# unfoldingWord Open Bible Stories — Saho

- Language code: `ssy`
- Canonical page: https://openbiblestories.org/l/ssy/
- Stories in this file: 50 of 50
- Published by: DokuWiki
- Last release: 2026-10-27
- License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org
- Illustrations: © Sweet Publishing, CC BY-SA 3.0

unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Saho translation; it is not a translation of the whole Bible.

## 1. Makhaaliqho

https://openbiblestories.org/l/ssy/story-1/

![](https://cdn.door43.org/obs/jpg/360px/obs-en-01-01.jpg?direct&)

Ummannimhi erhedhdho ta ginah kii tine. Yalli ta udduuniya kee teyadde tanem lixa lellecidde yukhluqhe. Yalli ta caalam yuqhluqhe gedda dite kee foyya kii tine, walaa inkim adde tekkeh mitine. Yallih Ufayi laakin amalle layet bukalle yine.

![](https://cdn.door43.org/obs/jpg/360px/obs-en-01-02.jpg?direct&)

Amayek sarrah Yalli: "Ifi alle yakko!" yerhxe. Amalle lel ifi yekke! Yalli lel ifi yemcem yuble gedda 'lellec' akko yerhxe. 'Bar' akko yerhxe diteeko lel kaa barhishe. Yalli ifo afti makhaaliqhot lellecidde kinni yukhluqhem.

![](https://cdn.door43.org/obs/jpg/360px/obs-en-01-03.jpg?direct&)

Makhaaliqhooko malammit lellec, Yalli waanisheh caran baarhot bukalle yukhluqhe. Usuk caran yuqhluqhem lel agani layeko gubi laye barhisheh kinni.

![](https://cdn.door43.org/obs/jpg/360px/obs-en-01-04.jpg?direct&)

Maddaxit lellec, Yalli waanisheh laye kafin baarhooko barhishe. Kafinikkek 'baarho' akko yerhxe, layek lel 'bad' akko yerhxe. Yalli amaa yukhluqheh yinem mecem kinam yuble.

![](https://cdn.door43.org/obs/jpg/360px/obs-en-01-05.jpg?direct&)

Amayek sarrah Yalli: "Baarho umman caynah xorh kee taklit bahtoo" yerhxe. Tekkem lel amay kii yine. Yalli amaa yukhluqheh yinem mecem kinam yuble.

![](https://cdn.door43.org/obs/jpg/360px/obs-en-01-06.jpg?direct&)

Makhaaliqhooko mafarrit lellec, Yalli waanisheh ayro, alsa kee xutuk abe. Yalli lel baarhoh ifo yaxawna kee bar kee lellec, amayim balih waqhte kee iggidit ishaarishoona ciloh ten siraaxe. Yalli amaa yukhluqheh yinem mecem kinam yuble.

![](https://cdn.door43.org/obs/jpg/360px/obs-en-01-07.jpg?direct&)

Makawwanit lellec, Yalli waanisheh inkoh layedde igiilittam kee kimbir yukhluqhe. Yalli amayim mecem kinam yubleh adde yebeereke.

![](https://cdn.door43.org/obs/jpg/360px/obs-en-01-08.jpg?direct&)

Makhaaliqhooko lixya lellec, Yalli: "Umbuka baarhot bahayim yannawna" yerhxe. Yalli akah yerhxeekah lel tekke. Wulim cari bahayim, wulim baarholle mexeltam, wulim lel zibim kii yinin. Yalli lel amyim mecem kinam yuble.

![](https://cdn.door43.org/obs/jpg/360px/obs-en-01-09.jpg?direct&)

Amaymik sarrah Yalli: "Noyyah yammangadoona xiyaw ninni misleh abnoo. Usun baarho kee umbuka bahayimti bukalle reeza yaalloona kinon" yerhxe.

![](https://cdn.door43.org/obs/jpg/360px/obs-en-01-10.jpg?direct&)

Amaymik sarrah, Yalli buureeko xiyawto siraaxeyaako aniina adde yoofoye. Ta xiyawtih migac Adam kii yine. Yalli lel Adam adde sigo dhiica jardiin yitkileyaako zan akko abo amadde kaa haye.

![](https://cdn.door43.org/obs/jpg/360px/obs-en-01-11.jpg?direct&)

Jardiin fanadde Yalli lamma xarha macna leya yuybuqhukeh yine. Wulitiyä aniinat xarha, wulitiyä lel umaani kee mecaani akah yaarhigin xarha kii tine. Amaa xarhaako beetemko rabo kii yine.

![](https://cdn.door43.org/obs/jpg/360px/obs-en-01-12.jpg?direct&)

Amaymik sarrah Yalli: "Xiyawti inketta yakkem mecem maki" yerhxe. Bahayimko laakin walaa inketti Adam xattam makkinnooni.

![](https://cdn.door43.org/obs/jpg/360px/obs-en-01-13.jpg?direct&)

Amaymik sarrah, Yalli Adam dhacuma dhin kaa dhiinishe. Yalli lel Adamko masangaleeko inki lafa akko beyeh saytiyä akko siraaxeyaako teya akah baahe.

![](https://cdn.door43.org/obs/jpg/360px/obs-en-01-14.jpg?direct&)

Adam tee yuble gedda: "Abayshimaako! Tatiyä yoyyah higgida! Labhattooko kii tinemhi sabbatah lel: "'Saytiyä' akko narhxoo" yerhxe. Tayimhi sabbatah kinni lel labhatti ishi ina kee ishi abba xabah ishi numaalih inketta yakkem.

![](https://cdn.door43.org/obs/jpg/360px/obs-en-01-15.jpg?direct&)

Yalli labmara kee saymara ishi misleh kinni ten yukhluqhem. Usuk adde yebeerekeh lel: "Mango cindham kee abuusa bahteenih baarho emeganta" akko yerhxe. Yalli lel yukhluqheh yanem mecem kinam yuble, amayim lel inkoh mangum yikxine. Taginah lel inkoh makhaaliqhooko lixya lellecidde tekke.

![](https://cdn.door43.org/obs/jpg/360px/obs-en-01-16.jpg?direct&)

Malxinya lellec yekke gedda, Yalli ishi ciyyo abayshe. Amaymih lel Yalli inkoh abak suge ciyyooko yucrufe. Malxinya lellec yeybeerekeh lel quddus akko abe. Amayim lel ta lellecidde ishi ciyyooko yucrufemhi sabbatah kinni. Taginah kinni lel Yalli udduuniya kee inkoh teyadde tanem yukhluqhem.

*Quddus kin Kitaabhi zanta: Erhedhdho, curfa 1-2*

## 2. Zambi caalamadde orobe

https://openbiblestories.org/l/ssy/story-2/

![](https://cdn.door43.org/obs/jpg/360px/obs-en-02-01.jpg?direct&)

Adam kee kaa numa Yalli akah abe carha mece jardiinidde xedeneenih maraa yinin. Tenko sara inketti akko hashshiitak miyine, amayim laakin caalamalle zambi miyinemhi sabbatah ten mixoolayshinna. Wuliili gedda lel jardiinidde gerhak Yallaalih waanishaa yinin.

![](https://cdn.door43.org/obs/jpg/360px/obs-en-02-02.jpg?direct&)

Amaa jardiinidde laakin wuli xikma le caroora tine. Amaa caroora lel numak: "Rummah Yalli ta jardiinidde yane xorhko walaa inkettat daro mibeetina sinak yerhxe?" teh tee esserte.

![](https://cdn.door43.org/obs/jpg/360px/obs-en-02-03.jpg?direct&)

Amaa numa lel: "'Yalli umaani kee mecaanit irhgahi xarhaako bextih farhinnan xarhaako daro benno dhicnam noh warishe. Yalli 'amaa daro betteenimko hido dhagteenimko, rabtoona kitin' nokyerhxe" teh alle deheyte.

![](https://cdn.door43.org/obs/jpg/360px/obs-en-02-04.jpg?direct&)

Amaa caroora amaa numak: "Amayim rumma maki! Rabtoona lel maki. Yalli laakin atin amaa darooko dhag-ishshan geddaakoh Yallah timmingidiinih umaani kee mecaani Kayya balih taarhagoona kitiinim yaarhigeh (kinni amah sinak yerhxem)" teh alle deheyte.

![](https://cdn.door43.org/obs/jpg/360px/obs-en-02-05.jpg?direct&)

Amaa numa ta daro carha mecem kinam kee basak-tarhxem kinam tuble. Maarhaga takko gantah fadhdhemhi sabbatah amaa darooko dagum beyteh bette. Amaymik sarrah, amaa teelih yine ishi baclah gantah akko toxoyeh, usuk yakkeedo beete.

![](https://cdn.door43.org/obs/jpg/360px/obs-en-02-06.jpg?direct&)

Gar-heeko lel ten intit fakkiteh casiinih yiniinim yeerhegin. Sara akkaboona lel darhaa sittiyadde yoorofiinih lel sinni rooxe agoogishoona yicikkinin.

![](https://cdn.door43.org/obs/jpg/360px/obs-en-02-07.jpg?direct&)

Amaymik sarrah amaa labhatto kee kaa numa Yallih andhax jardiinidde tillaabak yoobbin. Inkoh lel Yallaako sucuten. Yalli labhattoh akah deecimeh: "Awla tanito?" akyerhxe. Adam lel: "Garabadde ku arco oobbe gedda, casiinih aniyomhi sabbatah mashshiite. Amaa gedda lel sucute" yeh alle deheye.

![](https://cdn.door43.org/obs/jpg/360px/obs-en-02-08.jpg?direct&)

Yalli lel: "Cassinih tinitom miyatti koh warishe? Mibeetin kokko erhxe daro betteho?" yeh kaa essere. Labhatti lel: "Atu ta numa yoh toxoye, ishi lel amaa daro yoh toxoye" yeh alle deheye. Yalli lel numa: "Ayim kinni abtem?" yeh tee essere. Amaa numa lel: "Caroora yi doolabte" teh alle deheyte.

![](https://cdn.door43.org/obs/jpg/360px/obs-en-02-09.jpg?direct&)

Yalli caroorak: "Abaarimteh tanito! Garbah gototimteh buure betto kito. Amaa numa kee koyya sittiya tancaboona kitin, ku cindham kee tee cindham gantah sittiya yancaboona kinon. Amaa numaako radati ku amo yaxarmacho kinni, atu lel kaa sune akko tacammajo kito" akyerhxe.

![](https://cdn.door43.org/obs/jpg/360px/obs-en-02-10.jpg?direct&)

Amaa numak lel Yalli: "Anu umlaalo kolle aysaraw kiyo. Atu ishi bacla fadhdho kito, ku bacli lel ku amolle yaxkamo kinni" akyerhxe.

![](https://cdn.door43.org/obs/jpg/360px/obs-en-02-11.jpg?direct&)

Yalli amaa labhattok: "Ishi numa toobbeh yi farhi akkinnixem abte. Kado lel baarho abaarimteh tane, atu ishi folo carrishitto ciloh mangum tashtaqhalo kito. Amaymik sarrah rabta gedda, ku nabsi buurelle yanqayyaro kinni. Amaa labhatti ishi numak 'Xaawa' akko yerhxe. Ishe umbuka xiyawhi ina takko kinamhi sabbatah 'aniina-taxaye' yarhxiinim kinni. Yalli lel Adam kee Xaawa bahayimti qarbatah ten sarishe.

![](https://cdn.door43.org/obs/jpg/360px/obs-en-02-12.jpg?direct&)

Amaymik sarrah Yalli: "Kado xiyaw umaani kee mecaani yeerhegiinih nottah yimmingidiinih yanin. Umman gedih maraanamko lel aniinat xarhahi daro beetoona izne geyoona alle mitane" yerhxe. Amaymih Yalli, Adam kee Xaawa carha mece jardiinko asac ten ishe. Akkinnan mari orobeenih amaa aniinat xarhahi daro beetaanamko lel Yalli quwwa le malaykut amaa jardiin carafalle wardiyah akko haye.

*Quddus kin Kitaabhi zanta: Erhedhdho, curfa 3*

## 3. Weeca

https://openbiblestories.org/l/ssy/story-3/

![](https://cdn.door43.org/obs/jpg/360px/obs-en-03-01.jpg?direct&)

Dherh muddaako sarralle, mango xiyaw ta caalamalle maraa yinin. Uma maraa kee kakalat wannun lel yekkiinih yinin. Yalli umbuka caalam naba weecah abeh yaylawo farhanda fanah lel umaatih yoomiinih yinin.

![](https://cdn.door43.org/obs/jpg/360px/obs-en-03-02.jpg?direct&)

Nuux laakin Yallaako macruuf geye. Usuk uma marih fanadde mara xaqqi-wanna kin xiyawto kii yine. Yalli amaa dhirhiyo farhak yine weecahi zacabah Nuuxuh warishe. Nuuxuh lel naba jalba siraaxo akah warishe.

![](https://cdn.door43.org/obs/jpg/360px/obs-en-03-03.jpg?direct&)

Yalli Nuuxuh 140 mitrotiya dhedhdhanko, 23 mitrotiya fidaaneeko (masangale) 13.5 mitrotiya lel xafentah le jalba siraaxo akah warishe. Nuux amaa jalbadde adooxa daraja, mango qoraflih agaanako alifeh boxooko abo kii yine. Amaa jalba lel Nuux kee kaa xawaz, amayim balih babbarhi caynah baarhot bahayimko inki-inki tsimde weecaako raacishsho ciloh tekke tiya kii tine.

![](https://cdn.door43.org/obs/jpg/360px/obs-en-03-04.jpg?direct&)

Nuux Yalla yoobbe. Kaa kee kaa adooxa barha yekkiinih tamaa Yalli akko akah tenak yerhxeekah lel jalba siraaxen. Amaa jalba mangum nabatiya kii tinemhi sabbatah siraaximto mango iggidit beyte. Nuux lel amaa xiyaw yamaato le weecaako ten asuuseh sinni Yallalle gaxoona akah warishe, usun laakin kaa maamaninnooni.

![](https://cdn.door43.org/obs/jpg/360px/obs-en-03-05.jpg?direct&)

Yalli Nuux kee kaa xawaz dhicta folo sinne kee sinni bahaymih yassaqarraboona yakkeedo ten yeemere. Ummanim tinqirribe gedda, Yalli Nuuxukke, ishe kee ishi numah, kaa dhayloh adox kee ten sayyo, sittiyadde baxxara xiyawtok jalbadde oroboona akah warishe.

![](https://cdn.door43.org/obs/jpg/360px/obs-en-03-06.jpg?direct&)

Yalli umbuka bahayim kee kimbirko saytiya kee labbtiya jalbadde orobeenih weecaako naggoona ciloh Nuux fanah dhirhiye. Yalli umman caynah bahayimko, sadaqhah takko dhicta lab malxin kee say malxin Nuux fanah dhirhiye. Usun inkoh jalbadde oroben gedda Yalli maczo isheh alife.

![](https://cdn.door43.org/obs/jpg/360px/obs-en-03-07.jpg?direct&)

Amaymik sarrah, rob yane sanah rado erherhishe. Daweena maleh lel marootom lellectiya kee marootom bartiya rade. Laye lel baarhot addaako forhoorhoxitte. Umabuka baarholle tinem lel dherh koomam akko raacinnixak inkoh layeh agoogitte.

![](https://cdn.door43.org/obs/jpg/360px/obs-en-03-08.jpg?direct&)

Umbuka ta kafin baarholle tinem, amaa jalbadde tine xiyaw kee bahayimko bextih inkoh bakitte. Amaa jalba lel layet bukalle seleelikitteh tee addadde tinem yamundhuciinimko inkoh ten naggoyishshe.

![](https://cdn.door43.org/obs/jpg/360px/obs-en-03-09.jpg?direct&)

Rob xabek sarrah amaa jalba koona alsa layet bukalle seleelekitte, amaa gedda lel laye addah sayto erherhishshe. Amaymik sarrah, amaa jalba wuli max koomat bukalle tucrufe, baarho laakin kaddih layeh agoogitteh tine. Malammih adooxa alsak sarrah lel koomamti amom yamballaw erherhishe.

![](https://cdn.door43.org/obs/jpg/360px/obs-en-03-10.jpg?direct&)

Malammih marootom lellectiyak sarrah Nuux laye fuucuttemke yablo kaakotta irolle dirhiye. Amaa kaakotti lel kafin baarho wagiyo tawla amulalle firiirixite, laakin walaa inkikke geyo mirhiicinna.

![](https://cdn.door43.org/obs/jpg/360px/obs-en-03-11.jpg?direct&)

Amayek sarrah lel, Nuux xamaama irolle dhirhiye. Laakin ishi yakkeedo walaa inki kafinikke migeyinnaaki, Nuux fanah gaxte. Baxuurok leddelle, amaa xamaama malammih irolle tee dhirhiye gedda oolactot xak afakke tibbirheh gaxte. Laye guballe fuucutaa tine, xorh lel malammih carsimak yine.

![](https://cdn.door43.org/obs/jpg/360px/obs-en-03-12.jpg?direct&)

Nuux aki baxuuro ilaaleyaako amaa xamaama maddaxit gedda irolle dhirhiye. Ta waqhte alle tacrufe cara geyteyaako migaxinna. Laye lel fuucutaa tine.

![](https://cdn.door43.org/obs/jpg/360px/obs-en-03-13.jpg?direct&)

Lamma alsak sarralle Yalli Nuuxuk: "Koo kee ku xawaz kee inkoh bahaymik tamaa jalbaako tawcoona dhictan. Mango cindham kee abuusa bahteenih baarho emeganta" akyerhxe. Amaa gedda lel Nuux kee kaa xawaz amaa jalbaako yewcin.

![](https://cdn.door43.org/obs/jpg/360px/obs-en-03-14.jpg?direct&)

Amaymik sarrah, Nuux amaa jalbaako yewceh, mazbax siraaxeyaako, sadaqha yakke bahayimko babbarhitiya yisiddiqhe. Yalli amaa sadaqha yikxineyaako Nuux kee kaa xawazadde adde yebeereke.

![](https://cdn.door43.org/obs/jpg/360px/obs-en-03-15.jpg?direct&)

Yalli: "Walaa xiyaw cindhiikoh zambi-wannun yakkoona kibah, taymik sarrah xiyaw abta umaanih sabbatah ta baarho caduruh maabaara, weecah abeyaako lel ta baarho maylayem wacde yok yakko" yerhxe.

![](https://cdn.door43.org/obs/jpg/360px/obs-en-03-16.jpg?direct&)

Yalli lel ishi wacdih ishaarah erherhih robraat abe. Robraat caranalle ambullyinnan gedda Yalli ishi wacde azzikkirii yine, Kaa xiyaw lel amayim balih.

*Quddus kin Kitaabhi zanta: Erhedhdho, curfa 6-8*

## 4. Yallih cahde Abraahimlih

https://openbiblestories.org/l/ssy/story-4/

![](https://cdn.door43.org/obs/jpg/360px/obs-en-04-01.jpg?direct&)

Amaa weecaako mango iggiditik sarralle, malammih caalamalle mango xiyaw yinin, inkoh lel inki waanih waanishak yinin. Yalli akah yeemereekah caalam yamagiinim hidhdhah inkille yekettiniyaako katama siraaxen.

![](https://cdn.door43.org/obs/jpg/360px/obs-en-04-02.jpg?direct&)

Mango amnonobba lii yinin, Yalli yerhxemidde lel macal lii miyiniini. Carshe aleeloona gantah lel dherh qobba siraaxoona erherhishen. Yalli lel taginah inkidde umaani abaanam katattaysheenimko, mango zambe kinam aboona dhiicaanam yuble.

![](https://cdn.door43.org/obs/jpg/360px/obs-en-04-03.jpg?direct&)

Amaymih lel, Yalli ten luqha barhsimte caynah luqhaqhalle yiybiddileyaako, amaa xiyaw umbuka caalamalle faax-ishe. Tamaa siraaxoona erherhisheenih yinin katamak lel 'Baabel' akkay yinin, tee macna lel 'amalolokka' yarhxiinim kinni.

![](https://cdn.door43.org/obs/jpg/360px/obs-en-04-04.jpg?direct&)

Mango iggiditik sarralle, Yalli wuli Abram akyarhxin xiyawtoolih waanishe. Yalli: "Ishi wathan kee ishi xawaz xabteyaako anu ku aybulluwe baarho fanah aduu. Anu kodde ebeerekeh lel naba dik kok abo kiyo. Ku migacak nabatiya akko abo kiyo. Koyyah dhaaco aba mara aybaarako kiyo, koyya abaara mara lel abaaro kiyo. Umbuka diika caalamalle taneya lel ku sabbatah yambaarakoona kinon" akyerhxe.

![](https://cdn.door43.org/obs/jpg/360px/obs-en-04-05.jpg?direct&)

Amaa gedda Abram Yalla yoobbe. Ishi numa, Saaray kee inkoh ishi khaddamte kee isheh yabbuxutem bishshiiteyaako Yalli kaa yuybulluwe baarho, Kancaan akyarhiniya fanah yedee.

![](https://cdn.door43.org/obs/jpg/360px/obs-en-04-06.jpg?direct&)

Abram Kancaanalle yemeete gedda, Yalli: "Ishi wakalelle kulux-erhex. Ta inkoh ablii tanito baarho koo kee ku zurriyah miiraasah sinah axaw kiyo" akyerhxe. Amaymik sarrah Abram amaa baarholle sige.

![](https://cdn.door43.org/obs/jpg/360px/obs-en-04-07.jpg?direct&)

Wuli lellec, Abram Malkitsedeq akyarhxin Nabamko Naba Yallih qashshe geye. Malkitsedeq Abramah dhaaco akah abeyaako: "Nabamko Naba Yalli caran kee baarho leya Abramidde yabaarako" yerhxe. Abram lel isheh yabbuxutemko taman-ya af akah yoxoye.

![](https://cdn.door43.org/obs/jpg/360px/obs-en-04-08.jpg?direct&)

Mango iggidit tillaabe, Abram kee Saaray laakin barha lii miyiniini. Yalli Abram waanisheyaako lel barha baaho kinam kee caranalle yane xutuk balih kin zurriya yaallo kinamah malammih wacde akah saye. Abram Yallih wacdeh yeemene. Yallih wacde yeemenemhi sabbatah lel Yalli Abram xaqqi-wanna kinam caddoyshe.

![](https://cdn.door43.org/obs/jpg/360px/obs-en-04-09.jpg?direct&)

Amaymik sarrah, Yalli Abramlih cahde saye. Cahde akyaanam lammaati fanadde yakke ittifaaq kinni. Yalli: "Ku rooxeeko barha koh axaw kiyo. Ku zurriyah lel Kancaan baarho akah axaw kiyo" akyerhxe. Abram laakin toyendah barha lii miyine.

*Quddus kin Kitaabhi zanta: Erhedhdho, curfa 11-15*

## 5. Wacdi barha

https://openbiblestories.org/l/ssy/story-5/

![](https://cdn.door43.org/obs/jpg/360px/obs-en-05-01.jpg?direct&)

Saaray kee Abram Kancaanalle yemeetiinimko tamana iggidaaako bukalle sugen hanik, kaddih cindhawka mibaahinnooni. Amaymih Abram numa Saaray: "Yalli lee dhalaa yoh axaye wayek sarrah, anu lee dhalaa aallemko barah mangum nabatiya ekkek sarrah, taykinna yi khaddaamit, Hagaar. Cindham yoh bahtooki tee marcishit" akterhxe.

![](https://cdn.door43.org/obs/jpg/360px/obs-en-05-02.jpg?direct&)

Amaymik sarrah, Abram Hagaar marcishite. Hagaar barha bahte, Abram lel Ishmaacil akyerhxe. Saaray laakin Hagaarlih ashshinte. Ishmaacil adooxankee taman iggidiya gufe gedda, Yalli Abramlih malammih aalih waanishe.

![](https://cdn.door43.org/obs/jpg/360px/obs-en-05-03.jpg?direct&)

Yalli: "Anu Nabamko Naba Yalla kiyo. Cahde koolih abo kiyo" akyerhxe. Amaymik sarrah, Abram baarhodde kume. Yalli lel Abramak: "Atu mango diikah abba takko kito. Koo kee ku zurriyah Kancaan baarho tabbaxatoona sinah axaw kiyo, anu lel umman geedit ten Yalla akko kiyo. Ishi xawazadde lel labeetoh anniinnan marah inkoh askok kalum akah abto kolle tane"

![](https://cdn.door43.org/obs/jpg/360px/obs-en-05-04.jpg?direct&)

"Saaray ku numa, barha bahto kinni, usuk lel wacdi barha yakko kinni. Isxaaq akko erhex. Anu inni cahde kaalih abo kinni, usuk lel naba dik yakko kinni. Ishmaacilik yakkeedo naba dik akko abo kiyo. Yi cahdi laakin Isxaaqlih yakko kinni" akyerhxe. Amaymik sarrah, Yalli Abram migac 'Abraahim'-ille yiybiddile. Abraahim yaanam lel 'mango marih abba' yaanam kinni. Saaray migac lel 'Saara' -lle yiybiddile, Saara yaanam lel 'nigisti' yaanam kinni.

![](https://cdn.door43.org/obs/jpg/360px/obs-en-05-05.jpg?direct&)

Abraahim amaa lellecidde ishi xawazhi labeetoh inkoh askok kalum akah abe. Amayimko iggidi max, Abraahim 100 iggidiya abeh, Saara lel 90 iggidiya abte gedda, Saaray barha bahte. Tamaa Yalli abanta akah tenak yerhxeekah lel Isxaaq akyen.

![](https://cdn.door43.org/obs/jpg/360px/obs-en-05-06.jpg?direct&)

Isxaaq wuli burgudda yekke gedda, Yalli Abraahimik: "Isxaaq beyteyaako, amaa inkettak lito barha, yi sadaqhah kaa urxud" akyerhxeyaako kaa imaan yeqheese. Kado yakkeedo Abraahim Yalla yoobbeyaako, ishi barha yasaddaqho yinqirribe.

![](https://cdn.door43.org/obs/jpg/360px/obs-en-05-07.jpg?direct&)

Abraahim kee Isxaaq amaa sadaqhat makaanolle adiik, Isxaaq: "Abba! Sadaqhah takke boxo lino, ciidotti laakin awla yane" yeh kaa essere. Abraahim: "Yi barha, Yalli isheh sadaqhah yakke ciidotta noh yaxaw kinni" yeh alle deheye.

![](https://cdn.door43.org/obs/jpg/360px/obs-en-05-08.jpg?direct&)

Amaa sadaqhat makaano gufen gedda, Abraahim Isxaaq ishi barha yurhuweyaako sadaqhat makaanolle carhah kaa haye. Usuk ishi barha yasaddaqho kab-yerhxe gedda: "Daw-erhex! Cindhooka maacammajin! Busah lito barha yok misuumutitomhi sabbatah yok mashshittam kaado eerhege" akyerhxe.

![](https://cdn.door43.org/obs/jpg/360px/obs-en-05-09.jpg?direct&)

Abraahim ishi agaagalle wuli xorhudde yindhibbirhe maruu yuble. Yalla kinni Isxaaq yamsiddiqhemko maruu bahteh tinem. Abraahim lel kixinik amaa maruu sadaqhatah yisiddiqhe.

![](https://cdn.door43.org/obs/jpg/360px/obs-en-05-10.jpg?direct&)

Amaymik sarrah Yalli Abraahimik: "Inkettak lito barha akxabekkah ummanim yoh taxayemhi farhi abittemhi sabbatah, kodde abaarako wacde koh saa. Ku zurriya carananlle yane xutukko yammangoona kinon. Yi toobbeh tanitomhi sabbatah lel umbuka caalamti diika ku dik hi araxah yambaarakoona kinon" akyerhxe.

*Quddus kin Kitaabhi zanta: Erhedhdho, curfa 16-22*

## 6. Yalli Isxaaqhah yaxaye

https://openbiblestories.org/l/ssy/story-6/

![](https://cdn.door43.org/obs/jpg/360px/obs-en-06-01.jpg?direct&)

Abraahim mangum barrowe gedda, Isxaaq kaa barhi carsimeh labhatto yekkeh yine. Amaa gedda, Abraahim ishi khaddamteeko wulitiya amaa kaa zamad alle yinin baarho fanah ishi barha Isxaaqhah numa akah baaheh gaxo kaa dhirhiye.

![](https://cdn.door43.org/obs/jpg/360px/obs-en-06-02.jpg?direct&)

Amaa Abraahim zamad alle yinin baarho fanah dherh safarko sarrah, Yalli amaa khaddaam Ribqalle kaa baahe. Ishi lel Abraahim sacalak barhi barhä kii tine.

![](https://cdn.door43.org/obs/jpg/360px/obs-en-06-03.jpg?direct&)

Ribqa ishi dik xabteyaako amaa khaddaamlih Isxaaq dik fanah gaxto tirdiye. Isxaaq lel temeete geddaakoh tee marcishite.

![](https://cdn.door43.org/obs/jpg/360px/obs-en-06-04.jpg?direct&)

Dherh waqhtek sarralle, Abraahim rabe gedda, amaa Yalli inkoh kaalih sayeh yine wacdi, cahdeh kaalih abeh yineya Isxaaqhalle tillaabe. Yalli Abraahim xadde hin zurriya yaallo kinamah Yalli wacde akah sayeh yine, Isxaaq numa laakin cindham bahto mirhiicinna.

![](https://cdn.door43.org/obs/jpg/360px/obs-en-06-05.jpg?direct&)

Isxaaq Ribqah dhaaco akah abe, yallih farhih lel ishi gangalle soonowa tekke. Amaa ganga, Ribqat garbadde aniikoh lel sinne-sinneh angaacii yinin. Amaymih Ribqa ayim akkii tanem Yalla esserimte.

![](https://cdn.door43.org/obs/jpg/360px/obs-en-06-06.jpg?direct&)

Yalli lel Ribqak: "Ku garbadde yane lamma barhaako lamma wathan yawcoona kinon. Sinne-sinneh lel yangaacoona kinon. Nabati lel cindhatiih khaddaam yakko kinni" akyerhxe.

![](https://cdn.door43.org/obs/jpg/360px/obs-en-06-07.jpg?direct&)

Ribqat aycit yoobokin gedda, nabati casatiya kee dagor kii yooboke, migacah lel Eesaw akyerhxin. Amaymik sarrah, cindhati Eesaw sune yibbirheh yooboke, migacah lel Yacqoob akyen.

*Quddus kin Kitaabhi zanta: Erhedhdho, curfa 24:1-25:26*

## 7. Yalli Yacqoobudde yabeereke

https://openbiblestories.org/l/ssy/story-7/

![](https://cdn.door43.org/obs/jpg/360px/obs-en-07-01.jpg?direct&)

Cindhawki carsimak, Yacqoob meelalle defeyam kixinii yine, Eesaw laakin, hadin kixinii yine. Ribqa Yacqoob kixinii tine, Isxaaq laakin Eesaw kixinii yine.

![](https://cdn.door43.org/obs/jpg/360px/obs-en-07-02.jpg?direct&)

Wuli max Eesaw hadinko gaxe gedda, usuk mangum safriiteh yine. Eesaw Yacqoobuk: "Ku beezza tamaa abteh tanito folooko dagum yi dhacmish" ake. Yacqoob: "Tookomeh tamaa ishi riish xaqqe litoya yoh uxuu" yeh eldeheye. Amaa gedda, Eesaw Yacqoobuh ishi riish xaqqe akah yoxoye. Amaymik sarrah, Yacqoob dago folo akah yoxoye.

![](https://cdn.door43.org/obs/jpg/360px/obs-en-07-03.jpg?direct&)

Isxaaq Eesawuh ishi baraka akah yaxaw farhe. Usuk amayim abekkah laakin, Ribqa kee Yacqoob, kaa yiqhishshishiniyaako Yacqoob Eesawuh akah yammingideekah aben. Isxaaq baarroweh yinemhi sabbatah yablo dhiica miyine. Amaymih Yacqoob Eesaw sara sariteyaako ishi wadag kee gabadde alat qarbat hashshiite.

![](https://cdn.door43.org/obs/jpg/360px/obs-en-07-04.jpg?direct&)

Yacqoob Isxaaqhalle yemeeteyaako: "Anu Eesaw kiyo. Atu yodde tabaarako erhxeh emeete" akye. Isxaaq amaa alat dagar dhageyaako amaa sara unrayshite gedda, Eesaw yekkeleh adde yebeereke.

![](https://cdn.door43.org/obs/jpg/360px/obs-en-07-05.jpg?direct&)

Eesaw lel Yacqoob kaa riish xaqqe kee kaa baraka akko garacemhi sabbatah Yacqoob yincibe. Amaymih ten abba rabak sarrah kaa yagdafo yixiggire.

![](https://cdn.door43.org/obs/jpg/360px/obs-en-07-06.jpg?direct&)

Ribqa laakin Eesaw xagara toobbe. Amaymih tee kee Isxaaq Yacqoob dherh baarho yedeyeyaako, ishi zamadlih maro kaa dhirhiyen.

![](https://cdn.door43.org/obs/jpg/360px/obs-en-07-07.jpg?direct&)

Yacqoob Ribqat zamadlih mango iggidit suge. Amaa waqhtedde marcishiteyaako inki barha kee dhaylot lamman kee taman baahe. Yalli lel mangum kaa gaddaalishe.

![](https://cdn.door43.org/obs/jpg/360px/obs-en-07-08.jpg?direct&)

Yacqoob kaa dik kin Kancaanko akuula lamaatanna iggidiya sugek sarrah, ishi dik, ishi shaqqaala kee ishi medderoolih amalle gaxe.

![](https://cdn.door43.org/obs/jpg/360px/obs-en-07-09.jpg?direct&)

Eesaw kaddih kaa yagdafo farhaa yanem yekkelih Yacqoob mangum mashshiite. Amaymih Eesawuh mango meddero muttuxuwah akah dhirhiye. Amaa meddero Eesawuh beyte shaqqaala lel: "Ku shaqqaalatto kin Yacqoob ta bahayim koh axayik yane. Usuk isheh dheh yamaato kinni" akyen.

![](https://cdn.door43.org/obs/jpg/360px/obs-en-07-10.jpg?direct&)

Eesaw laakin mece geddaakoh Yacqoob yeseemexeh yine, malammih sittiya geyeenimih lel mangum xedeneenih yinin. Yacqoob Kancaanalle salaamadde maraa yine. Amaymik sarrah Isxaaq rabe gedda Yacqoob kee Eesaw kaa yoocogin. Amaa Yalli Abraahimih abe wacdi lel Isxaaqko Yacqoobulle tillaabe.

*Quddus kin Kitaabhi zanta: Erhedhdho 25:27-33:20*

## 8. Yalli Yoosuf kee kaa dik naggoysha

https://openbiblestories.org/l/ssy/story-8/

![](https://cdn.door43.org/obs/jpg/360px/obs-en-08-01.jpg?direct&)

Mango iggiditik sarrah Yacqoob barrowe gedda, isheh ziyaada kixinii yine Yoosuf amaa saci zan abaa tine ishi sacul yablo kaa dhirhiye

![](https://cdn.door43.org/obs/jpg/360px/obs-en-08-02.jpg?direct&)

Yoosuf, kaa abba mangum kaa kixinii yinemhi sabbatah kee amaa ishi saculhi manabotta yakko kinamhi soono yublemhi sabbatah kaa sacul mangum kaa yincibin. Yoosuf ishi sacululle yemeete gedda, kaa beyeenih garuuzat bacshaarodde kaa yeebexin.

![](https://cdn.door43.org/obs/jpg/360px/obs-en-08-03.jpg?direct&)

Yoosuf sacul careh gaxekkah Yoosuf sareena candhisheenih alat biilodde yusmundhucin. Amaymik sarrah, akkinnan alluulatti Yoosuf yigdifem yakkalo ciloh beyeenih sinni abba yuybullyin. Yacqoob lel mangum yixzine.

![](https://cdn.door43.org/obs/jpg/360px/obs-en-08-04.jpg?direct&)

Garuuzat bacshaaro Yoosuf Masri fanah beyen. Masri Niil nahaar-hi agaagalle geytimta naba quwwa le dik kii tine. Garuuzat bacshaaro Yoosuf wuli gaddaale kin doolat mas-uuludde yeebexin. Yoosuf ishi wanna meceetih yukhdume, Yoosufudde lel Yalli adde yebeereke.

![](https://cdn.door43.org/obs/jpg/360px/obs-en-08-05.jpg?direct&)

Kaa wannahi numa Yoosuflih dhinto ticikkine, Yoosuf laakin ta ginah Yallih zambedde saw mifarhinna. Ishi lel kurrayteh zirabah Yoosuf tiksiseyaako kaa yamdhdhaw xabshe kaa beyen. Xabshedde gantah Yalla yeemene, Yalli lel adde yebeereke.

![](https://cdn.door43.org/obs/jpg/360px/obs-en-08-06.jpg?direct&)

Yoosuf cagab male kii yine hanik lamma iggida fanah xabshedde yine. Wuli bar, amaa Masri xiyaw ni nugus kinni akyaxrhin Fircawun mangum kaa mashshishsha lamma soono yuble. Amaa soonoh macna lel amaa kaa fayishshamko walaa inketti akah warisho mirhiicinna.

![](https://cdn.door43.org/obs/jpg/360px/obs-en-08-07.jpg?direct&)

Yalli Yoosufuh soonot ayfassar hi dhic akah yoxoyeh yineyaako, Fircawun Yoosuf amaa xabsheeko kaa baahe. Yoosuf amaa soono akah yuturjumeyaako: "Yalli mango orba le malxina iggida, culul le malxina iggida lakadde akyaneya dhirhiyo kinni" akye.

![](https://cdn.door43.org/obs/jpg/360px/obs-en-08-08.jpg?direct&)

Fircawunuh Yoosuf mangum cibra akah yekkeyaako umbuka Masrille malammah mas-uuliya yaallo kaa reezishe.

![](https://cdn.door43.org/obs/jpg/360px/obs-en-08-09.jpg?direct&)

Yoosuf xiyawkke tamaa mango orba adde tane malxina iggidadde mango ilaw yakhzanoona akah warishe. Amaymik sarrah amaa culul kin malxina iggidi yemeete gedda, amaa xiyaw beetaanam geyoona ciloh Yoosuf ilaw adde yeebexe.

![](https://cdn.door43.org/obs/jpg/360px/obs-en-08-10.jpg?direct&)

Mango culul Masrille bisah maki yinem, Yacqoob kee kaa dik alle yinin Canaanalle gantah yine.

![](https://cdn.door43.org/obs/jpg/360px/obs-en-08-11.jpg?direct&)

Amaymih, Yacqoob ishi cindhamko naba mara Masriiko ilaw dhaamona ten dhirhiye. Ilaw dhaamoona kaa nifidde daw-yarhxin hanik, Yoosuf, kaa sacul kaa maarhaginnooni. Yoosuf laakin ten yeerhege.

![](https://cdn.door43.org/obs/jpg/360px/obs-en-08-12.jpg?direct&)

Yinqiyyiriinih yaniinim kee miyaniinim ten yeqheesek sarra, Yoosuf: "Anu Yoosuf sin sacal kiyo, mimashshiitina. Garuzzoh yi teebexin gedda umam abtoona ticikkinin. Yalli laakin umaanik mecaani akko abe. Anu sin aytaalaw kiyok amowantaaki sinne kee sinni dikih Masri siganta" akye.

![](https://cdn.door43.org/obs/jpg/360px/obs-en-08-13.jpg?direct&)

Yoosuf sacul dik gaxeenih ten abba kin Yacqoobuk, 'Yoosuf kaddih wofaalih yane' akan gedda, usuk mangum xedene.

![](https://cdn.door43.org/obs/jpg/360px/obs-en-08-14.jpg?direct&)

Yacqoob walaa mangum baarroweh yannaw kibah, umbuka ishi diklih Masri yegeeceze, inkoh lel amalle maraa yinin. Yacqoob Ribqah ishi cindhamah inkoh dhaaco akah abe.

![](https://cdn.door43.org/obs/jpg/360px/obs-en-08-15.jpg?direct&)

Yalli Abraahimih cahdi miimar Isxaaqhalle tillaabe, sarrah Yacqqobulle, sarrah Yacqoob cindhamhi lammankee taman kee ten dikille. Amaa cindhamhi lammankee tamanhi zurriya lel Israa-eel lammanke tamanhi kishotiya yekkin.

*Quddus kin Kitaabhi zanta: Erhedhdho 37-50*

## 9. Yalli Moosah deecima

https://openbiblestories.org/l/ssy/story-9/

![](https://cdn.door43.org/obs/jpg/360px/obs-en-09-01.jpg?direct&)

Yoosuf rabemko sarrah, kaa zamad inkoh Masrille defeyen. Ten kee tenko raddam lel inkoh mango iggidit amalle sugeniyaako mango cindham baahen. Israa-eel xiyaw akkay yinin.

![](https://cdn.door43.org/obs/jpg/360px/obs-en-09-02.jpg?direct&)

Boolaat iggidiyaako sarrah, Israa-el xiyaw mangum yemmengin. Masri xiyaw Yoosuf mece gedih kaa biyashshiiteenih, usuk en xatoh abem gantah mazzakkarinnooni. Israa-el xiyaw yemmengiinimhi sabbatah akko mashshiiten. Amaa max Masrille reezeh yine Fircawun lel Israa-eel xiyawuk garuuza akkabe.

![](https://cdn.door43.org/obs/jpg/360px/obs-en-09-03.jpg?direct&)

Masri xiyaw, Israa-eel xiyaw naba makun, amayim balih katamum ginoona ten xaylishen. Birthic ciyyo ten aniina toshshoome, Yalli laakin adde yebeerekeyaako ziyaada mango cindham baahen.

![](https://cdn.door43.org/obs/jpg/360px/obs-en-09-04.jpg?direct&)

Fircawun Israa-eel xiyaw mango cindham baaha yaniinim yuble. Amaymih lel ishi xiyaw inkoh Israa-eel xiyaw zabulti labeeto yigdifiinih Niil nahaaradde cidoona ten yeemere.

![](https://cdn.door43.org/obs/jpg/360px/obs-en-09-05.jpg?direct&)

Wuli Israa-eelta kin numa barha bahte. Tee kee bacla lel amaa zabalo dhiicaanam fanah sucusen.

![](https://cdn.door43.org/obs/jpg/360px/obs-en-09-06.jpg?direct&)

Kayya sucusaanam alle tigbide gedde, gidfooko kaa naggoyshoona ciloh Niil nahaar hi gimamalle tine wuli randat fanadde seleelekitta jambiilidde kaa hayen. Naba kaa sacla lel ayim yakkem tablo kaa waacensiita tine.

![](https://cdn.door43.org/obs/jpg/360px/obs-en-09-07.jpg?direct&)

Wuli Fircawun barhä amaa jambiil tubleyaako addadde kulux akko terhxe. Amaa zabalo tuble gedda lel ishi barha akkabitto beyte. Kaa dhoyishsho ciloh lel kaa ina kinam aarhigekkah casbeh amaa Israa-eeltälle toxoye. khaddaamitih bahte. Ishi lel amaa cindhooki yenebeh inat xan kaa farhshiishinnixam yekke gedda, amaa 'Moosa' yan migac akah teyyeece, Fircawun barhä fanah tedebbe.

![](https://cdn.door43.org/obs/jpg/360px/obs-en-09-08.jpg?direct&)

Wuli max, Moosa yenebe gedda, wuli Masriiti Israa-eelti garuzza aatukii yuble. Muusa lel ishi Israa-eelto kin kaa zoobatto gargeero yicikkine.

![](https://cdn.door43.org/obs/jpg/360px/obs-en-09-09.jpg?direct&)

Inketti kaa ablii miyinem yuble gedda lel Moosa amaa Masriita yigdifeh yoocoge. Moosa abeh yinem laakin wuliti yuble.

![](https://cdn.door43.org/obs/jpg/360px/obs-en-09-10.jpg?direct&)

Fircawun Moosa abem yoobe gedda, kaa yagdafo farhe. Moosa lel Masriiko amaa Fircawun caskarko alle naggowah iggidin zibolle kude.

![](https://cdn.door43.org/obs/jpg/360px/obs-en-09-11.jpg?direct&)

Moosa Masriiko mirixta kin zibolle lel saci loyna yekke. Amaa dikille wuli numa marcishiteh lel lamma barha adde baahe.

![](https://cdn.door43.org/obs/jpg/360px/obs-en-09-12.jpg?direct&)

Wuli max, Moosa ishi ciidohi zan abitak, wuli garabadde gira abbirhii yuble. Amaa garab laakin mixararo. Moosa lel meceetih yablo amaa garabhi gabolle kab-yerhxe. Amaa gira adde tibbirhe garabhi gabolle kab-arhxik, Yallih dhaw: "Moosa, ishi kabel eyyec. Quddus kin baarholle kinni daw-arhxii tanitom" ake.

![](https://cdn.door43.org/obs/jpg/360px/obs-en-09-13.jpg?direct&)

Yalli: "Inni xiyawhi cazaab ubleh aniyo. Atu Israa-eel xiyaw Masriiti garuuzinnaako ten tayyaaco ciloh lel Fircawun fanah ku dhirhiyo kiyo. Anu Abraahim, Isxaaq kee Yacqoobuh wacde akah saye Kancaan baarho tenah axaw kiyo" ake.

![](https://cdn.door43.org/obs/jpg/360px/obs-en-09-14.jpg?direct&)

Moosa: "Amaa xiyaw miyatti yi farem yaarhagoona farhan gedda, ayim arhxo?" yeh essere. Yalli: "ANU KIYOTIYA KIYO, 'ANU KIYO yi fareh yane' akke. Anu Yahweh, sin abo kin Abraahim, Isxaaq kee Yacqoob Yalla kiyom gantah akah warish. Tati umman geedit yi migac kinni" ake.

![](https://cdn.door43.org/obs/jpg/360px/obs-en-09-15.jpg?direct&)

Moosa meceetih waanisho mirhiicam yekkeleyaako mashshiiteh Fircawun fanah yadaw farhe waye gedda, Yalli, kaa sacal kin Ahaaroon, xatoh aalih dhirhiye. Yalli lel amaa Fircawun akxino kinam Moosa kee Ahaaroon ten asuuseh yine.

*Quddus kin Kitaabhi zanta: Muuca 1-4*

## 10. Tamana bala

https://openbiblestories.org/l/ssy/story-10/

![](https://cdn.door43.org/obs/jpg/360px/obs-en-10-01.jpg?direct&)

Moosa kee Ahaaroon Fircawun fanah yedeyin. Usun: "Israa-eel Yalli tayim yarhxe: 'Yi xiyaw yadawnaaki ten xab!'" aken. Fircawun ten mabbinna. Israa-eel xiyaw natsah ten dhirhiyam hidhdhah, inkinnah ziyaada yashtaqhaloona ten xaylishe!

![](https://cdn.door43.org/obs/jpg/360px/obs-en-10-02.jpg?direct&)

Fircawun ingirooko yadawna ten kalite. Amaymih lel Yalli Masrille dhacuma tamana bala alle dhirhiye. Ta balah lel Yalli Fircawun kee Masriiti yallitko xaylalem yuybulluwe.

![](https://cdn.door43.org/obs/jpg/360px/obs-en-10-03.jpg?direct&)

Yalli Niil nahaar biilolle yiybiddile. Fircawun laakin Israa-eel xiyaw ten mirhirhiyo.

![](https://cdn.door43.org/obs/jpg/360px/obs-en-10-04.jpg?direct&)

Yalli umbuka Masrille acaanun alle dhirhiye. Fircawun lel ta acaanun asac-isho Moosa dhaacime. Sarraako laakin amaa acaanun bade. Fircawun lel ziyaada ishi afcaado yiytirireyaako Israa-eel xiyaw Masriiko yadawna akah masmaxinna.

![](https://cdn.door43.org/obs/jpg/360px/obs-en-10-05.jpg?direct&)

Amaa gedda, Yalli arriima qaci bala alle dhirhiye. Amaymik sarrah qaci bala alle dhirhiye. Fircawun Moosa kee Ahaaroonuh akah deecimeh ta bala daw-ishisheenimko Israa-eel xiyaw Masriiko yawcoona kinoonim akah warishe. Moosa dhaaco abe gedda lel Yalli amaa qaca Masriiko asac-ishe. Fircawun laakin ishi afcaado yiytirireyaako, Israa-eel xiyaw natsah yadawna ten mixabinna.

![](https://cdn.door43.org/obs/jpg/360px/obs-en-10-06.jpg?direct&)

Sarrah, Yalli inkoh amaa Masri xiyaw cari bahayim laaxuuteenih akah badaanaakah akko abe. Fircawun afcaado titrireyaako, Israa-eel xiyaw yadawna akah masmaxinna.

![](https://cdn.door43.org/obs/jpg/360px/obs-en-10-07.jpg?direct&)

Sarrah Yalli Moosak Fircawun nifidde gaxeyaako gombots caranalle xarho akah warishe. Amayim abe gedda lel Israa-eel xiyawko makiiki Masri xiyawko waaxelta le biyok irot qarbatalle akko yewce. Yalli Fircawun afcaado yiytirireyaako, Israa-eel xiyaw natsah yadawna ten mixabo.

![](https://cdn.door43.org/obs/jpg/360px/obs-en-10-08.jpg?direct&)

Amaymik sarrah, Yalli mango ilaw kee irolle awcinnantiya inkoh yagdife barad dhirhiye. Fircawun Moosa kee Ahaaroonuh deecimeh: "Anu zambe abeh aniyo. Tadawna dhictan" ake. Amaymih Moosa dhaaco abe gedda caranko oobak yine barad daw-yerhxe.

![](https://cdn.door43.org/obs/jpg/360px/obs-en-10-09.jpg?direct&)

Fircawun laakin malammih zambe abeyaako ishi afcaado yiytirire. Israa-eel xiyaw natsah yadwna lel ten mixabinna.

![](https://cdn.door43.org/obs/jpg/360px/obs-en-10-10.jpg?direct&)

Amaymik sarrah, Yalli Masrille cawayni macat dhirhiye. Amaa cawayni lel inkoh amaa baradko raace ilaw yeylee.

![](https://cdn.door43.org/obs/jpg/360px/obs-en-10-11.jpg?direct&)

Amaymik sarrah Yalli adooxa maxah dite alle dhirhiye. Masri xiyaw irolle yawcoona taanaanam fanah lel dite tekke. Amaa Israa-eel xiyaw alle yininille laakin ifi yine.

![](https://cdn.door43.org/obs/jpg/360px/obs-en-10-12.jpg?direct&)

Fircawun, ta saggala balak sarrah gantah Israa-eel xiyaw natsah yadawna ten mixabinna. Fircawun aabbe wayemhi sabbatah lel Yalli sarroorimat bala dhirhiye. Tayim lel Fircawun xangal tasqayyaro kii yine.

*Quddus kin Kitaabhi zanta: Muuca 5-10*

## 11. Faasiga

https://openbiblestories.org/l/ssy/story-11/

![](https://cdn.door43.org/obs/jpg/360px/obs-en-11-01.jpg?direct&)

Yalli lel amaa Fircawun Israa-eel xiyaw natsah yadawna ten xabo xinemko, umbuka Masri xiyaw kee bahayimko lab riish akko yagdafo kinam kaa asuuse. Fircawun tayim yoobbe hanik yaamano kee Yalla yaabbo xine.

![](https://cdn.door43.org/obs/jpg/360px/obs-en-11-02.jpg?direct&)

Yalli lel inkoh kayyah yeemene marih riish akah raacisha arax abe. Umman dik lel muluu kin ciidotta dooreenih yarxadoona alle tine.

![](https://cdn.door43.org/obs/jpg/360px/obs-en-11-03.jpg?direct&)

Yalli Israa-eel xiyawak amaa ciidottih biilo sinni carafak hayniyaako gabalaceenih amaa xazo soleenih muluxinnixe cagunko aben qichchachlih beetoona akah warishe. Amayim beeteenik sarrah lel Masriikohi muucuh yanqarraboona akah warishe.

![](https://cdn.door43.org/obs/jpg/360px/obs-en-11-04.jpg?direct&)

Israa-eel xiyaw lel tamaa Yalli aboona akah ten yeemereekah aben. Barti abrhah lel Yalli muluu Masrille yadiyeedo umbuka riish yigdife.

![](https://cdn.door43.org/obs/jpg/360px/obs-en-11-05.jpg?direct&)

Umbuka Israa-eel xiyaw sinni carafakke biilo lii yinin, amaymih lel Yalli amaa carwa xabeh akko tillaabe. Amadde tinem lel inkoh nagaadde raacen. Usun lel amaa ciidottih biilohi sabbatah nagaadde raacen.

![](https://cdn.door43.org/obs/jpg/360px/obs-en-11-06.jpg?direct&)

Masri xiyaw laakin Yallah maamaninnooni, Yalli yerhxem lel maabinnooni. Amaymih Yalli ten carwa xabeh akko mitillaabinna. Yalli inkoh Masri xiyaw riish yigdife.

![](https://cdn.door43.org/obs/jpg/360px/obs-en-11-07.jpg?direct&)

Masri xiyaw riishosh inkoh raben. Xabshedde yinetiih riishko aykee Fircawun riish fanah inkoh raben. Masrille mango mari xazan sabbatah inkoh weecen.

![](https://cdn.door43.org/obs/jpg/360px/obs-en-11-08.jpg?direct&)

Amaa baradde lel, Fircawun Moosa kee Ahaaroonuh deecimeh: "Israa-eel xiyaw bishshitteenih kadookoh aduwanta!" akye. Masri xiyaw yakkeedo Israa-eel xiyaw akkanih yadawna akah warishen.

*Quddus kin Kitaabhi zanta: Muuca 11:1-12:32*

## 12. Muuca

https://openbiblestories.org/l/ssy/story-12/

![](https://cdn.door43.org/obs/jpg/360px/obs-en-12-01.jpg?direct&)

Israa-eel xiyaw Masriiko yadawna mangum xedeneenit kii yinin. Garuuza yakkiinim racteh, amaa Wacdi Baarho fanah adii yinin! Masri xiyaw lel Israa-eel xiyawah farh-isheenim dahab, burur kee aki limolem akah yoxoyin. Wuli aki diikah xiyawko gari Yallah yeemeniinih, Israa-eel xiyaw Masriiko tenlih yedeyin.

![](https://cdn.door43.org/obs/jpg/360px/obs-en-12-02.jpg?direct&)

Yalli, lellec lee wuli dherh camidda kin darur, bar lee wuli dherh camidda kin giralle yambiddileyalle ten santishe. Yalli ummangedda ten santisheyaako isheh aalih yedee. Usun aboona alle tinem lel Kayya kataanam bisa kii yine.

![](https://cdn.door43.org/obs/jpg/360px/obs-en-12-03.jpg?direct&)

Dago waqhtek sarrah, Fircawun kee kaa xiyaw sinni xasaab yisqiyyiriiniyaako Israa-eel xiyaw malammih ten garuuza yakkoona farhen. Usuk isheh Rummaahit inki Yalla kinam xiyaw yabloona kee Yahweh Fircawun kee kaa yallitko nabam yaarhagoona ciloh Yalli Fircawun afcaado yiytirire.

![](https://cdn.door43.org/obs/jpg/360px/obs-en-12-04.jpg?direct&)

Amaymih, Fircawun kee kaa maxaarho malammih sinni garuuza akko abitoona yeyrereddin. Israa-eel xiyaw Masriiti maxaarhi amiiti yublin gedda, Fircawun caskar kee Casa Bad hi fanadde yinqirqiriinim yeerhegin. Mangum mashshiiteenih lel: "Masri aymih xabne? Inkoh rabno kino!" yerhxiinih zeeren.

![](https://cdn.door43.org/obs/jpg/360px/obs-en-12-05.jpg?direct&)

Moosa Israa-eel xiyawuk: "Mashshiitaanam xabanta! Kaafa Yalli sinah dhibbayeh sin gargeero kinni" ake. Amaymik sarrah yalli Moosak: "Ta xiyawah Casa Bad hi gabolle yadawna akah warish" ake.

![](https://cdn.door43.org/obs/jpg/360px/obs-en-12-06.jpg?direct&)

Amaymik sarrah Yalli amaa Masri xiyaw Israa-eel xiyaw yabliinimko ciloh amaa camiddi darurta fanadde akko haye.

![](https://cdn.door43.org/obs/jpg/360px/obs-en-12-07.jpg?direct&)

Yalli Moosak Casa Bad hi bukalle gaba xaf-isheh laye barhisho akah warishe. Amaymik sarrah Yalli, amaa badadde arax adde yawco ciloh xaaxatti amaa badti laye gura kee mizgalle akah dufuwaakah akko abe.

![](https://cdn.door43.org/obs/jpg/360px/obs-en-12-08.jpg?direct&)

Israa-eel xiyaw layet qaana lamma gabo akko tane kafin baarholle yeecetiinih badti addaako yedeyin.

![](https://cdn.door43.org/obs/jpg/360px/obs-en-12-09.jpg?direct&)

Amaymik sarrah Yalli amaa Masri xiyaw Israa-eel xiyaw kudak yabloona ciloh amaa darurta aganalle xaf-ishe. Masri xiyaw lel ten sarradde yardoona abayshen.

![](https://cdn.door43.org/obs/jpg/360px/obs-en-12-10.jpg?direct&)

Sarrah usun Israa-eel xiyawadde amaa araxko adde katayen, Yalli laakin Masri xiyaw birriigeenih ten karrossas akah yandhibbirheekah akko abe. "Kuda! Yalli Israa-eel xiyawah amxeerebii yane!" yerhxiinih zeeren.

![](https://cdn.door43.org/obs/jpg/360px/obs-en-12-11.jpg?direct&)

Israa-eel xiyaw inkoh nagaadde badko amaa carhi wasanalle tabeenik sarrah, Yalli Moosah malammih gaba yayfaddago akah warishe. Usuk amayim abe gedda, amaa laye Masri xiyaw maxaarholle raddeyaako tamaa ishi awwalaahit caralle gaxte. Masri xiyaw maxaarhi lel inkoh yumundhucin.

![](https://cdn.door43.org/obs/jpg/360px/obs-en-12-12.jpg?direct&)

Israa-eel xiyaw Masri xiyaw rabeenim yublin gedda, Yallah yeemeniinih Moosa Yallih nabii kii yinem yeemenin.

![](https://cdn.door43.org/obs/jpg/360px/obs-en-12-13.jpg?direct&)

Yalli rabi kee garuuzinnaako ten gargeerem hi sabbatah Israa-eel xiyaw mango xedenih xedenen. Israa-eel xiyaw Masri xiyaw maxaarhooko ten gargeeremhi sabbatah sinni cusub xuriya simbilishoona Yallih faylah mango margaddiinon margadishen.

![](https://cdn.door43.org/obs/jpg/360px/obs-en-12-14.jpg?direct&)

Masri xiyaw bukalle nasre akah yoxoyeyaako garuuzinnaako ten yeyyeecem yazzakkaroona ciloh, Yalli Israa-eel xiyaw Faasiga iggida-iggidah simbilishoona ten yeemere. Usun lel kaamil kin ciidotta yurxudiiniyaako qichchaalih beetenih simbilishen.

*Quddus kin Kitaabhi zanta: Muuca 12:33-15:21*

## 13. Yallih cahde Israa-eellih

https://openbiblestories.org/l/ssy/story-13/

![](https://cdn.door43.org/obs/jpg/360px/obs-en-13-01.jpg?direct&)

Yalli Israa-eel xiyaw Casa Badko ten yeyyeecek sarrah, saxraako Siina akyan kooma fanah ten beye. Ta kooma lel amaa Moosa xarara garab alle yuble kooma kii tine. Amaa xiyaw lel amaa koomah rigidille tendad yittikilin.

![](https://cdn.door43.org/obs/jpg/360px/obs-en-13-02.jpg?direct&)

Yalli Moosa kee Israa-eel xiyawak: "Atin yoh tim-izziziinih yi cahde dhawudhdheenimko anu makkole yi buxta, qashshitti nigsinna kee quddus kin wathan takkoona kitin" akye.

![](https://cdn.door43.org/obs/jpg/360px/obs-en-13-03.jpg?direct&)

Adooxa lellecik sarrah amaa xiyaw sinni ufayko yinqirribiinik sarrah, Yalli angud, xankarha, tika kee wac-tarhxe machambraalih Siinaati koomah bukak oobe. Amaa koomah bukakke tawco fiqhaad geytem Moosa bisa kii yine.

![](https://cdn.door43.org/obs/jpg/360px/obs-en-13-04.jpg?direct&)

Yalli lel: "Anu Yahweh, sin Yalla, Masriiti garuuzinnaako sin gargeereya kiyo. Aki yallitih macbadina" yeh cahde akah yoxoye.

![](https://cdn.door43.org/obs/jpg/360px/obs-en-13-05.jpg?direct&)

"Anu, Yahweh, Anu ashshiina Yalla kiyomhi sabbatah, asnaam maabina, akah lel macbadina. Yi migac xishma hin xibarah maaqhacina. Sambatak lel quddus akko abanta. Wuli ginah lel inkoh sinni ciyyi lixa lellecidde abitteenih, malxinya lellec atin adde tacrufiinih yoyya adde tazzikkirin lellec kinni"

![](https://cdn.door43.org/obs/jpg/360px/obs-en-13-06.jpg?direct&)

"Sinni ina kee sinni abba xishmatanta. Magdafina. Maznayna. Migarciitina. Mizirabbitina. Sinni xuggattih numa, kaa care, hido lel inkoh kaayim akkinnannim sinneh miduumutina"

![](https://cdn.door43.org/obs/jpg/360px/obs-en-13-07.jpg?direct&)

Amaymik sarrah Yalli, ta Tamana Amre wuli lamma luxulle yuktubeh Moosalle yoxoye. Yalli, aki mango sercat kee amrit yakkeedo katattawna yoxoye. Xiyaw ta sercat yoobbiinimko, Yalli adde yebeerekeh ten dhawrho kinamah wacde akah saye. Aabbe waynimko laakin tan yaqtsaco kii yine.

![](https://cdn.door43.org/obs/jpg/360px/obs-en-13-08.jpg?direct&)

Yalli Israa-eel xiyaw aboona akko farhe tendah sharxe yakkeedo tiya-tiyah akah warishe. Rakhbi Tenda akkay yinin, naba goloh barhsime lamma care lel lii tine. Yalli amaa goleenaako wuli gaza marak yinemhi sabbatah, amadde tantabo fiqhaad lii tinem naba qashshe bisa kii yine.

![](https://cdn.door43.org/obs/jpg/360px/obs-en-13-09.jpg?direct&)

Yallih sercat cidinnanti amaa Rakhbi Tendah nifille yine mazbaxalle Yallih sadaqha yakko sacatto baahak yine. Qashshi amaa sacatto yarxudeh lel amaa mazbaxalle solaa yine. Amaa yimsiddiqhe sacattohi biili amaa xiyawtih zambe alifayaako amaa xiyawti Yallih nifidde yimsiffiyetiya akkii yine. Yalli Ahaaroon sacal kee Ahaaroonko raddam Kaa qashshit yakkona ten doore.

![](https://cdn.door43.org/obs/jpg/360px/obs-en-13-10.jpg?direct&)

Inkoh amaa xiyaw Yalli akah yoxoye sercat yoobbiniyaako inki Yallah yacbadoona kee barhsimte Kaa xiyaw yakkoona gaba beeten. Yalla yaabboona wacde saynimko dago waqhtek sarrah sirii ginah zambedde sayen.

![](https://cdn.door43.org/obs/jpg/360px/obs-en-13-11.jpg?direct&)

Moosa Yallaalih waanishak Siinaati koomah bukakke mango lellec suge. Usuk gaxo lel xiyaw kaa ilaladde kafte. Amaymih lel, usun zirabti yalla akah abo yeenih Ahaaroonulle dahab baahen!

![](https://cdn.door43.org/obs/jpg/360px/obs-en-13-12.jpg?direct&)

Ahaaroon lel rugi misleh dahab asnaam akah abe. Amaa xiyaw asnaam yacbadoona kee sadaqha akah aboona erherhishen! Yalli lel ten zambih sabbatah mangum kurrayeyaako ten yaylawo yixiggire. Moosa dhaaco akah abemhi sabbatah laakin Yalli kaa dhaaco yoobbeh ten maylayinna.

![](https://cdn.door43.org/obs/jpg/360px/obs-en-13-13.jpg?direct&)

Moosa amaa koomaako oobeh amaa asnaam yuble gedda, mangum kurrayeh amaa Yalli Tamana Amre alle yuktubeh yine luxukke dhaytih yootoke.

![](https://cdn.door43.org/obs/jpg/360px/obs-en-13-14.jpg?direct&)

Amaymik sarrah, Moosa amaa asnaamak doron akko abeyaako, wuli layedde xarheh yaacaboona amaa xiyawah yoxoye. Yalli amaa xiyawalle bala alle oobisheh mango mari akko raben.

![](https://cdn.door43.org/obs/jpg/360px/obs-en-13-15.jpg?direct&)

Moosa amaa yigdileh yine Tamana Amre yasqayyaro dhayitko cusub lux akah siraaxe. Sarrah amaa malammih amaa koomakke yewceh Yalli amaa xiyaw yasaamaxo dhaaco abe. Yalli Moosa yoobbeyaako amaa xiyaw yeseemexe. Moosa amaa Tamana Amri cusub luuxalle yineya yibbirheh amaa koomaako oobe. Sarrah Yalli Israa-eel xiyaw amaa Siinaati koomaako amulalle Wacdi Baarhoh gabolle ten beye.

*Quddus kin Kitaabhi zanta: Muuca 19-34*

## 14. Zibollehi heeliyotta

https://openbiblestories.org/l/ssy/story-14/

![](https://cdn.door43.org/obs/jpg/360px/obs-en-14-01.jpg?direct&)

Yalli ishi cahdehi masarratah Usuk Israa-eel xiyaw katattawna akko farha sercat akah warishemko sarrah, usun Siinaati koomaako yedeyin. Yalli Wacdi Baarho, Kancaan gantah akkarhxii yininiyahi gabolle ten beyo erherhishe. Amaa darurtat camiddi lel Kancaan gabolle afadde akko yedee, usun lel kaa katattayen.

![](https://cdn.door43.org/obs/jpg/360px/obs-en-14-02.jpg?direct&)

Yalli Abraahim, Isxaaq, kee Yacqoobuh ta Wacdi Baarho ten zurriyah yaxaw kinam wacde akah sayeh yine. Kado laakin amalle mango xiyawhi kishosh maraa yinin. Tenak lel Kancaan xiyaw akkay yinin. Amaa Kancaan xiyaw Yallah acbudii miyiniini, walaa Kaa aabbii miyiniini. Asnaamah yacbudiinih mango umaani abaa yinin.

![](https://cdn.door43.org/obs/jpg/360px/obs-en-14-03.jpg?direct&)

Yalli Israa-eel xiyawuk: "Tamaa Wacdi Baarholle tane Kancaan xiyaw inkoh hadantoona sinalle tane. Tenlih salaam maabinanta, waasibo lel aalih maabinanta. Ten asnaaminkoh tayfarasoona sinalle tane. Yotta aabbe wayteenimko, yiidhdhadde ten asnaamah tacbadoona kitin" ake.

![](https://cdn.door43.org/obs/jpg/360px/obs-en-14-04.jpg?direct&)

Israa-eel xiyaw Kancaan darat gufen gedda, Moosa kishollehi inketta kin lammankee tamana labhatto doore. Amaa labha yedeyinih amaa baarho aagina lii tinem idhdhitoona masxassa akah yoxoye. Usun amaa Kancaan xiyaw quwa le mara kii yiniinim kee rukut mara kii yiniinim yakkedo idhdhitoona kii yinin.

![](https://cdn.door43.org/obs/jpg/360px/obs-en-14-05.jpg?direct&)

Amaa lammankee taman labhattiya Kancaanadde marootom lellectiya yedeynih gaxen. Sarrah amaa xiyawakke: "Baarho mango kasbele baarho kinni, ilaw lel rakha kinni!" aken. Amaa idhdhiteenitko taman laakin: "Amaa katamum mangum nabam kinni, amaa xiyaw lel cagugguure kinon. Ten nootokemko, thummutuh ni yisciriinih ni yagdafoona kinon!" yerhxin.

![](https://cdn.door43.org/obs/jpg/360px/obs-en-14-06.jpg?direct&)

Akkanih lel Kaaleeb kee Yehooshuca amaa lamma idhdhiteeni: "Kancaan xiyaw dherh mara kee quwa-le mara rumma kinon, nanu laakin thummutuh ten nascaro kino! Yalli noh dhibbaw kinni!" yerhxin.__

![](https://cdn.door43.org/obs/jpg/360px/obs-en-14-07.jpg?direct&)

__

Amaa xiyaw laakin Kaaleeb kee Yehooshuca ten mabbinnooni. Moosa kee Ahaaroonlih kurrayniyaako: "Aymihi tayidhdha cur-ta baarholle ni bahteenim? Xarbadde rabneh ni sayyo kee ni cindham garuuza yakkiinimko Masrille defeyno nolle tine" aken. Amaa xiyaw Masri fanah ten yadabbe aki manabotta dooroona farhen.

![](https://cdn.door43.org/obs/jpg/360px/obs-en-14-08.jpg?direct&)

Yalli mangum kurrayeyaako amaa Rakhbi Tenda fanah yemeete. Yalli: "Yi diddeh ugutteenimhi sabbatah ta xiyawakke inkoh zibolle hel-tarhxoona kitin. Kaaleeb kee Yehooshucaako bextih lamaatanna iggidiya hido amayimko aganalle kin marak inkoh amalle rabtoona kitin, Wacdi Baarho lel caduruh moorobtaana" ake.

![](https://cdn.door43.org/obs/jpg/360px/obs-en-14-09.jpg?direct&)

Xiyaw tayim yoobbin gedda, zambe abeenimih yeththeecesin. Sinni aslaxa beyeenih lel Kancaan xiyaw yaatakoona yedeyin. Yalli tenlih miyinemhi sabbatah Moosa yadiinimko ten asuuse. Usun laakin kaa mabbinnooni.

![](https://cdn.door43.org/obs/jpg/360px/obs-en-14-10.jpg?direct&)

Ta xarabadde Yalli tenlih maadayinna, amaymih lel yimsicciriniyaako mango mari akko raben. Amaymik sarrah Israa-eel xiyaw Kancaanko gaxeenih marootom iggidiya zibolle hel-yerhxin. .

![](https://cdn.door43.org/obs/jpg/360px/obs-en-14-11.jpg?direct&)

Israa-eel xiyaw zibolle hel adde yerhxin marootom lellectiyadde Yalli ten yeyteele. Carsheeko "manna" akyarhxin folo akah yoxoye. Beetan xazo geyoona gantah gilgilishti filco ten sifra fanah akah dhirhiye. Toyidhdha kalen hanik lel ten sartim kee kabel ziramko Yalli akah dhawrhe.

![](https://cdn.door43.org/obs/jpg/360px/obs-en-14-12.jpg?direct&)

Yalli laye gantah dhayitko cibra kin araxah akah yoxoye. Tayim kinni hanik laakin, Israa-eel xiyaw Yalla kee Moosat diddeh antheerici kee angoroozomi yinin. Amayim kinni hanik lel Yalli Abraahim, Isxaaq kee Yacqoobuh saye wacdelle yisbite.

![](https://cdn.door43.org/obs/jpg/360px/obs-en-14-13.jpg?direct&)

Wuli max xiyaw laye wayen gedda, Yalli Moosak: "Laye akko tawco kinnik tamaa dhayittoolih waanish" ake. Moosa laakin dhayittoolih aalih waanisham hidhdhah iloh lamma gedda iloh akko yootokeyaako umbuka xiyawhi afalle Yalla xishma kalite. Ummanti yaacube laye amaa dhayittooko tewce, Yalli laakin kurrayeyaako Moosak: "Wacdi Baarhodde sayto makito" ake.

![](https://cdn.door43.org/obs/jpg/360px/obs-en-14-14.jpg?direct&)

Israa-eel xiyaw marootom iggidiya zibolle hel-yerhxiinimko sarrah, inkoh tamaa Yallih diddeh ugutteh tinem inkoh raben. Sarrah Yalli malammih amaa Wacdi Baarhohi wasanalle ten baahe. Amaa gedda Moosa mangum baarroweh yinemhi sabbatah amaa xiyaw yaymaraxo Yehooshuca doore. Yalli lel Moosah wuli max kayyah iggidin nabii dhirhiyo kinamah yakkeedo wacde akah saye.

![](https://cdn.door43.org/obs/jpg/360px/obs-en-14-15.jpg?direct&)

Sarrah Yalli Moosa amaa Wacdi Baarho yablo ciloh koomak yawco akah warishe. Moosa amaa Wacdi Baarho yuble, adde orobo laakin Yalli akah masmaxinna. Sarrah Moosa rabeyaako Israa-eel xiyaw soddom lellectiya akah yixzinin. Yehooshuca ten cusub manabotta yekke. Yehooshuca Yalla yaamineh yaabbetiya kii yinemhi sabbatah mece manabotta kii yine.

*Quddus kin Kitaabhi zanta: Muuca 16-17; Cadad 10-14; 20; 27; Gabbabbaaacite Sercat 34*

## 15. Wacdi Baarho

https://openbiblestories.org/l/ssy/story-15/

![](https://cdn.door43.org/obs/jpg/360px/obs-en-15-01.jpg?direct&)

Abayshimalle, Israa-eel xiyaw Kancaan, Wacdi Baarho adde oroban waqhte gufe. Yehooshuca quwwa le qaanah dhawrhumteh tine Kancaan katama kin Yerixo lamma idhdhitena dhirhiye. Amaa katamadde wuli Raaxaab akyarhxin sharmuutha tineyaako, amaa lamma idhdhiteena ten sucusseh sarrah lel ten kudusse. Tayim abtem lel Yallah teemeneh kinni. Usun lel Israa-eel xiyaw Yerixo yaylawna yamiitin gedda tee kee tee dikih dhawrhumto kinamah wacde akah sayen.

![](https://cdn.door43.org/obs/jpg/360px/obs-en-15-02.jpg?direct&)

Israa-eel xiyaw amaa Wacdi Baarhodde oroboona Yordaanos weecaako taboona kii yinin. Yalli lel Yehooshucak: "Qashshit afadde yadawna" akyerhxe. Amaa qashshit Yordaanos weecadde yaacatoona erherhishen gedda, aganaako raxa suge yine weeci daw-yerhxe, amaymih lel Israa-eel xiyaw weecaako amaa carhahille kafin baarhodde yeecetiinih taboona dhiicen.

![](https://cdn.door43.org/obs/jpg/360px/obs-en-15-03.jpg?direct&)

Amaa xiyaw Yordaanos weecaako tabeenimko sarrah, Yalli amaa quwa le Yerikhooti katama aaginah yaatukiinim Yehooshucah warishe. Amaa xiyaw Yalli akam yoobbin. Yalli akah tenak yerhxeekah lel caskar kee qashshit max yeenimidde inki waqhte lixa lellec amaa katamah wasanalle gerhen.

![](https://cdn.door43.org/obs/jpg/360px/obs-en-15-04.jpg?direct&)

Sarrah malxinya lellec, Israa-eel xiyaw amaa katamah wasanalle malxinya lellec gerhen. Amaa katamah wasanalle abayshimah gerhak amaa caskar andhaxen, amaa qashshit lel machambara yootokin.

![](https://cdn.door43.org/obs/jpg/360px/obs-en-15-05.jpg?direct&)

Sarrah amaa Yerikho makarteh tine qaana radde! Israa-eel xiyaw lel Yalli akah ten yeemereekah amaa katamadde tinem inkoh dumusen. Amaa bisah racte Raaxaab kee tee dik lel Israa-eel xiyawko yekkin. Kancaanalle maraa tine aki xiyaw Israa-eel xiyaw Yerikho dumuseenim yoobbin gedda Israa-eel xiyaw tena lel yaatukiinimko mangum mashshiiten.

![](https://cdn.door43.org/obs/jpg/360px/obs-en-15-06.jpg?direct&)

Yalli Israa-eel xiyaw amaa Kancaanalle tine xiyawko walaa inki kishoolih wagare abe wayoona ten yeemere. Wuli Kancaan kishoshko kin, Gibcoon xiyaw akyarhxin mari laakin, zirabbiteniyaako Yehooshucak Kancaanko akuula mirixta kin baarhooko kinoonim akah warishen. Yehooshucak lel wagare tenlih aboona akah warishen. Yehooshuca kee Israa-eel xiyaw lel amaa Gibcoon xiyaw awlaako kinoonim Yalla messerinnooni. Sarrah, Yehooshuca amaa maraalih wagare abe.

![](https://cdn.door43.org/obs/jpg/360px/obs-en-15-07.jpg?direct&)

Amaa Gibcoon xiyaw ten doolabeenim yeerhegin gedda Israa-eel xiyaw kurrayen, Yallih nifidde aben cahde kii yinemhi sabbatah lel amaa wagare yiysibitin. Dago waqhtek sarrah, amaa Kancaanalle tine aki Amoor akyarhxin kishoh reezon, amaa Gibcoon xiyaw Israa-eel xiyawlih wagare abeenim yoobbin gedda, sinni maxaarho yezgelliniyaako naba maxaarho akko abeenih Gibcoon xiyaw yootokin. Gibcoon xiyaw Yehooshuca fanah xati farto dhirhiyen.

![](https://cdn.door43.org/obs/jpg/360px/obs-en-15-08.jpg?direct&)

Amaymih, Yehooshuca Israa-eel xiyaw maxaarho yesketteyaako umbuka bar miraadak yixdiriinih Gibcoon xiyaw gufen. Subxe adde saynih lel Amoor xiyaw amymih bexsiitak ten yootokin.

![](https://cdn.door43.org/obs/jpg/360px/obs-en-15-09.jpg?direct&)

Amaa max Israa-eel xiyawuh Yalli akah dhibbaye. Yalli Amoor xiyaw akah yamlalakkiiniikah akko abeyaako mango Amoor xiyaw akah raben naba dhayit barad balih alle xarhe.

![](https://cdn.door43.org/obs/jpg/360px/obs-en-15-10.jpg?direct&)

Israa-eel xiyaw inkoh Amoor xiyaw yascaroona ten dhiica waqhte geyoona ciloh, Yalli ayrotta caranakke inkille akah defeytaakah akko abe. Amaa max, Yalli Israa-eelih naba nasre akah geye.

![](https://cdn.door43.org/obs/jpg/360px/obs-en-15-11.jpg?direct&)

Yalli amaa maxaarho yiscirek sarrah mango Kancaan xiyawhi kishosh Israa-eel xiyaw yaatakoona yekeekettin. Yehooshuca kee Israa-eel xiyaw lel ten yootokiinih ten yeyleyin.

![](https://cdn.door43.org/obs/jpg/360px/obs-en-15-12.jpg?direct&)

Ta dhibaako sarrah, Yalli amaa Wacdi Baarhooko umman kishoh ten ten gide akah yoxoye. Sarrah Yalli Israa-eelih umbuka ishi daratko salaam akah yoxye.

![](https://cdn.door43.org/obs/jpg/360px/obs-en-15-13.jpg?direct&)

Yehooshuca barrowe gedda, umbuka Israa-eel xiyaw yeskette. Sarrah amaa xiyaw Yalli Israa-eel xiyawlih Siinalle abe cahde dhawrhoona lon mas-uuliya ten duhsuuse. Amaa xiyaw lel Yallaalih yakkoona kee Kaa sercat katattawno kinoonimih cahde sayen.

*Quddus kin Kitaabhi zanta: Yehooshuca 1-24*

## 16. Gargeereenit

https://openbiblestories.org/l/ssy/story-16/

![](https://cdn.door43.org/obs/jpg/360px/obs-en-16-01.jpg?direct&)

Yehooshuca rabek sarrah, Israa-eel xiyaw Yallah mangazzayinnooni, Kancaan xiyawko ractem lel hadane kee Yallih sercat akah yaabbiiniikah akmaabinooni. Israa-eel xiyaw Yahweh, rummaahit Yallah, yacbudiinim hidhdhah Kancaan yallitih yacbadoona erherhishen. Israa-eel xiyaw nugus lii miyiniinimhi sabbatah ummanti isheh mecem akkalinnannim abitak yine.

![](https://cdn.door43.org/obs/jpg/360px/obs-en-16-02.jpg?direct&)

Israa-eel xiyaw Yalla yaabboona xineenimhi sabbatah, Yalli ten caduwa akah ten yasciriiniikah akko abeyaako ten yiqhtsice. Ta caduwa Israa-eel xiyawko nuwa akko garacen, ten iraaro akko bayshen, mango mara lel akko yigdifin. Yalli akko yerhxem xineenih, sinni caduwah dhuunumeenimko mango iggiditik sarrah, Israa-eel xiyaw yotoobiinih ten gargeero Yalla esseren.

![](https://cdn.door43.org/obs/jpg/360px/obs-en-16-03.jpg?direct&)

Sarrah Yalli amaa ten caduwaako ten yayyaaceh amaa baarholle salaam baaha gargeereena akah yoxoye. Amaymik sarrah laakin amaa xiyaw Yalla biyashshiiteenih malammih asnaamah yacbadoona erherhishen. Amaymih, Yalli amaa tenah dhayelle tine, Midyaan xiyaw akyarhxin caduwa kin xiyawhi kisho akah ten yasciriiniikah akko aben.

![](https://cdn.door43.org/obs/jpg/360px/obs-en-16-04.jpg?direct&)

Midyaan xiyaw lel malxina iggida Israa-eel xiyaw ilaw inkoh bishshiiten. Israa-eel xiyaw mangum mashshiitenih, Midyaan xiyaw ten geyaanamko galubudde sucuten. Abayshimalle, ten gargeero Yalladde zeeren.

![](https://cdn.door43.org/obs/jpg/360px/obs-en-16-05.jpg?direct&)

Wuli max, Gidcoon akyarhxin Israa-eel xiyawti Midyaan xiyaw akko garacaanamko sucuteh ilaw askiyyidii yine. Yallih malaykatti yemeeteh Gidcoonuk : "Naba bahar kin Yalli koolih yane. Aduwaaki lee Midyaan xiyawko Israa-eel garger" akye.

![](https://cdn.door43.org/obs/jpg/360px/obs-en-16-06.jpg?direct&)

Gidcoon abba asnaamah yitbirrice mazbax lii yine. Yalli Gidcoonuh amaa mazbax yagdalo akah warishe. Gidcoon laakin xiyawko mashshiiteh, baarho bar takkendah ilaale. Sarrah amaa mazbax yigdileyaako dhacto-dhacto akko abe. Amaa asnaamah mazbax alle yinekkehi agaagalle lel cusub mazbax abeyaako Yallah sadaqha alle abe.

![](https://cdn.door43.org/obs/jpg/360px/obs-en-16-07.jpg?direct&)

Malammit max amaa xiyaw amaa mazbax yiggidileyaako cayniteh yinem yublin gedda mangum kurrayen. Gidcoon yagdafoona lel kaa care fanah yedeyin. Kaa abba laakin: "Aymihi sinni yalla xattoona fadhdhaanam? Yalla yekkemko ishe dhawrhoo" ake. Usuk tayim yerhxemhi sabbatah lel Gidcoon magdafinnooni.

![](https://cdn.door43.org/obs/jpg/360px/obs-en-16-08.jpg?direct&)

Sarrah Midyaan xiyaw malammih Israa-eel xiyawko garacoona yemeetin. Usun lel mangah loyyiiminnixoonim kii yinin. Gidcoon Israa-eel xiyawuh tenlih dhibbawna inkidde akah deecime. Israa-eel gargeero ciloh kaa atneefecik yanem yaythammato ciloh Gidcoon Yalla lamma ishaara kaa essere.

![](https://cdn.door43.org/obs/jpg/360px/obs-en-16-09.jpg?direct&)

Erherh ishaarah, Gidcoon ciidot anada baarholle sidisheyaako dhaxiinit asxayta aki baarholle radekkah amaa anadalle bisah raddo Yalla essere. Yalli lel mayim abe. Malammit bar lel baarho unnayteyaako amaa anada kafinih racto esserime. Israa-eel xiyaw Midyaan xiyawko gargeero Yalli kayya yatnaafaco kinam lel Gidcoon ta lamma ishaarah yeemene.

![](https://cdn.door43.org/obs/jpg/360px/obs-en-16-10.jpg?direct&)

Israa-eel xiyaw caskarko 32,000 Gidcoon fanah yemeetinhaaki, Yalli tamari yemmengin ake. Amaymih lel Gidcoon dhibbaako mashshittamko 22,000 ten dik ten yedebbe. Yalli Gidcoonuk ku labha kado gantah mangum yemmengin ake. Amaymih, Gidcoon 300 caskartiyaako bextih ractem inkoh ten dik ten yedebbe.

![](https://cdn.door43.org/obs/jpg/360px/obs-en-16-11.jpg?direct&)

Amaa bar Yalli Gidcoonuk: "Aduwaaki Midyaan xiyaw macaskar fanah obteh usun yarhxiinim toobbemko mashshiita racto makito" ake. Amaymih, amaa bar, Gidcoon amaa macaskar fanah oobeh wuli Midyaan xiyaw caskarti wuli soonoh yublem ishi zoobah warishak yoobbe. Amaa labhattih zoobatti: "Ta soonoh macna Gidcoon maxaarhi Midyaan xiyaw maxaarho yascaroona kinon yaanam kinni!" ake. Gidcoon tayim yoobbe gedda Yallah yucbude.

![](https://cdn.door43.org/obs/jpg/360px/obs-en-16-12.jpg?direct&)

Sarrah Gidcoon ishi caskar fanah gaxeh babbarhi gashsha, kallat citro kee shiig akah yoxoye. Amaa Midyaan xiyaw alle dhiinak yinin macaskar lel makar-ishen. Gidcoon 300 caskartiya Midyaan xiyaw amaa shiig ifo yabliinimko shiig citrorudde hayen.

![](https://cdn.door43.org/obs/jpg/360px/obs-en-16-13.jpg?direct&)

Sarrah, Gidcoon caskar citror inkoh inki waqhte yigdiliniyaako, gar-heeko amaa shiighi gira faaken. Sinni gashshush yootokiinih lel: "Sef Yahweh kee Gidcoonuh!" yeenih andhaxen.

![](https://cdn.door43.org/obs/jpg/360px/obs-en-16-14.jpg?direct&)

Yalli Midyaan xiyaw akah yamlalakkiiniikah akko abeyaako sitta yaatakoona erherhisheenih sittiya yigidifin. Akkanih lel amaa racte Israa-eel xiyawah Midyaan xiyaw yayraraddoona ten carwaako akah deecimen. Tenko mango mara akko yigdifiinih lel amaa ractem Israa-eel xiyaw baarhooko ten hadanen. Amaa max Midyaan xiyawko 120,000 raben. Yalli Israa-eel gargeereh yine.

![](https://cdn.door43.org/obs/jpg/360px/obs-en-16-15.jpg?direct&)

Amaa xiyaw Gidcoonuk nugus akko aboona farhen. Gidcoon amayim aboona akah masmaxinnaaki, amaa usun inkoh Midyaan xiyawko beyeenih yinin dahab khawattim akah yaxawna ten essere. Amaa xiyaw lel Gidcoonuh mango dahab akah yoxoyin.

![](https://cdn.door43.org/obs/jpg/360px/obs-en-16-16.jpg?direct&)

Sarrah Gidcoon amaa dahabko naba qashshi saritak yinetiya balik kin mece sareena abe. Amaa xiyaw laakin tamaa asnaam balik akko abeenih akah yacbadoona erherhishen. Amaymih Yalli Israa-eel asnaamah yucbudiinimhi sabbatah malammih yiqhtsice. Yalli ten cangit akah ten yasciriinikah akko abe. Usun abayshimalle, Yalla malammih xatoh kaa esseren, Yalli lel aki gargeereena akah dhirhiye.

![](https://cdn.door43.org/obs/jpg/360px/obs-en-16-17.jpg?direct&)

Taginalem mango gedda gabbabbaacitte: Israa-eel xiyaw lee ansirik, Yalli lee ten aqhtsicik, usun lee atoobik, Yalli lee gargeereena akah dhirhiyak. Mango iggiditidde, Yalli Israa-eel xiyaw ten cangitko ten naggoyishshe mango gargeereenit dhirhiye.

![](https://cdn.door43.org/obs/jpg/360px/obs-en-16-18.jpg?direct&)

Abayshimalle, amaa xiyaw umman aki wathun nugus akah lii yiniiniika balih, Yalla nugusuh Kaa esseren. Usun dherhtiya kee quwa leh dhibadde ten santisho dhiica nugus farhen. Yalli ta essero makxaninnaahaaki, usun akah kaa essereeniikah akax yoxoye.

*Quddus kin Kitaabhi zanta: Daanayti 1-3; 6-8*

## 17. Yallih cahde Dawudlih

https://openbiblestories.org/l/ssy/story-17/

![](https://cdn.door43.org/obs/jpg/360px/obs-en-17-01.jpg?direct&)

Erherh nugus Israa-eeliya Shaa-uul kii yine. Usuk tamaa xiyaw akah farheeniikah dherhtiya kee carha mecetiya kii yine. Shaa-uul tamaa Israa-eel yuxkume erherh dago iggidit mece nugus kii yine. Sarrah laakin umatiya Yalla aabbinnixeya yekke. Amaymih lel Yalli wuli maxko tiyah kaa caradde nugus yakkeh iggidin aki xiyawto doore.

![](https://cdn.door43.org/obs/jpg/360px/obs-en-17-02.jpg?direct&)

Yalli Shaa-uulti caradde nugus yakko Dawud akyarhxin wuli cindha Israa-eelto doore. Dawud Beetlexemti katamaako kin saci loyna kii yine. Wuli gedda Dawud ishi abbah ciidohi zan abak amaa ciido beeto yemeete lubak kee dibbi yigdifeh yine. Dawud amnanabbinnixetiya kee xaqqi-wanna kin Yallah yaamineh yaabbetiya kii yine.

![](https://cdn.door43.org/obs/jpg/360px/obs-en-17-03.jpg?direct&)

Dawud naba caskarto kee reezanto yekke. Dawud cindhaa burgudda kiikoh wuli Golyaat akyarhxin barhaaytaalih dhibbayeh yine. Golyaat yitcillime caskarto quwa leya, dhedhdhanah lel adooxa mitro kintiya kii yine! Yalli laakin Dawud Golyaat yagdafo kee Israa-eel gargeero kaa xate. Amaymik sarrah, xiyaw akah kaa faylishshamah, Dawud Israa-eel cangitko mango mara yiscire.

![](https://cdn.door43.org/obs/jpg/360px/obs-en-17-04.jpg?direct&)

Shaa-uul xiyaw Dawud tikxinemih mangum ashshiine. Shaa-uul mangole gedda Dawud yagdafo yicikkine. Amaymih lel Dawud Shaa-uulko sucute. Wuli max, Shaa-uul Dawud yagdafo yeh wagiya yine. Shaa-uul tamaa Dawud kaako adde sucutak yine galba fanah yedee, laakin kaa maballinna. Amaa gedda Dawud Shaa-uulko akkaa yagdafo dhiica dhayelle akko yine hanik kaa magdafinna. Amayimhi idhdhah, isheh nugus yakko ciloh kaa yagdafo mafarham kaa yayballaw ciloh Shaa-uul sareenaako cindhaa erherha akko yigrice.

![](https://cdn.door43.org/obs/jpg/360px/obs-en-17-05.jpg?direct&)

Abayshimalle, Shaa-uul dhibadde rabe. Dwud lel Israa-eel nugus yekke. Usuk mece nugus kii yine, xiyaw lel kaa kixinii yinin. Dawududde Yalli adde yebeerekeyaako kaa yiynisire. Dawud mango dhiba dhibbayeh kinni, Israa-eel cangit yascaro lel Yalli kaa xate. Dawud Yerusaalem yibbirheyaako caasima akkabe. Dawud reezah waqhtedde Israa-eel quwa letiya kee gaddaale tekke.

![](https://cdn.door43.org/obs/jpg/360px/obs-en-17-06.jpg?direct&)

Dawud umbuka Israa-eel xiyaw Yallah adde yacbudiinih sadaqha adde aban Maqhdas Care abo farhe. 400 iggidiya takkem, xiyaw Yallah yacbudiinih sadaqha adde abaa yiniinim Moosa abe Rakhbi Tenda kii yine.

![](https://cdn.door43.org/obs/jpg/360px/obs-en-17-07.jpg?direct&)

Yalli laakin Dawud fanah nabii Nataan ta fartoolih kaa dhirhiye: "Atu dhibat xiyawto kitomhi sabbatah, ta Maqhdas Care yoh abto makito. Ku barhi siraaxo kinni. Anu laakin nabaatih kodde abaarako kiyo. Ku zurriyaako wuliti nugus yekkeh yi xiyaw umman geddah yaxkamo kinni!" Dawud zurriyaako umman geddah yaxkamo dhiicati lel Masiix kii bisa yine. Masiix lel umbuka caalamti xiyaw ten zambeeko ten gargeero Yalli Dooretiya letiya kinni.

![](https://cdn.door43.org/obs/jpg/360px/obs-en-17-08.jpg?direct&)

Dawud ta waani yoobbe gedda, naba nabne kee salaaxah cahde akah sayemhi sabbatah akkanih Yalla xamdishiteh faylishite. Yalli tayim anda abo lem Dawud aarhi miyine. Akkik laakin, Masiix mumutuk basolle Israa-eel xiyaw dherh waqhte ilaaloona kii yinin, amyim lel 1,000 iggidiya takkem kii yine.

![](https://cdn.door43.org/obs/jpg/360px/obs-en-17-09.jpg?direct&)

Dawud cadle kee imaanlih mango iggidit yuxkume, Yalli lel adde yebeereke. Yakko kibah abayshimat ishi cumrelle Yalli diddeh naba zambe abe.

![](https://cdn.door43.org/obs/jpg/360px/obs-en-17-10.jpg?direct&)

Wuli lellec Dawud caskar yedeyinh amula xarbidde dhibbaak, ishi rooshanko zibolle kulux-yerhxe gedda wuli cakalitta carhamece numa yuble. Tee migac lel Batshebac kii yine.

![](https://cdn.door43.org/obs/jpg/360px/obs-en-17-11.jpg?direct&)

Akuulalle kulux-yarhxemhi idhdhah, kaa fanah tee baaho wulitiya alle dhirhiye. Teelih dhiinek sarrah lel tee meelah tee dhirhiye. Dago waqhtek sarrah lel Batshebac soonoyittemhi farto Dawud fanah dhirhiite.

![](https://cdn.door43.org/obs/jpg/360px/obs-en-17-12.jpg?direct&)

Uuriyaah akyarhxin Batshebacti bacli lel amaa agiira kin Dawud caskarko tiya kii yine. Dawud Uuriyaah amaa dhibaako akah deecimeh yedeeh ishi numaalih yakko warishe. Uuriyaah laakin aki kaa zoobi amaa dhibadde anik ten xabeh gaxo xine. Sarrah Dawud Uuriyaah amaa dhibadde kaa yedebbeyaako usuk rabo ciloh amaa jeneraalak caduu alle sirii wakaledde kaa hayo akah warishe.

![](https://cdn.door43.org/obs/jpg/360px/obs-en-17-13.jpg?direct&)

Uuriyaah rabek sarrah, Dawud Batshebac marcishite. Sarrah, Dawduh barha akah bahte. Dawud abeh yinemih lel Yalli mangum kurrayeyaako Dawud abeh yine zambi ayidhdha sirii yinem akah warisho Natan akan nabii alle fare. Dawud ishi zambeeko yotoobe, Yalli lel kaa zambe alle xabe. Raace ishi cumrelle, Dawud amaa uma waqhtedde gantah Yalla katayeh Yalli yarhxem yoobbe.

![](https://cdn.door43.org/obs/jpg/360px/obs-en-17-14.jpg?direct&)

Amaa Dawud abe zambehi maqhtsactih laakin, amaa kaa zabali rabe. Amaa raace kaa cumrelle lel Dawud xawazadde zagaxa tine. Dawud xayli lel taana taane. Dawud walaa Yallih umun akke wayemih Yalli ishi wacde mathlaminna. Sarrah Dawud kee Batshebac aki barha baahen. Kaa migac lel Suleymaan kii yine.

*Quddus kin Kitaabhi zanta: 1 Shemuu-eel 10; 15-19; 24; 31; 2 Shemuu-eel 5; 7; 11-12*

## 18. Barhsimte nigsinna

https://openbiblestories.org/l/ssy/story-18/

![](https://cdn.door43.org/obs/jpg/360px/obs-en-18-01.jpg?direct&)

Mango iggiditik sarralle, Dawud rabeyaako kaa Suleymaan kaa barhi Israa-eelille reezo erhirhishe. Yalli Suleymaanlih aalih waanisheyaako ziyaada ayim farham kaa essere. Suleymaan kas kaa essere gedda, Yalli xedeneyaako caalamalle ummanimko kasletiya akkabe. Suleymaan mangum yudruseyaako mango kas le daaniya yekke. Yalli lel naba gaddaale akkabe.

![](https://cdn.door43.org/obs/jpg/360px/obs-en-18-02.jpg?direct&)

Suleymaan tamaa kaa abba abo yexeesebeh nuwaa gantah akko yesketteh yine Maqhdas Care Yerusaalemille abe. Xiyaw kado tamaa Rakhbi Tendadde abaanamhi idhdhah Maqhdas Caredde Yallah yacbadoona kee sadaqha aboona dhiicen. Yalli yemeeteh amaa Maqhdas Caredde yine. Amadde lel ishi xiyawlih maraa yine.

![](https://cdn.door43.org/obs/jpg/360px/obs-en-18-03.jpg?direct&)

Suleymaan laakin aki wathunhi sayyo kixinii yine. Mango sayyo, wuli 1000 takkeya, marcisheteyaako lel Yalla yaabbo xine! Ta sayyooko mango mari lel aki wathunko temeetem yekkiinih sinni yallit sinneelih bahiteniyaako sinni yallit hi cibaada daw-ishinnixem kii yinin.

![](https://cdn.door43.org/obs/jpg/360px/obs-en-18-04.jpg?direct&)

Yalli Suleymaanalle mangum alle kurrayeyaako Suleymaan thalumehi maqhtsactih Israa-eel wathan Suleymaan rabiiko sarrah lamma nigsinnalle barhisho kinamah cahde saye.

![](https://cdn.door43.org/obs/jpg/360px/obs-en-18-05.jpg?direct&)

Suleymaan rabek sarrah Rexabcaam kaa barhi nugus yekke. Rexabcaam duuda kii yine. Umbuka Israa-eel dik hi xiyaw kaa yaynagasoona inkidde yekkiinih lel nugus akkaben. Suleymaan mangum ten ayshuqhuli yinem kee mango gibre ten askifilii yinemhi tharaaco lel Rexabcaam fanah baahen.

![](https://cdn.door43.org/obs/jpg/360px/obs-en-18-06.jpg?direct&)

Rexabcaam lel ishi duudiinoh: "Yabba mangum sin yuyshuqhulem tekkelinhaaki, anu kaako ziyaada sin ayshaqhalo kiyo, kaako umaatih lel sin aqhtsaco kiyo" yeh eldeheye.

![](https://cdn.door43.org/obs/jpg/360px/obs-en-18-07.jpg?direct&)

Israa-eel dikko tamana kisho Rexabcaam diddeh uguten. Lamma kisho bisah kaalih raacen. Ta lamma kishosh lel Yahuudaati nigsinna yekkin.

![](https://cdn.door43.org/obs/jpg/360px/obs-en-18-08.jpg?direct&)

Tamaa aki Israa-eel dik hi tamana kisho Rexabcaam diddeh ugutteya Yaarobcaam akyan nugus yesseecin. Sinni nigsinna lel amaa baarhoh qilbat zifralle dhisheniyaako Israa-eel nigsinna aken.

![](https://cdn.door43.org/obs/jpg/360px/obs-en-18-09.jpg?direct&)

Yaarobcaam Yallih diddeh uguteyaako amaa xiyaw zambedde akah saanaakah akkabe. Kaa xiyaw Yahuudaati nigsinnahi Maqhdas Caredde Yallah yacbudiinim hidhdhah kah yacbadoona lamma asnaam akah abe.

![](https://cdn.door43.org/obs/jpg/360px/obs-en-18-10.jpg?direct&)

Yahuudaati nigsinna kee Israa-eel le caduwa yekkiniyaako wuli gedda sittiyaalih angaaci yinin.

![](https://cdn.door43.org/obs/jpg/360px/obs-en-18-11.jpg?direct&)

Cusub Israa-eel nigsinnadde, nuguusa inkoh uma mara kii yinin. Ta nuguusaako mango mari lel aki ten caradde nuguusa takko fadhdha Israa-eel xiyaw gabah rabtem kinon.

![](https://cdn.door43.org/obs/jpg/360px/obs-en-18-12.jpg?direct&)

Inkoh amaa nuguusa kee amaa Israa-eel nigsinnah xiyawko mango mari asnaamah yucbudin. Ten cibaada asnaamah abeniya lel zina kee wuliili gedda irro gantah asiddiqhi yinin.

![](https://cdn.door43.org/obs/jpg/360px/obs-en-18-13.jpg?direct&)

Yahuudaati nuguusa Dawudko raddam kinon. Ta nuguusaako gari mece mara, cadleh taxkumeh Yallah tacbudeya kii yinin. Yahuudaati nuguusaako mango mari uma mara, masxittem kee asnaamah tacbudem kii yinin. Amaa nuguusaako gari inkinnah sinni irro asnaamah tasiddiqhem kii yinin. Yahuudaati xiyawko mango mari gantah Yallih diddeh uguteenih aki yallitih tucbudem kinon.

*Quddus kin Kitaabhi zanta: 1 Nuguusa 1-6; 11-12*

## 19. Nobowa

https://openbiblestories.org/l/ssy/story-19/

![](https://cdn.door43.org/obs/jpg/360px/obs-en-19-01.jpg?direct&)

Israa-eel xiyaw taarikhille, Yalli nobowa akah dhirhiye. Amaa nobowa farto Yallaako yaabbiinih Yallih farto amaa xiyawah warishaa yinin.

![](https://cdn.door43.org/obs/jpg/360px/obs-en-19-02.jpg?direct&)

Ax-aab Israa-eel nigsinnahi nugus kii yine gedda, Eliyaas nabii kii yine. Ax-aab uma labhatto Bacal akyarhxin asnaamh yacbadoona xiyaw dufuffuwaya kii yine. Eliyaas Ax-aabak: "Anu erhxeh maarhige Israa-eel nigsinnalle rob yakko walaa naqhca tannaw maki" ake. Tayim Ax-aab mangum kaa kurrayishshe.

![](https://cdn.door43.org/obs/jpg/360px/obs-en-19-03.jpg?direct&)

Yalli Eliyaasak amaa kaa yagdafo farhe Ax-aabko sucuto ciloh wuli zibo kin gade fanah yadaw akah warishe. Umman kaso kee dhaxiineh kimbir folo kee xazo akah baaha yine. Ax-aab kee kaa maxaarho Eliyaasa wagiyenhaaki kaa geyoona mirhiicinnooni. Cabar mangum yisriyemhi sabbatah lel abayshimalle gadwa ganatah kafte.

![](https://cdn.door43.org/obs/jpg/360px/obs-en-19-04.jpg?direct&)

Amaymih Eliyaas wuli xuggi wathan fanah yedee. Wuli gubna kee tee barha amaa dik-hiya lel robti waytoh saye cululhi sabbatah macaashaako sikko yekkiinih yinin. Usun laakin Eliyaas baclayshen, Yalli lel ten xarich citro kee ten zeet berenle caduruh foyyayekkah akah yoxowe. Amaa muluu culul waqhtedde lel folo lii yinin. Eliyaas lel amalle wuli iggidit suge.

![](https://cdn.door43.org/obs/jpg/360px/obs-en-19-05.jpg?direct&)

Adooxa iggida kee abrhak sarrah, Yalli malammih rob dhirhiyo farhemhi sabbatah Eliyaasak Israa-eel nigsinna fanah gaxeyaako Ax-aablih waanisho akah warishe. Ax-aab Eliyaasa yuble gedda: "Taykito, ku zagaxat bacla!" ake, Eliyaas lel: "Koyya kinni zagaxat bacli! Atu rummaahit Yalla kin Yahweh xabteyaako Bacalah tucbude. Ta umbuka Israa-eel nigsinnah xiyaw lel Karmeel koomak yawcoonaaki ten bah" yeh alle deheye.

![](https://cdn.door43.org/obs/jpg/360px/obs-en-19-06.jpg?direct&)

Amaa Israa-eel nigsinnah xiyaw inkoh, Bacal ti 450 nobowatiya adde anik, Karmeel koomak koroona yemeetin. Eliyaas amaa xiyawak: "Sinni xangal manda fanah asqiyyirii martoona kitiini? Yahweh Yalla yekkemko, kayyah ukhdumanta! Bacal Yalla yekkemko lel kayya ukhdumanta!" akye.

![](https://cdn.door43.org/obs/jpg/360px/obs-en-19-07.jpg?direct&)

Sarrah Eliyaas Bacal nobowak: "Awur turxudiinih sadaqhah isqirribanta, gira laakin mibololishina. Anu lel amaa ginah abo kiyo. Tamaa girah radde radde yaxaye Yalli rummaahit Yalla kinni" ake. Amaa gedda Bacal qashshit sadaqha yisqirribin, gira laakin mibololishinnooni.

![](https://cdn.door43.org/obs/jpg/360px/obs-en-19-08.jpg?direct&)

Amaymik sarrah, amaa Bacal nobowa dhaaco abeniyaako: " Bacal, noobbaa!" yerhxin. Muluu max dhaacoh cadadak aseenih, roomimih gantah sinne yigricin hanik walaa inki radde migeyinnooni.

![](https://cdn.door43.org/obs/jpg/360px/obs-en-19-09.jpg?direct&)

Sarroorimaako lel Eliyaas Yallah sadaqha yisqirribe. Sarrah amaa xiyawak amaa xazo, boxo kee amaa mazbax wakalih baarho gantah inkoh unnaytandah layeko naba lammakee taman citrotiya alle xarhoona akah warishe.

![](https://cdn.door43.org/obs/jpg/360px/obs-en-19-10.jpg?direct&)

Sarrah lel Eliyaas taginah dhaaco abe: "Yahweh; Abraahim, Isxaaq kee Yacqoob Yalla, kaafa Israa-eel Yalla kitom kee anu ku khaddaam kiyom ni uybullu. Ta xiyaw atu rummaahit Yalla kitom yaamanoonaaki radde yoh uxuu."

![](https://cdn.door43.org/obs/jpg/360px/obs-en-19-11.jpg?direct&)

Akkanih, gira caranko raddeyaako amaa xazo, boxo, dhayit, cuduf kee amaa mazbax wakalille tine laye inkoh xararishshe. Amaa xiyaw tayim yublin gedda, baarholle radeenih: "Yahweh Yalla kinni! Yahweh Yalla kinni!" yerhxin.

![](https://cdn.door43.org/obs/jpg/360px/obs-en-19-12.jpg?direct&)

Sarrah Eliyaas: "Tamaa Bacal nobowaako walaa tii akko kude wayo!" yerhxe. Amaa gedda amaa xiyaw amaa Bacal nobowa yibbirhiinih amakkeeko ten beyeniyaako ten yigdifin.

![](https://cdn.door43.org/obs/jpg/360px/obs-en-19-13.jpg?direct&)

Sarrah Eliyaas nugus Ax-aabak: "Rob amiitik yanemhi sabbatah akkanih katama fanah gax" akye. Amalle anik lel caran dattummih yimmingideyaako cilish rob rado erherhishe. Yahweh maa cabar asac-isheyaako rummaahit Yalla kinam yuybulluwe.

![](https://cdn.door43.org/obs/jpg/360px/obs-en-19-14.jpg?direct&)

Eliyaas waqhteeko sarrah, Yalli Eliishaac akan xiyawto nabi yakko kaa doore. Yalli Eliishaacah abeh mango bexsishsha xaaja yuybulluwe. Amaa bexsishshamko wulim lel tamaa qarbat laxuu lii yine Nacmaan akyarhxin caduu caskar-hi mas-uulul tekkem kii yine. Eliishaac ware lii yinemhi sabbatah lel kaa fanah yedeyeyaako kaa uruso Eliishaac essere. Eliishaac lel Nacamaanak malxina waqhte Yordaanos weecadde ishe dhumuso akah warishe.

![](https://cdn.door43.org/obs/jpg/360px/obs-en-19-15.jpg?direct&)

Erherhih Nacamaan amayim qashasha yekkelemhi sabbatah kurraye. Sarrah laakin ishi xasab yisqiyyireyaako malxina waqhte amaa Yordaanos weecadde ishe dhumuse. Abayshimat waqhte amaa layeko yewce gedda kaa qarbat inkoh urteh tine. Yalli kaa uruseh yine.

![](https://cdn.door43.org/obs/jpg/360px/obs-en-19-16.jpg?direct&)

Yalli aki mango nobowa dhirhiye. Inkoh lel amaa xiyawak asnaamah yacbudiinim xabeenih sittiyahi cadle kee raxma yaybulluynim erherhishoona akah warishen. Amaa nobowa xiyaw umaani abaanam xabeenih Yalla yaabbiinim erherhishe waynimko, Yalli cagab wannunuh ten yafrado kinam kee ten yaqhtsaco kinamah teh asuusen.

![](https://cdn.door43.org/obs/jpg/360px/obs-en-19-17.jpg?direct&)

Mango waqhte amaa xiyaw Yalla mikabbaatinnooni. Wuliili gedda amaa nobowa yaaziinih ten agdifii gantah yinin. Wuli gedda, nabi Ermiyaas wuli kafe ceeladde kaa haynih amadde rabo kaa xaben. Amaa ceelih zaballe tine kalladde yumundhuce hanik laakin sarrah amaa nugus alle raxmateyaako Ermiyaas rabekkah amaa ceelaako kaa yayyaacoona ishi khaddamte akah dhirhiye.

![](https://cdn.door43.org/obs/jpg/360px/obs-en-19-18.jpg?direct&)

Amaa nobowa amaa xiyaw walaa ten yancaboona kibah Yallah waanishaanam mixabinnooni. Amaa xiyaw atoobe waynimko Yalli ten yaylaw kinamah ten asuusen. Yallih Masiix yamaato kinam gantah lel xiyaw duhsuuseenih kinon.

*Quddus kin Kitaabhi zanta: 1 Nuguusa 16-18; 2 Nuguusa 5; Ermiyaas 38*

## 20. Dulayyo kee gaxnan

https://openbiblestories.org/l/ssy/story-20/

![](https://cdn.door43.org/obs/jpg/360px/obs-en-20-01.jpg?direct&)

Israa-eel nigsinna kee Yahuudaati nigsinna inkoh Yallih nifidde zambe abeenih kinon. Yalli Siinalle tenlih abe wacde yithlimiinih kinon. Yalli ishi nobowa alle dhirhiyem lel ten asuuseenih yataaboona kee malammih Yallah yacbadoona kii yine, laakin Yalla yaabboona xinen.

![](https://cdn.door43.org/obs/jpg/360px/obs-en-20-02.jpg?direct&)

Amaymih Yalli ten caduwa akah ten yasciriiniikah akko abeyaako lammik ten yiqhtsice. Ashuur doola, dhacumah raxmahiniya, Israa-eel nigsinnak coona akteyyeece. Ashuur xiyaw Israa-eel nigsinadde mango xiyaw yigdifin, tamficemko takkanna inkoh beyen, dikko naba abrha lel xararishen.

![](https://cdn.door43.org/obs/jpg/360px/obs-en-20-03.jpg?direct&)

Amaa Ashuur mas-uuliin, gaddaalit dhicle mara inkoh yeskettiinih Ashuur bishshiiten. Israa-eel nigsinnalle amaa rabiiko racte baaxentit kin mari bisah raacen.

![](https://cdn.door43.org/obs/jpg/360px/obs-en-20-04.jpg?direct&)

Sarrah Ashuur xiyaw amaa Israa-eel nigsinna alle tinelle sigoona aki godobo alle baahen. Amaa godobo coona yekkeh yine katamum malammih siraaxen, amalle racteh tine Israa-eel xiyaw lel marcishiten. Amaa godobo marcishitteh tine Israa-eel xiyaw zurriyak lel Samaariyah xiyaw akkay yinin.

![](https://cdn.door43.org/obs/jpg/360px/obs-en-20-05.jpg?direct&)

Yahuudaati nigsinnah xiyaw Yalli Israa-eel nigsinnah xiyaw akah aamine waynih kaa aabbe wayen gedda aaginah ten yiqhtsiceh yinem yublin. Usun laakin kado gantah, Kacnaan xiyawhi yallit adde anik asnaamah yucbudin. Ten asuusoona Yalli nobowa dhirhiye, laakin kaa yaabboona xinen.

![](https://cdn.door43.org/obs/jpg/360px/obs-en-20-06.jpg?direct&)

Ashuur xiyaw Israa-eel nigsinna dumuseenimko 100 iggidiyak sarrah, Yahuudaati nigsinna yaatako Yalli Baabiloon nugus kin Nebuukadnetsar dhirhiye. Baabiloon quwa le doola kii tine. Yahuudaati nugus Nebuukadnetsar khaddaam yekkeh iggida-iggidah solaadi akah yakfalo yittifiqhe.

![](https://cdn.door43.org/obs/jpg/360px/obs-en-20-07.jpg?direct&)

Dago iggiditik sarrah laakin, Yahuudaati nugus Baabiloon nugus hi diddeh ugute. Amaymih Baabiloon xiyaw gaxeenih Yahuudaati nigsinna yootokin. Yerusaalem katama yibbirhin, amaa Maqhdas Care dumuseenih amaa katamaa kee Maqhdas Carih gadda bishshiiten.

![](https://cdn.door43.org/obs/jpg/360px/obs-en-20-08.jpg?direct&)

Amaa Yahuudaati nugus diddeh ugutemhi maqhtsactih lel Nebuukadnetsar caskar kaa cindham kaa afalle akko yigdifiniyaako sarrah kaako lel inti akko xarhen. Amaymik sarrah, amaa nusug Baabiloon xabshedde rabo amulalle kaa beyen.

![](https://cdn.door43.org/obs/jpg/360px/obs-en-20-09.jpg?direct&)

Nebuukadnetsar kee kaa maxaarho tamaa baaxentit kin mara bisa zariica yakhdamoona caazalle akko xabeniyaako Yahuudaati nigsinnah xiyaw inkoh Baabiloon fanah ten beyen. Amaa Yallih xiyaw Wacdi Baarho xabeenih yadawna adde yinqissibin waqhtek lel 'Dulayyo' akyarhxin.

![](https://cdn.door43.org/obs/jpg/360px/obs-en-20-10.jpg?direct&)

Yalli ishi xiyaw tamaa aben zambeh qitscatah dulayyolle ten beyoo kibah, Usuk ten mibiyashshiitinna, ishi wacde yakkeedo mixabinna. Yalli ishi dhawdham kee ishi nobowah abeh eelih waanisham mixabinna. Malxintomon iggidiyak sarrah amaa Wacdi Baarho fanah malammih gaxoona kinoonimih lel wacde akah saye.

![](https://cdn.door43.org/obs/jpg/360px/obs-en-20-11.jpg?direct&)

Malxintomon iggidiya takkemko sarrah, Koresh akyarhxin Faarisiin nugus Baabiloon yiscireyaako Baabiloon doola Faarisiin doolah temxeelefe. Ta gedda Israa-eel xiyawak Yahuud akkay yinin. Tenko mango mari lel sinni cumre inkoh Baabiloonulle maren. Wuli dago Yahuud baarrit bisah Yahuudaati baarho yizzikkiren.

![](https://cdn.door43.org/obs/jpg/360px/obs-en-20-12.jpg?direct&)

Faarisiin doola quwa lii tine, tamaa yagziin marah laakin raxma lii yinin. Koresh Faarisiin nugus yekkemko dago waqhtek sarralle 'akkinnan Yahuuddi Faarisiya xabeyaako Yahuuda fanah gaxo farhaya yinniyemko yadaw dhiica' yarhxe amre yoxoye. Maqhdas Care malammih siraaxitoona gantah solaadi akah yoxoye! Amaymih, malxintomon iggidiyah dulayyok sarrah, wuli cindhaa filco takkem Yahuudko Yahuudaati Yerusaalemille gaxen.

![](https://cdn.door43.org/obs/jpg/360px/obs-en-20-13.jpg?direct&)

Amaa xiyaw Yerusaalem gufen gedda, amaa Maqhdas Care mallammih siraaxeenih amaa katamaako yakkeedo qaana akko makishen. Aki xiyawuh angizzii yiniinih walaa yakko kibah, malammih amaa Wacdi Baarholle marak Maqhdas Caredde Yallah acbudi yinin.

*Quddus kin Kitaabhi zanta: 2 Nuguusa 17; 24-25; 2 Warit 36; Cezraa 1-10; Nexemyaa 1-13*

## 21. Yalli Masiix yaxaw wacde saa

https://openbiblestories.org/l/ssy/story-21/

![](https://cdn.door43.org/obs/jpg/360px/obs-en-21-01.jpg?direct&)

Tamaa erhedhdhooko, Yalli Masiix dhirhiyo yixiggire. Erherh Masiix wacdi Adam kee Xaawalle yemeete. Yalli tamaa caroorat amo yabarchaqho le Xaawat zurriyatti yaabako kinamah wacde saye. Amaa Xaawa doolabte caroora lel Sheethan kii yine. Amaa wacdi macna lel Masiix Sheethan sittadde yascaro kinam kii yine.

![](https://cdn.door43.org/obs/jpg/360px/obs-en-21-02.jpg?direct&)

Yalli Abraahimih kaa araxah umbuka xiyaw baraka geyoona kinoonimih wacde akah saye. Ta baraka lel niiroh Masiix yamiite gedda kaamil takko kii yine. Usuk lel xiyaw umbuka xiyawhi cayna caalamalle taneya gargeerimoona ten dhicshiisho kii yine.

![](https://cdn.door43.org/obs/jpg/360px/obs-en-21-03.jpg?direct&)

Yalli Moosah niiroh aki kayyah higgidin nabii baaho kinamah wacde akah sayeh yine. Tayim Masiix sabbatah sarrah aki gedda yakko le wacde kii yine.

![](https://cdn.door43.org/obs/jpg/360px/obs-en-21-04.jpg?direct&)

Yalli Dawuduh kaa zurriyaako wuliti ummangedda Yallih xiyawah nugus yakko kinamah wacde akah sayeh yine. Tayim lel Masiix Dawud zurriyaako wulitiya yakko kinamhi macna leya.

![](https://cdn.door43.org/obs/jpg/360px/obs-en-21-05.jpg?direct&)

Nabii Ermiyaas araxah abeh Yalli Cusub Cahde abo kii yine, laakin amaa Cahdi Yalli Israa-eellih Siinalle abe wacde balih yakko maki. Cusub Cahdi lel Yalli xiyaw afcaadodde sercat yaktabo, xiyaw Yalla nif kee nifih yaarhagoona usun kaa xiyaw yakkoona, Yalli lel ten zabe alle xabo kii yine. Masiix lel amaa Cusub Cahde erherhisho kii yine.

![](https://cdn.door43.org/obs/jpg/360px/obs-en-21-06.jpg?direct&)

Yalli nobowa yakkeedo Masiix nabii, qashshe kee nugus yakko kinam yerhxiinih kinon. Nabii akyaanam Yallih waani yaabbeyaako Yallih waani xiyawah warishatiya kinni. Tamaa Yalli dhirhiyo wacde akah saye Masiix lel naqhuus hin nabii yakko kii yine.

![](https://cdn.door43.org/obs/jpg/360px/obs-en-21-07.jpg?direct&)

Israa-eel xiyaw qashshit ten zambih maqhtsactih xiyaw idhdhadde Yallah sadaqha abaa yinin. Qashshit xiyawah yakkeedo Yalla dhaacita yinin. Amaa Masiix lel naqhuus hin naba qashshe ishi nabse Yallah yasaddaqho leya kii yine.

![](https://cdn.door43.org/obs/jpg/360px/obs-en-21-08.jpg?direct&)

Nugus lel wuli nigsinnat nugus yekkeh xiyaw afridii yine. Amaa Masiix lel amaa ishi abo kin Dawud nugus kurselle defeyo le naqhuus hin nugus kii yine. Usuk Umbuka caalamalle umman geddah reezeyaako meceetih yifrideh xaqhqhi firde yaxaw kinni.

![](https://cdn.door43.org/obs/jpg/360px/obs-en-21-09.jpg?direct&)

Yallih nobowa Masiix sabbatah mangum takko kinni yeenih yinin. Nabii Mal-aaki Masiix amiitekkah naba nabii yamaato kinam yookomeh yerhxeh yine. Nabii Isayas lel Masiix wuli barhäk tane barhäako yaabako kinam yiywissiyeh yine. Nabii Miikaayaahu lel Masiix Beetlexem akan katamalle yaabako kinam yiywissiyeh yine.

![](https://cdn.door43.org/obs/jpg/360px/obs-en-21-10.jpg?direct&)

Nabii Isayas Masiix Galiilalle defeyeyaako tixzine xiyawah yayrahaw kee tindhibbirhemih xurriya baaheyaako timxibbishem yayyaaco kinam warisheh yine. Usuk gaxisheh Masiix laxutte xiyaw kee cokka hin mara, tablo tantam, waanishsho tantam, amayim balih tadaw tantam uruso kinam yiywissiyeh yine.

![](https://cdn.door43.org/obs/jpg/360px/obs-en-21-11.jpg?direct&)

Nabii Isayas Masiix walaa inki sabab hinnim yamnaccabo kee xinnitimo kinam yakkeedo warisheh yine. Aki nobowa yakkeedo tamaa kaa yagdife mari kaa saralle qumaar digiroona kinoonim kee kaa kaxantooli kaa yasxaw kinam warisheenih yinin. Nabii Zakariyya lel amaa kaa kaxantooli Masiix yosxoyemih fiddat solaadih soddom tacriifatiya akah tamxawo kinam yookomeh warisheh yine.

![](https://cdn.door43.org/obs/jpg/360px/obs-en-21-12.jpg?direct&)

Nobowa Masiix aaginah rabo kinam warisheenih yinin. Nabii Isayas xiyaw Masiixille thuf alle yarhxoona, alle digiroona kee kaa yaatakoona kinoonim warisheh yine. Umaaniiko inkim maabinna hanik, kaa fiirishoona kee naba cazaab kin waaxeltah rabo kinam warisheh yine.

![](https://cdn.door43.org/obs/jpg/360px/obs-en-21-13.jpg?direct&)

Nobowa, Masiix walaa inki nuqhuus hin zambe male yakko kinam yerhxiinih yinin. Aki xiyawhi zambeh lel maqhtsacti kabbaato kii yine. Kaa maqhtsacti Yalla kee xiyawhi fanadde salaam bahto kii tine. Tayimhi sabbatah lel Masiix yaxirmichem Yallih farhi kii tine.

![](https://cdn.door43.org/obs/jpg/360px/obs-en-21-14.jpg?direct&)

Nobowa amaa Masiix rabo kinam kee Yalli rabiiko kaa uguso kinam yerhxiinih kinon. Masiix rabi kee kaa ugutuh Yalli zambi-wannunhi gargerti ishi xagara yiskimileyaako Cusub Cahde erherhisho kii yine.

![](https://cdn.door43.org/obs/jpg/360px/obs-en-21-15.jpg?direct&)

Yalli nobowa Masiix zacabah mango xaaja ten yuybulluwe, Masiix laakin amaa nobowaako walaa inketti waqhtedde maamaatinna. Tamaa nobowa yerhxiinimko sarroorimattiyaako sarralle 400 iggidiyaako ziyaada kale gedda, amaa ishi xaqqi waqhtedde, Yalli Masiix ta caalamalle dhirhiye.

*Quddus kin Kitaabhi zanta: Erhedhdho 3:15; 12:1-3; Gabbabbaaacite Sercat 18:15; 2 Shemuu-eel 7; Ermiyaas 31; Isayas 59:16; Daaniy-eel 7; Mal-aakii 4:5; Isayas 7:14; Miikaayaahu 5:2; Isayas 9:1-7; 35:3-5; 61; 53; Zaabuur 22:18; 35:19; 69:4; 41:9; Zakariyya 11:12-13; Isayas 50:6; Zaabuur 16:10-11*

## 22. Yohannis ubka

https://openbiblestories.org/l/ssy/story-22/

![](https://cdn.door43.org/obs/jpg/360px/obs-en-22-01.jpg?direct&)

Basoh, Yalli ishi xiyawlih ishi malaykut kee nobowah abeh aalih zidhdhiimeh yine. Sarrah laakin ten zidhdhiimekkah 400 iggidiya takkem suge. Gar-heeko lel wuli malaykatti Yallih fartoolih Zakariyya akyarhxin baarra kin qashshelle yemeete. Zakariyya kee kaa numa kin Elsaabeeth yallih xiyaw kii yininhaaki ishi dhalaa lii mitine.

![](https://cdn.door43.org/obs/jpg/360px/obs-en-22-02.jpg?direct&)

Amaa malaykatti Zakariyyak: "Ku numa barha bahto kinni. Yohannis lel aktarhxo kito. Usuk Quddus kin Ufayeh yammaago kinni. Masiixih lel arax yasqarrabo kinni!" akyerhxe. Zakariyya: "Yoo kee yi numa cindham bahnamko mangum baarroyneh nane! Tayim takko kinam lel aaginah aarhago kinni?" yeh alle deheye.

![](https://cdn.door43.org/obs/jpg/360px/obs-en-22-03.jpg?direct&)

Amaa malaykatti Zakariyyak: "Ta mece ware koh baaho yi fartem Yalla kinni. Yi maamanitomhi sabbatah lel amaa ayci yaabukendah waanishsho dhicto makito" ake. Akkanih lel Zakariyya waani taane. Amaymik sarrah amaa malaykatti Zakariyya xabeh yedee. Toyek sarrah, Zakariyya careh gaxe, kaa numa lel soonowa tekke.

![](https://cdn.door43.org/obs/jpg/360px/obs-en-22-04.jpg?direct&)

Elsaabeeth lix alsih soonowa tekke gedda, amaa awwal malaykatti Elsaabeeth ahlentö kin Maryamalle yemeete. Ishi barhäk tine, Yoosuf akyan labhattodde marcishimto lel timliisheh tine. Amaa malaykatti: "Atu soonowa takko kito, barha lel bahto kito. Yeesus lel migacah akah tayyaaco kito. Usuk Nabamko Naba Yallih Barha yakko kinni. Umman gedda lel reezo kinni" akye.

![](https://cdn.door43.org/obs/jpg/360px/obs-en-22-05.jpg?direct&)

Maryam: "Anu barhäk aniyuk tayim aaginah takko dhicta?" teh alle deheyte. Amaa malaykatti: "Quddus kin Ufay kolle yemeeteyaako Yalli xayli ku silaalisho kinni. Amaymih lel amaa ayci Yallih Barha kin quddus yakko kinni" yeh akah caddoyshe. Maryam lel teemeneyaako amaa malaykatti akko yerhxem kabbatte.

![](https://cdn.door43.org/obs/jpg/360px/obs-en-22-06.jpg?direct&)

Amaymi sarrah akkanih amaa malaykatti Maryamlih aalih waanisheyaako Elsaabeeth gufto tedee. Elsaabeeth Maryam salaamta toobbe geddaakoh tee ayci tee addadde tirtiire. Amaa sayyo Yallih akah abeh yinemih inkidde cafaden. Maryam lel Elsaabeethlih adooxa alsa sugtek sarrah ishi meelah gaxte.

![](https://cdn.door43.org/obs/jpg/360px/obs-en-22-07.jpg?direct&)

Elsaabeeth barha bahtek sarrah amaa malaykatti akah ten yeemereekah Elsaabeeth kee Zakariyya amaa aycak migacah Yohannis aken. Sarrah Zakariyya Yalli kaa wanshiishe. Zakariyya lel: "Yalli ishi xiyaw yizzikkiremhi sabbatah xamde akah takko! Atu yi barhak lel Nabamko Naba Yallih nabii tekkeyaako xiyaw sinni zambeeko cafuuka akah geyaanaakah akah warisho letiya kito!" yerhxe.

*Quddus kin Kitaabhi zanta: Luukas 1*

## 23. Yeesus ubka

https://openbiblestories.org/l/ssy/story-23/

![](https://cdn.door43.org/obs/jpg/360px/obs-en-23-01.jpg?direct&)

Maryam wuli xaqqi-wanna kin xiyawto Yoosuf akyaniyadde timliisheh tine. Usuk Maryam soonoyittem yoobbe gedda, kaa ayca makinam yeerhegeh yine. Maryam xoolaysho mifarhinnaaki suctodde tee xabo yixiggire. Usuk amayim abekkah laakin wuli malaykatti soonoh alle yemeete.

![](https://cdn.door43.org/obs/jpg/360px/obs-en-23-02.jpg?direct&)

Amaa malaykatti: "Yoosufo, Maryamak ishi numa akkabitto sikif-marhxin. Tee addadde yane ayci Quddus kin Ufayko kinni. Ishi lel barha bahto kinni. Migacah Yeesus akko erhex. ('Yeesus' yaanam, Yahweh gargeera' yaanam kinni). Amayim lel Usuk xiyaw ten zambeeko ten gargeero kinamhi sabbatah kinni.

![](https://cdn.door43.org/obs/jpg/360px/obs-en-23-03.jpg?direct&)

Amaymih, Yoosuf Maryam marcishiteh ishi numa akkabo bishshiite, ishi umultandah laakin teelih mirhiino.

![](https://cdn.door43.org/obs/jpg/360px/obs-en-23-04.jpg?direct&)

Maryam umulto kab-terhxe gedda, Roomaati doola ummanti ishi-ishi abbah dik yedeeh yankattabo akah warishe. Maryam kee Yoosuf abi kaa dik Beetlexem akkin Dawud kii yinemhi sabbatah tamaa alle maraa yinin Naazretko Beetlexem fanah dherh arax yadawna kii yinin.

![](https://cdn.door43.org/obs/jpg/360px/obs-en-23-05.jpg?direct&)

Maryam Beetlexemille temeete gedda adde defeyta makaano lii mitine. Usun makaanoh geyoona dhiiceenim lel wuli saci care bisa kii yine. Amaa aycah yakke carat aalle wayen gedda wuli makal makaanodde yooboke. Migacah lel Yeesus akah yeyyeecin.

![](https://cdn.door43.org/obs/jpg/360px/obs-en-23-06.jpg?direct&)

Amaa bar, amaa wakalih dhagigille sinni sacih zan abitta loynit yinin. Gar-heeko lel wuli ifisha malaykatti akah yumbulluweyaako mashshiiten. Amaa malaykatti: "Wuli mece ware sinah liyomhi sabbatah mimashshiitina. Masiix, Maddari, Beetlexemille yoobokeh yane!"

![](https://cdn.door43.org/obs/jpg/360px/obs-en-23-07.jpg?direct&)

"Aduwantaaki amaa ayca wagiyanta. Wuli makal makaanodde wuli sareenadde yuntulluleh sinah sugo kinni" akye. Saadifih lel: "Carshelle nabne Yallah takkoo, baarholle usuk kixin xiyawah salaam yakkoo” arhxii Yalla faylishsha malaykutuh caran yemmeegeh yine.

![](https://cdn.door43.org/obs/jpg/360px/obs-en-23-08.jpg?direct&)

Amaa loynit akkanih amaa Yeesus alle yinelle yemeetin gedda, tamaa malaykatti kah tenak yerhxeh yineekah, wuli makal makaanodde carhah gaxeh kaa geyen. Usun mangum xedenen. Amaa saci loynit lel yubliinim kee yoobbiinimih sinni Yalla faylishitak tamaa ten ciido alle tine makaanolle gaxen.

![](https://cdn.door43.org/obs/jpg/360px/obs-en-23-09.jpg?direct&)

Dago waqhtek sarrah, kas-le mari aki ayrommaaxat dherh wathunko cibra kin xutukta caranalle yublin. Yahuud cusub nugus yoobokeh yinem lel yeerhegin. Amaymih, ta nugus yabloona dherh baarho kallaaxen. Beetlexemille yemeetiinih lel Yeesus kee kaa dhaltoyya adde yinin care geyen.

![](https://cdn.door43.org/obs/jpg/360px/obs-en-23-10.jpg?direct&)

Amaa kas-le xiyaw Yeesus kaa inaalih kaa yublin gedda, kumeenih akah yucbudin. Yeesusuh lel limo naba muttuxuwa akah yoxoyin. Amaymik sarrah sinni dik gaxen.

*Quddus kin Kitaabhi zanta: Maatiyos 1; Luukas 2*

## 24. Yohannis Yeesus yaythimmiqhe

https://openbiblestories.org/l/ssy/story-24/

![](https://cdn.door43.org/obs/jpg/360px/obs-en-24-01.jpg?direct&)

Zakariyya kee Elsaabeeth barha kin Yohannis yenebeyaako nabii yekke. Usuk zibi baska kee cawayne beetak, sartimih lel gaalatti dagarko saraaximtem saritak zibolle maraa yine.

![](https://cdn.door43.org/obs/jpg/360px/obs-en-24-02.jpg?direct&)

Yohannis yaabboona mango mari zibolle yewcin. Usuk: "Yallih nigsinna kab-teh tanemhi sabbatah, otoobanta" arhxii warroyshak yine.

![](https://cdn.door43.org/obs/jpg/360px/obs-en-24-03.jpg?direct&)

Xiyaw Yohannis farto yoobbin gedda, mango mari sinni zambeeko yotoobiinih Yohannis ten yiythimmiqhe. Diin naba maraako mango mari Yohannisih yaythammaqhoona yemeetin, laakin maatabinnooni, sinni zambe lel maalaminnooni.

![](https://cdn.door43.org/obs/jpg/360px/obs-en-24-04.jpg?direct&)

Yohannis amaa diin naba marak: "Ko xinzele caroro! Totoobiinih sinni xaal isqiyyiranta. Mece daro baahinnixe xarha inkoh tiggiriceh giradde raddo kinni. Tamaa nobowa: "Ubul, arax koh yasqarrabo le inni fartotta afadde kok dhirhiyo kiyo" akyeenih yiniinim kinni Yohannis yiskimilem.

![](https://cdn.door43.org/obs/jpg/360px/obs-en-24-05.jpg?direct&)

Yahuudko wuli mari Yohannis Masiix kii yineh yakkemko kaa esseren. Yohannis: "Anu Masiix makiyo, laakin yi sarralle yamiiteti yane. Usuk mangum nabamhi sabbatah anu kaa kabella akkaftaxo yoh meedda" yeh eldeheye.

![](https://cdn.door43.org/obs/jpg/360px/obs-en-24-06.jpg?direct&)

Malammit max, Yeesus Yohannisih yanthammaqho yemeete. Yohannis kayya yuble gedda: "Ubula! Caalamti zambe beyo le Yallih Ciidotti tatiya kinni" yerhxe.

![](https://cdn.door43.org/obs/jpg/360px/obs-en-24-07.jpg?direct&)

Yohannis Yeesusuk: "Anu ku aythammaqho yoh meeda, yi taythammaqho eeddam koyya kinni" ake. Yeesus laakin: "Takko missilam kinamhi sabbatah, atu yi taythammaqho kolle tane" akye. Amayek sarrah walaa Yeesus zambe abeh miyaarhige hanik Yohannis kaa yiythimmiqhe.

![](https://cdn.door43.org/obs/jpg/360px/obs-en-24-08.jpg?direct&)

Yeesus yinthimmiqheh layeko yewce gedda, Yalli Ufaye xamaamat misleh aganaako oobeyaako kayyakke ase. Wuli gabooko lel Yallih dhaw carsheeko: "Atu anu kixiniyo yi Barha kito, Anu koyyah xedeneena kiyo" arhxii waanishe.

![](https://cdn.door43.org/obs/jpg/360px/obs-en-24-09.jpg?direct&)

Yalli Yohannisik: "Yallih Ufayi oobeyaako atu taythimmiqhe maraako wulitiyak aso kinni. Amaati Yallih Barha kinni" akeh yine. Yalli inketta kinni. Yohannis Yeesus yithimmiqhe gedda laakin Abba kinn Yalli waanishak yoobe, Yalla kin Barha yuble, Yallih Ufaye lel yuble.

*Quddus kin Kitaabhi zanta: Maatiyos 3; Markos 1:9-11; Luukas 3:1-23*

## 25. Sheethan Yeesus yacikkine

https://openbiblestories.org/l/ssy/story-25/

![](https://cdn.door43.org/obs/jpg/360px/obs-en-25-01.jpg?direct&)

Akkanih Yeesus yinthimmiqhek sarrah, Quddus kin Ufayi tamaa usuk morootom lellectiya kee marootom bartiya alle yosoome zibolle kaa beye. Sarrah Sheethan alle yemeeteyaako Yeesus zambe abo kaa yicikkine.

![](https://cdn.door43.org/obs/jpg/360px/obs-en-25-02.jpg?direct&)

Sheethan Yeesus: "Atu Yallih Barha tekkemko, betto ta dhayit fololle iybiddil!" yeh kaa yicikkine.

![](https://cdn.door43.org/obs/jpg/360px/obs-en-25-03.jpg?direct&)

Yeesus: "Yallih waanidde, 'Xiyaw maroona folo bisah maki ten farhshishsham, tamaa Yalli waanisha waani gantah kinni inkoh ten farhshishsham!" yeh alle deheye.

![](https://cdn.door43.org/obs/jpg/360px/obs-en-25-04.jpg?direct&)

Sarrah Sheethan Yeesus Maqhdas Carih bukakke kaa korisheyaako: "Yallih ​Barha tekkemko, 'Ku ibi dhayittodde yamuttukemko ku yaaqhacoona Yalli ishi malaykut yaamaro kinni' yaanam tunkuttubeh tanemhi sabbatah, guballe ishe cid" ake.

![](https://cdn.door43.org/obs/jpg/360px/obs-en-25-05.jpg?direct&)

Yeesus laakin Sheethanalle tunkuttubemko xuseyaako radde akah yedebbe. Usuk: "Yallih Waanidde, 'Ishi Maddara kin Yalla maacakkanin' yarhxeh ishi xiyaw yaamire."

![](https://cdn.door43.org/obs/jpg/360px/obs-en-25-06.jpg?direct&)

Sarrah, Sheethan Yeesus umbuka udduuniyat nigsinna kee tee nabinta kaa yuybulluweyaako: "Kumteyaako yoh tucbudemko, tayim inkoh koh axaw kiyo" ake.

![](https://cdn.door43.org/obs/jpg/360px/obs-en-25-07.jpg?direct&)

Yeesus: "Yok icrhii, ko Sheethano! Yalli ishi waanidde ishi xiyawak: 'Maddara kin sinni Yallah bisa ucbudantaaki kayya ukhduma" yarhxeh ten yaamire.

![](https://cdn.door43.org/obs/jpg/360px/obs-en-25-08.jpg?direct&)

Yeesus Sheethan cakanah gaba maaxayinna, amaymih lel Sheethan kaa xabe. Amaymik sarrah, malaykut yemeetiinih Yeesus baclayshen.

*Quddus kin kin Kitaabhi zanta: Maatiyos 4:1-11; Markos 1:12-13; Luukas 4:1-13*

## 26. Yeesus ishi ciyyo erherhisha

https://openbiblestories.org/l/ssy/story-26/

![](https://cdn.door43.org/obs/jpg/360px/obs-en-26-01.jpg?direct&)

Sheethan cakanaako sarrah, Yeesus amaa sigimah alle yine Galiilaati manthaqha fanah Quddus kin Ufayih xayladde gaxe. Yeesus aydurusik makanooko makaanolle yedee. Ummanti lel kaa sabbatah mecim waanishe.

![](https://cdn.door43.org/obs/jpg/360px/obs-en-26-02.jpg?direct&)

Yeesus amaa cindhik alle carsime Naazret katama fanah yedee. Cindha Sambatah lel cibaadat makaano fanah yedee. Usuk akko yaqhraw yeenih lel nabii Isayas kitaab akah yoxoyin. Yeesus lel amaa maqhaddamatko wulikke faakeyaako amaa xiyawah yiqhriye.

![](https://cdn.door43.org/obs/jpg/360px/obs-en-26-03.jpg?direct&)

Yeesus: "Anu baaxentitih mece ware, tindhibbirhemih xurriya, inti hinamah mablo, ercitemih lel ayrahaw ciloh Yalli ishi Ufaye yoh yoxoyeh yane. Tati Yallih mecaanih iggida kinni" yeh yiqhriye.

![](https://cdn.door43.org/obs/jpg/360px/obs-en-26-04.jpg?direct&)

Sarrah, Yeesus defeye. Inkoh kaa macalsiiten. Amaa usuk yiqhriyeh yine faqhara lel Masiix sabbatah kinam aarhigii yinin. Yeesus: "Ta sinah iqhriye waani kaado akkii tane" ake. Amaa xiyaw lel inkoh bexsiiten. "Tati Yoosuf barha makiho?" lel yerhxin.

![](https://cdn.door43.org/obs/jpg/360px/obs-en-26-05.jpg?direct&)

Sarrah Yeesus: "Walaa inki nabii ishi dikille mikabbaatiminnam rumma kinni. Nabii Eliishaac waqhtedde, Israa-eelille mango gubon yinin. Laakin rob adooxa iggida kee abrhah rade waye gedda, Yalli Eliishaac Israa-eelille gubna xato mirhirhiinnaaki aki wathanhi gubna xato dhirhiye" yerhxe.

![](https://cdn.door43.org/obs/jpg/360px/obs-en-26-06.jpg?direct&)

Yeesus: "Nabii Eliishaac waqhtedde, Israa-eelille qarbat laxuu le mango xiyaw tine. Eliishaac laakin amaa maraako inketta akko muurusinna. Usuk Israa-eel caduwahi mas-uul kin Nacamaan qarbat laxuu bisa uruse" arhxii katattayshe. Amaa Yeesus aabbi yine mari lel Yahuud kii yinin. Tayim arhxii kaa yoobbin gedda lel alle yuxurtumin.

![](https://cdn.door43.org/obs/jpg/360px/obs-en-26-07.jpg?direct&)

Amaa Naazret xiyaw Yeesus cibaadat makaanooko gototeenih kaa yeyyeeciniyaako cideenih kaa yagdafoona bolti afak kaa baahen. Yeesus laakin ten fantaako gerheyaako Naazert xabe.

![](https://cdn.door43.org/obs/jpg/360px/obs-en-26-08.jpg?direct&)

Sarrah Yeesus umbuka Galiilalle yedee, mango xiyaw lel codhdhoh alle temeete. Mango laxuttem kee naqhuus kin mara, tablo, tadaw, taabbo kee waanishsho tantam akko raacekkah alle baahen. Yeesus lel ten uruse.

![](https://cdn.door43.org/obs/jpg/360px/obs-en-26-09.jpg?direct&)

Junuun lii tenemko lel mango mara Yeesusulle baahen. Yeesus amreh lel amaa junuun amaa xiyawko yewceyaako: "Atu Yallih Barha kito!" yeh zeera yine. Mango xiyaw lel bexsiiteenih Yallah yucbudin.

![](https://cdn.door43.org/obs/jpg/360px/obs-en-26-10.jpg?direct&)

Sarrah Yeesus, fartottit akyerhxe lammankee taman xiyawtiya doore. Amaa fartottit Yeesuslih kallaaxeenih kaako yudrusin.

*Quddus kin Kitaabhi zanta: Maatiyos 4:12-25; Markos 1:14-15, 35-39; 3:13-21; Luukas 4:14-30, 38-44*

## 27. Mece Samaariyatti zanta

https://openbiblestories.org/l/ssy/story-27/

![](https://cdn.door43.org/obs/jpg/360px/obs-en-27-01.jpg?direct&)

Wuli max, wuli Yahuud sercat hi dhiiceeni Yeesusulle tah arhxii alle yemeete: "Mucallim, umman geedit aniina geyo ayim abo yolle tane?" Yeesus lel: "Yallih sercatalle ayim tunkuttubeh tane?" yeh alle deheye.

![](https://cdn.door43.org/obs/jpg/360px/obs-en-27-02.jpg?direct&)

Amaa sercat dhiiceeni amaa Yallih sercat yarhxem: "Maddara kin ishi Yalla, umbuka ishi afcaadooko, ishi rooxeeko, ishi xaylaako kee ishi xangalko ikxin. Ishi xuggatto ishe balih ikxin" yeh alle deheye. Yeesus lel: "Meceetih tanito! Marto kitok amayim ab" yeh alle deheye.

![](https://cdn.door43.org/obs/jpg/360px/obs-en-27-03.jpg?direct&)

Amaa sercat dhiiceeni ishi yasxaqqaqho farheyaako: "Miyatto kinni yi xuggatti?" yeh kaa essere.

![](https://cdn.door43.org/obs/jpg/360px/obs-en-27-04.jpg?direct&)

Yeesus amaa sercat dhiiceenah wuli zantah abeh radde akah yoxoye. "Wuli Yahuuddi Yerusaalemko Yerikho beya araxalle adii yine.

![](https://cdn.door43.org/obs/jpg/360px/obs-en-27-05.jpg?direct&)

"Amaa xiyawti arax adiik wuli garaacen kaa yootokin. Lii yinem inkoh akbishshiiteenih lel rabo farham fanah kaa yootokin. Sarrah amalle xabeenih akko yedeyin."

![](https://cdn.door43.org/obs/jpg/360px/obs-en-27-06.jpg?direct&)

"Dago waqhtek sarrah, wuli Yahuud qashshi amaa araxalle oobak yine. Amaa diin manabotti ta yumuttukeh yinsillibe xiyawto yuble hanik, xato farha xiyawto xabeyaako wuli gabooko gaxeh ishi gerho katattayshe ".

![](https://cdn.door43.org/obs/jpg/360px/obs-en-27-07.jpg?direct&)

"Dago waqhtek sarrah lel wuli Leewiiti xiyawti amaa araxalle guballe oobak yemeete. Leewi wuli Yahuud kisho yekkiinih Maqhdas Caredde qashshit xattiima yine mara kinni. Amaa Leewiiti xiyawti yakkeedo yimsillibeh yumuttuke xiyawto yuble hanik wuli gabooko akko tillaabeh yedee.

![](https://cdn.door43.org/obs/jpg/360px/obs-en-27-08.jpg?direct&)

“Toyek sarrah amaa araxalle oobe xiyawti lel wuli Samaariyatto kii yine. (Samaariyaati Yahuudko raddam yekkiinih aki diikaalih temweesebem kinon. Samaariyaati xiyaw kee Yahuud lel sittiya nicibii yinin.) Laakin amaa Samaariyatti amaa Yahuuddo yuble gedda, mangum kaa raxmatishe. Amaymih kaa baclaysheyaako amaa biyaake akah yusxukume."

![](https://cdn.door43.org/obs/jpg/360px/obs-en-27-09.jpg?direct&)

"Sarrah amaa Samaariyatti ayyih xiyawto xaf-isheyaako ishi zananak hayeh wuli arax afalle tine birgo fanah beyeyaako amadde kaa baclayshe."

![](https://cdn.door43.org/obs/jpg/360px/obs-en-27-10.jpg?direct&)

“Malammit max, amaa Samaariyatti ishi kallaaxe katattaysho alle tine. Amaa birgot nabatiyah yine xiyawtoh solaadi yoxoyeyaako: 'Tatiya kaa baclayish, ta solaadiiko ziyaada teyleemko lel anu gaxa gedda koh akfalo kiyo" ake.

![](https://cdn.door43.org/obs/jpg/360px/obs-en-27-11.jpg?direct&)

Sarrah Yeesus amaa sercat dhiiceena: "Aymih kolle higgida? Amaa yinsillibeh yumuttuke xiyawtoh ta adooxa xiyawtooko awlihtiya kinni kaa xuggatti?" yeh kaa essere. Usuk: "Tamaa kaalle raxmatetiya" yeh alle deheye. Yeesus: "Atu lel aduwaaki amah ab" ake.

*Quddus kin kitaabhi zanta: Luukas 10:25-37*

## 28. Gaddaale kin cindha reezanto

https://openbiblestories.org/l/ssy/story-28/

![](https://cdn.door43.org/obs/jpg/360px/obs-en-28-01.jpg?direct&)

Wuli max, wuli cindha gaddaale kin reezanti Yeesusulle yemeeteh taginah kaa essere: "Mece mucallimo, umman geedit aniina geyo ayim abo yolle tane?" Yeesus lel: "Aymihi 'mecetiya' yok tarhxem? Mecetiyah tanem inketta kinni. Amaati lel Yalla kinni. Umman geedit aniina taallo laakin Yallih sercat ibbirh" ake.

![](https://cdn.door43.org/obs/jpg/360px/obs-en-28-02.jpg?direct&)

“Amayimko awlihim abbarho yolle tane?" yeh kaa essere. Yeesus: "Magdafin. Maznayin. Migaracin. Mizirabbitin. Ishi ina kee ishi abba xishmat. Ishi xuggatto lel ishi balih ikxin" yeh alle deheye.

![](https://cdn.door43.org/obs/jpg/360px/obs-en-28-03.jpg?direct&)

Amaa xiyawti laakin: "Cindhiikoh ta sercat inkoh ibbirheh aniyo. Umman gedda maro ciloh abo missilamah ayim yok racteh tane?" ake. Yeesus kulux adde yerhxeyaako kaa yikxine.

![](https://cdn.door43.org/obs/jpg/360px/obs-en-28-04.jpg?direct&)

Yeesus: "Naqhuus hintiya takko fadhdhemko, aduwaaki tamaa litom inkoh teebexeh, amaa solaadi baaxentah uxuu. Jannadde lel gadda taallo kito. Sarrah temeeteh yi kataa" ake.

![](https://cdn.door43.org/obs/jpg/360px/obs-en-28-05.jpg?direct&)

Amaa xiyawti Yeesus yerhxem yoobbe gedda, naba gaddaale kii yinemhi sabbatah amaa lii yinem inkoh yoxoyeh akko raaco mifarhinnamhi sabbatah mangum yindime. Yeesusko wuli gabolle umfukun-yeh lel amulalle yedee.

![](https://cdn.door43.org/obs/jpg/360px/obs-en-28-06.jpg?direct&)

Sarrah Yeesus ishi darasak: "Gaddaalit Yallih nigsinnadde oroboona mangum akko siriya! Yoo, gaddaale kinti Yallih nigsinnadde orobamko, gaalatti ibrat intiiko tillaabam akko ruhuwa" ake.

![](https://cdn.door43.org/obs/jpg/360px/obs-en-28-07.jpg?direct&)

Amaa darasa Yeesus yem yoobbin gedda birriigeniyaako: "Miya kinni haye gargeerimto lem?" aken.

![](https://cdn.door43.org/obs/jpg/360px/obs-en-28-08.jpg?direct&)

Yeesus amaa darasadde kulux-yeh: "Tayim xiyaw dhiicaanam maki. Yallah laakin ummannim akah takke" ake.

![](https://cdn.door43.org/obs/jpg/360px/obs-en-28-09.jpg?direct&)

Bithroos Yeesusuk: "Nanu ummannim xabneh ku katayne. Ni jaza ayim kinni?" ake.

![](https://cdn.door43.org/obs/jpg/360px/obs-en-28-10.jpg?direct&)

Yeesus: "Tamaa inkoh carwa, sacul, abba, ina, cindham, hido iraaro yoyyah ayik xabeh yane mari, amyimko 100 waqhtiya akah ziyaddeh umman geedit aniina geyoona kinon. Laakin afti maraako mango mari sarroomadde, sarroorimat maraako mango mari lel afadde gaxoona kinon" ake.

*Quddus kin Kitaabhi zanta: Maatiyos 19:16-30; Markos 10:17-31; Luukas 18:18-30*

## 29. Naxrurtahin casbenti zanta

https://openbiblestories.org/l/ssy/story-29/

![](https://cdn.door43.org/obs/jpg/360px/obs-en-29-01.jpg?direct&)

Wuli max, Bithroos Yeesus: "Mucallim, yi sacal umam yokke abemko ayidhdhale gedda cafuu akah arhxo yolle tane? Malxina gedda fanah kinniho?" yeh kaa essere. Yeesus: "Malxina gedda makiiki, malxintomon waqhtiya malxin kinni" ake. Tayim lel, Yeesus umman gedda cafuu-narhxo nolle tane yan macnah yem kinni. Sarrah Yeesus ta zanta warishe:

![](https://cdn.door43.org/obs/jpg/360px/obs-en-29-02.jpg?direct&)

"Yallih nigsinna wuli ishi casbentitih xisaab dhiinisho farhe nugus balih kinni. Kaa casbentitko wulitii naba cidaa 200,000 iggidiyahi maahiyah idhdha takkeya lii yine.

![](https://cdn.door43.org/obs/jpg/360px/obs-en-29-03.jpg?direct&)

“Amaa casbentit yakfalo mirhiicinnamhi sabbatah, amaa nugus: 'Ta xiyawto kee kaa dik kaa cida akko tankaffalo kinnik garuuzinnah ibixanta'" yerhxe.

![](https://cdn.door43.org/obs/jpg/360px/obs-en-29-04.jpg?direct&)

"Amaa casbenti amaa nugusko dhaacimtoh gulubulle akkoobeh: 'Ku beezza, tamaa yodde lito cida inkoh koh akfalo kinnik, dagum yolle cur!' ake. Amaa nugus amaa casbenti kaa raxmatishemhi sabbatah amaa cida inkoh akah xabeyaako natsah kaa dhirhiye."

![](https://cdn.door43.org/obs/jpg/360px/obs-en-29-05.jpg?direct&)

"Amaa casbenti amaa nugusko yewce gedda, wuli affara alsih maahiyahi idhdha takke cida adde lii yine wuli kaa zoobatto kin casbenti geye. Amaa casbenti amaa kaa zoobatto kin casbenti ibbirh-isheyaako: 'Tamaa kodde liyo solaadi yoh ikfil!'" ake.

![](https://cdn.door43.org/obs/jpg/360px/obs-en-29-06.jpg?direct&)

"Amaa casbenti lel dhaacimtoh gulubulle akkoobeyaako: 'Ku beezza, tamaa yodde lito cida inkoh koh akfalo kinnik dagum yolle cur!' ake. Amaa casbenti laakin kaa cida akah yadabbendah kaa ilaam hidhdhah, akah yadabbendah ishi zoobatto yisxisbishe."

![](https://cdn.door43.org/obs/jpg/360px/obs-en-29-07.jpg?direct&)

“Aki casbentit tamaa tekkemk yubliinimhi sabbatah mangum berriigen. Amaa nugus fanah yedeyinih lel yubliinim inkoh akah warishen."

![](https://cdn.door43.org/obs/jpg/360px/obs-en-29-08.jpg?direct&)

"Amaa nugus amaa casbentoh akah deecimeh: 'Ko qeema male kin casbento! Atu yi dhaacimte gedda ku cida koh xabe. Atu lel amayim balih abto kolle tine' ake. Amaa nugus mangum kurrayeyaako amaa casbenti ishi cida yadabbendah kaa yixbishe."

![](https://cdn.door43.org/obs/jpg/360px/obs-en-29-09.jpg?direct&)

Sarrah Yeesus: "Atin sinni sacal sinni afcaadooko aseemexe wayteenimko tayim kinni Yabba abo lem" yerhxe.

*Quddus kin Kitaabhi zanta: Maatiyos 18:21-35*

## 30. Yeesus koona shiix  xiyawtiya bettiisha

https://openbiblestories.org/l/ssy/story-30/

![](https://cdn.door43.org/obs/jpg/360px/obs-en-30-01.jpg?direct&)

Yeesus ishi fartottit umbuka diikalle warroyshoona kee yaydarasoona ten dhirhiye. Amaa Yeesus alle yinille gaxen gedda, abeenih yiniinim akah warishen. Sarrah Yeesus xiyaw alle anniinixe igilko amaa carhihille wuli dago waqhte yacrafoona isheelih ten beye. Amaymih wuli jalbadde koreenih lel amaa igilko amaa carhihille taben.

![](https://cdn.door43.org/obs/jpg/360px/obs-en-30-02.jpg?direct&)

Yeesus kaa darasa jalbadde adiik laakin mango xiyaw ten tubleya tine. Amaa xiyaw amaa igilko maklaliteenih amaa carha tenko yookomiinih sugoona yerdin. Yeesus kee kaa darasa amakke gufen gedda, mango xiyaw amakke tenko yookomiinih tena ilaalak akah sugen.

![](https://cdn.door43.org/obs/jpg/360px/obs-en-30-03.jpg?direct&)

Amaa xiyaw sayyo kee irro akko xaban gedda, labha bisah 5,000ko aganalle kii yinin. Yeesus amaa xiyaw mangum kaa raxmatishen. Yeesusuh amaa xiyaw wuli ciido loyna hiniya balih kii yinin. Amaymih ten yuyduruseh, ten addadde laxutteh tinem lel uruse.

![](https://cdn.door43.org/obs/jpg/360px/obs-en-30-04.jpg?direct&)

Baarho kaso tekke gedda, amaa darasa Yeesusuk: "Baarho dhumteh tane. Katamum lel dhayelle miyane. Ta xiyaw yedeynih beetaanam waggiishitoonaaki ten dhirhii" aken.

![](https://cdn.door43.org/obs/jpg/360px/obs-en-30-05.jpg?direct&)

Yeesus laakin amaa darasak: "Atin beetaanamko wulim akah uxuwanta!" ake. Usun lel: "Amayim aaginah abno dhicna? Nanu folot koona kinnas kee lamma cindhaa caasatto bisah kinni linom" aken.

![](https://cdn.door43.org/obs/jpg/360px/obs-en-30-06.jpg?direct&)

Yeesus amaa ishi darasak amaa xiyaw 'cashsholle kokkontom xiyawtiyah defeyenta' akyarhxoona akah warishe.

![](https://cdn.door43.org/obs/jpg/360px/obs-en-30-07.jpg?direct&)

Sarrah Yeesus amaa koona kinnas kee amaa lamma caasatto yibbirheyaako carshedde kulux-yerhxeh, amaa foloh Yallah xamde yedebbe.

![](https://cdn.door43.org/obs/jpg/360px/obs-en-30-08.jpg?direct&)

Sarrah Yeesus amaa folo kee amaa caasa cindhadhaahumuh yegeerece. Amaa yegeerece cindhadhdhaahum lel amaa xiyawah keloona ishi darasalle yoxoye. Amaa darasa yane sanaha amaa folo tillallaasen, caduruh lel bakitto xinte! Amaa xiyaw inkoh beeten, inkoh lel xayten.

![](https://cdn.door43.org/obs/jpg/360px/obs-en-30-09.jpg?direct&)

Amaymik sarrah, amaa darasa amaa folooko bettiiminnixak ractem yeskettinih lel lammankee taman jambiiliya akko yamagin! Amaa macaasha lel amaa koona kinnas kee lamma caasattooko temeetem kii tine.

*Quddus kin Kitaabhi zanta: Maatiyos, 14:13-21; Markos 6:31-44; Luukas 9:10-17; Yohannis 6:5-15*

## 31. Yeesus layet bukalle gerha

https://openbiblestories.org/l/ssy/story-31/

![](https://cdn.door43.org/obs/jpg/360px/obs-en-31-01.jpg?direct&)

Sarrah Yeesus, amaa mango xiyaw dhirhiyeh amaa igilko amaa carhalle taboona ishi darasak amaa jalbadde koroona akah warishe. Yeesus amaa mango xiyaw dhirhiyek sarrah yassallaw wuli koomalle yewce. Yeesus amalle inkettak yine, kaso fanah lel amalle yissilliye.

![](https://cdn.door43.org/obs/jpg/360px/obs-en-31-02.jpg?direct&)

Yeesus amalle anik, amaa darasa jalba beyeenih, bartabrha tekke gedda bisah igil fanta gufen. Xaaxatti ten gabolle xaaxayshak yinemhi sabbatah lel amaa jalba xaylah beyaa yinin.

![](https://cdn.door43.org/obs/jpg/360px/obs-en-31-03.jpg?direct&)

Sarrah Yeesus salat abaysheyaako amaa darasa fanah yedee. Usuk amaa layeh bukalle gerheyaako ten jalba fanah yemeete!

![](https://cdn.door43.org/obs/jpg/360px/obs-en-31-04.jpg?direct&)

Amaa darasa lel Yeesus yublin gedda ufaye ablii yiniinim sinne yekkeliinih mangum mashshiiten. Yeesus usun mashshiiteenim ten yeerhegeyaako akah deecimeh: "Mimashshiitina. Yoyya kinni!" akye.

![](https://cdn.door43.org/obs/jpg/360px/obs-en-31-05.jpg?direct&)

Sarrah Bithroos: "Yeesusuk: "Mucallimo, koyya yekkemko, anu layet bukalle ku fanah amaato yeemer" akye. Yeesus lel Bithroosuk: "Amo!" akye.

![](https://cdn.door43.org/obs/jpg/360px/obs-en-31-06.jpg?direct&)

Amaymih, Bithroos amaa jalbaako uguteh layet bukalle gerheyaako Yeesus fanah yamaato erherhishe. Daguuhum yedeek sarrah laakin Yeesusko akuulalle kulux-yerhxeyaako amaa goomadhdhedde kulux-yeh amaa dhacuma xaaxatta koyshito erherhishe.

![](https://cdn.door43.org/obs/jpg/360px/obs-en-31-07.jpg?direct&)

Sarrah Bithroos mashshiiteh amaa layedde yamandhaco erherhishe. "Mucallimo, yi garger!" yeh lel zeere. Yeesus akkanih gaba dhirhiyeh kaa yibbirhe. Sarrah lel Bithroosuk: "Ko imaan male, aymih shakke ishedde hayte?" akye.

![](https://cdn.door43.org/obs/jpg/360px/obs-en-31-08.jpg?direct&)

Bithroos kee Yeesus jalbadde oroben gedda, amaa xaxatti akkanih yiggidileyaako amaa laye tihdiye. Amaa darasa cibrah raben. "Rummah atu Yallih Barha kito!" yeenih akah yucbudin.

*Quddus kin Kitaabhi zanta: Maatiyos 14:22-33; Markos 6:16-21*

## 32. Yeesus yimjinnine xiyawto kee laxutte numa urusa

https://openbiblestories.org/l/ssy/story-32/

![](https://cdn.door43.org/obs/jpg/360px/obs-en-32-01.jpg?direct&)

Wuli max, Yeesus kee kaa darasa amaa igilko jalbah amaa Geraasat mara akan xiyaw alle yinin manthqahalle taben.

![](https://cdn.door43.org/obs/jpg/360px/obs-en-32-02.jpg?direct&)

Usun amaa igilko amaa carhalle taben gedda wuli yimjinnine xiyawti ardik Yeesusulle yemeete.

![](https://cdn.door43.org/obs/jpg/360px/obs-en-32-03.jpg?direct&)

Ta xiyawti lel xayli sabbatah walaa inketti yazgiriretiya kii miyine. Xiyaw lakuk kee xaruu gantah katiinah akko yarhuyin hanik ummaan yattigirriceh adii yine.

![](https://cdn.door43.org/obs/jpg/360px/obs-en-32-04.jpg?direct&)

Amaa xiyawti amaa wakalih qabuuradde maraa yine. Ta xiyawti muluu bar kee muluu lellec zeera yine. Usuk sara misarita, ishi nabse lel dhaytih ageereci yine.

![](https://cdn.door43.org/obs/jpg/360px/obs-en-32-05.jpg?direct&)

Amaa xiyawti Yeesusulle yemeete gedda, gulubulle akkoobe. Yeesus lel amaa jinnettak: "Ta xiyawtooko akko ewec!" ake.

![](https://cdn.door43.org/obs/jpg/360px/obs-en-32-06.jpg?direct&)

Amaa jinnetta le xiyawti wac-yerhxeyaako: "Nabamko naba Yallih Barha kin Yeesuso, ayim yodde farhaa tanito? Ku beezza yi maacazzabin" ake. Sarrah Yeesus amaa jinnettak: "Miyatto ku migac?" ake. Usuk lel: "manginomhi sabbatah yi migac Lejiyon kinni" ake. ('Lejiyon' wuli mango shiixaat kin Roomaati caskar hi migac kii yine".)

![](https://cdn.door43.org/obs/jpg/360px/obs-en-32-07.jpg?direct&)

Amaa jinnetti Yeesus: "Ku beezza ta manthiqhaako akuulalle ni mirhirhiin!" yeenih kaa dhaacimen. Amaa wakalih koomalle taloole casama tine. Amaa junuun lel: "Amayidhdhah ta xasamadde ni dhirhii, ku beezza!" yeenih kaa dhaacimen. Yeesus: "Aduwanta!" ake.

![](https://cdn.door43.org/obs/jpg/360px/obs-en-32-08.jpg?direct&)

Amaa junuun amaa xiyawtooko yewciinih amaa xasamadde sayen. Amaa xasama guballe xarhiteenih igilidde yixriqhin. Amaa xasama lel 2000 takkem kii tine.

![](https://cdn.door43.org/obs/jpg/360px/obs-en-32-09.jpg?direct&)

Amaa xasamah zan abtam tekkem yublin gedda, katama fanah yerdiinih amaa Yeesus abeh yinem ummantiyah warishen. Xiyaw amaa katamaako yemeetiinih lel amaa junuun lii yine xiyawto yublin. Usuk sara hashshiiteh sik-yeh defeyaako saxxa le xiyawti abam abaa tine.

![](https://cdn.door43.org/obs/jpg/360px/obs-en-32-10.jpg?direct&)

Amaa xiyaw mangum mashshiiteenih Yeesusuk, 'nokko aduu' aken. Amaa gedda Yeesus yadaw yeh jalbadde kore. Amaa junuun lii yine xiyawti lel kaalih yadaw kaa dhaacime.

![](https://cdn.door43.org/obs/jpg/360px/obs-en-32-11.jpg?direct&)

Yeesus laakin: "Maale, anu, atu careh tedeyeyaako, Yalli koh abeh yanem kee aaginah kolle raxmateh yanem, ishi dik kee ishi kaxantoolitih warishsham kinni kok farham" ake.

![](https://cdn.door43.org/obs/jpg/360px/obs-en-32-12.jpg?direct&)

Amaa gedda amaa xiyawti yedeeh amaa Yeesus akah abeh yinem inkoh ummantiyah warishe. Inkoh kaa zanta yoobbe mari lel magnum cibrah raben.

![](https://cdn.door43.org/obs/jpg/360px/obs-en-32-13.jpg?direct&)

Yeesus amaa igilko amaa carhalle gaxe. Amakke gufek sarrah lel mango xiyaw yekettiniyaako kaa makareenih kaa yeytseqheeqhethin. Amaa mango xiyawhi addadd lel wuli lammankee taman iggidiya biilo zarta numa tine. Lii tine solaadi lel tee urusoona xakaayimille teylee, toomem kibah lee akah tur-huwem male.

![](https://cdn.door43.org/obs/jpg/360px/obs-en-32-14.jpg?direct&)

Yeesus mango xiyaw uruseh yinem toobbeh tineh lel: "Yeesus sareena bisah dhag-ishemko anu gantah uro kiyom mudhdhug kinni!" teh texeesebe. Amaymih Yeesus caazaako temeeteh kaa sareena dhagte. Dhag-ishshe geddaakoh lel ama biili daw-yerhxe.

![](https://cdn.door43.org/obs/jpg/360px/obs-en-32-15.jpg?direct&)

Akkanih lel Yeesus xayli akko yewcem yeerhege. Caazalle umfukun-yeh lel: "Miyatto kinni yi dhageti?" yeh essere. Amaa darasa lel: "Mango xiyaw ku codhdhoh ku makareenih ku dufuffuwaa yanin. Tayimhi fanadde: 'Miyatti yi dhage?' tah aaginah esserta?" aken.

![](https://cdn.door43.org/obs/jpg/360px/obs-en-32-16.jpg?direct&)

Amaa numa mashshitteyaako qathqath-teh Yeesus gulubulle radde. Sarrah ayim abtem akah warishsheyaako urte. Yeesus: "Ku imaan kuuruseh yane. Salaamdde aduu" ake.

*Quddus kin Kitaabhi zanta: Maatiyos 8:28-34; 9:20-22; Markos 5:1-20; 5:24b-34; Luukas 8:26-39; 8:42b-48*

## 33. Xarastaa zanta

https://openbiblestories.org/l/ssy/story-33/

![](https://cdn.door43.org/obs/jpg/360px/obs-en-33-01.jpg?direct&)

Wuli max, Yeesus mango xiyaw wuli igil afalle aydurusik yine. Yeesus yaabboona mango mari yemeetiinimhi sabbatah, tenlih akko waanisha cara geyo ciloh lel jalbadde koreyaako igil wasanakke gaxe. Jalabadde defeyeh lel amaa xiyaw yuyduruse.

![](https://cdn.door43.org/obs/jpg/360px/obs-en-33-02.jpg?direct&)

Yeesus ta zanta akah warishe: "Wuli xarastaa ilaw yazraw yedee. Amaa zara gabah azriik, amaa zaraako gari araxadde radeyaako kimbir yemeeteh amaa zara inkoh beete."

![](https://cdn.door43.org/obs/jpg/360px/obs-en-33-03.jpg?direct&)

"Amaa zaraako gari lel fire buure alle dago dhayitidde rade. Amaa dhayitle baarholle rade zari dheh yubqulehaaki, rimiida meceetih buuredde guballe dhirhiyo mirhiicinna. Ayro temeeteh lacte gedda lel amaa buqhli caamuuleyaako xarare."

![](https://cdn.door43.org/obs/jpg/360px/obs-en-33-04.jpg?direct&)

"Amaa zaraako wulim lel keenan-le xorhudde rade. Amaa zari carsimo erherhishehaaki keenan kaa yisniqhe. Amaa keenanle baarhodde yubqule zari lel walaa inki fire baaho mirhiicinna."

![](https://cdn.door43.org/obs/jpg/360px/obs-en-33-05.jpg?direct&)

"Amaa zaraako gari mece buuredde rade. Ta zari lel 30, 60, inkinnah 100 waqhtiya amaa yimzirriyeh yine zaraako ziyaada sasane. Cokka leti yaabboo!"

![](https://cdn.door43.org/obs/jpg/360px/obs-en-33-06.jpg?direct&)

Amaa darasa ta zanta ten teylelekke. Amaa gedda Yeesus taginah yishrixe: "Amaa zari Yallih waani kinni. Amaa arax lel Yallih waani yaabbe xiyawto kinnihaaki miyafhime, ibliis lel amaa waani akko beya.

![](https://cdn.door43.org/obs/jpg/360px/obs-en-33-07.jpg?direct&)

Amaa dhayitle baarho Yallih waani yaabbeh xedenlih kabbata xiyawto kinni. Nabra alle tasriye gedda, hido yamcizzibe gedda lel xabbishita.

![](https://cdn.door43.org/obs/jpg/360px/obs-en-33-08.jpg?direct&)

Amaa keenanle baarho Yallih waani yaabbeh, waqhti adiik yadiye gedda, maxada, gadda kee raaxale nabra Yallahi kaa kaxano kafishsha. Abayshimalle lel tamaa usuk yaabbe darsi fire mibaaha.

![](https://cdn.door43.org/obs/jpg/360px/obs-en-33-09.jpg?direct&)

Tamaa mece buure laakin Yallih waani yaabbeh, yaamineh fire baaha xiyawto kinni."

*Quddus kin Kitaabhi zanta: Maatiyos 13:1-8, 18-23; Markos 4:1-8, 13-20; Luukas 8:4-15*

## 34. Yeesus aki zanta warisha

https://openbiblestories.org/l/ssy/story-34/

![](https://cdn.door43.org/obs/jpg/360px/obs-en-34-01.jpg?direct&)

Yeesus Yallih nigsinnah zacabah mango aki zantat warishe. Masalan, Usuk yerhxe: "Yallih nigsinna wuli akkinnanti ishi dhagedde yizriye adratto balih kinni. Adratti lel umman zaraako cindhatiya kinam taarhigin."

![](https://cdn.door43.org/obs/jpg/360px/obs-en-34-02.jpg?direct&)

"Amaa adratto carsimta gedda amaa dhagedde yane takleeko tanabeh, kimbir gantah yamiiteh xakukukke akko yacrufem takke."

![](https://cdn.door43.org/obs/jpg/360px/obs-en-34-03.jpg?direct&)

Yeesus aki zanta warisha: "Yalli nigsinna tamaa numa folo akkabto cagunudde sittadde yakmilendah hayte aras balih kinni."

![](https://cdn.door43.org/obs/jpg/360px/obs-en-34-04.jpg?direct&)

"Yallih nigsinna akkinnanti ishi dhagedde yoocore gadda balih kinni. Aki xiyawti amaa gadda geyah lel malaamih yaacure. Xedenih yemmeegeh lel yedeyeyaako lii yinem inkoh yaabixeh amaa solaadih amaa dhage dhaame."

![](https://cdn.door43.org/obs/jpg/360px/obs-en-34-05.jpg?direct&)

"Yallih nigsinna limo naba luul balih kinni. Undhurhti bacashaara tee geya gedda, lem inkoh yaabixeh amaa solaadih teya dhaama."

![](https://cdn.door43.org/obs/jpg/360px/obs-en-34-06.jpg?direct&)

Sarrah Yeesus sinni mece ciyyoh taamineh aki mara ilactamhi zanta warishe. Usuk: "Lamma xiyawti yassallawna Maqhdas Care yedeyin. Tenko wuliti gibre yaskatte kii yine, wuliti lel diina manabotta kii yine.

![](https://cdn.door43.org/obs/jpg/360px/obs-en-34-07.jpg?direct&)

"Amaa diin manabotti ta ginah dhaaco abe: 'Ko yi Rabbiyo, anu tamaa zambi-wannun, garaacen, xaqqe abinnixem, tazniyem, hido lel too gibre yaskatti balih makiyomuh xamde koh takko.'"

![](https://cdn.door43.org/obs/jpg/360px/obs-en-34-08.jpg?direct&)

"Masalan, anu baxuurodde lamma gedda asoomeh inkoh geya solaadi kee nuwaako lel taman-ya af akko ayyaace'" yerhxe.

![](https://cdn.door43.org/obs/jpg/360px/obs-en-34-09.jpg?direct&)

"Amaa gibre yaskatti laakin amaa diin manabottaako miriix-yeh defeyayaako ishi naxar gummaadeh aatukik caranade kulux-yerhxeh: "Yi Rabbiyo, anu zambi-wanna kiyomhi sabbatah yolle raxmat' yeh dhaaco abe."

![](https://cdn.door43.org/obs/jpg/360px/obs-en-34-10.jpg?direct&)

Sarrah Yeesus: "Yalli amaa gibre yaskatti dhaaco yoobbeyaako 'Xaqqi-wanna kinni' akem rummah sinak arhxii aniyo. Amaa diin manabottahi dhaaco laakin makxaninna. Yalli yamnanabbetiya yascandhaw kinni, ishi yascundhuwetiya lel xaf-isho kinni" yerhxe.

*Quddus kin Kitaabhi zanta: Maatiyos 13:31-33, 44-46; Markos 4:30-32; Luukas 13:18-21; 18:9-14*

## 35. Naxrurta-le abbahi zanta

https://openbiblestories.org/l/ssy/story-35/

![](https://cdn.door43.org/obs/jpg/360px/obs-en-35-01.jpg?direct&)

Wuli max, Yeesus mango gibre yaskattit kee zambi-wannun kaa taabbo teketteya aydurisii yine.

![](https://cdn.door43.org/obs/jpg/360px/obs-en-35-02.jpg?direct&)

Diin manabottitko gari amalle tineya lel Yeesus amaa zambi-wannun zooba balih ten ablii yubliniyaako sinne-sinneh kaa cadaloona erherhishen. Amaa gedda Yeesus ta zanta akah warishe.

![](https://cdn.door43.org/obs/jpg/360px/obs-en-35-03.jpg?direct&)

“Wuli lamma barha le xiyawti yine. Amaa xiddagliido ishi abbak: 'Abba, anu inni miiraas kado farhak aniyo' ake. Amaymih abba ishi iraaro lamma barhah xaziile."

![](https://cdn.door43.org/obs/jpg/360px/obs-en-35-04.jpg?direct&)

“Akkanih lel amaa xiddagliido inkok lii yinem yesseketteh dherh baarho yedeyeyaako ishi solaadi uma xibaradde yeylee."

![](https://cdn.door43.org/obs/jpg/360px/obs-en-35-05.jpg?direct&)

“Amaymik sarrah, amaa xiddagliido alle yinelle sirii culul sayeyaako usuk macaasha akko dhaamita solaadi waye. Sarrah, bisah geyo dhiice shuqhle yibbirhe, amayim lel xasama bettiishaanam kii yine. Umaatih yine, sarrah lel mangum safriitemhi sabbatah amaa xasamat folo beeto farhe."

![](https://cdn.door43.org/obs/jpg/360px/obs-en-35-06.jpg?direct&)

"Abayshimalle, amaa xiddagliido ishi rooxek: 'Ayim abak aniyom?' yerhxe. Yabbah casbentit inkoh ten dhicta macaasha lon. Anu laakin talle cululuh rabak aniyo. Edeyeyaako yabbak 'ku casbento akko farhak aniyo' akko arhxo kiyo."

![](https://cdn.door43.org/obs/jpg/360px/obs-en-35-07.jpg?direct&)

"Sarrah, amaa xiddagliido ishi abbah dik fanah gaxe. Usuk mirixtalle aniikoh kaa abba kaa yubleh mangum kaa naxruuruse. Ishi barha fanah yerdeh lel kaa galeeliyeyaako kaa fugute."

![](https://cdn.door43.org/obs/jpg/360px/obs-en-35-08.jpg?direct&)

"Amaa barhi abbak: 'Abba, koo kee Yallih nifidde zambe abe. Anu ku barha akko yoh meedda" ake.

![](https://cdn.door43.org/obs/jpg/360px/obs-en-35-09.jpg?direct&)

"Kaa abba laakin ishi casbentitko tiyak, 'Iba lacteh aduwaaki mece sara bahteh yi barha sarish!' ake. Kaa gabadde khaatim, kaa ibadde lel kabel akah haa. Yi barhi rabeh yinemko aniinalle gaxeh yanemhi sabbatah xafla abinno kinnik ummannimko doorte ruga bahteh urxud! Usuk yeleeh yinemko kaado geytimeh yane!'"

![](https://cdn.door43.org/obs/jpg/360px/obs-en-35-10.jpg?direct&)

"Amaymih, xiyaw xafla aboona erherhishen. Ummanimko basolle amaa naba barhi zibolle ashtuqhulii yinemko yemeete. Usuk muziqqa kee rigdo yoobbe gedda akkii tanemhi cibrah rabe."

![](https://cdn.door43.org/obs/jpg/360px/obs-en-35-11.jpg?direct&)

"Amaa naba barhi kaa sacal careh yemeeteh yinemhi sabbatah xafla abaa yiniinim yeerhege gedda, mangum kurrayeyaako caredde orobo xine. Kaa abba alle yewceyaako tenlih yaxtafalo kaa dhaacime hanik, buurh-ishite."

![](https://cdn.door43.org/obs/jpg/360px/obs-en-35-12.jpg?direct&)

"Amaa naba barhi: 'Anu inkoh ta iggidit macna kee makkoh koh ushtuqhule! Anu, atu yoktem xineh maarhige hanik, inni kaxantoolitlih xafla akko abito walaa cindhaa lax yoh toxoyeh mitaarhige. Ku solaadi uma xibaradde yeylee ta ku barhi yemeete gedda laakin doorime ruga akah turxude!"

![](https://cdn.door43.org/obs/jpg/360px/obs-en-35-13.jpg?direct&)

Abba: "Yi barhaw, atu umman gedda yoolih tanito, tamaa anu liyom lel inkoh koyyah kinni. Ku sacal rabeh yimeko gaxeh yanemhi sabbatah laakin nanu xafal abinno xaqqe lino. Usuk yeleeh yimeko kado geytimeh yane!'" yeh alle deheye.

*Quddus kin Kitaabhi zanta: Luukas 15:11-32*

## 36. Yeesus badale

https://openbiblestories.org/l/ssy/story-36/

![](https://cdn.door43.org/obs/jpg/360px/obs-en-36-01.jpg?direct&)

Wuli max; Yeesus ishi darasaako adox Bithroos, Yacqoob kee Yohannis isheelih beye. (Amaa Yohannis akan darasatti lel Yeesus yiythimmiqhetiya kii miyine.) Yassallawna yeenih lel naba kooma sinni ulah yewcin.

![](https://cdn.door43.org/obs/jpg/360px/obs-en-36-02.jpg?direct&)

Yeesus assilliik, kaa nif ayrotta balih iffoye, kaa sari ifo balih caddowe. Ta baarholle lel amayidhdha inketti caddoysho mirhiica.

![](https://cdn.door43.org/obs/jpg/360px/obs-en-36-03.jpg?direct&)

Moosa kee nabii Eliyaas alle yemeetin. Ta mari boolaat iggidiyak basoh ta baarholle maraa tinem kinon. Yeesuslih lel Yerusaalemille takko le kaa rabih zacabah waanishen. .

![](https://cdn.door43.org/obs/jpg/360px/obs-en-36-04.jpg?direct&)

Moosa kee Eliyaas Yeesuslih waanishak, Bithroos Yeesusuk: "Nanu talle nemeetem temce. Kado adooxa tenda abnoo. Tiya koyyah, tiya Moosah, tiya lel Eliyaasah" ake. Bithroos ayim arhxii yinem aarhigii miyine.

![](https://cdn.door43.org/obs/jpg/360px/obs-en-36-05.jpg?direct&)

Bithroos waansihak, camburre yemeeteyaako agoogish ten isheh, darurko lel: "Tati anu kixiniyo yi Barha kinni. Anu kaalih xedena. Kayya oobbaanta" yarhxe dhaw yemeete. Amaa adooxa darasatti lel birriigeenih baarholle raden.

![](https://cdn.door43.org/obs/jpg/360px/obs-en-36-06.jpg?direct&)

Sarrah Yeesus ten dhageyaako: "Mimashshiitina. Uguta" akye. Sinni wakalelle kulux-yen gedda lel kaddih amalle tinem Yeesus bisa kii yine.

![](https://cdn.door43.org/obs/jpg/360px/obs-en-36-07.jpg?direct&)

Yeesus kee amaa darasa lel amaa koomaako ooben. Sarrah Yeesus: "Ta tekkem kadookoh walaa inkettah miwarishina. Anu dheh rabo kiyo, sarrah lel rabeh gaxo kiyo. Amaymik sarrah xiyawak tarhxoona dhictan" ake.

*Quddus kin Kitaabhi zanta: Maatiyos 17:1-9; Markos 9:2-8; Luukas 9:28-36*

## 37. Yeesus Alazaar rabaako ugusa

https://openbiblestories.org/l/ssy/story-37/

![](https://cdn.door43.org/obs/jpg/360px/obs-en-37-01.jpg?direct&)

Wuli max, Yeesus Alazaar laxuutemhi farto alle temeete. Alazaar kee kaa sacul Maryam kee Marta Yeesus dhaye kaxantoolit kii yinin. Yeesus amaa ware yoobbe gedda: "Kaa laxuu rabi kaa guddussam makiiki, laakin Yallih nabneh kinni" yerhxe. Yeesus ishi kaxantoolit ten kixinii yine, laakin tamaa alle yinelle lamma max suge.

![](https://cdn.door43.org/obs/jpg/360px/obs-en-37-02.jpg?direct&)

Lamma max tillaabishek sarrah, Yeesus ishi darasak: "Kata Yahuuda fanah gaxnok" ake. Kaa darasa lel: "Mucallimo, ta dhaye waqhtedde makini amalle tine xiyaw ku yagdafoona farheenim" yeenih alle deheyen. Yeesus: "Alazaar ni kaxantooli dhiineh yaneyaako kaa uguso yolle tane" ake.

![](https://cdn.door43.org/obs/jpg/360px/obs-en-37-03.jpg?direct&)

Yeesus darasa: "Mucallimo, Alazaar dhiineh yinniyemko yashsho kinni" yeenih alle deheyen. Sarrah Yeesus caddoysheyaako: "Alazaar rabeh kinni. Atin yoh taamanoona ciloh lel anu amalle suge wayemih xedeneena kiyo" yerhxe.

![](https://cdn.door43.org/obs/jpg/360px/obs-en-37-04.jpg?direct&)

Yeesus Alazaar dikille yemeete gedda, Alazaar rabemko affara lellec kaleh yine. Marta lel Yeesusuh akah garayteyaako: "Mucallimo, atu talle sugteh takkeedo yi sacal rabeh anniye mirhaarho. Atu kaa esserinnannim Yalli koh yaxaymih lel aamine" akte.

![](https://cdn.door43.org/obs/jpg/360px/obs-en-37-05.jpg?direct&)

Yeesus: "Anu Rabiikoh ugut kee Aniina kiyo. Yoyyah aamininnanti walaa raba hanik maro kinni. Yoyyah aamininnanti caduruh miraba. Taymih taamine?" yeh eldeheye. Marta lel: "Yoo, Mucallimo! Atu Masiix, Yallih Barha kitom aamine" teh radde akah toxoye.

![](https://cdn.door43.org/obs/jpg/360px/obs-en-37-06.jpg?direct&)

Sarrah Maryam temeete. Yeesus iballe raddeh lel: "Mucallimo, Atu bisah sugteh yakkeedo, yi sacal rabeh anniye mirhaarho" akte. Yeesus: "Alazaar adde hayteeni?" yeh ten essere. Usun lel: "Qabredde. Amowaaki ubul" aken. Sarrah Yeesus weece.

![](https://cdn.door43.org/obs/jpg/360px/obs-en-37-07.jpg?direct&)

Amaa qabri wuli dhayitti afadde akko gaxe galba kii yine. Yeesus amaa qabrelle yemeete gedda: "Dhayitto asac akko ishanta" ake. Marta laakin: "Usuk rabemko affara lellec sugeh yane. Uma ure yaallo kinni" akte.

![](https://cdn.door43.org/obs/jpg/360px/obs-en-37-08.jpg?direct&)

Yeesus: "Yoyyah teemeniinimko Yallih nabne tabloona kitin" sinak erhxeh miiniyoho?" yeh alle deheye. Amaa gedda amaa dhayitto asac akko ishen.

![](https://cdn.door43.org/obs/jpg/360px/obs-en-37-09.jpg?direct&)

Sarrah Yeesus caranadde kulux-yeh: "Abba, yi taabbemih xamde koh takko. Atu umman gedda yi taabbem aarhigehaaki, atu yi dhirhiitem yaamanoona ciloh talle daw-teh tane xiyawah arhxik tayim arhxik aniyo" yerhxe. Sarrah Yeesus wac-yerhxeyaako: "Alazaar, ewec!" yerhxe.

![](https://cdn.door43.org/obs/jpg/360px/obs-en-37-10.jpg?direct&)

Sarrah Alazaar yewce! Kaddiinah lel maknazadde sawlimeh yine. Yeesus: "Tamaa maknaz asac-isho kaa xatteenih kaa dhirhiyanta" ake. Ta bexsishshamhi sabbatah lel Yahuudko mango mari yeemenin.

![](https://cdn.door43.org/obs/jpg/360px/obs-en-37-11.jpg?direct&)

Yahuud diin manabottit lel ashshiineenih, yekettiiniyaako Yeesus kee Alazaar aaginah yagdifiinimidde zatteyen.

*Quddus kin Kitaabhi zanta: Yohannis 11:1-46*

## 38. Yeesus yinthillime

https://openbiblestories.org/l/ssy/story-38/

![](https://cdn.door43.org/obs/jpg/360px/obs-en-38-01.jpg?direct&)

Yahuud iggida-iggidah Faasiga axtifilii yinin. Tayim lel boolaat iggidiyak basoh Yalli Yahuud abbub Masriiti garuuzinnaako aaginah ten gargeerem ishaarisha cid kinni. Yeesus erherhih xiyaw yaybassaro kee yaydaraso erherhishemko adooxa iggidak sarrah, Yeesus ishi darasaalih ta Faasiga yaxtafalo farham kee amalle kaa yagdafoona kinoonim akah warisheh yine.

![](https://cdn.door43.org/obs/jpg/360px/obs-en-38-02.jpg?direct&)

Yeesus darasaako wulitiyak lel Yahuuda akkay yinin. Yahuuda amaa katattaynitti solaadit borsahi mas-uuliya lii yine. Solaadi kixinii yinemhi sabbatah lel wuli gedda amaa borsaako solaadi garciita yine. Yeesus kaa darasa Yerusaalem gufeenik sarrah, Yahuuda amaa Yahuud naba maralle yedeeh Yeesus solaadih tenalle kaa yayrhabaro yittifiqhe. Usuk Yahuud naba mari: 'Yeesus Masiix maki' arhxii yiniinim kee kaa yagdafoona farhaa yiniinim aarhigii yine.

![](https://cdn.door43.org/obs/jpg/360px/obs-en-38-03.jpg?direct&)

Yahuud naba mari, naba qashsheh yimmirrixiinih, Yahuuda Yeesus tenalle yasxaw fiddat solaadih soddom yoxoyin. Tayim lel amaa nobowa akah yerhxiinih yiniiniikah tekke. Yahuuda yittifiqheh solaadi bishshiiteyaako yedee. Usuk lel usun Yeesus yabbarhoona akah dhiican caashir xattiimo wagiya yine.

![](https://cdn.door43.org/obs/jpg/360px/obs-en-38-04.jpg?direct&)

Yerusaalemille, Yeesus ishi darasaalih Faasiga yixtifile. Amaa Faasigah beetoona farhen gedda lel Yeesus folo beyeh yigdile. Usuk: "Tati sinah yomxowwe yi nabse kinnik, beyteenih betanta. Tayim yi zikrah abanta" akye. Taginah lel, Yeesus kaa nabsi ten beezza yakko lem akah warishe.

![](https://cdn.door43.org/obs/jpg/360px/obs-en-38-05.jpg?direct&)

Sarrah Yeesus wuli kobbaayatto yooqhoceyaako: "Tayim sin zambe cakalisho xarhitak yane yi biilo Cusub Cahdihiya kinnik ucubanta. Ummaan aacubinnan gedda yi tazzakkaroonak tayim abanta" akye.

![](https://cdn.door43.org/obs/jpg/360px/obs-en-38-06.jpg?direct&)

Sarrah Yeesus amaa darasak: "Sinko wuliti yi yasxaw kinni" ake. Amaa darasa lel birriigeenih taginalem abto lem miyatto kinni, yeenih esserimen. Yeesus lel: "Anu ta folottat dhacto akah axayik aniyotii thallaam kinni" ake. Sarrah amaa folotta Yahuudah yoxoye.

![](https://cdn.door43.org/obs/jpg/360px/obs-en-38-07.jpg?direct&)

Yahuuda amaa folotta beetek sarrah, Sheethan adde orobe. Yahuuda lel Yeesus yabbarhoona amaa Yahuud naba mara xattiimo yedee. Baarho lel bar kii tine.

![](https://cdn.door43.org/obs/jpg/360px/obs-en-38-08.jpg?direct&)

Folo beetenik sarrah, Yeesus kee kaa darasa Oolac kooma fanah gerhen. Yeesus: "Kabar atin inkoh yi xabtoona kitin. 'Anu loyna aatako kiyo, ciido lel inkoh faax-tarhxo kinni' yaanam tunkuttubeh tane" ake.

![](https://cdn.door43.org/obs/jpg/360px/obs-en-38-09.jpg?direct&)

Bithroos lel: "Aki mari walaa inkoh ku xabeenimih, anu ku mixaba!" ake. Sarrah Yeesus Bithroosuk: "Sheethan inkoh sin bishshiito farhe, Bithroos, anu laakin imaan xabtaanamko dhaaco sinah abeh aniyo" ake. Yakko kibah laakin, kabar, dor-hotti andhaxamko basolle atu inkinnah yi mitaarhigemih adooxa gedda tammaskaro kito" ake.

![](https://cdn.door43.org/obs/jpg/360px/obs-en-38-10.jpg?direct&)

Sarrah Bithroos Yeesusuk: "Anu walaa rabo eelemih ku mixina!" ake. Aki darasa lel inkoh amayim yerhxin.

![](https://cdn.door43.org/obs/jpg/360px/obs-en-38-11.jpg?direct&)

Sarrah Yeesus ishe ishi darasah Get-seemani akanikke fanah yedee. Yeesus ishi darasak cakanadde sayaanamko yassallawna akah warishe. Sarrah isheh yassallaw ulah yedee.

![](https://cdn.door43.org/obs/jpg/360px/obs-en-38-12.jpg?direct&)

Yeesus adooxa gedda yissiliiye: "Yi Abbaw, dhiicimtemko, ku beezza ta weexelti kubbaaya yi mashshacin. Ta xiyawhi zambi aki ginah akah xabbiima arax waytimemko laakin, ku farhi takko" yerhxe. Yeesus mangum yomroocodeyaako kaako obta dhiimo biili dhimmiyoh higgidii tine. Yalli lel kaa yasquwwe malaykatto akah dhirhiye.

![](https://cdn.door43.org/obs/jpg/360px/obs-en-38-13.jpg?direct&)

Tamaa inki salat bakinnan gedda, ummaan gaxah ishi darasa yable gedda, dhiinaanah akah sugan. Maddaxit waqhte gaxe gedda, Yeesus: "Yi thallaam yemeeteh yanek, ugutanta!" ake.

![](https://cdn.door43.org/obs/jpg/360px/obs-en-38-14.jpg?direct&)

Yahuuda, Yahuud naba mara, caskar kee mango xiyaw yibbirheh yemeete. Amaa mari seefa kee ilol yibbirhiinih yinin. Yahuuda yemeeteyaako Yeesusuk: "Nagaa, Mucallim" yeh kaa fugute. Tayim lel Yahuud naba marah miyatto yabbirhiinim yaarhagoonahi ishaara kii tine. Sarrah Yeesus: "Yahuuda, fugtoh yasxay tanito?" ake.

![](https://cdn.door43.org/obs/jpg/360px/obs-en-38-15.jpg?direct&)

Amaa caskar Yeesus abbirhik, Bithroos ishi sef yeyyeeceyaako wuli naba qashshih khaddaamko cokka akko yigrice. Yeesus: "Asac-ish tamaa sef! Anu yi deesoona Yabba malaykutti maxaaarho kaa essere dhaarhe. Laakin inni Abba aabbo yolle tane" ake. Sarrah Yeesus amaa labhattih cokka uruse. Yeesus yindhibbirhemko sarrah, amaa darasa inkoh kuden.

*Quddus kin Kitaabhi zanta: Maatiyos 26:14-56; Markos 14:10-50; Luukas 22:1-53; Yohannis 12:6; 18:1-11*

## 39. Yeesus yammirmire

https://openbiblestories.org/l/ssy/story-39/

![](https://cdn.door43.org/obs/jpg/360px/obs-en-39-01.jpg?direct&)

Amaa geedi barti abrha kii yine. Amaa caskar Yeesus yibbirhiinih amaa naba qashshi kaa yamarmaro kaa fanah beyen. Bithroos lel caazalle mirixtaako ten katattaa yine. Yeesus caredde orbishen gedda, Bithroos irolle raaceyaako wuli giralle lalace.

![](https://cdn.door43.org/obs/jpg/360px/obs-en-39-02.jpg?direct&)

Amaa carih addadde, Yahuud naba mari Yeesus yimirmirin. Kaa sabbatah zirabbitta zirabti shohodaako lel mango mara baaheenih yinin. Yakko kibah ten waani sitta taatukem kii tinemhi sabbatah, Yahuud naba mari Yeesusuk walaa inki cagab adde yaysabatoona mirhiicinnooni. Yeesus walaa inkim marhxinna.

![](https://cdn.door43.org/obs/jpg/360px/obs-en-39-03.jpg?direct&)

Abayshimalle, amaa naba qashshi Yeesusko nifidde kulux-akeh: "Noh warish, atu yane Yallih Barha kin Masiix kito?" ake.

![](https://cdn.door43.org/obs/jpg/360px/obs-en-39-04.jpg?direct&)

Yeesus: "Yoo kiyo. Yallaalih defeyeh carsheeko amiitik lel yi tabloona kitin" ake. Amaa naba qashshi kurah sara ishelle candhishak amaa diin naba marak wac-yerhxeyaako: "Kamboh aki shahoda ni mifarhshishsha! 'Yallih Barha kiyo' arhxik lel sinneh toobbiinih tanin. Sin firdi ayim kinni?" yerhxe.

![](https://cdn.door43.org/obs/jpg/360px/obs-en-39-05.jpg?direct&)

Yahuud naba mari amaa naba qashshek inkoh: "Rabi akah eedda!" aken. Sarrah, Yeesusko nif akko alifeenih, thuf alle yerhxiinih kaa yootokiniyaako alle tsaggarowen.

![](https://cdn.door43.org/obs/jpg/360px/obs-en-39-06.jpg?direct&)

Bithroos irolle ten ilaalak lel wuli casbentö kaa tubleyaako: "Atu gantah Yeesuslih tinito" akte. Bithroos lel buurh-ishite. Sarrah wuli barhä lel amaa ginah terhxe gedda Bithroos malammih buurh-ishite. Abayshimalle, amaa xiyaw: "Inkoh Galiilaako kitiinimhi sabbatah atu gantah Yeesuslih tinitom naarhige" aken.

![](https://cdn.door43.org/obs/jpg/360px/obs-en-39-07.jpg?direct&)

Sarrah Bithroos: "Anu ta xiyawto aarhigeh ekkemko Yalli yoh yaamo!" yeh dhiiwite. Akkanih lel wuli dor-hotti andhaxe gedda, Yeesus ufkun-yeh Bithroosudde kulux-yerhxe.

![](https://cdn.door43.org/obs/jpg/360px/obs-en-39-08.jpg?direct&)

Bithroos yedeyeyaako sirii ginah weece. Amayimkehi fanah lel Yahuuda, Yahuud naba mari Yeesus rabih kaa yifridiinim yuble. Yahuuda qadabah yemmeegeyaako yedeeh ishe yigdife.

![](https://cdn.door43.org/obs/jpg/360px/obs-en-39-09.jpg?direct&)

Malammit max dhaxiine, amaa Yahuud naba mari Yeesus Roomaati ammaxadaari kin Pilaaatos fanah kaa baahen. Usun Pilaaatos Yeesusuk cagab wanna akkabeh rabih kaa yafrado kinni yittiminniinih yiniinim. Pilaaatos Yeesusuk: "Atu Yahuud nugus kitoho?" yeh kaa essere.

![](https://cdn.door43.org/obs/jpg/360px/obs-en-39-10.jpg?direct&)

Yeesus: "Atu gantah teh tanito, yi nigsinna laakin baarhot nigsinna maki. Kii tineh takkeedo yi khaddamte yoh dhibbaye dhaarhen. Ta baarholle emeetem Yallih sabbatah rumma warisho bisa kinni. Rumma akxininnanti lel yi yaabbe. Bithroos lel: "Aymti rumma?" yeh kaa essere.

![](https://cdn.door43.org/obs/jpg/360px/obs-en-39-11.jpg?direct&)

Pilaaatos Yeesuslih waanishek sarrah irolle yewceh amaa teketteh tine xiyawak: "Ta xiyawtodde walaa inki cagab adde migeyinniyo" ake. Amaa Yahuud naba mara kee amaa xiyaw: "Kaa takar!" yeenih andhaxen. Pilaaatos lel: "Usuk cagab male" yeh alle deheye. Amaa gedda inkinnah awwalko ziyaada wac-yeenih andhaxen. Sarrah Pilaaatos maddaxit gedda: "Usuk cagab male!" yerhxe.

![](https://cdn.door43.org/obs/jpg/360px/obs-en-39-12.jpg?direct&)

Pilaaatos amaa xiyaw cigirigir abaanamko mashshiiteh, kaa caskar Yeesus takaroona yensemeemece. Roomaati xiyawhi caskar lel Yeesus khormaajah yootokiinih wuli nugus gamde kee keenanko siraaxime nugus qoobic amokke akko hayen. "Ubula, Yahuud Nugus!" yeenih lel alle tsaggarowen.

*Quddus kin Kitaabhi zanta: Maatiyos 26:57-27:26; Markos 14:53-15:15; Luukas 22:54-23:25; Yohannis 18:12-19:16*

## 40. Yeesus takarime

https://openbiblestories.org/l/ssy/story-40/

![](https://cdn.door43.org/obs/jpg/360px/obs-en-40-01.jpg?direct&)

Amaa caskar Yeesusulle tsaggaroweenik sarrah, kaa takaroona kaa beyen. Tamaa akrabo le masqal lel kaa yushshuqhucin.

![](https://cdn.door43.org/obs/jpg/360px/obs-en-40-02.jpg?direct&)

Amaa caskar Yeesus wuli karhkadhdhe akyarhxinille kaa baaheenih lakuk kee gabubuh masqalak kaa yisimmirin. Yeesus laakin: "Abba, usun abaa yaniinim miyaarhigiiniiki alle xab" yerhxe. Pilaatos lel: "Yahuud Nugus" yarhxe kutuub wuli luxulle yuktubiinih amaa masqalko Yeesus amoh bukalle hayoona ten yeemere.

![](https://cdn.door43.org/obs/jpg/360px/obs-en-40-03.jpg?direct&)

Amaa caskar Yeesus saralle qumaarah alle digiren. Tayim aben gedda lel amaa: "Yi natsala sinni fanadde xazziiliteenih yi saralle qumaarah alle digiren" terhxeh tunkuttubeh tinem yiskimilin.

![](https://cdn.door43.org/obs/jpg/360px/obs-en-40-04.jpg?direct&)

Yeesus wuli lamma garceenih fanadde takarimeh yine. Tenko wuliti Yeesusulle tsaggarowe gedda wuliti: "Atu Yallih mashshi malito? Nanu cagab-wannun kino, ta xiyawti laakin cagab-male kinni" yerhxe. Usuk sarrah Yeesusuk: "Ku beezza ishi nigsinnadde yizzikkir" ake. Yeesus lel: "Kaafa, Jannadde yoolih takko kito" yeh alle deheye.

![](https://cdn.door43.org/obs/jpg/360px/obs-en-40-05.jpg?direct&)

Amaa Yahuud naba mara kee amaa tekette xiyaw Yeesusulle alle tsaggarowen. "Yalli Barha tekkemko, tamaa masqalko obaaki ishe garger! Sarrah nanu lel ku naamano kino" yerhxin.

![](https://cdn.door43.org/obs/jpg/360px/obs-en-40-06.jpg?direct&)

Sarrah lellecti abrha kii tine hanik, umbuka amaa manthiqhah bukalle yine caran dite yekke. Lellecti abrhah dite tekkeyaako amaa dite adooxa saaca sugte.

![](https://cdn.door43.org/obs/jpg/360px/obs-en-40-07.jpg?direct&)

Sarrah Yeesus wac-yerhxeyaako: "Bakitte! Abba inni ufaye ku gabadde haak aniyo" yerhxe. Sarrah amo guballe cunuunuseyaako ofa akko tewce. Usuk rabe gedda, naba kirdidimo tekkeyaako Maqhdas Caredde amaa xiyaw kee Yallih aniina barhishak yine goleeni aganaako guba fanah candhiirheh lammalle xazziime.

![](https://cdn.door43.org/obs/jpg/360px/obs-en-40-08.jpg?direct&)

Yeesus ishi rabih abeyaako xiyaw Yallalle yamaatoona arax fake. Amaa Yeesus dhawrhak yine caskarti tamaa tekkem yuble gedda: "Rummah ta xiyawti cagab-male kii yine. Usuk Yallih Barha kii yine" yerhxe.

![](https://cdn.door43.org/obs/jpg/360px/obs-en-40-09.jpg?direct&)

Sarrah, Yoosuf kee Nikodeemos, wuli lamma Yahuuddi Yeesus Masiix kinam teemeneya, Yeesus rashsha akah yaxawo Pilaaatos esseren. Kaa rashsha wuli saradde agoogisheenih wuli qooqhaxadde faraacime qabredde kaa hayen. Wuli galaalacin dhaa baaheenih lel afadde akko alifen.

*Quddus kin Kitaabhi zanta: Maatiyos 27:27-61; Markos 15:16-47; Luukas 23:26-56; Yohannis 23:26-56; Yohannis 19:17-42*

## 41. Yalli Yeesus rabiiko ugusa

https://openbiblestories.org/l/ssy/story-41/

![](https://cdn.door43.org/obs/jpg/360px/obs-en-41-01.jpg?direct&)

Amaa caskar Yeesus takareenimko sarrah, aamininnixe Yahuud naba mari Pilaatosuk: "Tamaa zirable kin Yeesus, 'adooxa maxak sarrah rabiiko uguto kiyo' yerhxeh yine. Tamaa kaa darasa yemeetiinih amaa rashsha gareciniyaako 'rabiiko ugute' nok yarhxinki akkinnanti dhawrho alle tane" aken.

![](https://cdn.door43.org/obs/jpg/360px/obs-en-41-02.jpg?direct&)

Pilaatos lel: "Caskarko garo beyaaki qabre faakoona akah dhiice waanaakah dhawrhanta" ake. Amaa caraf meceetih yuxtumiinih amaa rashsha gari garactamko caskar dhawrhoh alle hayen.

![](https://cdn.door43.org/obs/jpg/360px/obs-en-41-03.jpg?direct&)

Yeesus yumuccugemko malammit max cindha sambat kii yinemhi sabbatah Yahuud qabaaralle yadawna masmuux kii miyine. Cindha sambatko sarraahit max maaxalle wuli sayyooko gari Yeesus qabre fanah yedeynih kaa rashshalle jinaazat caydarruus alle hayoona yinqirribin.

![](https://cdn.door43.org/obs/jpg/360px/obs-en-41-04.jpg?direct&)

Gar-heeko lel naba kirdidimo tekke. Wuli xankarha balih ifisha malaykatti caranko yemeete. Amaa qabredde alfiimeh yine dhaa asac-isheh lel bukakke akko defeye. Amaa qabre dhawrhaa tine caskar lel birriigeenih rabtem balih baarholle raden.

![](https://cdn.door43.org/obs/jpg/360px/obs-en-41-05.jpg?direct&)

Amaa sayyo amaa qabrelle yemeetin gedda, amaa malaykatti: "Mimashshiitina. Yeesus talle miyane. Usuk akah sinak yeh yineekah rabiiko uguteh yane! Ubula, qabredde kulux-erhxa" ake. Amaa sayyo amaa qabredde kulux-yerhxin gedda, Yeesus nabsi carhah alle gaxeh yinekke yublin. Kaa nabsi laakin amalle miyine.

![](https://cdn.door43.org/obs/jpg/360px/obs-en-41-06.jpg?direct&)

Sarrah amaa malaykatti amaa sayyok: "Tedeynih darasah akah warishanta. Yeesus rabiiko uguteh yane, sin afadde lel Galiila fanah yadaw kinni" ake.

![](https://cdn.door43.org/obs/jpg/360px/obs-en-41-07.jpg?direct&)

Amaa sayyo gilix kee naba xedenih yemmeegiinih yinin. Amaa mece ware darasah warishoona lel yerdin.

![](https://cdn.door43.org/obs/jpg/360px/obs-en-41-08.jpg?direct&)

Amaa sayyo mece ware amaa darasah warishoona adiik, Yeesus alle yemeeteyaako usun akah yucbudin. Yeesus: "Mimashshiitina. Tedeynih lel yi darasak Galiila fanah yadawna akah warisha. Amalle yi yabloona kinon" ake.

*Quuddus kin Kitaabhi zanta: Maatiyos 27:62-28:15; Markos 16:1-11; Luukas 24:1-12; Yohannis 20:1-18*

## 42. Yeesus carshe fanah gaxa

https://openbiblestories.org/l/ssy/story-42/

![](https://cdn.door43.org/obs/jpg/360px/obs-en-42-01.jpg?direct&)

Yeesus rabiiko ugute max, kaa darasaako lamma wuli dhaye katama fanah adii yinin. Usun gerhak lel Yeesusulle tekkemidde haasawak yinin. Usun usuk Masiix kii yineh yakko attiminniik yiniinimko laakin usuk rabe. Amaa sayyo lel usk kaddih ufaalih yanem warishen. Aymih yaaminiinim lel sorheenih yinin.

![](https://cdn.door43.org/obs/jpg/360px/obs-en-42-02.jpg?direct&)

Yeesus tenadde kab-yerhxeyaako tenlih gerho erherhishe. Usun laakin kaa maysharhaarhaginnooni. Usuk aymidde haasawak sugeenim ten essereyaako, usun ta tillaabe dago lellecidde Yeesus zacabah tekke bexsishsha xaaja akah warishen. Usun aalih waanishaa yiniinim wuli gerhenta Yerusaalemille tekkem sorhaya yekkelin.

![](https://cdn.door43.org/obs/jpg/360px/obs-en-42-03.jpg?direct&)

Sarrah Yeesus Yallih waani Masiix sabbatah ayim tarhxem akah warishe. Masiix waaxelsiito kee rabo kinam, maddaxit lellec lel uguto kinam tamaa nobowa yerhxiinih yininiya ten duhsuuse. Amaa lamma xiyawti defeyoona alle yixiggiriinih yinin katama gufen gedda baarho dhumte.

![](https://cdn.door43.org/obs/jpg/360px/obs-en-42-04.jpg?direct&)

Amaa lamma xiyawti Yeesus amaa bar tenlih yadaw kaa yiczimin. Usuk lel tenlih yedee. Dirar beetoona yinqirribin gedda lel Yeesus folottat kinnas yooqhoceyaako Yallah xamde yaddebbeyaako yigdile. Akkanih lel Yeesus kinam kaa yeysherheerhegin. Amaa waqhte laakin ten nifko yelee.

![](https://cdn.door43.org/obs/jpg/360px/obs-en-42-05.jpg?direct&)

Amaa lamma labhatti sinne-sinneh: "Amaati Yeesus kii yine! Amaymih kinni warak Yallih waani noh yishrixe gedda afcaado nodde bololak tinem!" yerhxin. Akkanih lel Yerusaalem fanah gaxen. Gaxen gedda amaa darasak: "Yeesus wafaalih yane. Nanu kaa nuble!" yerhxin.

![](https://cdn.door43.org/obs/jpg/360px/obs-en-42-06.jpg?direct&)

Amaa darasa waanishak, Yeesus gar-heeko amaa caredde tenalle yemeeteh: "Salaam sinah yakko!" ake. Amaa darasa wuli ufaye kaa yekkelin, Yeesus laakin: "Aymih mashshittaanah shakkittaanam? Ubula yi gabub kee yi lakuk. Ufayi yoyya balik nabse male. Ufaye makinam ten yayballaw lel akkinnan bettimtam akah yaxawna ten essere. Alaye caasatto akah yoxynih lel beete.

![](https://cdn.door43.org/obs/jpg/360px/obs-en-42-07.jpg?direct&)

Yeesus: "Yi zacabah Yallih waanidde tunkuttubeh tanem inkoh takmalo alle tanem sinah warisheh iniyo" ake. Yallih waani yafhamoona ciloh lel xangal akah faake. Usuk: "Dherh muddah, Masiix waaxelsiito kee rabo kinam, maddaxit max lel rabiiko uguto kinam tunkuttubeh tine."

![](https://cdn.door43.org/obs/jpg/360px/obs-en-42-08.jpg?direct&)

"Ten zambi akah xabbiimo ciloh ummanti yataabo alle tanem yi darasa warishoona kinoonim gantah kutuubudde tunkuttubeh tane. Tayim lel Yerusaalemko erherhisheenih umbuka xiyawhi kishoshulle adiik aboona kinon. Atin tayimhi shohoda kitin" yerhxe.

![](https://cdn.door43.org/obs/jpg/360px/obs-en-42-09.jpg?direct&)

Ta tillaabe marootom iggidiyadde, Yeesus ishi darasah mango waqhte yumbulluwe. Wuli gedda, inki waqhtelle wuli 500 xiyawtiyah yakkeedo yumbulluweh yine! Usuk wofaalih yinem ishi darasa mango araxah ten yuybulluweh Yallih nigsinnah zacabah ten yuyduruse.

![](https://cdn.door43.org/obs/jpg/360px/obs-en-42-10.jpg?direct&)

Yeesus ishi darasak: "Umbuka carshe kee baarhoh mas-uuliya yoh tomxowweh tane. Amaydo, aduwantaaki inkoh ta anu sin eemereh aniyom aboona ten tuydurusiinih, umbuka xiyawhi kishosh darasa yakkoona Abba, Barha kee Quddus kin Ufayih migacalle ten iythimmiqhanta. Anu umman gedda sin annaw kiyom lel izzikkiranta" ake.

![](https://cdn.door43.org/obs/jpg/360px/obs-en-42-11.jpg?direct&)

Yeesus rabiiko ugutemko marootom lellectiyak sarrah, ishi darasak: "Quddus kin Ufayi sinalle yemeeteyaako Yabba xayla sinah yaxayem fanah Yerusaalemille suganta" ake. Sarrah Yeesus carshelle koreyaako, darur ten intitko kaa sucuse. Yeesus umbukaahim yaxkamo Yallahi mizgi gabooko defeyeh yane.

*Quddus kin Kitaabhi zanta: Maatiyos 28:16-20; Markos 16:12-20; Luukas 24:13-53; Yohannis 20:19-23; Fartottit hi Abittot 1:1-11*

## 43. Kaniisa erhedhdha

https://openbiblestories.org/l/ssy/story-43/

![](https://cdn.door43.org/obs/jpg/360px/obs-en-43-01.jpg?direct&)

Yeesus carshelle gaxek sarrah, amaa darasa Yeesus akah ten yeemereekah Yerusaalemille defeyen. Yaamine mari lel laklalakalle amalle yassallawna akattii yinin.

![](https://cdn.door43.org/obs/jpg/360px/obs-en-43-02.jpg?direct&)

Iggida iggidah, Faasigaako 50 lellectiyak sarrah, Yahuud Penteekostees akyarhxin makkole lellec yixtifilin. Penteekostees akyarhxiinim Yahuud sinraa orba adde yaxtifilin waqhte kinni. Penteekostees yaxtafaloona Yahuud umbuka caalamako Yerusaalemille yakattin. Ta iggidadde, amaa Penteekostees waqhti Yeesus carshelle gaxemko baxuurok sarrah yekke.

![](https://cdn.door43.org/obs/jpg/360px/obs-en-43-03.jpg?direct&)

Amaa yaamine mari inkidde anik lel, gar-heeko amaa usun adde yinin cari wuli sirii xaaxatti dhaw hi xibar lemih yemmeege. Sarrah amaa inkoh yaamine marih amomulle wuli girat bolahi xibar lem tumbulluwe. Inkoh Quddus kin Ufayeh yemmeegiinih lel aki waanih waanishoona erherhishen.

![](https://cdn.door43.org/obs/jpg/360px/obs-en-43-04.jpg?direct&)

Yerusaalemille tine xiyaw amaa dhaw yoobbin gedda, akkii tanem yabloona mango xiyaw amalle temeete. Amaa xiyaw amaa yaamine mari besishsha Yallih ciyyo warishaa yoobbin gedda, tayim ten-ten waanin yoobbiinimih mangum cibrah raben.

![](https://cdn.door43.org/obs/jpg/360px/obs-en-43-05.jpg?direct&)

Amaa xiyawko gari amaa darasak 'yiskiriinih yaanam kinni' aken. Bithroos laakin uguteyaako: "Yoobbaanta! Ta xiyaw yiskiriinih miyaniini. Tayim basoh Yalli nabii Yowel araxah abeh 'Sarroorimat max, anu inni Ufay xarho kiyo' yeh yinem takmalo tekkem kinni."

![](https://cdn.door43.org/obs/jpg/360px/obs-en-43-06.jpg?direct&)

"Israa-eel xiyawo, tamaa tubliinih akah taarhigiiniikah, Yeesus Yallahi xaylah naba ishaaraat kee mango bexsishsham abe xiyawto kinni. Atin laakin kaa masqalak kaa takarten!"

![](https://cdn.door43.org/obs/jpg/360px/obs-en-43-07.jpg?direct&)

"Walaa Yeesus rabo kibah, Yalli rabiiko kaa uguse. Tayim lel tamaa: 'Atu ishi Quddus Kintiya, qabredde kaa mabxishsha' yeenih yiniinim takmalo tekkem kinni. Yalli Yeesus rabiiko uguseh malammih aniina akah yoxyeh yanemih shohoda kino."

![](https://cdn.door43.org/obs/jpg/360px/obs-en-43-08.jpg?direct&)

"Yeesus kado Abba kin Yallahi mizgi gabooko defeyeh yane. Yeesus lel tamaa abo kinamah wacde akah sayekah Quddus kin Ufaye dhirhiyeh yane. Amaa Quddus kin Ufayi lel ta kado ablii taniinim kee aabbii taniinim abshiisha yane."

![](https://cdn.door43.org/obs/jpg/360px/obs-en-43-09.jpg?direct&)

"Atin ta xiyawto, Yeesus, masqalak takarten. Laakin Yalli thummutuh Yeesusuk Maddara kee Masiix akko abeh yane!" ake.

![](https://cdn.door43.org/obs/jpg/360px/obs-en-43-10.jpg?direct&)

"Amaa Bithroos aabbii tine xiyawadde lel usuk yerhxem mangum adde tossoobbe. Amaymih usun Bithroos kee amaa darasak: "Ni saculo, ayim abno nolle tane?" yeenih ten esseren."

![](https://cdn.door43.org/obs/jpg/360px/obs-en-43-11.jpg?direct&)

Bithroos: "Sinko ummanti yotoobeyaako, Yalli kaa zambe akah xabo ciloh Yeesus migacalle yanthammaqho alle tane. Sarrah usuk lel Quddus kin Ufayhi muttuxuwa akah yaxawo kinni” yeh eldeheye.

![](https://cdn.door43.org/obs/jpg/360px/obs-en-43-12.jpg?direct&)

3000 xiyawtiya takkem lel amaa Bithroos yerhxem yeemeniinih Yeesus darasa yekkin. Usun yinthimmiqhiinih lel Yerusaalem kaniisah zooba yekkin.

![](https://cdn.door43.org/obs/jpg/360px/obs-en-43-13.jpg?direct&)

Amaa darasa umman gedda amaa fartottit ten yaydurusiinim aabbik, inkidde waqhte tillaabishak, inkidde beetak kee inkidde assillii yinin. Inkidde Yalla faylishaanam yikxiniinih lel loonim inkidde xazziilitaa yinin. Ummanti lel ten sabbatah mecim axeesebii yine. Maaxi yamaato cusub mari aaminii yinin.

*Quddus kin Kitaabhi zanta: Fartottit hi Abittot 2*

## 44. Bithroos kee Yohannis caageena urusan

https://openbiblestories.org/l/ssy/story-44/

![](https://cdn.door43.org/obs/jpg/360px/obs-en-44-01.jpg?direct&)

Wuli max, Bithroos kee Yohannis Maqhdas Careh adii yinin. Amaa Maqhdas Careh kab-yerhxin gedda, wuli yixinkishe xiyawti solaadi caagensiitaya yublin.

![](https://cdn.door43.org/obs/jpg/360px/obs-en-44-02.jpg?direct&)

Bithroos amaa xankish kin xiyawtodde kulux adde yerhxeyaako: "Anu solaadih walaa inkim maliyo. Liyom laakin koh axaw kiyo. Yeesus migacalle, ugutaaki aduu!" ake.

![](https://cdn.door43.org/obs/jpg/360px/obs-en-44-03.jpg?direct&)

Akkanih lel Yalli amaa xankish kin xiyawto uruseh, gerho erherhisheyaako tirtiiraak Yalla fayslishite. Amaa Maqhdas Carehi kanshellodde tine xiyaw lel cibrah raben.

![](https://cdn.door43.org/obs/jpg/360px/obs-en-44-04.jpg?direct&)

Mango xiyaw lel amaa ure xiyawto yabloona iba laceenih yeemetin. Bithroos lel: "Aymihi ta xiyawti urem cibra sinalle tekkem? Nanu ninni xaylah hido ninni mecaanih kaa mi urusino. Ta xiyawti urem laakin Yeesus yaxaye xayla kee imaanah kinni."

![](https://cdn.door43.org/obs/jpg/360px/obs-en-44-05.jpg?direct&)

"Sina kinni Roomaati xiyawhi ammaxadaarih Yeesus yagdafo akah warishshem. Atin aniinat abeena tigdifin, Yalli laakin rabiiko kaa uguse. Abaa tiniinim walaa aarhige wayteenimih, tamaa 'Masiix waaxelsiito kee rabo kii yinem' yerhxiinih yininiya takmalo laakin Yalli sin abitto yetneefece. Amaydo, kado sin zambi sinah cakalo kinnik totoobiinih Yallalle ufkunanta" ake.

![](https://cdn.door43.org/obs/jpg/360px/obs-en-44-06.jpg?direct&)

Bithroos kee Yohannis arhxii yiniinim lel amaa Maqhdas Carehi naba mara mangum ten kurrayishshe. Amaa gedda, ten yibbirhiinih ten yixbishin. Amaa xiyawko mango mari laakin Bithroos farto yeemeniinih, Yeesusuh teemene xiyawhi manga 5000 takkem gufen.

![](https://cdn.door43.org/obs/jpg/360px/obs-en-44-07.jpg?direct&)

Malammit max, amaa Yahuud naba mari Bithroos kee Yohannis naba qashshe kee aki diin manabottit fanah ten baahen. Usun lel Bithroos kee Yohannis: "Ta yixinkishe xiyawto awlih xaylah urusseeni?" yeenih ten esseren.

![](https://cdn.door43.org/obs/jpg/360px/obs-en-44-08.jpg?direct&)

Bithroos: "Ta xiyawti Masiix kin Yeesus xaylah ureh sin nifille daw-arhxii yane. Ati Yeesus masqalak kaa takarten, Yalli laakin malammih aniinalle kaa uguse! Atin kaa xinten, Yeesus xaylah yekkem maarhige aki ginah akah gargeeriman arax miyane!" yeh eldeheye.

![](https://cdn.door43.org/obs/jpg/360px/obs-en-44-09.jpg?direct&)

Bithroos kee Yohannis atcilliminnixe gabbar kii yinin hanik sirii ginah waanishak yubliinimhi sabbatah, amaa mas-uuliin birriigen. Sarrah laakin ta mari Yeesuslih yiniinim yizzikkirin. Ten mashshiisheenimko sarrah laakin, Bithroos kee Yohannis yadawna ten xaben.

*Quddus kin Kitaabhi zanta: Fartottit hi Abittot 3:1-4:22*

## 45. Istifaanos kee Filippoos

https://openbiblestories.org/l/ssy/story-45/

![](https://cdn.door43.org/obs/jpg/360px/obs-en-45-01.jpg?direct&)

Tamaa erherh kaniisah naba maraako wulitiyak Istifaanos akkay yinin. Usuk mece ware letiya yekkeyaako Quddus kin Ufayeh yemmeege kas-letiya kii yine. Istifaanos mango bexsishsham abeyaako xiyaw Yeesusuh yaamanoona mece ginah yashshimine araxah yishrixetiya kii yine.

![](https://cdn.door43.org/obs/jpg/360px/obs-en-45-02.jpg?direct&)

Wuli max, Istifaanos Yeesus zacabah aydurusik, wuli Yeesus aamininnixe Yahuud Istifaanoslih yankaaxadoona erherhishen. Usun mangum kurrayniyaako lel Istifaanosko diin manabottitille akko zirabbiten. Usun: "Usuk Moosa kee Yallih zacabah umam waanishaa kaa noobbe!" lel yerhxin. Amaymih, amaa diin manabottit Istifaanos yibbirhiniyaako, aki Istifaanos zacabah zirabah tashhidem alle tine naba qashshe kee aki diin manabottit fanah kaa baahen.

![](https://cdn.door43.org/obs/jpg/360px/obs-en-45-03.jpg?direct&)

Amaa naba qashshi Istifaanos: "Tayim rumma kinniho?" yeh kaa essere. Istifaanos, Yalli Abraahim waqhteeko aykee Yeesus waqhte fanah abeh yine naba xaaja, Yallih xiyawlee aaginah kaddih kaa xina yaniinim ten xunsuusak radde akah yedebbe. Sarrah lel: "Ko kafnoytit kin mucaaridiino, tamaa sin abbub Yalla xineenih kaa nobowa akah yigdifiiniikah, umman gedda Quddus kin Ufaye xintan. Atin laakin usun abeenimko ziyaada umam abten! Masiix tigdifin!" ake.

![](https://cdn.door43.org/obs/jpg/360px/obs-en-45-04.jpg?direct&)

Amaa diin manabotit tayim yoobbin gedda, mangum kurrayniyaako sinni cokkak alifeeniyaako wac-yeenih andhadhdhaxen. Istifaanos katamaako irolle hiriigeenih kaa yeyyeeciniyaako kaa yagdafoona dhayit alle ciden.

![](https://cdn.door43.org/obs/jpg/360px/obs-en-45-05.jpg?direct&)

Istifaanos lel rabak, wac-yerhxeyaako: "Yeesus, yi ufaye yoh ibbirh" yerhxe. Sarrah lel gulubuh radeh malammih wac-yerhxeyaako: "Mucallimo, ta zambe alle mabbarhin" yerhxe. Sarrah rabe.

![](https://cdn.door43.org/obs/jpg/360px/obs-en-45-06.jpg?direct&)

Wuli Shaa-uul akyarhxin cindhaa gombi amaa Istifaanos tigdife xiyawah usun kayyalle dhayit cidaanandah ten sara akah dhawrho yittifiqhe. Amaa max, mango xiyaw Yeesus katattaynit yacazzaboona erherhisheenimhi sabbatah, amaa yaamine mari akuulalle kuden. Tayim takko kibah laakin, Yeesus zacabah sinneh alle adiinnanille waanishen.

![](https://cdn.door43.org/obs/jpg/360px/obs-en-45-07.jpg?direct&)

Amaa Yerusaalemko kudde yaamine maraako wuliti lel Filippoos akyarhxin Yeesus darasatto kii yine. Samaariya yedeeh lel Yeesus zacabah waanisheyaako mango mari gargeerimen. Sarrah wuli max, Yallih malaykatti alle yemeeteyaako Filippoosuk wuli saxrat araxalle yadaw akah warishe. Filippoos amaa araxalle adiik lel wuli Itobbiyaako yemeete naba mas-uul karrossak adii yuble. Quddus kin Ufayi lel Filippoosuk yedeeh ta xiyawtoolih waanisho akah warishe.

![](https://cdn.door43.org/obs/jpg/360px/obs-en-45-08.jpg?direct&)

Filippoos wuli karrossah kab-yerhxe gedda, wuli Itobbiyah xiyawti nabi Isayas yuktubeh yinemko aqhriik yoobbe. Amaa xiyawti: “Ciidoyta balih yagdafoona kaa beyen, usuk lel ciidotta balih sik-yerhxe. Walaa inki kalima marhxinna. Umaatih kaa yibbirhiin, kaa gantah mixishmatinnooni. Kaa yigdifin” yerhxeh yiqhriye.”

![](https://cdn.door43.org/obs/jpg/360px/obs-en-45-09.jpg?direct&)

Filippoos amaa Itobbiyaytok: "Ta aqhrii tanitom kodde oobaa tane?" yeh kaa essere. Amaa Itobbiyatti: "Maale. Akkinnanti yoh ashrixekkah afhamo mirhiica. Amowaaki ku beezza yi agaagalle defee. Isayas ishi sabbatah yuktubem kinni walla aketti sabbataha?" yeh eldeheye.

![](https://cdn.door43.org/obs/jpg/360px/obs-en-45-10.jpg?direct&)

Filippoos amaa Itobbiyattoh Isayas Yeesus zacabah yuktubem akah warishe. Filippoos Yeesus zacabah mece ware akah warisho ciloh aki kutuub yakkeedo yetneefece.

![](https://cdn.door43.org/obs/jpg/360px/obs-en-45-11.jpg?direct&)

Filippoos kee amaa Itobbiyatto inkidde araxalle adiik wuli layelle yemeetin. Amaa Itobbiyatti: "Ubul! Talle laye tane! Anthammaqho haye?" yerhxe. Amaa karrossa beyatiyak lee daw-ishishe.

![](https://cdn.door43.org/obs/jpg/360px/obs-en-45-12.jpg?direct&)

Sarrah, inkoh layedde oobeniyaako, Filippoos amaa Itobbiyatto yiythimmiqhe. Usun amaa layeko yewciinik sarrah, Quddus kin Ufayi Filippoos uqhuc-isheyaako akuula usuk Yeesus zacabah xiyawlih alle zindhdhiimaa yinelle kaa beye.

![](https://cdn.door43.org/obs/jpg/360px/obs-en-45-13.jpg?direct&)

Amaa Itobbiyatti Yeesus yeerhegemih xedenak ishi dik-hi gabolle yedee.

*Quddus kin Kitaabhi zanta: Fartottit hi Abittot 6:8-8:5; 8:26-40*

## 46. Pawlos kishtaanita

https://openbiblestories.org/l/ssy/story-46/

![](https://cdn.door43.org/obs/jpg/360px/obs-en-46-01.jpg?direct&)

Shaa-uul amaa Istifaanos tigdife xiyawhi sara dhawrhe gufaa kii yine. Yeesusuh aaminii miyinemhi sabbatah Yaamine marah aazii yine. Yerusaalemille care careh yadiyeh saymara kee labmara yabbirheyaako asxibishii yine. Naba qashshi lel Demaashqa fanah yedeeh amalle tine Kishtan yibbirheh Yerusaalem fanah baaho izne akah yoxoye.

![](https://cdn.door43.org/obs/jpg/360px/obs-en-46-02.jpg?direct&)

Shaa-uul Demaashqa fanah adiik, caranko ifi alle ifisheyaako baarholle rade. Shaa-uul akkinnanti: "Shaa-uul! Shaa-uul! Aymih yi azii tanito?" yarhxeya yoobbe. Shaa-uul lel: "Miyatto kito, Mucallimo?" yeh kaa essere. Yeesus: "Anu Yeesus kiyo. Atu yi azii tanito!" yeh aldeheye.

![](https://cdn.door43.org/obs/jpg/360px/obs-en-46-03.jpg?direct&)

Shaa-uul ugute gedda, yablo mirhiicinna. Kaa soxoba Demaashqa fanah kaa taatishen. Shaa-uul adooxa lellec walaa mibeetinna, maacabinna.

![](https://cdn.door43.org/obs/jpg/360px/obs-en-46-04.jpg?direct&)

Demaashqalle Anaaniyas akyarhxin darasatti yine. Yalli: "Shaa-uul adde yane care fanah aduu. Usuk yablo ciloh lel ishi gabub alle haa" ake. Anaaniyas laakin: "Mucallim, usuk yaamine mara aaginah yeezeem oobbeh aniyo" ake. Yalli: "Aduu! Yi migac Yahuud kee aki xiyawhi kishosh warisho kayya dooreh aniyo. Usuk yi migacah mango xaajah yamcazzabo kinni" yeh eldeheye.

![](https://cdn.door43.org/obs/jpg/360px/obs-en-46-05.jpg?direct&)

Amaymih, Anaaniyas yedeyeyaako ishi gabub Shaa-uululle hayeh: "Tamaa araxadde kolle yemeete Yeesus, atu malammih tablo dhicteyaako Quddus kin Ufayeh tammaago ciloh yi dhirhiyeh yane" ake. Shaa-uul lel akkanih malammih yablo dhiiceh, Anaaniyas kaa yiythimmiqhe. Sarrah Shaa-uul dago folo beeteh kaa xayli akah gaxe.

![](https://cdn.door43.org/obs/jpg/360px/obs-en-46-06.jpg?direct&)

Amalle anim lel, Shaa-uul amaa Demaashqalle tine Yahuuduk: "Yeesus Yalllih Barha kinni!" yeh ten yaydaraso erherhishe. Amaa yaamine mara yaylaw farhaa yine Shaa-uul gantah kado Yeesusuh yeemenem amaa Yahuuduh mangum cibra akah tekke! Shaa-uul Yahuudlih Yeesus Masiix kinamah aalih yenkeexede.

![](https://cdn.door43.org/obs/jpg/360px/obs-en-46-07.jpg?direct&)

Mango maxak sarrah, Yahuud Shaa-uul yagdafoona yixiggirin. Kaa yagdafoona ciloh lel amaa katamat carufulle kaa macalsiita mara hayen. Shaa-uul laakin amaa xagara yoobbeyaako kaa kaxantoolit kudo kaa xaten. Wuli bar amaa katamat qaanaako jambiilidde kaa hayeenih kaa oobishen. Shaa-uul Demaashqaako kudek sarrah, Yeesus sabbatah dhuguuguluh warroyshe.

![](https://cdn.door43.org/obs/jpg/360px/obs-en-46-08.jpg?direct&)

Shaa-uul amaa darasa geyo Yerusaalem yedee, usun laakin akko mashshiiten. Wuli Barnabaas akyarhxin yaaminetii Shaa-uul amaa fartottit fanah kaa beyeyaako, usuk aaginah Yeesus zacabah Demaashqalle warroyshem akah warishe. Amaymik sarrah, amaa darasa Shaa-uul kabbaaten.

![](https://cdn.door43.org/obs/jpg/360px/obs-en-46-09.jpg?direct&)

Wuli yaamine mari Yerusaalemko aziyat mashshih kuddeya lel Antaakhiyaati katama fanah yedeynih amalle Yeesus zacabah warroyshen. Amaa Antaakhiyalle tinem lel mangih Yahuud kii miyiniini, laakin erherhih tenko mango mari yaamine mara yekkin. Barnabaas kee Shaa-uul amaa yaamine mara ziyaada Yeesus zacabah ten yaydarasoona kee amaa kaniisa yasqawwawna amakke yedeyin. Amaa Antaakhiyalle bisa kinni erherhih yaamine marak "Kishtan" akyeenim.

![](https://cdn.door43.org/obs/jpg/360px/obs-en-46-10.jpg?direct&)

Wuli max, amaa Antaakhiyaati Kishtan asoomi kee assilliik, Quddus kin Ufayi: "Barnabas kee Shaa-uul anu aboona akah ten deecime ciyyo aboonaaki yoh barhishanta" akye. Amaa gedda, amaa Antaakiyaati Kishtan Barnabaas kee Shaa-uuluh dhaaco akah abeenih sinni gabub alle oobishen. Sarrah aki baarholle Yeesus zacabah warroysheenih mece ware faax-ishoona ten dhirhiyen. Barnabaas kee Shaa-uul lel mango aki kishoshti xiyaw yuydurusiinih, mango mari Yeesusuh yeemenin.

*Quddus kin Kitaabhi zanta: Fartottit hi Abittot 8:3; 9:1-31; 11:19-26; 13:1-3*

## 47. Pawlos kee Silaas Filippoyalle

https://openbiblestories.org/l/ssy/story-47/

![](https://cdn.door43.org/obs/jpg/360px/obs-en-47-01.jpg?direct&)

Shaa-uul umbuka Roomaati Doolalle kalaaxak, Roomaati xiyawhi migac "Pawlos" yetneefece. Wuli max Pawlos kee kaa zoobatto kin Silaas Filippiiti katamalle yemeetiinih Yeesus zacabah bissiraata warroyshen. Wuli xiyaw takatteh alle yassilliin kataamaako irolle kin nahaar afhi makaanolle yemeetin. Amalle wuli taybicshire numa, Liidiya akyarhxiniya geyen. Tikxineh lel Yallah tucbude.

![](https://cdn.door43.org/obs/jpg/360px/obs-en-47-02.jpg?direct&)

Yalli Liidiya Yeesus fartoh taamano afcaado akah faakeyaako, ishe kee ishi dikih inkoh yinthimmiqhin. Pawlos kee Silaas tee carelle defeyoona ten ticzimeyaako, usun tee diklih defeyen.

![](https://cdn.door43.org/obs/jpg/360px/obs-en-47-03.jpg?direct&)

Pawlos kee Silaas mangih amaa xiyawlih salaat makaanolle geytimaa yinin. Maaxi yamaato usun amalle adiik, wuli timjinnine garuzzo kin barhä adde katattayte. Ta jinnetti araxah lel xiyawah faala ciddayaato takko lem akah warishshah tamaa tee wannunuh mango solaadi akah tesketteh tine.

![](https://cdn.door43.org/obs/jpg/360px/obs-en-47-04.jpg?direct&)

Amaa garuzzo kin barhä usun adiik sarradde akko zerteh: "Ta mari Nabamko Naba Yallih khaddamte kinon. Atin akah gargeerimtaanaakah kinni sinah warishak yaniinim" terhxe. Tayim lel Pawlos gantah gurrassandah maaxi yamaato abte.

![](https://cdn.door43.org/obs/jpg/360px/obs-en-47-05.jpg?direct&)

Abayshimalle, wuli max amaa garuzzo kin barhä zerto erherhishshe gedda, Pawlos teyadde yufkuneyaako amaa teyadde yine jinnettak: "Yeesus migacalle, teeko ewec" ake. Akkanih lel amaa jinnetti tee xabe.

![](https://cdn.door43.org/obs/jpg/360px/obs-en-47-06.jpg?direct&)

Tamaa tee wannun lel mangum kurrayen! Amaa jinnetta hinnim amaa barhä takko lem xiyawah warishsho mirhictam yeerhegin. Tayim lel amaa xiyaw tee wannunuh ishe tenalle takko lem akah warishsho, solaadi akah yaxawna maki macnah kinni.

![](https://cdn.door43.org/obs/jpg/360px/obs-en-47-07.jpg?direct&)

Amaa gedda, amaa garuzzo kin barhähi wannun Pawlos kee Silaas yibbirhiinih Roomaati mas-uuliinhi gabadde ten hayen. Usun lel ten yootokiinih xabshedde ten ciden.

![](https://cdn.door43.org/obs/jpg/360px/obs-en-47-08.jpg?direct&)

Usun Pawlos kee Silaas sirii ginah dhawrhuma xabshedde ten haynih ibaako gantah ten yurhuyin. Usun lel barti abrhah Yallih fayla qannishaa yinin.

![](https://cdn.door43.org/obs/jpg/360px/obs-en-47-09.jpg?direct&)

Gar-heeko lel amalle dhacuma kirdidimo tekke! Umbuka xabshi caraf fakkiteyaako, umbuka maxaabush katiinan lel fakkiteh baarholle rade.

![](https://cdn.door43.org/obs/jpg/360px/obs-en-47-10.jpg?direct&)

Amaa xabshi dhawrheeni ugute gedda, amaa xabshi caraf fakkiteh yubleyaako, mangum birriige! Umbuka maxaabuush kudeenim yekkeleh ishe yagdafo yixiggire. (Maxaabuush dhirhiyemko Roomaati mas-uuliin kaa yagdafoona loonim aarhigii yine.) Pawlos lel kaa yubleh: "Daw-erhex! Ishi maacammajin. Nanu inkoh tadde nanino" ake.

![](https://cdn.door43.org/obs/jpg/360px/obs-en-47-11.jpg?direct&)

Amaa xabshi dhawrheeni, Pawlos kee Silaasalle qathqath-arhxik yemeeteyaako: "Gargeerimo ayim abo yolle tane?" yeh ten essere. Pawlos: "Yeesusuh imin, Maddarah, koo kee ku xawaz lel gargeerimtoona kitin" yeh eldeheye. Sarrah amaa xabshi dhawrheeni Pawlos kee Silaas ishi careh ten beyeyaako ten biyok akah cakalishe. Pawlos lel kaa caredde ummantiyah Yeesus zacabah bissiraata warroyshen.

![](https://cdn.door43.org/obs/jpg/360px/obs-en-47-12.jpg?direct&)

Amaa xabshi dhawrheena kee kaa xawaz Yeesusuh yeemeniinih yinthimmiqhin. Sarrah amaa xabshi dhawrheeni Pawlos kee Silaasah folo akah yoxoyeh inkidde xedenen.

![](https://cdn.door43.org/obs/jpg/360px/obs-en-47-13.jpg?direct&)

Malammit max amaa mas-uuliin Pawlos kee Silaas xabsheeko ten yeyyeeciinih Filippoyko yadawna akah warishen. Pawlos kee Silaas Liidiya kee aki ten kaxantoolit gufeenih amaa katamaako yedeyin. Bissiraata Yeesus zacabah dhuguuguluh faax-yerhxeyaako, kaniisa anabi tenebe.

![](https://cdn.door43.org/obs/jpg/360px/obs-en-47-14.jpg?direct&)

Pawlos kee aki Kishtan naba mari Yeesus zacabah bissiraata warroyshak mango diikalle kallaaxen. Amaa kaniisadde yaamine mara aydukumusoona kee yaydarasoona lel mango jawawub yuktubin. Ta jawawubko gari Quddus kin Kitaabadde kitob yekke.

*Quddus kin Kitaabhi zanta: Fartottit hi Abittot 16:11-40*

## 48. Yeesus wacdi Masiix kinni

https://openbiblestories.org/l/ssy/story-48/

![](https://cdn.door43.org/obs/jpg/360px/obs-en-48-01.jpg?direct&)

Yalli baarho yukhluqhe gedda, ummannim naqhuus hinam kii tine. Zambi miyine. Adam kee Xaawa sitta kixinii yinin, Yalla lel kixinii yinin. Laxuu yakko rabi mitine. Yalli lel ta baarho tagina takko kinni farheh yinem.

![](https://cdn.door43.org/obs/jpg/360px/obs-en-48-02.jpg?direct&)

Sheethan Xaawa doolabo ciloh caroorah yimmingideh eelih waanishe. Sarrah Adam kee Xaawa zambedde sayen. Usun zambe abeenimhi sabbatah baarholle ummanti laxuute ummanti lel rabe.

![](https://cdn.door43.org/obs/jpg/360px/obs-en-48-03.jpg?direct&)

Adam kee Xaawa zambe abeenimhi sabbatah, amayimko ziyaada umam tekke. Usun Yallahi cangit yekkin. Amayidhdhah, amaa maxko taahe ummanti makhaaliqhoh zambeelih yaabuke. Yallih cange yakkeedo yekke. Xiyaw kee Yallih zamoodinni lel zambi sabbatah yiggirice. Yalli laakin amaa zamoodinno yadabbo xagara lii yine.

![](https://cdn.door43.org/obs/jpg/360px/obs-en-48-04.jpg?direct&)

Yalli Xaawat zurriyaako wuliti amaa Sheethan amo yaxarmacho kinam kee Sheethan ishi sune yacammajo kinamah wacde saye. Tayim lel Sheethan Masiix yagdafo, Yalli lel Masiix malammih aniinalle kaa uguseh, Masiix umman gedih amaa Sheethan xayla yaxarmacho yaanam kinni. Mango iggiditik sarrah lel Yalli Yeesus Masiix kinam caddoyshe.

![](https://cdn.door43.org/obs/jpg/360px/obs-en-48-05.jpg?direct&)

Yalli umbuka baarho weecah yeylee gedda, kayyah aamini yine mara gargeero jalba akah yoxoye. Amayim balih lel ummanti zambi sabbatah yalaw akah eedda hanik, Yalli inkoh kayyah yaamine mara gargeero ciloh Yeesus yoxoye.

![](https://cdn.door43.org/obs/jpg/360px/obs-en-48-06.jpg?direct&)

Tenah eedda meqhtsacti amaa xiyaw yayballawna, boolaat iggidiya qashshit Yallah sadaqha abaa yinin. Amaa sadaqha laakin ten zambe beyto mirhiicinna. Yeesus Naba Qashshe kinni. Usuk aki qashshit balih akkekkah, umbuka caalamti xiyawhi zambe beyo ciloh ishi nabse yisiddiqhe. Yeesus ummanti abeh yine zambehi meqtsacti ishelle hayemhi sabbatah naqhuus hin naba qashshe kii yine.

![](https://cdn.door43.org/obs/jpg/360px/obs-en-48-07.jpg?direct&)

Yalli Abraahimik: "Umbuka baarhot kishosh hi xiyaw ku araxah yambaarakoona kinon" ake. Yeesus Abraahim zurriya kii yine. Yeesusuh aamininnanti zambeeko gargeerimeh tislixe Abraahim zurriya yekkemhi sabbatah umbuka kishosh hi xiyaw kaa araxah yembeerekiinih yanin.

![](https://cdn.door43.org/obs/jpg/360px/obs-en-48-08.jpg?direct&)

Yalli Abraahimih ishi barha, Isxaaq, sadaqhah yaxaw akah warishe gedda, kaa barha kin Isxaaq idhdhah, Yalli sadaqhatah ciidotta yoxoye. Nanu ninni inkoh zambeh rabi noh missila. Yalli laakin, Yeesus, Yallih Ciidotta, niidhdhadde rabo sadaqhah yoxoye.

![](https://cdn.door43.org/obs/jpg/360px/obs-en-48-09.jpg?direct&)

Yalli Masrille sarroorimat bala dhirhiye gedda, inkoh Israa-eel xiyawak naqhuus hin ciidotta yurxudiinih kaa biilo sinni dorkokitko guba kee aganaako alle hayoona akah warishe. Yalli amaa biilo yuble gedda, ten riishosh akko agdifekkah ten careeko akko tillaabe. Taymik lel Faasiga akyan.

![](https://cdn.door43.org/obs/jpg/360px/obs-en-48-10.jpg?direct&)

Yeesus ni Faasigahi Ciidotta kinni. Usuk naqhuus male kee zambe male yekkeyaako, Faasigaati cid hi waqhtedde lel kaa yigdifin. Akkinnanti Yeesusuh yaamine gedda, Yeesus biili kaa zambe akah yakfileyaako, amaa xiyawtoh Yallih maqhtsacti aganaako akah tillabta.

![](https://cdn.door43.org/obs/jpg/360px/obs-en-48-11.jpg?direct&)

Yalli amaa doorimte kaa xiyaw kin Israa-eel xiyawlih cahde abeh yine. Kado laakin Yalli ummantiyah yakke Cusub Cahde abeh yane. Ta Cusub Cahdih sabbatah lel akkinnanti farhinnan kishohi xiyawko yekkeh, Yeesusuh yeemeneh Yallih xiyawhi zoobatto yakko dhiica.

![](https://cdn.door43.org/obs/jpg/360px/obs-en-48-12.jpg?direct&)

Moosa Yallih waani warroyshe naba nabii kii yine. Yeesus laakin ummanimko naba kinni. Usuk Yalla kinni. Inkoh usuk yerhxeh abem lel Yallih abitto kee waani kii yine. Amaymih kinni lel Yeesusuk 'Yallih Waanitta' akyarhxiinim.

![](https://cdn.door43.org/obs/jpg/360px/obs-en-48-13.jpg?direct&)

Yalli Nugus Dawuduh, kaa zurriyaako wuliti Yallih xiyawah umman gedda nugus akah yakko kinam wacde akah sayeh yine. Yeesus Yallih Barha kee Masiix kinamhi sabbatah, usuk umman geddah yaxkamo dhiica barhsime Dawud zurriya kinni.

![](https://cdn.door43.org/obs/jpg/360px/obs-en-48-14.jpg?direct&)

Dawud Israa-eel nugus kii yine, Yeesus laakin umbuka udduuniyat nugus kinni! Usuk ishi nigsinnalle cadle kee salaamah umman gedda yaxkamo malammih yamaato kinni.

*Quddus kin Kitaabhi zanta: Erhedhdho 1-3, 6, 14, 22; Muuca 12, 20; 2 Shemuu-eel 7; Cibraan 3:1-6, 4:14-5:10, 7:1-8:13, 9:11-10:18; Waxye 21*

## 49. Cusub Yallih Cahde

https://openbiblestories.org/l/ssy/story-49/

![](https://cdn.door43.org/obs/jpg/360px/obs-en-49-01.jpg?direct&)

Wuli malaykatti barhak tine Maryamak Yallih Barha bahto kinam akah warishe. Ishi kaddih barhak anik Quddus kin Ufayi tee silaalisheyaako soonoyitte. Barha bahteh lel Yeesus akterhxe. Amaydo, Yeesus inkoh Yalla kinnih xiyawto kinni.

![](https://cdn.door43.org/obs/jpg/360px/obs-en-49-02.jpg?direct&)

Yeesus Yalla kaa ishishshamah mango bexsishsham abe. Usuk layet bukalle gerhe, goomadhdhe dhamxishe, mango laxutte xiyaw uruse, rabtem aniinalle uguse, koona folottah kinnas kee lamma cindhaa caasattok lel 5000ko bukalle takke xiyawah dhicta macaasha akko abe.

![](https://cdn.door43.org/obs/jpg/360px/obs-en-49-03.jpg?direct&)

Yeesus Yallih Barha kinamhi sabbatah mas-uuliyaalih waanisha naba mucallim yakkeedo kii yine. Usuk ishe akah kixintookah aki mara takxano kolle tanem aydurusii yine.

![](https://cdn.door43.org/obs/jpg/360px/obs-en-49-04.jpg?direct&)

Ishi gadda xabekkah, ummannimko ziyaada Yalla takxano ku farhshishsham yakkeedo aydurusii yine.

![](https://cdn.door43.org/obs/jpg/360px/obs-en-49-05.jpg?direct&)

Yeesus Yallih nigsinna umbuka caalamalle tane akyaanamko ziyaada limo leya. Akkinnantiya ummannimko ziyaada farhshishsham lel Yallih nigsinnah tiya yakkem kinni. Yallih nigsinnadde orobto, ishi zambeeko gargeerimto kolle tane.

![](https://cdn.door43.org/obs/jpg/360px/obs-en-49-06.jpg?direct&)

Yeesus, xiyawko gari kaa kabbaatoona kinoonim kee gargeerimoona kinoonim, gari laakin kaa kabbaate wayoona kee gargeerimoona makinoonim yuyduruse. Usuk xiyawko gari mece buure balih kinon yerhxe. Yeesus bissiraata kabbaataanah gargeeriman. Xiyawko gari lel tamaa tirir buure araxiya balih yeekkinih Yallih waani adde moorobta, walaa inki orba lel mibahta. Amaa mari Yeesus farto xinaniyaako Yallih nigsinnadde oroboona makinooni.

![](https://cdn.door43.org/obs/jpg/360px/obs-en-49-07.jpg?direct&)

Yalli zambi-wannun mangum kixinam Yeesus yuyduruse. Yalli zambi-wannun kixinam Yeesus Usuk cafuu akah yerhxeyaako ishi cindham akkabo farha.

![](https://cdn.door43.org/obs/jpg/360px/obs-en-49-08.jpg?direct&)

Yalli zambe nicibam lel Yeesus noh warisha. Adam kee Xaawa zambe aben gedda, umbuka zurriya sinneelih dhagen. Abayimhi idhdhah lel, caalamalle yane ummanti zambe abayaako Yallaako barhsime. Amaydo, ummanti Yallih cange yekkeh kinni.

![](https://cdn.door43.org/obs/jpg/360px/obs-en-49-09.jpg?direct&)

Laakin Yalli ta umbuka caalamalle yane mara yikxineyaako, Yeesusuh aamininnanti ishi zambeh anqitstsicekkah Yallaalih umman gedda maro ciloh, ishi Barha, inkettak leya yoxoye.

![](https://cdn.door43.org/obs/jpg/360px/obs-en-49-10.jpg?direct&)

Ishi zambih sabbatah rabi koh eedda. Yalli kolle kurrawo alle tane hanik, ishi kura Yeesusulle xarhe. Yeesus masqalakke rabe gedda, ku maqhtsacti kinni bishshiitem.

![](https://cdn.door43.org/obs/jpg/360px/obs-en-49-11.jpg?direct&)

Yeesus caduruh zambe maabinnaa hanik, ta caalamalle tane xiyawhi zambe beyo ciloh naqhuse hin sadaqhat yekkeh yanqatstsaco kee rabo doorite. Yeesus ishe yisiddiqhemhi sabbatah, Yalli walaa tamaa mangum uma zambe gantah yaseemexe.

![](https://cdn.door43.org/obs/jpg/360px/obs-en-49-12.jpg?direct&)

Mece ciyyoy ku migargeera. Yallaalih zamoodinno taallo ciloh abto dhictamah walaa inkim mitane. Atu Yeesus Yallih Barha kinam kee ku idhdhadde masqalakke rabem, Yalli lel malammih rabiiko aniinanalle kaa ugusem taamano kolle tane.

![](https://cdn.door43.org/obs/jpg/360px/obs-en-49-13.jpg?direct&)

Yeesusuh taamineh kayyak sinni Maddara abita mara Yalli inkoh gargeero kinni. Kayyah aamininnixe mara lel inkoh gargeero maki. Atu gaddaale takkeedo, baaxenta, labhatto takkeedo numa, cindhatiya takkeedo nabatiya, walaa awla martam barhsa male. Yalli ku kixina, Yeesusuh teemeneh lel kaalih dhaye zamoodinno taallo kok farha.

![](https://cdn.door43.org/obs/jpg/360px/obs-en-49-14.jpg?direct&)

Yeesus kayyah teemeneh tanthammaqho koh deecima. Yeesus Masiix kinam kee Yalli inkettak le Barha kinamah taamine? Atu zambi-wanna kitom kee Yalli ku yaqhtsaco akah eeddamah taamine? Yeesus masqalakke rabem ku zambe beyo ciloh kinamah taamine?

![](https://cdn.door43.org/obs/jpg/360px/obs-en-49-15.jpg?direct&)

Atu Yeesus kee usuk abemih teemenemko, Kishtanto kito! Yalli dite kin Sheethan nigsinnaako ku yeyyeeceh, ifo kin Yallih nigsinnadde ku hayeh yane. Yalli basoohit zambelem akah abaa tinitookah asac-isheyaako, cusub arax xaqqe-lem akah abtaya koh yoxoyeh yane.

![](https://cdn.door43.org/obs/jpg/360px/obs-en-49-16.jpg?direct&)

Kishtanto tekkemko, Yeesus abemih ku zambe kolle xabeh yane. Kado Yalli, cange balih makiiki, dhaye kaxantoole balih ku yubleh yane.

![](https://cdn.door43.org/obs/jpg/360px/obs-en-49-17.jpg?direct&)

Atu Yallih kaxantoole kee Maddara kin Yeesus hi khaddaam tekkemko, Yeesus ku yaydurusem abto fadhdho kito. Atu walaa Kishtanto tik kibah, kaddih zambo abto tacakkano kito. Yalli umun kinamhi sabbatah, ishi zambe teelememko, cafuu koh yarhxo kinni. Zambi diddeh tandafalo lel xayla koh yaxaw kinni. .

![](https://cdn.door43.org/obs/jpg/360px/obs-en-49-18.jpg?direct&)

Atu tassallaw, kaa waani tazaakaro, aki Kishtanlih inkidde cibaada abto kee Yeesus koh abem yanem aki marah warishsho Yalli koh warisha. Tayim lel inkoh kaalih addale zamoodinno taallo ku xattam kinni.

*Quddus kin Kitaabhi zanta: Roomaati Xiyaw 3:21-26, 5:1-11; Yohannis 3:16; Markos 16:16; Kolossayti Xiyaw 1:13-14; 2 Korintosti Xiyaw 5:17-21; 1 Yohannis 1:5-10*

## 50. Yeesus gaxa

https://openbiblestories.org/l/ssy/story-50/

![](https://cdn.door43.org/obs/jpg/360px/obs-en-50-01.jpg?direct&)

Yeesus Masiix zacabah bissiraata ta caalamalle tane xiyaw wuli 2,000 iggidiya takkem yoobbiinih yanin. Kaniisa carsima tine. Yeesus lel ta caalamhi abayshimah gaxo kinamah wacde saye. Kaddih walaa gaxeh anniye wayo kibah ishi wacde miyathlime.

![](https://cdn.door43.org/obs/jpg/360px/obs-en-50-02.jpg?direct&)

Yeesus gaxnan ilalna hanik lel, Yalli quddus kin arax kee kayya yaynabe araxah marno nok farha. Kaa nigsinnah zacabah lel aki marah warishno nok farha. Yeesus ta baarholle yine gedda: "Yi darasa umbuka ta caalamko ummanille tane xiyawah Yallih nigsinnahi zacabah bissiraata warroyshoona kinon, amymik sarrah lel, abayshima takko kinni" yerhxe.

![](https://cdn.door43.org/obs/jpg/360px/obs-en-50-03.jpg?direct&)

Mango kishosh hi xiyaw Yeesus zacabah kaddih yoobbiinih miyaniini. Usuk carshelle gaxamko basolle Kishtanakke ta bissiraata caduruh toobbeh sodhdha xiyawah akah warishoona akah warisheh yine. Usuk: "Aduwantaaki umbuka kishoshti xiyaw uydurusanta! Dhageg orba gufeh yane!" yerhxe.

![](https://cdn.door43.org/obs/jpg/360px/obs-en-50-04.jpg?direct&)

Yeesus: "Khaddaam ishi wannaako minaba. Ta caalamti mas-uuliin akah yi yincibiiniikah, yi sabbatah sin yacazaboona kee sin yaatakoona kinon. Atin ta caalamalle walaa imcizziba kibah, anu ta caalam yaxkume Sheethan iscireh aniyomhi sabbatah, aydukum-erhexanta. Abayshima fanah yoolih tisbitiinimko, sarrah Yalli sin gargeero kinni!" yakkeedo yerhxe.

![](https://cdn.door43.org/obs/jpg/360px/obs-en-50-05.jpg?direct&)

Ta caalamhi abayshima takke gedda, ta xiyaw ayim yakkoona kinoonim akah caddoysho Yeesus ishi darasah wuli zanta akah daalisheh yine. Usuk: "Wuli xiyawti dhagedde ilaw yizriye. Usuk dhiinak, wuli kaa cangi yemeeteh amaa sinraalih tsaxyaa agaagaako aalih yitkileh akko yedee."

![](https://cdn.door43.org/obs/jpg/360px/obs-en-50-06.jpg?direct&)

"Amaa takli yubqule gedda, amaa xiyawtih casbentit: 'Maddara, to dhagedde mece zara tizriyeh tinito. Aymihi tsaxyaa adde yanem?' aken. Amaa wanna lel: 'Wuli cangi adde yitkileh yakko alle tane' yeh alle deheye."

![](https://cdn.door43.org/obs/jpg/360px/obs-en-50-07.jpg?direct&)

"Amaa casbentit lel sinni wannak: 'Amaa tsaxyaa akko bukkusno?' yeenih kaa esseren. Amaa wanna lel: 'Maale. Amyim abteenimko, amaa sinraako garo gantah aalih bukkussoona kitin. Aykee ilaw orba gufandah akko sugteenih, amaa tsaxyaa xararishshoona ulah akko haytan, amaa sinraa lel yi makhaazinodde bahanta'" ake.

![](https://cdn.door43.org/obs/jpg/360px/obs-en-50-08.jpg?direct&)

Amaa darasa amaa zantahi macna mafhaminnoonimhi sabbatah, Yeesus meceetih akah yashraxo kaa esseren. Yeesus: "Amaa mece zara yizriye xiyawti Masiix toomar kinni. Amaa dhage caalamti toomar kinni. Mece zari lel tamaa Yallih nigsinnah xiyawhi toomar kinni."

![](https://cdn.door43.org/obs/jpg/360px/obs-en-50-09.jpg?direct&)

"Amaa tsaxyaa umatiyahi xiyawhi toomar kinni. Amaa tsaxyaa yitkile cangi lel ibliis toomar kinni. Amaa orba ta caalamti abayshimah toomar takke gedda, amaa orbishsha mari lel Yallih malaykut hi toomar kinni."

![](https://cdn.door43.org/obs/jpg/360px/obs-en-50-10.jpg?direct&)

"Ta caalam abayshimta gedda, amaa malaykut inkoh ta ibliis xiyaw yeskeekettiniyaako, adde weecaanah kee dhacuma waaxeltih sabbatah ikok xarqam adde ishan hadig-ta giradde ten cidoona kinon. Sarrah, amaa xaqqi-wannun ayro balih ten Abba kin Yallih nigsinnadde ifishoona kinon" akyerhxe."

![](https://cdn.door43.org/obs/jpg/360px/obs-en-50-11.jpg?direct&)

Yeesus ta caalam abayshimakkah ta baarholle gaxo kinam yakkeedo yerhxeh yine. Usuk tamaa akah yedeeka balih gaxo kinni, amayim lel nabse yeelleyaako, caranko darurudde yamaato kinni. Yeesus gaxa gedda, ta Kishtan inkoh rabteh taneya rabiiko uguteenih caranalle akah garayoona kinon.

![](https://cdn.door43.org/obs/jpg/360px/obs-en-50-12.jpg?direct&)

Sarrah, ta kaddih caalamalle rabekkah tane Kishtan caranalle yewciniyaako tamaa aki rabiiko ugutte Kishtanadde yangaloona kinon. Amalle inkoh Yeesuslih yakkoona kinon. Amaymik sarrah, Yeesus mece salaam kee inkettiinodde ishi xiyawlih umman gedda maro kinni.

![](https://cdn.door43.org/obs/jpg/360px/obs-en-50-13.jpg?direct&)

Yeesus inkoh kayyah yaamine marah nugus qoobic akah yaxawo kinamah wacde sayeh yine. Usun yingisiinih umman gedda Yallaalih salaamadde maroona kinon.

![](https://cdn.door43.org/obs/jpg/360px/obs-en-50-14.jpg?direct&)

Yalli laakin Yeesusuh aamine waye mara inkoh ten yafrado kinni. Umman gedda adde weecaanah waaxeltah ikoh xarqam adde ishan jahannabadde ten cido kinni. Caduruh badinnixe gira lel umman gedda ten xararishsho kinni, awwaaxa lel tena bettam caduruh xabto maki.

![](https://cdn.door43.org/obs/jpg/360px/obs-en-50-15.jpg?direct&)

Yeesus gaxa gedda, Sheethan kee kaa nigsinna inkoh yaylaw kinni. Yalla xabeyaako kaa katawo doore mara kee Sheethan inkoh umman gedda adde xararoona kinon giradde ten cido kinni.

![](https://cdn.door43.org/obs/jpg/360px/obs-en-50-16.jpg?direct&)

Adam kee Xaawa Yalla yaabboona xineenih ta caalamalle zambe baahen, Yalli lel amaa baarho abaareyaako yaylaw abayshe. Yalli laakin wuli max cusub baarho kee cusub caran abar hiniya yakhlaqho kinni.

![](https://cdn.door43.org/obs/jpg/360px/obs-en-50-17.jpg?direct&)

Yeesus kee kaa xiyaw amaa cusub baarholle maroona kinon, usuk lel inkoh amaa tanemhi amolle yaxkamo kinni. Usuk umman dhiimo inkoh asac-isheyaako, cazaab, qadab, weeca, umaani, waaxelta, hido rabi tannaw maki. Yeesus ishi nigsinna salaam kee cadleelih yaxkamo kinni. Umman gedda lel ishi xiyawlih maro kinni.

*Quddus kin Kitaabhi zanta: Maatiyos 24:14; 28:18; Yohannis 15:20, 16:33; Waxye 2:10; Maatiyos 13:24-30, 36-42; 1 Tessaloonikaati Xiyaw 4:13-5:11; Yacqoob 1:12; Maatiyos 22:13; Waxye 20:10, 21:1-22:21*