# unfoldingWord Open Bible Stories — زبان مازندرانی (Mazanderani)

- Language code: `mzn`
- Canonical page: https://openbiblestories.org/l/mzn/
- Stories in this file: 50 of 50
- Published by: fa_gl
- Last release: 2023-11-08
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the زبان مازندرانی translation; it is not a translation of the whole Bible.

## 1. ۱-  ديافری یِن

https://openbiblestories.org/l/mzn/story-1/

![](https://cdn.door43.org/obs/jpg/360px/obs-en-01-01.jpg)

خِدا، اَوِّلا هَمِه چی رِه اینطی دیافرییِه: وِه دِنیا و تِمومِ هَستی رِه شیش روزِه دیافرییِه. بِنِه رِه دیافری پِه، چونکِه خِدا هَنتا هِچّی رِه سَر وُ شِکل نِدا بی یِه، هَمِه جا تاريک وُ سیو وُ خالی بی یِه، اَمّا خِدایِ روح اویِ سَر دَیّیه.

![](https://cdn.door43.org/obs/jpg/360px/obs-en-01-02.jpg)

اونگِدِر خِدا باته: «روشْنایی بَوِّه» و روشنایی بَیّه. خِدا بدیه که روشْنایی چَندِه خارِه هَمینِتاسّه وِنه نوُم رِه «روز» بِشته؛ و خِدا سیوئی رِه، روشْناییِ جِه سیوا هَکرده وَ وِنه نوُمْ رِه «شُو» بِشته. خِدا روشْناییِ رِه یِکِمین روزِ دِلِه دِیافْرییه.

![](https://cdn.door43.org/obs/jpg/360px/obs-en-01-03.jpg)

دِیِّمین روزِ دیافری یِن خِدا باتِه: «اوی سَر، آسِمون بَوِّه» و هَمینطیِم بَیّه. خِدا اونتا فَلِکِ نوُمْ رِه آسِمون بِشته.

![](https://cdn.door43.org/obs/jpg/360px/obs-en-01-04.jpg)

سِیّمِین روز دِلِه خِدا باتِه: «آسِمونِ بِن هرچی او دَرِه، اَتّا جا جَمع بَوِّن که خِشکی دیار بَوّه». وِه خِشکیِ نوُم رِه « بِنِه» و اویِ نومِ رِه «دِریو» بِشته. خِدا بَدیه هرچی که دیافرییه چَندِه خارهَسّه.

![](https://cdn.door43.org/obs/jpg/360px/obs-en-01-05.jpg)

اونگِدِر خِدا باته: «همه جور دار و گیاه بِنه سَر ، سوز بَوّن» و هَمینطیِم بَیّه خِدا بَدِیه هرچی که دیافرییه خارهَسّه.

![](https://cdn.door43.org/obs/jpg/360px/obs-en-01-06.jpg)

چارِمین روزِ دیافریِ ین، خِدا باته: «آسمونِ دِلِه سو دَکِفِه» و اِینطی، خِدا اِفتاب ، ماه و اِستاره بِساته تا زمینِ سَر سو دَکِفه. هَمینتاسّه روز و شو، فَصلها وَ سالها هِدیِ جِه جِدا بَئینه. خِدا بَدِیه هرچی که دیافرییه خار هَسّه.

![](https://cdn.door43.org/obs/jpg/360px/obs-en-01-07.jpg)

پَنجِمین روزِ دِلِه خِدا باته: «جاندارا دِریوئه دِلِه رِه مَشت هَکِنِن و آسمونِ دِلِه پرنده ها پَر هَیرِن» اینطی وِه تِمومه اوُیِ دِلِه جاندار وُ پرنده ها رِه دیافرییه. خِدا بَدِیه هَرچی که بِساتِه خار هَسّه ،هَمینِتاسّه وِشونِ فِراوونی هِدا.

![](https://cdn.door43.org/obs/jpg/360px/obs-en-01-08.jpg)

ششمین روزِ دِیافرِی ین، خِدا باته: « بِنه سَر هِمِه جور جاندار مَشت بَوِّه» و هرچی خدا بات بی یه انجام بَیّه. اون جانِوَرا، دَرِندِه ، خزنده و حَشِرِه بینِنِه. خِدا بَدِیه هَرچی بِساتِه خار هَسّه و شاد بَیّه.

![](https://cdn.door43.org/obs/jpg/360px/obs-en-01-09.jpg)

اونگِدِر خِدا باته: « آدِم ره شِه واری بِسازیم تا بنهٔ دِله هَر جاندارِ سَر پادِشاهی هَکِنه.»

![](https://cdn.door43.org/obs/jpg/360px/obs-en-01-10.jpg)

اونگِدِر خِدا اَتِ کَم گِل ره بَیتِه، وِره اِنسان دِرِست هَکِرده وَ شِه نَفِسِ جا وِرِه جان هِدا. خِدا وِنِه نوم رِه آدِم بِشتِه و اَتّا گَتِ لِتکا وِنِسّه آمادِه هَکِردِه تا وِنه دِلِه زِندِگانی هَکِنه وَ وِنه جه بَرِسه.

![](https://cdn.door43.org/obs/jpg/360px/obs-en-01-11.jpg)

خِدا دَسّی دَسّی دِتا دارِ لِتکا دله بِشتِه، اَتّا زندگانیِ دار و اَتّا دارِ دیگه، خاری و بَدیِ بِشناسیِنِ دار. خِدا آدِم ره باته که لِتکایِ دِله وِه تونّه هَر دارِ تَن، میوه بَچینه و بَخِرِه فَقِط اتّا دارِ میوه رِه نَتّونه بَخِرِه که اونتام خاری و بدی بِشناسیِنِ داره که اگه اونتا دارِ میوه رِه بَخِرِه، میرنه.

![](https://cdn.door43.org/obs/jpg/360px/obs-en-01-12.jpg)

اونگِدِر خِدا باته: «خار نی یِه کِه آدِم تینار بَمونِه». چونکه حیوونا نَتونسِّنِه آدمِ وِسّه هَمدَم باوِّن.

![](https://cdn.door43.org/obs/jpg/360px/obs-en-01-13.jpg)

اینطی خِدا آدِم ره گَتِ خوُیِ دِله فِرو بَوِردِه، هَمونگِدِرِم آدمِ پَلی شافهٔ جِه اَتّا هِسِّکا ره بَیته و زَن ره دیافْریه، و زنا ره آدِمِ پَلی بیارده.

![](https://cdn.door43.org/obs/jpg/360px/obs-en-01-14.jpg)

آدِم که وِره بَدیه باته: « وِه مِرِه مونّه، ونِه نوم ره زَن اِلِمبه چونکه مَردِ پلی شافهٔ جِه بَئیت بَیّه». همینتاسّه هر مَرد شه پِی یِر وُ مارِ جِه سیوا بُونِه و شِه زنای جا پَیمون وَنّه وَ ، وِشون دِتا، دیگِه اتّا تَن بونِنِهِ.

![](https://cdn.door43.org/obs/jpg/360px/obs-en-01-15.jpg)

خدا زِنا و مَردی ره شِه واری دیافرییه وَ ِوشون ره فِراوونی هِدا و بِفرمسّه: «خَله بَوّین، وَچون بَکِنین و بِنه ره مَشت هَکِنین» و خِدا بَدیه که هَر چی دیافرییه خار هَسّه شاد بَیّه. اَتّنِه سرگِذشت شِشِمین روزِ دِلِه پیش بِیَمو.

![](https://cdn.door43.org/obs/jpg/360px/obs-en-01-16.jpg)

هفتمین روز که بَرِسّیه، خِدا شه دیافری ین رِه تِموم هَکِرده، هفتِمین روز رِه فِراوونی هِدا و وِره سیوا هَکرده وُ مُقَدِس بَدونِسّه چونکه هَمون روز ، خِدا شِه دیافری ین تِموم بَکِردِه پِه، آروم و قِرار بَیتِه. اینطی خِدا دِنیا و هرچی که وِنه دله دَره رهِ ، دیافریه

*کِتابِ مُقَدَسِ جِه بَئیته داستان:  کتاب پیدایش فصل ۱ و ۲*

## 2. ۲- گناه دنیایِ دِله بیَمو

https://openbiblestories.org/l/mzn/story-2/

![](https://cdn.door43.org/obs/jpg/360px/obs-en-02-01.jpg)

آدِم و ونه زنا اتّا قشنگه لِتکایِ دِله که خداوند وشونسّه بسات بی یه، بِه دِلخِشی زندگانی کرد بینه. با اینکه لخت و پَتی بینه امّا شرم نِداشتِنه چون هنتا گِناه دِنیا ِدله نیم بی یه. وِشون ویشتِرِ گِدِر لِتکادله قدم زونِنه و خدایِ جا گپ زونِنه.

![](https://cdn.door43.org/obs/jpg/360px/obs-en-02-02.jpg)

امّا اَتّا مولِ مَرِ لِتکادله دَیِیّه. مَر زنا جه بَپِرسیه «راسِّه که خِدا شِمه جلو ره َبیته تا تِمومِ دارایِ میوه ره نَخِرین؟»

![](https://cdn.door43.org/obs/jpg/360px/obs-en-02-03.jpg)

زنا جِواب هدا: « اِما اجازه دارمی که هر دارِ تنِ میوه ره بَخِریم فقط اتّا دارِ میوه ره نَونّه بَخريم، که وِنه نوم خار و بدیِ بشناسیِنِ دار هسّه.» خدا اِماره باته: « اگه شِما اونتا دارِ میوه ره بَخِرین و یا دَستِم بَزنین، میرنِنی.»

![](https://cdn.door43.org/obs/jpg/360px/obs-en-02-04.jpg)

مَر زِنا ره باتِه: «اینتا گَپ دِرِس نی‌یِه! شِما نَمیرنِنی. خدا شِه دونّه که اگه شِما اونتا دارِ میوه ره بَخِرین، خدایِ وِنِکِت خاری و بدی ره هِدی جه سیوا کننی

![](https://cdn.door43.org/obs/jpg/360px/obs-en-02-05.jpg)

زِنا بَدیه که اونتا دارِ میوه هَم قِشَنگه وهم خِش‌خِراک. وِهِم که خواسّه همه چی ره بَدونه، اونتا دارِ تَنِ میوه ره بَچّیه وُ بَخِرده. شه مَردی رِم هِدا وُ وِهِم بَخِرده.

![](https://cdn.door43.org/obs/jpg/360px/obs-en-02-06.jpg)

ناگِمون وِشونه چِش وا بَییّه وُ وشونِ حالی َبیّه که لُخت و پَتی‌هَسّنِه. آدِم و ونه زِنا دَته پَتِه هَکِردنه تا دارِ گِلام جِه شه لُختی ره دَپوشِنِن.

![](https://cdn.door43.org/obs/jpg/360px/obs-en-02-07.jpg)

اونگِدِرآدِم وُ وِنِه زِنا خِدایِ وَنگ رِه بِشتوسِّنه که لِتکای دِلِه قَدِم زوئه. وِشون خدایِ جه شه خِدِره جا بَزونِه. خِدا باتِه:«آدِم کِجه دَری؟» آدِم جِواب هِدا :« ته وَنگ ره لِتکادله بِشتوسِّمه و چونکه لخت و پَتی بیمه ته جه بَتِرسیمه و شِه خِدِره جا بِدامِه.»

![](https://cdn.door43.org/obs/jpg/360px/obs-en-02-08.jpg)

اَی خِدا بَپِرسیه: «کی تِره باته که لُخت هَسّی، اونتا دارِ میوه که تِره باتِمه نَخِر، بَخِردی؟» آدِم جِواب هِدا: «اینتا زِنا که مِره بِبَخشی، اونتا میوه ره مِره هِدا.» اون گدِر خِدا زِنایِ جه بَپِرسیه: «چی چیسِّه اینتا کارِه هَکِردی؟» زِنا باِته: «مَر مِره هَشوش دِم هِدا.»

![](https://cdn.door43.org/obs/jpg/360px/obs-en-02-09.jpg)

خِدا مَره باتِه: « تِه نَفرین بَئی هَسّی. ِشه اِشکِمِ سَر راه شونّی و گِل خِرنی. تِه و زَنِ هِدیِ جه بَد کَفِنِنی و تِه دودِمونِ میون و زَنِ دودِمونِ میونه جنگ و دِشمِنی اِلِمبِه. زَنِ دودِمونِ جا اَت کس اِنّه که تِه َسرِ لو گیرنِه و تِه ونه لینگِ کاب ره گاز گیرنی.»

![](https://cdn.door43.org/obs/jpg/360px/obs-en-02-10.jpg)

خِدام زِنا ره باتِه: « تِه وَچه کـَری رِه سَخت کمِّه. ته مَردی تِه اَرمونِ دل بُونه وُ وه تِه سَروَر بونه وُ تِه وِنِه دَسِ بِن.»

![](https://cdn.door43.org/obs/jpg/360px/obs-en-02-11.jpg)

خِدا مَردی ره باتِه: «چونکه شِه زِنایِ گَپِ گوش بَیتی و مِه جِه نا فَرمونی هَکِردی، بِنِه نَفرين بُونه و تِه زار و زَحمِتِ جا خِراک فِراهِم ِکنّی. آخِر سر میرنی و دِواره ِته تَن گِلِ دِله بَرگِردِنه.» آدِمم شه زِنایِ نوم ره حَوّا بِشته. یعنی زندگانی بَخش؛ چونکِه وِه وِنِسّه هَمِة آدِمایِ مار بَوّه. خِدا حیوونایِ پوسِّ جه وشون ره دَپوشِنیه.

![](https://cdn.door43.org/obs/jpg/360px/obs-en-02-12.jpg)

اونگِدِر خِدا باتِه : «اِسا که اِنسان اَمه وَنِکِتْ بَیِّه و خاری وُ بَدی رِه تونّه سیوا هَکِنِه، نَوِنّه بی یِلِّم که زندگانیِ دارِ میوه رِم بَخِرِن وَ هَمیشِکْ زنده بَمونِن.» اینطی بَیّه کِه خِدا وِشون ره قشنگِ لِتکایِ جه دَر هَکِرده. وِه لِتکایِ ورودیِ رِه فرشته های قوی هَیکل بِشته تا وِشون، زِندِگانیِ دارِ میوه ره نَچینِن و نَخِرِن.

*کِتابِ مُقَدَسِ جِه بَئیته داستان: کتاب پیدایش فصل ۳*

## 3. ۳- سِل

https://openbiblestories.org/l/mzn/story-3/

![](https://cdn.door43.org/obs/jpg/360px/obs-en-03-01.jpg)

خَله سال بوگذِشتِه پِه، آدِما بِنه سَر مَشت بَیّنِه. وِشون اَندِه خَشن و شَرور بَی بینه که خِدا بِنا بَیتِه تِمومِ دِنیا ره اتّا گَتِ سِلِ جِه نابود هَکِنه.

![](https://cdn.door43.org/obs/jpg/360px/obs-en-03-02.jpg)

مُنتا خِدا نوح ره خِش داشتِه. وِه دِرسکارِ مَرد بی یِه که آدِمایِ شَرِّ دِلِه زِندِگانی کِرد بی یه. خِدا نوح ره شِه خواستِ جه آگاه هَکِرده که خوانه گَتِ سِلِ بیاره. هَمینتاسّه وِه نوح ره بِفَرمِسّه که اَتّه گَتِ کِشتی بِسازه.

![](https://cdn.door43.org/obs/jpg/360px/obs-en-03-03.jpg)

خِدا نوح ره بِفَرمِسّه که، کِشتیِ رِه اینطی بِسازِه، کَتِلی صد و چِل مِتر وَ پَهنا بیست و سِه متر بَوّه وَ بِلِندیِ رِه پَنج متر و سیزدِه بَیرِه . نوح وِسِّه کِه کِشتی رِه سَروِ چویِ جا سِه اِشکوب بِسازِه. کِشتی وِسّه که، پَلوِر وُ بوم داشت بی بوُ و هَم اَتِّ خَلِه اِتاق و َپَنجِرِه. کِشتی اینتای وِسّه بِسات بی یِه کِه نوح وُ وِنِه خِنِوار وُ حِیوونا، سِلِ دَس دَر اَمان دَوِّن.

![](https://cdn.door43.org/obs/jpg/360px/obs-en-03-04.jpg)

نوحِم خِدایِ دَستوره انجام هِدا. وِه وُ وِنه سِه تا ریکا هَمونطی که خِدا اَمر هَکرِد بی یِه کِشتی ره بِساتِنه. مُنتا چونکه خَله گَتِ کِشتی بی یِه چَن سال بَوِرده تا بِسات بَوّه. نوح َمَردِم ره هُشدار هِدا که سِل اِنِه و وِشون وِنه خِدا ره هارِشِن و وِنه وَر بی یِن. مُنتا وِشون نوحِ گَپِ بوُوِر نَکِردِنه.

![](https://cdn.door43.org/obs/jpg/360px/obs-en-03-05.jpg)

خِدا اَی اَمر هَکِرده که نوح وَ وِنه خِنِوار شِه و شِه حِیوونایِ اَندازه خِراک جَم هَکِنِن. هَمه چی که آمادِه بَیّه، خِدا نوح ره باتِه اِسا اون زَمون بَرِسیه تا اون هَشت تَن کِه وِه وُ وِنه زِنا، وِنِه سِه تا ریکا و سِه تا پِسِر زَنون کِشتیِ دِلِه بورِن.

![](https://cdn.door43.org/obs/jpg/360px/obs-en-03-06.jpg)

خِدا هَمِه جور جاندار ُو پَرِندِة جِه اَتّه جفت نَر و ما نوحِ وَر رایی هَکِرده تا کِشتیِ دِله بُورِن و سِلِ جِه دَر اَمون داوّن. هَمطیِم خِدا تِمومِ حیوونایِ دِله که قِربونیِ وِسّه بِدَرد خِردِنه ره هَفتا جفت نَر و ما نوحِ وِسِّه رایی هَکِرده. هَمه که کِشتیِ دله بوردِنه، خِدا شِه کِشتیِ دَره دَوِسّه.

![](https://cdn.door43.org/obs/jpg/360px/obs-en-03-07.jpg)

اونگِدِر وارِش چِل روزِ آزِگار بِوارِسّه وُ اوُ بِنه جِه دَریَمو، اینطی که حَتّی بِلِن تِرین کوها رِم اوُ دَپوشِنیه.

![](https://cdn.door43.org/obs/jpg/360px/obs-en-03-08.jpg)

هَر جانداری که خِشکی دلِه دَی بینه، آدِما و حِیوونای که کِشتیِ دله دَی بینه بِه کِنار، هَر چیِ دیگِه نیست و نابود بَیِّنه. کِشتی اوُیِ سَر رُوشْ خِردِه و هَر چی که وِنه دِله دَی بی یِه سالِم بَمونِسّه.

![](https://cdn.door43.org/obs/jpg/360px/obs-en-03-09.jpg)

وارِش که لَس هِدا، کِشتی پَنج ماه اوُیَ سَر رُوش خِردِه واین پَنج ماهِ دِلِه اوُ شِروع هَکِرده یِواش، یِواش فِرو بوردِن. آخِر دَس اَتّه روز کِشتی اَتّا کویِ سَر اِس هَکِرده. مُنتا دِنیا هَنتا اوُیِ بِن دَی بی یِه. سِه ماه که بوگذِشتِه کوهایِ تِک دیار بَیِّه.

![](https://cdn.door43.org/obs/jpg/360px/obs-en-03-10.jpg)

چِل روز بوگذِشته پِه، نوح اَتّه کِلَج ره کِشتیِ جِه دَر هَکِرده تا دور ُو وَر چَرخ بَزِنه بَوینه چه خَوِرِه. کِلَج بال بَزّو بوردِه مُنتا خِشکی ره پیدا نَکِرده.

![](https://cdn.door43.org/obs/jpg/360px/obs-en-03-11.jpg)

اونگِدِر نوح اَتّا کوتِر رِه رایی هَکِرده. اَمّا کوتِرِم نَتّونِسّه خِشکِه بِنه پيدا هَکِنه، هَمینتاسّه دِواره دَگِرسِه بیَمو نوحِ وَر. اَتّا هَفتِة دیگِه نوح اَتّه کوتِرِ دیگه رایی هَکِرده واین کَش کوتِرزَیتونِ گِلام رِه شِه هِمکِت کِشتیِ دِله بیاردِه! اوُ فِرو بورد بی یِه و همه جا سوز بَیْ بی یِه.

![](https://cdn.door43.org/obs/jpg/360px/obs-en-03-12.jpg)

نوح اَتّه هَفتِة دیگه لَس هِدا و کوتِر رِه سِیِمین کَش رایی هَکِرده. مُنتا این کَش کوتِرنَگِرِسّه و نیَمو. اوُ اِسا دیگه فِروبورد بی یِه و کوتِر خِشکِ بِنه پيدا هَکِرد بی یِه.

![](https://cdn.door43.org/obs/jpg/360px/obs-en-03-13.jpg)

دِ ماه بوگذِشتِه پِه خِدا نوح ره بِفَرمِسّه: «شِه خِنِواده وُ شه حیوونایِ هِمکِت کِشتیِ جِه دَر بیيِن. خَلِه باوّین، وَچه بیارین و بِنِه سَر رِه مَشت هَکِنین.» اینطی بَیّه که نوح وُ وِنه خِنِواده کِشتیِ جه یور بی یَمونِه.

![](https://cdn.door43.org/obs/jpg/360px/obs-en-03-14.jpg)

نوح کِشتیِ جِه دَر بیَم پِه، اَتّه قِربونگاه بِساتِه و هَمون حیوونایی که هَمین کارِوِسّه کِنار بِشت بی یِه ره قِربونی هَکِردِه. خِدام نوحِ اینتا کارِ جه شاد بَیِّه و وِنه تِوارِ فِراوونی و بَرِکِت هِدا.

![](https://cdn.door43.org/obs/jpg/360px/obs-en-03-15.jpg)

اونگِدِر خِدا اینطی قِرار بِشتِه: «دیگِه زَمین ره اِنسانِ شِرارت و بَدیِسّه، سِل یا نَفرینِ جا نابود نَکِمّبه. دِرِسته که اِنسانِ دل هَمون کِچیکیِ جه گِناهکاره.»

![](https://cdn.door43.org/obs/jpg/360px/obs-en-03-16.jpg)

هَمینتاسّه خِدا نِشون به اون نِشون که شِه قِرارِ سَر دَره، یالِمون دِرِس هَکِرده. هَر زمون که یالِمون آسِمونِ دِله دیار بی یِه، خِدا و وِنه قوم، خِدایِ قِراره شِه یاد ایاردِنه.

*بَئیته داستان کِتابِ مُقَدَسِ جِه: کتاب پیدایش فصل های ۶ تا ۸*

## 4. ۴- خِدا ابراهیمِ جا پَیمون دَوِسِّه

https://openbiblestories.org/l/mzn/story-4/

![](https://cdn.door43.org/obs/jpg/360px/obs-en-04-01.jpg)

خَلِه سال بی یِه کِه نوحِ دوُرِه طوفان رَد بَی بی یِه، اَی آدِما بِنه رِه مَشت هَکِردِنِه. وِشون دِواره گِناه کِردِبینه، هَم دِئیِ جا وَ هَم خِدایِ پیشگاه، وَ چونکِه اَتّا زِوونِ گَپ زُو بینه، اَتِّ جا جمع بئینه تا شه وسّه اتّا شهر بِسازِن،بِجای اینکه خِدایِ دَستورِ ره گِس هَدِن وُ همه جا تَنِک بَوّن وُ بِنه رِه مَشت هَکِنِن .

![](https://cdn.door43.org/obs/jpg/360px/obs-en-04-02.jpg)

وشون اَندِه خِدپَسِن بینه کِه ِنخواسِّنه خِدایِ جِه فَرمون بَوِرِن، حتّی برجِ بارو بِساتِنه که سَر به فَلِکْ کَشِیه. خِدا بَدیه کِه اَگه وِشون همینطی شِه شِرارت رِه ادامه هدِن، وشون بَدتِر آلوده بونِنِه و اَی ویشترِگِناه کِننِه.

![](https://cdn.door43.org/obs/jpg/360px/obs-en-04-03.jpg)

همینتاسّه خِدا وشونِ اتّا زوون ره چَنتا زِوون هَکرده و وشونِ ره همه‌ جای دِنیا تَنِک هَکرده. اونتا شهر که آدِما دَئی نه سات بیِنهٔ نُوم ره بابل بِشتِنه یعنی «عَجِق وَجِقْ».

![](https://cdn.door43.org/obs/jpg/360px/obs-en-04-04.jpg)

چند صد سال بُگذِشته پِه خِدا اَتّا مَردیِ که وِنه نُوم اَبرام بی یِه جا گَپ بَّزو. خِدا بِفَرمّسِه: «شِه وَطِن و پیِ یِری سِره رِه تَرک هَکِنن و هَمونجِه که مِن تِره نِشون دِمّه بور. مِن تِره برکِت و فِراوونی دِمّه وُ تِه جِه اَتِّه گَتِ توار سازِمّه. مِن تِه نُوم وُ تِه آوازه ره بِلِند ِکمِبه. هرکی تِره برکِت هَدِه، وشون رِه بَرکت دِمّه وَ هَرکی تِره نَفرین هَکِنه، مِن وِشون رِه نَفرین کِمبِه. هَر چی آدِم دِنیایِ دِلِه دَرِه رِه تِه خاطری برکِت و فِراوونی دمّه.»

![](https://cdn.door43.org/obs/jpg/360px/obs-en-04-05.jpg)

اَبرام خِدایَ جِه فَرمون بَوِرده. وِه شِه زِنا سارا، شِه نوکِرا و پیشکارا وُ شِه دارونِدارِ بَیتِه و کنعانِ سَرزَمینِ وَری که خِدا وِره نشون هدا بی یِه بُورده.

![](https://cdn.door43.org/obs/jpg/360px/obs-en-04-06.jpg)

اَبرام کِه کنعان بَرِسیه، خِدا بَفِرمِسِّه: «شِه دور وُ وَرِ هارِش. تِمومِ این سرزمین که وینّی رِه تِه و ِته وَچونِ بَخشِمبه.» اون گِدِرِ اَبرا‌م همونجِه، بَمونِسّه.

![](https://cdn.door43.org/obs/jpg/360px/obs-en-04-07.jpg)

اونجِه اَتّا مَردی دَیِه که وِنِه نُومْ؛ مِلکیصِدِق بی یِه. وِه گَتِ خِدایِ پیشوا بی یِه. اَبرام شِه اَتّا جَنگِ تِموم بَکِردِه پِه، وِرِه بَدیِه. مِلکیصِدِق، ابرام رِه فراوونی هِدا وُ باتِه: «گَتِ خِدا که آسِمون وُ زمین وِنِه دَس دَرِه، اَبرام رِه فراوونی هَدِه.» اون‌گِدِر اَبرامِمْ‌ هرچی که جَنگِ دلِه بَئیتْ بِی یه، هر دَه تایِ دِلِه اَتّا مِلکیصِدِق رِه هِدا.

![](https://cdn.door43.org/obs/jpg/360px/obs-en-04-08.jpg)

خَله سال بُگذِشته، منتا اَبرام و سارا، هَنتا وَچِه دار نَی بینِه. خِدا اَبرامِ جا گَپ بَزّو و دِواره وِره وَعدِه هِدا کِه وشون رِه اتّا ریکا بَخشِنه و وِنِه تِوارِجِه خَلِه وَچه دِنیا اِنِه که آسمونِ اِستارِ وِنِکِت زیاد بُوِننِه. خِدا ابرام ره عادلِ مرد بَدونِسّه چونکه وِه خِدای وعده رِه بُووِر هَکِرد بی یِه.

![](https://cdn.door43.org/obs/jpg/360px/obs-en-04-09.jpg)

اون گِدِر خِدا اَبرامِ جِا پَیمون دَوِسِّه. هَمیشِکْ اینطی بی یه که عَهد وُ پیمون دِ وَر دَوِس بُونه، همینتاسّه هَر دِ وَر، قِرار وَنِّنِه هِدیِ وِسّه اَتّا کار هَکِنِن. مُنتا اَبرام، اونگدر ِکه خِدا وِنِه جا پَیمون دَوِسِّه، گَتِ خویِ دِلِه دَیِّه. هَمون گَتِ خویِ دِلِه خِدایِ وَنگِ بِشتوسِّه. خِدا باته: «مِن تِه تَنِ جِه اتّا ریکا تِرِه بَخشِمبِه و کنعانِ سرزمین ره ته تِوارِ بَخشِمبِه.» مُنتا اون ماقه اَبرام هَنتا وَچه نِداشِت بی یه.

*کِتابِ مُقَدَسِ جِه بَئیته داستان: کتاب پیدایش فصل ۱۱ تا ۱۵*

## 5. ۵- نِشون بَئی ریکا

https://openbiblestories.org/l/mzn/story-5/

![](https://cdn.door43.org/obs/jpg/360px/obs-en-05-01.jpg)

ده سال بوُگذِشت بی یِه کِه اَبرام و سارای کنعانِ جِه کوچ هَکِرد بینه و وِشون هَنتا سَبز نَی بینه، سارای اَبرامِ زِنا وِرِه باته: «اِسا که خِدا مِه وَچِه دار بَیّین رِه نِخوانِه، و مِه وَچِه کری هِم بوگذِشته و پیر بَئی مه، تِه تونّی مِه دَستمَرِه هاجِر رِه شِه وِسّه بَیری وَ وِنِه جا بَخِسی تا وِه مِه وِسِّه وَچِه بَکِنه.»

![](https://cdn.door43.org/obs/jpg/360px/obs-en-05-02.jpg)

اونگِدِر، اَبرامْ هاجِر جا ازدواج هَکِرده. هاجِر اَتّا ریکا بَکِرده که اَبرام وِنِه نوم رِه اِسماعیل بِشته. مُنتا سارای، هاجِر رِه حَسودی کرده، اسماعیل که سیزده ساله بَیِّه، اَتِّ کَشْ دیگِه خِدا اَبرامِ جا گَپ بَّزو.

![](https://cdn.door43.org/obs/jpg/360px/obs-en-05-03.jpg)

خِدا بِفَرمِسِّه: «مِن خدای تِوانایِ بی مونند هَسّمه و تِه جا عَهد و پَیمون وَمِّه» هَمون آن اَبرام خِدای پیشگاه ِشه سوال بِنِه سَر بشته وُ خدام وره بِفَرمِسِّه: «تِه گَتِ شِه تیره و تِوار و وِشونِ پی یِر ُبونی. مِن کنعانِ زمین رِه تِرِه وَ تِه تِوارِه بَخشِمبه تا شِمه میراث بَوِّه و همیشٔه وِسّه؛ وشونِ خِدا بُومِه. تِه هِم ونه هر چی ریکا ِته خِنوار دَرِنهٔ چیک ره بَورینی»

![](https://cdn.door43.org/obs/jpg/360px/obs-en-05-04.jpg)

ته زنا سارای اَتّا وچه دِنیا ایارنِه کِه هَمون عَهد وُ پَیمونِ وَچوئِه. وِنِه نومْ رِه ایساق بی یِل. من ونِه جا پَیمون وَمبِه وَ ونه جِه گَتِ توار دِرِس کِمبِه. اسماعیل جِم اَتّه گته توار بِلِن کِمبِه، مُنتا مِه پَیمون ایساقِ جا دَوِس بُونِه» اونگِدر خِدا اَبرام نومِ رِه عَوِض هَکِرده وَ ِابراهیم بِشته یعنی گَت و پی یِرِ خَلِه قوما. سارای نوم رم ساره بِشته یَعنی شاهزادِه.

![](https://cdn.door43.org/obs/jpg/360px/obs-en-05-05.jpg)

همون روز ابراهیم شِه خانِدانِ دله تِمومِ ریکائونِ چیک ره بَورینِسّه. اَتِّ سال بوگذِشته پِه، کِه دیگِه ابراهیم صد ساله و سارِم نَوِد ساله بی یِه ساره ریکا بِزا. هَمونجوری که خدا بِخواست بی یِه،وِشونِم ونه نوم رِه ایساق بِشتِنه.

![](https://cdn.door43.org/obs/jpg/360px/obs-en-05-06.jpg)

ایساق که اَتّا جِوونِ مردی بَیِّه، خِدام اِبراهیمِ ایمون ره آزمایش َهَکردِه و باتِه: « شِه اَتّا ریکا ایساق رِه مِه وِسِّه قِربونی هَکِن» ابراهیم اَت وار دیگه خِدا ِجه فَرمون بَوِردِه و شِه خِدره آماده هَکرده تا شه ریکا ره ِقربونی هَکِنِه.

![](https://cdn.door43.org/obs/jpg/360px/obs-en-05-07.jpg)

اونگدر که ابراهیم و ایساق قربونگاهِ وَری شینه، ایساق شِه پِی یِر جه بَپِرسیه: « جانِ پِی یِر، قربونی وِسِّه هیمه آمادوئه مُنتا قربونی وَره کِجِه دَرِه؟» اِبراهیم باتِه: «مِه جانِ ریکا، قربونی وَرِه رِه خِدا رَجْ کِنده»

![](https://cdn.door43.org/obs/jpg/360px/obs-en-05-08.jpg)

هَمینکه وشون قِربونگاه بَرسینه، ابراهیم شِه ریکا ایساق ره رَسِن جا دَوِسِّه و بِشته قِربونگاهِ سَر. اِبراهیم خواسِّه ِشه ریکا رِه قِربونی هَکِنِه کِه خدا ِبفَرِمسِّه: «لَسْ هَدِه، شِه ریکا رِه کار نِدار وُ وِرِه نَکوشْ، اِسا دومبِه که شه دل دله مِه جِه تَرسِنی، چونکه مِه وِسِّه شِه اَتّا ریکایِ جِه بوگذِشتی»

![](https://cdn.door43.org/obs/jpg/360px/obs-en-05-09.jpg)

ابراهیم اون دور وُ وَر اَتّا نَرِ گِسفِن بَدیِه که کِچیکِ دارِچلهٔ تَن دِماس بی یِه. خِدا اینتا نَرِ گِسفِن رِه ایساقِ عَوِضْ، قِربونی وسّه رَجْ هَکرد بی یه. اِبراهیمِم خِشال نَر گِسفِن ره ُ قِربونیِ وسّه خِدا رِه پیشکِش هَکرده.

![](https://cdn.door43.org/obs/jpg/360px/obs-en-05-10.jpg)

هَمونگِدِر خِدا ابراهیمِ ِباتِه: «اِسا که بِخواسّی ِشه دار وُ نِداره، هَمون شه اتّا ریکا ره مِه وسّه فِدا هَکِنی، مِنِم شِه گَپِ سَر دَرمبه که تِرِه فراوونی هَدِم. چونکه ِمه فَرمون رِه اَنجام هِدایی، تِه توار، آسِمونِ اِسّارِهٔ تونْ ویشتر بوُنه وَ بِنه سر آدِما، هِمِه تِه تِوارِ جِه فِراوونی گیرنِنِه.

*کِتابِ مُقَدَسِ جِه بَئیته داستان: کتاب پیدایش فصل ۱۶ تا ۲۲*

## 6. ۶- خدا ایساقِ وسّه جوُر کنده

https://openbiblestories.org/l/mzn/story-6/

![](https://cdn.door43.org/obs/jpg/360px/obs-en-06-01.jpg)

اونگِدِر که ابراهیم پیر بَیْ بی یِه وُ وِنِه ریکا ایساق جوون، ابراهیم شِه اتّا پیشکار شِه زادگاه رایی هَکرده تا وِنه قوم وُ خیشِ دِلِه ایساقِسّه زَن بَیره و شِه هِمکِت بیاره.

![](https://cdn.door43.org/obs/jpg/360px/obs-en-06-02.jpg)

پیشکار خَلِه دِرِه راه بوُردِه تا ابراهیمِ قوم وُ خیشِ پَلی بَرسیه، خِدا اونتا پیشکار ره رِبِکای وَری بَکِشیه. ربکا ابراهیمِ برارِ نَوه بی یه.

![](https://cdn.door43.org/obs/jpg/360px/obs-en-06-03.jpg)

رِبِکام اَره هِدا که ِشه خِنِواده رِه تَرک هَکِنه وُ پیشکارِ هِمکِت ایساقِ سِرِه بُوره. همینکه وِه بَرِسیِه ایساق وِنِه جا عروسی هَکِردِه.

![](https://cdn.door43.org/obs/jpg/360px/obs-en-06-04.jpg)

خَلِه زَمون بوگذشته، ابراهیمِم بَمرده و خِدا شِه پَیمونِ خاطری که ابراهیمِ جا دَوِس بی‌یه، ایساق ره فراوونی وُ برِکِت هِدا. اتّا وَعدِه که خِدایِ عَهد وُ پَیمونِ دِلِه دَئی بی یه اینتا بی یِه کِه اِبراهیمِ تِوارِ بی اَندازِه زیاد بوُنه. مُنتا ربکا، ایساقِ زنا نَتونِسّه وَچه دار بَوّه.

![](https://cdn.door43.org/obs/jpg/360px/obs-en-06-05.jpg)

خدا اجازه هِدا ایساقِ دعایِ جه رِبِکا دِگِلی سنگین بَوّه. اون دِتا وَچه هنتا دِنیا نی‌یَم پِه، مارِ اِشکِم دِلِه دیِی جا جنگ داشتِنه و همینتاسّه رِبِکا خدا جِه بَپِرسیه، چی شی وِسّه اینطی بونه.

![](https://cdn.door43.org/obs/jpg/360px/obs-en-06-06.jpg)

خِدا رِبِکا ره باتِه: «تِه، دِتا ریکا دِنیا ایارنی. وِشون دِ تایِ جِه دِ جور قُوم بِه وِجود اِنه. وشون همیشِه دیی جا جنگ دارِنِنه، اّما گَتِ ریکایِ قوم خُردِ برارِ قومِ جِه فَرمون وَرنه.

![](https://cdn.door43.org/obs/jpg/360px/obs-en-06-07.jpg)

رِبِکایِ ریکائون که دنیا بی یَمونه، گَتِ ریکا، سِرخه رو بی‌یه و ونه تَن و پِه اَنده می داشته که ونه نوم ره عیسو بِشتِنه. وِنه پشتِ سر خُردِ ریکا همینطی که شِه برار عیسویِ لینگِ کابِ بَئیت بی‌یه، دنیا بی یَمو. ونه نوم رِم یَعقوب بِشتِنه.

*کِتابِ مُقَدَسِ جِه بَئیته داستان: کتاب پیدایش فصل ۲۴ آیات ۱ تا ۲۵ و فصل ۲۶*

## 7. ۷- خِدا یعقوب رِه فِراوونی دِنّه

https://openbiblestories.org/l/mzn/story-7/

![](https://cdn.door43.org/obs/jpg/360px/obs-en-07-01.jpg)

اون دِتا ریکام گَت بَئی نه. عیسو شِکاردوست داشتِه ، مُنتا یَعقوب سرهِ دِلِه دَی بی یِه. رِبِکا یَعقوبِ رِه ویشتِردوست داشتِه و ایساقِم عیسو رِه.

![](https://cdn.door43.org/obs/jpg/360px/obs-en-07-02.jpg)

اَتّه روز؛ عیسو وِشنا و تِشنا شکارِ جِه دَگِرسّه ،یَعقوب رِه باتِه: «اَت کَم شه خِراکِ جه، مِرِه هَدِه» یَعقوب وِرِه اینطی جواب هِدا: «تِه ونه مِره قول هَدی، شِه حقِّ گَتّریِ که تِه زودتِر دِنیا بیَموئِنِ وِسّه تِرِه رِسِنِه رِه مِرِه بِبَخشی» اونگِدِر عیسوِم قِرار بِشته که شِه حَقِّ گَتِّری رِه هَدِه یَعقوبِ. یَعقوبِم ِشه خِراکِ هِدا وِرِه.

![](https://cdn.door43.org/obs/jpg/360px/obs-en-07-03.jpg)

اونگِدِر که ایساق خواسّه شِه برکت رِه هَدِه عیسو رِه، رِبِکا وِره کَلِک بَّزو وَ یَعقوب رِه عیسوی جا رایی هَکِرده پی یِرِ اتاقِ دِله. ایساق پیر بی ِیه و نَتونِسّه خَلِه خار بَوینه. یَعقوب عیسوی رَخت رِه شِه تَن دَکِرده و شِه دَسّ وُ گِردنِ بِزِ پوستِ جا دَپوشِنیه.

![](https://cdn.door43.org/obs/jpg/360px/obs-en-07-04.jpg)

یَعقوب شِه پِی یِر پَلی بی یَمو وُ وِره باتِه: « مِنِمه، تِه عیسو، اِسا بی یَمّه کِه مِره برکت هَدی» ایساق که بِزِ می رِه دَس بزوئه و اتِه کَمِم بو بَکِشیه، شِه پیش گِمون هَکرده که عیسو وِنه پَلی بیَ یِمو و وِرِه برکت هِدا.

![](https://cdn.door43.org/obs/jpg/360px/obs-en-07-05.jpg)

عیسو یَعقوبِ جِه بیزار بی یِه، چونکه یَعقوب وِنِه حَقِّ گَتِّری رِه بَدِزّیه. هَمینتاسّه وِهِم نَقشِه دَچیّه که ایساقِ بَمِرده پِه، یَعقوب رِه بَکوشِه.

![](https://cdn.door43.org/obs/jpg/360px/obs-en-07-06.jpg)

مُنتا رِبِکا وِنِه نَقشِه ره بَخونِسّه . هَمونگِدِر وِه وُ ایساقِ ، یَعقوب رِه دِرِه راه؛ رِبِکایِ خِنِوادِة پَلی رایی هَکِردِنه.

![](https://cdn.door43.org/obs/jpg/360px/obs-en-07-07.jpg)

یَعقوب خَلِه سال رِبِکای خِنِوادِة پیش زِندِگانی هَکِرده. همونگِدرَام زَن بَوِرده و دِوازدَه تا ریکا و اَتّا کیجا بیارده. خِدام وِره خَلِه فراوونی و سَرمایه هِدا.

![](https://cdn.door43.org/obs/jpg/360px/obs-en-07-08.jpg)

بیست سالِ آزِگار که یَعقوب شِه سِرِه و کَنعانِ جِه سیوا بَی بی یِه ،دِواره شِه وَچون و نوکِرِ و شِه گِسفَنِِ رَمِهٔ هِمکِت دِوارِه کَنعان دَگِرِسّه.

![](https://cdn.door43.org/obs/jpg/360px/obs-en-07-09.jpg)

یَعقوب خَله تَرس داشته؛ چونکه گِمون کِردِبی یِه،نَکِنه عیسو هَنتا خوانِه وِره بَکوشِه. هَمینتاسّه شِه گَلّه و رَمِهٔ دلِه اتِّه خَله پیشکَشی حیوون عیسویِ وِسّه رایی هَکرده. اونتا خِدمِتکار که رَمِه رِه عیسوی پَلی بَوِرد بی یِه، وِرِه باته: «اینتا رَمِه ره ته خِدمِتگِزار، یَعقوب شِمِسّه پیشکِش هَکِرده و شِه هِم خَله زود اینجه رِسِنه .»

![](https://cdn.door43.org/obs/jpg/360px/obs-en-07-10.jpg)

مُنتا عیسو دیگه نِخواسّه یَعقوبِ سَر بِلایی بیاره وَ ونِه بَدی یِنِ جِه خَلِم خِشال بَّیه. یَعقوب کَنعانِ دِلِه آسودِه وُدِلِ خِش زندگانی کِردبی یِه. ایساق که بَمرده؛ عیسو و یَعقوبِ وِره چال هَکِردِنِه . اون عَهد وُ پَیمون که خِدا ابراهیمِ جا دَوِس بی یه، ایساق بَمِرده پِه یَعقوب ره بَرِسیه.

*کِتابِ مُقَدَسِ جِه بَئیته داستان : کتاب پیدایش فصل ۲۵ آیات ۲۷ تا ۳۵ و فصل ۲۹*

## 8. ۸- خِدا یوسِف وُ وِنِه خِنواده رِه رِهایی دِنِّه

https://openbiblestories.org/l/mzn/story-8/

![](https://cdn.door43.org/obs/jpg/360px/obs-en-08-01.jpg)

خَلِه سال بوگذِشتِه وُ یَعقوب پیرِمَردی بَیِّه. اَتّا روز شِه عَزیزِ ریکا؛ یوسِف رِه، بِرارونِ دِمّال رایی هَکِردِه تا وِشونِ سِلامَتیِ جِه خَوِر بیارِه که گِسفِن چِرا بوردْ بینه.

![](https://cdn.door43.org/obs/jpg/360px/obs-en-08-02.jpg)

یوسِفِ ِبرارون وِنه جِه بَد دَکِت بینه، چونکه یَعقوب وِره ویشتِر دوس داشتِه و یوسِفِم خو بَدی بی یِه که وِشونِ سَروَر بوُنه. همینتایِسّه یوِسف که شِه بِراروِن پَلی بورده، وشون وِره بَیتِنِه و بَرده فِروشا رِه بَروتِنه.

![](https://cdn.door43.org/obs/jpg/360px/obs-en-08-03.jpg)

یوسفِ بِرارون سِرِه نَرِسی پِه، یوسِفِ جِمِه رِه چاک بَزّونِه وُ بِزِه خون رِه بَشِنینِه وِنِه جمة سَر. اونگِدِر یوسِفِ جِمِه رِه شِه پی یِرِه سِراغ هِدانه تا گِمون هَکِنه که اَتّا جانِوَر یوسِف رِه بَکوشته. یَعقوبِم بوُوِر هَکِرده وُ عزادار بَیِّه.

![](https://cdn.door43.org/obs/jpg/360px/obs-en-08-04.jpg)

بَردِه فِروشا یوسِف ره مصرِ دِلِه بَوِردِنه. مِصرِم که خَلِه قَوی وَ گَتِ سَرزَمین بی یِه و نیلِ روخِنِه کِنار مَرز و سامون داشتِه. بَردِه فِروشِم وره اَتّا دارا مردی کِه مِقام دار بی یِه ره بَروتنه. یوسِف شِه اِرباب رِه دِرِستْ خِدمِت کِردِه و خِدامْ وِرِه فِراوونی هِدا.

![](https://cdn.door43.org/obs/jpg/360px/obs-en-08-05.jpg)

اِربابِ زَن، هَی نَقشِه کَشیِه تا یوسِفِ جِه بَخِسِه، مُنتا یوسِف رَد دا بی یِه تا خِدایِ پیش گِناه نَکِنِه. هَمینتاسِّه اِربابِ زَنْ، یوسِفِ کارِ جِه فِئلْ بی یَمو و وِرِه بَدنوم هَکِردِه. یوسِفِم بَیتِـنِه وُ زِندونی بَیِّه، مُنتا یوسِف زِندونِ دِلِم خِدا جا وِفادار بَمونِسِه وَ خِدا وِرِه بَرِکِت وُ فِراوونی هِدا.

![](https://cdn.door43.org/obs/jpg/360px/obs-en-08-06.jpg)

چند سال رَد بَئی پِه و یوسِف، با اینکِه بی گِناه بی یِه؛ هَنتا زِندونی بی یِه. اَتّا شو فِرعُون، مِصرِ پادِشاه دِ تا خو بَدیِه که وره آشِفِته هَکِرده. فِرعُونِ پیشکار وُ مِشاوِرام هیچکَدوم نَتّونِسِّنه فِرعُونِ خویِ جِه سَر دَر بیارِن.

![](https://cdn.door43.org/obs/jpg/360px/obs-en-08-07.jpg)

چونکه یوِسف به خواست خِدا تعبیرِخُو بَلِد بی‌ یِه، فِرعون وِرِه زِندونِ جِه شِه پیش بِخواسِّه تا وِنِه خُویِ جِه سَر دَر بِیاره. یوسف وِرِه باتِه: «خِداوَند هَفت سالِ مَحصول رِه فِراوونی ِدنّه مُنتا وِنه پِه، هَفت سال خِشکسالی بوُنِه.»

![](https://cdn.door43.org/obs/jpg/360px/obs-en-08-08.jpg)

فرعون یوسِفِ دونایی ره کِه بَدیه میم بَئیه و دِیِّمین مِقامِ مِصر رِه هِدا وِره.

![](https://cdn.door43.org/obs/jpg/360px/obs-en-08-09.jpg)

یوِسف مردِم ره باِته که هفت سالِ فِراوونی دِلِه، هَر چنده کِه وِشونِ دَستِ بَیتِه، اِمبار بَزِنِن. اِسا که هفت سالِ خِشکسالی شِروع بَیِّه، یوسِفِم هَمون محصولا ره مَردِم رِه روتِه تا هَمِه شِه اَندازِه خِراک داِرِن.

![](https://cdn.door43.org/obs/jpg/360px/obs-en-08-10.jpg)

خِشکسالی اَنده تنگ هِدا بی یه که مصرِ دله بَکِت، کنعانِ سرزمینِ دلِم همونجه که یعقوب وُ وِنه خِنِوار زِندگانی کِرد بینه رِم بَئیت بی یه.

![](https://cdn.door43.org/obs/jpg/360px/obs-en-08-11.jpg)

هَمینتاسّه، یَعقوب ِشه گَتِ ریکائون ره خِراک وُ آذِقه دِمّال رایی هَکِرده. وِشونِم کِه یوسِفِ جا چِش دَر چِش بَئی نِه تا وِنِه جِه خِراک بَخرینِن وِرِه نِشناسینِه مُنتا یُوسِف وِشون رِه بِشناسیِه.

![](https://cdn.door43.org/obs/jpg/360px/obs-en-08-12.jpg)

یوسِف خواسته بَوینه کهِ ونه بِرارون تغییر هَکردنِه یا نا، وِشون ره آزمایِش هَکِرده. باته: «من یوسِفِمه شِمه بِرار، نَتِرسین. شِما مِه جا بَدی هَکِردنی مُنتا خِدا شِمِه بَدی رِه؛ خاری دِگارد‌نیه. اِسا بِی یین مِصِر دِلِه زندگانی هَکِنین، چونکِه مِن اینجِه تومبِه شِما و شِمه خِنوارِ وِسّه، هَمِه چی فِراهِم هَکِنِم.

![](https://cdn.door43.org/obs/jpg/360px/obs-en-08-13.jpg)

یوسِفِ بِرارون سِره دَگِرسِّه پِه، یوسِفِ زنده بی یِن رِه ِشه پی یِر؛ یَعقوُبِسّه باتِنِه. پی یِرِم خَلِه خِشالی هَکِردِه.

![](https://cdn.door43.org/obs/jpg/360px/obs-en-08-14.jpg)

دِرِستِه کِه یَعقُوب پیر بَیْ بی یِه اَمّا شِه خِنِوادِة هِمکِت، مِصر کوچ هَکِردِه وَ هَمونجِه زِندِگانی هَکِردِنِه. یَعقُوب نَمِردِه پِه شِه هَمِة ریکائون رِه بَرِکِت هِدا وُ وِشونِسّه دِعای فِراوونی هَکِردِه.

![](https://cdn.door43.org/obs/jpg/360px/obs-en-08-15.jpg)

اونتا پَیمونی که خِداوَند ابِراهیمِ جا دَوِس بی یه، ایساقِ جِه، یَعقوبِ رِه بَرِسیِه، و وِنِ پِشت یَعقوبِ دِوازدَه تا ریکا وُ وِشونِه خِنوار رِه بَرِسیِه. دِوازدَه تا ریکایِ تِوارِ جِه، دِوازدَه تا طایِفِة ِاسراییلْ به وِجود بیَمونِه.

*کِتابِ مُقَدَسِ جِه بَئیته داستان: کتاب پیدایش فصل ۳۷ تا ۵۰*

## 9. ۹- خِدا موسی رِه شِه پیش بَخونِسِّه

https://openbiblestories.org/l/mzn/story-9/

![](https://cdn.door43.org/obs/jpg/360px/obs-en-09-01.jpg)

یوسِف بَمِرده پِه وِنه خِنوادِه مِصرِ دِله مونِسّه گار بَیّینه. خله سال وشون وُ وشونِ وَچونْ همونجه زندگانی کِردِنه وُ خَلِه وَچِه بیاردِنه. مصریام وِشون رِه اسراییلی وَنگ کِردِنه.

![](https://cdn.door43.org/obs/jpg/360px/obs-en-09-02.jpg)

چَن صَد سال بوگذِشته پِه، اسراییلیِا خَله زیاد بَی بینه. مصریام دیگه یوسِف وُ وِنِه کارا رِه شِه یادِ جِه بَوِرد بینِه. وشون اسرایلیایِ جه تَرسینه چونکه َخله زیاد بَی بینِه. هَمینتاسّه اونتا فرعون که مصرِ پادِشاه بی یِه، اسرایلیا رِه مصریایِ نوکِر و بَرده هَکِرده.

![](https://cdn.door43.org/obs/jpg/360px/obs-en-09-03.jpg)

مصریا، اسراییلیا رِه وادار کِرد بینه که وِشونِسّه سِرا وُ کاخ وُ حتّی وِشونسّه اَتِّ خَله شهر بِسازِن. سَنگینِ کارِ جه، اَتِّه مِنّیکْ آسایِش وُ آرامِشْ وِشونِسِّه نَمونِسْ بی یِه و زِندگانی رِه وِشونِسِّه تَلْ هَکِردْ بی یِه.

![](https://cdn.door43.org/obs/jpg/360px/obs-en-09-04.jpg)

فرعون بَدیِه که اسراییلیا ََخله وَچِه کِنّنِه، هَمینتاسّه ِشه قوم ره دَستور هِدا که اِسراییلیایِ چِلیک وچونِ دله فقط ریکائون ره نیلِ روخنة دله دِم هَدِن و بَکوشِن.

![](https://cdn.door43.org/obs/jpg/360px/obs-en-09-05.jpg)

همونگِدِر اَتّا اِسراییلی زِنا یِتّـا ریکا دِنیا بیاردِه. وِه وُ وِنه مَردی؛ اَندِه کِه تونِسِّنه چِلیک وَچِه رِه جا بِدانِه.

![](https://cdn.door43.org/obs/jpg/360px/obs-en-09-06.jpg)

دیگه چِلیکِ وَچة پی یِر مار نَتّونسِنه وِره جا بَدِن، چونکِه خواسِّنه وِنِه بَکوشتِنِ جِلو ره بَیرِن، چِلیک وَچِه رِه اَتّا سَوِدِ دله اُویِ سَر بِشتِنه و نیلِ روخِنه وَر، لَلـِه جارِمیون رِها هَکِردِنه. مُنتا وِنِه گَتِ خواخِر وِره دیاری جِه اِشائِه تا بَوینه بِرارِ سَرچی اِنه.

![](https://cdn.door43.org/obs/jpg/360px/obs-en-09-07.jpg)

فرعونِ کیجا سَوِد رِه بَدیِه و وِنِه دِله ره هارِشیه. چِلیکِ وَچِه رِه که بَدیِه، به عِنوانِ شِه ریکا قبول هَکِردِه. وِه اَتّا اسراییلی زِنا رِه شیری مار بَیتِه تا وَچِه رِه شیر هَدِه. مُنتا وِنِه رُوحِم خَوِر دار نَیْ بی یِه که اینتا زِنا هَمون وَچِة مار هَسِّه. مارِم که وَچِه رِه شیرِ جِه بَیته، اَیْ دِوارِه فرعونِ کیجا رِه بَر دِگاردِنیه و فِرعونِ کیجا، وَچة نومْ رِه موسی بِشتِه.

![](https://cdn.door43.org/obs/jpg/360px/obs-en-09-08.jpg)

موسی کِه گَت بَیِّه، اَتّا مصری رِه بَدیِه که اسراییلی برده رِه دَرِه روشِنه و کِتِک زنّه. موسام دَته بَتِه دَکِتِه که شِه اسرائیلی برارِ جانِ سَر دَکِفه وُ وِرِه نِجاتْ هَدِه.

![](https://cdn.door43.org/obs/jpg/360px/obs-en-09-09.jpg)

موسی گِمون هَکِرده که هیچکَس وِره نَوینه، اونتا مِصری رِه بَکوشْته وُ وِنه نَعشْ رِه جا بِدا. مُنتا اَتّا نَفِر وِنِه کارِه بَدیِه.

![](https://cdn.door43.org/obs/jpg/360px/obs-en-09-10.jpg)

فرعون موسایِ کارِ جه آگاه بَیِّه و خواسِّه که موسی رِه بَکوشه. مُنتا موسی مِصرِجه اَت بیابونِ وَر دَربورده وَ ِفرعون سربازا نَتّونِسِنه وِره اونجِه گیر بیارِن.

![](https://cdn.door43.org/obs/jpg/360px/obs-en-09-11.jpg)

موسی مصرِ جه دَر بوئرده و بیابونِ دله ، چَپونیِ سَرگَرم بَیّه. همون سرزمینِ جِم زَن بَیتِه وُ دِتا ریکایِ پی یِر بَیِّه.

![](https://cdn.door43.org/obs/jpg/360px/obs-en-09-12.jpg)

اَت روز که موسی شه زَن پی یرِ گِسفِن گَلّه ره چِرا بَوِرد بی یه، لَم دِلِه بَدیه که تَش اَلو دارنه مُنتا نَسوزِنه. هَمینتاسّه تَشِ تَنِ وَر بورده تا بَدونه چی شی وسّه اینطیه. موسی که تَشِ وَر بورده، خِدا لَمِ دله وِره وَنگ هَکِرده وُ باته: «شه کَلوشِه لینگِ جه در بیار، چونکه اینجه که اِس هَکِردی پاک و مُقَدسّه.»

![](https://cdn.door43.org/obs/jpg/360px/obs-en-09-13.jpg)

اونگِدِر خدا باته: « مِن ِشه قوم ِ زار و بِلا ره مصر دله بَدیمه. ِ اِسا من ِتره فرعون پیش رایی کِمبِه تا مِه قوم ره مصرِبردگی جه آزاد هَکِنی. ِمن کَنعانِ سرزمین ره وشونِ بَخشِمبه، َهمونتا سرزمین که وِنه وعده ره ابراهیم و ایساق و یَعقوب ره هِدا بیمه.»

![](https://cdn.door43.org/obs/jpg/360px/obs-en-09-14.jpg)

موسی باته: اَگه قوم مِه جه بَپِرسِن که کی تِره رایی هَکِرده، وشون ره چی شی بَوّم؟ خِدا بِفَرمسّه: « هسّمه همینکه هَسّمه. وِشون ره بِاوُ هَسّمه مِره شِمه پَلی بَرِسِنیه. اَیِم وشون ره باوُ که مِن یَهُوَه شِمه پی یِرونِ خِدا، ابراهیم، ایساق و یَعقوبِ خِدا هَسّمه. مِه نوم هَمیشِهٔ وسّه هَمینتائه.»

![](https://cdn.door43.org/obs/jpg/360px/obs-en-09-15.jpg)

موسی نِخواسّه که فرعونِ پیش بوره ، چونکه ترسیه نَتونِه خارگَپ بَزِنِه، هَمینتاسّه خِدا موسایِ بِرار هارون ره ِونه هِمکِت رایی هَکِرده تا وِنه وَردس بَوّه.

*کِتابِ مُقَدَسِ جِه بئیته داستان : کتاب خروج ۱ تا ۴*

## 10. ۱۰- دَه تا بِلا

https://openbiblestories.org/l/mzn/story-10/

![](https://cdn.door43.org/obs/jpg/360px/obs-en-10-01.jpg)

خِدا ، موسی و هارون رِه آگاه هَکِردِه کِه فرعونِ چَندِه سَر سَخت هَسّه موسی و هارون فِرعونِ پَلی بوردِنه و باتنه: « اینتا پیغوم اسراییلِ خِدا ته وِسّه هِدا: مِه مردِمِ رِها هَکِن بورِن.» فرعون وشونِ گَپِ نشتوس بَیته وبِجای اینکِه بنی اسراییل رِه رِها هَکِنِه ، وشون ره ضَرب بِشتِه که اَیِم ویشتِر کار هَکِنِن.

![](https://cdn.door43.org/obs/jpg/360px/obs-en-10-02.jpg)

اَی فرعون گِس نِدا که اسراییلیا ره رِها هَکنه، هَمینتاسّه خِدام ده تا ،بَد تِرین بلا ره مصریای َسر بَشِنیه.همین بِلاهای ِجه خِدا فرعون ره هالی هَکِردِه کِه ونه تِوانایی ، فرعون ومصریایِ خِداها تون ویشتره.

![](https://cdn.door43.org/obs/jpg/360px/obs-en-10-03.jpg)

خدا نیلِ روخنه اوُ ره خون هَکرده. مُنتا ای فرعون بَنی اسراییل رِه رِها نکرده.

![](https://cdn.door43.org/obs/jpg/360px/obs-en-10-04.jpg)

خدا تِمومِ مصر ره وَکِ جا مَشت هَکرده، فرعون موسایِ جِه بِخواسّه که هَر چی وَک دَرِه وِشونِ سَرزَمینِ جه یور هَکِنه، وَکا کِه نابود َبَئینه، اَی فِرعونِ دِل سَنگتِر بَیّه و نِشته کِه اسراییلیا مصرِ جِه در بُورن .

![](https://cdn.door43.org/obs/jpg/360px/obs-en-10-05.jpg)

هَمینتاسِّه خدام لَلِ بلا وَ وِنِه پِشتِ سَر مَقِزِ بِلا ره رایی هَکرده. فرعون که این صحنه ره بَدیه، موسی و هارون رِه باته: اَگه اینتا بِلا ره اَمه جِه َرد هَکنین، اجازه دِمبه که مصر جِه در بورین. موسی دِعا هَکرده پِه، خدا اینتا بلا رِم وشونِ سرجه رَد هَکِردِه، منُتا فرعون دِل سنگتِر بَیّه وَ ای دِواره وشون ره نِشته که مصر جِه دَر بورن.

![](https://cdn.door43.org/obs/jpg/360px/obs-en-10-06.jpg)

این سَفِه، خِدا یِتّا کار هَکرده که تِنا مِصریایِ حِیوونایِ دِلِه ناغِشی دَکِتِه وُ بَمردنه. ُمنتا فرعونِ دل خله سنگ بی یه و این کَشِم نِشته کِه وِشون َدر بوُرن.

![](https://cdn.door43.org/obs/jpg/360px/obs-en-10-07.jpg)

خِدا موسی ره باته تا شِه دِ تا میسِ دِله کِلِن مَشت هَکِنه و فرعونِ چِشِ پیش هِوا سَر دِپاچه. موسی اینکاره که هَکرده اسراییلیا بِه کِنارهمة تنِ بَپِتِه کورک بّزوئه. مُنتا خِدا فرعون دل ره سنگ هَکرده و وِهِم نِشته که وشون دَر بُورن.

![](https://cdn.door43.org/obs/jpg/360px/obs-en-10-08.jpg)

این کَش خِدا سنگِ تیریگِ بلا ره رایی هَکرده و ویشترِ محصولا ره نابود هَکِرده و صحرای حیوونا رم بَکوشته. فرعون، موسی و هارون ره بِخواسّه و باته: « ِمن ِشه دومبِه، اِسا گِناه هَکرِدمه و ِشما تونِّنی دَر بورین» اونگِدر موسی دِعا هَکرده و سنگِ تیریگِ وارش ،بَن بیَمو.

![](https://cdn.door43.org/obs/jpg/360px/obs-en-10-09.jpg)

مُنتا فِرعون َای گِناه هَکرده َو شه دل ره سنگ واری هکرده و ِنشته که اسراییلیا ، دَر بُورن.

![](https://cdn.door43.org/obs/jpg/360px/obs-en-10-10.jpg)

هَمینتاسّه خِدام اَتّه خَله باج کاک ِرِه مِصرِ دِلِه رایی هَکرده. وشونِم مَحصولی که سنگِ تیریگِ بلایِ جه بَمونِس بی یِه ره بَخِردِنه.

![](https://cdn.door43.org/obs/jpg/360px/obs-en-10-11.jpg)

اونگدر خدام سیوئی بلا ره وشونِ سَر رایی َهکرده و سه روز وِنه دِم نوسّه. تموم جا اینطی سیو بَّیه که مصریا نَتّونِستنه ِشه سرِة جه دَر بوُرن. مُنتا اسراییلیایِ وَر سو دَیّیِه.

![](https://cdn.door43.org/obs/jpg/360px/obs-en-10-12.jpg)

نُه تا بِلایی کِه مِصرِ سَر بیَمو ، اَی فرعون اسراییلییا ِره نِشته که مصرِ جه یور بورن. اِسا که وهِم نِخواسته خدای حرفِ بِشتوئه، خدام بِنا بَیتِه کِه آخری ِبلا ره رایی هَکِنه. اینتا بِلا باعث بونه که فرعون شِه نقشه ره دِگاردِنه.

*کِتابِ مُقَدَسِ جِه بَئیته داستان:  کتاب خروج فصل ۵ تا ۱۰*

## 11. ۱۱- پِسَخِ جَشنِ

https://openbiblestories.org/l/mzn/story-11/

![](https://cdn.door43.org/obs/jpg/360px/obs-en-11-01.jpg)

خِدا موسی و هارون ره فرعونِ پَلی رایی هَکِرده که وِره بَوِّن اِسراییلیا ره رِها هَکِنه.وِشون فرعون ره هُشدار هِدانه که اَگه اسراییلِ قوم ره رِها نَکِنه، خِدا وشونِ همه گَتِ ریکائون وَ حتّی مصرِ حیوونارِم کِشِنه. فِرعون اینتا گَپِ بِشتوسّه ُمنتا ُبووِر نَکِرده و اَیِِم خِدا ره گِس نِدا.

![](https://cdn.door43.org/obs/jpg/360px/obs-en-11-02.jpg)

خِدا اونایِ وسّه که وره بووِر داشتنه،اَتّا راه آمادِه هَکِرده تاِ وِشونِ گَتِ ریکائون اینتا بِلایِ جِه جانِ سالم دَر بَوِرِن. هَر خِنِوار وِسّه که اَتّا سالِمِ وَرِه سیوا هَکِنه وُ قِربونی هَکِنِن.

![](https://cdn.door43.org/obs/jpg/360px/obs-en-11-03.jpg)

خِدا اسراییلِ قوم ره بِفَرمِسّه:وَره خون ره ِشه سِرِة دَرایِ کِنّایِ تَن بَسوئن.وِشونِم وسّه که َوره گوشت ره کِباب هَکِرد بُوئن و فَطیرِ نونِ جا هُولئیتی بَخِرن .خِدا اَیِم وِشون ره بَفِرمِس بی یه که بَخِرد په دَسِّ پا هَکِنِن وُ بَته بَته مصرِ جه دَر بورِن.

![](https://cdn.door43.org/obs/jpg/360px/obs-en-11-04.jpg)

اسراییلیا خِدایِ تِمومِ دَستورِ رِه ُمو به مُو انجام هِدانه. نصفه شو خِدا مصرَ جِه هِدار هَکِردِه و تمومِ گَتِ ریکائونِ مصرِ رِه از بَین بَوِرده.

![](https://cdn.door43.org/obs/jpg/360px/obs-en-11-05.jpg)

خِدا تِمومِ اِسراییلیایِ سِره که وِشونِ دَرِ کِنّا ،خونِ نِشون ره داشتِه ، هِدار هَکِردِه. هرکَسِم که اون سره هایِ دِله دَی بی یِه ، وَرهٔ خونِ خاطِری در اَمون بَمونِسّنه.

![](https://cdn.door43.org/obs/jpg/360px/obs-en-11-06.jpg)

منتا خِداوند مصریایِ سِرة جِه که ِوِره ُبووِر نِداشتِنه و ونه دَستورِگِس نِدا بینه ،هِدار نَکِردِه َو وِشونِ گَتِ ریکائون ره هِلاک هَکِردِه.

![](https://cdn.door43.org/obs/jpg/360px/obs-en-11-07.jpg)

مصریایِ گَتِ ریکائون از دَم بَمِردِنه. فرعونِ گَتِ ریکایِ جِه بَیر تا اونتا غِلام که زِنّدونی بی یهِ ونه گَتِ ریکام بَمِرده. مصرِیا ره اَنده غم و غِصه سَر بَئیت بی یه که بِرمه ، موری کِرد بینه.

![](https://cdn.door43.org/obs/jpg/360px/obs-en-11-08.jpg)

فرعون هَمون شُو، موسی و هارون ره ِشه پیش بَخواسّه وُ باته: «اسراییلِ قوم ره بَیرین و اِس نَکنین مِصرِ جِه دَر بورین.» مصریام ِوشونِ جا دَپیتِنه که زودتِر اونتا سَرزَمینِ رِه تَرک هَکنِن وُ بُورِن.

*کِتابِ مُقَدَسِ جِه بَئیته داستان: کتاب خروج، فصل ۱۱ آیه ۱ تا ۱۲ و فصل ۳۲*

## 12. ۱۲- خِروج

https://openbiblestories.org/l/mzn/story-12/

![](https://cdn.door43.org/obs/jpg/360px/obs-en-12-01.jpg)

اسراییلیا خَله خِشال بینه که دَرِنه مصرِ جه دَر شونِنهِ. وِشون دیگه برده نَی بیِنه وُ وَعدِه بَئی سَرزَمینِ وَر پیش شینه. مصریام هَرچی که اسراییلیا وِشونِ جه بِخواستِنه، طلا ونقره و ارزش دار بارِ هَمِه رِه وِشونِه هِدانه. اَتی مردم کِه اسراییلی نَی بینِه اَمّا خِدا رِه بُوور داشتِنه وشونِ هِمکِت مصر جِه دَربوُردنه.

![](https://cdn.door43.org/obs/jpg/360px/obs-en-12-02.jpg)

اَتّا سِتون ابر روزِ دلِه و اَتّه سِتون تش شُوی دله وشونِ جِلوُجِلوُ شیه. خِدام اَبر و تَشِ سِتونِ دِله وشون ره هِمکتی کِرده و هَمیشه راه ره وشونه نشون دائه. وِشونِم تِنا یِتّا کار وِسّه هَکِرد بون؛ اونِم خدایِ دِمبالِ سَر بورِن.

![](https://cdn.door43.org/obs/jpg/360px/obs-en-12-03.jpg)

اَتِّ کَم بوگذشته پِه، فرعون وُ وِنه مَردِم شه هَکِرده کاِر جِه پَشیمون بَئی نِه وُ اسراییلیایِ دِمبال پِه دَکتِنِه تا اَیْ دواره وِشون رِه شِه بَردِه هَکِنِن. خِدا وِشونِ رَأی رِه دِگاردِنیه تا وشون ره هالی هَکنه که وِه تِنا راس راسی خِدا هّسه و مَردِم بَدونِن که یَهّوه، فرعون و مِصریایِ خدایِ جِه تِواناتِره.

![](https://cdn.door43.org/obs/jpg/360px/obs-en-12-04.jpg)

اسراییلیا مصرِیایِ اَرتشِ کِه بَد ینِه، اونگِدر وِشون ره هالی بَیِّه، کِه ِسرخه دِریوی دِلِه و فِرعونِ اَرتشِ میون گیر دَکِتِنه. وِشونْ هُول وُ وِلا دَکِتِنه و شُونگ وُ شِوَنگْ کِردِنه: «چی شی ِوسّه مصر جِه در بی یَمّی؟» « اِسا هَمِه میرمی.»

![](https://cdn.door43.org/obs/jpg/360px/obs-en-12-05.jpg)

موسی اسراییلیا رِه باتِه: «هولْ نَخِرین! اَمروز خِدا شِمِسِّه جنگ کِندِه وُ شِما آزاد بُونِنی» اَیْ خِدا موسی رِه بِفَرمِسِّه: «اسراییلیا رِه باوُوْ که سِرخِ دِریویِ وَر راه دَکِفِن»

![](https://cdn.door43.org/obs/jpg/360px/obs-en-12-06.jpg)

اونگِدِر خِدا اَبرِ سِتون رِه رُوش هِدا و اِسراییلیا وُ فِرعونِ اَرتِشِ میون بِشته، تا مِصریایِ سَربازا نَتونِن وِشون رِه بَوینِنْ.

![](https://cdn.door43.org/obs/jpg/360px/obs-en-12-07.jpg)

خِدا موسی رِه دَستور هِدا کِه شِه دَس رِه دِریوی سَر راسْ هَکِنِه. هَمونگِدِرِم خِدا اَتّا وا رایی هَکِردِه و دِریویِ اُووْ چَپ وُ راسْ بُورده، اَتِّ جور که دِریوی دِلِه اتّا راه واز بَیِّه.

![](https://cdn.door43.org/obs/jpg/360px/obs-en-12-08.jpg)

هَمینطی که اِسراییلیایِ دِ وَر، دیوارِ وِنِکِتْ اوُ دَیْ بَی یِه، وِشونِم دِریویِ دِلِه شِه راه رِه بَیتِنه و بوردِنه.

![](https://cdn.door43.org/obs/jpg/360px/obs-en-12-09.jpg)

اَته کم که بوگذشته، خِدا ابرِ سِتون ره بَیتِه تا مصریا بَویِنِن کِه اسراییلیا دَرِنِه ِفرار کِنِنه. اونگِدِر مصریا بِنا بَیتِنه که وشون رِه دِمبال هَکنن.

![](https://cdn.door43.org/obs/jpg/360px/obs-en-12-10.jpg)

هَمینتاسّه اونام اسراییلیایِ په دِریویِ دِله بوُردِنه، مُنتا ِخدا مصریا ره اینطی ترس بِدائه که وشونِ گاریا تیلِ دِله دِماسّه. وشون شونگ کِردنه وُ گِتِنه: « دَر بُورین! چونکه ِخدا، اسراییلیایِ وسّه جَنگ کِنّه.»

![](https://cdn.door43.org/obs/jpg/360px/obs-en-12-11.jpg)

اِسراییلیا کِه خارخار اون وَر دِریو بَرسیِنه، خِدا موسی رِه بِفَرمِّسه: « اَتّه وارِ دیگه ِشه دَسْ رِه دِریوی وَر دِراز هَکن.» موسام هَمطی هَکِرده، اونگِدِر اُو دِ وَرِ ِجه مصریا وُ وِشونِ گاریایِ سَر بَشِنی بَیِّه وَ همه دِریویِ دِله غَرق بَیِنه وُ بَمِردِنه.

![](https://cdn.door43.org/obs/jpg/360px/obs-en-12-12.jpg)

اسراییلیا که اِسا شِه چِش جا بَدینه که چِطی مصرِ ارتِش نابود بَیِّه خِدا جِه دِلگَرم بَیینه و بوُور هَکردنِه که موسی خِدایِ پِیغُمبِر هَسِّه.

![](https://cdn.door43.org/obs/jpg/360px/obs-en-12-13.jpg)

بَنی اِسراییل خَله خِشال بیِنه چونکه خِدا وِشون رِه بَردگی و مَرگِ جه نِجات هِدا بی یِه. اِسا وِشون آزاد بینِنه که خِدا رِه پَرَستِش هَکِنِن وَ وِنه جِه فَرمون بَوِرِن. اسرایلیام شِه رِهاییِ وِسِّه آواز خونِسِّنِه و خِدا رِه سِتایِش کِردِنه که وِشون رِه مِصریایِ دِسِ جِه دَر بَوِردِه.

![](https://cdn.door43.org/obs/jpg/360px/obs-en-12-14.jpg)

هِمینتاسّه خِدا شِه قوم ره فَرمون هِدا که هر سال اینگِدِر جَشن بَیرِن و شِه یاد بیارِن که خِدا چِطی مصریا ره شِکَست هِدا و بَنی اسراییلِ رِه بَردِگی ِجه آزاد هَکِرده. اینتا جشنِ نوم رِه، پِسَخ بِشتِنِه. وشون هَر سال قربونی وَره ره کِباب کِردنه و فَطیرِ نونِ جا خِردِنه و جَشن گیتِنه.

*کِتابِ مُقَدَسِ جِه بَئیته داستان: کتاب خروج فصل ۱۲ آیه ۳۳ تا فصل ۱۵ آیه ۲۱*

## 13. ۱۳- خِدا اسراییلِ جا پیَمون وَندِه

https://openbiblestories.org/l/mzn/story-13/

![](https://cdn.door43.org/obs/jpg/360px/obs-en-13-01.jpg)

بَنی اِسرائیلِ سِرخه دِریویِ ِجه یور ُبوردِه پِه، خِدا وشون ره سینایِ کوهِ وَرراهنِمایی هَکِردِه. هَمون کویی که موسی لَمِ ِدله تَشِ اَلورِه بَدی بی یه. اینطی قوم هَمونتا کویِ بِن چادِر بَزّونه.

![](https://cdn.door43.org/obs/jpg/360px/obs-en-13-02.jpg)

خِدا موسی و بَنی اسراییلِ قوم ره بِفَرمِسّه: «شِما وِنه هر زَمون مِه جِه فَرمون بَوِرین.وپَیمونی که شِمه جا وَمبِه، وِفا هَکِنین. اَگه اینتاره بِجا بیارین ،مِه دَس بی یِشت دارایی هَسّنی، اَتّا مَملِکِت که هَمه پیشواهَسّنه وُ مُقدِّس .»

![](https://cdn.door43.org/obs/jpg/360px/obs-en-13-03.jpg)

مردِم سِه روزِ تِموم ِشه خِدرِه آماده هَکِردِنه تا خِدا ره بَوینِن. هَمینتاسّه خِداوند اَلبِسو وآسِمون غِرومبه وُ ديی و شَیپورِ گَتِ صِدایِ جا سینایِ کویِ تِک هِنیشتِه. موسام تیناری کویِ بالا بورده.

![](https://cdn.door43.org/obs/jpg/360px/obs-en-13-04.jpg)

اونگِدِر خِدا وِشونِ جا پَیمون دَوِسِّه و باتِه: «مِن هَسِّمِه یَهُوَه تِه خِدا، که تِره مصرِ بردگی و اسیريِ جِه آزاد هَکِردِمه. مِن بَکِرد هیچ خِدایِ دیگه رِه پَرِستِش نَکِنین.»

![](https://cdn.door43.org/obs/jpg/360px/obs-en-13-05.jpg)

«بُتْ دِرِس نَکِن و وِره پَرَستِش نَکِن، چونکه مِن یَهُوَه وِنه تِه تَنا خِدا بَوِّم. مِه نُوم رِه بی ارزش نَکِن و شَبّاتْ یا هَفتِمین روز رِه مُقَدِّس بَدون. شِه هَمة کارا رِه شیش روزِ دِله اَنجام هَدِه، چونکِه تِه ِونِه هَفتِمین روز آرامِش داری و مِره یاد بیاری.»

![](https://cdn.door43.org/obs/jpg/360px/obs-en-13-06.jpg)

شِه پی یِر و مارِ اِحتِرام بی یِل. آدِم نَکوش، زِنا نَکِن، دِزدی نَکِن و دِرو ناو. تِه چِشْ همسایه ِزِنا و هِمسایة مالِ دِمبال دَنی بَوِّه.

![](https://cdn.door43.org/obs/jpg/360px/obs-en-13-07.jpg)

قوم اَرِه هِدانِه دَستورایی که خِداوَند وِشون رِه هِدائِه؛ بِجا بیارِن. وِشون اَیْ اَرِه هِدانِه که خِدای وِسِّه بَوّن و فِقَط وِره پَرِستِش هَکِنِن.

![](https://cdn.door43.org/obs/jpg/360px/obs-en-13-08.jpg)

خِدا اَیْ اسراییل رِه بِفَرمِسّه که اَتّه گَتِ کیمه بِسازِن. وِه دستورِ کیمِه بِساتِنِ وُ هَر چی وِسِّه که وِنه دِله دِواشِه وَ رِزِ رِزِ کارا رِه وِشونِ هِدا. وِه دَستور هِدا اَتّا گَتِ پَرده بِسازِن که کیمه رِه دِ بَخش هَکِنِه. خِداوندِم اِتاقِ دِله پَردِه پِشت، اِیَمو و هَمونجه موندِسّه و گَتِ پیشوا تونِسّه تِناری اونتا اِتاقِ دِله خِدایِ پیشگاه بُوره.

![](https://cdn.door43.org/obs/jpg/360px/obs-en-13-09.jpg)

قوم هَمطی وِسِّه کِه کیمة دیدارِ جِلو اَتّا قِربونگاه بِسازِن. هَرکَسِم که خِدایِ قانونِ جه نافرمونی هَکِرد بو، وِسّه کِه اَتّا حیوون قِربونيِ وِسّه قربونگاه بیاره.اَتّا پیشوا وسّه کِه اونتا حیوون ره بَکوشه و به عِنوان قِربونی خِدایِ وِسّه قِربونگاه بالا بَسوزِنه. خِداوند باته که قِربونی حیوونِ خون، گِناهکارِ گِناه ره پوشِندنه. اینطی خِداوند وِنه گِناه رِه نادیده گِیته و اون گِناهکار خِدای چِشِ پیش پاک بونِه. خِدا موسایِ بِرار هارون و وِنه تِوار رِه نِشونْ هَکِرده تا وِنه پیشوا بَوّن.

![](https://cdn.door43.org/obs/jpg/360px/obs-en-13-10.jpg)

اونگِدِر خِدا دَه تا فَرمون رِه دِ تا سنگِ پِشت بَنوِشته و موسی رِه هِدا. خِداوَند اَیِّم قُوم رِه دَستورایِ دیگه هِدا که بِجا بیارِن. خِدا قِرار بِشته که اَگِه قوم دَستورا ره گِس هَدِن، وِشون ره فِراوونی دِنّه و پِشت و پِناه بوُنِه، مُنتا اَگه نافَرمون بَوِّن وِشونه جِزا ره دِنّه.

![](https://cdn.door43.org/obs/jpg/360px/obs-en-13-11.jpg)

موسی خَله روزا سینایِ کویِ تِک بَمونِسّه و خِدا جا گَپ بَزوئه. مَردِم وِنه دَگِرِسّنِه وِسِّه اَنده چِش بِراهی بَکِشینه که خَستِه بَئی نه. هَمینتاسِّه شِه طِلاها ره هارونِ پیش بیاردِنه و ونه جِه بِخواسِّنه که وِشونِسّه بُت بِسازه، تا خِدایِ عَوِض پَرِستِش هَکِنِن. اینطی خِدایِ پیش، گَتِ گِناه هَکِردِنه.

![](https://cdn.door43.org/obs/jpg/360px/obs-en-13-12.jpg)

هارون اَتّا بُت بِساتِ، طِلایی گوگزایِ واری. مَردِمِم وحشیِ واری بُت رِه پَرِستِش هَکِردِنه، اَندِه کِه بُتِ وِسّه قِربونیِم هَکِردِنه. وِشونِ گِناهِسّه خِدا رِه خَشم بَیته و موسی ره بِفَرمِسّه که خوانِه وِشون رِه نابود هَکِنه. مُنتا موسی پا پیش بِشته و خِدای جِه بِخواسِّه که اینتا کارِ نَکِنه، خِدِام موسایِ خواهِشِ بِشتوسِّه و قوم رِه هِلاک نَکِرده.

![](https://cdn.door43.org/obs/jpg/360px/obs-en-13-13.jpg)

اونگِدِر که موسی سینایِ کویِ جِه بِنه بی یَمو، ونه دَستِ دله دِ تا سَنگ بَنوِشت دَیِّه که خِدا دَه تا فَرمون ره وِنه پِشت بَنوِشت بی یه. بُت ره که بَدیه، اَنده وِره خَشم بَیته که ِشه دَستِ سَنگا ره بِنه بَّزو، و َسنگا بِشکِسّنه.

![](https://cdn.door43.org/obs/jpg/360px/obs-en-13-14.jpg)

موسی بُت رِه بَسوزِنیه و رِز هَکِرده تا گَرتِ واری بَیِّه. اونگِدِر گَرتِ ره اویِ ِدله دَکِرده و قوم ره وادار هَکِرده تا او رِه بَخِرِن. خِدام اَتّا بِلا بَرِسِنیه که ویشتِر مَردِم بَمِردِنه.

![](https://cdn.door43.org/obs/jpg/360px/obs-en-13-15.jpg)

موسی اون سَنگای عوِض که شِه بِشکِنی بی یه، دَه تا فَرمونِسّه چن تا سَنگ دیگه بِتاشیه. موسی اَی دِواره کویِ تِک بوردِه و خِدا جا راز و نیاز هَکِرده تا خِدا قوم ره بِبَخشه. خِدام موسایِ دِعا ره بِشتوسّه و وِشون ره بِبخشیه. موسام تازه بِتاشی سنگِا که خِدا ده تا فَرمون ره بَنوشت بی یهٔ هِمکِت کویِ جِه بِنه بیَمو. اونگِدِر خِدا وِشون ره سینایِ کویِ جِه وعدِه بَئی سرزمینِ وَر، راهنِمایی هَکِرده.

*کِتابِ مُقَدَسِ جِه بَئیته داستان: کتاب خروج فصل ١٩ تا ٣٤*

## 14. ۱۴-  بیابونِ دِلِه سَرگِردونی

https://openbiblestories.org/l/mzn/story-14/

![](https://cdn.door43.org/obs/jpg/360px/obs-en-14-01.jpg)

خِدا بنی اسراییل رِه شِه دَستورایِ جِه آگاه هَکِردِه پِه وِشونِ رِه سینایِ کویِ وَر راهنمایی هَکِردِه. وشونِم پَیمون خاطِری که خدایِ جِه دَوِس بینِه ، وِسّه که دستورای دینیِ جِه فَرمون بُرداری هَکِرد بوُئن. خِدایِ خواسِت بی یِه که وِشون کنعانِ سرزمین، یا هَمون وَعدِه بَئی سَرزَمین بَرِسِن. خِدام اسراییلِ پیش پیش ابرِ رجِه دِلِه شییِه و مردمِم وِنِه پشتِ سَر شینِه.

![](https://cdn.door43.org/obs/jpg/360px/obs-en-14-02.jpg)

خِدا ابراهیم، ایساق و یَعقوب جِه قرار بِشتِه که وَعده بَئی سَرزمینِ رِه وشونِ وَچونِ هَدِه. مُنتا هَمونگدِر اَتّا تیر و توارای دیگِه اونجِه زِندگانی کِردنه که وِشون ره کَنعانیا گِتِنِه، کَنعانیا راسّی خِدای جِه فرمونبَری نِداشتِنه و وِره پَرِستِش نَکردنِه. وشون دِراغی خِدا رِه پرستِش کِردنِه، و هَمیشِک شَرّ دِمبال دَئی بینه.

![](https://cdn.door43.org/obs/jpg/360px/obs-en-14-03.jpg)

خِدا اسراییلِ قوم رِه بِفَرمِسِّه: «وعَدِه بَئی سَرزَمین که بَرِسینی وِنِه کِه شِه خِدِرِه وشونِ دَسِ جِه رِها هَکِنین، وِشونِ جا رَفت وُ آمِد نَکِنین و زَن بِده بِستون نَکِنین، وَ وشونِ تمومِ بُتا رِه نابود هَکِنین. اگه اینتا دَستورایِ جِه نافَرمونی هَکِنین دَرِنی وشونِ بُتا رِه مِه عَوِضْ پَرِستِش کِنِنی»

![](https://cdn.door43.org/obs/jpg/360px/obs-en-14-04.jpg)

اسراییلیا کِه کنعانِ مرز وُ سامون بَرِسینِه موسی هر طایِفه جِه اَتِّ تَن، سَرجمع دوازده تَنْ رِه بَیتِه و کَنعانِ سرزمینِ دلهِ جاسوسی ِوسِّه وِشون رِه راه یاد بِداهِه. اَیْ وشونِ جِه بِخواسِّه که پِرس و جو هَکِنِن کِه کنعانیایِ قِد و تِوان چَنده هَسِّه.

![](https://cdn.door43.org/obs/jpg/360px/obs-en-14-05.jpg)

اونتا دِوازده تا مَردی، چِل روز کَنعان دِلِه سَفِر هَکردِنه وُ اَی دَگِرِسِنه. وِشون شِه قُوم رِه باتِنِه: «زمینا خَلِه حاصلخیز هَسِّه و بار فِراوونِه.» مُنتا جاسوسایِ میون، دَه تَن باتِنِه: « وشونِ شهرا خَلِه سِفت و سَخته مُنتا وشونِ مَردِم غولِ واری هَسِّنِه. اَگه وِشونِ جا جَنگ هَکِنیم، شَک نَکِنین که شِکِست خِرمی وُ وِشونِ دَس میرمی»

![](https://cdn.door43.org/obs/jpg/360px/obs-en-14-06.jpg)

اونگِدِر دِتا خَوِرچینِ دیگه ، کِه وشونِ نوم کالیب و یوشع بی یِه باتِنِه: «دِرِسِّه که کنعانیایِ مردِم اَمِه جِه بِلِن تِر و قِددارتِرِنِه مُنتا اِما توُمبی وِشونِ رِه شِکِست هَدیم! چونکه خِدا اَمِه وِسّه جَنگ کِندِه.»

![](https://cdn.door43.org/obs/jpg/360px/obs-en-14-07.jpg)

اَمّا قُوم یوشع و کالیبِ گَپا رِه گوش نَکِردِنِه وُ موسی و هارونِ جِه خَشم بَئینه و باتِنِه: «چی چی وِسِّه اِما رِه ترسناکِ جا بیاردِنی»، وِسِّه مصرِ دِلِه بَمونِس بُوییم. اَگه اونتا سرزمین دِلِه بُوریمِ ، جَنگ ِ دله اِماره کِشِنِنه و اَمِه زن وُ وَچونِ ره بَردگی وَرنِنه.». وِشون بِخواسِّنِه که اَتّا رَهبرِ دیگه بَیرِن که وِشون رِه دِوارِه مصرِ دِلِه دِگاردِنِه.

![](https://cdn.door43.org/obs/jpg/360px/obs-en-14-08.jpg)

وِشونِ گَپای جِه خِدا رِه خَلِه خَشم بَیتِه و کیمة دیدارِ دِلِه بی یَمو و باتِه: «شِما مِه جِه نافَرمونی هَکِردِنی، اِسا شِما بیابونِ دِلِه سَرگردون بونِنِی. کالیب و یوشَع بَکِتِه، اونایی که بیست سال رِه رَدْ هَکِردِنه، بیابونِ دِله هِلاک بونِنِه و هِچْ ماقِع وِشونِ لینگ وَعدِه بَئی سَرزمینِ ِ دِلِه نَرِسِنه.»

![](https://cdn.door43.org/obs/jpg/360px/obs-en-14-09.jpg)

اونگِدِر کِه مَردِم خِدای گپِ بِشتوسِّنه شِه گِناه جِه دَگِرسِّنه. بِنا بَیِتِنِه که کنعانیا رِه هِجوم بَوِرِن. موسی وشونِ گوشزِد هَکِردِه که نَشوئِن، چونکه خِدا وشونِ هِمکِت دَنی بی یِه. مُنتا وِشون موسایِ گَپ رِه گوش نَکِردِنِه.

![](https://cdn.door43.org/obs/jpg/360px/obs-en-14-10.jpg)

خِدا اونتا جَنگِ دِلِه وِشونِ هِمکِتْ دَنی بی یِه. هَمینتاسِّه جَنگِ دِلِه شِکست بَخِردِنِه و اَتِّه خَلِه بَمِردِنِه، اونگِدِر اسراییلیا کَنعانِ سرزمینِ جِه دَگِرسِّنه و چِل سال بیابونِ دِلِه سَرگِردون بَمونِسِّنِه.

![](https://cdn.door43.org/obs/jpg/360px/obs-en-14-11.jpg)

چِل سالی که اسراییلیا بیابونِ دِلِه سرگِردون بینه، خِدا وشونِ جِه رَسیِه و هَر چی که نیاز داشتِنِه وِشون رِه دائِه، خِدا آسِمونِ جِه اَت جور نون که وِنِه اِسم مَنّا بی یِه وِشونِ وِسّه فِراهِم هَکِردِه. خِدا اَی وشونِسِّه بِلدرچین رایی هَکِردِه که وِشون گوشت دارِن بَخِرِن. خِدا تمومِ چِل سال نِشتِه که وِشونِ رَخت پیت وُ وشونِ کَلوش بوسِّه.

![](https://cdn.door43.org/obs/jpg/360px/obs-en-14-12.jpg)

خِدا اَت جور موجِز هَکِردِه که گَتِ سَنگ جِه اُو دَربیاردِه وُ وشون رِه هِدا تا بَخِرِن. مُنتا اَی اسراییلِ قوم غِرغِر کِردِنه و موسا و خِدایِ دَس گَلِـه داشتِنِه. مُنتا اَی خِدا هَمونطی که وَعدِه هِدا بی یِه اِبراهیم، ایساق و یَعقوبِ جا وِفادار بَمونِسِّه.

![](https://cdn.door43.org/obs/jpg/360px/obs-en-14-13.jpg)

اَی اَتّ کَش دیگه که اسراییلیا اُو نداشتِنِه بَخِرن خِدا موسی رِه بفرمِسِّه: «سنگِ رِه باُو تا ونِه جِه اُو دَر بِی ِیه» مُنتا موسی بجایِ با تِن شِه دَسِّ چُویِ جا دِ کَش سَنگ رِه بَزّو وُ خِدا رِه بی حُرِمتی هَکِردِه. تَمیزِ اُو سَنگِ جِه دَر بیَمو مُنتا خِدا موسایِ جِه خَشم بَیتِه وَ باتِه: «تِه وَعدِه بَئی سَرزمینِ دِلِه، شِه لینگِ نِلِنّی»

![](https://cdn.door43.org/obs/jpg/360px/obs-en-14-14.jpg)

چِل سالی که اسراییلِ قوم بیابونِ دِلِه سرگِردون بینِه اونایی کِه خِدای رو دَر بی یَمونِه بَمِردِنِه. اونگِدِر خِدا اَتّ وارِ دیگه اسراییلیا رِه وَعده بَئی سرزمینِ سامون راهنمایی هَکِردِه. اِسا کِه موسا خَلِه پیر بَیْ بی یِه، خِدا یوشع رِه وِنِه جانِشین هَکِردِه تا اسراییلیا رِه رَهبَری هَکِنه. خِدا موسایِ جا قِرار بِشتِه که اَتّ روز وِنِه واری پَیغُمبِر اِسراییلیایِ وِسِّه راهی هَکِنِه.

![](https://cdn.door43.org/obs/jpg/360px/obs-en-14-15.jpg)

خِدا موسا رِه اَمر هَکِرده کِه کوهِ تِکْ بورِه تا وَعدِه بَئی سَرزِمینْ رِه بَوینِه. موسام اونتا زِمینا رِه بَدیِه مُنتا خدا وِره اجازه نِدا که اونجِه گوم بی یِلِّه. اینطی موسی بَمِردِه و اِسراییلِ قوم، سی روز وِنِّسه بِرمه موری هَکِردِنه. یوشَع وشونِ رهبر بَیِّه. وِه خَلِه خارِ رَهبَر بی یِه چونکه خِدا رِه بُووِر داشتِه وَ وِنِه جِه فَرمون وَردِه.

*کِتابِ مُقَدَسِ جِه بَئیته داستان: کتاب خروج فصل ۱۶ و ۱۷، کتاب اعداد فصل۱۰ تا ۱۴، کتاب تثنیه فصل ۳۴*

## 15. ۱۵- وَعدِه بَئی سَرزَمین

https://openbiblestories.org/l/mzn/story-15/

![](https://cdn.door43.org/obs/jpg/360px/obs-en-15-01.jpg)

آخِرسَر اون زَمون بَرِسیه که اِسرائیل قومِ وَعدِه بَئی سَرزَمین، یا هَمون کَنعانِ دِلِه بُورِن. اونجِه اَتّا شَهر دَئی‌بی یِه که وِنه نوم اَریحا بی‌یِه، وِنه دُورِ وَر زیلِ دیوار بَکِشی‌ بی یِه. اونجه اَتّا بَدکارِه زِنا کِه وِنه نوم راحاب بی یِه زنِدگی کِرد بی یِه. وِه خَوِرچینا رِه شِه پَلی جا بِدا. وِشون رِه کُمِک هَکِردِه تا اونتا شَهرِ جِه دَر بورِن. چونکِه وِه خِدا رِه بُووِر داشتِه این کار رِه هَکِرده. خَوِرچینام راحابِ جا قُول و قِرار بِشتِنه کِه اَریحا نابود هَکِردِه پِه، وِه وُ وِنه خِنِواده دَر اَمون بَمونِنِن.

![](https://cdn.door43.org/obs/jpg/360px/obs-en-15-02.jpg)

وَعدِه بَئی سَرزمین بَوِردِنِ خاطِری، اِسرائیلیا وِسِّه کِه اُردُنِ روخِنة جِه هِدار هَکِرد بوئِن. خِداوَند یوشَع رِه باتِه: «پیشواها رِه جِلوجِلو رایی هَکِن». پیشواهای لینگِ کابْ کِه اُردن روخِنِة اُو بَرِسی یِه، اُو اِس هَکِردِه وُ اِسرائیلیا تونِسِّنه خِشکِ بِنِة سَر، اونوَرِ روخِنه بَرِسِن.

![](https://cdn.door43.org/obs/jpg/360px/obs-en-15-03.jpg)

اونگِدِر که قُوم، اُردُنِ روخِنة جِه یور بوُردِنِه، خِدا یوشَع رِه باتِه که شِه خِدِرِه آماده هَکِن تا اَریحایِ شَهرکه خَلِه قَوی هَسِّه رِه هِجوم بَوِری. خِدا مَردِم رِه باتِه: پیشوائون و سَربازا وِنه شیش روزِ تِموم، هَر روز اَتّا کَش هَمِة شَهر دور بَزِنِن. پیشوائون وُ سربازام هَمین کارِ رِه هَکِردِنه.

![](https://cdn.door43.org/obs/jpg/360px/obs-en-15-04.jpg)

هَفتِمین روز اسرائیلیا وِسِّه هَف کَش شَهرِ دور بَزِنِن، پیشوائونِم شَیپور بَزِنِن و مَردِمم شونگ بَکِشِن. وِشونِم هَمین کار‌ رِه هَکِردِنه.

![](https://cdn.door43.org/obs/jpg/360px/obs-en-15-05.jpg)

اینطی بَیِّه که اَریحایِ دیوارا دَکِلِسّه. اِسرائیلیا هَرچی شهر دِله دَیِّیه رِه هَمونجوری که خِدا وِشون رِه باُت بی یِه نابود هَکِردِنه. تِنا راحاب وُ وِنه خِنواده که اِسرائیلیا ره هِمکِتی هَکِردِبینه دَر اَمون بَمونسِّنه. قُومایِ دیگه که اِسراییلِ وَر سامون دَیّنِه وَ کَنعانِ سَرزمینِ دِلِه زندگانی کِردبینه، بِشنوسِّنه که اِسرایلیا اَریحا رِه نابود هَکِردِنه، هُول و هِراس دَکِتِنه که نَکِنه اِسرایلیا بِخوان وِشون رِم هِجوم بَوِرِن.

![](https://cdn.door43.org/obs/jpg/360px/obs-en-15-06.jpg)

خِدا اِسرائیلِ قُوم رِه فَرمون هِدا که، کَنعانِیایِ جا پَیمون نَوِندِن وُ دوستی نَکِنِن. مُنتا اَتّا کَنعانی قوم که جَبعونیون گِتِنه، یوشَع رِه دِرو بَزونه و باتِنه که کَنعانِ اونورترِ جِه بیَمونِه، وِشون یوشَعِ جِه بِخواسِّنه که وِشونِ جا پَیمونِ دوستی دَوِنِن. یوشَع و پیشوائون و گَت‌ترایِ اِسرائیل خِدای جا دَرمیون نِشتِنه و خِدسَر جَبعونیونِ جا پَیمون دَوِسِّنه.

![](https://cdn.door43.org/obs/jpg/360px/obs-en-15-07.jpg)

سه روز بُگذِشتِه په، اسرائیلیا ره حالی بَیِّه که جَبعونیون هَمون کَنعانِ مَردِم هَسِّنه وَ وِشونِ دِروی جِه اسرائیلیا ره خَلِه غِظ بَیِته. مُنتا شِه پَیمون رِه نِشکِنینِه، چونکه خِدای پیش پَیمون رِه دَوِسْ‌ بینه. چَن وَقت بَیِّه په، اَتّا قومِ دیگه کَنعانی که وِشونِ نوم اَموریا بی یِه، بِشنوسِّنه که جَبعونیون اِسرائیلیایِ جا پَیمون دَوِسِّنه، شِه سَربازا رِه جَمْ هَکِردِنه و جَبعونیونِ سَر دَکِتِنه وُ وِشون رِه هِجوم بَوِردِنه. جَبعونیونِم یوشَعِ جا یاری بِخواسِّنه.

![](https://cdn.door43.org/obs/jpg/360px/obs-en-15-08.jpg)

یوشَع هِم اسرائیلِ سَربازای سَر رِه جَم هَکِردِه وُ وِشونِم تمومِ شو راه بوُردِنِه تا که جَبعون بَرِسینه. هَمونگِدِرم، طِلا وَنگ، ناگِمونی اَموریایِ سَر دَخِتِنه.

![](https://cdn.door43.org/obs/jpg/360px/obs-en-15-09.jpg)

اون روز خِدا اِسرائیلِ وِسّه جَنگ هَکِرده. وِه اَموریا رِه گِج وُ مَنگ هَکِرده، گَت گَتِه سَنگِتِریک آسمونه جا بِنه بَشِنیه وُ اَتّه خَله اَموریا رِه بَکوشته.

![](https://cdn.door43.org/obs/jpg/360px/obs-en-15-10.jpg)

اَی هَمطی خِدا کاری هَکِرده که اِفتاب آسمونِ دِله هِرِستا، تا اسرائیلِ سَربازا ویشتِر زَمون دارِن که اَموریایِ کاره یِکسَرِه هَکِنِن. اون روز خِدا اَتّا گَتِ پیروزی اِسرائیلیایِ وِسِّه فِراهِم هَکِرده.

![](https://cdn.door43.org/obs/jpg/360px/obs-en-15-11.jpg)

خِدا اونتا ارتشِ رِه شِکِست هِدا پِه، قومایِ دیگه کَنعانِ دِلِه هِدیِ جا پَیمون دَوِسِّنه تا اِسراییلِ جا جَنگ هَکِنِ. هَمینتاسِّه یوشَع و اِسرائیلیا وِشِون وَر هِجوم بَوِردِنِه وُ وِشون رِه نابود هَکِردنِه.

![](https://cdn.door43.org/obs/jpg/360px/obs-en-15-12.jpg)

جَنگها تِموم بَئی پِه، خِدا وَعدِه بَئی سَرزَمینِ دِلِه هَر اَتّا طایِفِة اِسرائیل رِه اَتّا سَهم هِدا. خِداوند؛ اَی اِسرائیلِ مَرز‌ و سامونِ دِلِه آرامِش بِشتِه.

![](https://cdn.door43.org/obs/jpg/360px/obs-en-15-13.jpg)

یوشَع پیرمَردی بَئی پِه، تِمومِ اِسرائیلِیا رِه جَم هَکِرده. هَمونگِدِرم مَردمِ یاد بیاردِه که وِشونِ قِرار بِشتْ بینه، پَیمونی که خِدا سینا کویِ دِله وِشونِ جا دَوِسْ بی‌یِه رِه فَرمون بَوِرِن. مَردِمِم قُول هِدانِه کِه خِدایِ جا وِفادار بَمونِنْ وَ وِنه دَستورِ رِه گِردِن بی یِلِّن و بِجا بیارِن.

*کِتابِ مُقَدَسِ جِه بَئیته داستان: کتاب یوشع فصل ۱ تا ۲۴*

## 16. ۱۶- رِها کِنِنده ها

https://openbiblestories.org/l/mzn/story-16/

![](https://cdn.door43.org/obs/jpg/360px/obs-en-16-01.jpg)

یوشع بَمِرده په، اسرائیلیا خِدای فَرمونا ره گِس نِدانه و تِمومِِ کنعانیا ره وَعده بَئی سَرزمین جِه یورنَکِردِنه. وِشون هَمطییِم یَهوه ،راسّی خِدایِ بَدِل کنعانیای بُتا ره َپرستِش کِردِنه. اون زَمونا، اِسرائیلیا پادشاه نِداشت بینه، هَمینتاسّه هَرکی هَر کاری که دِرِس دونِسِّه،هَمونتا ره انجام دائه.

![](https://cdn.door43.org/obs/jpg/360px/obs-en-16-02.jpg)

اسراییلِ قومِ سَرکِشی، باعث بَیّه که پِشتِ سَرِهَم وِشونِ سَر بِلا بی یِه ُو وِنِه دِم نوُسّه. پیشامِدایی که هَی رج به رَج ایموئه اینا بینِه: اسرائیلِ قوم خَله سال بی یِه که خِدا ره گِس نِدا بینه.هِمینتاسّه خِدام وِشونِ سِزایِ وِسّه، اِجازه دائه که وِشونِ دِشمِنون وِشونِ سَرسِوار بَوِّن . دِشمِنونِم خَلِه ها ره کِشتِنه وُ وِشونِ دار و نِدارِ وَردِنه و هَمه چی رِه نابود کِردِنه. اَت چَن سالی کِه دِشمِنون وِشونِ ره آزار هِدا بینِه پِه ، اَی خِدایِ وَر دَگِرسِنه و شِه کارا ی جه توبه هَکِردِنه و خِدا جا بِخوِاسّنه که دِشمِنونِ دَسِ جه وِشون ره رِها هَکِنه.

![](https://cdn.door43.org/obs/jpg/360px/obs-en-16-03.jpg)

هَر کَش که وِِشون توبه کِردبینه ، خِدا شه رِها کِنِنده رِه رایی کِرده تا وِشونِ رِه دِشمِنِ چنگِ جِه آزاد هَِکِنه. اون رِها کِنِنده دِشمِنونِ جا جَنگ کِرده و وِشون ره شِکَست دائه. .اینطی اَتِه دوره وِشونِ سَرزمینِ آرامِش داشتِه و اون رِهانندهم خارِ فَرمونرِوا بی یه . خِدام اسراییلِ قومِ وِسّه خَلِه رِها کِنِِنده بَرِسِنیه. خِدا اِجازه هِدا پِه که اسراییلیا ، شِه دِشمَن یَعنی مِدیانِ دَس شِکَست بَخِرِن، اَت وار دیگم وِشونِسّه رِها کِنِندِه بَرِسِنیه.

![](https://cdn.door43.org/obs/jpg/360px/obs-en-16-04.jpg)

مِدیانیا هَفت سالِ آزِگار اسراییلیایِ زَحمِت بَکِشی ره بِچاپِسّنِه، اِسراییلِ قوم وِشونِ تَرسِ جه غارایِ دله جا خِردِنه،تا نَکِنه مِدیانیا وِشون ره گیر بیارِن.آخِرِ کار خِدایِ دَس دامِن دَکِتِنِه تا وِشون ره آزاد هَکِنه.

![](https://cdn.door43.org/obs/jpg/360px/obs-en-16-05.jpg)

اَت روز اَت مَردی، جِدعون نوم بی چِمِر، دَیّیِه گَنّم کِتِنیِه تا مدیانیا نَتونِن وره بِچاپِن. هَمونگِدِر یَهوَُة فِرِشته وَنه جِلو دیار بَیّیه و باتِه:«آهای دِلِرِ جنگی، خِدا تِه هِمکِت دَره.بور و اسراییلِ رِه مِدیانیایِ چَنگِ جِه دَر بَوِر.»

![](https://cdn.door43.org/obs/jpg/360px/obs-en-16-06.jpg)

جِدعونِ پی یِر، شِه قِربونگاه ره اَتّا بُتِ وِسّه پیشکَش هَکِرد بی یِه.خِدا شِروعِ کار جدعونِ جِه بِخواسّه کِه اونتا قِربونگاه ره خِراب بِکِنه.ُ چونکِه جدعون مَردِمِ جه تَرسیه تا نصفِه شو لَس هِدا.اونگِدِر قِربونگاه ره بَزّوئه ، بِشکِنیِه و رِز رِز هَکِردِه.وه هَمون نَزیک پِه اَتّا دیگِه قِربونگاه خِدایِ وِسّه بِساتِه و وِنه سَر قِربونی هَکِردِه.

![](https://cdn.door43.org/obs/jpg/360px/obs-en-16-07.jpg)

فِردا سِوایی مَردِم که بَدینه وِشونه قِربونگاه ره اَت کَس بّزو خِراب هَکِرده خَله جوش بیاردِنِه. وِشون جِدعون سِرِه وَر بوردِنه که وِره بَکوشِن. امّا جدعونِ پی یِرِ باته «چیشی وِسّه خوانِنِی ِشه خِدا ره کمک هَکنین؟ اَگه وِه خِدا هَسّه بِی ِیلّین وِه شِه، شِه جِه نیگَداری هَکِنه.» وِشونِم اینتا گَپِ که بِشتوسِّنه جدعون ره نَکوشتنه.

![](https://cdn.door43.org/obs/jpg/360px/obs-en-16-08.jpg)

اَی دِواره مدیانیا بیَمونِه تا اسرائیلیا ره بِچاپن.وِشون اَندِه زیاد بَینِه که شِمارِش نَی بینِه. جِدعون، مِدیانیایِ جَنگِ وِسّه شِه ِتمومه قوم ره وَنگ هَکِرده. جِدعون خِدا جِه اَتّا نِشونه بِخواست بی یِه که وِ رِه هالی بَوّه که راس راسی، خِدا وِنه جه بِخواسّه که اسرائیلِ جانِ دَر بَوِره.

![](https://cdn.door43.org/obs/jpg/360px/obs-en-16-09.jpg)

یِکِمین نِشونه وِسّه، جِدعون اَتّا تیکه گِسپِن ِپوس ره بِنه سَر بِشته و خِدا جه بِخواسّه بِنه سَر خِشک بَمونِه، و پوسِ سَر شِبره هِنیشِه. خِدام هَمینکاره هَکِرده. فِردا خِدا جه بِخواسّه که بِنه سَر شیر بَوّه مُنتا پوسِ خِشک بَمونِه. خِدا اینتا کاررِم هَکِرده. این دِتا نِشونه َجدعون خیالِ تخت هَکرده که خِدا وِنه جه بِخواسّه که اسرائیل ره مدیانیایِ دَسِ جه دَر بَوِره.

![](https://cdn.door43.org/obs/jpg/360px/obs-en-16-10.jpg)

۳۲۰۰۰ تا اِسرائیلی سرباز، جِدعون پیش بیَمونِه، مُنتا خِدا وِره بِفَرمِسّه که وِشون خَله زیاد هَسِّنه. هَمینتاسّه جدعون بیست و ۲۲۰۰۰ سرباز که جَنگه جه تَرسینه ره سِرِه رایی هَکِرده. خِدا این کَش جدعون ره باتِه اَتَنّه آدِم خَله زیاد هَسّنه.اونگِدِر ۳۰۰ تن بَکِتِه جِدعون هَمه ره سِره رایی هَکِرده.

![](https://cdn.door43.org/obs/jpg/360px/obs-en-16-11.jpg)

هَمون شو خِدا جدعون ره باتِه: «بی چِمِر مِدیانیایِ اِردوگاه بُور،وِشونه حَرف و گَپِ که بِشتوُیی، دیگه نَتِرسِنی که وِشونِ سَر هِجوم بَوِری.» جدعون وِشونِ اِردوگاهه وَر بُورده و بِِشتوسّه که اَتّا مدیونی سَرباز،شِه خُو ره شه رَفِقِ وِسّه شَرح دِنّه. وِنه رَفِق ،وِره باته :«تِه خوُ اینطی سَر دَر ایارنِه که جدعون ارتش اِما ره شِکَست دِنِّنِه.» جدعون که اینتا گَپ ره بِشتوسّه خِدا ره شکر هَکِرده.

![](https://cdn.door43.org/obs/jpg/360px/obs-en-16-12.jpg)

جِدعون شِه سربازایِ پَلی دَگِرِسّه وهَر سَربازی ره اِتّا شَیپور و اِتا گِلی کوزه هِدا که ونه دِلِه تَشکَل دَیّیِیه. وِشون اونگِدِر که مِدیانیایِ سربازا بَخِت‌بینه وِشون ِره دوره هَکِردنه. اون سیصد تا سرباز شِه تَشکَلا ره گِلی کوزة دِله بِشت‌بینه که مدیانیا نَتونِن وِشونِ تَشکِلایِ سوُ ره بَوینِن.

![](https://cdn.door43.org/obs/jpg/360px/obs-en-16-13.jpg)

اینطی جِدعونِ سربازا، شِه هِمکِت گِلی کوزه رِه هَمِه تایی بَزّونِه بِشکِنینِه و وشون تَشکِل سُو دیار بَّیِیه. هَمینطی که شَیپور زونِنِه،شونگ َکشینه: «شمشیر، یَهوَه و جدعون‌ وِسّه»

![](https://cdn.door43.org/obs/jpg/360px/obs-en-16-14.jpg)

خِدا اَندِه مدیانیا ره گِج هَکِرده که شِروع هَکِردِنه هِدیِ سَر دَکِتِن و دِیی ره بَکوشتِن. جدعون دَر دَم اسرائلیایِ دیگه ره وَنگ هَکِرده وَ وِشونِ جِه بِخواسّه تا مدیانیایِ فِراریِ هِدائنِ وسّه وشون ره یاری هَدِن. وِشون اَته خَله مدیانیا ره بَکوشتنه دیگِرون رِم اسرائیل جا یور هَکردِنه. اون روز ۱۲۰۰۰۰ تَن مِدیانی بَمِردِنه.اینطی خِدا اسراییلِ قوم ره نِجات هِدا.

![](https://cdn.door43.org/obs/jpg/360px/obs-en-16-15.jpg)

مَردِم بِخواسِّنه کِه جدعون ره ِشه شاه هَکِنِن. وِه وِشون رِه نِشتِه اینتا کار رِه هَکنن، مُنتا وِشونِ جا بِخواسّه که اون حلقه هایِ طِلا ره که مدیانیایِ جِه بَیت بینِه ره هَدِن وِره. مَردِمِم ،جدعون ره خَله طِلا هِدانه.

![](https://cdn.door43.org/obs/jpg/360px/obs-en-16-16.jpg)

اونگِدِر جدعون طِلاهای جا اَتّا جِلیزقه گَتِ پیشواهایِ جِلیزقِه واری بِساته. مُنتا مَردِم اون جلیزقه ره بُتِ واری پَرَستِش کِردبینِه. همینتاسّه، دواره خِدا اسرائیل قوم ره گوشمالی هدا ، چونکه وِشون بُت ها ره پرستِش کِردبینِه، وشونِ دِشمِنون رِه اِجازه هِدا که وِشون ره شِکِست هَدن. دسِ آخر وِشون اَی دِواره خِدای جه یاری بِخواسّنه ، خِدام وشونِسّه اَتّا رِها کِنِندة دیگِه رایی هَکِرده.

![](https://cdn.door43.org/obs/jpg/360px/obs-en-16-17.jpg)

اینتا کار هَی گِردِش کِرده : اسرائیل قوم گِناه کِرِدبینِه ، خِدام وِشون ره سِزا دائه ، وِشون توبه کِردِنه و خدا وشو‌نِسّه اَتّا رِها کِنندِه رایی کِرد بی یِه.سالهایِ سال ،خِدا خَله ها ره رایی هکِرد بی یِه تا اسراییلِ قوم ره وِشونِ دِشمِنونِ دَسِ جه دَر بَوِرِه.

![](https://cdn.door43.org/obs/jpg/360px/obs-en-16-18.jpg)

آخرسَر اسرائیل قوم خِدا جِه بِخواست بینِه که قوم های دیگه واری وِشون رِه اَتّا شاه هَده. وِشون اَتّا پادِشاهِ بِلندِ بالاو قوی خواست بینِه که جَنگای دِلِه وِشون ره راهنِمایی و رَهبَری هَکنه. خِدا اینتا خواستِة جه خِشنود نَی بی یه، مُنتا هَمینطی که بِخواست بینِه وِشون ره شاه بِبَخشیه.

*کِتابِ مُقَدَسِ جِه بَئیته داستان: کتاب داوران فصل ۱ تا ۳ و ۶ تا ۸؛ کتاب اول سموئیل فصل ۱ تا ۱۰*

## 17. ۱۷- خِدا داودِ جا پَیمون وَنده

https://openbiblestories.org/l/mzn/story-17/

![](https://cdn.door43.org/obs/jpg/360px/obs-en-17-01.jpg)

شائول اِسرائیلِ یِکِمین پادشاه بی یِه. هَمونطی که مَردِم بِخواس‌ بینِه، بِلِن‌بالا و خِشْ بَر وُ رُو مَردی بی یِه. اونگِدِر که تازِه فَرمونرِوا بَیْ‌ بی یِه، خارِ پادشاه بی ِیه، مُنتا لَس‌لَس شَرور بَیِّه کِه دیگه خِدا ره گِس نِدائه. هَمینتاسِّه خِدا اَتّا مَردیِ دیگه رِه وِنه جا پادشاهی‌ وسّه نِشون هَکِرده.

![](https://cdn.door43.org/obs/jpg/360px/obs-en-17-02.jpg)

خِدا اَتّا جِوونِ مردی که وِنه نوم داوود بی یِه رِه اِنتخاب هَکِرده تا وِره شائولِ جانِشین هَکِنه. داوود بیت لَحِمی بیِه وَ چَپّونی کِرده. وِه اونگِدِر که شِه پی‌یِر گَلِّه هَمکِتْ چِرا شی یِه، دِ کَش گِسفِن رَمِه رِه اَش و شیرِدَّسِه جِه نِجات هِدا و اونا ره بَکوشتِه. داوود خَلِه خاکی و ‌پَرِزکار بی یِه. وِه خِدا رِه بُوور داشته وَ وِنه جِه فَرمون وَرده.

![](https://cdn.door43.org/obs/jpg/360px/obs-en-17-03.jpg)

اونگِدِر که داوود جِوونِ مَردی بی‌یِه، جُلیاتِ جا که غولِ آدِمونِ واری بی یِه وَ سه مِتر قَد داشته و قِددار و کار بَلِد بی‌یِه جَنگ هَکِرد بِی یِه. اَمّا خِدام داوود رِه یاری هَکِرده تا جُلیات ره بَکوشِه و اِسرائیل رِه نِجات هَده. داوود چَن کَشِ دیگِم اِسرائیلِ دِشمِنونِ رِه شِکِست هِدا. وِه دیگه جَنگِ دِلِه اِستا و کار بَلِد بَیْ‌ بی ِیه و تِمومِ جَنگایِ دِلِه اِسرائیلیا رِه فَرموندِهِی کِرد بی یِه. اَندِه که تِمومِ مَردمِ تِکِ جه نَکِته.

![](https://cdn.door43.org/obs/jpg/360px/obs-en-17-04.jpg)

مَردِم اَنده داوود رِه دِل دَوسِّنِه که شأول دیگه بَر نِداشته. هَمینتاسّه شأول بِنا بَیتِه که داوود رِه بَکوشِه، مُنتا وِه بیابونِ وَر دَر بورده وُ اونجِه جا بَخِرده، اَتّا روز هَمینطی که شائول وُ وِنِه سربازا داوودِ پِه دَئی بینِه، شائول ناگِمونی اَتّا غارِ دِله بوُرده که داوود اونجِه جا بَخِرد بی یِه. شائول داوود رِه نَدیِه. داوود اَندِه وِنِه تَنِ وَر بوردِه که تونِسّه اَتّا تیکِّه شأولِ جِمِه رِه بَورینِه. شائول غارهِ جِه یور بي‌یَمِ پِه، داوود وِرِه وَنگ هِدا وُ شائولِ جِمِه تیکّه رِه وِرِه سِراغ هِدا. اینطی شائول رِه هالی بَیِّه که داوود نِخوانه وِره بَکوشه تا شِه پادشاه بَوّه.

![](https://cdn.door43.org/obs/jpg/360px/obs-en-17-05.jpg)

آخِرِ سَر اَتّا جَنگ دِلِه، شائول رِه بَکوُشتِنِه و داوود اِسرائیلِ پادشاه بَیِّه. وِه خارِ پادشاه بی یِه و مَردِم وِرِه دوس داشتِنه. خِدام داوود رِه فِراوونی هِدا و تِمومِ کارای دِله وِره سَر بِلِن هَکِرده. داوود خَلِه جَنگا بورد بی یِه و خِدا وِره یاری هَکِرده تا اِسرائیلِ دِشمِنون رِه شِکِست هَدِه. داوود اورشلیم رِه بَیتِه و اونجهِ رِه شِه پایتَخت هَکِرده. داوود هَمونجِه زِندگانی هَکِرده و هَمونجه بَمِرده وخاکِ بَیِّه. وِه ۴۰ سال پادشاه بی یِه و اون سالای دِلِه اِسرائیل؛ هَم مال و ثِروِت داشتِه هَم زور.

![](https://cdn.door43.org/obs/jpg/360px/obs-en-17-06.jpg)

داوود خواسّه کِه اَتّا عِبادِتگاه بِسازه تا تِمومِ اِسرائیلیا بِتونِن وِنِه دِلِه خِدا رِه پَرستِش هَکِنِن و وِنِسّه قِربونی هَکِنِن. ۴۰۰ سال، مَردم اَتّه جا پَرِستَش و قِربونی کِردبینِه که وِنه نُوم کیمة دیدار بی ِیه، و موسی اونجه رِه بِسات‌ بی یِه.

![](https://cdn.door43.org/obs/jpg/360px/obs-en-17-07.jpg)

خِدا اَتّا پَیغُمبِر کِه وِنه نوم ناتان بی‌یه رِه داوود پیش رایی هَکِرده و وِره باتِه: «چونکه تِه خَلِه جَنگایِ دِله دَیْ بیی، عِبادِت‌گاه رِه تِه مِه وِسّه نِسازِنی، ته ریکا اونجه ره بِنا کِنده. هَمینتاسّه مِن ته رِه فِراوونی دِمبه. اَتّا کَس تِه تِوارِ جِه اِنِه کِه هَِمیشِکْ مِه قوم ره پادِشاهی کِنده.» تِنا کَسی که تونِسِّه تا هَمیشِکْ پادِشاهی هَکِنه مَسیحْ بی یِه. مَسیحْ خدایِ نِشون هَکِرد بی یِه که دِنیا رِه گناهِ جِه نِجات دائِه.

![](https://cdn.door43.org/obs/jpg/360px/obs-en-17-08.jpg)

داوود که اینتا پَیغوم رِه بِشتوسّه، خِدا رِه پَرسِتش هَکِردِه وَ خِدام وِرِه سَربِلن هکرده وَ وِرِه فِراوونی بِبَخشیِه. دِرسِّه که داوود نَدونِسِّه که کینتا ماقِع خِدایِ وَعدِه اَنجام بوُنِه مُنتا اِما اِسا دومبی که اِسرائیلِ قوم وِسِّه، داوودِ دورة جِه هِزار سال چِش بِراه بَوِّن تا مسیحْ بی یِه.

![](https://cdn.door43.org/obs/jpg/360px/obs-en-17-09.jpg)

داوود خَلِه سال دِرِس و با اِنصاف پادِشاهی هَکِرده. وِه خِدا جِه فَرمون وَردِه و خِدام وِره فِراوونی دائِه. مُنتا آخِرایِ شِه زِندِگانی اَتّا گَتِ گِناه خِدای پیش هَکِرده.

![](https://cdn.door43.org/obs/jpg/360px/obs-en-17-10.jpg)

اَتّه روز، اونگِدِر که داوودِ سربازا هَمِه جَنگِ‌سِّه شَهر جِه بیرون دَی‌بینِه، وِه شِه کاخِ بومِ‌سَرِ جِه دور و وَرِه اِشائِه که هَمونگِدِر بَدی‌یِه اَتّا قِشَنگِ‌ زِنا شِه سِرِة دِلِه شِه تَنِ شورنِه. وِه اونتا زِنا رِه نِشناسِیه مُنتا پِه بَوِردِه که وِنِه نُوم بَتشِبَع هَسِّه.

![](https://cdn.door43.org/obs/jpg/360px/obs-en-17-11.jpg)

داوود اینتا سُوسِه رِه شِه سَرِه جِه رَد نَکِردِه که هِچ، تازِم اَتّا کَسِ رِه راهی هَکِرده تا اونتا زِنا رِه وِنِه پَلی بیارِن. وِه اونتا زِنایِ جا بَخِتِه وتِموم بَیِّه په وِره وِنه سِره رایی هَکرده. اَتّه کَم بُوگذِشته پِه بَتْشِبَعْ داوودِ سّه پَیغوم بَرِسِنیه و باتِه کِه سَنگین بَیِّه.

![](https://cdn.door43.org/obs/jpg/360px/obs-en-17-12.jpg)

بَتْشِبَعِ مَردیِ نوم اوریا بی یِه، وِه بیتتِرین سَربازِ داوود بی ِیه. اوریام هَمونگِدِر شِه سِره زندگیِ سَر دَنی بی‌یِه و جَنگِ دِله دَی‌ بی یِه. داوود وِره جَنگِ جه شِه پَلی بَکِشیه و وِره باته شِه سِره ،شِه زنایِ وَربور. اوریا اره ندائه چونکه تِمومِ سربازا جَنگهِ دِله دَیّنهِ، وه نِخواسّه شِه سِرِه دَگِرده. هَمینتاسّه داوود، دِواره اوریا رِه جَنگِ دِله رایی هَکِرده و فَرمونده هایِ جِه بِخواسّه وِره ارتشِ جِلوُ بیِ یِّلِن که دِشمِن وِرِه بَکوشِه. اینطی بَیِّه که اوریا رِه جَنگه دِله بَکوشِتِنه.

![](https://cdn.door43.org/obs/jpg/360px/obs-en-17-13.jpg)

اوریا رِه بَکوشتِه پِه، داوودِم بَتْشِبَعِ جا آروسی هَکِرده وُ وِئِمِ داوودِ وسّه اَتّا ریکا بِزا. خِدا داوودِ کارِ جِه خَشم داشتِه، هَمینتاسّه ناتانِ پَیغُمبِر رِه داوودِ پیش بَرِسِنیه تا وِنه اَن گَتی گِناهِسّه وِره گوشزَد هَکِنه. داوودِم شِه گِناه ره مِقِر بیَمو وخِدام وِره بِبَخشیه. داوود تا زنده بی ِیه، بَدتِرین بِلایِ دِلئِم؛ خِدا جِه فَرمون وَرده.

![](https://cdn.door43.org/obs/jpg/360px/obs-en-17-14.jpg)

داوودِ شِه گِناهِ سِزا ره بَیتِه وُ وِنه ریکا بَمِرده. هَمینطی وِنه خِنِوادهِم وِنه رو در بی یَمونه وَ وِنِه قِد وُ قُدرِت روز به روز کَمتِر بَی بی یِه، دِرسِّه که داوود خِدایِ فَرمونِ جه سَر دَپیِته، اَمّا خِدا اونتا قِراری که داوودِ جا دَوِس بی یِه رِه وِفا هَکِرده وَ سَراَنجام هِدا. اَتِّ کَم دیگِه اَیْ بَتْشِبَعْ، داوودِ جِه وَچه دار بَیِّه َو ِونِه نوم رِه سِلَیْمون بِشتِنِه. کِتابِ مُقَدَسِ جِه بَئیته داستان:

*کتاب اوّل سموئیل، فصل ۱۰؛ و فصل ۱۵ تا ۱۹و ۲۴ و ۳۱؛ کتاب دوم سموئیل فصل ۵ و ۷ و ۱۱ و۱۲*

## 18. ۱۸-  اسراییلِ پادِشاهی دِ بخش بَئیه

https://openbiblestories.org/l/mzn/story-18/

![](https://cdn.door43.org/obs/jpg/360px/obs-en-18-01.jpg)

داوودِ پادِشاه چِل سال پادِشاهی هَکِردِه. داوود بَمِرده پِه، وِنه ریکا سِلِیمون اسراییلِ قومِ پادِشاه بَیِّه. خِدا سِلِیمونِ جا گَپ بَزو و وِنه جه بَپِرسیه: « مِه جِه چه چی خوانی، تا تِره هَدِم» سِلِیمونِم خِدا جِه بِخواسّه وِرِه دونایی و حِکمِت هَده. خِدا ره سِلِیمونِ بِخواسّیِ جِه خَلِه خِش بیَمو و بِنة سر وِرِه دوناتِرین مَردی هَکِرده. سِلِیمون خَله چیزا رِه یاد بَیتِه و پادِشاهِ دونایی بی یِه. خِدائِم سِلِیمون رِه خَله مال وُ مِنال هِدا.

![](https://cdn.door43.org/obs/jpg/360px/obs-en-18-02.jpg)

سِلِیمون، اورشلیمِ شهرِ دِله اَتّا پَرِستِشگاه بِساتِه که داوود وِنه نَقشِه رِه دَکِشی بی یِه و ساختِمون سازیِ لِوازِم رِه شِه جَم هَکِرد بی یِه. اون روز بوگذِشتِه پِه، مَردِم بِجایِ اینکه کیمة دیدارِ دِله پَرِستِش هَکِنِن، تونِسِّنِه اونجه بورِن و خِدا ره پَرِستِش هَکِنِن و هَمونجِم خِداسّه قِربونی هَکِنِن. خِدا پَرِستِشگاهِ دِله دَیِّه و شِه قومِ جا زندگی کِردِه.

![](https://cdn.door43.org/obs/jpg/360px/obs-en-18-03.jpg)

مُنتا سِلَیمون قومایِ دیگه رِه دِل دَوسّه و وِشونه دِله زَن بَیتِه. سِلیمون نزدیکِ ۱۰۰۰ تا زَن بَوِرده و اینطی خِدا جه نافَرمونی هَکِرده. این زَنون ویشتِر بیگانِه بینِنِه و غَریبِ جایِ جه بی یَم بینِه، و پَرِستِشِ وِسّه شِه بُتا رِه شِه هِمکِتْ ایاردِنه. سِلَیمون که پیرِمَردی بَیْ بی یِه، وِئِم شِه زَنونِ بُتا رِه پَرِستِش کِرد بی یِه.

![](https://cdn.door43.org/obs/jpg/360px/obs-en-18-04.jpg)

همینتاسِّه خِدا سِلَیمونِ جِه خَلِه خَشم بَیتِه وُ وِرِه باتِه اینتا نافَرمونیِ سِزا اینَسِّه که اسراییلِ پادشاهی، وِنه بَمِردِه پِه دِتا بَخش بونِه.

![](https://cdn.door43.org/obs/jpg/360px/obs-en-18-05.jpg)

سِلیمونِ بَمردِ په، وِنه ریکا رُحبَعام وِنه جا سَرهِنیشته و پادِشاه بَیِّه. تِمومِ اِسراییلیا جَم بَیِّنه که وِرِه شِه پادشاه هَکِنِن. وِشون رُحبَعام پیش گِلایه هَکِردِنه که سِلیمون خَله وِشون ِجه کار کَشیه و وِشون رِه وادار کِردِه کِه اَتِّه خَلِه باج و خِراج هَدِن. وِشون رُحبَعامِ جِه بِخواسّنه شِه پی یِرِ واری اَنده سختگیر نَوّه.

![](https://cdn.door43.org/obs/jpg/360px/obs-en-18-06.jpg)

مُنتا رُحبَعام خامی هَکِرده و وِشون رِه نَخِشِ جِواب هِدا و باتِه: «شِما گِمون کِنِنی که مِه پی یِر سِلَیمون خَلِه سختگیر بی یِه؟ مُنتا مِن خَلِه ویشتِر شِمِه جا کار کَشِمبِه و شِمِه سَر بِلا ایارمِه»

![](https://cdn.door43.org/obs/jpg/360px/obs-en-18-07.jpg)

مَردِم وِنه گَپِ بِشتوسِّه پِه، وِنه رو دَر بی یَمونه و شورِش هَکِردِنه. اسراییلِ دِوازدَه تا تِوارِ جه دَه تا تیره سیوا بَیّنه. دِتا تِوار فقط وِنه جا وِفادار بَمونِسّنه، و وِشون؛ شِه پادِشاهیِ نوم رِه یَهودایِ پادشاهی بِشتِنه.

![](https://cdn.door43.org/obs/jpg/360px/obs-en-18-08.jpg)

اونتا ده تا تِوار دیگِرِم اَتّا مردی که ونِه نوم یَرُبَعام بی یه رِه شِه پادشاه هَکِردِنه وِشون بَخش شِمالیِ هَمون سَرزَمین زِندِگانی کِردبینه و شه خِد ره اسراییلِ پادِشاهی گِتِنه.

![](https://cdn.door43.org/obs/jpg/360px/obs-en-18-09.jpg)

یَرُبَعام خِدایِ جِه فَرمون نَوردِه که هِچ، مَردِمِ گِناهِ باعِث و بانیِم بَیِّه. وِه دِ تا بُت بِساته وُ مردمِ ِجه بِخواسّه که وِرِه پَرِستِش هَکِنِن. وِشون؛ دیگه پَرستشِ وِسِّه اورشلیمِ دِله که یَهودایِ پادشاهی بی یِه نَشینِه.

![](https://cdn.door43.org/obs/jpg/360px/obs-en-18-10.jpg)

یَهودایِ پادشاهی و اسراییلِ پادشاهی دِییِ جا دِشمِن بَیینِه و و هَمیشِک جَنگ و مِرافه داشتِنه.

![](https://cdn.door43.org/obs/jpg/360px/obs-en-18-11.jpg)

اسراییلِ تازِه پادِشاهیِ دِلِه، تَِمومِ پادِشاها بَد و شَرور بینِه. ویشتِر پادِشاها رِه اون آدِمایی بَکوشتِنه که خواسِّنِه شِه پادِشاه بَوِّن.

![](https://cdn.door43.org/obs/jpg/360px/obs-en-18-12.jpg)

تِمومِ پادِشاها و خَلِه اسراییلِیا بُتا رِه پَرِستِش کِردِنه. هَم بُتا رِه پَرِستِش کِردبینِه و هَم زَنایِ بَدکارة جا خِتِنه و هَم شه وَچون ره بُتایِ وسّه قِربونی کِردِنه.

![](https://cdn.door43.org/obs/jpg/360px/obs-en-18-13.jpg)

یهودایِ پادشاها داوودِ تِوارِ جِه بینِه. این پادِشاهای دِلِه خارِ پادشاهِم دَیی بینِه، مِردمِ داد رَسینِه و خِدا رِه پَرِستِش کِردِنه. مُنتا یَهودایِ پادِشاها، ویشتِری بَدجِنس وُ شَرور بینِه. اَتِی هِم وِشونِ دِلِه دَیینِه کِه شِه کِچیک وَچون رِه بُتای وِسّه قِربونی کِردِنه. خَلِه یَهودایِ پادِشاهیِ مَردِمونِم خِدایِ رو دَر بی یَمونه و خِداهایِ دیگه رِه پَرَستِش هَکِردِنه. کِتابِ مُقَدَسِ جِه بَئیته داستان:

*کتاب اول پادشاهان فصل ۱ تا ۶ و ۱۱ و ۱۲*

## 19. ۱۹- پَیغُمبِرون

https://openbiblestories.org/l/mzn/story-19/

![](https://cdn.door43.org/obs/jpg/360px/obs-en-19-01.jpg)

اِسرائیلِ تاریخِ دِله، خِدا خَلِه پِیغُمبِرا رِه وِشونِسّه رایی هَکِردِه. وِشون خِدایِ پِیغوما رِه گیتِنِه و مَردِمِ وِسِّه اِیاردِنِه.

![](https://cdn.door43.org/obs/jpg/360px/obs-en-19-02.jpg)

اِیلیا پِیغُمبِری بی یِه که آخابِ پادشاهِ دورِه زندگانی کِرد بی یِه. آخاب خَلِه شَرور بی یِه و مَردِم رِه هَشوشْ دا که بُتِ بَعَلِ رِه پَرَستِش هَکِنِن. ایلیا آخاب رِه باته: «خِدا تِرِه سِزا دِنّه. وِه اَی آخاب رِه باتِه: «اِسراییلِ سامونِ دِلِه، مِن اگه فَرمون نَدِم؛ هیچ وارِش یا شَبرِه بِنه نَکفنه» آخاب ایلیای گَپِ جِه خِش نِیَمو و بِنا بِشته که وِرِه بَکوشِه.

![](https://cdn.door43.org/obs/jpg/360px/obs-en-19-03.jpg)

خِدا ایلیا رِه باتِه: «بیابونِ دِله بُور و شِه خِدِرِه آخابِ جِه جا بَدِه» ایلیائِم بیابونِ دِله بوردِه و اَتّا روخِنة پَلی که خِدا وِرِه نِشون هِدا موندِگار بَیِّه. هَر صِوائی و نِماشونِ سَر چَنتا کِلاج وِنِسّه گوشت وُ نون ایاردِنه. هَمونگِدِرم آخاب وُ وِنِه سربازا، ایلیایِ پِه دَینِیّه مُنتا نَتونِسِّنه وِرِه پيیدا هَکِنِن.

![](https://cdn.door43.org/obs/jpg/360px/obs-en-19-04.jpg)

چونکِه وارِش نَزوئه، اونتا روخِنه لَس لَس خِشکْ هَیتِه. اینطی بَیِّه که ایلیا هَمون دُور وُ وَرا اَتِه جایِ دیگِه کوچ بَکِشیه بُوردِه. اونتا سامونِ دِلِه اَتّا فَقیر بیچارِه زنا وُ وِنِه ریکا زندگی کِرد بینه که خِشکسالیِ خاطِری هِچ خِراکی نِداشتِنِه بَخِرِن. اَیِم وِه ایلیایِ جِه رَسیِه و هَمینتاسِّه خِدائِم وِشونِ سِفرِه رِه پِر کِردِه. وِشونِ آردِ کیسِه وُ راغونِ کوزه هِچ زَمون خالی نَیْ بی یِه و قحطی سالِ ماهِ دِله، شِه اَندازِه خِراکْ داشتِنه تا بَخِرِنِ. ایلیائِم سِه سال اونجِه بَمونِسِّه.

![](https://cdn.door43.org/obs/jpg/360px/obs-en-19-05.jpg)

سه سال و نیم که بوگذِشته، خِدا ایلیا رِه باتِه: «اَی دِواره وارِش اِنّه» خِدا ایلیای جِه بِخواسِّه که اسراییلِ سامون دَگِردِه وُ آخابِ جا گَپ بَزِنِه. آخابِم که ایلیا رِه بَدیِه، وِرِه باتِه: «اَتَّنه سَختی وُ بِلا رِه تِه دِرِس هَکِردی!» ایلیائِم وِرِه اینطی جِواب هِدا: «تِمومِ سَختی و بِلارِه تِه اَمِه سَر بیاردی، تِه راسّی خِدا، که یَهُوَّه هَسِّه رِه وِل هَکردی و بَعَل رِه پَرَستِش کِنّی. اِسا تِمومِ اسراییلِ قُوم که تِه پَلی دَرِنِه رِه کَرْمِلِ کوه بیار.»

![](https://cdn.door43.org/obs/jpg/360px/obs-en-19-06.jpg)

تِموم اسراییلِیا و پَیغُمبرایِ بَعَل که ۴۵۰ تَن بینِه، کَرملِ کویِ پَلی جَم بَیِّنه. ایلیا باته «تا کِه خواننی دِل دِل هَکِنین؟ اگه یهوه خِدا هَسّه، وره پَرسِتش هَکنین وُ وره گِس هَدین، اَگِم که بَعَل خِدا هَسِّه وِنِه جِه فَرمون بَوِرین»

![](https://cdn.door43.org/obs/jpg/360px/obs-en-19-07.jpg)

اونگِدِر ایلیا، بُتِ بَعَلِ پَیغُمبِرا رِه باتِه: «اَتّا جونیکّا رِه قِربونی هَکِنین، وِنِه تَنِ گوشت رِه چَن تیکّه هَکِنین و قِربونگاهِ سَر بیِ یِلّین مُنتا وِرِه تَشْ نَزِنین. مِنم قِربونگاهِ دیگِة سَر هَمینتا کارِه کِمبِه. اونتا خِدایی که قِربونگاهِ سَر، تَشْ رایی هَکِنِه، وِه راسّی خِدا هَسِّه» هَمینتاسِّه بُتِ بَعَلِ پَیغُمبِرا، شِه قِربونی رِه بِیاردِنِه، مُنتا وِرِه تَشْ نَزونِه.

![](https://cdn.door43.org/obs/jpg/360px/obs-en-19-08.jpg)

اونگِدِر وِشون بُتِ بعَلِ دَرگاه اینطی راز و نیاز هَکِردِنه: «اَیْ بَعَل، اَمِه وَنگِ بِشتو!» وِشون تِمومِ روز دُعا کِردِنه، شونگْ کَشینِه و شِه تَن رِه گِزلیکِ جا خِراش دانِنِه. مُنتا بَعَلِ جِه نا جِوابی بِشتوسِّنه، نا اَتِّ ذِرِّه تَش قِربونگاهِ سَر دَکِتِه.

![](https://cdn.door43.org/obs/jpg/360px/obs-en-19-09.jpg)

بَعَلِ پَِیغُمبرا اَنّه که تِمومِ روز دعا کِرد بینه، ذِلْ بَئینه وُ دیگِه نا نِداشتِنه هَمینتاسِّه شِه دِعا هَکِردِنه وِل هَکِردِنه. اونگدر ایلیا اَتِّه جونیکّای دیگِه رِه قِربونی وِسّه، قِربونگاهِ سَر بِشته و مَردِم رِه باته: «دِوازده تا گَتِ کوزه اُوْ قِربونگایِ سَر بَشِنِن، اَندِه که گوُ گوشت وُ هیمِه و بِنه شیر بَوِّه»

![](https://cdn.door43.org/obs/jpg/360px/obs-en-19-10.jpg)

اونگِدِر ایلیا اینطی دِعا هَکِردِه: «آ؛ یَهُوَّه، آ؛ اِبراهیمِ خِدا، آ؛ ایساق وُ یَعقوبِ خِدا، تِه اَمروز اِما رِه نِشون هَدِه کِه تِه شِه اِسراییلِ خِدایی وُ مِن تِه خادِم هَسِّمه. مِه دِعا رِه جِواب هَدِه تا مَردِم بَدونِن کِه تِه راسّی خِدا هَسّی.»

![](https://cdn.door43.org/obs/jpg/360px/obs-en-19-11.jpg)

دَر دَم اَتّا تَش آسِمونه جِه بِیَمو و هیمِه وُ گوشت وُ سنگ وُ خاک وُ قِربونگاه دُور وُ وَر دَکته، اَندِه که اُو رِم بَسوزِنِیه. مَردِم که اینتا ماجرا رِه شِه چِشِه جا بَدینِه، دَر دَم سِجده هَکِردِنه و باتِنه: «یَهُوَّه خِدا هَسِّه، یَهُوَّه خِدا هَسِّه!»

![](https://cdn.door43.org/obs/jpg/360px/obs-en-19-12.jpg)

اونگِدِر ایلیا باته: « نِلّین بَعَلِ پَیغُمبرایِ دِله یِتّام دَر بوُرِن!» هَمینتاسِّه مَردِمِم بَعَلِ پِیغُمبِرا رِه بَیْتِنِه وَ هَمِه رِه اونجِه جِه بَوِردِنه وُ اَز دَمْ بَکوشتِنه.

![](https://cdn.door43.org/obs/jpg/360px/obs-en-19-13.jpg)

ایلیام اَخاب پادشاهِ رِه باتّه: «لَس نَدِه، بور شِه سِرِه، اِسائه که وارِش بَزنه». هَمونگِدِر سیو اَبِرا آسِمون رِه دَپوشِنیه و اَتّه خَلِه شِلاب بَزوئِه. یَهُوَّه خِشکسالی رِه تِموم هَکِردِه و اینطی نِشون هِدا که تِنا وِه راسّی خِدا هَسِّه.

![](https://cdn.door43.org/obs/jpg/360px/obs-en-19-14.jpg)

اونگِدِر که ایلیای خِدمِت تِموم بَیِّه، خِدائِم اَتّا آدِمِ دیگه؛ اِلیشَع نوم رِه شِه پَیغُمبِر هَکِرده. خِدا خَلِه مُوجِزْ رِه وِنِه دَسِ جِه اَنجام هِدا. اَتّایِ این مُوجِزا، نَعمانِ وِسّه دَکِتِه کِه ، دِشمنِ فَرموندِه بی یِه. وِنِه تَنِ پوسْ، بی جُورِ مَرِض داشتِه. وِه اِلیشَع خَوِری بِشتوس داشتِه، هَمینتاسِّه وِنِه پَلی بوردِه وُ وِنِه جِه بِخواسِّه کِه وِنِه دَردِ دِوا هَکِنِه. اِلیشَع نَعمان رِه باتِّه: «شِه خِدِرِه هَفت کَشْ، اُردُنِ روخنة اُویِ بِن فِرو بَوِر»

![](https://cdn.door43.org/obs/jpg/360px/obs-en-19-15.jpg)

هَمون شِروعِ کار اینتا گَپِ جِه نَعَمانِ خَشم بَیتِه، چونکِه اینتارِه بیخِدِه کار دونِسّه و نِخواسّه که وِه رِه انجام هَدِه. مُنتا پَشیمون بَیِّه و شِه خِدِرِه هَفت کَشْ اُردُنِ روخِنه اوُ بِن فِرو بَوِردِه. هَفتِمین کَش کِه اوُیِ جِه دَر بِیَمو، خارِ خارِ بَیْ بی یِه. خِدا وِنه ناخِشی ره دِوا هَکِرده.

![](https://cdn.door43.org/obs/jpg/360px/obs-en-19-16.jpg)

خِدا، بَنی اسراییلِ قومِ وِسّه اَتِّه خَلِه پَیغُمبِرِِ دیگه رایی هَکِردِه. وِشون هَمِه مَردِم رِه هُشدار دانِنه کِه بُتا رِه پَرِستِش نَکِنِن،ِ دیگِرونِ جا دِرِسْ رفتار هَکِنِن، هَدیِ وِسّه دِلسوزی هَکِنِن و بَدیِ وَر نَشوئِن و خِدای جِه فَرمونبَری هَکِنِن. چونکه اَگه اینطی پیش نَشوئِن، خِدای پیش گِناکارِنِه و خِدائِم وِشون رِه سِزا دِنّه.

![](https://cdn.door43.org/obs/jpg/360px/obs-en-19-17.jpg)

خَلِه زَمونا مَردِم خِدا ره گِس نِٔدانه و گوش نَکِردِ بینه. وِشون پَیغُمبرایِ جا بَدرفتاری کِرد بینِه و اَتِّه ماقعِمِ بیِه کِه وِشون رِه کِشتِنه! اَتِّه کَشْ، اِرمیایِ پَیغُمبِر رِه چِلویِ دِلِه دِمبِدانِه و وِرِه رِها هَکِردِنِه تا بَمیره. اِرمیا چِلویِ دِلِه تیلِ دِلِه فِرو بوُردِه ، مُنتا هَمون ماقِع پادشاهِ دِل وِنِسّه بَسوتِه وُ شِه نوکِرا رِه فَرمون هِدا تا نَمردِه پِه، وِرِه چلویِ جِه دَر بِیارِن.

![](https://cdn.door43.org/obs/jpg/360px/obs-en-19-18.jpg)

دِرِسِّه که مَردِم پَیغُمبرایِ جه بَد داشتِنِه، وشون اَیِم خِدایِ خَوِری گَپ زونِنِه. وِشون مَردِم رِه هُشدار دانِنِه کِه توبه هَکِنِن اَگِه نا؛ نابود بُوننِه. وِشون هَمینطیِم خِدایِ وَعدِه که مَسیحْ رِه رایی کِنده، مَردِم رِه یاد آوَری کِردِنِه. کِتابِ مُقَدَسِ جِه بَئیته داستان:

*کتاب اول پادشاهان فصل ۱۶ تا ۱۸؛ کتاب دوم پادشاهان فصل ۵؛ کتاب ارمیا فصل ۳۸*

## 20. ۲۰- جِلایِ وَطِن و بَردَگِرسِن

https://openbiblestories.org/l/mzn/story-20/

![](https://cdn.door43.org/obs/jpg/360px/obs-en-20-01.jpg)

اِسراییلِ پادِشاهی و یَهودایِ پادِشاهی، دِتایی خِدایِ جا دِشمنی و گناه هَکِردِنه. وِشون اون عهد و پِیمونی که خِدا جا سینایِ کویِ دله دَوِسْ بینه رِه بِشکِستنه. خِدا شِه پِیغَمبِرونِ جا وِشون ره گوشزِد هَکِرد بی یِه تا ونه وَر دَگِردِن و دِواره وِره پَرِستِش هَکِنِن، مُنتا وِشون خِدا جِه فَرمون نَوِردِنه.

![](https://cdn.door43.org/obs/jpg/360px/obs-en-20-02.jpg)

هَمینتاسّه خِدا وِشونِ سِزا ره هِدا که وشونِ دِشمِنون وشون ره نابود هَکِنِن. هَمون زَمونا اَتّا قوم قَویِ دیگِم دَیی بیِه که وِنِه نوم آشور بی یِه. آشوریا قومایِ دیگة جا گِذِشت و بَخشِش نِداشتِنه. اسراییلِ پادِشاهی رِه آشور اَز بَین بَوِرده. آشوریا اَت خَله اسراییلِ پادشاهی مَردِم ره بَکوشتِنه، هر چی خواسِّنِه تاراج هَکِردِنه وُ بَوِردِنه وُ خَلِه جاهایِ اون سَرزمینِم تَش بَزونِه.

![](https://cdn.door43.org/obs/jpg/360px/obs-en-20-03.jpg)

آشوریا تِمومِ گَت گتون وُ سَرمایه دارا وُ اِستاکارا کِه اَتِّ کارِ دله سَر رِشته داشتِنه رِه شِه هِمکِت آشورِ دِلِه بَوِردِنه. تِنا بَدبَخت بیچاره ها، اسراییلِ دله بَمونِسِّنه.

![](https://cdn.door43.org/obs/jpg/360px/obs-en-20-04.jpg)

اونگِدِر آشوریا، اسراییلیایِ سَرِجا؛ بیگانِه ها رِه اسراییلِ سَرزمینِ دِله بیاردِنه، تا اونجه زِندِگانی هَکِنِن. بیگانه هام خِراب بَیی شهرا رِه دِواره بِساتِنه و اسراییلیاي جا اِزدِواج هَکِردِنه؛ هَمون بَدبَخت بیچاره هایی که اونجه بَمونِس بینه. تِواری که وشونِ پَیوِندِ جه دنیا بی یَمونِه، سامِری وَنگ کِنِنه.

![](https://cdn.door43.org/obs/jpg/360px/obs-en-20-05.jpg)

یهودایِ پادِشاهیِ مَردم شه چِشِ جا بَدینه که خِدا، اسراییلِ پادِشاهیِ مَردِم رِه بی ایمونیِ و نافرمونی وِسّه چِطی سِزا هِدا، مُنتا اَی هَمطی بُتا و کنعانیایِ خداها رِه پَرِستِش کِرد بینه. خِدام خَلِه پِیغَمبِر وِشونِسّه بَرِسِنیه تا وِشون رِه هُشدار هّدِن، مُنتا وِشون اَی همون کارایِ پِه دَئی بینه.

![](https://cdn.door43.org/obs/jpg/360px/obs-en-20-06.jpg)

صدسال بئی په که اِسراییلِ پادِشاهی، آشوریایِ دَس نابود بَئی بیِه، هَمون زَمونا خِدا نِبوکَدنِصَّر، بابلِ پادِشاه رِم رایی هَکِرده تا یَهودایِ پادِشاهی رِه هِجوم بَوِرِن و نابود هَکِنِن. بابِلیا خَلِه قوم قَویيی بینِنِه. هَمینتاسّه یَهودایِ پادِشاه زِرِنگی هَکِرده وحاضِر بَیِّه که نِبوکَدنِصَّر رِه خِدمِت هَکِنه وهَر سال اَتِّ خَلِه پول وِره باج هَدِه.

![](https://cdn.door43.org/obs/jpg/360px/obs-en-20-07.jpg)

چَن سال بوگذِشته پِه یَهودایِ پادِشاه ، بابِلِ پادِشاهِ رو دَر بی یَمو. هَمینتاسّه اَی بابِلیا یِ سَر و کَلّه پییدا بَیِّه واَی دِواره یَهودایِ سَرزَمین رِه هِجوم بَوِردِنه. بابِلیا اورشَلیمِ شَهر رِه شِه دَسْ بَیتِنه، خِدایِ خِنِه رِه نابود هَکِردِنه و هَر چی مال و ثِروِت که شَهرِ دِلِه و خِدایِ خِنِة دِلِه دَیْ بی یِه رِه شِه هِمْکِت بَوِردِنه.

![](https://cdn.door43.org/obs/jpg/360px/obs-en-20-08.jpg)

یَهودایِ پادِشاهِ گوشمالیِ وسّه، نِبوکَدنِصَّرِ سربازا وِنِه ریکائون رِه ونه چِشِ پیش بَکوشتِنه و ونِه چِش رِم کور هَکِردِنه، این کارا ره هَکِردِ پِه پادِشاه رِم شِه هِمکِت بَوِردِنِه بابِل تا هَمونجِه زِندونِ دله بَمیره.

![](https://cdn.door43.org/obs/jpg/360px/obs-en-20-09.jpg)

نِبوکَدنِصَّر و وِنه سَربازا، تمومِ یَهُودایِ پادِشاهی مَردِمون رِه شِه هِمکِت بابِل دِلِه بَوِردِنه وَ تِنا بَدبَختْ بیچارِه ها رِه اونجه بِشتِنه تا کِشاورزی هَکِنِن. این زَمون که خِدایِ قُوم ناچار بَیینه شِه سَرزَمینِ رِه رِها هَکِنِن و بورِن رِه جِلایِ وَطِن گِنِنه.

![](https://cdn.door43.org/obs/jpg/360px/obs-en-20-10.jpg)

دِرِسته که خِدا جِلایِ وَطِنِ جا، شِه قوم ره سِزا هِدا که گِناه هَکِرد بینه. مُنتا اون قِراری که وِشونِ جا دَوِس بی یِه رِم شِه یادِ جه نَوِرده. خِدا شِه قومِ نِگَهدار بی یِه و شِه پَیغُمبِرایِ جا وشونه جا گَپ زوئِه. خِدا وَعده هِدا بی یه که هِفتاد سال بَئی پِه، اسراییلِ قوم رِه دِواره، وَعده بَئی سَرزمینِ دِلِه بَرگاردِنِه.

![](https://cdn.door43.org/obs/jpg/360px/obs-en-20-11.jpg)

هِفتاد سال بوگذِشته پِه کوروش؛ پارسیایِ پادِشاه، بابِلیا ره شِکَست هِدا وَ اینطی پارسیایِ اِمپِراتوری، بابلِیایِ اِمپِراتوریِ جا سَر هِنیشتِه وَ خَلِه قوما رِه شِه دَستِ بِن بَیتِه وُ وِشونِ فَرمونرِوا بَیِّه. هَمونگِدِرا اِسراییلِ مَردِم رِه یَهودی وَنگ کِرد بینه. وِشونِ دِلِه خَلِه هام شِه تِمومِ عمر رِه بابلِ دله سَر هَکِرد بینه. تِنا پیرا، تونِّسِنه یَهودایِ سرزمین رِه شِه یاد بیارِن.

![](https://cdn.door43.org/obs/jpg/360px/obs-en-20-12.jpg)

پارسِ پادِشاهی دِرسّه که خَلِه قَوی بی یِه، اَی قومایي که وِنِه فَرمونرواییِ دَسِّ بِن دَئینة جا خِشْ رَفتار بی یِه. اَتِّ کَم بوگذِشته پِه که کوروش، پارسِ پادِشاه بَیِّه، وِه دَستور هِدا، یَهودیایی که اَی خواننِه دَگِردن بورِن ، یَهودا یِ سَرزمینِ دِله، آزاد هَسّنه که پارسِ سَرزِمین رِه تَرک هَکِنن وَ بورِن یَهودا. اَندِه که وِشون رِه پولِم هِدا تا خِدایِ خِنِه رِه دِواره بِسازِن! اینطی ،هِفتاد سال سَرگِردونی تِموم بَئی پِه، اَتِّه کِچیکِ دَستِه یهودیا، اورشَلیمِ شَهرِ وَر، یَهودایِ سرزمینِ دِلِه دَگِرِسّنِه.

![](https://cdn.door43.org/obs/jpg/360px/obs-en-20-13.jpg)

قوم ، اورشَلیم بَرِسی پِه، خِدایِ خِنه و شهرِ دور ِ وَر دیوارا ره دِواره بِساتِنه. دِرِسِّه کِه پارسیا هَنتا وِشونِ سَر فَرمونرِوایی کِردِنه، مُنتا وِشونِسّه خَله اَرزش داشته که دِواره ِشه وَعده بَئی سرزمین ِ دلِ دَئی بینه و تونِسِّنه شِه خِدا رِه ، وِنِه خِنة دِلِه پَرِستِش هَکِنِن. کِتابِ مُقَدَسِ جِه بَئیته داستان: کتاب دوم پادشاهان فصل ۱۷ و ۲۴ و ۲۵_ _؛ کتاب دوم تواریخ فصل ۳۶؛ کتاب عزرا فصل ۱ تا ۱۰؛_

*کتاب نحمیا فصل ۱ تا ۱۳*

## 21. ۲۱- خِداوَند، وَعدِه دِنّه که مَسیح اِنه

https://openbiblestories.org/l/mzn/story-21/

![](https://cdn.door43.org/obs/jpg/360px/obs-en-21-01.jpg)

خِدا هَمون اَوّلایِ دیافْریئِن خَلِه خار دونِسِّه که مَسیحِ وَعدِه بَئی رِه خَلِه زَمون بوگذِشتِه پِه، رایی کِنده. وِه آدِم و حَوّا رِه وَعدِه هِدا بی یِه که بی گِمون اینتا کار رِه سَرانجام دِنّه. خِدا وَعدِه هِدا کِه حَوّایِ ِتوارِ جِه اَتّا کَس اِنه که مَرِ کَلِّه رِه لو کِندِه. اونتا مَر که حَوّا رِه گول بَّزو، خِدِ شِیطون بی یِه. وَعدِه اینتا بی یِه که مَسیح، شِیطونِ قِد ره بِنه زَنده وُ همیشِک وِنه سر سِواره.

![](https://cdn.door43.org/obs/jpg/360px/obs-en-21-02.jpg)

خِدا ابراهیم رِه وعده هِدا کِه وِنِه جِا تِمومِ مَردِمِ دِنیا فِراوونی و بَرکِت گیرنِنِه. اَت مُدّت بوگذِشته پِه خِدام شِه وعده ره اینطی انجام دائه که مسیح ره رایی هَکنه. مسیح وِسّه که تِمومِ مَردِم ره ،هَر قومِ جه که بَوّن،وِشونِ گِناهایِ جِه وِشون رِه آزاد هَکِنِه.

![](https://cdn.door43.org/obs/jpg/360px/obs-en-21-03.jpg)

خِدا موسی رِه مِژدِه هِدا که اَتّا رِها کِنِنده وِنِه واری اِنّه. اینتا رِها کِنِنده هَمون مَسیحِ وعده بَئی بی ِیه. اینطی خِدا اَی دِوارِه مَسیحِ بیَموئِن رِه مِژدِه هِدا.

![](https://cdn.door43.org/obs/jpg/360px/obs-en-21-04.jpg)

خِدا داوودِ پادِشاه رِه وَعدِه هِدا کِه وِنهِ تِوارِ جِه اَته کَس َپادِشاه بُونِه و تا دِنیا بَرقِرارِه، خِدایِ قومِ ره فَرمونرِوایی کِنده. حَقیقِتِ که مَسیح، داوودِ تِوار جِه اِنِّه.

![](https://cdn.door43.org/obs/jpg/360px/obs-en-21-05.jpg)

خِدا اِرمیایِ پَیغومبِرِ جِه مِژدِه هِدا کِه اَتّا نو پَیمون وَندِه، مُنتا نا اونتا پَیمون وَنِکِت که سینا کویِ دِلِه، اسرائیلیایِ جِا دَوِسِّه بی یِه،ِتازه پَیمون کِه خِدا وَندِه، مَردِم دِِل دِلِه بَنوِشتِ بوُنه، مَردِم شه خِدا رِه اِشناسِنّنِه و وِرِه دوست دارِنِّه و وِنِه دَستورای جِه فَرمونبَری کِنِّنه. مَسیح همون آدِمی بی یِه کِه نو پِیمون رِه وِشونِ جا دَوِسِّه. وِشون وِنه قوم بونِنِه و خِدا وِشونِ گِناها رِه بَخشِنِه.

![](https://cdn.door43.org/obs/jpg/360px/obs-en-21-06.jpg)

خِدای پَیغُومبِرا اَی باتِنِه که مسیحِ وَعده بَئی، پَیغومبِر، پیشوا و پادشاه هَسِّه. پَیغومبِر اونتایی هَسِّه که خِدای گَپ رِه اِشتونّه و مَردِمِ وِسِّه گِنِه. مسیحی که خِدا مِژدِه هِدا پِیغومبِِری هَمه چی تِموم هَسِّه، چونکه وِه خِدایِ پَیغُوم رِه خار خار دَرک کِندِه و همینطییِم مَردِم ره هالی کِنده.

![](https://cdn.door43.org/obs/jpg/360px/obs-en-21-07.jpg)

یهودیایِ پیشواها، مَردِمِ عَوِض خِدای وِسّه قِربونی کِرد بینه که وِشونه گناهای بَدِل حِساب بَوّه. پیشواها، خِدایِ دَرگاه مَردِمِ وِسّه دِعا کِردِبینه. مسیحِ وعده بَئی، قِرار بِی یِه گَتِ پیشوا بَوّه که شِه خِدِرِه بی نَقصِ قِربونیِ واری ، خِدای وِسِّه پیشکِش هَکِنِه. یعنی وه هیچ زِمون گِناهی نَکِنِّه و وِه که شِه خدِرِه قِربونی واری پیشکِش َهکِنِه، گِناهایِ وِسّه اَی اَتّا قِربونیِ دیگه لازِم نَوونِه.

![](https://cdn.door43.org/obs/jpg/360px/obs-en-21-08.jpg)

پادشاها و مَملِکِت دارا اَتی مَردِم ره فَرمونروایی کِننه و اَتیِم اشتباه دارنِنه.. داوودِ پادِشاه، شِه تیناری ،اسرائیلیایِ سَر فَرمونروایی هَکردِه. مُنتا مَسیحِ وعده بَئی کِه داوودِ تِوارِ جِه اِیَیمو، تا دِنیا بَرقِرارِه فَرمونرَوایی کِنده. وِه با عِدالِت پادشاهی کِنده و دِرِسِ تَصمیم ره گیرنِه .

![](https://cdn.door43.org/obs/jpg/360px/obs-en-21-09.jpg)

پَیغومبِرایی کِه خدا وِشونِ راهی هَکِردِ بی یِه ، مَسیحِ وعده بَئی دَرواره خَلِه پَیغُوم بِیاردِنِه. مَلاکیِ پَیغومبِر پَیغُوم بِیاردِ بی یِه کِه اَتا گََتِ پَیغومبِرِِ دیگِه، مَسیحِ وعده بَئی نی یَم پِه ،انِه. اِشعَیایِ پَیغومبِر پَیغُوم هِدا بی یِه کِه مَسیحِ وعده بَئی، اَتّا دَس نَخِردِه کیجایِ جِه دِنیا اِنِه. میکاهِ پَیغومبِرِم باتِه که وِه بِیت لِحِمِ دِلِه دِنیا اِنِّه.

![](https://cdn.door43.org/obs/jpg/360px/obs-en-21-10.jpg)

اِشعَیایِ پَیغومبِر باتِه کِه مَسیح ، جَلیلِ دِلِه زِندِگی کِنده. وِه بِشکِسّه دِلا ره آرامِش دِنّه و اَسیرا رِه رِهایی دِنّه. وِه اَی پَیغُوم هِدا کِه مَسیحِ وعده بَئی هَر چی کور، شَل ، غول و لال هَسّنِه دَرد رِه دِوا کِنده.

![](https://cdn.door43.org/obs/jpg/360px/obs-en-21-11.jpg)

اِشعَیایِ پَیغومبِر اَی پِیغُوم بیارد بی یه کِه مَردِم مَسیحِ جِه بَد کَفِنِنه و وِرِه نِخوانِنه. پَیغومبِرایِ دیگئم پَیغُوم بیارد بینِه که مَسیحِِ اَتِّه رَفِق وِِره روشِنه ونامَردی کِنده. زَکریایِ پَیغومبِر پَیغُوم بیارد بی یه کِه اینتا رَفِق ، سی تا سِکِّة نقرة وِّسِه نا سِپاسی کِنده وُ وِره روشِنه. اَی پَیغومبِرایِ دیگِه پَیغُوم بیاردِنه کِه مَسیح رِه کِشِننِه و وِنِه تَنِ جِمهٔ وِسّه قرعه دِمدِنِنه.

![](https://cdn.door43.org/obs/jpg/360px/obs-en-21-12.jpg)

پَیغومبِرا اَی پیغُوم بیارد بینِه کِه مَسیح چِطی میرنِه. اِشعَیایِ پَیغومبِِر بات بی یِه کِه مَردِم وِنِه دیمِ فِلیک شَنِِّنِه و وِرِه روشِنِنه و وِرِه دَست دِم دِنِنه. اونگِدِر وِنِه تَن رِه سوراخ کِنِّنِه تا جَزر بَکِشِه و بَمیرِه.با اینکه وِه هیچ گِناهی نِداشت بی ِیه.

![](https://cdn.door43.org/obs/jpg/360px/obs-en-21-13.jpg)

پَیغومبِرای دیگِرِم پِیغُوم بیارد بینِه کِه مَسیحِ وعده بَئی وِنِه اَتّا کامِلِ مَرد َو بی گِنا بَوّه. وِنِه کِه وِه بَمیرِه، چونکِه خِدا وِرِه تِمومِ مَردِمِ دِنیایِ گِناهایِسّه سِزا دِنّه. وِنِه زَجر بَکِشی یِن وِسّه بی یِه کِه خِدا و اِنسانِ میونِه صُلح و آرامِش دَکِفِه. همینتایِسّه خِدا خواسّه که مسیح زخم بَخِره و بَمیره.

![](https://cdn.door43.org/obs/jpg/360px/obs-en-21-14.jpg)

پَیغومبِرایِ دیگِئم پَیغوم بیاردِنه که خِدا مَسیح رِه بَمِردِ پِه، اَی دِوارِه زِندِه کِنده. هَمینتاسّه خِدا بِخواسِّ بی یِه که عیسایِ بَمِردِن و زِندِه بَئِّینِ جا ، گِناهکارایِ آزادیِ وِسّه شِه دَچّی برنامه ره اَنجام بَرِسِنِه و اَتّا نو پَیمون ره مَردِم ِِ جا دَوِِنه.

![](https://cdn.door43.org/obs/jpg/360px/obs-en-21-15.jpg)

خِدا خَلِه چیزا رِه مسیحِ بِیَموئِنِ خَوِری، پَیغومبِرایِ وِسِّه روشِن هَکِرده مُنتا مَسیح هیچکدوم این پَیغومبِرایِ دوُره هَنتا نِیَم بی یِه وَ پِر توم ۴۰۰ سال آخِرین پَیغومِ جِه بوگذِشت بِی یه کِه زمون بَرِسِیِّه و خِدا مَسیح رِه دِنیایِ دِلِه راهی هَکِردِه. بَئیته داستان کِتابِ مُقَدَسِ جِه: کتاب پیدایش فصل ۳ و۱۲، کتاب تثنیه فصل ۱۸ آیه ۱۵،_ _کتاب دوم سموئیل فصل ۷، مزمور شماره ۱۶ و ۲۲ و ۳۵ و ۶۹ و ۴۱،_ _کتاب اشعیا فصل ۷ ایه ۱۴ و فصل ۹ ایه ۱ تا ۷ و فصل ۵۰ آیه ۶ و فصل ۵۹ آیه ۱۶و فصل ۵۳ و ۶۱، کتاب ارمیا فصل ۳۱،_ _کتاب دانیال فصل ۷، کتاب میکا فصل ۵ آیه ۲،_ _کتاب زکریا فصل از ۱۱ تا فصل ۱۲ آیه ۱۲ و ۱۳،_

*کتاب ملاکی فصل ۴ آیه ۵*

## 22. ۲۲- یَحیایِ دنیا بی یَمِن

https://openbiblestories.org/l/mzn/story-22/

![](https://cdn.door43.org/obs/jpg/360px/obs-en-22-01.jpg)

خِدا پیشتِرا پَیغُمبِرایِ جِه اِستفادِه کِردِه و شِه قومِ جا گَپْ زوئه. ۴۰۰ سال بُگْذِشتْ بی یِه وُ مُنتا خِدا شِه قومِ جا هِچ گَپْ نَّزو بی یِه، ناگِمونی خِدایِ فِرِشته، پیره پیشوا، زِکریا نومِ پیش دیار بَیّیِه. وِه وُ وِِنه زِنا اِلیزابِتْ خِداتَرس بینِه. وِشون پیر بیِنه و اِلیزابِتْ وَچِه کـَر نَی بی یِه.

![](https://cdn.door43.org/obs/jpg/360px/obs-en-22-02.jpg)

خِدای فِرشتِه زِکریا رِه باتِه:« تهِ زِنا اَتِّه ریکا دِنیا اِیارنه. تِه وِنه نومْ رِه یَحیی اِلِنّی. خِدا وِره روحِ ِقدُّوسِ جِه پِر کِنْدِه و یَحیی، مَسیحِ وَعدِه بَئی وِسِّه مَردِم رِه آمادِه کِنْدِه.» زکریا دَر جِواب باته: « مِن و مِه زِِنا وَچه دآر بَیّیِنِ وسّه خَله پیر هَسّمی! کِجِه جِه بِدونِم کِه راسْ ره مِره گِنی؟»

![](https://cdn.door43.org/obs/jpg/360px/obs-en-22-03.jpg)

خِدایِ فِرِشْتِه زَکِریا رِه باتِه:« مِرِه خِدا رایی هَکِردِه تا تِرِه خَووِرِ خِش هَدِم. اِسا کِه تِه مِه گَپْ رِه بُووِر نَکِردی، لال بُونی تا تِه وَچِه دِنیا بی یِه.» هَمون ماقِعْ زکِریا هِچّی نَتّونِسته بَوّه. خِدایِ فِرِشْتِه زکِریایِ پَلی جِه بورْدِه وُ زکِریام شِه سِرِه دَگِرِسِّه، خَلِه زَمونْ نَوِردِه کِه وِنِه زِنا سَنگینْ بَیّیِه.

![](https://cdn.door43.org/obs/jpg/360px/obs-en-22-04.jpg)

اونْگِدِر کِه اِلیزابِتْ شش ماهه سنگین بی یِه ، هَمونْتا فِرِشْتِه ناگِمونی اِلیزابِت ِ قوم وُ خیش که وِنِه نوم مَریِم بی یِة جِلو دیار بَّییِه. وِه دَسْ نَخِردِه کیجا و اَتِّه مَردی یوسِفْ نومِ نومزِه بَی یِه. فِرِشْتِه وِرِه باتهِ: « تِه سنگین بوُنی، اَتِّا ریکا دِنیا اِیارْنی ، وِنِهِ نومْ رِه عیسی اِلِنّی. وِه خِدایِ ریکا هَسِّه و تا هَمیشِک پادِشاهی کِنْدِه.»

![](https://cdn.door43.org/obs/jpg/360px/obs-en-22-05.jpg)

مَریِم جِواب هِدا:« مَگِه بوُنِه ، مِن کِه دَس نَخِردِ کیجا هَسّمِه؟» فِرِشْتِه وِرِه هالی هَکِرده کِه «روحِ قِدّوُس تِه وِجودِ دِلِه اِنِه و خِدایِ زور وُ تِوان تِه سَرِ سایِه دِم دِنِه . هَمینتاسِّه اونتا ریکا، قِدّوس وَ گَتِ خِدایِ ریکا بَخونِس بُونِه.» مَریِم فِرِشتِة گَپْ رِه بُووِر هَکِردِه و هَرچی وِِه باتِه رِه گِردن بَیته .

![](https://cdn.door43.org/obs/jpg/360px/obs-en-22-06.jpg)

اینتا پیش آمِدِ جِه اَتِّ کَم بوگْذِشتِه پِه، مَریِم ، اِلیزابِتِ سِره بُوردِه .اِلیزابِتْ کِه مَریمِ وَنگِ بِشتوسِّه وِنِه اِشکِم دِلِه وَچِه تِکونْ بَخِردِه. وِشون ،خِدایِ هَکِردِه کارِسِّه خَلِه خِشالی هَکِردِنِه . مَریِمِ سِه ماه اِلیزابِت پَلی بَمونِسِّه وُ اَیْ شِه سِرِه دَگِرِسّْه.

![](https://cdn.door43.org/obs/jpg/360px/obs-en-22-07.jpg)

اینتا پیش آمِد دَکِتِه پِه اِلیزابِت اَتِّه ریکا دِنیا بیاردِه ، وِه ُو وِنِه مَردی زکِریا وَچة نومْ رِه هَمونطی کِه فِرِشْتِه باتْ‌ بی یِه یَحیی بِشتِنِه. اَیْ خِدا زکِریایِ زِوون رِه وا هَکِردِه و زَکِریا باته:«خِدا رِه شُکر، چونکِه شِه قُومِ یاریِسِّه شِتاب هَکِردِه! وَ اَمّا تِه .جانِ ریکا، تِرِه گَتِ خِدایِ پَیغُمبِر وَنْگ کِنِنه وَ تِه شِه ، مَردِم رِه یاد دِنّی کِه چِطی شِه گِناهِایِسّه توبه هَکِنِن!»

*کِتابِ مُقَدَسِ جِه بَئیته داستان : انجیل لوقا فصل ۱*

## 23. ۲۳- عیسایِ دِنیا بِیَمِن

https://openbiblestories.org/l/mzn/story-23/

![](https://cdn.door43.org/obs/jpg/360px/obs-en-23-01.jpg)

مریم اَتّا خِش ذاتِ ُوعادِلِ مَردِی یوسِف نومِ جا نومزِه بَی بیِ یِه. یوسِف کِه آگاه بَیّه ، مَریِم آبِسّن هَسّه، وِه شِه دونِسِّه کِه وِنه وَچِه نَی بیِ یِه. هَمینتاسّه یوسِف نِخواسِّه مَریِم رِه بَدنوم و رِسوا هَکِنِه، بِنا بَیتِه که بی چِمِر وِنِه جا سیوا بَوِّه . هَنتا این کار رِه نَکِردِه پِه، اَتّا فِرِشتِه وِنِه خویِ دِلِه بی یَمو.

![](https://cdn.door43.org/obs/jpg/360px/obs-en-23-02.jpg)

اونتا فِرِشتِه یوسِف رِه باتِه: « مَریِمِ جا آروسی هَکِن و نَتِرس. اونتا وَچِه کِه وِنِه اِشکِمِ دِلِه دَرِه، روحِ قِدُّسِ جِه هَسِّه. مَریِم اَتّا ریکا ایارنِه و تِه وِنِه نوم رِه عیسی(یَهُوَّه آزاد کِندِه) بی یِل. چونکِه وِه، مَردِم رِه وِشونِ گِناهایِ جِه آزاد کِندِه.

![](https://cdn.door43.org/obs/jpg/360px/obs-en-23-03.jpg)

اونگِدِر یوِسف مَریمِ جا آروسی هَکِردِه َو وِرِه شِه سِره بَوِردِه. مُنتا تا وَچة دِنیا بیَمِّن، شِه زِنا ره دَس نَّزو وُ وَنه تَنِ وَر نَشیه.

![](https://cdn.door43.org/obs/jpg/360px/obs-en-23-04.jpg)

مَریِم که پا بِه ماه بی یِه، رومِ امپراطور، سَرشِماریِ وِسِّه دَستور هِدا کِه هَر کس ونِه شِه زادگاه بَردَگِرده. یوسِف و َمریمِم ،وسِّه کِه ناصِرة جا تا بِیت لِحِم دِله اَتِّ خَلِه راه بُورد بُون. چونکِه وِشون جَد داوودِ پادِشاهِ ره رَسِیه َو وشونِ زادگاهِم بیت لِحِم، بی یِه.

![](https://cdn.door43.org/obs/jpg/360px/obs-en-23-05.jpg)

اونگدِر که مَریِم ُو یوِسف، بیت لِحِم بَرِسینِه، هیچ جایی رِه پییدا نَکِردِنه تا بَمونِن. فِقَط اَتّه جا تونِسّنه بَمونِن اونِم گِسفِن پَلِ دِلِه بی یِه. مَریِم وَچه رِه اونجِه دِنیا بیاردِه و وِره پَلِ دِله بَخِسِنیه، چونکه وِنِه بَخِتِنِ وِسِّه جا دَنی بی یِه. وِشون وِنِه نوم رِه عیسی بِشتِنه.

![](https://cdn.door43.org/obs/jpg/360px/obs-en-23-06.jpg)

اون شو ،چَپونا صحرایِ دِلِه شِه گِسفِن گَلّة هِمکِت دَی بینِه که ناگِمونی اَتّا فِرِشتِه که اِفتابِ واری سوُ دائه وِشونِ میون دیار بَیّیِه، وِشونِم هوُل بَخِردِنه و بَتِرسینِه.فِرِشتِه وِشون رِه باتِه: «نَتِرسین، چونکه مِن شِمِسّه خَورِخِش بیاردِمِه. مَسیح وَعده بَئی که خِداوَند هَسّه، بیت لِحِمِ دِلِه دِنیا بی یَمو.»

![](https://cdn.door43.org/obs/jpg/360px/obs-en-23-07.jpg)

بورین و اَتّه وَچة دِمّال چَرخ هَیرین، چِلیک وَچه، قِنداق بَيی که پَلِ دِلِه َبَخِته ره پيدا کِنِنی.» دَر دَم اَتِّه خَلِه فِرشتِه آسمونِ جِه، اونتا فِرشتِه یِ پَلی بیَمونِه. وِشون خِدا ره پَرِستِش کِرد بینِه و گِتِنه: «خدا آسمون دِله گَت و باشکوه هسِّه و بنة سر آسودِگی و آرامِش اون مَردِمِ وِسِّه بَوّه که خِدا وِشون رِه اِشِنه و مُحَبِت کِنده.

![](https://cdn.door43.org/obs/jpg/360px/obs-en-23-08.jpg)

فِرشته ها کِه بُوردِنِه، چَپّونام شِه گَلّه و رَمِه رِه صحرایِ دِلِه وِل هَکِردِنه وُ هَمونجه ایی کِه عیسی دَی بی یِه بَرِسینِه و بَدینِه هَمونجوری کِه اونتا فِرِشتِه بات بی یِه، اَتّا چِلیک وَچِه پَلِ دِلِه بَخِتِه. وِشون خَلِه خِشال بَئینه. چَپّونا دِواره شِه گَلّه و رَمِة سَردَگِرِسِنِه وَ خِدا رِه اینتا کارِسِّه کِه شِه چِشِه جِه بَدینِه و شِه گوشِ جِه بِشنوسِّنِه، پَرَستِش هَکِردِنِه.

![](https://cdn.door43.org/obs/jpg/360px/obs-en-23-09.jpg)

هَمونگِدِرا سه تا اِستارِه شِناسِ دونا کِه مَشرق زمینِ جِه بیِنِه ،آسمونِ دِلِه اَتّه عَجیب غَریب اِستاره بَدینِه. وِشون آگاه بَئینه که یَهودِ نو پادِشاه دِنیا بی یَموِئِه. وِشون هَمینتاسِّه اَتِّه خَلِه راه رِه شِه سامونِ جِه بِکوبِسّنِه وُ بیَمونِه تا اینتا کِچیک وَچِه ره بَوينِن. وِشون بِیت لِحِمِ دِلِه بیَمونِه و اونجِه ایکِه عیسی و وِنه پیِ یِر وُ مار زِندِگانی کِردِبینه رِه پییدا هَکِردنِه.

![](https://cdn.door43.org/obs/jpg/360px/obs-en-23-10.jpg)

دانشمندا،که عیسی و وِنِه مار رِه بَدینِه، زانو دَکِتِنِه وَ وِرِه پَرَستِش هَکِردِنِه. وِشون عیسی رِه گِرونِ چِش روشِنی پیشکِش هَکِردِنِه و دِواره شِه سِرِه زِندگیِ وَر دَگِرِسّنِه. کِتابِ مُقَدَسِ جِه بَئیته داستان :

*انجیل متی فصل ۱ و ۲, انجیل لوقا فصل ۲*

## 24. ۲۴- یَحیی عیسی رِه تَعمید دِنّه

https://openbiblestories.org/l/mzn/story-24/

![](https://cdn.door43.org/obs/jpg/360px/obs-en-24-01.jpg)

یَحیی، زکِریا و اِلیزابِتِ ریکا گَت بَییِّه و پَیغُمبَری بَرِسیِّه. وِه بیابونِ دِلِه زِنْدِگی کِرد بی یِه، صَحرایِ عَسِلْ وُ مَلِخْ خِردِه َو اَتّا جِمِه داشتِه که شِتِرِپَشمِ جِه بَدوت بی یِه.

![](https://cdn.door43.org/obs/jpg/360px/obs-en-24-02.jpg)

خَلِه آدِما یَحیایِ پَلی بیابونِ دِلِه ایی یَمونِه و وِنِه گَپْ رِه گوش گِیتِنه. وِه وِشون‌ رِه پَند ُواَندِرز دائه و گِتِه: «توبِه هَکِنین، چونکِه خِدای پادِشاهی نَزدیک هَسِّه.»

![](https://cdn.door43.org/obs/jpg/360px/obs-en-24-03.jpg)

چونکِه مَردِم یَحیایِ پِیغوم رِه اِشتوسْتِنِه، خَلِه ها شِه گِناهایِ جِه توبِه هَکِردِنِه، یَحیامْ وِشون رِه اوُیِ جا تَعمید دائِه. پیشواهایِ دینِم خَله یَحیایِ پَلی اییَموِنه، مُنتا شِه گِناها رِه بِروز نِدانِنِه.َوشِه گِناه جِه توبه نَکِردِنِه.

![](https://cdn.door43.org/obs/jpg/360px/obs-en-24-04.jpg)

یَحیا پیشْواهایِ دینی رِه باتِه: « آی زهردارِ مَرا ! توبِه هَکِنین و شِه رَفتار جه دَگِردین. خِدا هَر داری کِه خارِ میوِه نیارِه، وِرینِّه و تَشِ دِله دِم دِنِّه.» یَحیا پَیغُومبِرایِ پیشگویی رِه کِه باتْ بینِه: «هارِش، مِنْ شِه فِرِستادِه رِه تِه جِلو جِلو رایی کِمْبِه تا تِه وِسِّه راه ره تخت هَکِنِه»، سَراَنجامْ هِدائه.

![](https://cdn.door43.org/obs/jpg/360px/obs-en-24-05.jpg)

اَتّی پیشواهایِ دینی، یَحیایِ جِه بَپِرسینِه: «تِه مَسیح هَسّی؟» یَحیا جِوابْ هِدا: «مِن مَسیح نیمِه، مُنتا مِه پِشتِ سَر اَت کَس اِنِه کِه وِنِه جایگاه مِه تون خَلِه بالاتِرِه. اَنّه کِه مِنْ لیاقِت نِدارمِه وِنِه کلوشِ وَنی رِه بُوشِم»

![](https://cdn.door43.org/obs/jpg/360px/obs-en-24-06.jpg)

فِردایِ اونْ روز عیسی تَعمیدِ اویِ وِسّه، یَحیایِ پَلی بُوردِه. یَحیا کِه وِرِه بَدیِه ِوره باته: « وِه هَمون خِدایِ وَرِکا هَسِّه کِه تِمومه دِنیا گِناه رِه از بین وَرنِه.»

![](https://cdn.door43.org/obs/jpg/360px/obs-en-24-07.jpg)

یَحیا عیسی رِه باتِه: « مِن شایِستِگی نِدارمِه تِه رِه تَعمید هَدِم. اینتا مِنِمه کِه وِنِه تِه جِه تَعمید بَیرِم.» اَمّا عیسی باته: « مِه رِه تَعمید هَدِه، دِرِسّه کارِ وِه هَسِّه.» هَمینتاسِّه یَحیا عیسی رِه تَعمید هِدا. دِرِسته که عیسی هِچ زَمونْ گِناهی نَکِرد‌ بی‌یِه.

![](https://cdn.door43.org/obs/jpg/360px/obs-en-24-08.jpg)

عیسی تَعمیدِ بَیتِه پِه اوُیِ جِه دَر بی یَمو، خِدایِ روح اتِّ کوتِرِ واری دیار بَیّه وُ پایین بی یَمو وَ وِنِه دوشِ سَر هِنیشتِه وُ هَمونگِدِر خِدایِ وَنگ ،آسِمونِ جِه بَرِسی‌یه کِه: «وِه هَسِّه مِه جان ریکا کِه وِرِه دوس دارمِه و وِنِه جِه خَلِه خِشنودِمِه.»

![](https://cdn.door43.org/obs/jpg/360px/obs-en-24-09.jpg)

خِدا یَحیا رِه بات بی یِه: «روح‌ِ قِدّوس، اونتا آدِمِ سَر کِه تِه وِره تَعمیدْ دِنّی اِنِه، هَمونتا خِدایِ ریکا هَسِّه.» خِدا یِتّا هَسِّه وَ یَحیا کِه عیسی رِه تَعمید دائه، خِدایِ پیِ یِر وَنگ رِه بِشتوسِّه. خِدایِ ریکا، یَعنی عیسی رِه بَدیه و روح‌ِ قِدّوسِ رِه که کوتِرِ واری بیَموئه رِم بَدیِه. کِتابِ مُقَدَسِ جِه بَئیته داستان:

*(انجیل متی باب ۳، انجیل مرقس باب ۱ ، انجیل لوقا باب ۳، انجیل یوحنا باب ۱ آیه ۱۵ تا ۳۷ )*

## 25. ۲۵- شِیطون عیسایِسّه سوُسِه اِنِه

https://openbiblestories.org/l/mzn/story-25/

![](https://cdn.door43.org/obs/jpg/360px/obs-en-25-01.jpg)

عیسی تَعمید بَیتِه پِه، دَر دَم خِدایِ روح وِرِه بیابونِ دِلِه بَوِرْدِه. اَتِّه جا کِه وِه چِل روز وُ شوُ، روزِه بَیتِه. اونگِدِر شیطون عیسایِ پَلی بی یَمو و وِنِسِّه سُوِسه بی یَمو تا وِه گِناه هَکِنه.

![](https://cdn.door43.org/obs/jpg/360px/obs-en-25-02.jpg)

شِیطون عیسایِسّه سوسِه بی یَمو وُ باتِه: «اَگِه تِه، خِدایِ ریکا هَسّی، اینتا سنگا رِه باوُ که نون بَوِّن تا بِتونی بَخِری.»

![](https://cdn.door43.org/obs/jpg/360px/obs-en-25-03.jpg)

عیسی جِواب هِدا: خِدایِ کِلامِ دِلِه بَنِوشْتِه کِه «آدِم؛ زِندِه بَمونِسِّنِ وِسِّه، تِنا نون نِخوانِّه، بَلکُمْ هَر کَلومی کِه خِدایِ کِتارِ جِه دَر اِنِه، نیاز دارنِه!»

![](https://cdn.door43.org/obs/jpg/360px/obs-en-25-04.jpg)

همونگِدِر شَیطون وِره بِلِن تِرین جایِ پَرِستِشگاه بَوِرْدِه وُ باتِه: «اَگِه تِه؛ خِدایِ ریکا هَسّی، شِه خِدِرِه اینجِة جِه بِنه دِم هَده، چونکِه کِتابِ مُقَدِّس گِنِه: «خِدا شِه فِرِشتِه ها رِه دَستور دِنِه کِه تِه هِوا رِه دارِنْ تا نَکِنه تِه لینگْ اَتّا سَنگِ چَکْ هَیْرِه.»

![](https://cdn.door43.org/obs/jpg/360px/obs-en-25-05.jpg)

مُنْتا عیسی هَر چی کِه شَیطون وِرِه باتْ بی یِه رِه اَنجام نِدا و دَر جِواب باتِه: خِدا شِه کِلامِ دِلِه شِه قُوم رِه اینطی دَستور هِدا: «خِداونْد شِه خِدا رِه آزمایِش نَکِن.»

![](https://cdn.door43.org/obs/jpg/360px/obs-en-25-06.jpg)

اونگِدِر شَیطون وِره اَتّا بِلِندِ کویِ تِک بَوِردِه وُ تِمومِ کِشوَرایِ دِنیا، وَ وِشونِ تِوانایی وُ سَرمایِه رِه وِرِه سِراغْ هِدا و باتِه: «اَگِه ساخْ بِنِه بَزِنی وُ مِرِه پَرِستِش هَکِنی، اینا هَمِه رِه تِرِه بَخشِمبِه.»

![](https://cdn.door43.org/obs/jpg/360px/obs-en-25-07.jpg)

عیسی جِواب هِدا: شِیطون، مِه سَرِ جِه رَد بِواش! خِدایِ کِلامِ دِله دَرِه که، وِه شِه قُوم رِه اینطی دَستور هِدا، «تِنا خِداوند، شِه خِدا رِه پَرِستِش هَکِن وُ تِنا وِرِه خِدمِت هَکِن.»

![](https://cdn.door43.org/obs/jpg/360px/obs-en-25-08.jpg)

عیسی شِیطونِ سوسِة دوُمْ دِله نَکِتِه. هَمینتاسِّه شِیطون وِنِه جِه نا اُمید بَیِّه وُ بُورْدِه، هَمونگِدِر فِرشتِه ها بی یَمونِه و عیسایِ دور ره بَیتِنه وُ وِنه جا بَرِسینه.

*کِتابِ مُقَدَسِ جِه بَئیته داستان: (کتاب انجیل متی باب ۴ آیه ۱ تا ۱۱، کتاب انجیل مرقس باب ۱ آیه ۱۲ و ۱۳، کتاب انجیل لوقا باب ۴ آیه ۱ تا ۱۳)*

## 26. ۲۶- عیسایِ کار سَر بَیتِه

https://openbiblestories.org/l/mzn/story-26/

![](https://cdn.door43.org/obs/jpg/360px/obs-en-26-01.jpg)

عیسی، شیطونِ سوسِه هایِ جِه سَربِلِند دِر بِیَم پِه، اَیْ شِه شَهرِ یا هَمونْ جَلیلِ دِلِه دَگِرسِّه. روحِ قِدّوس، عیسی رِه تِوانْ دائِه وَ وِه مَردِمِ یاد بِدائِنِ وِسِّه اینجِه وُ اونجِه شیِه وَ هَمِه وِنِه خوبیا رِه گِتِنه.

![](https://cdn.door43.org/obs/jpg/360px/obs-en-26-02.jpg)

عیسی، ناصِرة وَر بورْدِه، هَمون دِه کِه کِچیک بی یِه اونجِه زِندِگانی کِردِه. وِه شَبّاتِ روز پَرِستِشگاهِ دِلِه بورْدِه. پیشواهایِ دینی اَتِّه دَستْ بَنِوِشتْ که اِشعیایِ پَیغُمبِر کِتاب جِه بی یِه، هِدانِه وِرِه تا وِشونِسّه بَخونِه، عیسام اون بِلِنْ نومه رِه بَیتِه وُ اَتِّه بَخش رِه مَردِمِسِّه بَخونِسّه.

![](https://cdn.door43.org/obs/jpg/360px/obs-en-26-03.jpg)

وِه اینطی بَخونِسّه: «خِدا شِه روح رِه مِرِه هِدا تا، بینِواهایِسّه خَوِر خِشْ بَوِرِم. ِوِه مِره رایی هَکِرده تا اَسیرا رِه رِهایی، و کورا ره وینایی وُ سِتِم بَکِشیا رِه رِهایی هَدِم. چونکه اون زَمون بَرِسیه که خِدا اِنسون رِه بِبَخشِه وُ وِشونِ جا رَحمْ هَکِنه.

![](https://cdn.door43.org/obs/jpg/360px/obs-en-26-04.jpg)

عیسی؛ کِتاب رِه بَخونِّسِه پِه هِنیشتِه و هَمِه وِره اِشانه. ِوِشون دونِسِّنِه که اونتا بَخشِ کِتاب مُقَدِس، مَسیحِ وَعده بَئیِ دَروارِه بَنوِشْتِ هَسِّه. عیسی باتِه: «اینتا کِلام کِه شِمِه وِسِّه بَخونِسّمِه، هَمین اِسامْ دَرِه پیش شونِه.» مَردِم هَمِه رِه مات بَوِردِه و بَپِرسینِه: «مَگِه اینتا مَردی یوسُفِ ریکا نیِ یه؟»

![](https://cdn.door43.org/obs/jpg/360px/obs-en-26-05.jpg)

اونگِدِر عیسی بِفَرمِسّه: «راسِّه کِه گِنِنِه اَتّا پَیغُمبر شِه زادگاهِ دِله اَرزِش نِدارنِه. اون زَمون که ایلیایِ پَیغُمبِرِ دورِه؛ سه سال و نیمِ آزِگار وارِش نِوارِسّه، اسراییلِ اَتَنِّه بیوه زَنونِ دِلِه، خِدا ایلیا رِه اَتّه بیوه زِنایِ سِرِه که دِرِه راه دَی بی یِه، رایی هَکِردِه تا وِره کُمِک هَکِنه.»

![](https://cdn.door43.org/obs/jpg/360px/obs-en-26-06.jpg)

وِه شِه گَپِ دِمّالِه باته: «اِلیشَعِ پَیغُمبِرِ دوره، اِسراییلِ دِلِه خَلِه هایِ تَنِ پوسْ ناخِشی داشتْ بی یِه. مُنتا اِلیشَع هِچکِدوم رِه دَرمونْ نَکِردِه. وِه تِنا نَعمانِ سوری که اسراییلِ دِشمِنونِ فَرموندِه بی یِة مَرِضْ رِه شِفا هدا.» یهودیایي که وِره گوش هِدا بینِه، وِنه گَپِ که بِشتوسِّنه خَلِه وَرزِقْ بَئینِه.

![](https://cdn.door43.org/obs/jpg/360px/obs-en-26-07.jpg)

ناصِرة مَردِم، عیسی رِه پَرِستِشگاهِ جِه دَر هَکِردِنه، و وِرِه اَتّا سَنگی تَپّة تِکْ بَوِردِنه تا وِرِه اونجِة جِه بِنِه دِم هَدِن و بَکوشِن. مُنتا عیسی وِشونِ دَسِّ جِه دَربوردِه و ناصِرة جِه یور بوردِه.

![](https://cdn.door43.org/obs/jpg/360px/obs-en-26-08.jpg)

عیسی این سَرِ جَلیل تا اون سَرِ جَلیل راه کَتیِه وُ شی یِه. خَلِه مَردِمِم شِه ناخِشا رِه شِه هِمْکِتْ وِنِه پَلی اِیاردِنه. وِشونِ دِله، شِل وُ کور وُ غول دَی بینِه. اَتّیِم دَئینِه کِه نَتونِسّنِه راه بورِن و گَپ بَزِنِن. عیسی وِشون رِه دَرمون کِرده.

![](https://cdn.door43.org/obs/jpg/360px/obs-en-26-09.jpg)

هَمینطی خَلِه ها کِه دِبْ بَزّه بینِه، وَ روحِ شَیطانیِ اَسیرْ بینِه رِه عیسایِ پیش اِیاردِنِه. عیسایِ دَستورِ جِه روحایِ پَلید، مَردِمِ جِه دَر شینِه. ویشتِرِ روحایِ پَلید شونْگ کَشینِه و گِتِنِه: «تِه خِدایِ ریکا هَسّی!» و مَردِمِم خِشال بَئینِه وُ خِدا رِه سِتایِش کِردِنه.

![](https://cdn.door43.org/obs/jpg/360px/obs-en-26-10.jpg)

اونگِدِرعیسی شِه شاگِردونِ دِله دِوازدَه تَنْ رِه نِشون هَکِرده وُ وِشون نوم رِه رَسول بِشته. وِشونْ عیسایِ هِمْکِتْ هر جا شینِه وَ وِنه جِه یاد گِیتِنِه.

*کِتابِ مُقَدِسِّ جه بَئیته داستان: (کتاب انجیل متی باب ۴ آیه‌های ۱۲ تا ۲۵، کتاب انجیل مرقس باب‌های ۱ تا ۳، کتاب انجیل لوقا باب ۴)*

## 27. ۲۷- خارِ سامِریِ  سَر گِذِشت

https://openbiblestories.org/l/mzn/story-27/

![](https://cdn.door43.org/obs/jpg/360px/obs-en-27-01.jpg)

یِتّا مُعَلِم دینی یهودی ، اَت روز عیسایِ پَلی بِی یَموئِه. وِه خواسّه نِشونْ هَدِه کِه عیسی دَرِه اِشتِباهی دَرس دِنّه. وِه بَپِرسیه «اِستا، اِنسان چِکار وِنِه هَکِنه تا زندگانیِ اَبدی دارِه» عیسی جِواب هِدا: « اینتایِ دَرواره توراتِ دلِه چی‌ بَنویشتِ‌ بَیّه؟»

![](https://cdn.door43.org/obs/jpg/360px/obs-en-27-02.jpg)

اونتا مَردی باته: « خِداوِنْد، شِه خِدا رِه تِمومِ جانِ جا، تِمومِ تِوانِ جا و شِه تِموم فِکرِ جا دوس دار. شِه هِمسایه رِمْ شِه واری، دوست دار.» اَی عیسی بِفَرمِسِّه: «دِرِس گِنی! تِئم هَمطی هَکِن تا زندگانیِ اَبِدی داری.»

![](https://cdn.door43.org/obs/jpg/360px/obs-en-27-03.jpg)

امّا مُعَلِمِ دینی چونکِه خواسِّه شِه خِدِرِه پَریزگار و پاکِ آدِمْ نِشون هَدِه، اَتِّه کَشِ دیگِه بَپِرسیه: «کي مِه هِمسایوئِه؟»

![](https://cdn.door43.org/obs/jpg/360px/obs-en-27-04.jpg)

عیسی اَتّا داستانِ جا اونتا مُعَلِمِ دینیِ جِواب رِه هِدا: « اَتِّه یَهودی مَردی اورشَلیمِ جِه دَر‌ْ شی‌یِه اَریحایِ وَر»

![](https://cdn.door43.org/obs/jpg/360px/obs-en-27-05.jpg)

«راه دلِه، راهزِنا وِرِه سَر دَخِتِنه وُ ونِه دار و نِدارِه بَیتِنِه، وِرِه دَروشْتِنِه وَ وِه که کِتارِک زوئه ،جادِة کِنار دِمبِدانه.»

![](https://cdn.door43.org/obs/jpg/360px/obs-en-27-06.jpg)

«اینتا کارِ دَکِته په، اَتّا مُعَلِمِ دینی اونجِه جِه دَییِّه رَد بی یِه ، شیه. اونتا مَردی رِه کِه جاده کِنار بَدیِه، شِه راه رِه وَر هِدا وَ اَتوَرِ دیگة جادِة جِه بوردِه و وِرِه نَدید بَیتِه.»

![](https://cdn.door43.org/obs/jpg/360px/obs-en-27-07.jpg)

«اَتِّه کَم بوگْذِشتِه پِه اَتّا لاوی سَر بَرِسییِه.(لاویا، اَتّا اسرائیلی طایِفِه بینِه کِه مَعبَدِ پیشوائون رِه کِمِک کِردْ بینه). وِه هِم وَر هدا وُ اَت وَرِ دیگِة جاده بوردِه و اونتا مَردیِ داد نَرِسیه .»

![](https://cdn.door43.org/obs/jpg/360px/obs-en-27-08.jpg)

«اونْگِدِر اَتّا مَردی بیَ یَمو کِه سامِری بی‌یِه. ( سامِریا و یهودیا دئی ره بَد داشتِنه). وِه دونِسّه که زَخمی آدِم یَهودی هَسِّه، مُنتا وِنِه دِل مَردیِ‌سِّه بَسوتِه و وِنِه زَخما رِه بَشِسِّه، مَرهَم بِشتِه و دَوِسّه.»

![](https://cdn.door43.org/obs/jpg/360px/obs-en-27-09.jpg)

«اونگِدِر سامری مَردی وِرِه شِه خَرِ پِشت سِوارهَکِرده، اَتِّه مهمون‌خِنِه بَوِردِه و اونْجِه هِم وِنِه جِه بَرِسیه»

![](https://cdn.door43.org/obs/jpg/360px/obs-en-27-10.jpg)

« فِردایِ هَمون روز سامِری مَردی ، وِسّه که شِه راه پِه بَیره وُ بوُره.هَمینتاسّه مِهمون خِنه دار ره اَتی پول هِدا و باتِه: «اینتا مَردیِ جا بَرِس ، اگِه تِه هَکِردِ کار ویشتِر بَیِّه، مِن دَگِرِسِّه پِه تِه بِدِهی رِه تِره دِمبه.»

![](https://cdn.door43.org/obs/jpg/360px/obs-en-27-11.jpg)

اَیْ عیسی مُعَلِمِ دینیِ جِه بَپِرسیه: « اِسا چی شی فِکر کِنّی، اون ِسه تنِ دِله کِمینتا اون زِخمی و دِز بَزِّه مَردیِ هِمسایِه بی یِه؟» مُعَلِم دینی جِوابْ هِدا: «اونتا کِه وِنِه وِسّه دِلْ بَسوزِنیِه.» عیسی وِرِه جِواب هِدا: «تِه هِمْ بورْ هَمینکار رِه هَکِن».

*کتابِ مُقدِّس جه بَئیته داستان: (کتاب انجیل لوقا باب ۱۰ آیه‌های ۲۵ تا ۳۷)*

## 28. ۲۸-   مالدارِ جِوونِ

https://openbiblestories.org/l/mzn/story-28/

![](https://cdn.door43.org/obs/jpg/360px/obs-en-28-01.jpg)

اَتّا روز؛ اَتّا گَتِ مال دار عیسایِ پیش بی یَمو و وِنِه جِه بَپِرسیِه: «خارِ اِستا، چِه کار هَکِنِم که زِنْدگانیِ اَبِدی دارِم؟» عیسی وِرِه بِفَرمِسِّه: «چه شیسِّه مِرِه خارِ اِستا باتی؟ چونکِه خِدا بَکِته هِچکِس خار نی یِه. اگِه خوانی زِنْدِگانیِ اَبِدی داری، خِدایِ دَستورا ره گِس هَده.»

![](https://cdn.door43.org/obs/jpg/360px/obs-en-28-02.jpg)

وِه بَپِرسیه: «کِمینتا فَرمون رِه وِنه اَنجام هَدِم؟» عیسی در جِواب باته: « آدِم نَکوش، زنا نَکِن، دِزدی نَکِن، دِرو نَزن، ِشه پی یِر و مار ارزش ره بَدون و شِه هِمسایه ره شِه وَنِکِت دُوس دار.»

![](https://cdn.door43.org/obs/jpg/360px/obs-en-28-03.jpg)

مُنتا جِوونِ مَردی باتِه: «مِن هَمون کِچیکی جِه تا اِسا تِمومِ دَستورا رِه اَنجام هِدامه، اِسا دیگه وِنِه چِیکار هَکِنِم تا زِندگانیِ اَبِدی دارِم؟» عیسی میرِبون وِرِه هارْشیه.

![](https://cdn.door43.org/obs/jpg/360px/obs-en-28-04.jpg)

وَ جِواب هِدا:« اَگِه خوانی بیتِرین کارِه هَکِنی، بور هَرچی دارنی رِه بَروش وُ ونه پولِ هَدِه بدبخت بیچاره ها رِه تا تِه گَنجِ آسمون دِله دَواشِه نا بِنِه سَر! اون زَمون بِرو وِ مِه دِمبال سَر راه دَکِف!»

![](https://cdn.door43.org/obs/jpg/360px/obs-en-28-05.jpg)

جِوونِ مردی کِه عیسایِ گَپْ رِه بِشتوسِّه، غَم وُ غِصّه وِره سَر هَیته چونکِه مال و ثِروِت داشت بی یِه و نِخواسِّه هَرچی که جَم هَکِرد بی یِه رِه فِنا هَده. هَمینتاسّه وِه شِه رو رِه عیسایِ جه دِگاردِنیِه وشِه راهِ بَیتِه بوردِه.

![](https://cdn.door43.org/obs/jpg/360px/obs-en-28-06.jpg)

اونگِدِر عیسی شِه شاگِردا رِه بِفَرمِسّه: «اینتا رِه بِدونین کِه اَتّا دارایِ وِسّه خَله سَخته که خِدایِ پادِشاهیِ دلِه گوم بی یِلِّه. اَی گِمه کِه، خَلِه آسونتِره که اَتّه شِتِر ،دَرزِنه سوراخِ جِه رَتْ بَوّه تا اَتّه دارا ،خِدایِ پادشاهی دِلِه لینگ بی يلّه !»

![](https://cdn.door43.org/obs/jpg/360px/obs-en-28-07.jpg)

شاگِردا عیسایِ گَپِ جِه خَلِه یِکّه بَخِردِنِه و بَپِرسینِه «اَی کی تونْدِه نِجاتْ بَیره؟»

![](https://cdn.door43.org/obs/jpg/360px/obs-en-28-08.jpg)

عیسی شِه شاگِردا رِه هارْشیِه و بِفَرمِسِّه «انسان نَتوندِه شِه خِدِرِه نِجات هَدِه، مُنتا خِدایِ پیش هَمِه چی آسونِه.»

![](https://cdn.door43.org/obs/jpg/360px/obs-en-28-09.jpg)

پِترُسِم عیسی رِه باته: «اِما شِه هَمِه چیِ جِه دَس بَیتِمی تا تِه پِه کَت راه دَکِفیم، اِسا اَمِه مِزد چی شی هسِّه؟»

![](https://cdn.door43.org/obs/jpg/360px/obs-en-28-10.jpg)

عیسی در جِواب باته: «هَرکَس مِه وِسّه شِه بِرار و خواخِرجِه، پی یِر و مار و وَچِة جه وَ سِره و خِنِة جِه بوگذِره، صَد برابر ویشتِر وِنِه دَسّه گیرنه و زِندِگانیِ اَبَدی جِه رَسِنِه. مُنتا خَلِه ها کِه پیش دَرِنه دِمبال کَفِنِنه و خَلِه ها کِه دِمبال دَرِنّه پیش کَفِننه.»

*کتاب مُقَدّسِ جه بَئیته داستان: انجیل متی فصل ۱۹ آیه های ۱۶ تا ۳۰، انجیل مرقس فصل ۱۰ آیه های ۱۷ تا ۳۱، انجیل لوقا فصل ۱۸ آیه های ۱۸ تا ۳۰*

## 29. ۲۹- سَنگدِلِ نوکرِ سَرگِذِشت

https://openbiblestories.org/l/mzn/story-29/

![](https://cdn.door43.org/obs/jpg/360px/obs-en-29-01.jpg)

اَتّا روز پِترُس عیسایِ جِه بَپِرسیِه: «اِستا، اونتا بِراری کِه مِه جا بَد کِندِه، وِنِه چَن وار وِرِه بِبَخشِم؟ هَف وار وَسِّه؟» عیسی بِفَرمِسِّه: «هَف وارِم نا، هِفتاد تا هَف وار وِنِه بِبَخشی» عیسی خواسِّه که اِما رِه هالی هَکِنِه؛ همیشِک وِنِه بِبَخشیم. عیسی هَمونگِدِر اینتا داستان رِه باتِه.

![](https://cdn.door43.org/obs/jpg/360px/obs-en-29-02.jpg)

عیسی باتِه: «خِداوندِ پادِشاهی، اونتا پادِشاه رِه موندِنِه کِه خواسِّه شِه خِدمِتکارایِ بِدِهی رِه پاک هَکِنِه. وِشونِ دِلِه اَتّایِ بِدِهی، دِویست هِزارسالِ کارگِریِ جا بِرابِری کِردْ بی یِه.»

![](https://cdn.door43.org/obs/jpg/360px/obs-en-29-03.jpg)

چونکه اونتا خِدمِتکار اَنِّ گَتی بِدِهی رِه نَتونِسِّه پاک هَکِنه، هَمینتاسِّه پادِشاهِم فَرمون هِدا کِه بِدِهیِ جاسَر، وِه وُ وِنِه زِنا وُ وِنه وَچون وُ وِنِه دار وُ نِدار رِه بَروشِن.

![](https://cdn.door43.org/obs/jpg/360px/obs-en-29-04.jpg)

مُنتا اونتا مَردی پادشاهِ دَس وُ پِه دَکِتِه وُ عَیْز وُ وَیْزْ هَکِردِه باتِه: «اَی پادِشاه!، تِه لینگِ خِش دِمبه، مِرِه اَمون هَدِه تا سِکِّة آخِر شِه بِدِهی رِه پَس هَدِم.» پادِشاهِ دِل وِنِسِّه بَسوتِه وُ وِرِه رِها هَکِردِه وَ وِنِه تِمومِ بِدهی رِه بِبَخشیِه.

![](https://cdn.door43.org/obs/jpg/360px/obs-en-29-05.jpg)

مُنتا اونتا خِدمِتکار تا پادِشاهِ دربارِجِه شِه لینگِ یور بِشْتِه، اَتّا هَمکارِ بَدیِه که چارماهِ مزِّ اِندازِه وِرِه بِدِهکار بی یِه. بوردِه وُ وِنِه کِرّ رِه بَیتِه و باتِه: «مِه بِدِهکاری رِه مِرِه هَدِه.».

![](https://cdn.door43.org/obs/jpg/360px/obs-en-29-06.jpg)

اونتا هَمکار وِنِه دَس و پِه دَکِتِه باتِه: «خواهِش کِمبِه مِرِه زِمون هَدی، تا آخِرین سِکِّه تِه بِدِهی رِه پَس دِمبِه.» مُنتا طَلِبْکار قَبول نَکِردِه و شِه هَمکارِ زِندونِ دله دِمبِدا تا شِه تِمومِ بِدِهی رِه پَس هَده.

![](https://cdn.door43.org/obs/jpg/360px/obs-en-29-07.jpg)

اونگِدِر که بِدِهکارِ رَفِقون داستان رِه بِشتوسِّنِه، وِشون رِه خَلِه دَرد بی یَمو وُ بوردِنِه پادشاهِ پَلی داستان رِه وِنِسِّه باتِنه.

![](https://cdn.door43.org/obs/jpg/360px/obs-en-29-08.jpg)

پادشاه لَس نِدا، اونتا مردی رِه بخواسِّه وُ وِرِه باتِه «اَی خِدمِتکارِ بدجنس! مِن تِه بِخواسّیِ وِسِّه تِه اَنِّ گَتی بِدِهی رِه بِبَخشیمِه. تو هِم وِسِّه همینتا کاره شِه هَمکارِ جِه هَکِرد بویی.» پادشاه خَله ژاژ بَکِردِه وُ فَرمون هِدا وِرِه زندونی هَکنِن و تا شِه تِمومِ بدهی رِه پاک نَکِردِه وِرِه رِها نَکنِن.

![](https://cdn.door43.org/obs/jpg/360px/obs-en-29-09.jpg)

اونگِدِر عیسی بِفَرمِسّه: «اَگِه شِما شِه بِرار رِه شِه جان و دِلِ جِه نِبَخشین، مِه پیِ یِر که آسِمونِ دِلِه دَرِه، شِمِه جِم هَمینطی تا کِنده.»

*کتابِ مُقَدِسِ جه بَئیته داستان: انجیل متی فصل ۱۸ آیه های ۲۱ تا ۳۵*

## 30. ۳۰- عیسی مسیح پَنج هِزارتَن رِه خِراک دِنِّه

https://openbiblestories.org/l/mzn/story-30/

![](https://cdn.door43.org/obs/jpg/360px/obs-en-30-01.jpg)

عیسی شاگِردا رِه خَلِه دِیاتْ رایی هَکِردِه تا هَم خَوِرِه خِش رِه وِشونِ هَدِن و هَم وِشون رِه دَرس هَدِن. شاگِردا دَگِرِسِّه پِه شِه، کارا رِه عیسایِ وِسّه گِزارِش هِدانِه. اونگِدِر عیسی وِشون رِه خَلوِتی جا، دَریاچة کِنار بَوِردِه تا اَتِّ کَم دَم بَزِنِن. هَمینتاسِّه هَمه، اَتّا قایِق دِلِه سِوار بَئینِه وُ بوردِنِه اونوَرِ دَریاچِه.

![](https://cdn.door43.org/obs/jpg/360px/obs-en-30-02.jpg)

مردِم تا بَدینِه عیسی وُ وِنِه شاگردا قایق رِه سوار بَئینِه وَ دَرنِه شونِنِه اونوَرِ دریاچِه، بَتِتِنه تا عیساشون نَرِسی پِه وِشون اون وَرِ دریاچه دِواشِن. هَمینتاسِّه تا عیسی وُ وِنِه شاگردا بَرسینِه؛ اَتّه خَلِه مردِم وِشونِ چِشْ بِه راه بینِنِه، هَمینتاسِّه وشونِ پیشواز بوردِنِه.

![](https://cdn.door43.org/obs/jpg/360px/obs-en-30-03.jpg)

سِوایِ زَنون وُ وَچون؛ تِنا مَردا پَنج هِزار تَن بینِنِه. عیسای مسیحِ دِلْ وِشونِسِّه خَلِه بَسوتِه، چونکِه گِسپِنِ رَمِة بی چَپّونِ واری مونِّسِّنِه. هَمینتاسّه شِروع هَکِردِه وِشون رِه دَرس بِدائِن و نِخار وُ ناخِشا رِه دَرمون هَکِردِن.

![](https://cdn.door43.org/obs/jpg/360px/obs-en-30-04.jpg)

نِماشونِ سَر، شاگِردا عیسایِ پیش بیَمونِه وُ وِرِه باتِنِه: «اِستا جان! مَردِمِ رایی هَکِن تا بورِن شِه وِسّه خِراک فِراهِم هَکِنِن، اینجِه آبادیِ جِه خَلِه پَرتِه، خِراک پيیدا نَوونِه.

![](https://cdn.door43.org/obs/jpg/360px/obs-en-30-05.jpg)

مُنتا عیسا شاگردا ره باتِه :«شِما شِه ِوشون رِه خِراک هَدین». وِشون جِواب هِدانِه: «چِطی تومبی اَتّنِه مردمِ بِتیمِ سِر هَکِنیم؟! مُنتا تِنا پنج تا نون وُ دِ تا کِچیک ماهی دارمی، هَمی اَندِه.»

![](https://cdn.door43.org/obs/jpg/360px/obs-en-30-06.jpg)

عیسی شِه شاگردا رِه بِفَرمِسّه، مَردِم رِه بَوِّین، کِهِ پنجاه تایی دَستِه دِرِس هَکِنِن وُ سُوز وُ چَمِندِ سَرْ هِنيشِن.

![](https://cdn.door43.org/obs/jpg/360px/obs-en-30-07.jpg)

اونگِدِر عیسا پنج تا نون وُ دِتا ماهی رِه شِه دَستِ سَر بَیتِه و آسِمون رِه هارشیِه وخِراکِ وِسِّه خِدا رِه شُکر هَکِردِه و اون خِراکِ ره فِراوونی هِدا.

![](https://cdn.door43.org/obs/jpg/360px/obs-en-30-08.jpg)

اونگِدِر عیسی نونا و ماهیا رِه رِز رِز هَکرده هِدا شِه شاگردا رِه تا مردمِ دِلِه رَسِتْ هَکنِن. شاگردا، مَردِم رِه خِراک دانِه. همه بَخِرِدِنه، و سِر بَئینِه، مُنتا خِراکایِ جِه هِچّی کَم نَئی بی یِه.

![](https://cdn.door43.org/obs/jpg/360px/obs-en-30-09.jpg)

اونگِدِر شاگردا هَر چی بَمونِسِّه خِراکِ کودْ هَکردِنِه، اینطی که اون پنج تا نون وُ دِ تا ماهی جِه دِوازده تا سَوِد مَشت بَئیِه. کتابِ مُقَدِسّ جه بَئیته داستان:

*(کتاب انجیل متی باب ۱۴ آیه‌های ۱۳ تا ۲۱ ، کتاب انجیل مرقس باب ۶ آیه‌های ۳۱ تا ۴۴، کتاب انجیل لوقا فصل ۹ آیه‌های ۱۰ تا ۱۷، کتاب انجیل یوحنا باب ۶ آیه‌های ۵ تا ۱۵)*

## 31. ۳۱- عیسی اویِ سَر راه شونِه

https://openbiblestories.org/l/mzn/story-31/

![](https://cdn.door43.org/obs/jpg/360px/obs-en-31-01.jpg)

اونگِدِر که عیسی مَردِم رِه خِراک هِدا بَخِردِنه، شِه شاگِردا رِه بِفرمِسِّه قایق رِه سِوار بَّوِن وُ بورِن اونورِ دریاچه. مُنتا شِه تیناری هَمونجِه اَتِّه کَم بَمونِسِّه. شاگِردام اونجة جِه راه دَکتِنِه وُ بوردِنِه، عیسام اونگِدِر که مردِم رِه رایی هَکِرد بی یِه، شِه اَتّا کویِ تِک بوردِه تا راز و نیاز هَکِنِه. عیسی اونجِه تَک وُ تینار بی یِه و تا نیمه شو دعِا کِرد بی یِه.

![](https://cdn.door43.org/obs/jpg/360px/obs-en-31-02.jpg)

این میون، شاگِردام سَرگَرمِ پارو بَزوئِن بینِنه، اینطی تِنِّ وا دَکِتِه کِه تا نیمِه شو نَتونِسِّنِه دریاچه رِه تا نیمِه رَد هَکِنِن.

![](https://cdn.door43.org/obs/jpg/360px/obs-en-31-03.jpg)

عیسی شِه راز و نیازِ تِموم هَکرده پِه، شاگردای وَر بوردِه. وِه، وِشونِ قایقِ وَر؛ اوویِ سَر راه شی یِه.

![](https://cdn.door43.org/obs/jpg/360px/obs-en-31-04.jpg)

شاگِردا کِه عیسی رِه بَدینِه، هول بَخِردِنه، وِشون گِمون هَکِردِنِه کِه وِه اَتّا روح هَسِّه. عیسی کِه دونِسِّه وِشون خَلِه هول بَخِردِنِه، وِشون رِه بِفَرمِسِّه: «هول نَخِرین، مِن هَسِّمِه»

![](https://cdn.door43.org/obs/jpg/360px/obs-en-31-05.jpg)

هَمونگِدِر پِترُس، عیسی رِه باتِه: «مِه جانِ آقا، اگِه تِه شِه هَسّی، دَستور هَدِه کِه مِنِم اوویِ سَر، تِه پَلی بِی یِم» عیسائِم پِترُس رِه بِفَرمِسِّه: «بِرو»

![](https://cdn.door43.org/obs/jpg/360px/obs-en-31-06.jpg)

اینطی پتُرسِم قایق جِه دَر بی یَمو وُ اُوی سَر گوم زَنون بوردِه عیسای وَر. مُنتا اَتِّه کَم که راه بوردِه، شِه دیمْ رِه عیسای جِه دِگاردنیِه وَ هَمونگِدِر وِرِه هالی بَییِّه کِه دِریو کِلّاک دارنِه وُ تِنّه وا زَندِه.

![](https://cdn.door43.org/obs/jpg/360px/obs-en-31-07.jpg)

اونگِدِر پِترُسِ زَلِه اوو بَییِّه وُ هَمطی که اُوی دلِه فِرو شی یِه، شونگ کَشیِه: «جانِ آقا، مِه جانِ دَر بَوَر!» عیسی لَس نِدا، شِه دَسِ دِراز هَکِردِه و وِنه دَسِ بَیتِه وُ اوُیِ جِه وِرِه یور بیاردِه. اونگِدِر عیسی، پِترُس رِه بِفَرمِّسه: «اَی کَم بُووِر، چی چیِسِّه ِمِرِه بووِر نَکِردی که دَر اَمون بَمونی؟»

![](https://cdn.door43.org/obs/jpg/360px/obs-en-31-08.jpg)

عیسی و پِترُس تا قایِق رِه سِوار بَیینِه، تِنِّه وا ناگِمون لَس هِدا وُ اوُ اِس هَکِردِه. شاگِردا کِه خَلِه ماتْ بَمونِسِّنِه، عیسی رِه پَرِستِش هَکرِدنِه و عیسی رِه باتِنِه: «راس راسّی، تِه خدایِ ریکا هَسّی» کتابِ مُقَدِسّه جه بَئیته داستان:

*انجیل متی فصل ۱۴ آیه های ۲۲ تا ۳۳؛ انجیل مرقس فصل ۶ آیه های ۴۵ تا ۵۲؛ انجیل یوحنا فصل ۶ آیه های ۱۶ تا ۲۱*

## 32. ۳۱- عیسی اَتّا دِب بَزِه مَردی و اَتّا ناخِش زِنا یِ دَردِ دِوا کِندِه

https://openbiblestories.org/l/mzn/story-32/

![](https://cdn.door43.org/obs/jpg/360px/obs-en-32-01.jpg)

اَتّا روز عیسی وُ وِنه شاگِردا قایق جِه بوردِنِه اَت وَرِ دیگِة دِریاچه، جَدَریانِ وَر سامونِ. خِشکی که بَرسینِه قایقِ جِه بِنِه بی یَمونِه.

![](https://cdn.door43.org/obs/jpg/360px/obs-en-32-02.jpg)

اونجه اَتّا مَردی دَیّیِه که خَبیث روحا وِره گِرفتار هَکِرد بینه.

![](https://cdn.door43.org/obs/jpg/360px/obs-en-32-03.jpg)

اونتا مَردی اَندِه قِددار بی یِه که هِچ کَس نَتّونِسِه وِرِه اَتّه جا بَند هَکِنِه. چَنْ کَش وِره زَنجیرِ جا دَوِس بینِه مُنتا وِه زنجیرا رِه پاره کِردِه.

![](https://cdn.door43.org/obs/jpg/360px/obs-en-32-04.jpg)

اونتا مَردی، گورِستون دِله زندگی کِرد بی یِه. وِه روز و شو شونگ کَشیه. لُختِ پَتی بی یِه و شِه تَن رِه تِزِ سنگایِ جِه خِراش دائِه.

![](https://cdn.door43.org/obs/jpg/360px/obs-en-32-05.jpg)

وِه هَمین کِه عیسایِ پَلی بَرِسیِه، وِنِه لینگِ بِن زانو دَکِتِه. عیسی اونتا دِبْ رِه فَرمون هِدا: «اینتا مَردیِ تَنِ جِه دَر بُور».

![](https://cdn.door43.org/obs/jpg/360px/obs-en-32-06.jpg)

دِب اَتّه گَتِ شونگ بَکِشیه و باتِه: «آ عیسی، تِه گَتِ خدایِ ریکا هَسّی، مِه جِه چی چی خوانی؟ خواهِش کِمبِه مِرِه عِذابْ نَدِه» اونگِدِر عیسی اونتا دِبِ جِه بَپِرسیه: تِه نوم چی چی هسِّه؟» وِه جِواب هِدا «مِرِه لِژیون گِننِه، چونکه اِما خَلِه زیادِمی» (لِژِیون رومِ اَرتش دِلِه چَن هِزار سَرباز رِه گِتِنِه)

![](https://cdn.door43.org/obs/jpg/360px/obs-en-32-07.jpg)

دِبا عیسایِ جِه خواهش هَکِردِنه: «اِمارِه اینتا سامونِ جِه یور نَکِن» اونجِه اَتّه خی گَلِّه، تَپِّة سَر چِرا کِرد بینِه. پَلیدِ روحا عیسی رِه دَسْ دامِنْ دَکِتِنِه وُ باتِنه: «پَس بی یِل اِما بوُریم خیِایِ تَنِ دِلِه» عیسی وِشون رِه اِجازه هِدا و بِفَرمِسّه: «بورین»

![](https://cdn.door43.org/obs/jpg/360px/obs-en-32-08.jpg)

اَت خَلِه دِب، اونتا مَردیِ جِه دَر بی یَمونِه و بوردِنِه خی گَلّة دِلِه. تِموم اون دِ هزارتا خی، تَپِة جه لیز بَخِردِنه دَکِتنِه دریاچه دِله و خَفه بَیّنِه وُ بَمِردِنه.

![](https://cdn.door43.org/obs/jpg/360px/obs-en-32-09.jpg)

خی بونا کِه اونتا گَلّه ره خی بونی کِرد بینِه تا اینتا صحنِه رِه بَدینِه، بَته بَته شهرِ وَر بوردِنه وُ عیسایِ هَکِردِ کارِه مَردِمِسّه شَرح هِدانِه. شهرِ دِلة آدِمائِم بی یَمونِه و بَدینِه کِه دِب بَزّوُ مَردی بی چِمِر، جِمه دَپوشی، سَر بِه راه اَت جا هِنیشتِه.

![](https://cdn.door43.org/obs/jpg/360px/obs-en-32-10.jpg)

مردِم که خَله هول بَخِرد بینِه، عیسای جِه بخواسِّنِه اونجِه جه دَر بُوره. اونگِدِر عیسی قایقِ دِلِه بوُردِه. مُنتا هَمونتا مَردی که دِب بّزه بی یِه عیسای جِه خواهش هَکرده تا وِرِه شِه هِمکِت بَورِه.

![](https://cdn.door43.org/obs/jpg/360px/obs-en-32-11.jpg)

مُنتا عیسی ِوره باتِه: «دَگِرد شِه سِره وَر و هَمه رِه بِاوُ کِه خِدا تِه وِسِّه چیکار هَکِردِه و چِطی تِره رَحم هَکِردِه.»

![](https://cdn.door43.org/obs/jpg/360px/obs-en-32-12.jpg)

هَمینتاسِّه اونتا مَردیِم هَر کِجِه کِه شیِه و هر کَسِ ره کِه وینِّسِه وِشونِسِّه ِگتِه که عیسی ِونِسّه چیکار هَکِرده. هر کَسِم کِه وِنِه َسرِگذِشت رِه اِشتوسّه، خَله یِکِّه خِردِه.

![](https://cdn.door43.org/obs/jpg/360px/obs-en-32-13.jpg)

عیسی دِوارِه اونوَرِ دَریاچِه دَگِرِسّه. اونجِه بَرِسی پِه، خَلِه آدِما وِره دُوره هَکِردِنه و اَتّنه مَردِمِ دِله، اونجِه اَتّه ناخِشِ زِنا دَيی بی یِه که دِوازدَه سال آزِگار زَنانِگی خونریزی داشته و جان دَر عَذاب بی یِه. وِه ِشه تِمومِ دارو نِدار ِدوا درمونِّسه خرج هَکرِد بی یِه و هِدا دکترا رِه مُنتا وِنِه ناخِشی روز به روز بَدتِر بَي بی یِه.

![](https://cdn.door43.org/obs/jpg/360px/obs-en-32-14.jpg)

وِه کِه بِشتوسِّه عیسی خَلِه ها رِه دَرمون هَکِردِه، شِه پیش باتِه: «بُووِر دارمِه که مِن اگه فِقَط عیسای ِجِمِه رِه دست بَکِشِم خار بُومِه». اونتا زِنا اَتّنِه مَردِمِ دِلِه شِه خِدِرِه عیسایِ پِشتِ سَر بَرِسِنیِه وُ وِنِه بِلِندِ قِبا رِه دَست بَکِشیِه. دَر دَم وِنِه خونریزی بَند بی یَمو.

![](https://cdn.door43.org/obs/jpg/360px/obs-en-32-15.jpg)

همون آن عیسی رِه هالی بَیّیِه کِه آتّا قِد و قوُّه وِنِه جِه دَر بوردِه. هَمینتاسِّه، دَگِرِسّه وُ بَپِرسیِه: «مِه قِبا رِه کی دَس بَزّو؟» شاگِردا باتِنِه: «اَت خَلِه مَردِم هَمِه وَر تِره پوس دِنِنِه، چِه چیسِّه پِرسِنی «کی مِرِه دَس بَزّو»؟

![](https://cdn.door43.org/obs/jpg/360px/obs-en-32-16.jpg)

اونتا زِنا کِه تَرسِ جِه لَرزِسّه، عیسایِ لینگِ بِن زانو دَکِتِه. اونگِدِرشِه هَکِردِ کار وُ شِفایی کِه بَیتِه رِه وِرِه باتِه. عیسی زِنا رِه باته: «تِه بوُوِر تِره شِفا هِدا! بور بِه سِلامِت.» کتابِ مُقَدِسّه جه بَئیته داستان:

*انجیل متی فصل ۸ آیه های ۲۸ تا ۳۴؛ فصل ۹: آیه های ۲۰ تا ۲۲؛ انجیل مرقس فصل ۵؛ انجیل لوقا فصل ۸ آیه های ۲۶ تا ۴۸*

## 33. ۳۳- کِشاورزِ سَرگِذِشتْ

https://openbiblestories.org/l/mzn/story-33/

![](https://cdn.door43.org/obs/jpg/360px/obs-en-33-01.jpg)

اَتّا روز عیسی دِریاچه کِنار دَیّیه اَتِّ خَلِه مَردِمْ رِه دَرسْ دا بی یِه. مَردِم اَنْدِه زیاد بینِه کِه عیسی شِه هِنیشتِنِ وِّسِه جا نِداشتِه تا وِشونِ جا گَپْ بَزِنه. هَمینتاسِّه اَتّا نوُ که اویِ کِناره اِسْ هَکِرد بی یِة دِلِه سِوار بَیِّه و هَمونجِة جِه مَردِم رِه دَرسْ هِدائه.

![](https://cdn.door43.org/obs/jpg/360px/obs-en-33-02.jpg)

عیسی اینتا داستانْ رِه مَردِمِسِّه اینْطی شَرح هِدا: «اَتّا کِشاورز تیم شَنی وِسِّه یور بوردِه. هَمینطی کِه تیم رِه اینوَر و اونْوَر شَندیه ،اَتِ کَمْ مَرزِ سَر بَکِلِسّه وُ پَرَندِها بی یَمونِه وُ هَمِه رِه بَخِردِنِه.

![](https://cdn.door43.org/obs/jpg/360px/obs-en-33-03.jpg)

«اَتیِم گِل کَتِکِ سَر دَکِتِه کِه وِشونِ سَر رِه خاک دَپوشِنیه. تیما گِل کَتِک دِلِه خَلِه زود نوچ بَزّو . چونْکِه جولِ خاکْ نَی بی یِه. مُنْتا وِشونِ بِنّه نَتّونِسِّه خاکِ بِن فِرو بورِه. هَمینتایِسِّه اِفتابِ کِه پِل بَزّو، اَز دَم بَسوتِنِه و اَز بَین بُورْدِنِه.»

![](https://cdn.door43.org/obs/jpg/360px/obs-en-33-04.jpg)

«اَتی تیمِم لَمِ تَلی دِلِه دَکِتِه. تیما و تَلیا دِیی جا رِخ بَزّونِه. و گِیاهِ جِوونِ لیله ، تَلیاِیِ جِغ جِه خَفه بَئینه و بار نیارْدِنِه.»

![](https://cdn.door43.org/obs/jpg/360px/obs-en-33-05.jpg)

اَتی تیمام خارِه بِنِة سَر دَکِتِنه، و هَر تیمِ جه، سی، شَصْت، حتّی صَد بِرابِر بار بِیاردِه. هَرکس که خوانِّه خِدایِ جِه فَرمونْ بَوِرِه وِنِه کِه مِه گَپْ رِه گوش هَدِه.

![](https://cdn.door43.org/obs/jpg/360px/obs-en-33-06.jpg)

شاگِردا کِه اینتا داستان رِه بِشتوسِّنِه گِج بَئنِه. عیسی وِشونِ وِسِّه اینطی باته: «تیمْ هَمونْ خِدایِ گَپ هَسِّه. مَرزِ سَر، اونتا آدِمْ هَسِّه کِه خِدایِ گَپْ رِه اِشتونِه مُنتا وِرِه هالی نَاُنِه و شیطونِ خِدایِ گَپ رِه وِنِه جِه دِزّنِه.حَقیقِت وِه هَسّه که شَیطونْ نِلِّنِه خِدایِ گَپ وِرِه هالی بَوّه.»

![](https://cdn.door43.org/obs/jpg/360px/obs-en-33-07.jpg)

گِل کَتِکِ بِنِه، اونتا آدِمی هَسِّه کِه تا خِدایِ گَپ رِه بِشتوسّه، خِشال وُ خَندون قبول کِنده، مُنتا سَختی ِ دله یا مَردِمِ که وِره آزارِدِنِنه ، شِه رو ره خِدایِ جه گاردِنِه. اینطی بَوِّم که دیگه خدا جه دلگرمی نِدارنه وُ شِه پِشت و پِناه نَدونه.

![](https://cdn.door43.org/obs/jpg/360px/obs-en-33-08.jpg)

اونتا بِنه کِه تَلی وِرِه دَپوشِنیه، اونتا آدِمِ مونْدِه کِه پَیغُومْ رِه اِشتونِه، مُنتا دِلِ ناگِرونی زِندگانیِ، پول وُ مال ره دِل دَوِسِّن َو هَی جَم هَکِردِنه دِمبال بوردِن باعِث بونه که اَتِّ کَمْ بوگْذِشتِه پِه خِدایِ دوست داشتِن رِه کِنار بی یِلِّن. دیگِه اونْ تِوان رِه نِدارْنِه اونجوری که خِدایِ کِلامِ جِه یاد بَیتِه، خِدا رِه خِشنود هَکِنِه. وِه گنِّمِ خِشِه رِه موندِنه که بار نیارنِه.»

![](https://cdn.door43.org/obs/jpg/360px/obs-en-33-09.jpg)

مُنتا خارِه زَمین، آدِمی هَسِّه کِه خِدایِ پَیغُومْ رِه اِشتونِه، بُووِر کِندِه و بار اِیارْنِه. کتابِ مُقَدِسّه جه بَئیته داستان:

*انجیل متی فصل ۱۳ آیه های ۱ تا ۲۳؛ انجیل مرقس فصل ۴ آیه های ۱ تا ۲۰؛ انجیل لوقا فصل ۸ آیه های ۴ تا ۱۵*

## 34. ۳۴- عیسی   اَتی داستانِ دیگه دَرس دِنِه

https://openbiblestories.org/l/mzn/story-34/

![](https://cdn.door43.org/obs/jpg/360px/obs-en-34-01.jpg)

عیسی، خدای پادشاهیِ دَر واره خَلِه داستانایِ دیگِه رِم باته .اَتِ نِمونِه باته: «خِدای پادشاهی خَردله تیم ره موندِنِه که کِشاورز شِه لِتکا دِلِه کارِنِه. شِما خَلِه خاردونِّنی که خردله تیم کِچیکترین تیم هَسّه.»

![](https://cdn.door43.org/obs/jpg/360px/obs-en-34-02.jpg)

همینتاسّه خَردلِ تیم که نوچ َزنّه همه گیاهایِ جِه گَت تر بُونه. اَنده گت ُبونه که پرنده ها وِنه چُلّة تن وُ گِلامِ دِله کِلی سازِنِنه.

![](https://cdn.door43.org/obs/jpg/360px/obs-en-34-03.jpg)

عیسی اَتّا داستان دیگه ره شَرح هِدا و باته: «خِدای پادشاهی،اونتا خمیرمایه رِه موندِنه که اَتّا زِنا اون خَمیر مایِه رِه آردِ دِلِه شَندِنه تا تِمومِ خمیر هاشی بَوّه»

![](https://cdn.door43.org/obs/jpg/360px/obs-en-34-04.jpg)

«خِدای پادِشاهی، گَنْج رِه موندِنِه که اَتِّ کَس وِرِه شِه لِتکا دلِه چال هَکِرد بَوِّه، اَتِّ کَسِ دیگِم وِه رِه پیدا هَکِنه و اَیْ دِوارِه وِرِه خاکِ بِن چال هَکِنه و ذاق بَکِنِه بُورِه شِه دار و نِدار رِه بَروشِه تا بِتّونِه اونتا لِتکا که وِنه دِله گَنج چال هَکِردْ بی یِه رِه بَخرینِه.»

![](https://cdn.door43.org/obs/jpg/360px/obs-en-34-05.jpg)

خِدایِ پادِشاهی، اَتّا قِشنگ وُ گِرونِ میرِکا رِه موندِنه که اَتّا تاجِر وِره پیيدا هَکِردِه وَ هَرچی داشتِه رِه بَروتِه تا اونتا پولِ جا میرِکا رِه بَخرینِه.»

![](https://cdn.door43.org/obs/jpg/360px/obs-en-34-06.jpg)

اونجِه اَتی آدِم دَیّیِنه که گِمون کِردِنه چون دِرِس کار هَسِّنه خِدا وِشون رِه اِشِنِه. وِشون دیگِرون رِه که خارِکار نَکِرد بیِنه رِه کِچیک وینِّسِّنه. هَمینتاسّه عیسی وشونِسّه اینتا داستان رِه شَرح هِدا: «دِ نَفِر بوردِنه پَرستِشگاه دعا هَکِنن، اَتّا پیشوایِ دینی بی یِه ، اَتّام باجگیر»

![](https://cdn.door43.org/obs/jpg/360px/obs-en-34-07.jpg)

«پیشوای دینی هِرِسّا و اینطی دِعا هَکِرده: خِدا جانْ! تِره شُکر کِمّه که آدِمایِ دیگة وَنِکِتْ، گِناهکار، دِزد، ظالم، زِناکار، یا اینتا باجگیرِ وَنِکِتْ نیمِه.»

![](https://cdn.door43.org/obs/jpg/360px/obs-en-34-08.jpg)

«هَفت روزِ هَفته دِ روز، روزه گیرمِه و شِه هَمة پول و دَرآمِدی که دَر اِیارمِه، هَر دَه تایِ جِه یِتّا تِره دِمبه.»

![](https://cdn.door43.org/obs/jpg/360px/obs-en-34-09.jpg)

«باجگیرِم، پیشوایِ دینی جِه اَت کَم اونوَرتِر هِرِسّا و دعای گِدِر شِه سَر رِه آسمِونِ وَر راس نَکِردِه، وَ شِه سینه تَختْ رِه میس دَکِردِه وُ باته: «خِدایا مِرِه بِبَخش چونکه مِن گِناهکار هَسِّمه!»

![](https://cdn.door43.org/obs/jpg/360px/obs-en-34-10.jpg)

عیسی شِه گَپِ پِه بَیتِه و باتِه: «حقیقِتِ رِه شِمسِّه گِمِه، باجگیرِ دِعا رِه خِدا بِشتوسّه و وِرِه دِرِسکار وُ پَرِیزکار بَدونِسِّه. خِدا اونایی که خِد پَسِن بَوِّن رِه کِچیک و پَست کِندِه و هَرکِس که شِه سَر رِه بِنِه بیارِه، خِدا وِرِه سَر بِلِن کِندِه».

*بَئیته داستان کِتابِ مُقَدِسِّ جه: انجیل متی فصل ۱۳ آیه های ۳۱ تا ۴۶؛ انجیل مرقس فصل ۴ آیه های ۲۶ تا ۳۴؛ انجیل لوقا فصل ۱۳ آیه های ۱۸ تا ۲۱؛ فصل ۱۸ آیه های ۹ تا ۱۴*

## 35. ۳۵- دِلسوزِ پی یِر سَرگِذشت

https://openbiblestories.org/l/mzn/story-35/

![](https://cdn.door43.org/obs/jpg/360px/obs-en-35-01.jpg)

اَتِّه روز عیسی اَتَ خَلّه مَردِم ره_که وِرِه دورِه هَکِرد بینِه تا وِنِه جِه بِشتوئِن_ رِه دَئیِه دَرس دائِه. ویشتِرا باجگیر بینِنه و مَردِمی که نِخواسِّنه موسایِ کِتابِ دستورا رِه گِس هَدِن و به جا بیارِن.

![](https://cdn.door43.org/obs/jpg/360px/obs-en-35-02.jpg)

مُنتا پیشوائونِ دینی که اونجِه دَیْ بینه، وینّسِنه که عیسی، گِناهکارایِ جا شِه رَفِقِ وَنِکِت رَفتار کِنده .هَمینتاسّه هِدی هِدی ره گِتِنه که عیسی بَد کاری ِکنده. عیسی که وِشونِه گَپِ بِشتوسّه، اینتا داستان ره شَرح هِدا.

![](https://cdn.door43.org/obs/jpg/360px/obs-en-35-03.jpg)

اَتّه مَردی بی یِه، دِتا ریکا داشتِه. اَتّا روز کِچیکِ ریکا شِه پی یِرِ باتِه: «مِن شِه ارثیه ره هَمی اِسا خوامّه.!» همینتاسّه پی یِرِم وِنه سَهم ره شِه داراییِ جِه سِیوا هَکِرده و وِره هِدا.»

![](https://cdn.door43.org/obs/jpg/360px/obs-en-35-04.jpg)

کِچیک ریکام اَت کَم بوگذِشته پِه، هَر چی داشتِه نِداشتِه ره جَمع هَکِرده وُ بوردِه دیره شَهر وَ هَمونجِه هِمْ دِمّال عِیش و نوش و گِناه بُوردِه و شِه تِمومِ دارایی ره بَر باد هِدا.

![](https://cdn.door43.org/obs/jpg/360px/obs-en-35-05.jpg)

خَلِه نَئی بی ِیه که کِچیک ریکایِ شهر بی جور خِشکسالی بِموئه.وِه هِم دیگه هیچ پولی نِداشتِه تا خِراک بَخرینه و بَخِره. هَمینتاسّه تِنا یِتّا کار وِنِه جِه بَر ای یَمو که هَمون خی بونی بی یه. وَ اَنده دَرموندِه ُو وِشنا بَی بی یِه کِه خیِ خِراکِ جا شِه بِتیم ره سِر کِردِه.

![](https://cdn.door43.org/obs/jpg/360px/obs-en-35-06.jpg)

آخِر سَر اَتّه روز کِچیک ریکا شِه شِه جا دِلِه گَپ بَزّو وُ باتِه: «مِن اینجه چیکار کِمّه؟ مِن اینجِه وِشناییِ جِه میرمِه. بیتِّره کِه شِه پی یرِ پَلی دَگِردم ُو وِنِه جه بِخوام که وِنِه اَتّه نوکِر وَنِکِت وِنِسّه کار هَکِنِم.»

![](https://cdn.door43.org/obs/jpg/360px/obs-en-35-07.jpg)

اینطی بَّیه که شِه پی یِره سِره وَر راه دَکِتِه، . هَنتا پی یِره سِرة دیاری نَرِسی پِه ، پی یِر وِره بَدیه، پی یِرِه دِل اَنده وِنِسِّه بَسوتِه کِه وِنِه وَر بَتُتِه وُبوردِه وَ وِره کَشِه خِش هَکِردِه.

![](https://cdn.door43.org/obs/jpg/360px/obs-en-35-08.jpg)

کِچیک ریکا پی یِرِه باتِه: «پی یِر جان، مِن، هَم تِه جا و هَم خِدا جا بَدی و گِناه هَکِردِمه، هَمینتاسّه سِزاور نیمه کِه تِه ریکا بَوّم.»

![](https://cdn.door43.org/obs/jpg/360px/obs-en-35-09.jpg)

مُنتا وِنه پی یِر شِه یِتّا خِدمِت کار ره وَنگ هَکِرده ،باتِه: « دو هَیرین بورین سِرة جِه اَتّه بیتّرین جِمه ره بیارین و مِه ریکایِ تن دَکِنین. اَتّه اَنگوشتِر وِنه اَنگوس بی یِلّین واَتّه کلوش وِنِه لینگِ دَکِنین. اَتِّم پَروارِ گوکزا ره سَر بَورینین تا جَشن بَیریم و بِزَن وُ بِکوب هَکِنیم. چونکه مِه ریکا بَمِرد بی یِه وُ اِسا زِندِه بَیّیه .گُم بَی بی یِه وُ اِسا وِره پيیدا هَکِردِمِه.»

![](https://cdn.door43.org/obs/jpg/360px/obs-en-35-10.jpg)

اینطی، وِشون هَمه گَتِ جِشن بَیتِنه.خَلِه نوگذِشت بی یِه که گَتِه ریکا زَمین سَر جِه سِره دَگِرِسّه کِه لَلِه وا و خونِش و سِما ره بَدیه وُ وِنه دِهون وا بَمونِسّه کِه سِرة دِلِه چِه خَوِره.

![](https://cdn.door43.org/obs/jpg/360px/obs-en-35-11.jpg)

گَتِ ریکا تا بَدونِسّه که چَکّه سما وِنِه کِچیک بِرارِسِره بیَموئنسّه هَسِّه، وِره غِظ بَیتِه و نِخواسّه سِره دِلِه بی یه. وِنِه پی یِر یور بیَمو ُو وِنِه جِه بِخواسّه تا سِره دِلِه بی یِه و جَشنِ دلِه دَواشه، مُنتا وِه پی یِره گپ ره رَد هَکِرده.

![](https://cdn.door43.org/obs/jpg/360px/obs-en-35-12.jpg)

گَتِ ریکا پی یِره باته: «تِمومِ این سالهایِ دِلِه شِه جان و دِلِ جه تِه کارا ره بَرِسیمه و تِه جا وِفادار بیمه! هیچ زَمون تِه دَستور جِه سَر نَپیتِمه و سَرکِش نَیّیِمه .وَ هِچ ماقه نَئ یه که تِه اَتّا بِزکِلِه هِم مِره هَدی تا شِه رَفِقایِ جا هِنیشِم وجَشن بَیرِم. مُنتا تِه اینتا ریکا کِه تِه سَرمایِه ره عَیاشی وُ گِنایِسّه حَروم هَکِردِه و اِسا کِه سِره دَگِرسِّه،تِه وِنه جَشنِسّه اَتّا پَروارِ گوگزا رِه سَر بَوری .»

![](https://cdn.door43.org/obs/jpg/360px/obs-en-35-13.jpg)

پی یِر دَر جِواب باتِه: «آ مِه جانِ ریکا، تِه که هَمیشِه مِه وَر دَری و هَر چی کِه مِن دارمِه تِه وسِّه هَسِّه. اِسا بیتِّرین ماقه هَسِّه کِه جَشن بِیریم و بَزِن وُ بِکوب هَکِنیم، چونکِه تِه بِرار بَمِرد بی یه و زِندِه بَیّیِه. گُم بَیْ بی یِه و پيیدا بَیّیه.» کتابِ مُقَدِسّه جه بَئیته داستان:

*انجیل لوقا فصل ۱۵*

## 36. ۳۶- مسیحِ دیم دَگِرِسّه

https://openbiblestories.org/l/mzn/story-36/

![](https://cdn.door43.org/obs/jpg/360px/obs-en-36-01.jpg)

اَتّه روز عیسی شِه شاگردایِ دِلِه سِه تا ره یعنی، پترس، یعقوب و یوحنا ره بَوِردِه اَتا بِلَند ِکویِ تِک تا هَمِتایی دِعا هَکِنِن.(یوحنایی که عیسی ره تعمید هِدا اَت کَسِ دیگه هَسّه )

![](https://cdn.door43.org/obs/jpg/360px/obs-en-36-02.jpg)

دِعایِ گِدِر عیسایِ دیم اِفتابِ واری سو سو زوئه وَ وِنه جِمه اَلبِسویِ واری سُو داشتِه. اَندِه اِسبِه بَی یه که دِنیایِ دِله وِنِه وَنِکِت پیدا نَی بی یه.

![](https://cdn.door43.org/obs/jpg/360px/obs-en-36-03.jpg)

اونگِدِر موسی و ایلیای پَیغُمبِر دیار بَیّنه. این دِتا مَردی چَن صد سالِ بَمونِس بی یه کِه این ماجِراها پیش بی یه، دِنیای دِله زندگانی کِردِبینه. وِشون عیسای جا گَپ َزونه کَه خلّه نَمونِسّه عیسی اورشَلیمِ دِلِه بَمیره .

![](https://cdn.door43.org/obs/jpg/360px/obs-en-36-04.jpg)

اونگِدِرکه موسی و ایلیا دَینِه عیسایِ جا گپ زونِه، پترس عیسی ره باته: « خَلِه خاره که اِما اینجِه دَرِمی. بی یِل سِه تا نِسومِ کِل بِسازیم، اَتّا تِه وِسّه، اَتّا موسای وِسّه و اَتّام ایلیای وِسّه.» پترس نَدونِسّه چی چی دَرِه گِنِه ، فقط خواسّه اَت چی بَوّه.

![](https://cdn.door43.org/obs/jpg/360px/obs-en-36-05.jpg)

هَنتا پترسِ گَپ تموم نی بیِ یِه که اَتّا بَل بِلِ سوُ اَبر ، بنِه سَر بیِمو و وِشونِ رِه دُوره هَکِردِه و اَبرِ دلِة جه اَتّا وَنگ بیَمو که: « وِه هَسِّه مِه جانِ ریکا که وِنِه جه خِشنود هَسِّمه. وِنه گپ ره گوش بَیرین.» سِه تا شاگردا هُول بَخِردِنه وُ بِنه دَکِتِنه.

![](https://cdn.door43.org/obs/jpg/360px/obs-en-36-06.jpg)

عیسی وشونِ َسر ره دَس بِشته و باته: «هول نَخِرین ،هِرِسین .» وشون هِرِسّا پِه شِه دُورِ وَره هارشینِه، عیسی بَکِته هِچکَس ره اونجه نَدینِه.»

![](https://cdn.door43.org/obs/jpg/360px/obs-en-36-07.jpg)

عیسی و وِنِه شاگردا کوهِ جه بِنه دَگِرسنِه. اونگِدر عیسی وشون ره بَفرمِسّه: « اِسا هَرچی که بَدینی ره هیچکَسِ ره نَوّین.مِه بَمِردِن نَزّیکِه و دِواره زنده بُومِه. دِمبال ِ سَر تِر تّونِنی مردِم ره بَوّین که چی چی بَدینی.» کتابِ مُقَدِسّه جه بَئیته داستان:

*انجیل متی فصل ۱۷ آیه های ۱ تا ۹، انجیل مرقس فصل ۹ آیه های ۲ تا ۸، انجیل لوقا فصل ۹ آیه های ۲۸ تا ۳۶*

## 37. ۳۷- عیسی ایلعازر ره زنده کِندِه

https://openbiblestories.org/l/mzn/story-37/

![](https://cdn.door43.org/obs/jpg/360px/obs-en-37-01.jpg)

اَتّا مَردی بی یِه ایلعازر نوم ، وِه وُ وِنه دِتا خواخِر َمریم ُو مَرتا عیسایِ خَله خِدِمونی و نِدارِ رَفِق بینِنه. اَتّا روز عیسی بِشتوسِّه که ایلعازر خَله ناخش هسّه. اونگِدِر که عیسی اینتا خَوِر ره بشتوسِّه باته: اینتا ناخِشی وِره نَکوشنِه، ِبَلکِم خِدایِ شِکوه وتِوان رِه دیگِرونِسّه نِشون دِنّه»

![](https://cdn.door43.org/obs/jpg/360px/obs-en-37-02.jpg)

دِرِسّه که عیسی وشون ره دوس داشتِه، دِ روز دیگه هِم همونجه ای که دَیّیه، بَمونِسِّه. دِ روز بُگذِشته په عیسی شِه شاگردا ره باتِه: «بِئین دَگِردیم یهودیه .» مُنتا شاگِردا باتِنه: « اَی اِستا، همین چَن روز پیش بی یِه کِه یهودیهٔ مَردِم خواسّنه ته ره بَکوشِن!» در جِواب عیسی باته: « مِه رَفِق ایلعازر بَخِته، مِن وِنِه که وِرِه بیشار هَکِنِم.»

![](https://cdn.door43.org/obs/jpg/360px/obs-en-37-03.jpg)

عیسای شاگردا جِواب هِدانِه: «خِداوندا، اگه وِه بَخِتِه،اَی، خار بوُنه.» اونگِدِر عیسی روشِن وُ بی پَردِه باته: «ایلعازر بَمِردِه. خِشحالِمِه اونجه دَنی بیمِه تا مِره بوُوِر هَکنین.»

![](https://cdn.door43.org/obs/jpg/360px/obs-en-37-04.jpg)

عیسی هَمونتا شهری کِه ایلعازر وِنه دِله زندِگانی کِرد بی یه، بَرِسیِ پِه ، چهار روز ایلعازر بَمِردِنه جه بُگذِشت بیِ یِه. مرتا عیسای پیشواز بُورده و باتِه: «مِه سرور، اگه اینجِه دَی بوئی، مِه بِرار نَمِردِبی یِه. مُنتا مِن بُووِر دارمِه که هرچی خِدایِ جِه بِخواهی هَکِنی تِه رِه بَخشِنِه.»

![](https://cdn.door43.org/obs/jpg/360px/obs-en-37-05.jpg)

عیسی در جِواب باته: «مِن آخِرِت و زندگانی هَسّمه. هرکَس مِرِه بُوور هَکِنِه، اگِرِم بَمیرِه، زِنده بُونِه. هرکَس مِرِه ایمان بیاره نَمیرنه. مِه اینتا گَپ ره بُوور دارنِی؟» مرتا جواب هِدا: « اَره اِستا، مِن بُووِر دارمه که تِه مسیح هَسّی، خِدایِ ریکا.»

![](https://cdn.door43.org/obs/jpg/360px/obs-en-37-06.jpg)

اونگِدِر مَریم عیسای پلی بیَمو و وِنه لینگه په دَکِته و باتِه: « مِه سرور، اگه اینجه دَی بوُیی، مِه بِرار نَمِرده.» عیسی وِشونِ جه بَپِرسیِه: وِره کِجِه خاک هَکِردنی؟» وِشون جِواب هِدانه: «اَتّا آرِمگاه دِلِه ، بِرو و بَوین.» هَمون گِدِر عیسی ره بِرمِه بَئیتِه.

![](https://cdn.door43.org/obs/jpg/360px/obs-en-37-07.jpg)

ایلعازر آرِمگاه اَتّه غار دِلِه بی یه که وِنِه دَم اتّا گتِ سنگ بِشت بینِه. اونگدر که عیسی غارِ دَم برِسیِه وِشون ره باته: «سنگ ره کنار بَزنین!» امّا مَرتا باتِه: «چار روزِه کِه بَمِردِه. اِسا دیگه وِنِه تَن بو بیَمو.»

![](https://cdn.door43.org/obs/jpg/360px/obs-en-37-08.jpg)

عیسی جواب هِدا: « مَگِه ناتمِه مِره بُوور هَکِنين خِدای گَتِ گیری و تِوان رِه وینِّنِی؟» همینتاسّه وِشونِم سنگ ره وَر هِدانه.

![](https://cdn.door43.org/obs/jpg/360px/obs-en-37-09.jpg)

اونگدر عیسی آسمون ره هارشیِه وُ باته: «پی یِر تِه مَمنونِمِه که مِره اِشتونی. دومبِه کِه همیشِه مِره گوش کِنّی، مُنتا اینتا رِه مَردِمِ خاطری باتِمِه کِه اینجه دَرِنه تا ایمان بیارِن که تِه مِره رایی هَکِردی.» این کَش دَستوری وار،شِه بِلّندِ صِدا بِفَرمِسّه: «ایلعازر دَر بِرو!»

![](https://cdn.door43.org/obs/jpg/360px/obs-en-37-10.jpg)

ایلعازر همینطی که وِنِه تَن کَفِن پیچ بیِ یه، شِه گورِ جه دَر بیَمو. عیسی وشون ره باته: «کَفِنه بوشین تا وِه بِتونِه راه بورِه.» خَلِه یهودیا این مٌوجِز ره بَدینِه وُ عیسی ره ایمان بیاردنِه.

![](https://cdn.door43.org/obs/jpg/360px/obs-en-37-11.jpg)

مُنتا گَت گَتای یهودِ دین، حسودی هَکِردِنه، همینتاسِّه اَتّه جا جمع بَیّنِه تا نَقشِه دَکِشِن کِه عیسی و ایلعازِرِ بَکوشِن.

*کتابِ مُقَدِسّه جه بَئیته داستان: انجیل یوحنا فصل ۱۱ آیه های ۱ تا ۴۶*

## 38. ۳۸- عیسایِ پِشتِ خالی کِنّنِه

https://openbiblestories.org/l/mzn/story-38/

![](https://cdn.door43.org/obs/jpg/360px/obs-en-38-01.jpg)

یهودیا هَر سال، پِسَخِ عید رِه جشن گِیتِنِه. اینتا جشن، وِشونِ یاد ایارِدِه که چِطی خِدا چَن صَد سالِ پیش، وِشون پی یِرا رِه مصرِ بَردِگی جِه آزاد هَکِردِه. نَزّیکِ سه سال بی یه که عیسی هَمة وِسّه سِخِنرانی کِرد بی یِه وُ دَرس دا بی یِه، وِه شِه شاگِردا رِه باتِه؛ خوانِه کِه پِسَخِ جَشن رِه وِشونِ هَمکِت اورشلیم دِلِه بَئیرِه. وِه هَمینطیِم باتِه کِه هَمونجِم وِره کِشِنِنه.

![](https://cdn.door43.org/obs/jpg/360px/obs-en-38-02.jpg)

یَهودا؛ عیسایِ شاگرد بیِ یِه و شاگردایِ دیگة خَزانِه دار. وِه ویشتِرِ گِدِر خَزانة جِه پول دِزدی کِرده. عیسی وُ وِنِه شاگِردا اورشَلیم بَرِسی پِه؛ وِنِه شاگِرد یَهودا، پیشواهایِ دینیِ پَلی بُوردِه وُ باتِه کِه اگِه وِرِه پول هَدِن وِهِم عیسی رِه وِشونِ روشِنِه. وِه شِه دونِسِّه که رَهبَرایِ دینی عیسی رِه مَسیح نَدونِنِه وُ خواسِّنِه کِه وِرِه بَکوشِن.

![](https://cdn.door43.org/obs/jpg/360px/obs-en-38-03.jpg)

پیشواهایِ دینی یَهود وُ وِشونِ گَتِ پیشوا، یَهودا رِه سی تا نُقرِه سِکِّه رِشوِه هِدانِه تا وِه عیسی رِه بَروشِه وُ وِشونِ دَسْ هَدِه؛ دِرِس هَمونطی که پَیغُمبِرون پیش پیش باتْ بینِه. یَهودا اَرِه باتِه وُ پول رِه بَئیتِه وُ راه دَکِتِه. هَمونگِدِرا وِه اَتّا خارِماقة دِمبال دَئی یِه تا عیسی رِه هَدِه وِشونِ دَسْ.

![](https://cdn.door43.org/obs/jpg/360px/obs-en-38-04.jpg)

عیسی اورشلیم دِلِه، پِسَخِ عید رِه شِه شاگِردای هِمکِت جَشن بَیتِه. شامِ گِدِر، عیسی نون رِه بَیتِه لاپِّه لاپّه هَکردِه و باتِه: «بَیرین و بَخِرین، وِه مِه تَن هَسِّه که شِمِسِّه فِدا بُونه. مِه یادِگاری بِجا بیارین.» اینطی بَیِ یه که، عیسی باتِّه وِشونِسِّه شِه جان رِه دِنِّه و وِنِه تَن وشونِسِّه قِربونی بُونه.

![](https://cdn.door43.org/obs/jpg/360px/obs-en-38-05.jpg)

اَی عیسی اَتّا شرابِ پی یَلِه رِه بَیته و وشون ره باتِه: «اینتا مِه خون هَسِّه؛ نُو پَیمونِ وِسِّه که شِمِه گِناهای آمِرزِشِ خاطِری بَشِنی بوُنِه، وِرِه بَخِرین. پَسون، اینتا کارِه مِه یادِگاری بِجا بیارین.»

![](https://cdn.door43.org/obs/jpg/360px/obs-en-38-06.jpg)

اَیِّم عیسی شِه شاگِردا رِه باتِه: «شِمه دِله اَتِّ کَس مه پِشت رِه خالی کِنّه.» شاگردا هاج وُ واج بَمونِسِّنِه، بَپِرسینه کِمینتا اینکارِ کِنده. عیسی باتِه: «اونتایی که اینتا لاپِّه نون رِه مِه جِه گیرنِه مِرِه روشِنِه». هَمونگِدِرِم نونِ رِه هِدا یَهودایِ دَسْ.

![](https://cdn.door43.org/obs/jpg/360px/obs-en-38-07.jpg)

یَهودا نون رِه بَیتِه په، شِیطون وِنِه دَرون بُوردِه. وِه یَهودیایِ سَرونِ پیش بُوردِه تا وِشون رِه کُمِک هَکِنِه، عیسی رِه گیر دِمب هَدِنْ، اینا هَمِه شودِلِه پیش بی یَمو.

![](https://cdn.door43.org/obs/jpg/360px/obs-en-38-08.jpg)

عیسی وُ وِنِه شاگردا شوم بَخِردِ پِه، زِیتونِ کویِ وَر رایی بَئینه. عیسی باتِه: «اَمشو شِما هَمِه مِرِه تینار اِلِّنِنی. چونکِه بَنوِشتِه بَئیِه: «چَپّون رِه زَمبِه و گِسفِنا هَمِه رَتّ وُ رَم بُونِنِه.»

![](https://cdn.door43.org/obs/jpg/360px/obs-en-38-09.jpg)

پِترُس باتِه: «اَگِم هَمه تِرِه تینار بِلِّن، مِن تِرِه تینار نَلِمِّه.» عیسی وِرِه باتِه: «شِیطون خوانِه شِما هَمِه رِه شِه وَر بَکِشِه، مُنتا مِن تِسِّه دعا کِمبِه تا تِه بووِرْ فِنا نَوِّه. هَمین تِه؛ اَمشو بَئیتِه تا طِلاوَنگ، سه کَش مِرِه رَد کِندی و گِنی مِرِه نِشناسِنی.»

![](https://cdn.door43.org/obs/jpg/360px/obs-en-38-10.jpg)

پِترُس عیسی رِه باتِه: «اگِه بَمیرِمِم تِرِه رَد نَکِمّه.» شاگِردایِ دیگِم هَمینتا گَپِ رِه بَزّونِه.

![](https://cdn.door43.org/obs/jpg/360px/obs-en-38-11.jpg)

اونگِدِر عیسی وُ وِنه شاگردا جتسیمانیِ لَتِّه وَر بوردِنه. عیسی وِشون ره باتِه دعا هَکِنین که شِیطون شِما رِه گول نَزِنه، هَمینتاسّه وِشون پَلی جِه بوردِه تا اَتِّ جا شِه تِناری نیایِش هَکِنه.

![](https://cdn.door43.org/obs/jpg/360px/obs-en-38-12.jpg)

عیسی سِه کَش اینطی نیایِش هَکِرده: «آ جانِ پی یِر!، اجازه هَدِه این پی یَلة دَرد و رَنج رِه سَر نَکِشِم، اَگه اَتِّه راهِ دیگه دَنیِه که مَردِمِ گِناه رِه بیامِرزی، پس هَمونطی کِه تِه خواسِّه هَسِّه پیش بی یه.» عیسی اَندِه آشوب بی یِه که وِنه صِوالِ تَخت عَرِق خِدِه خون رِه مونِسّه. خِدا اَتِّه فِرشته رِه راهی هَکِردِه تا عیسی رِه ویشتِر تِوان هَدِن.

![](https://cdn.door43.org/obs/jpg/360px/obs-en-38-13.jpg)

هر کَش کِه نیایِش کِردِه، عیسی اَی شِه شاگردای پَلی ایَمو، مُنتا وینسّه کِه وِشون هَنتا بَخِتِنِه. سِیِّمِ مین کَش که دَگِرسِّه، باتِه: « هِرِسّین، اونتا شاگِردکه مِه پِشت ره خالی هَکرده وُ مِره بَروته، اینجه دَرِه.»

![](https://cdn.door43.org/obs/jpg/360px/obs-en-38-14.jpg)

یَهودا، پیشواهای ِ یَهودی وُ سَربازا و اَتِّ خَلِه مَردِمِ هِمکِت بیَمو. وِشون شِه هِمکِت شمشیر و دستِ چو داشتِنِه. یهودا عیسای پیش بیَمو و باتِه: «سِلام اِستا» و وِرِه خِش هِدا. اینتا کار سَرون یَهودیِسّه اَتّا نِشونه بی یه تا وِشون عیسی رِه َبِشناسِن. عیسی وِرِه باته: « یهودا یِتّا خِشِ جا مِره روُشِنی؟»

![](https://cdn.door43.org/obs/jpg/360px/obs-en-38-15.jpg)

اونگِدِر که سربازا عیسی رِه گیر دِمبِدانه، پترس شِه شمشیرِ دَر بیاردِه و گتِ پیشوای نوکِر گوش رِه بَورییِه. عیسی وِرِه باته: «شِه شمشیرِ بی یِل وِنه جا سَر . مِن تومبِه شِه پی یِر جِه بِخوام که اَتّا اَرتِش فِرِشتِه رِه مِه یاری بَرِسِنه. مُنتا وِنِه که شِه پی یِر گَپ رِه فَرمون بَوِرِم» عیسام اونتا مَردیِ گوش رِه شِفا هِدا و شاگردا همه دَر بوردِنِه. کتابِ مُقَدِسّه جه بَئیته داستان:

*انجیل متی فصل ۲۶ آیه های ۱۴ تا ۵۶، انجیل مرقس فصل ۱۴ آیه های ۱۰ تا ۵۰، انجیل لوقا فصل ۲۲ آیه های ۱ تا ۵۳، انجیل یوحنا فصل ۱۸ آیه های ۱ تا ۱۱*

## 39. ۳۹- عیسای باز پُرسی

https://openbiblestories.org/l/mzn/story-39/

![](https://cdn.door43.org/obs/jpg/360px/obs-en-39-01.jpg)

نیمه شو، سَربازا عیسی رِه گَتِ پیشوایِ سِره بَوِردِنِه تا وِنِه جه چِکِلِ پِرسی هَکِنِن. پِترُسِم اَتی دِمبال تِر وِشونِ پِشتِ سَر اییَمو و عیسی رِه کِه سِرة دِله بَوِردِنِه، پترُس اون سِرِة دَرِه پِشت تَشِ وَر اِس هَکِرد بی یِه تا شِه خِدِره گَرم هَکِنه.

![](https://cdn.door43.org/obs/jpg/360px/obs-en-39-02.jpg)

سِرِه دِلِه، سَرونِ یِهودی عیسایِ جه چِکِلِ پِرسی کِردنِه. وِشون اَتِ خَلِه دِراغی شاهِدا رِه بیاردِنِه کِه اَلِکی عیسی رِه بُهتون زونِنِه. مُنتا وِشون گَپ هِدی جا ،جور نَیّه، هَمینتاسّه سَرونِ یَهودی نَتّونِستِنِه عیسایِ گِناه رِه وِنه گِردِن دِمبَدِن. عیسام لام تا کام گَپ نَزّو .

![](https://cdn.door43.org/obs/jpg/360px/obs-en-39-03.jpg)

آخِر سَر،گَتِ پیشوا عیسی رِه هارِشیه و باتِه: «اِمارِه بِاُو کِه تِه هَمون مسیح ، خِدایِ زِندِة ریکا هَسّی یا نا؟»

![](https://cdn.door43.org/obs/jpg/360px/obs-en-39-04.jpg)

عیسی باته: «اَرِه هَسّمِه، و اَتّا روز مِرِه وینِّنی که خِدایِ راسِ دَس هِنیشتِمِه و آسِمونِ جِه دِواره بِنِه اِمبه.»گَتِ پیشوا، که عیسایِ بَزِّه گَپِ جِه وِرِه خَلِه غِظ بَیت بی یِه، شِه جِمِه رِه چاک بَّزو و شونگ بَکِشیه وُ پیشواهایِ دینی رِه باتِه: شاهِدایِ ویشتِر دیگه نِخوامی اِما. هَمه بِشتوسِّنه کِه وِه باتِه مِن خِدایِ ریکا هَسِّمه.اِسا شِمِه رای چی شیه؟»

![](https://cdn.door43.org/obs/jpg/360px/obs-en-39-05.jpg)

سَرونِ یَهودی هَمه ،گَتِ پیشوا رِه جواب هِدانِه: «وِنه سِزائه کِه بَمیرِه.» هَمینتاسّه عیسایِ چِش رِه دَوِسِّنه. وِنِه ديم ره فِلیک دِم هِدانِه، وِرِه دَروشتِنِه و دَس دِمبدانِه.

![](https://cdn.door43.org/obs/jpg/360px/obs-en-39-06.jpg)

پترُس سِرة دَر پِشت اِس هَکِرد بی یِه. که هَمون سِرهٔ دَس مَره وِرِه بَدیه و باتِه: «تِئم عیسایِ هِمکِت دَئیی» پِترُس گِس نِدا وِره ، اَت کَم بوگذِشتِه په، اَت دیگِه دَسمَره هَمینتا گَپِ وِرِه بَزّو و اَی پِترُس نِشتوس بَئیته. دَس آخِر آدِمایی کِه اون دُور و وَر دَیّینِه وِرِه باتِنِه: «اِما دومبی کِه تِه عیسایِ شاگِرد هَسّی، چونکِه تِئم جَلیلی هَسّی.»

![](https://cdn.door43.org/obs/jpg/360px/obs-en-39-07.jpg)

اونگِدِر پترُس خِدا رِه گِوا بَیتِه وُ باتِه: «خِدا مِرِه بَکوشه اَگه مِن اینتا مَردی رِه بِشناسِم.» هَمون دَم طِلا ونگ بَزّو وُ عیسی دَگِرسه پِترُسِ هارِشیه.

![](https://cdn.door43.org/obs/jpg/360px/obs-en-39-08.jpg)

پترُس بوردِه وگِلِم گِلِم اَسلی بَشِنیه. هَمونگِدِرِم ، یهودا کِه وِنِه پِشتِ خالی هَکِرد بی یِه تا بَدیه کِه یَهود گَت گَتون عیسایِ بَکوشتن ره مُهر َکِردِنه . اَنده غم و غِصه وِرِه سَر بَیتِه که بورده شِه خِدِرِه بَکوشتِه.

![](https://cdn.door43.org/obs/jpg/360px/obs-en-39-09.jpg)

هَمونروزا پیلاتُس کِه رومی بی یه وَ یَهودایِ فَرمونداری وِنِه دَس دَی بی یه. سَرون یَهودی عیسی رِه وِنِه پیش بَوِردِنِه. وِشون خواسّه بی یِه کِه پیلاتُس عیسایِ بَکوشتِن رِه اِمضا هَکِنِه. پیلاتس عیسیایِ جِه بَپِرسیه: «تِه یَهودِ پادِشاه هَسّی؟»

![](https://cdn.door43.org/obs/jpg/360px/obs-en-39-10.jpg)

عیسی جِواب هِدا: «دِرِس باتی.مُنتا مِه پادِشاهی، دِنیایی نی یِه. اَگِه اینطی بَی بُو ، مِه هِوا خواها مِه وِسّه جنگ کِردِنِه. مُنتا مِن دِنیایِ دِلِه بیَمّه تا راسّی ره خِدایِ دَرواره هَمیِسّه بَوّم. هَر کَس کِه راسّی رِه دوس دارِه مِه گَپِ رِه گوش کِنِده.» پیلاتُس بَپِرسیه: « راسّی چی شیه؟»

![](https://cdn.door43.org/obs/jpg/360px/obs-en-39-11.jpg)

پیلاتُس عیسایِ جا گَپ بَزّو ، پِه مَردِمِ پَلی بُوردِه و باتِه: « مِن اینتا آدِمِ جِه گِناهی نَدیمِه کِه وِنه وِره بَکوشِم.» مُنتا سَرونِ یِهودی و مَردِم داد زونِنه و گِتِنِه: « صَلیب بَکِشین وِرِه.» پیلاتُس جِواب هِدا: «وِه گِناهکار نی یِه» مُنتا مَردِم این کَش بِلِنتِر داد بَزّونِه و باتِنِه. اَی سِیِّمین کَش پیلاتُس باتِه: «وِه گِناهکار نی یِه.»

![](https://cdn.door43.org/obs/jpg/360px/obs-en-39-12.jpg)

پیلاتُس بَتِرسیه که نَکِنِه شورِش بَوِّه، هَمینتاسّه وِشون رِه اَرِه باته و عیسی ره شِه سَربازایِ دَس هِدا تا وِرِه صلیب ِ دارِ تن چار مِخ بَکِشِن. روُمِ سَربازام عیسی رِه شِلاقِ جِه دَروشتِنه وُ رَختِ شاهی ره وِنِه تَن دَکِردِنِه و تَلیِ جِه تاج دِرِس هَکِردِنِه و وِنه سَر بِشتِنِه. وِرِه دَس دِمبِدانِه و گِتِنِه: «زندِه بَمونه یَهودِ پادِشاه» کتابِ مُقَدِسّه جه بَئیته داستان:

*انجیل متی فصل ۲۶ آیه ۵۷ و فصل ۲۷ آیه ۲۶، انجیل مرقس فصل ۱۴ آیه ۵۳ تا فصل ۱۵ آیه ۱۵، انجیل لوقا فصل ۲۲ آیه ۵۴ تا فصل ۲۳ آیه ۲۵، انجیل یوحنا فصل ۱۸ آیه ۱۲ تا فصل ۱۹ آیه ۱۶*

## 40. ۴۰- عیسی صَلیبِ دار بورده

https://openbiblestories.org/l/mzn/story-40/

![](https://cdn.door43.org/obs/jpg/360px/obs-en-40-01.jpg)

سَربازا عیسی رِه دَس دِمبِدا پِه، وِرِه یور بَوِدِنِه تا صَلیب بَکِشِن. وِشون عیسی رِه زور هَکِردِنِه کِه شِه صلیبِ چو رِه شِه دوشِ سَر بَوِرِه.

![](https://cdn.door43.org/obs/jpg/360px/obs-en-40-02.jpg)

سَربازا عیسی ره اَتّا جا بوِردِنه که اونجِه رِه جُلجُتا گِتنِه (یعنی سَرِکاسه ) عیسایِ دَس و پِه رِه صلیبِ دارِ تَن مِخ بَزونِه. مُنتا عیسی باتِه: «پی یِر جان! مردِم گِنا رِه بِبخش، چونکِه وشون نَدونِنِه دَرِنِه چیکار کِننِه.» پیلاتس دَستور هِدا عیسای سرِ بالا اَتّا تَختِه بِشتِنِه که وِنِه پِشت بَنوِشت بی یِه: وِه یهودِ پادشاه هَسِّه.

![](https://cdn.door43.org/obs/jpg/360px/obs-en-40-03.jpg)

اونگِدِر سربازا عیسای رَخت وسِّه قرعه دِمبِدانِه. اینتا کارِ جا کتاب مقدسِ پیشگویی دِرِس دَر بیَمو که گِنِه: «مِه رَختِ رِه بوسِّنینه، شِه میون رَسِت هَکِردنِه و مه قِبایِسّه قرعه دِمِّبِدانِه.»

![](https://cdn.door43.org/obs/jpg/360px/obs-en-40-04.jpg)

سَربازا همونگِدر، دِتا دِزد رِم صلیبِ تَن چارمِخ بَکِشینه و عیسی رِم وِشون دِ تایِ میون صلیبِ دارِ تَن چار مِخ بَکِشینِه. اَتّا دِزد عیسی رِه دَس دِمدا، مُنتا اون اَتّا دِزدِ وِرِه باتِه:«تِه خِدایِ جِه نَتِرسَنی؟ اِما گِناهکارِمی مُنتا اینتا مَردی بیگِناه هَسّه» هَمونگدِر عیسی ره باتِه: «عیسی! شِه پادشاهی دِله مِره شِ یاد بیار.» عیسی وِره جواب هِدا: «تِه همین اَمروز مِه هِمکِت، بِهشتِ دِلِه دَری»

![](https://cdn.door43.org/obs/jpg/360px/obs-en-40-05.jpg)

یَهودِ دینِ گَت گَتا ومَردِمی کِه اونجِه دَی بینِه عیسی رِه دَس دِمبّدانِه وَ گِتِنِه: « تِه اگِه خِدایِ ریکا هَسّی، صلیبِ دارِ جِه بِنِه بِرو و شِه خِد رِه آزاد هَکِن! اون ماقع اِما تِره بوُوِر کِمبی.»

![](https://cdn.door43.org/obs/jpg/360px/obs-en-40-06.jpg)

دِرِسّه کِه چاشتِ گِدِر بی یه، مُنتا اون دور و وَرایِ آسِمون سیو وُ کَهو بَییّه. اینتا سیویی سه ساعِت بَکِشیه.

![](https://cdn.door43.org/obs/jpg/360px/obs-en-40-07.jpg)

اونگِدِر عیسی شونگ بَکِشیه: «تموم بَیّیه. پیِ یِر جان، شِه روح رِه تِه دَس دِمبّه.» اونگدِر وِنه گِس دَکِتِه وشِه سَر جِر بیاردِه وشِه روح رِه خِدایِ دَس بِسپارِسِّه. اونگِدر که جان دَر هدا بِنه ره لَرزه دَکِته وُ پَرِستِشگاهِ گتِ پرده( یا هَمون قدس الأقداس) کِه مَردِمِ رِه خِدایِ جایگاهِ جِه جِدا کِرد بی یِه ، بِن تا بالا لاپ بَخِرده وُ بوسّه.

![](https://cdn.door43.org/obs/jpg/360px/obs-en-40-08.jpg)

عیسی شِه مرگِ جا اَتّه راه وا هَکرده تا مَردِم بِتونِن وِنه پِشتی خدایِ پیشگاه بی یِن. اَتّه رومی پاسِبون کِه اینتا پیش آمِد رِه بَدیه، باتِه: «راس راسی کِه اینتا مَردی بی گِناه بی یِه و خِدایِ ریکا هَسِّه»

![](https://cdn.door43.org/obs/jpg/360px/obs-en-40-09.jpg)

اونگِدِر دِ تَن سَرونِ یهودی، نیقوُدیموس و یوسِف نوم که بوُوِر داشتِنِه عیسی هَمون مَسیحْ وعده بَئي هَسِّه، پیلاتُسِ پیش بوردِنِه وُ عیسایِ جِنازه رِه وِنِه جِه بِخواسِّنِه. وِشون عیسایِ تَن رِه اَتّا کَتونِ پارچة جا دَپیتِنِه و آرِمْگاهِ دِلِه که غارِ واری بی یِه بِشتِنِه، اَتّا گَتِ سَنگِم آرِمْگاهِ دَرِ سَر پِتی هِدانه کِه دَوِسْ بَوشه. کِتابِ مُقَدِسّ جه بَئیته داستان:

*کتاب انجیل متی باب ۲۷ آیه‌های ۲۷ تا ۶۱، کتاب انجیل مرقس باب ۱۵ آیه‌های ۱۶ تا ۴۷، کتاب انجیل لوقا باب ۲۳ آیه‌های ۲۶ تا ۵۶، کتاب انجیل یوحنا باب ۱۹ آیه‌های ۱۷ تا ۴۲*

## 41. ۴۱- خِدا عیسی رِه مِردِه هایِ  دله جِه راسْ کِنده

https://openbiblestories.org/l/mzn/story-41/

![](https://cdn.door43.org/obs/jpg/360px/obs-en-41-01.jpg)

سَربازا کِه عیسی رِه صَلیب بَکِشینه، گَتْ گتایِ یهودی پیلاتس َپلی بوردِنه و باتِنِه: «عیسی دِرو باتِه که سِه روز بَمردِه پِه اَی زِنده بوُنه، هَمینتاسِّه که عیسایِ شاگِردا نَتونِن وِنِه جِنازه رِه دِزدی هَکنِن، وِنِه کِه یِتّا آدِم رِه سِه روزِ تِموم آرِمگاهِ دُور وُ بَر پاسِبونی هَکِنِن. اَگِه بِتونِن جِنازه رِه بِلِن هَکِنِن بَوِرِن، اونگِدِر اِشتِلِم کِنِنه که بَمِردِه آدِم دِوارِه زِندِه بَئییِه.»

![](https://cdn.door43.org/obs/jpg/360px/obs-en-41-02.jpg)

پیلاتس باته: « چَن تا سَرباز شِه هِمکِت بَوِرین آرِمگاه دَرِسَر و تا تِوان دارنِنی َهَمونجه پاسِبونی هَکِنین.» اونگِدِر وِشون، آرِمگاه سَنگِ وِرودی رِه نِشون بَزّونِه و سربازا رِه بِشتِنِه هَمونجه تا پاسِبونی هَکنن که هِچ کَس نَتونِه اونجهٔ جه جِنازه ره دِزّی هَکِنه.

![](https://cdn.door43.org/obs/jpg/360px/obs-en-41-03.jpg)

اَتّه روز بوگذِشتِه وُ عیسی رِه خاک هَکِردِه پِه، شَبّات یا هَفتِمین روز هَفتِه بیِ یِه کِه هِچ کاری نَوِسِّه هَکِنِن. عیسای رَفِقا هیچکِدوم نَتونِسِّنه آرِمگاه بُورِن. مُنتا صِواحی سَر، چَنتا زنا شِه خِدرِه آماده هَکِردنِه که عیسای آرِمگاه دِلِه بُورِن و شِه رسم واری، عیسایِ جِنازِه رِه خِشبو هَکِنن.

![](https://cdn.door43.org/obs/jpg/360px/obs-en-41-04.jpg)

زَنون اونجه نَرِسی پِه، اَتّه گَتِه زَمین لَرزة آرِمگاه کِنار پیش بیَمو و اَتّا فِرِشتِه آسِمونِ جِه بِنِه بیَمو، آرِمگاه سنگِ وِرودیِ رِه وَر هِدا وُ سنگِ سَر هِنیشتِه. اونتا فرشته اَسمونِ اَلبِسویِ واری سوسو زوئِه. پاسبونا که وِه ره بَدینِه اَندِه بَتِرسینِه و هول بَخِردِنِه که اَتّا مِردة وَنِکِتْ بِنِه دَکِتنه.

![](https://cdn.door43.org/obs/jpg/360px/obs-en-41-05.jpg)

اونگِدِر کِه زَنون آرِمگاه بَرِسینِه، فِرِشته وِشون رِه باتِه: «هول نَخِرین، عیسی اینجِه دَنیِ یه. وِه همونطی که بات بیِ یِه، بَمِرده پِه مِردِه هایِ دلِة جِه هِرِسّا. «بی یین آرِمگاهِ دِلِه رِه هارِشین.» زَنون آرِمگاهِ دِلِه رِه هارِشینِه و هَمونجِه کِه عیسایِ جِنازِه رِه بِشت بینِه رِه بَدینِه، مُنتا جِنازِه رِه پيدا نَکِردِنِه.

![](https://cdn.door43.org/obs/jpg/360px/obs-en-41-06.jpg)

اونگدِر فرشته زَنون ره باتِه: «بُورین شاگردا رِه بَوّین کِه عیسی مِردِه هایِ دِلِه جِه هِرِسّا، و شِمِه تون زودتِر جَلیل رِسِنه»

![](https://cdn.door43.org/obs/jpg/360px/obs-en-41-07.jpg)

زَنون هَمینطی کِه هاج و واج وُ خِشحال بینِنه، شاگِردایِ وَر بوردِنِه تا خَوِرِ خِشِ وِشون رِه هَدِن.

![](https://cdn.door43.org/obs/jpg/360px/obs-en-41-08.jpg)

هَمطی که زَنون بَتِج بَتِج شاگردای ور شینِنه تا خَوِرِ خِش رِه هَدِن، ناگِمونی عیسی وشون چِشِ پیش دیار بَییِّه. وِشونِم ساق دَکِتِنِه وُ شِه صُوال رِه بِنِه بِشتِنِه. عیسی وِشون رِه باتِه: «هول نَخِرین! بُورین وُ مِه شاگردا رِه بَوّین کِه جلیل بورِن، هَمونجه تونِّنِه مِرِه بَوینِنْ.» کِتابِ مُقَدِسّ جه بَئیته داستان:

*کتاب انجیل متی باب ۲۷ آیه ۶۲ تا باب ۲۸ آیه ۱۵؛ کتاب انجیل مرقس باب ۱۶ آیه‌های ۱ تا ۱۱؛ کتاب انجیل لوقا باب ۲۴ آیه‌های ۱ تا ۱۲؛ کتاب انجیل یوحنا باب ۲۰ آیه‌های ۱ تا ۱۸*

## 42. ۴۲- عیسی آسِمونِ وَر دَگِرِسّه

https://openbiblestories.org/l/mzn/story-42/

![](https://cdn.door43.org/obs/jpg/360px/obs-en-42-01.jpg)

اون روز کِه خِدا عیسی رِه مِردِه هایِ دِلِة جِه راسْ هَکِردِه، وِنِه دِتا شاگِرد کِه هَمون وَرا اتّه شهرِ دیگِه دَی شینِه، عیسایِ دَروارِه گَپِ زو بینِنه که چی شی وِنِه سَر بی یَمو. وِشون دلِ اَرمون بی یِه که عیسی هَمون مَسیحِ وَعدِه بَئی بَوّه، مُنتا اِسا دیگِه وِرِه بَکوشت بینِه. زَنونِم گِنِنِه وِه دِوارِه زنده بَیِّه، مُنتا شاگِردا نَدونِسِّنِه کِه چی شی رِه بُوِوِر هَکِنِن.

![](https://cdn.door43.org/obs/jpg/360px/obs-en-42-02.jpg)

عیسی شاگِردِایِ تَنِ وَر بُورده و وِشونِ جا گَپ بَزّو مُنتا وِشون عیسی رِه نِشناسینه. عیسائِم وِشون جه بَپِرسیه که چی شیه دَرواره گَپ زَنِنه. وِشون عیسی ره باتِّنه که این چَن روز، عیسای سَرگِذِشتِ خَوِری گَپ زَمبی. وِشون گِمون کِردِنه که عیسی اَتّا ناشِناسِه که اورشلیم دِلة پیش آمد رِه خَوِردار نی یِه.

![](https://cdn.door43.org/obs/jpg/360px/obs-en-42-03.jpg)

اونگِدِر عیسی وِشونِ وِسّه خِدایِ کلام و عیسای زنده بَیِّن رِه شَرح هِدا. خَله پیشتِرا پَیغُمبِرا بات بینِه کِه بدکارا وُ بَدجِنسا عیسی رِه شِکِنجِه کِنِنه وُ وِرِه کِشِنِنه، مُنتا عیسی سِیِّمین روز؛ دِوارِه زندِه وونِه.

![](https://cdn.door43.org/obs/jpg/360px/obs-en-42-04.jpg)

اون دِتا مَردی که شِه سِره بَرِسینه، شامِ گِدِر بی یِه و عیسایِ جِه بِخواستِنه که اون شو رِه وِشون پَلی سَر هَکِنِه. عیسائِم اَرِه باتِه وُ وِشونِ هِمکِت اَتّا سِره دِلِه بوردِه. شامِ سَر کِه هِنیشتِنِه عیسی نون رِه بَیتِه و خدا رِه شُکر هَکِردِ پِه نون رِه لاپِّه هَکِردِه. دَر دَم دِتا مَردیِ چِش سو بی یَمو وُ عیسی رِه بِشناسینه. مُنتا هَمون دَم عیسی وِشونِ چِشِ پیش ناپَدید بَیِّه.

![](https://cdn.door43.org/obs/jpg/360px/obs-en-42-05.jpg)

وِشون دِئی رِه باتِنه: «وِه عیسی بی یِه، چونکه کتاب مُقَدِّس بَنِوشتِه رِه اَمِسّه که باتِه، اَمِه دل لَرزه دَکِتِه.» هَمینتاسّه هَمون گِدِر اورشلیمِ وَر دَگِرِسِنِه وُ بَرِسی پِه، شاگِردا رِه باتِنِه: «عیسی زِندوئه،! اِما وِره بَدیمی»

![](https://cdn.door43.org/obs/jpg/360px/obs-en-42-06.jpg)

هَمونگِدِر که وِشون گَپ بَزوئن سَرگَرم بینِنه، ناگِمونی عیسی وِشونِ چِشِ پیش دیار بَیِّه و باتِه: «سِلامتی شِمِسّه بَوّه» شاگِردا گِمون هَکِردِنه روح بَدینه، مُنتا عیسی وِشون رِه باتِه: «چی شیسّه هُول بَخِردِنی! شَک دارنِنی کِه من عیسامه؟ مِه دَسْ وُ لینگِ بَوینین. اِرواح مِه وَنِکِت تَن نِدارنِنِه.» خواسّه که وِشون رِه هالی هَکِنه روح نی یِه، وِشونه جِه خِراک بِخواسِّه تا هَدِن وِه بَخِره. وِشونِم، چَن تا بِرش ماهی هِدانه وِرِه وُ وِئم بَخِرده.

![](https://cdn.door43.org/obs/jpg/360px/obs-en-42-07.jpg)

عیسی باتِه: «مِن شِماره بات بیمِه که هَر چی خِدایِ کِلام مِه دَرواره باتِه رِه، وِنه کِه پیش بی‌یِه» اونگِدِر عیسی وِشونِ یاری هِدا کِه خِدایِ کِلام رِه بیّتِر سَردَر بِیارِن. وِه باتِه: «خَلِه قَدیم سالِماه، پَیغُومبِرای کتابایِ دِلِه بَنِویشتْ ‌بی یِه؛ مسیح که خِدایِ وَعدِه بَئی بی‌یِه، وِنِه که خَله زارِ بِلا بَکِشه و بَمیرِه و سِه روز بَمِردِه پِه، اَی زِنده بَوِّه»

![](https://cdn.door43.org/obs/jpg/360px/obs-en-42-08.jpg)

پَیغُومبِرا اَی باتْ‌بینه که مِه شاگردا خِدایِ کلِام رِه هَمِه جا جار زَنِنِه و هَمِه رِه گِنِنه وِنه که توبه هَکِنن. هرکَس توبه هَکِنه خِدا وِشونِ گِناها رِه بَخِشِنه. مِه شاگردام اینتا خَوِرِه اورشَلیمِ جه شروع کِنِنه، اونگِدِر هَمه مَردِمون میون شونِنه و هَمه جا سَر زَنِنه. شِما مِه گَپ وُ مِه رفتار وُ هَر چی کِه مِه سَر بی یَمو رِه گِواه هَسِّنی.

![](https://cdn.door43.org/obs/jpg/360px/obs-en-42-09.jpg)

عیسی این چِل روزِ دِله که دِواره زنده بَییِّه، چَن کَش شِه خِد رِه وِشونِه دیاری هِدا، وِه اَتِّ کَشِمْ شِه خِدِرِه ۵۰۰ تَنِ چِش‌ پیش دیاری هِدا. وِه هَمِه جوره شِه شاگِردا رِه نِشون هِدا که زِنده هَسِّه و خِدایِ پادِشاهیِ دَرواره وِشون ره یاد دائه.

![](https://cdn.door43.org/obs/jpg/360px/obs-en-42-10.jpg)

عیسی شِه شاگردا ره بِفَرِمِسّه: « خِدا هرچی آسمون و زمین دِله دَره ره مِه دَس بِسپارِسّه. اِسا بورین، و تِمومِ مَردِم رِه مِه شاگِرد هَکِنین و وِشون رِه پی‌یِر، پِسِر و روحِ قِدّوس نوم؛ تَعمید هَدین و وِشون رِه یاد بَدین اون دَستورایی کِه مِن شِمارِه هِدامِة جِه فَرمون بَوِرِن. شِمِه یاد دَوُشِه کِه مِن هَمیشه شِمِه هِمکِت دَرِمه.»

![](https://cdn.door43.org/obs/jpg/360px/obs-en-42-11.jpg)

عیسایِ زنِده بَیّینِ جِه چِل روز بوگذِشتهِ، وِه شِه شاگِردا رِه اینطی بِفَرمِسّه: «اورشَلیم دِلِه بَمونین که مِه پی‌یِر، شِما ره روحِ قِدّوسِ جا قِد و قُوِّت هَده» اونگِدِر عیسی رِه وِشونِ چِشِ پیش، آسمون دِلِه بَوِردِنِه و عیسی اَتّا اَبر دِله ناپَدید بَیّیه. عیسی خِدای راستِ دَس هِنیشته که همه چی رِه فَرموندِهی هَکِنه. کِتابِ مُقَدِسّ جه بَئیته داستان :

*کتاب متی باب ۲۸ آیه‌های ۱۶ تا ۲۰؛ کتاب مرقس باب ۱۶ آیه‌های ۱۲ تا ۲۰؛ کتاب لوقا باب ۲۴ آیه‌های ۱۳ تا ۵۳؛ کتاب یوحنا باب ۲۰ آیه‌های ۱۹ تا ۲۳؛ کتاب اعمال باب ۱ آیه‌های ۱ تا ۱۱*

## 43. ۴۳- کِلیسا شِروع بوُنِه

https://openbiblestories.org/l/mzn/story-43/

![](https://cdn.door43.org/obs/jpg/360px/obs-en-43-01.jpg)

عیسی آسِمونِ دِلِه دَگِردِسِّه پِه، شاگردا هَمونطی که عیسی دَستور هِدا بی یِه، اورشلیمِ دِله بَمونِسِّنِه. ایماندارا هَمیشِه هِدی پَلی جَم بینه‌ تا دِعا هَکِنِن.

![](https://cdn.door43.org/obs/jpg/360px/obs-en-43-02.jpg)

یهودیا هر سال اَتّا روز که وِنه نوم پِنتیکاست بیِ یِه که وشونِسِّه ارزش داشته رِه جَشن گیتِنه. اینتا جَشن؛ پِنجاه روز پِسَخِ جَشنِ جِه بوگذِشتِه پِه بی یِه. پِنتیکاست؛ هَمون گَنِّم تاشیِ جَشن بی یِه کِه یَهودیا گیتِنِه. وِشون هَر جایِ دِنیا کِه دَی بی بُون اون روز رِه اورشَلیمِ دِلِه جَمع بینِه تا هِدیِ جا جَشن بَیرِن. اَتّه هَفتِه بَئی په که عیسی آسِمونِ دِلِه بوردِه، هَمون سالِ پَنتیکاستِ جَشنِم وَر بَخِرد بی یِه.

![](https://cdn.door43.org/obs/jpg/360px/obs-en-43-03.jpg)

اونگِدِر که همة ایماندارا اَتّا جا جَمْ بَی بینه، ناگِمون اَتّا وَنگ که تِنِّ وایِ واری زُوز کَشیِه بِشتوسِّنه. اَتِّ چی هِم تَشِ واری وِشون سَر اَلوُ بَکِشی یِه. اون گِدِر بیِ یِه که هَمِه روح‌ِ قِدّوسِ جه پِر بَئینه وُ خِدا رِه غریبِ زِوُونایِ جا پرستش کِردِنِه کِه شِه اون زِوونا رِه بَلِد نَی بینِه. روح‌ِ قِدّوس وِشون رِه اینتا تِوانایی رِه بِبَخشیِه که اَتّا غَریبِ زِوُون گَپْ بَزِنِن.

![](https://cdn.door43.org/obs/jpg/360px/obs-en-43-04.jpg)

اونگِدِر اون آدِمایی کِه اورشلیم بیَم بینه، تا اینتا گَپ گَپِه رِه بِشتوسِّنِه، هِدی پَلی جَم بَیّنه تا بَوینِن چِی شی بَیِّه. وِشون بِشتوسِّنِه که ایماندارا خِدای گتِ کارا ره دَرِنِه دیگِرونسّه گِنِنِه. وِشون اینتا پیش آمِد جِه یِکِّه بَخِردِنِه. چونکه اونایِ گَپ وِشون رِه حالی بی یِه. وِشون کِشوَرِ دِلِه مَردِم چَنتا زِووُن گَپ زونِه. شاگِردا اسرائیلی بینِه و تِنا تونِسِّنِه زِوُونای آرامی، عِبرانی، یونانی گَپ بَزِنِن. مُنتا وِشون بِشتوسِّنِه کِه شاگِردا دَرِنِه وشونِ ماری زِووُنِ جا خِدای هَکِرده کار رِه گِنِنِه.

![](https://cdn.door43.org/obs/jpg/360px/obs-en-43-05.jpg)

اَتی هِم گِتِنه شاگردا مَست بَئینه. امّا پِترُس هِرِسّا وُ وِشونِ رِه باته: «گوش هَکِنین! این مَردِم مَست نینه اینتا هَمون یوئیلِ پَیغُمبِر پیشگویی هَسِّه که خِدا بات بیِ یِه؛ آخِرین روزا، مِن شِه روح رِه تمومِ مَردِمِ سَر شَندِمه.»

![](https://cdn.door43.org/obs/jpg/360px/obs-en-43-06.jpg)

آی اسرایلیا، عیسی اَتّا آدِم بیِ یِه کِه شاهکارایی هَکِرده تا شِه خِدرِه اِما رِه نِشون هَدِه تا اِما وِرِه بِشناسیم. وِه خِدای تِوانِ جا خَلِه عَجیب غریبِ کارا هَکِرده. شِما شِه دوُنِنِی، وِنِه کارا رِه بَدینی، مُنتا وِره صَلیبِ دار بَکِشینی»

![](https://cdn.door43.org/obs/jpg/360px/obs-en-43-07.jpg)

عیسی بَمِرده، مُنتا خِدا مِردِه هایِ دِلِة جِه وِره راسْ هَکِرده. اینتا اون پَیغُمبِرِ پیشگویی هَسِّه که باتِه: تِه نِلِّنی تِه پاک و مُقَدِّسِ وَچة تَن گورِ دِله بَپیسه. اِما گِواه هَسِّمی که خِدا عیسی رِه مِرده‌های دِلِه جِه زِندِه هَکِرده.

![](https://cdn.door43.org/obs/jpg/360px/obs-en-43-08.jpg)

«خِدایِ پی یِر، اِسا عیسی ره بِلِن ترین جایگاهِ آسِمون، شه راستِ دَسْ بِشتِه. عیسی همونطی که وَعده هِدا بیِ یِه روح‌ِ قِدّوس ره اَمه وِسّه رایی هَکِرده. اینکارا رِه که اَمروز وینِّنی و اِشتوننِی، روح‌قِدّوس اَنجام دِنِّه.»

![](https://cdn.door43.org/obs/jpg/360px/obs-en-43-09.jpg)

«شِما عیسی رِه صلیبِ دار بَکِشینی، بوُوِر هَکِنین که خِدا وِره، خِداوند و مَسیح، نِشون هَکِردِه.»

![](https://cdn.door43.org/obs/jpg/360px/obs-en-43-10.jpg)

پترُسِ گَپ خَلِه مَردِمِ دِل هِنیشته وُ وِشون رِه این رو اون رو هَکرده. هَمینتاسِّه وِنِه جِه و شاگِردای دیگه جِه بَپِرسینِه: «آی بِرارون، اِسا وِنه چِکار هَکِنیم؟»

![](https://cdn.door43.org/obs/jpg/360px/obs-en-43-11.jpg)

پترس جِواب هِدا: «شِما هَمِه خِدایِ دَستِش هَسِّنی که شِمِه گِناها رِه بِبَخشِه. هَمینتاسِّه که ونِه خِدایِ وَر دَگِردین وَ عیسای نومِ جا تَعمید بَیرین. اونگِدِر خِدا روحِ قِدّوُس رِه اَتّه پیشکشِ واری شِما رِه بَخشِنِه.»

![](https://cdn.door43.org/obs/jpg/360px/obs-en-43-12.jpg)

نزدیکِ ۳۰۰۰ تَن پترسِ گَپ رِه بشتوسِّنه و ایمون بیاردِنِه وُ عیسای شاگِرد بَئینه. وِشون اوُیِ جا تعمیدِ بَیتِنه و اورشلیم ایماندارایِ جَمعِ دلِه اضافِه بَئینِه.

![](https://cdn.door43.org/obs/jpg/360px/obs-en-43-13.jpg)

ایماندارا هَمیشِک رسولای دَرسا رِه گوش کِردِنه. هِدی پَلی جَم بینِه، هِدی پیش خِراک خِردِنه و دِعا و نیایِش کِردِنه. وِشون، جَم دِلِه خِدا رِه پِرستش کِردنه و هرچی داشتِنِه هِدی جا رَسِت کِردِنه. مردِم وِشونِ خَوِری خار خار گَپ زونِه و هر روز آِدِمایِ ویشتِری ایمان ایاردِنِه. کِتابِ مُقَدِسّ جه بَئیته داستان :

*کتاب اعمال رسولان فصل ۱ آیه ۱۲ تا ۱۴ و فصل ۲*

## 44. ۴۴- پترس ویوحنا  اَتّه گِدا مَردی ره شِفا دِنّنِه

https://openbiblestories.org/l/mzn/story-44/

![](https://cdn.door43.org/obs/jpg/360px/obs-en-44-01.jpg)

اَتّا روز پترس وُ یوحنا پَرِستِشگاهِ وَر شینِه. کِه دِروازه سَر اَتّا چِنگ و چِلِخِ مَردی رِه بَدینِه کِه گِدایی کِردِه.

![](https://cdn.door43.org/obs/jpg/360px/obs-en-44-02.jpg)

پترس چِنگِ مَردی رِه هارشیِه و باتِه: «مِن پول نِدارمه که تِرِه هَدِم. مُنتا هَرچی دارِمِه تِرِه دِمبِه. عیسای نومِ جا، هِرِس وُ راه بور!»

![](https://cdn.door43.org/obs/jpg/360px/obs-en-44-03.jpg)

خِدا همونگِدِر مَردی ره شِفا هِدا و مَردی راه دَکِته و وِشونِ دوُر وُ وَر خَندون و خِشال خِدا ره پَرِستِش کِرده. اون مردِمِم که پَرِستِشگاه دِله دَئی بینِه، مات بَمونِسّنِه.

![](https://cdn.door43.org/obs/jpg/360px/obs-en-44-04.jpg)

اَت خَلِه مَردِم دوُ هَئیت جَم بَیّنِه تا شِفا بَیتِه مَردی ره بَوینِن. پِتُرس مَردِم رِه باتِه: «اینتا مَردیِ شِفا بَیتِنِ جه یِکّه نَخِرین اِما شِه تِوان و دینداریِ جا وِرِه شِفا نِدامی. اینتا، عیسایِ تِوانِ هَسِّه که وِره شِفا هِدا، چونکه اِما وِره بوُوِر دارمی.»

![](https://cdn.door43.org/obs/jpg/360px/obs-en-44-05.jpg)

«شِما هَمونایی هَسِّنی که رومی فَرماندارِ جه بِخواس بینی عیسی ره بَکوشه. اونتا آدِمی کِه هَمِه رِه جان بَخشیه رِه بَکوشتِنی، مُنتا خِدا وِرِه مِردِه های دِلِه جه زندِه هَکِردِه. دِرِسّه کِه شِما نَدونِسِّنی دَرنی چیکار کِنِنی ،مُنتا پَیغُمبِرایِ پیشگویی ره سَر اَنجام هِدانی که بات بینه مَسیح وِنه زَجر بَکِشه و بَمیره. خِدا بِخواسّه اینطی بَوّه. هَمینتا سّه توبه هَکِنین و خِدای وَر دَگِردین، تا وِه شِمِه گِناها رِه پاک هَکِنِه.»

![](https://cdn.door43.org/obs/jpg/360px/obs-en-44-06.jpg)

پَرِستِشگاهِ پیشواها که پِترُس و یوحنایِ گَپا ره بِشتوسِّنه خَله بَرزِق بَئینه. هَمینتاسِّه وِشون ره بَیتِنه و زندون دِمبِدانه. مُنتا اونایی کِه پِترُس پَیغوم ره بِشتوسِّنه خَلِه ها ‌ایمان بیاردِنه، و ایماندارا ۵۰۰۰ تِن بَئینه.

![](https://cdn.door43.org/obs/jpg/360px/obs-en-44-07.jpg)

اَتّه روز بُگذِشتِ په، گَتای یَهود، پِترُس و یوحنا ره چِنگِ مَردیِ هِمکِت ، گَتِ کاهِنِ و گَتای دینی پیش بَوردِنه. وِشون پِترُس و یوحنایِ جِه بَپِرسینه:« کِمینتا تِوان جا چِنگِ مَردی ره شِفا هِدانی؟»

![](https://cdn.door43.org/obs/jpg/360px/obs-en-44-08.jpg)

پِترس جِواب هِدا: «اینتا مَردی که شِمِه پیش اِس هَکِردِه عیسای مَسیحِ تِوانِ جا شِفا هَیتِه. شِما عیسی ره صلیبِ دار بَکِشینی، مُنتا خِدا وِره دِواره زِنده هَکِرده! شِما وِرِه رَد هَکِردِنی، مُنتا نجاتِ وِسِّه عیسایِ تِوان بَکِته هِچ راه دیگه دَنی یِه !»

![](https://cdn.door43.org/obs/jpg/360px/obs-en-44-09.jpg)

پیشواهایِ دینی ، پِترُس و یوحنایِ دِلِریِ جه مات بَمونِسِّنه وُ یِکّه بَخِردِنه،چونکه وِشون بیسِواد بینه وُ سادِه چَم. هَمونگِدِر وِشونِ یاد بیَمو کِه این آدِما ،عیسای هِمکِت دَیْ بینه. همینتاسِّه وِشون ره باتِنه:« اگِه دِوارِه عیسای دَروارِه مَردِمِ جا گَپ بَزِنین شِمه سَر بِلا ایارمی.» وِشون پِترس و یوحنا ره تَرس وُ تُو هِدانه پِه، وشون رِه رِها هَکِردِنه. کِتابِ مُقَدِسّ جه بَئیته داستان :

*کتاب اعمال رسولان فصل ۳ و فصل ۴ تا آیه ۲۲*

## 45. ۴۵- اِستیفان و فیلیپُس

https://openbiblestories.org/l/mzn/story-45/

![](https://cdn.door43.org/obs/jpg/360px/obs-en-45-01.jpg)

استیفان اَتّا قَدیمی کِلیسایِ رَهبِر بی یِه کِه هَمِه وِرِه اِحترام اِشتِنِه. روح‌ِ قِدّوس وِرِه توانایی و دونایی هِدا بی یِه. اِستیفان خَلِه موجِزِ هَکِرد بی یِه و خَله هام وِنه سِخِنرانیِ جِه عیسی رِه بوُوِر هَکردِنه.

![](https://cdn.door43.org/obs/jpg/360px/obs-en-45-02.jpg)

اَتّا روز که اِستیفان دَی بی یِه عیسایِ دَروارِه دَرس دائِه، اَتِّه یَهودی کِه عیسی رِه بووِر نِداشت بی یه، اِستیفانِ جا بِگو مَگو هَکِردنِه. وِشون خَلِه بَرزِق بَئینه، و پیشواهایِ دینیِ پَلی اِستیفانِ خَوِری دِراغ باتنه کِه: «اِما بِشتوسِّمی کِه وِه ، موسی و خِدایِ دَروارِه بَد بَدِ گَپْ زوئِه.» هَمینتایِ وِسِّه پیشواهایِ دینی، اِستیفان رِه گیر دِمبِدانه وُ وِره گَتِ پیشوا و رَهبرایِ یَهودیِ پیش بَوِردِنه. اَتّی دیگِم دِراغی شاهدا ویشتر بَئینِه و وِنه خَوِری دِرو بَزّونه.

![](https://cdn.door43.org/obs/jpg/360px/obs-en-45-03.jpg)

گَتِ پیشوا اِستیفانِ جِه بَپِرسیِه: « این گَپا که وِشونْ تِه خَوِری گِننِّه، دِرِسّه؟» اِستیفان اینتا پِرسِشِ جِوابِسّه، گَتِ پیشوایِ وِسِّه خَلِه گَپْ بَزو. وِه باتِه کِه خِدا اِبراهیمِ دورِه تا عیسایِ دورِه، خَلِه گَتْ گَتِ کار یَهودیای وِسّه هَکِردِه، مُنتا اینتا قُوم هَر کَشْ وِنِه جِه نافَرمونی هَکِردِنه. اِستیفان شِه گَپِ پِه بَیتِه ُو وِشونِ باته: « شِما خَله چَموش وُگِردِن دَکِتِ قومِ هَسّنی و خِدایِ رو دَر رو اِس کِنِنی. شِما هِچْ زَمونْ روح‌ِ قِدّوس رِه نِخواسِّنی، دِرِس هَمونطی کِه اَمِه پیِ یِرون خِدا رِه رَد هَکِردنِه و وِنه پَیغومبِرا رِه بَکوشتِنِه شِما ئم وِشونِ تونْ بَدتِرِ هَکِردِنی، شِما مَسیحِ رِه بَکوشتِنی!»

![](https://cdn.door43.org/obs/jpg/360px/obs-en-45-04.jpg)

اونگِدِر که پیشواهایِ دینی این گَپا ره بِشتوسّنه وِشون ره خَله غِظ بیته، شِه گوش ره بَیْتِنه و شونْگ بَکِشینِه. وِشون اِستیفان رِه شَهرِ جِه یور بَوِردِنه و وِرِه سَنگِ روُش هَکِردِنه تا بَمیرِه.

![](https://cdn.door43.org/obs/jpg/360px/obs-en-45-05.jpg)

اِستیفان ،جانِ کِنّونِ ماقعْ وَنگِ وا هَکِرده : «عیسی جان! مِه روح رِه شِه وَر بَوِر» هَمونگِدِر زانو دَکِتِه وُ اَیِم وَنگ وا هَکِرده: «ای خِداوند! اینتا گِناه رِه وِشونِسّه نَنِویس» و جان دَر هِدا.

![](https://cdn.door43.org/obs/jpg/360px/obs-en-45-06.jpg)

اون روز اَت خَله اورشَلیمِ مَردِمون ُعیسایِ یارایِ آزار هِدائِنْ ره اَز سَر بَیتِنه و هَمینتاسّه ایماندارام این وَر وُ اون وَر رَت وُ رَم بَئینه. مُنتا وِشون اَتّنِه پیشآمِدِ رِه که بَدینِه اَیِّم هَر جا که شینِه عیسایِ دَروارِه سِخِنرانی کِردِنه.

![](https://cdn.door43.org/obs/jpg/360px/obs-en-45-07.jpg)

فیلیپُس که عیسایِ اَتّا شاگِرد بی یِه،وِئِم هَمونگِدِر ایماندارایِ هِمکِت آزار وینّسِه ،هَمینتاسّه اورشَلیمِ جِه دَر بَوِردْ بی یِه. وِه سامِرِه بُوردِه، اونجِه عیسایِ دَروارِه دَرس هِدا و اونجِة مَردِمون خَلِه ها نِجات پییدا هَکِردِنه. اَتِّه روز، اَتّا فِرِشته خِدایِ وَری فیلیپُس رِه فَرمون هِدا کِه بیابونِ دِلِه اَت جادِه ُبورِه. هَمونگِدِرکه وِه اونتا جادة دِله دَیییِّه، یِتّا گَتِ مَردیِ حَبَشِه رِه بَدیِه کِه شِه ارابِة جا سَفِر کِردِه. روح‌ِ قِدّوس فیلیپُس رِه بِفَرمِسِّه مَردیِ پَلی بُورِه و وِنِه جا گَپْ بَزِنه.

![](https://cdn.door43.org/obs/jpg/360px/obs-en-45-08.jpg)

فیلیپُس کِه اَرابِة تَنِ وَر بُورْدِه، بِشتوسِّه که اونتا حَبِشیِ مَردی دَرِه اِشعیای نَبیِ کِتاب رِه خوندِنِه. اونجِه که گِنه: «گِسفِنِ وَنِکِت که خوانِنه وِره بَکوشِن و اونتا وَرة واری که شِه پَشم تاشِ پَلی چِمِر نَکِندِه، اَتِّه کَلوم گَپ نَزّوُ. وِنه جا بَد تا هَکِردِنِه وَ وِنه اِحترام ره نِداشتِنه. وِشون وِنه جان رِه بَیتِنه.»

![](https://cdn.door43.org/obs/jpg/360px/obs-en-45-09.jpg)

فیلیپُسْ حَبِشی مَردیِ جِه بَپِرسیِه: « اون بَنوِشتِ که دَرِی خوندِی تِرِه هالی بوُنِه؟» حَبِشی جِواب هِدا: « نا. مِرِه هالی ناُنهِ مَگِر اینکِه اَتِّ کَس مِسِّه شَرح هَدِه تِه جا خوامّه که بِئی مِه وَر هِنیشی. اِسا مِرِه باُو که اِشْعَیا وِرِه شِه دَروارِه گِنِه یا کِه اَت کَسِ دیگهِ دَروارِه ؟»

![](https://cdn.door43.org/obs/jpg/360px/obs-en-45-10.jpg)

فیلیپُسِم بوردِه اَرابِه دِلِه وُ وِنه وَر هِنیشته، اونگِدِر حَبِشی وِسِّه شَرح هِدا که اِشعَیا اینتا بَخش رِه عیسایِ خَوِری بَنوِشته. فیلیپُس ،ویشتِرِ جایِ خِدای کِلامِ ره وِنِسِّه شَرح هِدا و عیسای اِنجیلِ پَیغومِ رِه وِرِه هِدا.

![](https://cdn.door43.org/obs/jpg/360px/obs-en-45-11.jpg)

فیلیپُسْ و حَبِشی مَردی هَمینطی کِه شینِه، اَتّا اِنْدونِ وَر بَرِسینِه. حَبِشی مَردی باتِه : «هارِش اینجِه اُو دَرِه! بوُنِه تَعمید بَیرِم؟» و شِه خِدمِتکار رِه فَرمونْ هِدا کِه ارابِه هَمونجه اِس هَکِنِه.

![](https://cdn.door43.org/obs/jpg/360px/obs-en-45-12.jpg)

اینطی بَییِّه کِه وِشونْ اُویِ دِلِه بورْدِنِه و فیلیپُسْ حَبِشی مَردی رِه تَعمید هِدا. اُویِ جِه کِه یور بیَمونِه، روح‌ِ قِدّوس ناگِمونی فیلیپُسْ رِه اَتِّ جا دیگِه بَوِردِه. فیلیپُسْ هَمونجِم عیسایِ خَوِری شِه سِخِنرانی رِه پِه بَیتِه.

![](https://cdn.door43.org/obs/jpg/360px/obs-en-45-13.jpg)

حَبِشی مَردی شِه راه رِه شِه سِره وَر اِدامه هِدا. وِه چون عیسی رِه بِشناسیِّه خَلِه خِشال بی یِه.

*کِتابِ مُقَدِسّ جه بَئیته داستان: کتاب اعمال رسولان باب ۶ تا ۸*

## 46. ۴۶- پولس مسیحی وونه

https://openbiblestories.org/l/mzn/story-46/

![](https://cdn.door43.org/obs/jpg/360px/obs-en-46-01.jpg)

سولوس اَتّا جِوونِ مَردی بی‌یه که اِستیفانِ بَکوشتِنِ گِدِر وِه یَهودیایِ رَختِ جه پاسبونی کِرده وَ عیسی رِه بوُوِر نِداشته. وه مسیحیا ره آزار دائه و اورشلیم دِلِه اینتا کِندا اونتا کِندا مردا و زنای په شیه تا وِشونِ ره بَیره وُ دِم هَده زندون. گَتِ پیشوا وِره باته که تا دمشق بوُره وَ هر چی مسیحی دَره ره تَله دِمبَدِه وُ بیاره اورشلیم.

![](https://cdn.door43.org/obs/jpg/360px/obs-en-46-02.jpg)

سولُسِم دمشقِ وَر رایی بَی‌یه. هَنتا اونجِه نَرِسی بی‌یِه کِه، آسِمونِ جِه اَتّا اِسپه سو وِنه دُورّ رِه بَیته و وِئَم بِنِه دَکِتِه. سولُس یِتّا وَنگ بِشتوسِّه که وِرِه باته: «شائول! شائول! چی شیِسّه مِرِه آزار دِنّی.» سولُس بَپِرسِیه: «مِه سَروَر! تِه کی هَسّی؟» عیسی وِرِه جِواب هِدا: « مِن عیسامِه. هَمونتایی که تِه وِرِه آزار دِندی»

![](https://cdn.door43.org/obs/jpg/360px/obs-en-46-03.jpg)

اونگِدِر که سولُس شِه جا سَرِ جِه راس بَّیه، هیچ جا رِه نَتّونَسّه بَوینِه. وِنِه رَفِقا وِرِه دمشقِ وَر راهنِمایی هَکِردِنِه. سولُس سِه روزِ آزِگار نا خِراک بَخِرده ، نا اوُ.

![](https://cdn.door43.org/obs/jpg/360px/obs-en-46-04.jpg)

حَنانیا اَتّا شاگِرد بی یِه که دَمِشقِ دِله زندِگانی کِرده. خِدا وِرِه بِفَرمِسِّه: « اَتّا سِرِة دِلِه بوُرکه سولُس اونجه دَره، شِه دَس رِه وِنِه سَرِ بالا بِی یِل تا وِنِه چِش سُو دَکِفِه.» مُنتا حنانیا باته: «اَی جان خِدا! مِن بِشتوس دارمه کِه اینتا مَردی چِطی مسیحیا رِه آزار کِرد بی یِه» خِدائِم اینطی جِواب هِدا: « بُور! مِن وِرِه نِشون هَکِردِمِه که یَهودیا و قومایِ دیگة پَلی مِه نوم رِه بَوِرِه. وِه مِه خاطری، خَلِه زار وُ بِلا کَشِنه.»

![](https://cdn.door43.org/obs/jpg/360px/obs-en-46-05.jpg)

حنانیائِم سولُسِ پَلی بُوردِه و شِه دس رِه وِنِه سَر بِشتِه و باتِه: «هَمون عیسایی که راهِ دِلِه تِه چِشِ پیش دیار بَّیه، مِه رِه فَرمون هِدا که تِه چِشِ سو رِه رَج هَکِنِم و تِه، روحِ قِدّوسِ جِه پِر بَوّی.» دَر دَم سوُلوسِ چِشِ سُو بیَمو و اونگِدِر حنانیا وِرِه تعمید هِدا. سولوس اَته کَم خِراک بَخِردِه وُ وِرِه جان دَکِتِه.

![](https://cdn.door43.org/obs/jpg/360px/obs-en-46-06.jpg)

هَمون آنِم سولوس شِروع هَکِردِه یَهودیایِ دِمِشق رِه دَرس هِدائِن و اینطی گِتِه: «عیسی خِدایِ ریکا هَسِّه» یَهودیائِم خَلِه گِج و مَنگ بیِنِه، چونکِه اونتا آدِم که هَمه کار کِردبی‌یه تا ایماندارا رِه اَز بِین بَوِرِه اِسا شِه عیسی رِه بووِر داشتِه!. سولوس ، یَهودیایِ جا کِلام کَلمه کِرده و وِشونِ رِه نِشون هِدا که عیسی همون مسیح هَسِّه.

![](https://cdn.door43.org/obs/jpg/360px/obs-en-46-07.jpg)

چَن روز کِه بوگذِشتِه، یَهودیا خواسّنِه که سولوس رِه بَکوشِن. وِشون اَتّه خَلِه آدِم ره شَهرِ دَروازِه سَر رایی هَکِردِنِه که وِرِه پیدا هَکِنِن و بَکوشِن مُنتا سولُوس وِشونِ نَقشِة جة سَر دَر بیارده و شِه رِفقایِ هِمکِت اونجِه جِه دَر بوردِه. اَتّا شو وِرِه اَتّا سَوِدِ دِلِه بِشتِنِه و شهرِ دیوارِ جِه بِنِه بیاردِنهِ و شهَرِ جِه یور بَوَردِنه. سولُس کِه دمشقِ جِه دَر بُوردِه، عیسایِ خاطری شِه درس هِدائِن رِه پِه بَیتِه.

![](https://cdn.door43.org/obs/jpg/360px/obs-en-46-08.jpg)

سولُس اورشلیمِ دِله بوُرده تارَسولا رِه بَوینِه، مُنتا وِشون وِنه جا بَتِرسینِه. هَمونگِدِر اَتّا ایموندار برنابا نوُم ، سولُوس رِه وِشونِ پَلی بَوِردِه. وِه عیسایِ شاگِردا رِه باتِه کِه سولُس، چِطی نِتَرسِا ،دَمشقِ دِلِه سِخِنرانی هَکِردبی‌یه. اینطی بَیّه که رَسولا سولُس رِه شِه دِلِه راه هِدانِه.

![](https://cdn.door43.org/obs/jpg/360px/obs-en-46-09.jpg)

اَتی ایموندارا اَندِه کِه آزار بَدی بینِه اورشلیمِ جِه، اَتّا دِرِ شهر که وِنه نوم انطاکیِه بی یه، بوردِنِه وُ هَمونجِم عیسایِ دَرواره ، سِخِنرانی کِردِنِه. اَنطاکیة مَردِم ویشتِرا یَهودی نَیئ بینه ، مُنتا اَوّلِ کَش بی یه کِه ایمون بِیاردِنِه. برنابا و سولُوسِم هَمونجِه بوردِنِه تا تازه ایمونادارا رِه عیسایِ دَروارِه دَرس هَدِن و کلیسا رِه قِد و قوِّت هَدِن. انطاکیهٔ دِلِه بی یه کِه ایموندارایی کِه مسیح رِه بوُوِر داشت بینِه ، اَوّلِ کَش مسیحی باتِنِه.

![](https://cdn.door43.org/obs/jpg/360px/obs-en-46-10.jpg)

اَتّا روز انطاکیةِ مسیحیا ، سَرگَرمِ دِعا و روزه بینه که روحِ قِدّوُس وِشونِ دَرواره بِفَرمِسِّه: « برنابا و سولس رِه که اَتّا کارِسّه وِشون رِه انتخاب هَکِردِمِه، ِدیگِرونِ جِه سیوا هَکِنین» اونگِدِر اَنطاکیةِ کلیسا، شِه دست رِه برنابا و سولسِ سَر بِشْتِنِه و وِشونِسِّه دِعا هَکِردِنه. هَمینتاسّه وشون رِه رایی هَکِردِنه تا عیسایِ خَوِرِه خِشِ ره هَر جا بَوِّن. برنابا و سولوسِم هَر تیر و تِوارِ جه اَتّه خَلِه مَردِم رِه درس هِدانه و خَلِه ها عیسی رِه بووِر هَکِردِنه و ایمون بیاردِنِه. کِتابِ مُقَدِسّ جه بَئیته داستان :

*کتاب اعمال رسولان باب ۸ آیه ۱ تا ۳؛ باب ۹ آیه ۱ تا ۳۱؛ باب ۱۱ آیه‌های ۱۹ تا ۲۶؛ باب ۱۳ آیه‌های ۱ تا ۱۴*

## 47. ۳۷- پولوس و سیلاس فیلیپی شهرِ دِلِه

https://openbiblestories.org/l/mzn/story-47/

![](https://cdn.door43.org/obs/jpg/360px/obs-en-47-01.jpg)

سولوس اونگِدِرکه تِمومِ رومِ امپرطوری دِلِه سَفِر کِردبی یه ، بِنا بِشتِه که شِه رومی نومِ جِه استفاده هَکِنِه. اَتّا روز پولوس وُ وِنِه رَفِق بوردِنِه فیلیپیِ شَهرِ دِلِه تا خَوِرِ خِشِ عیسی ره هَمسّة بَوّن .وِشون، شهَرِ جِه یور بُوردِنِه و اَتّا روخِنِه یِ پَلی بَرِسینِه. مَردِم اونجِه جَم بَینِه و دِعا کِرد بینه‌. اونجِه وِشون یِتّا زِنا ،لیدیه نوم که بازرگان بی‌یه رِه بَدینه . که وِه خِدا رِه دوس داشتِه و پَرَستِش کِردبی یه.

![](https://cdn.door43.org/obs/jpg/360px/obs-en-47-02.jpg)

خِدا لیدیه رِه تِوانایی هِدا کِه عیسی رِه بوُوِر هَکِنه. پولوس و سیلاس وِه و وِنِه خِنِواده رِه تَعمید هِدانِه. اَتِّه کَم که بوگذِشتِه، وِه پولس و سیلاس رِه شِه سِرِة دِلِه مِهمون هَکِردِه کِه وِشون هَمونجِه بَمونِن، وِشونِم هَمونجه بَمونِسِّنه.

![](https://cdn.door43.org/obs/jpg/360px/obs-en-47-03.jpg)

پولوس و سیلاس ویشتِرِ جاهایی کِه یَهودیا دِعا کِرد بی‌نه شینه تا مَردِم رِه بَوینِن. اونجِه اَتّا دَسمَره دَیيّه کِه ناپاکِ روح داشتِه و هَر روز وِشونِه پِه دَیّیه. وِه هَمین ناپاکِ روحِ جِه ، مَردِم آیندِه رِه پیش پیش گِته و اینتا کارِ جِه پیشگویِ وَنِکِت اَتّه خَلِه شِه اِربابایسّه دَرآمِد داشتِه.

![](https://cdn.door43.org/obs/jpg/360px/obs-en-47-04.jpg)

اونتا دَسمَره هَر زَمون وِشون کِه این وَر وُ اون وَر شینِه ، وِشونِ پِشتِ سَر شونگ کَشیه وُ گِتِه: «اینتا مَردا گَتِ خِدایِ خِدمِتگِزار هَسّنِه. وِشون رِهاییِ راه رِه شِمارِه سِراغ دِنّنِه! » وِه ویشتِرِ روزا اینطی گِذِرون کِردِه تا کِه دیگِه پولوسِ تاب نیاردِه.

![](https://cdn.door43.org/obs/jpg/360px/obs-en-47-05.jpg)

آخِرِ سَر اَت روز کِه اونتا دَسمَره وِشونِ پِه هَی شونگ کَشِیه ،پولوس دَسمَره رِه هارِشیِه وُ ناپاکِ روح رِه باته: «عیسایِ نومِ جا گِمه اینتا زِنایِ جِه یور بوُر.» ناپاکِ روحِم دَر دَم ونِه جّ دَر بوُرده.

![](https://cdn.door43.org/obs/jpg/360px/obs-en-47-06.jpg)

اونگِدِر که دَسمَرة اِربابون بَدینِه چی‌شی بَیّه ، خَلِه بَرزِق بَئینه. اینتا کارِ جا مَردِم دیگه دَسمَرة پیشگویی وِسّه اِربابون رِه پولی نِدانِه و وِشون رِه هالی بَیّه اَگِه ناپاکِ روح دَنی بَوِّه ، دَسمَره نَتّونِّه دیگه پیشگویی هَکِنه.

![](https://cdn.door43.org/obs/jpg/360px/obs-en-47-07.jpg)

هَمینتاسّه دَسمَرة اِربابون پولوس و سیلاس رِه بَوِردِنه رومیِای گَت گَتای پیش. وِشونِم پولوس و سیلاس رِه دَروشتِنِه وُ، زندونی هَکردنه.

![](https://cdn.door43.org/obs/jpg/360px/obs-en-47-08.jpg)

وِشون پولوس و سیلاس رِه زِندونِ دِلِه اَتّا بَند دِله دِم بِدانِه که ویشتِرین پاسِبون رِه داشتِه. وِشُونِ لینگ و پِه رِه گَته چویِ جا دَوِسِّنه. مُنتا وِشون نیمِه هایِ شُو، سِرود و آوازِ خونِسِّنِه وَ خِدا رِه پَرستش کردنه .

![](https://cdn.door43.org/obs/jpg/360px/obs-en-47-09.jpg)

ناگِمونی اَتّا گَتِ زَمین لَرزِه بیَمو! زِندونِ دَرا هَمِه وا بَّیِه و تِمومِ زندونیایِ زنجیر، وِشونِ دَس ولینگِه جِه بِنه دَکِته.

![](https://cdn.door43.org/obs/jpg/360px/obs-en-47-10.jpg)

سَر پاسِبون که بیشار بَّیه بَدیِه که زِندونِ دَرا اَز دَم وا بَیّه و گِمون هَکِردِه که تِمومِ زِندونیا فِرار هَکِردِنه و اَندِه وِرِه مَرگِ تَرس بَیتِه کِه اِسا رومیای گَت گَتا وِرِه کِشِنِنِه، بِنا بَیتِه کِه شِه خِدِرِه بَکوشه ،مُنتا پولوس وِرِه بَدیِه و شونگ بَکِشیه که: «شِه خِدِرِه نَکوش، اِما همه هَمینجه دَرِمی.»

![](https://cdn.door43.org/obs/jpg/360px/obs-en-47-11.jpg)

سَر پاسِبون کِه خَلِه بَترسی بی یِه پولوس و سیلاسِ پَلي بیَمو و بَپِرسیه: «چیکار هَکِنِم که نِجات پيیدا هَکِنِم؟» پولُس وِرِه جِواب هِدا: « عیسایِ خِداوند رِه بُووِر هَکِن . اونگِدِر هَسّه که تِه وُ تِه خِنِواده آزاد بونِنی» هَمونگِدِر اینتا پاسِبونِم پولس و سیلاس رِه شِه سِره بَوِردِه وَ وِشونه زَخما ره بَشِسّه و دَوسّه. پولوسِم خَوِرِ خِشِ عیسی رِه اون خِنِوارِسّه باتِه.

![](https://cdn.door43.org/obs/jpg/360px/obs-en-47-12.jpg)

سَر پاسِبون وُ وِنِه خِنِواده عیسی ره ایمان بیاردِنه و پولوس و سیلاس، وِشون رِه تَعمید هِدانه. اونگِدِر سَر پاسِبون پولوس و سیلاس ره خِراک هِدا و هِدی جا خَنده خِشالی هَکردنه.

![](https://cdn.door43.org/obs/jpg/360px/obs-en-47-13.jpg)

اَتّا روز کِه بوگذِشتِه، شهرِ گَت گَتا، پولوس و سیلاس رِه زِندونِ جِه آزاد هَکِردِنِه و وِشونِ جِه بِخواسّنِه که فیلیپی شَهرِ جِه دَر بورِن. پولوس و سیلاسِم لیدیه و شِه رَفِقا رِه بَدینِه پِه، شَهرِ جِه یور بوردِنه. خَوِرِ خِش عیسی ،هَمِه جا دَپیتِه ُو کِلیسام لَس‌لَس جان گِیتِه.

![](https://cdn.door43.org/obs/jpg/360px/obs-en-47-14.jpg)

پولوس وُ گَت گَتایِ مَسیحیِ ، خَلِه شَهرا ره شینه، وِشون عیسایِ خَوِرِ خِشِ دَرواره سِخِنرانی کِردنه ومَردِم رِم یاد دانِنِه. وِشون اَی اَتِّه خَلِه نامِه بَنِویشتِنه تا کِلیسایِ دِلِه ایماندارا رِه یاد بَدِن و وِشونه دِلگَرمی هَدِن. اَتّیِ اون نامِه ها، چَنتا کِتاب ِ کتابِ مُقَدّس بَیّه. کِتابِ مُقَدِسّ جه بَئیته داستان :

*کتاب اعمال رسولان فصل ۱۶ آیه های ۱۱ تا ۴۰*

## 48. ۴۸- عیسی هَمون مسیحِ وَعدِه بَئی هَسّه

https://openbiblestories.org/l/mzn/story-48/

![](https://cdn.door43.org/obs/jpg/360px/obs-en-48-01.jpg)

خِدا که دِنیا رِه دِیافْرِیِه، دِرِسّ وُ هَمِه چی تِموم بَی‌یِه و گِناه دَنی ‌بی یه. آدِم و حَوا دِئی رِه دوس داشتِنِه و خِدا رِم دوس داشتْ بینه. ناخِشی و مَرگ و میر دَنی‌ بی یه .اینتا هَمون دِنیایي بی‌یه کِه خِدا خواسّه.

![](https://cdn.door43.org/obs/jpg/360px/obs-en-48-02.jpg)

شِیطون اَتّا مَر پوسِّ پِه بورده َکِه لِتکا دِله زِندگانی کِرد بی یةو اینطی حَوّایِ جا گَپ بَزّو، چونکِه وِره خواسّه گول بَزِنِه. اینطی وِه وُ آدِم گِناه هَکِردِنِه. وِشونِ نافَرمونیِ سّه، تِمومِ آدِمایِ سَر نوشت اینطی بَیّه کِه بَمیرِن.

![](https://cdn.door43.org/obs/jpg/360px/obs-en-48-03.jpg)

آدِم و حَوّایِ ِگِناهِ وِسّه اَتّا پیش آمِدِ بَدّتِرِم دَکِتِه که وِشون خِدایِ دِشمِن بَئینِه . وِشونِ هَکِرده کار وِسّه، اون زَمون تا اِسا ، هَمِه گِناه هَکِردِنِه. یعنی هَرکِس که دِنیا اِنه خِدایِ دِشمِنه وُ خِدا و اِنسونِ میونِ دوستی کِل دِمبِدا. مُنتا خِدایِ دل خواسّه که آرامِش وُ دوستی دِواشِه.

![](https://cdn.door43.org/obs/jpg/360px/obs-en-48-04.jpg)

خِدا وَعدِه هِدا حَوِای تِوارِ جه اَتّا کَس شیطونِ سَر لو گیرنِه و شیطونِم ونه لینگِ کاب رِه گزنه. نِشون بِه نِشون که شِیطون مَسیح ره کِشِنه ، مُنتا خِدا دِوارِه وِرِه زنده کِنده .اونگِدِر مَسیحی کِه خِدا وَعدِه هِدا بی‌یه، هَمیشِهٔ وِسّه شیطونِ قِد و قُوِّتِ بِنِه زَنّه. خَلِه سال بوگذِشتِه پِه، خِدا نِشون هِدا که عیسی هَمون مَسیح هَسِّه که پیشتِرا وِنه وَعدِه رِه هِدا بی‌یه.

![](https://cdn.door43.org/obs/jpg/360px/obs-en-48-05.jpg)

خِدا نوح رِه بِفَرمِسّه: اَتّا کِشتی بِسازِه تا توفانِ جِه کِه خِدا خوانه رایی هَکِنه، شِه خِنِوادِه رِه نِجات هَدِه. هَمینتاسّه خِدا آدمایی که وِره بُوور داشتِنه رِه نِجات هِدا. هَمونتایِ وَنِکِت،تِمومِ آدما شِه گناهایِ وِسِّم خِدایِ ونِه که بَمیرِن، مُنتا خِدا عیسی رِه راهی هَکِردِه تا هَر کَس که وِرِه بُووِر هَکِنِه، آزاد هَکِنه.

![](https://cdn.door43.org/obs/jpg/360px/obs-en-48-06.jpg)

چَن صد سال بی‌یِه کِه، پیشواهایِ دینی آدِمایِ وِسِّه خِدایِ دَرگاه قِربونی کِرد بینِه. اینتا کارا نِشون دائه کِه گِناه هَکِردِنِه و وِشونِ ،سِزا بی یه که خِداِ وِشون ره جِزا هَده. مُنتا هَمون قِربونیا نَتّونِسِنِه آدمایِ گِناها رِه بَشورِن وُ وِشون ره پاک هَکِنن. مُنتا عیسی گَتِ پیشوائِه. وِه کاری هَکِردِه کِه گَتِ پیشواها نَتّونِسِنه هَکنِن. وِه شِه خِدرِه فِدا هَکِرده تا هَمِه آدِمایِ گِناهِ وِسِّه قِربونی وَنِکِت بَوّه. وه تَن هِدا که هَمِه آدِمای گِناهِ وِسّه جِزا بَوینِه. هَمینتاسّه عیسی گَتِ پیشوائه.

![](https://cdn.door43.org/obs/jpg/360px/obs-en-48-07.jpg)

خِدا ابراهیم رِه بات بی یِه: «تِه خاطری، تِمومِ دِنیایِ تیره و تِوارِه فِراوونی دِمبه.» عیسی، ابراهیمِ تیرِه و تِوار جِه بی‌یِه. خِدا هَمة مَردِم دِنیارِه اِبراهیمِ تِوارِ جِه فِراوونی بَخشِنه، چونکه هَرکس عیسی رِه بُووِر هَکِنِه، گِناهِ جِه آزاد بوُنِه وَ هر زَمون مَردِم کِه عیسی رِه بُوِور هَکِنن، خِدام وِشون رِه اِبراهیمِ تِوار دونّه.

![](https://cdn.door43.org/obs/jpg/360px/obs-en-48-08.jpg)

خِدا ابراهیم رِه بِفَرمِسّه که شِه ریکا ایساق ره، وِنِه وِسّه قِربونی هَکِنه. مُنتا خِدا گِسفِن وَره رِه ایساقِ بَدِل بَرِسِنیه تا قِربونی بَوِّه. اِما تِمومِ آدِما شِه گِناهِسّه وِسّه که بَمیریم!. مُنتا خِدا عیسی ره دنیایِ دِلِه بیارده تا اَمه بَدِل قِربونی بَوِّه و بَمیره. هَمینتاسّه عیسی ره خِدای وَرِه گِمبی.

![](https://cdn.door43.org/obs/jpg/360px/obs-en-48-09.jpg)

خِدا کِه آخِرین بِلا رِه مصریایِ سَر بیارده ،هَر اَتّا خِنِوارِ اسراییلی رِه بِفَرمِسّه تا اَتّه، وَرِه بَکوشِن. اینتا وَرِهٔ چار نِسخه وِسّه کِه دِرِس بی‌بوْ. اَی هَمطی وَرِه خون رِه وِسّه کِه شه سِرِة دَرِ کِندا بَسوئِن تا خِدا کِه اون خون رِه وینِسّه، وِشونِ سِرِه جِه رَد بَی‌بُو َو اون خِنِوارِ گَتِ ریکا رِه نَکوشت بو. اینتا پیش آمِد رِه خِداِ پِسَخ بَخونِسّه.

![](https://cdn.door43.org/obs/jpg/360px/obs-en-48-10.jpg)

عیسی پِسَخِ جَشنِ وَره رِه موندنه. وِه هِچ اِشتِباهی نَکِرد بی‌یِه و هِچ زَمون گِناه نَکِردِه. وِه هَمون روزایی که جَشنِ پِسَخ بی‌یِه بَمِردِه. هَرکس کِه عیسی رِه بووِر هَکِنِه ، وِنه گِناهِ سِزا رِه عیسایِ خون دِنّه. اِنگار که خِدا، وِرِه سِزا نِدِنه وُ وِنِه جِه رَد بُونِه.

![](https://cdn.door43.org/obs/jpg/360px/obs-en-48-11.jpg)

خِدا بنی اسراییلِ جا پَیمون دَوِسّه، هَمینتاسّه وِشون خِدایِ نِشون بَئی قوم بینِنه تا تِنا وِنِه وِسّه بَوّن. مُنتا خِدا اَتّه نو پَیمون دَوِسّه، کِه هَر کس تونّه شِه وِسّه بَیره. هر کس ، هر تیر و تِواری کِه دارنِه، اَگِه اینتا نو پَیمون ره گِردِن بَیره، خِدایِ قومِ دِلِه اِنِّه. وِه عیسی ره بوُوِر هَکِردِنِه وِسّه ، خدایِ قومِ دِله اِنِه.

![](https://cdn.door43.org/obs/jpg/360px/obs-en-48-12.jpg)

موسی پَیغُمبِری بی‌یِه که خِدای کِلام ره شِه تِمومِ تِوانِ جا هَمه جا گِتِه. مُنتا عیسی، پَیغُمبرای دیگهِ جِه گَت تِره. وِه خِداهَسّه، هَمینتاسّه وِه هرکاری هَکِردِه وُ هرچی باتِه ،خِدایِ گَپ و کارا بی‌یِه. هَمینتاسّه هَسّه که کتاب مُقَدِّس ، عیسی رِه خِدایِ گَپ گِنِه.

![](https://cdn.door43.org/obs/jpg/360px/obs-en-48-13.jpg)

خِدا داوودِ پادشاه رِه وَعدِه هِدا که وِنه تِوار جِه اَتّا کَس پادشاهِ وَنِکِت اِنه تا دنیا دَرِه خِدایِ قوم رِه فرمونرِوایی کِنده. عیسی خدایِ ریکا و مَسیحِ وعدِه بَئی هَسِّه و وِه هَمون داوودِ تِوار جِه هَسِّه که تا دِنیا بَرقِرارِه توندِه پادشاهی هَکِنه.

![](https://cdn.door43.org/obs/jpg/360px/obs-en-48-14.jpg)

داوود، اسراییلیایِ پادشاه بی یِه مُنتا عیسی تِمومِ دِنیایِ پادشاه هَسِّه! وِه اَی دِواره اِنّه و عِدالِت و آرامشِ جِا، تا دِنیا بَر قِرارِه پادشاهی کِنده. کِتابِ مُقَدِسّ جه بَئیته داستان :

*کتاب پیدایش فصل ۱؛ فصل ۳؛ فصل ۶؛ فصل ۱۴؛ فصل ۲۲؛ کتاب خروج فصل ۱۲؛ فصل ۲۰؛ کتاب دوم سموئیل فصل ۷؛ کتاب عبرانیان فصل ۳ آیه های ۱ تا ۶؛ فصل ۴ آیه ۱۴؛ فصل ۵ آیه ۱۰؛ فصل ۷ آیه ۱؛ فصل ۸ آیه ۱۳؛ فصل ۹ آیه ۱۱؛ کتاب مکاشفه فصل ۲۱*

## 49. ۴۹- خِدایِ  نو پِیمون

https://openbiblestories.org/l/mzn/story-49/

![](https://cdn.door43.org/obs/jpg/360px/obs-en-49-01.jpg)

اَتّا فرِشتِه، یِتّا جِوونِ کیجا ،مَریِم نوم رِه باتِه که وِه ،خِدایِ ریکا رِه دِنیا ایارنِه.مَریِم که دَس نَخَردِه کیجا بی یه،روحِ قِدّوس شِه وایِ جه وِره آبِسِّن هَکِرده. وِئم اَتّا ریکا بَکِردِه وُ وِنه نوم رِه عیسی بِشتِه. هَمینتاسّه عیسی هَم خِدا هَسّه و هَم اِنسون.

![](https://cdn.door43.org/obs/jpg/360px/obs-en-49-02.jpg)

عیسی خَلِه موجِز هَکِرده کِه نِشون دِنّه وِه خِدا هَسّه.وِه اویِ سَر راه بوردِه،توفان رِه رام هَکِردِه، خَلِه ناخِشایِ دَردِ دِوا هَکِردِه ، خَلِه دِب بَزِّه هایِ جِه ناپاک اِراوح رِه دَر هَکِردِه،مِردِه ها رِه زندِه هَکِردِه، پنج تا نون و دِتا کِچیک ماهی رِه فِراوونی هِدا و ۵۰۰۰ تَنِ بِتیم ره سِر هَکِردِه.

![](https://cdn.door43.org/obs/jpg/360px/obs-en-49-03.jpg)

عیسی ،گَتِ آموزِگار بی یه.وِنِه دَرسا هَمِه راسّ وُ دِرِس بی یه.مَردِمِم ، هَر چی کِه وِه یاد بِدائه رِه وِسّه کِه هَکِرد بوُن، چونکِه وِه خِدایِ ریکا بی یه. نِمونِة وِسّه ، یاد دائه کِه وِنِه دیگِرون رِم شِه وَنِکِت دُوس داریم.

![](https://cdn.door43.org/obs/jpg/360px/obs-en-49-04.jpg)

وِه اَی وِشون رِه یاد بِدا که خِداوند رِه ، وِنِه هَمه چیِ تُون ویشتِر دوس دارِن ، شِه دار وُ نِدارِ تون، ویشتَر.

![](https://cdn.door43.org/obs/jpg/360px/obs-en-49-05.jpg)

عیسی باته کِه خِدایِ پادِشاهیِ دِله دَیّیِن ،هَر چی که دِنیا دَرِة تون،اَرزِش دارتِرِه. خِدایِ پادِشاهیِ دِلِه بُوردِنِ وِسّه، وِه ،وِنِه که تِره تِه گِناهایِ جِه آزاد هَکِنِه.

![](https://cdn.door43.org/obs/jpg/360px/obs-en-49-06.jpg)

عیسی باته کِه اَتی آدِما وِرِه بُوِور کِنِنِه، هَمون ماقه هَسّه که خِدا وِشون رِه رِهایی دِنّه، مُنتا هَمِه وِرِه نِخوانِنِه.اَیِم باته کِه اَتی آدِما خارِه خاکِ واری هَسِّنِه،چونکِه عیسایِ خَوِر خِش رِه بُوِور کِنِنِه و خِدام وِشون رِه رِهایی دِنّه.اَتیِم سَنگِ کَتِک جادّه کِنارِ وَنِکِت هَسّنِه. وِشونِسّه خِدایِ کِلام اونتا تیم رِه موندِنه کِه کَتک سَر کَفِنِه،مُنتا هِچ بار نیارنه..وِشون هَمون مَردِمی هَسّنِه کِه عیسایِ پَیغوم رِه اِشتونِنه مُنتا رَد کِنِنه و نِخوانِنِه خِدایِ پادِشاهیِ دلِه بورِن

![](https://cdn.door43.org/obs/jpg/360px/obs-en-49-07.jpg)

عیسی وِشون رِه یاد بِدا کِه خِدا گِناهکارا رِه خَلِه دوس دارنِه. وِه خوانِه کِه وِشون رِه بِبَخشِه وُ شِه وَچِه بَدونِه.

![](https://cdn.door43.org/obs/jpg/360px/obs-en-49-08.jpg)

عیسی اَیِم وِشون رِه باته کِه، خِدا گِناهِ جِه بَد دارنِه. آدِم و حَوّاِیِ گِناهِسّه وِشونِ تِوارِم گِناه کِنِّنِه. هَمینتاسّه، هَمه دِنیایِ دِلِه گِناه کِنّنِه و خِدایِ جِه سیوا بونِنِه. هَمه خِدایِ دِشمِن هَسِّنِه.

![](https://cdn.door43.org/obs/jpg/360px/obs-en-49-09.jpg)

مُنتا خِدا اَنده هَمِة آدِمایِ دِنیا رِه دوس داشتِه کِه شِه اَتّا ریکا ، عیسی رِه فِدا هَکِردِه تا هَرکَس کِه وِرِه بوُوِر هَکِنِه شِه گِناهِسّه سِزا نَوینِه کِه هّچی تا اَبِدِم خِدایِ هِمکِت زِندِگانی کِندِه.

![](https://cdn.door43.org/obs/jpg/360px/obs-en-49-10.jpg)

شِمه گِناه هَکِردِنِسّه، شِمِه سِزا مَرگ هَسّه. خِدا وِنِه کِه شِمه جِه خَشم بَیره ، مُنتا چونکِه عیسی صَلیبِ دارِ تَن بوردِه و بَمِردِه، هَمِة گِناهِ سِزا رِه شِه گِردِن بَیتِه.

![](https://cdn.door43.org/obs/jpg/360px/obs-en-49-11.jpg)

عیسی هیچ زمون گِناه نَکِردِه، مُنتا گِس هِدا کِه اِنسونِ گِناهِایسِّه جِزا هَیرِه. اَنده که سنگینتِرین جِزا کِه مرگ هَسّه رِه شِه گِردِن بَیتِه. هَمینتاسّه وِه دِرِسّه قِربونی بی یه تا شِمه وَ دِنیایِ دلِة آدِمایِ گِناهها رِه بَشورِه و پاک هَکِنِه. چونکِه عیسی شِه خِد رِه قِربونیِ وَنِکِت خِدا رِه پیشکَش هَکِردِه، اینطی خِدا تِمومِ گِناها، تا اونجه که آدِمایِ بَدتِرین گِناها رِم که وِرِه بوُوِر دارنِنه رِه بَخشِنِه.

![](https://cdn.door43.org/obs/jpg/360px/obs-en-49-12.jpg)

بَدونین که شِمِه خارِ کارم نَتونّه شِما رِه رِهایی هَدِه. هِچ کاری دَنییِه هَکِنین تا شِمِه دوستی دِوارِه اَز سَر بَیرِه. وِنِه بَدِل وِنِه که بوُوِر هَکِنین ،عیسی خِدایِ ریکا هَسّه و شِمه جا سَر صَلیبِ دار بالا بَمِردِه و خِدا دِوارِه مِردهایِ جِه وِره زِندِه هَکِردِه. اَگِه اینتا حَقیقِت رِه بُووِر هَکِنین خِدام شِمِه تِمومِ گِناها رِه بَخشِنه.

![](https://cdn.door43.org/obs/jpg/360px/obs-en-49-13.jpg)

خِدا هَر کَس کِه عیسی رِه بُووِر هَکِنِه وُ وِرِه شِه خِداوند بَدونِه ره نجات دِنِّه. مُنتا خِدا آدِمایی کِه عیسی رِه بوُوِر نَکِنِن و وِرِه ایمون نیارِن، نِجات نَدِنِه. وِه نِشِنه کِه نِدارهَسّی یا دارا، مَردی یا زَن، پیری یا جِوون و یا کِجَه ایی هَسّی. خِدا شِما رِه دوس دارنِه و خوانِه کِه عیسی رِه بُووِر هَکِنین تا وِئِم بِتّونِه شِمِه جِا دوسّی دَوِنده و شِمِسّه خارِ رَفِق بَوّه.

![](https://cdn.door43.org/obs/jpg/360px/obs-en-49-14.jpg)

عیسی شِمِه جِه خوانه تا وِرِه بوُوِر هَکِنین و تعمید بَیرین. اِسا شِما بُووِر دارنِنی کِه عیسی هَمون مَسیحِ وَعدِه بَئي هَسّه و خِدایِ تِنا ریکا هَسّه؟ بُووِر دارنِنی کِه گِناهکار هَسِّنی وُ وِنِه کِه خِدا شِما رِه سِزا هَدِه؟ بُووِر دارنِنی کِه عیسی صَلیبِ دارِ تَن ، بَمِردِه تا شِمه گِناها ره بَشورِه وُ پاک هَکِنِه؟

![](https://cdn.door43.org/obs/jpg/360px/obs-en-49-15.jpg)

اَگِه عیسی و هَر چی کِه شِمِسّه هَکِردِه رِه بوُوِر دارنِنی، اِسا شِما مَسیحی هَسِّنی! اِسا دیگِه شیطون شِه سیو پادِشاهیَ دِلِه شِمِه سَر بالا دَنی یِه و شِمِه سَر فَرمونرِوایی نَکِنده . اِسا خِدا شِه نورانی پادِشاهیِ دِلِه شِمِه سَر بالا دَرِه.خِدا شِما رِه تِوانایی هِدا تا قَذیمایِ واری گِناه نَکِنین و چِطی پاک و دِرِس زندِگی هَکِردِن رِه شِمارِه یاد بِدا.

![](https://cdn.door43.org/obs/jpg/360px/obs-en-49-16.jpg)

اَگِه مَسیحی هَسِّنی،خِدا شِمِه گِناها رِه عیسایِ کارِسّه بِبَخشیه. اِسا خِدا شِما رِه شِه خارِه رَفِق دُوندِه نا دِشمِن.

![](https://cdn.door43.org/obs/jpg/360px/obs-en-49-17.jpg)

اَگِه خِدایِ رَفِق هَسِّنی وُ خِداوند عیسی ره خِدمت کِنّنی.شِمه دِل خوانه کِه عیسایِ دَرسا ره پِه بیرین. دِرِسّه کِه مَسیحی هَسّنی، شیطون اَیِم شِمِسّه سوسِه اِنِه تا گِناه هَکِنین. مُنتا خِدا هَمیشِک شِه گَپِ سَر اِسّتِنه . وِه فَرمِنِه اَگِه شِه هَکِردِه گِناها رِه شِه تِکِ جا بَوّین، وِه شِما رِه بَخشِنه و شِما رِه تِوان دِندِه تا گِناهِ رو دَر بِیین وُ وِنه جِه سَر شاخ بَوّین.

![](https://cdn.door43.org/obs/jpg/360px/obs-en-49-18.jpg)

خِدا شِما رِه گِنِه کِه دِعا و نیایِش هَکِنین و وِنِه کِلام و کِتاب رِه بَخونين. وِه اَیِم شِما رِه گِنِه کِه مسیحی هایِ دیگِة هِمکِت وِره پَرِستِش هَکِنِین و دیگِرون رِه بَوّین کِه شِمِسّه چیکار هَکِردِه. اَگِه هَمِة اینکارا رِه هَکِنین، شِما و خِدایِ میونِ اَتّا دوستی دَوِس وونه، موندِسّگار. کِتابِ مُقَدَسِ جِه بَئیته داستان :

*کتاب پیدایش باب ۳؛ انجیل متی باب ۱۳ و ۱۴؛ انجیل لوقا باب ۲ و باب ۱۰ آیه ۲۵ تا ۳۷؛ انجیل یوحنا باب ۳ آیه ۱۶؛ رساله پولس به رومیان باب ۳ آیه ۲۱ تا ۲۶؛ باب ۵ آیه ۱ تا ۱۱؛ رساله پولس به کولسیان باب ۱ آیه ۱۳ تا ۱۴؛ رساله اول یوحنا باب ۱ آیه ۵ تا ۱۰*

## 50. ۵۰- عیسی اَی گِردِنِه

https://openbiblestories.org/l/mzn/story-50/

![](https://cdn.door43.org/obs/jpg/360px/obs-en-50-01.jpg)

۲۰۰۰ سالی بونه کِه دِنیایِ آدِما ، خَوِرِ خِش اِنجیل عیسایِ مسیح رِه اِشتونِنِه. کِلیسا دَییِّه روُش گیته. عیسی مُژدِه هِدا بی یِه کِه آخِر دِنیا دِوارِه بَرگِردِنِه. دِرِسِّه که عیسی هَنتا نیَمو، مُنتا شِه گَپِ سَر اِسّنِه و شِه وَعدِه رِه وِفا کِندِه.

![](https://cdn.door43.org/obs/jpg/360px/obs-en-50-02.jpg)

خِدا اَمِه جِه خوانِه هَمینطی کِه مسیحِ دَگِرِسِنِ وِسِّه چِش بِه راه هَسِّمی، پاک زِندِگانی هَکِنیم َو وِنِه ارزش ره بَدونیم. اَی وِه اَمِه جا خوانِه کِه وِنِه پادِشاهیِ دَرواره هَمِة مَردِمِ جا گَپ بَزِنیم.مَسیح اونگِدِر کِه دِنیایِ دِله زِندِگانی کِرده، اینطی بِفَرمِسِّه: «مِه شاگِردا خَوِرِ خِشِ پادشاهی خِدا رِه هَمِة دِنیاِیِسّه گِنِنه، اونگِدِر آخِر دِنیا رَسِنِه.»

![](https://cdn.door43.org/obs/jpg/360px/obs-en-50-03.jpg)

خَلِه قوما دَرِنِه کِه عیسایِ دَروارِه هَنتا هیچی نِشتوسِّنِه. مَسیح هَنتا آسِمون نَشی بی یه، مَسیحیا رِه بِفَرمِسِّه تا اینتا خَوِرِ خِش رِه اَتَنده آدِمایِسّه که هیچ زَمون نِشتوسِّنِة گوش بَرِسِنن. عیسی بِفَرمِسّه: «بُورین و هَمِة مَردِمِ دِنیا رِه مِه شاگِرد هَکِنین، چونکِه وِشونِ دِل اَتّا دَشتِ وَنِکِت بِتاشیِنِ وِسّه آمادوئِه.»

![](https://cdn.door43.org/obs/jpg/360px/obs-en-50-04.jpg)

عیسی اینتارِم باته کِه: «خِدمِتکار ، شِه اِربابِ تون بالاتِر نی یِه. هَمونطی کِه دِنیایِ اِربابون مِه جِه بَد داشتِنِه، شِمارِم مِه خاطِری شِکِنجِه کِنِنِه و کِشِنِنِه. این دِنیایِ دِلِه دَرد و رَنج کَشِنِنی مُنتا شِمِه دِلِ دِلِه اُو تِکون نَخِرِه، چونکِه مِن این دِنیایِ پادِشاه کِه شیطون هَسّه رِه بِنِه بَزّومه. اَگِه تا آخِر مِه جا وِفا هَکِنین، اونگِدِر خِدا شِما رِه رِهایی دِنِّه.!»

![](https://cdn.door43.org/obs/jpg/360px/obs-en-50-05.jpg)

عیسی شِه شاگِردایِ وِسِّه اَتّه داستان باتِه، تا وِشون ره هالی هَکِنِه کِه آخِرِ دِنیا مَردِمِ سَر چِه بِلا اِنِه. وِه باته: «اَتّا مَردی شِه زَمینِ دِلِه خارِه تیم دِکاشتِه. اون ماقه که بَخِت بی یه ، دِشمِن بیَمو وُ وِنِه گَنّمِ تیمِ دِل به دَله عِلِفِ تیم دِکاشتِه وُ شِه راه رِه بَیتِه ، بُوردِه.

![](https://cdn.door43.org/obs/jpg/360px/obs-en-50-06.jpg)

تیما کِه نوچ بَزّونِه، اونتا مَردیِ کارگِرا باتِنِه: «اَی آقا، شِما که خارِه تیم زَمینِه دِلِه دِکاشتِنی! چی شیسِّه وِشونِ دِله عَلِف نوچ بَزّو؟» اونتا مَردی جِواب هِدا: «اینتا کار،مِه دِشمِنِونِ جِه بَر اِنّه. مِه اَتّه دِشمِن اینتا کارِه هَکِردِه.»

![](https://cdn.door43.org/obs/jpg/360px/obs-en-50-07.jpg)

کارِگِرا شِه اِرباب رِه جِواب هِدانِه: «اِسا گِنی عَلِفا رِه وِنه وِجین هَکِنیم؟» اِرباب دَر جِواب باتِه: «نا اَگِه اینتا کارِه هَکِنین اَتی گَنّما رِم وِجِنِّنی . تا بِتاشیِن لَس هَدین وُ اونگِدِر عِلف رِه تَش بَزِنین، مُنتا گَنّما رِه مِه اِمبارِه دِلِه بیارین.»

![](https://cdn.door43.org/obs/jpg/360px/obs-en-50-08.jpg)

شاگِردا نَیتِنه کِه اینتا داستان، چِشی ره خوانِه بَوِّه و مَسیحِ جه بِخواسّنِه تا داستان رِه وِشونِسّه قِشَنگ رُوشِن هَکِنِه. عیسی باته: «اونتا مَردی کِه خارِ تیم دِکاشتِه، مَسیح هَسّه. دَشت وُ لَتِکا هَمین دِنیا هَسّه و خارِه تیم اونتا مَردِمی هَسِّنِه کِه خِدایِ پادِشاهیِ دِلِه دَرِنِه.»

![](https://cdn.door43.org/obs/jpg/360px/obs-en-50-09.jpg)

عَلِف اون آدِمایی هَسّنِه کِه شَرِّنه و شیطونِ وَر دَرِنه. اونتا مَردیِ دِشمِن هَمونتایی هَسّه که عَلِفِ تیم رِه دِکاشتِه، وِه هَمون اِبلیس هَسّه. بِتاشیِن ماقِه آخِر دِنیا هَسّه، و فِرِشتِهام هَمون گَنِّم تاشا هَسِّنِه.

![](https://cdn.door43.org/obs/jpg/360px/obs-en-50-10.jpg)

دِنیا کِه آخِر بَرِسِه، فِرِشتِه ها اون آدِمایی کِه اِبلیسِ وَر دَرِنِه رِه ، تِمومِ دِنیایِ جِه اَتّه جا جَمع کِنّنِه و تَشِ دِریاچة دِلِه دِم دِنّنِه. اَتّه جا هَسّه کِه زار و بِلایِ جِه بِرمِه زاری کِننِه اَندِه که وِشونِ دَندون چِرَکِ چِریک کِنده. مُنتا پَریزکارا کِه عیسیِ دِمبال بوُردِنِه، شِه پی یِرِ پادِشاهیِ دِلِه اِفتابِ واری سو سو زَنّه.

![](https://cdn.door43.org/obs/jpg/360px/obs-en-50-11.jpg)

عیسی اَی هَمطی باته کِه این دِنیا تِموم نَیّیِه پِه وِه دِوارِه بِنِه اِنِه. وِه هَمونطی کِه زمین رِه تَرک هَکِردِه، دِواره بَرگِردِنِه، اینطی کِه اَمِه واری تَن دارنِه و اَبرِ دِلِه آسِمونِ جِه بِنِه اِنِه. عیسی دَگِرِس پِه هَر مَسیحی کِه بَمِرد بی یه ،دِوارِه زِندِه بوُنِه و وِرِه آسِمونِ دِلِه وینِده.

![](https://cdn.door43.org/obs/jpg/360px/obs-en-50-12.jpg)

مَسیحیایی کِه هَمون زَمون زِندِه هَسِّنِه، وِشونِم آسِمون شونِنِه و مَسیحی هایِ دیگِة پَلی شوننه کِه مِرده های دلهٔ جه زِندِه بَئینِه، هَمِه تایی هَمونجِه عیسایِ پَلی دَرِنِه وُ عیسی شِه قومِ پَلی زِندِگانی کِندِه. وِشون هَمیشِک آسایِش دله هِدی جا زِندِگانی کِنّنِه.

![](https://cdn.door43.org/obs/jpg/360px/obs-en-50-13.jpg)

عیسی وَعدِه هِدا، هَر کَس کِه وِرِه بوُوِر هَکِنِه، وِرِه اَتّه تاج بَخشِنِه. وِشون خِدایِ هِمکِت تا هَمیشِک هَمِه چیِ سَر فَرمونرِوایی کِنِّنِه وَ هَمیشِک آسایِش دارنِنه.

![](https://cdn.door43.org/obs/jpg/360px/obs-en-50-14.jpg)

مُنتا خِدا اونایی کِه عیسی رِه بوُوِر نَکِردِنِة جِه، حِساب کَشِنِه. وِه وِشون رِه تَشِ دِلِه دِم دِنِه. هَمونجِه ایکِه هَمیشک بِرمِه کِنّنِه و دَنّون چِریکه دارنِنه و دَرد کَشِنِنِه. اون تَشِ دِلِه کِه هیچ زَمون خاموش نانِه، وِشونِ پِتکا بونِنِه وُ اَجیکِ وِشونِ بَخِردِنِه جِه سِر نَوونه.

![](https://cdn.door43.org/obs/jpg/360px/obs-en-50-15.jpg)

عیسی دَگِرِس پِه، شیطون و وِنِه فَرمونرِوایی رِه اَز دَم نیست و نابود کِندِه. شیطونِم تا اَبِد هَمونایِ هِمکِت کِه خِدایِ جا سَر وِنِه دِمبال بوردِنِة واری تَشِ دِلِه پِتکا بونِنِه وُ سوزِنِنه.

![](https://cdn.door43.org/obs/jpg/360px/obs-en-50-16.jpg)

آدِم وُ حَوّایِ نافَرمونیِ جِه بی یه که گِناه دِنیایِ دِلِه بیَمو، هَمینتاسّه خِدا دِنیا رِه نَفرین هَکِردِه و بِخواسِّه تا وِرِه نابود هَکِنِه. مُنتا اَتّه روز خِدا نو آسِمون و نو بِنِه دِرِس کِندِه کِه هِچّی کَم نِدارنِه.

![](https://cdn.door43.org/obs/jpg/360px/obs-en-50-17.jpg)

عیسی وُ وِنِه مَردِم، نو بِنة سَر زِندِگانی کِنِّنه، و وِه تا هَمیشِک هَمه چیه سَر ، پادِشاهی کِندِه. وِه مَردِمِ چِشِ اَسلی رِه پاک کِندِه. دیگِه نا داغ وینده و نا هیچکَس دَرد کَشِنِه. وِشون هیچ زَمون بِرمِه نَکِنِنِه، هیچکَس ناخِش ناُنِه و نَمیرنِه. هچی اونجه نَخِش نی یه و عیسی عدل و دادِ جا شِه پادِشاهیِ دِلِه، فَرمونرِوایی کِندِه. همه چی نوُ بَئی په وِه شِه قومِ جا تا هَمیشِک زِندِگی کِندِه. کِتابِ مُقَدِسّ جه بَئیته داستان :

*؛ انجیل متی باب ۱۳ آیه ۲۴ تا ۴۲و باب ۲۲ آیه ۱۳ و باب ۲۴ آیه ۱۴و باب ۲۸ آیه ۱۸؛ انجیل یوحنا باب ۱۵ آیه ۲۰ و باب ۱۶ آیه ۳۳؛ رساله اول پولس به تسالونیکیان باب ۴ آیه ۱۳ و باب ۵؛ کتاب مکاشفه باب ۲ آیه ۱۰*