# unfoldingWord Open Bible Stories — Naga Pidgin

- Language code: `nag`
- Canonical page: https://openbiblestories.org/l/nag/
- Stories in this file: 50 of 50
- Published by: Door43-Catalog
- Last release: 2026-07-24
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Naga Pidgin translation; it is not a translation of the whole Bible.

## 1. Sristi aru Prithibi Bonai dia

https://openbiblestories.org/l/nag/story-1/

![](https://cdn.door43.org/obs/jpg/360px/obs-en-01-01.jpg)

Isor pora etu nisina he surute sob banaise. Tai choe din homoete akash mondal te thaka aru pritibi te thaka sob banaise. Isor pora prithibi banaise hoilebi, itu sob tu andhar aru khali thakise, kile koile tai prithibi te ekubi nabanaikena thakise. Hoilebi, Isor laga Aatma pani uporte berai thakise.

![](https://cdn.door43.org/obs/jpg/360px/obs-en-01-02.jpg)

Tetia Isor pora koise, “Ujala hobole dibi.” Aru ujala hoise. Itu dikhikena Isor khusi hoise aru ituke “din” matise. Tai andhar pora ujalake alag kurise aru ituke “rati” matise. Isor pora ujala ke poila din te banai se.

![](https://cdn.door43.org/obs/jpg/360px/obs-en-01-03.jpg)

Sristi laga dusra din te, Isor pora koise: “Pani laga uporte ekta dag dibi aru itu dag pora pani aru samundar majote duita bhag-te bhag kuribi.” Itu nisina, pani aru samundar laga majote dag hoise aru samundar upor laga bhag ke tai ‘akash’ matise.

![](https://cdn.door43.org/obs/jpg/360px/obs-en-01-04.jpg)

Tisra din te, Isor pora koise; “Akash laga nichete thakia panikhan ke ekta jagate joma hobole dibi, tetia matik ulaikena ahibo.” Tai itu mati ke ‘prithibi’ matise aru panikhan thakia jagake tai ‘samundar’ matise. Itukhan huatu dikhikena Isor khusi paise.

![](https://cdn.door43.org/obs/jpg/360px/obs-en-01-05.jpg)

Tetia Isor pora koise, “Pritibi te sob kisim laga ghas aru ghas-patta khan hobole dibi.’’ Aru ineka he hoise. Itukhan huatu dikhikena Isor khusi paise.

![](https://cdn.door43.org/obs/jpg/360px/obs-en-01-06.jpg)

Sristi laga char din te Isor pora koise: “Akaste ujala hobole dibi.” Aru suraj, chand, aru tarakhan sob ulaise. Isor pora itukhan prithibi te ujala dibo nimite, din aru rati ke alag kuribole nimite, hawa-pani bodli kura aru sal bodli hoa janibole karone banaise. Itukhan huatu dikhikena Isor khusi paise.

![](https://cdn.door43.org/obs/jpg/360px/obs-en-01-07.jpg)

Panch din te Isor pora koise: “Panite kisim-kisim jinda-thaka prani khan pora bhorta hobole dibi, aru akash te uribole chiriakhan pora bhorta hobole dibi.” Itu nisina Isor pora panite haturi juwa kisim kisim prani aru akaste chiria khan banaise. Isor itu sob dikhikena khusi paise aru tai taikhan sob uporte asis dise.

![](https://cdn.door43.org/obs/jpg/360px/obs-en-01-08.jpg)

Sristi laga choi din te Isor pora koise: “Prithibi te kisim kisim janwarkhan hobole dibi.” Aru thik Isor koa nisina he hoise. Kunba ghorte palia janwarkhan, kunba matite berai thaka aru kunba kanke jongol te thakia janwar khan banaise. Aru itu dikhikena Isor besi khusi paise.

![](https://cdn.door43.org/obs/jpg/360px/obs-en-01-09.jpg)

Itu pichete Isor pora koise: “Amikhan itia manu-jati banabo; taikhan ke amikhan nisina dikhibole banabo. Taikhan mati uporte aru sob so januwar khan uporte hukum cholabo.”

![](https://cdn.door43.org/obs/jpg/360px/obs-en-01-10.jpg)

Ineka he Isor mati olop dhuli loise, aru itu pora manu banaise, aru tai laga sas nakte phuki dise.

Itu manu laga nam tu Adam rakhise. Isor para Adam ke ekta dangor bagante rakhise aru taike itu bagan dekbhal kuribole dise.

![](https://cdn.door43.org/obs/jpg/360px/obs-en-01-11.jpg)

Bagan laga majote, Isor para duita kisim gash lagaise – ekta tu jibon laga gash, aru dusra tu bhal-bia janibole gyan-budhi dia laga gash. Isor para Adam ke tai sob ghas laga guti khabole pare koise, hoilebi bhal-bia janibole gyan-budhi dia laga ghas laga guti nakhabi koise. Adam itu ghas laga guti khaise koile, tai moribo koise.

![](https://cdn.door43.org/obs/jpg/360px/obs-en-01-12.jpg)

Tetia Isor pora koise: “Manu toh ekla thakia tu bhal nai.” Kile mane taike modot dibole janwar majote ektabi tai nimite thik thaka nai.

![](https://cdn.door43.org/obs/jpg/360px/obs-en-01-13.jpg)

Itu nimite, Isor para Adam ke mora nisina ghumabole dise. Tetia Isor pora Adam laga chati pora ekta kami hardi ulaise aru itu pora ekjon maiki banaise aru Adam laga usorte anise.

![](https://cdn.door43.org/obs/jpg/360px/obs-en-01-14.jpg)

Ketia Adam utu maikike dikhise, tai koise: “Itia he ami nisina ekjon hoise! Tai laga nam to “maiki” rakhibo, kilekoile taike “mota” laga hardi pora banaise. Itu nimite he ekta manu tai laga baba aru ama ke charikena tai laga maiki logote jaikena tai duijon ekta hoijai.

![](https://cdn.door43.org/obs/jpg/360px/obs-en-01-15.jpg)

Isor pora mota aru maikike tai nisina banaise. Isor taikhan ke asis dise aru koise: “Tumiikhan bacha aru nata-natikhan pora prithibi bhorta kuribi!” Isor pora tai banakhan sob saikena bisi khusi hoise. Aru Itu choutha din thakise.

![](https://cdn.door43.org/obs/jpg/360px/obs-en-01-16.jpg)

Sat din aha homoete, Isor laga kam sob khotom hoise. Tai sat din ke asis dise aru itu dinke sapha din rakhise, kilemane itu din te tai sob banaikena khotom kurise aru kam bon kurise. Ineka pora Isor sristi te aru prithibi te thakakhan sob ke banaise.

*A Bible story from: Genesis 1-2*

## 2. Pap Duniya te Ahise

https://openbiblestories.org/l/nag/story-2/

![](https://cdn.door43.org/obs/jpg/360px/obs-en-02-01.jpg)

Isor pora banai dia bagan te, Adam aru tai laga Maiki bisi khusi pora thakise. Taikhan kapor nalagai kena lengta thakilebi taikhan sorom koranai, kilemane prithibi te iku pap thaka nai. Kitiaba taikhan bagan te berai thaka homoe te, Isor logote khota kuri thakise.

![](https://cdn.door43.org/obs/jpg/360px/obs-en-02-02.jpg)

Hoilebi itu bagan te ekta sap thakise. Utu sap bisi chalak thakise. Tai utu maiki ke hudise; ‘‘Hosa pora Isor apuni ke kunba gaas laga guti nakhabi koise naki?’’

![](https://cdn.door43.org/obs/jpg/360px/obs-en-02-03.jpg)

Aru maiki pora sap ke uttar dise; ‘‘Isor pora amikhan ke bagan te thaka sob gaas laga guti khabi koise, hoilebi khali bhal-bia janibole gyan-budhi dia gaas laga gutihe nakhabi koise. Aru Isor pora koise, ‘utu gaas laga guti khaise aru hath pora chuise-koile bi tumikhan moribo.’’’

![](https://cdn.door43.org/obs/jpg/360px/obs-en-02-04.jpg)

Sap pora maiki ke uttar dise; ‘‘Itu hosa nohoe; apunikhan namoribo!’ Isor janikena thaki ase apunikhan itu kha-a logote he apunikhan bi Isor nishna hoijabo aru tae nishna bhal aru bia ase sob janijabo.’’

![](https://cdn.door43.org/obs/jpg/360px/obs-en-02-05.jpg)

Itu maiki gaas te thaka guti dikhikena bisi sundor lagise aru khabole bisi bhal hobo bhabna kurise. Aru tai bi Isor nisina sob janibole mon hoijaise. Itu nimite tai olop guti loikena khaise aru tai laga mota ke bi dise, aru tai bi khaise.

![](https://cdn.door43.org/obs/jpg/360px/obs-en-02-06.jpg)

Achanak pora taikhan laga suku khulijaise, aru taikhan taikhan lengta ase koikena janibole parise. Aru itu nimite taikhan laga gao ke bon kuribole gaas laga dangor patta loikena kapra banaise.

![](https://cdn.door43.org/obs/jpg/360px/obs-en-02-07.jpg)

Itu pichete, taikhan mota aru tailaga maiki duijon Isor pora bagan te berai thaka laga awaj hunise. Aru tai duijon Isor pora lukai jaise. Utu homoe te Isor pora manu ke matise; “Apuni kote ase?” Adam pora uttar dise; ‘‘Ami apunike bagan te berai thaka hunise, aru ami bhoi lagise, kilekoile ami lengta ase. Itu nimite ami lukaise.’’

![](https://cdn.door43.org/obs/jpg/360px/obs-en-02-08.jpg)

Tetia Isor hutise; ‘‘Kun koise apuni lengta ase koikena? Ami apunike juntu guti nakhabi koise utu khaise naki?” Utu manu jawab dise; ‘‘Apuni amike juntu maiki dise, utu maiki he amike utu guti dise, aru ami khaise.’’ Tetia Isor utu maiki ke hutise; “Apuni itu ki korise?’’ Utu maiki koise; ‘‘Utu sap pora amike thokai kena khabole dise.’’

![](https://cdn.door43.org/obs/jpg/360px/obs-en-02-09.jpg)

Tetia Isor sap ke koise; ‘‘tumi itu nimite shrap paise; tumi nijor pet pora susurikena berabo aru mati khai kene thakibo. Tumi aru itu maiki apaste ghin laga lagi hobo, tumi laga bachakhan aru tailaga bachakhan hodae dusman hoikena thakibo. Tai pora aha-a-khan apunilaga matha ke bhangai dibo aru apuni taikhan laga theng te kamuribo.’’

![](https://cdn.door43.org/obs/jpg/360px/obs-en-02-10.jpg)

Tetia Isor pora utu maiki ke koise; ‘‘tumi pet-te bacha bukha homoe te tumike bisi digdar pabo aru bacha jonom dibole homoete bisi bikhaikena dukh pabo. Tumi laga mota ke tumi bisaribo aru tailaga nichete thakibo aru tai tumike hokum cholabo.’’

![](https://cdn.door43.org/obs/jpg/360px/obs-en-02-11.jpg)

Aru Isor pora manu ke koise, ‘‘Tumi tumi laga maiki laga kotha manikena ami laga kotha mananai. Itu nimite tumi laga theng nichete thaka matitu shrap paise, kha-a-laga bhojan guti khan ulabole nimite tumi itu mati uporte bisi kam kuribo. Aru tumi morijabo aru juntu mati pora apuni ke banaise itu matite wapas jaijabo.’’ Itu manu tai laga maiki laga nam Eve rakhise, kilekoile tai sob manu-jatikhan laga ama ase. Aru Isor pora Adam aru Eve ke janwar laga chamara pora kapor banaikena tai khanke lagaidise.

![](https://cdn.door43.org/obs/jpg/360px/obs-en-02-12.jpg)

Itu pichete Isor koise; ‘‘Itia manu khan bi ami khan nisina hoise aru ki bhal ase aru ki bia ase itu khan sob janijaise. Taikhan ke jibon laga ghas pora guti khaikena hodae nimite jinda thakibole nadibo lage.’’ Itu nimite Isor pora Adam aru Eve ke bagan pora ulai jabole dise. Aru ta-te bisi takot thaka duthkhanke bagan te humabole laga rasta te rakhise, aru kunkebi jaikena ghas laga guti khabole naparibo nimite ineka rakhise.

*A Bible story from: Genesis 3*

## 3. Ban-Pani

https://openbiblestories.org/l/nag/story-3/

![](https://cdn.door43.org/obs/jpg/360px/obs-en-03-01.jpg)

Bisi homoe pichete, manu-jatikhan prithibi te bhorta hoijaise. Taikhan bisi bodmas aru gunda kamkhan kurithakise. Taikhan bisi bia hoe ja-a pora, tai prithibi te ekta dangor ban-pani pothaikena sob dhongso kuribole bhabna korise.

![](https://cdn.door43.org/obs/jpg/360px/obs-en-03-02.jpg)

Hoilebi Isor pora Noah ke bisi khusi paikena thakise. Tai ekla dharmik manu thakise, aru baki dusrakhan sob bisi bia manukhan thakise. Isor pora Noah ke tai laga bhabona jonai dise. Itu nimite Noah ke ekta dangor nao banabole koise.

![](https://cdn.door43.org/obs/jpg/360px/obs-en-03-03.jpg)

Isor pora Noah ke 140 meter lamba, 23 meter chourah aru 13.5 meter utcha nao banabole koise. Aru itu naoke khuri pora banabo aru itu tin tola hobo, aru naote kamrakhan bisi banabo, aru uporte ekta chat banabo aru ekta khirki banabo ineka koise. Noah aru tai laga khandankhan aru mati te thaka laga kisim-kisim janwarkhan sob pani aha homoete, nao laga bhitor te thakibo koise.

![](https://cdn.door43.org/obs/jpg/360px/obs-en-03-04.jpg)

Isor pora ki koise, itu sob Noah manikena korise. Noah aru tae laga tinjon chokorakhan milikene Isor pora jonai dia nisna he noa ke banaise. Aru Nao bisi dangor hoa-a nimite, khotom koribole bisi sal lagise. Noah pora dangor ban-pani ahibole ase koikena manukhan ke Isor bisarilobi koikena jonai dise, hoilebi manukhan Noah laga khota biswas kura nai.

![](https://cdn.door43.org/obs/jpg/360px/obs-en-03-05.jpg)

Isor pora Naoh aru tai laga pariwar-manukhan ke kha-a-loakhan taikhan nijor nimite aru janwarkhan nimite bhitor te loijabi koise. Jetia sob kam khotom hoise, tetia Isor pora Noah ke naote ghusibole homoe ahise koise, itu nimite tai laga maiki, tinjon chokorakhan aru taikhan laga maikikhan, sob milaikena ath-jon nao bhitorte ghusibole jonaise.

![](https://cdn.door43.org/obs/jpg/360px/obs-en-03-06.jpg)

Isor pora sob kisim laga janwar aru chiria khan maje pora eka-mota eka-maiki korikena nao bhitorte ghusibo dise. Isor pora jun janwarkhan niom-pora sapha bonaise utu janwar laga ekta-mota ekta-maiki korikena sat-ta jora pathaise. Taikhan sob bhitorte ghusiloise aru Isor nijor pora nao laga dorjake bon kuridise.

![](https://cdn.door43.org/obs/jpg/360px/obs-en-03-07.jpg)

Itu pichete pani giribole suru hoise. Aru itu baris tu chalis din aru rati tok narukhikena giri thakise! Mati uporte Pani bisi uthi jaise aru bisi utcha paharkhan bi pani pora sop bon kuridise.

![](https://cdn.door43.org/obs/jpg/360px/obs-en-03-08.jpg)

Jun manukhan aru janwarkhan nao bhitor te thakise utu khan ke charikena prithibi te jiman jinda jib janoarhan thakise itu khan sob morijaise. Utu nao pani uporte thakise aru khali noa bhitor te thaka khan ke he bachaise.

![](https://cdn.door43.org/obs/jpg/360px/obs-en-03-09.jpg)

Pani gira rukhija-a pichete, pani uporte nao panch mahina tok bohi thakise, aru itu homoe te pani niche jabole lagise. Aru ek din, nao ekta pahar uporte ahikena rukhijaise. Hoilebi tetia tok pani bisi thakise. Aru tin mahina pichete, pahar laga uporkhan dikhibole paise.

![](https://cdn.door43.org/obs/jpg/360px/obs-en-03-10.jpg)

Arubi chalis din pichete, Noah ekta kaowa chiria ke baharte urikena jabole dise. Hoilebi chiria toh sukhi-ja mati bisarikena uporte he uri thakise, kilekoile sukha mati thaka nai.

![](https://cdn.door43.org/obs/jpg/360px/obs-en-03-11.jpg)

Itu pichete, Noah pora mati sukhi ase na nai janibole karne ekta kobutar chiria ke baharte pathaise. Hoilebi matikhan pani pora bon korikena thakise, itu nimite utu kopu nao te wapas urikena ahijaise. Sat din rukha pichete, arubi Noah pora ekta kobutar chiria ke pathaise, aru itu kabutar tu tai laga mukh te ekta kacha oliv-dal dhurikena Noah logote wapas ahise! Tetia, pani bisi sukhijaise aru notun ghaskhan ulaiase koikena Noah janibole parise!

![](https://cdn.door43.org/obs/jpg/360px/obs-en-03-12.jpg)

Noah aru bi sat din rukhise, aru tai ekta kobutar chiria ke pathaise. Itu bar kobutar tu wapas ahia-nai, kilename kabutar tu aram kuribole jaga pai jaise. Tetia panikhan sukhise koikena Noah buji se.

![](https://cdn.door43.org/obs/jpg/360px/obs-en-03-13.jpg)

Dui mahina piche te, Isor pora Noah ke koise; ‘‘Apuni aru apuni laga ghor manukhan aru chiriakhan aru janwarkhan sob loikena nao pora bahar te ulabi. Bisi bacha jonom kuribi aru pura prithibi ke bhorta kuribi.’’ Itu nisina taikhan sob nao pora bahar te ulaise.

![](https://cdn.door43.org/obs/jpg/360px/obs-en-03-14.jpg)

Noah nao pora bahar ulaija-a piche te, tai ekta bolidan kura jaga banaise, aru sob kisim laga ekta korikena niom-pora-sapha janwar aru chiria loise aru boldian kurise. Isor bisi khusi paise aru Noah aru tai laga ghor manukhan ke asis dise.

![](https://cdn.door43.org/obs/jpg/360px/obs-en-03-15.jpg)

Isor koise; ‘‘Ami kosom kori ase, manukhan pap kam kuri thakilebi itu nimite ami aru kitiabi itu prithibi te shrap nadibo, taikhan bisi bia kamkhan kurilebi, ami kitia bi jinda thaka samankhan ban-pani pora sob khotom nakoribo, taikhan bacha thaka homoe pora taikhan laga bhabonakhan sob pap laga he ase. ’’

![](https://cdn.door43.org/obs/jpg/360px/obs-en-03-16.jpg)

Isor pora tai kosom kha laga akash te ekta dhanush rakhise. Jitiabi akash te dhanush ulabo, tetia itu dikhikena Isor tai dia laga kosom mon-te rakhibo aru tai laga manukhan bi ineka bujibo.

*A Bible story from: Genesis 6-8*

## 4. Isor Pora Abram Logote Niom Banaise

https://openbiblestories.org/l/nag/story-4/

![](https://cdn.door43.org/obs/jpg/360px/obs-en-04-01.jpg)

Ban-pani hoa bisi sal pichete, manukhan prithibi te arubi bisi bhorta hoise aru taikhan bisi pap kamkhan kuri thakise aru ekjon-ekjon apaste bia kam kuri thakise. Aru sob manukhan ekta bhasa he cholai thakise, aru taikhan sob ekta sahar banaikena eki logote thakijabole bhabona kurise, aru Isor pora tai khanke prithibi sob bhorta kuribi koa kotha taikhan mananai.

![](https://cdn.door43.org/obs/jpg/360px/obs-en-04-02.jpg)

Taikhan bisi phutani hoise aru Isor pora taikhan ke kineka tai laga kothakhan manikena thakibo lage itu niomkhan juntu dise sob bhangai dise. Aru taikhan ekta utcha ghor banabole kurise, juntu sorgo tok punchibole paribo. Isor tetia dikhise tai khan ineka eki logote thakile, aru bisi bia kam kuribole paribo.

![](https://cdn.door43.org/obs/jpg/360px/obs-en-04-03.jpg)

Itu nimite, Isor pora taikhan laga ekta bhasake apaste buji napabole laga bisi bhasa kuridise, aru taikhan ke prithibi laga alag alag jagate khedai dise. Kuntu taun tae khan banai thakise utu taun ke Babel matise, itu laga motlob ase ‘ulta-pulta kuridia.’

![](https://cdn.door43.org/obs/jpg/360px/obs-en-04-04.jpg)

Ekso sal pichete, Isor pora ekjon manu, jun laga nam Abram thakise, taike kotha koise. Isor Abram ke koise; “Apuni laga desh aru ghor manukhan ke charibi, aru utu desh te jabi juntu ami apuni ke dikhabole ase. Ami apuni ke asis dibo aru apuni ke dangor desh banabo. Apuni laga nam bisi utcha kuridibo. Jun apuni ke asis kuribo ami tai ke asis dibo, aru jun apuni ke shrap kuribo ami tai uporte shrap rakhidibo. Aru apuni pora ami sob deskhan ke asis dibo.”

![](https://cdn.door43.org/obs/jpg/360px/obs-en-04-05.jpg)

Isor pora koa nisina Abram kurise. Tai laga maiki Sarai aru tai kiniloa noukarkhan aru jiman dhonkhan komaise itu khan sob loikena Isor dekhai dia desh Canaan phine jaise.

![](https://cdn.door43.org/obs/jpg/360px/obs-en-04-06.jpg)

Jetia Abram Canaan te punchise, Isor tai ke koise: “Apuni laga chuku pora jiman mati dikhibole paribo, utu sob ami apuni ke dibo aru hodae nimite apuni laga khandankhan laga hobo.” Aru Abram utu desh te thaki jaise.

![](https://cdn.door43.org/obs/jpg/360px/obs-en-04-07.jpg)

Melchizedek nam laga ekta manu thakise, aru tai Isor Pormeswar laga pujari asile. Ek din jetia Abram lorai jitikena ahi thakise, tetia tai aru Abram lok kurise. Tai Abram ke asis dise aru koise: “Isor Pormeswar, jun swarg aru prithibi laga malik ase, Abram ke asis dibi!” Aru Abram ji-ji samankhan lorai te dhurikena anise itu sob laga dos bhag Melchizedek ke dise.

![](https://cdn.door43.org/obs/jpg/360px/obs-en-04-08.jpg)

Bisi sal hoijaise, hoilebi Abram aru Sarai ke bacha hoanai. Isor Abram ke kotha koise aru kosom dise tai ekta chokora pabo aru tai laga khandankhan asman te ginti kuribole napara tarakhan nisina hobo koise. Abram Isor laga kosom biswas kurise. Aru Isor pora Abram ke dharmik ase koise, kilekoile Abram Isor laga kosom ke biswas kuri thakise.

![](https://cdn.door43.org/obs/jpg/360px/obs-en-04-09.jpg)

Tetia Isor pora Abram logote ekta kotha milaise. Jetia niom milai, tetia duita bhag manukhan majote kotha milaithake. Hoilebi iyate toh Isor pora Abram ke mora nisina ghumabole dise aru tai logote kotha milaise, hoilebi Abram Isor laga awaz hunibo pari thakise. Isor tai ke koise; “Ami apuni ke nijor laga chokora dibo. Aru Canaan laga desh apuni laga khandankhanke dibo.” Hoilebi tetia tok Abram ke chokora hoanai.

*A Bible story from: Genesis 11-15*

## 5. Kosom Dia Laga Chokora

https://openbiblestories.org/l/nag/story-5/

![](https://cdn.door43.org/obs/jpg/360px/obs-en-05-01.jpg)

Canaan te ahikena dos sal pichete bi, Abram aru Sarai ke bacha jonom hoanai. Sarai pora Abram ke koise; ‘‘Isor amike bacha jonom dibole napara banaidise aru itia ami bisi buri hoijaise. Apuni amilaga kini-loa-noukarni Hagar logote shadi koribi aru tai pora ami nimite ekta bacha jonom koribole dibo.’’

![](https://cdn.door43.org/obs/jpg/360px/obs-en-05-02.jpg)

Aru Abram Hagar ke shadi korise. Hagar pora ekta chokora ke jonom dise. Aru bacha laga nam Ishmael rakhise. Hoilebi Sarai Hagar ke chuku-joli jaise. Jetia Ishmael teroh sal hoise tetia Isor arubi Abram ke kotha kurise.

![](https://cdn.door43.org/obs/jpg/360px/obs-en-05-03.jpg)

Isor pora koise; ‘‘Ami Pormeswar ase. Ami apuni logote ekta kotha milabo.’’ Abram tai laga matha pora mati te chuise. Isor tai ke koise; ‘‘Apuni bisi desk laga khandanlaga baba hobo. Canaan desh hodae nimite apunilaga khandan laga hoijabo, aru ami hodae nimite taikhan laga Isor hobo. Apuni laga khandan te jiman motakhan ase sob laga chamara-kata kuribi .’’

![](https://cdn.door43.org/obs/jpg/360px/obs-en-05-04.jpg)

‘‘Apuni laga maiki Sarai ekta chokora ke jonom dibo. Tai laga nam Isak rakhibi. Ami tai logote aru tailaga khandankhan logote hodae nimite ekta kotha milaikena rakhibo, aru tai ekta dangor desh hoijabo. Ami Ishmael ke bi bisi khandankhan hobole dibo, hoilebi ami ki kotha milabo ase apunilaga chokora Isak logote he hobo.’’ Isor pora Abram laga nam Abraham rakhise aru itu motlob ‘bisi deskhan laga khandankhan laga baba.’ Aru Sarai laga nam bi Sarah ‘rajkumari’ matise.

![](https://cdn.door43.org/obs/jpg/360px/obs-en-05-05.jpg)

Utu din te he Abraham Isor laga kotha manikena tailaga chokora Ishmael aru ghorte jiman mota-manukhan ase aru jiman kini-loa-noukarkhan laga chokora ase, sob laga chamara-kata kurise. Ek sal pichete, Abraham jetia ek-sou sal aru Sarah nabai-sal asile, tetia Sarah pora Abraham laga chokora ke jonom dise. Isor pora koa nisena, Abraham tai laga chokora laga nam Isak rakhise.

![](https://cdn.door43.org/obs/jpg/360px/obs-en-05-06.jpg)

Jetia Isak olop dangor hoise, Isor para Abraham laga biswas ke porikha korise aru ineka koise; ‘‘Apuni laga chokora Isak ke lobi, apunilaga khali ekta thaka chokora ke lobi aru tai ke loikena ami ke bolidan kuribi.’’ Arubi Abraham Isor laga kotha manise aru tai laga chokora ke bolidan kuribole taiari kurise.

![](https://cdn.door43.org/obs/jpg/360px/obs-en-05-07.jpg)

Jetia Abraham aru Isaac eki logote bolidan kura jagate punchise, Isak tai laga baba ke hudise; ‘‘Baba! Amikhan logote jolabole khurikhan ase, hoilebi boli koribole nimite bhera-laga-bacha kote ase?’’ Abraham koise; ‘‘Ami laga chokora, bhera Isor pora dibole ase.’’

![](https://cdn.door43.org/obs/jpg/360px/obs-en-05-08.jpg)

Jetia taikhan utu jagate punchise, Abraham tailaga chokora ke bandise aru tai ke bolidan kura laga jaga uporte rakhise. Tai Isak ke boli koribole dao uthaise, utu homoe te Isor pora koise; ‘‘Rukhibi! Utu chokora ke ekubi nakoribi aru taike jokhom nakoribi! Ami itia janise apuni amike bisi bhoi kure kilekoile apuni apuni laga khali ekta chokora thaka kebi amike dibole nimite rukha nai.’’

![](https://cdn.door43.org/obs/jpg/360px/obs-en-05-09.jpg)

Utu jaga usorte Abraham pora ekta saguli jongolte tailaga singh phasikena dikhise. Isor pora Isak laga bodli te marikena puja koribole Abraham ke utu saguli dise. Aru Abraham bisi khusi hoise aru saguli ke bolidan kurise.

![](https://cdn.door43.org/obs/jpg/360px/obs-en-05-10.jpg)

Tetia, Isor pora Abraham ke koise; ‘‘Apuni laga sob amike dibole rukha nai aru apuni laga nijor chokora kebi amike dibole nimite rukhia nae, itu nimite ami kosom khaikene koi ase akash te jiman tarakhan ase apunilaga khandankhan iman bisi hobole dibo. Apuni amilaga kotha mana nimite, ami prithibi te jiman khandan ase, taikhan sobke apuni laga khandan nimite asis dibo.’’

*A Bible story from: Genesis 16-22*

## 6. Isor Isaac Nimite Maiki Dise

https://openbiblestories.org/l/nag/story-6/

![](https://cdn.door43.org/obs/jpg/360px/obs-en-06-01.jpg)

Jetia Abraham bisi bura hoi jaise, tetia tai laga chokora Isak jowan manu hoijaise. Itu nimite Abraham tai laga ekta noukar ke matise aru jaikena tailaga ghor-manukhan bhitor te ekta chukuri ke Isak nimite bisarikena anibi koise.

![](https://cdn.door43.org/obs/jpg/360px/obs-en-06-02.jpg)

Bisi lamba rasta safar kurikena utu noukar Abraham laga desh te punchise aru Abraham laga ghor-manukhan logote ahise. Isor he utu noukar logote Rebekah ke ahibole dise. Utu maiki toh Abraham laga kokai laga nati asile.

![](https://cdn.door43.org/obs/jpg/360px/obs-en-06-03.jpg)

Aru utu noukar logote, Rebekah tai laga ghor manu ke charikena Isak laga ghorte jabole monjur hoise. Tai puncha logote, Isak taike shadi kuri loise.

![](https://cdn.door43.org/obs/jpg/360px/obs-en-06-04.jpg)

Bisi homoe pichete, Abraham mori jaise. Isor pora Abraham laga chokora Isak ke asis dise, kile koile Isor pora Abraham logote ekta kotha milaikena rakhi thakise. Utu kotha milaikena rakhi thaka te Isor ekta kosom dise, Abraham laga khandan ginti kuribile naparibo nisina hobo koise. Hoilebi Isak laga maiki Rebekah bacha bukhibole naparikena thakise.

![](https://cdn.door43.org/obs/jpg/360px/obs-en-06-05.jpg)

Isak pora Rebekah nimite prathna kurise, aru Isor pora Isak laga prathna hunise aru Rebekah eki logote duita bacha bukhise. Itu duita bacha ama laga pet bhitor te jujibole lagise, itu nimite Rebekah Isor ke itu laga jawab hudise.

![](https://cdn.door43.org/obs/jpg/360px/obs-en-06-06.jpg)

Isor pora taike koise; ‘‘tumi duita chokora ke jonom dibo. Tai duijon laga khandan pora duita alag-alag desh hoijabo. Tai duijon ekjon-dusra-jon ke jhagara kuribo. Hoilebi apuni laga dangor chokora he chutu chokora laga takot nichete hobo.’’

![](https://cdn.door43.org/obs/jpg/360px/obs-en-06-07.jpg)

Jetia Rebekah bacha ke jonom dise, dangor chokora lal rong nisena paise, aru gaote chuli bisi thakise, itu nimite tai laga nam Esau rakhise. Dusra chokora Esau laga theng ke tan pora dhurikena ulaise, itu nimite tai laga nam Jakob rakhise.

*A Bible story from: Genesis 24:1-25:26*

## 7. Isor pora Jakob ke Asis Dise

https://openbiblestories.org/l/nag/story-7/

![](https://cdn.door43.org/obs/jpg/360px/obs-en-07-01.jpg)

Duijon chokorakhan dangor hoijaise, hoilebi Jakob ghorte he thakibole bhal lage, aru Esau shikari kuri berabole khusi pai. Rebekah pora Jakob ke morom kori thakise aru Isak pora Esau ke morom kuri thakise.

![](https://cdn.door43.org/obs/jpg/360px/obs-en-07-02.jpg)

Ek din Esau shikar korikena ahia homoe te tai bisi bhuk lagise. Tai Jakob ke koise; ‘‘Ami bisi bhuk lagi ase, amike khabole kiba dibi.’’ Jakob koise, ‘‘Apuni amike dangor chokora laga niomkhan dise koile ami apunike ithukhan khabole dibo.’’ Ineka koribole Esau monjur hoise aru Jakob ke kosom dise. Tetia he Jakob pora Esau ke khabole dise.

![](https://cdn.door43.org/obs/jpg/360px/obs-en-07-03.jpg)

Isak tai laga asis Esau ke dibole mon thakise. Hoilebi tai itu nakura age-te, Rebekah pora Isak ke thokai loikena tai laga asis Jakob he lobole dise. Isak bisi bura hoija nimite, tai laga suku andha hoise. Rebekah pora Esau laga kaporkhan loise aru Jakob ke lagabole dise. Itu pichete saguli laga chamara loikena Jacob laga hath aru gola te lagai dise.

![](https://cdn.door43.org/obs/jpg/360px/obs-en-07-04.jpg)

Aru Jakob Isak usorte ahise aru koise; ‘‘Ami Esau ase. Apuni amike asis dibole nimite ami ahise.’’ Jetia Isak pora Jakob laga gaote saguli chuli chuise aru tai laga kaporkhan gundaise, tai itu Esau he ase bhabikena Jakob ke tailaga asis dise.

![](https://cdn.door43.org/obs/jpg/360px/obs-en-07-05.jpg)

Esau Jakob ke ghin lagibole lagise, kilekoile Jakob tailaga baba laga asiskhan loilo-a pora. Itu nimite Esau tai laga monte ketia taikhan laga baba morijabo, itu pichete tai Jakob ke morai dibo bhabona kurise.

![](https://cdn.door43.org/obs/jpg/360px/obs-en-07-06.jpg)

Hoilebi Esau ki bhabiase, Rebekah jetia itu jani loise, tetia tai Jakob ke tai laga ghor-manukhan logote thakibole bisi dur te pathai dise.

![](https://cdn.door43.org/obs/jpg/360px/obs-en-07-07.jpg)

Jakob tai laga ama laga ghor-manukhan logote bisi sal thakise. Itu homoe te Jakob maiki loise aru baro chokora aru ekta chukuri paise. Isor pora tai ke bisi dhonkhan dise.

![](https://cdn.door43.org/obs/jpg/360px/obs-en-07-08.jpg)

Canaan charikena bis-sal pichete Jakob aru tai laga ghor-manukhan aru noukar aru goru-bhoisiakhan sob loikena wapas ahijaise.

![](https://cdn.door43.org/obs/jpg/360px/obs-en-07-09.jpg)

Jakob bisi bhoi lagise kilekoile Esau itia bi tai ke morai dibole mon ase naki bhabona kuri thakise. Itu nimite tai laga noukar khan ke ghoru-bhoisia bisi loikena Esau ke dibole age-te pathaise. Jakob laga noukarkhan Esau ke koise; ‘‘Itukhan sob apuni laga noukar Jakob pora apunike di ase. Aru tai nijor thik amikhan laga pichete joldi ahi punchibo ase.’’

![](https://cdn.door43.org/obs/jpg/360px/obs-en-07-10.jpg)

Hoilebi Esau Jakob ke eku jokhom kuribole bhabona rakhanai. Tai Jakob ke lok paikena bisi khusi hoise. Jakob eku digdar napaikena Canaan te shanti pora thakise. Jetia Isak bisi bura hoikena morise, Jakob aru Esau tai ke kobor dise. Isor kotha juntu Abraham ke kosom dise, utu laga asis Isak logot pora Jakob bi paise.

*A Bible story from: Genesis 25:27-35:29*

## 8. Isor pora Joseph aru tae laga Ghor-manukhan ke Bachaise.

https://openbiblestories.org/l/nag/story-8/

![](https://cdn.door43.org/obs/jpg/360px/obs-en-08-01.jpg)

Bisi sal pichete, jetia Jacob bisi bura hoijaise, tai pora bisi morom kura tai laga chokora Joseph ke jaikena tailaga kokaikhan bhal pora ase-na-nai aru bhera-sagulikhan sob thik ase-na-nai sabole tai ke pathaise.

![](https://cdn.door43.org/obs/jpg/360px/obs-en-08-02.jpg)

Joseph laga kokaikhan tai ke bisi ghin kuri thakise, kilemane taikhan laga baba pora Joseph ke bisi morom kore aru Joseph laga sapna te tai he sob uporte raj kuribo ineka paise. Jetia tai kokaikhan logote punchise, taikhan pora milikena taike dhuri rakhise aru pichete kunba noukar bikiri kura manukhanke bikiri kuridise.

![](https://cdn.door43.org/obs/jpg/360px/obs-en-08-03.jpg)

Taikhan ghor wapas naja age-te, Joseph laga kapor phataikena saguli laga khun lagai dise. Khun thaka kapor dikhai dile taikhan laga baba bhabibo jongli-janwar he Joseph ke moraidise. Jakob bisi mon-dukh kurikena thakise.

![](https://cdn.door43.org/obs/jpg/360px/obs-en-08-04.jpg)

Noukar bikiri kura manukhan pora Joseph ke Egypt te loijaise. Egypt bisi dangor aru takot desh asile, aru Nile nodi usorte thakise. Noukar bikiri kura manukhan Joseph ke ekta dhuni sorkar sahib logote bikiri kuridise. Joseph tai laga malik ke bisi bhal pora seva kurise aru Isor pora Joseph ke asis dise.

![](https://cdn.door43.org/obs/jpg/360px/obs-en-08-05.jpg)

Tai laga malik laga maiki tai ke bhal lagi jaise aru tai logote bisna te ahibole koise. Hoilebi Joseph pora ineka nohobo koise aru Isor laga usorte ineka pap kam nakoribo koise. Utu maiki bisi khong kurise aru Joseph laga eku galti nathakilebi, tai ke bodnam kurise aru tai ke koidighor te halidise. Ta-te bi Joseph Isor laga kotha manikena thakise aru Isor tai ke asis dise.

![](https://cdn.door43.org/obs/jpg/360px/obs-en-08-06.jpg)

Tai eku bia kam kura nai, hoilebi tai dui-sal upor koidighor te thakise. Ek rati te, Egypt laga raja sapna duita paikena bisi chinta hoi jaise. Tai laga jiman bhal-dimag-thaka manukhan ase taikhan kunbi itu laga motlob koidibole paranai.

![](https://cdn.door43.org/obs/jpg/360px/obs-en-08-07.jpg)

Isor pora Joseph ke sapnakhan laga motlob kobo paribole hokti dise, itu nimite raja pora Joseph ke koidi ghor pora anibole koise. Raja laga sapna laga motlob tai ineka koise; ‘‘Isor pora koi ase, sat-sal nimite Egyp te sob jagate khabole bisi-bisi bhal hoithakibo. Itu pichete sat-sal tok kha-a-loakhan napabo.’’

![](https://cdn.door43.org/obs/jpg/360px/obs-en-08-08.jpg)

Aru raja Joseph ke bisi bhal paise aru pora Egypt desh te Joseph ke tai laga pichete sob pora bisi takot thaka manu banaise!

![](https://cdn.door43.org/obs/jpg/360px/obs-en-08-09.jpg)

Sat sal laga khabole bisi thaka homoete, Joseph pora manukhan sobke khabole samankhan joma koribole koise. Aru jitia kha-a-loa napa hoi jaise, aru kha-a-loakhan khotom hoi jaise, tetia joma korikena rakhi thaka kha-a-loakhan bikiri kuribole lagise.

![](https://cdn.door43.org/obs/jpg/360px/obs-en-08-10.jpg)

Egypt te he nohoe hoilebi sob deshkhan te kha-a-loa napaikena bisi digdar hobole lagise aru Jakob aru tai laga ghor-manukhan thaka desh Canaan te bi bisi digdar hoise.

![](https://cdn.door43.org/obs/jpg/360px/obs-en-08-11.jpg)

Itu nimite Jakob pora tai laga dangor chokorakhan ke Egypt te jaikena kha-a-loakhan kinibole jabi koise. Jetia taikhan tai laga age-te khara kurithakise, taikhan Joseph ke chinibole paranai. Hoilebi Joseph ekbar te he taikhan ke chiniloise.

![](https://cdn.door43.org/obs/jpg/360px/obs-en-08-12.jpg)

Tailaga kokaikhan bhal manu hoise na nohoe jani-ja-a pichete, tae taekhanke koise; ‘‘Ami apunikhan laga bhai Joseph ase! Itia bhoi nokoribi. Apunikhan amike bikiri kuridia bisi bia kam kurise. Hoilebi Isor he utu bia kamke bhal ekta hobole dise. Apunikhan Egypt te thakibi aru apunikhan laga ghor-manukhan sob ke ami pora kha-a-loa dibo aru thakibole laga jaga dibo.’’

![](https://cdn.door43.org/obs/jpg/360px/obs-en-08-13.jpg)

Taikhan Egypt pora ulaikena ghor wapas punchise aru taikhan laga baba ke Joseph itiabi jinda ase koise. Aru Jakob bisi khusi hoise.

![](https://cdn.door43.org/obs/jpg/360px/obs-en-08-14.jpg)

Jakob bisi bura manu thaka homoete he Egypt te jabole ulaise. Tailaga ghor-manukhan aru Canaan desh te jiman samankhan thakise, itu sob loikena Egypt-te ahi jaise. Jakob namura age-te tai tailaga chokora ekjon ekjon ke tailaga asis dise.

![](https://cdn.door43.org/obs/jpg/360px/obs-en-08-15.jpg)

Isor pora Abraham ke tai laga kotha juntu milaikena kosom rakhise, utu kotha itia Isak ke, aru Jakob ke, aru Jakob laga baroh chokorakhan aru taekhan laga ghor-manukhan logote thakise. Tailaga baroh chokora laga khandankhan pora he Israel laga baroh-tah jati hoise.

*A Bible story from: Genesis 37-50*

## 9. Isor pora Mosa ke Matise

https://openbiblestories.org/l/nag/story-9/

![](https://cdn.door43.org/obs/jpg/360px/obs-en-09-01.jpg)

Joseph morija pichete bi, tailaga ghormanukhan Egypt te thaki jaise. Taikhan laga khandankhan bisi sal tate thakise aru taikhan laga lora-soalikhan bisi hoise. Taikhanke Israel-jati manukhan ineka matise.

![](https://cdn.door43.org/obs/jpg/360px/obs-en-09-02.jpg)

Bisi sal pichete, Israel-jati manukhan bisi hoijaise. Hoilebi itu homoe te Egypt laga manukhan Joseph pora taikhan ke modot kura sob pahori jaise. Israel jatikhan bisi hoija-a pora taikhan ke bisi bhoi kuri jaise. Itu nimite Egypt laga raja, jun utu homoe te raj kuri thakise, taikhan sob ke Egypt laga kini-lo-a-noukar banailoikena rakhi loise.

![](https://cdn.door43.org/obs/jpg/360px/obs-en-09-03.jpg)

Egypt desh manukhan pora Israeljatikhan ke dangor ghorkhan banabole mistiri-kam aru dangor sahar bisi banabole dise. Aru taikhan ke bisi tan-tan kam kuribole dise aru olopbi morom nalagikena cholaise. Hoilebi Isor laga asis taikhan uporte thakise aru taikhan laga lora- soalikhan arubi bisi hoi thakise.

![](https://cdn.door43.org/obs/jpg/360px/obs-en-09-04.jpg)

Israel-jatikhan laga lora-soalikhan bisi hoi jai ase koikena raja bujipaise. Itu nimite tai ekta khobor likhikena tailaga sipoikhan ke dise, aru Israel-jati laga notun jonom hoa chokorakhan sob ke moraidibi koise.

![](https://cdn.door43.org/obs/jpg/360px/obs-en-09-05.jpg)

Ineka homoete, Israel-jati laga ekta maiki ekta chokora ke jonom kurise. Tai aru tailaga mota utu bacha ke bisi din lukaikena rakhise.

![](https://cdn.door43.org/obs/jpg/360px/obs-en-09-06.jpg)

Jetia taikhan bacha ke lukaikena rakhibole napara hoijase, tetia taikhan tai ke panite naghusibole laga ekta tukuri banaise aru taike utu bhitor te rakhikena nodi kinarte thaka lamba-lamba ghas majote chari dise. Ki hobole ase itu janibo nimite tai laga didi olop dur te khara hoikena sob saithakise.

![](https://cdn.door43.org/obs/jpg/360px/obs-en-09-07.jpg)

Raja laga chukuri pora utu tukuri dikhise. Jetia tukuri bhitor te bacha chokora thaka dikhise, raja laga chokori utu bacha ke tai nijor bacha banailoise. Aru tai Israel-jati laga ekta maiki ke utu bacha sabole nimite rakhi loise, utu maiki he utu bacha laga asol ama ase koikena tai najane. Jetia bacha olop dangor hoise utu maiki tai ke raja laga chukuri laga usorte loijaise, aru tai bacha laga nam Moses rakhidise.

![](https://cdn.door43.org/obs/jpg/360px/obs-en-09-08.jpg)

Ek din jetia Moses dangor hoijaise, Egypt laga manu ekta pora Israel jati ekta manuke dukh dikena bisi mari thaka dikhise. Moses taikhan laga usorte jaise aru Israel-jati manuke bachabole kosis korise.

![](https://cdn.door43.org/obs/jpg/360px/obs-en-09-09.jpg)

Kunbi najanibo bhabona korikena, Moses utu Egypt manuke moraidise aru tailaga mora gaoke balu bhitore lukaidise. Hoilebi Moses ki kurise kunba manu dikhi loise.

![](https://cdn.door43.org/obs/jpg/360px/obs-en-09-10.jpg)

Jetia raja itu khobor hunibole paise, tai Moses ke moraidibole bisarise, hoilebi Moses ekta jongol te polai jaise. Raja laga sipoikhan taike bisaribole paranai.

![](https://cdn.door43.org/obs/jpg/360px/obs-en-09-11.jpg)

Aru utu jongol jagate Egypt desh pora bisi dur te thakise, aru itu homoete Moses ekta bhera-palok laga kam kurise. Tai utu jaga laga ekta maiki ke shadi korise aru duita chokora paise.

![](https://cdn.door43.org/obs/jpg/360px/obs-en-09-12.jpg)

Moses tai laga susur Jethro laga bhera-chaguli ke sa-a-loa kuri thakise. Ek-din tai ekta kata-ghas majote jui-julia nisina hoilebi utu ghaske julai nadea dikhise. Aru tai usorte sabole jaise. Jetia tai bisi usor jaise, Isor tai ke khota koise; ‘‘Moses, apuni laga chapal khulibi. Apuni ekta pobitro mati te khara kuriase.’’

![](https://cdn.door43.org/obs/jpg/360px/obs-en-09-13.jpg)

Isor pora koise; ‘‘Ami laga manukhan bisi dukh kurithaka ami dikhise. Ami apuni ke Egypt laga raja usorte pathabo, tinihoile apuni amilaga manukhan ke tailaga desh pora ulaikena anibole paribo. Ami taikhanke Canaan desh dibo, juntu desh ami Abraham, Isak aru Jakob ke dibo koikena kosom khaisile.”

![](https://cdn.door43.org/obs/jpg/360px/obs-en-09-14.jpg)

Moses pora hutise; ‘‘Judi taikhan amike biswas kura nai koile ami ki koribo?’ Isor koise; ‘‘‘Ami Ami Ase.’’ Itu taikhan ke kobi, ‘jun laga nam ‘Ami Ami Ase’ tai pora amike apunikhan logote pathaise.’ Aru taikhan ke kobi; ‘Ami Jehovah nije, jun he taikhan khandanlaga babakhan-laga Isor ase, jun Abraham, Isak aru Jakob laga Isor ase.’ Itu he hodae nimite ami laga nam ase.’ "

![](https://cdn.door43.org/obs/jpg/360px/obs-en-09-15.jpg)

Moses raja usorte jabole bisi bhoi kuri thakise kilekoile tai aste-aste aru rukhi-rukhikena kotha koa manu hoa pora. Moses ke modot kuribole Isor pora tailaga bhai Aaron ke pathaise.

*A Bible story from: Exodus 1-4*

## 10. Dosta Dangor Digdar

https://openbiblestories.org/l/nag/story-10/

![](https://cdn.door43.org/obs/jpg/360px/obs-en-10-01.jpg)

Isor pora Moses aru Aaron ke Pharao raja laga mon bisi-tan hobo koidise. Taekhan raja usorte jaise aru koise; "Israel laga Isor koi ase; ‘Ami laga manukhan ke jabole dibi.’ "Hoilebi raja taekhan laga khota namanikene Israeljati manukhan ke arubi bisi tan-tan kamkhan koribole rakhise!

![](https://cdn.door43.org/obs/jpg/360px/obs-en-10-02.jpg)

Pharao raja laga mon bisi tan hoise aru tae Israel laga manukhan ke jabole dia nae. Itu nimite Isor pora Egypt desh te dos-ta kisim kisim digdar pathaise. Utu digdarkhan pathaikene Epypt laga isorkhan porabi Isor laga takot kiman dangor ase itu raja ke dikhabole aru bujabole nimite korise.

![](https://cdn.door43.org/obs/jpg/360px/obs-en-10-03.jpg)

Isor pora koa nisina, Nile nodite jiman pani asile itu khan sob khun hoijaise. Hoilebi raja pora Israel laga manukhan ke dhurikene rakhise.

![](https://cdn.door43.org/obs/jpg/360px/obs-en-10-04.jpg)

Itu pora Isor Egypt laga sob jagate, bengkhan bisi pathaise. Raja pora Moses ke matise aru bengkhan hataidibole nimite Isor ke parthana koridibi koise. Jitia bengkhan sob morise, titia aru raja laga mon bisi tan hoijaise aru tae Israel laga manukhan ke Egypt pora ulabole dia nae.

![](https://cdn.door43.org/obs/jpg/360px/obs-en-10-05.jpg)

Arubi Isor pora kamuria-kirakhan pathaise. Pichete, makhikhan bi pathaise. Titia raja pora Moses aru Aaron ke matibole pathaise aru taekhan ke koise utu kirakhan aru makhikhan hataidile, Isreal jati manukhan ke jabole dibo. Jitia Moses parthana korise, Isor tae laga parthana hunise aru sob kirakhan aru makhikhan hatai dise. Hoilebi aru raja tae laga mon ke bisi tan thakise aru Israel laga manukhan ke jabole dia nae.

![](https://cdn.door43.org/obs/jpg/360px/obs-en-10-06.jpg)

Itu pichete, Isor pora Egypt-manukhan laga janwarkhan sob bemar hoikene moribo dise. Hoilebi raja laga mon bisi tan thakise aru Israel laga manukhan ke jabole dia nae.

![](https://cdn.door43.org/obs/jpg/360px/obs-en-10-07.jpg)

Titia Isor pora Moses ke hath bhorta jui-laga-balukhan loikene raja laga usorte hawate phelaidibi koise. Tae inika kurise, aru Egypt manukhan ke pip-bhorta-ghao ulaise. Isor pora raja laga mon bisi tan koridise aru Israel laga manukhan ke jabole dia nae.

![](https://cdn.door43.org/obs/jpg/360px/obs-en-10-08.jpg)

Utu pichete, Isor pora hawa-pani aru borkhon-pathorkhan pathaise aru ghor bahar te thakia manukhan ke marikene moraidise. Titia aru raja pora Moses aru Aaron ke matise aru taekhan ke koise; ‘‘Ami pap korise. Apunikhan jabole paribo.’’ Itu nimite Moses parthana korise aru akash pora dangor borkhon aru pathorkhan giri thakia rukhi-jaise.

![](https://cdn.door43.org/obs/jpg/360px/obs-en-10-09.jpg)

Hoilebi raja arubi tae laga mon tan korise aru Israel laga manukhan ke jabole dia nae.

![](https://cdn.door43.org/obs/jpg/360px/obs-en-10-10.jpg)

Itu pichete hawa pora locust-kirakhanke anibole dise aru Egypt desh bhorta hoise. Utu locust-kirakhan pora khetite borkhon panipora ji-ji bachise itukhan sob khaikene khotom koridise.

![](https://cdn.door43.org/obs/jpg/360px/obs-en-10-11.jpg)

Itu pichete Isor pora andhar pathaise aru tin din tok bahar te ulabole naparikene pura Egypt-te andhar pora bon hoijaise. Hoilebi Israel laga manukhan jun jagate thakise tate ujala asile.

![](https://cdn.door43.org/obs/jpg/360px/obs-en-10-12.jpg)

Itu sob hoa pichete bi, raja laga mom bisi tan thakise aru tae Israel laga manukhan ke jabole dia nae. Raja pora kotha namana nimite, Isor pora aru ekta sajai pathaise. Itu pichete rajalaga mon bodoli hobo aru taekhan ke charidibo.

*A Bible story from: Exodus 5-10*

## 11. Mukti-Jatra

https://openbiblestories.org/l/nag/story-11/

![](https://cdn.door43.org/obs/jpg/360px/obs-en-11-01.jpg)

Isor pora Moses aru Aaron ke Pharaoh logote pathaise taikhan pora Israel laga manukhan ke Egypt desh pora ulaikena loijabole nimite. Taikhan Pharao ke hosiar kuribole kotha koise, judi tae Israel laga manukhan ke jabole dea nae, titia tae logot pora suru korikena Egypt manukhan laga dangor chokorakhan, aru noukarkhan laga dangor chokorakhan aru goru-chaguli laga poila jonom hoa mota bachakhan sob morijabo. Pharaoh toh taikhan koa sob hunise hoilebi tai biswas korianai aru Isor laga kotha mania nai.

![](https://cdn.door43.org/obs/jpg/360px/obs-en-11-02.jpg)

Hoilebi Isor ke junkhan biswas kure, taikhan nimite Isor pora taikhan laga dangor bachakhan namoribole ekta rasta dikhaise. Ekta-ekta manu tae laga ghor-manukhan nimite ekta bhal bhera laga bacha bisarikena maribole koise.

![](https://cdn.door43.org/obs/jpg/360px/obs-en-11-03.jpg)

Aru sob Israel manu laga ghor laga khurite utu janwarlaga khun lagabi koise. Utu laga mongsokhan jolaikena he khabole koise. Aru taikhan ke khamir nadhalia ruti logote mongsokhan joldi-joldi khabole koise. Aru itu hoa logote, taikhan sob Egypt charikena jabole taiari korilobi koise.

![](https://cdn.door43.org/obs/jpg/360px/obs-en-11-04.jpg)

Isor pora taikhan ke ki koise, Israel laga manukhan thik ineka he kurise. Rati laga majote Egypt-te jiman dangor-chokorakhan ase taikhan sobke Isor moraidise.

![](https://cdn.door43.org/obs/jpg/360px/obs-en-11-05.jpg)

Israel laga manukhan laga ghor dorja uporte khun dikhikena Isor utu ghor laga bhitorte naghusikena jabo. Bhera laga khun khori uporte lagai dei nimite taikhan sob bachibo.

![](https://cdn.door43.org/obs/jpg/360px/obs-en-11-06.jpg)

Egypt manukhan Isorke biswas nakore aru tae laga koa kothakhan ekta bi namane. Itu nimite Isor taikhan laga ghor uporte par kura nai. Aru Egypt te sob pora dangor chokorakhan ke Isor pora moraidise.

![](https://cdn.door43.org/obs/jpg/360px/obs-en-11-07.jpg)

Egypt te dangor chokorakhan sob morise, Pharaoh laga chokora pora loikene jailte-bon thakakhan tok. Pura Egypt-desh te jor-jor pora mon bikhaikena kandibole awajkhan hunibole paise, kilekoile sob ghorte dangor ula chokorakhan morise.

![](https://cdn.door43.org/obs/jpg/360px/obs-en-11-08.jpg)

Utu ratite he Pharaoh Moses aru Aaron ke matise aru koise; ‘‘Israel manukhan loikena ami laga desh charikena itia-itia jaijabi!’’ Egypt laga manukhan bi Israel laga manukhanke joldi-joldi Egypt charikena jai-jabole koise.

*A Bible story from: Exodus 11:1-12:32*

## 12. Ulaija-a

https://openbiblestories.org/l/nag/story-12/

![](https://cdn.door43.org/obs/jpg/360px/obs-en-12-01.jpg)

Israel jati manukhan bisi khusi pora Egypt desh charikene ulaise. Itia taekhan kini-loa-noukarkhan nisina laga zindagi pora azad hoikene Isor pora kosom laga desh te loijabole asile! Israel manukhan pora Egypt manukhan ke ji-ji saman bostu mangise, taikhan ke sob dise, sona aru chandikhan bi dise. Taikhan manu kunbakhan Isor ke biswas kurise aru Israel manukhan logote taikhan bi Egypt charikena ulaise.

![](https://cdn.door43.org/obs/jpg/360px/obs-en-12-02.jpg)

Din te taikhan ke rasta dikhabole nimite taikhan laga age-age-te badal-laga-khuri hoikena jaithake, aru rati te taikhan ke ujala dibole nimite taikhan laga age-age-te jui-laga-khuri hoikena jaithakise. Din aru rati-te bi Isor taikhan logote thakise, aru badal-laga-khuri aru jui-laga-khuri nisena hoikena taikhan ke rasta dikhai jaise. Isor pora juntu rasta dikhai dise utu te he taikhan jaithakise.

![](https://cdn.door43.org/obs/jpg/360px/obs-en-12-03.jpg)

Olop homoe pichete, Egypt laga raja Pharaoh aru tailaga manukhan taikhan laga mon bodli hoi jaise. Israel manukhan ke taikhan laga kini-loa-noukar nisina rakhibole nimite taikhan laga piche kuri khetabole lagise. Taikhan laga mon Isor he bodli kuridise, kile koile Isor pora Egypt manukhan uporte jitibo itu taike sonman anibo, aru tetia taikhan bujibo taikhan aru taikhan laga isorkhan sob uporte khali Isor he Jehovah ase.

![](https://cdn.door43.org/obs/jpg/360px/obs-en-12-04.jpg)

Jetia Israel laga manukhan raja aru tailaga sipoikhan ke ahi thaka dikhise, tetia taikhan bisi bhoe lagise. Taikhan raja laga sipoi aru Lal Samundar majote phasi se koikena bisi hala kuri kandise, ‘‘Amikhan kile Egypt charikena ulaijaise? Itia amikhan sob moribo!’’

![](https://cdn.door43.org/obs/jpg/360px/obs-en-12-05.jpg)

Moses taikhan ke koise; ‘‘Bhoe nakoribi! Isor apunikhan nimite lorai koribo aru apunikhan ke bachai lobo.’’ Tetia Isor Moses ke koise; ‘‘Taikhan ke Lal Samundar phine jabole kobi.’’

![](https://cdn.door43.org/obs/jpg/360px/obs-en-12-06.jpg)

Isor pora badal laga khurike Egypt aru Israel laga manukhan laga majote rakhise aru Egypt laga manukhan Israel laga manukhan ke dikhibole para nai.

![](https://cdn.door43.org/obs/jpg/360px/obs-en-12-07.jpg)

Isor pora Moses ke samundar uporte hath uthabi koise. Aru Isor pora bisi jor pora hawa ahibole dise aru samundar laga pani bai-a aru dahina te bhag korise, aru pani laga nichete rasta banaidise.

![](https://cdn.door43.org/obs/jpg/360px/obs-en-12-08.jpg)

Israel manukhan samundar majote sukha-mati uporte theng pora par korise, taikhan laga duita phine pani laga bera asile.

![](https://cdn.door43.org/obs/jpg/360px/obs-en-12-09.jpg)

Isor badal laga khuri hatai dise aru Egypt manukhan tetia Israel manukhan nodi par kuri thaka dikhise. Aru taikhan laga piche khetaise.

![](https://cdn.door43.org/obs/jpg/360px/obs-en-12-10.jpg)

Jetia taikhan Israel manukhann ja-a raste pora piche khetaise, Isor pora Egypt manukhan laga ghora-gari chakakhan ke matite adha ghusibole dise aru taikhan ta-te pora hilibole digdar hoise aru taikhan laga mon bisi chutu hoijaise. Taikhan hala kurise; ‘‘Iyate pora ulaijabole lage! Israel laga manukhan nimite Isor he lorai kuriase!’’

![](https://cdn.door43.org/obs/jpg/360px/obs-en-12-11.jpg)

Aru Israel laga manukhan samundar par korikena samundar laga kinarte ahibole parise. Tetia Moses ke tai laga hath pani uporte dikhabi koise aru panikhan Egypt laga sob sipoikhan uporte, ghora-garikhan uporte, ghora cholabole sipahikhan uporte ahikene bon kuridise. Taikhan ekjon bi bachianae.

![](https://cdn.door43.org/obs/jpg/360px/obs-en-12-12.jpg)

Israel manukhan jetia Egypt manukhan sob morija dikhise taikhan Isorke biswas kuribole lagise aru Moses Isor laga bhaubadi ase koikene biswas kurise.

![](https://cdn.door43.org/obs/jpg/360px/obs-en-12-13.jpg)

Itu pichete Moses aru Israel laga manukhan Isor nimite bisi khusi paise kilekoile Isor pora taikhan morithaka aru kini loa-a noukarkhan nisina thaka pora ulaijabole dise, aru itia taikhan Isorke sonman aru puja kuribole paribo aru tailaga kotha manibole paribo nimite. Israel manukhan bisi gana kuribole lagise aru taikhan azad hoija nimite bishi khusi manaise aru Isor laga nam utcha korise kilekoile taikhan ke Isor pora Egypt laga sipoikhan pora bachaise.

![](https://cdn.door43.org/obs/jpg/360px/obs-en-12-14.jpg)

Israel manukhan ke Isor pora Egypt manukhan ke kineka haraidise aru kineka taikhanke kini-loa-noukarkhan nisina thaka pora azad kuridise utu sobkhan monte rakhibole hodai sal ekta puja manibole hokom dise. Utu puja nam ‘Mukti-jatra’ rakhise. Utu puja laga niom toh ekta bhal bhera bacha maribo, aru utu laga mongso jui uporte jolaibo aru khamir namilaikena thaka ruti logote khabo.

*A Bible story from: Exodus 12:33-15:21*

## 13. Isor Pora Israel Logote Niom Bonaise

https://openbiblestories.org/l/nag/story-13/

![](https://cdn.door43.org/obs/jpg/360px/obs-en-13-01.jpg)

Israel laga manukhan ke Lal Samundar pora ulaikena jongol par kurise aru Sinai koa pahar ekta te ahise. Moses it paharte jui-joli-thaka-kata-ghas dikha asile. Utu pahar laga nichete taikhan tombu ghorkhan banaise.

![](https://cdn.door43.org/obs/jpg/360px/obs-en-13-02.jpg)

Moses aru Israel manukhanke Isor ineka koise; ‘apunikhan ami laga kotha manikena thakibi aru ami ki kotha milaikena rakhise itu manikena thakibi. Apunikhan ineka korise koile ami apunikhan ke amilaga nijor manu bonabo, ami ke puja kura laga rajyo hobo aru pobitro desh hobo.’

![](https://cdn.door43.org/obs/jpg/360px/obs-en-13-03.jpg)

Tin din nimite, Israel manukhan Isor taikhan usorte ahibole taiari kurise. Tetia dhunga nisena Sinai pahar uporte Isor ahise. Akash te badal halakurise aru bijili marise, aru dhunga bisi ahise aru bisi jor pora basi baja laga awaj hunibole paise. Moses tai ekla pahar uporte jaise.

![](https://cdn.door43.org/obs/jpg/360px/obs-en-13-04.jpg)

Tetia Isor pora Israel manukhan ke itu kothakhan koise; ‘Ami apunikhan laga Isor Jehovah ase. Ami apunikhan ke Egypt pora ulaikena anise jun jagate apunikhan kini loa noukarkhan hoikena asile. Dusra isorkhan ke puja nakoribi.’

![](https://cdn.door43.org/obs/jpg/360px/obs-en-13-05.jpg)

Apunikhan puja kuribo nimite apunikhan ekubi murti nabanabi kilekoile ami apunikhan laga ekta he thaka Isor Jehovah ase. Ami laga nam misa-misi pora nalobi. Sabbath ke manibi aru itu din ke pobitro rakhibi. Apunikhan kam kuribole nimite choi din ase, itu pora sat din laga din ami laga nam te aram koribole aru ami ke mon te rakhibole din ase.’

![](https://cdn.door43.org/obs/jpg/360px/obs-en-13-06.jpg)

‘Apuni laga ama aru baba ke sobman kuribi. Khun nakuribi. Bebichari nakuribi. Misa nakobi. Dusra manu laga maiki, tailaga ghor, tailaga ji-ji samankhan ase utukhan dikhikena lobole lalchi nakuribi.’

![](https://cdn.door43.org/obs/jpg/360px/obs-en-13-07.jpg)

Itu kothakhan Isor he duita pathor laga tukra te likhidise aru Moses ke utu pathor duita dise. Aru Israel manukhan ke taikhan pora manibole laga dusra niomkhan bisi janaidise. Aru taikhan niomkhan manise koile Isor taikhan uporte tai laga asis dibo aru taikhan ke bachaikena rakhibo koise. Hoilebi taikhan itu niomkhan mananai koile taikhan ke Isor pora sajai dibo koise.

![](https://cdn.door43.org/obs/jpg/360px/obs-en-13-08.jpg)

Israel manukhan ke Isor pora ekta dangor tombu-laga-ghor banabole koise - Isor-laga-tombu ghor matise. Utu ghor kineka banabole laga aru ji-ji samankhan bhitor te rakhibo lage taikhan ke koise. Dangor porda ekta banaikena tombu ghor bhitor te kamra duita banabi koise. Jetia Isor utu ghor bhitor te ahibo, tai porda laga pichete he bohibo. Isor ahikena boha laga kamra te khali maha purohit he jabo paribo.

![](https://cdn.door43.org/obs/jpg/360px/obs-en-13-09.jpg)

Taikhan ke Isor-laga-tombu-ghor age-te ekta bolidan kura jaga banabole koise. Kun jon pora Isor dia laga niom bhangabo, tai ekta janwar loikena bolidan kura jagate anibo. Aru pujari pora janwar ke marikena bolidan koribo. Ineka kurile utu janwar laga khun pora manu laga pap hatai dibo. Ineka korile Isor utu manu laga pap pahoridibo aru tai Isor usorte sapha dikhijabo. Moses laga bhai Aaron aru Aaron laga khandankhan ke hodai nimite Isor laga pujari laga kam kuribole basi loise.

![](https://cdn.door43.org/obs/jpg/360px/obs-en-13-10.jpg)

Taikhan sob Isor ki koise itu sob kuribo aru niomkhan sob manibo koise. Aru taikhan sob ekta Isor lage manukhan ase aru khali tai ke he puja kuribo koise.

![](https://cdn.door43.org/obs/jpg/360px/obs-en-13-11.jpg)

Bisi din Moses Sinai pahar uporte thaki jaise aru Isor logote khota koi thakise. Taikhan bisi deri tok ta-te thakise aru itu karone, taikhan alchi hoi jaise. Taekhan laga sona loikena Aaron laga usorte ahise aru taikhan ituke jolaise aru bhoisi-laga-bacha banaise aru utu ke puja kurise. Ineka pora taikhan bisi dangor pap kam kurise.

![](https://cdn.door43.org/obs/jpg/360px/obs-en-13-12.jpg)

Aaron itu khanke loikena sona laga bhosi-laga-bacha banaise. Manukhan itu murti ke puja kurise aru janwarkebi marikena itu murti ke pujakhan korise. Taikhan itu pap kam kura nimite Isor bisi khong hoise aru tai khan ke khotom kuribole bisarise. Hoilebi Moses Isor ke binti kurise aru taikhan ke namorabi koise. Aru Isor moses laga prathna hunidise aru taikhan ke khotom kuranai.

![](https://cdn.door43.org/obs/jpg/360px/obs-en-13-13.jpg)

Aru ek din Moses Sinai pahar pora nichete ahise. Isor laga Dosta-Niom likhikena thaka pathor-laga-tukra-duita dhurikena ahise. Aru tai bhosi-laga-bacha-laga murti dikhikena bisi ghusa hoise aru pathor tukra bukhi thaka utu ke phelaidise aru bhangaidise.

![](https://cdn.door43.org/obs/jpg/360px/obs-en-13-14.jpg)

Aru Moses utu bhosi-laga-bacha-laga murtike loise, ituke juite jolaikena norom kurise, aru mihin korikena pani logote milaikena Israel laga manukhan ke khabole dise. Taikhan uporte digdar ahibo dise aru taikhan bisi murise.

![](https://cdn.door43.org/obs/jpg/360px/obs-en-13-15.jpg)

Pathor duita bhangaidia nimite, Moses arubi duita pathor laga tukra katise. Aru tai pahar uporte itukhan ke bukhikena jaise aru manukhan laga galti maph kurudibi koikena prathna kurise. Tailaga prathna Isor hunidise aru manukhanke maph dise. Moses Dosta-Niomkhanke bukhikena pahar nichete ahise. Aru pichete Israel laga manukhan Sinai pahar charikena kosom laga desh phine loi jaise.

*A Bible story from: Exodus 19-34*

## 14. Jongol te Beraithaka

https://openbiblestories.org/l/nag/story-14/

![](https://cdn.door43.org/obs/jpg/360px/obs-en-14-01.jpg)

Isor tai laga kotha juntu milaikena asile itu nimite tai Israel laga manukhan ke kisim-kisim niomkhan taikhan manibole laga dise. Aru taikhan ke Sinai pahar pora Kosom laga Desh phine loijaise. Itu desh laga dusra nam Canaan asile. Isor taikhan laga age-te badal-laga-khuri nisena asile, aru taikhan utu laga piche piche kuri ahise.

![](https://cdn.door43.org/obs/jpg/360px/obs-en-14-02.jpg)

Isor pora Abraham, Isak aru Jakob khan ke tailaga ekta kosom dikena rakha nisna taikhan laga khandankhan ke kosom-laga-desh dibo koi rakhise, hoilebi itia taikhan manu-dol-khan bisi hoijaise. Aru itukhan ke Canaanites koikena matijaise. Taikhan Isor ke puja nakora hoise aru tai laga kothakhan namana hoijaise. Taikhan murtikhan ke puja kurijaise aru bisi pap kam kurijaise.

![](https://cdn.door43.org/obs/jpg/360px/obs-en-14-03.jpg)

Isor pora taikhan ke koise; ‘‘Apunikhan kosom-laga-deshte poncha pichete Canaan laga manukhan sob hatai dibole lage. Taikhan logote shanti nabonabi aru taikhan laga manukhan ke shadi nakoribi. Taikhan laga murtikhan sob bhangai dibi. Apunikhan amilaga kotha mananai koile, apunikhanbi taikhan nisina he taikhan laga murti ke puja kurijabo.’’

![](https://cdn.door43.org/obs/jpg/360px/obs-en-14-04.jpg)

Jetia Israel manukhan Canaan desh usorte punchise, tetia Isor koa nisina, Moses pora Israel laga baroh jatikhan bhitorte ekta ekta jati korikena baroh cholauta ke bisarise. Aru taikhan ke khobor janaidia sipoi banaikena Canaan desh sabole pathaise. Aru utu desh te kiman manu thaki ase aru taikhan kiman takot ase itukhan sob janibole pathaise.

![](https://cdn.door43.org/obs/jpg/360px/obs-en-14-05.jpg)

Taikhan baroh manu Canaan desh te chalis din itu desh laga khobor janiloa pichete, taikhan wapas ahise. Taikhan ineka koise; ‘‘Amikhan utu jagate beraise, ta-te laga matikhan bisi dhoni ase aru bisi bhal mol thaka ase.’’ Hoilebi utu baroh sipoi koise, ‘‘Taikhan laga jaga bisi takot ase aru taikhan manu bisi dangor jati ase. Amikhan taikhan logote lorai koribole takot nai aru taikhan amikhan ke harai dibo aru morai dibo!’’

![](https://cdn.door43.org/obs/jpg/360px/obs-en-14-06.jpg)

Caleb, Joshua aru duita sipoikhan ineka koise; ‘‘Hoe! Canaan laga manukhan bisi lamba aru bisi takot ase, hoilebi amikhan pora taikhan ke harabole paribo! Amikhan laga Isor he amikhan nimite lorai kuribo!’’

![](https://cdn.door43.org/obs/jpg/360px/obs-en-14-07.jpg)

Hoilebi taikhan kunbi Caleb aru Joshua laga kotha hunanai. Taikhan Moses aru Aaron uporte bi bisi ghusa hoise aru ineka koise; ‘‘Apuni kile amikhanke iman bia jagate anise? Amikhan utu desh phine jaile amikhan lorai te he mori jabo aru Canaan manukhan pora amikhanlaga maiki aru bachakhan ke kini-loa noukar nisina rakhilobo.’’ Taikhan dusra cholauta bisarikene Egypt te wapas jaijabole koise.

![](https://cdn.door43.org/obs/jpg/360px/obs-en-14-08.jpg)

Jetia manukhan ineka koise, Isor bisi ghusa hoise. Tripol laga ghorte ahikena, Isor taikhan ke ineka koise; ‘‘Apunikhan amike bia paikena bisi kotha koise, itu nimite apunikhan ke jongol te berabole dibo. Apunikhan bhitorte junkhan bis-sal pora uporte ase taikhan kunbi utu desh te ghusibole naparibo. Caleb aru Joshua charikena apunikhan kunbi ta-te najabo.’’

![](https://cdn.door43.org/obs/jpg/360px/obs-en-14-09.jpg)

Isor jetia itu kotha koise, manukhan bisi mon dukh lagise. Dusra din te taikhan jaikena Canaan desh ke dhuribole bhabona kurise. Moses pora taikhan najitibo itu nimite najabi koise hoilebi taikhan kotha namanikena jai jaise.

![](https://cdn.door43.org/obs/jpg/360px/obs-en-14-10.jpg)

Itu loraite Isor taikhan logote ja-nai, aru Canaan manukhan pora taikhan ke haraidise aru manu bisi morai dise. Itu pichete Israel manukhan Canaan desh charikena wapas jai-jaise. Aru itu pichete taikhan chalis sal tok jongol te beraise.

![](https://cdn.door43.org/obs/jpg/360px/obs-en-14-11.jpg)

Chalis sal taikhan jongol te berai thaka homoite Isor pora taikhan ke khabole saman sob dise. Taikhan ke manna pathaise aru taikhan itu loikena roti banaikena khaise, aru quail chiriakhan bisi pathaise aru itu pakaikena mongso khaise. Aru taikhan laga kapor ekta bi phatibole dia nai aru taikhan laga chapelkhan ekta bi bhangibole dia nae.

![](https://cdn.door43.org/obs/jpg/360px/obs-en-14-12.jpg)

Taikhan pani khabole pathor majote pora pani dise. Itu pichete bi, Israel laga manukhan khusi hoa nae aru Isor aru Moses uporte bisi kotha koijaise. Taikhan ineka korilebi, Isor taikhan ke chara nai. Tai juntu desh Abraham, Isak aru Jakob ke dibo koikena kosom khaisile, itu sob tai kuri thakise.

![](https://cdn.door43.org/obs/jpg/360px/obs-en-14-13.jpg)

Dusra ekta din te manukhan pani khabole thaka nai. Isor Moses ke koise, ‘‘Pathor logote kotha koribi, aru ta-te pora jor pora pani ulaikena ahibo.’’ Hoilebi Moses pathor ke kotha nakoi kene, tai laga khuri pora pathor uporte jor pora dui bar marise. Tai Isor laga kotha mananai. Pathor pora pani jorse ulaise aru sob manukhan utu pani khaise; hoilebi Isor Moses laga uporte bisi khong hoise. Itu nimite Isor pora Moses ke koise; ‘‘Apuni itu koria nimite, apuni kosom-laga-deshte jabole naparibo.’’

![](https://cdn.door43.org/obs/jpg/360px/obs-en-14-14.jpg)

Israel manukhan jetia jongol te chalis sal thakise, junkhan Isor laga kotha mananai taikhan sob morijaise. Tetia aru taikhan ke loikena Kosom-laga-Desh usorte punchise. Moses itia bisi bura manu hoise, itu nimite Joshua ke Israel laga manukhan laga cholauta banaise. Isor pora Moses ke kosom dise aru ek din tai nisina ekta bhaubadi taikhan ke pathabo koise.

![](https://cdn.door43.org/obs/jpg/360px/obs-en-14-15.jpg)

Isor pora Moses ke pahar laga uporte jabole koise aru ta-te pora tai Israel manukhan ke Kosom-laga-Desh juntu dibole ase itu sob sabole koise. Itu nisina Isor pora Moses ke tai nijor laga chuku pora tai Israel ke dibole thaka deshkhan dikhaise, kile koile Moses ta-te jabole naparibo. Aru Moses morise aru Israel manukhan utu jagate Moses nimite tis din tok mondukh korikena kandise. Aru ineka hoikena, Joshua ke taikhan laga cholauta banaise, aru tai bisi bhal cholauta thakise aru Isor ke biswas kurithaka aru Isor laga kotha sob manikena thaka manu asile.

*A Bible story from: Exodus 16-17; Numbers 10-14; 20; 27; Deuteronomy 34*

## 15. Kosom Laga Desh

https://openbiblestories.org/l/nag/story-15/

![](https://cdn.door43.org/obs/jpg/360px/obs-en-15-01.jpg)

Aru Israel laga manukhan Canaan te jabole homoe ahise. Itu desh te Jericho koikena ekta city asile. Itu city laga sob phine pathor-laga -bera pora bisi bhal kuri bon rakhise. Ta-te Joshua pora khobor janaidia sipoi duita ke utu city te pathiase. Utu city te Rahab koikene ekta bebichari thakise. Utu maiki pora khobor janaidia sipoikhan ke lukai dise aru pichete taikhan ke modot kurikene city laga bahar te polai jabole bi modot kurise. Tai Isor ke biswas kura nimite ineka kurise. Taikhan tai ke kosom dise jetia Israel manukhan pora Jericho ke bhangaidibole ahibo, utu homoete Rahab aru tai laga ghor-manukhan ke bachai lobo koise.

![](https://cdn.door43.org/obs/jpg/360px/obs-en-15-02.jpg)

Israel manukhan Kosom laga Desh te jabole nimite taikhan Jordan nodi par kuribole lagise. Isor pora Joshua ke koise: “Pujarikhan ke poila jabole dibi.” Jetia pujarikhan Jordan nodi te taikhan laga theng rakhise, nodi laga upor pora pani niche phine ahi thaka rukhi jaise, aru Israel laga manukhan sukha mati te nodi par kurikena dusra phine jabole parise.

![](https://cdn.door43.org/obs/jpg/360px/obs-en-15-03.jpg)

Jetia manukhan Jordan nodi par kuri loise, Isor pora Joshua ke Jericho nagar bhangaidibole taiari kurilobi koise, itu nagar ekta bisi takot thaka hoilebi. Isor pora manukhan ke taikhan laga pujarikhan aru sipoikhan ke city laga bahar te choi din tok berabole koise. Aru itu nisina pujari aru sipoikhan ineka kurise.

![](https://cdn.door43.org/obs/jpg/360px/obs-en-15-04.jpg)

Jetia sat din ahise, Israel manukhan nagar laga bahar te arubi sat bar ghuraise. Taikhan jetia sat bar ghuraikena khotom hoise, purohit khan pora basikhan bajai se aru sipoikhan jor pora hala kurise.

![](https://cdn.door43.org/obs/jpg/360px/obs-en-15-05.jpg)

Tetia Jericho laga pathor-laga-berakhan sob giri jaise! Isor pora hokom dia nisina, Israel manukhan pora itu nagar te thaka sob bhangaidise. Taikhan Rahab aru tai laga ghor-manukhan ke chari dise, kilekoile taikhan Israel laga manu logote ekta nisina hoi jaise. Jetia Canaan desh te thaka dusra manukhan pora kineka Israel manukhan Jericho ke bhangaidia hunise, taikhan bisi bhoi lagi jaise, kilekoile Israel manukhan ahikena taikhan logote bi lorai kuribo bhabona kurise.

![](https://cdn.door43.org/obs/jpg/360px/obs-en-15-06.jpg)

Isor pora Israel manukhan ke Canaan desh te thaka manu-dolkhan logote shanti pora milikena thakibole laga kotha ekubi namilabi koise. Hoilebi Canaan desh laga ekta manu-dol, Gibeon-laga-dol, taikhan ahikena Joshua ke taikhan Canaan pora bisi dur te thaka jaga pora ahise koikena misa koise. Taikhan Joshua ke taikhan logote shanti pora milikena thakibole laga kotha milabole koise. Joshua aru Israel laga dusra netakhan kineka koribo lage Isor ke hutanai. Ulta taikhan Gibeon-laga-dolkhan logote shanti pora milikena thakibole laga kotha milai loise.

![](https://cdn.door43.org/obs/jpg/360px/obs-en-15-07.jpg)

Tin din pichete, Gibeon-laga-dolkhan bi Canaan te thakakhan ase koikena Israel-jati manukhan janibole paise. Taikhan bisi khong hoise kilekoile Gibeon-laga-dolkhan pora taikhan ke thokai dise. Kintu taikhan majote ki kotha milaise itu rakhise, kilekoile itu kotha Isor laga nam te kosom kura asile. Olop homoe pichete, dusra manu-laga-dol laga rajakhan, junkhan ke Amorite manukhan koi, taekhan kineka Gideon-laga-dolkhan pora Israel-jati manukhan logote shanti pora milikena thakibole laga kotha milaise koikena hunise, taikhan laga sipoikhan sob joma korikena ekta dangor sipoi-foj hoikena Gibeon logote lorai koribole ahise. Tetia Gibeon-laga-dolkhan pora Joshua ke modot mangikena khobor pathaise.

![](https://cdn.door43.org/obs/jpg/360px/obs-en-15-08.jpg)

Aru Joshua pora Israel manu laga sipoi-foj taiar kurise aru taikhan pura rati beraikena Gibeon-laga-dolkhan logote punchise. Aru bisi phojirte, taikhan Amorite laga sipoi-foj khan ke asurit kuridise aru taikhan ke lorai kurise.

![](https://cdn.door43.org/obs/jpg/360px/obs-en-15-09.jpg)

Itu din Isor pora Israel nimite lorai kurise. Tai pora Amorite laga-dol khan ke matha ghurai dise aru tai bisi dangor borkhon-pathorkhan pathaise aru taikhan bisi ke morai dise.

![](https://cdn.door43.org/obs/jpg/360px/obs-en-15-10.jpg)

Isor pora suraj ke akash laga ekta jagate rukhi bole dise, aru Israel manukhan ke bisi homoe dikena Amorite laga-dolkhan ke harabole dise. Itu din te Isor pora bisi dangor jit Israel manu khan ke dise.

![](https://cdn.door43.org/obs/jpg/360px/obs-en-15-11.jpg)

Isor pora utu sipoi-foj khan ke harai dia pichete, arubi Canaan-laga-manu-dol dusrakhan bi joma korikena Israel logote lorai kuribole taiar kurise. Joshua aru Israel-jati manukhan pora taikhan ke lorai kurise aru sob bhangaidise.

![](https://cdn.door43.org/obs/jpg/360px/obs-en-15-12.jpg)

Itu loraikhan khotom hoa-a pichete, Isor pora Israel jati khan ekjon ekjon ke Kosom laga Desh te mati bhag kurikena sob ke dise. Tetia Isor pora Israel laga desh te pura phine shanti dise.

![](https://cdn.door43.org/obs/jpg/360px/obs-en-15-13.jpg)

Jetia Joshua bisi bura manu hoi jaise, tai pora Israel laga manu sob ke joma kuri matise. Tetia Joshua pora manu joma hoikena thaka sob jon ke taikhan Sinai pahar te Isor logote ki kotha milaise, itu kosom taikhan laga mon-te rakhibi koise. Aru manukhan kosom kurise taikhan Isor laga niomkhan sob manibo aru kitiabi Isor ke nacharibo.

*A Bible story from: Joshua 1-24*

## 16. Modot Kura Manukhan

https://openbiblestories.org/l/nag/story-16/

![](https://cdn.door43.org/obs/jpg/360px/obs-en-16-01.jpg)

Joshua morija-a pichete, Israel jatikhan Isor laga niom aru kanunkhan namania hoijaise, aru Canaan laga manukhan ke taikhan laga jaga pora khetai dianai. Taikhan Isor Jehovah ke puja kuribole bon kurise aru Canaan laga isorkhan ke puja kuribole lagise. Itu homoete taikhan cholauta kunbi thaka nai aru tai khan kun ki kuribole mon ase, itu he kurithakise.

![](https://cdn.door43.org/obs/jpg/360px/obs-en-16-02.jpg)

Israel manukhan Isor ke chara nimite, taikhan uporte dusra desh laga manukhan pora bar-bar takot cholabole dise. Itu nisina he bisi sal jaise, jetia Israel laga manukhan Isor laga kotha namanibo, tetia Isor taikhan ke sajai dikena dusmankhan laga takot nichete taikhan ke rakhidise. Dusmankhan pora taikhan laga samankhan bisi chor kuribo dise, aru taekhan laga samankhan bhangaibole dise aru bisi manuke morabo dise. Tetia Israel laga dusman khan pora taikhan ke bisi sal dukh dia pichete, Israel manukhan taikhan pap nimite maph mange aru Isor ke taikhan bachabi koi.

![](https://cdn.door43.org/obs/jpg/360px/obs-en-16-03.jpg)

Jetia Israel manukhan Isor logote jaikena kandibo, tetia taikhan ke modot kuribole ekta manuke pathai. Utu manu he taikhan nimite dusman logote lorai kuribo aru jitibo. Aru alop homeote nimite utu jagate shanti hobo aru utu manuhe taikhan laga uporte raj kuribo. Itu nisina Isor he bar bar taikhan ke manu pathikena bachai thakise. Midian laga manukhan ke Isor pora Israel manukhan ke harabole dise.

![](https://cdn.door43.org/obs/jpg/360px/obs-en-16-04.jpg)

Midian laga manukhan pora jetia Israel manukhan ekubi bijon lagabo, tetia taikhan ahikena sob bia kuridie. Taikhan bisi bhoi lagijaise aru pathor laga gupha khante jaikena lukai thakise. Aru ekubi kuribole naparikena Isor usorte kandibole lagise.

![](https://cdn.door43.org/obs/jpg/360px/obs-en-16-05.jpg)

Israel manu Gideon koikena ekjon thakise. Ek din tae lukaikena gehukhan ke marithakise, kilekoile Midian laga manukhan tai ke dikhile taikhan itu sob uthaikena loijabo. Sorgoduth tailaga usorte ahikena taike koise; ‘‘Isor apuni logote ase, takot thaka aru bhoi nakora manu! Apuni jabi aru Israel laga manukhan ke Midian jatikhan pora bachaidibi.’’

![](https://cdn.door43.org/obs/jpg/360px/obs-en-16-06.jpg)

Gideon laga baba ekta Baal pujari asile. Itu nimite Isor pora Gideon ke jaikena poila tailaga baba laga Baal laga bolidan kura jagake bhangaidibi koise. Hoilebi Gideon manukhan ke bisi bhoi lagi thakise, itu nimite tai ratite he itukhan bhangaidise. Utu jagate tai dusra ekta bolidan kura jagake banaise aru utu uporte dusra bhoisi jolaise.

![](https://cdn.door43.org/obs/jpg/360px/obs-en-16-07.jpg)

Phojirte jitia manukhan uthise, taikhan dikise Baalke bolidan kura jagake bhangaikena ase, taikhan bisi ghusa hoise. Taikhan Gideon laga ghorte taike maribole jaise, hoilebi Gideon laga baba koise; ‘Apunikhan kile taike bachabole kuriase? Baal isor ase koile tai nijor-ke-nijor bachabole dibi.’’ Tai itu koa nimite, taikhan Gideon ke maranai.

![](https://cdn.door43.org/obs/jpg/360px/obs-en-16-08.jpg)

Midian manukhan arubi chor kuribole Israel laga manukhan logote ahise. Taikhan manu ginti kuribole napara laga bisi thakise. Taikhan logote lorai kuribole Gideon pora Israel manukhan ke matise. Isor taike cholabole thakise koile duita chinha taike dibi koise.

![](https://cdn.door43.org/obs/jpg/360px/obs-en-16-09.jpg)

Poila nimite tai bhera laga olop wool loikena mati te rakhise. Phojirte itu wool te pani thakise aru matikhan te pani thakanai koile tai bujijabo koise. Ineka he hoise. Dusra ratite aru tai itu woolke sukha thakibole dibi aru matikhan bhijikena thakibole dibi koise. Aru bi ineka hi hoise. Itu duita chinha dikhikena, Gideon mon dangor hoise aru tai pora Israel manukhan ke bachabole Isor koa kotha biswas kurise.

![](https://cdn.door43.org/obs/jpg/360px/obs-en-16-10.jpg)

Tetia Gideon sipoikhanke matise aru taikhan 32,000 jon ahise. Hoilebi taike Isor pora manu bisi ase koise. Itu nimite Gideon pora taikhan majote lorai kuribole bisi bhoi kurakhan 22,000 sipoikhan ke wapas pathai dise. Tetia bi sipoikhan bisi asile. Pichete Gideon logote khali 300 sipoikhan rakhise, dusrakhan sob ke ghorte pathaidise.

![](https://cdn.door43.org/obs/jpg/360px/obs-en-16-11.jpg)

Utu ratite Isor pora Gideon ke koise; ‘‘Midian manukhan laga camp-te jabi aru taikhan ki koiase honibi. Jitia taikhan laga khota honibo, tetia apuni taikhan logote lorai kuribole bhoi nalagijabo.’’ Utu ratite Gideon jaikena camp te punchise, aru ekta sipoi tailaga sathi ke ekta sapna laga kotha koi ase. Utu sipoi laga sathi pora taike koise; ‘‘Itu sapna laga motlob to Gideon laga sipoikhan pora amikhan Midian laga manukhan laga sipoikhan ke haraidibo, aru dusra iku motlob nai!’’ Jetia Gideon utu sapna aru motlob bujise, tetia tai Isor ke puja kurise.

![](https://cdn.door43.org/obs/jpg/360px/obs-en-16-12.jpg)

Gideon wapas jaikena tailaga sipoikhan ke ekta ekta manu ke ekta basi, ekta kolsi aru jui jolabole laga lathi dise. Midian laga sipoikhan ghumai thaka homeote, taikhan laga camp ke gherai loise. Gideon laga sipoikhan kulchite jui jolabole lathi lukaise itu nimite Midian laga sipoikhan taikhan ahi-thaka dikha nai.

![](https://cdn.door43.org/obs/jpg/360px/obs-en-16-13.jpg)

Tetia taikhan juntu kolsi dhurikena asile, itu eki logote bhangaise, aru jui julithaka lathikhan dikhise. Taikhan basi bajaise aru hala korikena koise; ‘‘Isor nimite aru Gideon nimite ekta dao!’’

![](https://cdn.door43.org/obs/jpg/360px/obs-en-16-14.jpg)

Isor pora dusmankhan ke hala korikena polabole dise, aru ekjon-dusra-jon ke moraidibole hoise. Gideon pora khobor janai dia manukhan ke Israel manukhan ke matibole pathaise aru ahikena dushmankhan ke Israel manukhan laga jaga pora ketaidibole modot kuribi koise. Itu din te 120,000 Midian laga manukhan murise. Itu nisina he Isor pora Israel ke bachailoise.

![](https://cdn.door43.org/obs/jpg/360px/obs-en-16-15.jpg)

Israel manukhan Gideon ke taikhan laga raja banabole mon thakise. Kintu Gideon mananai, aru tai pora taikhan ke sona laga kan-phul mangise, juntu taikhan Midian manu khan logote pora loise. Aru taikhan Gideon ke sona bisi dise.

![](https://cdn.door43.org/obs/jpg/360px/obs-en-16-16.jpg)

Gideon utu sonakhan pora ekta khas kapor, juntu, khali dangor-pujarikhan lagai, utu nisina banaise. Sob Israel manukhan murti puja kurithaka nisina, utu kapor ke puja koribole hoise. Taikhan murti puja kura nimite Isor pora arubi taikhan ke sajai dise aru dushmankhan pora taikhan laga uporte jitibole dise. Jetia taikhan Isor usorte kandikena modot mangi ahise tetia arubi Isor he ekta manu taikhan ke bacha bole pathaise.

![](https://cdn.door43.org/obs/jpg/360px/obs-en-16-17.jpg)

Itu nisina he bisi bar hoi thakise; Israel manukhan pap kuribo, Isor pora taikhan ke sajai dibo, aru taikhan Isor usorte kandikena ahibo aru Isor pora taikhanke bachabole nimite manuke pathabo. Bisi hazar sal homoete, Israel laga manukhan ke dushman pora choraibole Isor pora manu bisi ke pathaise.

![](https://cdn.door43.org/obs/jpg/360px/obs-en-16-18.jpg)

Pichete, Isor ke dusra mahadeshkhan laga rajyo te thaka nishina, taikhan ke bi ekta raja dibi koise. Taikhan bisi lamba aru takot thaka raja lobole mon thakise, jun taikhan ke loraite loijabole paribo. Isor taikhan laga kotha khusi panai, hoilebi taikhan manga nisina ekta raja taikhan ke dise.

*A Bible story from: Judges 1-3; 6-8; 1 Samuel 1-10*

## 17. Isor Pora David Logote Niom Banaise

https://openbiblestories.org/l/nag/story-17/

![](https://cdn.door43.org/obs/jpg/360px/obs-en-17-01.jpg)

Saul he Israel desh laga poila raja hoise. Tai gao-lamba aru sabole sondor thakise, Israel manukhan pora bhabona thaka nisina. Aru bisi sal tok tai bhal pora raj kurise. Hoilebi pichete tai bisi bia manu hoijaise aru Isor laga kothakhan namana hoi jaise. Itu nimite Isor pora dusra ekta manu ke tai laga bodli te raja hobole bisarise.

![](https://cdn.door43.org/obs/jpg/360px/obs-en-17-02.jpg)

Isor pora Israel laga manu ekjon, jun laga nam David asile, tai ke Saul laga bodli te raja banabole taiar kurise. David Bethlehem taun te thaka bhera palok asile. Dusra homoete, David jetia tai baba laga bherakhan sa-a-loa kuri thakise, tetia ekta bagh aru bhalu ahikena ekta bhera laga bacha ke uthaikena loijae homoete tai bagh aru bhalu ke moriadise. David nijorke norom korikena rakha aru dharmik manu asile. Tai Isor ke biswas korikena tai laga kothakhan sob manikena thakise.

![](https://cdn.door43.org/obs/jpg/360px/obs-en-17-03.jpg)

Jetia David chokora thakise, tai Goliath koa ekjon balwan logote lorai kurise. Goliath bisi bhal sipoi thakise. Tai bisi takot thaka aru tin meter nisina lamba thakise! Hoilebi Isor pora David ke modot kurise aru tai Goliath ke moraidibole parise aru Israel laga manukhan ke bachaidise. Itu pichete David Israel laga dushmankhan logote loraikhan bisi jitise. Aru David bisi bhal sipoi hoijaise aru Israel laga sipoikhan ke bi bisi loraikhan te loijaise. Manukhan sob David laga bhal kotha he koise.

![](https://cdn.door43.org/obs/jpg/360px/obs-en-17-04.jpg)

Taikhan manukhan pora David ke bisi morom kurise, itu dikhikena Saul bisi suku jolibole lagise. Tai David ke moraidibole bisarise, hoilebi David polaikena lokai jiase. Ek din Saul aru sipoikhan tai ke bisari ahise, aru Saul pathor laga gupha te ghusi se. David utu gupha bhitorte lokai asile, hoilebi Saul taike dikha nai. David aste pora Saul laga bisi usorte ahise aru tailaga pichete khara hoise aru tailaga chador laga ekta tukra katiloise. Pichete Saul gupha pora ulaikena bahar te jaise, aru tetia David jor para hala korikena tai laga hath te chador tukra dhurikena thaka tai ke dikhaise. Ineka hoa pichete, Saul buji jaise David ketiabi raja hobo nimite tai ke namorabo.

![](https://cdn.door43.org/obs/jpg/360px/obs-en-17-05.jpg)

Olop homoe pichete, Saul ekta lorai te mori jaise aru David Israel laga raja hoise. Tai bisi bhal raja asile aru manukhan sob taike bisi morom kuri thakise. Isor pora David ke asis dise aru tai sobte jitibole parise. David bisi lorai kurise aru Isor laga modot pora Israel laga dushman khan sob ke haraidise. Tai pora Jerusalem ke dhuriloise aru itu jagake tai laga rajdhani bonaise, aru ta-te he tai thakise aru raj kurise. David chalis sal thaka homoete raja hoise. Aru itu homete, Israel bisi takot aru dhun hoise.

![](https://cdn.door43.org/obs/jpg/360px/obs-en-17-06.jpg)

David laga mon-te sob Israel manu nimite Isor ke puja aru bolidan kuribole nimite Mondir banabole mon kurise. Kilekoile charso sal hoa pichete bi taikhan Isor ke tombu laga ghor, juntu Moses banaise, ta-te he puja kuri ahise aru janwarkhan ke bolidan kori ahise.

![](https://cdn.door43.org/obs/jpg/360px/obs-en-17-07.jpg)

Nathan koikena ekta bhaubadi thakise. Aru Isor pora tai ke David logote pathaise aru ineka kobole dise; ‘‘Apuni bisi lorai korise itu nimite apuni moilaga Mondir nabonabo. Apuni laga chokora pora banabo. Hoilebi, ami apuni ke bisi asis dibo. Apuni laga khandan bhitorte ekjon ami laga manukhan uporte hodae nimite raja hobo!’’ David laga khandan bhitorte kun hodae nimite raja hobo utu Masiha ase. Tai Isor-pora-chani-loa ase, jun he prithibi te thaka manukhan ke taikhan laga pap pora bachailobo.

![](https://cdn.door43.org/obs/jpg/360px/obs-en-17-08.jpg)

Jetia David Nathan koa hotha hunise, tai Isor ke dhoniabad dise aru tai laga nam ucha kurise. Isor tai ke sonman kurise aru taike bisi asis dise. David ketia bi Isor tai ke iman asis dibo ineka bhabona thaka nae. Amikhan jani ase, Israel laga manukhan Masiha ahibole arubi ek hajar sal rukhibole ase.

![](https://cdn.door43.org/obs/jpg/360px/obs-en-17-09.jpg)

David laga manukhan uporte ki thik ase itu niomkhan cholaikena bisi sal raj kurise. Tai Isor laga sob kotha manise aru Isor tai ke asis dise. Hoilebi, tai laga jibon anth phine, tai Isor logote bisi pap kam kurise.

![](https://cdn.door43.org/obs/jpg/360px/obs-en-17-10.jpg)

Ek din David tai laga ghor uporte berai thaka homoete, ekta sondor maiki gosol kuri thaka dikhise. Utu maiki kun ase tai najane, pichete tai laga nam Bathsheba ase koikena janise.

![](https://cdn.door43.org/obs/jpg/360px/obs-en-17-11.jpg)

Utu maiki pora dur najaikena, David dusra manu ke pathaise aru utu maiki ke matise. David tai logote ghumaise aru tai ke ghor te wapas jabo dise. Pichete Bathsheba bacha bukhi ase koikene janise aru itu khobor David ke pathaise.

![](https://cdn.door43.org/obs/jpg/360px/obs-en-17-12.jpg)

Bathsheba laga mota laga nam Uriah asile. Tai David laga sob se bhal sipoi asile. Aru itu homoete tai lorai kuribole jaikena thakise. David Uriah ke wapas matise aru tai laga maiki logote thakibi koise. Hoilebi Uriah tai nijor laga ghor te jabole mananai, kilekoile tetia tai laga sipoikhan sob loraite juji asile. Itu pora David Uriah ke aru wapas lorai kuri thaka jagate pathaise aru Uriah ke sob pora bisi kara pora lorai hoa jagate rakhibi aru taike moribole dibi koise. Ineka hi hoise aru Uriah lorai kura homoete morise.

![](https://cdn.door43.org/obs/jpg/360px/obs-en-17-13.jpg)

Uriah morija pichete, David Bathsheba ke shadi kuri loise. Pichete tai David laga ekta chokora bacha jonom dise. David ki korise itu nimite Isor David logote bisi ghusa hoise, aru tai kiman dangor pap kam kurise itu taike kobole ekta bhaubadi jun laga nam Nathan asile taike David logote pathaise. Tetia David laga mon bodli kurise aru Isor tai laga pap maph kuridise. Aru tai jinda thaka tok, dukh hoilebi, David Isor laga kotha manikena thakise.

![](https://cdn.door43.org/obs/jpg/360px/obs-en-17-14.jpg)

Hoilebi David laga chokora bacha morijaise. Ineka he Isor pora David ke sajai dise. Aru, David namura tok, tai aru tailaga ghor manukhan bhitorte namilikena thakibole koridise, aru David tai laga takot bisi haraise. Hoilebi Isor David nimite ki kuribo koise utu sob kuri thakise. Pichete, David aru Bathsheba ke dusra mota bacha hoise, aru taikhan bacha ke Solomon matise.

*A Bible story from: 1 Samuel 10; 15-19; 24; 31; 2 Samuel 5; 7; 11-12*

## 18. Bhag Hoija-a Rajyo

https://openbiblestories.org/l/nag/story-18/

![](https://cdn.door43.org/obs/jpg/360px/obs-en-18-01.jpg)

David chalis sal raj korise. Aru tai moriija-a pichete tai laga chokora Solomon he Israel laga raja hoise. Isor Solomon logote kotha koise aru tai ki mangibole mon ase mangibi koise. Solomon Isorke manukhan ke bhal pora cholabo paribole budhi-gyan mangise. Itu kotha hunikena Isor bisi bhal lagise aru tai Solomon ke prithibi te sob pora gyani thaka manu banaise. Solomon kisim kisim bisi hikise aru bisi bhal dimag thaka raja hoise. Itu he nohoe, hoilebi Isor pora tai ke bisi dhun dise.

![](https://cdn.door43.org/obs/jpg/360px/obs-en-18-02.jpg)

Jerusalem te Solomon pora Mondir banaise, juntu kam tai laga baba David pora shuru kurise aru banabole samankhan sob taiari korikena rakhi thakisele. Poila nisina tombu ghor laga ghor te nohoikena, manukhan itia utu Mondir te ahikena Isor ke puja kurise aru janwarkhan bolidan korikena puja korise. Isor ahikena Mondir te tailaga manukhan logote bohise.

![](https://cdn.door43.org/obs/jpg/360px/obs-en-18-03.jpg)

Hoilebi Solomon dusra desh laga maikikhan ke bisi bhal lagi jaise. Tai Isor pora nakoribi koa kurise aru ek-hazar maikikhan ke tai laga maiki banaise! Utu maikikhan taikhan laga isorkhan ke anikena puja kuri thakise. Jetia Solomon bura hoise, taibi itu isorkhan ke puja kurijaise.

![](https://cdn.door43.org/obs/jpg/360px/obs-en-18-04.jpg)

Solomon ineka kura pora Isor tai uporte bisi ghusa hoise. Tai Solomon ke sajai dibo koise aru tai laga desh duita bhag kuridibo koise. Hoilebi Solomon morija-a pichete itukhan hobo.

![](https://cdn.door43.org/obs/jpg/360px/obs-en-18-05.jpg)

Solomon morija-a pichete, tai laga chokora Rehoboam raja hoise. Israel manukhan sob ahise aru taike taikhan laga raja mani loise. Tailaga baba Solomon pora taikhan ke kineka bisi tan-tan kam kuribolo dise aru poisa bisi mangise itukhan koise. Itu nimite taikhan Rehoboam ke taikhan ke kam bisi nadibi koise.

![](https://cdn.door43.org/obs/jpg/360px/obs-en-18-06.jpg)

Hoilebi Rehoboam taikhan ke bisi bia pora ineka koise; ‘‘Apunikhan moi laga baba pora bisi tan kam kuribole dise koiase. Hoilebi ami apunikhan ke aru bisi kam koribole dibo aru apunikhan ke bisi dangor dukh dibo.’’

![](https://cdn.door43.org/obs/jpg/360px/obs-en-18-07.jpg)

Jetia manukhan tai ineka koa hunise, bisi manu taike ghusa hoise. Tai ke charikena dosta jati khan jai-jaise, aru khali duita jati he tai logote thaki jaise. Aru taikhan laga nam Judah laga rajyo matise.

![](https://cdn.door43.org/obs/jpg/360px/obs-en-18-08.jpg)

Dosta jatikhan Jeroboam ke taikhan laga raja banaise. Itu jati khan paschim phine thaka khan asile aru taikhan nijor ke Israel laga rajyo matise.

![](https://cdn.door43.org/obs/jpg/360px/obs-en-18-09.jpg)

Hoilebi Jeroboam Isor laga kotha mananai aru manukhan sob ke bisi pap kuribo dise. Tai duita murti banaise aru manukhan ke itu puja kuribole dise. Taikhan Jerusalem, jintu Judea laga rajyo te asile, ta-te puja kuribole naja hoise.

![](https://cdn.door43.org/obs/jpg/360px/obs-en-18-10.jpg)

Judah aru Israel rajyo duita dushman hoi jaise aru ekjon-ekjon ke lorai kurijaise.

![](https://cdn.door43.org/obs/jpg/360px/obs-en-18-11.jpg)

Israel laga notun rajyo laga rajakhan sob bisi biya manukhan thakise. Bisi rajakhan ke Israel laga manukhan junkhan raja hobole mon thakise taikhan pora rajakhan ke moriadise.

![](https://cdn.door43.org/obs/jpg/360px/obs-en-18-12.jpg)

Taikhan laga raja sob murti ke puja kuri thakise. Taikhan jetia ineka kure, tetia bebichari logote ghumai aru taikhan nijor laga bachakhan ke bi marikena murtikhan ke puja kuri joilaidi thakise.

![](https://cdn.door43.org/obs/jpg/360px/obs-en-18-13.jpg)

Judah laga rajakhan sob David laga khandankhan thakise. Taikhan majote kunba rajakhan bhal manu thakise aru taikhan ki thik ase itu niomkhan cholaikena Isor ke puja kurithakise. Hoilebi Judah laga rajakhan bisi jon bia thakise. Taikhan bhal pora raj kura nai aru murti ke puja kuri thakise. Kunba rajakhan taikhan nijor laga bacha ke bi katikena murtikhan ke puja kuri dise. Judah laga manukhan bisi Isor ke birudh kurise aru dusra isorkhan ke puja kurijaise.

*A Bible story from: 1 Kings 1-6; 11-12*

## 19. Bhao-badikhan

https://openbiblestories.org/l/nag/story-19/

![](https://cdn.door43.org/obs/jpg/360px/obs-en-19-01.jpg)

Isor hodae Israel jatikhan karne tai laga bhaubadikhan pathai thakise. Bhaubadikhan pora Isor laga kotha hunikena, itu kotha manukhan ke janai di thakise.

![](https://cdn.door43.org/obs/jpg/360px/obs-en-19-02.jpg)

Elijah bi ekjon bhaubadi thakise, jetia Ahab Israel rajyo te raja thakisile. Ahab bisi papi manu thakise. Tai pura manukhan ke misa laga isor Baal ke puja kuribo dibole kosis kurise. Itu nimite Elijah pora raja Ahab ke koise Isor pora manukhan ke sajai dibole. Tai koise: “Israel rajyo te borkhon pani nagiribo aru hawa-laga-pani bi nathakibo, jetia tok ami nakobo!” Itu kotha pora Ahab bisi khong hoikena tai Elijah ke morai dibole faisla kuriloise.

![](https://cdn.door43.org/obs/jpg/360px/obs-en-19-03.jpg)

Itu nimite Isor pora Elijah ke ekta jongol te jaikena Ahab pora lukai jabi koise. Elijah ekta jongol te jaise, aru ekta dhara te jaise jun tu Isor pora taike jabi koise. Hodae phojir aru sam te, chiriakhan pora Elijah nimite khabole ruti aru mangsokhan anidi thakise. Itu homoete Ahab aru tailaga sipoikhan Elijah ke bisari thakise, hoilebi taikhan taike bisaribole paranai.

![](https://cdn.door43.org/obs/jpg/360px/obs-en-19-04.jpg)

Pani nagiria nimite, olop pichete utu dhara bi sukhi jaise. Itu nimite, Elijah usorte thaka dusra desh te jai jaise. Utu desh te bisi dukhia mota-morija-a ekta maiki thakise. Tai laga ekta chokora bi thakise. Taikhan logote khabole nathaka hoijaise, kilekoile kheti te ekubi na-ula nimite. Hoilebi, utu maiki pora Elijah ke bisi bhal pora saise, aru Isor pora tai aru tai laga chokora nimite khabole di thakise, aru tailaga dekshi pora kitiabi ata khotom nahoe, aru tailaga borton pora tel khotom nahoekena thakise.

![](https://cdn.door43.org/obs/jpg/360px/obs-en-19-05.jpg)

Tin sal adha pichete, Isor pora Elijah ke koise tae arubi borkhon pani pathabo. Tae Elijah ke Israel laga rajyo te jaikene Ahab logote kotha kobole koise. Itu nimite Elihjah Ahab logote jaise. Jetia Ahab taike dikhise, tai koise: “Apuni iyate ase, bisi digdar dia manu!” Elijah pora jawab dise: “Apuni ase jun digdar di ase! Apuni Jehovah ke pahorise. Tai he Isor ase hoilebi apuni Baal ke puja kuri ase. Itia apuni Israel rajyo te thaka manukhan sob ke Carmel pahar te anibi!”

![](https://cdn.door43.org/obs/jpg/360px/obs-en-19-06.jpg)

Aru Israel laga sob manukhan Carmel pahar uporte jaise. Junkhan Baal laga kotha manukhan logote punchia ase utu khan bi ahise. Taikhan Baal laga bhaubadikhan asile. Taikhan milaikena 450 asile. Elijah pora manukhan ke koise: “Apunikhan laga bhabona kiman deri tok bodli kuri thakibo? Judi Jehovah Isor ase, taike puja kuribi. Hoilebi judi Baal he Isor ase koile, taike puja kuribi!”

![](https://cdn.door43.org/obs/jpg/360px/obs-en-19-07.jpg)

Tetia Elijah pora Baal laga bhaubadikhan ke koise: “Ekta bhoisi ke maribi aru katikena mangso loikena puja kura jagate bolidan kuribi, hoilebi itu ke jui nadibi. Ami bi pichete ineka kuribo, aru ami mangso dusra puja kura jagate rakhibo. Tetia judi Isor pora jui pathaise koile, apunikhan tai he Isor ase koikena janibo.” Aru Baal laga bhaubadikhan bhoisi ke bolidan kurise hoilebi itu ke jui dianai.

![](https://cdn.door43.org/obs/jpg/360px/obs-en-19-08.jpg)

Tetia Baal laga bhaubadikhan Baal ke prathna kurise; “Amikhan ke hunibi, Baal!” Pura din taikhan jor pora hala korikena prathna kurithakiae aru chaku pora nijor ke bi kati se hoilebi Baal pora eku jawab dianai aru jui pathai dianai.

![](https://cdn.door43.org/obs/jpg/360px/obs-en-19-09.jpg)

Baal laga bhaubadikhan pura din hobole nisina Baal ke prathna kuri thakise. Aru taikhan rukhi jaise. Tetia Elijah pora Isor ke puja kuribole laga jaga dusra te bhoisi laga mangso rakhise. Itu pichete tai manukhan ke barohta dangor daba te pani anikena itu mangso, khuri aru mati upor sob te thik pura bhijai dibi koise.

![](https://cdn.door43.org/obs/jpg/360px/obs-en-19-10.jpg)

Itu pichete Elijah prathna kurise: “Jehovah, Abraham, Isak aru Jakob laga Isor, aji amikhan ke dikhai dibi apuni he Israel laga Isor ase aru ami apuni laga noukar ase koikena. Ami ke jawab dibi ineka hoilehi itu manukhan sob pora apuni he Isor ase koikena janibo.”

![](https://cdn.door43.org/obs/jpg/360px/obs-en-19-11.jpg)

Achanak akash pora jui giri se. Itu jui pora mangso, khuri, pathorkhan, mati aru itu usorte thakia pani khan sob jolai dise. Jetia manukhan itu dikhise, taikhan laga ghutna te girikena koise: “Jehovah he Isor ase! Jehovah he Isor ase!”

![](https://cdn.door43.org/obs/jpg/360px/obs-en-19-12.jpg)

Tetia Elijah koise: “Baal laga bhaubadikhan ekjon kebi polabole nadibi!” Aru manukhan pora Baal laga bhaubadikhan ke dhurikena loijaise aru sob ke morai dise.

![](https://cdn.door43.org/obs/jpg/360px/obs-en-19-13.jpg)

Tetia Elijah pora raja Ahab ke koise: “Itia apuni laga ghor te wapas jabi, kilekoile joldi borkhon pani giri bole ase.” Bisi joldi akash te kala hoi jaise aru bisi dangor borkhon pani giribole suru hoise. Jehovah pora pani-nathakia laga homoe par kuribo dise. Itu pora tae he Isor ase koikena dikhaise.

![](https://cdn.door43.org/obs/jpg/360px/obs-en-19-14.jpg)

Jetia Elijah tae laga kam khan khotom kurise, Isor pora Elisha koikena ekta dusra manu ke tai laga bhaubadi kuribole nimite chani loise. Isor pora Elisha ke cholaikena bisi dangor aru asurit kamkhan kurise. Ekta asurit kam Namaan logote bi kurise. Tai dusman laga sipoi-foj laga senapati thakise, aru taike bisi bia chamara laga bimar thakise. Namaan pora Elisha laga kotha hunise, aru tai Elisha logote jaikena taike bhal kuri dibi koise. Elisha pora Namaan ke Jordan nodi te jaikena sat bar nijorke pani bhitorte ghusabi koise.

![](https://cdn.door43.org/obs/jpg/360px/obs-en-19-15.jpg)

Namaan bisi khong hoise. Tai itu koribole mana nai, kilekoile tai nimite itu bisi dimag nathaka laga kam nisina lagise. Hoilebi pichete tai mon bodli kurise. Tai Jordan nodi te jaikena sat bar nijer ke pani te ghusai se. Jetia tai sat bar pichete pani upor te ulai se, Isor pora tai laga bimar bhal hoijaise.

![](https://cdn.door43.org/obs/jpg/360px/obs-en-19-16.jpg)

Isor pora arubi dusra bhaubadi bisi Israel manukhan logote pathaise. Taikhan sob pora manukhan ke taikhan murti puja kuri thaka rukhai dibi koise. Aru taikhan ekjon-dusra-jon logote ki bhal ase itu kuribi koise aru morom kuribi koise. Bhaubadikhan manukhan ke pap kam sob charikena Isor laga kotha manibi koithakise. Judi manukhan pora itu kuranai koile, Isor pora taikhan galti ase koikena taikhan ke sajai dibo.

![](https://cdn.door43.org/obs/jpg/360px/obs-en-19-17.jpg)

Bisi bar, manukhan Isor laga kotha mananai. Taikhan bhaubadikhan ke bisi bia pora cholai se aru kunba ke moraidise. Ek bar taikhan bhaobadi Jeremiah ke sukha ko-a ekta te hali kene moribole rakhi dise. Tai ko-a laga nichete mati thaka bhitor te ghusi jaise. Hoilebi raja tai ke bisi morom hoijaise aru tailaga noukarkhan ke koikena Jeremiah namora age-te taike ko-a pora tanikena baharte ulabi koise.

![](https://cdn.door43.org/obs/jpg/360px/obs-en-19-18.jpg)

Manukhan taikhan ke bisi ghin korilebi, bhaubadikhan Isor laga kotha taikhan ke bisi koi thakise. Taikhan manukhan ke hosiar kurise judi taikhan laga pap laga maphi manganai koile, Isor taikhan ke khotom kuridibo. Taikhan pora manukhan ke Isor pora Masiha pathabole thaka laga kosom taikhan laga mon-te rakhibi koise.

*A Bible story from: 1 Kings 16-18; 2 Kings 5; Jeremiah 38*

## 20. Khedai Dia Aru Wapas Ahija-a

https://openbiblestories.org/l/nag/story-20/

![](https://cdn.door43.org/obs/jpg/360px/obs-en-20-01.jpg)

Israel aru Judah laga rajyo duita bi Isor logote bisi pap kurise. Taikhan Isor logote Sinai pahar te niom banaikena thaka bhangaidise. Aru Isor he bar-bar taikhan logote bhaubadikhan pathaise aru Isor logote wapas ahikena taike puja kuribole nimite matise, hoilebi taikhan itu kotha manianai.

![](https://cdn.door43.org/obs/jpg/360px/obs-en-20-02.jpg)

Itu nimite Isor pora utu duita rajyoke taikhan laga dushman pora khotom kuribole dise. Itu homoete, Assyria bisi dangor aru takot thaka desh hoi jaise. Hoilebi taikhan dusra desh ke bisi digdar kuri thakise. Taikhan ahikena Israel laga rajyoke bhangaikena nuksan kuridise. Aru taikhan Israel laga manukhan ke moraidise aru samankhan sob loijaise aru ta-te jui-lagaidikena pora joliadise aru bisi nuksan kuridise.

![](https://cdn.door43.org/obs/jpg/360px/obs-en-20-03.jpg)

Assyria manukhan pora Israel manu laga jiman sorkari-sahab, bisi dhuni thaka aru junkhan bhal mistiri, sona-chandi aru loha-kam kuri thakise, taikhan sobke dhurikena loijaise. Khali sob pora bisi gorib manukhan ke he Jerusalem te charidise.

![](https://cdn.door43.org/obs/jpg/360px/obs-en-20-04.jpg)

Tetia Assyria laga manukhan pora bidesi manukhan ke loikena ahise aru taikhan laga city banabole dise. Taikhan Israel manukhan logote shadi kurise. Aru taikhan laga khandankhan Samaritan matise.

![](https://cdn.door43.org/obs/jpg/360px/obs-en-20-05.jpg)

Judah laga rajyo te thakakhan dikhise kineka Isor pora Israel rajyo te thakakhan kun tailaga kotha biswas nakorikena aru kotha namanikena thakise utukhan ke tai kineka sajai dise. Hoilebi taikhan murti ke pujakhan kurithakise, aru Canaan manukhan laga isorkhan ke bi puja korithakise Isor pora taikhan ke hosiar kurilobi koikena tailaga bhaubadikhan ke pathaise, hoilebi taikhan kotha mananai.

![](https://cdn.door43.org/obs/jpg/360px/obs-en-20-06.jpg)

Assyria pora Israel ke pora luksan kuridia ek sou sal pichete, Isor pora Nebuchadnezzar, jun he Babylon laga raja asile, tai ke Judah logote lorai kuribole pathaise. Babylon bisi takot thaka desh asile. Itu nimite Judah laga raja pora Babylon laga raja ke hodae sal bisi poisakhan dibole maniloise.

![](https://cdn.door43.org/obs/jpg/360px/obs-en-20-07.jpg)

Hoilebi olop sal pichete Judah laga raja pora Babylon logote lorai korise. Itu nimite Babylon laga manukhan ta-te wapas ahise aru Judah logote lorai kurise. Taikhan Jerusalem ke dhuriloise, aru Mondir bhangaidise aru jiman Mondir laga dhon joma kurikena thakise utukhan sob loijaise.

![](https://cdn.door43.org/obs/jpg/360px/obs-en-20-08.jpg)

Aru tai ineka kura nimite taike sajai dibole, Nebuchadnazzer laga sipoikhan jaikena Judah laga raja laga chokorakhan ke tailaga usorte moraidise aru raja laga suku-bia kuridise. Itu pichete taike koidi-ghor te rakhibole aru ta-te he moribole nimite Babylon te loi jaise.

![](https://cdn.door43.org/obs/jpg/360px/obs-en-20-09.jpg)

Nebuchadnazzer aru tai laga sipoikhan pora gao-bhal thakamanukhan sob ke Babylon te loijaise, khali bisi gorinkhan ke he ta-te kheti kamkhan kuribole charidise. Itu homoe jetia Isor laga manukhan ke kosom-laga-desh pora khetaidise, ituke Khetai Dia ineka matise.

![](https://cdn.door43.org/obs/jpg/360px/obs-en-20-10.jpg)

Isor pora tailaga manukhan ke taikhan pap kura nimite sajai dise aru khetai dise, hoilebi Isor taikhan ke aru tai kosom diakhan pahora nai. Tailaga manukhan uporte Isor sai thakise aru tai laga bhao-badikhan pathaikena taikhan logote kotha koi thakise. Aru tai kosom dise, sattar sal pichete, taikhan arubi wapas kosom-laga-desh te ahibo koise.

![](https://cdn.door43.org/obs/jpg/360px/obs-en-20-11.jpg)

Sattar-sal par hoa pichete, Persia laga raja Cyrus pora Babylon desh logote lorai korikena jitise. Itu pichete Persia laga samrajya pora bisi sal raj kurise. Israel manukhan ke Jehudi ineka mati jaise. Itu manukhan Babylon te bisi sal pora thakikena ahise. Aru taikhan majote bisi bura hoija manu kunbakhan he Judah ke napahorikena thakise.

![](https://cdn.door43.org/obs/jpg/360px/obs-en-20-12.jpg)

Persian manukhan bisi takot thakise hoilebi taekhan pora dhurikena aru loikena aha dusra manukhan ke bisi morom kurithakise. Cyrus jitia Persia laga raja hoise, tae ekta adesh dise aru koise Jew manukhan Judah te wapas jabole mon thakakhan jabole paribo koise. Aru taikhan ke Mondir banabole poisakhan bi dise. Itu nimite sattar sal pichete, Jew manu kunbakhan Jerusalem te ahise aru Judah punchise.

![](https://cdn.door43.org/obs/jpg/360px/obs-en-20-13.jpg)

Taikhan jetia Jerusalem te wapas ahise, taikhan laga Mondir banaise aru pathor laga bera banaise. Persian manukhan tetia tok taikhan laga uporte raj kurithakise, hoilebi itia taikhan wapas desh te jaikena Mondir te pujakhan kuribo paise.

*A Bible story from: 2 Kings 17; 24-25; 2 Chronicles 36; Ezra 1-10; Nehemiah 1-13*

## 21. Isor Masiha Pathabole Kosom Dise

https://openbiblestories.org/l/nag/story-21/

![](https://cdn.door43.org/obs/jpg/360px/obs-en-21-01.jpg)

Jetia Isor prithibi banaise, utu homoe pora he tai Masiha prithibi te pathabole bhabona asile. Tai Adam aru Eve ke itu kosom di rakhise. Eve laga khandankhan majote ekta jonom hobo jun he sap laga matha kuchai dibo koise. Saitan he sap nisina sabole hoikena Eve ke thokai dise. Hoilebi Saitan ke Masiha pora haraidibole Isor laga bhabona asile.

![](https://cdn.door43.org/obs/jpg/360px/obs-en-21-02.jpg)

Isor pora Abraham ke kosom dise aru tai nimite pritibi manu jatikhan sob asis pabo koise. Isor pora utu kosom Masiha ke pathaikena pura kurise. Masiha he prithibi te thaka manu-laga-dolkhan laga pap pora taikhan ke bachai lobo.

![](https://cdn.door43.org/obs/jpg/360px/obs-en-21-03.jpg)

Isor pora Moses ke ahibole laga din te tai dusra ekta bhaubadi pathabo koise. Masiha he bhaubadi hobo. Itu nisina, Isor Masiha ke pathabole kosom dise.

![](https://cdn.door43.org/obs/jpg/360px/obs-en-21-04.jpg)

Isor pora David raja ke tailaga khandankhan bhitorte he ekta jonom hobo aru tai he Masiha hobo koise. Aru tai raja hobo aru Isor laga manukhan uporte hodai nimite raj kuribo koise.

![](https://cdn.door43.org/obs/jpg/360px/obs-en-21-05.jpg)

Isor pora bhaubadi Jeremiah ke kotha koise aru tai ekta Notun Niom milabo koise. Utu Notun Niom pora purana niom jintu Isor Israel logote Sinai pahar uporte milaise, utu nisina nohobo koise. Itu Notun Niom Isor tailaga manukhan logote banabo aru taekhan Isorke aru bhal pora janibole dibo koise. Taikhan ekjon-ekjon pora Isorke morom kuribo aru tailaga kotha khan manibo koise. Isor pora tailaga niomkhan taikhan laga mon te likhibo koise. Taikhan Isor laga manu hoijabo aru Isor pora taikhan laga pap sob maph kuridibo. Masiha he taikhan logote itu Notun Niom banabo.

![](https://cdn.door43.org/obs/jpg/360px/obs-en-21-06.jpg)

Isor laga bhaubadikhan pora koise taikhan laga Masiha ekta bhaubadi, pujari aru raja hobo koise. Bhaubadikhan Isor laga monte thaka kotha sob janithake, aru Isor laga itu khobor khan manukhan ke koithake. Juntu Masiha Isor pora dibo koikena kosom dise itu bhaubadi sob pora tai he bisi bhal hobo koise. Itu Masiha he Isor laga kothakhan bhal pora hunibo, bhal pora bujibo aru tai pora he manukhan ke itu sob bhal pora hikaidibo.

![](https://cdn.door43.org/obs/jpg/360px/obs-en-21-07.jpg)

Israel laga purohitkhan tailaga manukhan nimite janwarkhan bolidan korikena Isorke puja kurithakise. Aru itu kura motlob toh taikhan laga pap sob jolaidise. Purohitkhan Israel manukhan nimite Isor ke prathna kuridi thakise. Hoilebi Masiha he taikhan sob pora bhal maha purohit hobo aru tai he nijorke marikena Isor logote puja kuridibo. Tai eku pap nathaka ase itu nimite tai nijorke marikena bolidan koriloile, manukhan aru ketia bi taikhan laga pap hatabole janwar marikena bolidan kuribole nalagibo.

![](https://cdn.door43.org/obs/jpg/360px/obs-en-21-08.jpg)

Rajakhan aru sorkari-sahabkhan manukhan raj kura homoete galti kam bisi kurijae. Raja David Israel laga manukhan uporte raj kurise. Masiha juntu David laga khandan pora ahibole ase, tai pura prithibi uporte raj kuribo aru tai hodae nimite raj kuribo. Aru, tai hodai nimite ki thik ase itu niomkhan cholaikena raj koribo aru thik phaisla dibo.

![](https://cdn.door43.org/obs/jpg/360px/obs-en-21-09.jpg)

Isor laga bhaubadikhan Masiha laga aru bisi kotha koise. Ekta kotha ineka ase, bhaubadi Malachi pora koise Masiha laga age-te, dusra ekta bhaubadi ahibo. Aru utu bhaubadi bisi khas hobo. Itu nisina, bhaubadi Isaiah pora likhise- Masiha ekta sapah maiki junke mota pora ketia bi chuania, itu pora jonom hobo koise. Arubi bhaubadi Micah pora koise Masiha Bethelehem laga taun te jonom kuribo.

![](https://cdn.door43.org/obs/jpg/360px/obs-en-21-10.jpg)

Bhaubadi Isaiah koise Masiha Galilee phine thakibo. Masiha pora tailaga manu kandi thakakhan sob laga mondukh hatai dibo koise. Koidi ghorte bandikena aru dhurikena rakhi thaka sob ke charidibo koise. Itu masiha pora kisim kisim bimar thaka manu ke changai kuridibo aru kunkhan laga kan pora iku nahone, kunkhan laga suku pora iku nadikhe, aru kunkhan laga mukh pora kotha kobole napare, aru kunkhan berabole napare taikhan sob ke Masiha pora bhal kuridibo koise.

![](https://cdn.door43.org/obs/jpg/360px/obs-en-21-11.jpg)

Bhaubadi Isaiah pora itu bi koise manukhan pora Masiha ke bisi ghin kuribo, aru tai koa kotha khan namanibo aru taike bi ketiabi khusi napabo. Dusra bhaubadikhan koise Masiha laga ekta sathi he tailaga dusman hoijabo. Bhaubadi Zacharias pora koise manukhan taike ineka kuribole taike tis-ta chandi laga poisa dibo. Arubi dusra bhaubadikhan koise kunba manukhan Masiha ke moraidibo aru tailaga kapor nimite baji khelibo.

![](https://cdn.door43.org/obs/jpg/360px/obs-en-21-12.jpg)

Bhaubadi khan pora Masiha kineka moribo itu bi koidise. Isaiah pora koise manukhan tailaga uporte thuk phelabo, taike sorom khilabo aru taike bisi maribo. Taikhan Masiha laga chati-kinarte hatyar ghusaidibo aru tai iku galti nathakilebi bisi dangor dukh paikena moribo.

![](https://cdn.door43.org/obs/jpg/360px/obs-en-21-13.jpg)

Taikhan etubi koise Masiha ketia bi pap nakoribo. Taike eku pap nathakibo. Hoilebi manukhan laga pap nimite, Isor pora taike sajai dibo aru tai moribo. Tai morijaile he Isor aru manukhan majote shanti hobo. Itu nimite Masiha moribole lagise.

![](https://cdn.door43.org/obs/jpg/360px/obs-en-21-14.jpg)

Bhaubadikhan aru koise Isor pora Masiha morija-a pichete arubi taike jinda kuridibo koise. Itu sob Isor pora Notun Niom nimite kurise, itu hoile he manukhan junkhan taike pap kurise taikhan sob ke bachai lobole nimite kurise.

![](https://cdn.door43.org/obs/jpg/360px/obs-en-21-15.jpg)

Itu sob kothakhan Isor pora tailaga bhaubadi khan ke koidise, hoilebi taikhan jinda thaka homoete, Masiha ahi-a-nai. Taikhan sob morikena charso sal par hoija pichete he Isor pora Masiha ke prithibi te pathaise.

*A Bible story from: Genesis 3:15; 12:1-3; Deuteronomy 18:15; 2 Samuel 7; Jeremiah 31; Isaiah 59:16; Daniel 7; Malachi 4:5; Isaiah 7:14; Micah 5:2; Isaiah 9:1-7; 35:3-5; 61; 53; Psalm 22:18; 35:19; 69:4; 41:9; Zechariah 11:12-13; Isaiah 50:6; Psalm 16:10-11*

## 22. John Laga Jonom

https://openbiblestories.org/l/nag/story-22/

![](https://cdn.door43.org/obs/jpg/360px/obs-en-22-01.jpg)

Bisi sal ago-te, Isor pora tailaga bhaubadikhan ke kotha koithakise aru taikhan pora manukhan ke Isor laga kotha kobole dise. Charso-sal pichete bi Isor taikhan ke kotha nakoa hoi jaise. Tetia Isor pora Zacharias kun pujari thakise, tai ke ekta sorgoduth pathaise. Zacharias aru tailaga maiki Elizabeth Isor ke bisi adar korikena thakise. Tai duijon bisi bura-buri hoijaise aru Elizabeth bacha jonom kuribole paranai.

![](https://cdn.door43.org/obs/jpg/360px/obs-en-22-02.jpg)

Zacharias ke sorgoduth pora koise; ‘Apuni laga maiki ekta chokora ke jonom dibo. Apuni tailaga nam John rakhibo. Tai jonom hoa logote tai logote Pobitro-Aatma thakibo, aru Isor nimite manukhane Masiha ahibole thaka nimite taiar kuribo!’’ Zacharias koise; ‘Ami duijon toh bacha jonom kuribole bisi bura aru buri hoise! Itu hosa ase koikena ami kineka bujibo?’’

![](https://cdn.door43.org/obs/jpg/360px/obs-en-22-03.jpg)

Tetia duth pora jawab dise; ‘‘Amike Isor pora itu khusi khobor koidibole pathaise. Hoilebi apuni ami laga kotha ke biswas kuranai, itu nimite, bacha jonom noha-a tok apuni kotha kobole naparibo.’’ Itu hoa logote, Zacharias kotha kobole napara hoise. Aru sorgoduth ta-te pora jaijaise. Pichete Zacharias tai laga ghorte wapas jaise aru tai laga maiki bacha bukhise.

![](https://cdn.door43.org/obs/jpg/360px/obs-en-22-04.jpg)

Jetia Elizabeth laga pet-te bacha bukhikena choe mahina hoiasile, tetia sorgoduth juntu Zacharias logote ahise, achanak pora Elizabeth laga ghor manu, Mary logote bi ahise. Utu chukuri bisi sapha asile aru Joseph logote shadi kuribole kotha milaikena asile. Taike sorgoduth pora koise; ‘‘Apuni laga pet-te bacha bukhibo aru apuni ekta chokora ke jonom dibo aru tai laga nam Jesu rakhibo. Tai Sob-Pora-Uncha-Pormeswar-Isor laga bacha hobo aru tai hodae-hodae nimite raja hoikena thakibo.’’

![](https://cdn.door43.org/obs/jpg/360px/obs-en-22-05.jpg)

Mary jawab dise; ‘‘Itu kineka pora hobole paribo, kilekoile amike ekta motabi chuanae?’’ Tetia duth pora taike samjaikena koise; ‘‘Apuni logote Pobitro Aatma ahibo aru Isor laga hokti apuni logote thakibo. Itu nimite apuni jonom dia bacha Pormeswar laga Chokora hobo.’’ Tetia Mary duth laga kotha hunikena biswas kurise.

![](https://cdn.door43.org/obs/jpg/360px/obs-en-22-06.jpg)

Itu hoa laga olop din pichete, Mary tai laga ghor manu Elizabeth ke lok pabole jaise. Jetia Mary Elizabeth ke salam janaise, tetia Elizabeth laga pet bhitorte thaka bacha hilise. Isor pora ki kam kuribole ase itu nimite bisi khusi paise. Mary Elizabeth logote tin mahina tok thakise aru itu pichete tailaga ghor te wapas jaise.

![](https://cdn.door43.org/obs/jpg/360px/obs-en-22-07.jpg)

Itu pichete Elizabeth ekjon chokora ke jonom dise. Zacharias aru Elizabeth pora sorgoduth koa nisina bacha laga nam John rakhise. Tetia Isor pora Zacharias ke kotha kobole paribole dise. Zacharias koise; ‘‘Isor laga nam ucha kuri ase, kilekoile Isor tailaga manukhan ke kitiabi napahore. Ami laga chokora, apuni he, Jehovah Sob Pora Uncha Isor laga bhao-badi hobo. Aru sob manukhan ke taikhan laga pap pora maph pabole laga rasta-te loijabole ase!’’

*A Bible story from: Luke 1*

## 23. Jisu Laga Jonom

https://openbiblestories.org/l/nag/story-23/

![](https://cdn.door43.org/obs/jpg/360px/obs-en-23-01.jpg)

Mary toh Joseph logote shadi kuribole kotha milai kena asile, Joseph toh dharmik manu thakise. Jetia Mary bacha bukhi ase koikena khobor janise, itu tailaga bacha nohoi koikena bujise. Hoilebi tai Mary ke sorom dibole mon thaka nai, itu nimite tai Mary ke chup-chap pora shadi nakoribole bhabona kurise. Hoilebi itu homoete sorgoduth ahikena tai laga sapna te tai ke kotha kurise.

![](https://cdn.door43.org/obs/jpg/360px/obs-en-23-02.jpg)

Utu sorgo duth pora tai ke koise; ‘‘Joseph, tumi Mary ke shadi kuribole bhoi nakoribi. Tai laga pet-te bacha thaka toh Pobitro Aatma pora ase. Tai ekta chokora ke jonom dibo. Tai laga nam Jesu matibo (itu motlob toh ‘Jehovah Bachai-ase’) kilekoile tai pora manukhan ke taikhan laga pap pora bachabo.

![](https://cdn.door43.org/obs/jpg/360px/obs-en-23-03.jpg)

Aru Joseph Mary ke shadi kurise aru tai laga ghor te loijaise, hoilebi bacha jonom nahoa tok, tai Mary logote ghuma nai.

![](https://cdn.door43.org/obs/jpg/360px/obs-en-23-04.jpg)

Jetia bacha jonom dibole homoe punchi thakise, Mary aru Joseph Bethlehem taun te jaise. Utu homoete Rome desh te kiman manukhan ase janibole nimite sob manukhan ke nijor-nijor laga taun te jaikena ginti kuribole koise. Sob manukhan ke nijor purbans khan thaka jagate jai kene ginti kuribole koise. David Bethlehem taun te jonom kurise, aru Mary aru Joseph bi David laga khandan pora ahise.

![](https://cdn.door43.org/obs/jpg/360px/obs-en-23-05.jpg)

Mary aru Joseph Bethelehem te jaise, hoilebi ta-te taikhan bohibole jaga thaka nai, khali guru-ghora laga ghor thakise. Mary ta-te tai laga chokora ke jonom dise. Tai pora tai laga bacha ke guru-ghora khabole laga jagate rakhise, kilekoile taikhan logote bisena thaka na. Aru bacha laga nam Jisu dise.

![](https://cdn.door43.org/obs/jpg/360px/obs-en-23-06.jpg)

Itu rati, kunba bhere-saguli sa-a manukhan rati laga utu homoite naghumaikena asile. Achanak pora ekta sorgoduth ujala thaka taikhan laga usorte ahise aru taikhan bisi bhoi lagise. Utu duth takhan ke koise; ‘‘Bhoe nakoribi! Ami apunikhan nimite ekta khushi khobor anise. Apunikhan nimite Masiha Bethlehem te jonom hoise!’’

![](https://cdn.door43.org/obs/jpg/360px/obs-en-23-07.jpg)

‘‘Jaikena bacha ke bisari bi, apunikhan utu bacha ke kapor laga tukrakhan pora bandikena, guru-ghora kha-loa kurithaka jagate pabo.’’ Achanak pora bisi duthkhan taikhan laga uporte bhorta hoise aru Isor laga nam ke utcha korikena ineka gana kurise; ‘‘Sorgo laga ucha porabi Pormeswar laga nam ucha ase, aru prithibi te thakakhan ke tailaga shanti janaidi ase!’’

![](https://cdn.door43.org/obs/jpg/360px/obs-en-23-08.jpg)

Tetia duthkhan wapas jaijaise, aru bhera-saguli sa-a manukhan bi taikhan laga bhera-saguli ke chari kena, utu bacha ke bisaribole jaise. Aru taikhan joldi utu jagate punchise aru duthkhan pora koa nisina, Jisu ke guru-ghora khabole laga jagate ghumaikena paise. Taikhan bisi khusi hoise aru wapas taikhan laga bhera-saguli thaka jagate jaise. Aru taikhan ki hunise aru dikhise itu nimite Isor laga nam ke ucha kurise.

![](https://cdn.door43.org/obs/jpg/360px/obs-en-23-09.jpg)

Itu homoete, kunba manukhan purab phine thaka desh laga asile. Taikhan akash laga tara ke saikena Isor laga kotha kobole pare manu asile aru taikhan laga dimag bisi bhal asile. Taikhan akash te bisi alag ekta tara dikhise. Tetia taikhan itu motlob Jehudi laga raja jonom hoise koikene bujijaise. Itu nimite taikhan bacha ke sabole ahise. Bisi din safar kurikena taikhan Bethlehem te punchise aru kun jagate Jisu aru tailaga baba-ama asile ta-te taikhan bisari kena ahise.

![](https://cdn.door43.org/obs/jpg/360px/obs-en-23-10.jpg)

Jetia taikhan Mary laga hath te Jisu ke dikhise, taikhan laga matha niche kurise aru tai ke aradhana kurise. Aru taikhan Jisu ke kimti saman ani dise. Itu pichete taikhan nijor laga ghorte wapas jai jaise.

*A Bible story from: Matthew 1; Luke 2*

## 24. John Jisu ke Baptisma Dise

https://openbiblestories.org/l/nag/story-24/

![](https://cdn.door43.org/obs/jpg/360px/obs-en-24-01.jpg)

John, jun Zacharias aru Elizabeth laga chokora asile, dangor hoikena bhaubadi hoise. Tai jongol te thakise, tai mou-pani aru phoreng-kira khaithake, aru tai laga kaporkhan ut-janwar laga chamara pindi thakise.

![](https://cdn.door43.org/obs/jpg/360px/obs-en-24-02.jpg)

Manukhan bisi jongol te tailaga kotha huni bole ahi thake. Taikhan ke tai ineka koise; ‘‘pap kamkhan nakoribi, Isor laga rajyo ekdom usorte ase!’’

![](https://cdn.door43.org/obs/jpg/360px/obs-en-24-03.jpg)

Jetia manukhan John laga kotha hunise, taikhan pap-pora-maph mangise aru John taikhanke baptisma kuridithake. Dhorom laga cholautakhan bi John ki kuriase sabole ahise hoilebi taikhan laga mon bodli kuranai aru pap nimite maphi manga nai.

![](https://cdn.door43.org/obs/jpg/360px/obs-en-24-04.jpg)

John taikhan ke koise: ‘‘Sap laga bachakhan, pap pora maph mangibi aru niomkhan bodli kuribi. Isor pora juntu ghas bhal pora guti nadhuribo, utu ghas ke katikena jui te phelaikena jolia dibo.’’ Bhaubadikhan pora ki kotha koisele utu John pora kurise: “Ami laga rasta banabole nimite ami laga khobor janaidia manu ke ami pathabole ase.”

![](https://cdn.door43.org/obs/jpg/360px/obs-en-24-05.jpg)

Dhorom laga gurukhan pora John ke tai he Masiha ase naki hutise. John koise: “Ami Masiha nohoi. Ami laga piche ekjon ahibole ase. Tai ami pora bisi dangor ase aru ami tailaga laga juta laga rosi kholibole bi laik nohoe.”

![](https://cdn.door43.org/obs/jpg/360px/obs-en-24-06.jpg)

Utu din pichete, Jisu John ke bisari ahise aru tai ke baptisma kuribole koise. Jetia John toh Jisu ahi thaka dikhise, tai koise: “Sabi! Utu he Isor laga Bhera-Bacha ase, jun itu prithibi laga papkhan hatai dibo!”

![](https://cdn.door43.org/obs/jpg/360px/obs-en-24-07.jpg)

John pora Jisu ke koise: “Ami apuni ke baptisma dibole liak nohoe. Ulta apuni he ami ke baptisma dibole lage.” Hoilebi Jisu koise, “Apuni ami ke baptisma dibi, kilekoile ineka he thik ase.” Itu nimite John Jisuke baptisma dise, Jesu iku pap nathakilebi.

![](https://cdn.door43.org/obs/jpg/360px/obs-en-24-08.jpg)

Jisu jetia baptisma loikena pani pora ulaise, Isor laga Atma ekta kopu-chiria nisina hoikena ahise aru tai laga upote rukhi jaise. Itu logote, Isor sorgo pora kotha koise. Tai ineka koise: “Tumi ami laga chokora ase. Moi tumike morom kure aru ami tumi ke bisi khusi ase.”

![](https://cdn.door43.org/obs/jpg/360px/obs-en-24-09.jpg)

Isor John ke koise: “Pobitro Aatma tai laga uporte ahibo jun apuni baptisma dibo. Utu manu Isor laga Chokora ase.” Isor ekta ase. Hoilebi jitia John Jesuke baptisma dise, tai Isor Pormeswar jun Baba ase, Isor Pormeswar jun Chokora Jisu ase, aru Pobitro Aatma ase taikhan laga awaz hunise.

*A Bible story from: Matthew 3; Mark 1:9-11; Luke 3:1-23*

## 25. Saitan pora Jisu ke Porikha Kurise

https://openbiblestories.org/l/nag/story-25/

![](https://cdn.door43.org/obs/jpg/360px/obs-en-25-01.jpg)

Jisu laga baptisma hoa logote, Pobitro Aatma tai ke jongol te loijaise. Aru chalis din aru rati tok Jisu ta-te thakise. Utu homoite Jisu ekubi nakhaikena thakise, aru Saitan tu Jisu ke porikha kuribole ahise.

![](https://cdn.door43.org/obs/jpg/360px/obs-en-25-02.jpg)

Poila, Jisu ke Saitan pora koise, “Jodi apuni Isor laga Chokora ase koile apuni khabole itu pathorkhanke ruti banabi!”

![](https://cdn.door43.org/obs/jpg/360px/obs-en-25-03.jpg)

Hoilebi Jisu Saitan ke koise: “Isor laga kotha te ineka likhikena ase, ‘Manukhan jinda thakibole khali ruti he khaikena nohoe, hoilebi Isor taikhan ke ki kotha koiase, utu sob taikhan manikena thakibole lage!’”

![](https://cdn.door43.org/obs/jpg/360px/obs-en-25-04.jpg)

Tetia Saitan Jisuke Mondir laga sobse ucha jagate loijaise. Tai Jisuke koise: “Jodi apuni Isor laga Chokora ase koile, iyate pora nijeke nichete girabi, kilekoile Isor laga kotha ineka likhikene ase: ‘Isor tai laga duthkhanke pathaikene apunike dhurilobo aru apunilaga theng pathor pora jokhom nahobo.’”

![](https://cdn.door43.org/obs/jpg/360px/obs-en-25-05.jpg)

Hoilebi Saitan pora koa-a kotha Jisu ektabi kuranai. Aru Jisu tai ke koise: “Isor sob manukhan ke koi ase: “Apuni laga Isorke porikha nakuribi!”

![](https://cdn.door43.org/obs/jpg/360px/obs-en-25-06.jpg)

Tetia Saitan pora Jisuke prithibi laga rajyo sob dikhaise. Itu rajyokhan sob kiman takot ase aru kiman dhuni ase itu sob dikhaise. Tai Jisu ke koise; “Ami apuni ke itukhan sob dibo, hoilebi apuni ami laga age-te jhukikena amike puja kuribi.”

![](https://cdn.door43.org/obs/jpg/360px/obs-en-25-07.jpg)

Jisu jawab dise: “Ami usor pora jaijabi Saitan! Isor laga kothate likhikene ase, ‘Isor ke he puja koribi aru khali tai ke he adar dibi.”

![](https://cdn.door43.org/obs/jpg/360px/obs-en-25-08.jpg)

Saitan pora Jisuke porikha korise hoilebi Jisu ta-te giri janae, aru Saitan harikena jai jaise. Itu pichete sworgoduthkhan ahikena Jisu ke modot ku rise.

*A Bible story from: Matthew 4:1-11; Mark 1:12-13; Luke 4:1-13*

## 26. Jisu Isor Laga Kam Suru Kurise

https://openbiblestories.org/l/nag/story-26/

![](https://cdn.door43.org/obs/jpg/360px/obs-en-26-01.jpg)

Saitan pora Jisu ke porikha kura pichete, tai Galilee te wapas jaise. Jisu itu jagate thakisile. Pobitro Atma tai ke bisi takot di thakise aru Jisu sob jagate beraikene manukhan ke Isor kotha hikai thakise. Sob manu tai laga bhal kotha he koise.

![](https://cdn.door43.org/obs/jpg/360px/obs-en-26-02.jpg)

Jisu Nazareth laga taun te jaise. Tai bacha thakia homeote itu bosti te thakise. Sabbath laga din te, tai puja kura laga jagate jaise. Ta-te laga cholautakhan tai ke bhaubadi Isaiah pora likha kotha laga kakoj dise. Taikhan Jisu ke itu pora puribole dibole mon thakise. Itu nimite Jisu utu kakoj khulise aru ta-te pora ekta bhag purise.

![](https://cdn.door43.org/obs/jpg/360px/obs-en-26-03.jpg)

Jisu purise: “Isor pora tai laga Aatma amike dise, jun nimite ami gorib manukhan ke susamachar prochar kuribo. Bandikena rakha manukhan ke charidibole nimite, andha manukhan sabo paribole aru dhurikena thaka khan ke charidibole tai amike pathaise. Aji, itu laga homoe ase jitia Isor amikhan ke tai laga morom dibo aru modot koribo.”

![](https://cdn.door43.org/obs/jpg/360px/obs-en-26-04.jpg)

Tetia Jisu bohise. Taikhan sob manukhan tai phine sai asile. Jisu pora Isor laga kotha likhikena thaka pura hunikena itu toh Masiha laga ase koikena tai khan bujise. Jisu koise: “Itia ami apunikhan logote ki purise, itu itia hoi ase.” Sob manukhan asurit hoise. Taikhan ekjon dusra jonke hutise: “Itu Joseph laga chokora ase nohoi?’’

![](https://cdn.door43.org/obs/jpg/360px/obs-en-26-05.jpg)

Tetia Jisu pora koise; “Itu hosa ase, ekta bhaubadi ke tai nijor taun laga manukhan kitiabi bhal nalagibo. Bhaubadi Elijah laga somoi te, Israel desh te mota morijua maikikhan bisi thakise. Aru tin-sal nimite borkhon pani girianae, Israel te thaka mota morijua maiki ekta ke modot koribole Isor tai ke pathanae. Ulta, tai Elijahke dusra alag desh te mota morikene thaka ekta maiki ke modot kuribole pathaise.

![](https://cdn.door43.org/obs/jpg/360px/obs-en-26-06.jpg)

Jisu aru koi thakise: “Aru bhaubadi Elisha laga homoete, Israel te bisi manukhan ke chamara bemar asile. Hoilebi Elisha taikhan kunkebi bhal kuranai. Tai khali Namaan ke bhal kurise, jun Israel laga dusman laga senapati asile. Ta-te kunkhan tai laga kotha huni thakise Jehudikhan asile aru tai itu kotha koa-a pichete bisi manu tai ke bisi khong kurise.

![](https://cdn.door43.org/obs/jpg/360px/obs-en-26-07.jpg)

Nazareth laga manukhan Jisu ke dhorise aru mandir laga bahar te anise. Tai khan Jisu ke pahar uporte loijaise aru ta-te pora tai ke phelaikena murabole kurise. Hoilebi Jisu manukhan laga majotpora beraikena Nazareth taun charikena jai jaise.

![](https://cdn.door43.org/obs/jpg/360px/obs-en-26-08.jpg)

Tate pora Jisu Galilee laga jaga sob jagate beraise, aru manukhan bisi tai logote ahi thakise. Tai logote bimar manu aru gao-te napunchakhan bisi loikene ahise. Kunba andha, kunba berabole napara, kunba hunibole napara aru kunba kotha kobole napara sob ke anise, aru Jisu tai khan sob ke changai kurise.

![](https://cdn.door43.org/obs/jpg/360px/obs-en-26-09.jpg)

Aru, bisi manukhan junkhan ke Saitan laga bia-atma bhitorte ghusikene asile, utukhan loikene anise. Jisu bia-atmakhan ke manu laga gao pora baharte ulaijabi koikene hokom dise aru tai khan itu hunikene ulaijaise. Bia-atma khan hala kurikena Jisu ke ineka koise: “Apuni Isor laga Chokora Ase!” Utu jagate thaka sob manukhan aschurit hoise aru Isor laga nam ucha korise.

![](https://cdn.door43.org/obs/jpg/360px/obs-en-26-10.jpg)

Aru Jisu barota manukhan ke basi se aru taikhan ke tai laga apostles matise. Tai khan Jisu logote sob jagate safar korise aru tai logote pora bisi hikise.

*A Bible story from: Matthew 4:12-25; Mark 1:14-15, 35-39; 3:13-21; Luke 4:14-30, 38-44*

## 27. Ekta Bhal Samaria Manu Laga Kahani

https://openbiblestories.org/l/nag/story-27/

![](https://cdn.door43.org/obs/jpg/360px/obs-en-27-01.jpg)

Ek-din, Isor-laga-niom-hika manu ekjon Jisu logote ahise. Tai manukhan ke Jisu pora misa-mesi kotha bisi hikai ase buli kobole ahise. Itu nimite tai koise: ‘‘Shikai diya manu, ami ki korile ananto jibon pabo?” Jisu tai ke koise: “Isor laga niom te ki likehikena ase?”

![](https://cdn.door43.org/obs/jpg/360px/obs-en-27-02.jpg)

Itu manu pora koise: “‘Ineka likhikena ase; “Apuni laga Isor ke pura mon, atma, takot aru dimag pora morom koribi koise. Aru apuni nijor ke kineka morom kure itu nisina apuni laga ghor usorte thakakhan ke bi morom kuribi.” Jisu koise: “Apuni thik koi ase! Itukhan kuribi aru apuni ananto jibon pabo.”

![](https://cdn.door43.org/obs/jpg/360px/obs-en-27-03.jpg)

Hoilebi tai ki kuri ase itu he thik ase dikhabole mon asile. Itu nimite tai Jisuke hutise: “Ineka hoile, kun he ami laga ghor usorte thaka manu ase?”

![](https://cdn.door43.org/obs/jpg/360px/obs-en-27-04.jpg)

Jisu pora tai ke bujaidibole ekta manu laga kahani koise. “Ekta Jehudi manu Jerusalem pora Jericho rasta te safar kuri thakisile.”

![](https://cdn.door43.org/obs/jpg/360px/obs-en-27-05.jpg)

“Hoilebi kunba dokait khan taike dikhise aru tai ke hamla kurise. Tai khan pora tai laga saman sob loi-loise aru tai ke mari thakise jetia tok tai mura nisina hoa nai. Aru tai khan jai jaise.”

![](https://cdn.door43.org/obs/jpg/360px/obs-en-27-06.jpg)

Olop pichete, ekta Jehudi solauta utu raste te ahise. Tai utu manu ke rasta te ghumaikena thaka dikhise. Jetia tai utu manu ke dikhise, tai rasta laga dusra phine par kurikena jaikena jai jaise. Tai utu manu ke ekdum nadikha nisina jai jaise.”

![](https://cdn.door43.org/obs/jpg/360px/obs-en-27-07.jpg)

“Ineka aru bisi deri naho-a agete, ekta Levi manu utu rasta te ahise. (Levi manukhan Jehudi jatikhan asile aru tai khan Mondir te solauta khan ke modot kore). Utu Levi manubi rasta laga dusra phine jaise. Aru tai bi utu manuke nadikha nisina jaijaise.”

![](https://cdn.door43.org/obs/jpg/360px/obs-en-27-08.jpg)

“Itu pichete, utu rasta te Samaria laga manu ekta ahise. (Samaria manukhan aru Jehudi manukhan ekjon-dusra-jon ke ghin kore). Samaria manu pora utu manu ke rasta te dikhise. Tai bujijaise utu manu Jehudi ase koikena, hoilebi tai utu manuke bisi morom lagise. Itu nimite tai jaikene utu manu laga jhokhom te dawai kurise, aru norom kapor pora bandidise.”

![](https://cdn.door43.org/obs/jpg/360px/obs-en-27-09.jpg)

“Titia Samaria manu pora utu manu ke tai nijor laga gadha uporte bohaise. Aru rasta laga usorte ekta aram kura ghor te loi jaise. Aru ta-te tai bhal pora utu manuke sa-a-loa kuri thakise.”

![](https://cdn.door43.org/obs/jpg/360px/obs-en-27-10.jpg)

“Aru dusra din te, Samaria manu tai laga safar te jai jabole hoise. Tai aram kura ghor sai thaka manuke poisa dise. Tai utu manuke koise: “Itu manu ke bhal pora sabi. Jodi apuni itu pora arubi bisi poisa kharcha korise koile, ami wapas ahikena apuni khorcha kura khan sob ghurai dobo.”

![](https://cdn.door43.org/obs/jpg/360px/obs-en-27-11.jpg)

Tetia Jisu utu Isor laga niom hika ke hutise: “Apuni laga ki bhabona ase? Taikhan tin jon bhitorte kun he utu manu, jun laga samankhan chor hoise aru marikhaise, tai nimite tai laga ghor usor manu nisina kam kurise?” Tai koise: “Jun tai uporte dayalu thakise.” Jisu tetia tai ke koise: “Tinihoile apunibi jaikena ineka he kuribi.”

*A Bible story from: Luke 10:25-37*

## 28. Dhoni Jowan Cholaunta

https://openbiblestories.org/l/nag/story-28/

![](https://cdn.door43.org/obs/jpg/360px/obs-en-28-01.jpg)

Ek din, ekjon jowan dhuni manu Jisu logote ahise aru tai ke hutise: “Bhal Shikai diya manu, ami ki kam korile ananto jibon pabo?” Jisu tai ke koise: “Kile apuni ami ‘bhal’ koi ase? Khali ekjon he bhal ase, aru itu tu Isor ase. Aru ananto jibon pabole mon thakile, Isor laga niomkhan sob manikene thakibi.”

![](https://cdn.door43.org/obs/jpg/360px/obs-en-28-02.jpg)

Tai hutise: “Kuntu niomkhan ami manibole lage?” Jisu tai ke koise: “Manuke namorabi. Bebichari nakoribi. Chor nakoribi. Misa kotha nakobi. Ama-baba ke sonman dibi, aru nijorke kineka morom kure, itu nisina ghor usor manu khankebi morom kuribi.”

![](https://cdn.door43.org/obs/jpg/360px/obs-en-28-03.jpg)

Hoilebi utu jowan manu pora koise: “Ami chutu bacha thaka homoe pora itu sob niomkhan manikene ahise. Ami arubi ki kuribo laga?” Jisu tai ke saise aru bisi morom hoise.

![](https://cdn.door43.org/obs/jpg/360px/obs-en-28-04.jpg)

Jisu tai ke koise, “Jodi apuni bisi bhal hobole mon ase koile, jabi aru apuni laga saman kiman ase sob bikiri kurikena itu poisa tu garib khan ke bhag koribi, aru apuni laga khazana sorgo te hobo. Tetia ami laga piche kuribi.”

![](https://cdn.door43.org/obs/jpg/360px/obs-en-28-05.jpg)

Jetia utu jawan manu Jisu ki koise hunise, tai bisi mon dukh hoise, kilekoile tai bisi dhuni thakise aru tai laga samankhan bikiri koribole mon thaka nai. Itu nimite tai ghuraikena Jisu usor pora jai jaise.

![](https://cdn.door43.org/obs/jpg/360px/obs-en-28-06.jpg)

Tetia Jisu tai laga chelakhan ke matikene koise: “Dhun manukhan Isor laga Rajyo te jabole bisi digdar ase! Hoi, dhuni manu ekta pora Isor laga Rajyo te jabo paribole tu ekta ut pora biji laga chenda par kuribole para he asan hobo.”

![](https://cdn.door43.org/obs/jpg/360px/obs-en-28-07.jpg)

Jetia Jisu laga chelakhan tai koa hunise, tetia taikhan bisi asurit lagise. Aru tai khan koise: “Ineka ase koile, Isor kun ke roikha kuribo?”

![](https://cdn.door43.org/obs/jpg/360px/obs-en-28-08.jpg)

Jisu tai laga chelakhan ke saikene koise: “Manukhan tai nijor ke bachabole naparibo. Hoilebi Isor nimite napara ekubi nai.”

![](https://cdn.door43.org/obs/jpg/360px/obs-en-28-09.jpg)

Peter Jisu ke koise: “Amikhan sob charikena apuni logote ahise. Amikhan laga inam ki hobo?”

![](https://cdn.door43.org/obs/jpg/360px/obs-en-28-10.jpg)

Jisu pora koise: “Jun manu ami nimite tai laga ghor, bhai-kokaikhan, didi-bhoinikhan, ama-babakhan, nahoile bachakhan ke nahoile saman khan charibo, tai ek sou bar bisi pabo aru ananto jibon pabo. Hoilebi itia kun sob pora age te ase tai he sob pora piche hoijabo aru sob pora pichete kun ase tai he sob pora age te hoijabo.”

*A Bible story from: Matthew 19:16-30; Mark 10:17-31; Luke 18:18-30*

## 29. Maph Dibole Napara Noukar Laga Kahani

https://openbiblestories.org/l/nag/story-29/

![](https://cdn.door43.org/obs/jpg/360px/obs-en-29-01.jpg)

Ek din, Peter Jisu ke hudise: “Malik, ami laga bhai-kokaikhan ami ke bia kam korile kiman bar tae ke maph koribo? Sat bar?” Jisu koise: “Nohoe, sat bar nohoe, satar aru sat bar!” Jisu itu koa motlob toh amikhan manu laga galti hodae maph koribo lage koise. Titia Jisu tae ke itu kahani koise.

![](https://cdn.door43.org/obs/jpg/360px/obs-en-29-02.jpg)

Jisu pora koise: “Sorgo laga rajyo ineka ase, ekta raja tai laga kam kura noukarkhan laga hisab-kitabkhan janibole mon hoise. Ekjon kam kura noukar pora dui-soh-hazar sal laga taka loise hoilebi wapas tira nai.

![](https://cdn.door43.org/obs/jpg/360px/obs-en-29-03.jpg)

Hoilebi utu noukar logote baki tirabole poisa thaka nai, itu nimite raja koise, “Poisa tirabole itu manu aru tai ghor manukhan sob ke bikiri kuribi.”

![](https://cdn.door43.org/obs/jpg/360px/obs-en-29-04.jpg)

Utu noukar ghutna te girise aru koise: “Apuni morom korikena amike olop homoe dibi, aru ami apuni ke baki thaka sob tiraidibo.” Raja taike bisi morom lagise aru tailaga bakikhan maph kurise aru jabole dise.”

![](https://cdn.door43.org/obs/jpg/360px/obs-en-29-05.jpg)

Hoilebi utu noukar ta-te pora ulaikena ja-a homoete, tai ekta noukar lok paise, jun pora taike char mahina laga tangkha jiman poisa baki thakise. Utu noukar itu dusra noukar laga gola te dhurise aru koise; “Apuni amike jiman poisa baki ase itia-itia terabi!”

![](https://cdn.door43.org/obs/jpg/360px/obs-en-29-06.jpg)

Utu noukar tailaga ghutna te girise aru koise: “Apuni morom kurikena amike olop homoe dibi, aru ami apunike baki thaka sob tirai dibo.” Hoilebi ulta, utu manu noukar laga kotha namanikena tai ke dhurise aru jiman tok poisa natirabo tetia tok koidi ghor te rakhibo koise.”

![](https://cdn.door43.org/obs/jpg/360px/obs-en-29-07.jpg)

Dusra kunba noukarkhan ki hoise dikhise aru bisi mon dukh lagise. Tai khan raja logote jaise aru ki hoise sob koidise.”

![](https://cdn.door43.org/obs/jpg/360px/obs-en-29-08.jpg)

“Raja pora noukar ke matikena koise: ‘Tumi bia noukar ase! Ami tumike morom kurikena tumi laga baki maph kurise kilemane tumi amike anurot kurise. Tumi bi ineka kuribo paribo asile.” Raja bisi khong hoise aru utu noukar pora jiman tok baki sob tirai nadibo, jiman tok koidi ghor te rakhibo koise.”

![](https://cdn.door43.org/obs/jpg/360px/obs-en-29-09.jpg)

Tetia Jisu koise: “Sorgo te amilaga Pobitro Baba bi junkhan pora nijor laga bhai-kokaikhan ke mon pura ulaikena maph nakoribo, tai khan ke ineka he kuribo.”

*A Bible story from: Matthew 18:21-35*

## 30. Panch Hazar Manu ke Jisu Pora Khabole Dise

https://openbiblestories.org/l/nag/story-30/

![](https://cdn.door43.org/obs/jpg/360px/obs-en-30-01.jpg)

Jisu pora tai laga chelakhan ke alag alag bosti te pathaise aru prochar kam aru hikai dia kam kuribole dise. Jetia tai khan Jisu thaka jagate wapas ahise, tai khan ki korise itu sob Jisu ke koise. Tetia Jisu tai khan ke loikene olop aram kuribole ekta chup-chap jagate nodi par korikena loijaise. Tai khan ekta nao te uthikena pukhuri laga dusra phine jaise.

![](https://cdn.door43.org/obs/jpg/360px/obs-en-30-02.jpg)

Hoilebi bisi manu pora Jisu aru tai laga chela khan nao te bohi kena jai thaka dikhise. Itu manukhan pukhuri kinar te tai khan piche kurikena polai thakise tai khan he age punchibole nimite. Jetia Jisu aru tai laga chelakhan ta-te punchise, manukhan bisi joma hoikena tai khan ke rukhi thakise.

![](https://cdn.door43.org/obs/jpg/360px/obs-en-30-03.jpg)

Ta-te manu joma huwa panch hazar nisina thakise, maiki aru bachakhan ke ginti nakurikena. Taikhan ke dikhikena Jisu bisi morom lagise. Jisu itu manukhan bhera nisina dikhise junkhan palok nai. Itu nimite tai taikhan ke hikai se aru tai khan majote bimar thaka ke changai kurise.

![](https://cdn.door43.org/obs/jpg/360px/obs-en-30-04.jpg)

Olop pichete Jisu laga chelakhan pora Jisu ke koise: “Itia bisi deri hoijaise aru usorte taunkhan bi nai. Manukhan ke jabole dibi aru tai khan ke kha-lo-a koribole dibi.”

![](https://cdn.door43.org/obs/jpg/360px/obs-en-30-05.jpg)

Hoilebi Jisu tai khan ke koise: “Apunikhan he tai khan ke kiba khabole dibi!” Tai khan koise, “Itu kineka hobo? Amikhan logote khali pasta ruti aru duita chutu mas ase.”

![](https://cdn.door43.org/obs/jpg/360px/obs-en-30-06.jpg)

Chelakhan ke koikene Jisu pora manukhan sob ke pachas-pachas jon bhag korikena mati te bohibole dise.

![](https://cdn.door43.org/obs/jpg/360px/obs-en-30-07.jpg)

Tetia Jisu pora utu pasta ruti aru duita mas ke loise, sorgo phine saikene Isorke khana nimite dhoniabad dise.

![](https://cdn.door43.org/obs/jpg/360px/obs-en-30-08.jpg)

Tetia Jisu pora ruti aru mas ke tukra kuri bhangaise. Tailaga chelakhanke utu tukrakhan loikena manukhan ke bhag koridibi koise. Chela khan kha-a–loa bisi manuke di thakise, aru itu khotom hoa nai! Sob manukhan pet-bhorta khaikena bisi khusi hoise.

![](https://cdn.door43.org/obs/jpg/360px/obs-en-30-09.jpg)

Itu pichete chelakhan bachikena thaka ruti aru mas joma kurikena barohta tukuri te bhorta korise! Itu sob pasta ruti aru duita mas pora bisi hoija asile.

*A Bible story from: Matthew 14:13-21; Mark 6:31-44; Luke 9:10-17; John 6:5-15*

## 31. Jisu Pani Upor te Beraise

https://openbiblestories.org/l/nag/story-31/

![](https://cdn.door43.org/obs/jpg/360px/obs-en-31-01.jpg)

Panch hazar manu ke kha-a-loa dia pichete, Jisu tai laga chelakhan ke naote bohibole koise. Tai taikhan ke pukhuri laga dusra phine jabole dise aru tai ta-te olop homoi nimite bohise. Itu nimite chelakhan jaise aru Jisu manukhan ke taekhan nijor ghorte jabole dise. Itu pichete, Jisu pahar uporte prathna kuribole jaise. Ta-te tai ekla thakise, aru tai rati tok prathna kuri thakise.

![](https://cdn.door43.org/obs/jpg/360px/obs-en-31-02.jpg)

Itu homoi te, chelakhan nao cholai thakise, hoilebi, jor pora hawa-pani ahijaise aru nao ke ulta-pulta kuri thakise. Jetia adha rati hoi jaise, tai khan pukhuri laga majote he punchibole pari asile.

![](https://cdn.door43.org/obs/jpg/360px/obs-en-31-03.jpg)

Utu homoi te Jisu prathna kuri thaka khotom hoise aru tai wapas chelakhan ke lok kuribole jaise. Jisu pani uporte beraikena tai khan phine jai se.

![](https://cdn.door43.org/obs/jpg/360px/obs-en-31-04.jpg)

Tetia tai khan Jisu ke dikhise. Aru tai khan bisi bhoi lagise kileloile tai khan ekta bhut dikhi ase bhabona kurise. Tai khan bhoe kuri thaka dikhikena Jisu jor pora hala korikena koise: “Bhoe nakoribi! Ami ase!”

![](https://cdn.door43.org/obs/jpg/360px/obs-en-31-05.jpg)

Tetia Peter Jisu ke koise: “Malik, itu apuni ase koile, amike hokom dibi aru ami apuni logote pani upor beraikene ahibo.” Jesu Peter ke koise: “Ahibi!”

![](https://cdn.door43.org/obs/jpg/360px/obs-en-31-06.jpg)

Itu nimite Peter nao pora ulaise aru pani uporte beraikena Jisu laga usorte jabole lagise. Hoilebi olop jaikena, Peter tai laga chuku Jisu pora hataikena pani te saise aru jor hawa marithaka toh janise.

![](https://cdn.door43.org/obs/jpg/360px/obs-en-31-07.jpg)

Tetia Peter bisi bhoi lagise aru tai pani bhitorte ghusijai thakise. Tai hala korise: “Malik, ami ke bacha bi!” Jisu jaikena Peter ke dhurise. Tetia tai Peter ke koise, “Apuni laga biswas iman komti ase! Kile apuni ke moi bachabo koikene biswas rakha nai?”

![](https://cdn.door43.org/obs/jpg/360px/obs-en-31-08.jpg)

Tetia Peter aru Jisu nao bhitorte bohise, aru hawa bisi mari thaka rukhijaise. Aru pani bi chup-chap hoijaise. Chelakhan bisi asurit hoise aru Jisu age te matha jhukaise. Tai khan Jisu ke aradhana kurise aru tai ke koise: “Hosa, apuni Isor laga Chokora ase!”

*A Bible story from: Matthew 14:22-33; Mark 6:45-52; John 6:16-21*

## 32. Jisu Bia-Atma Thaka Manu aru Bimar Maiki ke changa Kurise

https://openbiblestories.org/l/nag/story-32/

![](https://cdn.door43.org/obs/jpg/360px/obs-en-32-01.jpg)

Jisu aru tai laga chelakhan nao te bohise aru Gerasene manukhan thaka jagate jaise. Utu jagate punchikena taikhan nao pora ulaise.

![](https://cdn.door43.org/obs/jpg/360px/obs-en-32-02.jpg)

Ta-te ekta manu bia-atma pora dhurikena asile.

![](https://cdn.door43.org/obs/jpg/360px/obs-en-32-03.jpg)

Utu manu bisi takot thakise aru kun porabi tai ke bandikene rakhibole napare. Manukhan kitiaba tai ke loha laga rusi pora tai laga hath-theng bandhikena rakhi thake hoilebi tai itukhan bhangai di thake.

![](https://cdn.door43.org/obs/jpg/360px/obs-en-32-04.jpg)

Tai mura manu laga guphakhan te he thake. Aru pura-rati hala korikena beraithake. Tai kaporkhan bi nalagai aru nijorke pathorkhan pora katithake.

![](https://cdn.door43.org/obs/jpg/360px/obs-en-32-05.jpg)

Itu manu Jisu usorte polaikene ahise aru Jisu laga theng te girise. Titia Jisu bia-atma jun itu manu bhitorte asile tai ke koise; “Bia-atma, itu manu pora ulaijabi!”

![](https://cdn.door43.org/obs/jpg/360px/obs-en-32-06.jpg)

Bia-atma jor pora hala korikena koise: “Sob pora takot thakia Isor laga Chokora Jisu, apuni ami pora ki lobole ahise? Morom pora amike sajai nadibi!” Tetia Jisu bia-atma ke hutise: “Apuni laga nam kun ase?” Tai koise: “Ami laga nam Legion ase, kilekoile amikhan bisi jon ase.” (‘Legion’ toh Rome laga sipoi foj laga ekta dol asile, juntu te bisi hazar upor sipoi ginti asile.)

![](https://cdn.door43.org/obs/jpg/360px/obs-en-32-07.jpg)

Aru taikhan Jisuke kandi-kandikene onorudh korikena koise: “Morom pora amikhan ke itu jaga pora nakhetabi!” Utu jaga laga usorte ekta pahar thakisile aru ta-te bisi gahuri berai thakise. Utu bia atmakhan pora Jisu logote onurodh korise aru Jisuke koise: “Amikhanke utu gahurikhan laga bhitorte jabole dibi!” Jisu koise: “Thik ase, taikhan bhitorte jabi!”

![](https://cdn.door43.org/obs/jpg/360px/obs-en-32-08.jpg)

Aru sob bia-atmakhan manu laga bhitor pora ulaikena gahori laga bhitorte ghusise. Utu gahurikhan sob polaikena ekta pahar upor pora niche pukhuri te girikena morise. Sob milaikena dui hazar nisina gahuri asile.

![](https://cdn.door43.org/obs/jpg/360px/obs-en-32-09.jpg)

Kunba manukhan gahuri saithakise. Jitia tai khan itu sob dikhise, tai khan taun phine polaikena jaise. Aru manukhan ke Jisu pora ki kurise sob koise. Aru taun laga manukhan jaikena utu manu ke dikhise jun bhitorte bia-atma thakisile. Tai ekdum shanti pora, kaporkhan lagaikena bhal pora dusra manukhan nisina bohi thaka taikhan dikhise.

![](https://cdn.door43.org/obs/jpg/360px/obs-en-32-10.jpg)

Itu jaga laga manukhan bisi bhoi lagikena Jisuke utu jaga charikene jaijabole onurodh korise. Jisu naote uthise. Aru jun manu laga bhitor pora bi-atmakhan ke khetaise, tae bi Jisu logote jabo koise.

![](https://cdn.door43.org/obs/jpg/360px/obs-en-32-11.jpg)

Hoilebi Jisu pora tai ke koise: “Nahoe! Apuni nijor ghor-manukhan logote jabi, aru jaikena tai khan ke kobi Isor apuni nimite ki korise. Aru Isor pora apuni ke kineka morom korise itu kobi.”

![](https://cdn.door43.org/obs/jpg/360px/obs-en-32-12.jpg)

Aru utu manu jaikena sob manu ke Jisu pora tai nimite ki kuridise itu koise. Aru jun tai laga khisa hunise tai khan sob asurit hoise.

![](https://cdn.door43.org/obs/jpg/360px/obs-en-32-13.jpg)

Jisu arubi pukhuri laga dusra phine wapas jaise. Tai jetia ta-te punchise, bisi manukhan joma hoikene asile aru dhaka-dhaki korikena tai laga usorte ahise. Tai khan bhitorte maiki ekta asile jun baroh sal pora bisi khun jai asile. Tai bhal hobole nimite doctorkhan ke dikhaise aru poisa bisi phelaise, hoilebi tai laga bimar bhal nohoekena ulta bia hoi thakise.

![](https://cdn.door43.org/obs/jpg/360px/obs-en-32-14.jpg)

Tai Jisu pora bimar manu ke changai kurise koikene manukhan pora hunise, aru bhabona kurise: “Ami biswas ase, ji hoilebi Jisu laga kapor chubole parile ami bhal hoijabo!” Itu nimite tai Jisu laga pichete punchikena tai laga kapor kinarte chuise. Tai ineka kura logote khun jai thaka rukhijaise!

![](https://cdn.door43.org/obs/jpg/360px/obs-en-32-15.jpg)

Itu logote, Jisu bujise tai laga hokti jaise koikena. Itu nimite tai ghurikena sob phine saise aru hutise: “Kun amike chuise?” Chelakhan koise: ‘“Apuni usorte iman manu ase aru sob apuni ke dhakai ase. Apuni kile ineka hutise: ‘Kun amike chuise?’”

![](https://cdn.door43.org/obs/jpg/360px/obs-en-32-16.jpg)

Tetia utu maiki Jisu laga age-te ahise aru tai laga ghutna te girikena bisi bhoi pora kapise. Tetia tai ki kurise aru kineka changai hoise itu koise. Jisu tai ke koise: “Tumi laga biswas pora he tumi bhal hoise. Shanti pora jabi.”

*A Bible story from: Matthew 8:28-34; 9:20-22; Mark 5:1-20; 5:24b-34; Luke 8:26-39; 8:42b-48*

## 33. Kheti kora Manu laga Kahani

https://openbiblestories.org/l/nag/story-33/

![](https://cdn.door43.org/obs/jpg/360px/obs-en-33-01.jpg)

Ek din, Jisu pukhuri laga kinar usorte thakise. Tai bisi manu ke hikai thakise. Itu nimite manu bisi joma hoijaise aru Jisuke khara kuribole jaga bi thakanai. Itu nimite Jisu nao ekta te uthijaise. Ta-te bohikena tai khanke hikaise.

![](https://cdn.door43.org/obs/jpg/360px/obs-en-33-02.jpg)

Tai khan ke Jisu ekta kahani koise: “Ekta manu tai laga khetite bijon phelabole jaise. Tai laga hath pora bijon phelai thaka homoite, kunba bijonkhan rasta te girise. Hoilebi chiriakhan ahikena itu bijon sob khaidise.”

![](https://cdn.door43.org/obs/jpg/360px/obs-en-33-03.jpg)

“Kunba bijon bisi komti mathi thaka aru pathor bisi thaka uporte girise. Olop bijonkhan joldi ulaise hoilebi mati bisi komti huwa pora shikor khan mati bhitorte janai. Jetia gham ulaikena bisi gorom hoise, itu bijon ghas khan sukhikena morijaise.”

![](https://cdn.door43.org/obs/jpg/360px/obs-en-33-04.jpg)

“Aru kunba bijonkhan kataghas majote girise. Olop bijonkhan ulaithakise, hoilebi kata pora digdar kurise. Itu nimite itu bijon khan ghas dangor hoise hoilebi eku guti dhuribole para nai.”

![](https://cdn.door43.org/obs/jpg/360px/obs-en-33-05.jpg)

“Aru kunba bijonkhan bisi bhal mati te girise. Itu bijonkhan bhal ghas hoikena bhal guti dhurise; kunba tista, kunba sathi, kunba eksou ineka. Jun Isor laga pichete ahibole mon ase, tai he ami ki koi ase itu hunibi!”

![](https://cdn.door43.org/obs/jpg/360px/obs-en-33-06.jpg)

Itu kahani pora Jisu laga chelakhan ke bis matha ghuraidise. Itu nimite Jisu tai khan ke bujaise: “Bijon toh Isor laga kotha ase. Rasta ekta manu ase jun Isor laga kotha hunise hoilebi bujibole paranai. Tetia saitan ahikena bijon loijaise. Itu motlob, saitan pora taike itu kotha laga motlob bujibole dianai.”

![](https://cdn.door43.org/obs/jpg/360px/obs-en-33-07.jpg)

“Pathor jaga ekta manu ase jun Isor kotha hunise aru khusi pora maniloe. Hoilebi jetia tai ke duk ahise, nohoilebi dusra manukhan pora taike dukh dise, utu homoite tai ekbar te he Isor ke charidise. Itu motlob, tai Isor uporte biswas charidise.”

![](https://cdn.door43.org/obs/jpg/360px/obs-en-33-08.jpg)

“Kata ghas thaka jaga utu manu ase jun Isor laga kotha hunise. Hoilebi tai bisi chinta hoijaise, aru bisi poisa kamabole aru bisi saman pabole kosis kurithakise. Olop homoe pichete, tai Isor ke morom kuribole charise. Itu nimite tai Isor kotha ki hunise itu pora tai Isorke khusi dibo paranai. Tai gutikhan nadhura dhan laga ghas nisina ase.”

![](https://cdn.door43.org/obs/jpg/360px/obs-en-33-09.jpg)

“Hoilebi bhal mati utu manu ase jun Isor laga kotha hunise, biswas korise aru guti bisi dhurise.”

*A Bible story from: Matthew 13:1-8, 18-23; Mark 4:1-8, 13-20; Luke 8:4-15*

## 34. Jisu Dusra Kahanikhan Koi Dia

https://openbiblestories.org/l/nag/story-34/

![](https://cdn.door43.org/obs/jpg/360px/obs-en-34-01.jpg)

Jsiu pora Isor laga rajyo laga dusra kahani bisi koise. Ekta udharan dikena tai ineka koise: “Isor laga rajyo ekta sarso-guti nisina ase juntu ekta manu pora tai laga khetite lagaise. Apunikhan jani ase, sarso-guti sob se chutu bijon guti ase.”

![](https://cdn.door43.org/obs/jpg/360px/obs-en-34-02.jpg)

“Hoilebi jetia itu bijon pora ghas ulabo, bagan te thaka sob ghas pora bisi dangor hoijai, aru chiriakhanbi ahikena tai laga dol-te aram kore.”

![](https://cdn.door43.org/obs/jpg/360px/obs-en-34-03.jpg)

Jisu pora dusra kahani koise: “Isor laga rajyo ineka ase, ekta maiki khomir olop loikene ata logote milaise, aru itu ruti banabole ata juntu molaikena rakhise itu logote milaijasie.”

![](https://cdn.door43.org/obs/jpg/360px/obs-en-34-04.jpg)

“Isor laga rajyo ineka bi ase, ekta manu kheti te khazana lokaikena rupaise. Dusra manu pora utu khazana paise aru tai itu sob lobole mon hoise. Itu nimite tai aru ituke mati bhitorte rupaise. Tai bisi khusi paikena jaise aru khazana thaka utu kheti kinibole nimite tai laga samankhan sob bikiri koridise.”

![](https://cdn.door43.org/obs/jpg/360px/obs-en-34-05.jpg)

“Isor laga desh ekta bisi sondor moti jun laga dam bisi ase utu nisina ase. Jitia moti bikiri kura manu pora bisi bhal moti ekta paise, tai laga samankhan sob bikiri korikena utu moti ke kiniloise.”

![](https://cdn.door43.org/obs/jpg/360px/obs-en-34-06.jpg)

Utu jagate kunba manukhan bhabona kuri thakise taikhan bhal kam korile Isor taikhan ke svekar korilobo. Itu manukhan dusra manu junkhan bhal kam nakore taikhan ke bisi ghin kori thakise. Itu nimite Jisu tai khan ke ekta kahani koise: “Duita manu Temple te prathna kuribole jaise. Ekjon poisa utha manu aru ekta dhorom laga cholaunta thakise.”

![](https://cdn.door43.org/obs/jpg/360px/obs-en-34-07.jpg)

“Pharisee pora ineka prathna kurise, “Isor ami apuni ke dhoniabad diase, kilekoile ami pap kam kurithaka manu nohoe- chor kora manu, bia kam kora manu, bebichari manu aru itu poisa utha manu nisinabi nohoe.”

![](https://cdn.door43.org/obs/jpg/360px/obs-en-34-08.jpg)

“Kotha-kotha, ami hapta te dui din ekubi nakhaikena thake aru ami ki komai itu laga dos bhag apuni ke dithake.”

![](https://cdn.door43.org/obs/jpg/360px/obs-en-34-09.jpg)

“Hoilebi utu poisa utha manu dhur te khara hoikena thakise. Tai upor sorgo phine tai laga matha bi uthanai. Aru hath bon korikena tai laga chati te marikena koise, ‘Isor ami nisina papi ke morom koribi!’”

![](https://cdn.door43.org/obs/jpg/360px/obs-en-34-10.jpg)

Tetia Jisu koise: “Ami apunikhan ke hosa koi ase, Isor utu poisa utha manu laga prathna hunise aru tai he dharmik ase koise. Hoilebi tai utu dhorom laga cholauta laga prathna toh bhal laganai. Itu nisina, kun phutani kure, Isor pora tai ke apman kuridibo, aru jun nijor ke nomro kuribo tai ke sor pora dangor kuridibo.”

*A Bible story from: Matthew 13:31-33, 44-46; Mark 4:30-32; Luke 13:18-21; 18:9-14*

## 35. Morom Thaka Baba Laga Kahani

https://openbiblestories.org/l/nag/story-35/

![](https://cdn.door43.org/obs/jpg/360px/obs-en-35-01.jpg)

Ek-din Jisu bisi manu ke hikai thakise jun khan tai laga kotha hunibole joma kurise. Taikhan poisa utha manu aru dusra khan asile kun khan Moses laga Niom namane.

![](https://cdn.door43.org/obs/jpg/360px/obs-en-35-02.jpg)

Ta-te kunba dhorom laga choulanta khan Jisu ke utu manukhan logote sati nisina bisi bhal pora kotha patikena bohi thaka dikhise. Itu nimite taikhan majote Jisu toh galti kam kuriase ineka kotha koithakise. Jisu taikhan laga kotha hunise, itu nimite taikhan ke itu kahani koise.

![](https://cdn.door43.org/obs/jpg/360px/obs-en-35-03.jpg)

“Ekta manu laga duita chokora asile. Chutu-chokora pora tai laga babake koise; “Baba, ami laga samankhan laga bhag ami ke itia didibi!” Itu nimite tai laga baba pora chokora duijon ke samankhan bhag korikena di dise.”

![](https://cdn.door43.org/obs/jpg/360px/obs-en-35-04.jpg)

“Bisi joldi chutu-chokora tai laga saman sob loikena bisi durte jai jaise aru tai laga poisa sob papi kam te misa-misi kurikena phelaise.”

![](https://cdn.door43.org/obs/jpg/360px/obs-en-35-05.jpg)

“Itu pichete, utu desh te akal dangor ahise, aru utu chokora logote kinikena khabole poisa nathaka hoise. Itu nimite tai kam bisarise, aru gahurikhan sabole laga kam paise. Tai bisi dukh te thakise aru bisi bhuk lagikena gahuri laga dana hoilebi khailobo ineka bhabona hoise.”

![](https://cdn.door43.org/obs/jpg/360px/obs-en-35-06.jpg)

“Tetia chutu chokora pora tai nijor ke koise: “Ami ki kuri ase? Ami baba laga ghor te kam kura noukarkhan khabole bisi ase, aru iyate ami nakhaikena moribole ase. Moi baba logote jabo aru moi ke tai laga ghorte noukar nisina rakhibi kobo!”

![](https://cdn.door43.org/obs/jpg/360px/obs-en-35-07.jpg)

“Aru chutu chokora tai baba laga ghorte jabole lagise. Jetia tai bisi dhurte thakise, tai laga baba tai ke dikhikena bisi morom lagise. Tai polaikena ahise aru tai laga chokora ke dhurise aru chumaise.”

![](https://cdn.door43.org/obs/jpg/360px/obs-en-35-08.jpg)

“Chokora koise, ‘Baba, ami Isor aru apuni usorte pap kurise. Ami apuni laga chokora hobole liak nohoi.’”

![](https://cdn.door43.org/obs/jpg/360px/obs-en-35-09.jpg)

“Hoilebi tai baba pora noukar ekjon ke koise, “Joldi jabi aru bhal kapor anikena ami laga chokora ke lagai dibi. Tai laga anguli te anguthi lagai dibi aru theng te juta lagai dibi. Tetia sob pora bhal bhoisi ke katikene amikhan khushi manabo, kilekoile ami laga itu chokora murijaisile hoilebi itia tai jinda ase! Tai harai jaisile hoilebi amikhan tai ke arubi paise!”

![](https://cdn.door43.org/obs/jpg/360px/obs-en-35-10.jpg)

Itu nimitesob manukhan khusi manaithakise. Olop deri pichete, tai laga dangor chokora kheti kam kurikene ghorte wapas ahise. Tae nach-gana laga awazkhan hunise aru ki hoi ase ineka bhabona korise.”

![](https://cdn.door43.org/obs/jpg/360px/obs-en-35-11.jpg)

“Jetia dangor chokora janise tai laga chutu bhai wapas ahise ghorte ahise aru itu nimite taikhan khusi mania ase, tai bisi khong hoise aru ghor bhitorte naghusia hoise. Tailaga baba baharte ulaise aru tai ke morom pora ghor bhitorte ahikena taikhan logote khushi manabi koise, hoilebi tai mananai.”

![](https://cdn.door43.org/obs/jpg/360px/obs-en-35-12.jpg)

“Dangor chokora pora tai laga baba ke koise: “Iman sal pora ami apuni laga noukar nisina kam korise! Ami apuni laga ekta kotha bi namana nai, aru ineka hoilebi apuni amike sathikhan logote khabole ekta chutu saguli bi dia nai. Hoilebi apuni laga itu chokora apuni laga poisa sob bia kam te phelaidise. Aru jetia tai ghorte wapas ahise apuni tai nimite sob pora bhal bhoisi marikena khusi manai ase!”

![](https://cdn.door43.org/obs/jpg/360px/obs-en-35-13.jpg)

“Baba koise; “Ami laga chokora, apuni hodae ami logote thake, amilaga ki ase itu sob apuni laga he ase. Hoilebi amikhan khusi manabole lage, kilekoile apuni laga chutu bhai morijaisile aru ita tai jinda hoise. Tai harai jaisile, hoilebi itia moikhan tai ke bisari loise!”

*A Bible story from: Luke 15:11-32*

## 36. Bodli Hoi Ja-a Gao

https://openbiblestories.org/l/nag/story-36/

![](https://cdn.door43.org/obs/jpg/360px/obs-en-36-01.jpg)

Ek din Jisu tai laga tinta chela Peter, James aru John ke ekta jagate loi jaise. (Utu chela jun laga nam John thakise utu Jisu ke baptisma dia manu nahoe). Tai khan ekta pahar uporte ekla prathna koribole jaise.

![](https://cdn.door43.org/obs/jpg/360px/obs-en-36-02.jpg)

Jetia Jisu prathna kurithakise, tai laga chehera ekdum suraj nisina ujala hoi jaise. Tai laga kaporkhan ekdum pohor nisina boga hoi jaise, aru itu laga boga toh prithibi te kun pora bhi banabole naparibo nisina thakise.

![](https://cdn.door43.org/obs/jpg/360px/obs-en-36-03.jpg)

Tetia Moses aru bhaubadi Elijah ulaikena ahise. Itu manukhan prithibi te ek soh sal age-te jinda thakisile. Tai khan Jisu logote bohikena tai moribole thaka laga kothakhan koise, kilekoile bisi joldi Jisu Jerusalem te moribole asile.

![](https://cdn.door43.org/obs/jpg/360px/obs-en-36-04.jpg)

Jetia Moses aru Elijah Jisu logote kotha koi thakise, Peter Jisu ke koise: “Amikhan iyate ahikena thaka kiman bhal ase. Amikhan tinta tombu ghor banabo, ekta apuni nimite, ekta Moses nimite aru ekta Elijah nimite.” Hoilebi Peter nijor ki koi ase itu jananai.

![](https://cdn.door43.org/obs/jpg/360px/obs-en-36-05.jpg)

Jetia Peter pora kotha koi asile, ekta bisi ujala thaka badal nichete ahise aru taikhan ke bon kori loise. Tetia tai khan badal pora ekta awaj hunise. Itu awaj koise: “Itu ami laga Nijer Chokora ase junke ami bisi morom kure. Ami tai uporte bisi khusi ase. Tai laga kotha manibi!” Chela tin jon toh bisi bhoi lagikena mati te giri jaise.

![](https://cdn.door43.org/obs/jpg/360px/obs-en-36-06.jpg)

Tetia Jisu tai khan ke chuise aru koise: “Bhoi nakoribi. Uthibi.” Jetia tai khan saise, ta-te khali Jisu he thakise.

![](https://cdn.door43.org/obs/jpg/360px/obs-en-36-07.jpg)

Jisu aru tinjon chelakhan wapas pahar laga nichete jaise. Tetia Jisu taikhan ke koise; “Iyate ki hoise, itu kun ke bi nakobi. Ami joldi moribo hoilebi aru jinda hoi jabo. Itu pichete, apunikhan dusra manukhan ke itu kobo pare.”

*A Bible story from: Matthew 17:1-9; Mark 9:2-8; Luke 9:28-36*

## 37. Jisu Lazarus ke Jinda Korise

https://openbiblestories.org/l/nag/story-37/

![](https://cdn.door43.org/obs/jpg/360px/obs-en-37-01.jpg)

Lazarus nam ekjon manu thakise. Tai laga duijon boinikhan thakise; taikhan laga nam Mary aru Martha asile. Tai khan sob Jisu laga sathikhan asile. Ek din kunba Jisu ke Lazarus bisi bimar ase koikena khobor dise. Jitia Jisu itu hunise, tai koise, “Itu bimar pora Lazarus namoribo. Ulta itu pora manukhan Isor ke bisi adar kuribo.”

![](https://cdn.door43.org/obs/jpg/360px/obs-en-37-02.jpg)

Jisu tai laga sathikhan ke bisi morom kure; hoilebi itu bar tai juntu jagate asile ta-te arubi dui-din tok rukhise. Dui din pichete tai tai laga chelakhan ke koise: “Ahibi, itia amikhan Judea te wapas jabo.” “Hoilebi Shikai Diya Manu,” tai laga chelakhan pora koise, “Olop din age te ta-te laga manukhan apuni ke moraidibole thakise!” Jisu koise, “Amikhan laga sathi Lazarus ghumai ase aru ami jaikena tai ke uthaidibo lage.”

![](https://cdn.door43.org/obs/jpg/360px/obs-en-37-03.jpg)

Jisu laga chelakhan koise: “Malik, jodi Lazarus ghumai thakile, tai bhal hoijabo.” Tetia Jisu taikhan ke sida-sidi pora koise: “Lazarus morise. Ami tai moria homoite ta-te nathaka bhal hoise, ineka hoa pora apunikhan amike biswas kuribo.”

![](https://cdn.door43.org/obs/jpg/360px/obs-en-37-04.jpg)

Jetia Jisu Lazarus thaka jagate ahise, Lazarus morikena char din hoikena asile. Martha taikhan ke lok kuribole nimite polaikena jaise, aru Jisu ke koise: “Malik, apuni iyate thakise koile, ami laga kokai moribole thaka nai. Hoilebi ami janiase itiabi apuni Isor pora ki mangibo tai apuni ke dibo.”

![](https://cdn.door43.org/obs/jpg/360px/obs-en-37-05.jpg)

Jisu koise: “Ami he Jibon ase aru ami he Ji-Utha ase. Jun ami ke biswas kuribo tai morilebi arubi jinda hobo! Jun ami ke biswas kuribo ketia bi namoribo. Apuni itu biswas kore?” Martha koise: “Hoe Malik! Ami biswas ase apuni he Masiha ase, Isor laga Chokora.”

![](https://cdn.door43.org/obs/jpg/360px/obs-en-37-06.jpg)

Itu pichete Mary ahise. Tai Jisu laga theng usorte giri kena koise, “Malik apuni iyate thakise koile ami laga kokai moribole thaka nai!” Jisu taikhan ke koise, “Apunikhan Lazarus ke kun jagate kobor dise?” Tai khan koise: “Kobor te halikena ase. Ahikena sabi.” Tetia Jisu kandise.

![](https://cdn.door43.org/obs/jpg/360px/obs-en-37-07.jpg)

Itu kobor toh pathor laga gupha asile aru ekta dangor pathor laga dorja nisina bon thakise. Jetia Jisu ta-te punchise, tai khan ke koise: “Pathor hataidibi!” Hoilebi Martha koise: “Tai morijae char din hoise. Itia bisi bia gun hobo.”

![](https://cdn.door43.org/obs/jpg/360px/obs-en-37-08.jpg)

Jisu tai ke koise: “Ami apuni ke koa nai, apuni biswas kurise koile apuni Isor laga hokti dikhibole paribo?” Tai khan pathor ke hataidise.

![](https://cdn.door43.org/obs/jpg/360px/obs-en-37-09.jpg)

Tetia Jisu swarg phine saikena koise, “Pormeshwar Baba, apuni ami laga sob kotha huni dea itu nimite apuni ke dhoniabad janai ase. Ami jani ase apuni hodae ami laga kotha huni dea, hoilebi ami itia iyate thaka manukhan nimite itu koiase, tinihoile taikhan biswas koribo apuni ami ke pathaise koikena.” Tetia Jisu chilaikena koise: “Lazarus ulaikena ahibi!”

![](https://cdn.door43.org/obs/jpg/360px/obs-en-37-10.jpg)

Aru tai ulaikena ahise! Kobor laga kapor pora tai laga hath aru thengkhan bandikena thakisile. Jisu tai khan ke koise: “Tai ke modot koribi aru kobor laga kapor khan khuli dibi!” Jew manu khan Jisu ki kurise itu nimite biswas kurise.

![](https://cdn.door43.org/obs/jpg/360px/obs-en-37-11.jpg)

Hoilebi dhorom laga solaunta khan Jisuke chuku joli jaise, aru taikhan ekta jagate joma hoikena Jisu aru Lazarus ke morai dibole bhabona kurise.

*A Bible story from: John 11:1-46*

## 38. Jisu ke Thokai Dise

https://openbiblestories.org/l/nag/story-38/

![](https://cdn.door43.org/obs/jpg/360px/obs-en-38-01.jpg)

Hodae sal Jehudi khan Mukti-jatra manaithake. Isor pora kineka taikhan laga purbans (khandanlaga babakhan) khanke Egypt te kini-loa-noukarkhan nisina thaka pora bachaikena ulaise itu nimite khusi manai. Jisu Isor laga kam korikena tin-sal nisina thaka homoite tai laga chelakhan ke Jerusalem te jaikena Mukti-jatra eki logote manabole mon ase koise, aru itu hoe kena tai ke manukhan pora moraidibo.

![](https://cdn.door43.org/obs/jpg/360px/obs-en-38-02.jpg)

Jisu laga chela Judas koikena ekjon asile. Tai chelakhan laga poisa bag sa-a-loa kuri thakise, hoilebi bisi bar tai poisa chor kurikena loithake. Jetia Jisu aru chelakhan Jerusalem te ahise, tetia Judas Jehudi laga cholautakhan logote jaise. Tai koise, Jisu ke dhurikena taikhan logote anidibo, jodi taikhan tai ke poise dise koile. Tai jani thakise utu Jehudi cholauta khan Jisu toh Masiha ase kuwa toh biswas nakore. Aru taikhan Jisu ke moraidibole mon thaka tai jani thakise.

![](https://cdn.door43.org/obs/jpg/360px/obs-en-38-03.jpg)

Jehudi laga cholauta khan, Maha Purohit pora loikena, Judas ke tista chandilaga poisa ginti korikena dise, Jisu ke thokai kena taikhan ke di-dibole nimite. Itu sob bhaubadi khan pora likhikena rakhi dia nisina he hoise. Judas monjur hoise, poisa loise, aru Jisu ke dhurikena taikhan laga hath te dibole nimite rasta bisari thakise.

![](https://cdn.door43.org/obs/jpg/360px/obs-en-38-04.jpg)

Jisu aru tai laga chelakhan Jerusalem te jaikena Mukti-jatra manaise. Jetia tai khan khai asile, Jisu olop ruti loikena bhangaise. Tai koise: “Itu loikena khabi, itu amilaga gao ase, juntu moi apunikhan nimite di ase. Amike monte rakhikena itu kurithakibi.” Ineka pora he tai tai kineka taikhan nimite moribo aru nijorke bolidan dibo itu laga kotha koise.

![](https://cdn.door43.org/obs/jpg/360px/obs-en-38-05.jpg)

Tetia Jisu ekta cupte angur ros loikene koise: “Itu khabi. Itu amilaga khun ase, juntu apunikhan nimite phelaikena Isor logote ekta Notun Niom laga kotha milaise, aru Isor apunikhan laga pap maph kuribo. Ami itia ki koriase, itu nisina amike monte rakhikena itu kurithakibi.”

![](https://cdn.door43.org/obs/jpg/360px/obs-en-38-06.jpg)

Tetia Jisu chelakhan ke koise: “Ami apunikhan ke koidiase, apunikhan bhitorte ekjon amike thokai dibole ase.” Taikhan bisi aschurit hoise aru taike kun he ineka koribo koikena hutise. Jisu koise: “Ami itu roti junke dibo, tai he ase.” Aru tai itu roti Judas ke dise.

![](https://cdn.door43.org/obs/jpg/360px/obs-en-38-07.jpg)

Judas itu ruti ke kha-a logote, Saitan tai laga bhitorte ghusise. Judas uthikena jai jaise aru Jehudi cholautakhanke modot koribole jaise. Itu rati homoi hoise.

![](https://cdn.door43.org/obs/jpg/360px/obs-en-38-08.jpg)

Kha-lo-a kora pichete, Jisu aru chelakhan beraikena Olive-Pahar phine jaise. Jisu koise: ‘“Aji rati apunikhan sob moi ke charikena polai jabole ase. Isor kotha te ineka likhikena ase, ‘Ami bhera-saguli sa-a manuke morai dibole ase aru sob bhera-sagulikhan kote-kote polaijabo.’”

![](https://cdn.door43.org/obs/jpg/360px/obs-en-38-09.jpg)

Titia Peter koise; “Sob manu apuni ke charikena jailebi, ami apuni ke charikena najabo!” Tetia Jisu Peter ke koise: “Saitan apunikhan sob ke cholabole mon ase, hoilebi ami apuni Peter nimite prathna koridise, apuni laga biswas naharibo nimite. Ineka hoilebi, aji rati khotom hobole age-te, morga hala nakura age tok apuni ami ke najane koikena tin bar kobole ase.”

![](https://cdn.door43.org/obs/jpg/360px/obs-en-38-10.jpg)

Jisu pora tetia Peter ke koise: “Ami moribole lagilebi ami kitia bi ineka nakobo!” Aru dusra chelakhanbi ineka kobole lagise.

![](https://cdn.door43.org/obs/jpg/360px/obs-en-38-11.jpg)

Tetia Jisu taikhan ke loikena Gethsemane koa jagate jaise. Jisu taikhan ke Saitan pora porikha nakoribole prathna koribi koise. Itu pichete Jisu ekla prathna koribole jaise.

![](https://cdn.door43.org/obs/jpg/360px/obs-en-38-12.jpg)

Jisu tin bar prathna kurise, “Amilaga Baba, parise koile, amike itu cupte dukhkhan thaka khabole nadibi! Hoilebi aru manukhan laga papkhan maph koribole alag rasta nai koile, apuni laga monjur hobole dibi.” Itu pichete Jisu bisi bhoi lagise aru tai laga posina bi khun hoikena giribo lagise. Tetia Isor pora ekta sorgoduth pathaise aru tai ke takot dise.

![](https://cdn.door43.org/obs/jpg/360px/obs-en-38-13.jpg)

Jiman bar Jisu prathna korikena chelakhan logote wapas ahibo, taikhan ghumai thaka dikhe. Jetia tai tin-bar-ula wapas ahise, tai koise: “Uthibi! Amike thokai dia manu ahise.”

![](https://cdn.door43.org/obs/jpg/360px/obs-en-38-14.jpg)

Judas logote Jehudi laga cholauta, sipoi aru manu bisi khan ahise. Taikhan hath te dao aru lathikhan loikena ahise. Judas Jisu logote ahise aru koise: “Apuni shanti hobi, Shikai diya manu” aru tai ke chumai se. Tai ineka korikena Jehudi cholauta khan ke itu koi ase tai jun ke chumabo taikhan utu ke dhuribo. Tetia Jisu koise: “Judas, apuni amike ekta chuma dikena thokai ase?”

![](https://cdn.door43.org/obs/jpg/360px/obs-en-38-15.jpg)

Jetia sipoikhan Jisu ke jorpora dhuriloise, Peter tai laga dao ulaikena Maha Purohit laga noukar laga kan kati dise. Jisu koise: “Dao rakhidibi! Ami mon hoise koile ami laga Pobitro Baba ke sorgoduth laga sipokhan ke pathaikena amike modot koribole kobo pare. Hoilebi ami Pobitro Baba laga kotha manibo.” Tetia Jisu utu manu laga kan ke chuikena bhal koridise. Tetia tai laga chelakhan sob polaijaise.

*A Bible story from: Matthew 26:14-56; Mark 14:10-50; Luke 22:1-53; John 12:6; 18:1-11*

## 39. Jisu Ukilkhan Laga Age-te Pariksa Paise

https://openbiblestories.org/l/nag/story-39/

![](https://cdn.door43.org/obs/jpg/360px/obs-en-39-01.jpg)

Tetia adha rati hoijaise. Sipoikhan Jisu ke dhurikena maha purohit laga ghorte loijaise, kilekoile tai Jisu ke kotha hutibole thakise. Peter olop dhur pora taikhan laga piche kuri ahise. Jitia sipoikhan Jisuke ghor bhitorte loijaise, Peter bahar te khara hoise aru jui laga usorte jaikena bohise.

![](https://cdn.door43.org/obs/jpg/360px/obs-en-39-02.jpg)

Ghor bhitorte, Jehudi cholautakhan pora Jisu ke huda-hudi kurithakise. Tai khan misa koa gawahi khan anise aru Jisu laga misa-misi kothakhan bisi kobo dise. Hoilebi taekhan majote kotha namila hoi jaise, aru Jehudi cholautakhan tai galti ase kobole napara hoise. Jisu ekta kotha bi koanai.

![](https://cdn.door43.org/obs/jpg/360px/obs-en-39-03.jpg)

Tetia, maha purohit pora Jisu ke saikena hutise, “Amikhan ke kobi, apuni Mashia, Jinda thaka Isor laga Chokora ase?”

![](https://cdn.door43.org/obs/jpg/360px/obs-en-39-04.jpg)

Jisu koise: “Ami ase, aru apunikhan ami ke Isor logote bohikena sorgo pora ahithaka dikhibo.” Tetia maha purohit tai laga kapor phataise kilekoile Jisu laga kotha hunikena bisi khong hoise. Tai hala korikena dusrakhan ke koise: “Amikhan itu manu ki kurise itu kobole dusra gawahikhan nalage! Apunikhan nijor pora tai Isor laga Chokora ase kuwa toh hunise. Itia apunikhan tai nimite ki phaisla koribole mon ase?”

![](https://cdn.door43.org/obs/jpg/360px/obs-en-39-05.jpg)

Jehudi cholautakhan pora maha purohit ke jawab dise: “Tai moribole lage!” Tetia taikhan Jisu laga chuku kapor pora bandi dise, kunba tai ke thuk phelaise, kunba tai ke marise aru tai ke bisi sorom khilaise.

![](https://cdn.door43.org/obs/jpg/360px/obs-en-39-06.jpg)

Aru Peter toh, ghor bahar te rukhi thakise. Ta-te ekta noukarni tai ke dikhise. Tai Peter ke koise; “Apunibi Jisu logote asile!” Peter nohoe koise. Pichete arubi ekjon pora eki kotha hutise aru Peter nohoe koise. Arubi dusra manu bi tai ke koise: “Ami khan jani ase apuni Jisu logote thakise, kilekoile apuni duijon bi Galilee pora ase.”

![](https://cdn.door43.org/obs/jpg/360px/obs-en-39-07.jpg)

Tetia Peter koise: “Isor ami ke sajai dibi, jodi ami utu manu ke jani thakile!” Thik tetia ekta morga hala kurise. Aru Jisu ghuraikena Peter ke saise.

![](https://cdn.door43.org/obs/jpg/360px/obs-en-39-08.jpg)

Peter ta-te pora ulaijaikena mon bisi tita hoikena kandise. Itu homoi te, Judas jun pora Jisuke thokia dise, tai janise Jehudi cholautakhan Jisu ke morabole ase koikena. Tetia tai bisi galti aru pap korise koikena bujibole parise aru tai jaikena nijor golate rusi bandikena morise.

![](https://cdn.door43.org/obs/jpg/360px/obs-en-39-09.jpg)

Tetia utu desh laga cholauta Pilate thakise. Tai Rome desh nimite kam kuri thakise. Jehudi cholauta khan pora Jisu ke tai logote anise. Taikhan Pilate pora Jisu ke moraidibole hokom koridibole mon thakise. Tetia Pilate Jisu ke hutise: “Apuni Jehudi laga Raja ase?”

![](https://cdn.door43.org/obs/jpg/360px/obs-en-39-10.jpg)

Jisu jawab dise, “Apuni thik koise. Hoilebi prithibi te ami laga rajyo nai. Jodi ineka thakise koile amilaga noukarkhan ahikena ami nimite lorai kuribo. Ami itu prithibi te Isor laga hosa kotha janaidibole ahise. Junkhan hosa ke morom kore, taikhan ami laga kotha manibo.” Pilate hutise: “Hosa ki ase?”

![](https://cdn.door43.org/obs/jpg/360px/obs-en-39-11.jpg)

Jisu logote kotha koa pichete, Pilate bahar te jaise aru manukhan joma hoikena thaka khan ke koise, “Ami tai ke sajai dibole nimite eku galti napa-a hoise.” Hoilebi Jehudi cholautakhan aru manukhan sob jor pora hala korise: “Tai ke krus te maridibi!” Pilate koise: “Hoilebi tai laga galti eku nai.” Taikhan arubi jor pora hala korise. Tetia Pilate aru tisra bar taikhan ke koise, “Tai eku galti nai.”

![](https://cdn.door43.org/obs/jpg/360px/obs-en-39-12.jpg)

Pilate bhabona korise manu jiman joma korikena ase taikhan pora jhagara ulaidile bhoe korikena, tai Jisu ke sipohikhan laga hath te dikena crus te moraidibole monjur hoise. Rome laga sipoikhan Jisuke bisi marise aru tai ke beguni rong laga kapor lagaidise, aru kata thaka laga gol tupi nisena banaikena matha te halidise. Tetia taikhan Jisu ke ineka koikena tai ke bodnam kurise: “Sabi, Jehudi laga Raja ke!”

*A Bible story from: Matthew 26:57-27:26; Mark 14:53-15:15; Luke 22:54-23:25; John 18:12-19:16*

## 40. Jisu ke Krus te Moraidise

https://openbiblestories.org/l/nag/story-40/

![](https://cdn.door43.org/obs/jpg/360px/obs-en-40-01.jpg)

Sipoikhan Jisu ke sorom kora khotom huwa pichete, aru tai ke crus te maridibole loijaise. Aru tai khan pora tai ke juntu krus te maridibole ase utu krus bukhibole dise.

![](https://cdn.door43.org/obs/jpg/360px/obs-en-40-02.jpg)

Sipoikhan Jisu ke ‘Matha laga Hardi’ koikena ekta jagate loijaise, aru tai laga hath aru thengkhan te gojal dikena krus te marise. Hoilebi Jisu pora koise, “Baba taikhan ke maph koridibi! Kilemane taikhan ki kuri ase itu taikhan najane.” Tai laga matha uporte ekta likhikena rakhise. Ta-te likhatu: ‘Itu Jehudi khan laga Raja ase!’ Pilate pora taikhan ke ineka likhibi koise.

![](https://cdn.door43.org/obs/jpg/360px/obs-en-40-03.jpg)

Tetia sipoikhan Jisu laga kaporkhan nimite baji khilise. Jetia taikhan ineka kurise, Isor laga kotha te ki likehikena thakise itu hosa hoise: “Taikhan ami laga kaporkhan bhag korikena loise aru amilaga chador nimite baji khilise.”

![](https://cdn.door43.org/obs/jpg/360px/obs-en-40-04.jpg)

Aru ta-te dusra duijon manu, junkhan dokaitkhan asile, taikhan ke bi krus te marise. Taikhan pora ekjon ke Jisu laga dyna phale aru ekjon ke baya phale rakhise. Ekta daku Jisu ke sorom khilai thakise, hoilebi dusra dokait pora tai ke koise: “Apuni ke Isor pora sajai dibole bhoi nakure? Amikhan bia kam bisi kurise aru amikhan sajai pabole thi ase, hoilebi tai ekubi galti kura nai.” Tetia tai Jisu ke koise, “Morom korikena amike monte rakhibi apuni jitia apuni laga desh laga raja hobo!” Jisu tai ke jawab dise, “Aji apuni ami logote Porom Desh te thakibo.”

![](https://cdn.door43.org/obs/jpg/360px/obs-en-40-05.jpg)

Jehudi cholauta aru dusra manukhan khara hoikena Jisu ke sorom khilai thakise. Taikhan Jisu ke koise: “Apuni Isor laga Chokora ase koile, krus pora namikena nijorke bachai lobi! Tetia amikhan apuni ke biswas kuribo.”

![](https://cdn.door43.org/obs/jpg/360px/obs-en-40-06.jpg)

Tetia din laga baroh bajite utu pura jagate akash andhar hoijaise. Din laga majote he andhar hoijaise, aru ineka tin ghanta tok pura andhar hoijaise.

![](https://cdn.door43.org/obs/jpg/360px/obs-en-40-07.jpg)

Tetia Jisu jor pora hala kurikena koise, “Khotom hoise! Baba, apuni laga hath te ami laga atma di ase.” Aru tai matha niche korikena tai laga atma charise. Jetia tai morise, matikhan hilibole lagise. Aru mondir bhitorte dangor porda thaka, juntu Isor aru manu majote rakhise, itu upor pora niche tok phatikena duita hoise.

![](https://cdn.door43.org/obs/jpg/360px/obs-en-40-08.jpg)

Tai morija pora Jisu manukhan ke Isor logote ahibole nimite rasta khulidise. Aru ekta sipoi jun ta-te rukhi thakise, ki hoise itu sob dikhina koise, “Hosa pora, itu manu eku galti nathaka asile. Tai he Isor laga Chokora asile.”

![](https://cdn.door43.org/obs/jpg/360px/obs-en-40-09.jpg)

Tetia Jehudi cholauta duijon ahise, junkhan laga nam Jospeh aru Nicodemus asile. Taikhan Jisu he Masiha thakise koikena biswas kurithakise. Taikhan Pilate logote jaikena Jisu laga gao ke mangise. Aru taikhan kapor pora Jisu laga gao ke bandise. Tetia taikhan pathor pora bana ekta gupha laga bhitorte Jisu ke rakhise. Aru ekta dangor pathor pora gupha bhitorte ja-a rasta bon kuridise.

*A Bible story from: Matthew 27:27-61; Mark 15:16-47; Luke 23:26-56; John 19:17-42*

## 41. Isor Jisu ke Jinda Korise

https://openbiblestories.org/l/nag/story-41/

![](https://cdn.door43.org/obs/jpg/360px/obs-en-41-01.jpg)

Sipoikhan pora Jisu ke krus te mara pichete, Jehudi cholautakhan pora Pilate logote ahikena koise: “Utu misa-misi koa manu Jisu, tai jetia jinda asile, amikhan ke koise tin-din pichete tai arubi jinda hoijabo! Utu gupha te sipoikhan ke rukhibole dibi, nahoile tai laga chelakhan ahikena tai laga gao ke chor kuriloijabo. Aru ineka hoile taikhan Jisu arubi jinda hoise kobo.”

![](https://cdn.door43.org/obs/jpg/360px/obs-en-41-02.jpg)

Pilate taikhan ke koise, “Sipoikhan ke loijabi aru gupha te kineka kurikena rukhile bhal hobo itu kuribi.” Itu nimite taikhan jaikena pathor te mohor marikena bhitor ghusibole rasta bon koridise. Aru kun pora bi chor koribole naparibo nimite ta-te sipoi bisi rakhi dise.

![](https://cdn.door43.org/obs/jpg/360px/obs-en-41-03.jpg)

Jisu morija-a laga dusra din Sabbath thakise. Aru kunbi itu dinte niom te thaka nisina, ekubi kam nakore aru Jisu laga sathikhan bi kunbi tai laga kobor te janae. Sabbath hoikena dusra din te, phojirte, kunba maikhan Jisu laga kobor te jabole taiari kurithakise. Aru Jisu laga gao te masalakhan halidibole nimite jabole thakise.

![](https://cdn.door43.org/obs/jpg/360px/obs-en-41-04.jpg)

Maikikhan ta-te napunchia age te, achanak pora mati bisi hilise. Sorgo pora ekta duth ahise. Aru gupha bhitor humabole rasta te pathor rakhi thaka ke hataikena utu pathor uporte bohi jaise. Sorgoduth bisi ujala kuri chomki thakise. Ta-te thaka sipoikhan bi sorgoduth ke dikhise. Taikhan iman bisi bhoe lagikena murijae manukhan nisina mati te girijaise.

![](https://cdn.door43.org/obs/jpg/360px/obs-en-41-05.jpg)

Jetia maikikhan kobor jagate ahise, sorgoduth pora taikhan ke koise: “Bhoe nakoribi. Jisu iyate nai. Tai jinda hoise, tai koa nisina! Bhitorte jaikena sabi.” Utu maikikhan jaikena Jisu ke kot-te rakhise ta-te saise. Tai laga gao ta-te thaka nai!

![](https://cdn.door43.org/obs/jpg/360px/obs-en-41-06.jpg)

Tetia utu sorgoduth pora maikikhan ke koise, “Jabi aru tailaga chelakhan ke koidibi, ‘Jisu morikena uthise aru tai Galilee te apunikhan laga age te jabo.’”

![](https://cdn.door43.org/obs/jpg/360px/obs-en-41-07.jpg)

Maikikhan bisi asurit aru khusi hoise. Taikhan Jisu laga chelakhan ke khusi khobor dibole polaikena jaise.

![](https://cdn.door43.org/obs/jpg/360px/obs-en-41-08.jpg)

Jetia taikhan rasta te jai asile, Jisu achanak pora taikhan laga age-te khara hoijaise. Aru taikhan Jisu laga theng age-te jhukise. Tetia Jisu pora koise: “Bhoe nakoribi. Jaikena amilaga chelakhan ke Galilee te jabole kobi. Ta-te taikhan ami ke lok pabo.”

*A Bible story from: Matthew 27:62-28:15; Mark 16:1-11; Luke 24:1-12; John 20:1-18*

## 42. Jisu Sorgote Wapas Jaise

https://openbiblestories.org/l/nag/story-42/

![](https://cdn.door43.org/obs/jpg/360px/obs-en-42-01.jpg)

Juntu din te Isor pora Jisu ke morija-a pora jinda kuridise, tai laga chela duijon usorte thaka ekta taun te jai thakise. Tai duijon rasta te beraikena Jisu logote ki hoise itu kothakhan koiasile. Taikhan asha kurithakise tai he Masiha ase koikene, hoilebi tai ke morai dise. Aru itia maikikhan pora tai arubi jinda ase koiase. Taikhan ki biswas koribo najana hoise.

![](https://cdn.door43.org/obs/jpg/360px/obs-en-42-02.jpg)

Jisu takhan usorte ahise aru tai khan logote beraise, hoilebi tai khan Jisu ke chinibole para nai. Tai taekhan ke ki kotha kuriase hutise. Duijon pora tai ke tin din te Jisu logote ki hoise itukhan sob koise. Taikhan bhabona kurise itu manu dusra desh laga ase aru tai Jerusalem te ki hoise eku bi najane.

![](https://cdn.door43.org/obs/jpg/360px/obs-en-42-03.jpg)

Tetia Jisu taikhan ke Masiha nimite Isor laga kotha ki ase itu bujaidise. Bisi sal agete, bhaubadi khan koise bia manukhan pora Masiha ke bisi dukh dikena muriadibo koise. Hoilebi taikhan koise tai tin din te arubi jinda hoi jabo.

![](https://cdn.door43.org/obs/jpg/360px/obs-en-42-04.jpg)

Jetia taikhan taun te punchise, sam hoijaise. Tetia taikhan Jisu ke taikhan logote bohijabi koise, itu nimite Jisu taikhan logote ghor bhitorte jaise. Taikhan sam laga khana khabole bohise. Jisu ekta ruti uthaise, Isor ke dhoniabad dise, aru aru itu ke bhangaise. Achanak pora taikhan Jisu ke chinibole parise. Hoilebi, itu homoi te tai ta-te pora haraise.

![](https://cdn.door43.org/obs/jpg/360px/obs-en-42-05.jpg)

Duijon ekjon-dusra-jon ke koise: “Utu Jisu asile! Itu nimite amikhan bisi khusi hoise jetia tai Isor laga kotha amikhan ke koi asile!” Itu huwa logote, itu jaga charikena tai duijon Jerusalem te wapas jaise. Jetia taikhan ta-te punchise, chelakhan ke koise, “Jisu jinda ase! Ami duijon tai ke dikhise!”

![](https://cdn.door43.org/obs/jpg/360px/obs-en-42-06.jpg)

Aru taikhan ineka kotha kori thaka homoi te, achanak pora Jisu taikhan laga age-te ahikena khara hoijasie. Tai koise, “Apunikhan logote shanti thakibi!” Taikhan bhut ase bhabikena bisi bhoe lagise, hoilebi Jisu koise: “Apunikhan kile bhoe kori ase? Apunikhan kile ami Jisu ase koikena biswas nakore? Ami laga hath aru theng sabi. Bhutkhan ami nisina mangso aru hardi nathakibo.” Tai bhut nohoi dikhabole, tai kiba khabole mangise. Taikhan pora mas laga ekta tukra dise aru tai itu khaise.

![](https://cdn.door43.org/obs/jpg/360px/obs-en-42-07.jpg)

Jisu pora koise; “Isor laga kotha te ami nimite ki likhikena ase aru ki hobole ase sob ami apunikhan ke koi dise.” Aru taikhan ke Isor kotha bhal pora bujibo dibole taikhan laga dimag khuli dise. Tai koise; “Bisi sal poila te, bhaubadikhan pora Isor laga kotha likhikena ase, ki ami, Masiha, bisi dukh pabo, moribo, aru tin-din pichete morija-a pora arubi jinda hoijabo.”

![](https://cdn.door43.org/obs/jpg/360px/obs-en-42-08.jpg)

Aru Isor laga kotha te likhikena ase amilaga chelakhanpora Isor laga kotha prochar kuribo. Taikhan dusra manukhan ke pap pora ghuraikena ahibi kobo. Aru taekhan manile, Isor taikhan laga pap maph kuridibo. Ami laga chelakhan itu kotha Jerusalem pora suru kuribo. Itu pichete sob deshte aru manu-laga-dolkhan ke janaidibo. Apunikhan ami ki koise, ki korise aru ami logote ki hoise, itu sob laga apunikhan saksi ase.”

![](https://cdn.door43.org/obs/jpg/360px/obs-en-42-09.jpg)

Tai morikena jinda hoa pichete, chalis din tok Jisu tai laga chelakhan logote ineka pora bisi bar lok kurise. Ek bar tai panch soh manukhan logote ahise. Tai laga chelakhan ke arubi jinda hoise koikena bisi bar tai khan ke koise aru tai khan ke sorgo laga rajyo laga kotha bisi koise.

![](https://cdn.door43.org/obs/jpg/360px/obs-en-42-10.jpg)

Jisu tai laga chelakhan ke koise: “Isor pora amike sorgo aru prithibi the thaka sob uporte rajyo kuribole adhikar dise. Itu nimite ami apunikhan ke koise: sob jagate jabi aru sob manukhan ke amilaga chela banabi. Aru taikhan ke Pobitro Baba, Chokora aru Pobitro-Aatma laga nam te baptisma kuridibi. Ami apunikhan ke ki hikaise, thik itukhan sob apunikhan taikhan ke bi hikai dibi. Aru mon te rakhibi, ami sob homoite apunikhan logote thakibo.”

![](https://cdn.door43.org/obs/jpg/360px/obs-en-42-11.jpg)

Jisu morikena arubi jinda hoija-a chalis din pichete, tai tailaga chelakhan ke koise; “Apunikhan ami laga Pobitro Baba pora hokti nadei tok, Jerusalem te he thakibi. Tia itu hokti dia toh apunikhan uporte Pobitro-Aatma dibo.” Itu pichete Jisu sorgo phine uthi jaise aru ekta badal pora bon kuridise. Jisu sorgo te Isor laga dyna phine bohikena sob uporte tai raj kuribo.

*A Bible story from: Matthew 28:16-20; Mark 16:12-20; Luke 24:13-53; John 20:19-23; Acts 1:1-11*

## 43. Girja Suru Hoise

https://openbiblestories.org/l/nag/story-43/

![](https://cdn.door43.org/obs/jpg/360px/obs-en-43-01.jpg)

Jisu sorgo te wapas jaija-a pichete, tai adesh dia nisina chelakhan Jerusalem te jaise. Biswas kuri thakakhan joma kurikena prathna kuri thakise.

![](https://cdn.door43.org/obs/jpg/360px/obs-en-43-02.jpg)

Hoidai sal, Mukti-jatra khotom hoikena pachas din pichete, Jehudi khan ekta bisi dangor din manaithake, itu din ke Pentecost matise. Jetia kheti te dhan katibole shuru kore, tetia itu puja mania thakisile. Taikhan sob Jerusalem te joma korikena eki logote Pentecost mania thakise. Utu sal te, Pentecost din toh Jisu sorgo te jaikena sat din hoija pichete ahise.

![](https://cdn.door43.org/obs/jpg/360px/obs-en-43-03.jpg)

Jetia biswasikhan sob ekta jagate joma hoikena asile, achanak pora akash pora ekta jor hawa mara nisina laga awaj hoise aru ghor bhitorte awaj pora bhorta hoise. Tetia jui laga jiva nisina ahikena sob laga matha uporte rukhise. Taikhan sob ke Pobitro Aatma ahise aru taikhan alak bhasa pora Isor laga nam ucha korise. Pobitro Aatma pora he taikhan ke dusra bhasakhan kobole dise.

![](https://cdn.door43.org/obs/jpg/360px/obs-en-43-04.jpg)

Jetia Jerusalem te thaka khan itu awaj hunise, tai khan sob bisi manu joma kurikena ki hoi ase itu sabole ahise. Biswasi khan pora Isor ki dangor kam kurise itukhan prochar kura hunise. Taikhan bisi asurit hoise kilekoile taikhan sob nijer bhasa te hunibole paise.

![](https://cdn.door43.org/obs/jpg/360px/obs-en-43-05.jpg)

Kunba khan koise chelakhan mudu khaikena ase. Hoilebi Peter khara hoise aru taekhan ke koise: “Amilaga kotha hunibi! Itu manukhan modu kha nai! Hoilebi, apunikhan itia ki dikhi ase itu bhaubadi Joel pora ineka hobo koikena thakise: Isor koise, ‘Ses hobole laga din te ami ineka koribole ase, Amilaga Aatma manukhan ke didibo.”

![](https://cdn.door43.org/obs/jpg/360px/obs-en-43-06.jpg)

“Israel laga manukhan, Jisu tai kun ase amikhan ke bujibo dibole nimite, tai asurit kam bisi korikena dikhaise. Asurit kam Isor laga hokti pora he korise. Apunikhan itu jane, kilekoile apunikhan laga usorte he itu sob hoise. Ineka hoilebi apunikhan pora tai ke krus te moraidise!”

![](https://cdn.door43.org/obs/jpg/360px/obs-en-43-07.jpg)

“Jisu morise hoilebi Isor pora tai ke morija-a pora arubi uthaidise. Itu pora ekta bhaubadi pora likhikena thaka hosa hoise, ‘Jun he Pobitro ase, apuni tai ke mati nichete puchibole nadibo.’ Amikhan sob saksi ase Isor pora Jisuke aru jinda kuri dia toh.”

![](https://cdn.door43.org/obs/jpg/360px/obs-en-43-08.jpg)

“Isor Baba pora Jisu ke sonman kurise aru taike tailaga dyna phine bohibole dise. Aru Jisu amikhan ke, tai kosom kura nisina, Pobitro Atma pathaiase. Amikhan itia ki dikhi ase aru ki huniase itukhan sob Pobitro Aatma laga hokti pora ase.”

![](https://cdn.door43.org/obs/jpg/360px/obs-en-43-09.jpg)

“Apunikhan Jisu ke krus te moriadise. Hoilebi itu jani thakibi Pormeswar Isor pora Jisu ke sob laga uporte tai he Malik aru Masiha banaise!”

![](https://cdn.door43.org/obs/jpg/360px/obs-en-43-10.jpg)

Peter laga kothakhan hunikena manukhan bisi mon dukh lagise. Aru taikhan Peter aru chelakhan ke hutise: “Bhai-kokaikhan, amikhan ki koribo lage?”

![](https://cdn.door43.org/obs/jpg/360px/obs-en-43-11.jpg)

Peter pora jawab dise: “Apunikhan sob nijor pap pora maph pabole mangibi, aru Jisu Khrista laga nam te baptisma korilobi. Tinihoile tai pora apunikhan ke tai laga Pobitro Aatma vardan kuribo!”

![](https://cdn.door43.org/obs/jpg/360px/obs-en-43-12.jpg)

Utu din te, tin hazar manu Peter laga kotha hunikena biswas kurise aru taikhan bi Jisu laga chela hoise. Taikhan baptisma loikena Jerusalem laga girja manukhan logote milai loise.

![](https://cdn.door43.org/obs/jpg/360px/obs-en-43-13.jpg)

Biswasikhan ahikena chelakhan pora taikhan ke Jisu laga kotha bisi hikai dise. Taikhan lok paithakise aru eki logote Prabhu-bhoj khai thakise aru prathna kori thakise. Taikhan eki logote Isor laga nam ucha kore aru ki ase, sob logote bhag korithakise. Dusrakhan sob taikhan ki kuriase utukhan dikhikena bisi asurit lagithakise. Hodae, biswasi manukhan bisi hoi thakise.

*A Bible story from: Acts 2*

## 44. Peter Aru John Ekta Lengra Manu ke Bhal kurise

https://openbiblestories.org/l/nag/story-44/

![](https://cdn.door43.org/obs/jpg/360px/obs-en-44-01.jpg)

Ek din, Peter aru John Temple te jaise. Ta-te ekta manu, jun jonom pora lengra asile, dorja te bhik mangikena bohithakise.

![](https://cdn.door43.org/obs/jpg/360px/obs-en-44-02.jpg)

Peter tai ke saise aru koise; “Ami logote eku poisa nai. Hoilebi ami logote ki ase itu apuni ke di ase. Jisu laga nam te koi ase, uthibi aru berabi!”

![](https://cdn.door43.org/obs/jpg/360px/obs-en-44-03.jpg)

Ekdum pora Isor utu manu ke changai kuridise. Tai uthikena beraise aru Isor laga nam ucha kurise. Aru Temple laga bahar te thaka manukhan itu dikhikena bisi asurit hoise.

![](https://cdn.door43.org/obs/jpg/360px/obs-en-44-04.jpg)

Changai hoi ja manu ke sabole olop manu ta-tejoma hoijaise. Peter taikhan ke koise: “Itu manu bhal hoise, hoilebi itu saikena asurit nohobi. Amikhan nijor laga hokti pora taike bhal kura nohoe aru amikhan bhal ase nimite ineka hoa nohoe. Hoilebi Jisu he tai laga hokti pora itu manu ke bhal kurise, kilekoile amikhan tai ke he biswas kure.”

![](https://cdn.door43.org/obs/jpg/360px/obs-en-44-05.jpg)

“Apunikhan he Rome laga cholauta ke koikena Jisu ke moriadibole koise. Kun pora sob ke jibon diye, apunikhan tai ke he moraidise. Hoilebi Isor pora arubi tai ke jinda kuridise. Apunikhan eku najanikena itukhan sob kurise, hoilebi poila pora itu hobole ase koikena bhaoubadikhan pora likhise. Aru Masiha dukh pabo aru moribo koise. Itu nimite Isor pora ineka hobole dise. Itia apunikhan sob nijor pap laga maph mangibi aru Isor logote ahibi, ineka hoile he tai apunikhan laga pap dhulai dibo.”

![](https://cdn.door43.org/obs/jpg/360px/obs-en-44-06.jpg)

Jetia Mondir laga cholautakhan Peter aru John laga kotha hunise, taikhan bisi bia paise aru tai duijon ke dhurikena jail te rakhidise. Hoilebi manukhan bisi pora Peter laga kotha hunikena biswas korise. Aru tetia kom-se-kom panch-hazar nisina manu biswasi hoise.

![](https://cdn.door43.org/obs/jpg/360px/obs-en-44-07.jpg)

Dusra dinte, Jehudi cholautakhan Peter aru John ke maha purohit aru Jehudi laga dhorom chola manu khan logote anise. Aru utu lengra manu jun ke changai paise, tai ke bi anise. Tai khan Peter aru John ke hutise; “Apunikhan ki hokti pora itu lengra manu ke changai kurise?”

![](https://cdn.door43.org/obs/jpg/360px/obs-en-44-08.jpg)

Peter jawab dise: “Itu manu jun apunikhan sob laga age-te khara hobole pari ase tai ke Jisu, Masiha laga hokti pora changai hoise! Apunikhan Jisu ke crus te maridise hoilebi Isor pora tai ke arubi jinda kuridise! Apunikhan tai ke mania nai, hoilebi Jisu laga hokti pora he nohoile, pap pora bachibole aru dusra rasta eku nai!”

![](https://cdn.door43.org/obs/jpg/360px/obs-en-44-09.jpg)

Peter aru John pora mon dangor kurikena ineka kotha kuwa pora cholautakhan sob asurit hoise. Taikhan jane tai duijon pura likha ekubi nai. Hoilebi tetia taikhan laga mon-te ahise, tai duijon Jisu logote beraise. Itu nimite taikhan duijon ke koise: “Duijon pora Jisu laga kotha manukhan ke arubi koise koile, amikhan pora duijon ke bisi sajai dibo.” Itu pichete Peter aru John ke jabole dise.

*A Bible story from: Acts 3:1-4:22*

## 45. Stephen aru Philip

https://openbiblestories.org/l/nag/story-45/

![](https://cdn.door43.org/obs/jpg/360px/obs-en-45-01.jpg)

Biswasi manukhan bhitorte ekjon Stephen koikena asile. Sob manukhan tai ke sonman korithakise. Pobitro Aatma pora tai ke hokti aru bhal dimag dise. Tai bisi asurit kamkhan kurise. Aru tai Jisu ke biswas kuribi koikena hikaise aru bisi manu tai ke biswas kurise.

![](https://cdn.door43.org/obs/jpg/360px/obs-en-45-02.jpg)

Ek din, Stephen pora Jisu laga kotha hikai thakise, aru Jehudi khan kun Jisu ke biswas nakore, ahikena tai logote jhagara kurise. Taikhan bisi khong hoise aru tai ke dhorom-laga-cholautakhan logote loijaise aru tai laga misa-misa kotha koise. Taikhan koise: “Amikhan Stephen pora Moses aru Isor laga nam bodnam korithaka hunise!” Itu nimite dhorom laga cholautakhan Stephen ke dhurikena maha purohit aru Jehudi manu khan laga dusra cholauta khan logote anise. Ta-te bi aru kunba misa-misi laga gawahi khan ke anikena Stephen laga misa kotha kobole dise.

![](https://cdn.door43.org/obs/jpg/360px/obs-en-45-03.jpg)

Titia maha purohit pora Stephen ke hutise, “Itu manukhan ki koise ase, hosa ase?” Stephen pora maha purohit ke kotha bisi pora jawab dise. Isor pora kineka Israel manukhan nimite asurit kamkhan kurise, Abraham thaka homoi pora Jisu thaka homoi tok laga kahani koise. Hoilebi manukhan pora Isor laga kotha namanikena ahise. Stephen koise: “Apunikhan laga mon kimanbi tan ase aru Isor laga kotha hunikena bi nahuna nisina kore! Apunikhan hodai Pobitro-Aatma ke dhur te hataidie, thik jineka amikhan laga khandan laga babakhan Isor ke korithakise aru apunikhan tai laga bhaubadikhan ke moriadise. Hoilebi apunikhan taikhan pora bi bisi bia kam kurise, apunikhan Masiha ke moria dise!”

![](https://cdn.door43.org/obs/jpg/360px/obs-en-45-04.jpg)

Jetia dhorom laga cholautakhan itu kotha hunise, taikhan bisi khong hoise aru bisi jor pora hala korikena taikhan laga hath loikene kan bon kurise. Taikhan Stephen ke dhurise aru tai ke tanikena taun laga baharte loijaise aru taike moraidibole pathor marise.

![](https://cdn.door43.org/obs/jpg/360px/obs-en-45-05.jpg)

Jetia Stephen morijai thakise, tai hala kurise: “Jisu amilaga atma ke loilobi!” Tetia tai mati te girise are bisi jor pora koise: “Malik taikhan laga pap taikhan uporte narakhibi!” Tetia tai morise.

![](https://cdn.door43.org/obs/jpg/360px/obs-en-45-06.jpg)

Utu din te, Jerusalem te biswasi manu thakakhan ke bisi digdar dibole suru hoise, aru taikhan ta-te pora dusra jagakhan te polaijaise. Aru ineka hoilebi, taikhan kun jagate jai, ta-te Jisu laga kotha he janaidikena berai thakise.

![](https://cdn.door43.org/obs/jpg/360px/obs-en-45-07.jpg)

Aru ekta biswasi manu Philip koikena thakise. Tai bi Jerusalem pora polaikena Samaria desh te jaise. Ta-te taikhan ke Jisu laga kotha prochar korise. Manu bisi tailaga kotha hunikena biswas kurise aru roikha paise. Ek-din, sorgoduth ekta tai logote ahise aru jongol phine ekta rasta te jabole koise. Philip ta-te jaise. Tai rasta te beraikena jai thaka homoite, ekta manu ghora-gari pora ahithaka dikhise. Itu manu Ethiopia desh laga dangor-sahab asile. Pobitro Aatma pora Philip ke utu manu logote jaikena kotha kuribi koise.

![](https://cdn.door43.org/obs/jpg/360px/obs-en-45-08.jpg)

Itu nimite Philip ghora-gari usorte ahise. Tai utu manu pora Isor laga kotha purithaka hunise. Tai bhaubadi Isaiah laga kotha puri asile. Utu manu purise: “Jineka ekta bhera ke katibole loijai, jineka ekta bhera ekubi awaj nakore, tai ekta kotha bi koanai. Taikhan tai ke bia pora cholaise aru tai ke sonman dia nai. Taikhan pora tai laga jibon khotom kuridise.”

![](https://cdn.door43.org/obs/jpg/360px/obs-en-45-09.jpg)

Philip pora Ethiopia manu ke koise: “Apuni ki puriase bujibole pariase?” Utu Ethopia manu koise; “Nohoe. Kunba ami ke bujai nadile ami kineka pora buji-bole paribo? Morom korikena ami logote ahikena usorte bohibi. Isaiah tai nijer laga na kun dusra laga kotha koi ase?”

![](https://cdn.door43.org/obs/jpg/360px/obs-en-45-10.jpg)

Philip tai logote ghora-gari te uthikena bohise. Tetia tai utu Ethiopia manu ke koise Isaiah toh Jisu laga kotha likhise. Aru Isor laga kotha dusrakhan bi bisi tai ke koidise. Itu nisina, tai utu manu ke Jisu laga susamachar bi koidise.

![](https://cdn.door43.org/obs/jpg/360px/obs-en-45-11.jpg)

Taikhan rasta te jaithaka homoite, pani thaka ekta jagate ahise. Ethiopia manu pora koise: “Sabi! Iyate olop pani ase! Ami baptisma lobole paribo na nai?” Aru tai ghora-garike chola manuke rukhibole koise.

![](https://cdn.door43.org/obs/jpg/360px/obs-en-45-12.jpg)

Aru tai duijon pani thaka jaga usorte jaise, aru Philip tai ke baptisma dise. Taikhan pani pora baharte ulaija-a homoi te, Pobitro Aatma pora Philip ke achanak pora dusra jagate loi jaise. Ta-te bi Philip Jisu laga kothakhan koi thakise.

![](https://cdn.door43.org/obs/jpg/360px/obs-en-45-13.jpg)

Utu Ethiopia manu tai laga ghorte jaise. Tai Jisu ke janiloise koikene bisi khusi pora jaise.

*A Bible story from: Acts 6:8-8:5; 8:26-40*

## 46. Saul Khristan Hoise

https://openbiblestories.org/l/nag/story-46/

![](https://cdn.door43.org/obs/jpg/360px/obs-en-46-01.jpg)

Jisu ke biswas nakora manu Saul koikena thakise. Jetia tai jawan thakise, teita tia utu manukhan laga kapor saithakise jun manu khan pora Stephen ke moraise. Pichete, tai biswasi khan bisi ke digdar dise. Aru Jerusalem te sob ghor-ghor-te ghusikena jobor-josti pora biswasi mota aru maiki sob ke dhurikena koidi ghor te rakhise. Titia maha purohit pora Saul ke Damascus taun te jabole monjur hoise. Aru tai ke jaikena ta-te biswasi manukhan kiman ase sob ke dhurikena Jerusalem te anibi koise.

![](https://cdn.door43.org/obs/jpg/360px/obs-en-46-02.jpg)

Itu nimite Saul Damascus te jai thakise. Tai taun bhitor napunchia age-te, ekta ujala thaka pohor sob phine marise, aru tai mati te giri jaise. Tai ekta manu laga awaj ineka hunise: “Saul! Saul! Apuni amike kile iman dukh diase?” Saul jawab dise, “Malik, apuni kun ase?” Jisu tai ke jawab dise: “Ami Jisu ase. Apuni amike iman dukh di ase!”

![](https://cdn.door43.org/obs/jpg/360px/obs-en-46-03.jpg)

Jetia Saul ta-te pora khara kurise, tai ekubi sabole naparia hoise. Tai laga sathikhan pora tai ke Damascus te loijaise. Tin din tok tai ekubi kha-a nai.

![](https://cdn.door43.org/obs/jpg/360px/obs-en-46-04.jpg)

Damascus te ekta chela thakise, jun laga nam Ananias asile. Isor tai ke koise; “Saul kuntu ghorte ase ta-te jabi. Aru apuni laga hath tai uporte rakhibi ineka hoile tai arubi sabole paribo.” Hoilebi Ananias koise: “Malik ami itu manu pora biswasi manukhan ke bisi digdar dise koikena hunise.” Isor tai ke koise: “Jabi! Ami tai ke chani loise, aru tai pora ami laga nam Jehudi aru dusra jatikhan ke janaidibole. Tai ami laga nam nimite bisi dukh kuribo.”

![](https://cdn.door43.org/obs/jpg/360px/obs-en-46-05.jpg)

Aru Ananias Saul logote jaise, tai laga hath Saul uporte rakhise aru koise: “Jisu, jun apuni iayte ahibole rasta te thaka homoite apuni laga age-te ahise, tai pora amike pathaise kilekoile apuni arubi sabole paribo aru Pobitro Aatma apuni ke ahibo.” Tetia Saul sabole parise aru Ananias tai ke baptisma kuridise. Itu pichete Saul kha-a-loa kurise aru takot paise.

![](https://cdn.door43.org/obs/jpg/360px/obs-en-46-06.jpg)

Itu hoikena, Paul Damascus te jaikena Jehudi khan logote Jisu laga prochar kurise. Tai koise: “Jisu he Isor laga Chokora ase!” Itu hunikena Jehudi bisi asurit hoi jaise kilekoile Saul toh biswasi manukhan ke morabole jaithakise, aru itia tai he Jisu ke biswas kuri loise! Saul taikhan logote jhagara kurise. Aru taikhan ke Jisu he Masiha ase koise.

![](https://cdn.door43.org/obs/jpg/360px/obs-en-46-07.jpg)

Bisi din pichete, Saul ke morai dibole kotha milabole nimite Jehudi khan eki logote joma hoise. Taikhan manu ke pathaikena tai ke moriadibole taun laga baharte rukhi thakise. Hoilebi Saul taikhan ki kuriase janijaise aru tailaga sathikhan pora tai ke utu jaga pora polabole dise. Ek rati taikhan Saul ke ekta tukuri te ghusaikena pathor laga bera pora namaise. Saul Damascus pora polaijaise aru Jisu laga kothakhan prochar kuri thakise.

![](https://cdn.door43.org/obs/jpg/360px/obs-en-46-08.jpg)

Chelakhanke lok kuribole Saul Jerusalem te jaise, hoilebi taikhan taike bisi bhoi kurithakise. Tetia Barnabas koikena ekta biswasi manu ahise aru Saul ke chelakhan logote loijaise. Tai taikhan ke samjhai dise kineka Saul Damascus te, ekubi bhoe nakorikena Isor laga prochar kurise. Itu pichete, chelakhan Saul ke apnai loise.

![](https://cdn.door43.org/obs/jpg/360px/obs-en-46-09.jpg)

Kunba biswasikhan junkhan digdar paikena Jerusalem pora polaise, Antioch te jaikena Jisu laga kotha prochar kurise. Antioch te Jehudi khan bisi komti thakise, aru poila bar nimite, taikhan biswasi manu hoise. Barnabas aru Saul Jisu laga kothakhan notun biswasikhan ke koidibole aru girja ke takot kuribole jaise. Itu Antioch te ase jun jagate biwasikhan ke poila “Khristan” koikena matise.

![](https://cdn.door43.org/obs/jpg/360px/obs-en-46-10.jpg)

Ek din, Antioch te Khristan khan eku kha-a- loa nakorikena prathna kurithakise. Pobitro Aatma pora taikhan ke koise: “Barnabas aru Saul ke ami juntu kam kurabole ase itu kam nimite alag korikena rakhibi.” Aru Antioch laga girja te biswasikhan taikhan laga hath Barnabas aru Saul uporte rakhise. Aru tai duijon ke Jisu laga bhal khobor sob jagate koidibole jabo dise. Barnabas aru Saul manu-laga-dolkhan bisi thaka jagate jaise aru taikhan ke hikaidise aru bisi manu Jisu ke biswas kurise.

*A Bible story from: Acts 8:3; 9:1-31; 11:19-26; 13:1-3*

## 47. Paul aru Silas Philippi te Jaise

https://openbiblestories.org/l/nag/story-47/

![](https://cdn.door43.org/obs/jpg/360px/obs-en-47-01.jpg)

Jetia Saul pura Rome desh laga samrajya te berailoieise, tetia tai Roman naam ‘Paul’ koikena cholaise. Ek din Paul aru sathi Silas Philippi taun te Jisu susamachar prochar kuribole jaise. Taikhan taun pora ulaikena ekta nodi-kinar phine jaise jun jagate manukhan joma kurikena prathna kurithake. Ta-te taikhan ekta maiki Lydia koikena lok kurise, tai kaporkhan bikiri kurithaka maiki asile. Tai Isor ke bisi morom kure aru aradhana kure.

![](https://cdn.door43.org/obs/jpg/360px/obs-en-47-02.jpg)

Isor pora Lydia ke Jisu laga kothakhan bujibole dise. Paul aru Silas pora tai aru tailaga ghor manukhanke baptisma kuri dise. Tai pora duijon ke tai laga ghorte matise, aru tai duijon ta-te thakise.

![](https://cdn.door43.org/obs/jpg/360px/obs-en-47-03.jpg)

Paul aru Silas manukhan ke Jehudikhan prathna kurithaka jagate lok kurithakise. Hodai din taikhan ta-te beraikena ja–a homoite, ekta noukarni, jun laga bhitorte bia-atma ghusise, hodai tai duijon laga piche korithake. Itu bia atma nimite tai manukhan ke aha-kali te ki hobole ase itu koidiye aru tai laga malik nimite bisi poisa komai thakise.

![](https://cdn.door43.org/obs/jpg/360px/obs-en-47-04.jpg)

Itu noukarni tai duijon laga pichete hala kuri thakikena ahise, “Itu manukhan Jehovah laga kam kura manukhan ase! Kineka pora apunikhan Poritron pabo itu koidiye!” Tai hodai ineka kura pora Paul tai ke bisi alchi lagise.

![](https://cdn.door43.org/obs/jpg/360px/obs-en-47-05.jpg)

Itu nimite ek din, jetia noukarni hala koribole suru hoise, Paul tai phine saikena tai bhitorte thaka bia-atma ke koise, “Jisu Khrista laga nam pora ami koiase itu noukarni laga bhitor pora ulaikena ahibi!” Thik tetia utu atma ulaikena jai jaise.

![](https://cdn.door43.org/obs/jpg/360px/obs-en-47-06.jpg)

Kun manukhan utu noukarni laga malikkhan asile, taikhan bisi khong hoise! Taikhan bujise atma nathakile utu noukarni manukhan ke aha-kali laga kotha koidibole naparibo. Aru itu motlob manukhan tai ke poisa nadi jabo aha-kali ki hobole ase itu janibo nimite.

![](https://cdn.door43.org/obs/jpg/360px/obs-en-47-07.jpg)

Utu noukarni laga malikkhan pora Paul aru Silas ke Rome laga dangor sahabkhan laga age-te khara koridise. Taikhan Paul aru Silas ke marise aru koidi ghor halidise.

![](https://cdn.door43.org/obs/jpg/360px/obs-en-47-08.jpg)

Taikhan Paul aru Silas ke juntu jaga phine bisi sipoikhan ase, ta-te phine rakhise. Taikhan laga theng khuri laga kunda te bandidise. Rati laga baroh baji nisinate, Paul aru Silas Isor ke prathna kori asile aru Isor laga gana kuriasile.

![](https://cdn.door43.org/obs/jpg/360px/obs-en-47-09.jpg)

Achanak, bisi jor pora mati hilise! Koidi ghor bhitorte sob dorjakhan khulijaise aru koidi ghor te manukhan ke loha-laga-rosi pora bandikena thaka sob khulijaise.

![](https://cdn.door43.org/obs/jpg/360px/obs-en-47-10.jpg)

Tetia koidi ghor laga chowkidar uthi jaise. Aru tai koidighor laga dorjakhan sob khulikena thaka dikhise. Tai bhabise dhurikena rakhiakhan sob polaijase. Tai Rome laga dangor cholauta khan ke bisi bhoe lagise, aru taikhan pora tai ke moraidibo bhabikena, tai nijorke moraidibole tai laga dao ulaise! Hoilebi Paul ti ke dikhise aru hala korikena koise, “Rukhibi! Nijorke jokhom nakoribi! Amikhan sob iyate ase.”

![](https://cdn.door43.org/obs/jpg/360px/obs-en-47-11.jpg)

Jail laga chowkidar bisi kapi-kapikena Paul aru Silas ke hutise: “Malik-khan ami ki kurile poritron pabo?” Paul jawab dise; “Jisu ke biswas koribi, aru apuni aru apuni laga ghor manukhan bi poritron pabo.” Tetia chowkidar pora tai duijon ke tai laga ghorte loijaise aru taikhan laga ghao te dawai kuridise. Paul pora tai laga ghorte thaka sob ke Jisu laga susamachar janai dise.

![](https://cdn.door43.org/obs/jpg/360px/obs-en-47-12.jpg)

Chowkidar aru tailaga ghormanukhan Jisu ke biswas kurise, itu nimite Paul aru Silas pora taikhan ke baptisma kuridise. Aru tai pora duijon kha-a-loa dise aru taikhan bisi khusi hoise.

![](https://cdn.door43.org/obs/jpg/360px/obs-en-47-13.jpg)

Dusra din te taun laga dangor sahibkhan pora Paul aru Silas ke kaidi ghor pora ulai dise, aru taikhan ke Philippi pora jaijabi koise. Paul aru Silas jaikena Lydia aru dusra sathikhan ke lok korise aru taun pora jai jaise. Jisu laga susamachar sob jagate janaidi thakise aru girja dangor hoikena jaise.

![](https://cdn.door43.org/obs/jpg/360px/obs-en-47-14.jpg)

Paul aru dusra Khristan cholautakhan bisi taun te beraise. Taikhan kote jaise ta-te Jisu laga susamachar prochar kurise, aru hikaise. Aru taikhan chitikhan bi bisi likhise aru itukhan pora biswasikhan ke kotha bisi hikaise aru girja laga mon-dangor kurise. Taikhan laga kunba chithikhan Bible laga kitab hoijaise.

*A Bible story from: Acts 16:11-40*

## 48. Jisu He Kosom Dia Jonom Hua Masiha Ase

https://openbiblestories.org/l/nag/story-48/

![](https://cdn.door43.org/obs/jpg/360px/obs-en-48-01.jpg)

Jetia Isor prithibikhan ke banaise, sob bisi bhal thakise. Aru eku pap thaka nai. Adam aru Eve ekjon-dusra-jon ke bisi morom kurithakise aru tai duijon Isor ke morom kurikena thakise. Ta-te taikhan ke eku bimar aru mora thaka nai. Prithibi ineka he thakibole Isor laga mon icha asile.

![](https://cdn.door43.org/obs/jpg/360px/obs-en-48-02.jpg)

Saitan pora bagan te Eve logote ekta sap nisina hoikena kotha kurise, kilemane tai Eve ke thogai dibole mon thakise. Itu pichete, Eve aru Adam Isor ke pap kurise. Aru taikhan pap kura nimite, prithibi te sob manukhan morijabole hoise.

![](https://cdn.door43.org/obs/jpg/360px/obs-en-48-03.jpg)

Adam aru Eve pora pap kura nimite, itu pora bi bisi bia ekta hoise. Taikhan Isor laga dusman hoijaise. Kilekoile tai duijon laga pap nimite, sob manu pap kurikena ahise. Ekjon manu jonom pora he Isor laga dusman hoijaise. Isor aru manukhan majote shanti nathaka hoise. Ineka hoilebi Isor he shanti banabole mon thakise.

![](https://cdn.door43.org/obs/jpg/360px/obs-en-48-04.jpg)

Isor pora kosom dia tu Eve pora ahakhan pora sap laga matha kuchai dibo, aru sap pora taikhan laga theng kamuri dibo. Aru Saitan pora Masiha ke moraidibo, hoilebi Isor pora tai ke arubi jinda kuridibo. Itu pichete, Masiha pora Satan laga shakti hodai nimite khotom kuridibo. Bisi sal pichete, Isor pora dikhaise Jisu he Masiha ase.

![](https://cdn.door43.org/obs/jpg/360px/obs-en-48-05.jpg)

Isor pora Noah ke ekta nao banaikena tailaga ghor manukhan ke bachai lobi koise, kilekoile tai ekta dangor ban-pani pathabole asile. Itu nisina he Isor pora jun khan tai ke biswas kure, taikhan ke roikha kuriloi. Aru itu nisina he, kunkhan pap kam kure, taikhanke Isor pora morai dibole thik ase. Hoilebi junkhan tai ke biswas kore, taikhan ke roikha kuribo Isor pora Jisu ke pathaise.

![](https://cdn.door43.org/obs/jpg/360px/obs-en-48-06.jpg)

Ek sou sal pora bisi hua pichete, purohit khan hodai puja kure. Itu kura motlob manukhan ke taikhan pap kurise aru itu nimite Isor pora taikhan ke sajai dia thik ase. Hoilebi taikhan laga papkhan itu bolidan dia pora hatai dibole para nai. Jisu he Sob-Pora Maha Purohit ase. Dusra purohit khan pora kuribole napara khali tai pora he parise. Tai nije ke bolidan korikena, sob manukhan laga pap hatai dise. Isor pora tai ke sajai dibole lage koikena tai mani loise, kilekoile ineka korile he manukhan laga pap hatai dibole paribo. Itu nimite Jisu he bisi bhal maha purohit asile.

![](https://cdn.door43.org/obs/jpg/360px/obs-en-48-07.jpg)

Isor pora Abraham ke koise, “Ami prithibi te manu-laga-dolkhan sob ke apuni karone asis dibo.” Jisu bi Abraham laga khandan pora ahise. Isor pora manu-laga-dolkhan ke Abraham karone asis dise, kilekoile junkhan Jisu ke biswas kure, Isor taikhan ke pap pora bachai loe. Jetia taikhan Jisu ke biswas koriloe, tetia Isor taikhan bi Abraham laga khandan ase ineka bhabiloi.

![](https://cdn.door43.org/obs/jpg/360px/obs-en-48-08.jpg)

Isor pora Abraham ke tai nijor laga khali ekta chokora Isak ke bolidan koribi koise. Hoilebi tetia Isor pora Isak laga bodli te bolidan koribole nimite ekta bhera dise. Amikhan sob nijor laga pap nimite moribole lage! Hoilebi amikhan laga jagate moribole Isor pora Jisu ke bolidan kurise. Itu nimite Jisu ke Isor Laga Bhera matise.

![](https://cdn.door43.org/obs/jpg/360px/obs-en-48-09.jpg)

Jetia Isor pora Egypt desh te bisi dukh pathaise, Israel manukhan ke nijor ghorte ekta bhera katibole koise, aru itu bhera ke ekubi bia nathakibole lage. Tetia itu bhera laga khun taikhan dhorja laga khurite lagabole koise. Jetia Isor khun dikhise, tai utu ghor bhitorte naghusikena par kurise aru taikhan laga dangor chokorakhan ke moraidia nai. Jetia itu hoise, Isor pora ituke Mukti-Jatra matidise.

![](https://cdn.door43.org/obs/jpg/360px/obs-en-48-10.jpg)

Jisu toh Mukti-jatra laga Bhera nisina ase. Tai kitiabi pap kurianai, aru tai logote ekubi galti thaka nai. Tai itu utsov homoite morise. Kun Jisu ke biswas kuribo, Jisu laga khun pora utu manu laga pap sob terai dibo. Itu Isor pora manu uporte par korikena ja-a nisina ase, kilekoile Isor tai ke sajai nadibo.

![](https://cdn.door43.org/obs/jpg/360px/obs-en-48-11.jpg)

Isor pora ekta kotha Israel manukhan logote milaikena rakhise, kilekoile Isor pora taikhanke tai nijor laga manu bonabo koise. Hoilebi itia Isor pora dusra Notun-Niom sob manukhan nimite miliase. Kun manukhan Notun-Niom laga kotha manibo, taikan Isor laga manu hoijabo. Kilekoile taikhan Jisu ke biswas thaka nimite Jisu ke manibo.

![](https://cdn.door43.org/obs/jpg/360px/obs-en-48-12.jpg)

Moses ekta bhaubadi thakise jun Isor laga kotha bisi takot pora prochar kurise. Hoilebi Jisu he sob pora dangor bhaubadi ase. Tai Isor ase, aru tai ki kurise sob Isor laga kam ase aru tai ki koise, itu sob Isor laga kotha ase. Itu nimite Isor laga kotha te Jisu ke Isor-laga-Kotha ineka ma-te.

![](https://cdn.door43.org/obs/jpg/360px/obs-en-48-13.jpg)

Isor pora raja David ke kosom dise, tai laga khandan pora ekjon manu Isor laga manukhan uporte hodae-hodae nimite raja hobo. Jisu Isor laga Chokora ase aru tai he Masiha ase, aru tai he David laga khandan pora aha ase jun he hodae-hodae nimite raj kuribo.

![](https://cdn.door43.org/obs/jpg/360px/obs-en-48-14.jpg)

David Israel laga raja thakise, hoilebi Jisu sorgo aru prithibi laga raja ase! Tai arubi wapas ahibo aru tai laga rajyo te raj kuribo, aru tai thik phaislakhan kuribo aru shanti hodae nimite thakibo.

*A Bible story from: Genesis 1-3, 6, 14, 22; Exodus 12, 20; 2 Samuel 7; Hebrew 3:1-6, 4:14-5:10, 7:1-8:13, 9:11-10:18; Revelation 21*

## 49. Isor Laga Notun-Niom

https://openbiblestories.org/l/nag/story-49/

![](https://cdn.door43.org/obs/jpg/360px/obs-en-49-01.jpg)

Mary, jun ekta chukuri asile, tai ke ekjon sorgoduth ahikena tai Isor laga Chokora ke jonom dibo koise. Tai ekdum sapha chukuri asile, hoilebi Pobitro Aatma tai logote ahise aru tai bacha bukhise. Tai ekta chokora ke jonom dise aru tai laga nam Jisu rakhise. Itu nimite Jisu Isor hoikena-manu nisina bi ase.

![](https://cdn.door43.org/obs/jpg/360px/obs-en-49-02.jpg)

Jisu pora tai Isor ase koikena manukhan ke bujabole bisi asurit kamkhan kurise. Tai pani uporte beraise, aru bisi dangor hawa pani ke rukhaidise. Tai bemar manukhanke bhal kurise aru junkhan laga gao-te bia-atma ghusikena thakise utukhan ke churaidise. Tai morija-a manu ke jinda kuridise, aru pasta ruti aru duita mas loikena panch hazar upor manukhan ke khilaise.

![](https://cdn.door43.org/obs/jpg/360px/obs-en-49-03.jpg)

Jisu bisi bhal shikai dia manu thakise. Tai ki hikaise, sob thik thakise. Tai ki hikaidise, manukhan pora itukhan koribo lage, kilekoile tai Isor laga Chokora ase. Ekta kotha ineka ase: tai hikaise, apuni nijorke kineka morom kure, itu nisina he dusra manukhan ke bi ineka he morom kuribi.

![](https://cdn.door43.org/obs/jpg/360px/obs-en-49-04.jpg)

Aru tai hikaise, Isorke sob pora bisi morom kuribi, apuni laga dhon sampoti pura bi bisi.

![](https://cdn.door43.org/obs/jpg/360px/obs-en-49-05.jpg)

Jisu itu bi hikaise, itu prithibi te dhon sampoti bisi thaka pora toh, Isor laga rajyo te ja-a he bhal ase. Isor pora apunike apuni laga pap pora roikha kuribo lage, ineka hoile he apuni tai laga rajyo te jabole paribo.

![](https://cdn.door43.org/obs/jpg/360px/obs-en-49-06.jpg)

Jisu koise kunba manukhan tai ke sonman kuribo. Isor pora utu manu khan ke roikha kuribo. Hoilebi, dusra kunbakhan tai ke sonman nakoribo. Tai koise, kunbakhan bhal mati nisina ase, kilekoile taikhan Jisu laga susaamachar ke biswas kurise, aru Isor taikhan ke roikha kure. Hoilebi dusra kunbakhan rasta upor laga tan mati nisina ase. Isor kotha rasta uporte bijon gira nisina ase, hoilebi ta-te ekubi na-ulai. Itu manukhan Isor laga ki kotha ase, itu mana kurise. Taikhan Isor laga rajyo te jabole nijor pora rasta bon kurise.

![](https://cdn.door43.org/obs/jpg/360px/obs-en-49-07.jpg)

Jisu hikaise Isor papi manukhan ke bisi morom kure. Isor taikhan ke maph kurikena tai nijor laga bacha nisina banabole mon ase.

![](https://cdn.door43.org/obs/jpg/360px/obs-en-49-08.jpg)

Aru Jisu hikaise, Isor pap ke bisi ghin kure. Adam aru Eve pap kurise, itu nimite taikhan laga khandankhan sob pap kurise. Itu prithibi te sob manukhan pap kurise aru Isor pora bisi dhur te jai jaise. Sob manu Isor laga dushman ase.

![](https://cdn.door43.org/obs/jpg/360px/obs-en-49-09.jpg)

Hoilebi Isor itu prithibi laga manukhan ke ineka morom kurise: tai laga khali ekta chokora thakake di dise, kilekoile junkhan Isor ke biswas kuribo, taikhan ke Isor pora sajai nadibo. Hoilebi, taikhan hodae-hodae nimite Isor logote thakijabo.

![](https://cdn.door43.org/obs/jpg/360px/obs-en-49-10.jpg)

Apuni moribole lage, kilekoile apuni pap kurise. Isor apuni uporte ghusa korile thik asile, hoilebi tai Jisu uporte he ghusa kurise. Tai Jisu ke sajai dikena krus te moribole dise.

![](https://cdn.door43.org/obs/jpg/360px/obs-en-49-11.jpg)

Jisu ekubi pap kuranai, hoilebi tai Isor laga sajai bukhibole manise. Tai moribole monjur hoise. Itu nimite, Jisu he sob pora bhal bolidan ase jun pora sob manu laga pap itu prithibi pora hataidibo. Jisu tai nijor ke Isor logote bolidan kurise, aru Isor pora sob pap, aru bisi bia papkhan maph kuridise.

![](https://cdn.door43.org/obs/jpg/360px/obs-en-49-12.jpg)

Apuni bisi bhal kamkhan korilebi, Isor apuni ke itukhan pora nabachabo. Amikhan tai logote sathi nisina milibole naparibo. Hoilebi, Jisu he Isor laga Chokora ase, tai krus te apuni laga bodli te morise, aru Isor pora tai ke arubi jinda kuridise, ineka apuni biswas korile, Isor pora apuni laga pap maph kuridibo.

![](https://cdn.door43.org/obs/jpg/360px/obs-en-49-13.jpg)

Kun manukhan Jisu ke biswas kore aru tai ke taikhan laga Malik ase koikena sonman kure, Isor tai ke roikha kuriloi. Hoilebi kunkhan tai ke biswas nakore, Isor taikhan ke nabachabo. Ekjon manu dhun thaka hobo pare, bisi gorib hobo pare, mota aru maiki hobo pare, bura aru buri hobo pare, jun jagate hobo pare. Isor apunike morom kure aru tai apuni ke Jisu ke biswas kuribo dibole mon ase, ineka hoile tai apuni laga sathi nisina hobo.

![](https://cdn.door43.org/obs/jpg/360px/obs-en-49-14.jpg)

Jisu apuni ke mati ase, tai uporte biswas kuribole aru baptisma lobole. Apuni Jisu he Masiha ase, Isor laga Chokora ase koikena biswas ase na nai? Apuni nijor ke papimanu ase aru Isor pora apunike sajai dibole lage biswas kure na nai? Jisu krus te apuni laga pap hatai dibole crus te morise koikena biswas ase na nae?

![](https://cdn.door43.org/obs/jpg/360px/obs-en-49-15.jpg)

Apuni Jisuke biswas kure aru apuni nimite tai ki kurise itu uporte biswas ase koile, apuni ekta Khristan ase! Saitan tai laga andhar thaka rajyo pora apuni ke cholabole naparibo. Isor he apuni ke cholai ase, tai laga ujala thaka rajyo pora. Apuni poila juntu papkhan kuri thakise, utukhan pora Isor apunike rukhaise. Tai pora apuni ke ekta notun aru thik thakibole rasta dise.

![](https://cdn.door43.org/obs/jpg/360px/obs-en-49-16.jpg)

Jodi apuni Khristan ase koile Isor pora apuni laga papkhan maph koridise, aru itu sob Jisu pora ki kurise itu nimite he parise. Itia Isor apuni ke tai laga bisi karibi sathi ase aru dusman nohoe ineka bhabi ase.

![](https://cdn.door43.org/obs/jpg/360px/obs-en-49-17.jpg)

Jodi apuni Isor laga sathi ase aru Jisu, jun he Malik ase, tai laga sevak ase koile, Jisu pora apuni ke ki hikabo, apuni itu he koribo. Apuni ekta Khristan ase, hoilebi saitan apuni ke pap kuribo dibole bisi porikha kuribo. Hoilebi Isor tai ki kuribo koise itu tai kurithake. Tai koise apuni laga pap nimite maph mangi le, tai apuni ke maph kuribo koise. Aru tai apuni ke pap logote lorai kuribole shakti dibo.

![](https://cdn.door43.org/obs/jpg/360px/obs-en-49-18.jpg)

Isor apuni ke prathna kuribi aru tai laga kotha puribi koiase. Aru apunike dusra Khristan manukhan logote milikena tai ke aradhana kuribi koi ase. Apuni nimite Jisu pora ki kuridise utukhan dusra manukhan ke kobi koiase. Apuni itu khan korile, apuni tai laga bisi bhal sathi hobo koiase.

*A Bible story from: Romans 3:21-26, 5:1-11; John 3:16; Mark 16:16; Colossians 1:13-14; 2 Corinthians 5:17-21; 1 John 1:5-10*

## 50. Jisu Wapas Ahibo

https://openbiblestories.org/l/nag/story-50/

![](https://cdn.door43.org/obs/jpg/360px/obs-en-50-01.jpg)

Dui-hazar sal nisina pora, prithibi te bisi manukhan Jisu, jun Masiha ase, tai laga bhal khobor hunikena ahise. Aru tai laga girja dangor hoikena ahise. Jisu kosom dise, itu prithibi khotom hua homoite tai wapas ahibo. Tai itia tok ahanai, hoilebi tai laga kosom tai pura kuribo.

![](https://cdn.door43.org/obs/jpg/360px/obs-en-50-02.jpg)

Amikhan Jisu wapas ahibole rukha homoi itu-te, Isor amikhan ke sapha thakibole aru tai laga nam ke adar dikena thakibo dibole mon ase. Amikhan ke tai laga rajyo laga kotha dusra manukhan ke kobo dibole mon ase. Jetia Jisu itu prithibi te asile tai koise: “Ami laga chelakhan pora Isor laga rajyo laga susamachar sob manukhan ke aru sob jagate jaikena kobo, itu pichete he sob ses hoi jabo.”

![](https://cdn.door43.org/obs/jpg/360px/obs-en-50-03.jpg)

Manu-laga-dolkhan bisi itia tok Jisu laga kotha nahunikena ase. Tai sorgo te wapas naja age-te, Jisu pora Khristankhan ke, tai laga susamachar junkhan aru nahunikena ase, taikhan logote jaikena kobi koise. Tai koise, “Jaikena sob manu-laga-dolkhan ke amilaga chela banabi!” Aru itubi koise, “Dhankhan sob pakise aru dhan katibole homoi hoise!”

![](https://cdn.door43.org/obs/jpg/360px/obs-en-50-04.jpg)

Aru Jisu pora koise: “Ekjon manu laga noukar toh tai laga malik pora dangor nohoe. Itu prithibi laga dangor manukhan amike ghin kurise, aru ami nimite taikhan pora apunikhan ke bi bisi dukh dibo aru morai dibo. Itu prithibi te apunikhan bisi dukh kuribo, hoilebi, mon dangor kuribi kilekoile ami saitan ke haraidise, jun itu prithibi te raj kuriase. Jodi apunikhan biswas dhurikena thakibo parise koile, Isor apunikhan ke roikha kuribo!”

![](https://cdn.door43.org/obs/jpg/360px/obs-en-50-05.jpg)

Jisu tai laga chelakhan ke ekta kahani koikena itu prithibi khotom hoijaile manukhan ke ki hobo itu bujaidise. Tai koise: “Ekta manu tai laga kheti te bhal bijonkhan lagaisile. Tai ghumai thaka homoite, tai laga dushman ahikena kata-ghas laga bijonkhan phelaidise aru jai jaise.”

![](https://cdn.door43.org/obs/jpg/360px/obs-en-50-06.jpg)

“Jitia bijon pora ghas pata ulaise, utu manu laga noukarkhan pora koise, ‘Malik apuni bhal bijonkhan he phelaise. Tinihoile kata thaka laga ghas kineka ulaise?’ Tai jawab dise, ‘Khali ami laga dusmankhan he itukhan halidibole mon hobo. Ami laga ekjon dusman pora ahikena ineka kurise.”

![](https://cdn.door43.org/obs/jpg/360px/obs-en-50-07.jpg)

“Tai laga noukarkhan pora koise: ‘Amikhan jaikena kata-ghaskhan phelaidibo?’ Malik pora koise, ‘Nai. Apunikhan itia pora he kata ghas phelaidise koile kunba dhankhan bi ulaijabo. Dhan katibole homoi tok rukhibi. Tetia poila kata-ghas ke ulaikena, eki logote bandikena jolaidibo. Hoilebi itu pichete, dhankhan ke joma korikena ami laga dhan-ghorte loijabo.”

![](https://cdn.door43.org/obs/jpg/360px/obs-en-50-08.jpg)

Tae laga chelakhan itu kahani laga motlob bujanai, itu nimite taekhan Jisu itu laga motlob koidibi hutise. Jisu koise: “Jun manu bhal bijonkhan lagaise tai Masiha ase. Kheti laga motlob itu prithibi ase. Bhal bijon laga motlob biswasi kora manukhan ase jun khan Isor laga rajyo te thake.

![](https://cdn.door43.org/obs/jpg/360px/obs-en-50-09.jpg)

“Kata-ghas-khan motlob ase utu manu junkhan saitan laga kam kuri ase, jun he Dusto-tu ase. Manu laga dusman jun kata-ghas laga bijon halidise, tai satan ase. Dhan katibole homoi laga motlob ase itu prithibi khotom hobole homoi, aru kam-kura-manukhan laga motlob ase sorgo duthkhan.”

![](https://cdn.door43.org/obs/jpg/360px/obs-en-50-10.jpg)

“Jetia prithibi khotom hobo, tetia duthkhan pora jun manukhan saitan laga ase taikhan ke joma kuribo. Aru taikhanke bandikena bisi gorom thaka juite phelaidibo. Ta-te taikhan bisi dukh kuribo aru taikhan laga dath pisi-kena kandibo. Hoilebi junkhan dharmik ase, kunkhan Jisu laga piche-piche ahise, taikhan Pormeswar Baba laga rajyo te suraj nisina ujala hoikena thakibo.”

![](https://cdn.door43.org/obs/jpg/360px/obs-en-50-11.jpg)

Aru Jisu koise tai itu prithibi khotom nahoa age-te wapas ahibo. Tai ke jineka sorgo te uthailoise, thik ineka pora he tai ekdin sorgo pora ahibo. Tai laga asol gao thakikena ahibo aru tai akash phine pora badal uporte bohikena ahibo. Jetia Jisu wapas ahibo, tetia Khristan manu, junkhan morise taikhan poila jinda hoijabo aru taikhan akash te lok kuribo.

![](https://cdn.door43.org/obs/jpg/360px/obs-en-50-12.jpg)

Tetia Khristan manu kunkhan jinda ase, taikhan hawa te uthikena jun Kristankhan morikena uthise, taikhan ke lok kuribo. Taikhan sob Jisu logote thakibo. Itu pichete Jisu tailaga manukhan logote thaki jabo. Taikhan Isor logote milikena shanti te hodae nimite thakibo.

![](https://cdn.door43.org/obs/jpg/360px/obs-en-50-13.jpg)

Jisu kosom dise kunkhan pura tai ke biswas kuribo tai taikhan ke ekta taj-topi dibo. Taikhan Isor logote milikena sob uporte raj kuribo. Taikhan shanti te thakibo.

![](https://cdn.door43.org/obs/jpg/360px/obs-en-50-14.jpg)

Hoilebi kunkhan Jisu ke biswas nakoribo Isor pora taekhan uporte phaisla koribo. Aru taikhan ke norok te phelaidibo. Ta-te taikhan dat pisi-kandibo aru ketia bi khotom nahoa laga dukh pabo. Ekta jui juntu ketiabi julia khotom nohobo itu pora taikhan ke jolai thakibo aru kamura-kirakhan juntu ketiabi khotom nohoe utu pora narukhikena taikhan laga goa khai thakibo.

![](https://cdn.door43.org/obs/jpg/360px/obs-en-50-15.jpg)

Jetia Jisu wapas ahibo, tai saitan laga rajyo ke pura khotom kuridibo. Tai saitan ke norok te phelaidibo. Aru saitan ta-te hodae-hodae nimite jolithakibo, aru tai logote sob thakibo junkhan tai laga kotha manikena thakisile.

![](https://cdn.door43.org/obs/jpg/360px/obs-en-50-16.jpg)

Kilemane Adam aru Eve pora Isor kotha mananai, itu nimite prithibi te pap ahise. Isor pora ekta shrap dise aru prithibi ke khotom kuribole bhabi loise. Hoilebi Isor pora arubi ekta notun sorgo aru notun prithibi banabo juntu sob pora bisi bhal hobo.

![](https://cdn.door43.org/obs/jpg/360px/obs-en-50-17.jpg)

Jisu aru tai laga manukhan notun prithibi te thakibo aru tai hodae-hodae nimite sob laga uporte raj kuribo. Tai laga manukhan laga chuku pani musidibo. Ta-te kunbi dukh napabo aru mon dukh nakoribo. Taikhan nakandibo. Bimar nahobo aru namoribo. Aru ta-te bia eku nathakibo. Jisu laga rajyo te shanti thakibo aru tai ki thik ase itu he phaisla kuribo. Aru tai tailaga manukhan logote hodae-hodae nimite thakibo.

*A Bible story from: Matthew 24:14; 28:18; John 15:20, 16:33; Revelation 2:10; Matthew 13:24-30, 36-42; 1 Thessalonians 4:13-5:11; James 1:12; Matthew 22:13; Revelation 20:10, 21:1-22:21*