# unfoldingWord Open Bible Stories — Vlach Western Arli

- Language code: `rmy-x-vwa`
- Canonical page: https://openbiblestories.org/l/rmy-x-vwa/
- Stories in this file: 50 of 50
- Published by: Door43-Catalog
- Last release: 2021-03-13
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Vlach Western Arli translation; it is not a translation of the whole Bible.

## 1. Ćeriba

https://openbiblestories.org/l/rmy-x-vwa/story-1/

![](https://cdn.door43.org/obs/jpg/360px/obs-en-01-01.jpg)

Ače sar ulo o početko oto sa. O Devel šove divenđe ćerđa o svemir hem sa soi ano leste. Palo adava so o Devel ćerđa i Phuv, i Phuv inele ani tomina hem čuči, hem ništa upro late na inele oblikujime. A o Duho e Devlesoro inele upro pani.

![](https://cdn.door43.org/obs/jpg/360px/obs-en-01-02.jpg)

Tegani o Devel phenđa: "Nek ovel svetlost!" I ulo svetlost. O Devel dikhlja dai o svetlost šukar i dinđa le anav "dive". Odvojinđa le e tominatar, sava vičinđa "rat". O Devel ćerđa o svetlost ko prvo dive oto ćeriba.

![](https://cdn.door43.org/obs/jpg/360px/obs-en-01-03.jpg)

Ko dujto dive oto ćeriba, o Devel vaćerindoj ćerđa o nebo upri phuv. Ćerđa o nebo ađahar so odvojinđa o upruno pani e telune panjestar.

![](https://cdn.door43.org/obs/jpg/360px/obs-en-01-04.jpg)

Ko trito dive, o Devel vaćerindoj odvojinđa o pani e šuke thanestar. O šuko than vičinđa "phuv", a o pani vičinđa "morija". O Devel dikhlja dai adava so ćerđa šukar.

![](https://cdn.door43.org/obs/jpg/360px/obs-en-01-05.jpg)

Tegani o Devel phenđa: "Tari phuv nek ikljon sa o vrste oto kašta hem oto biljke." I ađahar ulo. O Devel dikhlja dai adava so ćerđa šukar.

![](https://cdn.door43.org/obs/jpg/360px/obs-en-01-06.jpg)

Ko štarto dive oto ćeriba, o Devel vaćerindoj ćerđa o Kham, o Masek hem o čerenja. O Devel ćerđa len te den svetlost e Phuvjaće hem te označinen o dive hem i rat, o štar sezone ano berš hem o berša. O Devel dikhlja dai sa adava so ćerđa šukar.

![](https://cdn.door43.org/obs/jpg/360px/obs-en-01-07.jpg)

Ko pandžto dive, o Devel vaćerindoj ćerđa sa so plivini ano pani hem sa e čirikljen. O Devel dikhlja dai sa šukar hem blagoslovinđa len.

![](https://cdn.door43.org/obs/jpg/360px/obs-en-01-08.jpg)

Ko šofto dive oto ćeriba, o Devel phenđa: "Nek oven oto sa o vrste životinje save džana phuvjaja!" I ulo ađahar sar so phenđa o Devel. Nesave životinje inele domaća, nesave lazinde upri phuv, a nesave inele divlja. I o Devel dikhlja dai sa adava šukar.

![](https://cdn.door43.org/obs/jpg/360px/obs-en-01-09.jpg)

Tegani o Devel phenđa: "Ana amen te ćera manušen ki amari slika te oven slična amenđe. On ka vladinen e phuvjaja hem sa e životinjencar."

![](https://cdn.door43.org/obs/jpg/360px/obs-en-01-10.jpg)

I ađahar, o Devel lelja xari phuv, oblikujinđa la ano manuš hem phudinđa životi ano leste. Adale manušesoro anav inele Adam. O Devel sadinđa vrt kote o Adam šaj ine te živini, hem čhivđa le adari te brinini pe zako vrt.

![](https://cdn.door43.org/obs/jpg/360px/obs-en-01-11.jpg)

Ano maškar e vrtesoro o Devel sadinđa duj posebna kašta—kaš savo dela dživdipe hem kaš savo dela sposobnost te pendžari pe o šukar hem o bišukar. O Devel phenđa e Adamese da šaj te xal bilo save kaštestar ano vrt sem e kaštestar savo dela sposobnost te pendžari pe o šukar hem o bišukar. Te xalja o Adam adale kaštestar, ka merel.

![](https://cdn.door43.org/obs/jpg/360px/obs-en-01-12.jpg)

Tegani o Devel phenđa: "Nane šukar o manuš te ovel korkoro." Ali nijek životinja našti ine te ovel e Adamesoro pomoćniko.

![](https://cdn.door43.org/obs/jpg/360px/obs-en-01-13.jpg)

I ađahar, o Devel muklja upro Adam zoralo sojba. Tegani lelja lestar jekh rebro savestar ćerđa đuvlja hem anđa la koro leste.

![](https://cdn.door43.org/obs/jpg/360px/obs-en-01-14.jpg)

Ked dikhlja la o Adam, phenđa: "Napokon! Akajai sar mande! Nek vičini pe 'Đuvli', adalese soi ćerdi e Muršestar." Adalese o murš ačhaj pe dade hem pe daja hem ovela jekh pe romnjaja.

![](https://cdn.door43.org/obs/jpg/360px/obs-en-01-15.jpg)

O Devel ćerđa e murše hem e đuvlja ki pli slika. Blagoslovinđa len hem phenđa lenđe: "Te ovel tumen but čhave hem unuci hem te pheren i Phuv." Tegani o Devel dikhlja da sa so ćerđa inele but šukar hem inele but zadovoljno adaleja so ćerđa. Adava sa ulo ko šofto dive oto ćeriba.

![](https://cdn.door43.org/obs/jpg/360px/obs-en-01-16.jpg)

Ked alo o eftato dive, o Devel završinđa e ćeribnaja. I ađahar, o Devel odmorinđa pe oto sa so ćerđa. Blagoslovinđa o eftato dive hem ćerđa le te ovel sveto, adalese so ko adava dive odmorinđa pe pla bućatar. I ađahar o Devel ćerđa o svemir hem sa soi ano leste.

*E biblijakiri paramiz taro 1. lil e Mojsijasoro 1-2*

## 2. O greh đerdini ki phuv

https://openbiblestories.org/l/rmy-x-vwa/story-2/

![](https://cdn.door43.org/obs/jpg/360px/obs-en-02-01.jpg)

O Adam hem lesiri romni inele but bahtale adalese so živinđe ano but šužo vrt savo inele ćerdo e Devlestar olenđe. Nijekh olendar na akharđa šeja, ali na lađandile, adalese so ko sveto na inele greh. But puti phirena ine ano vrt hem vaćerena e Devleja.

![](https://cdn.door43.org/obs/jpg/360px/obs-en-02-02.jpg)

A ano vrt inele jekh lukavo sap. Pučlja e đuvlja: "Čače li o Devel phenđa tumenđe te na xan o plodovija nijekhe kaštestar ano vrt?"

![](https://cdn.door43.org/obs/jpg/360px/obs-en-02-03.jpg)

I đuvli phenđa: "O Devel phenđa amenđe da šaj te xa bilo save kaštestar, sem e kaštestar savo dela sposobnost te pendžari pe o šukar hem o bišukar. O Devel phenđa: 'Te xaljen ili samo te pipinđen lesoro plodo, ka meren.'"

![](https://cdn.door43.org/obs/jpg/360px/obs-en-02-04.jpg)

O sap phenđa e đuvljaće: "Adava nane čače! Na ka meren. Nego, o Devel džanel da, samo so ka xan adava plodo, ka oven sar o Devel hem ka xaljoven o šukar hem o bišukar sar Ov so xaljola."

![](https://cdn.door43.org/obs/jpg/360px/obs-en-02-05.jpg)

I đuvli dikhlja dai o plodo šužo hem dičhilo laće dai gudlo. Oj manglja te ovel džandi, i dolinđa o plodo adale kaštestar hem xalja le. Tegani dinđa hem ple romese, kova inele olaja, i ov da xalja.

![](https://cdn.door43.org/obs/jpg/360px/obs-en-02-06.jpg)

Otojekhvar phravdile lengere jaćha hem dikhle soi nange. Mangle te učharen pe ađahar so oto listovija ćerdefse šeja.

![](https://cdn.door43.org/obs/jpg/360px/obs-en-02-07.jpg)

Tegani o murš hem i đuvli šunđe e Devle sar phirela ano vrt, i garavđe pe olestar. Tegani o Devel vičinđa e murše: "Kaj injan?" O Adam phenđa: "Šunđum tut sar phireja ano vrt, i darandiljum, adalese so injum nango. Adalese garavđum man."

![](https://cdn.door43.org/obs/jpg/360px/obs-en-02-08.jpg)

Tegani o Devel pučlja le: "Ko phenđa će da injan nango? Na li xaljan o plodo savo phenđum će te na xas?" O murš phenđa: "Tu dinđan man akala đuvlja, a oj dinđa man adava plodo." Tegani o Devel pučlja e đuvlja: "Sose ćerđan adava?" I đuvli phenđa: "O sap xovavđa man."

![](https://cdn.door43.org/obs/jpg/360px/obs-en-02-09.jpg)

O Devel phenđa e sapese: "Prokleto te ove! Ka lazine vođeja hem phuv ka xas. Tu hem i đuvli ka mrzinen tumen, hem te čhave hem lakere čhave ka mrzinen pe. E đuvljakoro potomko ka zdrobini to šero, a tu ka ranine lesiri patum."

![](https://cdn.door43.org/obs/jpg/360px/obs-en-02-10.jpg)

Tegani o Devel phenđa e đuvljaće: "Ka ćerav te oven tut bare dukha ked ka bijane. Ka mange te rome, a ov ka vladini tuja.

![](https://cdn.door43.org/obs/jpg/360px/obs-en-02-11.jpg)

O Devel phenđa e muršese: "Šunđan te romnja, a man na šunđan. Akanai i phuv prokleto, a tuće but pharo ka ovel ked ćereja buti te šaj barjol će xajbnase. Palo adava ka mere, a to telo ka irini pe ki phuv." O murš pe romnjaće dinđa anav ''Eva'' so značini ''okoja-koja-dela-dživdipe', adalese so ka ovel daj sa e manušengiri. A o Devel hurjavđa e Adame hem e Eva ani koža e životinjakiri.

![](https://cdn.door43.org/obs/jpg/360px/obs-en-02-12.jpg)

Palo adava, o Devel phenđa: "Akana ked o manuša ule sar amende ađahar so džanen o šukar hem o bišukar, našti muka lenđe te xan e kaštestar savo dela dživdipe i te živinen zauvek." Ađahar o Devel ispudinđa e Adame hem e Eva taro but šužo vrt. O Devel čhivđa zorale anđelen ko udar oto vrt te na muken nikase te xal e kaštestar savo dela dživdipe.

*E biblijakiri paramiz taro 1. lil e Mojsijasoro 3*

## 3. O baro pani

https://openbiblestories.org/l/rmy-x-vwa/story-3/

![](https://cdn.door43.org/obs/jpg/360px/obs-en-03-01.jpg)

Palo but berša, ki phuv živinđe but manuša. Ule but bišukar hem nasilna. Edobor sa inele bišukar da o Devel odlučinđa e bare panjeja te uništini sa i phuv.

![](https://cdn.door43.org/obs/jpg/360px/obs-en-03-02.jpg)

A o Noje inele manuš koleja o Devel inele zadovoljno. Ov inele šukar manuš, a živinđa maškaro bišukar manuša. O Devel phenđa e Nojase so mangela upri phuv te mukel baro pani. Phenđa lese te ćerel baro brodo.

![](https://cdn.door43.org/obs/jpg/360px/obs-en-03-03.jpg)

O Devel phenđa e Nojase te ćerel o brodo 140 metarija glego, 23 metarija bulo hem 13,5 metarija učo. O Noje valjanđa te ćerel le oto kašta, te ćerel trin spraća, pherdo sobe, krov hem prozori. Ked ka avel o baro pani, ano adava brodo valjani te garaven pe o Noje, lesiri porodica hem đi jekh vrsta e životinjendar save džana phuvjaja.

![](https://cdn.door43.org/obs/jpg/360px/obs-en-03-04.jpg)

O Noje šunđa e Devle. Ov hem lesere trin čhave ćerđe o brodo ađahar sar so phenđa lenđe o Devel. Valjanđa lenđe but berša te ćeren o brodo, adalese so inele but baro. O Noje sa e manušenđe vaćerđa da o Devel ka bičhali baro pani hem phenđa lenđe te ačhaven pumare greja hem te irinen pe ko Devel, ali on na verujinde lese.

![](https://cdn.door43.org/obs/jpg/360px/obs-en-03-05.jpg)

O Devel naredinđa e Nojase hem lesere porodicaće te čeden xajbnase edobor kobor valjani lenđe hem e životinjenđe. Ked sa inele spremno, o Devel phenđa e Nojase da alo o vreme te đerdini ko brodo pe romnjaja, pe trine čhavencar hem lengere romnjencar - adavai sa ofto đene.

![](https://cdn.door43.org/obs/jpg/360px/obs-en-03-06.jpg)

O Devel bičhalđa e Nojase murše hem đuvlja oti đijekh vrsta e životinjendar hem e čirikljendar te đerdinen ko brodo kote ka oven zaštitime e bare panjestar. O Devel bičhalđa efta muršen hem efta đuvljen oti đijekh vrsta e životinjendar save šaj ine te žrtvujinen pe. Ked sare inele ano brodo, korkoro o Devel phandlja o udar.

![](https://cdn.door43.org/obs/jpg/360px/obs-en-03-07.jpg)

Tegani o bršin lelja te čhorel. Pelo saranda dive hem saranda raća bizo ačhojba! O pani ikljola ine hem tari phuv. Sa so inele ki phuv inele učhardo e panjeja, đi o najbare planine.

![](https://cdn.door43.org/obs/jpg/360px/obs-en-03-08.jpg)

Mulo sa so živinđa upri phuv, sem o manuša hem o životinje kola inele ano brodo. O brodo džala ine upro pani hem zaštitini sarijen kola inele ano leste te na tasljon.

![](https://cdn.door43.org/obs/jpg/360px/obs-en-03-09.jpg)

Ked ačhilo o bršin, o brodo džala ine upro pani pana pandž masek, a zako adava vreme o pani lelja te cidel pe. I jekh dive o brodo terdino ko naj učo than e planinakoro, ali i phuv pana inele talo pani. Palo adava, valjanđa te nakhel pana trin masek te šaj dičhon o naj uče thana e planinengere.

![](https://cdn.door43.org/obs/jpg/360px/obs-en-03-10.jpg)

Palo adava nakhino pana saranda dive i o Noje bičhalđa e čiriklja savi vičini pe gavran te dikhel da li cidinđa pe o pani. O gavran ine džala hem avela rodindoj šuki phuv, ali našti ine te arakhi la.

![](https://cdn.door43.org/obs/jpg/360px/obs-en-03-11.jpg)

Palo adava o Noje bičhalđa e čiriklja savi vičini pe golubica. Ali ni oj našti ine arakhi šuki phuv, i irinđa pe ko Noje. Palo jekh kurko, o Noje palem bičhalđa e golubica, savi irinđa pe e maslinakere grankaja ano muj! O pani ine cidela pe, a o biljke palem lelje te barjon.

![](https://cdn.door43.org/obs/jpg/360px/obs-en-03-12.jpg)

O Noje adžićerđa pana kurko dive, i trito puti bičhalđa e golubica. Akava puti, i golubica arakhlja than kote ka ačhol hem na irinđa pe ko Noje. O pani ine cidela pe!

![](https://cdn.door43.org/obs/jpg/360px/obs-en-03-13.jpg)

Duj masek palo adava, o Devel phenđa e Nojase: "Tu, ti porodica hem o životinje akana šaj te ikljoven taro brodo. Nek ovel tumen but čhave hem unuci hem te pheren i phuv!" I ađahar, o Noje hem lesiri porodica iklile taro brodo.

![](https://cdn.door43.org/obs/jpg/360px/obs-en-03-14.jpg)

Ked o Noje iklilo taro brodo, vazdinđa jekh than kote dena pe žrtve hem žrtvujinđa oti đijekh vrsta e životinjendar save šaj ine te žrtvujinen pe. O Devel inele but zadovoljno adaleja hem blagoslovinđa e Noja hem lesere porodica.

![](https://cdn.door43.org/obs/jpg/360px/obs-en-03-15.jpg)

O Devel phenđa: "Dava mlo lafi da niked više na ka prokletinav i phuv zbog o bišukaripe e manušengoro hem da niked više na ka uništinav i phuv e bare panjeja, iako o manuša grešinena pana taro tikoripe."

![](https://cdn.door43.org/obs/jpg/360px/obs-en-03-16.jpg)

O Devel ćerđa i prvo duga sar znako oto lesoro obećanje. Đijekh puti ked ka ikljol duga ko nebo, o Devel ka setini pe ko plo obećanje, a lesoro narodo da ka setini pe adalestar.

*E biblijakiri paramiz taro 1. lil e Mojsijasoro 6-8*

## 4. E Devlesoro savez e Avraameja

https://openbiblestories.org/l/rmy-x-vwa/story-4/

![](https://cdn.door43.org/obs/jpg/360px/obs-en-04-01.jpg)

But berša palo baro pani, ki phuv palem živinđe but manuša. Sare on vaćerđe jekha čhibjaja. So te pheren i phuv sar so naredinđa lenđe o Devel, on čedinđe pe hem ćerđefse diz.

![](https://cdn.door43.org/obs/jpg/360px/obs-en-04-02.jpg)

But inele barikane, hem sa jekh ine lenđe zako adava so phenđa o Devel. Čak lelje te vazden jekh bari kula savi valjanđa te ovel bari đi o nebo. O Devel dikhlja da ka šaj te ćeren po više greja te nastavinđe zajedno te ćeren bišukaripe.

![](https://cdn.door43.org/obs/jpg/360px/obs-en-04-03.jpg)

Adalese o Devel ćerđa te na vaćeren više jekha čhibjaja nego bute avere čhibjencar, hem ćerđa te na oven više o manuša ko jekh than nego ki sa i phuv rasejime. I diz savi lelje te ćeren vičinđa pe Vavilon so značini "zbunime".

![](https://cdn.door43.org/obs/jpg/360px/obs-en-04-04.jpg)

But berša palo adava, o Devel vaćerđa jekhe manušese palo anav Avram: "Ačhav i phuv kote bijandiljan hem te porodica, hem dža ki phuv savi me ka mothovav će. Ka blagoslovinav tut hem tutar ka ćerav bare narodo. Ka ćerav to anav te ovel but baro. Ka blagoslovinav okolen kola tut ka blagoslovinen hem ka prokletinav okolen kola tut ka prokletinen. Sa o porodice ki phuv ka oven blagoslovime zbog tute."

![](https://cdn.door43.org/obs/jpg/360px/obs-en-04-05.jpg)

I ađahar, o Avram šunđa e Devle. Lelja pe romnja, e Saraja, sa pe slugen hem sa so inole, i dželo ki phuv savi o Devel mothovđa lese, ki phuv vičime Hanaan.

![](https://cdn.door43.org/obs/jpg/360px/obs-en-04-06.jpg)

Ked o Avram reslja ano Hanaan, o Devel phenđa lese: "Dikh sa adava angla tute. Tuće hem te potomstvose sar nasledstvo ka dav sa adaja phuv savi šaj te dikhe." Tegani o Avram ačhilo ani adaja phuv.

![](https://cdn.door43.org/obs/jpg/360px/obs-en-04-07.jpg)

Jekh dive, o Avram reslja e Melhisedeke, e Najbare Devlesere svešteniko. O Melhisedek blagoslovinđa e Avrame hem phenđa: O Najbaro Devel, kasoroi o nebo hem i phuv, te blagoslovini e Avrame." Tegani o Avram dinđa e Melhisedekese dešto kotor oto sa so inole.

![](https://cdn.door43.org/obs/jpg/360px/obs-en-04-08.jpg)

But berša nakhle, ali e Avrame hem e Saraja pana na inolen čhave. O Devel vaćerđa e Avramese hem palem obećinđa lese da ka ovel le čhavo hem potomci edobor kobor isi čerenja ko nebo. O Avram verujinđa e Devlesere lafese i adalese o Devel vaćerđa dai o Avram pravedno.

![](https://cdn.door43.org/obs/jpg/360px/obs-en-04-09.jpg)

Tegani o Devel ćerđa savez e Avrameja. O savezi dogovor maškaro duj strane. O Devel phenđa: "Tutar ka dav tut čhave. I phuv Hanaan dava te potomstvose." Ali e Avrame pana na inole čhavo.

*E biblijakiri paramiz taro 1. lil e Mojsijasoro 11-15*

## 5. Čhavo oto obećanje

https://openbiblestories.org/l/rmy-x-vwa/story-5/

![](https://cdn.door43.org/obs/jpg/360px/obs-en-05-01.jpg)

Deš berš palo adava so o Avram hem i Saraja resle ano Hanaan, pana na inolen čhave. Adalese e Avramese lesiri romni i Saraja phenđa: "Pošto o Devel na muklja maje te oven man čhave, a akana injum but purani te oven man čhave, ače mli sluškinja i Agara. Le hem ola romnjaće te šaj bijani maje čhave."

![](https://cdn.door43.org/obs/jpg/360px/obs-en-05-02.jpg)

I ađahar, o Avram lelja romnjaće e Agara. Oj bijanđa čhave, a o Avram dinđa le anav Jišmael. Ali i Saraja uli ljubomorno upri Agara. Ked e Jišmaele ine dešutrin berš, o Devel pale vaćerđa e Avramese.

![](https://cdn.door43.org/obs/jpg/360px/obs-en-05-03.jpg)

O Devel phenđa: "Me injum Devel kova sa šaj te ćerel. Ka ćerav tuja savez." Tegani o Avram pokloninđa pe ađahar so pelo mujeja đi phuv. O Devel phenđa e Avramese: "Ka ove dad bute nacijenđe. Tuće hem te potomstvose ka dav i phuv Hanaan, a me zauvek ka ovav lengoro Devel. Valjani te obrezine sa e muršen ani ti porodica."

![](https://cdn.door43.org/obs/jpg/360px/obs-en-05-04.jpg)

"Te romnja e Saraja ka ovel čhavo - ov ka ovel čhavo oto obećanje. Vičin le Isak. Me ka ćerav leja mlo savez, a olestar ka ovel baro narodo. Hem e Jišmaelestar ka ćerav bare narodo, ali o savez ka ćerav e Isakeja." Tegani o Devel menjinđa e Avramesoro anav ano Avraam, so značini "dad butengoro." Menjinđa hem e Sarajakoro anav ani Sara, so značini "princeza".

![](https://cdn.door43.org/obs/jpg/360px/obs-en-05-05.jpg)

Adava dive o Avraam obrezinđa đijekhe murše oto plo čher. Palo berš dive, ked e Avraame inele 100, a e Sara 90 berš, i Sara bijanđa e Avramesere čhave. Vičinđe le Isak, sar so phenđa lenđe o Devel.

![](https://cdn.door43.org/obs/jpg/360px/obs-en-05-06.jpg)

Ked o Isak inele terno, o Devel testirinđa e Avraamesiri vera ađahar so phenđa lese: "Le e Isake, te jekhore čhave, hem mudar le sar žrtva maje." O Avraam palem šunđa e Devle hem spreminđa pe te žrtvujini pe čhave.

![](https://cdn.door43.org/obs/jpg/360px/obs-en-05-07.jpg)

Sar ine o Avraam hem o Isak phirena đi ko than kote žrtvujini pe, o Isak pučlja: "Dade, isi amen kašta zaki žrtva, ali kaj o bakroro?" A o Avraam phenđa: "Mlo čhavo, o Devel ka pobrinini pe zako bakroro, zaki žrtva."

![](https://cdn.door43.org/obs/jpg/360px/obs-en-05-08.jpg)

Kad resle đi ko than kote valjanđa te žrtvujini pe, o Avraam phandlja pe čhave e Isake hem čhivđa le upro žrtveniko. I tegani ked o Avraam vazdinđa po vas te mudari pe čhave, o Devel phenđa: "Terđov! Ma mudar te čhave! Akana džanav da daraja mandar, adalese so mangljan hem te čhave te mudare zbog maje."

![](https://cdn.door43.org/obs/jpg/360px/obs-en-05-09.jpg)

Tegani o Avraam paše uzala peste dikhlja jekhe bakre savo zaglavisalo maškaro grmlje. O Devel pobrinisalo o bakro te ovel žrtva umesto o Isak. O Avraam radosno žrtvujinđa e bakre.

![](https://cdn.door43.org/obs/jpg/360px/obs-en-05-10.jpg)

Tegani o Devel phenđa e Avraamese: "Adalese so injanle spremno sa te de man, đi te jekhore čhave, dava tut mlo lafi da ka blagoslovinav tut. Te potomci ka oven više negoli čerenja ko nebo. Adalese so šunđan man, sa o porodice ki phuv ka oven blagoslovime prekali ti porodica."

*E biblijakiri paramiz taro 1. lil e Mojsijasoro 16-22*

## 6. O Devel pobrininđa pe e Isakese

https://openbiblestories.org/l/rmy-x-vwa/story-6/

![](https://cdn.door43.org/obs/jpg/360px/obs-en-06-01.jpg)

Ked o Avraam inele but purano, lesoro čhavo o Isak barilo hem ulo zoralo murš. Adalese o Avraam bičhalđa ple sluga te irini pe ki phuv kote živinđa e Avraamesoro jeri te anel romnja lesere čhavese e Isakese.

![](https://cdn.door43.org/obs/jpg/360px/obs-en-06-02.jpg)

Palo but baro džajba dromeja ki phuv kote živinđa e Avraamesoro jeri, o Devel lesere sluga legarđa đi ki Reveka. Oj inele e Avraamesere phralesiri unuka.

![](https://cdn.door43.org/obs/jpg/360px/obs-en-06-03.jpg)

I Reveka manglja te ačhaj pe jerje hem te irini pe e slugaja koro Isak. Ked resli, o Isak lelja la romnjaće.

![](https://cdn.door43.org/obs/jpg/360px/obs-en-06-04.jpg)

Palo but berša, o Avraam mulo, a sa e savezesere obećanja save o Devel dinđa le nakhle upro Isak. O Devel dinđa po lafi da e Avraame ka ovel but potomci, ali e Isakesere romnja e Reveka našti ine te oven la čhave.

![](https://cdn.door43.org/obs/jpg/360px/obs-en-06-05.jpg)

O Isak molinđa pe zaki Reveka i o Devel muklja laće te ačhol khamni duje čhavorencar. O duj čhavore maškara peste marena pe ine e Revekaće ano vođi, i adalese i Reveka pučlja e Devle so šaj te ovel adava.

![](https://cdn.door43.org/obs/jpg/360px/obs-en-06-06.jpg)

O Devel phenđa e Revekaće: "Duj nacije ka ikljon e duje čhavendar kolai ana tute. Ka maren pe maškara peste, a o phureder ka kandel e tiknedere."

![](https://cdn.door43.org/obs/jpg/360px/obs-en-06-07.jpg)

Ked o čhavore bijandile, o phureder čhavo iklilo lolo hem balalo, a dinde le anav Isav. Tegani o tikneder iklilo hem ićerđa e Isavesiri patum. Dinde le anav Jakov.

*E biblijakiri paramiz taro 1. lil e Mojsijasoro 24,1–25,26*

## 7. O Devel blagoslovini e Jakove

https://openbiblestories.org/l/rmy-x-vwa/story-7/

![](https://cdn.door43.org/obs/jpg/360px/obs-en-07-01.jpg)

Sar o čhave ine barjona, o Jakov volinđa te ačhol čhere, a o Isav volinđa te lovini. I Reveka više volinđa e Jakove, a o Isak više volinđa e Isave.

![](https://cdn.door43.org/obs/jpg/360px/obs-en-07-02.jpg)

Jekh dive, sar o Isav ine irini pe taro lov, inele but bokhalo. O Isav phenđa e Jakovese: "Molinava tut, de man nešto te xav adalestar so ćeravđan." O Jakov phenđa: "Prvo tu maje de o pravo savo preperela e najphuredere čhavese." I ađahar o Isav dinđa e Jakovese po pravo savo inole sar najphuredere čhave. Tegani o Jakov dinđa le te xal.

![](https://cdn.door43.org/obs/jpg/360px/obs-en-07-03.jpg)

O Isak manglja te del po blagoslov e Isavese. Ali, angleder so te ćerel adava, i Reveka hem o Jakov prevarinđe le ađahar so o Jakov ćerđa pe dai o Isav. O Isak inele but purano hem našti ine više te dikhel. Adalese o Jakov hurđa pe e Isavesere šeja hem čhivđafse ko vasta hem ki men buznjane bala.

![](https://cdn.door43.org/obs/jpg/360px/obs-en-07-04.jpg)

O Jakov alo koro Isak hem phenđa lese: "Me injum o Isav. Aljum te blagoslovine man." Ked o Isak osetinđa o buznjane bala hem mirišinđa o šeja, mislinđa dai adava o Isav hem blagoslovinđa le.

![](https://cdn.door43.org/obs/jpg/360px/obs-en-07-05.jpg)

O Isav but xoljanđa upro Jakov, adalese so čorđa lesoro pravo, savo inole sar najphuredere čhave, hem lesoro blagoslov. Adalese manglja te mudari e Jakove ked ka merel lengoro dad.

![](https://cdn.door43.org/obs/jpg/360px/obs-en-07-06.jpg)

A i Reveka šunđa adava so o Isav mangela te ćerel, i adalese oj hem o Isak bičhalđe e Jakove ki durutni phuv, te džal te živini lakere jerjeja.

![](https://cdn.door43.org/obs/jpg/360px/obs-en-07-07.jpg)

O Jakov živinđa e Revekakere jerjeja but berša. Sar ine živinđa adari, ženinđa pe i inole dešuduj čhave hem jekh čhaj. O Devel ćerđa le te ovel but barvalo.

![](https://cdn.door43.org/obs/jpg/360px/obs-en-07-08.jpg)

Palo biš berš so živinđa dur pe čherestar savoi ano Hanaan, o Jakov irinđa pe adari pe porodicaja, pe slugencar hem sa pe stadoja.

![](https://cdn.door43.org/obs/jpg/360px/obs-en-07-09.jpg)

O Jakov but darandilo, adalese so mislinđa da o Isav pana mangela te mudari le. Adalese bičhalđa e Isavese bute životinjen sar daro. O sluga kova anđa e životinjen phenđa e Isavese: "To sluga, o Jakov, dela tut akale životinjen. Pana xari, i ov ka resel."

![](https://cdn.door43.org/obs/jpg/360px/obs-en-07-10.jpg)

A o Isav već oprostinđa e Jakovese, i ađahar soduj đene inele radosna so šaj ine palem te dikhen pe. Palo adava, o Jakov mirno živinđa ano Hanaan. Tegani o Isak mulo, a o Jakov hem o Isav parunde le. E savezesere obećanja save o Devel obećinđa e Avraamese akana nakhle e Isakestar upro Jakov.

*E biblijakiri paramiz taro 1. lil e Mojsijasoro 25,27–33,20*

## 8. O Devel spasini e Josife hem lesere porodica

https://openbiblestories.org/l/rmy-x-vwa/story-8/

![](https://cdn.door43.org/obs/jpg/360px/obs-en-08-01.jpg)

Palo but berša, ked o Jakov inele purano, bičhalđa pe najvolime čhave, e Josife, te proverini sari lesere phralja kola arakhena ine e stado ko polje.

![](https://cdn.door43.org/obs/jpg/360px/obs-en-08-02.jpg)

E Josife lesere phralja mrzinde adalese so lengoro dad ole najviše volinđa hem adalese so o Josif dikhlja sune da ov ka ovel lengoro vladari. Ked o Josif alo koro pe phralja, on dolinde le hem bikninde le nesave manušende kola ine činena hem biknena robonen.

![](https://cdn.door43.org/obs/jpg/360px/obs-en-08-03.jpg)

Angleder so e Josifesere phralja irinde pe čhere, pharavđe e Josifesere šeja hem makhle len e buznjakere rateja. Tegani lesere šeja mothovđe pumare dadese sar te mislini da e Josife mudarđa nesavi divljo životinja. O Jakov inele but tužno.

![](https://cdn.door43.org/obs/jpg/360px/obs-en-08-04.jpg)

Okola so ine činena hem biknena robonen legarde e Josife ko Egipat. O Egipat inele bari, moćno phuv savi inele uzali len Nil. Adari e Josife bikninde sar robo jekhe barvale manušese kova inele jekh oto e phuvjakere vođe. O Josif šukar kandlja pe gospodare, i o Devel blagoslovinđa e Josife.

![](https://cdn.door43.org/obs/jpg/360px/obs-en-08-05.jpg)

E Josifesere gospodaresiri romni manglja te sovel e Josifeja, ali ov na manglja te grešini anglo Devel. Oj but xoljanđa hem xovavne optužinđa e Josife, adalese so manglja te dolen le hem te frden le ko phandlipe. Ali, čak hem ano phandlipe o Josif ačhilo verno e Devlese. Adalese o Devel blagoslovinđa le.

![](https://cdn.door43.org/obs/jpg/360px/obs-en-08-06.jpg)

Duj berša palo adava, o Josif pana inele phandlo ano phandlipe, a na inele krivo. Jekh rat, o faraon (ađahar o Egipćanja vičinde pumare caronen), dikhlja duj sune save but daravđe le. Nijekh lesere manušendar kola inele mudra našti ine te phenen lese so značinena adala sune.

![](https://cdn.door43.org/obs/jpg/360px/obs-en-08-07.jpg)

O Devel dinđa e Josifese sposobnost te tumačini o sune, i o Faraon rodinđa te anen lese e Josife taro phandlipe. O Josif vaćerđa lese so značinena o sune: "O Devel ka ćerel efta berš te ovel sa edobor xajbnase, a palo adava efta berš ka ovel bokhalipe."

![](https://cdn.door43.org/obs/jpg/360px/obs-en-08-08.jpg)

O faraon edobor inele zadivime e Josifeja da čhivđa le te ovel dujto najbaro manuš ano sa o Egipat.

![](https://cdn.door43.org/obs/jpg/360px/obs-en-08-09.jpg)

O Josif phenđa e manušenđe, ko adala berša ked ka ovel sa edobor xajbnase, te čhiven ki strana bare količine xajbnase. Ked ale o efta berš zako bokhalipe, o Josif biknela ine e manušenđe xajbnase te šaj sarijen te ovel so te xan.

![](https://cdn.door43.org/obs/jpg/360px/obs-en-08-10.jpg)

O bokhalipe na inele baro samo ano Egipat, nego hem ano Hanaan, kaj živinđe o Jakov hem lesiri porodica.

![](https://cdn.door43.org/obs/jpg/360px/obs-en-08-11.jpg)

Adalese o Jakov bičhalđa pe phuredere čhaven ko Egipat te činen xajbnase. O phralja na penđarde e Josife kad terdine anglo leste te činen xajbnase. Ali o Josif pendžarđa olen.

![](https://cdn.door43.org/obs/jpg/360px/obs-en-08-12.jpg)

Palo adava ked o Josif iskušinđa pe phraljen te dikhel da li promeninđe pe, phenđa lenđe: "Me injum tumaro phral, o Josif! Ma daran. Tumen maje mangljen te ćeren bišukaripe ked bikninđen man sar robo, ali o Devel adava bišukaripe irinđa ko šukar! Aven hem bešen ano Egipat te šaj brininav man tumenđe hem tumare porodicenđe."

![](https://cdn.door43.org/obs/jpg/360px/obs-en-08-13.jpg)

Ked e Josifesere phralja irinde čhere hem phende pumare dadese e Jakovese dai o Josif pana dživdo, ov inele but radosno.

![](https://cdn.door43.org/obs/jpg/360px/obs-en-08-14.jpg)

Iako o Jakov inele but purano, sa pe porodicaja nakhlo te bešel ano Egipat. I ađahar sare adari živinđe. Angleder so o Jakov mulo, blagoslovinđa đijekhe pe čhavendar.

![](https://cdn.door43.org/obs/jpg/360px/obs-en-08-15.jpg)

E savezesere obećanja save o Devel dinđa e Avraamese nakhle upro Isak, posle nakhle upro Jakov, a posle nakhle upro e Jakovesere dešuduj čhave hem lengere porodice. O potomci adale dešuduje čhavengere ule dešuduj plemija e Izraelesere.

*E biblijakiri paramiz taro 1. lil e Mojsijasoro 37-50*

## 9. O Devel vičini e Mojsija

https://openbiblestories.org/l/rmy-x-vwa/story-9/

![](https://cdn.door43.org/obs/jpg/360px/obs-en-09-01.jpg)

Palo e Josifesoro meriba, sa lesoro jeri ačhilo ano Egipat. On hem lengere potomci ačhile te živinen adari pana but berša hem inolen but čhave. On vičinde pe Izraelci.

![](https://cdn.door43.org/obs/jpg/360px/obs-en-09-02.jpg)

Ked nakhle but berša, sa više hem više inele Izraelcija. O Egipćanja bisterđe više ko inele o Josif hem sa so ćerđa lenđe. Lelje te daran taro Izraelci, adalese so inele but baro narodo. Adalese o faraon kova tegani vladinđa ano Egipat ćerđa o Izraelci te oven robovija e Egipćanenđe.

![](https://cdn.door43.org/obs/jpg/360px/obs-en-09-03.jpg)

O Egipćanja čhivđe e Izraelconen te ćeren but zgrade hem dizja. I phari buti ćerđa len but te patinen, ali o Devel blagoslovinđa len, ćerđa te ovel len po više čhave.

![](https://cdn.door43.org/obs/jpg/360px/obs-en-09-04.jpg)

O faraon dikhlja da e Izraelconen isi but čhave, i naredinđa pe manušenđe te mudaren sa lengere bebicen kola inele murša ađahar so ka frden len ani len Nil.

![](https://cdn.door43.org/obs/jpg/360px/obs-en-09-05.jpg)

Jekh Izraelka bijanđa murše. Oj hem lakoro rom garavđe e čhavore kobor šaj ine.

![](https://cdn.door43.org/obs/jpg/360px/obs-en-09-06.jpg)

Ked dikhlje da našti više te garaven le, čhivđe le ani jekh korpa savi džala ine e lenjaja Nil. Adava ćerđe te šaj spasinen le e meribnastar. Lesiri phureder phen dikhela ine odural so ka ovel oleja.

![](https://cdn.door43.org/obs/jpg/360px/obs-en-09-07.jpg)

I čhaj e faraonesiri zadikhlja i korpa hem dikhlja so isi andre. Ked dikhlja e čhavore, lelja le te ovel lakoro čhavo. Platinđa jekha Izraelka te del le te pijel thud, ali na džanđa dai adaja romni adale čhavoresiri daj. Ked o čhavoro inele edobor baro da na valjanđa lese više e dajakoro thud, oj irinđa le e faraonesere čhajate, koja dinđa le anav Mojsije.

![](https://cdn.door43.org/obs/jpg/360px/obs-en-09-08.jpg)

Jekh dive, ked o Mojsije već inele baro murš, dikhlja da nesavo Egipćanin marela e robo kova inele Izraelco. O Mojsije manglja te spasini e Izraelco adalese so džanđa dai hem ov Izraelco.

![](https://cdn.door43.org/obs/jpg/360px/obs-en-09-09.jpg)

Ked o Mojsije mislinđa da niko na ka dikhel, mudarđa e Egipćanine hem parunđa le. Ali neko dikhlja adava so ćerđa o Mojsije.

![](https://cdn.door43.org/obs/jpg/360px/obs-en-09-10.jpg)

Ked o faraon šunđa so ćerđa o Mojsije, manglja te mudari le. O Mojsije naštino taro Egipat ani divljina kote garavđa pe e faraonesere vojnikonendar.

![](https://cdn.door43.org/obs/jpg/360px/obs-en-09-11.jpg)

O Mojsije ulo pastiri ani divljina dur taro Egipat. Lelja romnja adale thanestar hem inole duj čhave.

![](https://cdn.door43.org/obs/jpg/360px/obs-en-09-12.jpg)

Jekh dive, sar o Mojsija arakhi ine pe bakren, dikhlja sar jekh grmo thabljola, ali i jag na oštetini le. Nakhino po paše uzalo grmo te šaj dikhel po šukar. Sar nakhela ine po paše, šunđa e Devlesoro glaso: "Mojsije, huljav ti obuća adalese so terđoveja ko sveto than."

![](https://cdn.door43.org/obs/jpg/360px/obs-en-09-13.jpg)

O Devel phenđa: "Dikhljum sar mo narodo patini. Ka bičhalav tut koro faraon te ikale e Izraelconen taro Egipat te na oven više robovija. Me ka dav len i phuv Hanaan, i phuv savi obećinđum e Avraamese, e Isakese hem e Jakovese."

![](https://cdn.door43.org/obs/jpg/360px/obs-en-09-14.jpg)

O Mojsije pučlja: "A so te mangle o manuša te džanen ko bičhalđa man, so te phenav lenđe?" O Devel phenđa: "ME INJUM OKOVA KOVA INJUM. Phen lenđe 'o ME INJUM bičhalđa man kora tumende'. Hem akava phen: 'Me injum o Jahve, o Devel tumare pradadengoro e Avraamesoro, e Isakesoro hem e Jakovesoro.' Akavai mlo anav zauvek."

![](https://cdn.door43.org/obs/jpg/360px/obs-en-09-15.jpg)

O Mojsije darandilo hem na manglja te džal koro faraon, adalese so mislinđa da na ka šaj šukar te vaćeri. Adalese o Devel bičhalđa e Mojsijasere phrale e Arone te pomožini lese. O Devel upozorinđa e Mojsija hem e Arone da o faraon na ka mangel te šunel.

*E biblijakiri paramiz taro 2. lil e Mojsijasoro 1-4*

## 10. Deš bare nevolje

https://openbiblestories.org/l/rmy-x-vwa/story-10/

![](https://cdn.door43.org/obs/jpg/360px/obs-en-10-01.jpg)

O Mojsije hem o Aron džele koro faraon. Phende lese: "Akava vaćeri o Devel e Izraelesoro: 'Muk me narodo!"' O faraon na šunđa len. So te mukel e Izraelconen, on terinđa len više te ćeren buti!

![](https://cdn.door43.org/obs/jpg/360px/obs-en-10-02.jpg)

O faraon na manglja te mukel e Izraelconen, i adalese o Devel bičhalđa deš bare nevolje upro Egipat. Adaleja o Devel mothovđa e faraonese dai po zoralo olestar hem sa e egipatesere devlendar.

![](https://cdn.door43.org/obs/jpg/360px/obs-en-10-03.jpg)

O Devel ćerđa i len Nil ano rat, ali o faraon palem na manglja te mukel e Izraelconen te džan.

![](https://cdn.door43.org/obs/jpg/360px/obs-en-10-04.jpg)

O Devel bičhalđa žaben upro sa o Egipat. O faraon molinđa e Mojsija te cidel e žaben. Ali, ked sa o žabe mule, e faraonesoro vilo pherdilo xoli hem na manglja te mukel e Izraelconen te ikljon taro Egipat.

![](https://cdn.door43.org/obs/jpg/360px/obs-en-10-05.jpg)

Adalese o Devel bičhalđa komarconen upro Egipat. Palo adava bičhalđa bare maćhijen. O faraon vičinđa e Mojsija hem e Arone te phenel lenđe da ka mukel e Izraelconen te zaustavinđe adaja nevolja. Ked o Mojsije molinđa pe, o Devel cidinđa e bare maćhijen taro Egipat. Ali e faraonesoro vilo pherdilo xoli hem na manglja te mukel e narodo.

![](https://cdn.door43.org/obs/jpg/360px/obs-en-10-06.jpg)

Palo adava, o Devel ćerđa sa e Egipćanengere domaća životinje te namborsaljon hem te meren. Ali e faraonese ano vilo inele xoli, i na manglja te mukel e Izraelconen te džan.

![](https://cdn.door43.org/obs/jpg/360px/obs-en-10-07.jpg)

Tegani o Devel phenđa e Mojsijase te frdel pepeo ano vazduho anglo faraon. Ked ćerđa adava, but bare čirevija mothovde pe upro Egipćanja, ali na upro Izraelci. O Devel ćerđa te ovel xoli e faraonese ano vilo, i o faraon na manglja te mukel e Izraelconen te džan.

![](https://cdn.door43.org/obs/jpg/360px/obs-en-10-08.jpg)

Palo adava, o Devel bičhalđa kukudi savi uništinđa sa so barilo ko njive ano Egipat hem mudarđa đijekhe kova ine ikljola avri. O faraon vičinđa e Mojsija hem e Arone hem phenđa lenđe: "Grešinđum. Šaj te džan taro Egipat." O Mojsije molinđa pe, i na peli više kukudi.

![](https://cdn.door43.org/obs/jpg/360px/obs-en-10-09.jpg)

A o faraon palem grešinđa hem ano vilo inole xoli. Na manglja te mukel e Izraelconen te džan.

![](https://cdn.door43.org/obs/jpg/360px/obs-en-10-10.jpg)

Palo adava, o Devel bičhalđa skakavconen te učharen o Egipat. O skakavci xale sa adava so barilo ko njive, a so i kukudi našti ine te uništini.

![](https://cdn.door43.org/obs/jpg/360px/obs-en-10-11.jpg)

Tegani o Devel ćerđa trin dive te ovel tomina. Edobor inele tomina da o Egipćanja našti ine te ikljoven taro čher. A adari kaj živinđe o Izraelci na inele tomina.

![](https://cdn.door43.org/obs/jpg/360px/obs-en-10-12.jpg)

I palo sa akala enja nevolje, o faraon na manglja te mukel e Izraelconen te džan. Adalese so o faraon na manglja te šunel e Devle, o Devel manglja te mukel pana jekh nevolja. Adaja nevolja ka promenini e faraonesoro mišljenje.

*E biblijakiri paramiz taro 2. lil e Mojsijasoro 5-10*

## 11. Pasha

https://openbiblestories.org/l/rmy-x-vwa/story-11/

![](https://cdn.door43.org/obs/jpg/360px/obs-en-11-01.jpg)

O Devel upozorinđa e faraone da ka mudari e najphuredere murše oti đijekh porodica e Egipćanengiri hem e prvone murše oto sa lengere životinje. O faraon šunđa adava, ali na manglja te verujini hem te šunel e Devle.

![](https://cdn.door43.org/obs/jpg/360px/obs-en-11-02.jpg)

E Devle inele način sar te spasini e najphuredere čhaven okolengeren kola verujinđe ano leste. Đijekh porodica valjanđa te birini najšukare bakrore hem te čhinel le.

![](https://cdn.door43.org/obs/jpg/360px/obs-en-11-03.jpg)

O Devel phenđa e Izraelconenđe e bakroresere rateja te makhen o krajevija pumare čheresere udarestar, te peken o mas hem sigate te xan le mareja savo inele ćerdo bizo kvasco. Phenđa lenđe da, palo adava so ka xan, te oven spremna te ikljoven taro Egipat.

![](https://cdn.door43.org/obs/jpg/360px/obs-en-11-04.jpg)

O Izraelci ćerđe sa sar so phenđa lenđe o Devel te ćeren. Ki ekvaš i rat, o Devel nakhino maškaro Egipat hem mudarđa đijekhe najphuredere čhave.

![](https://cdn.door43.org/obs/jpg/360px/obs-en-11-05.jpg)

Sa o čhera e Izraelconengere inele makhle rateja ko krajevija e udarengere, i o Devel nakhavđa adala čhera. Sare so inele ano čher inele ko sigurno, spasime zbog e bakroresoro rat.

![](https://cdn.door43.org/obs/jpg/360px/obs-en-11-06.jpg)

O Egipćanja na verujinđe e Devlese hem adalese na šunđe lesere naredbe. Adalese o Devel na nakhavđa lengere čhera. Mudarđa sa e Egipćanengere najphuredere čhaven.

![](https://cdn.door43.org/obs/jpg/360px/obs-en-11-07.jpg)

Sa e Egipćanengere najphuredera murša inele mule, taro najphureder čhavo e zatvorenikosoro đi o najphureder čhavo e faraonesoro. But manuša ano Egipat runđe hem tugujinđe.

![](https://cdn.door43.org/obs/jpg/360px/obs-en-11-08.jpg)

Ani isto rat, o faraon vičinđa e Mojsija hem e Arone hem phenđa lenđe: "Sig legaren e Izraelconen taro Egipat!" O Egipćanja da terinđe e Izraelconen po sig te džan taro Egipat.

*E biblijakiri paramiz taro 2. lil e Mojsijasoro 11,1–12,32*

## 12. Ikljojba

https://openbiblestories.org/l/rmy-x-vwa/story-12/

![](https://cdn.door43.org/obs/jpg/360px/obs-en-12-01.jpg)

O Izraelci inele but radosna so ikljovena taro Egipat. Na inele više robovija, a džana ine nakori Obećime phuv! O Egipćanja dinđe e Izraelconenđe sa so mangle, đi zlato, srebro hem avera vredna stvarija. Nesave manuša oto avera nacije tegani verujinđe ano Devel hem džele zajedno e Izraelconencar sar on ine ikljovena taro Egipat.

![](https://cdn.door43.org/obs/jpg/360px/obs-en-12-02.jpg)

O Devel legarđa len ađahar so ćerđa jekh učo stubo oto oblako savo džala ine anglo lende prekalo dive, a savo prekali rat ovela stubo oti jag. O Devel uvek inele olencar hem mothovđa lenđe o drom saveja on džana ine. On samo valjanđe te džan palo leste.

![](https://cdn.door43.org/obs/jpg/360px/obs-en-12-03.jpg)

Na nakhino but palo adava, o faraon hem lesoro narodo promeninde pumaro mišljenje hem mangle palem o Izraelci te oven lengere robovija. O Devel ćerđa o faraon te pherđol xoli te šaj dikhel o narodo dai samo Ov Čačikano Devel, hem te xaljoven dai Ov, o Jahve, pozoralo e faraonestar hem lesere develjendar.

![](https://cdn.door43.org/obs/jpg/360px/obs-en-12-04.jpg)

Adalese o faraon hem lesiri vojska džele palo Izraelci te dolen len. Ked o Izraelci dikhlje sar e faraonesiri vojska avela, xalile da inele zarobime maškar e faraonesiri vojska hem o Lolo more. But darandile hem vičinđe: "Na valjanđam te dža taro Egipat! Akana ka mera!"

![](https://cdn.door43.org/obs/jpg/360px/obs-en-12-05.jpg)

O Mojsije phenđa e Izraelconenđe: "Ma daran! O Devel ka marel pe tumenđe hem ka spasini tumen." Tegani o Devel phenđa e Mojsijase: "Vaćer e narodose te ciden pe nakoro Lolo more.

![](https://cdn.door43.org/obs/jpg/360px/obs-en-12-06.jpg)

Tegani o Devel cidinđa o stubo oto oblako hem čhivđa le maškaro Izraelci hem o Egipćanja, i o Egipćanja našti ine te dikhen e Izraelconen.

![](https://cdn.door43.org/obs/jpg/360px/obs-en-12-07.jpg)

O Devel phenđa e Mojsijase te vazdel po vas nakoro more hem te razdvojini o pani. Tegani o Devel bičhalđa barval savi phudinđa o pani ano more ki levo hem ki desno strana, i ađahar ćerđa pe drom maškaro more.

![](https://cdn.door43.org/obs/jpg/360px/obs-en-12-08.jpg)

O Izraelci nakhle maškaro more upri šuki phuv, a ko soduj strane o pani terdino sar duvarija.

![](https://cdn.door43.org/obs/jpg/360px/obs-en-12-09.jpg)

Tegani o Devel cidinđa o oblako taro drom, i o Egipćanja šaj ine te dikhen e Izraelconen sar našena. On tegani pođinđe palo lende.

![](https://cdn.door43.org/obs/jpg/360px/obs-en-12-10.jpg)

I ađahar, džana ine palo Izraelci dromeja maškaro more, ali o Devel ćerđa o Egipćanja te daran hem lengere kočije te zaglavinen pe. Vičinđe: "Te naša akatar! O Devel marela pe zako Izraelci!"

![](https://cdn.door43.org/obs/jpg/360px/obs-en-12-11.jpg)

Ked sa o Izraelci nakhle ko sigurno ki aver strana taro more, o Devel phenđa e Mojsijase palem te vazdel po vas. Ked ćerđa o Mojsije ađahar, o pani irinđa pe palal pe thaneste hem tasavđa sa e faraonesere vojska.

![](https://cdn.door43.org/obs/jpg/360px/obs-en-12-12.jpg)

Ked dikhlje o Izraelci da o Egipćanja mule, verujinđe ano Devel hem verujinđe dai o Mojsije proroko e Devlesoro.

![](https://cdn.door43.org/obs/jpg/360px/obs-en-12-13.jpg)

O Izraelci but inele radosna so o Devel spasinđa len taro meriba hem taro robujiba! Akana šaj ine te služinen e Devlese. O Izraelci đilabđe but đilja, proslavinđe pumari sloboda hem slavinđe e Devle adalese so spasinđa len tari e egipatesiri vojska.

![](https://cdn.door43.org/obs/jpg/360px/obs-en-12-14.jpg)

O Devel naredinđa e Izraelconenđe đijekh berš te slavinen i Pasha sar te setinen pe da o Devel dinđa len pobeda upro Egipćanja hem da spasinđa len taro robujiba. Slavinđe la ađahar so čhinena ine najšukare bakrore, save ine xana zajedno e mareja savoi ćerdo bizo kvasco.

*E biblijakiri paramiz taro 2. lil e Mojsijasoro 12,33–15,21*

## 13. E Devlesoro savez e Izraelconencar

https://openbiblestories.org/l/rmy-x-vwa/story-13/

![](https://cdn.door43.org/obs/jpg/360px/obs-en-13-01.jpg)

Palo adava so o Devel legarđa e Izraelconen maškaro Lolo more, legarđa len maškari pustinja đi ki planina savi vičini pe Sinaj. Adava inele isto planina kote o Mojsije dikhlja o grmo savo ine thabljola. O narodo čhivđe o šatorija teleder i planina.

![](https://cdn.door43.org/obs/jpg/360px/obs-en-13-02.jpg)

O Devel phenđa e Mojsijase hem e izraelskone narodose: "Te šunđen man hem te ićerđen mlo savez, ka oven mlo najmanglo narodo, me ka ovav tumaro caro, a tumen ka oven sar sveštenici, hem ka oven sveto narodo."

![](https://cdn.door43.org/obs/jpg/360px/obs-en-13-03.jpg)

Palo trin dive, palo adava so o narodo duhovno pripremisalo, o Devel hulilo upro najučo than e planinakoro Sinaj, a upral ine grminđa, khuvđe munje, mothovđa pe čuro hem šundilo zoralo zvuk e trubakoro. Samo e Mojsijase inele muklo te uštel ki planina.

![](https://cdn.door43.org/obs/jpg/360px/obs-en-13-04.jpg)

Tegani o Devel dinđa len savez hem phenđa: "Me injum o Jahve, o Devel klo, kova spasinđa tut taro robujiba ano Egipat. Ma slavinen avere devlen."

![](https://cdn.door43.org/obs/jpg/360px/obs-en-13-05.jpg)

"Ma ćeren idolen hem ma slavinen len, adalese so me, o Jahve, injum ljubomorno Devel. Ma koristinen mlo anav ko bišukar način. Dikh o eftato dive te ovel će sveto. Averčhane, ćer sa ti buti ko šov dive, adalese so ko eftato dive valjani te odmorine tut hem te setine tut mandar."

![](https://cdn.door43.org/obs/jpg/360px/obs-en-13-06.jpg)

"Poštujin te dade hem te daja. Ma mudar. Ma ćer preljuba. Ma čor. Ma xovav. Ma mang averesera romnja, ni averesoro čher, ni bilo aver soi averesoro."

![](https://cdn.door43.org/obs/jpg/360px/obs-en-13-07.jpg)

Tegani o Devel pisinđa akala Deš naredbe ko duj ploče oto bara hem dinđa len e Mojsijase. O Devel da dinđa but avera zakonja hem pravilja savenđe valjanđe te oven poslušna. Te o manuša ule poslušna akale zakonenđe, o Devel obećinđa da ka blagoslovini len hem da ka štitini len. Te na ule poslušna, o Devel ka kaznini len.

![](https://cdn.door43.org/obs/jpg/360px/obs-en-13-08.jpg)

O Devel e Izraelconenđe vaćerđa tačno sar te ćeren o šatori savo manglja lendar te ćeren. Vičinđa pe Šatori zako sastanko. Inole duj sobe saven odvojinđa jekh bari zavesa. Samo o baro svešteniko šaj ine te đerdini ki soba pali zavesa, adalese so adari inele o Devel.

![](https://cdn.door43.org/obs/jpg/360px/obs-en-13-09.jpg)

Te neko na ulo poslušno e Devlesere zakonese, šaj ine te anel životinja ko žrtveniko anglo Šatori zako sastanko sar žrtva e Devlese. O svešteniko tegani čhinela ine e životinja hem tharela la upro žrtveniko. O rat e životinjakoro savo inele žrtvujime učhari ine o greh adale manušesoro hem ćerela le ine te ovel čisto anglo Devel. O Devel birinđa e Mojsijasere phrale e Arone hem e Aronesere potomkonen te oven lesere sveštenici.

![](https://cdn.door43.org/obs/jpg/360px/obs-en-13-10.jpg)

O narodo phenđa da ka oven poslušna e zakonenđe saven o Devel dinđa len, te slavinen e jekhe Devle hem te oven lesoro posebno narodo. Ali na nakhino but palo adava so obećinđe da ka oven poslušna e Devlese, ćerđe nešto bišukar zako so o Devel inele but xoljame.

![](https://cdn.door43.org/obs/jpg/360px/obs-en-13-11.jpg)

O Mojsije but dive inele ko naj učo than e planinakoro Sinaj, kote vaćeri ine e Devleja. E manušenđe dosadinđa pe te adžićeren le te irini pe. Adalese anđe zlato e Aronese hem rodinđe lestar te ćerel lenđe idole.

![](https://cdn.door43.org/obs/jpg/360px/obs-en-13-12.jpg)

O Aron ćerđa idole oto zlato ko oblik e telcosoro. O manuša lelje te slavinen adale idole hem te anen lese žrtve! O Devel inele but xoljame upro lende adalese so grešinđe hem manglja te mudari len. Ali o Mojsije molinđa pe olenđe hem o Devel šunđa lesiri molitva i na mudarđa len.

![](https://cdn.door43.org/obs/jpg/360px/obs-en-13-13.jpg)

Ked o Mojsije hulilo tari planina hem ked dikhlja e idole, edobor inele xoljame da phaglja o ploče oto bara upro savende o Devel pisinđa o Deš naredbe.

![](https://cdn.door43.org/obs/jpg/360px/obs-en-13-14.jpg)

Tegani o Mojsije phaglja e idole, ćerđa le ko prah, o prah frdinđa ko pani hem terinđa e narodo te pijen adava pani. O Devel bičhalđa nevolja upro manuša i but đene olendar mule.

![](https://cdn.door43.org/obs/jpg/360px/obs-en-13-15.jpg)

O Mojsije ćerđa neve ploče oto bara zako Deš naredbe sar zamena okolenđe saven phaglja. Tegani palem uštino ki planina hem molinđa e Devle te oprostini e narodose. O Devel šunđa e Mojsija hem oprostinđa lenđe. Irinđa pe tari planina e Deše naredbencar save inele pisime ko neve ploče. Palo adava, o Devel e Izraelconen legarđa tari planina Sinaj nakori Obećime phuv.

*E biblijakiri paramiz taro 2. Lil e Mojsijasoro 19-34*

## 14. O narodo lutini ki pustinja

https://openbiblestories.org/l/rmy-x-vwa/story-14/

![](https://cdn.door43.org/obs/jpg/360px/obs-en-14-01.jpg)

Palo adava so o Devel e Izraelconenđe dinđa o zakonja savenđe manglja te oven poslušna sar kotor oto lesoro savez olencar, džele tari planina Sinaj. O Devel lelja te legari len nakori Obećime phuv, savi vičinđa pe Hanaan. O stubo oto oblako džala ine anglo lende nakoro Hanaan, a on džana ine palo leste.

![](https://cdn.door43.org/obs/jpg/360px/obs-en-14-02.jpg)

O Devel e Avraamese e Isakese hem e Jakovese dinđa po lafi da lengere potomkonenđe ka del i Obećime phuv, ali akana adari živinđe but nacije. Vičinđe pe Hanaanci. On ni na slavinđe ni na šunđe e Devle. Slavinđe xovavne develjen hem ćerđe but bišukar buća.

![](https://cdn.door43.org/obs/jpg/360px/obs-en-14-03.jpg)

O Devel phenđa e Izraelconenđe: "Valjani te jurinen sa e Hanaanconen tari Obećime phuv. Ma olencar te ćeren mir hem ma len tumenđe rome ili romnja olendar. Valjani te uništinen sa lengere idolen. Te na šunđen man, ka slavinen lengere idolen umesto man."

![](https://cdn.door43.org/obs/jpg/360px/obs-en-14-04.jpg)

Kad o Izraelci resle đi ki granica oto Hanaan, o Mojsije birinđa dešuduje muršen, po jekhe taro đijekh pleme e izraelesoro. Sikavđa len sar te džan hem garandoj te dikhen savi i phuv. Ađahar da valjanđe garandoj te dikhen kobor bari e hanaanconengiri vojska.

![](https://cdn.door43.org/obs/jpg/360px/obs-en-14-05.jpg)

Dešuduj murša phirđe maškaro Hanaan saranda dive, i irinđe pe. Phenđe e manušenđe: "I phuv but šaj te bijani hem but šuži." Ali deš murša phenđe: "O dizjai but zorale hem adalai manuša po uče hem po zorale amendar! Te napadinđam len, sigurno ka pobedinen amen hem ka mudaren amen!"

![](https://cdn.door43.org/obs/jpg/360px/obs-en-14-06.jpg)

Ali avera duj murša, o Kalev hem o Isus Navin, tegani phenđe: "Čačei o Hanaanci uče hem zorale, ali amen sigurno ka pobedina len adalese so o Devel ka marel pe amenđe!"

![](https://cdn.door43.org/obs/jpg/360px/obs-en-14-07.jpg)

Ali o manuša na šunđe e Kaleve hem e Isus Navine. Xoljanđe upro Mojsije hem upro Aron hem phenđe: "Sose anđen amen ko akava opasno than? Po šukar ka ovel amenđe ine ano Egipat, a akana, ače, ka mudarđova ano mariba, a amare romnja hem amare čhavore ka oven robovija." O manuša mangle te birinen nekas avere te ovel lengoro vođa kova ka legari len palal ko Egipat.

![](https://cdn.door43.org/obs/jpg/360px/obs-en-14-08.jpg)

O Devel but xoljanđa hem alo ano Šatori zako sastanko. Phenđa: "Adalese so na mangljen te ćeren sar so phenđum tumenđe, sa o narodo ka lutini ki pustinja. Sem o Isus Navin hem o Kalev, sarijen kolen isi biš berš ili više ka meren akate hem niked na ka đerdinen ki Obećime phuv."

![](https://cdn.door43.org/obs/jpg/360px/obs-en-14-09.jpg)

Ked šunđa o narodo adava, ine lenđe žao so grešinđe. Lelje pumaro oružje hem džele te maren pe e Hanaanconencar. O Mojsije phenđa lenđe te na džan adalese so o Devel na inele olencar, ali on na mangle te šunen le.

![](https://cdn.door43.org/obs/jpg/360px/obs-en-14-10.jpg)

Adalese so o Devel na dželo olencar ko mariba, o Hanaanci pobedinđe len hem buten mudarđe. Palo adava, o Izraelci cidinđe pe taro Hanaan, i saranda berša lutinđe ki pustinja.

![](https://cdn.door43.org/obs/jpg/360px/obs-en-14-11.jpg)

Ko adala saranda berša sar o narodo e izraelesoro lutini ine ki pustinja, o Devel brininđa pe olendar. Dinđa len maro taro nebo savo vičinđa pe ''mana''. Bičhalđa da bute čirikljen (prepelicen) ko thana kote bešena ine, sar te šaj xan hem mas. Ko sa adava vreme, o Devel ćerđa lengere šeja hem lengere sandale te na pharavđon.

![](https://cdn.door43.org/obs/jpg/360px/obs-en-14-12.jpg)

O Devel da ko čudno način dinđa len pani tari stena. A palem ko sa adava, e izraelesere narodose o Devel na inele šukar hem mrmljinđe protiv oleste hem protiv o Mojsije. Ali čak i tegani o Devel ačhilo verno zako ple obećanja save dinđa e Avraamese, e Isakese hem e Jakovese.

![](https://cdn.door43.org/obs/jpg/360px/obs-en-14-13.jpg)

Ko aver nesavo puti ked e manušen na ine pani, o Devel phenđa e Mojsijase: "Vaćer e stenaće hem o pani ka thavdel olatar." Ali o Mojsije na inele poslušno e Devlese. So te vaćeri e stenaće, ov anglo sa o narodo duj puti e štapeja khuvđa ki stena. O pani čače thavdino olatar sar te šaj sare te pijen, ali o Devel inele xoljame upro Mojsije hem phenđa lese: "Tu na ka đerdine ani Obećime phuv."

![](https://cdn.door43.org/obs/jpg/360px/obs-en-14-14.jpg)

Palo adava so o Izraelci lutinđe ki pustinja saranda berš, sare kola pobunisale protiv o Devel mule. Tegani o Devel palem legarđa e narodo angli Obećime phuv. Tegani o Mojsije inele but purano, i o Devel birinđa e Isus Navine te pomožini lese te legari e narodo. O Devel da obećinđa e Mojsijase da jekh dive ka bičhali avere proroko sar oleste.

![](https://cdn.door43.org/obs/jpg/360px/obs-en-14-15.jpg)

Palo adava, o Devel phenđa e Mojsijase te džal ko naj učo than e planinakoro sar te šaj dikhel i Obećime phuv. O Mojsije dikhlja i Obećime phuv, ali o Devel na muklja lese te đerdini ano late. Tegani o Mojsije mulo, a o Izraelci runde le trijanda dive. O Isus Navin ulo lengoro nevo vođa. Ov inele šukar vođa, adalese so verujinđa e Devlese hem inele lese poslušno.

*E biblijakiri paramiz taro 2. lil e Mojsijasoro 16-17; 4. lil e Mojsijasoro 10-14; 20; 27; 5. lil e Mojsijasoro 34*

## 15. I Obećime phuv

https://openbiblestories.org/l/rmy-x-vwa/story-15/

![](https://cdn.door43.org/obs/jpg/360px/obs-en-15-01.jpg)

I alo o vreme o Izraelci te đerdinen ano Hanaan, ani Obećime phuv. O Isus Navin bičhalđa duje muršen te dikhen savi e hanaanesiri diz Jerihon, savi inele zaštitime ađahar so inele okružime zorale duvarencar. Ani adaja diz živinđa jekh prostitutka palo anav Raava, savi garavđa e duje muršen hem kasnije pomožinđa lenđe te našen. Ćerđa adava adalese so verujinđa ano Devel. O duj murša obećinđe da ka zaštitinen e Raava hem lakere porodica ked o Izraelci ka uništinen o Jerihon.

![](https://cdn.door43.org/obs/jpg/360px/obs-en-15-02.jpg)

O Izraelci valjanđe te nakhen i len Jordan te šaj đerdinen ani Obećime phuv. O Devel phenđa e Isus Navinese: "O sveštenici nek džan prva." Ked o sveštenici čhivđe pumare pre ani len Jordan, o pani ačhilo te thavdel sar te šaj o Izraelci nakhen ki aver strana upri šuki phuv.

![](https://cdn.door43.org/obs/jpg/360px/obs-en-15-03.jpg)

Ked o manuša nakhle i len Jordan, o Devel sikavđa e Isus Navine sar te napadini i zorali diz Jerihon. O narodo šunđa e Devle. O vojnici hem o sveštenici šov dive phirindoj okolinđe i diz Jerihon jekhvar ko dive, sar so phenđa lenđe o Devel te ćeren.

![](https://cdn.door43.org/obs/jpg/360px/obs-en-15-04.jpg)

I ko eftato dive, o Izraelci phirindoj okolinđe i diz pana efta puti. Sar ine okolinena i diz zadnjo puti, o vojnici vičinđe, a o sveštenici phudinđe ano trube.

![](https://cdn.door43.org/obs/jpg/360px/obs-en-15-05.jpg)

Tegani e Jerihonesere duvarija pele! O Izraelci sa uništinđe ani diz sar so phenđa lenđe o Devel. Samo na dirinđe e Raava hem lakere porodica, kola pridružisale e Izraelconenđe. Ked avera nacije save živinđe ano Hanaan šunđe so o Izraelci uništinđe o Jerihon, but darandile da o Izraelci hem olen ka napadinen.

![](https://cdn.door43.org/obs/jpg/360px/obs-en-15-06.jpg)

O Devel naredinđa e Izraelconenđe te na phanden mir nijekhe narodoja taro Hanaan. Ali jekh narodo taro Hanaan, savo vičinđa pe Giveon, xovavđa e Isus Navine hem phenđa lese da avela taro than savoi dur taro Hanaan. Rodinđe e Isus Navinenstar te phanden mir olencar. O Isus Navin hem o Izraelci na pučle e Devle kotar ale o Giveonci, i o Isus Navin phandlja mir olencar.

![](https://cdn.door43.org/obs/jpg/360px/obs-en-15-07.jpg)

O Izraelci inele but xoljame kad dodžanđe so o Giveonci xovavđe len, ali ićerđe pe ko adava so phandle mir olencar adalese so adava inele obećanje anglo Devel. Ked nakhlo nesavo vreme, o carija jekhe avere narodosere ano Hanaan, o Amorejci, šunđe so o Giveonci phandle mir e Izraelconencar, i čedinđe pumara vojska ki jekh bari vojska hem napadinđe e Giveonconen. O Giveonci rodinđe pomoć e Isus Navinestar.

![](https://cdn.door43.org/obs/jpg/360px/obs-en-15-08.jpg)

I ađahar, o Isus Navin čedinđa e izraelesere vojska, i sa i rat phirđe sar te aven koro Giveonci. Sabaleja iznenadinđe e Amorejconen hem napadinđe len.

![](https://cdn.door43.org/obs/jpg/360px/obs-en-15-09.jpg)

Adava dive o Devel marđa pe zako Izraelci. Zbuninđa e Amorejconen hem bičhalđa bari kukudi savi mudarđa bute Amorejconen.

![](https://cdn.door43.org/obs/jpg/360px/obs-en-15-10.jpg)

O Devel da ćerđa o kham te terđol sa ko jekh than, sar te ovel e Izraelconen dovoljno vreme te pobedinen e Amorejconen. Adava dive o Devel anđa bari pobeda zako Izraelci.

![](https://cdn.door43.org/obs/jpg/360px/obs-en-15-11.jpg)

Palo adava so o Devel pobedinđa adala vojska, but avera narodija čedinđe pe te napadinen e Izraelconen. O Isus Navin hem o Izraelci napadinđe len hem pobedinđe len.

![](https://cdn.door43.org/obs/jpg/360px/obs-en-15-12.jpg)

Palo adava mariba, o Devel dinđa đijekhe izraelskone pleme lesoro kotor oti Obećime phuv. Tegani o Devel dinđa mir e Izraelese ko sa o granice.

![](https://cdn.door43.org/obs/jpg/360px/obs-en-15-13.jpg)

Ked o Isus Navin inele purano, vičinđa sa e Izraelconen. Podsetinđa len ki lengiri obaveza te oven poslušna zako savez savo o Devel ćerđa e Izraelconencar ko Sinaj. O narodo obećinđa da ka ačhol verno e Devlese hem da ka ićeri lesere naredbe.

*E biblijakiri paramiz taro lil e Isus Navinesoro 1-24*

## 16. O spasitelja

https://openbiblestories.org/l/rmy-x-vwa/story-16/

![](https://cdn.door43.org/obs/jpg/360px/obs-en-16-01.jpg)

Palo e Isus Navinesoro meriba, o Izraelci na inele poslušna e Devlese hem na ispudinđe avere Hanaanconen ni inele poslušna e Devlesere naredbenđe. So te slavinen e Jahve, e čačimasere Devle, on lelje te slavinen e hanaanesere devlen. E Izraelconen na inele caro, i sare ćerđe ađahar sar so mislinđe dai šukar.

![](https://cdn.door43.org/obs/jpg/360px/obs-en-16-02.jpg)

Adalese so o Izraelci na inele poslušna e Devlese, o Devel kazninđa len ađahar so muklja te pobedinen len lengere neprijatelja. Adala neprijatelja čorđe but so e Izraelconendar, uništinena ine lengoro imanje hem mudarena buten olendar. Palo adava so but berša na inele poslušna e Devlese, i adalese lengere neprijatelja mučinena len, o Izraelci pokajinđe pe hem rodinđe e Devle te spasini len.

![](https://cdn.door43.org/obs/jpg/360px/obs-en-16-03.jpg)

Tegani o Devel vazdinđa lenđe jekhe manuše kova oslobodinđa len lengere neprijateljendar hem anđa mir ki phuv. Ali o narodo palem bisterđa e Devle hem lelja palem te slavini idolen. Adalese o Devel muklja e Midijanconenđe, lengere neprijateljenđe, te pobedinen len.

![](https://cdn.door43.org/obs/jpg/360px/obs-en-16-04.jpg)

O Midijanci efta berš lena ine sa o điv e Izraelconendar. O Izraelci but darandile. Garavena pe ine ano pećine taro Midijanci. I konačno, zorale rodinđe e Devle te spasini len.

![](https://cdn.door43.org/obs/jpg/360px/obs-en-16-05.jpg)

Jekh dive, jekh Izraelco palo anav Gedeon garandoj čedela ine o điv sar te na čoren lestar o Midijanci. O anđeo e Devlesoro alo koro Gedeon hem phenđa lese: "O Develi tuja. Tu injan zoralo ko mariba. Dža hem spasin e Izraelconen e Midijanconendar."

![](https://cdn.door43.org/obs/jpg/360px/obs-en-16-06.jpg)

E Gedeonesere dade ine jekh žrtveniko posvetime zako nesavo idoli. O Devel phenđa e Gedeonese te phagel adava žrtveniko. Ali o Gedeon darandilo e manušendar, i adžićerđa te perel i rat. Tegani phaglja o žrtveniko sa ko kotora. Paše uzalo adava than, o Gedeon vazdinđa žrtveniko posvetime e Devlese hem upro leste anđa žrtva e Devlese.

![](https://cdn.door43.org/obs/jpg/360px/obs-en-16-07.jpg)

Sabaleja o manuša dikhlje da neko phaglja o žrtveniko hem but xoljanđe. Džele e Gedeonese ko čher te mudaren le, ali e Gedeonesoro dad phenđa lenđe: "Sose pokušinena te pomožinen tumare devlese? Tei ov devel, korkoro nek zaštitini pe." Adalese so phenđa lenđe adava, on na mudarđe e Gedeone.

![](https://cdn.door43.org/obs/jpg/360px/obs-en-16-08.jpg)

Tegani o Midijanci palem ale te čoren e Izraelconendar. Edobor đene ale da našti ine te đenen pe. O Gedeon vičinđa e Izraelconen te maren pe olencar. Molinđa e Devle te del le duj znaci sar te ovel sigurno da o Devel ka upotrebini le te spasini e Izraelconen e Midijanconendar.

![](https://cdn.door43.org/obs/jpg/360px/obs-en-16-09.jpg)

Sar prvo znako, o Gedeon čhivđa e bakresiri koža ki phuv hem molinđa e Devle te perel e sabalesiri rosa samo upri e bakresiri koža, a na upri phuv. O Devel ćerđa ađahar. Aver rat, molinđa e Devle i phuv te ovel sapani, a e bakresiri koža te ovel šuki. O Devel hem adava ćerđa. Adala duj znaci uverinđe e Gedeone da o Devel ka upotrebini le te spasini e Izraelconen e Midijanconendar.

![](https://cdn.door43.org/obs/jpg/360px/obs-en-16-10.jpg)

32.000 e izraelesere vojnici ale koro Gedeon, ali o Devel phenđa lese dai adava but. Tegani o Gedeon bičhalđa čhere 22.000 manušen kola darandile te džan ko mariba. O Devel phenđa e Gedeonese da palem isi le but manuša. Adalese o Gedeon bičhalđa čhere sarijen, sem 300 vojnikonen.

![](https://cdn.door43.org/obs/jpg/360px/obs-en-16-11.jpg)

Adaja rat o Devel phenđa e Gedeonese: "Hulji ano logori e midijanconengoro hem ked ka šune so vaćerena, na ka dara više." Adalese adaja rat o Gedeon hulilo ano logori hem šunđa e midijanesere vojniko sar vaćeri pe amalese so dikhlja ko suno. E manušesoro amal phenđa: "Akava suno značini da e Gedeonesiri vojska ka pobedini e midijanesere vojska!" Ked šunđa o Gedeon adava, slavinđa e Devle.

![](https://cdn.door43.org/obs/jpg/360px/obs-en-16-12.jpg)

Tegani o Gedeon irinđa pe koro pe vojnici hem đijekhese đinđa po jekh šing, čaro ćerdo oti glina hem baklja. Opkolinde o logori kote sovena ine e midijanesere vojnici. E Gedeonesere 300 vojnici čhivđe o baklje ano čaro sar te na dikhen o Midijanci o svetlo e bakljengoro.

![](https://cdn.door43.org/obs/jpg/360px/obs-en-16-13.jpg)

Tegani sa e Gedeonesere vojnici ko isto trenutko phagle pumare čare, i ađahar oto jekhvar mothovđa pe i jag e bakljengiri. Phudinđe pumenđe ano šinga hem vičinđe: "Maraja amen zako Jahve hem zako Gedeon!"

![](https://cdn.door43.org/obs/jpg/360px/obs-en-16-14.jpg)

O Devel zbuninđa e Midijanconen, ađahar da lelje te mudaren jekh avere maškara pumende. Odmah hem avera Izraelci inele vičime pumare čherendar te aven hem te pomožinen te jurinen e Midijanconen. Buten mudarđe, a averen jurinđe tari e Izraelesiri phuv. Adava dive mule 120.000 Midijanci. O Devel spasinđa e Izraelconen.

![](https://cdn.door43.org/obs/jpg/360px/obs-en-16-15.jpg)

O Izraelci mangle e Gedeone te čhiven sar pe caro. O Gedeon na muklja lenđe te ćeren adava, ali rodinđa lendar te den le xari zlatna angrustika save đijekh olendar lelje e Midijanconendar. I but zlato dinđe e Gedeonese.

![](https://cdn.door43.org/obs/jpg/360px/obs-en-16-16.jpg)

O Gedeon adale zlatostar ćerđafse posebno fostani savo ine akhari o baro svešteniko. Ali e manušenđe adava fostani ulo sar idoli save slavinđe. Adalese o Devel palem kazninđa e Izraelconen adalese so slavinđe idolen. O Devel muklja lengere neprijateljenđe te pobedinen len. I on palem rodinđe e Devle te pomožini lenđe, i o Devel bičhalđa lenđe pana jekhe manuše kova spasinđa len.

![](https://cdn.door43.org/obs/jpg/360px/obs-en-16-17.jpg)

Ađahar inele but puti: O Izraelci ine grešinena, o Devel ine kaznini len, on ine pokajinena pe, a o Devel ine bičhali lenđe manuše te spasini len. Ko but berša, o Devel bičhalđa lenđe bute manušen kola spasinena ine e Izraelconen olengere neprijateljendar.

![](https://cdn.door43.org/obs/jpg/360px/obs-en-16-18.jpg)

Konačno, o narodo molinđa e Devle te del len caro sar so avere nacijen ine. Mangle caro kovai učo hem zoralo, kova šaj te legari len ko mariba. E Devlese na inele šukar adava so mangle, ali dinđa len caro, ađahar sar so mangle.

*E biblijakiri paramiz taro Lil e Sudijendar 1-3; 6-8*

## 17. E Devlesoro savez e Davideja

https://openbiblestories.org/l/rmy-x-vwa/story-17/

![](https://cdn.door43.org/obs/jpg/360px/obs-en-17-01.jpg)

O Saul inele prvo caro e Izraelesoro. Inele učo hem šužo, inele baš esavko sar so manglja o narodo. O Saul inele šukar caro prva nekobor berša. Ali kasnije ulo bišukar hem na inele poslušno e Devlese, i o Devel birinđa jekhe avere manuše kova jekh dive ka ovel caro olese ko than.

![](https://cdn.door43.org/obs/jpg/360px/obs-en-17-02.jpg)

O Devel birinđa jekhe terne Izraelco palo anav David te ovel caro palo Saul. O David inele pastiri tari diz Vitlejem. Ko različita prilike, sar ine arakhi pe dadesere bakren, o David mudarđa hem lave hem medvede save napadinđe e bakren. O David inele ponizno hem pravedno manuš, kova verujinđa e Devlese hem ine lese poslušno.

![](https://cdn.door43.org/obs/jpg/360px/obs-en-17-03.jpg)

O David ulo zoralo vojniko hem kapetani. Sar inele pana terno, marđa pe jekhe but bare manušeja palo anav Golijat. O Golijat inele trenirime vojniko, but zoralo hem učo sar đi trin metarija. Ali o Devel pomožinđa e Davidese te mudari e Golijate hem te spasini e Izraelconen. Palo adava, o David pobedinđa bute e Izraelesere neprijateljen, i adalese o narodo volinđa le.

![](https://cdn.door43.org/obs/jpg/360px/obs-en-17-04.jpg)

O Saul ulo ljubomorno adalese so o narodo volinđa e Davide. But puti manglja te mudari le, i o David garaj pe ine olestar. Jekh dive o Saul rodinđa e Davide te mudari le. Đerdinđa ki isto pećina kote o David garavđa pe olestar, ali na dikhlja le. O David tegani inele lese but paše i šaj ine te mudari e Saule, ali na manglja. Umesto adava, čhinđa jekh kotor e Saulesere šejendar sar te mothoj lese da na ka mudari le sar te šaj ovel caro.

![](https://cdn.door43.org/obs/jpg/360px/obs-en-17-05.jpg)

Ko kraj o Saul mulo ano mariba, a o David ulo caro upro Izrael. Ov inele šukar caro, a o narodo volinđa le. O Devel blagoslovinđa e Davide hem ćerđa le te ovel but uspešno. O David marđa pe ano but mariba hem o Devel pomožinđa lese te pobedini e Izraelesere neprijateljen. O David osvojinđa o Jerusalim hem ćerđa le te ovel glavno diz pese ano carstvo. Zako e Davidesoro carujiba, o Izrael ulo zoralo hem barvalo.

![](https://cdn.door43.org/obs/jpg/360px/obs-en-17-06.jpg)

O David manglja te ćerel hram kote o Izraelci ka šaj te slavinen e Devle hem te anen lese žrtve. Đi sar 400 berša, o narodo slavinđa e Devle hem anđa lese žrtve ano Šatori zako sastanko savo ćerđa o Mojsije.

![](https://cdn.door43.org/obs/jpg/360px/obs-en-17-07.jpg)

Ali, o Devel bičhalđa koro David e proroko e Natane akale lafeja: "Adalese so tu injan manuš kova marela pe ano mariba, na ka ćere maje Hram. To čhavo ka ćerel le. Ali, me ka blagoslovinav tut but. Jekh te potomkonendar zauvek ka vladini sar caro upro mlo narodo!" Jedinoi potomko e Davidesoro kova šaj vladini zauvek o Mesija. O Mesijai e Devlesoro Izabraniko kova ka spasini akale phuvjakere manušen lengere grejonendar.

![](https://cdn.door43.org/obs/jpg/360px/obs-en-17-08.jpg)

Ked šunđa o David adala lafija, odmah zahvalinđa e Devlese hem slavinđa le adalese so obećinđa e Davidese esavki bari čast hem but blagoslovija. O David na džanđa ked o Devel ka ispunini pe obećanja. Ali, sar so ulo, o Izraelci pana but berša valjanđe te adžićeren e Mesijasoro aviba, đi sar 1.000 berša.

![](https://cdn.door43.org/obs/jpg/360px/obs-en-17-09.jpg)

O David vladinđa pravedno hem verno but berša, a o Devel blagoslovinđa le. Ali, ked purandilo, ćerđa baro greh anglo Devel.

![](https://cdn.door43.org/obs/jpg/360px/obs-en-17-10.jpg)

Jekh dive, sar lesere vojnici ine marena pe ano mariba dur pumare čherendar, o David taro po dvorco dikhlja jekha šuža đuvlja sar nanđola. Lakoro anav inele Vitsaveja.

![](https://cdn.door43.org/obs/jpg/360px/obs-en-17-11.jpg)

So te irini po šero ki aver strana te na dikhel, o David bičhalđa nekas te anen la koro leste. Suća olaja hem bičhalđa la čhere. Na nakhino but palo adava, i Vitsaveja bičhalđa poruka e Davidese dai khamni.

![](https://cdn.door43.org/obs/jpg/360px/obs-en-17-12.jpg)

E Vitsavejakoro rom, palo anav Urija, inele jekh oto e Davidesere najšukar vojnici. O David vičinđa e Urija te irini pe taro mariba hem phenđa lese te džal čhere hem te ovel pe romnjaja sar te mislinen o manuša da i Vitsaveja akhari e Urijasere čhave ano vođi. Ali o Urija na manglja te džal čhere adalese so sa o vojnici inele ano mariba. Adalese o David bičhalđa e Urija palal ano mariba hem phenđa e generalese te čhivel e Urija adari kaj o neprijatelji inele najzoralo, te mudarđol.

![](https://cdn.door43.org/obs/jpg/360px/obs-en-17-13.jpg)

Palo adava so o Urija inele mudardo, o David lelja romnjaće e Vitsaveja. Palo nesavo vreme oj bijanđa čhave e Davidese. O Devel but xoljanđa zbog adava so o David ćerđa, i bičhalđa e proroko e Natane te vaćeri e Davidese kobor bišukar inele lesoro greh. O David pokajinđa pe zako po greh hem o Devel oprostinđa lese. Palo adava, sa po dživdipe o David inele poslušno e Devlese, čak hem ano phare vremenija.

![](https://cdn.door43.org/obs/jpg/360px/obs-en-17-14.jpg)

Ali, sar kazna zako e Davidesoro greh, lesoro čhavoro mulo. Ađahar da, ko sa lesoro dživdipe savo ačhilo le, lesiri porodica marela pe ine maškara peste, i ađahar e Davidesoro moć slabonđa. Iako o David na inele verno e Devlese, o Devel inele verno zako pe obećanja. Kasnije, e Davide hem e Vitsaveja inele pana jekh čhavo. Dinđe le anav Solomon.

*E biblijakiri paramiz taro 1. Lil e Samuilesoro 10; 15-19; 24; 31; 2. Lil e Samuilesoro 5; 7; 11-12*

## 18. Ulavdo carstvo

https://openbiblestories.org/l/rmy-x-vwa/story-18/

![](https://cdn.door43.org/obs/jpg/360px/obs-en-18-01.jpg)

Palo but berša, o David mulo, a lesoro čhavo o Solomon lelja te vladini upro Izrael. O Devel vaćerđa e Solomoneja hem pučlja le so najviše mangela. Ked o Solomon rodinđa džandipe, o Devel inele zadovoljno hem ćerđa le te ovel najdžando manuš ki phuv. O Solomon siklilo but so hem inele but džando sudija. O Devel ćerđa le te ovel but barvalo.

![](https://cdn.door43.org/obs/jpg/360px/obs-en-18-02.jpg)

O Solomon vazdinđa Hram ano Jerusalim zako savo lesoro dad o David ćerđa plan hem čedinđa materijal. O narodo akana slavinđa e Devle hem anđa žrtve ano Hram, a angleder adava ine ćerena ano Šatori zako sastanko. O Devel alo hem inele ano Hram, hem živinđa pe narodoja.

![](https://cdn.door43.org/obs/jpg/360px/obs-en-18-03.jpg)

Ali o Solomon but volinđa e đuvljen taro avera phuvja. Na šunđa e Devle hem lelja bute romnjen, đi sar 1.000 romnja inole! But adale romnjendar ale taro avera phuvja, a pumencar anena ine pumare devlen saven ine slavinena. Ked o Solomon purandilo, hem ov da lelja te slavini lengere devlen.

![](https://cdn.door43.org/obs/jpg/360px/obs-en-18-04.jpg)

O Devel xoljanđa upro Solomon hem sar kazna zako adava so o Solomon na ine lese verno o Devel obećinđa lese da palo lesoro meriba e Izraelesoro narodo ka ovel ulavdo ko duj carstvija.

![](https://cdn.door43.org/obs/jpg/360px/obs-en-18-05.jpg)

Ked mulo o Solomon, lesoro čhavo o Rovoam ulo caro. Ov na inele razumno manuš. Sa o Izraelci čedinđe pe te proglasinen le carose. Žalinđe pe lese da o Solomon terinđa len te ćeren phare buća hem te platinen but porez.

![](https://cdn.door43.org/obs/jpg/360px/obs-en-18-06.jpg)

E Rovoamesoro odgovor na inele šukar: "Tumen mislinđen da mo dad o Solomon terinđa tumen te ćeren phare buća, ali me ka terinav tumen te ćeren po phare buća nego so ov terinđa tumen hem ka kazninav tumen po zorale nego so ov kazninđa tumen."

![](https://cdn.door43.org/obs/jpg/360px/obs-en-18-07.jpg)

I ađahar, deš plemenja e Izraelesere na mangle e Rovoame carose. Samo duj plemija ačhile lese verna. Adala duj plemija ule carstvo vičime E judejakoro carstvo.

![](https://cdn.door43.org/obs/jpg/360px/obs-en-18-08.jpg)

Aver deš plemenja e Izraelesere, kola na mangle e Rovoame carose, čhivđe carose e manuše palo anav Jerovoam. Lengoro carstvo inele ko upruno kotor e phuvjakoro, a vičinđe le E izraelesoro carstvo.

![](https://cdn.door43.org/obs/jpg/360px/obs-en-18-09.jpg)

O Jerovoam bunisalo protiv o Devel hem legarđa e manušen ano greh. Ćerđa duje idolen te šaj lesoro narodo slavini len, a na e Devle ano Hram savoi ano carstvo e Judejakoro.

![](https://cdn.door43.org/obs/jpg/360px/obs-en-18-10.jpg)

E Judejakoro hem e Izraelesoro carstvo ule neprijatelja hem but puti marđe pe jekh avereja.

![](https://cdn.door43.org/obs/jpg/360px/obs-en-18-11.jpg)

Ano nevo carstvo e izraelesoro, sa o carija inele bišukar. Buten olendar mudarđe avera Izraelci, kola mangle te oven carija lenđe ko than.

![](https://cdn.door43.org/obs/jpg/360px/obs-en-18-12.jpg)

Sa o carija hem but manuša taro e izraelesoro carstvo slavinena ine idolen. Ko adava inele uključime but bišukar buća hem sar žrtven dena ine pumare čhavoren.

![](https://cdn.door43.org/obs/jpg/360px/obs-en-18-13.jpg)

O carija e Judejakere inele potomci e Davidesere. Nesave olendar inele šukar manuša, kola vladinđe pravedno hem slavinđe e Devle. Ali, but carija e judejakere inele bišukar hem ćerena ine okova so na valjani, hem slavinena ine idolen. Nesave carija da dena ine pumare čhaven sar žrtva e xovavne devlenđe. But manuša tari Juda da cidinđe pe e Devlestar hem slavinena ine avere devlen.

*E biblijakiri paramiz taro 1. lil e caronendar 1-6; 11-12*

## 19. O Proroci

https://openbiblestories.org/l/rmy-x-vwa/story-19/

![](https://cdn.door43.org/obs/jpg/360px/obs-en-19-01.jpg)

O Devel bičhalđa prorokonen e izraelesere narodose pana od ked postaninđe narodo. O proroci šunena ine o lafi e Devlestar, i vaćerena le ine e narodose.

![](https://cdn.door43.org/obs/jpg/360px/obs-en-19-02.jpg)

O Ilija inele proroko zako vreme ked o Ahav inele caro upro e izraelesoro carstvo. O Ahav na inele šukar manuš hem ohrabrini ine e manušen te slavinen e xovavne devle palo anav Vaal. O Ilija phenđa e Ahavese: "Na ka perel bršin ano e izraelesoro carstvo đikote me na phenava." Adava but xoljanćerđa e Ahave.

![](https://cdn.door43.org/obs/jpg/360px/obs-en-19-03.jpg)

O Devel phenđa e Ilijase te džal đi ko jekh potok ani pustinja hem adari te garaj pe e Ahavestar, kova manglja te mudari le. Đijekh sabajle hem đijekh rat, o čiriklja anena lese ine maro hem mas. O Ahav hem lesiri vojska rodinđe e Ilija, ali našti ine arakhen le. Adalese so but vreme na pelo bršin, hem adava potok da šućilo.

![](https://cdn.door43.org/obs/jpg/360px/obs-en-19-04.jpg)

Adalese o Ilija dželo ki pašutni phuv. Ani adaja phuv živinđa jekh udovica hem lakoro čhavo, a skoro na ačhilo len ništa zako xajba adalese so inele bokhalipe adalese so na pelo bršin. Ali, on priminđe e Ilija pese ko čher hem dinđe le te xal i o Devel brininđa pe olendar ađahar so ćerđa lengoro čaro e vareja hem lengiri flaša e uljeja niked te na oven čuče. Sa đikote inele o bokhalipe, olen inele so te xan. O Ilija ačhilo adari nekobor berša.

![](https://cdn.door43.org/obs/jpg/360px/obs-en-19-05.jpg)

Ked nakhle trintekvaš berš, o Devel phenđa e Ilijase te irini pe e izraelese ano carstvo hem te vaćeri e Ahavese da palem ka bičhali bršin. Ked o Ahav dikhlja e Ilija, phenđa lese: "Adathe injan, tu kova ćereja problemija!" O Ilija phenđa lese: "Tu injan adava kova ćerela problemija! Ačhavđan e Jahve, e čačimasere Devle, a slavineja e Vaale. Ana sa e narodo oto carstvo Izrael ki planina Karmel."

![](https://cdn.door43.org/obs/jpg/360px/obs-en-19-06.jpg)

Sa o manuša oto carstvo Izrael, đi o 450 proroci e Vaalesere, ale ki planina Karmel. O Ilija phenđa e manušenđe: "Odlučinen tumen više kas ka slavinen. Tei o Jahve Devel, kanden ole, tei o Vaal Devel, kanden ole!"

![](https://cdn.door43.org/obs/jpg/360px/obs-en-19-07.jpg)

Tegani o Ilija phenđa e Vaalesere prorokonenđe: "Čhinen jekhe guruve hem čhiven le sar žrtva, ali ma te tharen i jag. Hem me ka ćerav ađahar. Čačimasoroi Devel okova kova ka bičhali jag te tharel e žrtven." I ađahar, e Vaalesere proroci čhivđe e žrtva, ali na tharđe i jag.

![](https://cdn.door43.org/obs/jpg/360px/obs-en-19-08.jpg)

Tegani e Vaalesere proroci molinđe pe e Vaalese: "Šun amen, Vaale!" Sa o dive molinena pe ine hem vičinena, čhinena pe da ine čhurjencar, ali na dobinđe nisavo odgovor hem na ali i jag te tharel e žrtva.

![](https://cdn.door43.org/obs/jpg/360px/obs-en-19-09.jpg)

Ked nakhlo o dive, o Ilija čhivđa e žrtva e Devlese. Tegani phenđa e manušenđe te čhoren dešuduj bare čare pani upri žrtva đikote o mas, o kaš, hem i phuv uzalo žrtveniko na ovena skroz sapane.

![](https://cdn.door43.org/obs/jpg/360px/obs-en-19-10.jpg)

Tegani o Ilija molinđa pe: "Jahve, Devla e Avraamesereja, e Isakesereja hem e Jakovesereja, mothov amenđe avdive da tu injan o Devel e Izraelesoro hem da me injum to sluga. Odgovorin maje ki molitva te dikhen akala manuša da tu injan čačimasoro Devel.

![](https://cdn.door43.org/obs/jpg/360px/obs-en-19-11.jpg)

Odmah peli i jag taro nebo hem tharđa o mas, o kašta, o bara, i phuv, čak hem o pani savo inele uzalo žrtveniko. Ked o manuša dikhle adava, pele ki phuv hem phenđe: "O Jahvei Devel! O Jahvei Devel!"

![](https://cdn.door43.org/obs/jpg/360px/obs-en-19-12.jpg)

Tegani o Ilija phenđa: "Ma te muken nijekhe e Vaalesere proroko te našel." I ađahar, o manuša dolinđe e Vaalesere prorokonen, legarđe len adathar hem mudarđe len.

![](https://cdn.door43.org/obs/jpg/360px/obs-en-19-13.jpg)

Tegani o Ilija phenđa e carose e Ahavese: "Odmah irin tut ani diz, adalese so avela o bršin." I o nebo kalilo hem lelja te perel bršin. O Jahve adaleja mothovđa dai ov čačimasoro Devel.

![](https://cdn.door43.org/obs/jpg/360px/obs-en-19-14.jpg)

Angleder so te nakhel e Ilijasoro vreme, o Devel birinđa jekhe manuše palo anav Elisej te ovel proroko. O Devel ćerđa but čudesija prekalo Elisej. Jekh oto adala čudesija ulo upro Naaman, kova inele kapetani e neprijateljengoro, kole inele kožno nambormipe. Šunđa zako Elisej, i dželo te zamolini le te sasljari le. O Elisej phenđa e Naamanese efta puti te frdel pe ani len Jordan.

![](https://cdn.door43.org/obs/jpg/360px/obs-en-19-15.jpg)

O Naaman prvo xoljanđa hem na manglja te ćerel adava, adalese so džanđa da o nanđojba našti korkoro pestar te legari o nambormipe. Ali kasnije odlučinđa te ćerel adava so terinđa le o Elisej hem frdinđa pe efta puti ani len Jordan. Ked o zadnjo puti iklilo taro pani, lesiri koža inele sasljardi! O Devel sasljarđa le.

![](https://cdn.door43.org/obs/jpg/360px/obs-en-19-16.jpg)

O Devel bičhalđa bute avre prorokonen. On e narodose vaćerđe te na slavinen e idolen hem te len te oven pravedna hem milosrdna premalo avera. O proroci upozorinena ine e manušen da o Devel, te na ačhavđe te ćeren bišukaripe hem te na lelje te slavinen le, ka osudini len hem ka kaznini len.

![](https://cdn.door43.org/obs/jpg/360px/obs-en-19-17.jpg)

Ali o manuša na šunđe e Devle. Često na postupinđe šukar e prorokonencar, a but puti mudarena len ine. Jekhvar o proroko o Jeremija inele frdime ano šuko bunari hem inele ačhavdo adari te merel. Propelo ani čik savi inele ano bunari, ali tegani o caro smilujinđa pe lese hem naredinđa pe slugenđe te ikalen le taro bunari angleder so ka merel.

![](https://cdn.door43.org/obs/jpg/360px/obs-en-19-18.jpg)

O proroci na ačhavđe te prenosinen e Devlesere lafija iako o manuša mrzinđe len. Upozorinena ine e manušen da o Devel ka mudari len te na pokajinđe pe. Ađahar da, podsetinena ine e manušen upro e Devlesoro obećanje da ka bičhali ple Mesija.

*E biblijakiri paramiz taro 1. lil e caronendar 16-18; 2. lil e caronendar 5; Jeremija 38*

## 20. Progonstvo hem iriba

https://openbiblestories.org/l/rmy-x-vwa/story-20/

![](https://cdn.door43.org/obs/jpg/360px/obs-en-20-01.jpg)

E Izraelesoro hem e Judejakoro carstvo grešinđe anglo Devel. Phagle o savez savo o Devel ćerđa olencar ki Sinaj. O Devel bičhalđa prorokonen te upozorini len te pokajinen pe hem te len palem te slavinen e Jahve, a na avere devlen. Ali on na mangle te šunen.

![](https://cdn.door43.org/obs/jpg/360px/obs-en-20-02.jpg)

Adalese o Devel kazninđa soduj carstvija ađahar so muklja lengere neprijateljenđe te uništinen len. O carstvo e Asirijakoro, jekh zoralo, bišukar narodo, uništinđa e Izraelesere carstvo. O Asirci mudarđe bute manušen ano Izrael, čorđe sa so inele vredno, hem tharđe but dizja hem gava ani phuv.

![](https://cdn.door43.org/obs/jpg/360px/obs-en-20-03.jpg)

O Asirci čedinđe sa e vođen, e barvalen hem e bućarne manušen hem legarde len ani Asirija. Ano e Izraelesoro carstvo ačhavđe samo okolen kola ačhile ko životi, a inele but čorore.

![](https://cdn.door43.org/obs/jpg/360px/obs-en-20-04.jpg)

Tegani o Asirci ande abanđijen te živinen ani phuv kote angleder inele e Izraelesoro carstvo. Adala abanđije palem vazdinđe dizja, hem lelje pe e Izraelconencar kola ačhile adari. O potomci e izraelesere kola lelje pe e abanđijencar vičinđe pe Samarijanci.

![](https://cdn.door43.org/obs/jpg/360px/obs-en-20-05.jpg)

O manuša kola živinđe ano e Judejakoro carstvo dikhlje sar o Devel kazninđa e manušen e Izraelesere carstvostar adalese so na inele verna hem poslušna e Devlese. Ali na ačhavđe te slavinen idolen, maškaro kolende inele hem o develja e Hanaanconengere. O Devel bičhalđa prorokonen te upozorinen len, ali on na mangle te šunen.

![](https://cdn.door43.org/obs/jpg/360px/obs-en-20-06.jpg)

Ked nakhle đi ko šel berša palo adava ked o Asirci uništinđe e Izraelesere carstvo, o Devel bičhalđa e Navuhodonozore, e vavilonskone caro, te napadini e judejakoro carstvo. O Vavilon inele zoralo carstvo. E judejakoro caro ulo e Navuhodonozoresoro sluga hem platinđa lese but love đijekh berš.

![](https://cdn.door43.org/obs/jpg/360px/obs-en-20-07.jpg)

Ali, palo nekobor berša e judejakoro caro pobunisalo protiv o Vavilon. Adalese o Vavilonci irinđe pe hem napadinđe e judejakoro carstvo. Prelelje i diz Jerusalim, uništinđe o Hram hem lelje sa o blago e dizjakoro hem e Hramesoro.

![](https://cdn.door43.org/obs/jpg/360px/obs-en-20-08.jpg)

E Navuhodonozoresere vojnici kazninđe e judejskone caro, adalese so pobunisalo, ađahar so mudarđe lesere čhaven anglo leste i palo adava ćerđe le te ovel kororo. Palo adava, legarđe le te merel ano phandlipe ano Vavilon.

![](https://cdn.door43.org/obs/jpg/360px/obs-en-20-09.jpg)

O Navuhodonozor hem lesiri vojska legarđe skoro sa e narodo taro e judejakoro carstvo ano Vavilon. Ani Judeja ačhavđe samo e but čorore manušen te frden seme ko njive. O vreme ked e Devlesoro narodo inele terime te ačhaven i Obećime phuv vičini pe Progonstvo.

![](https://cdn.door43.org/obs/jpg/360px/obs-en-20-10.jpg)

Iako o Devel kazninđa pe narodo zbog olengere greja ađahar so legarđa len ano progonstvo, na bisterđa ni olen ni ple obećanja. O Devel na ačhavđa te pazini upro plo narodo hem te vaćeri lenđe prekalo ple proroci. Obećinđa da, palo eftavardeš berš, on palem ka irinen pe ani Obećime phuv.

![](https://cdn.door43.org/obs/jpg/360px/obs-en-20-11.jpg)

Sar đi ko eftavardeš berš palo adava, e persijakoro caro o Kir osvojinđa o Vavilon, i e persijakoro carstvo zameninđa e vavilonskone carstvo. O Izraelci akana vičinđe pe Jevreja, a but đene olendar sa pumaro životi inele ano Vavilon. Samo nekobor but purane Jevreja setinena pe ine zaki Judeja.

![](https://cdn.door43.org/obs/jpg/360px/obs-en-20-12.jpg)

E persijakoro carstvo inele but zoralo, ali milosrdno premalo narodija kola pokorinđe pe. Na nakhlo but palo adava ked o Kir ulo caro e persijanconengoro, naredinđa đijekh Jevrejco, kova mangela te irini pe ani Judeja, da šaj te džal tari Persija ki Judeja. Čak dinđa len love palem te vazden o Hram! I ađahar, palo adava so eftavardeš berš inele ano progonstvo, tikori grupa oto Jevrejci irinđa pe ani diz Jerusalim ani Judeja.

![](https://cdn.door43.org/obs/jpg/360px/obs-en-20-13.jpg)

Ked o manuša resle ano Jerusalim, palem vazdinđe o Hram hem o duvarija uzali diz. Iako pana inele tali vlast avere narodosiri, palem živinđe ani Obećime phuv hem slavinđe e Devle ano Hram savo palem vazdinđe.

*E biblijakiri paramiz taro 2. lil e caronendar 17; 24-25; 2. lil e dnevnikosoro 36; Lil e Jezdrasoro 1-10; Lil e Nemijasoro 1-13*

## 21. O Devel obećini e Mesija

https://openbiblestories.org/l/rmy-x-vwa/story-21/

![](https://cdn.door43.org/obs/jpg/360px/obs-en-21-01.jpg)

Tari samo početka, o Devel planirinđa te bičhali e Mesija. Prvo obećanje e Mesijastar alo e Adamese hem e Evaće. O Devel obećinđa da ka bijanđol e Evakoro potomko, kova ka zdrobini e sapesoro šero. O sap savo xovavđa e Eva inele o Sotoni. O obećanje značinđa da o Mesija ka pobedini e Sotone.

![](https://cdn.door43.org/obs/jpg/360px/obs-en-21-02.jpg)

O Devel obećinđa e Avraamese da prekalo leste sa o nacije ki phuv ka oven blagoslovime. Akava blagoslov ka pherđol ki budućnost, ked ka avel o Mesija. Ov ka ćerel te šaj spasinen pe o manuša oti đijekh nacija.

![](https://cdn.door43.org/obs/jpg/360px/obs-en-21-03.jpg)

O Devel obećinđa e Mojsijase da ki budućnost ka vazdel pana jekhe proroko sar oleste. Adava inele pana jekh obećanje e Mesijastar kova ka avel palo nesavo vreme.

![](https://cdn.door43.org/obs/jpg/360px/obs-en-21-04.jpg)

E carose e Davidese, o Devel obećinđa da jekh oto lesere potomci zauvek ka carujini upro e Devlesoro narodo. Adava značinđa da o Mesija ka ovel e Davidesoro potomko.

![](https://cdn.door43.org/obs/jpg/360px/obs-en-21-05.jpg)

Prekalo o proroko Jeremija, o Devel obećinđa da ka ćerel Nevo savez, ali na sar o savez savo ćerđa e Izraeleja ko Sinaj. Ko Nevo savez, o Devel ka pisini po zakoni ko vile e manušengere, a o manuša korkore ka pendžaren e Devle, ka oven lesoro narodo, a o Devel ka oprostini lengere greja. O Mesija ka anel o Nevo savez.

![](https://cdn.door43.org/obs/jpg/360px/obs-en-21-06.jpg)

E Devlesere proroci isto ađahar phenđe da o Mesija ka ovel proroko, svešteniko hem caro. O prorokoi manuš kova šunela e Devlesere lafija hem vaćeri len e narodose. O Mesijai adava savršeno proroko kole o Devel obećinđa te bičhali.

![](https://cdn.door43.org/obs/jpg/360px/obs-en-21-07.jpg)

E izraelesere sveštenici anena ine žrtve e Devlese ko than e narodose, a sar zamena zaki kazna zbog lengere greja. O sveštenici da molinena pe ine e Devlese zako manuša. O Mesija ka ovel savršeno baro svešteniko, kova korkoro pes ka del sar savršeno žrtva e Devlese.

![](https://cdn.door43.org/obs/jpg/360px/obs-en-21-08.jpg)

O caroi okova kova vladini upro carstvo hem kova sudini e narodose. O Mesija ka ovel savršeno caro, kova ka bešel ko prestolje pe pradadesoro e Davidesoro. Ka vladini upri sa i phuv zauvek, hem uvek ka sudini pošteno hem ka anel ispravna odluke.

![](https://cdn.door43.org/obs/jpg/360px/obs-en-21-09.jpg)

Devlesere proroci prorokujinđe pana but so e Mesijastar. O proroko o Malahija prorokujinđa da angleder o Mesija ka avel jekh baro proroko. O proroko o Isaija prorokujinđa da i devica ka bijani e Mesija. O proroko o Mihej phenđa da o Mesija ka bijanđol ani diz Vitlejem.

![](https://cdn.door43.org/obs/jpg/360px/obs-en-21-10.jpg)

O proroko o Isaija phenđa da o Mesija ka živini ani Galileja, ka tešini e manušen kolen isi phagavde vile, hem ka vaćeri e phandlenđe da šaj te oven slobodna. Ađahar da, prorokujinđa da o Mesija ka sasljari e nambormen hem okolen kola na šunena, na dikhena, na vaćerena ili na phirena.

![](https://cdn.door43.org/obs/jpg/360px/obs-en-21-11.jpg)

O proroko o Isaija isto ađahar prorokujinđa da e Mesija ka mrzinen hem na ka mangen le iako ništa bišukar na ćerđa. Avera proroci prorokujinđe da okola kola ka mudaren e Mesija ka frden barbuti zako lesere šeja, hem da ka izdajini le o amal. O proroko o Zaharija prorokujinđa da adale amalese ka den trijanda srebrna kovanice adalese so izdajinđa e Mesija.

![](https://cdn.door43.org/obs/jpg/360px/obs-en-21-12.jpg)

O proroci da phenđe sar o Mesija ka merel. O Isaija prorokujinđa da o manuša ka čhungaren e Mesija, da ka asan lese hem da ka maren le. Ka posaven le, a ov ka merel ani bari patnja hem ano bare dukha, iako ništa bišukar na ćerđa.

![](https://cdn.door43.org/obs/jpg/360px/obs-en-21-13.jpg)

O proroci isto ađahar phenđe da o Mesija ka ovel savršeno, da niked na ka grešini. Ka merel sar te lel i kazna zako greja avere manušengere. Lesiri kazna ka anel mir maškaro Devel hem o manuša. Adalese e Mesijasoro meriba inele e Devlesiri volja.

![](https://cdn.door43.org/obs/jpg/360px/obs-en-21-14.jpg)

O proroci prorokujinđe da o Mesija ka merel, ali da o Devel ka vazdel le taro mule. E Mesijasoro meriba hem uštiba taro mule inele način ko savo o Devel ka spasini e grešnikonen hem ko savo ka počini o Nevo savez.

![](https://cdn.door43.org/obs/jpg/360px/obs-en-21-15.jpg)

O Devel e prorokonenđe mothovđa but so e Mesijastar, ali o Mesija na alo ano vreme nijekhesoro adale prorokonendar. Više oto 400 berš palo adava so dinđa o zadnjo proroštvo, tačno ko pravo vreme, o Devel bičhalđa e Mesija ki akaja phuv.

*E biblijakiri paramiz taro 1. lil e Mojsijasoro 3,15; 12,1–3; 5. lil e Mojsijasoro 18,15; 2. lil e Samuelesoro 7; Lil e Jeremijasoro 31; Lil e Isaijasoro 59,16; Lil e Danilosoro 7; Lil e Malahijasoro 4,5; Lil e Isaijasoro 7,14; Lil e Mihejesoro 5,2; Lil e Isaijasoro 9,1–7; 35,3–5; 61; 53; Psalam 22,18; 35,19; 69,4; 41,9; Lil e Zaharijasoro 11,12–13; Lil e Isaijasoro 50,6; Psalam 16,10–11*

## 22. Bijandipe e Jovanesoro

https://openbiblestories.org/l/rmy-x-vwa/story-22/

![](https://cdn.door43.org/obs/jpg/360px/obs-en-22-01.jpg)

Ko prošlost, o Devel vaćerđa pe narodoja prekalo pe anđelja hem prekalo proroci. Ali, 400 berš nakhlo sar na vaćerđa lenđe. Otojekhvar, jekhe purane sveštenikose palo anav Zaharija alo o anđeo te vaćeri lese e Devlesoro lafi. O Zaharija hem lesiri romni i Jelisaveta inele but pobožna manuša, ali našti ine te oven len čhave.

![](https://cdn.door43.org/obs/jpg/360px/obs-en-22-02.jpg)

O anđeo phenđa e Zaharijase: "Te romnja ka ovel čhavo. Tu ka de le anav Jovan. Ka ovel pherdo e Svetone Duhoja, hem ka pripremini e narodo zako Mesija." O Zaharija phenđa: "Mli romni hem me injam but purane te oven amen čhave. Sar me te ovav sigurno da ka ovel adava?"

![](https://cdn.door43.org/obs/jpg/360px/obs-en-22-03.jpg)

O anđeo phenđa e Zaharijase: "O Devel bičhalđa man te anav će akava šukar lafi. Adalese so na verujinđan maje, na ka šaj te vaćere đikote o čhavoro na bijanđola." O Zaharija odmah palo adava našti ine te vaćeri. Tegani o anđeo ačhavđa e Zaharija, a o Zaharija irinđa pe čhere. I lesiri romni ačhili khamni.

![](https://cdn.door43.org/obs/jpg/360px/obs-en-22-04.jpg)

Ked i Jelisaveta inele khamni šov masek, o isto anđeo otojekhvar iklilo e Jelisavetakere rođakinjaće palo anav Marija. Oj inele devica hem inele verime e manušeja palo anav Josif. O anđeo phenđa laće: "Ka ačhove khamni hem ka bijane čhave. Ka de le anav Isus. Ov ka ovel Čhavo e Najbare Devlesoro hem ka vladini zauvek."

![](https://cdn.door43.org/obs/jpg/360px/obs-en-22-05.jpg)

I Marija pučlja: "Sar šaj te ačhovav khamni, a injum čhaj?" O anđeo phenđa laće: "O Sveto Duho ka huljel upra tute hem o zoralipe e Devlesoro ka učhari tut. Adalese o čhavoro ka ovel sveto, Čhavo e Devlesoro." I Marija verujinđa hem prihvatinđa adava so phenđa laće o anđeo.

![](https://cdn.door43.org/obs/jpg/360px/obs-en-22-06.jpg)

Na nakhino but palo adava so o anđeo vaćerđa e Marijaja, oj dželi te dikhel e Jelisaveta. Ked i Jelisaveta šunđa e Marijakoro pozdrav, e Jelisavetakoro čhavoro mrdinđa ano late. I Marija hem i Jelisaveta zajedno radujinde pe zako adava so ćerđa lenđe o Devel. I Marija ačhili kori Jelisaveta trin masek i palo adava irinđa pe čhere.

![](https://cdn.door43.org/obs/jpg/360px/obs-en-22-07.jpg)

Ked i Jelisaveta bijanđa pe čhavore, o Zaharija hem i Jelisaveta dinđe le anav Jovan, sar so phenđa lenđe o anđeo. Tegani o Devel muklja e Zaharijase palem te vaćeri. O Zaharija phenđa: "Slava e Devlese, adalese so setinđa pe ple narodose! Tu, mo čhavo, ka ove proroko e Najbare Devlesoro hem ka phene e narodose sar šaj te priminen oprostiba zako pumare greja!"

*E biblijakiri paramiz taro Luka 1*

## 23. Bijandipe e Isusesoro

https://openbiblestories.org/l/rmy-x-vwa/story-23/

![](https://cdn.door43.org/obs/jpg/360px/obs-en-23-01.jpg)

I Marija inele verime e Josifeja kova inele pravedno manuš. Ked šunđa dai i Marija khamni, džanđa da adava našti te ovel lesoro čhavo. Na manglja te lađari e Marija, i manglja garandoj te prekinini i veridba. Angleder so te ćerel adava, ko suno alo lese o anđeo hem vaćerđa oleja.

![](https://cdn.door43.org/obs/jpg/360px/obs-en-23-02.jpg)

O anđeo phenđa lese: "Josife, ma te dara te le e Marija romnjaće. O čhavoro kovai ano late čudesnoi ćerdo e Svetone Duhostar. Oj ka bijani čhave. De le anav Isus (so značini: 'O Jahve spasini'), adalese so ov ka spasini e manušen lengere grejonendar."

![](https://cdn.door43.org/obs/jpg/360px/obs-en-23-03.jpg)

I ađahar, o Josif lelja e Marija romnjaće hem anđa la pese ano čher, ali na suća olaja sa đikote na bijanđa.

![](https://cdn.door43.org/obs/jpg/360px/obs-en-23-04.jpg)

Ked alo paše o vreme i Marija te bijani, e rimesiri vlast naredinđa te ćerel pe popis oto sa o manuša ano carstvo i adalese sare valjanđe te džan ki diz ani savi živinđe lengere preci. O Josif hem i Marija valjanđe te džan taro Nazaret, taro than kote živinđe, ko Vitlejem, adalese so o Vitlejem inele bijandi diz lengere pradadesiri, e Davidesiri.

![](https://cdn.door43.org/obs/jpg/360px/obs-en-23-05.jpg)

Ked resle ano Vitlejem, na inolen than kote te ačhoven. Inele samo jekh than savo šaj ine te arakhen, adava than inele i štala. O čhavoro bijandilo adathe, a lesiri daj čhivđa le ano jasle, adalese so na inolen kreveti olese. Dinđe le anav Isus.

![](https://cdn.door43.org/obs/jpg/360px/obs-en-23-06.jpg)

Adaja rat nesave pastirija paše uzalo lende arakhena ine pumare bakren. Otojekhvar, iklilo anglo lende jekh anđeo osvetlime bare svetloja. O pastirija but darandile. O anđeo phenđa lenđe: "Ma daran, adalese so anava tumenđe radosno lafi. Ano Vitlejem bijandilo o Mesija, o Gospodari!"

![](https://cdn.door43.org/obs/jpg/360px/obs-en-23-07.jpg)

"Roden e čhavore, i ka arakhen le sar pačardo pašljola ano jasle." Otojekhvar, o nebo pherdilo anđelencar kola slavinđe e Devle vaćerindoj: "Slava ko učipe e Devlese, a ki phuv mir e manušenđe kolencar o Devel zadovoljno."

![](https://cdn.door43.org/obs/jpg/360px/obs-en-23-08.jpg)

O pastirija resle ko than kote inele o Isus hem arakhle le sar pašljola ano jasle, sar so phenđa lenđe o anđeo. On inele but uzbudime. Palo adava, irinđe pe ko polje kote inele o bakre, slavindoj e Devle zako sa so šunđe hem so dikhlje.

![](https://cdn.door43.org/obs/jpg/360px/obs-en-23-09.jpg)

Palo nesavo vreme, o mudraci taro phuvja oto Durutno istok dikhlje ko nebo jekh neobično čereni. Xalile so adava značini da bijandilo nevo caro e Jevrejengoro. I ađahar putujinđe dur te dikhen adale caro. Ale ano Vitlejem hem arakhle o čher ano savo inele o Isus hem lesoro dad hem i daj.

![](https://cdn.door43.org/obs/jpg/360px/obs-en-23-10.jpg)

Ked o mudraci dikhlje e Isuse lesere dajaja, pokloninđe pe lese ađahar so pele anglo leste mujeja đi phuv hem obožavinđe le. Dinđe e Isusese skupa darovija, i tegani irinđe pe čhere.

*E biblijakiri paramiz taro Matej 1; Luka 2*

## 24. O Jovan krstini e Isuse

https://openbiblestories.org/l/rmy-x-vwa/story-24/

![](https://cdn.door43.org/obs/jpg/360px/obs-en-24-01.jpg)

O Jovan, o čhavo e Zaharijasoro hem e Jelisavetakoro, barilo hem ulo proroko. Živinđa ani pustinja, xala ine avđin hem skakavconen, hem akhari ine šeja ćerde e kamilakere balendar.

![](https://cdn.door43.org/obs/jpg/360px/obs-en-24-02.jpg)

But manuša džana ine ki pustinja te šunen e Jovane. Ov propovedini lenđe ine vaćerindoj: "Pokajinen tumen zako tumare greja, adalese soi o carstvo e Devlesoro paše!"

![](https://cdn.door43.org/obs/jpg/360px/obs-en-24-03.jpg)

Ked šunđe o manuša e Jovanesoro lafi, but đene olendar pokajinđe pe zako pumare greja, a o Jovan krstinđa len. Ale da but vođe e verakere te krstini len o Jovan, ali on na pokajinđe pe ni na priznajinđe pumare greja.

![](https://cdn.door43.org/obs/jpg/360px/obs-en-24-04.jpg)

O Jovan phenđa e verakere vođenđe: "Tumen injen sar o otrovna sapa! Pokajinen tumen hem promeninen tumaro ponašiba. Đijekh kaš savo na anela šukar bijandipe ka čhinel pe hem ka frdel pe ani jag." O Jovan ćerđa adava so phenđa o proroko: "Ače, bičhalava me glasniko angla tute, kova ka phravel će o drom."

![](https://cdn.door43.org/obs/jpg/360px/obs-en-24-05.jpg)

Nesave Jevreja pučle e Jovane nane li ov o Mesija. O Jovan phenđa lenđe: "Me na injum o Mesija, ali neko avela pala mande. Ovi edobor baro da me na injum dostojno ni lesere sandale te phravav.

![](https://cdn.door43.org/obs/jpg/360px/obs-en-24-06.jpg)

Aver dive, o Isus alo te krstini le o Jovan. Ked dikhlja le o Jovan, phenđa: "Dikhen! Ače o Bakroro e Devlesoro kova legari o greja akale phuvjakere manušengere."

![](https://cdn.door43.org/obs/jpg/360px/obs-en-24-07.jpg)

O Jovan phenđa e Isusese: "Na injum dostojno te krstinav tut. Tu valjani man te krstine." Ali o Isus phenđa lese: "Valjani te krstine man, adalese soi adava ispravno te ćerel pe." I ađahar, o Jovan krstinđa le, iako o Isus niked na grešinđa.

![](https://cdn.door43.org/obs/jpg/360px/obs-en-24-08.jpg)

Ked o Isus iklilo taro pani palo adava so inele krstime, o Duho e Devlesoro mothovđa pe ano oblik e golubesoro, hulilo hem ačhilo upro leste. Ko isto vreme, taro nebo šundilo e Devlesoro glaso: "Tu injan mlo Čhavo. Tut me mangava hem tuja injum but zadovoljno."

![](https://cdn.door43.org/obs/jpg/360px/obs-en-24-09.jpg)

O Devel angleder adalestar phenđa e Jovanese: "O Duh Sveti ka huljel hem ka ačhol upra nekaste kas ka krstine. Adavai manuš o Čhavo e Devlesoro." O Develi jekh. Ali, ked o Jovan krstinđa e Isuse, šunđa o vaćeriba e Devlesoro e Dadesoro, dikhlja e Devle e Čhave, e Isuse, hem dikhlja e Svetone Duho.

*E biblijakiri paramiz taro Matej 3; Marko 1,9–11; Luka 3,1–23*

## 25. O Sotoni kušini e Isuse

https://openbiblestories.org/l/rmy-x-vwa/story-25/

![](https://cdn.door43.org/obs/jpg/360px/obs-en-25-01.jpg)

Ked o Isus inele krstime, odmah o Sveto Duho legarđa le ani pustinja. Adari o Isus postinđa saranda dive hem saranda raća. Tegani o Sotoni alo koro Isus te pokušini te ćerel le te grešini.

![](https://cdn.door43.org/obs/jpg/360px/obs-en-25-02.jpg)

O Sotoni kušinđa e Isuse ađahar so phenđa: "Te injan o Čhavo e Devlesoro, ćer akava bar ano maro te šaj te xas!"

![](https://cdn.door43.org/obs/jpg/360px/obs-en-25-03.jpg)

O Isus phenđa lese: "Pisimei e Devlese ano Lafi: 'E manušenđe na valjani samo maro te šaj živinen, nego valjani lenđe te oven poslušna đijekhe e Devlesere lafese!"

![](https://cdn.door43.org/obs/jpg/360px/obs-en-25-04.jpg)

Tegani o Sotoni legarđa e Isuse ko naj učo than e Hramesoro hem phenđa lese: "Te injan o Čhavo e Devlesoro, frde tut tele, adalese soi pisime: 'O Devel ka naredini pe anđelenđe te akharen tut, i ađahar na ka khuve tut ni e preja ko bar.'"

![](https://cdn.door43.org/obs/jpg/360px/obs-en-25-05.jpg)

Ali, o Isus ko adava e Sotonese phenđa okova so pisini ko Sveto lil. Phenđa lese: "Pese ano Lafi, o Devel naredini pe narodose: 'Ma kušinen e Gospode, tumare Devle.'"

![](https://cdn.door43.org/obs/jpg/360px/obs-en-25-06.jpg)

Tegani o Sotoni mothovđa e Isusese sa o carstvija e phuvjakere hem sa lengiri slava hem phenđa: "Ka dav tut sa adava te peljan angla mande ko kočija hem te slavinđan man."

![](https://cdn.door43.org/obs/jpg/360px/obs-en-25-07.jpg)

O Isus phenđa: "Dža mandar, Sotone! Pese ano Lafi o Devel naredini ple narodose: 'Slavinen samo e Gospodare, tumare Devle, hem samo ole kanden.'"

![](https://cdn.door43.org/obs/jpg/360px/obs-en-25-08.jpg)

O Isus na pelo e Sotonese ko kušnje, i o Sotoni cidinđa pe olestar. Tegani ale o anđelja hem brininde pe zako Isus.

*E biblijakiri paramiz taro Matej 4,1–11; Marko 1,12–13; Luka 4,1–13*

## 26. O Isus lela te ćerel pli služba

https://openbiblestories.org/l/rmy-x-vwa/story-26/

![](https://cdn.door43.org/obs/jpg/360px/obs-en-26-01.jpg)

Palo adava so na pelo e Sotonese ko kušnje, o Isus irinđa pe ano zoralipe e Svetone Duhosoro ano krajo e Galilejakoro kaj živinđa. O Isus džala ine taro than ko than hem sikaj e manušen. Sare vaćerena ine šukar olestar.

![](https://cdn.door43.org/obs/jpg/360px/obs-en-26-02.jpg)

O Isus dželo ani diz Nazaret, kaj živinđa ked inele čhavoro. Ko savato dželo ko than kote slavini pe e Devle. Dinđe le o lil e prorokosoro e Isaijasoro te čitini adathar. O Isus phravđa o lil hem čitinđa o odlomko e manušenđe.

![](https://cdn.door43.org/obs/jpg/360px/obs-en-26-03.jpg)

O Isus čitinđa akava: "O Devel dinđa man pe Duho te šaj vaćerav o šukar lafi e čororenđe, da o phandle šaj te oven slobodna, da o korore šaj te dikhen, da o mučime šaj te oven slobodna. Akavai berš oti e Devlesiri milost."

![](https://cdn.door43.org/obs/jpg/360px/obs-en-26-04.jpg)

Tegani o Isus beštino. Sare dikhlje ano leste. Džanđe da adava odlomko oto lil savo šunđe vaćeri e Mesijastar. O Isus phenđa: "O lafija save čitinđum pherđona akana." O manuša inele iznenadime. Phenđe: "Nane li akava e Josifesoro čhavo?"

![](https://cdn.door43.org/obs/jpg/360px/obs-en-26-05.jpg)

Tegani o Isus phenđa: "Čačei adava da nijekh proroko nane prihvatime pese ani bijandi diz. E Ilijase ko vreme inele but udovice ano Izrael. Ali ked trin berš na pelo bršin, o Devel na bičhalđa e Ilija te pomožini nesava udovicaće ano Izrael, nego e udovicaće oto aver narodo."

![](https://cdn.door43.org/obs/jpg/360px/obs-en-26-06.jpg)

O Isus phenđa hem akava: "Ađahar da, ko vreme e Elisejesoro ano Izrael inele but manuša e kožakere nambormipaja. Ali o Elisej na sasljarđa nijekhe olendar. Sasljarđa samo e kožakoro nambormipe savo inele e Naamane, e Izraelesere neprijateljesere naredniko." O manuša kola šunena ine e Isuse inele Jevreja. Ked šunđe so vaćeri, but inele xoljame upro leste.

![](https://cdn.door43.org/obs/jpg/360px/obs-en-26-07.jpg)

O dizutne taro Nazaret ikalde e Isuse taro than kote slavini pe e Devle hem legarde le upre ko brego kotar mangle te frden le te mudaren le. Ali, o Isus nakhino maškar olende hem cidinđa pe tari diz Nazaret.

![](https://cdn.door43.org/obs/jpg/360px/obs-en-26-08.jpg)

Tegani o Isus nakhino maškaro krajo e Galilejakoro, a but đene ale koro leste. Anena ine koro leste bute manušen kola inele namborme ili sakatime, hem okolen kola na dikhlje, na phirđe, na šunđe ili na vaćerđe, a o Isus sasljari len ine.

![](https://cdn.door43.org/obs/jpg/360px/obs-en-26-09.jpg)

Anena ine koro Isus bute manušen ano kolende inele demonja. Ked o Isus naredini lenđe ine, o demonja ikljovena e manušendar, hem but puti vičinena ine: "Tu injan o Čhavo e Devlesoro!" But manuša inele zadivime hem slavinena ine Devle.

![](https://cdn.door43.org/obs/jpg/360px/obs-en-26-10.jpg)

Palo adava, o Isus birinđa dešuduje muršen kolen vičinđa apostolja. O apostolja džana ine dromeja palo Isus hem sikljovena ine olestar.

*E biblijakiri paramiz taro Matej 4,12–25; Marko 1,14–15, 35-39; 3,13–21; Luka 4,14–30, 38-44*

## 27. I paramiz e šukare Samarijancostar

https://openbiblestories.org/l/rmy-x-vwa/story-27/

![](https://cdn.door43.org/obs/jpg/360px/obs-en-27-01.jpg)

Jekh dive, jekh manuš kova šukar džanđa e jevrejengoro zakoni alo koro Isus te kušini le. Pučlja le: "Učitelju, so valjani te ćerav te šaj ovel man večno dživdipe?" O Isus phenđa lese: "So pisini adalestar ano zakoni e Devlesoro?"

![](https://cdn.door43.org/obs/jpg/360px/obs-en-27-02.jpg)

O manuš kova šukar džanđa o zakoni phenđa da o zakoni e Devlesoro vaćeri: "Čumudin e Gospode, te Devle, sa te vileja, sa te dušaja, te zoralipnaja hem te gođaja. Hem mang te pašutne sar korkore tut." O Isus phenđa lese: "Oja, ađahari! Ćer ađahar hem ka živine."

![](https://cdn.door43.org/obs/jpg/360px/obs-en-27-03.jpg)

Ali o manuš manglja te mothoj dai pravedno, i pučlja e Isuse: "A koi mlo pašutno?"

![](https://cdn.door43.org/obs/jpg/360px/obs-en-27-04.jpg)

Ko adava, o Isus vaćerđa lese akaja paramiz: "Inele jekh Jevrejco kova džala ine dromeja tari diz Jerusalim ki diz Jerihon."

![](https://cdn.door43.org/obs/jpg/360px/obs-en-27-05.jpg)

"Sar o manuš džala ine dromeja, napadinđe le o čora. Lelje lestar sa so inole hem edobor marđe le da o manuš samo so na ine te merel. Tegani dželefse."

![](https://cdn.door43.org/obs/jpg/360px/obs-en-27-06.jpg)

"Na nakhino but, jekh svešteniko e jevrejengoro phirela ine adale dromeja. Ked adava vođa e verakoro dikhlja e manuše kole čorđe hem marđe, nakhino ki aver strana e dromesiri, na pomožinđa e manušese hem dželo pe dromeja."

![](https://cdn.door43.org/obs/jpg/360px/obs-en-27-07.jpg)

"Na nakhino but palo adava, adale dromeja nakhino jekh levit. (O levitija inele pleme e jevrejengoro savo pomožini ine e sveštenikonenđe ano hram.) O levit da nakhino ki aver strana e dromesiri hem na manglja te pomožini e manušese kole čorđe hem marđe."

![](https://cdn.door43.org/obs/jpg/360px/obs-en-27-08.jpg)

"Aver manuš kova nakhino adale dromeja inele Samarijanco. (O Samarijanci inele potomci e Jevrejengere kola lena pe ine e manušencar oto avera nacije. O Samarijanci hem o Jevreja mrzinđe pe.) Ali, ked o Samarijanco dikhlja e Jevrejco, but inolese phare olese. Adalese pobrininđa pe olese hem paćarđa lesere rane."

![](https://cdn.door43.org/obs/jpg/360px/obs-en-27-09.jpg)

"Tegani o Samarijanco vazdinđa e manuše upro po xer hem legarđa le ko čher kote lovenđe šaj te xal pe hem te sovel pe, i adari brininđa pe olestar."

![](https://cdn.door43.org/obs/jpg/360px/obs-en-27-10.jpg)

"Aver dive, o Samarijanco valjanđa te nastavini po drom. Dinđa nekobor love e čherutnese hem phenđa lese: "Pobrinin tut olese, a te trošinđan buderi akale lovendar, me ka irinav će ked ka irinav oto drom."

![](https://cdn.door43.org/obs/jpg/360px/obs-en-27-11.jpg)

Tegani o Isus pučlja e manuše kova šukar džanđa o zakoni: "So mislineja? Kova akale trinendar inele pašutno e manušese kole čorđe hem marđe?" A ov phenđa: "Okova kova inolese milosrdno." O Isus phenđa lese: "Dža hem tu ćer ađahar."

*E biblijakiri paramiz taro Luka 10,25–37*

## 28. O barvalo terno

https://openbiblestories.org/l/rmy-x-vwa/story-28/

![](https://cdn.door43.org/obs/jpg/360px/obs-en-28-01.jpg)

Jekh dive, jekh barvalo terno manuš alo koro Isus hem pučlja le: "Učitelju šukareja, so te ćerav te šaj ovel man večno dživdipe?" O Isus phenđa lese: "Sose vičineja man 'Šukareja'? Isi samo jekh kovai šukar, a adavai o Devel. Ali, te mangljan te ovel tut večno dživdipe, ov poslušno e Devlesere zakonenđe."

![](https://cdn.door43.org/obs/jpg/360px/obs-en-28-02.jpg)

O terno pučlja le: "Zako save zapovedija olendar valjani te ovav poslušno?" O Isus phenđa: "Ma mudar. Ma ćer preljuba. Ma čor. Ma xovav. Poštujin te dade hem te daja, hem mang te pašutne sar korkore tut."

![](https://cdn.door43.org/obs/jpg/360px/obs-en-28-03.jpg)

Ali o terno phenđa lese: "Taro tikvarila injum poslušno adale zakonenđe. So pana valjani te ćerav te šaj živinav večno?" O Isus dikhlja le hem osetinđa saosećanje premalo leste.

![](https://cdn.door43.org/obs/jpg/360px/obs-en-28-04.jpg)

O Isus phenđa lese: "Te mangljan te ove savršeno, dža biknin sa so isi tut hem de o love e čororenđe, i ka ovel tut barvalipe ano nebo. Tegani ava hem phir pala mande."

![](https://cdn.door43.org/obs/jpg/360px/obs-en-28-05.jpg)

Ked o terno šunđa so phenđa o Isus, but rastužisalo, adalese so inele but barvalo hem na manglja te del sa so inole. Irinđa pe hem dželo e Isusestar.

![](https://cdn.door43.org/obs/jpg/360px/obs-en-28-06.jpg)

Tegani o Isus phenđa pe učenikonenđe: "Pharoi but e barvalenđe te đerdinen ano carstvo e Devlesoro! Čače, po lokhei e kamilaće te nakhel maškaro kan e suvjakoro nego e barvalese te đerdini ano carstvo e Devlesoro."

![](https://cdn.door43.org/obs/jpg/360px/obs-en-28-07.jpg)

Ked šunđe o učenici so phenđa o Isus, ule začudime hem pučle: "Ko onda šaj te spasini pe?"

![](https://cdn.door43.org/obs/jpg/360px/obs-en-28-08.jpg)

O Isus dikhlja ano pe učenici hem phenđa: "E manušenđe adava nane moguće, ali e Devlese sai moguće."

![](https://cdn.door43.org/obs/jpg/360px/obs-en-28-09.jpg)

O Petar phenđa e Isusese: "Amen ačhavđam sa hem phiraja pala tute. So ka ovel amari nagrada?"

![](https://cdn.door43.org/obs/jpg/360px/obs-en-28-10.jpg)

O Isus phenđa lese: "Sare kola ačhavđe po čher, pe phraljen, pe phenjen, pe dade, pe daja, pe čhaven ili po imanje zbog maje, ka priminen šel puti više hem ka ovel len večno dživdipe. Ali, but kolai prva ka oven poslednja, a but kolai poslednja ka oven prva."

*E biblijakiri paramiz taro Matej 19,16–30; Marko 10,17–31; Luka 18,18–30*

## 29. Paramiz e nemilosrdnone slugastar

https://openbiblestories.org/l/rmy-x-vwa/story-29/

![](https://cdn.door43.org/obs/jpg/360px/obs-en-29-01.jpg)

Jekh dive, o Petar pučlja e Isuse: "Gospodarona, kobor puti valjani te oprostinav mle phralese ked grešini premala mande? Đi ko efta puti?" O Isus phenđa lese: "Na efta puti, nego eftavardeš puta efta!" Akaleja o Isus mislinđa da valjani uvek te oprostina. O Isus vaćerđa akaja paramiz.

![](https://cdn.door43.org/obs/jpg/360px/obs-en-29-02.jpg)

O Isus phenđa: "O carstvo e Devlesoroi sar o caro kova mangela te rešini o računja ple slugencar. Jekh sluga inole dugo baro sar plata zako 200.000 berša."

![](https://cdn.door43.org/obs/jpg/360px/obs-en-29-03.jpg)

"Adalese so o sluga našti ine te irini o dugo, o caro phenđa: 'Bikninen akale manuše hem lesere čherutnen sar robonen te šaj adaleja irini pe lesoro dugo.'"

![](https://cdn.door43.org/obs/jpg/360px/obs-en-29-04.jpg)

"O sluga pelo ko kočija anglo caro hem phenđa: 'Molinava tut ov strpljivo mancar i ka irinav će sa so dugujinava će.' O caro smilujinđa pe, oprostinđa lese o dugo hem muklja le."

![](https://cdn.door43.org/obs/jpg/360px/obs-en-29-05.jpg)

"Ali ked adava sluga dželo e carostar, reslja avere sluga kova lese dugujinđa dugo baro sar plata zako štar masek. Ov dolinđa le hem phenđa lese: 'Irin maje o love save dugujineja maje!'"

![](https://cdn.door43.org/obs/jpg/360px/obs-en-29-06.jpg)

"O aver sluga pelo ko kočija hem phenđa: 'Molinava tut ov strpljivo mancar i ka irinav će sa so dugujinava će.' Ali, so te ćerel adava, o prvo sluga frdinđa e dujtone sluga ano phandlipe đikote na irini plo dugo."

![](https://cdn.door43.org/obs/jpg/360px/obs-en-29-07.jpg)

"Nesave avera sluge dikhlje adava so ulo hem but ine lenđe pharo. Džele koro caro hem sa vaćerđe lese."

![](https://cdn.door43.org/obs/jpg/360px/obs-en-29-08.jpg)

"O caro vičinđa e prvone sluga hem phenđa lese: 'Tu injan bišukar sluga! Oprostinđum će edobor baro dugo samo adalese so zorale molinđan man. Tu valjanđan te ćere isto ađahar.' O caro edobor inele xoljame da frdinđa e bišukare sluga ano phandlipe đikote na irini sa so dugujini."

![](https://cdn.door43.org/obs/jpg/360px/obs-en-29-09.jpg)

Tegani o Isus phenđa: "Akava mlo nebesko Dad ka ćerel đijekhese tumendar te na oprostinđen tumare phralese oto vilo."

*E biblijakiri paramiz taro Matej 18,21–35*

## 30. O Isus parvari pandž hiljade manušen

https://openbiblestories.org/l/rmy-x-vwa/story-30/

![](https://cdn.door43.org/obs/jpg/360px/obs-en-30-01.jpg)

O Isus bičhalđa ple apostolen te propovedinen hem te sikaven e manušen ano but gava. Ked irinđe pe koro Isus, phenđe lese sa so ćerđe. Tegani o Isus vičinđa len te džan oleja ko mirno than prekalo jezero te odmorinen pe xari. Adalese đerdinđe ano čamco hem džele ki aver strana e jezerosiri.

![](https://cdn.door43.org/obs/jpg/360px/obs-en-30-02.jpg)

Ali, but manuša dikhlje e Isuse hem e učenikonen ked džele ano čamco. Adala manuša prastandile e phuvjaja uzalo jezero sar te resen ki aver strana angleder olendar. I ađahar, ked o Isus hem o učenici resle, pherdo đene već adari adžićerena len ine.

![](https://cdn.door43.org/obs/jpg/360px/obs-en-30-03.jpg)

Adathe inele prekalo 5.000 murša, bizo te đenel pe e đuvljen hem e čhavoren. E Isusese pelo žao zako adala manuša. Ov dikhlja len dai on sar bakre bizo pastiri. Adalese sikaj len ine hem sasljari e nambormen kola inele maškaro lende.

![](https://cdn.door43.org/obs/jpg/360px/obs-en-30-04.jpg)

Ked lelja te nakhel o dive, o učenici phenđe e Isusese: '"Nakhela o dive, a o dizjai dur amendar. Bičhal e manušen te džan, te šaj činenfse nešto zako xajba."

![](https://cdn.door43.org/obs/jpg/360px/obs-en-30-05.jpg)

Ali, o Isus phenđa ple učenikonenđe: "Den len tumen nešto zako xajba!" On phenđe: "Ali, sar te ćera adava? Isi amen samo pandž mare hem duj tikore maćhe."

![](https://cdn.door43.org/obs/jpg/360px/obs-en-30-06.jpg)

O Isus phenđa e učenikonenđe te vaćeren e manušenđe te bešen ki čar ko kupe po pinda đene.

![](https://cdn.door43.org/obs/jpg/360px/obs-en-30-07.jpg)

Tegani o Isus lelja o pandž mare hem o duj maćhe, dikhlja naupre hem zahvalinđa e Devlese zako xajba.

![](https://cdn.door43.org/obs/jpg/360px/obs-en-30-08.jpg)

Tegani o Isus phaglja o mare hem e maćhen ko kotora. O kotora dinđa e učenikonende te den e manušenđe. O učenici ulavđe o xajba, a na ine te na ačhol. Sa o manuša xalje hem čalile.

![](https://cdn.door43.org/obs/jpg/360px/obs-en-30-09.jpg)

Palo adava, o učenici čedinđe o kotora save o manuša na xalje, a ačhilo edobor da šaj ine te pheren pe dešuduj korpe! Sa adava xajba alo oto pandž mare hem duj maćhe.

*E biblijakiri paramiza taro Matej 14,13–21; Marko 6,31–44; Luka 9,10–17; Jovan 6,5–15*

## 31. O Isus phirela upro pani

https://openbiblestories.org/l/rmy-x-vwa/story-31/

![](https://cdn.door43.org/obs/jpg/360px/obs-en-31-01.jpg)

Palo adava, o Isus phenđa ple učenikonenđe te đerdinen ano čamco hem te džan ki aver strana e jezerosiri, dok ov vaćeri e narodose te džanfse čhere. Ked bičhalđa e narodo čhere, uklinđa ki planina te molini pe. O Isus adari inele korkoro, a molinđa pe đi ki ekvaš i rat.

![](https://cdn.door43.org/obs/jpg/360px/obs-en-31-02.jpg)

Ko adava vreme, o učenici veslinđe ano čamco, ali đi ki ekvaš i rat resle đi ko ekvaš o jezero. But ine lenđe pharo te veslinen adalese so phudinđa i barval premalo lende.

![](https://cdn.door43.org/obs/jpg/360px/obs-en-31-03.jpg)

Ked o Isus završinđa i molitva, dželo koro učenici. Phirđa upro pani prekalo jezero nakoro lengoro čamco!

![](https://cdn.door43.org/obs/jpg/360px/obs-en-31-04.jpg)

O učenici but darandile ked dikhlje e Isuse, adalese so mislinđe da dikhena duho. O Isus džanđa da darana, i vičinđa len hem phenđa: "Ma daran. Me injum!"

![](https://cdn.door43.org/obs/jpg/360px/obs-en-31-05.jpg)

Tegani o Petar phenđa e Isusese: "Gospode, te injan tu, naredin maje te avav kora tute upro pani." O Isus phenđa e Petrese: "Ava!"

![](https://cdn.door43.org/obs/jpg/360px/obs-en-31-06.jpg)

I ađahar o Petar iklilo taro čamco hem lelja te phirel upro pani nakoro Isus. Ali, palo adava so xari phirđa upro pani, irinđa plo dikhiba e Isusestar hem lelja te dikhel o talasija hem te osetini zorali barval.

![](https://cdn.door43.org/obs/jpg/360px/obs-en-31-07.jpg)

Tegani o Petar darandilo hem lelja te tasljol ano pani. Vičinđa: "Gospode, spasin man!" O Isus odmah telilo hem dolinđa le. Tegani phenđa e Petrese: "Tikora verakere manušeja, sose sumnjinđan?"

![](https://cdn.door43.org/obs/jpg/360px/obs-en-31-08.jpg)

Ked o Petar hem o Isus đerdinđe ano čamco, i barval odmah ačhili hem o pani smirinđa pe. O učenici inele zadivime, pele ko kočija anglo Isus hem vaćerđe lese: "Čače, tu injan o Čhavo e Devlesoro."

*E biblijakiri paramiz taro Matej 14,22–33; Marko 6,45–52; Jovan 6,16–21*

## 32. O Isus sasljari e opsednutime manuše hem e namborma đuvlja

https://openbiblestories.org/l/rmy-x-vwa/story-32/

![](https://cdn.door43.org/obs/jpg/360px/obs-en-32-01.jpg)

Jekh dive, o Isus hem lesere učenici čamcoja nakhle prekalo jezero ki regija kote živinđe o Geresinci.

![](https://cdn.door43.org/obs/jpg/360px/obs-en-32-02.jpg)

Ked resle ki dujto strana e jezerosiri, nakoro Isus prastandilo jekh manuš ano koleste inele demonja.

![](https://cdn.door43.org/obs/jpg/360px/obs-en-32-03.jpg)

Adava manuš inele but zoralo da niko našti ine te smirini le. O manuša phandena ine lesere pre hem lesere vasta lanconencar, ali ov stalno čhinela len ine.

![](https://cdn.door43.org/obs/jpg/360px/obs-en-32-04.jpg)

Ov živinđa maškaro grobija ki adaja regija. Vrištini ine sa o dive hem i rat. Na akharđa šeja hem stalno čhinela pe ine barencar.

![](https://cdn.door43.org/obs/jpg/360px/obs-en-32-05.jpg)

Ked adava manuš alo koro Isus, pelo anglo leste ko kočija. O Isus phenđa e demonese: "Ikljov akale manušestar!"

![](https://cdn.door43.org/obs/jpg/360px/obs-en-32-06.jpg)

O manuš ano koleste inele demonja vičinđa bare glasoja: "So mangeja mandar Isuse, Čhaveja e Najbare Devlesereja? Molinava tut, ma mučin man!" Tegani o Isus pučlja e demone: "Sari to anav?" Ov phenđa lese: "Mo anavi Legija adalese so but đene injam." ("Legija" inele grupa oto nekobor hiljade manuša ani e rimesiri vojska.)

![](https://cdn.door43.org/obs/jpg/360px/obs-en-32-07.jpg)

O demonja zorale molinđe e Isuse: "Molinaja tut, ma bičhal amen taro akava krajo." Adari inele krdo oto bale save xana ine ko pašutno brego. Adalese o demonja zorale molinđe e Isuse: "Molinaja tut, so te ispudine amen akatar, bolje bičhal amen ano bale!" O Isus phenđa lenđe: "Džan!"

![](https://cdn.door43.org/obs/jpg/360px/obs-en-32-08.jpg)

O demonja iklile taro manuš hem đerdinđe ano bale. O bale prastandile natele ano jezero hem taslile. Inele đi ko 2.000 bale ano adava krdo.

![](https://cdn.door43.org/obs/jpg/360px/obs-en-32-09.jpg)

Ked o manuša kola arakhena ine balen dikhlje so ulo, prastandile ki diz hem vaćerđe sarijenđe so dikhlje so o Isus ćerđa. O manuša tari diz ale te dikhen e manuše ano koleste inele demonja. Bešlo mirno, akharđa šeja hem ponašinđa pe sar normalno manuš.

![](https://cdn.door43.org/obs/jpg/360px/obs-en-32-10.jpg)

O manuša but darandile hem phenđe e Isusese te džalfse. I ađahar, o Isus đerdinđa ano čamco hem spreminđa pe te džal. O manuš ano koleste angleder inele demonja zorale molinđa e Isuse te džal oleja.

![](https://cdn.door43.org/obs/jpg/360px/obs-en-32-11.jpg)

Ali, o Isus phenđa lese: "Na, mangava te dža čhere hem te vaćere te amalenđe hem te čherutnenđe sa so o Devel ćerđa će hem sar smilujinđa pe će."

![](https://cdn.door43.org/obs/jpg/360px/obs-en-32-12.jpg)

Adalese o manuš dželo hem sarijenđe vaćerđa so o Isus ćerđa lese. Sare kola šunđe lesoro vaćeriba ule but začudime hem zadivime.

![](https://cdn.door43.org/obs/jpg/360px/obs-en-32-13.jpg)

O Isus irinđa pe ki aver strana e jezerosiri. Ked reslja adari, pherdo đene čedinđe pe uzalo leste hem gurinđe pe ano leste. Maškaro lende inele jekh đuvli koja dešuduj berš patinđa oto thavdiba e ratesoro. Sa ple love dinđa e doktorenđe te sasljaren la, ali olaće inele sa po bišukar.

![](https://cdn.door43.org/obs/jpg/360px/obs-en-32-14.jpg)

Šunđa so o Isus sasljarđa bute nambormen hem mislinđa pe: "Sigurno injum da hem me ka sasljovav samo so ka dolav man upro e Isusesere šeja." Adalese čhivđa pe palo Isus hem dolinđa pe upro lesere šeja. Ked dolinđa le, o thavdiba e ratesoro ačhilo.

![](https://cdn.door43.org/obs/jpg/360px/obs-en-32-15.jpg)

O Isus odmah xalilo da o zoralipe iklilo olestar. Adalese irinđa pe hem pučlja: "Ko dolinđa man?" O učenici phenđe lese: "Isi edobor manuša kola gurinena pe uzala tute hem ana tute. Sose pučeja ko dolinđa tut?"

![](https://cdn.door43.org/obs/jpg/360px/obs-en-32-16.jpg)

I đuvli peli ko kočija anglo Isus hem tresinđa pe oti dar. Tegani phenđa e Isusese so ćerđa, hem da saslili. O Isus phenđa laće: "Ti vera sasljarđa tut. Dža ano mir."

*E biblijakiri paramiz taro Matej 8,28–34; 9,20–22; Marko 5,1–20; 5,24b–34; Luka 8,26–39; 8,42b–48*

## 33. Paramiz e sejačestar

https://openbiblestories.org/l/rmy-x-vwa/story-33/

![](https://cdn.door43.org/obs/jpg/360px/obs-en-33-01.jpg)

Jekh dive, o Isus sikaj ine bute manušen uzali obala e jezerosiri. Edobor manuša ale te šunen le, da o Isus đerdinđa ano čamco savo inele ikaldo ki obala uzalo pani sar te šaj ovel le dovoljno than te vaćeri lenđe. Beštino ano čamco hem sikavđa e narodo.

![](https://cdn.door43.org/obs/jpg/360px/obs-en-33-02.jpg)

O Isus vaćerđa lenđe akaja paramiz: "Jekh sejači iklilo te frdel seme. Sar ine vasteja frdela o seme, nesavo seme perela ine ko drom, i ađahar avena ine o čiriklja hem xana sa adava seme."

![](https://cdn.door43.org/obs/jpg/360px/obs-en-33-03.jpg)

"Aver seme perela ine ko than ano saveste inele više bara nego phuv. O seme savo pelo ko adava than sigate ine barjola, ali o koreno našti ine te đerdini ano xor e phuvjakoro. Ked o kham iklilo hem ked ulo tatipe, o biljke šućile hem mule."

![](https://cdn.door43.org/obs/jpg/360px/obs-en-33-04.jpg)

"A palem, aver seme perela ine maškaro kare. Ov ine lela te barjol, ali o kare tasavena le ine. Adalese, o biljke save barjona ine taro seme savo perela ine maškaro kare na dinđe nisavo bijandipe."

![](https://cdn.door43.org/obs/jpg/360px/obs-en-33-05.jpg)

"A aver seme perela ine ki šukar phuv. Ov barjola ine hem dela 30, 60 ili đi 100 puti više semenja nego so inele sadime. Phraven tumare kana te šunen!"

![](https://cdn.door43.org/obs/jpg/360px/obs-en-33-06.jpg)

Akaja paramiz zbuninđa lesere učenikonen. Adalese o Isus objasninđa: "O semei e Devlesoro lafi. O drom predstavini e manuše kova šunela e Devlesoro lafi, ali na xaljola le, i ađahar o beng lela lestar o lafi."

![](https://cdn.door43.org/obs/jpg/360px/obs-en-33-07.jpg)

"O than kote isi but bara predstavini e manuše kova šunela e Devlesoro lafi hem lela le radosno. Ali, ked avena lese o poteškoće ili o progonstvo, perela hem na džala više palo Devel."

![](https://cdn.door43.org/obs/jpg/360px/obs-en-33-08.jpg)

"O than kote isi kare predstavini e manuše kova šunela e Devlesoro lafi, ali sar o vreme nakhela, ađahar o brige, o barvalipe hem o šukaripe akala phuvjakoro tasavena lesoro manglipe premalo Devel. I sar rezultat adalestar, o sikajba savo šunđa na dela bijandipe."

![](https://cdn.door43.org/obs/jpg/360px/obs-en-33-09.jpg)

"Ali, i šukar phuv predstavini e manuše kova šunela e Devlesoro lafi, verujini lese hem anela bijandipe."

*E biblijakiri paramiz taro Matej 13,1–8, 18-23; Marko 4,1–8, 13-20; Luka 8,4–15*

## 34. O Isus sikaj avera paramiza

https://openbiblestories.org/l/rmy-x-vwa/story-34/

![](https://cdn.door43.org/obs/jpg/360px/obs-en-34-01.jpg)

O Isus vačerđa but avera paramiza e Devlesere carstvostar. Jekh primer, vaćerđa: "O carstvo e Devlesoroi sar o seme oti gorušica save neko sadinđa pese ki njiva. Džanen dai o seme oti gorušica najtikoro seme oto sa saven o manuša sadinena."

![](https://cdn.door43.org/obs/jpg/360px/obs-en-34-02.jpg)

"Ali, ked o seme oti gorušica barjola, ov ovela po baro sa e biljkendar ki bašta. Edobori baro da đi o čiriklja šaj te aven hem te odmorinen pe upro lesere granke."

![](https://cdn.door43.org/obs/jpg/360px/obs-en-34-03.jpg)

O Isus vaćerđa pana jekh paramiz: "O carstvo e Devlesoroi sar o kvasco save i đuvli čhivela ano humer, savo palo adava širini pe ko sa o humer."

![](https://cdn.door43.org/obs/jpg/360px/obs-en-34-04.jpg)

"O carstvo e Devlesoroi, isto ađahar, sar o blago savo neko garavđa ani njiva. Nesavo aver manuš arakhlja o blago, i palem parunđa le. Edobor inele radosno, da dželo hem bikninđa sa so inole, i e lovencar činđa adaja njiva."

![](https://cdn.door43.org/obs/jpg/360px/obs-en-34-05.jpg)

"O carstvo e Devlesoroi, isto ađahar, sar o savršeno biseri savo inele but skupo. Ked o trgovco arakhi le, biknela sa so isi le hem činela le adale lovencar."

![](https://cdn.door43.org/obs/jpg/360px/obs-en-34-06.jpg)

Tegani o Isus vaćerđa jekh paramiz e manušenđe kasoro pouzdanje inele ano pumare šukar delja, a but mrzinena ine avere manušen. Phenđa lenđe: "Duj manuša džele ano Hram te molinen pe. Jekh olendar inele cariniko, a o dujto inele e verakoro vođa."

![](https://cdn.door43.org/obs/jpg/360px/obs-en-34-07.jpg)

"E verakoro vođa molinđa pe ađahar: 'Hvala će, Devla, so na injum edobor baro grešniko sar avera manuša - sar o čora, o nepravednici, o preljubnici, ili sar akava cariniko.'"

![](https://cdn.door43.org/obs/jpg/360px/obs-en-34-08.jpg)

"'Na primer, postinava duj puti ko kurko hem dava dešto kotor oto sa o love hem oto sa so isi man.'"

![](https://cdn.door43.org/obs/jpg/360px/obs-en-34-09.jpg)

"A o cariniko terdino dur e verakere vođastar hem uopšte na dikhlja naupre. Umesto adava, ov khuvela pe ine ko gruđa hem molini pe: 'Devla, molinava tut, smilujin tut maje adalese so injum grešniko.'"

![](https://cdn.door43.org/obs/jpg/360px/obs-en-34-10.jpg)

Tegani o Isus phenđa: "Čače phenava tumenđe: o Devel šunđa i molitva e carinikosiri hem smatrinđa le sar pravednone. Ali, na sviđinđa pe lese i molitva e verakere vođasiri. O Devel ka peraj đijekhe kovai barikano, a ka vazdel okole kova ponizini pe."

*E biblijakiri paramiz taro Matej 13,31–33, 44-46; Marko 4,30–32; Luka 13,18–21; 18,9–14*

## 35. Paramiz e žalostivnone dadestar

https://openbiblestories.org/l/rmy-x-vwa/story-35/

![](https://cdn.door43.org/obs/jpg/360px/obs-en-35-01.jpg)

Jekh dive, o Isus sikaj ine bute carinikonen hem avere grešnikonen kola čedinđe pe te šunen le.

![](https://cdn.door43.org/obs/jpg/360px/obs-en-35-02.jpg)

Nesave e verakere vođe kola inele adari oleja, dikhlje so o Isus premalo grešnici ponašini pe sar premalo amala, i lelje maškara pumende te kritikujinen le. Adalese o Isus vaćerđa lenđe akaja paramiz.

![](https://cdn.door43.org/obs/jpg/360px/obs-en-35-03.jpg)

"Inele jekh manuš kole ine duj čhave. O tikneder čhavo phenđa ple dadese: 'Dade, mangava odmah te de man mlo kotor oto barvalipe klo!' I ađahar, o dad ulavđa plo barvalipe ple duje čhavenđe."

![](https://cdn.door43.org/obs/jpg/360px/obs-en-35-04.jpg)

"O tikneder čhavo čedinđa sa so inole, dželo ki durutni phuv hem xalja sa ple love živindoj grešno."

![](https://cdn.door43.org/obs/jpg/360px/obs-en-35-05.jpg)

"Palo adava, ki phuv kote živinđa o tikneder čhavo alo baro bokhalipe, a ole na inele love te činel xajbnase. Adalese lelja te ćerel jedino buti savi šaj ine te arakhi: parvarđa e balen. Edobor inele napatime hem bokhalo, da manglja te xal adava so xana o bale."

![](https://cdn.door43.org/obs/jpg/360px/obs-en-35-06.jpg)

"Konačno, o tikneder čhavo vaćerđa korkoro pese: 'So ćerava me adava? Sa o sluge mle dadesere isi len sa edobor xajbnase, a me akate merava bokhatar. Ka irinav man mle dadese hem ka molinav le te lel man sar jekhe ple slugendar.'"

![](https://cdn.door43.org/obs/jpg/360px/obs-en-35-07.jpg)

"I ađahar o tikneder čhavo lelja te irini pe ple dadesere čhereste. Sar pana inele dur, o dad dikhlja le hem pelo lese žal olese. Prastandilo nakoro čhavo, zagrlinđa le hem čumudinđa le."

![](https://cdn.door43.org/obs/jpg/360px/obs-en-35-08.jpg)

"O čhavo phenđa: 'Dade, grešinđum anglo Devel hem angla tute. Na injum više dostojno te ovav to čhavo.'"

![](https://cdn.door43.org/obs/jpg/360px/obs-en-35-09.jpg)

"Ali, lesoro dad phenđa jekhese ple slugendar: 'Siđar dža hem ana o najšuže šeja hem hurjav mle čhave! Čhiv lese i angrustik ko naj hem o sandale ko pre. Tegani čhinen e najšuže telco te šaj te xa hem te slavina, adalese so mlo čhavo inele mulo, ali akanai dživdo! Inele našaldo, ali akanai arakhlo!'"

![](https://cdn.door43.org/obs/jpg/360px/obs-en-35-10.jpg)

"I ađahar, o manuša lelje te slavinen. Na nakhino but, o phureder čhavo alo čhere tari buti savi ćerđa ki njiva. Šunđa bašaliba hem čheliba, i pučlja pe so šaj te ovel adava."

![](https://cdn.door43.org/obs/jpg/360px/obs-en-35-11.jpg)

"Ked o phureder čhavo šunđa so slavinena adalese so lesoro phral irinđa pe čhere, but xoljanđa i na manglja te đerdini ko čher. Lesoro dad iklilo hem molinđa le te đerdini te slavini olencar, ali ov na manglja."

![](https://cdn.door43.org/obs/jpg/360px/obs-en-35-12.jpg)

"O phureder čhavo phenđa ple dadese: 'Sa akala berša kandava tut! Niked na injumle će neposlušno, a tu na dinđan man ni buzore te šaj te veselinav man mle amalencar. A ked akava to čhavo, kova xalja sa te love živindoj grešno, irinđa pe čhere, tu čhinđan lese e najšukare telco!'"

![](https://cdn.door43.org/obs/jpg/360px/obs-en-35-13.jpg)

"O dad phenđa lese: 'Mlo čhavo, tu stalno injan mancar. I sa soi mlo-kloi. Ali, avela ano redo te slavina, adalese so to phral inele mulo, ali akanai dživdo, inele našaldo, ali akanai arakhlo!'"

*E biblijakiri paramiz taro Luka 15,11–32*

## 36.  Preobraženje

https://openbiblestories.org/l/rmy-x-vwa/story-36/

![](https://cdn.door43.org/obs/jpg/360px/obs-en-36-01.jpg)

Jekh dive, o Isus peja legarđa ple trine učenikonen: e Petre, e Jakove hem e Jovane. (O učeniko kova vičinđa pe Jovan na inele okova kova krstinđa e Isuse.) Uštine ki uči planina te oven korkore hem te molinen pe.

![](https://cdn.door43.org/obs/jpg/360px/obs-en-36-02.jpg)

Sar o Isus molini pe ine, lesoro muj ulo sjajno sar o kham hem lesere šeja ule parne sar o svetlost, po parne nego so šaj neko ki phuv te parnjari.

![](https://cdn.door43.org/obs/jpg/360px/obs-en-36-03.jpg)

Tegani iklile nekotar o Mojsije hem o proroko o Ilija. Adala manuša živinđe ki phuv više oto šel berša angleder adalestar. Vaćerđe e Isuseja lesere meribnastar, savo valjanđa sigende te ovel ano Jerusalim.

![](https://cdn.door43.org/obs/jpg/360px/obs-en-36-04.jpg)

Sar o Mojsije hem o Ilija vaćerena ine e Isuseja, o Petar phenđa e Isusese: "Šukari amenđe te ova akate. Te ćera trin šatorja, jekh tuće, jekh e Mojsijase, a jekh e Ilijase." O Petar na džanđa so vaćeri.

![](https://cdn.door43.org/obs/jpg/360px/obs-en-36-05.jpg)

Sar o Petar vaćeri ine, o osvetlime oblako hulilo hem okružinđa len, a taro oblako šundilo e Devlesoro glaso: "Akavai mlo Čhavo kole mangava. Oleja injum zadovoljno. Ole valjani te šunen." O trin učenici darandile hem telile ki phuv.

![](https://cdn.door43.org/obs/jpg/360px/obs-en-36-06.jpg)

Tegani o Isus čhivđa plo vas upro lende hem phenđa: "Ma daran. Ušten." Ked vazdinđe pumaro šero, dikhlje samo e Isuse korkore.

![](https://cdn.door43.org/obs/jpg/360px/obs-en-36-07.jpg)

O Isus hem o trin učenici hulile tari planina. Tegani o Isus phenđa: "Za akana ma vaćeren nikase so ulo akate. Sigende ka merav hem palo adava ka irinav man ko dživdipe. Palo adava ka šaj te vaćeren e manušenđe."

*E biblijakiri paramiz taro Matej 17,1–9; Marko 9,2–8; Luka 9,28–36*

## 37. O Isus vazdela e Lazare taro mule

https://openbiblestories.org/l/rmy-x-vwa/story-37/

![](https://cdn.door43.org/obs/jpg/360px/obs-en-37-01.jpg)

Jekh dive, e Isusese javinđe so o Lazar but namborme. O Lazar hem lesere duj phenja, i Marija hem i Marta, inele e Isusesere but paše amala. Ked o Isus šunđa adava, phenđa: "Akava nambormipe na ka legari ko meriba, nego ka anel slava e Devlese." O Isus volinđa ple amalen, ali adžićerđa pana duj dive adari kaj inele.

![](https://cdn.door43.org/obs/jpg/360px/obs-en-37-02.jpg)

Ked nakhine adala duj dive, o Isus phenđa ple učenikonenđe: "Hajde te dža palal ki Judeja." A o učenici phenđe: "Ali učitelju, na nakhino but oto adava so o manuša mangle te mudaren tut adari!" O Isus phenđa: "Amaro amal o Lazar zasuća, a me valjani te vazdav le."

![](https://cdn.door43.org/obs/jpg/360px/obs-en-37-03.jpg)

E Isusesere učenici phenđe: "Gospode, te o Lazar sovela, onda ka sasljol." Tegani o Isus jasno phenđa lenđe: "O Lazar mulo. Šukari so na injumle adari, te šaj tumen te verujinen ana mande."

![](https://cdn.door43.org/obs/jpg/360px/obs-en-37-04.jpg)

Ked o Isus reslo ki bijandi diz e Lazaresiri, o Lazar inele mulo već štar dive. I Marta iklili tari diz anglo Isus hem phenđa lese: "Gospode, ked bi oveja akate, mlo phral na ka merel ine. Ali, verujinava da o Devel ka ćerel sa so ka mange olestar."

![](https://cdn.door43.org/obs/jpg/360px/obs-en-37-05.jpg)

O Isus phenđa: "Me injum Vaskrsenje hem Dživdipe. Sar ko verujini ana mande, ka živini čak hem te mulo. Đijekh ko verujini ana mande niked na ka merel. Verujineja li akava?" I Marta phenđa: "Oja, Gospode! Verujinava da tu injan o Mesija, o Čhavo e Devlesoro."

![](https://cdn.door43.org/obs/jpg/360px/obs-en-37-06.jpg)

Tegani i Marija resli. Peli anglo e Isusesere pre hem phenđa lese: "Gospode, ked bi samo oveja akate, mlo phral na ka merel ine." O Isus pučlja len: "Kaj čhivđen e Lazare?" Phenđe lese: "Ano grobo. Ava hem dikh." Tegani o Isus lelja te rovel.

![](https://cdn.door43.org/obs/jpg/360px/obs-en-37-07.jpg)

O grobo inele pećina savi inele phandli bareja. Ked o Isus reslo ko grobo, phenđa lenđe: "Ciden o bar." Ali, i Marta phenđa: "Ovi mulo već štar dive. Ka khandel."

![](https://cdn.door43.org/obs/jpg/360px/obs-en-37-08.jpg)

O Isus phenđa: "Setineja tut li so phenđum će da ka dikhe i slava e Devlesiri te verujinđan ana mande?" I ađahar, cidinđe o bar.

![](https://cdn.door43.org/obs/jpg/360px/obs-en-37-09.jpg)

Tegani o Isus dikhlja naupre hem phenđa: "Dade, hvala će so šuneja man. Me džanav da tu uvek šuneja man, ali akava vaćerava zbog sa akala manuša kola terđovena akate, te šaj on te verujinen da tu bičhalđan man." Tegani o Isus vičinđa: "Lazare, ikljov!"

![](https://cdn.door43.org/obs/jpg/360px/obs-en-37-10.jpg)

I o Lazar iklilo! Pana inele pačardo ano trake savencar paćarena pe ine o mule. O Isus phenđa lenđe: "Pomožinen lese te huljaj adala trake hem oslobodinen le!" But Jevreja verujinđe ano Isus zbog akava čudo.

![](https://cdn.door43.org/obs/jpg/360px/obs-en-37-11.jpg)

Ali, e jevrejengere vođe inele ljubomorna upro leste, i čedinđe pe te planirinen sar te mudaren e Isuse hem e Lazare.

*E biblijakiri paramiz taro Jovan 11,1–46*

## 38. O Isus inele izdajime

https://openbiblestories.org/l/rmy-x-vwa/story-38/

![](https://cdn.door43.org/obs/jpg/360px/obs-en-38-01.jpg)

Đijekh berš, o Jevreja slavinđe i Pasha. Adava slavinđa pe adalese so o Devel ikalđa lengere pradaden taro robujiba ano Egipat, savo inele angleder but berša. Sar đi ko trin berš palo adava so o Isus lelja javno te propovedini hem te sikaj, phenđa ple učenikonenđe da mangela te slavini i Pasha olencar ano Jerusalim, hem da adari ka mudaren le.

![](https://cdn.door43.org/obs/jpg/360px/obs-en-38-02.jpg)

Jekh e Isusesere učenikonendar inele manuš kova vičinđa pe Juda. O Juda inele zadužime zaki blagajna e apostolengiri, ali volinđa love, i adalese but puti čorđa oti blagajna. Palo adava so o Isus hem lesere učenici resle ano Jerusalim, o Juda dželo koro e jevrejengere vođe hem phenđa lenđe da ka izdajini e Isuse te dinđe le love. Džanđa da e jevrejengere vođe na prihvatinđe adava dai o Isus Mesija hem da planirinđe te mudaren le.

![](https://cdn.door43.org/obs/jpg/360px/obs-en-38-03.jpg)

E jevrejengere vođe, kolengoro glavno vođa inele o baro svešteniko, platinđe e Judase trijanda srebrna kovanice te izdajini e Isuse. Adava ulo baš ađahar sar so o proroci vaćerđe da ka ovel. O Juda pristaninđa, lelja o love hem dželo. Lelja te rodel prilika te pomožini lenđe te dolen e Isuse.

![](https://cdn.door43.org/obs/jpg/360px/obs-en-38-04.jpg)

Ano Jerusalim o Isus slavinđa i Pasha ple učenikonencar. Sar xana ine e pashakoro xajba, o Isus lelja o maro hem phaglja le. Phenđa: "Len hem xan akava. Akavai mlo telo, savo dela pe tumenđe. Akava ćeren te šaj te setinen tumen mandar." Ko adava način, o Isus phenđa lenđe da lesoro telo ka ovel žrtvujime olenđe.

![](https://cdn.door43.org/obs/jpg/360px/obs-en-38-05.jpg)

Tegani o Isus vazdinđa i čaša pherdi moljaja hem phenđa: "Pijen akava. Adavai mlo rat oto Nevo savez, savo čhorđola zako oprostiba e grejonengoro. Akava ćeren te šaj te setinen tumen mandar đijekh puti ked pijena la."

![](https://cdn.door43.org/obs/jpg/360px/obs-en-38-06.jpg)

Tegani o Isus phenđa e učenikonenđe: "Jekh tumendar ka izdajini man." O učenici inele iznenadime hem pučle ko šaj ađahar nešto te ćerel. O Isus phenđa: "Okolese kolese ka dav o kotor e maresoro ovi izdajica." Tegani dinđa o maro e Judase.

![](https://cdn.door43.org/obs/jpg/360px/obs-en-38-07.jpg)

So lelja o Juda o maro, o Sotoni đerdinđa ano leste. O Juda iklilo avri hem dželo te pomožini e jevrejengere vođenđe te dolen e Isuse. Tegani peli i rat.

![](https://cdn.door43.org/obs/jpg/360px/obs-en-38-08.jpg)

Palo xajba, o Isus hem lesere učenici džele ki E maslinakiri gora. O Isus phenđa lenđe: "Sare tumen erat ka ačhaven man. Pisimei: 'Ka khuvav e pastire i sa o bakre ka našen.'"

![](https://cdn.door43.org/obs/jpg/360px/obs-en-38-09.jpg)

O Petar phenđa lese: "I sare te ačhaven tut, me na ka ačhavav tut!" Tegani o Isus phenđa e Petrese: "O Sotoni mangela sarijen tumen te prelel, ali me molinđum tuće, Petre, te ačhol ti vera ana mande. A palem, erat, angleder so o bašno ka đilabi, trin puti ka xovave da na pendžareja man."

![](https://cdn.door43.org/obs/jpg/360px/obs-en-38-10.jpg)

Tegani o Petar phenđa e Isusese: "Čak i te valjani te merav, niked na ka odrekninav man tutar!" Isto adava vaćerđe sa avera učenici.

![](https://cdn.door43.org/obs/jpg/360px/obs-en-38-11.jpg)

Tegani o Isus dželo ple učenikonencar ko than vičime E getsimanijakiri bašta. O Isus phenđa lenđe te molinen pe te na peren ko iskušenje. Tegani o Isus dželo te molini pe korkoro.

![](https://cdn.door43.org/obs/jpg/360px/obs-en-38-12.jpg)

O Isus molinđa pe trin puti: "Dade mleja, te šaj, molinava tut te na pijav akaja čaša pherdi patnjaja. Ali, te nane aver način te oprostinen pe e manušengere greja, onda nek ovel ti volja." O Isus inele but uznemirime hem lesoro znoj perela ine sar ratvale kapke. O Devel bičhalđa e anđele te hrabrini le.

![](https://cdn.door43.org/obs/jpg/360px/obs-en-38-13.jpg)

Palo đijekh puti ked molinđa pe, o Isus irini pe ine koro ple učenici, ali on sovena ine. Ked irinđa pe o trito puti, o Isus phenđa lenđe: "Ušten! Mlo izdajicai akate."

![](https://cdn.door43.org/obs/jpg/360px/obs-en-38-14.jpg)

O Juda alo e jevrejengere vođencar, e vojnikonencar, hem bute avere manušencar. On akharđe pumencar mačija hem kašta. O Juda alo koro Isus hem phenđa: "Zdravo, Učitelju," hem čumudinđa le. Adava inele znako e jevrejengere vođenđe te džanen kas te dolen. Tegani o Isus phenđa: "Judo, čumudipnaja li izdajineja man?"

![](https://cdn.door43.org/obs/jpg/360px/obs-en-38-15.jpg)

Sar o vojnici dolena ine e Isuse, o Petar ikalđa o mači hem čhinđa e bare sveštenikosere slugasoro kan. O Isus phenđa lese: "Irin o mači ani korica! Me mle Dadestar šaj te rodav sa e vojska e anđelendar te branini man. A palem, valjani te ovav poslušno mle Dadese." Tegani o Isus sasljarđa adale manušesoro kan. Palo adava so o Isus inele dolime, sa o učenici naštine.

*E biblijakiri paramiz taro Matej 26,14–56; Marko 14,10–50; Luka 22,1–53; Jovan 12,6; 18,1–11*

## 39. O Isus ko sudo

https://openbiblestories.org/l/rmy-x-vwa/story-39/

![](https://cdn.door43.org/obs/jpg/360px/obs-en-39-01.jpg)

Ki ekvaš i rat o vojnici legarđe e Isuse e bare sveštenikose ko čher sar te šaj o baro svešteniko te ispitujini le. O Petar džala ine palo lende odural. Ked anđe e Isuse ano čher, o Petar ačhilo avri hem tačola ine uzali jag.

![](https://cdn.door43.org/obs/jpg/360px/obs-en-39-02.jpg)

Ano čher e jevrejengere vođe sudinena ine e Isusese. Anđe bute xovavne svedokonen kola xovavena ine olestar. Ali, lengere izjave na složinđe pe jekh averaja, i e jevrejengere vođe našti ine te dokažinen da ćerđa nešto krivo. O Isus ništa na vaćerđa.

![](https://cdn.door43.org/obs/jpg/360px/obs-en-39-03.jpg)

Ko kraj o baro svešteniko dikhlja ano Isus hem pučlja le: "Vaćer amenđe tu li injan o Mesija, o Čhavo e dživde Devlesoro?"

![](https://cdn.door43.org/obs/jpg/360px/obs-en-39-04.jpg)

O Isus phenđa: "Oja, me injum, a tumen ka dikhen sar vladinava e Devleja hem avava taro nebo." O baro svešteniko xoljanđa hem pharavđa ple šeja, hem vičindoj phenđa avere verakere vođenđe: "Na valjanena amenđe više svedoci! Šunđen so phenđa dai o Čhavo e Devlesoro. Savi tumari odluka?"

![](https://cdn.door43.org/obs/jpg/360px/obs-en-39-05.jpg)

Sa e jevrejengere vođe phenđe e bare sveštenikose: "Ov zaslužini meriba!" Tegani učharđe e Isusesere jaćha, čhungarđe le, khuvđe le hem marđe leja muj.

![](https://cdn.door43.org/obs/jpg/360px/obs-en-39-06.jpg)

Sar o Petar adžićeri ine anglo čher, dikhlja le nesavi sluškinja hem phenđa lese: "Tu da injanle e Isuseja!" O Petar xovavđa da na inele. Na nakhino but, aver sluškinja phenđa isto, a o Petar palem xovavđa. Ko kraj o manuša phenđe lese: "Džanaja so tu injanle e Isuseja, adalese so soduj đene injen tari Galileja."

![](https://cdn.door43.org/obs/jpg/360px/obs-en-39-07.jpg)

Tegani o Petar phenđa: "Nek o Devel kaznini man te pendžarava adale manuše!" Odmah đilabđa o bašno, a o Isus irinđa pe hem dikhlja ano Petar.

![](https://cdn.door43.org/obs/jpg/360px/obs-en-39-08.jpg)

O Petar dželo hem zorale runđa. A ko adava vreme o Juda, o izdajica, dikhlja so e jevrejengere vođe osudinđe e Isuse ko meriba. E Judase but inele žao, dželo hem mudarđa pe.

![](https://cdn.door43.org/obs/jpg/360px/obs-en-39-09.jpg)

Rano sabajle, e jevrejengere vođe anđe e Isuse anglo Pilat, e rimesoro upravniko. Nadisale da o Pilat ka osudini e Isuse sar krivone hem da ka kaznini le meribnaja. O Pilat pučlja e Isuse: "Tu li injan e jevrejengoro caro?"

![](https://cdn.door43.org/obs/jpg/360px/obs-en-39-10.jpg)

O Isus phenđa: "Korkoro adava phenđan, ali mlo carstvo nane e phuvjakoro carstvo. Te ovel ine ađahar, mle sluge ka maren pe ine maje. Aljum ki phuv te vaćerav o čačipe e Devlestar. Đijekh kova mangela o čačipe, ovi poslušno mle lafese." O Pilat pučlja: "Soi o čačipe?"

![](https://cdn.door43.org/obs/jpg/360px/obs-en-39-11.jpg)

Palo adava so vaćerđa e Isuseja, o Pilat iklilo anglo narodo hem phenđa: "Na arakhava nisavi krivica upro akava manuš." Ali, e jevrejengere vođe hem avera manuša vičinđe: "Čhiv le ko krsto!" O Pilat phenđa: "Nane krivo." Ali, on po bare glasoja vičinđe. Tegani o Pilat trito puti phenđa: "Nane krivo!"

![](https://cdn.door43.org/obs/jpg/360px/obs-en-39-12.jpg)

O Pilat darandilo da o narodo ka pobunini pe, i pristaninđa lesere vojnici te čhiven ko krsto e Isuse. E rimesere vojnici šibinđe e Isuse hem čhivđe upro leste carsko ogrtači hem kruna ćerdi oto kare. Marđe muj oleja vaćerindoj: "Ače, o caro e jevrejengoro!"

*E biblijakiri paramiz taro Matej 26,57–27,26; Marko 14,53–15,15; Luka 22,54–23,25; Jovan 18,12–19,16*

## 40. O Isus čhivdoi ko krsto

https://openbiblestories.org/l/rmy-x-vwa/story-40/

![](https://cdn.door43.org/obs/jpg/360px/obs-en-40-01.jpg)

Palo adava so o vojnici marđe muj e Isuseja, legarđe le te čhiven le ko krsto. Terinđe le te akhari o krsto upro saveste ka merel.

![](https://cdn.door43.org/obs/jpg/360px/obs-en-40-02.jpg)

O vojnici anđe e Isuse ko than savo vičinđa pe "Lobanja" hem ekserencar kovinđe lesere vasta hem o pre ko krsto. Ali, o Isus phenđa: "Dade, oprostin lenđe, adalese so na džanen so ćerena." O Pilat naredinđa ki jekh ploča te pisinen: "Caro e jevrejengoro" hem te čhiven la ko krsto upro e Isusesoro šero.

![](https://cdn.door43.org/obs/jpg/360px/obs-en-40-03.jpg)

O vojnici frdinđe barbuti zako e Isusesere šeja. Ked ćerđe adava, pherdilo o proroštvo savo vaćeri: "Ulavđe mle fostanja maškara pumende hem frdinđe barbuti zako mle šeja."

![](https://cdn.door43.org/obs/jpg/360px/obs-en-40-04.jpg)

E Isuse čhivđe ko krsto maškaro duj manuša kola ćerđe bišukaripe. Jekh olendar marđa muj e Isuseja, ali o dujto phenđa: "Tu li na daraja e Devlestar? Amen injam kriva, ali akava manuš nane krivo." Tegani phenđa e Isusese: "Molinava tut, prihvatin man tuće ano carstvo." O Isus phenđa lese: "Avdive ka ove mancar ano raj."

![](https://cdn.door43.org/obs/jpg/360px/obs-en-40-05.jpg)

E jevrejengere vođe hem avera manuša save inele adari, marena ine muj e Isuseja. Vaćerena lese ine: "Te injan o Čhavo e Devlesoro, hulji taro krsto hem spasin tut! Tegani ka verujina će."

![](https://cdn.door43.org/obs/jpg/360px/obs-en-40-06.jpg)

Tegani o nebo upro sa adava krajo skroz kalilo, iako inele ekvaš o dive. Kalilo ko ekvaš dive hem trin saća inele tomina.

![](https://cdn.door43.org/obs/jpg/360px/obs-en-40-07.jpg)

Tegani o Isus vičinđa: "Završimei! Dade, mlo duh dava tuće ano vasta." Tegani peravđa plo šero hem muklja plo duho. Ked mulo, tresinđa i phuv, a i bari zavesa savi delini ine e manušen tari e Devlesiri prisutnost ano hram pharavdili ko duj kotora, odupral natele.

![](https://cdn.door43.org/obs/jpg/360px/obs-en-40-08.jpg)

Ple meribnaja, o Isus ćerđa o manuša te šaj aven paše e Devlese. Ked o vojniko kova ine pazini e Isuse dikhlja sa adava so ulo, phenđa: "Čače, akava manuš na inele krivo. Ov inele o Čhavo e Devlesoro."

![](https://cdn.door43.org/obs/jpg/360px/obs-en-40-09.jpg)

Tegani o Josif hem o Nikodim, o duj vođe e jevrejengere kola verujinđe dai o Isus o Mesija, pučle e Pilate te len e Isusesoro telo. Paćarđe lesoro telo čaršafeja hem čhivđe le ano grobo savo inele ćerdo ani stena. Tegani phandlje o grobo bare bareja.

*E biblijakiri paramiz taro Matej 27,27–61; Marko 15,16–47; Luka 23,26–56; Jovan 19,17–42*

## 41. O Devel vazdela e Isuse taro mule

https://openbiblestories.org/l/rmy-x-vwa/story-41/

![](https://cdn.door43.org/obs/jpg/360px/obs-en-41-01.jpg)

Palo adava so čhivđe ko krsto e Isuse, e jevrejengere neverna vođe phenđe e Pilatese: "Okova xovavno o Isus phenđa da ka uštel taro mule palo trin dive. Neko valjani te pazini o grobo te našti lesere učenici te čoren lesoro telo i onda te phenen da uštino taro mule."

![](https://cdn.door43.org/obs/jpg/360px/obs-en-41-02.jpg)

O Pilat phenđa lenđe: "Len nekobore vojnikonen hem šukar osigurinen o grobo." I ađahar, čhivđe o bar ko ulaz e grobosoro hem čhivđe e vojnikonen te osigurinen te našti niko te čorel o telo.

![](https://cdn.door43.org/obs/jpg/360px/obs-en-41-03.jpg)

Dive palo adava so o Isus inele parume inele savato, a e Jevrejenđe na inele muklo ko adava dive te džan ko grobo. Adalese, rano sabajle palo savato, nekobor đuvlja spreminđe pe te džan e Isusese ko grobo te čhiven pana mirisija upro lesoro telo.

![](https://cdn.door43.org/obs/jpg/360px/obs-en-41-04.jpg)

Otojekhvar ulo baro potres. O anđeo kova sijajinđa sar i munja, iklilo taro nebo. Cidinđa o bar savo učhari ine o grobo hem beštino upro leste. O vojnici kola pazinena ine o grobo, but darandile hem pele ki phuv sar mule.

![](https://cdn.door43.org/obs/jpg/360px/obs-en-41-05.jpg)

Ked o đuvlja resle ko grobo, o anđeo phenđa lenđe: "Ma daran. O Isus nane akate. Ov uštino taro mule, baš sar so phenđa! Aven hem korkore dikhen ano grobo!" O đuvlja dikhlje ano grobo hem dikhlje o than kote e Isusesoro telo inele pašljardo. Lesoro telo na inele adari!

![](https://cdn.door43.org/obs/jpg/360px/obs-en-41-06.jpg)

Tegani o anđeo phenđa e đuvljenđe: "Džan hem vaćeren e učenikonenđe: 'O Isus uštino taro mule hem ka džal ki Galileja angla tumende.'"

![](https://cdn.door43.org/obs/jpg/360px/obs-en-41-07.jpg)

O đuvlja darandile, ali inolen bari radost. Prastandile te vaćeren e učenikonenđe o šukar lafi.

![](https://cdn.door43.org/obs/jpg/360px/obs-en-41-08.jpg)

Sar o đuvlja pana ine džana dromeja nakoro učenici te vaćeren lenđe o šukar lafi, o Isus iklilo anglo lende, a on pele anglo leste ko kočija. O Isus phenđa lenđe: "Ma daran. Džan hem vaćeren mle učenikonenđe te džan ki Galileja. Adari ka dikhen man."

*E biblijakiri paramiz taro Matej 27,62–28,15; Marko 16,1–11; Luka 24,1–12; Jovan 20,1–18*

## 42. O Isus irini pe ko nebo

https://openbiblestories.org/l/rmy-x-vwa/story-42/

![](https://cdn.door43.org/obs/jpg/360px/obs-en-42-01.jpg)

Adava dive ked o Isus uštino taro mule, duj lesere učenici džana ine ki pašutni diz. Sar ine phirena, vaćerena ine adalestar so ulo e Isuseja. Nadisale dai ov o Mesija, ali onda o Isus inele mudardo. A akana o đuvlja phenđe dai palem dživdo. Na džanđe so te verujinen.

![](https://cdn.door43.org/obs/jpg/360px/obs-en-42-02.jpg)

O Isus alo koro lende hem lelja te phirel olencar, ali on na penđarđe le. Pučlja len sostar vaćerena, i on vaćerđe lese oto sa so ulo e Isuseja nekobor dive napalal. Mislinđe da vaćerena jekhe abanđijaja kova na džanđa so ulo ano Jerusalim.

![](https://cdn.door43.org/obs/jpg/360px/obs-en-42-03.jpg)

Tegani o Isus objasninđa lenđe so e Devlesoro lafi vaćeri e Mesijastar. Podsetinđa len da o proroci phenđe da o Mesija ka patini hem da ka mudaren le, ali da o trito dive ka uštel taro mule. Ked resle ani diz ani savi o duj manuša mangle te ačhoven, lelja te perel i rat.

![](https://cdn.door43.org/obs/jpg/360px/obs-en-42-04.jpg)

Adala duj manuša vičinđe e Isuse te ačhol olencar, i ačhilo. Angleder so te xan, o Isus vazdinđa o maro, zahvalinđa e Devlese hem phaglja le. Otojekhvar penđarđe da adava inele o Isus. Ali, ko adava trenutko nestaninđa anglo lengere jaćha.

![](https://cdn.door43.org/obs/jpg/360px/obs-en-42-05.jpg)

O duj manuša phenđe jekh averese: "Adava inele o Isus! Adalese amare vile inele tate ked objasninđa amenđe e Devlesoro lafi!" Odmah džele palal ko Jerusalim. Ked resle, phenđe e učenikonenđe: "O Isusi dživdo! Dikhljam le!"

![](https://cdn.door43.org/obs/jpg/360px/obs-en-42-06.jpg)

Sar o učenici vaćerena ine, o Isus otojekhvar iklilo anglo lende ani soba hem phenđa lenđe: "Mir tumencar!" U učenici mislinđe da dikhena duho, ali o Isus phenđa lenđe: "Sose darana hem sose sumnjinena? Dikhen mle vasta hem o pre. E duhoven nane telo sar so man isi." Sar te dokažini lenđe da nane duh, rodinđa lendar nešto te xal. Dinđe le kotor oto peko maćho, a ov xalja le.

![](https://cdn.door43.org/obs/jpg/360px/obs-en-42-07.jpg)

O Isus phenđa lenđe: "Phenđum tumenđe so valjani te ispunini pe sa soi pisime mandar ano e Devlesoro lafi." Tegani ćerđa len te oven sposobna te xaljoven e Devlesoro lafi. Phenđa lenđe: "Pana angleder pisimei da o Mesija ka patini, ka merel hem o trito dive ka uštel taro mule."

![](https://cdn.door43.org/obs/jpg/360px/obs-en-42-08.jpg)

"Isto ađahar pisimei ano Lila da mle učenici ka vaćeren sarijenđe te pokajinen pe sar te šaj priminen oprostiba zako pumare greja. Adava ka len te ćeren ano Jerusalim, a palo adava ka džan ko sa o thana hem ka svedočinen sa e manušenđe. Tumen injen svedoci adalese.

![](https://cdn.door43.org/obs/jpg/360px/obs-en-42-09.jpg)

Ano saranda dive palo adava, o Isus but puti ikljola ine anglo učenici. Jekhvar iklilo anglo više oto 500 manuša ano isto vreme! Dokažinđa ple učenikonenđe ko but načinja dai dživdo, hem sikaj len ine taro carstvo e Devlesoro.

![](https://cdn.door43.org/obs/jpg/360px/obs-en-42-10.jpg)

O Isus phenđa ple učenikonenđe: "Maje dindi đijekh vlast ko nebo hem ki phuv. Adalese, džan, ćeren učenikonen oto sa o nacije ađahar so ka krstinen len ano anav e Dadesoro, e Čhavesoro hem e Svetone Duhosoro, hem sikaven len te oven poslušna ko sa so naredinđum tumenđe. Setinen tumen, me uvek ka ovav tumencar."

![](https://cdn.door43.org/obs/jpg/360px/obs-en-42-11.jpg)

Saranda dive palo adava so o Isus uštino taro mule, phenđa ple učenikonenđe: "Ačhoven ano Jerusalim đikote mlo Dad na dela tumen zoralipe ked o Sveto Duho ka huljel upra tumende." Tegani o Isus dželo naupre ko nebo, a o oblako garavđa le lengere dikhibnastar. O Isus beštino e Devlese ki desno strana te vladini upro sa.

*E biblijakiri paramiz taro Matej 28,16–20; Marko 16,12–20; Luka 24,13–53; Jovan 20,19–23; Ćeriba e apostolengoro 1,1–11*

## 43. I Khanđiri počini

https://openbiblestories.org/l/rmy-x-vwa/story-43/

![](https://cdn.door43.org/obs/jpg/360px/obs-en-43-01.jpg)

Palo adava so o Isus irinđa pe ko nebo, o učenici ačhile ano Jerusalim sar so phenđa lenđe o Isus te ćeren. O vernici stalno čedena pe ine adari ki molitva.

![](https://cdn.door43.org/obs/jpg/360px/obs-en-43-02.jpg)

Đijekh berš, pinda dive pali Pasha, o Jevreja slavinena ine bitno dive vičime Pindato dive. O Pindato dive inele vreme ked o Jevreja zahvalinena ine e Devlese zako čediba e đivesoro. O Jevreja avena ine taro sa o phuvja ko Jerusalim zajedno te slavinen o Pindato dive. Adava berš, o vreme zako Pindato dive alo kurko dive palo adava so o Isus dželo ko nebo.

![](https://cdn.door43.org/obs/jpg/360px/obs-en-43-03.jpg)

Sar o vernici inele zajedno, otojekhvar o čher ano savo inele pherdilo zvukoja save ćerđa i zorali barval. Tegani nešto so dičhilo sar tikore jaga mothovđa pe upro sa e vernikonengere šere. Sare on pherdile e Svetone Duhoja hem lelje te vaćeren avere čhibjencar.

![](https://cdn.door43.org/obs/jpg/360px/obs-en-43-04.jpg)

Ked o manuša ano Jerusalim šunđe galama, but đene ale te dikhen soi adava. Ked šunđe e vernikonen sar vaćerena adalestar so o Devel ćerđa, inele začudime so šunđe sa adava pumenđe ko čhibja.

![](https://cdn.door43.org/obs/jpg/360px/obs-en-43-05.jpg)

Nesave adale manušendar phenđe dai o učenici mate. Ali, o Petar uštino hem phenđa lenđe: "Šunen man! Akala manuša nane mate! Akaleja ispuninđa pe o proroštvo e prorokosoro e Joilesoro, ano savo o Devel vaćeri: 'Ano poslednja dive, ka čhorav mle Duho.'"

![](https://cdn.door43.org/obs/jpg/360px/obs-en-43-06.jpg)

"Manušalen taro Izrael, o Isus inele manuš kova ćerđa but zorale znakija hem čudesija ano e Devlesoro zoralipe, sar so dikhljen hem sar so džanen. Ali, tumen čhivđen le ko krsto!"

![](https://cdn.door43.org/obs/jpg/360px/obs-en-43-07.jpg)

"Iako o Isus mulo, o Devel vazdinđa le taro mule. Adava ispuninđa o proroštvo savo phenela: 'Na ka muke to Sveco te čirnjol ano grobo.' Amen injam svedoci adalestar da o Devel e Isuse vazdinđa taro mule hem da irinđa le ko dživdipe."

![](https://cdn.door43.org/obs/jpg/360px/obs-en-43-08.jpg)

"Akanai o Isus vazdime hem bešela e Devlese e Dadese ki desno strana. Hem o Isus bičhalđa e Svetone Duho sar so obećinđa da ka ćerel. O Sveto Duho ćerela sa akava so akana dikhena hem šunena."

![](https://cdn.door43.org/obs/jpg/360px/obs-en-43-09.jpg)

"Tumen čhivđen ko krsto akale manuše, e Isuse. Ali, oven sigurna da o Devel ćerđa e Isuse te ovel Gospod hem Mesija."

![](https://cdn.door43.org/obs/jpg/360px/obs-en-43-10.jpg)

O manuša kola šunena ine e Petre inele but dotaknime adaleja so šunđe. Adalese pučle e Petre hem e učenikonen: "Phraljalen, so te ćera?"

![](https://cdn.door43.org/obs/jpg/360px/obs-en-43-11.jpg)

O Petar phenđa lenđe: "Đijekh tumendar te pokajini pe hem te krstini pe ano anav e Isusesoro e Hristesoro, te šaj o Devel te oprostini tumenđe o greja. Tegani ka del tumen hem e Svetone Duho sar daro."

![](https://cdn.door43.org/obs/jpg/360px/obs-en-43-12.jpg)

Đi sar 3.000 manuša verujinđe ano adava so phenđa o Petar hem ule e Isusesere učenici. Inele krstime hem ule deo e khanđirjakoro ano Jerusalim.

![](https://cdn.door43.org/obs/jpg/360px/obs-en-43-13.jpg)

O učenici stalno šunena ine e apostolengoro sikaviba, ovena ine zajedno, xana zajedno, hem molinena pe ine jekh avereja. Uživinđe ano zajedničko slaviba e Devle hem sa so inolen, ulavena ine jekh avereja. Sarijen inele šukar mišljenje olendar. Taro dive ko dive sa više manuša ovena ine vernici.

*E biblijakiri paramiz taro Ćeriba e apostolengoro 2*

## 44.  O Petar hem o Jovan sasljarena e prosjako

https://openbiblestories.org/l/rmy-x-vwa/story-44/

![](https://cdn.door43.org/obs/jpg/360px/obs-en-44-01.jpg)

Jekh dive, o Petar hem o Jovan džana ine ko Hram. Sar avena ine paše uzalo e hramesere udara, dikhlje jekhe manuše kova našti ine te phirel sar prosini.

![](https://cdn.door43.org/obs/jpg/360px/obs-en-44-02.jpg)

O Petar dikhlja ano manuš kova našti ine te phirel hem phenđa lese: "Nane man love te dav tut. Ali, ka dav tut okova so isi man. E Isusese ko anav, ušti hem phir!"

![](https://cdn.door43.org/obs/jpg/360px/obs-en-44-03.jpg)

O Devel odmah sasljarđa e manuše kova našti ine te phirel, a ov odmah lelja te phirel hem te ripini, hem te slavini e Devle. O manuša kola inele ki avlija e hramesiri inele začudime.

![](https://cdn.door43.org/obs/jpg/360px/obs-en-44-04.jpg)

Sa edobor manuša ale te dikhen e manuše kova inele sasljardo. O Petar phenđa lenđe: "Sose čudinena tumen soi akava manuš sasljardo? Amen na sasljarđam le amare zoralipnaja ili šukaripnaja, nego e Isusesoro zoralipe hem i vera savi o Isus dela sasljarđe akale manuše."

![](https://cdn.door43.org/obs/jpg/360px/obs-en-44-05.jpg)

"Tumen injen adala kola phenđen e rimesere upravnikose te mudari e Isuse. Tumen mudarđen okole so ćerđa o dživdipe, o Devel iskoristinđa tumaro ćeriba te ispunini o proroštvo da o Mesija ka trpini hem ka merel. Adalese, akana pokajinen tumen hem irinen tumen ko Devel te šaj tumare greja te oven thovde."

![](https://cdn.door43.org/obs/jpg/360px/obs-en-44-06.jpg)

O upravnici e hramesere but xoljanđe ko adava so o Petar hem o Jovan vaćerđe. Adalese dolinđe len hem frdinđe len ano phandlipe. Ali, but manuša verujinđe e Petresere lafese, a o broj oto manuša kola verujinđe ano Isus barilo hem ulo đi sar 5.000.

![](https://cdn.door43.org/obs/jpg/360px/obs-en-44-07.jpg)

Aver dive, e jevrejengere vođe anđe e Petre hem e Jovane anglo baro svešteniko hem anglo avera vođe e verakere. Pučle e Petre hem e Jovane: "Kasere zoralipnaja sasljarđen akale manuše kova našti ine te phirel?"

![](https://cdn.door43.org/obs/jpg/360px/obs-en-44-08.jpg)

O Petar phenđa: "Akava manuš terđola angla tumende palo zoralipe e Isusesoro e Mesijasoro. Tumen čhivđen ko krsto e Isuse, ali o Devel vazdinđa le taro mule hem irinđa le ko dživdipe! Tumen na mangljen le, ali nane aver način te spasinen tumen taro greja sem palo zoralipe e Isusesoro!"

![](https://cdn.door43.org/obs/jpg/360px/obs-en-44-09.jpg)

O vođe inele iznenadime so o Petar hem o Jovan vaćerena ađahar hrabro, adalese so dikhle dai prosta hem biškolujime manuša. Ali, tegani setinđe pe da on inele e Isuseja. Palo adava so pretinđe e Petre hem e Jovane, mukle len.

*E biblijakiri paramiz taro Ćeriba e apostolengoro 3,1–4,22*

## 45.  O Stefan hem o Filip

https://openbiblestories.org/l/rmy-x-vwa/story-45/

![](https://cdn.door43.org/obs/jpg/360px/obs-en-45-01.jpg)

Ked inele ćerdi i Khanđiri, jekh oto vođe vičinđa pe Stefan. Ov inele ko šukar glaso maškaro manuša hem inele pherdo e Svetone Duhoja hem inele mudro. O Stefan ćerela ine but čudesija hem dela ine zorale razlogija e manušenđe da valjani te verujinen ano Isus.

![](https://cdn.door43.org/obs/jpg/360px/obs-en-45-02.jpg)

Jekh dive, sar o Stefan sikaj ine e Isusestar, nesave Jevreja kola na verujinđe ano Isus lelje te raspravinen pe e Stefaneja. But xoljanđe hem xovavđe e verakere vođenđe e Stefanestar. Phenđe: "Šunđam sar na vaćeri šukar e Mesijastar hem e Devlestar!" Adalese e verakere vođe dolinđe e Stefane hem legarđe le anglo baro svešteniko hem anglo avera vođe e jevrejengere, kaj pana xovavne svedoci xovavena ine e Stefanestar.

![](https://cdn.door43.org/obs/jpg/360px/obs-en-45-03.jpg)

O baro svešteniko pučlja e Stefane: "Čače li adava so vaćerena tutar?" O Stefan odgovorinđa ađahar so podsetinđa len ko but bare stvarija save o Devel ćerđa, taro e Avraamesoro đi e Isusesoro vreme, hem dai e Devlesoro narodo stalno neposlušno. Tegani phenđa: "Tumen o šerale hem o manuša oti pobuna niked na mangena te šunen e Svetone Duho, baš sar so tumare preci niked na mangle te šunen e Devle hem mudarena ine lesere prorokonen. Ali, tumen ćerđen nešto but po bišukar olendar! Tumen mudarđen e Mesija!"

![](https://cdn.door43.org/obs/jpg/360px/obs-en-45-04.jpg)

Ked e verakere vođe šunđe adava, edobor xoljanđe da phandlje pumare kana hem zorale vičinđe. Vucinđe e Stefane avri tari diz hem frdinđe bara upro leste te mudaren le.

![](https://cdn.door43.org/obs/jpg/360px/obs-en-45-05.jpg)

Angleder so mulo, o Stefan vičinđa: "Isuse, le mlo duh!" Tegani pelo ko kočija hem palem vičinđa: "Gospodarona, ma le akava sar greh protiv olende!" Tegani mulo.

![](https://cdn.door43.org/obs/jpg/360px/obs-en-45-06.jpg)

Jekh terno manuš, palo anav Savle, složinđa pe e manušencar kola mudarđe e Stefane hem pazini ine lengere šeja dok on frdinđe bara upro leste. Adava dive, but manuša ano Jerusalim lelje te jurinen e Isusesere sledbenikonen, i o vernici našle ko avera thana. Ali adava ćerđa len te propovedinen e Isusestar kaj god džele.

![](https://cdn.door43.org/obs/jpg/360px/obs-en-45-07.jpg)

Jekh učeniko e Isusesoro kova vičinđa pe Filip, inele jekh oto okola vernici kola našle taro Jerusalim ked jurinđe len. Dželo ani Samarija, a adari propovedini ine e Isusestar hem but manuša inele spasime. Palo adava, jekh dive o anđeo e Devlesoro phenđa e Filipese te džal ko jekh drom ani pustinja. I sar o Filip phirela ine adale dromeja, dikhlja jekhe važnone službeniko tari Etiopija sar vozini pe pese ani kočija. O Sveto Duho phenđa e Filipese te džal hem te vaćeri adale manušeja.

![](https://cdn.door43.org/obs/jpg/360px/obs-en-45-08.jpg)

Sar o Filip avela ine nakori kočija, šunđa e Etiopljaninco sar čitini taro lil savo pisinđa o proroko o Isaija. O manuš čitinđa: "Legarđe le sar bakrore ko čhiniba, a sar soi o bakroro tiho, ađahar ni ov na vaćerđa nijekh lafi. Na ćerđe oleja pošteno hem na ceninđe le. Lelje lestar lesoro dživdipe."

![](https://cdn.door43.org/obs/jpg/360px/obs-en-45-09.jpg)

O Filip pučlja e Etiopljaninco: "Xaljoveja li adava so čitineja?" A ov phenđa lese: "Na. Na xaljovava adalese so nane ko te objasnini maje. Molinava tut, ava hem beš uzala mande te objasnine maje. Akava li o Isaija pisinđa pestar ili nekastar averestar?"

![](https://cdn.door43.org/obs/jpg/360px/obs-en-45-10.jpg)

O Filip objasninđa lese da o Isaija pisinđa e Isusestar. O Filip koristinđa hem avera Lila te vaćeri lese o šukar lafi e Isusestar.

![](https://cdn.door43.org/obs/jpg/360px/obs-en-45-11.jpg)

Sar o Filip hem o Etiopljaninco putujinena ine, ale đi ko nesavo pani. O Etiopljaninco phenđa: "Dikh, eče pani! Šaj li te ovav krstime?" Tegani phenđa e vozačese te zaustavini i kočija.

![](https://cdn.door43.org/obs/jpg/360px/obs-en-45-12.jpg)

Ked đerdinđe ano pani, o Filip krstinđa e Etiopljaninco. Ked iklile taro pani, o Sveto Duho otojekhvar legarđa e Filipe dur ko aver than kote nastavinđa te vaćeri e manušenđe e Isusestar.

![](https://cdn.door43.org/obs/jpg/360px/obs-en-45-13.jpg)

O Etiopljaninco nastavinđa te džal ple dromeja čhere, bahtalo so džanel e Isuse.

*E biblijakiri paramiz taro Ćeriba e apostolengoro 6,8–8,5; 8,26–40*

## 46. O Pavle ovela hrišćanin

https://openbiblestories.org/l/rmy-x-vwa/story-46/

![](https://cdn.door43.org/obs/jpg/360px/obs-en-46-01.jpg)

O Savle inele okova terno manuš kova pazinđa o šeja e manušengere kola mudarđe e Stefane. Ov na verujinđa ano Isus, i jurinđa e vernikonen. Džana ine oto čher ko čher ano Jerusalim te dolel e muršen hem e đuvljen hem te frdel len ano phandlipe. O baro svešteniko dinđa dozvola e Savlese te džal ki diz Damask hem adari te dolel e hrišćanen hem te anel len palal ko Jerusalim.

![](https://cdn.door43.org/obs/jpg/360px/obs-en-46-02.jpg)

Sar o Savle džala ine dromeja ki Damask, o baro svetlo taro nebo zasvetlinđa svugde uzalo leste, ađahar da pelo ki phuv. O Savle šunđa nekas sar vaćeri: "Savle! Savle! Sose jurineja man?" O Savle pučlja: "Ko injan tu, Gospode?" O Isus phenđa lese: "Me injum o Isus. Tu man jurineja!"

![](https://cdn.door43.org/obs/jpg/360px/obs-en-46-03.jpg)

Ked o Savle uštino, našti ine te dikhel. Lesere amala legarđe le ano Damask. O Savle ništa na xalja ni pilja trin dive.

![](https://cdn.door43.org/obs/jpg/360px/obs-en-46-04.jpg)

Ano Damask živinđa jekh učeniko kova vičinđa pe Ananija. O Devel phenđa lese: "Dža ko adava čher kaj o Savle. Čhiv te vasta upro leste te šaj palem te dikhel." Ali, o Ananija phenđa: "Gospode, šunđum da akava manuš jurini e vernikonen." O Devel phenđa lese: "Dža! Izaberinđum le te vaćeri mandar e Jevrejenđe hem e manušenđe oto avera nacije. Ov but ka trpini zbog mande."

![](https://cdn.door43.org/obs/jpg/360px/obs-en-46-05.jpg)

I ađahar o Ananija dželo koro Savle, čhivđa ple vasta upro leste hem phenđa: "O Isus kova mothovđa pe će ko drom nakari bičhalđa man te irini pe to dikhiba hem te ove pherdo e Svetone Duhoja." O Savle odmah šaj ine te dikhel, a o Ananija krstinđa le. Tegani o Savle nešto xalja hem irinđa pe lesoro zoralipe.

![](https://cdn.door43.org/obs/jpg/360px/obs-en-46-06.jpg)

O Savle odmah lelja te propovedini e Jevrejenđe ano Damask, vaćerindoj: "O Isusi e Devlesoro Čhavo!" O Jevreja inele zadivime adaleja da o manuš kova dikhlja te mudari e vernikonen akana isto verujini ano Isus! O Savle raspravinđa pe e Jevrejencar ađahar so dokažini lenđe ine dai o Isus o Mesija.

![](https://cdn.door43.org/obs/jpg/360px/obs-en-46-07.jpg)

Palo but dive, o Jevreja ćerđe plan te mudaren e Savle. Bičhalđe e manušen te roden le ko udara e dizjakere te šaj mudaren le. Ali, o Savle šunđa zako lengoro plan, i lesere amala pomožinđe lese te našel. Jekh rat, mukle le prekalo duvari ani bari korpa. Palo adava so o Savle naštino taro Damask, nastavinđa te propovedini e Isusestar.

![](https://cdn.door43.org/obs/jpg/360px/obs-en-46-08.jpg)

O Savle dželo ano Jerusalim te resel pe e učenikonencar, ali on darandile olestar. Tegani jekh verniko kova vičinđa pe Varnava anđa e Savle anglo apostolja hem phenđa lenđe sar o Savle hrabro propovedinđa ano Damask. Palo adava, o učenici prihvatinđe e Savle.

![](https://cdn.door43.org/obs/jpg/360px/obs-en-46-09.jpg)

Nesave vernici kola naštine taro juriba savo inele ano Jerusalim, džele dur ani diz Antiohija hem propovedinđe e Isusestar. But manuša ani Antiohija na inele Jevreja, ali, palo prvo puti, but olendar da ule vernici. O Varnava hem o Savle džele adari te sikaven e neve vernikonen više e Isusestar hem osnažinđe i khanđiri. Baš ani Antiohija okola kola verujinena ano Isus inele vičime "hrišćanja".

![](https://cdn.door43.org/obs/jpg/360px/obs-en-46-10.jpg)

Jekh dive, sar o hrišćanja ani Antiohija postinena ine hem molinena, o Sveto Duho phenđa lenđe: "Čhiven e Varnava hem e Pavle te ćeren okova zako sose vičinđum len." Adalese i khanđiri ani Antiohija molinđa zako Varnava hem zako Savle, o vernici čhivđe pumare vasta upro lende te blagoslovinen len. Bičhalđe len te propovedinen o šukar lafi e Isusestar ko but avera thana. O Varnava hem o Savle sikavena ine e manušen oto razna nacije, hem but đene verujinđe ano Isus.

*E biblijakiri paramiz taro Ćeriba e apostolengoro 8,3; 9,1–31; 11,19–26; 13,1–3*

## 47. O Pavle hem o Sila ano than Filipe

https://openbiblestories.org/l/rmy-x-vwa/story-47/

![](https://cdn.door43.org/obs/jpg/360px/obs-en-47-01.jpg)

Sar o Savle džala ine dromeja maškaro e rimesoro carstvo, lelja te koristini plo rimljano anav "Pavle". Jekh dive, o Pavle hem lesoro amal o Sila džele ani diz Filipe te vaćeren o šukar lafi e Isusestar. Džele ko than uzali len avri tari diz, kote o manuša čedena pe ine zaki molitva. Adari resle jekha đuvlja koja vičinđa pe Lidija, a koja inele trgovkinja. Oj volinđa hem slavinđa e Devle.

![](https://cdn.door43.org/obs/jpg/360px/obs-en-47-02.jpg)

O Devel phravđa e Lidijakoro vilo te verujini e lafese e Isusestar, hem oj hem lakere čherutne krstinđe pe. Oj vičinđa e Pavle hem e Sila te ačhon koro late ko čher, i on ačhile olaja hem lakere čherutnencar.

![](https://cdn.door43.org/obs/jpg/360px/obs-en-47-03.jpg)

O Pavle hem o Sila but puti arakhena pe ine e manušencar ko than zaki molitva. Đijekh dive sar phirena ine đi adari, palo lende dželi jekh ropkinja opsednutime demoneja. Adava demoni ćerela la ine te dikhljari i budućnost e manušenđe, i ađahar ple gospodarenđe zaradini ine but love.

![](https://cdn.door43.org/obs/jpg/360px/obs-en-47-04.jpg)

Sar on phirena ine, i ropkinja vičini: "Akalai manuša sluge e Devlesere e Najbaresere. Vaćerena tumenđe e Devlesoro plan zako spasenje!" But puti ćerela ine ađahar, i e Pavlese adava dosadinđa pe.

![](https://cdn.door43.org/obs/jpg/360px/obs-en-47-05.jpg)

I jekh dive, ked i ropkinja lelja te vičini, o Pavle irinđa pe nakoro late hem phenđa e demonese kova inele ano late: "E Isusese ano anav, ikljov olatar." O demoni odmah iklilo olatar.

![](https://cdn.door43.org/obs/jpg/360px/obs-en-47-06.jpg)

O manuša kolengiri inele i ropkinja but xoljanđe! Xalile so oj bizo demoni više na ka šaj te dikhljari i budućnost e manušenđe. Adava značini da o manuša više na ka den len love te šaj i ropkinja te vaćeri lenđe so ka ovel olencar.

![](https://cdn.door43.org/obs/jpg/360px/obs-en-47-07.jpg)

Adalese o manuša kolengiri inele i ropkinja legarđe e Pavle hem e Sila koro e rimesere vođe, kola marđe len hem frdinđe len ano phandlipe.

![](https://cdn.door43.org/obs/jpg/360px/obs-en-47-08.jpg)

Čhivđe e Pavle hem e Sila ko najšukar obezbedime than e phandlipnasoro, đi lengere pre phandlje lanconencar. Palem, ki ekvaš i rat on đilabđe hem slavinđe e Devle.

![](https://cdn.door43.org/obs/jpg/360px/obs-en-47-09.jpg)

Otojekhvar ulo baro potres! Sa o udara e phandlipnasere phravdile hem pele o lanci sa e manušendar kola inele phandle.

![](https://cdn.door43.org/obs/jpg/360px/obs-en-47-10.jpg)

O čuvari uštino taro sojba, a ked dikhlja da sa o udara e phandlipnasere inele phravde, but darandilo! Mislinđa da našle sa o manuša kola inele phandle, i manglja te mudari pe. (Džanđa da e rimesere vođe ka mudaren le te muklja e phandlenđe te našen.) Ali, o Pavle dikhlja le hem vičinđa: "Terđov! Ma mudar tut. Sare injam akate."

![](https://cdn.door43.org/obs/jpg/360px/obs-en-47-11.jpg)

O čuvari tresinđa pe sar avela ine nakoro Pavle hem nakoro Sila, i pučlja len: "So valjani te ćerav te ovav spasime?" O Pavle phenđa: "Verujin ano Isus, ano Gospod, i tu hem te čherutne ka oven spasime." Tegani o čuvari legarđa e Pavle hem e Sila pese ko čher hem thovđa lengere rane. O Pavle propovedinđa o šukar lafi e Isusestar sa lesere čherutnenđe.

![](https://cdn.door43.org/obs/jpg/360px/obs-en-47-12.jpg)

O čuvari hem sa lesere čherutne verujinđe ano Isus hem krstinđe pe. Tegani o čuvari e Pavlese hem e Silase dinđa nešto te xan hem zajedno radujinđe pe.

![](https://cdn.door43.org/obs/jpg/360px/obs-en-47-13.jpg)

Tejsato dive, o upravnici e dizjakere mukle e Pavle hem e Sila taro phandlipe hem phenđe lenđe te džan taro Filipe. O Pavle hem o Sila džele te dikhen pe e Lidijaja hem pe nesave avere amalencar, a palo adava džele tari diz. O šukar lafi e Isusestar nastavinđa te širini pe, a i Khanđiri nastavinđa te barjol.

![](https://cdn.door43.org/obs/jpg/360px/obs-en-47-14.jpg)

O Pavle hem aver vođe e hrišćanengere džana ine ko but dizja, vaćerindoj hem sikavindoj e manušen oto šukar lafi e Isusestar. Isto ađahar, pisinđe but lila savencar ohrabrinđe hem sikavđe e vernikonen ano khanđirja. Nesave adale lilendar ule lila ani Biblija.

*E biblijakiri paramiz taro Ćeriba e apostolengoro 16,11–40*

## 48. O Isusi adava obećime Mesija

https://openbiblestories.org/l/rmy-x-vwa/story-48/

![](https://cdn.door43.org/obs/jpg/360px/obs-en-48-01.jpg)

Ked o Devel ćerđa i phuv, sa inele savršeno. Na inele greh. O Adam hem i Eva mangle jekh avere, a mangle hem e Devle. Na inele ni nambormipe ni meriba. O Devel manglja i phuv te ovel esavki.

![](https://cdn.door43.org/obs/jpg/360px/obs-en-48-02.jpg)

O Sotoni vaćerđa prekalo sap ano vrt sar te xovaj e Eva. Oj hem o Adam tegani grešinđe premalo Devel. Adalese so grešinđe, sare ki phuv džanen te oven namborme hem sare merena.

![](https://cdn.door43.org/obs/jpg/360px/obs-en-48-03.jpg)

Adalese so o Adam hem i Eva grešinđe, ulo nešto po bišukar. Ule e Devlesere neprijatelja. Adalese otegani đijekh manuš bijanđola e grešnona prirodaja hem adaleja ovela e Devlesoro neprijatelji. O odnos maškaro o Devel hem o manuša inele rasturime zbog o greh. Ali, e Devle inele plan te obnovini adava odnos.

![](https://cdn.door43.org/obs/jpg/360px/obs-en-48-04.jpg)

O Devel obećinđa da jekh e Evakere potomkonendar ka zdrobini e Sotonesoro šero, a da o Sotoni ka ranini lesiri patum. Adava značinđa da o Sotoni ka mudari e Mesija, ali da o Devel palem ka irini le ko dživdipe, hem da o Mesija zauvek za zdrobini e Sotonesoro zoralipe. But berša palo adava, o Devel objavinđa dai o Isus adava Mesija.

![](https://cdn.door43.org/obs/jpg/360px/obs-en-48-05.jpg)

Ked o Devel e bare panjeja uništinđa sa i Phuv, obezbedinđa brodo savo ka spasini e manušen kola verujinđe ano leste. Isto ađahar, sare zaslužinena te oven uništime zbog pumare greja, ali o Devel dinđa e Isuse te spasini đijekhe kova verujini ano leste.

![](https://cdn.door43.org/obs/jpg/360px/obs-en-48-06.jpg)

Beršencar o sveštenici stalno dena ine žrtve e Devlese e manušenđe ko than, adaleja mothovđe i kazna savi zaslužinena zbog lengere greja. Ali, adala žrtve našti ine te legaren o greh. O Isusi najbaro baro svešteniko. Sar razlika taro aver sveštenici, ov dinđa korkoro pes sar jedinona žrtva koja šaj ine te legari o greja sa e manušengere ki phuv. O Isusi savršeno baro svešteniko, adalese so lelja i kazna zako đijekh greh savo ćerđe o manuša.

![](https://cdn.door43.org/obs/jpg/360px/obs-en-48-07.jpg)

O Devel phenđa e Avraamese: "Sa o nacije ki phuv ka oven blagoslovime prekala tute." O Isus inele e Avraamesoro potomko. Sa o nacije inele blagoslovime prekalo leste, adalese so đijekh kova verujini ano Isus spasimei taro greh hem ovela e Avraamesoro duhovno potomko.

![](https://cdn.door43.org/obs/jpg/360px/obs-en-48-08.jpg)

Ked o Devel phenđa e Avraamese te del ple čhave e Isake sar žrtva, o Devel obezbedinđa jarco zaki žrtva lesere čhavese e Isakese ko than. Sare amen zaslužinaja te mera zako amare greja! Ali o Devel dinđa e Isuse, e Bakrore e Devlesere, sar žrtva koja merela amenđe ko than.

![](https://cdn.door43.org/obs/jpg/360px/obs-en-48-09.jpg)

Ked o Devel bičhalđa i zadnjo nevolja upro Egipat, phenđa sa e izraeleskone porodicenđe te čhinen savršenone bakrore hem lesere rateja te makhen o krajevija hem o upruno kotor pumare čheresere udarestar. Ked o Devel dikhlja o rat, nakhavđa lengere čhera hem na mudarđa lengere najphuredere čhaven. Adava so ulo vičini pe Pasha.

![](https://cdn.door43.org/obs/jpg/360px/obs-en-48-10.jpg)

O Isusi amaro pashalno Bakroro. Ovi savršeno hem bizo greh, a inele mudardo zako vreme ked slavinđa pe i Pasha. Ked neko verujini ano Isus, e Isusesoro rat platini zako greh adale manušesoro, a e Devlesiri kazna nakhaj adale manuše.

![](https://cdn.door43.org/obs/jpg/360px/obs-en-48-11.jpg)

O Devel ćerđa Savez e Izraelconencar, kola inele lesoro izaberime narodo. Ali, o Devel akana ćerđa Nevo savez savoi dostupno sarijenđe. Zbog akava Nevo savez, đijekh oti bilo savi nacija šaj te ovel deo e Devlesere narodostar ađahar so ka verujini ano Isus.

![](https://cdn.door43.org/obs/jpg/360px/obs-en-48-12.jpg)

O Mojsija inele baro proroko kova vaćerđa e Devlesoro lafi. Ali, o Isusi najbaro proroko sarijendar. Ovi Devel, ađahar da sa so ćerđa hem so phenđa inele ćeriba hem lafi e Devlesoro. Adalese o Isus vičini pe Lafi e Devlesoro.

![](https://cdn.door43.org/obs/jpg/360px/obs-en-48-13.jpg)

O Devel obećinđa e carose e Davidese da jekh lesere potomkonendar zauvek ka vladini sar caro upro e Devlesoro narodo. Adalese soi o Isus Čhavo e Devlesoro hem Mesija, ovi adava posebno potomko e Davidesoro kova šaj te vladini zauvek.

![](https://cdn.door43.org/obs/jpg/360px/obs-en-48-14.jpg)

O David inele caro e Izraelesoro, ali o Isusi caro sa e svemiresoro! Ov palem ka avel hem ka vladini ple carstvoja ani pravda hem ano mir, zauvek.

*E biblijakiri paramiz taro Ćeriba 1-3; 6; 14; 22; Ikljojba 12; 20; 2. lil e Samuilesoro 7; Lil e Jevrejenđe 3,1–6; 4,14–5,10; 7,1–8,13; 9,11–10,18; Otkrivenje 21*

## 49. E Devlesoro Nevo savez

https://openbiblestories.org/l/rmy-x-vwa/story-49/

![](https://cdn.door43.org/obs/jpg/360px/obs-en-49-01.jpg)

O anđeo phenđa e devicaće palo anav Marija da ka bijani e Devlesere Čhave. I ađahar, sar oj pana inele devica, o Sveto Duho hulilo upro late hem oj ačhili khamni. Bijanđa čhave hem dinđa le anav Isus. Adalese, o Isusi hem Devel hem manuš.

![](https://cdn.door43.org/obs/jpg/360px/obs-en-49-02.jpg)

O Isus ćerđa but čudesija kola mothovena dai ov Devel. Phirđa upro pani, ačhavđa o barvalja, sasljarđa bute namborme manušen, ispudinđa e demonen, vazdinđa e mulen hem ćerđa o pandž mare hem o duj maćhe te oven dovoljno xajbnase zako više oto 5.000 manuša.

![](https://cdn.door43.org/obs/jpg/360px/obs-en-49-03.jpg)

O Isus inele baro učitelj, a vaćeri ine ano autoritet adalese soi o Čhavo e Devlesoro. Sikaj ine da valjani te mange avere manušen ađahar sar so mangeja korkore tut.

![](https://cdn.door43.org/obs/jpg/360px/obs-en-49-04.jpg)

Ađahar da, sikaj ine da valjani te mange e Devle više nego so mangeja bilo so aver, više nego sa so isi tut.

![](https://cdn.door43.org/obs/jpg/360px/obs-en-49-05.jpg)

O Isus phenđa dai o carstvo e Devlesoro po vredno oto bilo so aver ki phuv. Te pripadine e Devlese ko carstvo po bitnoi oto sa aver. Sar te šaj đerdine e Devlese ko carstvo, valjani te ove spasime te grejonendar.

![](https://cdn.door43.org/obs/jpg/360px/obs-en-49-06.jpg)

O Isus sikaj ine da nesave manuša ka prihvatinen le hem ka oven spasime, a avera na. Phenđa dai nesave manuša sar i šukar phuv. On lena o šukar lafi e Isusestar hem tegani ovena spasime. Avera manušai sar i zorali phuv savi arakhaja ko drom, kote o seme e Devlesere lafestar na đerdini hem na dela ništa zako čediba. Adala manuša na mangena te len o lafi e Isusestar hem na ka đerdinen lese ko carstvo.

![](https://cdn.door43.org/obs/jpg/360px/obs-en-49-07.jpg)

O Isus sikaj ine da o Devel but mangela e grešnikonen. Ov mangela te oprostini lenđe hem te ćerel len te oven lesere čhave.

![](https://cdn.door43.org/obs/jpg/360px/obs-en-49-08.jpg)

O Isus isto ađahar phenđa da o Devel mrzini o greh. Ked o Adam hem i Eva grešinđe, adava utičinđa upro sa lengere potomci. Sar posledica adalestar, đijekh manuš ki phuv grešini hem cidimei e Devlestar. Adalese, sare ule e Devlesere neprijatelja.

![](https://cdn.door43.org/obs/jpg/360px/obs-en-49-09.jpg)

Ali, o Devel edobor but manglja đijekhe manuše ki phuv, da dinđa ple jekhe Čhave da đijekh kova verujini ano Isus na ka ovel kaznime zako ple greja, nego ka živini večno e Devleja.

![](https://cdn.door43.org/obs/jpg/360px/obs-en-49-10.jpg)

Zbog te greja, tu injan krivo hem zaslužineja te mere. O Devel valjani ine te ovel xoljame upra tute, ali pli xoli čhorđa upro Isus umesto upra tute. Ked o Isus mulo ko krsto, ov lelja ti kazna.

![](https://cdn.door43.org/obs/jpg/360px/obs-en-49-11.jpg)

O Isus niked na grešinđa, ali odlučinđa te ovel kaznime hem te merel sar savršeno žrtva te legari te greja hem o greja đijekhe manušesere ki phuv. Adalese so o Isus žrtvujinđa korkoro pes, o Devel šaj te oprostini đijekh greh, đi o najphare greja.

![](https://cdn.door43.org/obs/jpg/360px/obs-en-49-12.jpg)

O šukar delja našti te spasinen tut. Nane ništa so tu šaj te ćere te ovel tut zajedništvo e Devleja. Samo o Isus šaj te kosel te greja. Tu valjani te verujine dai o Isus e Devlesoro Čhavo, da mulo ko krsto umesto tuće hem da o Devel vazdinđa le taro mule.

![](https://cdn.door43.org/obs/jpg/360px/obs-en-49-13.jpg)

O Devel ka spasini đijekhe kova verujini ano Isus hem kova prihvatini le sar ple Gospodare. Ali, na ka spasini okole kova na verujini ano leste. Nane bitno injan li tu barvalo ili čororo, murš ili đuvli, purano ili terno, ili kaj živineja. O Devel mangela tut hem mangela te verujine ano Isus te šaj ovel le zajedništvo tuja.

![](https://cdn.door43.org/obs/jpg/360px/obs-en-49-14.jpg)

O Isus vičini tut te verujine ano leste hem te ove krstime. Verujineja li dai o Isus o Mesija, jedino Čhavo e Devlesoro? Verujineja li da injan grešniko hem da zaslužineja te kaznini tut o Devel? Verujineja li da o Isus mulo ko krsto te legari te greja?

![](https://cdn.door43.org/obs/jpg/360px/obs-en-49-15.jpg)

Te verujinđan ano Isus hem ano okova so ov tuće ćerđa, onda injan hrišćanin. O Devel ikalđa tut taro e Sotonesoro bišukar carstvo savoi sar tomina hem čhivđa tut ano e Devlesoro carstvo savoi sar svetlost. O Devel lelja to purano, grešno dživdipe hem dinđa tut nevo, pravedno dživdipe.

![](https://cdn.door43.org/obs/jpg/360px/obs-en-49-16.jpg)

Te injan hrišćanin, o Devel oprostinđa te greja zbog adava so o Isus ćerđa. Akana o Devel dikhela tut sar pašutne amale, a na sar neprijatelje.

![](https://cdn.door43.org/obs/jpg/360px/obs-en-49-17.jpg)

Te injan amal e Devlesoro hem sluga e Gospodesoro e Isusesoro, tu ka mange te ove poslušno okolese so o Isus sikaj. Iako injan hrišćanin, palem ka ove ani kušnja te grešine. Ali o Develi verno hem vaćeri da te priznajinđan te greja, ov ka oprostini će. Ov ka del tut zoralipe te borine tut protiv o greh.

![](https://cdn.door43.org/obs/jpg/360px/obs-en-49-18.jpg)

O Devel vaćeri će te moline tut, te sikljove lesoro Lafi, te slavine le zajedno avere hrišćanencar hem te vaćere averenđe so ov ćerđa će. Sa akava pomožini će te ovel tut po paše zajedništvo oleja.

*E biblijakiri paramiz taro Lil e Rimljanenđe 3,21–26; 5,1–11; Jovan 3,16; Marko 16,16; Lil e Kološanenđe 1,13–14; 2. lil e Korinćanenđe 5,17–21; 1. lil e Jovanesoro 1,5–10*

## 50. O Isus irini pe

https://openbiblestories.org/l/rmy-x-vwa/story-50/

![](https://cdn.door43.org/obs/jpg/360px/obs-en-50-01.jpg)

Skoro sar 2.000 berš, sa više hem više o manuša taro sa o krajevija e phuvjakere šunena o šukar lafi e Isusestar e Mesijastar. I Khanđiri barjola. O Isus obećinđa da ka irini pe ked ka avel o kraj akala phuvjakoro. Iako pana na irinđa pe, ov ka ispunini plo obećanje.

![](https://cdn.door43.org/obs/jpg/360px/obs-en-50-02.jpg)

Sar pana adžićeraja e Isuse te irini pe, o Devel mangela te živina ko način savoi sveto hem savo dela lese slava. Ov da mangela te vaćera averenđe lesere carstvostar. Ked o Isus živinđa ki phuv, phenđa: "Mle učenici ka propovedinen o šukar lafi e Devlesere carstvostar ko sa o krajevija e phuvjakere, i tegani ka avel o kraj."

![](https://cdn.door43.org/obs/jpg/360px/obs-en-50-03.jpg)

Isi but manuša kola pana na šunđe e Isusese. Angleder so irinđa pe ano nebo, o Isus phenđa e hrišćanenđe te vaćeren o šukar lafi e manušenđe kola niked na šunđe le. Phenđa: "Džan hem ćeren sa e manušen te oven mle učenici!" Phenđa hem akava: "O njivei spremna zaki žetva!"

![](https://cdn.door43.org/obs/jpg/360px/obs-en-50-04.jpg)

O Isus phenđa hem akava: "O sluga nane po baro ple gospodarestar. Sar so o manuša ko vlast mrzinđe man, ađahar hem tumen ka mučinen hem ka mudaren zbog mande. Iako ka trpinen ki akaja phuv, oven ohrabrime adalese so me pobedinđum e Sotone, kova vladini upri akaja phuv. Te ačhiljen verna đi o kraj, tegani o Devel ka spasini tumen!"

![](https://cdn.door43.org/obs/jpg/360px/obs-en-50-05.jpg)

O Isus ple učenikonenđe vaćerđa akaja paramiz te objasnini lenđe so ka ovel e manušencar ked ka ovel kraj e phuvjakoro. Phenđa: "Nesavo manuš sadinđa šukar seme pese ki njiva. Sar ine sovela, alo lesoro neprijatelj hem sadinđa šuki čar maškaro điv i dželo."

![](https://cdn.door43.org/obs/jpg/360px/obs-en-50-06.jpg)

"Ked o biljke iklile, o sluge adale manušesere phenđe: 'Gospodarona, tu sadinđan šukar seme ki akaja njiva. Sose onda isi šuki čar upro late?' O Gospodari phenđa: 'Verovatno o neprijatelj sadinđa la'".

![](https://cdn.door43.org/obs/jpg/360px/obs-en-50-07.jpg)

"O sluge phenđe ple gospodarese: 'Te ikala i šuki čar?' O Gospodari phenđa: 'Na. Te ćerđen adava, ka ikalen hem kotor oto điv. Adžićeren o vreme e čedibnasoro, i tegani čeden i šuki čar ki kupa te tharel pe, a o điv čhiven maje ki šupa.'"

![](https://cdn.door43.org/obs/jpg/360px/obs-en-50-08.jpg)

O učenici na xalile o značenje akala paramizakoro, i pučle e Isuse te objasnini lenđe. O Isus phenđa: "O manuš kova sadinđa o šukar seme predstavini e Mesija. I njiva predstavini i phuv. O šukar seme predstavini e manušen e Devlese ano carstvo."

![](https://cdn.door43.org/obs/jpg/360px/obs-en-50-09.jpg)

"I šuki čar predstavini e manušen kolencar vladini o Bišukar. O Neprijatelj kova sadinđa i šuki čar predstavini e benge. O vreme e čedibnasoro predstavini o kraj e phuvjakoro, a o manuša kola čedena predstavinena e Devlesere anđelen."

![](https://cdn.door43.org/obs/jpg/360px/obs-en-50-10.jpg)

Ko kraj e phuvjakoro, o anđelja ka čeden sa e manušen kolencar vladini o beng hem ka frdel len ani jag, kote ka roven hem ka krcinen dandencar ani bari patnja. Tegani o pravednici ka svetlinen sar o kham ano carstvo e Devlesoro, lengere Dadesoro.

![](https://cdn.door43.org/obs/jpg/360px/obs-en-50-11.jpg)

O Isus phenđa hem akava, da ka irini pe ki phuv angleder so ka ovel kraj e phuvjakoro. Ka irini pe ko isto način sar so dželo, adava značini da ka ovel le fizičko telo hem ka avel upro oblaci e nebosere. Ked ka irini pe o Isus, đijekh hrišćanin kova mulo ka uštel taro mule hem ka resel pe oleja ano nebo.

![](https://cdn.door43.org/obs/jpg/360px/obs-en-50-12.jpg)

Tegani o hrišćanja kolai pana dživde ka džan ko nebo hem ka pridružinen pe e hrišćanenđe kola uštine taro mule. Sare ka oven adari e Isuseja. Palo adava, o Isus ka živini ple narodoja ano savršeno mir hem ano jedinstvo, zauvek.

![](https://cdn.door43.org/obs/jpg/360px/obs-en-50-13.jpg)

O Isus obećinđa da ka del kruna đijekhese kova verujini ano leste. On zauvek ka živinen hem ka vladinen e Devleja ano savršeno mir.

![](https://cdn.door43.org/obs/jpg/360px/obs-en-50-14.jpg)

Ali, o Devel ka sudini đijekhe kova na verujini ano Isus. Ka frdel len ano pakao, kote zauvek ka roven hem ka krcinen dandencar ani patnja. I jag savi niked na ka ačhol, stalno ka tharel len, a o čirme stalno ka xan len.

![](https://cdn.door43.org/obs/jpg/360px/obs-en-50-15.jpg)

Ked ka irini pe o Isus, skroz ka uništini e Sotone hem lesoro carstvo. Ka frdel e Sotone ano pakao, kote zauvek ka thabljol, zajedno sarijencar okolencar kola odlučinđe te sledinen ole umesto te oven poslušna e Devlese.

![](https://cdn.door43.org/obs/jpg/360px/obs-en-50-16.jpg)

Adalese so o Adam hem i Eva inele neposlušna e Devlese hem anđe o greh ani akaja phuv, o Devel prokletinđa i phuv hem odlučinđa te uništini la. Ali, jekh dive o Devel ka ćerel nevo nebo hem nevi phuv, save ka oven savršena.

![](https://cdn.door43.org/obs/jpg/360px/obs-en-50-17.jpg)

O Isus hem lesoro narodo ka živinen ki nevi phuv, a ov zauvek ka vladini upro sa so postojini. Ka kosel đijekh asvi hem na ka oven više patnje, ni tugujiba, ni rojba, ni bišukaripe, ni dukha, ni meriba. O Isus ka vladini upro plo carstvo ano mir hem ani pravda, hem zauvek ka ačhol ple narodoja.

*E biblijakiri paramiz taro Matej 24,14; 28,18; Jovan 15,20; 16,33; Otkrivenje 2,10; Matej 13,24–30, 36-42; 1. lil e Solunjanenđe 4,13–5,11; Lil e Jakovesoro 1,12; Matej 22,13; Otkrivenje 20,10; 21,1–22,21*