# unfoldingWord Open Bible Stories — Pathani

- Language code: `ps-x-pathani`
- Canonical page: https://openbiblestories.org/l/ps-x-pathani/
- Stories in this file: 50 of 50
- Published by: OBS-TLF
- Last release: 2026-06-26
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Pathani translation; it is not a translation of the whole Bible.

## 1. परमेश्वरो संसार बनाट्रि

https://openbiblestories.org/l/ps-x-pathani/story-1/

![](https://cdn.door43.org/obs/jpg/360px/obs-en-01-01.jpg)

ओ ध्याँए ठ्रो मुन्ड़ँरिग बेच़ि परमेश्वरे बत्‍तै चीज़तु रचना लत्ते। दोई त्रुई ध्याड़ारिंङ संसार ए उई दोऊ अन्दरेग ची-ची तोई बत्तेतु रचना लत्ते। अपेल परमेश्वरे पृथ्वी बनाकते धोपेल पृथ्‍वी हयांर ए सलजी तोई, छेई कुचे एन्तचे परमेश्वरे दोऊ अन्दरेग छल्ले चीज़ बनाशी मतरे। पर परमेश्वरो रुह तिऊ टोख्ठे किरज़ा तोई।

![](https://cdn.door43.org/obs/jpg/360px/obs-en-01-02.jpg)

दियू थल परमेश्वरै कुड़ी, “छ़ाङि शु!” दंङ छ़ांङि शुचै इलि। परमेश्वरै खणी छ़ाङि रुठे तो दांङ दोबि ‘ङींरा’ कुड़ि। दांङ परमेश्वरे ङिराबि हयांर रंग शता लरि, दोबि दोई ‘ञोंखोल’ कुड़ि। परमश्वरे बत्तेधिर बनाट्रिम मुन्डा झा ए छांङि बनाके केते।

![](https://cdn.door43.org/obs/jpg/360px/obs-en-01-03.jpg)

संसारो रचनो ङिंराकी थल परमेश्वरे कुड़ि, “तिऊ टोख्ठे इच़ा अन्तर शू।” दांङ इचा अंतर शुचे इलि। परमेश्वरै दु अन्तरबी ‘सर्ग’ कुड़ि।

![](https://cdn.door43.org/obs/jpg/360px/obs-en-01-04.jpg)

संसारो रचना लेईमी शुमूमेतिंग परमेश्वरे कुड़ि, “ती बत्ते इच़ा ठाड़िरिंग ठ्रोकन शुबि जुस दांङ कारची ज़मीन तांङफि जुस।” दोइ कारची ज़मीनबी ‘पृथ्वी’ कुड़ि दांङ तीबि ‘समंदर’ कुड़ि। परमेश्वरै खणीं कि चि दोई बणाकते दु रूठे तोई।

![](https://cdn.door43.org/obs/jpg/360px/obs-en-01-05.jpg)

दांङ परमेश्वरे कुड़ि, “पृथ्वीरिंग बत्‍ते पाटि ठ्रो बुट ए शांङ लेपि जुस।” दांङ ध्याएँ शुई। परमेश्वरे खणीं चि दोई बणाकते दु रुठे तोई।

![](https://cdn.door43.org/obs/jpg/360px/obs-en-01-06.jpg)

संसारो रचना लेईमी पीमेतिंग परमेश्वरे कुड़ि, “सरगरिंग ज्योतिरे शुबि जुस।” दांङ एके,लच़ङ ए कारज़े प्रकट शुईरे। परमेश्वरै दोतिंङ पृथ्वीरिंग छंङि रन्ड्रिम थल्ज़ी दांङ ङिरा ए ञंयोखोल, मौसम ए वर्षतु बिचांङ भेद लेईमी थल्ज़ि बनाकते। परमेश्वरे खणीं कि दोई चि बनाकते दु रूठे तो।

![](https://cdn.door43.org/obs/jpg/360px/obs-en-01-07.jpg)

संसारो रचना लेइमी ङांमेतिंग परमेश्वरे कुड़ी, “शिङि जन्तुरे तीरिंग बिंङे इलईं दांङ सरगरिंङ प्‍यारे फान्ज़ुईं।” ओ ध्याहँ ठ्रो दोई तिरिंग तैरेक्चच़ाड़ बत्ते जन्तुरे ए प्यारे बनाति। परमेश्वरै खणी कि दी रूठे तो दाङ दोतिंङ आशीष रणी।

![](https://cdn.door43.org/obs/jpg/360px/obs-en-01-08.jpg)

संसारो रचना लेइमी त्रुईमेतिंग परमेश्वरे कुड़ी, “धरतिरिंङ बांगज़ाड़ बत्‍ते पाटिऊ जानवररे शुबि जुस।” परमेश्वरै कुशी ठ्रो ए शूई। मिना जानवररै पालतू तौइरे, मिना वणों ऊई दांङ मिना धरतिरिंग रेंगेकच़ाड़ तोईरे। परमेश्वरे खणी कि दी बत्‍ते रूठे तोई।

![](https://cdn.door43.org/obs/jpg/360px/obs-en-01-09.jpg)

दांङ परमेश्वरै कुड़ी, “आतईं हेन्‍ज़ि मीबि हेन्दु रुपरिंग ए हेन्‍दू बराबर बणापोईं। दोई पृथ्‍वी ए बत्‍ते जानवरतू ठोख्‍टे राज लोतो।”

![](https://cdn.door43.org/obs/jpg/360px/obs-en-01-10.jpg)

परमेश्वरे शौ लेप्चे दोऊ मी बणाकि केरि दांङ दोउ अन्दरेग जीवनो साग्ग पींङे केरि। दी मीज़ू मिन आदम तोई। परमेश्वरे आदममबि बांगज़िरिंग इचा मोट्टे बगीचा बणाकते दांङ दोऊ टेहल लेइमी थल्ज़ी आदममबि दोर केची केरि।

![](https://cdn.door43.org/obs/jpg/360px/obs-en-01-11.jpg)

दु बगीचौ बिचांग परमेश्वरै जुट खास बुट पुंङे केरि- जीवनो बुट ए रुठे ए माज़ीउ ज्ञानो बुट। परमेश्वरै आदममबी कुड़ी कि केई दु बगीचांङ तोचि रुठे ए माज़ी ज्ञानो बुटो अलावा ऊई बत्‍ते बुटतु फल ज़ेइतरफोन। अगर केई दु रुठे ए माजिऊ ज्ञानो बुटो फल ज़रिना सेत क सीए योन।

![](https://cdn.door43.org/obs/jpg/360px/obs-en-01-12.jpg)

दांङ परमेश्वरे कुड़ी, “गंङमिबी इचा बंङज़ि ठीक मा।” पर अरला जानवर आदमो साथी शुबि मरतिरे।

![](https://cdn.door43.org/obs/jpg/360px/obs-en-01-13.jpg)

दिऊथल्ज़ि परमेश्वरे आदममबि सरसुत इमरिंग च़रचे केरि। दांङ परमेश्वरे आदमो धुन्ना इच़ा रिश्पा लेप्चे मेच़मीउ रचना लरि, दांङ दोबि आदमो कचंग लेन्ज़ा हाति।

![](https://cdn.door43.org/obs/jpg/360px/obs-en-01-14.jpg)

अपेल आदमे दोबि तांङरि दांङ दोई कुड़ी, “दि त ग्यू ठ्रो तो! दांङ परमेश्वरे कुड़ि दि ‘मेच़मी’ कहलापोतो, छेईकुचे दि गांङमिऊ दोरच़ि बणाशी शु।” दि वजहज़ि गांङमि एनो या बाकुतिंग केचे केयोतो दांङ एनो मेच़रंङ इच्च़ा शुचे योतो।

![](https://cdn.door43.org/obs/jpg/360px/obs-en-01-15.jpg)

परमेश्वरे गंगमी ए मेच़मीबि एनो रुपरिंग बनाकतु। परमेश्वरे दोकुतिंग आशीष रेएँ कुड़ी, “मास्‍स काटुरे ए पौत्ररै-परपौत्ररे जेपी ले पृथ्‍वी पिंङे चरतुशी!” दांङ संसारो रचना लेइमी त्रुईमेतिंग परमेश्वरै खणीं चिधिर दोई बनाकते दोरे बत्‍ते रुठे तोइरे, दोरे बत्‍ते खएँ परमेश्वर राजि शुई।

![](https://cdn.door43.org/obs/jpg/360px/obs-en-01-16.jpg)

अपेल ङिस्मी ध्याड़ा अन्जा धोपेल चिधिर परमेश्वरे लज़ि लेकि तोई दोई दु बत्‍ते कम्मरे योचे केरि। परमेश्वरे ङिजमेतिंगकि ध्‍याड़ाबि आशीष रेईं दांङ दु ध्‍याड़ाबि पवित्र कुड़ी, छेई कुचे दोथिंग दोई संसारंङ तोचि बत्‍ते चीज़तु रचना लेई योचे केते। ओ ध्यांह ठ्रो परमेश्वरे संसार ए आई चिधिर दोरिंङ तो दु बत्ते बनाकते।

*बाइबलो किताबंज़ी लेप्सी कहानी उत्ति अध्‍याय 1-2*

## 2. पापो संसारंङ अपि।

https://openbiblestories.org/l/ps-x-pathani/story-2/

![](https://cdn.door43.org/obs/jpg/360px/obs-en-02-01.jpg)

आदम ए दोऊ मेच़ा सल्‍ठे बगीचांङ राजी- खुशी बंङज़ि लेकी तोइकू। दि बगीचा परमेश्वरे दोकुतु थल्ज़ि बनाकते। दोकु बिचांङ अच़िला खमज़े लेच़ि मतोई, तांला दोकुई शेद मचेंच़ि तोई, छेई कुचे धोपेल संसारंङ पाप मतोई। दोकु हमेशा बगीचांङ जोच़ा तोइकु, परमेश्वरंग गप्‍पा लज़ा तोइकू।

![](https://cdn.door43.org/obs/jpg/360px/obs-en-02-02.jpg)

पर दु बगीचंग इच़ा ओमड्रा तोइ दु मास्‍स चलाक तोई। दोई दु मेच़मिबि रुक्ति, “केकुतिंग परमेश्वरै हेल्‍ले दु बगीचौ आऊँ ल बुटो फल ज़ेईरिंग मना लत्तेआ?”

![](https://cdn.door43.org/obs/jpg/360px/obs-en-02-03.jpg)

दु मेच़मी ज़बाब रड़िं, “परमेश्वरै कुत्‍ते कि रुठे ए माज़ी ज्ञानौ बुठबि केचे उई आँऊ ल बुठौ फल ज़ेई तरपोशी। परमेश्वरे ङेकुतांग कुत्ते कि अगर केकुई दु बुठो फल ज़रिशी या पच्छ ल रणिशी सेत, केकू सी योशी।”

![](https://cdn.door43.org/obs/jpg/360px/obs-en-02-04.jpg)

दु ओमड्रे मेच़मीबि जवाब रंड़ी, “दी हफसि शू! केकू मसियोशी। परमेश्वरबि एनबी पता तो कि अपेल ए केकूई दु फल ज़ोशी,केकू परमेश्वरौ बराबर शूचि योशी दांङ केकूतिंग रुठे ए माज़ीऊ समझ अच़ा अपतो।”

![](https://cdn.door43.org/obs/jpg/360px/obs-en-02-05.jpg)

दु मेच़मी खणीं कि दु बुटो फल ज़ेईरिंग स्वादिष्ट ए खन्ड्रिरिंग रूठे तोई। दु मेच़मी ल समझदार बणेक्पिमि तरे, दांङ दोई दु फल टोके ज़ेए च़रती। दोइ एनो गक्साबि ला आंऊ दु दोरांग साथे तोई दोबि दु फल रणीं दांग दोई ला ज़ेए च़रति।

![](https://cdn.door43.org/obs/jpg/360px/obs-en-02-06.jpg)

धोपेल ए, दोकुतु टीरा अलसा इलि, दांङ धल्‍ले दोकुतिंग ङेसरी कि दोकु नांङटे तोतोकू। दोकुई लब्त्ते ठ्रोक्कन ले पेन्जे दोऊ खाम्ज़े बनाकि एनकु फुक कपट्रिमि कोशिश लरिकु।

![](https://cdn.door43.org/obs/jpg/360px/obs-en-02-07.jpg)

दाङ गांग्मी ए दोऊ मेच़े बगीचांग परमेश्वरो जोईमि सग्‍ग थज़िकु। दोकु झुल्ला परमेश्वरांग ब्याके इलिकू। दांङ परमेश्वरे गांग्मिबि हाग रणीं, “क आँर तोतोन?” आदमै जवाब रन्‍दौ, “गे बगीचंग जौतर केनो चाला थश्‍तेग, दांङ गे वैए इन्देग, छेई कुचे गे नंग्‍टे तोइग। दिऊ थल्ज़ि गे ब्‍याके इन्‍देग।”

![](https://cdn.door43.org/obs/jpg/360px/obs-en-02-08.jpg)

दाङ परमेश्वरै रुकतो, “कनिंग आच़ि कन्जतो कि क नंग्‍टे तोतोन? केकुई चि दु फल ज़त्‍तेशिया आंऊ दोबि ज़ेईमि थल्ज़ि गे कनिंग मना लत्तेग?” गंग्मी जवाब रन्‍दो, “केई गिबि आऊं मेच़मि रांशि तत्तन दोईए गिबि दु फल ज़ेईरिंग रन्‍दे।” दाङ परमेश्वरे मेच़मिबि रुक्ति, “केई दी चि लरिना?” दाङ मेचमी कुत्‍तौ, “ओमड्रे गिबि ठगेकतो।”

![](https://cdn.door43.org/obs/jpg/360px/obs-en-02-09.jpg)

परमेश्वरे ओमड्राबि कुड़ी, “क शापित शुना! क केनो खौगटु बले जोओन आई शौ यग्पोन। क ए दि मेच़मी केंगुतु बिचांग रौष लोशी, कनु ए दोऊ कटुच़ि ल एनतु बिचांग रोश लोरे। मेच़मीउ वंशज़ि कनु पुन्ज़ा ज़िरेकपोरे, दांङ केई दोतु थूरि च़िकपोन।”

![](https://cdn.door43.org/obs/jpg/360px/obs-en-02-10.jpg)

दाङ परमेश्वरे मेच़मिबि कुड़ी, “गे कनु लिक्पि मास्स बारदो च़टे लोगा। केई केनो गाक्सो लालसा लोन, दांग दोई कनु टोख्ठे राज लोतो।”

![](https://cdn.door43.org/obs/jpg/360px/obs-en-02-11.jpg)

परमेश्वरे गांग्मिरंग कुड़ी, “केई ग्यु गप्‍पा ममनेकि केनो मेच़ो रेड्रिना। दिऊ थल्ज़ि धरति शापित शुचा, कनिंग अन्‍न उगाच़िम थल्ज़ि मस्‍स बरदौ लज़ि लेपोतो। द क सी योन, कनु फुक शौराङ च्‍वासा योतो।” दु गंग्मि ऐनो मेच़ौ मिन हव्‍वा केरि, छोऊ मतलब शू “जीवन रन्ड्राड़”, छेई कुचे दु बत्‍ते जाततू “या” शोतो। दांग परमेश्वरे आदम ए हव्‍वाबि जानवरो खलो बनेकि खमज़े पहनाति।

![](https://cdn.door43.org/obs/jpg/360px/obs-en-02-12.jpg)

दांङ परमेश्वरै कुत्तो, “दा रुठे माज़ी बत्‍ते ङेबे मीरे हेन्‍दंग चिके इन्‍दौरे, दोऊ थल्ज़ि दा दु मितिंग जीवनो बुठो फल ज़ेई रन्‍ड्रि जुंशी मशू। ध्यांह शुबि मेस कि दु फल ज़ेए दोरे हमेशो थल्ज़ि शिंङि केशा योरे।” दौउ थलज़ी आदम ए हव्‍वाबि परमेश्वरै बगीचंगज़ी हुन्जे च़रचतो। परमेश्वरै दु बगीचो तोंखा इबिमि पितांगरिंग शक्तिशाली स्वर्गो दूततिंग पेहरा रनड्रिरिंग केचि केतु ताकि अच़िला दु जीवनो बुठो फल ज़ेई मरथुरे।

*बाइबलो किताबंज़ी लेपसी कहानी उत्पत्ति अध्‍याय - 3*

## 3. डढ़ो अपि

https://openbiblestories.org/l/ps-x-pathani/story-3/

![](https://cdn.door43.org/obs/jpg/360px/obs-en-03-01.jpg)

मस्‍स ध्‍याड़ो थल, संसारंग मास्‍स मीरे बगज़तरै। दोरे मस्‍स ग्यशी ए बिगड़ेकि तोइरे। दि धोंण माज़ी तोइ कि परमेश्वरै दि फैसला लरि कि इच़ा मोट्टे डाढ़ हन्‍जे पूरे संसारो नाश लेई क्योग।

![](https://cdn.door43.org/obs/jpg/360px/obs-en-03-02.jpg)

पर परमेश्वर नूहरंग खुश तोई। दु इचा धर्मी मी तोई, अरि दुष्ट मीतु बिचांग बांगज़ि तोई। परमेश्वरै नूहबि कन्जतु कि दौई इच़ा मस्‍स मोट्टे डढ़ हापिमी ततु। दियु वजह ज़ी, दोई नूहबि इच़ा मोट्टे किश्‍ती बणाचीरिंग कुड़ी।

![](https://cdn.door43.org/obs/jpg/360px/obs-en-03-03.jpg)

परमेश्वरै नूहबि इच़ा समुन्द्रो जहाज़ बनाट्रिरिंग कुत्तो अऊं लगभग 140 मीटर लमै, 23मीटर चौड़ा ए 13.5 मीटर ऊँचा शोतो। नूहबि दु सिंगज़ू बणाचीमी तोइ दांङ दोरिंग शुमु तल,मस्‍स कमरारे, इच़ा लंङ ए इच़ा कल्ल बणाट्रिमी तौइ। दु समुन्द्रो जहाज़े नूह ए दौउ टवर ए धरतीउ बत्‍ते पाटी जानवरतिंग दू डाढ़रिंगज़ी सोठेकि तोओतो।

![](https://cdn.door43.org/obs/jpg/360px/obs-en-03-04.jpg)

नूहज़ी परमेश्वरो गप्पा मनेकति। दु ए दोउ शुमु योरेची ध्वाहंए ठ्रो जहाज़ बनातीरे छना परमेश्वरै कुत्‍ते। छेई कुच्‍चे दु जहाज़ मस्‍स मोड़े तोई दाङ दोबि बणाचीरिंग मस्‍स वर्ष लेति। नूहज़ी मीतिंग अन्ज़ाड़ डाढ़ो पाटि कन्‍जे केते, दोई दोतिंग परमेश्वरोहाखा किरज़ीरिंग कुड़ी, पर दौच़ि दौऊ टोखठे विश्वास मलरिरे।

![](https://cdn.door43.org/obs/jpg/360px/obs-en-03-05.jpg)

परमेश्वरे नूह ए दौउ टवरबि एनतिंग ए जानवरतु थलज़ी ला बागत ठ्रोक्कन लेइमी आदेश रणी। अपेल बत्‍तेधिर तैयार शुत्ते, दांङ परमेश्वरे नूहबि कुड़ी कि द दोऊ, दोउ मेचो, दोउ शुमू यो रेतु ए दोतू मेच़ातु–बत्‍ते मिलाके रै मीतु किश्‍तीतिंग इबिमि मोक्का शु।

![](https://cdn.door43.org/obs/jpg/360px/obs-en-03-06.jpg)

परमेश्वरै बत्‍ते जानवर ए प्‍यारैतू गांग्मी ए मेच़मिबि नूहज़ु कचंग चरच़तो ताकि दौरे दु जहाज़ांग इबि तरफोरे दांङ डाढ़े बचेके बंगज़ोरे। परमेश्वरै ध्‍याएँ ठ्रो बत्‍ते पाटीउ जानवरतू ङिज गंगमी ए ङिज मेच़मितिंग च़रचतु ताकि दोरे बलिऊ थल्ज़ि इस्तेमाल शुबि तरफोरे। अपेल दौरे बत्‍ते जहाज़ांग पिड़िरे दांङ परमेश्‍वरै एने दू जहाजो पितांग बंद ले केरि।

![](https://cdn.door43.org/obs/jpg/360px/obs-en-03-07.jpg)

दांङ सन्दाड़ शुबि च़ुक्सिरि आई सन्दाड़ शुआ लरि, शुआ लरि। लगातार निन्ज़ा ध्याड़ा ए निन्ज़ा दिन ए रात सनदाड लेकिए तोइ। धरतीरिंगज़ि ल ती ब्रोग-ब्रोग हुच़ि लेकि तोई। संसारो बत्‍ते चीज़रै, देर तची कि रंगी रंगी गो रे ल तीरिंग डूमजी इलिरे ।

![](https://cdn.door43.org/obs/jpg/360px/obs-en-03-08.jpg)

कारची धरतिरिंग तोचि बत्‍तेधिर सीए इलिरे, जहाज़ो अन्‍दरेग तोची मी ए जानवररै बत्‍ते बचेकि तोइरे। दु जहाज़ तीरिंग तैरेक्पा लरि आई जहाज़ो तोंगकि बत्ते चीज़तिंग डुबेक्पिरिंगज़ि बचाके तरि।

![](https://cdn.door43.org/obs/jpg/360px/obs-en-03-09.jpg)

सन्दाड़ चसा थल ङा ला तचे दु जहाज़ तीरिंग तैरेक्पि लेकी तोइ, दांङ धोपेल ती ल घटेक्पी लेकि तोइ। दांङ इचा झा दु जहाज़ गोज़ु मुकरिंग चसा इलि, पर संसार अतला तीउ अन्‍दरेगे तोइ। शुमु लाउ थल, गोज़ु मुक ताङफि लेकि तोई ।

![](https://cdn.door43.org/obs/jpg/360px/obs-en-03-10.jpg)

दांङ उइ निन्ज़ा ध्‍याड़ो थल, नूहज़ी इचा कगबि धाक्कते दि खन्ड्रि च़रचतो कि ती कारती या मकारती। दु कग कारची ठाढ़ि पैट्रिरिंग दैखा नौखा फन्ज़ी लेकी तोइ, पर दौवि आँरला कारची ठाढ़ि मखोग्सरि।

![](https://cdn.door43.org/obs/jpg/360px/obs-en-03-11.jpg)

दांङ दोऊ थल नूहजि इचा कबूतरबि खन्ड्रि धाक्तिका च़रती। पर दौबि कारची धरति मखोग्सवे, दु यच़ा नूहज़ु कचांग अच़ा अति। इच़ा हफ्‍तौ थल दौइ दु कबूतरबि ओल्ला च़रति दांङ दु ऐनो चोंचांग जैतूनो डाढी कुरच़ा याच़ा अति। ती थोडे शुबि लेकी तोई, पौधारे ओला पूंङमि लेकी तोइ।

![](https://cdn.door43.org/obs/jpg/360px/obs-en-03-12.jpg)

नूहजी इच़ा हफ्‍ता रुमज़ा शुमु फेरा दु कबूतरिबि ओला धाक्तिका च़रचतु, दि फेरा दोबि बंगज़ीरिंग ठाढ़ि खोग्सते दाङ दु याच़ा मादू। ती कारपि लेकी तोइ।

![](https://cdn.door43.org/obs/jpg/360px/obs-en-03-13.jpg)

जुट लाज़ु थल परमेश्वरे नूहराङ कुड़ि, “द क ए काँ टवर आई दु बत्‍ते जानवररै जहाज़ांगज़ि हुन्‍ज़ा अतईं। मस्‍स कटुरै ए पोत्रा ए पडपोत्ररै हुतूशी दांङ पृथ्‍वीरिंग बिङे इलईं।” दांङ नूह ए दौउ टवर जहाज़गंजि धाक्कते अच़ा अतिरै।

![](https://cdn.door43.org/obs/jpg/360px/obs-en-03-14.jpg)

नूहज़ु किश्तिरिंगज़ि धाक्तिका आन्जे थल्ल, दोई इच़ा बेदी बनाकतो ए बलिऊ जोगे हर किस्मो जानवरतु बिचांग मिनातिंग शिन्जे बलि चढ़ाति। परमेश्वर दु बलिज़ि खुश शुचा दांङ नुह ए दोऊ टावरबि आशीष रणीं।

![](https://cdn.door43.org/obs/jpg/360px/obs-en-03-15.jpg)

परमेश्‍वरै कुडी, “गे कसम लोग्ग कि मीतू धुन्ना लसि माज़ी कामतु थलज़ी गे अपेला धरतिबि शाप मरमोगा न डाढ़रंग संसारबि नष्‍ट लोगा, हालांकि मीरे एनतु बाडेरिंगज़िए पापी तोतोर।

![](https://cdn.door43.org/obs/jpg/360px/obs-en-03-16.jpg)

दांङ परमेश्वरै एनो वाचाओ सुनाहउ रूपरिंग इच़ा मेघधनुष बनाकते। अप्‍पेला सरगरिंग मेघधनुष तांगबोईं दांङ परमेश्वरबि हिद अपतो कि दोई चि वचन लत्ते ऊइ ध्वाँए दोऊ मीच़ि ला हिद लोरे।

*बाइबल किताबंज़ी लेपसी कहानी उत्पत्ति अध्‍याय – 6-8*

## 4. परमेश्‍वरो अब्राहमरंग साथे वायदा

https://openbiblestories.org/l/ps-x-pathani/story-4/

![](https://cdn.door43.org/obs/jpg/360px/obs-en-04-01.jpg)

डाढ़ो मस्‍स वर्षो थल, संसारांग मस्‍स मीरे बंगज़ी लेकी तोइरै, दाङ दोच़ि ओला परमेश्वरो ए एनतु खिलाफ पाप लेई च़ुके केरिरे। छेई कुच्‍चे दोच़ि बत्‍तेच़ि इच़ा भाषा कुट्रा तोइरे, दांङ दोच़ी इच़ानम ठ्रोक्कन शुचे इच़ा नगर बनातिरे। छना परमेश्वरे आदेश रन्दे, दोऊ अनुसार दोरे संसारंग मफैलिक्तरे।

![](https://cdn.door43.org/obs/jpg/360px/obs-en-04-02.jpg)

दोरे मास्स फोसो च़टे तोइरे, दोतिंग छना छो शिंञमिमि तोई दु पाटि परमेश्वरो आदेश मरेजिम तरिरे। दोच़ी स्वर्ग तचे पिपमि थलज़ी मोट्टे थम्म बनाच़ि चुक्तिरे। परमेश्वरे खन्दु कि अगर दिच़ि झांए कट्ठे शुचे माजि कम्म लरिरे सेत दांग दोचि उई ल मस्स माजि कम्म लेई तरफोरे ।

![](https://cdn.door43.org/obs/jpg/360px/obs-en-04-03.jpg)

दोऊ थलज़ि परमेश्वरे दोतू भाषा बी मास्स भाषारिंग लेके च़रचतु दांग दु मीतिंग बत्ते संसारंग फेलाके च़रच़तु। आँऊ नग्गरबि दोच़ि बनाचि च़ुकेतेर दु नग्गर थले बाबेल कहलाती, दोऊ मतलब तोई “गड़बड़ी”।

![](https://cdn.door43.org/obs/jpg/360px/obs-en-04-04.jpg)

तेईया रामि सालो थल, परमेश्वरे अब्राम मिनदांग इच़ा मीरांग गप्पा लरि। परमेश्वरे दुरांग कुड़ि, “केनो देशे टावरतिगं केचा दु देशांग अच़ा इला आँऊ कनिंग कम्बोगा। गे कनिंग आशिरवाद रमोगा दांग करांग इच़ा मोढे जात बनापोग। गे कनु मिन मोढ़े लोगा। आच़ि कनिंग आशीष रमोतो गे दोबि आशीष रमोगा, आच़ि कनिंग हत्या केयोतो गे दोबि हत्या केयोग, कनु मुके संसारो बत्ते कुलच़ि आशीष खोक्पोरे।”

![](https://cdn.door43.org/obs/jpg/360px/obs-en-04-05.jpg)

दोऊ थल अब्रामे परमेश्वरो गप्पा मनेक्ति। दोई एनो बत्ते नौकररे, एनो बत्ते धन-दौलत राँग साथे मेच़ा सारै बि लेन्ज़ा कनान देशो अखा आच़ा इलि आँऊ परमेश्वरे दोबि कान्जते।

![](https://cdn.door43.org/obs/jpg/360px/obs-en-04-06.jpg)

आपेल अब्राम कनान पिचा परमेश्वरे दोबि कुड़ि, “केनो पीला तरफे खणुं। गै कनिंग दि बत्ते देश रमोग दाँग दोऊ थल्ल दिऊ टोखटे काँ बत्ते वंशो अधिकार शोतो।” दाँग अब्राम दु देशांग बसेके इलि।

![](https://cdn.door43.org/obs/jpg/360px/obs-en-04-07.jpg)

मलिकिसिदक मिनदाँग इच़ा मी तोई। दु मि परमेश्वरो पण्डित तोई। इच़ा झाड़ा अब्राम युद्ध लज़ा आपि लेकि तोई दाँग अब्राम दु पण्डित रांग दोया। मलिकिसिदके अब्राम बी आशीरवाद रन्दु दाँग कुत्तो “बत्ते बेच़ि मोड़े ग्यू परमेश्वर आँऊ स्वर्ग ए धरतिऊ मालिक शु दोई कनिंग आशीश रमोतो” अब्रामे युद्धांग डाकशी बत्ते दिरो सामि हिस्सा मलिकिसिदक बी रन्दो।

![](https://cdn.door43.org/obs/jpg/360px/obs-en-04-08.jpg)

मास्स साल शुचे इलि, ताँ ला अत तचि ला अब्राम ए सारै बी यो शुचि मतोई। परमेश्वरे अबराम रांग गप्पा लत्तु दांग ओल्ला कुत्तो कि दोऊ इच़ा यो शोतो। परमेश्वरे कुड़ि छना स्वर्गगं कारज़े तोतोर ध्वाँए दोऊ वंशरे शोरे। अब्रामे परमेश्वरो वायदो टोख्ठे विश्वास लरि। परमेश्वरे कुत्तु कि अब्राम इच़ा धरमी मी तोई। छेई कुचे दोई परमेश्वरो लसि वायदा रिंग बिश्वास लत्ते।

![](https://cdn.door43.org/obs/jpg/360px/obs-en-04-09.jpg)

दांग परमेश्वरे अबराम रांग साथे इच़ा वायदा लरि, इच़ा वायदा जुट दलो बिचांग एनतु काम लेइमी समझौता शुबि। दि वाचा परमेश्वरे अब्राम रांग दोफेल लेप्चतु आँऊ घड़ी दु इमरिंग तोई, पर ताँ ला दोई परमेश्वरो गप्पा थच़ि लेकी तोई। परमेश्वरे कुड़ि, “गे कनु मैच़ा सारैऊ दोरच़ि इच़ा योज़ु आशीष रमोगा। गे कनु वंशो दोतिंग दि कनान देश रमोग।” ताँ ला आत तची ला अब्रामो इच़ ला यो मतोई।

*बाइबलो किताबं ज़ि लेप्‍सि कहानी- उत्पत्ति अध्याय11-15*

## 5. वायदो यो

https://openbiblestories.org/l/ps-x-pathani/story-5/

![](https://cdn.door43.org/obs/jpg/360px/obs-en-05-01.jpg)

अबराहमे सारैउ कनान पिचे सा सालो थल ला, एनतचि दोकुतिंग कटु शुचि मतोई। दोऊ थलज़ि अबराहमो मेच़ा सारै दोबि कुड़ि, “खणु परमेश्वरे गिवि आत तचे ला काटु जेपि लज़िमि तरछि मलोऊ। द गै कटु लिक्पि लेइरिंग मास्स यांगशे इन्दाग, दिबि खणु, दि ग्यू दासी हाज़िरा शु दोरांग साथे ब्याह ले ग्यू थल्ज़ि इच़ा कटु हुतुशि”।

![](https://cdn.door43.org/obs/jpg/360px/obs-en-05-02.jpg)

दांग अब्रामे हाज़िरारांग ब्याह ले केरि। हज़िराज़ि इच़ा योबि जन्म रन्दो, दोऊ मिन अब्रामे इशमाएल केरि। पर सारै हाज़िरारांग जलेक्पी लेकि तोई, अपेल इश्माएल शशुम सालो तोई परमेश्वरे अब्रामरांग यच़्‍च़ा गप्पा लरि।

![](https://cdn.door43.org/obs/jpg/360px/obs-en-05-03.jpg)

परमेश्वरे कुड़ि, “गे बत्ते बेच़ि मोड़े सर्व-शक्तिमान परमेश्वर शुगा। गै कराँग इच़ा वाचा छ़ुपोगा।” दाँग अब्रारामे धरतीरिंग दच्चे फियाग लत्तु। परमेश्वरे अबरामरांग दि ला कुड़ि कि, “का मास्स जातितु बा शोन। गे कनिंग ए कनु वंशो दोतिंग केन्दु केनतु ज़मीन शुबिमि थल्‍ज़ि कनान देश रमोगा आई दांग गे हमेशो थल्ज़ि दोतु परमेश्वर शोग। कनिंग केनो टावरतु हर गांग्मितु खतना लेई लेपोतो।”

![](https://cdn.door43.org/obs/jpg/360px/obs-en-05-04.jpg)

“काँ मेच़ा सारैबि इच़ा यो शोतो-दु वायदाज़ु यो शोतो। दोऊ मिन इसहाक केऊ। गे दोरांग साथे वाचा बनाके तोग दांग दु इच़ा मोढ़े जातो बनेके योतो। गे इश्माइलबि ला इच़ा मोढ़े जात बनापोग, पर ग्यू वाचा इसहाकरांग साथे केश्तो।” दांग परमेश्वरे अबरामो मिन लेक्के अब्राहम ले केरी, छोऊ मतलब शु “मास्सतु पिता।” परमेश्वरे सारैऊ ल मिन लेके सारा ले केरि, छोऊ मतलब शु “मास्सतु या।”

![](https://cdn.door43.org/obs/jpg/360px/obs-en-05-05.jpg)

दु झा अब्राहमे ऐनो घरानो बत्ते गांग्मितु खतना लत्तु। इच़ा व़षो थल,आपेल अब्राहम रा वर्षो तोई, सारा 90 वर्षो तोई, धोपेल साराज़ि अब्राहमो यो बि जन्म रन्दे। छना परमश्वरे दोकुतिंग कुशि तोई दोकुच़ि दोउ मिन इसहाक केतुकु।

![](https://cdn.door43.org/obs/jpg/360px/obs-en-05-06.jpg)

आफेल इसहाक जवान शुत्ते धोपेल परमेश्वरे अब्राहमो बिश्वासो परिक्षा लेपति, “परमेश्वरे दोबि कुड़ि केई केनो इच़ा योबि ग्यु थलज़ि बलि चढातु।” अब्राहमे यच़ा परमेश्वरो गप्पा रेड्ररि दांग एनो यो बि बलिऊ थल्ज़ि तैयार लरि।

![](https://cdn.door43.org/obs/jpg/360px/obs-en-05-07.jpg)

आपेल अब्राहमे इसहाक बलि रन्ड्रिमी ठाड़िरिंग इबि लेकि तोइकु दोथर इसहाके रुक्ति, “बा, हेंगुतु दोर बलिऊ थल्ज़ि सिंग त तो पर बलिऊ मेमना आँर तो?” दांग अब्राहमे कुड़ि, हे ग्यु यो, परमेश्वरे एने बलिउ थल्ज़ि मेमनो प्रबन्ध लोतो।

![](https://cdn.door43.org/obs/jpg/360px/obs-en-05-08.jpg)

आपेल दोकु बलि रन्जिमि ठाड़िरिंग पिड़िकु, अब्राहमे इसहाकबि छ़ुचे बलिउ बेदि रिंग लेटाके केरि। आपेल दु एनो यो बि साच़िए लेकि तोई दांग परमेश्वरे कुड़ि, “रुमज़ु! गांग्कटुबि छले थलउ! दा गे ङै केताग कि कनिंग ग्यू अयों बेद तो छेई कुचे केई केनो इच़ा योबि ला ग्यु दोरच़ि मबचातिन”।

![](https://cdn.door43.org/obs/jpg/360px/obs-en-05-09.jpg)

कचांग ए अब्राहमे इच़ा मेढ़े तांगरि दु झाड़ितु बिचांग फसेकि तोई। इसहाको भोन्दे परमेश्वरे बलिउ थलज़ि मेढ़ेज़ु प्रबन्ध लसि तरे। अब्राहमे खुशी खुशी मेढ़ेउ बलि चढ़ाति।

![](https://cdn.door43.org/obs/jpg/360px/obs-en-05-10.jpg)

दांग परमेश्वरे अब्राहमरांग कुड़ि, “छेईकुचे ग्यु थलज़ि का केनो बत्तेधिर रन्ड्रिरिंग तैयार तोइन, देर तचे केई केनो इच़ा यो ल बलि रन्जिरिंग तैयार लेइना, दि बत्तेतु थलज़ि गे करिंग आशीष रन्जिमि कसम लोग्ग। कनु वंशरे सरगरिंग कारज़े बेच़ि ला मस्स शोरे। केई ग्यु आज्ञा मनेक्तेन दोऊ थल्ज़ि कनु मुके दि संसारो बत्ते कुलच़ि आशीष खोक्पोरे।

*बाइबलो कहानी उत्पत्ति अध्‍याय –16-22*

## 6. परमेश्वरे इसहाको थलज़ि प्रबन्ध लत्ते

https://openbiblestories.org/l/ps-x-pathani/story-6/

![](https://cdn.door43.org/obs/jpg/360px/obs-en-06-01.jpg)

आपेल अब्राहम मास्स यांग्शे इन्दे दोफेल दोउ यो, इसहाक ब्याहउ उम्रो शुचे इन्जि तोई। दोउ थलज़ि अब्राहमे एनो इच़ा सेवकबि यो इसहाको थलज़ि दु देशांगज़ि मेच़ा हापिरिंग च़रचतु आँर दोउ एनो रिश्तेदाररे बांग्ज़ा तोईरे।

![](https://cdn.door43.org/obs/jpg/360px/obs-en-06-02.jpg)

आँर अब्राहमो नातारे बांगज़ा तोइरे दु देशांग इच़ा लामे यात्राओ थल्ल परमेश्वरे दु सेवकबि रिबकारांग साथे मिलाकतु। दु अब्राहमो काको पौत्री तोई।

![](https://cdn.door43.org/obs/jpg/360px/obs-en-06-03.jpg)

रिबका एनो टाबरबि केचा दु सेवकरांग साथे इबिरिंग मनेक्सा इलि। छन्ने दोरे चुंग पिचतोर इसहाके रिबकारांग ब्याह ले केतु।

![](https://cdn.door43.org/obs/jpg/360px/obs-en-06-04.jpg)

मास्स सालो थल, अब्राहम सिए इलि। दांग परमेश्वरे अब्राहमो यो इसहाक बी आशीष रन्दु, छेईकुचे परमेश्वरे अब्राहमरांग साथे वायदा लसि तरे। दु वाचारिंग परमेश्वरो इच़ा कसम तोई कि अब्राहमो मिक्च़मी मे (अनगिनत) वंशरे शोरे। पर इसहाको मेच़मी रिबकाबी इच़ा ला कटु मजेती।

![](https://cdn.door43.org/obs/jpg/360px/obs-en-06-05.jpg)

इसहाके रिबकाज़ु थलज़ि प्रार्थना लरि, दांग परमेश्वरे दोबि जुड़वा कटु खोग्टांग शबिमि आशीष रन्दु। आँऊ घड़ी दु काटकु रिबकाज़ु खोग्टुंग तोइकु दोकु एनकतु बिचांग शड़ेक्सी लेकि तोइकु, दांग चि-चि शुबि लेकि तोई रिबकाज़ि परमेश्वरंग साथे रुकतु कि दि चि शुबि लेकि तो।

![](https://cdn.door43.org/obs/jpg/360px/obs-en-06-06.jpg)

परमेश्वरे रिबकारांग कुड़ि, “केई जुट योकु जेपि लोन। दोकुतु वंशो जुट शाता-शाता जाति बनेक्पोतो। दोरे एनतु बिचांग शड़ेक्सोर। पर मोड़े योज़ु धुन्ना शुचि- जातिऊ दोतिंग कोचि योज़ु जातिऊ आज्ञा मनेक्च़ि लेपोतो।”

![](https://cdn.door43.org/obs/jpg/360px/obs-en-06-07.jpg)

आपेल रिबका ज़ु काटुरे जेक्तिरे, दोउ मोढे यो शेई ए क्रा च़टे तोई, दोच़ि दोउ मिन एसाव केतोर। दांग कोचि यो एसाबो कोऩ्ज़ो थुरि च़ुमज़ा जेपे, दोच़ि दोऊ मिन याकूब केतोर।

*बाइबलो किताबंज़ी लेपसी कहानी उत्पत्ति अध्‍याय-24:1-25:26*

## 7. परमेश्वरे याकूबबि आर्शिवाद रेईं

https://openbiblestories.org/l/ps-x-pathani/story-7/

![](https://cdn.door43.org/obs/jpg/360px/obs-en-07-01.jpg)

अपेल दु काटुरे मोढे शुईरे याकूबबी चुंग बांगज़ी रुठे आपि लेकि तोई, पर एसाबबी जानवरतु शिकार लज़ि रुठे आपि लेकि तोई। रिबकाज़ि याकूबरांग दा लरि, पर इसहाके एसावरांग दा तरि।

![](https://cdn.door43.org/obs/jpg/360px/obs-en-07-02.jpg)

इच़ा दिन, एसाव शिकार लज़ा वापिस आति दु मास्स योंगि तोई। एसावे याकूबरंग कुड़ि, चि केई पकासि ततन दोरच़ि फो आर गिवि रोंउ। याकूबे जवाब रईं, हेगा केई गेरांग साथे दि प्रतिज्ञा लोउ कि मुन्डो यो शुचे थल आँउ चीज़ कनिंग खोक्सिरी, दु बत्ते केई गिवि रमोन। एसावे ला दु बत्ते चीज़रे याकूबबी रन्ड्रिमि प्रतिज्ञा ले केरी। दांग याकूबे दोबि बागत रेईं।

![](https://cdn.door43.org/obs/jpg/360px/obs-en-07-03.jpg)

इसहाके एसाव बी आशीष रन्जिमि तरे। पर दिबे तुई दोइ जां लोतो, रिबकाए याकूबे एसाब रांग साथे धोखा लरिकु। दोकुई याकूबो तुईच़ि एसाब शुबिमि दिखावा लरिकु। इसहाक यांग्शी तोई आई खन्जि ल मारच़ि तोई। दोउ थलज़ि याकूबे एसाको खामज़े लेके बकरिउ खाल बि एनो मुथुए गूड़िंग लपेटेके केरि।

![](https://cdn.door43.org/obs/jpg/360px/obs-en-07-04.jpg)

याकूबे इसहाको कचांग अन्जे कुड़ि, “गे एसाव शुगा। गिबि आशीष रऊँ।” अपेल इसहाके त्रेईंउ क्रा बि पच रेंई, दोऊ खामज़ेतु बास नुमरि, दोई चेति कि दु एसाव शु दांग दोई दोबि आशीष रेंईं।

![](https://cdn.door43.org/obs/jpg/360px/obs-en-07-05.jpg)

एसाबबि याकूबरांग जलन शुई छेरिंगकुचे याकूबे दोऊ मुन्डा यो शुबिमि हक ए आई साथे दोऊ आशीषबी ल लेन्ज़ा शिलि। एसाबे एनो बा ज़ु सिए थल याकूबबी सच़िमि योजना बनाति।

![](https://cdn.door43.org/obs/jpg/360px/obs-en-07-06.jpg)

पर रिबकाज़ि एसावो योजना थशे केरि। दांग दोई ए इसहाके याकूबबी दोऊ नातातांग बाग्ज़िमि थलज़ि ओइरिंग च़रच़रचतु।

![](https://cdn.door43.org/obs/jpg/360px/obs-en-07-07.jpg)

याकूब मास्स साल तचि रिबकाज़ु नातातांग साथे बांग्ज़िरि। दु मौक्का दोई ब्याह ले सनिह यो इच़ा म्यों जेति। परमेश्वरे दोबि मस्स सोउखार बनाके केरि।

![](https://cdn.door43.org/obs/jpg/360px/obs-en-07-08.jpg)

ङिंज़ा साल तचे कनानंग एनो घर-बार बे ओई बाग़ंज़ा, याकूब एनो टाबर, सेवकरे, एनो जानवरतु झुंड कुरच़ा वापिस याच़िरि।

![](https://cdn.door43.org/obs/jpg/360px/obs-en-07-09.jpg)

याकूब मास्स बेई तोई छेईकुचे दोई चेसि तरे कि एसाबे आईतला दोबि सच़िमि हिटि ततु। दिऊ थल्ज़ि याकूबे उपहारो रुपरिंग जानवरतु झुण्ड एसावो कचरिंग च़रति। अऊँ सेवकरे दु झुण्ड तिंग लेन्ज़ा इन्देरे दोच़ि कुड़िरे, “कनु दास याकुबे, दि जानवररे कनिंग रन्दु। दु युरने आपतो।”

![](https://cdn.door43.org/obs/jpg/360px/obs-en-07-10.jpg)

पर एसाबे द याकूबबी नुकसान रन्ड्रिममि मतरे। दु याकूबबि ओल्ला खाँए मास्स खुश शुई। दोऊ थल जुल्ला काका नुआंकु कनान देशांड़ शान्तिरांग बांग्ज़िकु। दांग इसहाक सिए इलि, याकूबे एसाबे दोबि मिलेके तेप्तिकु। वाचाज़ु प्रतिज्ञा अँउ परमेश्वरे अब्राहमरांग लत्त्ते दु द इसहाको दोरच़ि याकूबो टोक्ठे अच़ा आन्दे।

*बाइबलो किताबंज़ी लेपसी कहानी उत्पत्ति अध्‍याय 25:27-35:29*

## 8. परमेश्वरे युसुफे दोऊ टावरतिंग बचाति

https://openbiblestories.org/l/ps-x-pathani/story-8/

![](https://cdn.door43.org/obs/jpg/360px/obs-en-08-01.jpg)

मास्स सालो थल, आपेल याकूब यागंशे इन्जि तोई, दोपेल दोई एनो मास्स शारसि यो युसुफबी दोऊ एनो काका, नुआतिंग खान्जि च़रच़तो। दोऊ काका नुआरेच़ि जानवरो झुण्डतु देखभाल लज़ि लेकि तोइरे।

![](https://cdn.door43.org/obs/jpg/360px/obs-en-08-02.jpg)

युसुफो काका नुआरेच़ि दोरांग साथे जेगदंङ लज़ा तोइरे छेई कुचे युसुफबी दोउ बा ज़ी मास्स दा लज़ा तोई दांग युसुफे ला मांग्जुंग खयेंते कि दु दोतु राजा बनेक्पोतो। आँऊ घड़ी युसुफ एनो काका नुआरेतु कचांग अन्जा दोच़ि दोबि बन्धक ले दासतु व्यापार लज़ाड़रेतिंग लाङे च़रच़तोर।

![](https://cdn.door43.org/obs/jpg/360px/obs-en-08-03.jpg)

चुंखा इबिमबेच़ि तुई युसुफो काका नुआरेच़ि दोऊ खामज़े फ्राक्शे छागड़ो शुईऊ अन्दरेग ठुमङे केतोर। दांग दोच़ि दु खामज़े एनतु बा बी कान्डिरे ताकि दोई चेपोतो कि युसुफ बी जंगलो जानवरेच़ि ज़े केतोर। याकूब मास्स उदास तोई।

![](https://cdn.door43.org/obs/jpg/360px/obs-en-08-04.jpg)

दासतु व्यापार लज़ाड़च़ि यसुफबी मिस्र देशो आखा लेन्ज़ा शिलिरे। नील नदिऊ किनारे बसेकि मिस्र इच़ा मास्स मोढ़े ए शक्तिशाली देश तोई। दासतु ब्यापार लज़ाड़च़ि युसुफ बी इच़ा मोढ़े साहुकारबी दास बनाके लांङे केतोर। युसुफे एनो मालिको रुठेरांग सेवा लरि, दांग परमेश्वरे युसुफबी आशीष रेईं।

![](https://cdn.door43.org/obs/jpg/360px/obs-en-08-05.jpg)

दोऊ मालिको मेच़े युसुफरांग साथे नजायज़ रिश्ता बनाट्रिम कोशिश लरि, पर युसुफे परमेश्वरो बनाशी रिवाज़ो खिलाफ काम लेईरिंग मना ले केरि। दु मेच़मिबि रोष आति, दोई युसुफो टोखटे हाफसि इलज़ाम लगाके केरि, दांग दोबि जेलांग च़रचे केरिरे। जेलांग इन्जे थल ला,युसुफे परमेश्वरो टोखटे बिश्वास तरि, दांग परमेश्वरे ला दोबि आशीष रेईं।

![](https://cdn.door43.org/obs/jpg/360px/obs-en-08-06.jpg)

युसुफ सचे तोई, ताँ ला दु जुट सालो थल ला जेलांगे तोई,इच़ा रात्त फिरौन, छना कि मिस्रो मिच़ि एनतु राजातिंग कुचा तोईरे मिस्रो राजा तोई,फिरौने जुट मांञ खड़िं, आऊँ दि दोबि मास्स बैचेन ले केरि। दोऊ सलाहकारच़ि आच़िला दु मांङ ज़ु अर्थ शच़ि मारतिरे।

![](https://cdn.door43.org/obs/jpg/360px/obs-en-08-07.jpg)

परमेश्वरे युसुफबी माङज़ु अर्थ कन्ड्रिमि समझ रांशि तरे, दोऊ थल्ज़ि फिरौने युसुफबी एनो कचांग बुलाति। युसुफे दोबि दोऊ मांङज़ु अर्थ शचतु दांग कुड़ि, “मिस्र देशांग परमेश्वरे मास्स फसलो ङिज सालो थल ङिज सालो थल्ज़ि अकाल च़रच़िम ततु।”

![](https://cdn.door43.org/obs/jpg/360px/obs-en-08-08.jpg)

फिरौन युसुफरांग दुठ्रो खुश शुचे इलि कि दोई दोबि मिस्र देशो आइच़ा शक्तिशाली मी बनाके केतु।

![](https://cdn.door43.org/obs/jpg/360px/obs-en-08-09.jpg)

युसुफे मीतिंग ङिज सालो रुठे फसलो बिचांग मस्स अन्न जमा लेइरिंग कुड़ि। आपेल ङिज सालो अकाल अन्जा, दोफेल युसुफे मीतिंग ज़ेईमि थल्जि दु अन्न लांञरि ताकि दोतु कचरिंग ज़ेईमि थल्ज़ि योशि शुबि जुस।

![](https://cdn.door43.org/obs/jpg/360px/obs-en-08-10.jpg)

दु मास्स माजि अकाल मिस्रांग जेत्ते मतोई, कनान देशागं ला पड़ेकि तोई आँर याकूबे दोऊ टाबर बांग्ज़ा तोइरे।

![](https://cdn.door43.org/obs/jpg/360px/obs-en-08-11.jpg)

याकूबे एनो मोढ़े योतिंग अन्न च़ुमज़िमि थल्ज़ि मिस्रांग च़रति। आपेल दु अन्न च़ुमज़िमि थल्जि युसुफो तुइच़ि खड़े शुईरे दोच़ि युसुफबी सेच़ि मारतिरे। पर युसुफे दोतिंग सेचे केरि।

![](https://cdn.door43.org/obs/jpg/360px/obs-en-08-12.jpg)

दि पता लेइमि थल्ज़ि कि दुरे लेक्सा इन्दोरेया दु बत्तेधिर जाँच ले थल, युसुफे दोतांग कुड़ि, “गे केतु नुआ युसुफ शुगा! बेउंई थांईं। अपेल केच़ि गिवि दास बनाके लांङतेई दोपेल केच़ि माजि लेईमि ठानेकतेई, पर परमेश्वरे दु माजिऊ रुठे लेईमि थलज़ि उपयोग लरि! अतईं अन्जे मिस्रांग बांग्ज़ुईं दांग गे केतु ए केतु परिवारो थल्ज़ि बागतो इन्तज़ाम लोग्ग।”

![](https://cdn.door43.org/obs/jpg/360px/obs-en-08-13.jpg)

आपेल युसुफो काका नुआँरे चुंखा याच़िरे दोच़ि एनतु बा याकूबबी शदिरे कि युसुफ आत ला शिंङि तो, दु दि रेड्रा मास्स खुश शुत्ते।

![](https://cdn.door43.org/obs/jpg/360px/obs-en-08-14.jpg)

हालांकि याकूब इच़ा यांग्शी मी तोई ताँ ला दु एनो बत्ते टाबरतांग साथे मिस्र देशो आखा आच़ा इलि, दांग दोरे दोर बसेके इलिरे। याकूबे एना सी बे तुई बत्ते योरेतिंग आर्शिवाद रेईं।

![](https://cdn.door43.org/obs/jpg/360px/obs-en-08-15.jpg)

वाचाज़ु दु वायदारे आऊँ परमेश्वरे अब्राहमरागं लसि तोई दु हेगा इसहाकबी, दोऊ थल याकूबबी, दागं दोऊ थल दोऊ सनि योरेतिंग ए दोतु टावरतिंग अच़ा आन्दे। दु सनि योरेतु वंशरे थले एस्राइलो सनि जात शुचे इलिरे।

*बाइबलो किताबंज़ी लेपसी कहानी उत्पत्ति अध्‍याय 37-50*

## 9. परमेश्वरे मूसाबि हाग रेंई।

https://openbiblestories.org/l/ps-x-pathani/story-9/

![](https://cdn.door43.org/obs/jpg/360px/obs-en-09-01.jpg)

युसुफो सिए थल दोऊ बत्ते नातारे मिस्र देशांग बसेके इलिरे। दु ए दोऊ वशंजरे मास्स वर्ष तचि मिस्रांग ए बांगज़िरे दोच़ि दोर एनतु मास्स कतुरे हुन्दिरे। दोतिंग एस्राइली कुड़िरे।

![](https://cdn.door43.org/obs/jpg/360px/obs-en-09-02.jpg)

रा चड़े वर्षो थल, इस्राइलिरे मिक्च़िरिंग मास्स शुचे इलिर। मिस्रो मीरे द दि गप्पो थलज़ि अभारी मतोईरे कि दोतु मदद लेईमि थल्ज़ि युसुफे मास्स लसि तरे। दोरे इस्राइलितांग बेए इन्देर छेई कुचे दोरे मक्च़िरिंग दोतु बेच़ि मास्स तोईरे। दोऊ थल्ज़ि दु मोक्का मिस्र देशांग राज लज़ाड़ फिरौने मिस्रो मीतु दास बनाके केति।

![](https://cdn.door43.org/obs/jpg/360px/obs-en-09-03.jpg)

मिस्रो मीच़ि इस्राइलीतिंग मास्स मकाने आंयो शुदा नगररे बनाट्रिरिंग मजबूर लेइरे। दु मस्स मेहनत ए दोतु जीवनबी मास्स बारदो च़टे ले केरि, पर परमेश्वरे दोतिंग आशीष रेईं दोतु आई मास्स सन्तानरे शुईरे।

![](https://cdn.door43.org/obs/jpg/360px/obs-en-09-04.jpg)

फिरौने खणि कि इस्राइलिरेतु मास्स काटुरे शुबि लेकि तोतोर, दांग दोई एनो मीतिंग इस्राइलो बत्ते गांगकटुतिंग नील नदिऊ अन्दरेग छ़ांङे सचे केट्रिम आदेश रेईं।

![](https://cdn.door43.org/obs/jpg/360px/obs-en-09-05.jpg)

इच़ा खास इस्राइलो मेचमि इच़ा यो बी जन्म रेईं, दु ए दोऊ गाक्से आंयो तचे शुई दु कटुबी प्याके तरिरे।

![](https://cdn.door43.org/obs/jpg/360px/obs-en-09-06.jpg)

आपेल दु काटुबी दोऊ या बा कुई दोबि उई मास्स प्याकच़ि मारतिकु, दांग दोकुई दोबि सीरिंगज़ि बचाच़िमि थलज़ि इच़ा लन्ज़ाड़ टोकरिंग नील नदिऊ किनारे शांङज़ु बिचांग प्याके केरिकु। दोऊ मोढ़े आछे दि खन्जिम थलज़ि निगरानि लरि कि दुरांग साथे चि शोतो।

![](https://cdn.door43.org/obs/jpg/360px/obs-en-09-07.jpg)

फिरौनो म्यों ज़ि दु टोकरिउ आन्दरेग खढिं। आपेल दोई दु काटु बी खणी दोई दोबि एनो काटु ले केरि। दोई इच़ा इस्राइलो मेच़मिबि दोबि पानु रन्ड्रिमि थलज़ि कामरिंग त्य तरि। दोई दि मनेरि कि दु दोऊए या शु। अपेल दु काटु दोंण मोढ़े शुचे एलि कि दोबि एनो या ज़ु पानू ज़रुत मतोई दांग दोई दोबि फिरौनो म्योबी रैं केरि, दोई दोऊ मिन मूसा केरि।

![](https://cdn.door43.org/obs/jpg/360px/obs-en-09-08.jpg)

इचा झा, आफेल मूसा मोढ़े शुचे इन्दे, दोई खणि कि इच़ा मिस्रो मीज़ी इस्राइलो मीबी तेंग्ज़ि लेकि तो। मूसाज़ी एनो इस्राईलि साथिबि बचाच़िमि कोशिश लरि।

![](https://cdn.door43.org/obs/jpg/360px/obs-en-09-09.jpg)

आपेल मूसाज़ि सोचेक्सिरि कि दोबि आच़िला मखन्जतोर दोई दु मिस्रीबी साचे सिचे पतेके च़रति। पर मूसाज़ि चि लत्ते दु अच़िया तांङे केशी तरेर।

![](https://cdn.door43.org/obs/jpg/360px/obs-en-09-10.jpg)

फिरौनबि पता लेके इन्दे कि मूसाज़ि चि लत्तु। दोई दोबि साच़िमि कोशिश लरि, पर मूसा मिस्रांगज़ी जंगलो आखा पोक्शे इलि। फिरौनो सैनिकच़ि दोबि दोर पेचि मारतिरे।

![](https://cdn.door43.org/obs/jpg/360px/obs-en-09-11.jpg)

मूसाज़ि मिस्र देशबे मास्स ओईतारे इच़ा मिघान देशांग बांगज़ि च़ुक्ति, दांग दोई दोर इच़ा मेच़मि रांग ब्याह ले केरि दांग दोकुई जुट यो पैदा लरिकु।

![](https://cdn.door43.org/obs/jpg/360px/obs-en-09-12.jpg)

मूसाज़ी एनो रू ज़ु त्रेईंतु थाचो देखभाल लज़ा तोई। इच़ा झा दोई इच़ा रोशि लेकि झाड़ी तागंरि दु ताब शुचे मे रोशि लेकि तोई। दोबि खान्जिमि थलज़ि दु झाड़िऊ कचांग इलि। अपेल दु दोऊ कचांग इलि दांग परमेश्वरे दोरांग गप्पा लरि। दोई कुड़ि, “हे मूसा, केनो बूटरे युप्शे केऊ। का इच़ा पवित्र ठाड़िरिंग खड़े तोतोन।”

![](https://cdn.door43.org/obs/jpg/360px/obs-en-09-13.jpg)

परमेश्वरे कुड़ि, “गे ग्यू मीतु दुख तांङताग। गै कनिंग फिरौनो कचागं च़रपोग ताकि केई इस्राईलो मीतिंग मिस्रो गुलामिऊ दोरच़ि हुन्जे हापोन। गे दोतिंग कनान देश रमोग, दु देश आँऊ गे अब्राहम, इसहाके याकूबबी रन्ड्रिमी वायदा लत्तेग।”

![](https://cdn.door43.org/obs/jpg/360px/obs-en-09-14.jpg)

मूसाज़ि रुक्ति, “अगर मीच़ी रुकपोर कि गिबि आच़ि च़रचतु दांग गे चि कुगा?” परमेश्वरे कुड़ि “दोतांग कुड़ु, “चि गे शुगा, दु गे शुगा। दोतांग कुड़ु, ‘गे शुगा ज़ि गिवि केतु कचांग च़रचतु। दोतांग दि ला कुड़ु कि, ‘गे केतु पूर्वजरे अब्राहम, इसहाके याकूबो परमेश्वर यहोवा शुगा।’ ग्यु दि मिन हमेशो थलज़ि शु।”

![](https://cdn.door43.org/obs/jpg/360px/obs-en-09-15.jpg)

मूसा बैई तोई दाङ दोई फिरौनो कचांग इबिमि हिटि मतरे छेईकुचे दोई चेति कि दोई रुठेरांग कुट्रि मतरफोतो, दांग परमेश्वरे मूसाजू काका, हारूनबि दोऊ मदद लज़ि च़रति।

*बाइबलो किताबंज़ी लेपसी निर्गमन अध्‍याय 1-4*

## 10. परमेश्वरे मिस्रांग सा मुसीबतरे च़रच़ि

https://openbiblestories.org/l/ps-x-pathani/story-10/

![](https://cdn.door43.org/obs/jpg/360px/obs-en-10-01.jpg)

परमेश्वरे मूसाए हारूनबी चेतावनी रन्दु कि फिरौन हठ लज़ाड़ शुचे योतो। आपेल दोरे फिरौनो कचांग इलिरे दोकुच़ि दोबि कुड़िकु, “इस्राइलो परमेश्वरे ध्यां कुचा कि, ‘ग्यु मीतिंग इबि रोऊँ!’” पर फिरौने दोतु मरेड्ररी दोई इस्राइलो मीतिंग छोड़ेक्च़िमि बजाए दोतिंग आई मास्स कठिन परिश्रम लेईरिंग मजबूर लरि।

![](https://cdn.door43.org/obs/jpg/360px/obs-en-10-02.jpg)

फिरौने दु मीतिंग छोडेक्च़िमि थलज़ि लगातार इन्कार लज़ि लेकि तोई, दोऊ थलज़ि परमेश्वरे मिस्रांग सा भयंकर मुसीबतरे च़रति। दि बत्ते मुसीबतरे च़रच़े, परमेश्वरे फिरौन बी कांडि कि दु फिरौने मिस्रो सादे बे च़ि मास्स शक्तिशाली तो।

![](https://cdn.door43.org/obs/jpg/360px/obs-en-10-03.jpg)

परमेश्वरे नील नदीऊ ती बी शुईरिंग लेके केरी, पर फिरौने तां ला इस्राइलीतिंग इबि मरेईं।

![](https://cdn.door43.org/obs/jpg/360px/obs-en-10-04.jpg)

परमेश्वरे बत्ते मिस्रांग मेंढकरे च़रति। फिरौने मेंढकतिंग साच़िमि थलज़ि मूसारांग ज़ी लरि। पर बत्ते मेंढकरे सिए थल, फिरौने एनो सेमबि कठोर ले केरि। दोई इस्राइलो मितिंग इबिए मरेईं।

![](https://cdn.door43.org/obs/jpg/360px/obs-en-10-05.jpg)

दांग परमेश्वरे च़िक्च़ाड़ यांग्ज़ातु मुसीबत च़रति। दोऊ थल दोई यांग्ज़ातु मुसीबत च़रति। फिरौने मूसाए हारूनबी बुलाके दोकुतिंग कुड़ि अगर दोकुई दि मुसीबतबी रोकके केरिकु सेत इस्राइलो मिरे मिस्रागज़ि इबि तरफोरे। अपेल मूसाज़ि प्रार्थना लरि दांग परमेश्वरे मिस्रांगज़ि यांग्ज़ातु मुसीबत हटाके केरि। पर फिरौने एनो सेम कठोर ले दोतिंग इबि मरेईं।

![](https://cdn.door43.org/obs/jpg/360px/obs-en-10-06.jpg)

दिऊ थल, परमेश्वरे मिस्रो बत्ते पालतु जानवरतिंग टेपि ले सी रन्दु। पर फिरौनो सेम उई ला कठोर शुचे इलि दोई दोतिंग इबि मरईं।

![](https://cdn.door43.org/obs/jpg/360px/obs-en-10-07.jpg)

दांग परमेश्वरे मूसाबि कुड़ि, कि फिरौनो तुईच़ि लन्नदिंग ताब छ़ाङु। आपेल दोई जां लरि मस्रो मितु चमड़ीरिंग खाजि हुन्ज़ा इलि, पर इस्राइलो मितिंग छल्ले मशुई, परमेश्वरे फरौनो सेमबि कठोर ले केरि, दोई दोतिंग तां ला इबि मरेईं।

![](https://cdn.door43.org/obs/jpg/360px/obs-en-10-08.jpg)

दिऊ थल परमेश्वरे शरू थचे मिस्रो मास्स फसलरे तबाह ले केरि आई अरिए धक्तिका हुन्ज़िरि दोबि साचे केरि। फिरौने मूसाए हारूनबि बुलाके कुड़ि, “गै पाप लत्ताग। केरे देरच़ि इलइं।” दांग मूसे प्रार्थना लरि, दांग सर्गांग ज़ि शरू दपि बन्द शुई।

![](https://cdn.door43.org/obs/jpg/360px/obs-en-10-09.jpg)

पर तां ला फिरौने यच़ा पाप लरि दोई एनो सेम डाक्कन ले केरि। दोई इस्राएलिरेतिंग इबि मरोऊं।

![](https://cdn.door43.org/obs/jpg/360px/obs-en-10-10.jpg)

दांग परमेश्वरे मिस्रो टोखटे टिटतु झुण्डतिंग आपि रन्दु। दु टिटच़ि बत्ते फसलबी जै़ केरिरे आउँ दु शरूजि़ बचेके इन्दे।

![](https://cdn.door43.org/obs/jpg/360px/obs-en-10-11.jpg)

दांग परमेश्वरे मिस्रांग शुम्मु ध्याड़ा तचे हयांर ले केरि । दु धोंड़ हयांर तोई कि मिस्रो मीरे एनतु चुंगज़ि धक्‍तिका हुपि मारतिरे। पर आंरतिग इस्राइलिरे बांगजतरे दोर छा़ङि तोई।

![](https://cdn.door43.org/obs/jpg/360px/obs-en-10-12.jpg)

दि कु मुश्किलो थल ला, फिरौने इस्राइलितिंग आज़ाद शुचे इबि मरेईं। छेईकुचे फिरौने दोऊ गप्पा मरेजते दोऊ थलज़ि परमश्वरे आखिरी मुसीबत च़रच़िमि योजना बनाकतो। दिरांग साथे फिरौनो सेम लेक्सा योतो।

*बाइबलो किताबंज़ी लेपसी निर्गमन अध्‍याय 5-10*

## 11. फसह ज़ु त्यौहार

https://openbiblestories.org/l/ps-x-pathani/story-11/

![](https://cdn.door43.org/obs/jpg/360px/obs-en-11-01.jpg)

परमेश्वरे मूसाए हारूनबी फिरौनो कचांग दि कुचिमि थलज़ि च़रचते कि इस्राइलितिंग इबि रोऊं। दोई दोबि चेतावनी रणी कि दोई अगर दोतिंग इबि मरणी सेत परमेश्वरे मिस्रो मितिंग ए जानवरतु मुन्डो योतिंग साचे केओतो। फिरौने दि रैड्रा ला परमेश्वरो टोखटे विश्वास लज़िए दोऊ गप्पा मनेक्चिरिंग इन्कार ले केते।

![](https://cdn.door43.org/obs/jpg/360px/obs-en-11-02.jpg)

परमेश्वरे दोऊ टोखटे बिश्वास लज़ारेतु मुन्डो यो बी बचाच़िमी थलज़ि इचा उपाय लरि। हर परिवार बी इच़ा निर्दोष लच़ो बलि रन्जि लेपि तोई।

![](https://cdn.door43.org/obs/jpg/360px/obs-en-11-03.jpg)

परमेश्वरे इस्राइलितिंग दु लाचो शुई शिन्जे आम्मो पितांगरिंग लगाचिम थलज़ि कुड़ि। दोतिंग दोऊ शा बि भुनेक्चिमि तोई दांग दोतिंग सुम मकेशी रोटीरांग फुर्ती रांग ज़ेइमि तोई। दोई दु बागत ज़ैथल दोतिंग युर कुचे मिस्र छोडेक्च़िमि थलज़ि तैयार बांगज़िरिंग कुत्तु।

![](https://cdn.door43.org/obs/jpg/360px/obs-en-11-04.jpg)

परमेश्वरे दोतिंग छना लेइरिंग आदेश रन्दे दोच़ि ध्वांए बत्तेदिर लत्तेर। आधा रातरिंग, परमेश्वरे इच़ा-इच़ा मुन्डो यो बि सपा सपा मिस्रो बिचांगज़ि इलि ।

![](https://cdn.door43.org/obs/jpg/360px/obs-en-11-05.jpg)

इस्राइलिरेतु बत्ते घरबारो पितांगरिंग शुई लेकी तोई, दोऊ थलज़ि परमेश्वरे दु घरबाररेतिंग छोड़ेके केतु। दु घरबारो अन्दरेकि बत्ते मीरे ठीक-ठाक तोईरे। दोरे लाच़ो शुईज़ु वजह ज़ी बचेके इन्देर।

![](https://cdn.door43.org/obs/jpg/360px/obs-en-11-06.jpg)

पर मिस्रो मीच़ी परमेशवरो टोखठे विश्वास मलेत्तेर दांग दोऊ आदेश ला ममनेक्तिरे। दोऊ थलज़ि परमेश्वरे दोतु घरबारतिंग मछोडेक्ति। परमेश्वरे मिस्रो दोतु बत्ते मुन्डो योतिंग साचे केरि।

![](https://cdn.door43.org/obs/jpg/360px/obs-en-11-07.jpg)

जेलांग तोचि कैदितु मुन्डो यो तु दोरच़ि च़ुके, फिरौनो मन्डो यो तचे, इच़िच़ो मुन्डो यो सिए इलिरे। एनतु मास्स दुखो कारण मिस्रो मास्स मीरे क्रापि लेकि तोईरे।

![](https://cdn.door43.org/obs/jpg/360px/obs-en-11-08.jpg)

दुए रात, फिरौने मूसाए हारूनबि बुलाकेतु दांग कुतो, “इस्राइलितिंग लेन्ज़ा मिस्रागंज़ि युरन हुन्ज़ा इलईं!” मिस्रो मी च़ि ला इस्राइलितिंग युरन हुन्ज़ा इबिमि थलज़ी शबस लरिरे।

*बाइबलो किताबंज़ी लेपसी निर्गमन अध्‍याय11:1-12:32*

## 12. इस्राइलि मीतु मिस्र देशांगज़ि हुन्ज़ि

https://openbiblestories.org/l/ps-x-pathani/story-12/

![](https://cdn.door43.org/obs/jpg/360px/obs-en-12-01.jpg)

इस्राइलो मीरे मिस्रागंज़ि हुच़ा मास्स राजी तोईरे। दोरे दा गुलाम मतोइरे, दा दोरे प्रतिज्ञा ज़ु देशांग इबि लेकि तोईरे! चिधिर ला इस्राएलिरेच़ि पेड़िरे, मिस्रो मीच़ी दोतिंग ज़ाङ, मुल ए कीमती समानरे रणींरे। उई देशो आऊँ मिना मी च़ी ला परमेश्वरो टोखटे विश्वास लज़ितरे, आपेल इस्राइलिरे मिस्रांग ज़ि हुन्ज़तेर दांग दुरे ला दोतांग साथे शुचे इलिरे।

![](https://cdn.door43.org/obs/jpg/360px/obs-en-12-02.jpg)

ङिरो दोपेल डु ज़ु इच़ा मोट्टे थम्म दोऊ तुई-तुई जोई लेकि तोई। रातरिंग दी ए थम मेऊ थम्म शुचे इलि। छेईकुचे परमेश्वर दु डू ए मेऊ थमो अन्दरेग दोतिंग आम्म कान्ड्रिमी थलज़ी तोई। दोतिंग दोऊ थले जेत्ते जोइमि काम तोई।

![](https://cdn.door43.org/obs/jpg/360px/obs-en-12-03.jpg)

फो आर ध्याड़ो थल, फिरौने दोऊ मीच़ि एनतु सेम लेके केरिरे। दोच़ि इस्राइली तिंग यच़ा एनतु गुलाम बनाचिम तरिरे। दोऊ थलज़ि दोरै दोतु थल्ल-थल्ल इलिरे। परमेश्वरे दोतु सेम लेके केते छेई कुचे दोई कान्जिम तरे कि फिरौने मिस्रो बत्ते देबता बेच़ि, यहोवा, मास्स शक्तिशाली शु।

![](https://cdn.door43.org/obs/jpg/360px/obs-en-12-04.jpg)

आपेल इस्राइलीरेच़ि मिस्रो सेनाबी आपि तांगरिरे दोतिंग चेसिरि कि दोरे फिरौनो सेनाए शेई समुन्द्रो बिचांग फसेके इलिरे। दोरे मास्स बेय इलिरे दागं क्रापि चुक्तिरे,” कि हेन्ज़ि मिस्र चिल छोड़ेक्तिंई? हेन्दरे सिच़ा शुई!”

![](https://cdn.door43.org/obs/jpg/360px/obs-en-12-05.jpg)

मूसाज़ि इस्राइलितांग कुड़ि, “बेउईं थाईं! परमेश्वर तोग केतु थलज़ि शास्तो दांग केतिंग बचापोतो।” परमेश्वरे मूसा बी कुत्तो दि मी तिंग कुड़ु कि शेई समुन्र्दो आखा तुखा शुईं।”

![](https://cdn.door43.org/obs/jpg/360px/obs-en-12-06.jpg)

दांग परमेश्वरे दु डु ज़ु थम बी इस्राइलि ए मिस्रो मीतु बिचांग केचे केतु छेई कुचे मिस्रो मीच़ि इस्राइलितिंग तांगज़ी मेस।

![](https://cdn.door43.org/obs/jpg/360px/obs-en-12-07.jpg)

परमेश्वरे मूसा बी समुन्र्दो आखा गुड़ तूखा लेइरिंग कुत्तु। दांग परमेश्वरे लान्न ज़ि कुचे समुदरो ती बी देखा-नोखा ले केतु, दांग समुदरो बिचांग ज़ी इच़ा आम्म बनेके इलि।

![](https://cdn.door43.org/obs/jpg/360px/obs-en-12-08.jpg)

इस्राइलो मीरे एनतु देच़ि नोच़ि तिऊ भीति रांग साथे कारचि धरतिरिंग समुंदरो बिचांगज़ि अच़ा इलिरे।

![](https://cdn.door43.org/obs/jpg/360px/obs-en-12-09.jpg)

दांग परमेश्वरे दु आम्मरिंगज़ि डु बि घरेके च़रचतु छेई मिस्रो मी च़ि इस्राइलितिंग ठीक-ठाक इबि तांमोरे। मिस्रो मीच़ि दोतिंग च़म्ज़िमि थल्ज़ि दोतु थले इबिमि इरादा लेईरे।

![](https://cdn.door43.org/obs/jpg/360px/obs-en-12-10.jpg)

दांग दोच़ि समुन्द्रो बिच्चे दु अम्मज़ि इस्राएलिरेतु पीछा लरिरे, पर परमेश्वरे मिस्रो मीतु रथरे फसेक्पि ले दोतिंग बेई ले केरि। दोरे हाउशेक्पि लेकितोइरे, “पोक्थुईं ए! इस्राइलितु भोन्दे परमेश्वर लड़ेक्पा।”

![](https://cdn.door43.org/obs/jpg/360px/obs-en-12-11.jpg)

बत्ते इस्राइलिरे समुद्रो नुरे पिचे इलिरे। दांग परमेश्वरे मूसाबी ओल्ला तिऊआखा गुड़ तूखा लेइरिंग कुत्तो। अपेल मूसाज़ि ध्यांह लत्तो, दांग ती मिस्रो सेनाओ टोख्टे अच़ा अति दांग तुईकि ठ्रो शुचे इलि। मिस्रो बत्ते सेनारे डुबेके इलिरे।

![](https://cdn.door43.org/obs/jpg/360px/obs-en-12-12.jpg)

लत्तो, दांग ती मिस्रो सेनाओ टोख्टे अच़ा अति दांग तुईकि ठ्रो शुचे इलि। मिस्रो बत्ते सेनारे डुबेके इलिरे।

![](https://cdn.door43.org/obs/jpg/360px/obs-en-12-13.jpg)

आपेल इस्राइलिरेच़ि ताङतेर कि मिस्रो मीरे सिए इलिरे दांग दोतिंग परमेश्वरो टोखटे बिश्वास शुई। दोच़ि विश्वास लेइरे कि मूसा परमेश्वरो भविष्यवक्ता तोई।

![](https://cdn.door43.org/obs/jpg/360px/obs-en-12-14.jpg)

इस्राइलि मीरे दोऊ थलज़ि ला मास्स राजी तोइरे छेईकुचे परमेश्वरे दोतिंग सीरिंगज़ि ए दास शुबिरिंगज़ि बचाकते। दा दोरे परमेश्वरबी ए दोऊ आज्ञा मनेक्च़िमि थलज़ि आज़ाद तोइरे। इस्राइलो मीच़ि एनतु आज़ादी ए परमेश्वरबी शबस लेइमी थलज़ि इच़ा योन्र्दा लेइरे छेईकुचे परमेश्वरे दोतिंग बचाकते।

*बाइबलो किताबंज़ी लेपसी निर्गमन अध्‍याय12:33-15:21*

## 13. इस्रराइल रांग साथे परमेश्वरो वायदा

https://openbiblestories.org/l/ps-x-pathani/story-13/

![](https://cdn.door43.org/obs/jpg/360px/obs-en-13-01.jpg)

इस्राएलिरेतिंग शेई समुद्रो नुरे शिन्जे थल, परमेश्वरे दोतिंग जंगलो बिचे सीनै कुचे गो आखा लेन्ज़ा इलि। दि दू ए गो तोई आँर मूसाज़ी रोशि लेकि झाड़ी तांङते। दोच़ि दु गो पोयांग एनतु तम्बु लगातिरे।

![](https://cdn.door43.org/obs/jpg/360px/obs-en-13-02.jpg)

परमेश्वरे मूसा ए इस्राइलो बत्ते मीतांग कुड़ि, “केतिंग हमेशा ग्यु गप्पा मनेक्च़ि लेपोतो। अगर केच़ि ग्यु आज्ञा मनेक्पोई, आई ग्यु वाचाउ पालन लोईं त बत्तेतु बिचांगज़ि केरे ग्यु इनामो रूपरिंग कीमती धन शोईं।” आई केरे ग्यु नज़रांग पुजारीतु राज्य ए इच़ा पवित्र जात शोईं।”

![](https://cdn.door43.org/obs/jpg/360px/obs-en-13-03.jpg)

परमेश्वरबी एनतु कचरिंग हापिमि थलज़ि मीच़ि शुमु झा तचि एनतिंग तैयार लत्तेर। दांग परमेश्वर सीनै गो पुन्जारिंग योंखा तांक्सिरि। आपेल दु अन्जा भूकम्प शुई, बिजली चमकेति, टु शुई, रणशिंग ज़ु ज़ोर- ज़ोरे चाला शुई। दांग मूसा एना गो पुन्ज़ारिंग लोक्सिरि।

![](https://cdn.door43.org/obs/jpg/360px/obs-en-13-04.jpg)

"दांग परमेश्वरे मीतांग साथे इच़ा वाचा छ़ुदि। दोई, “कुत्तु गै केतु परमेश्वर, यहोवा शुगा। गै ए शुगा आच़ि केतिंग मिस्रो दास पणे छुड़ाक्ते। उई अरिया देवता थ मनेक्तुईयों।"

![](https://cdn.door43.org/obs/jpg/360px/obs-en-13-05.jpg)

“न मूर्ति बनातुईं, न दोतिंग मनेक्तुईं, छेईकुचे गे, यहोवा, केतु इच़े परमेश्वर शुगा। गलत तरीकाज़ि ग्यू मिनज़ी काम थलाईं। शनिवार सब्तो ध्याड़ाबि पवित्र मनेकच़िम थल्ज़ि हिद ताईं कित त्रुई ध्याड़ारिंग केन्दु बत्ते काम्म लाईं, दांग ङिसमी ध्याड़ा केतु थल्ज़ि आराम लेईमिए गिबि हिद लेईमी ध्याड़ा शोतो।”

![](https://cdn.door43.org/obs/jpg/360px/obs-en-13-06.jpg)

“केन्दु या बा तु आदर लाईं। हत्या थलाईं। मेच़ा या गाक्सो अलावा उई अतांग ल सम्बन्ध थ बनातुईं। चोरी थलाईं। केन्दु पड़ोसीतु मेच़ाबि, दोऊ घरबा, या दोऊ छिल्ळा समान बी लेप्च़िमि इच्छा थलाईं।”

![](https://cdn.door43.org/obs/jpg/360px/obs-en-13-07.jpg)

परमेश्वरे दोतिंग चि नियम रन्दे दोरे दोऊ पालन लज़िरिंग तैयार शुईरे। दोरै परमेश्वरो मी शुबिमी ए दोऊ पूजा लेईमी थल्ज़ि ल तैयार शुईरे।

![](https://cdn.door43.org/obs/jpg/360px/obs-en-13-08.jpg)

परमेश्वरे इस्राइली तिंग इच़ा मास्स मोढ़े मिलाप लज़िमि तम्बु बनाचिरिंग कुढि। दोई दोतिंग रुठे रांग कान्जतु कि दु तम्बु बि छना बनाचि, दोऊ अन्दरेग चि -चि चीज़रे केचिम शु। दोई दोतिंग दु तम्बू बी जुट कमरा रिंग फाच़िमि थल्ज़ि इच़ा मास्स मोढ़े पर्दा बनाचि रिंग कुढ़ि। परमेश्वर दु पर्दो थलेच़ि कमरांग आपतो दांग दोर बांग्ज़तो। आँर परमेश्वर तोई दु कमरांग इबिमि अनुमति इच़ा मोढ़े प्रधानबि तोई।

![](https://cdn.door43.org/obs/jpg/360px/obs-en-13-09.jpg)

दु मीतिंग मिलापो तम्बू तुईच़ि इच़ा वेदी बनाचि लेपोतो। आच़ि ए परमेश्वरो बनाशी तरीका ममनेक्ति, दोई दु वेदिरिंग इच़ा जानवरबी हापतो। दांग याजके दोबि परमेश्वरो थल्ज़ि बलिऊ रूपरिगं रोपोतो। परमेश्वरे कुड़ि कि दु जानवरो शुई दु मी ज़ु पाप बि प्याके केयोतो। ध्यांह ले थल्ल परमेश्वरे दा दु पाप बी मा खम्बोतो। दु मी परमेश्वरो नज़ररिंग “शुद्ध” शोतो। परमेश्वरे मूसा ज़ु भाई हारूने, हारूनो वंशजतिंग एनो प्रधान शुबिमी थल्ज़ि चुनेकतु।

![](https://cdn.door43.org/obs/jpg/360px/obs-en-13-10.jpg)

दांग परमेश्वरे दि आज्ञातिंग राग्गटु जुट पन्ज़ो टोख्टे च़ेए मूसाबि रेंए केतु। परमेश्वरे पालन लेईमि थल्ज़ि मीतिंग ऊई ला मास्स तरीका रन्दू। अगर मीच़ि दु तरीकारे तु पालन लेईरे सेत परमेश्वरे दु मीतिंग आशीष ए दोतु सुरक्षा लेईमी कसम लरी। परमेश्वरे कुड़ि कि अगर दोच़ि दीतु पालन मलेईरे सेत दोई दोतिंग सज़ा रमोतो।

![](https://cdn.door43.org/obs/jpg/360px/obs-en-13-11.jpg)

मास्स ध्याड़ा तचे, मूसा सीनै गो पुन्ज़ारिंग ए बांग्ज़िरी। दोई परमेश्वर रांग गप्पा लेई लेकी तोई। पर मीरे दोऊ याच़िमी थल्ज़ि रुमज़ा रुमज़ा छचे इलिरे। दोऊ थल्ज़ि हारूनो कचांग ज़ागं कुरच़ा अतिरे दांग दोबि इच़ा मुर्ति बनाचिरिंग कुड़िरे ताकि दोच़ि परमेश्वरो बोन्दे दोऊ उपासना लेई तरफोरे। ध्याहं ले दोच़ि परमेश्वरो पाटि बेद आन्जि रूपरिंग पाप लेईरे

![](https://cdn.door43.org/obs/jpg/360px/obs-en-13-12.jpg)

हारूने रेन्ज़ो आकारो ज़ागंज़ु इच़ा मूर्ति बनाति। दोच़ि दु मूर्ति मनेक्च़ि च़ुक्तिरे आई दांग दोबि बलि ल रेईंरे! दोतु पापो वजहज़ी परमेश्वर दोतांग मास्स रोशेक्सा इन्दे। दोई दोतिंग खत्म ले केचिम तरे। पर मूसाज़ि दोतिंग म साच़िमि थल्ज़ि प्रार्थना लरी। परमेश्वरे दोऊ प्रार्थना रेड्रिरि दांग दोतिंग म सादि।

![](https://cdn.door43.org/obs/jpg/360px/obs-en-13-13.jpg)

थलमुकरिंग मूसा सीनै गोरिगंज़ि ताकसा अन्जा। मूसा राग्गटु दु जुट पट्टकुतिंग कुरच़ा तोई आंरतिग परमेश्वरे दु सा आज्ञारे च़ेयति। दांग दोई दु मूर्ति तांगरि। दोबि धोंड़ रोष आति कि दोई दु राग्गतु पट्टकुतिंग चुरुग मुरुग ले केरि।

![](https://cdn.door43.org/obs/jpg/360px/obs-en-13-14.jpg)

दांग मूसाज़ि दु मूर्ति पीसेके दोऊ धस्स बनाके केरि, दांग दु धस्सबि तिरांग च्वाचे दु मीतिंग पिलाति। परमेश्वरे दु मीतु टोखटे इच़ा मुसीबत च़रति दागं दोतु बिचांगज़ि मास्स मीरे सिए इलिरे।

![](https://cdn.door43.org/obs/jpg/360px/obs-en-13-15.jpg)

आऊँ पट्टतिंग मूसाज़ि थाके केति दोऊ ठाढ़ि लेप्च़िमि थल्ज़ि मूसाज़ि दु सा आज्ञाज़ु राग्गटु खरकोई पट्ट बनाति। दांग दु ओल्ला गो टोखटे लोक्सरि दांग प्रार्थना लरि कि परमेश्वरे दोतिंग माफ लोतो। परमेश्वरे मूसाज़ु रेड्रिरि दांग दोतिंग माफ लरि। खारकोई पट्टतिंग सा आज्ञारे कुरच़ा मूसा योंखा ताग्सा आति। दांग परमेश्वरे सीनै गोरिंगज़ि च़ुके वायदाज़ु देश तचे इस्राइलितिंग आम्म कान्डी।

*बाइबलौ किताबंज़ी लेप्सी कहानी र्निगमन अध्‍याय 19-34*

## 14. इस्राएली मीतु जंगलंग भटकेक्पी

https://openbiblestories.org/l/ps-x-pathani/story-14/

![](https://cdn.door43.org/obs/jpg/360px/obs-en-14-01.jpg)

इस्राइलितिंग बत्ते नियमतिंग कन्जे थल्ल परमेश्वरे सीनै गोज़ु तूखा दोतिंग अम्म कन्जतो। परमेश्वरे दोतिंग वायदो देशांग शिन्ज़िमि तरे। छेबि कनान देश कुट्रा तोईरे। परमेश्वर डु ज़ु थम्म बनेके दोतु तुईच़ि-तुईच़ि जोरि, दांग दोरे दोऊ थल-थल जोईरे।

![](https://cdn.door43.org/obs/jpg/360px/obs-en-14-02.jpg)

परमेश्वरे अब्राहम, इसहाके याकूबरांग वायदा लत्ते कि दोई दु वायदाज़ु देश दोतु वंशजतिंग रमोतो, पर एन्थेग दोरतिग मस्स जातिरे बंगज़ि लेकि तोइरे। दोतिंग कनानी कुचि तोई। दि कनानि मीरेच़ि परमेश्वरो पूजा मलज़ि तोई आई दोऊ हुकुम ला ममनेक्च़ि तोई दोच़ि हपसी देवतातिंग मनेक्च़िए उई मस्स माजि कम लज़ि तोई।

![](https://cdn.door43.org/obs/jpg/360px/obs-en-14-03.jpg)

परमेश्वरे इस्राएलिरेतांग कुत्तो, “अपेल केरे दु वाचाज़ु देशांग योईं दोरतिगकि बत्ते कनानिरेतुंगज़ि छुटकारा लेपचे च़रतुईं। दोतांग साथे सुलह थलाईं दोतांग ब्याह ला थलाईं। केतिंग दोतु बत्ते मूर्तितिंग खत्म लेई लेपोतो। अगर केच़ि ग्यु भाशे मलरईं सेत, केच़ि ग्यु भोन्दे दोतु देवतातु पूजा लज़ि शुरू लोईं।”

![](https://cdn.door43.org/obs/jpg/360px/obs-en-14-04.jpg)

आपेल इस्राएलीरे कनानो सीमारिंग पिचतोर, मूसाज़ि इस्राएलिरे तु इच़ा-इच़ा जातो धुना इच़ा-इच़ा ले 12 गांग्मितिंग चुनेक्तो। दोई दोतिंग इन्जे दु देश चिछो तोदा दु भेद लेप्च़िमि हुकुम रन्दो। दोतिंग दु कनानी रेतु ल भेद लेप्च़िमि तोई कि दोरे तकड़ा तोतोरे आ कमज़ोर तोतोरे।

![](https://cdn.door43.org/obs/jpg/360px/obs-en-14-05.jpg)

दु 12 गांग्मिच़ि पूरा कनानो दुन्ना शुचे ञिंन्ज़ामि ध्याड़ो यात्रा लज़ा वापस अच़ा आतिरे। दोच़ि मीतिंग कान्जतोर कि, “दु देश मास्स उपजाऊ ए मास्स फसल तो!” पर सा भेदिरेच़ि कुड़िरे, “दोतु नगर मास्स ताकतवर तो आई दु मीरे लम्बे- चौड़े तोतोर। अगर हेन्ज़ि दोतु टोखटे हमला लरेईं सेत, दोच़ि पक्का हेन्दिंग यारचे क्योरे दांग हेन्दिंग सचे क्योरे।”

![](https://cdn.door43.org/obs/jpg/360px/obs-en-14-06.jpg)

धोत्तरे कालेब यहोशू ए उई जुट भेदि कुई कुड़िकु, “दि हेल्ले शु कि कनानो मीरे लामे ए तगड़ा तोतोर, पर हेन्ज़ि दोतिंग यारचि तरछ़ि! परमेश्वर हेन्दु थल्ज़ि लड़ेक्पोतो।”

![](https://cdn.door43.org/obs/jpg/360px/obs-en-14-07.jpg)

पर मीच़ि कालेब ए यहोशू ज़ु म रेड्रिरे। दोच़ि मूसाए हारूनो टोखटे रोष ले कुड़िरे, “केच़ि ञेतिंग दि बेद आन्जि ठाढ़ि रिंग चिल लेन्ज़ा अन्दईं? हेन्दिंग मिस्रांग ए बांगज़ि जूंशी तोई। अगर हेन्दरे दु देशांग इलिंईं सेत हेन्दरे लड़ाई रिंग सीए योईं,दांग कनानो मी च़ि हेन्दु मेच़ा काटुतिंग गुलाम बनाके केयोरे।” दु मी च़ि दोतिंग यच़ा मिस्रो आखा शिन्जमि थल्ज़ि इच़ा उई प्रधान बी चुनेक्च़िम तरेर।

![](https://cdn.door43.org/obs/jpg/360px/obs-en-14-08.jpg)

अपेल दु मीच़ि ध्याँ कुड़िरे दंग परमेश्वरबी मस्स रोश अच़ा अति। परमेश्वरे मिलापो तम्बुंग अन्जे कुड़ि, “केच़ि ग्यु खिलाफ बगावत लत्तईं, दोऊ थल्ज़ि द केतिंग दि वणंग भटकेक्पि लेपोतो। हर इच़ा मी आँउ दु ञिंज़ा सालो तो या दुबेच़ि मोड़े उमरो तो दोर सी योतो दगं अपेल ला दु देशांग अपि मरपोतो अऊँ गे केतिंग रन्जतेग। कालेब ए यहोशू झेत्ते दोऊ अन्दरेग आपोकू।”

![](https://cdn.door43.org/obs/jpg/360px/obs-en-14-09.jpg)

अपेल मीच़ि परमेश्वरबी ध्याँ कुट्रि रेड्रिरे, दंग दोरे दुखी शुईरे छेई कुचे दोच़ि पाप लत्तेर। दोऊ थल्ज़ि दोच़ि कनानो मीतु टोख्टे हमला लेईमि फैसला लरिरे। मूसाज़ि दोतिंग मेबिमि चेतावनी रणी छेई कुचे परमेश्वर दोतांग साथे मतोई, पर दोच़ि दोऊ मरेड्रिरे।

![](https://cdn.door43.org/obs/jpg/360px/obs-en-14-10.jpg)

परमेश्वर दि लड़ाईरिंग दोतांग साथे मेजते, दु वजहज़ि कनानिरेच़ि दोतिंग यारचि केरिरे दंग दोतु बिचांगज़ि मास्स मीतिंग साचे केरिरे। दंग इस्राएलो मीरे कनानंगज़ि वापिस यच़ा इलिरे। तूखा निन्ज़ामि वर्ष तचि, दोरे वणंग देखा-नोखा भटकेक्पोरे।

![](https://cdn.door43.org/obs/jpg/360px/obs-en-14-11.jpg)

इस्राएली मीतू निन्ज़ामि साल तचे वणगं भटकेक्पिमि धोपेल, परमेश्वरे दोतु ज़रूरतबी पूरा लत्तु। दोई दोतिंग स्वर्गांगज़ि “मन्ना” कुचे रोटी रणी। दोई बटेर मिनदांग प्यारेतु झुण्ड ला दोतु कचांग च़रति ताकि दोतिंग ज़ेईमि थल्ज़ि शा शोतो। दु पूरा समय परमेश्वरे दोतु खम-मेश दुआक्पीरिंगज़ि बचाकी त्यते।

![](https://cdn.door43.org/obs/jpg/360px/obs-en-14-12.jpg)

देर तच्चे कि परमेश्वरे दोतु तुंग्विमि थल्‍ज़ि चमत्कारो ठ्रो गोच़ो धुन्ना ती हुन्जतु। पर दि बत्ते धिर ले थल ला इस्राएलिरेच़ि परमेश्वर ऐ मूसा ज़ु खिलाफ शिकायत ए कुड़कुड़ाच़ि च़ुक्तिरे। तां ल परमेश्वर विशवासो जोगे तोई। दोई अब्राहम, इसहाके, याकूब रांग साथे दोतु वशंतु थल्ज़ि चि लेइमि कसम लत्ते दोई दु ले केरि।

![](https://cdn.door43.org/obs/jpg/360px/obs-en-14-13.jpg)

इच़ा उई वक्त अपेल दोतु दोर तुंगबिमि थल्ज़ि ती मतोई, परमेश्वरे मूसा बि कुड़ि, “बेरांग गप्पा लोऊ, “दांग दोरतिगच़ि ती हुच़ोतो”। पर मूसाज़ि बे रांग गप्पा मलतो। ध्वां मले दोई बे बी डंडा ज़ी जुट फेरा गा केत्तु। जाँ ले दोई परमेश्वरो अनादर ले च़रचतु। बत्तेतु थल्ज़ि बेरिंगज़ि तुंगबिरिंग ती त हुन्ज़ा आति, पर परमेश्वर मूसारांग रोशेक्सा इलि। दोई कुत्तो, “छेईकुचे केई जाँ लत्तन, दोऊ थल्ज़ि क वायदाज़ु देशागं इबि मारपोन।”

![](https://cdn.door43.org/obs/jpg/360px/obs-en-14-14.jpg)

अपेल इस्राएलो मीरे ञिन्ज़ा साल बणंग यन्जे इन्जि तोइरे, दांग अच़ि परमेश्वरो खिलाफ बगावत लत्तेर दोरे बत्ते सिए इन्दोर। दांग परमेश्वरे दोतिंग यच़ा दु प्रतिज्ञा ज़ु देशो किनारे तचे शिन्दो। द मूसा मस्स यांग्शे इन्जि तोई, दोऊ थल्ज़ि परमेश्वरे मीतु अगुवाई लेईमी थल्ज़ि यहोशुबि दोऊ मदद लेईमि थल्जि चुनेकतु। परमेश्वरे मूसा रांग दि प्रतिज्ञा ल लत्तु कि इच़ा ध्याड़ा दोई दोतु कचरिंग मूसाऊ छो ए इच़ा भविश्य कन्जाड़ च़रचतो।

![](https://cdn.door43.org/obs/jpg/360px/obs-en-14-15.jpg)

दागं परमेश्वरे मूसा बी इच़ा गो ज़ु पुन्ज़ारिंग इबिरिंग कुत्तो छेई कुचे दोबि प्रतिज्ञा ज़ु देश तांगफि जुस। मूसाज़ि दु प्रतिज्ञा ज़ु देश तांग्तु पर परमेश्वरे दोबि दोर इबि मरेईं। दागं मूसा सिए इलि, इस्राएलिच़ि ञिज़ो सा ध्याड़ा तचे दुख मनाक्तोर। यहोशू दोतु खारकोई आमकन्जाड बनेके इन्जा। यहोशु इच़ा रुठे प्रधान तोई। छेई कुचे दोई परमेश्वरो टोखटे विशवास ए दोऊ गप्पा मनेक्ति।

*व्यवस्थाविवरण 34 बाइबलौ किताबंज़ी लेप्सी कहानी अध्‍याय 16-17;गिनती10-14;20;27*

## 15. वायदा ज़ु देश

https://openbiblestories.org/l/ps-x-pathani/story-15/

![](https://cdn.door43.org/obs/jpg/360px/obs-en-15-01.jpg)

थल्ल मुकरिगं, दा दु ध्याड़ा अच़ा अति अपेल इस्राइलो मीरॆ दु प्रतिज्ञा ज़ु देश, कनानॊ तोंखा योरे। दु देशांग इच़ा यरीहो मिनदांग नगर तोई। दोऊ रक्षाऊ थल्ज़ि दोर पीला तरफे पक्का भीतिरे तोईरे। यहोशू ज़ि दु नगरांग जुट भेदि कु च़रति। दु नगरांग राहाब मिन दांग इच़ा लांग्ज़ाड़ मेच़मि(वेश्या) तोई। दोई दु भेदितिंग बचाकतु, दांग थले दोई दोकुतिंग दु नगरांगज़ि बचेके हुच़ि रिंग मदद लत्तु। दोई ध्यांह लत्तु छेरिंग कुचे दोई परमेश्वरो टोखटे विशवास लज़ा तोई। आऊं घड़ी इस्राइलो मी च़ि यरीहो नगरो नाश लोरे दोपेल दोच़ि राहाब ए दोऊ टाबरो रक्षा लेईमि प्रतिज्ञा लत्तेर।

![](https://cdn.door43.org/obs/jpg/360px/obs-en-15-02.jpg)

इस्राएलो मीतिंग प्रतिज्ञाओ देशांग इबिमि थल्ज़ि यरदन बेन्डि राप्शिमि तोई। परमेश्वरे यहोशू रांग कुत्तो, “याजकतिंग तुई इबि राईं।” आपेल याजकच़ि यरदन बेन्डिंग कोन्ज़ा केरिरे तिऊ धारा बहेक्पि बन्द शुचे इलि, छेई कुचे इस्राएलि मीरे बेन्डिऊ नुरे कारचि धरतिऊ टोखटे इबि तरफोरे।

![](https://cdn.door43.org/obs/jpg/360px/obs-en-15-03.jpg)

दु मीतु यरदन बेन्डि पार ले थल परमेश्वरे यहोशू रागं कुत्तो कि यरीहो टोखटे हमला लेईरिंग तैयार तोईं, छेईकुचे दु इच़ा मास्स पक्का नगर तोई। परमेश्वरे दु मीतांग कुत्तो कि दोतु याजक ए दोऊ सैनिकतिंग त्रुई ध्याड़ा तचे दु नगरो फेरे किरज़ि लेपोतो। दांग याजकच़ि ए सैनारेच़ि ध्वांए लेईरे।

![](https://cdn.door43.org/obs/jpg/360px/obs-en-15-04.jpg)

दांग ञिंज मेतिंग, एस्राएलिरेच़ि दु नगरो फेरे ञिंज फेरा उई किरज़िरे। दोतु नगरो फेरे ञिंज फेरा किरज़ा थल, याजकच़ि रणशिंग कुलिरे दांग सैनिकच़ि जयकारा रेईंरे।

![](https://cdn.door43.org/obs/jpg/360px/obs-en-15-05.jpg)

ङिजफेरा कोरो रैंए थल्ल यरीहो ज़ु फेरे भीति दचे इलि। छना परमेश्वरे आदेश रन्दे इस्राएलिरेच़ि नगरो हर चीज़ बि तबाह ले केरिरे। दोच़ि राहाब ए दोऊ टाबर तिंग जेत्ते केचे केरिरे, दांग दोरे इस्राएलीतागं साथे शुचे इलिरे। अपेल कनानंग बांगज़ाड़ उई मी च़ि ल थज़िरे कि इस्राइलीरेच़ि यरीहोबि तबाह ले केरिरे दांग दोरे बए इलिरे कि इस्राएलीच़ि दोतु टोखटे ला हमला लोरे।

![](https://cdn.door43.org/obs/jpg/360px/obs-en-15-06.jpg)

परमेश्वरे इस्राएलितिंग आज्ञा रन्दे कि कनानंग बंगज़ाड़ आँऊ ला जाति रांग साथे शान्तिउ थल्ज़ि समझौता थलाईं। पर गिबोनियों मिनदांग इच़ा कनानि जातिज़ि यहोशुरांग हापसि कुड़ि कि दु कनान बेच़ि ओई तारे इच़ा ठाड़िरिंग बंगज़ाड़ शु। दोच़ि यहोशु रांग दोतांग साथे शान्तिऊ समझौता लेइरिंग थल्ज़ि ज़ी लत्तोर। यहोशू ए उई इस्राएली प्रधानरेच़ि परमेश्वरबी मरुक्तिरे कि दोतिंग चि लज़ि जुस। दोऊ भोन्दे, दोच़ि गिबोनिरेतांग शान्तिऊ समझौता ले केरिरे।

![](https://cdn.door43.org/obs/jpg/360px/obs-en-15-07.jpg)

शुमु ध्याड़ो थल, इस्राएलीतिंग पता लेति कि गिबोनी मीरे कनानंग ए बांगज़ा तोइरे। दोरे रोशेक्सा इलिरे छेईकुचे गिबोनिरेच़ि दोतिंग धोखा रन्देर। पर दोच़ि दोतांग साथे लसि शान्तिऊ समझौता बि ध्वाँए तरिरे छेई कुचे दु परमेश्वरो तुईच़ि लतेर। दांग मिना ध्याड़ो थल कनानंग बांगज़ाड़ इच़ा उई जाति, एमोरियों ज़ु रज़ारे च़ि थज़िरे कि गिबोनियों रेच़िइस्राएलितांग साथे शान्तिऊ समझौता ले केतोर, दोऊ थल्ज़ि दोच़ि एनतु सेनातिंग इच़ा ले इच़ा मास्स मोढ़े सेना बनातिरे दांग गिबोनो टोखठे हमला ले केरिरे। गिबोनिरेच़ि दोतु मदद लेइमि थल्ज़ि यहोशू कचरिंग उजाब च़रतिरे।

![](https://cdn.door43.org/obs/jpg/360px/obs-en-15-08.jpg)

दागं यहोशूज़ि इस्राएलितु सेनाबी ठ्रोक्कन ले गिबोनियों तु कचांग पिपिम थल्ज़ि दोरे पूरा रात जोरिरे। मुन्जे सारके दोच़ि एमोरियोंतु सेनाओ टोखटे हमला ले दोतिंग छ़ज़ि ले केरिरे।

![](https://cdn.door43.org/obs/jpg/360px/obs-en-15-09.jpg)

दोथिंग परमेश्वर इस्राएलितु थल्ज़ि लड़ेका। दोई मोरियों तिंग बेइ ले केरि दोई मास्स मोढ़े-मोढ़े शरू थचे एमोरि तिंग साचे केरि।

![](https://cdn.door43.org/obs/jpg/360px/obs-en-15-10.jpg)

परमेश्वरे ऐके बी ला सर्गांग इच़ा ठाड़िरिंग चचे केरि छोऊ थल्ज़ि इस्राएलितिंग एमोरिरेतिंग पूरे तरह हराच़िम थल्ज़ि कश्शी समय खोकसतो। दोथिंग,परमश्वरे इस्रएली तु थल्ज़ि इच़ मोढ़े जीत लेप्ति।

![](https://cdn.door43.org/obs/jpg/360px/obs-en-15-11.jpg)

अपेल परमेश्वरे दु सेनातिंग हराति दोऊ थल, मास्स कनानि जातो मीरे इस्राएलो टोखटे हमला लेईमि थल्ज़ि कट्ठा शुईरे। यहोशू ए इस्राएलिरेच़ि हमला ले दोतु सर्वनाश ले केरिरे।

![](https://cdn.door43.org/obs/jpg/360px/obs-en-15-12.jpg)

दि युद्धो थल, परमेश्वरे इस्राएलो इच़-इच़ जात बी प्रतिज्ञा ज़ु दु देशांग दोतु हिस्सा रेईं। दांग परमेश्वरे इस्राएल बी दोतु बत्ते सीमातिंग शान्ति रणी।

![](https://cdn.door43.org/obs/jpg/360px/obs-en-15-13.jpg)

अपेल यहोशु यांग्शे इलि दोई इस्राएलो बत्ते मीतिंग इच़ा साथे बुलाति। दांग यहोशुज़ि दु मीतिंग हिद कराति कि दोच़ि दु वाचा बी मनेक्च़िमी वायदा लत्तेर आऊँ परमेशवरे दोतांग साथे सीनै गोरिंग लत्ते। दु मीच़ि परमेश्वरबी विश्वास लज़िमि ए दोऊ व्यवस्थाबि मनेक्च़िम कसम लेईरे।

*यहोशु अध्याय 1-24 बाइबलो इच़ा कथा।*

## 16. छुड़ाच़ारे

https://openbiblestories.org/l/ps-x-pathani/story-16/

![](https://cdn.door43.org/obs/jpg/360px/obs-en-16-01.jpg)

यहोशूज़ु सिए थल इस्राएलिरेच़ि परमश्वरो आज्ञा ममनेक्तिरे। दोच़ि परमेश्वरो नियमो पालन मलरिरे, दांग दोच़ि दु वाचाओ देशांगज़ि बचेकि कनानिरेतिंग धाक्तिका महुतिर। इस्राएलिरेच़ि एनतु सच्चे परमेश्वर, यहोवाबि छोड़ेके कनानिरेतु देवतातिंग मनेक्च़ि च़ुके केरिरे। इस्राएलिरेतु कचरिंग अरला राजा मतोई, दोऊ थल्ज़ि आतिंग चि रुठे अति दोच़ि दुए लरि।

![](https://cdn.door43.org/obs/jpg/360px/obs-en-16-02.jpg)

परमेश्वरो आज्ञा ममनेके इस्राएलिरेच़ि इच़ा नियम शुरु लेइरे छेबि दोच़ि मास्स फेरा दोहराकतेर। दि नियम ध्याहं छो चलेका: मिना वर्ष तचे इस्राएलीरेच़ि परमेश्वरो आज्ञा ममनेक्पोर, दांग दोई दोतिंग दोतु दुश्‍मनतु दोरच़ि यारज़ि ले सज़ा रमोतो। दि दुश्मनच़ि इस्राएलिरेतु च़ीज़रे लूटेके च़रपोर, दोतु जागारे नष्ट ले च़रपोरे, आई दोतु बिचांगज़ि मास्स मी सचे च़रपोर। दांग अपेल इस्राएलिरेतु दुश्मनच़ि दोतु टोख्टे मास्स वर्ष तचे ज़ुल्म लोर, दोऊ थल इस्राएली रेच़ि एनतु पापो पश्च़ाताप लोरे आई परमेश्वरबी दोतिंग बचाच़िम थल्ज़ि प्रार्थना लोरे।

![](https://cdn.door43.org/obs/jpg/360px/obs-en-16-03.jpg)

घड़ि-घड़ि इस्राएलीच़ि पश्चाताप लोरे दांग परमेश्वरे दोतिंग बचापोतो। परमेश्वरे दोतिंग छुड़ाच़ाड़ो मुके ध्यांह लोतो- इच़ा ध्यांह ठ्रो मी अरि दोतु दुश्मनतांग लड़ेक्पोतो ए दोतिंग यारपोतो। दोपेल देशांग शान्ति शोतो दांग दु छुड़ाचाड़े दोतु टोखटे रुठे ले राज लोतो। परमेश्वरे दोतिंग छुड़ाच़िम थल्ज़ि मास्स छुड़ाच़ारे च़रचतु। परमेश्वरे कचरिंग ए इच़ा दुश्मन जात, मिधानियोंतु धुन्ना इस्राएलिरेतिंग यारचे ओल्ला ध्यांह लरि।

![](https://cdn.door43.org/obs/jpg/360px/obs-en-16-04.jpg)

मिधानिरेच़ि ङिज वर्ष तचे इस्राएलिरेतु फसलतिंग लुटेकतिर। इस्राएलि मिरे मास्स बेय इन्देर, दांङ दोरे फुक्टेतुंग ब्याके इलिरे ताकि मिधानि मीच़ि दोतिंग पेट्रि मरतुरे। थल्ल मुकरिंग, दोतिंग बचाच़िम थल्ज़ि दोच़ि परमेश्वरबि हाग रेईंरे।

![](https://cdn.door43.org/obs/jpg/360px/obs-en-16-05.jpg)

गिदोन मिन्दांग इच़ा इस्राएली गांग्मि तोई। इच़ा ध्याड़ा, दु इच़ा गुप्त ठाड़िरिंग छवा कुटेक्च़ि लेकि तोई ताकि मधानीरेच़ि दोबि कूज़ी मरपोरे। यहोवा ज़ु स्वर्गदूते गिदोनो कचरिंग अन्जे दोबि कुत्तो, “हे बहादुर योद्धा, परमेश्वर करांग साथे तो। इला दांग इस्राएलि रेतिंग मिद्यनितु धुन्ना बचातु।”

![](https://cdn.door43.org/obs/jpg/360px/obs-en-16-06.jpg)

गिदोनो बा ज़ु कचरिंग मूर्तिबि शेलसि इच़ा वेदि तोई। बब्बे मुन्डु गप्‍पा आंऊ परमेश्वरे गिदोनबि लज़िरिंग कुत्ते दु दुसांग वेदिबि थाक्च़ि तोई। पर गिदोन मीतांग बेई तोई, दोऊ थल्ज़ि दोई रात शुबिमी थल्ज़ि रुमज़िरि। दांग दोई दु वेदि बी थक्शे खान्नि खान्नि ले केरि। दोई परमश्वरो थल्ज़ि इच़ा नया वेदि बनाति दांग दोऊ टोख्टे परमेश्वरबि बलि चढ़ाति।

![](https://cdn.door43.org/obs/jpg/360px/obs-en-16-07.jpg)

ओईरांग मुन्जे मिच़ि खणींरे कि अच़िया वेदि बि थाक्शे खान्नि खन्नि ले केशि तो, दिऊ थल्ज़ि दोतिंग मास्स रोष अति। दोरे गिदोनबि सचे केट्रिम थल्ज़ि दोऊ चुंञ इलिरे, पर गिदोनो बा ज़ि कुड़ि, “केच़ि चिल केतु देवतातु मदद लेईमि कोशिश लज़ि लेकि तोतोईं? अगर दु देवता शु सेत दोबि एनो रक्षा एनबि लज़ि राईं!” छेई कुचे दोई ध्यांह कुड़ि दोऊ थल्ज़ि मीच़ि गिदोन बी मसदिरे।

![](https://cdn.door43.org/obs/jpg/360px/obs-en-16-08.jpg)

दोऊ थल्ल इस्राएलिरेतिंग लुटेक्चिम थल्ज़ि मिधानि मीरे ओल्ला अतिरे। दोरे धों मस्स तोईरे कि दोतिंग मिक्च़ि ल तरछ़िम मतोई। गिदोने दोतांग लड़ेक्पिम थल्ज़ि इस्राएलीतिंञ इच़ा साथे बुलाकतु। गिदोने परमेश्वरो धुन्ना जुट सुन्नाह पेढ़ि ताकि दोबि विश्वास शुचे योतो कि परमेश्वरे हेल्ले दोबि इस्राएलितिंग बचाच़िम थल्ज़ि कुट्रि लेकि तो।

![](https://cdn.door43.org/obs/jpg/360px/obs-en-16-09.jpg)

मुन्डो सुन्नाऊ थल्ज़ि, गिदोने त्रैईंऊ च़ाम्मबि धरतिऊ टोख्टे केचे परमेश्वरबी कुड़ि कि मुन्जेऊ बिल धरतिऊ टोख्टे मपड़ेकि दु त्रैईंऊ बोट्रो टोख्टे जेत्ते पड़ेक्पि जुस। परमेश्वरे ध्यांह ए लरि। ओईराग ञंयोखोल, दोई परमेश्वरांग कुड़ि कि धरति आलेग शुचे इबि जुस पर त्रेईंऊ बोट्रा कारचि केचि जुस। परमेश्वरे ध्यांह ल लरि। दि जुट सुन्नाह ज़ु कारण गिदौने विश्वास लरि कि परमेश्वरे हेल्ले जुन्ज़ा कि दोई इस्राएलिरेतिंग मिधानिरेतांग बचापोतो।

![](https://cdn.door43.org/obs/jpg/360px/obs-en-16-10.jpg)

दोऊ थल गिदोने सैनिकतिंग एनो कचरिंग बुलाकतु दांग 32,000 गांग्मी रे अतिरे। पर परमेश्वरे दोरांग कुड़ि कि दिरे मास्स तोतोरे। दांग गिदोने दोरे बत्ते 22,000 तिंग वापस यचे केतु आऊं दोरे लड़ेक्पिरिंग बेई तोईरे। परमेश्वरे गिदोनरांग कुड़ि कि दि गांग्मिरे आत ल मास्स तोईरे। दिऊ थल्ज़ि गिदोने 300 सैनिकतिंग केचे दु बत्तेतिंग चुंखा च़रचे केरि।

![](https://cdn.door43.org/obs/jpg/360px/obs-en-16-11.jpg)

दु रात परमेश्वरे गिदोनरांग कुड़ि कि, “मिधानिरेतु तम्बुरिंग इला दांग दोतिंग गप्पा लत्तर रेड्रु। अपेल केई रेड्रोन कि दोच़ि चि गप्पा लज़तोर दांग क दोतु टोखटे हमला लेईरिंग म बेओन।” दिऊ थल्ज़ि दु रात, गिदोन योंखा दोतु तम्बुरिंग इन्जा दांग दोई इच़ा मिधानि सैनिकबि एनो मित्र बी दु गप्पा कान्ड्रतर रेड्रिरि आंउ दोई माङरिंग तांगते। दु मिऊ मित्रे कुडि, “दि माञं ज़ु अर्थ शु कि गिदोनो सेनाज़ि हेन्नरे यारच़े चरपोरे!” अपेल गिदोने दि थज़ि दांग दोई परमेश्वरो प्रार्थना लरि।

![](https://cdn.door43.org/obs/jpg/360px/obs-en-16-12.jpg)

दोऊ थल्ल गिदोन एनो सैनिकतु कचरिंग याच़री आई इच़ा-इच़ा बि रणशिंग, इच़ा शो ज़ु नन, इच़ा मशाल रणीं। दोच़ि दोतु तम्बूरेतिंग घेरेके च़रच़तोरे आंरतिक मेधानी सैनिकरे फेटे शुचि तोईरे। गिदोनो 300 सैनिकच़ि एनतु मशालरे नान्देच़ि काप्शि तरिरे दिऊ थल्ज़ि मिधानि मीच़ि दु मशालो छांञिबि खान्ड्रि मारतिरे।

![](https://cdn.door43.org/obs/jpg/360px/obs-en-16-13.jpg)

दोऊ थल्ल गिदौनो बत्ते सैनिकच़ि एनतु नन्दे इच़े घड़िरिंग थाक्शे अचानके मशालो मे बि कान्डिरे। दोच़ि एनतु रणशिंगरे कुल्डिरे दांग जयकारा रड़िंरे, “यहोवाऊ हाखा गिदोनो तलवार!”

![](https://cdn.door43.org/obs/jpg/360px/obs-en-16-14.jpg)

परमेश्वरे मिधानिरेतिंग पज़ल ले केरि, दिऊ थल्ज़ि दोरे एनतु बिचांग तेंगज़िए ट्रिक्सि लेकि तोईरे। दोथरे, गिदोने एनो उजाब रन्जाड़ रेतिंग इस्राइलितु कचरिंग मिधानितु पीछा लज़िम थल्ज़ि दोतु मदद लेईमि थल्ज़ि बुलाति दोच़ि दोतु बिचांग ज़ि मास्स तिंग साचे केरिरे आई बाकितु पीछा ले दोतिंग इस्राएलो देशांग ज़ि हुन्जे च़रतिरे। दु ध्याड़ा 1,20,000 मिधानिरे सिए इलिरे। ओ ध्यांह छो परमेश्वरे इस्राएलबि बचाति।

![](https://cdn.door43.org/obs/jpg/360px/obs-en-16-15.jpg)

दु मीच़ि गिदोन बि एनतु राजा बनाचिम तरिरे, पर गिदोने दोतिंग ध्यांह लज़ि मरेईं, पर दोई दोतु दोरच़ि दु ज़ागंज़ु गहनारे पेड़ि आऊं दोतु बिचांग ज़ि इच़ि-इच़िच़े मिधानियोतु दोरचि लुटेकतेर। दोच़ि गिदोनबि मास्स ज़ांग रणिंरे।

![](https://cdn.door43.org/obs/jpg/360px/obs-en-16-16.jpg)

दांग गिदोने दु ज़ांगज़ि इच़ा खास खाम्म बनाकतु छना कि मोड़े पुजारी लेच़ा तोईरे। पर मीच़ि दोबि मनेक्च़ि च़ुके केरिरे जां मनांग कि दु इचा मूर्ति शु। दांग परमेश्वरे यच़ा इस्राएलबि सज़ा रणीं छेई कुचे दोच़ि मूर्तिबि मनेक्तेर। परमेश्‍वरे दोतु दुशमनतिंग दोतिंग यारच़िम थल्ज़ि तरछि लरि। थल्लमुकरिंग दोच़ि यच़ा परमश्वरो दोरच़ि मदद लेईरिंग पार्थना लेईरे, दांग परमेश्वरे दोतु कचरिंग इच़ा उई छुड़ाच़ाड़बि च़रति।

![](https://cdn.door43.org/obs/jpg/360px/obs-en-16-17.jpg)

दि ए गप्पा मास्स फेरा घटेक्ति: इस्राएलो मी च़ि पाप लोरे, परमेश्वरे दोतिंग सज़ा रमोतो, दोच़ि पश्चाताप लोरे,दांग परमेश्वरे दोतिंग छुडाच़िम थल्ज़ि आतिंञा च़रपोतो। मास्स साल तचे, परमेश्वरे तेईया छुड़ाच़ाड़रेतिंग च़रचतु। आच़ि इस्राएलिरेतिंग दोतु दुश्मनतु धुन्ना बचाति।

![](https://cdn.door43.org/obs/jpg/360px/obs-en-16-18.jpg)

थल्ल मुकरिंग, दु मीच़ि उई देशो ठ्रो परमश्वरो धुन्ना एनतु थल्ज़ि इच़ा राजाऊ मांग लेईरे। दोच़ि इच़ा ध्यांह छो राजा पचेतेर आरि लामे ए शक्तिशाली शोतो, आच़ि युदधरिंग दोतिंग आम्म कान्ड्रि तरफोतो। परमेश्वरबि दि गप्पा पसन्द मादि, पर परमेश्वरे दोतिंग धुवां छो राजा रन्दु छना दोच़ि पेश़ी तरेरे।

*न्यायियों अध्याय 1-3;6-8;1 शमूएल 1-10 ज़ि इच़ा बाइबलो कथा*

## 17. दाऊद रांग साथे परमेश्वरो वायदा

https://openbiblestories.org/l/ps-x-pathani/story-17/

![](https://cdn.door43.org/obs/jpg/360px/obs-en-17-01.jpg)

शाऊल इस्राइलो मुन्डा राजा तोई। दु लम्मे ए साल्ठे तोई, छना दोच़ि जुन्जतरे च़ोप्पन ध्वाँए। इस्राइलांग एनो शासनो मुन्डा सालरिंग शाऊल इच़ा रूठे रज़ा तोई। पर थले दु इच़ा माजि मी बनेके इलि अचि परमेश्वरो गप्पाबि ममनेक्ति, दोऊ थल्ज़ि परमेश्वरे इच़ा उई मीबि बीणेंक्तो आंऊ दु इच़ा ध्याड़ा दोऊ ठाढ़िरिंग राजा बनेक्पतो।

![](https://cdn.door43.org/obs/jpg/360px/obs-en-17-02.jpg)

परमेश्वरे दाऊद मिनदांग इच़ा बाड़े इस्राएलि गांग्मिबि बीणेके इच़ा ध्याड़ा शाऊलो ठाड़िरिंग राजा शुबिम थल्ज़ि तैयार लेई च़ुके केतु। दाऊद बैतलहम नगरो इच़ा पोहाल तोई। कई मोक्कारिंग, दाऊदे थर ए ओमो जुल्लाकुतिंग साचे केते छेई कुचे दाऊदो बा ज़ु त्रैईंरे रुन्ड्रतर दोतु टोख्टे दोच़ि हमला लत्तेर। दाऊद इच़ा लिहाजी ए धर्मी मी तोई। दोई परमेश्वरो टोख्टे भरोसा लरि दांग दोऊ गप्पा मनेक्ति।

![](https://cdn.door43.org/obs/jpg/360px/obs-en-17-03.jpg)

अपेल दाऊद अत बाड़े गांग्मी तोई, दोई लामे-चौड़े गोलियतो खिलाफ लड़ाई लरि। गोलियत इच़ा मास्से रुठे सैनिक तोई। दु मास्स तकड़ा ए लगभग शुमु मीटर लामे तोई। पर परमेश्वरे गोलियत बी साच़िमि ए इस्राएल बी बचाच़िम थल्ज़ि दाऊदो मदद लरि। दिऊ थल दाऊद इस्राएलो दुशमन तांग मास्स फेरा ड्राक्ति। दाऊद इच़ा मोढ़े सैनिक बनेके इलि, दांग दोई मास्स युद्धरिंग इस्राइलो सेनातु अगुवाई लरि। मीच़ि दोऊ मास्स तारीफ लेईरे।

![](https://cdn.door43.org/obs/jpg/360px/obs-en-17-04.jpg)

मीच़ि दाऊदरांग धोण दा लरिरे कि शाऊलबी दोरांग साथे जेगदांग शुई। शाऊले दोबि साच़िमि तरे, दोऊ थल्ज़ि दाऊद दोरांग ए दोऊ सैनिक तांग ब्याक्पिम थल्ज़ि जंगलांग पोख्शे इलि। इच़ा ध्याड़ा, अपेल शाऊले दोऊ सैनिकरे दाऊदबी पेट्रि लेकि तोईरे दांग शाऊल इच़ा फुक्टु अनदरेग इन्जा। दि दु ए फुक तोई आंरतिग दाऊद ब्याकि तोई, पर शाऊले दोबि मतांगरि। दाऊद शाऊलो थलेच़ि दोऊ मास्स च़म्बे अच़ा इन्जा दांग दोऊ खामरिंग ज़ि इच़ा खान्नि चिके केरि। थले, अपेल शाऊल दु फुक्टुंगज़ि हुन्ज़िरि दाऊदे दोऊ खाम्म ज़ु खान्नि कान्डि। दि तरीकाज़ि, शाऊले ञेंए केरि कि दाऊदे राजा बनेक्पिमि थल्ज़ि दोबि सच़िरिंगज़ि इंकार ले केतु।

![](https://cdn.door43.org/obs/jpg/360px/obs-en-17-05.jpg)

मिना ध्याड़ो थल, शाऊल युद्धरिंग सिए इन्ज़ा, दांग दाऊद इस्राएलो रज़ा बनेके इन्जा। दु इच़ा रुठे रज़ा तोई, मीच़ि ला दोरांग साथे दा तरिरे। परमेश्वरे दाऊदबी आशीष रेईं आई दोबि सफल बनाति। दाऊदे मास्स लड़ाई लड़ेक्ति, दांग परमेश्वरे इस्राएलो दुशमनतिंग यारच़िम थल्ज़ि दोऊ मदद लरि। दाऊदे येरुशेलम नगरबि जीतेके दोबि एनो राजधानी बनाति, आंर दु बांगज़रि ए शासन लरि। दाऊद ञिंन्ज़ामि वर्ष तचे राजा तोई। दि मोक्को बिचांग, इस्राइल तारछि ए सेठ बनेके इन्दे।

![](https://cdn.door43.org/obs/jpg/360px/obs-en-17-06.jpg)

दाऊदे इच़ा मन्दिर बनाट्रिम तरे आंर बत्ते इस्राएलीच़ि परमेश्वरो पूजा लज़ि ए दोबि बलि चढ़ाच़ि तरफोर। क्योमे पिरा साल बेचि, दोच़ि मूसाज़ु बनाशी मिलापो तम्बूरिंग परमेश्वरो अराधना लज़ि लेकि तोईरे आई दोऊ थल्ज़ि बलि चढ़ाच़ि लेकि तोईरे।

![](https://cdn.door43.org/obs/jpg/360px/obs-en-17-07.jpg)

पर दोर नातान मिन दांग इच़ा भविष्य कुचाड़ तोई। परमेश्वरे दोबि दाऊदबी दि कुचि च़रच़तु “कि केई मास्स लड़ाई लड़ेक्तन, दोऊ थल्जि केई ग्यु थल्ज़ि दि मन्दिर म बनापोन। कां यो ज़ि दि बनापोतो। तां ल, गै कनिंग आर्शीवाद रमोगा। कनु इच़ा वशंज हमेशो थल्ज़ि ग्यु मीतु टोख्टे रज्ज़ा बनेके राज लोतो।” हमेशौ थल्ज़ि राज लज़ाड़ दु दाउदो इच़े वशंज मसीह तोई। मसीह परमेश्वरो चुनेक्सी मी तोई आच़ि स़ंसारो मितिंग दोतु पापरिंगज़ि बचापोतो।

![](https://cdn.door43.org/obs/jpg/360px/obs-en-17-08.jpg)

अपेल दाऊदे नातानो उजाब रेड्रिरि दोई परमेश्वरो धन्यवाद ले दोऊ प्रार्थना लरि। परमेश्वरे दोऊ मान बढ़ाचिए दोबि मास्स आशीष रन्ड्रि लेकि तोई। दाऊदबि पता मतोई कि पमेश्वरे दि अपेल लोतो। दि वक्तरिंग हेन्ज़ि ञेंईं कि इस्राएलीतिंग इच़ा लामे वक्त तचे, क्योमे- क्योमे 1000 वर्ष तचे मसीह ज़ु आपिमि थल्ज़ि रुमज़ि लेपोतो।

![](https://cdn.door43.org/obs/jpg/360px/obs-en-17-09.jpg)

दाऊदे तेईया वर्ष तचे रूठे रांग शासन लत्ते। दोई मास्से इमानदारी रांग परमेश्वरो गप्पा बी मनेक्ते दांग परमेश्वरे दोबि आशीष रन्दे। हालांकि एनो उम्रो अंतरिंग दोई परमेश्वरो खिलाफ बेद आन्जि पाप लरि।

![](https://cdn.door43.org/obs/jpg/360px/obs-en-17-10.jpg)

इच़ा झा दाऊदे एनो महलांगज़ि धाक्तिका खणीं दांग दोर इच़ा साल्ठे मेच़मी बी सुज़तर खणीं, दोई दोबि मसेच़ि तोई। पर दोई पता ले केरि कि दोऊ मिन बतशेबा तोई।

![](https://cdn.door43.org/obs/jpg/360px/obs-en-17-11.jpg)

एनो नज़र फेरेक्च़िमी भोन्दे, दाऊदे दोबि एनो कचरिंग हापिमि थल्ज़ि आतिंङा च़रचतु। दु दोरांग साथे फेटे शुई दांग दोबि वापस च़रचे केरि। मिना ध्याड़ो थल बतशेबा ज़ि दि कुचे उजाब च़रचतु कि दु खोग्टांग तो।

![](https://cdn.door43.org/obs/jpg/360px/obs-en-17-12.jpg)

बतशेबा ज़ु गाक्सा उरियाह मिनदांग इच़ा मी तोई। दु दाऊदो बत्ते बे रूठे सैनिकतु बिचांग इच़ा सैनिक तोई। दु मोक्का दु युद्ध लज़ि धाक्तिका इन्जि तोई। दाऊदे ऊरिय्याह बि युद्धांग ज़ि वापस बुलाकै एनो मेच़ा रांग बागंज़िम थल्ज़ि कुत्तो। पर उई सैनिकरे युद्धांग तोईरे दोऊ थल्ज़ि उरिय्याह ज़ि चुंखा इबिरिंग मना ले केरि। दांग दाऊदे उरिय्याह बि वापिस युदधरिंग च़रचतु, दांग दोई सेनापति रांग दोबि दु ठाड़िरिंग केट्रिरिंग कुत्तो आंर दुशमन बत्ते बे तकड़ा शोतो ताकि दु दोर सिए योतो। दांग ध्याहंए शुई कि ऊरिय्याह युद्धरिगं सिए इलि।

![](https://cdn.door43.org/obs/jpg/360px/obs-en-17-13.jpg)

ऊरिय्याह ज़ु यद्धांग सिए थल दाऊदे बतशेबा रांग ब्याह ले केरि। थले दोई दाऊदो यो बी जेपि लरि। दाऊदे चि लत्ते दोरांग साथे परमेश्वर मास्स रोशेक्सा तोई, दिऊ थल्ज़ि दोई नातान इच़ा भविष्य कन्जाड़ बी दाऊद बी दि कान्ड्रिम थल्ज़ि च़रचतो कि दोऊ पाप अयों झाक तोई। दाऊदे एनो पापो पश्चाताप लत्तो दांग परमेश्वरे दोबि माफ ले केतु। एनो बचेकि जीवनांग, एनो खरे मोक्कारिंग ला दाऊद परमेश्वरो थले-थले जोया ए दोऊ गप्पा बी मनेक्तो।

![](https://cdn.door43.org/obs/jpg/360px/obs-en-17-14.jpg)

पर दाऊदो कटु सिए इन्जा। ध्यांह ले परमेश्वरे दाऊदबी सज़ा रन्दो। दिऊ अलावा, दाऊदो सीमि तचे, दोऊ एनौ टावरो रेई मीच़ि दोऊ खिलाफ लड़ाई लेईरे, दांग दाऊदो एनो बल थोड़े शुचे इन्दे। पर परमेश्वर विश्वासो जोगे तोई दांङ दोई आत्तला दु ए लत्ते आंऊ दोई दाऊद रांग लज़िमि वादा लत्ते कि दोई लोतो, हांलाकि दाऊदे दोऊ आज्ञाबि ममनेकते। थले दाऊदे बतशेबा ज़ु आईच़ा ऊई कटु शुई, दांग दोकुई दोऊ मिन सुलेमान केरिकु।

*1 शमूएल अध्याय 10;15-19;24;31;2 शमूएल 5;7;11-12 इच़ा बाईबलो कथा।*

## 18. इस्राएलो जुट हिस्सारिंग फाज़ि

https://openbiblestories.org/l/ps-x-pathani/story-18/

![](https://cdn.door43.org/obs/jpg/360px/obs-en-18-01.jpg)

दाऊद रज़ाज़ि ञिंन्ज़ामि साल तचे राज लत्ते। दोऊ थल दु सिए इलि, दांग दोऊ यो सुलैमाने इस्राराएलांग राज लज़ि च़ुक्ति। परमेश्वरे सुलेमान रांग गप्पा लरि दांग दोबि रुक्ति कि दोई बबै मास्स चि जुन्ज़िम ततु कि परमेश्वरे दोऊ थल्ज़ि पूरा लोतो। सुलैमाने परमेश्वरबी पेड़ि कि दोई दोबि मास्स दिमागी बनाके च़रतु। दि गप्पाज़ि परमेश्वरबी राजि ले केरि, दोऊ थल्ज़ि परमेश्वरे सलैमानबी संसारो बत्ते बे बुदधिमान गांग्मि बनाके च़रति। सुलैमान ए मास्स गप्पा रे सीखेकसरि दांग दु इच़ा मस्स बुद्धि च़टे राजा बनेके इन्जा। परमेश्वरे दोबि मास्स ढाबो ब्राक बनाके च़रति।

![](https://cdn.door43.org/obs/jpg/360px/obs-en-18-02.jpg)

येरूशलेमांग सुलैमाने दु मन्दिरबी बनाकतु छोऊ थल्ज़ि दोऊ बाज़ि सोचेक्सि तरे ए समान कट्ठा लसि तरे। द मीरे मिलापो तम्बुंग इबिम भोन्दे मन्दिरांग परमश्वरो आराधना ए बलि चढाचि तोईरे। परमेश्वर मन्दिरांग अन्जे एनो मीतु बिचांग बांगज़ि तोई।

![](https://cdn.door43.org/obs/jpg/360px/obs-en-18-03.jpg)

पर सलैमाने उई देशो मेच़मीतांग प्रेम लरि। दोई मास्स, लगभग 1000 मेच़मि तांग साथे ब्याह ले परमेश्वरो अपमान लरि! दीतु बिचांगज़ि मास्स मेच़मिरे उई देशांगज़ि अन्देर दांग एनतांग साथे एनतु सादेतिंग हातिरे दांग दोतिंग मेनेक्पा लरिरे। द सुलैमान यांग्शे इलि द दोई ल दोतु सादबि मनेक्च़ि च़ुक्ति।

![](https://cdn.door43.org/obs/jpg/360px/obs-en-18-04.jpg)

दि वजहज़ि परमेश्वर सलैमानरांग रोशेक्सा तोई। दोई कुड़ि कि दोई इस्राएल देशबी जुट राज्यरिंग फाज़ि ले दोबि सज़ा रमोतो। दोई सुलैमानो सिए थल ध्याँह लोतो।

![](https://cdn.door43.org/obs/jpg/360px/obs-en-18-05.jpg)

सलैमानो सिए थल, दोऊ यो रहबाम राजा बनेका। इस्राएल देशो बत्ते मीरे दोबि राजाओ रूपरिंग मनेक्च़िमि थल्ज़ि इच़ा नम ठ्रोक्कन शुईरे। दोच़ि रहबामरांग शिकायत लेईरे कि सुलैमाने दोतु दोरच़ि मास्स खरे काम लज़ि लत्ते दांङ मास्स कर लेप्च़ते। दोच़ि रहबामरांग शबस लरिरे कि दोतु धुन्ना थोड़े कम करातुईं।

![](https://cdn.door43.org/obs/jpg/360px/obs-en-18-06.jpg)

पर रहबामे दोतिंग मास्से मूर्खता रांग जवाब रेईं, “केच़ि कुचतईं कि ग्यु बा ज़ि केतिंग मास्स काम कराति। पर गै कैतु धुन्आ दोबे ल मास्स काम करापोग, दांग गै केतिंग दुबे ला मास्स तंग लोग्ग।”

![](https://cdn.door43.org/obs/jpg/360px/obs-en-18-07.jpg)

अपेल मीच़ि दोबि ध्यांह कुचि थश्तोर दोतु बिचांगज़ि मास्स मीच़ि दोऊ विरूद्ध बिरोध लरिरे। सा जातच़ि दोबि छोड़ेके करिरे। दोरांग साथे द जुटे जात बचेक्ति। दि जुट जात च़ि एनकुतिंग यहूदा ज़ु राज्य कुड़िकु।

![](https://cdn.door43.org/obs/jpg/360px/obs-en-18-08.jpg)

बचेकि सा जातच़ि यारोबाम मिनदांग इच़ा गांग्मिबी एनतु राजा बनाके चरतिरे। दि जात रे देशो उत्तर-पूर्वो हिस्सारिंग तोईरे। दोच़ि एनतिंग इस्राएलो राज्य कुईरे।

![](https://cdn.door43.org/obs/jpg/360px/obs-en-18-09.jpg)

पर यरोबामे परमेश्वरो खिलाफ विरोद्ध लरि दांग मीतु धुन्ना पाप लज़ि लत्तो। दोई एनो मितु धुन्ना पूजा लेईमि थल्ज़ि जुट मूर्ति बनाकतु। दोरे द यहूदाज़ु राज्य येरूशेलमांग परमेश्वरो अराधना लेई मेलिरे।

![](https://cdn.door43.org/obs/jpg/360px/obs-en-18-10.jpg)

यहूदा ए इस्राएलो राज्य दुशमन बनेके इलिरे। दांग घड़ी-घड़ि एनतु बिचांग लड़ेक्पा लेईरे।

![](https://cdn.door43.org/obs/jpg/360px/obs-en-18-11.jpg)

इस्राएलो खारकोई राज्यरिंग, बत्ते रजारे दुष्ट तोईरे। दीतु बिचांगज़ि मास्स राजारे राजा बनेक्पिमि इच्छा तच़ारे उई इस्राएलितु गुड़च़ि सिए इलिरे।

![](https://cdn.door43.org/obs/jpg/360px/obs-en-18-12.jpg)

इस्राएलो राज्यरिंग बत्ते राजा ए मास्स मीच़ि मुर्तिज़ु पूजा लेइरे। अपेल दोचि झां लेईरे। दांग दोरे तेईया फेरा वेशया तांग फेटे शुईरे। देर तचे कि दोचि तैईया फेरा कटु तु ल बलि रेईंरे।

![](https://cdn.door43.org/obs/jpg/360px/obs-en-18-13.jpg)

यहूदा राज्यज़ु राजा, दाऊदो वंशो तोई। दि राजातु बिचांगज़ि रेई रुठे मीरे ल तोईरे अच़ि न्याय रांग साथे राज लत्तेर ए परमेश्वरो पूजा लत्तेर। पर यहूदाज़ु मास्स राजारे माजि तोईरे। दोच़ि माजि ढंग रांग शासन लेईरे, ए मूर्ति तु पूजा लरिरे। दैर तचे कि दोतु बिचांगज़ि रेई राजाच़ि हापसि देवतातु तुईच़ि एनतु कटुतिंगल बलि ले केरिरे। यहूदाऊ मास्स मीच़िला परमेश्वरो विरूदध बलवा ले उई देवतातु पूजा लरिरे।

*1 राजा अध्याय 1-6;11-12 ज़ि बाइबलो इच़ा कथा।*

## 19. परमेश्वरो च़रसी भविष्य कुचाड़

https://openbiblestories.org/l/ps-x-pathani/story-19/

![](https://cdn.door43.org/obs/jpg/360px/obs-en-19-01.jpg)

परमेश्वरे हमेशा इस्राएलितु कचांग भविष्यकुट्राड़तिंग च़रपा लज़ि तोई। भविष्यवक्ताच़ि परमेश्वरो धुन्ना उजाब रेड्रि तोई दांङ दु मीतिंग कन्ड्रि तोई।

![](https://cdn.door43.org/obs/jpg/360px/obs-en-19-02.jpg)

अपेल अहाब इस्राएल राज्यरिंग राजा तोई दापेल एलिय्याह भविष्यवक्ता तोई। अहाब इच़ा माजि मी तोई। दोई हापसि बाल देवताऊ पूजा लेईमि थल्ज़ि मीतिंग मजबूर लत्ते। दोऊ थल्ज़ि एलिय्याहज़ि अहाबरांग कुत्तु कि परमेश्वरे दु मीतिंग सज़ा रन्ड्रि इबि लेकि तो। दोई दोतिंग कुत्तो कि, “अपेल तचे गे ओल्ला सन्दाड़ शुबिमि थल्ज़ि मकोग धोपेल तचे इस्ऱाएलो राज्यरिंग न सन्दाड़ शोतो न बिल शोतो।” दि गप्पाज़ि अहाबबी धों रोष चारि कि दोई एल्लियाहबि सचे केचिम फैसला लरि।

![](https://cdn.door43.org/obs/jpg/360px/obs-en-19-03.jpg)

दोऊ थल्ज़ि परमेश्वरे एलिय्याहबि कुड़ि कि दु अहाबरांगज़ि ब्याके जंगलांग अच़ा इला। एलिय्याह जंगलांग दु सोतेऊ कचरिंग इन्जा आंर इबिम थल्ज़ि परमेश्वरे दोबि कन्जते। रोज़ मुन्जे ए ञंयोखोल, प्यारेच़ि एलिय्याहज़ु थल्ज़ि रोटी ए शा लेन्ज़ा हापि तोई। दि बत्ते वक्तरिंग, अहाब ए दोऊ सेनाच़ि एलिय्याहबि पेप्पा लातेरे, पर दोबि पेचि मारतिरे।

![](https://cdn.door43.org/obs/jpg/360px/obs-en-19-04.jpg)

सन्दाड़ मशुबे मिना वक्तो थल दु झरना कारचे इन्जा। दोऊ थल्ज़ि एलिय्याह च़ाम्बेउ इच़ा देशांग अच़ा इन्जा। दु देशांग इच़ा गरीब विधवा तोई आतु इच़ा यो तोई। दोतु कचरिंग बगत लगभग योसा इन्जि तोई छेईकुचे दोर छल्ले फसल शुचि मतोई। पर तां ल, दु मेच़मि एलिय्याहज़ु देखभाल लरि, दोऊ थल्ज़ि परमेश्वरे दु ए दोऊ योज़ु ज़रूरततिंग पूरा लरि, दि वजहज़ि दोऊ फुकानो नन्न ए दोऊ तेलो कूपि अफेल्ला खाली मशुई। दि पूरा अकालो बिचांग दोकुतु दोर ज़ेईरिंग बागत तोई। एलिय्याह मिना वर्ष तचे दोर तोई।

![](https://cdn.door43.org/obs/jpg/360px/obs-en-19-05.jpg)

शुम्मु ए रेई वर्षो थल, परमेश्वरे अलिय्याहरांग कुड़ि कि दोई ओल्ला सन्दाड़ लोतो। दोई एलिय्याहरांग वापिस इस्‍राएलो राज्यरिंग इन्जे अहाबरांग गप्पा लज़िरिंग कुत्तो। दोऊ थल्ज़ि एलिय्याह अहाबो कचरिंग इन्जा। दांग अहाब ए दोबि तांञे कुत्तो, “अच्छा क शुन्ना, मुसीबत पैदा लज़ाड़!” एलिय्याहज़ि जवाब रेईं, “मुसीबत पैदा लज़ाड़ क शुन्ना! केई यहोबाबि छोड़ेके केतन। दु ए सच्चा परमेश्वर शु, पर केई बाल देवताबि मनेक्च़ि लेकि तोतोन। द कनिंग इस्राएल राज्यज़ु बत्ते मीतिंग कर्मेल गोरिंग लेन्ज़ा अपि लेपोतो।”

![](https://cdn.door43.org/obs/jpg/360px/obs-en-19-06.jpg)

द बत्ते मीरे कर्मेल गो आखा इलिरे। दु गांग्मिरे ल आतिरे अच़ि कुचा तोईरे कि दोरे बाल देवतो उजाब कुट्राड़ शुरे। दिरे बाल देवताऊ भविष्यवक्तारे तोईरे। दोरे बत्ते पिरा ज़ु टोखटे ङिन्ज़ो सा तोईरे। एलिय्याहज़ि मीतांग कुत्तो, “अपेल तचे केच़ि केन्दु सेमबी भटकाके तोईं? अगर यहोबा परमेश्वर शु सेत दोऊ पूजा लाईं! अगर बाल परमेश्वर शु सेत दोऊ उपासना लाईं।”

![](https://cdn.door43.org/obs/jpg/360px/obs-en-19-07.jpg)

दोपेल एलिय्याहज़ि बाल देवताऊ भविष्यवक्तातंड़ कुड़ि, “इच़ा बाँङबी बलि रैं दोऊ शाबि बलिदानो थल्ज़ि इच़ा वेदिऊ टोखटे केईं, पर मेंह थफारतुईं। दोऊ थल गे ल ध्वांह ए लोगा। इच़ा शता वेदिरिंग गे दु शाबि क्योग। दांग अगर परमेश्वरे बेदिऊ टोख्टे मे थदि सेत केच़ि ङेओईं कि दु सचे परमेश्वर शु।” धोपेल बाल देवताऊ भविष्यवक्ताच़ि इच़ा बलि तैयार लत्तोर पर मै म फरतुरे।

![](https://cdn.door43.org/obs/jpg/360px/obs-en-19-08.jpg)

दांग बाल देवताऊ भविष्यवक्ताच़ि बाल देवतारांग प्रार्थना लेईरे, “हे बाल देवता, ङेतु रेजु!” पूरा दिन दोच़ि प्रार्थना लैईरे, हाउशेक्तिरे आई देरतचे कि एनतिंग चक्कूज़ि ट्रिके केरिरे। पर बाले जवाब ल म रेईं, मै ल म थदि।

![](https://cdn.door43.org/obs/jpg/360px/obs-en-19-09.jpg)

बाल देवताऊ भविष्यवक्ताच़ि बाल देवताऊ प्रार्थना लेईरिंग क्योमेद-क्योमेद पूरा ध्याड़ा च़रचे केरिरे। थल्ल मुकरिंग दोचि प्रार्थना लेई ब्याड़ा ले केरिरे। दांग एलिय्याहज़ि आईसांग बांङु शाबि परमेश्वरो बेदिऊ टोखटे केचे केतु। दोऊ थल, दोई मीतिंग तीज़ु मोट्टे नान्देतिंग दु बलिदानो टोखटे धोपेल तचे लाक्च़िरिंग कुड़ि अपेल तचे कि शा, सिंङ, देरतचे कि वेदिऊ फेरे कि धरती पूरे आलेग शुचे मेलि।

![](https://cdn.door43.org/obs/jpg/360px/obs-en-19-10.jpg)

दांग एलिय्याहज़ि प्रार्थना लरि, “हे यहोवा, अब्राहम, इसहाके, याकूबो परमेश्वर, ङेतिंग कन्डु कि क इस्राएलो परमेश्वर शुना आई दिला कि गै कनु दास शुगा। गिबि जवाब रोऊँ ताकि दीच़ि ङेयोर कि क ए सचे परमेश्वर शुना।”

![](https://cdn.door43.org/obs/jpg/360px/obs-en-19-11.jpg)

धोत्तरे, सर्गांञ ज़ि मे ददि दांग दोई शा, सिंञ, चट्टान, शो, देर तचे कि दोई वेदिऊ कचरिंग ती बी ल रोचे केरि। अपेल मी च़ि दि तांगरिरे, दोच़ि धरति रिंग दचे कुड़िरे, “यहोवा ए परमेश्वर शु! यहोवा ए परमेश्वर शु!”

![](https://cdn.door43.org/obs/jpg/360px/obs-en-19-12.jpg)

दांग एलिय्याह ज़ि कुड़ि, “बालो इच़ा ल भविष्य कुचाड़ बचेके इबि मेस!” दोऊ थल्ज़ि मी च़ि बालो भविष्यवक्तातिंग च़ुमे केरिरे दांग दोतिंग शता शिन्‍जे साचे केरिरे।

![](https://cdn.door43.org/obs/jpg/360px/obs-en-19-13.jpg)

दांग एलिय्याहज़ि अहाब राजारांग कुड़ि, “युरकुचे केनो चुंञ पोख्शे इला, छेईकुचे सन्दाड़ शुबिमि तो।” युरने डु रोकि शुचे आति, दांग मास्स सन्दाड़ च़ुक्सा इलि। यहोबाज़ि दु कारचिऊ अकालबी योच़ि लेकि तोई। दिरांग साथे दि पता लेका कि यहोवा ए सच्चे परमेश्वर शु।

![](https://cdn.door43.org/obs/jpg/360px/obs-en-19-14.jpg)

अपेल एलिय्याहज़ि एनो कम्म योचे केरि, दांग परमेश्वरै एलीशा मिनदांग इच़ा गांग्मिबि एनो भविष्य कुट्राड़ चुनेक्ति। परमेश्वरे एलीशाउ धुन्ना मास्स चमत्कार लरि। इच़ा चमत्कार नामानरांग शुई। दु इच़ा दुशमनो सेनाऊ सरदार तोई, पर दोबि चमड़िऊ इच़ा जाक्ख बिमारी शुचे इन्जि तोई। नामाने एलीशाऊ बारेरिंग थसि तरे, दोऊ थल्ज़ि दु एलीशाऊ कचरिंग आति दांग दोरांग दोबि ठीक लज़िरिंग कुत्तो। एलीशाज़ी नामानबी कुड़ि कि यरदन बेन्डिऊ तीरिंग ङिज फेरा डुबकी लगातु।

![](https://cdn.door43.org/obs/jpg/360px/obs-en-19-15.jpg)

नामान रोशेक्सा इलि। दोई ध्यांह लज़िरिंग न ले केरि, छेई कुचे दोबि दि कम्म मूर्खता च़टे काम च़ेसि तोई। पर थले दोई एनो सेम लेके केरि दांग इन्जे यरदन बेन्डिंग ङिज फेरा डुबकी रन्दो। अपेल थल्लमुक्को फेरा दु तीरिंगज़ि धाक्तिका हुच़िरि सेत परमेश्वरे दोबि ठीक ले केरि।

![](https://cdn.door43.org/obs/jpg/360px/obs-en-19-16.jpg)

परमेश्वरे इस्राएलो मीतु कचांग उई ल मास्स भविष्यवक्तारे च़रति। दोचि बत्तेच़ि मूर्तितु उपासना लेई बन्द लज़िरिंग कुड़िरे। दिऊ भोन्दे, दोतिंग एनतु बिचांग न्यायरांग साथे व्यवहारे दया लज़ि जुस। दु भविष्यवक्ताच़ि मीतिंग चेतावनी रेईंरे कि दोतिंग माजि काम लज़ि बन्द लज़ि जुस दिऊ भोन्दे परमेश्वरो गप्पा ज़ु पालन लाईं। अगर दोच़ि ध्यांह म लेईरे सेत परमेश्वरे दोतिंग दोषी मनेके दोतु न्याय लोतो, दांग दोतिंग सज़ा रमोतो।

![](https://cdn.door43.org/obs/jpg/360px/obs-en-19-17.jpg)

मास्स फेरा, दु मी च़ि परमेश्वरो आज्ञा ममनिक्तिरे। मास्स फेरा दोच़ि भविष्यवक्तांङ साथे माजि व्यवहार लरिरे देर तचे कि अपेला-अपेला दोतिंग सचे केत्तेर। इच़ा फेरा यिर्मयाह भविष्‍य कुचाड़बि कारचि कुँओ अन्दरेग केचे केरिरे दांग दोबि सीरिंग थल्ज़ि केचे केरिरे। दु कूँआज़ू तड़ारिंग गाररिंग धसेके इन्जा। दांग दोपेल राजाबि दोऊ टोख्टे दया अति दांग दोई एनो सैनिकतिंग आदेश रेईं कि यिर्मयाहज़ु सिबिम बे तुई दोबि धाक्तिका हुन्ज़े च़रतुईं।

![](https://cdn.door43.org/obs/jpg/360px/obs-en-19-18.jpg)

भविष्यवक्ताच़ि परमेश्वरो तरफे कुचि जारि तरिरे मी च़ि दोतांग नफरत लेईरे। दोच़ि मीतिंग चेतावनी रेईंरे कि अगर दोच़ि पश्चाताप मलेईरे सेत परमेश्वरे दोतु नाश लोतो। दोच़ि मीतिंग दि ल हिद करातिरे कि परमेश्वरे दोतु कच़ांग मसीह बी च़रच़िम वायदा लसि ततु।

*1 राजा अध्याय 16-18:2 राजा 5: यिर्मयाह 38 38 इच़ा बाइबलो कहानी*

## 20. इस्राएलबि गुलाम बनाके शिन्ज़ि ए याच़ि

https://openbiblestories.org/l/ps-x-pathani/story-20/

![](https://cdn.door43.org/obs/jpg/360px/obs-en-20-01.jpg)

इस्राएल ए यहूदाऊ राज्य जुल्लाकुई परमेश्वरो खिलाफ पाप लेईरे। दोच़ि दु वाचाबि थ्वाके केतेरे आऊं परमेश्वरे दोतांग साथे सीनैरिंग लत्ते। परमेश्वरे दोतिंग पश्चाताप लज़ि ए ओल्ला दोऊ अराधना लज़िरिंग चेतावनी रन्ड्रिरिंग भविष्यवक्तातिंङ च़रचतो, पर दोच़ि दोऊ गप्पा मनेक्च़िरिंगज़ि न ले केतोर।

![](https://cdn.door43.org/obs/jpg/360px/obs-en-20-02.jpg)

दांग परमेश्वरे दोतु दुशमनतिंग दोतु नाश लेईरिंग तारछि ले जुल्ला राज्यकुतिंग सजा रेईं। अश्शूर इच़ा उई देश तोई आंऊ मास्स ए शक्तिशाली शुचे इन्जि तोई। दोरे उई देशो थल्ज़ि दया मे तोईरे। दोच़ि आन्जे इस्ऱाएल राज्यो नाश ले केईरे। अश्शूरियों रेच़ि अन्जे एस्रराएल राज्यरिंगज़ि मास्सतिंग साचे केरिरे, चि जुन्दिरे दु लुटेके केरिरे, आइ देशो मास्स हिस्सा रोचि केरिरे।

![](https://cdn.door43.org/obs/jpg/360px/obs-en-20-03.jpg)

अश्शूरियोंरेच़ि बत्ते प्रधानरे, सेठरे, आई दुछो मीतिंग अच़ि कीमती चीज़रे बनाचि तरछि तोईरे दोतिंग छ्रोक्कन ले अश्शूर देशांग लेन्ज़ा शिलिरे। इस्राएलांग मिना गरीब मीरे जेत्ते केशा इन्देर।

![](https://cdn.door43.org/obs/jpg/360px/obs-en-20-04.jpg)

दांग अश्शूरी मीच़ि दु देशांग बांगज़िमि थल्ज़ि विदेशीतिंग लेन्ज़ा हातिरे। दु व़िदेशीरेच़ि दु नगरबि यच़ा बनातिरे। आऊं एस्राएलिरे दोरतिग केश्तेरे दोतांग दोच़ि व्याह लरिरे। दि मीतु वशंजतिंग सामरी कुड़िरे।

![](https://cdn.door43.org/obs/jpg/360px/obs-en-20-05.jpg)

यहूदाज़ु राज्यो मीच़ि तांङतेर कि छना परमश्वरे दोऊ टोख्टे विश्वास मलज़ि ए दोऊ गप्पा ममनेक्च़िम वजहज़ि इस्राएलो मीतिंग सज़ा रन्दे। पर ताला दोच़ि कनानिरेतु मूर्तितु उपासना लेईरे। परमेश्वरे दोतिंग चेतावनी रन्ड्रिमि थल्ज़ि भविष्यवक्तातिंङ च़रति, पर दोच़ि रेड्रिरिंग न ले केरिरे।

![](https://cdn.door43.org/obs/jpg/360px/obs-en-20-06.jpg)

क्योमे रामि वर्षो थल अश्शूरियोंच़ि इस्राएलो राज्यऊ नाश ले केरिरे। परमेश्वरे बेबिलोनो राजा, नबूकदनेस्सरबी यहूदाऊ राज्यरिंग हमला लज़िरिंग च़रचतु। बेबीलोन इच़ा शक्तिशाली देश तोई। यहूदाऊ राजा नबूकदनेस्सरो दास बनेक्पि ए दोबि हर साल मास्स ढबा रन्ड्रिम थल्ज़ि राजि शुचे इन्जा।

![](https://cdn.door43.org/obs/jpg/360px/obs-en-20-07.jpg)

पर मिना सालो थल, यहूदाज़ु राजाज़ि बेबीलोनो खिलाफ बलवा लरि। दांग बेबिलोनीच़ि यच़्च़ा अन्जे यहूदाऊ राज्यरिंग हमला ले केरिरे। दोच़ि येरुशेलम नगरांग कब्ज़ा ले केरिरे, मन्दिरबि तबाह ले केरिरे, दांग नगरे मन्दिरो खज़ाना कूज़ा लेन्ज़ा शिलिरे।

![](https://cdn.door43.org/obs/jpg/360px/obs-en-20-08.jpg)

बलवा लेईमी वजहज़ि यहूदाज़ु राजाबि सज़ा रन्ड्रिमि थल्ज़ि, नबूकदनस्सरो सेनाच़ि राजाओ योबि दोऊ तांग्शि साचे केरिरे दाङ दोबि कांणें ले केरिरे। दोऊ थल दोच़ि राजाबि लेन्ज़ा शिलिरे, ताकि दु तहखानांग सिए योतो।

![](https://cdn.door43.org/obs/jpg/360px/obs-en-20-09.jpg)

नबूकदनेस्सर ए दोऊ सेनाच़ि यहूदा राज्यज़ु लगभग बत्ते मीतिंग बेबीलोन लेन्ज़ा शिलिरे, बबे गरीब मीतिंग थल्का केचे केरिरे छेई कुचे दोच़ि रीरेतिंग फसल एओर। समयऊ दि काल बी बधूंआई कुईरे छेई परमेश्वरो मीतिंग वयदो देशांगज़ि हुन्ज़िरिंग विवश लत्तेर।

![](https://cdn.door43.org/obs/jpg/360px/obs-en-20-10.jpg)

परमेश्वरे एनतु मीतिंग दोतु पापो थल्ज़ि दोतिंग गुलामिरिंग शिन्जे सज़ा रन्दो, तांला दु दोतिंग ए एनो वायदारेतिंग पेशा मतोई। परमेश्वरे एनतु मीतु निगरानी लजि जारी त्येतो दांञ एनो भविष्यवक्तातु धुन्ना दोतांग गप्पा लेई जारि तयेतो। दोई वायदा लरि कि शुमञिंज़ो सा सालो थल, दोरे ओल्ला वायदाज़ु देशांग याच़ोर।

![](https://cdn.door43.org/obs/jpg/360px/obs-en-20-11.jpg)

लगभग शुम्मञिंज़ो सा सालो थल, फारसो राजा कुस्रूज़ि बेबीलोनबि यारचतु, दोऊ थल्ज़ि बेबीलोनो साम्राज्यज़ु अलावा फारसो साम्राज्यज़ि उई देशो टोखटे राज लरि। इस्राएलि मीतिंग द यहूदी कुचा तोईरे। दोतु बिचंग मास्स मीच़ि एनतु पूरा जीवन बेबिलोनांङ बिताके केरिरे। यांग्शि यहूदी रेतिंग जेत्ते यहूदाज़ु देश हिद तोई।

![](https://cdn.door43.org/obs/jpg/360px/obs-en-20-12.jpg)

फारसी मीरे मास्स तारछि तोईरे, पर दोच़ि एनतु ड्राक्शि मीतु टोख्टे दया लत्तेर। फारसी मीतु रज़ा बनेक्पिमि थोड़े ध्याड़ो थल, कुस्रुज़ि आदेश रेईं कि अच़िए यहूदिज़ि यहूदा याच़िम तत्तु दु फारसांगज़ि हुच़ा यहूदा इबि तरफोतो। देर तचे कि दोई दोतिंग मन्दिरबी ओल्ला बनाचिम थल्ज़ि ढब़ा ल रेईं। दांग गुलामिऊ शुम्ञिंज़ो सा सालो थल, ट्रोल्नार यहूदिरे यहूदारिंग यरूशेलम नगरो आखा यच़ा इलिरे।

![](https://cdn.door43.org/obs/jpg/360px/obs-en-20-13.jpg)

अपेल दोरे येरूशेलम पिचतोरे दांङ दोच़ि मन्दिरे नगरो फेरे भीतिबि ओल्ला बनातिरे। फारसी मीच़ि आत्तला दोतु टोख्टे शासन लज़तेर पर इच़ा फेरा यच़ा दोरे वायदाऊ देशरिंग बांग्ज़ि लेकि ए मन्दिरांग अराधना लज़ि लेकि तोईरे।

*2 राजा ज़ु अध्याय 17;24-25;2 इतिहास 36; एज्रा 1-10; नहेम्याह 1-13 बाइबलो इच़ा कहानी।*

## 21. परमश्वरे मसीहज़ु आपिमि वायदा लरि

https://openbiblestories.org/l/ps-x-pathani/story-21/

![](https://cdn.door43.org/obs/jpg/360px/obs-en-21-01.jpg)

अपेल परमेश्वरे संसारो रचना लत्ते, दोबि पता तोई कि अपेला दोबि मसीह बी च़रच़ि लेपोतो। दोई आदमे हब्बा रांङ वायदा लत्ते कि दोई ध्यांह लोतो। दोई कुड़ि कि हव्वाज़ु धुन्ना इच़ा वशंजे जन्म लेपोतो आच़ि ओमजो पुन्ज़ाबि काकपोतो। आऊँ ओमजे हव्वाबी धोखा रन्दे दु इच़ा शैतान तोई। परमेश्वरो अर्थ तोई कि मसीहज़ि शैतानबी पूरे ठ्रो हराके केओतो।

![](https://cdn.door43.org/obs/jpg/360px/obs-en-21-02.jpg)

परमेश्वरे अब्राहमरांङ वायदा लत्ते कि दोऊ धुन्ना ससांरो बत्ते जातिच़ि आशीष खोक्पोर। परमेश्वर थले अपेला मसीहबि च़रचे दि वायदाबि पूरा लोतो। दु मसीहज़ि ससांरो इच़िच़ जातिबि दोतु पापे छुड़ापोतो।

![](https://cdn.door43.org/obs/jpg/360px/obs-en-21-03.jpg)

परमेश्वरे मूसारांग वायदा लत्ते कि भविष्यरिंग दोई मूसाऊ ठ्रो ए इच़ा उई भविष्यवक्ता च़रपोतो। दि भविष्यवक्ता मसीह शोतो। ध्यांह ले, परमेश्वरे ओल्ला वायदा लरि कि दोई मसीह बी च़रपोतो।

![](https://cdn.door43.org/obs/jpg/360px/obs-en-21-04.jpg)

परमेश्वरे राजा दाऊदरांङ वायदा लत्ते कि दोऊ इच़ा वशंज मसीह शोतो। दु राजा शोतो दांङ परमेश्वरो मीतु टोख्टे हमेशा राज लोतो।

![](https://cdn.door43.org/obs/jpg/360px/obs-en-21-05.jpg)

परमेश्वरे यिर्मयाह भविष्यवक्तारांग साथे गप्पा लरि दांङ दोई कुड़ि कि इच़ा दिन दोई उई खारकोई वायदा लोतो। दु खारकोई वायदा इस्राएलरांग साथे सीनैऊ टोख्टे लसि युई वायदाऊ ठ्रो मशोतो। अपेल दोई मितांग साथे एनो खारकोई वायदा लोतो, दांङ दोई दोतु टोख्टे एनवि व्यक्तिगत रूपरिंग प्रकट लोतो। हर इच़ा मिज़ि दोरांग साथे दा तोओतो दांग दोऊ बनाशी व्यवस्थ़ा बी मनेक्च़िरिंग सेम तोरे। परमेश्वरे कुड़ि कि दि दोऊ व्यवस्थाबी दोतु सेमुंग च़ैऐ केचिम ठ्रो शोतो। दोरे दोऊ मीरे शोरै, दांग परमेश्वरे दोतु पापबी माफ लोतो। दु मसीह शोतो आच़ि दोतांग साथे दु खारकोई वायदा बी छ़ुपोतो।

![](https://cdn.door43.org/obs/jpg/360px/obs-en-21-06.jpg)

परमेश्वरो भविष्यवक्ताच़ि दिला कुत्तेर कि मसीह इच़ा भविष्यवक्ता शोतो। इच़ा भविष्यवक्ता दु मि शु आच़ि परमेश्वरो वचनतिंग रेड्रा दांङ दोबि मीतिंग परमेश्वरो उजाबो घोषणा लज़ा। अतिंग च़रच़िम परमेश्वरे वायदा लसि तरे दु मसीह इच़ा सिद्ध भविष्यवक्ता शोतो। दु मसीह परमेश्वरो उजाबतिंग रुठेरांङ रेड्रोतो, दांङ दोई मीतिंग दु उजाबतिंग रुठेरांङ सिखापोतो।

![](https://cdn.door43.org/obs/jpg/360px/obs-en-21-07.jpg)

इस्राएलि पुजारीरेच़ि मीतु थल्ज़ि परमेश्वरो तुईच़ि बलि रन्ड्रि जारि तरिरे। दि बलि मीतु पापो थल्जि दोतिंग परमेश्वरो धुन्ना सज़ा रन्ड्रिमी ठाढ़िरिंग चढ़ाशी तोई। पुजारिरेच़ि मीतु थल्ज़ि प्रार्थना ल लत्तेर। पर, दु मसीह सिद्ध मोढे पुजारी शोतो अच़ि परमेश्वरबि रन्ड्रिम थल्ज़ि एनबि चढ़ाके च़रपोतो। दिऊ मतलब, कि दोई अपेल ल पाप मलोतो, दांङ अपेल दोई एनबी बलि शुबिमी थल्ज़ि रमोतो, धोपेल संसारो छिल्ला उई बलिऊ ज़रूरत मशोतो।

![](https://cdn.door43.org/obs/jpg/360px/obs-en-21-08.jpg)

मीतु समूहज़ु टोख्टे राजा ए प्रधानच़ी राज लज़ि, दांग अपेला-अपेला दोच़ि गलति लज़ि। राजा दाऊदे जेत्ते इस्राएलितु टोख्टे राज लत्ते, पर राजा दाऊदो वंशज मसीहज़ि पूरा संसारांग राज लोतो, दाङ दोई हमेशो थल्ज़ि राज लोतो। दोऊ अलावा, दोई हमेशा न्याय ले शासन लोतो, दांङ सही फैसलारे लेपोतो।

![](https://cdn.door43.org/obs/jpg/360px/obs-en-21-09.jpg)

परमेश्वरो भविष्यवक्ताच़ि मसीह ज़ु पाटि मास्स गप्पारे कुड़िरे। उदाहरणो थल्ज़ि मलाकिज़ि कुड़ि कि मसीहज़ु आपिम तुई इच़ा उई भविष्यवक्ता अपोतो। दु भविष्यवक्ता मास्स खास शोतो। दिऊ अलावा, यशायाह भविष्यवक्ताज़ि च़ेरि कि मसीह इच़ा व्याह मलसिऊ धुन्ना जेपोतो। मीका भविष्यवक्ताज़ि कुत्तो कि मसीहाज़ि बैतलहम नगऱांङ जन्म लेपोतो।

![](https://cdn.door43.org/obs/jpg/360px/obs-en-21-10.jpg)

यशायाह भविष्यवक्ताज़ि कुत्तो कि मसीहज़ि गलीलो इलाकारिंग वास लोतो। अऊँ मीरे मास्स दुखी तोतोरे मसीहज़ि दोतिंग शान्ति रमोतो। दोई कैदितिंग ल आज़ाद लोतो। मसीहज़ि टेचि दोतिंग ए आंऊँ मीच़ि रेड्रि मारच़ि, खान्ड्रि मारच़ि, प्रेई मारच़ि, ए जोई मारचाड़रेतिंग बत्तेतिंग ठीक लोतो।

![](https://cdn.door43.org/obs/jpg/360px/obs-en-21-11.jpg)

यशायाह भविष्यवक्ताज़ि दिला कुत्ते कि मीच़ि मसीहरांङ साथे नफरत लोरे दांग दोबि अपनाच़िरिंग न ले च़रपोर। उई भविष्यवक्ताच़ि कुत्तेर कि दोऊ इच़ा साथी दोऊ खिलाफ आच़तो। जकर्याह भविष्यवक्ताज़ि कुत्ते कि दोऊ दि साथी ध्याँह लेईरिंग मूलु ङिज़ो सा टंग्गा लेपोतो। दिऊ अलावा, मिना भविष्यवक्ताच़ि कुड़िरे कि मीच़ि मसीहबी सचे केओर, आई दांग दोऊ खामज़े तु थल्ज़ि जुआ योज़ोर।

![](https://cdn.door43.org/obs/jpg/360px/obs-en-21-12.jpg)

भविष्यवक्ताच़ि दिला कुत्तेर कि मसीह छना सिओतो। यशायाहज़ि भविष्यवाणी लरि कि मीच़ि मसीह ज़ु टोख्टे थू लोरे, दोऊ मज़ाक उड़ापोरे, दांग दोबि तेंङमोरे। दोच़ि दोऊ गुड़ ए कोन्ज़ा प्रैग ए टाके केओरे दांङ दु मास्स टेशी ए बारदोरिंग सीए योतो, हलांकि दोई छिल्ला गलत लसि मशोतो।

![](https://cdn.door43.org/obs/jpg/360px/obs-en-21-13.jpg)

भविष्यवक्ताच़ि दिला कुत्तेर कि मसीहज़ि पाप मलोतो। दु सिद्ध शोतो। पर दु दिऊथल्ज़ि सिओतो परमेश्‍वरे दोबि उई मीतु पापो थल्ज़ि सज़ा रमोतो। दोऊ सिए थल्ल मीरे परमेश्वररांग साथे जुड़ेक्पि तरफोरे। दोऊ थल्ज़ि परमेश्वरे जुन्दि कि मसीह सिओतो।

![](https://cdn.door43.org/obs/jpg/360px/obs-en-21-14.jpg)

भविष्यवक्ताच़ि दिल्ला कन्जेतेर कि परमेश्वरे मसीहबी सीऊ धुन्ना शिंगबि लोतो। दिरांग दि पता लेपा कि दि बत्ते खारकोई वाचाबि बाधंक्चिमी परमेश्वरो योजना तोई, छेईकुचे दोई दु मीतिंग बचाच़ि तरफोतो आऊ मीच़ि दोऊ खिलाफ पाप लत्तेर।

![](https://cdn.door43.org/obs/jpg/360px/obs-en-21-15.jpg)

परमेश्वरे भविष्यवक्तातिंग मसीहो पाटिरिंग मास्स गप्पारे प्रकट लरि। पर मसीह दु भविष्यवक्तातु अत्तुला शिंङि शुत्तर मादि। दि भविष्यवाणी रेतु रैंए केट्रिमि पिरा बेच़ि ल मास्स वर्षो थल्ल, सही वक्तरिंग परमेश्वरे मसीहबि दि संसाराङ च़रपोतो।

*उत्पत्ति 3:15;12:1-3; व्यवस्था ज़ु विवरण 18:15; 2 शमूएल 7; ‍यिर्मयाह31; यशायाह 59:16; दानिय्येल 7; मलाकी 4:5; यशायाह 7:14; मीका 5:2; यशायाह 9:1-7:35: 3-5:61; 53; भजन संहिता 22:18; 35:19; 22:18:35:19; 69:4 ;41:9: जकर्याह 11:12-13: यशायाह 50:6; भजन संहिता 16:10-11 बाईबलो इच़ा कहानी।*

## 22. यूहन्ना ज़ु जन्म

https://openbiblestories.org/l/ps-x-pathani/story-22/

![](https://cdn.door43.org/obs/jpg/360px/obs-en-22-01.jpg)

तुई थल्लरिंञ, परमेश्वरे एनो भविष्यवक्तातंङ गप्पा लसि तरे दोऊ थल्ज़ि दोई मीतांग गप्पा लेई तरछते। पर दु वक्त बेच़ि पिरा वर्ष योस तचे दोई दोतांङ गप्पा मलत्ते। दांङ परमेश्वरे जकर्याह मिनदांङ भविष्यवक्ताज़ु कचांग इच़ा स्वर्गदूत च़रति। जकर्याह ए दोऊ मेच़ा एलीशिबाज़ि परमेश्वरो आदर लज़ा तोईकु। दोकू मास्स यांग्शे इन्जि तोईकु, तां ल दोकुतु इच़ा ल कटु शुचि मतोई।

![](https://cdn.door43.org/obs/jpg/360px/obs-en-22-02.jpg)

दु स्वर्गदूते जकर्याहबी कुड़ि, “कनु मेच़ाबि इच़ा यो जेपोतो। केई दोऊ मिन यहुन्ना केऊ। परमेश्वरे दोबि पवित्र आत्माज़ि पिंग्शि शोतो, दांग यहुन्नाज़ि मीतिंग मसीहबि अपनाच़िम थल्ज़ि तैयार लोतो।” जकर्याहज़ि जवाब रैईं, “गे ए ग्यु मेच़ा कटु जेपि लेईमि थल्ज़ि मास्स यांगशी तोतोशि! गै छना ङेयोग कि केई गैरांग हेल्ले कुट्रातन?”

![](https://cdn.door43.org/obs/jpg/360px/obs-en-22-03.jpg)

दु स्वर्गदूते जकर्याहबि जवाब रेईं, “कनु कचांग दि रुठे उजाब हापिम थल्ज़ि गे परमेश्वरे च़रचतो। छेईकुचे केई ग्यु टोख्टे विश्वास मलत्तन, दिऊ थल्ज़ि कटु जेतचे केई कुच़ि मारपोन।” धोपेल ए, जकर्याहज़ि कुट्रि मरच़ते। दांङ दु स्वर्गदूत जकर्याहज़ु कचांगज़ि अच़ा इलि। दोऊ थल, जकर्याह चुंखा अच़ा आति दांङ दोऊ मेच़ा खोग्टांग शुई।

![](https://cdn.door43.org/obs/jpg/360px/obs-en-22-04.jpg)

अपेल एलिशिबा त्रुई लाज़ु खोगटांग तोई, दांङ दु ए स्वर्गदूत अचानके एलीशिबाओ रिश्तेदारो टोख्टे प्रकट शुई, अतु मिन मरियम तोई। मरियम व्याह मलसि तोई आई व्याह शुबिमि थल्ज़ि युसुफ मिनदांङ गांग्मिरांग दोऊ शागुण शुचि तोई। स्वर्गदूते कुत्तु, “क खोग्टांङ शोन दांङ इच़ा यो बी जन्म रमोन। कनिंग दोऊ मिन यीशू केट्रि लेपोतो। दु सर्व-शक्तिमान परमेश्वरो यो शोतो आई हमेशाऊ थल्ज़ि शासन लोतो।”

![](https://cdn.door43.org/obs/jpg/360px/obs-en-22-05.jpg)

मरियमे जवाब रेईं, “दि छना शोतो, छेईकुचे गे त व्याह मशुचि शुगा? दु स्वर्गदूते समझाति, “पवित्र आत्मा कनिंङ आपतो दांङ परमेश्वरे कनु टोख्टे छाया लोतो। दोऊ थल्ज़ि दु कटु पवित्र शोतो, ए दु परमेश्वरो यो शोतो। चि दु स्वर्गदूते कुत्तो दोऊ टोख्टे मरियमे विशवास लत्तो।

![](https://cdn.door43.org/obs/jpg/360px/obs-en-22-06.jpg)

ध्यांह शुचे थल, धोत्तरे मरियम एलिशिबा रांङ दोया। छन्ने मरियमे दोबि नमस्ते लरि, एलिशिबाऊ काटु दोऊ अन्दरेग तुरति। दोतु थल्ज़ि परमेश्वरे चि लत्ते दु पाटि दु मेच़मिकु राजि शुईकु। एलिशिबा रांञ साथे शुमु लाह बांगज़ा थल मरियम चुंखा अच़ा इलि।

![](https://cdn.door43.org/obs/jpg/360px/obs-en-22-07.jpg)

दियु थल्ल, एलिशिवाज़ि एनो काटुबि जेपि लरि। जकर्याह ए एलीशिबाज़ि दु कटु मिन यूहन्ना केरिकु, छना दु स्वर्गदूते दोतिंञ कुशि तरे। दांञ परमेश्वरे जकर्याहबि कुट्रिमि थल्ज़ि तरछि लरि। जकर्याहज़ि कुड़ि, “परमेश्वरो जय हो, छेईकुचे दोई एनतु मीतु मदद लेईरिंग हिद तरे! हे ग्यु यो, क सर्व-शक्तिमान परमेश्वरो भविष्यवक्ता शोन। केई मीतिंग कम्बोन कि छना एनतु पापो थलज़ि माफी लेप्च़ि तरफोरे!”

*लूकाऊ अध्याय 1 बाइबलो इच़ा कथा।*

## 23. यीशु ज़ु जन्म

https://openbiblestories.org/l/ps-x-pathani/story-23/

![](https://cdn.door43.org/obs/jpg/360px/obs-en-23-01.jpg)

युसुफ मिनदागं इच़ा धर्मी मीरांग मरियमो शागुन शुचे इन्जि तोई। अपेल दोई थज़ि कि मरियम खोग्टांग तो दोबि पता तोई कि दि दोऊ काटु मशु। पर दोई मरियमबि बदनाम लज़िम मतरे, दोऊ थल्ज़ि दोई दोऊ टोख्टे कृपा लज़िमि ए दोबि चुप्पे तलाक रन्जिमि सोचेक्ति। पर दिबे तुई कि दोई ध्यांह लोतो, इच़ा स्वर्गदूते दोऊ मांङरिंग आन्जे दोरांग गप्पा लरि।

![](https://cdn.door43.org/obs/jpg/360px/obs-en-23-02.jpg)

दु स्वर्गदूते कुड़ि, “हे युसुफ, मरियमबि केनो मेच़ा ले हापिरिंग थबेऊ। दोऊ अन्दरेग आंऊ कटु तो दु इच़ा पवित्र आत्माऊ धुन्ना शु। दोई इच़ा यो जेपि लोतो। दोऊ मिन यीशु केऊ (दोऊ अर्थ दि शोतो, ‘यहोवा बचाच़ाड़’), छेईकुचे दोई मीतिंग दोतु पापो धुन्ना बचापतो।”

![](https://cdn.door43.org/obs/jpg/360px/obs-en-23-03.jpg)

दांङ युसुफे मरियमरांग व्याह लरि ए दोबि एनो मेच़ा ले च़ुंखा लेन्ज़ा हाति, पर दोऊ कटु जेतचि दु दोरांग साथे फेटे मशु।

![](https://cdn.door43.org/obs/jpg/360px/obs-en-23-04.jpg)

अपेल मरियमो लिक्पिमि ध्याड़ा च़म्बे तोई, दांङ दोई ए युसुफे बैतलहम इबिमि इच़ा लामे सफर लत्तोकु। दोकुतिंग दोरतिग इबिमिए तोई छेईकुचे रोमी अधिकारीज़ि इस्राएलांग बांगज़ाड़ बत्ते मितिंग मिक्च़िम तरे। दोच़ि जुन्जतेर कि बत्ते मीरे दोर इन्जांग आंरतिग दोतु पूर्वजरे बांगज़तेर। राजा दाऊद बैतलहमांग जेकते, आई दु मरियमे युसुफ जुल्लो पूर्वज तोई।

![](https://cdn.door43.org/obs/jpg/360px/obs-en-23-05.jpg)

मरियमे युसुफ बैतलहम इलिकु, पर दोर डेल्ल क चढ़े दोकुतिंग बांगज़िरिंग उई छल्ले ठाढ़ि मतोई। दि दु ए ठाढ़ि तोई आंर मरियमे एनो कटुबी जेपि लत्ते। दोई दोबि चरनीऊ टोख्टे फेटे लरि छेईकुचे दोर दोतु थल्ज़ि छल्ले बिस्तर मतोई। दोकुई दोऊ मिन यीशु केरिकु।

![](https://cdn.door43.org/obs/jpg/360px/obs-en-23-06.jpg)

दु रात, कच्चो रीरिंग रेई पोहालरेच़ि त्रेंईतु थाच रुन्ड्रि लज़ि लेकि तोईरे, अचानके इच़ा यब-यब स्वर्गदूत दोतु टोखटे प्रकट शुई, दांङ दोरे बैए इलिरे। दु स्वर्गदूते कुत्तो कि, “बेऊईं थाईं, छेई कुचे ग्यु कचरिंग केतु थल्ज़ि रूठे उजाब तो। तोग्ग दाउदो नग्गर बैतलहमांग केतु थल्ज़ि मुक्ति रन्जाड़ जेका, दु ए मसीह ए प्रभु शु!”

![](https://cdn.door43.org/obs/jpg/360px/obs-en-23-07.jpg)

इन्जे दु काटुबि पेड़ुईं, दांङ केच़ि दोबि खाम्मज़ु बिचांग जिल्सी ए चारनिऊ टोखटे फेटे खोक्पोईं। धोपेल ए, सर्ग स्वर्गदूतरांग बिंङे इलि। दोच़ि परमेश्वरो अराधना लज़ि लेकि तोईरे। दोच़ि कुड़िरे, “बत्ते महिमा स्वर्गरिंग बांगसी परमेश्वरबि खोक्सी जुस। धरतीरिंग दु मीतु बिचांग शान्ति शुबि जूस आच़ि दोऊ चिन्द लज़ा!”

![](https://cdn.door43.org/obs/jpg/360px/obs-en-23-08.jpg)

दांङ स्वर्गदूतरे अच़ा इलिरे। त्रेईं रवाक्च़ाड़रे ल एनतु त्रैईंतिंग केट्रा दु कटुबी खान्ड्रि इलिरे। युरने दोरे दु ठाड़िरिंग पिड़िरे आंर यीशू तोई दांङ दोच़ि दोबि चरनीरिंग फेटे खोक्तिरे, छना कि दु स्वर्गदूते कुत्ते। दोरे मास्स राजी तोईरे। दांङ दु पोहालरे यच़ा दोर अच़ा इलिरे आंर दोतु त्रेईंरे तोईरे। दोच़ि चीए तांङतेर ए रेड्रेतेरे दु बत्तेतु थल्ज़ि दोच़ि परमेश्वरो अराधना लज़ि लेकि तोईरे।

![](https://cdn.door43.org/obs/jpg/360px/obs-en-23-09.jpg)

पूर्वरिंग ओईतारे इच़ा देशरिंग मिना गांङमिरे तोईरे। दोचि करज़ेतु पढ़ाई लसि तरिरे ए दोरे मास्स बुद्धिमान ल तोईरे। दोच़ि इच़ा नोखे कर सर्गरिंग तांङरिरे। दोच़ि कुड़िरे कि दिऊ मतलब शु कि यहूदीरेतु इच़ा खारकोई राजाऊ जन्म शुचा। दोऊ थल्ज़ि दोच़ि दु काटुबी खन्ड्रिम थल्ज़ि एनतु देशरिंगज़ि यात्रा लेईमि फैसला लेईरे। इच़ा लामे यात्राओ थल, दोरे बैतलहम अतिरे दांङ दु घरबार खोक्तिरे आंर यीशु ए दोऊ या बाकु बांगज़तेकु।

![](https://cdn.door43.org/obs/jpg/360px/obs-en-23-10.jpg)

अपेल दि गांग्मिच़ि यीशूबी एनो या रांग साथे तांङरिरे दोच़ि एनतु पुश्तु बले बांगज़ा अराधना लरिरे। दोच़ि यीशूबि कीमती तोहफा रेईंरे। दांङ दोरे चुंखा यच़ा इलिरे।

*मत्तीउ अध्याय 1;लूका 2 ज़ी बाईबलो इच़ा कथा।*

## 24. यूहन्नाज़ि यीशुबि बपतिस्मा रन्ड्रि

https://openbiblestories.org/l/ps-x-pathani/story-24/

![](https://cdn.door43.org/obs/jpg/360px/obs-en-24-01.jpg)

एलीशिबा ए जकर्याह ज़ु यो यूहन्ना, मोढ़े शुचे इच़ा भविष्यवक्ता बनेके इन्जा। दु जंगलांग बांगज़ा तोई, दांङ जंगली यमा ए टिटतिंग ज़ेई तोई, दांङ ऊँटो च़म्मज़ु बनेकि खामज़े लेच़ि तोई।

![](https://cdn.door43.org/obs/jpg/360px/obs-en-24-02.jpg)

मास्स मीरे यहून्नाओ गप्पा रेड्रिमि थल्ज़ि वणांङ हुन्ज़ा आतिरे। दोई दोतिंग दि कुचे प्रचार लरि कि,“पश्चाताप लाईं, छेईकुचे स्वर्गो राज्य च़ाम्बे तो!”

![](https://cdn.door43.org/obs/jpg/360px/obs-en-24-03.jpg)

अपेल मीच़ि यूहन्नाओ उजाब रेड्रिरे, दांग दोतु बिचांग मास्स मीच़ि एनतु पापो पश्चाताप लरिरे, दांङ यूहन्नाज़ि दोतिंग बपतिस्मा रेईं। यूहन्नाबी खन्ड्रिम थल्ज़ि मास्स यहूदि धार्मिक प्रधानरे ल अतिरे, पर दोच़ि एनतु न पाप मनेक्तिरे न पश्चाताप लेईरे।

![](https://cdn.door43.org/obs/jpg/360px/obs-en-24-04.jpg)

यूहन्नाज़ि धार्मिक प्रधानरेतांग कुड़ि, “हे ज़हरीला नाग रे! केन्दु पापो पश्चाताप लाईं आईं केन्दु व्यवहार लेक़तुईं। परमेश्वरे दु बत्ते बुठ चिके केओतो आंऊ दोच़ि रूठे फल मरन्ड्रतोर, दांग दोई दोतिंग मेहरिंग छांञे च़रपोतो। चि भविष्यवक्ताच़ि कुत्तेर यूहन्नाज़ि दोबि पूरा लरि, खणुं, युरने गे कनु तुईच़ि घ्यांङो उजाब रन्ड्राड़बी च़रपोग आच़ि कनु थल्ज़ि आम्म तैयार लोतो।

![](https://cdn.door43.org/obs/jpg/360px/obs-en-24-05.jpg)

मिना धार्मिक अगुवारेच़ि यूहन्नाबि रुक्तिरे कि चि क दु मसीह शुना ? यूहन्नाज़ि जवाब रेईं, “गे मसीह मशुग, पर दु ग्यु थल आपि लेकि तो। दु धोन महान तो कि गे दोऊ बूटो तस्मा युप्च़िम जोगे ल मतोग।”

![](https://cdn.door43.org/obs/jpg/360px/obs-en-24-06.jpg)

ओएराग, यीशु बपतिस्मा लेप्च़िम थल्ज़ि युहन्नाज़ु कचरिंग अन्जा, अपेल यूहन्नाज़ि दोबि तांङरि, दांञ दोई कुड़ि, “खांईं! परमेश्वरो कुरच़ा आच़ि संसारो पापरे कुरचे लेन्ज़ा शोतो।”

![](https://cdn.door43.org/obs/jpg/360px/obs-en-24-07.jpg)

यूहन्नाज़ि यीशुबी कुड़ि, “गे कनिंग दिक्षा रन्ड्रिम जोगे मतोग। दुबे त दि ज़रूरी तो कि केई गिबि बपतिस्मा रोऊँ।” पर यीशूज़ि कुड़ि कि, “केई गिबि बपतिस्मा रोऊं, छेईकुचे लेईमी थल्ज़ि दी ए काम ठीक शु।” दांङ यूहन्नाज़ि दोबि बपतिस्मा रेईं, जबकि यीशुज़ि अपेला पाप लसि मतरे।

![](https://cdn.door43.org/obs/jpg/360px/obs-en-24-08.jpg)

बपतिस्मा रैंए थल्ल अपेल यीशू तिऊ अन्दरेगच़ि हुन्ज़िरि, दांग परमेश्वरो आत्मा कबूतरो रूपरिंग आन्जे दोऊ टोखटे नच़ा इलि। धोपेलए, परमेश्वरे स्वर्गांगज़ि गप्पा लरि। दोई कुड़ि, “क ग्यू यो शुना। गै करांग साथे दा तताग, आई करांग राजि तोतोग।”

![](https://cdn.door43.org/obs/jpg/360px/obs-en-24-09.jpg)

परमेश्वरे युहन्नारांग कुश़ि तरे, “पवित्र आत्मा योंङ आन्जे अतुआ टोखटे रुमज़ा योतो आतिंग केई बपतिस्मा रमोन।” दु ए परमेश्वरो यो शु परमेश्वर इच़े शु। पर अपेल यूहन्नाज़ि यीशु बी बपतिस्मा रेईं, दांङ दोई, परमेश्वर बा बि गप्पा लेई थज़ि, यो परमेश्वरबि खणिं, आंऊ दु यीशू शु, दांग दोई पवित्र आत्माबी खणीं।

*मत्तीऊ अध्याय 3; मरकुस 1:9-11; लूका 3:1 ज़ि बाइबलो इच़ा कहानी*

## 25. शेताने यीशुज़ु परीक्षा लेप्ति

https://openbiblestories.org/l/ps-x-pathani/story-25/

![](https://cdn.door43.org/obs/jpg/360px/obs-en-25-01.jpg)

यीशुज़ु बपतिस्मा शुचि थल धोप्पेले, पवित्र आत्माज़ी दोबी बणंग शिली। यीशु दोर निन्ज़ा ध्याडा ए निन्ज़ा रात तोई। धोपेल दोई ब्रत लरी, दांङ शेताने यीशु कचरिंग अन्जे पाप लज़ी लेईरिंग थल्ज़ि दोउ परीक्षा लेप्ति।

![](https://cdn.door43.org/obs/jpg/360px/obs-en-25-02.jpg)

अपेल यीशुबि ङयोश लेति, शेताने यीशुरांग कुड़ि, “का परमेश्वरो यो शुना सेत दी राग्गटेतिंग रोटी बनाके केऊ छेबी केई ज़ेई तरफोन!”

![](https://cdn.door43.org/obs/jpg/360px/obs-en-25-03.jpg)

पर यीशुज़ी शैतानरांग कुत्तो, “परमेश्वरो वचनांग दी च़ेसी तो, ‘शिन्गमिमी थलज़ि मीबी झित्ते रोटिए जून्शि मशुबी, पर दोतिन्ग दु भत्ते गप्पो ज़रुरत तो अऊँ परमेश्वरे दोतांग कुच़ी!‘“

![](https://cdn.door43.org/obs/jpg/360px/obs-en-25-04.jpg)

दंग शैताने यीशुबी मंदिरो भब्बे रंगी मुक्करिंग रेन्ज़ा शिलि। दोई दोरांग कुडि, “अगर का परमेश्वरो यो शुना सेत धिन्ना योंखा छवाड़ रोऊँ, छेईकुचे च़ेसि तो, ‘परमेश्वरे कनिंग कुर्चिमि थलज़ि ऐनो स्वर्गो दूततिंग आज्ञा रमोतो कि कनु कोन्ज़ातिंग राग्टेच़ी लेपी मेस।’“

![](https://cdn.door43.org/obs/jpg/360px/obs-en-25-05.jpg)

पर यीशुज़ी ध्वाँ मलोऊ छना शैताने दोरंग लेईमी थलज़ि कुत्ते। दिऊ भोन्दे, दोई कुत्तो, “परमेश्वरे इच्चा-इच्चा रांङ कुच़ि, केई प्रभु परमेश्वरो परिक्षा थलेपतु।’”

![](https://cdn.door43.org/obs/jpg/360px/obs-en-25-06.jpg)

दंग शैताने दोबी संसारो भत्ते राज्‍य कंडि। दोई दोबी कंजतो कि दोरे अयों तकडा ए भत्तेधिर तोच़ि तोईरे ।” दोई यीशुराङ कुड़ि,” गे कनिंग दि बत्तेधिर रमोगा अगर केई पुशतिंग बांगज़ा ग्यु उपासना लोन।”

![](https://cdn.door43.org/obs/jpg/360px/obs-en-25-07.jpg)

यीशुज़ी जवाब रन्दो, “हे शैताना, ग्यू कच्चरिंगज़ी अच्च़ा इला! परमेश्वरो वचनंङ दोई मीतिंग आदेश रन्जा, ‘झेत्ते केन्दु प्रभु परमेश्वरो आराधना लाईं। परमेश्वरो रुपरिंग झेत्ते दोऊ ऎ आदर लाईं।’“

![](https://cdn.door43.org/obs/jpg/360px/obs-en-25-08.jpg)

यीशुज़ी शैतानो परिक्षाज़ी हार ममनेक्तो, दोऊ थलज़ी शैतान दोऊ कच्चरिंगज़ी अच्चा इन्जा। दंङ स्वर्गदूतरे अन्जे यीशुज़ु सेवाटहल लज़ि च़ुक्तिरे।

*मत्ती अध्याय 4:1-11; मरकुस 1:12-13; लूका 4;1-13 रिंगज़ी इच़ा बाइबलो कथा*

## 26. यीशुज़ि एनो सेवा चुक्ति।

https://openbiblestories.org/l/ps-x-pathani/story-26/

![](https://cdn.door43.org/obs/jpg/360px/obs-en-26-01.jpg)

यीशुज़ु परिक्षा शुचे थल, यीशु यच़ा गलीलो इलाकारिंग अन्जा। दि दु ए ठाड़ि शु आंर दु बांगज़ा तोई। पवित्र आत्माज़ि दोबि मास्स शक्ति रन्ड्रि लेकि तोई, दांग यीशु इच़ा ठाड़िरिंगज़ि आइच़ा ठाड़िरिंग इलि, दांङ मीतिंग शिक्षा रेईं। बत्तेच़ि दोऊ पाटि रूठे गप्पा कुड़िरे।

![](https://cdn.door43.org/obs/jpg/360px/obs-en-26-02.jpg)

यीशु नासरत नगरांग इन्जा। दि दु नगर शु आंरतिग दु एनो क्वाचतर बांगज़ा तोई। सब्तो ध्याड़ा, दु अराधना लेईमि ठाड़िरिंग इन्जा। यहूदि प्रधानरेच़ि दोबि यशायाह भविष्यवक्ताज़ु उजाबो किताब रेईंरे। दोच़ि जुन्ज़तेर कि दोई दोऊ धुन्ना पढ़ेक्पोतो। दांङ यीशुज़ि दु किताबबि आल्जे दोऊ इच़ा हिस्साबि मीतु थल्ज़ि पढ़ेक्ति।

![](https://cdn.door43.org/obs/jpg/360px/obs-en-26-03.jpg)

यीशुज़ि पढेक्ति, “परमेश्वरे गिवि एनो आत्मा रांशि ततो ताकि गे कंगालतिंग रुठे समाचारो प्रचार लज़ि तरफोग। दोई गिबि दियू थल्ज़ि च़रचतु कि गे कैदिरेतिंग आज़ाद लोगा, कांणे दोतिंग ओल्ला टीरा रम्मोग, आई दोतिंग छुटकारा रम्बोग आतिंग उई मीरेच़ि दबाच़तोर। दि दु वक्त शु अपेल परमेश्वर हेन्दु टोखटे कृपा लोतो ए हेन्दु मदद लोतो।”

![](https://cdn.door43.org/obs/jpg/360px/obs-en-26-04.jpg)

दांङ यीशु नच़ा इलि। बत्ते मीच़ि दोबि रूठेरांग खन्ड्रि लेकि तोइरे। दोच़ि ङेओरे कि शुच्चाशास्रो आऊं हिस्सा दोई एन्थेग पढेक्ते दु मसीहो पाटि तोई। यीशुज़ि कुड़ि, “आऊं गप्पारे गे एंथेग केतु थल्ज़ि पढ़ेक्ताग, दु दि मोक्का शुबि लेकि तो।” बत्ते मीरे हैरान तोईरे। दोच़ि कुईरे, “दि चि युसुफो यो मशता?”

![](https://cdn.door43.org/obs/jpg/360px/obs-en-26-05.jpg)

दांङ यीशुज़ि कुड़ि, “दि हेल्ले शु कि मीच़ि धुठ्रो भविष्य कन्जाड़बि अपेल ल ममनेक्च़ि आऊं दु दोतु नगरांग मोढ़े शुचि शु। एलिय्याह भविष्य कन्ड्राड़ो मोक्का इज़राएलांग मास्स विधवारे तोईरे। पर अपेल सढ़े शुम्मु साल तचे सन्दाड़ मशुई सेत परमेश्वरे एलिय्याहबि इस्राएलांग आरला विधवा ज़ु मदद लेई मच़रतु। दिऊ बोन्दे, दोई एलिय्याहबी इच़ा उई देशो विधवाउ कचरिंग च़रचतु।”

![](https://cdn.door43.org/obs/jpg/360px/obs-en-26-06.jpg)

यीशुज़ि कुट्रि जारि तरि, “आई एलीशा भविष्यवक्ताऊ वक्तरिंग, एस्राएलांग मास्स मीरे चमड़िऊ रोगे टेचि तोईरे। पर एलीशाज़ि दोतु बिचांगज़ि आतिंग ल ठीक मलोऊ। दोई इस्राएलो शत्रु रेतु सेनापति नामानबि जेत्ते ठीक लत्तु।” पर आऊं मिच़ि यीशुबि रेड्रि लेकि तोईरे दोरे बत्ते यहूदि तोईरे। दोऊ थल्ज़ि अपेल दोच़ि दोबि दि कुचतर रेड्रिरे दांङ दोतिंग दोऊ टोख्टे रोष आति।

![](https://cdn.door43.org/obs/jpg/360px/obs-en-26-07.jpg)

नासरतो मीच़ि यीशुबि च़ुमरिरे दांङ आराधनाऊ ठाड़िरिंगज़ि शोके धाक्तिखा लेन्ज़ा शिलिरे। दोच़ि दोबि साच़िम थल्ज़ि इच़ा गो पुन्ज़ारिंग शिलिरे। पर यीशु भीड़ांगज़ि हुच़ा नासरत नगर केचा अच़ा इलि।

![](https://cdn.door43.org/obs/jpg/360px/obs-en-26-08.jpg)

दांङ यीशु गलीलो बत्ते ठाड़िरिंग इलि, दांङ मास्स भीड़ दोऊ कचरिंग अति। दोच़ि मास्स दुट्रो मीरे हातिरे आँऊ टेचि ए अपंग तोईरे। दोतु बिचांगज़ि रेई खान्ड्रि, जोई, रेड्रि ए कुचि मरछ़ि तोई, यीशुज़ि दोतिंग ठीक ले केरि।

![](https://cdn.door43.org/obs/jpg/360px/obs-en-26-09.jpg)

दिऊ अलावा, मास्स दुछो मीरे ल यीशु कचांग इलिरे अतु अन्दरेग माजि आत्मारे तोईरे। यीशुज़ि माजि आत्मातिंग दोतु अन्दरेगच़ि हुन्ज़ा इबिम आदेश रेंईं। दु दुष्ट आत्मारे हाउशेक्तिरे, “क परमेश्वरो यो शुना!” भीड़ो मीरे हैरान तोईरे, दांङ दोचि परमेश्वरबी हिद लेईरे।

![](https://cdn.door43.org/obs/jpg/360px/obs-en-26-10.jpg)

दांङ यीशुई सनि गांङमितिंग चुनेक्ति आतिंग दोई एनो प्रेरितरे कुड़ि। दु प्रेरित मीच़ि दोरांग साथे यात्रा लरिरे दांङ दोऊ दोरच़ि शिक्षा लेप्तिरे।

*मत्तिऊ अध्याय 4:12-25; मरकुस 1:14-15, 35-39; 3:13-21; लूका 4:14-30, 38-44 बाईबलो इच़ा कहानी।*

## 27. दयालु सामरीऊ कथा

https://openbiblestories.org/l/ps-x-pathani/story-27/

![](https://cdn.door43.org/obs/jpg/360px/obs-en-27-01.jpg)

इच़ा ध्याड़ा, यहूदीरेतु नियम कानूनो इच़ा जानकार यीशु कचांग आति। दोई बत्तेतिंग दि कान्ड्रिम तरे कि यीशुई गलत ढंगे शिक्षा रन्ड्रि लेकि तो। दिऊ थल्ज़ि दोई कुड़ि, “हे गुरु, अन्नत जीवन जुन्ज़िम थल्ज़ि गे चि लगा?” यीशुज़ि जवाब रेईं, “परमेश्वरो नियम कानूनरिंग च़ि च़ेसि तो?”

![](https://cdn.door43.org/obs/jpg/360px/obs-en-27-02.jpg)

दु मीज़ि कुत्तो, “दोई कुच़ा कि केनो परमेश्वरराङ केनो बत्ते सेम, प्राण, तरछि ए बुद्धिज़ि प्रेम तोऊ, आइ केनो पड़ोसीरांङ केनो बराबर प्रेम तोऊ। यीशुज़ि जवाब रेईं, “क बिल्कुल सही शुना। अगर केई ध्याँ लेईना सेत कनिंग अन्नत जीवन खोक्सतो।”

![](https://cdn.door43.org/obs/jpg/360px/obs-en-27-03.jpg)

पर दु व्यवस्थाज़ु नीयम कानूनो जानकारे मीतिंग कान्जिम तरे कि दोऊ शिंगबिमि तरीका ठीक तोई। दोऊ थल्ज़ि दोई यीशु रांङ रुकतो, “ठीक शु, दांङ ग्यु पड़ोसी अरि शु?”

![](https://cdn.door43.org/obs/jpg/360px/obs-en-27-04.jpg)

यीशुज़ि दु व्यवस्थज़ु विशेषज्ञबि इच़ा कथा कन्जे जवाव रणिं। “इच़ा यहूदि मी तोई अरि इच़ा सड़कारिंगज़ि शुचे यरूशेलमांगज़ि यरीहोज़ु यात्रा लज़ि लेकि तोई।”

![](https://cdn.door43.org/obs/jpg/360px/obs-en-27-05.jpg)

“पर मिना डाकूरेच़ि दोबि तांङरिरे दांग दोऊ टोखटे हमला लेईरे। दोच़ि दोऊ बत्तेधिर लेन्ज़ा शिलिरे दांग दोबि लगभग सितचे कुटेक्तिरे। दांङ दोरे अच़ा इलिरे।”

![](https://cdn.door43.org/obs/jpg/360px/obs-en-27-06.jpg)

“दोऊ थल्ल धोप्पले, इच़ा यहूदी प्रधान दु ए सड़कांगज़ि इन्जा। दु प्रधाने दु मीबी सड़कारिंग पड़ेकि तांङरि। अपेल दोई दोबि तांङरि दु सड़को एखा शुचे तूखा अच़ा इलि। दोई दु मीबी पूरे छो मतांशि ले केरि।”

![](https://cdn.door43.org/obs/jpg/360px/obs-en-27-07.jpg)

“दिऊ थल्ल फोआर झाड़ो थल, इच़ा लेवी दु सड़कारिंग अन्जा। (लेवी यहूदि रेतु इच़ा गोत्र तोई आच़ि मन्दिरांग याजकतु मदद लत्तेर) दु लेवी ल सड़को एच़ि हुच़ा इलि। दोई ल दु मीबी मतांङशि ले केरि।”

![](https://cdn.door43.org/obs/jpg/360px/obs-en-27-08.jpg)

आईच़ा मी अरि दु सड़कारिंग अन्जा दु सामरिया ज़ु इच़ा गांङमि तोई। (सामरिया ए यहूदि च़ि एनतु बिचांग नफरत लज़ि तोई) दु सामरीज़ि सड़कारिंग दु मीबी तांङरी। दोई तांङतु कि दु यहूदी तोई पर तांला दोबि दोऊ टोखटे मास्स तरस आति। दु दोऊ कचरिंग इन्जा दांग दोऊ लेकिरिंङ पट्टी छ़ुदि।”

![](https://cdn.door43.org/obs/jpg/360px/obs-en-27-09.jpg)

“ दांङ दु सामरीज़ि दु मीबि एनो कारो टोख्टे केरि दांङ दोबि सड़कारिंगज़ि इच़ा सरायरिंङ लेंज़ा शिलि। आँरतिग दोई दोऊ देखभाल लज़ि जारि तयेतु।”

![](https://cdn.door43.org/obs/jpg/360px/obs-en-27-10.jpg)

ओईराग, दु सामरी बी एनो यात्रा जारी तच़िम ज़रूरत तोई। दोई दु सराय चलाच़ा मीबी मिना ढबा रणीं। दोई दोरांङ कुड़ि, “दि मिऊ देखभाल लोऊ। अगर दि ढबाऊ अलाबा कनु उई ढबा खर्च शुई सेत वापिस आन्जे कनु खर्चो ढबा रैं च़रपोग।”

![](https://cdn.door43.org/obs/jpg/360px/obs-en-27-11.jpg)

दांङ यीशुज़ि दु व्यवस्था ज़ु जानकारबि रुकतो, “केई चि सोचेक्सतन? दु शुमु मीतु बिचांङ आरि दोऊ पड़ोसी शु अतिंग लुटेकतेरे ए कुटेक्तेरेआ?” दोई जवाब रणीं, “दु ए आंऊ दोई दोऊ टोख्टे कृपा लत्ते।” यीशूज़ि दोरांग कुड़ि,” क इला दांङ ध्यांए लउ।”

*लूका ज़ु अध्याय 10:25-37 बाइबलो इच़ा कथा*

## 28. सेठ छ़ोकरा शासक

https://openbiblestories.org/l/ps-x-pathani/story-28/

![](https://cdn.door43.org/obs/jpg/360px/obs-en-28-01.jpg)

इच़ा ध्याडा, इच़ा सेठ छ़ोकरा शासके यीशुज़ु कच्चाङ अंजे दोबि रुक्ति, “हे रुठे गुरु, अनन्त जीवन जुन्ज़िमि थलज़ि गिबि चि लज़ि लेपोतो?” यीशुज़ी दोरंग कुडी, “केई गिबी ‘रुठे’ छेरिंग कुचतन? झित्ते इच्च़े रुथे शु दु परमेश्वर शु।

![](https://cdn.door43.org/obs/jpg/360px/obs-en-28-02.jpg)

दोई रुक्ति, “गिबी आऊंसंङ-आऊंसंङ आज्ञारे मनेकच़ि लेपोतो?” यीशुज़ी जवाब रेईं, ”हत्या थलोऊ। माजी थलोऊ। चोरी थलोऊ। हफसि थकुडु। केनो या-बाकू आदर लोऊ, अई केनो पढोसीरंग घ्याङो ठ्रो दा लोऊ।”

![](https://cdn.door43.org/obs/jpg/360px/obs-en-28-03.jpg)

पर दु छ़ोकरा गङमी कुडि, “गे घ्याङो बालपन बेच़िए दि भत्ते आज्ञातिंग मनेक्च़ा अन्जि शुगा। गिबि हमेशो थलज़ी श़िङि बंगज़िमि थलज़ी अत्तला चि लज़ि जूंशी तो? “यीशुज़ी दोऊ हाखा खणि ए दोबि दा लरि।

![](https://cdn.door43.org/obs/jpg/360px/obs-en-28-04.jpg)

यीशुज़ी जवाब रणि, “अगर का सिध्द शुबिमी ततन सेत इन्जे केनो भत्तेधिर लङे च़रतू अई दु ढबा गरीबतिङं फाए च़रतु, दंग कनिंग स्वर्गरिंग धन खोक्सोतो। दोऊ थल अंजे ग्यु थले शुचे इला।”

![](https://cdn.door43.org/obs/jpg/360px/obs-en-28-05.jpg)

चि यीशुज़ी कुत्ते अपेल दु छ़ोकरा गांङमी रेड्रिरी दंङ दु शोरन शुचे इल्लि, छेईकुचे दु मस्स ढबो ग्राक तोई दंङ दोई ऐनो भत्ते सम्पत्तिबी रंड्रिमि मतरे। दु किरज़ा यीशुज़ु कच्चरिंज़ी अच्च़ा इन्जा।

![](https://cdn.door43.org/obs/jpg/360px/obs-en-28-06.jpg)

धोपेल यीशुज़ी एनो चेलातंग कुड़ि, “परमेश्वरो राज्यरिंग सेठ मीतु तोंखा अपि मास्स खरे तो! वई, इच़ा सेठ मीज़ु परमेश्वरो रज्यरिंग इबिम बेच़ि अरिया ऊँठो चेबतु पुन्ज़ारिंगज़ी शुचे इबि योचि तो।”

![](https://cdn.door43.org/obs/jpg/360px/obs-en-28-07.jpg)

चि यीशुज़ी कुत्ते अपेल चेलारेचि रेड्रिरे दोरे हेरान तोइरे। दोच़ि कुढिरे, “अगर दि ध्याँह शु सेत परमेश्वरे अतिंग बचापोतो?”

![](https://cdn.door43.org/obs/jpg/360px/obs-en-28-08.jpg)

यीशुज़ी चेलातु आखा खणि दंग कुडि, “ मीतु थल्ज़ि घ्याङो उध्धार लज़ी खरे शु। पर परमेश्वरो थल्ज़ि छिल्ला लज़ि खरे मशु।”

![](https://cdn.door43.org/obs/jpg/360px/obs-en-28-09.jpg)

पतरसे यीशुरंङ कुत्तो, “ङेरे चेलारे हेन्दु भत्ते-धिर केट्रा काँ थले शुचि इन्दईं। दंग ङेतु इनाम चि शोतो?”

![](https://cdn.door43.org/obs/jpg/360px/obs-en-28-10.jpg)

यीशुज़ी जवाब रणि, ”इच्च़ा-इच्च़ा मी अच़ि ग्यु मुके चुंग, काका, ऋङ, या, बा, कटु, या जागा केट्रा अन्दोरे, दोच़ी दुबे 100 गुना मस्स खोक्कपोरे अई अनन्त जीवन ला खोक्पोरे। पर मस्स अऊँ दोरे तुई तोतोरे दोरे थले शोरे, अई मस्स अऊँ थले तोतोरे दोरे तुई शोरे।”

*मत्ती अध्याय 19:16-30; मरकुस 10;17-31; लूका 18;18-30 इच़ा बाइबलो कथा*

## 29. निर्दयी दासो कथा

https://openbiblestories.org/l/ps-x-pathani/story-29/

![](https://cdn.door43.org/obs/jpg/360px/obs-en-29-01.jpg)

इच़ा ध्याड़ा, पतरसे यीशुरांग रुकतु, “हे स्वामी, गिबि घ्यांञो काकाबि अयों फेरा माफ लज़ि लेपोतो अपेल दोई ग्यु खिलाफ पाप लोतो? चि ञिंज फेरा तचिया?” यीशुज़ि कुड़ि,” ञिंज फेरा मशु, पर ञिंजो भोन्दे शुम्मञिंज़ो सा फेरा!” दिऊ धुन्ना, यिशु मतलब शु कि हेन्दिंग हमेशा माफ लेई जुस। दोऊ थल यीशुज़ि दि कथा कान्डि।

![](https://cdn.door43.org/obs/jpg/360px/obs-en-29-02.jpg)

यीशुज़ि कुड़ि, “परमेश्वरो राज्य इच़ा राजाऊ छो शुबि आच़ि एनो गुलामो दोरच़ि हिसाब लेपच़िमि तरे। दोऊ इच़ा गुलाम 200000 वर्षो मज़दूरिऊ थल्ज़ि इच़ा मोट्टे कर्ज़ो कर्ज़दार तोई।”

![](https://cdn.door43.org/obs/jpg/360px/obs-en-29-03.jpg)

पर दु दासे एनो कर्ज़ चुकाच़ि मारति, दोऊ थल्ज़ि राजाज़ि कुड़ि, “दिऊ ऋण चुकाच़िम थल्ज़ि दि गांग्मिबि ए दिऊ टाबरतिंङ दास बनाके लांङे च़रतुईं।”

![](https://cdn.door43.org/obs/jpg/360px/obs-en-29-04.jpg)

“दु गुलामे राजाऊ तुईच़ि एनो पुशतु टोख्टे बांग्ज़ा कुड़ि, ‘ज़ी शबस गिबि फोआर ध्याड़ा रोऊं, दांङ गे घ्यांञो कर्ज़ो भुगतान ले च़रपोग।” राज़ाज़ि दासो टोख्ठे दया लरि, दिऊ थल्ज़ि दोई दोऊ बत्ते कर्ज़ बि माफ लेकेरि दांङ दोबि इबि रेईं।”

![](https://cdn.door43.org/obs/jpg/360px/obs-en-29-05.jpg)

“पर अपेल दु गुलाम राजाउ कचरिंगज़ि धाक्तिखा इन्जा, दांङ दोबि दोऊ इच़ा साथी गुलाम दोया आऊं दु दोऊ पी ला ज़ु मज़दूरिऊ कर्ज़दार तोई। दु दासे एनो साथि गुलामबि च़ुमे केरि, ‘दांङ कुड़ि, ‘आंऊ कनु टोखठे ग्यु कर्ज़ तो गिबि दोऊ भुगतान लोऊ!”

![](https://cdn.door43.org/obs/jpg/360px/obs-en-29-06.jpg)

“दु साथि गुलामे पुशटु भारे दचे कुड़ि, ‘ज़ि शबसे गैरांग साथे धीरज धरेक्तु, दांङ गे घ्यांङो कर्ज़ो बत्ते रकमो भुगतान ले च़रपोग।’ पर दिऊ भुन्दे, दु गुलामे एनो साथि गुलाम बी जेलखानो अन्दरेग केचे केरि अपेल तचे कि दोई दु कर्ज़ो भुगतान ले मकेतु।”

![](https://cdn.door43.org/obs/jpg/360px/obs-en-29-07.jpg)

“चि-चि शुत्ते दोबि मिना गुलामच़ि तांङतेर दांग दोरे मास्स परेशान शुईरे। दोरे राजाउ कचरिंग इलिरे दांङ दोबि बत्तेधिर कान्डिरे।”

![](https://cdn.door43.org/obs/jpg/360px/obs-en-29-08.jpg)

“राजाज़ि दु गुलामबि बुलाके कुड़ि, ‘हे दुष्ट गुलामा! गे कनु कर्ज़बि दोऊ थल्ज़ि माफ लत्तेग छेई कुचे केई गेरांग ज़िशबस लत्तेन। कनिंग ल ध्वांए लज़ि जुंशि तोई।’ राजाबि धोंण रोष अन्जि तोई कि दोई दोबि जेलखानांङ केचे केरि अपेल तचे कि दोई एनो बत्ते कर्ज़ो भुगतान ले मकेओतो।”

![](https://cdn.door43.org/obs/jpg/360px/obs-en-29-09.jpg)

दांङ यीशुज़ि कुड़ि, “ग्यु स्वर्गांग तोचि बाज़ि केतु बिचांग ज़ि इच़ा-इच़ा राङ साथे ध्यांए लोतो अगर केच़ि केन्दु काकाबि सेमज़ि माफ मलरीं।”

*मत्तिऊ अध्याय18:21-35 बाइबलो इच़ा कथा*

## 30. यीशुज़ि ङां हज़ार मीतिंग बागत रन्दो

https://openbiblestories.org/l/ps-x-pathani/story-30/

![](https://cdn.door43.org/obs/jpg/360px/obs-en-30-01.jpg)

यीशुई एनो जानकारतिंङ प्रचार लज़िमिए शिक्षा रन्ड्रिमि थल्ज़ि मास्स शता-शता नगरङ च़रचतु। अपेल दोरे दोर याच़िरे आंरतिंग यीशु तोई दोच़ि दोबि कान्डिरे कि दोच़ि चि लत्तोर। दाङ यीशुई दोतिंग झीलो नुरेच़ि दोरांग साथे इच़ा शान्त ठाड़िरिंग इन्जे फोआर वक्त आराम लज़िम थल्ज़ि कुत्तो। दाङ दोरे इच़ा नावो टोख्टे लोक्सा झीलो नुरेच़ि अच़ा इलिरे।

![](https://cdn.door43.org/obs/jpg/360px/obs-en-30-02.jpg)

पर दोरतिग मास्स ध्‍यांह ठ्रो मीरे तोईरे आंऊ दोच़ि यीशु ए दोऊ च़ेलारेतिंग किशतिंग इबि ताङतेर। दि मीरे दोतु बे तूखा झीलो नुरेच़ि इबिमि थल्ज़ि झीलो मुखे-मुखे पोख्तिरे। दाङ अपेल यीशुए दोऊ च़ेलारे पिचतोरे दाङ मास्स मीरे छ्रोक्कन शुचे दोतु थल्ज़ि रुमज़ा तोइरे।

![](https://cdn.door43.org/obs/jpg/360px/obs-en-30-03.jpg)

दु भीड़ांग मेच़मितिंग ए काटुतिंग मिके मे 5000 बे मास्स गांग्मिरे तोईरे। यीशुज़ि दु मीतु टोखटे बड़ा दया लरि। यीशुज़ु थल्ज़ि दु मीरे पौहाल मे त्रैंईंतु छो तोईरे। दोऊ थल्ज़ि दोई दोतिंग शिक्षा रणीं आई दोतु बिचांग आंऊ मीरे टेचि तोईरे दोतिंग ठीक लरि।

![](https://cdn.door43.org/obs/jpg/360px/obs-en-30-04.jpg)

ञंयोखोलच़िआर, च़ेलारेच़ि यीशुरांग कुड़िरे, “द झाड़ा शुचे इन्जा आई च़म्बे नगर ल मा। द दि मीतिंग बिदा लोऊ ताकि दोचि इन्जे ज़ेईमि थल्ज़ि छा लेप्चि तरफोरे।”

![](https://cdn.door43.org/obs/jpg/360px/obs-en-30-05.jpg)

पर यीशुज़ि च़ेलारेतांग कुड़ि, “केच़ि दितिंग ज़ेईमि थल्ज़ि छा रांईं!” दोच़ि जवाब रेईंरे, “हेन्जि ध्यांह छना लेई तरछि? हेन्दु कचरिंग जेत्ते ञाँ रोटि ए जुट क्वाचि मच्छ़ तो।”

![](https://cdn.door43.org/obs/jpg/360px/obs-en-30-06.jpg)

यीशुज़ि एनो चेलारेतांग कुड़ि कि दोच़ि मीतु झुण्डतिंग शांगज़ु टोख्टे ङिन्ज़ो साज़ु झुण्डरिंग बांगज़िरिंग कूईं।

![](https://cdn.door43.org/obs/jpg/360px/obs-en-30-07.jpg)

दांङ यीशुज़ि ञां रोटिए जुट मच्छबि लेप्चे स्वर्गो आखा खणीं, दांङ दु बागतो थल्ज़ि परमेश्वरो शबस लरि।

![](https://cdn.door43.org/obs/jpg/360px/obs-en-30-08.jpg)

दाङ यीशुज़ि रोटिए मच्छबि खान्नि-खान्नि लरि। दोई मीतिंग रन्ड्रिम थल्ज़ि एनो च़ेलारेतिंग दु खान्निरे रैं केरि। चेलारेच़ि दु बागत फावा लेइरे, आई दु अपेला मयोसु! दोरे बत्ते ज़ज़ा कशे इलिरे।

![](https://cdn.door43.org/obs/jpg/360px/obs-en-30-09.jpg)

दोऊ थल्ल, च़ेलारेच़ि दु बागतबि ठ्रोक्कन लरिरे आंऊ दु ज़सि मतोई दाङ दु सनि टोकरीतिंग पिंगजिम थल्ज़ि योशि तोई! दु बत्ते बागत दु ङा रोटि ए जुट मच्छो धुन्ना आन्जि तोई।

*मत्ती अध्याय 14:13-21; मरकुस 6:31-44; लूका 9:10- 17; यूहन्ना 6:5-15 बाइबलो इच़ा कथा।*

## 31. यीशूज़ु तीऊ टोख्टे जोई

https://openbiblestories.org/l/ps-x-pathani/story-31/

![](https://cdn.door43.org/obs/jpg/360px/obs-en-31-01.jpg)

ङा हजार मीतिंग बगत रैंथल, यीशूज़ि एनो चेलातिंग किशतिंग इबिरिंग कुत्तो। दोई दोतिंग झीलो नुरेच़ि इबिमि थल्ज़ि कुत्तो पर दु एना मिना ध्याड़ो थल्ज़ि दोरे रुमज़ा इन्जा। दोऊ थल्ल चेलारे अच़ा इलिरे दांङ यीशूज़ि दोतिंग विदा लरि कि दोरे एनतु चुंखा योरे। दिऊ थल्ल, यीशू प्रार्थना लेईमि थल्ज़ि इच़ा गो ज़ु टोख्टे अच़ा इन्जा। दोरतिग दु इच़ा तोई, दोई दोर मास्स रात तचे प्रार्थना लरि।

![](https://cdn.door43.org/obs/jpg/360px/obs-en-31-02.jpg)

धोपेल, चेलारे एनतु किशति चलाच़ा इबि लेकि तोईरे, पर लन्न दोतु फुचांङका मास्स जोरे अपि लेकि तोई। मास्स रात शुचे ल दोरे अत्तला झीलो बिचांगए पिचतेर।

![](https://cdn.door43.org/obs/jpg/360px/obs-en-31-03.jpg)

धोपेल यीशुज़ि प्रार्थना लज़ि योचतु दाङ एनतु चेलातु कचरिंग यच़ा इलि। दु किशतिऊ आखा इबिम थल्ज़ि तिऊ टोखटे जोरि।

![](https://cdn.door43.org/obs/jpg/360px/obs-en-31-04.jpg)

धोपेल चेलारेच़ि दोबि तांगरिरे। दोरे बै इलिरे छेई कुचे दोच़ि चेकतेर कि दु अरिया बेड़ा शु, यीशु ज़ि ञेंयते कि दोरे बै इन्देर, दिऊ थल्ज़ि दोई दोतिंग हाग रैं कुड़ि, “बेऊईं थाईं दि गे शुगा!”

![](https://cdn.door43.org/obs/jpg/360px/obs-en-31-05.jpg)

दाङ पतरसे यीशुरांग कुड़ि, “हे प्रभु, अगर दि का ए शुना सेत गिबि तीऊ टोख्टे जोए केनो कचरिंग अपिम आदेश रोऊं।” यीशुज़ि पतरसरांग कुड़ि, “अता!”

![](https://cdn.door43.org/obs/jpg/360px/obs-en-31-06.jpg)

दाङ पतरस किशतिंगज़ि ताग्सा इलि दांग यीशू कचरिंग इबिम थल्ज़ि तिऊ टोखठे इबि च़ुक्ति। पर फोआर ओईतारे इन्जे थल, दोई एनो टीरा यीशु दोरच़ि घेरेके केरि आई ती बि खन्जि ए लन्न बि महसूस लज़ि च़ुके केरि।

![](https://cdn.door43.org/obs/jpg/360px/obs-en-31-07.jpg)

पतरस बै इलि दाङ तीरिंग डुम्बि च़ुक्सिरि। दु हाऊशेक्ति, “हे प्रभु, गिबि बचातु!” यीशुज़ि धोपेलए गुड़ तूखा ले दोबि च़ुमे केरि। दांङ दोई पतरसबि कुड़ि, “कनु बिश्वास मास्स थोड़े तो! कनिंग सुरक्षित तच़िम थल्ज़ि केई ग्यु टोखटे भरोसा छेरिंग मतरिन?”

![](https://cdn.door43.org/obs/jpg/360px/obs-en-31-08.jpg)

दाङ यीशु ए पतरस किशतिंग लोक्सा इलिकु, धोपेले लान्न बन्द शुचे इलि। ति धिप्पन शुचे इलि। चेलारे हैरान शुचे यीशु तुईच़ि पुशतु टोखटे बांगज़ा इलिरे। दोच़ि दोबि फ्याग ले कुड़िरे, “हेल्ले क परमेश्वरो यो शुना।”

*मत्ती अध्याय14:22-33; मरकुस 6:45-52; यूहन्ना 6:16-21 बाइबलो इच़ा कथा*

## 32. यीशुज़ि माजि आत्माओ दोरच़ि इच़ा मीए इच़ा टेचि मेच़मिबि ठीक लरि

https://openbiblestories.org/l/ps-x-pathani/story-32/

![](https://cdn.door43.org/obs/jpg/360px/obs-en-32-01.jpg)

यीशुए दोऊ च़ेलारे एनतु किश्तिंग दु ठाढ़िरिंग इन्दोरे आंरतिग गिरासेनी मीरे बागंज़ा तोईरे। दु ठाढ़िरिंग पिचे दोरे दोर ताक्सिरे।

![](https://cdn.door43.org/obs/jpg/360px/obs-en-32-02.jpg)

दोर इच़ा मी तोई आतिंग माजि आत्माज़ि च़ुमसि तरे।

![](https://cdn.door43.org/obs/jpg/360px/obs-en-32-03.jpg)

दि मी धोंण तकड़ा तोई कि आच़िला दोबि काबू लेई मारच़तेर। मास्स फेरा मीच़ि दोऊ गुड़ ए कोन्ज़ाबि शांङणी कुचे छ़ुचे केतेर, पर दोई दु थाक्शे केट्रा तोई।

![](https://cdn.door43.org/obs/jpg/360px/obs-en-32-04.jpg)

दु मि दु ठाढ़िरिंग मशाणांग बांगज़ा तोई। दि मि पूरा ध्याड़ा ए पूरा रात हाऊशेक्पा लज़ि तोई। दोई खाम्म मलेच़ा तोई आई घड़ि-घड़ि एनबि राग्गट्रि घायल लज़ा तोई।

![](https://cdn.door43.org/obs/jpg/360px/obs-en-32-05.jpg)

दु मि ज़ारका रन्जा यीशु कचरिंग अन्जा दाङ दोऊ तुईच़ि पुशटु टोखटे बांगज़रि। दाङ यीशुज़ि दोऊ तोंग कि आत्मारांग गप्पा ले कुड़ि, “दि मिऊ अन्दरेगच़ि धाक्तिखा हुच़ा अता!”

![](https://cdn.door43.org/obs/jpg/360px/obs-en-32-06.jpg)

दु माजि आत्माज़ि जोरे हाउशेके कुड़ि, “हे यीशु, बत्ते बे मोढ़े परमेश्वरो यो, कनु गैरांग चि काम्म? ज़ी शबस गिबि तंग थलऊ!” दाङ यीशु ज़ि दु माजि आत्माबि रुकतो, “कनु मिन चि शु?” दोई जवाब रेंईं, “ग्यु मिन सेना शु, छेई कुचे ञेंरे मास्स तोतोईं।” (रोमी सेनारिंग मास्स हजार सैनिकतु इच़ा झुण्ड इच़ा “सेना” शुबि तोई)

![](https://cdn.door43.org/obs/jpg/360px/obs-en-32-07.jpg)

दु माजि आत्मारेच़ि यीशुबि शबस लेईरे कि, “दोतिंग दि ठाढ़िरिंगज़ि धातिका थच़रतु!” दोररे कचरिंग गोरिंग सुअरतु इच़ा झुण्ड रुआक्सि लेकि तोई। दिऊ थल्ज़ि दु माजि आत्मा रेच़ि यीशु बि शबस लरिरे, “शबस ले ञेंतिग दु सूअरतु अन्दरेग च़रचि च़रतु!” यीशु ज़ि कुड़ि, “ठीक शु, दीतु अन्दरेग अच़ा इलईं!”

![](https://cdn.door43.org/obs/jpg/360px/obs-en-32-08.jpg)

दाङ दु दुष्ट आत्मारे दु मीऊ अन्दरेगच़ि हुन्ज़ा सूअरतु अन्दरेग अच़ा इलिरे। दु सूअररे ज़रकेके इलिरे दाङ इच़ा गोच़ो दोरच़ि झीलांग छुआड़ रें डुमजे सिए इलिरे। दु झुण्डांग लगभग 2,000 सूअररे तोईरे।

![](https://cdn.door43.org/obs/jpg/360px/obs-en-32-09.jpg)

दोरतिग दु सुअररे रुन्जाड़ मीरे तोईरे। चि-चि शुत्ते अपेल दोच़ि खणिंरे दोरे नगरो आखा पोख्शे इलिरे। यीशुज़ि चि लत्ते दोर दोच़ि बत्तेतिंग शदिरे। दु नगरो मीरे बत्ते अतिरे दाङ दु मीबि खणिरे आंऊ दोऊ अन्दरेग माजि आत्मारे तोइरे। दु मी शान्तिरांग, खामज़े लेच़ा, इच़ा ठीक ठाक मीऊ छो बांगज़ा तोई।

![](https://cdn.door43.org/obs/jpg/360px/obs-en-32-10.jpg)

दु मीरे मास्स बै इन्जे तोईरे दाङ दोच़ि यीशुबि अच़ा इबिरिंग कुड़िरे। दाङ यीशु किश्तिंग लोक्सा इलि। दु मी आंऊ दिऊ अन्दरेग माजि आत्मारे तोईरे दोच़ि यीशुरांग इबिरिंग ज़ि लरिरे।

![](https://cdn.door43.org/obs/jpg/360px/obs-en-32-11.jpg)

पर यीशुज़ि दोरांग कुड़ि, “मेस्स। गे जुंगा कि केई चुंखा इन्जे बत्तेतिंग कन्डु कि परमेश्वरे कनु थल्ज़ि चि लत्तु। दोतिंग कन्डु कि छना परमेश्वरे कनु टोखटे दया लत्ते।”

![](https://cdn.door43.org/obs/jpg/360px/obs-en-32-12.jpg)

दोऊ थल्ज़ि दु मी अच़ा इलि दाङ बत्ते तिंग दि पाटि कन्जतु कि यीशु ज़ि दोऊ थल्ज़ि चि लत्तु। दोऊ कथा रेड्रा इच़ा-इच़ा मी हैरान शुत्ते।

![](https://cdn.door43.org/obs/jpg/360px/obs-en-32-13.jpg)

यीशु झीलो नुरेच़ि यच़ा अति। दोऊ दोर पिचे थल्ल, इच़ा मोट्टे भीड़ दोऊ कचरिंग ठ्रोक्कन शुई दाङ दोबि तेप्च़ि लेकि तोईरे। दु भीड़ांग इच़ा मेच़मि तोई आंऊ दु सनिह वर्षरिंगज़ि शुई आपिमि तकलीफरिंग तोई। दोई एनो बत्ते ढबा डाक्टरतिंग रैं केते छेई कुचे दोच़ि दोबि ठीक लेई तरफोरे, पर दोऊ रोग उई ल बिगड़ेके इलि।

![](https://cdn.door43.org/obs/jpg/360px/obs-en-32-14.jpg)

दोई थशते कि यीशुज़ि मास्स टेचि मीतिंग ठीक लत्ते दाङ दोई सोचेक्ति, “गै पक्का तोतोग कि अगर गै यीशु खामज़ेबि जेत्ते पच रैंईगा सेत गैला ठीक शुचे योग!” दिऊ थल्ज़ि दु यीशु थलेच़ि आन्जे यीशु खामज़ेतिंग पच रैं केरि। छन्ने दोई दोबि पच रणीं, शुई हुच़ि बन्द शुचे इलि।

![](https://cdn.door43.org/obs/jpg/360px/obs-en-32-15.jpg)

युरने, यीशुज़ि ञेंए केरि कि दोऊ धुन्ना शक्ति हुन्ज़ते। दोऊ थल्ज़ि दोई थल्का किरज़ा रुक्ति, “गिवि अच़ि पच रणीं?” चेलारेच़ि जवाब रेईंरे, “देर धोंण बत्ते मीरेच़ि कां फेरे झुण्ड लगासि ततोर, दाङ केई जां चिले रुकतन कि कनिंग अच़ि पच रन्दो?”

![](https://cdn.door43.org/obs/jpg/360px/obs-en-32-16.jpg)

दु मेच़मि यीशु तुईच़ि बेई ए डगेके एनो पुशतु टोख्टे बांगज़ा इलि। दाङ दोई दोबि कान्जे केरि कि दोई चि लत्ते, दाङ दिला कि दु ठीक शुचे इन्जा। यीशुज़ि दोरांग कुड़ि, “कनु विश्वासे कनिंग ठीक लत्तु। रुठे रांग इला।”

*मत्ती अध्याय 8:28-34; 9:20-22; मरकुस 5:1-20; 5:24b-34; लूका 8:26-39; 8:42b -48 बाइबलो इच़ा कथा*

## 33. इच़ा किसानो कथा

https://openbiblestories.org/l/ps-x-pathani/story-33/

![](https://cdn.door43.org/obs/jpg/360px/obs-en-33-01.jpg)

इच़ा ध्याड़ा, यीशु झीलो मुको च़ाम्बे तोई। दोई मीतु इच़ा मोट्टे झुण्डबि शिक्षा रन्ड्रते। दोबि रेड्रमि थल्ज़ि धोणबत्ते मीरे अतिरे कि यीशु कचरिंग दोतांग गप्पा लेईमि थल्ज़ि ठाढ़िए मकेशरि। दोऊ थल्ज़ि दु तीरिंग तोचि किशतिंग लोक्सा इलि। दाङ दोरतिग नच़ा मीतिंग शिक्षा रणीं।

![](https://cdn.door43.org/obs/jpg/360px/obs-en-33-02.jpg)

यीशुज़ि दोतिंग दि कथा शदि, “इच़ा किसान बैजा एच़िम थल्ज़ि धाक्तिखा हुन्ज़िरि। अपेल दोई गुड़च़ि बैजा पुरच़ि लेकि तोई दाङ मिना बैजा आम्मरिंग दचे इलि। पर प्याहरेच़ि अन्जे दु बत्ते बैजा ज़ेए केरिरे।”

![](https://cdn.door43.org/obs/jpg/360px/obs-en-33-03.jpg)

“उई बैजा राग्गच़टे धरतिरिंग ददि आंरतिग शो थोड़े तोई। राग्गच़टे धरतिरिंग दचि बैजा युरने हुन्ज़ा अति, पर दोतु जड़ धरतिरिंग डुगे इबि मारतिरे। अपेल एके हुच़िरि दाङ च़ाच़े शुई दु पौधारे कारचे सिए इलिरे।”

![](https://cdn.door43.org/obs/jpg/360px/obs-en-33-04.jpg)

“आऊंसांग बैजरे छ़वागटेतु बिचांग दचतेर। दु बैजाच़ि मोड़े शुबि च़ुक्तिरे, पर छ़वागटेच़ि दोतिंग तेप्चे केरिरे। दोऊ थल्ज़ि छ़वागच़टे धरतिरिंग दचि बैजारिंगज़ि हुन्ज़ि पौधारेच़ि अन्न रन्ड्रि मारतिरे।”

![](https://cdn.door43.org/obs/jpg/360px/obs-en-33-05.jpg)

“आंऊ बैजारे रुठे धरतिरिंग दचते दु बैजरे फलेक्तिरे दाङ आंयो बैजा एच़तेर दोरच़ि 30,60, देरतचे कि 100 गुणा अन्न पैदा शुई। अच़ि परमेश्वरो थले जोईमि ततु, दोच़ि दु गप्पाऊ टोखटे ध्यान रांई आंऊ गे कुचि लेकि तोतोग!”

![](https://cdn.door43.org/obs/jpg/360px/obs-en-33-06.jpg)

दि कथाज़ि चेलारेतिंग सोच विचाररिंग च़रचे केतु। दोऊ थल्ज़ि यीशुज़ि रुठेरांग कान्डि, “दु बैजा परमेश्वरो वचन शु। दु आम्म इच़ा ध्यांह ठ्रो मी शु आंऊ दि परमेश्वरो गप्पा रेड्रि, पर शुंगज़ि म। दांग शैताने दोऊ कचरिंगज़ि परमेश्वरो वचनबि कूज़ा लेन्ज़ा शिन्ज़ि। दिऊ मतलब शु कि शैताने दोबि वचनबि शुंगज़िरिंगज़ि ओईतारे केट्रि।”

![](https://cdn.door43.org/obs/jpg/360px/obs-en-33-07.jpg)

“दु राग्गच़टे धरती जाँ ठ्रो मी शु आच़ि परमेश्वरो वचनबी रेड्रि आई खुशीरांग साथे मनेक्च़ि। पर अपेल माजि ध्याड़ा अपि, या उई मीच़ि दोबि तंग लज़ि दाङ दु परमेश्वररांग ओई शुचे इबि। दोऊ मतलब कि दोई परमेश्वरो टोख्टे विश्वास लज़ि बन्द ले केचि।”

![](https://cdn.door43.org/obs/jpg/360px/obs-en-33-08.jpg)

“छ़वागच़टे धरती दु मी शु अच़ि परमेश्वरो वचनबी रेड्रा। पर दोई मास्स गप्पो पाटि चिन्द लेई च़ुके केचा, दाङ दोई मास्स ढबा कमाच़िम कोशिश लज़ा, आई दोई मास्स चीज़तिंग खोक्च़िमि कोशिश लज़ा। मिना वक्तो थल, द दु परमेश्वरबि दा लज़िमि जोगे म। दोऊ थल्ज़ि दोई चि परमेश्वरो वचनांगज़ि सिखेक्सते दोई दोबि परमेश्वरबि राजि लेई मारपोतो। दु छ्वाऊ टांडो छ्रो तो आच़ि अन्ने मरन्जि।”

![](https://cdn.door43.org/obs/jpg/360px/obs-en-33-09.jpg)

“पर रुठे धरति दु मी शु आच़ि परमेश्वरो वचनबि रेड्रा, दोऊ टोख्टे बिश्वास लज़ा, आई फल पैदा लज़ा।”

*मत्ति अध्याय 13:1-8,18-23; मरकुस 4:1-8,13-20; लूका 8:4-15 बाइबलो इच़ा कथा।*

## 34. यीशुज़ि उई कथातु शिक्षा रंड्रि

https://openbiblestories.org/l/ps-x-pathani/story-34/

![](https://cdn.door43.org/obs/jpg/360px/obs-en-34-01.jpg)

यीशुज़ि परमेश्वरो नगरो पाटि उई ला मस्स कथारे शदि। कंड्रिमि थलज़ि, दोई कुडि, “परमेश्वरो नगर इच़ा यूंङगर ज़ु बेजो धोन तो छेबि आच़िया ऐनो लिङरिंग ऐई केते। केच़ि ञेई कि यूंङगरो बेजा भत्ते बेजतु बिच्चंग भब्बे क्बाचि शुबि।”

![](https://cdn.door43.org/obs/jpg/360px/obs-en-34-02.jpg)

“पर अपेल राईऊ बेजा मोडे शुचि इबि दंग दु बागो भत्ते बुटतु बिचंग भब्बे मोडे शुचि इबि, धों मोडे कि प्यारे दोऊ ब्रन्ज़ातु टोक्ठे बङज़ा आराम लज़ि।”

![](https://cdn.door43.org/obs/jpg/360px/obs-en-34-03.jpg)

यीशुज़ि इच़ा उई कथा कंडि, “परमेश्वरो नगर ट्रेहऊ ट्रो शुबि छेबि इच़ा मेच़मी बगज़नरंग साथे ट्रुकि केते दंग दु भत्ते बगज़नरिंग सुम अच़ा इबि।”

![](https://cdn.door43.org/obs/jpg/360px/obs-en-34-04.jpg)

“स्वर्गो नगर दु प्यागतु ठ्रो तो छेबि अच़िआ रीरिंग प्याकि केतो। दंग अतिंग आ उईतिंग दु प्याकसी खज़ाना खोक्सा इन्जा दंग दोई दोबि लेपच़िमि मस्स सेम लरि। दोथलज़ि दोई दोबि ओल्ला पथेकी केरि। दु धोंन राजी शुचि तोई कि दोई इन्जे ऐनो भत्तेधिर लांञि केरि छेईकुचे दोई दुसंङ री च़ुमज़ि तरफोतो आऊंरतिग दु खज़ाना तोई।”

![](https://cdn.door43.org/obs/jpg/360px/obs-en-34-05.jpg)

“स्वर्गो नगर इच़ा मस्स कीमती ए शुच्चा मुतिगतु ठ्रो ला शु। अपेल अरिआ मुतिग लङज़ाडे दु खोकि केबे दंग दोबि च़ुमज़िमि थलज़ि एनो भत्तेधिर लङि च़रच़ा।”

![](https://cdn.door43.org/obs/jpg/360px/obs-en-34-06.jpg)

दोर मिन्ना मीरे तोइरे अच़ि ध्यां चेच़ितेरे कि परमेश्वरे दोतिंग दियुथलज़ि ला लेपोतो छेईकुच़े दोच़ि रुथे कम लज़ि लेकि तोतोरे। दि मिच़ि ध्यांठ्रो मितिंग छल्ले मे ठ्रो चेच़ि तोइरे अच़ि दु रुठे कम मलेई तोइ। दिऊ थलज़ि यीशुज़ी दोतिंग दु कथा कंडि: “जुट गङमिकु तोइकु दंग झुल्ला ए पूजा लेईरिंग थलज़ि मंदिरंग इलिकु। दोकुतु बिचंग इसंग कर लेपच़ाड तोई, अईसंग इच़ा यहूदि धार्मिक प्रधान तोई।”

![](https://cdn.door43.org/obs/jpg/360px/obs-en-34-07.jpg)

“दु यहुदि धार्मिक प्रधान ध्यांह ठ्रो आर पूजा लरि, ‘हे परमेश्वरा, केनाबी शबस कि गे उई मीतु ट्रो – झमा डाकू, माजी मनुक, झक विचार लज़ाड, देरत्तचि कि देर खडे दि कर लेपच़ाडो ठ्रो इच़ा पापी मशुग।’”

![](https://cdn.door43.org/obs/jpg/360px/obs-en-34-08.jpg)

“उदाहरणौ थलज़ि, गे हर हफतारिंग झुट फेरा उपवास तच़ि, अई गे गिबि खोक्सि ढब्बा ए समानो सामि हिस्सा कनिगं रमताग।”

![](https://cdn.door43.org/obs/jpg/360px/obs-en-34-09.jpg)

“पर दु कर लेपच़ाड दुसांग यहुदि धारमिक प्रधान बेच़ि मस्स ओय खडे शुचि इन्जा। दोइ तोरिंखा सर्गो हाखा खणि ला मा। दीऊ भोन्दे, दोई एनो मुक्श़ु कुचे एनो काहरिंग घाह केरि दंग परमेश्वरंग कुडि, ‘हे परमेश्वरा, ज़ी शबस ग्यू टोक्ठे दया लोऊ छेईकुचे गे इच़ा पापी शुगा।’”

![](https://cdn.door43.org/obs/jpg/360px/obs-en-34-10.jpg)

दोऊ थल यीशुज़ि कुडि, ”गे केतंग हेल्ले कुच़तग, परमेश्वरे दु कर लेपच़ाडो प्रार्थनाबि रेड्रिरी दंग दोबि धर्मी कुडि। पर दोई दु यहुदि धार्मिक प्रधाने प्रार्थनाबि रुठे मचेति। परमेश्वरे दोतु भत्तेतु पुन्ज़ा योंखा लोतो अतिंग घमंड तो, पर दोई दोतिंग भत्तेतिंग आदर रमोतो अच़ि एनबि फोसो मे लोतो।”

*मत्ती अध्याय 13:31-33, 44-46; मरकुस 4:30-32; लूका 13:18-21; 18:9-14 ज़ि इच़ा बाइबलो कथा*

## 35. इच़ा दयालु बाज़ु कथा

https://openbiblestories.org/l/ps-x-pathani/story-35/

![](https://cdn.door43.org/obs/jpg/360px/obs-en-35-01.jpg)

इच़ा ध्याड़ा, यीशुज़ी दु मास्स मीतिंग शिक्षा रन्ड्रि लेकि तोई आंऊ दोरे दोबि रेड्रिम थल्ज़ि ठ्रोक्कन शुचि तोईरे। दि मीरे कर लेप्च़ाड़रे ए आई उई दु मीरे तोईरे आच़ि मूसाऊ नियम कानूनो पालन लेईमि कोशिश मलत्तेर।

![](https://cdn.door43.org/obs/jpg/360px/obs-en-35-02.jpg)

मिना धार्मिक प्रधानच़ि खंणिरेकि यीशुज़ि दि मितांग इच़ा साथिऊ ट्रो गप्पा लज़ि लेकि तोई। दिऊ थल्ज़ि दोच़ि एनतु बिचांग गप्पा लेई च़ुक्तिरे कि दोई गलत लज़ि लेकि तोई। यीशुज़ि दोतिंग गप्पा लेई थदि, दियु थल्ज़ि यीशुज़ि दोतिंग दि कथा शदि।

![](https://cdn.door43.org/obs/jpg/360px/obs-en-35-03.jpg)

“इच़ा मी तोई अतु जुट यो तोई। क्वाचि यो ज़ि एनो बा रांग कुड़ि, “हे बा, गे एन्थेगे ग्यु हिस्सा जुंगा” दाङ बा ज़ि एनो जुल्ला यो कुतु बिचांग एनो जागा फाए केरि।”

![](https://cdn.door43.org/obs/jpg/360px/obs-en-35-04.jpg)

“युरने कोचि यो एनो बत्तेधिर ठ्रोक्कन लज़ा उई देशो आखा अच़ा इलि दाङ पापी जीवन शिंग्विम थल्ज़ि एनो बत्ते ढबा बर्बाद ले केरि।”

![](https://cdn.door43.org/obs/jpg/360px/obs-en-35-05.jpg)

“दिऊ थल, आंर क्वाचि यो तोई दु देशांग इच़ा बेद अन्जि अकाल अति, दाङ दोऊ कचरिंग बगत च़ुमज़िम थल्ज़ि ढबा मतोई। दिऊ थल्ज़ि दोबि चि काम्म खोक्सते दु सूअरतिंग रुआक्च़िमि कम्म तोई। दु दुछो योंञि ए दुखी तोई कि दोई सूअरतु बागत ज़ेईमि तरे।”

![](https://cdn.door43.org/obs/jpg/360px/obs-en-35-06.jpg)

“थल्ल मुकरिंग, दु क्वाचि यो ज़ि एनारांग कुड़ि, “गे चि लज़ि लेकि तोतोग? ग्यु बा ज़ु बत्ते सेवकतु कचरिंग ज़ेईरिंग बत्तेधिर तो, तां ल गे देरतिग योंञि सी लेकि तोतोग। गे घ्यांञो बा ज़ु कचरिंग यच़ा योग दाङ घ्याञों बाऊ नौकर बनेक्पिम थल्ज़ि शबस लोगा।”

![](https://cdn.door43.org/obs/jpg/360px/obs-en-35-07.jpg)

“दाङ दु क्वाचि योज़ि यच़ा एनो बाऊ चुंखा इबि च़ुक्ति। अत दु ओई ए तोई, दोऊ बा ज़ि दोबि खणीं दाङ दोबि दोऊ टोख्टे दा अति। दु ज़रका रन्जा एनो यो ज़ु कचरिंग इन्जा दांग दोबि ग्वाग रैं दा लरि।”

![](https://cdn.door43.org/obs/jpg/360px/obs-en-35-08.jpg)

“दु योज़ि कुड़ि, “हे बा, गे परमेश्वर ए कनु खिलाफ पाप लत्ताग। गै कनु यो कुचिम जोगे मतोग।’”

![](https://cdn.door43.org/obs/jpg/360px/obs-en-35-09.jpg)

“पर बा ज़ि एनो इच़ा नौकररांग कुड़ि, ‘युरना इन्जे बबे रुठे खांम्म हन्जे ग्यु योबि लेच़ि लोऊ! दोऊ ब्रेम्ज़ारिंग गुईथबए दोऊ कोन्ज़ातिंग मेश लगातुईं। दाङ बत्ते बे रुठे रेन्ज़ा सदुईं छेबि हेन्ज़ि ज़ोईं ए योन्द्रा लोईं, छेई कुचे ग्यु यो सिए इन्दे, पर द दु शिंञि तो! दु यन्जे इन्दे, पर एन्थेग हेन्ज़ि दोबि खोख्शे केतईं!’”

![](https://cdn.door43.org/obs/jpg/360px/obs-en-35-10.jpg)

“दिऊ थल्ज़ि मीचि योन्द्रा लज़ि च़ुक्तिरे। फोआर झाड़ो थल, मोढ़े यो लिङरिंग्ज़ि कम्म लज़ा चुंखा अति। दोई गीत ए गारफिमि चाला थश्तु दाङ दु हैरान शुचे इलि कि दि चि शुबि लेकि तो।”

![](https://cdn.door43.org/obs/jpg/360px/obs-en-35-11.jpg)

“अपेल मोढ़े यो बि पता लेका कि दोच़ि दिऊ थल्ज़ि योन्द्रा लज़ि लेकि तोतोर छेई कुचे दोऊ न्वां चुंङ पिचि तोई, दोबि मास्स रोष अति दाङ दु तोंखा ए मेजा। दोऊ बा ज़ि धाक्ते आन्जे दोबि एनतांग साथे योन्द्रा लज़िम थल्ज़ि शबस लत्तो, पर दोई मना ले केरि।”

![](https://cdn.door43.org/obs/jpg/360px/obs-en-35-12.jpg)

“दु मोढ़े यो ज़ि एनो बा रांग कुड़ि, ‘दि बत्ते वर्षरिंग गे कनु थल्ज़ि इमानदारी रांग काम्म लताग! अपेल ल कनु गप्पा मटालेक्तेग, पर केई गिबि ग्यु साथि तांग साथे योन्द्रा लेईमि थल्ज़ि इच़ा क्वाचि त्रेईं ल मरेइना। कनु दि क्वाचि यो ज़ि कनु बत्ते ढबा पापो कम्म लज़िरिंग जांणे च़रचे केरि। द दु यच़ा वापस अन्जा सेत केई दोऊ थल्ज़ि बत्ते बे रुठे रेन्ज़ाबि सचे केरिन!’”

![](https://cdn.door43.org/obs/jpg/360px/obs-en-35-13.jpg)

“बा ज़ि जवाब रन्दु, ‘हे ग्यु यो क हमेशा गैरांग साथे तोतोन, आई चि धिर ग्यु तो दु बत्ते कनु शु। पर हेन्दु दि योन्द्रा लज़ि ठीक शु छेई कुचे कनु नुवां सिए इन्दे, दु एन्थेग शिंञि तो। दु योंशा इन्जि तोई, पर द हेन्ज़ि दोबि खोक्शे केतईं!’”

*लूका अध्याय 15:11-32 बाइबलो इच़ा कथा*

## 36. यीशु मसीहज़ु रूप लेक्सि

https://openbiblestories.org/l/ps-x-pathani/story-36/

![](https://cdn.door43.org/obs/jpg/360px/obs-en-36-01.jpg)

इच़ा ध्याडा, यीशुज़ि एनो श़ुम्मु चेलारे, पतरस ,याकूब ए यूहन्नाबि एनारंग साथे शिल्लि। (दि यूहन्ना मिनदंग चेला दूसंग मी मशु अच़ि यीशुबि बपतिस्मा रंदे।) दोरे प्रार्थना लेईरिंग थलज़ि इच़ा रंगि गोरिंग इलिरे।

![](https://cdn.door43.org/obs/jpg/360px/obs-en-36-02.jpg)

अपेल यीशुज़ि प्रार्थना लेई लेकि तोई धोपेल दोऊ मोद एकेऊ ठ्रो यहल्न शुचि इन्जा। दोऊ खम्ज़े छ़ञींऊ ठ्रो छ़ांञसी शुचे इन्जा, छना धरतिरिंग अच्च़िआ लेई तरथु दुबे ला मस्स छ़ांञसी।

![](https://cdn.door43.org/obs/jpg/360px/obs-en-36-03.jpg)

धोपेल मूसा ए एलिय्याह भविष्यवक्ताकु प्रकट शुइकु। दि मीकु दि धरतिरिंग एन्थेग बेच़ि तेईया रामि साल तुई बङज़ा तोइरे। दोच़ि यीशुरंग दोऊ सीमि पाटी गप्पा लत्तेर, छेईकुचे दु युरने यरुशलेमंग सीए योतो।

![](https://cdn.door43.org/obs/jpg/360px/obs-en-36-04.jpg)

अपेल मूसा ए एलिय्याहज़ी यीशुरंग गप्पा लज़ि लेकि तोईकु धोपेल पतरसे यीशुरंग कुडि, “हेन्दु थलज़ि देर शुबि रुठे शु। हेन्ज़ि श़ुम्मु मन्डपरे बनापोईं, इच़ा कनु थल्ज़ि, इच़ा मूसाज़ु थल्ज़ि अई इच़ा एलिय्याह ऊ थलज़ि।” पर पतरसे मनेऊ कि दोई चि कुच़ि लेकि तोई।

![](https://cdn.door43.org/obs/jpg/360px/obs-en-36-05.jpg)

अपेल पतरसे गप्पा लेई लेकि तोई, धोपेल इच़ा याहलन छ़ाङि च़टे डू दोतु टोक्ठे चस्सा इन्जा। दंग दोच़ि डूरिंगज़ि इच़ा सग अपि थदिरे। दोई कुत्तो, “दि ग्यू यो शु अतिंग गे दा लज़ि। गे दोरंग राजि तोतोग।दोऊ रेड्रुईं।” दोरे श़ुमला चेलारे बेई इलिरे दंग श़ोढिंग लम्मे शुचि इलिरे।

![](https://cdn.door43.org/obs/jpg/360px/obs-en-36-06.jpg)

दंग यीशुज़ि दोतिंग पच्च रेईं कुडि, “बेऊईं थाईं। खडे शूंईं।” अपेल दोच़ि भत्ते नम खणिरे, धोपेल चीए दोर तोई दु यीशुए तोई।

![](https://cdn.door43.org/obs/jpg/360px/obs-en-36-07.jpg)

यीशु ए दोरे श़ुमुला चेलारे दु गोरिंगज़ि यच़ा योंखा तक्सा अतिरे। दोऊ थल यीशुज़ि दोतंग कुतो, “कि एन्थेग देर चि ची शुचा दु अतंगला थशदुईं। गे च़म्बे सी योग दंग ओल्ला श़ीञि योग। दोऊ थल केच़ि मितिंग कन्ड्रि तरफोईं।”

*मत्ती अध्याय 17:1-9; मरकुस 9:2-8; लूका 9:28-36 ज़ी इच़ा बाइबलो कथा*

## 37. यीशुजि लाज़रबी सी दोतु धुन्ना शिंगबि ले हाति

https://openbiblestories.org/l/ps-x-pathani/story-37/

![](https://cdn.door43.org/obs/jpg/360px/obs-en-37-01.jpg)

लाज़र मिन्दांग इच़ा मी तोई। दोऊ जुट रिंगकु तोइकु दोकु मिन मरियमे मार्था तोई। दोरे बत्ते यीशुज़ु च़म्बे साथि तोईरे। इच़ा ध्याड़ा, अच़िया यीशुबी कन्जतु कि लाज़र मास्स टेचि तोई। अपेल यीशुई दि थश्तो दांग दोई कुत्तो, “दि बिमारी लाज़रो सीरांग साथे योसा मेओतो। दिऊ भोन्दे, दि मीतिंग परमेश्वरो आदर लेईमि थल्ज़ि सिखाई शोतो।”

![](https://cdn.door43.org/obs/jpg/360px/obs-en-37-02.jpg)

यीशुज़ि एनो साथीतांग दा लज़ते, पर आंर दु तोई दोर दु जुट ध्याड़ा तचे रुमज़री। दु जुट ध्याड़ो थल्ल, दोई एनो चेलातांग कुड़ि, “आतईं, यच़्च़ा यहूदिऊ आखा योईं।” चेलाच़ि जवाब रेईंरे, “पर हे गुरु, एन्थेग मिना ध्याड़ा तुई तचे दोरकि मीच़ि कनिंग सचे केचिम तरेर!” यीशुज़ि कुड़ि, “हेन्दु साथी लाज़र इमरिंग अच़ा इन्जा, आई गे दोबि चेपि लज़िम तताग।”

![](https://cdn.door43.org/obs/jpg/360px/obs-en-37-03.jpg)

यीशु च़ेलारेच़ी जवाब रेईंरे, “हे प्रभु, अगर लाज़र इमरिंग तो सेत, दु ठीक शुचे योतो।” दाङ यीशुज़ि दोतांग सीधा कुचे केरि, “लाज़र सिए इन्जि तो। गै राजी तोतोग कि गै दोरतिग मतोइग, ताकि केच़ि ग्यु टोख्टे बिश्वास लेई तरफोईं।”

![](https://cdn.door43.org/obs/jpg/360px/obs-en-37-04.jpg)

अपेल यीशु लाज़रो नगरांग पिचा धोपेल लाज़रबि सिए तुईए पी ध्याड़ा शुचे इन्दे। मार्था यीशु रांग दोईमि थल्ज़ि धाक्तिका आति दाङ कुड़ि, “हे प्रभु, अगर क देर शुचांग दाङ ग्यु काका सी मतोई। पर गिवि बिशवास तो कि चिधिर ल केई परमेश्वरांग पेपोन दोई कनिंग रमोतो।”

![](https://cdn.door43.org/obs/jpg/360px/obs-en-37-05.jpg)

यीशुज़ि जवाब रेंईं, “सी ए शिंगवि गै ए शुगा। आच़ि ग्यु टोखटे बिश्वास लज़ा दु सी ल इलि सेत ताँ ल शिंङमोतो। आच़ि ग्यु टोखटे बिश्वास लोतो दु अपेल ल म सियोतो। चि केई ग्यु टोखटे विश्वास लज़िया?” मार्था ज़ी जवाब रैईं, “हे प्रभु, गै बिश्वास लज़ताग कि क परमेश्वरो यो मसीह शुना।”

![](https://cdn.door43.org/obs/jpg/360px/obs-en-37-06.jpg)

दाङ मरियम अन्जा। दोई यीशु कोन्ज़ातुंग दचे कुड़ि, “हे प्रभु, अगर क देर शुचांग सेत ग्यु काका सी मतोई।” यीशुज़ि दोरांग रुकतो, “केच़ि लाज़रबी आंर केशि ततईं?” दोच़ि दोबि कन्जतोर, “कब्रांग। अता दाङ खांए च़रतु।” दोपेल यीशु क्राप्चा ।

![](https://cdn.door43.org/obs/jpg/360px/obs-en-37-07.jpg)

दु कब्र इच़ा फुग्ग तोई छोऊ आरिंग इच़ा राग्ग केशि तोई। अपेल यीशु कब्रो दोर पिचा दाङ दोई दोतांग कुड़ि, “राग्ग घेरेक्तुईं।” पर मार्था ज़ि कुड़ि, “दोबि सिए पी ध्याड़ा शुचे इन्जा। दोऊ धुन्ना बास अपि लेकि शोतो।”

![](https://cdn.door43.org/obs/jpg/360px/obs-en-37-08.jpg)

यीशुज़ि जवाब रणिं, “चि गै केतांग मकुत्तेगा अगर केच़ि ग्यु टोख्टे विश्वास तरेईं सेत परमेश्वरे चि लेई तरछ़ि केच़ि तांग्मोईं?” दिऊ थल्ज़ि दोच़ि राग्ग घेरेके केरिरे।

![](https://cdn.door43.org/obs/jpg/360px/obs-en-37-09.jpg)

दाङ यीशुज़ि तोरिंखा स्वर्गो आखा खाँए कुड़ि, “हे बा, ग्यु रेड्रिम थल्ज़ि गै कनु शबस लज़ताग। गै ङैगा कि केई हर फेरा ग्यु रेड्रतन, पर गै देर खड़े बत्ते मी तु मदद लेईमि थल्ज़ि कुत्ताग छेई कुचे दीच़ि बिश्वास लेई तरफोरे कि केई गिबि च़रसि शुना।” यीशु ज़ी हाग्ग रेंईं, “हे लाज़र, धाक्तिका हुच़ा आता!”

![](https://cdn.door43.org/obs/jpg/360px/obs-en-37-10.jpg)

दाङ लाज़र धाक्तिखा हुच़ा आति! दु अत्तला कफनांग जिल्सा तोई। यीशुज़ि दोरांग कुड़ि, “दि कफनबि हुपिरिंग दोबि मदद लाईं ए दोबि आज़ाद लाईं।” दि चमत्कारो थल्ल मास्स यहुदिरेच़ि यीशु टोख्टे बिश्वास लरिरे।

![](https://cdn.door43.org/obs/jpg/360px/obs-en-37-11.jpg)

पर यहुदिरेतु धार्मिक प्रधाने यीशुरांग जेग्दांग लज़ि लेकि तोईरे, दोऊ थल्ज़ि दोरे बत्ते ठ्रोक्कन शुईरे कि छना यीशुए लाज़रबि सापोईं।

*यूहन्ना 11:1-46 बाइबलो इच़ा कथा*

## 38. यीशुबी च़ुमसि ले केचि

https://openbiblestories.org/l/ps-x-pathani/story-38/

![](https://cdn.door43.org/obs/jpg/360px/obs-en-38-01.jpg)

हर साल, यहूदी मीच़ि फसह ज़ु जातर मनेक्च़ा तोईरे। दि जातर दिऊ थल्ज़ि मनेक्च़ि तोई कि तेईया रामि सालो तुई परमेश्वरे दोतु पित्रतिंग मिस्रो गुलामी रिंगज़ि छुड़ाक्ते। लगभग शुमु सालो थल्ल यीशुज़ि खुलेरांग प्रचार लज़ि ए शिक्षा रन्जि शुरु लरि। यीशुज़ि एनो चेलारेतिंग कान्डि कि दोई दोतांग साथे यरुशलेमांग फसह ज़ु त्यौहार मनाच़िम ततु, आई दि ल कि दोबि दोरर साचे केओर।

![](https://cdn.door43.org/obs/jpg/360px/obs-en-38-02.jpg)

यीशुज़ु चेलारेतु बिचांग इच़ा यहुदा मिन्दांग मी तोई। यहुदा प्रेरिततु ढाबो थैली तच़िमि ज़िम्मेबारी लेप्च़ाड़ तोई, पर दोई घड़ी-घड़ी दु थैलीरिंगज़ि ढबा हुन्जे केचि तोई। यीशु ए चेलारेतु यरूशलेम पिचे थल यहुदा यहुदी प्रधानो कचांग इन्जा। दोई ढबो भोन्दे यीशुबी दोतु गुड़च़ि च़ुमज़िमि थल्ज़ि गप्पा लरि। दोबि पता तोई कि धार्मिक प्रधानच़ि दि ममनेक्च़ितोई कि यीशू ए मसीह तोई। दोबि पता तोई कि दोच़ि दोबि सचे केचिम ततोर।

![](https://cdn.door43.org/obs/jpg/360px/obs-en-38-03.jpg)

मोढ़े यहूदि पुजारीऊ कुबे यहूदी धार्मिक प्रधाने यीशुबि दोतु गुड़च़ि च़ुमसि लेईमि थल्ज़ि यहूदाबि मूलू ङिज़ो सा टांग्गा रेईंरे। दि ध्वांए शुचा छना दु भविष्यवक्ताज़ि कुत्ते कि शोतो। यहूदाज़ि मनके केरि दाङ ढबा लेन्ज़ा अच़ा इलि। दोई यीशुबि च़ुमज़िमि थल्ज़ि दोतु मदद लेईरिंग मोक्का पेचि लेकि तोई।

![](https://cdn.door43.org/obs/jpg/360px/obs-en-38-04.jpg)

यरुशलेमांग, यीशुज़ि एनो चेलातांग साथे फसहज़ु त्यौहार मनाकतु। फसहज़ु बागतो धोपेल, यीशुज़ि रोटी लेप्चे खान्नि लरि। दोई कुड़ि, “दि लेप्तु दाङ ज़ोऊ। दि ग्यु फुक शु छेबि गै कनु थल्ज़ि रन्जताग। दिबि ग्यु हिदरिंग लांईं।” ध्यांह छो, यीशुज़ि कुड़ि कि दु दोतु थल्ज़ि सिए योतो, छोऊ मतलब शु कि दोतु थल्ज़ि दोई एनो फुको बलि चढ़ापोतो।

![](https://cdn.door43.org/obs/jpg/360px/obs-en-38-05.jpg)

दाङ यीशुज़ि इच़ा दाखरसो प्याला लेप्चे कुड़ि, “दि तुङे च़रतु। दि खारकोई वायदाज़ु ग्यु शुई शु छेबि गै पोंग्बोगा ताकि परमेश्वरे केतु पापबी माफलोतो। हर फेरा दिबि तुंग्तर ग्यु हिदरिंग ध्यांह लांई छना गै एन्थेग लज़ि लेकि तोतोग।”

![](https://cdn.door43.org/obs/jpg/360px/obs-en-38-06.jpg)

यीशुज़ि एनो चेलारेतांग कुड़ि, “केतु बिचांग तोचि इच़ा मीज़ि गिबि च़ुमज़ि लोतो।” चेलारे झगेक्सा इलिरे, दाङ रुक्तिरे कि दिछो काम्म अच़ि लोतो। यीशु ज़ि कुड़ि, “गिवि च़ुमज़ि लज़ाड़ मि दु शु आतिंग गै दि रोटिऊ खान्नि रन्जताग।” दाङ दोई दु रोटी यहुदाबि रन्दु।

![](https://cdn.door43.org/obs/jpg/360px/obs-en-38-07.jpg)

दु रोटि लेप्चे थल्ल, यहुदा ज़ु अन्दरेग शैतान अच़ा आति। यहूदा हुच़ा यीशुबी च़ुमज़ि लेईमी थल्ज़ि रातरिंग यहुदि धार्मिक प्रधानतिङ साथि लेई अच़ा इन्जा।

![](https://cdn.door43.org/obs/jpg/360px/obs-en-38-08.jpg)

बागत ज़ेए थल्ल, यीशु ए दोऊ चेलारे जैतून गो आखा अच़ा इलिरे। यीशुज़ि कुड़ि, “केच़ि बत्तेच़ि तोग रातरिंग गिबि केचे केओईं। दि च़ैसि तो, ‘गै पोहालबि साचे केयोग दाङ बत्ते त्रैंईरे त्राठेक्शा योरे।’”

![](https://cdn.door43.org/obs/jpg/360px/obs-en-38-09.jpg)

पतरसे जवाब रणीं, “चीए शु उईच़ि बत्तेच़ि कनिंग केचे ल केओर, सेत गै मकेओग!” दाङ यीशुज़ि पतरस रांग कुड़ि, शैताने केतिंग बत्तेतिंग लेन्ज़ा शिन्ज़िम ततु, पर हे पतरसा, गै कनु थल्ज़ि प्रार्थना लत्ताग कि कनिंग ततपा योसि मेस। तां ल, तोग रात, मुर्गाऊ कुचिम बे तुई केई शुमु फेरा न लोन कि केई गै सेन्ने माह।”

![](https://cdn.door43.org/obs/jpg/360px/obs-en-38-10.jpg)

पतरसे धोपेल यीशुरांग कुड़ि, “गै सिए ल इलिगा सेत, अपेल ल कनु इन्कार मलोग!” उई ल बत्ते च़ेलाच़ि ल ध्वांए कुत्तोर।

![](https://cdn.door43.org/obs/jpg/360px/obs-en-38-11.jpg)

दाङ यीशु एनो च़ेलातांग साथे गतसमनी मिन्दांग ठाढ़िरिंग इन्जा। यीशुज़ि एनौ चेलातिंग प्रार्थना लेईरिंग कुड़ि ताकि शैताने दोतु परिक्षा मलेप्तो। दाङ धोपेल यीशु एना प्रार्थना लज़ि अचा इन्जा।

![](https://cdn.door43.org/obs/jpg/360px/obs-en-38-12.jpg)

यीशुज़ि शुमु फेरा प्रार्थना लरि, “हे ग्यु बा, अगर शुई सेत ज़ि शबस दि दुखो प्याला गिबि तुंग्बिरिंग थरउँ। पर मीतु पाप माफ लेईमि जोगे उई छा आम्म म सेत, दाङ कनु इच्छा पूरी शुबि जुस।” यीशु मास्स बैचेन तोई दोऊ त्रुग शुईओ जोगे तोई। दोबि हिम्मत रन्ड्रिम थल्ज़ि परमेश्वरे इच़ा स्वर्गदूतबी च़रचतु।

![](https://cdn.door43.org/obs/jpg/360px/obs-en-38-13.jpg)

हरफेरा प्रार्थना ले थल्ल, यीशु एनो च़ेलातु कचरिंग याच़िरि, पर दोरे इमरिंग अच़ा इन्देर। अपैल यीशु शुमु फेरा याच़िरि, दाङ कुड़ि, “आच़ुईं! गिबि च़ुमज़ाड़ देर तो।”

![](https://cdn.door43.org/obs/jpg/360px/obs-en-38-14.jpg)

यहूदि धार्मिक प्रधान, सेनारे, आई इच़ा मोढ़े झुण्डतांग साथे यहुदा आति। दोच़ि तलवाररे लोऊड़िरे कुरसि तरेरे। यहुदाज़ि यीशु कचरिंग अन्जे कुड़ि, “हे गुरु, नमस्ते,” दाङ दोबि दा लरि। दोई च़ुमसी लज़िमि मीबि यहूदी प्रधानो तांग्शि ध्यांह लत्ते। यीशु ज़ि कुड़ि, “हे यहुदा, केई चि इच़ा दा ज़ि गिबि च़ुमज़ि लज़तना?”

![](https://cdn.door43.org/obs/jpg/360px/obs-en-38-15.jpg)

अपेल दु सैनिकच़ि यीशुबी च़ुमज़ि लेकि तोईरे, धोपेल पतरसे एनो तलवार हुति दाङ मोढ़े यहुदि पुजारी इच़ा नोकरो रैट्रा ट्रिके केरि। यीशुज़ि कुड़ि, “तलवारबी ओई लोऊ! गै घ्यांञों बा रांञ गिबि बचाच़िम थल्ज़ि स्वर्गो दूततु इच़ा सेनाऊ थल्ज़ि ज़ी लेई तरछ़ि। पर गै घ्यांञों बा ज़ु गप्पा मनेक्च़िम तताग।” दाङ यीशुज़ि दु मीऊ रेट्रा ठीक ले केरि। दाङ बत्ते चेलारे पोख्शे इलिरे।

*मत्ती 26:14-56; मरकुस 14:10-50; लूका 22:1-53; यूहन्ना 12:6;18:1-11 बाइबलो इच़ा कथा*

## 39. यीशु टोख्टे मुकदमा चलेक्पि

https://openbiblestories.org/l/ps-x-pathani/story-39/

![](https://cdn.door43.org/obs/jpg/360px/obs-en-39-01.jpg)

द दि अद्धा रातो मोक्का तोई। दु सैनिकच़ि यीशुबि मोड़े पुजारिऊ चुङ लेन्ज़ा अतिरे, छेई कुचे दोई यीशुरांग प्रशन रुक्च़िम तरे। पतरस ओईतारेज़ि दोतु थल्ल थल्ल इबि लेकि तोई। अपेल सैनिकच़ि यीशुबि चुंखा लेन्ज़ा शिलिरे, धोपेल पतरस धाक्ते बांग्ज़ा मै ट्रोड्रि लेकि तोई।

![](https://cdn.door43.org/obs/jpg/360px/obs-en-39-02.jpg)

घरबारो तोंङ, यहूदी धार्मिक प्रधानच़ि मुकदमा चलातिरे। दोच़ि दोऊ खिलाफ हाफसि गप्पा लज़िम थल्ज़ि हाफसि गवाह लेन्ज़ा हातिरे। हलांकि, दोतु गप्पारे तुक में तोईरे, दोऊ थल्ज़ि यहुदी प्रधान दि साबित लेई मरतिरे कि यीशु चि गप्पो दोषी शु। यीशुज़ि छल्ले मकुई।

![](https://cdn.door43.org/obs/jpg/360px/obs-en-39-03.jpg)

थल्ल मुकरिंग, मोढ़े पुजारी सिधा यीशु आखा खंए कुड़ि कि, “ङेतिंग कन्डु चि क ए शिंङि परमेश्वरो यो मसीह शुना?”

![](https://cdn.door43.org/obs/jpg/360px/obs-en-39-04.jpg)

यीशुज़ि कुड़ि, “गे शुगा, केच़ि गिबि परमेश्वर रांग साथे नच़ा ए स्वर्गांगज़ि अपि ल ताञंबोई।” मोढ़े पुजारी एनो खाम्ज़े ट्रवाल्जे केरि दोबि दु गप्पो टोख्टे मास्स रोष अन्दे। दोई उई यहुदि धार्मिक प्रधानो टोखठे हाउशेके कुड़ि, “ङेतिंग दि कान्ड्रिम थल्ज़ि उई गवाह जुंशी मा कि दि मीज़ि चि लसि ततु! केच़ि केन्ज़िए दोबि दि कुट्रि थशे केतइं कि दु परमेश्वरो यो शु। दिऊ पाटि केतु चि फैसला शु?”

![](https://cdn.door43.org/obs/jpg/360px/obs-en-39-05.jpg)

बत्ते यहुदि धार्मिक प्रधानचि मोड़े पुजारीबि जवाब रेईंरे, “दि सीमि जोगे शु!” दाङ दोच़ि यीशु टीरांग यद छ़ुचे केरिरे, दोऊ टोख्टे थू लरिरे, दोबि तेंञरिरे आई दोबि झोकिक्तिरे।

![](https://cdn.door43.org/obs/jpg/360px/obs-en-39-06.jpg)

आई पतरस, अपेल घरबारो धाक्ते रुमज़ा तोई। धोपेल इच़ा दासी मेच़मी काटुई दोबि ताञंरि। दोई दोरांग कुड़ि, “क ला यीशुरांग साथे तोइना!” पतरसे न ले केरि। दिऊ थले इच़ा उई मेच़मि कटुई दी ए गप्पा कुड़ि, दाङ पतरसे ओल्ला न ले केरि। थल्ल मुकरिंग, रेई मीच़ि कुड़िरे, “ङेच़ि ङेई कि क ला यीशुरांग साथे तोईन केकु जुल्ला गलीलो शुशी।”

![](https://cdn.door43.org/obs/jpg/360px/obs-en-39-07.jpg)

धोपेल पतरसे कुड़ि, “अगर गै दि मी सेखा सेत परमेश्वरे गिबि हत्या केओतो!” युरने पतरसो ध्याहंठ्रो कसम ज़ैए थल्ल, इच़ा मुर्गे बांग रेंईं। यीशुज़ि थल्का किरज़ा पतरसबी खणीं।

![](https://cdn.door43.org/obs/jpg/360px/obs-en-39-08.jpg)

पतरस दोरच़ि अच़ा इलि दाङ हिके-हिके क्राप्ति। धोपेले, यीशुबी च़ुमज़ि लज़ाड़ यहुदाज़ि खंणि कि यहुदि प्रधाने यीशुबि साच़िम सज़ा रन्देरे। यहुदा मास्से दुखी शुचे इन्जा दाङ इन्जे एनबि साचे केरि।

![](https://cdn.door43.org/obs/jpg/360px/obs-en-39-09.jpg)

द दु देशो राज्यपाल पिलातुस तोई। दोई रोमो थल्ज़ि कम्म लोअते। यहुदी प्रधानच़ि यीशुबि दोऊ कचरिंग लेन्ज़ा हातिरे। दोच़ि जुन्ज़तेर कि पिलातुसे दोबि साच़िम सज़ा रमोतो दाङ दोबि साचे केओतो। दाङ पिलातुसे यीशुबि रुक्ति, “क चि यहुदितु राजा शुना?”

![](https://cdn.door43.org/obs/jpg/360px/obs-en-39-10.jpg)

यीशुज़ि जवाब रेंईं, “केई हेल्ले कुत्तन। पर ग्यु राज्य देरर धरतिऊ मशु। अगर शुचांग सेत ग्यु दासच़ि ग्यु थल्ज़ि लड़ाई लेईरे का। गै धरतिरिंग परमेश्‍वरो पाटि हेल्ले कान्ड्रिम थल्ज़ि आन्जि शुगा। बत्ते मीच़ी आच़ि हेल्ले राङ दा ततु दोई ग्यु गप्पा रेड्रि।” पिलातुसे कुड़ि, “दाङ हेल्ले चि शु?”

![](https://cdn.door43.org/obs/jpg/360px/obs-en-39-11.jpg)

यीशुरांग गप्पा ले थल्ल, पिलातुसे धाक्ते झुण्डो कचरिंग इन्जे कुड़ि, “दि मीबि साच़िम जोगे छल्ले वजह गै म खोक्तिगा।” पर यहूदि प्रधाने भीड़ांगज़ि हाऊशेके कुड़िरे कि, “दोबि क्रूसांग चढ़ाके केऊईं!” पिलातुसे जवाब रणीं, “दु छल्ले गलत लज़िमि दोषी मशु।” पर दोरे उई ल जोरे जोरे हाऊशेक्तिरे। पिलातुसे शुमु फेरा कुड़ि, “दु दोषी मशु!”

![](https://cdn.door43.org/obs/jpg/360px/obs-en-39-12.jpg)

पिलातुस बेए इलि कि दोरे तेंङज़ि च़ुक्सोरे, दोऊ थल्ज़ि दोई एनो सैनिकतिंग यीशुबि क्रूसो टोख्ठे चढ़ाच़िरिंग मनेके केरि। रोमी सैनिकच़ि यीशुबी कोड़े रांग तेङरिरे, दाङ दोबि राजातु खामज़े लेतिरे, दोऊ पुन्ज़ांग छ़ुवाग टु बनेकि ताज खातिरे। दाङ दोच़ि दि कुचे दोबि झोकिक्तेरे, “खांई यहूदी तु राजा!”

*मत्ती 26:57-27:26; मरकुस 14:53-15:15; लूका 22:54-23:25; यूहन्ना 18:12-19:16 बाइबलो इच़ा कहानी*

## 40. यीशुबी क्रूसो टोख्ठे चढ़ाच़ि

https://openbiblestories.org/l/ps-x-pathani/story-40/

![](https://cdn.door43.org/obs/jpg/360px/obs-en-40-01.jpg)

यीशुबी झोकेकेथल्ल, सैनिकच़ि दोबि क्रूसो टोख्ठे चढ़ाच़िम थल्ज़ि लेन्ज़ा शिलिरे। दोच़ि दु क्रूसबि दोबि कुरच़ि लत्तेरे छोऊ टोख्ठे दु सिओतो।

![](https://cdn.door43.org/obs/jpg/360px/obs-en-40-02.jpg)

दु सैनिकच़ि दोबि दु ठाढ़िरिंग लेन्ज़ा हातिरे आंऊ ‘खोपड़ी’ कहलाच़ा तो दाङ दोऊ गुड़ ए कोन्ज़ाबि क्रूसांग टाके केरिरे। पर यीशुज़ि कुड़ि, “हे बा, दीतिंग माफ लोऊ, छेई कुचे दीच़ि मङेऊरे कि दीच़ि चि लेई लेकि तोतोर।” दोच़ि इच़ा तख्ती दोऊ पुन्ज़ो कचांग टाके केरिरे। दोरिंग च़ेसि तोई, “यहूदीतु राजा।” पिलातुसे दोतिंग दि च़ेच़िरिंग कुत्ते।

![](https://cdn.door43.org/obs/jpg/360px/obs-en-40-03.jpg)

दाङ सैनिकच़ि यीशू खमज़ेतु थल्ज़ि पोगड़ा केरिरे। अपेल दोच़ि ध्यांह लरिरे दाङ दोच़ि दु भविष्यवाणी बी पूरा लरिरे छेई कुट्रते, “दोच़ि ग्यु खामज़े एनतु बिचांग फाए केरिरे, दाङ ग्यु खामज़ेतु थल्ज़ि पोगड़ा केओरे।”

![](https://cdn.door43.org/obs/jpg/360px/obs-en-40-04.jpg)

दोरतिग जुट डाकूकु ल तोइकु, अतिंग सैनिकच़ि धोपेल ए क्रूसरिङ लोकतेर। दोच़ि दोकुतिंग यीशु देच़ि नोच़ि केतेर। दोकुतु बिचांग इच़ा डाकुई यीशूबी झोकेक्ति, पर आईच़े कुड़ि, “चि क परमेश्वरो सज़ा राङ मबेओतना? हेंगु मास्स माजि काम्मो दोषि तोतोशि, पर दि मी निर्दोष शु।” दाङ दोई यीशुरांग कुड़ि, “अपेल क केनो राज्यरिंग अपोन ज़ी शबस धोपेल गिबि हिद तोउ।” यीशुज़ि जवाब रणीं, “तोग्गे क गैरांग साथे स्वर्गांग शोन।”

![](https://cdn.door43.org/obs/jpg/360px/obs-en-40-05.jpg)

यहूदी प्रधान ए दोरतिग तोचि उई मीरेच़ि ल यीशु वस्स लरिरे। दोच़ि दोबि कुड़िरे, “क परमेश्वरो यो शुना सेत, क क्रूसांगज़ि योंखा ताख्सा अता दाङ केनाबि योंखा ताख्सा बचातु! दाङ ङेच़ि कनु टोख्ठे बिश्वास लोईं।”

![](https://cdn.door43.org/obs/jpg/360px/obs-en-40-06.jpg)

दोऊ थल दु देशो बत्ते सर्ग ङिरो धोपेल रोकि शुचे इलि, दाङ शुमु घन्टा तचे ध्यांह ए तोई।

![](https://cdn.door43.org/obs/jpg/360px/obs-en-40-07.jpg)

दाङ यीशुज़ि हाग्ग रैं कुड़ि, “पूरा शुई! हे ग्यु बा, गै घ्यांञो आत्माबि कनु गूड़िंग रन्ड्रताग।” दाङ दोई एनो पुन्ज़ा योंखा ले केरि दाङ एनो प्राण ङयचे केरि। अपेल दु सिया धोपेल भुलिणिं इलि। दु मोढ़े पर्दा आंऊ परमेश्वरो शुबिरिंगज़ि मीतिंग शाता लज़ि तोई दु तोरिंगज़ि योंखा ड्रवाल्जे जुट हिस्सा शुचे इन्जा।

![](https://cdn.door43.org/obs/jpg/360px/obs-en-40-08.jpg)

एनो सिए थल्ल, यीशुज़ि मीतु थल्ज़ि परमेश्वरो कचरिंग अपिम थल्ज़ि अम्म कन्जे केरि। अपेल यीशुबी रुन्जाड़ इच़ा सैनिके चि चि शुत्ते दु बत्ते तांञे थल्ल दोई कुड़ि, “पक्का दि मी निर्दोष तोई। दि परमेश्वरो यो शु।”

![](https://cdn.door43.org/obs/jpg/360px/obs-en-40-09.jpg)

धोपेल युसुफे नीकदेमुस मिन दाङ जुट यहुदि धार्मिक प्रधानकु आतिकु। दोकुतिंग विश्वास तोई कि यीशु ए मसीह तोई। दोकुई पिलातुसो दोरच़ि यीशु फुक पेड़िकु। दोकुइ दोऊ फुक बी खामज़ेतु बिचांग जिल्जे केरिकु। दोऊ थल्ल दोबि इच़ा गोरिंगज़ि ट्रिके पान्ज़ो बनाशि कब्राङ शिन्जे दोऊ अन्दरेग केचे केरिरे। दोऊ थल्ल दोच़ि दु कब्रो पितांग बन्द लेइमि थल्ज़ि इच़ा मोड़े राग्ग केल्ड्रि ले केरिरे।

*मत्ति 27:27-61; मरकुस 15:16-47; लूका 23:26-56; यूहन्ना 19:17-42 बाइबलो इच़ा कथा*

## 41. परमेश्वरे यीशुबि सी दोतु धुन्ना शिंञबि ले केचि

https://openbiblestories.org/l/ps-x-pathani/story-41/

![](https://cdn.door43.org/obs/jpg/360px/obs-en-41-01.jpg)

सैनिकतु यीशुबि क्रूसौ टोखठे चढ़ाके थल्ल, यहुदि प्रधानच़ि पिलातुस राङ कुड़िरे, “दु हाप्साटु, यीशुज़ि कुत्ते कि दु शुमु ध्याड़ो थल्ल सीरिंगज़ि शिंङे आपतो। आतिंङा दि पक्का लेईमि थल्ज़ि दोऊ कब्रबि रुन्ड्रि लेपोतो कि दोऊ चेलारेच़ि दोऊ फुक कूज़ा लेन्ज़ा शोरे त मा। अगर दोच़ि ध्यांह लरिरे सेत दोच़ि कोरे कि दु सीरिंगज़ि शिंङे इन्जा।”

![](https://cdn.door43.org/obs/jpg/360px/obs-en-41-02.jpg)

पितालुसे कुड़ि, “मिना सैनिकतिंग लेन्ज़ा शिलंईं, दाङ छना केच़ि लेई तरथिंई ध्वांह रुन्डुंईं।” दिऊ थल्ज़ि दोच़ि दु क्रबो पिताङु राग्गटिङ इच़ा सुन्नाह केचे केरिरे। दोच़ि दि पक्का लेईमी थल्ज़ि दोरतिग सैनिकतिंग ल केचे केरिरे ताकि अच़िला दोऊ फुक कूज़ि मारपोरे।

![](https://cdn.door43.org/obs/jpg/360px/obs-en-41-03.jpg)

यीशुज़ु सिए थल्लकि ध्याड़ा सब्तो ध्याड़ा तोई। आच़िला सब्तो ध्याड़ो मोक्का काम्म लेई मारछ़ि तोई, दिऊ थल्ज़ि यीशुज़ु आरिया साथि कब्रांग माजतेर। पर सब्तो ओईराग कि ध्याड़ा, मुन्जे नम्म मज़ाङथर, मिना मेच़मीरे यीशु कब्रांग इबिम थल्ज़ि तैयार शुईरे। दोच़ि दोऊ फुकरिङ उई ल मसाला लगाच़िम तरेरे।

![](https://cdn.door43.org/obs/jpg/360px/obs-en-41-04.jpg)

दु मेच़मितु पिपिम बे तुई, कब्रांग जोरे भुलिणीं शुई। स्वर्गांगज़ि इच़ा स्वर्गो दूते अन्जे दु राग्गबि एखा लरि आंउ दोई कब्रो पितांग काप्शि तरे। आई दोऊ टोख्टे बांगज़ा इलि। दि स्वर्गदूत छ़ांञिऊ छो चमकेक्पि लेकि तोई। कब्रांग आंऊ सैनिकरे तोईरे दोच़ि दोबि ताङरिरे। दोरे धोणं बेए इन्देर कि सी दोतु ठ्रो शोड़िंग दचे इलिरे।

![](https://cdn.door43.org/obs/jpg/360px/obs-en-41-05.jpg)

अपेल दु मेच़मिरे कब्रांग पिचतोरे दाङ स्वर्गदुते दोतांग कुत्तो, “बेऊईं थांईं। यीशु देर म। दु सी दोतु धुन्ना शिंङे इन्जा, छना दोई कुशि तरे कि दु शिंङे योतो! कब्रांग पेचे खाईं।” दु मेच़मिच़ि कब्रो अन्दरेग आंरतिग यीशु फुक केशि तरिरे दोर पेड़िरे दाङ खणिंरे कि दोऊ फुक दोरतिग म!

![](https://cdn.door43.org/obs/jpg/360px/obs-en-41-06.jpg)

दाङ दु स्वर्गदूते दु मेच़मितिंङ कुड़ि, “इन्जे दु च़ेलारेतिंग कान्ड़ुईं, ‘यीशु सीरिंगज़ि शिंङे इन्जा दाङ दु केतु तुई-तुई गलीलो हाखा योतो।’”

![](https://cdn.door43.org/obs/jpg/360px/obs-en-41-07.jpg)

दु मेच़मिरे हैरान ए मास्स राजि शुईरे। दोरे चेलारेतिंग दि रुठे उजाब रन्ड्रिमि थल्ज़ि पोखतिरे।

![](https://cdn.door43.org/obs/jpg/360px/obs-en-41-08.jpg)

अपेल दु मेच़मीरे च़ेलारेतिंग दि रुठे उजाब रन्ड्रिमि थल्ज़ि आम्मरिंग तोईरे, दाङ यीशु दोतु तुईच़ि प्रकट शुचा। दोच़ि दोऊ कोन्ज़ातुंग फ्याग लेईरे। धोपेल यीशुज़ि कुड़ि, “बेऊंईं थांई। इन्जे ग्यु च़ेलारेतिंग गलीलोहाखा इबिरिंग कुड़ुईं। दोच़ि गिबि दोर तांङमोरे।”

*मत्ति 27:62-28:15; मरकुस 16:1-11; लूका 24:1-12; यूहन्ना 20:1-18 बाइबलो इच़ा कथा*

## 42. यीशुज़ु स्वर्गोहाखा यच़ा इबि

https://openbiblestories.org/l/ps-x-pathani/story-42/

![](https://cdn.door43.org/obs/jpg/360px/obs-en-42-01.jpg)

आंऊ ध्याड़ा परमेश्वरे यीशुबि सी दोतु धुन्ना शिंगबि लत्ते, दोऊ जुट चेलाकु च़म्बे नगरांग इबि लेकि तोईकु। जोतर दोकुई यीशुरांग चि-चि शुत्ते दोऊ पाटि गप्पा लज़ि लेकि तोईकु, दोकुतिंग उम्मीद तोई कि दु मसीह तोई, पर तां ल दोबि सचे केतेर। द दु मेच़मिच़ि कुट्रतोर कि द दु यच़्च़ा शिंङे इन्जा। दोच़ि मनेऊरे कि आंऊ गप्पारिंग विश्वास लज़िम शु।

![](https://cdn.door43.org/obs/jpg/360px/obs-en-42-02.jpg)

यीशुज़ि दोतु कचरिंग अन्जे दोतांग साथे जोई च़ुक्ति, पर दोच़ि दोबि सेच़ि मारतिरे। दोई रुक्ति कि दोच़ि छोऊ पाटि गप्पा लज़ि लेकि तोईरे। दोकुई दोबि मिना ध्याड़ा तुई यीशुरांग चि-चि शुत्ते दु बत्ते गप्पारे शदिकु। दोकुई चेतिकु कि दोकुई अरिया परदेसीरांग गप्पा लज़ि लेकि तोतोकु अतिंग पता म कि यरुशेलमांग चि शुत्ते।

![](https://cdn.door43.org/obs/jpg/360px/obs-en-42-03.jpg)

धोपेल यीशुज़ि दोकुतिंग समझाकतु कि परमेश्वरो कुशि गप्पाज़ि मसीहउ पाटि चि कुट्रा। मास्स तुई, भविष्यवक्ताच़ि कुत्तेरे कि माजि मीच़ि मसीहबी कष्ट रमोरे ए साचे च़रपोरे। पर भविष्य वक्ताच़ि दि ल कुत्तेर कि शुमु मेतिंग दु ओल्ला शिंङे योतो।

![](https://cdn.door43.org/obs/jpg/360px/obs-en-42-04.jpg)

अपेल दोरे दु नगरांग पिचतेर आंर दोकु नच़िमि तरेकु, धोपेल तचे क्योमे शिनमशे इन्जि तोई। दोकुई यीशुबि एनतांग साथे रुमज़रिंग कुड़िकु, दाङ दु दोकुतांग साथे इच़ा घरबारांग इन्जा। एनतु याग ज़ेईमि थलज़ि दोरे नच़ा इलिरे। यीशुज़ि इच़ा रोटि लेप्चे परमेश्वरबि दोऊ थल्ज़ि शबस लरि, दाङ दोबि थ्वाक्ति। धोत्तरे, दोच़ि ङेए केरिरे कि दु यीशु तोई। पर धोपेले दु रिप्सा इलि।

![](https://cdn.door43.org/obs/jpg/360px/obs-en-42-05.jpg)

दोकु झुट्टे एनकुतांग साथे कुड़िकु, “दु यीशु तोई! दिऊ थल्ज़ि अपेल दोई हेंगुतिंग परमेश्वरो वचनो पाटि समझाकते दाङ हेन्दरे मास्स राजि शुत्तैईं!” युरने, दोरे यच़ा येरुशेलमो हाखा इलिरे। अपेल दोरे दोर पिचतोरे धोपेल दोच़ि च़ेलारेतिंग कान्डिरे, “यीशु शिंङि तो! ङेच़ि दोबि तांग्तेईं!”

![](https://cdn.door43.org/obs/jpg/360px/obs-en-42-06.jpg)

अपेल चेलारेच़ि गप्पा लज़ि लेकि तोईरे, यीशु रिप्पकुचे दु पूरिरिंग दोतु तुईच़ि अच़ा अति। दोई कुड़ि, “केतिंग शान्ति खोक्सि जुस!” च़ेलारेच़ि चेतिरे कि दु अरिया बेड़ा तोई, पर यीशुई कुड़ि, “केरे छेरिंग बेवतईं? केच़ि दि छेरिंग मचेच़तईं कि दि हेल्ले गै, यीशु शुगा? ग्यु गुड़ ए कोन्ज़ा खांईं। बेड़ातु कचरिंग ध्यांह छो फुक मशुबि छना ग्यु कचरिंग तो।” दि कान्ड्ररिंग कि दु अरिया बेड़ा मशु, दोई ज़ेईरिंग थल्ज़ि छा: पेचतु। दोच़ि दोबि मच्छो इच़ा खान्नि रेईंरे, दाङ दोई दोबि ज़ै केरि।

![](https://cdn.door43.org/obs/jpg/360px/obs-en-42-07.jpg)

यीशुज़ि कुड़ि, “ग्यु पाटि परमेश्वरो वचने चिधिर ल कुट्रा दु बत्ते शोतो, गै केतिंग कन्जे केतेग कि दि ज़रूर शोतो।” दाङ यीशुज़ि दोतिंग परमेश्वरो वचन रुठेरांग समझाति। दोई कुड़ि, “मास्स तुई ए भविष्यवक्ताच़ि च़ेसि तरेर कि गै, मसीहबि बारदो उठाच़ि लेपोतो, सी लेपोतो आई ओल्ला शुम्मु ध्याड़ामेतिंग सीरिंगज़ि शिंग्मि लेपोतो।”

![](https://cdn.door43.org/obs/jpg/360px/obs-en-42-08.jpg)

“दु भविष्यवक्ताच़ि दि ल च़ेसि तरेरे कि ग्यु च़ेलारेच़ि परमेश्वरो वचनो घोषणा लोरे। दोच़ि बत्तेतिंग पश्चाताप लेईमि थल्ज़ि कोरे। दोच़ि ध्यांह लरिरे सेत परमेश्वरे दोतु पापतिंग माफ लोतो। ग्यु च़ेलारेच़ि दि उजाबो प्रचार लज़ि यरुशेलमांगज़ि च़ुक्पोर। दाङ दोरे बत्ते जगहरिंग बत्ते जातो कचरिंग योरे। केरे बत्ते ग्यु इच़िच़ कामो ए गप्पो गवाह शुईं, चि गै कुत्तेग ए लत्तेग, आई दोऊ ल चि-चि गैरांग साथे शुचा।” " तूखा ङिन्ज़ामि ध्याड़ो धोपेल, यीशु एनो चेलारेतिंग मास्स फेरा प्रकट शुचा। इच़ा फेरा दु इच्च़े वक्तरिंङ ङराह बै चढ़े मीतिंग प्रकट शुचा! दोई एनो चेलारेतिंग तैईया पाटि कन्डि कि दु शिङि तोई, दाङ दोई दोतिंग परमेश्वरो राज्यज़ु पाटि शिक्षा रणिं।"

![](https://cdn.door43.org/obs/jpg/360px/obs-en-42-09.jpg)

यीशुज़ि एनो च़ेला ताङ कुड़ि, “परमेश्वरे गिवि स्वर्ग ए धरतिऊ इच़ा-इच़ा मीऊ टोख्टे शासन लेइमि अधिकार रांशि ततु। दिऊ थल्ज़ि गै केतांग कुट्रताग इन्जे बत्ते जातियु मीतिंग च़ेला बनातुईं। ध्याहं लेईमि थल्ज़ि, केतिंग दोतु बा, यो ए पवित्र आत्माऊ मिन्ज़ि बप्तिस्मा रन्जि लेपोतो। चिधिर ल गै केतिंग आढेकिताग दु बत्ते गप्पा मनेक्च़ि दोतिंग सिखाच़ि लेपोतो। हिद ताईं, गै हमेशा केतांग साथे तोतोग।”

![](https://cdn.door43.org/obs/jpg/360px/obs-en-42-10.jpg)

यीशु सीरिंगज़ि शिंगबिमि ङिन्ज़ामि ध्याड़ो थल्ल, दोई एनो च़ेलारेतिंग कुड़ि, “अपेल तचि ग्यु बा ज़ि केतिंग शक्ति मरमोतो धोपेल तचे यरुशेलमांग ए बांग्ज़ुईं। दोई केतु टोख्टे पवित्र आत्मा च़रचे ध्यांह लोतो।” दाङ यीशु स्वर्गांग अच़ा इलि, दाङ इच़ा डु ज़ि दोबि दोतु नज़रांगज़ि प्याके केरि। स्वर्गांग यीशु बत्ते चीज़तु टोखटे शासन लज़िम थल्ज़ि परमेशवरो सुचाङ आच़ि बांग्ज़ा च़रति।

*मत्ति 28:16-20; मरकुस 16:12-20; लूका 24:13-53; यूहन्ना 20:19-23; Acts 1:1-11 बाइबलो इच़ा कथा*

## 43. कलीसियाज़ु च़ुक्सि

https://openbiblestories.org/l/ps-x-pathani/story-43/

![](https://cdn.door43.org/obs/jpg/360px/obs-en-43-01.jpg)

यीशुज़ु स्वर्गांग अच़ा इन्जे थल्ल, च़ेलारे यरुशेलमांग ए नच़िरे छना यीशुज़ि आदेश रन्दे। दोरतिगकि विश्वासि मीरे लगातार प्रार्थना लेईमि थल्ज़ि ठ्रोक्कन शुच़ा तोईरे।

![](https://cdn.door43.org/obs/jpg/360px/obs-en-43-02.jpg)

हर साल, फसहउ त्योहारो ङिन्ज़ो सा ध्याड़ो थल्ल, यहूदि मीच़ि पिन्तेकुस्त मिन्दाङ इच़ा ज़रूरी ध्याड़ाबि मनाच़ि तोई। पिन्तेकुस दु मोक्का तोई अपेल यहुदि मीच़ि छ्वा वाल्ज़िरिंग मनेक्च़ि तोई। बत्ते ससांरांगज़ि यहुदि मीरे पिन्तेकुसो त्योहार मनाच़ि यरुशेलमांग अन्ज़ा तोईरे। दि साल, पिन्तेकुस मनाच़िम ध्याड़ा यीशु स्वर्गांग इबिमि इच़ा हफ्ताज़ु थल्ल आन्दे।

![](https://cdn.door43.org/obs/jpg/360px/obs-en-43-03.jpg)

आंऊ घड़ि बत्ते विश्वासि मीरे इच़नम ठ्रोक्कन शुत्तेर, धोपेल आंऊ घरबारांग दोरे तोईरे खन्दा-मखन्दा दु तेज़ लन्दु चालाज़ि बिंङे इलि। दाङ मेलबतु ठ्रो तांग्छ़ा छा: बत्ते विश्वासीतु पुन्ज़तु टोख्टे प्रकट शुचा। दोरे बत्ते पवित्र आत्मारांग बिङे इलिरे दाङ दोच़ि उई मास्स भाषारिंग परमेश्वरो अराधना लेईरे। दि दु भाषारे तोईरे आंऊ दोतिंग कुचिम थल्ज़ि पवित्र आत्माज़ि तरछि लत्ते।

![](https://cdn.door43.org/obs/jpg/360px/obs-en-43-04.jpg)

अपेल येरुशेलमांग बांगज़ाड़ मीचि दु हल्ला थज़िरे, धोपेल दोरे झुण्ड बनाट्रा दि खन्ड्रि इलिरे कि चि शुबि लेकि तो। दोच़ि विश्वासीतिंग परमेश्‍वरो लसि मोढ़े-मोढ़े कमो घोषणा लज़ि थज़िरे। दोरे हक्का बक्का तोईरे छेईकुचे दोच़ि दु कमतिंग एनतु ए भाषारिंग रेड्रिलेकि तोईरे।

![](https://cdn.door43.org/obs/jpg/360px/obs-en-43-05.jpg)

दीतु बिचांगज़ि मिना मीच़ि कुईरे कि दु च़ेलारे क्योशि तोईरे। पर पतरसे खड़े शुचे कुड़ि, “ग्यु गप्पा रेजुईं! दिरे क्योशि मशुरे! दिऊ भोन्दे, केच़ि चि खन्जतईं दि दुए शु आंऊ योएल भविष्यवक्ताज़ि कुत्ते: परमेश्वरे कुड़ि, ‘अन्तो ध्याड़ारिंग, गै घ्यांञो आत्मा पोंङबोगा।’”

![](https://cdn.door43.org/obs/jpg/360px/obs-en-43-06.jpg)

“हे इस्राइलो गांग्मिरे, यीशु इच़ा ध्यांह ठ्रो मी तोई आच़ि दि कान्जिम थल्ज़ि कि दु आरि तोई मास्स नोखे कम्म लत्ते। दोई परमेश्वरो बले मास्स अदभुत कम्मरे लत्ते। केच़ि दि ङेई, छेईकुचे दि कम्मतिंग तांग्सी ततईं। पर केच़ि दोबि क्रूसांग लोके केतईं!”

![](https://cdn.door43.org/obs/jpg/360px/obs-en-43-07.jpg)

“यीशु सिए इन्जा तां ला परमेश्वरे दोबि सीऊ दोतु धुन्ना शिंग्बि लरि। दी दु गप्पा ल पूरा लरि छेबि इच़ा भविष्यवक्ताज़ि च़ेसि तरे: ‘केई केनो पवित्र मीबि कब्रांग ख्वाएक्च़ि मरपोन।’ ङेंरे गवाह शुंईं कि परमेश्वरे यीशुबी ओल्ला शिंगबि ले केत्तु।”

![](https://cdn.door43.org/obs/jpg/360px/obs-en-43-08.jpg)

“परमेश्वर बा ज़ि द यीशुबि एनो सुचांऊहासि बिठाके आदर रन्दो। द यीशुज़ि हेन्दु थल्ज़ि पवित्र आत्मा च़रसि ततु छना कि दोई प्रतिज्ञा लत्ते कि गे च़रपोग। पवित्र आत्माज़िए दु काम्म शुबि रन्जा आंऊ दोतिंग केच़ि खन्जि ए थच़ि लेकि तोतोईं।”

![](https://cdn.door43.org/obs/jpg/360px/obs-en-43-09.jpg)

“केच़ि दु मि, यीशुबि क्रूसरिंग लोके केतईं। पर दि रुठ्ठे ङेओईं कि परमेश्वरे यीशुबि बत्ते चीज़तु प्रभु ए मसीह जुल्ला बनाशि ततु!”

![](https://cdn.door43.org/obs/jpg/360px/obs-en-43-10.jpg)

पतरसबि रेड्राड़ मीच़ि दोऊ कुशि गप्पारांग तोंङ तचे तुरचे इन्देर। दिऊ थल्ज़ि दोच़ि पतरस ए च़ेलातांग रुक्तिरे, “हे काकारे, हेन्‍दिंग चि लज़ि लेपोतो?”

![](https://cdn.door43.org/obs/jpg/360px/obs-en-43-11.jpg)

पतरसे दोतिंग जवाब रैईं, “केतु बिचांगज़ि बत्तेच़ि केन्दु पापो पश्चाताप लाईं ताकि परमेश्वरे केतु पापबि माफ लोतो, आई यीशु मसीहज़ु मिन्ज़ि बपतिस्मा लेप्तुईं। दाङ दोई केतिंग वरदानो रूपरिंग पवित्र आत्मा ल रमोतो।”

![](https://cdn.door43.org/obs/jpg/360px/obs-en-43-12.jpg)

पतरसे चि कुत्ते दोऊ टोख्टे लगभग 3,000 मीच़ि विश्वास लरिरे दाङ यीशुज़ु च़ेला बनेके इलिरे। दोच़ि बपतिस्मा लेप्तिरे दाङ येरुशेलमो कलीसिया ज़ु हिस्सा बनेके इलिरे।

![](https://cdn.door43.org/obs/jpg/360px/obs-en-43-13.jpg)

अपेल प्रेरितच़ि दोतिंग शिक्षा रेईंरे बिश्वासिरेच़ि दाङ लगातार रेड्रिरे। दोरे च़म्बे दौआ लज़ि तोई दाङ साथे बगत ल ज़ेई तोई, दोच़ि एनतु थल्ज़ि प्रार्थना ल लज़ि तोई। दोच़ि ठ्रौक्कन शुचे परमेश्वरबि हिद लेईरे आई चिधिर ल दोतु कचरिंग तोई एनतु बिचांग फारिरे। नगरो इच़िच़ मीच़ि दोतु थल्ज़ि रुठे सेम तच़ि तोई। रोजे, मास्स मीरे विश्वासी बनेक्पा लेईरे।

*प्रेरिततु काम्म 2 ज़ि बाइबलो इच़ा कथा*

## 44. पतरस ए यूहन्नाज़ि इच़ा भिखारीबि ठीक लज़ि

https://openbiblestories.org/l/ps-x-pathani/story-44/

![](https://cdn.door43.org/obs/jpg/360px/obs-en-44-01.jpg)

इच़ा ध्याड़ा, पतरसे यूहन्ना मन्दिर इलिकु। इच़ा अपंग मी भीख पेचिमि थल्ज़ि पितांगरिंग बांग्सि तोई।

![](https://cdn.door43.org/obs/jpg/360px/obs-en-44-02.jpg)

पतरसे दु लाटे मीऊहाखा खणिं दाङ कुड़ि, “ग्यु कचरिंग कनिंग रन्ड्रिम थल्ज़ि ढबा त मा। पर चि ग्यु कचरिंग तो दु गै कनिंग रमोगा। यीशु मिन लेप्चे, आच़ु दाङ जोऊ!”

![](https://cdn.door43.org/obs/jpg/360px/obs-en-44-03.jpg)

युरने, परमेश्वरे दु लाटे मीबि ठीक ले केरि। दोई देखा-नोखा जोई ए छ्वाड़ रन्ड्रि ए, परमेश्वरबी शबस लेई च़ुक्ति। मन्दिरो ल्वाड़िंग तोचि मीरे हैरान शुईरे।

![](https://cdn.door43.org/obs/jpg/360px/obs-en-44-04.jpg)

युरने मीतु इच़ा भीड़ दु मीबि खान्ड्रि आतिरे आऊं दु ठीक शुत्ते। पतरसे दोतांग कुड़ि, “दि मी ठीक तो, पर दि गप्पाउ टोख्टे हैरान थशूईं। ङेच़ि दिबि हेन्दु शक्तिज़ि कुचे ठीक मलईं, या दिऊ थल्ज़ि मलईं कि ङेच़ि परमेश्वरो आदर लज़तईं। ब्लकि, दु यीशु शु आच़ि दि मीबि एनो शक्तिज़ि ठीक लत्तु, छेई कुचे ङेच़ि यीशु टोख्टे विश्वास लज़तईं।”

![](https://cdn.door43.org/obs/jpg/360px/obs-en-44-05.jpg)

“दु का ए शुना आच़ि रोमो राज्यपालबि यीशुबि साचे केचिम थल्ज़ि कुत्ते। केई दोबि साचे केरिन आच़ि बत्तेतिंग जीवन रन्ड्रि तोई। पर परमेश्वरे दोबि सी दोतु धुन्ना शिंगमि लत्तु। केई दि मसमझेक्सिरिन कि केई चि लज़तन, पर अपेल केई दु कम्मरे लज़ि लेकि तोईन, दाङ धोपेल चि भविष्य कुचाड़रेच़ि कुत्तेर दु पूरा शुई। दोच़ि कुत्तेर कि मसीहबि मास्स बारदो शोतो दाङ दु सिए योतो। परमेश्वरे दोबि दि तरीकाज़ि शुबि रणिं। दिऊ थल्ज़ि द, पश्चाताप लोऊ दाङ परमेश्वरो हाखा किरज़ु, ताकि दोई कनु पापतिंग शुल्जे केओतो।”

![](https://cdn.door43.org/obs/jpg/360px/obs-en-44-06.jpg)

अपेल मन्दिरो धार्मिक प्रधानच़ि पतरसे युहन्नाबि रेड्रिरे, धोपेल दोरे बैइ इलिरे। दोऊ थल्ज़ि दोच़ि दोबि च़ुम्मे जेलांग केचि केरिरे। पर पतरसे चि-चि कुते दोऊ टोखटे मास्स मीच़ि विश्वास लरिरे। यीशु टोख्टे विश्वास लजाड़रे बेसा ङां हजार शुचे इलिरे।

![](https://cdn.door43.org/obs/jpg/360px/obs-en-44-07.jpg)

ओईराग, दु यहुदि प्रधानच़ि पतरसे युहन्नाबि मोढ़े यहुदि पुजारी ए उई धार्मिक नेतातु तुईच़ि लेन्ज़ा हातिरे। दोरे दु मीबि ल लेन्ज़ा अतिरे आंउ दु लटे तोई। दोचि पतरसे युहन्नाराङ रुक्तिरे, “चि अधिकारे केच़ि दि मीबि ठीक लत्तई?”

![](https://cdn.door43.org/obs/jpg/360px/obs-en-44-08.jpg)

पतरसे जवाब रणिं, “दि मी आंऊ केतु तुईच़ि खड़े तो दोबि यीशु मसीहज़ु शक्तिज़ि ठीकलत्तु। केच़ि यीशुबि क्रूसो टोख्टे चढाके केतईं, पर परमेश्वरे दोबि ओल्ला शिंगबि ले केरि! केच़ि दोबि म अपनातिईं, पर यीशुऊ शक्तिऊ अम्म क चढ़े उई उधारो छल्ले अम्म म!”

![](https://cdn.door43.org/obs/jpg/360px/obs-en-44-09.jpg)

दु अगुवारे हैरान तोईरे कि पतरसे युहन्नाज़ि मास्स हिम्मत राङ गप्पा लत्‍तेर। दोच़ि ख्यंतोर कि दोरे आम ए अनपढ़ गांग्मिरे तोइरे। दाङ दोतिंग हिद आति कि दोरे यीशुरांग बांगसि तोईरे। दिऊ थल्ज़ि दोच़ि दोतिंग कुड़िरे, “ङेच़ि केतिंग सज़ा रमोई अगर केच़ि यीशु उई छा उजाब उई मीतिंग रमोई।” ध्याहं ठ्रो मास्स गप्पा ले थल्ल, दोच़ि पतरसे युहन्नाबि इबि रन्दोर।

*प्रेरिततु काम्म 3:1-4:22 बाइबलो इच़ा कथा*

## 45. स्तिफनुस ए फिलिप्पुस

https://openbiblestories.org/l/ps-x-pathani/story-45/

![](https://cdn.door43.org/obs/jpg/360px/obs-en-45-01.jpg)

मुन्डा मसीह नेतातु बिचांग स्तिफनुस मिनदांङ इच़ा गांग्मि तोई। बत्तेच़ि दोऊ आदर लज़ि तोई। पवित्र आत्माज़ि दोबि मास्स तरछि ए बुदधि रांशि तरे। स्तिफनुसे मास्स चमत्काररे लसि तरे। अपेल दोई यीशु टोख्टे भरोसा लेईमि थल्ज़ि शिक्षा रन्दे दाङ मास्स मीच़ि दोऊ टोख्टे विश्वास लरिरे।

![](https://cdn.door43.org/obs/jpg/360px/obs-en-45-02.jpg)

इच़ा ध्याड़ा, स्तिफनुसे यीशु पाटि शिक्षा रन्ड्रि लेकि तोई, दाङ मिना ध्याहं ठ्रो यहुदिरे आतिरे आच़ि यीशु टोख्टे विश्वास मलज़तेर दाङ दोतांग साथे बहस लेई च़ुके केरिरे। दोरे मास्स रोशेक्सा इलिरे, दोऊ थल्ज़ि दोरे धार्मिक नेतातु कचरिंग इलिरे दाङ दोऊ पाटि हाप्सि कुईरे। दोच़ि कुड़िरे, “ङेच़ि स्तिफनुसबि मूसा ए परमेश्वरो पाटि माजि गप्पा लज़तर थश्तईं!” दिऊ थल्ज़ि धार्मिकनेताच़ि स्तिफनुसबि च़ुमे मोढ़े पुजारि उई यहुदि प्रधानरेतु तुईच़ि शिन्दोर। उई ल हाप्सि गवाहरेच़ि स्तिफनुसो पाटि हापसि कुईरे।

![](https://cdn.door43.org/obs/jpg/360px/obs-en-45-03.jpg)

मोढ़े यहुदि पुजारि स्तिफनुसबि रुक्ति, “दि मीच़ि चि कनु पाटि हेल्ले कुट्रतोरेआ?” स्तिफनुसे यहुदि मोढ़े पुजारिबी जवाब रन्ड्रिम थल्ज़ि मास्स गप्पारे कुट्रि च़ुक्ति। दोई कुड़ि कि अब्राहमो मोक्काज़ि च़ुके यीशु मोक्का तचे परमेश्वरे इस्राएलो मीतु थल्ज़ि नोख्खे कम्म लत्ते। पर मीचि हमेशा परमेश्वरो भौन्ना मलेईरे। स्तिफनुसे कुड़ि, “केरे परमेश्वरो खिलाफ हठ्ठी ए बगावत लज़ाड़ शुंईं। केच़ि हमेशा शुच्चे आत्माबि मिन्दिईं, छनाह कि हेन्दु पूर्वजच़ि हमेशा शुच्चे आत्माबि मिन्ज़तेर आई दोऊ भविष्यकुट्राड़बि ल सचे केतेर। पर दोच़ि चि लत्तेर केच़ि दुबे ल माजि लत्तईं! केच़ि मसीहबि साचे केरिईं!”

![](https://cdn.door43.org/obs/jpg/360px/obs-en-45-04.jpg)

अपेल दु धार्मिक नेतारेच़ि दि रेड्रिरे, दाङ दोतिंग धोंण रोष आति कि दोच़ि एनतु रेट्रा बन्द ले मास्स जोरे हाउशेक्तिरे। दोच़ि स्तिफनुसबि शोके नगरो धाक्तिका लेन्ज़ा शिलिरे दाङ दोबि साच़िम थल्ज़ि राग्गटु द्रालेग केरिरे।

![](https://cdn.door43.org/obs/jpg/360px/obs-en-45-05.jpg)

अपेल स्तिफनुस सी लेकि तोई, दोई जोरे कुड़ि, “हे यीशु, ग्यु आत्माबि लेप्तु!” दांङ दोई एनो पुशटु भारे शोड़िंग दचे हाग्ग रणिं, “हे प्रभु, दु पाप दीतिंग लेपि थरोऊं।” दाङ दु सिए इलि।

![](https://cdn.door43.org/obs/jpg/360px/obs-en-45-06.jpg)

दु ध्याड़ा, यरुशलेमांग बांगज़ाड़ मास्स मीच़ि यीशुबी मनेक्च़ाड़ मीतिंग तंग लज़ि च़ुके केरिरे, दिऊ थल्ज़ि विश्वासी मीरे उईनम्खा पोख्शे इलिरे। पर दिऊ थल्ल ल, दोरे आंरे इलिरे दोच़ि यीशु पाटि प्रचार लरिरे।

![](https://cdn.door43.org/obs/jpg/360px/obs-en-45-07.jpg)

फिळिप्पुस मिनदाङ यीशु इच़ा विश्वासी तोई। छना उई विशवासिरेच़ि लत्तेर ध्वांहए दु ल यरुशलेमांगज़ि पोख्शे इलि। दु सामरियाऊहाखा अच़ा इलि। दोरतिग दोई मीतिंग यीशु पाटि कन्डि। मास्स मीच़ि दोऊ टोख्टे विश्वास ले उद्‍धार खोक्तिरे। इच़ा ध्याड़ा, फिलिप्पुसो कचांग परमेश्वरो तरफे इच़ा स्वर्गदूत अन्जा दाङ दोई दोबि बणांग इबिरिंग कुड़ि, दाङ दोई दोबि इच़ा सड़करिंगज़ि जोईरिंग कुड़ि। फिलिप्पुस दोरतिग अच़ा इलि। अपेल दु सड़करिंग जोई लेकि तोई, धोपेल दोई इच़ा मीबि एनो रथांग इबि तांगरि। दि मी कूश देशो इच़ा मोढे मी तोई। पवित्र आत्माज़ि कुड़ि कि इला दु मी रांग साथ-साथे अच़ा इला।

![](https://cdn.door43.org/obs/jpg/360px/obs-en-45-08.jpg)

दिऊ थल्ज़ि फिलिप्पुस रथो कचरिंग इलि। दोई थज़ि कि दु कूशी परमेश्वरो वचन पढेक्पि लेकि तो। दि वचन यशायाह भविष्यवक्ताज़ि च़ेसि तोई। दु पढ़ेक्पि लेकि तोई, “दोच़ि दोबि बलिऊ त्रैंईऊ ठ्रो लेन्ज़ा शिन्देर, आई छना इच़ा कुरच़ा चुप्पे शुबि, ध्वांह छो दोई इच़ा शब्द मकुड़ि। दोच़ि दोरांग साथे रुठे मलरिरे आई दोऊ आदर ल मलरिरे। दोच़ि दोऊ प्राण लेप्चे केरिरे।”

![](https://cdn.door43.org/obs/jpg/360px/obs-en-45-09.jpg)

फिलिप्पुसे दु कूशीबि रुक्ति, “चि केई पढ़ेकपतन्न दु केई शुंङतना?” दु कूशी जवाब रणीं, “मशु। अपेल तचे अच़िया गिबि समझाति म धोपेल तचे गै शुंगज़ि मारका। ज़ी शबस ग्यु कचरिंग अन्जे बांगज़ु। यशायाहज़ि दि एनो पाटि च़ेच़तिआ कि अरिया उईतु?”

![](https://cdn.door43.org/obs/jpg/360px/obs-en-45-10.jpg)

फिलिप्पुस रथांग लोक्सा बांगज़ा इलि। दाङ दोई दु कूशी मीबि दु कन्ड्रतु आऊं दु यशायाहज़ि यीशु पाटि च़ेसि तरे। फिलिप्पुसे परमेश्वरो वचनो उई ल मास्स भागो गप्पा लरि। ओ ध्याहं छो, दोई दु मीबि यीशु पाटि रुठे उजाब सुनाति।

![](https://cdn.door43.org/obs/jpg/360px/obs-en-45-11.jpg)

फिलिप्पुस ए दु कूशी जोथर तीऊ कचरिंग आतिकु। दु कूशीज़ि कुड़ि, “खणुं! देर ती तो! गे चि दीक्षा लेप्चि तरछ़िया?” दाङ दोई रथ चलाच़ाबि रथ चच़िम थल्ज़ि कुड़ि।

![](https://cdn.door43.org/obs/jpg/360px/obs-en-45-12.jpg)

दाङ दोकु तीरिंग अच़ा इलिकु, दांङ फिलिप्पुसे दु कुशीबि दीक्षा रणीं। अपेल दोकु तिरिंगज़ि धाक्तिका आतिकु पवित्र आत्माज़ि रिप्पकुचे फिलिप्पुसबी उई ठाड़िऊहाखा लेन्ज़ा शिलि। दोरतिग फिलिप्पुसे मीतिंग यीशु पाटि कान्ड्रि जारि तरे।

![](https://cdn.door43.org/obs/jpg/360px/obs-en-45-13.jpg)

दु कूशी एनो चुंखा इबिम थल्ज़ि तूखा डेके इलि। दु राजि तोई कि द दोई यीशूबि ङेंए केरि।

*प्रेरिततु काम्म 6:8-8:5; 8:26-40 बाइबलो इच़ा कथा*

## 46. पौलुस मसीहज़ु विश्वासि बनेकि य्वा

https://openbiblestories.org/l/ps-x-pathani/story-46/

![](https://cdn.door43.org/obs/jpg/360px/obs-en-46-01.jpg)

शाउल मिनदांग इच़ा मी तोई आच़ि यीशु टोख्टे विश्वास मलत्ते। अपेल दु बाढ़े उम्रो तोई, धोपेल दोई स्तिफनुसबि सच़ाड़ मीतु खमज़े रुन्ड्रते। थले दोई, विश्वासीरेतिंग तंग लत्ते। दोई यरुशलेमांग चुंङ-चुंङ इन्जे गांग्मि ए मेच़मी जुल्लाकुतिंग च़ुमे जेलांग केचे केते। दाङ मोड़े पुजारी शाउलबी दमिश्क नगरांङ इबि रन्दे। दोई दोरकि मसीहरेतिंग च़ुमे ए दोतिंग यच़ा यरुशेलमांग हापिमि थल्ज़ि शाऊलबि कुड़ि।

![](https://cdn.door43.org/obs/jpg/360px/obs-en-46-02.jpg)

दाङ शाउले दमिश्को हाखा इबि च़ुक्ति। दु नगरांङ पिपिम थोड़ेआर तुई, दोऊ फेरे सर्गांगज़ि इच़ा याल्लन बिजली चमकेका, दाङ दु धरतिरिंग दचे इलि। शाउले आतिंङा कुच़ि रेड्रिरि, “हे शाउल! हे शाउल! केई गिबि छेरिंग तंग लातन?” शाउले रुक्ति, “हे प्रभु, क आरि शुना?” यीशुई दोबि जवाब रणीं, “गै यीशु शुगा। केई गिवि तंग लातन!”

![](https://cdn.door43.org/obs/jpg/360px/obs-en-46-03.jpg)

अपेल शाउल खड़े शुई धोपेल दोई खन्ड्रि मरछ़ते। दोऊ साथिच़ि दोबि दमिश्क लेन्ज़ा इन्देर। शाउले शुम्मु ध्याड़ा तचे छल्ले ज़सि ए तुंङसि मतरे।

![](https://cdn.door43.org/obs/jpg/360px/obs-en-46-04.jpg)

दमिश्कांग हनन्याह मिन्दाङ इच़ा चेला तोई। परमेश्वरे दोरांग कुड़ि, “दु घरबारांग इला आंरतिग शाउल रुमज़ा तो। केनो गुड़ दोऊ टोख्टे केऊ छेई कुचे दोई ओल्ला खान्ड्रि तरफोतो।” पर हनन्याहज़ि कुड़ि, “हे प्रभु, गै रेड्रतेग कि दि मीज़ि विश्वासीरेतिंग छना तंग लत्ते।” परमेश्वरे दोबि जवाब रैईं, “इला! गै दोबि यहूदि ए उई जातो मीतिंग ग्यु मिन्ज़ु घोषणा लेइमि थल्ज़ि चुनेक्ताग। दोई ग्यु मिन्दु थल्ज़ि मास्स बारदो खांपोतो।”

![](https://cdn.door43.org/obs/jpg/360px/obs-en-46-05.jpg)

दोऊ थल्ल हनन्याह शाउलो कचरिंग इलि, एनो गुड़ दोऊ टोख्टे केरि, दाङ कुड़ि, “यीशुज़ि, अरि देर अन्दर आम्मरिंग कनु टोख्‍टे प्रकट शुत्ते, गिबि कनु कचरिंग च़रचतो छेई कुचे केई ओल्ला खान्ड्रि तरफोन, आई शुचे आत्माज़ि कनिंङ पिङे केओतो।” युरने शाउले ओल्ला खान्ड्रि तरथि, दाङ हनन्याहज़ि दोबि दीक्षा रणीं। शाउले बागत ज़रि दाङ दोबि ओल्ला बल अति।

![](https://cdn.door43.org/obs/jpg/360px/obs-en-46-06.jpg)

दोऊ थल्ल बेच़ि, शाउले द्मिश्काङ बांगज़ाड़ यहूदितु बिचाङ प्रचार लज़ि च़ुक्सिरि। दोई कुड़ि, “यीशू ए परमश्वरो यो शु!” यहूदि मीरे हैरान तोईरे, छेई कुचे शाउले विश्वासितिंग सचे कचिमि तरे, पर द दोई यीशू टोख्टे विश्वास लत्ते। शाउले यहूदिरेतांग साथे सलाह लरि। दोई कन्डि कि यीशु ए मसीह तोई।

![](https://cdn.door43.org/obs/jpg/360px/obs-en-46-07.jpg)

मास्स ध्याड़ो थल्ल, यहूदिरेच़ि शाउलबि सचे केचिम तरिरे। दोच़ि दोबि साचे केचिम थल्ज़ि नगराङ अपिमि पितांङरिंङ दोबि रुन्ड्रिरिंग मीरे च़रतिरे। पर शाउले दि थचे केरि, दोऊ साथिच़ि ब्याके पोख्फिरिंग दोबि साथि लेईरे। इच़ा रात दोच़ि दोबि किरतिऊ अन्दरेग केचे नगरो भितिऊ दोरच़ि दोबि योंखा ताख्शे केरिरे। दमिश्कांगज़ि हुच़ा थल्ल शाउले यीशु पाटि प्रचार लेई जारि तरि।

![](https://cdn.door43.org/obs/jpg/360px/obs-en-46-08.jpg)

शाउल प्रेरिततांग दोईमि थल्ज़ि येरुशेलम इन्जा, पर दोरे दोरांङ बेच़ा तोईरे। धोपेल बरनबास मिन्दांङ इच़ा विश्वासी शाऊलबि प्रैरिततु कचरिंग लेन्ज़ा अन्जा। दोई दोतिंग कन्जतु कि छना शाउले हिम्मत ले दमिश्कांग प्रचार लत्तु। दोऊ थल्ल, प्रेरितच़ि शाउलबि अपनाके केरिरे।

![](https://cdn.door43.org/obs/jpg/360px/obs-en-46-09.jpg)

मिना विश्वासीरे अरि यरुशेलमो सतावांगज़ि पोख्शे इन्देर दोरे च़लेकि अंताकिया नगरांङ अच़ा इन्देरे दांङ यीशु पाटि प्रचार लज़ि तोई। अंताकियांङ बांग्ज़ाड़ मास्स मीरे यहुदि मतोईरे, पर मुन्डा फेरा, दोतु बिचांगज़ि मास्स मीरे विश्वासि बणेके इलिरे। बरनवास ए शाउले दि नया विश्वासितिंङ यीशु पाटि उई ल मास्स सिखाच़िम थल्ज़ि दोर इलिरे दांङ कलीसियाबि पक्का लरिरे। यीशु टोख्टे विश्वास लज़ाड़रे मुन्ड़ा फेरा अंताकियांग ए “मसीही” कहलातिरे।

![](https://cdn.door43.org/obs/jpg/360px/obs-en-46-10.jpg)

इच़ा ध्याड़ा, अंताकियाज़ु मसीही मीच़ि व्रतरांङ साथे प्रार्थना ल लज़ि लेकि तोइरे। शुच्चे आत्माज़ि दोतांग कुड़ि, “ग्यु थल्ज़ि बरनबास ए शाउलबी दु कम्म लेईमि थल्ज़ि शाता ले च़रतुईं चि लेईमि थल्ज़ि गै दोतिंग बुलासि तताग। “दिऊ थल्ज़ि अंताकिया ज़ु कलीसियाज़ि बरनबास ए शाऊलो थल्ज़ि प्रार्थना लरि दांङ एनो गुड़ दोतु टोख्टे केरि। दांङ दोच़ि दोकुतिंग उई मास्स ठाढ़िरिंग यीशु रुठे उजाबो प्रचार लेईरिंग च़रचे केरिरे। बरनबासे शाउले शता-शता जातिऊ मीतिंग शिक्षा रैंईकु, आई मास्स मीच़ि यीशुरिंग विश्वास लरिरे।

*प्रेरिततु काम्म 8:3; 9:1-31; 11:19-26; 13:1-3 बाइबलो इच़ा कथा*

## 47. फिलिप्पीङ पौलुसे सीलास

https://openbiblestories.org/l/ps-x-pathani/story-47/

![](https://cdn.door43.org/obs/jpg/360px/obs-en-47-01.jpg)

अपेल शाउले बत्ते रोमि राज्यरिंङ जोयते धोपेल दोई एनो रोमी मिन “पौलुस” मिन्नज़ि काम लेई च़ुके केरि। इच़ा ध्याड़ा, पौलुस ए दोऊ साथी सीलास फिलिप्पी नगरांङ यीशु पाटि रुठे उजाब सुनाच़ि इलिकु। दोकु नगरो धाक्तेच़ि इच़ा बेन्डिऊ आढ़ारिंङ इलिकु आंरतिग मीरे प्रार्थना लेईमी थल्ज़ि ठ्रोक्कन शुचि तोईरे। दोरतिग दोकु लुदिया मिनदांङ इच़ा मेच़मीरांङ दोरिकु आरि व्यापारि तोई। दोई परमेश्वराङ प्रेम लज़ि तोई आई दोबि मनेक्च़ि तोई।

![](https://cdn.door43.org/obs/jpg/360px/obs-en-47-02.jpg)

परमेश्वरे लुदियाबि यीशु पाटि उजाबरिंग विश्वास लज़िमि थल्ज़ि जोगे लरि। पौलुसे सीलासे दोबिए दोऊ टाबरबी बपतिस्मा रैईंकु। दोई पौलुसे सिलासबि एनो चुंङ नच़िम थल्ज़ि कुड़ि, दोऊ थल्ज़ि दोरे दोर नाच़िरे।

![](https://cdn.door43.org/obs/jpg/360px/obs-en-47-03.jpg)

पौलुस ए सीलास मीतांङ च़ाम्बे दु ठाढ़िरिंग दोआ लातेर आंरतिग यहूदि मीच़ि प्रार्थना लातेर। रोज़ अपेल दोरे दोरतिग इबि तोई दांङ इच़ा गुलाम मेच़मिकटु आंऊ दोऊ टोख्टे माजि आत्मा तोई दोई दोकुतु पीछा लज़ि तोई। दि माजि आत्माज़ु बलरिंङ दोई मीतु भविष्य कान्ड्रि तोई, दिऊ थल्ज़ि दु भविष्य कन्ड्राड़ो ठ्रो एनो मालिकतु थल्ज़ि ढ़बा कमाच़ि तोई।

![](https://cdn.door43.org/obs/jpg/360px/obs-en-47-04.jpg)

दोतु इन्दर दु गुलाम मेच़मिकटुई हाउशेक्पि तोई, “दि गांङमिकु बत्ते बे मोढ़े परमेश्वरो सेवक शुकु। दिकुई केतिंग उद्धारो आम्म कान्ड्रि लेकि तोतोकु!” दोई रोज़ ध्यांह लज़ि तोई दोऊ थल्ज़ि पौलुस नराज़ शुचे इलि।

![](https://cdn.door43.org/obs/jpg/360px/obs-en-47-05.jpg)

थल्ल मुकरिंङ, इच़ा ध्याड़ा अपेल दु मेच़मीकटुई हाऊशेक्पि च़ुक्ति, दांङ पौलुसे दोऊहाखा किरज़ा दोऊ अन्दरेगकि माजि आत्माबि कुड़ि, “यीशु मिन्नज़ि दिऊ अन्दरेगच़ि हुच़ा इला।” धोत्तरे दु माजि आत्मा दोऊ अन्दरेगच़ि हुच़ा इलि।

![](https://cdn.door43.org/obs/jpg/360px/obs-en-47-06.jpg)

दु गुलाम मेच़मिकटुऊ मालिकतिंङ मास्स रोष आति। दोच़ि ङेंए केरिरे कि माजि आत्मा मे दु मेच़मीकटुई मीतिंङ भविष्य कान्ड्रि मारपोतो। दिऊ मतलब तोई कि मीच़ि दोऊ मालिकतिंङ ढबा मरमोरे छेई कुचे द दोई दोतु भविष्य कान्ड्रि मारपोतो कि दोतांङ साथे चिशोतो।

![](https://cdn.door43.org/obs/jpg/360px/obs-en-47-07.jpg)

दिऊ थल्ज़ि दु गुलाम मेच़मीकटुऊ मालिकच़ि पौलुसे सीलासबि रोमो अफसरतु कचरिंग लेन्ज़ा शिलिरे। दोच़ि पौलुसे सीलासबि कुटेक्तिरे, दांङ दोतिंग जेलांग केचे केरिरे।

![](https://cdn.door43.org/obs/jpg/360px/obs-en-47-08.jpg)

दोच़ि पौलुसे सीलासबि जेलो दु ठाढ़िरिंङ केरिरे आंरतिग मास्स सिपाहीरे तोईरे। देर तचे कि दोच़ि दोकुतु कोन्ज़ातिंग सिंङज़ु मोढ़े-मोढ़े पन्नदांङ तुंङे केतेर। पर पौलुस ए सीलासे हयांररिंग, परमेश्वरो गीत कुट्रि लेकि तोईकु।

![](https://cdn.door43.org/obs/jpg/360px/obs-en-47-09.jpg)

खन्दा-मखन्दा, इच़ा भुलिणिं शुई! ठाणों बत्ते पितांङरे अलसा इलिरे, बत्ते कैदितु शांङणीरे अल्सा दचे इलिरे।

![](https://cdn.door43.org/obs/jpg/360px/obs-en-47-10.jpg)

दांङ ठाणंदार चेके इलि। दोई खणीं कि ठाणों पितांङरे आल्सि तोई। दोई चेति कि बत्ते कैदिरे पोख्शे अच़ा इलिरे। दु बैऐ इलि कि दोतु पोख्शे इबे रोमो मोढ़े अफसरच़ि दोबि सचे केओर, दिऊ थल्ज़ि दु एनबि साचे केचिम थल्ज़ि तैयार शुई! पर पौलोस दोबि खंए हाउशेक्ति, “रुमज़ु! केनबि नुकसान थरोऊं। ङेंरे बत्ते देर ए तोतोईं।”

![](https://cdn.door43.org/obs/jpg/360px/obs-en-47-11.jpg)

दु ठाणेंदारे डगेके पौलुस ए सिलासो कचरिंग अन्जे रुक्ति, “उद्धार लेप्च़िम थल्ज़ि चि लगा?” पौलोसे जवाब रणीं, “प्रभु यीशु टोख्टे विश्सास लोऊ, दांङ कां ए कनु टाबरो उद्धार शोतो।” दांङ दोई पौलुस ए सिलासबि एनो चुंङ शिन्जे दोकु लेकि दोरे शुलि। पौलुसे दोऊ चुंङकि बत्ते मीतिंङ यीशु पाटि रुठे उजाब सुनाकतो।

![](https://cdn.door43.org/obs/jpg/360px/obs-en-47-12.jpg)

ठांढेदारे दोऊ बत्ते टाबरच़ि यीशु टोख्टे विश्वास लरिरे, दोऊ थल्ज़ि पौलुस ए सीलासे दोतिंग दिक्षा रणिंकु। दांङ ठांणेदारे पौलुस ए सिलासबि बगत रणीं, दांङ बत्ते राजि शुईरे।

![](https://cdn.door43.org/obs/jpg/360px/obs-en-47-13.jpg)

ओईराग नगरो धार्मिक प्रधानच़ि पौलुसे सीलासबि जेलांगज़ि हुन्जे केरिरे दांङ फिलिप्पिंगज़ि आच़ा इबिरिंङ कुड़िरे। पौलुस ए सीलास लुदिया ए मिना उई साथी तांङ दोए नगरांङज़ि अच़ा इलिरे। यीशु पाटि रुठे उजाब लेज़ा लरि, दांङ कलीसिया बेसा लरि।

![](https://cdn.door43.org/obs/jpg/360px/obs-en-47-14.jpg)

पौलुसे उई मसीही प्रधानरे उई ल मास्स नगरांङ इलिरे। दोच़ि मीतिंङ यीशु पाटि रुठे उजाब शदिरे। दोच़ि कलीसियातु विश्वासिरेतिंग राजि लज़िरिंग ए शिक्षा रन्ड्रिम थल्ज़ि तेईया डाक च़ेरिरे। दीतु बिचांगज़ि मिना ड़ाक बाइबलो किताब बनेके इलिरे।

*प्रेरिततु काम 16:11-40 बाइबलो इच़ा कथा*

## 48. यीशुए वायदा लसि मसीहा शु

https://openbiblestories.org/l/ps-x-pathani/story-48/

![](https://cdn.door43.org/obs/jpg/360px/obs-en-48-01.jpg)

अपेल परमेश्वरे संसार बनाकते धोपेल बत्तेधिर रुठे तोई। छल्ले पाप मतोई। आदम ए हब्बाज़ि एनकुतिंङ दा लज़ि तोई, आई दोच़ि परमेश्वररांङ दा लज़ि तोई। छल्ले बिमारी ए आरिया सी मतोई। परमेश्वरे ध्याहं ठ्रो ए संसार जुन्ज़ते।

![](https://cdn.door43.org/obs/jpg/360px/obs-en-48-02.jpg)

शैताने ओमड्रा शुचे बगीचो अन्दरेग हब्बारांङ गप्पा लरि, छेईकुचे दोई दोबि धोखा रन्ड्रिम तरे। हब्बा ए आदमे परमेश्वरो खिलाफ पाप लेईकु। छेईकुचे दोकुई पाप लत्तेकु दिउथलज़ि धरतिरिङ बांगज़ाड इच़ा-इच़ा जीव सिए य्वातोरे।

![](https://cdn.door43.org/obs/jpg/360px/obs-en-48-03.jpg)

छेईकुचे आदमे हब्बाज़ि पाप लत्तेकु, दिऊ थल्ज़ि छा उई ल माजि शुई। दोकु परमेश्वरो दुश्मन बणेके इलिकु। दि वजहज़ि दोऊ थल्ल बेच़ि इच़िच़ मीच़ि पाप लरिरे। बत्ते मीरे जेकि बेच़ि ए परमेश्वरो दुश्मन तोतोर। परमेश्वरे मीतु बिचांङ शान्ति मतोई। पर परमेश्वरे शान्ति तच़िम तरे।

![](https://cdn.door43.org/obs/jpg/360px/obs-en-48-04.jpg)

परमेश्वरे प्रतिज्ञा लरि कि हब्बाज़ु इच़ा वशंजे शैतानो पुन्ज़ा काक्पोतो। दोई दिला कुड़ि कि शैताने दोऊ थुरि च़िक्पोतो। उई पाटि कुड़िईं सेत, शैताने मसीहबि साचे च़रपोतो, पर परमेश्वरे दोबि ओल्ला शिंङमि ले च़रपोतो। दिऊ थल्ल, मसीहज़ि शैतानो शक्तिबि हमेशो थल्ज़ि खत्म ले च़रपोतो। मास्स सालो थल्ल, परमेश्वरे दि प्रकट लरि कि मसीह ए यीशु शु।

![](https://cdn.door43.org/obs/jpg/360px/obs-en-48-05.jpg)

परमेश्वरे दु डढांगज़ि एनो टवरबि बचाकतो अतिंग दोई हापिमि तरे। नूहबि इच़ा किश्ती बनाट्रिरिंग कुड़ि ध्याहं ठ्रो परमेश्वरे दु मीतिंङ बचाति आऊं दोच़ि दोऊ टोख्टे विश्वास लज़ि तोई। ओ ध्यांह ठ्रो, दोरे बत्ते परमेश्वरो धुन्ना साचे केचिम जोगे तोईरे छेईकुचे दोच़ि पाप लसि तरेर। पर परमेश्वरे दोतिंग बत्तेतिंङ बचाच़िम थल्ज़ि यीशुबि च़रचतो आच़ि दोऊ टोख्टे विश्वास लज़ि तोई।

![](https://cdn.door43.org/obs/jpg/360px/obs-en-48-06.jpg)

तेईया रामि साल तचे, पुजारीच़ि परमेश्वरो थल्ज़ि बलि चढ़ापा लरिरे। दी कुचे पता लेपा कि मीच़ि पाप लत्तेर, आई दि कि परमेश्वरो दोरच़ि सज़ा रन्ड्रिम जोगे तोईरे। पर दु बलिरेच़ि दोतु पापतिंङ माफ लेई मारचतेर। यीशु भब्बे मोढ़े पुजारि तोई। दोई दु लरि छेबि आंऊ ल उई पुजारीरेच़ि लज़ि मरतिरे। दोई इच्च़े बलिदान शुबिम थल्ज़ि एनबि रैं केरि आंऊ दोई अत्तुला पाप माफ शुचे इबिमि तोई। दोई मनेक्ति कि परमेश्वरे दोतु बत्तेतु पापो थल्ज़ि दोबि सज़ा रमोतो। दिऊ थल्ज़ि, यीशु पिचि ठ्रो मोढ़े पुजारि तोई।

![](https://cdn.door43.org/obs/jpg/360px/obs-en-48-07.jpg)

परमेश्वरे अब्राहमबि कुड़ि, “गै कनु दोरच़ि संसारो बत्ते कुलबि आशीष रमोगा।” यीशु दि ए अब्राहमो वशंज तोई। परमेश्वरे अब्राहमो धुन्ना बत्ते कुलबि आशीष रणीं, छेईकुचे आच़ि यीशु टोख्टे विश्वास लज़तोरे परमेश्वरे दोतिंङ बत्तेतिंङ पापांगज़ि बचाच़ि। अपेल दि मीच़ि यीशु टोख्टे विश्वास लज़ि, दांङ परमेश्वरे दोतिंग अब्राहमो वशंज चेच़ि।

![](https://cdn.door43.org/obs/jpg/360px/obs-en-48-08.jpg)

परमेश्वरे अब्राहमबि कुड़ि कि दोई एनो यो, दोऊ थल्ज़ि बलिदान ले च़रतु। पर दाङ परमेश्वरे इसहाको ठाढ़िरिंग बलि रन्ड्रिमि थल्ज़ि इच़ा लच़ा रैईं। हेन्दरे बत्ते हेन्दु पापो थल्ज़ि साचे केचिम जोगे तोतोईं! पर परमेश्वरे हेन्दु ठाढ़िरिंग साचे केचिम थल्ज़ि यीशुबि बलिदानो रूपरिंङ रन्दु। दि वजहज़ि हेन्ज़ि यीशुबि परमेश्‍वरो लच़ा कुट्रि।

![](https://cdn.door43.org/obs/jpg/360px/obs-en-48-09.jpg)

अपेल परमेश्वरे मिस्रांङ आखिरि खरे च़रति दांङ दोई इस्राइलो इच़िच टबरबि कुड़ि कि इच़ा छागडो बलि रांईं, दु छागड़बि छल्ले दोष शुबि मेस। दोऊ थल्ल एनतु पितांङु डेरिऊ टोख्टेच़ि ए देच़ि-नोच़ि दोऊ शुईबि लगाच़िम तोई। अपेल परमेश्वरे दु शुई ताङतु सेत दु दोतु घरबारबि केट्रा तूखा अच़ा इन्जा दांङ दोतु मुन्डो यो बि मसादि। अपेल दि शुचा दांङ परमेश्वरे दिबि फसहज़ु त्यौहार कुड़ि।

![](https://cdn.door43.org/obs/jpg/360px/obs-en-48-10.jpg)

यीशु फसहउ त्योहारो इच़ा लाच़ो ठ्रो शु। दोई अपेला पाप लसि मतरे, दिऊ थल्ज़ि दोऊ अन्दरेग छल्ले गलत मतोई। दु फसह ज़ु त्यौहारो मोक्का सियते। अपेल अच़िया यीशु टोख्टे विश्वास लज़ि, धोपेल यीशु शुईज़ि दोतु पापतु कीमत चुकाच़ि। दि ध्यांह ठ्रो शु छना परमेश्वर दु मीऊ दोरच़ि तूखा डेके इबि, छेई कुचे दोई दोबि सज़ा रन्ड्रिमि मतु ।

![](https://cdn.door43.org/obs/jpg/360px/obs-en-48-11.jpg)

परमेश्वरे इस्राएलि मीतांग साथे इच़ा वायदा लरि, छेईकुचे दोरे ध्यांह ठ्रो मीरे तोईरे आतिंग परमेश्वरे एनो थल्ज़ि चुनेक्ति। पर परमेश्वरे द ध्यांह ठ्रो वाचा छ़ुसि ततो आंऊ बत्तेतु थल्ज़ि शु। अगर आऊं ल जातिऊ आरला मीज़ि दिसांग नया वायदाबि मनेक्ति सेत, दु परमेश्वरो मीतु बिचांङ शामिल शुचे योतो। दोई ध्यांह दिऊ थल्ज़ि लेई छेईकुचे दोई यीशु टोख्टे विश्वास लज़ि।

![](https://cdn.door43.org/obs/jpg/360px/obs-en-48-12.jpg)

मूसा इच़ा ध्यांह ठ्रो भविष्यवक्ता तोई आच़ि परमेश्वरो कुशी वचनो रुठेरांङ प्रचार लत्ते। पर यीशु बत्ते भविष्यवक्तातु बिचांग मोढ़े शु। दु परमेश्वर शु, दिऊ थल्ज़ि चीए दोई लत्ते दु परमेश्वरो कम्म ए वचन तोई। दिऊ थल्ज़ि पवित्र शास्त्रे यीशुबि परमेश्वरो वचन कुट्रा।

![](https://cdn.door43.org/obs/jpg/360px/obs-en-48-13.jpg)

परमेश्वरे राजा दाउदरांङ प्रतिज्ञा लत्ते कि राजाऊ रूपरिंग दोऊ इच़ा वशंजे परमेश्वरो मीतु टोख्टे हमेशो थल्ज़ि राज लोतो। यीशु परमेश्वरो यो ए मसीह शु, दिऊ थल्ज़ि दु राजा दाउदो वंशज शु आच़ि हमेशा राज लज़ा।

![](https://cdn.door43.org/obs/jpg/360px/obs-en-48-14.jpg)

दाउद इस्राइलो राजा तोई, पर यीशु बत्ते संसारो राजा शु! दु यच़ा आपोतो दांङ हमेशो थल्ज़ि न्याय ए शान्तिरांङ साथे एनो राज्यरिंङ राज लोतो।

*उत्पत्ति 1-3,6,14,22; निर्गमन 12,20;2 शमूएल 7; इब्रानियों 3:1-6: 4:14-5:10,7:1-8:13, 9:11-10:18; प्रकाशितवाक्य 21 बाइबलो इच़ा कथा*

## 49. परमेश्वरो खारकोई वायदा

https://openbiblestories.org/l/ps-x-pathani/story-49/

![](https://cdn.door43.org/obs/jpg/360px/obs-en-49-01.jpg)

इच़ा स्वर्गदूते इच़ा बाड़े मेच़मी मरियमबि कुड़ि कि दोई परमेश्वरो यौ बि जेपि लोतो। दु अत्त व्याह मलसि तोई, पर पवित्र आत्मा दोऊ कचरिंग अन्जा दाङ दु खोग्टांङ शुई। दोबि इच़ा यो जेका अतु मिन दोई यीशु केरि। दिऊ थल्ज़ि, यीशु परमेश्‍वर ए मी जुल्ला शु।

![](https://cdn.door43.org/obs/jpg/360px/obs-en-49-02.jpg)

यीशुई मास्स चमत्कार लत्तो छेई कान्ड्रते कि दु परमेश्वर शु। दु तिऊ टोखटे जोयते दांङ लन्न ए टु बि शान्त लत्ते। दोई मास्स टेचि मीतिंग ठीक लत्ते आई मास्स मीतु अनदरेगच़ि माजि आत्मारे हुन्जते। दोई सी मीतिंग शिंगबि लरि, दांङ दोई ङां रोटि ए जुट मच्छबि 5,000 मीतु ज़ेइमी थल्ज़ि खोग कात्थचे बागत रणीं।

![](https://cdn.door43.org/obs/jpg/360px/obs-en-49-03.jpg)

यीशु इच़ा मोड़े गुरु ल तोई। चिधिर ल दोई कान्डि, दु दोई रुठे रांङ सिखाकतु। चि दोई मीतिंग लेईमि थल्ज़ि कुट्रा दु दोतिंग लज़ि जुंशि शु छेई कुचे दु परमेश्वरो यो शु। कान्ड्रिम थल्ज़ि, दोई सिखाकतो कि केतिंग उई मीतिंग ल ध्वांह ए ठ्रो दा लज़ि जूंशि शु छना केच़ि केन्दिंग लातईं।

![](https://cdn.door43.org/obs/jpg/360px/obs-en-49-04.jpg)

दोई दि ल सिखाकतो कि केतिंग घ्यांङा ए घ्यांङो बत्ते चीज़बे चढ़े परमेश्वरबि दा लज़ि जूंशि शु।

![](https://cdn.door43.org/obs/jpg/360px/obs-en-49-05.jpg)

यीशुज़ि कुड़ि कि संसारो छिल्ला चीज़बि लेपच़िमबे रुठे परमेश्वरो राज्यरिंङ शुबि तो। दोऊ राज्यरिंग इबिम थल्ज़ि जूंशि तो कि परमेश्वरे केतिंग केतु पापे बचापतो।

![](https://cdn.door43.org/obs/jpg/360px/obs-en-49-06.jpg)

यीशुई कुड़ि कि रेई मीच़ि दोबि लेपोरे। परमेश्वरे दु मीतिंग बचापोतो। पर रेई मीच़ि दोबि मलेप्पोरे। दोई दिला कुड़ि कि रेई मीरे रुठे धरतिऊ ठ्रो शुरे, छेईकुचे दोच़ि यीशु पाटि रुठे उजाब लेप्चे केचतोरे, दांङ परमेश्वरे दोतिंग बचाच़ा। पर रेई मीरे सड़को टाक्टाग धरतिऊ ठ्रो तोतोर। परमेश्वरो कुशी गप्पा बैजो ठ्रो धरतिरिंग दपा, पर दोर छल्ले मपुंगमा। दि मीच़ि यीशु पाटि उजाब लेप्च़िरिंग न ले केचि। दोच़ि दोऊ राज्यरिंग इबिरिंग न ले केचि।

![](https://cdn.door43.org/obs/jpg/360px/obs-en-49-07.jpg)

यीशुज़ि सिखाकतो कि परमेश्वरे पापीतांङ मास्स दा लज़ि। दोई दोतिंग माफ लज़िमि ततो दांङ दोतिंग एनो काटु बनाट्रिम ततो।

![](https://cdn.door43.org/obs/jpg/360px/obs-en-49-08.jpg)

यीशुज़ि दिला कुत्तो कि परमेश्वरे पापरांङ नफरत ला। छेईकुचे आदमे हव्वाज़ि पाप लत्तेकु, दिऊथल्ज़ि दोकुतु बत्ते वंशे ल पाप लत्तोर। दि संसारांङ बांगज़ाड़ हर इच़ा मीज़ि पाप लज़ा दिऊ थल्ज़ि दोरे परमेश्वरांङ ओई तोतोर। इच़िच़ मी परमेश्वरो दुश्मन शु।

![](https://cdn.door43.org/obs/jpg/360px/obs-en-49-09.jpg)

पर परमेश्वरे दि संसारांग बांगज़ाड़ हर इच़ा मी रांङ ध्याहं ठ्रो दा लरि कि: दोई एनो इच़ा यो बी रैं च़रति ताकि परमेश्वरे दोतिंग सज़ा मरमोतो आच़ि दोऊ टोख्टे विश्वास लज़ि तोई। दिऊ भोन्दे, दु दोतांङ साथे हमेशाउ थल्ज़ि बांङज़तो।

![](https://cdn.door43.org/obs/jpg/360px/obs-en-49-10.jpg)

केरे सीमी जोगे तोतोईं, छेईकुचे केच़ि पाप लत्तईं। परमेश्वरो केतु टोख्टे रोशेक्सि ठीक शु, दिऊ भोन्दे, दोई यीशु टोख्टे रोष हुति। दोई यीशुबि क्रूसो टोख्टे सिए इबिमि सज़ा रणीं।

![](https://cdn.door43.org/obs/jpg/360px/obs-en-49-11.jpg)

यीशुज़ि अपेला पाप मलऊ, पर दोई परमेश्वरबि एनबि सज़ा रन्ड्रि रन्दे। दोई सिए इबि ठीक चेति। ध्याहं ले, केतु पापतिंङ ए दि संसारांङ बांगज़ाड़ इच़िच़ मीऊ पापबि शिन्ज़िमि थल्ज़ि दि इच़ा मोढ़े बलिदान तोई। यीशुई एनबि परमेश्वरो थल्ज़ि बलिदान ले केरि, दिऊ थल्ज़ि परमेश्वरे छिल्ला पापबि, देर तचे कि बेद आन्जि पापबि ल माफ ले केरि।

![](https://cdn.door43.org/obs/jpg/360px/obs-en-49-12.jpg)

केच़ि आंयो ए रुठे काम्म लांईं तां ल परमेश्वरे केतिंग मबचापोतो। दोऊ साथी बनेक्पिम थल्ज़ि ध्यांह ठ्रो छल्ले कम्म म चि केच़ि लेई तरफोईं। दिऊ भोन्दे, केतिंग दि विश्वास लज़ि लेपोतो कि यीशु परमेश्वरो यो शु, आई दु केतु भोन्दे क्रूसो टोख्टे सीए इलि, दांङ दिला कि परमेश्वरे दोबि ओल्ला शिंगबि लेकेरि। केच़ि दिऊ टोखटे विश्वास लरिईं सेत, परमेश्वरे केतु पाप माफ ले केयोतो।

![](https://cdn.door43.org/obs/jpg/360px/obs-en-49-13.jpg)

परमेश्वरे दोतिंग बत्तेतिंग बचापोतो आच़ि यीशु टोख्टे विश्वास लज़ा आई दोबि एनो प्रभु मनेक्च़तोर। पर दोई दोतिंग मबचापोतो आच़ि दोऊ टोखटे विश्वास मलज़तोरे। दि छल्ले फर्क मपढेक्पोतो कि केरे ढब्बो घराक शुईंआ गरीब शुईं, गांङमी शुईं आ मेच़मी शुईं, यांङशि शुईंआ छ़ोक्करा, या केरे आंरतिग बांङज़तईं। परमेश्वरे केतांग दा लज़ा दांङ ध्यांह जुन्ज़ा कि केच़ि यीशु टोख्टे विश्वास लाईं कि दु केतु साथी बनेक्पि तरफोतो।

![](https://cdn.door43.org/obs/jpg/360px/obs-en-49-14.jpg)

यीशुज़ि केतिंग हाग्ग ला कि दोऊ टोख्टे विश्वास लाईं ए बपतिस्मा लेप्तुईं। चि केच़ि विश्वास लज़तईंआ कि परमेश्वरो इकलौता यो यीशु ए मसीह शु? चि केच़ि विश्वास लातईंयां कि केरे पापि शुईं आई दिला कि केरे परमेश्वरो धुन्ना सज़ा रन्ड्रिम जोगे तोतोईं? केच़ि चि विश्वास लज़तईंया कि केतु पापबि योच़िम थल्ज़ि यीशु क्रूसो टोख्टे सियते?

![](https://cdn.door43.org/obs/jpg/360px/obs-en-49-15.jpg)

अगर केच़ि यीशु टोख्टे ए आई दोई केतु थल्ज़ि चिलत्ते दोऊ टोख्टे विश्वास लज़तईंआ, दांङ केरे इच़ा मसीह शुईं! शैताने एनो हंयारो राज्यरिंङ द केतु टोख्टे राज मला। द परमेश्वरे एनो छांङिऊ राज्यरिंग केतु टोख्टे राज ला। दोई केतिंग पाप लज़ि मरन्ज़ा छना केच़ि तुई लोअतईं। दोई केतिंग इच़ा रुठे जीवन रांशि ततु।

![](https://cdn.door43.org/obs/jpg/360px/obs-en-49-16.jpg)

क अगर इच़ा मसीहि शुना सेत यीशुज़ि चि लसि ततु दोउ भोन्दे परमेश्वरे केतु पापबि माफ ले केतु। दा, परमेश्वरे इच़ा दुश्मनो भोन्दे केतिंङ इच़ा सचे साथी मनेक्च़ा।

![](https://cdn.door43.org/obs/jpg/360px/obs-en-49-17.jpg)

अगर केरे परमेश्वरो साथि शुईंसेत ए प्रभु यीशु सेवक शुईंसेत केच़ि दु गप्पा मनेक्पोईं आऊं यीशुज़ि केतिंङ सिखाच़ा। क मसीही शुना ल सेत, शैताने आत्त ल कनु पाप लेईमि थल्ज़ि कनु परिक्षा लेपोतो। पर परमश्वरे हमेशा दु लज़ि आंउ दु दोई लेईमि थल्ज़ि कुट्रा। दोई कुट्रा कि केच़ि केन्दु पापबि मनेक्तिईं सेत, दांङ दोई केतिंग माफ लेकेओतो। दोई केतिंग पापरांङ लड़ेक्पिमि थल्ज़ि बल रमोतो।

![](https://cdn.door43.org/obs/jpg/360px/obs-en-49-18.jpg)

परमेश्वरे केतिंग प्रार्थना लज़ि ए दोऊ वचनबी पढ़ेक्पिरिं कुचा। दोई केतिंग उई विश्वासि रेतांग छोक्कन शुचे दोऊ अराधना ल लेईरिंग कुचा। केतिंग उई मीतिंग ल कान्ड्रि लेपोतो कि परमेश्वरे केतु थल्ज़ि चि लसि ततो। अगर केच़ि दि बत्ते कम्मरे लरिईं सेत, दांङ केरे दोऊ इच़ा पक्का साथि बनेके योंईं।

*रोमियों 3:21-26, 5:1-11; यूहन्ना 3:16; मरकुस 16:16; कुलुस्सियों 1:13-14;2 कुरिन्थियों 5:17-21; 1 यूहन्ना 1:5-10 बाइबलो इच़ा कथा*

## 50. यीशु याच़ा अपि

https://openbiblestories.org/l/ps-x-pathani/story-50/

![](https://cdn.door43.org/obs/jpg/360px/obs-en-50-01.jpg)

क्योमे क्योमे 2,000 साल ज़ी, संसारंग भत्ते ठारिरिंग महस्स बे महस्स मीच़ी मसीह यीशु पाटि रुठे उजापबी रेड्रि लेकि तोइरे। कलीसियाज़ि तरक्की लज़ि लेकि तोई। यीशुज़ि वाइदा लरि कि दु संसारो योहसिमि बे तुई पक्का अपोतो। ध्यांरिंग दु ऐन्थेग याहच़ा अन्जि मा, तांला दोई ऐनो लसी वाइदा पूरे लोतो।

![](https://cdn.door43.org/obs/jpg/360px/obs-en-50-02.jpg)

ऐन्तच़ी ला हेनरे यीशुज़ु याहच़ा अपिमी थल्ज़ि रुम्ज़ा तोतोई, परमेश्वरे हेन्दंग ध्यां ठ्रो श़िंमिमी इच्छा तत्तो अऊं दु दोऊ आदर लज़ाडे शुच्चे शोतो। अपेल यीशु धरतिरिंग बांगज़ि तोई धोपेल दोई कुते, “ग्यू चेलाच़ि संसारो भत्ते ठाडिऊ मीतिंग परमेश्वरो राज्यो पाटी रुथे उजाप रमोरे, दंग धोपेल अंत अच़ा अपोतो।”

![](https://cdn.door43.org/obs/jpg/360px/obs-en-50-03.jpg)

मस्स जातो मीच़ि एन्नतची यीशु पाटि रेड्रि मतोइरे। स्वर्गो हाखा यच़िमि बे तुई, यीशूज़ी मसीहीतंग दु मीतिंग रुथे उजाप शच़िरिंग थल्ज़ि कुत्तो अच़ि दिबि अप्पेल ला मथशितेर। दोई कुडि, “इलाईं इन्जे भत्ते जातो मीतिंग चेला बनातुईं!” अई “वलज़िमी थलज़ि री त्यार शुचि इन्जि तो!”

![](https://cdn.door43.org/obs/jpg/360px/obs-en-50-04.jpg)

यीशुज़ी दि ला कुडि कि, ”अरिआ मीऊ नोकर एनो मालिक बेच़ि मोडे मशुबि। दि संसारो ज़रुरी मिच़ि गेरंग नफरत लहरिरे, अई ग्यू मुके दोच़ि केतिंगला तंग लोरे ए सचि क्योरे। दि संसारंग केरे दुखेकसोईं, तांला तकडा शूंईयों, छेईकुचे गे शेतानबि याहरचि केतग अच़ि दि संसारंग राज लज़िते। थलमुक्करिंग तचि केरे ग्यू विश्वासो जोगे शोईं सेत परमेश्वरे केतिंग बचापोतो!”

![](https://cdn.door43.org/obs/jpg/360px/obs-en-50-05.jpg)

यीशुज़ी एनो चेलारेतिंग दि शुंङसी लज़िमि थलज़ि इच़ा कथा शदि कि अपेल संसार योहसी लेकि शोतो धोपेल मितंग साथे चि शोतो। दोई कुड़ि, “अरिआ मीज़ि एनो ऋई रिंग रुथे बेजा एईतो। अपेल दु इमरिंग तोई धोपेल दोऊ दुशमने अन्जि छ्वाऊ बेजो बिचंग श़ाङो बेजा एई केतो, दंग दु अच़ा इन्जा।”

![](https://cdn.door43.org/obs/jpg/360px/obs-en-50-06.jpg)

“अपेल बेजा पुङे इन्दे धोपेल दासच़ि दु मीरंग कुढीरे, ‘हे मलिका, केई त केनो ऋईरिंग रुठे बेजा एईतेने। दंग दिरिंग बणों श़ाङ छेरिंग तो?’ दु मीज़ि जवाब रंदो, ‘झित्ते ग्यू दुशमनरे शोरे अच़ि दि एओतो। ग्यू अरिआ दुशमने ध्यां लतो।’”

![](https://cdn.door43.org/obs/jpg/360px/obs-en-50-07.jpg)

“दु दासच़ि मालिकबि जवाब रंदोरे, ‘ नेच़ि चि जंगली श़ांग फोम्मबोईंयां?’ दोई कुडि, ‘मेस। केच़ि ध्यां लरिंईं सेत रेई छ्वा ला फोंश़ा अपोतो। वालज़ि तचि रुम्ज़ुईं। धोपेल श़ाङो पुलटु लेई ठ्रोक्कन लेई च़ारतुईं छेबि थले रोट्रि तरफोईं। दंग छ्वाबि ग्यू गोदामांङ लेन्ज़ा अतंई। ’”

![](https://cdn.door43.org/obs/jpg/360px/obs-en-50-08.jpg)

चेलारेच़ी दि कथाज़ु मतलब मशुङदिरे, दीऊथलज़ि दिच़ि यीशुरंग दोबि समझाच़िरिंग कुईरे। यीशुज़ी कुडि, “रुठे बेजा एच़ाड मीज़ि मसीह बी कन्ड्रा। री ज़ि संसारबि कन्जा। रुठे बेजे परमेश्वरो राज्यो मीतु पाटी कन्ड्रा।”

![](https://cdn.door43.org/obs/jpg/360px/obs-en-50-09.jpg)

“बणों श़ाङ दु माजि मीतु , बेडो मीतु ठ्रो शुबि। दु मीज़ु दुशमने शेतानबी कन्ड्रा, अच़ि बणों श़ाङबि एई केतो। वालज़ि दि संसारो योहसिबि कंड्रा, अई वलज़ाडेच़ि परमेश्वरो स्वर्गदूततिंग कंड्रितोरे।”

![](https://cdn.door43.org/obs/jpg/360px/obs-en-50-10.jpg)

“अपेल संसार योसतो दोपेल स्वर्गो दूताच़ि दू भत्ते मीतिंग ठ्रोकन लोरे अरी सेतानो शोरे। दु स्वर्गदूतच़ि दोतिंग इच़ा मस्स च़च़े मेहरिंग छ़ाँङे च़ारपोरे। दोर दु मीरे भेबर कष्टांग क्रपोरे दंग एनतु छ़वा युपोरे। पर अरि धर्मी शुरे, अच़ि यीशु कांश़ी अमरिंग जोउरे, दोरे दोतु परमेश्वर बा ज़ु राज्यरिंग एखेऊ ठ्रो याहलन शोतो।”

![](https://cdn.door43.org/obs/jpg/360px/obs-en-50-11.jpg)

यीशुज़ी दि ला कुडि कि संसार योसिमिबे तुई दु धरतिरिं याच़ोतो। दु ध्वां ठ्रो ए अपोतो छना इन्दे। दोऊ कचरिंग हेलेकि फुक शोतो, दंग दु सरगंग डूज़ु टोकठे तेच़ा अपोतो। अपेल यीशु याच़ोतो, धोपेल भत्ते मसीही अरि सिये इन्देर दोरे ओल्ला श़िङे योरे दंग दोरांग सर्गांङ दोओरे।

![](https://cdn.door43.org/obs/jpg/360px/obs-en-50-12.jpg)

धोपेल अरि मसीही श़िंञी तोतोरे दोरे सरगांग लेन्ज़ा शोरे दंग दोरे ला उई मसीहीतंग शामिल शुचे योरे अरि सीरिंज़ि श़िञि इन्देरे। दोरे भत्ते दोर यीशुरंग साथे शोरे । दोऊ थल , यीशु एनो मीतंग साथे बङज़ोतो। अपेल दोरे इच्च़ा साथे बङज़ोरे धोपेल दोतु कचरिंग पूरे ठ्रो शान्ति शोतो।

![](https://cdn.door43.org/obs/jpg/360px/obs-en-50-13.jpg)

यीशुज़ी दोऊ टोक्ठे विश्वास लज़ाड भत्ते मीतिंग इच़ा मुकुट रंड्रिमि प्रतिज्ञा लत्तो। दोच़ि हमेशो थलज़ि परमेश्वरंग साथे भत्ते चीज़तु टोक्ठे राज लोरे। दोतु कचरिंग सिध्ध शान्ति शोतो।

![](https://cdn.door43.org/obs/jpg/360px/obs-en-50-14.jpg)

परमेश्वरे दोतु भत्तेतु ला रुठे लोतो अच़ि यीशु टोक्थे विश्वास मलज़ि तोईरे। दोई दोतिंग नरकरिंग केचि क्योतो। दोरतिग दोरे क्रापोरे ए एनातु छ़व्आ युपोरे, दंग दोतिंग बरदो शुआ लोतो। अपेल्ला म सिच़ा मेहज़ी दोतिंग लगातार रोप्पा लोतो, अई दोतिग ओमड्रा लेपोतो छेई दोतिंग लगातार ज़ोरे।

![](https://cdn.door43.org/obs/jpg/360px/obs-en-50-15.jpg)

अपेल यीशु यच़ोतो, धोपेल दोई पूरे ठ्रो शेतान ए दोऊ राजबी योचि च़रपोतो। दोई शेतानबी नरकङ केचि केओतो। दोर शेतान हमेशो थल्ज़ि दोतंग साथे अऊं दोच़ि परमेश्वरो गप्पा मरेठ्रा शेतानो थले इबिमि कम लरिरे दोरे रोश़ा लोरे।

![](https://cdn.door43.org/obs/jpg/360px/obs-en-50-16.jpg)

छेईकुचे आदम ए हव्वाज़ि परमेश्वरो ठ्रो मलोकु दंग पापबी दि संसारंग लेन्ज़ा अन्देकु, परमेश्वरे दोबि हत्या केरि दंग दोवि सच़िमि फैसला लरि। पर अपेला परमेश्वरे इच़ा खरकोई स्वर्ग ए इच़ा खरकोई धरति बणेक्पोतो अऊं दु हमेशो थल्ज़ि शोतो ।

![](https://cdn.door43.org/obs/jpg/360px/obs-en-50-17.jpg)

यीशुए दोऊ मिरे दु खरकोई धरतिरिंग बंगज़ोरे, दंग दोच़ि हमेशो थलज़ि दोर राज लोरे। दोई मीतु टीरंगज़ि इच्च़ा इच्च़ा मिक्ति भ्रुचि च़रपोतो। द अत्तिंगला बरदो ए दु:ख मशोतो। दोरे क्रपोरे मा। दोरे टेपोरे ए सिओरे मा। दोर छल्ले माजि मशोतो। यीशुज़ी एनो राज्यरिंग न्यायरांग, आई शान्तिरांग साथे शासन लोतो। दु हमेशो थल्ज़ि एनो मीतांग बांगज़तो।

*मत्ती 24:14; 28:18; यूहन्ना 15:20, 16:33; प्रकाशितवाक्य 2:10; मत्ती 13:24-30, 36-42; 1 थिस्सलुनीकियों 4:13-5:11; याकूब 1:12; मत्ती 22:13; प्रकाशितवाक्य 20:10, 21:1-22:21  बाइबलो इच़ा कथा*