# unfoldingWord Open Bible Stories — Shumcho

- Language code: `scu`
- Canonical page: https://openbiblestories.org/l/scu/
- Stories in this file: 50 of 50
- Published by: OBS-TLF
- Last release: 2026-06-26
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Shumcho translation; it is not a translation of the whole Bible.

## 1. मुलुक  रा जुरऊ।

https://openbiblestories.org/l/scu/story-1/

![](https://cdn.door43.org/obs/jpg/360px/obs-en-01-01.jpg)

ओशि यो परमेश्‍वरुस जुमऊ लोमशित सिङ -सङ जुराऊ। दोक टु दयारु नंऊ छे-तोई ओदो सिङरा जुराऊ। परमेश्‍वरुस मुलुक जुरऊ ज्ञपतिङ दो खाबङबङ मेननङ छोयो मातोई, छु लोननङ परमेश्‍वरुस दोननंऊ छोयो माजुरऊ तोई। दत लि परमेश्‍वरु जिवा “ तिऊ” थोरिङ ठुरातु पोसी तोई।

![](https://cdn.door43.org/obs/jpg/360px/obs-en-01-02.jpg)

दत परमेश्‍वरुस रिंऊ, “ छति वङछोत।” दत “छति” वंऊ जेऊ। परमेश्‍वरुस तंऊ “छति” ऐपो तश दोरा “नेन” लोऊ। अला दोक दोरा खाबङबङुस खेचौ लऊ दोरा दोक “मुन” लोऊ। परमेश्‍वरुस मुलुक जुरामऊ ई दयार दोमया “छतिरा” जुरऊ पिनु।

![](https://cdn.door43.org/obs/jpg/360px/obs-en-01-03.jpg)

मुलुक जुरऊ निश दयारू नंऊ परमेश्‍वरुस रिंऊ “तिऊ” थोरिङ इत खेचौ गिनमा।” अला दत इत खेचो वंऊ जेऊ। परमेश्‍वरुस दो खेचो वंई रा “नम” लोऊ।

![](https://cdn.door43.org/obs/jpg/360px/obs-en-01-04.jpg)

हुम दयार दोमया परमेश्‍वरुस रिंऊ, “ती इ जागऊ कट्ठा वङमा गिनमा अला फोसि मटङ तङमा गिनमा।” दोक फोसि मटङ रा “मुलुक” लोऊ अला “ती” रा समुन्‍द्रङ लोउ। परमेश्‍वरुस तंऊ कि छे दोगुस जुरामिन तशे दो ऐपो तश।

![](https://cdn.door43.org/obs/jpg/360px/obs-en-01-05.jpg)

दत परमेश्‍वरुस रिंऊ, “मुलुकु नंऊ सिङ सङ बोठङ नङ सोलत टुङमा।” अला दत ओशियो वंऊ। परमेश्‍वरुस तंऊ छे दोगुस जुरामिन दो ऐपो तश।

![](https://cdn.door43.org/obs/jpg/360px/obs-en-01-06.jpg)

मुलुक जुराऊ प दयार दोमया परमेश्‍वरुस रिंऊ नमु नंऊ “छति” वङमा।” दत नी, गोलछङ, नङ, कर्मा तुरो। परमेश्‍वरुस मुलुकु नंऊ “छति” खेमा रा “नेन” नङ “मुन” नमदिंऊ नङ बोषङु नंऊ खेचो लमा रा जुराऊ। परमेश्‍वरुस तंऊ दोक छे लि लऊ दो एपो तश।

![](https://cdn.door43.org/obs/jpg/360px/obs-en-01-07.jpg)

ङा दयार दोमया परमेश्‍वरुस रिंऊ, “सारस छुमा ती रा बुंऊ पिनि अला प्‍यात नमु यपु जेई।” ओशि यो परमेश्‍वरुस तिऊ नंऊ पोसि सिङ छुमा नङ अला प्‍यात पङरा जुरऊ। परमेश्‍वरुस तंऊ जि ता ऐपो तष दत दोपङरा बोरङ खेऊ।

![](https://cdn.door43.org/obs/jpg/360px/obs-en-01-08.jpg)

मुलुक जुरऊ टु दयारु नंऊ परमेश्‍वरुस रिऊ, “माटङु नंऊ पोसि सिङ छुमा तोमा गिनमा।” अला परमेश्‍वरुस रिङमिन खोता यो वंऊ। अला छुमा, क्‍युमु पोसि तोई, मटङु प्रिनलति तोई, अला बोनङु छुमा तोई। परमेश्‍वरुस तऊं जि ता ऐपो तश।

![](https://cdn.door43.org/obs/jpg/360px/obs-en-01-09.jpg)

परमेश्‍वरुस रिंऊ, “जिरश उलपङ मी रा एनु रूंअङु अला रंऊ इ रुखि जुरामा। दो मुलुकु नंऊ सिङ- सङ छुमा पोऊ थोरिङ राज लरो।”

![](https://cdn.door43.org/obs/jpg/360px/obs-en-01-10.jpg)

दत परमेश्‍वरुस फतिङ थुतु मी रा जुराऊ, दत दोननंऊ सारस पोसमा शितिङ सा रा फुसुतु पिनु। दत दो इत शिंई मी वंऊ जेऊ। दो मिंऊ मिन आदम तोई। आदम रा पोसमा शितिङ परमेश्‍वरुस इत चेइ रि जुरऊ, अला री रा खोनमा शितिङ आदम रा ओदा तऊ पिनु।

![](https://cdn.door43.org/obs/jpg/360px/obs-en-01-11.jpg)

दो रिऊ किललिङ परमेश्‍वरुस निश मारुखि बोठङ टुंऊ पिनु- मिऊ जोलोमु बोठङ अला ऐपो नङ हलम रा छोतमा बोठङ। परमेश्‍वरुस आदम रा लोऊ कि दो रिऊ जोलोमु बोठङ नङ ऐपो, हलमु छोतमा बोठङ रा सोठऊ अला हलेस लि बोठङु ऊशो जामा लिई। दत लि दो बोठङु ऊशो जानङ ता दो सिऊ जेई।

![](https://cdn.door43.org/obs/jpg/360px/obs-en-01-12.jpg)

दत परमेश्‍वरुस रिंऊ, “फोबलङ रा खेचो पोसमा ऐपो मातेई।” ऊङ लि छुमा आदमु पङगोत वङमा मलिऊ।

![](https://cdn.door43.org/obs/jpg/360px/obs-en-01-13.jpg)

ओदोक परमेश्‍वरुस आदम रा डरा ञोनमतु तऊ। दत परमेश्‍वरुस इत हरको हनु दोरा इत योबलङ जुराऊ पिनु अला दोरा आदमु रा क्‍युफु जेऊ।

![](https://cdn.door43.org/obs/jpg/360px/obs-en-01-14.jpg)

ओसपरिङ आदमुस दोरा खोनु ओशि लोऊ, “जि ता अङ खोता तश। जीरा “योबलङ” लोमा, छु लोननङ जीरा फोबलङकु रत जुरामिन तश।” ओदोक फोबलङ रऊं अमा-अपा रा सोठाऊ ऐनु योबलङ नङ ञमफो वंऊ जेइ।

![](https://cdn.door43.org/obs/jpg/360px/obs-en-01-15.jpg)

परमेश्‍वरुस फोबलङ नङ योबलङ रा ऐनु रूअङ नङ जुराऊ। दोक दोरा बोरङ खेऊ दत लोऊ, “गोप चिगजा नङ कोत-पात तऊ मुलुक रा पुऊ पिननिश।” अला परमेश्‍वरुस तंऊ कि छे लि दोक जुराऊ दो हत ऐपो तश, अला दो सिङ तंऊ हत गरीस सिऊ। जि सिङ-सङ मुलुक जुरामऊ टु दयारु नंऊ वंऊ तोइ।

![](https://cdn.door43.org/obs/jpg/360px/obs-en-01-16.jpg)

दत शिनिश दयार तुमा परिङ परमेश्‍वरुस छे-लि लेन तश दो सिङ लेन पङरा क्‍याऊ पिनु। दोक शिनिश दयार रा बोरङ खेऊ नङ दोरा संखमा लोऊ पिनु, छु लोन- नङ परमेश्‍वरुस मुलुक जुरामा क्‍याऊ तोई। ओशि यो परमेश्‍वरुस मुलुकु नंऊ छे लि तश दो सिङ-सङ जुराऊ।

*उत्‍पत्‍ति पाठ 1-2 गुस बाइबलु इत कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_01_128kbps.m4a

## 2. पाप जि मुलुकु नंऊ तु।

https://openbiblestories.org/l/scu/story-2/

![](https://cdn.door43.org/obs/jpg/360px/obs-en-02-01.jpg)

आदम नङ दोऊ योबलङकुस परमेश्‍वरु जुरामिन शरे रिऊ नंऊ जेऊ दोनिश हत गरीस तोई। दोपोऊ नंऊ उङ लि गस्‍कुला माचुखि तोई, दत लि दोपङ रा उङरयो सोरोम मातुई तोई, छु लोन नङ मुलुकु नंऊ पाप मातोइ तोई। दो निश दयारो रिऊ नंऊ हलतु पोसि दत परमेश्‍वर नङ कमचित लोऊ पोसि तोइ।

![](https://cdn.door43.org/obs/jpg/360px/obs-en-02-02.jpg)

दत दो रिऊ नंऊ इत सबस तोइ। दो हत चलाक थङ तोइ। दोक दो योबलङ रा शुऊ, “छे दिमलेऔ परमेश्‍वरुस किमपङरा जि रीऊ हालेस लि बोठङु ऊशो मजामा रिऊ आ छे?

![](https://cdn.door43.org/obs/jpg/360px/obs-en-02-03.jpg)

दो योबलङकुस जवाब खेऊ, “परमेश्‍वरुस उलपङरा रिंऊ कि उलपङ दो ऐपो नङ हलमु छोतमा बोठङु मेननङ हलेस लि बोठङु ऊशो जामा लिइ। परमेश्‍वरुस ऊलपङरा रिंऊ कि अला दत किमपङक दो ऊशो रा जानङ अला दोरा थोक नङ लि, दत किमपङ सिऊ जेइ।”

![](https://cdn.door43.org/obs/jpg/360px/obs-en-02-04.jpg)

दत दो सबसुस योबलङ रा ज़वाब खेऊ, “जि दिमलेओ मेन। किमपङ मासिइ। परमेश्‍वर सेसि किमपङ दो ऊशो रा जानङ, किमपङ परमेश्‍वरु खोता वंऊ जेई अला दोऊ खोता ऐपो नङ हलम रा सोमजतमा लिइ।”

![](https://cdn.door43.org/obs/jpg/360px/obs-en-02-05.jpg)

दो योबलङुस तंऊ कि ऊशो ता शरे नङ ञमि तङमा तु तश। दो लि सिङ सेसमा गिनु तोई। दत दोक लि ऊशो ठऊ जऊ पिनु। दत दोक एनु फोबलङ रा लि दो ऊशो खेऊ अला दोक लि जऊ पिनु।

![](https://cdn.door43.org/obs/jpg/360px/obs-en-02-06.jpg)

ओदोस परिङ ओ, दो निशु मि खुलतु, दत दोनिशता पोता लगयतु कि दोनिश गस्‍कुला माचुखमिन तोइ। दोनिशुस पतलङ पङरा ञमफो जुरऊ दोगुस एनु डियङ रा खोपमा जुरऊ।

![](https://cdn.door43.org/obs/jpg/360px/obs-en-02-07.jpg)

दत फोबलङ नङ योबलङ दो रिऊ नंऊ हलतु परमेश्‍वरु कत रा गोऊ। दो निश परमेश्‍वरूरत बेऊ ञखु पिनु। दत परमेश्‍वरुस आदम रा कुतु, “का अमा तोन?” आदमुस जवाब खेऊ, “गस गिरङरा रिऊ नंऊ हलति गोऊ, अला ग बेऊ पिनु तोइ, छु लोन नङ ग गस्‍कुला माचुखमिन तोरेक। ओदोक ग ञखु पिनु।”

![](https://cdn.door43.org/obs/jpg/360px/obs-en-02-08.jpg)

दत परमेश्‍वरुस आदम रा शुऊ, “कनना उङक रिंऊ कि का गस्‍कुला माचुखमिन तोन? छे कस दो ऊशो जऊ आ, दो ऊशो रा गस कनरा माजामा रिंऊ तोइ? “फोबलङकुस जवाब खेऊ, “अङरा जि योबलङ खेसु मै जिगुस ओ अङरा दो ऊशो जामा खेसु। “दत परमेश्‍वरूस योबलङरा शुऊ, “कस जि छे लऊ पिनु ? “दत योबलङुस लोऊ, “सबसुस अङरत जि सिङ चलाकुस लमा रिंऊ।

![](https://cdn.door43.org/obs/jpg/360px/obs-en-02-09.jpg)

परमेश्‍वरुस सबस रा लोऊ, “कनरा खुङखुङसि। का रंऊ खोकु थोरिङ विनि अला फतिङ जई। का नङ जि योबलङकु छङ इतुस अलित रा माडामा लई अला कन चिगजा पङ अला दोऊ चिगजा लि इतुस अलित रा मडामा लइ। जि योबलङकु वंश पङ लि कन पिशा रा टेमि, अला का दोऊ बङखोन रा चिई।”

![](https://cdn.door43.org/obs/jpg/360px/obs-en-02-10.jpg)

दत परमेश्‍वरुस योबलङरा लोऊ, “ग कन चिगजा तामरा हत मआसामा जुकजेर नङ लऊ पिनि। का रंऊ फोबलङक रा बेन्‍नङ लई, अला दो कन थोरिङ हुकुम चलई।”

![](https://cdn.door43.org/obs/jpg/360px/obs-en-02-11.jpg)

परमेश्‍वरुस आदम रा लोऊ, “कस रंउ योबलङकु गौऊ अला अङ लोमिन दो मागोऊ। ओदोक मटङ वश वंङमिन तश, अला कनरा जामंऊ शितिङ हत कोशटङ तङमा वंई। छङ का सिऊ जेइ, अला कन डियङ मटङु नंऊ कुशु जेइ।” दो आदमुस एनु योबलङकु मिन हव्‍वा तऊ, दोऊ मोतलब, “जोलोम खेइ दो”, छु लोननङ दो सिङ जातु अमा वंइ। अला परमेश्‍वरुस आदम नङ हव्‍वा रा छुमंऊ पख्‍फास जुरामिन गस्‍कुला चुऊ।

![](https://cdn.door43.org/obs/jpg/360px/obs-en-02-12.jpg)

दत परमेश्‍वरुस रिंऊ, “छङ ऐपो नङ हलम रा सेसु दत मी अङ खोता वंऊ जेऊ, ओदोक दोपङरा जोलोमु बोठङु ऊशो जामा माखेमा गिनंमा कि दोपङ सोदायो शिई पोसि। “ओदोक परमेश्‍वरुस आदम नङ हव्‍वा रा दो रिऊ दकपा हनु पिनु। अला परमेश्‍वरुस ऊङरयो दो जोलोमु बोठङु ऊशो रा माजामा लोमा शितिङ दो रिऊ नंऊ तुमा पितंऊ रा हत शेच्‍चन स्वर्गु मी पङरा तऊ पिनु।

*उत्‍पत्‍ति पाठ 3 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_02_128kbps.m4a

## 3. होलडो।

https://openbiblestories.org/l/scu/story-3/

![](https://cdn.door43.org/obs/jpg/360px/obs-en-03-01.jpg)

गोप टेमु ज्ञपतिङ, मुलुकु नंऊ गोप मी पङ पोसि तोइ। दोपङ हलम नङ अला कोचङ वंउ जैऊ । हलम ओनचे खुचि वंऊ जेऊ कि परमेश्‍वरुस इत चेइ होलडोस जि सिङ मुलुक रा तोबा लमा सुनचतु।

![](https://cdn.door43.org/obs/jpg/360px/obs-en-03-02.jpg)

दत परमेश्‍वर नूह रत हत गरीस तोई। दो हलम मीपोऊ किललिङ पोसि इत धर्मी मी तोई। परमेश्वरुस नूह रा लोऊ कि दो इत हत चेइ होलडो रा सुमा तो। ओदोक, दोगुस नूह रा इत चेइ तिऊ नाव जुरामा शितिङ लोऊ।

![](https://cdn.door43.org/obs/jpg/360px/obs-en-03-03.jpg)

परमेश्‍वरूस नूह रा मोतमतोइ 140 मीटर शुई, 23 मीटर कुनि अला 13 .5 मीटर थोनपो नाव जुरामा लोऊ। नूहस दोरा सिङुस जुराऊ तोइ अला दोननंऊ हुम मंजिला, गोप पनठङ, इत खयम नङ खिडकी जुरामा तोइ। दो नावु नूह, दोउ पेरङ, नङ मटङु सिङ छुमा पङरा होलडोस बचई।

![](https://cdn.door43.org/obs/jpg/360px/obs-en-03-04.jpg)

नूहस मीपङरा तुई होलडोऊ बारे लोऊ अला दोपङरा परमेश्‍वरु कमचित गोमा शितिङ लोऊ, दोपङक दोऊ थोरिङ देंङ मालऊ। नुहस परमेश्‍वरू कमचित गोऊ। दो नङ दोऊ छङ पङक ओशियो नाव जुराऊ हलेया परमेश्‍वरूस जुरामा रिंऊ तोइ। छु लोननङ दो नाव हत चेइ तोइ अला दोरा जुरामा शितिङ गोप बोषङ लगयतु।

![](https://cdn.door43.org/obs/jpg/360px/obs-en-03-05.jpg)

परमेश्‍वरूस नूह नङ दोऊ पेरङ नङ रंऊ शितिङ अला छुमा रा शितिङ थकतु कटठा लमा लोऊ। ओसपरिङ सिङ वंऊ तोइ, दत परमेश्‍वरुस नूह रा लोऊ जि बेला दोऊ, दोऊ योबलङ, दोऊ हुम छङ, नङ दोऊ योबलङ पोऊ- सिङ मिलायऊ गेत मी नावु जेमा तोइ।

![](https://cdn.door43.org/obs/jpg/360px/obs-en-03-06.jpg)

परमेश्‍वरुस सिङ छुमा अला फोबलङक प्‍यात नङ योबलङक प्‍यात रा नूह रा पिनु दत दोपङ नावु जेमा लिऊ अला होलडो तुमपरिङ एपो पोसमा लिइ। परमेश्‍वरूस ओशि सिङ छुमा पोऊ खोता शिनिश फोबलङक प्‍य़ात नङ शिनिश योबलङक प्‍यात रा पिनु, दोपङरा पुजा तीमा शितिङ गिनमा तोइ। दत दोपङ सिङ नावु पुतु तोइ दत परमेश्‍वरूस नावु पितङ रा बोनत लऊ पिनु।

![](https://cdn.door43.org/obs/jpg/360px/obs-en-03-07.jpg)

दत छरबा तुमा छसु तशे, अला छरबा तुओ पोसु, तुओ पोसु । मारुकयतु निशनिसा निर नङ निशनिसा मुन शम छरबा तुओ पोसु। मुलुकु सिङ छला, या बसक्यङ चेइ से चेइ डोङखङ लि तिऊ नंऊ डुबयतु जेऊ।

![](https://cdn.door43.org/obs/jpg/360px/obs-en-03-08.jpg)

फोसि मटङु नंऊ पोसि तोइ मातोइ सिङ सिऊ जेऊ, दो मीपङ नङ छुमा रा सोठऊ उङ लि नावु तोइ दोपङ बचतु। दो नाव तिऊ थोरिङ याशु पोसु, अला नावु नंऊ सिङ छला रा डुबयतमा से बचऊ तऊ।

![](https://cdn.door43.org/obs/jpg/360px/obs-en-03-09.jpg)

छरबा डेमु ज्ञपतिङ, ङा ला शम दो नाव तिऊ थोरिङ याशु पोसु, अला ओदोसपरिङो ती गटो वंऊ जेऊ तोइ। दत इ दयार दो नाव इत डोङखंऊ थोरिङ टेखयतु, मुलुक अला लि तीउ खोपशमिन तोइ। हुम लाऊ ज्ञपतिङ, गटो-गटो डोङखङु पिशा पङ लि तङमा तु तोइ।

![](https://cdn.door43.org/obs/jpg/360px/obs-en-03-10.jpg)

दत अला निशनिसा दयारु ज्ञपतिङ, नूह गुस इत का रा दकपा खोनमा शितिङ पिनु छे दो ती फोसु तशा । दो का फोसि मटङ रा फंऊ नोस- जिस यपु पोसु, दत लि दोरा छोयो फोसि मटङ मापोरतु।

![](https://cdn.door43.org/obs/jpg/360px/obs-en-03-11.jpg)

दोऊ ज्ञपतिङ नूहस इत कोकचुरु रा दकपा पिनु, दत लि दोरा फोसि मटङ मापोरतु, दत दो नूह रा पोलठतु तु। दत इत हफ्‍ता ज्ञपतिङ दोक दो कोकचुरु रा हेलि पिनु, दत दो एनु चोचु इत जैतूनू यलगा कयुफु पोलठतु तु । ती लि गटो वंऊ जेऊ तोइ , अला सोलत पङ हेलि चोऊ तशे।

![](https://cdn.door43.org/obs/jpg/360px/obs-en-03-12.jpg)

नूह गुस इत हफ्‍ता अला शुंऊ पोसु अला हुम फेरा दो कोकचुरु रा हेलि दकपा पिनु। देसङ गोर, दोरा पोसमा शितिङ जागा पोरतु अला दो पोलठतु मतु। ती फौसु जेऊ तशे।

![](https://cdn.door43.org/obs/jpg/360px/obs-en-03-13.jpg)

निश लऊ ज्ञपतिङ परमेश्‍वरूस नूह रा लोउ, “छङ का कन पैरङ नङ सिङ छुमा पङ नावुस हन्‍तु जिरश। परमेश्‍वरूस दोपङरा बोरङ खेऊ, गोप चिगजा नङ कोत-पात जोरमयामा अला मुलुक रा पुंऊ पिनमा।” दत नूह नङ दोऊ पेरङ पङ नावुस दकपा हन्‍तु तु।

![](https://cdn.door43.org/obs/jpg/360px/obs-en-03-14.jpg)

नूह नावुस दकपा हन्‍तु तु ज्ञपतिङ, दोक पुजा तीमा शितिङ इत जागा जुरऊ अला पुजा तीमा शितिङ सिङ छुमा पोऊ नंऊ गटो छुमा रा कयुफु पुजा तिऊ पिनु। परमेश्‍वर दो पुजास हत गरीस तोइ अला नूह नङ दोऊ पेरङ पङ रा बोरङ खैऊ।

![](https://cdn.door43.org/obs/jpg/360px/obs-en-03-15.jpg)

परमेश्‍वरूस लोउ, “ग वादा लारोक कि मिंऊ लमिन छे लि हलम क्रमु लमिन ग छङ मटङ रा शाप मखेई अला होलडोस मुलुक रा माकयारोक, छु लोन नङ मी एनु थिकलकु थलतो पापी तश।

![](https://cdn.door43.org/obs/jpg/360px/obs-en-03-16.jpg)

दत परमेश्‍वरूस एनु वायदऊ थोनतु होमशित मुरङमुतती रा जुराऊ। तशपा लि नमु नंऊ मुरङमुतती तङमा तुरो, दत परमेश्‍वर सुनचति कि दोक छे वादा लऊ अला ओशियो दोऊ मीपङ लि सुनचति।

*गुस इत बाइबलु कोथा। ऊत्‍पति पाठ 6-8*

Audio: https://git.door43.org/OBS-TLF/scu_obs/releases/download/v1/scu_obs_v1_03_128kbps.m4a

## 4. अब्राहम नङ परमेश्‍वरू वायदा।

https://openbiblestories.org/l/scu/story-4/

![](https://cdn.door43.org/obs/jpg/360px/obs-en-04-01.jpg)

होलडोऊ गोप बोशङ ज्ञपतिङ, मुलुकु नंऊ गोप मी पङ पोसि तोइ, अला दोपङक हेलि परमेश्‍वर नङ अला इतुस अलित नङ पाप लऊ। छु लोन नङ दो पङ इतो कत चलि तोइ, ओदोक दो ञमफो वंऊ अला मुलुक रा पुङमा शितिङ परमेश्‍वरुस रिङमिन बसक्यङ इत नगर रा जुराऊ।

![](https://cdn.door43.org/obs/jpg/360px/obs-en-04-02.jpg)

दोपङ हत शेखिसा तोई, अला दोपङ रा हले शिङमा गिनमा दो ओइऊ बारे परमेश्‍वरूस रिङमिन खोता मालमा गिनि तोइ। दत दोपङ इत ओशि खर जुरामा तिखु दो स्‍वग्रु शम पुति तोइ। परमेश्‍वरूस तंऊ दत दोपङ ञमफो तमपु पोसनङ हलम लउ पोसि, दत दोपङ गोप पाप कर्म लि लमा लिइ।

![](https://cdn.door43.org/obs/jpg/360px/obs-en-04-03.jpg)

ओदोक परमेश्‍वरुस दोपोऊ कत रा गोप कतु नंऊ लेऊ पिनु अला दो मीपङरा सिङ मुलुकु पुंऊ पिनु। दो जुरामिन नगर रा दोपङक बाबेल लोऊ, दोऊ मोतलब “गडबड”।

![](https://cdn.door43.org/obs/jpg/360px/obs-en-04-04.jpg)

गोप बोशङु ज्ञपतिङ, परमेश्‍वरूस अब्राम मिनु इत मी रा कमचित लोऊ। परमेश्‍वरूस दोरा लोऊ, “रंऊ देश नङ पेरङ रा सोठऊ ओदो देशु जो दो ग कनरा कनकसतोक। ग कनरा बोरङ खेसतोक अला कनरत इत चेइ जात जुरारोक। ग कन मिन रा चेइ लारोक। जो कनरा बोरङ खेसतो ग ओदो रा बोरङ खेरोक, अला जो कनरा शाप खेसतो ओदोरा शाप खेरोक। कन लामिन मुलुकु सिङ मी पङरा बोरङ पोरतति।

![](https://cdn.door43.org/obs/jpg/360px/obs-en-04-05.jpg)

दत अब्रामुस परमेश्‍वरू कमचित गोऊ। दोक एनु सिङ लेन लई नङ एनु सिङ रूपया निङ एनु योबलङ रा कयुफु अला दो मुलुक रा सोठऊ, कनान देश फोक जेऊ, दो देश परमेश्‍वरूस दोरा कनु तोइ।

![](https://cdn.door43.org/obs/jpg/360px/obs-en-04-06.jpg)

दत अब्राम कनान पुतु दत परमेश्‍वरूस दोरा लोउ, “रंऊ नोपा जिपा खोन। ग कनरा जि सिङ दैश खेसतोक अला कन वंश पङ अमबोरो जिऊ थोरिङ राज लऊ पोसि।” दत अब्राम ओदो देशु बोसतु।

![](https://cdn.door43.org/obs/jpg/360px/obs-en-04-07.jpg)

मालिकिसिदक मिनु इत फोबलङक तोइ दो परमेश्‍वरू चेला तोइ। इत दयार दो अब्राम तोङकु ज्ञपतिङ तु, दत दो नङ अब्राम छुशु। मालिकिसिदकुस अब्राम रा बोरङ खेऊ अला लोऊ, “थोनतु थोरिङ परमेश्‍वरूस दो स्‍वर्ग नङ मटङु मालिक दो कनरा बोरङ खेँसि।” दत अब्रामुस तोङकु जिततमिन सिङ चिसु सा हिसा मालिकिसिदक रा खेऊ पिनु।

![](https://cdn.door43.org/obs/jpg/360px/obs-en-04-08.jpg)

गोप बोषङ बिततु, दत ली अब्राम नङ सारेऊ छङ मतोइ। परमेश्‍वरूस अब्राम नङ कमचित लोऊ दत हे लि वादा लऊ कि दोऊ इत छङ वङमा अला हलेया नमु नंऊ कर्मा तश ओशि यो गोप वंश वङमा गिनमा। अब्रामुस परमेश्‍वरूस लमिन वादा रा दिमलेओ ततु। परमेश्‍वरूस सिङरा लोऊ कि अब्राम इत एपो मी तोइ छु लोन नङ दोक परमेश्‍वरू वादा लमिन दो दिमलेओ ततु।

![](https://cdn.door43.org/obs/jpg/360px/obs-en-04-09.jpg)

दत परमेश्‍वरूस अब्रामु रत इत वादा लऊ। हीन मेन नङ, इत वादा निश मिऊ किललिङ इत नङ अलितु लेन लमा इत समजोता तुइ। परमेश्‍वरूस अब्राम रा दो वादा लऊ तोइ कि ओसपरिङ अब्राहम ञोनमिन तोइ, दत लि दो ओसपरिङ लि परमेश्‍वरू कमचित रा गोमा ली तोइ। परमेश्‍वरूस रिऊ, “ग कन योबलङक सारैऊ डियङु जोरमयऊ कनरा इत चिगजा खेसतोक। ग कन वंश पङरा जि कनान देशङ खेसतोक” दत लि अब्रामु अला लि छङ मतोइ तोइ।

*उत्‍पत्ति पाठ 11-15 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_04_128kbps.m4a

## 5. वादऊ छङक।

https://openbiblestories.org/l/scu/story-5/

![](https://cdn.door43.org/obs/jpg/360px/obs-en-05-01.jpg)

अब्राम नङ सारे कनान पुतमंऊ सा बोषङ ज्ञपतिङ, अला लि दोपोऊ इत लि छङ मातोइ तोइ। ओदोक, अब्रामु योबलङ सारे गुस दोरा लोऊ, “छु लोननङ परमेश्‍वरूस अङरा अला चिगजा तामा बाश माजुरऊ अला छङ ग चिगजा तामा शितिङ गोप गनमो तोक, खोन, अङ लेन लई हाजिरा ओया तो। दोनङ जन्‍नेटङ लऊ पिन दत दो अङरा इत चिगजा तऊ खेसतो।

![](https://cdn.door43.org/obs/jpg/360px/obs-en-05-02.jpg)

अब्रामुस हाजिरा नङ जन्‍नेटङ लऊ पिनु। हाजिरास इत छङ तऊ, दत अब्रामुस दोऊ मिन इश्माएल तऊ। दत सारै हाजिरऊ रत माशोइ तोई। ओसपरिङ इश्माएल साहुम बोषङु तोइ, परमेश्‍वरूस हे लि अब्राम नङ कमचित लोऊ।

![](https://cdn.door43.org/obs/jpg/360px/obs-en-05-03.jpg)

परमेश्‍वरूस रिंऊ, “ग थोनतु शेच्‍चन परमेश्‍वर तोक। ग कन नङ इत वादा छुततोक।” दत अब्राम मटङु ओपङ जुकयतु। परमेश्‍वरूस अब्राम रा जि लि लोऊ, “का गोप जातु अपा वंइ। ग कन नङ कन वंश पङरा दोपोऊ जागा तोमा शितिङ कनान देश खेसतोक, अला ग होमयो दोपोऊ परमेश्‍वर वंई। कनरा रंऊ जातु सिङ फोबलङ रा खतना लमा वंइ।”

![](https://cdn.door43.org/obs/jpg/360px/obs-en-05-04.jpg)

“कन योबलङ सारै इत छङक तइ- दो वादऊ छङक वङरो। दोऊ मिन इसहाक तामा। ग दो नङ ञमफो रंऊ वादा जुरउ तइ दत दो इत चेइ जात वंऊ जेइ। ग इशमाएल रा लि इत चेइ जात जुरारोक, दत लि अङ वादा इसहाक नङ ञमफो पोसि।” दत परमेश्‍वरुस अब्रामु मिन लेऊ अब्राहम लऊ पिनु, दोऊ मोतलब तोइ “गोप पोऊ अपा”। परमेश्‍वरूस सारैऊ मिन लि लैऊ सारा तऊ, दोऊ मोतलब “गोप पोऊ अमा”।

![](https://cdn.door43.org/obs/jpg/360px/obs-en-05-05.jpg)

ओदो दयार अब्राहमुस रंऊ पेरङु सिङ फोबलङ पङरा खतना लऊ पिनु। मोत मेननङ इत बोषङ ज्ञपतिङ, ओसपरिङ अब्राहम 100 बोषङु तोइ अला सारा 90 बोषङु तोइ, दत सारा गुस अब्राहमु छङ तऊ। हले परमेश्‍वरूस दोरा लोऊ तोइ दोक दोऊ मिन इसहाक तऊ।

![](https://cdn.door43.org/obs/jpg/360px/obs-en-05-06.jpg)

इसहाक शरा वंऊ जेऊ दत परमेश्‍वरूस ओशि लोऊ अब्राहमु विश्‍वासु इम्‍तिहान किऊ, “रंऊ चेइ छङ रा तऊ, अला अङ‍ शितिङ पुजा तिऊ पिन।” दत अब्राहमुस परमेश्‍वरू कमचित रुङकु अला एनु छङ रा पुजा पिनमा शितिङ जुरऊ।

![](https://cdn.door43.org/obs/jpg/360px/obs-en-05-07.jpg)

दत अब्राहम नङ इसहाक पुजा तीमा शितिङ ओदो जागऊ जेऊ दत इसहाकुस शुऊ, “हई अपा, ऊलपोऊ रा पुजा तीमा शितिङ सिङ ता तोई, दत लि पुजा तीमा शितिङ क्रात अमतो?” अब्राहमुस जवाब खेऊ , ”हइ अङ छङ, परमेश्‍वर पुजा तीमा शितिङ क्रात जुरारो।”

![](https://cdn.door43.org/obs/jpg/360px/obs-en-05-08.jpg)

दत दोपङ पुजा तीमा शितिङ ओदो जागऊ रा पुतु, दत अब्राहमुस इसहाक रा छुतु ओदो जागऊ प्रेत तऊ पिनु। दो एनु छङ रा सतमयो तोइ दत परमेश्‍वरुस लोऊ, “पोस। छङ रा नाशङ थपिन। छङ ग सेसु तोक कि का अङरत बेऊ छुलोननङ कस कन चेइ छङ रलि अङरत माबचऊ तऊ।“

![](https://cdn.door43.org/obs/jpg/360px/obs-en-05-09.jpg)

ञमफो यो अब्राहमुस इत करात रा तंऊ दो रकटङु नऊ फसतु पोसमिन तशे इसहाकु कला पुजा तीमा शितिङ परमेश्‍वरुस करात रा जुरऊ। अब्राहमुस गरीस- गरीस करातु पुजा तिऊ पिनु।

![](https://cdn.door43.org/obs/jpg/360px/obs-en-05-10.jpg)

दत परमेश्‍वरुस अब्राहम रा लोऊ, ” छु लोन नङ का अङ शितिङ सिङ- सङ खेमा‍जुराशु, दत बस्‍कयङ रऊ चेइ छङ रा लि , दतो ग कनरा बोरङ खेसमा वादा लरोक । कन वंश पङ नमु नऊ कर्मा बस्‍कयङ लि खुचि वङरो। छु लोन नङ कस अङ कमचित गोऊ, ओदोक ग कन पेरङ नङ मुलुकु सिङ जात पङरलि बोरङ खेस्‍तोक।”

*उत्‍पत्ति पाठ 16-22 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_05_128kbps.m4a

## 6. परमेश्‍वर इसहाक रा शितिङ इन्‍तजाम लऊ।

https://openbiblestories.org/l/scu/story-6/

![](https://cdn.door43.org/obs/jpg/360px/obs-en-06-01.jpg)

ओसपरिङ अब्राहम गतपो वंऊ तोइ दत दोऊ छङ, इसहाक, इत शरा मीं वंऊ जेऊ तोइ। ओदोक अब्राहमुस एनु इत नुकुर रा ऐनु छङ इसहाक रा शितिङ ओदो देशु इत योबलङ सुमा पिनु ओदा दोऊ पेरङ पोसि तोइ।

![](https://cdn.door43.org/obs/jpg/360px/obs-en-06-02.jpg)

अब्राहमु पेरङ दा पोसि तोइ ओदो देशु जेमा इत चेई सैलिऊ ज्ञपतिङ परमेश्‍वरुस दो नुकुर रा रिबका नङ मिलायऊ। दो अब्राहमु बियमु कोत तोई।

![](https://cdn.door43.org/obs/jpg/360px/obs-en-06-03.jpg)

रिबका एनु पेरङ रा सोठऊ दो नुकुर नङ ञमफो पोलठतु जेमा यऊ। हले या दोपङ पुतु इसहाकुस रिबका नङ जन्‍नेटङ लऊ पिनु।

![](https://cdn.door43.org/obs/jpg/360px/obs-en-06-04.jpg)

इत चेई बेलऊ ज्ञपतिङ, अब्राहम सिऊ जैऊ। दत परमेश्‍वरुस अब्राहमु छङ इसहाक रा, अब्राहम नङ छुतमिन वादऊ लमिन बोरङ खेऊ। दो वादऊ नंऊ परमेश्‍वरुस लोऊ अब्राहमु गोप वंश पङ वङरो। दत लि इसहाकु योबलङक रिबकऊ छोयो चिगजा मावंऊ तोइ।

![](https://cdn.door43.org/obs/jpg/360px/obs-en-06-05.jpg)

इसहाकुस रिबका रा शितिङ प्राथना लऊ, अला परमेश्‍वरुस दोरा निश जुडवा चिगजा वङमा बोरङ खेऊ। दो टेमु दो निश चिगजा रिबकऊ खोकु तोइ, दो निश एनिशु नऊ तोङकि तोइ, ओदोक छे लि वंऊ तशे दो सिङ रिबकास परमेश्‍वर रा लोऊ पिनु। " परमेश्‍वरुस रिबका रा लोऊ, “का निश छङ रा पैदा लई। दोऊ वंश पङ खेचो- खेचो जातु वङरो। दो इत नङ अलित नङ ञमफो तोङकि। दत चेई छङकु चिगजा रा चिगित छङकु वंई चिगजऊ कमचित गोमा वई। "

![](https://cdn.door43.org/obs/jpg/360px/obs-en-06-06.jpg)

ओसपरिङ रिबकऊ छङ पङ जोरमयतु, दत चेई छङ मई नङ गोप करा नङ तोइ, दत दोक दोऊ मिन एसाव तऊ। दत चिगित छङ एसावु ठोङोल रा चुमु जोरमयतु तोइ, अला दोऊ मिन याकुब तऊ।

*उत्‍पत्ति पाठ- 24:1:25:26 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_06_128kbps.m4a

## 7. परमेश्‍वर याकुब रा बोरङ खेई।

https://openbiblestories.org/l/scu/story-7/

![](https://cdn.door43.org/obs/jpg/360px/obs-en-07-01.jpg)

दो चिगजा पङ चेई वंऊ दत याकुब रा क्‍युमु पोसमा एपो जेऊ, दत एसाव रा छुमा पङरा सतमा एपो जेऊ। रिबकास याकुब नङ बेन्‍नङ लऊ, दत इसहाकुस एसाव नङ बेन्‍नङ तऊ।

![](https://cdn.door43.org/obs/jpg/360px/obs-en-07-02.jpg)

इ दयार, एसाव शिकार लऊ पोलठतु तु दत दो हत ओनठुस तोई। एसावुस याकुब रा लोऊ, “कस छे जुरामिन तो दोननंऊ मोच्‍चे थकतु अङरा लि खे। “याकुबुस लोऊ, “होमशित अङरा वादा लत का अङरत चेइ तोमा नङ सिङ छे लि कनरा पोरतमा गिनमा, दो सिङ का अङरा खेसमा।” दत एसावुस सिङ छला याकुब रा खेमा वादा लऊ पिनु। दत याकुबुस दोरा मोच्‍चे थकतु खेऊ।

![](https://cdn.door43.org/obs/jpg/360px/obs-en-07-03.jpg)

इसहाक एसाव रा बोरङ खेमा गिनु तोइ। दत दोक ओशि लमा बस्‍कयङ, रिबका नङ याकुबुस दत याकुबुस एसाव वङमा रा कनु दत दोरा कवश लोऊ। इसहाक गतपो तोई अला छङ खोनमा मलिइ तोई। दत याकुबुस एसाव रा गस्‍कुला चुख्‍मा नङ तेतु पख्‍फा रा गोलंऊ नङ गुतु परिनलऊ पिनु।

![](https://cdn.door43.org/obs/jpg/360px/obs-en-07-04.jpg)

याकुब इसहाकु रा जेऊ दत लोऊ, ”ग एसाव तोक। ग ओदोक तु का अङरा बोरङ खे।“ दत इसहाकुस तेतु करा तो ततु अला गस्‍कुला रा मुनु, दत दोक सुनचतु दो एसाव तो अला दोरा बोरङ खेऊ।

![](https://cdn.door43.org/obs/jpg/360px/obs-en-07-05.jpg)

एसाव याकुबु रत जलतु छु लोन नङ याकुबुस दोऊ छङकु हक रा अला ञमफो दोऊ बोरङ रा लि खुतु पिनु। दत दोक दोऊ अपा सिऊ ज्ञपतिङ याकुब रा सतमा सुनचतु।

![](https://cdn.door43.org/obs/jpg/360px/obs-en-07-06.jpg)

छु लोन नङ रिबकास एसावु कमचित गोऊ तोइ। दत दो नङ इसहाकुस याकुब रा दोऊ पेरङ नङ पोसमा शितिङ हत वरि पिनु तोइ।

![](https://cdn.door43.org/obs/jpg/360px/obs-en-07-07.jpg)

याकुब गोप बोषङ शम रिबकऊ पेरङ नङ पोसु। दो बैलऊ दोक जन्‍नेटङ लऊ अला सनिश छङ नङ इत चमेत रा जोरमयऊ। परमेश्‍वरूस दोरा हत छुकपो लऊ पिनु।

![](https://cdn.door43.org/obs/jpg/360px/obs-en-07-08.jpg)

निसा बोषङु शम कनानु नंऊ रंऊ कयुमुस वरि पोसु ज्ञपतिङ, याकुब एनु पेरङ, एनु नुकुर, नङ एनु छुमा पोऊ सिङ शालङ नङ ञमफो ओदा पोलठतु तु।

![](https://cdn.door43.org/obs/jpg/360px/obs-en-07-09.jpg)

याकुब ओदोक हत बेऊ तोइ छु लोन नङ दोक सुनचतु एसाव अला लि दोरा सतमा गिनु तश। ओदोक तोफऊ खोता छुमऊ शालङ रा एसावु रा पिनु। दो नुकुर दो शालङ पङरा कयुफु जेऊ दत लोऊ, “कन नुकुर याकुब, जि छुमा पङरा कनरा खेसतो। दो हसल ओ तु तश।”

![](https://cdn.door43.org/obs/jpg/360px/obs-en-07-10.jpg)

दत एसाव छङ याकुब रा नाशङ पिनमा मागिनि तोइ। ओदो बसकयङ, दो दोरा इ फेरा खोनु हत गरीस सिऊ। दोऊ ज्ञपतिङ याकुब कनान देशु नंऊ एपो पोसु। दत इसहाक सिऊ जेऊ दत याकुब नङ एसावुस दोरा बंऊ पिनु। परमेश्‍वरूस दो वादा अब्राहम नङ लमिन तोइ दो छङ इसहाकु रत याकुबु रा तु तोइ।

*उत्‍पत्ति पाठ- 25:27:-35:29 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_07_128kbps.m4a

## 8. परमेश्‍वर युसुफ नङ दोऊ पेरङ रा बचई।

https://openbiblestories.org/l/scu/story-8/

![](https://cdn.door43.org/obs/jpg/360px/obs-en-08-01.jpg)

गोप बोषङु ज्ञपतिङ, याकुब गतपो वंऊ जेऊ तोइ, दत दोक एनु एपो छङ युसुफ रा दोऊ बियम रा खोनमा पिनु दो छुमा पोऊ शालङ रा खोनि तोइ।

![](https://cdn.door43.org/obs/jpg/360px/obs-en-08-02.jpg)

युसुफु बियम पङ दोरा हत माडामा लई तोइ छु लोननङ दोऊ अपा दोरा हत बेन्‍नङ लइ तोइ अला ओदोक युसुफुस मंङ तंऊ तोइ कि दो दोपोऊ राजा वंऊ जेई। दत युसुफ एनु बियम पोउरा तु दत दोपङ सिङुस दोरा चुमु पिनु दत दोरा नुकुरु रा रंई-छोंई मीपङरा रंऊ पिनु।

![](https://cdn.door43.org/obs/jpg/360px/obs-en-08-03.jpg)

कयुमु पोलठतमंऊ होमशित युसुफु बियम पङक युसुफु गस्‍कुला रा फशु तेतु शुईऊ नऊ चंऊ पिनु। दत दोक दो गस्‍कुला एनु अपा रा कनु दत दो ओशि सुनचति कि उङि बोनऊ छुमास युसुफ रा सतु पिनु तोइ। याकुब हत परेशान वंऊ तोइ।

![](https://cdn.door43.org/obs/jpg/360px/obs-en-08-04.jpg)

नुकुर रा रंई-छोंई मी पङ युसुफ रा मिस्‍त्रु कयुफु जेऊ। नील लुङफऊ थोचलङ बोसतु मिस्र इत चेई नङ गोप सोततिङ सा देशङ तोइ। दो नुकुर रा रई-छोंई मी पङ युसुफ रा इत जिमिदार सरकारी ओफसोर मीऊ रा नुकुर जुरऊ रंऊ पिनु। युसुफुस एनु राजा रा एपो से खोनु, अला परमेश्‍वरुस युसुफ रा बोरङ खेऊ।

![](https://cdn.door43.org/obs/jpg/360px/obs-en-08-05.jpg)

दोऊ मालिकु योबलङक युसुफ नङ ञोनमा जुराशु, युसुफुस परमेश्‍वरु खिलाफ पाप लमा रा मना लऊ। दो हत छिङना तंऊ अला युसुफु थोरिङ कवश कमचित जुरऊ, ओदोक दोरा चुमु जेलु किऊ पिनु। दत जेलु लि, युसुफ परमेश्‍वरु थोरिङ हत सोचचा तोइ, दत परमेश्‍वरुस दोरा बोरङ खेऊ।

![](https://cdn.door43.org/obs/jpg/360px/obs-en-08-06.jpg)

निश बोषङु ज्ञपतिङ, युसुफ अला लि जैलु तोइ, दो हत पापङ खोता तोइ। इ गोङक, फिरोन, जोदे मिस्‍त्रु मी पङ एनु राजा पङरा कुति तोइ, दोक निश मङ तंऊ दोपङक दोरा हत परेशान लऊ पिनु। दोरा दो मङु मोतलब उङ लि लोमा मली।

![](https://cdn.door43.org/obs/jpg/360px/obs-en-08-07.jpg)

परमेश्‍वरुस युसुफ रा मङु मोतलब लोमा सोतिङ खेऊ, दत फिरौनुस युसुफ रा जेलुस एनु रा कुतु। युसुफुस दोरा दोऊ मङु मोतलब लोऊ दत, “परमेश्‍वर शिनिश बोषङु गोप फौलङ चोमा मति, दत दोऊ शिनिश बोषङ ज्ञपतिङ मुलुकु अकाल पिनि।

![](https://cdn.door43.org/obs/jpg/360px/obs-en-08-08.jpg)

फिरौन युसुफु रत ओनचे गरीस तोइ कि दोगुस दोरा मिस्‍त्रु निश थौनतु शेच्‍चन फोबलङ चुनऊ पिनु।

![](https://cdn.door43.org/obs/jpg/360px/obs-en-08-09.jpg)

युसुफुस मीपङरा एपो फोलङ सा शिनिश बोषङ दोमया गोप फोलङ कटठा लऊ तामा लोऊ। दत शिनिश बोषङु अकाल तु दत युसुफुस मी पङ रा दो ब्रू रंऊ पिनु दत दोपोऊ रा जामा शितिङ गोप फोलङ वङरो।

![](https://cdn.door43.org/obs/jpg/360px/obs-en-08-10.jpg)

दो अकाल लेम मिस्रुओ मेन, अला कनानु लि हत कोचङ तोइ ओदा याकुब नङ दोऊ पेरङ पोसि तोइ।

![](https://cdn.door43.org/obs/jpg/360px/obs-en-08-11.jpg)

ओदोक याकुबुस एनु थोनतु चेइ छङ रा ब्रू छोङमा शितिङ मिस्र पिनु। दत दोपङ ब्रू छॊङमा युसुफु तुसिङ डेन वंऊ दत दोपङ बियंम पङ युसुफ रा मा ठोतु। दत लि युसुफुस दोपङरा ठोतु।

![](https://cdn.door43.org/obs/jpg/360px/obs-en-08-12.jpg)

जि खोदामा शितिङ कि छै दोपङ लेखु आ मालेखु दोपङरा खौनु ज्ञपतिङ, युसुफुस दोपङरा लोऊ, “ग किमपोऊ बियम युसुफ तोक। था बेरिश। दोसपरिङ किमपङ अङरा नुकुरु रुअङु रंऊ पिनु तोइ दत किमपङक हलम कर्म लमा सुनचतु तोइ, दत परमेश्‍वरुस दो हलम रा एपो शितिङ जुरऊ तोइ। जिरश अला मिस्‍त्रु पोसमा दत ग किमपोऊ नङ किमपोऊ पेरङ रा थकतु इन्‍तजाम लमा लीरोक।”

![](https://cdn.door43.org/obs/jpg/360px/obs-en-08-13.jpg)

छङ युसुफु बियम कयुमु पोलठतु तु दत एनु अपा रा लोऊ युसुफ अला लि सारस तोइ दत लि हत गरीस तोई।

![](https://cdn.door43.org/obs/jpg/360px/obs-en-08-14.jpg)

दत याकुब इत गतपो मी तोइ दत लि दो एनु पेरङ नङ ञमफो मिस्र जेऊ पिनु, अला दोपङ दा बोसतु पिनु। याकुबु सीमऊ होमशित, दोक एनु सिङ छङ पङरा बोरङ खेऊ।

![](https://cdn.door43.org/obs/jpg/360px/obs-en-08-15.jpg)

परमेश्‍वरुस दो वादा अब्राहम नङ लऊ तोइ दो इसहाक नङ दोऊ ज्ञपतिङ याकुब, अला दोऊ ज्ञपतिङ दोऊ सनिश छङ नङ दोऊ पेरङ पोऊ थोरिङ तु तोइ। दो सनिश छङक पोऊ वंश इस्राएलु सनिश गोत्र वंऊ जेऊ।

*उत्‍पत्ति पाठ - 37-50 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_08_128kbps.m4a

## 9. परमेश्‍वरुस मूसा रा कुतु।

https://openbiblestories.org/l/scu/story-9/

![](https://cdn.door43.org/obs/jpg/360px/obs-en-09-01.jpg)

युसुफ सिऊ ज्ञपतिङ दोऊ सिङ पेरङ मिस्र बोसतु। दत अला दोपोऊ वंश पङ गोप बोषङ शम मिस्र पोसु अला दोपङक गोप चिगजा पङ तऊ। दोपङ इस्राएली वंऊ जेऊ।

![](https://cdn.door43.org/obs/jpg/360px/obs-en-09-02.jpg)

ज्ञा बोषङु ज्ञपतिङ, इस्राएली पङ गोप वंऊ जेऊ तोइ। अला मिस्री पङ छङ ओई कमचित रा शितिङ कोशटङ मतति तोइ कि दोऊ शितिङ युसुफुस सिङ सङ लऊ तोइ। दोपङ इस्राएली पोऊरत बैऊ तोई छु लोननङ दोपङ गिनतिऊ नऊ दोपङ सै खुची तोइ। दत दो टाइमु मिस्रउ राज लइ फिरोनुस इस्राएली पङ रा मिस्रिऊ नुकुर लऊ पिनु।

![](https://cdn.door43.org/obs/jpg/360px/obs-en-09-03.jpg)

मिस्‍तरस पङक इस्राएली रा गोप बङुला नङ अला गोप नगर पङ जुरामा शितिङ चेकचे लऊ। दो कोशटङु लेनुस दोपोऊ जिंदगी रा हत दु:खङुस पुंऊ पिनु, दत परमेश्‍वरुस दोपङरा बोरङ खेऊ अला दोपङ अला गोप चिगजा जोरमयतु।

![](https://cdn.door43.org/obs/jpg/360px/obs-en-09-04.jpg)

फिरौनुस तंऊ कि इस्राएली पोऊ गोप चिगजा वंऊ तोइ, ओदोक दोगुस एनु सेनिक पङरा लोऊ जेरिश इस्राएली पोऊ सिङ फोबलङ चिगजा पङरा नील लुङफऊ पयऊ सतमा शितिङ लोऊ।

![](https://cdn.door43.org/obs/jpg/360px/obs-en-09-05.jpg)

इत इस्राएली योबलङकुस इत फोबलङ रा पैदा लऊ। दत अला दोऊ फोबलङुस तचे वङरो दो चिगजा रा दोपोऊ रत ञंऊ तऊ।

![](https://cdn.door43.org/obs/jpg/360px/obs-en-09-06.jpg)

दत दो चिगजऊ अमा-अपा दोरा अला ञामा मलिऊ, दत दोपङ दोरा सतमऊस बचामा शितिङ इत तिऊ यइ पिलतु लुङफऊ थोचलङ चिरू किललिङ तऊ पिनु। दो चिगजऊ चेई अपु जि खोनमा शितिङ पोसु कि ञमफौ दोरा छोयो वङमा ता मावंइ तशा।

![](https://cdn.door43.org/obs/jpg/360px/obs-en-09-07.jpg)

फिरोनु चमेतुस दो पिलत रा खोनु दोरा नंऊ शम खोनु। दत दोगुस ओदा इत चिगजा रा तंऊ एनु छङकु खोता थऊ पिनु। दोगुस इत इस्‍त्राएली योबलङक रा दोरा पेल पिलामा शितिङ लेन लमा तऊ, छोयो मासुनचतु दो दो चिगजऊ दिमलेओ अमा तोइ। दत दो चिगजा ओनचे चेइ वंऊ जेऊ कि छङ दोरा एनु अमऊ पेल मागिनमा तोइ, दत दोगुस फिरोनु चमेतु रा दो चिगजा रा खेऊ पिनु, दोऊ मिन मूसा तोइ।

![](https://cdn.door43.org/obs/jpg/360px/obs-en-09-08.jpg)

इ दयार, दत मूसा शरा वंऊ जेऊ तोइ, दत दोक तंऊ इत मिस्री इत इस्राएली रा तोऊ तश। मूसा गुस एनु पङगोत इस्राएली रा बचामा कोशिश लऊ।

![](https://cdn.door43.org/obs/jpg/360px/obs-en-09-09.jpg)

दत मूसा सुनचतु दोरा उङको मतऊ तश दत दोक दो मिस्‍त्री रा सतु पिनु अला दोऊ लोटङ रा मटऊ ओपङ बंऊ पिनु। दत लि मूसा गुस छे लि लऊ दो उङ तशकयो तऊ पिनु तोइ।

![](https://cdn.door43.org/obs/jpg/360px/obs-en-09-10.jpg)

फिरौन रा पता लगयतु कि मुसागुस छे लऊ। दोक दौरा सतमा कोशिश लऊ, दत ता मूसा मिस्‍त्रु रत जंगलु रोऊ जेऊ। फिरोनु सैनिक पङ दोरा ओदा फङमा मलिऊ।

![](https://cdn.door43.org/obs/jpg/360px/obs-en-09-11.jpg)

मिस्‍त्रुस वरि जंगलु मूसा इत मिधयान देशङु पोसु तोइ अला दो दत इत पालस वंऊ जेऊ । दोक ओदा इत योबलङ नङ शादी लऊ पिनु अला निश छङ जोरमयऊ।

![](https://cdn.door43.org/obs/jpg/360px/obs-en-09-12.jpg)

मूसा एनु गयोस्‍पोऊ तेतु शालङ रा खोनि तोइ। इ दयार, दोक इत रोशि चिर रा खोनु दो मेलिङ फतिङ मावंऊ लेम बरु जेऊ तोइ। दोरा खोनमा शितिङ दो ओदो डालङु नेमो जेऊ। दत दो डालङु नेमो पुतु दत परमेश्‍वरुस दोरा कमचित लोऊ। दोक लोऊ, “हे मूसा , रंऊ फोनि हनु पिन। का इत संखमा जागऊ थोरिङ डेन तोन।“

![](https://cdn.door43.org/obs/jpg/360px/obs-en-09-13.jpg)

परमेश्‍वरुस लोऊ, ”ग अङ मीपोऊ दु:खङ रा खौनु तोक। ग कनरा फिरौनु रा पिननोक दत का इस्‍त्राएली पङ रा मिस्‍त्रु नुकुर लमऊ रत हनु सुमा। ग दोपङरा कनान देश खेरोक, दो मुलुक दोरा गस अब्राहम, इसहाक नङ याकुब रा खेमा वादा लमिन तोरे।”

![](https://cdn.door43.org/obs/jpg/360px/obs-en-09-14.jpg)

मुसाक शुऊ, ”दत मीपङक शुशूसनङ अङरा उङ पिनपनसु दत ग छे लोमा?” परमेश्‍वरुस रिऊ, “ छे लि तोक ग तोक। दोपङरा लोमा , ‘परमेश्‍वरुस अङरा कनरा पिनपिनसु। दोपङरा ओशि लि लोमा, ” ग कन गनमो- गतपो अब्राहम, इसहाक नङ याकुबु परमेश्वर यहोवा तोक।” अङ जि मिन सोदा यो तोइ।

![](https://cdn.door43.org/obs/jpg/360px/obs-en-09-15.jpg)

मूसा बैइ तोइ अला फिरौनु रा जेमा मागिनि तोइ, छु लोननङ दोक सुनचतु दो एपो लोमा मलिइ, ओदोक परमेश्वर मूसऊ बियम, हारुन, रा दोऊ पङगोत लमा शितिङ पिनु।

*निर्गमन पाठ- 1-4 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_09_128kbps.m4a

## 10. सा मुसीबोत पङ।

https://openbiblestories.org/l/scu/story-10/

![](https://cdn.door43.org/obs/jpg/360px/obs-en-10-01.jpg)

परमेश्वरूस मुसा नङ हारुन रा लोऊ कि फिरौन रऊ मी वंऊ जेतो। दत दोपङ फिरौनु रा जेऊ दत दोपङक लोऊ, “इस्‍त्राएलु परमेश्वरुस ओशि रिंऊ, “अङ मिपङरा जेमा मत।” दत लि फिरौनुस दोपोऊ मागोऊ अला इस्‍त्राएली पङ रा जेमा शितिङ पुरुतु पिनमा बसकयङ दोक दोपङरा कयति लेन लमा शितिङ चेकचे लऊ।

![](https://cdn.door43.org/obs/jpg/360px/obs-en-10-02.jpg)

फिरौन दोपङ रा जैमा शितिङ दयारो मना लऊ पोसु, दत गोरि परमेश्वरुस मिस्रु नंऊ सा बैमा थङ मुसीबोत पिनु। ओइ मसीबोतु ज्ञपतिङ, परमेश्वरूस फिरौन रा कनु कि दो फिरोन नङ मिस्रु सत पङ बसकयङ खुचि शेच्‍चन तोक।

![](https://cdn.door43.org/obs/jpg/360px/obs-en-10-03.jpg)

परमेश्‍वरुस दत नीलु लुङफा रा बोदलऊ पिनु, दत लि फिरौनुस अला लि इस्राएली रा जेमा माखैऊ।

![](https://cdn.door43.org/obs/jpg/360px/obs-en-10-04.jpg)

परमेश्वरूस सिङ मिस्रु टिपलोक पिनु। फिरौनुस टिपलोक पङरा वरि लमा शितिङ मूसा रा ओरछे लोऊ। दत लि सिङ टिपलोक सिऊ ज्ञपतिङ, फिरौनुस एनु मोनङ रा शेच्‍चन लऊ पिनु अला इस्राएली पङ मिस्‍त्रुस हनतु जेरो।

![](https://cdn.door43.org/obs/jpg/360px/obs-en-10-05.jpg)

ओदोक परमेश्वरूस चिगित चिइ बियङक पोऊ मुसीबोत पिनु। ओदोऊ ज्ञपतिङ दोक शुई टिपि कोयङ पोऊ मुसीबोत पिनु। फिरौनुस मूसा नङ हारून रा कुतु दत दोक रिंऊ मेननङ दत दो ओलडो रा रोकयानङ दत इस्राएली मिस्र रा सोठऊ जेमा लिइ। दत मूसाक परमेश्वर रा ओरछै लोऊ दत मिस्रउ रत शुइ टिपि कोयङ पङरा हनु पिनु। दत फिरौनुस एनु मोनङ रा करई लऊ अला दो मीपङरा ओदत जेमा माखेऊ।

![](https://cdn.door43.org/obs/jpg/360px/obs-en-10-06.jpg)

दोऊ होमशित, परमेश्वरूस मिस्रिऊ सिङ कयुमु छुमा पङरा शोतु सीमा मतु तोइ। दत लि फिरौनु मोनङ करई वंऊ जेऊ अला दोक इस्राएली पङ रा जैमा माखेऊ।

![](https://cdn.door43.org/obs/jpg/360px/obs-en-10-07.jpg)

दत परमेश्वरूस मूसा रा फिरौनु तुसिङ लानु नऊ मेलिङ फतिङ पयामा लोऊ। दत दोक ओशि लऊ दत मिस्रु मिऊ डियङु जुकरेर सा पोटोक हनतु तु, दत लि इस्राएली पङरा छोयो मावंऊ। परमेश्वरूस फिरौनु मोनङ रा क्रईं लऊ पिनु, अला फिरौनुस इस्राएली पङरा आजाद वंऊ ओदत जेमा माखेऊ।

![](https://cdn.door43.org/obs/jpg/360px/obs-en-10-08.jpg)

दोऊ ज्ञपतिङ, परमेश्वरूस रस थतु अला मिस्‍त्रु सिङ फोलङ पङरा खोतोम लऊ पिनु अला उङ लि दकपा हनतु दोरा सतु पिनु। फिरोनुस मूसा नङ हारून रा कुतु अला दोक रिंऊ, “गस पाप लमिन। किमपङ जेमा लिई।” दत मूसाक परमेश्वर रा कोलङ लऊ, दत नमुस रस दतमा बोनत वंऊ।

![](https://cdn.door43.org/obs/jpg/360px/obs-en-10-09.jpg)

दत लि फिरौनुस हे पाप लऊ अला एनु मोनङ रा जेप लऊ पिनु। दोक इस्राएली पङरा आजाद वंऊ ओदत जैमा माखेऊ।

![](https://cdn.door43.org/obs/jpg/360px/obs-en-10-10.jpg)

दत परमेश्वरूस मिस्रु नंऊ बैमु वा रा तुमा खेऊ। दो बैम पङक दो सिङ फोलङ रा जऊ पिनु हलेसा फौलङ रसुस मासतु तोई।

![](https://cdn.door43.org/obs/jpg/360px/obs-en-10-11.jpg)

दत परमेश्वरूस मिस्‍त्रु खबङबङ लऊ पिनु दो हुम दयार शम वंऊ पोसु। जि ओनचे खुचि खबङबङ तोइ कि मिस्रु मी पङ एनु कयुमुस हन्‍तमा मालीरो। दत लि दा इस्राएली मी पङ पोसि तोई ओदा छति तोई।

![](https://cdn.door43.org/obs/jpg/360px/obs-en-10-12.jpg)

जि गू मुसीबोतु ज्ञपतिङ लि, फिरौनुस इस्राएली पङरा दत जेमा माखेऊ। छु लोन नङ फिरौनुस परमेश्वरू कमचित मागोऊ ओदोक परमेश्वरू इत कयामा मुसीबोत रा पिनमा प्‍लान जुरऊ। जि फिरौनु मोनङ रा लेऊ पिनि।

*निर्गमन पाठ- 5-10 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_10_128kbps.m4a

## 11. फसह-

https://openbiblestories.org/l/scu/story-11/

![](https://cdn.door43.org/obs/jpg/360px/obs-en-11-01.jpg)

परमेश्‍वर मूसा नङ हारून रा फिरौन ना ओशि लोमा शितिङ पिनु कि इस्राएली पङ रा जेमा मत। दोपङक दोरा लोऊ कि दत लि दोपङरा जेमा मखेसनङ, दत परमेश्‍वर मिस्रु मी पङरा अला छुमा पोऊ सिङ होमशित फौबलङ छङ पङरा सतु पिनि। फिरौनुस जि गोऊ लि परमेश्‍वरु थोरिङ देङ मालऊ अला दोऊ कमचित गोमा शितिङ मायऊ।

![](https://cdn.door43.org/obs/jpg/360px/obs-en-11-02.jpg)

परमेश्वरूस लोऊ ऊङ लि मी अङ थोरिङ दैङ लरो ग दोऊ चेइ छङ रा बचारोक। दत सिङ पेरङ रा इत ऐपौ क्रातु पुजा खेमा वंई।

![](https://cdn.door43.org/obs/jpg/360px/obs-en-11-03.jpg)

परमेश्वरूस इस्राएलिऊ पोऊ रत दो क्रातु शुइ रा कयुफु एनु कयुमु पितङु थोरिङ तीमा लोऊ। दोपङरा दोऊ शा रा रोतमा तोइ अला दत दोरा अखमीरी रोटि नङ ञमफो दोरा हस्‍ल जामा तोइ। दोक दो थकतु रा जऊ ज्ञपतिङ दोपङरा ओसपरिङ ओ मिस्र रा सोठऊ जेमा शितिङ जुराशु पोसमा लोऊ।

![](https://cdn.door43.org/obs/jpg/360px/obs-en-11-04.jpg)

हले लमा शितिङ परमेश्वरूस इस्राएली पङ रा लोऊ तोइ, दोपङक दोऊ रिङमिन खोता यो सिङ लऊ। खनङ मुञञा, परमेश्वरूस सिङ चेइ छङ रा नाशङ पिनु दत मिस्रु किल्‍लङ वंऊ जेऊ।

![](https://cdn.door43.org/obs/jpg/360px/obs-en-11-05.jpg)

इस्राएली पोऊ सिङ क्‍युमु थोरिङ शुइ पिनमिन तशे, ओदोक परमेश्वरूस दो क्‍युम पङरा सोठऊ पिनु। दोगु नंऊ सिङ मी बचतु तोई। दोपङ क्रातु शुईऊ लमिन बचतु तोइ।

![](https://cdn.door43.org/obs/jpg/360px/obs-en-11-06.jpg)

दत लि मिस्र मी पङ परमेश्वरू थोरिङ दैङ मलई तोइ अला दोऊ लोमिन कमचित मागोइ तोइ। ओदोक परमेश्वर दोपोऊ कयुम रा मासौठऊ तोई। परमेश्वरूस मिस्रु सिङ होमशित छङ पङरा सतु पिनु।

![](https://cdn.door43.org/obs/jpg/360px/obs-en-11-07.jpg)

जेलखानऊ कैदी पोऊ होमशित छङ बसकयङ, फिरौनु चेई छङ शम, सिङ चेइ फोबलङ छङ सिऊ। एनु मोनङु दु:खङुस मिस्रु सिङ मी करपु तोइ अला हरो टऊ तोइ।

![](https://cdn.door43.org/obs/jpg/360px/obs-en-11-08.jpg)

ओदो गोङक, फिरौनुस मूसा नङ हारून रा कुतु अला लोऊ, “इस्राएली पङरा कयुफु हसल मिस्रुस जेऊ पिन।” मिस्रु मी पङ लि इस्राएलिऊ पङरा हसल जेमा शितिङ लोऊ।

*निर्गमन पाठ -11:1-12:32 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_11_128kbps.m4a

## 12. इस्‍त्राएलु मी पङ मिस्‍त्र देशुस दकपा हनतु।

https://openbiblestories.org/l/scu/story-12/

![](https://cdn.door43.org/obs/jpg/360px/obs-en-12-01.jpg)

इस्राएलिऊ मी पङ मिस्रुस देशुस हन्‍तु थलत हत गरीस तोइ। दो पङ छङ नुकुर मतेइ तोइ, अला दोपङ वादऊ देश फोक जेऊ तोइ। छे लि इस्राएली पङक थथासु, मिस्‍त्रि पङक सिङ सङ खेऊ पिनु, या बसकयङ जङ नङ मूल अला अलित नोर पङ लि। अलित देषङु मोच्‍चै मी पङ परमेश्वरू थोरिङ दैङ लऊ अला दत इस्राएली मी पङ मिस्रुस हनतु दत दोपङ लि दोपङ नङ ञमफो वंऊ पिनु।

![](https://cdn.door43.org/obs/jpg/360px/obs-en-12-02.jpg)

निर दोस्‍परिङ जू इत चेई खम्‍बा दोनङ होमशित- होमशित जेऊ। अला गौङक दोस्‍परिङ दो मेऊ खम्‍बा जुरतु जेऊ। परमेश्वरूस दो जुऊ खम्‍बऊ नंऊ अला होमशितु खम्‍बऊ थोरिङ तोइ, दो दयारो दोपङ नङ तोइ अला दोक जैना परिङ दोपोऊ गोबा वंऊ। दोपङरा लेम ओनचे लमा तोइ कि परमेश्वरू ज्ञपतिङ विनमा।

![](https://cdn.door43.org/obs/jpg/360px/obs-en-12-03.jpg)

मोच्‍चे टेमु ज्ञपतिङ, फिरौन नङ दोऊ मीपङक एनु मोनङ लेऊ पिनु। दो इस्राएली रा हे लि एनु नुकुर जुरामा गिनु । ओदोक दोपङ इस्राएली पोऊ ज्ञपतिङ जेऊ। जि परमेश्वर ओ तोई जिक दोऊ मोनङ रा लेऊ तोइ। दोक ओशि ओदोक लऊ छु लोन नङ दो गिनु तोइ सिङ जि सेसमा गिनमा कि फिरोनु रत अला मिस्रिऊ सिङ भोगान बसकयङ दो, यहोवा, हत शेच्‍चन तोइ।

![](https://cdn.door43.org/obs/jpg/360px/obs-en-12-04.jpg)

दत इस्राएली पङक मिस्रु सेना रा तुइ तंऊ दत दोपङ सेसु दो फिरौनु सेना अला मंई समन्‍द्रङु किल्‍लिङ फसतु। दोपङ हत बेऊ अला करपु, “निङपङक मिस्‍त्र रा छु सोठऊ? निङपङ सीमरा तोक।”

![](https://cdn.door43.org/obs/jpg/360px/obs-en-12-05.jpg)

मूसा गुस इस्राएली पङरा लोऊ, “मबैमा। परमेश्वर तोरो किमपङरा शितिङ तोङकि अला कनरा बचई। “दत परमेश्वरूस मूसा रा लोऊ, “जि मी पङरा मंई समुन्‍दरङ फौक होमशित जैमा लोत।”

![](https://cdn.door43.org/obs/jpg/360px/obs-en-12-06.jpg)

दत परमेश्वरूस दो जुऊ खम्‍बा रा कयुफु इस्राएली नङ मिस्रिऊ किल्‍लिङ तऊ ओदोक मिस्रु मी पङ इस्राएली पङरा खोनमा मलीरो।

![](https://cdn.door43.org/obs/jpg/360px/obs-en-12-07.jpg)

परमेश्वरूस मूसा रा समुन्‍द्रङु नंऊ एनु गुत होमशित लमा शितिङक लोऊ। दत परमेश्वरूस लानुस समुन्‍द्रङु ती रा डैलौ नङ जखङ फोक लऊ पिनु, ओदोक समुन्‍दरङुस इत ओमप वंऊ जेऊ।

![](https://cdn.door43.org/obs/jpg/360px/obs-en-12-08.jpg)

इस्राएली मी पङ एनु निश फोक तिऊ बितिङ नङ ञमफो फोसि मटङु थोरिङ समुन्‍द्रङु रत वंऊ जेऊ पिनु।

![](https://cdn.door43.org/obs/jpg/360px/obs-en-12-09.jpg)

दत परमेश्वरूस ओदो ओमपु रत जू रा थुतु पिनु दत मिस्रु मी पङ इस्राएली पङरा बचतु जेइ तंङरो। मिस्रि पङक दोपङरा चुममा शितिङ दोपोऊ ज्ञपतिङ जेमा प्‍लान लऊ।

![](https://cdn.door43.org/obs/jpg/360px/obs-en-12-10.jpg)

दत दोपङ समुन्‍द्रङु ओमपुस इस्राएली पोऊ ज्ञपतिङ जेऊ, दत लि परमेश्वरूस मिस्रि पङरा पेऊ पिनु अला दोपोऊ बेशोख पङरा फसऊ पिनु। दोपङ हरो टऊ, “रोरिश। इस्राएलि पोऊ फोकुत परमेश्वर तोङकु तोइ।”

![](https://cdn.door43.org/obs/jpg/360px/obs-en-12-11.jpg)

सिङ इस्राएली पङ समुन्‍द्रङु नोपा फोक पुतु। दत परमेश्वरूस मूसा रा लोऊ हे लि तिऊ थोरिङ गुत पिनमा। दत मूसा गुस ओशि यो लऊ, दत ती मिस्रु सेनऊ थोरिङ तु अला होमशितु खोता वंऊ जेऊ। सिङ मिस्रु सेना डुबयतु जेऊ।

![](https://cdn.door43.org/obs/jpg/360px/obs-en-12-12.jpg)

दत इस्राएली पङक तंऊ मिस्री पङ सिऊ जेऊ तौइ दत दोपङक परमेश्वरू थोरिङ दैङ लऊ। दोपङ दैङ लऊ दत मूसा परमेश्वरू फोकुत भविष्‍य लोइ सा तोइ।

![](https://cdn.door43.org/obs/jpg/360px/obs-en-12-13.jpg)

इस्राएली मी पङ ओदोक हत गरीस तोइ छु लोननङ परमेश्वरुस दोपङरा सिमऊ रत बचऊ अला नुकुर वङमऊ रत बचऊ तोइ। दत दो परमेश्वरू अरादना लमा शितिङ आजाद तोइ। इस्राएली पङ एनु आजादिऊ तिवारङ मोनामा शितिङ परमेश्वर रा खुश लमा शितिङ गोप बजन पङ लोऊ छू लोननङ परमेश्वरूस दोपङरा मिस्रु सेना पोऊ रत बचऊ तोइ।

![](https://cdn.door43.org/obs/jpg/360px/obs-en-12-14.jpg)

परमेश्वरूस इस्राएली रा इ बोषङु इत तिवारङ मोनामा शितिङ लोऊ जि सेसमा शितिङ कि हलै परमेश्वरूस मिस्रि पङ रा ज्ञपतिङ तऊ दत दोपङरा नुकुर वङमऊ रत छुडायऊ पिनु। जिरा फसहऊ तिवारङ लोइ तोइ। जिननऊ दोपङरा जि तिवारङ मोनामा शितिङ इत एपो क्रात रा पुजा तीमा तोइ, दोरा रोतमा तोइ, अला दोरा सुरि रोटि नङ जामा तोइ।

*निर्गमन पाठ- 12:33-15:21 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_12_128kbps.m4a

## 13. इस्‍त्राएली मी पङ नङ परमेश्वरू वायदा।

https://openbiblestories.org/l/scu/story-13/

![](https://cdn.door43.org/obs/jpg/360px/obs-en-13-01.jpg)

इस्राएली पङरा मंइ समुन्‍द्रङु नोमा जेऊ ज्ञपतिङ, परमेश्वरूस दोपङरा जंगलुत वंऊ सीनै लोइ डोङखङु फोक कयुफु जेऊ पिनु। जि ओदो यो डोङखङ तोइ ओदा मूसाक रोशि चिर रा तंऊ तोइ। दो मी पङक डोङखङु ओपङ एनु तोमबुआ रा तिऊ पिनु।

![](https://cdn.door43.org/obs/jpg/360px/obs-en-13-02.jpg)

परमेश्वरूस मूसा नङ इस्राएलिऊ सिङ मी पङरा लोऊ, “कनरा अमबोरो अङ कमचित गोमा वई अला छे वादा ग कननङ ञमफो छुततोक दोरा जुरऊ तामा। दत ओशि लननङ, दत का अङ तोफा खेस्‍मिन गिनमा रूपया, याजक पोऊ राज्‍य, अला इत संखमा जातु मी वंइ।

![](https://cdn.door43.org/obs/jpg/360px/obs-en-13-03.jpg)

परमेश्वरूस लमिन दोपोऊ रा तुमा शितिङ मी पङक हुम दयार शम रङ रा जुरऊ। दत परमेश्वरूस सीनै डोङखङु थोरिङ हनतु। दत दो तुमा परिङ सङगुल तु, बिजुल टाशु, खू हन्‍तु, अला रोनशिङकु गोप कत वंऊ। दत मूसा एन डोङखङु थोरिङ जेऊ पिनु।

![](https://cdn.door43.org/obs/jpg/360px/obs-en-13-04.jpg)

परमेश्वरूस दत मी पङ नङ ञमफो इत वादा छुतु। दोक लोऊ, “ग किमपोऊ परमेश्वर तोक। ग ओ तोक जो किमपङरा मिस्रु नुकुर लमउरत छुडासु। अलित भोगानु अराधना मालमा।”

![](https://cdn.door43.org/obs/jpg/360px/obs-en-13-05.jpg)

“मुखङ माजुरामा अला दोऊ अरादना मलमा, छु लोननङ ग ओ, किमपोऊ इपोटोक परमेश्वर तोक। हलमुस अङ मिन माहनमा। शिनिश दयार रा एपो ततु मोनामा। अलित कतु नंऊ, टु दयारू नंऊ सिङ लेन लमा, शिनिश दयार किमपोऊ शितिङ पोसमा अला अङरा कोलङ लमाऊ दयारो तो।”

![](https://cdn.door43.org/obs/jpg/360px/obs-en-13-06.jpg)

“रंऊ अमा नङ अपा रा एपो लमा। ऊङरयो मास्‍तमा। उलपटाङ मरेतमा। चोरस मालमा। रंऊ ख्‍युमदेसु योबलङ, दोऊ कयुम, अला दोऊ छे लि छला रा थामा खुसि मालमा।”

![](https://cdn.door43.org/obs/jpg/360px/obs-en-13-07.jpg)

परमेश्वरूस दो मी पङ रा छे लमा लोऊ दोरा शितिङ दोपङ यऊ। दोपङ लेम परमेश्वरू मी वंऊ पोसमा अला लेम दोऊ अरादना लमा शितिङ यऊ।

![](https://cdn.door43.org/obs/jpg/360px/obs-en-13-08.jpg)

परमेश्वरूस इस्राएली मी पोऊ रत इत चेइ तोमबुआ जुरामा शितिङ लोऊ- छुशमंऊ तोमबुआ। दोक दोपङरा एपोस लोऊ कि जि तोमबुआ रा हले जुरामा तश, अला दोननंऊ छे छला पङ तामा। दोक दोपङरा दो तोमबुअऊ निश पनठङ खेचौ जुरामा शितिङ इत चेइ परदा जुरामा लोऊ। परमेश्वर दो परदऊ ज्ञपतिङ पनठङु तुइ अला ओदा यो पोसि। ओदा परमेश्वर तोइ दो पनठङु जेमा लेम महायाजक पोऊ तोइ।

![](https://cdn.door43.org/obs/jpg/360px/obs-en-13-09.jpg)

दो मी पङरा छुशमऊ तोमबुअऊ होमशित इत जागा जुरामा वई। उङ लि परमेश्वर रिङमिन दो मगोनङ दो ओदो वेदिऊ नंऊ इत छुमा रा कयुफु तुमा गिनमा। दत याजक दोरा पुजा तिइ अला वेदिऊ थौरिङ परमेश्वरू शितिङ पुजा तीमऊं खोता रोति। परमेश्वरुस रिंऊ अला दो छुमऊ शुई दो मिऊ पाप रा खोपि। ओदोक, छङ परमेश्वर दो पाप रा माखोनि। दो मी परमेश्वरू नजरु “संखमा” वङरो। परमेश्वर मूसऊ बियम हारून रा अला हारूनु वंश पङरा एनु याजक वङमा शितिङ चुनायऊ।

![](https://cdn.door43.org/obs/jpg/360px/obs-en-13-10.jpg)

दत परमेश्वरूस ओई सा कमचित पङरा रंऊ निश पटियऊ थोरिङ चेऊ मूसा रा खेऊ पिनु। परमेश्वरूस लमा शितिङ मी पङरा गोप सिङ कानुन खेऊ। दत लि दोपङ ओइ लेन लननङ परमेश्वर दो मी पङरा बोरङ खैमा अला दोपङ रा खौनमा शितिङ वादा लऊ। दत लि दोपङ लोमिन दो मलननङ दो दोपङरा सजा खेइ।

![](https://cdn.door43.org/obs/jpg/360px/obs-en-13-11.jpg)

गोप दयार शम,मूसा सीनै डोङखङु थोरिङ ओ पोसु। दो परमेश्वर नङ कमचित लोऊ तोइ। दत मी पङ दोऊ पोलठतु तुमा शितिङ शुंऊ पोसु-पोसु मलिऊ तोइ। ओदोक दोपङ हारूनु रा जङ कयुफु तु अला दोरा इत मुखङ लमा लोऊ दत दोपङ परमेश्वर बस्‍कयङ दोऊ अराधना लमा लीरो । ओदोक, दोपङ हत बैमा थङ परमेश्वरू खिलाफ पाप लऊ।

![](https://cdn.door43.org/obs/jpg/360px/obs-en-13-12.jpg)

हारूनुस लुक चेत जङु इत मुखङ जुरऊ। दो मी पङ दो मुखङ रा अराधना लमा तिखु अला दोरा पुजा तिऊ पिनु। दोऊ पापु लमिन परमेश्वर दोपङरा हत छिङना तंऊ तोइ। दो दोपङरा सतु पिनमा गिनु तोइ। दत मुसाक परमेश्वर रा दोपङरा मासतमा लोऊ। परमेश्वरूस दोऊ रिङमिन कमचित गोऊ अला दोपङरा मासतु।

![](https://cdn.door43.org/obs/jpg/360px/obs-en-13-13.jpg)

दत ज्ञपतिङ मूसा सीनै डोङखङुस ओपङ हनतु तु। दो निश रऊ पटिया रा थुतमिन तोइ दोगु नंऊ परमेश्वरूस सा हुकुम चेमिन तोइ। दत दोक ओदो मुखङ रा खौनु। दो ओनचे छिङना तंऊ कि दोक दो चेमिन पटिया रा ठऊ खनङ लऊ पिनु।

![](https://cdn.door43.org/obs/jpg/360px/obs-en-13-14.jpg)

दत मूसा गुस दो मुखङ रा पिसऊ दोऊ चूरा लऊ पिनु, अला दो चूरा रा तिऊ कुउ दो मीपङरा ओदो ती पलायऊ पिनु। परमेश्वरूस दो मी पोऊ थोरिङ इत ओलडो पिनु दत दोपोऊ नंऊ गोप मी सिऊ जेऊ।

![](https://cdn.door43.org/obs/jpg/360px/obs-en-13-15.jpg)

दो रऊ पटिया रा मूसा गुस ठऊ तोइ। दोऊ पोलङक थामा शितिङ मूसा गुस दो सा हुकुम रा रऊ सरपा पटिया जुरऊ। दत दो हे डोङखङु थोरिङ जेऊ अला लोऊ परमेश्वर दो मी पङरा माफ लरो। परमेश्वरूस मूसऊ गोऊ अला दोपङरा माफ लऊ। सरपा पटियऊ नंऊ चेमिन सा हुकुम दो कयुफु मूसा डोङखङु ओपङ तु। ओसपरिङ परमेश्वरूस सीनै डोङखङु रत वादऊ देश शम इस्राएली पोऊ गोबा वंऊ।

*निर्गमन पाठ- 19-34 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_13_128kbps.m4a

## 14. इस्‍त्राएलि मी पङ पनिसा बोषङ शम जंगलु भटकतु।

https://openbiblestories.org/l/scu/story-14/

![](https://cdn.door43.org/obs/jpg/360px/obs-en-14-01.jpg)

परमेश्वरूस इस्राएली पङरा दो कानून रा लोमा कयऊ पिनु दो कानून दोपोऊरा होमशित ओ तोइ। दत दोक सीनै डोङखङु होमशित दोपोऊ गोबा वंऊ। दो दोपङरा वादऊ देशु किमा गिनु तोइ। जि मुलुक रा कनान लि लोइ तोइ। परमेश्वरूस जुऊ खम्‍बऊ थौरिङ दोऊ होमशित- होमशित जेऊ, अला दो दोऊ ज्ञपतिङ- ज्ञपतिङ तु।

![](https://cdn.door43.org/obs/jpg/360px/obs-en-14-02.jpg)

परमेश्वरूस अब्राहम, इसहाक नङ याकुबु रत वादा लऊ तोइ दो वादऊ देशु रा दोऊ वंश पङरा खेइ, दत लि ओदा गोप जातु मी पोसि तोइ। दोपङरा कनानी लोइ तोइ। दो कनानी मी पङ परमेश्वरू अराधना मालई तोइ अला दोउ रिङमिन कमचित मागोइ तोइ। दोपङ कवश परमेश्वरू अराधना लइ तोइ अला गोप हलम लेन लइ तोइ।

![](https://cdn.door43.org/obs/jpg/360px/obs-en-14-03.jpg)

परमेश्वरूस इस्राएली पङरा लोउ, “ओसपरिङ का दो वादऊ देशु जेनङ दत ओदतु सिङ कनानी पोऊरत पीछा छुडऊ पिनमा। दोपङ नङ समजोता मालमा अला दोपङ नङ जन्‍नेटङ मालमा। किमपङ दोपोऊ सिङ मुखङ रा होमयो कयऊ पिनमा। दत लि का अङ कमचित मागोनङ, दत का अङ बसकयङ दोपोऊ भोगानु अराधना लऊ पोसि।”

![](https://cdn.door43.org/obs/jpg/360px/obs-en-14-04.jpg)

दत इस्राएली कनानु सिमंङु रा पुतु, मूसा गुस इस्‍त्राएलु सिङ खानदानु इत- इत लऊ सनिश फोबलङक रा चुनऊ। दोक दोपोऊ रा जेऊ ओदो देश हले तश खोनमा शितिङ पिनु दो हलै देश तश। दोपङरा दो कनानी पङरा खौनमा तोइ दो शेच्चन तोइ या मालि तोइ।

![](https://cdn.door43.org/obs/jpg/360px/obs-en-14-05.jpg)

दो सनिश फौबलङुस सिङ कनान देशुस वंऊ जेऊ निशनिसा दयार गुमयतु अला दत दोपङ पोलठतु तु। दोपङ मी पङरा लोऊ,” दो कनान मुलुक हत फोलङ सा तश अला फौलङ गोप वङमिन तश।“ दत सा जासुस पङक रिऊ, ” दोपोऊ नगर हत शेच्‍चन तोइ अला दो मी पङ चेइ- चेइ तोइ। दत उलपङ दोपङ नङ संङकु तोङमा जेनङ , दत उलपङ हसल हरति अला उलपङरा सतु पिनपनसि।

![](https://cdn.door43.org/obs/jpg/360px/obs-en-14-06.jpg)

हस्‍ल ओ कालेब नङ यहोश अला अलित निश जासुस पङक रिंऊ, ”जि दिमलेऔ हीन कनान देशु मी पङ चेइ नङ शेच्‍चन तोइ, दत लि उलपङ दोपङरा हरामा लिइ। परमेश्वर उलपोऊ शितिङ तोङकि।“

![](https://cdn.door43.org/obs/jpg/360px/obs-en-14-07.jpg)

दत लि मीपङक कालेब नङ यहोशुऊ मागोऊ। दो मूसा नङ हारुनु थोरिङ छिङना लऊ, ”का निङपङरा ओइ बैमा थङक जागऊ छु कयुफु तु? उलपङरा मिस्रु ओ पोसमा गिनमा तोइ। दत लि उलपङ दो देशु जेनङ उलपङ तोङकु सिऊ जेइ, अला कनानु मी पङ उलपोऊ योबलङ नङ चिगजा पङरा नुकुर जुरऊ पिनि। “ दो मी दोपङरा पोलठऊ मिस्रु कयुफु जैमा शितिङ इत अलित गोबा पङ चुनामा गिनु तोइ।

![](https://cdn.door43.org/obs/jpg/360px/obs-en-14-08.jpg)

दत दो मी पङ ओशि लोऊ दत परमेश्‍वर हत छिङना तऊ। दो छुशमा तोमबुअऊ नंऊ तु,अला रिंऊ ”किनपङक अङ खिलाफ बगावत लऊ तोइ , ओदोक किनपङरा ओइ जंगलु हलतमा वई। सिङ इत मी दो निसा बोषङ या ओदो बस्‍कयङ खुचि बोषङु तो दो सिऊ जेइ अला तशपयो ओदो देशु तुमा मलिइ दो ग किमपङरा खेसतोक। लैम कालैब नङ यहोशू दोन्नऊ जैमा लिइ।“

![](https://cdn.door43.org/obs/jpg/360px/obs-en-14-09.jpg)

दत मीपङक परमेश्वर रा ओशि लोइ गोऊ, दत दोपङ दु:खङुस तोइ छु लोननङ दोपङ पाप लमिन तोइ। ओदोक दोपङुस कनानु मी पोऊ थोरिङ संङकु तोङकमा शितिङ लोऊ। मूसा गुस दोपङरा माजैमा शितिङ लोऊ छु लोननङ परमेश्वर दोपङ नङ ञमफो माजैइ तोइ, दत लि दोपङ मुसऊ कमचित मागोऊ।

![](https://cdn.door43.org/obs/jpg/360px/obs-en-14-10.jpg)

परमेश्वर ओइ तोङमा परिङ दोपङ नङ ञमफो मा जेऊ तोइ, ओदोक कनानी पङक दोपङरा हरायऊ पिनु अला दोपोऊ गोप मी पङरा सतु पिनु। दत इस्‍त्राएली मीपङ कनानुस पोलठतु तु। अलित पनिसा बोषङ शम, दोपङ जंगलु नौस- जिस भटकयतु पोसि।

![](https://cdn.door43.org/obs/jpg/360px/obs-en-14-11.jpg)

इस्राएली मी पोऊ लमिन जंगलु मै जैऊ निशनिसा बौषङु, परमेश्वर दोपोऊ गिनमा दौरा सिङ गिनमा दो लऊ। दोक दोपङरा स्‍वर्गुस रोटि खेऊ दोऊ मिन “मन्‍ना” तोइ। दोक बटेर मिनु प्‍यातु शालङ रा दोपोऊ जागऊ रा पिनमा छु लोननङ दोपोऊ रा जामा शितिङ शा तोमा गिनमा। ओदो बेलऊ, परमेश्वरूस दोऊ गस्‍कुला नङ फोनि पङरा जेरमऊ रत बचऊ।

![](https://cdn.door43.org/obs/jpg/360px/obs-en-14-12.jpg)

दत बस्‍कयङ परमेश्वरूस दोऊ तुङमा शितिङ नमङ थङक राऊ रत ती हनु। दत लि जि सिङु बसकयङ, इस्राएलिऊ मी पङ परमेश्वर नङ मूसऊ खिलाफ कमचित शतु अला नमङ ततु। दत लि परमेश्वर दैङ तइ तोई। दोक दो वादा लऊ तोइ कि दो अब्राहम, इसहाक, नङ याकुबु वंश पोऊ शितिङ लई दोक दो लऊ।

![](https://cdn.door43.org/obs/jpg/360px/obs-en-14-13.jpg)

इत अलित टैम दोपोऊ रा ती मतोइ तोइ, परमेश्वरूस मूसा रा लोऊ, “रा नङ कमचित लोत, दत दोउरत ती हनति।” दत लि मुसास रा नङ कमचित मालोऊ। दो बसकयङ, दोक छुङा गुस रऊ थोरिङ निश फैरा तोंऊ। ओशि लऊ दोक परमेश्वर रा मामोनऊ। सिङरा तुङमा शितिङ रऊस ती ता हन्‍तु, दत है परमेश्वर मूसा रा छिङना तंऊ। दोक लोऊ, “छु लोननङ कस ओशि लऊ, ओदोक का वादऊ देशु जैमा मालिइ।

![](https://cdn.door43.org/obs/jpg/360px/obs-en-14-14.jpg)

दत इस्राएलिऊ मी पङ निशनिसा बोषङ शम जंगलु भटकयतु तोइ, दत दोपङक परमेश्वरू खिलाफ बगावत लऊ अला दोपङ सिङ सिऊ जैऊ तोइ। दत परमेश्वर दो मी पङरा हैलि दो वादऊ देशु सींमङ शम कयुफु जेऊ। छङ मूसा हत गतपौ वंऊ तोइ, ओदोक परमेश्वर मी पोऊ गोबा वङमा शितिङ यहोशु रा ठोतु। परमेश्वरूस मूसा नङ जि वादा लऊ तोइ कि इत दयार दो दोमीपोरा मूसऊ खोता इत भविष्‍य लोइ सा रा पिनि।

![](https://cdn.door43.org/obs/jpg/360px/obs-en-14-15.jpg)

दत परमेश्वरूस मूसा रा इत डोङखङु थोरिङ जैमा शितिङ लोऊ छु लोननङ दो वादऊ देश रा खोनमा लीइ। मूसा गुस दो वादऊ देश रा खौनु दत लि परमेश्वर दोरा दोननऊ जैमा माखेऊ। दत मूसा सिऊ जैऊ, अला इस्राएलीस हुमनिसा दयार शम दु:खङ मोनऊ। यहोशू दोपोऊ सरपा गोबा वऊ तोइ। यहोशू इत एपो गोबा तोइ छु लोननङ दोक परमेश्वरू थोरिङ दैङ लऊ अला दोऊ कमचित पङरा गोऊ।

*निर्गमन पाठ -16-17; गिनती 10-14; 20;27 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_14_128kbps.m4a

## 15. वादऊ देश।

https://openbiblestories.org/l/scu/story-15/

![](https://cdn.door43.org/obs/jpg/360px/obs-en-15-01.jpg)

कयाना परिङ, दो टैम तु तोइ कि इस्राएलिऊ मी पङ छङ कनान देशु जेमा लिइ तोइ। दो देशङु यरीहो मिनु इत नगर तोइ। दोपङरा एपोऊ शितिङ दोऊ नोस- जिस पका बितिङ तोइ। यहोशुस दो नगरू नंऊ निश जासूस रा पिनु। दो नगरु राहाब मिनु इत रिटिए पोसि तोइ। दोक दो मी पङरा ञंऊ तऊ, अला दत ज्ञपतिङ दोक दोपङरा ओदो नगरूत बचतु जैमा ओमप कनु। दोक ओशि ओदोक लऊ छु लोननङ दो परमेश्‍वरु थौरिङ दैङ तई तोइ। दोपङ राहाब रा वादा लऊ कि दत दो मी पङ जि छवनि रा कयऊ पिनि दत दोपङ दो नङ दोऊ पेरङ पङरा बचई।

![](https://cdn.door43.org/obs/jpg/360px/obs-en-15-02.jpg)

इस्राएलिऊ मी पङरा वादाऊ देशु जैमा शितिङ यरदन समुनद्रङ रा पोमा तोइ। परमेश्‍वरुस यहोशू रा लोऊ, “याजक पङरा होमशित जैमा मतमा।” दत याजक पङक यरदन समुनद्रङु नंऊ रंऊ बङखौन तऊ दत ती तुमा डेमु, ओदोक इस्राएलिऊ मी पङ समुनद्रङु नोचलङ फोसि मटङु थौरिङ जैमा लीरो।

![](https://cdn.door43.org/obs/jpg/360px/obs-en-15-03.jpg)

दो मीपङक यरदन लुङफा पोऊ जैउ दत परमेश्‍वरूस यहोशू रा लोऊ यरीहो नंऊ संङकु तोङमा शितिङ छसु पोसमा, दोपङ हत शेच्चन देशङ तोइ। परमरश्‍वरूस दो मी पङरा लोऊ कि दोपोऊ याजक पङ नङ सैनिक पङरा टु दयार शम दो नगरु नोपा- जिपा ठुरतु पोसमा वई। दत याजक नङ सैनिक पङक ओशि यो लऊ।

![](https://cdn.door43.org/obs/jpg/360px/obs-en-15-04.jpg)

दत शिनिश दयारू, इस्राएली पङक दो नगरु नोपा- जिपा हे शिनिश फैरा ठुरतु। दोऊ ज्ञपतिङ, याजक पङक रोनशिङक बजऊ दत सैनिक पङक शेच्‍चन हरो टऊ।

![](https://cdn.door43.org/obs/jpg/360px/obs-en-15-05.jpg)

दत यरीहोऊ नोपा- जिपा सिङ बितिङ बरूसु जैऊ। हलै परमेश्‍वरूस लोऊ तोइ इस्राएली पङक नगरू सिङ छला रा कयऊ पिनु। दोपङक लैम राहाब नङ दौऊ पैरङ रा सोठऊ, दो पङ इस्राएली पोऊ खोता वंऊ जेऊ तोइ। दत कनानु पोसि अलित मी पङ गोऊ इस्राएली पङ यरीहो रा कयऊ पिनु, दत दोपङ बैऊ इस्राएली मी पङ दोपङ नङ लि संङकु तोङकमा तुइ।

![](https://cdn.door43.org/obs/jpg/360px/obs-en-15-06.jpg)

परमेश्‍वरूस इस्राएली पङ रा लोऊ कनानु पोसि उङ लि जात नङ ञमफो समझोता मालमा। दत लि गिबोनियों मिनु इत कनानी जातु मीस यहोशू रा कवश लोऊ दो कनानुस वरि इत जागऊ पोसि तोइ। दोपङक यहोशू रत दोपङ नङ समझौता लमा शितिङ लोऊ। यहोशू नङ अलित इस्राएली मुखिया गुस परमेश्‍वर रा शुऊ कि दोपङरा छे लमा गिनमा। ओदो बसकयङ,दोपङ गिबोनि पङ नङ समझौता लऊ पिनु।

![](https://cdn.door43.org/obs/jpg/360px/obs-en-15-07.jpg)

हुम दयार ज्ञपतिङ, इस्राएली पङ रा पोता लगयतु कि गिबोनिऊ मी पङ कनानु ओ पोसि तोइ। दोपङ हत छिङना तऊ छु लोननङ गिबोनि पङ दोपङरा कवश लोऊ। दत लि दो दोपङ नङ ञमफो लमिन समझौता रा लऊ तऊ छु लोननङ दो परमरश्‍वरू तुसिङ तु तोइ। दत गोप टेमु ज्ञपतिङ, कनानु पोसि इत अलित जात, एमोरियोंऊ राजापङ गोऊ कि गिबोनी पङ इस्राएली पङ नङ समझोता लऊ पिनु, ओदोक दोपङक एनु- एनु सैनिक पङरा ञमफो लऊ इत चेइ सैना जुरऊ पिनु अला गिबोनु तोंङकमा जेऊ पिनु। गिबोनी पङ दोपोऊ पङगोत लमा शितिङ यहोशु रा इत फरिनतन पिनु।

![](https://cdn.door43.org/obs/jpg/360px/obs-en-15-08.jpg)

जि फरिनतन गोऊ यहोशूस इस्राएलिऊ पोऊ सैना रा कटठा लऊ अला गिबोनी पोऊरा पुतमा शितिङ दोपङ इ गोङक पूरा विनु। नममत ठेठे दोपङक एमोरिऊ सैना रा हैरान लऊ पिनु अला दोपङ नङ संङकु तोङकमा जेऊ।

![](https://cdn.door43.org/obs/jpg/360px/obs-en-15-09.jpg)

ओदो दयार परमेश्‍वर इस्राएलि पोऊ शितिङ तोङकु। दोक एमोरि पङरा पेऊ पिनु अला दोक चेइ- चेइ रस थतु गोप एमोरी सैनिक पङरा सतु पिनु।

![](https://cdn.door43.org/obs/jpg/360px/obs-en-15-10.jpg)

परमेश्‍वरूस नी रा लि नमु नंऊ इ जागा टेखयऊ तऊ छू लोननङ इस्राएली पङरा गोप टाइम पोरति दत एमोरि पङरा होमयो हरऊ पिन। ओदो दयार, परमेश्‍वरूस इस्राएली पोऊ शितिङ जिततु पिनु।

![](https://cdn.door43.org/obs/jpg/360px/obs-en-15-11.jpg)

दत परमेश्‍वरूस दो सैना पङ रा हरायऊ ज्ञपतिङ, गोप कनानु जातु मी पङ इस्राएलु संङकु तौङकमा शितिङ कटठा वंऊ। यहोशु नङ इस्राएली गुस तोङकु दोपङरा सतु पिनु।

![](https://cdn.door43.org/obs/jpg/360px/obs-en-15-12.jpg)

ओइ तोङकु ज्ञपतिङ, परमेश्‍वरूस इस्राएलु सिङ गोत्र पङरा प्रतिज्ञऊ देशु नंऊ दोपोऊ हिसा खैऊ तोइ। दत परमेश्‍वरूस इस्राएल रा दोपोऊ सिङ सिंमङु रा सवङना लऊ पिनु।

![](https://cdn.door43.org/obs/jpg/360px/obs-en-15-13.jpg)

दत यहोशु गतपो वंऊ जेऊ दत दोक इस्राएलु सिङ मी रा ञमफो कुतु। दत यहोशू गुस दो मी पङरा लोऊ कि किमपङक दो वादा रा लमा कसम लऊ तोइ दो परमेश्‍वरूस किमपङनङ सीनै डोङखङु रा छुतु तोइ। दो मीपङक परमेश्‍वरू थोरिङ देङ तामा अला दोऊ गिनमा दो खेमा शितिङ वादा लऊ।

*यहोशू पाठ -1-24 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_15_128kbps.m4a

## 16. छुडई पङ।

https://openbiblestories.org/l/scu/story-16/

![](https://cdn.door43.org/obs/jpg/360px/obs-en-16-01.jpg)

यहोशु सिऊ ज्ञपतिङ इस्‍त्राएलि पङक परमेश्‍वर रा मामोनऊ। दोपङक परमेश्‍वरूस रिङमिन दो मागोऊ, अला दोपङक दो वादऊ देशुस बचति कनानि मी पङरा दकपा माहनु। इस्‍त्राएलि पङक एनु सोचा परमेश्‍वर, यहोवा रा सोठऊ कनानी पोऊ भोगानु अराधना लमा तिखु। इस्‍त्राएलि मी पोऊरा उङो राजा मातोइ तोइ, ओदोक उङरा छे एपो तुरो दोक ओशि यो लऊ।

![](https://cdn.door43.org/obs/jpg/360px/obs-en-16-02.jpg)

परमेश्‍वरु रिङमिन दो मगोऊ ज्ञपतिङ इस्‍त्राएलि पङक इत रिवाज जोदे शुरु लऊ दोरा गोप फेरा लऊ तोइ। जि रिवाज ओशि चलतु कि गोप बोषङ शम इस्‍त्राएलु मी पङ परमेश्‍वरु कमचित मागोइ, दत दो दोपोऊ दुश्मोनु रत हरतु ज्ञपतिङ सजा खेइ। जि दुश्‍मोन पङ इस्‍त्राएलि पोरत सिङ- सङ लुटई तोइ, दोपोऊ नोर रा कयऊ पिनि, अला दोपोऊ नंऊ गोप मीपङरा सतु पिनि। दत दोसपरिङ इस्‍त्राएलि पोऊ दुश्‍मोन पङ दोपोऊ थोरिङ गोप बोषङ शम ङनचेन लई तोइ, दोऊ ज्ञपतिङक इस्‍त्राएलु मी पङ एनु पाप लमिन दो सोठइ अला दोपङरा बचामा शितिङ परमेश्‍वर रा कोलङ लई।

![](https://cdn.door43.org/obs/jpg/360px/obs-en-16-03.jpg)

दयारो दयारो इस्राएली दुखङ लन्नङ परमेश्‍वर दोपङरा बचायाई । दो इत छुडायई मिऊ रत ओशी लइ – इत ओशी मी दो दोपोऊ दुसमोन नङ तोङकी अला दोपङरा हरायइ । दत दो देशु सवङना वङरो अला दो छुडायइ मी दोपोऊ थोरिङ ऐपोस राज लरो। परमेश्‍वरूस दोपङरा बचामा रा गोप छुडायइ सा मी पङरा पिनु । परमेश्‍वर रा ञमफो तोई ईत दुसमोन जातु मी, मिधानी पङक इस्राएलि पङरा हरामा शितिङ हेलि ओशि लऊ।

![](https://cdn.door43.org/obs/jpg/360px/obs-en-16-04.jpg)

मिधानी पङक शिनिश बोषङ शम इस्राएली पोऊ फोलङ रा लुटायऊ। इस्राएलिऊ मी पङ गोप बेऊ तोइ, अला दोपङ गुफऊ ञखु छु लोननङ मिधानि मी पङ दोपङरा फङमा मालिइ। दोपङरा बचामा शितिङ दोपङक परमेश्‍वर रा कुतु।

![](https://cdn.door43.org/obs/jpg/360px/obs-en-16-05.jpg)

गिदोन मिनु इत इस्त्राएली फौबलङक तोइ। इ दयार, दो इत मातङमा जागऊ रोजत ठोंऊ तोइ छु लोननङ मिधानी मीपङ दोरा खुतमा मालिइ। यहोवऊ स्‍वर्गु मीस गिदोनु रा तु दोरा लोऊ,“ हे शेच्‍चन मी, परमेश्‍वर कन नङ ञमफो तो। जो अला इस्राएली पङरा मिधानी पोऊरत बचायई।“

![](https://cdn.door43.org/obs/jpg/360px/obs-en-16-06.jpg)

गिदोनु अपाऊ रा मुखङ रा तामा शितिङ इत जागा तोइ। थोनतु होमशित कमचित दो परमेश्‍वरुस गिदोन रा ओशि लमा शितिङक लोऊ छु लोननङ दोऊ जागा रा ठामा तोइ। दत गिदोन मी पोऊरत बेइ तोइ, ओदोक दोक मुञञा तशपा वङरो रिंऊ शुंऊ। दत दोक दो पुजा तीमा जागा रा ठऊ यम -यम लऊ पिनु। दोक परमेश्‍वरु शितिङ इत सरपा जागा जुरऊ अला दोऊ थोरिङ परमेश्‍वरु शितिङ पुजा तिउ।

![](https://cdn.door43.org/obs/jpg/360px/obs-en-16-07.jpg)

अलित नममत मीपङक तंऊ ऊङक ता दो जागा रा ठऊ यम-यम टुकडा लऊ पिनमिन तश, ओदोक दोपङ हत छिङना तंऊ तोइ। दोपङ गिदोन रा सतमा शितिङ दोऊ कयुमु जेऊ, दत गिदोनु अपास लोऊ, ” का छे रंऊ परमेश्‍वरु ओमेत लमा शितिङ कोशिश लऊ आ? दत दो परमेश्‍वर तोननङ दोरा एनु हिफाजत एनरा लमा मतमा। छु लोननङ दोक ओशि रिंऊ ओदोक मीपङक गिदोन रा मासतु।

![](https://cdn.door43.org/obs/jpg/360px/obs-en-16-08.jpg)

ओसपरिङ इस्राएली पङरा लुटामा शितिङक मिधानी मीपङ हेलि तु। दोपङ ओनचे तोइ कि दोपङरा शुममा लि मालिमा तोइ। गिदोनुस दोपोऊ खिलाफ तोङकमा शितिङ इस्राएली पङरा ञमफौ कुतु। गिदोनुस परमेश्‍वरु रत निश सार थऊ दत दोरा देङ वङरो परमेश्‍वर इस्राएल रा बचामा शितिङ रिंऊ तश।

![](https://cdn.door43.org/obs/jpg/360px/obs-en-16-09.jpg)

होमशित सार रा शितिङ, गिदोनुस तेतु चम रा मटङु तऊ परमेश्‍वर रा लोऊ कि नममतु बेमो लेम तेतु चमु थोरिङ तुमा गिनमा अला मटङु थोरिङ मेन। परमेश्‍वरु ओशि यो लऊ। अलित गोङक, दोगुस परमेश्‍वर रा लोऊ मटङ थिसि वङमा गिनमा अला तेतु चम फौसि यो पोसमा। परमेश्‍वरुस ओशि यो लऊ। ओइ निश सारु लमिन, गिदोन रा परमेश्‍वरु थोरिङ देङ वंऊ कि परमेश्‍वरुस दिमलेयो गिनि कि दो इस्राएली पङरा मिधानि पोऊरत बचई।

![](https://cdn.door43.org/obs/jpg/360px/obs-en-16-10.jpg)

दत गिदोनुस सैनिक पङरा एनु रा कुतु अला हुमनिसऊ निश हजार फौबलङक तु। दत परमेश्‍वरुस दोरा लोऊ कि जिपङ ता गोप तश। दत गिदोनुस दो सिङ निसऊ निश हजार मी पङरा कयुमु पोलठऊ पिनु दोपङ तोङकमरा बेई तोइ। परमेश्‍वरुस गिदोन रा लोऊ कि जि फोबलङ पङ अला लि गोप तश। ओदोक गिदोनुस हुमज्ञा सैनिक पङरा सोठऊ दोपङ सिङरा कयुमु पिनु।

![](https://cdn.door43.org/obs/jpg/360px/obs-en-16-11.jpg)

दो गोङक परमेश्‍वरूस गिदोन रा लोऊ, ” मिधानी पोऊ चातु नंऊ जेऊ पिन अला दोपङरा कमचित लोइ दो दोगुस गोउ। ओसपरिङ का गोनङ दत दोपङ छे कमचित लोऊ तश दत का दोपोऊ थोरिङ सङकु तोङकमा शितिङ माबेइ। ओदोक दो गोङक, गिदोन ओपङक नंऊ दोपोऊ चातु नंऊ जेऊ अला दोक इत मिधानिऊ सेनिक रा एनु पङगोत रा दो कमचित लोइ गोऊ दो दोक मङु नंऊ तंऊ तोइ। दो फोबलङकु पङगोतुस लोऊ, ” जि मङु मतलब गिदोनु सेना उलपङ मिधानी सैना रा हरऊ पिनि। दत गिदोनुस जि गोऊ दत दोगुस परमेश्‍वर रा ओरछे लोऊ।

![](https://cdn.door43.org/obs/jpg/360px/obs-en-16-12.jpg)

दत गिदोनुस एनु सैनिक पोऊरा पोलठतु अला दोपोऊ नंऊ इत- इत रोनशिङक, इत मटङु बनिङ, अला इत मेसालो खेऊ। दोपङक दो चात रा घेरऊ पिनु ओदा मिधानिऊ सैनिक ञोनु तोइ। गिदोनु हुमज्ञा सैनिक पङक रंऊ मेसालो रा बनिङुस खोपु तऊ ओदोक मिधानिऊ मी पङक दो मेसालोऊ मै रा मातंऊ।

![](https://cdn.door43.org/obs/jpg/360px/obs-en-16-13.jpg)

दत गिदोनु सिङ सैनिक पङ एनु बनिङ पङरा इतो टेमु ठऊ लेम मेसालोऊ मै रा कनु पिनु। दोपङक एनु रोनशिङक फुसुतु अला हरो टऊ, ” गिदोन नङ ञमफौ यहोवऊ तलवार।”

![](https://cdn.door43.org/obs/jpg/360px/obs-en-16-14.jpg)

परमेश्‍वरुस मिधानी पङरा पेऊ पिनु, ओदोक दोपङ इतुस अलित नङ तोङकु- सशु। हसल ओ, गिदोन दो कमचित हलइ पङरा अलित इस्राएली पङरा मिधानी पोऊ ज्ञपतिङ जेऊ दोपोऊ ओमेत लमा शितिङ कुतमा पिनु। दोपङक दोपोऊ नंऊ गोप रा सतु पिनु अला ञुइ पङरा फंऊ दोपङरा इस्राएली देशु दकपा हनु पिनु। ओदो निर इत लाख मिधानी सिऊ जेऊ। ओशि लऊ परमेश्‍वरुस इस्राएल रा बचऊ।

![](https://cdn.door43.org/obs/jpg/360px/obs-en-16-15.jpg)

दो मीपङ गिदोन रा राजा जुरामा गिनु तोइ, दत गिदोनुस दोपङरा ओशि लमा माखेऊ, दत दोक दोपोऊरत ज्ञङु टानङ थऊ दोपोऊ नंऊ गोप ता मिधानी पङक लुटऊ तोइ। दो मीपङक गोप ज्ञङ गिदोन रा खेऊ।

![](https://cdn.door43.org/obs/jpg/360px/obs-en-16-16.jpg)

दत गिदोनुस दो जङु इत एपो गस्‍कुला जुरऊ हले दो महायाजक चुखि तोइ। दत मीपङक दोरा मोनामा शुरु लऊ दो इत मुखङ तोइ। दत परमेश्‍वरुस हेलि इस्राएलु मी पङरा सजा खेऊ छु लोननङ दोपङक मुखङु अराधना लऊ तोइ। परमेश्‍वरुस दोपोऊ दु:श्‍मोन रा दोपङरा हरामा शितिङ लोऊ। दत हेलि दोपङक ओमेत लमा शितिङ परमेश्‍वर रा कोलङ लऊ, अला परमेश्‍वरुस दोपङ रा बचामा शितिङ इत अलित छुडई सा रा पिनु।

![](https://cdn.door43.org/obs/jpg/360px/obs-en-16-17.jpg)

जि कमचित गोप फेरा वंऊ, इस्राएलिऊ मी पङ पाप लई, परमेश्‍वर दोपङरा सजा खेइ, दोपङ दु:खङ लइ, अला परमेश्‍वर दोपङरा छुडामा शितिङ उङिरा पिनि। गोप बोषङ शम, परमेश्‍वरुस गोप छुडई पङरा पिनु दोपङक इस्राएल पङरा दोपोऊ दु:श्‍मोनु रत बचऊ।

![](https://cdn.door43.org/obs/jpg/360px/obs-en-16-18.jpg)

दत ज्ञपतिङ, दो मी पङक अलित देश पोऊ खोता परमेश्‍वरु रत एनपोऊ शितिङ इत राजा गिनमा लोऊ। दोपङ इत ओशि राजा गिनु तोइ दो शुइ नङ शेच्‍चन तोमा गिनमा, अला दो तोङकमा परिङ दोपोऊ गोबा वङरो। परमेश्‍वर रा जि कमचित एपो माजेऊ, दत लि दोक दोपङरा ओशि यो राजा खेऊ हलेया दोपङ गिनु तोइ।

*न्‍यायियों पाठ -1-3; 6-8;1 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_16_128kbps.m4a

## 17. दाऊद नङ ञमफो पेमेश्‍वरु वादा।

https://openbiblestories.org/l/scu/story-17/

![](https://cdn.door43.org/obs/jpg/360px/obs-en-17-01.jpg)

शाऊल इस्राएल मुलुकु पोइले राजा तोइ। दो चेइ नङ शरे तोइ, हले दोपङ गिनि ओदोशियो तोइ । इस्राएलु एनु राज लमा होमशित गोप बोषङु नंऊ शाऊल इत एपो राजा तोइ। दत ज्ञपतिङ दो इत हलम मी वंऊ जेऊ दोक परमेश्‍वरु कमचित मागोऊ, ओदोक परमेश्‍वरुस इत अलित मी रा चुनऊ दो इ दयार दोऊ पोलङकु राजा वई।

![](https://cdn.door43.org/obs/jpg/360px/obs-en-17-02.jpg)

परमेश्‍वरुस दाऊद मिनु इत शरा इस्राएली फौबलङ रा चुनऊ इ दयार दोऊ जागऊ राजा वङमा शितिङ । दाऊद बैतलहम देशु इत पालस तोइ। गोप बैलऊ, दाऊदुस हौम नङ थर निश रा यो सतु पिनु तोइ, छु लोननङ दाऊदुस खोननि परिङ दोऊ अपाऊ तेत पङरा दोपङक खेरऊ तोइ। दाऊद इत एपौ अला धर्मु मी तोइ। दोक परमेश्‍वरु थौरिङ दैङ लऊ अला दोऊ कमचित पङ गोऊ।

![](https://cdn.door43.org/obs/jpg/360px/obs-en-17-03.jpg)

ओसपरिङ दाऊद जोदे शरा फोबलङको तोइ, दोक चेइ-शुइ गोलियत नङ तोङकु। गोलियत इत हत एपो सेनिक तोइ। दो हत शेच्‍चन नङ हेत मेननङ हुम मीटर शुई नङ चेइ । दत लि परमेश्‍वरुस गोलियत रा सतमा अला इस्राएल रा बचामा शितिङ दाऊदु ओमेत लऊ। दोऊ ज्ञपतिङ, दाऊदुस इस्राएलु दुशमोनु नङ गोप फैरा जिततु। दाऊद इत चेई सेनिक वऊ जेऊ, अला दोक तोङकमऊ नऊ इस्राएली सेनऊ गोबा वंऊ। मीपङक दो हत एपो तश लोइ तोइ।

![](https://cdn.door43.org/obs/jpg/360px/obs-en-17-04.jpg)

मी पङक दाऊद रा ओनचे गोरङ लऊ कि दत शाऊल दोऊ रत माशोऊ। दत शाऊल दोरा सतमा गिनु तोइ, ओदोक दाऊद दो नङ दोऊ सैनिक पोऊरत बचतमा शितिङ जंगलु छुपयतु।। इ दयार, दत शाऊल नङ दोऊ सैनिक दाऊद रा फऊ दत शाऊल इत गुफऊ नऊ जैऊ। दो ओदोयो गुफा तोइ दोननऊ दाऊद ञङकु तोइ, दत लि शाऊलुस दोरा मातऊ। दाऊद शाऊलु ज्ञपतिङ दोऊ गोप तुसिङ जेऊ, दत दोऊ गस्‍कुलास इत टुकडा चेरु पिनु। दत ज्ञपतिङ, हे शाऊल दो गुफास दकपा हन्‍तु दत दाऊदुस दोरा कुतु दो चुममिन गस्‍कुला चेरमिन दो कनु। ओदोक, शाऊल सेसु कि दाऊदुस राजा वङमा शितिङ दोरा मासति लोऊ।

![](https://cdn.door43.org/obs/jpg/360px/obs-en-17-05.jpg)

गोप बैलऊ ज्ञपतिङ, शाऊल तोङमा परिङ सिऊ जैऊ, अला दाऊद इस्राएलु राजा वंऊ दो इत एपो राजा तोइ, अला मीपङक दोरा एपो ततु। परमेश्‍वरुस दाऊद रा बोरङ खेऊ अला दोरा जितऊ। दाऊद गोप तोङकमा जेऊ, अला परमेश्‍वरुस इस्राएलु दुश्‍मोन रा हरामा शितिङ दोऊ ओमेत लऊ। दाऊदुस यरूशलेम देशङ रा जिततु दोरा एनु राजधानी जुरऊ, दा दो पोसु अला राज लऊ। दाऊद निशनिसा बोषङु राजा तोइ। ओइ बैलऊ, इस्राएल गोप शेच्‍चन नङ छुकपो वंऊ जेऊ।

![](https://cdn.door43.org/obs/jpg/360px/obs-en-17-06.jpg)

दाउद इत थानङ जुरामा गिनु तोइ दा सिङ इस्राएली परमेश्‍वरु अरादना लमा लीरो अला दोऊ शितिङ पुजा तीमा लीरो। पज्ञा बौषङुस, दो मीपङ मूसऊ जुरामिन मिलापु तोंमबुअऊ नंऊ परमेश्‍वरू अराधना लइ तोइ अला दोरा पुजा खेइ तोइ।

![](https://cdn.door43.org/obs/jpg/360px/obs-en-17-07.jpg)

दत ओदा नातान मिनु इत भविष्‍य लोइ सा तोइ। परमेश्‍वरुस दोरा दाऊद रा ओशि लोमा शितिङ पिनु: “कस गोप तोङकु, ओदोक का अङरा शितिङ जि थानङ माजुरई। कन छङ जीरा जुरई। दत लि, ग कनरा गोप बोरङ खेसि। कन इत छङ अमबोरो अङ मी पोऊ थोरिङ राजऊ खोता राज लई। “अमबोरो शासन लई दो दाऊदु इपोटोक वंश मसीह तोइ। मसीह परमेश्‍वरु इत चुनामिन तोइ दो मुलुकु नऊ मी पङरा दोपोऊ पापुस बचई।

![](https://cdn.door43.org/obs/jpg/360px/obs-en-17-08.jpg)

दत दाऊदुस नातानु फरिनतन गोऊ दत दोक परमेश्‍वर रा ओरछे लोऊ अला दोरा पेरतु। परमेश्‍वरुस दोरा गोप चेइ लऊ पिनु अला दोरा गोप बोरङ खेऊ तोइ। दत लि, दाऊद मासेसि तोइ कि परमेश्‍वर ओइ कमचित रा तशपा रिइ। ओइ बेलऊ उलपङ सेसि कि इस्राएली पङरा इत चेइ बोषङ शम, मोच्‍चे मला इत हजार बोषङ शम मसीह तशपा तुरो शुङमा वई।

![](https://cdn.door43.org/obs/jpg/360px/obs-en-17-09.jpg)

दाऊदुस गोप बोषङ शम एपोस एनु मी पोऊ थोरिङ शासन लऊ। दोक एपो वंऊ परमेश्‍वरु कमचित गोऊ अला परमेश्‍वरुस दोरा बोरङ खेऊ। दत लि, गोप बोषङ ज्ञपतिङ दाऊदुस परमेश्‍वरु खिलाफ बैमा थङ पाप लऊ तोइ।

![](https://cdn.door43.org/obs/jpg/360px/obs-en-17-10.jpg)

इ दयार दाऊदुस एनु महेलु दकपा खोनु दत इत शरे योबलङक रा सुशि तंऊ। दो दोरा मासेसि तोइ, दत दो सेसु दोऊ मिन बतशेबा तोइ।

![](https://cdn.door43.org/obs/jpg/360px/obs-en-17-11.jpg)

एनु मी नोस लमा बसकयङ, दाऊदुस दो योबलङ रा एनुरा सुमा शितिङ अलित रा पिनु। दोगुस दोनङ ञमफौ ऊलटा लेन लऊ दत दोरा पोलठऊ कयुमु पिनु। गटो बेलऊ ज्ञपतिङ बतशेबा ओशि लोऊ दाऊदु रा फरिनतन पिनु कि दो चिगजा नङ वऊ।

![](https://cdn.door43.org/obs/jpg/360px/obs-en-17-12.jpg)

बतशेबऊ फोबलङक ऊरिय्‍याह मिनुस इत मी तोइ। दो दाऊदु सैनिकु नंऊ थोनतु एपो तोइ। ओइ फेरा दो तोङकमा शितिङ दकपा जेमिन तोइ। दाऊदुस ऊरिय्‍याह रा तोङकमऊ रत पोलठतु जिरा लोऊ दत दोरा एनु योबलङ नङ ञमफो पोसमा लोऊ। दत लि अला सैनिक पङ तोङकु तोइ ओदोक ऊरिय्‍याह गुस कयुमु माजेइ लोऊ। दत दाऊदुस ऊरिय्‍याह रा है पोलठऊ तोङकमा पिनु अला सैनापति रा दोरा ओशि जागऊ तामा लोऊ ओदा दु:शमोन थोनतु शेच्चन वङरो दत दो सिऊ जेइ। दत ओशि यो वऊ ऊरिय्‍याह तोङकमऊ नऊ सिऊ जेऊ।

![](https://cdn.door43.org/obs/jpg/360px/obs-en-17-13.jpg)

ऊरिय्‍याह तोङकमऊ नऊ सिऊ ज्ञपतिङ दाऊदुस बतशेबा नङ जन्‍नेटङ लऊ पिनु। ज्ञपतिङ, दोक दाऊदु छङरा तऊ। दाऊदुस छे लमिन ओदोक परमेश्‍वर हत छिङना तंऊ तोइ, ओदोक दोगुस नातान मिनु सैसि मिऊ रा दाऊद रा ओशि लोमा पिनु कि दोऊ पाप तचे हलम तोइ। दाऊदुस एनु पाप लमिन दो परूतु अला परमेश्‍वरुस दोरा माफ लऊ पिनु। एनु ञुङमिन जोलोमु नऊ, एनु कोषटङु टाइमु लि दाऊद परमेश्‍वरु ज्ञपतिङ- ज्ञपतिङ जैऊ अला दोऊ कमचित पङरा गोऊ।

![](https://cdn.door43.org/obs/jpg/360px/obs-en-17-14.jpg)

दाऊदु चिगजा सिऊ। ओशि यो परमेश्‍वरुस दाऊद रा सजा खेऊ। ओदो बस्‍कयङ, दाउद सीमा शम, दोऊ एनु पैरङुस दोऊ खिलाफ तोङकमा तु, अला दाऊदु एनु सोततिङ गटो वंऊ जैऊ। दत लि परमेश्‍वर एपौ तोई अला देसङ दोक ओशि लऊ दोगुस दाऊद छे लमा शितिङ लोऊ तोइ दो लई, दत लि दाऊदुस दोऊ मागोऊ तोइ। दत ज्ञपतिङ, दाऊद नङ बतशेबऊ अलित चिगजा वऊ, अला दोक दोऊ मिन सुलैमान तऊ।

*1 शमुएल पाठ- 10;15,19;24;31;2 शमुएल- 5;7;11-12 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_17_128kbps.m4a

## 18. खेचो वङमिन राज्‍य।

https://openbiblestories.org/l/scu/story-18/

![](https://cdn.door43.org/obs/jpg/360px/obs-en-18-01.jpg)

दाऊद राजा गुस निशनिसा बोषङ शम राज लऊ। दत दो सिऊ जेऊ, दत दोऊ छङक सुलैमानुस इस्राएलु राज लमा जूमा तिखु। परमेश्‍वरुस सुलैमान रा कमचित लोऊ अला दोरा शुऊ दो छैगिनु कि परमेश्‍वर दोऊ शितिङ लरो। सुलैमान परमेश्‍वरु रत थऊ कि दोरा हत हुशार जुरामा। ओइ कमचितुस परमेश्‍वर हत गरीस तोइ, ओदोक परमेश्‍वर सुलैमान रा गोप हुशार फोबलङ जुरऊ। सुलैमान गोप कमचित पङ सिखयतु अला दो इत हुशार शासक वंऊ तोइ। परमेश्‍वर दोरा हत छुकपो लि जुरऊ पिनु तोइ।

![](https://cdn.door43.org/obs/jpg/360px/obs-en-18-02.jpg)

यरूशलेमु सुलैमान दो थानङ रा जुरऊ ओदोऊ शितिङ दोऊ अपास सुनचतु तोइ अला छला रा कटठा लमिन तोइ। छङ मीपङ मिलतु तोमबुआ बसकयङ थानङु नऊ परमेश्‍वरु अराधना लइ तोइ पोसि तोइ।

![](https://cdn.door43.org/obs/jpg/360px/obs-en-18-03.jpg)

दत सुलैमानुस अलित देशु योबलङ पङ नङ प्‍यार लऊ। दोक गोप या बसकयङ इत हजार, योबलङ पङ नङ जन्‍नेटङ लऊ परमेश्‍वरु कमचित मागोऊ। दोपोऊ नऊ गोप योबलङ दकपा देशु तुमिन तोइ ञमफो एनु भोगान पङरा कयुफु तु अला दोपोऊ अराधना लऊ। दत सुलैमान गतपो वंऊ जेऊ तोइ दत दोगुस लि दोपोऊ भोगानु अराधना लऊ।

![](https://cdn.door43.org/obs/jpg/360px/obs-en-18-04.jpg)

ओदोक परमेश्‍वर सुलैमान रा हत छिङना तंऊ। दोक लोऊ कि दो इस्राएल देश रा निश राज्‍यु नऊ खेचो लऊ पिननङ दोरा सजा खेसि। दो सुलैमान सिऊ ज्ञपतिङ ओशि यो लरो।

![](https://cdn.door43.org/obs/jpg/360px/obs-en-18-05.jpg)

सुलैमान सिऊ ज्ञपतिङ, रहबाम राजा वंऊ। इस्राएल देशु सिङ मी दोरा एनु राजऊ खोता मोनामा शितिङ सिङ ञमफो कटठा वऊ। दोपङक रहबाम रा लोऊकि सुलैमानुस दोपङरा हत कोषटङ लेन लमा खेसु अला गोप रूपया थाथासु। दोपङक रहबाम रा लोऊ कि दोपङरा गटो लेन ककसमा।

![](https://cdn.door43.org/obs/jpg/360px/obs-en-18-06.jpg)

दत लि रहबामुस दोपङरा गोप मूरूख खोता जवाब खेऊ,“किमपङ रिंऊ तोश कि अङ अपा सुलैमानुस किमपोरत कोषटङु लेन ककसु। दत ग किमपङरा ओदो बसकयङ लि खुचि कोषटङु लेन लमा खेसि, अला ग किमपङरा ओदो बसकयङ लि खुचि जुकजेर खेसि।”

![](https://cdn.door43.org/obs/jpg/360px/obs-en-18-07.jpg)

दत मीपङक दोरा ओशि लोइ गोऊ दत दोपोऊ नऊ गोपुस दोऊ खिलाफ बगावत लऊ। सा चेला पङक लि दोरा सोठऊ पिनु, दोनङ ञमफो छङ लेम निश चेलायो ञुऊ तोइ। ओदो निश चेला पङक एनरा यहूदऊ राज्‍य लोऊ पिनु। ञुङमिन सा चेला

![](https://cdn.door43.org/obs/jpg/360px/obs-en-18-08.jpg)

पङक यारोबाम मिनु इत फोबलङ रा एनु राजा लोऊ पिनु। जि पेरङ पङ मुलुकु उतर- पूर्व हिसऊ तोइ। दोपङक एन रा इस्राएलु राज्‍य लोऊ।

![](https://cdn.door43.org/obs/jpg/360px/obs-en-18-09.jpg)

दत लि यारोबामुस परमेश्‍वरू खिलाफ बगावत लऊ अला मी पोऊ रत पाप लमा मतु। दोक एनु मी पोऊ अराधना लमा शितिङ निश मुखङ जुरऊ। दो छङ यहूदऊ राज्‍यु यरूशलेमु परमेश्‍वरु थानङु अराधना लमा माजेइ तोइ।

![](https://cdn.door43.org/obs/jpg/360px/obs-en-18-10.jpg)

यहूदा नङ इस्राएल राज्‍यु दुशमोन वंऊ जेऊ अला दयारो इतुस अलित नङ तोङकि तोइ।

![](https://cdn.door43.org/obs/jpg/360px/obs-en-18-11.jpg)

इस्राएलु सरपा राज्‍यु नंऊ, सिङ राजा हलम तोइ। दोपोऊ नंऊ तचे राजा ता दोपोऊ जागऊ थोरिङ राजा वङमा शितिङ गिनु दत अलित इस्राएली पोऊ रत सिऊ जेऊ तोइ।

![](https://cdn.door43.org/obs/jpg/360px/obs-en-18-12.jpg)

इस्राएल राज्‍यु सिङ राजा पङक अला गोप मीपङक मुखङ पोऊ अराधना लइ तोइ। दत दोपङक ओशि लऊ, दत दोपङ दयारो रिटिए पङ नङ ञमफो उल्‍टा लेन लऊ अला दत बसकयङ गोप फेरा मुखङु तुसिङ चिगजा पङरा पुजा लि तिऊ।

![](https://cdn.door43.org/obs/jpg/360px/obs-en-18-13.jpg)

यहूदा राज्‍यऊ राजा, दाऊदु वंश तोइ। दो राजा पोऊ नंऊ तचे ता एपो मी तोइ, दोपङक एपो राज लऊ अला परमेश्‍वरु अराधना लऊ। दत लि यहूदऊ गोप राजा हलम तोइ। दोपङक हलमुस राज लऊ, अला मुखङु अराधना लई तोइ। दत बसकयङ दोपोऊ नंऊ तचे ता राजा पङक कवश भोगानु शितिङ एनु चिगजा रा लि पुजा तिऊ। यहूदऊ गोप मीपङक परमेश्‍वरु खिलाफ बगावत लऊ अला अलित भोगानु अराधना लई तोइ।

*1 राजा पाठ -1-6; 11-12 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_18_128kbps.m4a

## 19. परमेश्‍वरु भविष्‍य लोइ सा।

https://openbiblestories.org/l/scu/story-19/

![](https://cdn.door43.org/obs/jpg/360px/obs-en-19-01.jpg)

परमेश्‍वर सोदायो इस्राएली पोऊ रा भविष्‍य लोइ सा रा पिनु पोसि तोइ। भविष्‍य लोइ सा परमेश्‍वरु कमचित पङ गोइ तोइ अला दत दोरा मी पङरा लोइ तोइ।

![](https://cdn.door43.org/obs/jpg/360px/obs-en-19-02.jpg)

दत अहाब इस्राएल राज्‍यु राजा तोइ दत ओदो टाइमु एलिय्‍याह भविष्‍य लोइ सा तोइ। अहाब इत हलम मी तोइ। दोक कवश करा सा भोगानु अराधना लमा शितिङ मी पङरा चेकचे लऊ तोइ। ओदोक एलिय्‍याह अहाब रा लोऊ कि परमेश्‍वर दो मी पङरा सजा खैमा जैऊ तश। एलिय्‍याह गुस दौरा लोऊ, “दत शम ग है छरबा तुमा शितिङ मा लोइ दत शम इस्राएलु राज्‍यऊ ना छरबा तुइ अला ना बेमो दति।” ओइ कमचितुस अहाब रा ओनचे छिङना जैऊ कि दोक एलिय्‍याह रा सतमा जुराशु।

![](https://cdn.door43.org/obs/jpg/360px/obs-en-19-03.jpg)

ओदोक परमेश्‍वरुस एलिय्‍याह रा लोऊ कि दो जंगलु जैऊ अहाबु रत ञङकमा। एलिय्‍याह जंगलु दो झरनऊ रा जैऊ दा जैमा शितिङ परमेश्‍वरुस दोरा लोमिन तोइ। दयारो नम्‍मत अला गोङक, का एलिय्‍याह रा शितिङ रोटि नङ शा कयुफु जैइ तोइ। ओदो बेलऊ, अहाब नङ दोऊ सैना एलिय्‍याह रा फंऊ जैऊ तोइ, दत लि दोरा फङमा मलिऊ।

![](https://cdn.door43.org/obs/jpg/360px/obs-en-19-04.jpg)

छरबा मतुमऊ गोप टाइमु ज्ञपतिङ दो झरना फोसु जेऊ। ओदोक एलिय्‍याह ञमफो यो इत देशु जैऊ। दो देशु इत मेतपो विधवा योबलङ तोइ दोऊ इत छङ तोइ। अकाल तु दत गोरे दोपोऊ रा जामा शितिङ छोयो मातेइ तोइ। दत लि, दो योबलङकुस एलिय्‍याह रा खोनु, ओदोक परमेश्‍वरुस दो नङ दोऊ छङकु गिनमा दो पूरा लऊ, ओदोक दोऊ तिसङु ढोबा नङ दोऊ मत्‍तिऊ ढोबा तशपयो खाली मावंऊ। दो अकाल तुमा परिङ दोऊ रा थकतु तोइ। एलिय्‍याह हुम बोषङ शम ओदा पोसु।

![](https://cdn.door43.org/obs/jpg/360px/obs-en-19-05.jpg)

हुम नङ खनङ बोषङु ज्ञपतिङ, परमेश्‍वरुस एलिय्‍याह रा लोऊ दो हैलि छरबा सुइ। दोक एलिय्‍याहऊ रत पोलठतु इस्राएल राज्‍य जैऊ अहाब नङ कमचित लोमा शितिङ लोऊ। ओदोक एलिय्‍याह अहाबु रा जैऊ। दत अहाबुस दोरा तंऊ दोक लोऊ, “अच्‍छा छा का तोन आ,मुसीबोत जोरमयई सा। एलिय्‍याहास लोऊ, मुसीबोत जोरमयई सा का तोन। कस यहोवा रा सोठऊ पिनु। दो यो एपो परमेश्‍वर तश, दत लि का करा सा सतु अराधना लऊ तोन । छङ कनरा इस्राएल राज्‍यु सिङ मी पङरा कर्मेल डोङखङु रा कयुफु तुमा वई।

![](https://cdn.door43.org/obs/jpg/360px/obs-en-19-06.jpg)

सिङ मी पङ कर्मेल डोङखङ फोक जेऊ। दो फोबलङ पङ लि तु तोइ दोपङ रिंइ तोइ दो करा सा भोगानु भविष्‍य लोइ सा तोइ। दोपङ करा सा भोगानु भविष्‍य लोइ सा तोइ। दोपङ पज्ञाऊ डईनिसा मी तोइ। एलिय्‍याहास मी पङरा लोऊ, “तशपा शम किमपङ रंऊ मोनङ रा नोस- जिस पिनु पोसि? छङ यहोवा परमेश्‍वर तोननङ दोऊ अराधना लमा। दत लि करासा भोगान परमेश्‍वर तोननङ दोऊ अराधना लमा।”

![](https://cdn.door43.org/obs/jpg/360px/obs-en-19-07.jpg)

दत एलिय्‍याहास करासऊ भविष्‍य लोइ पङक रिऊ, “इत रत रा पुजा तिऊ दोऊ शा रा यम- यम लऊ पुजा तीमा शितिङ इत जागऊ थोरिङ तामा, दत मै मापिनमा। दोऊ ज्ञपतिङ ग लि ओशि यो लई, अला इत खैचो जागऊ थोरिङ ग दो शा रा तई। दत परमेश्‍वर जागऊ थोरिङ मै पयानङ का सेसमा दो सोच्‍चा परमेश्‍वर तश।” दत करा सा सतु भविष्‍य लोइ पङक इत पुजा तीमा जुरऊ दत दो मै पिनमा मलिऊ।

![](https://cdn.door43.org/obs/jpg/360px/obs-en-19-08.jpg)

दत करासा भोगानु भविष्‍य लोइ पङक करासा भोगान रा कोलङ लऊ, “हे करा सा भोगान, निङपोऊ गोऊ।” सारा दयार दोपङ कोलङ लऊ अला हरौ टऊ अला या बसकयङ रङ रा चकूस थोलु पिनु, दत लि करासा भोगानुस छोयो मलोऊ, अला दोक छोयो मै मापयऊ।

![](https://cdn.door43.org/obs/jpg/360px/obs-en-19-09.jpg)

करासा भोगानु भविष्‍य लोइ पङक करासा भोगान रा कोलङ लऊ मोच्‍चेमला पूरा दयार तिऊ। दत ज्ञपतिङ दोपङक कोलङ लमा बोनत लऊ पिनु। दत एलिय्‍याहास अलित रतु शा रा परमेश्‍वरु जागऊ तऊ पिनु। दोऊ ज्ञपतिङ मी पोरत तिऊ सनिश चेइ बनिङ रा दो पुजा तीमऊ रा दत शम होसमा लोऊ ओसपरिङ शम शा, सिङ, नङ दत बसकयङ दो जागऊ नोपा- जिपा सिङ मटङ थिसि मा वङरो।

![](https://cdn.door43.org/obs/jpg/360px/obs-en-19-10.jpg)

दत एलिय्‍याहास परमेश्‍वर रा कोलङ लऊ, “हे यहोवा, अब्राहम, इसहाक, नङ याकुबु परमेश्‍वर, निङपङरा कनकसना गिरङ इस्राएलु परमेश्‍वर तोक अला ग गिरोऊ नुकुर तोक। अङरा रिङना ओदोक जि मीपङ सेसि कि गिरङ ओ सिङु एपो परमेश्‍वर तोक।”

![](https://cdn.door43.org/obs/jpg/360px/obs-en-19-11.jpg)

अचानक ओ, नमुरत मै तोलु अला दोक शा, सिङ, डोङखङ, फतिङ दत बसकयङ दो जागऊ नोपा- जिपाऊ ती र लि रोतु पिनु। दत मी पङक तंऊ, दोपङ मटङु थोरिङ बुशु जेऊ अला चलु, “यहोवा यो परमेश्‍वर तश। यहोवा यो परमेश्‍वर तश।”

![](https://cdn.door43.org/obs/jpg/360px/obs-en-19-12.jpg)

दत एलिय्‍याहास लोऊ, “करा सा भोगानु इत लि भविष्‍य लोइ सा बचतु माजैमा गिनमा।” ओदोक मी पङक करासा भोगनु भविष्‍य लोइ पङरा चुमु पिनु अला दोपङरा ओदत खैचो किऊ दत दोपङरा सतु पिनु।

![](https://cdn.door43.org/obs/jpg/360px/obs-en-19-13.jpg)

दत एलिय्‍याहस अहाब राजा रा लोऊ, “हसल ओ रंऊ कयुमु रोऊ जो, छु लोननङ छरबा तुइ सा तश।” हसल ओ जू गोप वंऊ तश, अला हत छरबा तु। यहोवा दो अकाल रा खोतोम लऊ तोइ। ओदोक पोता लगयतु कि यहोवा यो सिङु सोच्‍चा परमेश्‍वर तश।

![](https://cdn.door43.org/obs/jpg/360px/obs-en-19-14.jpg)

दत एलिय्याहास एनु लैन रा कयाऊ पिनु, दत परमेश्‍वरूस एलीशा मिनु इत फोबलङ रा एनु भविष्‍य लोइ सा वङमा लोऊ। परमेश्‍वरुस एलीशा नङ मिलतु गोप चमत्कार लऊ। इत चमत्‍कार नामान नङ ञमफो लऊ। दो इत दु:शमोनु सैनऊ गोबा तोइ, दत दोरा इत हलम कोडु शोत वंऊ तोइ। नामानुस एलीशऊ बारै गोऊ तोइ, ओदोक दो एलीशऊ रा जैऊ अला दोरा दोक एपो लमा शितिङ लोऊ। एलीशास नामान रा लोऊ जैऊ यरदन लुङफऊ तिऊ नऊ शिनिश फैरा चङकु पिन।

![](https://cdn.door43.org/obs/jpg/360px/obs-en-19-15.jpg)

नामान छिङना वंऊ जेऊ। दोक ओशि मालई लोऊ, छु लोननङ जि दोरा मूर्ख लैन तति तोइ। दत ज्ञपतिङ दोक एनु मोनङ लैऊ पिनु अला जैऊ यरदन समुन्‍द्रङु तिऊ नंऊ शिनिश फैरा चङकु। दत थौनतु ज्ञपतिङ दो तिऊ रत हन्‍तु दत परमेश्‍वरूस दोऊ कोडु शोत रा एपो लऊ पिनु।

![](https://cdn.door43.org/obs/jpg/360px/obs-en-19-16.jpg)

परमेश्‍वरुस इस्राएलु मी पोऊरा अलित गोप भविष्‍य लोइ सा रा पिनु। दो सिङुस मी पङरा मुखङु अराधना लमा शितिङ लोऊ। ओदो बसकयङ, दोपङरा इतुस- अलितनङ एपो पोसमा अला इतुस- अलित रा पापङ ततमा शितिङ लोऊ। दो भविष्‍य लोइ पङक मीपङरा लोऊ दोपङरा हलम लैन लमा सोठामा अला ओदो बसकयङ परमेश्‍वर रिंइ कमचित दो गोमा। दत लि दो मीपङक ओशि मालननङ परमेश्‍वर दोपङरा सजा खेइ।

![](https://cdn.door43.org/obs/jpg/360px/obs-en-19-17.jpg)

गोप शम, दो मीपङक परमेश्‍वरुस रिङमिन दो मागोऊ। अमबोरो दोपङक भविष्‍य लोइ पङरा हलम लऊ अला दत बसकयङ तचे ता भविष्‍य लोइ पङ रलि सतु पिनु। इ फैरा, दोपङ यिर्मयाह भविष्‍य लोइ सा रा फोसि कुअङु नंऊ पिनु अला दोरा ओदा सीमा शितिङ परूतु पिनु। दो कुअङु ओपङ कलऊ नऊ फसतु। दत बिन्यामीन राजा गुस दोरा पापङ ततु दोक एनु सैनिक पङरा लोऊ यिर्मयाह सिमऊ लोमशित दोरा कुअङुस धकपा हनु पिनमा।

![](https://cdn.door43.org/obs/jpg/360px/obs-en-19-18.jpg)

भविष्‍य लोइ सा पङक परमेश्‍वरु तरफुस लोऊ पोसु दत लि मीपङक दोरा माडामा लऊ। दोपङक मी पङरा लोऊ दत लि दोपङक मालमा लैन मासोठानङ दत परमेश्‍वर दोपङरा खौतोम लऊ पिनि। परमेश्‍वरुस मी पङरा कोलङ दिलायऊ कि परमेश्‍वर यीशु रा दोपोऊ रा मसीह रा हसल ओ पिननोक।

*1 राजा पाठ- 16-18;2 राजा 5; यिर्मयाह 38 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_19_128kbps.m4a

## 20. गुलाम अला वादऊ देशङु पोलठतु तुमा।

https://openbiblestories.org/l/scu/story-20/

![](https://cdn.door43.org/obs/jpg/360px/obs-en-20-01.jpg)

इस्राएलु राज्‍य नङ यहूदऊ राज्‍यु निशु ओ परमेश्‍वरु खिलाफ पाप लऊ। दोक दो वादा रा ठऊ पिनु दो परमेश्‍वर दोनङ सीनैऊ डोङखङु रा छुतु तोइ। परमेश्‍वरुस दोपङरा सिङ हलम लैन सोठऊ दत है लि दोऊ अराधना लमा शितिङ एनु भविष्‍य लोइ पङरा पिनु, दत लि दोपङक दोऊ कमचित रा गोमा मांयऊ।

![](https://cdn.door43.org/obs/jpg/360px/obs-en-20-02.jpg)

दत परमेश्‍वरुस दोपोऊ दु:शमोन पङरा दोरा सतमा लमिन दोक निशो राज्‍य रा सजा खेऊ। अशशूर इत अलित देश तोइ दो हत शेच्‍चन वंऊ जेऊ तोइ। दो अलित देशु शितिङ हत हलम तोइ। दोपङ तु इस्राएलु राज्‍य रा कयाऊ पिनु। अश्‍शुरी पङक तु इस्राएलु राज्‍यु सिङरा सतु पिनु, छे गिनु दोरा छिनु किऊ, अला देशु तचे ता हिसा पङरलि रोतु पिनु।

![](https://cdn.door43.org/obs/jpg/360px/obs-en-20-03.jpg)

अशशूरी पङक सिङ गोबा पङ, छुकपो मी पङ, अला ओशि मी पङरा दो गिनमा छला पङ जुरामा लिइ सिङ ञमफौ कटठा लऊ अला दो दोपङरा अशशुर देशङु कयुफु जेइ। इस्राएलु लैम गटो मेतपो इस्राएली पङ बचतु तोई।

![](https://cdn.door43.org/obs/jpg/360px/obs-en-20-04.jpg)

दत अशशुरी मी पङ दो देशु पोसमा शितिङ विदेशी मी पङरा कयुफु तु। दो विदेशी पङक दो नगर पङरा हेलि जुरऊ। तचे इस्राएली पङ ओदा ञुऊ तोइ दकपा मुलुकु मी पङक दोपङनङ जन्‍नेटङ लऊ पिनु। जि मी पोऊ वंश पङरा सामरी लोइ तोइ।

![](https://cdn.door43.org/obs/jpg/360px/obs-en-20-05.jpg)

यहूदऊ राज्‍यु मी पङक तंऊ हलै परमेश्‍वरुस दोपोऊ थोरिङ दैङ मालमा अला दोऊ कमचित रा मागोऊ ओदो शितिङ इस्राएलु राज्‍यु मी पङरा सजा खेऊ तोइ। दत लि दोपङक कनानि पोऊ भोगानु मुखङु अराधना लऊ। परमेश्‍वरुस दोपङरा लोमा शितिङ एनु भविष्‍य लोइ सा रा पिनु, दत लि दोपङ गोमा मागिनु।

![](https://cdn.door43.org/obs/jpg/360px/obs-en-20-06.jpg)

दत ज्ञा बोषङु ज्ञपतिङ अश्‍शुरी पङक इस्राएलु राज्‍य रा सवऊ पिनु। परमेश्‍वरूस बेबीलोनु राजा, नबूकदनेस्‍सर रा यहूदऊ राज्‍यु तोङकमा शितिङ पिनु। बेबीलोन इत शेच्‍चन मुलुक तोइ। यहूदऊ राजा नबूकदनेस्‍सरू नुकुर वङमा अला हर बोषङ दो गोप रूपया खेमा शितिङ यऊ।

![](https://cdn.door43.org/obs/jpg/360px/obs-en-20-07.jpg)

दत लि गोप बोषङ ज्ञपतिङ, यहूदऊ राजास बेबीलोन नङ बगावत लऊ। दत हे बेबीलोन पोलठतु तु यहूदऊ राज्‍यऊ सङकु तोङकमा तु। दोपङक यरूशलेम नगरु कोब्‍जा लऊ पिनु, थानङ रा सवऊ पिनु, अला नगर नङ थानङु जङ मूल सिङ खुतु किऊ।

![](https://cdn.door43.org/obs/jpg/360px/obs-en-20-08.jpg)

बगावत लऊ ज्ञपतिङ यहूदऊ राजा रा सजा खेमा शितिङ, नबूकदनेस्‍सरू सैनिक पोऊ राजऊ छङ रा दोऊ तुसिङ सतु पिनु अला दत दोरा कानो लऊ पिनु। दोऊ ज्ञपतिङ, दो राजा रा कयुफु जैऊ दत दौ बेबीलोनु जैलु सिऊ जेतो।

![](https://cdn.door43.org/obs/jpg/360px/obs-en-20-09.jpg)

नबूकदनेस्‍सर अला दोऊ सैना यहूदऊ राज्‍यऊ दत लोननङ सिङ मी पङरा बेबीलोन कयुफु जेऊ, दा थोनतु मैतपो मी पङरा ज्ञपतिङ सौठऊ छु लोननङ दोपङ रिऊ नंऊ फौलङ पुतमा लिइ। जि रा गुलामिऊ बैला लोइ तोइ, दोननऊ परमेश्‍वरुस मी पङरा वादऊ देशुस हनतु जैमा शितिङ चेकचे लऊ तोइ।

![](https://cdn.door43.org/obs/jpg/360px/obs-en-20-10.jpg)

दत लि परमेश्‍वर एनु मी पङरा दोपोऊ पाप लमिन शितिङ गुलामिऊ नंऊ पिनु तोइ , दत लि दो दोपङरा नङ एनु वादा लमिन दो मापोशु। परमेश्‍वरुस एनु मी पङरा खोनु पोसु अला एनु भविष्‍य लोइ सा दोपङ नङ कमचित लोऊ पोसु। परमेश्‍वरुस वादा लऊ कि हुमनिसऊ सा बोषङु ज्ञपतिङ, दोपङ हे लि वादऊ देशङु पोलठतु तुरो।

![](https://cdn.door43.org/obs/jpg/360px/obs-en-20-11.jpg)

दत हुमनिसऊ सा बोषङु ज्ञपतिङ, फारसु राजा कुस्‍त्रू गुस बेबीलोन रा हरऊ पिनु, ओदोक बेबीलोनु राज्‍यु बसकयङ फारसु साम्राज्‍यु गोप देशु नंऊ राज लऊ। इस्राएलू मी पङरा छङ यहूदी लोइ तोइ। दोपोऊ नंऊ गोपुस एनु सिङ जोलोम बेबीलोनु बितामिन तोइ। दत गोप गटो गतपो यहूदी पङो यहूदऊ देश सैसि तोइ।

![](https://cdn.door43.org/obs/jpg/360px/obs-en-20-12.jpg)

फारसु मी पङ गोप शेच्‍चन तोइ, दत लि दोपङ एनु जितति मी पङरयो पापङ ततु। फारसी मी पोऊ राजा वऊ मोच्‍चे ज्ञपतिङ, कुस्‍त्रु लोऊ उङ लि यहूदी दो यहूदा पोलठतमा गिनु, दो फारसुस हनतु हे पोलठतु यहूदा जेमा लिइ। दत बसकयङ दोक दोपङरा थानङ रा हे जुरामा शितिङ रूपया खेऊ। दत गुलामी हुमनिसऊ सा बोषङु ज्ञपतिङ, यहूदिऊ इत चिगित शालङ यहूदऊ राज्‍यु यरूशलेम नगरु पोलठतु तु।

![](https://cdn.door43.org/obs/jpg/360px/obs-en-20-13.jpg)

दत दो मीपङ यरुशलैम पुतु दत दोपङक थानङ नङ नगरु नोपत जिपत बितिङ रा हेलि जुरऊ। फारसु मी पङ अला लि दोपोऊ थोरिङ राज लई तोइ दत लि इ फैरा दो वादऊ देशु नंऊ पोसि तोइ अला थानङु नंऊ अराधना लइ तोइ।

*2 राजा पाठ - 17;24-25;2 इतिहास 36;एज्रा 1-10; नहेम्‍याह 1-13 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_20_128kbps.m4a

## 21. परमेश्‍वर मसीह रा पिनमा शितिङ वायदा लई।

https://openbiblestories.org/l/scu/story-21/

![](https://cdn.door43.org/obs/jpg/360px/obs-en-21-01.jpg)

दोसपरिङ परमेश्‍वर मुलुक जुरऊ तोइ, दो सेसि तोइ कि दोरा ज्ञपतिङ हे अलित दयार मसीह रा पिनमा वंइ। दोक आदम नङ हव्‍वा रा वादा लऊ कि दो ओशि यो लई। दोक लोऊ कि हव्‍वाऊ इत वंश जोरमयति दो सबसु पिशा रा टेमि। ओदो सबसुस हव्‍वा रा कवश लोऊ दो शैतान तोइ। परमेश्‍वरु रिङमंऊ मोतलब तोइ कि मसीह दो शैतान रा हरऊ पिनि।

![](https://cdn.door43.org/obs/jpg/360px/obs-en-21-02.jpg)

परमेश्‍वर अब्राहम रा वादा लमिन तोइ कि दोऊ लमिन मुलुकु सिङ जातु मी पङरा बोरङ पोरति। परमेश्‍वरु ज्ञपतिङ अलित टेमु मसीह रा मुलुकु पिनु एनु वादा रा पूरा लरो। दो मसीह मुलुकु सिङ मी पङरा दोपोऊ पापु रत छुडायइ अला दोपङरा बचायई।

![](https://cdn.door43.org/obs/jpg/360px/obs-en-21-03.jpg)

परमेश्‍वर मूसा रा वादा लऊ कि भविष्‍यु दो मूसऊ खोता इत अलित भविष्‍य लोइ सा रा पिनि। जि भविष्‍य लोइ सा मसीह तोइ। ओदोक, परमेश्‍वर हेलि वादा लऊ कि दो मसीह रा मुलुकु पिनि।

![](https://cdn.door43.org/obs/jpg/360px/obs-en-21-04.jpg)

परमेश्‍वरुस राजा दाऊद रा वादा लऊ कि दोऊ वंश मसीह वङरो। दो राजा वइ अला परमेश्‍वरु मी पोऊ शितिङ सौदायो राज लई।

![](https://cdn.door43.org/obs/jpg/360px/obs-en-21-05.jpg)

परमेश्‍वरुस यिर्मयाह भविष्‍य लोइ सा नङ कमचित लोऊ अला दत लोऊ कि दो इत सरपा वादा छुततो। दो सरपा वादा इस्राएल नङ ञमफो सीनै डोङखङु थोरिङ छुतमिन ऊशि वादऊ खोता मातेइ। दत मी पङ नङ दो एनु सरपा वादा रा छुति, दत मीपङ परमेश्‍वर रा एमपङो सेसतो । सिङ मी पङ दोरा बेन्नङ लई अला दोरा छे गिनमा मागिनमा सिङ खोनमा खुसि तंइ। परमेश्‍वरुस लोऊ कि जि दोऊ पोसमा शितिङ दोपोऊ जिवऊ थोरिङ चेइ। दो दोऊ मी वङरो, अला परमेश्‍वर दोपोऊ पाप रा माफ लरो। दो मसीह यो वङरो दो दोनङ ञमफो सरपा वादा रा छुततो।

![](https://cdn.door43.org/obs/jpg/360px/obs-en-21-06.jpg)

परमेश्‍वरु भविष्‍य लोइ पङक ओशि लि लोऊ कि मसीह इत भविष्‍य लोइ सा वङरो। इत भविष्‍य लोइ सा दो मी तोइ दो परमेश्‍वरु कमचित गोइ अला दत मीपङरा परमेश्‍वरु रिङमिन दो लोइ। दोरा पिनमा शितिङ परमेश्‍वरुस वादा लऊ तोइ दो मसीऊ इत चेइ भविष्‍य लोइ सा वङरो। दत दो मसीह परमेश्‍वरु रिङमिन दो एपो से गोइ, अला दो मी पङरा रिङमिन दो मी पङरा एपो से सिखायइ।

![](https://cdn.door43.org/obs/jpg/360px/obs-en-21-07.jpg)

इस्राएलिऊ याजक पङक मी पोऊ शितिङ परमेश्‍वरु होमशित पुजा तीमा छसु। दो पुजा तीमा मी पोऊ पाप लमिन ओदोक दोपोउ परमेश्‍वर दोपङरा सजा खैमा जागऊ पुजा तिइ तोइ। याजक पङक मी पोऊ शितिङ पुयइ तोइ। दत लि, दो मसीह एपो चेइ याजक वइ दो परमेश्‍वर रा खेमा शितिङ इत एपो पुजा तीमा शितिङ एनरा पुजा तिऊ पिनि। दत, दो तशपयो पाप मालइ, अला दत दो एन रा पुजा तीमा शितिङ खेइ, दत पापु मुलुकु अलित पुजा तिमा गिनमा जुरूरी मतेइ ।

![](https://cdn.door43.org/obs/jpg/360px/obs-en-21-08.jpg)

मी पोऊ भीडु नंऊ राजा नङ गोबा राज लई तोइ, अला तशपइ- तशपइ दोपङ गोलती लि लई तोइ। राजा दाऊदुस इस्राएलिऊ थोरिङ राज लऊ, दत राजा दाऊदु वंश मसीह सिङ मुलुकु थोरिङ राज लइ, दो सोदायो राज लइ। ओदो बसकयङ, दो दयारो एपो से राज लइ, अला एपो फेसला किरो।

![](https://cdn.door43.org/obs/jpg/360px/obs-en-21-09.jpg)

परमेश्‍वरू भविष्‍य लोइ पङक मसीहऊ बारै गोप कमचित पङ लोऊ। दत, मलाकी भविष्य लोइ साक लोऊ मसीहऊ तुमा होमशित इत अलित भविष्‍य लोइ सा तुइ। दो भविष्‍य लोइ सा तुइ दो हत एपो मी वङरो। ओशि यो, इशायाह सिङ भविष्‍य लोइ पङक चेऊ कि मसीह इत कुंवारी योबलङकु नऊ जोरमयति। अला मीका भविष्‍य लोइ साक रिंऊ कि मसीह बैतहलम नगरु जोरमयति।

![](https://cdn.door43.org/obs/jpg/360px/obs-en-21-10.jpg)

इशायाह भविष्‍य लोइ साक रिंऊ कि मसीह गलीलु जागऊ पोसि। तचे लि मीपङ हत दु:खङुस तोइ मसीह दोपङरा सवङना लरो। तचे लि मीपङरा शङलङुस छुतमिन तोइ दो पङरा लि छुडायइ। मसीह शोति पङरा नङ जो गोमा मलिइ, खोनमा मलिइ, चलमा मलिइ, अला विनमा मलिइ दोपङरा लि एपो लऊ पिनि।

![](https://cdn.door43.org/obs/jpg/360px/obs-en-21-11.jpg)

यशायाह भविष्‍य लोइ साक ओशि लि लोऊ कि मीपङ मसीह रा मडामा लई अला दोरा ममोनई लोऊ। अलित भविष्‍य लोई पङक लोऊ कि मसीहऊ इत पङगोत दोपोऊ खिलाफ अनति। जकरियाह भविष्‍य लोइ साक लोऊ कि दोऊ जि पङगोत ओशि लमा शितिङ अलित मी पोरत हुमनिसऊ सा सिक्‍का थइ। ओदो बसकयङ, तचे ता भविष्‍य लोइ पङक लोऊ कि मीपङ मसीह रा सतु पिनि, अला दोपङ दोऊ गस्‍कुलऊ शितिङ जुआ ज्ञखि।

![](https://cdn.door43.org/obs/jpg/360px/obs-en-21-12.jpg)

भविष्‍य लोइ पङक ओशि लि लोउ कि मसीह हलै सिइ। इशायाह गुस पोइले यो तंऊ कि मीपङ मसीह थोरिङ कराती फोइ, दोऊ थोरिङ वति, अला दोरा तोंइ। दो दोरा छोरू पिनि अला दो हत जुकजैरूस सिऊ जेइ, दत लि दोपङक छोयो पाप मलमिन तोइ।

![](https://cdn.door43.org/obs/jpg/360px/obs-en-21-13.jpg)

भविष्‍य लोइ पङक ओशि लि लोऊ कि मसीह पाप मालइ। दो सिदद वङरो। दत लि दो ओदोक सिइ छु लोननङ परमेश्‍वर दोरा मी पोऊ पापु शितिङ सजा खेइ। दोऊ सिऊ ज्ञपतिङ मी पङ परमेश्‍वर नङ कमचित लोमा लिइ। ओदोक परमेश्‍वर गिनु कि मसीह सीरो।

![](https://cdn.door43.org/obs/jpg/360px/obs-en-21-14.jpg)

भविष्‍य लोइ सा पङक ओशि लि लोऊ कि परमेश्‍वर मसीह रा सीमिनु रत लि जिंदा लरो। जि तङमा तुइ कि सिङ सरपा वादा छुतमा परमेश्‍वरु प्‍लान तोइ, दत दो मी पङरा बचामा लीरो दोपङक दोऊ खिलाफ पाप लमिन तोइ।

![](https://cdn.door43.org/obs/jpg/360px/obs-en-21-15.jpg)

परमेश्‍वरुस भविष्‍य लोइ पङरा मसीह रा शितिङ गोप कमचित पङ लोऊ, दत लि मसीह दो भविष्‍य सेसि पोऊरत उङु लि जोलोमु नऊ मतु तोइ। ओइ भविष्‍यवाणि लोऊ दत पज्ञा बोषङु ज्ञपतिङ, एपो बैलऊ, परमेश्‍वर मसीह रा ओइ मुलुकु पिनरो।

*उतपत्‍ति 3:15; 12:1-3; व्यवस्थाविवरण -18:15;2 शमूएल -7; यिर्मयाह- 31; यशायाह 59:16; दानिय्येल- 7; मलाकी 4:5; यशायाह-7:14; मीका-5:2; यशायाह-9:1-7;35:3-5;61;53; भजन संहिता-22:18;35:19;69:4;41:9; जकर्याह-11:12-13; यशायाह-50:6; भजन संहिता -16:10-11 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_21_128kbps.m4a

## 22. यहून्रा  जोरमयतु।

https://openbiblestories.org/l/scu/story-22/

![](https://cdn.door43.org/obs/jpg/360px/obs-en-22-01.jpg)

ओइ देसङ, परमेश्‍वरूस एनु भविष्‍य लोइ सा पङ नङ कमचित लोऊ तोइ ओदोक दो मी पङ नङ कमचित लोमा लिइ तोइ। दत दो बैलऊ थलत हे दत पज्ञा बोषङ बिततनि शम दोक दोपङरा कमचित मालोऊ। दत परमेश्‍वरुस जकरिहा मिनु सिङ सेसि रा इत स्‍वर्गदूत रा पिनु। जकरिहा नङ दोऊ योबलङ एलीशिबा परमेश्‍वर रा मोनइ तोइ। दोपङ सिङ गतपो वऊ जेऊ तोइ, अला दोऊ छोयो छङ मावऊ तोइ।

![](https://cdn.door43.org/obs/jpg/360px/obs-en-22-02.jpg)

दो स्‍वर्गदूत जकरिहा रा शुऊ, “कन योबलङकु इत छङ वङरो। का दोऊ मिन यूहन्रा तामा। परमेश्‍वर दोरा एपो जिवा नङ पुंऊ पिनरो, अला यूहन्रा मी पङरा मसीह रा मोनामा शितिङ जुरइ।“ जकरिहा गुस लोउ, “ ग नङ अङ योबलङ चिगजा तामा शितिङ गोप गतपो तोश। ग हले ततमा कि गिरङ अङरा दिमलयो रिऊ?”

![](https://cdn.door43.org/obs/jpg/360px/obs-en-22-03.jpg)

दो स्‍वर्गदूत जकरियाह रा लोउ, ”कनरा जि एपो फरिनतन सुमा शितिङ अङरा परमेश्‍वरूस पिनपिनसु। छु लोननङ कस अङ थोरिङ दैङ मालऊ, ओदोक चिगजा तानिशम का लोमा मालिइ।” हसल ओ, जकरियाह लोमा मालिऊ तोइ। दत दो स्‍वर्गदूत जकरियऊ रत जेऊ पिनु। ओदो ज्ञपतिङ, जकरियऊ कयुमु पोलठतु तु अला दोऊ योबलङ चिगजा नङ वऊ।

![](https://cdn.door43.org/obs/jpg/360px/obs-en-22-04.jpg)

दत एलीशिबा टु लऊ चिगजा नङ तोइ, दत ओदो यो स्‍वर्गदूत मी लैम एलीशिबऊ पेरङ थोरिङ सङकु, दोऊ मिन मरियम तोइ। मरियम कुवांरी तोइ अला जन्‍नेटङ लमा शितिङ युसुफ मिनु फोबलङ नङ धोऊ मंगनी वङ कयऊ तोइ। स्‍वर्गदूतुस मरीयम रा लोऊ, “ का चिगजा नङ वइ अला इत छङ जोरमयति। कनरा दोऊ मिन यीशु तामा वइ। दो हत शेच्‍चन परमेश्‍वरु छङ वङरो अला सोदायो राज लई।

![](https://cdn.door43.org/obs/jpg/360px/obs-en-22-05.jpg)

मरियमुस लोऊ , ”जि हलै वई, छु लोननङ ग ता कुंवारी तोक?” दो स्‍वर्गदुतुस सोमजऊ, “ एपो जिवा कन नऊ तुइ, अला परमेश्‍वरु शक्‍ति कन थोरिङ सोयङ लई। ओदोक दो चिगजा सखंमा वइ, अला दो परमेश्‍वरु छङ वई।” दत दो स्‍वर्गदूतुस रिङमिन दोऊ थोरिङ मरियमुस विश्‍वास लऊ।

![](https://cdn.door43.org/obs/jpg/360px/obs-en-22-06.jpg)

जि वंऊ ज्ञपतिङ, मरियमुस जैऊ एलीशिबा नङ छुशु। हलै यो मरियमुस दोरा पेरतु, एलीशिबऊ चिगजा दोऊ नऊ गवऊ। दोपोऊ शितिङ परमेश्‍वरूस छे लि लऊ ओदोऊ शितिङ दो योबलङ पङ ञमफो हत गरीस तोइ। एलीशिबा नङ हुम ला पोसु ज्ञपतिङ, मरियम कयुमु पोलठतु तु।

![](https://cdn.door43.org/obs/jpg/360px/obs-en-22-07.jpg)

ओदो ज्ञपतिङ, एलीशिबास एनु चिगजा रा तऊ। जकरियाह नङ एलीशिबास दो चिगजऊ मिन यहून्रा तऊ, हलै दो स्‍वर्गदूतुस रिङमिन तोइ। दत परमेश्‍वर जकरियाह रा लोमा शितिङ एपो लऊ। जकरियास लोऊ,” परमेश्‍वर एपो तश, छु लोननङ दोक एनु मी पोऊ शितिङ सिङ- सङ लऊ। हे अङ छङ, का थोनतु शेच्‍चन परमेश्‍वरू भविष्‍य लोइ सा वंइ। का मीपङरा लोइ कि दोपङ हलै एनु पापु शितिङ माफी थामा लिइ।”

*लूका पाठ- 1 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_22_128kbps.m4a

## 23. यीशू जोरमयतु।

https://openbiblestories.org/l/scu/story-23/

![](https://cdn.door43.org/obs/jpg/360px/obs-en-23-01.jpg)

युसुफ मिनु इत एपो मी नङ मरियमु मंगनी वङ कयऊ तोइ। दत दोगुस गोऊ कि मरियम चिगजा नङ वऊ दत दो सेसि तोइ कि दो दोऊ चिगजा मेन। दत लि, मरियम रा बोदनाम मालमा गिनि तोइ, ओदोक दोगुस दोरा पापङ ततु अला दोरा तमना तलाक खेमा सुनचतु। दत लि ओदोऊ होमशित दो ओशि लरो, इत स्‍वर्गदुतु मीस दोऊ मङु नऊ तु दोरा कमचित लोउ।

![](https://cdn.door43.org/obs/jpg/360px/obs-en-23-02.jpg)

दो स्‍वर्गदूतुस रिंऊ, “हे युसुफ, मरियम रा रऊ योबलङकु रूअङु कयुफु तुमा रा थाबेऊ। दोऊ नऊ दो चिगजा तश मे दो इत एपो जिवाऊ रत तुमिन। दो इत छङ रा तई। दोउ मिन यीशु तामा, छु लोननङ दो मी पोऊ लमिन दोपोऊ पापु रत बचायइ।”

![](https://cdn.door43.org/obs/jpg/360px/obs-en-23-03.jpg)

दत युसुफुस मरियम नङ जन्‍नेटङ लऊ अला दोरा एनु गोने जुरऊ एनु कयुमु सु, दत यीशु जोरमयतनि शम युसुफुस मरीयम नङ ञमफो छोयो शारिरिक रिश्ता मातऊ।

![](https://cdn.door43.org/obs/jpg/360px/obs-en-23-04.jpg)

दत मरियमु चिगजा तामा टेम पुतु तु, दत दो नङ युसुफुस बैतहलम नगर जैमा शितिङ इत वरि सैरू जैऊ। दोपङरा ओदा जैमा यो तोइ छु लोननङ रोमी अधिकारी इस्राएलु पोसि सिङ मी पङरा शुममा गिनु तोइ। दोपङ गिनि तोइ कि सिङ मी ओदा जैमा अमा दोपोऊ पेरङ पङ पोसि तोइ। राजा दाऊदु जोलोम बैतहलम नगरु वऊ तोइ, अला दो मरियम नङ युसुफ निशु ओ चेइ मी तोइ।

![](https://cdn.door43.org/obs/jpg/360px/obs-en-23-05.jpg)

मरियम नङ युसुफ बैतहलम जेऊ, दत ओदा छुमा पङरा तामा जागा मेननङ पोसमा शितिङ छोयो मातोइ तोइ। ओदो यो जागा तोइ ओदा मरियमुस एनु चिगजा रा तऊ। दोक दोरा शेननङु नंऊ बरिन तऊ छू लोननङ दा दोरा शितिङ छोयो मलछा मातोइ तोइ। दोपङक दो चिगजऊ मिन यीशु तऊ।

![](https://cdn.door43.org/obs/jpg/360px/obs-en-23-06.jpg)

ओदो गोङक, ओदा ञमफो यो रिऊ नंऊ तचे ता पालस पङ तेतु शालङु रा खोनु तोइ। दत हेलि, इत चमकयतु स्‍वर्गदूत दोपोऊ थोरिङ तु, अला दोपङ बेऊ पिनु। दो स्‍वर्गदूतुस लोउ, “माबैमा, ग कनरा इत एपो फरिनतन रिङरोक, दो मुलुकु सिङ मी पोऊ शितिङ वङरो। तोरो राजा दाऊदु नगर बैतहलमु किमपोऊ शितिङ इत मुक्‍तिदातऊ जोलोम वंऊ तोइ अला दो यो परमेश्‍वर तश।”

![](https://cdn.door43.org/obs/jpg/360px/obs-en-23-07.jpg)

जैऊ दो चिगजा रा फङमा, अला किमपङ दोरा गस्‍कुला चुखमिन अला चिऊ नंऊ बरिन पोसि तंइ। हेलि, नम स्‍वर्गदूतुस बुंऊ जेऊ। दोपङ परमेश्‍वर रा पेरतु तोइ। दोपङ ओशि बजन लोऊ तोइ कि स्‍वर्गु पोसमिन परमेश्‍वरु बडाई वङरो। “मुलुकु नंऊ मी पङ नङ सवङना वङमा गिनमा दोपोऊ दो जोरि लई तोइ।”

![](https://cdn.door43.org/obs/jpg/360px/obs-en-23-08.jpg)

दत स्‍वर्गदूत जेऊ पिनु। दो पालस पङ एनु तेत पङरा सोठऊ चिगजा रा खोनमा जेऊ। हसल ओ दोपङ ओदो जागऊ रा पुतु ओदा यीशू तोइ अला दोपङक दोरा दो शेननङु नंऊ बरिन तंऊ, हलै दो स्‍वर्गदूतुदस रिंऊ तोइ। दोपङ हत गरीस तोइ। दत दो पालस पङ पोलठतु जेऊ अला एनु तेत पङ तोइ। दोपङक छे लि गोऊ अला तऊ ओदो सिङरा शितिङ दोपङ परमेश्‍वरु तारीफ लऊ तोइ।

![](https://cdn.door43.org/obs/jpg/360px/obs-en-23-09.jpg)

पूर्वउ वरि इत देशु इत गटो फोबलङ तोइ। दोपङक कर्मा पङरा लफु तोइ अला दोपङ हत हुशार तोइ। दोपङक इत मरूखि कर्मा रा नमु नंऊ तंऊ। दोपङक लोऊ कि जिऊ मोतलब यहूदी पोऊ इत राजा जोरमयतु तोइ। ओदोक दोपङक जि चिगजा रा खोनमा शितिङ एनु देशङुस सैरू जेमा शितिङ लोऊ। इत चेई सैरू ज्ञपतिङ, दोपङ बैतहलम तु अला दो कयुम पोरतु ओदा यीशु नङ दोऊ अमा- अपा पोसमिन तोइ।

![](https://cdn.door43.org/obs/jpg/360px/obs-en-23-10.jpg)

दत दो फोबलङ पङक यीशु रा एनु अमा नङ ञमफो तंऊ दत दोपङक पुशपङ चु दोपङरा पेरतु। दोपङक यीशु रा गोप गिनमा छला खेऊ। दत दोपङ कयुमु पोलठतु जेऊ।

*मती पाठ-1; लूका 2 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_23_128kbps.m4a

## 24. यूहन्‍नास यीशु रा संखमा तिऊ डुबयतमा खेऊ।

https://openbiblestories.org/l/scu/story-24/

![](https://cdn.door43.org/obs/jpg/360px/obs-en-24-01.jpg)

एलीशिबा नङ जकर्याहऊ छङ यूहन्ना, चेइ वऊ इत भविष्‍य लोइ सा वंऊ जेऊ। दो जंगलु पोसि तोइ, अला जंगलु बरङसि नङ बैम जई तोइ, अला ऊँटु करास जुरामिन गस्‍कुला खमपि तोइ।

![](https://cdn.door43.org/obs/jpg/360px/obs-en-24-02.jpg)

गोप मीपङ यूहन्‍नऊ कमचित गोमा शितिङ जंगलु हनतु तु। दोक दोपङरा ओशि लोऊ कि, पापु रत माफी थामा, छु लोननङ परमेश्‍वेरु राज्‍य पुतु तु तश।”

![](https://cdn.door43.org/obs/jpg/360px/obs-en-24-03.jpg)

दत मीपङक यूहन्‍नऊ फरिनतन गोऊ, दत दोपोऊ नंऊ गोपुस एनु पाप लमिन दो परुतु पिनु, अला यूहन्‍नास दोपङरा संखमा तिऊ डुबयतमा खेऊ। यूहन्‍ना रा खौनमा शितिङ गोप धर्मु गोबा पङ लि तु, दत लि दोपङक एनु पाप लमिन दो मपरुतु।

![](https://cdn.door43.org/obs/jpg/360px/obs-en-24-04.jpg)

यूहन्नास धर्मु गोबा पङरा लोऊ, “हे सबसु खोता जहर सा मी पङ। पछतायततिश अला रंऊ पाप लमिन दो परुततिश। परमेश्‍वर ओदो सिङ बोठङ रा थोलु पिनि दो एपो फोलङ मसुइ, अला दो दोपङरा मैऊ नऊ पिनि।” सिङ भविष्‍य लोइ पङक लोऊ यूहन्‍नास सिङ सङ लऊ, “खोन, ग हसल ओ कन होमशित रऊ फरिनतन लोइ सा रा पिनि दो कन शितिङ ओमप जुरइ।

![](https://cdn.door43.org/obs/jpg/360px/obs-en-24-05.jpg)

तचे ता धर्मु गोबा पङक यूहन्‍ना रा शुऊ कि छे का मसीह तोन आ। यूहन्‍नास लोऊ, “ग मसीह मैन तोक, दत लि दो अङ ज्ञपतिङ तु तोइ। दो ओनचे शेच्‍चन तोइ कि ग दोऊ फोनिऊ फित्‍ता खोलामा लि काबिल मातोक।

![](https://cdn.door43.org/obs/jpg/360px/obs-en-24-06.jpg)

अलित दयार, यीशु संखमा तिऊ डुबयतमा शितिङ यूहन्‍नऊ रा तु। दत यूहन्‍नास दोरा तऊ, दत दोक लोऊ, “खोननिश। परमेश्‍वरु करात दो मुलुकु सिङ पाप रा एनु थोरिङ किऊ पिनि।”

![](https://cdn.door43.org/obs/jpg/360px/obs-en-24-07.jpg)

यूहन्‍नास यीशु रा लोऊ, “ग कनरा संखमा तिऊ डुबयतमा खेमा लायक मातोक। ओदो बसकयङ देसङ जरूरि तो कि का अङरा संखमा तिऊ डुबयतमा खै।” दत यीशुस लोऊ, “कनरा अङरा संखमा तिऊ चङखमा खैसमा गिनमा, छू लोननङ अङरा ओशि यो तरीकास परमेश्‍वरु मोरजी पूरा लमा तो।” दत यूहन्‍ना गुस दोरा संखमा तिऊ डुबयतमा खेऊ, दत लि यीशुक तशपयो पाप मालमिन तोइ।

![](https://cdn.door43.org/obs/jpg/360px/obs-en-24-08.jpg)

संखमा तिऊ डुबयतमा खेऊ ज्ञपतिङ दत यीशु तिऊ दकपा हनतु तु, दत परमेश्‍वरु जिवा कोकचुरुऊ रूअङु नंऊ वंऊ तु अला ओपङ तु दोऊ थोरिङ पोसु। ओदोसपरिङ, परमेश्‍वरुस स्‍वर्ग नङ कमचित लोऊ। दोक लोऊ, “का अङ गोरङ छङ तोन। ग कनरा गोरङ लई तोक, अला कनरत हत गरीस तोक।”

![](https://cdn.door43.org/obs/jpg/360px/obs-en-24-09.jpg)

परमेश्‍वरुस यूहन्‍ना रा लोऊ तोइ, “एपो जिवा ओपङ तु उङिऊरा पोसि दोरा का संखमा तिऊ डुबयतमा खेइ।” ओदोयो परमेश्‍वरु छङ तोइ अला परमेश्‍वर इत ओ तोइ। दत लि यूहन्‍ना रा संखमा तिऊ डुबयतमा खेऊ, दत दोक परमेश्‍वर अपा रा कमचित लोइ गोऊ, परमेश्‍वरु छङक रा तंऊ, दो यीशु ओ तोइ, अला दोक एपो जिवा रा यीशुउ थोरिङ पोसि तंऊ।

*मती पाठ- 3; मरकुस 1:9-11; लुका 3:1 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_24_128kbps.m4a

## 25. शैतान यीशुऊ इम्‍तिहान किइ।

https://openbiblestories.org/l/scu/story-25/

![](https://cdn.door43.org/obs/jpg/360px/obs-en-25-01.jpg)

यीशू संखमा तिऊ डुबयतमा वंऊ ज्ञपतिङ, संखमा जिवा दोरा जंगलु कयुफु जेऊ। यीशु ओदा निशनिसा दयार नङ निशनिसा गोङक तोइ। ओदो बेलऊ दोक छोयो माजऊ-मातुंऊ , अला शेतान यीशुउ रा तु पाप लमा शितिङ दोऊ इम्‍तिहान किऊ।

![](https://cdn.door43.org/obs/jpg/360px/obs-en-25-02.jpg)

होमशित, शेतानुस यीशु रा लोऊ, “का परमेश्‍वरु छङ तोननङ ओइ रआ रा रोटि लऊ पिन दत का जिरा जामा लिरोन।“

![](https://cdn.door43.org/obs/jpg/360px/obs-en-25-03.jpg)

दत यीशुक शैतान रा लोऊ, “परमेश्‍वरु कमचितु नऊ ओशि चेमिन तश,‘ शिऊ पोसमा शितिङ मीरा लैम रोटि यो मागिनमा, दत दोपङरा सिङ कमचित पङ गिनमा तश दो सिङ परमेश्‍वर दोपङरा लोइ।”

![](https://cdn.door43.org/obs/jpg/360px/obs-en-25-04.jpg)

दत शैतान यीशु रा थानङु थोनतु थोरिङ जागऊ रा कयुफु जेऊ। शैतानुस यीशु रा लोऊ, “का परमेश्‍वर छङ तोननङ ओयत ओपङ दुप जो, छु लोननङ चेमिन तोइ, ‘परमेश्‍वर कनरा थुतमा शितिङ एनु स्‍वर्गदूत पङरा लोइ कि कन बङखौनु रा गुस नाशङ मजेमा गिनमा।”

![](https://cdn.door43.org/obs/jpg/360px/obs-en-25-05.jpg)

दत लि यीशुस ओशि मालऊ छे शैतान गुस दोरा लमा शितिङ लोऊ तोइ। ओदो बसकयङ, दोक लोऊ, “परमेश्‍वर सिङरायो लोइ, का प्रभु रंऊ परमेश्‍वरु इम्‍तिहान माकिमा।”

![](https://cdn.door43.org/obs/jpg/360px/obs-en-25-06.jpg)

दत शैतान यीशु रा इत चेइ डोङखङु थोरिङ कयुफु जेऊ अला ओदत मुलुकु सिङ राज्‍य कनु यीशु रा लोमा तिखु, “दत का पुशपङ चुऊ अङरा पेरतनङ अला अङ अराधना लननङ दत सिङ-सङ खेसतोक।”

![](https://cdn.door43.org/obs/jpg/360px/obs-en-25-07.jpg)

यीशुस लोऊ, “हे शैतान, अङ तुसिङक जेऊ पिन। परमेश्‍वरू वचनु नंऊ चेमिन तश, ‘लैम रंऊ परमेश्‍वरू अराधना लमा। परमेश्‍वरू रूअङु लैम दोरा यो एपो ततमा।’

![](https://cdn.door43.org/obs/jpg/360px/obs-en-25-08.jpg)

यीशुस शैतानु किमिन इम्‍तिहानु रत हार मोनतु, ओदोक शैतान दोऊ तुसिङक जैऊ पिनु। दत स्‍वर्गदूत तु यीशुऊ सेवा लमा तिखु।

*मती पाठ- 4:1-11; मरकुस 1:12-13; लुका 4:1-13 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_25_128kbps.m4a

## 26. यीशु एनु सेवा लमा जुमा तिखु।

https://openbiblestories.org/l/scu/story-26/

![](https://cdn.door43.org/obs/jpg/360px/obs-en-26-01.jpg)

शैतानुस किमिन इम्‍तिहान रा मालइ लोऊ ज्ञपतिङ, यीशु पोलठतु गलीलु राज्‍यु तु। ओइ ओदो यो जागा तोइ ओदा दो पोसि तोइ। एपो जिवा दोरा हत सोततिङ खेऊ तोइ, अला यीशु इत जागास अलित जागऊ जेऊ अला मीपङरा लोऊ। सिङो दोरा शितिङ एपो कमचित लोऊ।

![](https://cdn.door43.org/obs/jpg/360px/obs-en-26-02.jpg)

यीशु नासरत नगरू जेऊ। जि ओदो नगर तोइ ओदा दो एनु चिगजा दोसपरिङ पोसि तोइ। शिनिश दयार दोमया, दो अराधना लमा जागऊ रा जेऊ। गोबा पङक दोरा यशायाह भविष्‍य लोइसाक फरिनतनु इत किताब खेऊ। दोपङ गिनि तोइ कि दोपङ ओइगुस लफतो। दत यीशु गुस दो किताब रा खोलऊ दोऊ इत हिसा रा मी पोऊ शितिङ लफु।

![](https://cdn.door43.org/obs/jpg/360px/obs-en-26-03.jpg)

यीशुस लफु, “परमेश्‍वरूस अङरा एनु जिवा खेसमिन तो छु लोननङ ग छोयो मतेइऊ नंऊ एपो फरिनतन लोमा लीरोक। दोक अङरा ओदोक पिनपनसु कि कैदी पङरा छुडायामा लीरोक, मातंई पङरा हेलि तङमा लीरो, अला दोपङरा छुडायामा दोपङरा अलित पङक टैमु पिनु। जि ओदो यो टाइम देसङ परमेश्‍वर ऊलपङरा पापङ तति अला उलपोऊ पङगोत लई।”

![](https://cdn.door43.org/obs/jpg/360px/obs-en-26-04.jpg)

दत यीशु पोसु । सिङ मी दोरा यो खोनु पोसु तोइ। दोपङ सेसि तोइ कि पवित्रशास्‍त्रु दो हिसा दोक जोदे लफु तोइ दो मसीहूउ बारे तोइ। यीशुस रिऊ, “दो कमचित पङ गस जोदे कन शितिङ लफु तोइ, दो देसङ वऊ तशँ। “सिङ मी पङ बिंऊ तोइ। दोपङक रिऊ, ”जि छै युसुफु छङ मेन आ?”

![](https://cdn.door43.org/obs/jpg/360px/obs-en-26-05.jpg)

दत यीशुस लोऊ, “जि दिमलैयो कि मीपङ ओशि भविष्‍य लोइ सा रा तशपयो मागिनि तोइ दो दोपोऊ नगरू चेइ वंऊ तोइ। एलिय्‍याह भविष्‍य लोइ सऊ टैमु, इस्राएलु गोप विधवा पङ तोइ। दत लि हुम नङ खनङ बोषङ शम छरबा मावऊ दत परमेश्‍वरूस एलिय्‍याह रा इस्राएलु उङ लि विधवऊ पङगोत लमा शितिङ मापिनु। ओदो बसकयङ, दोक एलिय्‍याह रा सदोन देशु विधवऊ रा पिनु।”

![](https://cdn.door43.org/obs/jpg/360px/obs-en-26-06.jpg)

यीशुस लोऊ ओ पोसु, “अला एलीशऊ भविष्‍य लोइ सऊ टाइमु, इस्राएलु गोप मीपङ कोडु शोतुस तोइ। दत लि एलीशास दोपोऊ नऊ उङरायो एपो मालऊ। दोक लैम इस्राएलु दुशमोनु सेनापति रा एपो लऊ। “दत लि दो मीपङ यीशु रा गोऊ तोइ दोपङ यहूदी तोइ। ओदोक हेलि दोपङक दोरा ओशि लोइ गोऊ दत दोऊ थोरिङ छिङना तंऊ।

![](https://cdn.door43.org/obs/jpg/360px/obs-en-26-07.jpg)

नासरतु मी पङक यीशु रा चुमु पिनु अला दोरा अराधना लमा जागऊ रा डपु दकपा कयुफू जेऊ। दोपङ दोरा सतमा रा पयामा शितिङ इत डोङखऊ थोरिङ कयुफु जेऊ। दत लि यीशु भीडुस हनतु तु अला नासरत नगर रा सोठऊ जेऊ पिनु।

![](https://cdn.door43.org/obs/jpg/360px/obs-en-26-08.jpg)

दत यीशु सिङ गलील जिलऊ सिङ इलाकऊ जेऊ, अला गोप मीपङ दोऊ तुसिङ तु। दोपङ ओशि गोप मीपङरा कयुफु तु दो शोतमिन नङ बङखोन मातेइ तोइ। दोपोऊ नऊ तचे मतंई, माविनि, मागोइ अला चलमा मालिइ तोइ, अला यीशुस दोपङरा एपो लऊ।

![](https://cdn.door43.org/obs/jpg/360px/obs-en-26-09.jpg)

ओदो बसकयङ, गोप मीपङ यीशु रा जेऊ दोपोऊ नऊ हलम जिवा पङ तोइ। यीशुस दो हलम जिवा पङरा दोपोऊ रत हनतु जैमा शितिङ लोऊ। दो हलम जिवा पङ दयारो हरो टऊ, ”का परमेश्‍वरु छङ तोन।“ भीडु मी पङ बिंऊ पोसु अला दोपङक परमेश्‍वरू तारीफ लऊ ।

![](https://cdn.door43.org/obs/jpg/360px/obs-en-26-10.jpg)

दत यीशु गुस सानिश फोबलङक रा चुनायऊ दोपङरा दोक एनु चेला लोऊ। दो खास चेला पङक दोपङ नङ ञमफो हलतु अला दोऊरत एपो कमचित सिखयतु।

*मती पाठ- 4:12-25; मरकुस- 1:14-15,35-39;3:13-21; लूका-4:14-30,38-44 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_26_128kbps.m4a

## 27. दयालु सामरिऊ कोथा।

https://openbiblestories.org/l/scu/story-27/

![](https://cdn.door43.org/obs/jpg/360px/obs-en-27-01.jpg)

इ दयार, यहूदिऊ कानून रा सेसि इत मी यीशुउ रा तु। दो सिङरायो कनमा गिनि तोइ कि यीशु हलम लफलफु तश। ओदोक दोगुस लोऊ, “हे गुरू, गोप चेइ जोलोम गिनमा शितिङ ग छे लमा?” यीशुस लोऊ, “परमेश्‍वरूस कानुनु नंऊ छे चेमिन तश?”

![](https://cdn.door43.org/obs/jpg/360px/obs-en-27-02.jpg)

दो मीस रिंऊ, “दो रिंऊ तशे कि रंऊ परमेश्‍वरू रत रंऊ सिङ मोनङ, जिवा, शेत अला दिमाग रा बेन्‍नङ तामा। अला रंऊ खयुमदेस नङ एपो पोसमा।” यीशुस लोऊ, “का दिमलयो एपो तोन, दत कनरा एपो जिन्‍दगी पोरततो।”

![](https://cdn.door43.org/obs/jpg/360px/obs-en-27-03.jpg)

दत लि दो कानून सेसि सा मी, मी पङरा कनमा गिनि तोइ कि दोऊ जिन्‍दगी शिङमऊ तरीका एपो तश आ। ओदोक दोगुस यीशु रा शुउ, “एपो तश, दत अङ खयुमदेस ऊङ तश?”

![](https://cdn.door43.org/obs/jpg/360px/obs-en-27-04.jpg)

यीशुस दो कानुन सेसि मी रा इत कोथा लोऊ दत जवाब खेऊ। “इत यहूदी मी तोइ दो इत ओमपुस वंऊ यरूमलेशुस यरीहो फौक जेऊ तोइ।”

![](https://cdn.door43.org/obs/jpg/360px/obs-en-27-05.jpg)

“दत तचे ता चोरस पङक दोरा खोनु अला दोऊ थोरिङ ञङकु तोङकमा जेऊ। दोपङक दोऊ सिङ-सङ किऊ पिनु अला दोरा खनङ सीमा शम तोंऊ- सतु। दत दोपङ जेऊ पिनु।”

![](https://cdn.door43.org/obs/jpg/360px/obs-en-27-06.jpg)

“दोऊ ज्ञपतिङ, इत यहूदी याजक ओदो यो ओमपुस वंऊ जेऊ। दो याजकुस दो फोबलङ रा ओमपु थोरिङ बरिन तऊ। दत दोक दोरा तंऊ दत दो ओमपु अलित फोक जेऊ विनु पोसु। दोक दो मी रा मातंइ खुङक वऊ।”

![](https://cdn.door43.org/obs/jpg/360px/obs-en-27-07.jpg)

“ओदोऊ ज्ञपतिङ टैम बिततु, इत लेवी दो ओमपु तु। लेवी यहूदी पोऊ इत कबीला तोइ दोपङक थानङु याजक पङरा पङगोत लऊ तोइ। दो लेवी लि ओमपु नोपत हन्‍तु जेऊ। दोगुस लि दो मी रा मातई खुङक वंऊ।”

![](https://cdn.door43.org/obs/jpg/360px/obs-en-27-08.jpg)

“अलित मी दो ओदो ओमपुस तु दो सामरियऊ इत फोबलङक तोइ। सामरी नङ यहूदी इत नङ अलित रा मडामा लइ तोइ। दो सामरीस ओमपु दो नाशङ जेइ मीरा तंऊ। दोक तंऊ कि दो यहूदी तश, दत लि दोक दोरा हत पापङ ततु। दत दो दोऊरा जेऊ अला दोऊ नाशङ जेमिन दोऊरा पट्टी छुतु।”

![](https://cdn.door43.org/obs/jpg/360px/obs-en-27-09.jpg)

“दत दो सामरीस दो मी रा एनु फोतु थौरिङ लेटायऊ अला दोरा दो ओमपुस इत सरायऊ किऊ। ओदा दोक दोरा खोनमा शितिङ पोसु।”

![](https://cdn.door43.org/obs/jpg/360px/obs-en-27-10.jpg)

अलित दयार, दो सामरी रा एनु हलतमा दो ओशि यो तामा तोइ। दोक दो सराएंऊ मालिक रा गटो रूपया खेऊ। दोक दोरा लोऊ, “जि मीरा एपो खौनमा। दत लि ओइ रूपया बसकयङ कन अला रूपया जेनङ दत पोलठतु तु थलत ग कन सिङ रूपया पोलठऊ खेस्‍तोक।”

![](https://cdn.door43.org/obs/jpg/360px/obs-en-27-11.jpg)

दत यीशुस दो यहूदी शास्‍त्री रा शुऊ, “का छे सुनचतु? ओइ हुम मी पोऊ नऊ उङ दो मिंऊ खयुमदेस तश दोरा लुटऊ अला तोंऊ तोइ?” दोगुस लोऊ, “ओदोक ओ दोगुस दोरा पापङ ततु।” यीशुस दोरा लोऊ, “का जो अला ओशि यो लत।”

*लूका पाठ- 10:25-37 गुस बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_27_128kbps.m4a

## 28. इत शरा साहुकार शासक।

https://openbiblestories.org/l/scu/story-28/

![](https://cdn.door43.org/obs/jpg/360px/obs-en-28-01.jpg)

इ दयार, इत शरा साहुकार यीशूउ रा तु दोरा शूउ, “हे गुरु, एपो जोलोम गिनमा शितिङ अङरा छे लमा वई? यीशुस दोरा लोऊ, “का अङरा ‘एपो’ छु रिऊ? लेम इत ओ एपो तोइ अला दो लेम परमेश्‍वर तोइ? दत लि का ऐपो जोलोम गिनमा तोननङ परमेश्‍वरूस रिङमिन दो गोमा।”

![](https://cdn.door43.org/obs/jpg/360px/obs-en-28-02.jpg)

“अङरा छे-छे कमचित पङ गोमा गिनमा? “दोक शुउ। यीशुस जवाब खेऊ, “उङरयो मासतमा, हलम मासुनचतमा, चोरस मालमा, रंऊ अमा नङ अपऊ आदर लमा, अला रंऊ खयुमदेस रा रंऊ खौता बेन्नङ लमा।”

![](https://cdn.door43.org/obs/jpg/360px/obs-en-28-03.jpg)

दत दो शरा फोबलङकुस लोऊ, “ग रंऊ चिगितुस ओ जि सिङ रिङमिन पङ लऊ तु। अङरा सोदायो जिंदा पोसमा शितिङ अला लि छे लमा वई?” यीशुस दोरा खोनु अला दोरा गोरङ लऊ।

![](https://cdn.door43.org/obs/jpg/360px/obs-en-28-04.jpg)

यीशुस जवाब खेऊ, “दत का सिदद वङमा गिनमा तोननङ जेऊ रंऊ सिङ- सङ रंऊ पिन अला दो रुपया मेतपो मीपङरा बाँटऊ पिनमा, अला कनरा स्‍वर्गु रूपया पोरति। दत तु अङ ज्ञपतिङ वंऊ पिन।”

![](https://cdn.door43.org/obs/jpg/360px/obs-en-28-05.jpg)

छेलि यीशुस लोऊ दत दो शरा फोबलङकुस गोऊ दत दो खरोसु पोसु, छु लोननङ दो हत साहुकर तोइ अला दोक एनु सिङ जङ-मूल खेमा मागिनि तोइ। ओदोक दो यीशूउ तुसिङक पोलठतु जेऊ पिनु।

![](https://cdn.door43.org/obs/jpg/360px/obs-en-28-06.jpg)

दत यीशुस एनु चेला पङरा लोऊ, “परमेश्‍वरू राज्‍यु साहुकर मीपङरा तुमा हत मुश्‍कोल तश। हां, इत साहुकर फोबलङक परमेश्‍वरू राज्‍यु तुमा बसकयङ ऊङि ऊँटु केपु मीस वंऊ जेऊ हनतमा एपो तश।”

![](https://cdn.door43.org/obs/jpg/360px/obs-en-28-07.jpg)

छेलि यीशुस रिंऊ चेला पङ गोऊ दत दोपङ बिंऊ पोसु। दोपङक लोऊ, “दत जि ओशि यो तोननङ परमेश्‍वर ऊङरा बचइ?

![](https://cdn.door43.org/obs/jpg/360px/obs-en-28-08.jpg)

यीशुस चेला पङरा खोनु दत लोऊ, “मीपङरा शितिङ रङरा बचामा मुशकोल तश। दत लि परमेश्‍वरू शितिङ छेलि लमा मुश्‍कोल मतेइ।”

![](https://cdn.door43.org/obs/jpg/360px/obs-en-28-09.jpg)

पतरसुस यीशु रा लोऊ, “निङपङ सनिश चेला रंऊ सिङ- सङ सोठऊ कन ज्ञपतिङ वंऊ जेऊ तोश। दत निङपोऊ तोफा छे वङरो?”

![](https://cdn.door43.org/obs/jpg/360px/obs-en-28-10.jpg)

यीशुस जवाब खेऊ, “सिङ मी पङ दोपङक अङ लमिन कयुम, अचो, अमा, अपा, चिगजा अला एनु सिङ-सङ सोठऊ, दोबसकयङ ज्ञा गुना खुचि पोरति अला एपो जोलोम लि पोरति। दत गोप पङ दो होमशित तोइ दोपङ ज्ञपतिङ वई, अला गोप पङ ज्ञपतिङ तोइ दोपङ होमशित वई।”

*मती पाठ- 19:16-30; मरकुस 10:17-31; लूका 18:18-30 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_28_128kbps.m4a

## 29. बेरहेम नुकुरु कोथा।

https://openbiblestories.org/l/scu/story-29/

![](https://cdn.door43.org/obs/jpg/360px/obs-en-29-01.jpg)

इ दयार, पतरसुस यीशु रा शुउ, “हे स्‍वामी, अङरा रंऊ बेते रा तचे फेरा माफ लमा वई हेलि दो अङ खिलाफ पाप लई? छे शिनिश फेरा शम?” यीशुस लोऊ, “शिनिश फैरा शम मेन, शिनिशु बसकयङ हुमनिसऊ सा फेरा।” ओइऊ लमिन, यीशु लोमा मतलब उलपङरा दयारो माफ लमा गिनमा। दत यीशुस ओइ कोथा लोऊ।

![](https://cdn.door43.org/obs/jpg/360px/obs-en-29-02.jpg)

यीशुस लोऊ, “परमेश्‍वरू राज्‍य इत राजा नङ बराबर तोइ दो एनु नुकुरूरत हिसाब थामा गिनु तोइ। दोऊ इत नुकुर रा दोऊ तुसिङ सु दोऊ थोरिङ गोप चेइ कोरजा तोइ।”

![](https://cdn.door43.org/obs/jpg/360px/obs-en-29-03.jpg)

दत लि दो नुकुर एनु कोर्जा रा खेमा मालिऊ, ओदोक राजास लोऊ, “ओइऊ कोर्जा खेमा शितिङ ओइ फोबलङक नङ अला जिऊ पेरङ पङरा नुकुर जुरऊ रंऊ पिनमा।”

![](https://cdn.door43.org/obs/jpg/360px/obs-en-29-04.jpg)

“दो नुकुरुस राजाऊ तुसिङ एनु पुशपङ चुऊ पोसु लोऊ, ‘ओरछे अङरा माफ लनना, अला ग रऊ कोर्जाऊ सिङ रूपया पोलठऊ खेसतोक। ‘राजास दो नुकुर रा पापङ ततु, ओदोक दोगुस दोऊ सिङ कोर्जा रा माफ लऊ अला दोरा जेमा खेऊ।”

![](https://cdn.door43.org/obs/jpg/360px/obs-en-29-05.jpg)

“दत दो नुकुर राजाऊ रत हनतु दकपा जेऊ, दत दोरा इत पङगोत नुकुर छुशु दो दोऊ प् लऊ कर्जु कर्जदार तोइ। दो नुकुरुस एनु पङगोत नुकुर रा चुमु अला लोऊ, ‘दो कन थोरिङ अङ कोर्जा तोइ अङरा दो पोलठऊ खे।”

![](https://cdn.door43.org/obs/jpg/360px/obs-en-29-06.jpg)

“दो पङगोत नुकुरुस पुशपङ चुऊ लोऊ, ‘ओरछे अङरा मोच्‍चे शुङ, ग रंऊ कोर्जाऊ सिङ रोकोम पोलठऊ खेसतोक। ‘ओइऊ बसकयङ, दो नुकुरुस एनु पङगोत रा जेलु पिनु दोसपा शम दो कोर्जा पोलठऊ माखैसि।”

![](https://cdn.door43.org/obs/jpg/360px/obs-en-29-07.jpg)

“छेलि वंऊ दो सिङ अलित नुकुरपङक तंऊ अला दोपङ हत बिंऊ जेऊ। दोपङ राजऊ रा जेऊ अला दोरा सिङ- सङ लोऊ पिनु।”

![](https://cdn.door43.org/obs/jpg/360px/obs-en-29-08.jpg)

“राजास दो नुकुर रा कुतु लोऊ, ‘हे हलम नुकुर। गस कन कोर्जा रा ओदोक माफ लऊ छु लोननङ कस अङरा ओरछै रिंऊ तोइ। कनरा लि ओशि यो लमा तोइ। ‘राजा ओनचे छिङना तंऊ कि दोक दो हलम नुकुर रा जेलु पिनु दोसपा शम एनु सिङ कोर्जा पोलठऊ माखेसतो।”

![](https://cdn.door43.org/obs/jpg/360px/obs-en-29-09.jpg)

दत यीशुस लोऊ, “अङ स्‍वर्गु पोसि अपा किमपोऊ नंऊ सिङ नङ ञमफो ओशि यो लई दत शम का रंऊ बियम रा रंऊ मोनङुस माफ मालई।”

*मती पाठ- 18:21-35 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_29_128kbps.m4a

## 30. यीशु ङा हजार मीपङरा थकतु खेइ।

https://openbiblestories.org/l/scu/story-30/

![](https://cdn.door43.org/obs/jpg/360px/obs-en-30-01.jpg)

यीशुस एनु खास चेला पङरा प्रचार लमा शितिङ अलित- अलित देषङु पिनु दत दोपङ मीपङरा यीशु बारे लोमा लीरो अला दोपङरा सिखयामा लीरो। दत दोपङ दा पोलठतु ओदा यीशु तोइ दत दोपङक रिंऊ कि दोपङक छे लऊ तोइ। दत यीशुस दोपङरा छोऊ नोपा फौक दोनङ ञमफो इत कत मातेइ जागऊ मोच्‍चे पोसमा शितिङ कुतु। दत दोपङ इत नावु थोरिङ जेऊ दत छोऊ नोपा फोक जेऊ पिनु।

![](https://cdn.door43.org/obs/jpg/360px/obs-en-30-02.jpg)

दत दा गोप मीपङ ओशि तोइ दोपङक यीशु नङ चेला पङरा नावु जेइ तंऊ तोइ। जि मीपङ दोपोऊरत होमशित छोऊ नोपा जेमा शितिङ छौऊ थोपा- थोपा रोऊ। दत यीशु नङ चेला पङ पुतु दत मी पोऊ इत चेई बीड दोपङरा होमशित थलत शुङु तोइ।

![](https://cdn.door43.org/obs/jpg/360px/obs-en-30-03.jpg)

दो भीडु योबलङ पङ नङ चिगजा पङरा शुममा बसकयङ मोतमेननङ ङा हजार फोबलङ तोइ। यीशुस दोपङरा हत पापङ ततु। यीशुरा शितिङ दो मीपङ पालस मातेइ तेतु खोता तोइ। ओदोक दोगुस दोरा लोऊ अला दोपोऊ नंऊ तचे मी शोतु तोइ दोपङरा एपो लऊ।

![](https://cdn.door43.org/obs/jpg/360px/obs-en-30-04.jpg)

निरू ज्ञपतिङ, चैलापङक यीशु रा लोऊ, “छङ गोप गोरू अला नोपा जिपा हलेस लि देशङ मातोइ तोइ। जि मीपङरा जेमा मत छु लोननङ दोपङ जेऊ जामा शितिङ छेई थऊ सुरो।”

![](https://cdn.door43.org/obs/jpg/360px/obs-en-30-05.jpg)

यीशुस एनु चेला पङरा लोऊ, “का दोपङरा छेई जामा खेततिश। “दोपङक लोऊ, “निङपङ ओशि हले लमा लिइ? निङपोऊरा लेम ङा रोटि नङ निश मचस तोइ।”

![](https://cdn.door43.org/obs/jpg/360px/obs-en-30-06.jpg)

यीशुस एनु चेला पङरा लोऊ कि दो बीडु गोप मी पङरा चिऊ थोरिङ डईनिसा- डईनिसा वंऊ पोसमा शितिङ लोमा।

![](https://cdn.door43.org/obs/jpg/360px/obs-en-30-07.jpg)

दत यीशुस ङा रोटि नङ निश मचस रा कयुफु स्‍वर्ग रा खोनु, अला दो थकतु रा शितिङ परमेश्‍वर रा ओरछे लोऊ।

![](https://cdn.door43.org/obs/jpg/360px/obs-en-30-08.jpg)

दत यीशुस रोटि नङ मचस रा खनङ लऊ पिनु। दोगुस मीपङरा खेमा शितिङ एनु चेला पङरा दो खनङ लमिन दो खेऊ पिनु। चेले दो थकतु रा छुऊ पोसु,अला कयामा मायंऊ। दो सिङ मीपङ थकतु जऊ सवङना वंऊ पोसु।

![](https://cdn.door43.org/obs/jpg/360px/obs-en-30-09.jpg)

दोऊ ज्ञपतिङ, चेला पङक दो बचति टुकडा कटठा लऊ अला टुकडा पङरा सानिश पिलतु नंऊ पुंऊ पिनु। दो सिङ थकतु ओदो ङा रोटि नङ निश मचसुस तु तोइ।

*मती पाठ -14:13-21; मरकुस 6:31-44; लुका 9:10-17; यूहन्‍ना 6:5-15 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_30_128kbps.m4a

## 31. यीशु तिऊ थोरिङ विनि।

https://openbiblestories.org/l/scu/story-31/

![](https://cdn.door43.org/obs/jpg/360px/obs-en-31-01.jpg)

ङा हजार मी पङरा थकतु खैऊ ज्ञपतिङ, यीशु गुस एनु चेला पङरा नावु जेमा शितिङ लोऊ। दोगुस दोपङरा छोऊ नोस फौक जैमा शितिङ लोऊ दत लि दो मोच्‍चे थङक ओदा यो पोसु तोइ। दत चेला पङ जेऊ अला यीशुस दोपोऊ बीड रा जेमा मतु छु लोननङ दोपङ एनु कयुमु जेऊ। ओदोऊ ज्ञपतिङ, यीशु प्रार्थना लमा शितिङ इत डोङखङु जेऊ। दो ओदा खेचो तोइ, अला दोक गोप मुञ्‍ञा शम परमेश्‍वर रा कोलङ लऊ।

![](https://cdn.door43.org/obs/jpg/360px/obs-en-31-02.jpg)

दो बेलऊ, चेला पङ एनु नाव रा चलऊ जेउ तोइ, दत दोपोऊ तुसिङ हत लान चलतु तोइ। गोप मुञ्‍ञा वंऊ जेऊ लि दोपङ लेम छौऊ किल्‍लिङ ओ पुतु तोइ।

![](https://cdn.door43.org/obs/jpg/360px/obs-en-31-03.jpg)

दो बेलऊ यीशुस प्रार्थना लमा कयऊ पिनु अला एनु चेला पोऊरा पोलठतु जेमा तिखु। दो नावु रा पुतमा शितिङ तिऊ थोरिङ विनु जेऊ।

![](https://cdn.door43.org/obs/jpg/360px/obs-en-31-04.jpg)

दत चेला पङक दोरा तंऊ। दोपङ हत बेऊ छु लोननङ दोपङ सुनचतु कि दो उङि शैतान तश। यीशु सेसि तोइ कि दोपङ बेऊ पिनु तोइ, ओदोक दोगुस दोपङरा कुतु लोऊ, ”थाबेरिश ,जि ग तोक।“

![](https://cdn.door43.org/obs/jpg/360px/obs-en-31-05.jpg)

ओसपरिङ पतरसुस यीशु रा लोऊ, ”हे प्रभु जि का तोननङ दत अङरा तिऊ थोरिङ विनु कनरा तुमा शितिङ रिङ। यीशुस पतरस रा लोऊ, ”तु पिन।

![](https://cdn.door43.org/obs/jpg/360px/obs-en-31-06.jpg)

दत पतरस नावुस हन्‍तु तु अला यीशु रा जेमा शितिङ तिऊ थोरिङ विनु जेऊ। दत मोच्‍चे नोपा जेऊ, दोक एनु मी रा ठुरऊ पिनु अला तिऊ लहर रा खौनु जेऊ अला लान तु तश ततु।

![](https://cdn.door43.org/obs/jpg/360px/obs-en-31-07.jpg)

दत पतरस बेऊ पिनु अला तिऊ नंऊ डुबयतु। दो हरो टऊ, “हे प्रभु, अङरा बचास। “यीशुस गुत खेऊ दोरा चुमु। ओसपरिङ दोक पतरस रा लोऊ, “कन देङ हत गटो तश। कनरा बचऊ तामा शितिङ कस अङ थौरिङ दैङ छू मालऊ?”

![](https://cdn.door43.org/obs/jpg/360px/obs-en-31-08.jpg)

दत यीशु नङ पतरस नावु शोखू, अला हसल ओ लान तुमा डेमु। ती सवङना वंऊ। चेला पङक हैरान वंऊ यीशु रा पुशपङ चुऊ। दोपङक दोरा अराधना लऊ अला दोरा लोऊ, “दिमलेओ का यो परमेश्‍वरु छङ तोन आ।”

*मती पाठ- 14:22-33; मरकुस 6:45-52; यूहन्‍ना 6:16-21 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_31_128kbps.m4a

## 32. यीशु हलम जिवा सङकमिन नङ इत शोतमिन योबलङक रा ठीक लई।

https://openbiblestories.org/l/scu/story-32/

![](https://cdn.door43.org/obs/jpg/360px/obs-en-32-01.jpg)

इ दयार यीशु नङ दोऊ चेला पङ एनु नावु ओदो जागऊ रा जेऊ ओदा गिरासेनी मीपङ पोसि तोइ। दोपङ ओदो जागऊ रा पुतु थलत नावुस हनतु तु।

![](https://cdn.door43.org/obs/jpg/360px/obs-en-32-02.jpg)

दो इत मी तोइ दोगु नंऊ हलम जिवा सङकु तोइ।

![](https://cdn.door43.org/obs/jpg/360px/obs-en-32-03.jpg)

दो मी ओनचे शेच्‍चन तोइ कि उङ लि दोरा काबू लमा मालिइ तोइ। गोप फैरा ता मीपङक दोऊ गुत नङ बङखोन रा शङलङुस लि छुतु, दत लि दो दोरा ठऊ पिनि तोइ।

![](https://cdn.door43.org/obs/jpg/360px/obs-en-32-04.jpg)

दो मी ओदो जागऊ कब्रु नंऊ पोसि तोइ। दो मी सारा दयार नङ मुनथना हरो टऊ पोसि तोइ। दो गस्‍कुला माचुखि तोइ अला दयारो एनरा रा गुस थोलि तोइ।

![](https://cdn.door43.org/obs/jpg/360px/obs-en-32-05.jpg)

दो मी करलतु यिशु रा तु अला यीशूउ तुसिङ पुशपङ चुऊ पोसु तोइ। दत यिशुस दो मिउ नंउ हलम जिवा पङरा लोऊ, “जी मिऊ डियङुत दकपा हनतु जिरा।’’

![](https://cdn.door43.org/obs/jpg/360px/obs-en-32-06.jpg)

दो हलम जिवा गोप शेततङ हरो टऊ, “हे यीशु, परमेश्‍वरु छङ, कनरा अङरत छे लेन? ओरछै अङरा ङनचेन थालस। “दत यीशुस दो हलम जिवा रा शुऊ , “कन मिन छे? दोक जवाब खेऊ, “निङपोऊ मिन सैना तो, छु लोननङ निङपङ गोप तोश। ”रोमी सैनऊ नंऊ गोप हजार सैनिक पङरा इत “सैना” लोइ।

![](https://cdn.door43.org/obs/jpg/360px/obs-en-32-07.jpg)

दो हलम जिवा पङक यिशु रा पेरतू, “ओरछे जमभु निङपङ रा जी जागास दकपा था पिन। “ओदयो तुसिङ डोङखङु थोरिङ सुरसु शालङ रा शवऊ तोइ। ओदोक हलम जिवा पङक यिशु रा पोरजऊ तोइं, “ओरछे निङपङरा लि ओदो सुरस पोऊ नंऊ पिन। “दत निङपङरा सजा माखेसमा।”

![](https://cdn.door43.org/obs/jpg/360px/obs-en-32-08.jpg)

अला दो हलम जिवा दौ मिऊ डियङुत हनतु दो सुरसु नंऊ जेऊ। दो सुरस पङ क्रलतु इत डेन डोङखङुस लाङ टऊ अला छोऊ नंऊ डुबयतु सिऊ जेऊ। दो शालङु मोतमेन्‍नङ निश हजार सूरस तोइ।

![](https://cdn.door43.org/obs/jpg/360px/obs-en-32-09.jpg)

ओदा दो सूरस पङरा खोनमा शितिङ मीपङ तोइ। छे लि वंऊ दो दोपङक तंऊ दत दोपङ नगरु रोऊ जेऊ। यीशुस छे लि रिंऊ दो दोपङ सिङरा लोऊ। दो देशङु मी पङ हनतु तु अला दो मी रा तंऊ दोननऊ हलम जिवा पङ तोइ । दो मेसङक,गस्‍कुला चुखु, अला इत एपो मिंऊ खोता वऊ जेऊ।

![](https://cdn.door43.org/obs/jpg/360px/obs-en-32-10.jpg)

दो मीपङ हत बेऊ तोइ अला दोपङक यीशु रा ओदत जेमा शितिङ लोऊ। दत यीशु नावु थोरिङ शोखु। दो मी दोननंऊ हलम जिवा पङ तोइ दोक यीशु नङ ञमफो जेमा शितिङ औरछे लोऊ।

![](https://cdn.door43.org/obs/jpg/360px/obs-en-32-11.jpg)

दत यीशुस दोरा लोऊ, ”मेन। ग गिनु तोक का कयुमु जेऊ सिङरा लोमा परमेश्‍वरुस कनरा शितिङ छे लऊ। दोपङरा लोत कि हले परमेश्‍वरुस कन रा पापङ ततु।”

![](https://cdn.door43.org/obs/jpg/360px/obs-en-32-12.jpg)

ओदोक दो मी जेऊ पिनु अला सिङरा ओइऊ बारे लोऊ छे यीशुस दोऊ शितिङ लऊ तोइ। दोऊ कोथा गोइ सिङ मी बिंऊ जेऊ तोइ।

![](https://cdn.door43.org/obs/jpg/360px/obs-en-32-13.jpg)

ओसपरिङ यीशु छोऊ नोस फोक पोलठतु तु। दोऊ ओदा पुतमंऊ ज्ञपतिङ, इत चेइ शालङ दोऊ नोपा- गिपा कटठा वंऊ अला दोरा टेममा लऊ। दो बीडु इत योबलङक तोइ दो सनिश बोषङुक शुइ बोयतमा शोतमिन तोइ। दोक एनु सिङ नौर रंऊ शोतु शितिङ खेऊ पिनु तोइ छु लोननङ दो दोरा एपो लरो ततु, दत लि दोऊ शोत अला लि खुचि यो वंऊ जेऊ तोइ।

![](https://cdn.door43.org/obs/jpg/360px/obs-en-32-14.jpg)

दोक गोऊ तोइ कि यीशुस गोप शोति मी पङरा एपो लऊ तोइ अला दो सुनचतु, “अङरा पोता ग लेम यीशुऊ गस्‍कुला रा थननङ, दत ग लि ठीक वंई।” ओदोक दो यीशूउ ज्ञपतिङक तु अला दोऊ गस्‍कुला रा छुअऊ। दत दोक दोपङरा छुअऊ, ओदोसपरिङ ओ दोऊ शुइ हनतमा बोनत वंऊ।

![](https://cdn.door43.org/obs/jpg/360px/obs-en-32-15.jpg)

हसल हो, यीशु सेसु कि अङरत सोततिङ हनतु तु। ओदोक दोगुस ज्ञपतिङ ठुरतु शुऊ, “अङरा ऊङक थनु?” चेला पङक लोऊ, “जा ओनचे मी पङक कन नोपा- जिपा बीड तिऊ पोसु, अला कनरा क्रोंऊ पिनु तश। दत कस छु शुशुसु कि अङरा ऊङक थनु?”

![](https://cdn.door43.org/obs/jpg/360px/obs-en-32-16.jpg)

दत दो योबलङक यीशुऊ रा क्रिंऊ तु अला हत बेऊ एनु पुशपङ चुऊ पोसु। दत दोगुस दोरा लोऊ पिनु कि दोगुस छे लऊ, अला ओशि लि लोऊ कि दो एपो वंऊ। यीशुस दोरा लोऊ, “कन दैङुस कनरा एपो लऊ। मेसङक जोयो।”

*मती पाठ- 8:28-34;9:20-22; मरकुस- 5:1-20;5;24-34; लूका- 8:26-39;8:42-48 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_32_128kbps.m4a

## 33. इत किसानु कोथा।

https://openbiblestories.org/l/scu/story-33/

![](https://cdn.door43.org/obs/jpg/360px/obs-en-33-01.jpg)

इ दयार, यीशु छोऊ थौचलङु तुसिङ तोइ। दो मी पोऊ इत गोप चेइ भीड रा लफु तोइ। दोऊ कमचित गोमा शितिङ ओनचे मी तु कि यीशुउ रा दोपङ नङ कमचित लोमा शितिङ जागा यो माबचतु। ओदोक दो तिऊ थोरिङ डेन नावु शोखु। ओदा दो पोसु पिनु अला मी पङरा लफु तोइ।

![](https://cdn.door43.org/obs/jpg/360px/obs-en-33-02.jpg)

यिशुस ईत कोथा सुनऊ, “इत किसान पुझत पिनमा शितिङक रिवरा जेऊ। दो गुतुस पुझत पिनु तोइ दत गोप पुझत ओमपु नंऊ दतु । दत प्यात पङ तू सिङ पुझत रा जऊ पिनु।”

![](https://cdn.door43.org/obs/jpg/360px/obs-en-33-03.jpg)

“अलित पुझत पङ शंङकरऊ मटङु दतु दा गोप गटो फतिङ तोइ। शंङकरऊ मटङु दति पुझत दो हत हसल चोऊ, दत दोपोउ झिलङ मटङु ओपोङ जेमाऊ शितिङक मुलुक कच्चा तोई। अलेया नी जुरू दो सोलत पङ फोसु अला सिऊ जेऊ।”

![](https://cdn.door43.org/obs/jpg/360px/obs-en-33-04.jpg)

“तचे ता पुझत रकटङु नंऊ दतु । दो पुजत पङ चेई वंऊ, दत ली छवा पङक दोपङरा टेमु पिनु। ओदोक छवा सा मटङु दति पुझतु नंऊ इत लि पुझत ब्रू मालइ सा तोइ।”

![](https://cdn.door43.org/obs/jpg/360px/obs-en-33-05.jpg)

“तचे ता पुजत एपो मटङु थोरिङ दतु। दो पुजत चेइ नङ तचे पुजत पुतु तोइ दोपोऊरत तचे ता हुमनिसा,तचे ता हुमनिसऊ सा अला या बसकयङ ज्ञा गुणा खुचि ब्रूँ वंऊ। ऊङ लि परमेश्‍वरु ज्ञपतिङ जेमा गिनि तोइ, दो ओदो कमचित रा कोलङ तामा ग छे रिंऊ तोक।” " जि कोथास चेला पङरा सुनचतमा उमा खेऊ। ओदोक यीशुस लोऊ कि, “दो पुजत परमेश्‍वरु वचन तश। दो ओमपु इत ओशि मी तोइ दो परमेश्‍वरु वचन रा गोइ, दत लि दोरा मासमजति। दत शैतान दोऊ रत वचन रा खुतु किइ। दत शैतान दोरा वचन रा मासमजतमा शितिङ वरि तई।” "

![](https://cdn.door43.org/obs/jpg/360px/obs-en-33-06.jpg)

“दो शंङकरा सा मटङ ओशि मी दो परमेश्‍वरु वचन रा गोइ अला हत गरीस दोरा मोनति। दत ओसपरिङ मुशकोल टेम तुरिऊ, अला दत अलित मी पङ दोरा ङनचेन लननङ, दत दो परमेश्‍वरू रत वरि जेऊ पिनि। छु लोननङ दो परमेश्‍वरु थोरिङ दैङ लमा बोनत लऊ पिनि।”

![](https://cdn.door43.org/obs/jpg/360px/obs-en-33-07.jpg)

“दो छवा सा मटङ ओदो मिंऊ खोता तोइ दो परमेश्‍वरु वचन रा गोइ तोइ। दत लि दो गोप कमचित पङ सुनचतु परेशान वंऊ पोसि तोइ, दो गोप रूपया कमायामा शितिङ हत मेहनत लइ, दो गोप छला गिनमा शितिङ हत मेहनत लई। गटो टैमू ज्ञपतिङ, छङ दो परमेश्‍वर रा गोरङ मालइ। ओदोक छेलि दोगुस परमेश्‍वरु वचनुस सिखयतु तोइ दो परमेश्‍वर रा खुश लमा मालिइ तोइ। दो रोजतु बेरखऊ खोता तोइ दो छोयो ब्रू मालई तोइ।”

![](https://cdn.door43.org/obs/jpg/360px/obs-en-33-08.jpg)

“दत एपो मटङ पुजत ओदो मिऊ खोता दो परमेश्‍वरु वचन रा गोइ तोइ, दोऊ थोरिङ दैङ लई, अला ऊशो हनि तोइ।”

*मती पाठ – 13:1-8,18-23; मरकुस- 4:1-8,13-20; लूका-8:4-15 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_33_128kbps.m4a

## 34. लफमा शितिङ यीशुस गोप कोथा पङ सुनायऊ।

https://openbiblestories.org/l/scu/story-34/

![](https://cdn.door43.org/obs/jpg/360px/obs-en-34-01.jpg)

यीशुस परमेश्‍वरु राज्‍यु बारे अलित गोप कोथा पङ सुनायऊ। इत कमचित, दोक लोऊ, “परमेश्‍वरु राज्‍यु इत राइऊ पुजतु खोता तोइ दोरा ऊङकि एनु रिऊ नंऊ पुतु पिनु तोइ। किनपङ सेसि राइऊ पुजत सिङ पुजत पोऊ नंऊ थोनतु चिगित तुइ।”

![](https://cdn.door43.org/obs/jpg/360px/obs-en-34-02.jpg)

“दत राइ चोऊ चेइ वंऊ जेइ दत दो रिऊ नंऊ सिङ बोठङ पोरत थोनतु चेइ वंऊ जेइ, ओनचे चेइ कि प्‍यात तु दोऊ डालङु थोरिङ शवनु पोसि।

![](https://cdn.door43.org/obs/jpg/360px/obs-en-34-03.jpg)

यीशुस इत अलित कोथा लोऊ, “परमेश्‍वरु राज्‍य सुरि बरकजनु खोता तोइ दोरा कयुफु दो योबलङक सिङ तिसङु नंऊ कुऊ पिनि दत दो सिङ तिसङु फैलतु जेइ।”

![](https://cdn.door43.org/obs/jpg/360px/obs-en-34-04.jpg)

“परमेश्‍वरू राज्‍य दो खजानंऊ खोता तोइ दोरा ऊङकि रिऊ नंऊ ञंऊ तऊ। ऊङि अलित मी रा दो खजाना पोरतु अला दोक दोरा गिनमा शितिङ हत खुसि लऊ। ओदोक दोगुस दोरा हेलि बंऊ पिनु। दो ओनचे गरीस तोइ कि दोगुस जेऊ एनु सिङ- सङ रंऊ पिनु छू लोननङ दो ओदो री रा छोङमा लिइ ओदा दो खजाना ञङमिन तोइ।”

![](https://cdn.door43.org/obs/jpg/360px/obs-en-34-05.jpg)

“परमेश्‍वरू राज्‍य इत हत कीमती संखमा मोतिऊ खोता तोइ। दत ऊङ लि छोंईसा दोरा गिनि दत दो दोरा छोङमा शितिङ एनु सिङ-सङ रंऊ पिनि।”

![](https://cdn.door43.org/obs/jpg/360px/obs-en-34-06.jpg)

ओदा तचे ता मी ओशि सुनचति तोइ कि परमेश्‍वर ओदोक दोपङरा गिनि छु लोननङ दोपङ एपो लेन लऊ ततु। जि मीपङ ओशि मीपङरा एपो मातति तोइ दो मीपङ एमपोऊ खोता लेन मालई तोइ। ओदोक यीशुस दोपङरा ओइ कोथा लोऊ: “निश फोबलङक तोइ अला निशो परमेश्‍वरू रा कोलङ लमा शितिङ थानङु जेऊ। दोपोऊ नंऊ इत माबला थइ सा तोइ, अला अलित इत धर्मु गोबा तोइ।”

![](https://cdn.door43.org/obs/jpg/360px/obs-en-34-07.jpg)

“दो धारमिक गोबास ओशि कोलङ लऊ कि, “हे परमेश्‍वर, कन ओरछे तो कि ग अलित मी पोऊ खोता डाकू, माएपो मी, हलम लेन लई सा, या बसकयङ जा पोसि दो माबला थ्ई खोता पापी मातोक।”

![](https://cdn.door43.org/obs/jpg/360px/obs-en-34-08.jpg)

“इत कमचित, ग हफ्‍तऊ निश फेरा व्रत तइ तोक, अला ग अङरा पोरति रूपया नङ छलऊ सा हिसा कनरा खेसि तोक।”

![](https://cdn.door43.org/obs/jpg/360px/obs-en-34-09.jpg)

“दत दो माबला थईसा दो धारमिक गोब नङ हत वरि डेन वंऊ पोसु। दोक थोरिङ स्‍वर्गु फोक मी लि माथुऊ। ओदो बसकयङ, दोक एनु मुठी गुस एनु छती रा तोंऊ अला परमेश्‍वर रा कोलङ लऊ, ‘हे परमेश्‍वर, अङरा पापङ तत छु लोननङ ग इत पापी तोक।”

![](https://cdn.door43.org/obs/jpg/360px/obs-en-34-10.jpg)

दत यीशु गुस लोऊ, “ग कनरा दिमलेओ रिंऊ तोक, परमेश्‍वरुस दो माबला थइ सऊ बिनती गोऊ अला दोरा एपो मी लोऊ। दत दोक दो धारमिक गोबऊ बिनती रा मागिनमा लऊ। परमेश्‍वर सिङ इत घंमडिऊ पिशा रा ओपङ लई, दत लि दो सिङ रा एपो लई दो एनरा परमेश्‍वरु तुसिङ झुकयारो।”

*मती पाठ – 13:31-33,44-46; मरकुस- 4:30-32; लुका-13:18-21; 18:9-14 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_34_128kbps.m4a

## 35. इत दयालू अपऊ कोथा।

https://openbiblestories.org/l/scu/story-35/

![](https://cdn.door43.org/obs/jpg/360px/obs-en-35-01.jpg)

इ दयार, यीशु सिङ मी पङरा लफु तोइ दोपङ दोऊ कमचित गोमा शितिङ कटठा वंऊ तोइ। जि मीपङ माबला थई सा तोइ अला अलित मी पङ लि तोइ दोपङक मूसऊ कानून रा मासेसि तोइ ।

![](https://cdn.door43.org/obs/jpg/360px/obs-en-35-02.jpg)

तचे धारमिक गोबा पङक तंऊ कि यीशु जि मीपङ नङ इत पङगोतु खोता कमचित लोऊ तश। ओदोक, दोपङक इतुस अलित रा ओशि लोमा शुरू लऊ कि दो गलत लऊ तश। यीशु गुस दोपङरा कमचित लोइ गोऊ, ओदोक दोगुस दोपङरा जि कोथा लोऊ।

![](https://cdn.door43.org/obs/jpg/360px/obs-en-35-03.jpg)

“इत मी तोइ दोऊ निश छङक तोइ। चिगित छङकुस एनु अपा रा लोऊ, ‘हे अपा, अङरा देसङो अङ हिसा गिनि।” दत अपास एनु छङक निशता सिङ जायदादु बँटवारा लऊ पिनु।”

![](https://cdn.door43.org/obs/jpg/360px/obs-en-35-04.jpg)

“हसल ओ चिगित छङक एनु सिङ कटठा लऊ देशु जेऊ पिनु अला पापु जोलोमु पोसु एनु सिङ रूपया पङरा बर्बाद लऊ पिनु।”

![](https://cdn.door43.org/obs/jpg/360px/obs-en-35-05.jpg)

“दोऊ ज्ञपतिङ, ओदा चिगित छङ तोइ ओदो मुलुकु इत बैमा थङक अकाल तु, अला दोऊरा थकतु जमा शितिङ रूपया मातेइ तोइ। ओदोक दोरा सूरस रा शवामा लेन तोइ। दो ओनचे दु:खङुस अला ओनठमिन तोइ कि दो सूरस पोऊ थकतु जामा गिनि तोइ।”

![](https://cdn.door43.org/obs/jpg/360px/obs-en-35-06.jpg)

“दत ज्ञपतिङक, दो चिगित छङकुस एन रा यो लोऊ, ‘ग जि छै लऊ तोक? अङ अपाऊ सिङ नुकुर पोऊरा जामा शितिङक गोप तोइ, दत लि ग जा ओनटु सिऊ पोसु। ग अङ अपऊ रा पोलठतु जेइ अला अङ अपऊ इत नुकुर वङमा शितिङ ओरछे लोइ।”

![](https://cdn.door43.org/obs/jpg/360px/obs-en-35-07.jpg)

“दत दो चिगित छङकुस पोलठतु एनु अपऊ कयुमु फोक जेमा जुराशु। दो अला गोप वरि तोइ, दोऊ अपास दोरा तंऊ अला दोरा पापङ ततु। दो करलतु एनु छङकु रा जेऊ अला दोरा कखलि चुमु गोरङ लऊ।”

![](https://cdn.door43.org/obs/jpg/360px/obs-en-35-08.jpg)

“दो छङकुस लोऊ, ‘हे अपा, गस परमेश्‍वर नङ कन खिलाफ पाप लऊ। ग कन छङ लोमा काबिल मातोक।”

![](https://cdn.door43.org/obs/jpg/360px/obs-en-35-09.jpg)

“दत अपास एनु नुकुर रा लोऊ, हसल जेऊ इत थोनतु एपो गस्‍कुला कयुफु जिरश अला अङ छङक रा चूरिश। दोऊ बरनतु लकसप अला दोऊ बङखोनु फोनि चूरिश। अला थोनतु एपो करात सतमा दत ऊलपङ जामा अला गोंमफना लमा, छु लोननङ अङ छङ सिमिन तोइ, दत दो सारस वंऊ तो। दो शो जेऊ तोइ, छङ ऊलपङरा दो पोरतु तश।”

![](https://cdn.door43.org/obs/jpg/360px/obs-en-35-10.jpg)

“ओदोक मी पङक गोंमफना लऊ जुमा तिखु। गोप टैम बिततु ज्ञपतिङ, चेइ छङक रिऊ नंऊ लेन लऊ कयुमु तु तोइ। दोक गरेप नङ शोनमऊ कत गोऊ हैरान वंऊ कि जि छे वंऊ तश।”

![](https://cdn.door43.org/obs/jpg/360px/obs-en-35-11.jpg)

“दत चेइ छङख रा पोता लगयतु कि दोपङ ओदोक गोंमफना लऊ छु लोननङ दोऊ बियम कयुमु पोलठतु तु तोइ, दत दो हत छिङना तंऊ अला कयुमु नंऊ मतु। दोऊ अपास दकपा तु दोरा दोपङ नङ ञमफो गोंमफना लत लोऊ, दत दोक मालई लोऊ पिनु।”

![](https://cdn.door43.org/obs/jpg/360px/obs-en-35-12.jpg)

“दो चेइ छङकुस एनु अपा रा लोऊ,‘ ओनचे बोषङ गस कन शितिङ तचे लेन लऊ। तशपयो कन कमचित रा मालई मारिंऊ, दत कि कस अङरा इत चिगित करात लि माखेसु दोगुस ग अङ पङगोत पङरा थकतु जामा कुतमा तोरे। कन ओइ छङकुस ता पापु लेन लऊ बर्बाद लऊ पिनपिनसु। अला छङ दो पोलठतु तु दत दोऊ शितिङ गोंमफमा लमा रा कस थोनतु एपो करात रा शुपु पिनु।”

![](https://cdn.door43.org/obs/jpg/360px/obs-en-35-13.jpg)

“अपास लोऊ, “हे अङ छङक, का अमबोरो अङनङ ञमफो तोन, अला छे लि अङ तो दो सिङ कन ओ तो। दत लि अलपङरा गोंमफमा लमा गिनमा छु लोननङ कन बेते सीमिन तोइ, छङ दो सारस वंऊ। दो शौ जेऊ तोइ, छङ ऊलपङरा दो पोरतु।”

*लूका पाठ- 15:11-32 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_35_128kbps.m4a

## 36. यीशुउ रूअङ बोदलतु।

https://openbiblestories.org/l/scu/story-36/

![](https://cdn.door43.org/obs/jpg/360px/obs-en-36-01.jpg)

इ दयार, यीशुस एनु हुम चेला पङ, पतरस, याकूब, अला यूहन्‍ना रा एन नङ ञमफो किऊ। (जि यूहन्‍ना मिनु चेला ओदो मी दो मेन दोगुस यीशु रा संखमा डुबयतमा खेऊ तोइ।) दोपङ परमेश्‍वर रा कोलङ लमा शितिङ इत थोनपो डोङखङु जेऊ।

![](https://cdn.door43.org/obs/jpg/360px/obs-en-36-02.jpg)

ओदोसपरिङ यीशु परमेश्‍वर रा कोलङ लऊ तोइ दत दोऊ मोमि नीऊ खौता छति वंऊ जेऊ। दोऊ गस्‍कुला छतिऊ खौता छंई वंऊ जेऊ, हले मुलुकु नंऊ ऊङ लि लरो ओदो बसकयङ लि छंई।

![](https://cdn.door43.org/obs/jpg/360px/obs-en-36-03.jpg)

दत मूसा नङ एलिय्‍याह भविष्‍य लोइ सा दा छतिऊ खोता तु। ओइ फोबलङक जि मुलुकु नंऊ देसङ बसकयङ सैकडों बोषङ होमशित थलतो पोसि तोइ। दोपङक यीशु रा दोऊ सीमंऊ बारे लोऊ, छु लोननङ दो हसल ओ यरूशलेमु सिइ सा तोइ।

![](https://cdn.door43.org/obs/jpg/360px/obs-en-36-04.jpg)

ओदोसपरिङ मूसा नङ एलिय्‍याह यीशु नङ कमचित लोऊ तोइ दत पतरसुस यीशु रा लोऊ, “ऊलपङरा शितिङ ओया तोमा एपो तश। ऊलपङ हुम जागा रा जुरारे, इत कन शितिङ, इत मूसा रा अला इत एलिय्‍याह रा शितिङ। “दत लि पतरस मासेसि तोइ कि दो छे रिंऊ तश।

![](https://cdn.door43.org/obs/jpg/360px/obs-en-36-05.jpg)

दत पतरस कमचित लोऊ तोइ, दत इत चमकयति जू ओपङ दोपोऊ थोरिङ तु छायतु। दत दोपङक जू नंऊ इत कत तुइ गोऊ। दौगुस लोऊ, “जि अङ छङक जीरा ग हत बेन्नङ लइ तोक। ग दोऊरत गरीस तोक। दोऊ गोमा।” दो हुम चेला पङ बेऊ मटङु थोरिङ लेटतु पिनु।

![](https://cdn.door43.org/obs/jpg/360px/obs-en-36-06.jpg)

दत यीशुस दोपङरा थनु अला लोऊ, “थाबेरिश। अनतिश।” दत दोपङ नोपा-जिपा खोनु, दो ओदा तोइ दो लेम यीशु ओ तोइ।

![](https://cdn.door43.org/obs/jpg/360px/obs-en-36-07.jpg)

यीशु नङ दो हुम चेला पङ दो डोङखङु पोलठतु ओपङ तु। दत यीशुस दोपङरा लोऊ, “देसङ ओया वङमिन दो ऊङरयो मालोमा। ग हसल ओ सिइ अला हे सारस वंई। दोऊ ज्ञपतिङ, किमपङ मीपङरा लोमा लिइ।”

*मती पाठ - 17:1-9; मरकुस- 9:2-8; लुका 9: 28-36 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_36_128kbps.m4a

## 37. यीशु लाज़र रा सिऊ थलत हेलि जिंदा लई।

https://openbiblestories.org/l/scu/story-37/

![](https://cdn.door43.org/obs/jpg/360px/obs-en-37-01.jpg)

लाज़र मिनु इत मी तोइ। दोऊ निश बियम तोइ दोनिशु मिन मरियम नङ मार्था तोइ। दोपङ सिङ यीशु नङ हत पङगोत तोइ। इ दयार, उङीस यीशु रा लोऊ कि लाज़र हत शोतमिन तशे। दत यीशु ओशि गोऊ दत दोक लोऊ, “जि शोत लाज़रू सिऊ ज्ञपतिङ लि माकयइ। ओदो बसकयङ, ओइ मी पङरा परमेश्‍वरू आदर लमा शितिङ लोइ।”

![](https://cdn.door43.org/obs/jpg/360px/obs-en-37-02.jpg)

यीशु एनु मीं पङरा हत बेन्नङ लई तोइ, दत लि ओदा दो तोइ तोइ दोगुस निश दयार शम शुंऊ पोसु। ओदो निश दयारू ज्ञपतिङ, दोक एनु चेला पङरा लोऊ, “जिरश पोलठतु यहूदिया प्रदेश फौक जेते।” चेला पङक जवाब खेऊ, “दत लि हे गुरू, जोदे गटो यो टेम वंऊ ओदतु मी पङ कनरा सतमा गिनु तशे। यीशुस लोऊ, “ऊलपोऊ पङगोत लाज़र ञोनमिन तश, अङरा दोरा अनमा तो।”

![](https://cdn.door43.org/obs/jpg/360px/obs-en-37-03.jpg)

यीशुउ चेला पङक जवाब खेऊ, “हे प्रभु, छे लाज़र ञोननङ, दो एपो वंई या।” दत यीशुस दोपङरा एपोस लोऊ, “लाज़र सिऊ कयामिन। ग गरीस तोक कि ग ओदा मातोरेक, छु लोननङ किमपङ अङ थोरिङ दैङ लमा लीरो।”

![](https://cdn.door43.org/obs/jpg/360px/obs-en-37-04.jpg)

दत यीशु लाज़रू देशङु पुतु दा ता लाज़र सिऊ प दयार वङ कयऊ तोइ। मार्था यीशु रा छुशमा शितिङ दकपा तु दत लोऊ, “हे प्रभु, का ओया तोननङ अङ बेते मासिइ तोइ। दत लि ग दैङ तारोक छै लि का परमेश्‍वरु रत थारोन दो कनरा खेसतो।”

![](https://cdn.door43.org/obs/jpg/360px/obs-en-37-05.jpg)

यीशुस जवाब खेऊ, “सिऊ लि जिंदा अला जिंदा तोक। ऊङ लि अङ थोरिङ दैङ तई दत लि दो सीनङ दत लि दोरा जोलोम पोरति। ऊङ लि अङ थोरिङ दैङ तानङ दो तशपयो मासिइ। का छे ओइऊ थोरिङ दैङ तई या?” मार्थास जवाब खेऊ, “हे परमेश्‍वर, ग दैङ तारोक कि का परमेश्‍वरु छङ मसीह तोन।

![](https://cdn.door43.org/obs/jpg/360px/obs-en-37-06.jpg)

दत मरियम तु। दोक यीशुउ बङखौनु दतु लोऊ, “हे प्रभु, का ओया तोननङ अङ बेते मासिइ तोइ।” यीशुस दोरा शुऊ, “किमपङक लाज़र रा अमा तामिन?” दोपङक दोरा लोऊ,“ कब्रु नंऊ। जिरा अला खोनु पिन।” दत यीशु करपु पिनु।

![](https://cdn.door43.org/obs/jpg/360px/obs-en-37-07.jpg)

दो कब्र इत गुफा तोइ दोरा डोङखङ खोदऊ जुरामिन तोइ। दत यीशु कब्रु रा पुतु दत दोगुस दोपङरा लोऊ, “रा र थुतु पिननिश।” दत मार्थास लोऊ, “दोरा सिऊ प दयार वङ कयऊ। दोननऊत डिमा तुइ।”

![](https://cdn.door43.org/obs/jpg/360px/obs-en-37-08.jpg)

यीशुस मारथा रा जवाब खेऊ, “गस कनरा मारिङरेक आ का अङ थोरिङ दैङ मालननङ दत परमेश्‍वरु शेत रा खोनि?” ओदोक दोपङक रा थुतु पिनु।

![](https://cdn.door43.org/obs/jpg/360px/obs-en-37-09.jpg)

दत यीशुस थोरिङ स्‍वर्गु फोक खोनु लोऊ, “हे अपा, अङ कमचित गोमा शितिङ ग कनरा पेरततोक। ग सेसि कि का सोदयो अङ गोइ, दत लि गस जि ओया डेन सिङ मी पङरा पङगोत लमा शितिङ रिंऊ छू लोननङ जि पङ दैङ लरो कि कस अङरा पिनपिनसु।” दत यीशुस कत टऊ, “हे लाज़र, दकपा हनतु जिरा।”

![](https://cdn.door43.org/obs/jpg/360px/obs-en-37-10.jpg)

दत लाज़र दकपा हनतु तु। दो अला लि कफनुस लिपटतमिन तोइ। यीशुस दोरा लोऊ, “ओइ कफन रा हनमा शितिङ दोऊ पङगोत लततिश अला दोरा आजाद लऊ पिनमा।” ओशि लऊ ज्ञपतिङ गोप यहूदी पङक यीशूउ थोरिङ दैङ लऊ।

![](https://cdn.door43.org/obs/jpg/360px/obs-en-37-11.jpg)

दत यहूदी पोऊ धरमु गोबा पङ यीशूउ रत माशोंऊ, ओदोक दोपङ प्‍लान लमा शितिङ ञमफौ कटठा वंऊ यीशु नङ लाज़र रा हलै सतमा गिनमा।

*यूहन्‍ना 11:1-46 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_37_128kbps.m4a

## 38. यीशु रा चुमु पिनि।

https://openbiblestories.org/l/scu/story-38/

![](https://cdn.door43.org/obs/jpg/360px/obs-en-38-01.jpg)

बोषङ रेखि, यहूदी मी पङ फसहऊ तिवारङ मोनइ तोइ। जि ओइअऊ बारे इत तिवारङ तोइ कि गोप होमशित परमरश्‍वरुस दोपोऊ गनमो- गतपो पङरा मिस्‍त्रु नुकुरूस छुडायऊ तोइ। मोतमेननङ हुम बोषङ ज्ञपतिङ यीशुस हेलि मीपङरा छेलि कमचित तो लोऊ अला लफमा जुराशु। यीशुस एनु चेल़ा पङरा लोऊ दो दोपङनङ ञमफो यरूशलेमु फसहऊ तिवारङ रा मोनामा गिनु तोइ, अला ओइ लि कि दो ओदा सिऊ जेइ।

![](https://cdn.door43.org/obs/jpg/360px/obs-en-38-02.jpg)

यीशुउ चेला पोऊ नंऊ इत यहूदा मिनु मी तोइ। यहूदा रूपयऊ हिसाब तइ सा तोइ, दत लि दयारो दो ओदो फातुस रूपया हनि तोइ। यीशु नङ चेला पङ यरूशलेम पुतु ज्ञपतिङ यहूदा यहूदि गोबा पोऊरा जेऊ। दोगुस रूपयऊ बसकयङ यीशु रा दोपङङा चुममा शितिङ लोऊ। दो सेसि तोइ कि यहूदीऊ गोबा पङ मासेसि कि यीशु यो मसीह तोइ। दो सेसि तोइ कि दोपङ दोरा सतमा गिनु तोइ।

![](https://cdn.door43.org/obs/jpg/360px/obs-en-38-03.jpg)

महायाजक रिङमिन दो गोऊ यहूदी गोबा पङक यीशु रा दोपोऊ गुतिङ चुमु सुमा शितिङ यहूदा रा हुमनिसा मूलू सिक्‍का खेऊ। जि ओशि यो वंऊ जेऊ हले भविष्‍य लोइ साक रिंऊ तोइ ओशि वंइ। यहूदा यऊ अला रूपया कयुफु जेऊ। दो यीशु रा चुममा शितिङ दोपोऊ पङगोत लमा शितिङ अलित दयारो शुंऊ पोसु।

![](https://cdn.door43.org/obs/jpg/360px/obs-en-38-04.jpg)

यरूशलेमु , यीशुस एनु चेला पङनङ फसहऊ तिवारङ मोनायऊ। फसहऊ थकतु जामा परिङ, यीशुस रोटि कयफु बोरङ थऊ निश लऊ पिनु। दोगुस लोऊ, “ओइ या अला जऊ पिननिश। जि अङ डियङ तो जिरा ग किमपोऊ शितिङ खैसतोक। ओइरा अङरा कोलङ लऊ लमा।“ ओशियो, यीशुस लोऊ कि दो दोपोऊ शितिङ सिऊ जेइ, दोपोऊ शितिङ दो एनु डियङ रा पुजा तिऊ पिनि।

![](https://cdn.door43.org/obs/jpg/360px/obs-en-38-05.jpg)

दत यीशुस इत गुणु रस थुतु अला लोऊ, “जिरा तुंऊ पिननिश। जि सरपा वादऊ अङ शुइ जिरा ग होसु पिनि छु लोननङ परमेश्‍वर किमपोऊ पाप लमिन दोरा माफ लइ। सोदयो ओइ तुङमा परिङ अङरा कोलङ लऊ ओइरा लमा जि जोदे ग लऊ तोक।

![](https://cdn.door43.org/obs/jpg/360px/obs-en-38-06.jpg)

दत यीशुस चेला पङरा लोऊ, ”किमपोऊ नंऊ इत मी अङरा चुममा मति।” चेला पङ बिंऊ जेऊ, अला दोरा शुउ कि ओशि लेन ऊङ लई। यीशुस लोऊ, ”अङरा चुमि मी ओदो वंइ दोरा ग ओइ रोटि खनङ लमिन दो खेरोक।” दत दोक दो रोटि यहूदा इस्‍करियोती रा खेऊ।

![](https://cdn.door43.org/obs/jpg/360px/obs-en-38-07.jpg)

दो रोटि थऊ ज्ञपतिङ, यहूदऊ नंऊ शैतान सङकु। यहूदा हनतु यीशु रा चुममा शितिङ यहूदी गोबा पोऊ पङगोत लमा शितिङ जेऊ पिनु। जि गोङकु टेम तोइ।

![](https://cdn.door43.org/obs/jpg/360px/obs-en-38-08.jpg)

थकतु जऊ ज्ञपतिङ, यीशु नङ दोऊ चेला पङ जैतून डोङखङ फौक जेऊ पिनु। यीशुस लोऊ, ”किमपङ तोरो गोङक अङरा सोठऊ पिनि। छु लोननङ पवित्रशास्‍त्रु चेमिन तोइ, ‘ ग पालस रा सति अला सिङ तेत पङ नोस- जिस वंऊ जेइ।”

![](https://cdn.door43.org/obs/jpg/360px/obs-en-38-09.jpg)

पतरसुस जवाब खेऊ, ”हले लि अलित पङ कनरा सोठासतो, ग मासोठासि। दत यीशुस पतरस रा लोऊ, “शैतान किमपोऊ सिङु इम्‍तिहान किमा गिनु तश, दत हे पतरस, गस कन शितिङ परमेश्‍वर रा लोऊ कि का दैङ मालरो। दत लि, तोरो गोङक, कुकरि बाँग खेमा होमशित का हुम फेरा मेन लोइ कि का अङरा सेसमेयो मासेसि।”

![](https://cdn.door43.org/obs/jpg/360px/obs-en-38-10.jpg)

पतरसुस दत यीशु रा लोऊ, ” दत मेननङ ग सिऊ जेतोक, ग तशपयो कनरा मासेसि मालोइ।” अलित सिङ चेला पङ लि ओशि यो लोऊ।

![](https://cdn.door43.org/obs/jpg/360px/obs-en-38-11.jpg)

दत यीशु एनु चेला पङनङ ञमफौ गतसमनी मिनु जागऊ रा जेऊ। यीशुस एनु चेला पङरा परमेश्‍वर रा कोलङ लमा शितिङ लोऊ छु लोननङ शेतान दोपऊ इम्‍तिहान माकिरो। दत यीशु एनु परमेश्‍वर रा कोलङ लमा शितिङ जेऊ पिनु।

![](https://cdn.door43.org/obs/jpg/360px/obs-en-38-12.jpg)

यीशुस हुम फेरा परमेश्‍वर रा कोलङ लऊ, ”हे अङ अपा, यानङ ओरछे ओइ दु:खङु टेमुस अङरा बचास। दत लि मी पोऊ पाप लमिन दो माफ लमा शितिङ अलित ओमप मातोननङ, दत का गिनि दो सिङ वङरो।” यीशु हत परेशान तोइ अला दोऊ दुसति शुइऊ बुंदू खौता फोरू थोरिङ दतु तोइ। दोरा सोततिङ खेमा शितिङ परमेश्‍वरुस इत स्‍वर्गदूत रा पिनु।

![](https://cdn.door43.org/obs/jpg/360px/obs-en-38-13.jpg)

दयारो परमेश्‍वर रा कोलङ लऊ ज्ञपतिङ, यीशु एनु चेला पोरा पोलठतु तु, दोपङ ञोन कयऊ तोइ। दत यीशु हुम फेरा पोलठतु तु दत यीशुस लोऊ, ”हनतु पिननिश। अङरा चुमि सा पङ तु तश।”

![](https://cdn.door43.org/obs/jpg/360px/obs-en-38-14.jpg)

ओसपरिङ यहूदी इस्‍करीयोती यहूदा गोबा,अला गोप सैनिक पङरा हथियार नङ ञमफो कयुफु तु। यहूदा यीशुऊ तुसिङ तु दोरा लोऊ, ”हे गुरु, नमस्‍ते, “अला दोरा पो खेऊ पिनु। दोगुस गिरफतार लइ सा मी रा यहूदी गोबा पङरा कनमा शितिङ ओशि लऊ तोइ। दत यीशुस लोऊ, ”हे यहूदा, का छै अङरा गोलङ तिखु चुमचुमसु तोन आ?”

![](https://cdn.door43.org/obs/jpg/360px/obs-en-38-15.jpg)

दत दो सैनिक पङ यीशु रा चुममा लऊ तोइ, दत पतरसुस एनु तलवार हनु अला महायाजकु इत नुकुरु रेपङ थोलु पिनु। यीशुस लोऊ, “ तलवार रा नोस लत। ग अङ अपऊरत अङरा बचामा शितिङ स्‍वर्गदूतु इत सैना खेसमा शितिङ लोमा लिइ। दत लि अङरा अङ अपाऊ कमचित गोमा वंइ।” दत यीशुस दो मिंऊ रेपङ रा एपो लऊ पिनु। दत सिङ चेला पङ यीशु रा सोठऊ रोऊ जेऊ।

*मती – 26:14-56; मरकुस-14: 10-50; लूका- 22: 1-53; युहन्‍ना- 12: 6; 18:1-11 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_38_128kbps.m4a

## 39. महासभऊ नंऊ  यीशूउ थोरिङ मुकदमा चलतु।

https://openbiblestories.org/l/scu/story-39/

![](https://cdn.door43.org/obs/jpg/360px/obs-en-39-01.jpg)

छङ ओइ खनङ गोङकु टैम तोइ। दो सैनिक यीशु रा महायाजकु कयुमु कयुफु तु, छु लोननङ दो यीशुउ रत छेइ शूमा गिनु तोइ। पतरस वरित दोपङ रा खेरऊ तोइ। दो सैनिक पङ यीशु रा कयुमु कयुफु जेऊ, दत पतरस दकपा टेखयतु अला पोसु मै टोशु।

![](https://cdn.door43.org/obs/jpg/360px/obs-en-39-02.jpg)

कयुमु नंऊ, यहूदी गोबा पङक मुकदमा चलऊ। दोपङ दोऊ खिलाफ कवश कमचित पङ लोमा शितिङ कवश गवा पङ कयुफु तु। दोपोऊ कमचित इतुस- अलित नङ मामिलति तोइ, ओदोक यहूदीऊ गोबा पङ साबित लमा मालिऊ कि दो दोषी तोइ। यीशुस छोयो मलऊ।

![](https://cdn.door43.org/obs/jpg/360px/obs-en-39-03.jpg)

थोनतु ज्ञपतिङ, महायाजकुस सिधा यीशु फोक खौनु लोऊ, “निङपङरा रिंङ का यो छे शिङमिन परमेश्‍वरू छङक मसीह तोन आ?”

![](https://cdn.door43.org/obs/jpg/360px/obs-en-39-04.jpg)

यीशुस लोऊ, “ग तोक, अला का अङरा परमेश्‍वर नङ ञमफौ पोसि अला स्‍वर्गुस तुइ लि तंई।” महायाजकुस एनु गस्‍कुला चेरू पिनु छु लोननङ यीशुस दो कमचित लोऊ ओदो थोरिङ हत छिङना तंऊ। दो अलित गोबा पोऊ थोरिङ हरो टऊ, “ऊलपङरा जि रिङमा शितिङ अलित गवा मागिनि कि जि मीस छे लऊ। किमफङक रङ ओ दोरा ओशि रिंइ गोऊ दो परमेश्‍वरू छङक तोक। दोऊ बारे किमपोऊ छे फैसला तो?”

![](https://cdn.door43.org/obs/jpg/360px/obs-en-39-05.jpg)

सिङ यहूदी गोबा पङक महायाजक रा जवाब खेऊ, “दो सीमा गिनमा।” दत दोपङक यीशुउ मिऊ नंऊ पट्‍टी छुतु पिनु, दोऊ थोरिङ कराती फौऊ, दोरा तोंऊ, अला दोरा ठटे लऊ।

![](https://cdn.door43.org/obs/jpg/360px/obs-en-39-06.jpg)

अला पतरस, दत दो कयुमु दकपा शुंऊ पोसु तोइ। दत दो नुकुर योबलङकुस दोरा तंऊ। दोगुस दोरा लोऊ, ”का लि यीशु नङ ञमफो तोइ या।” पतरसुस मना लऊ पिनु। ज्ञपतिङ, ऊङि अतित योबलङकुस ओइ कमचित रा लोऊ, अला पतरसुस हेलि मेन लोऊ पिनु। थोनतु ज्ञपतिङ, तचे ता मीपङक लोऊ, “निङपङ सेसि कि का यीशु नङ ञमफो तोइ छु लोननङ किनिश गलीलुस तोश।“

![](https://cdn.door43.org/obs/jpg/360px/obs-en-39-07.jpg)

दत पतरसुस लोऊ, “दत लि ग ओइ मी रा सेसि तोननङ परमेश्‍वर अङरा क्षाप खे।” ओदोसपरिङ ओ पतरस ओशि चलु ज्ञपतिङ, हसल ओ कुकरीस बाँग खेऊ। यीशु पोलठतु पतरस रा खौनु।

![](https://cdn.door43.org/obs/jpg/360px/obs-en-39-08.jpg)

पतरस ओदत जेऊ पिनु अला हिहिपु करपु। ओदोसपरिङ ओ, यीशु रा चुमि सा यहूदास तंऊ कि यहूदी गोबा पङक यीशु रा सतमा सजा़ खेऊ पिनु। यहूदा रा हत दु:खङ वंऊ अला जेऊ एनरायो सतु पिनु।

![](https://cdn.door43.org/obs/jpg/360px/obs-en-39-09.jpg)

छङ मुलुकु राजा पिलातुस तोइ। दो रोम रा शितिङ लेन लइ सा तोइ। यहूदीऊ गोबा पङ यीशु रा दोऊ रा कयुफु तु। दोपङ गिनि तोइ कि पिलातुस दोरा सतु पिनरो। दत पिलातुस गुस यीशुउ रत शुउ, “का छे यहूदी पोऊ राजा़ तोन आ?”

![](https://cdn.door43.org/obs/jpg/360px/obs-en-39-10.jpg)

यीशुस जवाब खेऊ, ”कस दिमलयो रिंऊ। दत लि अङ राज्‍य ओया मुलुकु मैन तो। दत लि तोननङ अङ नुकुर पङ अङ शितिङ तोङकतो। ग मुलुकु नंऊ परमेश्‍वरु बारे दिमलेयो रिङमा तु। हर इत मी दो दिमलेयो रा एपो तति दो अङ गोइ।” पिलातुसुस रिंऊ, “दत दिमलेओ छे?”

![](https://cdn.door43.org/obs/jpg/360px/obs-en-39-11.jpg)

यीशु नङ ञमफौ कमचित लोऊ ज्ञपतिङ, पिलातुस गुस दकपा गोप मी पोऊरा जेऊ लोऊ, ”अङरा जि मी रा सतमा शितिङ छोयो वजा तङमा मतु तो।” दत लि दो यहूदी गोबा पङ नङ राशिङ मी पङ गोप हरौ टऊ लोऊ, ”दोरा क्रूसु थोरिङ पिनमा। पिलातुसुस जवाब खेऊ, ”दोगुस छोयो हलम मालमिन।” दत लि दोपङ अला लि शेच्‍चन हरो टऊ। दत पिलातुसुस हुम फेरा दोसपरिङ लोऊ, ”दोऊ छोयो दोष मतेइ।”

![](https://cdn.door43.org/obs/jpg/360px/obs-en-39-12.jpg)

पिलातुस बेऊ जेऊ कि दो गोप मीपङ तोङकमा छसतो, ओदोक दो एनु सैनिक पङरा यीशु रा क्रूसु थोरिङ पिनमा शितिङ याऊ। रोमी सैनिक पङक यीशु रा कोडे तिऊ, अला दोरा शाही गस्‍कुला चुऊ, अला दोऊ पिशरिङ छवा खौता जुरामिन मुकुट तऊ। दत दोपङ ओशि लोऊ दोरा ठटे लऊ, “खौननिश, यहूदी पोऊ राजा।”

*मती पाठ 26:57-27:26; मरकुस-14:53-15:15; लुका- 22:54-23:25; युहन्‍ना- 18:12-19:16 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_39_128kbps.m4a

## 40. यीशु रा क्रूसु थोरिङ चडऊ पिनि।

https://openbiblestories.org/l/scu/story-40/

![](https://cdn.door43.org/obs/jpg/360px/obs-en-40-01.jpg)

यीशु रा ठटे लऊ ज्ञपतिङ, सैनिक यीशु रा क्रूसु थोरिङ पिनमा कयुफु जेऊ। दोपङक दो क्रूस रा ओशि यो थुतु दोऊ थोरिङ दो सिई।

![](https://cdn.door43.org/obs/jpg/360px/obs-en-40-02.jpg)

दो सैनिक पङ यीशु रा ओदो जागऊ कयुफु तु दो जागऊ मिन “खोपडी” तोइ अला दोऊ गुत नङ बङखौन रा क्रूसु थोरिङ परैकुस ठोकठोऊ वयऊ पिनु। दत लि यीशुस लोऊ, “हे परमेश्‍वर, जिपङरा माफ लत, छु लोननङ जिपङ मासेसि कि जि निङपङ छे लऊ तोश।” दोपङक इत रोत रा लि दोऊ पिशऊ थोरिङ योऊ पिनु। दोऊ थोरिङ चेमिन तोइ, “यहूदी पोऊ राजा।” पिलातुसुस दोपङरा ओशि चेमा शितिङ लोऊ तोइ।

![](https://cdn.door43.org/obs/jpg/360px/obs-en-40-03.jpg)

दत सैनिक पङक यीशुउ गस्‍कुलऊ शितिङ परची पिनु। ओसपरिङ दोपङक ओशि लऊ दत दोपङ भविष्‍य लमिन दो पूरा लऊ दो रिंई तोइ, “दोपङक अङ गस्‍कुला रा एमपोऊ नंऊ छुऊ पिनु, अला अङ गस्‍कुलऊ शितिङ परची पिनु।”

![](https://cdn.door43.org/obs/jpg/360px/obs-en-40-04.jpg)

ओदा निश चोरस लि तोइ, दोपङरा सैनिक पङक ओदो यो क्रूसु थोरिङ चडायऊ तोइ। दोपङक दोनिशता यीशुउ नोपा- जिपा तऊ तोइ। दोपोऊ नंऊ इत चोरसुस यीशु रा ठटे लऊ, दत अलितुस लोऊ, ” का छे माबेऊ तोना कि परमेश्‍वर कनरा सजा़ खेसतो? ऊलपङ गोप सारा हलम लैन लमऊ गुनहगार तोश, दत लि जि मीस ता छोयो मालमिन। दत दोगुस यीशु रा लोऊ, ”तशपा लि का रंऊ राज्‍यु तुननङ अङरा कोलङ तामा।” यीशुस जवाब खेऊ, ”तोरो यो का अङ नङ ञमफो स्‍वर्गु तुरोन।”

![](https://cdn.door43.org/obs/jpg/360px/obs-en-40-05.jpg)

यहूदी गोबा पङ अला बीडु अलित मी पङक यीशु रा ठटे लऊ। दोपङक दोरा लोऊ ,”दत लि का परमेश्‍वरु छङक तोननङ , दत क्रूसुस ओपङ हनत अला रङरा बचऊ पिन। दत निङपङ कन थोरिङ दैङ लई।”

![](https://cdn.door43.org/obs/jpg/360px/obs-en-40-06.jpg)

निरू टेमु सनिश बजेस हुम बजे शम सिङ देशु खबङबङ वंऊ पोसु , ओदोसपरिङ खनङ निर तोइ तोइ। मोतमेननङ हुम बजे शम सिङ मुलुकु खबङबङ ओ वंऊ पोसु।

![](https://cdn.door43.org/obs/jpg/360px/obs-en-40-07.jpg)

दत यीशुस कुतु लोऊ, ”पूरा वंऊ। हे अपा, ग रंऊ जिवा कन गुतिङ खेसतोक।” दत दोगुस एनु पिशा परूतु अला रंऊ जिवा परूतु पिनु। दत दो सिऊ दत इत सङगुल तु। दो चेइ पर्दा दो परमेश्‍वर तोमा परिङ मी पङरा खैचो लई तोइ, ओपङक थोरिङक बशु निश हिसा वंऊ जेऊ।

![](https://cdn.door43.org/obs/jpg/360px/obs-en-40-08.jpg)

एन सिऊ ज्ञपतिङ, यीशुस मीपङरा शितिङ परमेश्‍वर रा तुमा शितिङ ओमप हनु तोइ। दत यीशु रा खोनि सा इत सैनिकुस छे- छे वंऊ तोइ दो तंऊ दत दोगुस लोऊ, ”जिगुस छोयो मालमिन, जिरा पापङ। जि परमेश्‍वरू छङक हीन तश।”

![](https://cdn.door43.org/obs/jpg/360px/obs-en-40-09.jpg)

दत युसुफ नङ नीकुदेमुस मिनु निश यहूदी गोबा पङ तु। दोपङरा पोता तोइ कि यीशु ओ मसीह तोइ। दोपङक पिलातुसु रत यीशुउ लाश रा थऊ। दोपङक दोऊ डियङ रा गस्‍कुलऊ नंऊ परिनलऊ। दत दोपङ दोरा इत डोङखङुस फशु लमिन कब्रु कयुफु जेऊ अला दोननऊ दोरा तऊ। दत दोपङक दो कब्रु पितङ रा बोनत लमा शितिङ इत चेइ रा रा पोलठऊ पिनु।

*मती -27:27-61; मरकुस-15:16-47; लुका- 23:26-56; युहन्‍ना- 19:17-42 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_40_128kbps.m4a

## 41. परमेश्‍वर यीशु रा सिऊ ज्ञपतिङ हे जिंदा लऊ पिनि।

https://openbiblestories.org/l/scu/story-41/

![](https://cdn.door43.org/obs/jpg/360px/obs-en-41-01.jpg)

सैनिक पङक यीशु रा क्रूसु थोरिङ पिनु ज्ञपतिङ, यहूदी गोबा पङक पिलातुस रा लोऊ, ”दो यीशुस कवश चलु कि दो हुम दयार ज्ञपतिङ सिऊ थलत लि जिंदा वंऊ जेइ। ऊङ रलि कब्र रा खोनमा शितिङ तामा वंइ मेननङ दोऊ चेला पङ दोऊ लाश रा खुतु ता माकिइ या। दत दोपङ ओशि लननङ दोपङ रिंइ कि दो सिऊ थलत हे जिंदा वंऊ ।”

![](https://cdn.door43.org/obs/jpg/360px/obs-en-41-02.jpg)

पिलातुसुस लोऊ, ”गटो सैनिक पङरा कयुफु जेरिश,अला हले किमपङ लमा लिइ ओशि यो कब्र रा शुंऊ पोसमा।” ओदोक दोपङक कब्रु जेमा ओमपु रऊ थोरिङ इत सार तिऊ पिनु। दोपङरा ओदा ओदोक तऊ छुलोननङ दोऊ लाश रा ऊङो किमा मलीरो।

![](https://cdn.door43.org/obs/jpg/360px/obs-en-41-03.jpg)

यीशु सिऊ ज्ञपतिङकु दयार सब्‍तु दयार तोइ। ऊङ लि सब्‍त दोमया लेन मालइ तोइ, ओदोक यीशुउ ऊङलि पङगोत कब्रु रा मतु तोइ। दत सब्‍तु हइरो दोमया, नममत ठेठे, तचे ता योबलङ पङ यीशुउ कब्रु रा जेमा शितिङ जुराशु तोइ। दोपङ दोऊ लाशु थोरिङ अला लि मसाला पङ तीमा गिनु तोइ।

![](https://cdn.door43.org/obs/jpg/360px/obs-en-41-04.jpg)

दो योबलङक पङ पुतमऊ होमशित, कब्रु इत चेइ सङगुल तु। स्‍वर्गुस इत स्‍वर्गदूत तु दोक रा रा पोलठऊ पिनु, दो रास क्रबु पितङ रा खोपमिन तोइ ,अला दो दोऊ थोरिङ पोसु। दो स्‍वर्गदूत छतिऊ खौता चमकयतु तशे। कब्रु तचे लि सैनिक पङ तो दोपङक तंऊ। दोपङ ओनचे बेऊ पिनु कि सिइ मिंऊ खोता मटङु थोरिङ बरिन जेऊ।

![](https://cdn.door43.org/obs/jpg/360px/obs-en-41-05.jpg)

ओदोसपरिङ दो योबलङक पङ कब्रु पुतमा परिङ दो स्‍वर्गदूत दोपङरा लोऊ, “थाबेरिश। यीशु जा मतो। दो सिऊ ज्ञपतिङ लि हे जिंदा वंङ कयऊ, हले दोगुस रिङमिन तोइ दो हे जिंदा वंइ। कब्रु नंऊ फङरिश अला खोननिश।” दो योबलङक कब्रु नंऊ खौनु ओदा यीशुऊ लाश तामिन तोइ ओदा फंऊ अला खौनु दोऊ लाश ओदा मातशे।

![](https://cdn.door43.org/obs/jpg/360px/obs-en-41-06.jpg)

दत दो स्‍वर्गदूत दो योबलङक पङरा लोऊ, “जेऊ दोऊ चेला पङरा लोततिश, “यीशु सिऊ ज्ञपतिङ लि हे जिंदा वंऊ, अला दो किमपोऊ होमशित- होमशित गलील फोक जेइ।”

![](https://cdn.door43.org/obs/jpg/360px/obs-en-41-07.jpg)

दो योबलङ पङ बिंऊ जेऊ अला गोप गरीस सिऊ। दोपङ चेला पङरा जि खुशखबरी लोमा शितिङ करलतु जेऊ।

![](https://cdn.door43.org/obs/jpg/360px/obs-en-41-08.jpg)

दत दो योबलङ पङ चेला पङरा जि खुशखबरी लोमा शितिङ ओमपतिङ तोइ, दत यीशु ओदा अचानक तु। दोपङ दोऊ बङखौनु ओपङ बुशु जेऊ। दत यीशूस लोऊ, “थाबेरिश। जेऊ अङ चेला पङरा गलील जेमा शितिङ लोमा। दोपङ ओदा अङरा तंङरो।

*मती-27:62-28:15; मरकुस-16:1-11; लुका-24:1-12; युहन्‍ना- 20:1-18 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_41_128kbps.m4a

## 42. यीशु स्‍वर्गु फोक पोलठतु जेइ।

https://openbiblestories.org/l/scu/story-42/

![](https://cdn.door43.org/obs/jpg/360px/obs-en-42-01.jpg)

ओदो दयार परमेश्‍वरूस यीशु रा सिऊ रत शिंइ लऊ तोइ, दोऊ निश चेला पङ तुसिङ देशङु जेऊ तोइ। विनु जेऊ दोपङ यीशु नङ ञमफौ छै वंऊ ओदो बारे चलु जेऊ तोइ, दोपङ ओशि तति तोइ कि दो मसीह तोइ, दत दोरा सतु पिनु तोइ। छङ दो योबलङ पङ रिंइ तोइ कि दो है जिंदा वंङ कयऊ। दोपङ मासेसि तोइ कि हलेस कमचितु थोरिङ दैङ लमा।

![](https://cdn.door43.org/obs/jpg/360px/obs-en-42-02.jpg)

यीशु दोपोऊ रा तु दोपङ नङ ञमफौ विनु जेऊ, दत लि दोपङ दोरा माठोतु। दोक शुउ कि दोपङ ऊङु बारे कमचित चलु तोश। दोपङक दोरा इमया लोक यीशु नङ ञमफौ वङमिन दो दोरा लोऊ। दोपङ ततु कि दोपङ ऊङि पोसदैसी मी रा कमचित लोऊ तोश ततु दो मासेसि तोइ कि यरूशलेमु छे वंऊ तोइ।

![](https://cdn.door43.org/obs/jpg/360px/obs-en-42-03.jpg)

दत यीशुस दोरा सोमजायऊ कि परमेश्‍वरू रिङमिन कमचित दो मसीहु बारेऊ छे रिंइ तशे। गोप लोमशित, भविष्‍य लोइ साक ओशि रिंऊ तोइ हलम मी पङ मसीह रा हत जुकजेर खेइ अला दोरा सतु पिनि। दत भविष्‍य लोइ साक ओशि लि रिंऊ कि दो हुम दयार दोमयां हे अनति।

![](https://cdn.door43.org/obs/jpg/360px/obs-en-42-04.jpg)

दत दोपङ ओदो नगरू पुतु ओदा दो निश मी पोसमा गिनि तोइ, ओसपरिङ शम गोङसा वंऊ तोइ। दोपङक यीशु रा दोपङ नङ ञमफो पोसमा शितिङ लोऊ, दत दो दोपङ नङ ञमफौ इत कयुमु जेऊ। एमपोऊ गोङकु थकतु जामा शितिङ दोपङ पोसु पिनु। यीशु इत रोटि कयुफु दोऊ शितिङ परमेश्‍वर रा पेरतु, अला दत दोरा खनङ लऊ। अचानक ओ, दोपङ सेसु कि दो यीशु ओ तश, दत ओदोसपरिङ ओ, दो दोपोऊ तुसिङक शो जेऊ।

![](https://cdn.door43.org/obs/jpg/360px/obs-en-42-05.jpg)

दो निश मीस इतुस अलित ता लोऊ, “दो यीशु ओ तशे। ओदोक ओदोसपरिङ दोगुस ऊलपङरा परमेश्‍वरूस वचन रा सोमजासु दत ऊलपङ हत गरीस तोइ।” हसल ओ, दोपङ ओदत हनतु हे पोलठतु यरूशलेम फोक जेऊ। दत दोपङ ओदा पुतु ज्ञपतिङ दोपङक चेला पङरा लोऊ, “यीशु जिंदा तश। निङपङक दोरा तंऊ।”

![](https://cdn.door43.org/obs/jpg/360px/obs-en-42-06.jpg)

ओदोसपरिङ चेला पङ कमचित लोऊ तोइ, यीशु अचानक ओ दो पनठङु दोपङ नङ ञमफो तु। दोगुस लोऊ, “किमपङरा सुखङ पोरततो।” चेला पङ ततु कि दो ऊङि शुना तशे, दत यीशुस लोऊ, “किमपङ छु बेऊ तोश? किमपङ ओशि छे मासुनचतु कि जि दिमलेओ यो ग, यीशु तोक? अङ गुत नङ बङखौन रा खौननिश। शैतान पोऊरा ओशि डियङ मातुइ हलेया अङरा तो।” ओइ कनमा शितिङ कि दो छोयो शैतान मैन तशे, दोक जामा शितिङ छेइ थऊ। दोपङक दोरा मछसु इत खनङ टुकडा खेऊ, अला दोगुस दो जऊ पिनु।

![](https://cdn.door43.org/obs/jpg/360px/obs-en-42-07.jpg)

यीशुस लोऊ, “अङ बारे परमेश्‍वरू वचनु छे लि कमचित रिङरो दो वंइ यो वंइ। गस किमपङरा होमशित ओ रिङ कयऊ कि जि वङमा गिनमा।” दत यीशुस दोपङरा परमेश्‍वरू वचन एपो से सोमजायऊ। दोगुस लोऊ, “गोप होमशित भविष्‍य लोइ साक चेमिन तोइ कि ग, मसीह रा गोप दु:खङ कयुफमा वंइ, सिमा वंई अला दत हुम दयार दोमया सिऊ ज्ञपतिङ हे शिङमा वंई।”

![](https://cdn.door43.org/obs/jpg/360px/obs-en-42-08.jpg)

“दो भविष्‍यलोइ साक ओशि लि चेमिन तोइ कि अङ चेला पङ परमेश्‍वरुस रिङमिन दो अटङकरा लोइ। दोपङ सिङ रा यो पछतायतमा शितिङ लोइ। दत दोपङ ओशि लननङ परमेश्‍वर दोपोऊ पाप लमिन दोरा माफ लई। अला चेला पङ ओइ फरिनतन लोमा शितिङ यरूशलेमु रत जेई। दत दोपङ सिङ जागऊ सिङ जातु नंऊ जेइ, छे लि गस रिंऊ अला लऊ अला छे लि अङ नङ ञमफो वंऊ किमपङ ओइ सिङ कमचितु ग्‍वाह तोश।”

![](https://cdn.door43.org/obs/jpg/360px/obs-en-42-09.jpg)

अलित पनिसा दयार शम, यीशु एनु चेला पङरा गोप फेरा तङमा तु। इ फेरा ता दो इतो बेलऊ ङाज्ञा से लि खूचि मी पङक दोरा तंऊ। दोगुस एनु चेला पङरा गोप फेरा साबित लऊ कि दो जिंदा तोक, अला दोगुस दोपङरा परमेश्‍वरू राज्‍यु बारे लि लफु।

![](https://cdn.door43.org/obs/jpg/360px/obs-en-42-10.jpg)

यीशुस एनु चेला पङरा लोऊ, “परमेश्‍वरुस अङरा स्‍वर्ग नङ मुलुकु सिङ मी पोऊ थोरिङ राज लमा शितिङ रिऊं तोइ। ओदोक छङ ग किमपङरा रिङरोक, जेऊ सिङ जात पङरा चेला जुरारिश। ओशि लमा शितिङ, किमपङरा दोपङरा अपा, छङ अला संखमा जिवा मिनुस संखमा तिऊ चङकमा खैमा वंई। छे लि गस किमपङरा लमा रिंऊ ओदो सिङ कमचित रा लमा यामा लि अला किमपङरा दोपङरा सिखयामा लि वंई। कोलङ तामा, ग अमबोरो किमपङ नङ ञमफो तोक।”

![](https://cdn.door43.org/obs/jpg/360px/obs-en-42-11.jpg)

यीशु सिऊ ज्ञपतिङ लि हे अनतु पनिसा दयारू ज्ञपतिङ, दोगुस एनु चेला पङरा लोऊ, “तशपा शम अङ अपा किमपङरा सोततिङ माखेसतो दत शम यरूशलेमु ओ पोसु ताश। दो किमपोऊ थोरिङ संखमा जिवा पिनु ज्ञपतिङ ओशि लइ।” दत यीशु स्‍वर्गु जेऊ पिनु, अला जू गुस दोरा दोपङ मातङमा शितिङ ञंऊ पिनु। स्‍वर्गु यीशु सिङ छला पोऊ थोरिङ राज़ लमा शितिङ परमेश्वरु ज़खङ फौक पोसु पिनु।

*मती-28:16-20; मरकुस-16:12-20; लूका-24:13-53; यूहन्‍ना-20:19-23; खास चेला पोऊ लेन-1:1-11 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_42_128kbps.m4a

## 43. कलीसिया जुमा तिखु।

https://openbiblestories.org/l/scu/story-43/

![](https://cdn.door43.org/obs/jpg/360px/obs-en-43-01.jpg)

यीशु स्‍वर्गु पोलठतु जेऊ ज्ञपतिङ, चेला पङ यरूशलेम पोसु हले यीशुस दोपङरा लमा शितिङ लोमिन तोइ। ओदतुत विश्‍वासी मी पङ दयारो ञमफो परमेश्‍वर रा कोलङ लमा शितिङ कटठा वंई तोइ।

![](https://cdn.door43.org/obs/jpg/360px/obs-en-43-02.jpg)

हर साल, फसहु तिवारङु सङा दयार ज्ञपतिङ, यहूदी मी पङ पिन्‍तेकुस्‍त मिनु इत तिवारङ मोनइ तोइ। पिन्‍तेकुस्‍त ओदो टेम तोइ ओदोसपरिङ यहूदी मी पङ ब्रू रा थोलु तिवारङ मोनइ तोइ। सिङ मुलुकुस यहूदी मी पङ पिन्‍तेकुस्‍त तिवारङ मोनामा शितिङ यरूशलेमु तु तोइ। ओइ बोषङ, पिन्‍तेकुस्‍त मोनामा टेम यीशु स्‍वर्गु जेऊ मोतमेनङ इत हफता ज्ञपतिङ तु तोइ।

![](https://cdn.door43.org/obs/jpg/360px/obs-en-43-03.jpg)

ओदो टेमु सिङ मोनइ मी पङ ञमफो कटठा तोइ, हलेस कयुमु दोपङ तोइ ओदोसपरिङ ओ दो शेच्‍चन लानु कतुस बूंऊ जेऊ। दत मेंऊ लबु खौता तङमा तुइ खौता छैता सिङ विश्‍वासी पोऊ पिशरिङ थोरिङ तङमा तु। दो पङ सिङ संखमा जिवास बुंऊ जेऊ अला अलित कतुस परमेश्वर रा कोलङ लऊ। जि दो कतपङ तोइ दोरा लोमा शितिङ दोपङरा संखमा जिवास लोऊ तोइ।

![](https://cdn.door43.org/obs/jpg/360px/obs-en-43-04.jpg)

यरूशलेमु पोसि मीपङक दो कत गोऊ, दत दोपङ सिङ कटठा वंऊ जि खौनमा शितिङ ञमफौ वंऊ तु कि छै वंऊ वङरो। दोपङक मोनई पङरा परमेश्‍वरूस लमिन चेइ-चेइ लेन लइ पङ लोइ गोऊ। दोपङ बिंऊ जेऊ छु लोननङ दोपङ दो लेन पङरा रंऊ ओ कतु नंऊ गोऊ तोइ।

![](https://cdn.door43.org/obs/jpg/360px/obs-en-43-05.jpg)

दोपोऊ नंऊ तचे ता मी पङक लोऊ कि चेला पङ नशऊ नंऊ तशे। दत पतरस डेन वंऊ अला दोपङरा लोऊ, “अङ कमचित गोरिश। जि मी पङ नशऊ नंऊ मेन तश। ओदो बसकयङ, छे किमपङ तंऊ तोश दो ओदो तो छे योएल भविष्‍य लोइ साक रिंऊ तोइ ओशि वङरो: परमेश्‍वर लोऊ, “कयामा दयारोऊ, ग अङ जिवा पिननोक।”

![](https://cdn.door43.org/obs/jpg/360px/obs-en-43-06.jpg)

“ हे इस्‍त्राएली फोबलङ पङ, यीशु इत ओशि मी तोइ दोगुस जि कनमा शितिङ दो ऊङ तश गोप एपो लेन पङ लऊ। दोगुस परमेश्‍वरू सोततिङुस गोप एपो लेन पङ लऊ तोइ। किमपङ जि सेसि तोश, छु लोननङ किमपङक जि लेन पङरा तंऊ तोइ। दत लि किमपङक दोरा क्रूसु थोरिङ चडऊ पिनु।”

![](https://cdn.door43.org/obs/jpg/360px/obs-en-43-07.jpg)

“ यीशु सिऊ जेऊ दत लि परमेश्‍वरूस दोरा सिऊ थलत लि शिंइ लऊ पिनु। दो कमचित रा पूरा लऊ दोरा इत भविष्‍य लोइ साक चेमिन तोइ; ‘का रंऊ एपो मी रा क्रबु रूलमा माखेइ।’ निङपङ गवा तोश कि परमेश्वर यीशु रा हेलि जिंदा लऊ पिनु।”

![](https://cdn.door43.org/obs/jpg/360px/obs-en-43-08.jpg)

“परमेश्वरु छङ यीशु रा एनु जखङ फौक तऊ दोरा एपो लऊ। अला यीशुस निङपोऊ शितिङ संखमा जिवा पिनु हलै दोगुस वादा लमिन तोइ दो पिनि। संखमा जिवा गुस ओ दो लेन पङरा वङमा मतु दोपङरा किमपङ खोनु तोश अला गोऊ तोश।”

![](https://cdn.door43.org/obs/jpg/360px/obs-en-43-09.jpg)

“किमपङक दो मी, यीशु रा क्रूसु थोरिङ चडऊ सतु पिनु। दत लि किमपङ जि सेसमा कि परमेश्‍वर यीशु रा सिङ छला पोऊ थोरिङ परमेश्‍वर नङ अला मसीह निशतयो तामिन तश।”

![](https://cdn.door43.org/obs/jpg/360px/obs-en-43-10.jpg)

पतरस रा गोइ मी पङ दोऊ रिङमिन कमचित पङ गोऊ नंऊ शम करिंऊ जेऊ तोइ। ओदोक दोपङक पतरस नङ चेला पङरा शुऊ, “हे बियम पङ, ऊलपङरा छै लमा गिनमा?”

![](https://cdn.door43.org/obs/jpg/360px/obs-en-43-11.jpg)

पतरसुस दोपङरा जवाब खेऊ, “किमपोऊ नंऊ सिङ रंऊ पाप लमिन दोक पछतावा लमा छु लोननङ परमेश्वर किमपोऊ पाप लमिन दोरा माफ लरो, अला यीशु, मसीहु मिनुस संखमा तिऊ डुबयततो। दत दो किमपङरा बोरङु खौता संखमा जिवा लि खेसतो।”

![](https://cdn.door43.org/obs/jpg/360px/obs-en-43-12.jpg)

पतरसुस छे लि रिंऊ दोगु नंऊ मोतमेननङ हुम हजार मीस दैङ लऊ अला दोपङ यीशुउ चेला वंऊ जेऊ। दोपङ संखमा तिऊ डुबयतु अला यरूशलेमु कलीसियऊ फौक वंऊ जेऊ।

![](https://cdn.door43.org/obs/jpg/360px/obs-en-43-13.jpg)

दत मी पङक दोपङरा लफु दत मोनई मी पङ दयारो गोऊ। दोपङ दयारो छुशि तोइ अला ञमफौ थकतु जई तोइ, अला दोपङ दयारो इतु- अलित रा शितिङ परमेश्‍वर रा कोलङ लई तोइ। दोपङक मिलतु परमेश्वर रा पेरतु अला छे लि दोपोऊ रा तोइ दोपङक इतुस- अलित रा खेऊ। नगरु सिङ मी दोपङ रा एपो तति तोइ। दयारो, गोप सेलि गोप मी मोनइ सा वंऊ जेऊ।

*खास चेला पोऊ लेन 2 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_43_128kbps.m4a

## 44. पतरस नङ यूहन्‍ना इत खोरस भिखारी रा एपो लऊ पिनि।

https://openbiblestories.org/l/scu/story-44/

![](https://cdn.door43.org/obs/jpg/360px/obs-en-44-01.jpg)

इ दयार, पतरस नङ यूहनना थानङु जेऊ तोइ। इत खौरस मी बीख थामा शितिङ पितङु रा पोसमिन तोइ।

![](https://cdn.door43.org/obs/jpg/360px/obs-en-44-02.jpg)

पतरसुस दो खोरस मी फोक खौनु अला लोऊ, “अङरा कनरा खेसमा शितिङ रूपया ता मतो। दत लि अङरा छे तो ओदो ग कनरा खेसतोक। यीशुउ मिन हनु, अनत अला दोङ- दत।”

![](https://cdn.door43.org/obs/jpg/360px/obs-en-44-03.jpg)

ओदोसपरिङ ओ, परमेश्‍वरुस दो खौरस मी रा एपो लऊ पिनु। दोक नोपा- जिपा विनमा अला गवामा, अला परमेश्‍वर रा पेरतु। थानङु खौलगङु पोसि मी पङ बिंऊ जेऊ।

![](https://cdn.door43.org/obs/jpg/360px/obs-en-44-04.jpg)

हसल ओ गोप मी पङ दो मी रा खौनमा शितिङ तु दो मी एपो वंङमिन तोइ। पतरसुस दोपङरा लोऊ, “जि मी एपो तो, दत ओइ कमचित गोऊ बिंऊ माजेमा। निङपङक जिरा रंऊ सोततिङुस एपो मालऊ, ओदोक मैन निङपङ परमेश्वर रा मोनइ। दो यीशु यो तो दोगुस जि मी रा एनु सोततिङुस एपो लऊ, छु लोननङ निङपङ यीशुउ थोरिङ विश्‍वास लई तोश।”

![](https://cdn.door43.org/obs/jpg/360px/obs-en-44-05.jpg)

“दो किमपङ ओ तोश किमपङक दो रोमी राज्‍यपाल रा यीशु रा सतमा शितिङ लोऊ तोइ। किमपङक दोरा सतु पिनु दो सिङरयो जोलोम खैइ सा तोइ। दत लि परमेश्‍वर दोरा सिऊ लि जिंदा लऊ पिनु। किमपङ मासोमजतु कि किमपङ छै लऊ तोश, दत लि ओदोसपरिङ किमपङ दो लेन लऊ तोरेश, दत दो भविष्‍य लोइ सा पङक रिङमिन दो दिमलेओ वंऊ। दोपङक रिंऊ तोइ कि मसीह हत दु:खङ तंई अला सिऊ जेइ। परमेश्‍वर जीरा ओशि यो वङमा मतु। ओदोक छङ, पछतायततिश अला परमेश्‍वर फौक वङरिश, दत दो किमपोऊ पाप लमिन दो ऊरू जमा लरो।”

![](https://cdn.door43.org/obs/jpg/360px/obs-en-44-06.jpg)

दत थानङु गोबा पङक पतरस नङ यूहन्‍नऊ कत गोऊ, दत दोपङ बेऊ पिनु। ओदोक दोपङक दोपङरा चुमु जेलु संऊ पिनु। दत छे लि पतरसुस रिंऊ तोइ दोऊ थोरिङ गोप मीपङक विश्‍वास लऊ। यीशुऊ थोरिङ दैङ लई पोऊ गिनती बोजतु मोतमेनङ ङा हजार वंऊ जेऊ।

![](https://cdn.door43.org/obs/jpg/360px/obs-en-44-07.jpg)

अलित दयार, दो यहूदिऊ गोबा पङ पतरस नङ यूहन्‍ना रा महायाजक नङ अलित पुजारी गोबा पोऊ तुसिङ कयुफु तु। दोपङ दो मी रा लि कयुफु तु दो खोरस तोइ। दोपङक पतरस नङ यूहन्‍ना रा शुऊ, “ऊङु रत शुऊ किनिशुस दो खोरस मी रा एपो लऊ?”

![](https://cdn.door43.org/obs/jpg/360px/obs-en-44-08.jpg)

पतरसुस जवाब खेऊ, “ओइ मी जि किमपोऊ तुसिङ डेन तो दोरा यीशु मसीहस एपो लऊ। किमपङक यीशु रा क्रूसु थोरिङ चडऊ पिनु तोइ, दत लि परमेश्‍वरूस दोरा हेलि जिंदा लऊ पिनु। किमपङक दोरा मडामा लऊ, दत छङ यीशुउ सोततिङ ओ मेननङ छङ छुटकारा पोरतमा शितिङ अलित ओमप मतेइ।”

![](https://cdn.door43.org/obs/jpg/360px/obs-en-44-09.jpg)

दो गोबा पङ बिंऊ जेऊ कि पतरस नङ यूहन्‍नास माबेऊ कमचित लोऊ। दोपङ तंऊ कि जि ओशि यो फौबलङ तोइ दो अनपढ तोइ। दत लि दोपङरा कोलङ जेऊ कि जि फौबलङ पङ यीशु नङ ञमफो पोसमिन तोइ। ओदोक दोपङक दोपङरा लोऊ, “निङपङ किमपङरा गोप सजा खैसि दत लि किमपङ ओइ मी यीशुउ बारे मी पङरा छै लि फरिनतन लोननङ।” ओशि गोप कमचित लोऊ ज्ञपतिङ, दोपङक पतरस नङ यूहन्‍ना रा जेमा मतु।

*खास चेला पोऊ लेन -3:1-4:22 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_44_128kbps.m4a

## 45. सितफनुस नङ फिलिप्‍पुस।

https://openbiblestories.org/l/scu/story-45/

![](https://cdn.door43.org/obs/jpg/360px/obs-en-45-01.jpg)

होमशित मसीही गोबा पोऊ किल्‍लिङ सितफनुस मिनु इत फोबलङक तोइ। सिङ मी पङ दोरा एपो लई तोइ। संखमा जिवास दोरा गोप सोततिङ नङ अला हुशार लऊ पिनु तोइ। सितफनुसुस गोप चमत्‍कार लऊ तोइ। ओसपरिङ दोगुस यीशुउ थोरिङ दैङ लमा शितिङ दोपङरा लफु दत गोप मी पङक दोऊ थोरिङ दैङ लऊ।

![](https://cdn.door43.org/obs/jpg/360px/obs-en-45-02.jpg)

इ दयार, सितफनुस यीशुऊ बारे मी पङरा लोऊ तोइ, अला गटो ओशि यहूदी पङ तु दोपङक यीशुऊ थोरिङ दैङ मालऊ अला दोनङ ञमफौ थांशमा तिखु। दोपङ हत छिङना तंऊ, ओदोक दोपङ पुजारी गोबा पोऊरा जेऊ अला दौऊ बारे कवश लोऊ। दोपङक लोऊ ,”निङपङक सितफनुस रा मूसा नङ परमेश्वरु बारे हलम कमचित लोइ गोऊ।“ ओदोक पुजारी गोबा पङक सितफनुस रा चुमु पिनु अला दोरा महायाजक नङ यहूदी पोऊ गोबा पोऊ तुसिङ कयुफु तु। अला लि कवश गवा पङ तु अला दोपङक सितफनुसु बारे कवश लोऊ।

![](https://cdn.door43.org/obs/jpg/360px/obs-en-45-03.jpg)

महायाजकुस सितफनुस रा शुउ, ”छे जि मी पङ कन बारै दिमलेओ रिंऊ तशा?” सितफनुसुस महायाजक रा जवाब खैमा शितिङ गोप कमचित पङ लोमा तिखु। दोगुस लोऊ कि अब्राहमु टेमु थलतो यीशूउ टेम शम परमेश्‍वरुस इस्‍त्राएलु मी पोऊ शितिङ गोप लेन लमिन तोइ। दत लि मी पङक अमबोरो परमेश्‍वरुस रिङमिन दो मागोऊ। सितफनुसुस लोऊ, ”किमपङ परमेश्‍वरु खिलाफ जिदद लऊ अला बगावत लइ पङ तोश। किमपङक अमबोरो संकमा जिवा रा मागिनु, हले ऊलपोऊ गनमो-गतपो पङक ओमबोरो संखमा जिवा रा मागिनि लोऊ अला दयारो दोऊ भविष्‍य लोऊ सा पङरा सतु पिनु तोइ। दत दोपङक छे लि लऊ दोऊ बसकयङ किमपङक अला लि हलम लऊ । किमपङक मसीह रा सतु पिनु।

![](https://cdn.door43.org/obs/jpg/360px/obs-en-45-04.jpg)

दत दो दोरोमु गोबा पङक जि गोऊ, दत दोपङ ओनचे छिङना तंऊ कि दोपङक एनु रेपङ रा बोनत लऊ पिनु अला गोप शेच्‍चन हरो टऊ। दोपङ सितफनुस रा डपु देशङुस दकपा कयुफु जेऊ अला दोरा सतमा शितिङ दोरा रागुस तोंऊ।

![](https://cdn.door43.org/obs/jpg/360px/obs-en-45-05.jpg)

ओसपरिङ सितफनुस सिऊ तोइ, दो हरो टऊ, ”हे यीशु, अङ जिवा रा कयुफु जो।” दत दो एनु पुशपङ चुऊ बरिन जेऊ अला हेलि हरो टऊ,“ हे प्रभु, जि पाप दोपोऊ थोरिङ मापिनमा।“ दत दो सिऊ जेऊ।

![](https://cdn.door43.org/obs/jpg/360px/obs-en-45-06.jpg)

ओदो दयार, यरूशलेमु पोसि गोप मी पङक यीशुउ चेला पङरा ङनचेन लमा तिखु, ओदोक विश्‍वासी पङ अलित जागऊ रोऊ जेऊ। ओदो बसकयङ लि, अमा लि दोपङ जेऊ दोपङक यीशुउ बारे मी पङरा लौऊ।

![](https://cdn.door43.org/obs/jpg/360px/obs-en-45-07.jpg)

फिलिप्‍पुस मिनु यीशुउ इत विश्‍वासी तोइ। हले या अलित गोप विश्‍वासी पङक ओशि लऊ तोइ दो लि यरूशलेमुस रोऊ जेऊ। दो सामरिया जागा फौक जेऊ। ओदा दोगुस मी पङरा यीशुउ बारे लोऊ। गोप मीपङक दोऊ थोरिङ दैङ लऊ अला मुक्‍ति पोरतु। इ दयार, फिलिप्‍पुसु रा परमेश्‍वरु तरफुस इत स्‍वर्गु मी तु अला दोरा जंगलु जेमा शितिङ, इत ओमपु विनमा शितिङ लोऊ। फिलिप्‍पुस ओदा जेऊ पिनु। दत दो ओमपु विनु जेऊ तोइ, दत दोक इ मी रा एनु बेशोखु थोरिङ जेइ तंऊ। जि मी कूश देशु इत ओफसोर तोइ। संखमा जिवा गुस फिलिप्‍पुस रा लोऊ कि दो मी नङ ञमफौ- ञमफौ विनमा।

![](https://cdn.door43.org/obs/jpg/360px/obs-en-45-08.jpg)

ओदोक फिलिप्‍पुस बैशोखु तुसिंङ जेऊ। दोक गोऊ कि दो कूशी परमेश्‍वरु वचन रा लफु तश। छे यशायाह भविष्‍य सेसि साक चेमिन तोइ दो दोरा लफु तोइ। दो लफु तोइ, ” दो दोरा शुपमा तेतु खौता कयुफु जेऊ, अला हले इत करात तमना पोसि, दोगुस लि छोयो माचलु। दोपङक दोनङ ञमफौ हत हलम लऊ अला दोरा मडामा लऊ। दोपङक दोरा सतु पिनु।”

![](https://cdn.door43.org/obs/jpg/360px/obs-en-45-09.jpg)

फिलिप्‍पुसुस दो कूशी रा शुउ, ”ओइ का लफु तोन छे का दोरा सोमजतु लि तोना?“ दो कूशी ओफसरुस जवाब खेऊ, ”मेन। तशपा शम ऊङि अङरा समजासतो, दत शम ग जीरा मासोमजति। ओरछै अङरा तु पोस अला अङरा सोमजास । यशायाह जि एनु बारे चेऊ आ कि ऊङि अलितु बारे?”

![](https://cdn.door43.org/obs/jpg/360px/obs-en-45-10.jpg)

फिलिप्‍पुस बैशोखु थोरिङ शोखु। दत दोगुस दो कूशी औफसर रा ओदो वचन सोमजऊ दो यशायाह गुस यीशूउ बारे चेमिन तोइ। फिलिप्‍पुस गुस परमेश्‍वरु वचनु गोप अलित हिसा पोऊ लि चर्चा लऊ। ओशि यो, दोगुस दो मी रा यीशुउ बारे एपो फरिनतन लोऊ।

![](https://cdn.door43.org/obs/jpg/360px/obs-en-45-11.jpg)

फिलिप्‍पुस नङ दो कूशी विनु तिऊ तुसिङ पुतु। दो कूशीस ओफसरुस लोऊ, ”खौन। ओया ती तश। छै ग संखमा तिऊ डुबकी तिऊ आ?” अला दोगुस बैशोख चलई सा रा टेखयामा शितिङ लोऊ।

![](https://cdn.door43.org/obs/jpg/360px/obs-en-45-12.jpg)

दत दोपङ तिऊ नंऊ जेऊ पिनु, अला फिलिप्‍पुस गुस दो कूशी रा संखमा तिऊ डुबयतमा खेऊ।दत दोपङ तिऊ दकपा हनतु, दत संखमा जिवा अचानक ओ फिलिप्‍पुस रा थुऊ अलित जागऊ कयुफु जेऊ। ओदा फिलिप्‍पुस गुस मी पङरा यीशूउ बारे लोऊ पोसु।

![](https://cdn.door43.org/obs/jpg/360px/obs-en-45-13.jpg)

दो कूशी एनु कयुमु जेमा शितिङ होमशित जेऊ पोसु। दो हत गरीस तोइ कि दो छङ यीशु रा सेसि तोइ।

*खास चेला पोऊ लेन-6:8-8:5;8:26-40 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_45_128kbps.m4a

## 46. पौलुस मसीहऊ विश्‍वासी वंऊ जेइ।

https://openbiblestories.org/l/scu/story-46/

![](https://cdn.door43.org/obs/jpg/360px/obs-en-46-01.jpg)

शाऊल मिनु इत मी तोइ दोगुस यीशुउ थोरिङ दैङ मालऊ तोइ। ओसपरिङ दो शरा तोइ, दत दोगुस सितफनुस रा सति मी पोऊ गस्‍कुला पङरा शुंऊ तोइ। ज्ञपतिङ, दोगुस विश्‍वासी पङरा हत ङनचेन लऊ तोइ। दोगुस यरूशलेमु कयुमु- कयुमु जेऊ फौबलङक नङ योबलङक रा चुमु जैलु पिनु तोइ। ओसपरिङ महायाजकुस शाऊल रा दमिश्‍क नगरु जैमा शितिङ लोऊ। दोगुस ओदतु मसीही पङरा चुमु सुमा अला दोपङरा पोलठऊ यरूशलेम कयुफु तुमा शितिङ शाऊल रा लोऊ।

![](https://cdn.door43.org/obs/jpg/360px/obs-en-46-02.jpg)

ओदोक शाऊल दमिश्‍क जेमा शितिङ जुराशु। दो नगरु पुतमऊ मोच्‍चे होमशित, दोऊ नोपा-जिपा अला नमुत इत छति लाइट चमकयतु, अला दो मटङु थोरिङ दतु तु। शाऊलुस ऊङिरा लोइ गोऊ, “हे शाऊल। हे शाऊल। का अङरा छु ङनचेन ललसु तोन?” शाऊलुस शुउ, “हे प्रभु, का ऊङ तोन?” यीशुस दोरा जवाब खेऊ, “ग यीशु तोक। का अङरा ङनचेन ललसु तोन।”

![](https://cdn.door43.org/obs/jpg/360px/obs-en-46-03.jpg)

ओसपरिङ शाऊल अनतु दत दो तंङमा मालिइ तोइ। दोऊ पङगोत पङक दोरा दमिश्‍क कयुफु जेऊ। शाऊलुस हुम दयार शम छोयो माजऊ अला मातुंऊ तोइ।

![](https://cdn.door43.org/obs/jpg/360px/obs-en-46-04.jpg)

दमिश्‍कु हनन्‍याह मिनु यीशूउ इत चेला तोइ। परमेश्वरूस दोरा लोऊ, “ओदो कयुंमु फौक जो ओदा शाऊल पोसमिन तोइ। रंऊ गुत रा दोऊ थौरिङ तऊ दत दो हेलि खौनमा लीरो।” दत हनन्‍याहस लोऊ, “हे प्रभु, गस गोऊ कि जि मीस विश्‍वासी पङरा हले ङनचेन लऊ।” परमेश्वर दोरा जवाब खेऊ, जो। गस दोरा यहूदिऊ नंऊ अला अलित जातु मी पोऊ नंऊ अङ मिनु कत टामा शितिङ चुनऊ तोइ। दो अङ मिनु शितिङ हत कोषटङ तंइ।”

![](https://cdn.door43.org/obs/jpg/360px/obs-en-46-05.jpg)

हनन्‍याह शाऊलु तुसिङ जेऊ, एनु गुत रा दोऊ थोरिङ तऊ, अला लोऊ, “गुस, छै ओया तुमा शितिङ कन ओमपु कनरा तङमा तु तोइ आ, अङरा कनरा पिनपिनसु छु लोननङ का हेलि तङमा लीरोन, अला संखमा जिवा कनरा पुंऊ पिनसतो।” हसल ओ शाऊल हेलि तङमा लिऊ, अला हनन्‍याहस दोरा संखमा तिऊ डुबयतमा खेऊ। दत शाऊलुस थकतु जऊ अला हेलि शेच्‍चन वंऊ जेऊ।

![](https://cdn.door43.org/obs/jpg/360px/obs-en-46-06.jpg)

ओदत थलत, शाऊलुस दमिशकु पोसि पोऊ यहूदि पोऊरा लोमा तिखु। दोगुस लोऊ, “यीशु ओ परमेश्वरू छङ तश।” यहूदी मी पङ बिंऊ जेऊ, छु लोननङ शाऊलुस ता मोनई पङरा सतमा शितिङ जुराशु तोइ, छङ दोगुस यीशुऊ थोरिङ दैङ लऊ तोइ। शाऊलुस यहूदी पङरा तोङकमा लऊ। दोगुस कनु कि यीशु ओ मसीह तो।

![](https://cdn.door43.org/obs/jpg/360px/obs-en-46-07.jpg)

गोप दयार ज्ञपतिङ, यहूदी पङक शाऊल रा सतमा शितिङ प्‍लान जुरऊ। दोपङक दोरा सतमा शितिङ नगरु पितङुरा मी पङरा पिनु। दो छे लऊ तश खौनमा लोऊ दत शाऊलुस दो प्‍लानु बारे गोऊ पिनु, अला दोऊ पङगोत पङ दत हनतु जेमा शितिङ दोऊ ओमेत लऊ। इ गोङक दोपङक दोरा पिलतु तऊ कयुमु बितिङुस ओपङ हनु पिनु। दमिश्‍कुस बचतु हनतु ज्ञपतिङ शाऊलुस यीशुउ बारे मीपङरा लोऊ ओ पोसु।

![](https://cdn.door43.org/obs/jpg/360px/obs-en-46-08.jpg)

शाऊल मीपङरा छुशमा शितिङ यरूशलेम जेऊ, दोपङ दोऊरत बेइ तोइ। दत बरनबास मिनु इत विश्‍वासीक शाऊल रा मी पोऊरा कयुफु जेऊ। दोगुस दोपङरा लोऊ कि शाऊलुस हलै माबेऊ दमिश्‍कु मीपङरा लोऊ तोइ। दोऊ ज्ञपतिङ, मी पङक शाऊल रा लि मोनऊ।

![](https://cdn.door43.org/obs/jpg/360px/obs-en-46-09.jpg)

तचे ता विश्‍वासी दोपङ यरूशलेमु ङनचेन लमऊ रत रोऊ जेऊ तोइ दोपङ वरि अंताकिया नगरु जेऊ पिनु अला यीशुउ बारे मीपङरा लोऊ। अंताकियऊ पोसि मी पङ खुचि यहूदी मातोइ तोइ, दत लि होमशित फेरा, दोपोऊ नंऊ गोप मी पङ विश्‍वासी वंऊ जेऊ। बरनबास नङ शाऊल ओइ सरपा विश्‍वासी पङरा यीशूउ बारे अला खुचि सिखयामा शितिङ ओदा जेऊ अला कलीसिया पङरा शेच्‍चन लऊ पिनु। यीशुउ थोरिङ विश्‍वास लई पङ होमशित फेरऊ अंताकियऊ ओ “मसीही” वंऊ जेऊ।

![](https://cdn.door43.org/obs/jpg/360px/obs-en-46-10.jpg)

इ दयार, अंताकियऊ मसीही मी पङ वर्त नङ ञमफो परमेश्‍वर रा कोलङ लऊ तोइ। संखमा जिवास दोपङरा लोऊ, “अङ शितिङ बरनबास नङ शाऊल रा दो लेन लमा शितिङ खेचो लऊ पिनमा दोरा लोमा शितिङ गस दोपङरा कुतु तोइ। “ओदोक अंताकियऊ कलीसिया गुस बरनबास नङ शाऊल रा शितिङ परमेश्‍वर रा कोलङ लऊ अला दोपोऊ थोरिङ रंऊ गुत रा तऊ। दत दोपङक दोपङरा अलित गोप जागा – जागऊ यीशुऊ बारे एपो फरिनतन पिनमा शितिङ पिनु। बरनबास नङ शाऊल गुस खैचो- खैचो जातु मी पङरा लफु, अला गोप मी पङक यीशुउ थोरिङ दैङ लऊ।

*खास चेला पोऊ मिन-8:3;9:1-31;11:19-26;13:1-3 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_46_128kbps.m4a

## 47. फिलिप्‍पिऊ नगरू पौलुस नङ सीलास।

https://openbiblestories.org/l/scu/story-47/

![](https://cdn.door43.org/obs/jpg/360px/obs-en-47-01.jpg)

ओसपरिङ शाऊलुस सिङ रोमी राज्‍यु गुमयतु दत दोगुस एनु रोमी मिन “पौलुस” रा गिनमा तिखु। इ दयार, पौलुस नङ दोऊ पङगोत सीलास फिलिप्‍पी नगरु यीशुउ बारे एपो फरिनतन लोमा शितिङ जेऊ। दोपङ देशङु दकपा समुंद्ररङु थोचलङ इ जागऊ रा जेऊ ओदा मी पङ परमेश्‍वर रा कोलङ लमा शितिङ कटठा तोइ। ओदा दोपङ लुदिया मिनु इत योबलङक रा छुशु दो इत व्‍यापारी तोइ। दो परमेश्‍वर रा बेन्नङ लइ तोइ अला अराधना लइ तोइ।

![](https://cdn.door43.org/obs/jpg/360px/obs-en-47-02.jpg)

परमेश्‍वरुस लुदिया रा यीशुउ बारे फरिनतनु थोरिङ दैङ लमा शितिङ लोऊ। पौलुस नङ सीलासुस दोरा नङ दोऊ पेरङ पङरा संखमा तिऊ डुबयतमा खेऊ। दोगुस पौलुस नङ सीलास रा एनु कयुमु पोसमा शितिङ कुतु तोइ, ओदोक दोपङ ओदा पोसु पिनु।

![](https://cdn.door43.org/obs/jpg/360px/obs-en-47-03.jpg)

पौलुस नङ सीलास मी पोऊरत अमबोरो ओदो जागऊ छुशि तोइ ओदा यहूदिऊ मी पङ परमेश्‍वर रा कोलङ लई तोइ। दयारो ओसपरिङ दोपङ ओदा जेइ तोइ दत इत नुकुर योबलङक दो हलम जिवास छुश्‍मिन तोइ दोपोऊ ज्ञपतिङ तुइ तोइ। ओइ हलम जिवा गुस ओ दो मी पोऊ भविष्‍य लोइ तोइ, ओदोक दो भविष्‍य रिंइ सेऊ रूअङु एनु गोबा पङरा शितिङ रूपया कमयई तोइ।

![](https://cdn.door43.org/obs/jpg/360px/obs-en-47-04.jpg)

दोपङ जेमा परिङ जि नुकुर योबलङक पङ हरो टइ तोइ, “जि योबलङक थोनतु चेइ परमेश्‍वरु सेवक तोइ। जि किमपङरा मुक्‍ति पोरतमा शितिङ ओमप कनकनसु तश।” दो दयारो ओशि लई तोइ कि ओदोगुस पौलुस खरोसु जेऊ।

![](https://cdn.door43.org/obs/jpg/360px/obs-en-47-05.jpg)

गोप ज्ञपतिङ, इ दयार दत दो नुकुर योबलङकुस हरो टऊ, दत पौलुस गुस दोऊ फौक ठुरतु दोऊ नंऊ हलम जिवा रा लोऊ, “यीशुउ मिनुस जिऊ रत हनतु जो।” ओदोसपरिङ ओ ओदो हलम जिवास दोरा सोठऊ पिनु।

![](https://cdn.door43.org/obs/jpg/360px/obs-en-47-06.jpg)

ओदो नुकुर योबलङकु गोबा हत छिङना तंऊ। दोपङरा पता लगयतु कि दो हलम जिवा मतोननङ दो नुकुर योबलङक मी पङरा भविष्‍य लोमा मलिइ तोइ। ओइऊ मतलब वंऊ कि मी पङ छङ दोऊ गोबा पङरा रूपया माखेइ, दोपङरा भविष्‍य लोइ कि दोपङ नङ ञमफौ छै वंइ।

![](https://cdn.door43.org/obs/jpg/360px/obs-en-47-07.jpg)

ओदोक दो नुकुर योबलङकु स्‍वामी पौलुस नङ सीलास रा रोमी ओफसर पोऊरा कयुफु जेऊ। दोपङक पौलुस नङ सीलास रा तोंऊ,अला हे दोपङरा जेलु पिनु।

![](https://cdn.door43.org/obs/jpg/360px/obs-en-47-08.jpg)

दोपङक पौलुस नङ सीलास रा जेलु ओशि जागऊ रा तऊ ओदा थोनतु खुचि सिपाही तोइ। या बसकयङ दोपङक दोपोऊ बङखौन रा सिङ चेइ टुकडास जोडऊ पिनु। दत लि, पौलुस नङ सीलास खनङ गोङकु बेलऊ, परमेश्‍वर रा कोलङ लऊ बजन लोउ तोइ।

![](https://cdn.door43.org/obs/jpg/360px/obs-en-47-09.jpg)

लेम, इत बैमा थङक सङगुल तु। जेलु सिङ पितङ पङ खुलतु तु, अला सिङ कैदी पोऊ शङलङ खूलतु दतु जेऊ।

![](https://cdn.door43.org/obs/jpg/360px/obs-en-47-10.jpg)

दत दरोगा अनतु। दोगुस तंऊ कि जेलु सिङ पितङ खुलतु तशे। दोगुस सुनचतु कि सिङ कैदी बचतु रोऊ जेऊ तोइ। दो बेऊ तोइ कि दोपोऊ रोमऊ लमिन रौमी ओफसर दोरा सतु पिनपिनसि, ओदोक दो एन रा यो सतमा शितिङ छसु तोइ। दत पौलुस दोरा तंऊ हरो टऊ, “रूकयत। रङरा नुकसान थलत। निङपङ सिङ ओया तोश।”

![](https://cdn.door43.org/obs/jpg/360px/obs-en-47-11.jpg)

दो दरोगास करिंऊ पौलुस नङ सीलासु रा तुसिङ तु शुउ, “मुक्‍ति पोरतमा शितिङ ग छे लत?” पौलुसुस जवाब खेऊ, “प्रभु यीशुउ थोरिङ दैङ लत, दत का नङ कन पेरङ पङरा मुक्‍ति पोरततो।” दत दो दरोगा पौलुस नङ सीलास रा एनु कयुमु कयुफु जेऊ अला दोपोऊ जुकजेर पङरा ऊरू। पौलुसुस दोपोऊ कयुमु सिङ मी पङरा यीशूउ बारै एपो फरिनतन लोऊ।

![](https://cdn.door43.org/obs/jpg/360px/obs-en-47-12.jpg)

दरोगा नङ दोऊ सिङ पेरङ पङ यीशुउ थोरिङ दैङ लऊ, ओदोक पौलुस नङ सीलासुस दोपङरा संखमा तिऊ डुबयतमा खेऊ। दत दरोगास पौलुस नङ सीलास रा थकतु खेऊ, अला दोपङ ञमफो गरीस सिऊ।

![](https://cdn.door43.org/obs/jpg/360px/obs-en-47-13.jpg)

अलित दयार नगरु गोबा पङक पौलुस नङ सीलास रा जेलुस छुडायऊ पिनु अला फिलिप्‍पी गुस जेमा शितिङ लोऊ। पौलुस नङ सीलास लुदिया नङ अला तचे ता अलित पङगोत पङ नङ छुशु अला दोऊ ज्ञपतिङ नगरुस हनतु जेऊ। यीशुउ बारे एपो फरिनतन फैलतु जेऊ, अला कलीसिया खुचि वंऊ जेऊ।

![](https://cdn.door43.org/obs/jpg/360px/obs-en-47-14.jpg)

पौलुस नङ अलित मसीही गोबा पङक गोप नगरु जेऊ। दोपङक मी पङरा यीशूउ बारे एपो फरिनतन लोऊ। दोपङक कलीसिया पोऊ विश्‍वासी पङरा खुश लमा शितिङ अला लफमा शितिङ गोप चिठी लि चेऊ। ओइ पोऊ नंऊ तचे ता चिठी बाइबलु किताब वंऊ जेऊ।

*खास चेले पोऊ लेन-16:11-40 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_47_128kbps.m4a

## 48. यीशु ओ सोच्‍चा मसीह तो।

https://openbiblestories.org/l/scu/story-48/

![](https://cdn.door43.org/obs/jpg/360px/obs-en-48-01.jpg)

ओसपरिङ परमेश्‍वरु मुलुक रा जुरामा परिङ सिङ-सङ एपो तशे। छोयो पाप मातोइ तोइ। आदम नङ हव्‍वा इतुस -अलित रा हत बेन्‍नङ लई तोइ, अला दोपङ परमेश्‍वर नङ बेन्‍नङ लइ तोइ। छोयो शोत अला सीमा मातोइ तोइ। परमेश्‍वर ओशि यो मुलुक रा गिनि तोइ।

![](https://cdn.door43.org/obs/jpg/360px/obs-en-48-02.jpg)

शेतान गुस सबस वंऊ बुगीचऊ नंऊ हव्‍वा नङ कमचित लोऊ, छु लोननङ दो दोरा दोखा खेमा गिनु तोइ। दत हव्‍वा नङ आदम गुस परमेश्‍वरु खिलाफ पाप लऊ। छु लोननङ दोपङक पाप लमिन तोइ ओदोक मुलुकु पोसि सिङ मी पङ सिऊ जेइ।

![](https://cdn.door43.org/obs/jpg/360px/obs-en-48-03.jpg)

छु लोननङ आदम नङ हव्‍वा गुस पाप लमिन तोइ, ओदोक अला लि हलम वंऊ । दोपङ परमेश्‍वरु दु:श्‍मोन वंऊ जेऊ। दोऊ ज्ञपतिङ, ओदत थलत सिङ मीस पाप लमिन तो। सिङ-सङ मी जोरमयतु थलत ओ परमेश्‍वरु दु:श्‍मोन तो। परमेश्‍वर नङ मी पोऊ किललिङ सवङना मतोइ तोइ। दत लि परमेश्‍वर मुलुकु सवङना लमा गिनु तोइ।

![](https://cdn.door43.org/obs/jpg/360px/obs-en-48-04.jpg)

परमेश्‍वरुस वादा लऊ कि हव्‍वऊ इत चिगजा शैतानु पिशा रा टेमरो। दोगुस ओशि लि लोऊ कि शैतान दोऊ ठोङोल रा डसई। अलित कतु, शेतानु मसीह रा सतु पिनि, दत लि परमेश्‍वरु दोरा हेलि जिंदा लऊ पिनि। दोऊ ज्ञपतिङ, मसीह शैतानु सौततिङ रा अमबोरो रा शितिङ खोतोम लऊ पिनि। गोप बोषङ ज्ञपतिङ, परमेश्‍वरुस लोऊ कि दो मसीह यीशु तो।

![](https://cdn.door43.org/obs/jpg/360px/obs-en-48-05.jpg)

परमेश्‍वरु दो होलडो गुस एनु पेरङ रा बचऊ दोरा दो सुइसा तोइ। नूह रा इत नाव जुरामा शितिङ लोऊ कि दो ओशि यो परमेश्‍वरुस दो मीपङरा बचऊ दो दोऊ थोरिङ दैङ लई तोइ। ओशि यो, दोपङ सिङ-सङ परमेश्‍वर रा सतमा लमा शितिङ ओ तोइ छु लोननङ दोपङक पाप लमिन तोइ। दत लि परमेश्‍वरुस दोपङ सिङ रा बचामा शितिङ यीशु रा पिनु दोपङ दोऊ थोरिङ दैङ लई तोइ।

![](https://cdn.door43.org/obs/jpg/360px/obs-en-48-06.jpg)

सैकडों बोषङ शम, याजक पङ परमेश्‍वर रा शितिङ पुजा तिइ तोइ। जि तङमा तुइ कि मी पङक पाप लऊ, अला ओशि लि दोपङ परमेश्‍वरुस दोपङरा सजा़ खेमा एपो वङरो। दत लि दो पुजा तीमा दो दोपोऊ पाप रा माफ मलिइ तोइ। यीशु थोनतु चेइ महायाजक तोइ। दोगुस ओशि लऊ कि ऊङो याजक लमा मालिइ तोइ। दोगुस दो इपोटोक पुजा तीमा शितिङ एनरा यो खेऊ पिनु दो सिङु पाप रा शिमा यई तोइ। दो मोनतु कि परमेश्‍वरुस दोपोऊ सिङु पापु शितिङ दोरा सजा़ खेऊ। ओदोक ओ, यीशु एपो महायाजक तोइ।

![](https://cdn.door43.org/obs/jpg/360px/obs-en-48-07.jpg)

परमेश्‍वरुस अब्राहम रा लोऊ, ”ग कन लमिन मुलुकु सिङ मी पङरा बोरङ खेरोक।” यीशु ओइ ओ अब्राहमु छङ तोइ। परमेश्‍वरुस अब्राहमु लमिन सिङ मी पङरा बोरङ खैइ, छु लोननङ ऊङ लि यीशुउ थोरिङ दैङ लरो परमेश्‍वरुस दो सिङ रा यो पापुस बचारो। दत जि मी पङ यीशुउ थोरिङ दैङ लननङ, दत परमेश्‍वरुस दोपङरा अब्राहमु वंश तति।

![](https://cdn.door43.org/obs/jpg/360px/obs-en-48-08.jpg)

परमेश्‍वर अब्राहम रा लोऊ कि दो एनु इपोटोक छङ, दोऊ शितिङ दोरा पुजा तिऊ पिन। दत हेलि परमेश्‍वर इसहाकु बोदलऊ पुजा तीमा शितिङ इत करात खेऊ। ऊलपङ सिङ रंऊ पापु शितिङ सतमा यो लायक तोश। दत लि परमेश्‍वर ऊलपोऊ जागऊ सीमा शितिङ यीशु रा पुजा तिऊ पिनु। ओदोक ओ ऊलपङ यीशु रा परमेश्‍वरु करात लोइ तोश।

![](https://cdn.door43.org/obs/jpg/360px/obs-en-48-09.jpg)

दत परमेश्‍वर मिस्रु थोरिङ लास्‍ट ओलडो पिनु दत दोगुस सिङ इस्‍त्राएलिऊ पेरङ पङरा लोऊ कि दो इत करात रा पुजा तीमा। दो करातु छोयो दोष मातोइ गिनमा। दत रंऊ पितङु खोलगङु थोरिङ दोपङरा दोऊ शुइ रा तीमा तोइ। ओसपरिङ परमेश्‍वर दो शुइ रा तंऊ दत दो दोपोऊ कयुमुत होमशित जेऊ अला दोपोऊ चेइ छङ रा मासतु। ओसपरिङ जि वंऊ दत परमेश्‍वर ओइरा फसहऊ तिवारङ लोऊ।

![](https://cdn.door43.org/obs/jpg/360px/obs-en-48-10.jpg)

यीशु फसहऊ तिवारङु इत करातु खोता तोइ। दोगुस तशपयो पाप मालमिन तोइ, ओदोक दोगु नंऊ छोयो वामङ मातेइ। दो फसहऊ तिवारङु टेमु सिऊ तोइ। तशपयो उङ लि यीशूउ थोरिङ दैङ लननङ, दत यीशुउ शुइ दो मिंऊ पाप लमिनु कीमत चुकयारो। जि ओशि हले परमेश्‍वर दो मिऊ तुसिङक होमशित जेऊ पिनु, छु लोननङ दो दोरा सजा़ माखेइ तोइ।

![](https://cdn.door43.org/obs/jpg/360px/obs-en-48-11.jpg)

परमेश्‍वरुस इस्‍त्राएली मी पङ नङ इत वादा लऊ, छु लोननङ दोपङ ओशि मी तोइ दोपङरा परमेश्‍वरुस एनु वङमा शितिङ चुनायऊ तोइ। दत छङ परमेश्‍वरुस इत ओशि वादा छुतु दो सिङु शितिङ तोइ। दत ऊङु लि जातु मी ओइ सरपा वादा रा गिनरो, दत दो परमेश्‍वरु मी पोऊ फोक वंइ। दो ओशि ओदोक लई छु लोननङ दो यीशुउ थोरिङ दैङ लइ तोइ।

![](https://cdn.door43.org/obs/jpg/360px/obs-en-48-12.jpg)

मूसा इत ओशि भविष्‍य लोइ सा तोइ दोगुस परमेश्‍वरु वचन रा गोप सोततिङ नङ ञमफौ मी पङरा लोऊ तोइ। दत लि यीशु सिङ भविष्‍य लोइ सा पोऊ नंऊ थोनतु चेइ तोइ। दो परमेश्‍वर तश, ओदोक छे लि दोगुस लऊ अला रिंऊ दो परमेश्‍वरु लेन नङ वचन तशे। ओदोक संखमा- शास्‍त्र यीशु रा परमेश्‍वरु वचन लोइ तोइ।

![](https://cdn.door43.org/obs/jpg/360px/obs-en-48-13.jpg)

परमेश्‍वरुस राजा दाऊद रा वादा लऊ तोइ कि राजऊ खोता दोऊ चिगजा परमेश्‍वरु मी पोऊ थोरिङ सोदयो राज़ लइ। यीशु परमेश्‍वरु छङक अला मसीह तो, ओदोक दो राजा दाऊदु चिगजा यो तोइ दो सोदयो राज़ लमा लिइ।

![](https://cdn.door43.org/obs/jpg/360px/obs-en-48-14.jpg)

दाऊद ता इस्‍त्राएलु राजा तोइ, दत लि यीशु ता सिङो मुलुकु राजा तश। दो हेलि तुइ अला सोदयो इंसाफ नङ संवङनास एनु मी पोऊ थोरिङ राज़ लइ।

*उत्पत्ति-1-3,6,14,22; निर्गमन- 12,20;2 शमूएल-7  इब्रानियों -3:1-6,4:14-5:10,7:1-8:13,9:11-10:18; गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_48_128kbps.m4a

## 49. परमेश्वरू सरपा वादा।

https://openbiblestories.org/l/scu/story-49/

![](https://cdn.door43.org/obs/jpg/360px/obs-en-49-01.jpg)

इत स्‍वर्गु मीस इत चिओस योबलङक मरियम रा लोऊ कि दो परमेश्वरू छङक रा जोरमयइ। दो अला कुवांरी तोइ, दत संखमा जिवा दोऊ तुसिङ तु दो खोकु चिगजा नङ वंऊ। दोगुस इत छङ जोरमयऊ दोऊ मिन दोगुस यीशु तऊ। ओदोक, यीशु परमेश्वर नङ मी निशो तोइ।

![](https://cdn.door43.org/obs/jpg/360px/obs-en-49-02.jpg)

यीशुस गोप चमतकार लऊ दो तङमा तुइ कि यीशु ओ परमेश्वर तो। दो तिऊ थोरिङ विनु अला होलडो रा डेममा मतु। दोगुस गोप शोति मी पङरा एपो लऊ अला गोप मी पोरत हलम जिवा पङरा हनु पिनु। दोगुस सिइ मी रलि जिंदा लऊ, अला दोगुस ङा रोटि अला निश मछस रा ङा हजार मी पङरा खोक बुङ थकतु खेऊ।

![](https://cdn.door43.org/obs/jpg/360px/obs-en-49-03.jpg)

यीशु इत एपो मास्‍टर लि तोइ। छे लि दोगुस दोपङरा सिखायऊ, दो दोगुस एनु पूरा मोनङुस सिखायऊ। छे लि दो मी पङरा लमा शितिङ लोइ तोइ दो दोपङरा लमा गिनमा छु लोननङ दो परमेश्वरू छङक तो। इत कमचित, दोगुस सिखायऊ कि किमपङरा मी पङरा ओदोऊ खोता यो बेन्‍नङ लमा गिनमा हले किमपङ रङ रा गोरङ लइ तश।

![](https://cdn.door43.org/obs/jpg/360px/obs-en-49-04.jpg)

दोगुस ओशि लि सिखायऊ कि किमपङरा सिङ छला बसकयङ खुचि अला रंऊ जङ- मूल बसकयङ लि खुचि परमेश्वर रा बेन्नङ लमा गिनमा।

![](https://cdn.door43.org/obs/jpg/360px/obs-en-49-05.jpg)

यीशुस लोऊ कि मुलुकु हले लि छला गिनमा बसकयङ एपो तश परमेश्वरू राज्‍यु तोमा। दोऊ राज्‍यु नंऊ जेमा शितिङ जुरुरी कि परमेश्वर किमपङरा किमपोऊ लमिन पापुस बचारो।

![](https://cdn.door43.org/obs/jpg/360px/obs-en-49-06.jpg)

यीशुस लोऊ कि तचे ता मी पङ दोरा मोनई। परमेश्वर दो मी पङरा बचारो। दत अलित मी पङ दोरा मामोनइ। दोगुस ओशि लि लोऊ कि तचे ता मी पङ एपो मटङु खौता तश, छु लोननङ दोपङ यीशुउ बारे एपो कमचित रा गोइ तोइ,अला परमेश्वर दोपङरा बचइ। दत तचे ता मी ओमपु करंई रऊ खौता तश। परमेश्वरू वचन पुजतु खोता ओमपु दति, दत लि ओदा छोयो माचोइ। जि मी पङ यीशुउ बारे फरिनतन रा मागोइ खुङक वंऊ जेऊ। दोपङ दोऊ राज्‍यु जैमा शितिङ मना लऊ पिनि।

![](https://cdn.door43.org/obs/jpg/360px/obs-en-49-07.jpg)

यीशुस सिखायऊ कि परमेश्वर पापी पङरा हत बेन्‍नङ लई तश। दो दोपङरा माफ लमा गिनु तश अला दोपङरा एनु चिगजा जुरामा गिनु तश।

![](https://cdn.door43.org/obs/jpg/360px/obs-en-49-08.jpg)

यीशुस ओशि लि लोऊ कि परमेश्वर पाप रा माडई तो। छु लोननङ आदम नङ हव्‍वास पाप लऊ, ओदोक दोपोऊ चिगजा पङक लि पाप लऊ। ओइ मुलुकु पोसि सिङ मी पाप लइ अला परमेश्वरू रत वरि तश। सिङ मी पङ परमेश्वरू दु:शमोन तश।

![](https://cdn.door43.org/obs/jpg/360px/obs-en-49-09.jpg)

दत परमेश्वरूस ओइ मुलुकु पोसि सिङ मी पङरा ओशि एपो लऊ, दोगुस एनु इपोटोक छङक रा खेऊ पिनु दत परमेश्वर दोपङरा सजा माखेरो उङ लि दोऊ थोरिङ दैङ लऊ तश। ओदो बसकयङ, दोपङ दो नङ ञमफो अमबोरो यो पोसतो।

![](https://cdn.door43.org/obs/jpg/360px/obs-en-49-10.jpg)

किमपङ सिइ सा तश, छु लोननङ किमपङक पाप लमिन तश। परमेश्वर किमपोऊ थोरिङ, खरोसमा एपो यो तश, दोऊ ज्ञपतिङ, दो यीशुउ थोरिङ छिङना तंऊ। दोगुस यीशु रा क्रूसु थोरिङ सीमा शितिङ सजा खेऊ।

![](https://cdn.door43.org/obs/jpg/360px/obs-en-49-11.jpg)

यीशुस तशपयो पाप मालमिन तोइ, दत लि दोगुस परमेश्वर रा एनरा सजा खेमा मतु। दो सीमा गोमु। ओदोक ओ, किमपोऊ पाप रा अला ओइ मुलुकु पोसि सिङ मी पोऊ पाप रा थुतु किमा शितिङ दो इत मरि पुजा तशे। यीशुस एनरा परमेश्वर रा शितिङ पुजा तिऊ पिनु, ओदोक परमेश्वर ऊङ लि पापी रा, या बसकयङ बेमा थङक पाप रा लि माफ लइ तश।

![](https://cdn.door43.org/obs/jpg/360px/obs-en-49-12.jpg)

दत लि किमपङ गोप एपो लेन पङ लननङ, दत दोऊ लमिन परमेश्वर किमपङरा माबचासि। दोऊ पङगोत वङमा शितिङ ओशि छोयो मातेइ दो किमपङ लमा लीरो। ओदो बसकयङ, किमपङरा दैङ तामा कि यीशु परमेश्वरू छङक तो, अला किमपोऊ कला क्रूसु थोरिङ सिऊ जेऊ, अला ओइ लि कि परमेश्वर दोरा हेलि जिंदा लऊ पिनु। दत किमपङ ओइऊ थोरिङ दैङ लननङ, दत परमेश्वर किमपोऊ पाप लमिन दो माफि खेसतो।

![](https://cdn.door43.org/obs/jpg/360px/obs-en-49-13.jpg)

परमेश्वर दो सिङ मी रा बचारो दो यीशुउ थोरिङ दैङ तारो अला दोरा एनु प्रभु तततो। दत दो दोपङरा माबचइ दो दोऊ थोरिङ दैङ मालइ। जि छोयो माखौनि कि किमपङ छुकपो तोश या मेतपो तोश, योबलङक तोश कि फौबलङक तोश, गतपो तोश कि शरा तोश, या किमपङ अमा पोसि तोश। परमेश्वर किमपङ रा बेन्‍नङ लइ तश अला ओशि गिनि कि किमपङ यीशुउ थोरिङ दैङ लरो कि दो किमपोऊ पङगोत वङमा लीरो।

![](https://cdn.door43.org/obs/jpg/360px/obs-en-49-14.jpg)

यीशु किमपङरा कुकुशु तो कि किमपङ दोऊ थोरिङ दैङ लरो अला संखमा तिऊ डुबयतमा। छे किमपङ दैङ लइ तोश आ कि परमेश्वरू इपोटोक छङक, यीशु ओ मसीह तो। छे किमपङ दैङ लइ तोशा कि किमपङ पापी तोश अला ओइ लि कि किमपङरा परमेश्वर सजा खेमा गिनमा? छे किमपङ दैङ लई तोशा कि किमपोऊ पाप रा शिमा शितिङ यीशु क्रूसु थोरिङ सिऊ?

![](https://cdn.door43.org/obs/jpg/360px/obs-en-49-15.jpg)

दत किमपङ यीशूउ थोरिङ अला छे दोगुस किमपोऊ शितिङ लमिन तश दोऊ थोरिङ दैङ लननङ, दत किमपङ इत मसीही तोश। शैतान एनु खबङबङु राज्‍यु छङ किमपोऊ थोरिङ हुकुम माचलारो। छङ परमेश्वर एनु छतिऊ राज्‍यु किमपोऊ थोरिङ हुकुम चलारो। दोगुस किमपङरा पाप टेखयऊ ततासु, दोरा किमपङ लइ तोरेश। दोगुस किमपङरा इत सरपा, एपो जोलोम खेसु तश।

![](https://cdn.door43.org/obs/jpg/360px/obs-en-49-16.jpg)

दत किमपङ इत मसीही तोननङ छे यीशुस लऊ दोऊ लमिन परमेश्वर किमपोऊ पाप लमिन दो माफ लमिन तश। छङ, परमेश्वर इत दु:शमोन बसकयङ किमपङरा इत एपो पङगोत तति तश।

![](https://cdn.door43.org/obs/jpg/360px/obs-en-49-17.jpg)

यीशुउ का परमेश्वरू पङगोत तोन अला प्रभु यीशुउ नुकुर तोननङ किमपङ ओदो कमचित पङरा गोमा गिनमा छेलि यीशु किमपङरा सिखयासतो। दत लि किमपङ मसीह तोश, शैतान अला लि पाप लमा शितिङ किमपोऊ इम्‍तिहान किरो। दत लि परमेश्वर अमबोरो दो लइ तश दो छे रिंइ ओदो लइ। दो रिंइ कि किमपङ एनु पाप लमिन दो मोनतमा, दत दो किमपङरा माफ लऊ पिनि। दो किमपङरा पापु खिलाफ तोंङकमा शितिङ सोततिङ खेसतो।

![](https://cdn.door43.org/obs/jpg/360px/obs-en-49-18.jpg)

परमेश्वर किमपङरा दोरा मोनमा अला दोऊ वचन रा लफमा शितिङ रिंऊ तो। दो किमपङरा अलित विश्‍वासी पङ नङ ञमफौ पोसु दोरा अराधना लमा शितिङ लि रिंऊ तश। किमपङरा अलित मीपङरा लि लोमा वंइ कि दोगुस किमपोऊ शितिङ छे लऊ । दत किमपङ ओइ सिङ लेन पङ लननङ, दत दो किमपोऊ इत पका पङगोत वंऊ जेइ।

*रोमियों- 3:21-26,5:1-11, यूहन्ना-3:16; मरकुस-16:16; कुलुस्सियों 1:13-14;2 कुरिन्थियों 5:17-21;1, यूहन्ना-1:5-10 गुस इत बाइनलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_49_128kbps.m4a

## 50. यीशु हेलि पोलठतु तु।

https://openbiblestories.org/l/scu/story-50/

![](https://cdn.door43.org/obs/jpg/360px/obs-en-50-01.jpg)

मोच्‍चेमेननङ निशहजार बोषङुस, मुलुकु सिङ जागऊ नंऊ गोप- गोप मी मसीह यीशुउ बारे एपो कमचित पङ गोऊ तोइ। कलीसिया तरक्‍की लऊ तश। यीशुस वादा लऊ तोइ कि दो मुलुकु अंत वङमा परिङ पोलठति। दत लि दो अला लि पोलठतु मतु तश, दत लि दो एनु वादा रा पूरा लरो।

![](https://cdn.door43.org/obs/jpg/360px/obs-en-50-02.jpg)

ओदिसपरिङ ऊलपङ यीशु पोलठतु तुरो रिंऊ शुंऊ पोसि, परमेश्वर ऊलपोऊ नंऊ ओशि रिवाजुस जिंदगी जियामा खुसि लऊ तश ओदो संखमा तश अला दोरा आदर खेरो। ओसपरिङ यीशु मुलुकु पौसमा परिङ दोगुस लोऊ, “अङ चेला पङ मुलुकु सिङ जागऊ मी पङरा परमेश्वरू राज्‍यु बारे एपो कमचित पङरा लोरो, अला दत मुलुकु अंत वङरो।”

![](https://cdn.door43.org/obs/jpg/360px/obs-en-50-03.jpg)

गोप मीपङक अला लि यीशुउ बारे मागोऊ तोइ। स्‍वर्गु पोलठतु जेमऊ होमशित, यीशुस मसीही पङरा दो मी पङरा एपो कमचित लोमा शितिङ लोऊ दोपङक ओइ तशपयो मगोऊ तोइ। दोगुस लोऊ, “जेरिश अला सिङ जातु मीपङरा चेला लततिश।” अला “खोमा शितिङ रिऊ नंऊ फोलङ शोमिन तश।”

![](https://cdn.door43.org/obs/jpg/360px/obs-en-50-04.jpg)

यीशु ओशि लि लोऊ, “ऊङि मिऊ नुकुर एनु मालिक बसकयङ चेइ मतुइ। ओइ मुलुकु सिङ मीस अङरा मडामा लऊ, अला अङ लमिन दोपङ किमपङरा लि ङनचेन लइ अला सतु पिनरो। ओइ मुलुकु किमपङ शोति लि, दत लि शेच्‍चन वङमा, छु लोननङ गस शैतान रा हरायऊ पिनु, ओदो ओइ मुलुकु नंऊ हुकुम चलई तोइ। दत किमपङ कयामा शम अङ थोरिङ दैङ तामा, दत परमेश्वर किमपङरा बचासतो।”

![](https://cdn.door43.org/obs/jpg/360px/obs-en-50-05.jpg)

यीशुस एनु चेला पङरा ओइ सोमजामा शितिङ इत कोथा सुनायऊ कि ओसपरिङ मुलुकु अंत वङरो दत मी पङनङ ञमफौ छै वङरो। दोगुस लोऊ, “ऊङि मीस एनु रिऊ नंऊ एपो पुजत पुतु। ओसपरिङ दो ञोनु तोइ दत दोऊ दु:शमोन तु अला ब्रुऊ पुजत पोऊ किललिङ जंगलु सोलतु पुजत पङरा पुतु पिनु, अला दत दो जेऊ पिनु।”

![](https://cdn.door43.org/obs/jpg/360px/obs-en-50-06.jpg)

“ओसपरिङ सोलत वङमा परिङ नुकुर पङक दो मीरा लोऊ, “हे मालिक, कस ता रंऊ रिंऊ नंऊ एपो पुजत पुतु तोइ। दत ओइनंऊ जंगलु सोलत छु तश? ‘दो मीस जवाब खेऊ, “लेम अङ दु:शमोन ओ ओशि लमा लिइ। जि अङ ऊङि दु:शमोन ओ वङरो दोगुस ओशि यो लमिन तश।”

![](https://cdn.door43.org/obs/jpg/360px/obs-en-50-07.jpg)

“दो नुकुर पङक एनु मालिक रा जवाब खेऊ, “छे ऊलपङरा बोनऊ सोलत पङरा फुलु पिनमा गिनमेया? ‘दो मालिकुस लोऊ, मेन। दत किमपङ ओशि लननङ किमपङ गटो ब्रू रा लि फुलु पिनि। खोनि शम शुङरिश। दत बोनङु सोलत पङरा इ जागऊ कटठा लऊ पिननिश दत किमपङ दोरा रोतमा लीरोश। दत ब्रू रा अङ ढैरिऊ रा क्युफु तुमा”

![](https://cdn.door43.org/obs/jpg/360px/obs-en-50-08.jpg)

चेला पङ ओइ कोथऊ मोतलब मासमजतु, ओदोक दोपङक यीशु रा दोपङरा सोमजामा शितिङ लोऊ। यीशुस लोऊ, “एपो पुजत पुति सा मी मसीह रा कनु तश। री मुलुक रा कनु तश। एपो पुजत परमेश्वरु मी पङरा कनु तश।”

![](https://cdn.door43.org/obs/jpg/360px/obs-en-50-09.jpg)

“जंगलु सोलत दो हलम मी, शैतानु मी पङरा कनु तश। दो मिऊ दु:श्‍मोन शैतान रा कनु तश। दोगुस बोनङु सोलत पङरा पुतु पिनु तोइ। खौमा ओइ मुलुक कयामा परिङ दो कनु तश। अला खोइ पङ परमेश्वरू स्‍वर्गदूत पङरा कनु तश।”

![](https://cdn.door43.org/obs/jpg/360px/obs-en-50-10.jpg)

“ओसपरिङ मुलुक कयऊ जेइ दत स्‍वर्गदूत मी दो सिङ मी पङरा ञमफौ कटठा लइ दोपङ शैतान तोश। दो स्‍वर्गदूत मी दोपङरा इत गोप कोसरा मेंऊ नंऊ पयऊ पिनि। ओदा दो मीपङ हत करपि अला एमपोऊ सवा करिसि। दत ओदो मी धोरोमु तश, दोपङक यीशू रा मोनऊ, दोपोऊ परमेश्वर अपऊ राज्‍यु निंऊ खोता चमकयति।”

![](https://cdn.door43.org/obs/jpg/360px/obs-en-50-11.jpg)

यीशुस ओशि लि लोऊ कि दो मुलुक कयामंऊ होमशित मुलुकु पोलठतु तुइ। दो ओशि यो पोलठतु तुई हले दो जेऊ तोइ। दत, दोऊ रा एनु ओसली डियङ वङरो, अला दो नमु नंऊ जुऊ थोरिङ शोखु तुइ। ओसपरिङ यीशु पोलठति, दत सिङ- सङ मसीह दोपङ सी कयऊ तश सिऊ लि जिंदा वंइ अला दोरा नमु नंऊ छुशि।

![](https://cdn.door43.org/obs/jpg/360px/obs-en-50-12.jpg)

दत दो मसीही अला लि जिंदा तोइ दोपङ नमु नंऊ यपु जेइ अला दो अलित मसीहि पङ नङ ञमफौ वंऊ जेइ दोपङ सिऊ थलत लि जिंदा वंऊ जेइ। दोपङ सिङ ओदा यीशु नङ ञमफौ वङरो। दोऊ ज्ञपतिङ, एनु मी पङ नङ ञमफौ पोसि। ओसपरिङ दोपङ इत वंऊ ञमफौ पोसनङ दत दोपोऊ रा सोदयो संवङना वङरो।

![](https://cdn.door43.org/obs/jpg/360px/obs-en-50-13.jpg)

यीशुस दोऊ थोरिङ दैङ लमा शितिङ सिङ मी पङरा इत मुकुट खैसतोक लोऊ वादा लऊ। दोपङ सोदयो परमेश्‍वर नङ ञमफौ सिङ छलऊ थोरिङ राज लरो। दोपोऊ रा गोप संवङना वङरो।

![](https://cdn.door43.org/obs/jpg/360px/obs-en-50-14.jpg)

दत परमेश्‍वर दो सिङ मी पोऊ इंसाफ लरो दोपङ यीशुउ थोरिङ दैङ मालइ तश। दो दोपङरा नरगु पिनु तइ। ओदा दोपङ करपि अला रंऊ सवा करिसि,अला दोपङ अमबोरो दु:खङु ओ पोसतो। तशपयो माबयुइ मैं दोपङरा दयारो रोतु पोसि, अला ओङक दोपङरा जामा शितिङ तशपयो मारुकयति।

![](https://cdn.door43.org/obs/jpg/360px/obs-en-50-15.jpg)

ओसपरिङ यीशु पोलठति, दत दो होमयो शैतान रा नङ अला दोऊ राज्‍य रा खौतोम लऊ पिनि। दो शैतान रा नरगु पिनु तइ। ओदा शैतान ओमबोरो यो रोशु पोसि, दो सिङ नङ दोपङक परमेश्‍वरु कमचित गोमा बसकयङ शुनऊ ज्ञपतिङ विनु जेमा गिनु तोइ।

![](https://cdn.door43.org/obs/jpg/360px/obs-en-50-16.jpg)

छु लोननङ आदम नङ हव्‍वास परमेश्‍वरु कमचित मागोऊ अला पाप रा ओइ मुलुकु कयुफु तु तोइ, परमेश्‍वरुस दोरा शाप खेउ अला दोरा खोतोम लमा शितिङ फैसला लऊ। दत अलित दयार परमेश्‍वर इत सरपा स्‍वर्गु अला इत सरपा मुलुक जुरारो दो सिदद वङरो।

![](https://cdn.door43.org/obs/jpg/360px/obs-en-50-17.jpg)

यीशु नङ दोऊ मीपङ दो सरपा मुलुकु पोसि,अला दोपङ सोदयो सिङ छला पोऊ थोरिङ राज लरो। दो मी पोऊ मिंऊ सिङ मिसती रा सुऊ पिनरो। छङ ऊङो दु:खङुस मावङरो। दोपङ छङ माकरपि। दोपङ माशोति अला मासिइ। अला ओदा छोयो हलम मावङरो। यीशु एनु राज्‍यु पुरा लोगोनुस ,अला एपोस राज लरो। दो सोदयो एनु मी पङ नङ ञमफौ पोसतो।

*मत्‍ती-24:14;28:18; यूहन्ना- 15:20,16:33; प्रकाशितवाक्य-2:10; मत्‍ती-13:24-30,36-42;1 थिस्सलुनीकियों-4:13-5:11; याकूब-1:12;मत्ती-22:13;  प्रकाशितवाक्य- 20:10,21:1-22:21 गुस इत बाइबलु कोथा।*

Audio: https://git.door43.org/OBS-TLF/scu_obs/releases/download/v1/scu_obs_v1_50_128kbps.m4a