# unfoldingWord Open Bible Stories — Mawchi

- Language code: `mke`
- Canonical page: https://openbiblestories.org/l/mke/
- Stories in this file: 50 of 50
- Published by: OBS-TLF
- Last release: 2026-05-18
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Mawchi translation; it is not a translation of the whole Bible.

## 1. उत्पति

https://openbiblestories.org/l/mke/story-1/

![](https://cdn.door43.org/obs/jpg/360px/obs-en-01-01.jpg)

एहेकोय पोयला देवाय यो बाद्यो वस्तु बोनाव्यो. त्याय सोव दिह्यामाय बादी दुनिया आन जी काय त्यामाय हेय ती बोनाव्या. देवाय बोनाडली दोरतीवोय पासे आंदारा आन रिकामी आती काहाका आमी हुदी देवाय तीवोय कोहीबी वस्तुल नाय बोनाडला आतां. पेन देवा आत्मा पायांवोय फिरतां आतां.

![](https://cdn.door43.org/obs/jpg/360px/obs-en-01-02.jpg)

पासे देवाय आख्या, उजवाडो ओय जाय., आन उजवाडो जायो. देवाय उजवाडो देख्यो, का तो हारो हेय. आन त्याल देवाय दिही आख्या, आन त्याय त्याल आंदारा पाने जुदा कोअया त्याल त्याय रात आख्या. देवाय जुग बोनावा पोयला दिह्या उजवाडो बोनाव्यो.

![](https://cdn.door43.org/obs/jpg/360px/obs-en-01-03.jpg)

दुनिया बोनावा दूसरा दिह्याम देवाय आख्या, पायांहिने योक अंतर ओय जाय आन योक अंतर ओय गोया, देवाय त्या अंतराल जुग आख्यां,

![](https://cdn.door43.org/obs/jpg/360px/obs-en-01-04.jpg)

तिसरा दिह्याम देवाय आख्या, पांय योका जागावोय योखठा ओय जाय आन उखाली जमींन देखाये, त्याय उखाली जमिनील दोरती आख्या, आन पायांल दोर्यो आख्या. देवाय देख्या का जी त्याय बोनाव्या ती हारां हेय.

![](https://cdn.door43.org/obs/jpg/360px/obs-en-01-05.jpg)

पासे देवाय आख्या, दोरतीवोय बादी जाती जाड़े आन वेली उदे आन एहेके जाया, देवाय देख्या का जी काय बोनाव्या ती हारां हेय.

![](https://cdn.door43.org/obs/jpg/360px/obs-en-01-06.jpg)

दुनिया बोनावा चौथे दिही देवाय आख्या, आकाशामाय बेन ज्योति ओय जाय आन दिही, चाँद आन चांदाले उजब्ये, देवाय त्याहाल दोरतीवोय उजवाडो दा आन दिही आन रात, रुतु आन वोरहामाय जाण कोराहाटी बोनाव्या.

![](https://cdn.door43.org/obs/jpg/360px/obs-en-01-07.jpg)

पाचवे दिही देवाय आख्या जीवते जनावरे, पायांम बोय देय आन आकाशामाय उड़नारे चिडे उड़े, एहेके त्याय पायांवोय जेपनारे बादे जीव जंतुल आन चिडहाल बोनाव्या. देवाय देख्या का ई हारा हे आन त्याहाल बोरकात देना.

![](https://cdn.door43.org/obs/jpg/360px/obs-en-01-08.jpg)

दुनिया बोनाव्या त्या सहावा दिह्याम देवाय आख्या. दोरतीवोय रोनारे बादी जाती जनावरे ओय आन देवाय आख्या तेहेके ओय गोया, आरदे जनावरे पालतू, आरदे दोरतीवोय होपलूनारे, आन आरदे डोगाम रोनारे, आन देवाय देख्या का ई हारा हेय.

![](https://cdn.door43.org/obs/jpg/360px/obs-en-01-09.jpg)

पासे देवाय आख्या, चाला आपा माहाल आपे रुपामाय आन आपे रोका बोनावुहू, ती दोरतीवोय आन बादा जनावरहावोय राज कोय.

![](https://cdn.door43.org/obs/jpg/360px/obs-en-01-10.jpg)

सेले देवाय कादू लेदो, त्याकोय माहाल बोनाव्या आन त्यामाय जीवना वारो फुकी देनो, त्या माअहा नाव आदाम आता, देवाय आदामा रोयनाहाटी योक मोठो बगीचों बोनाव्यो आन त्या राखवाळयो आदामाल थोवी देनो.

![](https://cdn.door43.org/obs/jpg/360px/obs-en-01-11.jpg)

त्या बगीचा विसमाय देवाय बेन हारे जाड़े लाव्ये, जीवना जाड आन खोरा-खोटा होमजुना जाड. देवाय आदामाल आख्या का त्या बगीचा माअने जीवना जाडा आन खोरा-खोटा होमजुना जाडाल सोडिन बिजा कोहाबी जाड़ा फळ खाय सकतेहे जर तू त्या जाडा फळ खाहे ते मोय जाहे.

![](https://cdn.door43.org/obs/jpg/360px/obs-en-01-12.jpg)

पासे देवाय आख्या, माअहु योखलो रोय सके ई हारा नाय हेय. पेन कोहाबी जनावर आदामा आर्या नाय रोय सके.

![](https://cdn.door43.org/obs/jpg/360px/obs-en-01-13.jpg)

त्याहाटी देवाय आदामाल खूब नींद देनी, पासे देवाय आदामा योक आड्की लीन तिकोय योक स्री बोनावी, आन तील आदामा पाही ली येनो.

![](https://cdn.door43.org/obs/jpg/360px/obs-en-01-14.jpg)

जोवे आदामाय तील देख्या त्याय आख्या, कमीत-कमी इते मां रोकी हेय! तील बाई आखी, काहाका ती माहामाने बोनावीही. याहाटी माअहु आपे आयहील-आबहाल सोडी देहे आन त्या थेयी आरे योक ओय जाहे.

![](https://cdn.door43.org/obs/jpg/360px/obs-en-01-15.jpg)

देवाय माअहु आन बाई आपे रूपामाय बोनाव्या. त्याय त्याहाल बोरकत देनी, आन त्याहाल आख्या, खूब पोहे आन पोहा-पोहाल जन्म दा. आन दोरती बोय दा. आन देवाय देख्या का जी बी त्याय बोनाव्या, ती खूब हारा हेय, आन तो या बादाकोय खूब खुश जायो. ई बादा सहावे दिही बोनाव्या.

![](https://cdn.door43.org/obs/jpg/360px/obs-en-01-16.jpg)

जोवे सातवो दिही येनो, तोवे जी काय देव कोय रोयलो त्याय त्या कामाल पारवाड्या, त्याय सातवा दिह्याल बोरकात देना. आन त्याल पवित्र कोयो, काहाका त्या दिही त्याय बादी वस्तु बोनावी पारवाड्या. एहेकोय देवाय दुनिया आन जी काय त्यामाय हेय ती बोनाव्या.

*बायबला गोठ : उत्पति १, २.*

Audio: https://git.door43.org/OBS-TLF/mke_obs/releases/download/v1/mke_obs_v1_01_128kbps.m4a

## 2. पाप दुनिया माय येनो

https://openbiblestories.org/l/mke/story-2/

![](https://cdn.door43.org/obs/jpg/360px/obs-en-02-01.jpg)

आते आदाम आन त्या थेय देवाय त्याहाहाठी बोनाडला त्या खुब हारा बगीचामाय रोयन खूब खुश आते . त्यामायने कादाज फाडके नाय पोवे , तेबू ई गोठी त्यामाय कादालूज शरम नाय कओय ये ,काहका दुनियामाय पाप नाय आतो . त्ये कोवेबी त्या बगीचामाय फिरते आते आन देवाआरे गोठ कोएत.

![](https://cdn.door43.org/obs/jpg/360px/obs-en-02-02.jpg)

पेन त्या बगीचामाय योक हाप आतो .तो खूब लबाड आतो त्याय ती बाईल होद्या ,काय हुदलाज देवाय तुमहाल या बगीचामायने ळोहाबी जाअडा फळ खाअ नाय आखह्या .?

![](https://cdn.door43.org/obs/jpg/360px/obs-en-02-03.jpg)

त्या बाईल उत्तर देना , देवाय आमहाल आखह्या का आंमा त्या हारा –खोटा जाण कोय देनारा जाअडाल सोडीन कोहाबी जाअडा फळ खाय सकते हे . देवाय आमहाल आखह्या का जर तुमहाय त्या फळाल खाअदा नेते त्याल आथल्याबी ,तेबी मोय जाहा .

![](https://cdn.door43.org/obs/jpg/360px/obs-en-02-04.jpg)

त्या हापाय बाईल उत्तर देना ,ई खोअरानाय हेय | तुमा नाय मोअहा .देव जांहे का जेहेके तुमा फळाल खाअहा, तुमा देवा रोके ओय जाहा आन त्या रोके हाराल आन खोटालहोमजा लागहा.

![](https://cdn.door43.org/obs/jpg/360px/obs-en-02-05.jpg)

त्या बाई देख्या का ती फळ मोनाल हांरा आन चवदार दाखाया .तील बी जानकार बोननाआंता, त्याहाठी तीय फळाल तोडीन खाय लेदा. पासे तींय त्ये दोनाराल जो तीआरे आतो त्याल ती फळ देना आन त्यांय बी खाय लेदा.

![](https://cdn.door43.org/obs/jpg/360px/obs-en-02-06.jpg)

योकदम, त्यांहा डोळा उगडी गोया, आन त्याहाल होमजाय गोया का त्ये उगाडे हेय. त्याहाय पाने योकठे हिवीन त्याहा फाडके बोनावीन त्याकोय आपे आंग डाकते आते.

![](https://cdn.door43.org/obs/jpg/360px/obs-en-02-07.jpg)

तोवे माहाय आन त्या दोनारीय त्यां बगीचामाय फिरता देवा आवाज वोनाये. त्ये बेनी देवा हिने दोबी गोये. तोवे देवाय त्या माहाल हात कोया, तू केस हेय? आदामा य उत्तर देना, आंय तुल बगीचामाय फिरता वोनायो, आन आय बिअं गोयो. काहाका आय उगाडे हेय.त्याहाठी आय दोबी गोयो .

![](https://cdn.door43.org/obs/jpg/360px/obs-en-02-08.jpg)

पासे देवाय होद्या, तुल कुयें आख्या का तू उगडो हेय? काय तूंअ ती फळ खादहा जी खाहाठी नाय आखला आंता? माहाय उत्तर देना, तूंअये मान जी बाई देनही तीय मान ती फळ देना. तोवे देवाय त्या बाईल होद्या, तूंअ ई काय कोया? ती बाई आख्या, हापाय मान ठोगाडी देनहा.

![](https://cdn.door43.org/obs/jpg/360px/obs-en-02-09.jpg)

देवाय हापाल आख्या, तुल ठोकर लागे| तूअ तोअ डेडीके होपलेहे आन कादू चाटहे. तूअ आन ई बाई योकबिजा विरूद कोअहा, आन तोअ पोहे आन त्या पोहेबी योकबिजा विरूद कोरी. ई बाई पिढी तो टोलपाल चेंदी, आन तूअ त्यां पाटलील चावहे.

![](https://cdn.door43.org/obs/jpg/360px/obs-en-02-10.jpg)

तोवे देवाय बाईल आख्या, आय तोअ पोहाल जन्म दांअहाठी खूब पिडा दीही. तूं तो दोनारा ऐहे मोन कोअहे, आन तोवोय राज कोरी.

![](https://cdn.door43.org/obs/jpg/360px/obs-en-02-11.jpg)

देवाय माहाल आख्या, तूअ आपे दोनारी वोनायहो आन मां गोठ नाय मानही. त्याहाठी दोरतील ठोपको लागह्यो, आन तोअ खायना उदाडाहाठी कोठीन कष्ट कोरा पोडी. आमी तू मोय जाहे, आन तोअ आंग कादूमाय मिळी जाय. त्या माहाय त्याअ दोनारी नाव हवा थोव्या, ज्या अर्थ हेय जीवन देनारी, काहाका तीअ बादी जाती आयहो ओरी.आन देवाय आदम आन हवाल जनावरहा, चाबडा फाडके पोवाढ्ये.

![](https://cdn.door43.org/obs/jpg/360px/obs-en-02-12.jpg)

पासे देवाय आख्या, आमी हारा आन खोटा होमजुना माहांल आपे रोका ओय गोयहा, त्याहाठी त्यांहाल त्या जीवना जाअडा फळ नाय खाअ दांअ पोडी का त्येंअ सदा जीवते रोय. त्याहाठी देवाय आदम आन हवाल त्या बगीचामायने बारे काडी देने. आन देवाय कादाल बी त्या जीवना जाअडा फळ खायना रोकाहाठी त्या बगीचा बाअनाही शक्तीवाळा होरगा दूतहाल बोहाडी देना.

*बायबला गोठ: उत्पति ३*

Audio: https://git.door43.org/OBS-TLF/mke_obs/releases/download/v1/mke_obs_v1_02_128kbps.m4a

## 3. रेल

https://openbiblestories.org/l/mke/story-3/

![](https://cdn.door43.org/obs/jpg/360px/obs-en-03-01.jpg)

खूब दिह्या पासे, दुनियामाय खूब माअहे रोय. त्ये खूब लबाड आन वोखो देखाडनारे ओय गोयले आते. त्ये ओले खराब आते का देवाय योक मोठी रेलके या दुनियाल नाश कोअना निर्णय लेदो.

![](https://cdn.door43.org/obs/jpg/360px/obs-en-03-02.jpg)

पेन देव नोहाके आतो खुश आतो. तो लबाड माहाम रोनारो योक हारो माहु आतो.देवाय नोहाल आख्या का तो योक मोठी रेल ली येनारो हेय. त्याहाठी, त्याय नोहाल योक मोठी उडी बोनाडा आख्या.

![](https://cdn.door43.org/obs/jpg/360px/obs-en-03-03.jpg)

देवाय नोहाल लोगबोग १४०मिटर लांबा,२३ मीटर वेसळां आन १३.५ मीटर उची उडी बोनाडा आखी नोहाल ती लाकडाके बोनाड्ना आता आन त्यामाय तीन मजला,खूब खोल्यो, हूड आन योक खिडकी बोनावना आंता. ती उडी नोहो त्या कुंटूब, आन दोरतीवोरे बादी जाती जनावरे ती रेलीकोय हारे राखी.

![](https://cdn.door43.org/obs/jpg/360px/obs-en-03-04.jpg)

नोहाय देवा गोठ मानी. त्याय आन त्या पोहोहाय तोहडीज उडी बोनाडी जेहेके देवाय त्याहाल आखला आता. काहाका ती उडी खूब मोठी आती त्याहाठी तील बोनाडाहाठी वार वोरहे लाग्ये. नोहाय लोकहाल येनारी रेलीबद्द्ल आन त्याहाल देवा ऐहे फिराहाठी आख्या. पेन त्याहाय त्यावोय बोरसो नाय कोयो.

![](https://cdn.door43.org/obs/jpg/360px/obs-en-03-05.jpg)

देवाय नोहाल आन त्या कुंटूबाल त्याहाहाठी आन जनावरांहाठी खायना साठो कोरा हुकुम देनो. जोवे बादा तियारी आता, तोवे देवाय नोहाल आख्या का ई वेळ त्याय, दोनारी त्याय तीन पोहोहा, आन त्याहा दोनाऱ्या – बादे मीळीन आठ जांहा उडीमाय जायना आता.

![](https://cdn.door43.org/obs/jpg/360px/obs-en-03-06.jpg)

देवाय बादा जनावरहा आन चीडहा नर आन मादी नोहाही दोवाड्यें याहाठी का ते उडीम जाय सके आन रेलीम हारे रोय सके.देवाय ऐहेके बादि जाती सात दोनारा आन सात दोनारीहील दोवाडी देने ज्याहा वापार चढवाहाठी ओय सके.जोवे त्ये बादे उडीम पोची गोये तोवे देवांज उडी बांअना बंद कोया.

![](https://cdn.door43.org/obs/jpg/360px/obs-en-03-07.jpg)

तोवे पाअ पोडा सुरु जायो, आन पाअ पोडतो गोयो, पोडतो गोयो. नाय रुकायो ४० दीही आन ४० रात्यो पाअ पोडतो रोयो.बादि दुनिया योका-योक वस्तू, का उचामाय उचा डोगा बी पाअयामाय बुडी गोया.

![](https://cdn.door43.org/obs/jpg/360px/obs-en-03-08.jpg)

उखाली दोरतीवोय रोनारी योका-योक वस्तू मोय गोई,ज्ये माअहे आन जनावरहाल सोडीन जे उडीम आते. ती उडी पाअया वोय तोरंगाती रोयी आन उडी माजेने योका-योक वस्तू बुडनापाने रोय गोयी.

![](https://cdn.door43.org/obs/jpg/360px/obs-en-03-09.jpg)

पाअ पोडना रूकान,पाच मोयना हुदी उडी पाअया वोय तोरंगाती रोयी, आन त्या दिह्याम पाअ कमी ओता आता.तोवे योक दिही ती उडी डोगा सेंडीम जायन टेकी,पेन दुनिया आमी बी पाअयाकोय डाकाली आती तीन मोयनाहा कोय, डोगहा सेडी देखाती आती.

![](https://cdn.door43.org/obs/jpg/360px/obs-en-03-10.jpg)

आजू पासे चाळीस दिह्याके,नोहाय योका नेंडाडाल ई हेराहाठी बारे दोवाड्या का पाअ उखाय गोयला हेय. तीअ नेंडाडा उखाली दोरती होदाहाठी ऐहे-तेऐ फिरतांता रोया, पेन त्याल ओहडो काय जागो नाय मिळ्यो.

![](https://cdn.door43.org/obs/jpg/360px/obs-en-03-11.jpg)

आजू पासे नोहाय योक कबूतर बारे दोवाढ्यो.पेन त्यालबी उखाली दोरती नाय मिळी,याहाठी तो नोहापाय पासी यी गोयो.योक आठवड्या पासे त्याय त्या कबुतराल दोवाड्या,आन ती त्या चोचीम योक जैतूना जाडा डाहागी लीन पासी येनी. पाअ आटाय रोयला आता, आन जाअडे पासी उदते आते.

![](https://cdn.door43.org/obs/jpg/360px/obs-en-03-12.jpg)

नोहाय योक आठवड्या आजू वाट ऐअयी आन तिसरेदा ती कबुतरील बारे दोवाड्या. आमी तील बोहना जागो मिळी गोयो आन ती पासी नाय येनी. पाअ उखाय रोयला आता.

![](https://cdn.door43.org/obs/jpg/360px/obs-en-03-13.jpg)

बेन मोयना पासे देवाय नोहाल आख्या, ‘’आमी तूअ आन तोअ कुटुंब आन बादे जनावरे उडीमायने निगी या. खूब बादा पोहहाल आन पोहो-पोहाल जन्म दा आन दोरतील बोय दा.’’ सेंले नोहो आन त्या कुटुब उडीमायने बारे निगी येनो.

![](https://cdn.door43.org/obs/jpg/360px/obs-en-03-14.jpg)

नोहो उडी बारे एनो पासे, योक वेदी बोनावी आन देवा सेवाहाठी वापरूले जानारे बादि जाती जनावरहा मायने आरदे लेअन देवा सेवा कोयी. देव त्या बळहीके खुश जायो आन नोहो आन त्या कुंटूबाल बोरकत देनी.

![](https://cdn.door43.org/obs/jpg/360px/obs-en-03-15.jpg)

देवाय आख्या, ‘’आय वोचन लाहू का माअहा कोय ओनारा खाराब कामालीदे आय पासी कोदहिबी दोरतील ठोकर नाय दावं आन रेलीकोय दुनीयाल नास नाय कोऊ. काहाका माअहू त्याअ हानिपनापाने पापी हेय.

![](https://cdn.door43.org/obs/jpg/360px/obs-en-03-16.jpg)

पासे देवाय आपे वोचनाल चिन्हा रुपामाय पोयला वादळामाने बानाल बोनाव्या.जोवे कोवेबी वादळाम बान देखायहे, तोवे देवाल ईत येहे का त्याय काय वोचन लेदहा आन तेहेकेज त्यां माअहे बी ईतवे.

*उत्पती अध्याय ६-८ हुदी योक बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_03_128kbps.m4a

## 4. अब्राहामा आरे देवा वोचन .

https://openbiblestories.org/l/mke/story-4/

![](https://cdn.door43.org/obs/jpg/360px/obs-en-04-01.jpg)

रेली वार वोरहा पासे, दुनियामाय खूब माअहे रोत, आन त्यांहाय पासी देवा आन योक-बिजा विरूद पाप कोअयो. काहाका त्ये बादे योकूज भाषा बोले, त्याहाठी योकूज जागे योखठे जाये आन दोरती बोयदेअना देवा आज्ञाल मानीन योक शहर बोनाव्या.

![](https://cdn.door43.org/obs/jpg/360px/obs-en-04-02.jpg)

त्या खूब घोमंडी आता, आन त्याहाल कोहोडा जीवन जीवा जोजे त्या त्याकोय त्याहाल देवा आज्ञा पालन कोयना नाय आता. ओलहाज नाय पेन त्याहाय योक घड बोनावा सुरुवात कोयी जो होरगा हुदी पोचे. देवा देख्या का जर ये योखटे मिळीन खाराब कोअते रोये, ते त्ये खूब पापी कामहाल कोरी.

![](https://cdn.door43.org/obs/jpg/360px/obs-en-04-03.jpg)

त्याहाठी देवाय त्यांहा भाषाल खूब जुदिजुदी भाषांम बदल कोय देनो आन त्या माहाल बादी दोरतीवोय फेलावी देना. ज्या शहराल त्याहाय बोनावा सुरुवात कोयली त्याल बाबेल आखी, त्या अर्थ हेय ‘’गडबड.’’

![](https://cdn.door43.org/obs/jpg/360px/obs-en-04-04.jpg)

वार होव वोरहा पासे, देवाय अब्राम नावा माअहा आरे गोठ कोयी. देवाय त्याल आख्यां, ‘’तोअ देश आन कुटुंबाल सोडीन त्या देशांम निगी जो जी आय तुल देखाडीही. आय तुल बोरकत दिही आन तोहीने योक मोठी जाती बोनावीही. आय तो नाव मोठो कोही. जो तुल बोरकत दी त्याल आय बोरकत दीही, आन जो तुल हाराप दि त्याल आय हाराप दिही. तोकोय दोरतीवोरे बदी जातीहील बोरकत मिळी,’’

![](https://cdn.door43.org/obs/jpg/360px/obs-en-04-05.jpg)

सेंले अब्राहामाय देवा गोठ मानी. त्याय आपे बादा नोकराहाल आन आपे बादी मिळकत आपे दोनारी साराल लेदा आन त्या देशाम,कनान देशांम निगी गोयो जीअ देवाय त्याल देखाडला.

![](https://cdn.door43.org/obs/jpg/360px/obs-en-04-06.jpg)

जोवे अब्राहाम कनानाम पोचो तोवे देवाय त्याल आख्या, ‘’आपे चारीचमखी ऐअ. आय तुल ओ बादो देश दिही आन तोअ पोहे सदा यावोय राज कोरी.’’ तोवे अब्राहाम त्या देशामाय रोय गोयो.

![](https://cdn.door43.org/obs/jpg/360px/obs-en-04-07.jpg)

मलीकीसीदक नावा योक माअहू आता जी उचामउचा देवा याजक आतो. योक दिही अब्राहाम लोडाय कोयन पासे ये रोयलो आतो तोवे तो आन अब्राहाम मिळ्या. मलीकीसीदीकाय अब्राहामाल बोरकत देनी आन आख्या ‘’ उचामउचो देव जो होरगा आन दोरती मालिक हेय तो तुल बोरकत देय.’’ पासे अब्राहामाय लोडाई जीकल्यो बादी वस्तूहू दशाश मलीकीसीदीकाल देना.

![](https://cdn.door43.org/obs/jpg/360px/obs-en-04-08.jpg)

वार वोरहे निगी गोये, पेन आमी बी अब्राहाम आन साराल कायज पोहे नाय आते. देवाय अब्राहामा आरे गोठ कोयी आन पासे करार कोअयो का त्याहाल योक पोहो ओरी आन जेहेके वादळाम चांदाले हेय तेहेकेज त्याल खूब पोहे ओरी. अब्राहामाय देवा करारावोय बोरसो थोव्य. देवाय आख्या का अब्राहाम योक भक्ती कोनारा माअहू हेय काहाका त्याय देवा करारावोय बोरसो कोअलो आतो.

![](https://cdn.door43.org/obs/jpg/360px/obs-en-04-09.jpg)

तोवे देवाय अब्राहामाआरे योक गोठ कोयी. खोरा रुपमाय, योक गोठ बेन गटा विसमे योक-बिजा हाठी काम कोरा होमजुना आता. देवाय अब्राहामा आरे तो करार कोअयो जोवे अब्राहाम हूवी गोयो, पेन तोअ तोवेबी देवा वोनाये. देवाय आख्या, ‘’आय तो आंगामाने उचबाडीन तुल तोअ योक होरो पोहो दिही. आय तोअ पोहोहाल ओ कनान देश दाहू. ‘’ पेन आमी बी अब्राहामा पोहे नाय आते.

*उत्पत्ती अध्याय ११-१५ हुदी योक बायबला गोठ.*

Audio: https://git.door43.org/OBS-TLF/mke_obs/releases/download/v1/mke_obs_v1_04_128kbps.m4a

## 5. मानता पोहो.

https://openbiblestories.org/l/mke/story-5/

![](https://cdn.door43.org/obs/jpg/360px/obs-en-05-01.jpg)

अब्राहाम आन साराय कनानान माय पोचीन दहा वोरहा पासे, आमी हुदी बी काय पोहे नाय आते. त्याहाठी, अब्राहामा दोनारी साराय त्याल आख्या, काहाका देवाय आमी हुदी मान पोहाल जन्म दाहाठी शक्ती नाय देनही आन आमी आंय पोहाल जन्म दाहाठी खूब डाई हेती,ऐअ मां सेविका हागार ई हेय. यीआरे वोराड कोयले काहाका माहाठी योक पोहां जन्म दी सकी.

![](https://cdn.door43.org/obs/jpg/360px/obs-en-05-02.jpg)

सेंले अब्राहामाय हागारा आरे वोराड कोय लेदा. हागारील योक पोहो जायो, आन अब्राहामाय त्या नाव ईश्माएल थोव्या. पेन सारा हागाराल कुहूदाये जोवे ईश्माएल तेरा वोरहा आतो,देवाय पासी अब्राहामा आरे गोठ कोयी .

![](https://cdn.door43.org/obs/jpg/360px/obs-en-05-03.jpg)

देवाय आख्या, आंय बादी-शक्तीवाळो देव हेय आंय तोआरे योक वोचन लाहु तोवे अब्राहामाय दोरतीवोय पोडीन पागे पोड्यो.देवाय अब्राहामाल यीबी आख्या, तूअ खूब बादी जाती आबहो ओहे. आंय तुल आन तोअ पोहोहाल हारी दोरती होरा हाठी कनान देश दिही आन आंय बारीमास त्याहा देव ओही.तुल आपे गोअने बादा आदम्याहाल मायअंगा चामडी काडना हेय.

![](https://cdn.door43.org/obs/jpg/360px/obs-en-05-04.jpg)

तोअ दोनारी साराय योका पोहाल जन्म दी – तो मानता पोहो ओरी. त्या नाव इसहाक थोवजे. आंय त्याआरे मांअ वोचन इतवी राखही आन तोअ योक मोठी जाती बोनावी.आंय ईश्माएला कोयबी योक मोठी जाती बोनावाही, पेन मां वोचन इसाका आरे रोय, तोवे देवाय अब्राहामा नाव बदलील अब्राहम कोय देना,त्या अर्थ हेय खूबजाहा आबहो. देवाय साराय नाव बदलील सारा कोय देना, त्या अर्थ हेय खोरीआयहो.

![](https://cdn.door43.org/obs/jpg/360px/obs-en-05-05.jpg)

त्याअ दीही अब्राह्माय त्या गोअने बादा आदम्याहा मायअंगा वोरे चाबडा काड्या. जोवे योक वोरहा निगी गोया पासे,जोवे अब्राहम १०० वोरहा आतो आन सारा ९० वोरहा आती,तोवे साराय अब्राहमा पोहाल जन्म देनो.जेहेके देवाय त्याहाल आखला आंता त्याहाय त्या नाव इसाक थोव्या.

![](https://cdn.door43.org/obs/jpg/360px/obs-en-05-06.jpg)

जोवे इसाक जुवान जायो तोवे देवाय इं आखीन अब्राहमा विश्वासा पारोख कोयी, तोअ योकूलता पोहाल ले, आन त्याल मां सेवाहाठी माय टाक. पासे अब्राह्माय देवा गोठ मानी आन आपे पोहाल देवा सेवेहाठी तीयारी कओयो.

![](https://cdn.door43.org/obs/jpg/360px/obs-en-05-07.jpg)

जोवे अब्राहम आन इसाक सेवा कोअना जागा जाए लाग्या तोवे इसाकाय होद्या,ऐ आबा, आपहावोय सेवेहाठी लाकडेते हेय पेन सेवेहाठी बोकडो केस हेय? अब्राह्माय आख्या, ऐ मां पोहा, देव सेवेहाठी बोकडो दी.

![](https://cdn.door43.org/obs/jpg/360px/obs-en-05-08.jpg)

जोवे त्या सेवा कोअना जागाव पोची गोया, तोवे अब्राह्माय इसाकाल बांदीन वेदीवोय हुवाडी देना. तोअ आपे पोहाल माअनारोज आतो आन देवाय आख्या, उबोरो! पोहा नुकसान मा कोअहे! आमी आंय होमजी गोयहो का तुयें मां बीख राखली हेय काहाका तुयें योकूलता पोहाल बी मांहाठी वाचाडी नाय थोव्या,

![](https://cdn.door43.org/obs/jpg/360px/obs-en-05-09.jpg)

जागेज अब्राह्माय योका मेंडाल देख्या जीअ जाडहाम गुसवालां आंता. इसाका बदले सेवाहाठी मेंडाल वापऱ्या.अब्राह्माय ख़ुशी-ख़ुशी मेंडाल सेवेहाठी चडवी देना.

![](https://cdn.door43.org/obs/jpg/360px/obs-en-05-10.jpg)

तोवे देवाय अब्राह्माल आख्या काहाका तूअ मांहाठी बादाज काय दा तीयार आतो, ईही हुदी का आपे योकलुता पोहालबी, त्याहाठी आंय तुल बोरकत दाअ वोचन लाहु. तोअ पोहे बादळामाने चांदूलाहा कोयता बी वोदी रोय. काहाका तूअ मां आज्ञा मानही त्याहाठी आंय तोअ कुटुबाकोय दोरती बादी जातील बोरकत दिही.

*उत्पत्ती अध्याय १६-२२ हुदी योक बायबल गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_05_128kbps.m4a

## 6. देव इसाका हाठी व्यवस्था कोहे .

https://openbiblestories.org/l/mke/story-6/

![](https://cdn.door43.org/obs/jpg/360px/obs-en-06-01.jpg)

जोवे अब्राहम खूब डाअयो होय गोयो तोवे त्या पोहो इसाक योक जुवान ओय गोयो. त्याहाठी अब्राहमाय त्याअ योका सेवाकाल त्या पोहो इसाक याहाठी ज्या देशामायने योक दोनारी लाहाठी दोवाड्या जाअ त्या जातुले आते.

![](https://cdn.door43.org/obs/jpg/360px/obs-en-06-02.jpg)

जाअ अब्राह्मा जातुले रोय त्या देशांम जाहाठी योक मोठी वाटी पासे देवाय त्या सेवका वोळखात रिबका आरे कोअडी. ती अब्राह्मा बाहा पोहो-पोही.

![](https://cdn.door43.org/obs/jpg/360px/obs-en-06-03.jpg)

रिबका आपे कुंटुंबाल सोडीन त्या सेवका आरे पासी जाअहाठी मानी गोयी. जेहेके ती जाय पोची इसाकाय तीअ आरे वोराड कोय लेअदा.

![](https://cdn.door43.org/obs/jpg/360px/obs-en-06-04.jpg)

वार वोरहा पासे, अब्राहम मोय गोयो.तोवे देवाय अब्राह्मा पोहो इसाकाल, अब्राह्मा आरे कोअला वोचना लिदे बोरकत देनी. त्या वोचनामाय देवा योक मानता आंता का अब्राह्मा मोजाय नाय ओले पोहे ओरी.पेन इसाका दोनारी रिबकाल पोहे नाय जाअये.

![](https://cdn.door43.org/obs/jpg/360px/obs-en-06-05.jpg)

इसाकाय रिबका हाठी पार्थना कोअयी,आन देवाय तीअ डेडीम योकूजदा बेन पोहोहा दीही राअहाठी शक्ती देनी. जोवे त्येअ पोहे रिबका डेडीम आते तोवे त्येअ योक-बिजा आरे जुलाया टेक्ये,त्याहाठी जी काय ओय रोयला आंता रिबकाय ती देवाल आखी देना.

![](https://cdn.door43.org/obs/jpg/360px/obs-en-06-06.jpg)

देवाय रिबकाल आख्या, तूअ बेन पोहोहाल जन्म देहे. त्याहा पोहे बेन जुदी-जुदी जात्या बोनी. त्या योक-बिजा आरे जुलायी. पेन मोठा पोहाहीने जन्म ओनारी जात वांहाना पोहाहीने ओनारी जाती आज्ञा मानारी ओरी.

![](https://cdn.door43.org/obs/jpg/360px/obs-en-06-07.jpg)

जोवे रिबका पोहोहा जन्म जायो, तोवे मोठो पोहो लाल आन आंगावोय जोट्ये आते,आन त्याहाय त्याय नाव इसाव थोव्या.तोवे वाहानो पोहो एसावा पागाल दोईन जन्माल येनो, आन त्याहाय त्याय नाव याकूब थोव्या.

*उत्पती अध्याय २४:१-२५:२६ हुदी योक बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_06_128kbps.m4a

## 7. देव याकूबाला बोरकत देहे.

https://openbiblestories.org/l/mke/story-7/

![](https://cdn.door43.org/obs/jpg/360px/obs-en-07-01.jpg)

जोवे पोहा मोठा ओय गोया तोवे याकूबाल गोज रोयना हारा लागे, पेन एसावाल जनावरे मायना पटे. रिबका याकूबा आरी रोयी, पेन इसाकाय इसावावोय माया राखी.

![](https://cdn.door43.org/obs/jpg/360px/obs-en-07-02.jpg)

योक दिही, जोवे एसाव जनावरे मायीन पासी येनो तोवे तोअ खूब बूखो आतो. इसावाय याकूबाल आख्या, जी तूऐ रादह्या त्यामाने वायज मान दे. याकूबाय उत्तर देना, पोयला मांआरे ई वचन ले का पोयलो ओअना बादीज वस्तू तुल मिळा जोजे, ती बादीज तू मान देहे. सेंले एसावाय त्या बाद्यो वस्तू याकूबाल दाअ हाठी वोचन दी देना. तोवे याकूबाय त्यामाने आरदा खायना देना.

![](https://cdn.door43.org/obs/jpg/360px/obs-en-07-03.jpg)

इसाक एसावाल बोरकत दाअ आतो. पेन त्या पोयला त्याय ऐहेके कोया, रिबका आन याकूबाय याकूबा एसाव ओना डोंग कोयीन त्याल ठोगाड्या. इसाक डायो आतो आन आमी देखाता बी नाय आतां.त्याहाठी याकूबाय एसावा फाडके पोव्ये आन बोकडी चाबडा आपे बोचीही आन आथावोय वेटाळी लेदा.

![](https://cdn.door43.org/obs/jpg/360px/obs-en-07-04.jpg)

याकूब इसाकाही येनो आन आख्या, आंय एसाव हेय. आंय याहाठी येनहो का तूअ मान बोरकत देअ. जोवे इसाकाय बोकडी जोटह्या जाएया आन फाडकाहाल गांदाडे,तोवे त्याय विचार कोयो का ओ इसाव हेय आन त्याय त्याल बोरकत देनी.

![](https://cdn.door43.org/obs/jpg/360px/obs-en-07-05.jpg)

एसावाय याकुबावोय कुहुदाये काहाका याकूबाय त्या पोयला पोहा होक आन त्याआरे त्या बोरकत बी पेचकी लेदली आता. सेंले त्याय आबहा मोयना पासे याकूबाल माअना उकती बोनावी.

![](https://cdn.door43.org/obs/jpg/360px/obs-en-07-06.jpg)

पेन रिबकाय एसावा उकतील वोनाय लेदा. त्याहाठी तीअ आन इसाकाय याकूबाल त्यांहा जातुलाहा आरे राअ हाठी खूब दूर दोवाडी देनो.

![](https://cdn.door43.org/obs/jpg/360px/obs-en-07-07.jpg)

याकूब वार वोरहे हुदी जातूलाहा आरे रोयो. तोवे त्याय वोराड कोअया आन त्याल बारा पोहा आन योक पोही जायी. देवाय त्याल खूब धनवान बोनावी देनो.

![](https://cdn.door43.org/obs/jpg/360px/obs-en-07-08.jpg)

वीस वोरहे हुदी कनाना माय त्याअ गोआ हिने दूर रोयन पासे, याकूब त्या कुंटूब, त्या नोकर, आन त्या जनावरेहा टोळो लीन पासी येनो.

![](https://cdn.door43.org/obs/jpg/360px/obs-en-07-09.jpg)

याकूब याहाठी खूब गाबरालो आतो काहाका त्यांय विचार कोयो का एसाव आमी बी त्याल त्याल माअनारो हेय. त्याहाटी त्याय मिळनी रूपाम जनावरहा टोळील एसावाही डोवाडी. जो नोकर त्या टोळीहील ली गोयला आता त्यांहाय आख्या, तोअ नोकर याकूब, ये जनावरे तुल देहे. तोअ माहारीज यी रोयहो.

![](https://cdn.door43.org/obs/jpg/360px/obs-en-07-10.jpg)

पेन एसाव आमी याकुबा नुकसान नाय कोअनोरो आतो. त्याकोअता, तोअ त्याल योकदा पासी ऐअन खूब खुश आतो. त्या पासे याकूब कनानमाय शांतीकोय रोयो. पासे इसाक मोय गोयो आन याकूब आन एसावाय त्याल पुर्या. वचना करार जो देवांय अब्राहामा आरी कोअलो आंतो आमी इसाकावोरे याकूबाव यी गोयो.

*उत्पती अध्याय २५:२७-३५:२९ हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_07_128kbps.m4a

## 8. देव युसुफ आन त्या कुंटूबाल वाचाडेहे .

https://openbiblestories.org/l/mke/story-8/

![](https://cdn.door43.org/obs/jpg/360px/obs-en-08-01.jpg)

वार वोर्हा पासे ,जोवे याकूब डायो ओय गोयो, तोवे त्याय आपे होकलालो पोहो युसुफाल त्या बाहाहां होदपुश कोराहाठी दोवाड्या ज्या जनावरहा टोळी देख-रेख कोअता आता.

![](https://cdn.door43.org/obs/jpg/360px/obs-en-08-02.jpg)

युसूफा बाहा त्यावोय कुहुदाता आता काहाका त्याहां आबहो त्यावोय वोदारे माया कोअतो आतो आन याहाठी बी का युसुफ होपने ऐतो आतो का तोअ त्याहां राज कोअनारो ओय जाय. जोवे युसुफ त्या बाहाही येनो तोवे त्याहां त्याल गुलाम बोनाडी लेदो आन त्याल नोकराहा व्यापार कोअनाराहाल वेची देना.

![](https://cdn.door43.org/obs/jpg/360px/obs-en-08-03.jpg)

गोअ पासे फिअरा पोयला युसुफा बाहाहाय युसुफा फाडके फाडीन बोकडी लोयामाय बिजवी देना. पासे त्याहांय तीं फाडका त्याहा आबहाल देखाड्या काहाका तोअ यी विचार कोय का योक्ता डोगामाने जनावाराय युसुफाल मायी टाकह्या. याकूब खूब नाराश आतो.

![](https://cdn.door43.org/obs/jpg/360px/obs-en-08-04.jpg)

नोकराहा व्यापार कोअनारे माअहे युसुफाल मिस्रमाय ली गोये. नील नोयी कोडसाव बोठलो मिस्र देश योक मोठो आन शक्तीवाळो देश आतो. त्यां नोकराहा व्यापार कोअनाराहाय युसुफाल योका मातला सरकारी सांबा नोकरा रुपाम वेची देना. युसुफाय आपे मालका हारीरीते सेवा कोअयी, आन देवाय युसुफाल बोरकत देनी.

![](https://cdn.door43.org/obs/jpg/360px/obs-en-08-05.jpg)

त्या मालका दोनारीय युसुफा आरे हूवाहाठी कोशीश कोयी , पेन युसुफाय ऐहेके देवा विरूद पाप कोयना नाय आख्या. तील रोग कोय येनी आन युसुफावोय खोटो गुनो लावी देनो. त्त्याहाठी त्याल दोयीन जेलीमाय दोवाडी देना. ईही हुदी का जेलीमाय बी, युसुफ देवा भक्तीम खोरो रोयो, आन त्याल देवाय बोरकत देनी.

![](https://cdn.door43.org/obs/jpg/360px/obs-en-08-06.jpg)

बेन वोरहा पासे, युसुफ आमी बी जेलीमाय आतो, तोअ खोरो काहा नाय आतो तेबी. योक राती, फारो, जेहेके का मिश्री माअहे आपे राजाल हात कोअतेहे, आन बेन होपने देख्ये त्याहाके त्याल खागावागा कोय देना. त्या कोहोबी होमजाडनारो त्याल त्यां होपनाहा अर्थ नाय आखी सक्यो.

![](https://cdn.door43.org/obs/jpg/360px/obs-en-08-07.jpg)

देवाय युसुफाल होपनाहा अर्थ आखाहाठी शक्ती देनी, त्याहाठी फारोय जेलीमाने त्याल पाही हाद्या. युसुफाय त्या होपनाहा अर्थ होमजाडयो आन आख्या, देव भोरपूर पिका वाळा सात वोरहा पासे काळा सात वोरहे दोवाडनारो हेय.

![](https://cdn.door43.org/obs/jpg/360px/obs-en-08-08.jpg)

फारो युसुफाकोय ओलो खुश जायो का त्याय त्याल मिस्र बिहीरो शक्तीवाळो माअहु थोवी देनो.

![](https://cdn.door43.org/obs/jpg/360px/obs-en-08-09.jpg)

युसुफाय हारा पिकावाळा सात वोरहाम खूब-खूब खायना गोळो कोरा आख्या. जोवे सात वोरहा काळ पोडयो तोवे युसुफ माअहाल तीअ खायना वेच्या काहाका त्यांहावोय वोदी खायना रोय.

![](https://cdn.door43.org/obs/jpg/360px/obs-en-08-10.jpg)

तोअ काळ फक्तो मिस्र माअज नाय, पेन कानान माय बी खूब आतो जाअ याकूब आन त्यां कुंटूब रोय.

![](https://cdn.door43.org/obs/jpg/360px/obs-en-08-11.jpg)

याहाठी याकूबाय आपे बादहाने मोठा पोहाल खायना वेचाता लाहाठी मिस्र माय दोवाडया.जोवे त्या खायना वेचाता लाहाठी युसुफा हुंबुर उबा रोया तोवे त्या बाहाहाय युसुफाल नाय वोळख्या.पेन युसुफाय त्याहाल वोळखी लेदा.

![](https://cdn.door43.org/obs/jpg/360px/obs-en-08-12.jpg)

ई होमजाहाठी का त्या बदलाय गोयहा त्यांहा होदपुश कोयन पासे,युसुफाय त्याहाल आख्या,आंय तुमे बाहा युसुफ हेय. बिअता मा. जोवे तूम्हाय मान गुलामा रूपाम वेची देनेल तोवे तूम्हाय खोटा कोयना ठरवूला, पेन देवाय त्या खोटाकोय हारा कोरा वापर कोयो!या आन मिस्रमाय राअ काहाका आंय तुमा आन तुमे कुंटूबा खायना व्यावथा कोऊ.

![](https://cdn.door43.org/obs/jpg/360px/obs-en-08-13.jpg)

जोवे युसुफा बाहा गोअ फिरी गोया आन आपे आबहो याकूब याल आख्या का युसुफ आमी बी जीवतो हेय तोवे तो खूब खुश जायो.

![](https://cdn.door43.org/obs/jpg/360px/obs-en-08-14.jpg)

आमीते याकूब योक डाअयो माअहू आतो तेबी तोअ आपे कुंटूबा आरी मिस्रमाय निगी गोयो, आन त्ये तांज रोते लाग्ये. याकूबा मोरा पोयला, त्याय आपे बादा पोहोहाल बोरकत देनी.

![](https://cdn.door43.org/obs/jpg/360px/obs-en-08-15.jpg)

वोचना तीअ मानता जी देवाय अब्राहमा आरी कोयला ती इसाकावोय आन त्या पासे याकूब,आन त्या पासे त्या बारा पोहा आन त्यांहा कुंटूबाय यी गोयी. त्यां बारा पोहोहा -पोहे इस्रायला बारा जाती बोनी गोया.

*उत्पती अध्याय ३७-५० हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_08_128kbps.m4a

## 9. देव मोशेल निवडी लेहे

https://openbiblestories.org/l/mke/story-9/

![](https://cdn.door43.org/obs/jpg/360px/obs-en-09-01.jpg)

युसुफ मोय गोयो पासे,त्या बादे जातुले मिसर देशाम रोते आते. त्ये आन त्याहां पोहे वार वोरहे ताअ रोये आन त्यांहाल खूब पोहे जाये.त्याहाल इस्राएली ऐहेके आखते आते.

![](https://cdn.door43.org/obs/jpg/360px/obs-en-09-02.jpg)

होव वोरहा पासे इस्राएली माअहे खूब वादी गोये. युसुफाय कोयला काम मिसरी माअहे विहिराय गोये आमी इस्राएली माअहा बिख लागती लागी.काहाका त्ये खूब आते त्याहाठी तोवे मिसरावोय राज कोय रोयला फारोय इस्राएली माअहाल मिसरी माअहाल आवत्ये कोय थोव्ये.

![](https://cdn.door43.org/obs/jpg/360px/obs-en-09-03.jpg)

मिसऱ्याहाय इस्राएलहाल खूब ओवालाहा बांधकाम आन मोठया-मोठया शेहराहाल तियार कोराहाठी जोबरदस्ती कोयी.ओहोडा कठीन कामहाके त्याहां जीवन खूब वोखा जाया, पेन देवाय त्याहाल बोरकत देनी आन आजू पोहे देने.

![](https://cdn.door43.org/obs/jpg/360px/obs-en-09-04.jpg)

फारोय ऐअया ला इस्राएली माअहाल खूब पोहे एतेहे, याहाठी त्याय हुकुम देनो का इस्राएली माअहा पोहहाल नील नोयीम टाकी देअना.

![](https://cdn.door43.org/obs/jpg/360px/obs-en-09-05.jpg)

योकी इस्राएली बाई योक पोहाल जन्म देनो. ती आन तीअ दोनाराय त्या पोहाल वार वाआं हुदी दोबाडा कोशीश कोअयी.

![](https://cdn.door43.org/obs/jpg/360px/obs-en-09-06.jpg)

जोवे त्या पोहा आयोहो-आबहो त्याल दोबाडी सक्ये नाय, तोवे त्याहां त्या पोहाल मोअनापाने वाचाडा हाठी त्याल योकी जेपनारी सिबलीम थोवीन नील नोयी कडसावोय गुनद्यामाय थोवी.त्या पोहा मोठी बोअही त्या काय हूचबेहे तीअ ऐअती रोयी.

![](https://cdn.door43.org/obs/jpg/360px/obs-en-09-07.jpg)

फारो पोही ती सिबली उगाडीन माअजे ऐअहे. तोवे तीअ त्याल त्ये पोहो बोनाडयो. तीय त्या पोहोल दुध पाजाहाठी योकी इस्राएली बाईल हाद्या, पेन तीअ त्या आयहो आती ई तील मालूम नाय आता. तोवे तीं पोहां मोठा जायां आन त्याल त्याल आयही दुधा गरज नाय आती, तोवे त्येंय त्याल फारो पोहयील देना,तीअ त्या नाव मोशे थोव्या.

![](https://cdn.door43.org/obs/jpg/360px/obs-en-09-08.jpg)

योक दिही,जोवे मोशो मोठो जायो,तोवे त्याय योका मिसरी माअहाल योका यहूदी आवत्याल ठोकतां देख्या.मोशाय त्याअ इस्राएली बाहाल वाचाडा कोशिष कोअयी.

![](https://cdn.door43.org/obs/jpg/360px/obs-en-09-09.jpg)

आपहाल कादा ऐअ नाय ई ऐयीन मोशाय त्या मिसऱ्याल माई टाक्या आन त्या कूडी पूरी. पेन मोशाय कोयला काम कुयें तेबू देखला आता.

![](https://cdn.door43.org/obs/jpg/360px/obs-en-09-10.jpg)

जोवे फारोय मोशाय कोयला कामाबद्दल वोनायो तोवे त्याय त्याल मारा कोशीश कोयी. फारो राखवाळ्याहीने हारा राअहाठी मोशो मिसर देश सोडीन डोगाम नाअही गोयो.

![](https://cdn.door43.org/obs/jpg/360px/obs-en-09-11.jpg)

मोशो आमी मिसर देशा पाने दूर डोगाम मेंढे चाअरा टेक्यो त्याय ताअज योकी बाई आरे वोराड कोअया आन त्याल बेन पोहा जाया.

![](https://cdn.door43.org/obs/jpg/360px/obs-en-09-12.jpg)

योक दिही मेंढे चाऐ तोवे, मोशाय योक जाड सिलगुता देख्या. पेन ती जाड सिलगीन बूबऱ्या जाया नाय ऐहेके त्याल देखाय येना.पासे ती हारीरीते ऐरा तोअ त्यां जाडाही गोयो.तोअ त्या सिलगुनारा जाडाही जाय तोवे, देवा आवाज त्यां कानाम पोडयो, मोशा, तू तोअ पागहामाने चापले काड. काहाका तू पवित्र जागावोय उबो हेय.

![](https://cdn.door43.org/obs/jpg/360px/obs-en-09-13.jpg)

देवाय आख्या, मायें मांअ माअहा दुख ऐअला हेय.आंय तुल फारोही मा माअहाल मिसऱ्याहा ताबामाने सोडवाहाठी दोवाडा हेय.आंय त्याहाल कनान देश देनोरो हेय, जी मायें अब्राहम, इसाक आन याकूबाल दांहाठी मानता कोयला आता.

![](https://cdn.door43.org/obs/jpg/360px/obs-en-09-14.jpg)

मोशाय आख्या, जोवे माअहा मान होदया का तुल कुअ दोवाड्याहा, तोवे आंय त्याहाल काय आखू? देवाय आख्या,आंय हेय तो हेय.त्याहाल आख, आंय हेय यां मान तुमेही दोवाडला हेय. त्याहाल इंबी आख का, आंय त्याहां आगलाडायहा मनजे अब्राहाम,इसाक आन याकूबा देव हेय. यीज मा कायम नाव हेय.

![](https://cdn.door43.org/obs/jpg/360px/obs-en-09-15.jpg)

मोशो खूब बीअ गोयो आन फारोही जाहाठी नाय आखतो लाग्यो काहाका त्याल हारीरीते बोलता येय नाय, याहाठी देवाय मोशा बाहा,अहरोन,याल त्या मदतीहाठी दोवाड्या.देवाय मोशो आन अहरोनाल आगलाज आखी थोवला का फारो टीनी कोरी.

*बायबला गोठ:निर्गम १-४*

Audio: https://git.door43.org/OBS-TLF/mke_obs/releases/download/v1/mke_obs_v1_09_128kbps.m4a

## 10. दहा पिडा

https://openbiblestories.org/l/mke/story-10/

![](https://cdn.door43.org/obs/jpg/360px/obs-en-10-01.jpg)

देवात मोशाल आन अहरनाल चेतावनी देनी का फारो खूब टिनीवाळो ओय जाय. जोवे त्या फारोही पाही गोया तोवे त्याहाय आख्या, इस्राएला देव यी आखहे का, मा माअहाल जाअ दे! पेन फारो त्याहा नाय वोनायो आन इस्राएलीहाल जाअ हाठी सुटेअ कोरा राअदीन त्याय त्याहाल आजू खूब कष्ट कोराहाठी लाव्या.

![](https://cdn.door43.org/obs/jpg/360px/obs-en-10-02.jpg)

फारो त्या माअहाल जाअ दाहाठी पासीपासी नाय आखतो लाग्यो, याहाठी देवाय मिसर देशा वोय दहा हार्यानाय पिडा दोवाडया.यी पीडहीकोय, देवाय फारोल देखाड्या का तोअ फारो आन मिसरा देवाहा कोअता वोदारे शक्तीवाळो हेय.

![](https://cdn.door43.org/obs/jpg/360px/obs-en-10-03.jpg)

देवाय नील नोयील लोयावाळी कोय देनी,पेन फारोय आमी बी इस्राएलीहाल जाअ नाय देना.

![](https://cdn.door43.org/obs/jpg/360px/obs-en-10-04.jpg)

देवाय बादा मिसरमाय डेडके दोवाडये.फारोय देडके दूर कोराहाठी मोशाल विनंती कोयी. पेन बादा डेडके मोई गोये, फारोय आपे मनाल कठीण कोय लेदा आन इस्राएली हाल मिसर माने निगी नाय जाअ देना.

![](https://cdn.door43.org/obs/jpg/360px/obs-en-10-05.jpg)

याहाठी देवाय जुवहा पिडा दोवाडी. त्या पासे त्याय मगहा पिडा दोवाडी. फारोय मोशाल आन अहरनाल हाद्या आन त्याहाल आख्या का जर ती पिडाल रोअकी देय तर इस्राएली मिसर सोडीन जाय सकतेहे. तोवे मोशाय पार्थना कोयी तोवे देवाय मिसरमाने मगहाल काडी टाक्ये.पेन फारोय त्याअ मन कठीण कोय लेदा आन त्यां माअहाल सुअटे ऐयीन जाअ नाय देना.

![](https://cdn.door43.org/obs/jpg/360px/obs-en-10-06.jpg)

त्या आगला, देवाय मिसरीहया बादे पाळीव जनावरे रोग लागिन मोय जाअ देने.पेन फारो मन कठीण ओय गोयला आंता आन त्याय इस्राएलीहाल जाअ नाय देना.

![](https://cdn.door43.org/obs/jpg/360px/obs-en-10-07.jpg)

तोवे देवाय मोशाल फारो हुबूर वाराम बूबऱ्या टाका आख्या. जोवे त्याय ऐहेके कोया तोवे मिसरमाने माअहा चाबडीवोय दुखनारा पोपिला निगी येना, पेन इस्राएलीहाल कायज जाया नाय. देवाय फारो मनाल कठीण कोय देना, आन फारोय इस्राएलीहाल सुटे ओययीन जाअ नाय देना.

![](https://cdn.door43.org/obs/jpg/360px/obs-en-10-08.jpg)

त्या पासे, देवाय गाऱ्यो पाड्यो आन मिसरामाने बादेज पिके नाश कोय देने आन जो कादो बारे निग्यो त्याल माय टाक्या.फारोय मोशाल आन अहरनाल हाद्या आन त्याहाल आख्या, मांय पाप कोयोहो. तुमा जाय सकतेहे. सेंले मोशाय पार्थना कोयी, आन वादळामाने गाऱ्यो पोडना रुकाय कोयो.

![](https://cdn.door43.org/obs/jpg/360px/obs-en-10-09.jpg)

पेन फारोय पासी पाप कोयो आन आपे मन कठीण कोय लेदा. त्याय इस्राएलीहाल सुटे ओयीन जाअ नाय देना.

![](https://cdn.door43.org/obs/jpg/360px/obs-en-10-10.jpg)

सेंले देवाय मिसर वोय टोडाहा टोळाल याअ देना. या टोडहाय त्या बादा पिकहाल खाय लेदा ज्याहाल गारीहीकोय नाश नाय कोअला आंता.

![](https://cdn.door43.org/obs/jpg/360px/obs-en-10-11.jpg)

पासे देवाय आंदारा कोय देना जी तीन दिही हुदी रोया.यीई ओलाअ भीट आंता का मिसरी माअहे आपे गोमेने नाय निगी सक्ये.पेन जां इस्राएली माअहे रोअते आंते ताअ उजवाडो आंतो.

![](https://cdn.door43.org/obs/jpg/360px/obs-en-10-12.jpg)

या नोव पीडहा पासी बी, फारोय इस्राएलीहाल सुटे ओयीन जाहाठी नाय आखी देना. काहाका फारो नाय वोनालो आंतो याहाठी देवाय योक सेंले पिडा दोवाडाहाठी योजना बोनाडी.यीई फारो मनाल बदली दी.

*निर्गमन अध्याय ५-१० हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_10_128kbps.m4a

## 11. सण

https://openbiblestories.org/l/mke/story-11/

![](https://cdn.door43.org/obs/jpg/360px/obs-en-11-01.jpg)

देवाय मोशो आन अहरनाल फारोही यीई आखा दोवाड्या का इस्राएली लोकहाल जोअ देय.त्याहाय त्याल चेतवनी देनी का जर तो त्याहाल नाय जाअ दी. तर तर देव मिसरी माअहा आजू जनावरहा बादा पोयलाल माय टाकी. फारोय यीई वोनाय बी देवावोय बोरसो कोरा आन त्या गोठ माना नाय कोय देना.

![](https://cdn.door43.org/obs/jpg/360px/obs-en-11-02.jpg)

देवाय त्यावोय बोरसो कोअनारा पोयला पोहाल वाचाडा हाठी योक योजना बोनाडी थोवी. बादा कुंटुंबाय योक मेंडो लीन त्याल माअना हेय.

![](https://cdn.door43.org/obs/jpg/360px/obs-en-11-03.jpg)

देवाय इस्राएली लोकहाय त्या मेंडा लोय लीन त्याहा गोआ बाअनाही लावा आख्या. त्या माहाल बुजना आता आन पासे त्याल बेखमीरा बाखी आरे उतवाळ कोईन खायना हेय. त्याहाय त्या खायनाल खायीन पासे त्याहाल ताबाडूज मिसर सोडाहाठी तियार रोअ हाठी आख्या.

![](https://cdn.door43.org/obs/jpg/360px/obs-en-11-04.jpg)

जेहेके कोराहाठी देवाय इस्राएलीहाल हुकुम देनलो आंतो त्याहाय त्यारीते बादाज काय कोया. भोर-राती देव योका-योक पोयला पोहाल माअतो मिसरा माजेमाने ओयीन गोयो.

![](https://cdn.door43.org/obs/jpg/360px/obs-en-11-05.jpg)

इस्राएलीहा योका-योक गोआ बाअनाही लोय लागला आंता, त्याहाठी देवाय त्या गोअहाल सोडी देना. त्यामाजेने बादेज माअहे हारे आते.त्ये मेंडा लोया लीदे वाची गोअले आते.

![](https://cdn.door43.org/obs/jpg/360px/obs-en-11-06.jpg)

पेन मिसरी लोकहाय देवावोय बोरसो नाय कोअलो आतो आन त्या हुकूमाल नाय मानला आंता.याहाठी देवाय त्याहां गोआल नाय सोड्या.देवाय मिसरी लोकहा योका-योक पोयला पोहाल माई टाक्यां.

![](https://cdn.door43.org/obs/jpg/360px/obs-en-11-07.jpg)

जेलीमाने कैदयाहा पोहहा हीने लीन, फारो पोयला हुदी, योका-योक पोयला पोहाल मोयी गोया. त्याहा खूब दुखा लीदे मिसरा खूब माअहे रोडी रोयले आते आन बोंबली रोयले आते. त्या राती,

![](https://cdn.door43.org/obs/jpg/360px/obs-en-11-08.jpg)

फारोय मोशाल आन अहरनाल हाद्या आन आख्या, इस्राएली लोकहाल लीन ताबाडूज मिसरमाने निगी जा! मिसरा माअहा बी इस्राएली लोकहाल ताबाडूज निगी जाहाठी टिनी कोअयी.

*निर्गमन अध्याय ११:१-१२:३२ हुदी योक बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_11_128kbps.m4a

## 12. जायना .

https://openbiblestories.org/l/mke/story-12/

![](https://cdn.door43.org/obs/jpg/360px/obs-en-12-01.jpg)

इस्राएली माअहे मिसर माने निगीन खूब खुश आते.त्ये आमी आवत्ये नाय आते, आन त्ये करारा देशांम जाय रोयले आते! जी काय बी इस्राएलीहाय माग्या, मिसऱ्याहाय त्याहाल बादाज काय देना, ईही हुदी का होना आन चांदी आन बिज्या किमती वस्तू. बिहरा देशा आरदा माअहाय देवावोय बोरसो थोवो आन जोवे इस्राएली माअहे मिसरमाने निग्ये तोवे त्ये बी त्याहा आरे चाल्ये.

![](https://cdn.door43.org/obs/jpg/360px/obs-en-12-02.jpg)

आखा दीह्याम वादळा योक मोठो खांब त्याहा आगला-आगला चाले.आन राती वेळे ओ आगी खांबलो बोनी गोयो.देव जी काय त्या वादळा खांबामाय आतो,सदा त्याहा आरे आतो आन त्याहाय परवास कोयती वेळे त्याहाल वाट देखाडी.त्याहाल फक्त ओलहाज कोअना आंता का त्या पाहला चाले.

![](https://cdn.door43.org/obs/jpg/360px/obs-en-12-03.jpg)

वायज वाअके पासे,फारो आन त्या माअहाय त्याहा मनाल बदली देना. त्या इस्राएलीहाल पासी आपे आवत्या बोनाडना विचार आतो. याहाठी त्याहाय इस्राएली लोकहा पाहला गोया. ओ देवूज आतो ज्याय त्याहा मनाल बदली देनला आता. त्याय ऐहेके याहाठी कोया काहाका त्या इच्छा आती का बादेज ई जायी लेय का फारो आन मिसऱ्याहा बादा देवहा कोअता तोअ यहोवा, खूब शक्तीवाळो हेय.

![](https://cdn.door43.org/obs/jpg/360px/obs-en-12-04.jpg)

होमजाया का त्यां फारो सैनिक आन लाल दोरऱ्या विसमे अटकी गोये.त्ये खूब बीअ गोये आन रोअडा टेक्ये, आमहाय मिसराल काहा सोड्या? आमा मोयनारे हेय!

![](https://cdn.door43.org/obs/jpg/360px/obs-en-12-05.jpg)

मोशाय इस्राएलीहाल आख्या, बीअन बंद कोअ देव आजे तुमेहाठी लोडी आन बोचाडी. तोवे देवाय मोशाल आख्या, या माअहाल लाल दोर्या ऐहे आगला जां आख.

![](https://cdn.door43.org/obs/jpg/360px/obs-en-12-06.jpg)

तोवे देवाय त्या वादळा खांबाल लीन इस्राएली आन मिसऱ्याहा वीसमाय थोवी देना काहाका मिसरी माअहे इस्राएली लोकहाल ऐई नाय सक्ये.

![](https://cdn.door43.org/obs/jpg/360px/obs-en-12-07.jpg)

देवाय मोशाल लाल दोर्यावोय आपे आथ थोवाहाठी आख्या. पासी देवाय वाराकोय दोऱ्या पांअयाल हुदू आन उलटी कानी कोय देना,ज्याकोय दोऱ्यामाने योक वाट बोनी गोयी.

![](https://cdn.door43.org/obs/jpg/360px/obs-en-12-08.jpg)

इस्राएली माअहे त्याहा बेनी कानी पांअया कुडा आरे उखाली दोरतीवोरे दोऱ्यामाने आगला चाल्ये.

![](https://cdn.door43.org/obs/jpg/360px/obs-en-12-09.jpg)

तोवे देवाय त्या वाटीमाने वादळाल उसली लेदा याहाठी का मिसरी माअहे इस्राएलीहाल बोचीन जाते ऐई. मिसरी लोकहाय त्याहाल दोराहाठी त्याहा पाहला जायना ठरवी लेदा.

![](https://cdn.door43.org/obs/jpg/360px/obs-en-12-10.jpg)

सेंले त्याहाय दोऱ्या विसमाने त्या वाटीवोय इस्राएलीहा पाहला लाग्या, पेन देवाय मिसऱ्याहाल बियाडी देना आन त्याहा गाडल्यो रुकी देन्यो. त्यें बोंबला लाग्ये, नाहा! इस्राएली लोकहा ऐसने देव लोडी रोयलो हेय!

![](https://cdn.door43.org/obs/jpg/360px/obs-en-12-11.jpg)

बादे इस्राएली दोऱ्या बिहिरी कानी पोची गोये.तोवे देवाय मोशाल आख्या का तोअ पासी पांअयावोय आथ थोवे.जोवे मोशाय ऐहेके कोअया, तोवे पांई मिसरी सैनिकाहा वोय यीन पोडया आन आपे तिज रितीम यी गोया. बादा मिसरी सैनिक बुडी गोया.

![](https://cdn.door43.org/obs/jpg/360px/obs-en-12-12.jpg)

जोवे इस्राएली लोकहाय देख्या का मिसरी मोय गोयला आता तोवे त्याहाय देवावोय बोरसो कोअयो.त्याहाय बोरसो कोअयो क मोशो देवाहीने भविष्यो कोअनारो आतो.

![](https://cdn.door43.org/obs/jpg/360px/obs-en-12-13.jpg)

इस्राएली माअहे याहाठी बी खूब खुश आते काहाका देवाय त्याहाल मोयना पाने आन आवत्ये ओयना पाने वाचाडी लेदले आते. आमी त्ये देवा सेवा कोरा आन त्या आज्ञा पाळा हाठी सुटे आते. इस्राएली लोकहाय सुटना सन वाळा हाठी आन देवा स्तुती कोराहाठी आरदे गाने आख्ये काहाका त्याय त्याहाल मिसरी सैनिकाहा हीने बोचाडला आता.

![](https://cdn.door43.org/obs/jpg/360px/obs-en-12-14.jpg)

देवाय इस्राएलीहाल दर वोरही योक सन वाळा हुकूम देनो यी इतवाहाठी का केहेके देवाय मिसरी लोकहाल आरवी देना आन त्याहाल आवत्ये ओअना हीने सुटे कोअये ओ वोंनडाळना सन आखलो आतो.त्यामाय त्याहाल त्याहां सन वाळाहाठी योक चोखो मेंडो मायना आता, त्याल बुजना आता, आन त्याल बेखमीर बाखी आरे खायना आतो.

*निर्गमन अध्याय १२:३३-१५:२१ हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_12_128kbps.m4a

## 13. इस्राएला आरे देवा वोचन

https://openbiblestories.org/l/mke/story-13/

![](https://cdn.door43.org/obs/jpg/360px/obs-en-13-01.jpg)

इस्राएलीहाल लाल दोऱ्यामाने तिकानी लेजायन पासे, देव त्याहाल डोगामाने सीनाय आखतेहे त्या डोगाहे लीअ चाल्यो.ओ तो डोगो आतो जां मोशाय सिलगुता जाअडाल देखला आता.त्या माअहाय त्या डोगा निचे त्याहा मांडवा बोनाड्या.

![](https://cdn.door43.org/obs/jpg/360px/obs-en-13-02.jpg)

देवाय मोशो आन इस्राएला बादा माअहाल आख्या, तुमहाय सदा मा गोठ मानना हेय आन जी वोचन आंय तुमेआरी लाहु त्याल इतवी राखना हेय. जर तुमा ऐहेके कोहा, तर तुमा मा बक्षिश पोयसा, सेवोकाहा राज, आन योक चोखी जाती उचबी.

![](https://cdn.door43.org/obs/jpg/360px/obs-en-13-03.jpg)

देवा हीने त्या पाही याहाठी माअहाय तीन दिही हुदी स्वतःहाल तियार कोअया. तोवे देव सीनाय डोगा सेंडीमाने नीअचे उत्यो. जोवे तो येनो तोवे दोरती कापी उठी, बीज पोडी,धूवाय उठया, आन तुतारीही मोठो आवाज जायो. तोवे मोशो स्वतः डोगावोय चोडी गोयो.

![](https://cdn.door43.org/obs/jpg/360px/obs-en-13-04.jpg)

तोवे देवाय माअहा आरी योक वोचन लेदा. त्याय आख्या, आंय तुअमे देव, योहवा हेय. आंयज हेय ज्याय तुमहाल मिसरा आवत्ये ओयनापाने सोडव्या.कोहाबी बिजा देवा सेवा नाय कोअते.

![](https://cdn.door43.org/obs/jpg/360px/obs-en-13-05.jpg)

मुरत्यो नाय बोनाडाना आन त्याहा सेवा माअ कोअहा, काहाका आंय, यहोवा, तुमे योकूज देव हेय. खोटी रिते मा नावा वापर माअ कोयते. आठवडा दिहाल चोखो पाळा इत राखजा. बिहिरा शब्दाम, सोव दिहाम आपे बादा काम कोयना, सातवो दिही तुमेहाठी आराम कोयना आन मान इतवूना दिही हेय.

![](https://cdn.door43.org/obs/jpg/360px/obs-en-13-06.jpg)

आपे आयही आन आबहा मान राखना. खून नाय कोयना. सीनाळा नाय कोयना. चोरी नाय कोयना. आपे शेजाऱ्या दोनारी, त्या गुअ, नेते कोहीबी वस्तूल ली लेयना मोन नाय कोयना.

![](https://cdn.door43.org/obs/jpg/360px/obs-en-13-07.jpg)

तोवे देवाय या दहा आज्ञा दोगडा बेन पाट्याहा वोय लेखीन मोशेल देना. देवाय पाळाहाठी पासी खूब नियम देना. जर त्याहाय या नियमाहा पालन कोया तर देव त्यां माअहाल बोरकत दाअ आन त्याहा हारा राखा करार कोअया. पेन त्याय आख्या का जर त्याहाय त्या पालन नाय कोअया तर त्याहाल दोड मिळी.

![](https://cdn.door43.org/obs/jpg/360px/obs-en-13-08.jpg)

देवाय इस्राएलीहाल योक मोठो मांडवो बोनाडा बी आख्या – मिळना मांडवो. त्याय त्याहाल हारा-हारा आख्या का त्या मांडवाल केहेके बोनाडना हेय, आन त्या माजे कोअहयो वस्तू थोवना हेय. त्याय त्याहाल त्या मांडवाल बेन गाळहाम जुदा कोरा हाठी योक मोठो पोडदो बोनाडाहाठी बी आख्या. देव त्या पोडदा पाहालाऱ्या गाळाम यीई आन तां रोय. जाअ देव आतो त्या गाळाम जाहाठी परवानगी योकुज सेवोकाहा-सेवकाल आती.

![](https://cdn.door43.org/obs/jpg/360px/obs-en-13-09.jpg)

त्या माअहाल त्या मिळना मांडवा आगला योक वेदी बोनाडना आती. कादोबी जी देवा नियमा पालन नाय कोय तोअ त्या वेदीवोय योक जनावर ली येय. तोवे सेवक त्याल अर्पान कोरी आन वेदीवोय देवाहाठी अर्पना रुपाम सिलगाडी. देवाय आख्या का त्या जनावरा लोय त्या माअहा पापाल दोबाडी लीअ. ये रिते, आमी देव त्या पापाल नाय देखी. तीअ माअहु देवा नाजरीम चोखा उचबी. देवाय मोशा बाहा अहरनाल आन अहरना पोहोहाल सेवक ओराहाठी निवड्या.

![](https://cdn.door43.org/obs/jpg/360px/obs-en-13-10.jpg)

देवाय त्या माअहाल ज्या नियम देनला आता त्या नियमाहा पालन कोरा तियार जाया. त्या फक्त देवा माअहे ओरा आन फक्त त्याज सेवा कोराहाठी तियार जाया.

![](https://cdn.door43.org/obs/jpg/360px/obs-en-13-11.jpg)

वार दिही हुदी, मोशो सीनाय डोगा सेंडीमाय रोयो. तोअ देवाआरी गोठ कोय रोयलो आतो. पेन माअहे त्या पासी येयना वाट जोवी-जोवी थाकी गोये.त्याहाठी त्ये अहरनाही होना ली येने आन त्याल योक मूर्ती बोनाडा हाटी आख्या काहाका त्ये देवा वगर त्या सेवा कोय सके. यीई रिते, त्याहाय खूब मोठो रुपाम देवा विरूद पाप कोयो.

![](https://cdn.door43.org/obs/jpg/360px/obs-en-13-12.jpg)

अहरनाय वासडा रोकी होना योक मूर्ती बोनाडी. त्या माअहाय त्या मूर्ती सेवा कोयना सुरवात कोय देनी आन त्याल अर्पान कोया! त्याहा पापा कोय देवाल रोग कोय येलली आती. तोअ त्याहाल नाश कोय देनारो आतो. पेन मोशाय त्याहाल नाय मारा देवाल विनंती कोयी. देवाय त्या विनंतील वोनायो आन त्याहाल नाश नाय कोया.

![](https://cdn.door43.org/obs/jpg/360px/obs-en-13-13.jpg)

सेंले मोशो सीनाय डोगावोरे नीअचे उती येनो. तोअ त्या बेन पाटहील लेदला आता जीहीवोय देवाय दहा आज्ञेहेल लेखल्यो आत्यो. पासे त्याय त्या मूर्तील देख्या. त्याल ओली रग कोय येनी ती पाटही चुरो कोय देनो.

![](https://cdn.door43.org/obs/jpg/360px/obs-en-13-14.jpg)

पासे मोशाय त्या मूर्तील तोडीन त्या चुरो कोय देना, आन चुराल पांअयाम मिळवीन त्यां माअहाल तीअ पांअ पाजी देना.देवाय त्या माअहावोय योक पिडा दोवाडी आन त्यामाने खूब माअहे मोय गोये.

![](https://cdn.door43.org/obs/jpg/360px/obs-en-13-15.jpg)

ज्ये पाटहील मोशाय फोडी देनला आता त्याहा जागो लाहाठी मोशाय त्या दहा आज्ञाहा दोगडा नवी पाटी बोनाडी. तोवे तोअ पासी डोगावोय चडी गोयो आन पार्थना कोयी का देव त्या माअहाल माफ कोय. नवी पाटीवोय दहा आज्ञा लीन मोशो डोगावोरे नीअचे उती येनो. तोवे देवाय सीनाय डोगाहीने लीन मानता देशा हुदी इस्राएलीहाल वाट देखाडी.

*निर्गमन अध्याय १९-३४ हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_13_128kbps.m4a

## 14. जोंगलामाय भटकुना

https://openbiblestories.org/l/mke/story-14/

![](https://cdn.door43.org/obs/jpg/360px/obs-en-14-01.jpg)

देवाय इस्राएली लोकहाल त्या नियमाहाल आखा पारवाड्या ज्याहाल त्याहा कोय वोचना पालन कोअना हेय. पासे त्याय सीनाय डोगावोरे आगला त्याहा वाट देखाडी. तोअ त्याहाल मानता देशांम लीअ जानारो आतो.या देशाल कानान बी आखतेहे. देव वादळा खांबांमाने त्याहा आगला-आगला चाल्यो,आन त्ये त्या पाहाला-पाहाला चाल्यो.

![](https://cdn.door43.org/obs/jpg/360px/obs-en-14-02.jpg)

देवाय अब्राहम, इसाक आन याकूबाआरी मानता लेदला तीअ यीई मानता का तोअ मानता देश त्याहा पोहोहाल दिई, पेन यावेळे तां खूब जाती रोत्यो आत्या. त्याहाल कानानी आखे. येअ कानानी माअहे देवा सेवा नाय कोयते आते आन त्या आज्ञा नाय मानते आते. त्ये खोटया देवहा सेवा कोयते आते आन खूब खराब कामे कोयते आते.

![](https://cdn.door43.org/obs/jpg/360px/obs-en-14-03.jpg)

देवाय इस्राएली लोकहाल आख्या, जोवे तुमा त्या मानता देशामाय जाहा तोवे त्यां बादा कानानियहा हीने सुटे ऐई जाजा.त्याहा आरी दोस्ती मा कोहाआन त्याहा आरे वोराड मा कोहा.तुमहाल त्याहा बादी मुर्तीही नाश कोय देयना हेय. जर तुमा मा आज्ञा नाय मानहा, तर तुमा मा विगर त्याहा देवा सेवा कोरा लागहा.

![](https://cdn.door43.org/obs/jpg/360px/obs-en-14-04.jpg)

जोवे इस्राएली कानाना हिवेही पोअचे, मोशाय इस्राएला बादी जातीमाने योक-योक कोयीन बारा माअहे निवडये. त्याय त्याहाल जाईन त्या देशा मायनो लेहाठी इशारो देनो का ऐय का तोअ कोहोडो देश हेय. त्याहाल त्या कानानीयीहा मायनो बी लेयना आता का ऐय का त्या शक्तीवाळा हेय का अशक्त हेय.

![](https://cdn.door43.org/obs/jpg/360px/obs-en-14-05.jpg)

त्या बारा माअहा पुरा कानानमाने जाईन चाळीस दिही चाल्या आन पासी त्यां फिरी येना. त्याहाय माअहाल आख्या, तोअ देश खूब पाकवाळो हेय आन पिके खूब पिक देनारे हेय! पेन दहा मायना लेनाराहाय आख्या, त्याहा शहरे खूब मजबूत हेय आन माअहे लांबे-लांबे हेय! जर आपा त्याहाआरी लडाई कोताहा, तर खोराज आमा आराय जाहू आन आमहाल माय टाकी.

![](https://cdn.door43.org/obs/jpg/360px/obs-en-14-06.jpg)

ताबाडूज कालेब आन यहोशावा आन बिहीरा बेन मायना लेनाराहाय आख्या, यी खोरा हेय का कानाना माअहे उचे आन शक्तीवाळे हेय, पेन खोराज आपा त्याहाल आरवी सकतेहे! देव आपे हाठी लोडी!

![](https://cdn.door43.org/obs/jpg/360px/obs-en-14-07.jpg)

पेन माअहें कालेबा आन यहोशवा नाय मान्ये. त्ये मोशो आन अहरनावोय रोग कोय येनी आन आख्या, तूअ आमहाल या कठीण जागावोय काहा ली येनहो? आमहाल मिसर मायज राअ जोजता.जर आपा त्या देशाम जाहू तर लडाईम मोय जाहू, आन कनाना माअहे आपे दोनारीहील आन पोहोहाल आवत्ये बोनाडी ली. त्ये माअहे त्याहाल पासी मिसरमाय ली जाहाठी योक बिहीरो पुढारी निवडूनारे आते.

![](https://cdn.door43.org/obs/jpg/360px/obs-en-14-08.jpg)

जोवे त्या माअहाय ऐहेके आख्या तोवे देवाल खूब रोग कोय येनीली आती. तो मिळना मांडवाम येनो आन आख्या, तुमहाय मा विरूद काम कोयला हेय, याहाठी तुमहाल या जाडीम भटका पोडी. योका-योक जांअ जी वीस वोरहां नेते त्याअने वोदारे वय हेय ती मोय जाय आन कोवेबी त्या देशाम परवेस नाय कोरी जी आंय तुमहाल दाहू. फक्त कालेब आन यहोशवा परवास कोरी.

![](https://cdn.door43.org/obs/jpg/360px/obs-en-14-09.jpg)

जोवे माअहाय देवाल ऐहेके आखता वोनायो, तोवे त्त्या दुखी जाया काहाका त्याहाय पाप कोयलो आतो. याहाठी त्याहाय कनाना माअहाआरी लोडाई कोरा ठरवी लेदा. मोशाय त्याहाल नाय जां हाठी आख्या काहाका देव त्त्याहा आरी नाय जाय, पेन त्याहाय त्या नाय वोनाया.

![](https://cdn.door43.org/obs/jpg/360px/obs-en-14-10.jpg)

देव या लडाईम त्याहा आरी नाय गोयलो आतो, याहाठी कनानि लोकहाय त्याहाल आरावी देना आन त्याहामाने आरदाहाल मायी टाक्या. तोवे इस्राएली माअहे कनान माने फिरी येने. आगाढ्ये चाळीस वोरहे हुदी त्ये डोगाम ऐहे-तेऐ भटक्ये.

![](https://cdn.door43.org/obs/jpg/360px/obs-en-14-11.jpg)

इस्राएली माअहा कोय जाडीम भटकुना चाळीही वोरहाम, देवाय त्याहा गरजा पुऱ्या कोया. त्याय त्याहाल होरगामाने मन्ना आखतेहे ती बाखे देनी. त्याय लावरीही टोळो बी (जी हारकाज आकारा चिडे रोतहे) त्याहा मांडवाही दोवाडये काहाका त्याहावोय खाहाठी माहा रोय. त्या बादी वेळे, देवाय त्याहा फाडके आन चापलाहाल फाटनाहीने वाचाडी राख्या.

![](https://cdn.door43.org/obs/jpg/360px/obs-en-14-12.jpg)

यीही हुदी का देवाय त्याहाल पियांहाठी चमत्कार कोयीन खडकामाने पाई काअडया. पेन यीई बादा दीन बी, इस्राएली माअहाय देवा विरूद आन मोशा विरूद कायबी आखतेज रोये आन कुरकुर कोयी तेबी, देव बोरसावाळो आतो. त्याय जी मानता लेदला आता का तोअ अब्राहम, इसाक, आन याकूबा पोहोहा हाठी कोही त्याय ती कोया.

![](https://cdn.door43.org/obs/jpg/360px/obs-en-14-13.jpg)

योक वेळ आजू जोवे त्या माअहावोय पांइ नाय आता, देवाय मोशाल आख्या, खडकाआरे गोठ कोअ, आन त्यामाने पांइ निगी. पेन मोशाय खडका आरे गोठ नाय कोयी. त्याकोयता त्याय, होटीके खडकावोय बेनदा ठोक्या. ऐहेके रिते त्याय देवा अपमान कोयो. बादहा पियांहाठी पांइते निगी येना, पेन देवाल मोशावोय रोग कोय येनी. त्याय आख्या, काहाका तूअ ऐहेके कोअला हेय, याहाठी तू मानता देशाम परवास नाय कोहे.

![](https://cdn.door43.org/obs/jpg/360px/obs-en-14-14.jpg)

जोवे इस्राएली माअहे चाळही वोरहे जाडीम भटकी गोये, तोवे ज्याहाय देवा विरूद आखला आता त्ये बादे मोई गोयले आते. तोवे देवाय त्या माअहाल पासी त्या मानता देशा हिवेही हुदी ली गोयो. आमी मोशो खूब डाअयो ओय गोयलो आतो, याहाठी देवाय माअहाल वाट देखाडा हाठी त्या मदत कोराहाठी यहोशवाल निवड्या. देवाय मोशा आरे यी मानता लेदला आता का योक दिही तोअ त्या माअहाही मोशा रोको योक भविष्यो कोनारो दोवाडी.

![](https://cdn.door43.org/obs/jpg/360px/obs-en-14-15.jpg)

तोवे मोशाल योका डोगा सेंडीम जांहाठी आख्या काहाका तो त्या मानता देशाल ऐय सकी. मोशाय त्या मानता देशाल देख्या पेन देवाय त्याल त्यामाय जां परवानगी नाय देनी. तोवे मोशो मोई गोयो, आन इस्राएल लोकहाय तीस दिही हुदी इदगो कोयो. यहोशवा त्याहा नवो वाट देखाडनारो बोनी गोयो. यहोशवा योक हारो वाट देखाडनारो आतो काहाका त्याय देवावोय बोरसो कोयो आन त्या गोठ मानी.

*निर्गमन अध्याय १६-१७;गिनती१०-१४;२०-२७; व्यवस्थाविवरण ३४ हुदी बायबाला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_14_128kbps.m4a

## 15. मानता देश

https://openbiblestories.org/l/mke/story-15/

![](https://cdn.door43.org/obs/jpg/360px/obs-en-15-01.jpg)

सेंले आमी इस्राएली लोकहाल कनानाम, मानता देशाम परवास कोयना वेळ येनी. यहोशवाय कनानी शेहर यरीहो जी मोठ्या हिवेके हारा कोंला गोयला आता, तां बेन मायना लेनाराहाल एराहाठी दोवाड्या.त्याअ शेहरामाय रहाब नावा योक वेश्या रोती आती. त्येंय त्या मायना लेनाराहाल त्ये गोमे दोबाडी थव्या आन पासे त्याहाल नाअही पोडा हाठी मदत कोयी. तीअ ऐहेके कोया काहाका तीअ देवावोय बोरसो थोव्यो. जोवे इस्राएल माअहे यरोहो शेहरा नाश कोरी तोवे रहाब आन तीअ गोआ हारा राखाहाठी त्याहाय वचन देना. इस्राएलीहाल मानता देशाम जांहाठी यार्देन नोयी वोडाळीन जायना आता.

![](https://cdn.door43.org/obs/jpg/360px/obs-en-15-02.jpg)

देवाय यहोशवाल आख्या, पोयला देवा सेवाकाल आगला जा दाअ. जोवे देवा सेवका पाग पांयाल लाग्या तोवे यार्देन नोयी उचेने येनारो जओरो बंद जायो आन इस्राएली माअहे उखाल्या दोरती वोरे त्याकानी जाय सक्ये. यार्देन नोयी त्याकानी गोये पासे, देवाय यहोशवाल आख्या का केहेके रिते त्त्याहाय मजबूत यरीहो शेहरावोय लडाई कोयना.

![](https://cdn.door43.org/obs/jpg/360px/obs-en-15-03.jpg)

माअहाय देवा नियमा पालन कोया. देवाय आख्या त्यारीतेज बादा सैनिकाहाय आन देवा सेवकाहाय यरीहो शेहराल सोव दिही योक-योक वेळे फेरी मारी. पासे सातवा दिही. इस्राएलीहाय आजू सात वेले फेऱ्या माऱ्या.

![](https://cdn.door43.org/obs/jpg/360px/obs-en-15-04.jpg)

सेंले वेले फेऱ्या माऱ्या तोवे सैनिकाहाय आवाज कोयो आन देवा सेवाकाहाय आपे पाव्यो वाजाड्या. पासे यरीहो शेहरा बितडे पोडये.

![](https://cdn.door43.org/obs/jpg/360px/obs-en-15-05.jpg)

देवाय आज्ञा देन्या त्यारीतेके इस्राएलीहाय शेहरा नाश कोयो .त्याहाय फक्त राहाब आन तीअ कुंटूबाल जीवते थोव्ये, ज्ये पासे इस्राएला योक रोनारे बोन्ये. तोवे कनानाम रोनारे बीजे माअहे वोनाये का इस्राएलीहाय यरीहो शेहरा नाश कोयलो हेय, तोवे इस्राएली माअहे त्याहा आरी बी लोडी ऐहेके त्याहाल बिख लागी. देवाय इस्राएलीहाय आज्ञा गोठ कोयली आती का त्याहाय कनानी माअहा आरे शांती राखना नाय.

![](https://cdn.door43.org/obs/jpg/360px/obs-en-15-06.jpg)

पेन गिबोनी नावा कनानामाने योक माअहा टोळी यहोशवाल ठोगीन बोल्ये त्याहाय आख्या का त्या कनानाहीने खूब दूर रोतहा. यहोशवाय त्याहाआरे शांती गोठ कोरा विनंती कोयी. यहोशवा आन इस्राएलीहाय गिबोनी माअहे येनले आते ई देवाल होदला आता नाय.

![](https://cdn.door43.org/obs/jpg/360px/obs-en-15-07.jpg)

याहाठी यहोशवाय शांती गोठ कोयी. जोवे त्याहाल होमजाया का गिबोनी माअहाय त्याहाल ठोगी देनला हेय, तोवे त्याहाल खूब रोग चोडी, पेन तेबी त्याहाय गोठ पाळी काहाका त्याहाय देवा हुबूर त्याहाल वचन देनला आता. खूब वाआ पासे, कनानमाने बिजा माअहा टोळीअ राजहाय, अमोरी माअहे, वोनाये का गिबोनी माअहाय इस्राएली आरे गोठ कोयली हेय, तोवे त्याहाय त्याहा सैनिक योकठा कोयीन गीबोन्याहावोय चाल कोईन गोया. गिबोन्याहाय यहोशवाही आखी दोवाड्या आन त्याहाल मदत कोरा विनंती कोयी. याहाठी यहोशवाय इस्राएला सैनिक योकठा कोया आन गिबोन्याही पोचा हाठी पुरीरात चालता रोया.

![](https://cdn.door43.org/obs/jpg/360px/obs-en-15-08.jpg)

हाकाळहे त्याहाय अमोरी सैनिकाहाल योकदाज धोको देनो आन त्याहावोय चाल कोयी. त्या दिही इस्राएलीहा ऐहेने देव स्वतः लोडयो.

![](https://cdn.door43.org/obs/jpg/360px/obs-en-15-09.jpg)

त्याअ अमोरी माअहाम गडबड कोई देनी आन त्याहावोय मोठ्यो गाऱ्यो पोडयो,त्यामाय खूब अमोरी मोयी गोया. देवाय बी दिहाल वादळामाय योकाज जागावोय उबा राहाठी आज्ञा कोयी काहाका इस्राएलीहाल अमोऱ्याहा बादीरिते नाश कोरा वेल मिळे.

![](https://cdn.door43.org/obs/jpg/360px/obs-en-15-10.jpg)

त्याडीही देवाय इस्राएलीहाल मोठी जीत कोय देनी. देवाय त्यां सैनिकाहाल आराडी देने पासे, खूब कनानी माअहा टोळा योकठो यीन इस्राएलावोय चोडी गोया.

![](https://cdn.door43.org/obs/jpg/360px/obs-en-15-11.jpg)

यहोशवा आन इस्राएलीहाय त्यावोय लोडाई कोयीन त्याहा नाश कोयो. या लोडाई पासे देवाय इस्राएला बादा पोहोहाल मानता देश वाअटी देना.

![](https://cdn.door43.org/obs/jpg/360px/obs-en-15-12.jpg)

त्यापासे देवाय इस्राएला बादी हिवहेवोय शांती हुजबाडी देनी. तोवे यहोशवा डाअयो ओअयो, तोवे त्याय बादा इस्राएली लोकहाल योखठे हाद्यें.

![](https://cdn.door43.org/obs/jpg/360px/obs-en-15-13.jpg)

पासे यहोशवाय इस्राएली माअहाल देवाय त्याहाआरी कोयली गोठ ईतवी देनी का त्याहाय देवा आज्ञा पाळा.बादा माअहाय देवा आरी बोरसाकोय राअय आन त्याय आज्ञा पाळा वचन देना.

*यहोशवा १-२४ हुदी बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_15_128kbps.m4a

## 16. तारनारा

https://openbiblestories.org/l/mke/story-16/

![](https://cdn.door43.org/obs/jpg/360px/obs-en-16-01.jpg)

यहोशवा मोई गोयो पासे, इस्राएली माअहाय देवा रोका कोया नाय, उरला कनानी माअहाल नाहाडी देअता नाय येना देवा नियम पाळ्या नाय. याशिवाय आन जीवता देवा सेवा नाय कोयता इस्राएली माअहे कनानी देवहा पूजा कोयते लाग्ये. इस्राएलाल राजा नाय आतो, याहाठी बादे जांऐ आपे नजरीके जी हारा त्ये कोयते आते.

![](https://cdn.door43.org/obs/jpg/360px/obs-en-16-02.jpg)

इस्राएलीहाय सदा देवा आज्ञा तोडया, देवाय त्याहाल त्याहा विरोडयाहा आगला आर कोयीन सिको देनो. या विरोडयाहाय इस्राएली माअहा वस्तूहू चोरी कोयी, त्याहा धना नाश कोयो आन त्याहामाने खूब माई टाक्ये. खूब वोरहा पासे देवा आज्ञा तोडीना आन विरोडयाहा वोखो कोयीन जायो पासे त्याहाल ईतवा येना आन त्याहाय सुअटा हाठी देवाही दाहू लेदी.

![](https://cdn.door43.org/obs/jpg/360px/obs-en-16-03.jpg)

पासे देवाय त्याहाल योक तारनारो दोवाडयो ज्याय त्याहाल विरोदयापाने सोडव्या आन त्याहा माजे शांती उचबाडी देनी. पेन पासे इस्राएली माअहे देवाय विहीराय कोये आन पासी मूर्तीपूजन कोरा लाग्ये. पासे देवाय बाजुमाने मिद्यानी माअहा कोय त्याहाल आरवी देना.

![](https://cdn.door43.org/obs/jpg/360px/obs-en-16-04.jpg)

मिद्यानी माअहाय सात वोरहे इस्राएली माअहा अन्न-धान्य पेचकी लेदा. आमी इस्राएली खूब बीई गोया आन आपा मिद्यान्याहा आथाम सापडूहू नाय याहाठी त्या गोडदाम राअ लाग्या. सेंले आपे बोचाव उचबे याहाठी त्या देवाही विनंती कोरा लाग्या.

![](https://cdn.door43.org/obs/jpg/360px/obs-en-16-05.jpg)

योक दिही गिदोन नावा योक इस्राएली माअहू मिद्यानी आपे धान्यो चरे नाय याहाठी ठाकाज त्याहाल ऐया कोयतो आतो. यहोवा योक दूत यीन त्याल आख्या, ऐ शक्तीवाळा वीर, देव तोआरे हेय.जो आन इस्राएलीहाल मिद्यान्याहा आथामाने सोडवे.

![](https://cdn.door43.org/obs/jpg/360px/obs-en-16-06.jpg)

गिदोना आबहाय योका मूर्तीहाठी वेदी बोनाडली आती. देवाय गिदोनाल ती वेदी तोडा आख्या. पेन गिदोनाल माअहा बिख लागीयाहाठी त्याय आंदारा पोडाहाठी वाट ऐतो आतो.पासे त्याय ती वेदी फोडीन तीअ तुकडा-तुकडा कोया. मूर्तीहाठी बांदली वेदी जागेज त्याय जीवता देवाहाठी योक नवी वेदी बांदी आन त्यावोय देवाल जनावरे चोड्वीन अरपन कोया.

![](https://cdn.door43.org/obs/jpg/360px/obs-en-16-07.jpg)

बीजे दिही त्या वेदी कुअ तेबी नाश कोयलो हेय ई ऐयीन माअहाल खूब रोग कोययेनी. गिदोनाल माराहाठी त्याय गोअ गोया, पेन गिदोना आबहाय त्याहाल आख्या तुमा आपे देवा मदत कोराहाठी कोशीश काहा कोतेहे? जर तोअ देव हेय तर त्याल योखलाल हारा कोरा दाअ! त्याय ऐहेके आख्या याहाठी त्याहाय गिदोनाल माअया नाय.

![](https://cdn.door43.org/obs/jpg/360px/obs-en-16-08.jpg)

आन मिद्यानी माअहे पासी इस्राएली माअहा धान्य चोरी कोराहाठी येने. त्ये ओले बादे आते का, त्ये गोनाय नाय सक्ये ओले आते. गिदोनाय इस्राएली माअहाल योखठे हादीन मिद्यान्याहा आरी लोडाई लाअ तियार कोये. गिदोनाय देव आपहाल इस्राएली माअहा सूटको कोराहाठी वापर कोराहाठी कोनारो हेय या जाणं पोटा जोजे याहाठी देवाही बेन खुन मागी.

![](https://cdn.door43.org/obs/jpg/360px/obs-en-16-09.jpg)

पोयली खून ई गिदोनाय दोरतीवोय फाडको थोव्यो आन देवाल आख्या का हाकाळ हाकाळेहे दोरतीवोय जाकळा नाय पोडता फक्त फडकावोयज पोडा जोजे ऐहेके ओय. देवाय तेहेकेज कोया. बिहिरी राती, त्याय आख्या का दोरती बिजा जोजे पेन फाडको उखालो राअय ऐहेके ओय. देवाय तीबी कोया या बेनी खुनाहा कोय गिदोनाल जाणं पोटी का देव त्या वापर इस्राएलाल मिद्यान्याहा हीने सोडवाहाठी वापर कोनारो हेय.

![](https://cdn.door43.org/obs/jpg/360px/obs-en-16-10.jpg)

३२,००० इस्राएली सैनिक त्याही येना, पेन देवाय त्याहाल आख्या का, त्ये खूब हेय. याहाठी लोडाई कोरा बिनारा २२००० सैनिक त्याय पासी दोवाडया. देवाय गिदोनाल आख्या का त्या आजू खूब हेता. याहाठी ३०० सैनिक सोडीन आरदा बादहाल त्याय गोअ दोवाडी देने.

![](https://cdn.door43.org/obs/jpg/360px/obs-en-16-11.jpg)

ती राती देवाय गिदोनाल आख्या, तूअ मिद्यान्याहा मांडवा ऐहे जो आन त्या काय आखताहा ई वोनायन बिअतो नाय. याहाठी ती राती तोअ त्या मांडवाऐहे गोयो आन त्याहाल पोडला होपना योक मिद्यानी सैनिक आपे आऱ्याल आखता गिदोन वोनायो. त्या सैनिका आऱ्याय आख्या, या होपना अर्थ गिदोना सैनिक मिद्यानी सैनिकाहाल आरवी ऐहेके ओहे! गिदोन ई वोनायन देवा सेवा कोयी.

![](https://cdn.door43.org/obs/jpg/360px/obs-en-16-12.jpg)

आन गिदोन त्याअ सानिकाही पासी येनो आन त्याय बादहाल योक हिंग,योक वेनडला आन योक चुडो देनो. मिद्यानी सैनिक हुतला आता त्याअ मांडवा चोमखी रोय गोया.गिदोना ३०० सैनिकाहाल त्याहा चुडा वेनडलाम माजे थोव्या याहाठी मिद्यान्याहाल उजवाडो देखायो नाय.

![](https://cdn.door43.org/obs/jpg/360px/obs-en-16-13.jpg)

आन ,योकूज वेले गिदोना सैनिकाहाय वेनडले फोडये आन आपे चुडहा आग देखाया देनी. त्याहाय ज्या-त्याहा तुताऱ्यो फुक्यो आन आवाज कोयो, त्याहावोय देवा तलवार आन गिदोना तलवार!

![](https://cdn.door43.org/obs/jpg/360px/obs-en-16-14.jpg)

देवाय मिद्यान्याहा माय गडबड टाकी देनी आन त्याहाटी त्या त्याहामांयज योका-बीजाल ठोकता लाग्या आन मायता लाग्या.ताबाडूज मिद्तानी लोकहाल नाहाडाहाठी मदत कोराहाठी आर्दा इस्राएली माअहाल त्याहा गोओ हादां दोवाडये. त्याहाय त्यामाने खूबजाहाल मायी टाक्या आन आर्दाहाल इस्राएला दोरतीवोरे नाहाडी देने. त्येज दिही १२०००० मिद्यानी सैनिक माई टाक्या. देवाय इस्राएला ऐहके सूटको कोयो.

![](https://cdn.door43.org/obs/jpg/360px/obs-en-16-15.jpg)

माअहे गिदोनाल आपे राजा बोनाडा ऐते आते. गिदोनाय त्याहाल ऐहेके कोरा नाय आख्या, पेन त्याहामाने बादहाय मिद्यान्याहा हीने लेदला होना मुंदहीमाने आर्दया त्याय माग्या. माअहाय गिदोनाल खूब होना देना.

![](https://cdn.door43.org/obs/jpg/360px/obs-en-16-16.jpg)

पासे गिदोनाय त्या होनापाने महायाजक पोवे तोहोडा फडकारोका योक फाडका तियार कोया. पेन माअहाय त्या फाडकाल योक मूर्ती होमजीन त्या पूजा कोरा लाग्या. आन देवाय इस्राएलाल पासी वोखो देखाडयो, काहाका त्याहाय मूर्ती पूजन कोयला आता. देवाय त्याहा विरूद्याहा हीने आर कोई देनी.सेंले त्याहाय देवाज मदत मागी आन देवाय त्याहाल बिजो तारनारो दोवाडयो.

![](https://cdn.door43.org/obs/jpg/360px/obs-en-16-17.jpg)

ई गोठ खुबदा तेहेके-तेहेकेज जायी. इस्राएली पाप कोए,देव त्याहाल वोखो देखाडे, त्या ईतवी लेय आन देव त्याहा तारन कोराहाठी तारनारो दोवाडे. खूब वोरहाहीने, देवाय इस्राएली माअहा ही

![](https://cdn.door43.org/obs/jpg/360px/obs-en-16-18.jpg)

त्याहाल विरोदयाहा हीने सोडवाहाठी खूब तारनारा दोवाडया. सेंले, माअहाय बिहरा देशाहां रोको राजा देवाही माग्यो.त्याहाल उचो, हारो आन लोडाईम आगला कोअनारो राजा जोजतो आतो. देवाल ई पोट्या नाय, तेबी त्याय त्याहा मागनी कोय त्याहाल योक राजा देनो.

*बायबला गोठ: शास्ते १-३९;६-८*

Audio: https://git.door43.org/OBS-TLF/mke_obs/releases/download/v1/mke_obs_v1_16_128kbps.m4a

## 17. देवा दाविदाआरे गोठ

https://openbiblestories.org/l/mke/story-17/

![](https://cdn.door43.org/obs/jpg/360px/obs-en-17-01.jpg)

शौल इस्राएला पोयलो राजा आतो. इस्राएल माअहाल जोजे तोहोडो तोअ हारो आन उचो आतो. इस्राएलावोय वार वोरहे शौल राजाय हारा राज कोया.पेन पासे तोअ योक खराब राजा बोनी गोयो आन त्याय देवा आज्ञा मानी नाय, याहाठी देवाय त्या जागावोय राज कोराहाठी बिहरा माअहाल थोव्या.

![](https://cdn.door43.org/obs/jpg/360px/obs-en-17-02.jpg)

देवाय शौला पासे दावीद नावा योका इस्राएली जुवान्याल राजा ओरा निवडी लेदा. दावीद ओ बेथलेहेम गावामाने योक मेंडे पाळ्नारो आतो. तो आबहा मेंडे चायतो आतो दाविदाय वारदा मेंडहाल खा येनारा सिंहाल आन अस्वलाल मायला आता. दावीद ओ देवा बिख राखनारो हारो आन सेवा कोयनारो माअहू आतो.

![](https://cdn.door43.org/obs/jpg/360px/obs-en-17-03.jpg)

दावीद योक हारो लोडनारो पुढारी जायो. दावीद हानो आतो तोवे त्याय गल्याथ नावा योका राक्षा माअहाआरे लोडाई कोयी.गल्याथ ओ योक हिकाडलो, मजबूत आन तीन मीटर उचो आतो! पेन देवाय दाविदा मदत कोयी आन त्याकोयता गल्याथाल मायीन इस्राएली माअहाल सोडव्ये. त्यापासे दाविदाय इस्राएली लोकहा विरोदयाहा वोय वार जीत मिळव्यो याहाठी माअहाय त्याय वाखान कोयी.

![](https://cdn.door43.org/obs/jpg/360px/obs-en-17-04.jpg)

माअहे दाविदा वाखाण कोय ती ऐयीन शौलाल त्या रग ओरा लागी. शौलाय वारदा मारा कोशीश कोयी, पेन दाविदाय स्वतः शौलाहीने दोबीन बोठला गोडदामाय शौल गोयो. पेन शौलाल तो देखायो नाय.दावीद आमी शौला खूब जागेज आतो आन त्याल मोई सकतो आतो,पेन त्याय तेहेके कोया नाय.त्याकोयता, दाविदाय शौला फडकाहा सेडो कातर्यो आन देखाडीन कोया का राजा बोनाहाठी तोअ शौलाल मायी नाय.

![](https://cdn.door43.org/obs/jpg/360px/obs-en-17-05.jpg)

सेंले, शौल लोडाईम मोयी गोयो आन दावीद इस्राएला राजा बोन्यो. तोअ खूब हारो राजा आतो आन माअहे त्यावोय माया कोये. देवाय दाविदाल बोरकत देनी आन तोअ हारो जायो. दावीदाय वार लोडाया कोया आन देवाय त्याल इस्राएला विरोदयाहाल आरवाहाठी मदत कोयी. दाविदाय यरुशलेम जिकी आन तील आपे राजधानी बोनाडी. दाविदा काळाम इस्राएल शक्तीवाळा आन धनवान राज्यो बोन्या.

![](https://cdn.door43.org/obs/jpg/360px/obs-en-17-06.jpg)

दाविदाल योक मंदिर बादना आता ज्यामाय बादा इस्राएली माअहे देवा सेवा कोरी आन अरपन कोय सकी.लगबग ४०० वोरहे माअहे मोशाय बांदला दर्शना मांडवा हुबूर देवा सेवा कोयते आते आन अरपन लीअ येते आते.

![](https://cdn.door43.org/obs/jpg/360px/obs-en-17-07.jpg)

पेन नाथान सेवकाल दाविदाही गोठ लीन दोवाडया, तूअ लोडाई माअहू हेय याहाठी ई मंदिर बांदी सखये नाय. तोअ पोहो ती मंदिर बांदी. पेन आंय तुल खूब बोरकत दिही. तोअज पोहोहामाने योक माअहू मा माअहा वोय राज कोरी! बादी वेले राज कोयनारो दाविदा पोहोहा माने योकुज माअहू ती मशिहा.मशिहा ओ देवा निवडूलो बोरकोती जगामाने माअहाल त्याहा पापाहीने सोडवूनारो आतो.

![](https://cdn.door43.org/obs/jpg/360px/obs-en-17-08.jpg)

दाविदाय या शब्द वोनायान ताबाडूज देवाल धन्यवाद कोयो आन त्याय स्तुती कोयी,काहाका देवाय त्याल ओ मान आन खूब बोरकत दाअहाठी वोचन देनला आता. देव ई कोदही पुरा कोरी याबद्दल दाविदाल मालूम नाय आता. पेन मशिहा याआगला इस्राएली माअहाल लगबग १००० वोरहे त्याय वाट ऐरा पोडी.

![](https://cdn.door43.org/obs/jpg/360px/obs-en-17-09.jpg)

दाविदाय खोरा आन बोरसा कोय वार वोरहे राज कोया आन देवाय त्याल बोरकत देनी. तेबी,त्या जीवना सेंले त्याय देवा आगला खूब मोठो पाप कोयो.

![](https://cdn.door43.org/obs/jpg/360px/obs-en-17-10.jpg)

योक दिही दाविदा बादा सैनिक लोडाईहाठी बारे गोया तोवे, त्याय त्या राजवाडामाने योक खूब हारी बाईल आंगळूता देख्या.तीअ नाव बथशेबा आता.

![](https://cdn.door43.org/obs/jpg/360px/obs-en-17-11.jpg)

बिहिरी जागे ऐरा राअदीन, दाविदाय त्ये बाईल त्याहीं लीया आख्यां, याहाठी कादाल तेबी दोवाडया. तोअ तिअआरी हुतो आन तील तीअ गोअ दोवाडी देना. वार वेले पासे माआन मोईना हेय ऐहेके तीअ दाविदाल आखी दोवाडया.

![](https://cdn.door43.org/obs/jpg/360px/obs-en-17-12.jpg)

बथशेबा दोनारो उरिया ओ दाविदा हारो लोडनारो आतो. दाविदाय उरीयाल लोडाईमाने पासी हादया आन आपे दोनारी आरी राअ आख्या. पेन बिजा सैनिक लोदाई लोडताहा आन आपा गोअ जायना हारा नाय हेय ऐहेके होमजीन त्याय गोअ जाहाठी नाय आखी देना.याहाठी उरीयाल पासी लोडाईम दोवाडया आन सेनापतील आख्या का त्याय वोदारी लोडाईहि जागावोय उरिया थोवा जोजे मनजे उरिया लोडाईम मोयी जाय.

![](https://cdn.door43.org/obs/jpg/360px/obs-en-17-13.jpg)

उरिया मोई गोयो पासे दाविदाय बथशेबा आरी वोराड कोया पासे तीअ दाविदा पोहाल जन्म देनो. दाविदाय कोयला कामाकोय देवल रग कोई येनी. आन त्याय नाथान सेवकाल दाविदाही दोवाडीन त्याय पाप कोलो खराब आतो याबद्दल आख्या. दाविदाय त्याअ पापा कोयता ईत कोया आन त्याल माफ कोया. पासे मोयो ताऊहुदी दाविदाय खोराज कठीण वेले बी देवा आज्ञा पाळ्या.

![](https://cdn.door43.org/obs/jpg/360px/obs-en-17-14.jpg)

पेन पापा वोखो ऐहेके त्या पोहो मोई गोयो.दाविदा उगरुला जीवनाम त्याय कुटुंबाम पासे भिडा ओयता रोया आन त्या शक्तीबी खूब कमी जायी. दावीद देवाआरी बोरसोनाय रोयलो आतो तेबी देव त्याअ वोचन पाळाहाठी दाविदाआरी बोरसाकय रोयो.पासे दावीद आन बथशेबा याहाल आजू योक पोहो जायो, आन त्याहाय त्या नाव शलमन ऐहेके थोव्या.

*बायबला गोठ:शमुवेल १०;१५-१९;२४;३१; २ शमुवेल ५:७;११-१२*

Audio: https://git.door43.org/OBS-TLF/mke_obs/releases/download/v1/mke_obs_v1_17_128kbps.m4a

## 18. जुअदा-जुअदा राज्य

https://openbiblestories.org/l/mke/story-18/

![](https://cdn.door43.org/obs/jpg/360px/obs-en-18-01.jpg)

दावीद राजाय चाळही वोरहे हुदी राज कोया. तोवे तो मोई गोयो, आन त्या पोहाय शलमनाय इस्राएलावोय राज कोरा सुरवात कोयी. देवाय शलमना आरे गोठ कोयी आन त्याल होदया का त्याल बाद हाने वोदी काय जोजता हेय का देव त्याहाठी कोरी. सहलमनाय देवावोय माग्या का तोअ त्त्याल खूब अकालवाळो बोनाडी देय. ई गोठीकोय देवाल खुश कोया, याहाठी देवाय शलमनाल जगामाने बादहाने अकोलवाळो माअहू बोनाडी देना. शलमनाय खूब गोठयो हिक्या आन तोअ योक अकोलवाळो राज कोयनाआरो आतो. देवाय त्याल खूब धनवान बी बोनाडी देनलो आतो.

![](https://cdn.door43.org/obs/jpg/360px/obs-en-18-02.jpg)

यरूशलेममाय शलमनाय त्याअ मंदिराल बोनाडया ज्याहाठी त्याअ आबहाय योजना बोनाडली आती आन वस्तू योकठयो कोयल्या आंत्या. आमी माअहे मिळना मांडवा कोयता मंदिरमाय देवा सेवा कोयता आता आन त्याहाठी अरपन कोयते आते. देव मंदिरामाय रोअतो आतो, आन ताअ तोअ आपे माअहा आरी रोअतो आतो.

![](https://cdn.door43.org/obs/jpg/360px/obs-en-18-03.jpg)

पेन शलमनाय बिहीरा देशा ठेईहीवोय माया कोयी. त्याय खूबूज, लगबग १००० दोनारही आरी वोराड कोयीन देवा आज्ञा नाय मानी! यामाने खुबुज दोनाऱ्या पारका देशामाने येन्या आन त्येहे आरी त्येहे देवहाल ली येन्यो आन त्त्याहा सेवा कोरा चालू थोव्या. जोवे शलमन डाअयो ओय गोयो तोवे त्याय बी त्याहा देवा सेवा कोयी.

![](https://cdn.door43.org/obs/jpg/360px/obs-en-18-04.jpg)

या कोय देवाल शलमना रग कोयी येनली आती. त्याय आख्या का तोअ इस्राएल देशाल बेन राज्याम भाग कोयो त्याकोय त्याल वोखो देखाडी. तोअ शलमन मोई पासे ऐहेके कोरी.

![](https://cdn.door43.org/obs/jpg/360px/obs-en-18-05.jpg)

शलमन मोयो पासे, रहबाम राजा बोन्यो. इस्राएला देशा बादे माअहे त्याल आपे राजा रुपाम स्वीकार कोराहाठी योकुज जागे योकठे जाये. त्याहाय रहबामाही तक्रार कोयी का शलमनाय त्याहाल खूब कठीण कष्ट कोआडलो आतो आन खूब पोयसा लेदला आता. त्याहाय रहबामाल विनंती कोयी का त्याहाल कमी काम कोयआडे.

![](https://cdn.door43.org/obs/jpg/360px/obs-en-18-06.jpg)

पेन रहबानाय त्याहाल मोठा मुरखाणाकोय उतर देना, तुमा आखतेहे का मा आबहो शलमनाय तुमहाल कठीण कष्ट कोराडयो. पेन आंय तुमहाल त्याआने कोयता वोदारी कष्ट कोआडीही, आन आंय तुमहाल त्याआने बी वोदारी वोखो कोआडीही.

![](https://cdn.door43.org/obs/jpg/360px/obs-en-18-07.jpg)

जोवे माअहाय त्याल ऐहेके आखता वोनाये तोवे त्यामाने आरदाहाय त्याय विरूद काम कोया. दहा जातीहीय त्याल सोडी देना; त्याआरे आमी बेनूज जाती बोच्या. या बेन जातहीय स्वतः यहूदा राज आख्या.

![](https://cdn.door43.org/obs/jpg/360px/obs-en-18-08.jpg)

आरदी दहा जातीहीय याराबाम नावा योका माअहाल आपे राजा बोनाडी देनो. या जाती देशा उत्तर-पूर्व दिशाम आते.त्याहाय स्वताहाल इस्राएला राज आख्या.

![](https://cdn.door43.org/obs/jpg/360px/obs-en-18-09.jpg)

पेन याराबामाय देवा विरूद काम कोया आन माअहाल पाप कोराडयो. त्याय आपे माअहा कोय सेवा कोराहाठी बेन मुरत्यो बोनाडयो. या आमी यहूदा राजाम यरुशलेमाय देवा मंदिराम त्याअ सेवा कोराहांठी नाय गोया.

![](https://cdn.door43.org/obs/jpg/360px/obs-en-18-10.jpg)

यहूदा आन इस्राएल राज विरोदया बोनी गोया. आन कोवेबी योक-बिजा विरूद लोडा लाग्या. इस्राएला नवा राजामाय, बादाज राजा खराब आता. यामाने आरदा राजहाय त्याहा जागावोय राजा बोनाहाठी इच्छा राखनारा बिहीरा इस्राएलीहाहीने माई टाकला आता.

![](https://cdn.door43.org/obs/jpg/360px/obs-en-18-11.jpg)

इस्राएला राज्य बादाज राजहाय आन खूब माअहाय मुर्तीही सेवा कोयी. जोवे त्याहाय ऐहेके कोया, तोवे त्या वेश्याहा आरे हुवता आन ईही हुदी का मुर्तीही आगला पोहहाल अरपन बी कोया.

![](https://cdn.door43.org/obs/jpg/360px/obs-en-18-12.jpg)

यहूदा राज्या राजा, दाविदा पोहोहामाने आता. या राजहां माने आरदा हारे माअहे आते ज्याहाय हारीरिते राज कोया आन पोरमेहरा सेवा कोयी. पेन यहूदा खुबूज राजा खराब आता.

![](https://cdn.door43.org/obs/jpg/360px/obs-en-18-13.jpg)

त्याहाय खराबरिते राज कोअयो, आन मुर्तीही सेवा कोअयी. ईहीहुदी का त्यामाने आरदा राजहाय खोटा देवहा आगला आपे पोहे बी अरपन कोई देने. यहूदा वोदारी माअहाय बी पोरमेहरा विरूद काम कोया आन बिहीरा देवहा सेवा कोअयी.

*१ राजा अध्याय १-६; ११-१२ हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_18_128kbps.m4a

## 19. भविष्यो कोयनारो

https://openbiblestories.org/l/mke/story-19/

![](https://cdn.door43.org/obs/jpg/360px/obs-en-19-01.jpg)

देव सदा इस्राएलीहा पाही भविष्यो कोयनारा दोवाडी रोयलो आतो.भविष्यो कोयनारा देवाहीने गोठ वोनाता आता आन पासे माअहाल आखता आता.

![](https://cdn.door43.org/obs/jpg/360px/obs-en-19-02.jpg)

जोवे अहाब इस्राएली राज्यावोय राजा आतो तोवे त्या वेले एलिया भविष्यो कोयनारो आतो. अहाब योक खराब माअहु आतो. त्याय खोटा बाल देवा सेवा कोराडाहाठी माअहाल ताबाम लेदला आता. त्याहाठी एलियाय अहाबाल आख्या का देव त्या माअहाल शिक्षा कोरा जाय रोयलो हेय. त्याय त्याल आख्या, जाव हुदी आंय आजू पांई पोडाहाठी नाय आखू तावू हुदी इस्राएलामाय पांई नाय पोडी आन नाय जाकळा पोडी. ई गोठीकोय अहाबाल रग कोआडी देनी का एलियाल माराहाठी ठरवी लेदा.

![](https://cdn.door43.org/obs/jpg/360px/obs-en-19-03.jpg)

याहाठी देवाय एलियाल आख्या का तोअ जाडीम जायीन अहाबाहीने दोबी जाय. एलिया जाडीम त्या जोअरा पाही गोयो जाअ जाहाठी देवाय त्याल आखला आता. रोज हाकाळहे आन वेळेवोय, चिडे एलियाहाठी बाखे आन मांहा लीन येअते आते. या पुरा वेले, अहाब आन त्याअ सैनिक एलियाल होदता रोया, पेन त्याअ त्याल होदी नाय सक्या.

![](https://cdn.door43.org/obs/jpg/360px/obs-en-19-04.jpg)

पांई नाय पोडो त्या वार वेले पासे तोअ जोअरो उखाय गोयो. याहाठी एलिया पाहीने योका देशांम निगी गोयो. त्या देशाम योक गरीब विधवा आती जीअ योक पोहो आतो. त्याहा पाअने खायना पारवाय गोयला आता काहाका ताअ कायज पिक नाय जायला आता. पेन तेबी बी, त्या बाई एलिया गावारी-चाकरी कोयी, याहाठी देवाय तीअ आन तीअ पोहोहा गरजा पुरी कोयी, याहाठी तीअ कुटा बासना आन तीअ तेला सीची कोदहीज रिअती नाय जायी. त्या पुरा काळावेले त्याहावोय खायना आता. एलिया वार वोरहे हुदी ताअ रोयो.

![](https://cdn.door43.org/obs/jpg/360px/obs-en-19-05.jpg)

साडे तीन वोरहा पासे, देवाय एलियाल आख्या का तोअ पासी पांई पाडी. त्याय पासी इस्राएल राज्याम जायीन अहाबा आरी गोठ कोरा हाठी आख्या. याहाठी एलिया अहाबाही गोयो. जोवे अहाबाय त्याल देख्या तोवे त्याय आख्या, हारा तूअ हेय, संकट लीअ येनारो! एलियाय उतर देना, संकट लीअ येनारो ते तूअ हेय! तूअ यहोवाल सोडी देनला हेय. तोज खोरो देव हेय, पेन तू बआला सेवा कोय रोयलो हेय. आमी तुल इस्राएला बादा माअहाल कर्मेल डोगावोय ली येयना हेय.

![](https://cdn.door43.org/obs/jpg/360px/obs-en-19-06.jpg)

सेंले बादे माअहे कर्मेल डोगावोय गोये. त्ये माअहे बी येने जी आखते आते का त्याअ बाला गोठ आखतेहे. येए बाला भविष्यो कोयनारे आते.त्ये बादे ४५० आते.एलियाय माअहाल आख्या, कोवे हुदी तुमा आपे मोनाल फिरवी राखहा? जर यहोवा देव हेयते त्या सेवा कोआ! जर बआल देव हेय, ते त्याअ सेवा कोआ!

![](https://cdn.door43.org/obs/jpg/360px/obs-en-19-07.jpg)

तोवे एलियाय बाला भविष्यो कोयनाराहाल आख्या, योका बैला अरपन कोयीन त्या माहां चडवाहाठी योकी वेदीवोय थोवा, पेन आग मा लावहां. त्यां पासे आंय बी ऐहेकेज कोही, आन योक बिजी वेदीवोय आंय माहां थोवही. तोवे जर देव वेदीवोय आग पाडनारो हेय तर तुमा होमजी लेजा का तोअ खोरो देव हेय. तोवे बाला भविष्यो कोयनाराहाय योक अरपन तियार कोया पेन आग नाय लावी.

![](https://cdn.door43.org/obs/jpg/360px/obs-en-19-08.jpg)

तोवे बाला भविष्यो कोयनाराहाय बालाही पार्थना कोयी, ओ बआल, आमे वोनाय! आखो दिही त्याहाय पार्थना कोयी आन आवाज आन ईही हुदी का सोवताहाल सुरीके वाडी लेदा, पेन बालाय उत्तर नाय देना, आन त्याय काय आग नाय लावी.

![](https://cdn.door43.org/obs/jpg/360px/obs-en-19-09.jpg)

बाला भविष्यो कोयनाराहाय बालाही पार्थना कोरा लगबग पूरो दिही काडी देनो.सेंले त्याहाय पार्थना कोयना बंद कोया. तोवे एलियाय बिहरा बैला माहां देवा वेदीवोय थोवी देना. त्याय पासे, त्याय माअहा कोय पांअया मोठा बासनाहाल त्या अरपनावोय तावू हुदी टाकाहाठी आख्या जाउ हुदी का मांहा, लाकडे,आन इही हुदी का वेदी जागेजागेने दोरती पुरीरोका बिजी नाय जाय.

![](https://cdn.door43.org/obs/jpg/360px/obs-en-19-10.jpg)

तोवे एलियाय पार्थना कोयी, ओ यहोवा,अब्राहम, इसाक, आन याकूबा देवा, आमहाल देखाड का तूअ इस्राएला देव हेय आन इही हुदी का आंय तोअ नोकर हेय. मान उतर दे ज्याकोय येए माअहे होमजी लेय का तूअज खोरो देव हेय.

![](https://cdn.door43.org/obs/jpg/360px/obs-en-19-11.jpg)

ताबाडूज, वादळामाने आग पोडी आन त्याय मांहा लाकडे, दोगडा, कादू, आन इही हुदी का वेदी जागेजागेने पांई बी सिलगाडी टाक्या. जोवे माअहाय ई देख्या, त्ये दोरतीवोय पोडये आन बोल्ये, यहोवाज देव हेय! यहोवाज देव हेय!

![](https://cdn.door43.org/obs/jpg/360px/obs-en-19-12.jpg)

तोवे एलियाय आख्या, बाला योक बी भविष्यो कोयनारो बचीन नाय जाअ जोजे! याहाठी माअहाय बाला भविष्यो कोनाराहाल दोय लेदा आन त्याहाल ताअने जुदा ली गोया आन त्याहाल माई टाक्या.

![](https://cdn.door43.org/obs/jpg/360px/obs-en-19-13.jpg)

तोवे एलियाय अहाब राजाल आख्या, माहारी आपे गोअ नाअही जोअ,काहाका पांई पोडनारो हेय. ताबाडूज वादळामाय चेलाय येना, आन खूब पांई पोडा सुरु ओय गोयो. यहोवा त्या उखालाल पारवाडी रोयलो आतो. याकोय जाण जायी का यहोवा ओज खोरो देव हेय.

![](https://cdn.door43.org/obs/jpg/360px/obs-en-19-14.jpg)

जोवे एलियाय आपे कामाल पारवाडी देना, तोवे देवाय एलीशा नावा योक माअहाल आपे भविष्यो कोयनाराहाठी निवडयो. देवाय एलीशा कोय खूब चमत्कार कोया. योक चमत्कार नामाना आरी जायो. तोअ योक विरोदयाहा सैनिकाहा सरदार आतो, पेन त्याल चाबडी योक खराब रोग लागी कोयलो आतो. नामानाय एलीशा बद्दल वोनायो, याहाठी तोअ एलीशाही पाही येनो आन त्याय त्याल हारा कोराहाठी विनंती कोयी.एलीशाय नामानाल आख्या जायीन यार्देन नोयीमाय सातदा बुडी लेजे.

![](https://cdn.door43.org/obs/jpg/360px/obs-en-19-15.jpg)

नामानाल रग कोयी येनी. त्याय ऐहेके कोराहाठी नाय आखी देना, काहाका ई मूर्खो काम लागता आता. पेन पासे त्याय त्या मन बदली देना आन जायीन यार्देन नोयी पांईयाम सातदा बुडी निग्यो.जोवे सेंली वेले तोअ पांईयामाने बारे निग्यो तोवे देवाय त्याल हारा कोय देना.

![](https://cdn.door43.org/obs/jpg/360px/obs-en-19-16.jpg)

देवाय इस्राएल माअहा पाही बिहीरा खूब भविष्यो कोयनारा दोवाडया.त्या बादा माअहाय मुर्तीही सेवा कोअरा बंद कोराहाठी आख्या. त्याकोयता, त्याहाय योक-बिजा आरी हारो व्यवहार कोरा जोजे आन योक-बिजा वोय दया कोरा जोजे. त्या भविष्यो कोयनारा माअहाल आख्या का त्याहाल खोटे कामें कोयना बंद कोय देयना हेय आन त्याअ कोयता देवा गोठी पालन कोयना हेय. जर त्या माअहाय ऐहेके नाय कोया ते देव त्याहाल गुनेगार मानीन त्याहा न्याय कोरी, आन त्याहाल वोखो देखाडी.

![](https://cdn.door43.org/obs/jpg/360px/obs-en-19-17.jpg)

वोदारे वेले, त्या माअहाय देवा आज्ञा पाळन नाय कोया. वारदा त्याहाय भविष्यो कोयनाराहा आरी खराब व्यवहार कोयो आन इही हुदी का कदही –कदही त्याहाल माई टाक्या. योकदा, त्याहाय यीर्मया भविष्यो कोयनाराल उखाली वेअयीम टाकी देना आन त्याल ताअ मोरा हाठी सोडी देनो. पेन तो वेअयीम माजे चीखल्याम गुती रोयो. पेन तोवे राजाल त्याय दया येनी आन त्त्याय आपे सैनिकाहाल हुकुम देनो का यीर्मया मोरा पोयला त्याल वेंयीमाने बारे खेची लेय या.

![](https://cdn.door43.org/obs/jpg/360px/obs-en-19-18.jpg)

भविष्यो कोयनाराहाय देवा ऐहेने बोला चालुज राख्या जर त्याहाय विरोद कोयो. त्याहाय माअहाल आख्या का जर त्याहाय पश्चाताप नाय कोअयो तर देव त्याहाल नाश कोई दिअ.त्याहाय माअहाल यीबी ईत कोआडया का देवाय त्याहा पाही मसीहा दोवाड्ना बी मानता लेद्ला हेय.

*१ राजा अध्याय १६-१८; २ राजा ५;यीर्मया ३८ हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_19_128kbps.m4a

## 20. गुलाम आन सुटको

https://openbiblestories.org/l/mke/story-20/

![](https://cdn.door43.org/obs/jpg/360px/obs-en-20-01.jpg)

इस्राइलाय राज्याय आन यहूदा राज्याय या बेन्याहाय देवा विरूद पाप कोयो. त्याहाय त्या वोचनान तोडी देना जी देवाय त्याहा आरी सीनाय वोय कोयली आती. देवाय त्याहाल ईत कोरा आन पासी त्याय सेवा कोरा हाठी आखी देना का आपे भविष्यो कोयनाराहाल दोवाडया, पेन त्याहाय त्यांहा गोठल मानाहाठी नाय आखी देना.

![](https://cdn.door43.org/obs/jpg/360px/obs-en-20-02.jpg)

सेंले देवाय त्याहा विरोदयाहाल त्याहा नाश कोराहाठी मजबूत कोअया बेनी राज्याहाल वोखो देखाडयो. अश्शर योक देश आतो जी खूब शक्तीवाळो ओय गोयला आता. त्ये बिहीरा देशा कोयता खूब खराब बी आते. त्याहाय यीन इस्राएला राज्याहाल नाश कोय देना. अश्शुरीयाहाय यीन इस्राएल राज्यामाने खूबज माई टाक्ये, जी मिळ्या त्याल लुटी लेदा, आन देशा आर्दा हिसहाल सिलगाडी देना.

![](https://cdn.door43.org/obs/jpg/360px/obs-en-20-03.jpg)

अश्शुरीयाहाय बादा पुढारी, मातले माअहे, आन ओहोडे माअहे का जी मोगी वस्तू बोनाडी सकतेहे योकारीज योकठा कोया आन त्त्ये त्याहाल अश्शूर देश लीअ गोये. इस्राएलाम फक्त वायज गरीब इस्राएली वाचाला आता.

![](https://cdn.door43.org/obs/jpg/360px/obs-en-20-04.jpg)

पासी अश्शुरी माअहे त्या देशांम राअय हाठी पारकाहाल लीअ येना. त्या पारकाआहाय त्या शेहराहाल पासी बोनाडये. ज्या इस्राएली त्याअ वाचाला आता त्याहा आरी त्याहाय वोराड कोया. त्या माअहा पोहोहाल सामरी आखतेहे.

![](https://cdn.door43.org/obs/jpg/360px/obs-en-20-05.jpg)

यहूदा राज्य माअहाय देख्या का केहेके देवाय त्यावोय बोरसो नाय कोये आन त्या गोठील नाय माने तोवे इस्राएला राज्या माअहाल वोखो देखाडयो. पेन तेबी बी त्याहाय कनानीयीहा देवहा मुर्तीही सेवा कोयी.देवाय त्याहाल आखी दाअ हाठी भविष्यो कोयनाराहाल दोवाडया. पेन त्याहाय वोनाया हाठी नाय कोय देना.

![](https://cdn.door43.org/obs/jpg/360px/obs-en-20-06.jpg)

लगबग १०० वोरहा पासे अश्शुरीयाहाय इस्राएला राज्या नाश कोयी देनो. देवाय बेबीलोना राजा, नबूकदनेस्सराल यहूदा राज्यावोय लोडाई कोरा हाठी दोवाडया. बेबीलोन योक शक्तिवाळा देश आता.यहूदा राजा नबूकदनेस्सरा आवत्यो बोना आन दर वोरही त्त्याल खूब बाअदा पोयसा खोरचा हाठी राजी ओय गोयो.

![](https://cdn.door43.org/obs/jpg/360px/obs-en-20-07.jpg)

पेन वार वोरहा पासे, यहूदा राजाय बेबीलोना विरूद काम कोया.सेंले बेबीलोनियाहाय पासी यीन यहूदा राज्यावोय लोडाई कोय देनी.त्याहाय यरुशलेम शेहरावोय कबजो कोय लेदो,मंदिराल नाश कोय देना, आन शेहरा आन मंदिरा खजानो लुटी लेदो.

![](https://cdn.door43.org/obs/jpg/360px/obs-en-20-08.jpg)

खोटा कोया याहाठी यहूदा राजाल वोखो कोराडा हाठी, नबूकदनेस्सरा सैनिकाहाय राजा पोहाल त्या हुबूरुज माई टाक्या आन पासे त्याल आंदळो कोयी देनो. त्या पासे, त्ये राजाल लीअ गोये काहाका तोअ बेबीलोना जेलीमाय मोयी जाय.

![](https://cdn.door43.org/obs/jpg/360px/obs-en-20-09.jpg)

नबूकदनेस्सर आन त्याअ सैनिक यहूदा राज्या लगबग बादाज माअहाल बेबीलोन लीअ गोया,फक्त खूब गरीब माअहाल पाहाला सोडी गोया काहाका त्ये रानाम पिक पाकाडे. या दिहाहाल गुलाम आखला हेय ज्यामाय देवा माअहाल मानता देशाम निगी जाहाठी जोबरजस्ती कोयली गोयली आती.

![](https://cdn.door43.org/obs/jpg/360px/obs-en-20-10.jpg)

जोरी देवाय त्याअ माअहाल त्याहा पापा हाठी गुलामीमाय लीअ जायना कोय वोखो कोआडो, तेबी तोअ त्याहाल आन आपे मानाताल नाय विहरालो आतो. देवाय आपे माअहा देखरेख कोरा चालू राख्या आन आपे भविष्यो कोयनाराहा कोय त्याहाआरी गोठयो कोयतो रोअयो. त्याय मानता सत्तर वोरहा पासे, त्ये पासी मानता देशाम फिरी येने.

![](https://cdn.door43.org/obs/jpg/360px/obs-en-20-11.jpg)

लगबग सत्तर वोरहा पासे, पारसा राजा कोरेशाय बेबीलोनाल आरवी देना, याहाठी बेबीलोनावोय राज्य कोरा कोयता पारसा राज्याय वार देशाहा वोय हुकूम कोयो. इस्राएली माअहे आमी यहुदी आखते आते. त्यामाने खूब जाहांय त्याहा पुरा जीवन बेबीलोनामाय काडी देनला आता. फक्त कमीज डाअया यहुदी लोकहालूज यहूदा देश ईत आतो.

![](https://cdn.door43.org/obs/jpg/360px/obs-en-20-12.jpg)

पारसी माअहे खूब शक्तिवाळे आते, पेन त्याहाय आपहाय जीतला माअहा वोय माया आती. पारसी माअहा राजा बोनीन वायज वेले पासे, कोरेशाय योक हुकुम देनो का कोहाबी यहुदी जी यहूदामाय जानारा हेय, त्ये पारस माने निगीन पासी यहुदाम जाय सकतेहे. इही हुदी का त्याय त्याहाल मंदिराल बोनाडा हाठी पोयसा बी देना .सेंले गुलामा सत्तर वोरहा पासे, यहुदीयाहा योक हानो टोळो यहूदा यरुशलेम शेहरामाय फिरी येनो.

![](https://cdn.door43.org/obs/jpg/360px/obs-en-20-13.jpg)

जोवे त्ये माअहे यरुशलेम पोअचे तोवे त्याहाय मंदिराल आन शेहरा चारीचोमखीने बितडे पासी बोनाडये. पारसी माअहे आमी बी त्याहा वोय राज कोयते आते पेन योकदा पासी त्त्ये मानता देशाम रोअते आते आन मंदिरामाय सेवा कोयते आते.

*२ राजा अध्याय १७;२४-२५; २ इतिहास ३६;एज्रा १-१०; नहेम्या १-१३ हुदी बायबला गोठ.*

Audio: https://git.door43.org/OBS-TLF/mke_obs/releases/download/v1/mke_obs_v1_20_128kbps.m4a

## 21. पोरमेहेर मसीहा देयना वायदो कोअहे.

https://openbiblestories.org/l/mke/story-21/

![](https://cdn.door43.org/obs/jpg/360px/obs-en-21-01.jpg)

जोवे पोरमेहेराय दुनिया बोनाडली, तो जाआय का या पासे कोअहे बी दिही मसीहाल दोवाडा पोडी. त्याय आदाम आने हव्वा आरी वायदो कोअयो का तो ऐहेके कोरी. त्याय आख्या का हव्वा हीने योक वंश जन्माल यीई जी हापा टोलपा चेंदी. ज्या हापाय हवाल ठोगी देनला तो खोराखोर सैतान आतो. पोरमेहेरा अर्थ आतो का मसीहा पुरीरीते सैतानाल आरवी.

![](https://cdn.door43.org/obs/jpg/360px/obs-en-21-02.jpg)

पोरमेहेराय अब्राहमा आरी वायदो कोअलो का त्या दुवारे दुन्या बाद्यो जात्यो बोरकोत पामी. पोरमेहेर यापासे कोअहे बी समये मसीहाल दोवाडीन वायदो पुरो कोरी. तो मसीहा दुन्या योका-योक जातीमाने माअहाल त्याहा पापामाने सोडवी.

![](https://cdn.door43.org/obs/jpg/360px/obs-en-21-03.jpg)

देवाय मोशे आरी वायदो कोअलो का येनारा दिहह्याम तो मोशे रोको योक भविष्यद्वक्ता दोवाडी. ओ भविष्यद्वक्ता मसीहा ओरी. यारीते, पोरमेहेराय पासे वायदो कोअयो का तो मसीहा दोवाडी.

![](https://cdn.door43.org/obs/jpg/360px/obs-en-21-04.jpg)

पोरमेहेराय राजा दाविदा आरी वायदो कोअलो का त्या योक वंशामाने मसीहा ओरी. तो राजा ओरी आने पोरमेहेरा माअहावोय सदाकाळ राज कोरी.

![](https://cdn.door43.org/obs/jpg/360px/obs-en-21-05.jpg)

पोरमेहेराय यीर्मया भविष्यद्वक्ता आरी गोठ कोअयी आने आख्या का योक दिही तो योक नोवो करार कोअय. ती नोवो करार इस्राएला आरी सीनाय डोगावोय कोअलो त्या जुना करारा रोको नाय ओरी. जोवे माअहा आरी नोवो करार कोअय, तोवे तो त्याहावोय स्वताःल त्याज रुपामाय प्रगट ओरी. योका-योक त्यावोय माया राखी आने त्या नियमाहा पालन कोरा इच्छा राखी. पोरमेहेराय आख्या का ई त्या नियम हृद्यावोय लिखी देयना रोका ओरी. त्यें त्या माअहे ओरी, आने पोरमेहेर त्याहा पापहाल माफ कोरी. तो मसीहा ओरी तो त्याहा आरी नोवो करार कोअय.

![](https://cdn.door43.org/obs/jpg/360px/obs-en-21-06.jpg)

पोरमेहेर भविष्यद्वक्ताहाल ऐहेके बी आख्या का मसीहा योक भविष्यद्वक्ता ओरी. योक भविष्यद्वक्ता ती माअहु हेय जी देवा वचनाल वोनाडेहे आने पासे माअहावोय पोरमेहेरा संदेशाहा घोषणा कोअहे. ज्याल दोवाडना पोरामेहेराय वायदो कोअलो तो योक खोरो मसीहा आने खोरो भविष्यद्वक्ता ओरी. मोनजे तो मसीहा पोरमेहेरा संदेशाहाल हारीरीते वोनायी, आने तो माअहाल त्या संदेशाहाल हारीरीते हिकाडी.

![](https://cdn.door43.org/obs/jpg/360px/obs-en-21-07.jpg)

इस्राएली याजकाय माअहाहाठी पोरमेहेरा आगला अर्पण कोअना चालूज थोव्या. ई अर्पण माअहा पापहाहाटी त्याहाल पोरमेहेरापाने शिक्षा देयना जागावोय अर्पण कोअला. याजकाहाय माअहाहाटी प्रार्थना बी कोअयी. पेन मसीहा खोरो महायाजक ओरी जो पोरमेहेराल दाआहाटी योक खोरा बोली रुपामाय स्वता:ल अर्पण कोअय दी. मोनजे तो कोवेज पाप नाय कोअय, आने जोवे तो स्वता:ल अर्पणा ओराहाटी दी, तोवे दुनियाल कोअहाबी बिहीरा अर्पणा गरज नाय ओरी.

![](https://cdn.door43.org/obs/jpg/360px/obs-en-21-08.jpg)

माअहा टोळावोय राजा आन प्रधान राज कोअताहा, आने कोवे-कोवे त्या चुक्यो कोअताहा. राजा दाविदाय फक्त इस्राएली लोकहावोय राज कोअया, पेन राजा दाविदा वंश मसीह पुरा दुनियावोय राज कोरी, आने तो सदाकाळहाटी राज कोरी. त्याकोअता, तो कायम न्याया कोअय राज कोरी, आन खोरा फेसला ली.

![](https://cdn.door43.org/obs/jpg/360px/obs-en-21-09.jpg)

पोरमेहेर भविष्यद्वक्ताहाय मसीहा बारेमाय खुबज गोठ्यो आख्यो. दाखलाहाटी, मलाखीय आख्या का मसीहा येयना पोयला योक बिहीरो भविष्यद्वक्ता यी. तो भविष्यद्वक्ता खुब खास रोय. याकोअता, यशया भविष्यद्वाक्ताय लेख्या का मसीहा योक कुवारीपाने जन्म ली. आने मिखा भविष्यद्वक्ताय आख्या का मसीहा बेथलेहेम शेहरामाय जन्म ली.

![](https://cdn.door43.org/obs/jpg/360px/obs-en-21-10.jpg)

यशया भविष्यद्वक्ताय आख्या का मसीहा गालीला भागामाय रोय. ज्यें माअहे खुब दु:खी हेय मसीह त्याहाल शांती दि. तो कैद्याहा बी सुटका कोरी. मसीहा बिमाऱ्याहाल आने ज्यें वोनाय नाय सोके, ऐअय नाय सोके, बोली नाय सोके, नेते चाली नाय सोके त्याहाल बी हारो कोअय.

![](https://cdn.door43.org/obs/jpg/360px/obs-en-21-11.jpg)

यशया भविष्यद्वक्ताय ई बी आख्या का माअहे मसीहावोय रग थोवी आने त्याल स्विकार कोराहाटी नाकार कोई दी. बिजा भविष्यद्वक्ताहाय आख्या का मसीहा योक हेंगात्यो त्याय विरूद उठी. जखर्या भविष्यद्वक्ता आख्या का तो ओ हेंगात्यो ऐहेके कोराहाटी बिजा माअहावोरे चांदी तीस सिक्का ली. याकोअता, आजू बिजा भविष्यद्वक्ताहाय आख्या का माअहे मसिहाल माई टाकी, आने ई बी का त्या फाडकाहाहाटी पाते रोवी.

![](https://cdn.door43.org/obs/jpg/360px/obs-en-21-12.jpg)

भविष्यद्वक्ताहाय ई बी आख्या का मसीहा केहेके मोअरी. यशयाय भविष्यद्वाणी कोअयी का माअहे मसीहावोय थूपी, त्या मज्जाक उडवी, आने त्याल ठोकी. त्ये त्या खुकीमाय भोसकी आने तो खुब पिडा आने दु:खा मोई जाय, ईका तो कायज खाराब नाय कोअय तेबी.

![](https://cdn.door43.org/obs/jpg/360px/obs-en-21-13.jpg)

भविष्यद्वक्ताहाय ई भी आख्या का मसीह पाप नाय कोअय. तो खोरो ओरी. पेन तो याहाटी मोई का पोरमेहेर त्याल बिजा लोकहालिदे पापहाहाटी शिक्षा कोरी. त्या मोई जायना कोअय लोक पोरमेहेरा आरी मेल कोरा लायक ओरी. याहाटी पोरमेहेराल जरुरी हेय का मसीह मोअय.

![](https://cdn.door43.org/obs/jpg/360px/obs-en-21-14.jpg)

भविष्यद्वक्ताहाय ई बी आखला का पोरमेहेर मसीहाल मोअलाहामाने जीवतो कोरी. ई देखाडेहे का बादो नोवो करार कोअना पोरमेहेरा योजना आती, काहाका तो त्या माअहाल वाचाडी सोके ज्याहाय त्याय विरूद पाप कोयला हेय.

![](https://cdn.door43.org/obs/jpg/360px/obs-en-21-15.jpg)

पोरमेहेराय भविष्यद्वक्तावोय मसीहा बारेम खुबूज गोठ्यो प्रकट कोय्यो, पेन मसीहा त्या भविष्यद्वक्ताहामाने कादा बी जीवनाम नाय येनो. यो भविष्यवाण्यो कोअल्यो त्यापाने ४०० कोआता वोदारी वोरहा पासे, नेमला समयावोय पोरमेहेरा मसीहाल या दुनियाम दोवाडना.

*उत्पत्ति 3:15; 12:1-3; अनुवाद 18:15; 2 शमूएल 7; यिर्मया 31; यशया 59:16; दानिएल 7; मलाखी  4:5; यशया 7:14; मीखा  5:2; यशया 9:1-7; 35:3-5; 61; 53; स्तोत्र. 22:18; 35:19; 69:4; 41:9; जखर्या 11:12-13; यशया 50:6; स्तोत्र. 16:10-11 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_21_128kbps.m4a

## 22. योहना जन्म

https://openbiblestories.org/l/mke/story-22/

![](https://cdn.door43.org/obs/jpg/360px/obs-en-22-01.jpg)

जूनाकाळामाय, पोरमेहेराय आपे भविष्यद्वक्ताहा आरी गोठ कोअली याहाटी त्या माअहा आरी गोठ कोअय. पेन त्या समयापाने लेयने पासे ४०० वोरहे निंगी गोये तावहुद त्याय त्याहा आरी गोठ नाय कोअयी. तोवे पोरमेहेराय जखर्या नावा भविष्यद्वक्ताही योका होरगा दूताल दोवाड्यो. जखर्या आने त्या दोअनारी अलिशिबा पोरमेहेरावोय मानपान थोवे. त्यें खुब डाअये ओय गोयले आते, आने त्याहाल योक बी पोहा नाय जाअला आतां.

![](https://cdn.door43.org/obs/jpg/360px/obs-en-22-02.jpg)

त्या होरगा दुताय जखर्याल आख्या, “तो दोअनारील योक पोहो उजबी. तू त्या नाव योहान थोवजे. पोरमेहेर त्याल पवित्र आत्माकोय भरपूर कोअय, आने योहान माअहाल मसीहाल स्वीकार कोराहाठी तियार कोअय.” जखर्याय उतर देना, “आंय आने मा दोअनारी पोहाल जन्म देय नाय सोकजे काहाका आमाखूब डाअये हेते! आंय केहेके जाव का तुमा माआरी खोरा आखतोहो?”

![](https://cdn.door43.org/obs/jpg/360px/obs-en-22-03.jpg)

त्या होरगा दुताय जखर्याल उत्तर देना, “तोही ओ हारो संदेश लेय याहाटी मान पोरमेहेरापाने दोवाडह्यो. काहाका तूये मावोय बोरसो नाय कोअयो, याहाटी पोहा जन्म लेयनाहुदी तू बोली नाय सोकहे, “ताबडूज जखार्या बोली बंद ओय गोयी. तोवे तो होरगो दुत जखर्या पाने निंगी गोयो. त्या पासे, जखर्या गो येनो आने त्या दोअनारील मोयना जाया.

![](https://cdn.door43.org/obs/jpg/360px/obs-en-22-04.jpg)

जोवे अलिशिबाल सोव मोयना गर्भ आतां, तोवे तो होरगामाने दूत योकदम अलिशिबा जातुलाहा वोय प्रकट ओयो, ज्ये नाव मरिया आंता. मरिया जुवान आती आन वोराड ओराहाठी योसेफ नावा माअहा आरी ती मागनी ओली आती. होरगादुताय आख्या, “ तुल मोयना ओरी आने योका पोहाल जन्म देहे. तुल त्या नाव येशू थोवा पोडी. तो सर्व-शक्तिमान पोरमेहेरा पोहो ओरी.’’ आने कायम राज कोरी.’’

![](https://cdn.door43.org/obs/jpg/360px/obs-en-22-05.jpg)

मरिया उत्तर देना, “ई केहेके ओरी, काहाका आंय ते जुवान हेय?’’ त्या होरगा दुताय होमजाड्या, “पवित्र आत्मा तोवोय यी, आने पोरमेहेरा सामर्थ्या तोवोय सावली रोय. याहाटी तो पोहो पवित्र ओरी, आने तो पोरमेहेरा पोहो ओरी.” जी होरगा दुताय आख्या त्यावोय मरियमाय बोरसो थोव्यो.

![](https://cdn.door43.org/obs/jpg/360px/obs-en-22-06.jpg)

ई ओअना पासे ताबाडूज, मरिया जाईन अलिशिबाल मिळी. जेहेके बी मरियाय तील नमस्कार कोअया, अलिशिबा पोअहा ती डेडीमाय कुद्या. याहाटी पोरमेहेराय जी कोअला त्या बदल त्यो आनंदित जायो. अलिशिबा आरी तीन मोयना रोयन पासे, मरिया गोअ फिरी गोयी.

![](https://cdn.door43.org/obs/jpg/360px/obs-en-22-07.jpg)

त्या पासे, अलिशिबाय त्ये पोहाल जन्म देना. जखर्या आने अलिशिबाय त्या पोहा नाव योहान थोव्या, जेहेके त्या होरगा दुताय हुकूम देनलो. तोवे पोरमेहेराय जखर्याल बोलाहाटी वाचा देनी. जखर्या आख्या, “देवा स्तुती ओय, काहाका त्या लोकहा मदत कोरा ईत राखला हेय! ओ मा पोहा, तू सर्व-शक्तिमान पोरमेहेरा भविष्यद्वक्ता ओहे. तू लोकहाल आखहे का त्यें केहेके त्याहा पापाहाठी माफी मागी सोकतेहे!’’

*लूक अध्याय १ हीने बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_22_128kbps.m4a

## 23. यीसू  जन्म

https://openbiblestories.org/l/mke/story-23/

![](https://cdn.door43.org/obs/jpg/360px/obs-en-23-01.jpg)

योसेफ नावा योक सेवा कोअनारा माअहा आरी मरिया मागनी ओय गोयली आती. जोवे तो वोनायो का मरियमाल मोयना हेय तोवे तो जाआय का ती त्या पोहा नाय हेय. पेन तो मरियमा आब्रू नाय दोवाडा आतो, याहाटी त्येवोय तीवोय कृपा करां आने तील ठाकाज फारगुती देयना विचार कोअयो. पेन त्या पोयला तो ऐहेके कोअतो, योका होरगा दूताय त्या होप्नामाय येयने त्याआरी गोठ कोअयी.

![](https://cdn.door43.org/obs/jpg/360px/obs-en-23-02.jpg)

त्या होरगा दूताय आख्या, “ओ योसेफ, मरियमाल तो दोअनारी बोनाडीन लेय याहाटी मा बियहे. ती डेडीमाय जी पोहा हेय ती पवित्र आत्मापाने हेय. ती योका पोहाल जन्म दी त्या नाव येशू थोवजे (त्याय अर्थ हेय, यहोवा वाचाडेहे), काहाका तो माअहाल त्याहा पापाहामाने वाचाडी.’’

![](https://cdn.door43.org/obs/jpg/360px/obs-en-23-03.jpg)

सेल्ले योसेफाय मरिया आरी वोराड कोअया आने तील त्या दोअनारी कोअयने गोअ लेययेनो, पेन ती पोहाल जन्म देनो तावहुद तो तीआरी नाय हूतो.

![](https://cdn.door43.org/obs/jpg/360px/obs-en-23-04.jpg)

जोवे मरियमा जन्म देयना समय पाही आतो, तोवे त्येय आने योसेफाय बेथलेहेमाल जाआहाटी योक लांबो प्रवास कोअयो. त्याहाल ता जायनाज आतां काहाका रोमा अधिकारी इस्राएलाम रोनारा बादा लोकहा गोणती कोअनारो आतो. त्याहाल लागे का बादे माअहे ता जाय त्याहा आगला डाया रोता आता. राजा दाविदा जन्म बेथलेहेमाय जाअलो आतो, आने तो मरियम आने योसेफा बेनह्या वडील आतो.

![](https://cdn.door43.org/obs/jpg/360px/obs-en-23-05.jpg)

मरिया आने योसेफ बेथलेहेमाय गोये, पेन ता जनावरहा गोठाल सोडीन त्याहाल राअहाटी केसेज जागो नाय आतो. तोज जागो आतो जा मरियमाय त्ये पोहाल जन्म देना. त्याल त्याहाय गोवायीम हुवाड्यो काहाका ता त्याहाटी कायज पाथना नाय आता. त्याहाय त्या नाव येशू थोव्या.

![](https://cdn.door43.org/obs/jpg/360px/obs-en-23-06.jpg)

त्यें राती, ता जागेज रानामाय आर्दा मेंडे चाअनारा त्याहा मेंडहा टोळी राखवाळी कोअता आतां. योकदम, योक चमकुनारो होरगा दूत त्याहावोय प्रगट जायो, आने त्या बिई गोया. त्या होरगा दूताय आख्या, “बिईहा मा, काहाका मावोय तुमेहाटी हारी गोठ हेय. बेथलेहेममाय मसीहा, मालीका जन्म जायलो हेय!’’

![](https://cdn.door43.org/obs/jpg/360px/obs-en-23-07.jpg)

जायीन त्या पोहा होद काडा, आने तुमा त्याल फाडकामाय गुटाडळा आने गोवायीमाय हुतलो देखहा.’’ योकदाज, जुग होरगा दूतहा कोअय बोराय गोया. त्या पोरमेहेरा स्तुती कोअय. त्याहाय आख्या, “बादी महिमा होरगामाय गादीवोय बोठला पोरमेहेराल मिळे. दोरतीवोय त्या लोकहामाय शांती ओय ज्याहा तो चिंता कोअहे!’’

![](https://cdn.door43.org/obs/jpg/360px/obs-en-23-08.jpg)

तोवे होरगा दूत निंगी गोया. त्या मेंडपाळ बी त्या मेंडहाल सोडीन त्या पोहाल ऐरा गोया ताबाडूज त्या त्याअ जागावोय पोच्या जा येशू आतो आने त्याहाय त्याल गोवायीमाय हुतलो देख्यो, जेहेके का त्या होरगा दूताय आखला. त्याहाल खुब खुशी आती. तोवे त्ये मेंडे चाअनारा पासी तांअ फिरी गोया, जां त्याहा मेंडे आते. त्या जी कायबी वोनाया आने देख्या त्या बादाहाटी त्या पोरमेहेरा स्तुती कोअयी.

![](https://cdn.door43.org/obs/jpg/360px/obs-en-23-09.jpg)

पूर्वमाय दूर योका देशामाने चांदालाहा अभ्यास कोअनारा लोक आतां. त्याहाय चांदालाहा आभ्यास कोअयो आने त्या खुब ओकळीवाळा आतां. त्याहाय योक खुब महत्वा चांदालो वादळामाय देख्यो. त्याहाय आख्या का या अर्थ हेय का यहूदीयाहा योका नवा राजाय जन्म जायहो. याहाटी त्या पोहाल ऐराहाटी त्या त्याहा देशामाने प्रवास कोअना फेसलो कोअयो. योका लांबा प्रवासा पासे, त्या बेथलेहेमाय येना आने ती गुऊ मिळ्या जा येशू आने त्या आयहो-आबहो रुकाले आते.

![](https://cdn.door43.org/obs/jpg/360px/obs-en-23-10.jpg)

जोवे त्या माअहाहाय येशूल त्या आयही आरी देख्यो ते त्याहाय गुडगा टेकिन त्या स्तुती कोअयी. त्याहाय येशूल किंमती भेट देना. पासे त्या गोअ फिरी गोया.

*मत्तय अध्याय 1; लूक 2 हुदी बायबला गोठ.*

Audio: https://git.door43.org/OBS-TLF/mke_obs/releases/download/v1/mke_obs_v1_23_128kbps.m4a

## 24. योहान येशूल बाप्तिस्मा देहे.

https://openbiblestories.org/l/mke/story-24/

![](https://cdn.door43.org/obs/jpg/360px/obs-en-24-01.jpg)

अलिशिबा आन जखर्या पोहो योहान, मोठो ओयन योक भविष्यद्वक्ता बोनी गोयो. तो जंगलामाय रोय, आने जंगलामाने मद आने टोडा खाय, आने उंटहा चाबडा बोनले फाडके पोवे.

![](https://cdn.door43.org/obs/jpg/360px/obs-en-24-02.jpg)

खुबूज माअहे योहाना गोठयो वोनायाहाटी जंगलामाय निंगी येने. त्याय ई आखीन त्याहाल प्रचार कोअयो, “पश्चाताप कोआ, काहाका होरगा राज पाही हेय!’’

![](https://cdn.door43.org/obs/jpg/360px/obs-en-24-03.jpg)

जोवे लोक योहना संदेश वोनाया, तोवे त्याहामाने खुब लोक त्याहा पापहापाने पश्चाताप कोअया, आने योहानाय त्याहाल बाप्तिस्मा देना. योहानाल ऐराहाटी खुब धार्मिक अगुवा बी येना, पेन त्याहाय त्याहा पापहा पश्चाताप आने स्वीकार नाय कोअया.

![](https://cdn.door43.org/obs/jpg/360px/obs-en-24-04.jpg)

योहनाय धार्मिक अगुवाहाल आख्या, “ओ जेरीवाळा हापहाय! पश्चाताप कोआ आने तुमे वागना बदला. पोरमेहेर हारा फळ नाय देय ओहडा बादा जाडाहाल खांडी टाकी, आने तो त्याहाल आगीमाय टाकी दी.” जी भविष्यदवक्ताहाय आखला योहानाय पुरा कोअया, “ऐ माहारुज आंय तो आगला मा संदेश आखनाराल दोवाडही जो तोहाटी वाट तियार कोरी.’’

![](https://cdn.door43.org/obs/jpg/360px/obs-en-24-05.jpg)

धार्मिक अगुवाहाय योहानाल होद्या का काय तू मसीहा हेय. योहानाय उत्तर देना, “आंय मसीहा नाय हेय, पेन तो मा पासे येय रोयलो हेय. तो ओलो मोठो हेय का आंय त्या चांपलाहा दोर्यो सोडा बी लायक नाय हेय.’’

![](https://cdn.door43.org/obs/jpg/360px/obs-en-24-06.jpg)

आगले दिही, येशू बाप्तिस्मा लाहाटी योहानाही येनो. जोवे योहानाय त्याल देख्या, तोवे त्याय आख्या, “ऐरा! देवा मेंडा जी दुन्या पापाहाल उसलीन ली जाय.’’

![](https://cdn.door43.org/obs/jpg/360px/obs-en-24-07.jpg)

योहनाय येशूल आख्या, “आंय तुल बाप्तिस्मा दाहाटी लायक नाय हेतो. याकोअता या गरज हेय का तू मान बाप्तिस्मा दे.’’ पेन येशूय आख्या, “तुल मान बाप्तिस्मा दा जोजे, काहाका कोराहाटी खोरा काम ईज हेय.’’ सेल्ले योहानाय त्याल बाप्तिस्मा देना, काहाका येशूय कोदहिज पाप नाय कोअला.

![](https://cdn.door43.org/obs/jpg/360px/obs-en-24-08.jpg)

बाप्तिस्मा देय देना पासे जोवे येशू पाअंया बारे येनो, तोवे पोरमेहेरा आत्मा कबुतरा रुपामाय प्रगट जाया आने नीचे येयन बोही गोया. त्या समये, पोरमेहेराय होरगामाने गोठ कोअयी. त्याय आख्या, “तू मा पोहो हेय. आंय तोवोय माया कोअहू, आने आंय तोकोय खुब खुश हेय.’’

![](https://cdn.door43.org/obs/jpg/360px/obs-en-24-09.jpg)

देवाय योहानाल आखला, “पवित्र आत्मा निचे येयन ज्या कादावोय उबा रोय जाय, त्याल तू बाप्तिस्मा देहे.’’ तोज पोरमेहेरा पोहो हेय पोरमेहेर योकूज हेय. पेन जोवे योहानाय येशूल बाप्तिस्मा देना, तोवे पोरमेहेर पिताल गोठ कोअता वोनायो, जो येशू हेय, आने त्याय पवित्र आत्माल देख्या.

*मतत्य अध्याय 3; मार्क  1:9-11; लूक 3:1 हुदी बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_24_128kbps.m4a

## 25. सैतान येशू परीक्षा कोअहे.

https://openbiblestories.org/l/mke/story-25/

![](https://cdn.door43.org/obs/jpg/360px/obs-en-25-01.jpg)

येशू बाप्तिस्मा लेयने ताबाडूज पासे, पवित्र आत्मा त्याल जंगलामाय लेय गोया. येशू ता च्याळीस दिही आने च्याळीस रात आतो. त्या समये त्याय उपवास कोअया, आने सैतानाय येशूही येयने पाप कोराहाटी त्या परीक्षा कोयी.

![](https://cdn.door43.org/obs/jpg/360px/obs-en-25-02.jpg)

पोयला, सैतानाय येशूल आख्या, ‘’जोर तू पोरमेहेरा पोहो हेय ते या दगडाहाल बाखे बोनाडी दे काहाका तू खाय सोकहे!’’

![](https://cdn.door43.org/obs/jpg/360px/obs-en-25-03.jpg)

पेन येशू सैतानाल आख्या, “पोरमेहेरा वचनामाय ई लेखला हेय, ‘जीवता राआहाटी माअहाल फक्त बाखे गरज नाय हेय, पेन त्याहाल हर योक ती गोठी गरज हेय जी पोरमेहेर त्याहाल आखहे!’’’

![](https://cdn.door43.org/obs/jpg/360px/obs-en-25-04.jpg)

तोवे सैतान येशूल मंदिरा बादहाने उची सेंडी वोय लेय गोयो. त्याय त्याल आख्या, जोर तू पोरमेहेरा पोहो हेय ते ईहीने निचे कुदी जो, काहाका लेखला हेय, “देव तुल उसलाहाटी त्या होरगा दुतहाल आज्ञा दि का तो पागहाल दगडाके ठेच नाय लागे.’’

![](https://cdn.door43.org/obs/jpg/360px/obs-en-25-05.jpg)

पेन येशूय ती नाय कोया जी सैतानाय त्याल कोराहाटी आखला. त्याकोअता, त्याय आख्या, “पोरमेहेरा बादहालूज आखहे, ‘तू प्रभू तो पोरमेहेरा परीक्षा मा कोअहे.’’’

![](https://cdn.door43.org/obs/jpg/360px/obs-en-25-06.jpg)

पासे सैतानाय त्याल दुनिया बादे राज्ये देखाड्ये. त्याय त्याल देखाड्या का त्ये कोले शक्तीवाळे आने त्ये कोले हारे हेय. त्याय येशूल आख्या, “ आंय तुल ई बादाज दीही जोर तू गुडगा टेकीन मा सेवा कोअ.’’

![](https://cdn.door43.org/obs/jpg/360px/obs-en-25-07.jpg)

येशूय उत्तर देना, ‘’ओ सैतान मा पाहीने निंगी जो! पोरमेहेरा वचनामाय तो माअहाल हुकूम कोहे, फक्त तो प्रभू पोरमेहेराज सेवा को. पोरमेहेरा रुपामाय फक्त त्याज मान थोव.’’’

![](https://cdn.door43.org/obs/jpg/360px/obs-en-25-08.jpg)

येशूय सैताना परीक्षाहीने हार नाय मानी, याहाटी सैतान त्या पाहीने निंगी गोयो. तोवे होरगा दूत येयने येशू सेवा चाकरी कोरा लाग्या.

*मतय अध्याय 4:1-11; मार्क  1:12-13; लूक 4:1-13 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_25_128kbps.m4a

## 26. येशू त्या सेवा चालू कोअहे.

https://openbiblestories.org/l/mke/story-26/

![](https://cdn.door43.org/obs/jpg/360px/obs-en-26-01.jpg)

सैताना परीक्षाहाल नाकार कोईन पासे, येशू पासे गालीला भागाम येनो. ओ तो जागो हेय जा तो रोय. पवित्र आत्मा त्याल खूब शक्ती देया कोय, आने येशू योका जागावोरे बिजा जागावोय गोयो आने माअहाल हिकाड्या. बादे माअहे त्या बदल हाऱ्यो गोठ्यो आखे.

![](https://cdn.door43.org/obs/jpg/360px/obs-en-26-02.jpg)

येशू नासरेथ शेहरामाय गोयो. ती ई गाव हेय जा तो त्या हानापणामाय रोय. सब्त दिह्ये, तो सेवा कोअना जागावोय गोयो. आग्यावाहाय त्याल यशया भविष्यदवक्ता गोठीही योक पुस्तक देनी. त्याहा विचार आतो का तो ती वाचे. पासे येशूय ती पुस्तक उगाडीन त्या योका भागाल माअहाहाटी वाच्या.

![](https://cdn.door43.org/obs/jpg/360px/obs-en-26-03.jpg)

येशूय वाच्या, “पोरमेहेराय मान तो आत्मा देनहा काहाका आंय गरीबाहामाय सुसमाचार प्रचार कोय सोकू. त्याय मान याहाटी दोवाड्याहा का बंदिवानाहाल सुटे कोय सोकू, आंदळाहाल पासे नजर दि सोकू, आने त्याहाल सुटकारो दाव ज्याहाल बिजे माअहे ठेची रोयले हेय. ओ तो समय हेय जोवे पोरमेहेर आमहावोय मायाळू ओरी आने आमे मदत कोरी.’’

![](https://cdn.door43.org/obs/jpg/360px/obs-en-26-04.jpg)

पासे येशू बोही गोयो. बादे माअहे त्याल खूब ध्यान देयन ऐय रोयले. त्यें जाअते आते का पवित्रशास्त्र जो भाग त्याय आमी वाचह्यो तो मसीहा बदल आतो. येशूय आख्या, “ज्यो गोठ्यो माये आमी तुमेहाटी वाचह्यो, त्यो या समये पुरी ओय रोयल्यो हेय.’’ बादा माअहाल नावाय लागी. त्याहाय आख्या, “काय ओ योसेफा पोहो नाय हेय का?’’

![](https://cdn.door43.org/obs/jpg/360px/obs-en-26-05.jpg)

तोवे येशूय आख्या, “ई बोरबर हेय का माअहे कोअहाबी ओहडा भविष्यद्वक्ता स्विकार नाय कोए जो त्याहा सेहरामाय पालन-पोषण ओयन मोठ जायला हेय. एलिशा भविष्यद्वक्ता समयामाय, इस्राएलाम खूब विधवा आत्यो. पेन जोवे साडे तीन वोरहे हुदी पांअय नाय पोडो तोवे पोरमेहेराय एलियाल इस्राएलाम कोअहीबी विधवा मदत कोराहाठी नाय दोवाड्या. याल सोडीन, त्याय एलियाल योका बिजा देशा विधवा पाअही दोवाडया.’’

![](https://cdn.door43.org/obs/jpg/360px/obs-en-26-06.jpg)

येशूय आखना चालूज राख्या, “आने एलिशा भविष्यद्वक्ता समयामाय, इस्राएलामाय खूब माअहे चाबडी रोगाके पिडाले आते. पेन एलिशाय त्याहामाने कादाल बी हारा नाय कोया. त्याय फक्त इस्राएला विरोद्या सेनापती नामानालूज हारा कोया.’’ पेन ज्यें माअहे येशू वोनाय रोयले त्यें यहूदी आते. याहाटी जोवे त्याहाय त्याल ई आखता वोनाये तोवे त्याहाल त्यावोय रग कोय येनी.

![](https://cdn.door43.org/obs/jpg/360px/obs-en-26-07.jpg)

नासरेथा माअहाय येशूल दोयी लेदा आने त्याल सेवा कोअना जागावोरे गोहलीज बारे ली गोये. त्यें त्याल माई टाकाहाटी निचे टाका योका डोगाला सेंडीवोय लेय गोये. पेन येशू टोळामाने निंगी गोयो आने नासरेथ सेहराल सोडीन निंगी गोयो.

![](https://cdn.door43.org/obs/jpg/360px/obs-en-26-08.jpg)

पासे येशू बादा गालीला भागाम गोयो, आन मोठो टोळो त्याही येनो. त्यें ओहडा खूब माअहाल लेय येने ज्यें बिमार आने अपंग आते. यामाने आर्दे ऐयी, चाली, वोनाय नेते बोली नाय सोके, आने येशूय त्याहाल हारा कोया.

![](https://cdn.door43.org/obs/jpg/360px/obs-en-26-09.jpg)

पासे, खूब माअहे येशू पाही लेय येने ज्याहामाय खराब आत्मा आतां. येशू त्याहामाने खराब आत्माहाल निंगी जाअहाटी हुकूम देनो. त्यें खराब आत्मे खूब बोंबल्ये, “तू पोरमेहेरा पोहो हेय!’’ टोळा लोक नोवायी पाम्या, त्याहाय पोरमेहेरा स्तुती कोयी.

![](https://cdn.door43.org/obs/jpg/360px/obs-en-26-10.jpg)

पासे येशूय बारा आदम्याहाल निवड्या ज्याहाल त्याय त्या प्रेरित आख्या. त्या प्रेरिताहाय त्याआरी प्रवास कोयो आने त्यापाने शिक्षण लेदा.

*मतय  अध्याय 4:12-25; मार्क  1:14-15, 35-39; 3:13-21; लूक 4:14-30, 38-44 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_26_128kbps.m4a

## 27. दयाळू शोमरोन्या कहानी

https://openbiblestories.org/l/mke/story-27/

![](https://cdn.door43.org/obs/jpg/360px/obs-en-27-01.jpg)

योक दिही, यहुदी नियम खूब जाअनारा योक माअहू येशू पाही येना. तो बादहाल ई देखाडा आतो का येशू चुकीके हिकाडी रोयह्यो. याहाटी त्याय आख्या, ओ गुरु, जोलामजुग्या जीवन मिळाहाटी आंय काय कोउ?’’ येशूय उत्तर देना, “देवा नियमाम काय लेखला हेय?’’

![](https://cdn.door43.org/obs/jpg/360px/obs-en-27-02.jpg)

त्या माअहाय आख्या, “तो आखहे का तुमे पोरमेहेरावोय तो बादा मन, जीव, गोती, आने बुध्दीकोय मोया थोव. आने तो पोडोस्याव सोवताहा रोका माया थोव.’’ येशूय उत्तर देना, “तू योकदम बोरोबर हेय! जर तू ऐहेके कोहे, ते तुल जोलामजुग्या जीवन मिळी.”

![](https://cdn.door43.org/obs/jpg/360px/obs-en-27-03.jpg)

पेन तो नियम जाअनारा माअहाल देखाडना मागे का त्या जीवन जीवना रीत खोरी आती. याहाटी त्याय यीसूल होद्या, “ठीक हेय, ते मा पोडोसी कुउ हेय?’’

![](https://cdn.door43.org/obs/jpg/360px/obs-en-27-04.jpg)

येशूय त्या नियम जाअनाराल योक गोठ आखीन उत्तर देना. “योक यहूदी माअहू आता जी योक वाट दोयन यरुशलेममाने यरीहो ऐहे प्रवास कोय.’’

![](https://cdn.door43.org/obs/jpg/360px/obs-en-27-05.jpg)

“पेन बांडहाय त्याल देख्यो आने त्यावोय होमलो कोय देनो. त्याहाय त्या बादाज काय लेय लेदा आने त्याल लगबग मोअय जाय ओला ठोक्या. तोवे त्या निंगी गोया.’’

![](https://cdn.door43.org/obs/jpg/360px/obs-en-27-06.jpg)

“त्या पासे ताबाडूज, योक यहूदी याजक (देवा सेवक) ती वोरे गोयो. त्या याजकाय (देवा सेवकाय) त्या माअहाल वाटीवोय पोडला देख्या. जोवे त्याय त्याल देख्या तोवे तो वाटी बिजी कानी जायने आगला निंगी गोयो. त्याय त्या माअहाल पूरी रीतीकोय देखीन बी त्या एसने पाठ फेरवी लेदी.’’

![](https://cdn.door43.org/obs/jpg/360px/obs-en-27-07.jpg)

थोडा समया पासे, योक लेवी ती वाटीवोय येनो. (लेवी यहूदीयाहा योक जात आती ज्याहाय मंदिराम याजकाहा मदत कोय.) तो लेवी बी वाटी योके कानीने निंगी गोयो. त्याय बी त्या माअहाल देखीन बी त्या एसने पाठ फेरवी लेदी.’’

![](https://cdn.door43.org/obs/jpg/360px/obs-en-27-08.jpg)

“त्याहा पासे वाटीवोय येना ती योक शोमरोनी माअहू आता. (शोमरोनी आन यहूदी योक-बिजाल पसंद नाय कोय) त्या शोमरोनीय वाटीवोय त्या माअहाल देख्या. त्याय देख्या का ई यहूदी हे, तेबी बी त्याल त्यावोय खूब कीव येनी. पासे तो त्या पाही गोयो आने त्या जखमावोय पट्टी बांदी.

![](https://cdn.door43.org/obs/jpg/360px/obs-en-27-09.jpg)

“पासे त्या शोमरोनीय त्या माअहाल त्या खांदावोय टाक्या आने त्याल ती वाटीवोरे योका धर्मशाळेमाय लेय गोयो. जा त्याय त्या देखरेख चालू थोवी.’’

![](https://cdn.door43.org/obs/jpg/360px/obs-en-27-10.jpg)

आगले दिही, त्या शोमरोनील त्या प्रवास चालू थोवना गरज आती. त्याय त्या धर्मशाळेमाय काम कोअनाराल माअहाल पोयसा देना. त्याय त्याल आख्या, “या माअहा देखरेख कोअजे. जर या पोयसाहाल सोडीन तो पोयसा खर्चायी तर पासे फिरी येयन आंय तुल त्या खर्चाला पोयसाहा भोरपाई कोय दीही.’’

![](https://cdn.door43.org/obs/jpg/360px/obs-en-27-11.jpg)

पासे यीसूय त्या नियम जाअनारा माअहाल होद्या, “तुमा काय विचार कोअताहा? या तीन माअहा माने कुउ त्या माअहा पोडोसी हेय ज्याल लुटला आन ठोकला गोया आता?’’ त्याय उत्तर देना, “तोज जो त्यावोय दया कोयी. “येशूय त्याल आख्या,” तू जो आन तेहेकेज कोअजे.’’

*लूक अध्याय 10:25-37 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_27_128kbps.m4a

## 28. धनवान जूवान अधिकारी .

https://openbiblestories.org/l/mke/story-28/

![](https://cdn.door43.org/obs/jpg/360px/obs-en-28-01.jpg)

योक दिही, योका जुवान अधिकाऱ्याय येशू पाही येयन त्याल होद्या, “ओ हारा गुरु, जोलामजुग्या जीवन मिळवाहाठी मान काय कोरा पोडी?’’ येशूय त्याल आख्या, “तू मान ‘हारो’ काहा आखतोहो? फक्त योकूज हारो हेय आने तो पोरमेहे हेय. पेन जर तूल जोलामजुग्या जीवन मिळवूना हेय तर देवा नियमा पालन को.’’

![](https://cdn.door43.org/obs/jpg/360px/obs-en-28-02.jpg)

‘’मान कोही-कोही आज्ञाहा पालन कोअना गरज हेय?’’ त्याय होद्या. येशूय उत्तर देना, “खून मा कोअहे. सीनाळा मा कोअहे. चोरी मा कोअहे. ठोगहे मा. तो आयही-आबहा मान राखजे, आने तो पोडोशावोय सोवताहा रोकी माया कोअजे.’’

![](https://cdn.door43.org/obs/jpg/360px/obs-en-28-03.jpg)

पेन त्या जुवान माअहाय आख्या, “आंय मा हानापोणाहीनेज यी बादी आज्ञेहे पालन कोअतो येनहो. मान कायम जीवता राअहाटी आमी बी काय कोअना गरज हेय?’’ येशूय त्यावोय नजर कोयी आने त्यावोय मोया कोयी.

![](https://cdn.door43.org/obs/jpg/360px/obs-en-28-04.jpg)

येशूय उत्तर देना, “जर तू खोरो ऐरा मागतोहो तर जायीन तो बादां वेची दे आने ती धन गरीबाहामाय वाटी दे, आने तुल होरगामाय धन मिळी. तोवे येयन मा पाहाला ओय ले.’’

![](https://cdn.door43.org/obs/jpg/360px/obs-en-28-05.jpg)

जी येशूय आख्या जोवे ती जुवान माअहू वोनाया तोवे ती खूब दु:खी ओय गोया, काहाका ती खूब धनवान आता आने त्याल त्या बादी मिळकत देयना नाय आती. ती फिरीन येशू पाहीने निंगी गोया.

![](https://cdn.door43.org/obs/jpg/360px/obs-en-28-06.jpg)

तोवे येशूय त्या चेलहाल आख्या, “देवा राज्याम धनवान माअहा जायना खूब कोठीन हेय! हा योक धनवान माअहा देवा राज्यामाय जायना तुलना उंटा हुई नाकामाने निंगी जायना सोपा हेय.’’

![](https://cdn.door43.org/obs/jpg/360px/obs-en-28-07.jpg)

जी येशूय आख्या ती चेला वोनाया तोवे त्याहाल नोवाय लागी. त्याहाय आख्या, “जर ई ऐहेके हेय ते पोरमेहेर काल वाचाडी?’’

![](https://cdn.door43.org/obs/jpg/360px/obs-en-28-08.jpg)

येशूय चेलहावोय नजर कोयी आने आख्या, “माअहाहाटी सोवताहा तारन कोअना मुश्कील हेय. पेन पोरमेहेराहाटी कायज मुश्कील नाय हेय.’’

![](https://cdn.door43.org/obs/jpg/360px/obs-en-28-09.jpg)

पतरसाय येशूल आख्या, “आमा चेला आमे बादाज काय सोडीन तो पाहला येनहा. ते आमे बक्षीश काय ओरी?’’

![](https://cdn.door43.org/obs/jpg/360px/obs-en-28-10.jpg)

यीसूय उत्तर देना, “योका-योक माअहाय माहाटी गूअ, बाहा, बोही, आबहो, आयहो, पोहे, ई मिळकत सोडही, तो त्यापाने १०० पट वोदारी मिळवी आन जोलामजुग्या जीवन बी मिळवी. पेन ज्यें खूब पोयले हेय, त्ये पाहला ओरी, आने खूबज ज्ये पाहालाऱ्ये हेय त्ये पोयले ओरी.’’

*मतय अध्याय 19:16-30;मार्क 10:17-31; लूक 18:18-30 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_28_128kbps.m4a

## 29. दया नाय कोयनारा दासा गोठ

https://openbiblestories.org/l/mke/story-29/

![](https://cdn.door43.org/obs/jpg/360px/obs-en-29-01.jpg)

योक दिही, पतरसाय येशूल होद्या, “ओ मालका, मान मा बाहाल कोलादा माफ कोरा जोजे जोवे तो मा विरूद पाप कोहे? काय सात हुद?’’ येशूय आख्या, “सातदा नाय, पेन साता सत्तरदा!’’ त्याकोय, येशू आखना हेय का आमहाय कायम माफ कोरा जोजे. तोवे येशूय ई गोठ आखी.

![](https://cdn.door43.org/obs/jpg/360px/obs-en-29-02.jpg)

येशूय आख्या, “पोरमेहेरा राज योका राजा रोका हेय जो त्या दासहापाने ईसाब होदे. त्या योक दास २,००,००० वोरहा कामानी बराबोर योक मोठा कर्जा कर्जदार आतो.

![](https://cdn.door43.org/obs/jpg/360px/obs-en-29-03.jpg)

पेन तो दास त्या कर्जा चूकाडी नाय सोक्यो, याहाटी राजाय आख्या, “त्या कर्जा चुकाडाहाटी त्या माअहाल आने त्या कुंटूबाल दासा रुपाम वेची दा.’’

![](https://cdn.door43.org/obs/jpg/360px/obs-en-29-04.jpg)

“त्या दासाय राजा आगला त्या गुडगाहावोय पोडीन आख्या, दया कोईन माआरी धीर दोअ, आने आंय तो कर्जा पूरा रकम चुकाडी दीही. राजाय दासावोय दया कोयी, याहाटी त्याय त्या बादा कर्जा माफ कोय देना आने त्याल जा देना.’’

![](https://cdn.door43.org/obs/jpg/360px/obs-en-29-05.jpg)

“पेन जोवे तो दास राजाहीने बारे गोयो, तोवे त्याल त्या योक आऱ्यो दास मिळ्यो ज्या त्या चार मोयनाहा कामानी कर्जदार आतो. त्या दासाय त्या आऱ्या दासाल दोई लेदा आने आख्या, “जी तोवोय मा कर्जा हेय मान ती चुकाडी दे!’’

![](https://cdn.door43.org/obs/jpg/360px/obs-en-29-06.jpg)

त्या आऱ्या दासाय गुडगाहावोय पोडीन आख्या, “दया कोयीन माआरी धीर दो, आने आंय तो कर्जा पूरी रक्कम चुकाडी दीही. “पेन यावोय दया नाय कोअता, त्या दासाय त्या आऱ्या दासाल जेलीमाय टाकी देना जावहुद का तो त्या कर्जाल चुकाडी नाय देय.’’

![](https://cdn.door43.org/obs/jpg/360px/obs-en-29-07.jpg)

“जी काय जाअला त्याल बिजा दासाहाय देख्या आने त्या खूब निराश जाया. त्या राजाही गोया आने त्याल बादा आखी देखाडया.’’

![](https://cdn.door43.org/obs/jpg/360px/obs-en-29-08.jpg)

“राजाय त्या दासाल हादीन आख्या, “ओ दुष्ट दास! माये तो कर्जाल याहाटी माफ कोअला आता काहाका तूये माअही विनंती कोअली. तुल बी ऐहेकेज कोरा जोजता आता. “राजाल ओली रोग कोय येनी का त्याय त्या दुष्ट दासाल जेलीमाय टाकी देना जावहुद का तो त्या कर्जाल पासे चुकाडी नाय देय.’’

![](https://cdn.door43.org/obs/jpg/360px/obs-en-29-09.jpg)

तोवे येशूय आख्या, “मा होरगामाय रोनारो आबहो तुमे योका-योका आरी ई कोरी जर तुमे बाहाल तुमे मनाकोय माफ नाय कोअहा ते.’’

*मतय अध्याय 18:21-35  हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_29_128kbps.m4a

## 30. यीसू पाच हजार माअहाल खायना खावाडहे

https://openbiblestories.org/l/mke/story-30/

![](https://cdn.door43.org/obs/jpg/360px/obs-en-30-01.jpg)

येशूय प्रेषिताहाल प्रचार कोरा आने माअहाल हिकाडाहाटी खूब जुदा-जुदा गावामाय दोवाड्या. आने त्या ताने फिरी येना जाअ येशू आतो आने त्याहाल काय कोअया ती आखी देखाड्या. तोवे येशूय त्याहाल तलावा बिजी कानी त्याहा आरी शांत जागावोय जाईन थोडो समय आराम कोराहाटी होद्या. आने त्या उड्याम बोही गोये आने तलावा बिहिरी जागे निगी गोया.

![](https://cdn.door43.org/obs/jpg/360px/obs-en-30-02.jpg)

पेन ताअ खूब माअहे आतें ज्याहाय येशूल आने चेलहाल उड्याम जाता देख्या. त्ये माअहे त्याहा आगला तलावा बिजी कानी कोडसा-कोडसावोय धावलेते गोयें. येशू आने चेलाह येयना आगला माअहा योक मोठो टोळो त्याहा वाट जोवे ताअ तो पोयला हीने आतो.

![](https://cdn.door43.org/obs/jpg/360px/obs-en-30-03.jpg)

त्या टोळामाय बायहील आने पोहहाल नाय गोनता ५,००० कोअता वोदारी लोक आतां. येशूल त्या लोकहावोय खूब किंव येनी. येशू नोजरी,आय त्या लोक वोगर चाअनारा मेंडहा रोके आतें. याहाटी त्याहाल हिकाड्या आने त्याहामाय ज्या लोक बिमार आतां त्याहाल हारा कोया.

![](https://cdn.door43.org/obs/jpg/360px/obs-en-30-04.jpg)

दिही बुडा समये, चेलहाय येशूल आख्या,’’ आमी वाआ लागी गोयही आने जागेजागे शेहर बी नाय हेय. या लोकहाल सोडी दे काहाका त्ये जाईन खायनाहाटी लेय येय.’’

![](https://cdn.door43.org/obs/jpg/360px/obs-en-30-05.jpg)

पेन येशूय चेलहाल आख्या, “तुमा ऐलहाल खायनाहाटी कांय तेबी दा!’’ त्याहाय उत्तर देना, “आमा ऐहेके केहेके कोय सोकताहा? आमहावोय फक्त पाच बाख्यो आने बेन मासे हेय.’’

![](https://cdn.door43.org/obs/jpg/360px/obs-en-30-06.jpg)

येशूय त्या चेलहाल आख्या का त्या टोळा लोकहाल पन्नास-पन्नास पांगातमाय बोहा आखा.

![](https://cdn.door43.org/obs/jpg/360px/obs-en-30-07.jpg)

तोवे येशूय पाच बाख्यो आने बेन मासहाल लेयन होरगा ऐहे ऐया, आने त्या खायनाहाटी पोरमेहेराल धन्यवाद देना.

![](https://cdn.door43.org/obs/jpg/360px/obs-en-30-08.jpg)

पासे येशूय बाख्यो आने मासाहाल तुकडा कोया. त्याय लोकहाल दाहाटी चेलहाल तुकडा देय देना. चेला त्या खायनाल वाटता रोया, आने ती पारवाया नाय! त्या बादा लोक खाईन दाराय गोया.

![](https://cdn.door43.org/obs/jpg/360px/obs-en-30-09.jpg)

त्यापासे, चेलहाय त्या खायनाल योकठा कोया जी उगरी गोयला आने ती बारा सिबले बोराया! ती बादा खायना त्या पाच बाख्यो आने बेन मासहा हीने येनला आता.

*मतय अध्याय 14:13-21; मार्क 6:31-44; लूक 9:10-17; योहान 6:5-15   हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_30_128kbps.m4a

## 31. यीसू पांअया वोय चालहे

https://openbiblestories.org/l/mke/story-31/

![](https://cdn.door43.org/obs/jpg/360px/obs-en-31-01.jpg)

पाच ओजार माअहाल खायना खावाडीन पासे, यीसूय त्या चेलहाल उड्यामाय जाअहाटी आख्यां. त्याय त्याहाल तोळावा त्येकानी जाअहाटी आख्यां काहाका तो थोडा समया हाटी तांआज रुकाय गोयो. सेंले चेला निंगी गोया आने यीसूय लोकहाल सुटा कोया काहाका त्या त्याहा गोअ जाय. त्या पासे, यीसू प्रार्थना कोराहाटी योका डोगावोय निंगी गोयो. तांअ तो योखलो आतो, आने त्याय राती खुब समय हुदी प्रार्थना कोयी.

![](https://cdn.door43.org/obs/jpg/360px/obs-en-31-02.jpg)

त्ये समये, चेला त्या उड्याल चाटला देता जाय रोयला आतां, पेन वारो त्याहा विरूद खूब जोरमे चाली रोयला आतो. खूब रात ओय गोयली तेबी त्या तोळावा विसमाय पोचला.

![](https://cdn.door43.org/obs/jpg/360px/obs-en-31-03.jpg)

त्ये समये यीसूय प्रार्थना कोअना बंद कोयी आने त्या चेलहा ही पासी फिरी जाअ निंग्यो. तो उड्या ऐसे जाअहाटी पांअया उपे चाला लाग्यो.

![](https://cdn.door43.org/obs/jpg/360px/obs-en-31-04.jpg)

तोवे चेलहाय त्याल देख्या. त्या खूब गाबराय गोया काहाका त्याहाय जाअया का तो बूत हेय. यीसू जांअतो आतो का त्या गाबराय गोयहा, याहाटी त्याय त्याहाल आवाज देयन आख्यां, ‘’गाबराहा मा, आंय हेय!’’

![](https://cdn.door43.org/obs/jpg/360px/obs-en-31-05.jpg)

तोवे पतरसाय यीसूल आख्यां, “ओ प्रभू, जर ओ तुं हेय ते मान पांअया वोय तोही पाही याहाटी आज्ञा दे.’’ यीसूय पतरसाल आख्यां, “ये!’’

![](https://cdn.door43.org/obs/jpg/360px/obs-en-31-06.jpg)

सेंले पतरस उड्यामाने उती गोयो आने यीसू पाही जाअहाटी पांअया जेळकाहा वोय चाला सुरुवात कोयी. पेन वायज दूर जाईन, त्याय त्या नजर यीसू हीने फेडी लेदी आने जेळकाहाल ऐंया आने जोरमे वारो चालहे ऐहकोय त्याल होमजाया.

![](https://cdn.door43.org/obs/jpg/360px/obs-en-31-07.jpg)

तोवे पतरस गाबराय गोयो आने पांअया वोय बुडा लाग्यो. तो बोंबल्यो, “ओ प्रभू, मान वाचाड!’’ यीसूय त्ये समये आथ आगला कोईन त्याल दोई लेदा. तोवे त्याय पतरसाल आख्यां, “तो बरोसो खूब कोमी हेय! पोताल सांभळाहाटी मावोय तुये बरोसो काहा नाय कोयो?’’

![](https://cdn.door43.org/obs/jpg/360px/obs-en-31-08.jpg)

तोवे यीसू आने पतरस उड्याम चोडी गोया, आने योकदाज वारो चालना बंद ओय गोयो. पांयी शांत ओय गोया. चेलहाय नोवाय कोईन ईसू आगला गुडगा टेकाडी देना. त्याहाय त्या सेवा कोअयी आने त्याल आख्यां, ‘’खोराज तुं पोरमेहेरा पोहो हेय.’’

*मतय अध्याय 14:22-33; मार्क 6:45-52; योहान 6:16-21 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_31_128kbps.m4a

## 32. यीसू खराब आत्मा लागला माअहाल आन योकी बिमार बाईल हारा कोहे.

https://openbiblestories.org/l/mke/story-32/

![](https://cdn.door43.org/obs/jpg/360px/obs-en-32-01.jpg)

ईसू आने त्या चेला त्या उड्यामाय त्या जागावोय गोया जाअ गोरासेनी माअहे रोतें आतें. त्या त्याअ जागावोय पोचीन उड्यामाने उत्या.

![](https://cdn.door43.org/obs/jpg/360px/obs-en-32-02.jpg)

ताअ योक माअहू आता जी खराब आत्मा लागला आता.

![](https://cdn.door43.org/obs/jpg/360px/obs-en-32-03.jpg)

ई माअहू ओला शक्तीवाळा आता का कादाबी त्याल ताबामाय नाय कोय सोकता आतां. वार दा माअहाय त्या आथ आने पाग हाकळीहीकोय बी बांदला, पेन तीं त्येहेल तोडी टाके.

![](https://cdn.door43.org/obs/jpg/360px/obs-en-32-04.jpg)

तीं माअहू त्या भागामाय माहानाहा माय रोतां आतां. ई माअहू पुरो दिही आने पुरी रात बोंबल्या कोअता आतां. तो फाडके नाय पोवे आने कायम सोवताहाल दोगडाकोय ठोकी लेय.

![](https://cdn.door43.org/obs/jpg/360px/obs-en-32-05.jpg)

तीं माअहू दांहादीन ईसू पाही येना आने त्या आगला गुडगा टेकाडी देना. तोवे यीसूय त्या माअहा माजेने खराब आत्मा आरी गोठ कोअयी आने आख्यां, “या माअहा माने बारे निंगी ये!’’

![](https://cdn.door43.org/obs/jpg/360px/obs-en-32-06.jpg)

तीं खराब आत्मा मोठा आवाजामाय बोंबल्या, “ओ यीसू पोरदानाहा पोरदान पोरमेहेरा पोहा, तो मापाने काय काम? दया कोईन मान मा सताडेहे!’’ तोवे यीसूय त्या खराब आत्माल होद्या, “तो नाव काय हेय?’’ त्याय उत्तर देना, “मा नाव फोवज हेय, काहाका आमा खूब हेता.’’(रोमन सैनिकाहा लगभग ओजार सैनिकाहा योका टोळी योक “फोवज’’ रोय.)

![](https://cdn.door43.org/obs/jpg/360px/obs-en-32-07.jpg)

त्या खराब आत्माहाय यीसूल विनंती कोअयी, “दया कोईन आमहाल या जागामाने बारे मा दोवाडहे!’’ तां पाहीज डुकराहा योक टोळो चोअतो आतो. याहाटी त्या खराब आत्माहाय विनंती कोअयी, “दया कोईन आमहाल त्या डुकराहा माय दोवाडी दे!’’ यीसूय आख्यां,“ठीक हेय, ऐलहा माय निंगी जा!’’

![](https://cdn.door43.org/obs/jpg/360px/obs-en-32-08.jpg)

सेंले त्यें खराब आत्मा त्या माअहा माने निंगीन त्या डुकराहा माय उराय गोये. त्यें डुकरे दांहादीन योका कोडसा वोरे तोळावामाय कुदी गोये आने बुडी मोअये. त्या टोळामाय लगबग बेन ओजार डुकरे आते.

![](https://cdn.door43.org/obs/jpg/360px/obs-en-32-09.jpg)

तां त्या डुकराहा देखरेख कोअनारे माअहे आते. जीं काय ओअला जोवे त्याहाय देख्या तोवे त्यें शेहरामाय नाहीं गोये. ईसूय जी कोअला आतां तां त्याहाय बादहाल आख्यां. त्या शेहरा माअहे निंगी येने आने त्या माअहाल देख्या ज्यामाय खराब आत्मा आती. तो शांतीकोय, फाडके पोवलो, आने योक हारा माअहा रोका जीवन जीवे.

![](https://cdn.door43.org/obs/jpg/360px/obs-en-32-10.jpg)

त्यें माअहे खूब गाबराले आते आने त्याहाय यीसूल निंगी जाअहाटी आख्यां. सेंले ईसू उड्यावोय चोडी गोयो. तीं माअहू ज्यामाय खराब आत्मा आती त्याय ईसू आरी जाअ विनंती कोअयी.

![](https://cdn.door43.org/obs/jpg/360px/obs-en-32-11.jpg)

पेन ईसूय त्याल आख्यां, “नाय, मा ई इच्छा हेय का तुं गोअ जाईन बादहाल आख का पोरमेहेरांय तोहाटी काय कोअला हेय. त्याहाल आख का केहकोय पोरमेहेरांय तोवोय दया कोअली.’’

![](https://cdn.door43.org/obs/jpg/360px/obs-en-32-12.jpg)

याहाटी तीं माअहू निंगी गोया आने बादहाल या बदल आख्यां जीं यीसूय त्याहाटी कोअला त्या गोठील वोनानारा योका-योक माअहू चोकीत ओय जाय.

![](https://cdn.door43.org/obs/jpg/360px/obs-en-32-13.jpg)

यीसू तोळावा बिहिरी कानी फिरी येनो. त्या तांअ पोच्या पासे, योक मोठो गर्दी त्या च्यारी-चोमखी योखठी ओअयी आने त्याल दाबा लागी. ती गर्दीमाय योक बाई आती जी बारा वोरहे लोय वोवना रोगा के पिडाली आती. त्येय त्ये बादा पोयसा दवाखानामाय देय देनला आतां काहाका त्यें त्येल हारां कोई सके, पेन ती रोग आजू बी वोदी गोयलो .

![](https://cdn.door43.org/obs/jpg/360px/obs-en-32-14.jpg)

तीं वोनाली आती का यीसूय वार बिमारी माअहाल हारा कोअयेहे आने तिय विचार कोयो, “आंय खोरांज का जोर आंय फक्त यीसू फाडकाहाल आथली लिही तोवे आंय बी हारी ओय जाही!’’ याहाटी ती यीसू पाहला येनी आने त्या फाडकाहाल आथली लेदा. जेहकोय त्येय त्याल आथल्या तीं लोय वोवना बंद ओय गोया.

![](https://cdn.door43.org/obs/jpg/360px/obs-en-32-15.jpg)

ताबाडूज, यीसूय जाई लेदला का त्यामाने शक्ती निंगही. याहाटी त्याय पाहला फिरीन होद्या, “मान कादाय तेबी आथल्या?’’ चेलहाय उत्तर देना, “ईही ओलेबादे माअहाय तो च्यारी-चोमखी गर्दी कोअली हेय, आने तुल डेकली रोयले हेय. ते तुं काहा होद्या का मान कुयें आथलुला हेय’’

![](https://cdn.door43.org/obs/jpg/360px/obs-en-32-16.jpg)

ती बाई ईसू आगला कापती आने खूब गाबराईन तीं गुडगाहा वोय बोही गोयी. तोवे तिय त्याल आखी देना का तिय काय कोअला हेय, आने ई बी का ती हारी ओय गोयली हेय. यीसूय त्येल आख्या, “तो बरोसाय तुल हारा कोअला हेय. शांती कोय जो.’’

*मतय अध्याय 8:28-34; 9:20-22; मार्क 5:1-20; 5:24b-34; लूक 8:26-39; 8:42b-48  हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_32_128kbps.m4a

## 33. योका शेतकऱ्या गोठ

https://openbiblestories.org/l/mke/story-33/

![](https://cdn.door43.org/obs/jpg/360px/obs-en-33-01.jpg)

योक दिही, ईसू तळावा कोडसा पाही आतो. तो माअहा योक खूब मोठी गर्दील हिकाडी रोयलो आतो. त्याल वोनाया हाटी ओलेबादे माअहे येने का ईसूल पाही त्या बादहा आरी गोठ कोराहाटी जागो नाय वाचायो. याहाटी तो पांअयामाय उबी उडी वोय चोडी गोयो. तांअ तो बोही गोयो आने माअहाल हिकाडया.

![](https://cdn.door43.org/obs/jpg/360px/obs-en-33-02.jpg)

ईसूय त्याहाल ई गोठ आखी, “योक शेतकरी बियांरो वोराहाटी बारे निग्यो. जोवे तो आथाकोय बियांराल फोकी रोयलो आतो तोवे आरदो बियांरो वाटीवोय पोडयो. पेन चीडहाय येयन त्या बियांराल खाय लेदा.’’

![](https://cdn.door43.org/obs/jpg/360px/obs-en-33-03.jpg)

“बिहीरो बियांरो दोगडाली दोरती वोय पोडयो जांअ खूब कोमी कादू आतो. दोगडाली दोरती वोय बियांरो खूब माहारी हूकराय येनो, पेन त्याहा मुळे दोरतीमाय माअजे जाअ हारे नाय आते. जोवे दिही निग्यो आने तोप ओअयो तोवे त्ये रोपे कोमाय गोये आने मोई गोये.’’

![](https://cdn.door43.org/obs/jpg/360px/obs-en-33-04.jpg)

‘’आजू बिहीरो बियांरो जाडहा माअजे पोडयो. त्या बियांराय वोदा सुरुवात कोअयी, पेन काटहाय त्याहाल दाबी देना. याहाटी काटावाळी दोरती वोय पोडला बियांरा माने निगले रोपे कायबी धान्य पाकाडी नाय सोक्या.’’

![](https://cdn.door43.org/obs/jpg/360px/obs-en-33-05.jpg)

‘’बिहीरो बियांरो हारी दोरतीवोय पोडयो. तो बियांरो वोदयो आने बियांरो वोओलो आतो त्याकोयता तीस, साठ, होव पट धान्य पाकाडया. जी कादाबी पोरमेहेरा पाहाला चाला मागहे, ती ई गोठी वोय द्यान देय जी आंय आखी रोयलो हेय!’’

![](https://cdn.door43.org/obs/jpg/360px/obs-en-33-06.jpg)

ये गोठीकोय चेलहाल काय होमजाया नाय. याहाटी ईसूय दाखलो आख्यां, “तो बियांरो पोरमेहेरा वचन हेय ती वाट योक ओहोडा माअहू हेय जी पोरमेहेरा वचनाल वोनायेहे, पेन त्याल होमजे नाय. तोवे सैतान त्या पायने वचन उठावी लेय जाहे. मोनजे सैतान त्याल वचन होमजूना हीने दूर थोवतो हेय.’’

![](https://cdn.door43.org/obs/jpg/360px/obs-en-33-07.jpg)

“ती दोगडाली दोरती ओहोडा माअहू हेय जी पोरमेहेरा वचन वोनाहयेहे आने खुशीके त्याल स्वीकार कोअहे. पेन जोवे कठीन समय येहे, नेते, जोवे बिहिरे माअहे त्याल खिजवाडतेहे, तोवे तो पोरमेहेरा हीने दूर निंगी जाहे. मोनजे तो पोरमेहेरा वोय बोरसो कोरा बंद कोई देहे.’’

![](https://cdn.door43.org/obs/jpg/360px/obs-en-33-08.jpg)

“ती काटावाळी दोरती ओहोडा माअहू हेय जी पोरमेहेरा वचन वोनायेहे. पेन ती खूब बादया गोठही बदल चिंता कोयना सुरुवात कोय देहे. काही समया पासे, आमी तो पोरमेहेरावोय माया कोरा खोरो नाय हेय. याहाटी जी त्याहाय पोरमेहेरा वचना कोय हिकला आता तो त्या पोरमेहेराल खुश कोअना माय खोरा नाय कोई रोयलो हेय. तो गोंवहा बुहटा रोको हेय जी कायबी धान्य पाकाडी नाय सोके.’’

![](https://cdn.door43.org/obs/jpg/360px/obs-en-33-09.jpg)

“पेन हारी दोरती तीं माअहू हेय जी पोरमेहेरा वचनाल वोनायेहे, त्यावोय बोरसो कोअहे, आने फळ पाकाडहे.’’

*मतय अध्याय 13:1-8, 18-23; मार्क 4:1-8, 13-20; लूक 8:4-15 हुदी योक बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_33_128kbps.m4a

## 34. ईसू बिहिरी गोठीहीने हिकाडेहे

https://openbiblestories.org/l/mke/story-34/

![](https://cdn.door43.org/obs/jpg/360px/obs-en-34-01.jpg)

ईसूय पोरमेहेरा राज्या बदल बिहीऱ्यो खूब गोठ्यो आख्यो. दाखला रिते, त्याय आख्यां, “पोरमेहेरा राज योका राई दाना रोका हेय ज्याकादाय त्या रानामाय वोयी देना. तुमा जांअतेहे का राई दानो बादा दानहांमाय बादहाने वाहानो रोहे.’’

![](https://cdn.door43.org/obs/jpg/360px/obs-en-34-02.jpg)

“पेन जोवे राई बियांरो वोदी जाहे तोवे तो बगीचा माने बादा जाडहामाय बादहाने मोठो ओय जाहे, ओलो मोठो ओय जाहे का चिडे येयन त्या डाहागीही वोय आराम कोअतेहे.’’

![](https://cdn.door43.org/obs/jpg/360px/obs-en-34-03.jpg)

ईसूय योक बिहिरी गोठ आखी, “पोरमेहेरा राज खमीरा रोका हेय ज्याल लेयन योक बाई कुटा गोळामाय मिळवी देती आती तोवे तो गोळो फुली जाहे.’’

![](https://cdn.door43.org/obs/jpg/360px/obs-en-34-04.jpg)

“होरगा राज त्या खजाना रोका हेय ज्याल योगदां रानामाय दोबाडी देना. योगदा बिहीरा माअहाल तो खजानो मिळी गोयो आने त्याय त्याल मिळवाहाटी खूब ईच्छा राखी. याहाटी त्याय त्याल पासी पुरी देना. तो ख़ुशीकोय ओलो बोरालो आतो का त्याय जायीन त्या बादाज काय वेची देना काहाका तो ती रान वेचाता ली सके जांअ ओ खजानो आतो.’’

![](https://cdn.door43.org/obs/jpg/360px/obs-en-34-05.jpg)

‘’होरगा राज योका खूब मोअगा चोखा मोत्या रोका बी हेय. जोवे कादो मोत्याहा वेपारी त्याल मिळवी लेहे तोवे तो त्याल वेचता लाहाटी त्या बादाज काय वेची देहे.’’

![](https://cdn.door43.org/obs/jpg/360px/obs-en-34-06.jpg)

तांअ आरदे माअहे आते जी विचार कोअते आते का पोरमेहेर त्याहाल याहाटी स्वीकार कोरी काहाका त्ये हारे काम कोय रोयले हेय. ई माअहे ओहोडा माअहाल हारा नाय मानते आते ज्ये हारे कामे नाय कोअते आते. याहाटी ईसूय त्याहाल ई गोठ आखी: “बेन माअहे आते आने बेनी बी प्रार्थना कोराहाटी मंदिरामाय गोये. त्यामाने योक कर लेनारो आतो, आने बिहीरो योक सेवा कोअनारो पुढारी आतो.’’

![](https://cdn.door43.org/obs/jpg/360px/obs-en-34-07.jpg)

“त्या सेवा कोअनारा पुढाऱ्याहाय यापुरमाने प्रार्थना कोअयी, “ओ पोरमेहेर, तो धन्यवाद ओय का आंय बिहीरा माअहा रोको ऐहकोय का डाखू, न्यायनाय कोअनारे माअहे, सीनाळ्ये, ईही हुदी का या जागावोय हेय या कर लेनारा रोको योक पापी नाय हेतो.’’

![](https://cdn.door43.org/obs/jpg/360px/obs-en-34-08.jpg)

“दाखला हाटी, आंय दर आठवडा माय बेनदा उपवास कोअहू, आने आंय तुल मिळनारा पोयशा आने वस्तूहू दाहावो ईसो तुल दाहू.’’

![](https://cdn.door43.org/obs/jpg/360px/obs-en-34-09.jpg)

“पेन तो कर लेनारो त्या सेवा कोअनारा पुढाऱ्याहा हीने खूब दूर उबो रोय गोयो. त्याय उचे होरगा ऐसे नोजार बी नाय कोअयी. त्याकोयता, त्याय त्या साती पिटीन प्रार्थना कोअयी, “ओ पोरमेहेरा, मावोय दया कोअ काहाका आंय योक पापी हेतो.’’

![](https://cdn.door43.org/obs/jpg/360px/obs-en-34-10.jpg)

पासी ईसूय आख्यां, “आंय तुल खोराज आखहू, पोरमेहेरांय त्या कर लेनारा प्रार्थना वोनायो आने त्याल सेवा कोअनारो घोषित कोअया. पेन त्याय त्या सेवा कोअनारा पुढाऱ्या प्रार्थना नाय वोनायो. पोरमेहेर योका-योक घमंडी टोलपा नीचे कोआडी, पेन तो योका-योक जांआल मान दी ज्या सोवताहाल नम्रं कोअताहा.’’

*मत्तय अध्याय 13:31-33, 44-46; मार्क 4:30-32; लूक 13:18-21; 18:9-14  हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_34_128kbps.m4a

## 35. दया कोयनारा आबहा गोठ

https://openbiblestories.org/l/mke/story-35/

![](https://cdn.door43.org/obs/jpg/360px/obs-en-35-01.jpg)

योक दिही, ईसू त्या खूबज माअहाल हिकाडी रोयलो आतो जीं त्यें वोनाया हाटी योखठे जायले आते. त्यें माअहे कर लेनारे आने आरी बिहिरे माअहे बी आते ज्याहाय मोशे नियमाहा पालन कोरा कोशीत नाय कोअली आती.

![](https://cdn.door43.org/obs/jpg/360px/obs-en-35-02.jpg)

आरदा सेवा कोअनारा पुढाऱ्याहाय देख्या का ईसू या माअहा आरी योक आऱ्या रोको गोठ कोई रोयलो हेय. याहाटी त्याहाय योक-बीजाल ई आखना सुरुवात कोई देनी का तो चुक कोई रोयलो हेय. ईसूय त्याहाल गोठयो कोअते वोनायो, याहाटी त्याय त्याहाल ई गोठ आखी.

![](https://cdn.door43.org/obs/jpg/360px/obs-en-35-03.jpg)

‘’योक माअहू आतां ज्याल बेन पोहा आता. वाहाना पोहाय त्या आबहाल आख्यां, “ओ आबा, आमी मा ईसो जोजे!’’ सेंले आबहाय त्या बेनी पोहहा विसमाय त्या मिळकत वाटी देनी.’’

![](https://cdn.door43.org/obs/jpg/360px/obs-en-35-04.jpg)

“ताबाडूज वाहानो पोहो त्या बादाज काय योखठा कोईन दूर देशांमाय निगी गोयो आने पापी जीवन जीवनामाय त्या बादा पोयशा खर्च कोई देना.’’

![](https://cdn.door43.org/obs/jpg/360px/obs-en-35-05.jpg)

“त्या पासे, जांअ वाहानो पोहो आतो त्या देशामाय योक मोठो दुकाळ पोडयो, आने त्यापांय खायना वेचाता लांअ हाटी पोयशा नाय आतां. याहाठी त्याल जी काम मिळ्या ती डुकराहाल चायना आता. तो ओलो दुखी आने बुखो आतो का तो डुकराहा खायना खातो आतो.’’

![](https://cdn.door43.org/obs/jpg/360px/obs-en-35-06.jpg)

“सेल्ले, त्या वाहाना पोहाय सोवताहाल आख्यां, “आंय काय कोई रोयलो हेतो? मा आबहाही बादा आवत्याहा वोय खाहाटी खुबूज हेय, तेबी बी आंय ईही बुखो मोई रोयलो हेतो. आंय त्या आबहाही पासी फिरी जाही आने त्या आबहा योक आवत्यो बोनाहाटी त्याल विनंती कोअही.’’

![](https://cdn.door43.org/obs/jpg/360px/obs-en-35-07.jpg)

“सेंले त्या वाहाना पोहाय पासी त्या आबहा गोअ ऐसे जायना सुरुवात कोअयी. जोवे का ती आमी दुरुज आतां, त्या आबहाय त्याल देख्या आने त्यावोय दया कोअयी. तो धांवदीन त्या पोहा पाही गोयो आने त्याल सातीही लावीन गुळा देना.’’

![](https://cdn.door43.org/obs/jpg/360px/obs-en-35-08.jpg)

“त्या पोहाय आख्यां, “ओ आबा, मां पोरमेहेरा आने तो विरूद पाप कोअलो हेय. आंय तो पोहो आखाडा हाटी योग्य बी नाय हेतो.’’

![](https://cdn.door43.org/obs/jpg/360px/obs-en-35-09.jpg)

“’पेन आबहाय त्या योका आवत्याल आख्यां, “ताबाडूज जायीन बादहाने हारे फाडके लेय येय आने मा पोहाल पोवाडा! त्याय आंगळीमाय मुदी आने त्या पागहा माय बुटे पोवाडा. पासे बादहाने हारा वासडा माआ काहाका आमा खाजे आन सण वाळजे, काहाका मा पोहो मोई गोयलो आतो, पेन आमी तो जीवतो हेय! तो टाकाय गोयलो आतो, पेन आमी आमहाय त्याल मिळवी लेदलो हेय!’’’

![](https://cdn.door43.org/obs/jpg/360px/obs-en-35-10.jpg)

“याहाठी माअहाय सन वाळना सुरु कोअया. थोडो समय निगी गोयी, मोठो पोहो राना माने काम कोईन गोअ येनो. त्याय गीते आने नाचना आवाज वोनायो आने नवाय लागी का ई काय ओय रोयला हेय.’’

![](https://cdn.door43.org/obs/jpg/360px/obs-en-35-11.jpg)

“जोवे मोठा पोहाल मालूम ओअया का त्ये याहाटी सण वाळी रोयले आते काहाका त्या बाहा गोअ येय गोयलो आतो, तोवे त्याल खूब रग येनी आने गोआमाय हजर नाय ओअयो. त्या आबहाय येयन त्याआरी सण वाळा आख्यां, पेन त्याय त्याल नाय आखी देना.’’

![](https://cdn.door43.org/obs/jpg/360px/obs-en-35-12.jpg)

“त्या मोठा पोहाय त्या आबहाल आख्यां, या बादा वोरहा माय मां तोहाटी इमानदारी कोय काम कोअया! कोवेबी तो गोठील नाय टाळ्या, पेन तुयें कोदही मान योक वाहानी बोकडी बी नाय देनी काहाका आंय मा आरह्या आरी भांडारो कोई सकू. पेन तो या पोहाय तो पोयशा पापी कामहा माय खर्च कोई देनला हेय. आने आमी जोवे तो येनहो तोवे त्याहाटी सण वाळाहाटी तुं बादहाने हारा वासडाल माई टाक्या!’’’

![](https://cdn.door43.org/obs/jpg/360px/obs-en-35-13.jpg)

‘’आबहाय उतर देना, ‘’ओ मा पोहा, तुं बारीमास मा आरी हेय, आने जी काय मा हेय तीं बादा तो हेय. पेन आमेहाटी सण वाळना खोरा हेय काहाका तो बाहा मोई गोयलो आतो, पेन आमी तो जीवतो हेय. तो टाकाय गोयलो आतो, पेन आमी आमहाय त्याल मिळवी लेदलो हेय!’’

*लूक अध्याय 15:11-32  हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_35_128kbps.m4a

## 36. ईसू रूप बदलाना

https://openbiblestories.org/l/mke/story-36/

![](https://cdn.door43.org/obs/jpg/360px/obs-en-36-01.jpg)

योक दिही, ईसूय त्या तीन चेला, पतरस, याकोब, आने योहानाल त्या आरी लेदा.(ओ योहान नावा चेलो तीं माअहू नाय हेय ज्याय ईसूल बाप्तिस्मा देनलो आतो) त्या प्रार्थना कोअरा हाटी योका उचा डोगावोय गोया.

![](https://cdn.door43.org/obs/jpg/360px/obs-en-36-02.jpg)

जोवे ईसू प्रार्थना कोई रोयलो आतो तोवे त्या मुंय दिहया रोका चमकुनारा ओय गोया. त्या फाडके उजाळा रोके उजळे ओय गोये, जेहकोय दोरती वोय कादा कोई सके त्याकोअता बी वोदारी उजळा.

![](https://cdn.door43.org/obs/jpg/360px/obs-en-36-03.jpg)

तोवे मोशे आने एलिया भविष्यो कोअनारा प्रकट ओअयो. यें माअहे दोरती वोय ये समये हीने होव वोरहे पोयला रोत. त्याहाय ईसू आरी त्या मोअना बदल गोठ कोअयी, काहाका तो माहारुज यरुशेलेम माय मोई जाय.

![](https://cdn.door43.org/obs/jpg/360px/obs-en-36-04.jpg)

जोवे मोशे आने एलिया ईसू आरी गोठ कोय रोयला आता तोवे पतरसाय यीसूल आख्या, “आमेहाटी ई ओअना हारा हेय. आपा तीन मांडवा बोनाडहू, योक तो हाटी, योक मोशे हाटी, आने योक एलिया हाटी.’’ पेन पतरस नाय जाएतो आतो का तो काय कोई रोयलो हेय.

![](https://cdn.door43.org/obs/jpg/360px/obs-en-36-05.jpg)

जोवे पतरस गोठ कोई रोयलो आतो, तोवे योक चमकूनारा वादळा निचे येयन त्यावोय सावली कोअयी. पासे वादळा माने योक आवाज येतां वोनायो. त्याय आख्यां, “ओ मा पोहो हेय ज्यावोय आंय माया कोअहूं. आंय त्याकोय खुश हेतो. त्या वोनाया. “त्या तिनी चेला गाबराय गोया आने दोरतीवोय हुवी गोया.

![](https://cdn.door43.org/obs/jpg/360px/obs-en-36-06.jpg)

तोवे ईसूय त्याल आथल्या आने आख्यां, “बीयहा मा. उठा. “जोवे त्याहाय च्यारी-चामखी देख्या, तोवे जी बी तांअ आता तो फक्त ईसू आतो.

![](https://cdn.door43.org/obs/jpg/360px/obs-en-36-07.jpg)

ईसू आने त्या तिनी चेला त्या डोगावोरे पासी निचे उती येना. तोवे ईसूय त्याहाल आख्यां, “आमी जी ईही ओअया तीं गोठ कादा आरी नाय कोअना. आंय माहारुज मोई जाही आने पासी जीवतो ओय जाही. त्या पासे, तुमा माअहाल आखी सोकताहा.

*मत्तय अध्याय 17:1-9; मार्क 9:2-8; लूक 9:28-36 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_36_128kbps.m4a

## 37. यीसू लाजरसाल मोअलामाने जीवतो कोहे.

https://openbiblestories.org/l/mke/story-37/

![](https://cdn.door43.org/obs/jpg/360px/obs-en-37-01.jpg)

लाजरस नावा योक माअहू आता. त्याय बेन बोअहयो आत्या जीही नावे मरिया आन मार्था आता. त्ये बादे यीसू खूब हारे आर्ये आते. योक दिही, कुयें तेबी यीसूल आख्या का लाजरस खूब भिमार आतो. जोवे यीसूय ई वोनायो तोवे त्याय आख्या, ई भिमारी लाजरसाल मोयना आरी पारवाया नाय ओरी. त्याकोयता ई माअहाल देवा मान कोराहाठी कोशीश कोरी.

![](https://cdn.door43.org/obs/jpg/360px/obs-en-37-02.jpg)

यीसू आपे आर्या वोय माया कोयतो आतो, पेन जाअ तोअ आतो ताअ त्याहाय बेन दिही हुदी वाट जोवी. त्या बेन दिहया पासे, त्याय आपे चेलहाल आख्या, याअ, पासी यहुदिया माय जाता. चेलहाय उतर देना, पेन ओ गुरु, आमी वायज वेले पोयला ताअने माअहे तुल मायी टाका आते! यीसूय आख्या, आमे आर्यो लाजरस हुवी गोयलो हेय, आन माअन त्त्याल जागाडना हेय.

![](https://cdn.door43.org/obs/jpg/360px/obs-en-37-03.jpg)

यीसू चेलहाय उतर देना, ओ प्रभू, जर लाजरस हुवी रोयलो हेय, तर तोअ हारो ओय जाय. तोवे यीसूय त्याहाल खोरां-खोरां आखी देना, लाजरस मोयी गोयलो हेय. आंय खुश हेय का आंय ताअ नाय आतो, काहाका तुमा मावोय बोरसो कोय सकहा.

![](https://cdn.door43.org/obs/jpg/360px/obs-en-37-04.jpg)

जोवे यीसू लाजरसा गावाम पोअचो तोवे लाजरसाल मोइ जायीन पोयलाज चार दिही ओय गोयला आता. मार्था यीसूल मिळाहाठी बारे येनी आन आख्या, ओ प्रभू, जर तूअ ईही रोतो तर मा बाहा नाय मोअतो.पेन आंय बोरसो कोहू का जी कायबी तूअ देवावोय मागहे तीअ तुल दिअ.

![](https://cdn.door43.org/obs/jpg/360px/obs-en-37-05.jpg)

यीसूय उतर देना, पुनरुत्थान आन जीवन आंय हेतो. जी कादा मावोय बोरसो कोहे जर तीअ मोई बी जाय तेबी जीवी. जी कादा मावोय बोरसो कोहे तीअ कोदहीज नाय मोरी. काय तूअ यावोय बोरसो कोयतीही? मार्थाय उतर देना, ओ प्रभू, आंय बोरसो कोहू का तूअ देवा पोहो मशीहा हेय.

![](https://cdn.door43.org/obs/jpg/360px/obs-en-37-06.jpg)

तोवे मरिया येनी. तीअ यीसू पागहामाय पोडीन आख्या,ओ प्रभू, जर तूअ ईही रोतो तर मा बाहा नाय मोअतो. यीसुय तील होद्या, तुमहाय लाजरसाल केसे थोवला हेय? त्याहाय त्याल आख्या, कबरीमाय. येअ आन ऐयी लेअ. तोवे यीसू रोअडा लाग्यो.

![](https://cdn.door43.org/obs/jpg/360px/obs-en-37-07.jpg)

तीअ कबर योक गोडदो आतो ज्या बाअनाही योक दगडो थोवलो आतो. जोवे यीसू कबरीही पोअचो तोवे त्याय त्याल आख्या, दगडाल हरकाडी दाअ. पेन मार्थाय आख्या, ऐलाल मोयीन चार दिही ओय गोयला हेय. ऐला माने वास येतो ओरी.

![](https://cdn.door43.org/obs/jpg/360px/obs-en-37-08.jpg)

यीसुय उतर देना, काय मां तुमहाल नाय आखला आता का जर तुमा मावोय बोरसो कोहा तर देवा शक्तील ऐहा? याहाठी त्याहाय दगडाल हरकाडी देना.

![](https://cdn.door43.org/obs/jpg/360px/obs-en-37-09.jpg)

तोवे यीसूय उचे होरगा ऐहे ऐयीन आख्या, ओ आबा, मा वोनाय लाहाठी आंय तोअ धन्यवाद कोहू. आंय जांअतो हेतो का तूअ मा बारीमास वोनातो हो, पेन मां ई ईही उबला या बादा माअहा मदत कोरा हाठी आख्या काहाका या बोरसो कोए का तूयें मान दोवाडला हेय. तोवे यीसूय आवाज देनो, ओ लाजरस, बारे निगी ये!

![](https://cdn.door43.org/obs/jpg/360px/obs-en-37-10.jpg)

सेले लाजरस बारे निगी येनो! तोअ आमी बी मोअलाहा फाडकाके वेटाळला आता. यीसूय त्याल आख्या, याअ मोअलाहा फाडकाल काडाअ ऐला मदत कोआ आन ऐलाल सुटो कोआ. याअ चमत्कारे कोय खूब यहुदियाहाय यीसू वोय बोरसो कोयो.

![](https://cdn.door43.org/obs/jpg/360px/obs-en-37-11.jpg)

पेन यहुदियाहा सेवा कोयनारा आगेवान यीसूवे कुहुदाता लाग्या, याहाठी त्या योजना बोनाडा हाठी आरीज योकठा ओया का केहेके यीसू आन लाजरसाल माई टाकता यी.

*योहान 11:1-46 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_37_128kbps.m4a

## 38. यीसूल दोई देतहे .

https://openbiblestories.org/l/mke/story-38/

![](https://cdn.door43.org/obs/jpg/360px/obs-en-38-01.jpg)

दर वोरही, यहुदी माअहे वोलाडना सन वाळ ते आते. ओ या बदल सन आतो का काही वोरहा पोयला देवाय त्याहा आगला डांयहाल मिसरा गुलामी पाने सोडवूला आता. लगबग तीन वोरहे पासे यीसूय बादा जागावोय प्रचार कोयना आन हिकाडना सुरुवात कोयली. यीसूय त्या चेलहाल आख्या का तोअ त्याहा आरी यरुशेलेम माय वोलाडना सन वाळना विचार हेय,आन ई बी का तोअ ताअ माई टाकलो जाय.

![](https://cdn.door43.org/obs/jpg/360px/obs-en-38-02.jpg)

यीसू चेलहाम योक यहूदा नावा माअहू आता. यहूदा प्रेषिताहा पोयसाहा डोप्टी थोवनारो पुढारी आतो, पेन कोवेबी तोअ त्याअ डोप्टी माने पोयसा काडी लेतो आतो. यीसू आन चेलहा यरुशेलेम माय पोचीन पासे यहूदा यहुदी आग्यावानहाही गोयो.त्याय पोयसा कोयता यीसूल त्याहा आथाम दोय देयना बदल आख्या.तोअ जांअतो आतो का यहुदी आगेवान स्वीकार नाय कोयता आता का यीसू मशीहा आतो.तोअ जांअतो आतो का त्ये त्याल मोई टाकनारे आते.

![](https://cdn.door43.org/obs/jpg/360px/obs-en-38-03.jpg)

देवा सेवकाहा सेवकाय आख्या तेहेके यहुदी आग्यावानहाय यीसूल त्याहा आथाम दोई दाहाठी यहुदाल तीस चांदी सिक्का देना. ई त्या रोका ओया जेहेके का भविष्यो कोयनाराहाय आखला आता का ओरी.यहूदा मानी गोयो आन पोयसा लीन निंगी गोयो. तोअ यीसूल दोराडी दाहाठी त्याहा मदत कोराहाठी कोहीबी वेल होदा लाग्यो.

![](https://cdn.door43.org/obs/jpg/360px/obs-en-38-04.jpg)

यरुशेलेम माय, यीसूय आपे चेलहा आरी वोलांडना सन वाळयो. सना खायना वेले, यीसूय बाखे लीन तोडी. त्याय आख्या, याल लाअ आन खाअ. ई मा शरीर हेय जी आंय तुमे हाठी दाहू. याल मांअ आठवण माय कोयजा. येरीते, यीसूय आख्या का तोअ याहाठी मोयी जाय, मनजे त्याहाहाठी आपे शरीर अरपन चडवी दिअ.

![](https://cdn.door43.org/obs/jpg/360px/obs-en-38-05.jpg)

पासे यीसूय योक द्राक्षाहा रसा गिलास लेदो आन आख्या, याल पी लाअ. नवा वचना मा लोय हेय जी आंय रेडही काहाका देव तुमे पापे माफ कोरी. दर वेळे याल मान ईतवीन कोआ, जीं आमी कोई रोयलो हेतो.

![](https://cdn.door43.org/obs/jpg/360px/obs-en-38-06.jpg)

तोवे इसूय त्या चेलहाल आख्यां, “ तुमे माने योक जांआ मान दोई दी.” चेलहाल नोवाय लागी, आने योक-बिजाल होदता लाग्या का कुंऊ ओहोडा का कोरी. ईसूय आख्यां, “मान दोई देनारो वेक्ती तो हेय ज्याल आंय बाखी टूकडो दांहू.” तोवे त्याय तो बखी टूकडो यहूदाल देनो.

![](https://cdn.door43.org/obs/jpg/360px/obs-en-38-07.jpg)

त्ये बाखेल लेदी पासे, यहूदामाय सैतान उराय गोयो.यहूदा निगीन ईसूल दोरा हाटी यहूदी पुढाऱ्या मोदात कोअरा निंगी गोयो.ओ समय रात्री आतो.

![](https://cdn.door43.org/obs/jpg/360px/obs-en-38-08.jpg)

खायना खायन पासे, ईसू आने त्या चेला जैतून नावा डोगावोय निंगी गोया. ईसूय आख्यां, “तुमा बाद आजे राती मान सोडी दांहा.इं लेखला हेय का ‘मेंडपाळाल माअही आने बादे मेंडे ऐहे-तेहे ओय जाय.’”

![](https://cdn.door43.org/obs/jpg/360px/obs-en-38-09.jpg)

पेत्राय उत्तर देना, “जरी आरदा तुल सोडीन निंगी जाय पेन आंय तुल नाय सोडू!”तोवे ईसूय पेत्राल आख्यां, “सैतान तुमा बादहाल लेय ला मागहे, पेन ओ पेत्र माये तोहाटी प्रार्थना कोअली हेय का तुं बोरसा माय कमी नाय पोडी जां. पेन आजे राती कुकाड वाहायां पोयला तुं मा तीन दा नाकार कोअहे का तुं मान वोळखाबी नाय.”

![](https://cdn.door43.org/obs/jpg/360px/obs-en-38-10.jpg)

पेत्राय तोवे ईसूल आख्यां, “जरी आंय मोई बी जाही पेन आंय कोदही बी तो नाकार नाय कोअही!” आरदा चेलहाय बी ऐहकोयज आख्यां.

![](https://cdn.door43.org/obs/jpg/360px/obs-en-38-11.jpg)

तोवे ईसूय त्या चेलहा आरी गतसमनी नावा जागावोय ईसूय त्या चेलहाल प्रार्थना कोअरा हाटी आख्यां काहाका सैतान त्याहा पारख नाय कोय. तोवे ईसू सोवताहा प्रार्थना कोअरा हाटी निंगी गोयो.

![](https://cdn.door43.org/obs/jpg/360px/obs-en-38-12.jpg)

ईसूय तीनदा प्रार्थना कोअयी, “ ओ मा आबा, जर ओई सोके ते माया कोईन ओ दुखा गिलास पिंया हाटी मान मा देहे. पेन लोकहा पापहा माफ कोअरा हाटी बिहिरी वाट नाय ओरी ते इच्छा पुरी ओए.” ईसू खूब निराश आतो आने त्या गोदारो लोया साठहा रोको आतो.त्याल शक्ती दाहाटी यहोवा पोरमेहेरांय योक दूत दोवाडयो.

![](https://cdn.door43.org/obs/jpg/360px/obs-en-38-13.jpg)

दरेक समये प्रार्थना पासे, ईसू त्या चेलहा पाहीं येनो, पेन त्या हुवी गोयला आतां. जोवे ईसू तिसरेदा फिरी येनो तोवे ईसूय आख्यां, “जागी जा! मान दोई देनारो इही हेय.”

![](https://cdn.door43.org/obs/jpg/360px/obs-en-38-14.jpg)

यहूदी पुढारी, सैनिक, आने योकी मोठी टोळी लेयन यहूदा येनो. त्याहावोय तारवायचो आने होट्यो आत्यो.यहूदाय ईसू पाहीं येयन आख्यां, “ओ गुरु सलाम,” आने त्याल गुळा देना. त्याय दोअरा हाटी निशाणी कोअरा हाटी ऐहकोय कोअला आतां. तोवे ईसूय आख्यां, “ओ यहूदा, काय तुं गुळा देयन मान दोई देतहो?”

![](https://cdn.door43.org/obs/jpg/360px/obs-en-38-15.jpg)

जोवे त्या सैनिक ईसूल दोई रोयला आतां, तोवे पेत्राय त्या तारवाय काडी आने माहायाजका योक सेवका कान कातरी टाक्यो. ईसूय आख्यां, “तारवाय दूर कोअ! आंय मा आबहाल सांबाळ कोअरा हाटी होरगा दूतहा फोवजे हाटी विनांती कोई सोकहू. पेन मान मा आबहा गोठ मानना हेय.”तोवे ईसूय त्या वेक्ती कान हारो कोई देनो.तोवे बादा निंगी गोया.

*मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 से एक बाइबल की कहानी*

Audio: https://git.door43.org/OBS-TLF/mke_obs/releases/download/v1/mke_obs_v1_38_128kbps.m4a

## 39. यीसू होदपूस

https://openbiblestories.org/l/mke/story-39/

![](https://cdn.door43.org/obs/jpg/360px/obs-en-39-01.jpg)

आमी ई आर्दी राती वेल आती. त्या सैनिक यीसूल माहायाजका गोअ लीअ येना. काहाका तोअ यीसूल प्रश्न होदनारो आतो. पतरस दुरने पाहाला जाय रोयलो आतो. जोवे सैनिक यीसूल गोअमे लीअ गोया, तोवे पतरस बारे रुकायन स्वताहाल आगीकोय तापतो लाग्यो.

![](https://cdn.door43.org/obs/jpg/360px/obs-en-39-02.jpg)

गोआ माअजे, यहुदी आग्यावानाहाय यीसू होदपूस कोई. त्ये त्या विरूद खोटी गोठ बोलाहाठी खूब खोटा साक्षीदार लीअ येना. तेबी, त्याहा गोठया योक-बिजा आरी खोर्या नाय आत्या. याहाठी यहुदी आग्यावान ई खोरा नाय ठरवी सक्या का तोअ कोहीबी गोठीम गुनेगार आतो. यीसूय कायज नाय आख्या.

![](https://cdn.door43.org/obs/jpg/360px/obs-en-39-03.jpg)

सेंले, माहायाजकाय सिदा यीसूल ऐईन आख्या, आमहाल आख का काय तूअ जीवता देवा पोहो मशीहा हेय?

![](https://cdn.door43.org/obs/jpg/360px/obs-en-39-04.jpg)

यीसूय अख्या, आंय हेय, आन तुमा मान देवा आरी बोठलो आन होरगामाने येतो बी देखहा. माहायाजकाय त्या फाडके फाडी लेदे काहाका जी यीसूय आख्या त्याल तीअ गोठीव खूब रअग कोई येनी. तोअ बिहीरा आग्यावानहा वोय बोंबल्यो, आमहाल ई आखा हाठी बिहीरा साक्षीदारा काज गरज नाय हेय का या माअहाय काय कोयाहा! तुमहाय स्वताहा त्याल ई आखता वोनायाहा का तोअ देवा पोहो हेय. त्याबदल तुमे काय निर्नय हेय?

![](https://cdn.door43.org/obs/jpg/360px/obs-en-39-05.jpg)

बादा यहूदी आग्यावानहाय माहायाजकाल उतर देना, तोअ मोयना लायक हेय! तोवे त्याहाय यीसू डोळहावोय पट्ठी बांदी, त्यावोय थूप्या, त्याल ठोक्या, आन त्याअ चेहटा कोअयी.

![](https://cdn.door43.org/obs/jpg/360px/obs-en-39-06.jpg)

आन पतरस, जोवे तोअ गोआ बारे वाट जोवतो आतो. तोवे योका कामारी पोहीय त्याल देख्या. तीअ त्याल आख्या, तूबी यीसू आरी आतो! पतरसाय नाय आखी देना. पासे, बिहिरी पोहीय ई गोठील आख्या, आन पतरसाय पासी नाय आखी देना. सेंले, आर्दा माअहाय आख्या, आमा जाअतेहे का तूअ यीसू आरी आतो काहाका तुमा बेनी गालील माने हेय.

![](https://cdn.door43.org/obs/jpg/360px/obs-en-39-07.jpg)

तोवे पतरसाय आख्या, जर आय या माअहाल जाअतो तर देव माअन हाराप देय! ताबाडूज पतरसा ऐहेके रिते हाराप खायीन पासे,योक कुकडो वाहायो. यीसूय पाहाला फिरीन पतरसाल देख्या.

![](https://cdn.door43.org/obs/jpg/360px/obs-en-39-08.jpg)

पतरस ताआने निगी गोयो आन हुकली-हुकलीन रोडयो. त्याज वेले, यीसूल दोई देनारो यहूदाय देख्या का यहुदी आग्यावानाय यीसूल मोरना दंड देनलो हेय. यहूदा खूब दुखी ओय गोयो आन जायीन स्वताहा मोई गोयो.

![](https://cdn.door43.org/obs/jpg/360px/obs-en-39-09.jpg)

आमी त्या देशा राज्यपाल पिलातूस आतो. तोअ रोमा हाठी काम कोयतो आतो. यहुदी आग्यावान यीसूल त्या पांय लीन येना. त्याहा विचार आतो का पिलातूस त्याल मोरना दंड देय आन त्याल माई टाके. तोवे पिलातूसाय यीसूल होदयां, काय तूअ यहुदीयहा राजा हेय?

![](https://cdn.door43.org/obs/jpg/360px/obs-en-39-10.jpg)

यीसूय उतर देना, तूअ खोराज आखला हेय. पेन मा राज ईहिने दोरतीवोरे नाय हेय. जर रोतो तर मां आवत्या मां हाठी लडाय कोयता. आंय दोरती वोर देवा बदल खोराज आखा येनली हेय. बादेज जाऐ खोरा वोय माया कोहे तीअ मा वोनायेहे. पिलातुसाय आख्या, तोअ खोरा काय हेय?

![](https://cdn.door43.org/obs/jpg/360px/obs-en-39-11.jpg)

यीसू आरी गोठ कोयीन पासे, पिलातूस बारे गर्दीही यीन आख्या, आंय ऐहेके काय गोठ नाय देखू का ई माअहु माई टाका हाठी योग्य ओय. पेन यहुदी आग्यावान आन गर्दीय बोंबलीन आख्या, एलाल क्रूसवोय चडवी दाअ! पिलातुसाय उतर देना, तो काअहांबी खोटा कोरा गुनेगार नाय हेय. पेन त्या आजू बी मोठा आवाजाम बोंबला लाग्या. तोवे पिलातुसाय तिसर्यादा आख्या, तो गुनेगार नाय हेय!

![](https://cdn.door43.org/obs/jpg/360px/obs-en-39-12.jpg)

पिलातूस गाबराय गोयो का तीअ गर्दी दंगा सुरुवात कोई दिअ, याहाठी तोअ त्याअ सैनिकाहा कोय ईसूल क्रूस वोय चडवा माअनी गोयो. रोमो सैनिकाहाय ईसूल चापकाहा मार देनो, आन त्याल राजा रोके फाडके पोवडये, आन त्याय टोलपाम काटहा बोनावलो टोपो थोव्यो. तोवे त्या ई आखीन त्याय चेहटा कोरा लाग्या ऐरा, यहुदीय हा राजा!

*मतय 26:57-27:26; मार्क 14:53-15:15; लूक 22:54-23:25; योहान 18:12-19:16 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_39_128kbps.m4a

## 40. ईसूल क्रुसा वोय चडवी देतहे.

https://openbiblestories.org/l/mke/story-40/

![](https://cdn.door43.org/obs/jpg/360px/obs-en-40-01.jpg)

ईसू चेहटा कोईन पासे, सैनिक त्याल क्रुसा वोय चडवा हाठी ली गोयो. त्याहाय त्याल क्रूस उसलाड्यो ज्यावोय त्याल मोअनारा आता.

![](https://cdn.door43.org/obs/jpg/360px/obs-en-40-02.jpg)

त्या सैनिक ईसुल त्या जागवोय ली येना त्याल “खोपडी” आखवाम येहे आन त्या आथा पागहाल क्रुसा वोय खिला ठोकी देना. पेन ईसुंय आख्यां, “ओ आबा, याहाल माफ कोओ, काहाका या नाय जांएत का या काय कोई रोयला हेय.” त्याहाय योक पाटी बी त्याअ डोलपीहीं टांअगी देनी. त्यावोय लेखला आता, “यहुद्याहा राजा.” पिलातांय ओ लेख लेखां आखलो आतो.

![](https://cdn.door43.org/obs/jpg/360px/obs-en-40-03.jpg)

तोवे सैनिकाहाय ईसू फाडकाहा हाठी चिट्ठी टाकी. जोवे त्याहाय ऐहेके कोया तोवे त्याहाय ई भविष्योवानील पुरा कोअया जी आखती आती, “त्याहाय मा फाडकें त्याहामाय वाटी लेदें, आन मा फाडकाहा हाठी चिट्ठी टाकी.”

![](https://cdn.door43.org/obs/jpg/360px/obs-en-40-04.jpg)

तांअ बेन डाखू बी आता. त्या सैनिकाहाल त्या वेळे क्रुसा वोय चड्वूला आता. त्याहाल ईसू चामखी कानी चोडावला आता. त्यामाने योका डाखवांय ईसू चेहटा कोअयी, पेन बिहीराय आख्या, “काय तूं नाय बियां का पोरमेहेर तुल डोंड दी? आपा खूब खोटां काम कोअना लीदे गुनेगारी हेता, पेन इं मांअहुं निरदोस हेय.” पासे त्यांय ईसूल आख्यां, “जोवे तूं तो राज्याम येहे तोवे दया कोईन मान ईत राखजे. ईसुंय उतर देना, “आजेज तूं मांआरी होरगामाय रोहे.”

![](https://cdn.door43.org/obs/jpg/360px/obs-en-40-05.jpg)

यहूदी आगेवानहाय आन गर्दी माने बिहीरा लोकहांय बी ईसू चेहटा कोअयी. त्याहाय त्याल आख्या, “जर तूं पोरमेहेरा पोहो हेय, ते क्रूसा वोने नीचे उती ये आन सोवताहाल वाचाडी ले! तोवे आमा तोवोय बोरसो कोअहूं.”

![](https://cdn.door43.org/obs/jpg/360px/obs-en-40-06.jpg)

तोवे त्या बादा देशा वादळा पुरां काळां ओई गोया, जरी तो दिहया समय आतो. इं बोपरी वेळे काळां ओअलां आतां, आन तीन तास हुदी ऐहेकेज रोयला आता.

![](https://cdn.door43.org/obs/jpg/360px/obs-en-40-07.jpg)

तोवे ईसूय बोंबलीन आख्या, “पुरा जायां! ओ आबा, आंय मांअ आत्मा तो आथाम होपहूं.” तोवे त्याय त्या टोलपा नीचे कोअया आन त्या जीव सोडी देनो. जोवे तो मोअयो तोवे योक भूकंप येनो. तो मोठो पोडदो जो पोरमेहेरा हजरी हीने मांअहाल अलग कोए, तो उचेने ते नीचे हुद बेन भाग ओय गोयो.

![](https://cdn.door43.org/obs/jpg/360px/obs-en-40-08.jpg)

त्या मोअना कोय, ईसूय मांअहा हाठी पोरमेहेराहीं येयना वाट उगाडी देनी. ईसू राखवाळी कोअनारा योका सैनिकाय जीं काय ओअलां आता तीं बादां देख्या तोवे त्याय आख्या, “खोरांज, ई मांअहू निरदोस आतां .ओ पोरमेहेरा पोहो हेय.”

![](https://cdn.door43.org/obs/jpg/360px/obs-en-40-09.jpg)

तोवे योसेफ आन निकेदम नावा बेन यहूदी आगेवान येना. त्या बोरसो कोएत का ईसू ओज मशीहा आतो. त्याहाय पिलाता वोय ईसू कुडी मागी. त्याहाय त्या कुडील फाडकामाय वेटाळ्यां. आने त्या त्याल योका दगडामाने कातरीन बोनाडली कबरीमाय ली गोया आन त्येमाय थोवी देना. तोवे त्याहाय कबरी बाअना बंद कोराहाठी योक मोठो दोगाड ठोलाडीन थोवी देनो.

*मतय 27:27-61; मार्क 15:16-47; लूक 23:26-56; योहान 19:17-42 हुदी बायबला यक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_40_128kbps.m4a

## 41. यहोवा पोरमेहेर ईसूल मोअला माने जीवाडाहे.

https://openbiblestories.org/l/mke/story-41/

![](https://cdn.door43.org/obs/jpg/360px/obs-en-41-01.jpg)

सैनिकाहा दुवारे ईसूल क्रुसा वोय चडवी देनो पासे,यहूदी पुढाऱ्याहाय पिलातुसाल आख्यां, ‘’या ठोग, ईसूय आखला आतां तो तीन दिह्यापासे मोअला हा माने जीवतो ओरी. योगदाल इं खोरां कोअरा हाटी कबरी राखवाळी कोअरा पोडी का त्या चेला त्या कुडील लेय नाय जाय. जर त्यें ऐहकोय कोअतेहे ते त्यें आखी का तो मोअलाहा आने जीवी उठलो हेय.’’

![](https://cdn.door43.org/obs/jpg/360px/obs-en-41-02.jpg)

पिलातुसाय आख्यां, “वायज सैनिकाहाल लेय जा, आने जेहकोय तुमा कोय सोकताहा तेहकोय कबरी राखवाळी कोआ.” याहाटी त्याहाय त्ये कबरी उराना बाअणावोय योक सिको लावी देनो त्याहाय इं खोरां कोअरा हाटी तांअ सैनिकाहाल बी बोहाडी देना का कादो बी त्या कुडील लेय जाय नाय सोके.

![](https://cdn.door43.org/obs/jpg/360px/obs-en-41-03.jpg)

ईसू मोअना बिहीरो दिही शबाता दिही आतो. कादोबी शबात दिही काम नाय कोअतो आतो, याहाटी ईसू कोअहोबी आऱ्यो कबरीही नाय येनलो आतो. पेन शबाता बिहिरे दिही, हाकाळेहे वायज बायो ईसू कबरीही जांअहाटी तियार ओअयो. त्यो त्या कुडीवोय आजू मासालो लांवा आत्यो.

![](https://cdn.door43.org/obs/jpg/360px/obs-en-41-04.jpg)

त्यें बाईही पोचना पोयला, कबरीवोय योक मोठो भुकंप जायो. होरगा माने योका होरगा दुताय येयन त्या दोगाडाल होरकाडी देनो जो कबरी उराना बाअणाल बंद कोअना आतां आने त्यावोय बोही गोयो. ओ होरगो दुत उजवाडा रोको चोमकी रोयलो आतो.कबरीवोय ज्या सैनिक आतां त्याहाय त्याल देख्या. त्या ओला बीई गोयला आतां का मोअलाहा रोका दोरतीवोय पोडी गोया.

![](https://cdn.door43.org/obs/jpg/360px/obs-en-41-05.jpg)

जोवे त्यो बायो कबरीही पोच्यो तोवे त्या होरगादुताय त्याहाल आख्यां, ‘’मा बीईत्यो. ईसू ईही नाय हेय. तो मोअलाहा माने जीवी उठलो हेय, ऐहकोय त्याय आखला आतां का तो जीवी उठी! कबरीमाय होदा आने एआ.’’ त्ये बायहींय कबरी माजे आने जांअ ईसू कुडील थोवला आतां तांअ होद्या आने देख्या त्या कुडी तांअनाय आती!

![](https://cdn.door43.org/obs/jpg/360px/obs-en-41-06.jpg)

तोवे त्या होरगादुताय त्यें बाईहील आख्यां, ‘’जायन ऐला चेलहाल आखा, ‘’ईसू मोअला माने जीवतो उठलो हेय आने तो तुमे आगला-आगला गालीलामाय जाय.’’

![](https://cdn.door43.org/obs/jpg/360px/obs-en-41-07.jpg)

त्यें बाईहील नोवाय लागी आने खूब खुश ओअयो. त्यो चेलहाल ई हारी गोठ आखा हाटी दाहाद्यो.

![](https://cdn.door43.org/obs/jpg/360px/obs-en-41-08.jpg)

जोवे त्यो बायो चेलहाल ई हारी गोठ आखा हाटी त्येहे वाटीवोय आत्यो. तोवे ईसू त्याहाल देखायो त्यो त्या पागहाही पोडी गोयो. तोवे ईसूय त्येहेल आख्यां, “बीयहा मा. जायन मा चेलहाल गालील माय जांअ आख्यां. त्यें तांअ मान देखायी.”

*मतय 27:62-28:15; मार्क 16:1-11; लूक 24:1-12; योहान 20:1-18 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_41_128kbps.m4a

## 42. ईसू होरगामाय निंगी जाहे.

https://openbiblestories.org/l/mke/story-42/

![](https://cdn.door43.org/obs/jpg/360px/obs-en-42-01.jpg)

ज्ये दिही यहोवा पोरमेहेरांय ईसूल मोअला माने जीवता कोअला आतां, त्या बेन चेला पाहींने गावामाय जाय रोयला आतां. चालता त्या ईसू आरी कांय जायांला आतां, त्या बाराम गोठ्यो कोई रोयला आतां, त्याहाल आशा आती का तो मसीहा आतो, पेन तेबी त्याल माई टाक्लो आतो. आमी त्यो बायो आखी रोयल्यो आत्यो का तो पासी जीवतो ओय गोयलो हेय. त्या नाय जांऐ का कोअही गोठी वोय बोरसो कोअना हेय.

![](https://cdn.door43.org/obs/jpg/360px/obs-en-42-02.jpg)

ईसूय त्याहा पाहीं येयन त्याहा आरी चालना सुरुवात कोअया, पेन त्या त्याल वोळखी नाय सोक्या. त्याहाल होद्या का त्या कोअही गोठी विसये बोली रोयला आतां. त्याहाय त्याल पाहलाऱ्या दिह्यामाय ईसू आरी जायली बादी घटना बाराम आख्यां. त्याहाय विचार कोअयो का त्या योगदा पोरदेसी माअहा आरी बोली रोयला आतां जो नाय जांआतो आतो का यरुशेलेम माय कांय जायला आतां.

![](https://cdn.door43.org/obs/jpg/360px/obs-en-42-03.jpg)

तोवे ईसूय त्याहाल होमजाड्या का यहोवा पोरमेहेरा वचन मशीहा बोदाल कांय आखहे. खूब पोयला, भविष्यो कोयनाराहाय आखला आता का खोटे माअहे मशीहाल पिडा दि आने माई टाकी. पेन भविष्यो कोयनाराहाय ईबी आखला आता का तो तिसरे दिही जीवतो उठी.

![](https://cdn.door43.org/obs/jpg/360px/obs-en-42-04.jpg)

जोवे त्यें त्या शेहेरा माय पोची जाय त्या बेन ओदमी उबा रोनारा आता, तोवे लगबग वेळ पोडी गोयली आती. त्याहाय ईसूल त्याहा आरी रांअ हाटी आख्यां, सेंले तो त्याहा आरी योका गोआमाय गोया. आपे वेळेवोऱ्या खायना खाहाटी त्या बोही गोया. ईसूय योक बाखे लेयन त्याहाटी यहोवा पोरमेहेरांल धन्यवाद देना, आने पासे त्येल तोड्या. ताबडूज त्याहाय जाई लेदा का तो ईसू आतो. पेन त्या समये, तो त्याहा नोजरी माने निंगी गोयो.

![](https://cdn.door43.org/obs/jpg/360px/obs-en-42-05.jpg)

त्या बेन माअहाय योक-बीजाल आख्यां, ‘’तो ईसू आतो! याहाटी जोवे त्याय आमहाल वचन होमजाडला आता तोवे आमा खूब खुश आता!’’ ताबाडूज, त्या निंगीन पासी यरुशेलेम माय गोया. जोवे त्या पोच्या तोवे त्याहाय चेलहाल आख्यां, ‘’ ईसू जीवतो हेय! आमहाय त्याल देख्या!’’

![](https://cdn.door43.org/obs/jpg/360px/obs-en-42-06.jpg)

जोवे चेला गोठ्यो कोई रोयला आता, ईसू ताबाडूज त्या खोलीमाय त्याहा आरी प्रकट जायो, ‘’ तुमहाल शांती मिळे!’’ चेलहाय विचार कोअयो का तो योगदो बुत आतो, पेन ईसूय आख्यां,’’तुमा काहा बीईतेहे? तुमा काहा नाय विचार कोआ का ओ खोरोज आंय हेय? मा आथ आने पाग एआ. बुतहाल ऐहकोय आंग नाय रोय जेहकोय मापांय हेय.’’ इं देखाडा हाटी तो कादो बुत नाय हेतो, त्याय खाहाटी काय तेबी माग्या. त्याहाय त्याल मासा योक तुकडो देनो, आने त्याय त्याल खाय लेदा.

![](https://cdn.door43.org/obs/jpg/360px/obs-en-42-07.jpg)

ईसूय आख्यां, “मा बदल यहोवा पोरमेहेरा वचन जी काय आखहे ती पुरा ओरी. माये तुमहाल आखी देनला आता का त्या ओना गरज हेय.’’ तोवे ईसूय त्याहाल यहोवा पोरमेहेरा वचन हारी रिते होमजाड्या. त्याय आख्यां, ‘’खूब पोयला भविष्यो कोयनाराहाय लेखला आता का मान, मशीहाल दुख उठावा पोडी, मोरा पोडी आने तिसरे दिही मोअला माने जीवी उठा पोडी.’’

![](https://cdn.door43.org/obs/jpg/360px/obs-en-42-08.jpg)

‘’त्या भविष्यो कोयनाराहाय इं बी लेखला आता का मा चेला यहोवा पोरमेहेरा वचना प्रचार कोरी. त्या दरेक पश्चाताप कोरा हाटी आखी. जर त्या ऐहकोय कोयताहा तर यहोवा पोरमेहेर त्याहा पापहाल माफ कोरी. मा चेला ई गोठील प्रचार कोरी यरुशेलेम माने सुरुवात कोरी. तोवे त्या बादी जागे बादी जातीहीमाय जाय. तुमा मा दरेक गोठीही आने कामहा साक्षी हेय जी माये आखला हेय आने कोअला आता, आने त्या बादा बी जी माआरी जाया.’’

![](https://cdn.door43.org/obs/jpg/360px/obs-en-42-09.jpg)

आगला च्याळीस दिहह्या माय, ईसू त्या चेलहावोय खुबदा प्रकट जायो. योकदा तर तो योकूज समया वोय पाच ओजाराहाने वोदारी माअहा वोय प्रकट ओअयो! त्याय त्या चेलहा वोय खूब रिते साबित कोअया का तो जीवतो आतो, आने त्याय त्याहाल यहोवा पोरमेहेरा राज्या बदल हिकाड्या.

![](https://cdn.door43.org/obs/jpg/360px/obs-en-42-10.jpg)

ईसूय त्या चेलहाल आख्यां, ‘’यहोवा पोरमेहेरांय मान होरगा आने दोरती दरेका जांआ वोय राज कोअरा हक देनलो हेय. याहाटी आमी आंय तुमहाल आखहू जायीन बादी जाती माअहाल चेला बोनाडा. ऐहकोय कोरा हाटी तुमहाल त्याहाल आबहो, पोहो, आने पवित्र आत्मा नावाकोय बाप्तिस्मा देईना हेय. जी कायबी माये तुमहाल आज्ञा देनली हेय ती बादी गोठीहील माना बी तुमहाल हिकाडना हेय. ईत राखा, आंय बारीमास तुमे आरी रोही.’’

![](https://cdn.door43.org/obs/jpg/360px/obs-en-42-11.jpg)

ईसू मोअला माने जीवी उठना च्याळीस दिह्या पासे, त्याय त्या चेलहाल आख्यां, ‘’जांव हुदी का मा आबहो तुमहाल शक्ती नाय देय तांऊ हुदी यरुशेलेम माय रुकाय रा. तो तुमहा वोय पवित्र आत्मा दोवाडी त्याकोय ऐहकोय कोअहा. ’’तोवे ईसू होरगा माय निंगी गोयो, आने योका वादळाय त्याल त्याहा नजरी हीने दोबाडी लेदा. होरगामाय ईसू बादी वस्तू वोय राज कोरा यहोवा पोरमेहेरा हुदा आथा ऐसे बोही गोयो.

*मतय 28:16-20; मार्क 16:12-20; लूक 24:13-53; योहान 20:19-23; प्रेषित 1:1-11 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_42_128kbps.m4a

## 43. मंडळीही सुरुवात ओहे .

https://openbiblestories.org/l/mke/story-43/

![](https://cdn.door43.org/obs/jpg/360px/obs-en-43-01.jpg)

ईसू होरगा माय निंगी जायना पासे, चेला यरुशेलेम माय रुकाया जेहकोय का ईसूय त्याहाल कोरा हुकुम देनलो आतो. तांआने बोरसो कोयनारे मांअहे योकदाज बादे मिळीन प्रार्थना कोरा हाटी योकठें ओअया कोयते आते.

![](https://cdn.door43.org/obs/jpg/360px/obs-en-43-02.jpg)

दर वोरही, वोलानडन सणा ५० दिह्या पासे, यहूदी माअहे पेन्तिकोस्टोल नावा योक खूब महत्वा दिही वाळते आते. पेन्तिकोस्टोल ती वेळ आती जोवे यहूदी माअहे गोंवहा वाडनील वाळते आते. बादी दुनिया माने यहूदी माअहे पेन्तिकोस्टोल दिह्याल वाळाहाटी यरुशेलेम माय येने. ये वोरही पेन्तिकोस्टोल वाळना समये ईसू होरगा माय निंगी जायना लगबग योक आठवडा पासे येनलो आतो.

![](https://cdn.door43.org/obs/jpg/360px/obs-en-43-03.jpg)

त्ये समये बादे बोरसो कोयनारे माअहे योकदाज योकठे आते, तोवे ज्या गोआमाय त्यें आते योकदाज तीं जोरमे वाराकोय बोराय गोया. तोवे आगी जाळी ऐहकोय देखानारा बादा बोरसो कोयनारा माअहा टोलपा उपे प्रकट ओअया. त्यें बादे पवित्र आत्मा कोय बोराय गोये आने त्याहाय बिहिरी भाषा माय यहोवा पोरमेहेरा स्तुती कोअई. यो त्यो भाषा आत्या ज्याहाल बोलाहाटी त्याहाल पवित्र आत्माय शक्ती देनली आती.

![](https://cdn.door43.org/obs/jpg/360px/obs-en-43-04.jpg)

जोवे यरुशेलेम माय रोयनारा माअहाय त्या आवाजा वोनाया, तोवे त्यें गर्दी कोयीन ई एराहाटी येने का काय ओय रोयला आता. त्याहाय बोरसो कोयनारा माअहाल यहोवा पोरमेहेरा कोय कोअय गोयले मोठा-मोठा कामहा गोसना कोयता वोनाये. त्याहाल नोवाय आती काहाका त्यें त्या कामहाल त्याहा भाषेमाय वोनाय रोयले आते.

![](https://cdn.door43.org/obs/jpg/360px/obs-en-43-05.jpg)

त्यामाने आरदा माअहाय आख्यां का त्या चेला पिदला हेय. पेन पतरस उबो रोयो आने त्याहाल आख्यां, ‘’मा गोठ वोनाया! यें माअहे पिदले नाय हेय! त्याकोअता, जी काय तुमा देखतेहे ती हेय जी जोएल भविष्यो कोयनाराय आखला आता का ओरी: यहोवा पोरमेहेरांय आख्यां, सेंल्या दिह्यामाय, आंय मा आत्मा रेडही.’’

![](https://cdn.door43.org/obs/jpg/360px/obs-en-43-06.jpg)

‘’ओ इस्राएली मांअहा, ईसू योक ओहोडा माअहू आतां ज्याय ई देखाडा हाटी का तो कुंऊ आतो खूब चमत्कारी कामे कोयले आते. त्याय यहोवा पोरमेहेरा शक्ती कोय खूब चमत्कारी कामहाल कोअला आता. तुमा ई जांआतेहे, काहाका तुमहाय या कामहाल देखला हेय. पेन तुमहाय त्याल क्रूसावोय चढवी देनो!’’

![](https://cdn.door43.org/obs/jpg/360px/obs-en-43-07.jpg)

‘ईसू मोई गोयो पेन यहोवा पोरमेहेरांय त्याल मोअला माने जीवतो कोय देना. त्याय ई गोठील पुरा कोय देना ज्याकोय योक भविष्यो कोयनाराय लेखला आता: तुं तो पवित्र लोकहाल कबरी माय होडा नाय देहे.’’ आमा साक्षी हेय का ईसूल पासी जीवतो कोय देना.’’

![](https://cdn.door43.org/obs/jpg/360px/obs-en-43-08.jpg)

‘’पोरमेहेर आबाय आमी ईसूल त्या हुदा आथा ऐसे बोहाडीन मान देनलो हेय. आने ईसूय आमे हाटी पवित्र आत्मा दोवाडला हेय जेहकोय का त्याय करार कोअलो आतो तो दोवाडी. पवित्र आत्माज त्या कामहाल ओअरा दि रोयलो हेय ज्याहाल तुमा एयी रोयले हेय आने वोनाय रोयले हेय.’’

![](https://cdn.door43.org/obs/jpg/360px/obs-en-43-09.jpg)

‘’तुमहाय त्या माअहाल, ईसूल क्रुसावोय चढवी देना. पेन खोरा रुपाकोय जांई ला का यहोवा पोरमेहेरांय ईसूल बादी वस्तूहू वोय पोरमेहेर आने मशीहा बेनी नेमलो हेय!’’

![](https://cdn.door43.org/obs/jpg/360px/obs-en-43-10.jpg)

पतरसा गोठ्यो वोनानारे माअहे त्याकोय आखल्या गोठही कोय माजेने बदलाय गोयले आते. याहाटी त्याहाय पतरस आने चेलहाल होद्यां, ‘’ओ बाहाहाय, आमहाय काय कोरा जोजे?’’

![](https://cdn.door43.org/obs/jpg/360px/obs-en-43-11.jpg)

पतरसाय त्याहाल आख्यां, ‘’तुमहा माने दरेक सोवताहा पापहा पश्चताप कोए काहाका यहोवा पोरमेहेर तुमे पाप माफ कोए, आने ईसू नावाकोय बाप्तिस्मा लेय. तोवे तो तुमहाल दाना रुपामाय पवित्र आत्मा बी दी.

![](https://cdn.door43.org/obs/jpg/360px/obs-en-43-12.jpg)

पतरसाय जी आख्यां त्यावोय लगबग तीन ओजार माअहाय बोरसो कोअयो आने ईसू चेला बोनी गोया. त्याहाय बाप्तिस्मा लेदा आने यरुशेलेमा मंडळी भाग बोनी गोया.

![](https://cdn.door43.org/obs/jpg/360px/obs-en-43-13.jpg)

जोवे प्रेषिताहाय त्याहाल हिकाड्या तोवे बोरसो कोयनाराहाय ताबाडूज वोनाया. त्यें कोवेबी मिळते आते आने योखठें येयन खायना खाते आते, आने त्याहाय कोवेबी योक-बिजा हाटी प्रार्थना कोअई. त्याहाय मिळीन यहोवा पोरमेहेरा स्तुती कोईन आने जी काय बी त्याहापांय आतां त्याहाय योक-बीजाल वाटनी कोअया. शेहेरा माने दरेक माअहु हारा विचार राखता आतां. दर दिही, वोदारी आने वोदारी माअहे बोरसो कोअते गोये.

*प्रेरिताहा काम 2 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_43_128kbps.m4a

## 44. पतरस आन योहान योका मागनाराल हारा कोयताहा.

https://openbiblestories.org/l/mke/story-44/

![](https://cdn.door43.org/obs/jpg/360px/obs-en-44-01.jpg)

योक दिही, पतरस आने योहान मंदिरामाय गोया. योक पांगळ्या माअहू भीख मागाहाटी पाथारीवोय बोठला आतां.

![](https://cdn.door43.org/obs/jpg/360px/obs-en-44-02.jpg)

पतरसाय त्या लेंग्ड्या माअहा ऐसे एअया आने आख्यां, “मापांय तुल दाहाटी पोयशा ते नाय हेय. पेन जीं मापांय हेय ती आंय तुल दाहू. ईसू नावाकोय, उठ आने चाल-फिर!’’

![](https://cdn.door43.org/obs/jpg/360px/obs-en-44-03.jpg)

ताबाडूज, यहोवा पोरमेहेरांय त्या लेंगडा माअहाल हारां कोय देना. त्याय ऐहे-तेहे चाला आने कुदा, आने यहोवा पोरमेहेरा स्तुती कोअरा सुरुवात कोई देनी. मंदिरा बाआमाने माअहाल नोवाय लागी.

![](https://cdn.door43.org/obs/jpg/360px/obs-en-44-04.jpg)

ताबाडूज माअहा योक गर्दी त्या माअहाल ऐरा हाठी येनी जी हारा ओय गोयला आता. पतरसाय त्याहाल आख्या, ई माअहु हारा हेय, पेन ई गोठी वोय नवाय मा कोहा. आमहाय याल आपे शक्ती कोय हारा नाय कोयला हेय, पेन याहाठी नाय का आमा देवा माअन कोयतेहे. पेन, तोअ यीसू हेय ज्याय याअ माअहाल आपे शक्ती कोय हारा कोयला हेय, काहाका आमा यीसू वोय बोरसो कोयतेहे.

![](https://cdn.door43.org/obs/jpg/360px/obs-en-44-05.jpg)

‘’त्या तुमा हेय ज्याहाय त्या रोमी राज्यापालाल ईसूल माई टाका हाटी आखला आतां. तुमहाय त्याल माई टाक्या जो बादहाल जीवन देहे. पेन यहोवा पोरमेहेरांय त्याल मोअला माने जीवतो कोअयो. तुमहाय नाय होमज्या का तुमा काय कोअय रोयले हेय, पेन जोवे तुमा त्या कामहाल कोअय रोयले आते, तोवे जो भविष्यो कोअनाराहाय आखला आता ती पुरा ओअया. त्याहाय आखला आतां का मशीहा दुख उठाडी आने मोई जाय. यहोवा पोरमेहेरांय ये रीते ओअरा देना. याहाटी आमी, पस्तावो कोआ आने यहोवा पोरमेहेरा ऐसे फिरा, काहाका तो तुमे पापहाल दोवीन साफ कोय दि.’’

![](https://cdn.door43.org/obs/jpg/360px/obs-en-44-06.jpg)

जोवे मंदिरा आग्यावानहाय पतरस आने योहाना वोनाया, तोवे त्या खूब गाबराय गोया. याहाटी त्याहाय त्याहाल दोयीन जेलीमाय टाकी देना. पेन जी पतरसाय आखला आतां त्यावोय खूब माअहाय बोरसो कोअयो. ईसू वोय बोरसो कोअनाराहा संख्या वादीन लगबग पाच ओजार ओय गोयी.

![](https://cdn.door43.org/obs/jpg/360px/obs-en-44-07.jpg)

आगले दिही, त्या यहूदी आग्यावान पतरस आने योहानाल माहायाजक आने बिहीरा सेवा कोअनारा आग्यावानाहा हुंबुर लेय येना. त्या त्या माअहाल बी लेय येना जी पांगळ्या आता. त्याहाय पतरस आने योहानाल होद्यां, ‘’कोअहा ओदिकारा कोय तुमहाय त्या पांगळ्या माअहाल हारा कोअया?’’

![](https://cdn.door43.org/obs/jpg/360px/obs-en-44-08.jpg)

पतरसाय उतर देना, ‘’ई माअहू जी तुमे आगला उबा हेय त्याल ईसू मशीहा शक्ती कोय हारा कोअला गोयला हेय. तुमहाय ईसूल क्रुसावोय चढवी देना, पेन यहोवा पोरमेहेरांय त्याल पासी जीवता कोय देना! तुमहाय त्याल स्वीकार नाय कोअया, पेन ईसू शक्ती कोय बिहीरी तारन मिळवूना कोअहीबी बिहिरी वाट नाय हेय!’’

![](https://cdn.door43.org/obs/jpg/360px/obs-en-44-09.jpg)

त्या आग्यावान नाराश आतां का पतरसाय आने योहानाय खूब हिमाती रुपामाय गोठ कोअली आती. त्याहाय देख्या का ये सादे माअहे आते जी का हिकले नाय आते. पेन पासे त्याहाल ईत येना का ई माअहे ईसू आरी रोते आते. याहाटी त्याहाय याल आख्यां, “आमा तुमहाल खूब दंड दाहू जर या माअहा ईसू बदल माअहाल कोअही बी गोठ आखतेहे.” ऐहकोय खूब गोठ्यो आखीन पासे, त्याहाय पतरसाल आने योहानाल जांअ देना.

*प्रेरिताहा काम 3:1-4:22  हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_44_128kbps.m4a

## 45. स्तेफन आन फिलिप्प

https://openbiblestories.org/l/mke/story-45/

![](https://cdn.door43.org/obs/jpg/360px/obs-en-45-01.jpg)

पोयलो मशीहा आग्यावानहा माय स्तेफन नावा योक माअहू आतां. बादे माअहे त्या मान कोअते आते. पवित्र आत्माय शक्ती आने बुद्धी देनली आती. स्तेफनाय खूब चमत्कार कोअला आता. जोवे त्याय ईसू वोय बोरसो कोअना बदल त्याहाल हिकाड्या तोवे खूब माअहाय त्यावोय बोरसो कोअयो.

![](https://cdn.door43.org/obs/jpg/360px/obs-en-45-02.jpg)

योक दिही, स्तेफन ईसू बदल हिकाडी रोयलो आतो, आने आरदा ओहोडा यहूदी येना ज्याहाय इसू वोय बोरसो नाय कोअलो आतो आने त्या आरी बोला-बोली कोअरा सुरुवात कोय देना. त्याहाल खूब रग कोई येनी, याहाटी त्या सेवा कोअनारा आग्यावानाही गोया आने त्या बदल खोटा आख्यां. त्याहाय आख्यां, “आमहाय तर स्तेफनाल मोशे आने यहोवा पोरमेहेरा बदल खोट्यो गोठ्यो या बोलता वोनायाहा!” याहाटी सेवा कोअनारा आग्यावानाय स्तेफनाल दोई लेदा आने त्याल माहायाजकाहा आने यहुदियाहा बिहीरा आगेवानहा आगला लेय येना.आजूबी खोटी साक्षी आने त्याहाय स्तेफनसा बदल खोटां आख्यां.

![](https://cdn.door43.org/obs/jpg/360px/obs-en-45-03.jpg)

माहायाजकाय स्तेफनाल होद्या, “कांय या लोक तो बदाल आंय खोरां आखी रोयलो हेय?” स्तेफनासाय माहायाजकाल उतर दांहाटी खूब गोठ्यो आखा सुरुवात कोई देनी. त्याय आख्यां का अब्राहामा समये ईसु समये हुदी पोरमेहेरांय इस्राएल लोकहा हाटी खूब नोवायी कामे कोअले हेय. पेन लोकहाय कायम पोरमेहेरा आज्ञा नाय मानली आती. स्तेफनसाय आख्यां, “तुमा यहोवा पोरमेहेरा विरूद ठोग आने खोटे कामे कोअनारे हेते. तुमहाय कायम पवित्र आत्मा नाकार कोअला, जेहकोय का आमे वाडवडिलाहाय काय पवित्र आत्माल नाकार कोअला आतां आने कायम त्या भविष्य आखनाराहाल माई टाकला आतां. पेन जीं त्याहाय कोअला आतां त्याकोअता आजू बो खोटां कोअला हेय! तूहाय मसीहाल माई टाक्या!”

![](https://cdn.door43.org/obs/jpg/360px/obs-en-45-04.jpg)

जोवे त्या धोरमी आग्यावान इं वोनाया, तोवे त्याहाल रग कोई येनी त्याहाय त्याहा कानहाल बंद कोइ लेदा आने मोठा आवाजा माय बोंबलीन. त्या स्तेफनाल गोहलीन शेहेरा बारे लेय गोया आने त्याल माई टाका हाटी त्याल दोगाड झोड कोअया.

![](https://cdn.door43.org/obs/jpg/360px/obs-en-45-05.jpg)

जोवे स्तेफन मोई रोयलो आतो, तो बोंबली उठ्यो, “ओ इसू मा आत्माल स्वीकार कोअ!” तोवे तो गुडगाहा वोय पोडी गोयो आने पासे बोंबली उठ्यो, “ओ पोरमेहेरा, ओ पाप याहावोय मा लावहे.”तोवे तो मोई गोयो.

![](https://cdn.door43.org/obs/jpg/360px/obs-en-45-06.jpg)

त्ये दिही, यरूशलेम माय रोनारा खूब लोकहाय ईसू चेलहाल वोखो देखाडना चालू कोइ देना, याहाटी बोरसो थोवनारा लोक बिहीरा जागाहा वोय निंगी गोया. पेन त्यापासे बी, जांअ केसेबी त्यें गोये त्याहाय ईसू विसये प्रचार कोअयो.

![](https://cdn.door43.org/obs/jpg/360px/obs-en-45-07.jpg)

फिलिप्प नावा ईसू योक चेलो आतो. जेहकोय का बिहीरा खूब चेलहाय कोअला आतां तो बी यरूशलेम माय नाहीं गोयो. तो शामरोना भागामाय निंगी गोयो. तांअत्याय लोकहा माय ईसू बदाल प्रचार कोअयो.खूब लोकहाय त्यावोय बोरसो कोअयो आने तारन मिळव्या. योक दिही, फिलिप्पापांय यहोवा पोरमेहेरा हीने योक होरगा दुत येनो आने त्याल जोंगलामाय लेय जांअ हाटी, आने योकी वाटीवोय चालाहाटी आख्यां. फिलिप्प तांज निंगी गोयो. जोवे तो त्यो वाटीवोय चाली रोयलो आतो, तोवे त्याय योक वेक्तील त्या रथामाय जातां देख्या. इं वेक्ती कुश देशा योक मोठो ओदीकारी आतो. पवित्र आत्माय फिलिप्पाल आख्यां का जायन त्या वेक्ती आरी-आरी चाल.

![](https://cdn.door43.org/obs/jpg/360px/obs-en-45-08.jpg)

याहाटी फिलीप्प रथापांय गोयो, तो वोनायो का शंड पोरमेहेरा वोचन वाची रोयलो आतो. जीं यशया भविषवोक्ताय लेखलां आतां तीं तो वाची रोयलो आतो. तो वाचे, “त्याल बळी कोयन मेंडा समान लेय गोया, आने जेह्के योक मेंडा ठाकां रोहे, तो बी ओगोज रोयो. त्याहांय त्याआरी खराब वेहवार कोअयो आने त्या मान नाय कोअयो. त्याहांय त्याल माई टाक्यो.”

![](https://cdn.door43.org/obs/jpg/360px/obs-en-45-09.jpg)

फिलीप्पाय त्या शंडाल होद्यां, “जी तुं वाचतोहो तीं तुल होमजायेहे बी का? त्या शंडाय उतर देना, “नाय. जांव कादो मान नाय होमजाडे, तांव आंय नाय होमाजी सोकुं. दया कोईन मापांय येयन बोहो. यशया इं त्या बारामाय आखहे का बिजा योगदा?”

![](https://cdn.door43.org/obs/jpg/360px/obs-en-45-10.jpg)

फिलीप्प रथावोय चोडीन बोही गोयो. तोवे त्यांय त्या शंडाल आख्यां जी यशायांय ईसू विसये लेखला आतां. फिलीप्पाय यहोवा पोरमेहेरा वचना खूब बिज्यो गोठ्यो आख्यो. ये रिते त्यांय त्या माअहाल ईसू ख्रिस्ता विसये हारी गोठ आखी.

![](https://cdn.door43.org/obs/jpg/360px/obs-en-45-11.jpg)

फिलीप्प आने तो शंड चालीन पांअयाही गोया. त्या शंडाय आख्यां, “एअ! इही पांयी हेय आंय बाप्तिस्मा लेय सोकहुं?” आने त्याय चालाडनराल आखीन रथ उबो कोअयो.

![](https://cdn.door43.org/obs/jpg/360px/obs-en-45-12.jpg)

पासे त्या पांअयामाय निंगी गोया, आने फिलीप्पाय त्या शंडाल बाप्तिस्मा देनो. जोवे त्या बारे येना. तोवे पवित्र आत्मा योकदाज फिलीप्पाल इसीन बिजा जागावोय लेय गोयां. तांअ फिलीप्पाय लोकाहाल ईसू विसये आखना सुरु राख्यां.

![](https://cdn.door43.org/obs/jpg/360px/obs-en-45-13.jpg)

तो शंड त्याहा गोआ मुसाफरी आगला निंगी गोयो. तो खुश आतो का तो आमी ईसूल वोळखेहे.

*प्रेरिताहा काम 6:8-8:5; 8:26-40 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_45_128kbps.m4a

## 46. पौल ख्रिस्ती बोनी जाहे

https://openbiblestories.org/l/mke/story-46/

![](https://cdn.door43.org/obs/jpg/360px/obs-en-46-01.jpg)

शाउल नावा योक माअहू आतां ज्याय ईसू वोय बोरसो नाय कोअलो आतो. जोवे तो जुवान आतो, तोवे त्याय स्तेफनाल माअयनारा माअहा फडकाहा राखवाळी कोअली आती. पासे, त्याय बोरसो कोअनाराहाल तारास देनलो आता. त्याय यरुशेलेमाय गोअ-गोअ जायीन माअहाल आने बाईहील दोईन जेलीमाय टाकला आतां. तोवे माहायाजकाय शाउलाल दमिश्क शेहेरामाय जांअहाटी परवानगी देनी. त्याय तांआने ख्रिस्ती माअहाल दोरा आने त्याहाल पासी यरुशेलेम माय लिया हाटी शाउलाल आख्यां.

![](https://cdn.door43.org/obs/jpg/360px/obs-en-46-02.jpg)

सेले शाउलाय दमिश्कोल जांअहाटी मुसाफरील सुरुवात कोअई. त्या शेहेरा माय पोचा वायज पोयला, त्या च्यारी-चोमखी वादळा माने योक उजवाडो चमक्यो, आने तो दोरतीवोय पोडी गोयो. शाउल काल तेबी आखतां वोनायो, ‘’ओ शाउल! ओ शाउल! तुं मान काहा सताडी रोयलो हेय?’’ शाउलाय होद्या, ‘’ओ पोरमेहेरा तुं कुंऊ हेय?’’ ईसूय त्याल उतर देना, ‘’आंय ईसू हेय. तुं मान सताडी रोयलो हेय!’’

![](https://cdn.door43.org/obs/jpg/360px/obs-en-46-03.jpg)

जोवे शाउल उठयो तोवे तो देखी नाय सकतो आतो. त्या आऱ्या त्याल दमिश्कमाय लेय गोया. शाउलाय तीन दिही हुदी कायज खादाला- पिदाला नाय आता.

![](https://cdn.door43.org/obs/jpg/360px/obs-en-46-04.jpg)

दमिश्कम माय हनन्या नावा योक चेलो आतो. यहोवा पोरमेहेरांय त्याल आख्यां, ‘’त्या गोअ जो जांअ शाउल रोयलो आतो. तो आथहाल त्यावोय थोव काहाका तो पासी एअरा लागे.’’ पेन हनन्याय आख्यां, ‘’ओ पोरमेहेरा, आंय वोनालो हेय का इं माअहू बोरसो कोअनाराहाल केहकोय वोखो देखाडहे.’’ पोरमेहेरांय त्याल उतर देना, ‘’जो! आंय ऐलाल यहुदी लोकहा माने बिहिरी जाती लोकहाल मा नावा कोय प्रचार कोअरा हाटी निवडी लेदला हेय. तो मा नावा हाटी खूब दुख सहन कोरी.’’

![](https://cdn.door43.org/obs/jpg/360px/obs-en-46-05.jpg)

सेंले हनन्या शाउला पाहीं गोयो, त्या आथहाल त्यावोय थोव्या, आने आख्यां, ‘’ईसूय, जी ईही येयना तो वाटीमाय तोवोय प्रकट ओअलो आतो, मान तोपांय दोवाडला हेय काहाका तुं पासी एअरा लागहे, आने पवित्र आत्मा तुल बोय दिअ.’’ ताबाडूज शाउल पासी एअरा हाटी हारो ओय गोयो, आने हनन्याय त्याल बाप्तिस्मा देना. तोवे शाउलाय खायना खादा आने पासी शक्तीवाळो ओय गोयो.

![](https://cdn.door43.org/obs/jpg/360px/obs-en-46-06.jpg)

तांव हुदी, शाउलाय दमिश्क माय रोनारा यहुदियामाय प्रचार कोरा सुरुवात कोय देनी. त्याय आख्यां, “ईसूज पोरमेहेरा पोहो हेय!’’ यहूदी माअहाल नोवाय लागी, काहाका शाउलाय तर बोरसो कोअनाराहाल माई टाका कोसीत कोअली आती, पेन आमी त्याय ईसूवोय बोरसो कोअलो आतो. शाउलाय यहुदियाहा आरी बोला-बोली कोअई. त्याय देखाड्या का ईसूज मशीहा आतो.

![](https://cdn.door43.org/obs/jpg/360px/obs-en-46-07.jpg)

खूब दिहया पासे, यहूदीयहाय शाउलाल माई टाका योजना बोनाडी.त्याहाय त्याल माई टाका हाटी शेहेरा फाटकीवोय माअहाल दोवाडया. का त्यें राखवाळी कोय पेन शाउलाय त्या योजना बदल वोनाय लेदा, आने त्या आरह्याहाय बोचीन निगा मदत कोअयी. योकी राती त्याहाय त्याल सिबलामाय बोहाडीन शेहेरा बितडा वोरे नीचे उताडी देना. दमिश्क माने बोची निगीन पासे शाउलाय ईसू बदल प्रचार कोअना चालू राख्या.

![](https://cdn.door43.org/obs/jpg/360px/obs-en-46-08.jpg)

शाउलाय प्रेषिताहाल मिळाहाटी यरुशेलेम माय गोयो, पेन त्या त्याल बीअता आतां. तोवे बोर्नबास नावा योक माअहू शाउलाल प्रेषिताहाही लेय गोयो. त्याय त्याहाल आख्यां का शाउलाय केहकोय हिमात राखीन प्रचार कोअलो आतो. त्या पासे, प्रेषिताहाय त्याल स्वीकार कोय लेदा.

![](https://cdn.door43.org/obs/jpg/360px/obs-en-46-09.jpg)

आरदा बोरसो कोअनारा ज्या यरुशेलेमा तारासा हिने नाठले आते त्यें दूर अंताकीया शेहेरामाय निगी गोयले आते आने ईसू बदल प्रचार कोअते आते. अंताकीया माय रोनारे माअहे वोदारी यहूदी नाय आते, पेन पोयलादा त्याहामाने खूबज माअहे ख्रिस्ती बोनी गोये. बोर्नबास आने शाउल या नोवा ख्रिस्ती माअहाल ईसू बदल आने हिकाडा हाटी तांअ गोये आने मंडळील मजबूत कोअया. ईसू वोय बोरसो कोअनाराहाय पोयलेदा अंताकीयामाय ‘’ख्रिती’’ आखाड्या.

![](https://cdn.door43.org/obs/jpg/360px/obs-en-46-10.jpg)

योक दिही, अंताकिया ख्रिती माअहे उपवास कोईन प्रार्थना कोय रोयले आते. पवित्र आत्माय त्याहाल आख्यां, ‘’माहाटी बोर्नबास आने शाउलाल त्या कामाल कोरा हाटी जुदो कोय दे ज्याल कोरा हाटी माये त्याहाल हादला हेय.’’ याहाटी अंताकीया मंडळीय बोर्नबास आने शाउला हाटी प्रार्थना कोअयी आने त्यावोय त्या आथ थोव्या. तोवे त्याहाय त्याहाल बिहीरा जागावोय ईसू बदल हारी गोठ प्रचार कोरा हाटी दोवाड्या. बोर्नबास आने शाउलाय जुदी-जुदी जाती माअहाल हिकाडी देना, आने खूब माअहाय ईसू वोय बोरसो कोअयो.

*प्रेरिताहा काम 8:3; 9:1-31; 11:19-26; 13:1-3 हुदी योक बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_46_128kbps.m4a

## 47. फिलीप्पी शेहरा माय पौल आन सिलास

https://openbiblestories.org/l/mke/story-47/

![](https://cdn.door43.org/obs/jpg/360px/obs-en-47-01.jpg)

जोवे शाउलाय बादा रोमी राज्यामाय मुसाफरी कोअई तोवे त्याय त्या रोमी नावा मोनजे ‘’पौला’’ वापर कोअना सुरुवात कोय देना. योक दिही, पौल आने त्या आऱ्यो सिलास फिलीप्पी शेहेरामाय ईसू बदल हारी गोठ आखा हाटी गोयो. त्या शेहेरा बारे नोयी कोडसा योका जागा वोय गोयो जांअ माअहे प्रार्थना कोरा हाटी योकठें आते. तांअ त्या लुदिया नावा योका बाईल मिळ्या जी योक वेपारी आती. ती पोरमेहेरा वोय माया कोअती आती आने त्या आराधना कोअती आती.

![](https://cdn.door43.org/obs/jpg/360px/obs-en-47-02.jpg)

यहोवा पोरमेहेरांय लुदियाल ईसू बदल गोठीवोय बोरसो कोरा हाटी शक्ती देनी. पौल आने सिलासाय तील आने ती परिवाराल बाप्तिस्मा देना. त्येय पौल आने सिलासाल त्ये गोआमाय रांअ हाटी हाद्या, याहाठी त्या रोय गोया.

![](https://cdn.door43.org/obs/jpg/360px/obs-en-47-03.jpg)

पौल आने सिलास मांअहाल कोवेबी त्या जागावोय मिळता आतां जांअ यहूदी माअहे प्रार्थना कोय रोयले आते. दर दिही जोवे त्या तांअ जाता आता तोवे योक दासी पोही जी खराब आत्मा लागली आती ती त्याहा पाहाला जाया कोअती आती. या खराब आत्मा कोय त्या माअहा भविष्य आखती आती, याहाटी भविष्य आखनारी रूपामाय त्ये मालका हाटी खूब पोयसा कामावती आती.

![](https://cdn.door43.org/obs/jpg/360px/obs-en-47-04.jpg)

त्याहा जायना समये ई कामारी पोही बोंबलुती आती, ‘’ये माअहे यहोवा पोरमेहेरा सेवक हेय. या तुमहाल तारन मिळवूना वाट आखी रोयला हेय!’’ ती रोज-रोज ऐहकोयज कोअया कोअती आती त्याकोय पौल नाराज ओय गोयो.

![](https://cdn.door43.org/obs/jpg/360px/obs-en-47-05.jpg)

सेल्ले, योक दिही जोवे ती कामारी पोहयेय बोंबला सुरुवात कोअयी, तोवे पौलाय ती ऐसे एयीन ती माजेने खराब आत्माल आख्यां, “ईसू नावाकोय यीमाने निगी जो.’’ त्या समये त्या खराब आत्माय त्येल सोडी देना.

![](https://cdn.door43.org/obs/jpg/360px/obs-en-47-06.jpg)

ती दासी पोहये मालकाल खूब रग येय गोयी. त्याहाल होमजाय गोया का वोगार खराब आत्मा ती कामारी पोही माअहा भविष्य नाय आखी सकती आती. त्या अर्थ आतो का माअहे आमी त्या मालकाल पोयसा नाय दिअ का तो त्याहा भविष्य आखे का त्याहा आरी काय ओरी.

![](https://cdn.door43.org/obs/jpg/360px/obs-en-47-07.jpg)

याहाटी त्ये दासी पोहये मालक पौल आने सिलासाल रोमी ओदीकाऱ्या पांय लेय गोया. त्याहाय पौल आने सिलासाल ठोक्या, आने पासी त्याहाल जेलीमाय टाकी देना.

![](https://cdn.door43.org/obs/jpg/360px/obs-en-47-08.jpg)

त्याहाय पौलाल आने सिलासाल जेलीमाय ओहोडा भागामाय थोव्या जांअ बादहाने वोदारी पोलीस आता. ईही हुदी का त्याहाय त्याहा पागहाल लाकडा मोठा तुकडाहा माय जोडी देना. पौल आने सिलास आरदी राती समये, यहोवा पोरमेहेरा स्तुती गाते आखी रोयला आता.

![](https://cdn.door43.org/obs/jpg/360px/obs-en-47-09.jpg)

योकदाज, योक खूब मोठो भूकंप ओयो! जेली बादे बाअने उगडाय गोये, आन बादा कैदयाहा बेडया उगडीन पोडी गोया.

![](https://cdn.door43.org/obs/jpg/360px/obs-en-47-10.jpg)

तोवे पोलीस जागी गोयो. त्याहाय देख्या का जेली बाआने उगडाले आते. त्याहाय विचार कोअयो का बादा कैदी बोचीन नाहीं गोयला आता. तो गाबराय गोयो का त्या नाहीं गोयहा आने रोमी ओदीकारी त्याल माई टाकी, याहाटी तो सोवताहाल माई टाका हाटी तियार ओय गोयो! पेन पौल त्याल एईन बोंबल्यो, “उबो रोअ! सोवताहाल नास मा कोअतो. आमा बाआणाही हेय.”

![](https://cdn.door43.org/obs/jpg/360px/obs-en-47-11.jpg)

त्या पोलीसाय कापता-कापता पौल आने सिलासा पाहीं येयन होद्या, ‘’तारन मिळवा हाटी आंय काय कोऊ?’’ पौलाय उतर देना, “पोरमेहेर ईसू वोय बोरसो कोय, तर तो आने तो गोआल तारन मिळी.’’तोवे तो पोलीस पौल आने सिलासाल त्याअ गोअमे लेय गोयो आने त्याहा जुखुम दोव्या. पौलाय त्या गोअने बादा माअहाल ईसू बदल हाऱ्यो गोठ्यो आख्यो.

![](https://cdn.door43.org/obs/jpg/360px/obs-en-47-12.jpg)

पोलीस आने त्याय पुरा परिवाराय ईसू वोय बोरसो कोअयो, याहाटी पौल आने सिलासाय त्याहाल बाप्तिस्मा देना. तोवे पोलीसाय पौल आने सिलासाल खायना खावाडया, आने त्यें खूब खुश ओअये.

![](https://cdn.door43.org/obs/jpg/360px/obs-en-47-13.jpg)

आगले दिही शेहेरा आग्यावानहाय पौल आने सिलासाल जेलीमाने सुटा कोय देना आने फिलीप्पी माने निगी जांअ हाटी आख्यां. पौल आने सिलास लुदिया आने आरदा बिहिरा आऱ्या मिळ्या आने त्यापासे शेहेरा माने निगी गोये. ईसू बदल हाऱ्यो गोठ्यो ये फेलावते गोये, आने मंडळी वादती गोयी.

![](https://cdn.door43.org/obs/jpg/360px/obs-en-47-14.jpg)

पौल आने बिहीरा ख्रिस्ती आग्यावानहाय खूब शेहेरामाय मुसाफरी कोअयो. त्याहाय ईसू बदल हाऱ्यो गोठ्यो आख्यां. त्याहाय मंदळी माअहाल खुश कोरा आने हिकाडा हाटी खूब पत्रे बी लेख्ये. त्याहामाने आरदे पत्रे बायबला पुस्तक बोनी गोयो.

*प्रेषिताहा काम 16:11-40 हुदी बायबला योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_47_128kbps.m4a

## 48. ईसू ओ करार कोयलो मशीहा हेय

https://openbiblestories.org/l/mke/story-48/

![](https://cdn.door43.org/obs/jpg/360px/obs-en-48-01.jpg)

जोवे पोरमेहेरांय दुनिया बोनाडी तोवे बादाज काय हारां आतां. कायबी पाप नाय आतो. आदाम आने हवा योक-बिजा वोय माया कोअते आते, आने त्यें पोरमेहेरांवोय माया कोअते आते. कायबी बिमारी आने मोराण नाय आतां. पोरमेहेर ऐहकोयज दुनियाल रांअ मागतो आतो.

![](https://cdn.door43.org/obs/jpg/360px/obs-en-48-02.jpg)

सैतानाय हापा रुपामाय वाडीमाय हवा आरी गोठ कोअई, काहाका तो त्येल ठोगनारो आतो. तोवे हवा आने आदामाय पोरमेहेरा विरूद पाप कोअयो. काहाका त्याहाय पाप कोअलो आतो याहाटी दोरती वोय रोनारे बादे माअहे मोई जातहे.

![](https://cdn.door43.org/obs/jpg/360px/obs-en-48-03.jpg)

काहाका आदाम आने हवाय पाप कोअलो आतो, याहाटी काय आजू बी खोटा ओअया. त्यें पोरमेहेरा विरुद कोअनारे बोनी गोये. ज्याकोय जायला आतां, तोवे बादा जाअहाय पाप कोअलो हेय. दरेक जांआ जल्मा माने पोरमेहेरा विरुदया हेय. पोरमेहेर आने माअहा विसमाय शांती नाय आती. पेन पोरमेहेर शांती देनारो आतो.

![](https://cdn.door43.org/obs/jpg/360px/obs-en-48-04.jpg)

पोरमेहेरांय मानता कोअया का हवा योक पोहो सैताना टोलपा फोडी. त्याय ई बी आख्यां का सैतान त्या पाटलील चावी. बिहीरा शब्दामाय, सैतान मशीहाल माई टाकी, पेन पोरमेहेर त्याल पासी जीवतो कोई दि. त्यापासे, मशीहा सैताना शक्तील कायमा हाटी नास कोई दि. खूब वोरहा पासे, पोरमेहेरांय प्रकट कोअया का तो मशीहा हेय.

![](https://cdn.door43.org/obs/jpg/360px/obs-en-48-05.jpg)

पोरमेहेरांय त्या रेलीकोय त्या परिवाराल बोचाडया ज्याल तो लेय येनारो आतो. नोहाल योक उडी बोनाडा आख्यां का तो ये रिते पोरमेहेरांय त्या माअहाल बोचाड्या ज्या त्यावोय बोरसो कोअताहा. ये रीते, त्ये बादेज पोरमेहेरा कोय माई टाका योग्य आते काहाका त्याहाय पाप कोअलो आतो. पेन पोरमेहेरांय त्या बादहाल वाचाडा हाटी ईसूल दोवाडया ज्ये त्यावोय बोरसो कोअतेहे.

![](https://cdn.door43.org/obs/jpg/360px/obs-en-48-06.jpg)

होव वोरहे हुदी, याजक पोरमेहेरा हाटी अर्पण कोअता रोया. ई देखाडहे का माअहाय पाप कोअयो, आने ई का त्यें पोरमेहेरा कोय त्याहाल दंड ओअना योग्य आते. पेन त्या अर्पणा कोय त्याहा पापहाल माफ नाय कोय सकते आते. ईसू बादहाने मोठो याजक हेय. त्याय ई कोअया जी कोहोबी याजक नाय कोई सोके. त्याय तीं योकूज अर्पण ओअरा हाटी सोवताहाल देय देना जी दरेका पाप मिटाडी सकते आते. त्याय स्वीकार कोअया का पोरमेहेर त्या बादा पापहा हाटी त्याल दंड देय. याहाटी, ईसू खोरो माहायाजक आतो.

![](https://cdn.door43.org/obs/jpg/360px/obs-en-48-07.jpg)

देवाय अब्राहमाल आख्या, आंय तोअ कोय दुनिया बादी जातील बोरकत दीअही. यीसू याअ अब्राहमा जाती आतो. पोरमेहेरांय अब्राहमा कोय बादी जातील बोरकत देहे, काहाका जी यीसू वोय बोरसो कोहे पोरमेहेर त्या बादहाल पापा माने बोचाडेहे. जोवे माअहे यीसू वोय बोरसो कोयतेहे, तोवे पोरमेहेर त्याहाल अब्राहमा पोहे मानहे.

![](https://cdn.door43.org/obs/jpg/360px/obs-en-48-08.jpg)

पोरमेहेरांय अब्राहमला आख्या का तोअ आपे प्रिय पोहो, त्याहाठी अरपन कोई दिअ. पेन पासी पोरमेहेरांय इसाका बदले अरपन कोरा हाठी योक मेंडो देनो. आमा बादे आपे पापहा हाठी माई टाका योग्य आते! पेन पोरमेहेरांय आमे जागा वोय मोरां हाठी ईसूल अरपना रुपाम देना. याहाठी आमा ईसूल पोरमेहेरा मेंडा आखतेहे.

![](https://cdn.door43.org/obs/jpg/360px/obs-en-48-09.jpg)

जोवे देवाय मिसर माय सेंली पिडा दोवाडी तोवे त्याय दरेक इस्राएली परिवाराल आख्या का त्या योका मेंडाल अरपन कोये. त्या मेंडा माय कायज खराबी नाय ओरा जोजे. तोवे आपे बाअना चौकटाही उचे आन भोगलाम त्याहाल त्या लोयाल लावना आता. तोवे पोरमेहेरांय त्या लोयाल देख्या तोवे तोअ आगला निगी गोयो आन त्याहा पोयला पोहाल नाय माअया. जोवे ई ओया तोवे पोरमेहेरांय त्याल वोलाडना सन आख्या.

![](https://cdn.door43.org/obs/jpg/360px/obs-en-48-10.jpg)

ईसू वोलाडना सना योक मेंडा रोको हेय. त्याय कोवेबी पाप नाय कोयो, याहाठी त्यामाय कायज चुकी नाय आता. तोअ वोलाडना सना वेले वोय मोअयोजोवे कादो ईसूय बोरसो कोहे, तोवे यीसू लोय त्या माअहा पापा बोदलो चुकाडेहे. ई ऐहेके हेय जेहेके का पोरमेहेर त्या माअहा हिने आगला निगी गोयो, काहाका तोअ त्याल दंड नाय देय.

![](https://cdn.door43.org/obs/jpg/360px/obs-en-48-11.jpg)

पोरमेहेरांय इस्राएली माअहा आरी योक करार कोअयो, काहाका त्या ओहोडे माअहे आते ज्याहाल पोरमेहेरांय आपे ओरा हाठी निवडी लेदला आता. पेन आमी पोरमेहेरांय योक ओहोडो करार कोअलो हेय का बादहा हाटी हेय. जर कोहीबी जाती कोहाबी जाआ या नावा मानताल स्वीकार कोहे, तर तोअ पोरमेहेर माअहाम बेडाय जातो हेय.तोअ ऐहेके याहाठी कोअतो हेय काहाका तोअ ईसू वोय बोरसो कोयतो हेय.

![](https://cdn.door43.org/obs/jpg/360px/obs-en-48-12.jpg)

मोशो योक ओहोडो भविष्य कोयनारो आतो ज्याहाय देवा वचनाल मोठी शक्ती कोय प्रचार कोयला आता. पेन यीसू बादा भविष्य कोयनाराहा माय मोठो आतो. तो पोरमेहेर हेय, याहाठी जी कायबी त्याय कोया आन आख्या तोअ पोरमेहेरा काम आन वचन आतो. याहाठी पवित्र-शास्त्र ईसूल पोरमेहेरा वचन आखतो हेय.

![](https://cdn.door43.org/obs/jpg/360px/obs-en-48-13.jpg)

पोरमेहेरांय राजा दाविदा आरी करार कोअलो आतो का राजा रुपाम त्या योक पोहोहामाने पोरमेहेरा माअहा वोय बारीमासा हाटी राज कोरी. ईसू पोरमेहेरा पोहो आन मशीहा हेय, याहाठी तोअ राजा दाविदा पोहोहा माने हेय जो कायम हाठी राज कोरी.

![](https://cdn.door43.org/obs/jpg/360px/obs-en-48-14.jpg)

दावीद तर इस्राएला राजा आतो, पेन ईसू बादा दुनिया राजा हेय! तोअ पासी यी आन कायम हाठी राज न्यायाकोय आन शांती कोय आरी राज कोरी.

*उत्पत्ति 1-3, 6, 14, 22; निर्गम 12, 20; 2 शमूएल  7; इब्री  3:1-6, 4:14-5:10, 7:1-8:13, 9:11-10:18; प्रकटीकरण  21  हुदी योक बायबला गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_48_128kbps.m4a

## 49. यहोवा पोरमेहेरा नोवा वचन

https://openbiblestories.org/l/mke/story-49/

![](https://cdn.door43.org/obs/jpg/360px/obs-en-49-01.jpg)

योका होरगादुताय योकी जुवान बाईल मरियाल आख्यां का ती पोरमेहेरा पोहाल जन्म दिअ. ती आमी कुवारी आती, पेन पवित्र आत्मा त्ये पाही येना आने त्येल मोयना ओअया. त्येय योका पोहाल जन्म देनो ज्या नाव त्येय ईसू थोव्या. याहाटी पोरमेहेर आने माअहू बेनी हेय.

![](https://cdn.door43.org/obs/jpg/360px/obs-en-49-02.jpg)

यीसूय खूब चमत्कार कोया जी ऐयतेहे का तोअ देवा पोहो हेय. तोअ पांया वोय चाल्यो आन तुफानाल शांत कोया. त्याय खूब भिमार माअहाल हारा कोया आन खूब माअहा माने खराब आत्मे काडी टाक्ये. त्याय मोयला माअहाल जीवते कोय देने, आन त्याय पाच बाख्यो आन बेन मासहाल ५,००० मांअहाल खावाडा हाठी खूब खायनाम बदली देना.

![](https://cdn.door43.org/obs/jpg/360px/obs-en-49-03.jpg)

यीसू योक मोठो शिक्षक बी आतो. जी कायबी त्याय हिकाड्या, तीअ त्याय खोरा कोयीन हिकाड्या. जी तोअ माअहाल कोरा हाठी आखतो हेय तीअ त्याहाय कोरा जोजे काहाका तोअ देवा पोहो हेय. दाखला हाठी, त्याय हिकाड्या का तुमा बिहीरा मांअहाल यारीते माया कोयना गरज हेय का जेहेके तुमा स्वताहा वोय माया कोयतेहे.

![](https://cdn.door43.org/obs/jpg/360px/obs-en-49-04.jpg)

त्याय ईबी हिकाड्या का तुमहाल बादी वस्तूहू कोयता वोदारी आन आपे मिळकती कोयता बी वोदारी देवा वोय माया कोरा जोजे.

![](https://cdn.door43.org/obs/jpg/360px/obs-en-49-05.jpg)

ईसूय आख्या का दुनिया माने कोहीबी वस्तूल मिळवा कोयता वोदारी हारा हेय का देवा राज्याम ओयना. त्या राज्याम परवास कोरा हाठी गरज हेय का देव तुमहाल तुमे पापाहीने बोचाडे.

![](https://cdn.door43.org/obs/jpg/360px/obs-en-49-06.jpg)

यीसूय आख्या का काअही माअहे त्याल स्वीकार कोरी. देव त्या माअहाल बोचाडी. पेन बिहिरे माअहे त्याल स्वीकार नाय कोरी. त्याय ईबी आखला का काअही माअहे हारी दोरती रोके हेय, काहाका त्ये यीसू बदल हार्या गोठया स्वीकार कोय लेतहे, आन देव त्याहाल बोचाडी लेहे. पेन काअही माअहे वाटी कठीन दोरती रोके हेय. देवा वचन बियांरा रोका वाटीवोय पोडी जाहाय, पेन ताअ कायज बी नाय उदे. ये माअहे यीसू बदल वचनाल स्वीकार नाय कोएत. त्ये त्या राज्याम परवास कोरा नाय कोय देतेहे.

![](https://cdn.door43.org/obs/jpg/360px/obs-en-49-07.jpg)

ईसूय हिकाड्या का देव पापी माअहा वोय खूब माया कोअहे. तोअ त्याहाल माफ कोरा मागतो हेय आन त्याहाल आपे पोहे बोनाडा मागहे.

![](https://cdn.door43.org/obs/jpg/360px/obs-en-49-08.jpg)

ईसूय ईबी आख्या का देव पापहाल विटाळ कोयतो हेय. काहाका आदम आन हवाय पाप कोअयो, याहाठी त्याहा बादा पोहोहाय बी पाप कोअया. याअ दुनियाम रोयनारा दरेक जाआ पाप कोयता हेय आन देवाहीने दूर हेये. दरेक जाआ देवा विरूद्या हेय.

![](https://cdn.door43.org/obs/jpg/360px/obs-en-49-09.jpg)

पेन देवाय याअ दुनियामाय रोयनारा दरेक जाआल यारीते माया कोई: त्याय त्याहाल त्याअ योखलो पोहो दी देनो काहाका देव त्याहाल दंड नाय देय जी त्यावोय बोरसो कोयते हेय. त्या कोयता, त्ये त्याहा आरी बारीमासा आरी रोयी.

![](https://cdn.door43.org/obs/jpg/360px/obs-en-49-10.jpg)

तुमा मोअना योग्य हेय, काहाका तुमहाय पाप कोअलो हेय. तुमहा कोय देवाल रोग ओअना खोराज हेय, त्या इच्छा, तो यीसू वोय रोग कोअयी. त्यांय ईसूल क्रुसा वोय मरन देयन दंड देनो.

![](https://cdn.door43.org/obs/jpg/360px/obs-en-49-11.jpg)

ईसूय कोदहीज पाप नाय कोअयो, पेन त्याय देवाल त्याल दंड दांअ देनो. त्याय मोई जायना स्वीकार कोअया. यारीते, तुमे पापहाल याअ दुनियाम रोयनारा दरेक जाआ पापहाल उसली लीअ जांहाटी तो योक खोरो अरपन आतो. यीसूय स्वताहाल देवा हाठी अरपन कोई देना, याहाठी देव कोहाबी पापाल, ईही हुदी का मोठा पापाल बी माफ कोअहे.

![](https://cdn.door43.org/obs/jpg/360px/obs-en-49-12.jpg)

जर तुमा खूब हारे कामहाल कोअते ओरी, तर त्याकोय देव तुमहाल नाय बोचाडी. त्या आर्यो बोना हाठी ओहोडा कायबी नाय हेय जी तुमा कोय सकतेहे. त्या इच्छा इ हेय का, तुमहाय बोरसो कोयना हेय का यीसू देवा पोहो हेय, आन तो तुमे बदले क्रुसा वोय मोई गोयो, आन ईबी का देवाय त्याल पासी जीवतो कोई देनो. जर तुमा यावोय बोरसो कोअहा, तर देव तुमे पापाहा माफी दी.

![](https://cdn.door43.org/obs/jpg/360px/obs-en-49-13.jpg)

देव दरेक जाआल बोचाडी जी ईसू वोय बोरसो कोअहे आन त्याल आपे प्रभू स्वीकार कोय्तो हेय. पेन तोअ त्याहाल नाय बोचाडी जी त्यावोय बोरसो नाय कोए. ई काय महत्त्वा नाय हेय का तुमा धनवान हेय का गरीब हेय, माअहु हेय का बाई हेय, डाअया हेय का जुवान हेय, नेते तुम केसे रोतहे. देव तुमहा वोय माया कोअहे का तुमा ईसू वोय बोरसो कोआ का तोअ तुमे आऱ्यो बोनी जाय.

![](https://cdn.door43.org/obs/jpg/360px/obs-en-49-14.jpg)

यीसू तुमहाल हादी रोयलो हेय का त्यावोय बोरसो कोआ आन बाप्तिस्मा लाअ. काय तुमा बोरसो कोयतेहे का देवा योखलो पोहो, यीसूज मशीहा हेय? काय तुमा बोरसो कोयतेहे का तुमा योक पापी हेय आन ई का तुमा देवा कोय तुमहाल दंड देयना योग्य हेय? काय तुमा बोरसो कोयतेहे का तुमे पापहाल मिटाडां हाटी ईसू क्रुसा वोय मोअयो?

![](https://cdn.door43.org/obs/jpg/360px/obs-en-49-15.jpg)

जर तुमा यीसू वोय आन जी काय त्याय तुमेहाठी कोयला हेय त्यावोय बोरसो कोयतेहे, तर तुमा योक ख्रिस्ती हेय! सैतान त्याअ आंदारा राजमाय आमी तुमहा वोय राज नाय कोए. आमी देव त्याअ उजवाडा राजमाय तुमहा वोय राज कोअहे. त्याय तुमहाल पाप कोरा रुकी देनला हेय, जीं तुमां कोअते आते. त्याय तूमहाल योक नोवां, हारां जीवन देनला हेय.

![](https://cdn.door43.org/obs/jpg/360px/obs-en-49-16.jpg)

जर तुम योक ख्रिस्ती हेय तर जी यीसूय कोयला हेय त्या कोयता देवाय तुमे पापहाल माफ कोय देनला हेय. आमी, देव योका विरूद्या रोको नाय, तुमहाल योक खूब हारो आऱ्यो मानतो हेय.

![](https://cdn.door43.org/obs/jpg/360px/obs-en-49-17.jpg)

जर तुमा देवा आर्ये हेय आन प्रभू ईसू सेवक हेय तर तुमा त्या गोठी पालन कोआना इच्छा कोहा जी ईसू तुमहाल हिकाडेहे. जरका तुम ख्रिस्ती हेय, सैतान आमी बी पाप कोराहाठी तुमा परीक्षा कोरी. पेन देव बारीमास तीअ कोहे जी तोअ आखहे का तोअ कोरी.तोअ आखहे का जर तुमा तुमे पापहाल मानी लाहा, तोवे तुमहाल माफ कोय दिअ. तोअ तुमहाल पापा विरूद लोडा शक्ती दिअ.

![](https://cdn.door43.org/obs/jpg/360px/obs-en-49-18.jpg)

देव तुमहाल प्रार्थना कोरा आन त्या वचन वाचा हाठी आखतो हेय. तोअ तुमहाल बिहीरा ख्रिस्ती माअहा आरी मिळीन त्याय आराधना कोरा हाठी बी आखतो हेय. तुमहाल बिहीरा माअहाल बी आखना हेय का त्याय तुमे हाठी काय कोयला हेय. जर तुमा याअ बादा कामहाल कोहा, तर तुमा त्याय योक खोरे आर्ये बोनी जाहा.

*रोम  3:21-26, 5:1-11; योहान 3:16; मार्क 16:16; कलस 1:13-14; 2 कारींथ 5:17-21; 1 योहान 1:5-10  माने योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_49_128kbps.m4a

## 50. ईसू पासी फिरी यी

https://openbiblestories.org/l/mke/story-50/

![](https://cdn.door43.org/obs/jpg/360px/obs-en-50-01.jpg)

लगबग बेन ओजार वोरहे, दुनिया माय बादा जागाहा वोय वोदारीने वोदारी माअहे ख्रिस्त ईसू बदल हाऱ्यो गोठ्यो वोनाय रोयले आते. मंडळी वोदी रोयली आती. ईसूय वायदो कोअलो हेय का तो दुनिया सेंलीमाय पासी फिरी यी. पेन तो आमी फिरी नाय येनलो हेय, तेबी तो त्या वायदो पुरो कोरी.

![](https://cdn.door43.org/obs/jpg/360px/obs-en-50-02.jpg)

जोवे का आमा ईसू पासी फिरी येयना वाट जोवतेहे, पोरमेहेर आमहाल ऐहकोय रिते जीवन जीवा इच्छा कोअहे जी पवित्र हेय आने ज्या त्या मान कोअताहा. जोवे ईसू दोरती वोय रोय रोयलो आतो तोवे त्याय आख्यां, ‘’मा चेला दुनिया माय बादाज जागाहा वोय माअहाल पोरमेहेरा राज्या बदल हारी गोठी प्रचार कोअहा, आने तोवे सेल्लो समय यी लागी.’’

![](https://cdn.door43.org/obs/jpg/360px/obs-en-50-03.jpg)

खूब जातीहीय आमी हुदी ईसू बदल नाय वोनाला हेय. होरगामाय फिरी जांअ पोयला, ईसूय ख्रिस्ती माअहाल हारी गोठ आखा आखी ज्याहाय ई कोदहीज नाय वोनाला हेय. त्याहाल आखा, ‘’जा आने बादी जाती लोकहाल चेला बोनाडा!’’ आने ‘’वाडनी कोराहाटी रान पाकी गोयला हेय!’’

![](https://cdn.door43.org/obs/jpg/360px/obs-en-50-04.jpg)

ईसूय ई बी आख्यां, “कोअहाबी माअहा सेवक त्या मालकाने मोठा नाय रोय. या दुनिया महत्वा माअहाय मा नाकर कोअई, आने मा कोअता त्यें तुमहाल बी सताडी आने माई टाकी. या दुनियामाय तुमा पिडीत ओअहा, पेन मजबूत बोना, काहाका माये सैतानाल आरवी देनला हेय जो या दुनिया वोय राज कोअहे. जर तुमा सेले हुदी मावोय बोरसो कोअनारे बोनी राहा, तर पोरमेहेर तुमहाल बोचाडी!’’

![](https://cdn.door43.org/obs/jpg/360px/obs-en-50-05.jpg)

ईसूय त्या चेलहाल ई होमजा हाटी योक गोठ वोनाडी का जोवे दुनिया नाश ओरी तोवे माअहा आरी काय ओरी. त्याय आख्यां, “कोअहा माअहू त्या रानामाय हारो बियांरो वोअयो. जोवे तो हुवी रोयलो आतो तोवे त्या विरुदयो येनो आने गोंवहा बियांरा माय जंगली बियांरो वोई देनो, आने पासी तो निगी गोयो.’’

![](https://cdn.door43.org/obs/jpg/360px/obs-en-50-06.jpg)

‘’जोवे रोप निगे तोवे सेवकाय त्या माअहाल आख्यां, “ओ सायब, तुयें ते आपे रानामाय हारो बियांरो वोअलो आतो. ते पासे यामाय जंगली जाडे काहा हेय? ‘त्या माअहाय उतर देना, फक्त मा विरुद्या त्याल वोरा कोअनारा ई मा योगदो विरुदयो हेय त्यांय ऐहकोय कोअला हेय.’’

![](https://cdn.door43.org/obs/jpg/360px/obs-en-50-07.jpg)

‘’त्या सेवकाहाय त्या मालकाल उतर देना, “काय आमहाल जाडीमाने पिके उपडी टाका जोजे? त्या मालकाय आख्यां, नाय. जर तुमा ऐहकोय कोअहा ते तुमा आरदा गोंवहाल बी उपडी टाकहा. वाडनी समय हुदी वाट जोवा. तोवे जंगली पिके खाडामाय योकठां कोय ला काहाका तुमा त्याल सिलगाडी सोकहा. पेन गोंवहाल मांअ खोळामाय लेय या.’’

![](https://cdn.door43.org/obs/jpg/360px/obs-en-50-08.jpg)

चेलहाल ई गोठी अर्थ नाय होमज्यो, याहाटी त्याहाय ईसूल होमजाडां विनंती कोअयी. ईसूय आख्यां, “हारो बियांरो वोअनारा माअहू ख्रिस्ता काम कोअहे. रान दुनिया हेय. हारो बियांरो पोरमेहेर राज्या माअहा काम हेय.’’

![](https://cdn.door43.org/obs/jpg/360px/obs-en-50-09.jpg)

“जंगली पिके त्या खराब माअहा, सैताना माअहा काम हेय. त्या माअहा विरुदयो सैताना काम कोअतो हेय, ज्याय जंगली पिके वोई देनले आते. वाडनी या दुनिया नाश हेय, आने वाडनी कोअनारो पोरमेहेर होरगोदूतहा काम कोअहे.’’

![](https://cdn.door43.org/obs/jpg/360px/obs-en-50-10.jpg)

“जोवे दुनिया नास ओरी तोवे होरगादूत त्या बादा माअहाल योकाज जागावोय योखठां कोरी जी सैताना हेय. त्या होरगादूत त्याहाल योका खूब सिलगुती आगीमाय टाकी दिअ. तांआने त्यें माअहे मोठा सतावाके रोडी आने त्याहा दात कोकडावी. पेन जी माअहू सेवा कोअनारा हेय, ज्याहाय ईसू रोका जीवला हेय, त्ये माअहें पोरमेहेर आबा राज्यामाय दिहया रोके चमकी.’’

![](https://cdn.door43.org/obs/jpg/360px/obs-en-50-11.jpg)

ईसूय ई बी आख्यां का तो दुनिया नाश ओरा पोयला दोरती वोय यी. तो त्या रिते पासी यी जेहकोय तो गोयलो हेय. मोनजे, त्यावोय खोराज आंग रोय, आने तो वादळा वोय बोहीन यी. जोवे ईसू फिरी यी, तोवे दरेक ख्रिस्ती जी मोई गोयला हेय मोअला माने जीवी उठी आने त्याल वादळामाय मिळी.

![](https://cdn.door43.org/obs/jpg/360px/obs-en-50-12.jpg)

जोवे जी ख्रिस्ती आमी बी जीवता हेय त्यें वादळा माय उसली लेदले जाय आने त्या बिहीरा ख्रिस्ती माअहा आरी मिळी जाय जी मोअला माने जीवता उठला हेय. त्यें बादे ईसू आरी रोय. त्यापासे, ईसू त्या माअहा आरी रोय. जोवे त्यें योकठेज रोय तोवे त्याहा पांय कायम हाटी पुरी शांती रोय.

![](https://cdn.door43.org/obs/jpg/360px/obs-en-50-13.jpg)

ईसूय त्यावोय बोरसो कोअनारा दरेक जाआ योक मुकुट देयना करार कोअला हेय. त्ये बारीमासा हाटी पोरमेहेरा आरी दरेक वस्तू वोय राज कोरी. त्यापांय खोरी शांती रोय.

![](https://cdn.door43.org/obs/jpg/360px/obs-en-50-14.jpg)

पेन पोरमेहेर त्या बादहा न्याय कोरी जी ईसू वोय बोरसो नाय कोएत. तो त्याहाल नोरकामाय टाकी दिअ. तांअ त्यें रोडी आने त्याहा दात कोकडावी, आने त्यें कायमा पिडा बोगतें रोय. कोदहीज नाय उलानारी आग त्याहाल लगातार सिलगाडती रोय, आने किडे त्याहाल खाहाटी कोदहीज रुकायी नाय.

![](https://cdn.door43.org/obs/jpg/360px/obs-en-50-15.jpg)

जोवे ईसू फिरी, तोवे तो पुरी रिते सैतान आने त्या राज्याल नास कोअई दिअ. तो सैतानाल नोरका आगीमाय टाकी दिअ. तांअ सैतान कायमा हाटी सिलगुतो रोय, त्या बादहा आरी ज्याहाय पोरमेहेरा गोठयो माना कोअता सैताना पाहाला चालां निवडूला हेय.

![](https://cdn.door43.org/obs/jpg/360px/obs-en-50-16.jpg)

काहाका आदाम आने हवाय पोरमेहेरा आज्ञा नाय मानली आती आने पापाल या दुनिया माय लेय येनले आते, पोरमेहेरांय त्याहाल हाराप देनो आने त्याल नाश कोरा निर्णय कोअयो. पेन योक दिही पोरमेहेर योक नोवो होरगो आने नोवी दोरती बोनाडी जी खोरी ओरी.

![](https://cdn.door43.org/obs/jpg/360px/obs-en-50-17.jpg)

ईसू आने त्या माअहे त्या नोवी दोरती वोय रोय, आने तो बादी वस्तूहू वोय राज कोरी. तो माअहा डोळहा माने दरेका रोज्ये नुही दिअ. आमी कादा बी पिडीत आने दुखी नाय रोय. त्यें रोडी नाय. त्यें बिमार नाय ओरी आने मोई नाय. आने तांअ कायबी खराब नाय रोय. ईसू आपे राज्या वोय न्यायाकोय, आने शांती कोय आरी राज कोरी. तो सदाकाळ त्याअ माअहा आरी रोय.

*मत्तय 24:14; 28:18; योहान 15:20, 16:33; प्रकटी. 2:10; मत्तय 13:24-30, 36-42; 1 थेस्सलनी. 4:13-5:11; याकोब 1:12; मत्तय  22:13; प्रकटी. 20:10, 21:1-22:21 हुदी योक गोठ*

Audio: https://git.door43.org/OBS-TLF/mke_obs/releases/download/v1/mke_obs_v1_50_128kbps.m4a