِردِن: «اِ بَعَل، دَنگ اِیمانِه بَشنُو!» اونُو تَمُوم روز سَرگَرم دُعا، هَوار زَئِن ئو زخم کِردِن بدن خُشُو وا کارچو بی‎یِن. اَما دِ لا بَعَل جِوُوِیی نیوما ئو تَشی هَم نازل نِوی.

![](https://cdn.door43.org/obs/jpg/360px/obs-en-19-09.jpg)

پِیُمبَریا بعل دِما یَه کِه تمُومِ روز دعا کِردِن، شَکَت بین ئو دُعاشُونِه تمُوم کِردِن. اوسِه ایلیا گآو نَری هنی سی قربانی نیا وِ ریی قربانگاه ئو وِ مَردِم گُت کِه دُوزَه کیزَه گَپ آو بَریزَن وِ ریی قربانگاه، وِ طوری کِه گوشت گآو، هیمَه ئو حتی زِمی دُورِش هَم کامل تَر با.

![](https://cdn.door43.org/obs/jpg/360px/obs-en-19-10.jpg)

اوسِه ایلیا چِنی دُعا کِرد: «اِ یَهُوَه، اِ خدا ابراهیم، اسحاق ئو یعقوب، اِمروز وِ اِیما نِشُو بِه کِه تو خدا اسرائیل هیسی ئو مِ خدمتگزار تونِم. دُعا مِنِه جواو بِه تا ای قوم دُونِسَه بان کِه تو خدا راسی هیسی.»

![](https://cdn.door43.org/obs/jpg/360px/obs-en-19-11.jpg)

دَر جا تَشی دِ آسِمُو نازل بی ئو گوشت، هیمَه، بَرد‌یا، خاک ئو حتی آو دُور ئو وَر قربانگاهِه هَم سُختِنا. وَختی مَردِم یَنِه دییِن، دَرجا اُفتان وِ زِمی ئو گُتِن: «یَهُوَه خدائَه! یَهُوَه خدائَه!»

![](https://cdn.door43.org/obs/jpg/360px/obs-en-19-12.jpg)

اوسِه ایلیا گُت: «نِیلیت حتی یِه نفر دِ پِیُمبَریا بُت بَعل بَجی‎ئَه!» پس مَردِم پِیُمبَریا بَعلِ گرتِن ئو هَمَه‌شُونِه دِ اوچِه بُردِن ئو کُشتن.

![](https://cdn.door43.org/obs/jpg/360px/obs-en-19-13.jpg)

اوسِه ایلیا وِ اَخاب پادشاه گُت: «دَرجا وِرگَرد وِ حُونَت، سی‌یَه‌کِه وِ زیئی بارُو می‌بارَه.» هِه دِ ‌اُو مُوقَه، اُوریا سِی، آسِمُونِه پوشنا ئو بارُو شدیدی شُرو کِرد وِ بارِسِه. یَهُوَه حُشکسالی‌نِه تمُوم کِرد ئو وا ای کار نِشُو دَ کِه هِه او خدا راسی‎یَه.

![](https://cdn.door43.org/obs/jpg/360px/obs-en-19-14.jpg)

دِما یَه کِه ایلیا ماموریتِش تمُوم بی، خدا پیائی وِ نُوم اِلیشَع‌نِه وِ پِیُمبَری خُش پَسَن کِرد. خدا معجزه‎یا زیادی وِ تُرّ اَلیشَع اَنجُوم دَ. یَکی دِ ای معجزه‎یا سی نَعَمان اِتِفاق اُفتا کِه دِ فَرمُوندیا ارتش دشمن بی. او وِ ی مرضِ پوسی سختی دُچار بی. او دِ بارَه اِلیشع شِنَفتی، وِ ای خاطِر رَت وا لا او ئو شفاشِ حاست. اِلیشَع وِ نَعَمان گُت کِه هَفت گِل خُشِه مین رو اردن بَشورَه.

![](https://cdn.door43.org/obs/jpg/360px/obs-en-19-15.jpg)

دِ اوَل نَعمَان دِ ای پیشنهاد عَصَبُونی بی ئو سی‌یَه‌کِه ای کارَه احمقانَه دُونِس، نمی‌حاست اَنجُومِش بِئَه. اَما بَد قصد خُشِه عوض کِرد ئو هَفت گِل خُشِه مین رو اردن بُرد. زِمُونی کِه سی هفتمی گِل دِ آو اُما وِ دَر، کامل شفا پیا کِردی! خدا اونِه شفا دَ.

![](https://cdn.door43.org/obs/jpg/360px/obs-en-19-16.jpg)

خدا سی قوم اسرائیل پِیُمبَریا زیادی هَنی هَم فِرسَن. هَمَه اونُو وِ مَردِم هشدار می‌دَن کِه دِ پرستش بُت‎یا دَس بَکَشَن، وا بقیَه عادلانَه رفتار بَکَن، وِ یَکتِری رحم داشتَه بان، دِ شرارت دیری ئو دِ جاش دِ خدا فِرمُونبَری بَکَن. اَر چِنی رفتار نَکَن، دِ نظرِ خدا گناهکار وِ حِسآو میان ئو او اونُونِه مجازات می‌کَه.

![](https://cdn.door43.org/obs/jpg/360px/obs-en-19-17.jpg)

دِ بیشتِر مُوقَه‌یا، مَردِم دِ خدا فِرمُونبَری نمی‌کِردِن. اونُو بیشتِر وا پِیُمبَریا رفتار گَنی داشتِن ئو تاگِه‎گِلی حتی اونُونِه می‌کُشتِن! یِه دَفَه، ارمیای نبی‌نِه وَنِن دِ مین چاهی ئو اونِه دِ اوچِه وِل کِردِن تا بَمیرَه. ارمیا دِ تَه چاه رَت دِ مین گِل ئو خَرَه. اَما دِما وَ، پادشاه وِ او رحم کِرد ئو وِ خدمتکاریاش دستور دَ تا وِرَز یَه کِه بَمیرَه اونِه دِ مین چاه بیارَن وِ دَر.

![](https://cdn.door43.org/obs/jpg/360px/obs-en-19-18.jpg)

وا یَه کِه مَردِم دِ پِیُومبَریا نفرت داشدِن، اونُو هَنی هَم دِ مورد خدا صُبَت می‌کِردِن. اونُو وِ مَردِم هُشدار می‌دَن کِه اَر توبَه نَکَن، دِ بِئن میرَن. ئو اونُو وعدَه خدانِه می‌اُوِردِن وِ ویر مَردِم کِه هِه ‌اُو فِرسَنِن مسیح بی.

*مَتَلِی گِرِتِسَه دِ کِتآو مقدس: (کِتآو اول پادشایا فصل ۱۶ تا ۱۸؛ کِتآو دوئِم پادشایا فصل ۵؛کِتآو ارمیا فصل ۳۸)*

## ۲۰. تبعید ئو وِرگَشتِن

https://openbiblestories.org/l/lrc/story-20/

![](https://cdn.door43.org/obs/jpg/360px/obs-en-20-01.jpg)

پادشاهی اسرائیل ئو پادشاهی یهودا هَر دو وِ ضد خدا گناه کِردِن. اونُو عَدی کِه وا خدا دِ کوه سینا بستَه بی‎یِن، اِشکِنان. خدا وِ وَسیلَه پِیُمبَریا وِ اونُو هشدار دَ تا توبَه بَکَن ئو دوارَه اونِه بپرستن، اَما اونُو دِ خدا فِرمُونبَری نَکِردِن.

![](https://cdn.door43.org/obs/jpg/360px/obs-en-20-02.jpg)

وِ ای خاطِر خدا اونُون تنبیه کِرد ئو اِجازَه دَ کِه دشمن‎یاشُو، اونُونِه نابود بَکَن. دِ اُو زِمُون قوم قدرتمنی هَنی وِ نُوم آشور بی. آشوری‎یا نسبت وِ قوم‌یائی هَنی خیلی بی‌رحم بی‎یِن. پادشاهی اسرائیل وِ وَسیلَه آشور دِ بِئن رَت. آشوری‎یا خیلی دِ مَردِم پادشاهی اسرائیلِه کُشتِن، هَرچی کِه می‎حاستِن غارت کِردِن ئو خیلی دِ جایا سرزمین‌شُو سُختِنان.

![](https://cdn.door43.org/obs/jpg/360px/obs-en-20-03.jpg)

آشوری‎یا هَمَه رَبَریا، آیِم‎یا دُو‎لَمَن ئو کَسُونی کِه دَسِلات خوئی داشتِن وا خُشُو بُردِن وِ آشور. هِه قَری دِ آیِم‎یا خیلی فقیر مَنِن دِ اسرائیل.

![](https://cdn.door43.org/obs/jpg/360px/obs-en-20-04.jpg)

اوسِه آشوری‎یا، بیگُونَه‎یانِه اُوِردِن وِ سرزمین اسرائیل کِه دِ اوچِه زِنِئی بَکَن. بیگُونَه‎یا شهریا ویرُون بی‌یَه‌نِه دِ نو ساختِن ئو وا بَقیَه اسرائیلی‎یائی کِه دِ اوچِه باقی مَنِنی، دُوئَت کِردِن. وِ ثمره ای دُوئَت‎یا ، سامری گُتِن.

![](https://cdn.door43.org/obs/jpg/360px/obs-en-20-05.jpg)

مَردِم پادشاهی یهودا، دییِن کِه خدا مَردِم پادشاهی اسرائیلِ وِ خاطِر بی ایمانی ئو نافِرمُونی مجازات کِرد. اَما وا ای وجود هَنی هَم بُت‎یا ئو خدایا کنعانی‎یانِه پرستش می‌کِردِن. خدا پِیُمبَریائی فِرسَن کِه وِ اونُو هُشدار بِئَن، اَما اونُو هَنی هَم وِ کار خُشُو اِدامَه می‌دَن.

![](https://cdn.door43.org/obs/jpg/360px/obs-en-20-06.jpg)

حدود صد سال دِما نابودی پادشاهی اسرائیل وِ دَس آشوری‎یا، خدا نِبوکَدنِصَّر پادشاه بابِلِه فِرسَن تا وِ پادشاهی یهودا یورِش بُورَه. بابلی‌یا قوم قدرتمَنی بی‎یِن. پادشاه یهودا قبول کِرد کِه خدمت‌گزار نِبوکَدنِصَّر با ئو هَر سال پیل زیادی وِش بِئَه.

![](https://cdn.door43.org/obs/jpg/360px/obs-en-20-07.jpg)

اَما دِما چَن سال، پادشاه یهودا وِ ضد بابل شورش کِرد. هِه وِ ای خاطِر بابلی‌یا وِرگَشتِن ئو دُوارَه وِ پادشاهی یهودا یورِش بُردن. بابلی‌یا شهر اورشلیمِ گِرِتِن، معبدِ دِ بین بُردن ئو هَر ثروتی کِه دِ شهر ئو دِ معبد بی، وا خُشُو بُردِن.

![](https://cdn.door43.org/obs/jpg/360px/obs-en-20-08.jpg)

سی تنبیه پادشاه یهودا، سَروازیا نِبوکَدنِصَّر، کُریا اونِه ری‌وِری خُش کشتن ئو تیا اونِه کور کِردِن. دِما یَه، اونُو پادشاهِ وا خُشُو بُردِن تا دِ زِندُونِ بابل بَمیرَه.

![](https://cdn.door43.org/obs/jpg/360px/obs-en-20-09.jpg)

نِبوکَدنِّصَّر ئو قُشونِش حدوداً هَمَه مَردِم پادشاهی یهودانِه وا خُشُو بُردِن وِ بابل ئو هِه آیِم‎یا خیلی فقیرِه هِیشتِن تا کشاورزی بَکَن. وِ ای دُورُو کِه قومِ خدا مجبور وِ ترکِ سرزمین موعود بی‎یِن، تبعید مُوئَن.

![](https://cdn.door43.org/obs/jpg/360px/obs-en-20-10.jpg)

هَرچَن خدا وا تبعید، قوم خُشِه وِ خاطِر گناه‌یاشُو مجازات کِرد، اَما اونُونِه ئو وعدَه‌یایی کِه وِشُو دِئی دِ ویر نُوِرد. خدا ویردار قوم خُش بی ئو وِ وَسیلَه پیومبریا خُش وا اونُو صُبَت می‌کِرد.خدا وعدَه دَ کِه دِما هَفتا سال دُوارَه قومِ اسرائیلِه وِرمی‎گَردِنَه وِ سرزمین موعود.

![](https://cdn.door43.org/obs/jpg/360px/obs-en-20-11.jpg)

دِما هَفتا سال، کوروش پادشاه پارسی‎یا، بابلی‎یانِه شِکَس دَ ئو وِ ای طوری امپراطوری پارسی‎یا وِ جا امپراطوری بابلی، وِ خیلی دِ قوم‌یا زور گِرِت. دِ ای زِمُون وِ مَردِم اسرائیل یهودی می‌گُتِن ئو بیشتِر اونُو تَمُومِ عمر خُشُو دِ بابل زِنِئی کِردَه بی‎یِن. هِه کَسُونی کِه خیلی پیر بی‎یِن، می‌تُونِسِن سرزمین یهودانِه وِ ویر بیارَن.

![](https://cdn.door43.org/obs/jpg/360px/obs-en-20-12.jpg)

پارسی‎یا وا یَه کِه زوردار بی‎یِن، وا قوم‌یا زیر سُلطَه خُشُو، وا نَرمی ئو مهربُونی تا می‎کِردِن. دِما مدت کَمی کِه کوروش رَسِس وِ پادشاهی پارس، او فِرمُون دَ کِه هَر یهودی کِه میحا وِ یهودا وِرگَردَه، می‌تُونَه دِ سرزمین پارس رُوئَه ئو وِرگَردَه وِ سرزمین یهودا. او حتی وِ اونُو پیل دَ تا معبدِ دِ اورشلیم دُوارَه دِ نو بَسازَن! اوسِه، هَفتا سال دِما تبعید، بُر کُچِکی دِ یهودی‎یا وِرگَشتِن وِ شهر اورشلیم دِ سرزمین یهودا.

![](https://cdn.door43.org/obs/jpg/360px/obs-en-20-13.jpg)

وَختی قوم رَسِسِن وِ اورشلیم، معبد ئو دیوار دُور شَهرِه دِ نو ساختِن. پارسی‎یا هَنی هَم وِ اونُو وِ زور بین، اَما اونُو دُوارَه دِ سرزمین موعود بین ئو می‌تُونِسِن خدانِه دِ معبد پرستش بَکَن.

*مَتَلِی گِرِتِسَه دِ کِتآو مقدس: (کِتآو دوئِم پادشایا فصل ۱۷ ئو ۲۴ ئو ۲۵؛ کِتآو دوئِم تواریخ فصل ۳۶؛ کِتآو عزرا فصل ۱ تا ۱۰؛ کِتآو نحمیا فصل ۱ تا ۱۳)*

## ۲۱. خداوند وعدَه اُمایِن مسیحِه مِئَه

https://openbiblestories.org/l/lrc/story-21/

![](https://cdn.door43.org/obs/jpg/360px/obs-en-21-01.jpg)

هِه دِ ‌اُو اول آفرینش خدا وِ خویی دُونِس کِه دِما مدتی طولانی مسیح موعودِه می‌فِرسنَه. او وِ آیِم ئو حوا وعدَه دِئی کِه ای کارِه بی‌گِمُو اَنجُوم مِئَه. خدا وعدَه دَ کِه دِ نسل(پُشت) حوا کَسی میا کِه سَر مارِه می‌کوئَه. ماری کِه حوانِه گول دَ هِه ‌اُو شیطان بی. وعدَه یَه بی کِه مسیح، شیطانِ کامل شِکَس مِئَه.

![](https://cdn.door43.org/obs/jpg/360px/obs-en-21-02.jpg)

خدا وِ ابراهیم وعدَه دَ کِه وِ وَسیلَه او هَمَه ملت‎یا دُنیا برکت پیا می‌کَن. او وِ وَعدَه خُش دِما مدت زِمُونی وا فِرسَنِن مسیح عمل می‌کِرد. مسیح موعود بایس مَردِمِه دِ هَر قومی دِ دنیا دِ گناه‌شُو نجات بِئَه.

![](https://cdn.door43.org/obs/jpg/360px/obs-en-21-03.jpg)

خدا وِ موسی وعدَه دَ کِه دِ آینده نجات دهندِه چی او وِرْمِسَه. ای نجات دهندَه هِه اُو مسیحای موعود بی. وِ ای طور خدا یِه گِل هَنی وعدَه اُمایِن مسیحِه دَ.

![](https://cdn.door43.org/obs/jpg/360px/obs-en-21-04.jpg)

خدا وِ داود پادشاه وعدَه دَ کِه کَسی دِ پشت او می‌رَسَه وِ پادشاهی ئو تا وِ ابد وِ قوم خدا سلطنت می‌کَه. یَه وِ اُو معنی بی کِه مسیح دِ پُشت داود میا.

![](https://cdn.door43.org/obs/jpg/360px/obs-en-21-05.jpg)

وِ وَسیلَه ارمیای نبی خدا وعدَه دَ کِه پِیمُون جدیدی جور می‌کَه، اَما نه چی عَدی کِه خدا وا اسرائیل دِ کوه سینا بستَه بی. دِ پِیمُونِه جدید، خدا قانون خُشِه وِ ریی قلب‌یا مَردِم می‌نِویسَه، مَردِم خُشُو اونِه می‌شناسَن ئو وِ او محبت می‌کَن دِ احکام او فِرمُونبَری می‌کَن. مسیح کَسی بی کِه ای پِیمُون تازَه‎نِه وا اونُو می‌بَست. اونُو موئَن وِ قوم او ئو خدا گناه‌یاشُو می‌وخشَه.

![](https://cdn.door43.org/obs/jpg/360px/obs-en-21-06.jpg)

پِیُمبَریا خدا گُتِن کِه مسیح موعود موئَه وِ نبی، کاهن ئو پادشاه موئه. نبی کَسی‎ئَه کِه کَلُوم خدانِه میشنَوَه ئو وَنِه سی مَردِم وازگو می‌کَه. مسیح موعود خدا، نبی کاملی موئَه سی‌یَه‌کِه او پیام‌یا خدانِه کامل می‌فَمَه ئو وَنِه وِ طور کامل وِ مَردِم وازگو می‌کَه.

![](https://cdn.door43.org/obs/jpg/360px/obs-en-21-07.jpg)

کاهن‌یا یهودی دِ لا مَردِم سی خدا قربانی می‌کِردِن کِه جانشینی بی سی مجازات گناه‌یا اونُو. ئو کاهن‌یا سی مَردِم وِ درگاه خدا دُعا می‌کِردِن. وا ای حال قِرار بی مسیح موعود کاهن گَپی با کِه خُشِه وِ عنوانِ یِه قربانی کامل پیش‎کَش خدا می‌کَه. یعنی او هیچ وخت گناه نِمی‌کَه ئو وَختی او خُشِه وِ عنوان قربانی پیش‌کَش بَکَه، دَ نیازی وِ هیچ قربانی هَنی سی گناه نیسا.

![](https://cdn.door43.org/obs/jpg/360px/obs-en-21-08.jpg)

پادشایا ئو ریاست‎یا وِ گروه‌یائی دِ مَردِم حکومت می‌کَن ئو بَضی مُوقَه‌یا هَم اشتباه‎یائی دارَن. داود پادشاه تَنیا وِ اسرائیلی‌یا حکومت کِرد. اَما مسیح موعود کِه دِ پُشت داود میا وِ تمُوم دُنیا تا ابد حکومت می‌کَه. او عادلانَه حکومت می‌کَه ئو تصمیم‌یا دُرسی مِی‌رَه.

![](https://cdn.door43.org/obs/jpg/360px/obs-en-21-09.jpg)

پِیُمبَریائی کِه دِ لا خدا فِرسنائین نبوت‌یا زیادی دِبارَه مسیح موعود کِرده بین. ملاکی نبی نبوت کِردی کِه وِرَز اُمایِن مسیح موعود، پِیُمبَر گَپِی هَنی میا. اِشعیای نبی نبوت کِردی کِه مسیح موعود دِ دُختِر ریی بَستِه میا و دیی. میکاه نبی هَم گُتی کِه او دِ شهر بیت لحم میا وِ دِی.

![](https://cdn.door43.org/obs/jpg/360px/obs-en-21-10.jpg)

اشعیا نبی گُت کِه مسیح دِ جلیل زِنِئی می‌کَه. او قلب‌یا اِشکِسَه آیِم‌یانِه آرُومِش مِئَه ئو اسیریانِه رها می‌کَه. ئو او نبوت کِرد کِه مسیح موعود، بیماریا یعنی کوریا، شَل‎یا، کَریا ئو لال‎یانِه هَم شفا مِئَه.

![](https://cdn.door43.org/obs/jpg/360px/obs-en-21-11.jpg)

ئو اشعیا نبی نبوت کِردی کِه مَردِم دِ مسیح موعود نفرت دارَن ئو دِ گِردِش نمیرَن. پِیُمبَریائی هَنی هَم نبوت کِردین کِه یَکی دِ دوس‎یا مسیح وِش پُشت می‌کَه. زکریا نبوت کِرد کِه ای دوس وِ خاطِر سی سِکَه نُقرَه وِ او خیانت می‌کَه. پِیُمبَریائی هَنی هَم نبوت کِردین کِه مسیحِ می‌کُشَن ئو وِ جُمَش قُرَه مُونَن.

![](https://cdn.door43.org/obs/jpg/360px/obs-en-21-12.jpg)

ئو پِیُمبَریا دِبارَه یَه کِه مسیح موعود چِطوری می‌میرَه نبوت کِردین. اشعیای نبی گُتی کِه مَردِم وِ او آو دَم مُونَن ئو اونِه می‌زِنَن ئو مَسخِرَه می‌کَن. اوسِه بدن اونِه سیلا می‌کَن تا وا رنج گَپی بَمیرَه، وا وجود وَ کِه هیچ گُناهی نَکِردی.

![](https://cdn.door43.org/obs/jpg/360px/obs-en-21-13.jpg)

ِیُمبَریائی هَنی هَم نبوت کِردین کِه مسیح موعود بایس آیِم کامل ئو بی هیچ گناهی با. او بایس بَمیرَه، سی‌یَه‌کِه خدا اونِه وِ جا گناه هَمَه مَردِم جهان مجازات می‌کَه. مجازات او بائث مِوی کِه دِ بِئن انسان ئو خدا آرُومِش ئو صلح بَرقِرار با. هِه وِ ای خاطِر، ارادَه خدا یِنَه بی کِه مسیح زخمی ئو کُشتَه با.

![](https://cdn.door43.org/obs/jpg/360px/obs-en-21-14.jpg)

پِیُمبَریائی هَنی یَنِه هَم نبوت کِردِن کِه خدا مَسیحِ دِما مرگ بُلِن می‎کَه. وِ ای خاطِر وا مُردِن ئو وِریسائِن مسیح دِ مرگ، خدا می‌حاست کِه نَقشَه نجات گناهکاریانِه کامل بَکَه ئو عَد تازِه وا آیِم بَوَنَه.

![](https://cdn.door43.org/obs/jpg/360px/obs-en-21-15.jpg)

خدا چیا زیادی دِبارَه اُمایِن مسیح وِ پِیُمبَریا دیاری کِرد. اَما مسیح دِ زِمُونِ هیچ کُم دِ ای پِیُمبَریا هَنی نی‌اُمائی. بیشتِر دِ ۴۰۰ سال دِما آخِری نبوت، وَختی کِه زِمُون وِ کمال رَسِس، خدا مَسیحِ وِ دُنیا فِرسَن.

*مَتَلِی گِرِتِسَه دِ کِتآو مقدس: 
(کِتآو پیدایش  فصل ۳ آیه ۱۵، فصل ۱۲ آیه ۱ تا ۳، کِتآو تثنیه فصل ۱۸ آیه ۱۵، کِتآو دوئِم سموئیل فصل ۷، کِتآو ارمیا فصل ۳۱، کِتآو اشعیا فصل ۵۹ آیه ۱۶، کِتآو دانیال فصل ۷، کِتآو ملاکی فصل ۴ آیه ۵،  کِتآو اشعیا فصل ۷ آیه ۱۴، کِتآو میکا فصل ۵ آیه ۲، کِتآو اشعیا فصل ۹ آیه ۱ تا ۷ ئو فصل ۳۵ آیه ۳ تا ۵ ئو فصل ۵۳، کِتآو مزامیر فصل ۲۲ آیه ۱۸ ئو فصل ۳۵ آیه ۱۹ ئو فصل ۶۹ آیه ۴ ئو فصل ۴۱ آیه ۹، کِتآو زکریا فصل ۱۱ آیه ۱۲ ئو ۱۳،  کِتآو اشعیا فصل۵۰ آیه ۶، کِتآو مزامیر فصل ۱۶ آیه ۱۰ ئو ۱۱)*

## ۲۲. وِ دُنیا اُمایِن یوحنای تعمید دهندَه

https://openbiblestories.org/l/lrc/story-22/

![](https://cdn.door43.org/obs/jpg/360px/obs-en-22-01.jpg)

دِ قدیم خدا وِ وَسیلَه پِیُمبَریا خُش وا قومِش حَرف می‌زَه. اَما دِما گذشتِ ۴۰۰ سال کِه خدا وا قوم خُش حَرفی نَزِیَه بی، یِه گِلی فرشتَه خدا وِ کاهن پیری کِه نُومِش زکریا بی وِش دِراُما. او ئو زینَش الیزابت، آیِم‎یا خداترسی بی‎یِن. اونُو پیر بی‎یِن ئو الیزابت بَچَه‌دار نِمِوی.

![](https://cdn.door43.org/obs/jpg/360px/obs-en-22-02.jpg)

فرشتَه خدا وِ زکریا گُت: «زینَه تو کُرِی میارَه وِ دیی. تو نُومِش مینی وِ یوحنا. خدا اونِه دِ روحِش پُر می‌کَه ئو یوحنا مَردِمِ سی اُمایِن مسیحِ موعود آمادَه می‌کَه.» زکریا دِ جِوُو گُت: « مِ ئو زینَم سی بَچَه‌دار بی‎یِن خیلی پیریم! چطور دُونِسَه بام کِه وِ مِ راس مُوئی؟»

![](https://cdn.door43.org/obs/jpg/360px/obs-en-22-03.jpg)

فرشتَه خدا وِ زکریا جِوُو دَ: «مِ دِ لا خدا اُمامَه تا ای خَوَر خوشِه وِ تو بَرَسِنِم. ایسِه کِه تو حرف‎یا مِنِه باور نَکِردی، قدرتِ حَرف زَئِنِه دِ دَس مِئی تا زِمُونی کِه اُو بَچَه بیا وِ دُنیا.» هِه دِ ‌اُو مُوقَه، زکریا دَ نَتُونِس حَرفی وِ زِوُون بیارَه. اوسِه فرشتَه خدا دِ تِه زکریا رَت، زکریا وِرگَشت وِ حُونَه ئو وختی نگذشت کِه زینَش باردار بی

![](https://cdn.door43.org/obs/jpg/360px/obs-en-22-04.jpg)

وَختی کِه الیزابت دِ ماه شیشِم بارداری بی، هِه اُو فرشتَه یِه‌دَفَه وِ فامیل الیزابت کِه نُومِش مریم بی وِش دِراُما. او دُختِر ریی بَستِه ئو دَسگیرُو پیائی وِ نُوم یوسف بی. فرشتَه وِ او گُت: «تو حامِلَه مویی ئو کُری میاری وِ دیی ئو نُومِش مینی وِ عیسی. او پسر خدای بزرگَ ئو سلطنتِش ابدی‌یَه.»

![](https://cdn.door43.org/obs/jpg/360px/obs-en-22-05.jpg)

مریم جِوُو دَ: «چطور چِنی چیئی مووَه دِ حالی که مِ دُختِر ریی بَستِه هیسِم؟» فرشتَه گُت: «روح‎القدس وِ تو نازل مووَه ئو قوت خدا وِ تو سایَه مُونَه. وِ ای خاطِر وِ اُو کُر، قدوس ئو پسرخدا ی بزرگ مُوئَن.» مریم وِ حرف‌یا اُو فرشته ایمان اُوِرد ئو اُو چِیئی‌نِه کِه او گُتی، قبول کِرد.

![](https://cdn.door43.org/obs/jpg/360px/obs-en-22-06.jpg)

زِمُون کَمی دِما ای اِتفاق، مریم رَت وِ حُونَه الیزابت. تا الیزابت دَنگِ سِلام مَریَمِ شِنَفت، بَچَه دِ رحمِش تِکُو حَرد،. اونُو وِ خاطِر کاریائی کِه خدا سی‎شُو کِردی شادی زیادی کِردِن. مریم حدود سِه ماه مَن وِ تِه الیزابت ئو اوسِه وِرگَشتِن وِ حُونَه.

![](https://cdn.door43.org/obs/jpg/360px/obs-en-22-07.jpg)

دِما ای اِتفاق الیزابت کُری اُوِرد وِ دیی. او ئو زکریا نُوم بَچَه‌نِه هِه ‌اُو طور کِه فرشتَه گُتی نیان وِ یوحنا. اوسِه خدا دُوارَه دَم زکریانِه واز کِرد ئو زکریا گُت: «خدانِه شُکر، سی‌یَه‌کِه او وِ یاری قومِش اُمائه! ئو تو اِ کُرِم وِت مُوئَن پِیُمبَر خدای بزرگ ئو وِ آیِم‌یا مُوئی کِه چِطور می‌تُونَن آمرزش گناه‎یاشُونه پیا بَکَن!»

*مَتَلِی گِرِتِسَه دِ کِتآو مقدس:
(کِتآو پیدایش فصل ۳ آیه ۱۵ ئو فصل ۱۲ آیه ۱ تا ۳، کِتآو تثنیه فصل ۱۸ آیه ۱۵، کِتآو دوئِم سموئیل  فصل ۷، کِتآو ارمیا فصل ۳۱، کِتآو اشعیا فصل ۵۹ آیه ۱۶، کِتآو دانیال فصل ۷، کِتآو ملاکی فصل ۴ آیه ۵، کِتآو اشعیا فصل ۷ آیه ۱۴، کِتآو میکا فصل ۵ آیه ۲، کِتآو اشعیا فصل۹ آیه ۱ تا ۷ ئو فصل ۳۵ آیه ۳ تا ۵ ئو فصل ۶۱ ئو فصل ۵۳، کِتآو مزامیر فصل ۲۲ آیه ۱۸ ئو فصل ۳۵ آیه ۱۹ ئو فصل ۶۹ آیه ۴ ئو فصل ۴۱ آیه ۹، کِتآو زکریا فصل ۱۱ آیه ۱۲ ئو ۱۳، کِتآو اشعیا فصل ۵۰ آیه ۶، کِتآو مزامیر فصل ۱۶ آیه ۱۰ ئو ۱۱)*

## ۲۳. وِ دیی اُمایِن عیسی

https://openbiblestories.org/l/lrc/story-23/

![](https://cdn.door43.org/obs/jpg/360px/obs-en-23-01.jpg)

مریم وا پیائی عادل ئو خو، وِ نُوم یوسف دَسگیرُو بیئی. وَختی یوسف فَمِس کِه مریم اوسه بیه، او دُونِس کِه بَچَه مال او نِوی. یوسف نمی‌حاست کِه مَریَمِه رسوا ئو بی آوِریی بَکَه، وِ ای خاطِر قصد کِرد کِه بی کِش دِ او جِگا با. اَما وِرَز یَه کِه اُو کارِه اَنجُوم بِئَه، فرشتِه دِ خآو وِش دِراُما.

![](https://cdn.door43.org/obs/jpg/360px/obs-en-23-02.jpg)

فرشتَه وِ یوسف گُت: «دِ عروسی وا مریم زَلَت نَرُوئَه. بَچِه کِه ها دِ رحم(لَم) او دِ روح‎القدسَ. مریم کُری میارَه وِ دیی ئو نُومِش بَنی وِعیسی (یَهُوَه نجات مِئَه)، سی‌یَه‌کِه او مَردِمِه دِ گناه‎یاشُو نجات مِئَه»

![](https://cdn.door43.org/obs/jpg/360px/obs-en-23-03.jpg)

وِ ای خاطِر یوسف وا مریم دُوئَت کِرد ئو بُردِش وِ حُونَه خُش. اَما تا زِمُونی کِه بَچَه وِ دُنیا نی‎اُما، وا او نُوحُفتی.

![](https://cdn.door43.org/obs/jpg/360px/obs-en-23-04.jpg)

دِ روزیا آخِر آووِسی مریم، امپراطور روم فِرمُو دَ کِه سی سَرشِماری، هَر کَس بایس وِ شهر جد و آباد خُش وِرگَردَه. یوسف ئو مریم بایس رَه زیادی دِ ناصرَه می‌رَتِن وِ بِیت لَحِم، سی‌یَه‌کِه جد اونُو داود پادشاه ئو شهرِشُو بِیت لَحِم بی.

![](https://cdn.door43.org/obs/jpg/360px/obs-en-23-05.jpg)

وَختی مریم ئو یوسف رَسِسِن وِ بِیت لَحِم، جائی سی مَنِن پیا نَکِردِن. تَنیا جائی کِه دِش می‌تُونِسِن بَمُونَن، جائی سی نِگَه‌داری حِیوُن‎یا بی. دِ اوچِه مریم بَچَه‌نِه اُوِرد وِ دیی ئو اونِه دِ آخور(آحِر) حُوفتِنا، سی‌یَه‌کِه کِه سی او جا خآویی ناشدِن. اونُو نُومِش نیان وِ عیسی.

![](https://cdn.door43.org/obs/jpg/360px/obs-en-23-06.jpg)

اُو شُو، چوپُون‎یائی دِ صحرا دِ گلَه‌یا خُشُو نِگَه‌بُونی می‌کِردِن. یِه‌دَفَه فرشتَه نورانی‎ئی دِ مین اونُو ظاهر بی ئو هول گِرِتِشُو. فرشتَه وِ اونُو گُت: «زَلَه‎تُو نَرُوئَه، سی‌یَه‌کِه مِ خبر(خَوَر) خوشی سی شِما دارِم. مسیح موعود کِه خداوندَه دِ بیت لَحِم اُما وِ دُنیا!

![](https://cdn.door43.org/obs/jpg/360px/obs-en-23-07.jpg)

«رِت ئو وِ دُم اُو بَچَه بَگَردیت ئو بَچِه پیا میکیت کِه دِ کُلپیچِک پیچِسَه ئو دِ آحِر حُوفتِنانَه.» یِه‌دَفَه بُر زیادی دِ فِرشتَه‎یا آسِمُونی وِ اُو فرشتَه اضافَه بی‎یِن. اونُو دِ ستایش خدا می‌حَنِن ئو می‌گُتِن: «خدانِه دِ آسِمُو جلال با ئو وِ زِمی صلح ئو آرُومی سی مَردِمی کِه خدا وِشُو نظر دارَه!»

![](https://cdn.door43.org/obs/jpg/360px/obs-en-23-08.jpg)

اوسِه فِرشتَه‎یا دِ تِه اونُو رَتِن ئو چوپُون‎یا هَم گَلَه‌یا خُشُونه هِیشتِن ئو رَتِن تا وِ محلی کِه عیسی اوچِه بی رَسِسِن ئو بَچِه دییِن کِه دِ آخوری حُوفتی‎یَه بی، دُورس هِه اُو طور کِه اُو فرشتَه گُتی. اونُو خیلی هَوَس کِردِن. چوپُون‎یا وِرگَشتِن وِ تِه گلَه‌یا خُشُو ئو خدانِه وِ خاطِر اُو چی‎ئی کِه دیئین ئو شِنَفتین شُکر ئو ستایش می‌کِردِن.

![](https://cdn.door43.org/obs/jpg/360px/obs-en-23-09.jpg)

دِما وَ پیایائی دِ مشرق زِمی کِه آسارَه شِناس ئو خیلی حکیم بی‎یِن، آسارَه بِلاجی‎ئِی دِ آسِمُو دییِن. اونُو فَمِسِن کِه پادشاه جدید یهود وِ دُنیا اُمائَه. وِ ای خاطِر، رَه زیادی دِ سرزِمین‎یا خُشُو سی دییِن ای بَچَه اُمان. اونُو اُمان وِ بِیت لَحِم ئو حُونِه کِه عیسی وا دا ئو بُوئَش دِش زِنِئی می‌کِرد، پیا کِردِن.

![](https://cdn.door43.org/obs/jpg/360px/obs-en-23-10.jpg)

وَختی اُو پیایا دانشمند عیسی‎نِه وا داش دییِن، زُونی زَن ئو اونِه پرستش کِردِن. اونُو وِ عیسی پیش‎کَشی‎یا گِرُون قیمتی دَن ئو اوسِه وِرگَشتِن وِ حُونَه خُشُو.

*مَتَلِی گِرِتِسَه دِ کِتآو مقدس: (انجیل متی فصل ۱ ئو انجیل لوقا فصل ۲)*

## ۲۴. یوحنا، عیسی‎نِه تعمید مِئَه

https://openbiblestories.org/l/lrc/story-24/

![](https://cdn.door43.org/obs/jpg/360px/obs-en-24-01.jpg)

یوحنا کُر زکریا ئو الیزابت، گَپ بی ئو وِ پِیُمبَری پَسَن بی. او دِ بیابُو زِنِئی می‌کِرد، عسل کوهی ئو قُلَه می‌حَرد ئو جُومِه دِ پَشم شُتِر می‌کِرد دِ وَر.

![](https://cdn.door43.org/obs/jpg/360px/obs-en-24-02.jpg)

بُر زیادی دِ مَردِم وِ بیابُو می‌اُمان وِ تِه یوحنا ئو حرف‎یاشِه گوش می‌دَن. او سی‌شُو مُوعِظَه می‌کِرد ئو می‌گُت: «توبَه بَکیت، سی‌یَه‌کِه پادشاهی خدا نِزیکَه.»

![](https://cdn.door43.org/obs/jpg/360px/obs-en-24-03.jpg)

سی‌یَه‌کِه مَردِم پیغوم یوحنا‌نِه می‌شنَفتِن، خیلی دِشُو دِ گناه‎یاشُو توبَه می‌کِردِن ئو یوحنا اونُونِه وا آو تعمید می‎دَ. خیلی دِ رَبَریا مذهبی وِ تِه یوحنا هَم می‌اُمان ، اَما وِ گناه‌یا خُشُو اِتِراف نمی‌کِردِن ئو دِ وِنُو توبَه نمی‌کِردِن.

![](https://cdn.door43.org/obs/jpg/360px/obs-en-24-04.jpg)

یوحنا تعمید دهندَه وِ رَبَریا مذهبی گُت: «اِ ماریا سَمی! توبَه بَکیت ئو رفتار خُتُونِه عوض بَکیت. خدا هَر درختی کِه میوَه خو نیارَه، مُرَّه ئو مُونَه دِ تَش.» یوحنا پیشگویی پِیُمبَریانِه تَمُوم کِرد کِه گُتِبین: «سِیل‌کُو، ایسِه مِ قاصُو خُومِه دِ نِها تو می‌فرِسِم تا رَه‌نِه سی تو صاف بَکَه.»

![](https://cdn.door43.org/obs/jpg/360px/obs-en-24-05.jpg)

قَری دِ رَبَریا مذهبی دِ یوحنا پُرسین: «تو مسیحی؟» یوحنا جِوُو دَ: «مِ مسیح نیسِم، اَما کَسی دِما مِ میا کِه مقومِش دِ مِ خیلی بالاتِرَه. اُوقَه کِه مِ قابل نیسم بَن کالَه‌یاشِه واز بَکِم.»

![](https://cdn.door43.org/obs/jpg/360px/obs-en-24-06.jpg)

روز بَد عیسی سی تعمید آو، اُما وِ تِه یوحنا تعمید دهندَه. وَختی یوحنا اونِه دیی گُت: «یَه هِه اُو بِرَه‌ خدائَه کِه گناه‌ تَمُوم دُنیانِه وِرمیارَه.»

![](https://cdn.door43.org/obs/jpg/360px/obs-en-24-07.jpg)

یوحنا تعمید دهندَه وِ عیسی گُت: «مِ لایق نیسِم کِه تُونِه تعمید بِئِم. یَه مِنِم کِه بایس دِ تو تعمید بیرِم.» اَما عیسی گُت: «مِنِه تعمید بِه، سی‌یَه‌کِه کار دُورس هِه یِنا.» وِ ای خاطِر یوحنا عیسی‎نِه تعمید دَ، وا یَه کِه عیسی هیچ‎وقت گناهی نَکِردی.

![](https://cdn.door43.org/obs/jpg/360px/obs-en-24-08.jpg)

وَختی عیسی دِما تعمید دِ آو دِراُما وِ دَر، روح خدا چی کَموتَری دیاری بی ئو اُما وِ هار ئو وِ ریی او قِرار گِرِت ئو هِه اُو مُوقَه، دَنگ خدا دِ آسِمُو رَسِس کِه: «یِنا کُر مِ کِه اونِه دوس دارِم ئو دِ او خیلی راضی‎یِم.»

![](https://cdn.door43.org/obs/jpg/360px/obs-en-24-09.jpg)

خدا وِ یوحنا گُتَه بی: «روح‎القدس وِ کَسی کِه تو اونِه تعمید مِئی میا، اُو شخص پسر خدائَه.» خدا یَکی‌یَه ئو وَختی کِه یوحنا عیسی‎نِه تعمید دَ، دَنگ خدا بُوئَه‌نِه شِنَفت. خدا کُر یعنی عیسی‎نِه دیی ئو روح‎القدسِ هَم دِ طُور کَموتَری دیی.

*مَتَلِی گِرِتِسَه دِ کِتآو مقدس: (کِتآو انجیل متی باب ۳، کِتآو انجیل مرقس باب ۱ آیه ۹ تا ۱۱، کِتآو انجیل لوقا باب ۳ آیه ۱ تا ۲۳)*

## ۲۵. شیطان عیسی‎نِه وَسوَسَه می‌کَه

https://openbiblestories.org/l/lrc/story-25/

![](https://cdn.door43.org/obs/jpg/360px/obs-en-25-01.jpg)

دِما تعمید عیسی، روح خدا دَرجا اونِه بُرد وِ بیابُو، جائی کِه او وِ مدت چهل شُو ئو چهل روز، روزَه گِرِت. اوسِه شیطان اُما وِ تِه عیسی، اونِه وَسوَسَه کِرد تا گناه بَکَه.

![](https://cdn.door43.org/obs/jpg/360px/obs-en-25-02.jpg)

شیطان عیسی‎نِه وَسوَسَه کِرد ئو گُت: «اَر تو پسر خدا هیسی، وِ ای بَرد‌یا بُو کِه بووَن وِ نُون تا بَتُونی بُحُوری!»

![](https://cdn.door43.org/obs/jpg/360px/obs-en-25-03.jpg)

عیسی جِوُو دَ: دِ کَلُوم خدا نوشتَه بی‌یَه «آیِم سی زِنَه مَنِه تَنیا نیاز وِ نُون نارَه، بلکه وِ هَر کلمِه کِه دِ دَم خدا بَکَه وِ دَر!»

![](https://cdn.door43.org/obs/jpg/360px/obs-en-25-04.jpg)

اوسِه شیطان اونِه بُرد وِ بُلِن‌ترین جا معبد ئو گُت: « اَر تو پسر خدا هیسی، خُتِه دِ ایچِه بُون وِ هار؛ سی‎یَه‎کِه کِتآو مقدس فرمایش می‌کَه: «خدا وِ فِرشتَه‎یا خُش فِرمُون مِئَه تا تونِه دِ کول بیرَن ، نَکَه پاتِه بَزِنی وِ بَردی.»

![](https://cdn.door43.org/obs/jpg/360px/obs-en-25-05.jpg)

َما عیسی وِ اُو چی‎ئی کِه شیطان گُتی عمل نَکِرد ئو جِوُو دَ: خدا دِ کَلُومِش وِ قوم خُش فِرمُون دِئَه: «خداوند خدای خُتِه اِمتِحُو نَکُو.»

![](https://cdn.door43.org/obs/jpg/360px/obs-en-25-06.jpg)

اوسِه شیطان اونِه بُرد وِ تُک کوه بُلِنی ئو تَمُوم کشوریا دُنیا ئو قدرت ئو ثروت وِنونِه وِ او نِشُو دَ ئو گُت: «اَر زُونی بَزِنی ئو مِنِه بپرستی، هَمَه یِنُونِه وِ تو می‌وَخشِم.»

![](https://cdn.door43.org/obs/jpg/360px/obs-en-25-07.jpg)

عیسی جِوُو دَ: دِ مِ دیر با اِ شیطان! دِ کَلُوم خدا، او وِ قوم خُش فِرمُون دا کِه: «تَنیا خداوند خدای خُتِه پرستش بَکُو ئو تَنیا وِ او خدمت بَکُو.»

![](https://cdn.door43.org/obs/jpg/360px/obs-en-25-08.jpg)

عیسی دِ دُوم وَسوَسَه‌یا شیطان گرفتار نِوی. پس شیطان اونِه دِ تِه اوسه رَت وهِیشت ئو فِرشتَه‎ یا اُمان ئو وِ عیسی خدمت کِردِن.

*مَتَلِی گِرِتِسَه دِ کِتآو مقدس: (کِتآو انجیل متی باب ۴ آیه ۱ تا ۱۱، کِتآو انجیل مرقس باب ۱ آیَه ۱۲ ئو ۱۳، کِتآو انجیل لوقا باب ۴ آیه ۱ تا ۱۳)*

## ۲۶. شُرو خدمت عیسی

https://openbiblestories.org/l/lrc/story-26/

![](https://cdn.door43.org/obs/jpg/360px/obs-en-26-01.jpg)

دِما پیروزی وِ وَسوَسَه‌یا شیطان، عیسی وِ جلیل جائی کِه دِ اوچِه زِنِئی می‌کِرد، وِرگَشت. روح‎القدس وِ عیسی قُوَت زیاد می‎دَ ئو او سی تعلیم دِ جائی وِ جائی هَنی می‌رَت ئو هَمَه دِبارَه او وِ خویی یاد می‌کِردِن.

![](https://cdn.door43.org/obs/jpg/360px/obs-en-26-02.jpg)

عیسی وِ ناصرَه، آبادی‌ئی کِه دُورُو بَچِه‌ایی خُشِه دِش گُذَرَنی، رَت. دِ روز شبات، او رَت وِ پرستشگاه. رَبَریا مذهبی نُسخِه دِ کِتآو اشعیا نبی‌نِه وِش دَن تا بُحُونَه، اوسِه عیسی طومارِه واز کِرد ئو قری دِش سی مَردِم حَن.

![](https://cdn.door43.org/obs/jpg/360px/obs-en-26-03.jpg)

او چِنی حَن: «خدا روح خُشِه وِ مِ نیائَه تا خَوَر خوشِه وِ فقیریا بو وم. او مِنِه فِرسنائَه تا اسیریانِه آزادی، کوریانِه بینایی‌ ئو جورکشون را رهایی بَوَخشِم. سی‌یَه‌کِه زِمُون رحمت خدا وِ آیِم رَسِسَه.»

![](https://cdn.door43.org/obs/jpg/360px/obs-en-26-04.jpg)

اوسِه عیسی نِشِس ئو هَمَه وا دَقَت سِیلِش می‌کِردِن. اونُو دُونِسِن کِه اُو جا دِ کِتآو مقدس کِه عیسی حَن، وِ مسیح موعود اشارَه می‌کِرد. عیسی گُت: «کلُومی کِه سی شِما حَنِم، هِه اِیسِه دِ حالِه اَنجُومَه.» هَمَه مَردِم وا رَتِن ئو پُرسی‎یِن: «مَر ای شخص کُر یوسف نیسا؟»

![](https://cdn.door43.org/obs/jpg/360px/obs-en-26-05.jpg)

اوسِه عیسی فرمایش کِرد: «وِ راسی کِه یِه پِیُمبَرِ دِ وِلات خُش قبولِش نمیکن. زِمُونی کِه دِ دُورُو ایلیا پِیُمبَر وِ مدت سه سال ئو نیم بارُو نَبارِس، وا وجود بیوَه زَن‎یا زیاد دِ اسرائیل، خدا ایلیانِه وِ کمک بیوَه زنی فِرِسَن کِه دِ وِلاتی هَنی زِنِئی می‌کِرد.»

![](https://cdn.door43.org/obs/jpg/360px/obs-en-26-06.jpg)

ئو چِنی اِدامَه دَ: «دِ زِمُون اِلیشَع پِیُمبَر، بُرّی دِ آیِم‎یا دِ اسرائیل بیماری پوسی گِرِتَه بین. اَما اِلیشَع هیچ‌کُوم دِ اونُونِه شفا نَدَه. او هِه نَعَمان سوری، فَرمُوندَه دشمن اسرائیلِه دِ اُو بیماری شفا دَ.» کَسُونی کِه گوش می‌دَن یهودی بی‎یِن، وَختی ای حرف‎یانِه شِنَفتِن خیلی عَصَبُونی بی‎یِن.

![](https://cdn.door43.org/obs/jpg/360px/obs-en-26-07.jpg)

مَردِم ناصرَه، عیسی‎نِه دِ پرستشگاه کشین وِ دَر، بُردِن وِ لُو یِه کَمَری تا اونِه دِ اوچِه بُونَن وِ هار ئو بَکُشَن. اَما عیسی دِ مین بِئن اونُو گُوارِس ئو دِ شهر ناصرَه‌ رَت وِ دَر.

![](https://cdn.door43.org/obs/jpg/360px/obs-en-26-08.jpg)

اوسِه عیسی وِ سراسر جلیل رَت. بری دِ مردم وا لاش می‌اُمان ئو بیماریا زیادی وا خُشُو می‌اُوِردِن. دِ مین اونُو قری علیل، کور ئو کَر بی، قَری هَم نِمی‌تُونِسِن رَه رُوئَن ئو حرف بَزِنَن. عیسی اونُون شفا می‎دَ.

![](https://cdn.door43.org/obs/jpg/360px/obs-en-26-09.jpg)

ئو عِدَه زیادی‌نِه کِه گرفتار روح گَن بی‎یِن، وِ تِه عیسی می‌اُوِردِن. وِ فرمُون عیسی روح‌یا گَن دِ مَردِم می‌کِردِن وِ دَر. خیلی دِشُو هَوار می‌زَن: «تو پسر خدا هیسی!» ئو مَردِم وا تعجب خدانِه ستایش می‌کِردِن.

![](https://cdn.door43.org/obs/jpg/360px/obs-en-26-10.jpg)

اوسِه عیسی دِ مین شاگریا خُش دُوزَه نفَرِه جِگا کِرد ئو نُوم‌شُو نیا وِ رسول‎یا. اونُو وا عیسی مسافرت می‌کِردِن ئو دِ او یاد می‌گِرِتِن.

*مَتَلِی گِرِتِسَه دِ کِتآو مقدس: (کِتآو انجیل متی باب ۴ آیه‌یا ۱۲ تا ۲۵، کِتآو انجیل مرقس باب‌یا ۱ تا ۳، کِتآو انجیل لوقا باب ۴)*

## ۲۷. مَتَل سامری خو

https://openbiblestories.org/l/lrc/story-27/

![](https://cdn.door43.org/obs/jpg/360px/obs-en-27-01.jpg)

یِه روز یَکی دِ اوسایا مذهبی یهود اُما وا لا عیسی. او می‌حاست نِشُو بِئَه کِه تعلیم‌یا عیسی اشتباهَه. او پُرسی: «استاد، آیِم چی بایس بَکَه تا زِنِئی هَمیشه‌ئی‌نِه بیارَه وِ دَس ؟» عیسی جِوُو دَ: «دِ کِتآو تورات دِ ای بارَه چی نوشتَه بی‌یَه؟»

![](https://cdn.door43.org/obs/jpg/360px/obs-en-27-02.jpg)

اُو پیا گُت: «خداوند، خدا خُتِه وا تَمُوم دل، وا تَمُوم جُون، وا تَمُوم قوت ئو وا تَمُوم فکرِت دوس داشتو. هُمساتِه هَم چی خُت، دوس داشتو.» اوسِه عیسی فرمایش کِرد: «دُورس مُوئی! تو هَم چِنی بَکُو تا زِنِئی هَمیشه‌ئی داشتَه بای.»

![](https://cdn.door43.org/obs/jpg/360px/obs-en-27-03.jpg)

اَما اُو دُونِشمَن مذهبی سی‌یَه‌کِه می‌حاست خُشِه آیِم خوئی نِشُو بِئَه، یِه دَفَه هَنی پُرسی: «هُمسا مِ کی‌یَه؟»

![](https://cdn.door43.org/obs/jpg/360px/obs-en-27-04.jpg)

عیسی وِا مَتَلِی جِوُو اُو گپ مذهبی‌نِه دَ: «پیائی یهودی دِ اورشلیم وِ لا اریحا دِ سفر بی.

![](https://cdn.door43.org/obs/jpg/360px/obs-en-27-05.jpg)

دِ رَه، رَهزِن‎یا وِش یورِش بُردِن ئو تَمُوم دارایی‌شِه گِرِتِن، اونِه زَن ئو بدن نیمَه جُونِشِه دِ رُونَه جَدَه وِل کِردِن.

![](https://cdn.door43.org/obs/jpg/360px/obs-en-27-06.jpg)

دِما ای جریان، کاهن یهودی‎ئِی دِ اوچِه رَد مِوی. وَختی اُو پیانِه دِ مین جدَه اُفتائَه دیی، دِ لائِی هَنی دِ جَدَه وِ رَه خُش اِدامَه دَ ئو اونِه وِ کُلی نِئی‌یَه گِرِت.

![](https://cdn.door43.org/obs/jpg/360px/obs-en-27-07.jpg)

کَمِی دِما وَ یِه لاوی‌ئی دِ رَه رَسِس (لاوی‎یا، طایفِه دِ اسرائیل بی‎یِن کِه وِ کاهن‎یا معبد کمک می‌کِردِن.). او هَم رَت وِ لائِی هَنی دِ جَدَه ئو وِ اُو پیا کمک نَکِرد.

![](https://cdn.door43.org/obs/jpg/360px/obs-en-27-08.jpg)

اوسِه پیائی هَنی اُما کِه سامری بی. (سامری‌یا ئو یهودی‌یا دِ یَکتِری نفرت داشتِن). وا یَه کِه دیی اُو پیا زخمی یهودی‌یَه، اَما دِلِش وِ حال او سُخت ئو زخم‎یاشِه شُست، مرهم مالی ئو بَست.»

![](https://cdn.door43.org/obs/jpg/360px/obs-en-27-09.jpg)

اوسِه پیا سامری اونِه ِ سُوآر خَر خُش کِرد، بُرد وِ مِمُونخُونِه ئو دِ اوچِه هَم دِش تیمارش کِرد.

![](https://cdn.door43.org/obs/jpg/360px/obs-en-27-10.jpg)

«با صُوش روز، پیا سامری بایس وِ سفر خُش اِدامَه می‎دَ. او قری پیل دَ وِ صِحاو مِمُونخُونَه ئو گُت: « ویردار ای کَس با ئو اَر بیشتِر دِ یِنَه خرج بَکی، وَختی کِه وِرگَشتِم وِ تو مِئِمِش.»

![](https://cdn.door43.org/obs/jpg/360px/obs-en-27-11.jpg)

اوسِه عیسی دِ اُو دُونِشمَن مذهبی پُرسی: «اِیسِه فکر میکی کُومی دِ اُو سِه نفر، هُمسا اُو پیائی بی کِه دِش دُوزی کِردِنی ئو زِیَه بینش؟» دُونِشمَن مذهبی جِوُو دَ: «وِنَه کِه سیش دل سُوختَه بی.» عیسی وِ او جِوُو دَ: «تو هَم رُو ئو چِنی بَکُو.»

*مَتَلِی گِرِتِسَه دِ کِتآو مقدس: (کِتآو انجیل لوقا باب ۱۰ آیه‌یا ۲۵ تا ۳۷)*

## ۲۸. جِوُون دُولَمَن

https://openbiblestories.org/l/lrc/story-28/

![](https://cdn.door43.org/obs/jpg/360px/obs-en-28-01.jpg)

یِه روز یَکی دِ گپیا دُولَمَن اُما وا لا عیسی ئو دِش پُرسی: «استاد خو، چی بایس بَکِم تا زِنِئی هَمیشه‌ئی‌نِه وِ دَس بیارِم؟» عیسی وِ او فرمایش کِرد: «سی‌چی وِ مِ خو مُوئی ؟ دِ حالی کِه، بِجُز خدا کَسِی خو نیسا. اَر میحای زِنِئی هَمیشه‌ئی داشتَه بای، دِ فِرمُون‎یا خدا فِرمُبَری بَکُو.»

![](https://cdn.door43.org/obs/jpg/360px/obs-en-28-02.jpg)

او پُرسی: «دِ کُومی فِرمُون‌یا بایس فِرمُوبَری بَکِم؟» عیسی جِوُو دَ: «قتل نَکُو، زِنا نَکُو، دُزی نَکُو، دِرو نُو، وِ بُوئَه ئو دات احترام بَنی ئو هُمساتِه چی خُت دوس داشتو.»

![](https://cdn.door43.org/obs/jpg/360px/obs-en-28-03.jpg)

اَما پیا جِوُون گُت: «مِ دِ بَچِه‌اِیی دِ هَمَه اُو فِرمُون‌یا فِرمُوبَری کِردِمَه، اِیسِه دَ چی بایس بَکِم تا زِنِئی هَمیشَه‌ئی داشتَه بام؟» عیسی وا محبت سِیلِش کِرد.

![](https://cdn.door43.org/obs/jpg/360px/obs-en-28-04.jpg)

ئو جِوُو دَ: «اَر میحای بهترین کار انجُوم بِئی، رُو ئو هَرچی داری بَفروش ئو پیلِش بِه وِ فَقیریا تا گنج تو دِ آسِمُو با نه وِ ریی زِمی! اوسِه بیا ئو دِ مِ فِرمُوبَری بَکُو!»

![](https://cdn.door43.org/obs/jpg/360px/obs-en-28-05.jpg)

وَختی اُو پیا جِوُون ای حرف عیسی‎نِه شِنَفت، خیلی غمگین بی سی‌یَه‌کِه دُولَمَن بی ئو نمی‌حاست مال ئو اموال خُشِه دِ دَس بِئَه. او ریی خُشِه وِرگَردَن ئو دِ عیسی دیر بی.

![](https://cdn.door43.org/obs/jpg/360px/obs-en-28-06.jpg)

اوسِه عیسی وِ شاگِردیاش فرمایش کِرد: «یَنِه دُونِسَه بایت کِه رد بی‎یِن یِه دُولَمَن دِ پادشاهی خدا خیلی سَختَه. هَنی هَم مُوئِم، رد بی‎یِن شتر دِ سیلا سیزِه آسُوتِرَه دِ رَد بی‎یِن یِه کَس دارندَه دِ پادشاهی خدا!»

![](https://cdn.door43.org/obs/jpg/360px/obs-en-28-07.jpg)

شاگردیا دِ شِنَفتِن ای حَرف عیسی وا رَتِن ئو پُرسین: «پَه کی می‌تُونَه نجات پیا بَکَه؟»

![](https://cdn.door43.org/obs/jpg/360px/obs-en-28-08.jpg)

عیسی سِیلی دِ شاگردیا کِرد ئو فرمایش کِرد: «آیِم نِمی‌تُونَه خُشِه نجات بِئَه، اَما وِ تِه خدا هَمَه چی مووَه.»

![](https://cdn.door43.org/obs/jpg/360px/obs-en-28-09.jpg)

پترس وِ عیسی گُت: «اِیما دِ هَمَه چی خُمُو دَس کَشی‌مَه تا وِ دُم تو بیایم، ایسِه مُز اِیما چی مووَه؟»

![](https://cdn.door43.org/obs/jpg/360px/obs-en-28-10.jpg)

عیسی جِوُو دَ: «هَرکَس سی مِ دِ بِرار ئو خُوَئر، بُوئَه ئو دا ئو بَچَه، حُونَه ئو زِمی چَش بَپوشَه، صد براوَر بیشتِر پیا می‌کَه ئو زِنِئی هَمیشه‌ئِی‌نِه وِ دَس میارَه. اَما خیلی‎یا کِه اول هیسِن، آخِر مووَن ئو خیلی‎یا کِه آخِرَن، اول مووَن.»

*مَتَلِی گِرِتِسَه دِ کِتآو مقدس: 
(انجیل متی فصل ۱۹ آیه‌یا ۱۶ تا ۳۰، انجیل مرقس فصل ۱۰ آیه‌یا ۱۷ تا ۳۱، انجیل لوقا فصل ۱۸ آیه‌یا ۱۸ تا ۳۰)*

## ۲۹. مَتَل خدمتکار بی‌رحم

https://openbiblestories.org/l/lrc/story-29/

![](https://cdn.door43.org/obs/jpg/360px/obs-en-29-01.jpg)

یِه روز پترس دِ عیسی پُرسی: «استاد، بِرارِی کِه وِ مِ گَنی می‌کَه، چَن گِل بایس بَوَخشِم؟ هفت گِل ؟» عیسی فرمایش کِرد: «نه هفت گِل ، بلکه هَفتا تا هفت گِل!» عیسی می‌حاست وِ اِیما بَفَمِنَه کِه بایس هَمیشَه بَوَخشیم. اوسِه عیسی ای مَتَلِه گُت.

![](https://cdn.door43.org/obs/jpg/360px/obs-en-29-02.jpg)

او گُت: «پادشاهی خداوند چی پادشاهی‌یَه کِه می‌حاست حِسآویا خُشِه وا خدمتکاریاش تسویه بَکَه. بدهی یَکی دِ اُو خدمتکاریا، چَن مُز ۲۰۰۰۰۰ سال کاربی.»

![](https://cdn.door43.org/obs/jpg/360px/obs-en-29-03.jpg)

دِ اوچِنی کِه خدمتکار نِمی‌تُونِس ایقَه بدهی‌نِه پرداخت بَکَه، پادشاه دستور دَ دِ جا اُو بدهی، اونِه وا زینَه ئو بَچُونِش ئو تَمُوم مال و اموال‌یاش بَفروشَن.

![](https://cdn.door43.org/obs/jpg/360px/obs-en-29-04.jpg)

اَما اُو پیا خُشِه وَن وِ پایا پادشاه ئو لالکِس ئو گُت: «اِ پادشاه، دِت میخوام وِ مِ وقت بِه تا هَمَه قَرتِ‌مِه تا آخِر وِت بِئِم.» پادشاه دلِش وِ حالِش سُخت، پس اونِه وِل کِرد ئو تَمُوم قرت‌شِه بَخشی.

![](https://cdn.door43.org/obs/jpg/360px/obs-en-29-05.jpg)

اَما وَختی کِه اُو خدمتکار دِ دربار پادشاه اُما وِ دَر، یَکی دِ هُمکاریاشِه دیی کِه وِ اندازَه مُزد چهار ماه وِ او قَرت‎دار بی. پس تِشنی‌شِه فشار دَ ئو گُت: «قرت‌تِه وِ مِ بِه.»

![](https://cdn.door43.org/obs/jpg/360px/obs-en-29-06.jpg)

دوس قرت‎دارِش اُفتا وِ پایاش ئو گُت: «دِت می‎حام مُلَتی وِ مِ ‎بِئِی تا تَمُوم قرت‌مِه بِئِم وا دِما.» اَما طلبکار راضی نِوی ئو هُمکارشِه تا دِئِن هَمَه قَرتِش وَن دِ زِندُون.

![](https://cdn.door43.org/obs/jpg/360px/obs-en-29-07.jpg)

وَختی دوس‎یا اُو کَس ای ماجرانِه شِنَفتِن، خیلی ناراحت بی‎یِن ئو رَتِن وِ پادشاه، جریُونِه وِش گُتِن.

![](https://cdn.door43.org/obs/jpg/360px/obs-en-29-08.jpg)

پادشاه دَرجا اُو پیانِه حاست ئو گُت: «اِ خادم شرآوشور! مِ وِ لالکِس تو اُو بدهی کلانِه بَخشَنِم. تو هَم بایس هِه ای رفتارِه وا هُمکارِت می‌کِردی.» پادشاه خیلی عَصَبُونی بی ئو فِرمُون دَ اونِه بُونَن دِ زِندُون ئو تا هَمَه قرت‌نِه نَدِیَه، اونِه آزاد نَکَن.

![](https://cdn.door43.org/obs/jpg/360px/obs-en-29-09.jpg)

اوسِه عیسی فرمایش کِرد: «اَر شِما بِرارتُونِه دِ تَه دل نَوَخشیت، بُوئَه آسِمُونی مِ هَم وا شِما هِه ای طوری رفتار می‌کَه.»

*مَتَلِی گِرِتِسَه دِ کِتآو مقدس: (انجیل متی فصل ۱۸ آیه‌یا ۲۱ تا ۳۵)*

## ۳۰. عیسی مسیح وِ پنج هزار نَفَر غذا مِئَه

https://openbiblestories.org/l/lrc/story-30/

![](https://cdn.door43.org/obs/jpg/360px/obs-en-30-01.jpg)

عیسی رسول‎یانِه سی بشارت ئو یاد دَئِن فِرسَن وِ آبادی‎یا زیادی. دِما وِرگَشتِن، اونُو عیسی‎نِه دِ کاریائی کِه کِردَه بی‎یِن با خَوَر کِردِن. اوسِه عیسی اونُونِه وِ جا چولی دِ نِزیکی دریاچه بُرد تا کَمی شَکَتی شو دِرا. اوسِه هَمَه سُوار قایقی بین ئو رَتِن وِ اولانِه رو.

![](https://cdn.door43.org/obs/jpg/360px/obs-en-30-02.jpg)

سی‌یَه‌کِه مَردِم دییِن کِه عیسی ئو شاگردیا سُوار قایق بی‌نَه دِ اوچِه می‌رَن، دِ رُونَه دریا شُرو کِردِن وِ دُووِسِن تا وِرَز اونُو بَرَسَن وِ اولا دریا. وِ ای خاطِر وَختی عیسی ئو شاگِردیاش رَسِسِن وِ اوچِه، بُر گَپی دِ مَردِم چَش وِ رَه‌شُو بین ئو رَتِن وا نِهاشُو.

![](https://cdn.door43.org/obs/jpg/360px/obs-en-30-03.jpg)

تعداد اونُو بِجُز زَن‎یا ئو بَچَه‌یا، نِزیک پنج هزار پیا بی. عیسی مسیح دِلِش خیلی وِ حالِشُو سُخت، سی‌یَه‌کِه چی دُنیا بی چوپُو بی‎یِن. اوسه شُرو کِرد وِ یاد دَئِن اونُو ئو کَسُونی کِه بیمار بین، شفا دَ.

![](https://cdn.door43.org/obs/jpg/360px/obs-en-30-04.jpg)

ایوارَه، شاگردیا اُمان وا لا عیسی ئو گُتِن: «اِ استاد! مَردِمِ بَفرِس تا سی خُشُو غذا جور بَکَن؛ سی‌یَه‌کِه دِ ای جا پِرت، چیئی سی حَردِن پیا نِمووَه.»

![](https://cdn.door43.org/obs/jpg/360px/obs-en-30-05.jpg)

اَما عیسی وِ شاگردیا گُت: «شِما خُتُو وِشُو غذا بِئیت.» اونُو جِوُو دَن: «چطور می‌تُونیم ای بُر دِ مَردِمِ سیر بَکیم؟! اِیما هِه پنج نُون ئو دو ماهی کُچِک داریم ئو بَس.»

![](https://cdn.door43.org/obs/jpg/360px/obs-en-30-06.jpg)

عیسی وِ شاگِردیاش فرمایش کِرد تا وِ مَردِم بُوئَن، کِه دِ دَسَه یا پَنجا نفری وِ ریی سُوزی یا بَشینَن.

![](https://cdn.door43.org/obs/jpg/360px/obs-en-30-07.jpg)

اوسِه عیسی پنج نُون ئو دو ماهی‌نِه گِرِت دِ مین دَس سِیل آسِمُو کِرد ئو خدانِه سی غذا شُکر کِرد ئو وَنِه برکت دَ.

![](https://cdn.door43.org/obs/jpg/360px/obs-en-30-08.jpg)

اوسِه عیسی نُون‌یا ئو ماهی‌یانِه کُت کُت کِرد ئو دَ وِ شاگِردیاش تا دِ بِئن مَردِم بَر بَکَن. شاگردیا وِ مَردِم غذا می‌دَن. هَمَه حَردِن ئو سیر بی‎یِن، اَما چی‌ئی دِ اُو غذایا کَم نِمِوی.

![](https://cdn.door43.org/obs/jpg/360px/obs-en-30-09.jpg)

اوسِه شاگردیا پس مَنَه غذانِه جَم کِردِن، وِ ای طوری دِ بقیَه اُو پنج نُون ئو دو ماهی، دُوزَه سَلَه پُر بی.

*مَتَلِی گِرِتِسَه دِ کِتآو مقدس: (کِتآو انجیل متی باب ۱۴ آیه‌‌یا ۱۳ تا ۲۱ ، کِتآو انجیل مرقس باب ۶ آیه‌‌یا ۳۱ تا ۴۴، کِتآو انجیل لوقا فصل ۹ آیه‌‌یا ۱۰ تا ۱۷، کِتآو انجیل یوحنا باب ۶ آیه‌‌یا ۵ تا ۱۵)*

## ۳۱. عیسی وِ ریی آو رَه میرَه

https://openbiblestories.org/l/lrc/story-31/

![](https://cdn.door43.org/obs/jpg/360px/obs-en-31-01.jpg)

دِما وَ کِه عیسی وِ جَمیَت غذا دَ وِ شاگردیاش فرمایش کِرد کِه سُوآر قایق بووَن، رُوئَن وِ اولانِه دریاچه، اَما او سی گِری دِ اوچِه مَن. اوسِه شاگردیا اُفتان وِ رَه ئو عیسی دِما وَ کِه مَردِمِ کِل کِرد، رَت بالا کوهی تا دُعا بَکَه. او دِ اوچِه تَنیا بی ئو تا نِصمِه شُو دُعا می‌کِرد.

![](https://cdn.door43.org/obs/jpg/360px/obs-en-31-02.jpg)

دِ ای بِئن، شاگردیا دِ مین قایق سرگرم پارو زَئِن بی‎یِن، اَما بادِ چپ می‌اُما ئو تا نیمَه شُو تَنیا تا مینجا دریاچَه‌ن رَتین.

![](https://cdn.door43.org/obs/jpg/360px/obs-en-31-03.jpg)

اوسِه عیسی دُعا خُشِه تَمُوم کِرد ئو رَت وا لا شاگردیا. او وا لا قایق اونُو وِ ریی آو رَه رَت.

![](https://cdn.door43.org/obs/jpg/360px/obs-en-31-04.jpg)

وَختی شاگردیا عیسی‎نِه دییِن، خیلی تَرسِسِن، سی‌یَه‌کِه فکر کِردِن روحی هیسا. عیسی دُونِس کِه اونُو زَلَه‎شُو رَتَه، اوسِه وِشُو فرمایش کِرد: «زَلَه‎تُو نَرُوئَه من هستم !»

![](https://cdn.door43.org/obs/jpg/360px/obs-en-31-05.jpg)

اوسِه پترس وِ عیسی گُت: «سرورِم، اَر تونی، امر بَکُو تا ریی آو وِ تِه تو بیام.» عیسی وِ پترس فرمایش کِرد: «بیا!»

![](https://cdn.door43.org/obs/jpg/360px/obs-en-31-06.jpg)

اوسه پترس دِ قایق اُما وِ دَر ئو وِ ریی آو وا لا عیسی رَت. اَما دِما رَتِن رَه کَمِی، او ریی خُشِه دِ عیسی وِرگَردَن ئو پی وِ موج‌یا بُلن ئو زورِ زیادِ باد بُرد.

![](https://cdn.door43.org/obs/jpg/360px/obs-en-31-07.jpg)

اوسِه پترس، هول گِرِتش ئو دِ حالی کِه وِ زیر آو می‌رَت ، داد زَه: «سرورِم نجاتِم بِه!» عیسی دَر جا دَس خُشِه دراز کِرد ئو اونِه کَشی وِ دَر. اوسِه عیسی وِ پترس فرمایش کِرد: «اِ کَم ایمان، سی‌چی وِ مِ اعتماد نَکِردی تا دِ اَمُو بَمُونی؟»

![](https://cdn.door43.org/obs/jpg/360px/obs-en-31-08.jpg)

وَختی پترس ئو عیسی سُوآر قایق بی‎یِن، باد یِه دَفَه دِ حرکت هِسا ئو آو آرُوم گِرِت. شاگردیا کِه خیلی وا رَتین، عیسی‎نِه پرستش کِردِن، وِ او گُتِن: «دِ راسی کِه تو پسرِ خدا هیسی.»

*مَتَلِی گِرِتِسَه دِ کِتآو مقدس:  (انجیل متی فصل ۱۴ آیه‌یا ۲۲ تا ۳۳؛ انجیل مرقس فصل ۶ آیه‌یا ۴۵ تا ۵۲؛ انجیل یوحنا فصل ۶ آیه‌یا ۱۶)*

## ۳۲.  عیسی یِه پیا دیوُنِه ئو زینَه بیماری ن آزا میکه

https://openbiblestories.org/l/lrc/story-32/

![](https://cdn.door43.org/obs/jpg/360px/obs-en-32-01.jpg)

یِه روز عیسی ئو شاگِردیاش وا قایق وِ اولانِه دریاچه وِ سرزمین جَدَری‎یا رَتِن. وَختی رَسِسِن وِ حُشکی دِ قایق خُشُو اُمان وِ دَر.

![](https://cdn.door43.org/obs/jpg/360px/obs-en-32-02.jpg)

پیائی اوچِه بی کِه گیر روح‎یا گنی بی.

![](https://cdn.door43.org/obs/jpg/360px/obs-en-32-03.jpg)

اُو پیا اُقَه زوردار بی کِه هیچ کَس نمی‌تُونِس رُمِش بَکَه. فراوو اونِه وِ زنجیر کَشی‎یَه بی‎یِن، اَما او زنجیریانِه مُورّن.

![](https://cdn.door43.org/obs/jpg/360px/obs-en-32-04.jpg)

اُو پیا دِ مین قُوریا اوچِه زِنِئی می‌کِرد. او شُو ئو روز می‌قارَن، جُومِه دِ وَرِش نِوی ئو خُشِه وا بَرد‌یا تیز زخمی می‌کِر

![](https://cdn.door43.org/obs/jpg/360px/obs-en-32-05.jpg)

وَختی او رَسِس وِ تِه عیسی، دِ بِراوَرِش زُونی زَه. عیسی وِ اُو دیو فِرمُون دَ: «دِ ای پیا بَکُو وِ دَر!»

![](https://cdn.door43.org/obs/jpg/360px/obs-en-32-06.jpg)

دیو هَوار بُلِنی زَه ئو گُت: «اِ عیسی، پسر خدای بزرگ، دِ مِ چی میحای؟ دِت میحام مِنِه عَذاو نِیی!» اوسِه عیسی دِ اُو دیو پُرسی: «نُوم تو چی‌نَه؟» او جِوُو دَ: «نُوم مِ لژیونَه، سی‌یَه‌کِه اِیما بُری هیسیم.» (لژیون ، چَن هزار سَرواز دِ ارتش روم بی.)

![](https://cdn.door43.org/obs/jpg/360px/obs-en-32-07.jpg)

دیویا دِ عیسی حاستن : «اِیمانِه دِ ای وِلات نَکُو وِ دَر!» دِ اوچِه گَلِه دِ وِرازیا وِ ریی تَپِه می‎چَرِیِن. روح‌یا گَن وِ عیسی لالکِسِن ئو گُتِن: «پَ اِیمانِه بَفرِس دِ مین وِرازیا!» عیسی اِجازَه دَ ئو فرمایش کِرد: «رِیت»

![](https://cdn.door43.org/obs/jpg/360px/obs-en-32-08.jpg)

دیویا دِ اُو پیا اُمان وِ دَر، رَتِن دِ مین وِرازیا. تَمُومِ اُو وِرازیا کِه نِزیک دو هزارتا بی‎یِن، دِ سرازیری تَپَه اُفتان دِ مین دریاچه ئو خَفَه بی‎یِن.

![](https://cdn.door43.org/obs/jpg/360px/obs-en-32-09.jpg)

وِراز چِرُون‌یائی کِه ویردار اُو گَلَه بیین، وا دییِن اُو اتفاق وا لا شهر دُووِسِن ئو مَردِمِ دِ اُو کاری کِه عیسی کِردی وا رسَنن. مَردِم شهر اُمان ئو اُو پیا دیوزِیَه‌نِه دییِن کِه آرُوم گِرِتَه، جُمِه کِردَه دِ وَر ئو عاقل نِشِسَه.

![](https://cdn.door43.org/obs/jpg/360px/obs-en-32-10.jpg)

مَردِم کِه خیلی زَلَه‎شُو رَتی، دِ عیسی حاستِن کِه دِ اوچِه‌ بَکَه وِ دَر. اوسه عیسی سُوآر قایق بی. اَما اُو پیائی کِه وِرَز یَه اسیرِ دیو بی دِ عیسی حاست تا واش رُوئَه.

![](https://cdn.door43.org/obs/jpg/360px/obs-en-32-11.jpg)

اَما عیسی وِ او گُت: « وِ حُونَه‌ت وِرگَرد ئو وِ هَمَه بُو کِه خدا سی تو چی کِردَه ئو چِطور رَمتِ او وتو رَسسه.»

![](https://cdn.door43.org/obs/jpg/360px/obs-en-32-12.jpg)

وِ ای خاطِر اُو پیا رَت ئو وا هَر کَس کِه ریی وِ ریی مِوی، می‌گُت کِه عیسی سیش چی کِردَه. هَرکَس کِه قصه اونِه می‌شنَفت، وا می‎رَت.

![](https://cdn.door43.org/obs/jpg/360px/obs-en-32-13.jpg)

عیسی وِرگَشت وِ اولانِه دریاچه. دِما رَسِسِن وِ اوچِه، بُر زیادی وِ دُورِش جَم بینی، دِ مین جمعیت مَردِم، زینِه بی کِه دُوزَه سال دِ خین‌ریزی عذاو مُوئِرد. او کُل دارایی‌شِه سی دَرمُونِ خُش خَرج کِردی ئو وِ دکتریا دِئی، اَما حالِش بَتِر هَم بیئی.

![](https://cdn.door43.org/obs/jpg/360px/obs-en-32-14.jpg)

او شِنَفتی کِه عیسی مریضیا زیادی نه شفا دِئَه اوسه وا خُش گُت: «باور میکم کِه اَر هِه وِ جُومَه عیسی‎نِه دس بزنم، مِ هَم شفا پیا می‌کِم.» او زینَه خُشِه دِ مین مَردِم رَسَن وِ پشت سَر عیسی ئو دس زه وِ چوقاش. تا وِ جُومَه عیسی‎ دَس زَه، خین‌ریزیش قَط بی.

![](https://cdn.door43.org/obs/jpg/360px/obs-en-32-15.jpg)

هِه اُو لَظَه عیسی فَمِس کِه نیروئی دِ او کِردَه وِ دَر. اوسِه وِرگَشت ئو پُرسی: «کی دَس نیا وِ جَومَه مِ ؟» شاگردیا جِوُو دَن: «مَردِم زیادی دِ هَمَه لا وِ تو زور میارَن، سی‌چی می پُرسی «کی وِ مِ دَس زَه؟»

![](https://cdn.door43.org/obs/jpg/360px/obs-en-32-16.jpg)

اُو زینَه دِ حالی کِه دِ ترس می‎رِکِس، دِ وَر پایا عیسی زُونی زَه. اوسِه وِ او گُت کِه چی کِردَه ئو چطوری شفا پیا کِردَه. عیسی وِ او گُت: «ایمانت تونِه شفا دَ! رُو وِ سِلامَت.»

*مَتَلِی گِرِتِسَه دِ کِتآو مقدس: (انجیل متی فصل ۸ آیه‌یا ۲۸ تا ۳۴؛ فصل ۹: آیه‌یا ۲۰ تا ۲۲؛ انجیل مرقس فصل ۵؛ انجیل لوقا فصل ۸ آیه‌یا ۲۶ تا ۴۸)*

## ۳۳. مَتَل کشاورز

https://openbiblestories.org/l/lrc/story-33/

![](https://cdn.door43.org/obs/jpg/360px/obs-en-33-01.jpg)

یِه رو عیسی دِ رُونَه دریاچه دِ حالِ یاد دیین وِ بُر گَپی دِ مَردِم بی. شمار اونُو اُقَه زیاد بی کِه عیسی جا وِ اندازه سی صُبَت وا اونُو ناشت. وِ ای خاطِر سُوآر قایقی بی کِه دِ رُونَه آو بی ئو دِ اوچِه شُرو وِ یاد دیین مَردِم کِرد.

![](https://cdn.door43.org/obs/jpg/360px/obs-en-33-02.jpg)

عیسی ای مَتَلِه سی مَردِم تَریف کِرد: «کشاورزی سی تُم وَنِن رَت وِ دَر. دِ حالی کِه تُوم‎یانِه وِ هَر لائی می‌پاشَن، قَری دِشُو اُفتان دِ مین رَه ئو بالِنَه‎یا اُمان ئو هَمَه‌شُونِه حَردِن.»

![](https://cdn.door43.org/obs/jpg/360px/obs-en-33-03.jpg)

قَری وِ ریی بَردکو اُفتان کِه ریی‌شِه کَمی خاک پوشِنائی. تُم‎یا ریی اُو خاک کَم عمق، خیلی زیی سُوز بی‎یِن. اَما ریشه‌‌یاشُو نِمی‎تُونِسِن تا زیر خاک رُوئه. وِ ای خاطِر وَختی اَفتاو داغ نیا وِشُو، هَمَه سُختِن ئو دِ بِئن رَتِن.

![](https://cdn.door43.org/obs/jpg/360px/obs-en-33-04.jpg)

«قَری دِ تُم‎یا هَم دِ مین خاریا اُفتان. خاریا ئو تُم‎یا وا یَک سُز کِردِن ئو قاو‌یا تازَهِ گیاه زیرِ زورِ خاریا دِ بِئن رَتِن ئو هیچ ثَمَری وِ بار نی‌اُوِردِن.»

![](https://cdn.door43.org/obs/jpg/360px/obs-en-33-05.jpg)

«قَرِی دِ تُم‎یا اُفتان وِ ریی خاک خو، ئو دِ هَر تُم، سی، شص ئو حتی صد براوَر ثمر اُوِرد. هَر کَس کِه میحا دِ خدا فرمون بری بَکَه وِ حرف‎یا مِ گوش بَکَه.»

![](https://cdn.door43.org/obs/jpg/360px/obs-en-33-06.jpg)

شاگردیا دِ شِنَفتِن ای مَتَل گیج بی‎یِن. اوسِه عیسی سیشو چِنی واز کرد: «تُم، کِلومِ خدائَه. رَه، آیِمی‌یَه کِه کِلومِ خدانِه می‌شنَوَه اَما وَنِه نمیفهمه ئو شیطان کِلومِه دِ او وِرمی‎راقنَه. دِ راسی شیطان نِمیلَه او کِلومِ خدانِه بفهمه»

![](https://cdn.door43.org/obs/jpg/360px/obs-en-33-07.jpg)

«زِمی بَردکو، آیِمی‌یَه کِه تا پیغومِ خدانِه می‌شنَوَه، وَنِه وا هَوَس قبول می‌کَه، اَما دِ مُوقَه سختی‌یا یا وَختی مَردِم عذاوش می‌َن، دِ خدا ریی وِرمی‎گَردِنَه. دِ کلومی هَنی او دِ اعتماد وِ خدا دَس وِرمیارَه.»

![](https://cdn.door43.org/obs/jpg/360px/obs-en-33-08.jpg)

«زِمینی کِه دِ خاریا پوشِسَه، آیِمی‌یَه کِه پیغومِه می‌شنَوَه اَما نگرانی‌یا زِنِئی ئو دل بستگی او وِ پیل ئو وِ دَس اُوِردِن چیا زیاد، دِما مدت کَمی اونِه دِ عشق وِ خدا وِرمی‎گَردِنَه. دَ نِمی‌تُونَه خدانِه دِ ریی اُو چی‌یائی کِه دِ کلوم خدا یاد گِرتی راضی بَکَه. او چی گل‌یا گَنِمی‌یَه کِه ثمری نِمیه.»

![](https://cdn.door43.org/obs/jpg/360px/obs-en-33-09.jpg)

«اَما زِمی خو، آیِمی‌یَه کِه پیغوم خدانِه می‌شنَوَه، باوَرِش می‌کَه ئو ثَمَر میارَه.»

*مَتَلِی گِرِتِسَه دِ کِتآو مقدس: (انجیل متی فصل ۱۳ آیه‌یا ۱ تا ۸؛ فصل ۱۳ آیه‌یا ۱۸ تا ۲۳؛ انجیل مرقس فصل ۴ آیه‌یا ۱ تا ۸؛ فصل ۴: آیه‌یا ۱۳ تا ۲۰؛ انجیل لوقا فصل ۸ آیه‌یا ۴ تا ۱۵)*

## ۳۴. عیسی مَثَل‌یائی هَنی یاد مِئَه

https://openbiblestories.org/l/lrc/story-34/

![](https://cdn.door43.org/obs/jpg/360px/obs-en-34-01.jpg)

عیسی مَتَل‎یا زیادی هَنی هَم دِبارَه پادشاهی خدا تَریف کِرد. مثلا چِنی گُت: «پادشاهی خدا چی دُون خردلَه کِه کسی دِ زِمینِش کاشت. شِما وِ خویی دُونیت کِه دُونَه خردل کُچِکتِرینه دُونَه‌یائَه.

![](https://cdn.door43.org/obs/jpg/360px/obs-en-34-02.jpg)

«وا یکه وَختی دُونَه خردل سُز می‌کَه، دِ تَموم گیایائی هَنی گَپتِر مووَه. اُقَه کِه بالنه‌یا دِ مین شاخَه‌یاش شکتی در می آوردِن.»

![](https://cdn.door43.org/obs/jpg/360px/obs-en-34-03.jpg)

عیسی مَتَلِی هَنی تَریف کِرد ئو گُت: «پادشاهی خدا چی خمیر تُرشی‌ئَه کِه زَنی وَنِه وا آرد قاطی می‌کَه تا دِ کُل خمیر پخش بووَه.»

![](https://cdn.door43.org/obs/jpg/360px/obs-en-34-04.jpg)

«پادشاهی خدا، چی گنجی‌ئَه کِه کسی وَنِه دِ زِمینی قایِم کِردَه با. کسی هَنی وَنِه پیا کِرد ئو دُوارَه دِ زیر خاک قایِمِش کِرد ئو دِ شوق وِنَه رَت ئو هَرچی داشت فِرُوخت تا پیل وِ اندازه وِ دَس بیارَه ئو اُو زِ‌مینی کِه گنج دِ مینش بی، بَخَرَه.»

![](https://cdn.door43.org/obs/jpg/360px/obs-en-34-05.jpg)

«پادشاهی خدا، چی یِ مروارید قِشَنگِ گِرُون‌قیمَتَه کِه تاجری، اُو مرواریدِه پیا کِرد ئو هَر چی داشت، فِرُوخت تا وا پیلِش وَنِه بَخَرَه.»

![](https://cdn.door43.org/obs/jpg/360px/obs-en-34-06.jpg)

دِ اوچِه کَسُونی بین کِه گمو می‎کِردِن وِ خاطِرِ کاریا خوشُو،خدا پسنشو کرده. اونُو بَقیَه مَردِمِه کِه کاریا خو نمی‎کِردِن کُچِک وِ حِسآو می‌اُوِردِن، اوسِه عیسی ای مَتَلِه سی‎شُو تَریف کِرد: «دو نفر رَتِن وِ معبد تا دُعا بَکَن. یَکِی دِشُو رَبَر مذهبی ئو اُو یَکِی باجگیر بی.

![](https://cdn.door43.org/obs/jpg/360px/obs-en-34-07.jpg)

«رَبَر مذهبی هِسا ئو چِنی دُعا کِرد:«اِ خدا تونِه شُکر می‌کِم کِه چی بَقیَه مَردِم، گناه‎کار، دُز، ستمکار، زِناکار ئو حتی چی ای باجگیر نیسِم.»

![](https://cdn.door43.org/obs/jpg/360px/obs-en-34-08.jpg)

دِ هَفتَه دو گِل روزَه مِی‌رِم ئو دِ کُل پیل‌یا ئو دَرُومَدی کِه وِ دَس میارِم، یِک دَهمِه مِئِم وِ تو.»

![](https://cdn.door43.org/obs/jpg/360px/obs-en-34-09.jpg)

«اَما اُو باجگیر دیرتِر دِ اُو رَبَر مذهبی هِسا ئو مُوقَه دُعا، حتی سَر خُشِه ری وِ آسِمُو بُلِن نَکِرد، بلکه وا گُورمچ زَه وِ سینَه خُش، گُت: «خدایا وِ مِ رحم بَکُو، سی‌یَه‌کِه گناه کارِم!»

![](https://cdn.door43.org/obs/jpg/360px/obs-en-34-10.jpg)

اوسِه عیسی اِدامَه دَ: «حقیقَتِه وِ شِما مُوئِم؛ خدا دُعا اُو باجگیرِه شِنَفت ئو اونِه عادل وِ حِسآو اُوِرد. خدا هَر کَس کِه خودپسند با کُچِک می‌کَه ئو هَر کَس کِه خُشِه کُچِک بَکَه سربُلِن می‌کَه.»

*مَتَلِی گِرِتِسَه دِ کِتآو مقدس: (انجیل متی فصل ۱۳ آیه‎یا ۳۱ تا ۴۶؛ انجیل مرقس فصل ۴ آیه‎یا ۲۶ تا ۳۴؛ انجیل لوقا فصل ۱۳ آیه‎یا ۱۸ تا ۲۱؛ فصل ۱۸ آیه‎یا ۹ تا ۱۴)*

## ۳۵. مَتَل بُوئَه دلسوز

https://openbiblestories.org/l/lrc/story-35/

![](https://cdn.door43.org/obs/jpg/360px/obs-en-35-01.jpg)

یِه روز عیسی بُری دِ مَردِمِه کِه وِ دُورِش جَم بی‎ئین تا دِ او بَشنوَن، تعلیم می‎دَ. بیشتِر وِنُو باجگیریا ئو بقیه مَردِمی بین کِه نمی‎حاستِن دِ شریعت موسی فِرمُونبَری بَکَن.

![](https://cdn.door43.org/obs/jpg/360px/obs-en-35-02.jpg)

اَما رَبَریا مذهبی کِه دِ اوچِه بی‎یِن، مِئی‎یِن کِه عیسی چِطور وا گناهکاریا چی دوس‎یا جون جونی رفتار می‌کَه. اوسِه وِ یَکتِری می‎گُتِن کِه عیسی کارِه اشتباهی می‎کَه. وَختی عیسی حرف‎یا اونُونِه شِنَفت، ای مَتَلِه سی شُو تَریف کِرد.

![](https://cdn.door43.org/obs/jpg/360px/obs-en-35-03.jpg)

«پیائی بی کِه دو کُر داشت. یِه روز کُر کُچِک‎تِر وِ بُوئَش گُت: «بُوئَه، مِ ارثِمِه اَلان می‌حام!» وِ ای خاطِر بُوئَه دِ دارایی خُش بَرِشِه دَ.

![](https://cdn.door43.org/obs/jpg/360px/obs-en-35-04.jpg)

چیئی نگذشت کِه کُرِ کُچِکتِر هَرچی داشت جَم کِرد ئو رَت وِ وِلاتِ دیری ئو دِ اوچِه تَمُومِ دارایی خُشِه دِ زِنِئی گناه آلود وِ باد دَ.

![](https://cdn.door43.org/obs/jpg/360px/obs-en-35-05.jpg)

چی‎ئی نگذشت کِه قَطی سختی دِ جائی کِه اُو کُر بی، اُما وِ وجود ئو او دَ پیلی سی خَرییِن غذا هَم ناشت. وِ ای خاطِر وِ ناچار وِ تَنیا کاری کِه دِش بَرمی‎اُما یعنی چَرَنِن وِرازیا سرگرم بی ئو اُوقَه گیر ئو گُسنَه بی کِه وا غذا وِرازیا گیَه خُشِه سیر می‎کِرد.

![](https://cdn.door43.org/obs/jpg/360px/obs-en-35-06.jpg)

آخِر یِه روز کُرِ کُچِکتِر وا خُش گُت: «مِ ایچِه چی می‌کِم؟ هَمَه خدمتکاریا بُوئَم غذا زیاد سی حَردِن دارَن، اَما مِ ایچِه دارِم دِ گُسنِه‌ئی می‌میرِم. پس وِرمیگَردِم وِ تِه بُوئَه خُوم ئو دِش می‌حام کِه بوم و یَکی دِ نوکریاش.»

![](https://cdn.door43.org/obs/jpg/360px/obs-en-35-07.jpg)

پس وا لا حُونَه بُوئَش اُفتا وِ رَه. هَنی دِ حُونَه دیر بی کِه بُوئَش اونِه دیی ئو دِلِش وِ حالِش سُخت ئو تُن رَت وا نِهاش، اونِه گِرِت دِ بَغَل ئو ماچش کِرد.

![](https://cdn.door43.org/obs/jpg/360px/obs-en-35-08.jpg)

کُر وِ بُوئَش گُت: «بُوئَه، مِ دِ حق تو ئو خدا گناه کِردِمَه ئو دَ لیاقت نارِم کِه کُر تو بام.»

![](https://cdn.door43.org/obs/jpg/360px/obs-en-35-09.jpg)

اَما بُوئَش وِ یَکی دِ خدمتکاریا گُت: «زی بایت ئو بهترین جُومَه‌نِه دِ حُونَه بیاریت ئو بَکیت دِ وَرِ کُرِم. انگشتری وِ دَسِش ئو کالِه بَکیت دِ پاش ئو گوسال مَسی بیاریت، سَر بُوئریت تا میمُونی بیریم ئو شادی بَکیم. سی‎یَه‎کِه ای کُرِم، مُردی ئو ایسِه زِنَه بی‎یَه. گُم بیئی ئو ایسِه اونِه هَنی پیا کِردِمَه»

![](https://cdn.door43.org/obs/jpg/360px/obs-en-35-10.jpg)

اوسِه، هَمَه اونُو میمُونی گَپی برپا کِردِن. چی‎ئی نگذشتی کِه کُر گَپ‎تِر کِه دِ کار دِ سَر زِمی وِرمی‎گَشت وِ حُونَه، دَنگ ساز ئو باختن ئو هننِ شِنَفت ئو کنجکاو بی کِه چِی بیه.

![](https://cdn.door43.org/obs/jpg/360px/obs-en-35-11.jpg)

وَختی کُر گَپ‎تِر فَمِس کِه ای میمُونی وِ خاطِر وِرگَشتِن بِرارِش وِ حُونا، عَصَبُونی بی ئو نِحاست رُوئَه حُونَه. بُوئَش اُما وِ دَر ئو وِش لالکِس کِه بیا وِ حُونَه ئو بیا دِ مِمُونی ، اَما او مِکیس بُوئَه‎نِه قبول نَکِرد.

![](https://cdn.door43.org/obs/jpg/360px/obs-en-35-12.jpg)

کُر گَپ‎تِر وِ بُوئَش گُت: «هَمَه ای سال‎یا وا وفاداری وِ تو خدمت کِردِم! هیچ وَخت دِ فِرمُونِت تَفره نَرَتِم ئو دِ کُل ای مدت، حتی یِه چَپیشی هَم وِ مِ نَدِئی تا بَتُونِم وا دوس‎یام مِمُونی بیِرِم. اَما ای کُرِت، مال تونِه دِ رَه‎یا گناه وِباد دیه ئو ایسِه کِه وِرگَشتَه وِ حُونَه، بیترین گوسال مَسِن سیش سر بُرّیئی تا میمُونی‎ئِی بِیری.»

![](https://cdn.door43.org/obs/jpg/360px/obs-en-35-13.jpg)

بُوئَش جِوُو دَ: «کُرِم، تو هَمیشَه دِ تِه مِ هیسی ئو هَرچی کِه دارِم مالِه تُونَه. اَما بهترین کار یِنا کِه ایسِه میمُونی بیریم ئو شادی بَکیم، سی‎یَه‎کِه بِرار تو مُردی ئو زِنَه بی، گُم بیئی ئو پیا بی.»

*مَتَلِی گِرِتِسَه دِ کِتآو مقدس: ‎(انجیل لوقا فصل ۱۵ آیه‎یا ۱۱ تا ۳۲)*

## ۳۶. عَوض بی‎یِن قیافَه مسیح

https://openbiblestories.org/l/lrc/story-36/

![](https://cdn.door43.org/obs/jpg/360px/obs-en-36-01.jpg)

یِ روز، عیسی سِه نفر دِ شاگِردیاش یعنی پترس، یعقوب ئو یوحنانِه وِرداشت ئو بُرد وِ توک کوه بُلِنی تا وا یَک دُعا بَکَن. (یوحنائی کِه عیسی‎نِه تعمید دَ، کَسی هَنی‎ئَه)

![](https://cdn.door43.org/obs/jpg/360px/obs-en-36-02.jpg)

مُوقَه دُعا، ریی عیسی چی اَفتآو نورانی بی ئو جُومَه‎ش چی نور اِسپی بی. طوری اِسپی بی کِه وِ ریی زِمی چی وِنَه پیا نِمووَه.

![](https://cdn.door43.org/obs/jpg/360px/obs-en-36-03.jpg)

اوسِه موسی ئو ایلیا نبی وش دِرُومان. ای پیایا، صدها سال وِرَز ای اتفاق وِ ریی زِمی زِنِئی می‌کِردِن. اونُو وا عیسی دِبارَه مُردِنِش کِه وِ زیئی دِ اورشلیم اتفاق مُوفتا، صُبَت کِردِن.

![](https://cdn.door43.org/obs/jpg/360px/obs-en-36-04.jpg)

وَختی کِه موسی ئو ایلیا وا عیسی سرگرم صُبَت کِردِن بی‎یِن، پترس وِ عیسی گُت: «چِه خوئَه کِه اِیما هایم ایچِه. اجازَه بِه سه تا کولا بَسازیم؛ یَکِی سی تو، یَکِی سی موسی ئو یَکی هَم سی ایلیا.» پترس نُوِنِس کِه چی مُوئَه.

![](https://cdn.door43.org/obs/jpg/360px/obs-en-36-05.jpg)

هَنی حَرفِ پترس تَموم نِوی‎ئی کِه اُور نورانی‎ئی اُما وِ هار ئو اونُون گِرِت دِ وَر ئو دَنگی دِش رَسِس کِه: «یِنا کُر عزیز مِ کِه دِ او راضی‎ئِم. وِ حَرف او گوش بَکیت.» سه شاگرد دِ ترس اُفتان وِ ریی زِمی.

![](https://cdn.door43.org/obs/jpg/360px/obs-en-36-06.jpg)

عیسی دَس نیا وِشُو ئو گُت: «وِریسیت ئو زَلَه‎تُو نَروئَه». وَختی کِه اونُو وِ هَمَه لا سِیل کِردِن، جُز عیسی کَسی هَنی‌نِه دِ اوچِه نِئی‎یِن.

![](https://cdn.door43.org/obs/jpg/360px/obs-en-36-07.jpg)

عیسی ئو اُو سِه شاگرد دِ کوه اُمان وِ هار. اوسِه عیسی وِ اونُو فرمایش کِرد: «ایسِه دِ اُو چی‎ئی کِه دیئیت وِ کَسی چی‎ئی نُوئیت. مِ وِ زیئی می‎میرِم ئو دُوارَه زِنَه موئِم. دِما وَ می‌تُونیت وِ بَقیَه بُوئیت کِه چی دیئیت.»

*مَتَلِی گِرِتِسَه دِ کِتآو مقدس: (انجیل متی فصل ۱۷ آیه‎یا ۱ تا ۹، انجیل مرقس فصل ۹ آیه‎یا ۲ تا ۸، انجیل لوقا فصل ۹ آیه‎یا ۲۸ تا ۳۶)*

## ۳۷. عیسی ایلعازَرِه زِنَه می‌کَه

https://openbiblestories.org/l/lrc/story-37/

![](https://cdn.door43.org/obs/jpg/360px/obs-en-37-01.jpg)

پیائی بی کِه نُومِش ایلعازَر بی، او ئو دو خُوَئرِش مریم ئو مرتا، دِ دوس‎یا نِزیک ئو جون جونی عیسی بی‎یِن. یِه روز، عیسی شِنَفت کِه ایلعازَر سخت مریضَه. وَختی عیسی ای خَوَرِه شِنَفت، گُت: «ای بیماری باعث مُردن او نِمووَه بلکه گَپی ئو جلالِ خدا، سی بَقیَه، دِ وَ دیاری مووَه.»

![](https://cdn.door43.org/obs/jpg/360px/obs-en-37-02.jpg)

عیسی وا یَه کِه اونُونِ دوس داشت، دو روز هَنی دِ جائی کِه بی، مَن. دِما گذشت اُو دو روز عیسی وِ شاگِردیاش گُت: «بیایت وِ یهودی‎یَه وِرگَردیم.» اَما شاگردیا گُتِن: «اِ استاد، هِه ای چَن روزِ پیش بی کِه مَردِم یهودی‎یَه می‌حاسِن تونِه بَکُشَن!» عیسی دِ جِوُو گُت: «دوس اِیما ایلعازَر حُوفتی‎ئَه ئو مِ بایس اونِه بیار بَکِم.»

![](https://cdn.door43.org/obs/jpg/360px/obs-en-37-03.jpg)

شاگردیا عیسی جِوُو دَن: «خداوندا، اَر او حُوفتی‎ئَه، حالش بیتِر مووَه.» اوسِه عیسی آشکارا گُت: «ایلعازَر مُردَه. شادم کِه دِ اوچِه نِویم تا شِما بَتُونیت وِ مِ ایمان بیاریت.»

![](https://cdn.door43.org/obs/jpg/360px/obs-en-37-04.jpg)

وَختی عیسی وِ شهری کِه ایلعازَر دِش زِنِئی می‎کِرد رَسِس، چهار روز دِ مُردِنِ ایلعازَر گذشتی. مرتا رَت وا نِها عیسی ئو گُت: «سرورِم، اَر ایچِه بیئی، بِرارِم نمی‌مُرد. اَما مِ ایمان دارِم هَر چِی کِه تو دِ خدا بِهای، وِ تو می‌وَخشَه.»

![](https://cdn.door43.org/obs/jpg/360px/obs-en-37-05.jpg)

عیسی جِوُو دَ: «مِ قیامت ئو زِنِئی هیسِم. هَرکَس وِ مِ ایمان بیارَه، حتی اَر بَمیرَه، زِنَه مووَه. هَرکَس وِ مِ ایمان بیارَه هیچ وخت نمی‌میرَه. وِ ای حَرفِ مِ ایمان داری؟» مرتا جِوُو دَ: «اَ استاد، مِ ایمان دارِم کِه تو مسیح، پسرِ خدائی.»

![](https://cdn.door43.org/obs/jpg/360px/obs-en-37-06.jpg)

اوسِه مریم رَسِس وِ تِه عیسی ئو اُفتا وِ پایاش ئو گُت: «سرورِم، اَر ایچِه بیئی، بِرارِم نمی‌مُرد.»عیسی دِ اونُو پُرسی: «کجا خاکِش کِردیتَه؟.» اونُو جِوُو دَن: «دِ ی قُوری. بیا ئو بئین.» اوسِه عیسی گِریوِس.

![](https://cdn.door43.org/obs/jpg/360px/obs-en-37-07.jpg)

قُور ایلعازَر غاری بی کِه بَرد گَپی نیائین دَم دَرِش. وَختی عیسی رَسِس وِ قُور وِشُو گُت: «بَردِه بَزِنیت وا لا!» اَما مرتا گُت: «چهار روز دِ مُردنش گُذَشتَه. ایسِه دِ لَشِش بو کرده.»

![](https://cdn.door43.org/obs/jpg/360px/obs-en-37-08.jpg)

عیسی جِوُو دَ: «مَر نَگُتِم اَر وِ مِ ایمان بیاری جلالِ خدانِه مِئی‎نی؟» اوسِه اونُو بَردِه زَن وا لا.

![](https://cdn.door43.org/obs/jpg/360px/obs-en-37-09.jpg)

اوسِه عیسی سِیل آسِمُو کِرد ئو گُت: «بُوئَه، تونِه شُکر می‌کِم کِه مِنِه می‎شنَوی. دُونِم کِه هَمیشَه وِ مِ گوش مِئی، اَما یَنِه وِ خاطِر مَردِمی کِه هان ایچِه گُتِم، تا ایمان بیارَن کِه تو مِنِه فرسَنی‎ئَه.» اوسِه وا دَنگ بُلن فرمایش کِرد: «ایلعازَر، بیا وِ دَر!»

![](https://cdn.door43.org/obs/jpg/360px/obs-en-37-10.jpg)

ایلعازَر، دِ حالی کِه بَدَنِش دِ کَفِه پیچِسَه بی، دِ قُور اُما وِ دَر. عیسی وِ اونُو گُت: «وازِش بَکیت تا بَتونَه رَه رُوئَه.» بُری دِ یهودی‎یا سی‎یَه‎کِه ای معجزَه‎نِه دییِن، وِ عیسی ایمان اُوِردِن.

![](https://cdn.door43.org/obs/jpg/360px/obs-en-37-11.jpg)

اَما گپون مذهبی یهود حَسیدی کِردِن، اوسه وِ دُور یَک جَم بی‎یِن تا نقشَه کُشتن عیسی ئو ایلعازَرِه بَکَشَن.

*مَتَلِی گِرِتِسَه دِ کِتآو مقدس: (انجیل یوحنا فصل ۱۱ آیه‎یا ۱ تا ۴۶)*

## ۳۸. خیانت وِ عیسی

https://openbiblestories.org/l/lrc/story-38/

![](https://cdn.door43.org/obs/jpg/360px/obs-en-38-01.jpg)

یهودی‎یا هَر سال، عِد پِسَخِه جشن می‌گِرِتِن. ای جشن، وِ خاطِر وِنَه بی کِه چِطور خدا صدها سال پیش، بُوئَه‌یا اونُون دِ بَنِه‎اِیی مصر نجات دِئی. نِزیک سه سال دِما وَ کِه عیسی شُرو وِ مُوعِظَه ئو تعلیم هَمَه مَردِم کِرد، وِ شاگِردیاش گُت کِه میحا عِد پِسَخِه وا اونُو دِ اورشلیم جشن بیرَه، ئو او گُت کِه دِ اوچِه کُشتَه مووَه.

![](https://cdn.door43.org/obs/jpg/360px/obs-en-38-02.jpg)

یهودا یَکِی دِ شاگردیا عیسی ئو خَزُونَه‎دار دَسَه شاگردیا بی. بیشتِر موقَه‎یا هَم دِ اُو پیل مُوزی. دِما وَ کِه عیسی ئو شاگِردیاش رَسِسِن وِ اورشلیم، یهودا رَت وِ تِه کاهن‎یا گَپ یهود ئو پیشنهاد لُو دَئِن عیسی‎نِه دِ جا گِرِتِن پیل وِشُو دَ. او دُونِس کِه رَبَریا یهودی، مسیح بی‎یِن عیسی‎نِه باوَر نارَن ئو خواهان کشتِن او بین.

![](https://cdn.door43.org/obs/jpg/360px/obs-en-38-03.jpg)

سران مذهبی یهود وِ رَبَری کاهن گَپ، سی خیانت یهودا ئو تحویل دَئِن عیسی و اونُو، سی سِکَه نُقرَه وِش دَن. دُورس هِه اُو طور کِه پِیُمبَریا پیش‎گویی کِردین. یهودا قبول کِرد ئو پیلِه گِرِت ئو اُفتا وِ رَه. دِ اُو مُوقَه او وِ دُم فرصتی بی تا عیسی‎نِه وِ اونُو تسلیم بَکَه.

![](https://cdn.door43.org/obs/jpg/360px/obs-en-38-04.jpg)

عیسی دِ اورشلیم، عِد پِسَخِه وا شاگِردیاش جشن گِرِت. مُوقَه حَردِن شُوم پِسَخ، عیسی نُونِ گِرِت تیکَه تیکَش کِرد ئو گُت: «بی‎ریت ئو بُحُوریت، یِنَه بدنِ مِنَ کِه سی شِما فدا مووَه. یَنِ وِ ویر مِ وِ جا بیاریت.» وِ ای طوری، عیسی گُت کِه وِ خاطِر اونُو جُو مِئَه ئو بَدَنِش سی اونُو قربانی مووَه.

![](https://cdn.door43.org/obs/jpg/360px/obs-en-38-05.jpg)

اوسِه عیسی جُوم شِرآوِی گِرِت ئو وِ اونُو گُت: «یِنَ خینِ مِ دِ عَد جدیدَه کِه سی آمرزش گناه‌یا شِما میریزی‎ئَه، دِش بُحُوریت. ای کارِه دِ آیندَه وِ ویر مِ اَنجُوم بِئیت.»

![](https://cdn.door43.org/obs/jpg/360px/obs-en-38-06.jpg)

اوسِه عیسی وِ شاگردیا گُت: «یَکی دِ شِما وِ مِ خیانت می‌کَه.» شاگردیا وا رَتِن ئو پُرسین کِه چِه کَسی دَس وِ چنی کاری می‎زِنَه. عیسی گُت: «وِنَه کِه ای گُپ‎نُونِه دِ مِ می‎رَه، خیانتکارَه.» اوسِه نُونِه دَ وِ یهودا.

![](https://cdn.door43.org/obs/jpg/360px/obs-en-38-07.jpg)

دِما وَ کِه یهودا نُونِه وِرداشت، شیطان رَت دِ مینش. او رَت وِ تِه گپون یهود تا سی دَسگیری عیسی وِشُو کمک بَکَه. یِنُو هَمَه دِ شُو اتفاق اُفتا.

![](https://cdn.door43.org/obs/jpg/360px/obs-en-38-08.jpg)

دِما حَردِن غذا، عیسی ئو شاگِردیاش رَتِن وا لا کُوه زیتون. عیسی گُت: «اِمشُو شِما هَمَه مِنِ تَنیا مِیلیت. سی‌یَه‌کِه نوشتَه بی‎یَه، «چوپُونِه می‌زِنِم ئو هَمَه میشُو پَخش مووَن.»

![](https://cdn.door43.org/obs/jpg/360px/obs-en-38-09.jpg)

پترس گُت: «حتی اَر هَمَه تونِه بِیلَن ئو رُوئَن، مِ ای کارِه نمی‌کِم.» عیسی وِش گُت: «شیطان میحا هَمَه شِمانِه مالِ خُش بَکَه، اَما مِ سی تو دُعا کِردِم تا ایمانِت دِ بِئن نَرُوئَه. وا ای حال، اِمشُو، وِرَز بُونگ کِلَشیر، تو سِه گِل حاشا میکی کِه مِنِه می‌شناسی.»

![](https://cdn.door43.org/obs/jpg/360px/obs-en-38-10.jpg)

پترس وِ عیسی گُت: «حتی اَر بَمیرِم، تونِه حاشا نمی‌کِم» بقیه شاگردیا هَم چِنی گُتِن.

![](https://cdn.door43.org/obs/jpg/360px/obs-en-38-11.jpg)

اوسِه عیسی وا شاگِردیاش رَتِن وِ باغ جتسیمانی. عیسی وِ اونُو گُت دُعا بَکَن تا شیطان نَتُونَه وَسوَسَه‎شُو بَکَه. اوسِه عیسی اونُون هیشت ئو رَت وِ خلوَت تا دُعا بَکَه.

![](https://cdn.door43.org/obs/jpg/360px/obs-en-38-12.jpg)

عیسی سِه گِل ای طوری دُعا کِرد: «اِ بُوئَه مِ، اَر مووَه، بییل کِه دِ ای جُومِ رنج نُحُورم. اَما اَر رَهی هَنی سی آمرزش گناه‌یا آیِم‎یا نیسا، پس ارادَه تو اَنجُوم با.» عیسی چِنُو هُول گِرِتِشی کِه عرقِش چی تُکَه‎یا خین بی. خدا فرشتِه فِرسَن تا اونِه قوی بَکَه.

![](https://cdn.door43.org/obs/jpg/360px/obs-en-38-13.jpg)

دِما هَر گِل دُعا، عیسی وِرمی‎گَشت وا لا شاگِردیاش، اَما اونُون دِ خآو مِئیی. دَفَه سِئم کِه وِرگَشت، گُت: «وِریسیت، اُو شاگرد خیانتکار ها ایچِه.»

![](https://cdn.door43.org/obs/jpg/360px/obs-en-38-14.jpg)

یهودا وارْد رَبَریا یهود، سَروازیا ئو بُری آیم اُما. اونُو وا خُشُو شِمشیر ئو گُرز داشتِن. یهودا اُما وا لا عیسی ئو گُت: «سِلام اِ استاد» ئو اونِه ماچ کِرد. یَه نِشُونِه بی تا عیسی‎نِه وِ گپون یهود، سی دَسگیری بَشناسِنَه. عیسی وِ او گُت: «یهودا، وا ماچی وِ مِ خیانت میکی؟»

![](https://cdn.door43.org/obs/jpg/360px/obs-en-38-15.jpg)

زِمُونی کِه سَروازیا، عیسی‎نِه دَسگیرِ کِردِن، پترس شِمشیر خُشِ کَشی ئو گوشِ خدمتکار کاهن گَپِه بُرّی. عیسی وِش گُت: «شِمشیرِت غلاف کُو. مِ می‌تُونِم دِ بُوئَم بِحام کِه قشونی دِ فرشتَه‎یا بفِرسَه وِ کُمَکِم. اَما بایس دِ بُوئَم فِرمُونبَری بَکِم.» اوسِه عیسی گوش اُو پیانِه شفا دَ ئو هَمَه شاگردیا جیستِن.

*مَتَلِی گِرِتِسَه دِ کِتآو مقدس: (انجیل متی فصل ۲۶ آیه‎یا ۱۴ تا ۵۶، انجیل لوقا فصل ۲۲ آیه‎یا ۱ تا ۵۳، انجیل یوحنا فصل ۱۸ آیه‎یا ۱ تا۱۱)*

## ۳۹. محاکِمَه عیسی

https://openbiblestories.org/l/lrc/story-39/

![](https://cdn.door43.org/obs/jpg/360px/obs-en-39-01.jpg)

دِ نِصمِه شُو، سَروازیا عیسی‎نِه بُردِن وِ حُونَه کاهن گَپ تا دِش بازجویی بَکَه. پترس هَم دِ دیر وِ دُم اونُو می‌اُما. وَختی عیسی‎نِه بُردِن وِ مین حُونَه، پترس هِسا وِ دَر حُونَه وا لا تَش تا خُشِ گَرم بَکَه.

![](https://cdn.door43.org/obs/jpg/360px/obs-en-39-02.jpg)

دِ مین حُونَه، گپونِ یهود دِ عیسی بازجویی کِردِن. اونُو شاهدیا دِروزِنه زیادی اُوِردِن کِه تُمَت‎یا ناروا وِ عیسی می‎زَن. اَما، حرف‎یا اونُو وا یَک، یَکی نِوی، وِ ای خاطِر رَبَریا یهود نَتُونِسِن گناهی‎نِه وِ او ثابت بَکَن. عیسی هَم هیچ حَرفی وِ زِوُون نی‌اُوِرد.

![](https://cdn.door43.org/obs/jpg/360px/obs-en-39-03.jpg)

آخِر، کاهنِ گَپ سِیل عیسی کِرد ئو گُت: «وِ اِیما بُو، آیا تو مسیح پسرِ خدای زِنَه هیسی؟»

![](https://cdn.door43.org/obs/jpg/360px/obs-en-39-04.jpg)

عیسی گُت: «اَ هیسِم، ئو یِه روز مِنِه مِئی‎نیت کِه دِ دَس راسِ خدا نِشِسِمَه ئو دِ آسِمُو وِ زِمی وِرمی‎گَردِم.» کاهن گَپ، کِه دِ حرف‎یا عیسی عَصَبُونی بی‎ئی، جُومَه خُشِه دِرّی ئو وا قارَه وِ بَقیَه رَبَریا مذهبی گُت: «اِیما وِ شاهدیائی هَنی نیاز ناریم. هَمَه شِنَفتِن کِه او گُت مِ پسرِ خدائِم. چِی نظر مِئیت؟»

![](https://cdn.door43.org/obs/jpg/360px/obs-en-39-05.jpg)

رَبَریا یهود هَمَه دِ جِوُو کاهن گَپ گُتِن: «او حقشَ بمیره» اوسِه چَشیا عیسی‎نِه بَستِن، آو دَم وَنِن دِ مین ریش، اونِه زَن ئو تیتالِش کِردِن.

![](https://cdn.door43.org/obs/jpg/360px/obs-en-39-06.jpg)

پترس دِ دَر حُونَه هِسائی. کنیزی اونِه دیی ئو وِش گُت: «تو هَم وا عیسی بیئی» پترس حاشا کِرد. کَمِی بَد کنیزی هَنی هِه ای حرفِ وِش زَه ئو پترس هَنی حاشا کِرد. آخِر، کَسُونی کِه اوچِه هِسائین وِش گُتِن: «دُونیم کِه تو یَکی دِ شاگردیا عیسی‎ئی، سی‎یَه‎کِه تو هَم جلیلیی‎ئی.»

![](https://cdn.door43.org/obs/jpg/360px/obs-en-39-07.jpg)

اوسِه پترس قسم حَرد ئو گُت: «خدا مِنِه لَنَت بَکَه اَر ای پیانِه بَشناسِم». هِه اُو مُوقَه کِلَه‎شیر بُونگ زَه ئو عیسی وِرگَشت ئو سِیل پترس کِرد.

![](https://cdn.door43.org/obs/jpg/360px/obs-en-39-08.jpg)

پترس رَت ئو روآرو گِریوِس. هِه دِ اُو زِمُون، یهودای خیانتکارِ دیی کِه رَبَریا یهود عیسی‎نِه وِ مُردن مَکوم کِردِنَه. غم ئو غصه گِرِتِش، رَت ئو دَس وِ خودکشی زَه.

![](https://cdn.door43.org/obs/jpg/360px/obs-en-39-09.jpg)

دِ ای روزیا پیلاتس فَرمُوندار رومی وِ یهودا حکومت می‎کِرد. سران یهود عیسی‎نِه بُردِن وِ تِه او. حواستَه اونُو یِنَه بی کِه پیلاتوس عیسی‎نِه وِ مُردِن مَکوم بَکَه. پیلاتوس دِ عیسی پُرسی: «آیا تو پادشاه یهودی؟»

![](https://cdn.door43.org/obs/jpg/360px/obs-en-39-10.jpg)

عیسی جِوُو دَ: «دُرس گُتی. اَما پادشاهی مِ زِمینی نیسا. اَر چِنی بی، پیرویام سی مِ می‌جَنگِسِن. اَما مِ اُمامَه وِ ای دُنیا تا حقیقتِه دِبارَه خدا وِ هَمَه بُوئِم. هَر کَس کِه حقیقتِه دوس داشتَه با وِ مِ گوش مِئَه.» پیلاتوس پُرسی: «حقیقت چی‎نَه؟»

![](https://cdn.door43.org/obs/jpg/360px/obs-en-39-11.jpg)

پیلاتوس دِما صُبَت وا عیسی رَت وِ دَر وا لا جمعیت ئو گُت: «مِ گناهی دِ ای کَس پیا نَکِردِم کِه حقش مُردن با.» اَما گپون یهود ئو جمعیت هَوار زَن: «مصلوبِش بَکُو.» پیلاتوس جِوُو دَ: «او گناهکار نیسا.» اَما اونُو ای دَفَه وا دَنگ بُلِنتِری هَوار زَن. اوسِه پیلاتوس سی دَفَه سِئم گُت: «او گناهکار نیسا.»

![](https://cdn.door43.org/obs/jpg/360px/obs-en-39-12.jpg)

پیلاتوس دِ تَرس یِنَه کِه شورِش نووَه، قبول کِرد ئو عیسی‎نِه وِ سَروازیاش سِپارد تا مصلوبِش بَکَن. سَروازیا رومی عیسی‎نِه شلاق زَن ئو چوغا سلطنتی کِردِن دِ وَرِش ئو تاجی دِ خار نیان ریی سَرِش. اوسِه وِ تیتال می‎گُتِن: «زِنَه با پادشاه یهود».

*مَتَلِی گِرِتِسَه دِ کِتآو مقدس: (انجیل متی فصل ۲۶ آیه ۵۷ ئو فصل ۲۷ آیه ۲۶، انجیل مرقس فصل ۱۴ آیه ۵۳ ئو فصل ۱۵، انجیل لوقا فصل ۲۲ آیه ۵۴ ئو فصل ۲۳ آیه ۲۵، انجیل یوحنا فصل ۱۸ آیه ۱۲ ئو فصل ۱۹ آیه ۱۶)*

## ۴۰. عیسی مصلوب بی

https://openbiblestories.org/l/lrc/story-40/

![](https://cdn.door43.org/obs/jpg/360px/obs-en-40-01.jpg)

دِما وَ کِه سَروازیا عیسی‎نِه تیتال کِردِن، اونِه بُردِن وِ دَر تا مصلوبِش بَکَن. اونُو وادارِش کِردِن تا صلیب خُشِه بیرَه وا کول.

![](https://cdn.door43.org/obs/jpg/360px/obs-en-40-02.jpg)

سَروازیا عیسی‎نِه بُردِن وِ جائی کِه وِش می‎گُتِن جُلجُتا (یعنی جُمجُمَه سر) ئو دَس ئو پاشِه وِ صلیب میخکو کِردِن. اَما عیسی گُت: «اِ بُوئَه! ای مَردِمِ بَوَخش، سی‌یَه‌کِه نُوئِنَن چِی می‌کَن.» وِ دستور پیلاتوس بالا سرِش نِوِشتِه نیان کِه وِ ریش نوشتَه بیئی: یِنا پادشاه یهود

![](https://cdn.door43.org/obs/jpg/360px/obs-en-40-03.jpg)

اوسِه سَروازیا وِ جُومَه عیسی قُرَه وَنِن. وا ای کارِ اُو پیشگویی کِتآو مقدس اَنجُوم بی کِه مُوئَه: «جُومَه ‌یامِه مین خُشُو بَر کِردِن ئو وِ چوغا مِ قُرَه وَنِن.»

![](https://cdn.door43.org/obs/jpg/360px/obs-en-40-04.jpg)

سروازیا هَمزِمُون دو دُوزِه هَم مصلوب کِردِن ئو عیسی‎نِه ریی صلیب نیان دِ مین اونُو. یَکِی دِشُو عیسی‎نِه مَسخِرَه می‌کِرد، اَما اُو یَکی وِ او گُت: « تو دِ خدا نمی‌تَرسی؟ اِیما گناهکاریم اَما ای پیا بی‎گناهَه.» اوسِه وِ عیسی گُت: «اِ عیسی! مِنِ دِ پادشاهی خُت وِ ویر بیار.» عیسی وِ او جِوُو دَ: «تو هِه اِیمروز وا مِ دِ بهشت هیسی.»

![](https://cdn.door43.org/obs/jpg/360px/obs-en-40-05.jpg)

گپونِ مذهبی یهود ئو مَردِمی کِه اوچِه بی‎یِن عیسی‎نِه ریش خن ش می‌کِردِن ئو می‌گُتِن: «اَر تو پسرِ خدا هیسی دِ صلیب بیا وِ هار ئو خُتِه نجات بِه! اوسِه اِیما وِ تو ایمان میاریم.»

![](https://cdn.door43.org/obs/jpg/360px/obs-en-40-06.jpg)

هَرچَن ظُر بی، اَما آسِمُو سرتاسر اُو وِلات تاریک بی. ای ظُلمات تا سِه ساعت هه بییش.

![](https://cdn.door43.org/obs/jpg/360px/obs-en-40-07.jpg)

اوسِه عیسی هَوار زَه: «تَمُوم بی. اِ بُوئَه، روح خُومِه وِ دَس‌یا تو می‌سپارم ». اوسِه سر خُشِه وَن وِ هار ئو روحِ خُشِه تسلیم کِرد. وَختی کِه جُو دَ زِمی اُما وِ لَرزَه ئو پردَه گَپ معبد، کِه مَردِمِ دِ ته خدا جِگا می‌کِرد (قدس‎القداس)، دِ بالا تا هار بی وِ دو کُت.

![](https://cdn.door43.org/obs/jpg/360px/obs-en-40-08.jpg)

عیسی وا مُردن خُش رَهی واز کِرد تا مَردِم بَتُونَن بیان وِ ته خدا. وَختی نِگَه‌بُون رومی ای اِتفاقِه دیی، گُت: «دِ راسی کِه ای پیا بی‎گناه بی. او پسرِ خدا بی.»

![](https://cdn.door43.org/obs/jpg/360px/obs-en-40-09.jpg)

اوسِه دو نَفَر دِ گپونِ یهود، نیقودیموس ئو یوسف کِه ایمان داشتِن عیسی هِه اُو مسیحِ موعودَه، رَتِن وِ تِه پیلاتوس ئو حاستِن کِه لَش عیسی‎نِه تحویل بیرَن. اونُو لَشِه وا پَرو کَتُون پی‎چَنِن ئو دِ قُور بَردی‎ئی نیان ئو بَرد گَپی هَم پِل دَن دَم در قُور تا بَوَنی‎ئَه.

*مَتَلِی گِرِتِسَه دِ کِتآو مقدس: (کِتآو انجیل متی باب ۲۷ آیه‌یا ۲۷ تا ۶۱، کِتآو انجیل مرقس باب ۱۵ آیه‌یا ۱۶ تا ۴۷، کِتآو انجیل لوقا باب ۲۳ آیه‌یا ۲۶ تا ۵۶، کِتآو انجیل یوحنا باب ۱۹ آیه‌یا ۱۷ تا ۴۲)*

## ۴۱. خدا عیسی‎نِه دِ مین مُردیا وِرمیارَه

https://openbiblestories.org/l/lrc/story-41/

![](https://cdn.door43.org/obs/jpg/360px/obs-en-41-01.jpg)

دِما یَه کِه سَروازیا عیسی‎نِه مصلوب کِردِن، گپونِ قومِ یهود رَتِن وِ تِه پیلاتس ئو گُتِن: «عیسى دِ دِرو گُت کِه دِما سِه روز دِ مین مُردیا وِرمِسَه. سی‎یَه‎کِه شاگِردیاش نَتونَن لَشِش بُوزَن، بایس کَسی‎نِه مامور بَکیم تا سی سِه روز دِ قُور نِگَه‎بُونی بَکَه. اَر بَتُونَن لَشِه بُوزَن، اوسِه اِدا می‎کَن کِه او دِ مین مُردیا وِریسائَه.»

![](https://cdn.door43.org/obs/jpg/360px/obs-en-41-02.jpg)

پیلاتس گُت: «سَروازیائی‌نِه وا خُتُو بُوریت ئو تا جائی کِه می‎تُونیت ویردار قُور بوئیت.» وِ ای خاطِر اونُو بَرد دَم دَر قُورِه مهر ئو موم کِردِن ئو سَروازیائی‌نِه دِ اوچِه نیان وِ نِگَه‎بُونی، تا کَسی نَتُونَه لَشِه بُوزَه.

![](https://cdn.door43.org/obs/jpg/360px/obs-en-41-03.jpg)

سی‎یَه‎کِه دِما روزِ خاکسپاری عیسی، یعنی روزِ شبات کار کِردِن ممنوع بی، هیچ‎کُوم دِ دوس‎یا عیسی نَتُونِسِن رُوئَن وِ سَر قُور. اَما روز بَد صو زی، چَن تا دِ زَن‎یا آمادَه بی‎ئِن تا رُوئَن وِ سَر قُورِ عیسی ئو لَش عیسی‎نِه خُوش‎بو بَکَن.

![](https://cdn.door43.org/obs/jpg/360px/obs-en-41-04.jpg)

وِرَز یَه کِه زَن‎یا بَرَسَن وِ اوچِه، دِ تِه قُور زِمی لَرزَه شدیدی اُما. فرشتِه دِ آسِمُو اُما وِ هار، بَرد دَم دَر قُورِه پِل دَ وا لائی ئو نِشِس وِ سَرِش. اُو فِرِشتَه چی برقِ آسِمُو می‎دِرَخشِس. نِگَه‌بُونیا وا دییِن او چِنُو زَلَه‎شُو رَت کِه چی مُردِه اُفتان وِ ریی زِمی.

![](https://cdn.door43.org/obs/jpg/360px/obs-en-41-05.jpg)

وَختی کِه زَن‎یا رَسِسِن وِ سَر قُور، فِرِشتَه وِشُو گُت: «زَلَه‎تُو نَرُوئَه! عیسی ایچِه نیسا. او هِه اُو طور کِه وَعدَه دِئی دِ مین مُردیا وِریسائَه. سِیل مین قُورِ بَکیت ئو بِئی‎نیت.» زَن‎یا سِیل مین قُورِ کِردِن ئو جائی کِه لَش عیسی‎نِه نیائِین دِش دییِن، اَما لَشی پیا نَکِردِن.

![](https://cdn.door43.org/obs/jpg/360px/obs-en-41-06.jpg)

اوسِه فِرِشتَه وِ زَن‎یا گُت: «رِیت ئو وِ شاگردیا بُوئیت کِه عیسی دِ مین مُردیا وِریسائَه ئو وِرَز شِما میرَه وِ جلیل.»

![](https://cdn.door43.org/obs/jpg/360px/obs-en-41-07.jpg)

زَن‎یا دِ حالی کِه شاد بی‎یِن ئو وا رَتین، رَتِن وا لا شاگردیا تا خَوَر خوشِه وِشُو بَرَسِنَن.

![](https://cdn.door43.org/obs/jpg/360px/obs-en-41-08.jpg)

دِ ‌حالی کِه زَن‎یا می‌دُوئِسِن تا ای خَوَر خوشِه وِ شاگردیا بِئَن، یِهُو عیسی‎ وِشُو دِروما. اونُو دِ بِراوَرِش سِجدَه کِردِن. عیسی وِ اونُو گُت: «زَلَه‎تُو نَرُوئَه! رِیت ئو وِ شاگردیا مِ بُوئیت کِه رُوئَن وِ جلیل ئو مِنِه دِ اوچِه مِئی‎نَن.»

*مَتَلِی گِرِتِسَه دِ کِتآو مقدس: (کِتآو انجیل متی باب ۲۷ آیه ۶۲ تا باب ۲۸ آیه ۱۵؛ کِتآو انجیل مرقس باب ۱۶ آیه‌یا ۱ تا ۱۱؛ کِتآو انجیل لوقا باب ۲۴ آیه‌یا ۱ تا ۱۲؛ کِتآو انجیل یوحنا باب ۲۰ آیه‌یا ۱ تا ۱۸)*

## ۴۲. وِرگَشتِن عیسی وِ آسِمُو

https://openbiblestories.org/l/lrc/story-42/

![](https://cdn.door43.org/obs/jpg/360px/obs-en-42-01.jpg)

روزی کِه خدا عیسی‎نِه دِ مین مُردیا بُلِن کِرد، دو نفر دِ شاگردیا مُوقَه رَتِن وِ یَکی دِ شهریا نِزیک، دِبارَه اُو چِی‎ئی کِه سی عیسی پیش اُمائی صُبَت می‌کِردِن. اونُو امید داشتِن کِه عیسی هِه ‌اُو مسیحِ موعود با، اَما او کُشتَه بیئی. ایسِه زَن‎یا مُوئَن کِه او دُوارَه زِنَه بی‎یَه، اَما شاگِردیا نُوئِنِسِن چه چی‎ئی‎نِه باوَر بَکَن.

![](https://cdn.door43.org/obs/jpg/360px/obs-en-42-02.jpg)

عیسی وِ شاگِردیا نِزیک بی ئو واشُو حَرف زَه اَما اونُو اونِه نَشِنَختن. عیسی دِشُو پُرسی کِه دِبارَه چه چی‎ئی صُبَت می‎کَن. وِ عیسی گُتِن کِه صُبَتِشُو دِ بارَه جریانیائی‎ئَه کِه دِ ای چَن رو، سی عیسی پیش اُمائی. اونُو خیال می‎کِردِن کِه عیسی غَریوِه‎ئَه کِه دِ پیش آمدیا اورشلیم بی خَوَرَه.

![](https://cdn.door43.org/obs/jpg/360px/obs-en-42-03.jpg)

اوسِه عیسی سی اونُو واز کِرد، کِه کَلوم خدا دِبارَه مسیح چی گُته بی. مدت‎یا پیش پِیُمبَریا گُته بین کِه شروریا مسیحِ عذاوش مِئَن ئو اونِه می‎کُشَن، اَما او دِ روزِ سِئم زِنَه مووَه.

![](https://cdn.door43.org/obs/jpg/360px/obs-en-42-04.jpg)

وَختی اُو دو پیا رَسِسِن وِ جا، حدوداً بیئی وِ شُو. اونُو عیسی ن مِکیس کِردِن کِه شُونِه وا اونُو بَمُونَه، او هَم واشُو رَت وا مین حُونِه. وَختی نِشِسِن سر سفرَه شُوم، عیسی نُونِه وِرداشت ئو شکرگزاری کِرد ئو نِصمِش کِرد. یِهُو تیاشُو واز بی ئو دَرجا اونِه شِنَختن. اَما هِه ‌اُو گِر عیسی دِ وَر تیاشو غِو بی.

![](https://cdn.door43.org/obs/jpg/360px/obs-en-42-05.jpg)

اُو دو نَفَر وِ یَکتِری گُتِن: «او عیسی بی، و ای خاطر کِه وَختی کِه نوِشتَه‎یا کِتآو مقدَسِه سی‎مُو وازگو کرد، دل‎مُو اُفتا وِ تتِپ‎تَپ.» اوسِه دَرجا وِرگَشتِن وِ اورشلیم ئو وَختی کِه رَسِسِن، وِ شاگردیا گُتِن: «عیسی زِنَه‌ئا! اِیما اونِه دیئی‎مَه.»

![](https://cdn.door43.org/obs/jpg/360px/obs-en-42-06.jpg)

ِه دِ ‌اُو حالی کِه سرگرم صُبَت بی‎یِن، یِه‎دَفَه عیسی وشو دروما ئو گُت: «سِلامَتی سی شِما با!» شاگردیا فکر کِردِن کِه روح مِئی‎نَن، اَما عیسی گُت: «سی‌چی زَلتِراق بی‎ئیت! شک داریت کِه مِ عیسی‎ئِم؟ سِیل دس‎یا ئو پایام بَکیت، روح‎یا چی مِ بدن نارَن.» ئو سی وَ کِه وِ اونُو نِشُو بِئَه کِه روح نیسا، دِشُو حاست کِه وِش چی‎ئی بِئَن تا بُحُورَه. اونُو تیکِه ماهی وِش دَن ئو عیسی وَنِه حَرد.

![](https://cdn.door43.org/obs/jpg/360px/obs-en-42-07.jpg)

عیسی گُت: «مِ وِ شِما گُتِم کِه هَرچی دِ کَلوم خدا دِبارَه مِ گُتَه بی‎یَه، بایس انجوم با.» اوسِه عیسی وِشُو کمَک کِرد تا کَلوم خدانِه بیتِر بَفَمَن. او گُت: «دِ زِمُون‎یا دیر، دِ کِتآویا پِیُمبَریا نوشتَه بیئی کِه مسیحِ موعود بایس عذاو ئو زَمَت بِئی‎نَه، بَمیرَه ئو روز سِئم دِ مین مُردیا وِریسَه.»

![](https://cdn.door43.org/obs/jpg/360px/obs-en-42-08.jpg)

«ئو پِیُمبَریا نِوِشتِه‎نَه کِه شاگردیا مِ کَلومِ خدانِه وازگو می‌کَن ئو وِ هَمَه مُوئَن کِه بایس توبَه بَکَن. هَر کَس کِه توبَه بَکَه، خدا گناه‎یاشِه می‎وَخشَه. شاگِردیا مِ وازگفتِ ای پیامِه دِ اورشلیم شُرو می‌کَن، اوسِه میرَن دِ مین هَمَه قوم‎یا ئو وِ هَمَه جا میرَن. شِما شاهد حَرف‎یا، کاریا ئو هَمَه پیش آمدیائی هیسیت کِه سی مِ پیش اُما.»

![](https://cdn.door43.org/obs/jpg/360px/obs-en-42-09.jpg)

عیسی دِ مدت چهل رو دِما زِنَه بی‎یِن دِ مین مُردیا، چَن گِل خُشِه وِ شاگِردیاش نِشُو دَ. او وا ای حال یِه گِل خُشِه دِ ی آن وِ بیشتِر دِ ۵۰۰ نفر نِشُو دَ. او وِ رَه‎یا جور وا جور وِ شاگِردیاش نِشُو دَ کِه زِنَه‎آ ئو وِ اونُو دِبارَه پادشاهی خدا یاد میده.

![](https://cdn.door43.org/obs/jpg/360px/obs-en-42-10.jpg)

عیسی وِ شاگردیا فرمایش کِرد: «خدا کُلِ اختیاریا دِ ریی زِمی ئو آسِمُونِه دِئَه وِ مِ. ایسه رِیت ئو تَمُوم قوم‎یانِه بَکیت وِ شاگردِ مِ ئو اونُون وِ نُوم پدر، پسر ئو روح‎القدس تعمید بِئیت ئو وِشُو یاد بِئیت کِه چِطوری دِ تَمُوم فِرمُون‎یائی کِه وِ شِما دَمَه فِرمُونبَری بَکَن. وِ ویر داشتَه بایت کِه مِ هَمیشَه هیسِم وا شِما.»

![](https://cdn.door43.org/obs/jpg/360px/obs-en-42-11.jpg)

چهل روز دِما وَ کِه عیسی دِ مین مُردیا وِریسا وِ شاگِردیاش چِنی فرمایش کِرد: « بَمُونیت دِ اورشلیم تا بُوئه مِ وا فِرسَنِنه روح‎القدس، وِ شِما قدرت بِئَه.» دِما وِنَه، عیسی دِ بِراوَر تیا اونُو وِ لا آسِمُو رَت بالا ئو دِ اُوری غِو بی. عیسی نِشِس وِ دَس راس خدا تا وِ هَمَه چی حکومت بَکَه.

*مَتَلِی گِرِتِسَه دِ کِتآو مقدس: (کِتآو متی باب ۲۸ آیه‌یا ۱۶ تا ۲۰؛ کِتآو مرقس باب ۱۶ آیه‌یا ۱۲ تا ۲۰؛ کِتآو لوقا باب ۲۴ آیه‌یا ۱۳ تا ۵۳؛ کِتآو یوحنا باب ۲۰ آیه‌یا ۱۹ تا ۲۳؛ کِتآو اعمال باب ۱ آیه‌یا ۱ تا ۱۱)*

## ۴۳. شُرو بیین ِ کلیسا

https://openbiblestories.org/l/lrc/story-43/

![](https://cdn.door43.org/obs/jpg/360px/obs-en-43-01.jpg)

دِما یَه کِه عیسی وِرگَشت وِ آسِمُو، شاگردیا چِنُو کِه عیسی فِرمُو دِئی، مَنِن دِ اورشلیم. ایمانداریا مرتب(گِر گِر) وا یَک جَم مِئی‌یِن تا دُعا بَکَن.

![](https://cdn.door43.org/obs/jpg/360px/obs-en-43-02.jpg)

یهودی‎یا هَر سال روزِ مهمی‎نِه وِ نُومِ پنتیکاست جشن می‎گِرِتِن کِه پَنجائِمی روز دِما عِد پِسَخ بی. پنتیکاست جشن یهودی‎یا سی وِرداشتِن ثمر گَنِم بی. اونُو دِ سرتاسر دُنیا می‌اُمان وِ اورشلیم تا ای جشنِه وا یَک بیرن. دِ اُو سال، جشن پنتیکاست، حدود یِه هَفتَه دِما رَتِن عیسی وِ آسِمُو پیش اوما.

![](https://cdn.door43.org/obs/jpg/360px/obs-en-43-03.jpg)

وَختی هَمَه ایمانداریا وِ دور یَک جَم بینی، یِه‌دَفَه صدائی چی دَنگ بادِ تُنی شِنَفتِن. اوسِه چی‎ئی چی‎ بِلیزَه تَش وِ سر هَمَه اونُو بِلیز بی. اوسِه هَمَه دِ روح‎القدس پُر بی‎یِن ئو خدانِه وِ زِوُن‎یائی کِه بِلَد نِوین پرستش کِردِن. روح‎القدس قُووت حَرف زَئِن وِ زِوُن‎یانِه وِشُو بَخشَنی.

![](https://cdn.door43.org/obs/jpg/360px/obs-en-43-04.jpg)

وَختی مَردِمی کِه اُمانی وِ اورشلیم، ای دَنگِه شِنَفتِن، وِ دُور یَک جَم بی‎یِن تا بِئی‎نَن چِه پیش اُوماَ. اونُو شِنَفتِن کِه ایمانداریا کاریا گَپ خدانِه وازگو می‎کَن. اونُو دِ ای جریان وا رَتِن، سی‎یَه‎کِه می‎تُونِسِن حرف‎یا اونُونِه بَفَمَن. دِ کِشور اونُو مَردِم زِوُنی هَنی داشتِن. شاگردیا اسرائیلی بی‎یِن ئو می‎تُونِسِن هِه وِ زِوُن‎یا آرامی، عبرانی ئو یا یونانی حرف بَزِنَن. اَما اونُو شِنَفتِن کِه شاگردیا وِ زِوُن مادری اونُو کاریا خدانِه وازگو می‎کِردِن.

![](https://cdn.door43.org/obs/jpg/360px/obs-en-43-05.jpg)

قَری هَم گُتِن کِه شاگردیا مَس بی‎نَه. اَما پترس هِسا ئو وِ اونُو گُت: «گوش بَکیت! ای مَردِم مَس نیسِن! بلکه یَه هِه ‌اُو پیشگویی یوئیلِ پیومبَرَه کِه خدا گُته بی: « دِ روزیا آخِر، مِ روحِ خُومِه وِ تُمومِه آیِم‎یا میریزِم.»

![](https://cdn.door43.org/obs/jpg/360px/obs-en-43-06.jpg)

«اِ قوم اسرائیل، عیسی کَسی بی کِه کاریا بِلاجئِی اَنجُوم می‎دَ تا خُشِه وِ اِیما بَشناسِنَه. او وا قدرتِ خدا کاریا بِلاجئِی زیادی اَنجُوم دَ. شِما یَنِه دُونیت، سی‎یَه‎کِه شاهد کاریاش بیئیت، اَما اونِه وِ صلیب کَشی‎ئیت.»

![](https://cdn.door43.org/obs/jpg/360px/obs-en-43-07.jpg)

«عیسی مُرد، اَما خدا اونِه دِ مین مُردیا بُلِن کِرد. یِنَه راس دِراُمایِن پیشگویی اُو پیومبری‎ئَه کِه گُت: تو نِمِیلی کِه بدنِ پسرِ مقدسِ تو دِ قُور فاسد بووَه. اِیما شاهد یِنَه هیسیم کِه خدا عیسی‎نِه دِ مین مُردیا بُلِن کِرد.»

![](https://cdn.door43.org/obs/jpg/360px/obs-en-43-08.jpg)

خدای بُوئَه، ایسِه عیسی‎نِه وِ بُلِنترین جا آسِمُو یعنی وِ دَسِ راس خُش نِشَنَه. عیسی هِه اُو طور کِه وَعدَه دِئی روح‎القدسِ سی اِیما فِرسَن. ای کاریائی کِه اِیمروز مِئی‎نیت ئو می‎شنَویت روح‎القدس اَنجُوم مِئَه.

![](https://cdn.door43.org/obs/jpg/360px/obs-en-43-09.jpg)

شِما عیسی‎نِه مصلوب کِردیت، اَما خاطرجَم بوئیت کِه خدا اونِه، خداوند ئو مسیح، پسن کِردَه.

![](https://cdn.door43.org/obs/jpg/360px/obs-en-43-10.jpg)

مَردِم سخت تحت تاثیر حَرف‎یا پترس قِرار گِرِتِن. وِ ای خاطِر دِ او ئو بَقیَه شاگردیا پُرسین: «اِ بِراریا، ایسِه بایس چی بَکیم؟»

![](https://cdn.door43.org/obs/jpg/360px/obs-en-43-11.jpg)

پترس جِوُو دَ: «هَمَه شِما وِ آمرزش از گناهان نیاز داریت. پَ توبَه بَکیت ئو دِ نُوم عیسی مسیح تعمید بیریت. اوسِه خدا پیش کشی روح‎القدسِ هَم وِ شِما می‌وَخشَه.»

![](https://cdn.door43.org/obs/jpg/360px/obs-en-43-12.jpg)

حدوداً ۳۰۰۰ نفر وِ حرف‎یا پترس ایمان اُوِردِن ئو بی‎یِن وِ شاگرد عیسی. اونُو تعمید آو گِرِتِن ئو وِ جَم ایمانداریا دِ کلیسا اورشلیم یَکاگیر بین.

![](https://cdn.door43.org/obs/jpg/360px/obs-en-43-13.jpg)

ایمانداریا هَمیشَه وِ یاد دِن‎یا رسول‎یا گوش می‌دَن. وا یَکتِری جَم مِوین، وا یَک نُو می‎حَردِن ئو دُعا می‎کِردِن. اونُو دِ جَم خدانِه پرستش می‎کِردِن ئو هَرچی داشتِن وا یَکتِری بَر می‌کِردِن. مَردِم دِبارَه اونُو وِ خویی حَرف می‌زَن ئو هَر رو شمار بیشتِری ایمان می‎اُوِردِن.

*مَتَلِی گِرِتِسَه دِ کِتآو مقدس: (کِتآو اعمال رسول‎یا فصل ۱ آیه ۱۲ تا ۱۴ ئو فصل ۲)*

## ۴۴. شفای پیا حاس که وِ دَسِ پترس ئو یوحنا

https://openbiblestories.org/l/lrc/story-44/

![](https://cdn.door43.org/obs/jpg/360px/obs-en-44-01.jpg)

یِه روز پترس ئو یوحنا می‎رَتِن وا لا پرستشگاه. دِ تِه دروازَش، پیا فِلَجی‌نِه دییِن کِه حاس می‎کِرد.

![](https://cdn.door43.org/obs/jpg/360px/obs-en-44-02.jpg)

پترس سِیل اُو پیا فِلَج کِرد ئو گُت: «مِ هیچ پیلی نارِم کِه وِ تو بِئم. اَما اُو چی‎ئی کِه دارِم، وِت مِئِم. دِ نُوم عیسی، وِریس ئو رَه رُو!»

![](https://cdn.door43.org/obs/jpg/360px/obs-en-44-03.jpg)

خدا دَر جا اُو پیانِه شفا دَ ئو او شُرو کِرد وِ رَه رَتِن ئو دِ دُور ئو وَر اونُو شادی می‎کِرد ئو خدانِه پرستش می‎کِرد. مَردِمی کِه دِ مین حیاط پرستشگاه بی‎یِن، وا رَتِن.

![](https://cdn.door43.org/obs/jpg/360px/obs-en-44-04.jpg)

جَمیَت زیادی آزِه جَم بی‎یِن تا اُو پیائی‌نِه کِه شفا پیا کِردی بِئی‎نَن. پترس وِ اُو جَمیَت گُت: «دِ دییِن شفا ای پیا بِلاجی‎تُو نیا. اِیما ای پیانِه وِ قدرت‌ یا وِ خاطِر دینداری خُمُو شفا نَدِئی‎مَه. بلکه یِنَه قدرتِ عیسی‎ئَه کِه اونِه شفا دِئَه، سی‎یَه‎کِه اِیما وِ او ایمان داریم.»

![](https://cdn.door43.org/obs/jpg/360px/obs-en-44-05.jpg)

«شِما کَسُونی هیسیت کِه دِ فرمُوندار رومی حاستیت کِه عیسی‎نِه بَکُشَه. شِما وَنِه کِه وِ هَمَه جُو مِئَه کُشتیت، اَما خدا اونِه دِ مین مُردیا زِنَه کِرد. هَرچَن کِه شِما نُوئِنِسیت ها چِی میکیت، اَما پیشگویی پیومبریانِه عملی کِردیت کِه گُتِنی مسیح بایس عَذاو بَکَشه ئو بَمیرَه. خدا حاست کِه ای طوری بووَه. پَ توبَه بَکیت ئو وِرگَردیت وا لا خدا تا او گناه‎یاتونِ پاک بَکَه.»

![](https://cdn.door43.org/obs/jpg/360px/obs-en-44-06.jpg)

وَختی رَبَریا پرستشگاه حرف‎یا پترس ئو یوحنانِه شِنَفتِن خیلی عَصَبُونی بی‎یِن. اوسِه اونُونِه دَسگیر کِردِن ئو وَنِن دِ زِندُون. اَما خیلی دِ وِنُونی کِه پیغوم پترسِه شِنَفتِن، ایمان اُوِردِن ئو شمارِ ایمانداریا وِ۵۰۰۰ نفر رَسِس.

![](https://cdn.door43.org/obs/jpg/360px/obs-en-44-07.jpg)

روز بَد، گپونِ یهود، پترس ئو یوحنانِه وارْد اُو پیا فِلَج اُوِردِن وِ ته کاهن گَپ ئو رَبَریا مذهبی. اونُو دِ پترس ئو یوحنا پُرسین: «وا چِه قدرتی ای پیا فِلَجِه شفا دئیت؟»

![](https://cdn.door43.org/obs/jpg/360px/obs-en-44-08.jpg)

پترس جِوُو دَ: «ای پیا کِه ریی وِ ریی شِما هِسائَه وِ قدرتِ عیسی مسیح شفا پیا کِردَه. شِما عیسی‎نِه کَشی‎ئیت وِ صلیب، اَما خدا اونِه دُوارَه زِنَه کِرد! شِما اونِه قبول نَکِردیت، اَما رَه نجاتی هَنی نیسا، جز وِ قدرت عیسی!»

![](https://cdn.door43.org/obs/jpg/360px/obs-en-44-09.jpg)

رَبَریا مذهبی دِ جُرَت پترس ئو یوحنا وا رَتِن، سی‌یَه‌کِه اونُو آیِم‎یا بی سواد ئو معمولی‎ئی بی‎یِن. اوسِه اُوِردِن وِ ویر کِه ای پیایا وا عیسی بی‎یِن. پس وِشُو گُتِن: « اَر هَنی هَم دِبارَه عیسی وا مَردِم حرف بَزِنیت شِمانِه سخت تنبیه میکیم.» اونُو دِما یَه کِه وِ پترس ئو یوحنا سَم‎سی کِردِن، آزادِشُو کِردِن.

*مَتَلِی گِرِتِسَه دِ کِتآو مقدس: (کِتآو اعمال رسول‎یا فصل ۳ ئو فصل ۴ آیه ۲۲)*

## ۴۵. اِستیفان ئو فیلیپُس

https://openbiblestories.org/l/lrc/story-45/

![](https://cdn.door43.org/obs/jpg/360px/obs-en-45-01.jpg)

یَکِی دِ رَبَریا کلیسایا اولی، پیائی وِ نُوم اِستیفان بی کِه هَمَه وِش عزت می‎نیان. روح‎القدس وِ او قدرت ئو حکمت دِئی. اِستیفان معجزه‎یا زیادی اَنجُوم دَ ئو خیلی‎یا وا حرف‎یا او وِ عیسی ایمان اُوِردِن.

![](https://cdn.door43.org/obs/jpg/360px/obs-en-45-02.jpg)

روزی کِه اِستیفان سَرگَرم یاد دِئِن دِبارَه عیسی بی، قَری دِ یهودی‎یائی کِه وِ عیسی ایمان ناشدِن، شُرو کِردِن وِ جَرّ ئو جُرّ وا اِستیفان. اونُو خیلی عَصَبُونی بی‎یِن ئو وِ رَبَریا مذهبی دِبارَه اِستیفان دِ دِرو گُتِن: «اِیما شِنَفتیم کِه او دِبارَه موسی ئو خدا، حرف‎یا گَنی می‌گُت.» پَ رَبَریا دینی، اِستیفانِه دَسگیر کِردِن ئو اونِه بُردِن وِ تِه کاهن گَپ ئو بَقیَه رَبَریا یهودی. اوسِه شاهدیا دِروزِه بیشتِری اُمان ئو دِبارَش دِرو گُتِن.

![](https://cdn.door43.org/obs/jpg/360px/obs-en-45-03.jpg)

کاهن گَپ دِ اِستیفان پُرسی: «اُو چی‌ئی کِه ای آیِم‎یا دِبارَه تو مُوئَن حقیقت دارَه؟» اِستیفان سی جِوُو وِ ای سوال، حرف‎یا زیادی وِ کاهن گَپ گُت. او گُت کِه خدا دِ زِمُون ابراهیم تا دُورُو عیسی، کاریا گَپ زیادی سی یهودی‎یا اَنجُوم دا، اَما ای قوم دَفَه‎یا زیادی دِ او نافرمونی کِردِنَه. استیفان وِ اونُو گُت: « شِما قومِ سرسختی هیسیت ئو دِ بِراوَر خدا سرکَش‎ هیسیت. شِما هِه روح‎القدسِ رَد کِردِیتَه، دُورس هِه‌ اُو طوری کِه بُوئَه‌یا اِیما هِه خدانِه رَد کِردِنَه ئو پیومبریاشِه کُشتِنَه. اَما شِما کاری بَتِر دِ اونُو اَنجُوم دئیت، شِما مسیحِه کشتید!»

![](https://cdn.door43.org/obs/jpg/360px/obs-en-45-04.jpg)

وَختی کِه رَبَریا مذهبی ای حرف‎یانِه شِنَفتِن خیلی عَصَبُونی بی‎یِن، گوش‌یا خُشُونِه گِرِتِن ئو هَوار زَن. اونُو اِستیفانِه دِ شهر کَشین وِ دَر ئو سنگسارِش کِردِن تا بَمیرَه.

![](https://cdn.door43.org/obs/jpg/360px/obs-en-45-05.jpg)

اِستیفان دِ حالی کِه جُو می‎دَ هِنا کِرد: «اِ عیسی! روح مِنِه قبول بَکُو.» اوسِه وِ زُونی دِراُما ئو دُوارَه هِنا کِرد: «اِ خداوند! ای گناهِ وِ اونُو نیر» ئو اوسِه جُو دَ.

![](https://cdn.door43.org/obs/jpg/360px/obs-en-45-06.jpg)

اُو روز خیلی دِ مَردِم اورشلیم شُرو وِ اذیت ئو آزار پیرویا عیسی کِردِن ئو ایمانداریا وِ جایائی هَنی جیستِن. اَما وا ای حال پیش آمدیا‎یا، اونُو وِ هَرجا کِه می‌رَتِن دِبارَه عیسی سخنرانی می‌کِردِن.

![](https://cdn.door43.org/obs/jpg/360px/obs-en-45-07.jpg)

یَکی دِ شاگردیا عیسی وِ نُوم فیلیپُس وا خیلی دِ ایمانداریائی هَنی، دِ زِمُون جور دِ اورشلیم جیستی. او رَت وِ سامرَه، دِ اوچِه دِبارَه عیسی سخنرانی کِرد ئو خیلی دِ مَردِم اوچِه نجات پیا کِردِن. اوسِه یِه روز، فرشتِه دِ لا خدا وِ فیلیپُس اَمر کِرد تا رُوئَه وِ جَدِه دِ بیابُون. وَختی کِه او دِ اُو جَدَه بی، یَکی دِ مقام‎یا مهم حَبَشَه‌نِه دیی کِه وا گاری خُش سفر می‌کِرد. روح‎القدس وِ فیلیپُس فرمایش کِرد تا رُوئَه وِ تِه اُو پیا ئو واش صُبَت بَکَه.

![](https://cdn.door43.org/obs/jpg/360px/obs-en-45-08.jpg)

وَختی فیلیپُس وِ گاری نِزیک بی، شِنَفت کِه اُو شخص حبشی تیکِه دِ کِتآوِ اشعیای نبی‎نِه مُوحُونَه. اوچِه کِه مُوئَه: «چی میشی کِه سی ذبح مُورَن ئو بِرِه کِه وِ تِه چَرَه‎گریا خُش خاموشه، هیچ کَلَمِه نَگُت. وا او ناعادلانَه رفتار کِردِن ئو وِش عزت نَنیان. اونُو جُونِشِه گِرِتِن.»

![](https://cdn.door43.org/obs/jpg/360px/obs-en-45-09.jpg)

فیلیپُس دِ شَخص حبشی پُرسی: «او چی‎ئی کِه مُوحُونی میتونی بفهمیش؟» حبشی جِوُو دَ: «نه. مِ نِمی‌تُونِم وَنِه بَفَمِم مَر کَسی سیم وازِش بَکَه. دِت میحام بیای ئو وِ تِه مِ بَشینی. اشعیا یَنِه دِبارَه خُش یا کَسی هَنی مُوئَه؟»

![](https://cdn.door43.org/obs/jpg/360px/obs-en-45-10.jpg)

فیلیپُس رَت وا مین گاری ئو تِه او نِشِس، اوسِه سی حبشی واز کِرد کِه اشعیا اُو جانِ دِبارَه عیسی نوشتَه. فیلیپُس جا‎یا زیادی دِ کَلُوم خدانِه سی او واز کِرد ئو پیغومِ انجیلِ عیسی‎نِه وِ او رَسَن.

![](https://cdn.door43.org/obs/jpg/360px/obs-en-45-11.jpg)

دِ حالی کِه فیلیپس ئو پیا حبشی واوَر می‎رَتِن، رَسِسِن وِ یِه گُولِم آویی. پیا حبشی گُت: «سِیل بَکُو ایچِه آو هیسا! مووَه مِ تعمید بیرِم؟» ئو وِ نوکَرِش فرمُون دَ کِه بیل گاری بِیسَه.

![](https://cdn.door43.org/obs/jpg/360px/obs-en-45-12.jpg)

وِ ای خاطِر اونُو رَتِن دِ مین آو ئو فیلیپُس پیا حبشی‌نِه تعمید دَ. وَختی دِ آو اُمان وِ دَر، یِه‌دَفَه روح‎القدس فیلیپُسِه بُرد وِ جائی هَنی، فیلیپس دِ اوچِه وِ مُوعِظَه دِبارَه عیسی اِدامَه دَ.

![](https://cdn.door43.org/obs/jpg/360px/obs-en-45-13.jpg)

پیا حبشی وِ سفر خُش وِ لا حُونَش میرت. او دِ یَه کِه عیسی‎نِه اِشنَختَه شاد بی.

*مَتَلِی گِرِتِسَه دِ کِتآو مقدس: (کِتآو اعمال رسول‎یا باب ۶ تا ۸)*

## ۴۶. پولس مسیحی مووَه

https://openbiblestories.org/l/lrc/story-46/

![](https://cdn.door43.org/obs/jpg/360px/obs-en-46-01.jpg)

پیائی وِ نُوم سولُس بی کِه دِ جِوُونی مُوقَه کُشتِن استیفان، ویردار جُومَه‌ یهودی‎یا مِوی ئو وِ عیسی ایمان ناشت. او مسیحی‎یانِه آزار می‌دَ ئو دِ اورشلیم دِ حُونِه وِ حُونِه هَنی می‌رَت تا پیایا ئو زَن‎یانِه دَسگیر بَکَه ئوِ بُونَه دِ زِندُون. کاهن گَپ وِ او گُت کِه رُوئَه وِ شهرِ دمشق تا مَسیحی‎یا اوچِه‌نِه دَسگیر بَکَه ئو وِرگَردِنَه وِ اورشلیم.

![](https://cdn.door43.org/obs/jpg/360px/obs-en-46-02.jpg)

وِ ای خاطِر سولُس وا لا دمشق اُفتا وِ رَه. وِرَز رَسِسِن وِ اوچِه، نیر درخشونی دِ آسِمُو دُور ئو وَرشِه گِرِت دِ وَر ئو اُفتا وِ زِمی. سولُس دَنگی شِنَفت کِه وِش گُت: «شائول، شائول، سی‌چی وِ مِ عذاو مئی؟» سولس پُرسی: «سرورِم، تو کی‎ئی؟» عیسی وِ او جِوُو دَ: «مِ عیسی‎ئِم. هِه وِنَه کِه وِش آزار می‌رَسِنی!»

![](https://cdn.door43.org/obs/jpg/360px/obs-en-46-03.jpg)

وَختی کِه سولُس دِ جا وِریسا، تیاش نِمِئیی. دوس‎یاش اونِه وا لا دمشق رَهمُونی کِردِن. سولُس مدت سه روز، چی‎ئی نَحَرد ئو نَنوشی.

![](https://cdn.door43.org/obs/jpg/360px/obs-en-46-04.jpg)

دِ شهر دمشق، شاگردی وِ نُوم حنانیا زِنِئی می‌کِرد. خدا وِ او فرمایش کِرد: «رُو وِ حُونِه کِه سولُس ها دِش. دَس‎یا خُتِه بَنی وِش تا دُوارَه بِئی‎نَه.» اَما حنانیا گُت: «خداوندِم! مِ شِنَفتِمَه کِه ای پیا چِطور وِ ایمانداریا عذاو می‌رَسِنَه.» خدا دِ جِوُو گُت: «رُو! مِ اونِه پَسَن کِردِمَه تا نُوم مِنِه وِ یهودی‎یا ئو طایِفه‎یائی هَنی وازگو بَکَه. او وِ خاطِر نُوم مِ، رنج ئو مصیبت‎یا زیادی مِئی‎نَه.»

![](https://cdn.door43.org/obs/jpg/360px/obs-en-46-05.jpg)

پس حنانیا رَت وِ تِه سولُس ئو دَس‎یا خُوشِه نیا وِش ئو گُت: «هِه ‌اُو عیسی کِه دِ مین رَه وِ تو دِراُما، مِنِه فِرسَن تا تو هَنی بینایی خُتِه پیا بَکی ئو دِ روح‎القدس پُر بای.» سولُس دَرجا توُنِس دُوارَه بِئی‎نَه ئو حنانیا اونِه تعمید دَ. اوسِه سولُس غذا حَرد ئو قدرتِش وِرگَشت.

![](https://cdn.door43.org/obs/jpg/360px/obs-en-46-06.jpg)

سولُس دَرجا شُرو وِ مُوعِظَه سی یهودی‎یا دمشق کِرد ئو می‌گُت: «عیسی پسرِ خدائَه!» یهودی‎یا خیلی وا رَتِن، سی‎یَه‎کِه پیائی کِه تَقِلا می‌کِرد ایمانداریانِه دِ بِئن بُورَه، ایسِه خُش وِ عیسی ایمان اُوِردَه! سولُس بِنیا نیا وِ جَرئوجُر وا یهودی‎یا. او نِشُو دَ کِه عیسی هِه ‌اُو مسیحَه.

![](https://cdn.door43.org/obs/jpg/360px/obs-en-46-07.jpg)

دِما چَن روز، یهودی‎یا قصد کشتنِ سولُسِه کِردِن. اونُو کَسُونی‌نِه فِرسَنِن تا اونِه دِ دروازَیا شهر پیا بَکَن ئو بَکُشَن. اَما سولُس دِ قصد اونُو خَوَر دار بی ئو دوس‎یاش وِش کمک کِردِن تا بَجی‎ئَه. یِه شُو اونِه نیان دِ سَلِه ئو دِ دیواریا شهر فِرسَنِن وِ هار. دِما وَ کِه سولُس دِ دمشق جیست، وِ مُوعِظَه دِبارَه عیسی اِدامَه دَ.

![](https://cdn.door43.org/obs/jpg/360px/obs-en-46-08.jpg)

سولُس رَت وِ اورشلیم تا وا رسول‎یا دیدار بَکَه، اَما اونُو زَلَه‎شُو دِش رَت. اوسِه یِه ایمانداری وِ نُوم برنابا، سولُسِه بُرد وِ تِه رسول‎یا. او وِشُو گُت کِه چِطوری سولُس، وا جُرَت دِ دمشق مُوعِظَه کِردی. دِما وَ بی کِه رسول‎یا، سولُسِه قبول کِردِن.

![](https://cdn.door43.org/obs/jpg/360px/obs-en-46-09.jpg)

قَری دِ ایمانداریا کِه دِ جورِ شهر اورشلیم جیستین، رَتِن وِ شهر دیری وِ نُوم انطاکی‎یَه ئو دِبارَه عیسی مُوعِظَه کِردِن. بیشتِر مَردِم انطاکی‎یَه یهودی نِوین، اَما سی اولین دَفَه ایمان اُوِردِن. برنابا ئو سولُس رَتِن وِ اوچِه تا وِ ایمانداریا تازَه، دِبارَه عیسی بیشتِر بِئَن ئو کلیسانِه قوت بیین. دِ انطاکی‎یَه بی کِه سی اولین گِل وِ ایمانداریا وِ مسیح، «مسیحی» گُتِن.

![](https://cdn.door43.org/obs/jpg/360px/obs-en-46-10.jpg)

یِه روز مَسیحی‎یا انطاکی‎یَه سرگرم دُعا ئو روزَه بی‎یِن کِه روح‎القدس وِ اونُو فرمایش کِرد: «برنابا ئو سولُسِه سی کاری کِه اونُونِه سی اَنجُومِش هِنا کِردِمَه، جِگا بَکیت.» اوسِه کلیسا انطاکی‎یَه دَس‎یا خُشُون نیان وِ ریی برنابا ئو سولُس ئو سی‎شُو دُعا کِردِن. اوسِه اونُونِه فِرسَنِن تا خَوَر خوش عیسی‎نِه دِ جایائی هَنی مُوعِظَه بَکَن. برنابا ئو سولُس وِ مَردِم زیادی دِ طایِفه‎یا جور وا جور یاد دَن ئو مَردِم زیادی وِ عیسی ایمان اُوِردِن.

*مَتَلِی گِرِتِسَه دِ کِتآو مقدس: (کِتآو اعمال رسول‎یا باب ۸ آیه ۳؛ باب ۹ آیه ۱ تا ۱۳؛ باب ۱۱ آیه‌یا ۱۹ تا ۲۶؛ باب ۱۳ آیه‌یا ۱ تا ۳)*

## ۴۷. پولس ئو سیلاس دِ فیلیپی

https://openbiblestories.org/l/lrc/story-47/

![](https://cdn.door43.org/obs/jpg/360px/obs-en-47-01.jpg)

سولُس وَختی کِه دِ کُلِ امپراتوری روم سَفَر می‌کِرد، تصمیم گِرِت دِ نُوم رومی خُش کِه پولُس بی، استفادَه بَکَه. یِه رو، پولس ئو دُوسِش سیلاس رَتِن وِ شهر فیلیپی تا خَوَر خوش عیسی‎نِه وازگو بَکَن. اونُو وِ رُونَه روئِی کِه دَر دِ شهر بی رَتِن. مَردِم دِ اوچِه وِ دور یَکتِری جَم مِوین تا دُعا بَکَن. اونُو دِ اوچِه زَنی وِ نُوم لیدیَه‎نِه دین کِه تاجر بی. او خدانِه دوس داشت ئو اونِه پرستش می‎کِرد.

![](https://cdn.door43.org/obs/jpg/360px/obs-en-47-02.jpg)

خدا لیدیَه‌نِه قادر کِرد تا وِ عیسی ایمان بیارَه. پولس ئو سیلاس اونِه وا خانوادَش تعمید دَن. اوسِه او، مِکیس پولُس ئو سیلاس کِرد تا بَمُونَن دِ حُونَه‌ش ئو اونُو هَم مَنِن وِ تِه او.

![](https://cdn.door43.org/obs/jpg/360px/obs-en-47-03.jpg)

پولُس ئو سیلاس بیشتِر دِ جائی کِه یهودی‎یا دُعا می‌کِردِن، وِ ملاقات مَردِم می‎رَتِن. دِ اوچِه کنیزی بی کِه روحِ ناپاک داشت ئو هَر روز وِ دُم اونُو می‎اُما. او وِ کمک ای روح پلید، آیندَنِه سی مَردِم پیشگویی می‌کِرد ئو وِ ای طور وِ نومِ یِه غِوگو، سود زیادی نِصیو اربابیاش می‌کِرد.

![](https://cdn.door43.org/obs/jpg/360px/obs-en-47-04.jpg)

اُو کنیز وَختی کِه اونُو رَه می‌رَتِن، وا دَنگ بُلِن می‌گُت: «ای پیایا خدمتگزاریا خدای بزرگن. اونُو رَه نجاتِه وِ شِما نِشُو مِئَن!» او روزیا زیادی چِنی ‌کِرد تا یَه کِه طاقَت پولس تَمُوم بی.

![](https://cdn.door43.org/obs/jpg/360px/obs-en-47-05.jpg)

آخِر یِه روز وَختی کِه اُو کنیز هَوار می‌زَه، پولس ریی کِرد وا لاش ئو وِ روح ناپاکی کِه دِ او بی گُت: «وِ نُومِ عیسی دِ ای دُختِر بیا وِ دَر.» روح ناپاک دَرجا اونِه وِل کِرد.

![](https://cdn.door43.org/obs/jpg/360px/obs-en-47-06.jpg)

وَختی اَربآویا کنیز دییِن چی پیش اومائه، خیلی عَصَبُونی بی‎یِن. یَه وِ اُو معنی بی کِه مَردِم دَ وِ اَربآویا اُو دُختِر پیل نمی‌دَن، سی‌یَه‌کِه فَمِسِن کِه بی اُو روح پلید، کنیز دَ نمی‌تُونِس غِوگویی بَکَه.

![](https://cdn.door43.org/obs/jpg/360px/obs-en-47-07.jpg)

وِ ای خاطِر اَربآویا اُو کنیز، پولس ئو سیلاسِه بُردِن وِ تِه مقام‎یا رومی. اونُو پولس ئو سیلاسِه زَن ئو وَنِن دِ زِندُون.

![](https://cdn.door43.org/obs/jpg/360px/obs-en-47-08.jpg)

اونُو پولُس ئو سیلاسِه وَنِن دِ جائی دِ زِندُون، کِه نگَه‎بُون زیادی داشت. ئو اونُو پایاشُونِه وا تیکَه‎یا گَپ چو بَستِن. وا ای حال اونُو دِ نیمَه‌یا شُو، سِرویائِی دِ ستایش ئو پرستش خدا می‌حَنِن.

![](https://cdn.door43.org/obs/jpg/360px/obs-en-47-09.jpg)

یِه‌دَفَه، زِمی لرزَه قوی پیش اُوما! تَمُوم دریا زِندُون واز بی ئو زنجیریا هَمَه زِندُونی‎یا افتان.

![](https://cdn.door43.org/obs/jpg/360px/obs-en-47-10.jpg)

اوسِه نگَه‌بُون زِندُون بیار بی ئو دیی کِه دروازه یا زِندُون واز بی‎نَه. او گمو کِرد کِه هَمَه زِندُونی‎یا جیستِنَه ئو دِ تَرسِ مجازاتِ مُردن وِ دَس مقام‎یا رومی، قصد کِرد خُشِه بَکُشَه. اَما پولس اونِه دیی ئو هِنا کِرد: «وِ خُت صدمَه نَزِه! هَمَه اِیما هیسیم ایچِه.»

![](https://cdn.door43.org/obs/jpg/360px/obs-en-47-11.jpg)

نِگَه‌بُون زِندُون دِ حالی کِه زَلتِراق بی‎ئِی ئو می‎رِکِس اُما وِ تِه پولس ئو سیلاس ئو پُرسی: «چی بَکِم تا نجات پیا بَکِم؟» پولُس جِوُو دَ: «وِ عیسی خداوند، ایمان بیار. اوسِه تو ئو خانوادَت نجات پیا میکیت.» اوسِه نِگَه‌بُونِ زِندُون، پولس ئو سیلاسِه بُرد وِ حُونَه خُش ئو زخم‎یاشُونِه شُست. پولس خَوَر خوش عیسی‎نِه سی هَمَه کَسُونی کِه دِ حُونَه او بی‎یِن، مُوعِظَه کِرد.

![](https://cdn.door43.org/obs/jpg/360px/obs-en-47-12.jpg)

اُو نِگَه‌بُونِ زِندُون ئو هَمَه خانوادَش وِ عیسی ایمان اُوِردِن ئو پولس ئو سیلاس اونُونِه تعمید دَن. اوسِه نِگَه‌بُونِ زِندُون وِ پولُس ئو سیلاس غذا دَ ئو اونُو وا یَک شادی کِردِن.

![](https://cdn.door43.org/obs/jpg/360px/obs-en-47-13.jpg)

روز بَد(روز دِمان)، رَبَریا شهر، پولس ئو سیلاسِه دِ زِندُون آزاد کِردِن ئو دِشُو حاستِن تا دِ فیلیپی بَکَن وِ دَر. پولس ئو سیلاس رَتِن وِ دییِن لیدیَه ئو قَری دِ دوس‎یاشُو ئو اوسِه دِ شهر کِردِن وِ دَر. خَوَر خوش دِبارَه عیسی هَنی هَم پخش مِویی ئو کلیسا رشد می‌کِرد.

![](https://cdn.door43.org/obs/jpg/360px/obs-en-47-14.jpg)

پولس ئو بَقیَه رَبَریا مسیحی وِ شهریا زیادی سفر می‌کِردِن. اونُو وِ یاد دیین ئو مُوعِظَه دِبارَه خَوَر خوش عیسی سرگرم مِوین. ئو اونُو نامَه‌یا زیادی نوشتِن تا ایمانداریانِه دِ کلیسایا یاد بیین ئو تشویق بَکَن. قَری دِ ای نامَه‌یا بی‎یِن وِ کِتآویائی دِ کِتآو مقدس.

*مَتَلِی گِرِتِسَه دِ کِتآو مقدس: (کِتآو اعمال رسول‎یا فصل ۱۶ آیه‎یا ۱۱ تا ۴۰)*

## ۴۸. عیسی مسیحا وعدَه دیه هیسا

https://openbiblestories.org/l/lrc/story-48/

![](https://cdn.door43.org/obs/jpg/360px/obs-en-48-01.jpg)

وَختی خدا دنیانِه دُرس کِرد، هَمَه چی کامل بی ئو گناه نئی. آیِم ئو حوا یَکتِری‎نِه دوس داشتِن ئو عاشق خدا بی‎یِن. هیچ مریضی یا مردنی نِوی. یِنَه هِه ‌اُو دُنیائی بی کِه خدا می‎حاست.

![](https://cdn.door43.org/obs/jpg/360px/obs-en-48-02.jpg)

شیطان، دِ تُرّ ماری کِه دِ مین باغ بی، وا حوا حَرف زَه، سی‎یَه‎کِه می‎حاست اونِه گول بِئَه. اوسِه او ئو آیِم گناه کِردِن. وِ خاطِر نافِرمُونی اونُو، هَمَه آیِم‎یا مَکوم وِ مَردِنَن.

![](https://cdn.door43.org/obs/jpg/360px/obs-en-48-03.jpg)

حتی وِ خاطِر گناه آیِم ئو حوا چی وحشتناک‎تِری پیش اوما. اونُو بی‎یِن وِ دشمن‎یا خدا. در نتیجه، دِ اُو زِمُون تا ایسِه، هَمَه گناه کِردِنَه. هَر کَس دِ زمُونی کِه میا وِ دِی دشمن خدائَه. دِ بِئن خدا ئو آیِم صلحی نِوی، اَما خدا می‎حاست صلح برقِرار بووَه.

![](https://cdn.door43.org/obs/jpg/360px/obs-en-48-04.jpg)

خدا وعدَه دَ کِه کَسی دِ نَسل حوا سَر شیطانِ می‎کوئَه ئو شیطان پَسَه پا اونِه می‎زِنَه. وِ ای معنی کِه شیطان مَسیحِ می‌کُشَه، اَما خدا دُوارَه اونِه زِنَه می‌کَه. اوسِه مسیح موعود سی هَمیشَه قدرت شیطانِ دِ بِئن مُورَه. دِما سال‎یا زیادی، خدا نِشُو دَ، کِه عیسی، هِه ‌اُو مسیحای موعودَه.

![](https://cdn.door43.org/obs/jpg/360px/obs-en-48-05.jpg)

خدا وِ نوح فرمایش کِرد تا کشتی‎ئی بَسازَه تا خانِوادَشِه دِ توفانی کِه می‌فرِسَه نجات بِئَه. وِ ای طوری خدا کَسُونی کِه وِ او ایمان داشتِن نجات دَ. هِه وِ ‌اِیی طوری هَمَه آیِم‌یا وِ خاطِر گناه‎یاشُو دِ لا خدا حقشونه بمیرن، اَما خدا عیسی‎نِه فِرسَن تا هَرکَس کِه وِش ایمان بیارَه، نجات بِئَه.

![](https://cdn.door43.org/obs/jpg/360px/obs-en-48-06.jpg)

سی صدها سال، کاهن‎یا سی آیم‌یا وِ درگاه خدا قربانی می‌کِردِن. ای کار وِ مَردِم نِشُو می‎دَ کِه گناه کِردِنَه ئو حقشونه دِ لا خدا تنبیه بان. اَما اُو قربانی‎یا نمی‌تُونِسِن باعث بخشش گناه‌یا آیِم‎یا بووَن. عیسی کاهن گَپَ. او کاری کِرد کِه کاهن‎یا دِ اَنجُومِش ناتوان بی‎یِن. او خُشِه فدا کِرد تا قربانی‎ئی سی گناه‌یا آیِم‎یا جور بَکَه. او قبول کِرد تا وِ خاطِر گناه‎یا هَمَه آیِم‎یا، مجازات با. هِه وِ ای خاطِر عیسی کاهن گَپَه.

![](https://cdn.door43.org/obs/jpg/360px/obs-en-48-07.jpg)

خدا وِ ابراهیم گُته بی: «دِ تُرّ تو هَمَه طایِفه‎یا دنیانِه برکت مِئِم.» عیسی دِ پُشتِ ابراهیم بی. خدا هَمَه قوم‌یا دنیانِه وِ دَسِ ابراهیم برکت مِئَه، سی‌یَه‌کِه هَرکَس کِه وِ عیسی ایمان میارَه، دِ گناه نجات پیا می‌کَه. وَختی ای مَردِم وِ عیسی ایمان میارَن، خدا اونُونِه دِ پُشتِ ابراهیم وِ حِسآو میارَه.

![](https://cdn.door43.org/obs/jpg/360px/obs-en-48-08.jpg)

خدا وِ ابراهیم فرمایش کِرد تا کُرِش اسحاقِ سیش قربانی بَکَه. اَما خدا بِرِه وِ جا اسحاق جور کِرد تا قربانی با. هَمَه اِیما وِخاطِر گناه‎یامُو حقمو مَردِنَ! اَما خدا عیسی‎نِه وِ دُنیا بَخشَن تا وِ جا اِیما قربانی بووَه ئو بَمیرَه. هِه وِ ای خاطِر وِ عیسی مُوئِیم بِرَه خدا.

![](https://cdn.door43.org/obs/jpg/360px/obs-en-48-09.jpg)

وَختی خدا آخِری بِلانِه فِرسَن وِ مصر، وِ هَر خانوادَه اسرائیلی فرمایش کِرد تا یِه بِرِه بَکُشَن. ای بِرَه بایس بی‎عِو مِوی. اوسِه اونُو بایس خینِش وِ بالا ئو دُور ئو وَر چارچو دَر حُونَه‌ می‎پاشین. وَختی کِه خدا اُو خینِه مِئی، دِ حُونَه‎یا اونُو کِل مِوی ئو کُر پیشِه‌زا اُو خانوادَن نمی‌کُشت. وَختی ایَ جریون پیش اُوما، خدا نُومِش نیا وِ پِسَخ.

![](https://cdn.door43.org/obs/jpg/360px/obs-en-48-10.jpg)

عیسی چی بِرَه عِد پِسَخَه. او هیچ اشتباهی نَکِرده بی ئو هیچ وخت گناهی نَکِرد. او هِه دِ اُو روزیا عِد پِسَخ مُرد. وَختی کَسی وِ عیسی ایمان میارَه، خین عیسی، تاوون گناه‌ اُو کَسه می‌ه. مِری خدا، وا تقاص نَگِردِتنِش، دِ او رَد مووَه.

![](https://cdn.door43.org/obs/jpg/360px/obs-en-48-11.jpg)

خدا وا بنی اسرائیل پیمُون بست، سی‎یَه‎کِه اونُو قومی بی‎یِن کِه او پسن کردی تا مالِ او بان. اَما خدا ایسِه پِیمُونِی تازِه دُرس کِردَه کِه دِ دَسرس هَر کَسی هیسا. هَر کَس دِ هَر قوم ئو طایِفِه، اَر ای پِیمُونِه قبول بَکَه، وِ قومِ خدا اضافَه مووَه او وِ خاطِرِ ایمان وِ عیسی وا قومِ خدا یکاگیر مووَه .

![](https://cdn.door43.org/obs/jpg/360px/obs-en-48-12.jpg)

موسی پِیُمبَری بی کِه کَلومِ خدانِه وا قوتِ زیاد وازگو کِرد. اَما عیسی گَپتِرینِ پِیُمبَریائَه. او خدائَه، پَ هَرچی او اَنجُوم دَ ئو گُت، کِردار ئو حَرف‎یا خدا بی‎یِن. وِ ای خاطِرَه کِه کِتآو مقدس وِ عیسی کلَمَه خدا موحُونه.

![](https://cdn.door43.org/obs/jpg/360px/obs-en-48-13.jpg)

خدا وِ داود پادشاه وعدَه دَ کِه کَسی دِ پُشت او وِ نومِ پادشاه تا ابد وِ قومِ خدا حکومت می‌کَه. عیسی پسرِ خدا ئو مسیحا موعودَه ئو او هی اُو پُشتِ داودَه کِه می‌تُونَه تا ابد پادشاهی بَکَه.

![](https://cdn.door43.org/obs/jpg/360px/obs-en-48-14.jpg)

داود، پادشاهِ قومِ اسرائیل بی، اَما عیسی پادشاه هَمَه دُنیاه! او دُوارَه میا ئو وا عدالت ئو دوسی تا ابد پادشاهی می‌کَه.

*مَتَلِی گِرِتِسَه دِ کِتآو مقدس: (کِتآو پیدایش فصل ۱؛ فصل ۳؛ فصل ۶؛ فصل ۱۴؛ فصل ۲۲؛ کِتآو خروج فصل ۱۲؛ فصل ۲۰؛ کِتآو دوئِم سموئیل فصل ۷؛ کِتآو عبرانیا فصل ۳ آیه‎یا ۱ تا ۶؛ فصل ۴ آیه ۱۴؛ فصل ۵ آیه ۱۰؛ فصل ۷ آیه ۱؛ فصل ۸ آیه ۱۳؛ فصل ۹ آیه ۱۱؛ فصل؛ کِتآو مکاشِفَه فصل ۲۱)*

## ۴۹. پِیمُون تازَه خدا

https://openbiblestories.org/l/lrc/story-49/

![](https://cdn.door43.org/obs/jpg/360px/obs-en-49-01.jpg)

فرشتِه ی وِ دُختِر جِوُونی وِ نُوم مریم گُت کِه او پسرِ خدانِه وِ دُنیا میارَه. وَختی کِه مریم هَنی دُختِر ریی بَستِه بی، روح‎القدس وِش دَمِس ئو باردار بی. او کُرِی اُوِرد وِ دُنیا ئو نُومِش نیا وِ عیسی. وِ ای خاطِر، عیسی هَم خدا ئو هَم آیِمه.

![](https://cdn.door43.org/obs/jpg/360px/obs-en-49-02.jpg)

عیسی معجزَه‎یا زیادی اَنجُوم دَ کِه نِشُو مِئَه او خدائَه. او وِ ریی آو رَه رَت، توفانِه آرُوم کِرد، مریضیا زیادی شفا دَ، دِ کَسُونِه زیادی روح‎یا گَنه وَن وِ دَر، مُردیانِه زِنَه کِرد ئو پنج نُون ئو دو ماهی کُچِکِه، برکت دَ ئو کِرد وِ غذائی وِ اندازه ، که سی سیر کِردِن بیشتِر دِ ۵۰۰۰ نفر بی.

![](https://cdn.door43.org/obs/jpg/360px/obs-en-49-03.jpg)

عیسی معلم گَپی هَم بی. هَمَه چی‎یائی کِه او یاد می‎دَ حقیقت داشت. مَردِم اُو چی‎ئی کِه او وِشُو می‎گُت بایس اَنجُوم می‎دَن، سی‎یَه‎کِه او پسرِ خدا بی. سی نِمونَه او یاد می‎دَ کِه بایس وِ بَقیَه‎ چی خُمُو محبت بَکیم.

![](https://cdn.door43.org/obs/jpg/360px/obs-en-49-04.jpg)

ئو او وِ اونُو یاد دَ کِه بایس خداوندِه بیشتِر دِ هَر چی‎ئی هَنی، حتی دارایی‎یا خُشُو دوس داشتَه بان.

![](https://cdn.door43.org/obs/jpg/360px/obs-en-49-05.jpg)

عیسی گُت کِه بی‎یِن دِ پادشاهی خدا، با ارزشتِر دِ هَر چی‎ئی دِ ای دُنیائَه. سی رَتن وِ پادشاهی خدا، بایس او تونِه دِ گناه‎یات نجات بِئَه.

![](https://cdn.door43.org/obs/jpg/360px/obs-en-49-06.jpg)

عیسی گُت قَری دِ آیم‌یا اونِه قبول می‌کَن، اوسِه خدا اونُونِه نجات مِئَه؛ اَما هَمَه اونِه قبول نمی‎کَن. او یَنِه هَم گُت کِه قَری دِ آیم‌یا چی خاک خو هیسِن، سی‎یَه‎کِه خَوَرِ خوشِ عیسی‎نِه قبول می‌کَن ئو خدا اونُونِه نجات مِئَه. قَری هَم چی خاک سُفت ئو سخت رُونَه رَه هیسِن. کَلُومِ خدا چی اُو تُمی‎ئَه کِه مُوفتَه وِ ریی اُو زِمی، اَما هیچ ثَمَری وِ بار نِمیا. یِنُو مَردِمی‎ئَن کِه پیومِ عیسی‎نِه قبول نمی‎کَن ئو نمی‎حان وِ پادشاهی خدا رُوئَن.

![](https://cdn.door43.org/obs/jpg/360px/obs-en-49-07.jpg)

عیسی وِ اونُو یاد دَ کِه خدا گناهکاریانِه خیلی دوس دارَه. او میحا کِه اونُونِه بَوَخشَه ئو بَکَه وِ بَچُونِ خُش.

![](https://cdn.door43.org/obs/jpg/360px/obs-en-49-08.jpg)

ئو عیسی وِ اونُو گُت کِه خدا دِ گناه نفرت دارَه. وِ خاطِرِ گناه آیِم ئو حوا، هَمَه نَسل اونُو هَم گناه می‎کَن. وِ ای خاطِر، هَر کَسی دِ دُنیا گناه می‌کَه ئو دِ خدا جِگا بی‎یَه. هَمَه دشمنِ خدائَن.

![](https://cdn.door43.org/obs/jpg/360px/obs-en-49-09.jpg)

اَما خدا وِ هَمَه مَردِمِ دنیا چِنی محبت کِرد کِه تَنیا کُر خُش عیسی‎نِه دَ، تا هَر کَس وِش ایمان بیارَه وِ خاطِر گناه‎یاش تاووان نیه، بلکه تا ابد وا خدا زِنِئی بَکَه.

![](https://cdn.door43.org/obs/jpg/360px/obs-en-49-10.jpg)

شِما وِ خاطِر گناه کِردِن، حقتو مردِنَ. خدا حق دارَه کِه وِ شِما عَصَبُونی با، اَما عیسی وا رَتِن وِ ریی صلیب ئو مُردنش، تقاصِ گناه‎یا اِیمانِه گِرِت وِ خُش.

![](https://cdn.door43.org/obs/jpg/360px/obs-en-49-11.jpg)

عیسی هیچ وخت هیچ گناهی نَکِرد، اَما قبول کِرد کِه سی گناه‎یا آیم تاوون بیه. او حتی سنگین‎تِرین تاوونه کِه مُردنه، قبول کِرد. وِ ای طوری او قربانی بی عیوی بی تا گناه‎یا شِما ئو هَر کَسی هَنی‎نِه دِ ای دنیا پاک بَکَه. سی‎یَه‎کِه عیسی خُشِه وِ نوُمِ قربانی تقدیم خدا کِرد، اوسه خدا هَمَه گناه‎یا، حتی گناه‌یا خیلی گَنِه وِنُونی کِه وِ او ایمان میارَن می‎وَخشَه.

![](https://cdn.door43.org/obs/jpg/360px/obs-en-49-12.jpg)

حتی کاریا خو شِما نمی‎تُونَه باعِثِه نجاتِ‎تُو با. کاری نیسا کِه وا اَنجُومِش بَتُونیت وا او سَرِ دوسی بَنِیت. وِ جاش بایس ایمان بیاریت کِه عیسی پسرِ خدائَه ئو وِ جا شِما وِ ریی صلیب مُرد ئو خدا دُوارَه اونِه دِ مُردِن بُلِن کِرد. اَر وِ ای حقیقت ایمان بیاریت خدا هَم کُلِ گناه‎یا شِمانِه می‎آمُورزَه.

![](https://cdn.door43.org/obs/jpg/360px/obs-en-49-13.jpg)

خدا هَر کَسِ کِه وِ عیسی ایمان بیارَه ئو اونِ وِ نوُمِ خداوندِه خُش قبول بَکَه، نجات مِئَه. اَما خدا کَسُونی کِه وِ او ایمان نیارَن، نجات نِمِئَه. مهم نیسا فقیر یا پیل‎دار، پیا یا زینه، پیر یا جِوُو ئو یا یَه کِه مالِ کجا بایت. خدا شِمانِه دوس دارَه ئو میحا وِ عیسی ایمان بیاریت تا او بَتونَه وا شِما سَر دوسی داشتَه با.

![](https://cdn.door43.org/obs/jpg/360px/obs-en-49-14.jpg)

عیسی شِمانِه مکیس می‌کَه تا وِ او ایمان بیاریت ئو تعمید بیریت. ایمان داریت کِه عیسی هِه اُو مسیحای موعود ئو تَنیا پسرِ خدائَه؟ ایمان داریت کِه گناهکارید ئو حقتونه خدا تقاص دتو بیره؟ ایمان داریت کِه عیسی وِ ریی صلیب مُرد تا گناه‌یا شِمانِه پاک بَکَه؟

![](https://cdn.door43.org/obs/jpg/360px/obs-en-49-15.jpg)

اَر وِ عیسی ئو اُو چی‎ئی کِه او سی شِما اَنجُوم دِئَه ایمان داریت، پَ شِما مسیحی هیسیت! دِ ایسِه وا دِما دَ شیطان دِ پادشاهی تاریک خُش وِ شِما حکومت نمی‎کَه. ایسِه خدا دِ پادشاهی نورانی خُش وِ شِما حکومت می‎کَه. خدا وِ شِما قوت دِئَه تا چی گذشتَه گناه نَکیت ئو وِ شِما رَه دُرس زِنِئی کِردِنِه یاد دِئَه.

![](https://cdn.door43.org/obs/jpg/360px/obs-en-49-16.jpg)

اَر مسیحی هیسیت، خدا گناه‌یا شِمانِه وِ خاطِر کاری کِه عیسی کِرد بَخشَنَه. ایسِه خدا شِمانِه دوس نِزیک خُش حِسآو می‌کَه ئو نَه دشمن.

![](https://cdn.door43.org/obs/jpg/360px/obs-en-49-17.jpg)

اَر دوس خدا ئو خدمتکار عیسی خداوند هیسیت، میل داریت کِه دِ یاد دین‎یا عیسی فرمُون بری بَکیت. وا یَه کِه مسیحی هیسیت، شیطان هَنی شِمانِه وَسوَسَه می‎کَه تا گناه بَکیت، اَما خدا هَمیشَه وِ وَعدَه‎یا خُش وفا می‎کَه. او فرمایش می‌کَه اَر وِ گناه‌یا خُتُو اِتِراف بَکیت، شِمانِه می‌وَخشَه ئو وِ شِما قوت مِئَه تا وا گناه بجنگید.

![](https://cdn.door43.org/obs/jpg/360px/obs-en-49-18.jpg)

خدا وِ شِما مُوئَه کِه دُعا بَکیت ئو کَلُومِ اونِه بُوحُونیت. ئو او وِ شِما مُوئَه تا وا مَسیحی‎یائی هَنی اونِه بَپِرَستیت ئو وِ بَقیَه هَم بُوئیت کِه سی شِما چی کِردَه. اَر تَمُوم یِنُونِه اَنجُوم بِئیت، دوسی قوی‎ئی دِ بِئن شِما ئو خدا پیش میا.

*مَتَلِی گِرِتِسَه دِ کِتآو مقدس: (رساله پولس وِ رومیا باب ۳ آیه ۲۱ تا ۲۶؛ باب ۵ آیه ۱ تا ۱۱؛ کِتآو انجیل یوحنا باب ۳ آیه ۱۶؛ کِتآو انجیل متی باب ۱۶ آیه ۱۶؛ رسالَه پولس وِ کولسیا باب ۱ آیه ۱۳ تا ۱۴؛ رسالَه دوئِم پولس وِ تسالونیکیا باب ۵ آیه ۱۷ تا ۲۱؛ رسالَه اول یوحنا باب ۱ آیه ۵ تا ۱۰)*

## ۵۰. عیسی وِرمی‎گَردَه

https://openbiblestories.org/l/lrc/story-50/

![](https://cdn.door43.org/obs/jpg/360px/obs-en-50-01.jpg)

نِزیک وِ ۲۰۰۰ سالَه کِه آیِم‎یا زیادی دِ دُنیا، خَوَر خوشِ انجیلِ عیسی مَسیحِه می‎شنَوَن. کلیسا دِ حال رشد بی‎یَه. عیسی وَعدَه دا کِه دِ آخِرِ دنیا وِرمی‎گَردَه. هَر چَن عیسی هَنی نیومائَه، اَما وِ وَعدَه خُش وفا می‌کَه.

![](https://cdn.door43.org/obs/jpg/360px/obs-en-50-02.jpg)

خدا دِ اِیما میحا دِ حالی کِه چَش وِ رَه وِرگَشتِن مسیح هیسیم، طوری زِنِئی بَکیم کِه مقدس بوئِیم ئو وِ او عزت بَنیم. ئو او دِ اِیما میحا کِه دِبارَه پادشاهی او وا بَقیَه حرف بزنیم. وَختی کِه هَنی مسیح وِ ریی زِمی زِنِئی می‎کِرد، چِنی فرمایش کِرد: «شاگردیا مِ خَوَر خوشِ پادشاهی خدانِه دِ هَمَه دُنیا مُوعِظَه می‎کَن، اوسِه آخِر زِمِو می‎رَسَه.»

![](https://cdn.door43.org/obs/jpg/360px/obs-en-50-03.jpg)

قوم‌یا زیادی هیسِن کِه هَنی دِبارَه عیسی چی‎ئی نَشنَفتِنَه. وِرَز وَ کِه مسیح وِرگَردَه وِ آسِمُو، او وِ مَسیحی‎یا فرمایش کِرد تا ای خَوَر خوشِه وِ هَمَه کَسُونی کِه وَنِه هیچ وخت نَشنَفتِنَه وازگو بَکَن. عیسی فرمایش کِرد: «رِیت ئو هَمَه ملت‎یان بَکیت وِ شاگردیا مِ، سی‎یَه‎کِه قلب‎یا چی کِشت‎یا سی دِرو آمادان.»

![](https://cdn.door43.org/obs/jpg/360px/obs-en-50-04.jpg)

عیسی یَنِه هَم گُت کِه: «نوکَر دِ اَربآو خُش بالاتِر نیسا. هِه ‌اُو طُور کِه اَربآو‎یا ای دُنیا دِ مِ نفرت داشتِن، شِمانِه هَم وِ خاطِر مِ عذاو می‌ئن ئو می‌کُشَن. دِ ای دُنیا رنج می‌کَشیت اَما دلگرم بایت؛ سی‌یَه‌کِه مِ، شیطانِ کِه حاکم ای دُنیائَه شِکَس دَمَه. اَر تا وِ آخِر وِ مِ وفادار بَمُونیت، اوسِه خدا شِمانِه نجات مِئَه!»

![](https://cdn.door43.org/obs/jpg/360px/obs-en-50-05.jpg)

عیسی سی شاگردیا خُش مَتَلِی تَریف کِرد، تا سی اونُو واز بکه دِ آخِر ای دُنیا چی وِ سَر مَردِم میا. او گُت: « پیائی دِ زِمی خُش تُم خو کاشت. وَختی هَنی دِ خآو بی، دشمنِش اُما ئو لا وِ لا تُم گَنِم، تخم گیاه هرزکاشت ئو رَت وِ رَه خُش.

![](https://cdn.door43.org/obs/jpg/360px/obs-en-50-06.jpg)

وَختی تُم‎یا جیک زَن، کارگریا اُو پیا گُتِن: «آقا، شِما تُم خو دِ ای زِمی کاشتیت! سی‌چی دِ مینشُو گیاه هرز سُوز کِردَه؟» اُو پیا جِوُو دَ: «یَه تَنیا می‎تُونَه کارِ دشمن‎یا مِ با کِه وِنُون بَکارَن. یَکی دِ دشمن‎یا مِ ای کارِه کِردَه.»

![](https://cdn.door43.org/obs/jpg/360px/obs-en-50-07.jpg)

کارگریا دِ جِوُو اَربآو خُشُو گُتِن: «آیا بایس گیایانِه بَکَشیم وِ دَر؟» ارباب جِوُو دَ: «نَه. اَر ای کارِه اَنجُوم بِئیت، قَری دِ گَنِم‌یان هَم واشُو می‌کَشیت وِ دَر. تا مُوقَه دِرُو بَکُومیت ئو اوسِه گیایان جَم بَکیت بَسوزِنیت، اَما گَنِم‌یان بیاریت وِ انبار مِ.»

![](https://cdn.door43.org/obs/jpg/360px/obs-en-50-08.jpg)

شاگردیا معنی ای مَتَلِ نَفَمِسِن ئو دِ مسیح حاستِن تا ای مَتَلِه سی اونُو واز بکه. عیسی گُت: «پیائی کِه تُم خونِه کاشت، مَسیحَه. زِمی ای دُنیائَه ئو تُم خو مَردِمی‎ئَن کِه هان دِ پادشاهی خدا.»

![](https://cdn.door43.org/obs/jpg/360px/obs-en-50-09.jpg)

گیا هَرز کَسُونی هیسِن کِه مالِ شیطان، یَعنی شرآشون. دشمن اُو پیا یعنی کَسِی کِه گیا‌یا هرزِ کاشت، هِه اُو اِبلیسَه. فصل دِرُو، آخِر دُنیائَه، ئو دروگریا فرشته‎یائَن.

![](https://cdn.door43.org/obs/jpg/360px/obs-en-50-10.jpg)

وَختی دُنیا وِ آخِر بَرَسَه، فرشته‎یا هَمَه مَردِمی کِه مال اِبلیسَن، دِ تَمُومِ دُنیا جَم می‌کَن دِ دریاچَه تَش مُونَن. جائی کِه اونُو وا رنج ئو عذاو وحشتناکی می‎گِریوَن ئو دِنُون‌یا خُشُو می‎سائَن وِ یَک. اَما عادل‎یا کِه دِ عیسی فرمون بری کِردِنَه چی اَفتآو دِ پادشاهی بُوئَه خُشُو، خدا، می‎درَخشَن.

![](https://cdn.door43.org/obs/jpg/360px/obs-en-50-11.jpg)

ئو عیسی گُت کِه وِرَز آخِر دُنیا وِرمیگَردَه وِ زِمی. او هِه وِ ‌اُو طورِی کِه دِ زِمی رَت وِرمیگَردَه، یعنی یِه بدنِ جسمی دارَه ئو دِ آسِمُو وِ ریی اُوریا میا. وَختی عیسی وِرگَردَه، هَر مسیحی‎ئی کِه مُردَه، دِ مین مُردیا وِرمِسَه ئو وا او دِ آسِمُو یکترین مینن.

![](https://cdn.door43.org/obs/jpg/360px/obs-en-50-12.jpg)

اوسِه مسیحی‎یائی کِه هَنی زِنَه هیسِن، وِ آسِمُو بالا می‎رَن ئو وِ مسیحی‎یائی هنی می‎رَسَن کِه دِ مین مُردیا وِریسانَه. هَمَه اونُو وا عیسی دِ اوچِه هیسِن ئو عیسی وا قومِ خُش زِنِئی می‎کَه. اونُو دِ دوسی هَمیشَه‎ئِی وا یَکتِری زِنِئی می‌کَن.

![](https://cdn.door43.org/obs/jpg/360px/obs-en-50-13.jpg)

عیسی وعدَه دَ کِه وِ هَر کَس کِه وِ او ایمان دارَه، تاجی می‎وَخشَه. اونُو وا خدا تا ابد وِ هَمَه چی حکومت می‎کَن ئو دِ آرُومِش کامل هیسِن.

![](https://cdn.door43.org/obs/jpg/360px/obs-en-50-14.jpg)

اَما خدا کَسُونی کِه وِ عیسی ایمان نی‎اُوِردِن، داوری می‌کَه. او اونُون مُونَه دِ جَنِم. اوچِه جائی‎ئَه کِه اونُو تا ابد می‎گِریوَن ئو دِنُون‌یا خُشُو فشار مِئَن وِ یَک ئو رنج می‎کَشَن. تَشی کِه هیچ وَخت خاموش نِمووَه اونُون می‎سوزِنَه ئو کِرم‌یا دِ حَردِنشُو هیچ نِمِسَن.

![](https://cdn.door43.org/obs/jpg/360px/obs-en-50-15.jpg)

وَختی کِه عیسی وِرگَردَه، شیطان ئو حکومَتِشِه کامل نابود می‌کَه. شیطان تا ابد وا هَمَه کَسُونی کِه وِ جا فرمون بری دِ خدا، دِ او فرمون بری کِردِن دِ اوچِه می‎سوزَن.

![](https://cdn.door43.org/obs/jpg/360px/obs-en-50-16.jpg)

وِ خاطِر نافِرمُونی آیِم ئو حوا ئو اُوِردِن گناه وِ ای دُنیا، خدا دُنیانِه لَنَت کِرد ئو تصمیم وِ نابودیش گِرِت. اَما یِه روز خدا آسِمُو ئو زِمی نوئِی دُورس می‌کَه کِه کامل هیسِن.

![](https://cdn.door43.org/obs/jpg/360px/obs-en-50-17.jpg)

عیسی ئو قومِش دِ زِمی نوئِ زِنِئی می‌کَن، ئو او تا وِ ابد وِ هَر چی‎ئی کِه هیسا سلطنت می‌کَه. او هَر اَسری‎نِه دِ تیا مَردِم پاک می‌کَه. دَ غَمی نیسا ئو هیچ کَس عذاو نمی‎کَشَه. اونُو هیچ وخت نمی‎گِریوَن، دَ کَسی مریض نِموئَه ئو نِمی‎میرَه. ئو هیچ چی گَنِی دِ اوچِه نیسا ئو عیسی وا دوسی ئو عدالت دِ پادشاهی خُش حکومت می‎کَه. دِ وَ وا دِما او وا قوم خُش تا ابد هیسا.

*مَتَلِی گِرِتِسَه دِ کِتآو مقدس: (کِتآو انجیل متی باب ۲۴ آیه ۱۴؛ باب ۲۸ آیه ۱۸؛ کِتآو انجیل یوحنا باب ۱۵ آیه ۲۰؛ باب ۱۶ آیه ۳۳؛ کِتآو مکاشفه باب ۲ آیه ۱۰؛ کِتآو انجیل متی باب ۱۳ آیه ۲۴ تا ۳۰؛ باب ۱۳ آیه ۳۶ تا ۴۲؛ رسالَه اول پولس وِ تسالونیکیا باب ۴ آیه ۱۳ ئو باب ۵)*