# unfoldingWord Open Bible Stories — Rathawi

- Language code: `rtw`
- Canonical page: https://openbiblestories.org/l/rtw/
- Stories in this file: 50 of 50
- Published by: OBS-TLF
- Last release: 2026-06-26
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Rathawi translation; it is not a translation of the whole Bible.

## 1. ૦১. બણાવલુ

https://openbiblestories.org/l/rtw/story-1/

![](https://cdn.door43.org/obs/jpg/360px/obs-en-01-01.jpg)

ઈનિ રીતે બધુ સાલુ હોયુ, ઈસવર સો દાહળામાં દુનિયા ને તિનામાંનુ બધુ બણાયુ. ઈસવર જેર ધરતી બણાવી તેર ચે અંધારા થી ભરલી હતી.ને સાહા બીંજુ કચૂદ ની હોતુ, પુન ઈસવરનો આત્મા પાણી પોર સાલતલો.

![](https://cdn.door43.org/obs/jpg/360px/obs-en-01-02.jpg)

તેતાર ઈસવર કહયુ, “ઈજોળુ હોય જા” ને ઈજોળુ હોય જયુ, ને ઈસવર ચુ ઈજોળુ ભાલ્યુ ને ચુ વારુ હોતુ, ને તીનાને “દાહળો” કહયો, ને તિનાને ચુ અંધારલાથી આંગે કર્યો, ને અંધારલાને “રાત” કહી, બણાવાના પેહલે દાહળે ઈસવર ઈજોળુ બણાયુ.

![](https://cdn.door43.org/obs/jpg/360px/obs-en-01-03.jpg)

બણાવાના બીજે દાહળે ઈસવર કહયુ ને ધરતી પોર અંતરિક્ષ બણાયુ, ચુ હરેગના પાણીને ને નિસેના પાણીને આંગે કર્યુ.

![](https://cdn.door43.org/obs/jpg/360px/obs-en-01-04.jpg)

તિનમે દાહળે ઈસવર બોલ્યો ને પાણીને ભોયથી આંગે કર્યુ, તિની ભોયને ધરતી કહી, ને પાણીને દરીયો કહયો. ને ઈસવર ભાલ્યુ કિ જયુ બણાયુ ચુ વારુ સે.

![](https://cdn.door43.org/obs/jpg/360px/obs-en-01-05.jpg)

હિના પસી ઈસવર કહયુ, “ધરતી ખોળ, બિ વાલુ સાક, ને ફલ ઉગાળે”, ને હહીદ હોય જયુ. ઈસવર ભાલ્યુ કી જ્યુ બણાયુ ચું વારલુ સે.

![](https://cdn.door43.org/obs/jpg/360px/obs-en-01-06.jpg)

ને બણાવાના ચારમે દાહળે ઈસવર ધરતી પોર ઈંજોળુ આપવા ને રાતને ને દાહળાને આંગે પાળવા દાહળો, સાંદ ને તારા બણાયા. ઈસવર ભાલ્યુ કી જ્યુ બણાયુ ચુ વારલુ હોયુ.

![](https://cdn.door43.org/obs/jpg/360px/obs-en-01-07.jpg)

પાસમે દાહળે ઈસવર પાણીમાંના બધી જાતના જનાવોરુ બણાયા, ને ઈસવર ભાલ્યુ ને ચુ બધુ વારુ સે. ઈસવર તિનુને આશીરવાદ આપ્યો.

![](https://cdn.door43.org/obs/jpg/360px/obs-en-01-08.jpg)

બણાવાના સોવમા દાહળે ઈસવર કહયુ, “ધરતિ પોરના બધી જાતના જનાવોરુ બણો,” ને ઈસવર દહી કહયુ તિની રીતે થોળાક પાલે ચે જનાવોરુ ને થોળાક પેટે સાલવાવાલા જનાવોરુ ને, થોળાક જંગલી જનાવરુ હોતા. ઈસવર ભાલ્યુ ને ચુ વારુ હોતુ.

![](https://cdn.door43.org/obs/jpg/360px/obs-en-01-09.jpg)

ને ઈસવર કહયુ, “આવો આપણુ આપણા રુપ ઘાટ જેહલો માણેહને બણાવજે, ચુ ધરતી પોરના બધા જનાવોરુ પોર હક સલાળે.”

![](https://cdn.door43.org/obs/jpg/360px/obs-en-01-10.jpg)

ઈસવર થોળોક ધુલો લેધો ને તિનાથી માણેહનુ પુતલુ બણાયુ, ને તિનામાં જીવનો હાહ ફુકયો, તિના માણેહનુ નામ આદેમ હોતુ. ને આદેમ રહવા લેધે ઈસવર એક એદન નામની વાળી બણાવી, સાહા રહીકને ચુ બધાની હમાલ રાખે.

![](https://cdn.door43.org/obs/jpg/360px/obs-en-01-11.jpg)

ઈસવર વાડીની વસમા બે ખાસ ઝાળુ રોપ્યા, એક જીણગીનુ ઝાળ ને બિજુ વારુ ને ખરાબ જાણવાનુ ઝાળ. ઈસવર આદમને કહયુ તુ બધા ઝાળુના ફલ ખાઈ હકે, પુન વારુ ને ખરાબ જાણવાના ઝાળનુ ની, હિના ઝાળનુ ફલ ખાહે ચુ મરહેત.

![](https://cdn.door43.org/obs/jpg/360px/obs-en-01-12.jpg)

તેતાર ઈસવર કહયુ “માણેહ એખલો રહે ચુ ની વારુ” ને જનાવરુમાનુ કોય પુન આદેમની મદેક કરવાવાલુ ની બણી હકયુ.

![](https://cdn.door43.org/obs/jpg/360px/obs-en-01-13.jpg)

તિને ઈસવર આદમને ભોર નિંદેરમાં નાખ્યો, ને તિનાન્યુ પાહલ્યુમાની એક પાહલી કાઢી ને તિનીની એક બયેર બણાવી, ને તિનીને ચુ આદમ પાહે લાયો.

![](https://cdn.door43.org/obs/jpg/360px/obs-en-01-14.jpg)

ને આદેમ તિનીને ભાલી ને કહયુ, “ઈયે માર હરખીદ હોવી, ચુ તિનીને બયેર કહી. કાહા કી ચે આદમીમાંથી લેવાયલી સે. હિના લેધે માણેહ પોતાના આચ બાહા ને સોળિકને તિનાની ઘોરવાલી ભેગો એક હોવહે.”

![](https://cdn.door43.org/obs/jpg/360px/obs-en-01-15.jpg)

ઈસવર આદમીને ને બયેરને પોતાના રુપ ઘાટમાં બણાયા, ચુ તિનુને આશિરવાદ આપ્યો ને કહયુ, “તિનુને ઘણા પોર્યાના પોર્યા હોવે, ને આખી ધરતી ભરાય જાય” ને ઈસવર ભાલ્યુ કી ચુ જયુ બણાવલુ ચુ બધુ વારુ હોતુ. ને ચે ઘણા ખુસ હોય જયા, ને ઈયુ બધુ સોવ દાહળામાં બણયુ.

![](https://cdn.door43.org/obs/jpg/360px/obs-en-01-16.jpg)

ને જેર હાતમો દાહળો આયો તેર ઈસવર તિનાનુ કામ પુરુ કર્યુ, ને બધા કામુમાથો આરામ લેધો. ને ચુ હાતમાં દાહળાને ભરકેત આપી, ને પવિત્ર ગીણ્યો, કાહા કી હાતમે દાહળે ચુ બધા કામુમાથો આરેમ લેધલો, ઈનિ રીતે ઈસવર દુનિયા ને તિનીમાંનુ બધુ બણાયુ.

*બાઈબલ નો વાતરો- બણાવલુ ૧-૨*

Audio: https://git.door43.org/OBS-TLF/rtw_obs/releases/download/v1/rtw_obs_v1_01_128kbps.m4a

## 2. ૦૨. પાપ દુનિયામાં આયુ

https://openbiblestories.org/l/rtw/story-2/

![](https://cdn.door43.org/obs/jpg/360px/obs-en-02-01.jpg)

ઈસવર બણાવલી વારૂ વાળીમાં આદમ ને તીનાની બયેર હવા ખુસીથી રહતલાં. ચેં સાખલાં ની પેહેરતલા તે હોદે તીનુને લાજુ ની આવતલુ. કાહા કી દુનિયામાં પાપ ની હોતુ. ચેં કાયેમ વાળીમાં ઈસવર ભેગાં સાલતલાં ને વાતે કરતલાં.

![](https://cdn.door43.org/obs/jpg/360px/obs-en-02-02.jpg)

પુન તીની વાળીમાં એક સેતેરવાવાલો ગહળો રહતલો. ચુ હવાને પુસ્યુ, કો ઈસવર તહુને હાસુદ અહી કહયુ કી વાળીના બધા ઝાળુના ફલ ની ખવા.

![](https://cdn.door43.org/obs/jpg/360px/obs-en-02-03.jpg)

હવા જપાબ આપ્યો, “ઈસવર હમુને કહયુ કી હમુ બધા ઝાળુના ફલ ખાય હકજે પુન ભલુ ભુંડુ જાણવાનુ ફલ ની.” ઈસવર હમુને કહયુ કિ, તહું હિયું વારુ ને ખરાબ જાણવાનુ ફલ ધરહો નીતે ખાહો તિને દાહળે તહું મરહો.

![](https://cdn.door43.org/obs/jpg/360px/obs-en-02-04.jpg)

ગહળો તિનીને જપાબ આપ્યો, હિયે ખોટી વાત સે. તહુ ની મરો પુન ઈસવર ને ખબેર સે કી તહુ ખાહો તેર ઈસવર જેહલા વારુ ને ખરાબ જાણવાવાલા બણી જહો.

![](https://cdn.door43.org/obs/jpg/360px/obs-en-02-05.jpg)

હવા ભાલ્યુ તે ચુ ફલ ખવામાં વારૂ ને ભાલવામાં રૂપાલુ હોતુ. ચે હજુ વધાર અકેલવાલી બણવા માંગતલી તીને ચે ચુ ફલ તોળીકને ખાધુ. પસેણ ચે પોતાના આદમીને હોદે ખવા આપ્યુ ને ચુ હોદે ખાધુ.

![](https://cdn.door43.org/obs/jpg/360px/obs-en-02-06.jpg)

તિનીદ ટેમે તિનુના ડોલા ઉઘળી જયા, ને ચે ભાલ્યુ કી હમુ નાગેરલાદ હોયા, તેર ચે પાયડા હિવીકને સાખલા બણાવવા ને પોતાની દેહી ને ઢાકવા મથ્યા.

![](https://cdn.door43.org/obs/jpg/360px/obs-en-02-07.jpg)

તેર આદમ ને તિનાની બયેર હવા વાડીમાં સાલીક જતલા ઈસવરનો અવાજ હાંમલ્યો, ને ચે બેહોવ ઈસવરથી હતાય જયા, ને ઈસવર આદમને કહયુ, “તુ કા હોયો ?” આદમ કહયુ “મેં વાડીમાં તાર ચાલીક જવાનો અવાજ હામલ્યો, ને મેં બિહી જયો, કાહા કી મેં નાગેરલોદ હોતો. તિને મેં હંતાય જયો.”

![](https://cdn.door43.org/obs/jpg/360px/obs-en-02-08.jpg)

તેતાર ઈસવર પુચ્યુ “તને કોય કહયુ કી તુ નાગેરલો હોયો? જિના ઝાળનુ ફલ ની ખાવા કહલુ, ચુ કો તુ ખાધુ ?” આદમે કહયુ “માર હાંતે રહવા કરીકને જ્યે બયેર તુ મને આપલી ચે મને ફલ આપ્યુ ને મેં ખાધુ.” તેર ઈસવર બયેરને પૂચ્યુ, “ઈયુ તુ કો કર્યુ? “તેર બયેર જપાબ આપ્યો “ગહળો મને સેતરી”

![](https://cdn.door43.org/obs/jpg/360px/obs-en-02-09.jpg)

ઈસવર ગહળાને કહયુ. તુ હરાપવાલો સે, તુ પેટે સાલહી, ને ધુલો ખાહી. તાહરી ને બયેરની વસે, ને તાહરા સેલાની ને તિનીનાં પોર્યાની વસે વેર કરાવેહ. બયેરનો પોર્યો તાહરુ મુંડૂ છુદહે ને તુ તિનાની પુઠીએ કયેડહી.

![](https://cdn.door43.org/obs/jpg/360px/obs-en-02-10.jpg)

તિના પસી ઈસવર બયેરને કહયુ કી તુ દુખે પોર્યુ જણહી, ને તુ તાહરા ધણીહના કહયે સાલહી ને ચુ તાર પોર ધણીપણુ કરહે.

![](https://cdn.door43.org/obs/jpg/360px/obs-en-02-11.jpg)

ઈસવર આદમને કહયુ તુ તાહરી બયેરની વાત માનીકને માહરી આગ્ના તોડી. હાય ભોય હરાપિત હોય જેય, ને તાહરે ખાવાનુ ભેગુ કરવા તંતોડ મેહનેત કરવુ પડહે. તુ મરહી ને તાહરી દેહી ભોયમાં મેલાય જાહે, ચુ માણેહ આફાની બયેરનુ નામ “હવા” એતરે “જીવતલી” પાડયુ કાહા કી ચે બધા જીવતલાની આચ હોતી. ને ઈસવર આદમને ને હવાને જાનવોરના સામડાના સાખલા પેહરાયા.

![](https://cdn.door43.org/obs/jpg/360px/obs-en-02-12.jpg)

તેર ઈસવર કહયુ, “ભાલો ઈયુ માણેહ આપેણ હરખુ વારુ ને ખરાબ જાણવા વાલુ બણી જ્યુ. તિનુને જીણગીના ઝાડનુ ફળ ની ખવા દેવા. નિતે ચે બધા દાહળા જીવતા રહશે.” કરીકને ઈસવર આદમને ને હવાને વારુવાડીમાંથા બાહેર કાઢી મેચ્યા. ને ચેં જીણગીના ઝાડનુ ફળ તોડીકને ની ખાય કરીકને ઈસવર બધા દાહળા જીવાની જીણગીના ઝાડને હાસેવવા તાકેત વાલા દૂતને મેંચ્યો.

*બાયબલનો વાતરો ઉત્પતિ ૩*

Audio: https://git.door43.org/OBS-TLF/rtw_obs/releases/download/v1/rtw_obs_v1_02_128kbps.m4a

## 3. ૦૩. જલપ્રલય

https://openbiblestories.org/l/rtw/story-3/

![](https://cdn.door43.org/obs/jpg/360px/obs-en-03-01.jpg)

ઘણા ટેમ પસી માંણહુ દુનિયામાં જીવતલા. ને ચે માણહુ ઘણા ખરાબ ને મારી નાખવાવાલા બણી જેલા.ચુ ઘણુ ખરાબ હોતુ તિને ઈસવર નકકી કરયુ કી મેં આખી દુનીયાને ધોયકને મારી નાખેહ.

![](https://cdn.door43.org/obs/jpg/360px/obs-en-03-02.jpg)

પુન નુહ ઈસવરની નજેરમાં હાસો હોતો. ચુ ઘણા ખરાબ માણહુમાં જિવાવાલો હાસો માણેહ હોતો. ઈસવર પાણી થી ધોયકને મારી નાખવાની યોજના નુહને કહી. ને ચુ નુહને એક મોટી નાવડી બણાવા કહયુ.

![](https://cdn.door43.org/obs/jpg/360px/obs-en-03-03.jpg)

ઈસવર નુહને તિનહો (૩૦૦) હાથ લાંબી, ને પસાહ (૫૦) હાથ પનહી, ને તિસ (૩૦) હાથ ઉચી, ને તિન માલની ને, ઘણા ઓયળાવાલી ને ઉપોર પડાલ ને બારીવાલી લાકળાની એક મોટી નાવડી બણાવવા કહયું. ચે મોટી નાવડી પાણી આવહે તિના ટેમે નુહને, ને તિનાના કુટુંમને ને બધી જાતના જાનવરુને હમાલીકને રાખહે.

![](https://cdn.door43.org/obs/jpg/360px/obs-en-03-04.jpg)

નુહ ઈસવરની વાત માનિકને ચુ ને તિનાના તિન પોર્યા હોયકને ઈસવર કહલુ તહી ચે એક મોટી નાવડી બણાવી. હિયે નાવડી બણાવવા તીનુને ઘણા વરહુ લાજ્યા, કાહા કી ચુ ઘણુદ મોટુ હોતુ. નુહ જયુ પાણી આવવાનુ હોતુ, તિને માણહુને ઘણાદ શેતાયા, ને તીનુને ઈસવર ઘમી વલવા કહ્યુ પુન ચે ની માન્યા.

![](https://cdn.door43.org/obs/jpg/360px/obs-en-03-05.jpg)

ઈસવર નુહને કહયુ, તાર લેધે ને તાહરા કુટુમ લેધે, ને જનાવરુ લેધે પુરતુ ખવાનુ ભેગુ કર. જેર બધુ તીયાર હોય જયુ તેર ઈસવર નુહને કહયુ કી ટેમ પુરો હોય જયો ને તુ, તાહરી બયેર, ને તાહરા તિન પોર્યા ,ને તિનુની તિન ઘોરવાલ્યુ નાવડીમાં આય જોવ. ને ચે બધા હોયક ને આઠ માણહુ હોતા.

![](https://cdn.door43.org/obs/jpg/360px/obs-en-03-06.jpg)

ઈસવર, જલપ્રલય આવે તે બસી જાય કરીકને બધા જનાવરુમાંના ને પોદયામાના એક એક જોળી ને, તિનાને ભોગ સળાવી હકાય હેહલા હાત હાત જનાવરુની જોળી નુહ પાહે મોકલ્યા. ચે નાવડીમાં ચઢી જ્યા પસી ઈસવર બાયણુ બંધ કરી દેધુ.

![](https://cdn.door43.org/obs/jpg/360px/obs-en-03-07.jpg)

પસેણ વહરાત સાલુ હોય જ્યો. ને ચુ સાલીહ દાહડાને સાલીહ રાત લાગો ટેકો રહી જ્યો, ને ધરતીમાં પડૂ ફુટી જ્યા. આખી દુનિયા ને દુનિયામાંનુ બધુ ડુબી જ્યુ. ને મોટા મોટા ડુંગોરુ હોદે ડુબી જ્યા.

![](https://cdn.door43.org/obs/jpg/360px/obs-en-03-08.jpg)

જ્યે માણહુ ને જાનવરુ મોટી નાવડીમાં હોતા તીનુ વગેર ધરતી પોર જ્યુ હોતુ ચુ બધુ નાશ હોય જ્યુ. ને મોટી નાવડી તીરવા બાંજેય ને તિનીમાંના બધા બસી જયા.

![](https://cdn.door43.org/obs/jpg/360px/obs-en-03-09.jpg)

વહરાતનુ પાણી બંધ હોય જ્યુ પસેણ મોટી નાવડી પાંચ મહીના હુદી તીરી , ને હિના ટેમમાં પાણી ઓહરાયવા બાજયુ. ને એક દાહડે મોટી નાવડી અરારટ નાંમને ઉસે ડુંગોરે જાયકને ઊભી રહી, પુન તે હોદે દુનિયા પાણી થી ભરલી હોતી. તીન મહિના પસેણ બધા ડુંગોરુની ચોટલી દેખાયવા લાગી.

![](https://cdn.door43.org/obs/jpg/360px/obs-en-03-10.jpg)

સાલીહ દાહડા પસેણ, નુહ, પાણી ઓહર્યુ કી ની કરિકને ભાલવા કાગડાને બહાર છોળયુ, કાગડો કોરલી ભોય લેધે આડો અવલો ઉડ્યો, પુન તિનાને કદે જગા ની જળી.

![](https://cdn.door43.org/obs/jpg/360px/obs-en-03-11.jpg)

તિના પસેણ નુહ પારેવાને છોળ્યુ, પુન તિનાને કોરલી ભોય ની જડી, તિને ચુ પાસુ નુહ પાહે આયુ. એક હઠવાડ્યા પસેણ નુહ પાસો પારેવાને છોળ્યુ. ને ચુ જેતુન ઝાડનુ પાયડુ લેકને આયુ. પાણી અટાયવા બાજયુને ઝાડૂ પાસા ઉગવા બાજયા

![](https://cdn.door43.org/obs/jpg/360px/obs-en-03-12.jpg)

નુહ બીજુ એક હઠવાડીયુ વાટ જોવી, ને તિનમી આટો પાસો પારેવાને છોળ્યુ. હમણે તિનાને થાકો પીવાની જગા જડી, તિને ચુ પાસુ ની આયુ. ને પાણી હુકવા બાજ્યુ.

![](https://cdn.door43.org/obs/jpg/360px/obs-en-03-13.jpg)

બે મયના પસેણ ઈસવર નુહને કહયુ “તુ ને તાહરુ કુટુમ ને બધા જનાવોરુ મોટી નાવડીમાથા નિકલી જોવ. ને તહુને ઘણા પોર્યા ને પોરેયુ હોવે ને ધરતીને ભરી દોવ.” તિને નુહ ને તિનાનુ કુટુંમ મોટી નાવડીમાથા બાહેર આયા.

![](https://cdn.door43.org/obs/jpg/360px/obs-en-03-14.jpg)

નુહ મોટી નાવડીમાથો બાહેર આયો પસેણ વેદી બણાવી ને બધી જાતના જનાવરુ જીનુનો ભોગ ચડાવવાં વાપરી હકાય તિનુનો ભોગ ચડાયો. ઈસવર ભોગથી રાજી હોયો. ને નુહ ને તિનાનાં કુટુમને આશિરવાદ આપ્યો.

![](https://cdn.door43.org/obs/jpg/360px/obs-en-03-15.jpg)

ઈસવર કહયુ “હાય મેં કોયદાળ બી જે માણહું ખરાબ કરે તિનુ લેધે ધરતીને પાણી મોકલીકને ની મારુ. કાહાકી માણહુ ઝીંનલાં હોતા તેરનાંદ પાપમાં હોયા.”

![](https://cdn.door43.org/obs/jpg/360px/obs-en-03-16.jpg)

તિને ઈસવર વાયદાને નિસાનીના રુપમાં પેહલુ બાણ બણાયું. બધા ટેમે જેર હરેગમાં બાણ દેખાય, તેર ઈસવર પોતે આપલા વાયદાને ફોમ કરહે ને હહિદ તિનાના માણહુને હોદે કરહે.

*બાયબલનો વાતરો ઉત્પતિ ૬-૮*

Audio: https://git.door43.org/OBS-TLF/rtw_obs/releases/download/v1/rtw_obs_v1_03_128kbps.m4a

## 4. ૦૪. ઈબ્રાહિમની હાતે ઈસવરનો કરાર

https://openbiblestories.org/l/rtw/story-4/

![](https://cdn.door43.org/obs/jpg/360px/obs-en-04-01.jpg)

જલપ્રલયનાં ઘણા વરહુ પસેણ, દુનિયામાં ઘણા માણહુ હોય જેલા, ને ચે એકેદ બોલી બોલતલા. ઈસવર ધરતીને પુરેપુરી ભરવા આગ્ના આપલી, તિના લેધે ચે ભેગા હોયા ને હેહેર બાધયું.

![](https://cdn.door43.org/obs/jpg/360px/obs-en-04-02.jpg)

ચે મોટાય કરવાવાલા બણી જયા, ને ઈસવર કહલુ તહી ચે ની કરયુ.ચે હરેગ હુંદી પોહતી જાય હેહલો ઉસામા ઉસો બુરજ બાંધવાનુ સાલુ કરયુ. ઈસવર ભાલયુ કી ચે ખરાબ કામુ ભેગા વલિકને કરહે તે ચુ ઘણુદ ખરાબ હોય જાહે.

![](https://cdn.door43.org/obs/jpg/360px/obs-en-04-03.jpg)

તિને ઈસવર તિનુની બોલી બદલી દેધી, ને માણહુંને દુનિયામાં ખોલવી નાખયા. જયુ હહેર ચે બાંધવાનુ સાલુ કરલુ તિનાનુ નાંમ બાબિલ હોતુ, તિનાનો અરેથ “ગરબળ” સે.

![](https://cdn.door43.org/obs/jpg/360px/obs-en-04-04.jpg)

ઘણા વરહુ પસેણ ઇસવર ઈબ્રામ નામના માણેહ હાતે વાત કરી. ઈસવર તિનાને કહયુ “તાહરો દેહ ને તાહરુ કુટુમ છોડદેકને જે જગા મે તને દેખાળુ સાહા જા. મેં તને ભરકેત આપેહ ને તારથી મેં એક મોટી પેઢી ઉભી કરેહ. મેં તાહરુ નામ મોટુ કરેહ. જયુ તને ભરકેત આપહે તિનાને મેં ભરકેત આપેહ ને જે તને હરાપ આપહે તિનાને મે હરાપ આપેહ. તાહરી લેધે ધરતી પોરના બધા કુટુબ ભરકેત વાલા બણહે.”

![](https://cdn.door43.org/obs/jpg/360px/obs-en-04-05.jpg)

તિને ઈબ્રામ ઈસવરની આગ્ના માંની. ચુ તિનાની બયેર સારાને, ને તિનાના વેઠીયાને, ને જયુ કમાયલો ચુ બધુ લેકને જ્યુ કનાન દેહ ઇસવર દેખાળલો સાહા જયો.

![](https://cdn.door43.org/obs/jpg/360px/obs-en-04-06.jpg)

જેર ઈબ્રામ કનાન દેહમાં આયો, તેર ઈસવર કહયુ,“તાહરી આહેપાહે ભાલ મેં તને ને તાહરા કુટુમનાને ઈયુ દેહ, જયુ તુ ભાલે ચુ વારસામાં આપેહ.” તેર ઈબ્રામ તિના દેહમાંદ રહી જયો.

![](https://cdn.door43.org/obs/jpg/360px/obs-en-04-07.jpg)

એક દાહળે ઈબ્રામ ,ઉસામાં ઉસા ઈસવરના સેવક મલખીસદેકને ભેગાયો. મલખીસદેક ઈબ્રામને ભરકેત આપી ને કહયુ,“હરેગ ને ધરતીનાં માલીક ઈબ્રામને ભરકેત આપો.” તેર ઈબ્રામ મલકીસદેકને તિનાની મિલકેતમાથી દોહમો ભાગ આપ્યો.

![](https://cdn.door43.org/obs/jpg/360px/obs-en-04-08.jpg)

ઘણા વરહુ નિકલી જયા, પુન ઈબ્રામ ને સારાને એતાર હુદી એક હોદે પોર્યુ ની હોતુ. ઈસવર ઈબ્રામ હાંતે વાત કરી ને પાસો વાયદો કર્યો કી તને પોર્યો હોવહે, ને હરેગના તારા જેતરા વંશવેલો વધાળેહ. ઈબ્રામ ઈસવરના વાયદા પોર ભરહો કરયો. ઈસવર જાહેરાત કરી કી ઈબ્રામ હાસો હતો. કાહાકી ચુ ઈસવરની વાત માન્યો.

![](https://cdn.door43.org/obs/jpg/360px/obs-en-04-09.jpg)

તેર ઈસવર ઈબ્રામ હાતે કરાર બાધયો. કરાર તે બે પાલટી વચે સહમતી સે. ઈસવર કહયુ,“ મે તને તાહરાથીદ પોર્યો આપેહ. મેં તાહરા વંશવેલાને કનાન દેહ આપેહ.” પુન હજુ લગી ઈબ્રામને પોર્યો ની હોતો.

*બાયબલનો વાતરો ઉત્પતિ ૧૧-૧૫માંથી*

Audio: https://git.door43.org/OBS-TLF/rtw_obs/releases/download/v1/rtw_obs_v1_04_128kbps.m4a

## 5. ૦૫. વાયદાનો પોર્યો

https://openbiblestories.org/l/rtw/story-5/

![](https://cdn.door43.org/obs/jpg/360px/obs-en-05-01.jpg)

દોહ વરેહ પસેણ ઈબ્રામ ને સારાય કનાન દેહ માં પોહચ્યા, તિનુને હજુ લગી એક હોદે પોર્યુ ની હોતુ.તિને ઈબ્રામની બયેર સારા તિનાને કહયુ,“ હજુ હુદી ઈસવર મને પોર્યુ ની આપ્યુ ને હાય મેં ડોહી હોય જેય ને ઈયા માહરી સાકરેન હાગાર હોવી. તુ તિની હાતે વિહા કરલે કિ તિનીથી માર લેધે પોર્યો હોવે.”

![](https://cdn.door43.org/obs/jpg/360px/obs-en-05-02.jpg)

તિને ઈબ્રામ હાગાર હાતે વિહા કર્યા, ને હાગારથી પોર્યો હોયો, ને ઈબ્રામ તિનાનુ નામ ઈશ્માયેલ પાડ્યું. પુન સારાય હાગારની કુહરાય કરવા બાજેય.જેર ઈશ્માયેલ 13 વરેહનો હોયો, તેર ઈસવર પાસો ઈબ્રામ હાંતે બોલ્યો.

![](https://cdn.door43.org/obs/jpg/360px/obs-en-05-03.jpg)

ઈસવર કહયુ, “મેં બધી તાકેતવાલો ઈસવર હોયો.મેં તાર હાતે કરાર બાંધેહ.” તેર ઈબ્રામ ભોય લગી નમયો. ઈસવર ઈબ્રામને ઈયુ હોદે કહયુ,“તુ ઘણી દેહજાતિનો બાહ હોવહી, મેં તને ને તાહરા વંસવેલાને ઈયુ કનાન દેહનો વારસો આપેહ ને મેં તિનુનો બંધા દાહડાનો ઈસવર હોવેહ.ને તાહરે તારા કુટુંમના આદમીની સુન્નત કરાવવી.”

![](https://cdn.door43.org/obs/jpg/360px/obs-en-05-04.jpg)

“ તાહરી બયેર, સારા ને પોર્યો હોવહે – ચુ વસોનનો પોર્યો હોવહે.તિનાનુ નામ ઈસહાક રાખજી. મેં માહરો કરાર તિનાની હાતે કરેહ, ને ચે એક મોટી દેહજાતી બનહે. મેં ઈશ્માયેલ ને હોદે મોટી દેહજાતી બનાવેહ, પુન માહરો કરાર ઈસહાક હાતે હોવહે.” તિના પસેણ ઈસવર ઈબ્રામનુ નામ બદલિકને ઈબ્રાહિંમ પાડ્યું.જીનાનો અરર્થ “ઘણાનો બાહ” ઈસવર સારાયનુ નામ બદલીકને સારા પાડ્યુ, કી જીનાનો અરર્થ “રાજકુમારી” હોવે.

![](https://cdn.door43.org/obs/jpg/360px/obs-en-05-05.jpg)

તિને દાહળે ઈબ્રાહિંમ આફાના ઘોરના બધા આદમીઓની સુન્નત કરી.એક વરેહ પસેણ જેર ઈબ્રાહિંમ ૧00 વરેહનો ને સારા ૯0 વરેહની હોવી,તેર સારા ઈબ્રાહિંમના પોર્યાનો જલમ આપ્યો.ચે તિનાનુ નામ ઈસહાક પાડયું.જહી ઈસવર કહલુ તહિ.

![](https://cdn.door43.org/obs/jpg/360px/obs-en-05-06.jpg)

જેર ઈસહાક જુવાન હોયો તેર ઈસવર ઈબ્રાહિંમની અહી કસોટી કરી “તાહરો એકનો એક પોર્યો ઈસહાકને લઈલે ને તિનાને માર લેધે ભોગ ચળાય દે.” પાસો ઈબ્રાહિંમ ઈસવરની આગ્ના માન્યો ને આફાના પોર્યાનો ભોગ આપવા તિયાર હોય જ્યો.

![](https://cdn.door43.org/obs/jpg/360px/obs-en-05-07.jpg)

જેર ઈબ્રાહિંમ ને ઈસહાક ભોગ ચડાવવાની જગાએ જતલા તેર ઈસહાક પુચ્યુ,“બા આપણી પાહે ભોગ ચડિવવા લાકડા હોયા પુન ઘેટુ કા હોયુ?” ઈગ્રાહિંમ જપાબ આપ્યો,“માહરા પોર્યા ભોગ ચડાવવા ઈસવર ઘેટુ પુરુ પાડહે.”

![](https://cdn.door43.org/obs/jpg/360px/obs-en-05-08.jpg)

જેર ચે ભોગ ચડાવવાની જગાએ પોહચ્યા, તેર ઈબ્રાહિંમ તિનાનો પોર્યો ઈસહાકને બાધ્યો ને સાય પોર હુવાડ્યો.જેર ચુ આફાના પોર્યાને મારવા જતલો, તેતાર ઈસવર કહયુ,“ ઉભો રેહ,પોર્યાને કચ્યુની કરતો હોય. હાય મેં જાણી જયો કી તુ મારથી બીહે ને ચુ આફાનો એકનો એક પોર્યાને માહેરથી પાસો ની કર્યો.”

![](https://cdn.door43.org/obs/jpg/360px/obs-en-05-09.jpg)

તેર ઈબ્રાહિમે થડુમના ઝાળુમાં ફસાય રહલો ઘેટો ભાલ્યો. ઈસવર ઈસહાકની જગાએ ઘેટાને ભોગ ચડાવવા પુરો પાડ્યો.ઈબ્રાહિંમે રાજીથી ઘેટાનો ભોગ ચડાયો.

![](https://cdn.door43.org/obs/jpg/360px/obs-en-05-10.jpg)

તેર ઈસવર ઈબ્રાહિંમને કહયું, “કાહાકી તુ મને બધુ આપવાની મરજી હોવી ઈયા લગીકી તાહરો એકનો એક પોર્યો,તિને મેં તને ભરકેત વાલો બણવાનુ વસોન આપુ. તાહરો વંસવેલો હરેગના તારા કરતે વધાર હોવહે. કાહાકી તુ મારી આગ્ના માંની દુનિયાના બંધા કુટુમ તાહરા કુટુંમથી ભરકેત વાલા બણહે.”

*બાઈબલની વાર્તાઉત્પતિ 16-22*

Audio: https://git.door43.org/OBS-TLF/rtw_obs/releases/download/v1/rtw_obs_v1_05_128kbps.m4a

## 6. ૦૬. ઈસવર ઈસહાકને પુરુ પાડે.

https://openbiblestories.org/l/rtw/story-6/

![](https://cdn.door43.org/obs/jpg/360px/obs-en-06-01.jpg)

જેર ઈબ્રાહિંમ ઘણોદ ડાહો હોય જયો. તિનાનો પોર્યો ઈસહાક હલકોહ જુવાન હોયો તેર ઈબ્રાહિંમ તિનાના વેઠયામાના એકને આફાના દેહમાં જાહાં તિનુના હગા રહતલા સાહાં તીનાના પોર્યા ઈસહાકની બયેર લાવવા કરીકને પાસો મોકલ્યો.

![](https://cdn.door43.org/obs/jpg/360px/obs-en-06-02.jpg)

ઈબ્રાહિમના હગા જાહા રહતલા તિના દેહ ઘમીં ઘણો સાલતો સાલતો જયો. ઈસવર તિના સાકરને રિબકા લગી લીજયો. ચે ઈબ્રાહિમના ભાચની પોરેય હોતી

![](https://cdn.door43.org/obs/jpg/360px/obs-en-06-03.jpg)

રિબકા આફિના ઘોરને સોડવા ને સાકેર હાતે ઈસહાકને ઘોર જવાનુ માની લેધુ. જહી ચે આવી તહીદ તરેત ઈસહાક તિની હાતે વિહા કર્યા

![](https://cdn.door43.org/obs/jpg/360px/obs-en-06-04.jpg)

ઘણા ટેમ પસેણ ઈબ્રાહિમ મરી જ્યો ને ઈસવર બધાં વાયદા જે તિનાને કરારથી આપલુ ચુ ઈસહાકને આપ્યું.. ઈસવર ઈબ્રાહિમને વાયદો આપલો કી તિનાને ગીણાય ની હેતરા પોર્યા હોવહે. પુન ઈસહાકની બયેર રિબકાને પોર્યા ની હોતા

![](https://cdn.door43.org/obs/jpg/360px/obs-en-06-05.jpg)

ઈસહાક રિબકા લેધે પ્રાર્થના કરી ને ઈસવર તિનીને જોવલ્યા પોર્યા હાતે મહિના રીયા. બેહોવ પોર્યા રીબકાના પેટમાં હોતા તેર ચે એકબીજા ઝગડો કરતલા તિને રિબકા ઈસવરને પુચ્યુ કી ઈયુ કો હોય રીયુ

![](https://cdn.door43.org/obs/jpg/360px/obs-en-06-06.jpg)

ઈસવર રિબકાને કહયુ,“ તાહરા પેટમાં બે કુટુમ હોયા ને તિનુમાથી બે અલગ અલગ પ્રજા હોવહે. ચે એકબીજા હાતે ઝુમાહે ને મોટલો ભાચ નનલા ભાચની સેવા કરહે.“

![](https://cdn.door43.org/obs/jpg/360px/obs-en-06-07.jpg)

જેર રિબકાને પોર્યા જલમ્યા, મોટલો પોર્યો બાહેર આયો ને ચુ રાતલા રુવાવાલો હોતો ને ચે તિનાનુ નામ એસાવ પાડ્યું તેર તિનીનો નનલો પોર્યો એસાવની પુટી ધરીકને બાહેર આયો ને ચે તિનાનુ નામ યાકુબ પાડયું.

*બાયબલનો વાતરો ઉત્પતિ 24:1-25:26*

Audio: https://git.door43.org/OBS-TLF/rtw_obs/releases/download/v1/rtw_obs_v1_06_128kbps.m4a

## 7. ૦૭. ઈસવર યાકુબને ભરકેત આપી

https://openbiblestories.org/l/rtw/story-7/

![](https://cdn.door43.org/obs/jpg/360px/obs-en-07-01.jpg)

પોર્યા જહિ જહિ મોટા હોયા તહી યાકુબ ઘોર રહવાનુ ને એસાવ શિકાર કરવા જવાનુ નકકી કર્યુ. રિબકા યાકુબને લાડ કરતલી, પુન ઈસહાક એસાવને લાડ કરતલો.

![](https://cdn.door43.org/obs/jpg/360px/obs-en-07-02.jpg)

એક દાહળે એસાવ શિકાર કરિકને ઘોર આયો, તેર તિનાને ઘણીદ ભુખ લાગી.એસાવ યાકુબને કહયુ,“ તુ બણાવલુમાંથી થોડુક ખવાનુ લાવ.” યાકુબ જપાબ આપ્યો, “પેહલો તુ મને તાહરુ વડલાપણુ મને આપી દે.” તિને એસાવ યાકુબને તીનાનો વડલાપણો હક આપી દેધો. યાકુબ તિનાને થોડુક ખાવાનુ આપ્યું.

![](https://cdn.door43.org/obs/jpg/360px/obs-en-07-03.jpg)

ઈસહાક એસાવને તિનાની ભરકેત આપવા વિચારતલો. પુન ચુ હહી કરે પેહલા રિબકા ને યાકુબ ઈસહાકને એસાવ હોય હહી સેતર્યો. ઈસહાક ડાહો હોય રહલો ને તિનાને દેખાયતલુ ની. તિને યાકુબ એસાવના સાખલા પેહરી લેધા ને તિનાને ગલે ને હાથે બોકળીનુ ચામળુ પેહર્યુ.

![](https://cdn.door43.org/obs/jpg/360px/obs-en-07-04.jpg)

યાકુબ એસાવ પાહે આયો ને કહયુ,“ મેં એસાવ હોયો, મેં તાહરી પાહે આયો કી તુ મને ભરકેત આપી હકે.” જેર ઈસહાક બોકળીના કાન્યાને અડ્યો ને તિનાના સાખલાને ગંધ્યો, ને ચુ વિચાર્યુ કી મેં એસાવને ભરકેત આપ્વા બાઝિર્યો.“

![](https://cdn.door43.org/obs/jpg/360px/obs-en-07-05.jpg)

એસાવ યાકુબને વાક કાઢવા લાજ્યો કાહા કી ચુ તિનાનુ વડલાપણાનો હક ને તિનાની ભરકેત ચોરી લેધલી. તિને ચુ તિનાને બાહ મરી જાય પસેણ તિનાને મારી નાખવા વિચારતલો.

![](https://cdn.door43.org/obs/jpg/360px/obs-en-07-06.jpg)

પુન રિબકા એસાવનો વિચાર જાણી જેય. તિને ચે ને ઈસહાક યાકુબને તિનાના હગામાં મોકલી દેધો.

![](https://cdn.door43.org/obs/jpg/360px/obs-en-07-07.jpg)

યાકુબ રિબકાના હગાને ઘોર ઘણા વરહુ રહયો, તિના ટેમમાં તિનાના વિહા હોય જયા ને બાર પોર્યા ને પોરેયુ હોયા. ઈસવર તિનાને ઘણોદ માલદાર બણાયો.

![](https://cdn.door43.org/obs/jpg/360px/obs-en-07-08.jpg)

તિનાની રહવાની જગા કનાનથી વિહ વરેહ સેટો રીયો પસેણ, યાકુબ તિનાનુ કુટુબ, તિનાના સાકેરે ને જનાવરુના ટોલા હાંતે પાસો જયો.

![](https://cdn.door43.org/obs/jpg/360px/obs-en-07-09.jpg)

યાકુબ ઘણો ગભરા જેલો કાહા કી ચુ વિચાર કરતલો કી એસાવ હમણે હોદે મારી નાખવા હીંને. તિને ચુ એસાવ લેધે ભેટના રુપમાં જનાવરુના ટોલા મોકલ્યા.સાકેરે કી ચે જનાવરુ એસાવ પાહે લાયા, ચે તિનાને કહયુ કી,“ તાહરો ભાચ યાકુબ તને ઈયે જનાવરુ આપે.” ચુ એકદોમ આવે.

![](https://cdn.door43.org/obs/jpg/360px/obs-en-07-10.jpg)

પુન એસાવ તિનાને માફ કરી દેધલો, ને ચે એકબીજાને ભાલીકને ખુસ હોય જ્યા. તિના પસેણ યાકૂબ દેહમાં વારુ રીયો. તેર ઈસહાક મરિ જયો ને યાકુબ ને એસાવ તિનાને દાટી દેધો. જયુ કરારનો વાયદો ઈસવર ઈબ્રાહિમને આપલો ચુ હાય ઈસહાક પસેણ યાકૂબને આપ્યો.

*બાઈબલની વાર્તા ઉત્પતિ 25:27-33:20*

Audio: https://git.door43.org/OBS-TLF/rtw_obs/releases/download/v1/rtw_obs_v1_07_128kbps.m4a

## 8. ૦૮. ઈસવર યૂસફ ને તિનાના કુટુમને બસાવે.

https://openbiblestories.org/l/rtw/story-8/

![](https://cdn.door43.org/obs/jpg/360px/obs-en-08-01.jpg)

ઘણાંદ વરહુ પસેણ, જેર યાકુબ ડાહો હોય જયો, ચુ આફાના લાટકો પોર્યો યૂસફને તિનાના ભાચુહ કી ચે ઘેટા ચરાવતલા તિનુની ખબેર લેવા મોકલ્યો.

![](https://cdn.door43.org/obs/jpg/360px/obs-en-08-02.jpg)

યૂસફના ભાચુ તિનાની નિંદા કરતલા કાહા કી તિનુનો બાહ તિનાને બધા કરતે વધાર લાડ કરતલો ને યૂસફને હિંમણુ આવલુ કી ચુ તિનુ પોર હક સલાળહે. જેર યૂસફ તિનુના ભાચુ પાહે આયો, તેર ચે તિનાને નિનબોલે ધરીકને તિનાને થોલાક વેઠીયામાં વેપારીને વેચી દેધો.

![](https://cdn.door43.org/obs/jpg/360px/obs-en-08-03.jpg)

યૂસફના ભાચુ ઘોર આવા પાસા વલ્યા તેર પેહલા ચે યૂસફનો ઝંબો ફાડી નાચ્યો ને તિનાને બોકડીના લોહીમાં બોલ્યો. તિના પસેણ ચે ચુ ઝંબો આફાના બાહને દેખાડ્યો કી ચુ એહલુ વિચારે કી જંગલી જાનવરુ યૂસફને મારી નાચ્યો. યાકૂબને ઘણોદ હોંહ લાજ્યો.

![](https://cdn.door43.org/obs/jpg/360px/obs-en-08-04.jpg)

વેઠીયાના વેપારી યૂસફને મિસર દેહમાં લીજયા. મિસર ઘણો મોટો ને તાકેતવાલો દેહ હોતો ને ચુ નાઈલ કોતડાની ધેડે હોતો. વેઠીયાના વેપારી યૂસફને માલદાર સરકારી અધિકારીને સાહા વેચી દેધો. યૂસફ આફાના સેઠની ભાલદેખ વારુ કરી ને ઈસવર યૂસફને ભરકેત આપી.

![](https://cdn.door43.org/obs/jpg/360px/obs-en-08-05.jpg)

તિના સેઠની બયેર યૂસફ હાતે આવા હિંન્તલી, પુન યૂસફ ઈસવર અગોલ પાપ ની કર્યુ ચે ઘણીદ કીસવાય જેય ને ચે યૂસફ પોર નિનબોલે ગુનો માથે પાડ્યો તિને તિનાને ધરી લેધો ને તિનાને જેલમાં પુરી દેડાવે ને જેલમાં હોદે યૂસફ ઈસવરની નજેરમાં હાસો રીયો ને ઈસવર તિનાને ભરકેતવાલો કર્યો.

![](https://cdn.door43.org/obs/jpg/360px/obs-en-08-06.jpg)

યુસફ ગુના વગેરનો તે હોદે બે વરેહ પસેણ હોદે જેલમાં હોતો. એક રાતે મિસરના માણહુંના રાજા ફારુનને બે હિમણા આયાં. તીને ચુ વિચારમાં પડી જયો. તીનાને સલાહ આપવાવાલામાંનો એક બી તીના હિમણાનો અરથ ની કહયો.

![](https://cdn.door43.org/obs/jpg/360px/obs-en-08-07.jpg)

ઈસવર યુસફને હિમણાનો અરથ હમજાળવાની તાકેત આપી તીને ફારુન યુસફને જેલમાંથો બાહેર લાયો. યુસફ હિમણાનો અરથ કહયો ને તીનાને કહયુ "ઈસવર હાત વરહુ વારુ પકાળહે ને પસેણના હાત વરહુ કાલ પળહે."

![](https://cdn.door43.org/obs/jpg/360px/obs-en-08-08.jpg)

ફારુન યૂસફથી પાસો ઘણોદ રાજી હોય જયો ને ચુ મિસરમાં તિનાને બીજા નંબેરનો મોટો હોદો આપ્યો.

![](https://cdn.door43.org/obs/jpg/360px/obs-en-08-09.jpg)

યુસફ નુણવાના હાત વરહુમાં માણહુંને ખવા લેધે ધાન ભેગુ કરવા કહયુ. પસેણ યુસફ કાલ પડ્યો તેર માણહુંને ખવાનુ જળવા લેધે દાણા વીહસી આપ્યા

![](https://cdn.door43.org/obs/jpg/360px/obs-en-08-10.jpg)

ઈયુ કાલ મિસરમાં એતરોદ મોટો ની હોતો પુન કનાનમાં હોદે કી સાહા યાકુબ ને તિનાનુ કુટુંમ રહતલુ સાહા હોદે હેતરોદ મોટો હોતો.

![](https://cdn.door43.org/obs/jpg/360px/obs-en-08-11.jpg)

તિને યાકૂબ તિનાના મોટલા પોર્યાને ખાવાનુ વેસાતુ લેવા મિસરમાં મોકલ્યા. તિનાના ભાચુ જેર દાણા લેવા યૂસફ અગોલ ઉભા હોય રહલા તેર ચે યૂસફને ઓલખી ની હક્યા પુન યૂસફ તિનુને ઓલખી લીધા.

![](https://cdn.door43.org/obs/jpg/360px/obs-en-08-12.jpg)

ચુ તિનાના ભાચુહની કસોટી કરી ચુ જાણવા માંગતલો કી ચે બદલાય જયા કી ની, યૂસફ તિનુને કહયુ,"મેં તોહરો ભાચ યૂસફ હોયો ! બિહવા ની તહુ જેર મને વેઠયો હમજીકને વેચી દેધલો તેર તહુ ખોટુ કરવાનુ હોતુ પુન ઈસવર તિના ખોટાને વારલા કામુમાં વાપર્યો ! તહુ આવો ને મિસરમાં રહો કી મેં તહુને ને તોહરા કૂટુમને લેધે બધુ પુરુ પાડુ."

![](https://cdn.door43.org/obs/jpg/360px/obs-en-08-13.jpg)

જેર યૂસફના ભાચુ પાસા ઘોર વલ્યા ને તિનુનો બાહ યાકૂબને કહયુ કી," યૂસફ જીવતલો હોયો."તેર ચુ ઘણોદ ખુસ હોય જયો.

![](https://cdn.door43.org/obs/jpg/360px/obs-en-08-14.jpg)

યાકુબ ઘણોદ ડાહો હોય જયો.ચુ આફાના કુટુમની હાંતે મિસરમાં જયો ને યાકુબ મરી જયો તિના પેહલો ચુ તિનાના બધાં પોર્યાને ભરકેત આપી.

![](https://cdn.door43.org/obs/jpg/360px/obs-en-08-15.jpg)

કરારના વાયદા કી જે ઈસવર ઈબ્રાહિમને આપલા ચે ઈસહાક પાહે આયા ને તિના પસેણ યાકૂબ પાહે ને યાકુબ પસેણ તિનાના બાર પોર્યા ને તિનાના કુટુંબો પાહે આયા .બાર પોર્યાનો વંસવેલો બાર કુટુંમ બણ્યા.

*બાયબલનો વાતરો ઉત્પતિ 37-50*

Audio: https://git.door43.org/OBS-TLF/rtw_obs/releases/download/v1/rtw_obs_v1_08_128kbps.m4a

## 9. ૦૯. ઇસવર મુસાને બોલાયો.

https://openbiblestories.org/l/rtw/story-9/

![](https://cdn.door43.org/obs/jpg/360px/obs-en-09-01.jpg)

યૂસફ મરી જયો પસેણ તિનાના બધા હંગા મિસર દેહમા રીયા. ને તિનુનો વંસજો ઘણા વરહુ હુદી સાહા રીયા ને તિનુને ઘણા પોર્યા હોયા. ચે ઈઝરાયેલી કહવાયા.

![](https://cdn.door43.org/obs/jpg/360px/obs-en-09-02.jpg)

ઘણાદ વરહુ પસેણ ઈઝરાયેલીની સંખ્યા ઘણીદ વધી જેય. મિસરીઓને હાય યૂસફ ને ચે તિનુને કકીહી મદેદ કરલી ચુ તિનુને યાદ ની રીયુ. ચે ઈઝરાયેલીથી બિહવા બાજ્યા કાહાકી ચે ઘણાદ હોય જેલા. તિને મિસર દેહમાં તિનાટેમે ફારુન રાજો રાજ કરતલો ચુ ઈઝરાયેલીને વેઠીયા બણાયા.

![](https://cdn.door43.org/obs/jpg/360px/obs-en-09-03.jpg)

મિસરીઓ ઈઝરાયેલી પોર મોટા બંગલા ને હેહેરુ બાંધવા લેધે ડબોણ કર્યુ. ઘણુદ કાઠુ કરવાથી તિનુની જીણગીની હાલેત બગળી જેલી, પુન ઈસવર તિનુને ભરકેત આપ્યો ને તિનુને ઘણાદ પોર્યા હોયા.

![](https://cdn.door43.org/obs/jpg/360px/obs-en-09-04.jpg)

ફારુન રાજો ભાલ્યુ કી ઈઝરાયેલીના ઘણાદ પોર્યા હોયા, તિને ચુ તિનાના માણહુને હુકેંમ કર્યો કી ચે ઈઝરાયેલીના બધા પોર્યાને નાઈલ કોતળામા નાખી દેકને મારી નાખો.

![](https://cdn.door43.org/obs/jpg/360px/obs-en-09-05.jpg)

એક ઈઝરાયેલી બયેર પોર્યાને જલમ આપ્યો. ચે ને તિનીનો આદમી તિના પોર્યાને બણી હકે તેહ હુદી ઘણોદ ટેમ હતાળી મેકલો.

![](https://cdn.door43.org/obs/jpg/360px/obs-en-09-06.jpg)

જેર પોર્યાના આચ બાહત તિનાને વધાર હતાળી ની હકયા , તેર ચે તિનાને એક ટોપલીમાં મેકયો ને બરુની વસમાં નાઈલ કોતળાની કિનારે તિરતો મેકયો. તેથી ચે તિનાને મરવાથી બચાવે. તિનાની મોટલી બોહનેહ તિનાને દેખતલી કી, તિનાનુ કો હોવહે?

![](https://cdn.door43.org/obs/jpg/360px/obs-en-09-07.jpg)

ફારુન રાજાની પોરેય ટોપલીને ભાલીકને તિનામા ભાલ્યુ. જેર ચે પોર્યાને ભાલ્યો કી તરેત તિનાને ચે આફીનો પોર્યો હહી ગિણી લેધો, ચે ઈઝરાયેલી બયેરને ભાડે રાખી કી ચે પોર્યાની ભાલદેખ રાખે.ચે ઈયુ ની જાણતલી કી ચે ઈના પોર્યાની આચ હોવી. જેર પોર્યુ વારુ મોટુ હોયુ સાહા તિનાને આચાના દુધની જરુર ની હોતી, ચે તિનાને ફારુનની પોરેયને પાસો આપી દેધો, ચે તિનાનુ નામ મૂસા પડ્યુ.

![](https://cdn.door43.org/obs/jpg/360px/obs-en-09-08.jpg)

એક દાહળે જેર મૂસો મોટો હોય જયો તેર ચુ ભાલ્યુ કી એક મિસરી એક ઈઝરાયેલીને મારતલો.મૂસા તિનાનો સાથી ઈઝરાયેલીને બસાવવા કોસીશ કરી.

![](https://cdn.door43.org/obs/jpg/360px/obs-en-09-09.jpg)

તેર મૂસો વિચાર્યુ કી કોઈ તિનાને ની ભાલ્યુ, તેર ચુ તિના મિસરીને મારી દેધો ને તીનાની દેહી દાટી દેધી. પુન મૂસા જયુ કર્યુ ચુ કદુક ભાલી જયુ.

![](https://cdn.door43.org/obs/jpg/360px/obs-en-09-10.jpg)

મૂસા જયુ કર્યુ તિનાની ખબેર ફારુન રાજાને હોવી તેર ચુ તિનાને મારી નાખવા કોસિશ કરી. મૂસો મિસરમાંથો ઉજાળમાં ઢાય ચૂટયો કી સાહા ચુ ફારુન રાજાના સિપાયોથી વારુ રહી હકે.

![](https://cdn.door43.org/obs/jpg/360px/obs-en-09-11.jpg)

મૂસા મિસરથી ઘણોદ સેટો ઉજાળમાં ભરવાડ બણીકને રહયો. ચુ તિની જગામાં એક પોરેય હાતે વિહા કર્યા. ને તિનીને બે પોર્યા હોયા.

![](https://cdn.door43.org/obs/jpg/360px/obs-en-09-12.jpg)

એક દાહળે જેર મુસા ઘેટા સારતલો, તેર ચુ ભાલ્યુ કી એક ઝાળ હલેગતલુ. પુન ઝાળ હલગી ની જયુ. મૂસો વારુ ભાલી હકે તિના લેધે તિના પાહે જયો. જહી ચુ બલતલા ઝાળ થળુમ જયો, ઈસવરનો અવાજ કહયુ, “મૂસા તાહરા ચાટલ્યા કાઢ. ઈયે જગા તુ ઉભો હોય રીયો ચે પવિત્ર હોવી.”

![](https://cdn.door43.org/obs/jpg/360px/obs-en-09-13.jpg)

ઈસવર કહયુ,“ મેં માહરા માણહુના દુ:ખ ને પીડા ભાલી. મેં તને ફારુન રાજા પાહે મોકલેહ. તિનાથી તુ ઈઝરાયેલીને મિસરની ગુલામીમાથા બાહેર કાઢી હકે. મેં તહુને કનાન દેહ આપેહ, તિને મે ઈબ્રાહિમ, ઈસહાક, ને યાકુબને વાયદો કરલો.”

![](https://cdn.door43.org/obs/jpg/360px/obs-en-09-14.jpg)

મૂસો પુછ્યુ,“દેખ માણહુ ઈયુ પૂસહે કી મને કોય મોકલ્યો, તેર મેં કો કેહેહ?” ઈસવર કહયુ, “મેં જયુ હોયો ચૂદ સે. તિનુને કહજી કી “મેં હોયો” ચુ મને મોકલ્યો.“ તિનુને ઇયુ હોદે કહજી કી , મેં યહોવા હોયો. તોહરો ડાહલો બાહ ઈબ્રાહિમ, ઈસહાક ને યાકૂબનો ઈસવર. ઈયુ માહરુ બધા દાહળાનુ નામ સે”.

![](https://cdn.door43.org/obs/jpg/360px/obs-en-09-15.jpg)

મૂસો ફારુન પાહે જવા બિહતલો. કાહા કી ચુ વિચારતલો કી મને વારુ બોલતે ની આવડતુ, તિને ઈસવર મૂસાનો ભાચ હારુનને તિનાની મદેક કરવા મોકલ્યો. ઈસવર મૂસા ને હારુનને ચેતવ્યા કી ફારુન કાઠા જીવનો હોવહે.

*બાઈબલનો વાતરો નિર્ગમન 1-4*

Audio: https://git.door43.org/OBS-TLF/rtw_obs/releases/download/v1/rtw_obs_v1_09_128kbps.m4a

## 10. ૧૦. દોહ મમરકી

https://openbiblestories.org/l/rtw/story-10/

![](https://cdn.door43.org/obs/jpg/360px/obs-en-10-01.jpg)

મૂસા ને હારુન ફારુન રાજા પાહે પોહચ્યા. ને ચે કહયુ."ઈઝરાયેલનો ઈસવર કેહે કી,માહરા માણહુને જવા દે!" પુન ફારુન રાજો તિનુનુ ની હામલ્યુ .ઈઝરાયેલીને સોડવાને બદલે ચુ તિનુની પાહે વધાર મજુરી કરાવી.

![](https://cdn.door43.org/obs/jpg/360px/obs-en-10-02.jpg)

ફારુન માણુને ની જવા દેવા કરીકને નકાર કરતો રીયો તિને ઈસવરે મિસરમાં દોહ ઘણી મોટી મંદવાઙ મોકલી. મંદવાઙ પોરથી ઈસવર ફારુને કહયુ કી ચુ ફારુનથી ને મિસરમાંના બધા ઈસવરો કરતે વધાર તાકેત વાલો હોયો.

![](https://cdn.door43.org/obs/jpg/360px/obs-en-10-03.jpg)

ઈસવર નાઈલ નામના કોતળાને લોહીવાલો બણાવી દેધો, પુન ફારુન રાજો હજુ હોદે ઈઝરાયેલીને જવાદ ની દેતો.

![](https://cdn.door43.org/obs/jpg/360px/obs-en-10-04.jpg)

ઈસવર આખા મિસર પોર દેડકા મોકલ્યા. ફારુન મુસાને દેડકા સેટા કરવા કાલાવાલા કરી. બધા દેડકા મરી જયા તે હોદે ફારુન આફાનો જીવ કાઠો કર્યો ને ઈઝરાયેલીને મિસરમાંથી જવા ની દેધા.

![](https://cdn.door43.org/obs/jpg/360px/obs-en-10-05.jpg)

તિને ઈસવર જુળાની મરકી મોકલી. તિના પસેણ ચુ મખોળાની મરકી મોકલી ફારુન મૂસા ને હારુનને બોલાયકને કહયુ ભાલ ચુ ઈયે મરકી રોકહે તે ઈઝરાયેલીને મિસરમાંથી જવા દેહ, જેર મૂસા પ્રાર્થના કરી તેર ઈસવર મિસરમાથી મખોળા સેટા કર્યા. પુન ફારુન આફાનો જીવ કાઠો કર્યો ને માણુને જવા ની દેધા.

![](https://cdn.door43.org/obs/jpg/360px/obs-en-10-06.jpg)

તિના પસેણ ઈસવર મિસરીઓના ડગરા ને ડોબા માંદા હોય જયા ને મરવા બાંજયા. પુન ફારુન જીવ કાઠો કર્યો. ને ચુ ઈઝરાયેલીને ની જવા દેધા.

![](https://cdn.door43.org/obs/jpg/360px/obs-en-10-07.jpg)

તેર ઈસવર મુસાને ફારુન હાંમે વાયમાં રખોડો ઉડાળવા કહયુ. જેતાર ચુ અહી કર્યુ તેર મિસરી પોર ઘણાદ દુ:ખ આપે હેહલા ગુમળા પેદા હોયા પુન ઈઝરાયેલીને કચુ ની હોયુ. ઈસવર ફારુનનો જીવ કાઠો કર્યો ને ફારુન ઈઝરાયેલી માણુને ની જવા દેધા.

![](https://cdn.door43.org/obs/jpg/360px/obs-en-10-08.jpg)

તિના પસેણ ઈસવર કરા મોકલ્યા, તિનાથી મિસરનુ બધુ ધાન ને જે બાહેર નિકલ્યા તિનુને મારી નાખ્યા. ફારુન રાજો મૂસાને ને હારુનને બોલાયા ને કહયુ કી “મેં પાપ કર્યુ સે, ને તહુ જાય હકો.“એતરે મૂસો પ્રાર્થના કરી ને હરેગમાંથા કરા પાડવાનુ બંધ હોય જયુ.

![](https://cdn.door43.org/obs/jpg/360px/obs-en-10-09.jpg)

પુન ફારુન પાસો ખોટુ કર્યુ ને આફાનો જીવ કાઠો કર્યો. ચુ ઈઝરાયેલીને ની જવા દેધા.

![](https://cdn.door43.org/obs/jpg/360px/obs-en-10-10.jpg)

તિને ઈસવર મિસર પોર તીડા મોકલ્યા, કરાથી જયુ ધાન બસી જેલુ ચુ તિડા ખાય જયા.

![](https://cdn.door43.org/obs/jpg/360px/obs-en-10-11.jpg)

તિના પસેણ ઈસવર અંધારુ મોકલ્યુ ચુ તિન દાહળા હુદી રીયુ. એતરુ બધુ અંધારલુ હોતુ કી મિસરીયો પોતાનુ ઘોર સોડી ની હકયા, પુન ઈઝરાયેલી જાહા રહતલા સાહા ઈજોળુ હોતુ.

![](https://cdn.door43.org/obs/jpg/360px/obs-en-10-12.jpg)

ઈયુ નોવ મરકી પસેણ હોદે, ફારુન હજુ હોદે ઈઝરાયેલીને સોડવાનો નકાર કર્યો. હજુ ફારુન ની હામેલતલો. તિને ઈસવર સેહલી મરકી મોકેલવા નકકી કર્યુ. ચુ ફારુનનુ મન બદલી નાખહે.

*બાઈબલની વાર્તા નિરગમન 5-10*

Audio: https://git.door43.org/OBS-TLF/rtw_obs/releases/download/v1/rtw_obs_v1_10_128kbps.m4a

## 11. ૧૧. પાસ્ખા

https://openbiblestories.org/l/rtw/story-11/

![](https://cdn.door43.org/obs/jpg/360px/obs-en-11-01.jpg)

ઈસવર ફારુન રાજાને સેતવણી આપી કી, તુ ઈઝરાયેલી માણહુંને ની જવા દેય, તે ચુ માણહુંને ને જનાવોરુમાંના પેહેલખોલ્યા બધાને મારી નાખહે. ફારુન રાજો ચું હાંમલ્યુ તેર ચું માનવા ને ઈસવરની વાત પાલવા નકારી દેધુ.

![](https://cdn.door43.org/obs/jpg/360px/obs-en-11-02.jpg)

જયુ કોય ઈસવર પોર ભરહો કરે તીના લેધે એક વાટ આપી, તીનીથી તીનુના પેહેલ ખોલ્યાને બસાવી હકાય. બધાં કુટુંમના એક વારુ ઘેટુ લેવા ને તીનાનો ભોગ સળાવા.

![](https://cdn.door43.org/obs/jpg/360px/obs-en-11-03.jpg)

ઈસવર ઈઝરાયેલી માણહુંને કહયુ કી ઘેટાની લોહીમાંથુ થોલુક બાયણાને સોઠખે સોપળો ને હેકલુ માહ આથા વગેરના રોટા ભેગુ એકદમ ખય જોવ. ચેં ખાતલાં તેર ચુ તીનુને મિસર સોળવા લેધે તીયાર રહવા કહયુ.

![](https://cdn.door43.org/obs/jpg/360px/obs-en-11-04.jpg)

ઈસવર ઈઝરાયેલ માણહુંને દહી કરવા કહયુ તહિદ ચેં કર્યું. અધલી રાતે ઈસવર મિસરના પેહેલ ખોલ્યાને મારી નાખવા નિકલ્યો.

![](https://cdn.door43.org/obs/jpg/360px/obs-en-11-05.jpg)

બધાં ઈઝરાયેલી માણહુંના બાયણાને સોઠકે લોહી સોપેળલુ હોતુ કાહા કી ઈસવર તીનુને રહવા દેય. તીનુમાના બધાં હસવાય રહયાં. ઘેટાની લોહી હોતી તીને તીનુને રહવા દેધલાં.

![](https://cdn.door43.org/obs/jpg/360px/obs-en-11-06.jpg)

પુન મિસરના માણહું ઈસવરનુ ની માન્યાં ને તીનાના નિયમ ની પાલ્યા તીને ઈસવર તીનુના ઘોર ની સોળ્યા. ને ઈસવર મિસરના પેહેલ ખોલ્યાને મારી નાચ્યા.

![](https://cdn.door43.org/obs/jpg/360px/obs-en-11-07.jpg)

મિસરના પેહેલખોલ્યા બધાત જેલ્યાથી લેકને ફારુનનો પેહેલખોલ્યા લગી બધા મરી જયા. મિસરમાં માણહું મોટા દુખ લેધે રળવા બાદજયા ને હોહવાય જયાં.

![](https://cdn.door43.org/obs/jpg/360px/obs-en-11-08.jpg)

તીનીદ રાતે ફારુનરાજો મૂસાને ને હારુનને બોલાયકને કહયુ ”ઈઝરાયેલી માણહુંને લેકને હમણેદ મિસર સોળી દોવ.” મિસરના માણહું હોદે ઈઝરાયેલી માણહુંને એકદમ જવા કાલાવાલા કરી.

*બાયબલનો વાતરો, નિરગમન ૧૧:૧-૧૨:૩૨*

Audio: https://git.door43.org/OBS-TLF/rtw_obs/releases/download/v1/rtw_obs_v1_11_128kbps.m4a

## 12. ૧૨. નિકલ્યા

https://openbiblestories.org/l/rtw/story-12/

![](https://cdn.door43.org/obs/jpg/360px/obs-en-12-01.jpg)

ઈઝરાયેલી માણહું મિસરમાથા સુટીજ્યા તિને ઘણાં ખુશ હોતા. હાય ચેં વેઠયા ની રહયાં, ને ચેં વાયદાના દેહમાં જતલાં. ઈઝરાયેલી માણહું મિસરના માણહું પાહે જયુ માગ્યું ચું બધું એતરે લગી કી હોનુ ને સાંદી ને બીજુ મોહંગુ વસ્તુ હોદે આપ્યુ. થોલાંક બીજા દેહના માણહું જ્યે ઈસવર પોર ભરહો કરતલાં. ચેં હોદે ઈઝરાયેલી માણહું ભેગાં મિસર સોળીકને ઢિંજયા.

![](https://cdn.door43.org/obs/jpg/360px/obs-en-12-02.jpg)

ઈસવર તીનુને દીહો ઉસા મેઘસ્તંભથી આગેવાની કરતલો ને રાતે અગ્નિસ્તંભ બણી જતલો. ચેં જતલાં તેર ઈસવર તીનુ ભેગો હોતો ને સલાહ આપતલો. ચેં જયુ કરવાનું હોતુ ચું તીનાનુ માનવાનુ એતરુદ હોતુ.

![](https://cdn.door43.org/obs/jpg/360px/obs-en-12-03.jpg)

થોલાંક ટેમ પસેણ ફારુન ને તીનાના માણહુંનુ મન બદલાયુ ને ચેં પાસાં ઈઝરાયેલી માણહુંને તીનુના વેઠયા બણાવા માંગતલાં. ઈસવર ફારુનનુ મન હઠીલુ કર્યું કાહા કી માણહું ભાલી ને હમજી હકે કી ચુ એખલોદ હાસો ઈસવર સે. ચુ યહોવા ફારુન ને તીનાના દેવુ કરતે વધાર તાકેતવાલો સે.

![](https://cdn.door43.org/obs/jpg/360px/obs-en-12-04.jpg)

તીને ફારુન ને તીનાની લહકેર ઈઝરાયેલી માણહુંને પાસાં પોતાના ગુલામ બણાવા લેધે પસોલ પડયા. ઈઝરાયેલી માણહું ભાલ્યુ કી મિસરની લહકેર આવા બાઝી રહી, તેર તીનુને હમેજ પડી કી ચેં ફારુનની લહકેરને રાતલા દરિયા ની વસમાં ફસાઈ જ્યા. ચે ઘણાં બીહણી જયા ને કહવા બાદજયા કી " હમુ કાહા મિસર સોળયુ હમુ મરવા બાઝી રહ્યા.”

![](https://cdn.door43.org/obs/jpg/360px/obs-en-12-05.jpg)

મૂસો ઈઝરાયેલી માણહુંને કહયુ કી "બીહવા ની, ઈસવર આજે તોહરી લેધે લળાય કરહે ને તહુંને બસાવહે.” ને ઈસવર મૂસાને કહયુ “માણહુંને કેહ કી ચેં રાતલા દરિયા ઘમી અઘા વધે."

![](https://cdn.door43.org/obs/jpg/360px/obs-en-12-06.jpg)

પસેણ ઈસવર મેઘસ્તંભ સેટો કરીકને ઈઝરાયેલી માણહું ને મિસરના માણહુંની વસે મેકયો. હિનાથી મિસરના માણહું ઈઝરાયેલી માણહુંને ભાલી ની હકે.

![](https://cdn.door43.org/obs/jpg/360px/obs-en-12-07.jpg)

ઈસવર મૂસાને કહયુ કી તાહરો હાથ દરિયા ઘમી લાંબો કરીકને પાણીના બે ભાગ કરી દે. ને ઈસવર વાય મોકલ્યો ને દરિયાનુ પાણી ડાબી ને જમણી ઘમી ધકેલાવા બાદજયુ. હિનાથી દરિયાની વસે રોહો બણી જયો.

![](https://cdn.door43.org/obs/jpg/360px/obs-en-12-08.jpg)

ઈઝરાયેલી માણહું બેહો પાહ પાણીની ભીત ને કોરી જમીન પોર સાલ્યા.

![](https://cdn.door43.org/obs/jpg/360px/obs-en-12-09.jpg)

પસેણ ઈસવર મેઘસ્તંભ સેટો કરી દેધો. હિનાથી મિસરના માણહું ઈઝરાયેલી માણહુંને જતા ભાલી હકે. મિસરના માણહું તીનુ પસોલ પડવા નક્કી કર્યું.

![](https://cdn.door43.org/obs/jpg/360px/obs-en-12-10.jpg)

તીને ચેં દરિયાને રોહે ઈઝરાયેલી માણહું પસોલ પડયા, પુન ઈસવર મિસરના માણહુંને ગભરાય નાસ્યા, ને તીનુના ઘોડાગાડા ફસાઈ જ્યા. ને ચે આયળ્યા “ઈહાથા ઢાહો. ઈસવર ઈઝરાયેલી માણહું લેધે લળે.”

![](https://cdn.door43.org/obs/jpg/360px/obs-en-12-11.jpg)

ઈઝરાયેલી માણહું દરિયાની પેલી પાહ વારુ રિતે પોહતી જયા પસેણ ઈસવર મૂસાને પાસો આફાનો હાથ લાંબો કરવા કહયુ. ચુ હહીં કર્યું ને તરેત પાણી મિસરના માણહું પોર ફિરી વળ્યુ ને મિસરની આખી લહકેર ડુબાય જેય.

![](https://cdn.door43.org/obs/jpg/360px/obs-en-12-12.jpg)

ઈઝરાયેલી માણહું ભાલ્યુ કી મિસરના માણહું મરી જયા તેર ચેં ઈસવર પોર ભરહો કર્યો કી મૂસો ઈસવરનો પ્રબોધક હોતો.

![](https://cdn.door43.org/obs/jpg/360px/obs-en-12-13.jpg)

ઈઝરાયેલી માણહું ઈના લેધે હોદે આનંદ કર્યો કી ઈસવર તીનુને મોત ને ગુલામીમાંથી બસાયાં. હાય ચેં ઈસવરની સેવા કરવા લેધે સુટા હોતા. ઈઝરાયેલ માણહું તીનુની નવી સ્વતંત્રતા ઉજવવા ઘણાં ગીતુ ગાયાં ને મિસરના માણહુંની લહકેરથી ચેં બસ્યા તિને ચે ઈસવરના વખાણ કર્યા.

![](https://cdn.door43.org/obs/jpg/360px/obs-en-12-14.jpg)

ઈસવર ઈઝરાયેલી માણહુંને વરેહ સાલ પાસ્ખા ઊજવવા હૂકમ કર્યો. ચેં ફોમ રાખી હકે કી ઈસવર કકીહી તીનુને મિસરના માણહું પોર જીત અપાવી, ને તીનુની ગુલામીમાંથી સોળાયા. ચેં તીનાને ઘેટુ મારીકને આથા વગેરના રોટા ભેગુ ખાયકને ઊજવતલાં.

*બાયબલના વાતરા નિરગમન ૧૨:૩૩-૧૫:૨૧*

Audio: https://git.door43.org/OBS-TLF/rtw_obs/releases/download/v1/rtw_obs_v1_12_128kbps.m4a

## 13. ૧૩. ઈસરાયેલ હાથે ઈસવરનો કરાર

https://openbiblestories.org/l/rtw/story-13/

![](https://cdn.door43.org/obs/jpg/360px/obs-en-13-01.jpg)

ઈસવર ઈઝરાયેલ માણહુંને રાતલા દરિયામાંથી લીયાયો પસેણ તીનુને ઉજાળમાં સિનાઈ ડુંગોર ઘમી લીજયો. ઇના ડુંગોર પોર મૂસો હલેગતલુ ઝાડ ભાલલુ. માણહું ડુંગોર નીસાં પોતાના તંબુ બાંધ્યા.

![](https://cdn.door43.org/obs/jpg/360px/obs-en-13-02.jpg)

ઈસવર મૂસાને ને ઈઝરાયેલી માણહુંને કહયુ "તહું માહરા હૂકમ પાલહો ને માહરા કરાર પાલહો તે તહું માહરીખાસ મિલકત ને પુજારાનુ રાજ ને પવિત્ર દેશ બણહો."

![](https://cdn.door43.org/obs/jpg/360px/obs-en-13-03.jpg)

તીન દાહળા પસેણ માણહું પોતે આત્મિક રીતે તીયાર હોયા. ઈસવર ગાજણ્યા ને વીજલી ને ધૂમાડા ને રણશીંગડાના ઉદ અવાજ ભેગો સિનાઈ ડુંગોર પોર ઉતર્યો. સાહા મૂસુ એતરોદ જવાની પરવાનગી હોતી.

![](https://cdn.door43.org/obs/jpg/360px/obs-en-13-04.jpg)

તેર ઈસવર તીનુને કરાર આપ્યો ને કહયુ “મે યહોવા તાહરો ઈસવર સે. મે તહુંને મિસરની ગુલામીમાંથી સોળાય લાયો. બીજા દેવુને ની ભજવા.”

![](https://cdn.door43.org/obs/jpg/360px/obs-en-13-05.jpg)

“તહું મૂર્તિ ની બણાવા ને તીનીની ભકિત ની કરવા. કાહા કી મે યહોવા ભરહાવાલો ઈસવર સે. માહરુ નામ અમથુ ની લેવા. આરેમના દાહળાને પવિત્ર પાલવાનુ ની ભુલવા. તહું સોવ દાહળા તોહરા બધાં કામ કરો. હાતમો દાહળો તોહરી લેધે આરેમનો ને મને યાદ કરવાનો દાહળો સે.”

![](https://cdn.door43.org/obs/jpg/360px/obs-en-13-06.jpg)

“તોહરા આચ બાહને માન આપો. ખૂન ની કરવા. સિનાલુ ની કરવા. સોરી ની કરવા. જુઠું ની બોલવા. તાહરા પડોશીની બયેર ને તીનાનુ ઘોર ને તીનાનુ જયુ હોય તીનાની આચા ની કરવા.”

![](https://cdn.door43.org/obs/jpg/360px/obs-en-13-07.jpg)

પસેણ ઈસવર ઈયે દોહ હૂકમ સપોહળાની પટી પોર લખી ને મૂસાને આપી. ઈસવર બીજા ઘણા નિયમ ને રીત પાલવા આપી. માણહું હિયે નિયમ પાલહે તે ઈસવર વાયદો કરલો હહીં તીનુને ભરકેત આપહે ને તીનુને હાસેવહે. ચેં ની કરે તે ઈસવર તીનુને શિક્ષા કરહે.

![](https://cdn.door43.org/obs/jpg/360px/obs-en-13-08.jpg)

ઈઝરાયેલી માણહું જયુ મંડપ બણાવા માંગતલાં તીનાની બધી માહિતી ઈસવર આપી. તીનાને મુલાકાત મંડપ કહતલાં. તીનાના બે ઓયળા હોતા. તીનુને એક મોટા પડદાથી અલેગ કરલા. પડદા પસોલ મુખ્ય પૂજારો જાય હકે. કાહા કી સાહાં ઈસવર રહતલો.

![](https://cdn.door43.org/obs/jpg/360px/obs-en-13-09.jpg)

જયુ કોય ઈસવરના નિયમ તોડે ચુ મુલાકાત મંડપ અગોલ એક જનાવોરને લાવતલો ને તિનાનો ઈસવરને ભોગ સળાવતલા. પૂજારો તીના જનાવોરને મારતલો ને તીનાને વેદી અગોલ બાલતલો. જીના જનાવોરનો ભોગ સળાવતલા તીનાનુ લોહી માણેહના પાપને ઢાકતલુ ને ચુ માણેહ ઈસવર અગોલ સોખો ગિણાયતલો. ઈસવર મૂસાના ભાચ હારુન ને તીનાના વંશને પૂજારા બણાવા નક્કી કર્યું.

![](https://cdn.door43.org/obs/jpg/360px/obs-en-13-10.jpg)

બધાં માણહું ઈસવર જયે નિયમ આપલા તીનાની એખલાનીદ ભકિત કરવા ને તીનાના ખાસ માણહું બણવા લેધે એક હોય જયા. પુન ચેં ઈસવરને માનીકને રહવાનુ જયુ વાયદો આપલો તીના ટુકા ગાલા પસેણ ચેં મોટુ પાપ કર્યું.

![](https://cdn.door43.org/obs/jpg/360px/obs-en-13-11.jpg)

મૂસો ઘણાં દાહળા લગી ઈસવર ભેગો વાતે કરતો સિનાઈ ડુંગોર પોર રહયો. માણહું તીનાને પાસો આવાની વાટ જોઈકને થાકી જેલાં. તીને ચેં હારુન પાહે હોનુ લેકને આયાં ને તીનુ લેધે પુતલુ બણાવા કહયુ.

![](https://cdn.door43.org/obs/jpg/360px/obs-en-13-12.jpg)

હારુન તીનુ લેધે હોનાનુ વાસળાના ઘાટ જેહલુ પુતલુ બણાયુ. માણહું ખરાબ રીતે ભકિત કરવા બાદજયા ને ભોગ સડાવવા બાદજયા. ઈસવર તીનુથી રીહવાય જયો ને તીનુને નાસ કરવા નક્કી કર્યું.

![](https://cdn.door43.org/obs/jpg/360px/obs-en-13-13.jpg)

પુન મૂસો તીનુ લેધે પ્રાર્થના કરી ને ઈસવર તીનાની પ્રાર્થના હાંમલી ને તીનુને નાસ ની કર્યા. દેર મૂસો ડુંગોર પોરથો નીસો ઉતર્યો ને ચુ મૂર્તિ ભાલી તેર એતરો બધો રીહવાય જયો કી ઈસવર દોહ હૂકમ લખલા ચે શીલા પટી તોડી નાખી.

![](https://cdn.door43.org/obs/jpg/360px/obs-en-13-14.jpg)

તેર મૂસો તીના પુતલાને ખાંડીને ભુહકો કરી નાખી ને તીના ભુહકાને પાણીમાં ભેગવીકને માણહુંને પીવડાય દેધો. ઈસવર માણહું પોર મરકી મોકલી ને તીનુમાના ઘણાં મરી જયા.

![](https://cdn.door43.org/obs/jpg/360px/obs-en-13-15.jpg)

મૂસો બીજી આટો ડુંગોર પોર સળી જયો ને ઈસવરના માણહુંને માફ કરવા પ્રાર્થના કરી. ઈસવર મૂસાનુ હાંમલ્યુ ને તીનુને માફ કર્યું. મૂસો જયે સાપોરની શિલા પટી ભાંગી નાખલી તીની જગાએ ચુ બીજી આટો શિલા પટી પોર દોહ હૂકમ લખ્યા. પસેણ ઈસવર ઈઝરાયેલ માણહુંને સિનાઈ ડુંગોર પોરથી વાયદાના દેહ ઘમી લીજયો.

*બાઈબલનો વાતરો નિરગમ ૧૯-૩૪*

Audio: https://git.door43.org/OBS-TLF/rtw_obs/releases/download/v1/rtw_obs_v1_13_128kbps.m4a

## 14. ૧૪. ઉજાળમાં ભટેલવુ

https://openbiblestories.org/l/rtw/story-14/

![](https://cdn.door43.org/obs/jpg/360px/obs-en-14-01.jpg)

ઈસવર આફાના કરારથી જયે નિયમ તીનુને પલાવા ધારતલો ચે કહયા પસેણ ચેં સિનાઈ ડુંગોર સોળી દેધો. ઈસવર તીનુને વાયદો કરલો તીના કનાન દેહ ઘમી તીનુને લીજવા સાલુ કર્યું. મેઘસ્તંભ કનાન દેહ ઘમી અઘો વધતલો ને ચેં તીનાનુ માનતલાં.

![](https://cdn.door43.org/obs/jpg/360px/obs-en-14-02.jpg)

ઈસવર ઈબ્રાહીમને ને ઈસહાકને ને યાકૂબને વાયદો કરલો કી ચુ તીનાના વસતારને વાયદો કરલો ચુ દેહ આપહે. પુન હાવ સાહાં ઘણી જાતનાં માણહું રહતલાં. તીનુને કનાની કહતલાં. કનાની માણહું ઈસવરની ભકિત ની કરતલાં ને તીનાનુ ની માનતલાં. ચેં ઝુઠા દેવની ભકિત ને ખરાબ કામ કરતલાં.

![](https://cdn.door43.org/obs/jpg/360px/obs-en-14-03.jpg)

ઈસવર ઈઝરાયેલ માણહુંને કહયુ “તહું વાયદાના દેહમાં બધાં કનાની માણહુંથી સૂટા રહવા. તીનુ ભેગાં ની રહવા ને વીહા હોદે ની કરવા. તહું તીનુની બધી મૂર્તિને નાસ કરવા. તહું માહરુ ની માનો તે તહું માહરે બદલે તીનુની મૂર્તિની ભકિત કરહો."

![](https://cdn.door43.org/obs/jpg/360px/obs-en-14-04.jpg)

દેર ઈઝરાયેલ માણહું કનાનની હદમાં પોહત્યા તેર મૂસો બાર માણેહને નક્કી કર્યા. ઈઝરાયેલની બધી જાતીમાંથી એક એકને. ચુ તીનુ માણેહને તીના દેહની ખબેર કાઢવા મોકલ્યા કી ચુ દેહ કાહના હરકો સે ચું ભાલજો. તીનુને કનાની માણહુંની હોદે ખબેર કાઢવા કહયુ કી ચે તાકેતવાલા સે કી નબલા સે.

![](https://cdn.door43.org/obs/jpg/360px/obs-en-14-05.jpg)

બાર માણેહ સાલીહ દાહળા લગી કનાનમાં ફિર્યા ને પસેણ ચે પાસા આયા. ચે માણહુંને કહયુ "દેહની જમીન ખતરોટ હોવી ને ઘણુ પાકે." પુન તીનુમાના દોહ કહયુ "હેહેર ઘણુ કાઠુ હોયુ ને માણેહ તાકેતવાલા હોયા. આપણુ તીનુ પોર લડાઇ કરહુ તે ચે હાસુદ આપણુને હરાવીકને મારી નાખહે."

![](https://cdn.door43.org/obs/jpg/360px/obs-en-14-06.jpg)

તરેત કાલેબ ને યહોશુઆ ને બીજા બે ખબેર કાઢવાવાલા કહયુ "હિયુ હાસુ સે કી કનાનના માણેહ ઉસા ને તાકેતવાલા સે. પુન હાસુદ આપણુ તીનુને હરાવી હકજે. ઈસવર આપણી લેધે લડાઇ કરહે."

![](https://cdn.door43.org/obs/jpg/360px/obs-en-14-07.jpg)

પુન માણહું કાલેબનુ ને યહોશુઆનુ ની હાંમલ્યુ. ચેં મૂસા પોર ને હારુન પોર રીહવાય જયા ને કહયુ "તુ હમુને એહલી ખરાબ જઘામાં કાહા લાયો? હમુ ઈહા લડાઇમાં મરવા કરતે તે હમેર બયરા ને પોર્યાં વેઠયા બણીક મિસરમાં રહવા વારુ હોતુ.” માણહું મિસરમાં પાસાં જવા લેધે અલેગ અલેગ આગેવાનુને નક્કી કરવા માંગતલાં.

![](https://cdn.door43.org/obs/jpg/360px/obs-en-14-08.jpg)

ઈસવર તીનાથી ઘણો રીહવાય જયો ને ખબેર લેવા મંડપમાં આયો. ઈસવર તીનુને કહયુ "કાહા કી તહું માહરી વિરુધ લવ લવ કર્યું તીને તહું બધાં ઉજાળમાં ભટેકહો. કાલેબને ને યહોશુઆને સોળીકને બધાં જયુ વીહ વરેહ નીતે તીનાથી મોટુ હોહે ચું મરહે ને કોય દાહળે વાયદાના દેહમાં ની જાય”.

![](https://cdn.door43.org/obs/jpg/360px/obs-en-14-09.jpg)

માણહું હિયું હાંમલ્યુ તેર પોતાના કરલા પાપથી દુખી હોયાં. ચેં પોતાના હથિયારુ લેધા ને કનાન દેહના માણહું પોર હુમલો કર્યો. મૂસો તીનુને ની જવા કહયુ કાહા કી ઈસવર તીનુ ભેગો ની હોતો. પુન ચેં તીનાનુ ની હાંમલ્યુ.

![](https://cdn.door43.org/obs/jpg/360px/obs-en-14-10.jpg)

ઈસવર તીનુ ભેગો ઈની લડાઇમાં ની જયો ને ચેં હારી જયાં ને તીનુમાના ઘણાં માણહું મરી જયાં. ઈઝરાયેલ માણહું કનાનથી પાસાં વલી જયાં ને સાલીહ વરહુ લગી ઉજાળમાં ભટકયાં.

![](https://cdn.door43.org/obs/jpg/360px/obs-en-14-11.jpg)

હિયે સાલીહ વરહુ ઈઝરાયેલ માણહું ઉજાળમાં ભટકયાં તેર ઈસવર તીનુને પોહયાં. ચુ તીનુને હરેગમાંથો રોટો જિનાને માન્ના કહવાય ચું આપ્યુ. ચુ લાવડીના ટોલા મોકલ્યા ને તીનુના તંબુની વસમાં લાયો કી ચેં માહ ખાય હકે. ઈના ટેમમાં ઈસવર તીનુના સાખલાં ને સાટલ્યાં ઘહાયવા ની દેધાં.

![](https://cdn.door43.org/obs/jpg/360px/obs-en-14-12.jpg)

ઈસવર તીનુને સમેતકાર કરીકને સપોહળામાંથુ પાણી આપ્યુ. પુન હિયું બધુ તે હોદે ઈઝરાયેલના માણહું ઈસવર ને મૂસા વિરુધ લવ લવ કર્યું. તે હોદે ઈસવર ઈબ્રાહીમ ને ઈસહાક ને યાકૂબને પોતાના વાયદા લેધે ભરહાવાલો રહયો.

![](https://cdn.door43.org/obs/jpg/360px/obs-en-14-13.jpg)

બીજી આટો માણહું પાહે પાણી ની હોતુ. ઈસવર મૂસાને કહયુ "ડુંગોરને કેહ ને પાણી બાહેર આવહે. પુન મૂસો બધાં માણહું અગોલ ઈસવરનો નિયમ ની પાલ્યો. ચુ ડુંગોરને કહવા બદલે બે આટા ડુંગોરને લાકડી આહટી. બધાં માણહું લેધે ડુંગોરમાંથુ પાણી નીકલ્યુ. પુન ઈસવર મૂસા પોર રીહવાય જયો ને કહયુ "તુ વાયદાના દેહમાં જાય ની હકે. "

![](https://cdn.door43.org/obs/jpg/360px/obs-en-14-14.jpg)

સાલીહ વરહુ લગી ઈઝરાયેલ માણહું ઉજાળમાં ભટકયાં પસેણ જયેં ઈસવર વિરુધ લવ લવ કર્યું ચેં બધાં મરી જયાં. પસેણ ઈસવર તીનુને વાયદાના દેહની હિમ પોર લીજયો. મૂસો હાય ઘણો ડાહો હોય જયો તીને ઈસવર યહોશુઆને માણહુંને દોરવા ને મદેક કરવા નક્કી કર્યો. ઈસવર મૂસાને વાયદો કરલો કી એક દાહળે ચુ મૂસા જેહલો પ્રબોધક મોકેલહે.

![](https://cdn.door43.org/obs/jpg/360px/obs-en-14-15.jpg)

તેર ઈસવર મૂસાને કહયુ " તુ ડુંગોરની સોટલી પોર સળી જા, કી તુ વાયદાનો દેહ ભાલી હકહી”. મૂસો વાયદાનો દેહ ભાલ્યો પુન તીનાને તીનામાં ની જાય હકાય. ને મુસો મરી જ્ય ને ઈસરાયેલી માણહુ તિસ દાહળા લગી હોહ કર્યો. ને યહોસુઆ તિનુ નો નવલો આગેવાન બણ્યો. યહોસવા વારુ આગેવાન હોતો કાહાકી ચુ ઈસવરનુ કહલુ માંતલો.

*બાઈબલનો વાતરો નિરગમ ૧૬-૧૭, ગણના ૧૦-૧૪, ૨૦:૨૭, પુનરનિયમ ૩૪*

Audio: https://git.door43.org/OBS-TLF/rtw_obs/releases/download/v1/rtw_obs_v1_14_128kbps.m4a

## 15. ૧૫. વાયદાનો દેહ

https://openbiblestories.org/l/rtw/story-15/

![](https://cdn.door43.org/obs/jpg/360px/obs-en-15-01.jpg)

સેવટે, ચુ ટેમ આય જયો કી ઈઝરાયેલ માણહું વાયદાના દેહ કનાનમાં જાય. યહોશુઆ યરીખો હેહેર કી ચું કાઠી ભીતથી હસવાય રહલુ. સાહાં બે ભાલદેખ કરવાવાલાને મોકલ્યા. હેહેરમાં રાહાબ નામની એક સિનાલ્યેન રહતલી. ચે તીનુને હતાડયા ને પસેણ તીનુને ઢાહી સુટવા મદેક કરી. ચે હહીં કર્યું કાહા કી ચે ઈસવર પોર ભરહો કરતલી. ચે રાહાબ ને તીનીના કુટુમને દેર ચે નાસ કરે તેર તીનુને બસાવા વાયદો કર્યો.

![](https://cdn.door43.org/obs/jpg/360px/obs-en-15-02.jpg)

ઈઝરાયેલ માણહું વાયદાના દેહમાં આવા લેધે યર્દન કોતળુ વટવાનુ હોતુ. ઈસવર યહોશુઆને કહયુ "પૂજારાને પેહલા જવા દે." દેર પૂજારા પોતાના પોગ યર્દન કોતળામાં મેસ્યા તેર દક્ષિણ ઘમીનુ પાણી વહતુ બંધ હોય જયુ ને ઈઝરાયેલ માણહું કોતળાની પેલી પાહ હુકી જમીન પોર પોંહત્યાં.

![](https://cdn.door43.org/obs/jpg/360px/obs-en-15-03.jpg)

યર્દન કોતળુ વટી જયા પસેણ ઈસવર યહોશુઆને કકીહી તાકેતવાલા યરીખો હેહેર પોર લડાઇ કરવા ચુ કહયુ. માણહુંને ઈસવર જ્યે નિયમ પાલવા કહલુ ચે પાલ્યા. લહકેર ને પૂજારા યરીખો હેહેરની ચારેમેર સોવ આટા એક દાહળામાં એક આટો હહીં સોવ દાહળા ફિર્યા.

![](https://cdn.door43.org/obs/jpg/360px/obs-en-15-04.jpg)

ને હાતમે દાહળે ઈઝરાયેલી માણહું હેહેરની ચારેમેર હાત આટા ફિર્યા. દેર ચે હેહેરની ચારેમેર સેહલી આટો ફિરતલા તેતાર પૂજારા રણશીંગુ વગાડ્યુ ને લહકેર ઘણી આયળી.

![](https://cdn.door43.org/obs/jpg/360px/obs-en-15-05.jpg)

તેર યરીખોની ભીત પડી જેય. ઈઝરાયેલ માણહુંને ઈસવર દહી હુકમ કર્યો હહીં હેહેરના બધાંને નાસ કર્યા. ચુ રાહાબ ને તીનીના કુટુમને બાકી રાસ્યા. ચેં ઈઝરાયેલનો ભાગ બણ્યો. બીજાં માણહું કનાનમાં રહતલાં ચેં હાંમલ્યુ કી ઈઝરાયેલ માણહું યરીખોનો નાસ કર્યો તેર તીનુને બીહેક લાગી કી ઈઝરાયેલ માણહું તીનુ પોર હોદે હુમલો કરહે.

![](https://cdn.door43.org/obs/jpg/360px/obs-en-15-06.jpg)

ઈસવર ઈઝરાયેલ માણહુંને હુકમ કરલો કી ચે કનાનમાંની કોઈ જાતિ ભેગાં ની રહવા પુન કનાની માણહુંની એક જાતિ તીનુને ગિબયોન કહતલાં. ચેં યહોશુઆને જુઠું કહયુ કી ચે કનાનથી સેટાં રેહે. ચેં યહોશુઆને હલીમલીકને રહવા કહયુ.

![](https://cdn.door43.org/obs/jpg/360px/obs-en-15-07.jpg)

યહોશુઆ ને ઈઝરાયેલ માણહું ઈસવરને ની પુસ્યુ કી ગિબયોન માણહું કાહના સે. તીને યહોશુઆ તીનુ ભેગો સાનતીનો કરાર કર્યો. ઈઝરાયેલ માણહું જાણ્યું કી ગિબયોન માણહું તીનુને સેતર્યા. ચે ઘણાં રીહવાય જયા પુન ચે તીનુ સાનતીના કરાર રાસ્યા. કાહા કી ચે ઈસવર અગોલ વાયદો કરલો. થોલોક ટેમ પસેણ કનાન દેહની બીજી જાતિ અમોરી માણહું હાંમલ્યુ કી ગિબયોન માણહું ઈઝરાયેલ માણહું ભેગાં રેહે. તીને ચે લહકેર ભેગી કરી ને તીનુનુ લહકેર બનાવીને ગિબયોન માણહું પોર હુમલો કર્યો. ગિબયોન માણહું મદેક લેધે યહોશુઆને વાત મોકલી.

![](https://cdn.door43.org/obs/jpg/360px/obs-en-15-08.jpg)

તીને યહોશુઆ ઈઝરાયેલની લહકેરને ભેગી કરી ને ચેં ગિબયોન પોંહેતવા લેધે આખી રાત સાલ્યાં. હવારે વેઘાં ચેં અમોરીના લહકેરને વિચાર કરતુ કરે હહીં લડાઇ કરી.

![](https://cdn.door43.org/obs/jpg/360px/obs-en-15-09.jpg)

તીને દાહળે ઈસવર ઈઝરાયેલ લેધે લડાઇ કરી. ચુ અમોરી માણહુંને વિચાર કરતાં કરી દેધાં. ચુ મોટા કરા મોકલ્યા કી ઘણાં અમોરી માણહું મરી જયાં.

![](https://cdn.door43.org/obs/jpg/360px/obs-en-15-10.jpg)

ઈસવર દાહળાને હોદે હરેગમાં એક જગાએ રોકી દેધો. હિનાથી ઈઝરાયેલ માણહું પાહે અમોરી માણહુંને પૂરા હરાવા ટેમ હોતો. તીને દાહળે ઈસવર ઈઝરાયેલ લેધે મોટી જીત કરી.

![](https://cdn.door43.org/obs/jpg/360px/obs-en-15-11.jpg)

ઈસવર તીના લહકેરને હરાયુ પસેણ કનાનની બીજી જાતિ હોદે ભેગી હોયકને ઈઝરાયેલ પોર લડાઇ કરવા લાગી. યહોશુઆ ને ઈઝરાયેલ માણહું તીનુ પોર લડાઇ કરીને નાસ કર્યો.

![](https://cdn.door43.org/obs/jpg/360px/obs-en-15-12.jpg)

હિની લળાય પસેણ ઈસવર ઈઝરાયેલના બધાં કુટુમને વાયદાના દેહમાં પોતાનો ભાગ આપ્યો. પસેણ ઈસવર ઈઝરાયેલની હદમાં સાનતી રેહે એહલુ કર્યું.

![](https://cdn.door43.org/obs/jpg/360px/obs-en-15-13.jpg)

યહોશુઆ ડાહો હોય જયો તેર ચુ ઈઝરાયેલના બધાં માણહુંને ભેગાં કર્યાં. યહોશુઆ માણહુંને ઈસવર જયે શરેત સિનાઈમાં તીનાના કરારને માનવાની કરલી ચે તીનુને ફોમ કરાવી. માણહું ઈસવરના ભરહામાં રહવાનુ ને તીનાના નિયમ પાલવા બંધાયાં.

*બાઈબલનો વાતરો યહોશુઆ ૧-૧૭*

Audio: https://git.door43.org/OBS-TLF/rtw_obs/releases/download/v1/rtw_obs_v1_15_128kbps.m4a

## 16. ૧૬. સોળાવાવાલા

https://openbiblestories.org/l/rtw/story-16/

![](https://cdn.door43.org/obs/jpg/360px/obs-en-16-01.jpg)

યહોશુઆ મરી જયો પસેણ ઈઝરાયેલ માણહું ઈસવરના નિયમ ની પાલતલાં ને ચેં બાકી રહલાં કનાની માણહુંને દોયળી ની કાઢયાં. ઈઝરાયેલ માણહું હાસા ઈસવરની ભકિત કરવાને બદલે કનાની માણહુંના દેવુની ભકિત કરી. ઈઝરાયેલમાં રાજો ની હોતો તીને બધાં પોતાને જયુ ગમે ચું કરતલાં.

![](https://cdn.door43.org/obs/jpg/360px/obs-en-16-02.jpg)

ઈઝરાયેલ માણહું ઈસવરના નિયમ ની પાલ્યા તીને ચુ તીનુને વિરુધ કરવાવાલાને તીનુ પોર જીત અપાળી ને તીનાને શિક્ષા કરી. ચે વિરુધ કરવાવાલા ઈઝરાયેલ માણહુંની વસ્તુ સોરી લીજયા ને તીનુની મિલક્તનો નાસ કર્યો ને ઘણાને મારી નાસ્યા. ઘણા વરહુ લગી ઈસવરનુ ની માન્યાં તીનુને વિરુધ કરવાવાલાથી ડબાય રીયા પસેણ ઈઝરાયેલ માણહું મન બદલ્યુ ને સુટવા લેધે ઈસવરને કાલાવાલા કરી.

![](https://cdn.door43.org/obs/jpg/360px/obs-en-16-03.jpg)

તેર ઈસવર તીનુને વિરુધ કરવાવાલાના હાથમાંથી બસાવા લેધે સોળાવાવાલા મોકલી આપ્યા. ને તીનુના દેહમાં શાંતિ લાયા. પુન પસેણ માણહું પાસાં ઈસવરને ભુલી જયા ને પાસાં પુતલાની પૂજા કરવા બાદઝયા. તીને ઈસવર મિઘાની માણહુંને તીનુ પોર લાયો કી ચે તીનુને હરાવે.

![](https://cdn.door43.org/obs/jpg/360px/obs-en-16-04.jpg)

મિઘાની માણહું ઈઝરાયેલ માણહુંનો બધો પાક હાત વરહુ લગી લીજયા. ઈઝરાયેલ માણહું ઘણાં બીહણી જયાં ને ભીગમાં હતાય રહયા કાહા કી મિઘાની માણહું તીનુને જોય ની કાઢે કરીકને. સેહલે ચેં સુટવા લેધે ઈસવરને કાલાવાલા કરી.

![](https://cdn.door43.org/obs/jpg/360px/obs-en-16-05.jpg)

એક દાહળે ગિદિઓન નામનો એક ઈઝરાયેલી માણેહ હોગો હોગો ઘંઉ મોહેલતલો કી મિઘાની માણહું તીનાને સોરી ની લીજાય કરીકને. તેર ઈસવરનો દૂત આવીને ગિદિયોનને કહયુ “ તાકેતવાલો, ઈસવર તાહરી ભેગો સે. જા ને ઈઝરાયેલ માણહુંને મિઘાની માણહુંના હાથમાંથી સોળાવ."

![](https://cdn.door43.org/obs/jpg/360px/obs-en-16-06.jpg)

ગિદિયોનના બાહ પાહે એક વેદી હોતી. ચે પુતલાથી ભરલી હોતી ઈસવર ગિદિયોનને કહયુ કી તીની વેદીને સીરી નાખ. પુન ગિદિયોનને માણહુંની બીહેક લાગી ને રાત પડવા લગી વાટ જોવી. પસેણ ચુ તીની વેદીને તોડી નાખી ને તીનીના કુટકા કરી નાસ્યા. ચુ જાહાં પુતલા લેધે ભોગ સળાવતલા સાહા નવલી વેદી બાધી.

![](https://cdn.door43.org/obs/jpg/360px/obs-en-16-07.jpg)

બીજે દાહળે માણહું ભાલ્યુ કી કોઈક વેદી તોડી નાખી ને તીનીનો નાસ કર્યો તેર માણહું રીહવાય જયાં. ચેં ગિદિયોનને મારી નાખવા ઘોર જયા. પુન ગિદિયોનનો બાહ તીનુને કહયુ “તહું કાહા તોહરા દેવુને બસાવો? ચુ ઈસવર હોય તે તીના પોતાને બસાવા દોવ." ચુ હહીં કહયુ તીને ચે ગિદિયોનને મારી ની નાસ્યો.

![](https://cdn.door43.org/obs/jpg/360px/obs-en-16-08.jpg)

પસેણ પાસાં મિઘાની માણહું ઈઝરાયેલ માણહુંને લૂટવા આયાં. ચે એતરા બધા હોતા કી ચે ગીણાય ની. ગિદિયોન ઈઝરાયેલ માણહુંને તીનુ હામ્બા લડાઇ કરવા ભેગા કર્યા. ગિદિયોન ઈસવરને બે નિશાની આપવા કહયુ તીનાથી તીનુને ખાતરી હોવે કી ઈસવર તીનાને ઈઝરાયેલ માણહુંને બસાવા વાપેરહે.

![](https://cdn.door43.org/obs/jpg/360px/obs-en-16-09.jpg)

પેહલી નિશાની, ગિબયોન સાખલુ લેકને બાહેર જમીન પોર મેસ્યુ ને ઈસવરને કહયુ કી હવારે ઈના સાખલા પોર ઝાકોલ પળે ને જમીન પોર ની. ઈસવર હહીં કર્યું. બીજી રાતે ચુ ઈસવરને કહયુ કી જમીન ભીગવી જોવે પુન સાખલુ ની. ઈસવર ચું હોદે કર્યું. ઈયે બે નિશાની ગિદિયોનને ખાતરી અપાળી કી ઈસવર ઈઝરાયેલ માણહુંને મિઘાની માણહુંના હાથમાંથી બસાવા માંગે.

![](https://cdn.door43.org/obs/jpg/360px/obs-en-16-10.jpg)

૩૨000 ઈઝરાયેલી ધગળાં ગિબયોન પાહે આયાં પુન ઈસવર તીનાને કહયુ કી ચે ઘણા બધા સે. તીને ગિબયોન ૨૨000 માણેહને જ્યે લડાઇથી બીહતલા તીનુને પાસા ઘોર મોકલી દેધા. ઈસવર ગિદિયોનને કહયુ કી હજુ હોદે ઘણા સે. તીને ગિદિયોન ૩00 ધગળાને રહવા દેધાં ને બીજા બધાને ઘોર મોકલી દેધા.

![](https://cdn.door43.org/obs/jpg/360px/obs-en-16-11.jpg)

તીની રાતે ઈસવર ગિદિયોનને કહયુ “નીસો મિઘાની હોયા સાહાં જા ને ચે જયુ કેહે ચું હાંમલે ને તુ બીહવા ની." તીની રાતે ચે હોતા સાહાં જયો ને એક ધગળાને તીનાના ભાયબંધને જયુ હિમણુ ભાલલુ ચું કહતો હાંમલ્યો. તીના માણેહનો ભાયબંધ કહયુ “હિના હિમણાનો અર્થ ઈયુ હોયો કી ગિદિયોનની લહકેર મિઘાની માણહુંની લહકેરને હરાવહે." ગિદિયોન હિયું હાંમલ્યુ તેર ચુ ઈસવરનો આભાર માન્યો.

![](https://cdn.door43.org/obs/jpg/360px/obs-en-16-12.jpg)

પસેણ ચુ પોતાના ધગળાં ભેગો પાસો જયો ને ચુ તીનુને રણશીંગુ ને ધુલાના હાંડલાં ને દીવા આપ્યા. ચે મિઘાની ધગળાં જાહાં હુવતલા ચે જગા ઘેરી લેધી. ગિદિયોનના 300 ધગળાં પાહે હાંડલાંમાં દીવા હોતા કી મિઘાની તીનુના દીવાની ઈજોળી ભાલી ની હકે.

![](https://cdn.door43.org/obs/jpg/360px/obs-en-16-13.jpg)

તેર ગિદિયોનના ધગળાંને એકીવાર્યા હાંડલાં ફોડી નાસ્યા ને તરેત દીવાની ઈજોળી પપેલવા બાદઝેય. ચે પોતાનુ રણશિંગડુ ફુકયુ ને આયળ્યા “યહોવાની ને ગિદિયોનની તલવાર."

![](https://cdn.door43.org/obs/jpg/360px/obs-en-16-14.jpg)

ઈસવર મિઘાની માણહુંને ગુસવી નાસ્યા તીને ચે એકબીજાને મારી નાખવા ને હુમલો કરવા લેધે સાલુ કર્યું. તરેત બાકીના ઈઝરાયેલ માણહુંને તીનુના ઘોરુમાંથી બોલાયા કી ચે મિઘાની માણહું પસોલ પડે. ચેં ઘણાને મારી નાસ્યા ને બાકીનાને ઈઝરાયેલની જગામાંથી દોયળી કાઢયાં ને તીનુ પસોલ પડયા. ૧૨0,000 મિઘાની માણહું તીને દાહળે મરી જયાં. ઈસવર ઈઝરાયેલને બસાયુ.

![](https://cdn.door43.org/obs/jpg/360px/obs-en-16-15.jpg)

માણહું ગિદિયોનને તીનુનો રાજો બણાવા માંગતલાં. પુન ગિદિયોન હહીં ની કરવા દેધુ. પુન ચુ તીનુને હોનાના જયે વસ્તુ મિઘાની માણહું પાહેથી લેય લેધલી ચે લાવા કહયુ. માણહું ગિદિયોનને ઘણુ હોનુ આપ્યું.

![](https://cdn.door43.org/obs/jpg/360px/obs-en-16-16.jpg)

તેર ગિદયોન તીના હોનાનો ઉપયોગ ખાસ સાખલાં કી જયે મુખ્ય પૂજારો પેહરે ચેં બણાવા કર્યો. પુન ઈસવર તીનાને મૂર્તિ હવાલ ભકિત કરવાનુ સાલુ કર્યું. તીને ઈસવર પાસો ઈઝરાયેલ માણહુંને શિક્ષા કરી કાહા કી ચેં મૂર્તિની ભકિત કરતલાં. ઈસવર તીનુને વિરુધ કરવાવાલાને હરાવવા સુટ આપી ને સેહલે ચેં ઈસવરની મદેક માંગી ને ઈસવર તીનુને સોડાવવા કોઈકને મોકલી આપ્યો.

![](https://cdn.door43.org/obs/jpg/360px/obs-en-16-17.jpg)

ઈયે વાત વારંવાર બણતી રહી. ઈઝરાયેલ માણહું પાપ કરતલાં ને ઈસવર તીનુને શિક્ષા કરતલો. ચેં પસ્તાવો કરે ને ઈસવર તીનુને સોડાવા લેધે સોડાવાવાલાને મોકેલતલો. ઘણા વરહુ લગી ઈસવર ઈઝરાયેલ માણહુંને તીનુને વિરુધ કરવાવાલાના હાથમાંથી સોડાવા લેધે સોડાવાવાલાને મોકલી આપ્યા.

![](https://cdn.door43.org/obs/jpg/360px/obs-en-16-18.jpg)

સેહલે માણહું ઈસવર પાહે રાજો માંગ્યો. બીજા દેહુ પાહે હોતા હહીં. ચેં ઉસા ને કાઠા રાજાને માંગતલાં કી ચુ લળાયમાં આગેવાની કરે. ઈસવરને ઈયે વાત ની ગમી તે હોદે ચેં રાજો માંગ્યો હહીં તીનુને આપ્યો.

*બાઇબલનો વાતરો ન્યાયધિશો ૧-૩:૬-૮*

Audio: https://git.door43.org/OBS-TLF/rtw_obs/releases/download/v1/rtw_obs_v1_16_128kbps.m4a

## 17. ૧૭. ઇસવારનો દાઉદ હાતેનો કરાર

https://openbiblestories.org/l/rtw/story-17/

![](https://cdn.door43.org/obs/jpg/360px/obs-en-17-01.jpg)

શાઉલ ઈઝરાયેલનો પેહલો રાજો હોતો. માણહુંનુ ધારતલાં હહીં ચુ ઉસો ને દેખાવમાં હોતો. શાઉલ પેહલાંના વરહુમાં ઈઝરાયેલ પોર રાજ કર્યું તેર ચુ વારુ રાજો હોતો પુન પસેણ ચુ ખરાબ બણી જયો. ચુ ઈસવરનો નિયમ ની પાલ્યો. તીને ઈસવર બીજા માણેહને નક્કી કર્યો કી ચુ એક દાહળે તીનાની જગાએ રાજ કરહે.

![](https://cdn.door43.org/obs/jpg/360px/obs-en-17-02.jpg)

ઈસવર જુવાન ઈઝરાયેલના દાઉદને શાઉલ પસેણ રાજો નક્કી કર્યો. દાઉદ બેથલેહેમ ગામમાં ગોવાલ્યો હોતો. એક વાર ચુ આફાના બાહના ઘેટાં સારતો હોય તેર દાઉદ ઘેટાને હુમલો કરવાવાલા સિંહને ને રીસળાને મારી નાખે. દાઉદ હુંગરો ને હાસો માણેહ હોતો. ચુ ઈસવર પોર ભરહો કરતલો ને તીનાના નિયમ પાલતલો.

![](https://cdn.door43.org/obs/jpg/360px/obs-en-17-03.jpg)

દાઉદ મોટો ધગળો ને આગેવાન બણ્યો. તેર દાઉદ હજુ જુવાન હોતો. ચુ ગોલ્યાથ નામના મોટા ઝુમાવાવાલા હામ્બો લડયો. યોલ્યાથ તાલિમ લેધલો ધગળો હોતો. ઘણો તાકેતવાલો ને તીન મીટર ઉસો હોતો. પુન ઈસવર દાઉદને ગોલ્યાથને મારવામાં ને ઈઝરાયેલને બસાવવામાં મદેક કરી. પસેણ દાઉદ ઈઝરાયેલના દુશ્મન હામ્બો જીતી જયો તીને માણહું તીનાનુ નામ લેતલાં.

![](https://cdn.door43.org/obs/jpg/360px/obs-en-17-04.jpg)

દાઉદ લેધે માણહુંનો પ્રેમ ભાલીકને શાઉલને કોસરાય આવી. શાઉલ તીનાને મારી નાખવા ઘણી વાર કોશિશ કરી. તીને દાઉદ શાઉલથી હતાય જયો. એક દાહળે શાઉલ દાઉદને મારી નાખવા જોવતલો. શાઉલ તીની ભીગમાં જયો કી સાહાં દાઉદ શાઉલથી હતાય રેહે. પુન શાઉલ તીનાને ની જોયો. દાઉદ શાઉલથી ઘણો ઢુકળો હોતો ને તીનાને મારી હકતો પુન હહીં ની કર્યું. તીના બદલે દાઉદ શાઉલના સાખલાંની કોર વાઢી લેધી. ઈયું સાબિત કરવા કી રાજો બણવા લેધે તીનાને મારતો.

![](https://cdn.door43.org/obs/jpg/360px/obs-en-17-05.jpg)

સેહલે શાઉલ લળાયમાં મરી જયો ને દાઉદ ઈઝરાયેલનો રાજો બણ્યો. ચુ વારુ રાજો હોતો ને માણહું તીનાને વારુ કહતલાં. ઈસવર દાઉદને ભરકેતવાલો કર્યો ને તીનાને સફળ બણાયો. દાઉદ ઘણી લળાય કરી ને ઈસવર ઈઝરાયેલના દુશ્મનને હરાવવા દાઉદને મદેક કરી. દાઉદ યરુશાલેમ જીતી લેધુ ને તીનાને રાજધાની બણાવી. દાઉદ રાજ કરતલો તેર ઈઝરાયેલ શકિતવાલુ ને માલદાર બણ્યુ.

![](https://cdn.door43.org/obs/jpg/360px/obs-en-17-06.jpg)

દાઉદ એક ભકિત કરવાની જગા બાંધવા માંગતલો કી સાહાં બધાં ઈઝરાયેલ માણહું આરાધના કરી હકે ને તીનાને ભોગ આપી હકે. 400 વરહુ લગી માણહું મૂસો બાંધલા મુલાકાત મંડપમાં ઈસવરની આરાધના કરતલાં ને ભોગ આપતલાં.

![](https://cdn.door43.org/obs/jpg/360px/obs-en-17-07.jpg)

પુન ઈસવર નાથાન પ્રબોધકને ઈની વાતથી દાઉદ પાહે મોકલ્યો તુ લળાય કરવાવાલો આદમી સે તીને તુ માહરી લેધે ભકિત કરવાની જગા ની બાંધે. તાહરો પોર્યો બાંધહે. પુન મે તને ઘણી ભરકેત આપેહ. તાહરા વંશમાંથી એક કાયેમ માહરા માણહું પોર રાજ કરહે. દાઉદનો એક વંશ કી ચુ બધા દાહળા રાજ કરહે. ચુ ખ્રિસ્ત સે. “ખ્રિસ્ત ઈસવરનો નક્કી કરલો એક સે. ચુ દુનિયાના માણહુંને પાપથી બસાવહે.”

![](https://cdn.door43.org/obs/jpg/360px/obs-en-17-08.jpg)

દાઉદ હિયે શબદો હાંમલ્યા તેર તરેત ઈસવરનો આભાર માન્યો. કાહા કી ચુ દાઉદને ઘણુ માન આપ્યું ને ઘણી ભરકેત આપી દાઉદ જાણ્યું ની હોતુ કી ઈસવર કેર હિયે વાત કરહે. પુન હિયું બણવા લેધે ખ્રિસ્ત આવાની વાત ઈઝરાયેલ માણહું ઘણાં વખેતથી વાટ જોવી પળહે. ૧000 વરહુ લગી.

![](https://cdn.door43.org/obs/jpg/360px/obs-en-17-09.jpg)

દાઉદ હાસાયથી ને ભરહાથી ઘણાં વરહુ રાજ કર્યું ને ઈસવર તીનાને ભરકેત આપી. પુન ચુ જીણગીના સેહલા દાહળામાં ઈસવર વિરુધ મોટુ પાપ કર્યું.

![](https://cdn.door43.org/obs/jpg/360px/obs-en-17-10.jpg)

એક દાહળે દેર દાઉદના ધગળાં લળાય કરવા બાહેર જાય રહલાં તેર ચુ પોતાના મહેલ પોર રહીકને એક રુપાલી બયેરને ઊઘેલતી ભાલી. તીનીનુ નામ બેથશેબા હોતુ.

![](https://cdn.door43.org/obs/jpg/360px/obs-en-17-11.jpg)

નજેર ફેરવી લેવાને બદલે દાઉદ તીની બયેરને બોલાવા કોયકને મોકલ્યો. ચુ તીની ભેગો હુંઈ જયો ને પસેણ તીનીને ઘોર મોકલી દેધી. થોલાક દાહળા પસેણ બેથશેબા દાઉદને વાત મોકલી કી તીનીને મયના હોયા.

![](https://cdn.door43.org/obs/jpg/360px/obs-en-17-12.jpg)

બેથશેબાનો આદમી તીનાનુ નામ ઉરીયા હોતુ. ચુ દાઉદનો ખાસ ધગળો હોતો. દાઉદ ઉરીયાને લળાયમાંથો બોલાયો ને તીનાને કહયુ કી ચુ પોતાની બયેર પાહે જાય. પુન બીજા ધગળાં લળાયમાં હોય ને મે ઘોર જોમ ચે વાત ઉરીયા નકારી દેધી. તીને દાઉદ ઉરીયાને પાસો લળાયમાં મોકલ્યોને લહકેરના આગેવાનને કહવાળ્યુ કી તીનાને જાહાં વધાર દુશ્મન હોય સાહાં અગોલ રાખજો કી તીનાને મારી નાખે.

![](https://cdn.door43.org/obs/jpg/360px/obs-en-17-13.jpg)

ઉરીયા મરી જયો પસેણ દાઉદ બેથશેબાને રાખી. પસેણ ચે દાઉદના પોર્યાને જલમ આપ્યો. દાઉદ જયુ કર્યું તીનાથી ઈસવર રીહવાય જયો તીને ચુ નાથાન પ્રબોધકને દાઉદપાહે મોકલ્યો. ઈયું દેખાળવા કી ચુ કેતરુ મોટુ પાપ કર્યું. દાઉદ પાપનો પસ્તાવો કર્યો ને ઈસવર તીનાને માફ કર્યો. બાકીની જીણગીમાં દાઉદ ઈસવર પસોલ સાલ્યો ને માન્યો.તીનાના મુશ્કેલીના દાહળામાં હોદે.

![](https://cdn.door43.org/obs/jpg/360px/obs-en-17-14.jpg)

દાઉદના પાપની શિક્ષાના બદલામાં તીનાનુ પોર્યુ મરી જયુ. દાઉદના કુટુમમાં આખી જીણગી લડાઇ સાલી ને દાઉદની તાકેત ઊતરતી જેય. દાઉદ ઈસવરનુ ની માન્યો. ઈસવર તીનાના વાયદા પોર ભરહાવાલો હોતો. પસેણ દાઉદ ને બેથશેબાને બીજો એક પોર્યો હોયો તીનાનુ નામ સુલેમાન પાડયું.

*બાઇબલનો વાતરો ૧ શમુએલ ૧૦:૧૫;૧૯,૨૪,૩૧, ૨શમુએલ ૫,૭,૧૧-૧૨*

Audio: https://git.door43.org/OBS-TLF/rtw_obs/releases/download/v1/rtw_obs_v1_17_128kbps.m4a

## 18. ૧૮. અલેગ અલેગ રાજ્ય

https://openbiblestories.org/l/rtw/story-18/

![](https://cdn.door43.org/obs/jpg/360px/obs-en-18-01.jpg)

ઘણા વરહુ પસેણ દાઉદ મરી જયો ને તીનાનો પોર્યો સુલેમાન ઈઝરાયેલ પોર રાજ કરવા બાઝયો. ઈસવર સુલેમાનને કહયુ "તુ જયુ માંગવા હોય ચું માંગ." સુલેમાન અકેલ માગી તેર ઈસવર તીનાથી ઘણો ખુસ હોય જયો ને તીનાને દુનિયાનો વધાર અકેલવાલો માણેહ બણાય દેધો. સુલેમાન ઘણુ હિકયો ને કાયદા કરવાવાલો બણી જયો. ઈસવર તીનાને ઘણો માલદાર બણાયો.

![](https://cdn.door43.org/obs/jpg/360px/obs-en-18-02.jpg)

સુલેમાન યરુશાલેમમાં ભકિત કરવાની જગા બાંધી. તીનાનો બાહ દાઉદ નક્કી કરલુ ને બધુ વસ્તુ ભેગુ કરલુ. માણહું હાય મુલાકાત મંડપની જગાએ ભકિત કરવાની જગાએ ભોગ સડાવા બાદઝયાં ને ઈસવરનીભકિત કરવા બાદઝયાં. ઈસવર ભકિત કરવાની જગાએ હાજર હોતો ને સાહાં ચુ તીનાના માણહું ભેગો રહતલો.

![](https://cdn.door43.org/obs/jpg/360px/obs-en-18-03.jpg)

પુન સુલેમાનને બીજા દેહની બયરે હાતે પ્રેમ હોય જયો. ચુ ૧000 બયરે ભેગો વીહા કર્યા ને ઘણ્યુ બયરે રાસ્યુ ને ઈસવરનુ ની માન્યો. તીનુમાની ઘણી બયરે બીજા દેહન્યુ હોત્યુ ચુ તીનુના દેવુને હોદે લીયાયુ ને ભકિત કરવાનુ સાલુ રાસ્યુ. સુલેમાન ડાહો હોય જયો તેર ચુ હોદે મૂર્તિની ભકિત કરી.

![](https://cdn.door43.org/obs/jpg/360px/obs-en-18-04.jpg)

ઈસવર સુલેમાનથી રીહવાય જયો ને તીનાનો ભરહો ની હોતો તીની શિક્ષાના રુપમાં ઈસવર ઈઝરાયેલ દેહને સુલેમાન મરી જયો પસેણ બે રાજમાં વિહેસવા વાયદો કર્યો.

![](https://cdn.door43.org/obs/jpg/360px/obs-en-18-05.jpg)

સુલેમાન મરી જયો પસેણ તીનાનો પોર્યો રહાબામ રાજો બણ્યો. રહાબામ હુનેર વગેરનો માણેહ હોતો. ઈઝરાયેલના બધાં માણહું તીનાને રાજો બણાવા ભેગાં વલ્યા. ચેં રહાબામને ફરીયાદ કરી કી સુલેમાન ભારી મજૂરી કરાવી ને ઘણો ફાલો લેધો.

![](https://cdn.door43.org/obs/jpg/360px/obs-en-18-06.jpg)

રહાબામ તીનુને હુનેર વગેર જપાબ આપ્યો “તહું એહલો વિચાર કરો કી માહરો બાહ તોહરી પાહે વધાર મજૂરી કરાવી. પુન મે તીના કરતે હોદે વધાર વેઠ તોહરી પોર નાખેહ ને તીના કરતે હોદે વધાર શિક્ષા કરેહ.”

![](https://cdn.door43.org/obs/jpg/360px/obs-en-18-07.jpg)

ઈઝરાયેલના દોહ કુટુમ રહાબામ વિરુધ ઝગડો કર્યો. ખાલી બે કુટુમ એતરાદ તીનાનુ માન્યાં. ઈયે બે કુટુમ યહુદાનુ રાજ બણ્યુ.

![](https://cdn.door43.org/obs/jpg/360px/obs-en-18-08.jpg)

ઈઝરાયેલના બાકીના દોહ કુટુમ રહાબામ વિરુધ ઝગડો કર્યો ચેં યરોબામ નામના માણેહને રાજો કરીકને ઉભો કર્યો. ચેં પોતાનુ રાજ દેહના ઉતર ભાગમાં ઉભુ કર્યું. તીનાને ઈઝરાયેલ રાજ કહયુ.

![](https://cdn.door43.org/obs/jpg/360px/obs-en-18-09.jpg)

યરોબામ ઈસવર વિરુધ ઝગડો કર્યો ને માણહુંને પાપ કરવા દોર્યા. ચુ ઈસવરની આરાધના કરવાને બદલે તીનાના માણહું લેધે યહુદાના રાજની ભકિત કરવાની જગાએ બે મૂર્તિ મેકી.

![](https://cdn.door43.org/obs/jpg/360px/obs-en-18-10.jpg)

યહુદાનુ રાજ ને ઈઝરાયેલનુ રાજ દુશ્મન બણી જયા ને એકબીજા હાતે વારંવાર ઝુમાયતલા.

![](https://cdn.door43.org/obs/jpg/360px/obs-en-18-11.jpg)

ઈઝરાયેલના નવા રાજમાં બધા રાજા ખરાબ હોતા. ઘણા રાજાને બીજા ઈઝરાયેલ માણહું કી જયે તીનુની જગાએ રાજો બણવા માંગતલાં તીનુથી મારી નખાળ્યા.

![](https://cdn.door43.org/obs/jpg/360px/obs-en-18-12.jpg)

ઈઝરાયેલ રાજના બધા રાજા ને માણહું મૂર્તિની પૂજા કરતલાં. તીનુની મૂર્તિ પૂજામાં ઘણીવાર સિનાલાના પાપુ ને પોર્યાંનો ભોગ સડાવતલાં.

![](https://cdn.door43.org/obs/jpg/360px/obs-en-18-13.jpg)

યહુદાના રાજા દાઉદના વંશ હોતા. ઘણા રાજા વારલા હોતા. ચે હાસાયથી રાજ કર્યું ને ઈસવરની આરાધના કરી પુન યહુદાના ઘણા રાજા ખરાબ ને ખરાબ મગજના ને મૂર્તિને પૂજતલા. થોલાક રાજા તે પોતાના પોર્યાંને હોદે ખોટા દેવુ અગોલ ભોગ આપ્યો. યહુદાના મોટા ભાગના માણહું ઈસવર વિરુધ જયાં ને બીજાં દેવુની ભકિત કરી.

*બાઇબલનો વાતરો ૧ રાજા ૧-૬:૧૧-૧૨*

Audio: https://git.door43.org/OBS-TLF/rtw_obs/releases/download/v1/rtw_obs_v1_18_128kbps.m4a

## 19. ૧૯. પરબોધકુ

https://openbiblestories.org/l/rtw/story-19/

![](https://cdn.door43.org/obs/jpg/360px/obs-en-19-01.jpg)

ઈઝરાયેલનો પેહલેથો ઈતિહાસ દેખજે તે ઈસવર પ્રબોધકુને મોકલ્યા. પ્રબોધકુ ઈસવર પાહેથી વાત હાંમલે ને પસેણ ચે વાત માણહુંને કેહે.

![](https://cdn.door43.org/obs/jpg/360px/obs-en-19-02.jpg)

આહાબ ઈઝરાયેલનો રાજો હોતો તેર એલિયા પ્રબોધક હોતો. આહાબ ખરાબ માણેહ હોતો. ચુ માણહુંને ઝુઠો દેવ બઆલની ભકિત કરવા મદેક કરતલો. એલિયો આહાબને કહયુ “મે દેંહ લગી ની કહું તેંહ લગી ઈઝરાયેલમાં વહરાત નીતે ઝાકોલ ની પળે. તીને આહાબ ઘણો રીહવાય જયો.”

![](https://cdn.door43.org/obs/jpg/360px/obs-en-19-03.jpg)

ઈસવર એલિયાને ઉજાળમાં નાળામાં હતાય રહવા કહયુ. કાહા કી આહાબ તીનાને મારી નાખવા હિનતલો. હવારે ને હાંજે પોદયા તીના લેધે માહ ને રોટો લાવતલાં. આહાબ ને તીનાનુ લહકેર એલિયાને જોવતલુ પુન ચુ તીનુને ની જળયો. કાલ એતરો બધો હોતો કી નાળું હુકી જયુ.

![](https://cdn.door43.org/obs/jpg/360px/obs-en-19-04.jpg)

તીને એલિયો ઢુકળા દેહમાં જયો. તીના દેહમાં એક રંડાયલી ને તીનીનો પોર્યો કાલ પળતલો તીને ભુખે મરતલાં. પુન ચેં એલિયાની કાલજી રાખી તીને ઈસવર તીનુને પુરુ પાળ્યું કી તીનુની ગયણીમાં તેલ ને હાંડીમાં લોઠ ની ખુટયો. આખો કાલ ખવાનુ સાલ્યુ. એલિયો થોલાં વરહુ લગી સાહાં રહયો.

![](https://cdn.door43.org/obs/jpg/360px/obs-en-19-05.jpg)

હાળા તીન વરેહ પસેણ ઈસવર એલિયાને ઈઝરાયેલ રાજમાં જવા કહયુ ને આહાબને ભેગાવા કહયુ. કાહા કી ચુ પાસો વહરાત મોકેલવા માંગતલો. દેર આહાબ એલિયાને ભાલ્યો તેર ચુ તીનાને કહયુ "તુ દુખ આપવાવાલે હોયો." એલિયો તીનાને કહયુ "તુ દુખ આપવાવાલો હોયો તુ ઈસવરનો નિયમ તાળ્યો ને બઆલની ભકિત કરી. તુ ઈઝરાયલ માણહુંને કાર્મેલ ડુંગોર પોર લીઆવ.

![](https://cdn.door43.org/obs/jpg/360px/obs-en-19-06.jpg)

ઈઝરાયેલના બધાં માણહુંને ને બઆલના ૪૫૦ પ્રબોધકુને લેકને કાર્મેલ ડુંગોર પોર આવ. એલિયો માણહુંને કહયુ "કાં લગી બે મનવાલા રહસો? યહોવા ઈસવર સે તે તીનાની ભકિત કરો ને બઆલ ઈસવર સે તે તીનાની ભકિત કરો."

![](https://cdn.door43.org/obs/jpg/360px/obs-en-19-07.jpg)

તેતાર એલિયો બઆલના પ્રબોધકુને કહયુ “એક ગોધાને મારીકને તીનુ લેધે વેદી તીયાર કરો. પુન આગ ની હલગાવા. મે હોદે હહીંદ કરેહ. જયે આગથી ઈસવર જવાબ આપે ચુદ હાસો ઈસવર સે." તીને બઆલના પૂજારા વેદી તીયાર કરી પુન આગ ની હલગાવી.

![](https://cdn.door43.org/obs/jpg/360px/obs-en-19-08.jpg)

પસેણ બઆલના પ્રબોધકુ બઆલને પ્રાર્થના કરી કી "બઆલ હમેર હાંમેલ." આખો દાહળો ચે પ્રાર્થના કરી ને આયળ્યા ને પોતાને સૂરા ઘોપીયા પુન કસ્યુ જવાબ ની જળ્યો.

![](https://cdn.door43.org/obs/jpg/360px/obs-en-19-09.jpg)

હાંનતો એલિયો ઈસવરની વેદી તીયાર કરી. પસેણ ચુ માણહુંને વેદી પોર માહ ને લાકડા ને વેદીની ચારેમેરની જમીન ની ભીગે તેંહ લગી બાર હાંડલાં પાણી રેળવા કહયુ.

![](https://cdn.door43.org/obs/jpg/360px/obs-en-19-10.jpg)

તેર એલિયો પ્રાર્થના કરી "એ યહોવા ઈબ્રાહીમ ને ઈસહાક ને યાકૂબના ઈસવર હમુને દેખાળ કી તુ ઈઝરાયેલનો ઈસવર ને મે તાહરો સેવક હોયો. મને જવાબ આપ કી ઈયેં માણહું જાણે કી તુ હાસો ઈસવર હોયો."

![](https://cdn.door43.org/obs/jpg/360px/obs-en-19-11.jpg)

તરેત હરેગમાંથી આગ ઉતરી ને માહ ને લાકડા ને સપોહળા ને દેળ ને જયું વેદીની ચારેમેર પાણી હોતુ ચું બધું બાલી નાચ્યુ. માણહું હિયું ભાલ્યુ ને ભોંય પોર પળ્યા ને કહયુ "યહોવા ઈસવર સે. યહોવા ઈસવર સે.

![](https://cdn.door43.org/obs/jpg/360px/obs-en-19-12.jpg)

તેર એલિયો કહયુ “બઆલના એક હોદે પ્રબોધકને જવા ની દેવા.” તીને માણહું બઆલના પ્રબોધકુને ધર્યા ને સેટા લીજાયકને મારી નાચ્યા.

![](https://cdn.door43.org/obs/jpg/360px/obs-en-19-13.jpg)

એલિયો આહાબ રાજાને કહયુ “તુ હેહેર ઘમી જા. કાહા કી વહરાત આવા બાઝી રીયો.” તરેત કાલા વાદળા આયાં ને ભારી પાણી પળ્યો. યહોવા કાલ બંધ કર્યો ને સાબિત કર્યું કી ચુદ હાસો ઈસવર સે.

![](https://cdn.door43.org/obs/jpg/360px/obs-en-19-14.jpg)

એલિયાના ટેમ પસેણ ઈસવર એલિશા નામના માણેહને પ્રબોધક હહીં નક્કી કર્યો. ઈસવર એલિશાથી ઘણાં સમતકાર કર્યા. એક સમતકાર નામાનને હોયો. ચુ દુશ્મન સેનાનો મોટો હોતો. તીનાને સામળીનો રોગ હોતો. ચુ એલિશાની વાત હાંમલી સાત વાર ડુબકી મારવા કહયુ.

![](https://cdn.door43.org/obs/jpg/360px/obs-en-19-15.jpg)

પેહલો નામાન રીહવાય જયો ને ચુ હહીં ની કર્યું કાહા કી ચું ગાંડા હરકુ લાજયુ. પુન સેહલે ચુ પોતાનુ મન બદલ્યુ ને ચુ સાત વાર યર્દનમાં ડુબકી મારી. સેહલે ચુ બાહેર આયો તેર તીનાની સામડી આખી વારલી હોય જેલી હોતી. ઈસવર તીનાને વારલો કર્યો.

![](https://cdn.door43.org/obs/jpg/360px/obs-en-19-16.jpg)

ઈસવર બીજા ઘણા પ્રબોધકુને મોકલ્યા. ચે માણહુંને મૂર્તિ પૂજા ની કરવા ને હાસાયથી રહવા ને બીજાને પ્રેમ કરવા કહયુ. પ્રબોધકુ માણહુંને સેતવણી આપી કી ચેં ખરાબ કરવાનુ સોળે ની ને ઈસવરના નિયમમાં રહવાનુ સાલુ ની કરે તે ઈસવર તીનુને ગુનો માથે પાળીને નીયો કરહે ને શિક્ષા કરહે.

![](https://cdn.door43.org/obs/jpg/360px/obs-en-19-17.jpg)

ઘણી વાર માણહું ઈસવરનુ ની માન્યુ. ચેં પ્રબોધકુને વિતાળ્યા ને તીનુને મારી હોદે નાસ્યા. એક વાર યર્મિયા પ્રબોધકને પાણી ની હોતુ તીના કૂવામાં મારી નાખવા નાખી દેધલો. ચુ કૂવામાં ગુરકાય જયો. પુન રાજાને તીના પોર દિયા આવી ને ચુ તીનાના ધગળાને હુકમ કર્યો કી યર્મિયા મરે તીના પેહલો તીનાને બાહેર કાઢો.

![](https://cdn.door43.org/obs/jpg/360px/obs-en-19-18.jpg)

કાહા કી માણહું તીનાને ધિકારતલાં તે હોદે પ્રબોધકુ ઈસવર લેધે બોલ્યા. ચે માણહુંને સેતવણી આપી કી ચેં મન ની બદલે તે ઈસવર તીનુનો નાસ કરહે. ચે માણહુંને ઈસવરની ઈયે વાત હોદે યાદ દેવળાવી કી મસિહ આવહે.

*બાઇબલનો વાતરો ૧ રાજા ૧૬-૧૮, ૨ રાજા ૫, યરમિયા ૩૮*

Audio: https://git.door43.org/OBS-TLF/rtw_obs/releases/download/v1/rtw_obs_v1_19_128kbps.m4a

## 20. ૨૦. વેઠ ને સુટકારો

https://openbiblestories.org/l/rtw/story-20/

![](https://cdn.door43.org/obs/jpg/360px/obs-en-20-01.jpg)

ઈઝરાયલનુ રાજ ને યહુદાનુ રાજ બેહો ઈસવર વિરુધ પાપ કર્યું. ઈસવર તીનુને જયુ કરાર સિનાઈ ડુંગોર પોર આપલો ચુ તોળી નાચ્યો. માણહું મન બદલે ને પાસાં તીનાની ભક્તિ કરે કરીકને સેતવણી આપવા ઈસવર તીનાના પ્રબોધકુને મોકલ્યા પુન ચે ની માન્યુ.

![](https://cdn.door43.org/obs/jpg/360px/obs-en-20-02.jpg)

તીને ઈસવર બેહો રાજને તીનુના દુસમનુથી તીનુનો નાસ કરવા સુટ આપી. આસૂરનુ રાજ તાકેતવાલુ હોતુ ને નાસ કરવાવાલુ હોતુ. ચું ઈઝરાયેલના રાજનો નાસ કર્યો. આસૂરનુ લહકેર ઈઝરાયેલના રાજના ઘણાં માણહુંને મારી નાચ્યાં. બધી મિલકેત લેક જતા રહયા ને દેહને બાળી નાચ્યો.

![](https://cdn.door43.org/obs/jpg/360px/obs-en-20-03.jpg)

આસૂરના માણહું બધા આગેવાનુને ને માલદાર માણહુંને ને વારુ કારીગરુ હોતા તીનુ બધાને ભેગા કરીકને આસૂર લીજયા. તીનુમાના ગરીબ ઈઝરાયેલ માણહું તીનુને મારી ની નાચ્યાં ચેં એતરાંદ ઈઝરાયેલ રાજમાં રહયાં.

![](https://cdn.door43.org/obs/jpg/360px/obs-en-20-04.jpg)

પસેણ આસૂરના માણહું બીજા દેહના માણહુંને ઈઝરાયેલનુ રાજ જાહાં હોતુ સાહાં રહવા લાયાં. બીજા દેહના માણહું નાસ કરલાં હેહેરને પાસાં બાંધ્યાં ને સાહાં રહી જેલાં ઈઝરાયેલ માણહું ભેગાં પયણ્યા. ઈઝરાયેલનો જયુ વસતાર બીજા દેહના માણહુંને પયણ્યો ચેં સમરુની માણહું કહવાયાં.

![](https://cdn.door43.org/obs/jpg/360px/obs-en-20-05.jpg)

યહૂદા રાજના માણહું ભાલ્યુ કી ઈસવરની ભકિત ને નિયમ ની પાલવાવાલાં ઈઝરાયેલ રાજના માણહુંને કેહલી સિકસા કરી. તેહોદે ચેં મુર્તિની ભકિત કરવાનું ને કનાની માણહુંના દેવુના ઉપાહ કરવાનું સાલુ રાખ્યુ. ઈસવર તીનુને સેતવણી આપવા લેધે પ્રબોધકુ મોકલ્યા પુન ચેં તીનુનુ ની હાંમલ્યુ.

![](https://cdn.door43.org/obs/jpg/360px/obs-en-20-06.jpg)

આસૂર ઈઝરાયેલના રાજનો નાસ કર્યો તીનાના ૧00 વરહુ પસેણ ઈસવર બાબિલના રાજા નબુખાદનેસ્સારને યહૂદાના રાજ પોર લળાય કરવા મોકલ્યો. બાબિલ તાકેતવાલુ રાજ હોતુ. યહૂદા રાજનો રાજો નબુખાદનેસ્સાર રાજાનો ગુલામ બણવા કબુલ કરી ને તીનાને દર વરેહે પચ્યા આપવા નક્કી કર્યું.

![](https://cdn.door43.org/obs/jpg/360px/obs-en-20-07.jpg)

પુન થોલાંક વરહુ પસેણ યહુદિયાનો રાજો નબુખાદનેસ્સાર વિરુધ ઝગડો કર્યો તીને બાબિલ પાસા આવીકને યહુદિયાના રાજ પોર હુમલો કર્યો. ચે યરુશાલેમનુ હેહેર લેય લેધુ. ભકિત કરવાની જગાને નાસ કરી ને હેહેર ને ભકિત કરવાની જગાનો બધો ખજાનો લૂંટી લેધો.

![](https://cdn.door43.org/obs/jpg/360px/obs-en-20-08.jpg)

યહુદિયાના રાજાને ઝગડો કરવાની શિક્ષા આપવા લેધે નબુખાદનેસ્સાર રાજાના ધગળાં રાજાના પોર્યાને તીના અગોલ મારી નાસ્યો ને પસેણ તીનાને આંધળો કરી દેધો. પસેણ ચે રાજાને બાબિલના બંધિવાસમાં મારવા લેધે લીજયા.

![](https://cdn.door43.org/obs/jpg/360px/obs-en-20-09.jpg)

નબુખાદનેસ્સાર ને તીનાનુ લહકેર યહુદિયા રાજના બધાં માણહુંને બાબિલ લીજયા. જયે વધાર ગરીબ હોતાં તીનુનેદ વાળ્યુમાં ખેતી કરવા લેધે રહવા દેધાં. ઈયુ એહલો ટેમ હોતો કી ઈસવરના માણહુંને વાયદાનો દેહ સોળીકને બંધિવાસમાં લીજવા ડબોણ આપલુ.

![](https://cdn.door43.org/obs/jpg/360px/obs-en-20-10.jpg)

ઈસવર તીનાના માણહુંને તીનુના પાપુ લેધે શિક્ષા કરી કી તીનુને બંધિવાસમાં મોકલે પુન ચુ તીનુને ને પોતાના વાયદાને ભુલ્યો ની. ઈસવર તીનુને ભાલદેખ રાખવાનુ ને પોતાના પ્રબોધકુથી તીનુ ભેગો બોલવાનુ સાલુ રાસ્યુ. ચુ વાયદો કર્યો કી સીતેર વરહુ પસેણ ચેં વાયદાના દેહમાં પાસાં આવહે.

![](https://cdn.door43.org/obs/jpg/360px/obs-en-20-11.jpg)

સીતેર વરહુ પસેણ કોરેશ ચુ પરશિયાનો રાજો હોતો. ચુ બાબિલને હરાયુ ને તીનુનુ રાજ લેય લેધુ. ઈઝરાયેલ માણહું હાય યહુદી કહવાયતલા ને તીનુમાના ઘણાં માણહું પોતાની આખી જીણગી બાબિલમાં પુરી કરી. તીનુમાના ઘણા ઓસા ડાહલાંને યહુદિયા દેહ યાદ હોતો.

![](https://cdn.door43.org/obs/jpg/360px/obs-en-20-12.jpg)

પરશિયન રાજ તાકેતવાલુ હોતુ પુન ચે જીતેલી પ્રજા પોર દિયાવાલા હોતાં. કોરેશ પરશિયાનો રાજો બણ્યો પસેણ તરેત હુકમ કર્યો કી જયે યહુદી માણહું યહુદિયા રાજમાં જવા માંગતા હોય ચેં પરશિયા સોળીકને યહુદિયા જાય હકે. ચુ ભકિત કરવાની જગા પાસી બાંધવા લેધે પચ્ચા હોદે આપ્યા. તીને સીતેર વરહુ પસેણ યહુદી માણહુંનુ એક નનલુ ટોળું યહુદિયાના યરુશાલેમ હેહેરમાં પાસુ આયુ.

![](https://cdn.door43.org/obs/jpg/360px/obs-en-20-13.jpg)

દેર માણહું યરુશાલેમમાં પાસાં આયાં તેર ભકિત કરવાની જગા ને હેહેરની ચારેમેર કોટ બાંધ્યો. હજુ બીજા માણહુંથી તીનુને અમલ ચલાવાતો. પાસાં ચેં વાયદાના દેહમાં રહવા બાદજયા ને ભકિત કરવાની જગામાં આરાધના કરવા બાદજયા.

*બાઇબલનો વાતરો ૨ રાજો ૧૭;૨૪-૨૫; ૨ કાળવુતાંત ૩૬; એઝરા; ૧-૧૦; નહેમયા ૧-૧૩*

Audio: https://git.door43.org/OBS-TLF/rtw_obs/releases/download/v1/rtw_obs_v1_20_128kbps.m4a

## 21. ૨૧.ઈશ્વરે મસિહનું વચન આપ્યું

https://openbiblestories.org/l/rtw/story-21/

![](https://cdn.door43.org/obs/jpg/360px/obs-en-21-01.jpg)

પેહલેથોદ ઈસવર મસિહને મોકેલવાની યોજના કરી, મસિહની વાત પેહલામ પેહલી આદેમ ને હવા પાહે આવલી. ઈસવર કહલુ કી હવાથી એક વંશ ઉબેજહે, ને ચુ ગહળાનું મુંડુ સુન્દહે. જયુ હવાને સેતેરલી ચુ સેતાન હોતો. વસોનનો અરેથ ઇયુ હોદતો કિ મસિહ સેતાનને પુરેપુરી રીતે હરાવહે.

![](https://cdn.door43.org/obs/jpg/360px/obs-en-21-02.jpg)

ઈસવર આબ્રાહામને વાયદો આપલો કી તિનાથી ધરતિના બધા માણહુને આશીર્વાદ જળહે. આવતા ટેમમા જેર મસીહ આવહે તેર ઈયે વાત પુરી હોવહે, તિનાથી આખી માણેહ જાતનુ બસવાનુ હાસુ પળી હકે.

![](https://cdn.door43.org/obs/jpg/360px/obs-en-21-03.jpg)

ઈસવર મુસાને વાયદો આપલો કી આવતા ટેમમાં તિના હરખો બિજો પરબોધક ઉભો હોવહે. મસિહ થોળાક ટેમ પસી આવાનો હોતો. તિનાના બારામા ઈયુ બિજો વાયદો હોતો.

![](https://cdn.door43.org/obs/jpg/360px/obs-en-21-04.jpg)

ઈસવર દાવુદને વાયદો આપલો કી તિનાના પોતાનોદ વંશ ઈસવરના માણહુ પોર બધા દાહળા રાજ કરહે. હિનાનો અરેથ ઈયુ હોતો કી મસિહ દાવુદના પોતાના વંશમાનો હોહે.

![](https://cdn.door43.org/obs/jpg/360px/obs-en-21-05.jpg)

યર્મિયા પરબોધકથી ઈસવર કહલુ કી ઈઝરાયેલ માણહુ હાથે સિનાય ડુંગોર પોર કરલા કરાર હરખો ની, પુન એક નવલો કરાર કરહે, નવલા કરારમાં ઈસવર માણહુના મનમાં તિનાના નિયમુ લખહે, માણહુ જાતે ઈસવરને જાણહે, ચે તિનાના માણહુ હોવહે, ને ઈસવર તિનુના પાપુ માફ કરહે, ને મસિહ નવલા કરારની શરુઆત કરહે.

![](https://cdn.door43.org/obs/jpg/360px/obs-en-21-06.jpg)

ઈસવરની વાત કહવાવાલા જણાવલુ કી ચુ મસીહ પરબોધક, મોટો પુજારો ને રાજો હોદે હોહે, પરબોધકુ એતરે માણેહ, જ્યે ઈસવરની વાત હામલે ને માણહુને કહી હમલાવે, , જિના મસીહને ઇસવર મોકેલવાનુ વસોન આપલુ સે ચુ એક પુરેપુરો પરબોધક હોહે.

![](https://cdn.door43.org/obs/jpg/360px/obs-en-21-07.jpg)

ઈઝરાયેલી પુજારા માણહુના પાપુની સિકસા લેધે ઈસવરને ભોગ સળાવતલા. પુજારા હોદે માણહુ લેધે પરાથના કરી, મસીહ એક પુરેપુરો મોટો પુજારો હોહે, ને ચુ પોતાને એક પુરેપુરો ભોગ બણી જાહે.

![](https://cdn.door43.org/obs/jpg/360px/obs-en-21-08.jpg)

રાજો એતરે એક માણેહ જ્યુ, રાજ કરે ને માણહુનો નિયો કરે, મસીહ એક પુરેપુરો રાજો હોહે ને ચુ દાવુદની રાજ કરવાની ખુરસી પોર બહચે, ચુ આખી ધરતિ પોર રાજ કરહે, ને હરખો ને હાસો નીયો કરહે.

![](https://cdn.door43.org/obs/jpg/360px/obs-en-21-09.jpg)

મસીહ આવાના બારામાં પરબોધકુ ઘણ્યુ બધ્યુ ભવિષ્યવાણ્યુ કરલ્યુ. મલાખી નામનો પરબોધક અહિ ભવિષ્યવાણી કરલી કી મસિહ આવે પેહલો એક મોટો પરબોધક આવહે. યશાયા અહી ભવિષ્યવાણી કરલી કી મસિહનો જલેમ એક કુવારલીથી હોવહે, ને મિખાહ પરબોધક કહલુ કી તિનાનો જલેમ બેથલેહેમ ગામમાં હોવહે.

![](https://cdn.door43.org/obs/jpg/360px/obs-en-21-10.jpg)

યસાયા પરબોધક કહલુ કી મસીહ ગાલીલમાં રહચે, જ્યે દુખી હોહે તિનુને દિલાસો આપહે, જેલ્યાને સોળાવહે, ને ચુ ઈની વાતની હોદે ભવિષ્યવાણી કરલી કી ચુ માદલા માણહુને હાજા કરહે, ને જિનુને ની હમલાયતુ, ની બોલાયતુ, ની સલાયતુ, તિનુને હોદે.

![](https://cdn.door43.org/obs/jpg/360px/obs-en-21-11.jpg)

યસાયા પરબોધક અહી હોદે ભવિષ્યવાણી કરલી કી મસિહને કારેણ વગેર વાક કાઢહે ને ધિકારહે. બિજા પરબોધકુ ભવિષ્યવાણી કરલી કી જ્યે માણહુ મસીહને મારી નાખહે ચે તિનાના સાખલા લેધે સીઠી ઊસાલહે, ને તિનાના ભાયબંધુમાનોદ એક તિનાને ધરાય દેહે. ઝખાર્યો પરબોધક ભવિષ્યવાણી કરલી કી જ્યુ ભાયબધ તિનાને ધરાય દેહે તિનાને તિસ સાંદીના સીકા આપવામાં આવહે.

![](https://cdn.door43.org/obs/jpg/360px/obs-en-21-12.jpg)

પરબોધકુ મસીહનુ મોત કકિહી હોવહે હિયુ હોદે કહી જણાવલુ, યસાયો ભવિષ્યવાણી કરલી કી માણહુ મસીહના મોહ પોર થુપહે, ને તિનાના ખિહલ્યા રમહે, ને તિનાને ઠોકહે ને મારી નાખહે, ચુ કસ્યુ ખોટુ ની કર્યુ તે હોદે ઘણી વેલ્હામાં મરહે.

![](https://cdn.door43.org/obs/jpg/360px/obs-en-21-13.jpg)

પરબોધકુ ઇયુ હોદે કહયુ કી મસીહમા જરી પુન પાપ ની હોય, ચુ બિજા માણહુના પાપુની સીક્સા વેઠવા મરહે, તિનાની સજાથી માણહુને ઈસવર વસે સાંતી લાવહે, ને ઈના લેધે ઈસવરની મરજી ઈયે હોતી કી ચુ મસીહને કુસરી નાખે.

![](https://cdn.door43.org/obs/jpg/360px/obs-en-21-14.jpg)

પરબોધકુ ભવિષ્યવાણી કરલી કી મસીહ મરી જાહે, ઈસવર તિનાને મોતમાંથો જિવતો કરહે, મસીહના મોત ને તિનાના પાસો જિવતો હોય જવાથી ઈસવર પાપી માણુહુને બસાવાની યોજના પુરી કરહે. ને નવલો કરાર સાલુ કરહે.

![](https://cdn.door43.org/obs/jpg/360px/obs-en-21-15.jpg)

ઈસવર મસીહના બારામાં પરબોધકુને ઘણી બધી વાતે કહલી, પુન મસીહ કોય પુન પરબોધકુના ટેમમાં ની આયો. ઈયુ સેહલ્યુ ભવિષ્યવાણ્યુ આપ્યાના ચારહો વરેહ પસી ખરા ટેમે ઈસવર મસીહને ઈની દુનીયામાં મોકલ્યો.

*બાઈબલમાંથી એક વાર્તા:ઉત્પત્તિ ૩: ૧૫; ૧૨: ૧-૩; પુનર્નિયમ ૧૮: ૧૫; ૨ શમૂએલ ૭; યર્મિયા ૩૧; યશાયા ૫૯: ૧૬; દાનીયેલ ૭; માલાખી ૪: ૫; યશાયાહ ૭: ૧૪; મીખાહ ૫: ૨; યશાયા ૯: ૧-૭; ૩૫: ૩-૫; ૬૧; ૫૩; ગીતશાસ્ત્ર ૨૨: ૧૮; ૩૫: ૧૯; ૬૯: ૪; ૪૧: ૯; ઝખાર્યા ૧૧: ૧૨-૧૩; યશાયાહ ૫૦: ૬; ગીતશાસ્ત્ર ૧૬: ૧૦-૧૧*

Audio: https://git.door43.org/OBS-TLF/rtw_obs/releases/download/v1/rtw_obs_v1_21_128kbps.m4a

## 22. ૨૨ યોહાન નો જલેમ.

https://openbiblestories.org/l/rtw/story-22/

![](https://cdn.door43.org/obs/jpg/360px/obs-en-22-01.jpg)

અગલો ઈસવર, દુતુ ને પરબોધકુથી માણહુ હાથે વાત કરી, પુન હીના પસી ચાર હો વરહુમાં ઈસવર કોય હાતે કચુ વાતે ની કરી, ઉસકાહલેદ એક હરેગ દૂત બાબા ઝખાર્યા પાહે ઈસવરની વાત લેકને આવે, ઝખાર્યો ને તિનાની ઘોરવાલી એલિસાબેથ ઈસવરનુ માનીકને સાલવાવાલા હોતા, તે હોદે તિનુને પોર્યુ હોવાની કોય આચા ની હોતી.

![](https://cdn.door43.org/obs/jpg/360px/obs-en-22-02.jpg)

દૂત ઝખાર્યાને કહ્યુ, “તાહરી ઘોરવાલી ને પોર્યો હોવહે, ને તુ તિનાનુ નામ યોહાન રાખજી, ચુ પવિતર આત્માથી ભરેલો હોવહે, ને મસીહ દેધે માણહુને તિયાર કરહે” ઝખાર્યો કહયુ “હમું, મે ને માહરી ઘોરવાલી ઘણા ડાહા હોયા હમુને કકિહી પોર્યુ હોવહે.”

![](https://cdn.door43.org/obs/jpg/360px/obs-en-22-03.jpg)

દૂત ઝખાર્યાને કહ્યુ, “તને ઈયે વારુ વાત કહવા મને ઈસવર મોકલ્યો, જાહ લગી પોર્યાનો જલેમ ની હોવે તાહ લગી તુ બોલી ની હકે, કાહા કી તુ માર પોર ભરહો ની કર્યો” તરતેદ ઝખાર્યાથી બોલી ની હકાયુ. હિના પસી ઝખાર્યુ ઘોર જ્યો ને તિનાની ઘોરવાલીને મહિના રહયા.

![](https://cdn.door43.org/obs/jpg/360px/obs-en-22-04.jpg)

જે એલીસાબેથને સો મહિના હોય રહલા, તેર ઉસકાહલોત એક હરેગ દૂત એલીસાબેથની હગીને દેખાયો, તિનીનુ નામ મરિયમ હોતુ, ચે કુવારલિત હોતી ને તિનીને યુસુફ નામના એક જુવાન્યાને જોળી મેકલી, ને દૂત તિનીને કહયુ “તને મહિના રહચે ને તુ એક પોર્યો જણહી, ને તિનાનુ નામ તુ ઈસુ પાળજી, ચુ ઉસામ ઉસા ઇસવરનો પોર્યો હોહે, ને ચુ બધા દાહળા રાજ કરહે, “

![](https://cdn.door43.org/obs/jpg/360px/obs-en-22-05.jpg)

મરીયમ કહ્યુ કી “હિયુ કકિહી હોવહે, મે તે એક કુવારલીત હોવી” દૂત તિનીને કહયુ કી, “પવિતર આત્મા તાહરા પોર આવહે, ને ઈસવરની તાકેત તાહરા પોર પળહે, તિને ચુ પોર્યો, પવિતર સે, ને ઈસવરનો પોર્યો કહવાયહે,” મરીયમ દુતની વાત પોર ભરહો કર્યો ને માની લેધી.

![](https://cdn.door43.org/obs/jpg/360px/obs-en-22-06.jpg)

દુતની વાત કહી પસી મરિયમ એલીસાબેથને ભેગાયવા જેય, જેતાર એલીસાબેથ મરીયમની બોલી હામલી તહિત તરેત તિનીના પેટમાં પોર્યુ ઉસલ્યુ, ચુ બયરે ઈસવર તિનુ લેધે જ્યુ કર્યુ તિનાથી ઘણ્યુ ખુસ હોત્યુ, તિન મહિના પસી મરીયમ આફિને ઘોર પાસી જેય.

![](https://cdn.door43.org/obs/jpg/360px/obs-en-22-07.jpg)

એલીસાબેથ પોર્યાને જલેમ આપ્યો, ને દહિ દૂત કહલુ તહી પસી ચેં તિનાનુ નામ યોહાન પાળ્યુ, ને ઇસવર પાસો ઝખાર્યાને બોલતો કર્યો, ઝખાર્યો કહયુ “ઇસવરના વખાણ હોવે, કાહા કિ ચુ તિનાની પરજાને ફોમ રાખી, માહરા પોર્યા તુ મોટા ઇસવરનો પરબોધક કહવાયહી, ને માણહુને પાપુની માફી કકિહી મેલવી ચુ દેખાળહી.”

*બાઈબલમાંથી એક વાર્તા: લૂક 1*

Audio: https://git.door43.org/OBS-TLF/rtw_obs/releases/download/v1/rtw_obs_v1_22_128kbps.m4a

## 23. ૨૩. ઈસુનો જલેમ.

https://openbiblestories.org/l/rtw/story-23/

![](https://cdn.door43.org/obs/jpg/360px/obs-en-23-01.jpg)

મરીયની હગાય યુસુફ નામના એક હાસા માણેહ હાથે હોય રહલી. જેતાર ચુ હામલ્યુ કી તિનિને મયના હોયા, તેર ચુ જાણતલોદ કી ચુ પોર્યુ તિનાનુ ની મલે, મરિયમને બદલામ ની કરવા માંગતલો તિને સોળી દેવા વિચાર્યુ, ચુ કચુક કરે તિના પેહલો હરેગનો દૂત તિનાના હિમણામાં આવીકને વાત કરી.

![](https://cdn.door43.org/obs/jpg/360px/obs-en-23-02.jpg)

દૂત કહયુ, “યુસુફ મરિયમને તાહરી ઘોરવાલી બણાવવા બિહવા ની, જ્યે મહિના સે ચે પવિતર આત્માથી સે, ચે એક પોર્યો જણહે ને તિનાનુ નામ ઇસુ પાળજી, (તિનાનો અરેથ: ઈસવર બસાવે) કાહા કી ચુ માણહુને તિનુનાં પાપુમથો બસાવહે”.

![](https://cdn.door43.org/obs/jpg/360px/obs-en-23-03.jpg)

તિને યુસુફ મરિયમ ને પયણીક ને ઘોર લાયો, પોર્યાનો જલેમની હોયો તાહ લગી ચુ તિની પાહે ની જ્યો.

![](https://cdn.door43.org/obs/jpg/360px/obs-en-23-04.jpg)

જેર મરિયમને ખટલો હોવાનો ટેમ નજીક હોતો તેર, રોમન સરકાર પોતપોતાના ડાહલા બાહુહ જાહા રહતલા સાહા જાયકને નામુ લખાળવા કહયુ. મરિયમને ને યુસુફને નાઝરેથથા બેથલેહેમ જવા ઘણુ સાલવુ પળ્યુ. કાહાકી તિનુનો પુરવોજ દાવુદ હોતો. ને તિનાનુ ગામ બેથલેહેમ હોતુ.

![](https://cdn.door43.org/obs/jpg/360px/obs-en-23-05.jpg)

જેતાર ચે બેથલેહેમ પોહત્યા તેર તિનુને રહવા લેધે જગા ની જળી તિનુને ડગરા બાધવા નુ કુળ એતરુદ જળ્યુ. ને પોર્યાનો જલેમ સાહા હોયો. ને તિનાની આચ તિના પોર્યા ને ગભાણમા હુવાળ્યો. કાહા કી તિનુ પાહે ખાટલો ની હોતો, ચેં તિનાનુ નામ ઈસુ પાડયુ.

![](https://cdn.door43.org/obs/jpg/360px/obs-en-23-06.jpg)

તિનિ રાતે થોળાક ભરવાળુ પાધોરુમા ધેટાની રખવાલી કરતલા, ઉસકાહલુદ તિનુ અગોલ ઇંજળાહન હોય જ્યુ ને એક દૂત તિનુ ને દેખાયો. ને ચે બિહી જ્યા, ને દૂત તિનુ ને કહ્યુ, “બિહો ની કાહાકી તોર લેધે મે વારુ ખબેર લાયો, મસિહ, પ્રભુ, બેથલેહેમમાં જન્યો.”

![](https://cdn.door43.org/obs/jpg/360px/obs-en-23-07.jpg)

“જોવને પોર્યાને જોવો, ચુ તહુને સાખલામા લપેટલો, ગભાણમા હુવાળલો ભાલહો,” એકદોમ હરેગ ઈસવરના દુતુ થી ભરાય જ્યુ. ને છે ઈસવરનાં વખાણ કરતા કહયુ કી, “હરેગ માં ઈસવરના વખાણ હોવે ને તીનાને પસંદ કરવાવાલા ધરતિપોર ના માણહુ ને સાંતી જળે.”

![](https://cdn.door43.org/obs/jpg/360px/obs-en-23-08.jpg)

થોળાકેદ ટેમાં ભરવાળુ, ઈસુ જાહા હોતો સાહા પોહતી જ્યા, દહીં દુતુ કહલુ તહી પોર્ઉઓ ગભાણમા હુવતો ભાલવા જલ્યો. ચે ઘણાત ખુસમાં હોતા, ભરવાળુ જ્યુ ભાલ્યુ ને હામ્યુ તિના લેધે ઈસવરના વખાણ કરતા, કરતા પોતાના ઘેટા હોતા સાહા પાધોરમા પાસા જતા રહ્યા.

![](https://cdn.door43.org/obs/jpg/360px/obs-en-23-09.jpg)

થોળાક ટેમ પસી, ઉગેમ્યા દેહુ માના ઘણી બુદ્ધિવાલા માણહુ હરેગમાં એક અલેગેત તારો ભાલ્યો, તિનુને ખબેર પળી કી યહુદિમાણહુનો એક નવો રાજો જલેમ્યો, તિને ચે ઇના એક નવલા રાજા ને ભાલવા ઘણે લામ્બે જ્યા, ને ચે બેથલેહેમાં આયા ને જાહા ઈસુ ને તિનાના આચબાહા હોતા તિના ઘોરને જોયુ,

![](https://cdn.door43.org/obs/jpg/360px/obs-en-23-10.jpg)

જેતાર બુધ્ધિવાલા માણહુ ઈસુને તિનાની આચ ભેગુ ભાલ્યુ તેર ચે તિનાનુ ભજન કર્યુ, ને ચે ઇસુને ઘણી મોહંગી મોહંગી ભેટે આપ્યુ, ને પાસા ઘોર ઘમી વલ્યા.

*બાઈબલમાંથી એક વાર્તા: માથ્થી ૧*

Audio: https://git.door43.org/OBS-TLF/rtw_obs/releases/download/v1/rtw_obs_v1_23_128kbps.m4a

## 24. ૨૪. યોહાન ઈસુને બાપતિસમાં આપ

https://openbiblestories.org/l/rtw/story-24/

![](https://cdn.door43.org/obs/jpg/360px/obs-en-24-01.jpg)

ઝખાર્યા ને એલીસાબેથનો પોર્યો યોહાન મોટો હોયો, ને પરબોધક બણ્યો. ચુ ઉજાળમા રહતલો, ને મોધ ને તિડા ખાતલો. ને ઉટળાના રુવાના સાખલા પેહેરતલ

![](https://cdn.door43.org/obs/jpg/360px/obs-en-24-02.jpg)

ઘણા બધા માણહુ યોહાનનુ હામેલવા ઉજાળમાં આવતલા. ચુ તિનુને કહયુ કી “પસતાવો કરો, કાહા કી ઈસવરનુ રાજ ઢુકળુ આય રહયુ

![](https://cdn.door43.org/obs/jpg/360px/obs-en-24-03.jpg)

જેતાર માણહુ યોહાનની વાત હામલ્યા તેતાર, ઘણા બધા પોતાના પાપુનો પસતાવો કર્યો, ને યોહાન તિનુને બાપતીસમા આપ્યુ. મોટા મોટા ગુરુ હોદે યોહાનથી બાપતિસમાં લેવા યોહાન પાહે આયા, પુન ચે પસતાવો ની કર્યો ને માફી ની માંગી.

![](https://cdn.door43.org/obs/jpg/360px/obs-en-24-04.jpg)

યોહાન તિનુ ગુરુને કહયુ, “તહુ જેહેરવાલા ગહળા હોયા, પસતાવો કરો ને તોહરી સાલસલેણ બદલો. જ્યે વારુ ફલ ની આપે તિનુ બધા ઝાળુને વાઢી નાખહે, ને તિનુને આગમાં નાખી દેવાયહે,” યોહાન ને પરબોધકુ જ્યુ કહલુ ચુ બધુ પુરુ હોયુ, ભાલ મે માહરા સંદેશ લિજવાવાલાને મોકલેહ ને ચુ તાહરા લેધે રોહો તિયાર કરહે,

![](https://cdn.door43.org/obs/jpg/360px/obs-en-24-05.jpg)

થોળાક યહૂદી યોહાનને પુસયુ કી કો તુ મસીહ સે, યોહાન તિનુને જવાબ આપયો કી “મે મસીહ ની મલે. પુન માહરી પસોલ જ્યુ આવાનો સે ચુ સે, ચુ ઘણો મોટો સે મે તિનાના સાટલ્યા કાઢવા લાયક ની મલે.”

![](https://cdn.door43.org/obs/jpg/360px/obs-en-24-06.jpg)

બિજે દાહળે, ઈસુ યોહાન પાહે બાપતિસમા પામવા આયો, જેતાર યોહાન તિનાને ભાલ્યો, તેર તિનાને કહ્યુ, “ભાલો ઈયુ ઈસવરનુ હલવાન સે ચુ દુનિયાના પાપુ સેટા કરહે. “

![](https://cdn.door43.org/obs/jpg/360px/obs-en-24-07.jpg)

યોહાન ઈસુને કહયુ, “મે તને બાપતિમા કરવા લાયક ની મલે, તુ મને બાપતિસમા આપવુ જોવે.” ઇસુ તિનાને કહયુ, કી “તુ મને બાપતિસમા આપ, કાહા કી હિયુ કરવા વારુ સે,” ઈસુ કચુ પાપ નિ કરલુ હોતુ તે હોદે યોહાન તિનાને બાતપતિસમા આપ્યું.

![](https://cdn.door43.org/obs/jpg/360px/obs-en-24-08.jpg)

ઈસુ બાપતિસમાં લેધા પસી પાણીમાથો બાહેર આયો તેર, ઈસવરનો આત્મા કબુતેર હવાલ તિના પોર ઉતર્યો, ને તિના પોર રહ્યો, તિનિદ ટેમે ઈસવરની બોલી હરેગમાથી હમલાયી, “ઈયુ માહરો લાટકો પોર્યો સે મે તિના પોર રાજી સે”

![](https://cdn.door43.org/obs/jpg/360px/obs-en-24-09.jpg)

ઈસવર યોહાનને કહયુ, “પવિતર આત્મા નિસો આવહે ને, તુ જિના માણેહને બાપતિસમા આપહિ તિના પોર રહચે ચુ ઈસવરનો પોર્યો સે, ઈસવર તે એકેદ સે,” યોહાન ઈસુને જેતાર બાપતિસમા આપ્યું તેતાર જ્યે વાત હામલી ચે તિનાના બાહની હોતી, ઈસવરનો પોર્યો ઈસુને ભાલ્યો ને પવિતર આત્માને ભાલ્યો.

*બાઈબલનો વાતરો.-માથી ૩, માર્ક ૧:૯-૧૧, લુક ૪:૧-૧૩*

Audio: https://git.door43.org/OBS-TLF/rtw_obs/releases/download/v1/rtw_obs_v1_24_128kbps.m4a

## 25. ૨૫. સેતાન ઈસુને પારખી ભાલે

https://openbiblestories.org/l/rtw/story-25/

![](https://cdn.door43.org/obs/jpg/360px/obs-en-25-01.jpg)

બાપતિસમા હોયા પસી પવિતર આત્મા ઈસુને ઉજાળમાં લિજ્યો. સાહા ઈસુ સાલીહ દાહળા ને સાલિહ રાત ઉપાહ કર્યા. ને સેતાન તિના પાહે આયો પાપ કરાવા કરીકને પારખી ભાલયો.

![](https://cdn.door43.org/obs/jpg/360px/obs-en-25-02.jpg)

સેતાન ઇસુને કહયુ, કી “તુ હાસુદ ઈસવરનો પોર્યો હોય તે ઈના સપોહળાને કહી દે કી રોટો બણી જાય. ને તુ ખાય હકે.”

![](https://cdn.door43.org/obs/jpg/360px/obs-en-25-03.jpg)

ઈસુ તિનાને હાંબો કહયુ, “ઈસવરના વસોનુમાં લખલુ સે કી માણેહ એખલા રોટાથી ની પુન ઈસવરના મોહમાંથી નિકેલલા બધાત વસોનુથી જિવહે.”

![](https://cdn.door43.org/obs/jpg/360px/obs-en-25-04.jpg)

પસી સેતાન ઈસુને મંદિરની ઉસામ ઉસી જધા પોર લિજ્યો, ને કહયુ, કી “તુ ઈસવરનો પોર્યો હોય તે નીસો ઉડી પળ, કાહા કી અહી લખી મેસ્યુ કી, ઈસવર આફાના દુતુને કહચે ને ચે તને હાથુથી ઝેલી લેહે, ને તાહરા પોગ હોદે ની સપોહળે અહટાય.”

![](https://cdn.door43.org/obs/jpg/360px/obs-en-25-05.jpg)

પુન ઈસુ સેતાન ને પવિતર સોપળીમાના વસોન થી વાત કરતો કહયુ, “ઈસવરના વસોનમાં આગ્ના આપલી હોતી કી, તાહરા ઈસવરને પારખેહ ની.”

![](https://cdn.door43.org/obs/jpg/360px/obs-en-25-06.jpg)

પસી સેતાન ઈસુને દુનિયાનુ બધુત વારુ વસ્તુ દેખાળીકને કહયુ કિ “તુ મને પોગે પળીકને માહરુ ભજોન કરે તે ઈયુ બધુત વસ્તુ તને આપી દેહ.”

![](https://cdn.door43.org/obs/jpg/360px/obs-en-25-07.jpg)

ઈસુ તિનાને કહયુ, “જા સેતાન માહરી પાહેથો જાતો રેહ. ઈસવર તિનાના માણહુને કહલુ સે, કી પરભુ તાહરા ઈસવર નુ એતરુદ ભજોન કર ને તિનાની એતરાની દ સેવા કર”.

![](https://cdn.door43.org/obs/jpg/360px/obs-en-25-08.jpg)

સેતાન તિનાને સોળીકને જાતો રહયો કાહા કી ઈસુ તિનાની વાતમાં ની ફસાયો. ને દુતુ તિના પાહે આવિકને સેવા કરી.

*બાઈબલનો વાતરો.-માથી ૪ : ૧-૧૧, માર્ક ૧ : ૧૨-૧૩, લુક ૪ : ૧-૧૩*

Audio: https://git.door43.org/OBS-TLF/rtw_obs/releases/download/v1/rtw_obs_v1_25_128kbps.m4a

## 26. ૨૬. ઈસુ આફાની સેવા સાલુ કરે.

https://openbiblestories.org/l/rtw/story-26/

![](https://cdn.door43.org/obs/jpg/360px/obs-en-26-01.jpg)

સેતાન ઈસુને પારેખવાનુ પુરુ હોય જ્યા પસી ઇસુ પવિતર આતમાની તાકેત હાથે, આફો રહતલો તિના ગાલીલ હેહેરમાં આયો. ઈસુ હિકાળવા કરીકને એક ગામમાંથો બિજા ગામમાં ફિર્યો. ને બધા માણહુ તિનાના બારામાં વારુ વાતે કરી.

![](https://cdn.door43.org/obs/jpg/360px/obs-en-26-02.jpg)

ઇસુ જાહા મોટો હોવલો સાહા નાઝરેથ ગામમાં જ્યો, ને આરેમને દાહળે ચુ પરાથના ઘોરમાં જ્યો, ને ચે તિનાને યસાયા પરબોધકની સોપળી વાસવા કરીક આપી. ને ઈસુ ચે સોપળી ઊઘળી ને થોળુક વાસી હમલાયુ.

![](https://cdn.door43.org/obs/jpg/360px/obs-en-26-03.jpg)

ઈસુ વાસ્યુ, “નબલા પાતલાને વારુ ખબેર કહવા, જેલ્યાને સોળાવા, આધલાને ભાલતા કરવા ને વેઠયાને સોળાવા ઈસવર મને તિનાનો આત્મા આપ્યો, ઈયુ વરેહ ઈસવરની કુરપાનુ સે.”

![](https://cdn.door43.org/obs/jpg/360px/obs-en-26-04.jpg)

ને પસી ઈસુ નિસો બહી જ્યો, ને બધા માણહુ તિનાને ધારી ધારીકને ભાલી રહયા, ને ચુ સોપળીમાના મસીહાના બારામાં જ્યુ ભાગ વસ્યો ચુ જાણતલા, ઈસુ અહી કહયુ કી “જ્યુ મે વાસ્યુ ચુ હમણે હોવા બાઝી રહ્યુ,” ને બધા માણહુ ઉસેકાને હોય જ્યા, ને કહયુ, કો “ઈયુ યોસફ નો પોર્યો ની મલે.”

![](https://cdn.door43.org/obs/jpg/360px/obs-en-26-05.jpg)

પસી ઈસુ કહયુ, “ઈયે વાત હાસીદ સે કી પરબોધકને પોતાના ગામમાં માન ની જળે, એલિયા પરબોધકના ટેમમાં ઇઝરાયેલમાં ઘણયુ રંડાયલ્યુ બયરે હોત્યુ, પુન જેર સાહા સાળા તિન વરેહનો કાલ પળ્યો તેર ઈસવર એલિયાને ઈઝરાયેલન્યુ રંડાયલ્યુ પાહે ની પુન બિજા દેહની રંડાયલી પાહે મોકલ્યો.”

![](https://cdn.door43.org/obs/jpg/360px/obs-en-26-06.jpg)

પસી ઈસુ કહયુ, “એલિસા પરબોધકના ટેમાં સામળીના રોગવાલા ઈઝરાયેલમાં ઘણા માણહુ હોતા, તે હોદે એલિસા તિનુમાના એકને પુન વારુ ની કર્યો, ચુ નામાનનો એતરોદ કોડ મટાળ્યો. ચુ ઈઝરાયેલના દુસમનનો સેનાપતી હોતો.” જ્યે માણહુ ઈસુનુ હામેલવા બાઝી રહલા ચે બધા યહૂદી હોતા. ને ચે ઈસુને હહી કહતો હામલીકને રિહે રાતાલાલ હોય જ્યા.

![](https://cdn.door43.org/obs/jpg/360px/obs-en-26-07.jpg)

નાઝરેથના માણહુ તિનાને પરાથના ઘોરમાથો બાહરો કાઢી દેધો, ને તિનાને મારવા ડુગોરની ધેળે લીજ્યા, પુન ઇસુ ટોલામાંથો નીકલી જ્યો ને નાઝરેથ સોળી દેધુ.

![](https://cdn.door43.org/obs/jpg/360px/obs-en-26-08.jpg)

પસી ઈસુ ગાલીલના ગામુમાં જ્યો, ને ઘણા માણહું તિના પાહે આવતલા, ચે માદલા, આધલા,બેહરા ને બોબળા માણહુને તિના પાહે લાયા, ને ઈસુ તિનુને વારુ કર્યા,

![](https://cdn.door43.org/obs/jpg/360px/obs-en-26-09.jpg)

ને ઘણામાં ભુતળા હોતા તિનુને ઇસુની પાહે લાયા, ને ઇસુના કહવાથી ભુતળા તિનુ માણહુમથા બાહરા નિકલી જ્યા. ને ઘણી વખેત આયેળતલા હોદે કિ “તુ ઈસવરનો પોર્યો સે,” ને માણહુનુ ટોલુ ડોલ ફાટ્યા હોય જ્યુ ને ઈસવરના વખાણ કર્યા.

![](https://cdn.door43.org/obs/jpg/360px/obs-en-26-10.jpg)

પસી ઈસુ બાર જણાને ટાલ્યા. ચે ખાસ પુઠેર્યા કહવાયા, ને પુઠેર્યા ઈસુ ભેગા ફિર્યા ને હિકયા.

*બાઈબલનો વાતરો.-માથી ૪ : ૧૨-૨૫ , માર્ક ૧: ૧૪-૧૫, ૩૫-૩૯, ૩: ૧૩-૨૧  લુક ૪: ૧૪-૩૦,૩૮-૪૪*

Audio: https://git.door43.org/OBS-TLF/rtw_obs/releases/download/v1/rtw_obs_v1_26_128kbps.m4a

## 27. ૨૭. હાસા સમરુની માણેહનો વાતરો

https://openbiblestories.org/l/rtw/story-27/

![](https://cdn.door43.org/obs/jpg/360px/obs-en-27-01.jpg)

એક દાહળે એક યહૂદી પાલેણનો જાણકાર ઈસુને પારેખવા કરીકને આવે, ને ઈસુને પુસયુ “બધા દાહળાની જિણગી મેલેવા માહરે કો કરવુ જોવે,” ઈસુ તિનાને જપાબ આપયો “ઈસવરની પાલેણેમાં કો લખી મેસ્યુ?”

![](https://cdn.door43.org/obs/jpg/360px/obs-en-27-02.jpg)

પાલેણનો જાણકાર જપાબ આપ્યો કી, “તાહરા ઈસવરને પુરા મનથી, પુરા જિવથી, પુરી તાકેતથી ને પુરી બુધીથી પરેમ કર. ને જહી પોતાના પોર તહી પળોસી પોર પરેમ કર.” ઈસુ તિનાને કહયુ “તુ હાસુ કહયુ, હહિ કર તે જિવહી.”

![](https://cdn.door43.org/obs/jpg/360px/obs-en-27-03.jpg)

પુન પાલેણનો જાનકાર ઈસુ અગોલ પોતે હાસો સે હહી સાબિત કરવા માંગતલો તિને પુસ્યુ, “માહરો પળોસી કોય ?”

![](https://cdn.door43.org/obs/jpg/360px/obs-en-27-04.jpg)

ઈસુ તિના પાલેણના જાણકારને જપાબ આપવા એક વાતરો કહયો. “એક માણેહ યરુસાલેમથો યરીખો ગામ ઘમી જતલો.”

![](https://cdn.door43.org/obs/jpg/360px/obs-en-27-05.jpg)

ચુ જતલો તેર રોહામાં સોરટા તિનાને લુટી લેધો, ને જ્યુ હોતુ ચુ બધુ હાપકી લેધુ ને મરી જાય એડો ઠોકીકને નાખદેકને જતા રહયા.

![](https://cdn.door43.org/obs/jpg/360px/obs-en-27-06.jpg)

થોળાક ટેમમાં એક યહૂદી મોટો પુજારો સાહા સરસ્યો, પેલા પળલા માણેહને ઈયુ પુજારો ભાલ્યો તે ટાલો દેકને જતો રહયો,

![](https://cdn.door43.org/obs/jpg/360px/obs-en-27-07.jpg)

થોળીક વાર પસી એક લેવી તિને રોહે હોયકને સરસ્યો (લેવી એક યહુદિ માણહુની જાત સે, ચે પુજારાને મદેક કરે.) લેવી હોદે પેલા પળી રહલા માણેહને ભાલ્યો ને બિજિ પાહ હોયકને જતો રહયો.

![](https://cdn.door43.org/obs/jpg/360px/obs-en-27-08.jpg)

ને પસી તિને રોહે હોયકને એક સમરુની જાય, (સમરુનિ માણહુ યહૂદીના વંશ માનાત હોતા પુન ચે બિજે વિહા કરી રહલા) સમરુનિ ને યહૂદી હાંબ હાંબા વારુ ની હોતા,) જેતાર ઇયુ પેલા માણેહને પળી રહલો ભાલ્યો તેર, તિના પોર ઘણી દિયા આવી ને તિનાની હંભાલ લેધી, ને તિનાને જાહા લાગી રહલુ સાહા પાટા બાધ્યા.

![](https://cdn.door43.org/obs/jpg/360px/obs-en-27-09.jpg)

ને પસી ઈયુ સમરુની તિનાને પોતા ના ગધળા પોર બહાળીકને એક ધરેમસાલામાં લિજ્યો, ને તિનાની કાલજિ લેધી.

![](https://cdn.door43.org/obs/jpg/360px/obs-en-27-10.jpg)

બિજે દાહળે ચુ સાહાથો અઘો જવાનુ હોતુ તિને ધરેમસાલામાં કામ કરતા એક માણેહને થોલાક પસ્યા આપીકને તિનાની હંભાલ રાખવા કેહે ને તિનાને કહયુ કી હજુ વધાર પસ્યાની જરુર પળહે તે મે પાસો આયકને આપી જાહ.

![](https://cdn.door43.org/obs/jpg/360px/obs-en-27-11.jpg)

પસી ઈસુ પાલેણના જાણકાર ને પુસ્યુ “તને કો લાગે,? ઈનુ તિનમાનો પેલા માણેહનો હાસો પળોસી કોય?” પેલો જપાબ આપ્યો જ્યુ માણેહ તિના પોર દિયા કરી ચુ.” ઈસુ તિનને કહયુ “તુ જા ને હિનિદ રીતે કર.”

*બાઈબલનો વાતરો.  લુક ૧૦ : ૨૫-૩૭*

Audio: https://git.door43.org/OBS-TLF/rtw_obs/releases/download/v1/rtw_obs_v1_27_128kbps.m4a

## 28. ૨૮. માલદાર જુવાન અધિકારી

https://openbiblestories.org/l/rtw/story-28/

![](https://cdn.door43.org/obs/jpg/360px/obs-en-28-01.jpg)

એક દાહળે એક જુવન માલદાર અધિકારી ઈસુ પાહે આયકને પુસે, કિ “વારુ ગુરુ બધા દાહળાની જિણગી મેલેવા લેધે માહરે કો કરવુ જોવે?” ઈસુ તિનાને જવાબ આપ્યો, “તુ મને વારુ કાહા કેહે, એકેદ વારુ હોયો, ચુ ઈસવર સે. પુન તુ બધા દહળાની જિણગી મેલેવા માંગતો હોય તે ઈસવરની પાલેણ પાલ.”

![](https://cdn.door43.org/obs/jpg/360px/obs-en-28-02.jpg)

ચુ પુસ્યુ “માહરે કાહની પાલેણ પાલવી જોવે.? ” ઈસુ કહયુ, કોઈને મારી ની નાખવા, સિનાલુ ની કરવા, સોરી ની કરવા, લંડય ની મેકવા, તાહરા આચબાહાને માન આપવા, ને પોતાને તહી પળોસીને હોદે પરેમ કર. “

![](https://cdn.door43.org/obs/jpg/360px/obs-en-28-03.jpg)

પુન જુવાન્યો કહયુ, “મે નનલો તેરનોદ ઈયુ બધ્યુ પાલેણ પાલુ, હજુ મે કો કરુ, જિનાથી મને અનંત જિવન ઝળે ?” ઈસુ તિનાને ભાલ્યુ ને તિનાને પરેમ કર્યો.

![](https://cdn.door43.org/obs/jpg/360px/obs-en-28-04.jpg)

ને ઈસુ જપાબ આપ્યો, “તુ પુરેપુરો હોવા માંગતો હોય તે પસી જાયકને તાહરી પાહે જ્યુ હોયુ ચુ બધુ વેસી નાખિકને નબલા પાતલાને આપી દે. ને તને હરેગમા ખજાનો જળહે, ને પસી આયકને માહરી પસોલ સાલ.”

![](https://cdn.door43.org/obs/jpg/360px/obs-en-28-05.jpg)

જુવાન્યો ઈસુ જ્યુ કહયુ ચુ હામલ્યા પસી ઘણો નિરાશ હોય જ્યો, કાહા કી ચુ ઘણો માલદાર હોતો, ને ચુ પોતાની બધ્યુ વસતુ સોળવા ની માંગતલો. ને ચુ ઈસુ પાહેથો જતો રહયો.

![](https://cdn.door43.org/obs/jpg/360px/obs-en-28-06.jpg)

પસી ઈસુ તિનાના પુઠેર્યાને કહયુ, “માલદાર માણેહને ઈસવરના રાજમા જવા ઘણૂ કાઠુ સે. હોવ, તિના માલદાર માણેહને ઈસવરના રાજમાં જવા કરતે ઊટળાને હુયના કાણાંમાં હોયક ને જવા હેલુ સે.”

![](https://cdn.door43.org/obs/jpg/360px/obs-en-28-07.jpg)

ઈસુ જ્યુ કહયુ ચુ પુઠેર્યા હામલ્યુ તેર તિનુને ઘણુ કાઠુ લાગયુ, ચે કહવા લાગ્યા કી “તે પસી કોય હરેગના રાજમાં જાય હકે.”

![](https://cdn.door43.org/obs/jpg/360px/obs-en-28-08.jpg)

ઈસુ પુઠેર્યાને ઘમી ભાલ્યુ ને કહયુ કી “માણહુથી ની હોવે પુન ઈસવરથી ની હોવે હેહલુ કચુ ની મલે.”

![](https://cdn.door43.org/obs/jpg/360px/obs-en-28-09.jpg)

પિતર ઈસુને કહયુ “ તે હમુ બધુત સોળી મકને તાહરી પસોલ આયા તે હમુને કો જળહે?”

![](https://cdn.door43.org/obs/jpg/360px/obs-en-28-10.jpg)

ઈસુ જપાબ આપયો, “માહરા લેધે પોતાના ઘોરુ, આચબાહા, ભાયબોહના, પોર્યા, ને બધી મિલકેત સોળી હોહે ચુ ૧૦૦ ગણુ વધાર મેલેવહે, ને બધા દાહળાની જિણગી હોદે મેલેવહે, પુન ઘણા બધા જ્યે પેહલા ચે સેહલા ને જ્યે સેહલા ચે પેહલા હોવહે. “

*બાઈબલનો વાતરો.-માથી ૧૯ : ૧૬-૩૦ , માર્ક ૧૦ : ૧૭-૩૧, લુક ૧૮ : ૧૮-૩૦*

Audio: https://git.door43.org/OBS-TLF/rtw_obs/releases/download/v1/rtw_obs_v1_28_128kbps.m4a

## 29. ૨૯. દિયા ની કરવાવાળો સકેર

https://openbiblestories.org/l/rtw/story-29/

![](https://cdn.door43.org/obs/jpg/360px/obs-en-29-01.jpg)

એક દાહળે, પિતર ઈસુને પુસ્યુ, “પ્રભુ માહરો ભાચ માહરી વિરુધ પાપ કરે તે કેતરા આટા માફ કરવુ જોવે? કો હાત આટા લગી?” ઈસુ કહયુ, “હાત આટા ની પુન સિતેરગણી હાત આટા”, ઈની રીતે ઈસુ અહિ જાહેર કર્યુ કી તોહરે બધાત આટા માફ કરવુ જોવે. પસી ઈસુ ઈયુ વાતરો કહયો.

![](https://cdn.door43.org/obs/jpg/360px/obs-en-29-02.jpg)

ઈસુ કહયુ, “ઈસવરનુ રાજ એક રાજા હરખુ સે, જ્યુ પોતાના સાકેરુ હાથે હિસાબ કરવા માંગે, એક સાકેર ઘણુત દેવુ કર્યુ, તિનાની કિમેત, ૨,૦૦,૦૦૦ (બે લાખ) વરેહના પગાર જેતરુ હોતુ.”

![](https://cdn.door43.org/obs/jpg/360px/obs-en-29-03.jpg)

સાકેર ચુ દેવુ ભરી હકે અહી ની હોતુ, તિને રાજો કહયુ “દેવુ ભરવા હિના માણેહપા કુટુમનાને વેસી દોવ.”

![](https://cdn.door43.org/obs/jpg/360px/obs-en-29-04.jpg)

સાકેર રાજાને પોગે પળી જ્યો ને કહવા લાગ્યો કી “થોળાક દાહળા થોભી જા, મે માહરા દેવાના બધાદ પસ્યા ભરી દેહ.” રાજાને સાકેર પોર દિયા આવી. ને તિનાનુ બધુ દેવુ માફ કરી દેધુ.

![](https://cdn.door43.org/obs/jpg/360px/obs-en-29-05.jpg)

ચુ સાકેર સાહાથો જાયકને બિજા સાકેરને ભેગાયો. ને તિનાનુ ચાર મહિના નિ કમાણી જેતરુ દેવુ હોતુ. “ચુ તિનાના ટોટે ધરીકને કહયુ મને માહરા પસ્યા પાસા આપ.”

![](https://cdn.door43.org/obs/jpg/360px/obs-en-29-06.jpg)

ચુ સાકેર પેલા સાકેરના પોગે પળીકને તિનાને કહયુ કિ, “થોળોક થોભી જા મે તને બધા પસ્યા સુકતા કરીદેહ,” પુન પેલો સાકેર ની માન્યો ને પેલા સાકેરને દાહ લગી ચે પસ્યા નિ સુકતા કરે તાહ લગી જેલમાં પુરી દેવા કહયુ.

![](https://cdn.door43.org/obs/jpg/360px/obs-en-29-07.jpg)

સાકેરુમાંના થોળાક હિયુ હોવતે ભાલ્યુ, તિનુને ની વારુ લાગ્યુ. ને રાજાને જાયકને બધુ કહી હમલાયુ.

![](https://cdn.door43.org/obs/jpg/360px/obs-en-29-08.jpg)

રાજો તિના સાકેરને બોલાયો ને કહયુ, “એ ખરાબ સાકેર, તુ માહરી અગોલ કાલાવાલા કરી તિને મે તાહરુ દેવુ મે માફ કરી દેધુ, હહિત તાહરે હોદે કરવુ જોવતલુ.” રાજા ને વધાર રિહ લાગી ને ચુ તિના સાકેરનુ દેવુ ની સુકતુ હોવે તાહ લગી જેલમાં પુરી દેધો.

![](https://cdn.door43.org/obs/jpg/360px/obs-en-29-09.jpg)

પસી ઈસુ કહયુ તહુ હોદે તોહરા ભાચુને તોહરા મનથી માફની કરો તે તોહરો હરેગમાંનો બાહ હોદે તહુને માફ ની કરે.

*બાઈબલનો વાતરો.-માથી ૧૮ : ૨૧-૩૫ ,*

Audio: https://git.door43.org/OBS-TLF/rtw_obs/releases/download/v1/rtw_obs_v1_29_128kbps.m4a

## 30. ૩૦. ઈસુ પાસ હજાર માણહુ ને ખવડાવે.

https://openbiblestories.org/l/rtw/story-30/

![](https://cdn.door43.org/obs/jpg/360px/obs-en-30-01.jpg)

ઈસુ આફાના પુઠેર્યાને માણહુને હિકવાળવા ને હમજાળવા ઘણા બધા ગામુમા મોકલ્યા. ને ચે જાહા ઈસુ હોતો સાહા પાસા આયા. ને ચે જ્યુ જ્યુ કરલુ ચુ બધુ કહી હમલાયુ. પસી ચે આરેમ કરી હકે કરીકને તલાવની હાંબિ ધેળે લેકને જ્યો. ને ચે બધા તિના ભેગા જ્યા.

![](https://cdn.door43.org/obs/jpg/360px/obs-en-30-02.jpg)

પુન ઘણા માણહુ ઈસુ ને તિનાના પુઠેર્યાને હુળીમાં જતા ભાલ્યા, ઈયે માણહુ તિનુને ભેગાયવા તિનુથા પેહલા સાહા પોહતી જ્યા. જેતાર ઈસુ ને તિનાના પુઠેર્યા સાહા પોહત્યા તેર માણહુનુ ઘણુત મોટુ ટોલુ પેહલેથુદ સાહા ઈસુની વાટ જોવતલુ.

![](https://cdn.door43.org/obs/jpg/360px/obs-en-30-03.jpg)

તિના ટોલામાં પાંસ હજાર આદમીદ હોતા, પોર્યા ને બયરા તે અલેગ. ઈસુ માણહુને ભાલીકને વધાર દિયા આવી. ઈસુની લેધે ઈયે માણહુ ગોવાલ્યા વગેરના ઘેટા જેહલા હોતા. તિને ચુ તિનુને હિકવાળ્યુ ને તિનુમા જ્યે માદલા હોતા તિનુ ને વારુ કર્યા.

![](https://cdn.door43.org/obs/jpg/360px/obs-en-30-04.jpg)

વેલાહે, પુઠેર્યા ઈસુને આયકને કહયુ, “હાય વેલા હોય રહી તિને માણહુને મોકલી દે, ચે આહેપાહેના ગામુમાં જાયકને ખવાનું કરે તહી.”

![](https://cdn.door43.org/obs/jpg/360px/obs-en-30-05.jpg)

ઈસુ તિનાના પુઠેર્યાને કહયુ “તહુદ તિનુને કચુક ખવાનુ આપો. હમુ હિયુ કકિહિ કરી હકજે હમેર હાતે, તે પાસ રોટા ને બે માસલ્યુ એતર્યુદ હોયુ.”

![](https://cdn.door43.org/obs/jpg/360px/obs-en-30-06.jpg)

ઈસુ તિનાના પુઠેર્યાને કહયુ કી માણહુને ખોળ પોર પંગાતમાં બહી જવા કહો.

![](https://cdn.door43.org/obs/jpg/360px/obs-en-30-07.jpg)

પસી ઈસુ પાસ રોટા ને બે માસલ્યુ લેધ્યુ, ને હરેગ ઘમી ભાલ્યુ. ને ખવાના લેધે ઈસવરનો આભાર માન્યો.

![](https://cdn.door43.org/obs/jpg/360px/obs-en-30-08.jpg)

પસી ઈસુ રોટાના ને માસલ્યુના કુટકા કર્યા, ને ચે કુટકા માણહુને આપવા કરીકને પુઠેર્યાને આપ્યા. ને પુઠેર્યા ચુ ખવાનુ બિજા માણહુને આપતા જ્યા ને ચુ ખવાનુ ની ખુટ્યુ. બધા માણહુ પેટ ઠોકીકને ખાધુ ને આફરી જ્યા.

![](https://cdn.door43.org/obs/jpg/360px/obs-en-30-09.jpg)

ને પસી પુઠેર્યા વધલા કુટલા ભેગા કર્યા, ને તિનાની બાર સારલ્યુ ભરાયુ, ને હિયુ બધુ ખવાનુ પાંસ રોટા ને બે માસલ્યુમાથુ હોતુ .

*બાઈબલનો વાતરો.-માથી ૧૪ : ૧૩-૨૧ , માર્ક ૬ :૩૧-૪૪,  લુક ૯ : ૧૦-૧૭, યોહન ૬ : ૫-૧૫*

Audio: https://git.door43.org/OBS-TLF/rtw_obs/releases/download/v1/rtw_obs_v1_30_128kbps.m4a

## 31. ૩૧. ઈસુ પાણી પોર સાલે

https://openbiblestories.org/l/rtw/story-31/

![](https://cdn.door43.org/obs/jpg/360px/obs-en-31-01.jpg)

ઈસુ માણહુંને વલાવતલો તેર ચુ પૂઠેર્યા હુળીમાં બહીકને દરિયાની પેલી પાહ જવા કહયુ પસેણ ઈસુ પ્રાર્થના કરવા ડુંગોર પોર એખલો જયો.સાહાં ઈસુ એતરોદ હોતો ને મોડી રાત લગી પ્રાર્થના કરી.

![](https://cdn.door43.org/obs/jpg/360px/obs-en-31-02.jpg)

તીની ટેમે પૂઠેર્યા પોતાની હુડીને હલેસા મારતલા પુન ચે મોડી રાત લગી હજુ દરિયાની વસમાં હોતા. ચે ઘણી વેલ્હા કરીકને હુળીને હલેસા મારતલા. કાહા કી વાય તીનુની હામ્બો હોતો.

![](https://cdn.door43.org/obs/jpg/360px/obs-en-31-03.jpg)

ઈસુ પોતાની પ્રાર્થના પુરી કરીકને પૂઠેર્યા પાહે આયો. ચુ પાણી પોર સાલીકને તીનુની હુળી ઘમી આયો.

![](https://cdn.door43.org/obs/jpg/360px/obs-en-31-04.jpg)

પૂઠેર્યા ઈસુને ભાલ્યો તેર ગભરાઈ જયા કાહા કી ચે વિચાર્યું કી ચુ ભુતળો હોયો. ઈસુ જાણી જયો કી ચે ગભરાઈ જયા તીને ઈસુ આયળીકને કહયુ "બીહવા ની મે હોયો."

![](https://cdn.door43.org/obs/jpg/360px/obs-en-31-05.jpg)

તેર પિતર ઈસુને કહયુ “એ પ્રભુ, તુ હોય તે મને હૂકમ કર. મે પાણી પોર સાલીકને તાહરી પાહે આવુ?" ઈસુ પિતરને કહયુ “ આવ."

![](https://cdn.door43.org/obs/jpg/360px/obs-en-31-06.jpg)

પિતર હુળી પોરથો ઉતરીકને ઈસુ પાહે જવા પાણી પોર સાલ્યો પુન થોલીક વાર પસેણ ચુ ઈસુ પોર નજેર ની રાખી ને સોલ ઘમી ભાલ્યુ.

![](https://cdn.door43.org/obs/jpg/360px/obs-en-31-07.jpg)

તેર પિતર ગભરાઈ જયો ને પાણીમાં ડુબવા લાગ્યો. ચુ આયળ્યો “પ્રભુ મને બસાવ.” ઈસુ તરેત હાથ લાંબો કરીકને ધરી લેધો. ચુ પિતરને કહયુ “એ ભરહા વગેરના તુ ડગમગ કાહા કર્યું.?”

![](https://cdn.door43.org/obs/jpg/360px/obs-en-31-08.jpg)

દેર પિતર ને ઈસુ હુળીમાં આયા ને તરેત વાય બંધ હોય જયો ને પાણી ટાઢુ પડી જયુ. પૂઠેર્યા વિચાર કરતાં હોય જયા. ચે ઈસુની આરાધના કરી ને કહયુ “હાસુદ તુ ઈસવરનો પોર્યો સે.”

*બાઈબલનો વાતરો.-માથી ૧૪ : ૨૨-૩૩ , માર્ક ૬ : ૪૫-૫૨,  યોહન ૬ : ૧૬-૨૧*

Audio: https://git.door43.org/OBS-TLF/rtw_obs/releases/download/v1/rtw_obs_v1_31_128kbps.m4a

## 32. ૩૨. ઈસુ ભુતળું સોહટેલા માંણેહને ને માંદલી બયેરને વરુ કરે

https://openbiblestories.org/l/rtw/story-32/

![](https://cdn.door43.org/obs/jpg/360px/obs-en-32-01.jpg)

એક દાહળે ઈસુ ને તીનાના પૂઠેર્યા હુળીમાં બહીકને દરિયાની પેલી પાહ એક વિસ્તારમાં જયા. સાહાં ગદરાનીના માણહુ રહતલાં.

![](https://cdn.door43.org/obs/jpg/360px/obs-en-32-02.jpg)

દેર ચે દરિયાની પેલી પાહ પોહત્યા તેર એક ભુતળો સોહટેલો માણેહ રપટીને તીનુ પાહે આયો.

![](https://cdn.door43.org/obs/jpg/360px/obs-en-32-03.jpg)

હિયુ માણેહ એતરો તાકેતવાલો હોતો કી કોઈ તીનાને કાબુમાં લાવી ની હકતલુ. માણહુ તીનાને હાથે ને પોગે સાકેલે હોદે બાંનતલાં. પુન ચુ તીનુને તોડી નાખતલો.

![](https://cdn.door43.org/obs/jpg/360px/obs-en-32-04.jpg)

ચુ માણેહ તીના વિસ્તારની કબેરેમાં રહતલો. ચુ માણેહ રાત દાહળો આયળ્યા કરતલો. ચુ સાખલાં ની પેહેરતલો. સપોળાથી પોતાને સુનતલો.

![](https://cdn.door43.org/obs/jpg/360px/obs-en-32-05.jpg)

ચુ માણેહ ઈસુ પાહે આયો તેર તીના અગોલ ઘુટણે પડી જયો. ઈસુ તીના ભુતળાને કહયુ “ ઈના માણેહમાંથો નીકેલ.”

![](https://cdn.door43.org/obs/jpg/360px/obs-en-32-06.jpg)

ભુતળો સોહટેલો માણેહ જોરથી આયળ્યો “મોટા ઈસવરના પોર્યા ઈસુ તુ માહરી પાહેથો કો ધારે? દિયા કરીકને મને વેલ્હા ની પાળવા.” ઈસુ ભુતળાને પુસ્યુ “તાહરુ નામ કો?” ચુ કહયુ “માહરુ નામ લહકેર સે. કાહા કી હમુ ઘણા બધા સે.” (લહકેરમાં હજારે ધગળાં રેહે.)

![](https://cdn.door43.org/obs/jpg/360px/obs-en-32-07.jpg)

ભુતળો ઈસુને કાલાવાલા કરી કી “દિયા કરીકને હમુને ઈના વિસ્તારમાંથા ની કાઢવા.” સાહાં થળુમ ડુંગોર પોર ભુંડળાંનુ એક ટોળું સરતલુ. તીને ભુતળાં ઈસુને કાલાવાલા કરી કી “હમુને ભુંડળાંના ટોળામાં મોકલી દે.” ઈસુ કહયુ “ જોવ.”

![](https://cdn.door43.org/obs/jpg/360px/obs-en-32-08.jpg)

ભુતળાં તીના માણેહમાંથા નીકલીકને ભુડળામાં ભરાય જયાં. ભુડળાં ડુંગોર પોરથાં નીસાં રપટીક આયાં ને દરિયામાં ડુબાય જયાં. તીના ટોળામાં લગભગ ૨000 ભુડળા હોતાં.

![](https://cdn.door43.org/obs/jpg/360px/obs-en-32-09.jpg)

જયે ભુંડળાંની ભાલદેખ કરતલા ચે જયું હોય જયુ ચું બધુ ભાલ્યુ. ચે હેહેરમાં જયા ને જયે ભેગાયા તીનુને ઈસુ કર્યુ ચું કહી દેધુ. પસેણ માણહું હેહેરમાંથા આવીકને ભુતળો સોહટેલો માણેહને ભાલ્યો. ચુ માણેહ સાખલાં પેહરીકને સાનતીથી બહી રહલો ને એક વારલા માણેહ જેહલો વેવાર કરતલો.

![](https://cdn.door43.org/obs/jpg/360px/obs-en-32-10.jpg)

માણહું ઘણાં બીહણી જયા ને ઈસુને સાહાંથો જતો રહવા કહયુ. તીને ઈસુ હુડીમાં બહયો ને જવાની તીયારી કરી. જીના માણેહમાં પેહલો ભુતળો હોતો ચુ માણેહ ઈસુ ભેગો જવા કાલાવાલા કરી.

![](https://cdn.door43.org/obs/jpg/360px/obs-en-32-11.jpg)

પુન ઈસુ તીનાને કહયુ “ની તુ ઘોર જા ને ઈસવર તાહરી લેધે કર્યું ચે વાત તાહરા ભાયબંધુને ને કુટુમને કેહ કી ચુ કકીહીં તાહરી પોર દિયા કરી.”

![](https://cdn.door43.org/obs/jpg/360px/obs-en-32-12.jpg)

ચુ માણેહ સાહાંથો જતો રહયો ને ઈસુ તીના લેધે જયુ કામ કર્યું ચુ બધાને કહી દેધુ. જયેં તીનાની વાત હાંમલી ચેં વિચાર કરતાં હોય જયાં.

![](https://cdn.door43.org/obs/jpg/360px/obs-en-32-13.jpg)

ઈસુ દરિયાની પેલી પાહ જયો તેર સાહાં એક મોટું ટોળું તીનાની ચારેમેર ભેગુ વલ્યુ ને તીના પોર પડાપડી કરતલુ. ટોળામાં એક બયેર હોતી. તીનીને બાર વરેહથી પખાલો હોતો. ચે દાક્તરને ઘણા પચ્ચા ખરસી નાસ્યા કી ચે વારુ હોય જાય પુન તીનીની હાલેત વધાર ખરાબ હોય જેય.

![](https://cdn.door43.org/obs/jpg/360px/obs-en-32-14.jpg)

ચે હાંમેલલુ કી ઈસુ ઘણાં માંદલાં માણહુંને વારુ કર્યાં ને ચે વિચાર્યું “મને ભરહો સે કી મે તીનાના સાખલાંને અડેહ તે મે હોદે વારુ હોય જાહ.” તીને ચે ઈસુ પસોલ આવીકને સાખલાંને અડી. ચે હહીં કર્યું તેર પખાલો મટી જયો.

![](https://cdn.door43.org/obs/jpg/360px/obs-en-32-15.jpg)

ઈસુ તરેત જાણી લેધુ કી તીનામાંથી તાકેત નીકલી. તીને ચુ પાસો ફિરીકને ભાલ્યુ ને પુસ્યુ “મને કોઈ અડકયુ?”

![](https://cdn.door43.org/obs/jpg/360px/obs-en-32-16.jpg)

પુઠેર્યા જપાબ આપ્યો “તાહરી ચારેમેર ઘણાં માણહું સે ને કાહા પુસે કી મને કોઈ હાથ લગાળ્યો. “ ચે બીહતી ને થથરતી ઈસુ અગોલ ઘુટણે પડી. પસેણ ચે તીનાને કહી દેધુ કી ચે કર્યું ને ચે વારુ હોય જેય. ઈસુ તીનીને કહયુ “તાહરો ભરહો તને વારુ કરી. શાંતિથી જા.”

*બાઈબલનો વાતરો.-માથી ૮ : ૨૮-૩૪ , ૯ : ૨૦-૨૨ , માર્ક ૫ : ૧-૨૦ ,,  લુક ૮ : ૨૬-૨૯, ૮ : ૪૨-૪૮*

Audio: https://git.door43.org/OBS-TLF/rtw_obs/releases/download/v1/rtw_obs_v1_32_128kbps.m4a

## 33. ૩૩. ખેડૂત નો વાતરો

https://openbiblestories.org/l/rtw/story-33/

![](https://cdn.door43.org/obs/jpg/360px/obs-en-33-01.jpg)

એક દાહળે ઈસુ દરિયા ધેળે એક મોટા ટોળાને હિકાળતલો. તીનાનુ હાંમેલવા માણહું એતરાં બધાં આવલાં કી ઈસુને દરિયા ધેળે એક હુળી પોર બહવુ પડયું. ઈના લેધે કી તીનુને બહવા લેધે જગા જળે. ઈસુ હુળીમાં બહી જયો ને હિકાળવા સાલુ કર્યું.

![](https://cdn.door43.org/obs/jpg/360px/obs-en-33-02.jpg)

ઈસુ ઈયુ વાતરો કહયો “એક ખેડૂત બી વાવા જયો. ચુ વાવતલો તેર થોલુક બી રોહે પડયું ને પોદયા આવીને ખય જયા.”

![](https://cdn.door43.org/obs/jpg/360px/obs-en-33-03.jpg)

“બીજુ બી સપોહળામાં પડયું સાહાં થોલોક ધુલો હોતો. સપોહળ્યાલી જમીનમાં બી વેઘાં ઉગી જયા. પુન મૂલ ધુલામાં ઊંડાં ની હોતા. તોપ લાજયો ને ગરમી વધી તેર સિમાય જયુ ને મરી જયુ.”

![](https://cdn.door43.org/obs/jpg/360px/obs-en-33-04.jpg)

“ને થોલાક બી કાટા ઝીખરામાં પડયું. ચું વધ્યું પુન કાટા ઝીખરા ડાબી નાસ્યુ ને ની પાસ્યુ.”

![](https://cdn.door43.org/obs/jpg/360px/obs-en-33-05.jpg)

થોલુક બી “વારુ જમીન પોર પડયું. ચું વધ્યુ ને તીનાથી 30 ને 60 ને 100 ગણુ વધાર દાણા પાસ્યુ. જીનાને હાંમેલવાના કાન હોય ચુ હાંમલે.”

![](https://cdn.door43.org/obs/jpg/360px/obs-en-33-06.jpg)

ઈના વાતરાથી પુઠેર્યા વિચારમાં પડી જયા. તીને ઈસુ હંમજાયુ "બી ઈસવરની વાત સે. રોહો એહલુ સે ચુ ઈસવરની વાત હાંમલે પુન હમેજતો ની ને સેતાન હિયે વાત તીનાથી સેટી રાખે.

![](https://cdn.door43.org/obs/jpg/360px/obs-en-33-07.jpg)

સપોહળ્યાલી જમીન એહલુ માણેહ કી ચુ ઈસવરની વાત હાંમલે ને ખુસીથી માની લેય પુન દુખ ને માણહુ વેલ્હા પાડે તેર પાસાં હરકી જાય.

![](https://cdn.door43.org/obs/jpg/360px/obs-en-33-08.jpg)

કાટાવાલી જમીન એહલુ માણેહ કી ચુ ઈસવરની વાત હાંમલે પુન દહીં ટેમ જાય તહીં સિનતા ને માન ને જીણગીનો આનંદ ને ઈસવર લેધે તીનાના પ્રેમને નાસ કરે. તીનાનુ પરિણામ જયે વાત ચુ હાંમલી તીનાનુ ફલ ની આવતુ.

![](https://cdn.door43.org/obs/jpg/360px/obs-en-33-09.jpg)

“પુન વારુ જમીન ઈયુ માણેહ કી ચુ ઈસવરની વાત હાંમલે ને તીના પોર ભરહો કરે ને ફલ આપે.”

*બાઈબલનો વાતરો.-માથી ૧૩ : ૧-૮-, ૧૮-૨૩,  માર્ક ૪ : ૧-૮ ,  ૧૩-૨૦, : લુક ૮ : ૪-૧૫,*

Audio: https://git.door43.org/OBS-TLF/rtw_obs/releases/download/v1/rtw_obs_v1_33_128kbps.m4a

## 34. ૩૪. ઇસુ બીજા વાતરા હિકવાળે.

https://openbiblestories.org/l/rtw/story-34/

![](https://cdn.door43.org/obs/jpg/360px/obs-en-34-01.jpg)

ચુ તીનુને હરેગના રાજના થોલાક વાતરા કહયા. ડાખલા તરીકે “હરેગનુ રાજ રઇના દાણા જેહલુ હોયુ. તીનાને એક માણેહ લેકને પોતાના ખેતોરમાં વાયુ. તહું જાણો કી રઇનો દાણો બધા બી કરતે નનલો હોયો.”

![](https://cdn.door43.org/obs/jpg/360px/obs-en-34-02.jpg)

“પુન ચુ વધે તેર ચુ બાગમાંના બધા છોડવા કરતે મોટો હોય જાય. એતરો બધો કી પોદયા આવીને તીનાની ડાલે પોર બેહે.”

![](https://cdn.door43.org/obs/jpg/360px/obs-en-34-03.jpg)

ઈસુ એક બીજો વાતરો કહયો “હરેગનુ રાજ આથા જેહલુ હોયુ. તીનાને એક બયેર રોટીના થોલાક લોઠમાં ચુ બધે હોય જવા લગી નાસ્યો.”

![](https://cdn.door43.org/obs/jpg/360px/obs-en-34-04.jpg)

“હરેગનુ રાજ એક એહલા ખજાના જેહલુ હોયુ કી ચુ એક માણેહને જળ્યો ને ખેતોરમાં હાતી રાસ્યો. ચુ બીજા માણેહને જળ્યો ને પાસો ડાટી દેધો. ચુ એતરો ખુસ હોય જયો કી તીના પાહે જયુ હોતુ ચું વેસી નાસ્યુ ને ખેતોર વેસાથુ લેધુ.”

![](https://cdn.door43.org/obs/jpg/360px/obs-en-34-05.jpg)

“ઈસવરનુ રાજ મોહગી મોતી જેહલુ હોયુ. ચે વેપારીને જળી તેર ચે વેસાથી લેવા પોતાનુ બધુ વેસી નાસ્યુ.”

![](https://cdn.door43.org/obs/jpg/360px/obs-en-34-06.jpg)

પસેણ ઈસુ જયે પોતાના વારુ કામુ પોર ભરહો કરતલા ને બીજા માણહુને વાક કાઢતલા તીનુને ઈયુ વાતરો કહયો “બે માણેહ મંદિરમાં પ્રાર્થના કરવા જયા. એક ફાલો લેવાવાલો ને બીજો ધર્મનો પૂજારો.”

![](https://cdn.door43.org/obs/jpg/360px/obs-en-34-07.jpg)

ધર્મનો પૂજારો અહીં પ્રાર્થના કરી “ઈસવર તાહરો આભાર કી મે બીજા માણહું જેહલો ને ઈના ફાલો લેવાવાલા જેહલો પાપી ને લૂટવાવાલો ને બગાડવાવાલો ને સિનાલુ કરવાવાલો ની મલે.”

![](https://cdn.door43.org/obs/jpg/360px/obs-en-34-08.jpg)

“ડાખલા તરીકે મે અઠવાડિયામાં બે વાર ઉપાહ કરુ ને માહરી બધી માલ મિલકતનો દોહમો ભાગ આપુ.”

![](https://cdn.door43.org/obs/jpg/360px/obs-en-34-09.jpg)

ચુ ફાલો લેવાવાલો માણેહ પૂજારાથી સેટો ઉભો રહયો ને ડોલા ઉસા હોદે ની કર્યા. પુન ચુ પોતે સાતી કુટીકને પ્રાર્થના કરી “એ ઈસવર માહરી પોર દિયા કર. કાહા કી મે પાપી હોયો.”

![](https://cdn.door43.org/obs/jpg/360px/obs-en-34-10.jpg)

પસેણ ઈસુ કહયુ “મે તને કહું કી ફાલો લેવાવાલાની પ્રાર્થના હાંમલી ને હાસો ગીણ્યો. પુન તીનાને ધર્મના પૂજારાની પ્રાર્થના ની ગમી. જયે મોટાય કરે તીનુને ઈસવર હુંગરા કરહે ને જયે પોતાને હુંગરો બણાવે તીનુને ઉસા કરહે.”

*બાઈબલનો વાતરો. માથી ૧૩:૩૧-૩૩, ૪૪-૪૬; મારક ૪:૩૦-૩૨, લુક ૧૩:૧૮-૨૧, ૧૮:૯-૧૪.*

Audio: https://git.door43.org/OBS-TLF/rtw_obs/releases/download/v1/rtw_obs_v1_34_128kbps.m4a

## 35. ૩૫. દિયાગરા બાહનો વાતરો.

https://openbiblestories.org/l/rtw/story-35/

![](https://cdn.door43.org/obs/jpg/360px/obs-en-35-01.jpg)

એક દાહળે ઈસુ ઘણા બધા ફાલો લેવાવાલાને ને પાપી માણહુંને હિકાળતલો. ચે તીનાનુ હાંમેલવા ભેગા વલી રહલા.

![](https://cdn.door43.org/obs/jpg/360px/obs-en-35-02.jpg)

સાહાં થોલાક ધર્મના પૂજારા હોતા. ચે ભાલ્યુ કી ઈસુ પાપી માણહું ભેગો ભાયબંધ જેહલો વેહવાર કરે. તેર ચે માહાં માહાં વાક કાઢવા બાદઝયા. તીને ઈસુ તીનુને એક વાતરો હંમલાયો.

![](https://cdn.door43.org/obs/jpg/360px/obs-en-35-03.jpg)

એક માણેહને બે પોર્યા હોતા. નનલો પોર્યો પોતાના બાહને કહયુ “બા મિલકતનો માહરો ભાગ મને હમણેદ આપ.” તેર બાહ પોતાની મિલકત બે પોર્યાને વીહસી આપી.

![](https://cdn.door43.org/obs/jpg/360px/obs-en-35-04.jpg)

નનલો પોર્યો એકદમ તીના પાહે જયુ હોતુ ચું બધુ ભેગુ કર્યું ને સેટા દેહમાં જયો ને પાપી જીણગીમાં પોતાની મિલકત ઉડાય દેધી.

![](https://cdn.door43.org/obs/jpg/360px/obs-en-35-05.jpg)

પસેણ જીના દેહમાં નનલો પોર્યો રહતલો સાહાં ભારી કાલ પડ્યો ને તીના પાહે ખવાનુ વેસાથુ લેવા લેધે પચ્ચા ની હોતા. તીનાને ભુંડળાં સારવાનુ કામ જળ્યુ. ચુ એતરો દુખી ને ભુખલો હોતો કી ભુંડળાં જયું ખાતલાં ચું ખાતલો.

![](https://cdn.door43.org/obs/jpg/360px/obs-en-35-06.jpg)

સેહલે નનલો પોર્યો પોતાને કહયુ “મે ઈહાં કો કરુ? માહરા બાહના બધા સાકેર પાહે ખવા લેધે ઘણુ ખવાનુ હોયુ ને મે ઈહાં ભુખે મરુ. મે માહરા બાહ પાહે પાસો જાહ ને તીનાનો એક સાકેર બણેહ.”

![](https://cdn.door43.org/obs/jpg/360px/obs-en-35-07.jpg)

સેહલે નનલો પોર્યો પાસો પોતાના બાહને ઘોર જવા તીયાર હોય જયો. ચુ હજુ ઘણો સેટો હોતો તેર તીનાનો બાહ તીનાને ભાલ્યો ને તીના પોર દિયા આવી. ચુ પોતાના પોર્યા પાહે રપટયો ને તીનાને મેલાયો ને ઘોટયો.

![](https://cdn.door43.org/obs/jpg/360px/obs-en-35-08.jpg)

પોર્યો કહયુ “બા મે ઈસવર ને તાહરી વિરુધ પાપ કર્યું. મે તાહરો પોર્યો કહવાયવા લાયક ની મલે.”

![](https://cdn.door43.org/obs/jpg/360px/obs-en-35-09.jpg)

પુન તીનાનો બાહ પોતાના સાકેરુને કહયુ “એકદમ જોવ ને વારુ સાખલાં લાવો ને માહરા પોર્યાને પેહરાવો. તીનાની આંગલીમાં વીંટી પેહરાવો ને પોગે સાટલ્યાં પેહરાવો. વારુ બોકડાને લાવીકને મારો. પસેણ આપણુ ખાયકને આનંદ કરજે. કાહા કી માહરો પોર્યો મરી જેલો ચુ જીવતો હોય જયો. ચુ ખોવાઇ જેલો પાસો જળ્યો.”

![](https://cdn.door43.org/obs/jpg/360px/obs-en-35-10.jpg)

ચેં માણહું આનંદ કરવા બાદજયા. થોલીક વાર પસેણ વડલો પોર્યો ખેતોરમાં કામ કરીકને ઘોર પાસો આયો. ચુ ઢોલળાનો અવાજ હાંમલ્યો ને વિચાર કરતલો કી કો હોવા બાઝી રહયુ.

![](https://cdn.door43.org/obs/jpg/360px/obs-en-35-11.jpg)

દેર વડલા પોર્યાને ખબેર પળી કી નનલો પોર્યો પાસો આયો તીને ચેં આનંદ કરે. તેર ચુ ઘણો રીહવાય જયો ને માહાં જવા રાજી ની હોતો. તીનાનો બાહ બાહેર આવીકને કાલાવાલા કરી કી તુ હમેર ભેગો આનંદ કર. પુન ચુ ની કહયુ.

![](https://cdn.door43.org/obs/jpg/360px/obs-en-35-12.jpg)

વડલો પોર્યો પોતાના બાહને કહયુ “એતરાં બધાં વરહુ મે તાહરુ કામ કર્યું. મે કદી તાહરો નિયમ ની તોડયો. તે હોદે માહરા ભાયબંધુ ભેગો આનંદ કરવા મને બોકડી ની આપી. પુન ઈયુ તાહરો પોર્યો તાહરી મિલકત ઉડાયકને ઘોર પાસો આયો તેર તુ તીના લેધે બોકડુ માર્યુ.”

![](https://cdn.door43.org/obs/jpg/360px/obs-en-35-13.jpg)

બાહ જપાબ આપ્યો “માહરા પોર્યા તુ દાહળી માહરી ભેગો સે. જયું માહરુ સે ચું તાહરુ સે પુન હાય આપણી લેધે આનંદ કરવા વારુ સે. કાહા કી ઈયુ તાહરો ભાચ મરી જેલો ચુ હાય જીવતો હોય જયો. ખોવાઇ જેલો ચુ પાસો જળ્યો.”

*બાઈબલ નો વાતરો. લુક ૧૫:૧૧-૩૨.*

Audio: https://git.door43.org/OBS-TLF/rtw_obs/releases/download/v1/rtw_obs_v1_35_128kbps.m4a

## 36. ૩૬. બદલાણ

https://openbiblestories.org/l/rtw/story-36/

![](https://cdn.door43.org/obs/jpg/360px/obs-en-36-01.jpg)

એક દાહળો ઈસુ આફાના તિન પુઠેર્યા, પિતર, યાકુબ ને યોહાન ને આફા ભેગા લેધા. ને હુની જઘામાં પરાથના કરવા ડુગોર પોર જ્યા.

![](https://cdn.door43.org/obs/jpg/360px/obs-en-36-02.jpg)

જેતાર ઈસુ પરાથના કરવા બાઝી રહલો તેતાર તિનાનુ મોહ દાહળા હવાલ સમેકવા લાગ્યુ. ને તિનાના સાખલા ઈજોળા હરખા ધોલા બગ હોય જ્યા. ને હેતરા સોખા ઈની ધરતિ પોર કોઈ ની કરી હકે.

![](https://cdn.door43.org/obs/jpg/360px/obs-en-36-03.jpg)

તેતાર મુસો ને એલિયો દેખે પળ્યા. ઈના બણાવના ઘણા વરહુ પેહલા ઈયે માણેહ ઈની દુનીયામા જિવી જેલા. ચે યરુસાલેમમાં ઈસુના મરેણ હોવાનુ હોતુ તિના બારામાં વાત કરતલા.

![](https://cdn.door43.org/obs/jpg/360px/obs-en-36-04.jpg)

જેતાર મુસો ને એલીયો ઈસુની હાથે વાત કરતલા તેતાર, પિતર ઈસુને કહયુ. “આપેણ લેધે ઈહા રહવા વારુ સે.” સાલો આપણુ તિન માંડવા બણાવજે, એક તાહરી લેધે, એક મુસા લેધે ને એક એલીયા લેધે. પુન પિતર કો બોલવા બાઝી રહલો ચું ચુ ની જાણતલો.

![](https://cdn.door43.org/obs/jpg/360px/obs-en-36-05.jpg)

પિતર બોલવાત બાઝી રહલો ને એક સમેકતુ વાદલુ તિનુ પોર સાહલો કર્યો. ને વાદલામાથી એક અવાજ હમલાયો. “ઈયુ માહરો લાટકો પોર્યો સે, મે ઈના પોર રાજી સે, તહું તિનાનુ હાંલો”. તિનાના પુઠેર્યા ઘણા બિહી જ્યા ને ભોય પોર પળી જ્યા.

![](https://cdn.door43.org/obs/jpg/360px/obs-en-36-06.jpg)

તેતાર ઈસુ તિનુને હાથ અળકાયો, ને કહયુ, “બિહવા ની ઉભા હોવો.” જેતાર ચે ચારેમેર ભાલ્યુ તેતાર સાહા ઈસુ એતરોદ હોતો.

![](https://cdn.door43.org/obs/jpg/360px/obs-en-36-07.jpg)

ઈસુ ને તિન પુઠેર્યા ડુગોરેથા નિશા ઉતર્યા, તેતાર ઈસુ તિનુને કહયુ, “જ્યુ કઈ ઈહા બણ્યુ ચુ કોઈને ની કહવા, મે થોળાક ટેમ પસી મરી જાહ ને પાસો જીવતો હોય જાહ. ને હિના પસી તહુ માણહુને ઈયુ વાતે કહી હરકો”.

*બાઈબલ નો વાતરો. માથી:૧૭:૧-૯, માર્ક ૯:૨૮-૩૬.*

Audio: https://git.door43.org/OBS-TLF/rtw_obs/releases/download/v1/rtw_obs_v1_36_128kbps.m4a

## 37. ૩૭. ઈસુ લજરસ ને મરેલા માથો જિવતો કરે.

https://openbiblestories.org/l/rtw/story-37/

![](https://cdn.door43.org/obs/jpg/360px/obs-en-37-01.jpg)

એક દાહળે ઈસુને જાણવા જળ્યુ કી લાજરસ ઘણો માંદો હોયો. લાજરસ ને તિનાન્યુ બે બોહનેહે માર્થા ને મરિયમ વારુ ભાયબંધ હોતા. જેતાર ઈસુને ખબેર જળી તેતાર ચુ કહયુ “ઈયે મંદવાળ મારી દેય હેહલી ની મલે. પુન ચે ઈસવરના વખાણને લેધે સે”. ઈસુ આફાના ભાયબંધને પરેમ કરતલો. પુન ચુ જાહા હોતો સાહા બે દાહળા લગી રહયો.

![](https://cdn.door43.org/obs/jpg/360px/obs-en-37-02.jpg)

બે દાહળા પસેણ, ઈસુ આફાના પુઠેર્યાને કહયુ, “સલો આપણુ પાસા યહુદિયા જાજે.” પુઠેર્યા કહયુ, પ્રભુ હમણે થોળાક ટેમ પેહલાદ સાહાના માણહુ તને મારી નાખવા કરતલા.” ઈસુ તિનુને કહયુ આપણો ભાયબંધ લાજરસ હુય જેલો સે મે તિનાને ઉઠાળવા જવાનો સે.”

![](https://cdn.door43.org/obs/jpg/360px/obs-en-37-03.jpg)

પુઠેર્યા કહયુ, “પ્રભુ, લાજરેસ હુય જ્યો હોહે તે પાસો ઉઠી જાહે.” તેતાર ઈસુ તિનુને સોખુ કહિ દેધુ કી “લાજરસ મરી જ્યો, મે ખુસ સે કાહા કી મે સાહાની હોતો, હિનાથી તહુ માહરા પોર ભરોહો કરી હકો.”

![](https://cdn.door43.org/obs/jpg/360px/obs-en-37-04.jpg)

જેતાર ઈસુ લાજરસના ગામમાં આયો, તેતાર લાજરસ મરી જ્યાન ચાર દાહળા હોય જેલા હોતા, ને મારથા ઈસુને ભેગાયવા બાહેર આવી. ચે ઈસુને કહયુ “તુ ઇહા રહતો તે માહરો ભાચ ની મરતો, પુન મે ભરોહો કરુ કી તુ ઈસવર પાહે જ્યુ માંગહી ચુ ઈસવર આપહે.”

![](https://cdn.door43.org/obs/jpg/360px/obs-en-37-05.jpg)

ઈસુ હાંબો કહયુ, પુનરુત્થાન ને જિણગી મે હોયો, જ્યુ કોઈ માહરા પોર ભરહો કરે ચુ ભલે મરી જય તે હોદે જિવતો રહચે. ને જ્યુ કોઈ માર પોર ભરહો કરહે ચુ મરે ની, કો તુ ઈનિ વાત પોર ભરહો કરે. માર્થા કહયુ, “હોવ પ્રભુ મે ભરોહો કરુ, કિ તુ ઈસવરનો પોર્યો સે.”

![](https://cdn.door43.org/obs/jpg/360px/obs-en-37-06.jpg)

ને પસી મરીયમ સાહા આય જેય, ચે ઇસુને પોગે પળી ને કહયુ, “તુ ઈહા રહતો તે માહરો ભાચ ની મરતો.” ઈસુ તિનિને પુસ્યુ, “તહુ લાજરસને કા મેસ્યો.” ચે તિનાને કહયુ કબેરમાં, આયકને ભાલી લે.” તેતાર ઈસુ રળ્યો.

![](https://cdn.door43.org/obs/jpg/360px/obs-en-37-07.jpg)

કબેર એક ભિગમાં બણાવલી હોતી. ને તિનિ અગોલ એક મોટો સપોહળો મેકી સાડલો હોતો. ઈસુ તિના સપોહળા થળુમ જયો, ને કહયુ “ઈના સપોહળાને એથો કરો.” પુન મારથા કહયુ,”નિ ચુ મરી જેલો ચાર દાહળા હોય જેલા સે, હાય તે ચુ ગંધાયતો હોહે,”

![](https://cdn.door43.org/obs/jpg/360px/obs-en-37-08.jpg)

ઈસુ કહયુ કો “મે તને ની કહયુ કી તુ ભરહો કરહી તે ઈસવરનો મહીમા ભાલહી” ને તેતાર ચે તિના સપોહળાને એથો કરી દેધો.

![](https://cdn.door43.org/obs/jpg/360px/obs-en-37-09.jpg)

ને ઈસુ ડોલા ઉસા રાખીકને કહયુ, “એ બા, તુ માહરુ હામલ્યુ તિને તાહરો આભાર, મે જાણુ કી તુ માહરુ હામલે. પુન ઈહા ચારેમેર ઉભા રહલા માણહુ, તુ મને મોકલ્યો હહી ભરહો કરે તિને મે કહુ.” ને ઈસુ આયળીકને કહયુ “લાજરસ બાહેર આવ.”

![](https://cdn.door43.org/obs/jpg/360px/obs-en-37-10.jpg)

ને લાજરસ પાટા બાધેલોદ બાહેર આયો, ઈસુ તિનાને કહયુ “તિનાના પાટા સોળવામાં ને સાખલા કાઢવા હિનાને મદેક કરો.” ઈના સમેતકારને ભાલીકને ઘણા યહૂદી માણહુ ઈસુ પોર ભરહો કર્યો.

![](https://cdn.door43.org/obs/jpg/360px/obs-en-37-11.jpg)

પુન યહૂદી માણહુના આગેવાનુ કોસરાય કરતલા, ચે લાજરસને ને ઈસુને કકિહી મારી નાખવા કરિકને કલા કરવા એક બિજા હાથે ભેગા હોયા.

*બાઈબલ નો વાતરો. યોહાન ૧૧ : ૧-૪૬.*

Audio: https://git.door43.org/OBS-TLF/rtw_obs/releases/download/v1/rtw_obs_v1_37_128kbps.m4a

## 38. ૩૮. ઈસુને દગો કર્યો.

https://openbiblestories.org/l/rtw/story-38/

![](https://cdn.door43.org/obs/jpg/360px/obs-en-38-01.jpg)

વરેહ દિટ યહૂદી માણહુ વટવાનો તિહવાર વાલતલા, ઈસવર વરહુ પેહલો તિનુના અગલાના માણહુંને મિસર દેહની વેઠમાથા સોળાવલા તિના બારામાં ઈયુ તિહવાર હોતો. ઈસુ બધાની અગોલ પેહલી આટો માણહુને હિકાળવાનુ સાલુ કરયાના તિન વરેહ પસી, ઈસુ તિનાના પુઠેર્યાને કહયુ કી ચુ યરુસાલેમમાં તિનુ ભેગો ઈયુ તિહવાર વાલવા માંગતલો. ઈહા તિનાને મારી નાખહે.

![](https://cdn.door43.org/obs/jpg/360px/obs-en-38-02.jpg)

ઈસુના એક પુઠેર્યાનુ નામ યહુદા હોતુ, પુઠેર્યાના પસ્યાની દેખરેખ ઈયુ યહુદા કરતલો, પુન ચુ પસ્યાને વધાર પરેમ કરતલો, તિને ચુ તિનિ કોથલીમાથા પસ્યા સોરી લેતલો, ઈસુ ને તિના પુઠેર્યા યરુસાલેમમાં પોહતયા પસી યહુદો, યહૂદી માણહુના પુજારા પાહે જ્યો, ને ચે તિનાને પસ્યા આપે તે ચુ ઈસુને ધરાય દેહે ચે વાત કરી. ચુ જાણતલો કી યહૂદી પુજરા ઈસુને મસિહ ની માનતલા. ને ચે તિનાને મારી નાખવાની કલા કરવા બાઝી રહયા.

![](https://cdn.door43.org/obs/jpg/360px/obs-en-38-03.jpg)

યહૂદી પુજારા જ્યે મોટા પુજારાનિ વાત માની રહલા ચે ઈસુને ધરાવાના તિસ સાંદીના સિકા યહુદાને આપ્યા, ને પરબોધકુ જ્યુ કહલુ તિનિદ રિતે બણ્યુ, યહુદો સહમત હોયો ને પસ્યા લેકને સાહાથો જાતો રહયો, ને ઈસુને ધરાવા કરીકને લાગ જોવતલો.

![](https://cdn.door43.org/obs/jpg/360px/obs-en-38-04.jpg)

ઈસુ યરુસાલેમમા આફાના પુઠેર્યા ભેગો વટવાનો તિહવાર વાલ્યો. રોટો લેધો ને તિનાને ભાંગ્યો ને કહયુ, “ઇનામાથુ ખોવ, ઈયે માહરી દેહી સે. હિયુ તોહરી લેધે આપવામાં આવલુ સે. માહરી ફોમમા હિયું કર્યા કરો. હિની રિતે, ઈસુ તિનુને કહયુ કી તિનાની દેહીને તિનુ લેધે ભોગ કરહે.

![](https://cdn.door43.org/obs/jpg/360px/obs-en-38-05.jpg)

પસી ઈસુ ગીલાસ લેધો ને કહયુ, “ઈયુ પિવો, ઈયુ નવા કરારનુ માહરુ લોહી સે. હિયુ તોહરા પાપુની માફી લેધે વહાળલુ સે. હિયુ માહરી ફોમમાં કરયા કરો.

![](https://cdn.door43.org/obs/jpg/360px/obs-en-38-06.jpg)

પસી ઈસુ તિનાના પુઠેર્યાને કહયુ, તોહરામાનો કોઈક મને ધરાવહે, પુઠેર્યા, ઉસે કાને હોય જ્યા, ને પુસવા લાજા, હિયુ કોશચુ હેહલુ કામ કરહે, ઈસુ કહયુ, “મે ઈના રોટાનો કુટકો જિનાને આપેહ ચુદ મને ધરાવહે.” ને પસી ચુ રોટાનો કુટકો યહુદાને આપ્યો.

![](https://cdn.door43.org/obs/jpg/360px/obs-en-38-07.jpg)

રોટો લેધા પસી સેતાન યહુદામાં ભરાય જ્યો, ને યહુદો સાહાથો ઢય જ્યો. કાહા કિ ચુ ઈસુને ધરાવા યહૂદી પુજારાની મદેક કરી હકે. ચુ રાતનો ટેમ હોતો.

![](https://cdn.door43.org/obs/jpg/360px/obs-en-38-08.jpg)

ખવાનુ ખાધા પસી ઈસુ ને તિનાના પુઠેર્યા જૈતુન ડુગોરે જ્યા, ઈસુ તિનુ બધાને કહયુ આજ રાતે તહુ બધા મને સોળી દેહો, અહી લખી મેસ્યુ કી “મે ગોવાલ્યાને ઠોકેહ ને ઘેટા બધા વિખરાય જાહે.”

![](https://cdn.door43.org/obs/jpg/360px/obs-en-38-09.jpg)

પિતર કહય, “તને બધા સોળી દેય તે હોદે મે એતરો નિદ સોળુ.” તેતાર ઈસુ તિનાને કહયુ સેતાન તને સલાળવા માંગે, પુન પિતર તાહરો ભરહો ની ખુટે કરીકને મે તાહરી લેધે પરાથના કરી. તે હોદે આજે કુકળો વાહે પેહલા તુ મને તિન આટા ની ઓલેખતો કરીકને માહરો નકાર કરહી.”

![](https://cdn.door43.org/obs/jpg/360px/obs-en-38-10.jpg)

પિતર ઈસુને કહયુ મને ભલે મરવુ પળે તે હોદે મે તાહરો નકાર ની કરુ. ને બધા પુઠેર્યા હોદે હહિદ કહયુ.

![](https://cdn.door43.org/obs/jpg/360px/obs-en-38-11.jpg)

પસી ઇસુ પુઠેર્યા ભેગો ગેથસેમાં નામની એક જધામાં જ્યો, “તહુ ફાદામાં ની પળવા પરાથના કરો.” પસી ઈસુ પરાથના કરવા જતો રહયો.

![](https://cdn.door43.org/obs/jpg/360px/obs-en-38-12.jpg)

ઈસુ તિન આટા પરાથના કરી, “માહરા બા, હોય હકે તે ઈયુ દુખનો ગીલાસ ની પિવળાવા પુન માણહુના પાપુની માફિનો બિજો કોય રોહો ની હોય તે માહરી ની પુન તાહરી મરજી પુરી હોવે. ઈસુ ઘણા દુખમાં હોતો તિનાનો પરસેવો લોહિના ટીપા નરો ભોય પોર પળતલો. ને ઈસવર તિનાને તાકેત આપવા એક દુતને મોકલ્યો.

![](https://cdn.door43.org/obs/jpg/360px/obs-en-38-13.jpg)

બધી આટો ચૂ પરાથના કરિકને ઉઠ્યો તેતાર ચુ આફાના પુઠેર્યા પાહે આયો. ને ચે હુવાત બાઝી રહલા, ચુ તિનમી આટો આયો તેતાર તિનુને કહયુ “ઉઠો, મને ધરાવાવાલો આય જ્યો.”

![](https://cdn.door43.org/obs/jpg/360px/obs-en-38-14.jpg)

યહુદો, આફા ભેગા યહૂદી પુજારાને ને ધગળાને, ને એક મોટા ટોલાને લેકને આય જ્યો. તિનુના હાથુમા તલવારે ને ઢિંગા હોતા, યહુદો ઈસુ પાહે આયો ને કહયુ, “સલામ, પ્રભુ” ને તિનાને ઘોટ્યો, ને યહૂદી પુજારા લેધે ઈયે એક નિસાની હોતી કી ચે કોયને ધરવા. તેતાર ઈસુ તિનાને કહયુ, કો “તુ મને ઘોટિકને ધરાવે?”

![](https://cdn.door43.org/obs/jpg/360px/obs-en-38-15.jpg)

દેહલા ધગળા ઈસુને ધરી લેધો, તહિત પિતર બાઝ્યો આફાની તલવાર કાઢતોદ મોટા પુજારાના સાકેરનો કાન ઝટકાય નાસ્યો. ઈસુ કહયુ. “તલવાર ની સલાળવા, મે માહરી રખવાલી લેધે હમણે બાહને કહીકને દુતુની ફોજ બોલાય હકુ. પુન માહરે માહરા બાહની આગ્ના માનવી જોવે, ને પસી ઈસુ તિના માણેહનો કાન હાધી દેધો. ને ઈસુ ધરાયો તેર તિનાના બધા પુઠેર્યા તિનાને સોળીકને જાતા રહયા.

*બાઈબલ નો વાતરો. માથી ૨૬:૧૪-૫૬, મારક ૧૪:૧૦-૫૦, લુક ૨૨:૧-૫૩, યોહાન ૧૨:૬, ૧૮:૧-૧૧.*

Audio: https://git.door43.org/OBS-TLF/rtw_obs/releases/download/v1/rtw_obs_v1_38_128kbps.m4a

## 39. ૩૯. ઈસુ પોર કેસ સાલે.

https://openbiblestories.org/l/rtw/story-39/

![](https://cdn.door43.org/obs/jpg/360px/obs-en-39-01.jpg)

અધલી રાત હોય રહલી, તેતાર ધગળા ઈસુને પ્રશ્ન પુસવા કરીકને મોટા પુજારાને ઘોર લિજ્યા, પિતર સેટેથો તિના ભેગો જતલો, જેતાર ઈસુને ઘોરની માહા લિજ્યા તેર પિતર બાહેર બહીકને તાપતલો.

![](https://cdn.door43.org/obs/jpg/360px/obs-en-39-02.jpg)

ઘોરની માહા યહૂદી પુજારા ઈસુ પોર કેસ સલાળતલા. ચે ઘણા બધા ઝુટા સાકસી આપવાવાલાને લેક આયા. ને ચે ઈસુની વિરુધ સાકસી આપી. તિનુની સાકસી એક બિજાને મેલની ખાતલી. તિને યહૂદી પુજારા ઈસુને ગુનેગાર ની સાબિત કરી હકયા. ઈસુ કચુ ની કહયુ.

![](https://cdn.door43.org/obs/jpg/360px/obs-en-39-03.jpg)

સેહલે મોટો પુજારો ઈસુ ઘમી ભાલીકને કહયુ. “કો તુ ઈસવરનો પોર્યો ખ્રિસ્ત સે?”

![](https://cdn.door43.org/obs/jpg/360px/obs-en-39-04.jpg)

ઈસુ કહયુ “મે સે” તહુ મને ઈસવરની જમળી પાહ બહલો ને હરેગમાથો આવતો ભાલહો.” મોટો પુજારો રિહવાયકને આફાના સાકલા ફાળી નાસ્યા, ને આયળીકને આગેવાનુને કહયુ, “હાય આપણુને બીજા સાકસીની જરુર ની મલે, તહુ હિનાને કહતે હામલ્યો કી હિયુ ઈસવરનો પોર્યો સે. તહુ કો કહવા માંગો?

![](https://cdn.door43.org/obs/jpg/360px/obs-en-39-05.jpg)

બધા યહૂદી આગેવાનુ મોટા પુજારાને કહયુ, “હિનાને મારવો જોવે” તેતાર ચે તિનાના ડોલાહે પાટો બાધ્યો ને તિના પર થુપયા, તિનાને ઠોકયો ને વિતાળ્યો.

![](https://cdn.door43.org/obs/jpg/360px/obs-en-39-06.jpg)

જેતાર પિતર ઘોરની બાહેર બહી રહલો તેર, એક જણી કહયુ, “તુ હોદે ઈસુ ભેગો હોતો”. ચુ નિકારો કર્યો. હિના પસી બિજિ હોદે હહીદ કહયુ, ને પિતર પાસો ની અહિ કહયુ. ને સેહલે માણહુ કહયુ કી “હમુ જાણજે તુ ઈસુ ભેગો હોતો, કાહા કી તુ હોદે ગાલીલનો દેખાય,”

![](https://cdn.door43.org/obs/jpg/360px/obs-en-39-07.jpg)

તેતાર પિતર હરાપવા ને હોમ ખવા લાગ્યો, કિ “મે હિના માણેહને ની ઓલેખતો” ને તરેત કુકળા વાહી જ્યા. ને ઈસુ ફિરિકને પિતર ઘમી ભાલ્યુ.

![](https://cdn.door43.org/obs/jpg/360px/obs-en-39-08.jpg)

પિતર સાહાથો સેટો જતો રહયો ને ઘણો રળ્યો, હિનિ ટેમે ઈસુને મોતની સજા હોવી હિયુ પેલો ધરાવાવાલો યહુદો ભાલ્યુ, ચુ ઘણો દુખી હોયો ને જાયકને મરી જ્યો.

![](https://cdn.door43.org/obs/jpg/360px/obs-en-39-09.jpg)

બિજે દાહળે હવારે, યહૂદી પુજારા ઈસુને રોમન રાજપાલ પિલાત પાહે લિજ્યા., ચે પિલાત હોદે તિનાને ગુનાવાલો ગિણહે ને મોતની સિકસા કરહે હિયે આચા કરી રહલા. પિલાત ઈસુને પુસ્યુ ?કો તુ યહુદિ માણહુનો રાજો સે?”

![](https://cdn.door43.org/obs/jpg/360px/obs-en-39-10.jpg)

ઈસુ તિનાને હાંબો કહયુ “હહિ તે તુ કહવા બાઝી રહયો માહરુ રાજ ઇની દુનીયાનુ ની મલે, હહિ હોય તે માહરા સેવકુ માહરી લેધે ઝુમાયતા. મે ઈસવરના બારામાં હાસુ કહવા આયો, જ્યુ હાસાનો સે ચે બધા માહરી વાત હામેલહે.” પિલાત કહયુ “હાસુ કો સે?”

![](https://cdn.door43.org/obs/jpg/360px/obs-en-39-11.jpg)

ઈસુ હાથે વાત કર્યા પસી પિલાત ટોલા પાહે જ્યો ને કહયુ, “મને ઈના માણેહમાં કોઈ પુન ગુનો માલેમ ની પળતો, પુન યહૂદી યાજકુનુ ટોલુ આયળી આયળીકને કહયુ, હિનાને કુરુસે, ઠોકો, હિનાનો કચુ ગુનો ની મલે. પુન ચે જોર જોરથી આયેળવા લાગ્યા કી હિનાને કુરુસ પોર ઠોકો. હહિ પિલાત તિનમી આટો કહયુ કી મને હિનામાં કચુ ગુનો ની માલેમ પળતો.

![](https://cdn.door43.org/obs/jpg/360px/obs-en-39-12.jpg)

પિલાત બિહિ જ્યો માણહુ તોફાન ની કરે કરીકને, ને પસી ચુ તિનાન ધગળાથી ઈસુને કુરોસ પોર ઠોકી દેવા સહમતી આપી. રોમન ધગળા ઈસુને કોયળા આહટ્યા, ને રાજાનો ઝબો ને કાટાનો મુગેટ પેહરાયો. ને ચે તિનાની મસકરી કરી કી “ભાલો ઈયુ યહૂદી માણહુનો રાજો”.

*બાઈબલ નો વાતરો. માથ્થી ૨૬ : ૫૭-૭૫, મારક ૧૪ : ૬૦-૭૨, લુક ૨૨ : ૪૭-૬૨, યોહન ૧૮ : ૪-૨૭*

Audio: https://git.door43.org/OBS-TLF/rtw_obs/releases/download/v1/rtw_obs_v1_39_128kbps.m4a

## 40. ૪૦. ઈસુને કુરોસ પોર ટાંગી દેવામાં આયો

https://openbiblestories.org/l/rtw/story-40/

![](https://cdn.door43.org/obs/jpg/360px/obs-en-40-01.jpg)

ઈસુને વિતાળ્યા પસેણ, ધગળા તિનાને કુરોસ પોર ટાંગવા સેટા લીજયા.ચે ઈસુ પાહે જિના પોર ઈસુને મારવાના હોતા ચુ કુરોસ હકલાડ્યો.

![](https://cdn.door43.org/obs/jpg/360px/obs-en-40-02.jpg)

ધગળા ઈસુને “ખોપરી“ નામની જગાએ લીજયા ને ચે તિનાના હાથુ ને પોગુને કુરોસ પોર ખિલા ઠોકીકને ટાંગી દેધો.તે હોદે ઈસુ કહયુ,“ હે બાહ તિનુને માફ કર, કાહા કી ચે કો કરે ચુ ની જાણતા,પિલાત હુકેમ કર્યો કી તિનાના મુડા પોર “ યહૂદીયોનો રાજો“ લખલુ,ગુનો માથે પાળલુ લગાળે.

![](https://cdn.door43.org/obs/jpg/360px/obs-en-40-03.jpg)

ધગળા ઈસુના સાખલા લેધે સીઠયુ ઉસાલે. જેર ચે એહલુ કર્યુ તેર ઈયે વાત પુરી હોવી:“ચે માહા ને માહા માહરા સાખલા ભાગ કરી લેધા, ને માહરા ઝંબ્બા લેધે ચે સીઠયુ ઉચાલી.“

![](https://cdn.door43.org/obs/jpg/360px/obs-en-40-04.jpg)

ઈસુને બે સોરટાની વસમાં કુરોસ પોર ટાંગી દેધો.તિનામનો એક સાળી કરતલો, પુન બીજો કહયુ,“કો તુ ઈસવરથો હોદે ની બીહતો ? આપણુ તે ગુનહાવાલા હોયા, પુન ઈયુ માણેહ ગુનહા વગેરનો હોયો.પસી ચુ ઈસુને કહયુ,“ દિયા કરિકને,તહુ તોહરા રાજમાં આવો તેર મને યાદ કરજી. ઈસુ તિનાને જપાબ આપ્યો,“આજે તુ માહરી હાંતે પારાદેહમાં હોવહી.“

![](https://cdn.door43.org/obs/jpg/360px/obs-en-40-05.jpg)

યહુદી પુજારા ને બીજા માણહુ જે ટોલામાં હોતા ચે ઈસુને વિતાળતલા.ને ચે ઈસુને કહયુ,“ દેખ તુ ઈસવરનો પોર્યો હોય તે કુરોસ પોરથો ઉતરી આવ ને તુ આફાને બસાવ. પછી હમુ તાર પોર ભરહો કરહુ.“

![](https://cdn.door43.org/obs/jpg/360px/obs-en-40-06.jpg)

તેર બહપોરની ટેમે બધે અંધારુ હોય જેલુ. બહપોરથી 3.00 વાજ્યે લગી અંધારુ રિયુ.

![](https://cdn.door43.org/obs/jpg/360px/obs-en-40-07.jpg)

ઈસુ જોરથી આયળીકને કહયુ," બધુ પુરુ હોય જયુ,"હે બાહ મેં માહરો આત્મા તાહરા હાથમાં હોપુ. તેર ચુ મુડુ નમાવીકને આફાનો જીવ સોડી દેધો. જેર ચુ મરી જેલો તેર એક ધરતીકંમ હોયો. મંદિરનો મોટો પડધો કી જે માણહુ ઈસવરની હાજરીથી અલેગ કરતલો ચુ ઉપોરથી નીચે બે ભાગ હોય જયો.

![](https://cdn.door43.org/obs/jpg/360px/obs-en-40-08.jpg)

આફાના મરેણથી ઈસુ માણહુને ઈસવર પાહે આવા લેધે રોહો ઉઘળી દેધો. જે ધગળો ઈસુની રખવાલી કરતલો ચુ બધુ ભાલ્યુ ને કહયુ, “હાસુદ ચુ ગુનાવગેરનો ને ઈસવરનો પોર્યો હોતો."

![](https://cdn.door43.org/obs/jpg/360px/obs-en-40-09.jpg)

તેર યૂસફ ને નીકોદેમસ નામના બે યહૂદીયો કી ચે ભરહો કરતલા કી ઈસુદ ખ્રિસ્ત હોયો, ચુ પિલાત પાહે ઈસુની લાસ માંગી. ને ચે તિનાની લાસ સાખલાથી વિટાળીકને ભીગ બણાયકને કબરમાં રાખ્યુ.પસેણ ચે કબેર બંધ કરવા કરીકને એક મોટલો સપરોહળો ગવળાય દેધો.

*બાયબલનો એક વાતરો: માથ્થી 27:27-61; માર્ક 15:16-47; લૂક 23:26-56; યોહાન 19:17-42*

Audio: https://git.door43.org/OBS-TLF/rtw_obs/releases/download/v1/rtw_obs_v1_40_128kbps.m4a

## 41. ૪૧. ઈસવર ઈસુને મરલામાથો પાસો જીવતો કરે

https://openbiblestories.org/l/rtw/story-41/

![](https://cdn.door43.org/obs/jpg/360px/obs-en-41-01.jpg)

જેતાર ધગળા ઈસુને કુરોસ પોર ટાગી દેધો તેતાર યહૂદી પુજારા પિલાતને કહયુ, “હિયુ ઈસુ અહી કહતલો કી મે તિન દાહળા પસી પાસો જિવતો હોય જાહ, તિને કદાક હિનાના પૂઠેર્યા તિનાની લાસ સોરી લિજહે ને પસી કહી દેહે કિ ઈસુ જિવતો હોયજ્યો. તિને તિનાની કબેરે પેરો મેકવો જોવે.”

![](https://cdn.door43.org/obs/jpg/360px/obs-en-41-02.jpg)

પિલાત કહયુ “કબેરની રખવાલી કરવા લેધે તહુ ધગળાને લિજાય હકો”. ને પસી ચે કબેરના મોહ અગોલ મેકલા સપોહળાને સીલ કરી દેધો. ને ધગળાને સાહા બહાળી દેધા, કાહાકી લાસને કોય સોરી ની લિજાય કરીકને.

![](https://cdn.door43.org/obs/jpg/360px/obs-en-41-03.jpg)

ઈસુને કબેરમા મેસ્યા પસીનો દાહળો આરેમનો દાહળો હોતો. ને આરેમને દાહળે કોઈ પુન યહૂદી કબેરે ની જાય હકે. આરેમના દહળાને પસીને દાહળે થોળ્યુક બયરે હાથમાં અંતેર લેકને કબેરે જ્યુ.

![](https://cdn.door43.org/obs/jpg/360px/obs-en-41-04.jpg)

ને ઉસકાહલોદ સાહા એક મોટો ધરતિકમ હોયો, ને એક ધોલોબગ હરેગ દૂત તિનુને દેખે પળ્યો, ને ચુ કબેર અગોલના સપોહળાને એથો કરીને તિના પોર બહી જ્યો. ને જ્યે ધગળા કબેરની રખવાલી કરતલા તિનુની થથરી સુટી જેય ને ભોય પોર પળી જ્યા.

![](https://cdn.door43.org/obs/jpg/360px/obs-en-41-05.jpg)

જેતાર બયરે કબેર અગોલ આયુ તેતાર હરેગ દૂત તિનુને કહયુ, “બિહવા ની, ઈસુ ઈહા ની મલે, દહીં ચુ કહલુ તહી મરેલામાંથો પાસો જિવતો હોય જ્યો. આયકને કબેરમાં ભાલો”, ચુ ઈસુની લાસ મેકલી સાહા ભાલ્યુ પુન ઈસુની લાસ સાહા ની હોતી.

![](https://cdn.door43.org/obs/jpg/360px/obs-en-41-06.jpg)

હરેગ દૂત બયરેને કહયુ, “જાયકને પુઠેર્યાને કહો, ઈસુ મરલાંમાથો જિવતો હોય જ્યો ને તિનુથો પેહલો ગાલીલમાં જાહે.”

![](https://cdn.door43.org/obs/jpg/360px/obs-en-41-07.jpg)

બયરે બિહેકથી ને ખુસીથી ભરાય જ્યુ, ને ચુ પુઠેર્યાને વારુ ખબેર આપવા રપટ્યુ.

![](https://cdn.door43.org/obs/jpg/360px/obs-en-41-08.jpg)

જેતાર બયરે વારુ ખબેર આપવા જવા બાઝી રહલ્યુ તેતાર ઈસુ દેખે પળ્યો ને ચુ તિનાની આરાધના કરી. ઈસુ તિનુને કહયુ “બિહવા ની, માહરા પુઠેર્યાને કહો કિ મે ગાલિલમાં જોમ ને ચે મને સાહા ભાલહે.”

*બાયબલનો વાતરો: માથ્થી ૨૭:૬૨-૨૮:૧૫; માર્ક ૧૬:૧-૧૧; લૂક ૨૪:૧-૧૨; યોહાન ૨૦:૧-૧૮*

Audio: https://git.door43.org/OBS-TLF/rtw_obs/releases/download/v1/rtw_obs_v1_41_128kbps.m4a

## 42. ૪૨. ઈસુ હરેગે જતો રહે.

https://openbiblestories.org/l/rtw/story-42/

![](https://cdn.door43.org/obs/jpg/360px/obs-en-42-01.jpg)

જિને દાહળે ઈસુ મરેલામાંથો જિવતો હોયો, તિને દાહળે તિનાના બે પુઠેર્યા એક ગામમાં જતલા, ને ઈસુને જ્યુ કરાયુ તિના બારામાં ચે વાતે કરતલા. તિનુને આચા હોતી કી ચુ મસીહ સે. પુન તિનાને મારી નાખવામાં આવલો. બયેરે કહયુ કી ચુ પાસો જિવતો હોય જ્યો. તિનુને ખબેર ની પળતલી કી ચે કાહની વાત પોર ભરહો કરે.

![](https://cdn.door43.org/obs/jpg/360px/obs-en-42-02.jpg)

ઈસુ તિનુ પાહે પોહત્યો ને તિનુ ભેગો સાલવા લાગ્યો. પુન ચે તિનાને ની ઓલખ્યો. ચુ તિનુને પુસ્યુ કિ ચે કો વાતે કરવા બાઝી રહયા. તેતાર ચે પાસલા દાહળામાં બણલી ઈસુના બારામની બધી વાતે કહી હમલાવી. ને તિનુને અવલુત લાગ્યુ કી ઈનાને એતરીદ ની ખબેર હોયલી કી યરુસાલેમમાં કો બણ્યુ ચું.

![](https://cdn.door43.org/obs/jpg/360px/obs-en-42-03.jpg)

ઈસવરના વસોનુમા મસીહાના બારામાં કો લખી મેસ્યુ ચુ બધુ તિનુને હમજાળ્યુ. તિનુને પરબોધકો કહલુ ચુ ફોમ આવી કી મસીહ દુખ બેઠહે, ને તિનાને મારી નાખવામાં આવહે ને ચુ તિનમે દાહળે પાસો જિવતો હોય જાહે. તેતાર ચે જિના ગામમાં જતલા સાહા પોહતી જ્યા, ને તેતાર હાંજ પળી વાગલી.

![](https://cdn.door43.org/obs/jpg/360px/obs-en-42-04.jpg)

ચે બે જણા ઈસુને તિનુ ભેગો રહવા કહયુ, ને ચુ રહી જ્યો, જેતાર ચે હાંતાનુ ખવાનુ ખવા બહયા, તેતાર ઈસુ રોટાનો એક કુટકો લેધો, તિના લેધે ઈસવરનો આભાર માનીકને ભાંગ્યો, ને ઉસકાહલાદ ચે તિનાને ઓલખી લેધો કી ઇયુ તે ઈસુ હોયો. પુન તિનિદ ટેમે ચુ સાહાથો અલેપ હોય જ્યો.

![](https://cdn.door43.org/obs/jpg/360px/obs-en-42-05.jpg)

ચે બે જણા હાંબ હાંબા કહયુ, “હિયુ તે ઈસુ હોતો”. જેતાર ચુ આપણુને ઈસવરના વસોનુ હમજાળતલો તેતાર આપણુને વારુ લાગતલુ. ને ચે તરેત પાસા યરુસાલેમ જતા રહયા, ને જાયકને પુઠેર્યાને કહયુ, “ઈસુ જીવતો હોય જ્યો હમુ તિનાને ભાલ્યો.”

![](https://cdn.door43.org/obs/jpg/360px/obs-en-42-06.jpg)

જેતાર પુઠેર્યા હાંબ હામ્બા વાતે કરતલા તેતાર ઈસુ ઉસકાહલોદ તિનુની વસમા ઉતરી પળ્યો, પુઠેર્યાને લાગ્યુ કી હિયુ ભુતળુ હોયુ, પુન ઈસુ તિનુને કહયુ, તહુ કાહા બિહો ને શંકા કરો, માહરા હાથુ ને પોગુ ભાલો. કાહા કી આત્માને દેહી ની આવતી જેહલી માહરી હોવી” ચુ ભુતળો ની મલે હિની વાતને સાબિત કરવા ચુ કચુક ખવાનુ માંગ્યુ. ચે તિનાને હેકેલી માસલીનો કુટકો આપ્યો, ને ચુ ખાધુ.

![](https://cdn.door43.org/obs/jpg/360px/obs-en-42-07.jpg)

ઈસુ તિનુને કહયુ કી “માહરા બારામાં વસોનુમા લખી મેસ્યુ, જેતાર ચુ તિનુના મન ઊઘળ્યા તેતાર ચે, ચેં વસોનુ હમજી હકયા,” ઘણા કેરનુ લખી મેકલુ કી મસીહ દખ વેઠહે, મરીજાહે ને તિનમે દાહળે પસો જિવતો હોય જાહે.

![](https://cdn.door43.org/obs/jpg/360px/obs-en-42-08.jpg)

“પવિતર સોપળીમાં હિયુ હોદે લખી મેકયુ કી માહરા પુઠેર્યા બધા માણહુને કહચે ને ચે પસતાવો ને પાપુની માફી મેલેવાની જરુળ સે. હિનાની શરુવાત યરુસાલેમથી હોવહે, ને પસી બધી જાતિના ને બધી જઘાના માણહુ પાહે જાહે. ને ઈની બધી વાતના તહુ સાકસી સે.”

![](https://cdn.door43.org/obs/jpg/360px/obs-en-42-09.jpg)

ને પસી સાલિહ દાહળા લગી ઈસુ તિનાના પુઠેર્યાને દેખે પળયો, ને એક દાહળો એકેદ ટેમે પ૦૦ કરતે વધાર માણહુને ચુ દેખે પળ્યો, ને ઘણી બધી રિતે ચુ પોતાના પુઠેર્યાની અગોલ સાબિત કરયુ કી ચુ જિવતલો સે. ને ચુ તિનુને ઈસવરના રાજની વાત હિકવાળી.

![](https://cdn.door43.org/obs/jpg/360px/obs-en-42-10.jpg)

ઈસુ પોતાના પુઠેર્યાને કહયુ કી “હરેગ ને ધરતિના બધા અધીકાર મને અપાયલા સે. તિને તહુ જોવ ને બધી જાતિના માણહુને પુઠેર્યા બણાવો, ને તિનુને બા, પોર્યો, ને પવિતર આત્માના નામમાં બાપતિસમાં આપતા જોવ. ને મે તહુને જ્યુ પાલેણે આપ્યુ ચુ બધ્યુ તિનુને હિકવાળો. ને ફોમ રાખો મે બધા દાહળા તોહરી ભેગો હોયો.”

![](https://cdn.door43.org/obs/jpg/360px/obs-en-42-11.jpg)

ઈસુ જિવતો હોય જ્યાના સાલિહ દાહળા પસી ચુ આફાના પુઠેર્યાને કહયુ, “જાહ લગી માહરો બા તહુને પવિતર આત્માથી તાકેત ની આપે તાહ લગી તહુ યરુસાલેમમાંત રહજો”. ને પસી ઈસુને હરેગમાં લેય લેવાયો. ને વાદલા તિનાને ઢાકી દેધો, ઈસુ ઈસવરના જમળ્યે હાથે બહયો કાહા કી ચુ બધા પોર રાજ કરે.

*બાઈબલ નો વાતરો. માથી ૨૮ : ૧૬-૨૦, મારક ૧૬ : ૧૨-૨૦, લુક ૨૪ : ૧૩-૪૩, યોહાન ૨૦ : ૧૯-૨૩, પ્રે.કૃ ૧ : ૧-૧૧*

Audio: https://git.door43.org/OBS-TLF/rtw_obs/releases/download/v1/rtw_obs_v1_42_128kbps.m4a

## 43. ૪૩. મંડલી ની શરુવત.

https://openbiblestories.org/l/rtw/story-43/

![](https://cdn.door43.org/obs/jpg/360px/obs-en-43-01.jpg)

ઈસુ હરેગમાં ઢય જ્યો પસી તિનાની કહલી રીતે પુઠેર્યા યરુસાલેમમાં રહયા, વિસવાસી માણહુ સાહા કાયેમ પરાથના કરવા ભેગા વલતલા.

![](https://cdn.door43.org/obs/jpg/360px/obs-en-43-02.jpg)

વરેહ ડિટ નુણવાના પસાહ દાહળા પસી, યહૂદી માણહુ એક ખાસ દાહળો ઉજેવતલા, તિનાને પસાહમાનો દાહળો કહવામાં આવે. પસાહમાનો દાહળો એતરે ઈયુ દાહળો કી યહૂદી માણહુ નુણવાના તિહવાર તરીકે વાલતલા. આખી દુનિયાના યહૂદી માણહુ ભેગા વલીકને ઈના દાહળાને ઉજેવતલા. ઈને વરેહે પસાહમાનો દાહળો ઈસુ હરગે ઢય જ્યાને એક અઠવાળ્યા પસી આયો.

![](https://cdn.door43.org/obs/jpg/360px/obs-en-43-03.jpg)

તેતાર બધા યહૂદી માણહુ એક જધામાં ભેગા હોય રહલા. ચે જિના ઘોરમાં ભેગા હોય રહલા ચુ ઘોર ઉસકાલુદ વાયવાધેણના હરકા વાય થી ભરાય જ્યુ ને પસી આગ હરખી જિબે બધા વિસવાસી પોર ઊતરી, ચે બધા પવિતર આત્માથી ભરાય જ્યા. ને બિજિ બોલિ બોલવા લાગ્યા.

![](https://cdn.door43.org/obs/jpg/360px/obs-en-43-04.jpg)

જેતાર યરુસાલેમના માણહુ ઈયુ અવાજ હામલ્યો તેર કો હોવા બાઝી રહયુ ચુ જાણવા એક ટોલુ ભેગુ હોયુ. ને જેતાર વિસવાસી માણહુને ઈસવરના મોટા ને અલેગ કામુના વખાણ કરતા હામલ્યા, તેતાર ચે વિચાર કરતા હોય જ્યા. કાહા કી ચે તિનુ પોતાની બોલીમાં ચે હામેલતલા.

![](https://cdn.door43.org/obs/jpg/360px/obs-en-43-05.jpg)

થોળાક તે હિયે પિલેકને હહાં આયેળવા બાઝી રહ્યા હહીં કહતલા, પુન પિતર ઉભો હોયકને તિનુને કહયુ, કી “માહરી વાત હામલો, ઈયે માણહુ પિધેલા ની મલે, ઈયુ તે યોએલ પરબોદક જ્યે ભવિસ્યની વાત કહલી ચે પુરી હોવા બાઝી રહી, કિ “સેહલા દાહળામાં મે માહરો આત્મા રેળી દેહ”.

![](https://cdn.door43.org/obs/jpg/360px/obs-en-43-06.jpg)

“એ ઈઝરાયેલના માણહુ ઈસુ એક માણેહ હોતો ચુ ઈસવરની તાકેતથી ઘણા સમેતકારુ ને મોટા કામુ કર્યા, જિનુને તહુ ભાલ્યા હોદે ને જાણો હોદે. પુન તે હોદે તહુ તિનાને કુરોસ પોર ઠિકી દેધો.”

![](https://cdn.door43.org/obs/jpg/360px/obs-en-43-07.jpg)

“ને ઈસુ મરી જયો, પુન ઈસવર તિનાને મરેલામાથો તિનમે દાહળે, જિવતો કરી દેધો. ઈયે તે ભવિષ્યવાણી પુરી હોવાની વાત સે, જયે કેહે કી “તુ તાહરા પવિતર ને કબેરમાં કુહવા (સળવા) ની દેય, ને હમુ હિની વાતના સાકસી સે કી ઈસવર ઈસુને પાસો જિવતો કરી દેધો.”

![](https://cdn.door43.org/obs/jpg/360px/obs-en-43-08.jpg)

“હમણે ઈસુ ઈસવરની જમળી પાહ બહલો સે, ને જિનિ રિતે ચુ કહલુ તિનિ રીતે ચુ પવિતર આત્માને મોકલ્યો. ને હિની વાતને તહુ હમણે હામેલવા ને ભાલવા બાઝિ રહયા. હિયુ પવિતર આત્માને લેધે સે.”

![](https://cdn.door43.org/obs/jpg/360px/obs-en-43-09.jpg)

“તહુ ઈનાત ઈસુને કુરોસ પોર ઠોકિ દેધો. ને હિયે વાત હાસી સે કી ઈસવર ઈસુને પ્રભુ ને મસિહ બણાયો.”

![](https://cdn.door43.org/obs/jpg/360px/obs-en-43-10.jpg)

“જ્યે વાતે પિતર તિનુને કહયુ ચુ હામલીકને તિનુને ઘણુ કાઠુ લાગ્યુ, તિને ચે પિતરને ને બિજા પુઠેર્યાને પુસ્યુ કી હાવ હમુ કો કરજે.”

![](https://cdn.door43.org/obs/jpg/360px/obs-en-43-11.jpg)

પિતર તિનુને જપાબ આપ્યો કી “બધા પોતાનુ મન બદેલવુ જોવે ને બધા ઈસુ ને નામે બાપતિસમા લેવુ જોવે. તિનાથી તોહરા પાપુ માફ હોય હકે. ચુ તહુને પવિતર આત્મા હોદે આપહે.”

![](https://cdn.door43.org/obs/jpg/360px/obs-en-43-12.jpg)

પિતર જ્યુ કહયુ ચુ માનિકને તિન હજાર માણહુ ભરહો કર્યો. ને ચે ઈસુના પુઠેર્યા બણ્યા. ને ચે બાપતિસમા લેકને યરુસાલેમની મંડલીના સભ્ય બણી જ્યા.

![](https://cdn.door43.org/obs/jpg/360px/obs-en-43-13.jpg)

વિસવાસી કાયેમ ખાસ પુઠેર્યાની વાતે હામેલતલા, ને બધા ભેગા રહતલા, ને ભેગા ખાતલા, ને ભેગા પરાથના કરતલા. ને ચે બધા ભેગા ઈસવરની મંડલીમાં ઈસવરના વખાણ કરતલા, ને જ્યુ કય પુન તિનુ હાથે હોતુ ચુ હાંબ હાંબા વેહેસતલા. ચે બધા એકબિજાની કાલજી રાખતલા. ને રોજ ઘણા માણહુ વિસવાસી બણતલા.

*બાઈબલનો વાતરો :  પ્રેરીતોના કામ ૨*

Audio: https://git.door43.org/OBS-TLF/rtw_obs/releases/download/v1/rtw_obs_v1_43_128kbps.m4a

## 44. ૪૪. પિતર ને યોહાન ભિકારીને હાજો કરે.

https://openbiblestories.org/l/rtw/story-44/

![](https://cdn.door43.org/obs/jpg/360px/obs-en-44-01.jpg)

એક દાહળો પિતર ને યોહાન મંદિરમાં જતલા, જેતાર ચે બાયણે પોહત્યા તેતાર એક લંગળા માણેહને પસ્યા માંગતો ભાલ્યો.

![](https://cdn.door43.org/obs/jpg/360px/obs-en-44-02.jpg)

પિતર તિના લંગળા માણેહ ઘમી ભાલીકને કહયુ, “માહરી પાહે તને આપવા લેધે પસ્યા નિ મલે, પુન માહરી પાહે જ્યુ હોયુ ચુ મે તને આપેહ, ઈસુના નામમાં ઊઠ ને સાલતો હોવ”.

![](https://cdn.door43.org/obs/jpg/360px/obs-en-44-03.jpg)

તરેતદ ઈસવર તિના લંગળા માણેહને સાલતો કરી દેધો, ચુ સાલવા ને ચારેમેર કુદવા લાજ્યો. ને ઈસવરના વખાણ કરવા લાગ્યો. મંદિરના આંગણામાં જે માણહુ હોતા ચે બધા ડોલફાટ્યા હોય જ્યા.

![](https://cdn.door43.org/obs/jpg/360px/obs-en-44-04.jpg)

જ્યુ માણેહ વારુ હોય જ્યો તિનાને ભાલવા તરેત સાહા માણહુનુ ટોલુ ભેગુ હોય જ્યુ, પિતર તિનુને કહયુ, “ઈયુ માણેહ વારુ હોય જ્યો હિની વાતથી તહુ કાહા ડોલફાટ્યા હોયા, હિયુ હમરી તાકેતથી હાજો ની હોવલો મલે. પુન ઈસુની તાકેતથી ઈયુ માણેહ હાજો હોવલો સે.”

![](https://cdn.door43.org/obs/jpg/360px/obs-en-44-05.jpg)

“તહુદ રોમન રાજપાલને કહલુ કી ઈસુને મારી નાખ, તહુ જિવળાવાવાલાને મારી નાસ્યો. પુન ઈસવર તિનાને મરેલામાથો જિવતો કરી દેધો, તહુ ની જાણતલા કિ કો કરવા બાઝી રહયા, પુન ઈસવર તોહરા કામુને ભવિષ્યવાણી પુરિ કરવા ઊપયોગ કર્યો. તિને હાવ તહુ તોહરા મન ફેરવો ને ઈસવર ઘમી પાસા ફીરો, કાહા કી ચુ તોહરા પાપુ માફ કરી દેય તહી.”

![](https://cdn.door43.org/obs/jpg/360px/obs-en-44-06.jpg)

પિતર ને યોહાન જ્યુ કરતલા તિનાથી મંદિરના આગેવાનુ ઘણા હેરાન હોયા, તિને ચે તિનુને ધરી લેધા, ને જેલમાં પુરી દેધા, પુન તે હોદે ઘણા માણહુ પિતરની વાત માન્યા. ને ઈસુ પોર ભરોમહો કરવાવાલા વધીક ને ૫૦૦૦ પાસ હજાર હોયા.

![](https://cdn.door43.org/obs/jpg/360px/obs-en-44-07.jpg)

બિજે દાહળે યહૂદી આગેવાનુ પિતરને ને યોહાનને મોટા પુજારા ને બિજા ધરેમના આગેવાનુ હોતા તિનુ પાહે લાયા. ચે પિતરને ને યોહાનને પુસ્યુ. “તહુ ઈના લંગળા માણેહને કોઈની તાકેતથી વારુ કર્યો?”.

![](https://cdn.door43.org/obs/jpg/360px/obs-en-44-08.jpg)

પિતર તિનુને જપાબ આપયો “ઈયુ માણેહ ઈસુ મસીહાની તાકેતથી હાજો હોયકને તોહરી અગોલ ઉભો હોય રહયો. તહુ ઈસુને કુરોસ પોર ટાંગી દેધો પુન ઈસવર તિનાને પાસો જિવતો કરી દેધો. તહુ તિનાને ની ગણકાર્યો પુન બસવા લેધે ઈસુની તાકેત વગેર બિજો કોય રોહો ની મલે”.

![](https://cdn.door43.org/obs/jpg/360px/obs-en-44-09.jpg)

બધા આગેવાનુ ઉસેકાને હોય જ્યા કાહાકી પિતર ને યોહાન હેતરી હિમેતથી વાત કહતલા. કાહા કી ચે જાણલા કી ઈયે ની જેહલા અભણ માણહુ સે. પસી તિનુને ફોમ આવી કી ઈયે ઈસુ ભેગા રહતલા. તેતાર પસી ચે પિતરને ધમકી આપીકને મોકલી દેધા.

*બાઈબલનો વાતરો :  પ્રેરીતોના કામ ૩ : ૧૪-૨૨*

Audio: https://git.door43.org/OBS-TLF/rtw_obs/releases/download/v1/rtw_obs_v1_44_128kbps.m4a

## 45. ૪૫. ફિલિપ ને કુસ દેશનો અધિકારી.

https://openbiblestories.org/l/rtw/story-45/

![](https://cdn.door43.org/obs/jpg/360px/obs-en-45-01.jpg)

પેહલાની મંડલીમાં એક માણેહ હોતો તિનાનુ નામ સ્તેફન હોતુ. ચુ એક વારુ માનવાલો ને ઘણી બુધી વાલો ને પવિતર આત્માથી ભરલો માણેહ હોતો. સ્તેફન ઘણા મોટા કામુ કરલા. ને ચુ માણહુને વારુ માનથી હમજાળતલો.

![](https://cdn.door43.org/obs/jpg/360px/obs-en-45-02.jpg)

એક દાહળે સ્તેફન ઈસુના બારામાં હિકવાળવા બાઝી રહલો તેતાર થોળાક યહૂદી માણહુ જ્યે ઈસુ પોર ભરહો ની કરતા, ચે તિના હાથે વાતમાં હાપકાતાણ કરવા લાજયા. તિનુને ઘણી રીહ લાગી ને સ્તેફનના બારામા આગેવાનુ ની અગોલ લંડાય મેકી, ને કહયુ કી, “હમુ તિનાને મુસા ને ઈસવરની વિરુધ્ધ કારા કરતો હાંમલ્યો.” ધરેમના આગેવાનુ તિનાને ધરી લેધો ને પસી મોટા પુજારા ને બિજા આગેવાનુ પાહે લિજ્યા. સાહા સ્તેફનની વિરુધ ઝુટી સાકસી આપવાવાલાને ઉભા કર્યા, ને ચે ઝુટુ બોલયા.

![](https://cdn.door43.org/obs/jpg/360px/obs-en-45-03.jpg)

મોટા પુજારા સ્તેફનને પુસયુ, “કો ઈયે બધી વાતે હાસી સે?” સ્તેફન તિનુને અબ્રાહમથી લેકને ઈસુના ટેમ લગીમાં ઈસવરથી કરવામાં આવલા, મોટા બણાવુને ફોમ કરાયકને કકિહી માણહુ ઈસવરની વાત ની માન્યા ચુ કહી હમલાયુ. ને તિનુને હોદે કહયુ “તહુ કાઠા મનના ને ઈસવરની વાતની વિરુધ જવાવાલા માણહુ સે. તહુ બધા દાહળા પવિતર આત્માની વાત ની માનતા, તોહરા ડાહલા બાહુહ હોદે પરબોદકુને મારી નાખીકને ઈસવરનો વિરોધ કરલો, પુન તહુ તે તિનુથા હોદે અઘા નિકલ્યા, તહુ ખ્રિસ્તને મારી નાખ્યો!.”

![](https://cdn.door43.org/obs/jpg/360px/obs-en-45-04.jpg)

જેતાર પેલા ધરેમના આગેવાનુ ઈયુ વાતે હામલ્યુ તેતાર રિહે રાતાલાલ હોય જ્યા, ને ચે પોતાના કાનુ ઢાકી દેધા ને જોરથી આયેળવા લાગ્યા. ચે તિનાને ગામ બાહરો લિજ્યા ને તિનાને મારી નાખવા સપરાટવાનુ સાલુ કર્યુ.

![](https://cdn.door43.org/obs/jpg/360px/obs-en-45-05.jpg)

જેતાર સ્તેફન મરવા બાઝી રહલો તેતાર જોરથી આયળીકને કહયુ, “ઈસુ માહરા આત્માને લેય લે” પસી ચુ ઘટણે પળીકને જોરથી કહયુ, “પ્રભુ ઈયુ ગુનો ઈનુને માથે ની પાળવા” પસી તિનાનો જિવ ઢય જ્યો.

![](https://cdn.door43.org/obs/jpg/360px/obs-en-45-06.jpg)

શાવુલ નામનો એક જુવાન્યો સ્તેફનને મારવામાં સહમેત હોતો. ને ચુ જયે પેલાને સપરાટતલા તીનુ માણહુના સાખલાની રખવાલી કરતલો. તિનેત દાહળે યરુસાલેમમાં ઈસુ પોર ભરહો કરવાવાલા માણહુને વેલ્હા પાળવાનુ સાલુ કરી દેધુ. તિને ઘણા વિસવાસી માણહુ બિજિ બિજિ જઘામાં ઢાહિકને ઢય જ્યાં, પુન તે હોદે ચે જાહા જ્યા સાહા ઈસુની વારુ ખબેર માણહુને કહિ હમલાવી.

![](https://cdn.door43.org/obs/jpg/360px/obs-en-45-07.jpg)

ફિલિપ નામનો ઈસુનો એક પુઠેર્યો હોતો ચુ યરુસાલેમાં વિસવાસી માણહુને વેલ્હા પાળતલા તિને ચુ યરુસાલેમમાથો, સમરુન હહેરમાં ઢાહિકને ઢય જેલો. ને ચુ સાહા ઈસુની વારુ ખબેર માણહુને કહી, ને ઘણા માણહુ વાત હામલીકને બસી જ્યા. એક દાહળે ઈસવરનો દૂત ફિલિપને ઉજાળમાં એક રોહે જવા કહયુ. તિને રોહે ફિલિપ કુશ દેહના એક મોટા માણેહને આફાની ઘોળાગાડીમા જતો ભાલ્યો. પવિતર આત્મા ફિલિપને કહયુ કી “જા હિના માણેહ ભેગો વાતે કર”.

![](https://cdn.door43.org/obs/jpg/360px/obs-en-45-08.jpg)

જેતાર ફિલિપ ઘોળાગાડી થળુમ જ્યો તેતાર પેલા માણેહને યસાયા પરબોધકની સોપળી વાસતો હાંમલ્યો, ચુ અહી વાસવા બાઝી રહલો કી ચે તિનાને ઘેટા હવાલ મારવા લેક જ્યા, ને ચુ ઘેટા હવાલ શાત હોતો, ચુ કચુ બોલ્યો ની, ચે તિના અગોલ ઘણો ખરાબ વેવાર કર્યો. ને તિનાને માન ની આપ્યુ, ને ચે તિનાનો જિવ લેય લેધો”.

![](https://cdn.door43.org/obs/jpg/360px/obs-en-45-09.jpg)

ફિલીપ તિના ખોજાને પુસ્યુ, “તુ જ્યુ વાસવા બાઝી રહયો હિયુ કો તુ હમજે કી, ચુ કહયુ ની, જેહ લગી કોય હમજાવે ની તેહ લગી મે કકિહિ હમજી હકુ. આવ તુ ઈહા આયકને બેહ, ઈયુ યસાયો આફા લેધે લખે કી પસી બિજા લેધે.

![](https://cdn.door43.org/obs/jpg/360px/obs-en-45-10.jpg)

ફિલિપ તિના ઈથોપિયાના માણેહને હમજાળ્યુ કી યસાયો, હિયુ ઈસુ લેધે લખે, ને ફિલિપ પવિતર સોપળીના બિજા વસોનુનો ઉપયોગ કરીકને વારુ ખબેર હમજાળી.

![](https://cdn.door43.org/obs/jpg/360px/obs-en-45-11.jpg)

તિને રોહે જતે ઇથોપિયાનો પેલો માણેહ ને ફિલિપ થોળુક પાણી હોતુ સાહા આયા, ઈથોપયાનો માણેહ કહયુ, “ઈહા પાણી હોયુ કો મને બાપતિસમા આપી હકે?” ને ચુ ઘોળાગાડી ઉભી રાખવા કહયુ.

![](https://cdn.door43.org/obs/jpg/360px/obs-en-45-12.jpg)

પસી બેહો જણા પાણીમા ઉતર્યા, ને ફિલિપ ખોજાને બાપતિસમાં આપ્યુ, ને જેતાર ચે પાણી માથા બાહેર નિકલ્યા તેતાર ઉસકાલોદ પવિતર આત્મા ફિલોપને લિજ્યો, ને ચુ સાહા માણહુને ઈસુના બારામાં કહવાનુ સાલુ રાખયુ.

![](https://cdn.door43.org/obs/jpg/360px/obs-en-45-13.jpg)

ખોજો ઈસુને જાણીકને ખુસ હોય જ્યો. ને આફાના ઘોર ઘમી જવાનુ સાલુ રાખ્યુ.

*બાઈબલનો વાતરો :  પ્રેરીતોના કામ – ૬ : ૮,  ૮ : ૫ ,૨૬-૪૦*

Audio: https://git.door43.org/OBS-TLF/rtw_obs/releases/download/v1/rtw_obs_v1_45_128kbps.m4a

## 46. ૪૬. પાવુલ ઈસુને માને

https://openbiblestories.org/l/rtw/story-46/

![](https://cdn.door43.org/obs/jpg/360px/obs-en-46-01.jpg)

શાવુલ એક જુવાન માણેહ હોતો. ચુ સ્તફનને સપરાટીકને મારવાવાલા માણહુના સાખલા હાસેવતલો. ચુ ઈસુને ની માનતલો તિને વિસવાસી માણહુને સતાવણી કરતલો. ચુ યરુસાલેમમાં વિસવાસી માણહુને ઘોરે ઘોર જાયકને બયરાને ને આદમીને બાધી લાયકને જેલમા પુરી દેતલો. મોટો પુજારો તિનાને સુટ આપી દેધી કિ ચુ દમસકમાં હોદે જાયકને વિસવાસી માણહુને બાધીકને યરુસાલેમ લીઆવે.

![](https://cdn.door43.org/obs/jpg/360px/obs-en-46-02.jpg)

જેતાર શાવુલ દમસક જવાને રોહે હોતો તેર તિનાની ચારેમેર દાહળાની ઈંજોળી કરતે વધાર ઈંજોળુ સમક્યુ, ને ચુ નિસો પળી જ્યો. શાવુલને એક અવાજ હમલાયો કી “શાવુલ શાવુલ તુ મને કાહા સતાવે?” શાવુલ પુસ્યુ “પરબુ તુ કોય? ઈસુ કહયુ “મે ઈસુ સે તુ મને સતાવે”.

![](https://cdn.door43.org/obs/jpg/360px/obs-en-46-03.jpg)

ને શાવુલ ઉભો હોયો પસી તિનાને દેખાયુ ની તિનાના ભેગાવાલા તિનાને દમસક ઘમી દોરી લિજ્યા. ને શાવુલ તીન દાહળા લગી કચુ ખાધુ પિધુ ની.

![](https://cdn.door43.org/obs/jpg/360px/obs-en-46-04.jpg)

દમસકમાં અનાન્યા નામનો એક પુઠેર્યો હોતો, ઈસવર તિનાને કહયુ, “જિના ઘોરમાં શાવુલ રોકાયલો સે સાહા જા, તુ તિના પોર તાહરો હાથ મેકહી પસેણ ચુ પાસો ભાલતો હોય જાહે,” પુન અનાન્યો કહયુ, “પરબુ હિયુ માણેહ વિસવાસી માણહુને ઘણી ખરાબ રીતે વેલહા પાળ્યા ચુ મે હામેલલુ સે, ઈસવર તિનાને જપાબ આપ્યો, “જા’ મે ઇનાને ટાલલો સે, ચુ યહુદી માણહુને ને જ્યે યહૂદી ની મલે તિનુ માણહુને માહરુ નામ જણાવહે, ચુ માહરા નામ લેધે ઘણુ દુખ વેઠહે.”

![](https://cdn.door43.org/obs/jpg/360px/obs-en-46-05.jpg)

તિના લેધે અનાન્યો શાવુલ પાહે જ્યો, તિના પોર પોતાનો હાથ મેસ્યો ને કહયુ, “જેતાર તુ આવતલો તેતાર જ્યુ ઈસુ તાહરી હાથે વાત કરી ચુ ઈસુ મને તાહરી પાહે મોકલ્યો. ને તુ પાસો દેખતો હોવહી ને પવિતર આત્માથી ભરાય જાહી.” ને આનાન્યો તિનાને બાપતિસમાં આપ્યુ પસેણ ચે ખવાનુ ખાધુ. ને તિનાને તાકેત પાસી આવી.

![](https://cdn.door43.org/obs/jpg/360px/obs-en-46-06.jpg)

તિના ટેમમાં શાવુલ યરુસાલેમાંના યહૂદી માણહુને ઈસુની વાત કહવાનુ સાલુ કર્યુ, “ઈસુ ઈસવરનો પોર્યો સે,” યહૂદી માણહુ વિચાર કરવા લાગ્યા કી જ્યુ માણેહ વિસવાસી માણહુને બાધીબાધી જેલમા પુરતલો ચુ હોદે હાય ઈસુ પોર ભરહો કરી લેધો, શાવુલ યહૂદી માણહુ અગોલ ઈસુ ખ્રિસ્ત સે હિયુ સાબિત કરતલો.

![](https://cdn.door43.org/obs/jpg/360px/obs-en-46-07.jpg)

ઘણા દાહળા પસી યહૂદી આગેવાનુ શાવુલને મારી નાખવા કલા કરી, ચે હહેરુના બાયણે, માણહુ નજેર રાખવા મોકલ્યા કી તીનાને મારી નાખે. પુન શાવુલ તિનિ કલાને જાણી જ્યો, ને તિનાના હગાંથયા તિનાને બસાવા મદેક કરી. એક રાતે ચે તિનાને કોટ પોરથો સારલાંમાં બાહાળીકને ઉતારી દેધો. દમસકથો નિકેલતેદ ચુ ઈસુની વાત કહવાનુ સાલુ કરી દેધુ.

![](https://cdn.door43.org/obs/jpg/360px/obs-en-46-08.jpg)

શાવુલ પુઠેર્યાને ભેગાયવા યરુસાલેમ જ્યો, પુન ચે તિનાથી બિહી રહલા, પસી બારનાબાસ નામનો એક પુઠેર્યો શાવુલને પ્રેરિતુ પાહે લિજ્યો, ને શાવુલ કકિહી દમસકમા હિમેતથી ઈસુની વાત માણહુને કહી ચુ તિનુને જણાયુ. ને પસી પુઠેર્યા શાવુલને સ્વીકારી લેધો.

![](https://cdn.door43.org/obs/jpg/360px/obs-en-46-09.jpg)

ઘણા બધા માણહુ યરુસાલેમની સતાવણીથી સેટે સેટા જતા રહલા તિનુમાં થોળાક અંત્યોખ હહેરમાં જતા રહલા, ને સાહા ઈસુની વારુ ખબેર માણહુને કહી હમલાવી, અંત્યોખમાં વધાર યહૂદી ની હોતા, પુન તે હોદે તિનુમાથા ઘણા માણહુ વિસવાસી બણી જ્યા, બારનાબાસ ને શાવુલ ઈનુ નવા વિસવસી પાહે જ્યા. ચે હજુ વધાર ઈસુના બારમાં માણહુને હિકવી હકે, ને વિસવાસી માણહુને મજબુત કરી હકે, ને અંત્યોખમાં પેહલી આટો વિસવાસી માણહુ “ખ્રિસ્તી” તરીકે ઓલખાયા.

![](https://cdn.door43.org/obs/jpg/360px/obs-en-46-10.jpg)

એક દાહળે અંત્યુખના બધા ખ્રિસ્તી માણહુ ઉપાહ ને પરાથના કરતલા તેર પવિતર આત્મા તિનુને કહયુ, “બારનાબાસ ને શાવુલને માહરુ કામ કરવા અલેગ કરો, જિના લેધે મે તિનુને બોલાવલા સે, તેતાર અંત્યોખની મંડલી શાવુલ ને બારનાબાસના લેધે મુંડા પોર હાથ મેકીક પરાથના કરી, ને તિનુને બિજી જઘામા ઈસુની વારુ ખબેર કહવા મોકલ્યા, શાવુલ ને બારનાબાસ ઘણી બધી જાતના માણહુને ઈસુની વારુ ખબેર કહી હમલાવી ને ઘણા બધા માણહુ ઈસુ પોર ભરહો કર્યો.

*બાઈબલનો વાતરો :  પ્રેરીતોના કામ  ૮ : ૩, ૯ : ૧ -૩૧, ૧૧ : ૧૯-૨૬, ૧૩ : ૧-૩*

Audio: https://git.door43.org/OBS-TLF/rtw_obs/releases/download/v1/rtw_obs_v1_46_128kbps.m4a

## 47. ૪૭. ફિલિપી હહેરમાં પાવુલ ને સિલાસ.

https://openbiblestories.org/l/rtw/story-47/

![](https://cdn.door43.org/obs/jpg/360px/obs-en-47-01.jpg)

જેર શાવુલ આખા રોમમા જવાનુ સાલુ કર્યુ તેર ચુ આફાનુ નામ “પાવુલ” નો ઉપયોગ કરતલો, એક દાહળે પાવુલ ને તિનાનો હંગાથ્યો સિલાસ ઈસુની વાત કહવા ફિલિપી હેહેરમાં જ્યા. ચે તિના હેહેર બાહરા એક કોતળાની ધેળે એક પરાથનાઘોર હોતુ ચે સાહા જ્યા. ને સાહા માણહુ પરથના કરવા ભેગા હોય રહલા. તિનુને સાહા એક લુદિયા નામની બયેર ભેગાયી ચે એક વેપારી હોતી. ને ચે ઈસવરને પરેમ કરતલી ને તિનાની આરાધના કરતલી.

![](https://cdn.door43.org/obs/jpg/360px/obs-en-47-02.jpg)

ઈસવર લુદિયાનુ મન ઊઘળી નાસ્યુ કાહા કી ચે ઈસુની વારુ ખબેર પોર ભરહો કરતલી. ને ચે ને તિનિના ઘોરના બાપતિસમાં લેધુ, ચે પાવુલને ને સિલાસને આફિને ઘોર પરુણ્યા રહવા કહયુ, તિને ચેં તિનિના ઘોરના ભેગા રહયા.

![](https://cdn.door43.org/obs/jpg/360px/obs-en-47-03.jpg)

પાવુલ ને સિલાસ બધા માણહુને પરાથના ઘોરેત ભેગાયતલા. રોજ ચે સાહા જતલા, ને ભુતળુ સોહટેલી એક પોરેય સાહા ફિર્યા કરતલી. ને ભુતળાની મદેકથી ચે માણહુને તિનુનુ ભવિષ્ય કહિ દેતલી. ને ચે તિનીના સેઠુને ઘણા પસ્યા કમાય આપતલી.

![](https://cdn.door43.org/obs/jpg/360px/obs-en-47-04.jpg)

જેતાર ચે જતલા તેતાર ચે આયળ્યા કરતલી કી “ઈયે માણહુ મોટા ઈસવરના સેવકુ સે, ને હિયે બસવાનો રોહો દેખાળવા બાઝી રહયા”, હિનિ રિતે ચે કર્યા કરતલી તિને પાવુલ તિનિથી નારાજ હોય જ્યો.

![](https://cdn.door43.org/obs/jpg/360px/obs-en-47-05.jpg)

એક દાહળે ચે બયેર આયેળવાનુ સાલુ કર્યુ, તે પાવુલ ભુતળાને કહયુ, “ઈસુના નામમા હિનીમાથુ બાહરુ નિકલી જા.” ને તિનિત ટેમે ભુતળુ તિનીને સોળી દેધી.

![](https://cdn.door43.org/obs/jpg/360px/obs-en-47-06.jpg)

ને તિનિના શેઠુને ઘની રિહ લાગી, ચે જાણી જ્યા કી ભૂતળા વગેર ચે માણહુની ભવિષ્યની વાત ની કહી હકે. ને માણહુ તિનુને પસયાની આપે.

![](https://cdn.door43.org/obs/jpg/360px/obs-en-47-07.jpg)

તિને પેલી પોરેયના શેઠુ પાવુલને ને સિલાસને રોમન અધીકાર્યુ હોતા સાહાં લિજ્યા ને ચે તિનુને ઠોકયા ને જેલમા પુરી દેધા.

![](https://cdn.door43.org/obs/jpg/360px/obs-en-47-08.jpg)

ચે પાવુલને ને સીલાસને જેલમા ઘણી અઘાની જઘામાં રાખ્યા. તે હોદે ચે રાતે ઈસવરની આરાધના કરતલા.

![](https://cdn.door43.org/obs/jpg/360px/obs-en-47-09.jpg)

ઉસકાહલોત સાહા ધરતીકમ આયો ને જેલના બધા બાયણા ઉખળી જ્યા. ને બધા જેલ્યાની હાકેલે તુટી જ્યુ

![](https://cdn.door43.org/obs/jpg/360px/obs-en-47-10.jpg)

સાહા હાસેવાવાલો ધગળો જાગીકને ભાલ્યુ તે જેલના ભાયણા બધા ઉઘાળી જેલા હોતા, તિને ચુ ઘણો બિહી જ્યો. તિનાને લાગ્યુ કી બધા જેલા ઢાહી સુટયા હોવે. તિને ચુ જાતે મરી જવા વિચાર્યુ, (તિનાને અહી હોતુ કી બધા જેલ્યા ઢાહી સુટ્યા તે પસી રોમન રાજો મને મારી નાખહે.) પુન પાવુલ તિનાને કહયુ “ઉભો રેહ, પોતાને કચુ ની કરવા હમુ બધા ઈહાત હોયા.”

![](https://cdn.door43.org/obs/jpg/360px/obs-en-47-11.jpg)

દ્વારપાળ કાંપતો પાઉલ અને સિલાસની પાસે આવ્યો, અને પૂછ્યું “ઉદ્ધાર પામવા માટે હું શું કરું?” પાઉલે ઉત્તર આપ્યો, “જો તું પ્રભુ ઈસુ ખ્રિસ્ત પર વિશ્વાસ કરીશ તો તું અને તારા ઘરના ઉદ્ધાર પામશો.”ત્યારે દ્વારપાળ પાઉલ અને સિલાસને પોતાના ઘરે લઈ ગયો અને તેના ઘાવ ધોયા. પાઉલે દ્વારપાળના ઘરના બધા લોકોને ઈસુની સુવાર્તા સંભળાવી.

![](https://cdn.door43.org/obs/jpg/360px/obs-en-47-12.jpg)

દ્વારપાળે અને તેના પૂરા પરિવારે ઈસુ પર વિશ્વાસ કર્યો અને બાપ્તિસ્મા લીધું. ત્યારે દ્વારપાળે પાઉલ અને સિલાસને ભોજન આપ્યું અને સાથે મળીને આનંદ કર્યો.

![](https://cdn.door43.org/obs/jpg/360px/obs-en-47-13.jpg)

બીજા દિવસે નગરના અધિકારીઓએ પાઉલ અને સિલાસને છોડી દીધા અને તેઓને આજ્ઞા આપી કે તમે ફિલિપીને છોડી દો. પાઉલ અને સિલાસ લુદિયા અને કેટલાંક અન્યમિત્રોની મુલાકાત પછી તેઓએ શહેર છોડી દીધું. ઈસુની સુવાર્તા ફેલાતી ગઈ. અને ખ્રિસ્તી સમુદાય વધતી ગઈ.

![](https://cdn.door43.org/obs/jpg/360px/obs-en-47-14.jpg)

પાઉલ અને અન્ય ખ્રિસ્તી આગેવાનોએ ઇસુ વિષે સુવાર્તા પ્રચાર કરવા અને શિક્ષણ આપવા ઘણા શહેરોની યાત્રાઓ કરી. તેઓએ મંડળીના વિશ્વાસીઓને ઉત્તેજન આપવા અને સુવાર્તા પ્રચાર કરવા માટે ઘણા પત્રો લખ્યા. તેમાથી કેટલાક પત્રો બાઇબલના પુસ્તકો બની ગયા.

*બાઇબલની એકવાર્તાઃ પ્રેરિતોનાં કૃત્યો ૧૬ઃ૧૧-૪૦*

Audio: https://git.door43.org/OBS-TLF/rtw_obs/releases/download/v1/rtw_obs_v1_47_128kbps.m4a

## 48. ૪૮. ઈસુ દ આવાવાલો મસિહા

https://openbiblestories.org/l/rtw/story-48/

![](https://cdn.door43.org/obs/jpg/360px/obs-en-48-01.jpg)

જેર ઈસવર દુનિયા બણાવી તેર બધુત વારુ ને પુરેપુરુ હોતુ, ને પાપ હોદે ની હોતુ, આદેમ ને હવા વારુ એક બિજાને પરેમ કરતલા, ને ચે ઈસવરને હોદે પરેમ કરતલા. મંદવાળ કી મરેણ કચુ ની હોતુ. જેહલુ ઇસવર આચા રાખતલો હેહલી દુનિયા હોતી.

![](https://cdn.door43.org/obs/jpg/360px/obs-en-48-02.jpg)

હવાને સેતેરવા સેતાન વાળીમાં ગહળાનુ રુપ લેકને વાત કરી. પસી આદમ ને હવા ઈસવર વિરુધ્ધ પાપ કર્યુ, તેરથી આખી દુનિયામાં બધા માણહુ માંદા હોવે ને મરી જાય.

![](https://cdn.door43.org/obs/jpg/360px/obs-en-48-03.jpg)

આદેમ ને હવા પાપ કરવાથી બિજી એક ઘણી મોટી વાત બણી, ચે ઈસવરના દુશ્મનુ બણી જ્યા. ને હિનાનુ પરીણામ ઈયુ આયુ કી તિનુના બધા માણહુ પાપી સોભાવ હાથે જલમે, ને ચુ હોદે ઈસવરનો દુશ્મન સે, ને ઈસવર ને માણેહની વસેનો સંબેધ પાપની લેધે તુટી જ્યો, પુન ઈસવર પાહે હિયુ સંબધ પાસો જોળવાની યોજના હોતી.

![](https://cdn.door43.org/obs/jpg/360px/obs-en-48-04.jpg)

ઈસવર વાયદો કર્યો કી હવાના વંશમાનો એક જણો સેતાનના મુડાને સુંદી નાખહે. ને સેતાન તિનાની પુઠીને સુદહે, હિનાનો અરેથ ઈયુ હોયો કી સેતાન મસિહને મારી નાખહે, પુન ઈસવર તિનાને પાસો જિવતો કરહે ને પસી મસિહ સેતાનની તાકેતને કાયેમ લેધે સુંદી નાખહે. ઘણા વરહુ પસી ઈસવર જાણ કરી કી ઈસુદ મસિહ સે.

![](https://cdn.door43.org/obs/jpg/360px/obs-en-48-05.jpg)

જેતાર ઈસવર દુનિયાને જળપ્રલયથી નાશ કર્યો, તેર મોટી નાવળી બણાવા કહયુ હિનાથી ઈસવર પોર ભરહો કરવાવાલા બસી હકાય. હિની રીતે બધા પોતાના પાપુ લેધે નાશ હોવા લાયક સે. પુન ઈસવર ઇસુને આપ્યો કી જ્યુ કોઇ તિના પોર ભરહો કરે તિનાને બસાવી લેવાયહે.

![](https://cdn.door43.org/obs/jpg/360px/obs-en-48-06.jpg)

વરહુથી પુજારા માણહુ લેધે ઈસવરને ભોગુ સળાયા, તિનાથી ખબેર પળે કી પાપ લેધે દંડ જરુરી સે. પુન હિયે ભોગુ તિનુના પાપુને સેટા ની કરી હકતલા, ઈસુ એક મોટો પુજારો સે, બિજા પુજારા હવાલ ની, ચુ પોતાની જાતનો ભોગ સળાયો કાહાકી દુનિયાના માણહુના પાપુને સેટા કરી હકે. ઇસુ પુરેપુરો મોટો પુજારો સે, કાહા કી બધાના પાપુનો દંડ પોતે લેય લેધો.

![](https://cdn.door43.org/obs/jpg/360px/obs-en-48-07.jpg)

ઈસવર અબ્રાહમને કહયુ “દુનિયાના બધિ જાતના માણહુ તાહરાથી ભરકેતવાલા હોવહે” ઈસુ અબ્રાહમના વંશનો હોતો.

![](https://cdn.door43.org/obs/jpg/360px/obs-en-48-08.jpg)

બધી જાતિ તિનાથી ભરકેતવાલી સે, કાહા કી જ્યુ કોઈ ઇસુ પોર ભરહો કરે તિનાને પાપુમાથો બસાવ હોવે. ને અબ્રાહમનુ આત્મિક પોર્યુ બણી જાય, જેર ઈસવર અબ્રાહમને આફાનો પોર્યો, ઇસહાકનો ભોગ સળાવા કહયુ, તેતાર ઈસવર ઈસહાકની બદલે ભોગ સળાવા એક ઘેટું પુરુ પાડયુ. આપણુ બધા આપણા પાપુ લેધે મોતને લાયક સે. પુન ઈસવર આફાનુ ઘેટું ઈસુને આપેણ લેધે મરવા મોકલ્યુ.

![](https://cdn.door43.org/obs/jpg/360px/obs-en-48-09.jpg)

જેર ઈસવર મિસર દેહમાં સેહલી મહામારી મોકલી, તેર ચુ બધા ઈસરાયેલી કુટુંબુને એક ઘેટાનો ભોગ સળાવા ને તિનાનુ લોહી પોતાના ઘોરના બાયણાના સોટખાની સારેમેર લગાળવા કહયુ. જેર ઈસવર લોહી ભાલ્યુ તેર ચુ, ચું ઘોર વટીકને અઘો ઢય જ્યો. ને તિનુના પેહેલ ખોલ્યાનો નાશ કર્યો. ઈના બણાવને વટવાનો તિહવાર નિતે પસ્ખાપર્વ કહવાય.

![](https://cdn.door43.org/obs/jpg/360px/obs-en-48-10.jpg)

ઈસુ આપણા વટવાનુ ઘેટું સે. ચુ પુરેપુરો ને પાપ વગેરનો હોતો. ને તિનાને વટવાના તિહવારની ટેમે મારી નાખલો, જેર કોઈ માણેહ ઈસુમાં ભરહો કરે તેર ઈસુ તિનાના પાપુની કિમેત સુકવી દેય. ને ઈસવરની સિક્સા તિના પોર ની રેહે.

![](https://cdn.door43.org/obs/jpg/360px/obs-en-48-11.jpg)

ઈસવર ઈઝરાયેલને વાયદો કરલો કી ચે તિનાના ટાલલા માણહુ સે. પુન હાય ઈસવર એક નવો કરાર કર્યો. ચુ બધા માણહુ લેધે સે. ઇના નવા કરારથી કોઈ પુન જાતનો કોઈ પુન મણેહ ઈસુ પોરના ભરહાથી ઈસવરના માણહુમાંનો બણી હકે.

![](https://cdn.door43.org/obs/jpg/360px/obs-en-48-12.jpg)

મુસો એક મોટો પરબોધક હોતો. ચુ ઈસવરની વાત દેખાળી. પુન ઈસુ બધા પરબોધકુમાં મોટો હોતો. ચુ ઈસવર સે, ચુ જ્યુ કહયુ ને કર્યુ ચું બધુ ઈસવરના સબ્દા ને કામુ હોતા. તિના લેધે ઈસુને ઈસવરનો સબ્દો કહવાય.

![](https://cdn.door43.org/obs/jpg/360px/obs-en-48-13.jpg)

ઈસવર દાવિદ રાજાને વાયદો કરલો કિ તિનાના વંશમાનો એક જણો ઈસવરનાં માણહુ પોર બધા દાહળા રાજ કરહે. કાહા કી ઈસુ ઈસવરનો પોર્યો મસિહ સે. હિયુ ખ્રિસ્ત સે. ચુ દાવિદનો ખાસ વંશજ સે. ચુ બધા દાહળા રાજ કરી હકે.

![](https://cdn.door43.org/obs/jpg/360px/obs-en-48-14.jpg)

દાવિદ ઈઝરાયેલનો રાજો હોતો, પુન ઈસુ આખી દુનિયાનો રાજો સે. ચુ પાસો આવહે, ને આફાના રાજમા હાસી રીતે ને સાંતિમાં કાયેમ રાજ કરહે.

*બાયબલનો વાતરો: ઉત્પતિ ૧-૩,૬,૧૪,૨૨; નિરગમન ૧૨,૨૦; ૨ શમુએલ ૭; હિબ્રુ ૩:૧-૬, ૪,૧૪-૫:૧૦, ૭:૧-૮:૧૩,૯:૧૧-૧૦:૧૮; પ્રકટીકરણ ૨.*

Audio: https://git.door43.org/OBS-TLF/rtw_obs/releases/download/v1/rtw_obs_v1_48_128kbps.m4a

## 49. ૪૯. ઈસવરનો નવો કરાર.

https://openbiblestories.org/l/rtw/story-49/

![](https://cdn.door43.org/obs/jpg/360px/obs-en-49-01.jpg)

એક દૂત મરિયમ નામની કુવારલીને કહયુ કી તુ ઈસવરના પોર્યાને જલેમ આપહી. ચે હજુ કુવારલીત હોતી. ચે એક પોર્યાને જલેમ આપ્યો ને ચે તિનાનુ નામ ઈસુ રાખ્યું, તિને ઈસુ ઈસવર ને માણેહ હોદે સે.

![](https://cdn.door43.org/obs/jpg/360px/obs-en-49-02.jpg)

ઈસુ ઘણા બધા સમેતકાર કર્યા ને સાબિત કર્યુ કી ચુ ઈસવર સે, ચુ પાણી પોર સાલ્યો. વાયવાધેણને ટાઢી પાળી ને ઘણા માદલાને વારુ કર્યા, ને ભુતળાને કાઢયા, ને મરલાને જિવતા કર્યા. ને પાંસ રોટા ને બે માસલ્યુ પાંસ હજાર માણહુને હોય જાય હહી બદલી નાખ્યુ.

![](https://cdn.door43.org/obs/jpg/360px/obs-en-49-03.jpg)

ઈસુ એક મોટો હિકાળવાવાલો ગુરુ હોદે હોતો, ને ચુ અધિકારથી બોલતલો. કાહા કી ચુ ઈસવરનો પોર્યો હોતો. ચુ બિજા માણહુને ઈની રિતે હુકવાળ્યુ કી, તહુ દહીં પોતાના પોર તહીં બિજા માણહુને પરેમ કરો.

![](https://cdn.door43.org/obs/jpg/360px/obs-en-49-04.jpg)

ચુ અહિ હોદે હિકવાળ્યુ કી તહુ બધી વસ્તુ ને માલમિલકેત કરતે વધાર ઈસવર પોર પરેમ કરવો જોવે.

![](https://cdn.door43.org/obs/jpg/360px/obs-en-49-05.jpg)

ઈસુ કહયુ ઈસવરનુ રાજ ઈની દુનિયાની બધીત વસ્તુ કરતે વધાર કિમતિ સે. ઈસવરના રાજમાં હોવુ હિયુ કોઈ પુન માણેહને લેધે વારુ સે. ઈસવરના રાજમાં જવા લેધે તોહરે તોહરા પાપુની માફી મેલેવવી જરુળી સે.

![](https://cdn.door43.org/obs/jpg/360px/obs-en-49-06.jpg)

ઈસુ કહયુ ઘણા માણહુ તિના પોર ભરોહો કરહે ને બસી જાહે, પુન ઘણા બધા હહિ ની કરે. થોળાક માણહુ વારુ ભોય હરખા હોય, ચે ઈસુની વારુ ખબેર પોર ભરહો કરીકને બસી જાય, ને થોળાક વાટની કાઠલી ભોય હરખા હોયા, જિનામાં ઈસવરનુ બિ ની ઉગતુ, ને કચુ ફળની આપતુ. હેહલા માણહુ ઈસવરની વાત ની માનતા ને ઈસવરના રાજમાં ની જાય હકતા.

![](https://cdn.door43.org/obs/jpg/360px/obs-en-49-07.jpg)

ઈસુ હિકવાળ્યુ કી ઈસવર પાપીને ઘણો પરેમ કરે, ચુ તિનુને માફ કરવા માંગે, ને પોતાના પોર્યા બણાવા માંગે.

![](https://cdn.door43.org/obs/jpg/360px/obs-en-49-08.jpg)

ઈસુ હમુને અહી હોદે કહયુ કી ઈસવર પાપને ધિકકારે, જેર આદેમ ને હવા પાપ કરયુ તેર તિનાની અસેર આખી માણેહ જાતિ પોર હોવી. તિનાનુ પરીનામ ઈયુ હોતુ કી, દુનિયાના બધાત માણહુ પાપ કરે, ને ઈસવરથી સેટા સે, તિને બધા માણહુ ઈસવરના દુશ્મન બણયા.

![](https://cdn.door43.org/obs/jpg/360px/obs-en-49-09.jpg)

પુન ઈસવર દુનિયાના માણહુ પોર એતરો બધો પરેમ કર્યો કી ચુ આફાનો એકનો એક પોર્યો આપી દેધો જ્યુ કોઈ તિના પોર ભરહો કરે તિનાને પાપની સજા ની હોવે, પુન ચુ ઈસવર ભેગો બધા દાહળા રહચે.

![](https://cdn.door43.org/obs/jpg/360px/obs-en-49-10.jpg)

તોહરા પાપ લેધે તહુ ગુનેગાર હોયા ને તહુને મોત સે, ને બધા દાહળા નરેકના ભાગિદર હોયા. ઈસવર તોહરી પોર ગુસે હોવો જોવે, પુન ચુ તિનાનો ઘુસો તોહરા બદલે ઈસુ પોર ઉતાર્યો. જેતાર ઈસુ કુરોસ પોર મરેણ પામ્યો તેતાર, ચુ આપણી સિકસા વેઠી.

![](https://cdn.door43.org/obs/jpg/360px/obs-en-49-11.jpg)

ઈસુ કદી કચુ પાપની કર્યુ, પુન તે હોદે ચુ સજા વેઠી ને મોત પસેદ કર્યું. ચુ પુરે પુરા ભોગના રુપમાં આપણાને દુનિયાના બધા માણહુ લેધે પોતાની જાતને આપી દેધી. ઈસુ આફાનો ભોગ આપ્યો તિને ઈસવર ગમે તેહલુ પાપ માફ કરી હકે, મોટામ મોટા પાપને હોદે.

![](https://cdn.door43.org/obs/jpg/360px/obs-en-49-12.jpg)

તહુંને વારુ કામુ ની બસાય હકે, કોય પુન એહલુ કામ ની મલે જીનાથી તહુ ઈસવર હાતેના સંબેધમાં આય હકો, ઈસુ એતરોદ તોહરા પાપુને વારુ કરી હકે. તોહરે ભરહો કરવો જોવે કી ઈસુ ઈસવરનો પોર્યો સે. ચુ તોહરી જધા પોર કુરોસ પોર ભોગ ભણી જ્યો, ને ઈસવર તિનાને પાસો મરેલામાથો જિવતો કરી દેધો.

![](https://cdn.door43.org/obs/jpg/360px/obs-en-49-13.jpg)

જ્યુ કોઈ ઈસુ પોર ભરહો કરહે ને પ્રભુ હહીં માનહે ને તિનાને ઈસવર બસાવહે. પુન જયુ કોઈ ની ભરહો કરતુ ને ની માનતુ તિનાને ની બસાવે. તહુ કોય હોયા, કાહના હોયા, આદમી હોયા કી બયરે, માલદાર હોયા કી ગરીબ, જુવાન હોયા કી ડાહલા, હિયે વાત મોટી ની મલે, ઈસવર તહુને પરેમ કરવા બાઝી રહયો ને ચુ અહિ આચા રાખે કી તહુ ઈસુ પોર ભરહો કરો. તિનાથી તોહરી હાથે એક ઢુકળાનો સંબેધ રાખી હકે.

![](https://cdn.door43.org/obs/jpg/360px/obs-en-49-14.jpg)

ઈસુ તહુને તિના પોર ભરહો કરવા ને બાપતિસમા લેવા નોતરુ નાખે. કો તહુ ઈની વાત પોર ભરહો કરો કી ઈસુ મસિહા સે ને ચુ ઈસવરનો એકનો એક પોર્યો સે. કો તહુ માનો કી તહુ પાપી સે ને ઈસવરની સિકસાને લાયક સે? કો તહુ ભરહો કરો કી ઈસુ તોહરા પાપુ લેધે કુરોસ પોર મરી જયો?

![](https://cdn.door43.org/obs/jpg/360px/obs-en-49-15.jpg)

એતરે તહુ ઈસુ પોર ને ચુ જ્યુ કર્યુ તિના પોર ભરહો કરો તે તહુ એક વિસવાસી (ખ્રિસ્તી) હોયા, ઈસવર તહુંને સેતાનના રાજના અંધારામાથા બાહેર કાઢયા ને ઈસવર ઈજોળાના રાજમાં રાખયા. ઈસવર તોહરા જુનલા પાપી રોહાને લેકને નવલો હાસો રોહો આપ્યો.

![](https://cdn.door43.org/obs/jpg/360px/obs-en-49-16.jpg)

જો તહુ એક વિસવાસી (ખ્રિસ્તી) હોયા તે ઈસુ જ્યુ કર્યુ તિનાથી ઈસવર તોહરા પાપુ માફ કરી દેધા. હાય ઇસવર તહુને દુસમન ની પુન ભાયબંધ માને.

![](https://cdn.door43.org/obs/jpg/360px/obs-en-49-17.jpg)

જો તહુ ઈસવરના ભાયબંધ ને ઈસુના સેવક હોય તે, ઈસુ જ્યુ જ્યુ હિકવાળે ચુ તોહરે પાલેણ કરવુ જોવે. જો તહુ વિસવાસી હોય તે હોદે પાપના ફાંદા તોહરી પાહે આવહે. પુન ઈસવર ભરહો કરવા લાયક સે તિને તહુ તોહરા પાપુ માની લોવ તે ચુ તહુને માફ કરવા તિયાર સે. ને ચુ પાપ હાંબો હોવાની તહુને તાકેત આપહે.

![](https://cdn.door43.org/obs/jpg/360px/obs-en-49-18.jpg)

ઈસવર કેહે કી તહુ બિજા માણહુ હાથે ભેગા હોયકને પરાથના કરો. તિનાનુ વસોન વાસો, ને તિનાનિ આરાધના કરો, ને ચુ આપણા લેધે કર્યુ ચે બિજા માણહુ ને સાકસી આપો. ઈયે બધી વાતે તહુને ઈસવર હાથે કાઠો સંબેધ રાખવા મદેક કરહે.

*બાઈબલનો વાતરો : રોમીયો ૩ : ૨૧-૨૬, ૫ : ૧-૧૧, યોહન ૩ : ૧૬, માર્ક ૧૬ : ૧૬, કલોસ્સીઓ ૧ : ૧૩-૧૪*

Audio: https://git.door43.org/OBS-TLF/rtw_obs/releases/download/v1/rtw_obs_v1_49_128kbps.m4a

## 50. ૫૦. ઈસુ પાસો આવહે.

https://openbiblestories.org/l/rtw/story-50/

![](https://cdn.door43.org/obs/jpg/360px/obs-en-50-01.jpg)

લગભગ બે હજાર વરહુથી દુનિયાના માણહુ વધાર ને વધાર ઈસુ ખ્રિસ્તની વારુ ખબેર હામેલવા બાઝી રહયા. ને ભરોહો કરવાવાલા વધવા બાઝી રહયા. ને ઈસુ કહલુ કી ચુ દુનિયાના સેહલા ટેમમાં પાસો આવહે. ભલે ચુ આજ લગી ની આયો પુન પોતે કહલી વાત પુરી કરહે.

![](https://cdn.door43.org/obs/jpg/360px/obs-en-50-02.jpg)

જેતાર આપણુ ઈસુ પાસો આવાની વાટ જોવા બાઝી રહયા, તેતાર ઈસવર,આપણુ પવિતર જિણગી જિવજે ને તિનાને માન આપજે હીયે આચા રાખે. ને આપણુ બિજાને હોદે તિનાની વાત કહજે હિયે હોદે આચા રાખે. જેતાર ઈસુ ઈની દુનિયામાં હોતો તેતાર કહલુ કી “માહરા પુઠેર્યા ને, મને માનવા વાલા બધાં માણહુ દુનીયાની બધીત જધામાં જાયકને ઈસવરના રાજની વારુ ખબેર કહચે, ને પસીદ દુનીયાનો અંત આવહે.”

![](https://cdn.door43.org/obs/jpg/360px/obs-en-50-03.jpg)

ઘણા માણહુ હજુ ઈસુના બારામા ની હામેલુ મલે. તિને ઈસુ હરગે જતા પેહલો કહલુ કી જ્યે કદી વારુ ખબેર ની હામલી હોય તિનુ ને વારુ ખબેર કહો. ચુ કહયુ “જોવ ને બધી જાતના માણહુને પુઠેર્યા બણાવો. ખેતરુનો પાક વાઢવા આયરહયો.”

![](https://cdn.door43.org/obs/jpg/360px/obs-en-50-04.jpg)

ઈસુ અહી હોદે કહયુ કી “એક સાકેર પોતાના માલિક કરતે મોટો ની મલે”, દહીં ઈની દુનીયાના માણહુ મને ની ગણકાર્યો, તહિ ચે તહુને હોદે વેલ્હા પાળહે. ને મારી નાખહે, ને ઈની દુનીયામા તહુને વેઠવુ પળહે. પુન કાઠા રહજો ઈની દુનિયામા રાજ કરવાવાલા સેતાનને મે હરાવલો સે. તહુ સેહલે લગી માહરુ માનહો તે ઈસવર તહુ ને બસાવહે.”

![](https://cdn.door43.org/obs/jpg/360px/obs-en-50-05.jpg)

જેતાર દુનિયાનો અંત આવહે તેર માણહુને કો હોવહે તિના બારામા ઈસુ આફાના પુઠેર્યાને એક વાતરો હમલાયો. “એક માણેહ આફાના ખેતોરમાં વારુ બિ વાયુ. જેતાર ચુ હુવતલો તેતાર તિનાના દુશમનુ ખરાબ બી, વારુ બી ભેગુ વાયકને ઢહી જ્યા.”

![](https://cdn.door43.org/obs/jpg/360px/obs-en-50-06.jpg)

જેતાર ચુ ઉગ્યુ, તેતાર તિના માણેહનો સાકેર કહયુ, માલીક તુ તે ખેતોરમાં વારુ બિ વાવલુ, તે પસી ઈયે ખરાબ બી કકિહી ઉગયુ, મલિક કહયુ “કોઈક દુશમન હિયે બી વાયુ હોહે.”

![](https://cdn.door43.org/obs/jpg/360px/obs-en-50-07.jpg)

સાકેરુ કહયુ કો “હમુ જાયકને ચે ખરાબ બીના સોળવાને ઉખેળી નાખજે,” ની તહુ હહી કરહો તે તહુ વારુ ગહુને હોદે ઉખેળી નાખહો. વાઢવાના ટેમ લગી વાટ જોવો ને “વાઢતી ટેમે તિનુ ખરાબ બીના સોળુને ભેગા કરીક ને હલગાય દેજો. ને ગહુને માહરી મુહટીમાં લાવજો.”

![](https://cdn.door43.org/obs/jpg/360px/obs-en-50-08.jpg)

પુઠેર્યા ઈના વતરાનો અરેથ ની હમજી હકયા, તિને ચે ઈસુને હમજાળવા કહયુ. ઈસુ કહયુ.” જ્યુ માણેહ વારુ બિ વાયુ ચુ મસિહ સે, ને ખેતોર સતેણ દુનીયા સે. ને વારુ બિ ઈસવરના રાજના માણહુને દેખાળે.”

![](https://cdn.door43.org/obs/jpg/360px/obs-en-50-09.jpg)

ને ખરાબ બિ એતરે ખરાબ માણહુ, ને ખરાબ બી વાવાવાલો દુશમન સતેણ સેતાન સે. ને નુણવાનુ એતરે દુનીયાનો અંત. ને પાક નુણવાવાલા ઈસવરના દુતુ સે.

![](https://cdn.door43.org/obs/jpg/360px/obs-en-50-10.jpg)

જેતાર દુનિયાનો અંત આવહે તેતાર જ્યે માણહુ સેતાનના સે તિનુ બધાને દુતુ ભેગા કરહે. ને તિનુને હહેલતી ને કદી ની ઓલવાય હેહલી આગમાં નાખી દેહે, સાહા ઘણી વેલ્હા સે. સાહા માણહુ રળહે ને કકેલહે. ને ઈસુ પોર ભરહો કરવાલા માણહુ ઈસવરનાં રાજમાં દાહળા હવાલ પપેલહે.

![](https://cdn.door43.org/obs/jpg/360px/obs-en-50-11.jpg)

ઈસુ કહયુ કી દુનીયાના અંત પેહલો ચુ ધરતી પોર પાસો આવહે. જિની રીતે ચુ જેલો તિનીદ રીતે ચુ પાસો આવહે. ચુ માણેહની દેહી હરખી દેહીમા હોહે ને વાદલા પોર પાસો આવહે. જેતાર ચુ પાસો આવહે તેતાર જ્યે વિસવાસી મરી જેલા સે, ચે પાસા જિવતા હોવહે ને, ઈસુને ભેગાયહે.

![](https://cdn.door43.org/obs/jpg/360px/obs-en-50-12.jpg)

ને તિને ટેમે જ્યે વિસવાસી જિવતલા હોહે તિનુને હરેગમાં લેય લેવાયહે. ને જ્યે મરલામાંના જ્યે જિવતા હોય જેલા તિનુ ભેગા ભેગાય જાહે. ચે બધા ઈસુ ભેગા હોહે, ને હિના પસી ઈસુ પુરેપુરી સાંતિમાં ને એકતામાં આફાના માણહુ ભેગો બધા દાહળા રહચે.

![](https://cdn.door43.org/obs/jpg/360px/obs-en-50-13.jpg)

ઈસુ કહલુ કી જયુ કોય તિના પોર ભરહો કરહે તિનુને ચુ મુગટ આપહે. ચે કાયેમ ઈસવર ભેગા સાંતિમાં રહચે.

![](https://cdn.door43.org/obs/jpg/360px/obs-en-50-14.jpg)

પુન જ્યે ઈસુ પોર ભરહો ની કરે તિનુને ચુ નીયો કરહે, ને તિનુને નરેકમાં નાખી દેહે. સાહા ચે વેલ્હામાં બધા દાહળા રળહે ને કકેલહે. કદી ની ઓલાય હેહલી આગ તિનુને કાયેમ સોહટ્યા કરહે ને, કિળા તિનુને કયળ્યા કરહે.

![](https://cdn.door43.org/obs/jpg/360px/obs-en-50-15.jpg)

જેતાર ઈસુ પાસો આવહે તેતાર ચુ સેતાનને ને તિનાના રાજને પુરેપુરુ નાશ કરી નાખહે. ને સેતાનને ચુ નરેકમાં નાખી દેહે. સાહા ચુ ને ઈસવરનુ ની માન્યા ચે બધા બલ્યા કરહે.

![](https://cdn.door43.org/obs/jpg/360px/obs-en-50-16.jpg)

કાહા કી આદમ ને હવા ઈસવરની વાત ની માન્યા, ને દુનિયામાં પાપ આયુ, તિના લેધે ઈસવર તિનુને હરાપ આપ્યો, ને તિનુનો નાસ કરવાનુ નકકી કર્યુ, પુન એક દાહળે ઈસવર નવલી ધરતી ને નવલા હરેગને બણાવહે. ને ચે પુરેપુરી હોહે.

![](https://cdn.door43.org/obs/jpg/360px/obs-en-50-17.jpg)

ઈસુને તિનાના માણહુ નવલી ધરતી ને નવલા હરેગમાં રહચે. ને ઈહાં જ્યુ કય હોયુ તિના પોર ઈસવર કાયેમ રાજ કરહે. ને ચુ બધા આહવા નુસી નાખહે. ને સાહા કદી, દુખ, વેલ્હા, નિરાસા, ને રળવાનુ, ને મોત ની હોય. ને ચુ બધા દાહળા ઈસવરનાં માણહુ ભેગો રહચે.

*બાઈબલનો વાતરો : માથ્થી ૨૪:૧૪;૨૮:૧૮; યોહાન ૧૫:૨૦, ૧૬:૩૩; પ્રકટીકરણ ૨:૧૦, માથ્થી ૧૩:૨૪-૩૦,૩૬-૪૨; ૧ થેસ્સાલોનિકિયા ૪:૧૩, ૫:૧૧,  યાકૂબ ૧:૧૨; માથ્થી ૨૨:૧૩; પ્રકટીકરણ ૨૦:૧૦, ૨૧:૧-૨૨:૨૧*

Audio: https://git.door43.org/OBS-TLF/rtw_obs/releases/download/v1/rtw_obs_v1_50_128kbps.m4a