# unfoldingWord Open Bible Stories — Musi

- Language code: `mui`
- Canonical page: https://openbiblestories.org/l/mui/
- Stories in this file: 50 of 50
- Published by: DokuWiki
- Last release: 2026-10-27
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Musi translation; it is not a translation of the whole Bible.

## 1. Penciptoan

https://openbiblestories.org/l/mui/story-1/

![](https://cdn.door43.org/obs/jpg/360px/obs-en-01-01.jpg)

Crito ni pasal awal galo-galonyo. Allah nyiptoke alam semesta samo segalo isinyo slamo enem ari. Awalnyo dunio ni gelep jugo kosong, tros dak katek yang tebentok di dalemnyo. Tapi Ro Allah melayang-layang di pocok banyu.

![](https://cdn.door43.org/obs/jpg/360px/obs-en-01-02.jpg)

Ngomongla Allah cak ini, “Jadila trang!” Tros trang tu jadi. Allah nyingok amen trang tu baek tros nyebotnyo “siang.” Dio misakenyo dari kegelepan, yang Dio sebot “malem.” Allah nyiptoke trang di ari petamo penciptoan.

![](https://cdn.door43.org/obs/jpg/360px/obs-en-01-03.jpg)

Pas ari keduo, Allah ngomong tros beken langet di pocok bumi. Dio beken langet dengen misake banyu yang ado di pocok dengen banyu yang ado di bawa.

![](https://cdn.door43.org/obs/jpg/360px/obs-en-01-04.jpg)

Pas ari ketigo penciptoan, Allah ngomong tros misake banyu dari daratan. Dio sebot daratan tu "tana", tros banyu tu Dio sebot "laot". Allah nyingok apo yang la Dio ciptoke tu baek.

![](https://cdn.door43.org/obs/jpg/360px/obs-en-01-05.jpg)

Abes tu ngomongla Allah cak ini, “Biarla bumi ni ngaselke segalo jenis pohon samo taneman.” Tros itula yang tejadi. Allah nyingok apo yang la Dio ciptoke tu baek.

![](https://cdn.door43.org/obs/jpg/360px/obs-en-01-06.jpg)

Pas ari keempat penciptoan, Allah ngomong tros beken matoari, bulan, samo bintang-bintang. Allah beken galo-galo tu ontok ngenjokke cahayo ke bumi tros ontok nandoi siang samo malem, mosem samo taon. Allah nyingok apo yang Dio ciptoke tu baek.

![](https://cdn.door43.org/obs/jpg/360px/obs-en-01-07.jpg)

Pas ari kelimo, Allah ngomong tros beken segalo yang berenang di dalem banyu jugo segalo borong. Allah nyingok amen itu tu baek galo, tros Dio ngeberkati binatang-binatang tu.

![](https://cdn.door43.org/obs/jpg/360px/obs-en-01-08.jpg)

Pas ari keenem penciptoan, Allah ngomong cak ini, “Jadila segalo jenis binatang darat!” Laju tejadila pecak apo yang dikatoke Allah. Sebagean tu iola binatang ternak, sebagean binatang yang merangkak di tana, tros sebageannyo lagi binatang buas. Allah nyingok amen sloronyo tu baek.

![](https://cdn.door43.org/obs/jpg/360px/obs-en-01-09.jpg)

Ngomongla Allah cak ini, “Biarla kito jadike manusio pecak Kito supayo merep samo Kito. Dio wong bakal nguasoi bumi samo sloro binatang.”

![](https://cdn.door43.org/obs/jpg/360px/obs-en-01-10.jpg)

Laju Allah ngambek segumpel tana, tros ngebentoknyo jadi sikok lanang, tros niupke napas keedopan dalem dirinyo. Namo lanang ni Adam. Allah ngebeken taman di mano Adam pacak edop, tros nempatke dio di situ ontok ngerawat taman tu.

![](https://cdn.door43.org/obs/jpg/360px/obs-en-01-11.jpg)

Di tenga-tenga taman tu, Allah nanem duo pohon kosos – iola pohon keedopan samo pohon pengetauan pasal yang baek samo yang jahat. Allah ngenjoktauke Adam amen dio pacak makan dari sloro pohon di taman tu kecuali dari pohon pengetauan pasal yang baek samo yang jahat. Amen dio makan dari pohon tu dio gek mati.

![](https://cdn.door43.org/obs/jpg/360px/obs-en-01-12.jpg)

Abes tu ngomongla Allah cak ini, “Dak baek amen manusio tu dewekan bae.” Tapi dak katek sikokpun dari binatang-binatang ni pacak jadi penolong Adam.

![](https://cdn.door43.org/obs/jpg/360px/obs-en-01-13.jpg)

Tros Allah ngebeken Adam tedok nyenyak. Allah ngambek sala sikok tulang rosok Adam tros ngebekennyo jadi sikok betino, tros digawaknyo ke Adam.

![](https://cdn.door43.org/obs/jpg/360px/obs-en-01-14.jpg)

Pas Adam nyingok betino tu, dio ngomong cak ini, “Akernyo! Yang sikok ni pecak aku! Dio bakal disebot ‘betino.’” Inila soalnyo ngapo lanang ninggalke ubak samo umaknyo tros jadi sikok dengen bininyo.

![](https://cdn.door43.org/obs/jpg/360px/obs-en-01-15.jpg)

Allah nyiptoke lanang samo betino pecak diri-Nyo. Dio ngeberkati dio wong tros ngomong ke dio wong, “Branak cocongla kamu di bumi!” Tros Allah nyingok amen segalo yang Dio beken tu baek, jadi Dio seneng nian dengen segalonyo tu. Ini ni tejadi pas ari keenem penciptoan.

![](https://cdn.door43.org/obs/jpg/360px/obs-en-01-16.jpg)

Pas ari ketojo, Allah nyelesaike gawean-Nyo. Jadi Allah brenti dari segalo yang la Dio lakuke. Dio ngeberkati ari ketojo tros ngebekennyo suci, cak inila Allah ngebeken alam semesta samo sloro isinyo.

*Sikok crito Alkitab dari: Kejadian 1-2*

## 2. Duso Masok ke Dunio

https://openbiblestories.org/l/mui/story-2/

![](https://cdn.door43.org/obs/jpg/360px/obs-en-02-01.jpg)

Adam samo bininyo seneng nian tinggal di taman yang bagus yang la dibeken Allah ontok dio wong tu. Dak katek sikokpun di antaro dio wong yang makek baju, tapi itu dak ngebeken dio wong malu, soalnyo dak katek duso di dunio. Dio wong sereng bejalan di taman sambel ngomong-ngomong samo Allah.

![](https://cdn.door43.org/obs/jpg/360px/obs-en-02-02.jpg)

Tapi ado sikok ulo yang calak di taman tu. Dio nanyo ke betino tu cak ni, "Bener dak Allah ngelarang nian kamu makan bua dari sloro pohon di taman ni?"

![](https://cdn.door43.org/obs/jpg/360px/obs-en-02-03.jpg)

Uji betino tu, "Allah ngeboleke kami makan bua dari sloro pohon, kecuali pohon pasal pengetauan yang baek samo yang jahat. Uji Allah, 'Amen kamu makan bua tu, apo cuman nyenggolnyo bae, kamu bakal mati.'"

![](https://cdn.door43.org/obs/jpg/360px/obs-en-02-04.jpg)

Uji ulo tu, “Itu tu dak bener! Kamu dak bakal mati. Allah tau, amen kamu makan bua tu, kamu bakal jadi pecak Allah, tau apo yang baek samo yang jahat.”

![](https://cdn.door43.org/obs/jpg/360px/obs-en-02-05.jpg)

Betino tu nyingok amen bua tu bagus tros kejingokannyo lemak. Dio jugo pengen jadi bijaksano, laju dio ngambek bua tu tros dimakannyo. Abes tu dio ngenjokkenyo ke lakinyo yang lagi samo dio, jadi lakinyo melok makan jugo.

![](https://cdn.door43.org/obs/jpg/360px/obs-en-02-06.jpg)

Tibo-tibo, mato dio wong tebukak, tros dio wong sadar amen dio wong tu tlanjang. Dio wong nyubo notopi badannyo dengen ngebeken baju dari daon-daonan.

![](https://cdn.door43.org/obs/jpg/360px/obs-en-02-07.jpg)

Tros Adam samo bininyo ngedenger suaro Allah lagi bejalan di taman. Dio wong singitan dari Allah. Tros Allah manggel Adam, uji-Nyo, “Di mano kau?” Uji Adam, “Aku ngedenger Kau bejalan di taman jadi aku takot, soalnyo aku ni tlanjang. Mangkonyo tu aku singitan.”

![](https://cdn.door43.org/obs/jpg/360px/obs-en-02-08.jpg)

Tros Allah betanyo, “Siapo yang ngomong amen kau tlanjang? Apo kau makan bua yang aku larang tu?” Lanang tu ngejawab, “Betino yang Kau enjok ke aku ni, diola ngenjok aku bua tu.” Tros Allah nanyo ke betino tu, “Apo yang la kau lakuke?” Betino tu ngejawab, “Ulo tu na ngolai aku.”

![](https://cdn.door43.org/obs/jpg/360px/obs-en-02-09.jpg)

Uji Allah ke ulo tu, “Tekotokla kau! Kau bakal ngerayap makek perot, tros kau jugo gek makan debu tana. Kau samo betino ni bakal saleng ngebenci, tros anak-anak kau samo anak-anaknyo jugo gek saleng bemosoan. Ketoronan betino ni bakal ngancorke palak kau, tros kau gek ngancorke tumitnyo.”

![](https://cdn.door43.org/obs/jpg/360px/obs-en-02-10.jpg)

Tros Allah ngomong ke betino tu, “Aku bakal ngebeken kau kesaketan pas kau branak. Tros kau agek napsu samo laki kau tros dio bakal nguasoi kau.”

![](https://cdn.door43.org/obs/jpg/360px/obs-en-02-11.jpg)

Allah ngomong ke lanang tu, “Kau ngedengerke bini kau tapi dak noroti Aku. Sekarang tana ni dikotok, kau mesti begawe berat ontok nyari makan. Tros kau gek bakal mati, tros badan kau gek balek ke tana.” Lanang tu ngenjok namo bininyo Hawa, yang artinyo “Ngenjok Keedopan”, soalnyo dio gek bakal jadi emak dari sloro wong. Tros Allah makekke Adam samo Hawa baju dari kolet binatang.

![](https://cdn.door43.org/obs/jpg/360px/obs-en-02-12.jpg)

Tros uji Allah, “Sekarang ni karno manusio la samo pecak Kito, tau yang baek samo yang jahat, dio wong dak bole makan bua dari pohon keedopan tros edop slamonyo.” Jadi Allah ngongkon Adam samo Hawa metu dari taman yang bagus tu. Allah mrentoke malekat yang kuat bejago di depan pintu masok taman tu supayo dak katek wong yang pacak makan bua keedopan.

*Sikok crito Alkitab dari: Kejadian 3*

## 3. Banjer Besak

https://openbiblestories.org/l/mui/story-3/

![](https://cdn.door43.org/obs/jpg/360px/obs-en-03-01.jpg)

Lamo-kelamoan, manusio di bumi betamba banyak. Dio wong tu jadi jahat jugo kejem nian. Laju dunio jadi kacau nian akernyo Allah motoske ontok ngancorke dunio dengen banjer besak.

![](https://cdn.door43.org/obs/jpg/360px/obs-en-03-02.jpg)

Tapi Nuh dapet kase karunio Allah. Dio tu wong bener yang edop di antaro wong-wong jahat. Allah ngenjok tau Nuh pasal banjer besak yang Dio rencanoke. Allah ngongkon Nuh ontok ngebangun kapal yang besak.

![](https://cdn.door43.org/obs/jpg/360px/obs-en-03-03.jpg)

Allah ngongkon Nuh ontok ngebeken kapal. Okoran panjangnyo kiro-kiro 140 meter, lebarnyo 23 meter, tros tingginyo 13,5 meter. Kapal tu haros dibeken pakek kayu, tros dibeken jadi tigo tingkat. Ado atep, ado jendelo, tros ado banyak kamar. Kapal tu agek nyelametke Nuh, kluargonyo, samo setiap jenis binatang darat bakal aman slamo banjer.

![](https://cdn.door43.org/obs/jpg/360px/obs-en-03-04.jpg)

Nuh norot samo Allah. Dio samo ketigo anaknyo ngebangun kapal pecak yang la Allah prentoke ke dio wong. Perlu waktu betaon-taon ontok ngebangun kapal tu karno besak nian. Nuh ngenjok tau wong-wong pasal banjer besak yang bakal dateng tros ngongkon dio wong balek ke Allah, tapi dio wong cuman ngetawoinyo bae.

![](https://cdn.door43.org/obs/jpg/360px/obs-en-03-05.jpg)

Allah jugo mrentoke Nuh samo kluargonyo ontok ngompolke makanan yang cokop ontok dio wong samo binatang. Pas segalonyo la siap, Allah ngomong samo Nuh la waktunyo ontok dio, bininyo, samo ketigo anaknyo, jugo mantu-mantunyo naek ke kapal. Ado lapan wong di jero kapal tu.

![](https://cdn.door43.org/obs/jpg/360px/obs-en-03-06.jpg)

Allah ngongkon sepasang dari sloro jenis binatang samo borong dateng ke Nuh supayo pacak naek ke kapal tu dengen aman selamo banjer. Allah jugo ngerem tojo pasang dari sloro jenis binatang yang kagek pacak dijadike kurban. Pas la masok galo ke jero kapal, Allah dewek yang notop pintu kapal tu.

![](https://cdn.door43.org/obs/jpg/360px/obs-en-03-07.jpg)

Abes tu toronla ujan besak yang dak brenti-brenti. Ujannyo toron selamo empat polo ari empat polo malem dak brenti-brenti! Banyu jugo metu dari jero tana. Sloro yang ado di dunio tetotop banyu, sampe-sampe gonong yang paleng tinggi jugo.

![](https://cdn.door43.org/obs/jpg/360px/obs-en-03-08.jpg)

Segalo yang edop di daratan jadi mati, kecuali wong-wong samo binatang yang ado di kapal. Kapal tu ngapong di pocok banyu, jadi segalo yang di jero kapal idak tenggelem.

![](https://cdn.door43.org/obs/jpg/360px/obs-en-03-09.jpg)

Pas ujan la brenti, kapal tu ngapong di pocok banyu selamo limo bulan, tros beangsor-angsor dalem waktu ini banyu mulai sorot. Abes tu kapan ari kapal tu lagi brenti di puncak gonong, tapi dunio mase ditotopi dengen banyu. Pas la tigo bulan abes tu, puncak gonong mulai kejingokan.

![](https://cdn.door43.org/obs/jpg/360px/obs-en-03-10.jpg)

Pas la lebe dari empat polo ari, Nuh ngelepaske sikok borong gagak ontok nyingok amen banyu la kereng apo belom. Gagak tu terbang bolak-balek nyari tana kereng, tapi dak pacak nemukenyo.

![](https://cdn.door43.org/obs/jpg/360px/obs-en-03-11.jpg)

Tros Nuh ngerem borong merpati. Tapi dak pacak jugo nemuke tana yang kereng, laju balek lagi ke Nuh. Pas la seminggu Nuh ngeremke borong merpati tu lagi, tros borong tu balek lagi sambel gawak cabang batang jaitun di parunyo! Tandonyo banyu tu la sorot tros taneman la tombo lagi!

![](https://cdn.door43.org/obs/jpg/360px/obs-en-03-12.jpg)

Nuh nungguke seminggu lagi tros ngeremke borong merpati tu ontok ketigo kalinyo. Kali ni, borong tu nemuke tempat ontok istirahat tros dak balek lagi. Banyunyo la nak ngereng.

![](https://cdn.door43.org/obs/jpg/360px/obs-en-03-13.jpg)

Duo bulan berekotnyo Allah ngomong samo Nuh, uji-Nyo, “Kau samo kluargo kau jugo samo sloro binatang-binatang ni pacak ninggalke kapal sekarang. Branak-cocongla tros penuila bumi.” Laju Nuh samo kluargonyo metu dari kapal tu.

![](https://cdn.door43.org/obs/jpg/360px/obs-en-03-14.jpg)

Pas Nuh la metu dari kapal, dio ngebangun sikok meja pesembahan abes tu ngurbanke beberapo ikok jenis binatang yang pacak digunoke ontok kurban. Allah seneng dengen kurbannyo Nuh tros ngeberkati dio samo kluargonyo.

![](https://cdn.door43.org/obs/jpg/360px/obs-en-03-15.jpg)

Uji Allah, “Aku bejanji dak bakal ngotok bumi ni lagi karno manusio, apo ngancorke dunio makek banjer besak, mugola dio wong beduso dari masa mudo dio wong.”

![](https://cdn.door43.org/obs/jpg/360px/obs-en-03-16.jpg)

Tros Allah ngebeken pelangi ontok petamo kalinyo, yang jadi tando janji-Nyo. Setiap kali ado pelangi moncol di langet, Allah bakal inget apo yang Dio janjike, cak itu jugola umat-Nyo.

*Sikok crito Alkitab dari: Kejadian 6-8*

## 4. Pejanjian Allah ke Ibrahim

https://openbiblestories.org/l/mui/story-4/

![](https://cdn.door43.org/obs/jpg/360px/obs-en-04-01.jpg)

Betaon-taon seabes banjer besak, betamba lagi jumla wong di bumi, tros dio wong ngomong makek baso yang samo galo. Tapi dio wong ni dak norot samo Allah. Bukannyo branak cocong samo ngisi bumi, dio wong mala bekompol samo-samo ontok beken sikok kota.

![](https://cdn.door43.org/obs/jpg/360px/obs-en-04-02.jpg)

Dio wong bangga nian, tros dio wong dak peduli samo omongan Allah. Sampe-sampe dio wong mulai ngebangun sikok menara yang tinggi supayo nyampe ke surgo. Allah tau amen dio wong teros-terosan kerjo samo ontok beken kejahatan, dio wong pacak beken jao lebe banyak pasal yang beduso.

![](https://cdn.door43.org/obs/jpg/360px/obs-en-04-03.jpg)

Laju Allah nguba baso dio wong ke dalem banyak baso-baso yang laen tros nyebarke wong-wong tu ke sloro bumi. Kota yang mulai dio wong bangun tu disebot kota Babel, yang artinyo, “bingung.”

![](https://cdn.door43.org/obs/jpg/360px/obs-en-04-04.jpg)

Ratosan taon abes tu, Allah ngomong ke sikok lanang yang benamo Abram. Allah ngomong ke dio, “Tinggalkela negara kau samo kluargo kau tros pegila ke tana yang Aku bakal tonjokke. Aku bakal ngeberkati kau tros Aku bakal ngebeken kau jadi bangso yang besak. Aku bakal ngebeken namo kau besak. Aku bakal ngeberkati sloro wong yang ngeberkati kau tros ngotok sloro wong yang ngotok kau. Segalo kluargo di bumi bakal diberkati karno kau.”

![](https://cdn.door43.org/obs/jpg/360px/obs-en-04-05.jpg)

Jadi Abram noroti Allah. Dio gawak bininyo, Sarai, samo sloro babunyo jugo galo-galo yang dio punyo, tros pegi ke tempat yang ditonjokke Allah samo dio, namo tana tu iola Kanaan.

![](https://cdn.door43.org/obs/jpg/360px/obs-en-04-06.jpg)

Pas Abram sampe di Kanaan, Uji Allah, “Jingokla di sekitar kau. Aku bakal ngenjokke kau samo sloro ketoronan kau segalo tana yang pacak kau jingok ontok jadi waresan kau.” Jadi Abram tinggal di tana tu.

![](https://cdn.door43.org/obs/jpg/360px/obs-en-04-07.jpg)

Kapan ari, Abram ketemu samo Melkisedek, dio ni imam Tuhan Yang Mahabesak yang dihormati. Melkisedek ngeberkati Abram tros ngomong cak ini, “Semugo Tuhan Yang Mahabesak yang nguasoi langet samo bumi ngeberkati Abram.” Tros Abram ngenjok Melkisedek sepolo persen dari segalo hartonyo.

![](https://cdn.door43.org/obs/jpg/360px/obs-en-04-08.jpg)

Pas la liwat beberapo taon, Sarai mase bae belom punyo anak. Allah ngomong ke Abram tros bejanji lagi amen dio bakal punyo anak tros ketoronannyo banyak nian pecak bintang di langet. Abram pecayo samo janji Allah. Allah nyatoke amen Abram ni wong yang bener, soalnyo dio pecayo samo janji Allah.

![](https://cdn.door43.org/obs/jpg/360px/obs-en-04-09.jpg)

Abes tu Allah beken pejanjian ke Abram. Pejanjian tu iola kesepakatan antaro duo pihak. Uji Allah, “Aku bakal ngenjokke sikok anak lanang dari badan kau dewek. Aku ngenjokke tana Kanaan ontok ketoronan kau.” Tapi Abram mase belom punyo anak lanang.

*Sikok crito Alkitab dari: Kejadian 11-15*

## 5. Anak Lanang yang Dijanjike

https://openbiblestories.org/l/mui/story-5/

![](https://cdn.door43.org/obs/jpg/360px/obs-en-05-01.jpg)

Sepolo taon abes Abram samo bininyo, Sarai, nyampe di Kanaan, dio wong mase dak katek anak. Jadi uji Sarai, “Karno Allah belom ngejeni aku ontok bonteng tros sekarang aku la tuo nian ontok punyo anak. Ini na babu aku, Hagar. Kawenila dio supayo dio pacak punyo anak ontok aku.”

![](https://cdn.door43.org/obs/jpg/360px/obs-en-05-02.jpg)

Jadi Abram ngaweni Hagar. Hagar punyo kupek lanang, tros Abram namoi dio Ismail. Tapi, Sarai jadi cemburu samo Hagar. Pas Ismail omornyo tigo belas taon, Allah ngomong lagi samo Abram.

![](https://cdn.door43.org/obs/jpg/360px/obs-en-05-03.jpg)

Uji Allah, “Akula Tuhan Yang Mahakuaso. Aku bakal beken pejanjian samo kau.” Laju Abram sojod ke tana. Allah jugo ngomong samo Abram, “Kau bakal jadi ubak ontok banyak bangso. Aku bakal ngenjok kau samo ketoronan kau tana Kanaan ontok jadi hak melek dio wong. Tros Aku bakal jadi Tuhan dio wong selamonyo. Kau haros nyunat sloro lanang di kluargo kau.”

![](https://cdn.door43.org/obs/jpg/360px/obs-en-05-04.jpg)

“Bini kau Sarai, bakal punyo anak lanang, dio bakal jadi anak pejanjian. Namoi dio Ishak. Aku bakal beken pejanjian Aku ke dio, tros dio bakal jadi bangso yang besak. Aku jugo bakal beken bangso yang besak ke Ismail. Tapi pejanjian Aku tetep samo Ishak.” Abes tu Allah nguba namo Abram jadi Ibrahim, yang artinyo “ubak banyak wong.” Allah jugo nguba namo Sarai jadi Sarah, yang artinyo “putri.”

![](https://cdn.door43.org/obs/jpg/360px/obs-en-05-05.jpg)

Ari tu Ibrahim nyunat sloro lanang di rumanyo. Kiro-kiro setaon abes tu, pas Ibrahim omornyo 100 taon tros Sarah 90 taon, Sarah ngelaerke anaknyo Ibrahim. Dio wong namoi budak tu Ishak, pecak yang la dikongkon Allah.

![](https://cdn.door43.org/obs/jpg/360px/obs-en-05-06.jpg)

Pas Ishak mase mudo, Allah ngetes imannyo Ibrahim dengen ngomong cak ini, “Gawakla Ishak anak kau sikok-sikoknyo tu, tros kurbankela dio ontok jadi pesembahan kau ke Aku.” Ibrahim noroti Allah tros besiap ontok ngurbanke anaknyo.

![](https://cdn.door43.org/obs/jpg/360px/obs-en-05-07.jpg)

Pas Ibrahim samo Ishak bejalan ke tempat pengurbanan, Ishak nanyo, “Ubak, kito punyo kayu ontok kurban pesembahan, tapi di mano anak dombanyo?” Uji Ibrahim, “Allah bakal nyedioke anak domba ontok dikurbanke, anakku."

![](https://cdn.door43.org/obs/jpg/360px/obs-en-05-08.jpg)

Pas dio wong sampe di tempat kurban, Ibrahim ngiket anaknyo Ishak tros ngolengke dio di pocok meja pesembahan. Pas dio nak bunu anaknyo, Allah ngomong “Demla! Jangan saketi anak tu! Sekarang Aku tau amen kau takot samo Aku. Soalnyo kau idak ngejaoi anak tu dari Aku.”

![](https://cdn.door43.org/obs/jpg/360px/obs-en-05-09.jpg)

Ibrahim jingok sikok domba lanang tesangkot di parak semak-semak. Ternyato Allah la nyiapke sikok domba lanang ontok dikurbanke gantike Ishak. Ibraham dengen ati seneng ngurbanke sikok domba lanang tu jadi kurban pesembahan.

![](https://cdn.door43.org/obs/jpg/360px/obs-en-05-10.jpg)

Abes tu Allah ngomong samo Ibrahim, “Karno kau la rela ngenjokke apo bae ke Aku, temasok anak lanang kau sikok-sikoknyo, Aku bejanji bakal ngenjok kau berkat. Ketoronan kau bakal ngelebei banyaknyo bintang di langet. Soalnyo kau la noroti Aku, sloro kluargo di bumi ni bakal dienjok berkat liwat kluargo kau.”

*Sikok crito Alkitab dari: Kejadian 16-22*

## 6. Allah Mliaro Ishak

https://openbiblestories.org/l/mui/story-6/

![](https://cdn.door43.org/obs/jpg/360px/obs-en-06-01.jpg)

Pas Ibrahim la tuo nian, Ishak anaknyo tu la bujang. Laju Ibrahim ngongkon sikok babunyo ontok balek ke tana di mano kluargonyo tinggal, supayo pacak nemuke bini ontok Ishak.

![](https://cdn.door43.org/obs/jpg/360px/obs-en-06-02.jpg)

Abes ngelakuke pejalanan yang jao nian nojo ke tempat sanak kluargo Ibrahim, Allah nonton babunyo Ibrahim ke Ribka. Ribka tu iola cocong dari dolornyo Ibrahim.

![](https://cdn.door43.org/obs/jpg/360px/obs-en-06-03.jpg)

Ribka stuju ninggalke kluargonyo tros melok samo babu tu ke ruma Ishak. Pas la nyampe, Ishak langsong ngaweni dio.

![](https://cdn.door43.org/obs/jpg/360px/obs-en-06-04.jpg)

Betaon-taon abes tu, Ibrahim mati tros sloro janji-janji yang la dibeken Allah samo dio diteroske ke Ishak. Allah la bejanji amen Ibrahim bakal punyo ketoronan yang dak pacak dietong jumlanyo, tapi bininyo Ishak ni dak pacak punyo anak.

![](https://cdn.door43.org/obs/jpg/360px/obs-en-06-05.jpg)

Ishak bedoa ke Allah pasal Ribka, jadi Allah ngejeni Ribka supayo bonteng tros punyo kupek kembar. Duo ikok kupek tu besaeng sikok dengen laennyo waktu mase di perotnyo Ribka. Jadi Ribka ni nanyo ke Allah apo yang lagi tejadi.

![](https://cdn.door43.org/obs/jpg/360px/obs-en-06-06.jpg)

Allah ngomong ke Ribka cak ini, “Duo ikok bangso bakal dateng dari duo anak lanang yang ado di dalem perot kau tu. Dio wong bakal besaeng sikok dengen yang laennyo. Anak lanang yang lebe tuo agek bakal ngelayani yang lebe mudo.”

![](https://cdn.door43.org/obs/jpg/360px/obs-en-06-07.jpg)

Pas kupek Ribka la laer, budak lanang yang lebe tuo metu dengen kolet abang tros bebulu, dio wong namoi dio Esau. Tros anak lanang yang keduo ni metu sambel megang tometnyo Esau. Dio wong namoi dio Yakob.

*Sikok crito Alkitab dari: Kejadian 24:1-25:26*

## 7. Allah Berkati Yakob

https://openbiblestories.org/l/mui/story-7/

![](https://cdn.door43.org/obs/jpg/360px/obs-en-07-01.jpg)

Pas budak-budak tu la besak, Esau ni kesenengannyo beburu, amen Yakob lebe seneng mendep di ruma. Ribka lebe nyayangi Yakob, tapi amen Ishak ni lebe sayang samo Esau.

![](https://cdn.door43.org/obs/jpg/360px/obs-en-07-02.jpg)

Kapan ari, pas balek dari beburu, Esau kelaperan nian. Uji Esau ke Yakob, “Tolong enjokla aku masakan yang la kau beken tu.” Uji Yakob, “Sebelom tu, kau enjokke dulu hak-hak anak petamo kau ke aku.” Laju dienjokkenyola hak-hak anak petamonyo tu ke Yakob. Abes tu Yakob ngenjok dio masakannyo.

![](https://cdn.door43.org/obs/jpg/360px/obs-en-07-03.jpg)

Pas Ishak la tuo nian tros matonyo la buto, Ishak nak ngeberkati Esau. Tapi, Ribka samo Yakob ngolai dio dengen caro Yakob ecak-ecak jadi Esau. Yakob makek bajunyo Esau, tros makek kolet kambeng di leher samo tangannyo.

![](https://cdn.door43.org/obs/jpg/360px/obs-en-07-04.jpg)

Yakob dateng ke Ishak, ujinyo, “Aku Esau. Aku dateng supayo kau pacak ngeberkati aku.” Pas Ishak ngeraba kolet kambeng tros nyium bauk bajunyo tu, Ishak ngiro amen dio iola Esau tros ngeberkatinyo.

![](https://cdn.door43.org/obs/jpg/360px/obs-en-07-05.jpg)

Esau jadi benci nian samo Yakob karno la maleng hak anak petamo samo berkatnyo. Laju dio berencano nak ngebunu Yakob pas ubaknyo la mati.

![](https://cdn.door43.org/obs/jpg/360px/obs-en-07-06.jpg)

Tapi Ribka ngedenger rencanonyo Esau. Laju dio samo Ishak ngongkon Yakob pegi jao ontok tinggal di ruma sanak kluargonyo Ribka.

![](https://cdn.door43.org/obs/jpg/360px/obs-en-07-07.jpg)

Selamo betaon-taon Yakob tinggal samo sanak kluargo Ribka. Dio kawen tros punyo duo blas anak lanang samo sikok anak betino. Allah jadike dio kayo rayo.

![](https://cdn.door43.org/obs/jpg/360px/obs-en-07-08.jpg)

Pas la duo polo taon, Yakob balek lagi ke Kanaan, dio gawak sloro kluargonyo, babu-babunyo, jugo ternak-ternaknyo.

![](https://cdn.door43.org/obs/jpg/360px/obs-en-07-09.jpg)

Yakob mati ketakotan, dio peker Esau mase nak ngebunu dio. Laju dio ngongkon babu-babunyo gawak banyak ternaknyo ontok dienjokke ke Esau. Uji babu-babunyo, “Hamba kau, Yakob, nak ngenjok kau ternak-ternak ni. Denget lagi dio dateng.”

![](https://cdn.door43.org/obs/jpg/360px/obs-en-07-10.jpg)

Ternyato Esau la maapke Yakob, tros dio wong seneng nian pacak ketemu lagi. Yakob edop tenang di Kanaan. Tros Ishak mati, Yakob samo Esau yang ngobori dio. Pejanjian yang la Allah janjike ke Ibrahim diteroske dari Yakob ke Ishak.

*Sikok crito Alkitab dari: Kejadian 25:27-33:20*

## 8. Allah Nyelametke Yusup samo Kluargonyo

https://openbiblestories.org/l/mui/story-8/

![](https://cdn.door43.org/obs/jpg/360px/obs-en-08-01.jpg)

Betaon-taon abes tu, pas Yakob la tuo, dio ngongkon anak kesayangannyo, Yusup, ontok ngawasi dolor-dolornyo yang lagi ngoros ternak.

![](https://cdn.door43.org/obs/jpg/360px/obs-en-08-02.jpg)

Dolor-dolornyo benci nian samo Yusup karno ubak dio wong lebe nyayangi Yusup, jugo karno Yusup ni bemimpi amen dio bakal nguasoi dio wong. Pas Yusup nemuke dolor-dolornyo, dio wong nyolek tros ngejual Yusup ke tukang budak.

![](https://cdn.door43.org/obs/jpg/360px/obs-en-08-03.jpg)

Dolor-dolornyo ngoyakke bajunyo Yusup, tros dicelopkenyo baju tu ke dara kambeng, abes tu balek ke ruma. Dio wong ngolai ubaknyo, ditonjokkenyola baju tu ke ubaknyo tros ngomong amen Yusup la mati karno diserang binatang buas. Laju Yakob sede nian.

![](https://cdn.door43.org/obs/jpg/360px/obs-en-08-04.jpg)

Tukang-tukang budak ngawak Yusup ke Mesir. Mesir ni negaro yang besak jugo kuat yang ado di pengger Sungi Nil. Yusup dijual ke pejabat pemrento yang kayo. Dio ngelayani tuannyo dengen baek, tros Allah ngeberkati Yusup.

![](https://cdn.door43.org/obs/jpg/360px/obs-en-08-05.jpg)

Bini tuannyo nak nyubo tedok samo Yusup, tapi Yusup dak galak bebuat duso ke Allah. Laju betino tu jadi mara tros nudu Yusup, tros dio ditangkep ontok dimasokke ke penjaro. Di jero penjaro Yusup tetep stio samo Allah, tros Allah ngeberkati Yusup.

![](https://cdn.door43.org/obs/jpg/360px/obs-en-08-06.jpg)

Pas la duo taon, Yusup mase di penjaro, padahal dio dak besala. Rajo Mesir, sebotannyo Piraun, punyo duo mimpi yang nganggu dio nian. Dak katek antaro penasehatnyo yang pacak ngartike mimpi-mimpinyo.

![](https://cdn.door43.org/obs/jpg/360px/obs-en-08-07.jpg)

Allah la ngenjok Yusup kemampuan ontok ngartike mimpi, jadi Piraun ngongkon wong gawak Yusup dari penjaro. Yusup ngartike mimpinyo Piraun, ujinyo, “Allah bakal ngerem tojo taon panen yang bagus abes tu tojo taon kelaperan.”

![](https://cdn.door43.org/obs/jpg/360px/obs-en-08-08.jpg)

Piraun kagom nian samo Yusup, laju dio jadike Yusup wong keduo yang bekuaso di sloro Mesir!

![](https://cdn.door43.org/obs/jpg/360px/obs-en-08-09.jpg)

Yusup ngongkon wong-wong ontok nyimpen banyak makanan pas tojo taon panen yang bagus, tros pas tojo taon waktu kelaperan. Yusup ngejual makanan ke wong-wong supayo dio wong punyo cokop makanan ontok dimakan!

![](https://cdn.door43.org/obs/jpg/360px/obs-en-08-10.jpg)

Kelaperan besak tu idak cuman tejadi di Mesir bae, tapi jugo di Kanaan, di mano Yakob samo kluargonyo tinggal.

![](https://cdn.door43.org/obs/jpg/360px/obs-en-08-11.jpg)

Laju Yakob ngongkon anak-anaknyo ke Mesir ontok beli makanan. Pas dolornyo Yusup tegak di depannyo ontok beli makanan, dio wong dak keciren samo Yusup. Tapi Yusup keciren samo dio wong.

![](https://cdn.door43.org/obs/jpg/360px/obs-en-08-12.jpg)

Yusup ngetes dio wong la beruba apo belom, abes tu uji Yusup ke dio wong, “Aku ni dolor kau, Yusup! Dak usa takot. Kau ngelakuke kejahatan pas kau ngejual aku jadi budak, tapi Allah makek kejahatan tu ontok kebaekan! Payo sinila! tinggalla di Mesir, supayo aku pacak nyedioke makanan ontok kau samo kluargo kau.”

![](https://cdn.door43.org/obs/jpg/360px/obs-en-08-13.jpg)

Pas dolor-dolornyo balek ke ruma tros dio wong nyritoke kejadian ni ke Yakob amen Yusup mase edop, Yakob seneng nian.

![](https://cdn.door43.org/obs/jpg/360px/obs-en-08-14.jpg)

Mugola Yakob la tuo, dio pinda ke Mesir samo sanak kluargonyo, tros dio wong tinggal di sano galo. Sebelom Yakob mati, dio ngeberkati sloro anaknyo.

![](https://cdn.door43.org/obs/jpg/360px/obs-en-08-15.jpg)

Pejanjian yang la dijanjike Allah samo Ibrahim diteroske ke Ishak, abes tu ke Yakob, tros ke sloro ketoronannyo Yakob. Ketoronan dari duo blas anak lanang ni jadi duo blas suku Israel.

*Sikok crito Alkibab dari: Kejadian 37-50*

## 9. Allah Manggel Musa

https://openbiblestories.org/l/mui/story-9/

![](https://cdn.door43.org/obs/jpg/360px/obs-en-09-01.jpg)

Pas Yusup mati, sloro kluargonyo tinggal di Mesir. Dio wong samo ketoronannyo tinggal di sano selamo betaon-taon tros punyo banyak anak. Dio wong disebot wong Israel.

![](https://cdn.door43.org/obs/jpg/360px/obs-en-09-02.jpg)

Pas la beratos-ratos taon, wong Israel jadi banyak nian. Wong-wong Mesir la ngelupoke Yusup samo segalo yang la Yusup lakuke ontok nolong dio wong. Wong Mesir jadi takot samo wong Israel karno wong Israel ni banyak nian. Laju, Piraun yang bekuaso di Mesir pas jaman tu jadike wong Israel budaknyo wong Mesir.

![](https://cdn.door43.org/obs/jpg/360px/obs-en-09-03.jpg)

Wong Israel dipakso beken banyak bangunan, sampe-sampe haros ngebangun kota. Gawe berat tu ngebuat dio wong sengsaro. Tapi Allah ngeberkati wong Israel, tros ketoronan dio wong malahan betamba banyak.

![](https://cdn.door43.org/obs/jpg/360px/obs-en-09-04.jpg)

Piraun jingok amen wong Israel ngelaerke banyak kupek, laju dio mrentoke ontok ngebunu sloro kupek lanang wong Israel dengen caro dibuang ke jero Sungi Nil.

![](https://cdn.door43.org/obs/jpg/360px/obs-en-09-05.jpg)

Sala sikok betino Israel ngelaerke kupek lanang. Dio samo lakinyo nyingiti kupek tu sebisonyo.

![](https://cdn.door43.org/obs/jpg/360px/obs-en-09-06.jpg)

Pas wong tuo kupek tu dak pacak lagi nyingitinyo, dio wong narok kupek tu di keranjang yang ngapong di pengger Sungi Nil supayo dio dak tebunu. Ayuknyo kupek tu ngawasinyo supayo tau apo yang bakal tejadi samo dio.

![](https://cdn.door43.org/obs/jpg/360px/obs-en-09-07.jpg)

Sikok anak betinonyo Piraun jingok keranjang yang ado kupek dijeronyo. Dio ngangkat kupek tu jadi anaknyo dewek. Dio nyewo betino Israel ontok jadi inang kupek tu. Dio dak sadar amen betino tu umak kupek tu dewek. Pas budak tu la besak tros dak perlu susu lagi, dibalekkenyola budak tu ke anak betinonyo Piraun. Anak Piraun tu namoi budak tu Musa.

![](https://cdn.door43.org/obs/jpg/360px/obs-en-09-08.jpg)

Kapan ari, pas Musa la besak, dio nyingok wong Mesir ngeboki budak Israel. Musa nyubo nyelametke wong sebangsonyo.

![](https://cdn.door43.org/obs/jpg/360px/obs-en-09-09.jpg)

Pas dio ngeraso dak katek yang nyingok, dio ngebunu wong Mesir tu tros ngoborke mayatnyo. Tapi ternyato ado wong yang nyingok kejadian tu.

![](https://cdn.door43.org/obs/jpg/360px/obs-en-09-10.jpg)

Pas Piraun tau kejadian tu, dio nak ngebunu Musa. Musa lari dari Mesir ke padang goron di mano dio pacak aman dari tentaro Mesir.

![](https://cdn.door43.org/obs/jpg/360px/obs-en-09-11.jpg)

Musa jadi pengoros domba di padang goron yang jao dari Mesir. Dio ngaweni betino dari tempat tu, tros punyo duo anak lanang.

![](https://cdn.door43.org/obs/jpg/360px/obs-en-09-12.jpg)

Pas Musa lagi ngoros domba-dombanyo, dio nyingok sikok semak yang bekobar-kobar, tapi semaknyo idak kebakar. Laju Musa maraki semak tu supayo pacak jingok lebe jelas, tapi Allah ngomong, “Musa, lepaskela selop kau. Kau tu lagi tegak di tana yang suci.”

![](https://cdn.door43.org/obs/jpg/360px/obs-en-09-13.jpg)

Uji Allah, “Aku la nyingok pendritoan umat Aku. Aku bakal ngerem kau ke Piraun supayo kau pacak gawak wong Israel metu dari pebudakan dio wong di Mesir. Aku bakal ngenjok dio wong tana Kanaan, iola tana yang Aku janjike ke Ibrahim, Ishak, samo Yakob.”

![](https://cdn.door43.org/obs/jpg/360px/obs-en-09-14.jpg)

Tanyo Musa, “Cak mano amen dio wong nak tau siapo yang ngerem aku, apo yang haros aku omongke.” Uji Allah, “Aku ni iola Yang Kekal. Omongi bae ke dio wong, ‘Yang Kekal la ngerem aku ke kau.’ Omongke jugo ke dio wong, ‘Aku ni YHWH, Tuhan Ibrahim, Ishak, samo Yakub, lelohor kau.' Inila namo Aku selamonyo.” (Namo YHWH tu mongken diucapke “Yawe” tros retinyo “Yang Kekal”.)

![](https://cdn.door43.org/obs/jpg/360px/obs-en-09-15.jpg)

Musa dak galak pegi ke Piraun karno dio takot. Dio peker dio dak pinter ngomong. Jadi Allah ngerem Harun dolor lanangnyo Musa ontok ngerewangi dio. Allah ngingetke Musa jugo Harun amen Piraun bakal nekak.

*Sikok crito Alkitab dari: Keluaran 1-4*

## 10. Sepolo Bencano

https://openbiblestories.org/l/mui/story-10/

![](https://cdn.door43.org/obs/jpg/360px/obs-en-10-01.jpg)

Musa samo Harun ni pegi nemui Piraun. Dio wong ngomong cak ini, “Inila omongan Tuhan wong Israel, ‘Biarkela umat Aku pegi!’” Tapi Piraun dak ngedengerke dio wong. Bukannyo ngebebasi wong Israel, malahan dienjokkenyo gawean yang lebe saro.

![](https://cdn.door43.org/obs/jpg/360px/obs-en-10-02.jpg)

Piraun tetep nolak wong-wong tu pegi, jadinyo Allah ngerem sepolo Bencano. Liwat Hokoman-hokoman ni, Allah nonjokke ke Piraun amen Dio lebe kuat dari Piraun samo segalo dewa-dewa Mesir.

![](https://cdn.door43.org/obs/jpg/360px/obs-en-10-03.jpg)

Allah nguba Sungi Nil jadi dara, tapi Piraun ni tetep bae dak ngebiarke wong Israel pegi.

![](https://cdn.door43.org/obs/jpg/360px/obs-en-10-04.jpg)

Allah ngeremke kodok-kodok ke sloro Mesir. Piraun melas ke Musa supayo ngilangi kodok-kodok tu. Tapi pas kodok-kodok tu la mati, Piraun ni ngeraske atinyo, tros dak ngebiarke wong Israel ni ninggalke Mesir.

![](https://cdn.door43.org/obs/jpg/360px/obs-en-10-05.jpg)

Laju Allah ngeremke Bencano seranggo. Abes tu Allah ngeremke Bencano lalet. Piraun manggel Musa samo Harun tros ngomong ke dio wong, amen dio wong pacak ngebrentike Bencano ni, wong Israel pacak pegi dari Mesir. Pas Musa ni bedoa, Allah ngilangke lalet dari Mesir. Tapi Piraun ni ngeraske atinyo tros dak ngebiarke wong Israel pegi.

![](https://cdn.door43.org/obs/jpg/360px/obs-en-10-06.jpg)

Abes tu, Allah ngebeken segalo binatang ternak di Mesir ni jadi saket tros mati. Tapi Piraun ni tetep dikeraske atinyo tros dak ngebiarke wong Israel ni pegi.

![](https://cdn.door43.org/obs/jpg/360px/obs-en-10-07.jpg)

Laju Allah ngongkon Musa ontok nguntalke abu ke udaro di depan Piraun. Pas dio ngelakuke tu, penyaket besol tejadi di sloro Mesir, tapi wong Israel dak keno besol ni. Allah ngeraske atinyo Piraun, tros Piraun ni dak ngebiarke wong Israel pegi.

![](https://cdn.door43.org/obs/jpg/360px/obs-en-10-08.jpg)

Abes tu, Allah ngeremke ujan es sebesak batu yang pacak ngancori taneman di Mesir, tros ngebunu siapo bae yang metu dari ruma. Piraun manggel Musa samo Harun tros ngomong ke dio wong cak ni, “Aku la beduso. Kamu pacak pegi dari sini.” Abes tu Musa bedoa. Tros ujan es brenti.

![](https://cdn.door43.org/obs/jpg/360px/obs-en-10-09.jpg)

Tapi Piraun buat duso tros ngeraske atinyo lagi. Dio dak bakal ngebiarke wong Israel pegi.

![](https://cdn.door43.org/obs/jpg/360px/obs-en-10-10.jpg)

Jadi Allah ngebeken segrombolan belalang dateng ke Mesir. Belalang ni makan taneman apo bae yang tesiso, yang dak ancor karno ujan es tadi.

![](https://cdn.door43.org/obs/jpg/360px/obs-en-10-11.jpg)

Laju Allah ngeremke Bencano kegelepan selamo tigo ari. Itu tu gelep nian sampe-sampe wong Mesir dak pacak metu dari ruma dio wong. Tapi ado cahayo di mano wong Israel tinggal.

![](https://cdn.door43.org/obs/jpg/360px/obs-en-10-12.jpg)

Mugola la ngalami sembilan ikok Bencano, Piraun tetep nolak ngebiarke wong Israel pegi. Karno Piraun ni nekak, Allah ngerencanoke ontok ngerem sikok Bencano teaker. Kejadian ni bakal nguba pekerannyo Piraun.

*Sikok crito Alkitab dari: Kejadian 5-10*

## 11. Paska Wong Israel

https://openbiblestories.org/l/mui/story-11/

![](https://cdn.door43.org/obs/jpg/360px/obs-en-11-01.jpg)

Allah pringetke Piraun, amen dio dak ngebiarke wong Israel pegi, Allah bakal ngebunu sloro anak lanang petamo dari manusio jugo binatang yang ado di tana Mesir. Pas Piraun tau soal tu dio tetep nolak ontok pecayo jugo norot samo Allah.

![](https://cdn.door43.org/obs/jpg/360px/obs-en-11-02.jpg)

Allah ngenjok caro supayo pacak nyelametke anak petamo siapo bae yang pecayo samo Dio. Setiap kluargo haros mele sikok domba yang sempurno tros nyemblenyo.

![](https://cdn.door43.org/obs/jpg/360px/obs-en-11-03.jpg)

Abes tu Allah mrentoke wong Israel supayo ngoleske separo dara anak domba yang disembele tadi di sekitar pintu ruma dio wong. Tros dagengnyo dibakar, abes tu dimakan dengen gancang samo roti yang dak beragi. Allah jugo ngomong ke dio wong supayo la siap ontok ninggalke Mesir pas dio wong makan.

![](https://cdn.door43.org/obs/jpg/360px/obs-en-11-04.jpg)

Wong-wong Israel ngelakuke sloro yang la diprentoke Allah ke dio wong. Pas tenga dalu, Allah pegi ke sloro Mesir tros ngebunu sloro anak lanang petamo.

![](https://cdn.door43.org/obs/jpg/360px/obs-en-11-05.jpg)

Sloro wong Israel ngoleske dara di sekitar pintu rumanyo, jadi Allah ngelendongi ruma dio wong. Tros sloro wong yang ado di jero ruma tu aman. Dio wong slamet karno dara anak domba tu.

![](https://cdn.door43.org/obs/jpg/360px/obs-en-11-06.jpg)

Tapi wong Mesir dak pecayo tros dak noroti prento-Nyo Allah. Jadi Allah dak ngelendongi ruma dio wong. Allah ngebunu setiap anak lanang yang petamo dari wong Mesir.

![](https://cdn.door43.org/obs/jpg/360px/obs-en-11-07.jpg)

Setiap anak lanang petamo wong Mesir mati, mulai dari anak lanang petamo yang ado di penjaro, sampe anak lanang petamonyo Piraun jugo mati. Banyak wong Mesir yang nangis jugo ngeratapi karno dio wong sede nian.

![](https://cdn.door43.org/obs/jpg/360px/obs-en-11-08.jpg)

Malem tu jugo, Piraun manggel Musa samo Harun tros ngomong cak ini, “Gawakla wong Israel ni tros gancangla tinggalke Mesir!” Wong Mesir jugo makso wong Israel supayo gancang pegi ninggalke Mesir.

*Sikok crito Alkitab dari: Keluaran 11:1-12:32*

## 12. Keluaran

https://openbiblestories.org/l/mui/story-12/

![](https://cdn.door43.org/obs/jpg/360px/obs-en-12-01.jpg)

Wong-wong Israel seneng nian karno nak ninggalke Mesir. Dio wong idak lagi jadi budak. Tros dio wong nak pegi ke Tana Pejanjian! Wong-wong Mesir ngenjokke apo bae yang dimintak samo wong Israel, pecak emas samo perak jugo barang-barang laennyo. Beberapo wong dari negaro laen yang pecayo samo Allah jugo pegi samo wong Israel ontok ninggalke Mesir.

![](https://cdn.door43.org/obs/jpg/360px/obs-en-12-02.jpg)

Dari pagi sampe sore, Allah ngebembeng dio wong makek cagak awan yang tinggi, tros bejalan di depan dio wong. Tros pas malem ari, cagak awan tu beruba jadi cagak api. Allah besamo dio wong tros. Dio ngebembeng wong Israel selamo dio wong di pejalanan. Yang haros dio wong lakuke cuman meloki Dio bae.

![](https://cdn.door43.org/obs/jpg/360px/obs-en-12-03.jpg)

Dak lamo abes tu, Piraun samo rakyatnyo beruba pekeran, supayo wong Israel jadi budaknyo lagi. Allah ngebeken Piraun nekak supayo wong-wong nyingok amen Diola sikok-sikoknyo Tuhan Yang Bener. Tros dio wong jadi tau amen Dio, Allah, lebe kuat dari Piraun jugo dewa-dewanyo.

![](https://cdn.door43.org/obs/jpg/360px/obs-en-12-04.jpg)

Laju, Piraun samo tentaronyo ngejer wong Israel ontok ngejadike dio wong budaknyo lagi! Pas wong Israel nyingok tentaro Mesir dateng, dio wong sadar amen dio wong tejebak di antaro tentaronyo Piraun samo Laot Abang. Dio wong ketakotan nian tros mekek, “Ngapo kito mesti ninggalke Mesir? Kito bakal mati!”

![](https://cdn.door43.org/obs/jpg/360px/obs-en-12-05.jpg)

Musa ngomong ke wong Israel, ujinyo, “Dak usa takot! Allah agek betempor ontok kamu tros nyelametke kamu.” Tros Allah ngomong ke Musa, uji-Nyo, “Kongkon dio wong supayo berenggot ke Laot Abang.”

![](https://cdn.door43.org/obs/jpg/360px/obs-en-12-06.jpg)

Tros Allah mindake cagak awan tu ke antaro wong Israel samo wong Mesir, sampe-sampe wong Mesir dak pacak nyingok wong Israel.

![](https://cdn.door43.org/obs/jpg/360px/obs-en-12-07.jpg)

Allah ngongkon Musa ontok ngangkat tangannyo di pocok laot tros misake banyu tu. Tros Allah ngebeken angin ontok ngedorong banyu supayo ngebentok jalor di laot

![](https://cdn.door43.org/obs/jpg/360px/obs-en-12-08.jpg)

Wong-wong Israel ni bebares ngeliwati laot di tana yang kereng, dikepet banyu laot.

![](https://cdn.door43.org/obs/jpg/360px/obs-en-12-09.jpg)

Abes tu Allah naekke cagak awan supayo tentaro Mesir pacak jingok wong-wong Israel ngelarike diri. Laju tentaro Mesir motoske ngejer wong-wong Israel.

![](https://cdn.door43.org/obs/jpg/360px/obs-en-12-10.jpg)

Jadi dio wong meloki wong Israel masok ke jalor tu. Tapi Allah beken wong Mesir bingsal, jadinyo kreto dio wong tejebak. Dio wong mekek, “Lari! Allah lagi betempor ontok wong Israel!”

![](https://cdn.door43.org/obs/jpg/360px/obs-en-12-11.jpg)

Pas wong Israel la aman di sebrang laot, Allah ngongkon Musa ontok ngangkat tangannyo lagi. Pas dio noroti omongan Allah, banyu tu nimpo tentaro Mesir. Abes tu, laot balek lagi cak semulo. Sloro tentaro Mesir tu tenggelem.

![](https://cdn.door43.org/obs/jpg/360px/obs-en-12-12.jpg)

Pas wong Israel nyingok amen wong Mesir ni la mati, dio wong pecayo samo Allah tros pecayo amen Musa ni iola nabi otosan Allah.

![](https://cdn.door43.org/obs/jpg/360px/obs-en-12-13.jpg)

Wong-wong Israel seneng soalnyo Allah la nyelametke dio wong dari kematian samo pebudakan! Mak ini ari dio wong bebas ontok ngelayani Allah. Wong Israel ni nyanyike lagu ontok ngerayoke kebebasan dio wong, jugo ontok muji Allah soalnyo Allah la nyelametke dio wong dari tentaro Mesir.

![](https://cdn.door43.org/obs/jpg/360px/obs-en-12-14.jpg)

Allah mrentoke wong-wong Israel ontok ngerayoke Paska tiap taon. Perayoan ni ontok ngingetke dio wong cak mano Allah ngalake wong Mesir jugo ngebebaske dio wong dari pebudakan. Dio wong ngerayokenyo dengen caro nyembele anak domba yang sempurno, tros dimakan makek roti yang dak beragi.

*Sikok crito Alkitab dari: Keluaran 12:33-15:21*

## 13. Pejanjian Allah samo Israel

https://openbiblestories.org/l/mui/story-13/

![](https://cdn.door43.org/obs/jpg/360px/obs-en-13-01.jpg)

Abes Allah mempen bangso Israel ngeliwati Laot Abang, Allah ngajak dio wong ngeliwati padang goron ke Gonong Sinai. Ini gonong yang samo di mano Musa nyingok semak yang bekobar-kobar. Laju wong-wong tu negakke tenda di kaki gonong tu.

![](https://cdn.door43.org/obs/jpg/360px/obs-en-13-02.jpg)

Uji Allah ke Musa samo wong-wong Israel, “Amen kamu norot samo omongan Aku jugo bepegang tegu samo pejanjian Aku, kamu bakal jadi melek Aku yang berego. Kamu bakal jadi sikok kerajaan yang pendodoknyo imam galo jugo bangso yang suci.”

![](https://cdn.door43.org/obs/jpg/360px/obs-en-13-03.jpg)

Tigo ari abes tu, pas wong-wong Israel la nyiapke diri, Allah toron ke puncak Gonong Sinai dengen guntur, peter, asep, samo suaro terompet yang besak. Cuman Musa yang diboleke ontok naek ke gonong tu.

![](https://cdn.door43.org/obs/jpg/360px/obs-en-13-04.jpg)

Di situ Allah ngebeken pejanjian ke dio wong tros ngomong cak ini, “Aku ni iola Allah, jugo Tuhan kamu, yang la nyelametke kamu dari pebudakan di Mesir. Dak bole nyemba tuhan laen.”

![](https://cdn.door43.org/obs/jpg/360px/obs-en-13-05.jpg)

“Dak bole ngebeken berhalo tros jangan nyembanyo, soalnyo Aku, Allah, iola Tuhan yang cemburuan. Dak bole nyebot namo Aku baseng-baseng bae. Ingetla ontok ngejago kesucian ari Sabat. Artinyo tu, kamu gaweke gawean kamu slamo enem ari, soalnyo ari yang ketojo iola arinyo istirahat ontok nginget Allah.”

![](https://cdn.door43.org/obs/jpg/360px/obs-en-13-06.jpg)

“Hormatila ubak samo umak kau. Dak bole ngebunu. Dak bole bebuat mesum. Dak bole maleng. Dak bole ngebudike. Dak bole nakser dengen bini sesamo kau, rumanyo, jugo apo bae yang dio punyo.”

![](https://cdn.door43.org/obs/jpg/360px/obs-en-13-07.jpg)

Abes tu Allah noles Sepolo Prento Allah ni di duo ikok batu ceper tros dienjokkenyo ke Musa. Allah jugo ngenjokke banyak hokom samo peratoran laen ontok ditoroti. Amen wong-wong tu noroti hokom-hokom tu, Allah bejanji amen Dio bakal ngeberkati jugo ngelendongi dio wong. Tapi amen dio wong dak norot, Allah bakal ngokom dio wong.

![](https://cdn.door43.org/obs/jpg/360px/obs-en-13-08.jpg)

Allah jugo ngenjok penjelasan pasal tenda yang haros dio wong beken. Tenda tu disebot Tenda Petemuan. Di jero tenda tu ado sikok hordeng besak yang misake ruang depan dari ruang belakang. Dak katek yang bole masok ke ruang belakang tu, kecuali imam besak. Soalnyo Allah tinggal di situ.

![](https://cdn.door43.org/obs/jpg/360px/obs-en-13-09.jpg)

Siapo bae yang ngelanggar hokom Allah, dio wong mesti gawak sikok binatang ke meja pesembahan yang ado di depan Tenda Petemuan ontok jadi pesembahan ke Allah. Binatang tu bakal disemble tros dibakar di pocok meja pesembahan. Dara binatang yang dikurbanke tu notopi duso wong tu tros ngebeken wong tu berse di adepan Allah. Allah ni mele Harun dolornyo Musa, samo ketoronannyo Harun ontok jadi imam-Nyo.

![](https://cdn.door43.org/obs/jpg/360px/obs-en-13-10.jpg)

Sloro wong Israel stuju ontok noroti hokom yang la Allah enjokke ke dio wong, cuman nyemba Allah bae, jugo jadi umat-Nyo. Tapi dak lamo abes dio wong bejanji, dio wong beken duso yang jahat nian.

![](https://cdn.door43.org/obs/jpg/360px/obs-en-13-11.jpg)

Slamo poloan ari, Musa ni ado di puncak Gonong Sinai lagi ngomong samo Allah. Wong-wong ni la malek nunggui dio balek. Jadi dio wong gawak emas ke Harun tros mintak dio beken berhalo ontok dio wong.

![](https://cdn.door43.org/obs/jpg/360px/obs-en-13-12.jpg)

Jadi Harun ngebeken berhalo dari emas dengen bentok anak sapi. Wong-wong tu mulai nyemba berhalo tu dengen gilo-giloan, tros ngenjok kurban ke berhalo tu! Laju Allah mara nian karno duso dio wong tros berencano ontok ngancorke dio wong. Tapi Musa bedoa ontok dio wong, tros Allah ngedengerke doanyo laju Allah orong ngancorke dio wong.

![](https://cdn.door43.org/obs/jpg/360px/obs-en-13-13.jpg)

Pas Musa toron dari gonong tros nyingok berhalo tu, Musa mara nian. Sampe-sampe dio mecake batu ceper yang la tetoles Sepolo Prento Allah.

![](https://cdn.door43.org/obs/jpg/360px/obs-en-13-14.jpg)

Laju Musa ngancori berhalo tu sampe jadi bubuk. Tros dio nguntalke bubuk tu ke banyu tros makso dio wong minum banyu tu. Allah ngedatengke bencano ke wong-wong tu laju banyak wong yang mati.

![](https://cdn.door43.org/obs/jpg/360px/obs-en-13-15.jpg)

Musa ngebeken batu ceper yang baru ontok gantike yang lamo yang la diancorkenyo. Abes tu, Musa naek gonong lagi tros bedoa ke Allah supayo Allah ngamponi wong-wong tu. Allah ngedengerke doa Musa tros ngamponi dio wong. Tros Musa toron lagi dari gonong tu gawak Sepolo Prento yang la di toles di batu ceper yang baru tu. Akernyo Allah mempen wong Israel dari gonong Sinai ke Tana Pejanjian.

*Sikok crito Alkitab dari: Keluaran 19-34*

## 14. Bekelano di Padang Goron

https://openbiblestories.org/l/mui/story-14/

![](https://cdn.door43.org/obs/jpg/360px/obs-en-14-01.jpg)

Seabes Allah ngenjoktauke pasal syarat-syarat pejanjian-Nyo yang haros bangso Israel toroti, pegila dio wong tu dari Gonong Sinai. Allah mulai mempen dio wong ke Tana Pejanjian, yang disebot Kanaan. Cagak awan nonjokke jalan yang haros dio wong liwati, tros dio wong melokinyo.

![](https://cdn.door43.org/obs/jpg/360px/obs-en-14-02.jpg)

Allah la bejanji samo Ibrahim, Ishak, samo Yakob amen Dio bakal ngenjok Tana Pejanjian ontok ketoronan dio wong. Tapi di masa itu ado banyak suku laen yang tinggal di sano. Dio wong disebot wong Kanaan. Wong Kanaan ni dak pecayo samo Allah. Dio wong nyemba dewa-dewa tros ngebeken banyak kejahatan.

![](https://cdn.door43.org/obs/jpg/360px/obs-en-14-03.jpg)

Uji Allah ke bangso Israel, “Kau haros sengkerke sloro wong Kanaan di Tana Pejanjian. Jangan bedamai samo dio wong, tros jangan kawen samo dio wong jugo. Kau haros ngancori sloro berhalo dio wong. Amen tu dak kau lakuke, kau bakal nyemba berhalo-berhalo dio wong jugo bukannyo nyemba Aku.”

![](https://cdn.door43.org/obs/jpg/360px/obs-en-14-04.jpg)

Pas wong Israel la nyampe di pebatesan tana Kanaan, Musa mele duo blas wong, sikok wong dari tiap suku Israel. Musa ngongkon dio wong nyeledeki tana tu supayo tau pecak apo tana tu. Dio wong jugo nyeledeki wong-wong Kanaan supayo tau dio wong tu kuat apo idak.

![](https://cdn.door43.org/obs/jpg/360px/obs-en-14-05.jpg)

Keduo blas wong tu nyeledeki Kanaan selamo empat polo ari, abes tu dio wong balek. Uji dio wong, “Tana ni sobor nian! Tanemannyo jugo sobor nian!” Tapi kesepolo mato-mato ngomong, “Kotanyo kuat nian! Tros wong-wongnyo besak nian! Amen kito nyerang dio wong, kito pasti bakal kala tros mati!”

![](https://cdn.door43.org/obs/jpg/360px/obs-en-14-06.jpg)

Langsong bae Kaleb samo Yosua, duo mato-mato laennyo ngomong, “Iyo nian, wong Kanaan tu jolor jugo kuat, tapi kito pasti pacak ngalake dio wong! Karno Allah betempor ontok kito!”

![](https://cdn.door43.org/obs/jpg/360px/obs-en-14-07.jpg)

Tapi wong-wong tu dak ngagoki Kaleb samo Yosua. DIo wong mara ke Musa samo Harun, ujinyo, “Oi! Ngapola kau ni gawak kami ke tempat cak ini? Harosnyo kito ni tinggal di Mesir. Amen di sini, kito pacak tebunu, tros anak samo bini kito pacak dijadike budak.” Laju wong-wong ni nak ngebunu Musa samo Harun, tros nak nyari pemempen baru yang pacak gawak dio wong balek ke Mesir lagi.

![](https://cdn.door43.org/obs/jpg/360px/obs-en-14-08.jpg)

Allah mara nian, tros Dio dateng ke Tenda Petemuan. Uji Allah, “Karno kau brontak samo Aku, sloro wong bakal bekelano di padang goron. Kecuali Yosua samo Kaleb, sloro wong yang beomor duo polo taon apo yang lebe tuo bakal mati di sano. Dio wong dak bakal masok ke Tana Pejanjian.”

![](https://cdn.door43.org/obs/jpg/360px/obs-en-14-09.jpg)

Pas dio wong denger tu, dio wong nyesel karno la beduso. Dio wong ngambek senjato tros pegi nyerang Kanaan. Musa la ngingeti dio wong supayo jangan pegi karno Allah dak nyertoi dio wong. Tapi dio wong dak ngagoki Musa.

![](https://cdn.door43.org/obs/jpg/360px/obs-en-14-10.jpg)

Karno Allah dak nyertoi dio wong, laju dio wong kala, tros banyak yang mati. Abes tu, siso wong Israel balek dari Kanaan tros bekelano padang goron selamo empat polo taon.

![](https://cdn.door43.org/obs/jpg/360px/obs-en-14-11.jpg)

Selamo masa tu Allah nyedioke sloro kebotoan dio wong. Allah ngenjok dio wong roti dari surgo, yang disebot “manna.” Tros Dio ngerem borong puyu ke dio wong supayo dio wong pacak makan dageng. Selamo empat polo taon, Allah teros ngejago baju samo selop dio wong supayo dak rusak.

![](https://cdn.door43.org/obs/jpg/360px/obs-en-14-12.jpg)

Mala, Allah ngenjok dio wong banyu dari batu. Tapi Mugola cak itu, wong Israel ni berotokan jugo ngelu ke Allah samo Musa. Tapi Allah mase stio samo pejanjian-Nyo ke Ibrahim, Ishak, samo Yakob.

![](https://cdn.door43.org/obs/jpg/360px/obs-en-14-13.jpg)

Kapan ari, wong-wong tu la keabesan banyu. Uji Allah ke Musa, “Ngomongla ke batu tu, tros agek metu banyu.” Di depan banyak wong, Musa nolak prento Allah. Bukannyo ngomong ke batu tu, dio mala nyatok batu tu pakek tongkatnyo duo kali. Banyunyo metu dari batu tu ontok dio wong minum, tapi Allah mara samo Musa, uji-Nyo, “Kau dak bakal masok ke Tana Pejanjian.”

![](https://cdn.door43.org/obs/jpg/360px/obs-en-14-14.jpg)

Pas la empat polo taon, sloro wong yang la brontak ke Allah mati. Allah mempen bangso Israel ke pebatesan Tana Pejanjian tu lagi. Musa la tuo nian, jadi Allah mele Yosua ontok bantu dio mempen wong-wong Israel. Allah bejanji samo Musa amen kapan ari agek Dio bakal ngerem sikok nabi laen pecak dio.

![](https://cdn.door43.org/obs/jpg/360px/obs-en-14-15.jpg)

Abes tu Allah ngongkon Musa ke puncak gonong supayo dio pacak jingok Tana Pejanjian. Musa cuman pacak jingok bae tapi dak pacak masok. Abes tu Musa mati, tros wong Israel bekabong selamo tigo polo ari. Yosua yang gantike Musa jadi pemempen. Yosua ni pemempen yang baek karno dio pecayo jugo norot samo Allah.

*Sikok crito Alkitab dari: Keluaran 16-17; Bilangan 10-14; 20; 27; Ulangan 34*

## 15. Tana Pejanjian

https://openbiblestories.org/l/mui/story-15/

![](https://cdn.door43.org/obs/jpg/360px/obs-en-15-01.jpg)

Akernyo tibola waktunyo ontok wong Israel masok ke Kanaan, itu tu Tana Pejanjian. Yosua ngerem duo ikok wong ontok mato-matoi kota Yeriko yang ado di Kanaan. Kota tu dilendongi dengen dendeng yang kuat. Di kota tu ado sikok pelacor namonyo Rahab, dio ni nyingiti mato-mato tu tros ngebantu dio wong supayo pacak ngelarike diri. Dio ngelakuke tu karno dio pecayo samo Allah. Dio wong tu bejanji ontok ngelendongi Rahab samo kluargonyo pas Yeriko diancorke.

![](https://cdn.door43.org/obs/jpg/360px/obs-en-15-02.jpg)

Ontok masok ke Tana Pejanjian, bangso Israel haros nyebrangi Sungi Yordan. Allah ngenjoktauke Yosua, uji-Nyo, “Kongkonla imam tu pegi duluan.” Pas kaki imam ni nyentu sungi Yordan, banyunyo brenti ngaler. Jadi wong Israel pacak nyebrang di tana yang kereng.

![](https://cdn.door43.org/obs/jpg/360px/obs-en-15-03.jpg)

Pas dio wong la nyebrangi Sungi Yordan. Allah ngenjoktauke Yosua cak mano caronyo ontok nyerang kota Yeriko yang kuat tu. Wong-wong tu noroti apo yang la dikongkon Allah. Prajoret-prajoret samo imam-imam ngelelengi kota Yeriko seari sekali slamo enem ari.

![](https://cdn.door43.org/obs/jpg/360px/obs-en-15-04.jpg)

Pas ari yang ketojo, wong Israel ngelelengi kota tu tojo kali lagi. Pas teaker kali dio wong ngelelengi kota tu, prajoret-prajoret ni mekek pas imam-imam tu niup terompet yang besak.

![](https://cdn.door43.org/obs/jpg/360px/obs-en-15-05.jpg)

Abes tu dendeng di sekitar Yeriko tu ancor! Wong-wong Israel ngancori galo-galo yang ado di kota tu pecak yang la diprentoke Allah. Cuman Rahab samo kluargonyo bae yang slamet di kota tu, tros dio wong jadi bagean dari wong Israel. Pas wong-wong laennyo yang tinggal di Kanaan denger pasal apo yang tejadi di Yeriko, dio wong ni jadi takot amen wong Israel bakal nyerang dio wong jugo.

![](https://cdn.door43.org/obs/jpg/360px/obs-en-15-06.jpg)

Allah mrentoke ke wong Israel supayo dio wong dak ngebeken pejanjian damai dengen suku-suku Kanaan. Tapi ado sala sikok suku Kanaan yang disebot suku Gibeon. Dio wong ni ngotaki Yosua tros ngomong amen dio wong ni tinggalnyo jao dari Kanaan. Dio wong mintak Yosua ontok ngebeken pejanjian damai. Yosua samo bangso Israel ni dak betanyo lagi ke Allah dari mano asal suku Gibeon tu. Laju Yosua bedamai samo dio wong.

![](https://cdn.door43.org/obs/jpg/360px/obs-en-15-07.jpg)

Bangso Israel ni mara pas dio wong tau amen wong Gibeon ni la ngotaki dio wong, tapi dio wong tetep ngejago pejanjian damai dengen suku Gibeon soalnyo pejanjian tu dibeken di adepan Allah. Tros, ado limo rajo dari suku Amori yang jugo ado di Kanaan. Dio wong ngedenger amen wong Gibeon la ngebeken pedamaian samo wong Israel. Laju dio wong gabongke tentaro-tentaronyo jadi sikok, tros nyerang suku Gibeon. Suku Gibeon ngerem pesen ke Yosua ontok mintak bantuan.

![](https://cdn.door43.org/obs/jpg/360px/obs-en-15-08.jpg)

Akernyo Yosua ngompolke tentaro Israel, tros dio wong bebares sepanjang malem ontok ngedatengi Gibeon. Pas paginyo, tentaro Amori ni tekejot karno wong-wong Israel nyerang dio wong.

![](https://cdn.door43.org/obs/jpg/360px/obs-en-15-09.jpg)

Ari tu Allah betempor ontok wong Israel. Dio ngebeken wong Amori jadi bingung, tros Dio ngeremke ujan es sebesak batu yang nyebabke banyak wong Amori mati.

![](https://cdn.door43.org/obs/jpg/360px/obs-en-15-10.jpg)

Allah ngebeken matoari brenti di sikok tempat supayo wong Israel punyo cokop waktu ontok ngalake wong Kanaan. Ari tu Allah ngenjokke kemenangan besak ontok wong Israel.

![](https://cdn.door43.org/obs/jpg/360px/obs-en-15-11.jpg)

Abes kekalahan ni, banyak suku-suku laen yang ado di Kanaan bekompol samo-samo ontok nyerang Israel. Yosua samo bangso Israel nyerang tros ngancorke dio wong.

![](https://cdn.door43.org/obs/jpg/360px/obs-en-15-12.jpg)

Abes dari perang tu, Allah ngenjokke tiap suku Israel bagean dio wong maseng-maseng dari Tana Pejanjian. Abes tu Allah ngenjokke Israel pedamaian di sepanjang pebatesan.

![](https://cdn.door43.org/obs/jpg/360px/obs-en-15-13.jpg)

Pas Yosua ni la tuo, dio manggel sloro wong Israel. Tros Yosua ni ngingetke wong-wong tu pasal kewajeban dio wong ontoki noroti pejanjian yang la Allah beken samo wong Israel di Gonong Sinai. Wong-wong tu bejanji ontok tetep stio samo Allah tros norot samo hokom-hokom-Nyo.

*Sikok crito Alkitab dari: Yosua 1-24*

## 16. Wong-wong yang Ngebebaske

https://openbiblestories.org/l/mui/story-16/

![](https://cdn.door43.org/obs/jpg/360px/obs-en-16-01.jpg)

Abes Yosua mati, wong Israel ni idak noroti Allah. Dio wong idak ngoser siso wong Kanaan, jugo dak noroti hokom-hokom Allah. Wong-wong Israel mulai nyemba dewa-dewa Kanaan, bukannyo nyemba ke sikok-sikoknyo Tuhan yang bener. Bangso Israel dak katek rajo, tros sloro wong ngelakuke apo yang dio wong peker bener.

![](https://cdn.door43.org/obs/jpg/360px/obs-en-16-02.jpg)

Karno bangso Israel dak norot samo Allah, laju Allah ngokom bangso Israel dengen caro ngebiarke dio wong dikalake moso-moso dio wong. Mosonyo ni maleng dari wong Israel, ngancorke harto bendo, tros banyak ngebunu wong Israel. Pas la betaon-taon dak noroti Allah tros ditindes ole moso-mosonyo, wong Israel betobat jugo mintak Allah nyelametke dio wong.

![](https://cdn.door43.org/obs/jpg/360px/obs-en-16-03.jpg)

Jadi Allah nyedioke pembebas ontok dio wong. Pembebas ni nyelametke dio wong dari moso, jugo gawak pedamaian di Israel. Tapi abes tu dio wong lupo pasal Allah, tros mulai nyemba berhalo lagi. Laju, Allah ngebiarke wong Midian, suku yang tinggal parak dengen bangso Israel, ngalake wong Israel.

![](https://cdn.door43.org/obs/jpg/360px/obs-en-16-04.jpg)

Wong Midian ni ngambek sloro asel panen wong Israel selamo tojo taon. Bangso Israel takot nian sampe-sampe dio wong singitan di goa-goa supayo dak ditemuke wong Midian. Akernyo, dio wong mintak tolong Allah supayo dislametke.

![](https://cdn.door43.org/obs/jpg/360px/obs-en-16-05.jpg)

Kapan ari, ado lanang dari Israel yang benamo Gideon. Diem-diem dio manen gendum supayo dak dipaleng wong Midian. Malekat Allah dateng ke Gideon, ujinyo, “Allah ado samo kau, prajoret yang kuat! Pegi tros slametkela wong Israel dari wong-wong Midian.”

![](https://cdn.door43.org/obs/jpg/360px/obs-en-16-06.jpg)

Ubaknyo Gideon punyo meja pesembahan ontok berhalo. Allah ngongkon Gideon ontok ngancori meja pesembahan tu. Tapi Gideon takot samo wong-wong, jadi dio nunggu sampe malem. Abes tu diancorinyo meja pesembahan ontok berhalo tu sampe bekepeng-kepeng. Dio ngebeken meja pesembahan baru ontok Allah di tempat tu, tros nyembake kurban ontok Allah.

![](https://cdn.door43.org/obs/jpg/360px/obs-en-16-07.jpg)

Besok paginyo wong-wong mara nian pas jingok meja pesembahan tu ancor. Dio wong pegi ke ruma Gideon nak ngebunu Gideon. Tapi ubaknyo ngomong, “Ngapo kamu nak nyubo nolong dewa kamu? Amen dio dewa, dio pasti pacak ngelendongi diri dewek!” Karno ubaknyo ngomong cak itu, laju wong-wong itu dak jadi ngebunu Gideon.

![](https://cdn.door43.org/obs/jpg/360px/obs-en-16-08.jpg)

Tros wong Midian dateng lagi ontok maleng dari wong Israel. Dio wong ni banyak nian sampe dak pacak dietong. Gideon manggel wong-wong Israel supayo bekompol ontok betempor. Gideon mintak duo tando dari Allah ontok ngeyakenke dio amen emang Allah tu bakal makek dio ontok nyelametke wong Israel.

![](https://cdn.door43.org/obs/jpg/360px/obs-en-16-09.jpg)

Petamo, dio narok kaen di tana tros mintak Allah ngebiarke embon pagi nyampak di kaen tu bae bukan di tana. Allah lakuke tu. Malem besoknyo, dio mintak supayo tana yang basa, bukan kaennyo. Allah lakuke tu jugo. Keduo tando ni ngeyakenke Gideon amen Allah bakal makek dio ontok nyelametke Israel dari Midian.

![](https://cdn.door43.org/obs/jpg/360px/obs-en-16-10.jpg)

32.000 tentaro Israel dateng ke Gideon, tapi uji Allah itu kebanyakan. Laju Gideon balekke 22.000 wong yang takot nian betempor. Allah ngomong itu mase kebanyakan. Laju Gideon cuman mele 300 tentaro bae.

![](https://cdn.door43.org/obs/jpg/360px/obs-en-16-11.jpg)

Pas malem tu, Allah ngomong samo Gideon, “Pegila ke tenda-tenda wong Midian. Pas kau denger apo yang dio wong omongi, kau dak bakal takot lagi.” Laju malem tu Gideon pegi ke tenda-tenda tu, tros denger tentaro Midian yang lagi nyritoke pasal mimpi ke kawannyo. Uji kawannyo tu, “Mimpi ni artinyo Gideon bakal ngalake Midian!” Pas Gideon denger omongan tu dio muji Allah.

![](https://cdn.door43.org/obs/jpg/360px/obs-en-16-12.jpg)

Abes tu Gideon balek ke tentaronyo tros ngenjok dio wong maseng-maseng terompet, guci, samo obor. Tigo ratos tentaro tu ngepong tempat wong-wong Midian tedok. Dio wong galo gawak obor-obor tu di jero guci supayo dak tejingok.

![](https://cdn.door43.org/obs/jpg/360px/obs-en-16-13.jpg)

Abes tu, dio wong ngancori sloro guci tempat nyingiti obor tu bareng-bareng supayo pacak nyingok api obornyo. Dio wong niup terompet tros mekek, “Pedang demi Allah samo demi Gideon!”

![](https://cdn.door43.org/obs/jpg/360px/obs-en-16-14.jpg)

Allah ngebeken wong Midian bingung, laju dio wong saleng serang samo saleng bunu. Langsong bae Gideon ngongkon wong-wong Israel laennyo dari ruma ontok ngejer wong Midian. Wong Israel banyak ngebunu wong Midian tros ngejer sisonyo metu dari tana Israel. 120.000 wong Midian mati ari tu. Allah la nyelametke wong Israel.

![](https://cdn.door43.org/obs/jpg/360px/obs-en-16-15.jpg)

Abes tu, wong-wong Israel nak jadike Gideon rajo dio wong. Gideon nolak tawaran dio wong secaro alus, tapi Gideon mintak sebagean dari anteng-anteng emas yang maseng-maseng dio wong la ambek dari wong Midian. Gideon nrimo banyak emas.

![](https://cdn.door43.org/obs/jpg/360px/obs-en-16-16.jpg)

Gideon makek emas tu ontok ngebeken baju kosos pecak yang dipakek imam besak. Tapi wong-wong mulai nyemba baju tu pecak berhalo. Laju Allah ngokom wong Israel lagi karno dio wong nyemba berhalo. Allah ngebiarke moso-moso dio wong ngalake dio wong. Akernyo dio wong mintak Allah ontok nolong lagi, tros Allah ngerem pembebas laen.

![](https://cdn.door43.org/obs/jpg/360px/obs-en-16-17.jpg)

Orotan duso, hokoman, petobatan, samo pembebasan diulang bekali-kali. Selamo betaon-taon Allah ngotos banyak pembebas yang nyelametke Israel dari moso-moso dio wong.

![](https://cdn.door43.org/obs/jpg/360px/obs-en-16-18.jpg)

Akernyo dio wong mintak rajo ke Allah, rajo yang cak bangso-bangso laennyo. Dio wong mintak rajo yang jolor, kuat, jugo yang pacak ngawak dio wong di petemporan. Sebenernyo, Allah dak seneng samo pemintakan ini, tapi Dio ngabolke pemintakan dio wong.

*Sikok crito Alkitab dari: Hakim-hakim 1-3; 6-8*

## 17. Pejanjian Allah samo Daud

https://openbiblestories.org/l/mui/story-17/

![](https://cdn.door43.org/obs/jpg/360px/obs-en-17-01.jpg)

Rajo petamo di Israel iola Saul. Dio ni wongnyo jolor jugo belagak, pecak yang digalaki wong-wong Israel. Pas awalnyo Saul ni ngaweke gaweannyo dengen bagus, tapi dio jadi wong yang jahat yang dak norot ke Allah. Jadi Allah mele wong laen ontok jadi rajo gantike dio.

![](https://cdn.door43.org/obs/jpg/360px/obs-en-17-02.jpg)

Allah mele sikok lanang Israel yang mase mudo ontok jadi rajo gantike Saul. Namonyo Daud. Dio ni dari doson Betlehem, tros gaweannyo ngoros domba. Sambel ngejago domba, Daud perna ngebunu singa samo beruang yang nyerang domba-dombanyo. Daud ni wong yang dak sombong jugo bener, dio ni jugo pecayo tros norot samo Allah.

![](https://cdn.door43.org/obs/jpg/360px/obs-en-17-03.jpg)

Daud jadi tentaro jugo pemempen yang hebat. Pas dio mase mudo, dio betempor ngelawan raksaso yang benamo Goliat. Goliat ni iola prajoret yang telate, kuat nian, tros tingginyo amper tigo meter! Tapi Allah ngebantu Daud ngebunu Goliat tros nyelametke wong Israel. Abes tu, Daud menangke banyak petemporan dari moso-moso Israel, sampe-sampe banyak wong muji dio.

![](https://cdn.door43.org/obs/jpg/360px/obs-en-17-04.jpg)

Saul iri ati soalnyo rakyat ni lebe cinto samo Daud daripada dio. Saul teros nyubo ontok ngebunu dio. Jadi Daud singitan dari Saul. Kapan ari, Saul ni lagi nyari Daud supayo pacak bunu dio. Saul masok ke jero goa yang samo di mano Daud lagi singitan dari Saul, cuman Saul dak nyingok dio. Jaraknyo Daud ni la parak nian samo Saul. Daud pacak bae ngebunu Saul, tapi dak dilakukenyo. Sebaleknyo, Daud netak bajunyo Saul ontok ngebuktike ke Saul amen dio dak bakal ngebunu Saul ontok gantike dio jadi rajo.

![](https://cdn.door43.org/obs/jpg/360px/obs-en-17-05.jpg)

Akernyo, Saul mati di petemporan, tros Daud jadi rajo Israel. Dio ni rajo yang baek. Wong-wong cinto samo dio. Allah ngeberkati Daud tros beken dio berasel. Daud bejuang di banyak petemporan, tros Allah nolong dio ngalake moso-moso Israel. Daud naklukke Yerusalem, tros dijadikenyo ibu kota kerajaannyo. Selamo Daud mrento, Israel jadi kuat jugo kayo.

![](https://cdn.door43.org/obs/jpg/360px/obs-en-17-06.jpg)

Daud nak ngebangun Ruma Allah di mano sloro wong Israel pacak nyemba Allah samo ngenjok kurban ke Dio. Selamo kiro-kiro 400 taon, wong-wong la nyemba Allah samo ngenjokke kurban di Tenda Petemuan yang dibangun Musa.

![](https://cdn.door43.org/obs/jpg/360px/obs-en-17-07.jpg)

Allah ngotos Nabi Natan ontok nyampeke pesen ni, “Karno kau iola lanang pejuang, kau dak bakal ngebangun Ruma ni ontok Aku. Anak kaula yang bakal ngebangunnyo. Tapi, Aku bakal ngeberkati kau. Sala sikok dari ketoronan kau bakal mrento jadi rajo umat Aku selamonyo!” Sikok-sikoknyo ketoronan Daud yang pacak mrento selamonyo iola Almasih. Almasih ni iola Wong Yang Dipele Allah yang bakal nyelametke wong-wong di dunio dari duso dio wong.

![](https://cdn.door43.org/obs/jpg/360px/obs-en-17-08.jpg)

Pas Daud ngedengerke kato-kato ni, dio langsong ngucap sokor tros muji Allah soalnyo Dio la bejanji ngenjokke kehormatan besak ni, samo banyak berkat. Daud dak tau kapan Allah bakal ngelakuke pasal-pasal ni. Tapi nyatonyo, wong Israel mesti nunggu lamo sebelom Almasih dateng, amper 1.000 taon.

![](https://cdn.door43.org/obs/jpg/360px/obs-en-17-09.jpg)

Daud mrento dengen adel jugo stio selamo betaon-taon, tros Allah ngeberkati dio. Tapi, pas aker edopnyo, dio beken duso yang besak di mato Allah.

![](https://cdn.door43.org/obs/jpg/360px/obs-en-17-10.jpg)

Kapan ari tu, pas prajoret-prajoret Daud lagi pegi betempor, dio ke jabo istana tros jingok sikok betino belagak lagi mandi. Namo betino tu Batsyeba.

![](https://cdn.door43.org/obs/jpg/360px/obs-en-17-11.jpg)

Bukannyo dio pegi, Daud mala ngerem sikok wong ontok gawak betino tu ke dio. Daud tedok dengen betino tu, tros ngerem dio balek ke rumahnyo. Dak lamo abes tu, betino tu ngemem pesen ke Daud ngenjok tau amen dio bonteng.

![](https://cdn.door43.org/obs/jpg/360px/obs-en-17-12.jpg)

Lakinyo Batsyeba, yang benamo Uria, dio tu sala sikok prajoret tebaeknyo Daud. Daud manggel Uria balek dari petemporan tros ngongkon dio pegi ke bininyo. Tapi Uria ni dak galak balek sementaro tentaro yang laennyo betempor. Laju Daud ngongkon Uria balek ke petemporan tros ngongkon dio ditempatke di mano ado moso yang paleng kuat supayo dio dibunu.

![](https://cdn.door43.org/obs/jpg/360px/obs-en-17-13.jpg)

Pas Uria la tebunu, Daud ngaweni Batsyeba. Tros dio beranakke sikok kupek lanang. Allah mara nian samo apo yang dilakuke Daud, jadi Allah ngotos Nabi Natan supayo ngenjoktauke ke Daud cakmano kejahatan dio. Daud betobat dari dusonyo, tros Allah ngamponi dio. Selamo siso edopnyo, Daud pecayo jugo noroti Allah, mugola pas dio saro.

![](https://cdn.door43.org/obs/jpg/360px/obs-en-17-14.jpg)

Jadi hokoman dari dusonyo Daud, kupek lanangnyo tu mati. Jugo ado kerebotan dalem kluargo Daud selamo siso edopnyo, tros kekuasoan Daud jadi ngelema. Mugola Daud dak stio samo Allah, Allah mase stio samo janji-janji-Nyo. Batsyeba ngelaerke kupek laennyo yang benamo Suleiman.

*Sikok crito Alkitab dari: 1 Samuel 10; 15-19; 24; 31; 2 Samuel 5; 7; 11-12*

## 18. Kerajaan yang Tebage

https://openbiblestories.org/l/mui/story-18/

![](https://cdn.door43.org/obs/jpg/360px/obs-en-18-01.jpg)

Abes Daud mati, Sulaiman, anaknyo, mulai mrento. Allah nanyo samo Sulaiman apo yang paleng dio kendaki. Suleiman cuman mintak hikmat bae. Allah seneng tros jadike Sulaiman wong yang paleng bijaksana di dunio. Sulaiman belajar banyak hal tros jadi hakem yang bijaksana nian. Allah jugo jadike dio kayo rayo.

![](https://cdn.door43.org/obs/jpg/360px/obs-en-18-02.jpg)

Di Yerusalem, Sulaiman ngebeken Ruma Allah yang la direncanoke ubaknyo, Daud. Bahan-bahannyo jugo la dikompolke ole Daud. Mak ini ari wong-wong nyemba Allah samo nyembake kurbannyo di Ruma Allah, bukan di Tenda Petemuan lagi. Allah hader di sano tros tinggal besamo umat-Nyo.

![](https://cdn.door43.org/obs/jpg/360px/obs-en-18-03.jpg)

Tapi, Sulaiman ni cinto samo banyak betino dari negaro aseng. Dio dak norot samo Allah dengen ngaweni banyak betino. Amper 1000 betino yang dio kaweni! Betino-betino ni banyak yang beasal dari negaro aseng tros gawak dewa-dewa dio wong ontok disemba. Pas Sulaiman la tuo, dio jugo melok nyemba dewa-dewa dio wong tu.

![](https://cdn.door43.org/obs/jpg/360px/obs-en-18-04.jpg)

Allah jadi mara samo Sulaiman karno dio dak stio. Tros Allah ngokom dio dengen caro ngebage kerajaan Israel jadi duo abes dio mati.

![](https://cdn.door43.org/obs/jpg/360px/obs-en-18-05.jpg)

Abes Sulaiman mati, Rehabeam, anaknyo, jadi rajo. Rehabeam ni wong yang lolo. Sloro wong Israel bekompol ontok ngakui dio jadi rajo. Dio wong ngelu amen Sulaiman tu la makso dio wong begawe berat, tros bayar pajak yang besak nian.

![](https://cdn.door43.org/obs/jpg/360px/obs-en-18-06.jpg)

Dengen lolonyo, Rehabeam ngomong cak ni ke dio wong, ujinyo, “Kau peker ubak aku makso kau gawe berat. Aku bakal makso kau gawe lebe berat lagi. Tros aku bakal ngokom kau lebe kejem lagi daripada ubak aku.”

![](https://cdn.door43.org/obs/jpg/360px/obs-en-18-07.jpg)

Sepolo suku Israel brontak ke Rehabeam. Cuman duo suku yang mase stio samo dio. Keduo suku ni jadi kerajaan Yehuda.

![](https://cdn.door43.org/obs/jpg/360px/obs-en-18-08.jpg)

Sepolo suku yang brontak ke Rehabeam tu ngangkat sikok wong yang benamo Yerobeam jadi rajo dio wong. Dio wong ngebangun kerajaan dio wong di bagean utara, tros dio wong tetep disebot kerajaan Israel.

![](https://cdn.door43.org/obs/jpg/360px/obs-en-18-09.jpg)

Yerobeam brontak ke Allah, tros nyebabke sloro wong di dalem kerajaannyo beken duso. Dio ngebeken duo berhalo ontok disemba. Dio ngelakuke tu supayo wong-wong di kerajaannyo idak pegi lagi ke Rumah Allah di Yehuda ontok nyemba Allah.

![](https://cdn.door43.org/obs/jpg/360px/obs-en-18-10.jpg)

Kerajaan Yehuda samo Israel ni bemosoan. Tros dio wong ni sereng betempor.

![](https://cdn.door43.org/obs/jpg/360px/obs-en-18-11.jpg)

Di kerajaan Israel yang baru, sloro rajonyo jahat. Banyak dari rajo-rajo ni dibunu ole wong-wong Israel yang pengen jadi rajo ngantike dio wong.

![](https://cdn.door43.org/obs/jpg/360px/obs-en-18-12.jpg)

Sloro rajo Israel samo sebagean besak wong Israel nyemba berhalo. Pasal tu sereng dilakuke dengen pejinahan, mala kadang sampe ngurbanke anak dio wong ke berhalo tu.

![](https://cdn.door43.org/obs/jpg/360px/obs-en-18-13.jpg)

Rajo-rajo Yehuda ni ketoronannyo Daud. Beberapo rajonyo mrento dengen baek jugo nyemba Allah. Tapi ado sebagean besak rajo Yehuda yang jahat, korup, jugo nyemba berhalo. Mala ado beberapo rajo yang ngurbanke anak-anaknyo ontok dewa-dewa. Kebanyakan wong Yehuda jugo brontak ke Allah jugo nyemba dewa-dewa.

*Sikok crito Alkitab dari: 1 Rajo-rajo 1-6; 11-12*

## 19. Nabi-nabi

https://openbiblestories.org/l/mui/story-19/

![](https://cdn.door43.org/obs/jpg/360px/obs-en-19-01.jpg)

Slamo sejaranyo Israel, Allah ngongkon nabi-nabi ke dio wong. Nabi-nabi tu denger pesen dari Allah abes tu nyampeke pesen Allah tu ke rakyat.

![](https://cdn.door43.org/obs/jpg/360px/obs-en-19-02.jpg)

Pas Ahab jadi rajo Israel ado sikok nabi yang benamo Elias. Ahab ni wong jahat yang ngedorong wong-wong Israel ontok nyemba dewa yang benamo Baal. Uji nabi Elias ke Ahab, “Dak bakal ado ujan apo embun di Israel sampe aku ngongkonnyo.” Pasal tu beken Ahab jadi mara.

![](https://cdn.door43.org/obs/jpg/360px/obs-en-19-03.jpg)

Abes tu Allah ngongkon Elias pegi ke padang goron parak sungi ontok singitan dari Ahab yang nak ngebununyo. Tiap pagi jugo tiap malem, borong-borong gawakke dio roti samo dageng. Ahab samo pasokannyo nyari Elias, tapi dio wong dak pacak nemukenyo. Kekerengan tu jadi para nian sampe-sampe sungi jadi kereng.

![](https://cdn.door43.org/obs/jpg/360px/obs-en-19-04.jpg)

Laju Elias pegi ke negaro tetanggo. Di situ ado sikok jando samo anaknyo ni yang amper bae keabesan makanan karno bencano tu. Tapi dio wong ngoros Elias, tros Allah beken wada tepong samo botol minyak dio wong dak perna kosong. Dio wong ngedapetke makanan tu slamo bencano kelaperan tu. Elias tinggal di sano lumayan lamo.

![](https://cdn.door43.org/obs/jpg/360px/obs-en-19-05.jpg)

Pas la tigo setenga taon, Allah ngongkon Elias supayo balek lagi ke Israel tros ngomong ke Ahab amen Allah bakal noronke ujan lagi. Pas Ahab nyingok Elias, dio ngomong cak ini, “Na, ini dio! Kau nila biang keroknyo!” Uji Elias, “Kaula biang keroknyo! Kau la ninggalke Allah, Tuhan yang bener, jugo nyemba Baal. Gawakla galo wong Israel ke Gonong Karmel.”

![](https://cdn.door43.org/obs/jpg/360px/obs-en-19-06.jpg)

Sloro wong Israel, temasok jugo 450 ikok nabi Baal, dateng ke Gonong Karmel. Uji Elias ke wong-wong tu, “Berapo lamo kamu bakal teros beruba pekeran? Amen Allah tu iola Tuhan, sembala Dio! Amen Baal tu Tuhan, sembala dio!”

![](https://cdn.door43.org/obs/jpg/360px/obs-en-19-07.jpg)

Tros Elias ni ngomong ke nabi-nabinyo Baal, “Sembelela sikok sapi lanang ontok jadi kurban, tapi dak usa dulu ngedopke apinyo. Aku bakal ngelakuke pasal yang samo. Tuhan yang ngejawab dengen api iola Tuhan yang sejati.” Laju nabi-nabi Baal nyiapke kurban tapi dak ngedopke api.

![](https://cdn.door43.org/obs/jpg/360px/obs-en-19-08.jpg)

Abes tu nabi-nabi Baal bedoa ke Baal, ujinyo, “Dengerla kami, ya Baal!” La searian dio wong bedoa samo mekek sampe-sampe dio wong ngelukoi dirinyo makek ladeng, tapi Baal dak ngejawab.

![](https://cdn.door43.org/obs/jpg/360px/obs-en-19-09.jpg)

Pas sorenyo, Elias nyiapke kurban ontok Allah. Laju dio ngongkon wong Israel nuangke duo blas gentong besak banyu di pocok kurban tu, sampe dageng, kayu, jugo tana di sekitar meja pesembahan tu basa nian.

![](https://cdn.door43.org/obs/jpg/360px/obs-en-19-10.jpg)

Abes tu Elias bedoa, “Ya Allah, Tuhan Ibrahim, Ishak, samo Yakob, tonjokkela ke kami ari ni amen Kaula Tuhan Israel jugo amen aku ni babu Kau. Jawabla aku supayo wong-wong ni tau, amen Kaula Tuhan yang bener.”

![](https://cdn.door43.org/obs/jpg/360px/obs-en-19-11.jpg)

Tibo-tibo, api nyampak dari langet tros ngebakar abes dageng, kayu, batu, tana, jugo banyu yang ado di sekitar meja pesembahan Elias. Pas wong-wong nyingok tu, dio wong tesongkor ke tana tros ngomong cak ini, “Allah iola Tuhan! Allah iola Tuhan.”

![](https://cdn.door43.org/obs/jpg/360px/obs-en-19-12.jpg)

Abes tu Elias ngomong cak ini, “Jangan biarke nabi-nabi Baal tu ngelarike diri!” Jadi wong-wong nangkep nabi-nabi Baal tu tros gawak dio wong dari sano tros ngebunu dio wong.

![](https://cdn.door43.org/obs/jpg/360px/obs-en-19-13.jpg)

Laju Elias ngomong ke Rajo Ahab, ujinyo, “Langsongla balek ke kota, soalnyo ujan bakal toron.” Dak lamo dari tu langet jadi gelep tros ujan besak toron. Allah la nyelesaike kekerengan tros ngebuktike amen Diola Tuhan sikok-sikoknyo.

![](https://cdn.door43.org/obs/jpg/360px/obs-en-19-14.jpg)

Abes masanyo nabi Elias, Allah mele Ilyasa jadi nabi-Nyo. Allah ngelakuke banyak keajaeban liwat Ilyasa. Sala sikok keajaeban ni tejadi ke Naaman. Dio ni iola komandan tentaro moso Israel. Dio tau amen dio ni saket kolet para. Dio ni la ngedenger pasal Ilyasa, laju dio pegi tros mintak Ilyasa ontok nyembukenyo. Ilyasa ngongkon dio nyelemke dirinyo tojo kali di Sungi Yordan.

![](https://cdn.door43.org/obs/jpg/360px/obs-en-19-15.jpg)

Awalnyo Naaman ni mara tros dak galak ngelakukenyo karno prento tu dak masok akal. Tapi akernyo dio beruba pekeran tros nyelemke dirinyo ke Sungi Yordan sebanyak tojo kali. Pas dio moncol dari dalem banyu ontok yang teaker kalinyo, penyaket koletnyo bener-bener sembu! Allah la nyembuke dio!

![](https://cdn.door43.org/obs/jpg/360px/obs-en-19-16.jpg)

Allah ngongkon banyak nabi laen. Dio wong galo ngongkon wong-wong ontok brenti nyemba berhalo tros mulai bebuat adel samo bebelaskase. Nabi-nabi ngingetke wong-wong pasal duso dio wong. Amen dio wong dak bebalek dari duso-dusonyo jugo mulai noroti prento Allah, laju Allah bakal ngokom dio wong.

![](https://cdn.door43.org/obs/jpg/360px/obs-en-19-17.jpg)

Sereng nian, wong-wong tu idak norot samo Allah. Dio wong sereng nganiayo nabi, kadang-kadang sampe ngebunu nabi-nabi tu. Perna sekali, nabi Yeremia dimasokke ke jero somor kereng, tros ditinggalke di sano supayo dio mati. Dio tenggelem ke jero lumpur yang ado di dasar somor tu, tapi rajo kasean samo dio tros ngongkon babu-babunyo ontok narek dio metu dari somor tu sebelom dio mati.

![](https://cdn.door43.org/obs/jpg/360px/obs-en-19-18.jpg)

Nabi-nabi teros-terosan ngomongi pasal Allah, mugola banyak wong yang ngebenci dio wong. Dio wong ngingetke amen wong-wong tu dak betobat, Allah bakal ngancori wong-wong tu. Tros nabi-nabi tu jugo ngingetke ke wong-wong pasal janji Allah, amen Almasih bakal dateng.

*Sikok crito Alkitab dari: 1 Rajo-rajo 16-18; 2 Rajo-rajo 5; Yeremia 38*

## 20. Pembuangan samo Baleknyo Wong Israel

https://openbiblestories.org/l/mui/story-20/

![](https://cdn.door43.org/obs/jpg/360px/obs-en-20-01.jpg)

Bangso Israel samo Bangso Yehuda ni samo-samo la beduso ke Allah. Dio wong ngelanggar pejanjian yang la Allah beken samo dio wong di Gonong Sinai. Allah ngotos nabi-nabi-Nyo ontok ngingetke dio wong supayo betobat samo nyemba Allah lagi, cuman dio wong ni nekak.

![](https://cdn.door43.org/obs/jpg/360px/obs-en-20-02.jpg)

Jadi Allah ngokom keduo bangso tu dengen caro ditalakkenyo bae dio wong diancorke. Bangso Israel diancori ole Kekaisaran Asyur, bangso yang kuat jugo kejem. Banyak wong Israel yang dibunu ole wong-wong Asyur. Sloro yang berego diambek dio wong, tros dio wong jugo bakar banyak tempat di negaro tu.

![](https://cdn.door43.org/obs/jpg/360px/obs-en-20-03.jpg)

Wong-wong Asyur ngompolke sloro pemempen, wong kayo, samo wong yang ado kepacakan tros sloro wong Israel yang tepele tu di gawak ke Asyur. Cuman wong-wong Israel yang mesken nian tetep tinggal di Israel.

![](https://cdn.door43.org/obs/jpg/360px/obs-en-20-04.jpg)

Abes tu wong Asyur gawak wong-wong aseng ontok tinggal di Israel. Wong-wong aseng tu ngebangun lagi kota-kota yang la diancorke tros ngaweni wong Israel yang mase ado di sano. Ketoronan dio wong disebot wong Samaria.

![](https://cdn.door43.org/obs/jpg/360px/obs-en-20-05.jpg)

Wong-wong di kerajaan Yehuda nyingok cakmano Allah la ngokom kerajaan Israel karno dak pecayo samo noroti-Nyo. Tapi dio wong mase bae nyemba berhalo samo dewa-dewa wong Kanaan. Allah ngotos nabi-nabi-Nyo ontok ngingetke dio wong, tapi dio wong mase bae nekak.

![](https://cdn.door43.org/obs/jpg/360px/obs-en-20-06.jpg)

Kiro-kiro 100 taon abes Israel diancori wong Asyur, Allah ngerem Nebukadnezar, Rajo Babel, ontok nyerang negri Yehuda. Karno Babel ni kerajaan yang kuat, laju rajo Yehuda ni stojo jadi jajahannyo Nebukadnezar dengen caro bayar banyak upeti tiap taonnyo.

![](https://cdn.door43.org/obs/jpg/360px/obs-en-20-07.jpg)

Tapi dak lamo abes tu, wong Yehuda ni brontak ke Babel. Jadi, wong-wong ni Babel dateng lagi tros nyerang dio wong. Wong Babel ngerebot kota Yerusalem, ngancori Ruma Allah, tros ngambek sloro barang yang berego dari kota tu jugo dari Ruma Allah tu.

![](https://cdn.door43.org/obs/jpg/360px/obs-en-20-08.jpg)

Karno rajo Yehuda brontak, laju Rajo Nebukadnezar ngebunu sloro anak rajo Yehuda di depan matonyo. Abes tu rajo Yehuda tu dibuatnyo buto, tros dio wong masokke rajo Yehuda ke penjaro sampe mati di Babel.

![](https://cdn.door43.org/obs/jpg/360px/obs-en-20-09.jpg)

Nebukadnezar samo pasokannyo gawak amper sloro wong Yehuda ke Babel, tapi disisokenyo wong-wong yang mesken nian di Yehuda ontok nanem kebon. Masa di mano umat Allah dipakso ninggalke Tana Pejanjian ni disebot Pembuangan.

![](https://cdn.door43.org/obs/jpg/360px/obs-en-20-10.jpg)

Mugola Allah ngokom umat-Nyo karno duso dio wong dengen caro gawak dio wong ke Pembuangan, Dio dak ngelupoke umat-Nyo samo janji-Nyo. Allah teros ngawasi umat-Nyo jugo ngomong samo dio wong liwat nabi-nabi-Nyo. Dio bejanji amen abes tojo polo taon, dio wong bakal balek ke Tana Pejanjian lagi.

![](https://cdn.door43.org/obs/jpg/360px/obs-en-20-11.jpg)

Kiro-kiro tojo polo taon abes tu, Koresh, rajo Persia, ngalake Babel. Jadi Kerajaan Persia gantike Kerajaan Babel. Wong-wong Israel mak ini ari disebot wong Yahudi, tros sebagean besak dari dio wong la tinggal di Babel seomor edop. Cuman beberapo wong Yahudi yang tuo nian bae yang mase inget samo tana Yehuda.

![](https://cdn.door43.org/obs/jpg/360px/obs-en-20-12.jpg)

Bangso Persia tu kuat tapi baek ke wong-wong yang dikalakenyo. Dak lamo abes Koresh mulai bekuaso, dio ngeboleke wong Yahudi yang nak balek ke Tana Yehuda. Mala dio ngenjok wong Yahudi duet ontok ngebangun lagi Ruma Allah! Pas la tojo polo taon di pengasengan, akernyo sekelompok kecik wong-wong Yahudi balek ke Yerusalem.

![](https://cdn.door43.org/obs/jpg/360px/obs-en-20-13.jpg)

Pas dio wong nyampe, dio wong ngebangun lagi Baet Allah, tros beken tembok disekeleleng kota Yerusalem tu. Dio wong mase diprento ole wong laen, tapi dio wong la tinggal di Tana Pejanjian lagi jugo beibada di Ruma Allah.

*Sikok crito Alkitab dari: 2 Rajo-rajo 17; 24-25; 2 Tawarik 36; Ezra 1-10; Nehemiah 1-13*

## 21. Allah Janjike Almasih

https://openbiblestories.org/l/mui/story-21/

![](https://cdn.door43.org/obs/jpg/360px/obs-en-21-01.jpg)

Awal mulonyo, Allah berencano bakal ngerem Almasih. Janji petamo pasal Almasih yang bakal dateng tu dienjokke ke Adam samo Hawa. Allah bejanji amen ado ketoronan Hawa yang bakal ngancorke palak ulo yang ngolai Hawa, ulo tu sebenernyo Ebles. Itu retinyo Almasih yang agek dateng bakal ngalake Ebles.

![](https://cdn.door43.org/obs/jpg/360px/obs-en-21-02.jpg)

Allah bejanji ke Ibrahim amen liwat dio sloro suku bakal diberkai. Janji ni bakal ditepati dengen kedatengannyo Almasih, Dio bakal ngenjok jalan keslametan ontok sloro suku di dunio.

![](https://cdn.door43.org/obs/jpg/360px/obs-en-21-03.jpg)

Allah bejanji samo Musa amen Dio bakal ngotos nabi laen pecak Musa. Ini iola janji yang laen pasal Almasih yang bakal dateng.

![](https://cdn.door43.org/obs/jpg/360px/obs-en-21-04.jpg)

Allah bejanji samo Daud amen Almasih tu sala sikok dari ketoronannyo dewek yang bakal jadi rajo umat Allah ontok selamonyo. Itu artinyo Almasih iola ketoronan Daud.

![](https://cdn.door43.org/obs/jpg/360px/obs-en-21-05.jpg)

Liwat nabi Yeremia, Allah bejanji amen Dio bakal beken pejanjian baru, tapi pejanjian tu dak samo pecak pejanjian Allah samo Israel di gonong Sinai. Di pejanjian baru tu Allah bakal noleske hokom-Nyo dalem ati wong-wong. Wong-wong tu bakal kenal samo Allah, tros jadi umat-Nyo, jugo Allah bakal ngapos duso-duso dio wong. Almasih yang bakal mulai pejanjian baru tu.

![](https://cdn.door43.org/obs/jpg/360px/obs-en-21-06.jpg)

Nabi-nabi Allah jugo ngomong amen Almasih yang nak dateng ni iola nabi, imam, jugo rajo. Nabi iola wong yang dengerke omongan Allah jugo ngebritokenyo. Almasih yang bakal dateng ni iola nabi yang sempurno.

![](https://cdn.door43.org/obs/jpg/360px/obs-en-21-07.jpg)

Imam wong Israel iola wong yang nyembake kurban ke Allah ontok gantike hokoman karno duso-duso wong Israel. Imam-imam jugo bedoa samo Allah ontok dio wong. Almasih yang bakal dateng tu agek jadi imam besak yang sempurno, yang bakal ngurbanke dirinyo jadi kurban yang sempurno ke Allah.

![](https://cdn.door43.org/obs/jpg/360px/obs-en-21-08.jpg)

Rajo iola wong yang mrento kerajaan samo ngakemi sloro wong. Almasih bakal jadi rajo yang sempurno yang dodok di kursi Daud, lelohornyo. Dio bakal nguasoi sloro dunio selamonyo, jugo bakal ngakemi secaro adel tros beken kepotosan yang pas.

![](https://cdn.door43.org/obs/jpg/360px/obs-en-21-09.jpg)

Nabi-nabi ngeramalke hal-hal laen jugo pasal Almasih. Nabi Maleakhi ngewahyuke amen nabi besak bakal dateng sebelom Almasih. Nabi Yesaya ngewahyuke amen Almasih bakal laer dari betino prawan. Nabi Mika ngewahyuke amen Almasih bakal laer di Betlehem.

![](https://cdn.door43.org/obs/jpg/360px/obs-en-21-10.jpg)

Uji Nabi Yesaya, Almasih bakal tinggal di Galilea, ngebor ati yang saket, tros ngumumke kebebasan ke tahanan jugo ke wong yang ditawan. Dio jugo nugewahyuke amen Almasih bakal nyembuke wong saket, pekak, buto, bisu, jugo yang lompo.

![](https://cdn.door43.org/obs/jpg/360px/obs-en-21-11.jpg)

Nabi Yesaya jugo ngewahyuke amen Almasih bakal dibenci dak bealesan tros ditolak. Nabi laennyo ngewahyuke amen wong-wong yang ngebunu Dio bakal goncang undi ontok dapetke baju Almasih, tros kawan-Nyo bakal ngianati Dio. Nabi Jakaria ngewahyuke amen kawan-Nyo tu dibayar tigo polo kepeng duet perak ontok ngianati-Nyo.

![](https://cdn.door43.org/obs/jpg/360px/obs-en-21-12.jpg)

Nabi-nabi jugo nyritoke cakmano kematian Almasih tu. Nabi Yesaya ngewahyuke amen Almasih bakal diludai, dihino, samo digeboki. Abes tu Dio bakal dituja tros Dio mati dalem pendritoan samo kesaketan padahal Dio dak bebuat sala samo sekali.

![](https://cdn.door43.org/obs/jpg/360px/obs-en-21-13.jpg)

Nabi-nabi jugo ngomong amen Almasih tu sempurno, dak beduso. Dio bakal mati ontok nrimo hokoman demi duso wong-wong laen. Hokomannyo bakal gawak pedamaian antaro Allah samo manusio. Karno tu, Allah stuju Almasih tu ancor.

![](https://cdn.door43.org/obs/jpg/360px/obs-en-21-14.jpg)

Almasih dak cuman bakal mati, malahan nabi-nabi jugo ngewahyuke amen Allah bakal bangketke dio dari antaro wong mati. Liwat kematian samo kebangketan Almasih, Allah bakal nepati rencano-Nyo ontok nyelametke wong-wong beduso, tros memulai pejanjian baru.

![](https://cdn.door43.org/obs/jpg/360px/obs-en-21-15.jpg)

Allah tonjokke ke nabi-nabi-Nyo banyak pasal Almasih yang bakal dateng, tapi Almasih belom dateng pas jaman nabi-nabi tu. Lebe dari 400 taon abes pewahyuan yang teaker, pas waktunyo la tibo, Allah ngotos Almasih ke dunio.

*Sikok crito Alkitab dari: Kejadian 3:15; 12:1-3; Ulangan 18:15; 2 Samuel 7; Yeremia 31; Yesaya 59:16; Daniel 7; Maleaki 4:5; Yesaya 7:14; Mikha 5:2; Yesaya 9:1-7; 35:3-5; 61; 53; Saer Nyanyian 22:18; 35:19; 69:4; 41:9; Zakaria 11:12-13; Yesaya 50:6; Saer Nyanyian 16:10-11*

## 22. Kelaeran Yahya

https://openbiblestories.org/l/mui/story-22/

![](https://cdn.door43.org/obs/jpg/360px/obs-en-22-01.jpg)

Dulu, Allah ngomong ke umat-Nyo liwat malekat samo nabi-nabi-Nyo. Tapi la liwat 400 taon Dio dak ngomong ke dio wong. Tibo-tibo, ado malekat dateng gawak pesen dari Allah ontok imam yang benamo Jakaria. Jakaria samo Elisabet, bininyo, iola wong yang sole, tapi dio wong dak pacak punyo anak.

![](https://cdn.door43.org/obs/jpg/360px/obs-en-22-02.jpg)

Uji malekat tu ke Jakaria, “Bini kau gek ngelaerke sikok budak lanang. Kau bakal namoi dio Yahya. Dio agek dipenui samo Ro Suci, tros diola yang bakal nyiapke wong-wong ontok Almasih!” Uji Jakaria, “Aku samo bini aku ni la tuo nian ontok punyo anak! Cakmano aku pacak tau amen pasal tu bakal tejadi?”

![](https://cdn.door43.org/obs/jpg/360px/obs-en-22-03.jpg)

Uji malekat tu, “Aku ni dikerem ole Allah ontok nyampeke kabar baek ni samo kau. Tapi karno kau dak pecayo samo aku, kau bakal bisu sampe kupek tu laer.” Tibo-tibo Jakaria ni dak pacak ngomong. Tros tu malekat ni ninggalke Jakaria. Abes tu, Jakaria balek ke ruma. Dak lamo abes tu bininyo bonteng.

![](https://cdn.door43.org/obs/jpg/360px/obs-en-22-04.jpg)

Pas Elisabet lagi bonteng enam bulan, malekat yang samo tibo-tibo moncol ke dolornyo Elisabet yang namonyo Mariam. Dio ni mase gades tros agek kawen samo tunangannyo yang benamo Yusup. Malekat tu ngomong, ujinyo, “Kau gek bonteng tros ngelaerke sikok kupek lanang. Kau mesti namoi dio Yesus. Soalnyo Diola Anak Tuhan Yang Mahabesak, tros Dio jugo bakal mrento ontok selamonyo.”

![](https://cdn.door43.org/obs/jpg/360px/obs-en-22-05.jpg)

Maria ni ngejawab, ujinyo, “Cakmano ini pacak tejadi, aku ni blom belaki?” Malekat tu ngejelaske, “Ro Suci agek dateng ke kau, tros kuaso Allah agek nodongi kau. Jadi budak tu suci, soalnyo Dio ni Anak Allah.” Mariam ni pecayo tros nrimo apo yang la diomongke ole malekat tu.

![](https://cdn.door43.org/obs/jpg/360px/obs-en-22-06.jpg)

Abes malekat tu ngomong ke Mariam, Mariam ngonjongi Elisabet. Pas Elisabet denger salamnyo Mariam, kupek yang ado dalem perot Elisabet ni ngelonjak kesenengan. Betino-betino tu seneng dengen apo yang la dilakuke Allah. Abes Mariam ngonjongi Elisabet selamo tigo bulan, Mariam balek ke ruma.

![](https://cdn.door43.org/obs/jpg/360px/obs-en-22-07.jpg)

Pas Elisabet la ngelaerke kupek lanangnyo, Jakaria samo Elisabet ni namoi kupek tu Yahya, pecak yang la diprentoke ole malekat. Tros Allah ngejenke Jakaria ngomong, jadi dio ngomong cak ini, “Pujila Allah, karno Dio la inget umat-Nyo! Kau, anak aku, bakal disebot nabi Tuhan Yang Mahabesak. Kau bakal ngenjoktauke cakmano wong-wong pacak diamponi dari duso-dusonyo.”

*Sikok crito Alkitab dari: Lukas 1*

## 23. Kelaeran Yesus

https://openbiblestories.org/l/mui/story-23/

![](https://cdn.door43.org/obs/jpg/360px/obs-en-23-01.jpg)

Mariam lagi betunangan samo wong baek benamo Yusup. Pas Yusup denger Mariam bonteng, dio ni tau amen itu tu bukan kupeknyo. Mugola cak itu, dio dak galak beken Mariam malu, jadi dio motoske ontok nyereke Mariam diem-diem. Sebelom tu tejadi, ado sikok malekat nampakke dirinyo ke Yusup liwat mimpi.

![](https://cdn.door43.org/obs/jpg/360px/obs-en-23-02.jpg)

Uji malekat tu, “Yusup, dak usa takot jadike Mariam bini kau. Apo yang ado di rahemnyo tu iola dari Ro Suci. Mariam bakal beranakke anak lanang. Enjok Dio namo Yesus, karno Diola yang bakal nyelametke umat-Nyo dari duso dio wong" (Namo Yesus tu artinyo,‘ALLAH nyelametke'.)

![](https://cdn.door43.org/obs/jpg/360px/obs-en-23-03.jpg)

Jadi Yusup ngaweni Mariam tros gawak dio balek jadi bininyo, tapi dio wong dak behobongan laki bini sampe Mariam beranak.

![](https://cdn.door43.org/obs/jpg/360px/obs-en-23-04.jpg)

Pas Mariam la nak ngelaerke, pemrento Romawi ngongkon sloro wong pegi ke kota asal nenek moyang dio wong dewek-dewek ontok sensus pendodok. Laju Mariam samo Yusup haros pegi jao dari Nazaret ke Betlehem. Karno lelohor dio wong iola Daud yang kampong halamannyo di Betlehem.

![](https://cdn.door43.org/obs/jpg/360px/obs-en-23-05.jpg)

Pas dio wong nyampe di Betlehem, dak katek tempat ontok nginep. Sikok-sikoknyo tempat yang pacak dio wong temuke cuman kandang ternak. Kupek tu laer di sano tros umaknyo ngolengke Dio di wada makanan ternak, karno katek tempat laennyo. Dio wong ngenjok namo kupek tu Yesus.

![](https://cdn.door43.org/obs/jpg/360px/obs-en-23-06.jpg)

Malem tu, di parak tempat tu ado beberapo gembala lagi ngejago ternak dio wong. Tibo-tibo, dio wong ketakotan karno moncol malekat yang besinar. Uji malekat tu, “Dak usa takot, aku punyo kabar baek ontok kau. Almasih la laer di Betlehem!”

![](https://cdn.door43.org/obs/jpg/360px/obs-en-23-07.jpg)

“Pegila, temukela kupek tu, tros kau bakal nemuke Dio dibedong kaen tros tebareng di wada makanan ternak.” Tibo-tibo, banyak nian malekat moncol di langet tros nyanyi samo muji Allah, ujinyo, “Kemulioan ontok Allah di surgo, tros damai di bumi ontok manusio yang Allah dewek seneng melenyo!”

![](https://cdn.door43.org/obs/jpg/360px/obs-en-23-08.jpg)

Pas sloro gembala nyampe di tempat Yesus, dio wong jingok Yesus lagi tebareng di wada makanan ternak, pecak yang malekat tu omongi. Dio wong seneng nian. Mariam jugo seneng nian. Abes tu gembala-gembala tu balek ke padang rompot sambel muji Allah karno sloro yang dio wong denger samo jingok.

![](https://cdn.door43.org/obs/jpg/360px/obs-en-23-09.jpg)

Beberapo waktu abes tu, wong bijak dari negri jao di timur jingok bintang ane di langet. Dio wong sadar amen rajo wong Yahudi yang baru la laer. Laju, dio wong lakuke pejalanan jao ontok jingok rajo ni. Dio wong nyampe di Betlehem tros nemuke tempat di mano Yesus tinggal.

![](https://cdn.door43.org/obs/jpg/360px/obs-en-23-10.jpg)

Pas dio wong jingok Yesus samo umak-Nyo, dio wong tesongkor tros nyemba Dio. Dio wong ngenjok Yesus hadia-hadia mahal. Abes tu dio wong balek.

*Sikok crito Alkitab dari: Matius 1; Lukas 2*

## 24. Yahya Ngebaptes Yesus

https://openbiblestories.org/l/mui/story-24/

![](https://cdn.door43.org/obs/jpg/360px/obs-en-24-01.jpg)

Yahya, anak dari Jakaria samo Elisabet, la besak, tros dio ni jadi nabi. Dio tinggal di padang goron, makanannyo tu madu liar samo belalang. Tros dio makek baju yang tebuat dari bulu unto.

![](https://cdn.door43.org/obs/jpg/360px/obs-en-24-02.jpg)

Banyak wong yang dateng ontok ngedengerke kotba Yahya. Uji Yahya, “Betobatla, soalnyo Kerajaan Allah la parak!”

![](https://cdn.door43.org/obs/jpg/360px/obs-en-24-03.jpg)

Pas wong-wong ngedenger pesen Yahya, banyak di antaro wong-wong tu betobat dari duso-dusonyo, tros Yahya ngebaptes dio wong. Banyak pemempen agama jugo dateng, tapi dio wong dak betobat apo ngakui duso-duso dio wong.

![](https://cdn.door43.org/obs/jpg/360px/obs-en-24-04.jpg)

Yahya ngomong ke pemempen agama tu, “Kamu tu ulo bebiso! Betobatla tros ubala kelakuan kamu. Setiap batang yang dak ngaselke bua yang bagus bakal ditebang tros dibuang ke dalem api.” Jadi Yahya ngenepi apo yang diomongke nabi Yesaya, “Jingokla, Aku ngongkon otosan Aku ngedaului Kau. Tros dio bakal nyiapke jalan Kau.”

![](https://cdn.door43.org/obs/jpg/360px/obs-en-24-05.jpg)

Ado beberapo dari wong Yahudi nanyo ke Yahya amen dio tu Almasih apo bukan. Uji Yahya, “Aku ni bukan Almasih, tapi bakal ado sikok wong yang dateng abes aku. Dio yang jao lebe hebat dari aku, sampe-sampe ontok mecolke selopnyo bae aku dak pantes.”

![](https://cdn.door43.org/obs/jpg/360px/obs-en-24-06.jpg)

Pas besoknyo, Yesus dateng ontok dibapteske ole Yahya. Pas Yahya nyingok Yesus, dio ngomong cak ini, “Jingokla! Inila Anak Domba Allah, yang ngapos duso dunio.”

![](https://cdn.door43.org/obs/jpg/360px/obs-en-24-07.jpg)

Uji Yahya ke Yesus, “Aku ni dak pantes ontok ngebaptes Kau. Harosnyo Kau yang ngebaptes aku.” Tapi Yesus ngomong cak ini, “Kau la yang mesti ngebaptes Aku, soalnyo itula pasal yang bener ontok dilakuke.” Akernyo Yahya ngebaptes Yesus tapi bukan karno Yesus ni beduso. Yesus dak perna beduso.

![](https://cdn.door43.org/obs/jpg/360px/obs-en-24-08.jpg)

Pas Yesus metu dari banyu abes dibaptes, Ro Allah ngambek bentok pecak borong merpati tros hinggap di diri Yesus. Pas waktu yang samo, suaro dari surgo ngomong cak ni, “Kau ni iola Anak Aku yang tekase, samo Kaula yang Aku senengi.”

![](https://cdn.door43.org/obs/jpg/360px/obs-en-24-09.jpg)

Allah la ngomong ke Yahya, “Ro Suci bakal dateng ke sikok Wong yang kau baptes. Dio tu iola Anak Allah.” Cuman ado sikok Allah. Tapi pas Yahya ngebabtis Yesus ado suaro dari Allah Ubak, dio jingok Allah Anak (iola Yesus), tros dio jingok Ro Suci.

*Sikok crito Alkitab dari: Matius 3; Markus 1:9-11; Lukas 3:1-23*

## 25. Ebles Nyuboi Yesus

https://openbiblestories.org/l/mui/story-25/

![](https://cdn.door43.org/obs/jpg/360px/obs-en-25-01.jpg)

Abes Yesus la dibaptes, Ro Suci mempen Dio metu ke padang goron. Di sano Dio bepuaso selamo empat polo ari empat polo malem. Selamo tu jugo Dio dicuboi samo Ebles.

![](https://cdn.door43.org/obs/jpg/360px/obs-en-25-02.jpg)

Uji Ebles, “Amen Kau Anak Allah, ubala batu ni jadi roti biar Kau pacak makan!”

![](https://cdn.door43.org/obs/jpg/360px/obs-en-25-03.jpg)

Uji Yesus, “Ado ayat, ‘Manusio edop bukan dari roti bae, tapi dari setiap omongan yang Allah ucapke!’”

![](https://cdn.door43.org/obs/jpg/360px/obs-en-25-04.jpg)

Abes tu Ebles gawak Yesus ke sikok tempat yang paleng tinggi di Ruma Allah tros ngomong cak ini, “Amen Kau Anak Allah, campakkela diri Kau ke bawa, karno ado tetoles, ‘Dio bakal ngongkon malekat-Nyo ontok nangkep Kau supayo kaki Kau dak nyentu batu.’”

![](https://cdn.door43.org/obs/jpg/360px/obs-en-25-05.jpg)

Tapi Yesus jawab cak ini, “Ado jugo ayat yang tetoles cak ni, ‘Jangan nyuboi Allah.’”

![](https://cdn.door43.org/obs/jpg/360px/obs-en-25-06.jpg)

Abes tu Ebles nonjokke ke Yesus sloro kerajaan dunio samo sloro kemulioannyo tros ngomong cak ni, “Aku bakal ngenjokke Kau sloro ni amen Kau sojod samo nyemba aku.”

![](https://cdn.door43.org/obs/jpg/360px/obs-en-25-07.jpg)

Uji Yesus, “Pegila dari Aku, Ebles! Ado ayat, ‘Sembala Allah Tuhan kau bae, tros layanila Dio bae.’”

![](https://cdn.door43.org/obs/jpg/360px/obs-en-25-08.jpg)

Yesus idak kala samo olokannyo Ebles, laju Ebles ninggalke Dio. Abes tu malekat-malekat dateng tros ngelayani Yesus.

*Sikok crito Alkitab dari: Matius 4:1-11; Markus 1:12-13; Lukas 4:1-13*

## 26. Yesus Ngemulai Gaweannyo

https://openbiblestories.org/l/mui/story-26/

![](https://cdn.door43.org/obs/jpg/360px/obs-en-26-01.jpg)

Pas la ngalake olokan Ebles, Yesus balek ke Galilea tempat di mano Dio tinggal. Dio dipenui samo kuaso Ro Suci. Yesus pegi dari sikok tempat ke tempat yang laen sambel ngajar. Sloro wong di situ ngomongi yang baek pasal Dio.

![](https://cdn.door43.org/obs/jpg/360px/obs-en-26-02.jpg)

Yesus pegi ke Najaret tempat dio dibesaki. Pas ari Sabat Dio pegi ke tempat ibada. Dio dienjok golongan kitab Nabi Yesaya, supayo dibacokenyo. Yesus ngebukak golongan kitab tu tros dibacokenyo sebagean ke wong-wong tu.

![](https://cdn.door43.org/obs/jpg/360px/obs-en-26-03.jpg)

Yesus baco, “Allah la ngenjokke Ro-Nyo ke Aku supayo Aku pacak ngebritoke kabar baek ontok wong-wong mesken, kebebasan ontok tahanan, kesemboan ontok wong-wong yang buto, jugo kelepasan ontok wong-wong yang teaniayo. Taon ni iola taon kebaekan Allah.”

![](https://cdn.door43.org/obs/jpg/360px/obs-en-26-04.jpg)

Tros Yesus dodok. Setiap wong yang dado di tempat ibada tu masati Dio. Dio wong tau amen bagean dari kitab yang baru dibacokenyo tu ngomong pasal Almasih. Uji Yesus, “ayat-ayat yang baru Aku bacoke ke kamu la digenepi pas kamu ngedengernyo.” Sloro wong teheran. Uji dio wong, “bukannyo Dio ni anak Yusup?” .

![](https://cdn.door43.org/obs/jpg/360px/obs-en-26-05.jpg)

Uji Yesus, “Emang bener amen katek nabi yang dihargoi di dosonnyo dewek. Pas jaman Nabi Elias ado banyak jando di Israel. Tapi pas ujan idak toron selamo tigo taon enam bulan, Elias idak diotos ole Allah ontok nolong sala sikok dari jando-jando di Israel, melaenke nolong sikok jando dari bangso laen.”

![](https://cdn.door43.org/obs/jpg/360px/obs-en-26-06.jpg)

Yesus ngelanjotke omongan-Nyo, uji-Nyo, “Pas jaman Nabi Ilyasa, ado banyak wong Israel tekeno penyaket kusta. Tapi Ilyasa dak nyemboke sala sikok dari dio wong. Dio cuman nyemboke penyaket kustanyo Naaman. Dio ni komandan dari moso-moso Israel.” Wong-wong yang denger ajaran Yesus ni iola wong Yahudi. Jadi pas dio wong denger Yesus ngomong cak tu, dio wong jadi mara nian ke Yesus.

![](https://cdn.door43.org/obs/jpg/360px/obs-en-26-07.jpg)

Wong-wong Najaret nyeret Yesus metu dari tempat ibada tu, tros gawak Dio sampe ke pengger jurang supayo pacak dicampakke ke jurang tu ontok ngebunu Dio. Tapi Yesus ni bejalan ngeliwati keromonan wong-wong tu tros pegi dari kota Najaret.

![](https://cdn.door43.org/obs/jpg/360px/obs-en-26-08.jpg)

Abes tu Yesus pegi ngeliwati daera Galilea, tros banyak wong yang dateng ke Dio. Dio wong banyak gawak wong saket jugo wong cacat, temasok jugo yang dak pacak bejalan, yang buto, yang pekak, samo yang bisu. Tros Yesus nyembuke dio wong.

![](https://cdn.door43.org/obs/jpg/360px/obs-en-26-09.jpg)

Banyak wong yang kemasokan setan digawak ke Yesus. Dengen prento Yesus, setan-setan tu metu dari wong-wong tu, tros bejeret, “Kau iola Anak Allah!” Wong banyak tekagom tros muji Allah.

![](https://cdn.door43.org/obs/jpg/360px/obs-en-26-10.jpg)

Abes tu Yesus mele duo belas ikok wong yang Dio panggel rosul. Rosul-rosul tu pegi samo Yesus tros belajar dari Dio.

*Sikok crito Alkitab dari: Matius 4:12-25; Markus 1:14-15, 35-39; 3:13-21; Lukas 4:14-30, 38-44*

## 27. Crito Wong Samaria yang Baek Ati

https://openbiblestories.org/l/mui/story-27/

![](https://cdn.door43.org/obs/jpg/360px/obs-en-27-01.jpg)

Kapan ari, ado sikok hakem dateng ke Yesus ontok nguji Dio, ujinyo, “Guru, apo yang mesti aku lakuke supayo aku edop selamonyo?” Jawab Yesus, “Apo yang tetoles di Prento Allah?”

![](https://cdn.door43.org/obs/jpg/360px/obs-en-27-02.jpg)

Uji hakem tu, “Kasehila Allah Tuhan kau, dengen sepenu ati, jiwo, kekuatan, samo pekeran kau. Tros kasehila sesamo manusio pecak diri kau dewek.” Uji Yesus, “Bener kato kau tu! Gawekela cak itu biar kau bakal edop selamo-lamonyo.”

![](https://cdn.door43.org/obs/jpg/360px/obs-en-27-03.jpg)

Tapi hakem tu nak ngeboktike amen diri dio tu bener. Jadi dio betanyo lagi, “Siapo yang dimaksod sesamo manusio tu?”

![](https://cdn.door43.org/obs/jpg/360px/obs-en-27-04.jpg)

Yesus ngejawab makek sikok crito. Uji-Nyo, “Ado sikok lanang Yahudi yang lagi dalem pejalanan dari Yerusalem, nak ke Yeriko.”

![](https://cdn.door43.org/obs/jpg/360px/obs-en-27-05.jpg)

“Sementaro dio bepegian, dio diserang samo sekelompok perampok. Perampok ni ngambek galo-galo hartonyo, tros wong Yahudi tu digeboki sampe amper mati. Abes tu dio wong pegi.”

![](https://cdn.door43.org/obs/jpg/360px/obs-en-27-06.jpg)

“Abes tu, ado sikok imam Yahudi yang kebetolan ngeliwati jalan tu. Pas imam tu nyingok wong yang dirampok samo digeboki tadi, dio pinda ke sebrang jalan tros dak diagokinyo wong yang boto petolongan tu. Jadi dio ngeliwatinyo bae.”

![](https://cdn.door43.org/obs/jpg/360px/obs-en-27-07.jpg)

“Dak lamo abes tu, ado wong Lewi ngeliwati jalan tu. (Lewi tu iola suku Yahudi yang ngebantu imam-imam di Ruma Allah.) Wong Lewi ni jugo pinda ke sebrang jalan tu tros dak diagokinyo wong yang dirampok samo yang digeboki tu.”

![](https://cdn.door43.org/obs/jpg/360px/obs-en-27-08.jpg)

“Wong selanjotnyo yang bejalan di jalan tu iola wong Samaria. (Wong-wong Samaria iola ketoronan camporan Yahudi samo wong-wong dari negaro-negaro laen. Wong Samaria samo wong Yahudi saleng ngebenci.) Pas wong Samaria ni nyingok wong tu, dio ngeraso kesian. Dio ngerawat wong tu tros ngebalot luko-lukonyo.”

![](https://cdn.door43.org/obs/jpg/360px/obs-en-27-09.jpg)

“Laju wong Samaria tu naekke wong tu ke keledainyo tros digawaknyo ke sikok penginepan di mano dio ngerawatnyo.”

![](https://cdn.door43.org/obs/jpg/360px/obs-en-27-10.jpg)

“Pas besoknyo, wong Samaria tu mesti ngelanjotke pejalanannyo. Dio ngenjokke duet ke wong yang betanggong jawab di penginepan tu, tros ngomong cak ni, ‘Jagola dio, tros amen duetnyo kurang agek aku ganti pas aku balek lagi ke sini.’”

![](https://cdn.door43.org/obs/jpg/360px/obs-en-27-11.jpg)

Tros Yesus betanyo ke hakem tu, “Cakmano uji kau? Yang mano dari ketigo wong tadi yang kau peker sesamo manusio dari wong yang dirampok samo digeboki tu?” Jawab hakem tu, “Wong yang nonjokke raso kesian tadi.” Uji Yesus ke hakem tu, “Pegila tros gawekela cak itu jugo.”

*Sikok crito Alkitab dari: Lukas 10:25-37*

## 28. Penguaso Mudo yang Kayo

https://openbiblestories.org/l/mui/story-28/

![](https://cdn.door43.org/obs/jpg/360px/obs-en-28-01.jpg)

Kapan ari ado penguaso mudo yang kayo dateng ke Yesus tros nanyo cak ini, “Guru yang baek, apo yang mesti aku gaweke supayo pacak edop selamonyo?” Uji Yesus ke wong tu, “Ngapo kau ngomongke amen Aku ni baek? cuman ado sikok yang baek, itu tu Allah. Tapi amen kau nak edop selamo-lamonyo, norotla hokom-hokom Allah.”

![](https://cdn.door43.org/obs/jpg/360px/obs-en-28-02.jpg)

“Hokom-hokom yang mano?” tanyo wong tu. Jawab Yesus, “Jangan ngebunu. Jangan bejina. Jangan maleng. Jangan ngotaki. Hormatila ubak samo umak kau tros kasehila sesamo kau manusio pecak diri kau dewek.”

![](https://cdn.door43.org/obs/jpg/360px/obs-en-28-03.jpg)

Uji lanang tu, “Aku la noroti segalo hokom ni dari aku mase kecik. Apo lagi yang mesti aku lakuke?” Yesus nyingok dio tros ngasei lanang tu.

![](https://cdn.door43.org/obs/jpg/360px/obs-en-28-04.jpg)

Jawab Yesus, “Amen kau nak jadi wong yang sempurno, pegila tros jualla sloro yang kau punyo tros enjokke duetnyo ke wong-wong mesken, tros kau bakal ado harto di surgo. Abes tu melokla samo Aku.”

![](https://cdn.door43.org/obs/jpg/360px/obs-en-28-05.jpg)

Pas lanang tu ngedenger apo yang diomongke Yesus, dio jadi sede nian, karno dio ni kayo nian tros dio dak galak ngenjokke hartonyo. Dio bebalek tros pegi ninggalke Yesus.

![](https://cdn.door43.org/obs/jpg/360px/obs-en-28-06.jpg)

Tros Yesus ngomong ke mored-mored-Nyo, “Saro nian ontok wong kayo masok ke jero Kerajaan Allah! Yo, lebe muda sikok unto masok ke lobang jarom daripada sikok wong kayo masok ke jero Kerajaan Allah.”

![](https://cdn.door43.org/obs/jpg/360px/obs-en-28-07.jpg)

Pas mored-mored ngedenger tu, dio wong tekejot tros ngomong cak ini, “Amen cak tu, siapo yang pacak dislametke?”

![](https://cdn.door43.org/obs/jpg/360px/obs-en-28-08.jpg)

Yesus nyingoki dio wong tros ngomong cak ini, “Ontok manusio ini dak mongken, tapi ontok Allah segalo sesuatu tu mongken.”

![](https://cdn.door43.org/obs/jpg/360px/obs-en-28-09.jpg)

Uji Petros ke Yesus, “Kami ni la ninggalke galo-galonyo tros meloki Kau. Apo yang bakal jadi upa kami?”

![](https://cdn.door43.org/obs/jpg/360px/obs-en-28-10.jpg)

Jawab Yesus, “Setiap wong yang la ninggalke ruma, ubak, umak, anak, dolor, apo hartonyo demi Aku bakal nerimo lagi 100 kali lipet, jugo edop yang kekal. Tapi banyak wong yang petamo bakal jadi wong yang teaker, tros wong yang teaker bakal jadi wong yang petamo.”

*Sikok crito Alkitab dari: Matius 19:16-30; Markus 10:17-31; Lukas 18:18-30*

## 29. Crito Pasal Babu yang Dak Katek Raso Kasean

https://openbiblestories.org/l/mui/story-29/

![](https://cdn.door43.org/obs/jpg/360px/obs-en-29-01.jpg)

Kapan ari Petros ngomong ke Yesus, “Tuan, sampe berapo kali aku mesti maapke dolor aku amen dio beken duso ke aku? Apo sampe tojo kali?” Uji Yesus, “Bukan tojo kali, tapi sampe tojo polo kali tojo!” Maksodnyo kito mesti teros maapke. Laju Yesus nyritoke crito ni.

![](https://cdn.door43.org/obs/jpg/360px/obs-en-29-02.jpg)

“Kerajaan Allah tu pecak sikok rajo yang nak nyelesaike peretongan utang dengen babunyo. Sala sikok babunyo ni ngutang banyak nian, kiro-kiro upa gawe 200.000 taon.”

![](https://cdn.door43.org/obs/jpg/360px/obs-en-29-03.jpg)

“Karno babunyo ni dak pacak ngebayar utangnyo, uji rajonyo tu cak ni, ‘Jualla wong ni jugo kluargonyo jadi budak ontok gantike pembayaran utangnyo.’”

![](https://cdn.door43.org/obs/jpg/360px/obs-en-29-04.jpg)

“Babunyo ni nyampakke dirinyo tros belotot di adepan rajo tu, tros ngomong cak ini, ‘Besabarla samo aku! aku bakal bayar galonyo.’ Rajo ngeraso kasean samo babunyo tu, tros diaposkenyola sloro utangnyo.”

![](https://cdn.door43.org/obs/jpg/360px/obs-en-29-05.jpg)

“Babu tu pegi tros ketemu samo babu yang laen yang punyo utang samo dio, jumla utangnyo tu sekitar empat bulan gajinyo. Babu yang tadi tu nyekek babu yang punyo utang samo dio. Tros ngomong cak ini, ‘Bayarla utang kau tu samo aku.’”

![](https://cdn.door43.org/obs/jpg/360px/obs-en-29-06.jpg)

“Wong tu nyampakke diri tros belotot, tros ngomong cak ini, ‘Besabarla samo aku! aku bakal bayar galonyo.’ Tapi babu yang tadi tu dak galak, tros masoki wong tu ke penjaro sampe dio pacak ngebayar utangnyo.”

![](https://cdn.door43.org/obs/jpg/360px/obs-en-29-07.jpg)

“Beberapo babu yang laen nyingok apo yang la tejadi tros ngeraso teganggu nian. Dio wong pegi ke rajo tros nyritoke sloronyo.”

![](https://cdn.door43.org/obs/jpg/360px/obs-en-29-08.jpg)

“Rajo manggel babu yang tadi tu tros ngomong cak ni, ‘Kau tu babu yang jahat! Aku maapi kau tros ngelunasi utang kau karno kau yang mintak-mintak di adepan aku. Harosnyo kau ngelakuke hal yang samo.’ Jadi rajo mara nian tros masokke babu yang jahat tadi ke jero penjaro sampe dio ngebayar sloro utangnyo.”

![](https://cdn.door43.org/obs/jpg/360px/obs-en-29-09.jpg)

Laju Yesus ngomong cak ini, “Itula yang bakal dilakuke Ubak Aku yang di surgo ke setiap wong di antaro kamu, amen kamu dak maapi dolor kau dari dalem ati kamu.”

*Sikok crito Alkitab dari: Matius 18:21-35*

## 30. Yesus Ngenjok Makan Limo Ribu Wong

https://openbiblestories.org/l/mui/story-30/

![](https://cdn.door43.org/obs/jpg/360px/obs-en-30-01.jpg)

Yesus ngongkon mored-mored-Nyo ontok bekotba samo ngajar wong-wong di beberapo doson yang bebeda. Pas dio wong balek, dio wong nyritoke ke Yesus apo yang la dio wong ajarke samo lakuke. Abes tu Yesus ngajak dio wong pegi samo Dio ke tempat yang tenang ontok istirahat sedenget. Laju, dio wong naek ke prau tros pegi ke sebrang danau.

![](https://cdn.door43.org/obs/jpg/360px/obs-en-30-02.jpg)

Tapi banyak wong yang nyingok Yesus samo mored-mored tu pegi. Wong-wong tu belari di sekitaran danau ontok sampe ke sebrang ngedului dio wong. Pas Yesus samo mored-mored-Nyo sampe, segrombolan wong la ado di situ, nunggui dio wong.

![](https://cdn.door43.org/obs/jpg/360px/obs-en-30-03.jpg)

Ado lebe dari 5000 wong dalem keromonan tu. Itu tu belom temasok betino samo anak-anak. Yesus ngeraso sayang nian samo wong-wong tu. Bage Yesus, wong-wong ni pecak domba yang dak katek gembalanyo. Yesus ngajar dio wong tros nyemboke wong-wong yang saket.

![](https://cdn.door43.org/obs/jpg/360px/obs-en-30-04.jpg)

Pas ari la maken petang, mored-mored-Nyo ngomong cak ini, “Ari la petang tros dak katek kota deket sini. Kongkonla wong-wong tu pegi supayo dio wong pacak nyari makanan.”

![](https://cdn.door43.org/obs/jpg/360px/obs-en-30-05.jpg)

Tapi Yesus ngomong ke dio wong, “Kamu mesti ngenjok dio wong makan!” Uji mored-mored-Nyo, “Cak mano kami pacak ngelakuke tu? Kami ni cuman punyo limo ikok roti samo duo ikok iwak.”

![](https://cdn.door43.org/obs/jpg/360px/obs-en-30-06.jpg)

Yesus ngomongke mored-mored-Nyo ontok ngongkon wong banyak tu dodok bekompol di pocok rompot. Sikok kelompok tu limo polo wong.

![](https://cdn.door43.org/obs/jpg/360px/obs-en-30-07.jpg)

Laju Yesus ngambek limo roti samo duo iwak tu, tros nyingok ke langet, tros besokor ke Allah ontok makanan tu.

![](https://cdn.door43.org/obs/jpg/360px/obs-en-30-08.jpg)

Laju Yesus ngebela-bela roti samo iwak tu. Dio ngenjokke belahan-belahan tadi ke mored-mored-Nyo ontok dibageke ke wong-wong tu. Mored-mored tu teros-terosan ngebageke makanan tu sampe dak abes! Sloro wong yang ado di situ makan tros ngeraso kenyang.

![](https://cdn.door43.org/obs/jpg/360px/obs-en-30-09.jpg)

Mala mored-mored tu ngompolke siso makanan tadi. Makanan tu mase tesiso duo belas keranjang! Sloro makan tu beasal dari limo roti samo duo iwak.

*Sikok crito Alkitab dari: Matius 14:13-21; Markus 6:31-44; Lukas 9:10-17; Yahya 6:5-15*

## 31. Yesus Bejalan di Pocok Banyu

https://openbiblestories.org/l/mui/story-31/

![](https://cdn.door43.org/obs/jpg/360px/obs-en-31-01.jpg)

Abes tu Yesus ngongkon mored-mored-Nyo ontok naek ke prau tros belayar ke sebrang danau, sementaro Dio ngongkon wong banyak tu pegi. Abes Yesus ngongkon wong banyak tu pegi, Dio naek ke gonong ontok bedoa. Yesus di sano dewekan, tros Dio bedoa sampe dalu.

![](https://cdn.door43.org/obs/jpg/360px/obs-en-31-02.jpg)

Sementaro tu, mored-mored Yesus lagi ngedayong prau, tapi sampe dalu dio wong cuman sampe ke tenga danau. Dio wong ngedayong saro nian, soalnyo angin kenceng ngara ke dio wong.

![](https://cdn.door43.org/obs/jpg/360px/obs-en-31-03.jpg)

Seabes Yesus bedoa, Dio pegi ke mored-mored-Nyo. Dio bejalan di pocok banyu ke prau dio wong!

![](https://cdn.door43.org/obs/jpg/360px/obs-en-31-04.jpg)

Mored-mored-Nyo ketakotan pas dio wong nyingok Yesus, soalnyo dio wong peker lagi nyingok antu. Yesus tau amen dio wong ketakotan, jadi Dio ngomong, “Jangan takot. Ini Aku!”

![](https://cdn.door43.org/obs/jpg/360px/obs-en-31-05.jpg)

Uji Petros ke Yesus, “Guru, amen itu Kau, kongkonla aku dateng ke Kau bejalan di pocok banyu!” Laju Yesus ngongkon Petros, “Datengla ke sini.”

![](https://cdn.door43.org/obs/jpg/360px/obs-en-31-06.jpg)

Laju Petros toron dari prau tros mulai bejalan di pocok banyu ke ara Yesus. Tapi pas baru bejalan dikit, dio ngalike pandangan matonyo dari Yesus tros mulai nyingok gelombang samo ngerasoke angin kenceng.

![](https://cdn.door43.org/obs/jpg/360px/obs-en-31-07.jpg)

Laju Petros ngeraso takot tros mulai tenggelem. Pekeknyo, “Guru, slametkela aku!” Yesus ngejolorke tangan-Nyo tros megang tangan Petros. Laju Dio ngomong cak ini ke Petros, “Oi kau yang kurang pecayo, ngapo kau dak yaken?”

![](https://cdn.door43.org/obs/jpg/360px/obs-en-31-08.jpg)

Pas Petros samo Yesus naek ke prau, angin langsong brenti tros banyu jadi tenang. Mored-mored-Nyo takjob nian. Dio wong nyemba Yesus tros ngomong ke Dio, “iyo nian, Kau Anak Allah.”

*Sikok crito Alkitab dari: Matius 14:22-33; Markus 6:45-52; Yahya 6:16-21*

## 32. Yesus Nyemboke Lanang yang Dimasoki Setan samo Betino yang Saket

https://openbiblestories.org/l/mui/story-32/

![](https://cdn.door43.org/obs/jpg/360px/obs-en-32-01.jpg)

Kapan ari, Yesus samo mored-mored-Nyo naek prau tros nyebrangi danau ke tempat wong Gadara tinggal.

![](https://cdn.door43.org/obs/jpg/360px/obs-en-32-02.jpg)

Pas dio wong sampe di sebrang danau, sikok lanang yang kemasokan setan belari ke Yesus.

![](https://cdn.door43.org/obs/jpg/360px/obs-en-32-03.jpg)

lanang ni kuat nian sampe-sampe dak katek yang pacak megangi dio. Wong-wong sereng masong tangan samo kakinyo makek rante-rante, tapi dio teros-terosan ngancorke rante tu.

![](https://cdn.door43.org/obs/jpg/360px/obs-en-32-04.jpg)

Dio tinggal di koboran di daera tu. Siang malem wong ni mekek-mekek. Dio dak makek baju tros bekali-kali dio nyeseti badannyo dewek makek batu.

![](https://cdn.door43.org/obs/jpg/360px/obs-en-32-05.jpg)

Pas lanang tu sampe ke Yesus, dio belotot di adepan-Nyo. Uji Yesus ke setan tu, “Metula dari wong ni!”

![](https://cdn.door43.org/obs/jpg/360px/obs-en-32-06.jpg)

Wong yang kemasokan setan tu mekek kuat nian cak ni, “Apo yang kau kendaki samo aku, Yesus, Anak Tuhan Yang Mahabesak? Jangan nyikso aku!” Laju Yesus nanyo ke setan yang masoki wong tu, “Siapo namo kau?” Uji dio, “Aku ni Legiun, karno jumla kami ni banyak.” (Legiun iola kelompok tentaro Roma yang jumlanyo beribu-ribu tentaro.)

![](https://cdn.door43.org/obs/jpg/360px/obs-en-32-07.jpg)

Setan-setan tu mintak ke Yesus, “Jangan ngoser kami dari daera ni!” Di sano ado segrombolan babi lagi makan di boket parak tempat tu. Laju, setan-setan tu mintak ke Yesus, “Tolong kongkon bae kami masok ke dalem babi-babi tu!” Uji Yesus, “Pegila!”

![](https://cdn.door43.org/obs/jpg/360px/obs-en-32-08.jpg)

Laju setan-setan tu metu dari wong tu tros masok ke dalem babi-babi tu. Babi-babi tu belari noroni tebeng yang curam tros nyampak ke dalem laot sampe tenggelem. Kiro-kiro ado 2.000 babi di grombolan tu.

![](https://cdn.door43.org/obs/jpg/360px/obs-en-32-09.jpg)

Pas wong-wong yang ngorosi babi-babi tu nyingok apo yang la tejadi, dio wong lari tros ngenjoktauke ke sloro wong apo yang la dilakuke Yesus. Sloro wong dateng dari kota tros nyingok wong yang tadinyo kemasokan setan. Dio lagi dodok, la makek baju, tros sikapnyo la cak wong waras.

![](https://cdn.door43.org/obs/jpg/360px/obs-en-32-10.jpg)

Wong-wong tu ketakotan tros mintak Yesus ontok pegi. Laju Yesus naek ke prau tros besiap nak pegi. Lanang yang kemasokan tadi mintak supayo melok pegi samo Yesus.

![](https://cdn.door43.org/obs/jpg/360px/obs-en-32-11.jpg)

Tapi Yesus ngomong ke dio, “Dak usala. Balekla ke ruma kau tros enjoktauke ke kawan samo kluargo kau apo yang la dilakuke Allah ontok kau, karno Dio la ngaseani kau.”

![](https://cdn.door43.org/obs/jpg/360px/obs-en-32-12.jpg)

Laju wong tu pegi tros dienjoktaukenyo ke wong-wong apo yang la dilakuke Yesus ke dio. Setiap wong yang denger critonyo keheranan tros ngeraso takjob.

![](https://cdn.door43.org/obs/jpg/360px/obs-en-32-13.jpg)

Yesus balek ke sebrang dari danau Galilea. Ado banyak yang bekompol di sekeleleng-Nyo tros bedesekan di parak Yesus. Di keromonan tu ado sikok betino yang la ngalami pendarahan selamo duo belas taon. Betino tu la ngabeske sloro duetnyo ontok ngebayar dokter supayo pacak sembo, tapi keadaannyo tamba para.

![](https://cdn.door43.org/obs/jpg/360px/obs-en-32-14.jpg)

Betino tu denger amen Yesus la nyemboke banyak wong saket tros meker cak ini, “Aku yaken amen aku pacak nyentu baju Yesus bae, aku bakal disemboke jugo!” Dio maraki Yesus tros nyentu baju-Nyo. Tibo-tibo, pas dio nyentu baju Yesus, pendarahannyo brenti!

![](https://cdn.door43.org/obs/jpg/360px/obs-en-32-15.jpg)

Yesus langsong sadar amen ado kuaso yang metu dari diri-Nyo. Laju Yesus bebalek tros betanyo, “Siapo yang nyentu Aku?” Uji mored-mored-Nyo, “Tuan, banyak wong yang ado di parak Kau jugo besenggolan samo Kau. Cak mano Kau pacak nanyo, ‘Siapo yang nyentu Aku?’”

![](https://cdn.door43.org/obs/jpg/360px/obs-en-32-16.jpg)

Betino tu belotot di adepan Yesus. Dio gemeteran tros takot. Laju betino tu ngenjoktauke ke Dio apo yang dio lakuke, jugo amen dio la disemboke. Uji Yesus, “Iman kau la nyemboke kau. Pegila dengen damai.”

*Sikok crito Alkitab dari: Matius 8:28-34; 9:20-22; Markus 5:1-20; 5:24b-34; Lukas 8:26-39; 8:42b-48*

## 33. Crito Pasal Petani

https://openbiblestories.org/l/mui/story-33/

![](https://cdn.door43.org/obs/jpg/360px/obs-en-33-01.jpg)

Kapan ari, Yesus ado di pengger laot, lagi ngajar keromonan wong banyak. Keromonan wong tu maken banyak sampe-sampe Yesus naek ke pocok prau tros mulai ngomong dari sano.

![](https://cdn.door43.org/obs/jpg/360px/obs-en-33-02.jpg)

Yesus ngomong cak ini. “Ado sikok petani lagi nanem biji. Pas dio lagi nyebarke biji tu dengen tangannyo, sebagean dari biji tu campak ke jalan. Laju datengla borong, tros dimakannyo galo-galo biji yang nyampak di jalan tadi.”

![](https://cdn.door43.org/obs/jpg/360px/obs-en-33-03.jpg)

“Sebagean dari biji-biji laennyo nyampak di tempat yang bebatu, yang dak banyak tananyo. Biji yang nyampak di tempat bebatu tu tombo cepet nian. Tapi pas matoari tembol tros jadi panas, taneman tu jadi layu tros mati, karno akarnyo idak masok nian ke dalem tana.”

![](https://cdn.door43.org/obs/jpg/360px/obs-en-33-04.jpg)

“Sebagean dari biji-biji laennyo lagi campak di tenga-tenga semak yang beduri. Biji tu tejepet duri, jadi dak pacak ngaselke bua.”

![](https://cdn.door43.org/obs/jpg/360px/obs-en-33-05.jpg)

“Sebagean dari biji-biji laennyo campak di tana yang sobor. Biji tu tombo tros ngaselke bua 30, 60, sampe 100 kali lipet dari yang la ditanem. Siapo yang punyo kopeng, biarla dio denger!”

![](https://cdn.door43.org/obs/jpg/360px/obs-en-33-06.jpg)

Crito ni ngebingungke mored-mored Yesus. Tros Dio ngejelaske cak ni, “Biji tu iola Pirman Allah. Jalan tu pecak wong-wong yang ngedengerke Pirman Allah, tapi idak ngerti. Jadi Ebles ngambek pirman tu dari dio wong.”

![](https://cdn.door43.org/obs/jpg/360px/obs-en-33-07.jpg)

“Tana yang bebatu tu pecak wong yang denger Pirman Allah tros nrimonyo dengen seneng ati. Tapi pas dio ngalami kesaroan, apo pas waktu ado penganiayoan, dio mondor. Ini tejadi karno Pirman Allah tu dak beakar di dalem ati dio wong.”

![](https://cdn.door43.org/obs/jpg/360px/obs-en-33-08.jpg)

“Tana yang banyak semak duri tu pecak wong yang denger Pirman Allah tros pecayo. Tapi seereng bejalannyo waktu, kase dio wong ke Allah tealang samo kekuateran, kekayoan, samo kenikmatan edop. Akibatnyo ajaran yang dio wong denger dak ngaselke bua.”

![](https://cdn.door43.org/obs/jpg/360px/obs-en-33-09.jpg)

“Tapi tana yang sobor tu iola wong-wong yang denger Pirman Allah, pecayo, tros ngaselke bua.”

*Sikok crito Alkitab dari: Matius 13:1-8, 18-23; Markus 4:1-8, 13-20; Lukas 8:4-15*

## 34. Yesus Ngajar Crito-crito Laennyo

https://openbiblestories.org/l/mui/story-34/

![](https://cdn.door43.org/obs/jpg/360px/obs-en-34-01.jpg)

Yesus nyritoke banyak crito laennyo pasal Kerajaan Allah. Uji Yesus, “Kerajaan Allah tu pecak biji sawi yang ditanem di ladang. Pas mase bebentok biji, sawi tu biji yang paleng kecik dari segalo jenis biji.”

![](https://cdn.door43.org/obs/jpg/360px/obs-en-34-02.jpg)

“Tapi pas biji tu la tombo, biji tu agek jadi yang paleng besak dari sloro taneman yang ado di kebon, lumayan besak sampe-sampe borong-borong dateng tros buat sarangnyo di cabang-cabangnyo.”

![](https://cdn.door43.org/obs/jpg/360px/obs-en-34-03.jpg)

Yesus nyritoke crito yang laen jugo, “Kerajaan Allah pecak ragi yang dicamporke ke dalem adonan roti sampe ragi tu nyatu ke sloro adonan tadi.”

![](https://cdn.door43.org/obs/jpg/360px/obs-en-34-04.jpg)

“Kerajaan Allah jugo pecak harto yang tependem di kebon. Pas ado wong yang nemukenyo, dikoborkenyo lagi. Dengen ati yang seneng, dio pegi nyualke galo-galo yang dio punyo tros dibelinyo kebon tadi.”

![](https://cdn.door43.org/obs/jpg/360px/obs-en-34-05.jpg)

“Kerajaan Allah jugo pecak mutiaro yang sempurno dengen hargo yang mahal. Pas pedagang mutiaro nemukenyo, dio ngejual sloro hartonyo ontok beli mutiaro tu.”

![](https://cdn.door43.org/obs/jpg/360px/obs-en-34-06.jpg)

Tros Yesus nyritoke crito laen jugo. Crito ni ontok wong-wong yang pecayo amen amal dio wong tu pacak nyelametke dio wong, tros galak ngino wong laen. Uji-Nyo, “Ado duo ikok wong pegi ke Ruma Allah ontok bedoa. Sala sikoknyo iola tukang pajak, tros yang laen tu pemempen agama.”

![](https://cdn.door43.org/obs/jpg/360px/obs-en-34-07.jpg)

“Pemempen agama tu bedoa cak ini, ‘Mokase Allah amen aku bukan wong penduso pecak wong-wong laen, pecak perampok, wong yang dak adel, pejina, jugo bukan pecak tukang pajak ni.’"

![](https://cdn.door43.org/obs/jpg/360px/obs-en-34-08.jpg)

"‘Aku puaso duo kali setiap minggunyo, tros aku ngenjokke sepolo persen dari apo yang aku punyo.’”

![](https://cdn.door43.org/obs/jpg/360px/obs-en-34-09.jpg)

“Tapi tukang pajak tu tegak di tempat yang jao, tros matonyo jugo dak nyingok ke langet, malahan dio ngeboki dadonyo tros bedoa cak ni, ‘Allah, kesianila aku, wong yang beduso ni.’”

![](https://cdn.door43.org/obs/jpg/360px/obs-en-34-10.jpg)

Abes tu uji Yesus, “Aku omongi ke kamu, tukang pacak tula yang didenger jugo dibenerke Allah. Tapi Allah dak seneng samo doa pemempen agama tu. Allah bakal ngerendake wong yang sombong, jugo bakal ngangkat wong yang ngerendake diri.”

*Sikok crito Alkitab dari: Matius 13:31-33, 44-46; Markus 4:30-32; Lukas 13:18-21; 18:9-14*

## 35. Crito Pasal Ubak yang Baek

https://openbiblestories.org/l/mui/story-35/

![](https://cdn.door43.org/obs/jpg/360px/obs-en-35-01.jpg)

Kapan ari, Yesus ngajar banyak tukang pajak samo banyak wong yang beduso laennyo yang la bekompol ontok ngedengerke Dio.

![](https://cdn.door43.org/obs/jpg/360px/obs-en-35-02.jpg)

Beberapo pemempen agama yang jugo ado di sano jingok Yesus ni ngebeken wong-wong beduso tu pecak kawan dewek. Pasal tu ngebekn dio wong saleng berotokan. Laju Yesus nyritoke crito ni.

![](https://cdn.door43.org/obs/jpg/360px/obs-en-35-03.jpg)

“Ado sikok ubak yang punyo duo ikok anak lanang. Anak yang keduo ni ngomong ke ubaknyo cak ini, ‘Bak, aku nak waresan aku sekarang!’ Jadi ubaknyo ni ngebageke sloro hartonyo ontok keduo anaknyo tu."

![](https://cdn.door43.org/obs/jpg/360px/obs-en-35-04.jpg)

“Laju anak yang keduonyo ni ngompolke galo-galo yang dio punyo, tros pegi ke tempat yang jao, tros ngambor-amborke duetnyo dalem keedopannyo yang banyak duso."

![](https://cdn.door43.org/obs/jpg/360px/obs-en-35-05.jpg)

“Abes tu tejadila musiba kelaperan yang besak di tempat tu, tros dio dak katek duet ontok beli makanan. Dio nrimo sikok-sikoknyo gawean yang dio temuke. Gaweannyo tu ngenjok makan babi. Dio jadi sengsaro jugo kelaperan sampe dio nak makan makanan babi tu.’”

![](https://cdn.door43.org/obs/jpg/360px/obs-en-35-06.jpg)

“Akernyo anak yang keduo tu ngomong ke dirinyo dewek, ‘Apola yang lagi aku gaweke ni? Babu-babu di tempat ubak aku bae punyo makanan yang banyak, tapi aku di sini kelaperan. Aku nak balek ke ubak aku tros mintak supayo aku pacak jadi sala sikok babunyo.’”

![](https://cdn.door43.org/obs/jpg/360px/obs-en-35-07.jpg)

“Sementaro anaknyo yang keduo ni mase jao, ubaknyo ni la nyingok dio, tros ngeraso kesian samo dio. Jadi ubaknyo belari ke ara anaknyo tros dipeloknyo jugo diciumnyo.”

![](https://cdn.door43.org/obs/jpg/360px/obs-en-35-08.jpg)

“Uji anak yang keduo ni, ‘Bak, aku la beduso samo Allah jugo samo Ubak. Aku ni dak pantes lagi jadi anak Ubak. Biarla aku jadi babu Ubak bae.’”

![](https://cdn.door43.org/obs/jpg/360px/obs-en-35-09.jpg)

“Tapi ubaknyo ngomong ke sala sikok babunyo, ‘Gancangla pegi! Gawakke baju yang bagus tros pakekke ke anak aku! Pasangkela cencen di jarinyo jugo pasangke selop di kakinyo. Abes tu sembelela anak sapi yang sempurno, tros kito beken pesta. Soalnyo anak aku yang la mati, sekarang dio edop lagi! Dio ilang, tapi sekarang la ditemuke lagi!’”

![](https://cdn.door43.org/obs/jpg/360px/obs-en-35-10.jpg)

“Laju dloro wong di tempat tu beseneng-seneng. Dak lamo tu, anaknyo yang petamo ni balek dari kebon. Dio denger suaro musik tros jingok wong-wong tu lagi bejoget, laju betanyo apo yang tejadi.”

![](https://cdn.door43.org/obs/jpg/360px/obs-en-35-11.jpg)

“Pas dio tau amen ado pesta karno adeknyo la balek, dio jadi mara nian tros dak galak masok ke jero ruma. Jadi ubaknyo ni metu tros ngajak dio ontok melok bepesta, tapi dio ni tetep dak galak.”

![](https://cdn.door43.org/obs/jpg/360px/obs-en-35-12.jpg)

“Ujinyo, ‘Selamo ni aku la stio begawe ontok Ubak. Aku dak perna dak noroti Ubak, tapi sikok kambeng kecik bae Ubak dak perna enjokke ke aku supayo aku pacak bepesta samo kawan-kawan aku. Tapi pas anak Ubak yang sikok tu ngambor-ngambori duet Ubak ontok pasal-pasal yang beduso, Ubak nyembeleke anak sapi yang sempurno ontok dio!’”

![](https://cdn.door43.org/obs/jpg/360px/obs-en-35-13.jpg)

"Jawab ubaknyo, ‘Anakku, kau tu ado samo aku teros. Sloro yang aku punyo ni jugo punyo kau. Tapi kito pantes beken pesta ontok adek kau, soalnyo adek kau la mati, tapi sekarang edop lagi. Dio ilang, sekarang la ditemuke lagi!’”

*Sikok crito Alkitab dari: Lukas 15:11-32*

## 36. Yesus Beruba Wujud

https://openbiblestories.org/l/mui/story-36/

![](https://cdn.door43.org/obs/jpg/360px/obs-en-36-01.jpg)

Kapan ari, Yesus gawak tigo ikok mored-Nyo besamo Dio: Petros, Yakobus, samo Yahya. (Yahya yang ini bukan wong yang ngebaptes Yesus.) Dio wong naek ke gonong yang tinggi ontok bedoa.

![](https://cdn.door43.org/obs/jpg/360px/obs-en-36-02.jpg)

Pas Yesus lagi bedoa, rai Yesus ni beruba jadi terang pecak matoari. Tros baju-Nyo jugo jadi pote pecak cahayo, lebe pote daripada yang pacak dibeken ole wong di bumi ni.

![](https://cdn.door43.org/obs/jpg/360px/obs-en-36-03.jpg)

Abes tu, Nabi Musa samo Nabi Elias moncol. Nabi-nabi ni edop ratosan taon sebelom kejadian ni. Dio wong ngomong ke Yesus pasal kematian-Nyo, yang dak lamo lagi bakal tejadi di Yerusalem.

![](https://cdn.door43.org/obs/jpg/360px/obs-en-36-04.jpg)

Pas Musa samo Elias ni lagi ngomong samo Yesus, uji Petros ke Yesus, “Bagus nian kito ado di sini. Payo kito beken tigo tempat tinggal, sikok ontok Kau, sikok ontok Musa, tros sikok ontok Elias.” Petros idak tau apo yang diomongkenyo.

![](https://cdn.door43.org/obs/jpg/360px/obs-en-36-05.jpg)

Pas Petros ni lagi ngomong, ado awan yang terang nian toron tros notopi dio wong. Tros ado suaro dari awan tu, “Inila Anak Aku yang Aku kasehi. Aku seneng samo Dio. Dengerkela Dio.” Tigo ikok mored Yesus ni ketakotan nian tros nyampak ke tana.

![](https://cdn.door43.org/obs/jpg/360px/obs-en-36-06.jpg)

Tros Yesus nyentu dio wong tros ngomong cak ini, “Dak usa takot. Bangunla.” Pas dio wong nyingok di sekitar situ, dio wong dak nyingok siapo-siapo kecuali Yesus.

![](https://cdn.door43.org/obs/jpg/360px/obs-en-36-07.jpg)

Yesus samo tigo mored-Nyo toron dari gonong. Laju Yesus ngomong ke dio wong, “Dak usa dulu ngomong ke siapo-siapo pasal apo yang tejadi di sini. Dak lamo lagi Aku bakal mati tros bakal dibangketke. Abes tu kamu bole nyritokenyo ke wong-wong.”

*Sikok crito Alkitab dari: Matius 17:1-9; Markus 9:2-8; Lukas 9:28-36*

## 37. Yesus Ngebangketke Lajarus dari Kematian

https://openbiblestories.org/l/mui/story-37/

![](https://cdn.door43.org/obs/jpg/360px/obs-en-37-01.jpg)

Kapan ari, Yesus nrimo pesen amen Lajarus saket para. Lajarus ni samo keduo dolor betinonyo, Mariam samo Marta bekawan baek samo Yesus. Pas Yesus tau kabar ni, Dio ngomong cak ni, “Penyaket ni dak bakal slesai dengen kematian, tapi agek gawak kemulioan ontok Allah.” Yesus sayang samo kawan-kawan-Nyo, tapi Dio nunggu di tempat-Nyo selamo duo ari.

![](https://cdn.door43.org/obs/jpg/360px/obs-en-37-02.jpg)

Pas la liwat duo ari, Dio ngomong ke mored-mored-Nyo, “Payo kito balek ke Yudea.” Uji mored-mored-Nyo, “Tapi Tuan, tempo ari tu kan wong-wong di sano nak ngebunu Kau!” Uji Yesus, “Lajarus, dolor kito tu, la tetedok, tros Aku mesti ngebangunkenyo.”

![](https://cdn.door43.org/obs/jpg/360px/obs-en-37-03.jpg)

Uji mored-mored-Nyo, “Tuan, amen Lajarus lagi tedok, dio agek sembo dewek.” Laju Yesus ngomong teros terang, “Lajarus la mati. Aku seneng kito dak di situ pas dio mati, supayo kamu bakal pecayo samo Aku.”

![](https://cdn.door43.org/obs/jpg/360px/obs-en-37-04.jpg)

Pas Yesus sampe di kampong halaman Lajarus, Lajarus ni la mati selamo empat ari. Marta pegi nemui Yesus tros ngomong cak ini, “Tuan, amen Kau ado di sini, dolor aku dak bakal mati. Tapi aku pecayo Allah pasti ngenjokke apo bae yang Kau mintak dari-Nyo.”

![](https://cdn.door43.org/obs/jpg/360px/obs-en-37-05.jpg)

Uji Yesus, “Akula Kebangketan jugo Keedopan. Siapo bae yang pecayo samo Aku bakal edop, mugola dio mati. Setiap wong yang pecayo samo Aku dak bakal perna mati. Kau pecayo dak ini?” Uji Marta, “Yo, Tuan! Aku pecayo Kau iola Almasih, Anak Allah.”

![](https://cdn.door43.org/obs/jpg/360px/obs-en-37-06.jpg)

Abes tu Mariam sampe. Dio nyampakke dirinyo di kaki Yesus tros ngomong cak ini, “Tuan, amen Kau ado di sini, dolor aku dak bakal mati.” Yesus nanyo cak ini, “Kamu tarok di mano Lazarus?” Uji dio wong, “Di koboran. Dateng tros jingokla.” Laju Yesus nangis.

![](https://cdn.door43.org/obs/jpg/360px/obs-en-37-07.jpg)

Koboran tu iola goa yang pintunyo ditotop batu. Pas Yesus sampe di koboran tu, Yesus ngomong ke dio wong, “Golengke batu tu.” Tapi Marta ngomong cak ini, “Dio tu la mati selamo empat ari. Pastila dio la bosok.”

![](https://cdn.door43.org/obs/jpg/360px/obs-en-37-08.jpg)

Uji Yesus, “Bukannyo la Aku enjok tau ke kamu amen kamu bakal nyingok kemulioan Allah asak kamu pecayo samo Aku?” Jadi dio wong ngegolengke batu tu.

![](https://cdn.door43.org/obs/jpg/360px/obs-en-37-09.jpg)

Laju Yesus nyingok ke surgo tros ngomong cak ni, “Ubak, mokase karno Kau la dengerke Aku. Aku tau Kau teros dengerke Aku, tapi Aku ngomong ini demi sloro wong yang tegak di sini, supayo dio wong pecayo amen Kaula yang ngotos Aku.” Laju Yesus mekek, “Lajarus, metula!”

![](https://cdn.door43.org/obs/jpg/360px/obs-en-37-10.jpg)

Jadi Lazarus metu! Dio mase tebongkos dengen kaen kapan. Yesus ngomong ke dio wong, “Rewangi dio ngelepasi kaen kapan tu!” Banyak wong Yahudi pecayo samo Yesus karno keajaeban ni.

![](https://cdn.door43.org/obs/jpg/360px/obs-en-37-11.jpg)

Tapi pemempen-pemempen agama Yahudi ni serek, jadi dio wong bekompol ontok ngerencanoke cakmano supayo pacak ngebunu Yesus samo Lajarus.

*Sikok crito Alkitab dari: Yahya 11:1-46*

## 38. Yesus Dihianati

https://openbiblestories.org/l/mui/story-38/

![](https://cdn.door43.org/obs/jpg/360px/obs-en-38-01.jpg)

Tiap taon, wong Yahudi ngerayoke Ari Rayo Paska. Ini iola perayoan ontok nginget kejadian cakmano Allah nyelametke lelohor wong Israel dari pebudakan di Mesir beabad-abad yang lalu. Kiro-kiro tigo taon abes petamo kalinyo Yesus bekotba samo ngajar di depan umum, Yesus ngenjoktauke mored-mored-Nyo amen Dio nak ngerayoke Paska taon ni samo dio wong di Yerusalem, jugo amen Dio bakal dibunu di sano.

![](https://cdn.door43.org/obs/jpg/360px/obs-en-38-02.jpg)

Sala sikok mored Yesus benamo Yudas. Dio ni tugasnyo ngorosi duetnyo dio wong, tapi dio ni mato duetan tros sereng malengi duet tu. Pas Yesus samo mored-mored-Nyo la sampe di Yerusalem, Yudas pegi ke tempat pemempen-pemempen Yahudi. Tros dio nawarke ontok nyerake Yesus ke dio wong amen dio wong ngenjok duet. Dio tau amen pemempen-pemempen Yahudi tu dak trimo amen Yesus tu iola Almasih tros berencano nak ngebunu Dio.

![](https://cdn.door43.org/obs/jpg/360px/obs-en-38-03.jpg)

Pemempen-pemempen Yahudi, yang dipempen ole imam besak, bayar ke Yudas tigo polo kepeng perak ontok ngianati Yesus. Kejadian ini samo pecak apo yang la dinubuatke nabi-nabi. Yudas stojo, diambeknyo duet tu, tros pegi. Dio mulai nyari kesempetan ontok bantu dio wong ningkep Yesus.

![](https://cdn.door43.org/obs/jpg/360px/obs-en-38-04.jpg)

Di Yerusalem, Yesus ngerayoke Ari Rayo Paska samo mored-mored-Nyo. Pas makan makanan Paska, Yesus ngambek roti sambel dibela-belainyo. Uji-Nyo, “Ambekla, tros makanla, ini badan Aku, yang la Aku enjokke ontok kamu. Lakuke ini ontok nginget Aku.” Dengen caro ini, Yesus ngomong amen badan-Nyo bakal dikurbanke ontok dio wong.

![](https://cdn.door43.org/obs/jpg/360px/obs-en-38-05.jpg)

Abes tu Dio ngambek cangker, uji-Nyo, “Minumla ini. Ini ni dara Aku dari Pejanjian Baru yang dituangke ontok pengamponan duso. Lakuke ni ontok nginget Aku setiap kali kamu minum tu.”

![](https://cdn.door43.org/obs/jpg/360px/obs-en-38-06.jpg)

Uji Yesus ke mored-mored-Nyo, “Sala sikok dari kamu bakal ngianati Aku.” Mored-mored tu tekejot. Dio wong betanyo-tanyo siapo yang bakal cak itu. Uji Yesus, “Wong yang Aku enjok sepotong rotinila yang bakal ngianati Aku.” Abes tu Dio ngenjok roti tu ke Yudas.

![](https://cdn.door43.org/obs/jpg/360px/obs-en-38-07.jpg)

Abes Yudas ngambek roti tu, dio kerasokan Ebles. Yudas pegi ontok ngebantu pemempen-pemempen Yahudi ningkep Yesus. Waktu tu ari la malem.

![](https://cdn.door43.org/obs/jpg/360px/obs-en-38-08.jpg)

Abes makan, Yesus samo mored-mored-Nyo bejalan ke Boket Jaitun. Uji Yesus, “Malem ini kamu bakal ninggalke Aku dewekan. Ado tetoles, ‘Aku bakal ngebok Pengoros domba tu, tros domba-domba tu bakal tepencar-pencar.’”

![](https://cdn.door43.org/obs/jpg/360px/obs-en-38-09.jpg)

Uji Petros, “Mugola amen wong laen ninggalke Kau, aku dak bakal!” Laju, uji Yesus ke Petros, “Ebles nak ngedapetke kamu galo, tapi aku la bedoa ontok kau, Petros, supayo iman kau dak bakal lontor. Mugola cak tu, malem ni, sebelom ayam bekokok, kau bakal nyangkal ngenal Aku sebanyak tigo kali.”

![](https://cdn.door43.org/obs/jpg/360px/obs-en-38-10.jpg)

Uji Petros lagi, “Mala amen aku haros mati, aku dak bakal perna nyangkal Kau!” Sloro mored-mored yang laen jugo ngomong cak itu.

![](https://cdn.door43.org/obs/jpg/360px/obs-en-38-11.jpg)

Tros Yesus pegi samo mored-mored-Nyo ke sikok tempat namonyo Getsemani. Yesus ngongkon mored-mored-Nyo bedoa supayo dio wong dak masok ke pencuboan. Abes tu Yesus pegi ontok bedoa dewekan.

![](https://cdn.door43.org/obs/jpg/360px/obs-en-38-12.jpg)

Yesus bedoa tigo kali, “Ubak, amen pacak, tolong nian jangan Kau biarke Aku minum cangker pendritoan ni. Tapi amen dak katek caro laen ontok ngapos duso-duso manusio, biarla kendak Kau bae yang tejadi.” Yesus bingsal nian, tros kringet-Nyo pecak tetesan dara. Laju Allah ngotos sikok malekat ontok nguatke Dio.

![](https://cdn.door43.org/obs/jpg/360px/obs-en-38-13.jpg)

Abes tiap kali bedoa, Yesus balek ke mored-mored-Nyo, tapi dio wong lagi tedok. Pas Dio balek ontok ketigo kalinyo, Yesus ngomong cak ni, uji-Nyo, “Bangon! Dio yang ngianati Aku la ado di sini.”

![](https://cdn.door43.org/obs/jpg/360px/obs-en-38-14.jpg)

Yudas dateng besamo pemempen-pemempen Yahudi, tentaro, jugo segrombolan wong. Dio wong gawak pedang samo pentongan. Yudas dateng ke Yesus, ujinyo, “Salam, guru,” tros nyium Yesus. Ini ni iola tando ontok pemempen-pemempen Yahudi supayo tau siapo yang haros ditingkep. Tros uji Yesus, “Yudas, apo kau ni ngianati Aku makek ciuman?”

![](https://cdn.door43.org/obs/jpg/360px/obs-en-38-15.jpg)

Pas prajoret-prajoret ningkep Yesus, Petros metuke pedangnyo tros motong kopeng babu imam besak tu. Uji Yesus, “Masokke pedang tu! Aku pacak mintak Ubak Aku ngeremke pasokan malekat ontok ngebela Aku. Tapi Aku haros norot samo Ubak Aku.” Abes tu Yesus nyemboke kopeng wong tu. Pas Yesus ditingkep, sloro mored ngelarike diri.

*Sikok crito Alkitab dari: Matius 26:14-56; Markus 14:10-50; Lukas 22:1-53; Yahya 12:6; 18:1-11*

## 39. Yesus Diadeli

https://openbiblestories.org/l/mui/story-39/

![](https://cdn.door43.org/obs/jpg/360px/obs-en-39-01.jpg)

Pas tu tenga dalu. Yesus digawak ole prajoret-prajoret ke ruma imam besak ontok ditanyo-tanyoi. Petros meloki jao di belakang. Pas Yesus digawak ke jero ruma, Petros nunggu di jabo tros ngangetke badannyo di parak api unggun.

![](https://cdn.door43.org/obs/jpg/360px/obs-en-39-02.jpg)

Di jero ruma tu, pemempen-pemempen Yahudi gawak banyak saksi palsu ontok ngadeli Yesus. Tapi, omongan dio wong ni katek yang samo. Laju pemempen-pemempen Yahudi dak pacak ngeboktike amen Yesus besala. Yesus dak ngomong apo-apo.

![](https://cdn.door43.org/obs/jpg/360px/obs-en-39-03.jpg)

Akernyo, imam besak tu masati Yesus tros ngomong cak ni, ujinyo, “Enjoktaukela samo kami, iyo nian apo Kau ni Almasih, Anak Tuhan yang Edop?”

![](https://cdn.door43.org/obs/jpg/360px/obs-en-39-04.jpg)

Uji Yesus, “Yo, tros kau bakal jingok Aku dodok samo Allah tros dateng dari surgo.” Sakeng maranyo imam besak tu sampe-sampe dio ngoyakke bajunyo, pekeknyo, “Kito dak boto saksi lagi! Kamu la denger dewek apo yang Dio omongi amen Dio tu iola Anak Allah. Jadi apo kepotosan kamu?”

![](https://cdn.door43.org/obs/jpg/360px/obs-en-39-05.jpg)

Uji sloro pemempen Yahudi tu, “Dio pantes dihokom mati!” Laju dio wong tu notop mato-Nyo, ngeludai Dio, ngeboki Dio, jugo ngino Dio.

![](https://cdn.door43.org/obs/jpg/360px/obs-en-39-06.jpg)

Sementaro tu pas Petros nunggu di jabo ruma, ado babu betino nyingok Petros, ujinyo, “Kau jugo besamo-samo Yesus!” Petros nyangkalnyo. Abes tu, betino laen ngomong cak itu jugo, Petros nyangkal lagi. Akernyo, banyak wong ngomong, “Kami tau kau besamo-samo Yesus karno kau beduo ni beasal dari Galilea.”

![](https://cdn.door43.org/obs/jpg/360px/obs-en-39-07.jpg)

Petros besumpa, ujinyo, “Kironyo Allah ngotok aku amen aku kenal Wong tu!” Pas tu ayam bekokok, tros Yesus nole nyingoki Petros.

![](https://cdn.door43.org/obs/jpg/360px/obs-en-39-08.jpg)

Petros metu tros nangis sede nian. Sementaro, tu Yudas, pengianat tu, nyingok amen pemempen-pemempen Yahudi la ngenjok hokoman mati ke Yesus. Dio jadi sede nian tros pegi ontok bunu diri.

![](https://cdn.door43.org/obs/jpg/360px/obs-en-39-09.jpg)

Besoknyo pagi-pagi nian, pemempen-pemempen Yahudi tu gawak Yesus ke Gubernur Romawi, Pilatus. Dio wong ngarep supayo Pilatus ngenjok hokoman mati ontok Yesus. Pilatus nanyo ke Yesus, ujinyo, “Iyo nian apo Kau ni Rajo wong Yahudi?”

![](https://cdn.door43.org/obs/jpg/360px/obs-en-39-10.jpg)

Uji Yesus, “Kau la ngomongke cak tu, tapi kerajaan Aku bukan kerajaan duniawi. Amen kerajaan Aku dari dunio, babu-babu Aku bakal bejuang ontok Aku. Tapi Aku dateng ke bumi ontok ngenjoktauke kebeneran pasal Allah. Sloro wong yang cinto dengen kebeneran ngedengerke Aku.” Uji Pilatus, “Apo dio kebeneran?”

![](https://cdn.door43.org/obs/jpg/360px/obs-en-39-11.jpg)

Abes ngomong samo Yesus, Pilatus pegi ke keromonan wong tu, ujinyo, “Aku dak nemuke kesalahan di wong ni.” Tapi sloro wong samo pemempen-pemempen Yahudi jeret, uji dio wong, “Salebke Dio!” Uji Pilatus, “Dio dak besala.” Tapi dio wong mala jeret lebe keras. Tros uji Pilatus ontok ketigo kalinyo, “Dio dak besala!”

![](https://cdn.door43.org/obs/jpg/360px/obs-en-39-12.jpg)

Pilatus ni takot bakal tejadi kerusuan, jadi dio stojo bae ngongkon pasokannyo supayo nyalebke Yesus. Tentaro-tentaro Romawi nyamboki Yesus, makekke Dio juba kerajaan samo mahkota yang tebuat dari duri. Tros dio wong jugo ngino Yesus, uji dio wong, “Jingok, inila rajo wong Yahudi!”

*Sikok crito Alkitab dari: Matius 26:57-27:26; Markus 14:53-15:15; Lukas 22:54-23:25; Yahya 18:12-19:16*

## 40. Yesus Disalebke

https://openbiblestories.org/l/mui/story-40/

![](https://cdn.door43.org/obs/jpg/360px/obs-en-40-01.jpg)

Abes prajoret-prajoret tu ngino Yesus, dio wong gawak Dio pegi ontok disalebke. Dio wong ngongkon Yesus mekol saleb-Nyo dewek.

![](https://cdn.door43.org/obs/jpg/360px/obs-en-40-02.jpg)

Prajoret-prajoret tu gawak Yesus ke tempat yang disebot boket “Tengkorak”, tros tangan samo kaki-Nyo Yesus dipaku di kayu saleb. Tapi uji Yesus, “Ubak, amponila dio wong, karno dio wong ni dak tau apo yang dio wong lakuke.” Pilatus ngongkon wong ontok masang tando bacoan di pocok kepalak Yesus, yang tetoles “Rajo wong Yahudi.”

![](https://cdn.door43.org/obs/jpg/360px/obs-en-40-03.jpg)

Prajoret-prajoret beken goncang undi ontok ngebageke baju Yesus. Kejadian yang dio wong lakuke ini samo pecak yang la diwahyuke, “Dio wong ngebage-bageke pakean Aku, tros ngebeken undian ontok baju Aku.”

![](https://cdn.door43.org/obs/jpg/360px/obs-en-40-04.jpg)

Yesus disalebke di antaro duo perampok. Sala sikoknyo ngino Yesus, tapi perampok sikoknyo lagi ngomong, ujinyo “Apo kau dak takot samo Allah? Kito ni besala, tapi wong tu idak.” Abes tu dio ngomong samo Yesus, ujinyo, “Tolong ingetla aku di kerajaan Kau.” Uji Yesus, “Ari ni, kau bakal ado besamo Aku di surgo.”

![](https://cdn.door43.org/obs/jpg/360px/obs-en-40-05.jpg)

Pemempen-pemempen Yahudi samo wong-wong dalem keromonan tu ngino Yesus, uji dio wong, “Amen Kau Anak Allah, toronla dari saleb tu tros slametkela diri Kau, supayo kami pecayo samo Kau!”

![](https://cdn.door43.org/obs/jpg/360px/obs-en-40-06.jpg)

Abes tu, langet di sloro daera tu jadi gelep nian, mugola mase tenga ari. Langet tetep bae gelep dari tenga ari selamo tigo jam.

![](https://cdn.door43.org/obs/jpg/360px/obs-en-40-07.jpg)

Tros Yesus mekek, “La dem! Ubak, Aku nyerake nyawo Aku ke Kau.” Abes tu Dio nondokke kepalak-Nyo tros nyerake nyawo-Nyo. Pas Dio mati, tejadi gempa bumi, tros hordeng besak di Ruma Allah yang misake hadirat Allah dari manusio tebela duo, dari pocok sampe ke bawa.

![](https://cdn.door43.org/obs/jpg/360px/obs-en-40-08.jpg)

Liwat kematian-Nyo, Yesus bukak jalan ontok wontok manusio supayo dateng ke Allah. Pas prajoret yang ngejago Yesus jingok sloro kejadian tu, uji dio, “Wong ni pasti dak besala. Dio ni pasti Anak Allah.”

![](https://cdn.door43.org/obs/jpg/360px/obs-en-40-09.jpg)

Abes tu Yusup samo Nikodemus, duo pemempen Yahudi yang pecayo amen Yesus ni Almasih, mintak mayat Yesus ke Pilatus. Dio wong ngebedong badan-Nyo makek kaen tros ngobori-Nyo di jero koboran yang digali di boket batu. Abes tu dio wong notop pintu koboran tu dengen batu yang besak nian.

*Sikok crito Alkitab dari: Matius 27:27-61; Markus 15:16-47; Lukas 23:26-56; Yahya 19:17-42*

## 41. Allah Bangketke Yesus dari Kematian

https://openbiblestories.org/l/mui/story-41/

![](https://cdn.door43.org/obs/jpg/360px/obs-en-41-01.jpg)

Abes prajoret-prajoret tu nyalebke Yesus, pemempen-pemempen Yahudi yang dak pecayo tu ngomong ke Pilatus. Uji dio wong, “Yesus,Tukang ngotaki tu, ngomongke amen Dio bakal bangket dari kematian pas ari ketigo. Koboran tu haros dijago nian supayo mayat-Nyo dak diambek ole mored-mored-Nyo, tros abes tu ngomong amen Dio la bangket dari antaro wong mati.”

![](https://cdn.door43.org/obs/jpg/360px/obs-en-41-02.jpg)

Uji Pilatus, “Gawakla beberapo prajoret, tros bekenla koboran tu seaman-amannyo.” Jadi dio wong nyegel batu besak yang notopi koboran tu. Tros dio ngongkon tentaro-tentaro bejago di sano ontok mastike dak katek yang pacak ngambek mayat Yesus.

![](https://cdn.door43.org/obs/jpg/360px/obs-en-41-03.jpg)

Seari abes Yesus dikoborke, ari tu iola ari Sabat, ari istirahat. Di ari tu wong Yahudi dak diejenke pegi ke koboran. Jadi pas sobo seabes ari Sabat, beberapo betino pegi ke koboran Yesus ontok narok lebe banyak rempa-rempa pengawet mayat di badan Yesus.

![](https://cdn.door43.org/obs/jpg/360px/obs-en-41-04.jpg)

Tibo-tibo tejadila gempa bumi yang besak nian. Malekat Allah moncol dari langet, tejingok seterang peter. Dio golengke batu yang notopi pintu masok ke koboran tu tros dodok di pocoknyo. Tentaro-tentaro yang ngejago koboran tu jadi ketakotan nian tros nyampak ke tana pecak wong mati.

![](https://cdn.door43.org/obs/jpg/360px/obs-en-41-05.jpg)

Pas betino-betino tu nyampe di koboran, malekat tu ngomong ke dio wong, ujinyo, “Dak usa takot. Yesus dak katek lagi di sini. Dio la bangket dari antaro wong mati pecak yang la Dio omongi! Jingokla ke jero koboran tu.” Betino-betino tu nole ke jero koboran tros nyingok di mano mayat Yesus ditarok. Mayat-Nyo dak katek lagi di situ!

![](https://cdn.door43.org/obs/jpg/360px/obs-en-41-06.jpg)

Tros malekat tu ngomong ke betino-betino tu, ujinyo, “Enjoktaukela samo mored-mored amen Yesus la bangket dari kematian tros bakal ngedului kamu ke Galilea.”

![](https://cdn.door43.org/obs/jpg/360px/obs-en-41-07.jpg)

Betino-betino tu ketakotan nian sekalegos penu kesenengan. Dio wong belari ontok nyritoke kabar bagus tu ke mored-mored.

![](https://cdn.door43.org/obs/jpg/360px/obs-en-41-08.jpg)

Pas betino-betino tu lagi di pejalanan ontok ngenjoktauke ke mored-mored kabar baek tu, Yesus moncolke diri ke dio wong, tros dio wong nyemba Yesus. Uji Yesus, “Dak usa takot. Pegila tros enjoktauke ke mored-mored Aku supayo pegi ke Galilea. Dio wong bakal nyingok Aku di sano.

*Sikok crito Alkitab dari: Matius 27:62-28:15; Markus 16:1-11; Lukas 24:1-12; Yahya 20:1-18*

## 42. Yesus Balek ke Surgo

https://openbiblestories.org/l/mui/story-42/

![](https://cdn.door43.org/obs/jpg/360px/obs-en-42-01.jpg)

Pas ari Yesus bangket dari mati, duo pengekot Yesus pegi ke kota yang parak. Pas dio wong bejalan, dio wong ngomongke pasal yang la tejadi samo Yesus. Dio wong la bearep amen Yesus iola Almasih, tapi Dio dibunu. Sekarang betino-betino tu ngomong amen dio la edop lagi. Dio wong dak tau apo yang mesti dipecayoi.

![](https://cdn.door43.org/obs/jpg/360px/obs-en-42-02.jpg)

Yesus maraki dio wong tros mulai bejalan samo dio wong, cuman dio wong dak nyireni Yesus. Yesus betanyo samo dio wong apo yang lagi diomongke. Tros dio wong ngomongke ke Dio pasal sloro kejadian luar biaso yang la tejadi selamo beberapo ari teaker. Dio wong peker Yesus tu wong aseng yang dak tau apo yang la tejadi di Yerusalem.

![](https://cdn.door43.org/obs/jpg/360px/obs-en-42-03.jpg)

Abes tu Yesus jelaske ke dio wong apo yang la tetoles dalem Pirman Allah pasal ALmsih. Yesus ngingetke dio wong amen nabi-nabi ngomong Almasih bakal sengsaro tros dibunu, tapi bakal bangket lagi pas ari ketigo. Pas dio wong sampe ke kota yang ditojo, ari la amper malem.

![](https://cdn.door43.org/obs/jpg/360px/obs-en-42-04.jpg)

Duo ikok lanang tu ngundang Yesus ontok nginep besamo dio wong, laju Dio nrimo undangan tu. Pas dio wong siap ontok makan, Yesus ngambek sepotong roti, besokor samo Allah ontok roti tu, abes tu mecakenyo. Tibo-tibo, mato dio wong tebukak, tros dio wong tau amen Dio tu Yesus. Pas tu, Yesus ngilang.

![](https://cdn.door43.org/obs/jpg/360px/obs-en-42-05.jpg)

Duo ikok lanang tu saleng ngomong, “Wong tadi iola Yesus! Itula sebabnyo ati kito besemangat pas Dio jelaske Pirman Allah ke kito!” Dio wong langsong balek ke Yerusalem tros ngenjok tau mored-mored, “Yesus edop! Kami la jingok Dio!”

![](https://cdn.door43.org/obs/jpg/360px/obs-en-42-06.jpg)

Pas mored-mored tu lagi ngomong, Yesus tibo-tibo moncol di ruangan tu besamo dio wong, tros ngomong, “Damai ontok kamu galo!” Mored-mored ngiro amen Dio tu antu, tapi uji Yesus, “Ngapo kamu takot tros ragu-ragu? Jingokla tangan samo kaki Aku. Antu dak katek badan pecak Aku.” Ontok ngeboktike amen Dio bukan antu, Dio mintak makanan ontok dimakan. Dio wong ngenjok Yesus setetak ikan yang dimasak tros dimakannyo.

![](https://cdn.door43.org/obs/jpg/360px/obs-en-42-07.jpg)

Uji Yesus, “Aku la omongke ke kamu amen sloro yang tetoles pasal Aku di Pirman Allah haros digenepi.” Tros dibukakke-Nyo pekeran dio wong tu, supayo dio wong pacak ngerti Pirman Allah. Uji Dio, “Ado tetoles spas jaman dulu amen Almasih bakal sengsaro, mati, tros bangket dari kematian pas ari ketigo.”

![](https://cdn.door43.org/obs/jpg/360px/obs-en-42-08.jpg)

“Ado jugo tetoles amen mored-mored Aku bakal ngenyatoke amen sloro wong haros betobat dari duso dio wong ontok ngedapetke pengamponan. Dio wong bakal ngelakuke ni mulai dari Yerusalem sampe ke sloro suku di dunio. Kamu ni iola saksi pasal kejadian-kejadian ni.”

![](https://cdn.door43.org/obs/jpg/360px/obs-en-42-09.jpg)

Selamo empat polo ari berekotnyo, Yesus nampakke diri ke mored-mored samo pengekot-Nyo bekali-kali. Kapan ari, Dio mala nampakke diri ke lebe dari 500 wong di waktu yang samo! Dio ngeboktike samo mored-mored-Nyo makek banyak caro amen Dio tu edop lagi, tros Dio ngajari dio wong pasal kerajaan Allah.

![](https://cdn.door43.org/obs/jpg/360px/obs-en-42-10.jpg)

Yesus ngomong ke mored-mored-Nyo, “Segalo kuaso di surgo jugo di bumi la dienjokke ke Aku. Jadi pegila, jadikela sloro suku bangso mored Aku dengen caro ngebaptes dio wong dalem namo Ubak, Anak, samo Ro Suci, tros ngajari dio wong ngelakuke segalo pasal yang la Aku kongkon ke kamu. Inget, Aku bakal samo kamu selamonyo.”

![](https://cdn.door43.org/obs/jpg/360px/obs-en-42-11.jpg)

Empat polo ari abes Yesus bangket, Dio ngongkon mored-mored-Nyo, uji-Nyo, “Tinggalla di Yerusalem sampe Ubak Aku ngenjok kekuatan pas Ro Suci dateng ke kau.” Abes tu Yesus naek ke surgo, tros awan notopi Yesus sampe-sampe dio wong dak pacak nyingok Dio lagi. Sekarang Yesus dodok di pengger kanan Allah ontok mrento sloronyo.

*Sikok crito Alkitab dari: Matius 28:16-20; Markus 16:12-20; Lukas 24:13-53; Yahya 20:19-23; Acts 1:1-11*

## 43. Grejo Mulo-mulo

https://openbiblestories.org/l/mui/story-43/

![](https://cdn.door43.org/obs/jpg/360px/obs-en-43-01.jpg)

Abes Yesus balek ke surgo, mored-mored-Nyo tinggal di Yerusalem pecak yang la dikongkon Yesus. Wong-wong pecayo yang ado di sano bekompol ontok bedoa teros-terosan.

![](https://cdn.door43.org/obs/jpg/360px/obs-en-43-02.jpg)

Tiap taon, limo polo ari abes Paska, wong-wong Yahudi ngerayoke ari yang penteng yang disebot ari Pentakosta. Pentakosta tu iola ari pas wong Yahudi lagi ngerayoke panen gendom. Sloro wong Yahudi dari sloro dunio dateng ke Yerusalem ontok ngerayoke ari Pentakosta samo-samo. Taon tu, Pentakosta dirayoke kiro-kiro seminggu abes Yesus naek ke surgo.

![](https://cdn.door43.org/obs/jpg/360px/obs-en-43-03.jpg)

Sementaro wong-wong pecayo tu lagi kompol besamo-samo, tibo-tibo ruma tempat dio wong bekompol tu dipenui ole suaro pecak angin besak. Abes tu ado pecak nyalo api tejingok di pocok kepalak wong-wong pecayo tu. Sloro dio wong tu dipenui Ro Suci tros mulai ngomong makek baso-baso laen.

![](https://cdn.door43.org/obs/jpg/360px/obs-en-43-04.jpg)

Pas wong-wong di Yerusalem denger suaro tu, banyak wong bekompol nak tau apo yang tejadi. Pas dio wong denger wong-wong pecayo tu ngenyatoke pasal pebuatan Allah yang hebat nian, dio wong teheran karno dio wong denger sloro omongan tu dalem baso-baso dio wong dewek.

![](https://cdn.door43.org/obs/jpg/360px/obs-en-43-05.jpg)

Beberapo wong nudu amen mored-mored Yesus tu mabok. Laju Petros tegak tros becerama ke dio wong, ujinyo, “Dengerke aku! Wong-wong ni dak mabok! Kejadian ni ngenepi pewahyuan yang la disampeke ole Nabi Yoel di mano Allah ngomong cak ini, ‘Pas ari-ari teaker, Aku bakal nuangke Ro Aku.’”

![](https://cdn.door43.org/obs/jpg/360px/obs-en-43-06.jpg)

“Oi wong Israel, Yesus ni iola wong yang ngebeken banyak nian tando-tando yang hebat jugo ajaeb pakek kuaso Allah, cak yang la kamu jingok jugo yang la kamu tau. Tapi mase bae kamu salebke Dio!”

![](https://cdn.door43.org/obs/jpg/360px/obs-en-43-07.jpg)

“Mugola Yesus mati, tapi Allah bangketke Dio dari antaro wong mati. Ini ni ngenepi pewahyuan yang tetoles cak ni, ‘Kau dak bakal biarke Wong Suci Kau busuk di jero koboran.’ Kami la jadi saksi-saksi nyato amen Allah la bangketke Yesus.”

![](https://cdn.door43.org/obs/jpg/360px/obs-en-43-08.jpg)

“Yesus sekarang dimulioke di sampeng kanan Allah Ubak. Tros Yesus jugo la ngerem Ro Suci yang la Dio janjike. Ro Sucila yang beken sloro apo yang kamu jingok samo denger sekarang ni.”

![](https://cdn.door43.org/obs/jpg/360px/obs-en-43-09.jpg)

“Kamu nyalebke Yesus ni. Tapi kamu perlu tau dengen pasti amen Allah la jadike Yesus Tuan jugo ALmasih!”

![](https://cdn.door43.org/obs/jpg/360px/obs-en-43-10.jpg)

Wong-wong yang dengerke omongan Petros jadi tesentu nian pasal yang diomongkenyo. Laju dio wong betanyo samo Petros jugo samo mored-mored tu. Uji dio wong, “Apo yang haros kami lakuke?”

![](https://cdn.door43.org/obs/jpg/360px/obs-en-43-11.jpg)

Uji Petros, “Betobatla tros dibaptes dalem namo Yesus Almasih, supayo duso kamu diamponi Allah. Jadi Dio bakal ngenjok kamu karunio Ro Suci.”

![](https://cdn.door43.org/obs/jpg/360px/obs-en-43-12.jpg)

Kiro-kiro tigo ribu wong pecayo samo omongan Petros tros jadi mored-mored Yesus. Dio wong dibaptes tros jadi jemaat grejo di Yerusalem.

![](https://cdn.door43.org/obs/jpg/360px/obs-en-43-13.jpg)

Mored-mored tu rajen bekompol, dengerke ajarannyo rosul-rosul, makan besamo, jugo bedoa samo-samo. Dio wong seneng muji Allah besamo-samo jugo saleng bebage sloro yang dio wong punyo. Sloro wong seneng samo dio wong. Tiap ari maken banyak bae wong yang jadi pecayo.

*Sikok crito Alkitab dari: Kisa Para Rosul 2*

## 44. Petros samo Yahya Nyemboke Pengemis

https://openbiblestories.org/l/mui/story-44/

![](https://cdn.door43.org/obs/jpg/360px/obs-en-44-01.jpg)

Kapan ari, Petros samo Yahya pegi ke Ruma Allah. Pas la parak gerbang Ruma Allah tu dio wong nyingok sikok lanang lompo yang ngemis mintak-mintak duet.

![](https://cdn.door43.org/obs/jpg/360px/obs-en-44-02.jpg)

Uji Petros sambel jingok dio, “Aku katek duet nak ngenjok kau. Tapi aku bakal ngenjok kau apo yang pacak aku enjok. Dalem namo Yesus, tegak tros bejalanla!”

![](https://cdn.door43.org/obs/jpg/360px/obs-en-44-03.jpg)

Pas tu jugo Allah langsong nyemboke wong tu. Tros wong tu mulai bejalan jugo melompat-lompat tros muji Allah. Sloro wong yang ado di depan Ruma Allah tekagom.

![](https://cdn.door43.org/obs/jpg/360px/obs-en-44-04.jpg)

Segrombolan wong begancang nak jingok wong yang la disemboke tu. Uji Petros ke dio wong, “Ngapo kamu tekagom amen wong ni sembo? Kami nyemboke dio bukan makek kekuatan apo kebaekan kami dewek. Sebaleknyo, kekuatan Yesus samo iman yang dienjokke ole Yesus yang nyemboke wong ni.”

![](https://cdn.door43.org/obs/jpg/360px/obs-en-44-05.jpg)

“Kamula yang mintak samo gubernur Roma supayo Yesus dibunu. Kamu la ngebunu pencipto keedopan, tapi Allah la bangketke Dio dari antaro wong mati. Mugola kamu dak ngerti apo yang la kamu lakuke, Allah makek pebuatan kamu ontok genepi pewahyuan amen Almasih tu bakal sengsaro jugo mati. Tapi sekarang, betobatla kamu tros norotla samo Allah supayo duso-duso kamu diamponi.”

![](https://cdn.door43.org/obs/jpg/360px/obs-en-44-06.jpg)

Laju Petros samo Yahya ditingkep tros dimasokke ke jero penjaro, karno pemempen-pemempen agama di Ruma Allah tu mara samo omongan dio wong. Tapi banyak wong yang pecayo samo omongannyo Petros, tros wong-wong yang pecayo samo Yesus betamba jadi kiro-kiro limo ribu wong.

![](https://cdn.door43.org/obs/jpg/360px/obs-en-44-07.jpg)

Besoknyo, pemempen-pemempen Yahudi gawak Petros samo Yahya ke adepan imam besak samo pemempen-pemempen agama laennyo. Tros dio wong tu ngomong ke Petros samo Yahya, ujinyo, “Pakek kuaso apo kamu nyemboke wong lompo ni?”

![](https://cdn.door43.org/obs/jpg/360px/obs-en-44-08.jpg)

Uji Petros, “Wong yang tegak di adepan kamu disembke dalem namo Yesus Almasih. Kamu nyalebke Yesus, tapi Allah la bangketke Dio supayo edop lagi! Kamu la nolak Dio, tapi katek caro laen supayo dislametke amen dak liwat kuaso Yesus!”

![](https://cdn.door43.org/obs/jpg/360px/obs-en-44-09.jpg)

Dio wong tekejot samo omongannyo Petros jugo Yahya karno dio wong jingok Petros samo Yahya ni wong biaso yang dak bependedekan. Tapi abes tu dio wong sadar amen Petros jugo Yahya ni la besamo dengen Yesus. Abes dio wong tu ngancem Petros samo Yahya, dio wong biarke Petros samo Yahya pegi.

*Sikok crito Alkitab dari: Kisa Para Rosul 3:1-4:22*

## 45. Stepanus samo Pilipus

https://openbiblestories.org/l/mui/story-45/

![](https://cdn.door43.org/obs/jpg/360px/obs-en-45-01.jpg)

Sala sikok pemempen di grejo mulo-mulo iola lanang yang benamo Stepanus. Dio ni punyo namo baek jugo dio penu samo Ro Suci jugo behikmat. Stepanus ngebeken banyak mujijat, jugo omongannyo ngeyakenke nian amen wong haros pecayo samo Yesus.

![](https://cdn.door43.org/obs/jpg/360px/obs-en-45-02.jpg)

Kapan ari pas Stepanus ngajar pasal Yesus, beberapo wong Yahudi yang dak pecayo samo Yesus bedebat samo Stepanus. Dio wong jadi mara nian tros ngolai pemempen-pemempen agama pasal Stepanus. Uji dio wong, “Kami denger dio ni ngomongi yang jahat-jahat pasal Musa samo Allah!” Laju pemempen-pemempen agama ningkep Stepanus tros gawak dio ke imam besak samo pemempen-pemempen Yahudi laennyo, di mano banyak saksi palsu laennyo yang ngotaki pasal Stepanus.

![](https://cdn.door43.org/obs/jpg/360px/obs-en-45-03.jpg)

Imam besak tu nanyo samo Stepanus, “Bener dak tuduan tu?” Stepanus ngejawab dengen ngingeti dio wong pasal pebuatan besak yang la Allah lakuke dari jaman Ibrahim ke jaman Yesus. Jugo cakmano umat Allah teros-terosan dak noroti Allah. Laju ujinyo, “Kau ni wong yang tekak jugo tukang brontak yang teros nolak Ro Suci, samo pecak nenek moyang kau yang nolak Allah jugo ngebunu nabi-nabi-Nyo. Tapi kau ni lebe para jahatnyo! Kau ngebunu Almasih otosan Allah!”

![](https://cdn.door43.org/obs/jpg/360px/obs-en-45-04.jpg)

Pas denger tu dio wong jadi mara nian laju dio wong notop kupeng sambel mekek. Dio wong nyeret Stepanus ke luar kota tros ngebabetinyo pakek batu sampe mati.

![](https://cdn.door43.org/obs/jpg/360px/obs-en-45-05.jpg)

Pas Stepanus lagi sekarat, dio mekek, “Yesus, trimola ro aku.” Tros dio belotot tros mekek, “Tuan, dak usa anggep ini jadi duso dio wong.” Abes tu dio mati.

![](https://cdn.door43.org/obs/jpg/360px/obs-en-45-06.jpg)

Sikok lanang benamo Saulus stojo samo wong yang ngebunu Stepanus, tros dio ngejago juba punyo dio wong yang ngebabeti Stepanus. Ari tu, banyak wong di Yerusalem mulai nyikso pengekot-pengekot Yesus, sampe-sampe dio wong ngelarike diri ke tempat-tempat laen. Tapi mugola cak itu, dio wong mase bae ngebritoke pasal Yesus ke mano bae dio wong pegi.

![](https://cdn.door43.org/obs/jpg/360px/obs-en-45-07.jpg)

Mored Yesus yang benamo Pilipus iola sala sikok dari wong pecayo yang ngelarike diri dari Yerusalem pas masa penganiayoan. Dio pegi ke Samaria. Di situ dio bekotba pasal Yesus, jadi banyak wong yang dislametke. Tros, kapan ari ado malekat Allah ngongkon Pilipus pegi ngeliwati sikok jalan di padang goron. Pas dio lagi bejalan, dio jingok ado pejabat penteng dari Etiopia dodok di kreto. Ro Suci ngongkon Pilipus ontok maraki wong tu tros ngomong samo wong tu.

![](https://cdn.door43.org/obs/jpg/360px/obs-en-45-08.jpg)

Pas Pilipus la parak kreto tu, dio denger wong Etiopia tu baco kitab Nabi Yesaya cak ni. “Dio wong gawak Dio pecak anak domba yang nak dibunu. Jugo, pecak anak domba yang diem, Dio dak ngomong apo-apo. Dio diperlakuke dak adel tros dak dihormati. Edop-Nyo diambek dari Dio.”

![](https://cdn.door43.org/obs/jpg/360px/obs-en-45-09.jpg)

Pilipus nanyo samo wong Etiopia tu, ujinyo, “Kau ngerti dak apo yang kau baco?” Jawab wong Etiopia tu, “Idak. Aku dak pacak ngerti, kecuali amen ado wong yang nerangke ke aku. Sinila tros dodokla di sebela aku. Apo Yesaya ni noles pasal dio dewek apo wong laen?”

![](https://cdn.door43.org/obs/jpg/360px/obs-en-45-10.jpg)

Laju Pilipus nerangke ke wong Etiopia tu amen Yesaya tu ngomong pasal Yesus. Pilipus jugo makek banyak ayat Alkitab yang laen ontok nerangke kabar baek pasal Yesus.

![](https://cdn.door43.org/obs/jpg/360px/obs-en-45-11.jpg)

Pas dio wong di pejalanan, dio wong jingok banyu. Uji wong Etiopia, “Jingok! Ado banyu! Bole dak aku dibaptes?” Tros dio ngongkon soper ontok nyetopi kretonyo.

![](https://cdn.door43.org/obs/jpg/360px/obs-en-45-12.jpg)

Abes tu toronla dio wong ke dalem banyu, tros Pilipus ngebaptes wong Etiopia tu. Abes dio wong metu dari banyu, tibo-tibo Ro Suci gawak Pilipus pegi ke tempat laen di mano dio pacak ngelanjotke ontok ngelanjotke wong-wong pasal Yesus.

![](https://cdn.door43.org/obs/jpg/360px/obs-en-45-13.jpg)

Wong Etiopia tu ngelanjotke pejalanannyo. Dio seneng karno dio la ngenal Yesus.

*Sikok crito Alkitab dari: Kisa para Rosul 6:8-8:5; 8:26-40*

## 46. Paulus Jadi Wong Kristen

https://openbiblestories.org/l/mui/story-46/

![](https://cdn.door43.org/obs/jpg/360px/obs-en-46-01.jpg)

Saulus ni lanang mudo yang ngejago juba wong-wong yang ngebunu Stepanus. Dio dak pecayo samo Yesus. Karno itula dio nganiayo pengekot Yesus. Dio ningkepi lanang jugo betino dari ruma ke ruma di Yerusalem, tros dimasokkenyo ke jero penjaro. Imam besak ngejeni Saulus pegi ke kota Damaskus ontok ningkep wong Kristen di sano tros gawak dio wong balek ke Yerusalem.

![](https://cdn.door43.org/obs/jpg/360px/obs-en-46-02.jpg)

Pas Saulus lagi dalem pejalanan ke Damaskus, ado cahayo terang dari langet besinar di sekelelengnyo. Tros dio nyampak ke tana. Saulus denger ado wong ngomong cak ni, “Saulus! Saulus! Ngapo kau nganiayo Aku?” Uji Saulus, “Siapo kau, Tuan?” Uji Wong tu, “Akula Yesus. Kau nganiayo Aku!”.

![](https://cdn.door43.org/obs/jpg/360px/obs-en-46-03.jpg)

Pas Saulus tegak, dio sadar amen dio la buto. Laju kawan-kawannyo nonton dio masok ke Damaskus. Saulus dak makan jugo dak minum selamo tigo ari.

![](https://cdn.door43.org/obs/jpg/360px/obs-en-46-04.jpg)

Di Damaskus ado sikok mored benamo Ananias. Tuan ngomong samo dio, “Pegila ke ruma tempat Saulus nginep. Tarok tangan kau di dio supayo dio pacak nyingok lagi.” Tapi uji Ananias, “Tuan, aku la denger cakmano wong ni nganiayo wong-wong pecayo.” Uji Tuan, “Pegila! Aku la mele dio ontok nyatoke namo Aku ke wong-wong Yahudi samo suku-suku laennyo jugo. Dio bakal banyak mendrito demi Aku.”

![](https://cdn.door43.org/obs/jpg/360px/obs-en-46-05.jpg)

Laju Ananias pegi ke Saulus, narok tangannyo ke dio sambel ngomong, ujinyo, “Tuan Yesus, yang nampakke dirinyo pas di pejalanan kau ke sini, ngongkon aku dateng ke kau supayo kau pacak jingok lagi tros dipenui Ro Suci.” Saulus langsong pacak jingok lagi, tros Ananias ngebabtes dio. Abes tu Saulus makan tros kekuatannyo balek.

![](https://cdn.door43.org/obs/jpg/360px/obs-en-46-06.jpg)

Langsong bae Saulus mulai bekotba ke wong-wong Yahudi di Damaskus, ujinyo, “Yesus iola Anak Allah!” Wong-wong Yahudi tekagom karno wong yang la nyobo ngancori pengekot-pengekot Yesus sekarang mala pecayo samo Yesus! Saulus bedebat dengen wong-wong Yahudi, ngeboktike amen Yesus iola Almasih.

![](https://cdn.door43.org/obs/jpg/360px/obs-en-46-07.jpg)

Pas la beberapo ari, wong Yahudi berencano nak ngebunu Saulus. Dio wong ngerem wong ontok ngawasi Saulus di gerbang kota ontok ngebunu dio. Tapi Saulus denger rencano itu, laju kawan-kawannyo nolong dio ngelarike diri. Pas ari la dalu dio wong noroni Saulus dari pocok dendeng kota pakek bakol. Pas Saulus ngelarike diri dari Damaskus, dio ngelanjotke bekotba pasal Yesus.

![](https://cdn.door43.org/obs/jpg/360px/obs-en-46-08.jpg)

Saulus pegi ke Yerusalem ontok betemu mored-mored Yesus, tapi dio wong takot samo dio. Tapi wong pecayo yang benamo Barnabas gawak Saulus ke rosul-rosul, tros nyritoke keberaniannyo Saulus ngajar di Damaskus. Abes tu mored-mored nrimo Saulus.

![](https://cdn.door43.org/obs/jpg/360px/obs-en-46-09.jpg)

Beberapo wong pecayo yang ngelarike diri dari Yerusalem pegi jao ke kota Antiokia tros britoke pasal Yesus. Sebagean besak wong di Antiokia bukan wong Yahudi, tapi banyak nian dari dio wong yang pecayo samo Yesus ontok petamo kalinyo. Barnabas samo Saulus ke sano nak ngajar wong-wong tu lebe dalem pasal Yesus, jugo nak nguatke grejo yang ado di situ. Di Antiokiala wong yang pecayo samo Yesus disebot wong Kristen. Ini petamo kalinyo ado sebotan “wong Kristen”.

![](https://cdn.door43.org/obs/jpg/360px/obs-en-46-10.jpg)

Kapan ari, Pas wong-wong Kristen di Antiokhia lagi puaso jugo bedoa, Ro Suci ngomong ke dio wong, uji-Nyo, "Pisahkela Barnabas samo Saulus ontok Aku supayo dio wong pacak gaweke apo yang la Aku kongkon ke dio wong." Laju dio wong ngerem Barnabas samo Saulus pegi ngebritoke kabar baek pasal Yesus di banyak tempat laennyo. Barnabas samo Saulus ngajar wong-wong dari banyak suku, laju banyak wong pecayo samo Yesus.

*Sikok crito Alkitab dari: Kisa Para Rosul 8:3; 9:1-31; 11:19-26; 13:1-3*

## 47. Paulus samo Silas di Pilipi

https://openbiblestories.org/l/mui/story-47/

![](https://cdn.door43.org/obs/jpg/360px/obs-en-47-01.jpg)

Pas Saulus ngelakuke pejalanan di sloro kerajaan Romawi, dio mulai makek namo Romawinyo, “Paulus”. Kapan ari, Paulus samo kawannyo Silas pegi ke kota Pilipi, ontok ngebritoke kabar baek pasal Yesus. Dio wong pegi ke sikok tempat di pengger sungi di luar kota di mano wong-wong bekompol ontok bedoa. Di situ dio wong betemu samo betino benamo Lidia, dio ni wong yang ngejual kaen ungu. Dio ngasei jugo nyemba Allah.

![](https://cdn.door43.org/obs/jpg/360px/obs-en-47-02.jpg)

Allah bukak atinyo Lidia supayo pacak pecayo pesen pasal Yesus, tros dio samo kluargonyo dibaptes. Betino tu ngajak Paulus samo Silas nginep di rumanyo, laju nginepla dio wong di rumanyo Lidia besamo kluargonyo jugo.

![](https://cdn.door43.org/obs/jpg/360px/obs-en-47-03.jpg)

Paulus samo Silas sereng betemu samo wong-wong di tempat doa. Tiap ari pas dio wong bejalan ke tempat doa, sikok babu betino yang kemasokan setan meloki dio wong. Dio pakek kekuatan setan ontok ngeramalke masa depan wong, tros betino tu ngaseli banyak duet ontok tuan-tuannyo.

![](https://cdn.door43.org/obs/jpg/360px/obs-en-47-04.jpg)

Babu betino ni teros-terosan mekek-mekek cak ini, “Dio wong ni iola hamba Tuhan yang Mahabesak. Dio wong ngenjoktauke ke kamu caro ontok dislametke!” Dio nemen nian ngelakuke ni, sampe-sampe Paulus jadi kesel.

![](https://cdn.door43.org/obs/jpg/360px/obs-en-47-05.jpg)

Akernyo kapan ari, pas babu betino tu mulai mekek, Paulus bebalek ke dio tros ujinyo ke setan yang ngerasoki betino tu, “Dalem namo Yesus, metula kau darinyo.” Langsong bae setan tu ninggalke babu betino tu.

![](https://cdn.door43.org/obs/jpg/360px/obs-en-47-06.jpg)

Tuan-tuannyo babu betino tu mara nian pas dio wong tau apo yang tejadi. Dio wong tau amen setannyo la pegi, jadi budak betino tu dak pacak ngeramalke masa depan wong lagi. Itu artinyo wong-wong dak bakal ngebayar ontok tau apo yang bakal tejadi ke dio wong.

![](https://cdn.door43.org/obs/jpg/360px/obs-en-47-07.jpg)

Laju tuan-tuan betino tu gawak Paulus samo Silas ke penguaso Romawi. Dio wong digeboki tros dimasokke ke jero penjaro.

![](https://cdn.door43.org/obs/jpg/360px/obs-en-47-08.jpg)

Dio wong narok Paulus samo Silas di tempat yang paleng aman di penjaro tros kakinyo dirante. Tapi pas tenga dalu, dio wong nyanyike lagu-lagu pujian ontok Allah.

![](https://cdn.door43.org/obs/jpg/360px/obs-en-47-09.jpg)

Tibo-tibo, tejadi gempa bumi, tros sloro pintu penjaro tebukak. Sloro rante tahanan telepas.

![](https://cdn.door43.org/obs/jpg/360px/obs-en-47-10.jpg)

Penjago penjaro tu tebangun. Pas dio jingok pintu penjaro tebukak, dio jadi ketakotan! Dio peker sloro tahanan la lepas, laju dio nak bunu diri. (Dio tau pemrento Romawi bakal ngebunu dio amen dio ngebiarke tahanan-tahanan ngelarike diri.) Tapi Paulus nyingok penjago tu tros ngomong cak ni, "Brentila! Jangan nyaketi diri kau dewek. Kami ado di sini galo."

![](https://cdn.door43.org/obs/jpg/360px/obs-en-47-11.jpg)

Kepalak penjaro tu maraki Paulus samo Silas sambel gemeteran, ujinyo, “Apo yang haros aku lakuke supayo aku dislametke?” Tros Paulus jawab, “Pecayola samo Yesus yang iola Tuan. Kau samo kluargo kau bakal dislametke.” Abes tu, kepalak penjaro tu gawak Paulus samo Silas ke rumanyo tros nyuci luko dio wong. Paulus ngebritoke kabar baek pasal Yesus ke sloro wong yang ado di ruma tu.

![](https://cdn.door43.org/obs/jpg/360px/obs-en-47-12.jpg)

Akernyo kepalak penjaro samo sloro kluargonyo tu pecayo samo Yesus, tros dio wong dibaptes. Kepalak penjaro tu ngenjok Paulus samo Silas makan tros dio wong beseneng-seneng galo.

![](https://cdn.door43.org/obs/jpg/360px/obs-en-47-13.jpg)

Besoknyo Paulus samo Silas dibebaske ole pemempen kota tros dio wong dimintak ninggalke kota Pilipi. Paulus samo Silas ngonjongi Lidia samo beberapo kawan laen, tros abes tu ninggalke kota tu. Kabar baek pasal Yesus teros nyebar, jugo grejo teros bekembang.

![](https://cdn.door43.org/obs/jpg/360px/obs-en-47-14.jpg)

Paulus samo pemempen-pemempen Kristen laennyo bekotba samo ngajar pasal Yesus di banyak kota. Dio wong jugo banyak noles surat ontok dokong samo ngajar wong-wong pecayo di grejo-grejo. Beberapo suratnyo ni jadi kitab di dalem Alkitab.

*Sikok crito Alkitab dari: Kisa Para Rosul 16:11-40*

## 48. Yesus Iola Almasih yang Dijanjike

https://openbiblestories.org/l/mui/story-48/

![](https://cdn.door43.org/obs/jpg/360px/obs-en-48-01.jpg)

Pas Allah nyiptoke dunio, segalonyo sempurno. Dak katek duso. Adam samo Hawa saleng cinto, tros dio wong jugo cinto samo Allah. Dak katek kematian, penyaket, jugo drito. Pecak inila dunio yang Allah galak.

![](https://cdn.door43.org/obs/jpg/360px/obs-en-48-02.jpg)

Ebles ngomong liwat ulo di Taman Pirdaus ontok nipu Hawa. Abes tu Hawa samo Adam beduso ke Allah. Karno dio wong beken duso, laju sloro wong di bumi jadi saket tros sloro wong mati.

![](https://cdn.door43.org/obs/jpg/360px/obs-en-48-03.jpg)

Karno Adam samo Hawa beken duso, pasal yang lebe para lagi tejadi. Dio wong jadi musu Allah. Akibatnyo sloro wong sejak tu laer dengen sipat beduso jugo jadi moso Allah. Hobongan manusio samo Allah jadi rusak ole duso. Tapi Allah ado rencano supayo hobongan tu pacak baek lagi.

![](https://cdn.door43.org/obs/jpg/360px/obs-en-48-04.jpg)

Allah bejanji amen sala sikok ketoronan Hawa bakal ngancorke kepalak Ebles, tros Ebles bakal ngelukoi tometnyo. Ini ni artinyo Ebles bakal ngebunu Almasih, tapi Allah bakal bangketke Dio lagi, tros Almasih bakal ngancorke kekuatan Ebles selamonyo. Betaon-taon abes tu, Allah ngenyatoke amen Yesus ni iola Almasih.

![](https://cdn.door43.org/obs/jpg/360px/obs-en-48-05.jpg)

Pas Allah ngancori sloro bumi pakek banyu banjer besak, Dio nyedioke kapal jadi jalan keslametan ontok dio wong yang pecayo samo Allah. Cak itula, mugola sloro wong pantes diancori karno duso-duso dio wong, Allah nyedioke Yesus ontok nyelametke sloro wong yang pecayo samo Dio.

![](https://cdn.door43.org/obs/jpg/360px/obs-en-48-06.jpg)

Selamo ratosan taon, imam-imam nyembake kurban ontok Allah dari wong-wong ontok nonjokke hokoman apo yang sesuai dengen duso-duso dio wong. Tapi ternyato kurban-kurban tu dak pacak ngapos duso dio wong. Yesus iola Imam Besak Yang Agong. Tapi idak pecak imam-imam laennyo, Yesus ngurbanke diri-Nyo ontok jadi sikok-sikoknyo kurban yang pacak ngapos duso sloro wong di dunio ni. Yesus iola imam besak yang sempurno soalnyo Dio nrimo hokoman ontok sloro duso yang perna dilakuke manusio.

![](https://cdn.door43.org/obs/jpg/360px/obs-en-48-07.jpg)

Allah ngomong samo Ibrahim, uji-Nyo, “Liwat kau, sloro suku di dunio bakal diberkai.” Yesus iola ketoronan Ibrahim. Sloro suku di dunio diberkai liwat Dio. Setiap wong yang pecayo samo Dio dislametke dari duso tros jadi ketoronan umat Allah, iola ketoronan rohani Ibrahim.

![](https://cdn.door43.org/obs/jpg/360px/obs-en-48-08.jpg)

Pas Allah ngongkon Ibrahim ontok ngorbanke Ishak, anaknyo, Allah la nyedioke domba lanang ontok gantike Ishak. Kito galo pantes mati karno duso-duso kito! Tapi Allah nyedioke Yesus, Anak Domba Allah, jadi kurban ontok mati gantike kito!

![](https://cdn.door43.org/obs/jpg/360px/obs-en-48-09.jpg)

Pas Allah ngerem bencano yang teaker ke Mesir, Dio ngongkon sloro kluargo Israel ontok nyemble domba lanang yang sempurno. Dio wong haros ngoleske daranyo di sekitar pintu ruma dio wong. Pas Allah jingok dara tu, Dio ngelendongi ruma-ruma dio wong, tros dak ngebunu anak lanang petamo dio wong. Kejadian ini disebot Paska.

![](https://cdn.door43.org/obs/jpg/360px/obs-en-48-10.jpg)

Yesus iola anak domba Paska kito. Dio sempurno jugo katek duso tros dibunu pas Ari Rayo Paska. Pas wong pecayo samo Yesus, dara Yesus nebos duso wong tu, tros dio telendongi dari hokoman Allah.

![](https://cdn.door43.org/obs/jpg/360px/obs-en-48-11.jpg)

Allah ngebeken pejanjian samo Israel, bangso pelean-Nyo. Tapi mak ini ari Allah la beken Pejanjian Baru. Pejanjian Baru ni iola Pejanjian yang Allah beken ontok sloro bangso, supayo setiap wong yang pecayo samo Yesus pacak jadi bagean umat pelean Allah.

![](https://cdn.door43.org/obs/jpg/360px/obs-en-48-12.jpg)

Musa iola nabi besak yang nyebarke Pirman Allah. Tapi Yesus iola nabi tebesak. Dio iola Tuhan, jadi sloro yang Dio lakuke samo sloro yang Dio omongke iola pebuatan jugo kato-kato Allah. Itula ngapo alesan Yesus disebot Pirman Allah.

![](https://cdn.door43.org/obs/jpg/360px/obs-en-48-13.jpg)

Allah bejanji ke Rajo Daud amen sala sikok ketoronannyo bakal mrento jadi rajo umat Allah selamonyo. Karno Yesus iola Anak Allah jugo Almasih, Dio iola ketoronan Daud yang bakal mrento selamonyo.

![](https://cdn.door43.org/obs/jpg/360px/obs-en-48-14.jpg)

Pecak Daud, Yesus iola rajo, tapi Yesus iola rajo alam semesta! Dio bakal dateng lagi tros mrento kerajaan-Nyo dengen adel jugo damai, selamonyo.

*Sikok crito Alkitab dari: Kejadian 1-3, 6, 14, 22; Keluaran 12, 20; 2 Samuel 7; Ibrani 3:1-6, 4:14-5:10, 7:1-8:13, 9:11-10:18; Wahyu 21*

## 49. Pejanjian Baru Allah

https://openbiblestories.org/l/mui/story-49/

![](https://cdn.door43.org/obs/jpg/360px/obs-en-49-01.jpg)

Sikok malekat ngenjoktauke ke gades benamo Mariam amen dio bakal ngelaerke Anak Allah. Jadi sementaro dio mase gades, Ro Suci nodongi dio, tros dio jadi bonteng. Dio beranakke kupek lanang tros ngenamoi Dio Yesus. Karno itula, Yesus iola Tuhan sekalegos manusio.

![](https://cdn.door43.org/obs/jpg/360px/obs-en-49-02.jpg)

Banyak nian mujijat yang Yesus beken. Dio bejalan di pocok banyu, nenangke badai, nyemboke banyak wong saket, ngoser setan, bangketke wong mati, tros ngenjok makan limo ribu wong pakek limo roti samo duo iwak kecik.

![](https://cdn.door43.org/obs/jpg/360px/obs-en-49-03.jpg)

Yesus jugo iola guru yang agong, tros Dio ngomong dengen kuaso karno Dio iola Anak Allah. Dio ngajari amen kau perlu ngasei sesamo manusio pecak kau ngasei diri kau dewek.

![](https://cdn.door43.org/obs/jpg/360px/obs-en-49-04.jpg)

Dio jugo ngajari amen kau haros ngasei Allah lebe dari apo bae, temasok jugo harto kau.

![](https://cdn.door43.org/obs/jpg/360px/obs-en-49-05.jpg)

Yesus ngajarke amen kerajaan Allah lebe berego dari apo bae yang ado di dunio ni. Yang paleng penteng ontok setiap wong iola jadi umat kerajaan Allah. Supayo pacak masok kerajaan Allah, kau haros dislametke dari duso.

![](https://cdn.door43.org/obs/jpg/360px/obs-en-49-06.jpg)

Yesus ngajarke amen sebagean wong-wong bakal nrimo Dio, tros dislametke, tapi yang laen idak. Dio ngomongke amen sebagean wong-wong tu pecak tana yang sobor. Dio wong nrimo kabar baek pasal Yesus tros dislametke. Wongwong yang laennyo pecak tana keras jalanan, di mano biji pirman Allah dak masok jugo dak ngaselke bua. Wong-wong tu nolak pesen pasal Yesus, tros dak bakal masok ke kerajaan-Nyo.

![](https://cdn.door43.org/obs/jpg/360px/obs-en-49-07.jpg)

Yesus ngajarke amen Allah ni ngasei nian wong-wong yang beduso. Dio galak ngamponi dio wong tros jadike dio wong anak-anak-Nyo.

![](https://cdn.door43.org/obs/jpg/360px/obs-en-49-08.jpg)

Yesus jugo ngajarke amen Allah benci duso. Pas Adam samo Hawa beken duso, itu jugo ngarui sloro ketoronannyo. Laju, sloro wong di dunio beduso tros tepisa dari Allah. Karno itula, sloro wong la jadi moso Allah.

![](https://cdn.door43.org/obs/jpg/360px/obs-en-49-09.jpg)

Tapi Allah ngasei sloro manusio, jadi Dio ngeremke Yesus, Anak sikok-sikok-Nyo. Itu tu supayo sloro wong yang pecayo samo Yesus dak bakal dihokom karno dusonyo, tapi bakal edop samo Allah selamonyo.

![](https://cdn.door43.org/obs/jpg/360px/obs-en-49-10.jpg)

Karno duso kau, kau besala. Kau pantes mati tros keno murka Allah, tapi Allah nimpoke murka-Nyo ke Yesus bukan ke kau. Pas Yesus mati di kayu saleb, Dio nrimo hokoman kau.

![](https://cdn.door43.org/obs/jpg/360px/obs-en-49-11.jpg)

Yesus dak perna beken duso, tapi Dio mele ontok dihokom tros mati jadi kurban yang sempurno. Dio ngelakuke ni ontok ngapos duso kau jugo duso sloro wong di dunio ni. Karno Yesus ngurbanke diri-Nyo dewek, Allah pacak ngamponi duso apo bae, mala duso-duso yang ngeri nian.

![](https://cdn.door43.org/obs/jpg/360px/obs-en-49-12.jpg)

Pebuatan baek dak pacak nyelametke. Dak katek yang pacak kau lakuke ontok bebaekan samo Allah. Cuman Yesus yang pacak ngapos duso-duso kau. Kau haros pecayo amen Yesus iola Anak Allah, amen Dio mati di kayu saleb gantike kau, jugo amen Allah bangketke Dio lagi.

![](https://cdn.door43.org/obs/jpg/360px/obs-en-49-13.jpg)

Sloro wong yang pecayo samo Yesus tros nrimo Dio jadi Tuannyo bakal Allah slametke. Tapi siapo bae yang dak pecayo dak bakal ditrimo. Dak peduli amen kau kayo apo mesken, lanang apo betino, tuo apo mudo, jugo dari mano asal kau. Allah ngasei kau tros ngarep supayo kau pecayo samo Yesus, supayo Dio pacak behobongan lagi samo kau.

![](https://cdn.door43.org/obs/jpg/360px/obs-en-49-14.jpg)

Yesus ngajak kau supayo pecayo samo Dio tros dibaptes. Pecayo dak kau amen Yesus iola Almasih, sikok-sikok-Nyo Anak Allah? Pecayo dak kau amen kau wong yang beduso tros pantes dapet hokoman Allah? Pecayo dak kau amen Yesus mati di kayu saleb ontok ngamponi duso kau?

![](https://cdn.door43.org/obs/jpg/360px/obs-en-49-15.jpg)

Amen kau pecayo samo Yesus jugo apo yang la dilakuke-Nyo, kau wong Kristen! Allah la gawak kau metu dari kerajaan Ebles tros narok kau ke kerajaan terang Allah. Allah la ngambek keedopan lamo kau yang penu duso, tros ngenjok kau edop baru yang bener.

![](https://cdn.door43.org/obs/jpg/360px/obs-en-49-16.jpg)

Amen kau wong Kristen, duso kau la diapos karno pebuatan Yesus. Mak ini ari, Allah dak jingok kau jadi moso lagi, tapi Dio jingok kau jadi kawan deket-Nyo.

![](https://cdn.door43.org/obs/jpg/360px/obs-en-49-17.jpg)

Amen kau kawan deket-Nyo Allah jugo hamba Yesus, yang iola Tuan, jadi kau galak meloki ajaran-Nyo Yesus. Mugola kau wong Kristen, kau mase pacak tegoda ole duso. Tapi Allah ngomong amen kau ngakui duso-duso kau, Dio stio jugo bakal ngamponi kau tros bakal ngenjok kau kekuatan ontok ngelawan duso.

![](https://cdn.door43.org/obs/jpg/360px/obs-en-49-18.jpg)

Allah ngongkon kau bedoa, belajar Pirman-Nyo, nyemba Dio besamo wong-wong Kristen laennyo, jugo besaksi ke wong laen apo yang la Dio lakuke ontok kau. Pasal-pasal ni bakal ngebantu kau betombo behobongan kau samo Allah.

*Sikok crito ALkitab dari: Roma 3:21-26, 5:1-11; Yahya 3:16; Markus 16:16; Kolose 1:13-14; 2 Korintus 5:17-21; 1 Yahya 1:5-10*

## 50. Yesus Balek Lagi

https://openbiblestories.org/l/mui/story-50/

![](https://cdn.door43.org/obs/jpg/360px/obs-en-50-01.jpg)

Selamo amper duo ribu taon, kabar baek Yesus Almasih la tesebar ke sloro dunio. Grejonyo jugo la bekembang. Dulu Yesus ngomong amen Dio bakal balek lagi pas aker jaman. Mugola sekarang Dio belom dateng, tapi Dio bakal nepati janji-Nyo.

![](https://cdn.door43.org/obs/jpg/360px/obs-en-50-02.jpg)

Selamo kito lagi nunggu Yesus dateng, Allah pengen kito edop suci jugo ngormati Dio. Dio jugo pengen kito ngenjoktauke ke wong laen pasal kerajaan-Nyo. Pas Yesus ado di bumi, Dio ngomong cak ini, “Mored-mored Aku bakal ngebritoke kabar baek pasal kerajaan Allah ke sloro wong di dunio. Abes tu aker jaman bakal dateng.”

![](https://cdn.door43.org/obs/jpg/360px/obs-en-50-03.jpg)

Banyak suku yang mase belom denger pasal Yesus. seblom Dio balek ke surgo, Yesus ngenjok tugas ke sloro wong Kristen ontok gawak kabar baek ke dio wong yang blom perna denger. Uji-Nyo, “Pegila, jadikela sloro suku mored Aku! Ladang la mateng ontok panen!”

![](https://cdn.door43.org/obs/jpg/360px/obs-en-50-04.jpg)

Yesus jugo ngomong, uji-Nyo, “Sikok babu dak lebe besak dari tuannyo. Samo pecak penguaso-penguaso di dunio ni benci samo Aku, dio wong jugo bakal nyikso tros ngebunu kamu karno Aku. Mugola di dunio ni kamu bakal ngalami pendritoan, tapi besemangatla karno Aku la ngalake Ebles, yang mrento dunio ni! Amen kamu tetep stio samo Aku sampe aker, Allah bakal nyelametke kamu.”

![](https://cdn.door43.org/obs/jpg/360px/obs-en-50-05.jpg)

Yesus nyritoke sikok crito ke mored-mored-Nyo ontok ngejelaske apo yang bakal tejadi ke wong-wong pas aker jaman. Uji-Nyo, “Ado wong yang nanem biji yang baek di tananyo. Tapi pas dio lagi tedok, mosonyo dateng tros nanem rompot liar diantaro gendomnyo. Abes tu dio pegi.”

![](https://cdn.door43.org/obs/jpg/360px/obs-en-50-06.jpg)

“Pas taneman tu tombo, babu-babunyo betanyo cak ni, ‘Tuan, kau nanem biji yang baek. Ngapo pacak ado rompot liar di dalemnyo tu?’ Uji tuannyo, ‘Moso yang ngelakuke tu.’”

![](https://cdn.door43.org/obs/jpg/360px/obs-en-50-07.jpg)

“Dio wong nanggapi tuannyo, ‘Haros dicabot dak rompot liar tu?’ Uji tuannyo, ‘Amen kau cabot, laju sebaean gendomnyo jugo tecabot. Tunggu bae sampe panen. Abes tu kompolke rumpot liar tu, tros dibakar, tapi gawakla gendom tu ke lombong aku.’”

![](https://cdn.door43.org/obs/jpg/360px/obs-en-50-08.jpg)

Mored-mored-Nyo dak ngerti arti crito tu. Uji dio wong ke Yesus, “Tolong jelaske crito ni ke kami.” Uji Yesus, “Wong yang nanem biji yang baek ni iola Almasih. Ladang tu iola dunio. Biji tu iola umat kerajaan Allah.”

![](https://cdn.door43.org/obs/jpg/360px/obs-en-50-09.jpg)

“Rompot liar iola wong-wong yang beasal dari yang jahat. Moso yang nanemnyo tu iola Ebles. Panen iola aker jaman, tros pemanen iola malekat.”

![](https://cdn.door43.org/obs/jpg/360px/obs-en-50-10.jpg)

“Pas aker jaman, sloro wong yang meloki Ebles bakal dikompolke tros dibuang ke dalem api. Di situ wong-wong nangis tros ngertakke gigi dalem pendritoan yang nakotke. Abes tu wong-wong yang bener bakal besinar pecak matoari di kerajaan Allah, Ubak dio wong.”

![](https://cdn.door43.org/obs/jpg/360px/obs-en-50-11.jpg)

Yesus jugo ngomong amen Dio bakal balek ke bumi sebelom aker jaman. Dio bakal balek dengen caro yang samo pecak dio pegi, iola dengen badan jasmani jugo bakal dateng dalem awan-awan di langet. Pas Yesus balek, sloro wong Kristen yang la mati bakal bangket dari kematian, tros nemui Dio di langet.

![](https://cdn.door43.org/obs/jpg/360px/obs-en-50-12.jpg)

Abes tu wong-wong Kristen yang mase edop bakal diangkat ke langet besamo-samo wong-wong Kristen yang bangket dari kematian tadi. Abes tu Yesus bakal besamo umat-Nyo dalem kedamaian jugo kesatuan yang sempurno selamonyo.

![](https://cdn.door43.org/obs/jpg/360px/obs-en-50-13.jpg)

Yesus bejanji amen Dio bakal ngenjok mahkota ke sloro wong yang pecayo samo Dio. Dio wong bakal edop tros mrento besamo Allah dalem kedamaian yang sempurno selamonyo.

![](https://cdn.door43.org/obs/jpg/360px/obs-en-50-14.jpg)

Tapi dio wong yang dak pecayo samo Yesus bakal dihakemi ole Allah. Dio bakal masokke dio wong ke dalem nerako, di mano dio wong bakal nangis tros jugo ngertakke gigi dio wong sampe kesaketan selamonyo. Api yang dak perna mati bakal ngebakar dio wong teros-terosan, jugo caceng-caceng bakal teros makani dio wong.

![](https://cdn.door43.org/obs/jpg/360px/obs-en-50-15.jpg)

Pas Yesus balek, Dio bakal ngancori Ebles samo kerajaannyo. Dio jugo bakal nguntalke Ebles tu ke dalem laotan api di mano dio bakal tebakar selamonyo, besamo sloro wong yang mele meloki Ebles daripada norot samo Allah.

![](https://cdn.door43.org/obs/jpg/360px/obs-en-50-16.jpg)

Karno Adam samo Hawa dak noroti Allah tros beken duso di dunio ni, Jadi Allah ngotok manusio tros motosi ontok ngancorkenyo. Tapi ado ari di mano Allah bakal nyiptoke langet samo bumi baru yang sempurno.

![](https://cdn.door43.org/obs/jpg/360px/obs-en-50-17.jpg)

Yesus samo umat-Nyo bakal edop di bumi baru, tros Dio bakal mrento segalo yang ado selamonyo. Dio bakal ngapos banyu mato, tros dak bakal ado lagi drito, kesedean, tangesan, kejahatan, kesaketan jugo kematian. Yesus bakal mrento kerajaan-Nyo dengen damai jugo adel, tros Dio bakal besamo umat-Nyo selamonyo.

*Sikok crito Alkitab dari: Matius 24:14; 28:18; Yahya 15:20, 16:33; Wahyu 2:10; Matius 13:24-30, 36-42; 1 Tesalonika 4:13-5:11; Yakobus 1:12; Matius 22:13; Wahyu 20:10, 21:1-22:21*