# unfoldingWord Open Bible Stories — Male (Ethiopia) (Male)

- Language code: `mdy`
- Canonical page: https://openbiblestories.org/l/mdy/
- Stories in this file: 50 of 50
- Published by: DokuWiki
- Last release: 2026-10-27
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Male (Ethiopia) translation; it is not a translation of the whole Bible.

## 1. ማዢንቲ

https://openbiblestories.org/l/mdy/story-1/

![](https://cdn.door43.org/obs/jpg/360px/obs-en-01-01.jpg?direct&)

ሃይካፓ ሊካ ኑ ዛጋሢ ቢያ ባኣዚ ማዢፆ ባራሪ ዓርቄሢ ፆኦሲ ማዒፆኬ። ያዺዲ ፆኦሲ ሳዖንታ ጫሪንጮንታ ዒኢካ ዓኣ ባኮዋ ቢያ ላሆ ኬሊ ጋርካ ማዤኔ። ሳዖ ፆኦሲ ማዤስካፓ ሳዓ ዹሚ ሃሣ ዔኤቢያ ፔቴታዎ ባኣያ ማዒ ዓኣኔ፤ ሳዖይዳኣ ሃጊ ፔቴታዖ ማዢንቴ ባኣዚ ባኣሴ። ያዺ ማዔቴያ ፆኦሲኮ ዓያና ዋኣፆ ዑፃ ዒማና ሴካ ሃንጋ ጋዓኔ።

![](https://cdn.door43.org/obs/jpg/360px/obs-en-01-02.jpg?direct&)

ዬካፓ ፆኦሲ “ፖዒ ማዖንጎ” ጌዔም ማዔኔ። ፆኦሲያ ዬይ ፖዓ ኮሺ ማዔሢ ዛጋዖ “ሮኦሪ” ጌይ ሱንሢ ጌሤኔ። ፆኦሲ ሮኦሮ ዹሞፓ ዱማሳዖ ዹሞ “ዋንቴ” ጌይ ሱንፆ ጌሤኔ። ፆኦሲ ቤርታሳ ኬሎ ፖዒ ማዤኔ።

![](https://cdn.door43.org/obs/jpg/360px/obs-en-01-03.jpg?direct&)

ላምሳ ኬሎና ፆኦሲ ጫሪንጮኮ ዑፃ ሌካ ዼጌ ዓኣ ጉሪ ቤሲ ማዤኔ፤ ያዺዲ ዒዚ ዋኣፆ ሌካ ዼጌ ዓኣ ጉሮ ቤዞፓ ዱማሴኔ።

![](https://cdn.door43.org/obs/jpg/360px/obs-en-01-04.jpg?direct&)

ሃይሣሳ ኬሎና ፆኦሲ ፃኣዾ ዓጮይዳፓ ዋኣፆ ዱማሴኔ። ፆኦሲ ዬያ ፃኣዾ ዓጮ “ሳዓ”፥ ዋኣፆዋ “ዼኤፒ ባዚ” ጌዔኔ። ፆኦሲያ ዬይ ዒ ማዤ ባካ ኮሺ ማዔሢ ዛጌኔ።

![](https://cdn.door43.org/obs/jpg/360px/obs-en-01-05.jpg?direct&)

ዬካፓ ፆኦሲ ሳዓ ቢያ ቶኦኪ ሚሢንታ ዱማ ዱማ ባቃላ ባኣዚያ ባቃልሶንጎ ጌዔኔ፤ ዒ ጌዔ ጎይፆዋ ማዔኔ። ዬይ ዒ ማዤ ባካ ኮሺ ማዔሢ ፆኦሲ ዛጌኔ።

![](https://cdn.door43.org/obs/jpg/360px/obs-en-01-06.jpg?direct&)

ማዢፆኮ ዖይዳሳ ኬሎይዳ ፆኦሲ ዓቢ፥ ዓጊኒንታ ዦኦጋሢያ ማዤኔ። ፆኦሲ ሮኦራ፥ ዋንታ፥ ሌዖንታ ዱማ ዎዶዋ ፓቄኔ። ዬይ ዒ ማዤ ባካ ኮሺ ማዔሢ ፆኦሲ ዛጌኔ።

![](https://cdn.door43.org/obs/jpg/360px/obs-en-01-07.jpg?direct&)

ዶንጋሳ ኬሎና ፆኦሲ ዋኣሢዳ ናንጋ ባኮንታ ካፖዋ ቢያ ማዤኔ። ዬይ ዒ ማዤ ባካ ኮሺ ማዔሢ ፆኦሲ ዛጌኔ፥ ማዢንቴ ባኮዋ ዓንጄኔ።

![](https://cdn.door43.org/obs/jpg/360px/obs-en-01-08.jpg?direct&)

ላሃሳ ኬሎ ፆኦሲ “ሳዖይዳ ቢያ ቶኦኪ ቆሎንታ ቦዖዋ ዓኣያ ማዖንጎ” ጌዔኔ። ፆኦሲ ጌዔ ጎይፆ ማዔኔ። ዬያ ባኮይዳፓ ዛላ ባይ፥ ዛላ ሳዓና ጎቺንቲ ሃንታ ማዢንቲ፥ ዛላ ካይዚ ቦዖኬ። ፆኦሲያ ዬይ ኮሺ ማዔሢ ዛጌኔ።

![](https://cdn.door43.org/obs/jpg/360px/obs-en-01-09.jpg?direct&)

ፆኦሲ ሃሣ “ዓሲ ኑኡኒ ኑ ማሎና ኑና ኮኦኪንሣያ ማሂ ማዦም፤ ዔያቶኮ ሳዖ ቢያይዳ፥ ጊንሣ ሃሣ ሼምፓ ዓኣ ቆሎንታ ዱማ ዱማ ቦዖንታኮ ቢያ ዑሢ ማዒ ዎይሣ ቢታንቶ ዓኣያ ማዖንጎ” ጌዔኔ።

![](https://cdn.door43.org/obs/jpg/360px/obs-en-01-10.jpg?direct&)

ዬያሮ ፆኦሲ ሳዖ ዓጮይዳፓ ዔኪ ዓሲ ማሂ ማዢ፥ ሼምፖ ዑሲያ ዒንጌኔ። ዬያ ዓሢኮ ሱንፃ ዓዳኣሜ ጌይንቴኔ። ዓዳኣሜ ናንጋ ቤዞይዳ ፆኦሲ ዱማ ዱማ ዓኣፖዋ ሙሙዖ ሚሢ ቱኪ፥ ዬያ ባኮኮ ዓጮ ቦኦኪ ዋኣሢያ ዑሺ ሚዛጲሲ ቆላንዳጉዲ ዒኢካ ዒዛ ጌሤኔ።

![](https://cdn.door43.org/obs/jpg/360px/obs-en-01-11.jpg?direct&)

ዬያ ሚፆ ባኣካ ፆኦሲ ላምዖ ዱማዻ ሚሢ ቱኬኔ፤ ዬንሢ ሚፆንሢ ናንጊ ዒንጋ ሚሢ፥ ኮሺና ፑርታና ዱማሲ ዔርዛ ዔራቶ ዒንጋ ሚሢ ጌይንታያኬ። ዓዳኣሜ ዬኖ ፑርቶና ኮዦና ዱማሳ ዔራቶ ዒንጋ ሚፄሎ ዓኣፓፓ ዓታዛ ሃንጎ ሚፆኮ ዓኣፖ ቢያ ኮዔሢ ጎይፆ ሙዓኒ ዳንዳዓሢ ፆኦሲ ዒዛም ኬኤዜኔ። ጋዓንቴ ዬኖ ፑርቶና ኮዦና ዱማሲ ዔርዛ ሚፆ ዓኣፔሎ ሙዔቴ ዒ ሃሃይቃንዳያታሢ ላቴኔ።

![](https://cdn.door43.org/obs/jpg/360px/obs-en-01-12.jpg?direct&)

ዓሲ ፔኤሮ ሴሎ ማዒፃ ኮሺቱዋኣሢ ፆኦሲ ኬኤዜኔ። ዬያ ዱማ ዱማ ቆሎንታ ቦዖንታ ባኣካፓ ፔቴታዖ ዓዳኣሜ ማኣዳያ ማዓኒ ዳንዳዔይ ባኣሴ።

![](https://cdn.door43.org/obs/jpg/360px/obs-en-01-13.jpg?direct&)

ዬካፓ ፆኦሲ ዓዳኣሜ ሃሃይቄጉዲ ጊንዒሼኔ፤ ያዺ ዒ ጊንዒ ዓኣንቴ ጎኦቦ ባራንፃፓ ፔቴ ሜጌሢ ዔኪ ላኣሊ ማሂ ማዣዖ ዓዳኣሜ ኮይላ ዔኪ ዬዔኔ።

![](https://cdn.door43.org/obs/jpg/360px/obs-en-01-14.jpg?direct&)

ዓዳኣሜ ዒዞ ዴንቃዖ “ሃና ታና ቤዛ ማላያኬ፤ ዓቲንቄፓ ዒዛ ጴዼሢሮ ‘ላኣሊ’ ጌይንቶጎ” ጌዔኔ። ዬያሮ ዓሲ ዒንዶንታ ዓዶንታ ሃሺ ፔ ማቾና ዎላ ፔቴ ማዓኔ።

![](https://cdn.door43.org/obs/jpg/360px/obs-en-01-15.jpg?direct&)

ፆኦሲ ዬያይዲ ዓቲንቄንታ ላኣሊንታ ፔ ማሎና ማዤኔ። ፆኦሲ ዔያቶ ዓንጄኔ፤ “ሚርጌ ናይ፥ ናይኮዋ ናይ ዒንሢኮ ዓኣያ ማዖንጎ፥ ሳዖዋ ኩሙዋቴ” ጌዔኔ። ፆኦሲ ዒ ማዤ ባካ ሚርጌና ኮሺ ማዔሢ ዛጌኔ። ቢያ ባኮናኣ ፆኦሲ ዎዛዼኔ፥ ዬይ ቢያ ላሆ ኬሊዳ ማዔኔ።

![](https://cdn.door43.org/obs/jpg/360px/obs-en-01-16.jpg?direct&)

ላንካሳ ኬሎይዳ ፆኦሲ ማዢፆ ማዾ ቢያ ጋፒሴኔ፤ ዬያሮ ዬኖ ኬሎ ፆኦሲ ማዾ ሃሼኔ። ዬኖ ላንካሳ ኬሌሎ ዒ ዓንጄኔ፥ ፔኤማኣ ዱማሴኔ፤ ዓይጎሮ ጌዔቴ ዬኖ ኬሎ ማዾ ቢያ ጋፒሲ ዒ ሃሼሢሮኬ። ፆኦሲ ጫሪንጮንታ ሳዖንታ ዒኢካ ዓኣ ባኮዋ ቢያ ማዤያና ማዺንቴ ባካ ያዼኬ።

*ጌኤዦ ማፃኣፖይዳ ኬኤዚንቴ ሃይሴ፡- ማዢንቲ ማፃኣፔ 1-2።*

## 2. ጎሜ ዓጮ ጌሌሢ

https://openbiblestories.org/l/mdy/story-2/

![](https://cdn.door43.org/obs/jpg/360px/obs-en-02-01.jpg?direct&)

ዓዳኣሜና ማቾና ፆኦሲ ዔያቶም ማዢ ዒንጌ ዱማ ዱማ ሚፃ ዓኣ ቤዜሎይዳ ዓኣ ዎዶና ሚርጌና ዎዛዺ ናንጋኔ። ላምዓሢ ዬማና ዑሢ ካሎኬ፥ ጋዓንቴ ዬይ ካሉማ ዔያቶ ዎሊ ሴልቂሲባኣሴ፤ ዬይያ ጎሜ ዓጮ ሃጊ ጌሊባኣሢሮኬ። ዔያታ ዒማና ዱማ ዱማ ሚፆ ባኣኮ ሃንቲ ሃንቲ ፆኦሲናኣ ጌጌስታኔ።

![](https://cdn.door43.org/obs/jpg/360px/obs-en-02-02.jpg?direct&)

ጋዓንቴ ዬያ ሚፆ ባኣካ ጌኔ ማዻ ሾኦሺ ዓኣኔ። ላኣሌሎዋ ዒዚ “ፆኦሲ ዒንሢ ጎኔ ሃያ ሚፆ ዓኣፖ ቢያ ሙዒፖቴ ጌዒያ?” ጌይ ዖኦጬኔ።

![](https://cdn.door43.org/obs/jpg/360px/obs-en-02-03.jpg?direct&)

ላኣሌላኣ፥ “ፑርቶንታ ኮዦንታ ዱማሲ ዔርዛ ሚፄሎ ዓኣፖማፓ ዓታዛ ሃንጎ ሚፆ ዓኣፖ ኮዔሢጉዲ ኑ ሙዓኒ ዳንዳዓሢ ኬኤዜኔ። ጋዓንቴ ‘ዬኖ ሚፆ ዓኣፔሎ ዒንሢ ሙዔቴ፥ ሙዓ ዓታዛ ካሜቴያ ዒንሢ ሃይቃንዳኔ’ ጌይናኣኮኬ” ጌዔኔ።

![](https://cdn.door43.org/obs/jpg/360px/obs-en-02-04.jpg?direct&)

ሾኦዣሢያ ላኣሌሎም ማሃዖ፥ “ዬይ ጎኔ ባኣዚቱዋሴ፤ ዒንሢ ሃይቂንዱዋሴ፥ ዒንሢ ሚፆ ዓኣፔሎ ሙሙዓማና ዓኣፓ ዒንሢኮ ቡሊንቴም ኮሺንታ ፑርታንታ ዱማሲ ዒንሢ ዔሪ ፆኦሲጉዲ ማዓንዳያታሢ ፆኦሲ ዔሬሢሮኬ ‘ሙይፖቴ!’ ዒንሢም ጌዔሢ” ጌኤኔ።

![](https://cdn.door43.org/obs/jpg/360px/obs-en-02-05.jpg?direct&)

ዬና ሚፆ ዓኣፔላ ሙዒሢም ኮሺ፥ ዛጊማኣ ጊኢጋያና ዔራቶዋ ዴንቃኒ ጫናሳያ ማዔሢ ላኣሌላ ዛጌስካፓ ሚፆ ዓኣፔሎ ዔኪ ሙዔኔ። ዒዞና ዎላ ዓኣ ዓኒማኣ ዔኪ ዒዛ ዒንጌኔ። ዒዚያ ዬኖ ሚፆ ዓኣፔሎ ሙዔኔ።

![](https://cdn.door43.org/obs/jpg/360px/obs-en-02-06.jpg?direct&)

ኔጉዋዖ ላምዖንሢኮ ዓኣፓ ቡሊንቴኔ። ዔያታ ካሎ ማዔሢያ ዔያቶም ዔርቴኔ፤ ዬያሮ ዒላሺ ዓፒላ ጎይሢ ዎላ ካንሢ ሲኪ ፔ ካሉሞ ዓኣቻኒ ማሌኔ።

![](https://cdn.door43.org/obs/jpg/360px/obs-en-02-07.jpg?direct&)

ዓሢና ማቾና ፆኦሲኮ ዑኡዞ ዱማ ዱማ ሚፃ ቱኪንቲ ዓኣ ቤዞይዳ ዋይዛዖ ቢያሢ ፆኦሲ ቤርታፓ ፑኔኔ። ፆኦሲያ ዓዳኣሜ ዔኤሊ “ኔ ዎካ ዓኣይ?” ጌዔኔ። ዓዳኣሜያ “ሚፆ ባኣኮይዳ ኔ ሃንታሢ ዋይዚ ካሎ ታ ማዔሢሮ ፑኔኔ” ጌዔኔ።

![](https://cdn.door43.org/obs/jpg/360px/obs-en-02-08.jpg?direct&)

ፆኦሲያ “ኔ ካላዼሢ ዖ ኔኤም ኬኤዜይ? ታ ኔና ሙይፖ ጌዔ ሚፄሎ ዓኣፖ ኔ ሙዒያ?” ጌዔኔ። ዓዳኣሜያ፥ “ሃና፡ ኔ ታኣና ዎላ ናንጋንዳጉዲ ዒንጌ ላኣሌላ ሚፄሎ ዓኣፖ ዔኪ ዒንጌም ታ ሙዔኔ” ጌዔኔ። ፆኦሲ ላኣሌሎ ኮይላ “ዬይ ኔ ማዼ ባካ ዓይጎ ማዾዳይ?” ጌዔኔ። ዒዛኣ፥ “ሾኦዣሢ ታና ዻቢሼም ታ ሙዔኔ” ጌዔኔ።

![](https://cdn.door43.org/obs/jpg/360px/obs-en-02-09.jpg?direct&)

ፆኦሲ ሾኦዣሢ ኮይላ፥ “ኔ ጋዳንቂንቴያኬ፤ ዳዲና ጎቺንቲ ኔ ሃንታንዳኔ፥ ዓጪያ ኔ ሙዓንዳኔ፥ ኔኤና ላኣሎና ኮሜ ዓሲ ማዒ ናንጋንዳኔ፥ ኔ ናኣቶና ዒዞ ናኣቶና ዒማዺ ዎሊኮ ሞርኬ ማዒ ዓታንዳኔ፤ ላኣሌሎ ዜርፃሢ ኔኤኮ ቶኦኮ ዳኣፃንዳኔ፥ ኔኤኒያ ዒዛኮ ቶኮ ዻዓንዳኔ” ጌዔኔ።

![](https://cdn.door43.org/obs/jpg/360px/obs-en-02-10.jpg?direct&)

ፆኦሲ ላኣሌሎም፥ “ሾይፆሮ ኔ ባና ዎዶና ዋኣዪፆ ታ ኔኤም ዺቢሻንዳኔ፤ ማዔቴያ ኔ ዓኒ ኔኤኒ ሱኡካዻንዳኔ፥ ዒዚ ኔኤኮ ዑፃሢ ማዓንዳኔ” ጌዔኔ።

![](https://cdn.door43.org/obs/jpg/360px/obs-en-02-11.jpg?direct&)

ዓዳኣሜም ፆኦሲ፥ “ኔ ማቾ ጌኤዞ ኔ ዋይዚ ታ ኔና ‘ሙይፖ’ ጌዔ ሚፆ ዓኣፖ ኔ ሙዔሢሮ ሳዓ ኔ ማዼ ማዾና ጋዳንቂንቴኔ። ኔ ናንጎ ዎዶ ቢያይዳ ላቢ ማዺ ጮጋቲ ሙዖ ባኣዚ ኔ ዴንቃንዳኔ። ዬካፓ ኔ ሃይቃንዳኔ፤ ኔኤኒ ዓጪታሢሮ ዓጮ ባንሢ ማዓንዳኔ” ጌዔኔ። ዓዳኣሜያ ፔ ማቾ ዒዛ ሼምፓ ዓኣ ማዢንቶኮ ቢያ ዒንዶኬ ጌዒ ሱንፆ ዒዞኮ “ሂዋኣኖ” ጌይ ጌሤኔ፤ ዬይ ጌይፃ “ሼምፖ ዒንጋ ዒንዶ” ጌይሢኬ። ፆኦሲያ ቆሎኮ ዒልዒና ማኣዖ ኮሺ ዓዳኣሜና ሂዋኣኖና ማይሴኔ።

![](https://cdn.door43.org/obs/jpg/360px/obs-en-02-12.jpg?direct&)

ዓሲ ኮሺንታ ፑርታንታ ዱማሲ ዔሪፆና ዓዳ ኑናጉዲ ማዔሢሮ ላሚ ጊንሣ ዒ ፔ ኩቻ ናንጊ ዒንጋ ሚፆ ዓኣፖ ዱኡዚ ሙዑዋጉዲና ናኣናና ዒ ናንጉዋጉዲ ዓዳኣሜንታ ሂዋኣኖንታ ሚዛጶ ማዔ ዱማ ዱማ ሚፃ ዓኣ ቤዜሎፓ ‘ኑ ኬሶም” ጌዒ ፆኦሲ ዒኢፓ ዔያቶ ሺኢሼኔ። ዬካፓ ናንጎ ዒንጋ ሚፆ ባንሢ ዔኪ ጌልዛ ጎይፆ ካፓንዳጉዲና ዬኖ ሚፆ ዓኣፖ ዱኡዚ ሙዑዋጉዲ ላኣጋኒ ዎልቄና ዶዲ ማዔ ኪኢታንቻ ዱማ ዱማ ሚፃ ዓኣ ቤዞይዳ ጌሤኔ።

*ጌኤዦ ማፃኣፖይዳ ኬኤዚንቴ ሃይሴ፡- ማዢንቲ ማፃኣፔ 3*

## 3. ባይሲንታ ዋኣሢ

https://openbiblestories.org/l/mdy/story-3/

![](https://cdn.door43.org/obs/jpg/360px/obs-en-03-01.jpg?direct&)

ሚርጌ ዎዴኮ ጊንፃ ሳዖይዳ ሚርጌ ዴሬ ሾይንቲ ዺቢ ናንጋያ ማዔኔ። ዬይ ዓሳ ሚርጌና ፑርታ፥ ሃሣ ዎልቃዻያኬ። ዓሲኮዋ ፑርቱማ ዺቢ ዺቢ ሙኬሢሮ ፆኦሲ ዓጮ ቢያ ዱኡኪ ባይዛንዳ ዋኣሢና ኩርሳኒ ማሊ ዔቄኔ።

![](https://cdn.door43.org/obs/jpg/360px/obs-en-03-02.jpg?direct&)

ኖሄ ጌይንታ ዓሲስኬይ ጋዓንቴ ፆኦሲ ቤርታ ኮሺ ዓሲ ማዒ ጴዼኔ። ኖሄ ዬኖ ዎዶና ዓኣ ዓሶይዳፓ ቢያ ባሼ ፂሎ፥ ሃሣ ፑርቱሞ ማዾፓኣ ፔና ካፓያኬ። ፆኦሲ ሳዖይዳ ዳካኒ ማሌ ባይሲንቶ ዋኣፆ ዛሎ ኖሄም ኬኤዜኔ፤ ዼኤፒ ዋኣሢ ካኣሚሌያ ማዣንዳጉዲ ዒዛ ዓይሤኔ።

![](https://cdn.door43.org/obs/jpg/360px/obs-en-03-03.jpg?direct&)

ኖሄ ዼኤፒ ዋኣሢ ካኣሚሌ (ማርካቤ) ማዣንዳጉዲ ፆኦሲ ዒዛም ኬኤዜኔ። ዬኖ ዋኣፆ ካኣሚሌሎኮ ዖዶሱማ 140፥ ጋሮ ዳልጉማ 23፥ ሌካ ዔጳ 13.5 ሜቲሬ ማዖንጎ ጌዔኔ። ኖሄ ማዤ ዋኣፆ ካኣሚሌላ ሚሢና ኮሺንቴያ፥ ሃይሦ ኩቤ ኬኤሲ ሌካ ዑፃ ዓኣያ፥ ዺቢ ቆልዓንታ ዑፃ ማኣሪንታ ፑልታ ካራኣ ዓኣያኬ። ፆኦሲ ዬኖ ካኣሚሌሎይዳ ኖሄ ፔናንታ ማኣሮ ዓሶንታ ዱማ ዱማ ቶኦኮ ቆልሞንታ ቦዖዋ ዒኢካ ጌልዚ ባይሲንቶ ዋኣፃፓ ቶሊሳንዳጉዲ ዓይሤኔ።

![](https://cdn.door43.org/obs/jpg/360px/obs-en-03-04.jpg?direct&)

ኖሄያ ፆኦሲም ዓይሢንቲ፥ ዒ ጌዔ ጎይፆ ፔኤኮ ሃይሦ ናኣቶና ዎላ ዋኣፆ ካኣሚሎ ማዤኔ። ዬና ዋኣፆ ካኣሚላ ሚርጌና ዼኤፒታሢሮ ዔያታ ማዣኣና ዺቢ ዎዴ ዔኬኔ። ኖሄ ዬኖ ባይሲንቶ ዋኣፆ ዛሎ ዓሶም ላቲ ላቲ ኬኤዚ፥ ፆኦሲ ባንሢያ ማዓንዳጉዲ ኬኤዜንቴ ዔያታ ዒዛሲ ጎናሲ ዔኪባኣሴ።

![](https://cdn.door43.org/obs/jpg/360px/obs-en-03-05.jpg?direct&)

ኖሄንታ ማኣሮ ዓሶንታ ዔያቶና ዱማ ዱማ ቆሎና ቦዖናም ዺቢ ዎዴኮ ጊዳንዳ ሙኡዚ ቡኩሳንዳጉዲ ፆኦሲ ዔያቶ ዓይሤኔ፤ ቢያ ባካ ጊኢጊንቲ ጋፔስካፓ ዋኣፆ ካኣሚሎ ጋሮ ጌሊፆ ዎዳ ሄሌሢያ ኖሄም፥ ኖሄ ማቾም፥ ሃይሦ ዓቲንቆ ናኣቶንታ ዔያቶኮ ማቾንሢንታም ፆኦሲ ኬኤዜኔ። ዬያሮ ዎሊ ዑፃ ሳሊ ዓሲ ዋኣፆ ካኣሚሎ ጋሮ ጌሌኔ።

![](https://cdn.door43.org/obs/jpg/360px/obs-en-03-06.jpg?direct&)

ባይሲንቶ ዋኣፆይዳፓ ፔና ዓውሳንዳጉዲ ቢያ ቶኦኮ ቆልሞንታ ቦዖንታፓ ዓዴና ዒንዴና ማሂ ማሂ፥ ካፖዋ ዒማይዲ ኖሄ ኮይላ ፆኦሲ ዳኬኔ። ፆኦሲም ዒንጎ ባኣዚ ማዒ ሺኢካኒ ዳንዳዓ ላንካይ ባኣዚ ዓዴና ዒንዴና ማሂ ቢያ ቦዖንታ ቆልሞንታኮ ቶኦካፓ ቶኦካፓ ኖሄ ካኣሚሎይዳ ጌላንዳጉዲ ዳኬኔ። ጌላኒ ኮይሳ ባካ ቢያ ጌሊ ጋፔስካፓ ፆኦሲ ዋኣፆ ካኣሚሎኮ ካሮ ዙሊና ዎዼኔ።

![](https://cdn.door43.org/obs/jpg/360px/obs-en-03-07.jpg?direct&)

ዬካፓ ዒራ ዋዾ ዓርቄኔ፤ ሻንቁዋ ዒርዚ ዋርቄ ጎይሣ ዖይዲታሚ ኬሊ ዋንቴና ሮኦሪና ጉቤ ዴዔኔ። ሊካ ሳዖ ዴማፓኣ ቱሮ ዹኡቂ ኬስካ ዋኣሢ ዓልቂሢ ዓርቄኔ። ዬያሮ ዓጪ ማዔ ካራና ጉቤ ዋኣፆና ዔኤዺንቴኔ፤ ዼኤፖ ዖዶዞ ዹካኣ ዓቱዋዖ ዋኣፆና ዱኡኪንቲ ባይቄኔ።

![](https://cdn.door43.org/obs/jpg/360px/obs-en-03-08.jpg?direct&)

ዋኣፆ ካኣሚሎ ጋራ ዓኣ ዓሶንሢና ዱማ ዱማ ባኮንሢፓ ዓታዛ ሳዖይዳ ሼምፔና ዓኣ ባኣዚ ቢያ ሃይቂ ኩዴኔ። ዋኣፆ ካኣሚሌላ ጋዓንቴ ዋኣፆ ዑፃ ሼሌዒ ዴዒ ጋሮይዳ ዓኣ ሼምፔና ዓኣ ዓሶንሢንታ ባኮዋ ቢያ ዓይሴኔ (ዓውሴኔ)።

![](https://cdn.door43.org/obs/jpg/360px/obs-en-03-09.jpg?direct&)

ዒራ ዋዾ ሃሼስካፓኣ ዋኣፆ ካኣሚላ ዶንጎ ዓጊኒ ጉቤ ዋኣፆ ዑፃ ሴካ ሃንጋ ጌዔኔ። ዬካፓ ዋኣፃ ታሢ ታሢ ሚጪ ኬዲሢ ዓርቄኔ። ፔቴ ኬሊ ዋኣፆ ካኣሚሌላ ዹካ ዑስካ ዴዔኔ፤ ያዺ ማዔቴያ ሳዓ ቢያ ዋኣፆና ዱኡኪንቲ ዓኣ ጎይሣኬ። ሃይሦ ዓጊኒኮ ጊንፃ ጋዓንቴ ዹኮኮ ቶኦካ ጴዺሢ ዓርቄኔ።

![](https://cdn.door43.org/obs/jpg/360px/obs-en-03-10.jpg?direct&)

ዖይዲታሚ ኬሊኮ ጊንፃ ዋኣፃ ሳዓፓ ሚጬቴ ዛጎም ኖሄ ፔቴ ቁራኬ ኬሲ ዋኣፆ ካኣሚላፓ ዳኬኔ። ዬማ ቁራኮማ ሴካ ሃንጋ ባራኒ ሌሊ ባራናዖ ፃኣዺ ሳዓ ዴንቃኒ ዳንዳዒባኣሴ።

![](https://cdn.door43.org/obs/jpg/360px/obs-en-03-11.jpg?direct&)

ዬካፓ ሃሣ ኖሄ ዶኦሌ ኬሲ ዳኬኔ፤ ጋዓንቴ ዴዓንዳ ቤሲ ዴንቂባኣሢሮ ማዒ ኖሄ ባንሢ ዋኣፆ ካኣሚሎ ሙኬኔ። ፔቴ ቃልሾ ኬሊኮ ጊንፃ ኖሄ ጊንሣ ማሂ ዶኦሌሎ ዳኬኔ። ዬካፓ ዬና ዶኦሌላ ሪሚቲ ዒላሺ ዻንጋ ዔኪ ማዒ ሙኬኔ። ዋኣፃኣ ሳዓፓ ሚጪ ሚጪ ዓኣሢሮ ዱማ ዱማ ቶኦኮ ሚፃ ባቃሊሢዳኬ።

![](https://cdn.door43.org/obs/jpg/360px/obs-en-03-12.jpg?direct&)

ኖሄ ጊንሣ ሃሣ ፔቴ ቃልሾ ኬሊ ዴዓዖ ዶኦሌሎ ጊንሣ ሃይሣሲ ዳኬኔ። ዬካፓ ዶኦሌላ ዴዓንዳ ቤሲ ዴንቄሢሮ ማዒ ሙኪባኣሴ። ዋኣፆኮ ሚጪፃኣ ዔርቴኔ።

![](https://cdn.door43.org/obs/jpg/360px/obs-en-03-13.jpg?direct&)

ያፓ ላምዖ ዓጊኒኮ ጊንፃ ፆኦሲ ኖሄም፥ “ኔናንታ ኔ ማኣሮ ዓሶንታ ቆልሞንታ ዱማ ዱማ ቦዓኣ ዋኣፆ ካኣሚላፓ ኬስኩዋቴ” ጌዔኔ። ዬያሮ ማኣሮ ዓሳ ዋኣፆ ካኣሚሎ ጋራፓ ኬስኬኔ። ዬካፓ ሚርጌ ናይንታ ናይኮዋ ናይ ሾይ ጊንሣ ሳዖ ኩሜኔ።

![](https://cdn.door43.org/obs/jpg/360px/obs-en-03-14.jpg?direct&)

ኖሄ ዋኣፆ ካኣሚላፓ ኬስካዖ ፆኦሲም ዒንጎ ባኣዚ ዒንጎ ቤሲ ኮሺ፥ ዱማ ዱማ ቆሎንታ ቦዖንታይዳፓ ፆኦሲም ሹኪንቲ ሺኢካኒ ኮይሳ ባኮ ዒንጌኔ። ፆኦሲያ ዬያ ሺኢኬ ዒንጊፆና ዎዛዼኔ፤ ኖሄንታ ማኣሮ ዓሶዋ ዓንጄኔ።

![](https://cdn.door43.org/obs/jpg/360px/obs-en-03-15.jpg?direct&)

ዬካፓ ፆኦሲ፥ “ዓሲ ማዻ ፑርቶ ባኮ ዛሎሮ ላሚ ሳዖ ታኣኒ ጋዳንቂንዱዋኣያ ማዒፆ ጫኣቃኔ። ዎዚ ዓሲ ሃጊ ሾሾይንቴማፓ ዓርቃዖ ጎሜ ማዻያ ማዔቴያ ሳዖ ታኣኒ ላሚ ሃያይዲ ዋኣሢና ባይዛዓኬ” ጌዔኔ።

![](https://cdn.door43.org/obs/jpg/360px/obs-en-03-16.jpg?direct&)

ፆኦሲ ዬያ ጫኣቁሞኮ ማላታ ማዓንዳጉዲ ባራሪ ማዓ ዡኡሎ ማዤኔ። ዬካፓ ቢያ ዎዴ ዡኡሎ ጫሪንጫ ጴዻኔ። ፆኦሲ ዬያይዲ ዬያ ዡኡሎ ዛሎና ፔ ዴሮም ጫኣቄ ጫኣቁሞ ጶቂሣኔ።

*ጌኤዦ ማፃኣፖይዳ ኬኤዚንቴ ሃይሴ፡- ማዢንቲ ማፃኣፔ 6-8*

## 4. ፆኦሲ ዓብራሃሜም ጫኣቄ ጫኣቁሞ

https://openbiblestories.org/l/mdy/story-4/

![](https://cdn.door43.org/obs/jpg/360px/obs-en-04-01.jpg?direct&)

ባይሲንቶ ዋኣፆኮ ጊንፃ ዴሬ ሳዖይዳ ጊንሣ ሾይንቲ ዺቤኔ። ዬይ ዓሳ ቢያ ዒማና ፔቴ ሙኡቺ ጌስታኔ። ፆኦሲ ዔያቶ ዓይሤ ጎይፆ ሳዖ ቢያ ዴንዲ ኩሚፆ ሃሺ ፔቴይዳ ቡኪንቲ ካታማ ማዤኔ።

![](https://cdn.door43.org/obs/jpg/360px/obs-en-04-02.jpg?direct&)

ዬይ ዓሳ ሚርጌና ዖቶርቃያና ፆኦሲ ዔያቶም ኬኤዜ ባኮዋ ዔኤቢ ዓቴኔ ጎዑዋያኬ። ዬያ ሌሊቱዋንቴ ጫሪንቺ ሄላንዳኔ ጌዒ ዼኤፒ ዖዶሲ ኩቤ ማኣሪ (ፖኦቄ) ማዢሢ ዓርቄኔ። ፆኦሲያ ዬና ዓሳ ፑርታ ማዾ ዓርቄሢና ዬያ ሃሹዋዖ ማዻኒ ጊኢጌሢ ዴንቄኔ። ዬያፓ ዑሣ ዓኣዼ ፑርታ ጎሜያ ዔያታ ማዻኒ ዳንዳዓያኬ።

![](https://cdn.door43.org/obs/jpg/360px/obs-en-04-03.jpg?direct&)

ዬያሮ ፆኦሲ ሙኡጮ ዔያቶኮ ዱማ ዱማ ማሂ ሺርሺ፥ ዬያ ዴሮ ዓጮ ቢያ ዜርቄኔ። ዬና ዔያታ ማዣኒ ዓርቄ ካታሜሎ ሱንፃ “ባብሎኔ” ጌይንታያኬ። ዬኖኮ ቡሊፃ “ሲኢሪንቴያ፥ ጊንሣ ሃሣ ዣኣሌያ” ጌይሢኬ።

![](https://cdn.door43.org/obs/jpg/360px/obs-en-04-04.jpg?direct&)

ፄኤታ ሌዔኮ ጊንፃ ፆኦሲ ዓብራሜም ፔቴ ባኣዚ ኬኤዜኔ። ፆኦሲ ዒዛም “ኔ ዓጮንታ ኔ ማኣሮ ዓሶንታ ሃሺ ታ ኔና ዻዋ ዓጮ ዴንዴ። ዒኢካ ታ ኔና ዓንጃንዳኔ፤ ዼኤፒ ዴሬያ ታ ኔና ማሃንዳኔ፥ ሱንፆዋ ታ ኔኤኮ ዼኤፒሳንዳኔ፤ ኔና ዓንጃዞንሢ ታ ዓንጃንዳኔ፥ ጋዳንቃዞንሢ ታ ጋዳንቃንዳኔ፤ ኔ ዛሎና ሳዖ ዓሳ ቢያ ዓንጂንታንዳኔ።

![](https://cdn.door43.org/obs/jpg/360px/obs-en-04-05.jpg?direct&)

ዓብራሜያ ፆኦሲም ዓይሢንቲ፥ ፔ ማቾ ሶኦራንታ ማዻ ዓይሎንታ ዓኣ ቆሎዋ ቢያ ዔኪ ፆኦሲ ዒዛም ዻዌ ካኣናኔ ዓጮ ዴንዴኔ።

![](https://cdn.door43.org/obs/jpg/360px/obs-en-04-06.jpg?direct&)

ዓብራሜ ካኣናኔ ዓጮ ሄላዛ ፆኦሲ፥ “ኔ ኮይሎይዳ ዓኣ ባኮ ቢያ ዛጌ፤ ሃያ ኔ ዛጋ ዓጮ ቢያ ኔናንታ ኔ ዜርፆንታም ታ ዻካልሳንዳኔ” ጌዔኔ። ዓብራሜያ ዬኖ ዓጮይዳ ዴዔኔ።

![](https://cdn.door43.org/obs/jpg/360px/obs-en-04-07.jpg?direct&)

ፔቴ ኬሊ ዓብራሜ ሜልኬ ፃዲቄ ጌይንታ ዼኤፒ ፆኦሲም ማዻ ቄኤስኬያና ካኣሜኔ። ሜልኬ ፃዲቄያ ዓብራሜ ዓንጄኔ፤ “ጫሪንጮና ሳዖናኮ ጎዳ ማዔ ዼኤፖ ፆኦዛሢ ዓብራሜ ዓንጆንጎ” ጌዔኔ። ዓብራሜያ ሜልኬ ፃዲቄም ዓኣ ባኮኮ ታጶፓ ፔቴ ፔቴ ዒንጌኔ።

![](https://cdn.door43.org/obs/jpg/360px/obs-en-04-08.jpg?direct&)

ሚርጌ ሌዔ ዔያታ ናንጌቴያ ዓብራሜና ሶኦራናኮ ናይ ባኣያኬ። ፆኦሲ ዓብራሜም ዎዛ ቃኣላ ዒንኔ፤ ናይ ዒ ሾዓንዳሢና ዜርፃኣ ዒዛኮ ጫሪንጮ ዉጮጉዲ ዺባንዳሢያ ኬኤዜኔ። ዬያሮ ዓብራሜ ፆኦሲ ዒዛም ዒንጌ ሃጊ ማዓንዳ ዎዞ ቃኣሎ ጉሙርቂ ዔኬኔ። ዓብራሜያ ፆኦሲ ዒዛም ዒንጌ ሃጊ ማዓንዳ ዎዞ ቃኣሎ ጉሙርቂፆና ፂሎ ማዒ ፓይዲንቴኔ።

![](https://cdn.door43.org/obs/jpg/360px/obs-en-04-09.jpg?direct&)

ፆኦሲ ዓብራሜም ማዺ ኩንሣንዳ ባኮ ዛሎ ጫኣቄኔ። ጫኣቁሞ ጌይፃ ላምዖ ዱማ ዓሲ ዎላ ፔቴ ባኣዚ ማዺ ኩንሣንዳያ ማዒፆ ዔርዛ ጌኤሲ ጌስቲ ዔኤዓያኬ። ፆኦሲ ዓብራሜም፥ “ኔ ጊዳፓ ናይ ኬሲ ታ ኔኤም ዒንጋንዳኔ” ጌዔኔ። ዓብራሜኮ ዬማና ናይ ባኣሴ።

*ጌኤዦ ማፃኣፓ ኬኤዚንቴ ሃይሴ፡- ማዢንቲ ማፃኣፔ 11-15*

## 5. ሃጊ ማዓንዳ ዎዞ ኩንሤ ናዓሢ

https://openbiblestories.org/l/mdy/story-5/

![](https://cdn.door43.org/obs/jpg/360px/obs-en-05-01.jpg?direct&)

ታጶ ሌዔኮ ጊንፃ ዓብራሜና ሶኦራና ካኣናኔ ዓኣዺ ሄሌኔ፤ ዬያ ሄላንዳኣና ናይ ዔያቶኮ ባኣሴ። ዬያሮ ዓብራሜኮ ማቻ፥ ሶኦራ “ፆኦሲ ታና ናይንዶ ማዒፆ ላኣጌኔ፥ ታኣኒያ ጋርቼኔ፤ ዬያሮ ታ ዓይሌሎ ዓጋኣሮ ሃኣዛጌ፤ ዒዞ ዔኬ፥ ናይ ታኣም ዒዛ ሾዖም” ጌዔኔ።

![](https://cdn.door43.org/obs/jpg/360px/obs-en-05-02.jpg?direct&)

ዬያሮ ዓብራሜ ዓጋኣሮ ጊንፃኣ ማቾ ማሂ ዔኬም ዓጋኣራ ዓቲንቄ ናይ ሾዔኔ። ዓብራሜ ናዓሢኮ ሱንፆ “ዒስማዔኤሌ” ጌይ ጌሤኔ። ያዺ ማዔቴያ ሶኦራ “ዬይ ታኣም ማዓንዳባኣዚታዖኬ” ጌይ ዓጋኣሮ ቂኢሬኔ። ዬካፓ ዒስማዔኤሌኮ ሌዓ ታጶ ሃይሦ ማዓዛ ፆኦሲ ዓብራሜም ሂዚ ጌዔኔ።

![](https://cdn.door43.org/obs/jpg/360px/obs-en-05-03.jpg?direct&)

ፆኦሲ ዓብራሜም፥ “ታኣኒ ቢያ ባኣዚ ዳንዳዓ ፆኦሲኬ፤ ታ ኔኤም ታ ማዻንዳ ባኮ ጫኣቃንዳኔ” ጌዔኔ። ዓብራሜ ዒማና ባሊቶና ሳዓ ላሂ ዚጌኔ፤ ፆኦሲያ ዒዛም፥ “ኔኤኒ ዺቢ ዴሬኮ ዓዶ ማዓንዳኔ፤ ካናኣኔ ዓጮ ታኣኒ ኔኤና ኔ ዜርፆና ዻካልሳንዳኔ፤ ታኣኒ ናንጊና ዒንሢኮ ፆኦሲ ማዓንዳኔ፤ ኔኤኒ ጋዓንቴ ኔ ማኣሮይዳ ዓኣ ዓቲንቆኮ ቢያ ዓቲንቶ ቤርቶ ቲቄ” ጌዔኔ።

![](https://cdn.door43.org/obs/jpg/360px/obs-en-05-04.jpg?direct&)

ፆኦሲ፥ “ኔ ማቻ ሶኦራ ዓቲንቄ ናይ ሾዓንዳኔ፤ ዒዚ ዒንጊንቴ ሃጋ ማዓንዳ ዎዞ ኩንሣሢ ማዓንዳኔ፤ ሱንፆ ኔ ዒዛኮ ዪሳኣቄ ጌይ ጌሤ፤ ታ ማዻንዳኔ ጌዔ ጫኣቁሞ ዒዛና ዎላ ማሃንዳኔ። ዒዚያ ዼኤፒ ዴሬ ማዓንዳኔ። ዒስማዔኤሌያ ታኣኒ ዼኤፒ ዴሬ ማሃንዳኔ፤ ያዺ ማዔቴያ ታኣኮ ጫኣቁማ ዪሳኣቄና ዎላ ማዓንዳኔ” ጌዔኔ። ፆኦሲ ዓብራሜኮ ሱንፆ “ዓብራሃሜ” ጌይ ላኣሚ ጌሤኔ፤ ዬኖኮ ቡሊፃ “ሚርጌሢ ዓዶ” ጌይሢኬ። ፆኦሲ ሃሣ ሶኦራ ሱንፆ “ሳኣራ” ጌይ ሺርሺ ጌሤኔ፤ ዬኖኮዋ ቡሊፃ “ሚርጌሢ ዒንዶ” ጌይሢኬ።

![](https://cdn.door43.org/obs/jpg/360px/obs-en-05-05.jpg?direct&)

ዒማ ኬሎ ዓብራሃሜ ፔ ማኣሮይዳ ዓኣ ዓቲንቆኮ ዓቲንቶ ቤርቶ ቢያ ቲቄኔ። ሌዔኮ ጊንፃ ዓብራሃሜኮ ሌዓ 100 ማዔንቴ፥ ሶኦራኮ 99 ማዔንቴ ሶኦራ ዓብራሃሜም ዓቲንቄ ናይ ሾዔኔ፤ ፆኦሲ ዔያቶ ዓይሤ ጎይፆ ናዓሢኮ ሱንፆ ዔያታ “ዪሳኣቄ” ጌይ ጌሤኔ።

![](https://cdn.door43.org/obs/jpg/360px/obs-en-05-06.jpg?direct&)

ዪሳኣቄ ሃጊ ዔቃ ናይ ዓኣንቴ ፆኦሲ ዓብራሃሜኮ ፆኦሲዳ ዓኣ ጉሙርፆ ዛጋኒ ፔቴ ባኣዚ ዓይሤኔ፤ ሂዚ ጌዔኔ፦ “ኔኤኮ ፔቴ ናዓሢ ዔኪ ዴንዲ ታኣም ሹኪ ዒንጌ” ጌዔኔ። ዬያሮ ላሚ ሃሣ ዓብራሃሜ ፆኦሲም ዓይሢንቲ ናዖ ሹኪ ፆኦሲም ሺኢሻኒ ጊኢጊንቴኔ።

![](https://cdn.door43.org/obs/jpg/360px/obs-en-05-07.jpg?direct&)

ዓብራሃሜና ዪሳኣቄና ፆኦሲም ዒንጎ ባኮ ሺኢሾ ቤዞ ዴንዲፆይዳ ዓኣንቴ ዪሳኣቄ ዓዶ ኮራ፥ “ዓዴ፡ ፆኦሲም ሹኪ ዒንጎ ባኮ ሚቾ ሃንፂላ ሃይሾ፥ ማራዓ ዎካዳዖ?” ጌይ ዖኦጬኔ። ዓብራሃሜያ “ታ ናዓሢዮ፡ፆኦሲም ኑ ሹኪ ዒንጋንዳ ማራዖ ፆኦሲ ጊኢጊሻንዳኔ” ጌዔኔ።

![](https://cdn.door43.org/obs/jpg/360px/obs-en-05-08.jpg?direct&)

ፆኦሲም ዒንጎ ባኮ ሺኢሾ ቤዞ ዔያታ ሄላዛ ዓብራሃሜ ፔኤኮ ናዖ ዪሳኣቄ ዒንጎ ባኮ ዒንጎ ቤዞይዳ ቱኪ ላይሤኔ። ዓብራሃሜ ፔ ናዖ ሹካኒ ዓፓሮ ፔ ኩቻ ሌካ ዼጊዴኔ፤ ዒማና ፆኦሲ “ሃሼ፤ ናዖይዳ ፔቴ ባኣዚታዎ ማዺፖ፤ ኔ ታና ዒጊጫሢንታ ፔቴ ናዖማ ሚጪንቱዋዖ ታኣም ዒንጋኒ ላኣጊባኣሢ ታ ዔሬኔ” ጌዔኔ።

![](https://cdn.door43.org/obs/jpg/360px/obs-en-05-09.jpg?direct&)

ዓብራሃሜ ዒማና ዒኢካ ፔቴ ማራይ ቱሮና ማርቲ ዔቂ ዓኣንቴ ዴንቄኔ። ዬይ ማራዓሢ ዪሳኣቄ ዛሎ ሹኪንቲ ሺኢካንዳጉዲ ፆኦሲ ጊኢጊሼያኬ። ዓብራሃሜያ ዎዛና ዬያ ማራዓሢ ዔኪ ፆኦሲም ሹኪ ሺኢሼኔ።

![](https://cdn.door43.org/obs/jpg/360px/obs-en-05-10.jpg?direct&)

ፆኦሲ ዓብራሃሜም፥ “ኔ ኔኤኮ ፔቴ ናዓሢታዖ ዓይሱዋ ዓኣ ባኮ ቢያ ዒንጋኒ ጊኢጌያታሢሮ ታ ኔና ዓንጃኒ ጫኣቃኔ። ዜርፃ ኔኤኮ ጫሪንጮ ዉጫሢፓ ባሼ ሚርጋንዳኔ፤ ኔ ታኣም ዓይሢንቴሢሮ ዓጮ ዴራ ቢያ ኔ ዛሎና ዓንጂንታንዳኔ” ጌዔኔ።

*ጌኤዦ ማፃኣፖይዳ ኬኤዚንቴ ሃይሴ፡- ማዢንቲ ማፃኣፔ 16-22።*

## 6. ፆኦሲ ዪሳኣቄም ላኣሊ ጊኢጊሼሢ

https://openbiblestories.org/l/mdy/story-6/

![](https://cdn.door43.org/obs/jpg/360px/obs-en-06-01.jpg?direct&)

ዓብራሃሜ ሚርጌና ጋርቼስካፓ ዪሳኣቄ ዼጋቴኔ። ዬያሮ ዓብራሃሜ ፔ ዓይሎፓ ፔቴስኬያ ናኣዚ ዪሳኣቄም ላኣሊ ዔኪ ዬዓንዳጉዲ ፔ ዒጊኖ ዓጮ ዳኬኔ።

![](https://cdn.door43.org/obs/jpg/360px/obs-en-06-02.jpg?direct&)

ዬይ ዓይላሢ ሚርጌ ኬሊ ሃንቴስካፓ ዓብራሃሜኮ ዒጊኖ ሳዖ ሄሌኔ። ዒማና ፆኦሲ ዬያ ዓብራሃሜ ዳኬ ዓይላሢ ዒርቢቃ ኮራ ዳኬኔ። ዒርቢቃ ዓብራሃሜ ጌርሲኮ ናይኮ ናይኬ።

![](https://cdn.door43.org/obs/jpg/360px/obs-en-06-03.jpg?direct&)

ዒርቢቃኣ ዒማና ፔ ማኣሮ ዓሶ ሃሺ፥ ዬያ ዓብራሃሜ ዓይላሢና ዎላ ዪሳኣቄ ማኣሪ ዴንዳኒ ዔኤዔኔ። ዴንዲ ሄሄላዖ ዪሳኣቄም ሌዔኔ።

![](https://cdn.door43.org/obs/jpg/360px/obs-en-06-04.jpg?direct&)

ዬካፓ ሚርጌ ዎዴ ዴዔዖ ዓብራሃሜ ሃይቄኔ፤ ፆኦሲያ ዓብራሃሜም ማዻንዳኔ ጌይ ጫኣቄ ጫኣቁማ ቢያ ዪሳኣቄ ባንሢ ሺሬኔ። ፆኦሲ ዓብራሃሜም ዜርፆ ዒዛኮ ፓይዲንቱዋያ ማሃኒ ጫኣቂናኣኮኬ። ያዺ ማዔቴያ ዪሳኣቄኮ ማቻ ዒርቢቃ ናይ ሾዓኒ ዳንዳዒባኣሴ።

![](https://cdn.door43.org/obs/jpg/360px/obs-en-06-05.jpg?direct&)

ዪሳኣቄ ዒርቢቃም ፆኦሲ ሺኢቃዛ ዒዛ ሜንቴ ጎጳዻንዳጉዲ ሺኢጲፃ ዋይዚንቴኔ። ዒማና ላምዖ ናኣታ ዒርቢቃ ጎጳ ዓኣዖ ዎላ ማሹምቦ ዓርቃያ ማዔኔ። ዬያሮ ዒርቢቃ ዒዞ ጎጳ ናኣታ ዎዎይታቴያ ፆኦሲ ኮይላ ዖኦጬኔ።

![](https://cdn.door43.org/obs/jpg/360px/obs-en-06-06.jpg?direct&)

ፆኦሲያ ዒርቢቃም፥ “ኔ ጎጳ ዓኣ ላምዖ ናኣቶፓ ላምዖ ዱማ ዴሬ ኬስካንዳኔ፤ ዬያታ ዎላ ማሹምቦ ዓርቂ ዖልታያ ማዓንዳኔ፤ ጋዓንቴ ቶይዲ ጌኤዚም ዓይሌ ማዒ ዎርቃንዳኔ” ጌዔኔ።

![](https://cdn.door43.org/obs/jpg/360px/obs-en-06-07.jpg?direct&)

ዒርቢቃ ናኣቶ ሾዓኣና ቶይዳሢኮ ዑፃ ዞቄ፥ ጋፓኔና ዓኣያ ማዒ ኬስኬኔ፤ ዬያሮ “ዔኤሳዎ” ጌይ ሱንፃ ጌሢንቴኔ፤ ጌኤዛሢያ ዔኤሳዎኮ ቶኮ ዲንጊርዦ ዓርቂ ኬዴኔ፥ ሱንፃኣ ዒዛኮ “ያይቆኦቤ” ጌይንቴኔ።

*ጌኤዦ ማፃኣፖይዳ ኬኤዚንቴ ሃይሴ፡- ማዢንቲ ማፃኣፔ 24፥1-25፤ 26።*

## 7. ፆኦሲ ያይቆኦቤ ዓንጄሢ

https://openbiblestories.org/l/mdy/story-7/

![](https://cdn.door43.org/obs/jpg/360px/obs-en-07-01.jpg?direct&)

ዬያታ ናኣታ ዑጊ ኬስኬስካፓ ያይቆኦቤ ዒንዶና ዎላ ማኣራ ፔኤቃኒ ናሽካኔ። ዔኤሳዎ ጋዓንቴ ኬሞ ናሽካያ ማዔኔ። ዒርቢቃኣ ያይቆኦቤ ናሽካኔ፤ ዪሳኣቄ ጋዓንቴ ዔኤሳዎ ናሽካኔ።

![](https://cdn.door43.org/obs/jpg/360px/obs-en-07-02.jpg?direct&)

ፔቴ ኬሊ ዔኤሳዎ ኬማሢፓ ናይዺንቲ ማዒ ሙኬኔ። ዔኤሳዎ ዒማና ያይቆኦቤ ኮይላ፥ “ሃዳራ፡ ኔ ካሤ ካፃፓ ታኣም ዻካ ዒንጌቴራ” ጌዔኔ። ያይቆኦቤ ጋዓንቴ፥ “ቤርታዺጋፓ ኔኤኮ ቶይዱሞ ቢታንቶ ታኣም ዒንጌ” ጌዔኔ። ዬያሮ ዔኤሳዎ ፔኤኮ ቶይዱሞ ቢታንቱሞማ ያይቆኦቤም ዒንጋዛ ያይቆኦቤያ ካሤ ካፆፓ ዔኤሳዎም ዒንጌኔ።

![](https://cdn.door43.org/obs/jpg/360px/obs-en-07-03.jpg?direct&)

ያዺ ማዔስካፓ ዪሳኣቄ ዔኤሳዎ ዓንጃኒ ኮዔኔ። ጋዓንቴ ዒርቢቃና ያይቆኦቤና ዎላ ዞርቲ ዪሳኣቄ ጌሼኔ። ጌሺፆሮ ዔኤሳዎ ያይቆኦቤ ማሊ ዪሳኣቄ ኮይላ ሺኢኬኔ፤ ዪሳኣቄ ሚርጌና ጋርቼሢሮ ዓኣፓ ዴንቁዋሴ። ዬያሮ ያይቆኦቤ ዔኤሳዎ ማኣዓሢ ማይንቲ፥ ጋፓና ጴዻ ቤዞ ዓኣቺሢሮ ዋኣሪ ዒልዒ ባቃኖና ኩጮ ዑፆናይዳ ማኣዒ ዪሳኣቄ ኮይላ ሙኪ ማልቴኔ።

![](https://cdn.door43.org/obs/jpg/360px/obs-en-07-04.jpg?direct&)

ያይቆኦቤ ዪሳኣቄ ኮይላ ሙካዖ፥ “ዓዴ፥ ታኣኒ ዔኤሳዎኬ፤ ታ ሃይሾ ሙኬኔ፤ ታና ኔ ዓንጃኒ ዳንዳዓኔ” ጌዔኔ። ዬያሮ ዪሳኣቄ ዑፆ ዓርቂ ዛጋዖ ዋኣሪ ፓጋኔታሢ ዱማሲባኣሴ፥ ዑፆዋ ዒ ሲንቂ ዛጋዛ ዔኤሳዎ ዔኤሳዎ ጌዔሢሮ ጎኔኬ ጌይ ዓንጄኔ።

![](https://cdn.door43.org/obs/jpg/360px/obs-en-07-05.jpg?direct&)

ያይቆኦቤ ዬያይዲ ዔኤሳዎኮ ቶይዱሞ ቢታንቶንታ ዓንጆዋ ጌሺ ዔኬሢሮ ዒዚ ያይቆኦቤ ዒፂ ኮሜኔ፤ ዓዴ ሃይቄስካፓ ዒዛ ዎዻኒ ማሌኔ።

![](https://cdn.door43.org/obs/jpg/360px/obs-en-07-06.jpg?direct&)

ጋዓንቴ ዒርቢቃ ዔኤሳዎ ማዻኒ ማሌ ባኮ ዋይዜኔ። ዬያሮ ዪሳኣቄና ዎላ ዞርቲ ዔያቶ ዒጊኖና ዎላ ዴንዲ ናንጋንዳጉዲ ሃኬ ዓኣ ዒጊኖ ኮራ ያይቆኦቤ ዔያታ ዳኬኔ።

![](https://cdn.door43.org/obs/jpg/360px/obs-en-07-07.jpg?direct&)

ያይቆኦቤ ዒማና ዴንዲ ሚርጌ ሌዔ ዒርቢቃ ዒጊኖና ዎላ ናንጌኔ። ዒኢካ ያይቆኦቤ ናንጌ ዎዶና ላኣሊ ዔኪ 12 ዓቲንቄ ናይ፥ 1 ዉዱሮ ናይ ሾዔኔ። ፆኦሲያ ዒዛ ሚርጌና ዖርጎቼኔ።

![](https://cdn.door43.org/obs/jpg/360px/obs-en-07-08.jpg?direct&)

ያይቆኦቤ ሜሶፖታሚያይዳ ላማታሚ ሌዔ ናንጌስካፓ ፔ ማኣሮ ዓሶ፥ ዒዛም ማዾ ማዻ ዓይሎንታ ቆሎዋ ቢያ ዔኪ ካኣናኔ ዓጮ ማዓኒ ማሊ ዔቄኔ።

![](https://cdn.door43.org/obs/jpg/360px/obs-en-07-09.jpg?direct&)

ያይቆኦቤ ፔ ዒኖና “ዔኤሳዎ ሄኤዶ ሄሊ ታና ዎዻኒ ማላ ጎይሣ ናንዳኔ” ጌይ ዒጊጬኔ። ዬያሮ ጌኤዞ ሺሚሻኒ ዔኤሳዎም ሚርጌ ባይ ዒሺሲ ቤርታ ዳኬኔ። ባኣቶ ዒሺ ሙኬ ያይቆኦቤ ዓይላ ዔኤሳዎም “ኔ ዓይላሢ ያይቆኦቤ ሃያ ባኣቶ ኔኤም ዒንጎም ዳኬኔ፤ ዒዚ ሃይሾ ጊንፆ ሙኪ ሙኪ ዓኣኔ” ጌዔኔ።

![](https://cdn.door43.org/obs/jpg/360px/obs-en-07-10.jpg?direct&)

ዔኤሳዎ ጋዓንቴ ዔያታ ቤርታ ዎላ ጌስቲ ዓቶም ጌይ ዎሊ ዔኬሢሮ ዎላ ካኣሚፆ ዎዛና ካፓኔ። ዬያይዲ ዔያታ ዎላ ካኣሜም ያይቆኦቤ ካኣናኔይዳ ኮሺ ናንጌኔ፤ ጊንፃፓ ዪሳኣቄ ሃይቄኔ፥ ያይቆኦቤና ዔኤሳዎና ዒዛ ዬኤኪ ዱኡኬኔ፤ ፆኦሲ ዓብራሃሜም ማዻንዳኔ ጌይ ጫኣቄ ጫኣቁማ ሃሣ ዪሳኣቄፓ ያይቆኦቤ ባንሢ ሺሬኔ።

*ጌኤዦ ማፃኣፓ ኬኤዚንቴ ሃይሴ፡- ማዢንቲ ማፃኣፔ 25፡27-33*

## 8. ፆኦሲ ዮሴፔንታ ማኣሮ ዓሶዋ ዓውሴሢ

https://openbiblestories.org/l/mdy/story-8/

![](https://cdn.door43.org/obs/jpg/360px/obs-en-08-01.jpg?direct&)

ዺቢ ሌዔኮ ጊንፃፓ፥ ያይቆኦቤ ጋርቺ ዓኣዖ ዒዛኮ ቆልሞ ሄንቂ ሞኦስካ ናንጋ ናኣቶ (ዮሴፔ ጌርሲንሢ) ዛጋንዳጉዲ፤ ጋላኣ ዔያቶም ዔኪ ዓኣዻንዳጉዲ ዮሴፔ ዳኬኔ።

![](https://cdn.door43.org/obs/jpg/360px/obs-en-08-02.jpg?direct&)

ዓዳሢ ያይቆኦቤ ዮሴፔ ሚርጌና ናሽካሢሮ፥ ጊንሣ ሃሣ ዔያቶኮ ዒ ሱኡጌ ማዓንዳያ ማዒፆ ዛሎ ዓውቲ ዓውታዼሢሮ ጌርሲንሢ ዮሴፔ ዒፄኔ። ዮሴፔ ጌርሲንሢ ዛጋኒ ሙካዛ፥ ጌኔ ጎይሢና ዔያታ ዒዛ ዓርቂ ኮርሞ ዓሲም ሻንቼኔ።

![](https://cdn.door43.org/obs/jpg/360px/obs-en-08-03.jpg?direct&)

ዮሴፔኮ ጌርሲንሢ ማኣሪ ማዒ ሙካንዳሢኮ ቤርታ ዔያታ ዒዛ ዑፃፓ ኬሲ ዔኬ ማኣዓሢ ዳርዚ ዋኣሪ ሱጉሢ ዑሼኔ። ዬካፓ ዬኖ ሱጉፆና ፑርቴ ማኣዔሎ ዔኪ ሙኪ ዓዶ ያይቆኦቤም ዻዌኔ። ዓዴያ ፔቴ ቦዖ ዮሴፔ ዎዺ ሙዔኔ፥ ጌይ ዬኤካዖ ሲዬኔ።

![](https://cdn.door43.org/obs/jpg/360px/obs-en-08-04.jpg?direct&)

ዬንሢ ዓይሌ ሻንቺ ሃንታ ኮርሞ ዓሶንሢ ዮሴፔ ጊብፄ ዔኪ ዴንዴኔ። ዬኖ ዎዶና ጊብፄ ዓባዬ ዎሮ ዓጮይዳ ዓኣያ፥ ዎልቃዻያ ዶዲ ዓጪኬ። ዬንሢ ኮርሞ ዓሶንሢ ፔቴ ቢታንቶ ዓኣ ሱኡጌስኬያም ዓይሌ ማሂ ዮሴፔ ጊብፄይዳ ሻንቼኔ። ዬካፓ ዮሴፔ ፔ ጎዳሢ ቃራ ጎይሢና ማዺ ማኣዴኔ፤ ፆኦሲያ ዮሴፔ ዓንጄኔ።

![](https://cdn.door43.org/obs/jpg/360px/obs-en-08-05.jpg?direct&)

ያዺ ጌይ ዒ ዓኣንቴ ዒዛ ጎዳሢኮ ማቻ ዮሴፔና ላሃኒ ኮዔኔ። ዮሴፔ ጋዓንቴ “ፆኦሲ ቤርታ ጎሜ ታ ማዻዓ” ጌይ ዒፄኔ። ዬያሮ ጎዳሢ ማቻ ዻጋዺ ሉኡዙሞ ጎይሢና ዎጌና ዒዛ ዓይሲሢ ቱኪሴኔ፤ ዒዚ ጋዓንቴ ቱኡዞ ማኣሮይዳኣ ፆኦሲም ጉሙርቂንታያ ማዒ ጴዼሢሮ ፆኦሲ ዒዛ ዓንጄኔ።

![](https://cdn.door43.org/obs/jpg/360px/obs-en-08-06.jpg?direct&)

ዎዚ ዮሴፔ ፂሎታቴያ ላምዖ ሌዔ ሄላንዳኣና ቱኡዞ ማኣራ ቱኡቲ ዴዔኔ። ፔቴ ዋንቴ ጊብፄ ዓጮ ካኣቲ (ፓኣሮኦኔ) ፔና ዲቃሣ ላምዖ ዓውቲ ዓውታዼኔ። ዒዛ ዞራ ዓሶይዳፓ ፔቴታዖ ዬያ ዓውቶ ዒዛም ቡላኒ ዳንዳዒባኣሴ።

![](https://cdn.door43.org/obs/jpg/360px/obs-en-08-07.jpg?direct&)

ፆኦሲ ጋዓንቴ ዮሴፔም ዓውቲ ቡሊሢ ዔራቶ ዒንጊናኣኮኬ፤ ዬያሮ ፓኣሮኦኔ ቱኡዞ ማኣራፓ ዮሴፔ ዔኤሊሲ ዔኪ ዬዔኔ። ዮሴፔ ዓውቶ ቡላዖ፥ “ፆኦሲ ላንካይ ሚሺ ሌዔ ዳካንዳኔ፤ ሄሊሲ ሃሣ ላንካይ ናይዚ ሌዔ ዓኣኔ” ጌዔኔ።

![](https://cdn.door43.org/obs/jpg/360px/obs-en-08-08.jpg?direct&)

ፓኣሮኦኔያ ዮሴፔ ዔራቶ ሚርጌ ዲቃቲ ሄርሼኔ፤ ዬያሮ ጊብፄ ዓጮይዳ ዒዛፓ ሄሊሲ ዴማ ማዒ ማዻንዳ ቢታንቶ ዒንጌኔ።

![](https://cdn.door43.org/obs/jpg/360px/obs-en-08-09.jpg?direct&)

ዮሴፔያ ላንካዎ ሚዦ ሌዖይዳ ቢያ ዺቢ ሃኣኮ ዒ ጊኢጊሼ ኮኖይዳ ዓርሢንታንዳጉዲ ዴሮም ኬኤዜኔ። ዴራኣ ሃኣኮ ሺኢሼም ዺቢ ሃኣኮ ኮኖይዳ ዓርዴሢሮ ላንካዎ ናዮ ሌዖና ዬያ ኮኖይዳፓ ዮሴፔ ሃኣኮ ዴሮም ሻንቼኔ፤ ዬያሮ ሙኡዚም ጊዳ ሃኣኮ ዓሳ ቢያ ዴንቄኔ።

![](https://cdn.door43.org/obs/jpg/360px/obs-en-08-10.jpg?direct&)

ናዮኮ ዶዲፃ ጊብፄ ዓጫ ሌሊቱዋንቴ ያይቆኦቤንታ ማኣሮ ዓሶንታ ናንጋ ካኣናኔይዳኣ ዒማዺኬ።

![](https://cdn.door43.org/obs/jpg/360px/obs-en-08-11.jpg?direct&)

ዬያሮ ያይቆኦቤ ሃኣኮ ሻንቆም ናኣቶ ጊብፄ ዓጮ ዳኬኔ። ዮሴፔኮ ጌርሲንሢ ሃኣኮ ሻሞሮ ጊብፄይዳ ዮሴፔ ቤርታ ሙኪ ዔቃዖ ዬይ ዮሴፔታሢ ዱማሲ ዔሪባኣሴ፤ ዒ ጋዓንቴ ዔያቶ ዔሬኔ።

![](https://cdn.door43.org/obs/jpg/360px/obs-en-08-12.jpg?direct&)

ዮሴፔ ዒዛኮ ጌርሲንሢ ዖኦጪሢና ሴካ ሃንጋ ጌይሲ ዛጌስካፓ፥ “ጎዖንቴ ዔያቶቱዋቴሽ” ጌይ ማላዖ፥ “ዒጊጪፖቴ፤ ታኣኒ ዒንሢኮ ጌርሲ ዮሴፔኬ፥ ታና ዒንሢ ዓይሌ ማሂ ሻንቼያና ፑርታ ባኣዚ ታና ሄሎም ጌይ ማሊኬ፤ ጋዓንቴ ፆኦሲ ዬያ ፑርቱሞ ማሊፆ ኮሹሞሮ ማሂ ሺርሼኔ። ዬያሮ ሃይካ ሙኪ ጊብፄይዳ ናንጉዋቴ፥ ታኣኒ ዒንሢንታ ዒንሢ ማኣሮ ዓሶንታም ኮይሳ ባኣዚ ዒንጊ ማኣዳንዳኔ” ጌዔኔ።

![](https://cdn.door43.org/obs/jpg/360px/obs-en-08-13.jpg?direct&)

ዮሴፔኮ ጌርሲንሢ ፔ ዓጮ ማዒ ዴንዳዖ ዮሴፔ ሼምፔና ዓኣሢ ዓዶ፥ ያይቆኦቤም ኬኤዛዛ ዒ ሚርጌና ዎዛዼኔ።

![](https://cdn.door43.org/obs/jpg/360px/obs-en-08-14.jpg?direct&)

ዎዚ ያይቆኦቤ ጋርቼቴያ ፔ ማኣሮ ዓሶ ቢያሢና ዎላ ጊብፄ ዴንዲ ዒኢካ ናንጌኔ። ያይቆኦቤ ሃይቃንዳሢኮ ቤርታ ፔቴ ፔቴ ናኣቶ ዓንጄኔ።

![](https://cdn.door43.org/obs/jpg/360px/obs-en-08-15.jpg?direct&)

ፆኦሲ ዓብራሃሜም ማዻንዳኔ ጌይ ጫኣቄ ጫኣቁሞ ዎዛ ዪሳኣቄ ባንሢ ሺሬኔ፤ ዬካፓ ያይቆኦቤ ባንሢ፥ ሄሊሳዖ ታጶ ላምዖ ያይቆኦቤ ናኣቶና ማኣሮ ዓሶና ባንሢ ሺሬኔ። ታጶ ላምዖ ናኣቶኮ ዜርፃ ታጶ ላምዖ ዒስራዔኤሌ ፃጶ ማዔኔ።

*ጌኤዦ ማፃኣፖይዳ ኬኤዚንቴ ሃይሴ፡- ማዢንቲ ማፃኣፔ 37-50።*

## 9. ፆኦሲ ሙሴ ፔ ማዾም ዔኤሌሢ

https://openbiblestories.org/l/mdy/story-9/

![](https://cdn.door43.org/obs/jpg/360px/obs-en-09-01.jpg?direct&)

ዮሴፔ ሃይቄስካፓ ዒጊና ቢያ ዒዛኮ ጊብፄይዳ ዴዔኔ። ዔያቶንታ ዔያቶኮ ዜርፆንታ ሚርጌ ሌዔ ዒኢካ ናንጌኔ፤ ሚርጌ ናይያኣ ሾዔኔ፤ ዔያታ ዒስራዔኤሌ ዓሶዋ ጌይንቲ ዔኤሊንቴኔ።

![](https://cdn.door43.org/obs/jpg/360px/obs-en-09-02.jpg?direct&)

ፄኤታና ፓይዲንታ ሌዔኮ ጊንፃ ዒስራዔኤሌ ዓሶኮ ፓይዳ ዺቢ ዺቢ ዓኣዼኔ። ጊብፄ ዓሳኣ ዮሴፔንታ ዒ ዔያቶ ማኣዳኒ ማዼ ባኮዋ ቢያ ዋሌኔ። ዒስራዔኤሌ ዓሳ ሚርጊ ሚርጊ ዓኣዼሢሮ ጊብፄ ዓሳ ዔያቶ ዒጊጬኔ። ዬያሮ ዬኖ ዎዶና ዓጮ ዎይሣ ካኣቲ (ፓኣሮኔ) ዒስራዔኤሌ ዓሶ ጊብፄ ዓሶኮ ዓይሌ ማሄኔ።

![](https://cdn.door43.org/obs/jpg/360px/obs-en-09-03.jpg?direct&)

ጊብፄ ዓሳ ዒስራዔኤሌ ዓሶ ሹቺ ማኣሪ ማዣንዳጉዲ፥ ካታማ ቢያ ዔያታ ማዣንዳጉዲያኣ ዎልቃዼኔ። ዬይ ዴኤፆ ማዻ ናንጎ ዔያቶኮ ዋኣዮ ናንጊ ማሄኔ። ጋዓንቴ ፆኦሲ ዔያቶ ዓንጄኔ፥ ሚርጌ ናይያኣ ዔያቶኮ ዓኣያ ማዔኔ።

![](https://cdn.door43.org/obs/jpg/360px/obs-en-09-04.jpg?direct&)

ዒማና ፓኣሮኔ ዒስራዔኤሌ ዓሶኮ ሚርጌ ናይ ዓኣሢ ዛጌኔ፤ ዬያሮ ዒዚ ዒስራዔኤሌ ዓሳ ዓቲንቄ ናይ ሾዓማና ዓባዬ ዎሮይዳ ኬኤሪ ኬኤሪ ዎዻንዳጉዲ ፔ ዴሮ ዓይሤኔ።

![](https://cdn.door43.org/obs/jpg/360px/obs-en-09-05.jpg?direct&)

ዬኖ ዎዶና ፔቴ ዒስራዔኤሌ ዓሲስኬና ዓቲንቄ ናይ ሾዔኔ፤ ዒዞንታ ዓኒንታ ዔያታ ዳንዳዓማ ሄላንዳኣና ናዓሢ ዓኣቼኔ።

![](https://cdn.door43.org/obs/jpg/360px/obs-en-09-06.jpg?direct&)

ዬያፓ ዑሣ ዔያታ ዓኣቻኒ ዳንዳዒባኣሢሮ ናዓሢ ሾዔ ዓሳ ዒዛ ዔኪ ዓባዬ ዎሮ ዓጮ ዴንዳዖ ኮታ ማላ ባኣዚ፥ ዋኣሢ ጌሉዋያ ኮሺ ዒኢካ ዓጋዖ ማጫሬ ባኣካ ጌሤኔ። ዒማና ናዓሢኮ ሚሻ ዒዛይዳ ማዺንታ ባኮ ዛጋኒ ሴካ ሃንጋ ሃንቲ ሃንቲ ሙራኔ።

![](https://cdn.door43.org/obs/jpg/360px/obs-en-09-07.jpg?direct&)

ፓኣሮኔኮ ናይስኬና (ካኣቲ ናኣ) ዬኖ ዎሮ ኬዳዖ ኮታ ማላ ባኣዚ ዴንቂ፥ ጋራ ዓይጌ ዓኣቴያ ቡሊ ዛጌኔ። ዬኖኮ ጋራ ናይ ዓኣሢ ዴንቃዖ ፔ ናይ ማሂ ዔኬኔ። ካኣቲ ናኣ ዒማና ናዓሢ ዒዞም ዻንሥሢ ዲቻንዳጉዲ ፔቴ ዒስራዔኤሌ ላኣሊስኬኖም ሚኢሼ ጪጊ ዒንጌኔ። ዬና ላኣሌላ ናዓሢኮ ዒንዶታሢ ጋዓንቴ ዒዛ ዔሪባኣሴ። ናዓሢ ዲጪ፥ ጉኡጳዛ ላኣሌላ ፓኣሮኔ ናዎም ማሂ ዒንጌኔ፤ ሱንፆዋ ዒዛኮ ዔያታ “ሙሴ” ጌይ ጌሤኔ።

![](https://cdn.door43.org/obs/jpg/360px/obs-en-09-08.jpg?direct&)

ሙሴ ዼኤፔስካፓ ፔቴ ኬሊ ጊብፄ ዓሲስኬይ ዒስራዔኤሌ ዓሲ ማዔ ዓይሌስኬያ ጳርቃንቴ ዛጋዖ ፔ ዒጊናሢ ማዔ ዒስራዔኤሌ ዓሢ ዓውሳኒ ኮዔኔ።

![](https://cdn.door43.org/obs/jpg/360px/obs-en-09-09.jpg?direct&)

ዒማና ሙሴ ዖኦኒያ ዒዛ ዴንቁዋሴ ጌይ ጊብፄ ዓሢ ዎዺ ማኣሻላ ካኣሺ ዱኡኬኔ። ጋዓንቴ ዬያ ሙሴ ማዻሢ ፔቴ ዓሲ ዴንቄኔ።

![](https://cdn.door43.org/obs/jpg/360px/obs-en-09-10.jpg?direct&)

ሙሴ ማዼ ባኮ ፓኣሮኔ ዋይዛዖ ዒዛ ዎዻኒ ኮዔኔ። ሙሴ ጋዓንቴ ፓኣሮኦኔኮ ዖሎ ዓሳ ዒዛ ዎዹዋጉዲ፥ ቶላኒ ዓሲ ናንጉዋ ዳውሌ ጊብፄ ዓጫፓ ቤቲ ዓኣዼኔ።

![](https://cdn.door43.org/obs/jpg/360px/obs-en-09-11.jpg?direct&)

ጊብፄፓ ሃኪ ዴንዲ ዒ ዓኣ ቤዞይዳ ፔቴ ዓሲ ማኣሪ ጌሊ ማራይ ሄንቃያ ማዔኔ። ዬያ ዓሢኮ ዉዱሮ ናይስኬኖዋ ዔኪ ላምዖ ዓቲንቄ ናይ ሾዔኔ።

![](https://cdn.door43.org/obs/jpg/360px/obs-en-09-12.jpg?direct&)

ፔቴ ኬሊ ሙሴ ማራቶ ሄንቂቤቃ ካዮ ታሚ ዓርቂ ዔኤታያ ዴንቄኔ፤ ጋዓንቴ ዬይ ታማ ካዮ ሙዑዋያኬ፤ ሙሴ ዬያ ኮሺ ዛጋኒ ካዮ ባንሢ ዶጬኔ። ዒ ዬያ ዔኤታ ታሞ ባንሢ ዑካኣና ፆኦሲኮ ዑኡሲ “ሙሴ፥ ኔኤኒ ፆኦሲም ዱማዼ ቤሲዳ ዔቂ ዓኣሢሮ ቶካፓ ዱርዞ ኔኤኮ ኬሴ” ጌዔኔ።

![](https://cdn.door43.org/obs/jpg/360px/obs-en-09-13.jpg?direct&)

ፆኦሲ ሃሣ “ታ ዴሮኮ ሜቶ ታኣኒ ዛጌሢሮ ፓኣሮኔ ኮይላ ታ ኔና ዳካንዳኔ፤ ዒስራዔኤሌያ ኔኤኒ ዓይላታፓ ኬሳንዳኔ፤ ታኣኒ ዓብራሃሜም፥ ዪሳኣቄንታ ያይቆኦቤንታም ሃጊ ማዓንዳ ዎዛ ማሂ ዒንጌ ካኣናኔ ዓጮዋ ዔያቶ ታ ዻካልሳንዳኔ” ጌዔኔ።

![](https://cdn.door43.org/obs/jpg/360px/obs-en-09-14.jpg?direct&)

ሙሴ ጋዓንቴ፥ “ዴራ፡ ‘ዖ ኔና ዳኬይ’ ጌይ ታና ዖኦጬቴ ታ ዎዚ ጋዓንዳይ?” ጌይ ፆኦሲ ኮይላ ዖኦጬኔ። ፆኦሲ ሙሴም፥ “ታኣኒ ዓኣያ፥ ሃሣ ናንጋሢኬ፤ ዬያሮ ‘ዓኣሢና ናንጋሢ’ ታና ዒንሢ ኮይላ ዳኬኔ ጌዔ” ጌኤኔ።

![](https://cdn.door43.org/obs/jpg/360px/obs-en-09-15.jpg?direct&)

ሙሴ ዒጊጬሢሮ ፓኣሮኔ ኮራ ዓኣዻኒ ኮይባኣሴ። ዬያ ዒ ኮይባኣሢ “ጌኤሲ ጌስቲሢ ታ ዔሩዋሴ” ጌይ ማሌሢሮኬ። ፆኦሲ ጋዓንቴ ሙሴና ዎላ ዒዛኮ ጌርሲ ዓኣሮኔ ዒዛ ማኣዳኒ ዴንዶም ዳኬኔ። ፓኣሮኔኮ ዒኖ ፆኦሲ ፔኤሮ ዶዲሻንዳያ ማዔሢ ሙሴና ዓኣሮኔናም ላቲ ኬኤዜኔ።

*ጌኤዦ ማፃኣፖይዳ ኬኤዚንቴ ሃይሴ፡- ኬሲ ማፃኣፔ 1-4።*

## 10. ባይዞም ጌይ ዳኮና ታጶ ባኮ

https://openbiblestories.org/l/mdy/story-10/

![](https://cdn.door43.org/obs/jpg/360px/obs-en-10-01.jpg?direct&)

ሙሴና ዓኣሮኔና ጊብፄ ካኣቲ (ፓኣሮኔ) ኮይላ ዴንዴኔ። ዔያታ ዴንዳዖ “ዒስራዔኤሌ ፆኦሲ ‘ታኣኮ ዴሮ ሃሼ!’ ጋዓኔ” ጌኤኔ፤ ፓኣሮኔ ጋዓንቴ ዔያቶሲ ዋይዚባኣሴ። ዒስራዔኤሌ ዓሶ ዓይላቶ ማዾ ሃሺሲ ዳኪፃፓ ሃቺም ዴኤሢ ማዾ ማዻንዳጉዲ ዎልቃዼኔ።

![](https://cdn.door43.org/obs/jpg/360px/obs-en-10-02.jpg?direct&)

ፓኣሮኔ ዴሮ ‘ሃሻዓ’ ጌይፆና ዶዴኔ፤ ዬያሮ ፆኦሲ ጊብፄ ዓሶ ዎዺ ባይዛንዳ ታጶ ባኣዚ ዳኬኔ። ፆኦሲ ዬያይዲፆና ጊብፄ ካኣቲና ዔያቶኮ ፆኦዞናፓ ቢያ ባሼ ዎልቄና ማዔሢ ዻዌኔ።

![](https://cdn.door43.org/obs/jpg/360px/obs-en-10-03.jpg?direct&)

ፆኦሲ ዒማና ዓባዬ ዎሮ ዋኣፆ ሱጉሢ ማሂ ላኣሜኔ፤ ጋዓንቴ ጊብፄ ካኣቲ (ፓኣሮኔ) ዒስራዔኤሌ ዴሮ ሃሺባኣሴ።

![](https://cdn.door43.org/obs/jpg/360px/obs-en-10-04.jpg?direct&)

ፆኦሲ ጊብፄ ቢያይዳ ሻዻ ፓንቆ ዳኬኔ። ጊብፄ ካኣቲያ ሙሴ ዬያ ፓንቃሢ ባይዛንዳጉዲ ሺኢቄኔ። ሙሴያ ፆኦሲ ሺኢቄሢሮ ፓንቃሢ ቢያ ሃይቄኔ። ጊብፄ ካኣቲ ጋዓንቴ ፔ ዒኖ ዶዲሺ ዒስራዔኤሌ ዓሶ ሃሺባኣሴ።

![](https://cdn.door43.org/obs/jpg/360px/obs-en-10-05.jpg?direct&)

ያፓ ሃሣ ፆኦሲ ሳዖ ባባይዛ ጩጉቺ ዳኬኔ፤ ሄሊሳዖ ጊንሣ ሶኦፆንቦ ዉፃሌ ዳኬኔ። ጊብፄ ካኣቲያ ሙሴና ዓኣሮኔና ዔኤሊ ዬያ ባይዛ ባኮ ዔያታ ዓጫፓ ሺኢሼቴ ዒስራዔኤሌ ዓሶ ዒ ሃሻንዳሢ ኬኤዜኔ። ሙሴያ ፆኦሲ ሺኢቃዛ ዬያ ባኮ ፆኦሲ ባይዜኔ። ያዺ ማዔቴያ ጊብፄ ካኣቲ ፔ ዒኖ ዶዲሺ ዴሮ ሃሾ ዒፄኔ።

![](https://cdn.door43.org/obs/jpg/360px/obs-en-10-06.jpg?direct&)

ጊንሣ ሃሣ ፆኦሲ ጊብፄ ዓሶኮ ባኣቶ ቢያ ዎዼኔ፤ ጋዓንቴ ጊብፄ ካኣቲ ዒስራዔኤሌ ዓሶ ሃሾ ዒፄኔ።

![](https://cdn.door43.org/obs/jpg/360px/obs-en-10-07.jpg?direct&)

ዬካፓ ሙሴ ጊብፄ ካኣቲ ቤርታ ዲቢንሢ ሌካ ጫሪንካ ላኣላንዳጉዲ ፆኦሲ ዓይሤኔ፤ ሙሴ ያዺዴስካፓ ጊብፄ ዓሶኮ ዑፃ ቢያ ዻርጬ ኪሢ ሌሊ ማዔኔ፤ ዬይ ኪፃ ዒስራዔኤሌ ዓሶይዳ ባኣያ ማዔኔ። ጋዓንቴ ፆኦሲ ፓኣሮኮ (ጊብፄ ካኣቲኮ) ዒኖ ዶዲሼሢሮ ዒስራዔኤሌ ዓሶ ዒ ሃሺባኣሴ።

![](https://cdn.door43.org/obs/jpg/360px/obs-en-10-08.jpg?direct&)

ዬካፓ ፆኦሲ ጊብፄ ዓጮይዳ ዓኣ ባቃሌ ሃኣኮንታ ሶኦፓይዳ ዓኣ ዓሶንታ ቆሎንታ ቢያ ዎዺ ኩርሴ ሻቺ ዋርቂሴኔ። ዒስራዔኤሌ ካኣቲያ ሙሴ ዔኤላዖ፥ “ታ ዻቤኔ፤ ዒንሢ ዒስራዔኤሌ ዴሮ ዔኪ ዓኣዻኒ ዳንዳዓኔ” ጌዔኔ። ዬያሮ ሙሴ ፆኦሲ ሺኢቄኔ፥ ሻጫኣ ዋዾ ሃሼኔ።

![](https://cdn.door43.org/obs/jpg/360px/obs-en-10-09.jpg?direct&)

ጋዓንቴ ፓኣሮኔ ላሚ ፔ ዒኖ ዶዲሺ ጎሜ ማዼኔ። ዒስራዔኤሌ ዴሮዋ ሃሺባኣሴ።

![](https://cdn.door43.org/obs/jpg/360px/obs-en-10-10.jpg?direct&)

ዬያሮ ፆኦሲ ጊብፄ ዓሶይዳ ዓቢሢ ዳኬኔ። ዬይ ዓቢፃ ሻጫ ዓይሴ ሃኣኮ ባቃሎ ሙዪ ኩርሴኔ።

![](https://cdn.door43.org/obs/jpg/360px/obs-en-10-11.jpg?direct&)

ዬካፓ ፆኦሲ ሃይሦ ኬሊ ጉቤ ጊብፄ ዓጮ ዹሚሼኔ። ጊብፄ ዓሳ ጋራፓ ኬሲ ባሺንታንዳያ ሄላንዳኣና ሳዓ ዹሚ ዴዔኔ። ዒስራዔኤሌ ዓሳ ናንጋ ቤዛ ጋዓንቴ ፖዔኬ።

![](https://cdn.door43.org/obs/jpg/360px/obs-en-10-12.jpg?direct&)

ዬያ ባይሲንታም ዳኮና ታዞጶ ባኮኮ ጊንፃታዖ ጊብፄ ካኣቲ ዒስራዔኤሌ ዓሶ ሃሻኒ ኮዒባኣሴ። ጊብፄ ካኣቲ (ፓኣሮኔ) ማሊ ዋይዞ ዒፄሢሮ ፆኦሲ ፔቴ ጋፒንሢ ባኣዚ ዳኬኔ። ዬና ዳኮና ባኬላ ዒኖ ዒዛኮ ሺኢቼኔ።

*ጌኤዦ ማፃኣፖይዳ ኬኤዚንቴ ሃይሴ፡- ኬሲ ማፃኣፔ 5-10።*

## 11. ዑሣ ዓኣዺፆ ቦንቾ

https://openbiblestories.org/l/mdy/story-11/

![](https://cdn.door43.org/obs/jpg/360px/obs-en-11-01.jpg?direct&)

ጊብፄ ካኣቲ ዒስራዔኤሌ ዓሶ ሃሺባኣቴ ዓሶንታ ቆልሞንታኮ ቶይዶ ናኣቶ ፆኦሲ ዎዻንዳያ ማዔሢ ላቲ ኬኤዜኔ። ፓኣሮኔ ዬያኣ ዋይዜዖ ፆኦሲም ዓይሢንቲፆ ዒፄኔ።

![](https://cdn.door43.org/obs/jpg/360px/obs-en-11-02.jpg?direct&)

ፆኦሲ ዒዛ ጉሙርቄ ዓይጎ ዓሲኮዋ ቢያ ቶይዲ ናይ ዻቂሻንዳ ጎይሢ ጊኢጊሼኔ። ፔቴ ፔቴ ማኣሮ ዓሳ ዾንኪሳ ባኣዚባኣ ማራናይ ዶኦሪ ሹኬኔ።

![](https://cdn.door43.org/obs/jpg/360px/obs-en-11-03.jpg?direct&)

ፆኦሲ ዒማና ዬያ ማራዖ ሱጉፆ ዔኪ ፔ ማኣሮ ጌሎ ካሮ ቲሽካንዳጉዲ፥ ዓሽኮዋ ሚቺ ላኣዳና ዎላ ሩኡሪ ሙዓንዳጉዲ ዒስራዔኤሌ ዓሶም ኬኤዜኔ። ዬያ ሙሙዓዖ ዑኬና ጊብፄፓ ኬስካኒ ጊኢጊንታንዳጉዲያኣ ኬኤዜኔ።

![](https://cdn.door43.org/obs/jpg/360px/obs-en-11-04.jpg?direct&)

ዒስራዔኤሌ ዓሳ ፆኦሲ ዔያቶም ኬኤዜማ ጎይፆ ቢያ ባኮ ማዼኔ። ሳዓኮ ጊዲሚሺ ማዓኣና ፆኦሲ ጊብፄ ዓጮ ቢያ ሃንቲ ቶይዲ ማዒ ሾይንቴ ናይ ቢያ ዎዼኔ።

![](https://cdn.door43.org/obs/jpg/360px/obs-en-11-05.jpg?direct&)

ዒስራዔኤሌ ዓሶኮ ማኣሮ ካራ ቢያ ሱጉሢና ቲሽኪንቴያታሢሮ ፆኦሲ ዬያ ማኣሮኮ ዑሣ ዖኦኪ ዓኣዼኔ። ዬኖ ኬኤፃ ዓኣ ዓሲ ቢያ ሃይቁዋዖ ዓቴኔ፤ ዒስራዔኤሌ ዓሳ ዬያይዲ ማራዖ ሱጉፆ ዛሎና ሃይቦፓ ቶሌኔ።

![](https://cdn.door43.org/obs/jpg/360px/obs-en-11-06.jpg?direct&)

ጊብፄ ዓሳ ጋዓቴ ፆኦሲ ጉሙርቂባኣሴ፤ ዓይሢፆዋ ካፒ ኩንሢባኣሴ። ዬያሮ ፆኦሲ ዔያቶ ማኣሮ ዖኦኪ ዓውሳኒ ዳንዳዒባኣሴ። ያዺዲ ፆኦሲ ጊብፄ ዓሶኮ ቶይዶ ናኣቶ ቢያ ዎዺ ኩርሴኔ።

![](https://cdn.door43.org/obs/jpg/360px/obs-en-11-07.jpg?direct&)

ቱኡዞ ማኣራ ዓኣ ዓሶፓ ዓርቃዖ ዴንዲ ጊብፄ ካኣቲ ማኣሮይዳ ዓኣ ቶይዶ ዓቲንቆ ናኣቶ ሄላንዳኣና ሃይቂ ቢያ ኩዴኔ። ዒማና ጊብፄይዳ ዓኣ ዓሳ ሚርና ዖዬሢሮ ዺቢ ዓሲ ዒላቲ ዒላቲ ዬኤካኔ።

![](https://cdn.door43.org/obs/jpg/360px/obs-en-11-08.jpg?direct&)

ዬኖ ኬሎ ዋንቶ ጊብፄ ካኣቲ (ፓኣሮኔ) ሙሴና ዓኣሮኔና ዔኤሊ፥ “ዒስራዔኤሌ ዓሶ ሃሢ ታ ዓጫፓ ዔኪ ዴንዱዋቴ!” ጌዔኔ።

*ጌኤዦ ማፃኣፖይዳ ኬኤዚንቴ ሃይሴ፡- ኬሲ ማፃኣፔ 11፡1-12፡32።*

## 12. ዒስራዔኤሌ ዓሳ ጊብፄፓ ኬስኬሢ

https://openbiblestories.org/l/mdy/story-12/

![](https://cdn.door43.org/obs/jpg/360px/obs-en-12-01.jpg?direct&)

ዒስራዔኤሌ ዓሳ ጊብፄፓ ኬስኬሢሮ ሚርጌና ዎዛዼኔ። ዬማፓ ማይ ዔያቶኮ ዓይላቶ ናንጋ ጋፔኔ፤ ዔያታ ዒማና ፆኦሲ ዔያቶም “ዒንጋንዳኔ” ጌይ ዎዞ ዒንጌ ዓጮ ዴንዲፆ ዓርቄኔ! ዒማና ዒስራዔኤሌ ዓሳ ጊብፄ ዓሶፓ ዎርቄንታ ቢራንታ፥ ዬያጉዴ ሚርጌ ባኣዚ ዔኪ ኬስኬሢሮ ዒኢካ ዓኣ ሜሌ ቶኦኪ ማዔ ዓሳ ፆኦሲ ጉሙርቂ ዔኪ ዎላ ኬስኪ ዴንዴኔ።

![](https://cdn.door43.org/obs/jpg/360px/obs-en-12-02.jpg?direct&)

ዒስራዔኤሌ ዓሳ ጎይፆ ዴንዳኣና ሮኦሮ ሮኦሮ ፒዝ ጌይ ዔቄ ዖዶሲ ሻኣሬና፥ ዹሞና ጊንሣ ፒዝ ጌይ ዔቄ ታሚና ሶሮፒ ማዒ ፆኦሲ ዔያቶ ዔኪ ዴንዴኔ።

![](https://cdn.door43.org/obs/jpg/360px/obs-en-12-03.jpg?direct&)

ዻካ ኔጋዖ ጊብፄ ካኣቲንታ ዴሮንታ ፔ ዒኖ ሺርሺ ዒስራዔኤሌ ዓሶ ጊንሣ ዓይሌ ማሃኒ ኮዔኔ። ፆኦሲ ዒ ሌሊ ጎኔ ፆኦሲ ማዒፆ ዴራ ዔራንዳጉዲ፥ ዒ ሌሊ ቢያ ባኮ ዎይሣ ጎዳ (ያህዌ) ማዔሢ ፓኣሮኔንታ ዒዛኮ ፆኦዞንታፓ ቢያ ባሼ ዎልቄና ዓኣያ ማዒፆ ዻዋኒ ፆኦሲ ጊብፄ ካኣቲ (ፓኣሮኔኮ) ዒኖ ዶዲሼኔ።

![](https://cdn.door43.org/obs/jpg/360px/obs-en-12-04.jpg?direct&)

ዬያሮ ጊብፄ ካኣቲ ዒስራዔኤሌ ዓሶ “ጊንሣ ዓይሌ ማሃንዳኔ” ጌይ ፔኤኮ ዖሎ ዓሶና ዎላ ጊንፆ ዳውሲ ዴንዴኔ። ዒማና ዒስራዔኤሌ ዓሳ ጊብፄ ዓጮ ዖሎ ዓሳ ጊንፆ ሙካሢ ዛጋዖ፥ ዬያ ዖሎ ዓሶና ዞቄ ባዞናኮ ሳዛ ማዒ ሜቶይዳ ኬዴሢ ዔሬኔ። ሚርጌናኣ ዔያታ ዒጊጪ፥ “ጊብፄፓ ኑ ዓይጋ ኬስኬይ? ኑ ማይ ኩዴያዋይ!” ጌዒ ዒላቴኔ።

![](https://cdn.door43.org/obs/jpg/360px/obs-en-12-05.jpg?direct&)

ሙሴ ዒስራዔኤሌ ዓሶም፥ “ዒጊጪፖቴ! ሃኖ ፆኦሲ ዒንሢ ዛሎ ዖልቲ ዓውሳንዳኔ” ጌዔኔ። ዬካፓ ፆኦሲ “ዴራ ባዞ ባንሢ ዴንዳንዳጉዲ ኬኤዜ” ጌይ ሙሴ ዓይሤኔ።

![](https://cdn.door43.org/obs/jpg/360px/obs-en-12-06.jpg?direct&)

ፆኦሲ ዒማና ፒዝ ጌይ ዔቄ ሻኣሮ ዒስራዔኤሌ ዴሮና ጊብፄ ዓሶናኮ ባኣካ ዔቂሲ ጊብፄ ዓሳ ዒስራዔኤሌ ዓሶ ዴንቁዋጉዲ ሺቢሺ ዓኣቼኔ።

![](https://cdn.door43.org/obs/jpg/360px/obs-en-12-07.jpg?direct&)

ዬካፓ ሙሴ ባዞይዳ ፔ ኩጮ ዞንካንዳጉዲና ዋኣፆዋ ፓቃንዳጉዲ ፆኦሲ ኬኤዜኔ። ዒማና ዋኣፆ ሻውሎና ሚዛቆ ዛሎና ሂዒ ፓቄም ጎይሢ ጌሢንታንዳጉዲ ፆኦሲ ዼኤፒ ዶዲ ዢባሬ ዔኪ ዬዔኔ።

![](https://cdn.door43.org/obs/jpg/360px/obs-en-12-08.jpg?direct&)

ዒስራዔኤሌ ዓሳ ዋኣፃ ዔያቶኮ ሻውሎና ሚዛቆናይዳ ፓቂንቲ ኮጬ ማዒ ዔቄም ባዞ ፃኣዺና ፒቄኔ።

![](https://cdn.door43.org/obs/jpg/360px/obs-en-12-09.jpg?direct&)

ዬካፓ ጊብፄ ዓሳ ዒስራዔኤሌ ዓሶኮ ቶሊ ዴንዲፆ ዛጋንዳጉዲ ዓኣቺ ዓርቄ ሻኣሮ ፆኦሲ ሌካ ዔቂሴኔ። ዬያሮ ጊብፄ ዓሳ ጊንፆ ዳውሲ ዬዓኒ ማሊ ዔቄኔ።

![](https://cdn.door43.org/obs/jpg/360px/obs-en-12-10.jpg?direct&)

ዬያሮ ዒስራዔኤሌ ዓሶ ዳውሲ ባዞ ሳዞ ጊብፄ ዓሳ ጌሌኔ፤ ጋዓንቴ ፆኦሲ ጊብፄ ዓሳ ሜታዺ ካራ ባይዛንዳጉዲ ዔያታ ቶጊ ሙካ፥ ዖሎ ፓራሢ ጎቻ ሳርጌሎ ዖይቶ ዒኢካ ባዞ ሳዛ ሳዖይዳ ቶኦሊ ዓይሤኔ። ጊብፄ ዓሳ ዒማና “ዓሲዮቴ፡ ቶላኒ ጊንሢም ጳሽኩዋቴ! ፆኦሲ ዒስራዔኤሌ ዓሶ ዛላ ማዒ ኑና ዖሊሢዳኬ!” ጌይ ዒላቴኔ።

![](https://cdn.door43.org/obs/jpg/360px/obs-en-12-11.jpg?direct&)

ዒስራዔኤሌ ዓሳ ጋዓንቴ ባዞ ኮሺና ፒንቃዛ፥ ሙሴ ጊንሣ ኩጮ ባዞ ባንሢ ዞንካንዳጉዲ ፆኦሲ ዒዛ ዓይሤኔ። ሙሴያ ዓይሢንቴ ጎይፆ ማዻዛ፥ ዋኣፃ ጊንሣ ዎላ ካኣሚ ጊብፄ ዓሶ ዱኡኬኔ፤ ጊብፄኮ ዖሎ ዓሳ ዬያይዲ ቢያ ዋኣፆና ዔኤዺንቲ ሃይቄኔ።

![](https://cdn.door43.org/obs/jpg/360px/obs-en-12-12.jpg?direct&)

ጊብፄ ዓሳ ሃይቄሢ ዒስራዔኤሌ ዓሳ ዴንቃዖ ፆኦሲ ጉሙርቄኔ፤ ሙሴያ ጎኔ ፆኦሲ ማሊሢ ኬኤዛ ዓሲ ማዔሢ ጎናሲ ዔኬኔ።

![](https://cdn.door43.org/obs/jpg/360px/obs-en-12-13.jpg?direct&)

ጊንሣ ሃሣ ዒስራዔኤሌ ዓሳ ፆኦሲ ዔያቶ ሃቢና ዓይላቶናፓ ዓይሴሢሮ ዒናፓ ዎዛዼኔ! ያዺ ማዒፆና ዔያታ ፆኦሲም ማዻኒ (ካኣሽካኒ) ዬያ ዓይላቶፓ ኬስኬኔ። ዒስራዔኤሌ ዓሳ ፆኦሲ ዔያቶ ጊብፄኮ ዖሎ ዓሶ ኩጫፓ ዓይሴሢሮ፥ ዔያቶኮ ዓይላታፓ ኬስኪፆዋ ቦንቻኒ ሚርጌ ዓይኑሞ ፆኦሲ ቦንቾም ማዓያ ዓይናዼኔ።

![](https://cdn.door43.org/obs/jpg/360px/obs-en-12-14.jpg?direct&)

ጊብፄ ዓሶ ዔያቶ ዒ ባሺሴሢና ዓይላቶፓኣ ዔያቶ ኬሴሢ ማሊ ጶቂሣኒ ዒስራዔኤሌ ዓሳ “ዑሣ ዓኣዺሢ ቦንቾ” ሌዓ ሌዓ ቦንቻንዳጉዲ ፆኦሲ ዔያቶ ዓይሤኔ። ዬያሮ ዔያታ ዾንኪሳ ባኣዚባኣ ማራናይ ሹኪ ሹኪ ላኣዳና ዎላ ሙይ ዎዛዼኔ።

*ጌኤዦ ማፃኣፖይዳ ኬኤዚንቴ ሃይሴ፡- ኬሲ ማፃኣፔ 12፡33-15፡21።*

## 13. ፆኦሲ ዒስራዔኤሌ ዓሶም “ማዻንዳኔ” ጌይ ጫኣቄ ጫኣቁሞ

https://openbiblestories.org/l/mdy/story-13/

![](https://cdn.door43.org/obs/jpg/360px/obs-en-13-01.jpg?direct&)

ፆኦሲ ዒስራዔኤሌ ዓሶ ዞቄ ባዞ ባንፆና ዓርናዺ ዔኪ ዴንዲ ዓሲ ናንጉዋ ዳውሎይዳ ዓኣ ሲና ዹኮ ኮይሎ ሄሊሴኔ። ዬና ቤዛ ካዮ ታሚ ዓርቂ ዓኣንቴ ሙሴ ዛጌ ቤዞኬ። ዴራ ዒማና ዬኖ ዹኮ ዴሞይዳ ፔኤኮ ዓፒሎና ማዦ ማኣሮ ዾቄኔ።

![](https://cdn.door43.org/obs/jpg/360px/obs-en-13-02.jpg?direct&)

ፆኦሲ፥ “ታኣም ዒንሢ ዓይሢንቴቴ፥ ታ ዒንሢም ጫኣቄ ጫኣቁሞዋ ካፔቴ ታኣኮ ዒንሢ ቦንቺንቴ ዴኔ፤ ካኣቲም ማዻ ቄኤሴ፤ ታኣም ዱማዼ ዴሬያ ማዓንዳኔ” ጌይ ሙሴና ዒስራዔኤሌ ዴሮናም ኬኤዜኔ።

![](https://cdn.door43.org/obs/jpg/360px/obs-en-13-03.jpg?direct&)

ዴራ ፆኦሲ ካኣሽኪፆ ዳምቦ ጎይፆና ፔና ሃይሦ ኬሊ ጊኢጊሻዛ ፆኦሲ ጉጉንሢና፥ ዜኤሊንሢና፥ ጩቢና፥ ዬያጉዲ ሃሣ ዼኤፒ ዛዬ ዑኡሲና ሲና ዹኮይዳ ኬዴኔ። ዒማና ዬኖ ዹኮ ኬስካንዳጉዲ ዓይሢንቴሢ ሙሴም ሌሊኬ።

![](https://cdn.door43.org/obs/jpg/360px/obs-en-13-04.jpg?direct&)

ዬካፓ ፆኦሲ ዔያቶም ጫኣቁሞ ጫኣቃዖ፥ “ታ ዒንሢ ጊብፄ ዓጮ ዓይላታፓ ኬሴ፥ ዒንሢኮ ፆኦዛሢ ናንጊና ናንጋ ጎዳኬ። ሜሌ ፆኦዞ ካኣሽኪፖቴ” ጌዔኔ።

![](https://cdn.door43.org/obs/jpg/360px/obs-en-13-05.jpg?direct&)

ዬያጉዲ ሃሣ “ሜሌ ባኣዚ ፆኦሲ ማሂ ኔኤም ኮሺፖ፥ ካኣሽኪያ ካኣሽኪፖ፤ ዎይታዛ ጌዔቴ ታኣኒ ናንጊና ናንጋ ጎዳ፥ ታ ሌሊ ካኣሽኪንታንዳጉዲ ኮዓ ዒኔ ዓኣ ፆኦሲኬ። ሱንፆ ታኣኮ ጉሪ ዔኤሊፖ፤ ሃውሾ ኬሎዋ ታኣም ዱማሳኒ ኮሺ ማሊ ዒና ዔኬ፤ ዬይያ ማዾ ኔኤኮ ኔ ላሆ ኬሊዳ ማዻንዳኔ፥ ላንካሳ ኬላ ጋዓንቴ ኔኤኒ ሃውሻንዳ ኬሊ፥ ሃሣ ታና ኔ ማሊ ጶቂሣንዳ ኬሊኬ” ጌዔኔ።

![](https://cdn.door43.org/obs/jpg/360px/obs-en-13-06.jpg?direct&)

“ዓዶና ዒንዶና ቦንቼ፤ ዓሲ ዎዺፖ፤ ዓኒ ሃሣ ማቾ ማዒባኣ ዓሲና ላሂፖ፤ ዉኡቂፖ፤ ሉኡቂፖ፤ ኔ ላጋሢኮ ማቾ፥ ማኣሮ፥ ዬያጉዲ ዒዛሮ ማዔ ባኮ ቢያ ኔኤሮ ማዓኣባሽ ጌይ ሱኡካዺፖ” ጌዔኔ።

![](https://cdn.door43.org/obs/jpg/360px/obs-en-13-07.jpg?direct&)

ፆኦሲ ዬያ ታጶ ዓይሢፆ ላሾ ፓልዒንቴ ላምዖ ሹቺዳ ፃኣፒ ሙሴም ዒንጌኔ። ዬያጉዲ ሃሣ ሃካፓ ሊካ ኬኤዚንታሢጉዴያ ሜሌ ዺቢ ዓይሥሢና ዳምቤያ ሙሴ ዛሎና ዒንጌኔ። ዴራ ዬያ ዓይሢፆና ዳምቦና ማዺ ኩንሤቴ ፆኦሲ ዔያቶ ዓንጃንዳሢና ፑርታፓኣ ካፓንዳሢ ጉሙርሲ ኬኤዜኔ። ዬያ ዓይሢፆንታ ዳምቦንታ ዔያታ ካፒባኣቴ ዴሮይዳ ፆኦሲ ሜቶ ዓጋንዳሢ ዔርቴኔ።

![](https://cdn.door43.org/obs/jpg/360px/obs-en-13-08.jpg?direct&)

ዬያጉዲ ዒስራዔኤሌ ዓሳ ዓፒላና ማዢንታ ዱማ ማኣሪያ ማዣንዳጉዲ ፆኦሲ ዔያቶም ማዦንዶ ጎይፆ ኬኤዜኔ። ዬና ዓፒሎና ማዢንታ ማኣራ “ፆኦሲ ዴሮና ካኣማ ማኣሮ” ጌይንታኔ፤ ዼኤፒ ጎኦቦ ዓፒላና ጋሮ ዱማሶና ላምዖ ቆልዔያኣ ዓኣያኬ። ፆኦሲ ናንጋሢ ዒኢካታሢሮ ጎኦቦ ዓፒሎይዴና ጌይ ላምዓሳ ቆልዖ ጌላንዳጉዲ ዓይሢንቴሢ ቄኤሶኮ ቢያ ዑፃሢም ሌሊኬ።

![](https://cdn.door43.org/obs/jpg/360px/obs-en-13-09.jpg?direct&)

ፆኦሲ ዓይሤ ዓይሢፆና ዳምቦዋ ዻቤ ዓይጎ ዓሲ ፆኦሲ ዴሮና ካኣማ ኬኤፄሎኮ ቤርቶ ዛላ ዓኣ ዒንጎ ባኮ ሺኢሾ ቤዞይዳ ፆኦሲም ዒንጎ ቆልሞ ሹኪ ዒንጋኒ ዳንዳዓያኬ። ቄኤሳሢ ዬያ ቆልሞ ሹኪ ዒንጎ ባኮ ሺኢሾ ቤዛ ሚቻኔ። ዬያ ቆልሞኮ ሱጉፃ ዓሢኮ ጎሞ ሺሚሻያ (ዓኣቻያ) ማዒ ፆኦሲ ቤርታ ዓሢ ጌኤሺ ማሃኔ። ፆኦሲ ዒማና ቄኤሶ ማዓንዳጉዲ ሙሴኮ ጌርሲ ዓኣሮኔና ዒዛኮ ዜርፆና ዶኦሬኔ።

![](https://cdn.door43.org/obs/jpg/360px/obs-en-13-10.jpg?direct&)

ዴራ ቢያ ፆኦሲ ዔያቶም ዒንጌ ዓይሢፆ ኩንሣኒ፥ ፆኦሲ ካኣሽካኒ፥ ዬያጉዲ ሃሣ ፆኦሲም ዱማዼ ዴሬ ማዓኒ ዔኤዔኔ። ጋዓንቴ ያዺዲ ፆኦሲም ዓይሢንታኒ ጫኣቂ ማማዓዖ ፑርታ ጎሜ ማዼኔ።

![](https://cdn.door43.org/obs/jpg/360px/obs-en-13-11.jpg?direct&)

ዒማና ሙሴ ሚርጌ ኬሊ ፆኦሲና ዎላ ሲና ዹኮይዳ ጌስቴኔ። ሙሴ ማዒ ሙካንዳኣና ዴራ ዬያ ኬሎ ቢያ ካፒፆ ዒፂ ቶኦዛዼኔ። ዬያሮ ዓኣሮኔም ዎርቄ ዔኪ ሙካዖ ፆኦዞ ማዣንዳጉዲ ዒዛ ዖኦጬኔ።

![](https://cdn.door43.org/obs/jpg/360px/obs-en-13-12.jpg?direct&)

ዬያሮ ዓኣሮኔ ዬያ ዎርቆና ናኣሪ ማሊሲ ፆኦዞ ማዤኔ። ዴራኣ ፔኑሞ ኬኤሪ ዬያ ፆኦዞ ካኣሽኪሢ ዓርቄኔ፤ ዒንጎ ባኣዚያ ዔኪ ሙኪ ሺኢሼኔ። ዬያሮ ፆኦሲ ሚርጌና ዻጋዼኔ፥ ዴሮ ባይዛኒያ ማሌኔ። ጋዓንቴ ሙሴ ዴሮም ሺኢቄሢሮ፥ ሺኢጲፆ ዋይዚ ዔያቶ ባይዚፆ ሃሼኔ።

![](https://cdn.door43.org/obs/jpg/360px/obs-en-13-13.jpg?direct&)

ሙሴ ዹካፓ ኬዲ ሙኪ ዬያ ማዦና ፆኦዞ ዴንቃዖ ሚርጌና ዻጋዼኔ፤ ኩጫ ዒ ዔኪ ዓኣ ታጶ ዓይሢፆ ዎጋ ፃኣፒንቴ ፓልዒንቴ ሹጮዋ ኬኤሪ ሜንሤኔ።

![](https://cdn.door43.org/obs/jpg/360px/obs-en-13-14.jpg?direct&)

ዬካፓ ሙሴ ዬያ ፆኦዞ ጌይ ማዦና ባካሢ ሜንሢ ጋኣጬኔ፤ ዴራ ዑሽካ ዋኣፆይዳኣ ዬያ ሲኢራዖ ዴሮ ዑሼኔ። ፆኦሲያ ዴሮይዳ ፑርታ ዶርዖ ዳኬሢሮ ዺቢ ዓሲ ሃይቄኔ።

![](https://cdn.door43.org/obs/jpg/360px/obs-en-13-15.jpg?direct&)

ሙሴ ጊንሣ ዹኮ ኬስኪ ፆኦሲ ዴሮም “ዓቶንጎ” ጋዓንዳጉዲ ሺኢቄኔ። ፆኦሲያ ሙሴ ሺኢጲፆ ዋይዚ ዴሮ ማኣሬኔ። ሙሴ ሜንሤ፥ ዎጋ ፃኣፒንቲ ዓኣ ፓልዒንቴ ሹጮ ቤዛ ፆኦሲ ሜሌ ዓኪ ሹቺዳ ታጶ ዓይሢፆ ጊንሣ ፃኣፔኔ። ዬካፓ ፆኦሲ ዒስራዔኤሌ ዴሮ ሲና ዹካፓ ዒዚ ዔያቶም ዒንጋንዳኔ ጌይ ጫኣቄ ዓጬሎ ዓርና ማዒ ዔኪ ዓኣዼኔ።

*ጌኤዦ ማፃኣፖይዳ ኬኤዚንቴ ሃይሴ፡- ኬሲ ማፃኣፔ 19-34።*

## 14. ዴራ ዓሲ ናንጉዋ ዳውሎይዳ ሴካ ሃንጋ ጌይ ሜታዼሢ

https://openbiblestories.org/l/mdy/story-14/

![](https://cdn.door43.org/obs/jpg/360px/obs-en-14-01.jpg?direct&)

ፆኦሲ ዒስራዔኤሌ ዴሮና ዎላ ጫኣቄ ጫኣቁሞኮ ፔቴዞ ማዔ ዱማ ዱማ ዎጎ ዔያታ ዓይሢንቲ ኩንሣንዳጉዲ ኬኤዜስካፓ ዴራ ሲና ዹኮ ሃሺ ዴንዴኔ። ፆኦሲያ ዴሮ ሲና ዹካፓ ዓርና ማዒ ካኣናኔ ጌይንታ ቤርታዺ ዒ ዔያቶም ዒንጋኒ ጫኣቄ ዓጬሎ ዔኪ ዴንዴኔ። ፒዝ ጌይ ዔቄ ሻኣራ ዴሮኮ ቤርታ ቤርታ ካኣናኔ ሄላንዳኣና ዓኣዻዛ ዴራኣ ዬያ ዛጊ ጊንፆ ዴንዴኔ።

![](https://cdn.door43.org/obs/jpg/360px/obs-en-14-02.jpg?direct&)

ፆኦሲ ዬኖ ዒ ዒንጋንዳኔ ጌዔ ዓጬሎ ዔያቶኮ ዜርፆሮ ማሂ ዒንጋንዳሢ ዓብራሃሜም፥ ዪሳኣቄም፥ ያይቆኦቤማኣ ጫኣቂናኣኮኬ። ጋዓንቴ ዬኖ ቤዞይዳ ሚርጌ ሜሌ ዴሬ ቶኦኪ ናንጋኔ፤ ዬያታ ቶኦካ ካኣናኔ ዓሶ ጌይንታያኬ። ዬይ ካኣናኔ ዴራ ፆኦሲ ካኣሽኪባኣሴ፥ ሃሣ ዓይሢንቲባኣሴ፤ ጎኔ ፆኦሲቱዋ ፆኦዞ ካኣሽኪ፥ ዬያጉዴ ሚርጌ ፑርታባኣዚያ ማዻኔ።

![](https://cdn.door43.org/obs/jpg/360px/obs-en-14-03.jpg?direct&)

ፆኦሲ ዒስራዔኤሌ ዴሮም፥ “ታ ዒንሢም ‘ዒንጋንዳኔ’ ጌይ ጫኣቄ ዓጬሎይዳ ዓኣ ዴሮ ቢያ ዎዺ ባይዙዋቴ፤ ዔያቶና ዎላ ኮሽኪ ናንጊፖቴ፥ ዔኪያ ዔኪ ሎዒያ ሎዒፖቴ። ዔያታ ፆኦዞ ጌይ ካኣሽካ ባኮ ጋፒሲ ባባይዙዋቴ። ታኣም ዒንሢ ዓይሢንቲባኣቴ ዬያ ፆኦዞ ዒንሢ ካኣሽካንዳሢ ዔሩዋቴ” ጌዔኔ።

![](https://cdn.door43.org/obs/jpg/360px/obs-en-14-04.jpg?direct&)

ዒስራዔኤሌ ዓሳ ካኣናኔ ዓጮ ዛጶ ሙኪ ሄላዛ፥ ሙሴ ፔቴ ፔቴ ዒስራዔኤሌ ፃጳፓ ፔቴ ዎሊ ዑፃ ታጶ ላምዖ ሱኡጌ ዶኦሬኔ። ዔያታ ዴንዲ ዓጬላ ዎዚዺታቴያ ሙራንዳጉዲ ዳኬኔ። ዬና ዓሳ ዴንዴሢ ካኣናኔ ዓሳ ዎልቄና ዶዲታቴያ ላቤያታቴያ ሙራኒኬ።

![](https://cdn.door43.org/obs/jpg/360px/obs-en-14-05.jpg?direct&)

ዬንሢ ታጶ ላምዖ ዓሳ ካኣናኔ ዓጮ ዖይዲታሚ ኬሊ ጉቤ ሃንቲ ዛጋዖ ማዒ ሙኬኔ። ዔያታ ማዒ ሙካዛ ላምዖ ዓሲ ዔያቶ ባኣካፓ ዴሮም፥ “ሳዔላ ኮሺ ማሊ ዓጪኬ፤ ሳዓ ሃኣኮ ሌሊኬ!” ጌዔኔ። ታጳሢ ጋዓንቴ፥ “ካታማ ሚርጌና ዙሎ ዶዲሺ ማዦናያኬ፤ ዓሳኣ ሚርጌ ዼኤፒ፥ ዎልቄና ዓኣያኬ፤ ኑ ዔያቶና ዖልቴቴ ኑና ዎዺ ዔያታ ኩኩርሳንዳኔ!” ጌዔኔ።

![](https://cdn.door43.org/obs/jpg/360px/obs-en-14-06.jpg?direct&)

ዒማና ላምዖንሢ፥ ካኣሌቤና ዒያሱና “ካኣናኔ ዓሳ ዖዶሲ፥ ሃሣ ዎልቄና ዓኣያ ማዒፃ ጎኔኬ፤ ጋዓንቴ ኑ ዔያቶ ዖሌቴ ኑ ባሻንዳሢ ዔርቴያኬ! ፆኦሲኬ ኑ ዛሎ ዖልታንዳሢ!” ጌዔኔ።

![](https://cdn.door43.org/obs/jpg/360px/obs-en-14-07.jpg?direct&)

ዴራ ጋዓንቴ ካኣሌቤና ዒያሱና ጋዓሢ ዋይዞ ዒፄኔ። ዬያሮ ዴራ ሙሴና ዓኣሮኔናይዳ ዻጋዺ፥ “ሃያጉዴ ፑርታ ቤሲ ኑና ዒንሢ ዓይጎሮ ዔኪ ዬዔይ? ኑ ዖልዚና ኩዴም ኑኡኮ ላኣሎንታ ናኣቶንታ ዬያ ዴሮኮ ዓይሌ ማዓስካፓ ጊብፄይዳ ኑ ናንጌቴ ኮሺቱዋዓዳ!” ጌዔኔ። ዴራ ያዺ ጋዓዖ ጊንሣ ዔያቶ ዔኪ ጊብፄ ማሃንዳ ሱኡጌ ዶኦራኒ ኮዔኔ።

![](https://cdn.door43.org/obs/jpg/360px/obs-en-14-08.jpg?direct&)

ዬያሮ ፆኦሲ ሚርጌና ዻጋዺ ዴሮና ዎላ ካኣማ ዓፒሎና ማዦና ማኣሮ ዬዔኔ። ዬካፓ ፆኦሲ፥ “ዒንሢ ታኣም ጌኤታዼሢሮ፥ ሃይ ዴራ ጉቤ ዓሲ ናንጉዋ ቦኦሎይዳ ሴካ ሃንጋ ሃንቲ ሜታዻንዳኔ። ዒያሱና ካኣሌቤናፓ ዓታዛ ላማታሚ ሌዔና ዬካፓ ዑሣ ማዔ ዓሲ ቢያ ዒኢካ ሃይቂ ኩዳንዳኣፓዓቴም ታ ‘ዒንጋንዳኔ’ ጌይ ጫኣቄ ዓጬሎ ፔቴታዎ ጌላዓኬ” ጌዔኔ።

![](https://cdn.door43.org/obs/jpg/360px/obs-en-14-09.jpg?direct&)

ዴራ ዬያ ዋይዛዖ ጎሜ ዔያታ ማዼያ ማዔሢ ዔሪ ዖዬኔ። ዬካፓ ፔኤኮ ዖሎ ዓንጋሞ ዔኪ ካኣናኔ ዓሶ ዖላኒ ዴንዶ ዔቄኔ። ሙሴ ጋዓንቴ ፆኦሲ ዔያቶና ዎላቱዋኣሢሮ ዔያታ ዴንዱዋጉዲ ጎሪ ላኣጌኔ፤ ታቴያ ዔያታ ዋይዞ ዒፂ ዓኣዼኔ።

![](https://cdn.door43.org/obs/jpg/360px/obs-en-14-10.jpg?direct&)

ፆኦሲ ጎኔ ዒማና ዴሮና ዎላ ዖሎ ዴንዲባኣሴ፤ ዬያሮ ሚርጌ ዓሲ ሃይቄም ዔያታ ባሺንቴኔ። ዬካፓ ዒስራዔኤሌ ዓሳ ካኣናኔፓ ማዒ ዓሲ ናንጉዋ ቦኦሎይዳ ሴካ ሃንጋ ጌይ ዖይዲታሚ ሌዔ ሚርጌና ሜታዼኔ።

![](https://cdn.door43.org/obs/jpg/360px/obs-en-14-11.jpg?direct&)

ዒስራዔኤሌ ዓሳ ዬያ ዖይዲታሞ ሌዖ ጉቤ ዓሲ ናንጉዋ ቦኦሎይዳ ሜታዺ ሃንቴቴያ ፆኦሲ ዔያቶ ሙኡዜኔ። ጫሪንካፓ “ማና” ጌይንታ ካሣ ዔያቶም ኬይሲ ሙኡዜኔ። ሃሣ ዓሽኪያ ዔያታ ሙዓንዳጉዲ ፑሮ ማላ ካፒ ሚርጌ ዔያቶም ዳኬኔ። ዬያ ዎዶ ቢያ ዔያታ ቦኦላ ሃንቴያና ፆኦሲ ዔያቶኮ ዓፒሎንታ ዱርዞንታ ዳርዑዋጉዲ ናንጊሼኔ።

![](https://cdn.door43.org/obs/jpg/360px/obs-en-14-12.jpg?direct&)

ፆኦሲ ፔኤኮ ዲቃሢ ሄርሺሳ ዎልቆና ላሌፓ ዋኣሢያ ኬሲ ዒስራዔኤሌ ዓሶ ዑሼኔ። ያዺ ማዔቴያ ዒስራዔኤሌ ዴራ ፆኦሲና ሙሴናይዳ ዻጋዺ ጉንዱሜኔ። ፆኦሲ ጋዓንቴ ዓብራሃሜም፥ ዪሳኣቄም ሃሣ ያይቆኦቤማኣ ማዻንዳኔ ጌይ ጫኣቄ ቃኣሎ ካፒ ጉሙርቂንታያ ማዔኔ።

![](https://cdn.door43.org/obs/jpg/360px/obs-en-14-13.jpg?direct&)

ዬኖጉዲ ሃሣ ሜሌ ኬሊ ዴራ ዋኣሢ ባይዛዛ ፆኦሲ ሙሴም፥ “ሃያ ላሎም ኬኤዜ፤ ዋኣሢ ዒኢፓ ኬስካንዳኔ” ጌዔኔ። ጋዓንቴ ሙሴ ላሎሜ ኬኬኤዞንዶሢ ሃሺ ላምዒ ማይንቲ ኮኦሎና ጳርቄኔ፤ ዬይ ፆኦሲኮ ቶኦኪ ባይዛያ ማዔኔ። ዒማና ዴራ ዑሽካንዳጉዲ ላላፓ ዋኣፃ ኬስኬኔ፤ ጋዓንቴ ፆኦሲ ሙሴይዳ ዻጋዺ፥ “ታ ‘ዒንጋንዳኔ’ ጌይ ጫኣቄ ዓጬሎ ኔ ጌላዓኬ” ጌዔኔ።

![](https://cdn.door43.org/obs/jpg/360px/obs-en-14-14.jpg?direct&)

ያዺዲ ዖይዲታሚ ሌዔ ሄላንዳኣና ዒስራዔኤሌ ዴራ ዓሲ ናንጉዋ ዳውሎይዳ ሜታዺ ሃንቴያና ፆኦሲም ዋይዞ ዒፄ ዓሳ ቢያ ዒኢካ ሃይቂ ኩዴኔ። ዬካፓ ፆኦሲ ላሚ ጊንሣ ዴሮ ዒዚ “ዒንጋንዳኔ” ጌይ ጫኣቄ ዓጬሎ ባንሢ ዓርናዺ ዔኪ ዴንዴኔ። ሙሴ ጋርቼሢሮ ዒዛ ማኣዳንዳጉዲ ፆኦሲ ዒያሱ ዶኦሬኔ። ሃሣ ጊንሣ ፔቴ ኬሊ ፆኦሲ ሙሴጉዴያ ፆኦሲ ማሊሢ ኬኤዛ ዓሲ ዳካንዳያ ማዒፆ ሃጋኣ ዎዛ ማሂ ሙሴም ኬኤዜኔ።

![](https://cdn.door43.org/obs/jpg/360px/obs-en-14-15.jpg?direct&)

ዬካፓ ፆኦሲ “ዒንጋንዳኔ” ጌይ ጫኣቄ ዓጬሎ ዛጋኒ ፔቴ ዹካ ኬስካንዳጉዲ ሙሴ ዓይሤኔ። ሙሴያ ፆኦሲ “ዒንጋንዳኔ” ጌይ ጫኣቄ ዓጬሎ ኬስኪ ዔቂ ዛጌኔ፤ ጋዓንቴ ዒዚ ዴንዲ ጌሉዋጉዲ ፆኦሲ ዒዛ ላኣጌኔ። ያዺ ማዔስካፓ ሙሴ ሃይቄኔ፤ ዒስራዔኤሌ ዓሳኣ ሃይሢታሚ ኬሊ ጉቤ ዖዪ ዬኤኬኔ። ሄሊሳዖ ዒያሱ ዔያቶኮ ሱኡጋሢ ማዔኔ። ዒያሱ ፆኦሲ ጉሙርቃያና ዓይሢንታያ ማዔሢሮ ቃራ ሱኡጌኬ።

*ጌኤዦ ማፃኣፓ ኬኤዚንቴ ሃይሴ፦ ኬሲ ማፃኣፔ 16-17፤ ፓይዲ ማፃኣፔ 10-14፤ 20፤ 27፤ ላሚንቴ ዎጎ ማፃኣፖ 34።*

## 15. ፆኦሲ “ዒንጋንዳኔ” ጌይ ጫኣቄ ዓጬሎ

https://openbiblestories.org/l/mdy/story-15/

![](https://cdn.door43.org/obs/jpg/360px/obs-en-15-01.jpg?direct&)

ጋፒንፆይዳ ዒስራዔኤሌ ዴራ ፆኦሲ “ዒንጋንዳኔ” ጌይ ጫኣቄ ዓጬሎ፥ ካኣናኔ ጌላንዳ ዎዳ ሄሌኔ። ዒማና ዒያሱ ካኣናኔይዳ ዒያርኮ ጌይንታ ዓጫ ሹቺና ኬልቂ ዴርቂንቴ ካታማስኬኖ ዴንዲ ሙራንዳ ላምዖ ዓሲ ዳኬኔ። ዬኖ ኬታሜሎይዳ ዞኦስካ ኮኦማ ላኣሊ ሬዓባ ጌይታስኬና ናንጋኔ፤ ዬና ላኣሌላ ዒያርኮ ዓሳ ዬንሢ ሙሮ ዓሶ ዎዹዋጉዲ ዓኣቺ ዓይሲ ቶሊሲ ዳኬያኬ። ዒዛ ፆኦሲ ጉሙርቄሢሮ ዬያ ማዼኔ። ዒስራዔኤሌ ዓሳ ዒያርኮ ካታሞ ዖሊ ባይዛኒ ሙካኣና ሬዓባንታ ዒዞኮ ማኣሮ ዓሶዋ ዔያታ ዎዺንዱዋኣሢ ዒዞም ዬንሢ ሙሮ ዓሶንሢ ጫኣቄኔ።

![](https://cdn.door43.org/obs/jpg/360px/obs-en-15-02.jpg?direct&)

ዒስራዔኤሌ ዓሳ ፆኦሲ ዔያቶም “ዒንጋንዳኔ” ጌይ ጫኣቄ ዓጬሎ ጌላኒ ዮርዳኖሴ ጌይንታ ዎሮና ፒንቃንዳያ ኮይሴኔ። ፆኦሲ ዒማና፥ “ቤርታዺ ቄኤሳ ዎሮና ፒንቆንጎ” ጌይ ዒያሱም ኬኤዜኔ። ዬያሮ ቄኤሳ ዎሮና ፒንቃኒ ቶኮ ዓዓጋኣና ዒስራዔኤሌ ዓሳ ፃኣዺ ሳዓና ፒንቃንዳጉዲ ዎታ ዋኣፃ ዔቄኔ።

![](https://cdn.door43.org/obs/jpg/360px/obs-en-15-03.jpg?direct&)

ዴራ ዮርዳኖሴ ዎሮና ፒንቄስካፓ ዶዲ ማዔ ዒያርኮ ካታሞ ዎይቲ ዔያታ ዖላንዳቴያ ዒያሱም ፆኦሲ ኬኤዜኔ። ዒስራዔኤሌ ዴራኣ ፆኦሲም ዓይሢንቴኔ። ዬያሮ ዒስራዔኤሌኮ ዖሎ ዓሶንታ ቄኤሶንታ ዓዳ ፆኦሲ ዔያቶ ዓይሤ ጎይፆ ፔቴ ኬሊዳ ፔቴ ዎሊ ዑፃ ላሆ ኬሊ ዒያርኮ ካታሞ ሺሬኔ።

![](https://cdn.door43.org/obs/jpg/360px/obs-en-15-04.jpg?direct&)

ላንካሳ ኬሎይዳ ዒስራዔኤሌ ዴራ ካታሜሎ ላንካይ ማይንቲ ሺሬኔ። ጋፒንፆ ዔያታ ሺሪፆይዳ ዓኣንቴ ዒስራዔኤሌኮ ዖሎ ዓሳ ዖሎ ዒላቶ ዒላቴኔ፤ ቄኤሳኣ ዛያሢ ዋርቄኔ።

![](https://cdn.door43.org/obs/jpg/360px/obs-en-15-05.jpg?direct&)

ዬካፓ ዒያርኮኮ ዓጮ ሺርሺ ዲርቆና ኬኤሎ ዲፃ ዶዔኔ፤ ፆኦሲያ ዔያቶ ዓይሤ ጎይፆ ዒስራዔኤሌ ዓሳ ካታሜሎይዳ ዓኣ ባኮ ቢያ ዖሊ ባይዜኔ። ዒስራዔኤሌ ዓሶና ዒጊንቴ፥ ሬዓባንታ ዒዞኮ ማኣሮ ዓሶንሢ ሌሊ ዎዹዋ ቶሊሲ ዓይሴኔ። ካኣናኔይዳ ናንጋ ሜሌ ዴራ ዒስራዔኤሌ ዓሳ ዒያርኮ ዖሊ ባይዜሢ ዋይዛዖ ዔያቶዋ ዖላኒ ሙካንዳሢሮ ዒጊጬኔ።

![](https://cdn.door43.org/obs/jpg/360px/obs-en-15-06.jpg?direct&)

ዬያኮ ቤርታ ካኣናኔይዳ ዓኣ ዓይጎ ዓሲና ዎላ ኮሹሞና ናንጋኒ ሳሌ ጌሉዋጉዲ ዒስራዔኤሌ ዓሶ ፆኦሲ ላኣጊናኣኮኬ። ጋዓንቴ ጌባዖኦኔ ዓሶ ጌይታ ካኣናኔ ዴሮፓ ፔቴ ፃጲ ሚርጌ ሃኬ ዓጪፓ ሙኬ ዓሲኬ ጌይ ዒያሱ ጌሼኔ፤ ዒያሱ ዔያቶና ዎላ ሳላዻንዳጉዲያኣ ዖኦጬኔ። ዬና ጌባዖኦኔ ዓሳ ዓንካፓ ሙኬቴያ ዒያሱንታ ዒስራዔኤሌ ዓሶንታ ፆኦሲ ዖኦጩዋዖ ዔያቶና ዎላ ዒጊንታኒ ሳላዼኔ።

![](https://cdn.door43.org/obs/jpg/360px/obs-en-15-07.jpg?direct&)

ጌባዖኦኔ ዓሳ ዔያቶ ጌሼሢ ዒስራዔኤሌ ዓሳ ዔራዖ ዻጋዼኔ፤ ጋዓንቴ ፆኦሲ ቤርታ ዔያታ ሳላዼ ሳሌ ዓኣሢሮ ዬያ ቃኣሎ ዒጊጪ ቦንቼኔ። ሜሌ ኬሊና ካኣናኔይዳ ዓኣ ሜሌ ዴሮ ካኣቶንታ ዓሞኦራ ዓሶንታ ዒስራዔኤሌ ዴራ ጌባዖኦኔ ዓሶና ዎላ ሳላዺ ጊኢጌሢ ዋይዜኔ፤ ዬያሮ ዔያታ ፔኤኮ ዖሎ ዓሶ ፔቴይዳ ማሂ ጌባዖኦኔ ዴሮ ዖሌኔ። ዬያሮ ጌባዖኦኔ ዓሳ ማኣዶ ዖኦጪሢ ዒያሱ ኮይላ ኪኢታ ዳኬኔ።

![](https://cdn.door43.org/obs/jpg/360px/obs-en-15-08.jpg?direct&)

ዒያሱዋ ዒስራዔኤሌ ዖሎ ዓሶ ፔቴይዳ ዔኪ ጌባዖኦኔ ሄላኒ ሃንቴ ጎይሣ ዎርቄኔ። ዬካፓ ካሪፆ ዓሞኦራ ዓሳ ዔሩዋንቴ ዔያቶይዳ ዒያሱንሢ ዖልዚ ቡሌኔ።

![](https://cdn.door43.org/obs/jpg/360px/obs-en-15-09.jpg?direct&)

ዬኖ ኬሎ ፆኦሲ ዒስራዔኤሌ ዓሶ ዛላ ማዒ ዖሎኔ። ዎዎዴይ ጌዔቴ ዼኤፒ ሹቺጉዴ ሻቺ ጫሪንካፓ ኬይሲ ዓሞኦራ ዓሶኮ ካራ ባይዛዖ ሚርጌ ዓሲ ዎዼኔ።

![](https://cdn.door43.org/obs/jpg/360px/obs-en-15-10.jpg?direct&)

ሃሣ ጊንሣ ዒስራዔኤሌ ዓሳ ዓሞኦራ ዴሮ ጋፒ ዖሊ ባሻንዳያ ሄላንዳኣና ፔቴ ኬሊ ዓባ ጌሉዋጉዲ ጫሪንጫ ዓርቂ ዴይሤኔ። ዬኖ ኬሎ ፆኦሲ ዒስራዔኤሌ ዓሶም ዼኤፒ ባሺሢ ዒንጌኔ።

![](https://cdn.door43.org/obs/jpg/360px/obs-en-15-11.jpg?direct&)

ፆኦሲ ዬያይዲ ዬያ ሞርኮኮ ዖሎ ዓሶ ባሺሴስካፓ ሚርጌ ካኣናኔ ፃጲ ማዔ ዴሬ ዒስራዔኤሌ ዓሶ ዖላኒ ዎሊ ዑፃ ቡኬኔ። ዒያሱንታ ሃንጎ ዒስራዔኤሌ ዓሳኣ ሃሣ ዖላዖ ዬያ ዓሶ ባሼኔ።

![](https://cdn.door43.org/obs/jpg/360px/obs-en-15-12.jpg?direct&)

ዬያ ዖሎኮ ጊንፃፓ ፆኦሲ ፔቴ ፔቴ ዒስራዔኤሌ ፃጶም ዒዚ “ዒንጋንዳኔ” ጌይ ጫኣቄ ዓጬሎ ሄላ ጎይፆ ጊሽኬኔ። ያዺ ማዔስካፓ ፆኦሲ ዒስራዔኤሌም ዒንጊንቴ ዓጮኮ ዛጶይዳ ቢያ ዖልዚባኣያ ማሂ ኮሹሞ ዒንጌኔ።

![](https://cdn.door43.org/obs/jpg/360px/obs-en-15-13.jpg?direct&)

ዒያሱ ጋርቼስካፓ ዒስራዔኤሌ ዴሮ ፔቴይዳ ዔኤሌኔ። ዬካፓ ፆኦሲ ሲና ዹኮይዳ ዒስራዔኤሌ ዓሶም “ማዻንዳኔ” ጌይ ጫኣቁሞ ጫኣቄያና ዓይሤ ዓይሢፆ ዴራ ካፒ ኩንሣኒ ኮይሳሢ ጶቂሢ ኬኤዜኔ። ዴራኣ ፆኦሲም ጉሙርቂንታያ ማዒ ናንጋኒና ዎጋ ዓይሣ ጎይፆዋ ናንጋኒ ፔቱሞና ጫኣቄኔ።

*ጌኤዦ ማፃኣፖይዳ ኬኤዚንቴ ሃይሴ፡- ዒያሱ ማፃኣፖ 1-24።*

## 16. ዴሮ ዓይላቶፓ ኬሴ ዓሶ

https://openbiblestories.org/l/mdy/story-16/

![](https://cdn.door43.org/obs/jpg/360px/obs-en-16-01.jpg?direct&)

ዒያሱ ሃይቄስካፓ ዒስራዔኤሌ ዓሳ ፆኦሲም ዓይሢንቲባኣሴ፤ ዔያቶ ባኣካ ዓቲ ዓኣ ካኣናኔ ዓሶ ዳውሲ ዳኪባኣሴ፤ ፆኦሲ ዎጎዋ ዓይሢንቲ ካፒ ኩንሢባኣሴ። ዒስራዔኤሌ ዓሳ ጎኔ ፆኦሲ ማዔ ናንጊና ናንጋ ጎዳ (ያህዌ) ካኣሽኪፆ ሃሺ ካኣናኔ ዓሶ ፆኦዞ ካኣሽኪሢ ዓርቄኔ። ዒማና ዒስራዔኤሌ ዓሶኮ ካኣቲ ባኣሴ፤ ዬያሮ ዓሲ ቢያ ፔኤኮ ሼኔ ጌዔሢ ማዻ ዎዴኬ።

![](https://cdn.door43.org/obs/jpg/360px/obs-en-16-02.jpg?direct&)

ዒስራዔኤሌ ዓሳ ፆኦሲም ጌኤታዺፆ ሃሾ ዒፄሢሮ ፆኦሲ ዔያቶ ሞርኮም ዓኣሢ ዒንጌኔ። ዬያታ ሞርካ ዒስራዔኤሌ ዓሶኮ ዓኣ ባኮ ቢያ ዉኡቄኔ፤ ቆሎዋ ቢያ ዎዺ ባይዜኔ፤ ሚርጌ ዓሲያ ዒስራዔኤሌፓ ዎዼኔ። ዒስራዔኤሌ ዓሳ ፆኦሲም ዋይዚባኣሢሮ ሞርካ ዔያቶ ሄርቂ ዎይሤስካፓ ጎሞ ፔኤኮ ቡኡፂ፥ ፆኦሲ ዔያቶ ሞርኮ ኩጫፓ ዓይሳንዳጉዲ ዖኦጬኔ።

![](https://cdn.door43.org/obs/jpg/360px/obs-en-16-03.jpg?direct&)

ያዺ ማዔስካፓ ዒስራዔኤሌ ዓሶ ሞርኮ ኩጫፓ ዓይሲ ኬሳንዳ ዓሲ ፆኦሲ ዔያቶም ዳኬኔ፤ ዬይ ዓሢያ ዓጮይዳ ኩሹሞ ዔኪ ዬዔኔ። ጋዓንቴ ዒስራዔኤሌ ዴራ ጊንሣ ፆኦሲ ዋሌኔ። ሜሌ ፆኦዞዋ ካኣሽኪሢ ዓርቄኔ። ዬያሮ ፆኦሲ ዔያቶኮ ዑኬ ዓኣ ሚዲያሜ ዴሮ ሞርኬ ማሂ ዒስራዔኤሌ ዓሶይዳ ዔቂሴም ዖሊ ባሼኔ።

![](https://cdn.door43.org/obs/jpg/360px/obs-en-16-04.jpg?direct&)

ዬይ ሚዲያሜ ዓሳ ዒስራዔኤሌ ዓሶኮ ዓኣ ሃኣኮ ቢያ ላንካይ ሌዔ ቡሪ ቡሪ ዴዔኔ። ዬያሮ ዒስራዔኤሌ ዓሳ ሚርጌ ዒጊቹሞይዳኬ፤ ያዺ ማዒፆና ዛሬና ዴኔ ዔቴያናይዳ ዒስራዔኤሌ ዓሳ ጌሊ ፑኒ ናንጋሢሮ ሚዲያሜ ዓሳ ዔያቶ ዴንቂ ዖላኒ ዳንዳዒባኣሴ። ዒስራዔኤሌ ዓሳ ጋፒንፆይዳ ፆኦሲ ዔያቶ ማኣዳንዳጉዲ ዒላቴኔ።

![](https://cdn.door43.org/obs/jpg/360px/obs-en-16-05.jpg?direct&)

ፔቴ ኬሊ ጌዲዎኔ ጌይንታ ዒስራዔኤሌ ዓሲስኬይ ሚዲያሜ ዓሶፓ ዓኣሺንቲ ሃኣኮ ሺርካንቴ ፆኦሲ ኪኢታንቾ ጌዲዎኔ ኮራ ሙኪ፥ “ኔኤኒ ሃይ ዶዶ ዖሎ ዓሢዮ! ፆኦሲ ኔኤና ዎላኬ። ዴንዲ ዒስራዔኤሌ ዓሶ ሚዲያሜ ዓሶ ኩጫፓ ዓውሴ” ጌዔኔ።

![](https://cdn.door43.org/obs/jpg/360px/obs-en-16-06.jpg?direct&)

ዒማና ጌዲዎኔኮ ዓዴ ሜሌ ፆኦዞም ዒንጎ ባኣዚ ሺኢሺ ካኣሽካ ቤሲ ዓኣኔ። ጌዲዎኔ ዬያ ሹጮና ኮሺንቴ ሜሌ ፆኦዞም ዒንጎ ቤዞ ሻሃንዳጉዲ ፆኦሲ ዒዛም ኬኤዜኔ። ጋዓንቴ ጌዲዎኔ ዴሮ ዒጊጬሢሮ ሳዓ ዓማንዳያ ሄላንዳኣና ዬያ ማዺባኣሴ። ዬካፓ ዬያ ዒንጎ ባኮ ሺኢሾ ቤዞ ሜንሢ ጋኣጪ ሲላሊ ማሄኔ። ዒኢካ ኮይሎይዳ ፆኦሲም ዒንጎ ባኣዚ ሺኢሾ ዓኪ ቤሲ ሹቺና ኮሼኔ። ዒኢካ ፆኦሲም ዒንጎ ባኣዚያ ሺኢሺ ካኣሽኬኔ።

![](https://cdn.door43.org/obs/jpg/360px/obs-en-16-07.jpg?direct&)

ዚሮ ጉቴሎ ፔቴ ዓሲ ዔያቶኮ ካኣዦ ቤዞ ሻሄሢ ዛጊ ዴራ ሚርጌና ዻጋዼኔ። ጌዲዎኔያ ዎዻኒ ዒዛኮ ማኣሪ ዴንዴኔ። ጋዓንቴ ጌዲዎኔኮ ዓዴ፥ “ዓይጎሮ ዒንሢ ዒንሢኮ ፆኦዞ ማኣዳኒ ኮዓይ? ዒ ዬይ ጎኔ ፆኦሲ ማዔያታቴ ፔ ዛሎ ፔኤሮ ሂንዳ ዖልቲ ሞኦቶንጎ!” ጌዔኔ። ጌዲዎኔኮ ዓዴ ያዺ ጌዔሢሮ ዴራ ጌዲዎኔ ዎዺባኣሴ።

![](https://cdn.door43.org/obs/jpg/360px/obs-en-16-08.jpg?direct&)

ሚዲያሜ ዓሳ ዒስራዔኤሌ ዓሶ ቡሪሢሮ ላሚ ሃሣ ሙኬኔ። ዬያ ዴሮኮ ዺቡማ ዓጪጉዲታሢሮ ፓይዲም ማጋያኬ። ጌዲዎኔያ ዬያ ሚዲያሜ ዓሶ ዖላኒ ዒስራዔኤሌ ዴሮ ዔኤሌኔ። ፆኦሲ ዒዛ ዛሎና ዒስራዔኤሌ ዓሶ ማኣዳኒ ጎኔ ኮዔያ ማዒፆ ዔራኒ ጌዲዎኔ ላምዖ ማላታ ፆኦሲ ኮይላ ዖኦጬኔ።

![](https://cdn.door43.org/obs/jpg/360px/obs-en-16-09.jpg?direct&)

ዒዚ ዒማና ቤርታሳዖ ጉፓሌ ፔጌይዳ ሳዓ ጌሣዖ ዚሮ ጉቴ ዋንቶ ጫርካ ዬኖ ጉፓሎይዳ ሌሊ ጴዻዖ ሳዓ ፃኣዺ ማዓንዳጉዲ ፆኦሲ ዖኦጬኔ። ፆኦሲያ ዒ ጌዔማ ጎይፆ ማዼኔ። ሄሊሴ ዋንቴሎ ጌዲዎኔ “ጉፓሌሎ ሃሻዖ ሳዖይዳ ጫርካ ጴዾንጎ” ጌይ ፆኦሲ ዖኦጬኔ። ፆኦሲያ ዒማይዴኔ። ዬንሢ ላምዖ ማላቶንሢ ፆኦሲ ዒስራዔኤሌ ዓሶ ዒዛ ዛሎና ሚዲያሜ ዓሶ ኩጫፓ ዓውሳኒ ኮዔሢ ጌዲዎኔም ዔርዛያ ማዔኔ።

![](https://cdn.door43.org/obs/jpg/360px/obs-en-16-10.jpg?direct&)

ዬያሮ ዒስራዔኤሌኮ ሃይሢታሚ ላምዖ ሺያ ዖልዚ ዓሲ ጌዲዎኔ ኮራ ሙኬኔ፤ ጋዓንቴ ፆኦሲ ጌዲዎኔም “ዬያ ዖሎ ዓሶኮ ፓይዳ ዺቤኔ” ጌዔኔ። ዬካፓ ጌዲዎኔ ዖሎ ዴንዲፆሮ ዒጊጫ ላማታሚ ላዖ ሺያ ዓሲ ማኣሪ ማኣሪ ማሂ ዳኬኔ። ሃሣ ፆኦሲ ጌዲዎኔም “ሃሢ ሄላዖ ዖሎ ዓሶኮ ፓይዳ ዺቢኬ” ጌዔኔ። ጊንሣ ሃሣ ጌዲዎኔ ሃይሦ ፄኤታ ዖልዚ ዓሲ ሌሊ ዓይሳዖ ሃንጎዋቶ ማሂ ዳኬኔ።

![](https://cdn.door43.org/obs/jpg/360px/obs-en-16-11.jpg?direct&)

ዬኖ ዋንቶ ፆኦሲ ጌዲዎኔም፥ “ሚዲያሜ ዓሶኮ ዖሎ ዓሳ ዓኣ ጉርዶ ዎቴ፤ ዔያታ ጋዓ ባኮ ኔ ዋይዜቴያ ዒጊጪፖ” ጌዔኔ። ዬያሮ ጌዲዎኔ ሚዲያሜ ዓሶኮ ዖሎ ዓሶ ጉርዶ ዒማ ዋንቶ ዴንዴኔ፤ ፔቴ ሚዲያሜ ዖልዚ ዓሲስኬይ ፔ ላጌስኬያም ዓውቲ ኬኤዛዖ፥ “ጌዲዎኔኮ ዖሎ ዓሳ ሚዲያሜ ዓሶ ባሻንቴ ታ ዛጌኔ” ጋዓንቴ ዒ ዋይዜኔ። ጌዲዎኔ ዬያ ዋይዛዖ ፆኦሲም ዚጊ ካኣሽኬኔ።

![](https://cdn.door43.org/obs/jpg/360px/obs-en-16-12.jpg?direct&)

ዬካፓ ጌዲዎኔ ፔኤኮ ዖሎ ዓሶ ባንሢ ማዒ ፔቴ ፔቴሢም ዛዬ፥ ዖቲ ናይንታ ኩሻኣ ፖዒሢ ኩጫ ኩጫ ዒንጌኔ። ያዺዴስካፓ ሚዲያሜኮ ዖሎ ዓሳ ጊንዒ ዓኣ ጉርዶ ሙኪ ማንጌኔ። ሚዲያሜኮ ዖሎ ዓሳ ሚርጌና ጊንዔሢሮ ጊዲዎኔኮ ሃይሦ ፄኤቶ ዖሎ ዓሳ ፖዒ ሙካ ኩሾ ታሞ ዔያታ ዴንቃኒ ዳንዳዒባኣሴ።

![](https://cdn.door43.org/obs/jpg/360px/obs-en-16-13.jpg?direct&)

ጌዲዎኔኮ ዖሎ ዓሳ ዎሊ ዑፃ ኩጫ ዓኣ ዖቶ ጳዺሲ ዹኡሴኔ፤ ኩሾዋ ፔቴይዳ ፖዒሢ፥ ዛያሢያ ፔኤኮ ዋርቂ ዋርቂ፥ “ሃይ ፆኦሲና ጌዲዎኔና ዖሎ ዓሶኬ!” ጌይ ዒላቴኔ።

![](https://cdn.door43.org/obs/jpg/360px/obs-en-16-14.jpg?direct&)

ፆኦሲ ሚዲያሜኮ ዖሎ ዓሶ ዲቃሢ ካራ ባይዜኔ፤ ዬያሮ ዔያታ ዎሊ ዎዺሢ ዓርቄኔ። ዬካፓ ዒስራዔኤሌ ዓሳ ማኣራ ዓቴ ዓሶዋ ቢያ ዔኤሊ ፔቱሞና ሚዲያሜ ዓሶ ዳውሴኔ፤ ዛሎ ዓሶ ዔያታ ዎዼኔ፥ ዛሎ ዳውሲ ዒስራዔኤሌ ዓጫፓ ዳኬኔ። ዒማና ፄኤታና ላማታሚ ሺያ ዖልዚ ዓሲ ሚዲያሜ ዓሶኮ ሃይቄኔ። ዬያይዲ ፆኦሲ ዒስራዔኤሌ ዴሮ ዓውሴኔ።

![](https://cdn.door43.org/obs/jpg/360px/obs-en-16-15.jpg?direct&)

ዒስራዔኤሌ ዴራኣ ጌዲዎኔ ካኣታሣኒ ኮዔኔ። ጌዲዎኔ ጋዓንቴ ዬያ ዒፄኔ፤ ዒዚ ዔያቶ ሚዲያሜ ዓሶፓ ዔያታ ቡሪ ዔኬ ዎርቆ ዢኢራሢ ዔኪ ዬዓንዳጉዲ ዓይሤኔ። ዬያሮ ዴራ ጌዲዎኔም ሚርጌ ዎርቄ ዔኪ ዬዒ ዒንጌኔ።

![](https://cdn.door43.org/obs/jpg/360px/obs-en-16-16.jpg?direct&)

ጌዲዎኔ ዬያ ዎርቆ ሼኤሺ፥ ቄኤሶ ቢያኮ ሱኡጋሢ ማኣዓንዳ ዱማ ማኣዖ ኮሺሴኔ። ዴራ ጋዓንቴ ዬያ ዎርቆና ኮሺንቴ ማኣዓሢ ፆኦዞ ማሂ ካኣሽኪሢ ዓርቄኔ። ዬያሮ ፆኦሲ ዴሮ ሞርካ ዔያቶ ባሻንዳጉዲ ዓኣሢ ዒንጊ ፁንቄኔ። ጋፒንፆይዳ ዴራ ሃሣ ፆኦሲ ዔያቶ ዓውሳንዳጉዲ ዖኦጫዛ ሜሌ ዓውሳያ ዔያቶም ዒ ዳኬኔ።

![](https://cdn.door43.org/obs/jpg/360px/obs-en-16-17.jpg?direct&)

ዬያጉዴ ባኣዚ ሚርጌ ማይንቲ ዒስራዔኤሌ ዓሶይዳ ማዺንቴኔ። ዎዎይታይ ጌዔቴ ዒስራዔኤሌ ዓሳ ጎሜ ማዻኔ፥ ፆኦሲ ዔያቶይዳ ሜቶ ዓጊ ፁንቃኔ፤ ጊንሣ ዴራ ጎሞ ቡኡፃኔ፤ ፆኦሲያ ዔያቶ ዓውሳንዳ ዓሲ ዳካኔ። ሚርጌ ዎዴ ማዓንዳያ ፆኦሲ ዒስራዔኤሌ ዓሶ ዓውሳኒ፥ ዔያታ ጌሌ ሜታፓ ኬሳንዳ ዓሲ ዳኪ ዳኪ ዓውሴኔ።

![](https://cdn.door43.org/obs/jpg/360px/obs-en-16-18.jpg?direct&)

ጋፒንፆይዳ ዒስራዔኤሌ ዴራ ሜሌ ዴሮኮ ካኣታ ዓኣሢጉዲ ዔያቶማኣ ዒ ካኣቲ ዒንጎም ፆኦሲ ዔያታ ዖኦጬኔ። ዖሎ ዔያቶ ዓርና ማዒ ዖሊሳንዳ፥ ዖዶሲ ሃሣ ዶዲ ዓሲ ዔያታ ኮዔኔ። ፆኦሲ ጋዓንቴ ዬያ ዔያቶኮ ዖኦጪፆ ናሽኪባኣሴ፤ ማዔቴያ ዔያታ ኮዔሢ ጎይፆ ካኣቲ ዔያቶም ካኣታሤኔ።

*ጌኤዦ ማፃኣፖይዳ ኬኤዚንቴ ሃይሴ፡- ሱኡጎ ማፃኣፖ 1-5፤ 6-8።*

## 17. ፆኦሲ ዳውቴም ማዻኒ ጫኣቄ ጫኣቁሞ

https://openbiblestories.org/l/mdy/story-17/

![](https://cdn.door43.org/obs/jpg/360px/obs-en-17-01.jpg?direct&)

ዒስራዔኤሌኮ ቤርታሳ ካኣታሢ ሳኣዖኦሌ ጌይንታያኬ፤ ዬይ ካኣታሢ ዴራ ኮዔ ጎይፆጉዴያ ዖዶሲ ሃሣ ዓውካራኣ ሚርጌ ሚዛጲኬ። ሳኣዖኦሌ ካኣታዺ ዎይሢፆ ዓርቄዖ ዻካ ሌዔ ጋርካ ሌሊ ኮሺ ካኣቲ ማዒ ዎይሤኔ። ጊንፃፓ ጋዓንቴ ፆኦሲም ዋይዙዋ ፑርታ ዓሲ ማዔኔ፤ ዬያሮ ፆኦሲ ፔቴ ኬሊ ሳኣዖኦሌ ቤዞይዳ ካኣታዻንዳ ሜሌ ዱማ ዓሲ ዶኦሬኔ።

![](https://cdn.door43.org/obs/jpg/360px/obs-en-17-02.jpg?direct&)

ፆኦሲ፡ ካኣቲ ሳኣዖኦሌኮ ጊንፃፓ ካኣታዻንዳያ፥ ዳውቴ ጌይንታ ፔቴ ዒስራዔኤሌ ዼጌስኬያ ዶኦሬኔ። ዳውቴ ቤኤቴሌሄሜ ካታማ ሾይንቴያ፥ ማራይ ሄንቃ ናይኬ። ዳውቴ ዺቢ ኬሊዳ ዒዛኮ ማራቶ ሙዓኒ ሙካ ዞቦንታ ዲቤ ጌይንታ ቦዖዋ ዎዺ ዔራያኬ። ዳውቴ ፆኦሲ ጉሙርቂ ዒዛም ዓይሢንታያ፥ ሼሌዔ ሃሣ ፂሎ ዓሲኬ።

![](https://cdn.door43.org/obs/jpg/360px/obs-en-17-03.jpg?direct&)

ዬካፓ ዳውቴ ዼኤፒ ዖልዚ ዓሲ፥ ሃሣ ሱኡጌ ማዔኔ። ዳውቴ ሃጊ ዔቃ ዼጌ ዓኣዖ ጎሊያዴ ጌይንታ ዼኤፒ፥ ዎልቄናኣ ዶዲ ማዔ ዖልዚ ዓሲስኬያና ዖልቴኔ። ጎሊያዴ ዖልዚ ዖሎ ጎይሢ ታማሪ ዔሬያ፥ ዶዲ ዎልቄ ዓኣያ፥ ዔጳኣ ላሆ ዋዻ ማዓ ዼኤፒ ዓሲኬ። ጋዓንቴ ዳውቴ ጎሊያዴ ዎዺ፥ ዒስራዔኤሌ ዓሶ ዓውሳንዳጉዲ ፆኦሲ ዒዛ ማኣዴኔ። ዬካፓ ዒስራዔኤሌ ዴራ ዒዛ ሚርጌና ሄርሺ ጋላታንዳያ ሄላንዳኣና ዔያቶኮ ሞርኮ ባሺሢና ሚርጌ ማዾ ዳውቴ ማዼኔ።

![](https://cdn.door43.org/obs/jpg/360px/obs-en-17-04.jpg?direct&)

ዳውቴ ዓሳ ባሼ ናሽኬሢሮ ሳኣዖኦሌ ዒፂሢ ቂኢሩሞ ዒዛ ቂኢሬኔ። ዬያሮ ሳኣዖኦሌ ሚርጌ ኬሊ ዳውቴ ዎዻኒ ካራ ኮዔኔ፤ ዳውቴያ ሳኣዖኦሌፓ ቶላኒ ፑኔኔ። ፔቴ ኬሊ ሳኣዖኦሌ ዳውቴ ዎዻኒ ኮይፆይዳ ዓኣዖ ዳውቴ ዓኣሺንቲ ዓኣ ዴኖ ዔቶ ባኣኮ ሼኤሺዳ ጌሊ ዴዔኔ፤ ጋዓንቴ ዒ ዳውቴ ዴንቃኒ ዳንዳዒባኣሴ። ዳውቴ ጋዓንቴ ሳኣዖኦሌ ጫርጊ ዎዻንዳጉዴያ ቃኣፂ ሙኪ ዑኬዖ ዎዺፆ ሃሺ፥ ዎዺ ቤዛ ካኣታዻኒ ኮዒባኣሢ ሳኣዖኦሌ ዔራንዳጉዲ ሳኣዖሌኮ ማኣዓሢ ዓጫፓ ዻካ ቤሲ ቲቂ ዔኬኔ።

![](https://cdn.door43.org/obs/jpg/360px/obs-en-17-05.jpg?direct&)

ጋፒንፆይዳ ሳኣዖኦሌ ዖልዚዳ ሃይቄኔ፤ ዳውቴያ ዒስራዔኤሌይዳ ካኣታዼኔ። ዳውቴ ኮሺ ካኣቲ ማዔሢሮ ዴራ ዒዛ ናሽኬኔ። ፆኦሲያ ዳውቴ ዓንጄኔ፥ ዔቦ ቢያ ዒዛም ጊኢጊሼኔ። ዳውቴ ሚርጌ ዖልዚ ዖልቴኔ፥ዬያ ቢያይዳ ፔ ሞርኮ ዒ ባሻንዳጉዲ ፆኦሲ ዒዛ ማኣዴኔ። ዳውቴ ዬሩሳላሜ ካታሞ ዖሊ ባሺ ዓርቂ ዒ ዴዒ ዎይሣ ዼኤፒ ካታማ ማሄኔ። ዳውቴ ካኣታቴ ዎዶይዳ ቢያ ዒስራዔኤሌ ሚርጌና ዶዲ፥ ሃሣ ዖርጎቺ ዓጪያ ማዔኔ።

![](https://cdn.door43.org/obs/jpg/360px/obs-en-17-06.jpg?direct&)

ዒስራዔኤሌ ዓሳ ቢያ ፆኦሲ ካኣሽካያና ፆኦሲም ዒንጎ ባኣዚ ዔኪ ሺኢሻንዳ ፆኦሲም ዱማዼ ጌኤሺ ማኣሪ ማዣኒ ዳውቴ ኮዔኔ። ዴራ ዒማና ዖይዶ ፄኤታ ሌዔኮ ቤርታ ሙሴ ማዢሴ ፆኦሲ ዴሮና ካኣማ ዓፒሎና ማዢንቴ ኬኤፆይዳ ሌሊ ፆኦሲ ካኣሽካኔ፥ ሃሣ ዒንጎ ባኣዚያ ዒኢካ ሺኢሻኔ።

![](https://cdn.door43.org/obs/jpg/360px/obs-en-17-07.jpg?direct&)

ጋዓንቴ ፆኦሲ ሂዚ ጋዓ ኪኢታና ፆኦሲ ማሊሢ ኬኤዛ ናኣታኔ ዳውቴ ኮይላ ዳኬኔ፦ “ኔኤኒ ዖልዚ ዓሲ ማዔሢሮ ዬያ ታኣም ዱማዼ ማኣሮ ኔ ማዢንዱዋሴ፤ ጋዓንቴ ኔ ናኣዚ ማዣንዳኔ፥ ታ ኔና ሚርጌና ዓንጃንዳኔ። ኔ ዜርፃፓ ፔቴይ ታ ዴሮኮ ናንጊና ካኣቲ ማዒ ዎይሤ ጎይሣ ናንጋንዳኔ!” ዬይ ናንጊና ዎይሢ ናንጋንዳ ካኣታሢ ዳውቴ ዜርፃሢ ማዔ፥ ሜሲሄኬ (ካኣቱሞም ዶኦሞናሢ)። ዬይ ካኣቱሞም ዶኦሞና ካኣታሢ ዓጪ ዴሬኮ ቢያ ጎሞ ጌኤሻንዳያ ማሂ ፆኦሲ ዒዛ ዶኦሬሢኬ።

![](https://cdn.door43.org/obs/jpg/360px/obs-en-17-08.jpg?direct&)

ዳውቴ ዬያ ጌይንቴ ባኮ ዋይዛዖ ዬያ ዼኤፖ ቦንቾና ሚርጌ ዖርጎቹሞ ዒዛም ዒንጋኒ ጫኣቄ ፆኦዛሢ ኔጉዋዖ ጋላቲ ሄርሺያ ዼኤፒሴኔ። ፆኦሲ ዬያ ባኮ ዓይዲ ማዺ ኩንሣንዳቴያ ዳውቴ ዔሪባኣሴ። ያዺ ማዒፆና ዒስራዔኤሌ ዓሳ ዬይ ሜሲሄ ጌይንቴሢ ሙካንዳያ ሄላንዳኣና ፔቴ ሺያ ሌዔጉዴያ ቢያ ዎዛ ጌሢ ካፔኔ።

![](https://cdn.door43.org/obs/jpg/360px/obs-en-17-09.jpg?direct&)

ዳውቴያ ሚርጌ ሌዔ ፒዜ ዎጊ ዎይሣያ፥ ሃሣ ጉሙርቂንታያ ማዒ ዓጮ ዎይሤኔ፤ ፆኦሲያ ዒዛ ዓንጄኔ።ያዺ ማዔቴያ ዒዛ ናንጎኮ ጋፒንፆ ዑኬዖ ፆኦሲ ዖዪሳ ፑርታ ጎሜ ማዼኔ።

![](https://cdn.door43.org/obs/jpg/360px/obs-en-17-10.jpg?direct&)

ፔቴ ኬሊ ዳውቴ ፔኤኮ ዖሎ ዓሶ ዖላ ዳካዖ ማኣሮኮ ዑፃ ዢባሬ ዔካኒ ኮሾና ዼጌ ቤዞይዳ ዓኣኔ፤ ዒማና ፔቴ ሚዛጲ ላኣሊስኬና ዑሢ ማስታንቴ ዒ ዴንቄኔ፤ ላኣሌሎኮ ሱንፃ ቤርሳቤ ጌይንታኔ።

![](https://cdn.door43.org/obs/jpg/360px/obs-en-17-11.jpg?direct&)

ዳውቴ ፔ ዓኣፖ ዬካፓ ሺርሾ ባሺንቲ ዴንዲ ዒዞ ዔኪ ዬዓንዳ ዓሲ ዳኬኔ። ዔኪ ዬይሴስካፓ ዒዞና ላሃዖ ማሂ ዳኬኔ። ዻካ ዎዴኮ ጊንፃ ቤርሳቤ፥ “ታኣኮ ዑስካ ዓሲ ዓቴኔ” ጌይ ኪኢታ ዳውቴም ዳኬኔ፤ ዒዛ ዖሪዮ ማቾኬ።

![](https://cdn.door43.org/obs/jpg/360px/obs-en-17-12.jpg?direct&)

ዖሪዮ ጌይንታሢ ዳውቴኮ ዖሎ ዓሶ ባኣካ ጎኦባ ዔርቴ ዖልዚ ዓሲኬ። ዬካፓ ዳውቴ ዖሪዮ ዖሎ ቤዛፓ ዔኤሊ ዔኪ ዬይሲ ማቾና ዎላ ዴዓንዳጉዲ ዓይሤኔ። ጋዓንቴ ዖሪዮ “ታኣኮ ላጋ ዖሎይዳ ዓኣንቴ ታኣኒ ታ ማቾ ኮይላ ማኣሪ ዴንዲንዱዋሴ” ጌይ ዒፄኔ። ዬያሮ ዳውቴ ዖሪዮ ጊንሣ ማሂ ዖሎ ቤዞ ዳካዖ ዖላ ዶዲ ዓኣ ዛሎይዳ ዒዛ ዔቂሲ ዎዺሻንዳጉዲ ዖሎ ዓሶ ዓይሣሢም ኬኤዜኔ።

![](https://cdn.door43.org/obs/jpg/360px/obs-en-17-13.jpg?direct&)

ዳውቴ ዖሪዮ ዬያይዲ ዎዺሼስካፓ ቤርሳቤ ዔኬም ዓቲንቄ ናይ ሾዔኔ። ዳውቴ ማዼ ባኮሮ ፆኦሲ ዒዛይዳ ሚርጌና ዻጋዼኔ፤ ዒ ማዼ ጎማ ዎማዺ ፑርታቴያ ኬኤዛንዳጉዲ ፆኦሲ ማሊፆ ኬኤዛ ናኣታኔ ዳውቴ ኮይላ ዳኬኔ። ዬያሮ ዳውቴ ጎሞ ቡኡፄሢሮ ፆኦሲ ዒዛ ማኣሬኔ። ዳውቴ ዬካፓ ዓቴ ዎዶ ቢያይዳ ሜርጌ ሜታሳ ዎዶናታዖ ፆኦሲ ጎይፆ ሃንቲ ዓይሢንቴኔ።

![](https://cdn.door43.org/obs/jpg/360px/obs-en-17-14.jpg?direct&)

ጋዓንቴ ዳውቴ ማዼ ጎሞሮ ዬያ ሾይንቴ ናዓሢ ፆኦሲ ዎዼኔ። ዬካፓ ሃሣ ዳውቴ ማኣሮይዳ ዖልዚ ሌሊ ማዔኔ፤ ዳውቴኮዋ ዎልቃ ሚርጌና ላቤኔ። ዳውቴ ፆኦሲም ጉሙርንታያ ማዒባኣቴያ ፆኦሲ ዒዛም ማዻንዳኔ ጌዔሢ ጉሙርቂንቲ ካፓያ ማዔኔ። ዬካፓ ቤርሳቤ ሜሌ ዓቲንቄ ናይ ሾዓዛ፥ ሱንፆ ሴሎሞኔ ጌይ ዔያታ ጌሤኔ።

*ጌኤዦ ማፃኣፓ ኬኤዚንቴ ሃይሴ፡- 1ሳሙዔኤሌ 10፡15-19፤ 24፤ 31፤ 2ሳሙዔኤሌ 5፤ 7፤ 11-12።*

## 18. ዒስራዔኤሌኮ ፓቂንቴ ካኣቶ

https://openbiblestories.org/l/mdy/story-18/

![](https://cdn.door43.org/obs/jpg/360px/obs-en-18-01.jpg?direct&)

ሚርጌ ሌዔኮ ጊንፃ ዳውቴ ሃይቄኔ፤ ናኣዚ ሴሎሞኔ ዒስራዔኤሌይዳ ካኣታዺ ዎይሢፆ ዓርቄኔ። ፆኦሲ ሴሎሞኔ ኮይላ ዒ ባሼ ዓይጎ ኮዓቴያ ዖኦጬኔ። ሴሎሞኔ ጋዓንቴ ዔራቶ ሺኢቄኔ፤ ዬያሮ ፆኦሲ ዒዛ ሳዖይዳ ዓኣ ዓሶፓ ቢያ ባሼ ጪንጫ ዓሲ ማሄኔ። ሴሎሞኔ ሚርጌ ባኣዚ ታማሪ ዔሪ ዔራቶና ጌኤሲ ቲቃያ ማዔኔ። ሃሣ ፆኦሲ ዒዛ ሚርጌ ዖርጎቼኔ።

![](https://cdn.door43.org/obs/jpg/360px/obs-en-18-02.jpg?direct&)

ሴሎሞኔ ዒዛኮ ዓዴ ዳውቴ ዬሩሳላሜይዳ ፆኦሲም ዱማዼ ማኣሮ ማዣኒ ማሊ ጊኢጊሼ ባኮና ጌኤዦ ማኣሮ ማዤኔ። ዬያሮ ዴራ ዓፒሎና ማዢንቴ ማኣሮ ሃሺ ዬያ ፆኦሲም ዱማዼ ጌኤዦ ማኣሮይዳ ፆኦሲም ዒንጎ ባኮ ዒንጊ ዒንጊ ካኣሽኬኔ። ፆኦሲያ ዒኢካ ሙኪ ጴዼኔ፤ ዴሮና ዎላኣ ናንጌኔ።

![](https://cdn.door43.org/obs/jpg/360px/obs-en-18-03.jpg?direct&)

ሴሎሞኔ ሜሌ ዴሮይዳፓ ማዔ ሚርጌ ላኣሊ ናሽኬኔ። ዬያሮ ዎሊ ዑፃ ሴካ ሺያ ማዓንዳ ላኣሊ ዔኪ ፆኦሲም ዋይዚ ዒፃያ ማዔኔ! ዬያቶፓ ዺቦ ላኣላ ሜሌ ዓጪፓ ሙኬያ ማዓዖ ካኣሽኮ ፆኦዞዋ ፔኤና ዎላ ዔኪ ዬዒ ካኣሽኪሢ ዓርቄኔ። ሴሎሞኔያ ጋርቼሢኮ ጊንፃ ዬያ ፆኦዞ ካኣሽሢዳ ጌሌኔ።

![](https://cdn.door43.org/obs/jpg/360px/obs-en-18-04.jpg?direct&)

ዬያሮ ፆኦሲ ሴሎሞኔይዳ ዻጋዼኔ፥ ሴሎሞኔ ፆኦሲም ጉሙርቂንቱዋ ማዔሢሮ ዒዚ ሃይቄስካፓ ዒስራዔኤሌ ላምዖ ካኣቶ ማዒ ፓቂንታንዳሢ ፆኦሲ ኬኤዜኔ፤ ፆኦሲ ዒስራዔኤሌ ዓሶ ሻርሺሢሮ ዬያ ማዼኔ።

![](https://cdn.door43.org/obs/jpg/360px/obs-en-18-05.jpg?direct&)

ሴሎሞኔ ሃይቄስካፓ ዒዛ ቤዛ ዒዛኮ ናኣዚ ሮቢዓሜ ካኣታዼኔ። ሮቢዓሜ ዔኤያ ዓሲኬ። ዒስራዔኤሌ ዴራ ጋዓንቴ ካኣቲ ኩሙሢና ካኣታሳኒ ሙኪ ቡኬኔ። ሴሎሞኔ ዔያቶ ሚርጌ ዴኤሢ ማዾ ማዺሼሢንታ ዺቢ ጊኢራኣ ጊኢሪሼሢ ዾንኪ ኬኤዜኔ።

![](https://cdn.door43.org/obs/jpg/360px/obs-en-18-06.jpg?direct&)

ሮቢዓሜ ፔ ዔኤያቶና ማሃዖ፥ “ታ ዓዴ፥ ሴሎሞኔ ዒንሢ ሚርጌ ማዾ ማዺሼኔቱዋ ዒንሢ ጋዓሢ፤ ታ ዒዛስካፓ ባሼ ዴኤሢ ማዾ ዒንሢ ማዺሺባኣቴ ዛጉዋቴ፤ ዒዚ ዒንሢ ሻርሼስካፓ ባሼ ታ ዒንሢ ጳርቃንዳኔ” ጌዔኔ።

![](https://cdn.door43.org/obs/jpg/360px/obs-en-18-07.jpg?direct&)

ዬያሮ ታጶ ዒስራዔኤሌ ፃጳ ሮቢዓሜም ዋይዞ ዒፂ ጌኤታዼኔ። ዓቴ ላምዖ ፃጶንሢ ሌሊ ካኣቲ ሮቢዓሜም ጉሙርቂንታያ ማዔኔ፤ ዪሁዳ ካኣቶ ዴሬያ ማዔኔ።

![](https://cdn.door43.org/obs/jpg/360px/obs-en-18-08.jpg?direct&)

ሮቢዓሜም ዋይዞ ዒፄ ታጶ፥ ዒስራዔኤሌ ፃጳ ዒዮርቢዓሜ ጌይንታያ ካኣቲ ፔኤኮ ካኣታሤኔ። ዬያታ ዒስራዔኤሌኮ ኬዶ ዛሎ ካኣቶ ማዔኔ፤ ሱንፃኣ ዒስራዔኤሌ ካኣቶ ዴሬ ጌይንቴኔ።

![](https://cdn.door43.org/obs/jpg/360px/obs-en-18-09.jpg?direct&)

ዬይ ዒዮርቢዓሜ ፆኦሲም ዋይዞ ዒፂ፥ ዴሮዋ ጎሜ ማዺሼኔ። ዔያታ ዎዎዴይ ጌዔቴ ዪሁዳ ካኣቶ ዓጮይዳ ዓኣ፥ ፆኦሲም ዱማዼ ማኣሮይዳ ፆኦሲ ካኣሽኪፆ ሃሺ ዴራ ካኣሽካንዳጉዲ ላምዖ ፆኦዞ ዔያቶም ማዤኔ።

![](https://cdn.door43.org/obs/jpg/360px/obs-en-18-10.jpg?direct&)

ዪሁዳ ካኣቶና ዒስራዔኤሌ ካኣቶና ዎሊኮ ሞርኬ ማዒ ዺቢ ዎዴ ዖልቴኔ።

![](https://cdn.door43.org/obs/jpg/360px/obs-en-18-11.jpg?direct&)

ዬኖ ዓኮ ዒስራዔኤሌ ካኣቶ ዓጮ ጌይንቴዞይዳ ካኣታዻ ካኣታ ቢያ ሚርጌና ፑርታኬ፤ ዔያቶፓ ባሼሢ ዔያቶ ቤዛ ኬስኪ ካኣታዻኒ ኮዓ ዓሳ ዎዺ ኩርሴኔ።

![](https://cdn.door43.org/obs/jpg/360px/obs-en-18-12.jpg?direct&)

ዒስራዔኤሌ ካኣቶ ቢያሢንታ ዴሮንታ ፆኦሲ ሃሺ ሜሌ ፆኦዞ ካኣሽኬኔ። ዬያ ሜሌ ፆኦዞ ዔያታ ካኣሽካ ጎይፃ ዓሱሞ ዒኔና ማዾ ማዾፓ ኬስኬያኬ፤ ዬይያ ካኣዦሮኬ ጌይ ዓኒ ሃሣ ማቾ ማዒባኣ ዓሲና ላሂ ላሂ፥ ናይያ ሹኪ ዒንጊ ዒንጊ ካኣሽኮያኬ።

![](https://cdn.door43.org/obs/jpg/360px/obs-en-18-13.jpg?direct&)

ዪሁዳ ካኣቶ ጌይንቴ ዓሳ ዳውቴ ዜርፆኬ። ዬያቶ ካኣቶፓ ፔቴ ፔቴ ካኣታ ፒዜ ጎይሢና ዴሮ ዎይሤያ፥ፆኦሲያ ካኣሽኬ ቃራ ካኣቶኬ። ጋዓንቴ ዺቦ ካኣታ ፑርታ፥ ዒኢቴ ማዾዋ ማዼያኬ፤ ሜሌ ፆኦዞዋ ዔያታ ካኣሽኬኔ። ዬያቶፓ ፔቴ ፔቴዞንሢ ፔኤኮ ናኣቶ ጎኔ ፆኦሲቱዋ ሜሌ ፆኦዞም ሹኪ ዒንጌኔ። ዬያጉዲ ዪሁዳኮ ዺቢ ዴሬ ፆኦሲም ጌኤታዺ ሜሌ ፆኦዞ ካኣሽኬኔ።

*ጌኤዦ ማፃኣፖይዳ ኬኤዚንቴ ሃይሴ፡-1ካኣቶ 1-6፤ 11-12።*

## 19. ፆኦሲ ማሊፆ ኬኤዛ ዓሶ

https://openbiblestories.org/l/mdy/story-19/

![](https://cdn.door43.org/obs/jpg/360px/obs-en-19-01.jpg?direct&)

ዒስራዔኤሌ ዴራ ናንጌ ዎዶይዳ ቢያ ፆኦሲ ፔ ማሊፆ ኬኤዛ ዓሶ ዳኬሢ ኬኤዚንቴኔ። ዬያታ ዓሳ ፆኦሲ ጋዓ ባኮ ፆኦሲፓ ዋይዚ፥ ዬያ ኪኢቶ ዴሮም ኬዛኔ።

![](https://cdn.door43.org/obs/jpg/360px/obs-en-19-02.jpg?direct&)

ዓክዓቤ ዒስራዔኤሌይዳ ካኣታዼያና ፆኦሲ ማሊፆ ኬኤዛሢ ዔኤሊያሴኬ። ዬይ ዓክዓቤ ጎዖሢ ዴራ ባዓኣሌ ጌይንታ ሜሌ ፆኦዞ ካኣሽካንዳጉዲ ዴሮ ዔቂሴ፥ ፑርታ ካኣቶኬ። ዬያሮ ዔኤሊያሴ ዓክዓቤም፥ “ታኣኒ ጊንሣ ማሂ ኬኤዛንዳያ ሄላንዳኣና ዒስራዔኤሌይዳ ፔቴታዖ ዒርዚ ዋርቃዓኬ” ጌዔኔ። ዬይ ዓክዓቤ ሚርጌና ዻጋሴኔ።

![](https://cdn.door43.org/obs/jpg/360px/obs-en-19-03.jpg?direct&)

ዔኤሊያሴ ዒዛ ዎዻኒ ኮዓ ዓክዓቤፓ ፑኒ ዓሲ ናንጉዋ ቦኦሎይዳ ዓኣ ፔቴ ዎርዚስኬኖ ዴንዳንዳጉዲ ፆኦሲ ዒዛም ኬኤዜኔ። ዬኖ ቤዞይዳ ዒ ዓኣንቴ ሳዓ ሃባርታኣና ሃባርታኣና ካፒ ዒዛም ካሣንታ ዓሽኪያ ዔኪ ዬዓኔ። ዬያሮ ካኣቲ ዓክዓቤና ዖሎ ዓሶና ዔኤሊያሴ ኮዔኔ፤ ጋዓንቴ ዔያታ ዒዛ ዴንቃኒ ዳንዳዒባኣሴ። ዬይ ናዮ ዎዳ ሚርጌ ዶዲ ዶዲ ዓኣዼሢሮ ጋፒንፆይዳ ዬና ዎሬላኣ ዓቱዋዖ ሚጬኔ።

![](https://cdn.door43.org/obs/jpg/360px/obs-en-19-04.jpg?direct&)

ያዺ ማዔሢሮ ዔኤሊያሴ ዒኢካ ዑኬ ዓኣ ዓጪ ቤቴኔ። ዬኖ ዓጬሎይዳ ሉማሢ ዶዲፃፓ ዔቄያና ፔቴ ዜኤሪንዶስኬኖና ዒዞኮ ዻካ ናይስኬማናኮ ሙዖ ባኣዚ ጋፓኒ ዑኪ ዓኣያታንቴ ዔያታ ዔኤሊያሴም ሙኡዚ ካሢ ካሢ ዒንጌኔ። ዬያሮ ፆኦሲ ዬኖ ዓሴሎኮ ዺኢላ ቆኦሮይዳፓ፥ ዛይታኣ ዖታፓ ጋፑዋጉዲ ናጊሼኔ። ዬይ ናዮ ዎዳ ጋፓንዳያ ሄላንዳኣና ዔያቶኮ ሙኡዚ ባይቁዋዖ ዴዔኔ፤ ዔኤሊያሴያ ዒኢካ ሚርጌ ሌዔ ናንጌኔ።

![](https://cdn.door43.org/obs/jpg/360px/obs-en-19-05.jpg?direct&)

ሃይሦ ሌዔና ዛላናኮ ጊንፃፓ ዒርዚ ዋርቃንዳያ ማዒፆ ዒስራዔኤሌ ዓጮ ዴንዲ ካኣቲ ዓክዓቤም ዔኤሊያሴ ኬኤዛንዳጉዲ ፆኦሲ ዒዛ ዓይሤኔ። ዬያሮ ዔኤሊያሴ ማዒ ሙካዛ ዓክዓቤ ዔኤሊያሴ ዴንቃዖ “ዔኤዞ ሜቶ ማዣ! ኔ ማዒ ሙኪባይ!” ጌዔኔ። ዔኤሊያሴ ማሃዖ፥ “ሜቶ ማዣ ጎዖንዶሢ ኔናኬ! ጎኔ ፆኦዛሢ ማዔ ቢያ ባኮ ዎሣ ጎዳ ኔኤኒ ሃሺ፥ ባዓኣሌ ጌይንታ ሜሌ ፆኦዞ ካኣሽኬኔ። ሃሢ ዓካሪ ዒስራዔኤሌ ዴሮ ቢያ ቄርሜሎሴ ዹካ ቡኩሴ” ጌዔኔ።

![](https://cdn.door43.org/obs/jpg/360px/obs-en-19-06.jpg?direct&)

ዒማና ዒስራዔኤሌ ዓሳ ዖይዶ ፄኤታና ዶንጊታሚና ማዓ ባዓኣሌ ማሊፆ ኬኤዛ ዓሶዋ ዎላ ዔኪ ቄርሜሎሴ ዹካ ቡኬኔ። ዔኤሊያሴ ዴሮም፥ “ዋኣዺ ማይንቲ ማይንቲ ማሊፆ ዒንሢኮ ዒንሢ ሺርሻይ? ናንጊና ናንጋ ጎዳ ፆኦሲ ማዔቴ ዒዛ ካኣሽኪ ዒዛም ማዹዋቴ!” ጌዔኔ።

![](https://cdn.door43.org/obs/jpg/360px/obs-en-19-07.jpg?direct&)

ዬካፓ ዔኤሊያሴ ባዓኣሌ ማሊፆ ኬኤዛ ዓሶም፥ “ፔቴ ዎፓና ሹኪጋፓ ፆኦሲም ዒንጎ ባኣዚ ማሂ ሺኢሹዋቴ፤ ጋዓንቴ ታሚ ዔኤሢፖቴ። ታኣኒያ ዒማይዳንዳኔ። ዒ ዋይዛያ ማዒፆ ዔርዛኒ ታሚና ኬዲ ጴዼሢ፥ ዬይ ጎኔ ፆኦሲኬ” ጌዔኔ። ዬያሮ ባዓኣሌ ቄኤሳ ዒንጎ ባኮ ሹኪ ሺኢሼኔ፥ ታሞ ጋዓንቴ ዔኤሢባኣሴ።

![](https://cdn.door43.org/obs/jpg/360px/obs-en-19-08.jpg?direct&)

ዬካፓ ባዓኣሌ ማሊፆ ኬኤዛ ዓሳ፥ “ባዓኣሌ! ኑኡም ዋይዜ!” ጌይ ዑኡዞ ዼጊዲ ሺኢቄኔ። ዬያይዲ ሮኦሮ ጉቤ ዒላቲ ሺኢቄ ጎይሣ ፔኤቄኔ። ዔያታ ዒማና ፔኤኮ ዑፆ ዓፓሬና ሃኣዚ ሃኣዚ ሺኢቄኔ፤ ጋዓንቴ ፔቴታዖ ዔያቶ ሺኢጲፃ ዋይዚንቲባኣሴ።

![](https://cdn.door43.org/obs/jpg/360px/obs-en-19-09.jpg?direct&)

ጋፒንፆይዳ ዔኤሊያሴ ፆኦሲም ሹኪ ዒንጎ ባኮ ሺኢሼኔ። ዬያኮ ቤርታ ዔኤሊያሴ ዴሮም ዓሽኮይዳ፥ ሃንፂሎይዳ፤ ጊንሣ ሃሣ ዒንጎ ባኮ ሺኢሾ ቤዞኮ ኮይሎይዳ ታጶ ላምዖ ኮሎሢ ዖቲ ዋኣሢ ዋሂ ሳዖ ዋኣሢ ሌሊ ማሂ ሃሻንዳጉዲ ኬኤዚናኣኮኬ።

![](https://cdn.door43.org/obs/jpg/360px/obs-en-19-10.jpg?direct&)

ዬካፓ ዔኤሊያሴ ሺኢቃዖ፥ “ቢያ ባኮ ዎይሣ ጎዳሢዮ! (ያህዌ) ዓብራሃሜንታ ዪሳኣቄንታ ያይቆኦቤንታ ፆኦዛሢዮ! ኔኤኒ ዒስራዔኤሌኮ ፆኦሲ ማዔሢና ታኣኒያ ኔ ዓይሌ ማዒፆ ሃኖ ፔጋሲ ዻዌ። ኔኤኒ ጎኔ ፆኦሲ ማዔሢ ሃይ ዴራ ዔራንዳጉዲ ሺኢጲፆ ታኣሲ ዋይዜ” ጌዔኔ።

![](https://cdn.door43.org/obs/jpg/360px/obs-en-19-11.jpg?direct&)

ዒማና ኔጉዋዖ ታሚ ጫሪንካፓ ኬዲ ዓሽኮ፥ ሃንፂሎ፥ ሹጮ፥ ኮይላ ዓኣ ቡኡሮ፤ ዬያጉዲ ዬያ ዒንጎ ባኮ ሺኢሾ ቤዞኮ ኮይላ ዋሆና ዋኣፆዋ ዓይሱዋዖ ላኣዒ ሙዔኔ። ዴራ ዬያ ዛጋዖ ሳዓ ሎኦሚ ላሂ፥ “ቢያ ባኮ ዎይሣ ጎዳሢ ጎኔ ፆኦሲኬ! ዒ ጎኔ ፆኦሲኬ!” ጌዔኔ።

![](https://cdn.door43.org/obs/jpg/360px/obs-en-19-12.jpg?direct&)

ዬካፓ ዔኤሊያሴ፥ “ባዓኣሌ ማሊፆ ኬኤዛ ዓሶፓ ፔቴ ዓሲታዖ ቶሊ ዴንዱዋጉዲ!” ጌዔኔ። ዬያሮ ዴራ ባዓኣሌ ማሊፆ ኬኤዛ ዓሶ ቢያ ዓርቂ ዔኪ ዴንዲ ዎዼኔ።

![](https://cdn.door43.org/obs/jpg/360px/obs-en-19-13.jpg?direct&)

ዔኤሊያሴያ ካኣቲ ዓክዓቤም፥ “ዒራ ሙኪናኣኮኬ፤ ዬያሮ ዑኬና ካታሞ ማዒ ዴንዴ” ጌዔኔ። ዒማና ጫሪንጫ ኔጉዋዖ ካርሤኔ፤ ዎልቄና ዓኣ ዒርዚያ ዋዺ ዓርቄኔ። ቢያ ባኮ ዎይሣ ጎዳሢ (ያህዌ) ጎኔ ፆኦሲ ማዔሢ ዬያይዲ ዔርዜኔ።

![](https://cdn.door43.org/obs/jpg/360px/obs-en-19-14.jpg?direct&)

ዔኤሊያሴ ማዼ ዎዶኮ ጊንፃ ፆኦሲ ዒዛ ማሊሢ ኬኤዛያ ማሂ ዔልሳዒ ጌይንታሢ ዶኦሬኔ። ፆኦሲ ዔልሳዒ ዛሎና ሚርጌ ፔ ዎልቄና ማዺንታ ዓኪ ባኣዚ ማዼኔ። ዬያ ማዺንቴ ዓኮ ባኮይዳፓ ፔቴ ማዔሢ ዓይጎዳይ ጌዔቴ ዑፃ ኬስካ ዶርዖና ዓርቂንቴ ኒዕማኔ ጎዖ፥ ዖሎ ዓሶ ዓይሣስኬያ ዶርዓሢፓ ዻቂሺፆኬ። ዔልሳዒ ፆኦሲ ዎልቄና ዓኪ ባኣዚ ማዻሢ ኒዕማኔ ዋይዛዖ ዴንዲ ዒዛ ፓሣንዳጉዲ ዖኦጬኔ። ዒዚያ ዮርዳኖሴ ዎሮይዳ ላንካይ ማይንቲ ኬስኪ ጌሊ ጋዓንዳጉዲ ዔልሳዒ ዒዛ ዓይሤኔ።

![](https://cdn.door43.org/obs/jpg/360px/obs-en-19-15.jpg?direct&)

ዔልሳዒ ዬያ ጋጋዓዛ ኒዕማኔ ኮራ ዬይ ዔኤዩሞ ሃይሴ ማሌሢሮ ዻጋዺ፥ ዬያይዳኒ ኮይባኣሴ። ጋዓንቴ ጊንፃፓ ዒዛኮ ዓይላሢ ዒዛ ዞሬም ፔ ማሊፆ ሺርሺ፥ ዔልሳዒ ጌዔ ጎይፆ ዮርዳኖሴ ዎሮይዳ ላንካይ ማይንቲ ኬስኪ ጌሊ ጌዔኔ። ጋፒንፃ ዒ ዋኣፆፓ ኬስካኣና ዑፃ ኬስካ ዶርዓሢፓ ዒ ጋፒ ጌኤሽኬኔ! ዬያይዲ ፆኦሲ ዒዛ ፓሤኔ።

![](https://cdn.door43.org/obs/jpg/360px/obs-en-19-16.jpg?direct&)

ዬካፓ ፆኦሲ ዒስራዔኤሌ ዓሶም ዒዛ ማሊሢ ኬኤዛ ሚርጌ ዓሲ ዳኬኔ። ዬያታ ኪኢቶ ዓሳ ቢያ ዒስራዔኤሌ ዴራ ሜሌ ፆኦዞ ካኣሽኪፆ ሃሻንዳጉዲ፥ ዓሲም ፒዜ ዎጌ ዎጋንዳጉዲና ሚጪንታንዳጉዲ ኬኤዜኔ። ዴራ ፑርቶ ማዾ ሃሺ ፆኦሲም ዓይሢንቲባኣቴ ፆኦሲ ዔያቶ ዻቢንቴያ ማሂ ፑርታና ዎጋንዳሢ፥ ሜቶዋ ዔያቶይዳ ዓጋንዳሢ ላቲ ኬኤዜኔ።

![](https://cdn.door43.org/obs/jpg/360px/obs-en-19-17.jpg?direct&)

ሚርጌ ዎዴ ዴራ ፆኦሲም ዋይዞ ዒፂ ጌኤታዻያ ማዔኔ። ፆኦሲ ማሊፆ ኬኤዛ ዓሶኮዋ ዔያታ ቶኦኮ ዛጋ ጎይፃ ኮሺቱዋሴ፤ ፔቴ ፔቴና ዔያታ ፆኦሲ ማሊፆ ኬኤዛ ዓሶ ዎዻኔ። ፔቴና ፆኦሲ ማሊፆ ኬኤዛ ዔርሚያሴ ዴራ ዎዻኒ ማሊ ዔቴይዳ ዔኪ ዓጌም ዒኢካ ዔቶይዳ ዓኣ ዾቃሌና ዒዚ ዓዺንቴኔ። ዬያሮ ዬኖ ዎዶና ዓኣ ካኣታሢ ዔርሚያሴም ሚጪንቲ ዬያፓ ጎቺ ኬሳንዳ ዓይሌ ዳኬኔ።

![](https://cdn.door43.org/obs/jpg/360px/obs-en-19-18.jpg?direct&)

ዴራ ፆኦሲ ማሊፆ ኬኤዛ ዓሶ ዒፃያ ማዔቴያ ፆኦሲ ጋዓ ባኮ ኬኤዚፆ ሃሺባኣሴ። ዴራ ጎሞ ቡኡፂባኣቴ ፆኦሲ ዔያቶይዳ ሜቶ ዓጋንዳያታሢ ላቲ ኬኤዜኔ። ጊንሣ ሃሣ ፆኦሲ ዶኦሚንቴ ካኣቲ (ሜሲሄ) ዳካኒ ጫኣቄሢ ዴራ ጶቂሣንዳጉዲያኣ ኬኤዛኔ።

*ጌኤዦ ማፃኣፖይዳ ኬኤዚንቴ ሃይሴ፡-1ካኣቶ. ማ 16-18፤ 2ካኣቶ. ማ 5፤ ዔርሚያሴ 38።*

## 20. ዒስራዔኤሌ ዴሮኮ ዲዒንቲፆና ዲዒንቶፓ ማዒፆ

https://openbiblestories.org/l/mdy/story-20/

![](https://cdn.door43.org/obs/jpg/360px/obs-en-20-01.jpg?direct&)

ዒስራዔኤሌ ካኣቶንታ ዪሁዳ ካኣቶንታ ዎሊ ዑፃ ፆኦሲ ዖዪሳ ጎሜ ማዼኔ። ፆኦሲ ዔያቶም ማዻንዳኔ ጌይ ሲና ዹኮይዳ ጫኣቄ ጫኣቁሞንታ ዒንጊንቴ ዎጎዋ ካፖ ዒፂ ዳኣቄኔ። ዬያሮ ፆኦሲ ዔያታ ዬያ ጎሞ ማዻፓ ሃሺ ማዓንዳጉዲና ጊንሣ ፆኦሲ ካኣሽካንዳጉዲ ላቲ ኬኤዞም ዒዛ ማሊፆ ኬኤዛ ዓሶ ዳኬኔ፤ ዴራ ጋዓንቴ ዬያ ዋይዚ ዓይሢንቲባኣሴ።

![](https://cdn.door43.org/obs/jpg/360px/obs-en-20-02.jpg?direct&)

ያዺ ማዔሢሮ ፆኦሲ ዔያቶኮ ሞርኮ ኩጫ ዓኣሢ ዒንጊሢና ላምዖ ካኣቶይዳ ሜቶ ዓጌኔ። ዎልቄና ዼኤፒ ማዔ ዓሶኦሬ ካኣቲ ሙኪ ዒስራዔኤሌ ካኣቶ ዖሊ ባሼኔ፤ ሚርጌና ቦንቺንታያ ማዔ ሚኢሾዋ ቡሪ ዔኪ ዴንዴኔ፤ ዺቢ ዓጪያ ሚቺ ባይዜኔ።

![](https://cdn.door43.org/obs/jpg/360px/obs-en-20-03.jpg?direct&)

ዓሶኦሬ ዓሳ ዒስራዔኤሌ ዓሶኮ ሱኡጎ፥ ዖርጎጮ ዓሶ፤ ዬያጉዲ ሃኣሚ ማዒ ማዾ ማዻ ዓሶዋ ቢያ ዔኪ ፔ ዓጮ ዴንዴኔ። ዎዺንቱዋዖ ሃሣ ዲዒንቱዋዖ ዓቴዞንሢ ሚርጌና ኩፒ ማዔ ዒስራዔኤሌ ዓሶ ሌሊኬ።

![](https://cdn.door43.org/obs/jpg/360px/obs-en-20-04.jpg?direct&)

ዬካፓ ዓሶኦሬ ዓሳ ዒስራዔኤሌ ዓጮይዳ ሜሌ ዴሬ ሙኪ ናንጋንዳጉዲ ዔኪ ዬዔኔ። ዬይ ሜሌ ዴራ ዒስራዔኤሌኮ ሻሂንቴ ካታሞ ካታሞ ጊንሣ ዶዲሺ ማዢ፥ ዒኢካ ዓቴ ዒስራዔኤሌ ዓሶ ዔኪያ ዔኪ ሎዒያ ሎዔኔ። ዬያ ሜሌ ዴሮና ዎላ ሲኢሪንቴ ዴራ ሳማሪያ ዓሶ ጌይንቴኔ።

![](https://cdn.door43.org/obs/jpg/360px/obs-en-20-05.jpg?direct&)

ዒስራዔኤሌ ካኣታ ፆኦሲም ጉሙርቂንቲባኣያ፥ ሃሣ ዓይሢንቲባኣያ ማዔሢሮ ፆኦሲ ዔያቶ ዎያጉዴ ሜቶይዳ ዓጌቴያ ዪሁዳይዳ ዓኣ ዴራ ዛጌኔ። ያዺ ማዔቴያ ዪሁዳ ዴራ ካኣናኔ ዓጮ ዓሳ ካኣሽካ ፆኦዞዋ ቃሲ ሜሌ ፆኦዞ ካኣሽኬኔ። ፆኦሲ ዔያቶ ጎሪ ማሃኒ ዒዛ ማሊፆ ኬኤዛ ዓሶ ዳኬንቴያ ዔያታ ዬያ ዔኤቢኬ ጌይ ዔኪባኣሴ።

![](https://cdn.door43.org/obs/jpg/360px/obs-en-20-06.jpg?direct&)

ዓሶኦሬ ዓሳ ዒስራዔኤሌ ካኣቶ ዓጮ ዖሊ ባይዜሢኮ ፄኤታ ሌዔኮ ጊንፃ ዪሁዳ ካኣቶ ዓጮ ዖላንዳጉዲ ፆኦሲ ባብሎኔ ዴሮ ዳኬኔ። ባብሎኔ ዒማና ሚርጌና ዎልቃዻ ካኣቶ ዓጪኬ፤ ዬያሮ ዪሁዳ ዓጮ ካኣቲ ባብሎኔ ካኣቲ ናብካዳናፆኦሬም ዓይሌ ማዒ ማዻኒ፥ ሃሣ ሌዓ ሌዓ ሚርጌ ሚኢሼ ጊኢራኒ ዔኤዔኔ።

![](https://cdn.door43.org/obs/jpg/360px/obs-en-20-07.jpg?direct&)

ጋዓንቴ ዻካ ሌዔኮ ጊንፃ ዪሁዳ ካኣቶ ዓጫ ካኣቲ ናብካዳናፆኦሬም ዋይዞ ዒፄኔ። ዬያሮ ባብሎኔ ዓጮ ዓሳ ጊንሣ ሙኪ ዪሁዳ ዓጮ ዖሊ፥ ዬሩሳላሜ ካታሞዋ ባሺ ዓርቄኔ፤ ፆኦሲም ዱማዼ ጌኤዦ ማኣሮ ሻሂ ባይዚ ካታሞንታ ዬያ ጌኤዦ ማኣሮይዳ ዓኣ ባኮ ቢያ ቡሪ ዔኪ ዴንዴኔ።

![](https://cdn.door43.org/obs/jpg/360px/obs-en-20-08.jpg?direct&)

ዪሁዳ ካኣቲ ናብካዳናፆኦሬም ዋይዞ ዒፄሢሮ ሻርሻኒ ኮዒ ዪሁዳ ካኣቲኮ ናኣዚ ቶይዲ ዒዛኮ ቤርታ ዎዼኔ፤ ዪሁዳ ካኣቲኮዋ ዓኣፖ ዋቂ ኬሲ ባይዜኔ። ዬካፓ ዪሁዳ ካኣቲ ባብሎኔ ዓጫ ቱኡዞ ማኣራ ቱኡቲ፥ ዒኢካ ሃይቃንዳጉዲ ዔኪ ዴንዴኔ።

![](https://cdn.door43.org/obs/jpg/360px/obs-en-20-09.jpg?direct&)

ናብካዳናፆኦሬንታ ዒዛኮ ዖሎ ዓሶንታ ኩፒ ማዔ ዓሳ ፔ ዓጫ ዓቲ ሳዖ ጎሽኪ ጎሽኪ ዴዓንዳጉዲ ሃሻዖ ባሼ ዺቦ ዪሁዳ ዴሮ ባብሎኔ ዔኪ ዓኣዼኔ። ዒስራዔኤሌ ዴራ ዔያቶም ዎዛ ማሂ ዒንጊንቴ ዓጮ ሃሺ ዴንዳንዳጉዲ ዎልቄና ዔውቴሢ “ዲዒንቲ” ጌይንቴኔ።

![](https://cdn.door43.org/obs/jpg/360px/obs-en-20-10.jpg?direct&)

ዎዚ ፆኦሲ ዴሮ ዔያታ ማዼ ጎሞሮ ዲዒሲ ዔኪ ዳኪ ሜቶይዳ ዓጌቴያ ዔያቶንታ ዔያቶም ማዻንዳኔ ጌይ ጫኣቄ ጫኣቁሞዋ ዋሊባኣሴ። ፆኦሲ ፔ ዴሮ ካፒፆንታ ዒዛ ማሊፆ ኬኤዛ ዓሶዋ ዳኪፆ ዴራ ዴንዴ ቤዛታዖ ሃሺባኣሴ። ላንካይታሚ ሌዔኮ ጊንፃ ዔያቶሮ ማሂ ዒንጊንቴ ዓጮ ዔያታ ማዓንዳሢ ሃጊ ማዓንዳ ዎዛ ማሂ ኬኤዜኔ።

![](https://cdn.door43.org/obs/jpg/360px/obs-en-20-11.jpg?direct&)

ላንካይ ሌዔ ማዓ ዎዴይዳ ፓሪሴ ካኣቲ ባብሎኔ ዖሊ ባሼኔ፤ ዬያሮ ፓሪሴ ካኣቲ ባብሎኔ ካኣቲ ቤዛ ማዒ ዓጮ ዎይሤኔ። ሃሢ ዒስራዔኤሌ ዓሶ ጌይንታ ዓሳ ዓይሁዴ ዴሬ ጌይንቴኔ፤ ባሼ ዓሳ ሚርጌ ሌዔ ናንጌሢ ባብሎኔይዳኬ። ዻካ ጋርቺ ዓሲ ሌሊ ዪሁዳ ዓጮ ጶቂሢ ዔሬኔ።

![](https://cdn.door43.org/obs/jpg/360px/obs-en-20-12.jpg?direct&)

ፓሪሴ ካኣቲ ሚርጌና ዶዲ ዎልቄና ዓኣያኬ፤ ጋዓንቴ ዒ ዖሊ ባሺ ዓርቄ ዴሮም ሚጪንታኔ። ቂኢሮሴ ጌይንታ ካኣቲ ፓሪሴይዳ ካኣታዼንቴ ዻካ ሌዔኮ ጊንፃ ዪሁዳ ዓጮ ማዓኒ ኮዓ ዓይሁዴ ዓሲ ቢያ ዴንዳኒ ዳንዳዓሢ ኬኤዜኔ። ፆኦሲም ዱማዼ ጌኤዦ ማኣሮ ጊንሣ ጊኢጊሺ ማዣንዳጉዲ ሚኢሼያ ዓይሁዶም ዒንጌኔ። ዬያሮ ዓይሁዶ ዓሳ ዲዒንቶይዳ ላንካይታሚ ሌዔ ዴዔስካፓ ዻካ ዛላ ዓይሁዴ ዓሲ ዪሁዳይዳ ዓኣ ዬሩሳላሜ ካታሞ ማዒ ዴንዴኔ።

![](https://cdn.door43.org/obs/jpg/360px/obs-en-20-13.jpg?direct&)

ዓይሁዶ ዴራ ዬሩሳላሜ ሙኪ ሄላዖ ፆኦሲም ዱማዼ ጌኤዦ ማኣሮንታ ካታሞዋ ጊንሣ ዓካሲ ኮሼኔ። ዎዚ ዔያታ ሜሌ ዴሬ ዴንካ ዎርቄቴያ ላሚ ጊንሣ ማዒ ሙኪ ዔያቶም ዒንጎና ዓጬሎይዳ ናንጊ፥ ጌኤዦ ማኣሮይዳኣ ፆኦሲ ካኣሽኬኔ።

*ጌኤዦ ማፃኣፖይዳ ኬኤዚንቴ ሃይሴ፡- 2ካኣቶ. ማ 17፤ 24-25፤ 2ፆኦሲ.ዓሃኬ 36፤ ዒዝራ 1-10፤ ኔሄሚያ 1-13።*

## 21. ካኣቱሞም ዶኦሚንቴሢ (ሜሲሄ) ሙካንዳያ ማዒፆ ፆኦሲ ኬኤዜሢ

https://openbiblestories.org/l/mdy/story-21/

![](https://cdn.door43.org/obs/jpg/360px/obs-en-21-01.jpg?direct&)

ፆኦሲ ሃጊ ዓይፆይዳ ካኣቱሞም ዶኦሞናሢ (ሜሲሄ) ዓጮ ዳካኒ ማሌኔ። ቤርታሲ ፆኦሲ ሃጊ ማዓ ዎዛ ማሂ ዬያ ዛሎ ኬኤዜሢ ዓዳኣሜና ሂዋኣኖናምኬ፤ ዔያቶ ዻቢሼ ሾኦዣሢኮ ቶኦኮ ዳኣፃንዳሢ ሂዋኣኖ ዜርፃሢ ማዒፆ ሃጋኣ ዎዛ ማሂ ፆኦሲ ኬኤዜኔ። ዬይ ሃጊ ማዓ ዎዛ ዒንጊንቴ ጎይፆና ሜሲሄ (ኪሪስቶሴ) ፃላሄ ጋፒንሢ ባሻኔ ጌይሢኬ።

![](https://cdn.door43.org/obs/jpg/360px/obs-en-21-02.jpg?direct&)

ዬያ ሂዋኣኖ ዜርፃሢ ዛሎና ዓጪ ዴሬ ቢያ ዓንጆ ዴንቃንዳሢ ፆኦሲ ዓብራሃሜም ጫኣቂ ኬኤዜኔ። ዬይ ዓንጃ ሃጊ ካኣቱሞም ዶኦሞናሢ (ኪሪስቶሴ) ሙካኣና ኩማያኬ። ዒዚ ዓጪዳ ዓኣ ዴሬ ቶኦኪፓ ቢያ ዺቢ ዓሲ ዻቂሻንዳኔ።

![](https://cdn.door43.org/obs/jpg/360px/obs-en-21-03.jpg?direct&)

ዬያጉዲ ሙሴማኣ ፆኦሲ ዒዛጉዴ ፆኦሲ ማሊሢ ኬኤዛ ዓሲ ኬስካንዳሢ ጫኣቂ ኬኤዜኔ። ዬይያ ሃጊ ሙካንዳ ካኣቱሞም ዶኦሞናሢ ዛሎ ኬኤዚንቴያኬ።

![](https://cdn.door43.org/obs/jpg/360px/obs-en-21-04.jpg?direct&)

ዒዛ ዜርፃፓ ፔቴ ፆኦሲ ዴሮኮ ናንጊና ካኣቲ ማዒ ዎይሢ ናንጋንዳሢ ፆኦሲ ዳውቴማኣ ጫኣቄኔ። ዬይ ካኣቱሞም ዶኦሞናሢ (ኪሪስቶሴ) ዳውቴ ዜርፃፓ ማዒፆ ዻዋኔ።

![](https://cdn.door43.org/obs/jpg/360px/obs-en-21-05.jpg?direct&)

ፆኦሲ ዓኪ ጫኣቁሞ ዴሮና ጫኣቃንዳሢ ፆኦሲ ማሊፆ ኬኤዛ ዔርሚያሴ ዛሎና ጉሙርሲ ኬኤዜኔ፤ ዬይ ጫኣቁማ ፆኦሲ ሲና ዹኮይዳ ዒስራዔኤሌ ዴሮና ዎላ ጫኣቄሢጉዲቱዋሴ። ዬያ ዓኮ ጫኣቁሞና ፆኦሲ ፔ ዎጎ ፔ ዴሮ ዒና ፃኣፓንዳኔ፤ ዴራ ቶኦካ ቶኦካ ዒዛ ዔራንዳኔ፤ ዒዛ ዴሬያኣ ማዓንዳኔ፤ ዒዚያ ዔያቶኮ ጎሞ ዓቶም ጋዓንዳኔ። ዬይ ካኣቱሞም ዶኦሞናሢ ዓኮ ጫኣቁሞ ዓርቃሢ ማዓንዳኔ።

![](https://cdn.door43.org/obs/jpg/360px/obs-en-21-06.jpg?direct&)

ፆኦሲ ማሊፆ ኬኤዛ ዓሳኣ ዬይ ካኣቱሞም ዶኦሞናሢ (ሜሲሄ) ፆኦሲ ማሊሢ ኬኤዛያ፥ ቄኤሴ፥ ሃሣ ካኣቲያ ማዓንዳኔ ጌዔኔ። ፆኦሲ ማሊሢ ኬኤዛያ ጌይፃ ፆኦሲ ጋዓ ባኮ ዋይዚ ዔኪ ዴሮም ኬኤዛያ ጌይሢኬ። ፆኦሲ ዳካኒ ማሌ ዒዛ ማሊፆ ኬኤዛሢ ፓጬ ባኣዚባኣ፥ ኩሙሢ ማዔያኬ።

![](https://cdn.door43.org/obs/jpg/360px/obs-en-21-07.jpg?direct&)

ዒስራዔኤሌ ዴሮኮ ቄኤሳ ፔ ጎሞ ዛሎንታ ዓሶ ጎሞ ዛሎዋ ፆኦሲም ዒንጎ ባኮ ዔኪ ሺኢሻኔ። ሃሣ ዬይ ቄኤሳ ዴሮ ዛሎዋ ፆኦሲ ሺኢቃኔ። ዬይ ካኣቱሞም ዶኦሞናሢ (ኪሪስቶሴ) ፓጬ ባኣዚባኣ፥ ኩሙሢ ዒንጊሢ ማሂ ፔና ፆኦሲም ዔኪ ሺኢሻያ ቄኤሶኮ ቢያ ዑሢኬ።

![](https://cdn.door43.org/obs/jpg/360px/obs-en-21-08.jpg?direct&)

ዴሬኮ ካኣቲ ፔ ዓጮይዳ ዓኣ ዓሶም ዎጊ ዎይሣ ዓሲኬ። ዬይ ካኣቱሞም ዶኦሞናሢ ጋዓንቴ ቤርታዺ ዳውቴኮ ካኣቱሞ ዖይቶይዳ ዴዓያ፥ ፓጬ ባኣዚባኣ ካኣቲ ማዓንዳኔ። ዬያ ሌሊቱዋንቴ ዓጪ ቢያ ናንጊና ዎይሣ ካኣቲ ማዓኔ፤ ዬያጉዲ ቢያ ዎዴ ጌኤሺ ዒኔና ፒዜ ዎጌ ዎጋያ ማዓንዳኔ።

![](https://cdn.door43.org/obs/jpg/360px/obs-en-21-09.jpg?direct&)

ፆኦሲ ማሊፆ ኬኤዛ ዓሳ ዬያ ካኣቱሞም ዶኦሞናሢ ዛሎ ሜሌ ሚርጌ ባኣዚ ቤርታሲ ኬኤዜኔ። ፆኦሲ ማሊፆ ኬኤዛ ሚልኪያሴ ዬይ ካኣቱሞም ዶኦሞናሢ ሙካንዳሢኮ ቤርታ ፆኦሲ ማሊሢ ኬኤዛ ዼኤፒ ዓሲ ኬስካንዳሢ ኬኤዜኔ። ዬያ ካኣቱሞም ዶኦሞናሢ ፔቴ ኩሙሢ ዉዱሮ ናይ ሾዓንዳሢያ ፆኦሲ ማሊፆ ኬኤዛ ዒሲያሴ ኬኤዜኔ። ፆኦሲ ማሊፆ ኬኤዛ ሚኪያሴ ዬይ ካኣቱሞም ዶኦሞናሢ ቤኤቴሌሄሜ ካታማ ሾይንታንዳሢያኣ ኬኤዜኔ።

![](https://cdn.door43.org/obs/jpg/360px/obs-en-21-10.jpg?direct&)

ፆኦሲ ማሊፆ ኬኤዛ ዓሳ ዬያ ካኣቱሞም ዶኦሞናሢ ዛሎ ሜሌ ሚርጌ ባኣዚ ቤርታሲ ኬኤዜኔ። ፆኦሲ ማሊፆ ኬኤዛ ሚልኪያሴ ዬይ ካኣቱሞም ዶኦሞናሢ ሙካንዳሢኮ ቤርታ ፆኦሲ ማሊሢ ኬኤዛ ዼኤፒ ዓሲ ኬስካንዳሢ ኬኤዜኔ። ዬያ ካኣቱሞም ዶኦሞናሢ ፔቴ ኩሙሢ ዉዱሮ ናይ ሾዓንዳሢያ ፆኦሲ ማሊፆ ኬኤዛ ዒሲያሴ ኬኤዜኔ። ፆኦሲ ማሊፆ ኬኤዛ ሚኪያሴ ዬይ ካኣቱሞም ዶኦሞናሢ ቤኤቴሌሄሜ ካታማ ሾይንታንዳሢያኣ ኬኤዜኔ።

![](https://cdn.door43.org/obs/jpg/360px/obs-en-21-11.jpg?direct&)

ጊንሣ ሃሣ ፆኦሲ ማሊፆ ኬኤዛ ዒሲያሴ ዬይ ካኣቱሞም ዶኦሞናሢ ዻቤ ባኣዚ ባኣንቴ ዒፂንታንዳሢንታ ማኪሢ ሃይሴያ ዒዛ ሄላንዳሢ ኬኤዜኔ። ዬያጉዲ ሃንጎ ፆኦሲ ማሊፆ ኬኤዛ ዓሳኣ ዬያ ካኣቱሞም ዶኦሞናሢ ዎዺ፥ ዒዛኮ ዓፒሎ ዔካኒ ዎሊም ዓሳ ዒፃ ዓጋንዳሢንታ ዒዛኮ ላጌ ማዔሢያ “ታ ዒዛ ዔሩዋሴ” ጋዓንዳሢ ዛሎዋ ኬኤዜኔ። ፆኦሲ ማሊፆ ኬኤዛ ዛካሪያሴ ዬያ ካኣቱሞም ዶኦሞናሢኮ ላጌታዖ ዓኣሢ ዒንጋንዳሢም ሃይሢታሚ ቢራ ጪጊንታንዳሢ ዛሎዋ ኬኤዜኔ።

![](https://cdn.door43.org/obs/jpg/360px/obs-en-21-12.jpg?direct&)

ፆኦሲ ማሊፆ ኬኤዛ ዒሲያሴ ዬያ ካኣቱሞም ዶኦሞናሢኮ ሃይቦ ዛሎዋ ኬኤዜኔ። ዓሳ ዬያ ካኣቱሞም ዶኦሞናሢዳ ጩታንዳሢ፥ ሚኢጪ ዒዛ ዓማላንዳሢ፥ ጳዺያ ጳርቃንዳሢ ዛሎ ኬኤዜኔ። ዎዚ ዒዚ ማዼ ዻቢንቲ ባኣቴያ ዓሳ ዒዛ ጫርጊ ዎዻንዳሢና ዑፆ ዒዛኮ ሃርጊሼም ሚርጌ ሜቶና ዒ ሃይቃንዳሢያ ኬኤዜኔ።

![](https://cdn.door43.org/obs/jpg/360px/obs-en-21-13.jpg?direct&)

ዬያጉዲ ፆኦሲ ማሊፆ ኬኤዛ ዓሳ ጎሜ ዒዛኮ ባኣ ጌኤሺ ዓሲ ማዓንዳሢ ዛሎዋ ኬኤዜኔ። ሜሌ ዓሶኮ ጎሞ ጌኤሻኒ ዒዚ ሃይቃኔ። ዬያ ካኣቱሞም ዶኦሞናሢኮ ዬያይዲ ሜታዺ ሃይቂፃ ፆኦሲና ዓሲና ዎላ ጊኢጊሺ ኮሹሞ ዔኪ ዬዓኔ። ዬያ ካኣቱሞም ዶኦሞናሢኮ ዬያይዲ ሜታዺፃ ፆኦሲ ጌዔም ማዺንታያኬ።

![](https://cdn.door43.org/obs/jpg/360px/obs-en-21-14.jpg?direct&)

ዬይ ካኣቱሞም ዶኦሞናሢ ሃይቃንዳሢንታ ፆኦሲያ ሃይባፓ ዒዛ ዔቂሳንዳሢ ፆኦሲ ማሊፆ ኬኤዛ ዓሳ ቤርታዺ ኬኤዜኔ። ፆኦሲ ዬያ ካኣቱሞም ዶኦሞናሢኮ ሃይቦና ሃይባፓ ዔቂፆ ዛሎና ጎሞ ዓሶ ዒ ዻቂሻኒ ማሌ ማሊፆ ኩንሢ ዓኮ ጫኣቁሞ ዓርቃኔ።

![](https://cdn.door43.org/obs/jpg/360px/obs-en-21-15.jpg?direct&)

ፆኦሲ ዒዛ ማሊፆ ኬኤዛ ዓሶም ዬያ ካኣቱሞም ዶኦሞናሢ ዛሎ ሚርጌ ባኣዚ ፔጋሲ ዻዌኔ፤ ጋዓንቴ ዬይ ካኣቱሞም ዶኦሞናሢ ዬያቶ ፆኦሲ ማሊፆ ኬኤዛ ዓሶ ዎዶና ሃያ ዓጮ ሙኪባኣሴ። ዬይ ፆኦሲ ማሊፃ ኬኤዚንቴንቴ ዖይዶ ፄኤታ ሌዔኮ ጊንፃ፥ ዬይ ፆኦሲ ማሊፆ ኬኤዜ ዓሳ ጌዔ ዎዶማ ካፒ ፆኦሲ ዬያ ካኣቱሞም ዶኦሞናሢ ሃያ ዓጮ ዳኬኔ።

*ጌኤዦ ማፃኣፖይዳ ኬኤዚንቴ ሃይሴ፡- ማዢንቲ ማፃኣፔ 3፡15፤ 12፡1-3፤ ላሚንቴ ዎጎ 18፡15፤ 2ሳሙዔኤሌ 7፤ ዔርሚያሴ 31፤ ዒሲያሴ 59፡16፤ ዳኣኔኤሌ 7፤ ሚልኪያሴ 4፡5፤ ዒሲያሴ 7፡14፤ ሚኪያሴ 5፡2፤ ዒሲያሴ 9፡1-7፤ 35፡3-5፤ 61፡53፤ ዓይኑሞ 22፡18፤ 35፡19፤ 69፡4፤ 41፡9፤ ዛካሪያሴ 11፡12-13፤ ዒሲያሴ 50፡6፤ ዓይኑሞ 16፡10-11፡፡*

## 22. ዮሃኒሴኮ ሾይንቶ

https://openbiblestories.org/l/mdy/story-22/

![](https://cdn.door43.org/obs/jpg/360px/obs-en-22-01.jpg?direct&)

ፆኦሲ ቤርታዺ ፔኤኮ ኪኢታንቾ ዛሎና ዒዛ ማሊፆ ኬኤዛ ዓሶ ዛሎናኣ ዴሮም ፔ ማሊፆ ኬኤዜኔ። ጋዓንቴ ፔቴታዖ ፆኦሲ ዔኤቢ ኬኤዚባኣ ዖይዶ ፄኤታ ሌዔ ዓኣዼኔ። ፔቴ ኬሊ ፆኦሲ ኪኢታንቾ ዛካሪያሴ ጌይንታ ፔቴ ጋርቺ ቄኤሴስኬያም ፆኦሲ ኮራፓ ኪኢታ ዔኪ ዬዔኔ። ዛካሪያሴንታ ዒዛኮ ማቾ ዔልሳቤፆንታ ፆኦሲ ዒጊጫ ዓሲኬ፤ ጋዓንቴ ዒዛ ናይ ሾይባኣያ ዞኦኮኬ።

![](https://cdn.door43.org/obs/jpg/360px/obs-en-22-02.jpg?direct&)

ዬይ ኪኢታንቻሢ ዛካሪያሴም፥ “ኔ ማቻ ዓቲንቄ ናይ ሾዓንዳኔ። ሱንፆ ኔ ዒዛኮ ‘ዮሃኒሴ’ ጌይ ጌሤ፤ ዒዚ ዓያና ጌኤሺ ዼኤፒ ዎልቄና ዒዛይዳ ማዓያ ማዓንዳኔ፤ ዒዚ ዴሮ ካኣቱሞም ዶኦሞናሢም ጊኢጊሻንዳኔ!” ጌዔኔ። ዛካሪያሴያ፥ “ታ ማቾንታ ታናንታ ኑ ሚርጌና ጋርቼኔ! ዬይ ማዓንዳሢ ታ ዎዲ ዔራንዳይ?” ጌዔኔ።

![](https://cdn.door43.org/obs/jpg/360px/obs-en-22-03.jpg?direct&)

ኪኢታንቻሢ ዛካሪያሴም፥ “ሃያ ኮዦ ሃይሶ ታ ዒንሢም ኬኤዛንዳጉዲ ፆኦሲ ታና ዳኬኔ። ጋዓንቴ ኔኤኒ ሃሢ ጉሙርቂባኣሢሮ ናዓሢ ሾይንታንዳያ ሄላንዳኣና ዻንጋ ኔ ባይቃንዳኔ” ጌዔኔ። ዬያሮ ቤዞማና ዛካሪያሴ ጌኤሲ ባሺንቴኔ። ዬካፓ ዬይ ኪኢታንቻሢ ዛካሪያሴፓ ዱማዼኔ። ዛካሪያሴ ማዒ ፔ ማኣሪ ዴንዴሢኮ ጊንፃ ማቻ ዒዛኮ ጎጳኔ።

![](https://cdn.door43.org/obs/jpg/360px/obs-en-22-04.jpg?direct&)

ዔልሳቤፃ ላሆ ዓጊኒ ማዔ ጎጲንዶ ዓኣንቴ ዬይ ኪኢታንቻሢ ማይራሞ ጌይንታ ዔልሳቤፆ ዒጊኒስኬኖ ኮራ ዒዛ ዔሪባኣ ጎይሢና ሙኪ ጴዼኔ። ዬና ማይራማ ዮሴፔ ዒዞ ዔካኒ ዖኦጫያ ኩሙሢ ዉዱሮ ናይኬ። ኪኢታንቻሢ ማይራሞም፥ “ኔ ጎጳዺ ዓቲንቄ ናይ ሾዓንዳኔ፤ ሱንፆዋ ዒዛኮ ኔ ‘ዬሱሴ’ ጌይ ጌሣንዳኔ” ጌዔኔ። ዒዚ ዼኤፖ ፆኦዛሢ ናይ ጌይንታንዳኔ፤ ዎይሥሢ ቢታንቶዋ ናንጊና ዒዛሮ ማዓንዳኔ” ጌዔኔ።

![](https://cdn.door43.org/obs/jpg/360px/obs-en-22-05.jpg?direct&)

ማይራማ ዒማና፥ “ታኣኒ ኩሙሢ ዉዱሮ ናይኬ፤ ዬይ ዎይቲ ማዓኒ ዳንዳዓይ?” ጌዔኔ። ኪኢታንቻሢ፥ “ዓያና ጌኤሺ ኔ ጊዳ ዬዓንዳኔ፤ ዼኤፖ ፆኦዛሢኮ ዎልቃ ኔ ጎጳንዳጉዲ ማሃንዳኔ። ዬያሮ ናዓሢ ዱማዼያ ፆኦሲ ናይ ማዓንዳኔ” ጌዔኔ፤ ዬያ ማይራማ ጉሙርቂ ጎናሲ ዔኬኔ።

![](https://cdn.door43.org/obs/jpg/360px/obs-en-22-06.jpg?direct&)

ዬይ ኪኢታንቻሢ ማይራሞም ዬያ ሃይሶ ኬኤዜስካፓ ማይራማ ኔጉዋዖ ዔልሳቤፆ ዖኦጫኒ ዴንዴኔ። ዔልሳቤፃ ማይራሞኮ ዔኤሊፆ ዋዋይዛኣና ናዓ ጎጶይዳ ኮኦሚሢ ዓርቄኔ። ዬያሮ ዬያታ ላምዖ ላኣሎንሢ ፆኦሲ ዔያቶም ማዼ ማዾና ዎዛዼኔ። ማይራማ ዔልሳቤፆ ማኣራ ሃይሦ ዓጊኒ ዴዔስካፓ ማዒ ፔ ማኣሪ ዴንዴኔ።

![](https://cdn.door43.org/obs/jpg/360px/obs-en-22-07.jpg?direct&)

ዔልሳቤፃ ዓቲንቄ ናይ ሾዔስካፓ ዛካሪያሴና ዎላ ናዓሢኮ ሱንፆ ዔያታ ኪኢታንቻሢ ዓይሤ ጎይፆ ዮሃኒሴ ጌይ ጌሤኔ። ዬካፓ ፆኦሲ ዛካሪያሴኮ ዻንጎ ቡሊ ጌስቲሴኔ። ዬያሮ ዛካሪያሴ፥ “ፆኦሲ ዴሮም ማሌሢሮ ጋላታ ዒዛም ማዖንጎ! ኔኤኒ ሃይ ታ ናዓሢ፥ ዓሳ ፔኤኮ ጎሞ ቡኡፂ ማኣሪንታንዳ ጎይፆ ዻዋ፥ ዼኤፖ ፆኦዛሢ ማሊሢ ኬኤዛያ ኔ ጌይንታንዳኔ!” ጌዔኔ።

*ጌኤዦ ማፃኣፓ ኬኤዚንቴ ሃይሴ፡- ሉቃሴ 1።*

## 23. ዬሱሴኮ ሾይንቶ

https://openbiblestories.org/l/mdy/story-23/

![](https://cdn.door43.org/obs/jpg/360px/obs-en-23-01.jpg?direct&)

ማይራማ ዒማና ዮሴፔ ጌይንታ ፂሎ ዼጌስኬይ ዒዞ ዖኦጫያኬ፤ ዬያሮ ዒዛኮ ዖኦጮዛ ማይራማ ጎጲ ዔኬሢ ዒ ዋይዛዖ ናዓ ዬይ ዒዛሮቱዋኣሢ ዔሬኔ። ያዺ ማዒፆና ማይራሞ ዒ ዻውሲሳኒ ኮይባኣሢሮ ዓሲ ዔሩዋንቴ ዴሜና ዒዞ ሃሻኒ ኮዔኔ። ጋዓንቴ ዮሴፔ ዬያ ማዻንዳሢኮ ቤርታ ፆኦሲ ኪኢታንቻ ሙኪ ዒዛም ኬኤዜኔ።

![](https://cdn.door43.org/obs/jpg/360px/obs-en-23-02.jpg?direct&)

ዬይ ኪኢታንቻሢ ኬኤዛዖ፥ “ዮሴፔ፤ ኔ ዖኦጫ ማይራሞ ዔኪፆ ዒጊጪፖ። ዒዛ ጎጳዼሢ ዓያና ጌኤሺፓ ማዔያኬ። ዒዛ ዓቲንቄ ናይ ሾዓንዳኔ፤ ሱንፆዋ ኔ ዒዛኮ ዬሱሴ ጌይ ጌሤ (ዬሱሴ ጌይፃ፦ ‘ቢያ ባኮ ዎይሣ ጎዳ (ያህዌ) ዓውሳያኬ’ ጌይሢኬ) ጌዔኔ፤ ዒዚያ ዓጮ ዴሮ ጎማፓ ዓውሳንዳኔ” ጌዔኔ።

![](https://cdn.door43.org/obs/jpg/360px/obs-en-23-03.jpg?direct&)

ዬያሮ ዮሴፔ ማይራሞ ዔኬኔ፤ ጋዓንቴ ዒዛ ሾዓንዳያ ሄላንዳኣና ዒዞና ላሂባኣሴ።

![](https://cdn.door43.org/obs/jpg/360px/obs-en-23-04.jpg?direct&)

ማይራሞኮ ሾይፆ ዎዳ ሄሌንቴ ሮሜ ዓጮ ካኣቲ ዴራ ቢያ ፓይዲንታኒ ቤርታ ሾይንቴ ካታሞ ካታሞ ዴንዶንጎ ጌይ ዓይሤኔ። ዬያሮ ዮሴፔና ማይራሞና ዔያታ ናንጋ ናዚሬቴ ካታማፓ ሚርጌ ኬሊ ሃንቲ ቤኤቴሌሄሜ ካታሞ ዴንዴኔ፤ ዓይጎሮ ጌዔቴ ዬና ካታማ ዔያቶኮ ቤርታኣ ማዓሢ፥ ዳውቴ ካታሞታሢሮኬ።

![](https://cdn.door43.org/obs/jpg/360px/obs-en-23-05.jpg?direct&)

ቤኤቴሌሄሜ ዔያታ ሄላዖ ዎርቆንዶ ኬኤሲ ባይዜኔ፤ ዬያሮ ቆልሞ ዎርቃ ሞኦሢ ጌሌኔ። ዬኖ ዋንቶ ማይራሞ ሾይፃ ዓርቄም ሾዓዖ ላይሦንዶ ቤዛ ባይቄሢሮ ባኣቶ ጎንጋሎይዳ ናዖ ላይሤኔ፤ ሱንፆዋ ናዓሢኮ “ዬሱሴ” ጌይ ጌሤኔ።

![](https://cdn.door43.org/obs/jpg/360px/obs-en-23-06.jpg?direct&)

ዬኖ ዋንቶ ሃሣ ዒኢካ ቦኦሎይዳ ቆልሞ ሄንቂ ዎርቄ ቆልሞ ናይ ዓኣንቴ ዔያታ ዔሪባኣ ጎይሢና ፖፖዓ ፆኦሲ ኪኢታንቾ ጴዼሢሮ ዔያታ ዒጊጬኔ። ኪኢታንቻሢ ጋዓንቴ፥ “ዲቃቲፖቴ፤ ታ ዒንሢም ኬኤዛንዳ ኮሺ ሃይሴ ዓኣኔ። ካኣቱሞም ዶኦሚንቴ፥ ጎዳሢ ቤኤቴሌሄሜይዳ ሾይንቴኔ!” ጌዔኔ።

![](https://cdn.door43.org/obs/jpg/360px/obs-en-23-07.jpg?direct&)

ሃሣ ዒ ኬኤዛዖ፥ “ዴንዲ ናዓሢ ኮዑዋቴ፤ ቱርጫና ካንቂ ባይ ጎንጋላይዳ ላይሦናንቴ ዒንሢ ዴንቃንዳኔ” ጌዔኔ። ሃሣ ዔርቲባኣንቴ ጫሪንጫ ፆኦሲ ኪኢታንቾና ኩሜኔ፤ ዬያታ ፆኦሲ ጋላቲ ጋላቲ፥ “ቦንቾ ጫሪንጮይዳ ፆኦሲም ማዖንጎ! ዓሲማኣ ሳዖይዳ ኮሹሞ ማዖም!” ጋዓኔ።

![](https://cdn.door43.org/obs/jpg/360px/obs-en-23-08.jpg?direct&)

ቆልሞ ናኣታ ዑኬና ዴንዳዖ ኪኢታንቻሢ ጌዔ ጎይፆማ ናዓሢ ባኣቶ ጎንጋላ ላሂ ዓኣንቴ ዴንቂ ሚርጌና ዎዛዼኔ። ማይራማኣ ሚርጌና ዎዛዼኔ። ዬካፓ ቆልሞ ናኣታ ዔያታ ዋይዜ ባኮንታ ዛጌ ባኮንታሮ ቢያ ፆኦሲ ጋላቲ ጋላቲ ጊንሣ ሞኦፆ ማዒ ዴንዴኔ።

![](https://cdn.door43.org/obs/jpg/360px/obs-en-23-09.jpg?direct&)

ዻካ ጋዓዖ ሃኬ፥ ዓባ ኬስካ ባንፃ ዓኣ ዔሮ ዓሳ ጫሪንጮይዳ ፔቴ ዦኦጌ ዴንቄኔ። ዬይ ዓይሁዶኮ ዓኪ ካኣቲ ሾይንቴያ ማዒፆ ዻዋሢያ ዔያታ ዔሬኔ። ዬያሮ ዔያታ ዬያ ካኣታሢ ዛጋኒ ሚርጌ ኬሊ ዦኦጋሢ ዛጊ ዛጊ ሃንቲ ቤኤቴሌሄሜ ሙካዖ ዬሱሴንታ ዒዛኮ ዒንዶንሢያ ዓኣ ማኣሮ ዴንቄኔ።

![](https://cdn.door43.org/obs/jpg/360px/obs-en-23-10.jpg?direct&)

ዬያታ ዔሮ ዓሳ ዬሱሴንታ ዒንዶዋ ዴንቃዖ ሳዓ ሎኦሚ ላሂ ዚጌኔ፤ ዬሱሴም ሚርጌና ቦንቺንታ ዒንጎ ባኣዚያ ዒንጌኔ፤ ዬካፓ ፔ ዓጮ ዔያታ ማዒ ዴንዴኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 1፤ ሉቃሴ 2።*

## 24. ዮሃኒሴ ዬሱሴ ዋኣፆና ማስኬሢ

https://openbiblestories.org/l/mdy/story-24/

![](https://cdn.door43.org/obs/jpg/360px/obs-en-24-01.jpg?direct&)

ዛካሪያሴና ዔልሳቤፆናኮ ናዓሢ፥ ዮሃኒሴ ዑጊ ፆኦሲ ማሊሢ ኬኤዛያ ማዔኔ። ዬካፓ ዒ ዓሲ ናንጉዋ ቦኦሎ ዴንዲ ዑቶ ዔኤሲንታ ዓቢሢያ ሙዒ ሙዒ ናንጌኔ፤ ዒ ጋኣሎ ጋፓኔና ኮሺንቴ ማኣዖ ማይንቲ ኬርና ቃልሾ ቱካኔ።

![](https://cdn.door43.org/obs/jpg/360px/obs-en-24-02.jpg?direct&)

ዒማና ሚርጌ ዴሬ ዮሃኒሴ ጋዓሢ ዋይዛኒ ዬያ ዓሳ ናንጉዋ ቦኦሎ ሙኬኔ። ዒዚያ ዔያቶም፥ “ፆኦሲ ካኣቱማ ዑኬሢሮ ጎሞ ዒንሢኮ ቡኡፁዋቴ” ጌዒ ዼጊዲ ኬኤዜኔ።

![](https://cdn.door43.org/obs/jpg/360px/obs-en-24-03.jpg?direct&)

ዴራ ዬያ ዮሃኒሴ ኬኤዛ ባኮ ዋይዜስካፓ ሚርጌሢ ጎሞ ፔኤኮ ቡኡፄኔ፤ ዮሃኒሴያ ዔያቶ ዋኣፆና ማስኬኔ። ዓይሁዶ ካኣዦኮ ሱኡጌ ማዓ ሚርጌ ዓሲያ ዮሃኒሴ ኮራ ዋኣፆና ማስቶሮ ሙኬኔ፤ ጋዓንቴ ዔያታ ጎሞ ፔኤኮ ቡኡፂባኣሴ።

![](https://cdn.door43.org/obs/jpg/360px/obs-en-24-04.jpg?direct&)

ዒማና ዮሃኒሴ ዬያ ካኣዦኮ ሱኡጎ ማዓ ዓሶም፥ “ዒንሢ ሃይ ሾኦዣ! ጎሞ ዒንሢሲ ቡኡፂ ዒንሢ ሃንታ ጎይፆዋ ላኣሙዋቴ፤ ኮሺ ዓኣፒ ዓኣፑዋ ሚሢ ቢያ ቲቂንቲ ታሚዳ ዓጊንታንዳኔ” ጌዔኔ። ዮሃኒሴ ዬያይዲ ፆኦሲ ማሊፆ ኬኤዛ ዓሳ “ሃይሾ፥ ኔኤኮ ጎይፆ ጊኢጊሻንዳ ታኣኮ ኪኢታ ዓሲ ታ ዳካንዳኔ” ጌዔሢ ኩንሤኔ።

![](https://cdn.door43.org/obs/jpg/360px/obs-en-24-05.jpg?direct&)

ፔቴ ፔቴ ዓይሁዶ ዓሳ ዒዚ ካኣቱሞም ዶኦሞናሢ (ሜሲሄ) ታቴ ጌይ ዮሃኒሴ ዖኦጬኔ። ዮሃኒሴ ጋዓንቴ፥ “ታኣኒ ካኣቱሞም ዶኦሞናሢቱዋሴ፤ ጋዓንቴ ታኣኮ ጊንፃፓ ሙካንዳ ፔቴ ዓሲ ዓኣኔ። ዬይ ታኣኒ ዒዛኮ ቶኮ ዱርዞ ሱዞታዖ ቡላኒ ኮይሱዋ ዼኤፒ ቦንቺንታያኬ” ጌዔኔ።

![](https://cdn.door43.org/obs/jpg/360px/obs-en-24-06.jpg?direct&)

ሄሊሴ ኬሎ ዬሱሴ ዮሃኒሴ ኮራ ዋኣፆ ማስታኒ ዬዔኔ። ዮሃኒሴ ዒዛ ዴንቃዖ፥ “ሃያ ዛጉዋቴ! ሃይ፥ ዓጪ ዴሬኮ ጎሞ ጌኤሻ ፆኦሲ ማራይኬ!” ጌዔኔ።

![](https://cdn.door43.org/obs/jpg/360px/obs-en-24-07.jpg?direct&)

ዮሃኒሴ ዬሱሴ ኮራ፥ “ታ ኔና ዋኣፆና ማስካኒ ታኣኒ ጊዳ ዓሲቱዋሴ፤ ኔናኬ ታና ማስካኒ ኮይሳሢ” ጌዔኔ።ዬሱሴ ጋዓንቴ፥ “ማዻኒ ኮይሳ ፒዜ ማዾታሢሮ ኔ ታና ማስካኒ ኮይሳኔ” ጌዔኔ። ዬሱሴ ፔቴታዖ ጎሜ ማዺባኣቴያ ዮሃኒሴ ዬሱሴ ዋኣፆና ማስኬኔ።

![](https://cdn.door43.org/obs/jpg/360px/obs-en-24-08.jpg?direct&)

ዬሱሴ ዋኣፆና ማስቲ ኬኬስካኣና ፆኦሲኮ ዓያና ዶኦሌ ማሎና ኬዲ ጴዺ ዒዛ ዑፃ ዴዔኔ። ዒማና ፆኦሲኮ ዑኡሲ ጫሪንካፓ፥ “ኔኤኒ ታ ኔና ናሽካ፥ ታኣኮ ናዓሢኬ፤ ታ ኔ ዛሎና ሚርጌ ዎዛዻኔ” ጌዔኔ።

![](https://cdn.door43.org/obs/jpg/360px/obs-en-24-09.jpg?direct&)

ፆኦሲ ዮሃኒሴም፥ “ዓያና ጌኤሺ ኬዲ ኔኤኒ ዋኣፆና ማስካ ዓሢ ዑፃ ዴዓንዳኔ፤ ዬይ ዓሢ ፆኦሲ ናይኬ” ጌይ ቤርታ ኬኤዚናኣኮኬ። ፔቴ ፆኦሲ ሌሊ ዓኣኔ። ጋዓንቴ ዮሃኒሴ ዬሱሴ ዋኣፆና ማስኬያና ፆኦሲ ዓዴ ጌስታሢ ዒ ዋይዜኔ፤ ፆኦሲ ናዖዋ ዒ ዛጌኔ፥ ዬይ ዬሱሴኬ፤ ዓያኖ ጌኤዦዋ ዒ ዴንቄኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 3፤ ማርቆሴ 1፡9-11፤ ሉቃሴ 3፡1-23።*

## 25. ዬሱሴ ዎይታቴያ ዛጋኒ ፃሌኮ ጌሺፆ

https://openbiblestories.org/l/mdy/story-25/

![](https://cdn.door43.org/obs/jpg/360px/obs-en-25-01.jpg?direct&)

ዬሱሴ ዋኣፆና ማስቴስካፓ ኔጉዋዖ ዓያና ጌኤሺ ዒዛ ዔኪ ዓሲ ናንጉዋ ዳውሎ ዴንዴኔ፤ ዒኢካ ዒዚ ዖይዲታሚ ሮኦሪና ዋኣንቴና ሙኡዚ ሃሺ ፆኦሜኔ። ዬካፓ ፃላሄ ጎሜ ማዺሻኒ ኮዒ ዬሱሴ ኮራ ሙኪ ጌሼኔ።

![](https://cdn.door43.org/obs/jpg/360px/obs-en-25-02.jpg?direct&)

ፃላሄ ዬሱሴ ኮራ፥ “ኔኤኒ ሂንዳ ፆኦሲ ናይታቴ ሙዓኒ ሃያ ሹጮ ካሣ ማሄ” ጌይ ማልቴኔ።

![](https://cdn.door43.org/obs/jpg/360px/obs-en-25-03.jpg?direct&)

ዬሱሴ ጋዓንቴ፥ “ ‘ዓሲ ሼምፔና ናንጋኒ ካሣ ሌሊ ኮይሱዋሴ፤ ፆኦሲ ኬኤዛ ቃኣላ ኮይሳያኬ’ ጌይንቲ ጌኤዦ ማፃኣፖይዳ ፃኣፒንቴኔ” ጌዔኔ።

![](https://cdn.door43.org/obs/jpg/360px/obs-en-25-04.jpg?direct&)

ዬካፓ ሃሣ ፃላሄ ዬሱሴ ዔኪ ጌኤዦ ማኣሮኮ ሙስኩላ ኬሲ ዔቂሳዖ፥ “ኔ ሂንዳ ፆኦሲ ናይታቴ ኔና ሊካ ኬኤሬ፤ ዓይጎሮ ጌዔቴ፥ ‘ሹጫ ኔኤኮ ቶኮ ዹቁዋጉዲ ዓርቂ ዓይሳኒ ፆኦሲ ፔ ኪኢታንቾ ዓይሣንዳኔ’ ጌይንቲ ፃኣፒንቴኔ” ጌዔኔ።

![](https://cdn.door43.org/obs/jpg/360px/obs-en-25-05.jpg?direct&)

ጋዓንቴ ዬሱሴ ፆኦሲ ቃኣላፓ ዔኪ ኬኤዚ ኬኤዚ ፃላሄ ማኬኔ። ዒዚ ጋዓዖ፥ “ጌኤዦ ማፃኣፖይዳ ‘ኔ ጎዳ ፆኦዛሢ ዎይታቴያ ዛጋኒ ጌሺፖ’ ጌይ ዴሮም ኬኤዞናኔ” ጌዔኔ።

![](https://cdn.door43.org/obs/jpg/360px/obs-en-25-06.jpg?direct&)

ዬካፓ ሃሣ ፃላሄ ሃያ ዓጮኮ ካኣቱሞንታ ቦንቾንታ ቢያ ዬሱሴ ዻዋዖ፥ “ሎኦሚ ላሂ ኔ ታኣም ዚጌቴ ሃያ ቢያ ታ ኔኤም ዒንጋንዳኔ” ጌዔኔ።

![](https://cdn.door43.org/obs/jpg/360px/obs-en-25-07.jpg?direct&)

ዬሱሴያ፥ “ፃላሄ፥ ሴካ ሺኢኬ! ጌኤዦ ማኣፃኣፖይዳ ዴሮም ‘ኔ ጎዳ ኔ ፆኦዛሢም ዚጌ፤ ዒዛ ሌሊ ካኣሽኬ’ ጌይ ዓይሦናኔ” ጌዔኔ።

![](https://cdn.door43.org/obs/jpg/360px/obs-en-25-08.jpg?direct&)

ያዺ ማዒፆና ዬሱሴ ፃላሄም ባሺንቲ ኩቺ ዒንጊባኣሴ፤ ዬያሮ ፃላሄ ዒዛ ዻካሮ ሃሺ ዴንዴኔ። ዬካፓ ፆኦሲ ኪኢታንቻ ሙኪ ዬሱሴ ማኣዴኔ።

*ጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 4፡1-11፤ ማርቆሴ 1፡12-13፤ ሉቃሴ 4፡1-13።*

## 26. ዬሱሴ ማዾ ዓርቄሢ

https://openbiblestories.org/l/mdy/story-26/

![](https://cdn.door43.org/obs/jpg/360px/obs-en-26-01.jpg?direct&)

ዬሱሴ ፃላሄ ባሼስካፓ ቤርታ ዒ ዓያኖ ጌኤዦ ዎልቆና ማዒ ናንጋ ጌሊላ ዓጮ ማዒ ዴንዲ ዒኢካ ሴካ ሃንጋ ሃንቲ ፆኦሲ ቃኣሎ ዔርዜኔ። ዬያሮ ዓሲ ቢያ ዒዛኮ ኩሾሞ ዛሎ ማርካዺ ኬኤዛኔ።

![](https://cdn.door43.org/obs/jpg/360px/obs-en-26-02.jpg?direct&)

ዬካፓ ሃሣ ዬሱሴ ቤርታ ዒ ናንጌ፥ ናዚሬቴ ካታሞ ማዒ ዓኣዼኔ፤ ዓይሁዶኮ ሃውሾ ኬሎናኣ ካኣዦ ማኣሪ ዴንዴኔ። ዒማና ዒ ናባባንዳጉዲ ፆኦሲ ማሊፆ ኬኤዛ ዒሲያሴ ማፃኣፓ ዒንጊንቴኔ። ዬሱሴ ዬያ ማሪንቴ ማፃኣፖ ቡሊ ዛላ ቤሲ ዴሮም ናባቤኔ።

![](https://cdn.door43.org/obs/jpg/360px/obs-en-26-03.jpg?direct&)

ዬሱሴ ናባቤ ቤዛ፥ “ማንቆ ዓሶም ኮዦ ሃይሴ፥ ዲዒንቲ ዔውቴ ዓሶም ዓይላቶፓ ኬስኪሢ ሃይሴ፥ ዓኣፓ ባይቄ ዓሶም ዛጊሢ ሃይሴ፥ ቱኡቲ ዓኣ ዓሶም ቡሊንቲሢ ሃይሴ ታ ኬኤዛንዳጉዲ ፆኦሲ ፔ ዓያኖ ታኣም ዒንጌኔ። ሃይ ናሽኪንታያ፥ ጎዳፓ ማዔ ሌዔኬ” ጋዓያኬ።

![](https://cdn.door43.org/obs/jpg/360px/obs-en-26-04.jpg?direct&)

ዬካፓ ዬሱሴ ዴዓዛ ቢያሢ ዒዛ ጊዥ ጌይ ዛጊ ዓርቄኔ። ዔያቶም ዒማና ዒ ናባቤ ጎይፆማ ፆኦሲ ቃኣላ ካኣቱሞም ዶኦሞናሢ ዛላ ኬኤዛያኬ። ዬያሮ ዬሱሴ፥ “ዬይ ታ ዒንሢም ናባቤ ቃኣላ ጎኔ ማዒ ሃሢ ኩማኔ” ጋዓዛ ዴራ ቢያ ዲቃቲ ሄርሼኔ። ጋዓንቴ ዔያታ ጊንሣ፥ “ዓህ፥ ሃይ ዮሴፔ ናኣዚቱዋኣዓዳ?” ጌዔኔ።

![](https://cdn.door43.org/obs/jpg/360px/obs-en-26-05.jpg?direct&)

ጊንሣ ሃሣ ዬሱሴ፥ “ፆኦሲ ማሊሢ ኬኤዛ ዓሲ ፔ ዓጫ ቦንቺንቱዋኣሢ ጎኔኬ፤ ፆኦሲ ማሊፆ ኬኤዛ ዔኤሊያሴ ዎዶና ዒስራዔኤሌይዳ ሚርጌ ዜኤሪንዶ ማዔ ላኣሊ ዓኣኔ። ጋዓንቴ ሃይሦ ሌዔና ዛላና ማዓያ ዒርዚ ዋርቂባኣያ ማዒፆና ሉማ ኬስኬሢሮ ፆኦሲ ዒስራዔኤሌፓ ሜሌ ዓጪዳ ዓኣ ሜታዼ ላኣሊስኬኖ ማኣዳንዳጉዲ ዳኬኔ” ጌዔኔ።

![](https://cdn.door43.org/obs/jpg/360px/obs-en-26-06.jpg?direct&)

ዬሱሴ ቃሳዖ፥ “ፆኦሲ ማሊፆ ኬኤዛ ዔልሳዒ ዎዶናኣ ዒስራዔኤሌይዳ ዑስካ ኬስካ ዶርዓሢና ዓዺንቴ ሚርጌ ዓሲ ዓኣንቴ ዔልሳዒ ዔያቶፓ ፔቴ ዓሲታዎ ዓውሲባኣሴ። ጋዓንቴ ዒስራዔኤሌ ዓሶኮ ሞርኬ ማዔ፥ ዖሎ ዓሶ ዓይሣ ኒዒማኔ ጎዖሢ ሌሊ ፓሤኔ” ጌዔኔ። ዒማና ዬሱሴ ጋዓ ባኮ ዋይዛ ዓሳ ዓይሁዴ ዓሲኬ፤ ዬያ ዒ ጋዓሢ ዋይዛዖ ዬያታ ዻጋዼኔ።

![](https://cdn.door43.org/obs/jpg/360px/obs-en-26-07.jpg?direct&)

ዬያሮ ናዚሬቴ ካታሞ ዴራ ዬሱሴ ካኣዦ ማኣራፓ ጎቺ ዔኪ ጎኦቢ ሂዒ ዳካኒ ፔቴ ዹካ ኬሴኔ። ጋዓንቴ ዬሱሴ ዬያ ዴሮኮ ባኣኪና ዔያታ ዔሩዋ ጎይሢ ቶሊ ኬስኪ ካታሞ ዴንዴኔ።

![](https://cdn.door43.org/obs/jpg/360px/obs-en-26-08.jpg?direct&)

ዬካፓ ዬሱሴ ጌሊላ ዓጮ ቢያ ሃንቴኔ፤ ሚርጌ ዴሬያ ዒዛ ባንሢ ሙኬኔ። ዬይ ዓሳ ዒዛ ኮይላ ዓኣፒ ባይቄያ፥ ቶኪ ዎቢ ሃንቱዋያ፥ ዋይዚ ባይቄያ፥ ዻንጋ ጌስቱዋና ዬያጉዴ ዱማ ዱማ ሃርጌና ዓኣ ሚርጌ ዓሲ ዔኪ ዬዔኔ።

![](https://cdn.door43.org/obs/jpg/360px/obs-en-26-09.jpg?direct&)

ሃሣ ፑርታ ዓያና ዓርቄም ዣኣሽካ ዓሲያ ዴራ ዔኪ ዬሱሴ ኮይላ ሙኬኔ። ዬያ ፑርቶ ዓያኖ ዬሱሴ ኬስካንዳጉዲ ቢታንቶና ዓይሤም ዓሶፓ ኬስኬኔ፤ ኬስካ ዎዶና ዬይ ፑርቶ ዓያና ባሼሢ፥ “ኔኤኒ ፆኦሲ ናኣዚኬ!” ጌይ ዒላታኔ። ዴራኣ ዬያ ዛጋዖ ዲቃቲ ሄርሺ ፆኦሲ ቦንቺ ካኣሽኬኔ።

![](https://cdn.door43.org/obs/jpg/360px/obs-en-26-10.jpg?direct&)

ዬሱሴ ያዺዴስካፓ “ዒዛ ጊንፆ ሃንታዞንሢ” ጌይንቴ ታጶ ላምዖ ዓሲ ዶኦሬኔ። ዬያታ ጊንፃፓ “ፆኦሲ ማዾም ዳኪንቴዞንሢ” ጌይንታንዳያ ሄላንዳኣና ዒዛና ዎላ ሃንቲ ዒዛፓ ሚርጌ ባኣዚ ታማሪ ዔሬኔ።

*የጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 4፡12-25፤ ማርቆሴ፡14-15፣ 35-39፤ 3፡13-21፤ ሉቃሴ 4፡14-30፣ 38-44።*

## 27.ፔቴ ኮሺ ሳማሪያ ዓሲስኬያ ሃይሴ

https://openbiblestories.org/l/mdy/story-27/

![](https://cdn.door43.org/obs/jpg/360px/obs-en-27-01.jpg?direct&)

ፔቴ ኬሊ ዓይሁዶኮ ዎጎ ዔርዛ ፔቴ ዓሲስኬይ ዬሱሴ ዎዚ ጋዓቴያ ዛጋኒ ዬሱሴ ኮራ ሙካዖ፥ “ዔርዛሢዮ! ናንጊና ናንጊ ዴንቃኒ ታ ዎይታንዳያ ኮይሳይ” ጌዔኔ። ዬሱሴ ማሃዖ፥ “ፆኦሲ ዎጎይዳ ዎዚ ጌይ ፃኣፒንቴይ?” ጌዔኔ።

![](https://cdn.door43.org/obs/jpg/360px/obs-en-27-02.jpg?direct&)

ዬይ ዎጎ ዔርዛሢ፥ “ፆኦሲ ዎጎይዳ ‘ኔ ጎዳ ፆኦዛሢ ጉቤ ዒኔፓ፥ ጉቤ ሼምፓፓ፥ ጉቤ ዎልቃፓ፥ ጉቤ ማሊፃፓ ናሽኬ፤ ኔ ላጋሢያ ኔና ማሂ ናሽኬ’ ጋዓኔ” ጌኤኔ። ዬያሮ ዬሱሴ፥ “ኔ ፒዜ ማሄኔ! ዬያ ማዺ ኩንሤ፤ ሼምፔና ኔ ናንጋንዳኔ” ጌዔኔ።

![](https://cdn.door43.org/obs/jpg/360px/obs-en-27-03.jpg?direct&)

ጋዓንቴ ዎጎ ዔርዛሢ ፔና ጌኤሺ ማሃኒ ኮዓዖ፥ “ታ ላጋሢ ዖናዳይ?” ጌይ ዖኦጬኔ።

![](https://cdn.door43.org/obs/jpg/360px/obs-en-27-04.jpg?direct&)

ዬያሮ ዬሱሴ ፔቴ ማዺንቴ ሃይሴ ኮኦኪንሢ ማሂ ኬኤዛዖ ሂዚ ጌዔኔ፦ “ፔቴ ዓይሁዴ ዓሲስኬይ ዬሩሳላሜፓ ዒያርኮ ዴንዳኔ።”

![](https://cdn.door43.org/obs/jpg/360px/obs-en-27-05.jpg?direct&)

“ዬያ ዓሢ ጎይፆይዳ ሱላ ዴንቃዖ ዓርቂ ሼምፖማ ሌሊ ሃሺ ጳርቄስካፓ ዓኣ ባኮ ቢያ ቡሪ ዔኪ ዴንዴኔ።”

![](https://cdn.door43.org/obs/jpg/360px/obs-en-27-06.jpg?direct&)

“ዬካፓ ኔጉዋዖ ዬኖ ጎይፆና ፔቴ ዓይሁዴ ቄኤሴስኬይ ሙኬኔ፤ ዬይ ካኣዦ ሱኡጋሢ ዬያ ቡሪንቲ ሃሣ ጳዺንቲ ላሄ ዓሢ ዴንቃዖ ዔኤቢ ዓቴኔ ጌዒ ማኣዱዋዖ ጱሪ ዴንዴኔ።”

![](https://cdn.door43.org/obs/jpg/360px/obs-en-27-07.jpg?direct&)

“ጊንሣ ሃሣ ኔጉዋዖ ፔቴ ሌዊ ዓሲ ዒኢና ሙኬኔ (ዬና ሌዊ ዓሳ ጌኤዦ ማኣሮይዳ ቄኤሶ ማኣዲ ማዻ ዓይሁዴ ዓሲኬ።) ዬይ ሌዊ ዓሣሢያ ዬያ ጳዺንቲ ላሄ ዓሢ ማኣዱዋ ጱሪ ዴንዴኔ።”

![](https://cdn.door43.org/obs/jpg/360px/obs-en-27-08.jpg?direct&)

“ዬኖ ጎይፆ ሄሊሲ ሙኬሢ ፔቴ ሳማሪያ ዓሲስኬያኬ (ሳማሪያ ዓሶ ጌይንታ ዓሳ ሜሌ ዓጮና ዎላ ዔፒና ሲኢሪንቴ ዓይሁዴ ዜርፆኬ። ሳማሪያ ዓሶና ዓይሁዶና ዎሊ ዒፂ ዱማዺ ናንጋያኬ።” ጋዓንቴ ዬይ ሳማሪያ ዓሢ ዬያ ጳዺንቲ ላሄ ዓሢ ዛጋዖ ሚጪንቴኔ፤ ዬያሮ ሙኪ ዓሢኮ ኪፆ ቱርጫና ቱኪ ማኣዴኔ።

![](https://cdn.door43.org/obs/jpg/360px/obs-en-27-09.jpg?direct&)

“ዬካፓ ዬይ ሳማሪያ ዓሢ ዬያ ጳዺንቴ ዓሢ ሳዓፓ ዔቂሲ ፔ ሃሮ ቶጊሳዖ ሾኦጫ ዎርቃ ኬኤፆ ዔኪ ዴንዲ ማይሤኔ።”

![](https://cdn.door43.org/obs/jpg/360px/obs-en-27-10.jpg?direct&)

“ዚሮ ጉቴሎ ሳማሪያ ዓሢ ፔ ጎይፆ ዴንዳሢሮ ሾኦጮ ማኣሮ ዎይሣሢም ሚኢሼ ዒንጋዖ፥ ‘ሃያ ዓሢ ታኣም ዛጊ ማይሤ፤ ሜሌ ሚኢሼያ ኔ ዒዛ ዛሎ ጪጌቴ ታ ኔኤም ማሂ ዒንጋንዳኔ’ ጌዔኔ።”

![](https://cdn.door43.org/obs/jpg/360px/obs-en-27-11.jpg?direct&)

ዬካፓ ዬሱሴ ዎጎ ዔርዛሢ ኮይላ፥ “ኔኤም ዓይጎ ማላይ? ዬያ ሱሎና ጳዺንቴሢም ላጎ ማዔሢ ሃይሦ ዓሶፓ ዎያዳይ?” ጌዔኔ። ዒዚ ማሃዖ፥ “ሚጪንቲ ዒዛ ማኣዴሢሾ” ጌዔኔ። ዬያሮ ዬሱሴ፥ “ኔያ ዴንዳዖ ዒማይዴ” ጌዔኔ።

*ጌኤዦ ማፃኣፖይዳ ኬኤዚንቴ ሃይሴ፡- ሉቃሴ 10፡25-37።*

## 28. ፔቴ ዼጌ ዖርጎቺስኬያ ሃይሴ

https://openbiblestories.org/l/mdy/story-28/

![](https://cdn.door43.org/obs/jpg/360px/obs-en-28-01.jpg?direct&)

ዼጌ ዖርጎቺስኬይ ፔቴ ኬሊ ዬሱሴ ኮራ ሙካዖ፥ “ኮዦ ዔርዛሢዮ! ናንጊና ናንጊ ዴንቃኒ ታ ዓይጎ ማዾንዶይ?” ጌይ ዖኦጬኔ። ዬሱሴ ማሃዖ፥ “ዓይጋ ኔ ታና ‘ኮዣሢ’ ጋዓይ ኮሺ ፔቴ ሌሊኬ፤ ዬይያ ፆኦሲ ሌሊኬ። ኔኤኒ ናንጊና ናንጊ ዴንቃኒ ኮዔቴ ፆኦሲ ዎጎም ዓይሢንቲ ማዺ ኩንሤ” ጌዔኔ።

![](https://cdn.door43.org/obs/jpg/360px/obs-en-28-02.jpg?direct&)

ዬይ ዼጌሢ፥ “ዋኣቶ ዓይሢፆ?” ጌይ ዖኦጬኔ። ዬሱሴያ ዒዛም፥ “ዓሲ ዎዺፖ፥ ማቾ ሃሣ ዓኒ ማዒባኣያና ላሂፖ፥ ዉኡቂፖ፥ ሉኡቂፖ፥ ኔ ዓዶና ዒንዶና ቦንቼ፥ ኔ ላጋሢ ኔና ማሂ ዛጊ ናሽኬ” ጋዓሢሾ ጌዔኔ።

![](https://cdn.door43.org/obs/jpg/360px/obs-en-28-03.jpg?direct&)

ጋዓንቴ ዬይ ዼጌሢ፥ “ናኣቶፓ ዓርቃዖ ዬያ ዎጎ ታ ካፒ ቢያ ኩንሤኔ። ናንጊና ናንጊ ዴንቃኒ ሜሌ ታ ዓይጎ ማዾንዶይ?” ጌዔኔ። ዬሱሴ ዬያ ዓሢ ናሹሞና ዛጌኔ።

![](https://cdn.door43.org/obs/jpg/360px/obs-en-28-04.jpg?direct&)

ዬካፓ ዬሱሴ ዒዛም፥ “ኔኤኒ ፔቴታዖ ፓጬ ባኣዚ ባኣ ዓሲ ማዓኒ ኮዔቴ ዴንዲጋፓ ኔኤኮ ዓኣ ባኮ ሻንቺ ማንቆ ዓሶም ዒንጌ፤ ጫሪንጮይዳ ኔ ማዼ ባኮ ፃኣፒ ጌሦናያ ኔ ዴንቃንዳኔ፤ ሂዲጋፓ ሙኪ ታ ጊንፆ ሃንቴ” ጌዔኔ።

![](https://cdn.door43.org/obs/jpg/360px/obs-en-28-05.jpg?direct&)

ዬይ ዼጌሢ ዬሱሴ ዬያ ጌዔሢ ዋይዛዖ ሚርጌና ዒ ዖርጎቺ ማዔሢሮ ዓኣ ባኮ ቢያ ሻንቺ ዒንጊፆ ኮዒባኣሢሮ ዖያዖ ዬሱሴይዳፓ ዓኣፖ ሺርሺ ዴንዴኔ።

![](https://cdn.door43.org/obs/jpg/360px/obs-en-28-06.jpg?direct&)

ዒማና ዬሱሴ ዒዛ ጊንፆ ሃንታዞንሢም፥ “ዔዛታ! ዖርጎቺ ዓሲም ፆኦሲ ካኣቱሞይዳ ጌሊሢ ሚርጌ ሜቶኬ፤ ዋይዙዋቴ፥ ዖርጎቺ ዓሲ ፆኦሲ ካኣቱሞይዳ ጌላሢዳፓ ጋኣሎም ናርፔ ፂኢናና ጌሊፃ ሼሌዔ ማዓንዳኔ” ጌዔኔ።

![](https://cdn.door43.org/obs/jpg/360px/obs-en-28-07.jpg?direct&)

ዒዛ ጊንፆ ሃንታዞንሢ ዬሱሴ ጌዔ ባኮና ዒኔ ዱጳዖ፥ “ሂዴቴ ዖ ዻቃኒ ዳንዳዓይ?” ጌዔኔ።

![](https://cdn.door43.org/obs/jpg/360px/obs-en-28-08.jpg?direct&)

ዬያሮ ዬሱሴ ዒዛ ጊንፆ ሃንታዞንሢ ባንሢ ዛጋዖ፥ “ዬይ ዓሲም ዳንዳዒንታያቱዋሴ፤ ፆኦሲም ጋዓንቴ ሼሌዔኬ” ጌዔኔ።

![](https://cdn.door43.org/obs/jpg/360px/obs-en-28-09.jpg?direct&)

ጴፂሮሴ ዒማና፥ “ሃይሾ፡ ኑኡኒ ቢያ ባኣዚ ሃሺ ኔ ጊንፆ ሃንታኔ፤ ኑም ዒንጊንታንዳ ባካ ዓካሪ ዓይጎዳይ?” ጌዔኔ።

![](https://cdn.door43.org/obs/jpg/360px/obs-en-28-10.jpg?direct&)

ዬሱሴ ማሃዖ፥ “ታ ጋይቴ ጌዒ ፔ ማኣሮ፥ ጌርሲንሢ፥ ጌሮንሢ፥ ዓዶ፥ ዒንዶ፤ ዬያጉዲ ዓኣ ቆሎ ቢያ ሃሻ ዓይጎ ዓሲያ ዬያ ባኮ ቤዛ ፄኤታ ጳንጬ ባኣዚ ዴንቃንዳኔ፤ ናንጊና ናንጊያኣ ዒ ዻካላንዳኔ። ጋዓንቴ ቤርቲ ማሂ ፔና ጎኦቢሻ ዓሳ ጊንሢም፥ ጊንፃ ዓቴያ ማላ ላኣፖ ዓሳ ቤርቲም ማዓንዳኔ” ጌዔኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 19፡16-30፤ ማርቆሴ 10፡17-31፤ ሉቃሴ 18፡18-30።*

## 29. ዓቶንጎ ጌይሢ ባሺንቴ ዓይሌስኬያ ሃይሴ

https://openbiblestories.org/l/mdy/story-29/

![](https://cdn.door43.org/obs/jpg/360px/obs-en-29-01.jpg?direct&)

ፔቴ ኬሊ ጴፂሮሴ ዬሱሴ ኮራ፥ “ዔርዛሢዮ፤ ታ ዒሻሢ ታኣም ፑርታ ባኣዚ ማዺ ዻቤቴ ዋኣዼ ማይንቲ ዓቶንጎ ጎዖንዶይ? ላንካይ ማይንቲ ጎዖንዶሞ?” ጌይ ዖኦጬኔ። ዬሱሴ ጋዓንቴ፥ “ላንካይ ሌሊቱዋንቴ ላንካይታሚ ማይንቲ ላንካይ ማዓንዳኣናኬ” ጌዔኔ። ዬሱሴኮ ዬያ ጌይፃ፡ ኑም ፑርታ ማዼ ዓሲም ቢያ ዎዴ ዓቶም ኑ ጋዓንዳጉዲኬ። ዬካፓ ዬሱሴ ሂዚ ጋዓ ሃይሴ ኬኤዜኔ፦

![](https://cdn.door43.org/obs/jpg/360px/obs-en-29-02.jpg?direct&)

ዬሱሴ ኬኤዛዖ፥ “ፆኦሲ ካኣቱማ ፔኤኮ ዓይላ ማዼ ማዾ ዛጋኒ ማሌ ፔቴ ካኣቲስኬያ ሃይሴጉዲኬ። ዬያ ካኣቲኮ ዓይሎፓ ፔቴስኬያ ዑፃ ፔቴ ዓሲ ሌዔ ቢያ ማዾ ማዼም ዒንጎ ሚኢሼጉዴያ (ታጶ ሺያ ሜክሊቴ) ጋሌ ጴዼኔ” ጌዔኔ።

![](https://cdn.door43.org/obs/jpg/360px/obs-en-29-03.jpg?direct&)

ዬይ ዓይላሢ ዬያ ጋሎ ጪጋኒ ዳንዳዒባኣሢሮ ካኣቲ፥ “ዬያ ጋሎ ጪጋኒ ሃያ ዓሢንታ ማኣሮ ዓሶዋ ቢያ ዒዛኮ ሻንቹዋቴ” ጌዔኔ።

![](https://cdn.door43.org/obs/jpg/360px/obs-en-29-04.jpg?direct&)

ዬያሮ ዬይ ዓይላሢ ካኣቲ ቤርታ ጉምዓታዖ፥ “ሃዳራ፥ ዻካ ኬሊ ታኣም ማሌ፤ ጋሎ ታ ኔኤኮ ቢያ ጪጋንዳኔ” ጌዔኔ። ካኣቲያ ዒዛም ሚጪንታዖ ጋሎ ጉቤ ዒዛም ሃሺ ማኣሬኔ።

![](https://cdn.door43.org/obs/jpg/360px/obs-en-29-05.jpg?direct&)

ዬይ ዓይላሢ ካኣቲ ቤርታፓ ኬስካንቴ ዖይዶ ዓጊኒኮ ጪጎንዶ ሚኢሼጉዴያ ዒዛኮ ጋሌና ዓኣ ዓይሌስኬያ ዴንቄኔ፤ ዬያ ዒዛኮ ላጌ ማዔ ዓይላሢ ዒ ጩኡሊ ዓርቃዖ፥ “ጋሎ ታኣም ጪጌ!” ጌዔኔ።

![](https://cdn.door43.org/obs/jpg/360px/obs-en-29-06.jpg?direct&)

ዬይ ዒዛኮ ላጋሢ፥ “ሃዳራ፥ ዻካ ኬሊ ታኣም ማሌ፤ ጋሎ ታ ኔኤኮ ቢያ ጪጋንዳኔ” ጌዔኔ። ጋዓንቴ ዬይ ዓይላሢ ዬያ ዋይዞ ዒፂ ፔ ላጋሢ ጋሎ ጪጋንዳያ ሄላንዳኣና ዎጌና ዓይሢሲ ቱኡሲ ማኣሪ ጌልዜኔ።

![](https://cdn.door43.org/obs/jpg/360px/obs-en-29-07.jpg?direct&)

ሃንጎ ዓይሎ ማዔ ዓሳ ዬያ ሃይሶ ዋይዛዖ ዲቃቲ ማሌስካፓ ዬያ ሃይሶ ቢያ ካኣቲም ዴንዲ ኬኤዜኔ።

![](https://cdn.door43.org/obs/jpg/360px/obs-en-29-08.jpg?direct&)

ዬያሮ ካኣቲ ዬያይዴ ዓይላሢ ዔኤላዖ፥ “ኔ ፑርቶ ዓይላሢ ሃይ! ኔ ታና ሺኢቄም ታ ኔኤም ጋሎ ሃሺባይ? ኔኤኒያ ዬያ ኔ ላጋሢም ዒማይዳንዳያ ኮይሳያቱዓዳ!” ጌዔኔ። ዬካፓ ካኣቲ ሚርጌና ዻጋዺ ዒዚያ ጋሎ ቢያ ካኣቲም ጪጋንዳያ ሄላንዳኣና ቱኡዞ ማኣራ ቱኪሴኔ።

![](https://cdn.door43.org/obs/jpg/360px/obs-en-29-09.jpg?direct&)

ጊንሣ ሃሣ ዬሱሴ፥ “ዒንሢ ፔቴ ፔቴሢ ዒንሢኮ ጌርሲ ማዓ ላጎም ዓቶም ጌይባኣቴ ጫሪንጮ ዓዳሢያ ዒንሢ ዻቢንቶ ዒማይዳንዳኔ” ጌዔኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 18፡21-35።*

## 30. ዬሱሴ ዶንጎ ሺያ ዓሲ ሙኡዜሢ

https://openbiblestories.org/l/mdy/story-30/

![](https://cdn.door43.org/obs/jpg/360px/obs-en-30-01.jpg?direct&)

ሚርጌ ጉርዳይዳ ዴንዲ ዴንዲ ኮዦ ሃይሶ ኬኤዛንዳጉዲ ዬሱሴ ዒዛ ጊንፆ ሃንታዞንሢ ዳኬኔ። ዬካፓ ዔያታ ዬሱሴ ኮራ ማዒ ሙካዖ ማዼ ባኮ ቢያ ኬኤዜኔ። ዬሱሴያ ባዞና ዒዛና ዎላ ፒንቂ ዴንዲ ዓሲባኣ ቤስካ ዒዛና ዎላ ዻካ ሃውሻንዳጉዲ ዔያቶም ኬኤዜኔ፤ ዬያሮ ዋኣፆ ፒንቆ ጎንጎይዳ ጌሊ ባዞና ዔያታ ፒንቄኔ።

![](https://cdn.door43.org/obs/jpg/360px/obs-en-30-02.jpg?direct&)

ጋዓንቴ ዬሱሴና ጊንፆ ሃንታዞንሢና ዋኣፆ ፒንቆ ጎንጎ ቶጊ ዴንዳሢ ዛጌ ዓሳ ዺቢታሢሮ ቢሪ ሶ ሱኮ ሄላኒ ጳሽኬኔ። ዬያሮ ዬሱሴና ዒዛኮ ጊንፆ ሃንታዞንሢና ሱኮ ፒቃንቴ ሚርጌ ዴሬ ቢሪ ዔያቶ ካፓኔ።

![](https://cdn.door43.org/obs/jpg/360px/obs-en-30-03.jpg?direct&)

ዬይ ዴራ ላኣሎንታ ናኣቶንታ ፓይዱዎንቴ ዓቲንቃ ሌሊ ዶንጎ ሺያፓ ዑሣ ማዓያኬ። ዬሱሴ ዬያ ዴሮ ዛጋዖ ዔያታ ሄንቃ ዓሲባኣ ማራይጉዲ ማዔሢሮ ሚጪንቴኔ፤ ሚርጌ ባኣዚያ ዔያቶም ኬኤዚ ዔርዜኔ፥ ሃርጊንቴ ዓሶዋ ፓሤኔ።

![](https://cdn.door43.org/obs/jpg/360px/obs-en-30-04.jpg?direct&)

ዒማና ሳዓ ዒባናያ ማዔሢሮ ዬሱሴኮ ጊንፆ ሃንታዞንሢ ዒዛ ኮራ፥ “ሳዓ ዓሜኔ፤ ኔ ዛጋሢጉዲ ሃይካ ዑኬ ካታማ ባኣሴ፤ ዔያታ ዴንዲ ሙዖ ባኣዚ ሻንቃንዳጉዲ ዴሮ ዳኬ” ጌዔኔ።

![](https://cdn.door43.org/obs/jpg/360px/obs-en-30-05.jpg?direct&)

ዬሱሴ ጋዓንቴ ዔያቶም፥ “ዔያታ ሙዓንዳ ባኣዚ ዒንሢ ዒንጉዋቴ!” ጌዔኔ። ዔያታ ማሃዖ፥ “ዬያ ኑ ዎዲ ዳንዳዓንዳይ? ኑ ኮራ ዓኣዞንሢ ዶንጎ ካሣና ላምዖ ሞሎና ሌሊኬ” ጌዔኔ።

![](https://cdn.door43.org/obs/jpg/360px/obs-en-30-06.jpg?direct&)

ዶንጊታሚ ዶንጊታሚ ማሂ ዴሮ ቡጮይዳ ዴይሣንዳጉዲ ዒዛኮ ጊንፆ ሃታዞንሢም ዬሱሴ ኬኤዜኔ።

![](https://cdn.door43.org/obs/jpg/360px/obs-en-30-07.jpg?direct&)

ዬካፓ ዬሱሴ ዬንሢ ዶንጎ ካሦንሢና ላምዖ ሞሎንሢ ዔኪ ጫሪንጮ ባንሢ ዛጋዖ፥ ዬንሢ ሙዖሮ ፆኦሲ ጋላቴኔ።

![](https://cdn.door43.org/obs/jpg/360px/obs-en-30-08.jpg?direct&)

ዬሱሴ ያዺዴስካፓ ዬንሢ ካሦንሢና ሞሎንሢያ ቡንፂ ዒዛኮ ጊንፆ ሃንታዞንሢ ዴሮም ሺኢሻንዳጉዲ ዒንጌኔ። ዬሱሴኮ ጊንፆ ሃንታዞንሢያ ሙዖ ጊሽኪሢ ዓርቄኔ፤ ጋዓንቴ ዬይ ሙዓ ጋፖ ዒፄኔ፥ ዴራኣ ቢያ ሙዒ ሚሽኬኔ።

![](https://cdn.door43.org/obs/jpg/360px/obs-en-30-09.jpg?direct&)

ዬካፓ ዬሱሴኮ ጊንፆ ሃንታዞንሢ ዓቴ ዶምቦ ቡኩሴኔ፤ ዬይ ዶምባ ታጶ ላምዖ ዼኤፒ ሌኤማቴ ኩሜኔ፤ዬሱሴ ዬንሢ ዶንጎ ካሦንሢና ሞሎንሢ ሌሊታንቴ ዬያይዲ ዺቢሼኔ።

*ጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 14፡13-21፤ ማርቆሴ 6፡31-44፤ ሉቃሴ 9፡10-17፤ ዮሃኒሴ 6፡5-15።*

## 31. ዬሱሴኮ ዼኤፖ ባዞይዳ ሃንቲፆ

https://openbiblestories.org/l/mdy/story-31/

![](https://cdn.door43.org/obs/jpg/360px/obs-en-31-01.jpg?direct&)

ዬካፓ ዬሱሴ ዴሮ ዳኪፆይዳ ዓኣዖ ዋኣፆና ፒንቆ ጎንጎ ቶጊ ዒዛኮ ጊንፆ ሃንታዞንሢ ሱኮ ፒንቃንዳጉዲ ዓይሤኔ። ዴራ ዴንዴስካፓ ዬሱሴ ሺኢጲሢሮ ፔቴ ዹካ ኬስኬኔ፤ ዒዚ ዒኢካ ፔኤሮ ሌሊ ዴንዲ ሳዓኮ ጊዲሚሺ ሄላንዳኣና ሺኢቂ ዴዔኔ።

![](https://cdn.door43.org/obs/jpg/360px/obs-en-31-02.jpg?direct&)

ዬያ ሄላንዳኣና ዒዛኮ ጊንፆ ሃንታዞንሢ ዋኣፆና ፒንቆ ጎንጎ ዒሺ ዒሺ ዼኤፖ ባዞኮ ሳዞ ሄሌኔ፤ ዒማና ዼኤፒ ዢባሬ ዢባርሻሢሮ ዔያታ ዋኣፆና ፒንቆ ጎንጎ ዔኪ ዴንዳሢ ሚርጌ ሜቶናኬ።

![](https://cdn.door43.org/obs/jpg/360px/obs-en-31-03.jpg?direct&)

ዬሱሴያ ሺኢጲፆ ጋፒሴስካፓ ዬያ ባዞ ዋኣፆይዳ ሃንቲ ሃንቲ ባዞ ሳዛ ዓኣ ዒዛኮ ጊንፆ ሃንታዞንሢ ኮይላ ሙኬኔ።

![](https://cdn.door43.org/obs/jpg/360px/obs-en-31-04.jpg?direct&)

ዒዛኮ ጊንፆ ሃንታዞንሢያ ዬሱሴ ዴንቃዖ ዓሲኮ ዔኤዤ ዔያቶ ኮራ ማሌም ሚርጌና ዒጊጬኔ፤ ዔያታ ዒጊጬሢ ዬሱሴ ዔራዖ ዼጌ ዑኡሲና ዔያቶም፥ “ዲቃቲፖቴ፤ ታናኬ!” ጌዔኔ።

![](https://cdn.door43.org/obs/jpg/360px/obs-en-31-05.jpg?direct&)

ዒማና ጴፂሮሴ ዬሱሴ ኮራ፥ “ዔርዛሢዮ፤ ኔናታቴ ታኣኒያ ዋኣፆይዴና ሃንቲ ኔ ኮራ ሙኮም” ጌዔኔ።ዬሱሴያ ጴፂሮሴም፥ “ሃኒ ዬዔ!” ጌዔኔ።

![](https://cdn.door43.org/obs/jpg/360px/obs-en-31-06.jpg?direct&)

ዬያሮ ጴፂሮሴ ዋኣፆና ፒንቆ ጎንጋፓ ኬዲ ዬሱሴ ባንሢ ዋኣፆይዴና ሃንቲሢ ዓርቄኔ። ጋዓንቴ ዻካ ዒ ሃንቴስካፓ ዬሱሴፓ ዓኣፖ ሺርሺ ኮይላ ዓኣ ዋኣፆ ጉዳሢ ዛጌኔ።

![](https://cdn.door43.org/obs/jpg/360px/obs-en-31-07.jpg?direct&)

ጴፂሮሴያ ዒጊቹሞ ዒዛይዳ ጌሌም ዋኣፃ ዒዛ ዔኤዺሢ ዓርቄኔ፤ ዬያሮ “ዔርዛሢዮ፤ ታ ጋፔኔ፥ ታና ዓውሴ!” ጌይ ዒላቴኔ። ዬያሮ ኔጉዋዖ ዬሱሴ ዒዛኮ ኩጮ ዓርቂ፥ “ሃይ ኔ ጉሙርፃ ፓጬሢዮ! ዓይጋ ኔ ዓልቴይ?” ጌዔኔ።

![](https://cdn.door43.org/obs/jpg/360px/obs-en-31-08.jpg?direct&)

ጴፂሮሴንታ ዬሱሴንታ ዋኣፆና ፒንቆ ጎንጎ ጋሮ ጌላዛ ጉዳሢ ዢባራ ዢባርሲፆ ሃሼም ቢያ ባካ ዚቲ ጌዔኔ። ዬያሮ ዬሱሴኮ ጊንፆ ሃንታዞንሢ ዲቃቲ ሄርሻዖ፥ “ጎኔ ኔኤኒ ፆኦሲ ናይኬ!” ጌይ ዬሱሴም ዚጌኔ።

*ጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 14፡22-23፤ ማርቆሴ 6፡45-52፤ ዮሃኒሴ 6፡16-21።*

## 32. ዬሱሴ ሜዣ ዓርቄ ዓሲስኬያና ሃርጌ ላኣሊስኬኖዋ ዻቂሼሢ

https://openbiblestories.org/l/mdy/story-32/

![](https://cdn.door43.org/obs/jpg/360px/obs-en-32-01.jpg?direct&)

ፔቴ ኬሊ ዬሱሴንታ ዒዛኮ ጊንፆ ሃንታዞንሢንታ ዋኣፆና ፒንቆ ጎንጎና ባዞ ፒንቂ ጌርጌሴኖኔ ዓሳ ናንጋ ጉርዶ ሄሌኔ።

![](https://cdn.door43.org/obs/jpg/360px/obs-en-32-02.jpg?direct&)

ባዞ ሱኮ ዔያታ ፒፒንቃኣና ፑርታ ሜዣ ዓርቄ ዓሲስኬይ ዬሱሴ ባንሢ ጳሽኪ ሙኬኔ።

![](https://cdn.door43.org/obs/jpg/360px/obs-en-32-03.jpg?direct&)

ዬያ ዓሢ ዓሲ ዓርቂ ቃዙዋ ጎይሢ ዎልቃዻያኬ። ዬያሮ ዓሳ ዒዛኮ ኩጮንታ ቶኮንታ ካኒ ቢራታና ቱካኔ፤ ጋዓንቴ ዬያ ዓንጎ ዒ ዱኡዚ ዱኡዚ ኬኤራኔ።

![](https://cdn.door43.org/obs/jpg/360px/obs-en-32-04.jpg?direct&)

ዬይ ዣኣዣሢ ዬኖ ቤዛ ዓኣ ዱኡፒ ካይካ ናንጊ ሮኦሮንታ ዋንቶዋ ቢያ ዒላታኔ። ዓፒላኣ ማይንቱዋሴ፤ ዑፆዋ ፔኤኮ ቲሊንጊና ቲቂ ቲቂ ሱጉሣኔ።

![](https://cdn.door43.org/obs/jpg/360px/obs-en-32-05.jpg?direct&)

ዬይ ዓሢ ዬሱሴ ኮራ ሙካዖ ቶኮ ዴማ ሎኦሚ ዚጌኔ። ዬሱሴያ ዬያ ፑርቶ ዓያናሢ፥ “ሃያ ዓሢፓ ኬስኬ!” ጌይ ዓይሤኔ።

![](https://cdn.door43.org/obs/jpg/360px/obs-en-32-06.jpg?direct&)

ዬይ ፑርቶ ዓያናሢ ዼጊ ጌዔ ዑኡሲና፥ “ዼኤፖ ፆኦዛሢ ናዓሦ፥ ዬሱሴ! ኔኤና ታኣናኮ ዓይጌ ዓኣይ? ሃዳራ ታና ሜታሲፖ!” ጌዒ ዒላታኔ። ዬሱሴ ፑርቶ ዓያናሢ፥ “ሱንፃ ኔኤኮ ዖናዳይ?” ጋዓዛ፥ ዒዚያ “ኑ ዺቢታሢሮ ሱንፃ ታኣኮ ሌጌዎኔኬ” ጌዔኔ (ሌጌዎኔ ጌይፃ ሮሜ ዓጮ ዖሎ ዓሶ ዺቢ ማሂ ፔቴይዳ ፓቃዖ ጌሦና ሱንሢኬ።)

![](https://cdn.door43.org/obs/jpg/360px/obs-en-32-07.jpg?direct&)

ዬይ ፑርቶ ዓያና፥ “ሃዳራ ኑና ሃኪሲ ዳኪፖ!” ጌይ ዬሱሴ ሺኢቄኔ። ዒማና ዓሲኮ ቆሎ ሚርጌ ጉዱንሢ ጌሜሪዳ ሄንቃንቴ ዬያታ ፑርቶ ዓያና ዬሱሴ ኮራ፥ “ሃዳራ ሃሴኬ ጉዱንፆይዳ ኑ ዓኣዺ ጌሎም ጌዔቴራ!” ጋዓዛ፥ ዬሱሴ ዔያቶ፥ “ዒኢካ ዴንዲ ጌሉዋቴ!” ጌዔኔ።

![](https://cdn.door43.org/obs/jpg/360px/obs-en-32-08.jpg?direct&)

ዬያሮ ዬይ ፑርቶ ዓያና ዣኣዣሢዳፓ ኬስኪ ጉዱንፆይዳ ጌሌኔ። ሴካ ላምዖ ሺያ ማዓ ጉዱንሢ ዲርጊ ባዞይዳ ዴንዲ ጌላዖ ዔኤዺንቲ ሃይቂ ኩዴኔ።

![](https://cdn.door43.org/obs/jpg/360px/obs-en-32-09.jpg?direct&)

ዬያ ጉዱንፆ ሄንቃ ዓሳ ዬያ ባኮ ዛጋዖ ካታሞ ጳሽኪ ዴንዲ ዬሱሴ ማዼ ባኮ ዴንቄ ዓሲም ቢያ ኬኤዜኔ። ዬያሮ ካታሞ ዓሳ ጳሽኪ ሙኪ ዛጋንቴ ዬይ ዣኣዣሢ ዻቂ ፔኤኮ ማኣሢያ ዳምቤና ማይንቲ፥ ዚቲ ጌይ ዴዒ ዓኣንቴ ዴንቄኔ።

![](https://cdn.door43.org/obs/jpg/360px/obs-en-32-10.jpg?direct&)

ዓሳኣ ሚርጌና ዲቃቲ ዒጊጫዖ ዬሱሴ ዔያቶኮ ዓጮ ሃሺ ዴንዳንዳጉዲ ዖኦጬኔ። ዬያሮ ዬሱሴ ዋኣፆና ፒንቆ ጎንጎ ቶጊ ዓኣዺፆሮ ጊኢጊንቴኔ፤ ዒማና ዣኣዣሢፓ ዻቄ ዓሢ ዬሱሴና ዎላ ዴንዳኒ ሺኢቄኔ።

![](https://cdn.door43.org/obs/jpg/360px/obs-en-32-11.jpg?direct&)

ጋዓንቴ ዬሱሴ፥ “ያዺ ጌይፖ፤ ኔ ማኣሪ ዴንዲጋፓ ፆኦሲ ኔኤም ማዼ ባኮ ቢያ፥ ኔና ዒ ዎማዺ ሚጪንቲ ማኣዴቴያ ኔ ዒጊኖንታ ኔኤኮ ማኣሮ ዓሶንታም ኬኤዜ” ጌዔኔ።

![](https://cdn.door43.org/obs/jpg/360px/obs-en-32-12.jpg?direct&)

ዬያሮ ዓሢ ዴንዳዖ ዬሱሴ ማዼ ባኮ ዓሲም ቢያ ኬኤዜኔ። ዬያ ሃይሶ ዋይዜ ዓሳ ቢያ ሚርጌና ዲቃቲ ሄርሼኔ።

![](https://cdn.door43.org/obs/jpg/360px/obs-en-32-13.jpg?direct&)

ዬካፓ ዬሱሴ ጊንሣ ባዞና ፒንቂ ቤርታኣ ቤዞ ዓኣዼኔ። ዒኢካ ዒዚ ሄላዛ ሚርጌ ዓሲ ዒዛኮ ኮይላ ቡኪ ቱቺ ሜታሴኔ። ዒማና ዬያ ዴሮ ባኣኮይዳ ታጶ ላምዖ ሌዔ ጉቤ ሱጉሢ ሾኦቲ ሜታሳ ላኣሊስኬና ዓኣኔ። ዒዛ ፖዓኒ ሚኢሾ ፔኤኮ ዼኤሾ ዔራ ዓሶም ጪጊ ኩርሴቴያ ሃቺም ሴካ ባባሼኔ።

![](https://cdn.door43.org/obs/jpg/360px/obs-en-32-14.jpg?direct&)

ዬሱሴ ሚርጌ ዶርዖ ዓሲ ፓሤሢ ዒዛ ዋይዛዖ፥ “ዬሱሴኮ ማኣዓሢታዖ ታ ካኣሜቴ ዻዻቃንዳኔ!” ጌይ ማሌኔ። ዬካፓ ዬሱሴኮ ጊንፆ ዒዛ ቃኣፂ ሙኪ ማኣዓሢኮ ዓጮ ካኣማዛ፥ ዒዞኮ ሾኦታ ሱጉፃ ቤዞና ዔቄኔ።

![](https://cdn.door43.org/obs/jpg/360px/obs-en-32-15.jpg?direct&)

ዬሱሴ ኔጉዋዖ ዎልቄ ዒዛይዳፓ ኬስኬሢ ዔሬኔ። ዬያሮ ጊንሢም ሺሪ ዛጋዖ፥ “ዖናዳይ ታና ሄሌሢ?” ጌዔኔ። ዒዛ ጊንፆ ሃንታዞንሢ፥ “ሃያ ኔ ኮይሎይዳ ቱቺንታ ዺቦ ዓሶ ኔ ዛጌያታዖ ‘ዖ ታና ሄሌይ?’ ጌዒ ኔ ዎይቲ ዖኦጫይ?” ጌዔኔ።

![](https://cdn.door43.org/obs/jpg/360px/obs-en-32-16.jpg?direct&)

ዓሴላ ዒማና ዒጊቹሞና ጎጋይቂ ጎጋይቂ ሙኪ ዬሱሴኮ ቶኮ ዴማ ሎኦሜኔ። ዬካፓ ዒዛ ማዼ ባኮንታ ዶርዓሢፓኣ ዒዛ ፖዔሢ ኬኤዜኔ። ዬሱሴያ ዒዞም፥ “ኔ ጉሙርቂፃ ኔና ዻቂሼኔ፤ ኮሺ ዓኣዼ” ጌዔኔ።

*ጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 8፡28-34፤ 9፡20-22፤ ማርቆሴ 5፡1-20፤ 5፡24-34፤ ሉቃሴ 8፡26-39፤ 8፡42-48።*

## 33. ጎሺ ጎሽካ ፔቴ ዓሲስኬያ ሃይሴ

https://openbiblestories.org/l/mdy/story-33/

![](https://cdn.door43.org/obs/jpg/360px/obs-en-33-01.jpg?direct&)

ፔቴ ኬሊ ዬሱሴ ባዞ ዓጮይዳ ሚርጌ ዺቢ ዓሲ ዓኣንቴ ዔያቶ ዔርዚቤቃ ዔቂ ዒ ኬኤዛንዳ ቤዛ ባይቃጉዲ ጌዔሢሮ ዋኣፆና ፒንቆ ጎንጎ ባዞ ሳዞ ባንሢ ዶጪሲ ዒኢካ ጌሊ ዴዓዖ ሚርጌ ባኣዚ ኬኤዜኔ።

![](https://cdn.door43.org/obs/jpg/360px/obs-en-33-02.jpg?direct&)

ዬሱሴ ፔቴ ሃይሴ ኬኤዛዖ፥ “ፔቴ ዓሲ ዜርሢ ዜራኒ ጎዦ ጋራ ዔቄኔ፤ ዒዚ ኩጫ ዔኪ ዓኣ ዜርፆ ዜራዛ ዛላ ጎይፆ ዓጫ ዴንዲ ኬዴኔ፥ ዬያሮ ካፒ ሙኪ ማንፂ ሙዔኔ” ጌዔኔ።

![](https://cdn.door43.org/obs/jpg/360px/obs-en-33-03.jpg?direct&)

“ዛሎ ዜርፃ ጊንሣ ሚርጌ ዓጪ ባኣ ሹቺ ሳዓይዳ ኬዴኔ፤ ዬይ ባቃሌቴያ ፃጲ ዳካኒ ዳንዳዒባኣሢሮ ዓባ ኬስካዛ ባቃላ ሹላዖ ሜሌኔ።”

![](https://cdn.door43.org/obs/jpg/360px/obs-en-33-04.jpg?direct&)

“ዛላ ዜርሢ ሃሣ ዓንጊሢ ቶሻ ባኣካ ኬዴኔ፤ ዬይ ዜርፃኣ ባቃላኔ፥ ጋዓንቴ ዓንጊፃ ሹኡሚ ዑጎ ባሼሢሮ ፔቴታዎ ዓኣፒ ዓኣፓኒ ዳንዳዒባኣሴ።”

![](https://cdn.door43.org/obs/jpg/360px/obs-en-33-05.jpg?direct&)

“ዛሎ ዜርፃ ጊንሣ ቃራ ሳዓይዳ ኬዳዖ ፔቴይ ሃይሢታሚ፥ ባጋ ላሂታሚ፥ ዓቴዛ ፄኤታ ዓኣፔኔ። ዋይዛ ዋይዚ ዓኣሢ ዋይዞንጎ!”

![](https://cdn.door43.org/obs/jpg/360px/obs-en-33-06.jpg?direct&)

ዬይ ሃይሳ ዒዛኮ ጊንፆ ሃንታዞንሢም ዔርቶ ዒፄኔ። ዬያሮ ዬሱሴ ዔያቶም ቡሊ ኬኤዛዖ፥ “ዜርፃ ፆኦሲ ቃኣሎኬ፤ ጎይፆ ዓጫ ኬዲፃ ዻዋሢ ፆኦሲ ቃሎ ዋይዛ ዓሶኬ፤ ጋዓንቴ ዔያታ ማሊ ጶቂሡዋኣሢሮ ፃላሄ ዒናፓ ሙኪ ቃኣሎ ዔካኔ” ጌዔኔ።

![](https://cdn.door43.org/obs/jpg/360px/obs-en-33-07.jpg?direct&)

“ሹጮ ሳዖይዳ ኬዴ ዜርፃ ዻዋሢ ፆኦሲ ቃኣሎ ዋይዛዖ ዑኬና ዎዛዺ ዔካ ዓሶኬ፤ ጋዓንቴ ሜቶና ዳውሲሢና ሙካኣና ዶዲፆ ባሺንቲ ፆኦሲ ጉሙርቂፆ ሃሻኔ።”

![](https://cdn.door43.org/obs/jpg/360px/obs-en-33-08.jpg?direct&)

“ዓንጊፆ ቶሾ ባኣካ ኬዴ ዜርፃኣ ዻዋሢ ፆኦሲ ቃኣሎ ዋይዛ ዓሶኬ፤ ጋዓንቴ ዴይ ቤቃ ሃያ ዓጮ ባኣዚ ማሊሢንታ ዖርጎቹሞንታ ዎዛንታ ሙካዖ ፆኦሲ ናሽኮ ናሹሞ ባይዛኔ። ዬያሮ ዋይዞና ቃኣላ ዓኣፒ ዓኣፒሱዋያ ማዓኔ።”

![](https://cdn.door43.org/obs/jpg/360px/obs-en-33-09.jpg?direct&)

“ኮዦ ሳዖይዳ ኬዴ ዜርፃ ዻዋሢ ፆኦሲ ቃኣሎ ዋይዛዖ ጉሙርቂ ዔኪ ዓኣፒ ዓኣፓ ዓሶ ዛላኬ።”

*ጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 13፡1-8፣ 18-23፤ ማርቆሴ 4፡1-8፣ 13-20፤ ሉቃሴ 8፡4-15።*

## 34.ዬሱሴ ኬኤዜ ሜሌ ሃይሴ

https://openbiblestories.org/l/mdy/story-34/

![](https://cdn.door43.org/obs/jpg/360px/obs-en-34-01.jpg?direct&)

ዬሱሴ ፆኦሲ ካኣቱሞ ዛሎ ኮኦኪንሢና ሚርጌ ሃይሴ ኬኤዚ ዴሮ ዔርዜኔ። ኮኦኪንሦ ኬኤዛዖ፥ “ፆኦሲ ካኣቱማ ዓሲ ሴናፒጬ ጌይንታ ዜርሢ ቢያፓ ዻካ ዜርሢስኬማ ዜርቄ ሃይሴ ማላኔ” ጌዔኔ።

![](https://cdn.door43.org/obs/jpg/360px/obs-en-34-02.jpg?direct&)

“ጋዓንቴ ዬማ ዜርፆማ ባቃላዖ ሃንጎ ቱኮና ባኮይዳፓ ቢያ ባሼ ዼኤፒ፥ ካፒያ ሙኪ ማኣሪ ማዣያ ማዓኔ።”

![](https://cdn.door43.org/obs/jpg/360px/obs-en-34-03.jpg?direct&)

ዬሱሴ ሃሣ ሜሌ ሃይሴ ኬኤዛዖ፥ “ፆኦሲ ካኣቱማ ፔቴ ላኣሊ ዲርኪንቴ ዺኢሊዳ ዋሃ ዻካ ሙኑቃ ፃኣዛ ማላኔ።”

![](https://cdn.door43.org/obs/jpg/360px/obs-en-34-04.jpg?direct&)

“ሃሣ ጊንሣ ፆኦሲ ካኣቱማ ዓሲ ጎሺ ጋርካ ዓኣቺ ጌሤ ማዝጋቤ ማላኔ። ዬኖ ዒ ዓኣቺ ጌሤዞ ሜሌ ዓሲ ዴንቃዖ ጊንሣ ማሂ ዱኡካዖ ዴንዲ ፔኤኮ ዓኣ ባኮ ቢያ ሻንቺ ዬኖ ጎዤሎ ሻንቄኔ።”

![](https://cdn.door43.org/obs/jpg/360px/obs-en-34-05.jpg?direct&)

“ዬያጉዲ ፆኦሲ ካኣቱማ ሻንቾቴ ሚርጌ ሚኢሼ ኬሳንዳ ሚዛጶ ሹጮ ማላኔ። ዬያ ሚዛጶ ሹጮ ኮርማ ዓሲ ዴንቃዖ ዓኣ ባኮ ቢያ ሻንቺ ዬኖ ሻንቄኔ።”

![](https://cdn.door43.org/obs/jpg/360px/obs-en-34-06.jpg?direct&)

“ዬካፓ ዬሱሴ ፔ ማዼ ማዾና ጉሙርቂንቲ ሄርሺንታ ዓሶንታ ሜሌ ዓሶ ቶኦቻ ዓሶም ሂዚ ጌይ ቶሴ ሃይሴ ኬኤዛዖ፥ ‘ላምዖ ዓሲ ፆኦሲ ሺኢቃኒ ጌኤዦ ማኣሪ ዴንዴኔ። ዬያቶፓ ፔቴሢ ዴሮ ቃራፄ ሚኢሼ ጪጊሻያኬ፥ ሃንጎሢ ፆኦሲ ካኣሽካ ዓሶኮ ሱኡጌኬ” ጌዔኔ።

![](https://cdn.door43.org/obs/jpg/360px/obs-en-34-07.jpg?direct&)

“ፆኦሲ ካኣሽካ ዓሶ ሱኡጋሢ ሺኢቃዖ፥ ‘ፆኦሲዮ! ሜሌ ዓሶጉዲ ታ ቡሩዋያ፥ ዋይዚ ዒፁዋያ፥ ማቾ ሃሣ ዓኒ ማዒባኣያና ላሁዋያ፥ ሃያ ዓሢ ጎይፆዋ ቃራፄ ሚኢሼ ጪጊሺ ሺሩዋያ ማዔሢሮ ታ ኔና ጋላታኔ’ ጌዔኔ።”

![](https://cdn.door43.org/obs/jpg/360px/obs-en-34-08.jpg?direct&)

“ታኣኒ ቃልሾ ኬሎ ጋራ ላምዒ ማይንቲ ሙዖ ሃሺፆ ዳምቦ ካፓኔ፥ ታ ዴንቃ ሚኢሾንታ ዱማ ዱማ ባኮይዳፓ ታጳፓ ፔቴ ኬሲ ኬሲ ኔኤም ዒንጋኔ።”

![](https://cdn.door43.org/obs/jpg/360px/obs-en-34-09.jpg?direct&)

“ቃራፆ ሚኢሾ ጪጊሻሢ ጋዓንቴ ዬያ ፆኦሲ ካኣሽካ ዓሶ ሱኡጋሢፓ ሃኬ ዶጪ ዔቃዖ፥ ሌካ ጫሪንጮዋ ዛጋኒ ጫርቂባኣሴ። ዬያ ሃሻዖ ፔ ኩጮና ዳዶ ባዒ ባዒ ‘ፆኦሲዮ! ታ ጎሜናኬ፤ ሃዳራ ታና ማኣሬ’ ጌዔኔ።”

![](https://cdn.door43.org/obs/jpg/360px/obs-en-34-10.jpg?direct&)

ዬካፓ ዬሱሴ ሂዚ ጌዔኔ፦ “ጎኔ ታ ዒንሢም ጋዓኔ፤ ፆኦሲ ዬያ ቃራፆ ሚኢሾ ጪጊሳሢ ሺኢጲፆ ዋይዚ ፂሊሴኔ። ፆኦሲ ካኣሽካ ዓሶ ሱኡጋሢ ጌዔ ባኮ ጋዓንቴ ፆኦሲ ናሽኪ ዔኪባኣሴ። ፔና ዼግ ዼጊዳሢ ቢያ ፆኦሲ ዻውሲሳኔ፤ ፔና ሂርኪዳሢያ ዼጊዲ ቦንቺሳኔ።”

*ጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 13፡31-33፣ 44-46፤ ማርቆሴ 4፡30-32፤ ሉቃሴ 13፡18-21፤ 18፡9-14።*

## 35. ሚጪንታያ ማዔ ዓዶስኬያ ሃይሴ

https://openbiblestories.org/l/mdy/story-35/

![](https://cdn.door43.org/obs/jpg/360px/obs-en-35-01.jpg?direct&)

ፔቴ ቤሲዳ ዬሱሴ ቃራፄ ሚኢሼ ጪጊሳ ሚርጌ ዓሲንታ ዺቢ ጎሜ ዓሲንታ ዒዛ ኮራ ሙኬም ዔያቶ ዒ ዔርዛኔ።

![](https://cdn.door43.org/obs/jpg/360px/obs-en-35-02.jpg?direct&)

ዬኖ ቤዞይዳ ዓኣ ፆኦሲ ካኣሽካ ዓሶ ሱኡጋ ዬሱሴ ጎሞ ዓሶ ናሽኪ ዔኬሢ ዴንቃዖ ዎላ ዾንኮ ዓርቄኔ። ዬያሮ ዬሱሴ ሂዚ ጋዓ ቶሴ ሃይሴ ኬኤዜኔ።

![](https://cdn.door43.org/obs/jpg/360px/obs-en-35-03.jpg?direct&)

ላምዖ ናይ ዓኣ ፔቴ ዓሲስኬያ ዓኣኔ። ዬያቶፓ ጌኤዛሢ ዓዶ ኮራ፥ “ዓዴ! ኔኤኮ ዓኣ ሚኢሾፓ ታና ሄላ ዛሎ ፓቂ ዒንጌ” ጌዔኔ። ዬያሮ ዓዳሢ ሚኢሾ ዔያቶም ጊሽኬኔ።

![](https://cdn.door43.org/obs/jpg/360px/obs-en-35-04.jpg?direct&)

“ጌኤዛሢ ጋዓንቴ ሚኢሾ ቡኩሲ ዔኪ ሃኬ ዓጪ ዴንዳዖ ጎሜ ማዾ ማዺ ሚኢሾ ላኣሊ ባይዜኔ።”

![](https://cdn.door43.org/obs/jpg/360px/obs-en-35-05.jpg?direct&)

“ዬይ ጌኤዛሢ ዴንዴ ዓጬሎይዳ ዼኤፒ ሉማ ኬስኬኔ፤ ሙዖንዶ ባኣዚንታ ሻንቆንዶ ሚኢሼያ ዒ ባይዜኔ። ዬያሮ ፔቴ ዓሲኮ ጉዱንሢ ሄንቃኒ ዓሲ ማኣሪ ጌሌኔ፤ ያዺ ማዔቴያ ሚርጌ ዒ ካራ ባይዚ ናይዺ ሜታዼሢሮ ጉዱንፆም ዒንጎ ሙዖ ሙዓኒ ዓፃዼኔ።”

![](https://cdn.door43.org/obs/jpg/360px/obs-en-35-06.jpg?direct&)

“ጋፒንፆይዳ ፔ ዒኖና፥ ‘ታ ሃሢ ሃይካ ዓይጎዎዳይ? ታ ዓዶ ማኣራ ማዻ ዺቦ ዓሳ ሙዓ ዺቢ ባኣዚ ዓኣኔ፤ ታ ጋዓንቴ ሃይካ ናይዚና ሃይቃኔ። ዬያሮ ታኣኒ ታ ዓዶ ማኣሪ ማዒ ዴንዲ ዓይሌ ማሂ ታና ዔካንዳጉዲ ሺኢቃንዳኔ’” ጌዔኔ።

![](https://cdn.door43.org/obs/jpg/360px/obs-en-35-07.jpg?direct&)

“ዬያሮ ዬይ ጌኤዛሢ ዓዶ ማኣሪ ማዒ ሙኪፆይዳ ዓኣንቴ ዓዴ ሃኬና ዒዛ ዴንቃዖ ሚጬንቴኔ፤ ዬያሮ ዒዛ ባንሢ ጳሽኪ ሙካዖ ኮንቂ ዓርቂ ሄርቄኔ።”

![](https://cdn.door43.org/obs/jpg/360px/obs-en-35-08.jpg?direct&)

“ናዓሢ ጋዓዖ፥ “ዓዴ፤ ፆኦሲንታ ኔናንታ ቤርታ ታ ዻቢንቲ ማዾ ማዼኔ። ታ ኔ ናይ ጌይንታኒ ኮይሳያቱዋሴ’ ጌዔኔ።”

![](https://cdn.door43.org/obs/jpg/360px/obs-en-35-09.jpg?direct&)

“ጋዓንቴ ዓዳሢ ዓይሎይዳፓ ፔቴስኬያም፥ ‘ዑኬና ዴንዲ ቃራ ማኣዖ ዔኪ ሙኪ ታ ናዓሢ ማይሴ! ኬኤሎይዳ ዢኢሮ፥ ቶኮይዳኣ ዱርሲ ዓኣሤ። ዬካፓ ኑ ሙይ ዑሽኪ ዎዛዻንዳጉዲ ፔቴ ሶቦሪ ዔኪ ሙኪ ሹኩዋቴ፤ ዓይጎሮ ጌዔቴ ሃይ ናዓሢ ታኣኮ ሃቄዖ ሃሢ ዻቄኔ! ባይቂ ጋፔዖ ጴዼኔ!” ጌዔኔ።

![](https://cdn.door43.org/obs/jpg/360px/obs-en-35-10.jpg?direct&)

“ዬያይዲ ዔያታ ዎዛዺሢ ዓርቄኔ። ዒማና ሚርጌ ናጉዋዖ ጎሺ ሶኦፒ ዴንዴ ቶይዶ ናዓሢ ማዒ ሙካዖ ዋርቂንታ ባኮንታ ኮፆዋ ዋይዚ ‘ሃኖ ሃይካ ዓይጌ ማዢንቴይ?’ ጌይ ዲቃቲ ሄርሼኔ።

![](https://cdn.door43.org/obs/jpg/360px/obs-en-35-11.jpg?direct&)

“ዬይ ቶይዶ ናዓሢ ዒዛኮ ጌኤዚ ሙኬም ዓሳ ዎዛዻሢ ዖኦጪ ዔራዖ ሚርጌና ዻጋዺ ኬኤፆ ጌላኒያ ኮዒባኣሴ። ዬያሮ ዓዴ ኬስኪ ቶይዳሢ ዔያቶና ዎላ ጌሊ ዎዛዻንዳጉዲ ሺኢቄኔ፥ ጋዓንቴ ዒዚ ዒፄኔ።”

![](https://cdn.door43.org/obs/jpg/360px/obs-en-35-12.jpg?direct&)

“ቶይዶ ናዓሢ ዓዶ ኮራ፥ ‘ሃያጉዴ ሚርጌ ሌዔ ቢያ ታ ኔኤም ጉሙርቂንታያ ማዒ ማዼኔ! ፔቴታዖ ታኣኒ ዓይሢንቲ ዒፂባኣሴ፤ ኔኤኒ ጋዓንቴ ታ ላጎና ዎላ ሹኪ ሙዒ ታ ዎዛዻንዳጉዲ ፔቴ ዋናይታዖ ዒንጊባኣሴ። ሃይ ታ ጌኤዛሢ ጎሜ ማዾ ማዺ ሚኢሾዋ ቢያ ላኣሊ ባይዚ ሙካዛ ዎዲ ኔ ሶቦሪ ሹኬይ!።”

![](https://cdn.door43.org/obs/jpg/360px/obs-en-35-13.jpg?direct&)

“ዓዴ ማሃዖ፥ ‘ታ ናዓሢዮ! ኔኤኒ ቢያ ዎዴ ታኣና ዎላኬ፤ ታኣሮ ማዔ ባካ ቢያ ኔኤሮኬ። ሃሢ ጋዓንቴ ኑኡኮ ዎዛዺፃ ፒዜኬ፤ ዓይጎሮ ጌዔቴ ሃይ ኔ ጌኤዚ ሃይቄዖኬ ዻቄሢ! ጋፒ ባይቄዖ ሃሢ ጴዼኔ” ጌዔኔ።

*ጌኤዦ ማፃኣፓ ኬኤዚንቴ ሃይሴ፡- ሉቃሴ 15፡11-32።*

## 36. ዬሱሴኮ ዓውካሮ ላኣሚንቶ

https://openbiblestories.org/l/mdy/story-36/

![](https://cdn.door43.org/obs/jpg/360px/obs-en-36-01.jpg?direct&)

1. ፔቴ ኬሊ ዬሱሴ ሃይሦ ዒዛኮ ጊንፆ ሃንታስኬንሢ፡ ጴፂሮሴ፥ ያይቆኦቤንታ ዮሃኒሴንታ ዔኪ ሺኢጲሢሮ ፔቴ ዹካ ኬስኬኔ። (ዮሃኒሴ ጌይንቴ ዬሱሴ ጊንፆ ሃንታሢ ዬሱሴ ዋኣፆና ማስኬ ዮሃኒሴቱዋሴ።”

![](https://cdn.door43.org/obs/jpg/360px/obs-en-36-02.jpg?direct&)

ዬሱሴ ሺኢጲፆይዳ ዓኣንቴ ዓውካራ ዒዛኮ ላኣሚንቲ ዓቢጉዲ ፖዔኔ፤ ማኣዓሢያ ቦኦሪ፥ ሳዓይዳ ዓይጎ ዓሲያ ማኣዖ ማስኪ ጌኤሺ ቦኦሪሳያይዳፓ ባሼ ቦኦሬኔ።

![](https://cdn.door43.org/obs/jpg/360px/obs-en-36-03.jpg?direct&)

ዒማና ሙሴና ዔኤሊያሴና ፔጋዺ ጴዼኔ። ዬያታ ዓሳ ፄኤታና ፓይዲንታ ሌዔኮ ቤርታ ሳዖይዳ ናንጌያኬ። ዬያታ ዓሳ ዬሱሴ ዬሩሳላሜይዳ ሃይቃንዳ ጎይፆ ዒዛና ጌስቴኔ።

![](https://cdn.door43.org/obs/jpg/360px/obs-en-36-04.jpg?direct&)

ሙሴንታ ዔኤሊያሴንታ ዬሱሴና ዎላ ጌስታ ጎይሣ ዓኣንቴ ጴፂሮሴ ዬሱሴ ኮራ፥ “ኑ ሃይካ ናንጋቴ ኮሺኬ። ፔቴ ኔኤም፥ ፔቴ ሙሴም፥ ፔቴ ዔኤሊያሴም ሃይሦ ዉዲ ኑ ማዦም” ጌዔኔ። ጴፂሮሴ ዓይጎ ጋዓቴያ ዔሪባኣዖ ባልባቲሢ ጎይሢኬ ዬያ ጌዔሢ።

![](https://cdn.door43.org/obs/jpg/360px/obs-en-36-05.jpg?direct&)

ጴፂሮሴ ዬያ ኬኤዛ ጎይሣ ዓኣንቴ ቦኦሬ ሻኣሬ ሙኪ ዔያቶ ባይዛዛ ዬያ ባኣካፓ፥ “ታ ዒዛና ሚርጌ ዎዛዻ ናዓሢ ታኣኮ ሃያኬ፤ ዒዚ ጋዓሢ ዋይዙዋቴ” ጋዓ ዑኡሲ ዋይዚንቴኔ። ዒማና ሃይሦ ዬሱሴ ጊንፆ ሃንታዞንሢ ዲቃቲ ሳዓ ሎኦሜኔ።

![](https://cdn.door43.org/obs/jpg/360px/obs-en-36-06.jpg?direct&)

ዬያሮ ዬሱሴ ዔያቶኮ ዑፆ ካኣማዖ፥ “ዲቃቲፖቴ፥ ዔቁዋቴ” ጌዔኔ። ዒማና ዔያታ ኮይሎ ዛጋንቴ ዬሱሴፓ ዓታዛ ዖኦኒያ ባኣሴ።

![](https://cdn.door43.org/obs/jpg/360px/obs-en-36-07.jpg?direct&)

ዬካፓ ዬሱሴንታ ዒዛኮ ጊንፆ ሃንታ ሃይሦንሢንታ ዹካፓ ኬዴኔ። ዒማና ዬሱሴ ፔ ጊንፆ ሃንታዞንሢም፥ “ሃይካ ሃሢ ማዺንቴ ባኮ ዓይጎ ዓሲማኣ ኬኤዚፖቴ። ታኣኒ ሚርጌ ፔኤቃዓኬ፥ ሃይቃንዳኔ፤ ዬካፓ ታ ሃይባፓ ዻቂ ዔቃንዳኔ። ዬካፓ ዒንሢ ዓሶም ኬኤዛኒ ዳንዳዓኔ” ጌዔኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 17፡1-9፤ ማርቆሴ 9፡2-8፤ ሉቃስ 9፡28-36።*

## 37. ዬሱሴ ዓላዜሬ ሃይባፓ ዔቂሴሢ

https://openbiblestories.org/l/mdy/story-37/

![](https://cdn.door43.org/obs/jpg/360px/obs-en-37-01.jpg?direct&)

ፔቴ ኬሊ “ዓላዜሬ ሃይቃኒ ዑኪ ሃርጊንቴኔ” ጋዓ ኪኢታ ዬሱሴ ሄሌኔ። ዓላዜሬንታ ማርታና ማይራሞና ጌይንታ ዒዛኮ ጌሮንሢንታ ዬሱሴና ዎሊ ናሽካ ላጌኬ። ዬሱሴ ዬያ ኪኢቶ ዋይዛዖ፥ “ዬይ ሃርጋ ፆኦሲ ቦንቾ ፔጋሳያኬ፥ ዎዎዻያቱዋሴ” ጌዔኔ። ዬሱሴ ዒዛኮ ላጎ ማዔዞንሢ ሚርጌና ናሽካያ ማዔቴያ ኪኢቶ ዋይዜዖ ላምዖ ኬሊ ፔኤቄኔ።

![](https://cdn.door43.org/obs/jpg/360px/obs-en-37-02.jpg?direct&)

ላምዖ ኬሊኮ ጊንፃ ዬሱሴ ዒዛኮ ጊንፆ ሃንታዞንሢም፥ “ኑ ዪሁዳ ዴንዶም” ጌዔኔ። ጊንፆ ሃንታዞንሢ ጋዓንቴ “ዔርዛሢዮ! ሃሢ ዑኬ ኬሊዳ ዒኢካ ዓኣ ዓይሁዶ ዓሳ ኔና ዎዻኒ ኮይባኣዓዳ!” ጌዔኔ። ዬሱሴ ጊንሣ ዔያቶም፥ “ኑ ላጋሢ ዓላዜሬ ጊንዔኔ፤ ጊንዓስካፓ ታ ዒዛ ጴቻኒ ዴንዳንዳኔ” ጌዔኔ።

![](https://cdn.door43.org/obs/jpg/360px/obs-en-37-03.jpg?direct&)

ዬሱሴኮ ጊንፆ ሃንታዞንሢ፥ “ጎዳሢዮ፤ ዓላዜሬ ጊጊንዔቴ ማይ ፖዒስካይ!” ጌዔኔ። ዬያሮ ዬሱሴ ዔያቶም ፔጌና፥ “ዓላዜሬ ሃይቄኔ። ዒንሢ ታና ጉሙርቃንዳጉዲ ታኣኮ ዒኢካ ባኣያ ማዒፆና ታ ዎዛዼኔ” ጌዔኔ።

![](https://cdn.door43.org/obs/jpg/360px/obs-en-37-04.jpg?direct&)

ዓላዜሬ ሾይንቴ ካታሞ ዬሱሴ ሄላኣና ዓላዜሬ ሃይቄንቴ ዖይዶ ኬሊ ኩሚናኣኮኬ። ማርታ ዬሱሴ ሞኦኪ ዔካኒ ኬስካዖ፥ “ጎዳሢዮ! ኔ ዎንዴ ሃይካ ዓኣቴ ታ ጌርሲ ሃይቃንዳ! ጋዓንቴ ሃሢያ ኔ ሺኢቃ ሺኢጲፆ ቢያ ፆኦሲ ዋይዛንዳሢ ታ ጉሙርቃኔ” ጌዔኔ።

![](https://cdn.door43.org/obs/jpg/360px/obs-en-37-05.jpg?direct&)

ዬሱሴ ማሃዖ፥ “ሃይባፓ ዔቂሳሢንታ ሼምፔና ናንጊሻሢያ ታናኬ። ታና ጉሙርቃይ ቢያ ሃይቄቴያ ሼምፔና ናንጋንዳኔ፤ ታና ጉሙርቃይ ፔቴታዖ ሃይቁዋሴ፤ ዬያ ኔ ጉሙርቃ?” ጋዓዛ ማርታ፥ “ሂዮ ጎዳሢዮ! ጎኔኬ፤ ኔኤኒ ካኣቱሞም ዶኦሞናሢ (ሜሲሄ)፥ ፆኦሲ ናኣዚ ማዒፆ ታ ጉሙርቃኔ” ጌዔኔ።

![](https://cdn.door43.org/obs/jpg/360px/obs-en-37-06.jpg?direct&)

ዬካፓ ማይራማ ሙካዖ ዬሱሴኮ ቶካ ሎኦሚ፥ “ጎዳሢዮ! ኔ ዎንዴ ሃይካ ዓኣቴ ታ ጌርሲ ሃይቂንዱዋንቴቱዋይ!” ጌዔኔ። ዬሱሴያ፥ “ዓላዜሬ ዒንሢ ዎካ ጌሤይ?” ጌይ ዖኦጬኔ። ዔያታ ዬሱሴም፥ “ዒ ዱኡኪንቴኔ፥ ሃኒ ሙኪ ዛጌ” ጌዔኔ። ዬካፓ ዬሱሴ ዬኤኬኔ።

![](https://cdn.door43.org/obs/jpg/360px/obs-en-37-07.jpg?direct&)

ዒ ዱኡኪንቴሢ ዴኔ ዔቴይዳኬ፤ ካሮዋ ዼኤፒ ሹቺና ዎዾናኔ። ዬሱሴ ዬያ ዱኡፖ ቤዞ ሙካዖ “ሹጮ ኮላሲ ሺኢሹዋቴ” ጌዔኔ። ማርታ ጋዓንቴ፥ “ዓላዜሬ ሃይቄንቴ ሃኖ ዖይዶ ኬሊኬ፤ ሃሢ ማይ ዛዛዓንዳኔ” ጌዔኔ።

![](https://cdn.door43.org/obs/jpg/360px/obs-en-37-08.jpg?direct&)

ዬሱሴ፥ “ኔ ታና ጉሙርቄቴ ፆኦሲ ቦንቾ ኔ ዛጋንዳሢ ታ ኔኤም ኬኤዚባኣዓዳ?” ጌዔኔ። ዬያሮ ዔያታ ሹጮ ዱኡፖ ካራፓ ኮላሲ ሺኢሼኔ።

![](https://cdn.door43.org/obs/jpg/360px/obs-en-37-09.jpg?direct&)

ዬካፓ ፆኦሲ ጫሪንጮ ባንሢ ዛጋዖ፥ “ዓዴ! ኔ ታኣም ዋይዛንዳሢሮ ታ ኔና ጋላታኔ። ኔኤኒ ቢያ ዎዴ ታኣም ዋይዛሢያ ታ ዔራኔ፤ ጋዓንቴ ሃሢ ኔኤኒ ታና ዳኬሢ ሃይ ዴራ ጉሙርቃንዳጉዲ፥ ሃያ ዓሶ ዛሎ ታ ጋዓኔ” ጌዔኔ። ዬካፓ ዬሱሴ፥ “ዓላዜሬ፤ ሃኒ ኬስኬ!” ጌይ ዒላቴኔ።

![](https://cdn.door43.org/obs/jpg/360px/obs-en-37-10.jpg?direct&)

ዬያሮ ዓላዜሬ ኬስኬኔ! ዒዛ ሱኡዳዖ ዓሳ ቱኬ ቱርጮና ዒ ቱኡቴ ጎይሣኬ ኬስኬሢ። ዬያሮ ዬሱሴ፥ “ቡሊ ሃሹዋቴ፥ ዒ ሃንቶም” ጌዔኔ። ዓይሁዶፓ ዺቢ ዓሲ ዬያ ፆኦሲ ዎልቆና ማዺንቴ ባኮ ዛሎና ዬሱሴ ጉሙርቂ ጎናሲ ዔኬኔ።

![](https://cdn.door43.org/obs/jpg/360px/obs-en-37-11.jpg?direct&)

ጋዓንቴ ዓይሁዶ ካኣዦ ሱኡጋ ዬሱሴ ዒፂ ቂኢሬኔ፤ ዬያሮ ዬሱሴንታ ዓላዜሬንታ ቢያ ዎዻኒ ዞርቲሢሮ ቡኬኔ።

*ጌኤዦ ማፃኣፓ ኬኤዚንቴ ሃይሴ፡- ዮሃኒሴ 11፡1-46።*

## 38. ዬሱሴ ሃይቢም ዓኣሢ ዒንጊንቴሢ

https://openbiblestories.org/l/mdy/story-38/

![](https://cdn.door43.org/obs/jpg/360px/obs-en-38-01.jpg?direct&)

ዓይሁዳ ሌዓ ሌዓ ዑሣ ዓኣዺፆ ቦንቾ ቦንቻኔ። ዬይ ቦንቻ ሚርጌ ሌዔኮ ቤርታ ፆኦሲ ዔያቶኮ ማዖንሢ ዎዲ ጊብፄ ዓጮ ዓይላቶ ናንጋፓ ኬሴቴያ ማሊ ቦንቾያኬ። ዬሱሴ ኮዦ ሃይሶ ኬኤዚፆና ዔርዚፆዋ ዓርቄንቴ ሃይሦ ሌዔ ማዓኣና ዬያ ዑሣ ዓኣዺፆ ቦንቾ ዬሩሳላሜይዳ ዒዛኮ ጊንፆ ሃንታዞንሢና ዎላ ቦንቻኒ ኮዔሢንታ ዒኢካ ዒዛ ዎዾንዶሢያ ኬኤዜኔ።

![](https://cdn.door43.org/obs/jpg/360px/obs-en-38-02.jpg?direct&)

ዬሱሴኮ ጊንፆ ሃንታዞንሢፓ ፔቴሢ ዪሁዳ ጎዖያኬ። ዬይ ዪሁዳ ዬሱሴ ጊንፆ ሃንታዞንሢኮ ሚኢሾ ዓርቃያኬ፤ ጋዓንቴ ዒ ሚኢሼ ናሽካያ ማዔሢሮ ዺቢ ሚኢሼ ቃርፂታፓ ዉኡቂ ዉኡቂ ዔካኔ። ዬሱሴንታ ዒዛኮ ጊንፆ ሃንታዞንሢንታ ዬሩሳላሜ ሄላዛ ዪሁዳ ዓይሁዶኮ ካኣዦ ሱኡጎ ኮራ ዴንዲ ሚኢሼ ዔያታ ዒዛም ዒንጌቴ ዬሱሴ ዓኣሢ ዒንጋንዳሢ ጌስቲ ዔኤዔኔ። ዬያ ዒ ማዼሢ ዓይሁዶ ካኣዦ ሱኡጋ ዬሱሴ ካኣቱሞም ዶኦሚንቴያ (ሜሲሄ) ማዔሢ ጎኔኬ ጌይ ዔኮ ዒፂ ዎዻኒያ ኮዓሢ ዔሬሢሮኬ።

![](https://cdn.door43.org/obs/jpg/360px/obs-en-38-03.jpg?direct&)

ዓይሁዶ ሱኡጋ ቄኤሶኮ ቢያ ዑፃሢ ዔያቶኮ ዓርና ማዔም ዬሱሴ ዓኣሢ ዒንጋንዳጉዲ ዪሁዳም ሃይሢታሚ ቢራ ጪጌኔ። ዬይያ ፆኦሲ ማሊፆ ኬኤዛ ዓሳ ቤርታዺ ኬኤዜ ጎይፆ ማዺንቴኔ። ዬያሮ ዪሁዳ ዔኤዒ ሚኢሾ ዔኪ ዴንዳዖ ዬሱሴ ዔያታ ዓርቃንዳጉዲ ዓኣሢ ዒንጋንዳ ጊኢጋ ካራ ኮይሢ ዓርቄኔ።

![](https://cdn.door43.org/obs/jpg/360px/obs-en-38-04.jpg?direct&)

ዬሱሴ ዒዛኮ ጊንፆ ሃንታዞንሢና ዎላ ዬሩሳላሜይዳ ዑሣ ዓኣዺፆ ቦንቾ ሙዖ ሙይ ቦንቼኔ። ዬኖ ኬሎ ካሣ ዔኪ ቡንፃዖ፥ “ሃኣዛጉዋቴ ሙዑዋቴ፤ ሃይ ዒንሢም ዒንጊንታሢ ታናኬ፤ ዬያ ታና ማሊ ጶቂሣያ ማሂ ማዹዋቴ” ጌዔኔ። ያዺዲ ዬሱሴ ዓሲ ዛላ ሃይቃንዳሢ ኬኤዜኔ።

![](https://cdn.door43.org/obs/jpg/360px/obs-en-38-05.jpg?direct&)

ዬካፓ ዬሱሴ ዑሽኮ ባኮ ዔካዖ፥ “ሃያ ዑሽኩዋቴ፤ ሃይ ሚርጌ ዓሶኮ ጎሞ ጌኤሻኒ ሾኦታንዳ ዓኪ ጫኣቁሞ ሱጉሢኬ። ዬያ ዒንሢ ዑሽካ ዎዶና ቢያ ታና ማሊ ጶቂሣያ ማዑዋቴ” ጌዔኔ።

![](https://cdn.door43.org/obs/jpg/360px/obs-en-38-06.jpg?direct&)

ጊንሣ ሃሣ ዒዛ ጊንፆ ሃንታዞንሢም፥ “ዒንሢፓ ፔቴሢ ታና ሃይቃንዳጉዲ ዓኣሢ ዒንጋንዳኔ” ጌዔኔ። ዬያሮ ዒዛኮ ጊንፆ ሃንታዞንሢ ዲቃታዖ፥ “ዬያጉዴ ባኣዚ ዖ ማዻኒ ዳንዳዓይ?” ጌይ ዖኦጬኔ። ዬሱሴ ዒማና፥ “ሃያ ካሦ ታ ኩልሳሢኬ ታና ዓኣሢ ዒንጋሢ” ጋዓዖ ካሦ ዪሁዳ ኩልሴኔ።

![](https://cdn.door43.org/obs/jpg/360px/obs-en-38-07.jpg?direct&)

ዪሁዳ ካሦ ኩኩኡላዛ ፃላሄ ዒዛይዳ ጌሌኔ፤ ዬያሮ ዓይሁዶ ሱኡጋ ዬሱሴ ዓርቃንዳ ጎይፆ ኬኤዛኒ ዴንዴኔ። ሳዓ ዒማና ዹሚኬ።

![](https://cdn.door43.org/obs/jpg/360px/obs-en-38-08.jpg?direct&)

ዬሱሴና ዒዛኮ ጊንፆ ሃንታዞንሢና ካዋሢ ሙዔስካፓ ዛይቴ ሪሚቲ ዹካ ጎዖ ዹካ ዴንዴኔ። ዬሱሴ ጊንፆ ሃንታዞንሢም፥ “ሃኖ ዒባኒ ዒንሢ ቢያሢ ታና ሃሺ ዴንዳንዳኔ፤ ‘ቆልሞ ሄንቃሢ ታ ጳርቃንዳኔ፤ ማራታኣ ቢያ ዣኣላንዳኔ’ ጌይንቲ ጌኤዦ ማፃኣፖይዳ ፃኣፒንቴኔ” ጌዔኔ።

![](https://cdn.door43.org/obs/jpg/360px/obs-en-38-09.jpg?direct&)

ጴፂሮሴ፥ “ሃንጎዋታ ኔና ቢያ ሃሺ ዴንዴቴያ ታ ኔና ማሊ ሃሺ ዴንዳዓኬ” ጌዔኔ። ዒማና ዬሱሴ ጴፂሮሴም፥ “ፃላሄ ዒንሢ ቢያሢ ፔ ዓሲ ማሃኒ ኮዓኔ፤ ጋዓንቴ ዋይዜ ጴፂሮሴ፡ ኔ ጉሙርፃ ሺኢቱዋጉዲ ታኣኒ ፆኦሲ ሺኢቄኔ። ያዺ ማዔቴያ ሃኖ ዒባኒ ኮይዳ ቂኢቃንዳሢኮ ቤርታ ሃይሢ ማይንቲ ኔኤኒ ‘ታ ዒዛ ዔሩዋሴ’ ጋዓንዳኔ” ጌዔኔ።

![](https://cdn.door43.org/obs/jpg/360px/obs-en-38-10.jpg?direct&)

ዒማና ጊንሣ ጴፂሮሴ ዬሱሴም፥ “ሃይቂ ሃይቆቴያ ታ ኔና ‘ዔሩዋሴ’ ጋዓዓኬ” ጌዔኔ። ሃንዋታኣ ቢያ ዒማዺ ጌይሢ ዓርቄኔ።

![](https://cdn.door43.org/obs/jpg/360px/obs-en-38-11.jpg?direct&)

ዬካፓ ዬሱሴ ዒዛ ጊንፆ ሃንታዞንሢና ዎላ ጌኤቴሴማኔ ጌይንታ ቤሲ ዴንዴኔ። ዒኢካ ዒዛኮ ጊንፆ ሃንታዞንሢም፥ “ዻቢሻኒ ጌሾ ጌሺሢዳ ዒንሢ ጌሉዋጉዲ ሺኢቁዋቴ” ጌዔኔ። ዬሱሴያ ፔኤሮ ሺኢቃኒ ዔያቶፓ ዱማዺ ዴንዴኔ።

![](https://cdn.door43.org/obs/jpg/360px/obs-en-38-12.jpg?direct&)

ዬሱሴ ሃይሢ ማይንቲ ሺኢቄስካፓ፥ “ታ ዓዴ! ኔኤም ዳንዳዒንታቴ ሃያ ሜቶ ዑዦ ታ ቤርታፓ ሺኢሼ። ጋዓንቴ ዓሲኮ ጎሜ ዓቶም ጌይሢሮ ሃይ ማዺንታሢሮ ኔ ማሊፃ ኩሞንጎ” ጌዔኔ። ዬሱሴ ዒማና ሚርጌ ዲቃቴሢሮ ሱጉሢ ማላ ጮጋቺ ዒዛ ዑፃፓ ፆዻኔ። ፆኦሲ ዒዛ ዶዲሻንዳጉዲ ኪኢታንቻ ዳኬኔ።

![](https://cdn.door43.org/obs/jpg/360px/obs-en-38-13.jpg?direct&)

ዬሱሴ ዬያ ሺኢጲፆ ቢያ ሺኢቂ ጋዓዖ ዒዛኮ ጊንፆ ሃንታዞንሢ ኮራ ማዒ ሙካንቴ ዔያታ ጊንዖይዳኬ። ሃይሣሶ ዒ ሙካዖ፥ “ዔቁዋቴ! ታና ዓኣሢ ዒንጋሢ ሃይሾ ሙኬኔ” ጌዔኔ።

![](https://cdn.door43.org/obs/jpg/360px/obs-en-38-14.jpg?direct&)

ዓይሁዶ ሱኡጋ ዖልዚ ዓሲንታ ሚርጌ ዴሬናኣ ዎላ ሙኬኔ፤ ዬይ ዓሳ ኩጮይዳ ጬንቻ ዓራፖንታ ኮኦሎንታ ዔኪ ዓኣኔ። ዬካፓ ዪሁዳ ዬሱሴ ባንሢ ዶጫዖ፥ “ዔርዛሢዮ፤ ኮሹሞ ኔኤም ማዖንጎ” ጌዒ ሄርቄኔ። ዓይሁዶ ሱኡጎም ዒ ቤርታዺ ዬይ ኬኤዜ ማላቶኬ፤ ዬሱሴያ፥ “ዪሁዳ፡ ኔ ታና ሄርቂ ዓኣሢ ዒንጋንዳ!” ጌዔኔ።

![](https://cdn.door43.org/obs/jpg/360px/obs-en-38-15.jpg?direct&)

ዖሎ ዓሳ ዬሱሴ ዓዓርቃዛ ጴፂሮሴ ፔ ዓራፖ ቱጋዖ ቄኤሶ ዑፃሢም ማዻ ዓይሌስኬያኮ ዋዮ ቆፂ ቲቄኔ። ዬሱሴ፥ “ዓራፖ ኔኤኮ ጎንጎና ማሂ ዳኬ! ታና ዓውሳኒ ዖሎም ሚርጌ ኪኢታንቾ ዳካንዳጉዲ ታ ዓዶ ታ ዖኦጫንዳያታዖኬ” ጌዔኔ። ዬካፓ ዬሱሴ ዬያ ዓሢኮ ዋዮ ጊንሣ ዓይሢ ፓፂሴኔ። ዬያይዲ ዬሱሴ ዓዺንቴስካፓ ዒዛኮ ጊንፆ ሃንታዞንሢ ጳሽኪ ፑኔኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 26፡14-56፤ ማርቆሴ 14፡10-50፤ ሉቃሴ 22፡1-53፤ ዮሃኒሴ 12፡6፤ 18፡1-11።*

## 39. ዬሱሴ ዎጎ ዎጋ ዓሶ ቤርቶ ሺኢኬሢ

https://openbiblestories.org/l/mdy/story-39/

![](https://cdn.door43.org/obs/jpg/360px/obs-en-39-01.jpg?direct&)

ዬማና ሳዓ ጊዲሚሺ ማዔኔ። ዒዛኮ ዻቢንቶ ዖኦጫንዳጉዲ ዬሱሴ ዓርቄ ዓሳ ቄኤሶኮ ቢያ ሱኡጋሢ ማኣሪ ዔኪ ዴንዴኔ። ጴፂሮሴ ዒማና ሃኬና ጊንፆ ጊንፆ ሙካኔ፤ ዬሱሴ ዓሳ ዔኪ ዲሮ ጋሮ ጌልዛዛ ዬሱሴ ዙሎይዳ ታሚ ካሽታ ዓሲና ዎላ ታሞ ካሽቴኔ።

![](https://cdn.door43.org/obs/jpg/360px/obs-en-39-02.jpg?direct&)

ዬያ ቄኤሳሢ ኬኤፆይዳ ዓይሁዶ ሱኡጋ ዬሱሴ ዑፃ ዎጊሳኒ ዎጎ ዎጎ ቤዞ ሺኢሼኔ። ዒዛይዳ ዒማና ሉኡዙሞና ማርካዻንዳ ዓሲ ሚርጌ ዔያታ ዔኪ ዬዔኔ። ያዺ ማዔቴያ ሃይሳ ዔያቶኮ ዎሊ ዔኪባኣሴ፤ ዬያሮ ዓይሁዶ ሱኡጋ ዓይጎ ጎይሢናኣ ማዖም ዬሱሴ ዻቢንቴያ ማሃኒ ዳንዳዒባኣሴ።

![](https://cdn.door43.org/obs/jpg/360px/obs-en-39-03.jpg?direct&)

ጋፒንፆይዳ ቄኤሶ ቢያኮ ዑፃሢ ጊዥ ጌይ ዬሱሴ ዛጋዖ፥ “ሂንዳ ኑም ኬኤዜ፤ ኔኤኒ ካኣቱሞም ዶኦሞናሢ (ሜሲሄ)፥ ናንጊና ናንጋ ፆኦዛሢ ናኣዚዳ?” ጌዔኔ።

![](https://cdn.door43.org/obs/jpg/360px/obs-en-39-04.jpg?direct&)

ዬሱሴያ፥ “ሂዮ ታናኬ፤ ዬያ ሌሊቱዋንቴ ታኣኒ ጫሪንጮይዳ ፆኦሲና ዎላ ዴዒ፥ ዬካፓኣ ታ ሙካንቴ ኔ ዛጋንዳኔ” ጌዔኔ። ዬያሮ ቄኤሶኮ ዑፃሢ ማኣዓሢ ፔኤኮ ዻጋዺ ዳርዛዖ ሃንጎ ዓይሁዶ ካኣዦ ሱኡጎ ባንሢ ዛጊ ዛጊ፥ “ሜሌ ማርካ ማይ ኮይሱዋሴ! ‘ታኣኒ ፆኦሲ ናይኬ’ ጌዔሢ ዒንሢ ዋይዚባይ! ዒንሢ ዎማይዲ ዎጋኒ ጋዓይ?” ጌይ ዒላቴኔ።

![](https://cdn.door43.org/obs/jpg/360px/obs-en-39-05.jpg?direct&)

ዓይሁዶ ሱኡጋ ቢያ፥ “ሃይቢ ዒዛም ኮይሳኔ!” ጌዒ ቄኤሶ ዑፃሢም ኬኤዜኔ። ዬካፓ ዬሱሴኮ ዓኣፖ ዔያታ ዓፒላና ቱኬኔ፤ ጩቺያ ጩቲ፥ ጳዺያ ጳርቂ፥ ሚኢጪ ሚኢጪ ዓማሌኔ።

![](https://cdn.door43.org/obs/jpg/360px/obs-en-39-06.jpg?direct&)

ጴፂሮሴ ዒማና ዲሮ ዙላ ካፒፆይዳ ዓኣንቴ ዓሲም ማዾ ማዻ ፔቴ ዉዱሮ ናይስኬና ዒዛ ዴንቃዖ፥ “ኔኤኒያ ዬሱሴና ዎላ ዓኣያኬ!” ጌዔኔ። ጴፂሮሴ ጋዓንቴ “ኔ ጋዓ ዓሢ ታ ዔሩዋሴ” ጌዔኔ። ዬካፓ ሃሣ ሜሌ ማዾ ማዻስኬና ጴፂሮሴ ኮራ ዒማዺ ጌዔኔ፤ ጋዓንቴ ዒ “ታ ዒዛ ዔሩዋሴ ጎዖዛ ዋይዙዋይ!” ጌዔኔ። ጋፒንፆይዳ ዒኢካ ዔቂ ታሞ ካሽታ ዓሳ፥ “ዒንሢ ቢያ ጌሊላፓ ሙኬ ዓሲታሢሮ ዬሱሴና ዎላ ዓኣያታሢ ኑ ዔራኔ” ጌዔኔ።

![](https://cdn.door43.org/obs/jpg/360px/obs-en-39-07.jpg?direct&)

ዬካፓ ጴፂሮሴ፥ “ሃያ ዓሢ ጎኔ ታ ዔራ ዓሲታዖ ጋዓቴ ‘ፆኦሲ ታና ባይዞም!’ ” ጌይ ጫኣቂሢ ዓርቄኔ። ዒማና ኔጉዋዖ ኮይዳ ቂኢቄኔ፤ ዬሱሴያ ሺሪ ጴፂሮሴ ዛጌኔ።

![](https://cdn.door43.org/obs/jpg/360px/obs-en-39-08.jpg?direct&)

ዬያሮ ጴፂሮሴ ዓሶፓ ዱማዺ ኬስካዖ ዒኔ ሜቂ ዬኤኬኔ። ዬሱሴ ዓኣሢ ዒንጌ፥ ዪሁዳኣ ዓሳ ዬሱሴ ሃይቃንዳጉዲ ጌስቲ ኩንሤሢ ዴንቃዖ ሚርጌና ዖዪ ዴንዲ ፔና ሱፂ ዎዼኔ።

![](https://cdn.door43.org/obs/jpg/360px/obs-en-39-09.jpg?direct&)

ዓይሁዶ ሱኡጋ ዚሮ ጉቴሎ ሚኢሪ ዔቂ ዬሱሴ ዔካዖ ሮሜ ዓጮ ዎይሣ ጲላፆሴ ቤርቶ ሺኢሼኔ። ዔያታ ዒማና ጲላፆሴ ዒዛይዳ ዻቢንቲ ዴንቂ ‘ሃይቆም’ ዎጋንዳኔ ጌይ ጉሙርቄኔ። ጲላፆሴያ ዬሱሴ ኮራ፥ “ኔኤኒ ዓይሁዶ ካኣቲዳ?” ጌዒ ዖኦጬኔ።

![](https://cdn.door43.org/obs/jpg/360px/obs-en-39-10.jpg?direct&)

ዬሱሴ ማሃዖ፥ “ኔ ጌዔሢጉዴያኬ፤ ጋዓንቴ ታኣኮ ካኣቱማ ሃያ ሳዖይዳ ዓኣ ካኣቱሞጉዲቱዋሴ። ያዺ ዎንዴ ማዔያታቴ ታኣኮ ዖሎ ዓሳ ሙኪ ዖልቴያ ናንዳንቴኬ። ታኣኒ ፆኦሲ ዛሎ ጎኑሞ ማርካዻኒ ሃያ ሳዖ ሙኬኔ። ጎኑሞ ናሽካሢ ቢያ ታ ጋዓሢ ዋይዛንዳኔ” ጌዔኔ። ጲላፆሴያ፥ “ጎኑሞ ጌይፃ ዎዚ ጌይሢዳይ?” ጌዔኔ።

![](https://cdn.door43.org/obs/jpg/360px/obs-en-39-11.jpg?direct&)

ጲላፆሴ ዬሱሴና ዎላ ጌስቴስካፓ ዴሮ ባንሢ ኬስካዖ፥ “ሃያ ዓሢዳ ፔቴታዖ ዻቢንቲ ታ ዴንቂባኣሴ” ጌዔኔ። ዓይሁዶ ሱኡጎንታ ዴሮንታ ጋዓንቴ፥ “ሱፄ! ዒዛ ሱሱፄ!” ጌይ ዒላቴኔ። ጲላፆሴያ “ዻቢንቴ ባኣዚ ባኣንቴሞ!” ጌዔኔ። ዔያታ ጋዓንቴ ዒላቶ ዺቢሼኔ፤ ጲላፆሴ ሃይሣሲ፥ “ዒ ዻቤ ባኣዚ ባኣሴ!” ጌዔኔ።

![](https://cdn.door43.org/obs/jpg/360px/obs-en-39-12.jpg?direct&)

ጲላፆሴ ዒማና ዴራ ዣሊ ፑርታ ማዾይዳ ጌላንዳኔ ጌይ ዒጊጬኔ፤ ዬያሮ ዖሎ ዓሳ ዔኪ ዓኣዺ ዬሱሴ ሱፃንዳጉዲ ዓይሤኔ። ሮሜ ዓጮ ዖሎ ዓሳኣ ዬሱሴ ጳርቃዖ ዲንኪ ዞቄ ማኣዖ ማይሴኔ፤ ዬያጉዲ ዓንጊሢያ ካኣቶ ቶኦካ ዓጎ ቦንቾ ባኮ ማሊሲ ማሪ ዒዛኮ ቶኦካ ዓጌኔ። ዬካፓ፥ “ሃይሾ ዓይሁዶ ካኣታሢ!” ጌይ ጌይ ሚኢጪ ዓማሌኔ።

*ጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 26፡57-27፡26፤ ማርቆሴ 14፡53-15፡15፤ ሉቃሴ 22፡54-23፡25፤ ዮሃኒሴ 18፡12-19፡16።*

## 40. ዬሱሴኮ ሱፂንቶ

https://openbiblestories.org/l/mdy/story-40/

![](https://cdn.door43.org/obs/jpg/360px/obs-en-40-01.jpg?direct&)

ሮሜ ዖሎ ዓሳ ዬሱሴ ያዺዲ ቦሂ ዓማሌስካፓ ሱፃኒ ዔኪ ዴንዴኔ። ዒዛ ሱፆንዶ ሚፆዋ (ማስቃሎ) ዬሱሴ ኬዲሴኔ።

![](https://cdn.door43.org/obs/jpg/360px/obs-en-40-02.jpg?direct&)

ዖሎ ዓሳ ዬሱሴ ዔኪ፥ “ቶኦኪ ሜጌሢ” ጌይንታ ቤሲ ሄሊሳዖ ኩጮንታ ቶኮንታ ማስቃሎይዳ ዼኤፒ ሚስማሬና ዓይሢ ጳርቄኔ። ዬሱሴ ጋዓንቴ ዒማና፥ “ታ ዓዴ፤ ዔያታ ማዻ ባኮ ዔሩዋኣሢሮ ዓቶም ጌዔ” ጌኤኔ። ጲላፆሴያ ማላታ ማዓንዳጉዲ “ዓይሁዴ ካኣቲ” ጋዓያ ፃኣፒሲ ዬሱሴ ሱፂንቴ ሚፆኮ ቶኦካ ጌሢሴኔ።

![](https://cdn.door43.org/obs/jpg/360px/obs-en-40-03.jpg?direct&)

ዬካፓ ዖሎ ዓሳ ዬሱሴኮ ዓፒሎ ዔካንዳሢ ዱማሲሢሮ ዎሊም ዒፃ ዓጌኔ። ዬያ ዔያታ ማዼሢ፥ “ታኣኮ ማኣዓሢ ዔያታ ጊሽቴኔ፤ ማኣዓሢ ዔኮሮ ዒፃ ዓጌኔ” ጌይንቲ ኬኤዚንቴሢኮ ኩሚፆ ማዔኔ።

![](https://cdn.door43.org/obs/jpg/360px/obs-en-40-04.jpg?direct&)

ዬሱሴ ዬካፓ ላምዖ ሱላኮ ባኣካ ዎላ ሱፂንቴኔ። ፔቴሢ ዬሱሴ ቦሂ ጌስታዛ፥ ባጋሢ ጋዓንቴ፥ “ኔኤኒ ፆኦሲ ዒጊጩዋዓዳ? ኑ ኑ ዻቢንቲናኬ፤ ሃይ ዓሢ ጋዓንቴ ዻቤ ባኣዚ ባኣዖኬ” ጋዓዖ ዬሱሴ ኮራ፥ “ሃዳራ ኔ ካኣቱሞይዳ ታኣም ማሌ” ጌዔኔ። ዬሱሴያ “ሃኖ ኮዦ ቤዞ ጌኔቴይዳ ኔ ታኣና ዎላኬ” ጌዔኔ።

![](https://cdn.door43.org/obs/jpg/360px/obs-en-40-05.jpg?direct&)

ዓይሁዶ ዓሶ ሱኡጎንታ ዴሮ ባኣኮይዳ ዓኣ ዓሳኣ ዬሱሴ ቦሂ፥ “ሂንዳ ኔ ጎኔ ፆኦሲ ናይታቴ ማስቃላፓ ኬዲ ኔና ዓውሴ! ኔና ኑ ጉሙርቆም” ጌይ ጌይ ሚኢጬኔ።

![](https://cdn.door43.org/obs/jpg/360px/obs-en-40-06.jpg?direct&)

ዒማና ዓባ ሳዛ ማዒ ዓኣዖ ዴንዲ ማሢ ዶምቦልሳ ዎዴ ሄላንዳኣና ሳዓ ዹሜኔ።

![](https://cdn.door43.org/obs/jpg/360px/obs-en-40-07.jpg?direct&)

ዬካፓ ዬሱሴ፥ “ኩሜኔ! ጎዳሢዮ፤ ታ ሼምፓሢ ታ ኔ ኩጫ ዓኣሢ ዒንጋኔ” ጌይ ዒላቴኔ። ያዺዴስካፓ ፔ ቶኦኮ ሊካ ሱሊሲ ሃይቄኔ። ዒማና ሳዓ ዓጊፄሢሮ ጌኤዦ ማኣሮይዳ ፆኦሲ ዴዓ ቤዞ ጌይንታ ቤዞ ዴሮፓ ዱማሳ፥ ዼኤፖ ጎኦቦ ዓፒላ ሎፓ ሉ ሄላንዳኣና ሄኮ ዳርዔኔ።

![](https://cdn.door43.org/obs/jpg/360px/obs-en-40-08.jpg?direct&)

ዬሱሴ ዬያይዲ ፔኤኮ ሃይቦና ዓሲ ፆኦሲ ባንሢ ሙካንዳጉዲ ጎይሢ ቡሌኔ። ዒኢካ ዔቂ ዬሱሴ ካፓ ፔቴ ዖልዚ ዓሲስኬይ ዬያ ማዺንቴ ባኮ ዛጋዖ፥ “ሃያ ዓሢኮ ጎኔ ጎሜ ባኣያ ፆኦሲ ናይኬ” ጌዔኔ።

![](https://cdn.door43.org/obs/jpg/360px/obs-en-40-09.jpg?direct&)

ዬሱሴ ካኣቱሞም ዶኦሚንቴያ (ሜሲሄ) ማዔሢ ጎናሲ ጉሙርቂ ዔኬ፥ ላምዖ ዓይሁዴ ሱኡጌ፥ ዮሴፔና ኒቆዲሞሴ ጎዖስኬንሢ ዬሱሴኮ ሌዞ ዔያቶም ዒንጋንዳጉዲ ጲላፆሴ ኮይላ ሺኢቄኔ። ጲላፆሴያ ዔካንዳጉዲ ዓይሣዛ ሌዞ ዔያታ ማስቃላፓ ኬይሲ ሱኡዳዖ ላሌ ቆኦቂ ቦኦኮና ዔቴይዳ ዱኡኬኔ። ዬካፓ ዱኡፖ ካሮ ዼኤፒ ሹቺ ኮላሲ ዎዼኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 27፡27-61፤ ማርቆሴ 15፡16-47፤ ሉቃሴ 23፡26-56፤ ዮሃኒሴ 19፡17-42።*

## 41. ፆኦሲ ዬሱሴ ሃይባፓ ዔቂሴሢ

https://openbiblestories.org/l/mdy/story-41/

![](https://cdn.door43.org/obs/jpg/360px/obs-en-41-01.jpg?direct&)

ዬሱሴ ያዺዲ ሃይቂ ዱኡቴስካፓ ዬሱሴ ጉሙቂባኣ ዓይሁዶ ሱኡጋ ጲላፆሴ ኮራ፥ “ዬይ ሉኡዙሞ ዓዴ፥ ዬሱሴ፡ ‘ሃይሦ ኬሊኮ ጊንፃፓ ታኣኒ ሃይባፓ ዔቃንዳኔ’ ጌዔኔ። ዓካሪ ሃሢ ዒዛኮ ጊንፆ ሃንታዞንሢ ሌዞ ዒዛኮ ዉኡቂ ዔካዖ ‘ዒ ሃይቢ ባሺ ዔቄኔ’ ጌይ ጌሹዋጉዲ ዖልዚ ዓሲ ዱኡፖ ካፓንዳያ ኮይሳኔ” ጌዔኔ።

![](https://cdn.door43.org/obs/jpg/360px/obs-en-41-02.jpg?direct&)

ጲላፆሴ ዒማና፥ “ዻካ ዛላ ዖልዚ ዓሲ ዔኪጋፓ ዱኡፖ ካፒሱዋቴራ” ጌዔኔ። ዬያሮ ዔያታ ዱኡፖ ካሮ ዎዾና ሹጮይዳ ‘ቡሉንቶፓ’ ጋዓ ማላታ ዓይሢ፥ ዖኦኒያ ሌዞ ዉኡቁዋጉዲ ዖልዚ ዓሲና ካፒሴኔ።

![](https://cdn.door43.org/obs/jpg/360px/obs-en-41-03.jpg?direct&)

ዬሱሴ ሱፂንቴ ኬሎ ሄሊ ዓኣ ኬላ ዓይሁዶኮ ሃውሾ ኬሎታሢሮ ዓይሁዳ ዬኖ ኬሎ ዱኡፒ ቤሲ ዴንዳንዳጉዲ ዓይሢንቴያቱዋሴ። ዬያሮ ሃውሾ ኬላ ጋጋፓዛ ጉቴ ዹቡርታ ላኣሊስኬንሢ ሳውቃ ቲሺ ሌዞይዳ ፑኡካኒ ዬሱሴኮ ዱኡፖ ቤዞ ዴንዴኔ።

![](https://cdn.door43.org/obs/jpg/360px/obs-en-41-04.jpg?direct&)

ዒማና ዔርቲባኣንቴ ዶዲ ሳዓ ዓጊፂሢ ሙኪ ሳዖ ዓጊሤኔ። ዜኤሊንሢጉዲ ፖፖዓ ኪኢታንቾዋ ጫሪንጫፓ ኬዲ ጴዻዖ ዱኡፖ ካሮ ዎዾና ዼኤፖ ሹጮ ኮላሲ ዑፃ ኬስኪ ዴዔኔ። ዬያ ዱኡፖ ካፓ ዖሎ ዓሳኣ ሚርጌና ዲቃታዖ ሃይቄ ዓሲጉዲ ሳዓ ሎኦሜኔ።

![](https://cdn.door43.org/obs/jpg/360px/obs-en-41-05.jpg?direct&)

ላኣሎንሢ ዱኡፖ ቤዞ ሄላዛ ኪኢታንቻሢ፥ “ዲቃቲፖቴ! ዬሱሴ ሃይካ ባኣሴ፤ ቤርታ ዒ ጌዔ ጎይፆማ ሃይፓባ ዔቄኔ! ዱኡፖ ሃኣዛጉዋቴ!” ጌዔኔ። ላኣሎንሢያ ዱኡፖ ዔቶ ሂርኪ ጌይ ዛጋንቴ ዬሱሴኮ ሌዛ ዓሳ ላይሤ ቤዛ ባኣሴ።

![](https://cdn.door43.org/obs/jpg/360px/obs-en-41-06.jpg?direct&)

ዬካፓ ሃሣ ኪኢታንቻሢ ላኣሎንሢም፥ “ሃሢ ዴንዲጋፓ ‘ዬሱሴ ሃይቦ ባሺ ዔቄኔ፥ ዒዚ ዒንሢ ቢሪ ጌሊላ ዴንዳንዳኔ’ ጌይ ዒዛኮ ጊንፆ ሃንታዞንሢም ኬኤዙዋቴ” ጌዔኔ።

![](https://cdn.door43.org/obs/jpg/360px/obs-en-41-07.jpg?direct&)

ላኣሎንሢ ሚርጌ ዒጊቹሞይዳ ጌሌኔ፤ ጊንሣ ዎዛዺያ ዎዛዼኔ። ዬያሮ ዬያ ኮዦ ሃይሶ ኬኤዛኒ ዬሱሴኮ ጊንፆ ሃንታዞንሢ ኮራ ጳሽኬኔ።

![](https://cdn.door43.org/obs/jpg/360px/obs-en-41-08.jpg?direct&)

ዬንሢ ላኣሎንሢ ዬያ ኮዦ ሃይሶ ኬኤዚፆሮ ዴንዲፆይዳ ዓኣንቴ ዬሱሴ ፔኤሮ ዔያቶም ፔጋዺ ጴዻዛ ዔያታ ዒዛም ዚጌኔ። ዬሱሴያ ዔያቶም፥ “ዲቃቲፖቴ፤ ጌሊላ ዴንዳንዳጉዲ ታ ጊንፆ ሃንታዞንሢም ኬኤዙዋቴ፤ ዒኢካ ዔያታ ታና ዴንቃንዳኔ” ጌዔኔ።

*ጌኤዦ ማፃኣፖይዳ ኬኤዚንቴ ሃይሴ፡- ማቲዎሴ 27፡62-28፡15፤ ማርቆሴ 16፡1-11፤ ሉቃሴ 24፡1-12፤ ዮሃኒሴ 20፡1-18።*

## 42. ዬሱሴ ጫሪንጮ ማዒ ዴንዴሢ

https://openbiblestories.org/l/mdy/story-42/

![](https://cdn.door43.org/obs/jpg/360px/obs-en-42-01.jpg?direct&)

ዬሱሴ ሃይቦ ባሺ ዔቄ ኬሎና ዬሱሴኮ ጊንፆ ሃንታ ላምዖስኬንሢ ዬሩሳላሜኮ ዑኬ ዓኣ ዔማዎሴ ጌይንታ ካታማስኬኖ ዴንዴኔ። ዔያታ ጎይፆ ዴንዲፆይዳ ዓኣዖ ዬሱሴይዳ ማዺንቴ ባኮ ዛሎ ጌስቲ ጌስቲ ዓኣዼኔ። ዔያታ ጌስታ ባካ፥ “ዬሱሴ (ሜሲሄ) ዒስራዔኤሌ ዓውሳኒ ሙኬ ካኣቲኬ ጌይ ኑ ጉሙቂናኣኮኬ፤ ጋዓንቴ ሱፂ ዒዛ ዎዾናኔ። ጊንሣ ሃሣ ላኣሎንሢ ዻቂ ሼምፔና ዓኣያ ማዔሢ ኬኤዜኔ” ጋዓያኬ። ጋዓንቴ ዬንሢ ዬሱሴ ጊንፆ ሃንታ ላምዖንሢ ዔያታ ጉሙርቃ ባኮ ዛሎ ኮሺ ዔሪባኣያኬ።

![](https://cdn.door43.org/obs/jpg/360px/obs-en-42-02.jpg?direct&)

ዬሱሴ ዒማና ዔያቶና ዎላ ማዒ ጎይፆ ዴንዴኔ፤ ዔያታ ጋዓንቴ ዒዛ ማዒፆ ዔሪባኣሴ። ዬሱሴ ዔያታ ዓይጎ ዛላ ጌስታቴያ ዔያቶ ዖኦጫዛ ዻካ ኬሊኮ ቤርታ ዬሱሴይዳ ማዺንቴ ባኮ ዛሎንታ ዲቃሢ ሄርሺሳያ ማዔ ባኮ ዛሎ ዔያታ ኬኤዜኔ። ዔያታ ዒማና “ሃይ ዓሢ ማዺንቴ ባኮ ዋይዚባኣ ሾኦቺ ዓሲ ዻባዓ” ጌይ ማሌኔ።

![](https://cdn.door43.org/obs/jpg/360px/obs-en-42-03.jpg?direct&)

ዬካፓ ዬሱሴ ካኣቱሞም ዶኦሞናሢ ዛሎ ጌኤዦ ማፃኣፖይዳ ቤርታዺ ኬኤዚንቴ ባኮ ፓይዲ ፓይዲ ኬኤዜኔ። ዬይ ካኣቱሞም ዶኦሞናሢ ሜቶ ዔካንዳሢንታ ዎዺንታንዳሢ፥ ጋዓንቴ ሃይሣሳ ኬሎና ሃይባፓ ዔቃንዳሢ ዛሎ ፆኦሲ ማሊፆ ኬኤዛ ዓሳ ጌዔ ባኮ ጶቂሢ ዔያቶም ኬኤዜኔ። ዬንሢ ዬሱሴ ጊንፆ ሃንታ ላምዖንሢ ሳዓ ሃባርቲ ባይቃንቴ ዔያታ ዴንዳ ካታሜሎ ሄላዖ ዎርቃኒ ፔቴ ኬኤሢ ጌሌኔ።

![](https://cdn.door43.org/obs/jpg/360px/obs-en-42-04.jpg?direct&)

ዬንሢ ላምዖንሢ ዬሱሴ ዔያቶና ዎላ ዎርቃንዳጉዲ ዖኦጬም ዒዚያ ዔኤዔኔ። ዬካፓ ዔያታ ካዎ ሙዓኒ ጊኢጊንቲ ዓኣንቴ ዬሱሴ ካሦ ዔካዖ ፆኦሲ ጋላቲ ቡንፄኔ። ዔያታ ቤዞማና ዬይ ዬሱሴ ማዔሢ ዔሬኔ። ጋዓንቴ ዒዚ ዔያቶኮ ዓኣፓፓ ዓኣሺንቴኔ።

![](https://cdn.door43.org/obs/jpg/360px/obs-en-42-05.jpg?direct&)

ዬንሢ ላምዖንሢ፥ “ዔዛይ ሃይ ዬሱሴኬ! ዎንዴ ዒ ፆኦሲ ቃኣሎ ኑም ፔጋሲ ኬኤዛኣና ዒና ኑኡኮ ታሚጉዲ ዔኤቴሢ ዬያሮኬ ጌይሢኬ!” ጌዔኔ። ዬካፓ ዔያታ ኔጉዋዖ ዬሩሳላሜ ካታሞ ማዒ ዴንዴኔ። ዒኢካ ዔያታ ሄላዖ ዔያቶኮ ላጎንሢም፥ “ዬሱሴ ዻቂ ሼምፔና ዓኣንቴ ኑ ዴንቄኔ!” ጌዒ ኬኤዜኔ።

![](https://cdn.door43.org/obs/jpg/360px/obs-en-42-06.jpg?direct&)

ዬያ ዛሎ ዬሱሴኮ ጊንፆ ሃንታዞንሢ ጌስቲፆይዳ ዓኣንቴ ዬሱሴ ዔያታ ዓኣ ኬኤፆ ጌሊ ባኣካ ዔቂ ጴዻዖ፥ “ኮሺ ዒንሢም ማጎንጎ!” ጌዔኔ። ዬሱሴኮ ጊንፆ ሃንታዞንሢም ጋዓንቴ ዬይ ዔኤዤ ማሌኔ። ዬሱሴ ጋዓንቴ “ዓይጋ ዒንሢ ዒጊጪ ዓልታይ? ቶኮንታ ኩጮንታ ታኣኮ ዛጉዋቴ! ዔኤዤኮ ታጉዲ ጴዺ ዓርቂንታ ዑሢ ባኣሴ” ጌዔኔ። ዬካፓ ዔኤዤ ማዒባኣያ ማዒፆ ዔርዛኒ ካሣ ዒንጋንዳጉዲ ዔያቶ ዖኦጬም ሞሎ ሚቺሢ ዔያታ ዒዛም ዒንጋዛ ሙዔኔ።

![](https://cdn.door43.org/obs/jpg/360px/obs-en-42-07.jpg?direct&)

ዬሱሴ ዒማና፥ “ጌኤዦ ማፃኣፖይዳ ታ ዛሎ ኬኤዚንቴ ባካ ቢያ ማዺንቲ ኩማኒ ኮይሳሢ ታ ዒንሢም ቤርታዺ ኬኤዚናኣኮኬ” ጌዔኔ። ዬያሮ ዔያታ ፆኦሲ ቃኣሎ ማሊ ጶቂሢ ዔራንዳጉዲ ዒኖ ዔያቶኮ ዒ ቡሌኔ። ሃሢ ዒዚ “ካኣቱሞም ዶኦሞናሢ ሜቶ ዔካንዳያ ማዒፆ፥ ሃይቃንዳሢ፥ ሃይሣሳ ኬሎና ሃይቦ ባሺ ዔቃንዳሢ ሚርጌ ሌዔኮ ቤርታ ፃኣፒንቴኔ” ጌዔኔ።

![](https://cdn.door43.org/obs/jpg/360px/obs-en-42-08.jpg?direct&)

“ጊንሣ ሃሣ ዓሲ ቢያ ጎሜፓ ጌኤሽካኒ ጎሞ ፔኤኮ ቡኡፃንዳያ ኮይሳያ ማዒፆ ዛሎ ታ ጊንፆ ሃንታዞንሢ ኬኤዛንዳጉዲ ጌኤዦ ማፃኣፖይዳ ዓይሢንቴኔ። ዔያታ ዬሩሳላሜፓ ዓርቃዖ ዴንዲ ዓጪ ዴሬም ቢያ ዬያ ሃይሶ ኬኤዛንዳኔ፤ ዒንሢያ ታኣኮ ማርኮኬ።”

![](https://cdn.door43.org/obs/jpg/360px/obs-en-42-09.jpg?direct&)

ዬካፓ ዴንዲ ዖይዲታሚ ኬሊ ሄላንዳኣና ዬሱሴ ሚርጌ ማይንቲ ዒዛኮ ጊንፆ ሃንታዞንሢም ፔጋዺ ጴዼኔ። ፔቴና ዶንጎ ፄኤታፓ ዑሣ ማዓ ዓሲም ፔቴና ጴዼኔ፤ ዒዚ ሃይባፓ ዔቂ ሼምፔና ዓኣያ ማዒፆ ሚርጌ ጎይሢና ጎናሴኔ፤ ፆኦሲ ካኣቱሞ ዛሎዋ ሚርጌ ባኣዚ ኬኤዚ ዔርዜኔ።

![](https://cdn.door43.org/obs/jpg/360px/obs-en-42-10.jpg?direct&)

ዬሱሴ ዒዛኮ ጊንፆ ሃንታዞንሢም፥ “ቢታንቶ ቢያ ጫሪንጮና ሳዖናይዳ ታኣም ዒንጊንቴኔ፤ ዬያሮ ዴንዲጋፓ ዓጪ ዴሬ ቢያ ዓዶ፥ ናዖ፥ ዓያኖ ጌኤዦ ሱንፆና ዋኣሣ ማስኪ ማስኪ፤ ታ ዒንሢ ዓይሤ ባኮዋ ቢያ ኬኤዚ ዔርዚ ዔርዚ ማዺያ ዔያታ ኩንሣንዳንጉዲ ዓይሢ ታ ዓሲ ማሁዋቴ። ታኣኒ ዴንዲ ዓጮኮ ጋፖ ሄላንዳኣና ዒንሢና ዎላ ማዓንዳሢ ማሊ ጶቂሡዋቴ” ጌዔኔ።

![](https://cdn.door43.org/obs/jpg/360px/obs-en-42-11.jpg?direct&)

ዬሱሴ ሃይባፓ ዔቄሢኮ ዖይዲታሚ ኬሊኮ ጊንፃ ዒዛኮ ጊንፆ ሃንታዞንሢም፥ “ዓያና ጌኤሺ ዒንሢዳ ዬዔም ታ ዓዴ ዎልቄ ዒንሢም ዒንጋንዳያ ሄላንዳኣና ዬሩሳላሜይዳ ዴዑዋቴ” ጌዔኔ። ዬካፓ ዬሱሴ ሌካ ጫሪንጮ ዓኣዼኔ፤ ሻኣሬያ ዔያቶኮ ዓኣፓፓ ዒዛ ዓኣቼኔ። ዬያይዲ ዬሱሴ ማዢንቲ ቢያ ፔ ቢታንቶና ዎይሣኒ ፔ ዓዶኮ ሚዛቆ ዛላ ዴዔኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 28፡16-20፤ ማርቆሴ 16፡12-20፤ ሉቃሴ 24፡13-53፤ ዮሃኒሴ 20፡19-23፤ ዳኪንቴዞንሢ ማዾ 1፡1-11።*

## 43. ሺኢጲፆ ማኣሮ ዓሶኮ ቡኪንታ ዓርቄ ጎይፆ

https://openbiblestories.org/l/mdy/story-43/

![](https://cdn.door43.org/obs/jpg/360px/obs-en-43-01.jpg?direct&)

ዬሱሴ ሌካ ጫሪንጮ ዔውቴስካፓ ዒዛኮ ጊንፆ ሃንታዞንሢ ዒ ዔያቶ ዓይሤ ጎይፆ ዬሩሳላሜይዳ ዴዔኔ። ዒኢካ ዬሱሴ ጉሙርቃ ዓሳ (ዓማና) ቢያ ኬሊ ሺኢጲሢሮ ቡካኔ።

![](https://cdn.door43.org/obs/jpg/360px/obs-en-43-02.jpg?direct&)

ዓይሁዳ ሌዓ ሌዓ ዑሣ ዓኣዺፆ ቦንቻ ቦንቻ ቦንቺንቲ ጋፔስካፓ ዶንጊታሚ ኬሊ ዴዒ ቦንቾ ጴንፄቆስፄ ጌይንታ ቦንቾ ዓኣኔ። ዬኖ ቦንቾ ዓይሁዶ ዓሳ ማኣሊ ቡራዖ ቦንቻያኬ፤ ዬያሮ ቢያ ዓጪዳፓ ዓይሁዴ ማዔ ዓሲ ዬያ ቦንቾ ኬሎ ቦንቻኒ ዬሩሳላሜ ሙካኔ። ዬሱሴ ሌካ ጫሪንጮ ዔውቴንቴ ፔቴ ቃልሾ ኬሊኮ ጊንፃ ዬና ጴንፄቆስፄ ቦንቾ ኬላ ሄሌኔ።

![](https://cdn.door43.org/obs/jpg/360px/obs-en-43-03.jpg?direct&)

ዬያሮ ሺኢጲፆ ማኣሮ ዓሳ (ዓማና) ፔቴይዳ ቡኪ ዓኣንቴ ዔርቲባኣ ጎይሢና ዼኤፒ ዑኡሲ ዋይዚሳ ዢባሬ ጋሮ ኩሜኔ። ዬካፓ ፔቴ ፔቴ ዓማኖ ዑፆይዳ ታሚ ሎስቶ ማላ ባኣዚ ኬዲ ዴዔኔ፤ ያዺ ማዔሢሮ ቢያሢ ዓያና ጌኤሺ ቢታንቶ ዴሞ ጌሊ (ዓያና ጌኤሺ ኩሚ) ዱማ ዱማ ዻንጋ ጌስቲሢ ዓርቄኔ።

![](https://cdn.door43.org/obs/jpg/360px/obs-en-43-04.jpg?direct&)

ዬሩሳሌሜይዳ ናንጋ ዓሳ ዬያ ዑኡዞ ዋይዛዖ ዒኢካ ማዺንታ ባኮ ዛጋኒ ዲርጊ ሙኬኔ። ዬሱሴ ጉሙርቂ ዔኬ ዓማኖ ዓሳ ፆኦሲኮ ዲቃሢ ሄርሺሳ ማዾ ዼጊዲ ኬኤዛሢ ዬይ ዓሳ ዋይዛዖ ፔ ዻንጎና ዻንጎና ዔያታ ዋዛያ ማዔሢሮ ዲቃቲ ሄርሼኔ።

![](https://cdn.door43.org/obs/jpg/360px/obs-en-43-05.jpg?direct&)

ፔቴ ፔቴ ዓሳ ጋዓንቴ “ሃይ ዬሱሴ ጊንፆ ሃንታ ዓሳ ዣኣሽኬኔ” ጌይ ዾንኮ ዓርቄኔ። ጴፂሮሴያ ዔቂ ዬያ ዓሶም ማሃዖ፥ “ዔዛታ ዋይዙዋቴ! ሃይ ዓሳ ዣዣሽኪባኣሴ! ፆኦሲ ፔ ማሊፆ ኬኤዛ ዒዩዔኤሌ ዛሎና ‘ጋፒንፆ ዎዶይዳ ታ ዓያኖ ዓሶ ዑፃ ታኣኒ ላኣላንዳኔ!’ ጌዔሢ ኩሞ ኩማኔ” ጌዔኔ።

![](https://cdn.door43.org/obs/jpg/360px/obs-en-43-06.jpg?direct&)

“ዒንሢ ዔስራዔኤሌ ዓሲዮቴ! ዒንሢ ሃሢ ዛጌ ጎይፆ ጉዴያ፥ ጊንሣ ሃሣ ዔራ ጎይፆ ዬሱሴ ፆኦሲ ዎልቄና ዼቢ ዲቃሢ ሄርሺሳ ባኣዚንታ ማላታኣ ማዺ ዻዌ ዓሲኬ። ዒንሢ ጋዓንቴ ዒዛ ሱፂ ዎዼኔ!”

![](https://cdn.door43.org/obs/jpg/360px/obs-en-43-07.jpg?direct&)

“ዬሱሴ ሃይቄቴያ ፆኦሲ ዒዛ ሃይባፓ ዔቂሴኔ። ዬይያ፦ ጌኤዦ ማፃኣፖይዳ “ኔኤኮ ጌኤዣሢ ኔኤኒ ዱኡፖይዳ ዎዒሲንዱዋሴ’ ጌይንቴሢኮ ኩሚፆኬ። ፆኦሲ ዬሱስ ኪሪስቶሴ ሼምፔና ዻቂ ዔቃንዳጉዲ ማሄሢኮ ኑ ማርካኬ።”

![](https://cdn.door43.org/obs/jpg/360px/obs-en-43-08.jpg?direct&)

“ዬሱሴ ሃሢ ፆኦሲኮ ሚዛቆ ዛላ ቦንቺንቲ ዴዔኔ፤ ጊንሣ ሃሣ ዒዚ ሃጊ ማዓ ዎዛ ዒንጌ ጎይፆና ዓያኖ ጌኤዦ ዳኬኔ። ሃሢ ሃይ ዒንሢ ዛጋ ባኮንታ ዋይዛ ባኮንታ ዬይ ዓያኖ ጌኤዣ ማዻያኬ።

![](https://cdn.door43.org/obs/jpg/360px/obs-en-43-09.jpg?direct&)

“ዬያ ዬሱሴ ዒንሢ ሱፄኔ፤ ጋዓንቴ ፆኦሲ ዒዛ ጎዳቲ፥ ጊንሣ ሃሣ ካኣቱሞም ዶኦሚንቴያ (ሜሲሄ) ማሄሢ ዔሩዋቴ!”

![](https://cdn.door43.org/obs/jpg/360px/obs-en-43-10.jpg?direct&)

ጴፂሮሴ ዬያ ጋዓሢ ዋይዛ ዓሳ ቢያ ዒኔ ሜቃዖ ጴፂሮሴንታ ዒዛኮ ላጎንሢንታ ኮራ፥ “ዒሾንሢዮቴ፤ ኑ ሃሢ ዓካሪ ዎዎይቶንዶይ?” ጌይ ዖኦጬኔ።

![](https://cdn.door43.org/obs/jpg/360px/obs-en-43-11.jpg?direct&)

ዬያሮ ጴፂሮሴ ማሃዖ፥ “ፆኦሲ ዒንሢኮ ጎሞ ዓቶም ጋዓንዳጉዲ ፔቴ ፔቴሢ ጎሞ ዒንሢኮ ቡኡፂ ዋኣፆና ማስቱዋሴ፤ ዬካፓ ዒዚ ዓያኖ ጌኤዦ ዒንጊፆ ዒንሢም ዳካንዳኔ” ጌዔኔ።

![](https://cdn.door43.org/obs/jpg/360px/obs-en-43-12.jpg?direct&)

ጴፂሮሴ ዬያ ኬኤዜሢሮ ሃይሦ ሺያ ማዓ ዓሲ ጎኔኬ ጌይ ዬሱሴ ጉሙርቂ ዒዛ ጊንፆ ሃንታያ ማዔኔ፤ ዋኣፆናኣ ማስቲ ዬሩሳላሜይዳ ዓኣ ሺኢጲፆ ማኣሮ ዓሶ ባኣኮ ጌሌኔ።

![](https://cdn.door43.org/obs/jpg/360px/obs-en-43-13.jpg?direct&)

ዬሱሴ ጊንፆ ሃንታያ ማዔዞንሢያ ዒማና ቢያ ኬሊ ፆኦሲ ማዾም ዳኪንቴዞንሢ ኬኤዛ ባኮ ዋይዛኔ፤ ሚርጌ ዎዴያ ዎላ ዓኣሤኔ፥ ሙኡዚያ ዎላ ሙዔኔ፥ ፔቴይ ባጋሢም ሺኢቂ ሺኢቂ ዎሊ ዶዲሼኔ። ዎላ ማዒ ፆኦሲያ ጋላታኔ፥ ዓኣ ባኮዋ ቢያ ዎሊም ጊሽካኔ። ዬያሮ ዓሲ ቢያ ዔያቶም ኮሺ ማሊሢ ማላሢሮ ኬላ ኬላ ዺቢ ዓሲ ዬሱሴ ጉሙርቂ ዔኪ ዔያቶይዳ ቃሲንታኔ።

*ጌኤዦ ማፃኣፖይዳ ኬኤዚንቴ ሃይሴ፡- ዳኪንቴዞንሢ ማዾ 2።*

## 44. ጴፂሮሴና ዮሃኒሴና ፔቴ ዎቦ ዓሲ ፒሼሢ

https://openbiblestories.org/l/mdy/story-44/

![](https://cdn.door43.org/obs/jpg/360px/obs-en-44-01.jpg?direct&)

ፔቴ ኬሊ ጴፂሮሴና ዮሃኒሴና ጌኤዦ ማኣሪ ሺኢጲሢሮ ሙካዖ ጌኤዦ ማኣሮ ካራ ዴዒ ሚኢሼ ዒንጎም ሺኢቃ ዎቦ ዓሲስኬያ ዴንቄኔ።

![](https://cdn.door43.org/obs/jpg/360px/obs-en-44-02.jpg?direct&)

ጴፂሮሴ ዒማና ዬያ ዎቦ ዓሢ ዛጋዖ፥ “ታ ኔኤም ዒንጋዳ ሚኢሼ ፔቴታዎ ታ ኮራ ባኣሴ፤ ጋዓንቴ ታኣኮ ዓኣ ባኮማ ታ ዒንጋንዳኔ፤ ዬሱስ ኪሪስቶሴ ሱንፆና ዔቂ ሃንቴ!” ጌዔኔ።

![](https://cdn.door43.org/obs/jpg/360px/obs-en-44-03.jpg?direct&)

ዬያሮ ቤዞና ፆኦሲ ዬያ ዎቦ ዓሢ ዻቂሼኔ፤ ዒዚያ ፒኪ ዔቂ ሴካ ሃንጋ ሃንቲ ኮኦሚያ ኮኦሚ ፆኦሲ ጋላቲሢ ዓርቄኔ። ጌኤዦ ማኣሮኮ ዲሮ ጋራ ዓኣ ዓሳ ዬያ ዛጋዖ ሚርጌና ዲቃቲ ሄርሼኔ።

![](https://cdn.door43.org/obs/jpg/360px/obs-en-44-04.jpg?direct&)

ዬያ ዻቄ ዓሢ ዛጋኒ ሚርጌ ዴሬ ዲርጊ ሙኬኔ። ጴፂሮሴ ዒማና ዬያ ዓሶም፥ “ሃይ ዎቦ ዓሢ ዻቂ ዔቄሢኮ ዓይጎሮ ዒንሢ ኑ ማዼጉዲ ዲቃቲ ሄርሻይ? ኑኡኒ ኑ ዎልቄና፥ ጊንሣ ሃሣ ኑ ማዻ ኮሺ ማዾ ዛላና ዒ ዻቄያቱዋሴ። ሃያ ዓሢ ፒሺ ዻቂሴሢ ዬሱስ ኪሪስቶሴኮ ዎልቆና ዒዚ ዒንጋ ጉሙርቂሢኬ” ጌዔኔ።

![](https://cdn.door43.org/obs/jpg/360px/obs-en-44-05.jpg?direct&)

“ዬሱሴ ዒ ዎዻንዳጉዲ ሮሜ ዓጮ ዎይሣሢም ፑሽኬሢ ዒንሢኬ። ናንጊኮ ዓይሢ ማዔሢ ዒንሢ ዎዼኔ፤ ፆኦሲ ጋዓንቴ ዒዛ ሃይባፓ ዔቂሴኔ። ዒንሢ ዓይጎ ማዻቴያ ዔሪባኣያታንቴ ካኣቱሞም ዶኦሞናሢ ሜቶ ዔካንዳጉዲና ሃይቃንዳጉዲ ኬኤዚንቴ ዒዛ ማሊፆ ኩንሣኒ ፆኦሲ ዒንሢ ማዾ ሶኦሬኔ። ዬያሮ ሃሢ ጎማ ዒንሢኮ ማስቲ ጌኤሽካንዳጉዲ ጎሞ ቡኡፂ ፆኦሲ ባንሢ ማዑዋቴ” ጌዔኔ።

![](https://cdn.door43.org/obs/jpg/360px/obs-en-44-06.jpg?direct&)

ጌኤዦ ማኣሮ ዎይሣ ሱኡጋ ጴፂሮሴንታ ዮሃኒሴንታ ጋዓ ባኮ ዛሎና ሚርጌና ዻጋዼኔ። ዬያሮ ዔያቶ ዓርቂ ዔኪ ቱኡሲ ማኣሪ ጌልዜኔ። ጋዓንቴ ሚርጌ ዓሲ ጲፂሮሴ ጋዓ ባኮ ጎናሲ ዔኪ ዬሱሴ ጉሙርቄኔ፤ ዬያሮ ዬሱሴ ጉሙርቂ ዔኬ ዓማኖኮ ፓይዳ ሴካ ዶንጎ ሺያ ባንሢ ማዔኔ።

![](https://cdn.door43.org/obs/jpg/360px/obs-en-44-07.jpg?direct&)

ዚሮ ጉቴሎ ዓይሁዶ ሱኡጋ ጴፂሮሴንታ ዮሃኒሴንታ ቄኤሶኮ ሱኡጋሢና ሃንጎ ዓይሁዶ ዓሶኮ ካኣዦ ሱኡጋ ዓኣ ቤዞ ዔኪ ዬዔኔ። ዬካፓ ጴፂሮሴንሢ ኮራ፥ “ሃያ ዎቦ ዓሢ ዓይጎ ዎልቄና ዒንሢ ፒሺ ዻቂሼይ?” ጌይ ዖኦጬኔ።

![](https://cdn.door43.org/obs/jpg/360px/obs-en-44-08.jpg?direct&)

ጴፂሮሴያ ማሃዖ፥ “ሃይ ዓሢ ካኣቱሞም ዶኦሚንቴ፥ ዬሱሴ ዎልቄና ዻቂ ሃይሾ ዒንሢ ቤርታ ዔቄኔ።ዒንሢ ዬሱሴ ሱፂ ዎዼኔ፤ ፆኦሲ ጋዓንቴ ዒዛ ሃይባፓ ዔቂሴኔ! ዒንሢ ዒዛ ጎኔኬ ጌይ ዔኪባኣሴ፤ ጋዓንቴ ዬሱሴ ዎልቄና ማዒባኣንቴ ሜሌ ዻቂንታኮ ካራ ባኣሴ!” ጌዔኔ።

![](https://cdn.door43.org/obs/jpg/360px/obs-en-44-09.jpg?direct&)

ጴፂሮሴና ዮሃኒሴና ዻንጋ ጩቺባኣያ ጌስታሢሮ ዓይሁዶ ሱኡጋ ዲቃቴኔ፤ ዎይቲ ጌዔቴ ጴፂሮሴንሢ ቲሚርቴ ታማሪባኣያታሢ ዔያታ ዔራሢሮኬ። ያዺ ማዔቴያ ዔያታ ዬሱሴና ዎላ ዓኣያታሢ ጶቂሣዖ ዲቃሢ ዒጊቻንዳ ሃይሴ ኬኤዛዖ ቡሊ ዔያቶ ዳኬኔ።

*ጌኤዦ ማፃኣፖይዳ ኬኤዚንቴ ሃይሴ፡- ዳኪንቴዞንሢ ማዾ 3፡1-4፡22።*

## 45. ፒልጶሴና ዒቶጲያ ዓጮኮ ቢታንቶ ዓኣ ዓሲስኬያና ሃይሴ

https://openbiblestories.org/l/mdy/story-45/

![](https://cdn.door43.org/obs/jpg/360px/obs-en-45-01.jpg?direct&)

ሚና ሃጊ ዓይፆይዳ ዓኣ ሺኢጲፆ ማኣሮ ሱኡጎፓ ፔቴሢ ዒስፂፓኖሴ ጌይንታያኬ። ዒዚ ኮሺ ዓሲ፥ ዓያና ጌኤሺያ ኩሙሢ ዎልቄና ዒዛይዳ ማዻያ፥ ዔራ ዓሲኬ። ዬይ ዒስፂፓኖሴ ፆኦሲ ዎልቄና ማዺንታ ሚርጌ ዓኪ ባኣዚ ማዼያ፥ ዓሳኣ ዬሱሴ ጉሙርቃንዳጉዲ ጎኑሞ ፔጋሲ ዔሪ ኬኤዜ ዓሲኬ።

![](https://cdn.door43.org/obs/jpg/360px/obs-en-45-02.jpg?direct&)

1. ፔቴ ኬሊ ዒስፂፓኖሴ ዬሱሴ ዛሎ ኬኤዛንቴ ዬሱሴ ጉሙርቁዋ ዓይሁዴ ዓሲ ዒዛና ሞኦቶ ዓርቄኔ፤ ዒማና ዔያታ ሚርጌ ዻጋዻዖ ሉኡዙሞ ባኣዚና ዴንዲ ዔያቶኮ ሱኡጎም ዒስፂፓኖሴ ፑሽኬኔ። ዔያታ፥ “ሙሴንታ ፆኦሲንታይዳ ዒስፂፓኖሴ ፑርታ ጌኤሲ ጌስታንቴ ኑ ዋይዜኔ!” ጌዔኔ። ዬያሮ ዓይሁዶ ሱኡጋ ዒስፂፓኖሴ ዓርቂ ሜሌ ዓሲያ ዒዛም ሉኡቂ ፑሽኬ፥ ቄኤሶኮ ሱኡጋሢንታ ሃንጎ ሱኡጎ ኮራ ዔኪ ዴንዴኔ።

![](https://cdn.door43.org/obs/jpg/360px/obs-en-45-03.jpg?direct&)

ዒማና ቄኤሶኮ ሱኡጋሢ ዒስፂፓኖሴ ኮራ፥ “ዬይ ባካ ጎኔ ባኣዚዳ?” ጌዒ ዖኦጬኔ። ዒስፂፓኖሴ ዓብራሃሜ ዎዳፓ ዓርቃዖ ዴንዲ ዬሱሴ ማዼ ዎዶ ሄላንዳኣና ፆኦሲ ማዼ ዲቃሢ ሄርሺሳ ባኮ ዛሎ፤ ዬያጉዲ ሃሣ ዴራኣ ፆኦሲም ዋይዞ ዒፂ ጌኤታዼሢ ዛሎ ጶቂሢ ኬኤዜኔ። ዬካፓ ዒ፥ “ዒንሢ ባቃኖ ዴይሤ ዓሳ! ቤርታ ዒንሢኮ ዓዶንሢ ፆኦሲንታ ዒዛ ማሊፆ ኬኤዛ ዓሶ ዎዼ ጎይፆማ ዒንሢያ ዓያኖ ጌኤዦ ሃሢ ማካኔ፤ ያዺ ማዒፆና ዒንሢኮ ዓዶንሢፓ ባሼ ፑርታ ባኣዚ ዒንሢ ማዻኔ፥ ካኣቱሞም ዶኦሞናሢያ ዒንሢ ዎዼኔ!” ጌዔኔ።

![](https://cdn.door43.org/obs/jpg/360px/obs-en-45-04.jpg?direct&)

ዓይሁዶ ካኣዦ ሱኡጋ ዬያ ዋይዛዖ ዋዮ ፔኤኮ ዓርቂ ዒላታንዳያ ሄላንዳኣና ዻጋዼኔ። ዒስፂፓኖሴያ ዔያታ ጎቺ ዔኪ ካታሞ ዙሎ ኬሲ ሹቻ ዹይ ዓጌኔ።

![](https://cdn.door43.org/obs/jpg/360px/obs-en-45-05.jpg?direct&)

ዒስፂፓኖሴ ሃይቢሮ ሳዛ ጋሽኪቤቃ፥ “ዬሱሴ! ታ ሼምፖ ዔኬ” ጌይ ዒላቴኔ። ዬካፓ ሃሣ ሳዓ ጉምዓቲ፥ “ጎዳሢዮ! ሃያ ዻቢንቶ ዔያቶኮ ዓርቂፖ” ጌዒ ላሚ ዒላታዖ ሃይቄኔ።

![](https://cdn.door43.org/obs/jpg/360px/obs-en-45-06.jpg?direct&)

ሳውሌ ጌይንታ ፔቴ ዼጌስኬይ ዒስፂፓኖሴ ዎዼ ዓሶኮ ማዾ “ቃራኬ” ጌዒ ሶኦሪ ሹጮና ዒዛ ዹዓ ዓሶኮ ዓፒሎ ካፔኔ። ዒማ ኬሎ ዬሩሳላሜይዳ ናንጋ ዓሳ ዬሱሴ ጊንፆ ሃንታ ዓሶ ዳውሲሢ ዓርቄኔ፤ ዬያሮ ዓማኖ ዓሳ ሜሌ ቤሲ ቤቲ ዴንዴኔ። ያዺ ዔያታ ዳውሲንታቴያ ዴንዴ ቤዞይዳ ቢያ ዬሱሴ ዛሎ ማርካዻኔ።

![](https://cdn.door43.org/obs/jpg/360px/obs-en-45-07.jpg?direct&)

ዬሱሴ ጊንፆ ሃንታ ፒልጶሴ ጌይንታስኬይ ዬሩሳላሜፓ ዳውሲንቲ ዴንዴ ዓሶፓ ፔቴሢኬ። ዬይ ሳማሪያ ካታሞ ዴንዳዖ ዬሱሴ ዛሎ ኮዦ ሃይሶ ኬኤዛዛ ሚርጌ ዓሲ ጉሙርቂ ዻቄኔ። ዬካፓ ፔቴ ኬሊ ፆኦሲፓ ዳኪንቴ ኪኢታንቾስኬይ ዓሲ ናንጉዋ ዳውሎይዴና ዴንዳ ጎይፆ ዓኣዻንዳጉዲ ፒልጶሴም ኬኤዜኔ። ዬያሮ ዒ ዓኣዺፆይዳ ዓኣንቴ ፔቴ ዔርቴ ቢታንቶ ዓኣ ዒቶጲያ ዓሲስኬያ ሳርጌላና ዴንዳንቴ ዴንቃዛ ዬያ ዓሢ ባንሢ ዴንዲ ጌስታንዳጉዲ ዓያና ጌኤሺ ዒዛ ዓይሤኔ።

![](https://cdn.door43.org/obs/jpg/360px/obs-en-45-08.jpg?direct&)

ፒልጶሴ ዬያ ሳርጌሎ ባንሢ ሙካዖ ዬይ ዒቶጲዮ ዓሢ ፆኦሲ ማሊፆ ኬኤዛ፥ ዒሲያሴ ማፃኣፖፓ ፔቴ ቤሲ ናባባንቴ ዋይዜኔ። ዓሢ ናባባሢ፥ “ሹኪንታ ማራይጉዲ ዒሺንቴኔ፥ ማራይ ዚቲ ጋዓሢጉዲ ዒ ፔቴታዖ ዔኤቢ ጌይባኣሴ፤ ዒዛይዳ ዎጋኒ ዔኪ ዴንዶናኔ፥ ዒዛ ቦንቺያ ቦንቺቦኦሴ፤ ሼምፖና ዓኣ ዓሳ ናንጋ ሳዓፓ ዒዛ ባይዞናኔ” ጋዓያኬ።

![](https://cdn.door43.org/obs/jpg/360px/obs-en-45-09.jpg?direct&)

ዬያሮ ፒልጶሴ ዒቶጲዮ ዓሢ ኮይላ፥ “ኔ ናባባ ባካ ኔኤም ጌላ?” ጌዒ ዖኦጬኔ። ዒቶጲዮ ዓሢያ፥ “ዔርታ ባኣዚ ባኣሴ፤ ታኣም ፔጋሲ ኬኤዛ ዓሲ ባኣንቴ ዎይቲ ታ ሃያ ዔራንዳይ? ሂንዳ ሃኒ ሃይካ ዬዒ ዴዒ ታኣም ኬኤዜቴራ። ፆኦሲ ማሊፆ ኬኤዛ ዒሲያሴ ሃያ ጋዓሢ ፔ ዛላሞ ዓሲ ዛላዳይ?” ጌዔኔ።

![](https://cdn.door43.org/obs/jpg/360px/obs-en-45-10.jpg?direct&)

ዒሲያሴ ዬያ ጌይ ፃኣፔሢ ዬሱሴ ዛሎ ማዔሢ ፒልጶሴ ዒቶጲዮ ዓሢም ፔጋሲ ኬኤዜኔ። ፒልጶሴ ዬሱሴ ዛሎ ኬኤዛ ኮዦ ሃይሶ ጌኤዦ ማፃኣፖይዳፓ ዔኪ ዔኪ ቃሲ ኬኤዜኔ።

![](https://cdn.door43.org/obs/jpg/360px/obs-en-45-11.jpg?direct&)

ፒልጶሴና ዒቶጲዮ ዓሢና ጎይፆ ዓኣዺፆይዳ ዓኣዖ ዋኣሢ ዎርዚ ሄሌኔ። ዬያሮ ዒቶጲዮ ዓሢ፥ “ሃይሾ ሃይካ ዋኣሢ ዓኣኔ! ዳምቦ ጎይፆና ታ ማስታኒ ላኣጋ ባኣዚ ዓኣ?” ጌይ ዖኦጬስካፓ ሳርጌሌሎ ዒሻ ዓሣሢም ኬኤዚ ዔቂሲሴኔ።

![](https://cdn.door43.org/obs/jpg/360px/obs-en-45-12.jpg?direct&)

ዬያሮ ዔያታ ዎሮ ኬዴም ፒልጶሴ ዒዛ ዬሱሴ ጉሙርቄ ዓሳ ማዻ ዳምቦ ጎይፆ ዋኣፆና ማስኬኔ። ዋኣፃፓ ዔያታ ኬኬስካኣና ዔርቲባኣ ጎይሢና ዓያና ጌኤሺ ፒልጶሴ ዔኪ ዴንዲ ሜሌ ቤስካ ጌሤም ዬሱሴ ዛሎ ዒኢካ ኬኤዚሢ ዓርቄኔ።

![](https://cdn.door43.org/obs/jpg/360px/obs-en-45-13.jpg?direct&)

ዬይ ዒቶጲዮ ዓሢ ዬሱሴ ዔሪ ጉሙርቄሢሮ ዎዛዺ ዎዛዺ ፔ ዓጮ ዴንዴኔ።

*ጌኤዦ ማኣፃፖይዳ ኬኤዚንቴ ሃይሴ፡- ዳኪንቴዞንሢ ማዾ 6፡8-8፡5፤ 8፡26-40።*

## 46. ጳውሎሴ ኪሪስቶሴ ጉሙርቂ ዒዛ ዓሲ ማዔሢ

https://openbiblestories.org/l/mdy/story-46/

![](https://cdn.door43.org/obs/jpg/360px/obs-en-46-01.jpg?direct&)

ሳውሎ ጌይንታሢ ዓሳ ዒስፂፓኖሴ ሹጮና ዹይ ዎዻኣና ዎላ ሶኦሪ ዓፒሎ ዔያቶኮ ካፔ ዼጌሢኬ። ዬሱሴ ጉሙርቂ ዒዚ ዔኪባኣሴ፤ ዬያሮ ዓማኖ ዓሶ ዳውሳ ዓሲ ማዔኔ። ዬሩሳላሜይዳ ኪሪስቶሴ ጉሙርቃ ዓቲንቆንታ ላኣሎንታ ኬኤፃፓ ዓርቂ ዓርቂ ዔኪ ቱኡሲ ማኣሪ ዒ ጌልዛኔ፤ ዴማስቆ ካታሞይዳ ዓኣ ዓማኖዋ ዔኪ ሙኪ ዬሩሳላሜይዳ ቱካኒ ቄኤሶ ቢያኮ ሱኡጋሢፓ ቢታንቶ ዋርቃታኣ ዔኬኔ።

![](https://cdn.door43.org/obs/jpg/360px/obs-en-46-02.jpg?direct&)

ዬያሮ ሳውሌ ዴማስቆ ዴንዲፆይዳ ዓኣንቴ ጫሪንካፓ ዔርቲባኣ ፖዒ ዒዛ ኮይላ ፖዔኔ፤ ዬያሮ ዒዚ ኬዲ ሳዓ ሎኦሜኔ። ፔቴ ዓሲ ዒማና፥ “ሳውሌ! ሳውሌ! ኔ ታና ዓይጋ ዳውሳይ?” ጋዓያ ዒ ዋይዛዖ፥ “ጎዳሢዮ! ኔ ዖናዳይ?” ጌይ ዖኦጬኔ። ዬሱሴያ፥ “ኔ ታና ዳውሳ፥ ታኣኒ ዬሱሴኬ!” ጌዔኔ።

![](https://cdn.door43.org/obs/jpg/360px/obs-en-46-03.jpg?direct&)

ሳውሌ ሳዓፓ ዔቃንቴ ዓኣፓ ዒዛኮ ሳዖ ዴንቁዋያ ማዔኔ፤ ዬያሮ ዒዛና ዎላ ዓኣ ላጋ ዒዛ ጎቺ ዔኪ ዴማስቆ ካታሞ ጌልዜኔ። ዒኢካ ሳውሌ ሙኡዚያ ሙዒ፥ ዑሽኮ ባኣዚያ ዑሽኩዋዖ ሃይሦ ኬሊ ዴዔኔ።

![](https://cdn.door43.org/obs/jpg/360px/obs-en-46-04.jpg?direct&)

ዴማስቆይዳ ሃናኒያ ጌይንታ ዬሱሴ ጊንፆ ሃንታያ ማዔስኬይ ዓኣኔ። ፆኦሲ ሃናኒያም፥ “ሳውሌ ዓኣ ማኣሪ ዴንዴ፤ ዒዛኮ ዓኣፓ ቡሊንታንዳጉዲ ዒዛ ዑፃ ኩጮ ጌሤ” ጌዔኔ። ሃናኒያ ጋዓንቴ “ጎዳሢዮ! ዬይ ዓሢ ዬሱሴ ጊንፆ ሃንታያ ማዔ ዓሶ (ዓማኖ) ዎማይዲ ዳውሲ ሺራቴያ ታ ዋይዜኔ” ጌዔኔ። ፆኦሲያ “ኔኤሮ ዴንዴ! ዒዚ ዓይሁዶንታ ሜሌ ዴሮንታም ቢያ ሱንፆ ታኣሲ ኬኤዛያ ማዓንዳጉዲ ታ ዒዛ ዶኦሬኔ፤ ዒዚ ታ ሱንፆ ጋይቴ ሚርጌ ሜቶ ዛጋንዳያኬ” ጌዔኔ።

![](https://cdn.door43.org/obs/jpg/360px/obs-en-46-05.jpg?direct&)

ዬያሮ ሃናኒያ ሳውሌ ኮራ ዴንዳዖ ኩጮ ዒዛ ዑፃ ጌሤኔ፤ ዬካፓ ዒዛም፥ “ሃይካ ኔ ሙካኣና ጎይፆይዳ ኔኤም ፔጋዺ ጴዼ፥ ዬሱሴ ዓኣፓ ኔኤኮ ጊንሣ ዛጋንዳጉዲ፤ ዓያና ጌኤሺያ ኩሙሢ ዎልቄና ኔ ጊዳ ማዻንዳጉዲ ታና ዳኬኔ” ጌዔኔ። ዒማና ሳውሌ ኔጉዋዖ ዛጋኒ ዳንዳዔኔ፥ ሃናኒያ ዒዛ ዳምቦ ጎይፆ ዋኣፆና ማስኬኔ። ሳውሌያ ሙኡዚ ሙዒ፥ ዶዴኔ።

![](https://cdn.door43.org/obs/jpg/360px/obs-en-46-06.jpg?direct&)

ሳውሌ ቤዞማና፥ “ዬሱሴ ፆኦሲ ናይኬ!” ጌዒ ዴማስቆይዳ ዓኣ ዓይሁዶ ዓሶም ኬኤዚሢ ዓርቄኔ። ዬይ ቤርታ ዓማኖ ባይዛኒ ዳውሲ ሺራ ዓሢ ዬሱሴ ጉሙርቂ ዔኪ ዒዛ ዓሲ ማዒፆና ዓይሁዶ ዓሳ ዲቃቲ ሄርሼኔ። ሳውሌያ ዬሱሴ ካኣቱሞም ዶኦሞናያ (ሜሲሄ) ማዔሢ ጎናሲ ኬኤዚ ኬኤዚ ሚርጌ ዓይሁዴ ዓሲ ዬሱሴ ጊንፆ ሃንታያ ማሄኔ።

![](https://cdn.door43.org/obs/jpg/360px/obs-en-46-07.jpg?direct&)

ዎርቂ ፔኤቂቤቃ ዓይሁዶ ዓሳ ሳውሌ ዎዻኒ ኮዔኔ፤ ዬያሮ ካታሞ ጌሎ ካሮይዳ ካቲ ዴይ ዒዛ ዎዻንዳ ዓሲ ዶኦሪ ዳኬኔ። ጋዓንቴ ሳውሌ ዬያ ዓይሁዶኮ ማሊፆ ዋይዜሢሮ ዓማኖ ዓሳ ዒዛ ዹማ ካታሞኮ ኬኤሎ ዲፆ ዑሣ ኮታና ኬይሲ ዳኪ ቶሊሴኔ። ሳውሌ ዴማስቆይዳፓ ዬያይዲ ቶሌስካፓ ዬሱሴ ዛሎ ዓኣዼ ቤዛ ቢያ ኬኤዜኔ።

![](https://cdn.door43.org/obs/jpg/360px/obs-en-46-08.jpg?direct&)

ዬካፓ ሳውሌ ዬሱሴ ጊንፆ ሃንታዞንሢና ካኣማኒ ዬሩሳላሜ ዴንዴኔ፤ ዔያታ ጋዓንቴ ዒዛ ዒጊጬኔ። ዒማና ባርናባሴ ጌይንታ ዓማናስኬይ ሳውሌ ዔኪ ዬሱሴ ጊንፆ ሃንታዞንሢ ኮራ ዴንዳዖ ዒዚ ላኣሚንቴያ ማዒ ዴማስቆይዳ ዬሱሴ ዛሎ ኮዦ ሃይሶ ጫርቂ ኬኤዜ ጎይፆ ዔያቶም ማርካዼኔ። ዬያሮ ዬሱሴ ጊንፆ ሃንታዞንሢ ሳውሌ ጉሙርቂ ዔያቶና ዎላ ዒ ማዓንዳጉዲ ዔኤዔኔ።

![](https://cdn.door43.org/obs/jpg/360px/obs-en-46-09.jpg?direct&)

ዬኖ ዎዶና ሃሣ ዬሩሳላሜይዳ ዔቄ ዳውሲፆ ዛሎና ፑኒ ዓኣዼ ፔቴ ፔቴ ዓማና ዓሲ ዓንፆኪያ ዴንዲ ዬሱሴ ዛሎ ኮዦ ሃይሶ ኬኤዜኔ። ዓንፆኪያይዳ ዓኣ ዓሶኮ ባሼሢ ዓይሁዴ ዓሲቱዋሴ፤ ጋዓንቴ ዬኖ ቤዞይዳ ፔቴ ጌዒ ዓይሁዴቱዋ ሚርጌ ዴሬ ዬሱሴ ጉሙርቂ ዔኪ ዓማና ማዔኔ። ዬያሮ ባርናባሴና ሳውሌና ዒኢካ ዓኣ ዓኮ ዓማኖ ዬሱሴ ዛሎ ዔርዚ ዔርዚ ዶዲሻኒ፥ ሺኢጲሢ ማኣሪያ ዔቂሳኒ ዴንዴኔ። ዬሱሴ ጉሙርቂ ዔኪ ዻቄ ዓሳ ባራሪ ዬኖ ቤዛ “ዓማኖ” ጌይ ሱንሢ ጌቴኔ።

![](https://cdn.door43.org/obs/jpg/360px/obs-en-46-10.jpg?direct&)

ፔቴ ኬሊ ዓማኖ ዓሳ ዓንፆኪያይዳ ሙኡዚ ሃሺ፥ ፆኦሲያ ሺኢቃንቴ ዓያና ጌኤሺ “ታኣኒ ታ ማዾም ዔኤሌ፥ ባርናባሴና ሳውሌና ታኣም ዱማሱዋቴ” ጌዔኔ። ዬያሮ ዓንፆኪያይዳ ዓኣ ሺኢጲፆ ማኣሮ ዓሳ ባርናባሴና ሳውሌናም ሺኢቃዖ ኩጮ ዑፃ ጌሤኔ። ዬካፓ ዬሱሴ ዛሎ ኮዦ ሃይሶ ኬኤዛንዳጉዲ ሚርጌ ቤሲ ዳኬኔ። ዬያሮ ባርናባሴና ሳውሌና ሚርጌ ፃጲ ዴሬም ዬሱሴ ዛሎ ኬኤዜም ዺቢ ዓሲ ዬሱሴ ጉሙርቂ ዔኪ ዓማና ማዔኔ።

*ጌኤዦ ማፃኣፖይዳ ኬኤዚንቴ ሃይሴ፡- ዳኪንቴዞንሢ ማዾ 8፡3፤ 9፡1-31፤ 11፡19-26፤ 13፡1-3።*

## 47. ጳውሎሴና ሲላሴና ፒልጲሲዮሴ ካታሞይዳ

https://openbiblestories.org/l/mdy/story-47/

![](https://cdn.door43.org/obs/jpg/360px/obs-en-47-01.jpg?direct&)

ሳውሌ ሮሜ ካኣቶ ዓጮ ቢያ ሃንታ ዎዶና ሮሜ ዓሳ ዒዛኮ ሱንፆ “ጳውሎሴ” ጌይ ዔኤሊሢ ዓርቄኔ። ፔቴ ኬሊ ጳውሎሴና ዒዛኮ ላጋሢ ሲላሴና ዬሱሴ ዛሎ ኮዦ ሃይሶ ኬኤዛኒ ፒልጲሲዮሴ ካታሞ ዴንዴኔ። ዒማና ዔያታ ዓሳ ሺኢጲሢሮ ቡካ፥ ካታሞኮ ዙላ ዓኣ ዎርዚ ዓቺስኬኖ ሙካዖ ኮርሞ ኮርማያ ሊዲያ ጌይንታ ላኣሊስኬኖ ዴንቄኔ። ዒዛ ሚርጌና ፆኦሲ ናሽካያ ሃሣ ካኣሽካ ላኣሊኬ።

![](https://cdn.door43.org/obs/jpg/360px/obs-en-47-02.jpg?direct&)

ጳውሎሴንሢ ዬሱሴ ዛሎ ኬኤዛ ኪኢቶ ዒዛ ጉሙርቂ ዔካንዳጉዲ ፆኦሲ ዒዞኮ ዒኖ ቡሌኔ። ዬያሮ ዒዛ ዬሱሴ ጉሙርቂ ዔኪ ዒዞንታ ማኣሮ ዓሶንታ ዋኣፆና ማስቴኔ። ዬካፓ ዒዛ ጳውሎሴንታ ሲላሴንታ ዒዞ ማኣሪ ዬዓንዳጉዲ ዔኤላዛ ዔያታ ዒኢካ ዴንዲ ኮዦ ሃይሶ ማዾ ማዻኣና ዬኖ ማኣሮ ዓሶና ዎላ ዴዔኔ።

![](https://cdn.door43.org/obs/jpg/360px/obs-en-47-03.jpg?direct&)

ጳውሎሴና ሲላሴና ሚርጌ ኬሊ ሺኢጲፆ ቤዞይዳ ዓሶና ካኣማኔ። ፔቴ ኬሊ ጳውሎሴንሢ ሺኢጲፆ ቤዞ ዴንዳንቴ ዓሲም ማዾ ማዻ ዣኣዦ ዉዱሮ ናይስኬና ጊንፆ ዔያቶኮ ሙኪ ሙኪ ዔያቶ ዛሎ ኬኤዚሢ ዓርቄኔ። ዬና ዉዱሮ ናዔላ ዒዞይዳ ዓኣ ፃላሆ ዓያና ዒዞ ጌስቲሳሢሮ ዓሶም ዦኦቂ ዦኦቂ ዒዞ ማዺሻ ዓሶም ሚርጌ ሚኢሼ ዴንቂሳያኬ።

![](https://cdn.door43.org/obs/jpg/360px/obs-en-47-04.jpg?direct&)

ዬና ናዔላ ዔያቶ ጊንፆ ሃንታዖ፥ “ሃንሢ ዓሶንሢ ዼኤፖ ፆኦዛሢም ማዻያኬ፤ ዒንሢም ዔያታ ዻቂንታ ጎይሢ ኬኤዛንዳኔ!” ጌይ ዒላቲ ዓርቄኔ። ጳውሎሴ ዻጋዻንዳያ ሄላንዳኣና ዺቢ ማይንቲ ዒዛ ዬያ ማዼኔ።

![](https://cdn.door43.org/obs/jpg/360px/obs-en-47-05.jpg?direct&)

ጋፒንፆይዳ ፔቴ ኬሊ ናዔላ ዬኖ ባኮ ኬኤዚ ኬኤዚ ዒላቶ ዓርቃዛ ጳውሎሴ ዒዞ ባንሢ ሺራዖ፥ “ዬሱሴ ሱንፆና ሃኖ ናዔሎፓ ሃሺ ኬስኬ!” ጌዒ ሜዣሢ ጎራዛ ኔጉዋዖ ኬስኬም ዒዛ ዻቄኔ።

![](https://cdn.door43.org/obs/jpg/360px/obs-en-47-06.jpg?direct&)

ዬኖ ዓይሌ ማሂ ማዺሻ ዓሳ ናዔላ ዬይ ፑርቶ ዓያና ባኣንቴ ዦኦቃኒ ዳንዳዑዋኣሢንታ ሚኢሻኣ ዔያቶኮ ዓቴሢ ዔሪ ሚርጌና ዻጋዼኔ።

![](https://cdn.door43.org/obs/jpg/360px/obs-en-47-07.jpg?direct&)

ዬያሮ ናዔሎ ማዺሺ ናንጋ ዓሳ ጳውሎሴና ሲላሴና ዓርቂሲ ሮሜ ዓጮ ዎይሣ ዓሶ ቤርቶ ሺኢሼስካፓ ጳርቂሲ፥ ቱኡሲ ማኣሪያ ጌልዜኔ።

![](https://cdn.door43.org/obs/jpg/360px/obs-en-47-08.jpg?direct&)

ጳውሎንሢ ዒማና ቱኡዞ ማኣሮኮ ጋሮ ቆልዖይዳ ቶኮ ዱፄና ቱኡቲ ዴዔኔ። ጋዓንቴ ዬኖ ዋኣንቶ ሳዓ ጊዲሚሺ ማዓኣና ፆኦሲ ቦንቾም ማዓ ጋላታ ዓይኑሞ ዓይናዺሢ ዔያታ ዓርቄኔ።

![](https://cdn.door43.org/obs/jpg/360px/obs-en-47-09.jpg?direct&)

ዒማና ዔርቲባኣንቴ ሳዓ ዓጊፄኔ፤ ዬያሮ ቱኡዞ ማኣሮኮ ካራ ቢያ ጉሪ ቡሊንቴኔ። ቱኡዞ ዓሶ ቱኮና ካኖ ቢራታኣ ቶርሌ ዲኢኔኔ።

![](https://cdn.door43.org/obs/jpg/360px/obs-en-47-10.jpg?direct&)

ቱኡዞ ማኣሮ ካፓሢያ ጊንዓፓ ጴጫዖ ቱኡዞ ማኣሮኮ ካራ ቡሊንቴሢ ዴንቂ፥ ቱኡዞ ዓሳ ቢያ ቶሌኔ ጌይ ማሊ ዲቃቴኔ፤ ዬያሮ ፔና ዎዻኒ ማሌኔ። ዬያ ዒ ማዼሢ ቱኡዞ ዓሳ ጎኔ ቶሌያታቴ ሮሜ ዓጮ ዎይሣ ዓሳ ዒዛ ዎዻንዳሢሮኬ። ዬያ ዒ ማዻኒ ጋዓሢ ጳውሎሴ ዴንቃዖ፥ “ኔ ጊዳ ፔቴ ባኣዚታዖ ማዺፖ! ኑ ቢያሢ ዓኣኔ” ጌይ ዒላቲ ኬኤዜኔ።

![](https://cdn.door43.org/obs/jpg/360px/obs-en-47-11.jpg?direct&)

ቱኡዞ ማኣሮ ካፓሢ ጳውሎሴና ሲላሴና ባንሢ ጎጋይቂ ጎጋይቂ ሙካዖ፥ “ታ ዻቃኒ ዓይጎ ማዾንዶይ?” ጌይ ዖኦጬኔ። ጳውሎሴ ዒዛም፥ “ጎዳ ዬሱሴ ጉሙርቂ ዔኬ፤ ኔናንታ ኔ ማኣሮ ዓሶንታ ዻቃንዳኔ” ጌዔኔ።ዬካፓ ዬይ ቱኡዞ ማኣሮ ካፓሢ ጳውሎሴና ሲላሴና ፔ ማኣሪ ዔኪ ዴንዲ ኪፆ ዔያቶኮ ዋኣሢ ዖይዺሺ ማስኬኔ። ጳውሎሴያ ዬኖ ኬኤፆይዳ ዓኣ ዓሶም ዬሱሴ ዛሎ ኮዦ ሃይሶ ኬኤዜኔ።

![](https://cdn.door43.org/obs/jpg/360px/obs-en-47-12.jpg?direct&)

ዬያሮ ዬያ ዓሢንታ ማኣሮ ዓሶንታ ቢያ ዬሱሴ ጉሙርቂ ዔኪ ዋኣፆና ማስቴስካፓ ጳውሎሴና ሲላሴናም ሙኡዚ ሺኢሻዖ ፔቱሞና ዎላ ሙይ ዑሽኪ ዎዛዼኔ።

![](https://cdn.door43.org/obs/jpg/360px/obs-en-47-13.jpg?direct&)

ዚሮ ጉቴሎ ፒልጲሲዮሴ ካታሞ ዎይሣ ዓሳ ጳውሎሴና ሲላሴና ቱኡዛፓ ቡሊ ካታሞ ሃሺ ዓኣዻንዳጉዲ ዔያቶ ዖኦጬኔ። ዬያሮ ጳውሎሴና ሲላሴና ሊዲያንታ ሜሌ ዔያቶኮ ላጎዋ ሳራሤስካፓ ካታሞ ሃሺ ዴንዴኔ። ዬካፓ ዔያታ ዬሱሴ ዛሎ ኮዦ ሃይሶ ኬኤዚፆ ሃሺባኣሴ፤ ሺኢጲፆ ማኣሮ ዓሳኣ ዶዲ ዶዲ ዳልጊሢ ዓርቄኔ።

![](https://cdn.door43.org/obs/jpg/360px/obs-en-47-14.jpg?direct&)

ጳውሎሴንታ ሃንጎ ዓማኖ ዓሶ ሱኡጎንታ ዬሱሴ ዛሎ ኮዦ ሃይሶ ኬኤዚ ኬኤዚ ዺቢ ካታማ ሃንቴኔ። ዬያጉዲ ዱማ ዱማ ሺኢጲፆ ማኣሮ ዓሶ ዶዲሻኒና ፆኦሲ ዛሎዋ ዔራንዳጉዲ ዺቢ ኪኢታ ፃኣፔኔ። ዬያ ኪኢቶኮ ፔቴ ፔቴሢ ጌኤዦ ማፃኣፖይዳ ጌሌኔ።

*ጌኤዦ ማፃኣፖይዳ ኬኤዚንቴ ሃይሴ፡- ዳኪንቴዞንሢ ማዾ 16፡11-40።*

## 48. ዬሱሴ “ሙካንዳኔ” ጌይንቴ ሜሲሄ ማዒፆ

https://openbiblestories.org/l/mdy/story-48/

![](https://cdn.door43.org/obs/jpg/360px/obs-en-48-01.jpg?direct&)

ፆኦሲ ሳዖ ማዤያና ፔቴታዖ ዻቢንቴ ባኣዚ ባኣያ፥ ቢያ ባካ ፒዜ፤ ሃሣ ኩሙሢኬ፥ ጎሜያ ሳዖይዳ ባኣሴ። ዓዳኣሜንታ ሂዋኣኖንታ ዎሊ ናሽካኔ፤ ፆኦሲያ ዔያታ ናሽካኔ። ዒማና ዶርዖንታ ሃይቢያ ሳዖይዳ ባኣሴ። ሳዓ ማዓንዳጉዲ ፆኦሲ ኮዔሢ ያዺኬ።

![](https://cdn.door43.org/obs/jpg/360px/obs-en-48-02.jpg?direct&)

ጋዓንቴ ፃላሄ ጌኔቴይዳ ሂዋኣኖ ሾኦሺ ማዒ ሙኪ ጌሼኔ፤ ዬያሮ ዒዞንታ ዓኒ፥ ዓዳኣሜንታ ፆኦሲ ዖዪሳ ጎሜ ማዼኔ። ዬያ ጎማፓ ዔቄያና ሳዖይዳ ዓኣ ዓሲ ቢያ ሃርጊንታኔ፥ ሃይቃኔ።

![](https://cdn.door43.org/obs/jpg/360px/obs-en-48-03.jpg?direct&)

ዓዳኣሜንታ ሂዋኣኖንታ ማዼ ጎሞ ዛሎና ሃርጌንታ ሃይቢንታፓ ዑሣ ማዔ ፑርታ ባኣዚያ ማዺንቴኔ። ዬይያ፦ ዓሲ ፆኦሲና ዎላ ሞርኬ ማዔኔ፥ ዓሲ ጎሜና ዓኣያ ማዒያ ሾይንቲ ዓርቄኔ። ፆኦሲና ዓሲናኮ ካኣሚፆ ዬይ ጎማ ዱኡዜኔ። ጋዓንቴ ፆኦሲ ዬያ ዱጲፆ ካንሣኒ ካራ ኮዔኔ።

![](https://cdn.door43.org/obs/jpg/360px/obs-en-48-04.jpg?direct&)

ሂዋኣኖ ዜርፃፓ ፔቴይ ፃላሄኮ ቶኦኮ ዳኣፃንዳሢንታ ፃላሄያ ቶኮ ዓሲኮ ዻዓንዳሢ ዛሎ ሃጊ ማዓንዳ ዎዛ ዒንጌኔ። ዬይያ፦ ፃላሄ ካኣቱሞም ዶኦሞናሢ (ሜሲሄ) ዎዻንዳኔ፥ ፆኦሲያ ሃይባፓ ዒዛ ዔቂሳንዳኔ፤ያዺ ማዒፆና ዬይ ካኣቱሞም ዶኦሞናሢ ፃላሄኮ ቶኦኮ ሄርቂ ዳኣፂ፥ ናንጊና ካኣታዺ ናንጋንዳኔ ጌይሢኬ። ሚርጌ ሌዔኮዋ ጊንፃፓ ዬይ ካኣቱሞም ዶኦሞናሢ (ሜሲሄ) ዬሱሴ ማዔሢ ፔጋሴኔ።

![](https://cdn.door43.org/obs/jpg/360px/obs-en-48-05.jpg?direct&)

ፆኦሲ ሳዖ ቢያ ዋኣሣ ባይዜ ዎዶና ዒዛ ጉሙቄ ዓሶ ዻቂሻኒ ዋኣሢ ካኣሚሌ ጊኢጊሼኔ። ዬኖ ጎይፆ ዓሲ ቢያ ማዼ ጎሞሮ ሃይቂ ኩዳንዳያ ኮይሳንቴ ፆኦሲ ዒዛ ጉሙርቂ ዔኬ ዓሳ ቢያ ዻቃንዳጉዲ ዬሱሴ ጊኢጊሼኔ።

![](https://cdn.door43.org/obs/jpg/360px/obs-en-48-06.jpg?direct&)

ዓሲኮ ጎሜ ጌኤሻኒ ቄኤሳ ፆኦሲም ዒንጎ ባኣዚ ሺኢሺ ሺኢሺ ሚርጌ ሌዔ ናንጌኔ። ጋዓንቴ ዬይ ዔኪ ሙኪ ሹኮ ባኮንታ ሜሌ ዒንጎ ባካ ዓሲኮ ጎሜ ጋፒንሢ ጌኤሻኒ ዳንዳዒባኣሴ። ዬሱሴ ጋዓንቴ ቄኤሶኮ ቢያ ዑሢ ማዒ ሙኬኔ፤ ዬያ ሌሊቱዋንቴ ሃንጎ ቄኤሳ ማዻ ጎይፃፓ ዱማ ጎይሢ ዓሲኮ ጎሜ ቢያ ጌኤሻኒ ፔና ፆኦሲም ዒንጎ ባኣዚ ማሂ ዎዺ ሺኢሼሢሮ ቄኤሳፓ ቢያ ዑሢ ማዔኔ። ዓሲ ማዼ ጎሞሮ ዔካኒ ኮይሳ ሜቶ ዬሱሴ ፔኤሮ ዔኬሢሮ ፓጬ ባኣዚባኣ ኩሚሢ ቄኤሴ ማዔኔ።

![](https://cdn.door43.org/obs/jpg/360px/obs-en-48-07.jpg?direct&)

ፆኦሲ ዓብራሃሜም፥ “ዓጪ ዴሬ ቢያ ኔ ዛሎና ዓንጂንታንዳኔ” ጌዔኔ። ዬሱሴያ ዓብራሃሜ ፃጲ ማዔሢሮ ዒዛ ዛሎና ዓጪ ዴሬ ቢያ ዓንጂንቴኔ፤ ዎይቲ ጌዔቴ ዬሱሴ ጉሙርቂ ዔኬ ዓሲ ቢያ ፔ ጎማፓ ዻቃኔ፥ ዓብራሃሜኮዋ ዓያናና ሾዖና ናይ ማዓኔ።

![](https://cdn.door43.org/obs/jpg/360px/obs-en-48-08.jpg?direct&)

ዓብራሃሜ ዒዛኮ ናኣዚ፥ ዪሳኣቄ ሹኪ ፆኦሲም ሺኢሻንዳጉዲ ፆኦሲ ዒዛ ዓይሣዛ ዬያ ማዻኒ ዒ ማሌንቴ ፆኦሲ ላኣጊ ዬያ ናዓሢ ቤዛ ማራይ ጊኢጊሼሢሮ ዓብራሃሜ ሹኪ ሺኢሼኔ። ኑ ቢያሢ ማዼ ጎሞ ዛሎኮ ሃይቢ ኮይሳያኬ! ፆኦሲ ጋዓንቴ ኑ ቤዛ ሃይቃንዳጉዲ ማራይ ማዔ ዬሱሴ ዳኬኔ።

![](https://cdn.door43.org/obs/jpg/360px/obs-en-48-09.jpg?direct&)

ፆኦሲ ጊብፄ ዓሶይዳ ጋፒንሢ ማዔ ባይዛ ፑርቶ ባኮ ዳኬያና ፔቴታዖ ፓጬ ባኣዚባኣ ማራናይ ሹኪ ሱጉፆና ካሮ ቶኦኮንታ ሬኤኮዋ ፑጫንዳጉዲ ዒስራዔኤሌ ማኣሮም ኬኤዜኔ። ፆኦሲ ዬያ ሱጉፆ ዛጋዖ፥ ቶይዶ ናኣቶ ዎዺፆ ሃሺ ዖኦኪ ዴንዴኔ፤ ዬይያ ዒስራዔኤሌ ዳምቦና ዑሣ ዓኣዺሢ ቦንቾ ጌይንቴኔ።

![](https://cdn.door43.org/obs/jpg/360px/obs-en-48-10.jpg?direct&)

ዬሱሴ ኑኡኮ ዬያ ዑሣ ዓኣዺፆ ቦንቾሮ ሹኮ ማራዓሢ ማዔኔ። ዒዚ ኩሙሢ፥ ሃሣ ፔቴታዖ ጎሜ ባኣንቴ ዑሣ ዓኣዺፆ ቦንቾ ዎዶይዳ ሃይቄኔ። ዓይጎ ዓሲያ ዬሱሴ ጉሙርቂ ዔካ ዎዶና ዬሱሴኮ ሱጉፃ ዓሢኮ ጎሞ ዛሎ ጪጎ ጪጋ ማዓኔ፤ ፆኦሲያ ዬያ ዓሢዳ ዓጋኒ ማሌ ፑርቶ ባካ ዖኦካኔ።

![](https://cdn.door43.org/obs/jpg/360px/obs-en-48-11.jpg?direct&)

ሚርጌ ዎዴኮ ቤርታ ፆኦሲ ፔኤኮ ዶኦሪንቴ ዴሮ ማዔ፥ ዒስራዔኤሌ ዓሶና ዎላ ጫኣቁሞ ጫኣቄኔ። ሃሢ ጋዓንቴ ፆኦሲ ቢያ ዓሲም ማዓ ዓኪ ጫኣቁሞ ጫኣቄኔ። ዬያ ዓኮ ጫኣቁሞ ዛሎና ዓይጎ ዓሲ ፃጲፓኣ ማዖም ዬሱሴ ጉሙርቂ ዔኬቴ ፆኦሲ ዒጊኒ ማዓኒ ዳንዳዓኔ።

![](https://cdn.door43.org/obs/jpg/360px/obs-en-48-12.jpg?direct&)

ሙሴ ቃኣሎ ዼጊዲ ዴሮም ኬኤዜ ፆኦሲ ማሊሢ ኬኤዛያኬ። ዬሱሴ ጋዓንቴ ቢያፓ ባሼ ፆኦሲ ማሊሢ ኬኤዜያኬ። ዒዚ ፆኦሲ ማሊሢ ኬኤዜያ ሌሊቱዋንቴ ፔ ቶኦኪና ፆኦሲኬ፤ ዬያሮ ዒ ማዼ ባኮንታ ኬኤዜ ባካኣ ቢያ ፆኦሲ ማዾና ዒ ጌዔ ባኣዚናኬ። ዬሱሴ ሃሣ “ፆኦሲ ቃኣላ” ጌይንቲ ሱንሢ ጌቴያኬ።

![](https://cdn.door43.org/obs/jpg/360px/obs-en-48-13.jpg?direct&)

ካኣቲ ዳውቴ ዜርፆይዳፓ ፔቴይ ፆኦሲ ዴሮኮ ካኣቲ ማዒ ዎይሣንዳሢ ዳውቴም ፆኦሲ ጉሙርሲ ኬኤዚናኣኮኬ። ዬሱሴ ፆኦሲ ናይ፥ ሃሣ ካኣቱሞም ዶኦሞናያ ማዔሢሮ ናንጊና ካኣታዺ ዎይሣኒ ዳንዳዓሢ ዬያ ዳውቴ ፃጳሢ ሌሊኬ።

![](https://cdn.door43.org/obs/jpg/360px/obs-en-48-14.jpg?direct&)

ዳውቴ ዒስራዔኤሌ ዴሮኮ ካኣቲኬ፤ ዬሱሴ ጋዓንቴ ፆኦሲ ማዤ ዓጮይዳ ዓኣ ዓሶንታ ቢያ ባኮኮዋ ካኣቲኬ! ላሚ ዒ ሙካዖ ፔ ካኣቱሞ ፒዙሞና ኮሹሞና ዶዲሺ ናንጊና ዎይሣንዳኔ።

*ጌኤዦ ማፃኣፖይዳ ኬኤዚንቴ ሃይሴ፡- ማዢንቲ ማፃኣፔ 1-3፤ 6፤ 14፤ 22፤ ኬሲ ማፃኣፔ 12፣ 20፤ 2ሳሙዔኤሌ 7፤ ዔብሬ ዓሶ ማፃኣፖ 3፡1-6፤ 4፡14-5፡10፤ 7፡1-8፡13፤ 9፡11-10፡18፤ ዮሃኒሴም ፆኦሲ ፔጋሲ ዻዌ ባኮ 21።*

## 49. ፆኦሲኮ ዓኮ ጫኣቁሞ

https://openbiblestories.org/l/mdy/story-49/

![](https://cdn.door43.org/obs/jpg/360px/obs-en-49-01.jpg?direct&)

ፔቴ ፆኦሲ ኪኢታንቾስኬይ ማይራሞ ጌይንታ ፔቴ ኩሙሢ ዉዱሮ ናይስኬኖም ፆኦሲ ናይ ዒዛ ሾዓንዳሢ ኬኤዜኔ። ዬያሮ ዒዛ ኩሙሢ ዉዱሮ ናይ፥ ዓቲንቄናኣ ካኣሚባኣዖ ዓቲንቄ ናይ ሾዒ ሱንፆ “ዬሱሴ” ጌይ ጌሤኔ። ያዺ ማዒፆና ዬሱሴ ፆኦሲያ ፆኦሲ፥ ዓሲያ ዓሲ ማዔኔ።

![](https://cdn.door43.org/obs/jpg/360px/obs-en-49-02.jpg?direct&)

ዬሱሴያ ፆኦሲ ማዒፆ ዔርዛኒ ሚርጌ ዲቃሢ ሄርሺሳ ባኣዚ ማዼኔ። ዋኣሢዳ ዒ ሃንቴኔ፥ ባዞ ጉዳሢ ዚቲዴኔ፥ ሚርጌ ሃርጊንቴ ዓሲ ፖዒሴኔ፥ ሜዦዋ ሚርጌ ዣኣዦ ዓሲፓ ኬሴኔ፥ ሃይቄ ዓሲ ዻቂሼኔ፥ ዶንጎ ካሣና ላምዖ ሞሎስኬንሢና ዶንጎ ሺያፓ ዑሣ ማዔ ዓሲ ሙኡዚ ሚሼኔ።

![](https://cdn.door43.org/obs/jpg/360px/obs-en-49-03.jpg?direct&)

ዬሱሴ ሃሣ ዼኤፒ ሄርሺሳ ዓስታማሬ (ዔርዛ ዓሲኬ) ማዔኔ። ፆኦሲ ናይ ማዔሢሮ ዼኤፒ ቢታንቶና ጌስቴኔ። “ዒንሢ ዒንሢና ናሽካ ጎይፆማ ሜሌ ዓሶዋ ናሽኩዋቴ” ጌዒ ሚርጌ ዓሲም ኬኤዜኔ።

![](https://cdn.door43.org/obs/jpg/360px/obs-en-49-04.jpg?direct&)

ሃሣ ዒ ኬኤዛዖ፥ “ዒንሢኮ ቆሎንታ ሃንጎ ባኮዋ ቢያ ናሽካ ጎይፆፓ ባሼ ፆኦሲ ናሽኩዋቴ” ጌይያ ዓይሤኔ።

![](https://cdn.door43.org/obs/jpg/360px/obs-en-49-05.jpg?direct&)

ዬሱሴ ኬኤዛዖ፥ “ፆኦሲ ካኣቱማ ሳዖይዳ ዓኣ ዓይጎ ባኣዚዳፓኣ ቢያ ባሼ ቦንቺንቴያኬ” ጌዔኔ። ዬያሮ ዓሲም ቢያ ሚርጌና ኮይሳያ ማዓ ባኣዚ ፆኦሲ ካኣቱሞ ጋራ ማዒሢኬ። ዬያ ፆኦሲ ካኣቱሞይዳ ጌላኒ ዓሲ ጎሜፓ ጌኤሽኪ ዻቃንዳያ ኮይሳኔ።

![](https://cdn.door43.org/obs/jpg/360px/obs-en-49-06.jpg?direct&)

ዬሱሴ ዓሶ ዔርዛ ዎዶና፥ “ፔቴ ፔቴ ዓሳ ታና ጉሙርቂ ዔኪ ዻቃንዳኔ፥ ሃንጎዋታ ዬያ ዒፃንዳኔ” ጌዔኔ። ፔቴ ፔቴ ዓሳ ዬሱሴ ዛሎ ኮዦ ሃይሶ ጎናሲ ዔኪ ዻቃንዳሢሮ ዜርሢ ዜርቆዛ ባቃሊ ካፃ፥ ኮሺ ሳዓና ኮኦኪንሢንቴኔ፤ ዛላ ዬሱሴ ዛሎ ኬኤዚንታ ኮዦ ሃይሶ ዔኪ ፆኦሲ ካኣቱሞይዳ ጌሊንዱዋኣሢሮ ዜርሢ ዜርቄም ባቃልሲ ሃኣኮ ካፂሱዋ ሹቺ ሳዓ፥ ጊንሣ ሃሣ ጎይሢ ዓቺ ሳዓ ማሂ ኮኦኪንሢንቴኔ።

![](https://cdn.door43.org/obs/jpg/360px/obs-en-49-07.jpg?direct&)

ዓሲ ጎሜ ማዻያ ማዔቴያ ፆኦሲ ዒናፓ ዓሲ ናሽካሢ ዬሱሴ ኬኤዜኔ፤ ጎሞ ዓቶም ጋዓኒና ፔ ናይ ማሃኒያ ኮዓያኬ።

![](https://cdn.door43.org/obs/jpg/360px/obs-en-49-08.jpg?direct&)

ሃሣ ፆኦሲ ጎሜ ሚርጌና ዒፃሢያ ዬሱሴ ኬኤዜኔ። ዓዳኣሜና ሂዋኣኖና ጎሜ ማዼሢሮ ዬይ ጎማ ዔያቶ ዜርፆይዳ ቢያ ሜቶ ዔኪ ዬዔኔ። ዬያሮ ሃያ ሳዖይዳ ዓኣ ዓሲ ቢያ ጎሜ ማዻያ፥ ፆኦሲፓኣ ዱማዻ ሞርኬ ማዔኔ።

![](https://cdn.door43.org/obs/jpg/360px/obs-en-49-09.jpg?direct&)

ጋዓንቴ ዒዛኮ ናኣዚ፥ ዬሱሴ ጉሙርቂ ዔኬሢ ቢያ ባይቁዋዖ ናንጊና ሼምፓ ዓኣያ ማዒ ናንጋንዳጉዲ ፆኦሲ ፔኤኮ ፔቴ ናዓሢ ሃያ ዓጮ ዳካንዳያ ሄላንዳኣና ዓሲ ዜርሢ ቢያ ናሽኬኔ።

![](https://cdn.door43.org/obs/jpg/360px/obs-en-49-10.jpg?direct&)

ዓሲ ማዼ ጎሞሮ ሃይቢ ኮይሳያኬ፤ ፆኦሲያ ዬያ ዻቢንቶሮ ዻጋዺ ዓሲ ባባይዛንዳያኬ፤ ጋዓንቴ ዓሲዳ ፆኦሲ ዬያ ዻጎ ጮኦሽኮ ሃሺ፥ ዬሱሴይዳ ማሂ ኩንሤኔ። ዬሱሴያ ማስቃሎይዳ ሃይቄ ዎዶና ዓሶኮ ዻቢንቶ ቢያ ፔ ዑፃ ማሂ ጳዺንቶ ዔኬኔ።

![](https://cdn.door43.org/obs/jpg/360px/obs-en-49-11.jpg?direct&)

ዬሱሴ ጎሜ ፔቴታዖ ማዺባኣሴ፤ ጋዓንቴ ዓሲ ቢያኮ ጎሜ ጌኤሻኒና ፆኦሲኮዋ ጎሪንቶ ዻጎ ዓሲፓ ሺኢሻኒ ፆኦሲም ሺኢሾ ኩሙሢ ዒንጊሢ ማዒ ሃይቂሢ ዶኦሬኔ። ዬሱሴ ፔና ዓኣሢ ዒንጌሢሮ ዓይጎ ጎሜ ማዔቴያ ፆኦሲ ዓሲም ዓቶም ጋዓኒ ዳንዳዓኔ።

![](https://cdn.door43.org/obs/jpg/360px/obs-en-49-12.jpg?direct&)

ዓሲኮ ኮሺ ማዾ ዓሲ ዓውሳኒ ዳንዳዑዋሴ፤ ፆኦሲና ዎላ ዓሲ ካኣማኒ ማዻ ማዾ ፔቴታዖ ባኣሴ። ዬሱሴ ሌሊ ዓሲኮ ጎሜ ጌኤሺ ፆኦሲና ካንሣኒ ዳንዳዓኔ። ዬሱሴ ፆኦሲ ናይ ማዔሢ፥ ዓሲ ቤዛ ዒ ፔና ዓኣሢ ማስቃሌይዳ ሃይቄሢ፥ ፆኦሲያ ዒዛ ሃይባፓ ዔቂሴሢ ዓሲ ጉሙርቂ ዔካንዳያ ኮይሳኔ።

![](https://cdn.door43.org/obs/jpg/360px/obs-en-49-13.jpg?direct&)

ዬሱሴ ጉሙርቃያና ጎዳ ማሂ ዔካ ዓይጎ ዓሲያ ፆኦሲ ዻዻቂሻኔ። ዖርጎቺታቴያ ኩፒ፥ ዓቲንቄታቴያ ላኣሊ፥ ጋርቺ ማዖም ዼጌ፥ ዓንካ ናንጋ ዓሲ ማዔቴያ ፆኦሲና ዎላ ካኣማኒ ዬሱሴ ጉሙርቂ ዔካንዳያ ኮይሳኔ።

![](https://cdn.door43.org/obs/jpg/360px/obs-en-49-14.jpg?direct&)

ዓሲ ዬሱሴ ጉሙርቃንዳጉዲና ዳምቦ ጎይፆና ዋኣሢያ ማስታንዳጉዲ ዒ ኮዓኔ። ኔ ሃኖ ማፃኣፖ ናባባያ ማዔቴ ዬሱሴ ካኣቱሞም ዶኦሞናያ (ሜሲሄ)፥ ፔቴ ፆኦሲ ናይ ማዔሢ ጉሙርቃ? ኔኤኒ ጎሜና ዓኣ ዓሲ ማዔሢንታ ፆኦሲ ዻጋዺ ሜቶ ኔጊዳ ዓጋያ ማዔቴ ፒዜታሢ ኔ ዔራ? ዬሱሴ ጎሞ ኔኤኮ ጌኤሻኒ ማስቃሎይዳ ሃይቄሢ ኔ ጉሙርቂ ዔካ?

![](https://cdn.door43.org/obs/jpg/360px/obs-en-49-15.jpg?direct&)

ዬሱሴንታ ዒ ኔኤም ማዼ ማዾንታ ኔ ጉሙርቂ ጎናሲ ዔኬቴ ዬሱሴ ጊንፆ ሃንታያ (ዓማና) ማዔኔ! ፆኦሲ ኔና ፃላሄና ዹሞ ካኣቱሞናይዳፓ ቶሊሲ ዒዛ ፖዖ ካኣቱሞ ጋሮ ጌልዜኔ። ፆኦሲ ሃያኮ ቤርታ ኔኤኒ ማዻ ጪሞና ጎሞ ጎይፆና ላኣሚ ዓካሲ ፂሉሞ ማዾ ማዺንታ ጎይሢ ኔና ዻዌኔ።

![](https://cdn.door43.org/obs/jpg/360px/obs-en-49-16.jpg?direct&)

ዬሱሴ ኔኤኒ ኔኤኮ ሼምፖ ዼኤሻ ማሂ ዔኬቴ ኪሪስቶሴ ዓሲ (ዓማና) ማዔኔ፤ ዬሱሴ ማዼ ማዾ ዛሎና ፆኦሲ ጎሞ ኔኤኮ ዓቶም ጌዔኔ። ሃያኮ ቤርታ ፆኦሲኮ ኔ ሞርኬታንቴ ሃሢ ኔና ዒ ፔኤና ዒጊንሤኔ።

![](https://cdn.door43.org/obs/jpg/360px/obs-en-49-17.jpg?direct&)

ፆኦሲኮ ኔ ዒጊኒ፥ ሃሣ ማዻ ዓይሌ ማዔቴ ዬሱሴ ኬኤዛ ባኮ ዓይሢንቲ ኔ ኩንሣያ ማዓንዳኔ። ዓማና ኔ ማዔቴያ ጎሜ ማዺሢ ሼኔ ኔጊዳ ዬዓኒ ዳንዳዓኔ። ጋዓንቴ ፆኦሲ ጉሙርቂንታያ ማዔሢሮ ጎሞ ኔ ቡኡፄቴ ዒ ዓቶም ጋዓያኬ። ጎሜ ኔ ዒፂ ባሻንዳ ዎልቄያ ኔኤም ዒዚ ዒንጋንዳኔ።

![](https://cdn.door43.org/obs/jpg/360px/obs-en-49-18.jpg?direct&)

ፆኦሲ፡ ዒዛ ኔ ሺኢቃንዳጉዲ፥ ቃኣሎ ናባባንዳጉዲ፥ ዓማና ማዔ ኔ ላጎና ዎላ ኔ ዒዛ ካኣሽካንዳጉዲ፥ ኔኤም ዒ ማዼ ባኮ ሜሌ ዓሶም ኔ ማርካዻንዳጉዲ ኮዓኔ። ዬይ ባካ ቢያ ኔኤና ፆኦሲናኮ ካኣሚፆ ዶዲሻያኬ።

*ጌኤዦ ማፃኣፖይዳ ኬኤዚንቴ ሃይሴ፡- ሮሜ 3፡21-26፤ 5፡1-11፤ ዮሃኒሴ 3፡16፤ ማርቆሴ 16፡16፤ ቆላሲያሴ 1፡13-14፤ 2ቆሮንቶሴ 5፡17-21፤ 1ዮሃኒሴ 1፡5-10።*

## 50. ዬሱሴ ማዒ ሙካንዳያ ማዒፆ

https://openbiblestories.org/l/mdy/story-50/

![](https://cdn.door43.org/obs/jpg/360px/obs-en-50-01.jpg?direct&)

ላምዖ ሺያ ሌዔ ጉዴያ ዓጪ ቢያይዳ ዓኣ ዴሬ ካኣቱሞም ዶኦሞና ዬሱሴ ዛሎ ኬኤዛ ኮዦ ሃይሶ ዋይዚ ዋይዚ ዴዔኔ። ሺኢጲፆ ማኣሮ ዓሳ ዶዲ ዶዲ ዳልጌኔ። ዬሱሴያ ዓጮኮ ጋፒንፆና ማዒ ሙካንዳሢ ጉሙርሲ ኬኤዜኔ። ዒዚ ሃጊ ማዒ ሙኪባኣቴያ ዒ ኬኤዜ ቃኣሎ ጉሙርቂንቲ ካፓኔ።

![](https://cdn.door43.org/obs/jpg/360px/obs-en-50-02.jpg?direct&)

ዬሱሴኮ ሙኪፆ ኑ ካፒ ካፒ ዓኣዖ ጌኤሹሞና፥ ሃሣ ፆኦሲ ቦንቺሳ ናንጊ ናንጋንዳጉዲ ዒ ኮዓኔ። ጊንሣ ሃሣ ፆኦሲ ካኣቱሞ ዛሎ ሜሌ ዓሶም ኑ ኬኤዛንዳጉዲያኣ ኮዓኔ። ዬሱሴ ሳዖይዳ ናንጌያና፥ “ታ ጊንፆ ሃንታዞንሢ ኬኤዛ፥ ፆኦሲ ካኣቱሞ ዛሎ ኮዦ ሃይሳ ዓጪ ቢያይዳ ኬኤዚንታንዳኔ፤ ዬይያ ጋፒንፆ ዎዶ ማዓንዳኔ” ጌዔኔ።

![](https://cdn.door43.org/obs/jpg/360px/obs-en-50-03.jpg?direct&)

ሃሢ ሚርጌ ፃጲ ዴሬ ዬሱሴ ዛሎ ኮዦ ሃይሶ ዋይዚባኣሴ። ዬሱሴ ጫሪንጮ ዔውታንዳሢኮ ቤርታ ኮዦ ሃይሶ ዋይዚባኣ ዓሶም ኬኤዛንዳጉዲ ዒዛ ጊንፆ ሃንታዞንሢ ዓይሤኔ። ዒ ኬኤዛዖ “ቢያ ዓጮ ዴንዲጋፓ ዓሲም ቢያ ኮዦ ሃይሶ ኬኤዚ ታ ዓሲ ማሁዋቴ! ማኣሎ ቡሮ ዎዳ ሄሌኔ” ጌዔኔ።

![](https://cdn.door43.org/obs/jpg/360px/obs-en-50-04.jpg?direct&)

ሃሣ ዬሱሴ፥ “ማዻ ዓይላሢ ማዺሻሢፓ ባሹዋሴ። ሃያ ዓጮኮ ቢታንታ ዓኣ ዓሳ ታና ዒፄሢጉዲ ዒንሢያ ዒፂ ሜታሳንዳኔ፥ ዎዺያ ዎዻንዳኔ። ሃያ ሳዖይዳ ዒንሢ ሜቶ ዔኬያ ማዔቴያ ሜታ ባኣሴ፤ ታኣኒ ሃያ ዓጮ ዎይሣ ፃላሄ ባሺናኣኮኬ። ዒንሢ ታና ጉሙርቂፆና ዶዴቴ ፆኦሲ ዒንሢ ዬያፓ ዓውሳንዳኔ!” ጌዔኔ።

![](https://cdn.door43.org/obs/jpg/360px/obs-en-50-05.jpg?direct&)

ዓጮኮ ጋፒንሢ ዎዴ ማዓኣና ማዺንታንዳ ባኮ ፔጋሲ ኬኤዛኒ ዬሱሴ ፔቴ ሃይሴ ኮኦኪንሢ ማሂ ሂዚ ጌይ ኬኤዜኔ፦ “ፔቴ ዓሲ ፔኤኮ ጎዣ ቃራ ባርቼ ዜርሢ ዶኦሪ ዜርቄኔ፤ ጋዓንቴ ዒ ዴንዲ ማኣራ ላሄንቴ ዹማ ዒዛኮ ሞርኬ ሙኪ ዓዦ ዜርቂ ዴንዴኔ።”

![](https://cdn.door43.org/obs/jpg/360px/obs-en-50-06.jpg?direct&)

“ዬይ ዓሢ ዜርቄ ባርቾንታ ባኣኮይዳ ዓዣሢያ ባቃሌኔ፤ ዬያሮ ዒዛም ማዻ ዓይሎፓ ፔቴ፥ ‘ጎዳሢዮ! ጎዦይዳ ኔ ዜርቄሢ ቃራ ባርቼ ሌሊቱዋዓዳ? ሂዳዖ ዓዣሢ ዓንካፓ ሙኬይ?’ ጌይ ዖኦጬኔ። ጎዳሢያ፥ ‘ዬያ ዓዣሢ ዜርቄሢ ሞርኬዋይ’ ጌዔኔ።”

![](https://cdn.door43.org/obs/jpg/360px/obs-en-50-07.jpg?direct&)

“ማዾ ማዻ ዓይሎንሢ ጎዳሢ ኮራ፥ ‘ኑ ዴንዲ ዓዣሢ ቱጎንዶ?’ ጌዔኔ። ጎዳሢ ጋዓንቴ፥ ‘ዔይዔ፤ ዬያ ዒንሢ ማዼቴ ዓዣሢ ቱጋኔ ጌይ ባርቾ ቱጋንዳኔ። ዬያሮ ማኣላ ቡሪንታንዳያ ሄላንዳኣና ዎላ ዴዖንጎ፤ ዬካፓ ዓዣሢ ቱጊ ታሚዳ ዓጊ፥ ባርቾ ጋዓንቴ ማንፂ ኮና ዋሁዋቴ።”

![](https://cdn.door43.org/obs/jpg/360px/obs-en-50-08.jpg?direct&)

ዬሱሴኮ ጊንፆ ሃንታዞንሢም ዬያ ኮኦኪንሦ ሃይሶ ዓይጎኮ ዒ ኬኤዜቴያ ዔያቶም ጌሊባኣሴ፤ ዬያሮ ዒ ዔያቶም ቡሊ ኬኤዛንዳጉዲ ዖኦጬኔ። ዬሱሴ ኬኤዛዖ፥ “ቃሮ ዜርፆ ዜርቄ ዓሢ ካኣቱሞም ዶኦሞናሢኬ፤ ጎዣ ዓጮ ጌይፆኬ፤ ቃሮ ዜርፃ ፆኦሲ ካኣቱሞይዳ ዓኣ ዓሶ ጌይፆኬ” ጌዔኔ።

![](https://cdn.door43.org/obs/jpg/360px/obs-en-50-09.jpg?direct&)

“ዓዣሢ ፃላሄ (ፑርታሢ) ኮኦኪንሣያኬ። ዬያ ዓዣሢ ዜርቄሢ ዲያብሎሴ ጌይንታ ፃላሄኬ። ማኣሎ ቡሪፆ ጌይፃ ዓጮኮ ጋፒንፆኬ፤ ማኣሎ ቡራ ዓሳ ፆኦሲ ኪኢታንቾኬ።”

![](https://cdn.door43.org/obs/jpg/360px/obs-en-50-10.jpg?direct&)

“ዓጮኮ ጋፒንፆና ፆኦሲ ኪኢታንቻ ፃላሄሮ ማዔ ዓሶ ቢያ ቡኩሲ ዔኪ ዼኤፖ ታሞይዳ ኬኤራንዳኔ፤ ዒኢካ ዬይ ዓሳ ዼኤፒ ዋኣዪሢዳ ጌሊ፥ ሜታዺ ዓቺያ ዻዓንዳኔ። ዬኖ ዎዶና ፂሎ ማዔ ዓሳ ፔ ዓዳሢ ካኣቱሞይዳ ዓቢጉዲ ፖዒ ናንጋንዳኔ።”

![](https://cdn.door43.org/obs/jpg/360px/obs-en-50-11.jpg?direct&)

ዬካፓ ሃሣ ዬሱሴ ዓጮኮ ጋፒንፆ ማዓንዳሢኮ ቤርታ ዒ ማዒ ሙካንዳሢ፥ ሳዓፓ ማዒ ዴንዴ ጎይፆማ ማዒ ዬዓንዳሢያ ኬኤዜኔ። ዴንዴ ጎይፆማ ጌይፃ፦ ዑፃ ዒዛኮ ዓኣ ጎይፆማ ማዒ ሻኣሬና ዴንዴሢጉዲ ሻኣሬና ማዒ ሙካንዳኔ። ዬሱሴ ጫሪጫፓ ማዒ ሙካኣና ዬሱሴ ጉሙርቂ ዔኬዖ ሃይቄ ዓሳ ሃይባፓ ዔቂ ዢባራ ኬስኪ ዒዛ ሞኦካንዳኔ።

![](https://cdn.door43.org/obs/jpg/360px/obs-en-50-12.jpg?direct&)

ዒማና ሼምፖና ዓኣ ዓሳ ዢባራ ሌካ ዔውቲ ሃይባፓ ዔቄ ዓሶና ዎላ ዬሱሴ ዔኮሮ ሞኦካንዳኔ፤ ዒኢካ ዬሱሴና ዎላኣ ማዓንዳኔ። ዬካፓ ዬሱሴ ዴሮና ዎላ ጋፒንሢ ኮሹሞና፥ ሃሣ ፔቱሞና ናንጊና ናንጋንዳኔ።

![](https://cdn.door43.org/obs/jpg/360px/obs-en-50-13.jpg?direct&)

ዬሱሴ ዒዛ ጉሙርቂ ዔኬ ዓሶም ቢያ ካኣቶ ቶኦካ ዓጎሢጉዴ ቦንቾ ባኮ ዓጋንዳያታሢ ጉሙርሲ ኬኤዜኔ። ዬያሮ ዔያታ ጋፒንሢ ማዔ ኮሹሞና ፆኦሲና ዎላ ናኣናና ካኣታዺ ናንጋንዳኔ።

![](https://cdn.door43.org/obs/jpg/360px/obs-en-50-14.jpg?direct&)

ጋዓንቴ ፆኦሲ ዬሱሴ ጉሙርቂ ዔኪባኣ ዓሶይዳ ቢያ ፑርታ ዎጌ ዎጋንዳኔ። ናንጊና ዔያታ ሜታዻንዳ ቤዞና ዬያ ሜቶፓ ዔቄያና ዓቺ ዔያታ ዻዓንዳ፥ ዼኤፖ ዔታ ኬኤሪንታንዳኔ። ዒኢካ ባይቁዋ ታሚ ዔያቶ ሚቻንዳኔ፤ ሃይቁዋ ዛኣሌያ ዔያቶ ሙዒ ሙዒ ናንጋንዳኔ።

![](https://cdn.door43.org/obs/jpg/360px/obs-en-50-15.jpg?direct&)

ዬሱሴ ማዒ ሙካዖ ፃላሄንታ ዒዛ ካኣቱሞዋ ቢያ ባይዛንዳኔ። ፃላሄ ፆኦሲም ዓይሢንቶ ዒፂ ዒዛ ጊንፆ ሺሬ ዓሶ ቢያሢና ዎላ ናንጊና ሚቺንታንዳ ታሞይዳ ኬኤሪንታንዳኔ።

![](https://cdn.door43.org/obs/jpg/360px/obs-en-50-16.jpg?direct&)

ዓዳኣሜና ሂዋኣኖና ፆኦሲም ዓይሢንቶ ዒፂ ሃያ ሳዖ ጎሜ ዔኪ ጌልዜሢሮ ፆኦሲ ሳዖ ጋዳንቄኔ፤ ባይዛኒያ ማሌኔ። ጋዓንቴ ፔቴ ኬሊ ፆኦሲ ፔቴታዖ ፓጬ ባኣዚባኣ ዓኪ ጫሪንቺንታ ሳዓንታ ማዣንዳኔ።

![](https://cdn.door43.org/obs/jpg/360px/obs-en-50-17.jpg?direct&)

ዬሱሴና ዴሮና ዓኮ ሳዖይዳ ናንጋንዳኔ፤ ዓኣ ባኮኮ ቢያ ዑሢ ማዒ ካኣታዻንዳኔ። ዬሱሴ ዬኤካ ዓሶኮ ዓኣፓፓ ዓቢፆ ዑጫንዳኔ፤ ዬካፓ ሴካ ዋኣዮ ናንጊ፥ ዖዪሢ፥ ዬኤፒ፥ ፑርቱሞ፥ ሃርጌንታ ሃይቢያ ባኣያ ማዓንዳኔ። ዬሱሴ ፔኤኮ ካኣቱሞ ኮሹሞና ፒዙሞና ዶዲሺ ናንጊና ዴሮና ዎላ ናንጋንዳኔ።

*ጌኤዦ ማፃኣፓ ኬኤዚንቴ ሃይሴ፡- ማቲዎሴ 24፡14፤ 28፡18፤ ዮሃኒሴ 15፡20፤ 16፡33፤ ዮሃ. ፆፔዻ 2፡10፤ ማቲዎሴ 13፡24-30፤ 36-42፤ 1ቴስሎንቄ 4፡13-5፡11፤ ያይቆኦቤ 1፡12፤ ማቲዎሴ 22፡13፤ ዮሃ. ፆፔዻ 20፡10፤ 21፡1-22፡21።*