# unfoldingWord Open Bible Stories — Sanumá - Language code: `xsu` - Canonical page: https://openbiblestories.org/l/xsu/ - Stories in this file: 50 of 50 - Published by: es-419_gl - Last release: 2023-02-17 - License: CC BY-SA 4.0 (https://creativecommons.org/licenses/by-sa/4.0/). The original work by unfoldingWord is available from https://openbiblestories.org - Illustrations: © Sweet Publishing, CC BY-SA 3.0 unfoldingWord Open Bible Stories is a collection of 50 illustrated Bible stories, from Creation to Revelation, that churches and translation teams read, listen to, translate and share freely under the Creative Commons Attribution-ShareAlike 4.0 license. This file mirrors the Sanumá translation; it is not a translation of the whole Bible. ## 1. Tö ma apanoi itö pewö tapalöma https://openbiblestories.org/l/xsu/story-1/ ![](https://cdn.door43.org/obs/jpg/360px/obs-en-01-01.jpg) Somitö saita pina tö kuama. Seis (6) wakala töna Tiosö nö masitatö uli pewö pata tapalönö itö ulina tö pewö kule itöjö, jutumösökö patana tö pewö kule itöjö, inatö pewö ta ta naia sotalöma. Tiosö nö masitatö uli pata tapalöiaja tö uli pata mumi ipö, tö uli pata poke epö inatö kuoma, itö uli patana aitö ma apa paioma. Maike matu jösöka patana Tiosö Kosiomopö Osi Ikitipö kuapalo paitio sisama. ![](https://cdn.door43.org/obs/jpg/360px/obs-en-01-02.jpg) Inatö kuanö Tiosö japaloma: “¡Wakalatö kupaso pökö!” A kuiaja wakalatö kua sotaköma. Tiosö na itö wakala toita apama inatö kuaiaja “wakalatö” itö jilo ta sotalöma. Ianö itöna mumimumitö sokapalönö “mumimumitö” ina itö jilo ta soa pasitalöma. Tö pewö tama piale itaja Tiosö nö wakalatö ta somataköma. ![](https://cdn.door43.org/obs/jpg/360px/obs-en-01-03.jpg) Itö pewö tama pöle i polakapi tö wakala kupotaja, Tiosö japalonö masita tö uli jösöka patana jutumösökö pata taköma. Ia patanö komamö matu kule ituna jituamö matu kulali itu sokapalönö jutumösökö pata taköma. ![](https://cdn.door43.org/obs/jpg/360px/obs-en-01-04.jpg) Tres (3) tö wakalana Tiosö japalonö matuna masitatö jasiti ipi itö sokapamanöma. Ianö tö jasiti ipi itö “masitatö uli” tö jilo ta sotalöma, matu pewö liki “mötati tu” tu pewö jilo ta naia sotalöma. Tiosö nö tö tapalöwi kamanö itö mö kukema tö topa apama. ![](https://cdn.door43.org/obs/jpg/360px/obs-en-01-05.jpg) Itö nojana Tiosö japalo nomoko sotanö: “Masitatö ulina jiti pewö, sikisikitö pewö, inatö pala kua totio pökö.” A kuma. Ina itö kua sotaköma. Tiosö nö tö tapalöwi kamanö itö mö kukema tö topa apama. ![](https://cdn.door43.org/obs/jpg/360px/obs-en-01-06.jpg) Itö pewö tama pöle i cuatro (4) tö wakalana Tiosö japalonö pila motokö, pulipulia, sitikalipö inatö ta tapalöma. Masitatö uli wakalakönö mumimumitö sokapö töna Tiosö nö itö pewö tapalöma. Ianö inama töna matu jölöwi tö wakala pewö soka naia sotalöma. Tiosö nö tö tapalöwi kamanö itö mö kukema tö topa apama. ![](https://cdn.door43.org/obs/jpg/360px/obs-en-01-07.jpg) Cinco (5) tö wakalana, Tiosö japalonö matuna tö pewö toi ipi tö pewö kule itö pewö tapali, salo pö pewö katöwi pö pewö tapali a kuama. Tiosö na itö topa apaiaja, kökö pewö kua topa apapö töna a japalo sotasoma. ![](https://cdn.door43.org/obs/jpg/360px/obs-en-01-08.jpg) Itö pewö tama pöle i seis (6) tö wakalana Tiosö japalonö: “¡Masitatö uli patana salo kökö pewö kuo pökö!” Tiosö kuiaja itö sai kua toitasoma. Ai salo pö noi ipi ipö, masita töna ai salo pö pakönö pö joleawi pö, ai salo pö waitili ipi pö naiwö, inatö ta taköma. Tiosö nö itö mö kukema tö topa apama. ![](https://cdn.door43.org/obs/jpg/360px/obs-en-01-09.jpg) Itö nojana, Tiosö japalonö: “Kamakö kulena ina sanöma tö kui ma tapalönö, kamakö kua kuawina ina a kuapö töna ma tapalö nökö. Masitatö ulina tö pewö kule itö pewöna i töpö kaikanamo piasalo.” Ina a kuma. ![](https://cdn.door43.org/obs/jpg/360px/obs-en-01-10.jpg) Inatö kuanö, Tiosö nö wani ipi masitatö sulönö, sanömatö nu tapalöma, ia nuna Tiosö nö toi ipapö tö jolasia sotaköma. I sanömatö liki Adan a jilo kuoma. Adan kuopö töna Tiosö nö jikalia kulena ina tö uli kui tö uli taköma, ia a kukönö itö uli totiapalapö töna ia a ta sotaköma. ![](https://cdn.door43.org/obs/jpg/360px/obs-en-01-11.jpg) Itö uli mötalöna Tiosö nö polakapi jiti pö aipu upi tipö öpa naimaköma: Toi ipa sotiopö tiji, toita api tö, wanisana api tö inatö taöpo kuawi tiji, ina kipi jiti öpa kuoma. Adan na Tiosö japalonö, ai jiti pewöna mo kuowi i wamo oa sisa pökö, maike toita api tö wanisana api tö inatö taöpo kuawi i tina mo kuowi mo oa pasio jatoti, a kuma. I tina mo kuowi ianö i mo oalöma a nomasopö tö kuoma. ![](https://cdn.door43.org/obs/jpg/360px/obs-en-01-12.jpg) Salo pönö Adan pasiliapala pö tö ma apaiaja Tiosö japalonö: “Sami ipi wanotö kuköma tö toita maikötö.” A kuma. ![](https://cdn.door43.org/obs/jpg/360px/obs-en-01-13.jpg) Inatö kuanö, Tiosö nö Adan mia supa toitamakönö, sami ipi Adan lepuku tutu sulöma, itönö sutö tapalönö Adan na a totoköma. ![](https://cdn.door43.org/obs/jpg/360px/obs-en-01-14.jpg) Adan nö ia sua jötölönö: “¡Aitaku! ¡Kamisa kulena ina ia ku toti naiwö! Wano töna ia kuoma kötönö 'sutö' iana kuto pökö." A ku sotama. Itö pina kamani pöa, kamani pupöna, ina kipili töpöna wanotö sokapalonö kamani pusupa sola sami ipi töpö kuto kötö. ![](https://cdn.door43.org/obs/jpg/360px/obs-en-01-15.jpg) Kama kulena ina wanotö, sutö, Tiosö nö töpö tapalöma. Töpö kuo topa apapö töna a japalo sotanö: “¡Pö pala pasio, kamakö ola töpö palama totio opa, masitatö uli pewö matijimakö!” Ina a kuma. Tiosö nö tö pewö tapalöwi kamanö itö mö kukema tö topa apama, itö pewö pina a pi mönaja apama. Seis (6) tö wakalana itö kuama. ![](https://cdn.door43.org/obs/jpg/360px/obs-en-01-16.jpg) Siete (7) tö wakala kupasoiaja, Tiosö tatamowi tö pewö mapasoma. Inatö kuaiaja tö pewö tamanoi itö tama mapalonö Tiosö mota mapo koma. Jitö wakalana Tiosö mota mapo koma kötönö, ianö siete (7) tö wakala liki kamani itö wakala toita api tö wakala tapalönö kamani itö wakala sokapalöma. Ina Tiosö nö masitatö uli pewö patana tö pewö kule itö pewö, jutumösökö patana tö pewö kule itö pewö, ina itö pewö pata ta tapalöma. *Genesis tököna 1-2 töna Tiosö nö tö tamanoi itö tosokama kule itö* ## 2. Jitö uli patana wanisana apawi itö lisipasoma https://openbiblestories.org/l/xsu/story-2/ ![](https://cdn.door43.org/obs/jpg/360px/obs-en-02-01.jpg) Tiosö nö jikalia kulena inatö uli kui tö uli takönoi itö ulina Adan nö kamani pusupa kai kukönö, töpö pi mönajapalo toitioma. I töpönö jaloösö jalopo ma apama, maike jitö uli patana wanisanatö mi ipö kötönö, töpö pi kilijita ma apama. Itö ulina töpö jupalotipa Tiosö na töpö japalo soatalo opatima. ![](https://cdn.door43.org/obs/jpg/360px/obs-en-02-02.jpg) Maike ia olökökö pi wani tao opawi a wani kuo naioma. Sua wanina i olökökö wani japalonö: “¿Pitilitö saina kauna Tiosö ki, ji jiti pewöna mo kuowi mo oa jatoti a ku aluke?.” A kuma. ![](https://cdn.door43.org/obs/jpg/360px/obs-en-02-03.jpg) Sua japalo jötonö: “Tiosö ki, jiti pewöna mo kuowi i ma mo oa soa pöatalo opa pökö, maike wanisana tö, toita api tö inatö taöpo kuawi itina mo kuowi i mo oa pasio jatoti, ina kamisamaköna Tiosö ku köpöli. Kamisamaköna Tiosö ki: 'I mo oa jatoti, mo jöpa naio jatoti i matö tama kukema makö nomaso kötö.' Ina a ku köpöli." Ina i sutö ku jötoma. ![](https://cdn.door43.org/obs/jpg/360px/obs-en-02-04.jpg) I su töna olökökö wani japalo kotanö: “¡I pitilitö maikötö! Makö noma maikötö. Tiosö nö, wanisanatö, toita api tö itö pewö taö öpa kua kulena i ma mo oalöma ina i matö pewö taöa kua naia sotaso piale ianö itö taö öpa waikia köle.” Ina olökökö wani kuma. ![](https://cdn.door43.org/obs/jpg/360px/obs-en-02-05.jpg) I su tönö i mo mö kukema mo mumo toita apö, mo oalöma mo oamo toita apapö mo mumo ku toti ipö ina mo kuoma. Ianö itö pewö taöpo pi topa apa salo sami ipi aimo sulönö, mo oalöma. Itö nojana ia kamani panopa öpa naia sotale iana aimo asawösö tota noma sotaköma, ianö i mo oa naia sotalöma. ![](https://cdn.door43.org/obs/jpg/360px/obs-en-02-06.jpg) Inatö kuanö töpö pi jatuka soa pötasoma, töpö sino opi itö talalöma. Töpö jaloköpö töna sanakapö jana tia sotalalöma. ![](https://cdn.door43.org/obs/jpg/360px/obs-en-02-07.jpg) Inatö kuataja i sanömatö, kamani pusupa ina kipi töpönö itö ulina Tiosö ju pöle itö jini ipama. Tiosö na töpö sosapalo sotama. Inatö kuaiaja Tiosö nö i wanotö jilo katea sotanö: “¿Witia wa kua köle?” A kuiaja, Adan ki: “Sa sino opö kötönö, wa ju pöle i satö jininönö sa kilipalo opa ke. Itö pina sa sosakö ke." Ina a ku jötoma. ![](https://cdn.door43.org/obs/jpg/360px/obs-en-02-08.jpg) Iana Tiosö nö tö jininö: “¿Wa sino opö kauna witipila ku ke? ¿Mo oa jatoti sa ku pili i wa mo oalö aluke?” A kuiaja, i wanotö japalo jötonö: “Kamisana su watö totopö pili ianö kamisana i mo totopö ke.” Ina a ku jötoma. Itö nojana i sua na Tiosö nö tö jini nomo sotanö: “¿Kapili watö tama ke?” A kuiaja, sutö japalo jötonö: “Olökökö waninö sa mönamanö ke.” A ku jötoma. ![](https://cdn.door43.org/obs/jpg/360px/obs-en-02-09.jpg) Olökökö wanina Tiosö japalo sotanö: “¡Kauna pe epi wanisanatö kua toitio piasalo! Kama wa nipönö wa joleanö, masita watö kopeke oa sotio piasalo. Kawa, sutö ina kipi makö nisi tapaso toitio piasalo, au ulu töpö, i sua wani ulu töpö ina kipi töpö nisi tapaso naio sotio piasalo. I sua ai ulu tö olanö wa je patikipalöiaja, kaunö i wa amösö tisana ninia jötömakö piasalo.” Ina a ku sotama. ![](https://cdn.door43.org/obs/jpg/360px/obs-en-02-10.jpg) Itö nojana, suana Tiosö japalo nomo sotanö: “Au ulu wa taiaja wa ninimo totio opapö satö tapa piaköle. Kawa kotöna au panopa kuapalo sotiopö watö pi ipa piasalo, kauna ia kaikanamo piasalo.” Ina a ku sotama. ![](https://cdn.door43.org/obs/jpg/360px/obs-en-02-11.jpg) Wano töna Tiosö japalonö: "Kaunö sa kuwi i watö jini ma apama, au pusupa kuwi i watö jini sisama. Jukiki masitatö uli wanisana waikipasoma kötönö, lotete epi wa tatapajamo totio opanö masitatö ulina au ni watö tösa totio opa piasalo. Itö nojana, wa nomasoiaja kawa pewö liki masitatö kopeke kua kopaso piasalo.” Ina a kuma. I sua liki sateje toti ipi töpö pupöna kupasopö tö kötönö, i wano tönö, “toi ipi tö totomawi ia” tö kutowi töna "Eva" kamani pusupa jilo ta sotalöma. Tiosö nö salo pö jöösönö Adan, Eva i töpö jaloa sotamaköma. ![](https://cdn.door43.org/obs/jpg/360px/obs-en-02-12.jpg) Inatö kuaiaja Tiosö japalonö: “Jukiki sanöma töpönö wanisana api tö, toita api tö, itö pewö taöpalonö kamakö kulena ina töpö kua naipasoma kötönö, i töpönö ji jitina toi ipa sotiopö mo kule i mo oalöpö satö pi maikötö.” Ina a kuma. Inatö kuanö, jikalia kulena tö uli kui Tiosö nö tö uli totokönoi itö ulina Adan, Eva i töpö atua kopamanöma. Itö ulina aitö lisipalonö jitina toi ipa sotiopö mo kule i mo oa ma apapö töna Tiosö nö töpö simötawi töpö lotete epi töpö lömaköma. *Genesis tököna 3 töna Tiosö nö tö tamanoi itö tosokama kule itö* ## 3. Matu pata okimonö masitatö uli pewö pata patilia totikönoi itö. https://openbiblestories.org/l/xsu/story-3/ ![](https://cdn.door43.org/obs/jpg/360px/obs-en-03-01.jpg) Tö tatea totia noma kopaso noiaja, jitö uli patana sateje toti ipi sanöma töpö kuo totio opama. I töpö pi ku wanisana totipaso, töpö waitilia totipaso ina töpö kuama. Töpö wanisana totio opa kötönö Tiosö nö matu pata okimanönö jitö uli pata waniapa pi topa apama. ![](https://cdn.door43.org/obs/jpg/360px/obs-en-03-02.jpg) Maike Noe nö Tiosö pi mönajapalama apatima. A pi ku toita totio opama, sanöma töpö wanisana apawi töpö mötalöna a kuo naitioma. Noe na Tiosö japalo nö, matu pata okimama piale itö wösöma. Noe naja, ai kutiata asö pata pe epi ösö pata tapalö, Tiosö kuma ![](https://cdn.door43.org/obs/jpg/360px/obs-en-03-03.jpg) Noe naja, kutiata asö pata pe epi ösö patana, kolo osö, ola asö töna 140 metros tö wöa, pili ösö osimöna 23 metros tö wöa, 13.5 metros töna ösö jösöka wöa lasa, inatö pewö kulataja ösö tapalö Tiosö kuma. Jiti sinonö Noe nö ösö tapa piama, koma aitö osimö kua köla, itö jösökana aitö osimö söta sota, itö jituna aitö osimö kua, ina 3 ösö osimö kuoma, itö osimö pewöna saia osimöwai kulena inatö osimö kui tö pewö ta jötaja sotaköma, ösö jösöka laki, sami ipi takataka osowai sötömaki, inatö pewö tama piama. I kutiata asö patana Noe, kama töpö pewö, salo pö pewö wani ina kipili, matu pata okimo pöle itaja ösö patana i töpö titia topa asaköpö tö kuoma. ![](https://cdn.door43.org/obs/jpg/360px/obs-en-03-04.jpg) Tiosö kuiaja Noe nö tö tama jötoma. Kamani tres (3) ulu kökö kaina, Tiosö kunoi ina i kutiata pata kui ösö pata ta jötöpalöma. I kutiata pata pe epö kötönö, ösö pata tatipaja sateje epi inamatö jasupasoma. Sanöma töpöna, matu pata okimo piale Noe nö itö wösönö, makö wanisana apawi i matö josalönö Tiosö japalowi itö pewö tama nomo kokö i töpöna ina a kutima, maike pitilita töpö pi kuti ma apama. ![](https://cdn.door43.org/obs/jpg/360px/obs-en-03-05.jpg) Noe, kamani i töpö pewö, i töpönaja pe epi ni matö suanö tö simoma totio opaje i ni töna makö iapalo, salo pö pewö wani iapalo inatö kuapö tönakö, ina Tiosö ku naioma. Itö pewö tama ma totipasoiaja, Noe na Tiosö ki, kutiata asö patana kawa au pusupa, au ulu kökö, kamani pusupö kökö i makö pewö lisipaso pö jitö wakala waikiwö a kuma. Ocho (8) sanöma töpö kuoma. ![](https://cdn.door43.org/obs/jpg/360px/obs-en-03-06.jpg) Salo kökö pewöna Tiosö nö wanotö, sutö, tö sai tamama, matu pata okimoiaja kökö söpo ma apapö töna Noe nö kökö titipa löatalopö töna kökö sima soatalo opama. Sanöma töpö nö salo kökö isitama nö Tiosö na kökö tototapö töna siete (7) salo wano kökö, siete (7) salo su kökö, kökö toita api kökö jakika apölata kökö saipalönö Noe na kökö sima naiköma. I kutiata asöna i töpö pewö titia toitaköiaja, Tiosö nö takataka kolo la sotaköma. ![](https://cdn.door43.org/obs/jpg/360px/obs-en-03-07.jpg) Itö nojana, pe epi matu jölö kolo kua sotasoma. ¡Matu jölö matalo pölata kunumai cuarenta (40) wakalatö kupaso, cuarenta (40) mumimumitö kupaso inatö kuama! Masita töna matu pata japo tikilo naioma. Jitö ulina tö pewö kule matunö itö pewö pata patilia totia apököma, jiima töpö pewö pata lape epi i töpö pewö pata patilio totio opa naioma. ![](https://cdn.door43.org/obs/jpg/360px/obs-en-03-08.jpg) Masitatö uli jasitina tö pewö toi ipi tö pewö kuonoi itö pewö noma totisoma, maike kutiata asö patana sanöma töpö, salo kökö, i töpö titio asanoi ipö pewö noma asa ma apama. Matuna i kutiata asö kalö pöle ösö osimöna töpö pewö titile i töpö nasö tuo asa ma apama. ![](https://cdn.door43.org/obs/jpg/360px/obs-en-03-09.jpg) Matu pewö jölö mapaso noiaja, matuna i kutiata asö pata kalötipa cinco (5) pulipuliana matu wejepo kotiolöma. Inatö kuataja aitö wakalana ai jiima tö jösöka patana i kutiata asö pata makipaköma, maike matunö itö uli pewö pata patilio totio opa soa pasio paioma. Tres (3) pulipulia jasua noma kopalonö jiima töpö jösöka pewö pata tapamo nomo koonöma. ![](https://cdn.door43.org/obs/jpg/360px/obs-en-03-10.jpg) Cuarenta (40) wakalatö jasua kua noma kopaso noiaja, matu weja ko waikia jatopasonoi kötö Noe pi ku upa salo, motosila wani simöpalöma. Ia wani katö jötöpo totio opanö, masita tö uli jasiti tai totio opa koma, maike aitö uli jasiti tapa ma apama. ![](https://cdn.door43.org/obs/jpg/360px/obs-en-03-11.jpg) Tö pi tateja noma kopaso noiaja Noe nö joleta wai sima nomöpalöma. Maike aitö uli jasiti tapa taso ma apama, Noe na awai waloa kokö solöma. ¡Siete (7) wakalatö jasua noma kopaso noiaja Noe nö i joleta wai sima kotalöma, ia wainö kama jiso waina olivo ai jiti jilo kuawi ti poko wai wiilönö a wai waloa kokö solöma! ¡Matu pata wejepo koonöpamö, jiti, sikisikitö, itö pewö jaö topa totio opako soa alöma! ![](https://cdn.door43.org/obs/jpg/360px/obs-en-03-12.jpg) Siete (7) wakala töna Noe opio nomoko paionö, itö nojana tres (3) tö pina joletawai sima kotalöma. Ia i saloa oso wainö aitö uli talalönö awai walo kotasolö ma apama. ¡Matu pata jasitipo totio opa ko waikioolöma! ![](https://cdn.door43.org/obs/jpg/360px/obs-en-03-13.jpg) Polakapi pulipulia jasua noma kopaso noiaja Noe naja: “Jukiki i kutiata patana kawa, au töpö pewö, salo kökö pewö wani, i pö pewö atua kopalo. Kamaki ulu ma töpö taki, i ulu töpönö kamani ulu töpö ola ta tolea noma sotaki ina makö kuanö masitatö uli pewö matija komakö.” Ina Tiosö kuma. I kutiata patana Noe nö kamani i töpö kai pewö atua kopasoma. ![](https://cdn.door43.org/obs/jpg/360px/obs-en-03-14.jpg) Kutiata asö patana Noe atua kupalonö, Tiosö na a pi mönaja apa salo aitö wakalana, salopö isitamapö tö öpamaköma, Tiosö na pi mönaja apa salo, salo kökö isitamapö töna kökö saipalönoi i kököna ai kökö sulönö itöna kökö isimanöma. I salo kökö isimanöwi itöna Tiosö pi mönaja apa salo, Noe, kamani i töpö pewö, i töpöna toita api tö kua sotiopö töna a japalo sotasoma. ![](https://cdn.door43.org/obs/jpg/360px/obs-en-03-15.jpg) Tiosö japalonö: “Sanöma töpönö wanisanatö tamawi itö pina masitatö ulina wanisanatö kuapö töna jukiki sa japalo kota maikötö, sanöma töpö oso wani ipö sotaiaja wanisanatö tama kolo kua soatalo opa pölata maike ma satu okimamanö i satö uli wania kota maikötö.” Ina a kuma. ![](https://cdn.door43.org/obs/jpg/360px/obs-en-03-16.jpg) Ina Tiosö japalo kunoi, sanöma töpönö itö taö öpa sotiopö töna Tiosö nö olökökö si kuatalo taimi ipi jutumösököna tö taköma. Jutumösököna olökökö si kuta sinimo opa lasoiaja Tiosö nö kama kunoi itö taöpo sinimo opa ko piasalo, ina kamani sanöma töpö kua naio sota piasalo. *Genesis tököna 6-8 töna Tiosö nö tö tamanoi itö tosokama kule itö* ## 4. Abraham na Tiosö Japalo topamonasonoi itö https://openbiblestories.org/l/xsu/story-4/ ![](https://cdn.door43.org/obs/jpg/360px/obs-en-04-01.jpg) Matu pata okimo mapaso noiaja sateje epi inamatö jasua noma kopalonö, jitö ulina sateje epi sanöma töpö kuo totio opa nomo koma, sami ipi tö kaina i töpö pewö japalo sisama. I masita matö uli pewö pata matija totimakö pökö Tiosö kunoi ina töpö kua pölanö kunumai, töpö pewö koka pöpalonö aitö uli takönö, ia töpö pewö kua koka pököma. ![](https://cdn.door43.org/obs/jpg/360px/obs-en-04-02.jpg) Kama töpö pina töpö kua pi topa apa sisanö, Tiosö kunoi itö tama wani ipa pasioma. Jutumösökö patanamö saia pata walokölasopö töna a sai pata lape epi a sai öpama naio sisama. Wanisanatö tamapö töna i töpö tatamo kokapalo sotio kukema, pe epi wanisanatö tama totio opapö tö kulati Tiosö nö itö tapa apama. ![](https://cdn.door43.org/obs/jpg/360px/obs-en-04-03.jpg) Inatö kuaiaja, Tiosö nö tikotö kaina i töpö pewö japalopö töna tö tota jötöjaköma, inatö kuanö jitö uli pewö patana töpö pewö salekea sopasoma. I töpönö tö uli tama kolo kuponoi itö uli liki “pi ku monöpalo opa” tö kutowi töna, Babel itö uli jilo ta sotalöma. ![](https://cdn.door43.org/obs/jpg/360px/obs-en-04-04.jpg) Sateje toti ipi inamatö jasua noma kopaso noiaja, ai wanotö Abram a jilo kuawi ana Tiosö japaloma. Ia naja: “Au masitatö uli, au ai töpö pewö, i watö pewö ta soa pötakölönö kauna satö uli möma piale iamö a julolö. Kamisanö wa totiapala totio opa kötö, autö ulina sanöma sa töpö pala totimanö piasalo. Sanöma töpönö wa kili taö totio opapö satö tama piasalo. Kauna töpö japalo toita api i töpöna Sa japalo topa apa jöto piasalo, kauna töpö japalo wanisanawi i töpöna Sa japalo wanisana jöto piasalo. Kawa pina masitatö uli pewö patana sanöma töpö kule i töpö kuo topa apapö satö tama piasalo.” Ina Tiosö kuma. ![](https://cdn.door43.org/obs/jpg/360px/obs-en-04-05.jpg) Inatö kuanö, Tiosö kuwi Abram nö itö tama jötoma. Ianö kamani pusupa Sarai, a simoiaja tö tamawi i töpö, kamani itö pewö kule itö pewö, inatö pewö sua talölönö Tiosö nö tö uli möma piale itö ulina a jua sotasolöma, Canaan tö ulina. ![](https://cdn.door43.org/obs/jpg/360px/obs-en-04-06.jpg) Canaan tö ulina Abram walokö tasoiaja, ianaja: “Tö pewö mö asoka totio opa. Ji watö uli pewö mö pöle kauna i satö uli pewö totokönö, au ulu töpö olana i satö uli pewö tota tolea noma jaia sotakö piasalo.” Ina Tiosö kuma. Inatö kuanö, ia Abram kua sotaköma. ![](https://cdn.door43.org/obs/jpg/360px/obs-en-04-07.jpg) Jitö jitupatamö Tiosö pata kulali iana aitö totokö piasalo tö isitamawi Melquisedec a jilo kuawi Abram nö aitö wakalana ia mö taöpasoma. Abram kua topa apapö töna Melquisedec japalonö: “Jutumösökö pata, masita tö uli pata ina kipi jitö jitupatamö i kama Tiosö pata kulali, Ia japalonö Abram kuo topa apa pökö.” Ina a kuma. Inatö kuanö sösopa matijitö jukölönoi Abram nö 10 itö pewö tapalönö ia sami ipi tö sulönö Melquisedec na tö totoköma ![](https://cdn.door43.org/obs/jpg/360px/obs-en-04-08.jpg) Sateje epi inamatö jasua totipasoma, maike Abram, Sarai ina kipi töpö ai ula kupo ma apama. Abram na Tiosö japalonö sami ipi au ula kukö kötö, sitikali kökö sateje kulena ina au ulu töpö ola kupo totio opa piasalo, ina a ku kotama. Ina Tiosö kuiaja, pitilita Abram pi ku totio opama. Satö tama piasalo Tiosö kuti pöle itöna pitilita Abram pi ku totio opaiaja, Abram pi ku toita apö, sa kuiaja tö jini totiatalo opaö, ina Tiosö kuma. ![](https://cdn.door43.org/obs/jpg/360px/obs-en-04-09.jpg) Inatö kuanö, Abram na tö tama piale itöna Tiosö japalo topamonasoma. Tiosö kunoi pitilitö saina itö tama totio opa piama, Abram nö Tiosö simonoi itö tama jötopö tö kuoma. Ianaja: “Kamisanö au ulana kawa iipö sai kulata au sa totokö piasalo, kawa au pusupa Sarai ina kipi makö i ula sai kuo piasalo. Canaan tö uli liki au ulu töpö olana satö uli tota totikö piasalo.” Ina Tiosö kuma. Maike itaja Abram ula ma apa soama. *Genesis tököna 11-15 töna Tiosö nö tö tamanoi itö tosokama kule itö* ## 5. Ulu sa totokö piasalo Tiosö kunoi ia https://openbiblestories.org/l/xsu/story-5/ ![](https://cdn.door43.org/obs/jpg/360px/obs-en-05-01.jpg) Canaan tö ulina Abram, Sarai ina kipi töpö walokönoi i diez (10) inamatö kua waikia köle, maike kamani ula kupoti ma apama. Inatö kuaiaja, Abram naja: “Tiosö nö kamisana ai ula toto wani ipö kuataja ai ulu sa tapalöpö sa patasoma apö waikiwö inatö kua kötönö, sa simowi ji Agar kua köle. Iana wa mai sakata pökö, ianö ipa ai ula takö pökö.” Ina kamani pusupa Sarai kuma. ![](https://cdn.door43.org/obs/jpg/360px/obs-en-05-02.jpg) Inatö kuanö, Agar na Abram mai sakatatima. Agar nö ai ula wanoa wai tapalöma, Abram nö Ismael ia jilowai tapalöma. Maike Sarai nö Agar na kamani panopa noama sotama. Ismael na trece (13) inamatö kuataja, Abram na Tiosö japalo kotama. ![](https://cdn.door43.org/obs/jpg/360px/obs-en-05-03.jpg) Ianaja: "Kamisa liki Tiosö lotete epi i Sa. Makö japalo topamo piaköle." Ina Tiosö kuma. Ina a kuiaja masita töna Abram maiko pewö jitata sotaköma. Abram naja: "Kawa liki jitö uli pewö patana töpö kuowi i töpö i pöwa kupaso piasalo. Kawa, au ola töpö, ina kipi maköna Canaan satö uli tota totikönö kamisa liki i töpö Tiosö sa kuo sotio piasalo. Kauna au ulupö pewö kule i töpö, pata töpö, i töpö isi ola poke tolejele ia tö janönalö." ![](https://cdn.door43.org/obs/jpg/360px/obs-en-05-04.jpg) "Au pusupa Sarai nö ai ula tapalö piasalo, ia liki au ulu sa toto pianoi ia sai kupaso piasalo. Isaac i wa jilo tapalö pökö. Ia sola samakö japalo topamonaso piasalo, Isaac i ola sa töpö pala totimanö piasalo. Ismael i ola sa töpö pala totia naimanö piasalo, maike satö tama piale i Isaac na i satö tama totio asa piasalo." Ina Tiosö kuma. Inatö kuanö "sateje epi töpö i pöa" tö kutowi töna Tiosö nö Abraham a jilo ta noma kopalöma. Tiosö nö Sarai jilo tikoa naia kopalönö, "kaikanatö patea" tö kutowi töna Sara a jilo ta naia kopalöma. ![](https://cdn.door43.org/obs/jpg/360px/obs-en-05-05.jpg) Itö wakalana sotawö Abraham nö kamani saiana wano töpö pewö kule i töpö pewö isi olana wani ipi tö janö jötöpo sotama. Sami inamatö jasupaso noiaja, Abraham na cien (100) inama tö kua, Sara na noventa (90) inamatö kua, ina tö kulata Sara nö Abraham ula tapalöma. Isaac ma jilo tapalö pökö Tiosö kunoi ina a jilo ta jötöpalöma. ![](https://cdn.door43.org/obs/jpg/360px/obs-en-05-06.jpg) Isaac liki jisatö kupasoiaja, Tiosö nö Abraham wapa piasalo: "Sami ipi au ula Isaac kule, i wa söpalönö wa isimanönö kamisana a totopa". Ina a kuma. Tiosö simoiaja Abraham nö tö tama jöto kotanö, kamani ula isimanöpö töna tö pewö ta topapala sotama. ![](https://cdn.door43.org/obs/jpg/360px/obs-en-05-07.jpg) A isima piale itö ulina Abraham, Isaac ina kipi töpö ju ulöpamö: "Japa, matö isimapö töna talöka kua asa köle, ¿maike witia oveja wai pasiwö? Isaac kuiaja: "Ipa ula a pi kupaloti Tiosö nö oveja ma wai isimanöpö a wai totopö kötö." Abraham ku jötoma. ![](https://cdn.door43.org/obs/jpg/360px/obs-en-05-08.jpg) Isitamawi itö ulina i töpö walokö tasoiaja, Abraham nö kamani ula Isaac okapalönö isitamawi töna a pa sotaköma. Kamani ula söpa piataja: "¡Tamati! ¡Au ula söpa jatoti! Au ulawai sami ipi Kamisana i wa umapo ma apama kötönö, jukiki kaunö sa kili taö öpawi i satö tapa apa köle." Ina Tiosö ku löa konasoma. ![](https://cdn.door43.org/obs/jpg/360px/obs-en-05-09.jpg) Abraham nö ai jiti oso waina ai oveja wani ja talalöma. Isaac isima pianoi ia a isimanöpö töna Tiosö nö a totoköma. Abraham pi mönaja apölanö i oveja wani isia jötömanöma. ![](https://cdn.door43.org/obs/jpg/360px/obs-en-05-10.jpg) Inatö kuaiaja, Abraham naja: "Kamisana au ai watö umapo mi toti ipö, au ula sami ipö pölata maike wa umapo naio mi ipö ina wa kua kötönö, wa kua topa apapö töna satö tama piaköle. Sitikalipö pata sateje toti ipö maike, au ulu töpö ola sateje totio opa asa piasalo. Sa simoiaja watö tama totiatalo opa kötönö, au ai töpö pina sanöma töpö pewö pata kuo topa apa naio piasalo." Ina Tiosö kuma. *Genesis tököna 16-22 töna Tiosö nö tö tamanoi itö tosokama kule itö* ## 6. Isaac na Tiosö nö toita api tö totomanoi itö https://openbiblestories.org/l/xsu/story-6/ ![](https://cdn.door43.org/obs/jpg/360px/obs-en-06-01.jpg) Abraham patasipö toti waikiiaja, kamani ula Isaac patalonö patatö jisa kupasoma. Inatö kuaiaja, kamani ai töpö kulati iamö kamani ula Isaac pusupa sulötasopö töna, Abraham nö kamani simowi a simöpalöma. ![](https://cdn.door43.org/obs/jpg/360px/obs-en-06-02.jpg) Abraham ai töpö kulati iamö ia juulöpamö tö tatea totipaso noiaja, a simöpalönoi i Tiosö nö Rebeca kuomö kuopamö ia simamo talöma. Ia liki Abraham papala ula i patea kuoma. ![](https://cdn.door43.org/obs/jpg/360px/obs-en-06-03.jpg) Rebeca nö kamani ai töpö takölönö, a simöpalönoi iana a noka nailolönö, Isaac saiana a jua naia jötösolöma. Ia walotaköiaja Isaac nö kamani pusupa ta sotalöma. ![](https://cdn.door43.org/obs/jpg/360px/obs-en-06-04.jpg) Tö tatea totipaso noiaja Abraham nomasoma, inatö kuaiaja, satö tama piasalo Abraham na Tiosö kunoi i Isaac na itö pewö jasua noma sotaköma. Abraham naja au ulu töpö ola pata seteje totio opa piasalo Tiosö kuma maike, Isaac pusupa Rebeca sipinapiti ma apama. ![](https://cdn.door43.org/obs/jpg/360px/obs-en-06-05.jpg) Rebeca pina Tiosö na Isaac japalo jötoiaja, Tiosö nö polakapi ulupö waina a sipinapia jötömanöma. Rebeca osimöna i ulu kököwai titio paja kököwai söso totio opatima, inatö kuaiaja Rebeca nö Tiosö na itö jinima. ![](https://cdn.door43.org/obs/jpg/360px/obs-en-06-06.jpg) Rebeca naja: "Kawa osimöna ulu kököwai titile i kököna polakapi sanöma tiko töpö kua salekepaso piasalo. I kama töpö söso toitio piasalo, au ula patanö au ula osa simoiaja tö tamawi a kupaso piasalo." Ina Tiosö kuma. ![](https://cdn.door43.org/obs/jpg/360px/obs-en-06-07.jpg) Rebeca ulu kököwai kupasoiaja, kamani ula pata junuku janaja apö a pewö koi ipö, ina a kui a kupasoma, itö pina Esau a jilo ta sotalöma. Kamani ula osanö Esau amösökö tisana jupolata a kupasoma, Jacob ia jilo ta pasipalöma. *Genesis tököna 24:1-25:26 töna Tiosö nö tö tamanoi itö tosokama kule itö* ## 7. Jacob kua topa apapö töna Tiosö japalonoi itö https://openbiblestories.org/l/xsu/story-7/ ![](https://cdn.door43.org/obs/jpg/360px/obs-en-07-01.jpg) I ulu kökö pata alöpamö, Jacob liki saiana a kupalo pi topa apa sisa pasioma, maike Esau namo ju pi topa apa pasitioma. Rebeca nö Jacob pi ipa pasia, Isaac nö Esau pi ipa pasia ina töpö kuatima. ![](https://cdn.door43.org/obs/jpg/360px/obs-en-07-02.jpg) Aitö wakalana Esau namo jutitasoma a oi ipi a waloa kokösolöma. Jacob naja: “Au ni töna wani ipi aitö pita.” Ina Esau kuiaja: “Ina wa ku salo, ulu patawa kötönö jaoaninö kauna tö pewö toto piale kamisana itö pewö tota paipa.” Ina Jacob ku sotama. Inatö kuanö, Esau nö kama itö pewö kupo piale i Jacob na itö pewö totoköma. Inatö kuaiaja, Jacob nö ai nitö tota jötököma. ![](https://cdn.door43.org/obs/jpg/360px/obs-en-07-03.jpg) Esau na Isaac nö kamani itö pewo kule itö pewö totoki, a kua topa apapö töna a japalo, ina a kua pi topa apama. Maike tö tama piataja, Rebeca nö Jacob liki Esau uni tapalönö Isaac mönamanöma. Isaac patasipö toti waiki kötönö tö mö ma apa waikioma. Inatö kuaiaja Jacob nö Esau jaloösö jalolönö, kama pewöna cabra ai saloa jilo wani kuawi a koiki wani sölaja sotamaköma. ![](https://cdn.door43.org/obs/jpg/360px/obs-en-07-04.jpg) Isaac na Jacob jua sotalolönö: “Kamisa liki Esau sa. Kamisana toita api tö kuapö töna wa japalopö töna sa ju köle.” Ina a ku sotama. Isaac nö saloa cabra koiki wani jöpa, jalo ösö jisiaö, ina tö tamanö Esau jatowö a pi kunö iana toita api tö kuapö töna a japalo sotasoma. ![](https://cdn.door43.org/obs/jpg/360px/obs-en-07-05.jpg) Kamani papala itö pewö kupo pianoi i Jacob nö itö pewö sua toma lölöiaja Esau nö Jacob nisi taö kuköma. Inatö kuanö, kamani jaoani nomasoiaja Jacob söa jaipalöpö töna a pi kupalo opama. ![](https://cdn.door43.org/obs/jpg/360px/obs-en-07-06.jpg) Maike Rebeca nö Esau pi kupalo pöle itö jinia jötölöma. Inatö kuanö, ia, Isaac ina kipi töpönö paipatamö kamani ai töpö kuo tasopa jacob kuo naio tasopö töna a simönöma. ![](https://cdn.door43.org/obs/jpg/360px/obs-en-07-07.jpg) Sateje epi inama töna Rebeca ai töpö kotöna Jacob kuo naitio tasoma. Ia a kupalo naitio tasopaja kamani pusupa sulönö doce (12) kamani ulu wano kökö sami (1) kamani patea, ina kamani ulu kökö ta takötasoma. Tiosö nö a pilapalo totio opawi a tapalöma. ![](https://cdn.door43.org/obs/jpg/360px/obs-en-07-08.jpg) Kamani Canaan tö uli jöko ma apapa tikiamö a kupaloti tasopa veinte (20) inamatö jasupalonö, Jacob nö iamö kamani ulu töpö, kamani i töpö simawi i töpö, kamani salopö wani, itö kai pewö jua sapa konasolöma. ![](https://cdn.door43.org/obs/jpg/360px/obs-en-07-09.jpg) Esau nö sa söpa pi topa apa soa jatolö kötö Jacob pi ku upa salo a kilipalo opama. Itö pina, Jacob nö Esau na sateje epi salo kökö wani sima tolejepalöma. Esau na salo kökö totoma jötölati i töpöki: “Kawa pina a tatamowi i Jacob nö kauna noami ipi ji salo kökö totoma köle. Jisimö ia ju koa kölati.” Ina töpö ku solöma. ![](https://cdn.door43.org/obs/jpg/360px/obs-en-07-10.jpg) Maike Esau nö Jacob ote ta ko waikilöma tö kuoma, töpö möpaso koa salo töpö pi mönajapalo totio opama. Inatö kuanö, Canaan tö ulina Jacob kua topa totia apa koköma. Itö nojana Isaac nomasoiaja, Jacob, Esau ina kipi töpönö a patilia koköma. Satö tama piasalo Abraham na Tiosö kunoi i Isaac na itö jasupalonö Jacob itö kua noma sotasoma. *Genesis tököna 25:27-33:20 töna Tiosö nö tö tamanoi itö tosokama kule itö* ## 8. Jose, kamani ai töpö, ina kapi Tiosö nö töpö nö löa konönoi itö https://openbiblestories.org/l/xsu/story-8/ ![](https://cdn.door43.org/obs/jpg/360px/obs-en-08-01.jpg) Sateje epi inamatö jasupasonoia, Jacob patasipö toti waikiiaja, kamani papala töpönö oveja kökö pewö totiapalati pölati i töpö mö tasopö töna iamö kamani ula Jose pi ipawi ia simönöma. ![](https://cdn.door43.org/obs/jpg/360px/obs-en-08-02.jpg) Jose manimoiaja, i töpö pewöna a mani kaikamoma tö kuoma, inatö kua naiataja kamani pöanö Jose pi satia apa asa, inatö kuaiaja kamani papala töpönö a nisi taö öpama. Kamani papala töpö kuo tasopa Jose walokö tasoiaja, i töpönö sotawö a uma apa pölataja a jua sotakönö, noami ipi sanöma töpö tatamopö töna töpö noa taöwi i töpöna a noa ta sotamanöma. ![](https://cdn.door43.org/obs/jpg/360px/obs-en-08-03.jpg) Saiana Jose papala töpö ju koonö piasalo, Jose jalonoi ösö kakapalönö saloa cabra iipö waninö ösö juluka sotalöma. Inatö kuanö, ai saloa wani waitili ipi a waninö Jose söa jatopalöma kamani pöa pi ku upapö töna i jalo ösö möma sotama. Jacob pi jonipo totio opama. ![](https://cdn.door43.org/obs/jpg/360px/obs-en-08-04.jpg) Noami ipi sanöma töpö tatamopö töna töpö noa taöwi i töpönö Egipto tö ulina Jose sulölöma. Egipto tö uli pilapalo totio opaö, tö uli pata pe epö inatö kuoma, Nilo matu jilo pata kuawi itu kasö patana itö uli kua. Jose noa tapalönoi i töpönö, kaikana töpöna a tatamo sötapalo naiowi ana Jose noa tapamanöma. Kamani kaikanatö simoiaja toita api Jose nö tö tama totiatalo opatima, ina a kuaiaja Tiosö nö Jose totiapalatima. ![](https://cdn.door43.org/obs/jpg/360px/obs-en-08-05.jpg) Jose na kamani kaikanatö pusupa mai saka pi topa apama, maike inatö kuawi töna Jose nö Tiosö na wanisanatö tapa wani ipama. Itö pina ia pi jisujupalonö, Jose julönö a pöka kasömaköpö tö pi ipa salo jolisi töna a namo sima sotaköma. A pöka kasöa pölata maike, Tiosö na pitilita a pi ku satia totio opaiaja Tiosö nö a totipala apama. ![](https://cdn.door43.org/obs/jpg/360px/obs-en-08-06.jpg) Jose nö ai wanisanatö tama pasio ma apa puo noia maike polakapi inamatö jasupasonoia, a pöka kaso soama. Faraon, ina Egipto tili töpönö kamani kaikana töpö jilo tatama, aitö mumina polakapi ia manimo pi kua jalupasoiaja pe epi a pi kupalo totio opama. Kamani i töpö pi tao opawi töpö kule i töpönö i manitö wösöpö tö jatuko ma apama. ![](https://cdn.door43.org/obs/jpg/360px/obs-en-08-07.jpg) Jose nö manimowi itö pewö wösö taö öpapö töna Tiosö nö tö totoköma tö kuoma, inatö kuaiaja, pöka kasötawi ia sai patana faraon nö Jose nakalö tasoma. Jose nö i manitö pewö wösö jötonö: “Tiosö nö nitö jaö topa apapö töna siete (7) inamatö simöpa piaköle, itö nojana nomö sotawö nitö jaö ma apapö töna siete (7) inamatö simöpa nomo sota piaköle.” Ina a kuma. ![](https://cdn.door43.org/obs/jpg/360px/obs-en-08-08.jpg) ¡Jose na faraon pi mönaja totia apa salo Egipto tö uli pewöna a kaikanamowi a ta sotalöma! ![](https://cdn.door43.org/obs/jpg/360px/obs-en-08-09.jpg) Sanöma töpönaja i siete (7) inama töna nitö jaö toita api itö inama pewöna pe toti ipi nitö simoma totio opaje, ina Jose kuma. Itö nojana, siete (7) inama töna nitö jaö mi ipi itö inama waloköiaja, sanöma töpö nitö kuo jötopö töna, Jose nö nitö noa tama sotama. ![](https://cdn.door43.org/obs/jpg/360px/obs-en-08-10.jpg) Nitö mi ipi i Egipto tö ulina itö kuo sisa ma apama, Canaan tö ulina Jacob nö kamani i töpö kai pewö kule ia nitö ma apa naio tasoma. ![](https://cdn.door43.org/obs/jpg/360px/obs-en-08-11.jpg) Inatö kuaiaja, Egipto tö ulina nitö noa tapalö tasopö töna Jacob nö kamani ulu pata töpö simönöma. Kamani papala töpönö Jose na nitö noa taö köle maike, ji ipa poosa jatowö töpö pi ku ma apama. Maike, ji ipa papala töpö ina Jose pi upa asama. ![](https://cdn.door43.org/obs/jpg/360px/obs-en-08-12.jpg) Ipa papala töpö pi ku toita apö ko waikö jatö kötö a pi ku upa salo töpö wapa totio opa paionö, itö nojana i töpönaja: “¡Kamisa kamakö i pooso Jose sa! Pö kiliti. ¡Kamakanö kamisana wanisana matö tama pi topa apa salo noami ipi sa tatamotipö töna kamakanö sa noa tapamanö köpöli, maike Tiosö nö toita api tö tama piasalo i wanisanatö kuo puoma! Kamisanö kamaka, kamaka ai töpö, i makö pewöna ni satö totomapö töna jisa Egipto tö ulina pö kua naiköso.” Ina Jose kuma. ![](https://cdn.door43.org/obs/jpg/360px/obs-en-08-13.jpg) Kama töpö saipö namö Jose papala töpö jua kononönö kamani pöa Jacob na, Jose kua soa kölai töpö ku ko tasoiaja a pi mönaja totio opama. ![](https://cdn.door43.org/obs/jpg/360px/obs-en-08-14.jpg) Jacob patasipö toti pölata maike, Egipto tö ulina kamani i töpö kai pewö wasimö ikukönö, ia töpö pewö kukö tasoma. Jacob nomaso piasalo kamani ulu töpö kua topa jaiopö töna a japalo jötöja totipasoma. ![](https://cdn.door43.org/obs/jpg/360px/obs-en-08-15.jpg) Satö tama totio opa piasalo Abraham na Tiosö kunoi, itö liki Isaac na itö tota nomököma, itö nojana Jacob itö kua nomöpasoma, itö nojana doce (12) Jacob ulu töpö, kamani ai töpö pewö, ina kipi töpö itö kua noma sotasoma. I doce (12) töpö i ulu töpö ola pewö salekepalonö, doce (12) kamani itö uli pewö ta jötöja soköma. *Genesis tököna 37-50 töna Tiosö nö tö tamanoi itö tosokama kule itö* ## 9. Tiosö nö Moises nakanoi itö https://openbiblestories.org/l/xsu/story-9/ ![](https://cdn.door43.org/obs/jpg/360px/obs-en-09-01.jpg) Jose nomasoiaja, Egipto tö ulina kamani i töpö pewö kua jipasoma. Ia sateje epi inama töna, kamani i töpö, kamani ulu töpö ola ina kipi töpö kutiopaja, sateje epi kamani ulu töpö ola kua totipasoma. I töpö liki Israel töpö jilo kuo pasioma. ![](https://cdn.door43.org/obs/jpg/360px/obs-en-09-02.jpg) Sateje toti ipi inamatö jasua totipasonoia, Israel tili töpö pala totisoma. Jose nö tö pewö tamanoi i Egipto tili töpönö itö pewö taimio opama. Israel tili töpö pala totio opaiaja, i töpö kili ipama. Inatö kuanö, itaja Egipto tö ulina faraon kaikanamo pöle ianö noami ipi Israel tili töpö tatamowi töpö ta sotalöma. ![](https://cdn.door43.org/obs/jpg/360px/obs-en-09-03.jpg) Israel tili töpönö saipö pata lape toti ipi saipö pata öpamapö töna Egipto tili töpönö lotete toti ipi töpö sima totio opama, ai tiko somitö uli pata tama totio opa naioma. Tatamowi tö jatuku mi ipi tö tama totio opa kötönö töpö pi jonipo totio opama, maike Tiosö nö töpö pasiliapala jöto kötönö, kama töpö ulupö pala totio opa alöma. ![](https://cdn.door43.org/obs/jpg/360px/obs-en-09-04.jpg) Israel tili töpö ulu pala totiomati, i faraon kaikananö itö tapa totio opa salo, kama töpönaja, Israel tili töpö sunö wanoa oso tapalöiaja ma töpö oso sönö Nilo tu patana ma töpö oso sösaja soatalo pökö, ina a kuma. ![](https://cdn.door43.org/obs/jpg/360px/obs-en-09-05.jpg) Ai Israel tilitö sunö ai ula osowai tapalöma. Ia, kamani panopa ina kipi töpönö awai sosapalama jötötioma. ![](https://cdn.door43.org/obs/jpg/360px/obs-en-09-06.jpg) I ulawai pö töpönö awai sosapalamapö tö jatuka mapasoiaja, awai söpa ma apapö töna ai wöawai kalöwi toina awai titikönö Nilo tu kasö patana jitipö osowai kuo opapaja a piwai ka sotaköma. Kamani pasi pata wainö a piwai tapala jötötioma. ![](https://cdn.door43.org/obs/jpg/360px/obs-en-09-07.jpg) Faraon ai pateanö i wöawai talalönö tö osimöwai mö sotama. Ulawai talalönö, kamani ula saiwai kulena ina a wai ta sotalöma. Awai satiapalamapö töna ianö ai Israel tilitö su naka sotalöma, i sua liki i ulawai pöpöna kuo jatoma. Ula piwai patajapalonö kamani pöpöna paluku su pi kota ma apaiaja, faraon pateana awai tota koköma, ianö Moises a jilowai ta sotalöma. ![](https://cdn.door43.org/obs/jpg/360px/obs-en-09-08.jpg) Moises pata apö waikiiaja, aitö wakalana ai Egipto tilitönö ai Israel tilitö sötipaja tö talalöma. Moises nö kamani ai Israel tilitö noama jötoma. ![](https://cdn.door43.org/obs/jpg/360px/obs-en-09-09.jpg) Ai tönö sa ta jatoa maikötö Moises pi ku upa salo, i Egipto tilitö söpalönö a patilia sotaköma. Maike ai tönö Moises nö tö tama pöle itö ta pasio jatotioma. ![](https://cdn.door43.org/obs/jpg/360px/obs-en-09-10.jpg) Moises nö tö tamanoi i faraon nö itö jininönö, a söpa pi topa apama. Faraon löapalawi i töpönö a söpa ma apapö töna pölösa patanamö Moises toka sotasolöma. ![](https://cdn.door43.org/obs/jpg/360px/obs-en-09-11.jpg) Egipto tö uli paja apa tasopamö pölösa patana Moises nö oveja kökö totiapalawi a kupaso tasoma. Itö ulina ai sutö kuowi a sulönö polakapi kamani ulu kökö taköma. ![](https://cdn.door43.org/obs/jpg/360px/obs-en-09-12.jpg) Aitö wakalana Moises nö oveja kököwani totiapalatitaja, ai jiti waina koataka jili pölati itö talalöma. Maike i jitiwai isi ma apama. Moises nö itö mö jöka pi topa apa salo a öpa jöka toitakö tasoma. I jiti jili pöle ia a öpa jöka toitakö tasonoiaja, Tiosö japalo sotalonö: “Moises, wa amösökö jalole itökö jasupalö. Ipatö uli ausi ipapa wa öpa köle.” Ina a ku sotama. ![](https://cdn.door43.org/obs/jpg/360px/obs-en-09-13.jpg) Ia naja: “Ipa sanöma töpö wasiso totia apöle i satö tapa apa köle. Egipto tö ulina noami ipi Israel tili töpö tatamo toitile i wa töpö ta kopalöpö töna faraon kaikanana wa simöpa piaköle. Satö uli totokö piasalo Abraham, Isaac, Jacob ina kipi töpöna sa kutinoi, i Canaan tö uli liki, i töpöna i satö uli totokö piasalo." Ina Tiosö kuma. ![](https://cdn.door43.org/obs/jpg/360px/obs-en-09-14.jpg) Moises japalo jötonö: “Sa sima pöle sanöma töpönö ia taöpo pi topa apa könaja, ¿Wina sa ku jöto piasalo?” Ina a kuiaja: “KAMISA LIKI, I KAMISA SAI. Ina a kunö, i töpönaja: ‘KAMISA patanö kamakana sa simöpalö ke.’ Ina wa kunö: ‘KAMISA LIKI I Pata sa, kamaka i kolo pata töpö Abraham, Isaac, Jacob, i töpö i Tiosö sa.’ Ina sa jilo ku sotio piasalo.” Ina wa ku naio pökö, Tiosö kuma. ![](https://cdn.door43.org/obs/jpg/360px/obs-en-09-15.jpg) Sa japalo topa jato maikötö Moises pi ku upanö a kili ipa salo faraon na a ju kili ipa alöma, inatö kuaiaja, a pasiliapala jötopö töna Tiosö nö Moises papala Aaron sima naipalöma. Moises, Aaron ina kipi töpönaja, pitilitaja faraon ma pi tama jaöta maikötö, ina Tiosö ku sotasoma. *Exodo tököna 1-4 töna Tiosö nö tö tamanoi itö tosokama kule itö* ## 10. Diez (10) tö wanisana api tö pi kua kupasonoi itö https://openbiblestories.org/l/xsu/story-10/ ![](https://cdn.door43.org/obs/jpg/360px/obs-en-10-01.jpg) Moises, Aaron ina kipi faraon kaikanana töpö julasolöma. Töpö japalonö: “'¡Ipa sanöma töpö jua konasolöpö töna töpö jula kopalö!' Ina Israel tili töpö i Tiosö pata ku köle." Ina töpö ku tasoma. Faraon nö töpö jini ma apama. Israel tili töpö julapa ko pölanö kunumai, ¡Lotete epi töpö sima satia totio asa puoma! ![](https://cdn.door43.org/obs/jpg/360px/obs-en-10-02.jpg) I töpö jua konasolöpö töna faraon nö tö pi ma apama, inatö kuaiaja Tiosö nö Egipto tö uli patana diez (10) tö pi wanisana kuapö tö simöpalöma. Faraon, Egipto tö ulina tiosö pö nuwani kujaapöle i pö nu wani i töpöna Tiosö nö Kama pata lotete epi itö möma piasalo, tö wanisanamawi itö pewö tama totio opama. ![](https://cdn.door43.org/obs/jpg/360px/obs-en-10-03.jpg) Tiosö nö Nilo tu pata liki iitu pata tapalöma, maike faraon nö Israel tili töpö julapako paio ma apama. ![](https://cdn.door43.org/obs/jpg/360px/obs-en-10-04.jpg) Tiosö nö Egipto tö uli pewö patana polapolama pöwani sima nomököma. Moises nö polapolama kökö pewö wani sasu kopö töna faraon ote tamo totio opama. Maike i polapolama kökö pewö wani noma totisonoia, faraon osi pi ku lotetea kopalonö Israel tili töpö simöpako ma apama. ![](https://cdn.door43.org/obs/jpg/360px/obs-en-10-05.jpg) Inatö kuaiaja tö wanisanama totio opapö töna Tiosö nö ukisilöpö osowai sima nomötaköma. Itö nojana mosili kökö sima nomöpalöma. Faraon kaikananö Moises, Aaron ina kipi töpö nakalönö, tö wanisanama totile i matö pewö ma kopamanöma, Israel sa töpö julapako piaköle, ina a kuiaja. Tiosö na Moises japalo jötoma, Tiosö nö Egipto tö ulina ukisila kökö pewö wani ma jöta kopamanöma. Maike, faraon kaikana osi pi ku lotetea kopalonö i töpö julapako ma apama. ![](https://cdn.door43.org/obs/jpg/360px/obs-en-10-06.jpg) Itö nojana, Tiosö nö Egipto tili töpö i salo kökö pewö wani kamakalipalönö kökö pewö wani nomamanöma. Maike, faraon kaikana osi pi ku lotetea kopalonö Israel tili töpö julapako ma apama. ![](https://cdn.door43.org/obs/jpg/360px/obs-en-10-07.jpg) Inatö kuanö, Moises naja faraon mönaköna wa öpakönö sopisi sösa sopököpalö, ina Tiosö ku nomoma. Itö tama kukema Egipto tili töpö pewö jöösö walakasömo totisoma, maike Israel tili töpöna tö kua pasio ma apama. Tiosö nö faraon pi ku lotetea kopamanöiaja, faraon nö Israel tili töpö simöpako ma apa paioma. ![](https://cdn.door43.org/obs/jpg/360px/obs-en-10-08.jpg) Itö nojana, Tiosö nö sateje toti ipi ösö joleletö komati pata keama nomoma, itönö Egipto tö ulina nitö pewö töjöle itö pewö wania totilalöma, töpö atupo pasionoi i töpö pewö söa totia naipasoma. Faraon nö Moises, Aaron ina kipi töpö nakalönö: “Sa wanisana apama, pö juakonono.” A kuiaja, Tiosö na Moises japalo jöto kukema, jutumösököna itö pewö keopo ma kopasoma. ![](https://cdn.door43.org/obs/jpg/360px/obs-en-10-09.jpg) Maike faraon pi ku wanisana kopalonö a osi pi ku lotetea kopasoma. Israel tili töpö julapako ma apama. ![](https://cdn.door43.org/obs/jpg/360px/obs-en-10-10.jpg) Inatö kuaiaja, Egipto tö ulina sateje toti ipi kusumapö pata waloa totiköpö töna Tiosö nö tö tama nomoma. ösö joleletö komatinö nitö pewö waniapa pasio ma apanoi i kusumapö waninö itö pewö oa noma konanöma. ![](https://cdn.door43.org/obs/jpg/360px/obs-en-10-11.jpg) Inatö kuanö, tres (3) tö wakalana Tiosö nö mumimumitö tama nomoma. Tö pata mumi toti ipö kötönö kamani saiana Egipto tili töpö atuatalo ma apama. Maike, Israel tili töpö kule ia tö wakala apa sisa asatioma. ![](https://cdn.door43.org/obs/jpg/360px/obs-en-10-12.jpg) Ji nueve (9) wanisana apawi tö pi kupo kua waikia köle maike, faraon nö Israel tili töpö umapo satimo soama. Faraon nö tö jiniti mi ipaja, sami ipi tö wanisanama ko sisatapö töna, Tiosö pi kupaloma. Itönö faraon pi ku tikopa noma kopasopö tö kuoma. *Exodo tököna 5-10 töna Tiosö nö tö tamanoi itö tosokama kule itö* ## 11. Israel tili töpö uluna Tiosö jasua janokönoi itö wakala https://openbiblestories.org/l/xsu/story-11/ ![](https://cdn.door43.org/obs/jpg/360px/obs-en-11-01.jpg) Israel wa töpö julapako ma apa kukema, Egipto töpö i ulu wanopö kuo somawi töpö, salo kökö wani i ulu wanopö kuo somawi i kökö, i sa töpö pewö söpa piaköle ina faraon na Tiosö ku paioma. I faraon nö itö jini jöta köle maike, pitilitaja a pi ku ma apanö Tiosö kuwi itö tama ma apama. ![](https://cdn.door43.org/obs/jpg/360px/obs-en-11-02.jpg) Iana pitilitaja töpö pewö pi ku upawi i töpö i ulu wanopö kuo somawi i kökö söpa ma apapö töna Tiosö nö tö wösö naio sotama. Sami kama pö töpönö ovejawai toita api pö sainö kökö söpö tö kuoma. ![](https://cdn.door43.org/obs/jpg/360px/obs-en-11-03.jpg) Israel tilipö oveja mawai sö pöle, ia iipönö kamaka takataka kolo juluka soatalo opaje, i ma noka sotalönö, pantö jölömo mi ipi tö kaina lope epi ma oa sotalö pökö ina Tiosö kuma. Egipto matö uli tako kölöpö töna makö iapalo mapalonö makö jusupalo ko sota pökö ina a ku naioma. ![](https://cdn.door43.org/obs/jpg/360px/obs-en-11-04.jpg) Tiosö kuwi Israel tili töpönö itö tama totiatalo opa jötötioma. Mumimumitö mötalöna, itö uli pewöna, Tiosö ju jalunö, Egipto tili töpö i ulu wanopö kuo somawi i kökö pewö sö jötöpo jaluma. ![](https://cdn.door43.org/obs/jpg/360px/obs-en-11-05.jpg) Israel tili töpö i takatakapö kolo pewöna iitö pewö kujo totio opa asama, inatö kua kötönö, i töpö saipö pewöna Tiosö jano totiatalo opa asama. I saipöna töpö titija asale i töpö löa asa koma. Oveja iipö pina töpö nö löa asa konasoma. ![](https://cdn.door43.org/obs/jpg/360px/obs-en-11-06.jpg) Maike Tiosö kuwi i pitilitaja Egipto töpö pi ku pasio ma apama. Itö pina itöpö saipöna Tiosö jano pasio ma apama. Egipto tili töpö i ulu wanopö kuo somawi Tiosö nö i kökö pewö söma. ![](https://cdn.door43.org/obs/jpg/360px/obs-en-11-07.jpg) Egipto töpö i ulu wanopö kuo somatawi, i kökö pewö nomalasoma, a pöka kasowi a i ula wanoa kuo somawi a söa toitaso, faraon i ula wanoawai kuo somawi ia söa waikia toitaso inatö kuama. Egipto tö ulina sateje epi töpö pi jonipo opa salo töpö ököpalo totio opama. ![](https://cdn.door43.org/obs/jpg/360px/obs-en-11-08.jpg) Itö mumina sotawö, faraon nö Moises, Aaron ina kipi töpö naka sotalönö: “¡Au Israel wa töpö pewö koka kopalönö, au töpö kai pewö jua kononö!” Ina a kuma. Egipto tili töpö pewönö Israel tili töpö sima totio opa naio koma. *Exodo tikina 11:1-12:32 töna Tiosö nö tö tamanoi itö tosokama kule itö* ## 12. Töpö jupa konoi itö https://openbiblestories.org/l/xsu/story-12/ ![](https://cdn.door43.org/obs/jpg/360px/obs-en-12-01.jpg) Egipto tö ulina Israel tili töpö jupa kotio piale itöna töpö pi mönaja totio opama. ¡Noami ipi töpö tatamo mapalonö, Tiosö nö masitatö uli totomanoi iamö töpö juulö piama! Egipto tili töpönaja Israel tili töpö nakoiaja tö noapi tö pewö totatotia jötököma, oro töjö, plata töjö, aitöjö ina. Tiosö na ai tiko töpö pi ku upa naiowi Israel tili töpöna i töpö noka naipasolöma. ![](https://cdn.door43.org/obs/jpg/360px/obs-en-12-02.jpg) Wakalaiaja ölasitö kaina Tiosö nö töpö kai juu, tö mumasoiaja koataka jili pölata töpö kai juu, inatö kuama. I töpö kaina Tiosö kuapalo nai sotiopaja töpö kai ju makokapalo toitioma. Ia nojana i töpö kuapalo sisapö töna tö pi ipama. ![](https://cdn.door43.org/obs/jpg/360px/obs-en-12-03.jpg) Faraon, kama töpö ina kipi töpö pi ku wanisana jaia kopalonö Israel ma töpö noami tatamöpalama ko nökö töpö pi ku jaia konasoma. Faraon, kamani i tiosö kökö i töpöna i Tiosö pata lotete jasua apa asa kilia, sami ipi i Tiosö pata sisawö ina sanöma töpö pewö pi ku upapö töna, Tiosö nö faraon pi taoma jaöatalo ma apa puoma. ![](https://cdn.door43.org/obs/jpg/360px/obs-en-12-04.jpg) Inatö kuanö noami ipi Israel tili töpö tatamo kopö töna faraon, kama löapalawi töpö ina kipi töpönö i töpö nasö suako soköma. Israel tili töpönö Egipto tili töpö wasu ju jailati itö talalönö, tö mö sota kukema faraon löapalawi i töpö ju tasa, mötati pata janaja api itu pata löa löa sota inatö kuoma. I töpö kili totia apa salo: “¿kapilitö pina Egipto tö ulina makö jusa pasia konaso tasoma? ¡Makö söpo pia köle!”. Ina töpö komö kuto totio opama. ![](https://cdn.door43.org/obs/jpg/360px/obs-en-12-05.jpg) Israel tili töpönaja: “¡Pö kiliti! Kamaka pina Tiosö pata sösonö makö löa konö kötö.” Ina Moises kuiaja, Moises naja: “Mötatitu pata janaja api itu pata kuamö kulati iamö pö juulö i töpöna ina a kuu.” Tiosö kuma. ![](https://cdn.door43.org/obs/jpg/360px/obs-en-12-06.jpg) Inatö kuanö, Egipto tili töpönö Israel tili töpö tapa ma apapö töna Tiosö nö mötala ölasi ta pata löa löa sotamaköma. ![](https://cdn.door43.org/obs/jpg/360px/obs-en-12-07.jpg) Mötatitu jitu patana wa poko sononokönö tu pata jamatapalö, ina Moises na Tiosö kuma. Inatö kuaiaja, mötati mötalö patana pilitiso kuköpö töna, Tiosö pina ipoko ta patanö aitö jötömöna ai matu pata jasiamo tali, aitö jötömöna aitu pata jasiamo tali tö kuama. ![](https://cdn.door43.org/obs/jpg/360px/obs-en-12-08.jpg) Israel tili töpö kotona matu pata sokea totilata mötatitu mötalö patana masitatö uli jasitina töpö juulöma. ![](https://cdn.door43.org/obs/jpg/360px/obs-en-12-09.jpg) Inatö kuaiaja, Egipto tili töpönö Israel tili töpö tokö komati itö talalöpö töna Tiosö nö ösamö ölasitö ösa kopamanönö pilitiso jatuka komaköma. Egipto tili töpönö i töpö nasö suako soköma. ![](https://cdn.door43.org/obs/jpg/360px/obs-en-12-10.jpg) Inatö kuanö mötatitu mötalö patana pilitisona i töpönö Israel tili töpö nasö suapalama, maike Tiosö pina Egipto tili töpö kilipalo opa, katosöpö poko pewö kasöpa apa, inatö kuama. I töpö lalupalo pölanö: “¡Pö lölöpa ko! ¡Israel tili töpö pina Tiosö pata jöla pöle!” Ina töpö kutoma. ![](https://cdn.door43.org/obs/jpg/360px/obs-en-12-11.jpg) Mötatitu patana Israel tili töpö pökata totia apako waikitakö noiaja, Moises naja a poko sonona kopalo Tiosö kuma. Ina ianö tö tama jöto kukema, Egipto tili töpöna matu pata kea totikönö tu pata kutionoi ina tu pata kua totia apa ko sotaköma. Egipto tili töpö pewö nasö tua totipasoma. ![](https://cdn.door43.org/obs/jpg/360px/obs-en-12-12.jpg) Egipto tili töpö pewö söa totipasowi i Israel tili töpönö itö ta totio opa salo, Pitilitaja Tiosö na töpö pi ku totio opanö, Moises liki Tiosö kai wösöwi ia, ina töpö pi ku totio opama. ![](https://cdn.door43.org/obs/jpg/360px/obs-en-12-13.jpg) ¡Töpö söpasopö töna Tiosö nö töpö löa kopali, noami ipi töpö tatamotinoi itöna töpö löa koni, inatö kuaiaja itö pewö pina töpö pi mönajapalo totio opama! Tiosö kuwi itö tama sisapö töna töpö kua kopasoma. Egipto tili töpöna Tiosö nö töpö löa konönoi itö pina Tiosö na töpö pi mönaja apa salo sateje epi ama töna töpö amamo pi mönajapalo toitioma, noami ipi töpö tatamo ma kopasonoi itö pina töpö amamo totio opa naioma. ![](https://cdn.door43.org/obs/jpg/360px/obs-en-12-14.jpg) Egipto tili töpöna töpö nö löa koni, noami ipi töpö tatamowi töna töpö löa naia koni, ina Tiosö kuanoi itö taöpo ko sinimopö töna, inamatö pewönamö Pascua tö wakalana töpö pi mönajapalo sinimopö töna Tiosö simoma. I töpönö ai ovejawai toita api a söpalönö pantö jölömo mi ipi tö kaina a oanö töpö pi mönajapalo sinimoma. *Exodo tököna 12:33-15:21 töna Tiosö nö tö tamanoi itö tosokama kule itö* ## 13. Israel, Tiosö ina kipi töpö japalo topamonasonoi itö https://openbiblestories.org/l/xsu/story-13/ ![](https://cdn.door43.org/obs/jpg/360px/obs-en-13-01.jpg) Mötati pata janaja api itu patana Tiosö nö Israel tili töpö pökatöpamanönö, itö nojana Sinai ai jiimatö jilo pata kuawi iamö Ianö töpö kai jua nomösolöma. I jiima töna Moises nö jiti osowai isititaja tiwai tapanoi itö jiima kuoma. Sanöma töpönö i jiimatö komö patana kamani saipö pewö ta sotaköma. ![](https://cdn.door43.org/obs/jpg/360px/obs-en-13-02.jpg) Moises, Israel tili töpö ina kipi töpönaja: “Makö japalo topamonaso pöli i matö sai tama totiatalo opa kukema, kamisanö makö pi satea apa asawi i makö kupaso piasalo, Ipa saia totiapalawi i makö kupaso piasalo, Ipa makö soka totiowi makö kuo piasalo.” Ina Tiosö kuma ![](https://cdn.door43.org/obs/jpg/360px/obs-en-13-03.jpg) Tres wakalatö jasupalonö Tiosö na töpö mömopö töna töpö totea jöta waikipaso noiaja, Sinai tö jiu pata öso opa lasopamö, sanö töjö, tö samisamimo opa, wakisi töjö, tola pata ku lotete epi töjö ina kipi tö kaina Tiosö pata itopasoma. I jiima töna Moises jamea sisata solöpö tö pi ipa sisama. ![](https://cdn.door43.org/obs/jpg/360px/obs-en-13-04.jpg) Inatö kuanö i töpönö tö tamapö töna Tiosö japalo sotanö: “Kamisa liki Jehova sa, kamaka i Tiosö sa, noami ipi makö tatamo toitio piataja kamisanö makö ta kopalö köpili. Ai tiko tiosö töpöna pö pi ku janoa jatoti.” ![](https://cdn.door43.org/obs/jpg/360px/obs-en-13-05.jpg) “Ai ma töpö nu wani tamanö i pö nu mönakö wanina pö mai popa jatoti, wina pi kusalo kamisa, pata Tiosö sa liki, satö noama totio opawi sa. Sa kili taö pölanö kunumai sa jilo katea jatoti. Toita apö kulena ina mota mapowi i matö wakala tamanö matö wakala kili taö totio opa pökö. Seis (6) wakala töna matö tama pi topa apawi i matö tamanö, Siete (7) tö wakalana makö mota mapo konö, kamisana makö pi tao sotio pökö” ![](https://cdn.door43.org/obs/jpg/360px/obs-en-13-06.jpg) Kamaka i jaoani ma töpö kili taö totiatalo opa pökö. Aitö söpa jatoti. Kamaka i pusupa pasi mi ipi iana pö mai saka jatoti. Pö tomömo jatoti. Pö jolisimo jatoti. Kamaka kotöna aitö kuo söto naiowi iawani pusupa, kamani saia, kamani ai matiji töjö inatö sua ta löatalo jatoti." Ina a kuma. ![](https://cdn.door43.org/obs/jpg/360px/obs-en-13-07.jpg) Inatö kuanö Tiosö nö polakapi mama kökö asawösö patete epi töna diez (10) simowi tö tosoka takönö Moises na tö totoköma. Israel tili töpönö tö tama totiatalo opapö töna Tiosö nö sateje epi ai simöwi tö tota naiköma. Sanöma töpönaja, sa kuwi i matö tama totio opa könaja kamakana toita api satö totoma, makö totiapalai ina sa kua piasalo Tiosö kuma. Itö tama mia könaja Tiosö nö töpö wasisamapö tö kuo sotama. ![](https://cdn.door43.org/obs/jpg/360px/obs-en-13-08.jpg) Kamisa kaina makö kutapö töna ina saia osowai kui ma saiwai tata pökö Israel tili töpöna ina Tiosö ku naioma. "Kokamotawi a sai" i saia jilo tapalöma, polakapi a sai osimö kuoma, mötala jaloösö asawösö lama. I saia totiapalawi ia wani liki noja a sai osimö kulati ia a wani lisita sisapö tö kou sisama, ia sanöma töpöna Tiosö walota sisama. ![](https://cdn.door43.org/obs/jpg/360px/obs-en-13-09.jpg) Ai sanöma tönö Tiosö kunoi itö tama ma apa könaja kokamotawi i saia kolo sikana salo kökö wani isitamawi tö kule ia ai saloa söpalönö Tiosö na a tototama. Tiosö saia totiapalawi ianö i saloa söpalönö saloa isitamawi ia a isitamama. I saloa wani söpalöwi ia iipö waninö Tiosö nö i sanömatö wasisama ma apapö töna tö noa kotamama. Kamani saia totiapalapö töna Tiosö nö Moises papala Aaron, kamani ulu töpö ina kipi töpö saipalöma. ![](https://cdn.door43.org/obs/jpg/360px/obs-en-13-10.jpg) Tiosö na töpö pi motapalo sisai, i töpö liki kamani i sanöma töpö sai kupaso inatö kuapö töna, Tiosö simowi itö pewö tama jötopö töna, topa apa köle sanöma töpö ku jötoma. Maike, Tiosö simowi itö tama jötopö töna topa apa köle töpö kulasonoi itö pi tatejetotaja, i töpönö pe epi wanisanatö tama totio opama. ![](https://cdn.door43.org/obs/jpg/360px/obs-en-13-11.jpg) Sateje epi wakala töna Sinai tö jiima jösöka patana, Tiosö na Moises japalotiiaja a kuo toitiolasoma. Sanöma töpönö a walo ta kotiopaja töpö mota totisoma. ¡Inatö kuaiaja i töpönö Aaron na orotö totokönö jitönö kamisamakö ai nutö tapalö töpö kuma! ![](https://cdn.door43.org/obs/jpg/360px/obs-en-13-12.jpg) Aaron nö i oro tönö jaka jokotoma nu wani tapalöma. ¡Ia nu wanina sanöma töpö pi mönajapalo soka sotama, ia nu pina sateje epi salo kökö sö öpama! Tiosö simowi itö tama sisa mi ipaja i töpöna Tiosö pi jisujupalonö töpö söpa pi topa apama. Maike, i töpö pina Tiosö na Moises japalo jötoiaja Tiosö nö tö jinia jötölönö töpö söpa ma apama. ![](https://cdn.door43.org/obs/jpg/360px/obs-en-13-13.jpg) Jiima töna Moises itua kopalonö ia nu wani talalöma, itöna a pi jisua totipalonö mama kökö asawösöna (10) simowi Tiosö nö tö tosokokönoi i mama kökö waniapalöma. ![](https://cdn.door43.org/obs/jpg/360px/obs-en-13-14.jpg) Inatö kuaiaja, Moises nö ia nu wani sö toitiopaja a nu wani kopekea totipalöma, matuna ia nu kopeke pewö kemakönö i töpö pewöna tu koama sotama. Tiosö nö sanöma töpöna kamakalitö simökönö sateje epi töpö söa totilasoma. ![](https://cdn.door43.org/obs/jpg/360px/obs-en-13-15.jpg) Diez (10) simowi itö pewö tosoka koköpö töna Moises nö ai mama kökö asawösö ta kopalöma. Itö nojana jiima töna a tua kopölönö sanöma töpö ote ta konöpö töna Tiosö na a japalo ko lasoma. Tiosö nö Moises jinia jötölönö töpö ote ta konöma. Mama kökö tutena diez (10) simo somatawi itö pewö tosokolata Moises nö jiima töna tö kai itua kopasoma. Inatö kuanö Tiosö nö Sinai tö jiima pata tako kölönö, masita satö uli totopö kötö A kunoi itö ulina töpö kai jua noma sotasolöma. *Exodo tököna 19-34 töna Tiosö nö tö tamanoi itö tosokama kule itö* ## 14. Pölösana töpö ju monöpalotinoi itö https://openbiblestories.org/l/xsu/story-14/ ![](https://cdn.door43.org/obs/jpg/360px/obs-en-14-01.jpg) Tiosö nö Israel tili töpöna a simowi itö pewö totoköiaja, Sinai tö jiima pata ta ko kölöma. Masita satö uli totokö piasalo a kunoi, i Canaan tö ulina Tiosö nö töpö kai jua sotasolöma. Canaan tö uli kuomö kuopamö ölasitö juulöiaja itö nojana töpö ju jaiolömama. ![](https://cdn.door43.org/obs/jpg/360px/obs-en-14-02.jpg) Abraham, Isaac, Jacob ina kipi töpöna kamaka ulu töpöna i satö uli totokö piasalo ina Tiosö kuma, maike itaja ia sateje epi ai tiko töpö kuo totio opa löoma. Canaan i töpö jilo kuo pasioma. I Canaan tili töpönö Tiosö kuwi itö tama pasio mi ipö, a pi pasio mi ipö ina töpö kuama. I töpönö ai tiosöpö nu wani pi ipaö, pe epi wanisanatö tama apaö ina töpö kuama. ![](https://cdn.door43.org/obs/jpg/360px/obs-en-14-03.jpg) Israel tili töpönaja: "Kamakanö satö uli toto piale itö ulinaja Canaan tili töpö kule i ma töpö sasa kopalö pökö. I töpö kotöna noi ipi pö kuo söto jatoti, i töpö su sua jatoti. Kamani nu ma töpö pewöwani wania totipalö pökö, kamakanö sa kuwi i matö tama ma apa könaja, i pö nu wanina makö pi mota naikönö kamisana matö taö ma pasia kopaso kötö." Ina Tiosö kuma. ![](https://cdn.door43.org/obs/jpg/360px/obs-en-14-04.jpg) Canaan tö uli kotöna Israel töpö kukönö, Moises nö 12 Israel ulu töpö ola saipalöma. Tö uli mö monimo tasopö töna töpö sima sotaköma. Canaan tili töpö utiti jato, töpö lotete epö jato itö taöpo pi topa apa salo Moises simoma. ![](https://cdn.door43.org/obs/jpg/360px/obs-en-14-05.jpg) 40 wakala töna Canaan tö uli pewö möpala totikö tasonö töpö kopöma. Kama töpönaja: "¡Masitatö uli toita apö, nitö kua apa inatö kua kölali!" Ina töpö ku ko solöma. Maike 10 ai töpönö tö uli mö naio tasonoi i töpö ki: "¡Töpö uli pata jokola totia apa, sanöma pö pata pe toti ipö ina tö kua kölali! ¡I ma töpö namo keköma kamakana i töpö sua totia apa asasopö tö, makö söpalö pö tö!" Ina töpö ku pasioma. ![](https://cdn.door43.org/obs/jpg/360px/obs-en-14-06.jpg) Itö nojana sotawö, polakapi töpönö itö uli mö naio tasonoi, i Josue, Caleb ina kipi töpö ki: "¡Pitilitö saina Canaan tili töpö pe epö, töpö lotete toti öpö inatö kua kölali, maike i töpöna makö sua totiso kötö! ¡Kamaka kaina Tiosö pata söso naio kukema makö sulaso kötö!" Ina i töpö ku asama. ![](https://cdn.door43.org/obs/jpg/360px/obs-en-14-07.jpg) Maike sanöma töpönö Caleb, Josue Ina kipi töpö jini ma apama. Moises, Aaron ina kipi töpöna töpö jiso opa asa puonö: "¿Kapilitö pina jisa tö jiopa apapa kamakanö samakö kai ju pasioma? Egipto tö ulina samakö kua topa apa pasio waikio noiaja, jisia samakö söpalonö kamisamökö pusupö töpö, ulu töpö ina kipi töpö wasisama jaiopö tö kupo pasio piaköle." Ina töpö kupalo opama. Ai kaikana tute tönö Egipto tö ulina i töpö kai sapa kopasolöpö töna a saipa pi topa apa koma. ![](https://cdn.door43.org/obs/jpg/360px/obs-en-14-08.jpg) Tiosö jiso opölanö kokamotawi ia saina a walokösolönö: "Kamisana makö waitilimo opa kötönö, jukiki pölösa patana makö ju monöpalo toitio piaköle. Iamö (20) veinte inamatö kuo tolejowi i töpö pewö söa totilalonö satö uli toto piale ia töpö lisipo pasio maikötö, Josue, Caleb ina kipi töpö lisia sisapaso piasalo." Ina a kuma. ![](https://cdn.door43.org/obs/jpg/360px/obs-en-14-09.jpg) I töpönö itö jininönö, töpö wanisana apa ma kötönö töpö pi jonipo opa koma. I töpönö sösowi i kamani itö pewö sulönö Canaan tili töpö sömo julasolöma. Kamakana Tiosö noka ma apöle pö juulöti ina Moises kuma, maike pitilita töpö pi ku ma apama. ![](https://cdn.door43.org/obs/jpg/360px/obs-en-14-10.jpg) I töpö sösopa Tiosö noka ma apama, itö pina töpö sakölonö sateje epi töpö söa totipasoma. Inatö kuaiaja, Canaan tö uli ta ko kölönö pölösa patana (40) cuarenta inama töna töpö ju monöpalo toitioma. ![](https://cdn.door43.org/obs/jpg/360px/obs-en-14-11.jpg) I (40) inama töna Israel tili töpö ju monöpalotinoi itaja, Tiosö nö i töpöna nitö sima jötötioma. Jutumösököna pantö kuo lasowi tö "mana" tö jilo kuawi tö totoköma. I töpönö saloa sai oa soatalo opapö töna i töpö kule ia sateje epi salopö katöwi kökö sima naioma. Itö inama pewöna, Tiosö pina i töpö jaloösö, amösö jalowi tö itö pewö joteti jöto ma apama. ![](https://cdn.door43.org/obs/jpg/360px/obs-en-14-12.jpg) Tiosö nö tö aipamanö mamana matu jamanönö tu tota naiköma. Inatö kua pölata maike, Tiosö, Moises ina kipi töpöna sanöma töpö pi jisuapalo satea apama. kua pasia pölata maike Abraham, Isaac, Jacob ina kipi töpöna Tiosö kunoi itö tama satea apa piama. ![](https://cdn.door43.org/obs/jpg/360px/obs-en-14-13.jpg) Aitö wakalana sanöma töpö nitö mi ipaja, Moises naja: "Mama patana a japalo, matu ja sotaso kötö." Tiosö kuma. Maike sanöma töpö mamotalöna Moises nö Tiosö kili taö ma apanö a japalo pölanö kunumai jitinö polakapi mama pi söa ta pölöma. I töpö pewönö tu koapö töna mamana matu ja jötösoma, maike Moises na Tiosö pi jisujupalonö: "Satö uli toto piale ia wa lisipo naio maikötö." A kuma. ![](https://cdn.door43.org/obs/jpg/360px/obs-en-14-14.jpg) (40) Cuarenta inama töna töpö ju monöpalo toitiopaja, Tiosö na töpö waitilimo opa pasionoi i töpö pewö noma totisoma. Inatö kuaiaja, tö uli toto piale iamö Tiosö nö töpö kai jua jöta konasolöma. Itaja Moises patasipö totio opa waikioma, inatö kuaiaja sanöma töpö kai ju nomopö töna Tiosö nö Josue saipalöma. Kaunö sa kai wösö tolea kua kuawina ina aitö kuawi waia sa sima noma kopalö piasalo Moises na ina Tiosö ku naioma. ![](https://cdn.door43.org/obs/jpg/360px/obs-en-14-15.jpg) Inatö kuanö, masitatö uli toto piale itö uli möpö töna jiima tö jösöka pata ösa totio opa lasopamö a jamepalolo Moises na Tiosö kuma. Masitatö uli toto piale Moises nö itö uli mö asama maike ia Tiosö nö a lisipama ma apama. Inatö kuanö, Moises nomasoiaja iana (30) treinta wakala töna Israel tili töpö ökötima. Josue liki i töpö i kaikana tutetö kua nomöpasoma. Josue nö Tiosö kili taö öpaö, pitilita a pi ku upaö, ina a kua kötönö a kaikana toita apama. *Exodo tököna 16-17 tönaja; Números tököna 10-14; 20; 27 tönaja; Deuteronomío 34 tönaja Tiosö nö tö tamanoi itö tosokama kule itö* ## 15. Tö uli toto pianoi itö uli https://openbiblestories.org/l/xsu/story-15/ ![](https://cdn.door43.org/obs/jpg/360px/obs-en-15-01.jpg) Tö uli toto pianoi i Canaan tö ulina Israel tili töpö lisipasopö tö wakala waloa jötököma. Canaan tö ulina Jerico aitö uli jilo kuawi tö uli jokola totiotasopa polakapi töpönö tö uli möpala monimo tasopö töna Josue nö töpö simönöma. Ai su tönö tö noa koanö wano töpö mamomawi Rahab a jilo kuawi itö ulina a kuoma, ianö itö uli möpala pölati i töpö sosapalama, töpö toka komani ina a kuama. Tiosö na pitilita a pi kunö itö tamama. Israel tili töpönö Jerico tö uli wania solöiaja kamisamakönö kawa, au ai töpö ina kipi makö söpa pasio maikötö Rahab na ina i töpö kuma. ![](https://cdn.door43.org/obs/jpg/360px/obs-en-15-02.jpg) Jordan tu patana töpö pökata paipalonö tö uli toto piale itö ulina Israel tili töpö lisipasopö tö kuoma . Josue naja: “Ipa saia totia palawi i töpönaja pö ju somaalö a kuu.” Tiosö kuma. Jordan tu patana Tiosö saia totiapalawi i töpö juulö kukema matu pata opiköma, itu kolo pata jasiti ipapaja Israel tili töpö pökatöpasoma. ![](https://cdn.door43.org/obs/jpg/360px/obs-en-15-03.jpg) Jordan tu patana i töpö pökatöpasoiaja, pina Jerico tö ulina wa wasu ikuo kua pökö Josue na Tiosö kuma. Sanöma töpönö Tiosö kuiaja tö tama totio jötoma. Inatö tama Tiosö kuiaja tö tama jötonö, Jerico tö uli julu patana töpö sösowi i töpö, Tiosö saia totiapalawi i töpö ina kipi (6) seis wakala töna töpö asoka pi kupasoma. ![](https://cdn.door43.org/obs/jpg/360px/obs-en-15-04.jpg) (7) Siete tö wakalana, itö uli julu patana (7) siete i töpö pi asoka kua noma kopasoma. Töpö asoka kota ma apapö i töpö asokopo ko sisatapaja, sösowi i töpö lalupalo pasia, Tiosö saia totiapalawi i töpönö tola pö jola pasia inatö kuama. ![](https://cdn.door43.org/obs/jpg/360px/obs-en-15-05.jpg) ¡Inatö kuanö, Jerico tö uli pata jokolole itö pewö pata kea totisoma! Inatö tama Tiosö kuiaja Israel tili töpönö itö ulina tö pewö kuowi tö pewö wania totilalöma. Rahab, kamani ai töpö ina kipi töpö jia ko sisapalöma, i töpö liki Israel tili töpö i ai töpö kua naipasoma. Israel tili töpönö Jerico tö uli pata waniapalönoi i Canaan tö ulina ai töpö kua naile i töpönö itö jininö Israel tili töpöna töpö kili ipama. ![](https://cdn.door43.org/obs/jpg/360px/obs-en-15-06.jpg) Canaan tö uli pewöna töpö kuowi töpöna pö noia jatoti ina Israel tili töpöna Tiosö kuma. Maike Canaan tö ulina ai töpö kuowi gabaonitas töpö jilo kuawi, Josue naja Canaan tö ulina samakö kua pasia maikötö ina töpö jolisi kuma. Noimowi makö kua pasipalo nökö Josue na i töpö kuma. Tiosö na witiamö ji gaboanitas töpö kua pasia Josue, Israel töpö ina kipi töpö ku paio ma apama. Inatö kuanö auie noimowi makö kupalo nökö i töpöna Josue ku jötösoma. ![](https://cdn.door43.org/obs/jpg/360px/obs-en-15-07.jpg) Gabaonitas töpö monimonoi Israel tili töpönö itö jinia konönö töpö jiso opa koma, maike Tiosö nö tö ta apölata auie töpö ku waikioma kötönö kua pölatakö töpö ku soa pötasoma. Tö pi tatejepasonoiaja, Israel töpöna gabaonitas töpö noimowi töpö kupasonoi i Canaan tö ulina ai töpö kuo naiowi, i amorreos töpö kaikananö itö jininönö kamani sösowi töpö kokapalönö Gabaon töpö namo keoma. Samakö pasilipalöso ina tosokamatö kuwi gabaonitas töpönö Josue na tö simöpalöma. ![](https://cdn.door43.org/obs/jpg/360px/obs-en-15-08.jpg) Inatö kuaiaja Josue nö kamani sösowi töpö kokapalönö gabaonitas töpö kuo tasopamö, mumaia töpö jua jalusolöma. Tö jalu upataja amorreos töpö kuopa töpö walopakö tasonö töpö namo kea sotaköma. ![](https://cdn.door43.org/obs/jpg/360px/obs-en-15-09.jpg) Itö wakalana Israel tili töpö pina Tiosö söso totio opama. Ianö amorreos töpö pi ta monöma totia apa, sateje toti ipi mama kökö asawösö pata keamanö sateje epi amorreos töpö söa totia apa naipali, inatö tamama. ![](https://cdn.door43.org/obs/jpg/360px/obs-en-15-10.jpg) Tö wakala apa soa pailata Israel töpönö amorreos töpö pewö söa totia sotalöpö töna Tiosö nö pila motokö pata opia paimaköma. Itö wakalana Israel töpö pina Tiosö pata sua totisoma. ![](https://cdn.door43.org/obs/jpg/360px/obs-en-15-11.jpg) Tiosö nö i töpö sakömanöiaja itö nojana, Israel tili töpöna töpö wasu ikua nomököpö töna sateje epi ai Canaan töpö kokamo nomoma. Josue, Israel töpö ina kipi töpö wasu ikukönö i töpö pewö söa totia noma kopalöma. ![](https://cdn.door43.org/obs/jpg/360px/obs-en-15-12.jpg) I töpö söso mapasoiaja, Israel ulu töpö i ulu töpö ola pewöna Tiosö nö kamani masitatö uli pewö tota jötaja sotaköma. Inatö kuanö, Tiosö pina kalimai töpö kuo totio nomo kotioma. ![](https://cdn.door43.org/obs/jpg/360px/obs-en-15-13.jpg) Josue patasipö ipö waiki salo, Israel töpö nakalönö töpö pewö kokapamanöma. Inatö kuanö, Sinai tö jiu patana Israel tlili töpöna Tiosö japalonoi itö pewö tama totio opa jaiopö töna i töpöna Josue japaloma. Tiosö na samakö sötapalo jaio sotio kötö, a simowi i samatö tama sotio kötö ina i töpö ku jötoma. *Josue tököna 1-24 töna Tiosö nö tö tamanoi itö tosokama kule itö* ## 16. Löapalanoi i töpö https://openbiblestories.org/l/xsu/story-16/ ![](https://cdn.door43.org/obs/jpg/360px/obs-en-16-01.jpg) Josue nomaso noiaja, Israel tili töpönö Tiosö simoiaja tö tama ma apanö ai Cananeo töpö kua apa sole i töpö sasupa ko mi ipö, a simonoi itö tama mi ipö ina töpö kuama. Jehova, Tiosö pitili ipi iana Israel töpö japalo toita pölanö kunumai, cananeo töpö i tiosö pö wanina töpö japalo toita sisama. Israel töpö ai kaikana patatö mi ipö kötönö kama töpö pi kupa töpö kua soa pöatalotima. ![](https://cdn.door43.org/obs/jpg/360px/obs-en-16-02.jpg) Israel tili töpönö Tiosö kili taöti ma apa alöiaja, ia patanö i töpö wasisamapö töna ai tiko töpönö i töpö sönö töpö sakömanöma. I tiko töpönö Israel tili töpö i matijitö pewö toma totilali, saia pewö wania totilali, ai töpö söa totilali ina töpö kuama. Tiosö kili taö ma apanoi i sateje epi inama jasupaso, töpö nisi taö öpawi i töpönö töpö wasisama totiki, inatö kua waikionoiaja, Israel tili töpö ote tamo konö Tiosö na samakö nö löa kopalö ina töpö ku koma. ![](https://cdn.door43.org/obs/jpg/360px/obs-en-16-03.jpg) Inatö kuaiaja, i töpö nö löa konöpö töna Tiosö nö löa kowi a sima jötöpalöiaja ianö kalömai töpö ta topa jöta koköma. Maike, sanöma töpönö Tiosö taö ma kopalonö ai tiosö pö nu wanina töpö japalo toita apa nomo koonöma. Inatö kuaiaja, Tiosö pina madianita tili töpönö i töpö sö paja töpö saka noma komanöma. ![](https://cdn.door43.org/obs/jpg/360px/obs-en-16-04.jpg) (7) siete inama töna madianita töpönö Israel tili töpö jikaliana nitö sua toitioma. Madianita töpönö Israel tili töpö tapa ma apapö töna takatakana töpö sosapalo toitioma. Töpö pi joni totia apa salo Tiosö nö töpö löa kopalöpö töna töpö nako koma. ![](https://cdn.door43.org/obs/jpg/360px/obs-en-16-05.jpg) Aitö wakalana, Gedeon ai Israel tilitö jilo kuawi a sosakönö madianita töpönö tomotomomo kökö sua kota ma apapö töna mopö sua jatomo kotioma. Tiosö nö a simötawi Gedeon na ia walotakönö: “Wano, wa kasija apa köle, wa kili mi ipö, kauna Tiosö nokapalo köle. Wa julolönö madianita töpöna Israel töpö nö löa konö.” Ina a kuma. ![](https://cdn.door43.org/obs/jpg/360px/obs-en-16-06.jpg) Ai nutö pi wanina Gedeon pöanö salo kökö isitamawi tö öpama. Gedeon nö i salo kökö isitamawi itö waniapalöpö töna Tiosö simoma. Maike sanöma töpöna Gedeon kili ipa salo tö muma ta paioma. Tö mumasoiaja itö wököpamakönö tö patikia toitiopaja tö kopekea totipalöma. Nutö pi wanina saloa isitamanoi itö kotöna ianö Tiosö pina saloa isitamawi tö öpa nomömakönö ia Tiosö pina ai saloa isa sotamanöma. ![](https://cdn.door43.org/obs/jpg/360px/obs-en-16-07.jpg) Itö janata sotawö saloa isitamawi itö waniapalönoi sanöma töpönö itö talalönö töpö jiso totio opama. Gedeon söpalöpö töna kamani saiana i töpö jua sotasolöma, maike: “¿I kapilitö pina kamaka tiosö ma pasiliapala pi topa apa pasia köle? ¡I tiosö sai kuo kukema, kama löapalo pasio kötö!” Ina Gedeon pöa kuiaja i töpönö Gedeon söpa ma apama. ![](https://cdn.door43.org/obs/jpg/360px/obs-en-16-08.jpg) Madianita tili töpönö Israel tili töpö i nitö sua kotapö töna töpö ju kotama. Töpö sateje toti kötönö töpö kateapö tö ma apama. Israel tili töpö kokapalonö i töpö sö jötopö töna Gedeon nö töpö pewö naka jötölöma. Israel tili sa töpö löa kopalöpö töna pitilitö saina Tiosö nö sa saipalöma sa, a pi ku upanö, tö taöpo pi topa apa salo polakapi tö aipama pi kuapö töna Tiosö na Gedeon nako paioma. ![](https://cdn.door43.org/obs/jpg/360px/obs-en-16-09.jpg) Tö aipama somata piale itöna, Gedeon nö masita töna jaloösö asawösö pakönö itöna janasaita ölasitö kuowi itö pewö kea sisakönö masitatö jasiti ipa soa pasiopö töna Tiosö na a nakoma. Tiosö nö itö tama jötoma. Itö mumina nomöko sotawö, masitatö pewö jawe toiti ipö maike, jaloösö asawösö jasiti ipa soa pasiopö töna a nako nomoma. Tiosö nö itö tama naio jötoma. Polakapi itö pi aipa kua pöle itöna, pitilita Tiosö pina kamisanö madianita tili töpöna Israel sa töpö nö löako piaköle a pi ku jötösoma. ![](https://cdn.door43.org/obs/jpg/360px/obs-en-16-10.jpg) Gedeon na 32,000 töpö sösowi töpö waloa jötököma, maike töpö sateje toti ipö Tiosö kuma. 22,000 Töpö söso kili ipa pasiowi i Gedeon nö kama töpö saipöna i töpö sima pasia konöma. Au töpö sateje toti öpö sowö Gedeon na Tiosö ku soama. Kama töpö saipöna Gedeon nö i töpö pewö sima kopalönö, 300 töpö sösowi töpö jia sisapalöma. ![](https://cdn.door43.org/obs/jpg/360px/obs-en-16-11.jpg) Itö mumina Gedeon naja: “Madianita tili töpö kulati ia a julolö, ia i töpö japaloiaja watö jinö kukema wa kili kota maikötö.” Ina Tiosö kuma. Inatö kuanö, i töpö kulati iamö a jua jötösolöma, ai madianita tilitö manimoma kama sötapalowi ana itö wösötipöle itö jini kukema ia naja: “Gedeon i töpö sösowi i töpönö madianita tili töpö sösowi i töpö saköma piale itöna wa manimo pasioma." Ina a sötapalowi ia kuma. Gedeon nö itö jininönö Tiosö na a japalo pi mönaja totio opama. ![](https://cdn.door43.org/obs/jpg/360px/obs-en-16-12.jpg) Kamani i töpö sösowi i töpöna Gedeon waloa kokö tasonö, i töpöna sami ipi tola, masitatönö japoka tapalöma töjö, asapokosi si, inatö tota ta jötaja totiköma. Madianita tili töpö sösowi i töpö pewö miaja toitile ia töpö pewö jokola sotasoma. Madianita töpönö koataka si tapa ma apapö töna Gedeon 300 töpö sösowi i töpönö masitatö japoka kökö pewö osimöna jiti olana koataka jili pöle itö pewö titiaja sotaköma. ![](https://cdn.door43.org/obs/jpg/360px/obs-en-16-13.jpg) Inatö kuanö, Gedeon i töpö sösowi i töpö pewönö japoka kökö pewö wania ösöja totipalönö, koataka jili pöle itö möma soa pötama. I töpönö tola kökö pewö jolatalönö, “¡Jehova, Gedeon ina kipi töpö pina samakö söso piaköle!” Ina töpö komö ku sotasoma. ![](https://cdn.door43.org/obs/jpg/360px/obs-en-16-14.jpg) Tiosö nö madianita tili töpö pi ta monömanöma, itö pina kama töpö namo keo sapa konö kama töpö söpaso koma. Inatö kuaiaja kamani saiana ai Israel tili töpö kua jaia solati i töpönö madianita töpö nasö suapala naiopö töna lope epi i töpö naka konö tasoma. Sateje epi i töpö söa totipalönö Israel tili töpö i masitatö uli wöle i toliamö töpö nasö suapala satia apa soaalöma. Itö wakalana 120,000 madianita tili töpö söa tapalöma. Tiosö nö Israel tili töpö nö löa konöma. ![](https://cdn.door43.org/obs/jpg/360px/obs-en-16-15.jpg) Sanöma töpönö Gedeon liki kamani kaikanatö tapa pi topa apama. Gedeon nö inatö kuapö tö pi pasio ma apama, maike pila amösö jiso olana toi tatawi oro tönö toi tapalöma kamani i töpönö madianita töpöna tö sulöma, tö naka jötöja pölalöma. Sanöma töpönö Gedeon na pe epi orotö tota totiköma. ![](https://cdn.door43.org/obs/jpg/360px/obs-en-16-16.jpg) I oro tönö Tiosö saia totiapalawi anö ösö jalopo sinimo opawi Gedeon nö ösö tapalöma. Maike ösö liki sanöma töpönö kamani tiosö uni ta soa pöpalöma. Inatö kuaiaja Tiosö nö Israel tili töpö wasisama kotama. Töpö nisi taö öpawi töpönö Tiosö pina i töpö sö paja töpö sakömanöma. Töpö pi joni ipa salo töpö pasilia kopalöpö töna Tiosö na töpö nako jöto koiaja, töpö nö löa konöpö töna Tiosö nö löa kowi a sima jöta kotalöma. ![](https://cdn.door43.org/obs/jpg/360px/obs-en-16-17.jpg) Sateje epi inatö pi kua kua toitioma: Israel tili töpö wanisana kotaiaja, Tiosö nö töpö wasisama kotaö, i töpö ote tamo jöto koiaja, Tiosö nö ai löa kowi a sima jöta kopali, inatö kua toitioma. Sateje epi inama töna Tiosö nö sateje epi löa kowi töpö simösimöma toitionö i töpönö Israel tili töpö nisi taö öpawi i töpöna töpö löapa kotioma. ![](https://cdn.door43.org/obs/jpg/360px/obs-en-16-18.jpg) Itö pewö nojana, ai töpö uli patana kaikana töpö kuju upö kulena ina ai kaikanatö kui sanöma töpönö Tiosö na a nakama. I töpönö kamani kaikanatö salöjö öpi a lotete epö, sösopa töpö kai ju kili mi ipö ina a kuawi a pi ipama. Tiosö nö i töpö nako pöle itö pi ma apama, maike i töpönö a nakanoi ia kaikana tota jötököma. *Jueces tököna 1-3; 6-8 töna Tiosö nö tö tamanoi itö tötosokama kule itö* ## 17. David na Tiosö japalo topamonasonoi itö https://openbiblestories.org/l/xsu/story-17/ ![](https://cdn.door43.org/obs/jpg/360px/obs-en-17-01.jpg) Saúl liki Israel tili töpö i kaikanatö kuo somatama. A salöjö öpö, a toita apö ina a kuoma, sanöma töpönö ina a kui a pi ipanoi ina a kuo jötöma. Israel tö ulina Saúl kaikanamo kolo kupotaja a kua topa apama. Maike itö nojana a wanisana apaö, Tiosö kili taö mi ipö ina a kuawi a kua nomöpasoma, inatö kuaiaja Saúl nojana a pi ku toita api a kaikana kua nomöpasopö töna Tiosö nö aitö saia nomöpalöma. ![](https://cdn.door43.org/obs/jpg/360px/obs-en-17-02.jpg) David ai Israel tilitö jisa jilo kuawi Saul nojana a kaikanamo nomopö töna Tiosö nö a saipalöma. David nö oveja kökö totiapalawi a kuoma. Belen aitö uli jilo kuawi tö ulina a kutioma. Ianö kamani jaoani i oveja kökö totiapalatipaja ai öla pata söpali, ai töpa pata söpali a kuama. Tiosö na pitilita David pi ku totio opaö, a noi ipö, a pi ku toita apö, Tiosö kuwi itö tama totiatalo opaö ina a kuawi a kuoma. ![](https://cdn.door43.org/obs/jpg/360px/obs-en-17-03.jpg) David söso lotete epi a kupalonö a kaikanamo sotama. David jisa apö soiaja aia pata pe epö a lape toti ipi Goliat a jilo kuawi a sola töpö sösoma. ¡Goliat pata söso taötotio opaö a lotete epö 3 metros tö kotöna a öpa ösa wöa totialasa inatö kuoma! Maike Tiosö pina David nö Goliat pata söpalönö Israel tö uli löa konöma. Itö nojana, Israel tili töpö nisi taö öpawi David nö i töpö sönö töpö suamati ma apama, itö pina iana sanöma töpö japalo toita apama. ![](https://cdn.door43.org/obs/jpg/360px/obs-en-17-04.jpg) Sanöma töpönö David pi ipa asale itö pina Saúl jiso opa pasioma. A söpalö piasalo Saúl nö a namo kusu upaiaja David sosaköma. Aitö wakalana, David sosale ia Saúl lisipasoma, maike Saúl nö a tapa ma apama. Saúl kotöna David sosama, a söpalöpö tö topa apama, maike a söpa ma apama. Inatö tama pölanö kunumai, sa kaikanamo nomo pi topa apanö wa söpa maikötö, David ku pi topa apa salo Saúl jaloösö kasö jana pöpalöma. ![](https://cdn.door43.org/obs/jpg/360px/obs-en-17-05.jpg) Inatö kuatipaja, töpö sösopa Saúl söpasoiaja, David liki Israel tili töpö i kaikanatö kua sotasoma. Ia kaikana pi ku toita apö kötönö sanöma töpönö a pi ipama. David kua topa apapö töna Tiosö japaloiaja David nö tö pewö tamawi itö pewö kua topa apatima. Sösopa sateje epi David pi söso kua totio opanö Israel tili töpö nisi taö öpawi Tiosö pina i töpö sö toitioma. David nö Jerusalen tö uli jukölönö kamani mötalötö uli tapalöma. David kaikanamo pöle itaja Israel tö uli lotete epö tö uli pilapalo opaö inatö kuama. ![](https://cdn.door43.org/obs/jpg/360px/obs-en-17-06.jpg) Tiosö na Israel tili töpö japalo topa apaö, Tiosö pina saloa isitamaö ina töpö kuapö töna David nö Tiosö saia ta pi topa apama. Moises nö kokamotawi a saiwai tapalönoi ia saina sanöma töpönö salo kökö isimaö, ia Tiosö na töpö japalo pi monajapalo ina töpö kuatipa 400 inamatö pi kotöjö wöa totipasoma. ![](https://cdn.door43.org/obs/jpg/360px/obs-en-17-07.jpg) Maike David naja Tiosö nö Kama kai wösöwi i Natan simöpalönö: “Kawa liki sösowi wa pasi kötönö kaunö ipa saiwa ta pasio maikötö. Au ulanö a sai ta pasikö piasalo, maike toita api kauna satö totoma totio opa kötö. ¡Au ai ulutö ola liki ipa sanöma töpöna a kaikanamo sotiopö a kupaso piasalo!" Ina a kuma. David ai ulutö ola kaikanamo sotio piale ia liki Tiosö nö a Saipalöwi ia kuo piama. Tiosö nö a saipalöwi ianö jitö uli pewöna sanöma töpö wanisana apawi, wanisana apapa i töpö titio piale itöna i töpö löa konöpö ia kupo piama. ![](https://cdn.door43.org/obs/jpg/360px/obs-en-17-08.jpg) David nö itö pewö jinia toitalönö, Tiosö nö toita api tö tama piale itöjö, David pina toita api tö tama pöle itöjö, itö pewö pina David pi monaja apa salo Tiosö na a japalo toita apama. Tiosö nö itö tama piale David nö itö wakala taimi ipama. Tiosö nö a Saipalöwi 1,000 inama töna Israel tili töpönö ia walo ta toitiopö tö kuoma. ![](https://cdn.door43.org/obs/jpg/360px/obs-en-17-09.jpg) David nö Tiosö kuwi itö tama totiatalo apatinö sateje epi inama tona a kaikanamo topa toitioma, Tiosö nö toita api tö totoma totio opama. Maike, a patasipa totilonö Tiosö nö tö pi mi ipi tö tapalöma. ![](https://cdn.door43.org/obs/jpg/360px/obs-en-17-10.jpg) Aitö wakalana David i töpö sösowi, paja apa tasopamö i töpö söso pasilatitaja, kamani saia osimöna a titikönö atuamö tö möpalöma ai sua toita api a sanömotita a talalöma. Betsabé ia jilo kuama. ![](https://cdn.door43.org/obs/jpg/360px/obs-en-17-11.jpg) A pi motöpoko pölanö kunumai, kama kuopa a jilakösolöpö töna aitö sima sotaköma. Iana a mai saka sotaköma. Tö tatea apa noma kopaso noiaja David na Betsabe nö tosokamatö simöpalönö sa sipönapi ipö a kuma. ![](https://cdn.door43.org/obs/jpg/360px/obs-en-17-12.jpg) Betsabé panopa liki Urías a jilo kuama, ia liki David i töpö söso lotete epi i aia kuo naioma. David nö Urias naka konö, au pusupa na wa noimo ko paionö a mai sakapaloko paioso a kuma. Maike, kamani ai töpö söso opa soa pasilata saiana Urías juko paio wani ipama. Inatö kuaiaja David nö Urias sima kopalönö, sösowi i kaikana tönö tikö töpö lotete epapa a simökönö a söpalöpö töna David simo sotama. ![](https://cdn.door43.org/obs/jpg/360px/obs-en-17-13.jpg) Urías söpalö noiaja David nö Betsabé liki kamani pusupa tapalöma. Tö pi tateja totipasonoiaja ianö David ula tapalöma. David nö tö tamanoi itöna Tiosö jiso totio opama, itö pina David naja wa jiopa totia apa köle ina Tiosö kai wösöwi i Natan ku tasopö töna Tiosö nö a simököma. Tiosö kili taö ma apanoi itö pina David ote tamo koiaja Tiosö nö a ote ta jöta konöma. Itö nojana David nö Tiosö kili taö sotiolöma, jatuka mi ipi tö wakala pölata David nö Tiosö kili taö satia soama. ![](https://cdn.door43.org/obs/jpg/360px/obs-en-17-14.jpg) David nö Tiosö kili taö ma apanoi itö pina kamani ulawai nomasoma. David kamani ai töpö ina kipi töpö söso sotioma, kuataja naiwö David kaikana utitipo naio soaalöma. David nö Tiosö kili taö ma apa puo noia maike, satö tama piasalo Tiosö kunoi itö tama satia apa soama. Tö pi tateja kopaso noiaja David, Betsabé ina kipi töpö ai ulawai kua koköiaja Salomon a jilowai tapalöma. *1 Samuel tököna 10; 15-19; 24; 31 tönaja; 2 Samuel tököna 5; 7; 11-12 tönaja Tiosö nö tö tamanoi itö tosokama kule itö* ## 18. Kaikanamo sokapasonoi itö https://openbiblestories.org/l/xsu/story-18/ ![](https://cdn.door43.org/obs/jpg/360px/obs-en-18-01.jpg) Sateje epi tö inama jasupalonö, David nomasoma, itö nojana Israel tö ulina kamani ula Salomon kaikanamo kolo kua noma sotasoma. Salomon naja kapili watö pi ipa köle Tiosö kuma. Salomon nö pi tao opawi tö nakaiaja Tiosö pi mönaja apa salo itö uli pewö patana a pi tao satia apawi a tapalöma. Salomon kaikana pi tao totio opawi a kuoma. Tiosö nö a pilapalo opawi a ta naia sotalöma. ![](https://cdn.door43.org/obs/jpg/360px/obs-en-18-02.jpg) Jerusalen tö ulina, Salomon nö kamani jaoani David nö Tiosö na japalotawi a sai pata takö piasalo saia tatawi itö pewö simomatinoi itönö ia sai pata taköma. Itaja saia oso waina kokamotawi ia töpö kokamo kota maiaja ia sai patana töpö kokamo, Tiosö pina salo kökö isimai ia ina töpö kua nomoma. Tiosö pata itopalonö i kokamowi ia sai patana, kamani sanöma töpö kaina a kuo naioma. ![](https://cdn.door43.org/obs/jpg/360px/obs-en-18-03.jpg) Maike Salomon nö tikotö ulina su töpö kuowi töpö su pi ipama. Sateje epi su töpö sua jötöpo opanö Tiosö kili taö mapasoma, ¡1000 tö kotöna su töpö ösöjowi töpönö! Kamani nu töpö kai waloa soatalo opanö i pö nu wanina töpö japalo toita apa sotio pasioma. Salomon patasipö waikiiaja, tiko tiosö pö nu wanina a japalo naioma. ![](https://cdn.door43.org/obs/jpg/360px/obs-en-18-04.jpg) Salomon na Tiosö pi jisujupasoma, Tiosö na pitilita Salomon pi ku sisa ma apöle itö pina, Salomon nomasoiaja Israel tö ulina polakapi kaikana töpö kua salekepaso piasalo ina Tiosö kuma. ![](https://cdn.door43.org/obs/jpg/360px/obs-en-18-05.jpg) Salomon nomaso noiaja, kamani ula Roboam liki kaikanatö kua nomöpasoma. Roboam pi ku toita ma apama. Ia liki kaikanatö sai kupasopö töna Israel tili töpö pewö kokamonasoma. Salomon nö lotete epi i töpö tatamopalama apanö tö noa koa totio opanoi itö pina Roboam na töpö japalo pi jisuapalo opama. ![](https://cdn.door43.org/obs/jpg/360px/obs-en-18-06.jpg) Roboam japalo monöa soa pötalonö: “Ipa jaoani Salomon nö lotete epi samakö tatamopalama totio opama ina makö pi ku upa köle, maike kamisanö lotete sati ipi makö tatamopalama satia apaö, lotete epi makö wasisama totio opaö ina sa kua piaköle.” Ina a kuma. ![](https://cdn.door43.org/obs/jpg/360px/obs-en-18-07.jpg) Diez Israel töpö olanö Roboam kuwi itö tama wani ipa pasioma. Iana polakapi Israel tili töpö ola nokapalo satia soa pasioma. I polakapi sanöma töpö ola liki Juda töpö jilo kua pasipasoma. ![](https://cdn.door43.org/obs/jpg/360px/obs-en-18-08.jpg) Roboam na diez ai Israel tili töpö ola soka pasipasonoi i töpönö Jeroboam liki kamani kaikanatö tapalöma. Tikiamö i töpö kaikanamo pasiopö töna töpö kua pasikö tasoma, Israel i töpö jilo kua pasioma. ![](https://cdn.door43.org/obs/jpg/360px/obs-en-18-09.jpg) Tiosö na Jeroboam kua kasiapalo opanö wanisanatö tamapö töna sanöma töpö sima apama. Juda tö ulina Tiosö saia kulati iamö sanöma töpö ju taso ma apapö töna polakapi nu töpö ta pasipalöma ![](https://cdn.door43.org/obs/jpg/360px/obs-en-18-10.jpg) Juda tili töpö, Israel tili töpö ina kipi töpö nisi tapaso kolo kupalonö töpö söso sinimo toitioma. ![](https://cdn.door43.org/obs/jpg/360px/obs-en-18-11.jpg) Israel tö ulina tute töpö kaikana kupo nomoko pöle i töpö pewö wanisana totio opatima. Ai Israel tilitö kaikanatö kupo pi topa apawi anö a kaikanamo somale ia söpalönö ia töpö kaikanamo nomo soatalo opatima. ![](https://cdn.door43.org/obs/jpg/360px/obs-en-18-12.jpg) Nu töpö pi wanina Israel töpö kaikana pewö, sateje epi sanöma töpö ina kipi töpö pi mönajapalo sisama. I pö nu pina su töpöna töpö mamo soatalo opaö, i pö nu pina ulu kökö osowai isima totio opa naio ina töpö kua toitioma. ![](https://cdn.door43.org/obs/jpg/360px/obs-en-18-13.jpg) Juda tö ulina töpö kaikanamo nomatalowi i töpö liki David ola töpö kuoma. I ai kaikana töpö liki töpö pi ku toita apö, töpö kaikanamo pi tao opaö, Tiosö kili taö öpaö ina töpö kuama. Maike sateje epi Juda tili töpö kaikana jiopa totio opama, töpö tomömo opaö nu töpö kili taö öpa sisaö ina töpö kuama. Ai kaikana töpönö tiosö pö nu jolisi pina kamani ulu kökö isima totio opa naioma. Sateje epi Juda tili töpönö Tiosö kili taö ma apanö, tiko tiosö pö nu wanina töpö pi motöapalo totio opa sisama. *1 Reyes tököna 1-6; 11-12 töna Tiosö nö tö tamanoi itö tosokama kule itö* ## 19. Tiosö kai wösöwi i töpö https://openbiblestories.org/l/xsu/story-19/ ![](https://cdn.door43.org/obs/jpg/360px/obs-en-19-01.jpg) Israel tili töpö kua kolo kupasonoi itaja, Tiosö nö Kama kai wösöwi i töpö sima kolo kua sopasoma. Tiosö kai wösöwi i töpönö, Tiosö japalowi itö jininö sanöma töpöna tö wösö soatalo opama. ![](https://cdn.door43.org/obs/jpg/360px/obs-en-19-02.jpg) Israel tö ulina Acab kaikanamo pöle itaja Elias liki Tiosö kai wösöwi a kuoma. Acab jiopa apawi a kuoma, Baal ai tiosö jilo kui a nu wanina sanöma töpö japalo toita apanö a kili taö öpapö töna töpö sima apama. Acab naja: "Israel tö ulina matu jölöko paio maikötö, kamisa ku koia sisawö." Ina Elias kuma. Itöna Acab jöla apama. ![](https://cdn.door43.org/obs/jpg/360px/obs-en-19-03.jpg) Elias naja pölösa patana ai matu osowai kuo tasopa wa julolönö a sosakötö, Acab nö wa söpa pi topa apa saile ina Tiosö kuma. Janasaitaja, wisatiaja salopö oso wainö Elias na pan töjö, saloa sai inatö totoma tama sinimo tasoma. Kamani löapalawi töpö kaina Acab nö Elias taima maike a tapa ma apama. Inamatö lotete epö kötönö i matu osöwai jasitipasoma. ![](https://cdn.door43.org/obs/jpg/360px/obs-en-19-04.jpg) Inatö kuaiaja aitö uli jöko opapa Elias julasolöma. Itö ulina ai sutö panopa nomasoma anö kamani ula kaiwai kutioma, nitö jatuka mi ipi itö pina kamani nitö mapo piawi tö kuoma. Maike i töpönö Elias totiapala jötoma, i töpöna Tiosö nö toa apa kötönö kamani taputaputu kutawi itöjö, pantö tamawi tö kopeke kutawi itöjö, ina kipi tö pokopoti ma apama. Nitö jatuka mi ipi itö wakala pewöna i töpö nitö kuo sotioma. Pi sateje epi inama töna ia Elias kutioma. ![](https://cdn.door43.org/obs/jpg/360px/obs-en-19-05.jpg) 3 inama töjö 5 pulipulia inatö jasua kupasoiaja, Elias naja Israel tö ulina wa jua kononönö Acab na a japalo kotö, ma satu simöpako piaköle, ina Tiosö kuma. Acab nö Elias ta konanönö: "¡Wa ta konanöke! Tö wanisanama löatalowi ia" Ina a kuiaja: "¡Wanisanatö tama löatalowi i kawa sisawö! Tiosö wa ta pasikönö Baal wa nu wani pi ipa sisa köle. Carmelo tö jiu patana Israel tili töpö kai pewö ju kösölö." Ina Elias ku jötoma. ![](https://cdn.door43.org/obs/jpg/360px/obs-en-19-06.jpg) Israel tili töpö pewö, Baal nu pina töpö tatamowi 450 i töpö, Carmelo tö jiu patana töpö pewö waloa jötököma. Sanöma töpönaja: "¿Witita makö pi ku tikopa kopaso piasalo? Jehová liki i Tiosö saia könaja, ¡Ia simowi itö tama sisa! Baal nu liki i tiosö saia könaja, ¡Ia simowi itö tama sisa!" Ina Elias kuma. ![](https://cdn.door43.org/obs/jpg/360px/obs-en-19-07.jpg) Inatö kuanö, Baal nu pina töpö tatamowi i töpönaja: "Ai jaka ma söpalönö a isimanöpö töna a totipalö, maike koataka jilima jatoti. Ina satö tama naio piaköle. Ai Tiosö nö koataka sima asapalöwi i Tiosö pitili ipi ia asawö" Ina Elias kuma. Inatö kuanö Baal pina töpö tatamowi i töpönö itö pewö tama jötoma, maike koataka jilima ma apama. ![](https://cdn.door43.org/obs/jpg/360px/obs-en-19-08.jpg) Baal pina töpö tatamowi i Baal na i töpö japalo jötonö: "¡Baal, samakö jini!" Ina töpö kuma. I sami wakalatöna töpö japalo lalupalo toitioma, poa oso wainö kama töpö janömo tikilio naioma, ina töpö kuati köle maike, tö kupoti ma apama. ![](https://cdn.door43.org/obs/jpg/360px/obs-en-19-09.jpg) Wisatiia, Elias nö Tiosö pina ai saloa wani isimanöpö töna a totipalöma. Itö nojana itö jösökana japokapö pe epi töna 12 matu pi löa takönö, saloa sai, talökö kökö, masitatöjö, itö pewö jawea toitasopö töna a simo sotama. ![](https://cdn.door43.org/obs/jpg/360px/obs-en-19-10.jpg) Inatö kuanö Tiosö naja: "Jehová kawa liki Abrahan, Isaac, Jacob ina kipi töpö i Tiosö wa, Israel tili töpö i Tiosö wa, juki ipi itö möma totio opa, kamisanö wa simowi i satö tamawi i sa. Ji Tiosö pitili ipö asawö ina sanöma töpö kupö töna sa jinia toitalö" Ina Elias japalo ku sotama. ![](https://cdn.door43.org/obs/jpg/360px/obs-en-19-11.jpg) Lope epi, jutumösökö patana koataka pata kea sotalonö saloa sai, talikea kökö, mama kökö, masitatöjö, itö pewö isia totisoma, matu pa asokole i tu isia satea apa naisoma. Sanöma töpönö itö tapa apanö masita töna töpö mai poaja sotakönö: "¡Jehová liki i Tiosö! ¡Jehová liki i Tiosö!" Ina töpö kutoma. ![](https://cdn.door43.org/obs/jpg/360px/obs-en-19-12.jpg) Inatö kuanö, i töpö naja: "¡Baal nu pina töpö tatamowi i töpö tokoma ko jatoti!" Ina Elias kuiaja, sanöma töpönö i töpö jua sotalöma, tikiamö töpö sua sotalölönö töpö söpalö tasoma. ![](https://cdn.door43.org/obs/jpg/360px/obs-en-19-13.jpg) Itö nojana, kaikana Acab naja: "Matu jölöko pia kötönö lope epi autö ulina a jua kononö" Ina Elias kuma. Lope epi jutumösökö pata muma sotalonö pe epi matu jölöko sotama. Jehová patanö kama Tiosö pitili ipi itö möma toitanö, inamatö ma kopamanöma. ![](https://cdn.door43.org/obs/jpg/360px/obs-en-19-14.jpg) Elias kuatinoi itö pewö mapasoiaja, ai wanotö Eliseo a jilo kuawi anö a kai wösö nomopö töna Tiosö nö a saipalöma. Eliseo nö Tiosö pina sateje epi tö aipama totio opama. Naaman na tö aipama naioma, ia liki tikotö ulina töpö sösowi töpö i kaikanatö kuoma, ia jöösöna kamakalitö jiopö öpi tö kuoma. Ianö Eliseo kuawi itö jininönö iamö a julolönö sa löa konö a ku tasoma. Jordán tu patana 7 wa pi mai oa kupaso pökö ina Naaman na Eliseo kuma. ![](https://cdn.door43.org/obs/jpg/360px/obs-en-19-15.jpg) Itö kumo jolisi ipaja Naamán pi jisujupalonö tö tama ma apama. Maike pi tatejepaso noiaja a pi ku kononö Jordán tu patana 7 a pi mai oa kupasoma. Nojatö saina a jösököpo kopa a jöösö toita apa koma. Tiosö nö a nö löa kopalöma. ![](https://cdn.door43.org/obs/jpg/360px/obs-en-19-16.jpg) Tiosö nö sateje epi kama kai wösöpö töna ai töpö sima naioma. Nu töpö wanina pö pi mönajapalo opatiti toita api makö kukönö ai töpö pepalo opawi i töpöna pö pi ku naio, sanöma töpöna ina i töpö ku toitioma. Wanisana matö tama mapoti ma apanö Tiosö ma kili taöti ma apa könaja Tiosö nö makö wasisama kötö, sanöma töpöna ina Tiosö kai wösöwi i töpö ku toitioma. ![](https://cdn.door43.org/obs/jpg/360px/obs-en-19-17.jpg) Sanöma töpönö Tiosö kili taöti ma apama. Tiosö kai wösöwi i töpö wasisama sinimo opama, töpö sö naioma ina sanöma töpö kuatima. Aitö wakalana Tiosö kai wösöwi i Jeremias söpasopö töna takatakana a kemaköma. I taka osimöna tö kaleke öpöti ipö kötönö a kasököma, maike kaikana tönö a ote ta konönö Jeremias noma pailata kunumai a ta kopalöpö töna ai töpö sima sotaköma. ![](https://cdn.door43.org/obs/jpg/360px/obs-en-19-18.jpg) Sanöma töpönö Tiosö kai wösöwi i töpö pi mi ipö pölata maike Tiosö japalowi itö wösö jötötioma. Tiosö nö makö pi ku totipo ko mi ipi i makö wasisama totio opa piasalo ina i töpö kutima. Tiosö nö a Saipalöwi ia ju piale itö wösö koatalo opa naioma. *1 Reyes tököna 16-18 tönaja; 2 Reyes 5 tönaja; Jeremias 38 tönaja Tiosö nö tö tamanoi itö tosokama kule itö* ## 20. Töpö ju wani ipapa töpö julolönö sutu upa töpö sapa kopaso tasonoi itö https://openbiblestories.org/l/xsu/story-20/ ![](https://cdn.door43.org/obs/jpg/360px/obs-en-20-01.jpg) Israel tili töpö, Juda tili töpö, Tiosö na polakapi i töpö kaikana wanisana apama. Sinai tö jiu patana Tiosö japalonoi itö pewö tama ma kopasoma. Makö jiopa apawi i matö josa konönö pö ote tamoko ina Tiosö kai wösöwi i töpö kupö töna Tiosö nö töpö sima toitioma, maike pitilita sanöma töpö pi kuti ma apama. ![](https://cdn.door43.org/obs/jpg/360px/obs-en-20-02.jpg) Inatö kuaiaja i töpö nisi taö öpawi i töpönö i polakapi i töpö uli wasisamapö töna Tiosö nö tö tamama. Asirio töpö wanisana apaö, töpö lotete epö, i töpönö Israel tö uli pewö wania totipalöma. Asirio tili töpönö sateje epi Israel tili töpö söa totilalönö, ia tö noa api tö pewö kuowi itö pewö sua totilöma, itö uli pata isia naimanöma. ![](https://cdn.door43.org/obs/jpg/360px/obs-en-20-03.jpg) Asirio tili töpönö, töpö kaikanamowi töpö, töpö pilapalo opawi töpö, töpö tatamo taö öpawi töpö, töpö söso taö öpawi töpö, i töpö pewö julönö Asiria tö ulina töpö sulölöma. Israel tili töpö pepalo opa pasiowi töpö söpa pasio ma apanoi Israel tö ulina i töpö kuo jaio sisama. ![](https://cdn.door43.org/obs/jpg/360px/obs-en-20-04.jpg) Inatö kuanö, Asirio töpönö tiko tö ulina ai töpö kuowi töpö nakalönö Israel töpö kuonoi ia töpö taköma. Ji sanöma töpönö itö uli pewö topa komakönö, ia ai Israel tili töpö jipasonoi i töpö i pate töpö sua sotalalöma. Israel tili töpönö i tiko töpö suanoi Samaritano i töpö jilo kuo pasioma. ![](https://cdn.door43.org/obs/jpg/360px/obs-en-20-05.jpg) Pitilita Tiosö na Israel töpö pi ku mi ipaja töpö wasisama pöle i Juda töpönö itö jini ipama. Maike nu töpö wanina töpö pi janoa satia soama, Cananeo töpö i Tiosö pö nu wanina töpö pi ku janua naio sisama. Inatö tamati, Tiosö kai wösöwi i töpö kupö töna Tiosö nö töpö simatima, maike pitilita töpö pi kuti ma apama. ![](https://cdn.door43.org/obs/jpg/360px/obs-en-20-06.jpg) Asirio töpönö Israel tö uli wanianoi itöna 100 inamatö kupo jöka apataja Babilonia töpö i kaikana Nabucodonosor nö Juda tili töpö sö pö töna Tiosö nö a simöpalöma. Babilonia tö uli pata lotete epi tö uli pata kuoma. Juda töpö i kaikana liki Nabucodonosor nö a simawi a kupalonö inamatö pewöna pe epi sitipa totoma toitioma. ![](https://cdn.door43.org/obs/jpg/360px/obs-en-20-07.jpg) Maike sateje epi inamatö jasupaso noiaja, Babilonia tili töpö pina Juda töpö i kaikana tatamo kota wani ipama. Inatö kuaiaja Babilonia töpö wasu ikua kokönö töpö sö ma. I töpönö Jerusalen tö ulina kama töpö julöma, kokamotawi ia sai pata waniapalönö, ia sai osimöna tö noa api tö pewö kule itöjö, itö ulina tö noa api tö pewö kule itöjö, inatö sua ta sotalölöma. ![](https://cdn.door43.org/obs/jpg/360px/obs-en-20-08.jpg) Juda töpö i kaikananö tö kili taö ma apanoi itö pina a wasisama piasalo ia mamotalöna Nabucodonosor löapalawi i töpönö kamani ulu kökö pewö söpalönö, itö nojana kamani pöa mamo joköa sotalöma. Itö nojana, pöka kasötawi a saina i kaikana söpasopö töna Babilonia tö ulina a sua sotalölöma. ![](https://cdn.door43.org/obs/jpg/360px/obs-en-20-09.jpg) Nabucodonosor, kamani löapalawi i töpö ina kipi töpönö sateje epi Babilonia tö ulina Juda tili töpö sulölöma, jikaliana nitö tösa pasiopö töna töpö pepalo opawi i töpö ta pasikölöma. Tö uli totokönoi itö uli taalö wani ipö pölata maike, Tiosö i sanöma töpönö itaja itö uli takölönoi i Exilio itö jilo kua. ![](https://cdn.door43.org/obs/jpg/360px/obs-en-20-10.jpg) Kamani sanöma töpönö wanisanatö tamaiaja, töpö wasisamanö töpö ju wani ipapa töpö sima pölö noia maike, Tiosö nö töpö taö mapo ma apama. Kamani sanöma töpöna Tiosö mamo löapalo sotionö i töpöna kama kai wösöwi i töpö sima sotioma. 70 inamatö jasupasoiaja satö uli totokönoi ia makö jua konasolö piasalo ina Tiosö kuma. ![](https://cdn.door43.org/obs/jpg/360px/obs-en-20-11.jpg) 70 inamatö jasupaso noiaja, Persa töpö i kaikana Ciro nö, Babilonia töpö sölalönö Persa töpö kua nomöpasoma. Itaja Israel tili töpö liki Judio töpö jilo kua nomöpasoma, Babilonia tö ulina töpö ulu oso patanoi i töpö sateje epama. Polakapi ipi Judio töpö patasipönö Juda tö uli taö öpa soa jöto sisama. ![](https://cdn.door43.org/obs/jpg/360px/obs-en-20-12.jpg) Persa töpö kaikanamo lotete epö maike, sanöma töpö ote taö öpawi töpö kuoma. Ciro liki Persa töpö i kaikanatö kupalonö, Juda tö ulina ai Judio tilitö ju ko pi topa apa könaja a jua konasolö pökö ina a kuma. ¡Tiosö na japalotawi ia sai pata ta topa koköpö töna sitipa tota naiköma! Inatö kuanö, töpö ju wani ipö pölata töpö julasolönoi itöna 70 inamatö jasupasoiaja, polakapi ipi Jerusalen tö ulinamö Juda töpö jua konasolöma. ![](https://cdn.door43.org/obs/jpg/360px/obs-en-20-13.jpg) Jerusalen tö ulina sanöma töpö waloa kokönö Tiosö na japalotawi ia sai pata ta topa koki, itö uli pewö jokola koki inatö tama koma. I töpöna ai tiko töpö kaikanamo soa pölata maike, Tiosö nö tö uli totokönoi ia töpö kua kokönö Tiosö na japalotawi ia saina töpö pi mönajapalo kotioma. *2 Reyes tököna 17; 24-25 tönaja; 2 Crónicas 36 tönaja; Esdras 1-10 tönaja; Nehemías 1-13 tönaja Tiosö nö tö tamanoi itö tosokama kule itö.* ## 21. A Saipalöwi ia simöpalöpö töna Tiosö japaloma https://openbiblestories.org/l/xsu/story-21/ ![](https://cdn.door43.org/obs/jpg/360px/obs-en-21-01.jpg) Kolotö ulinaja, a Saipalöwi ia simöpalöpö töna Tiosö pi kupalo kolo kua sotama. Adan, Eva ina kipi töpöna ia simöpa piale itö wösö somatama. Eva ai ulutö olana a Saipalöwi ia kupalonö olökökö je wani patikipalö piasalo ina Tiosö kuma. A Saipalöwi ianö Satanas wani sakömanö piasalo itö ku pasio puoma. Olökökö waninö Eva mönamanönoi i Satanas wani kuoma. ![](https://cdn.door43.org/obs/jpg/360px/obs-en-21-02.jpg) Kawa pina jitö uli patana sanöma töpöna toita api tö kua piasalo Abraham na ina Tiosö kuma. A Saipalöwi waia ia juiaja itö kuapö tö kuoma. Jitö ulina sanöma töpö pewö löakopö töna ianö tö tamapö tö kuoma. ![](https://cdn.door43.org/obs/jpg/360px/obs-en-21-03.jpg) Kaunö sa kai wösö kuawina ina aitö kuawi waia sa sima noma kopalö piasalo Moises na ina Tiosö kuma. A Saipalöwi waia ia jupö töna itö ku soa puoma. ![](https://cdn.door43.org/obs/jpg/360px/obs-en-21-04.jpg) Ipa sanöma töpöna au ai ulutö ola kaikanamo sotiopö a kupaso piasalo kaikana David na ina Tiosö kuma. A Saipalöwi ia liki i David ai ulutö ola kuopö tö kuoma. ![](https://cdn.door43.org/obs/jpg/360px/obs-en-21-05.jpg) Tiosö kai wösöwi i Jeremias naja, waia sa japalo topamo nomoko piasalo maike Sinai tö jiu patana Israel na sa japalonoi inakö kota kunumai ina Tiosö kuma. A japalo topa nomoko piale itaja, sanöma töpö kosiomopöna a simowi itö takönö i töpönö a taöpasoiaja i kamani i töpö kupo soatalo opa piasalo, inatö kuanö Tiosö nö töpö ote ta ko piasalo. A Saipalöwi ianö itö tamapö tö kuoma. ![](https://cdn.door43.org/obs/jpg/360px/obs-en-21-06.jpg) A Saipalöwi ia liki Tiosö kai wösöwi a kupaso,Tiosö saia totiapalawi a kupaso, Kaikanatö kupaso ina a kua piasalo ina Tiosö kai wösöwi i töpö ku naioma. Tiosö kai wösöwi profeta i töpö jilo kua pasia. A Saipalöwi ia simöpalöpö töna Tiosö japalonoi ia liki Tiosö kai wösöwi a toita api a kupo piama. ![](https://cdn.door43.org/obs/jpg/360px/obs-en-21-07.jpg) Israel tili töpönö, Tiosö saia totiapalawi i töpönö sanöma töpö wanisana apawi itö pina saloa isimanönö Tiosö na tö tototama. Sanöma töpö pina Tiosö saia totiapalawi Tiosö na i töpö japalo naioma. A Saipalöwi ia liki i Tiosö saia totiapalawi a toita apa piasalo, kama söa kopalonö Tiosö na salo pö wani totota kuawina ina a kuapö tö kuoma. ![](https://cdn.door43.org/obs/jpg/360px/obs-en-21-08.jpg) Aitö ulina a kaikanamowi ianö sanöma töpö wanisanaiaja tö topama löatalo opako kötö. A saipalöwi ia kaikana toita apanö kamani kolo patatö David lonoi ia a lo nomo piama. Jitö uli pewöna ia kaikanamo sotionö, wanisana apawi i töpö saia makoka totilo opanö töpö wasisama totilo opa piama. ![](https://cdn.door43.org/obs/jpg/360px/obs-en-21-09.jpg) Tiosö kai wösöwi i töpönö a Saipalöwi iana tö kua pialati itö pewö wösö totioma. A Saipalöwi ia walo pialataja Tiosö kai wösöwi a lotete epi a walo somata piasalo, ina Tiosö kai wösöwi i Malaquias kuma. Sutö mamo paio ma apama ana a Saipalöwi ia kupaso piasalo ina Tiosö kai wösöwi i Isaias kuma. Belen tö ulina a kupaso pisalo ina Tiosö kai wösöwi i Miqueas kuma. ![](https://cdn.door43.org/obs/jpg/360px/obs-en-21-10.jpg) Galilea tö ulina a Saipalöwi ia kuo piasalo, töpö kosiomopö pi jonipo opawi töpö pi mönajapalamai, wanisana apawi i töpöna toita api tö wösö, töpö pöka kasowi i töpö pöka jakoma koo, ina akua piasalo ina Tiosö kai wösöwi i Isaias kuma. A saipalöwi ianö töpö kamakali ipi töpö, tö jini mi ipi töpö, tö mö mi ipi töpö, töpö japalo mi ipi töpö, töpö ju mi ipi töpö, i töpö pewö löako solö piasalo ina a ku naioma. ![](https://cdn.door43.org/obs/jpg/360px/obs-en-21-11.jpg) A Saipalöwi sanöma töpönö ia pi ma apa pialati Tiosö kai wösöwi i Isaias nö itö wösö naioma. A Saipalöwi ia söpalöwi, kamani jaloösö sulöpö töna sitipa manona i töpö sapöko piasalo, a sötapalowi anö a namo simökö piasalo ina Tiosö kai wösöwi i töpö ku naioma. A saipalöwi ia namo simököpö töna kamani sötapalowi ana 30 sitipa mano tota takö piasalo ina Tiosö kai wösöwi i Zacarias kuma. ![](https://cdn.door43.org/obs/jpg/360px/obs-en-21-12.jpg) Inatö kuanö a Saipalöwi ia söpaso piasalo ina Tiosö kai wösöwi i töpö ku naioma. A saipalöwi i sanöma töpönö ia nakimaö, töpö pi wasa apaö, a sö öpaö, ina iana töpö kua pisalo ina Isaias kuma. Ai wanisanatö tama pasio ma apa puo noia maike i töpönö a tikiapalöiaja a nini wasiso totikönö a nomasopö tö kuoma. ![](https://cdn.door43.org/obs/jpg/360px/obs-en-21-13.jpg) A Saipalöwi ia toita apö, a wanisana mi ipö ina a kuo piasalo ina Tiosö kai wösöwi i töpö ku naioma. Töpö jiopa apawi i töpöna tö kua pianoi itö pewö tama löonö a söpo piama. Ia wasisama pöle itö pina sanöma töpöna Tiosö pi noia koköpö tö kuoma. Itö pina a Saipalöwi ia söpalöpö Tiosö nö tö pi ipama. ![](https://cdn.door43.org/obs/jpg/360px/obs-en-21-14.jpg) A Saipalöwi ia söpalö piasalo, maike Tiosö nö a toia kopalö piasalo ina Tiosö kai wösöwi i töpö kuma. A Saipalöwi ia söpaso, a toia kopaso inatö kuaiaja, sanöma töpö wanisana apawi i töpö löa konöpö töna Tiosö pi kunoi itö pewö kupasopö tö kuoma. ![](https://cdn.door43.org/obs/jpg/360px/obs-en-21-15.jpg) A Saipalöwi iana tö kua pialati i Tiosö kai wösöwi i töpöna Tiosö nö itö wösö tolejapalo toitioma, maike i Tiosö kai wösöwi i töpö kua solata a Saipalöwi ia ju ma apama. I töpö kutinoi itöna 400 inamatö jasupaso noiaja, itö wakala sai kua toitasoiaja Tiosö nö a Saipalöwi ia simöpa nomo jaio piama. *Génesis tököna 3:15; 12: 1-3 tönaja; Deuteronomio 18:15 tönaja; 2 Samuel 7 tönaja; Jeremías 31 tönaja; Isaías 59:16 tönaja; Daniel 7 tönaja; Malaquías 4: 5 tönaja; Isaías 7:14 tönaja; Miqueas 5: 2 tönaja; Isaías 9: 1-7; 35: 3-5; 61; 53 tönaja; Salmo 22:18; 35:19; 69: 4; 41: 9 tönaja; Zacarías 11: 12-13 tönaja; Isaías 50: 6 tönaja; Salmo 16: 10-11 tönaja Tiosö nö tö tamanoi itö tosokama kule itö* ## 22. Juan kupasonoi itö https://openbiblestories.org/l/xsu/story-22/ ![](https://cdn.door43.org/obs/jpg/360px/obs-en-22-01.jpg) Somitö saita Tiosö nö kamani i töpö simawi i töpö, Kama kai wösöwi i töpö, i töpö simanö sanöma töpöna a japalo sinimo opatima. Maike 400 inamatö jasupasoiaja i töpöna a japalo kota ma apama. Tiosö saia totiapalawi Zacarias a jilo kuawi ana Tiosö nö a simötawi ia waloa soa pötaköma. Zacarias, kamani pusupa Elisabet i töpönö Tiosö kili taö öpawi töpö kuoma, maike kamani ula kupoti mi ipi tö kuoma. ![](https://cdn.door43.org/obs/jpg/360px/obs-en-22-02.jpg) Tiosö nö a simötawi ia ki: "Zacarias, au pusupa ai ula kukö piasalo. Juan wa jilo tapalö pökö. ¡Tiosö Kosiomopö Osi Ikitöpönö ia osi matijo opa piasalo, a Saipalöwi ia pina ianö sanöma töpö totiama löapalo piasalo!" Ina a kuiaja: "¡Ipa pusupa, kamisa, samakö patasipö waiki kötönö ai ula kuköpö tö mi ipö! ¿Wina tö kuanö pitilita sa pi ku pasio piasalo?" Ina Zacarias ku jötoma. ![](https://cdn.door43.org/obs/jpg/360px/obs-en-22-03.jpg) Zacarias naja: "Ji satö toita wösöpö töna Tiosö nö sa simöpalö ke. Maike pitilita wa pi ku ma apama kötönö wa japalo ko paita maikötö, i ulawai kupasoiaja wa japalo ko sisa piasalo." Ina Tiosö nö a simötawi ia kuma. Iakö sotawö Zacarias japalo ma sotasoma. Tiosö nö a simötawi ianö Zacarias ta ko sotakölöma. Itö nojana kamani saiana Zacarias jua konasölöma, ia kamani pusupa sipinapi sotasoma. ![](https://cdn.door43.org/obs/jpg/360px/obs-en-22-04.jpg) Elizabet sipinapi naja 6 pulipulia kuataja, kamani aitö Maria a jilo kuawi ana Tiosö nö a simötawi ai tapamo nomosoma. Iana aitö mamatalo taimi ipi a kuoma, Jose ai wanotö jilo kuawi anö i kamani pusupa tapa piama. Ia naja: "Wa sipinapilonö au ulawai kukö piasalo ia liki Jesus wa jilo tapalö pökö. Ia liki Tiosö i ula kuo piasalo, a kaikanamo sotiopö a kupaso piasalo." Ina Tiosö nö a simötawi ia kuma. ![](https://cdn.door43.org/obs/jpg/360px/obs-en-22-05.jpg) Maria japalo jötonö: "¿Sa mamatalo taimi ipö, wina itö kua pasio piasalo?" A kuiaja: Tiosö Kosomopö osi lotete epi kauna itö walo piasalo. Inatö kua kötönö ia liki Tiosö i ula Saipalöwi ia kuo piasalo." Ina Tiosö nö a simötawi ia kuma. Itöna pitilita Maria pi ku upa kötönö auie a ku sotama. ![](https://cdn.door43.org/obs/jpg/360px/obs-en-22-06.jpg) Maria na Tiosö nö a simötawi ia japalonoi itö pi tatejepaso noiaja, Elisabet na a noimo julasolöma. Wa kua soa köle Maria kutasowi i Elisabet nö itö jinitalöma ia osimöna ulawai jilipasoma. I su töpöna Tiosö nö tö tama pöle itöna töpö pi monajapalo opama. Elisabet na 3 pulipuliana Maria noimo mapalonö kamani saiana a jua noma konasolöma. ![](https://cdn.door43.org/obs/jpg/360px/obs-en-22-07.jpg) Elisabet nö kamani ulawai tapalöiaja, Zacarias, Elisabet ina kipi töpöna Juan ma jilo tapalö pökö Tiosö simötawi ia kunoi ina a jilo ta jötöpalöma. Ia Zacarias japalo kopö Tiosö nö tö tota koköma. Zacarias ki: "Tiosö nö kamani sanöma töpö taöa kopasoma kötönö pö pi mönajapalo. Ji ipa ula liki Tiosö kai wösöpö a. Ina makö kua kukema makö ote ta ko kötö sanöma töpöna a kupö a." Ina a kuma. *Lucas tököna 1 töna Tiosö nö tö tamanoi itö tosokama kule itö* ## 23. Jesus kupasonoi itö https://openbiblestories.org/l/xsu/story-23/ ![](https://cdn.door43.org/obs/jpg/360px/obs-en-23-01.jpg) Ai wanotö pi ku toita api Jose a jilo kuawi anö Maria sulöpö tö kuoma. Maria sipinapi ipi ianö itö jininönö, i ipa ula maikötö a pi ku sotama. Ianö Maria kilima wani ipö salo, pola a ku jatomo ko piama. Ina a ku pailata kunumai, iana mani töna Tiosö nö a simötawi ia japalo löoma. ![](https://cdn.door43.org/obs/jpg/360px/obs-en-23-02.jpg) Ianaja: "Jose, Maria liki au pusupa kupasopö töna a kiliti. Iana ulawai titile i Tiosö kosiomopö osi pina itö kua köle. Wanoa osowai kupaso piasalo 'Jehova patanö tö löako kötö inatö kuwi töna Jesus i wa jilo tapalo pökö, ianö wanisana töna sanöma töpö nö löako piasalo." Ina Tiosö nö a simawi ia mani kuma. ![](https://cdn.door43.org/obs/jpg/360px/obs-en-23-03.jpg) Inatö kuaiaja, Jose nö Maria sulönö kamani saiana a kai kuköma, maike Maria na a mai saka paio maiaja i ulawai kua toitasoma. ![](https://cdn.door43.org/obs/jpg/360px/obs-en-23-04.jpg) Maria nö ulawai tapalöpö tö jöka apataja, romano töpö kaikananö i töpö jilo pewö tosokama piasalo, kamani kolo pata töpö kuonoi iamö kama ulu töpö pewö sima koma. David liki Jose kolo patatö kuoma kötönö Nazaret tö uli ta kölönö, Belen tö ulina ia kupasonoi iamö Jose, Maria ina kipi töpö jua pasia konasolöma. ![](https://cdn.door43.org/obs/jpg/360px/obs-en-23-05.jpg) Belen tö ulina töpö walopaköma, maike töpö kuköpö ai saia ma apa pasioma. Salo kökö wani kuopaja töpö kuköpö tö ta sisalalöma. Ia i ulawai kupasoma, a wai paköpö tö topa mi ipaja, saloa sapuku wanina a wai pa sotaköma. Jesus a jilo wai ta sotalöma. ![](https://cdn.door43.org/obs/jpg/360px/obs-en-23-06.jpg) Itö mumina ai töpönö saloa totiapalawi tö uli juko opapaja kamani salo kökö wani totiapalatima. I töpönaja Tiosö nö a simötawi ia wakala toti ipi a tapamo soa potasoiaja töpö kilipalo opama. I töpönaja: "Pö kilipaloti kamakana toita api satö wösö piaköle. ¡A Saipalöwi, kaikanatö, Belen tö ulina a kupaso ke!" ![](https://cdn.door43.org/obs/jpg/360px/obs-en-23-07.jpg) "I ula wai taipalötö, jaloösö asawösönö awai jalolata, saloa sapuku wanina awai palata ma wai talalo kötö." Ina Tiosö nö a simawi ia ku sotama. Itö nojana jutumösökö patana Tiosö nö töpö simötawi i pö sateje pata amamonö Tiosö na töpö pi monajapalo opa soa pöta lasoma: "¡Jutumösökö patana Tiosö pata kule ia pi patana toita api kamani sanöma töpö totiapalawi i töpö kua sisa!" Ina töpö amamo kutoma. ![](https://cdn.door43.org/obs/jpg/360px/obs-en-23-08.jpg) Jesus ositiwai kuopa, salo kökö totiapalawi i töpö walokö tasoma, Tiosö nö a simötawi ia kunoi ina saloa sapuku wanina a wai pa kuo jötötioma. I töpö pi monaja apama. Kamani oveja kökö wani kuo tasopa i töpö jukoonö pölanö Tiosö na töpö amamo pi monaja totio opa koonöma. ![](https://cdn.door43.org/obs/jpg/360px/obs-en-23-09.jpg) Aitö wakalana, ai tiko tö ulina ai töpö pi taö opawi töpönö jutumösököna ai sitikalia aipö ipi tö talalöma. Itöna judio tili töpö i kaikana tutetö kupaso aluke i töpö pi ku pasio tasoma. Inatö kuanö i kaikanatö mö piasalo iamö töpö jama jua sotasolöma. Belen tö ulina töpö walokönö, Jesus, kamani jaoani, kamani naoani, ina kipi töpö kule i saia ta jötölalöma. ![](https://cdn.door43.org/obs/jpg/360px/obs-en-23-10.jpg) I töpö pi tao opawi i töpönö kamani naoani kaina Jesus talalönö, töpö maiko jitata sotakönö töpö pi mönajapalo sotama. Jesus na tö noa api tö pewö tota sotaköma. Itö nojana töpö jua ko sotasolöma. *Mateo tököna 1 tönaja; Lucas 2 tönaja Tiosö nö tö tamanoi itö tosokama kule itö* ## 24. Juan nö Jesus mai opamanönoi itö https://openbiblestories.org/l/xsu/story-24/ ![](https://cdn.door43.org/obs/jpg/360px/obs-en-24-01.jpg) Zacarias, Elizabet ina kipi töpö i ula Juan patalonö Tiosö kai wösöwi a kupasoma. Pölösa patana a kutioma, putu koai, kusuma kökö wani waai, camello jöösönö joloösö tapalöma ösönö a jaloa ina a kuama. ![](https://cdn.door43.org/obs/jpg/360px/obs-en-24-02.jpg) Juan japalo jini piasalo pölösa patana sanöma töpö walo walomo sinimo opatima. I töpöna tö wösönö: "Pö pi ku totia kopalo, Tiosö kaikanamopö tö jöka apa waikia köle." Ina a kutima. ![](https://cdn.door43.org/obs/jpg/360px/obs-en-24-03.jpg) Juan ku pöle itö jininö sateje epi töpö pi ku totipo opakoiaja, Juan nö töpö mai oma soatalo opatima. Sateje epi kokamotawi a saina tö wapamawi Juan na i töpö mai omo naioma, maike töpö pi ku totipoko pasio mi ipö, töpö jiopa apawi itö wösöko mi ipö, ina i töpö kua pasioma. ![](https://cdn.door43.org/obs/jpg/360px/obs-en-24-04.jpg) Kokamotawi ia saina tö wapamawi i töpönaja "¡kamaka liki olökökö wasu upi i makö! Makö pi ku totia kupalonö toita api tö tama nomo ko. Jiti pewöna pilimo jaö pasio mi ipi iti pewö tusupakönö koatakana ti sapa pasio piasalo." Ina Juan kuma. Tiosö kai wösöwi i töpö ki: "Au pilitiso totiama löatalopö töna ji ipa sa simawi i sa simöpa piaköle." Ina töpö kunoi i Juan nö itö tama totio opa jötoma. ![](https://cdn.door43.org/obs/jpg/360px/obs-en-24-05.jpg) Juan na ai Judio töpönö tö jininö, a Saipalönoi i wa töpö ku pasioma. Juan japalo jötonö: "A Saipalönoi i sa maikötö, maike kamisa nojana aitö ju jaia köle. Ia lotete epö kötönö a amösökö jalole i sa tökö jasua pötalöpö tö mi ipö kötö." Ina a kuma. ![](https://cdn.door43.org/obs/jpg/360px/obs-en-24-06.jpg) Itö janata Juan na Jesus mai opamonaso piasalo a juma. Juan nö ia talalönö: "¡Tö möje! Ji Tiosö pata i saloa Cordero wainö itö uli pewö patana wanisanatö josa kowi ia ju köle" Ina a ku sotama. ![](https://cdn.door43.org/obs/jpg/360px/obs-en-24-07.jpg) Jesus naja: "Kamisanö wa mai oma kili ipawö. Kaunö sa mai opama sisa mi ipösalo." Juan kuma. Maike: "Sa mai opamanö, itö topa apa asa köle." Ina Jesus ku puoma. Inatö kuanö, ai wanisanatö tama pasio ma apa puo noia maike, Juan nö Jesus mai opamanöma. ![](https://cdn.door43.org/obs/jpg/360px/obs-en-24-08.jpg) Jesus mai opamanonö a jösöka kopasoiaja, joletawai kulena ina Tiosö Kosiomopö Osi Ikitipö kupalonö iana awai loa sotaköma. Jutumösökö patana ia Tiosö japalo jino sotanö: "Kawa liki ipa uluwa, kauna sa pi mönaja apa köle." Inatö kulasoma. ![](https://cdn.door43.org/obs/jpg/360px/obs-en-24-09.jpg) Juan naja: "Ai watö mai opamanöiaja iana Sa Kosiomopö Osi Ikitipö itopaso kötö. Ia liki Tiosö i ula." Ina Tiosö kuma. Sami ipi Tiosö kua sisa, Juan nö Jesus mai opamanöma, kamani jaoani Tiosö pata japalo jinili, kamani ula Jesus talali, Tiosö Kosomopö Osi Ikitipö talali, ina a kuama. *Mateo tököna 3 tönaja; Marcos 1: 9-11 tönaja; Lucas 3: 1-23 tönaja Tiosö nö tö tamanoi itö tosokama kule itö* ## 25. Satanas waninö Jesus wapama. https://openbiblestories.org/l/xsu/story-25/ ![](https://cdn.door43.org/obs/jpg/360px/obs-en-25-01.jpg) Jesus mai omo matasoiaja, Tiosö Koslomopö Osi Ikitipönö pölösa patana a kai jua sotasolöma, iamö a iapalo mi ipi 40 wakala töjö, 40 mumimumi töjö inatö kupasoma. Inatö kuaiaja, Jesus nö wanisanatö tamapö tö pi ipa salo iana Satanas wani walokönö, a wapa pasioma. ![](https://cdn.door43.org/obs/jpg/360px/obs-en-25-02.jpg) Satanas waninö Jesus mönama pi topa apa salo: "Kawa liki Tiosö i Ulu wa salo, ji mama kökö liki pantö tapalö, wa iapalo pökö." A kuma. ![](https://cdn.door43.org/obs/jpg/360px/obs-en-25-03.jpg) Jesus japalo jötonö: "SANÖMA TÖPÖ KUOPÖ TÖNA PANTÖ PI SISA MAIKÖTÖ, TIOSÖ JAPALOWI ITÖNÖ TÖPÖ KUA NAIA SISA, Tiosö wajeta tököna inatö tosokama kua." Ina a kuma. ![](https://cdn.door43.org/obs/jpg/360px/obs-en-25-04.jpg) Itö nojana, Satanas nö kokamotawi ia sai jösöka pata ösa apa lasopa a sua nomölölönö: " 'MAMANA WA AMÖSÖ TIKIMO MA APAPÖ TÖNA, TIOSÖ NÖ KAMANI SIMAWI I TÖPÖ SIMÖPALÖ KÖTÖ.' Inatö tosokama ku köle, kötönö Tiosö i ulu wa salo, a sutukö" A kuma. ![](https://cdn.door43.org/obs/jpg/360px/obs-en-25-05.jpg) Maike Jesus nö tosokamatö kateanö: "Kamani tosokama töna, Tiosö ki: 'KAMAKA I KAIKANA TIOSÖ WAPA PI TOPA JATOTI.' Ina A ku köle." Ina Satanas na a kuma. ![](https://cdn.door43.org/obs/jpg/360px/obs-en-25-06.jpg) Itö nojana, Jesus na Satanas waninö jitö uli pewö pata möma totio opanö: "Wa maiko pewö jitatakönö, kamisana wa japalo toita apa könaja, kauna ji satö uli pewö pata totokö kötö." A ku sotama. ![](https://cdn.door43.org/obs/jpg/360px/obs-en-25-07.jpg) Jesus japalo jötokonö: "¡Satanas, kamisana a ju pasököa kopalo! "AU KAIKANA TIOSÖ SIMOWI I WATÖ TAMA SISANÖ IANA WA JAPALO TOITA SISA PÖKÖ. Ina Kamani sanöma töpöna Tiosö ku köle." Ina a ku sotasoma. ![](https://cdn.door43.org/obs/jpg/360px/obs-en-25-08.jpg) Satanas waninö Jesus mönama pi topa apa köle maike Jesus nö tö tama mi ipaja, Satanas wani jua konasolöma. Inatö kuaiaja Tiosö nö töpö simawi i töpö walokönö a totiapala sotama. *Mateo tököna 4:1-11 tönaja; Marcos 1: 12-13 tönaja; Lucas 4: 1-13 tönaja Tiosö nö tö tamanoi itö tososkama kule itö* ## 26. Jesus tatamo kolo kupasonoi itö https://openbiblestories.org/l/xsu/story-26/ ![](https://cdn.door43.org/obs/jpg/360px/obs-en-26-01.jpg) Satanas waninö a wapama pöle itö pewö jasumaköiaja, Jesus na Tiosö Kosiomopö Osi Ikitipö titia kokönö Galilea tö ulina a kutionoi iamö a jua konasolöma. Ai töpö ulina Jesus nö tö wapama nomatalo toitioma. Ia kuawi itöna sanöma töpö japalo toita apama. ![](https://cdn.door43.org/obs/jpg/360px/obs-en-26-02.jpg) Nazaret tö ulina a osowai patatinoi iamö Jesus julasolöma. Mota mapowi tö wakalana kokamotawi ia saina a julasolöma, Tiosö kai wösöwi i Isaias nö tö tosokopalönoi i tökö kateapö töna tökö totoköma. Jesus nö i tökö jakopalönö Kamana tö kuawi itö tosokama kateama. ![](https://cdn.door43.org/obs/jpg/360px/obs-en-26-03.jpg) Jesus nö tö katea pöle: "Töpö pepalo opawi i töpöna toita api satö wösö, wanisana tönö töpö osi matiji ipi isa töpö osi pokama koo, tö mö mi ipi isa töpö löa koo, töpö pi jonipowi isa töpö pi mönajapalama, ina sa kuapö töna Tiosö nö kama Kosomopö Osi Ikitipö totopöma. Tiosö pata toita apö kötönö makö pasiliapalapö jitö inama." Ina itö kuma. ![](https://cdn.door43.org/obs/jpg/360px/obs-en-26-04.jpg) Itö nojana, Jesus loako sotaköma. Sanöma töpönö a mö totio opama. A Saipalöwi iana itö ku köle i töpö pi ku tao opa waikioma. Jesus ki: Juki ipi tosokama satö katipale jukiki itö kupo waikia köle." Ina a kuma. I töpö pi ku monö öpama. "¿Ji Jose i ula wani pasi maikötö?" Ina töpö kupalo opama. ![](https://cdn.door43.org/obs/jpg/360px/obs-en-26-05.jpg) Inatö kuaiaja: "Aitö ulina Tiosö kai wösöwi a kupasonoi ia töpö kuowi i töpönö ia pi mi ipi i pitilita. Tiosö kai wösöwi i Elias kuonoi itaja Israel tö ulina su töpö panopa nomapoma sateje epi töpö su kuo opama. Maike tres inamana 5 pulipulia kulata matu jölö ma apanoi itaja Israel tö ulina ai sutö panopa nomasoma a pasilipalöpö töna Tiosö nö Elias sima ma apama, ai tiko tö ulina ai sutö kuowi ana a sima sisapalöma" Ina Jesus kuma ![](https://cdn.door43.org/obs/jpg/360px/obs-en-26-06.jpg) Jesus japalo soalanö: "Tiosö kai wösöwi i Eliseo kuonoi itaja Israel tö ulina sateje epi sanöma töpö jöösöna kamakalitö kulata töpö kuo opama. Maike Eliseo nö ia aitö löako ma apama. Ianö Naaman, Israel töpö nisi taö öpawi i töpö kaikana, ia jöösö kamakali ipi itö löako sisalöma" Ina a kuma. A jini pöle i judio töpö kuoma. Inatö kua kötönö ina a kuiaja, töpö pi jisujapalo opama. ![](https://cdn.door43.org/obs/jpg/360px/obs-en-26-07.jpg) Tiosö na japalowi ia sai pasököo tasopaja Nazaret tili töpönö Jesus jilula kai juulöpaja ösöösö töna a kemakönö a söpa piama. Maike sanöma töpö mötalöna Jesus jasuakokönö Nazaret tö uli tako kölönö tikiamö a jua konasolöma. ![](https://cdn.door43.org/obs/jpg/360px/obs-en-26-08.jpg) Inatö kuanö, Galilea tö uli pewöna Jesus jasumo koonöma, iana sateje epi sanöma töpö walo totio opama. Sateje epi kamakali töpö kai walowalomo totio opama, tö mö mi ipö, töpö ju mi ipö, tö jini mi ipö, töpö japalo mi ipö, ina töpö kui töpö jakiko totio opama, Jesus nö i töpö pewö löa koma. ![](https://cdn.door43.org/obs/jpg/360px/obs-en-26-09.jpg) Sateje epi sanöma töpö osimöna sai töpö titiowi Jesus na töpö kai walo naioma. Jesus nö saipö wani sasuko kukema pö wani atupo jaiatalo opa koma, ai pö wani atupoko pialanö: "¡Kawa liki Tiosö pata i uluwa!" Ina pö wani kutoma. Sanöma töpö pi kilijo opanö Tiosö na töpö japalo toita apama. ![](https://cdn.door43.org/obs/jpg/360px/obs-en-26-10.jpg) Inatö kuanö, Jesus nö doce (12) wano töpö saia tapalöma i töpö liki Jesus na töpö wapowi i töpö kupasoma. Jesus na i wapowi i töpö nokapalo naitiopaja Jesus kuawi itö pewö taöpasoma. *Mateo tököna 4:12-25 tönaja; Marcos 1: 14-15, 35-39; 3: 13-21 tönaja; Lucas 4: 14-30, 38-44 tönaja Tiosö nö tö tamanoi itö tosokama kule itö* ## 27. Samaritano tilitö pi ku toita apanoi itö https://openbiblestories.org/l/xsu/story-27/ ![](https://cdn.door43.org/obs/jpg/360px/obs-en-27-01.jpg) Aitö wakalana, judio töpöna Tiosö simonoi itö taö öpawi anö Jesus wapa piasalo: "Wapamawi ia, ¿Sa toi ipa sotiopö töna i kapili satö tama piasalo?" Ina a kuiaja: "¿Tiosö simowi wina itö tosokama ku köle?" Ina Jesus kuma. ![](https://cdn.door43.org/obs/jpg/360px/obs-en-27-02.jpg) Tiosö simowi itö tosokama naja: "KAWA KOSOMOPÖ OSI, PILIWA JIASI, WA LOTETE EPI ITÖ, PILIWA JE OSI, ITÖ PEWÖNÖ AU TIOSÖ WA PI IPA PÖKÖ. KAMA WA PIMO KUAWINA INA AU AI WATÖ PI KUA NAIO PÖKÖ." Inatö ku köle Tiosö simowi itö taö öpawi ia kuiaja: "¡Watö taö öpa waikia köle! I watö tama kukema wa toi ipa sotio piasalo." Ina Jesus ku jötoma. ![](https://cdn.door43.org/obs/jpg/360px/obs-en-27-03.jpg) Maike Jesus na i kama pi jolisi ku toita api itö möma pi topa apa salo: "¿I witipila liki ipa aitö jötöwö?" A kuma. ![](https://cdn.door43.org/obs/jpg/360px/obs-en-27-04.jpg) Sutu upa tö kuanoi iana Jesus nö tö wösö sotama. "Jerusalen tö ulina ai judio tilitö kuowi Jerico tö ulina a jama julasolöma." ![](https://cdn.door43.org/obs/jpg/360px/obs-en-27-05.jpg) "Ia jama juulöpamö ai oka töpönö a namo keköma. A sö totio opapaja a mai söa totipalönö kamani matijitö pewö sulöma. Itö nojana töpö jua ko sotalöma." ![](https://cdn.door43.org/obs/jpg/360px/obs-en-27-06.jpg) "Itö pi tatejepaso noiaja, Tiosö saia totipalawi itisona ia ju tasoma. Ianö i sanomatö nini pale ia talalönö, a ju janoa sotaköma, a pasilipalöpö tö pi totile ia möa soa pötalönö, a jasua pököma." ![](https://cdn.door43.org/obs/jpg/360px/obs-en-27-07.jpg) "Tö pi tatejeto kotataja, itisona ai levita tilitö waloa nomötaköma. (Levita tili töpönö Tiosö saia totiapalawi i töpö pasilipalawi i töpö kuo pasioma.) Aitö masina i levita tilitö janoa naia sotakönö, a nini pale ia möa naia soa pötalölöma." ![](https://cdn.door43.org/obs/jpg/360px/obs-en-27-08.jpg) "Itisona ai sanömatö jaso nomötale i samaritano tilitö kuo pasioma. (Tiko tö ulina töpö kuowi töpönö judio töpö suanö kamani ulu töpö tanoi i töpö ola liki samaritano töpö kuo pasioma. Samaritano töpö, judio töpö, i töpö nisi tapaso opa pasiowi töpö kuoma.) Maike i samaritano tilitönö i judio tilitö talalönö a ote ta sotalöma. Inatö kuanö, a nini ipi itö löa konönö a totiapala sotama." ![](https://cdn.door43.org/obs/jpg/360px/obs-en-27-09.jpg) "Itö nojana i samaritano tilitönö kamani saloa burro jösökana ia loa sotamaköma, ai saia kuotasopamö a kai jua sotalolönö ia a totiapalati tasoma." ![](https://cdn.door43.org/obs/jpg/360px/obs-en-27-10.jpg) "Itö janata, i samaritano tilitö juko sota piaalöma. Inatö kuaiaja ia saina a mamo löapalowi iana ai sitipa totokönö: 'Ji wa wani totiapala jaio pökö, maike au sitipa wa jötöta nailö könaja sa jaso kotaiaja au satö noa koa komakö kötö' Ina a kuma." Itö pewö wöa toitaköma. ![](https://cdn.door43.org/obs/jpg/360px/obs-en-27-11.jpg) Inatö kuanö, Tiosö simowi itö pewö taö öpawi ia naja: "¿Wina wa pi ku köle? ¿Ji wanotö sönoi iana i tres wano töpö jasonoi, ia, witipila liki kama aitö kuo asama?" Ina Jesus kuiaja: "Wano tönö a ote ta asalönoi ia wani ki." Ina ia ku jötoma. Ia naja: "Wa jupa itö tama naio." Ina Jesus kuma. *Lucas tököna 10:25-37 töna Tiosö nö tö tamanoi itö tosokama kule itö* ## 28. Jisatö pilapalo opawi a https://openbiblestories.org/l/xsu/story-28/ ![](https://cdn.door43.org/obs/jpg/360px/obs-en-28-01.jpg) Aitö wakalana, jisatö pilapalo opawi ianö Tiosö simowi itö taö öpawi Jesus naja: "Wapamawi a toita api ia, ¿Sa toi ipa sotiopö töna kapili satö tama piasalo?" A kuma. Jesus ki: "¿Kapilitö pina kamisana 'toita api ia' wa ku köle? A toita api sami ipi Tiosö kua sisa. Maike wa toi ipa sotiopö watö pi ipa könaja Tiosö simowi tö tosokama kule itö tama totio." Ina A kuma. ![](https://cdn.door43.org/obs/jpg/360px/obs-en-28-02.jpg) "¿I kapili satö sai tama jöto piasalo?" Ina kuiaja: "Aitö söpa jatoti. Ai tikotö pusupana a mamo jatoti. A tomömo jatoti. A jolisimo jatoti. Au jaoani, au naoani ina kipi wa töpö kili taö totiatalo opa pökö. Kama wa pimo kua kuawina ina tiko wa töpö pi kua sota pökö." Ina Jesus ku jötoma. ![](https://cdn.door43.org/obs/jpg/360px/obs-en-28-03.jpg) Mike: "Ulu sa soiaja i satö pewö tama sota köpili. ¿Sa toi ipa sotiopö töna kapili satö tama satea soa piasalo?" Ina a kuiaja, Jesus nö a mö sotanö a pi ipama. ![](https://cdn.door43.org/obs/jpg/360px/obs-en-28-04.jpg) Ianaja: " Wa totipo satea pi topa apa salo, au matijitö pewö kule i watö noa tapamanönö pepalo opawi töpöna i sitipa wa tota jötöjökö könaja, jutumösököna wa pilapalo opako laso piasalo. Itö nojana kamisana wa nokapalo sota pökö." Ina Jesus kuma. ![](https://cdn.door43.org/obs/jpg/360px/obs-en-28-05.jpg) Jesus ku pöle itö jininönö, i jisatö pilapalo opawi a kötönö kamani matijitö pewö josa wani ipö salo a pi jonipo opama. A nomöja kopalonö a jua pasököa konasolöma. ![](https://cdn.door43.org/obs/jpg/360px/obs-en-28-06.jpg) Inatö kuaiaja, kamani wapamawi i töpönaja: "¡Tiosö kaikanamowi, ia töpö pilapalo opawi i töpö lisipasopö tö jatuka pasio mi ipö! Awai, makosatö kaika waina saloa Camello wani lisipasopö tö jatuka apa asalö kötö maike Tiosö kaikanamowi ia a pilapalo opawi a lisipasopö tö jatuka pasio mi ipö." Ina Jesus kuma. ![](https://cdn.door43.org/obs/jpg/360px/obs-en-28-07.jpg) Töpö wapamawi i töpönö itö jininönö töpö pi kilijipalonö: "Inatö kua köle manukule, ¿Witipila nö löa asa kopaso piasalo?" Ina töpö kuma. ![](https://cdn.door43.org/obs/jpg/360px/obs-en-28-08.jpg) Töpö wapamawi Jesus nö i töpö mö sotanö: "Sanöma töpöna itö jatuka pasia maikötö, maike Tiosö na itö pewö jatuka apa asa." Ina a ku sotama. ![](https://cdn.door43.org/obs/jpg/360px/obs-en-28-09.jpg) Jesus naja: "Kamisamakö i samatö pewö ta totikölönö kauna samakö nokapaloti köle. ¿Itö pina kamisamaköna i kapili watö toto jöto piasalo?" Ina Pedro kuma. ![](https://cdn.door43.org/obs/jpg/360px/obs-en-28-10.jpg) Inatö kuaiaja: "Aiwanö au saia, au ai töpö, au pasi töpö, au jaoani, au naoani, au matijitö pewö, kamisa pina i watö pewö ta totikölönoi, i wanö pe epi 100 tö jasujulata au watö tapa totioko piasalo, wa toi ipa sotiopö tö toto naio piasalo. Maike sateje epi töpö palule i töpö noja kopaso piasalo, töpö noja pasionoi i töpö palua kopaso piasalo." Ina Jesus kuma. *Mateo tököna 19: 16-30 tönaja; Marcos 10: 17-31 tönaja; Lucas 18: 18-30 tönaja Tiosö nö tö tamanoi itö tososkama kule itö* ## 29. A simawi anö tö ote taö ma apanoi itö https://openbiblestories.org/l/xsu/story-29/ ![](https://cdn.door43.org/obs/jpg/360px/obs-en-29-01.jpg) Aitö wakalana, Jesus na Pedro ki: "Wapamawi ia, ¿Kamisana ipa aitö jiopa apaiaja wina kipili sa ote pi wani ta tapalö piasalo? ¿7 ki? Ina a kuiaja: "Ma, 7 kunumai, ¡70 töna, 7 tö pi ösöjölata!" Ina Jesus kuma. Matö ote taö koatalo opatipö töna Jesus ku puoma. Inatö kuanö Jesus nö itö wösö sotama. ![](https://cdn.door43.org/obs/jpg/360px/obs-en-29-02.jpg) Jesus ki: "Ai kaikana tönö kamani simawi i töpöna sitipa noa koako pianoi itö kua kuawina ina Tiosö kaikanamowi itö kua kötö. 200,000 inama töna tatamo toitionö sitipa sua ösöjötawi, inatö kui kamani ai tatamowi ana ianö kamani sitipa noa koa konöpö tö kuoma. ![](https://cdn.door43.org/obs/jpg/360px/obs-en-29-03.jpg) "tö noa komaköpö tö mi ipaja: 'Noami ipi töpö tatamotipö töna i wano töjö, kamani ai töpö ina kipi töpö noa tapamanönö ipatö noa tota kopa.' Ina kaikanatö kuma." ![](https://cdn.door43.org/obs/jpg/360px/obs-en-29-04.jpg) "Kaikanatö mönakö kuopa ia maiko jitata sotakönö: 'Kaikana wa opio paio mi ipö salo, au satö noa koa toitamakö kötö.' Ina a kuiaja, kaikana tönö a ote taö öpa salo, pöla tö noa koama jatoti a kunö a sima kopalöma." ![](https://cdn.door43.org/obs/jpg/360px/obs-en-29-05.jpg) "Maike kaikana töna a ju pasöka kopasoma, 4 pulipuliana tatamonö sitipa sua ösöjötawi inatö kui kamani ai tatamowi tilitöna kamani sitipa noa koa konöpö tö kule ia talalöma. A jua sotakönö: '¡ipa sitipa tota kopa!' A ku sotama." ![](https://cdn.door43.org/obs/jpg/360px/obs-en-29-06.jpg) "I tatao tilitö maiko jitata sotakönö: 'Wa opio paio mi ipö salo, au satö noa koa komakö kötö.' Ina a kuma. Maike, kamani itö pewö noa koa komaköiaja a pöka jakoa kopalöpö töna a pöka kasöa sotamaköma." ![](https://cdn.door43.org/obs/jpg/360px/obs-en-29-07.jpg) "Ai tatao tili töpönö itö tanö töpö pi jonipo opama. Kaikana töna töpö julolönö itö pewö wököma." ![](https://cdn.door43.org/obs/jpg/360px/obs-en-29-08.jpg) "Kaikana tönö ia nakalönö: '¡Wa jiopa apawö! Kamisana wa ote tamoiaja wa ote ta asa konö ke. Ina wa kua naio jöto ma apama.' Itöna kaikana pi jisuja apa salo ia pöka kasökönö tö noa koama kopö töna a pöka kasömaköma" ![](https://cdn.door43.org/obs/jpg/360px/obs-en-29-09.jpg) Inatö kuanö: "Pili makö kosiomopö osinö kamaka ai matö ote tako ma apa kukema ina ipa Jaoani patanö makö tama naio piasalo." Ina Jesus ku sotama *Mateo tököna 18: 21-35 töna Tiosö nö tö tamanoi itö tososkama kule itö.* ## 30. Jesus nö 5.000 sanöma töpö iapalamanoi itö https://openbiblestories.org/l/xsu/story-30/ ![](https://cdn.door43.org/obs/jpg/360px/obs-en-30-01.jpg) Tiko töpö ulina kamani wapamawi i töpönö tö wösö, tö wapama ina töpö kuapö töna Jesús nö töpö simönöma. Jesus na töpö waloa kokönö, tö pewö tama tasonoi itö pewö wösöko solöma. Itö nojana, kosota oki pökatö patana Jesús nö kamani i töpö kai möta mapotaso piama. Inatö kuanö kutiatana töpö titikönö ituna töpö pökatöpasolöma. ![](https://cdn.door43.org/obs/jpg/360px/obs-en-30-02.jpg) Maike Jesús nö kutiatana kamani i töpö kai titipalo pöle, sateje epi sanöma töpönö itö talalöma. I matu kasöna sanöma töpö löla asokopalolönö pökatamö töpö waloa somakö lasoma. Inatö kuanö Jesús nö kamani i töpö kai walotaja sateje epi sanöma töpö mamo löo totio opa löo waikioma. ![](https://cdn.door43.org/obs/jpg/360px/obs-en-30-03.jpg) Su töpö, ulu töpö ina kipi töpö katea pasio maiaja, 5.000 wano töpö kuoma. Sanöma töpöna Jesús pi jonipo opama. Ji sanöma töpö liki oveja kökö totiapalawi i kama mi ipö kulena ina i töpö kuama. Inatö kuaiaja, Ianö töpö wapama, töpö kamakali löa koo ina a kuama. ![](https://cdn.door43.org/obs/jpg/360px/obs-en-30-04.jpg) Itö wisatina, Jesús naja: "Tö wisia apa waikiataja aitö uli kua jöka ma apa köle. Sanöma töpö jua kononönö töpö iapalopö tö tai kopö töna töpö sima kopalö" Ina kamani wapamawi i töpö kuma. ![](https://cdn.door43.org/obs/jpg/360px/obs-en-30-05.jpg) Maike kamani wapamawi i töpö naja: "¡Kamakanö töpö iapalama sota!" Ina Jesus ku puoiaja: "¿Wina i samatö tama kua pasio piasalo? Kamaka 5 pan töjö, polakapi salaka kökö inatö kua pöta köle" Ina töpö ku jötoma. ![](https://cdn.door43.org/obs/jpg/360px/obs-en-30-06.jpg) 50 sanöma töpö saitanö sikisiki töna töpö loa sokamapö töna, Jesús nö kamani wapamawi i töpö simama. ![](https://cdn.door43.org/obs/jpg/360px/obs-en-30-07.jpg) Itö nojana, Jesús nö 5 pan töpö, polakapi salaka kökö tö sulönö, jituamö tö mö sotanö i nitö pina Tiosö na topaköle a ku sotama. ![](https://cdn.door43.org/obs/jpg/360px/obs-en-30-08.jpg) Inatö kuanö, Jesús nö pan töjö, salaka inatö pewö nakasia sotalalöma. Kamani wapamawi i töpönö sanöma töpöna tö totoma salekeapö töna tö pewö tota sotaköma. ¡I töpönö nitö totoma jötöpo toitia köle maike tö mapo ma apama! Sanöma töpö pewö pöta totisoma. ![](https://cdn.door43.org/obs/jpg/360px/obs-en-30-09.jpg) ¡Itö nojana, sanöma töpönö tö jia konanönoi itö kua apa kötönö, töpö wapamawi i töpönö itö pewö toa jötöja konanöma, 12 wö kökö kua kopasoma! 5 pan töpö, polakapi salaka kökö ina kipi töna i nitö pewö kuoma. *Mateo tököna 14: 13-21 tönaja; Marcos 6: 31-44 tönaja; Lucas 9: 10-17 tönaja; Juan 6: 5-15 tönaja Tiosö nö tö tamanoi itö tososkama kule itö* ## 31. Matu jösökana Jesús junoi itö https://openbiblestories.org/l/xsu/story-31/ ![](https://cdn.door43.org/obs/jpg/360px/obs-en-31-01.jpg) Kamani wapamawi i töpöna Jesús ki, kutiatana pö pi pökatöpo pasio koonö, ji sanöma sa töpö simöpa pasio ko jaio paio piaköle a kuma. Jesús nö sanöma töpö simakopalönö, ai jiima töna Tiosö na a japalomo julasolöma. Jesús sami ipö kötönö, Tiosö na a japalotipa tö mumasoma. ![](https://cdn.door43.org/obs/jpg/360px/obs-en-31-02.jpg) Inatö kua pasilata töpö wapamawi i töpönö tö sakatipa mötalö tuna töpö pi wöpasoma. Pe epi tö ipokomo totia apa kötönö tö saka tomöpoti ma apama. ![](https://cdn.door43.org/obs/jpg/360px/obs-en-31-03.jpg) Tiosö na Jesús japalo mapalonö kamani wapamawi i töpöna a jua jaisolöma. ¡Kutiatasö kuomö kuopa matu jösökana a juulöma! ![](https://cdn.door43.org/obs/jpg/360px/obs-en-31-04.jpg) Jesús talalönö i töpö kilipalo opama, janepolepö tö jato töpö pi ku upama. I töpö kilipalo pöle Jesús nö itö tapa apa salo: "Pö kilipaloti. ¡Kamisa sai!" Ina a kuma. ![](https://cdn.door43.org/obs/jpg/360px/obs-en-31-05.jpg) Inatö kuaiaja, Jesús naja: "Wapamawi ia, kawa sai salo, matu jösökana sa junö kauna sa walokö tasopö tö tama" Ina Pedro kuiaja. "¡Japo!" Jesús ku jötoma. ![](https://cdn.door43.org/obs/jpg/360px/obs-en-31-06.jpg) Kutiatana Pedro itopalonö matu jösökana Jesús kuotasopa a ju sotaalöma . Maike wani ipi a pi jutalolönö, Jesús na a mamo tatea sokapalonö tö mö asoka sotama, polatu pata mö öpa, ipokotö tapa apa ina a kuama. ![](https://cdn.door43.org/obs/jpg/360px/obs-en-31-07.jpg) Inatö kuaiaja, Pedro kilipalo opa kukema matuna a keo komupo olöma. A komönö: "¡Kaikana sa ta kopalö!" Ina a kuiaja, lope epi Jesús walokö tasonö a jösöka kopamanöma. Itö nojana Pedro naja: "Pitilita wa pi ku totio mi ipö, ¿Kapilitö pina wa pi ku tomöpo ma apa ke?" Jesús ku sotasoma. ![](https://cdn.door43.org/obs/jpg/360px/obs-en-31-08.jpg) Kutiatana Pedro, Jesús ina kipi töpö titia kotaköiaja ipokotö pewö mako sotalonö matu pi moti pata kuako sotaköma. Tö aipa apa kölia töpö wapamawi i töpö pi ku totio opama. Jesús na i töpö japalo pi mönajapalo opanö: "Pitilitö saina, kawa liki Tiosö pata i uluwa sai totiwö" Ina töpö kuto totio opama. *Mateo tököna 14:22-33 tönaja; Marcos 6:45-52 tönaja; Juan 6:16-21 tönaja Tiosö nö tö tama noi itö tosokama kule itö* ## 32. Jesús nö ai sanömatö osina saitö titiowi a löa koni, ai sutö kamakali ipi a löa koni inatö tamanoi itö https://openbiblestories.org/l/xsu/story-32/ ![](https://cdn.door43.org/obs/jpg/360px/obs-en-32-01.jpg) Aitö wakalana, kutiatana Gadara tili töpö kuowi tö ulina Jesús nö kamani wapamawi i töpö kai pökatöpasolöma. ![](https://cdn.door43.org/obs/jpg/360px/obs-en-32-02.jpg) Töpö waloköiaja, sanömatö osina saitö titiowi Jesus na ia löla lököma. ![](https://cdn.door43.org/obs/jpg/360px/obs-en-32-03.jpg) A wani lotete epö kötönö aitönö a juapala ma apama. Söpalasö toto patanö a oka jötököma maike, toto jutipa totio opa koma. ![](https://cdn.door43.org/obs/jpg/360px/obs-en-32-04.jpg) Nomawö töpö patilitawi ia i wanotö kutatima. Wakalatö pewönaja, mumimumitö pewönaja a lalupalo sotioma. Kamani jaloösö tapo mi ipö, mama namo opi tönö kama janömoko sotio ina a kuatima. ![](https://cdn.door43.org/obs/jpg/360px/obs-en-32-05.jpg) Jesús kotöna ia walotakönö a maiko jitata sotaköma. Saitoni naja: "¡Ji wano töna a atua kopalo!" Ina Jesus kuma. ![](https://cdn.door43.org/obs/jpg/360px/obs-en-32-06.jpg) Saitö titile ia lalupalo pölanö: "¿Jesús, jituamö Tiosö pata kulali ia i Ula, kamisana i kapili watö pi köle? ¡Sa wasisama jatoti!" Ina a kuma. Inatö kuaiaja saitoni naja: "¿Wina wa jilo kua?" Jesús kuiaja. "Samakö sateje epö kötönö Legión sa jilo kua" A ku jötoma. (Sateje toti ipi Roma tili töpö sösowi i töpöna "Legión" tö kutoma). ![](https://cdn.door43.org/obs/jpg/360px/obs-en-32-07.jpg) Jesús naja: "¡Tikotö ulina samakö simöpako jatoti!" Ina sai töpö ku jötoma. Ai jimatö kuo jöka apapa kusi kökö sateje pata iapalo toitioma, Inatö kuaiaja, Jesús naja: "¡Ji kusi kököna samakö simökö!" Sai töpö kuiaja: "¡Pö julolö!" Jesús ku sotama. ![](https://cdn.door43.org/obs/jpg/360px/obs-en-32-08.jpg) I wano töna saipö wani atua kopalonö kusi kököna pö wani lisia nomöpasoma. Kusi kökö pewö pata lölapalo sotanö matu kuomö kuopa kökö pata löla sotakönö kökö nasö pata tua sopasoma. Itö pewöna 2.000 kusi kökö pata kuoma. ![](https://cdn.door43.org/obs/jpg/360px/obs-en-32-09.jpg) I kusi kökö totiapala jötonoi i töpönö itö tanö, töpö löla kononönö Jesús nö tö tama pöle itö wösö jötöpo ko tasoma. Sanöma töpö pewö walokö solönö wano töna sai töpö titionoi ia möpala totio opama. Kamani jaloösö ta koni, sanöma tö sai kuawina ina a kua kopaso ina a kuanö a pi moti lo kotioma. ![](https://cdn.door43.org/obs/jpg/360px/obs-en-32-10.jpg) Sanöma töpö kilipalo opa salo Jesús sima koma. Inatö kuaiaja, Jesús jusa kononö, kutiatana a titia kokönö a ju koonö piama. Sai töpö titionoi Jesús na ia nokapalo pi topa apa naia salo a ote tamo totio opama. ![](https://cdn.door43.org/obs/jpg/360px/obs-en-32-11.jpg) Maike ia naja: "Ma, au saiana wa jua kononönö Tiosö nö kauna tö pewö tamaje itö, wa ote ta konia itöjö au ai töpö pewöna i watö wösö ko tasopö satö pi ipa köle" Ina Jesus ku puoma. ![](https://cdn.door43.org/obs/jpg/360px/obs-en-32-12.jpg) I sanömatö jua kononönö Jesús nö iana tö pewö tamanoi itö wösö jötöpo totio opama. Itö jini jötöle i töpö pi kilijo opanö aipa apa kölia töpö ku totio opama. ![](https://cdn.door43.org/obs/jpg/360px/obs-en-32-13.jpg) Jesús pi pökatöa kopasolöma. Ia a waloa koköiaja, sateje epi sanöma töpö ju jösönia totio opanö a jutikia totio opama. Ia ai sutö na iipo toitiopa 12 inamatö kupowi a ju naioma. Sanöma töpönö ajaitö tapowi i töpönö a löa konöpö töna sitipa jötöta totio opama, maike a pala totio opa asa puoma. ![](https://cdn.door43.org/obs/jpg/360px/obs-en-32-14.jpg) Jesús nö sateje epi sanöma töpö kamakali löa kotiowi i ianö itö jini ipa kötönö: "Jesús jalole i sa asö jöpötalia könaja ¡Sa löa naiako sotaso kötö!" Ina a pi ku toitio opama. Inatö kuanö, Jesús nojana a kutakönö kamani jaloösö jöpa sotalöma. ¡Ianö ösö jöpötalöma, iitö wanimo mako sotasoma! ![](https://cdn.door43.org/obs/jpg/360px/obs-en-32-15.jpg) Jesús na lotetetö jalasowi kamanö itö tatalalöma, a nomöja sotalonö: "¿Witipilanö sa jöpa ke?" A kuiaja: "Kawa kotöna sanöma töpö öpaja apökönö wa jutikipo opa, wa jasiama apa inatö kua pasilata ¿Witipilanö sa jöpa ke wa ku pasilikia?" Ina kamani wapamawi i töpö ku pasioma. ![](https://cdn.door43.org/obs/jpg/360px/obs-en-32-16.jpg) Jesús mönaköna i sutö maiko jitata sotaköma. A kili ipa salo a satitimo opama. A löa konasonoi itö wösö jötoma. Ia naja: "Pitilita wa pi ku upawi itönö wa löa konö ke. Wa pi kupalomai a jua kononö" Ina Jesús ku sotama. *Mateo tököna 8:28-34; 9:20-22 tönaja; Marcos 5:1-20; 5:24b-34 tönaja; Lucas 8:26-39; 8:42b-48 tönaja Tiosö nö tö tamanoi itö tosokama kule itö* ## 33. Tö tösawi iana tö kuanoi itö https://openbiblestories.org/l/xsu/story-33/ ![](https://cdn.door43.org/obs/jpg/360px/obs-en-33-01.jpg) Matu kasöna Jesús nö sateje epi sanöma töpö wapamatima. Sateje toti ipi sanöma töpönö tö jini piasalo töpö waloa totikö solöma kötönö, Jesús kua topakönö tö wösö piasalo ai kutiatana a titiköma. Kutiatana a lokönö sanöma töpö wapamatima. ![](https://cdn.door43.org/obs/jpg/360px/obs-en-33-02.jpg) I töpöna Jesús nö itö wösöma: "Jikalimo tilitönö ai tomotomo pö töamo julasolöma. Mo pöwai sösa jötöpopaja, pilitisona aimo pöwai kea pasiköma, salo kökö katöwi kökönö imo pöwai oa pasilöma" ![](https://cdn.door43.org/obs/jpg/360px/obs-en-33-03.jpg) "Aimo pö pasi liki masitatö umö ma apapa mama kuo opa sisapa imo pöwai kea pasiköma. Lope epi imoko jaö waikitama, maike mo nasikilipö komöpoolö ma apama. Wakejewakeje tönö i tikiwai sopipalonö, tikiwai jasitipasoma." ![](https://cdn.door43.org/obs/jpg/360px/obs-en-33-04.jpg) "Aimo pö liki mösökö tiki öpaja apapa mo pö kea pasiköma. Imo pö pata jötoolöma, maike mösökö tikinö i tiki pewö patilia lököma. Inatö kuanö, mösökö tiki mötalöna itipö pata pasionoi i tikipöna kama mo salolo ma apama" ![](https://cdn.door43.org/obs/jpg/360px/obs-en-33-05.jpg) "Aimo pö liki masitatö uli topa apapa imo pö kea asaköma. Imo pö patalonö 30 ai tikina mo salola kuki, ai tikina 60 mo salola kuki, ai tikina 100 mo salola kuki inatö kuama. ¡Wa sömöka kuowi wanö itö jini totio opa!" ![](https://cdn.door43.org/obs/jpg/360px/obs-en-33-06.jpg) Kamani wapamawi i töpönö itö jini tomöpo ma apama. Inatö kuaiaja Jesús nö tö wösö topa konö: "Tomotomomo liki i Tiosö japalowi itö. Pilitiso liki i sanöma tönö Tiosö japalowi itö jini jöta köle maike tö jini tomöpo mi ipaja sai toninö iana Tiosö japalowi itö josa ko sotalöwi itö." ![](https://cdn.door43.org/obs/jpg/360px/obs-en-33-07.jpg) "Masita töna mama kökö kua apa pasile i sanöma tönö Tiosö japalowi itö jininö a pi mönajapalo totio opawi ia pasiwö. Maike tö jatuka mi ipi itö tapa apa, töpö nasö suapala apa inatö kuaiaja ia liki a pasököa kopasowi itö." ![](https://cdn.door43.org/obs/jpg/360px/obs-en-33-08.jpg) "Masitatö uli mösököpö ipi i sanöma tönö Tiosö japalowi itö jini totio opatiwi ia pasiwö. Maike tö tatepo opaalötaja, pi kupalo opawi töjö, pilapalo opawi töjö, jitö ulina tö tama pi topa apawi töjö, itö pewö pina Tiosö pi ipawi itö ma kopaso. Inatö kuanö a wapo jötötia köle maike itö tamati mi ipö." ![](https://cdn.door43.org/obs/jpg/360px/obs-en-33-09.jpg) "Maike masitatö uli toita apö asawi i sanöma tönö Tiosö japalowi itö jinininö pitilita a pi ku totio opaö, toita api tö tama apaö ina a kuawi ia asawö" Ina Jesus kuma. *Mateo tököna 13:1-8, 18-23 tönaja; Marcos 4:1-8, 13-20 tönaja; Lucas 8:4-15 tönaja Tiosö nö tö tamanoi itö tosokama kule itö* ## 34. Jesús nö ai tikotö wösö nomatalo naitionoi itö https://openbiblestories.org/l/xsu/story-34/ ![](https://cdn.door43.org/obs/jpg/360px/obs-en-34-01.jpg) Jesús nö Tiosö kaikanamowi itö wösö nomatalo toitioma. Aitö wösönö: "Ai tönö kamani jikaliana mostaza tomotomo mo jilowai kuawi mo tökönoi ina Tiosö kaikanamo kua kötö. Mostaza mo osowai wani toti ipi i matö taö öpa waikia." ![](https://cdn.door43.org/obs/jpg/360px/obs-en-34-02.jpg) "Maike mostaza mowai patasoma tiki pata pepo opa ko kötö, tiki pata pe epö kötönö i tiki pokona salopö osowai lota sinimo opaö." Ina Jesus kuma. ![](https://cdn.door43.org/obs/jpg/360px/obs-en-34-03.jpg) Jesús nö aitö wösö nomoko sotanö: "Ai su tönö pantö takönö tö jölömowi itö tikiliköma tö pewö tikilia toitakö kuawina ina Tiosö kaikanamowi itö kua kötö" Ina a kuma. ![](https://cdn.door43.org/obs/jpg/360px/obs-en-34-04.jpg) Aitö wösö nomoko sotama: "Ai tönö ai jikaliana ai wanitö noa api tö sosamaköma. Ai sanöma tönö itö talalönö ia tö sosa sapa ko sotamaköma. A pi mönaja apa salo i jikalia noa tapalöpö töna kamani matijitö pewö kule itö pewö noa tapamanöma. Itö kuawina ina Tiosö kaikanamo kua naio kötö." Ina a kuma. ![](https://cdn.door43.org/obs/jpg/360px/obs-en-34-05.jpg) "Perla tö toita api itö noa apö kulena ina Tiosö kaikanamo kua naio kötö. Perla töpö noa tamawi ianö inisimötö talalönö itö noa tapalöpö töna kamani matijitö pewö noa tapamanöma" Ina Jesus ku naioma. ![](https://cdn.door43.org/obs/jpg/360px/obs-en-34-06.jpg) Itö nojana, sa toita apö asawö ai töpö pi ku upanö ai töpö wanipo opawi i töpönö tö jinipö töna Jesús nö aitö wösö nomo kotanö: “Kokamotawi a sai patana Tiosö na polakapi wano töpö japalotaso piasalo töpö julasolöma. Aia waninö sitipa sua löatalowi a kuo pasioma, aia waninö Tiosö simowi itö wapamawi a kuo pasioma.” ![](https://cdn.door43.org/obs/jpg/360px/obs-en-34-07.jpg) “Tiosö simowi itö wapamawi ia japalonö: "Topaköle, Tiosö, ai sanöma töpö wanisana apanö, töpö tomömo opaö, toita api tö tama mi ipö, tikotö suna töpö mamo soa pöatalo opaö, ji sitipa sua löatalowi ia kua kuawinaja ina sa kua naio pasio mi ipö.’" ![](https://cdn.door43.org/obs/jpg/360px/obs-en-34-08.jpg) “Ina sa kuanö, sami semana töna polakapi sa pi iapalo mi ipi sa kutaö, sitipa, matiji töjö satö pewö suawi 10 i satö pewö tapalönö kauna sami satö totota sinimo sotio ina sa kua sotia köle. Ina a kuma.” ![](https://cdn.door43.org/obs/jpg/360px/obs-en-34-09.jpg) “Maike sitipa sua löatalowi ia öpa paja apa pasio tasoma, jituamö tö möatala ma apama. Tö mö ösatala pölanö kunumai kama amösö puusinö a kotopö söo pölanö: "Tiosö sa ote ta konö, sa wanisana apama." Ina Tiosö na a japalo ku pasioma." ![](https://cdn.door43.org/obs/jpg/360px/obs-en-34-10.jpg) Itö nojana: "Pitilitö saina sa ku piaköle, Tiosö nö sitipa sua löatalowi ia jininönö a ote ta konöma. Maike Tiosö simowi itö wapamawi ia japalo jini wani ipa pasioma. Sa kasija apa makö pi ku upawi Tiosö nö i makö utitiama piasalo, makö ote tamowi Tiosö nö i makö kasiapalama asa piasalo.” Ina Jesus ku sotama. *Mateo tököna 13:31-33, 44-46 tönaja; Marcos 4:30-32 tönaja; Lucas 13:18-21; 18:9-14 tönaja Tiosö nö tö tamanoi itö tosokama kule itö.* ## 35. Pöanö tö ote taö öpanoi itö https://openbiblestories.org/l/xsu/story-35/ ![](https://cdn.door43.org/obs/jpg/360px/obs-en-35-01.jpg) Aitö wakalana, Jesús nö sateje epi, sitipa sua löatalowi i töpö, ai töpö wanisana apawi töpö, töpö wapamatima. ![](https://cdn.door43.org/obs/jpg/360px/obs-en-35-02.jpg) Ia Tiosö simowi itö wapamawi i töpö ju naile i töpönö, wanisanatö tamawi i töpöna Jesús noimo pöle itö tanö töpö japalo pi wasa apa pasioma. Inatö kuaiaja Jesús nö itö wösö sotama. ![](https://cdn.door43.org/obs/jpg/360px/obs-en-35-03.jpg) “Ai samöma toni polakapi ulu kökö kuoma. Kamani pöanaja: '¡Japa, ipatö kupo piale itö pewö pio sota pasio!' Kamani ula osa kuiaja, kamani pöanö polakapi kamani ulu kököna tö pewö salekea sotalöma.” ![](https://cdn.door43.org/obs/jpg/360px/obs-en-35-04.jpg) “I ula osanö kamani itö pewö sulönö tö paja apa tasopamö a jua sotasolöma, iamö a kua wanisana apanö kamani i sitipa pewö jötötölö tasoma.” ![](https://cdn.door43.org/obs/jpg/360px/obs-en-35-05.jpg) "Inatö tama waikio noiaja, ia kule itö ulina oioitö waloköma, nitö noa tapö kamani sitipa ma apama. Inatö kuaiaja, kusi kököna nitö totoma löatalowi i kamani tatapajotö ta jötölalöma. A oi toti ipö kötönö i kusi kökö wani i nitö wa pi topa soa pöatalo opama.” ![](https://cdn.door43.org/obs/jpg/360px/obs-en-35-06.jpg) "I kama japalo sapa konö: '¿I kapili satö tamati köle? Ipa jaoani tatamowi i töpö nitö kua apa asalata, jisia sa oi wasiso pasitia köle. Ipa jaoanina sa jua kononönö au tatao tili sa kua naipalo nökö sa kuko taso piaköle.' Ina a kuma" ![](https://cdn.door43.org/obs/jpg/360px/obs-en-35-07.jpg) “Inatö kuanö, kamani jaoani saiana a jua sapa konasolöma. A ju paja apa solatita kamani jaoaninö a ta tolejelalönö a ote ta apa koma. Kamani ulana a löla tolejekönö a jasokoli, a juku ususuli inatö tama löo tasoma.” ![](https://cdn.door43.org/obs/jpg/360px/obs-en-35-08.jpg) “Kamani ula ki: 'Tiosö, kawa, ina kipi maköna sa wanisana apa köle. Kamisa liki au ulu sa kupo kota kili ipawö' Ina a kuma.” ![](https://cdn.door43.org/obs/jpg/360px/obs-en-35-09.jpg) “Maike kamani ai tatao tili tönaja: "¡Jaloösö toita api ösönö ipa ula jalomakö! Pila amösö jiso olana söpalasö toi taki, a amösökö jalomaki ina a kua. ¡Itö nojana jaka jokotoma toita api wa söa sotalö pökö, ipa ula nomasoma, maike a kua kopaso ke! ¡A motösoma, maike a tapamo konaso ke! Itö pina makö pi mönajapalo piaköle.’ Ina kamani pöa kuma." ![](https://cdn.door43.org/obs/jpg/360px/obs-en-35-10.jpg) “Inatö kuanö, sanöma töpö pi mönajapalo kolo kupasoma. Tö pi tatejepaso noiaja kamani ula pata tatamoti tasoma a waloko solöma. Töpö amamo jininönö, kapilitö kuatiköle a pi ku upama.” ![](https://cdn.door43.org/obs/jpg/360px/obs-en-35-11.jpg) “Kamani poosa waloa kokönoi itö pina töpö pi mönajapaloti pöle itö taöpalonö a jiso opa salo saiana a lisipo wani ipa pasioma. Kamani jaoani atupalonö kamani ula pata lisia naipasolöpö töna a ote tamoma maike, kamani ula lisipo wani ipama.” ![](https://cdn.door43.org/obs/jpg/360px/obs-en-35-12.jpg) “Kamani pöanaja: ‘¡Itö inama pewöna kawa pina sa tatamo sotiaköle! Wa kili taö sotiaköle, inatö kuaköle maike, ipa sötapalowi i töpö kaina sa pi mönajapalo pasiopö töna ai cabra wa osowai pio pasio pöta mi ipö. ¡Maike ji au ulanö au sitipa jötöta wanisana soa pötalönö, saiana a waloa koköiaja, jaka jokotoma toita api ia pina wa söa soa asatalö ke!’ Ina kamani ula pata ku pasioma.” ![](https://cdn.door43.org/obs/jpg/360px/obs-en-35-13.jpg) “Kamani pöa japalo jötonö: ‘Ipa ula, kamisa kotöna wa kua asa waikitia köle. Ipatö pewö kule i autö pewö pasi waikiwö. Maike au poosa pina makö pi mönajapaloiaja tö topa apa asa köle, a nomasoma, maike juki ipi a toi ipö kuwö, ¡A motösoma, maike juki ipi a tapamo konaso ke!’ Ina a kuma” *Lucas tököna 15:11-32 töna Tiosö nö tö tamanoi itö tosokama kule itö* ## 36. Jesús pewö mömo tikopöpasonoi itö https://openbiblestories.org/l/xsu/story-36/ ![](https://cdn.door43.org/obs/jpg/360px/obs-en-36-01.jpg) Aitö wakalana, Jesus nö tikiamö 3 kamani wapamawi töpö kai julasolöma, Pedro, Santiago, Juan ina kipi töpö. (Juan a jilo kui i Jesús mai opamanönoi ia maikötö.) Tiosö na töpö japalo piasalo jiima töna töpö julasolöma. ![](https://cdn.door43.org/obs/jpg/360px/obs-en-36-02.jpg) Tiosö na Jesus japalotitaja, pila motoko kulena a juku wakala kua totipaso, jokotö si kulena kamani jaloösö ausi kua totipaso inatö kuama, jitö ulina ai tönö ösö ausi tapa mi ipi, ina ösö ausi ku totio opama. ![](https://cdn.door43.org/obs/jpg/360px/obs-en-36-03.jpg) Inatö kuanö, Moises, Tiosö kai wösöwi i Elias ina kipi töpö tapamonasoma. Sutu totipa jitö ulina ji wano töpö kuo soma waikioma tö kulata jitö kuama. Jerualen tö ulina Jesús söpo piale itöna töpö japalotima. ![](https://cdn.door43.org/obs/jpg/360px/obs-en-36-04.jpg) Jesús na Moises, Elias ina kipi töpö japalo pasilataja: “Samakö ju naile itö topa apa köle. 3 sai samakö ta pi topa apa köle, sami awa sai, sami Moises ia sai, sami Elias ia sai ina.” Ina Jesús na Pedro ku pasioma. Pedro nö tö taimi ipö pölanö maike a ku puoma. ![](https://cdn.door43.org/obs/jpg/360px/obs-en-36-05.jpg) Pedro japalo soa pasilataja, ölasitö wakala api tönö töpö jalopalöma, i ölasitö mötalöna tö japalonö: "Ji ipa Ulu sa pi ipawi ia. Iana sa pi mönaja apa köle. Ia jini totio opaje.” Inatö kuma. 3 i töpö wapamawi i töpö kili totia apa salo töpö kelasoma. ![](https://cdn.door43.org/obs/jpg/360px/obs-en-36-06.jpg) Inatö kuaiaja Jesus nö töpö jöpa konö: “Pö kiliti. Pö joka kopalo.” A kuma. I töpönö tö möpala köle maike sami ipi Jesús öpako sisama. ![](https://cdn.door43.org/obs/jpg/360px/obs-en-36-07.jpg) Jiima töna Jesús nö kamani 3 wapamawi i töpö kai itua kopasoma. Ia i töpönaja: “Jisa tö kuaje aitöna itö wösö paio jatoti. Sa söpaso, sa toia kopaso ina sa kuapö tö jöka apa waikia köle. Itö nojana, matö wösö sisa pökö.” Ina Jesús kuma. *Mateo tököna 17:1-9 tönaja; Marcos: 2-8 tönaja; Lucas 9:28-36 tönaja Tiosö nö tö tamanoi itö tosokama kule itö.* ## 37. Lázaro nomasoma maike Jesús nö a toia kopamanönoi itö https://openbiblestories.org/l/xsu/story-37/ ![](https://cdn.door43.org/obs/jpg/360px/obs-en-37-01.jpg) Aitö wakalana, Jesus nö pe epi Lázaro kamakali ipi itö jininöma. Lázaro, polakapi kamani pasi kökö, Maria, Marta i Jesús noimowi kamani i töpö sai kuoma. Jesús nö itö jininönö: “I kamakali tönö a söpa maikötö, maike Tiosö pata lotete epi itö mömapö itö pasi pötawö.” A kuma. Jesús nö i töpö pi ipama maike polakapi tö wakalana a opioko paioma. ![](https://cdn.door43.org/obs/jpg/360px/obs-en-37-02.jpg) Polakapi tö wakala jasupasoiaja: “Judea tö ulina makö ju kota piakölati.” Kamani wapamawi i töpöna Jesús kuiaja: “Maike, wapamawi ia,” Kamani wapamawi i töpö ku jötonö, “¡Iamö makö ju tasoiaja sanöma töpönö wa söpa pi topa apa köpili! Ina töpö kuaiaja: "Makö noimowi i Lázaro mia kölati, i sa nama ko piakölati." Ina i töpöna Jesús kuma. ![](https://cdn.door43.org/obs/jpg/360px/obs-en-37-03.jpg) Inatö kuaiaja Jesus naja: “Kaikana, Lázaro mia pötia köle manukule a topa kopaso kötö.” Ina kamani wapamawi i töpö kuiaja: “Lázaro nomasoma. Kamisana pitilitaja makö pi ku upapö töna ia sa ma apanoi itöna sa pi mönaja apa köle.” Ina Jesús ku salilia sotasoma. ![](https://cdn.door43.org/obs/jpg/360px/obs-en-37-04.jpg) Lázaro kupasonoi itö ulina Jesús waloköma, 4 wakala töna Lázaro nomasoma tö kuo waikioma. Jesús jutasopa Marta ikua lökönö: “Kaikana, jisa wa kuoma könaja ipa pasia noma ma apanoi kipi. Maike Tiosö na ai watö naka kukema tö tota sotakö kötö, sa pi ku totia apa köle.” Ina a kuma. ![](https://cdn.door43.org/obs/jpg/360px/obs-en-37-05.jpg) Iana Jesus ki: “Toitama kowi i sa, toi ipi i sa. Pitilita kamisana aiwa pi ku upawi wa noma pölata maike wa toia kopaso piasalo. Pitilita kamisana aiwa pi ku upawi i wa noma pasio maikötö ¿Itöna pitilita wa pi ku köle?” Ina Jesús kuiaja. “¡Auie Kaikana! Kawa liki Tiosö Ulu wa, wa Saipalönoi i wa, sa pi ku totia apa köle.” Ina Marta ku jötoma. ![](https://cdn.door43.org/obs/jpg/360px/obs-en-37-06.jpg) Itö nojana, Maria waloa nomötakö solöma. Jesús amösö öpapa a kea sotakönö: “Kaikana, jisa wa kuoma könaja ipa pasia noma ma apa noi kipi.” Ina a kuma. Jesús nö tö jininö: “¿Witia Lázaro ma taköma?” A kuiaja: “Nomawö tö patilitawi iakö. Wa ju kösölönö tö möso.” I töpö ku sotama. Inatö kuaiaja Jesús ököma. ![](https://cdn.door43.org/obs/jpg/360px/obs-en-37-07.jpg) A noma titile i mama kaika kuoma i taka kolona mama pata la löoma. Ia Jesús walokönö: “I mama jakoa kopalö.” A kuma. Maike: “4 kawala töna a nomasoma tö kua waikia köle. A jötani ipö waiki kötö.” Ina Marta ku löoma. ![](https://cdn.door43.org/obs/jpg/360px/obs-en-37-08.jpg) Jesús japalo jötonö: “¿Pitilita kamisana wa pi ku upa könaja Tiosö lotete epi i watö mö totio opa kötö, ina kauna sa ku ma apa aluke?” Ina a kuiaja i töpönö mama pata jasia kopalöma. ![](https://cdn.door43.org/obs/jpg/360px/obs-en-37-09.jpg) Inatö kuanö, Jesús nö jutumösökö mö sotanö: “Japa kaunö sa jini pöle itö toita apö. Kaunö sa jini sotiowi i satö taö öpa waikia köle, maike kaunö sa simöpalönoi itöna pitilitaja ji sanöma töpö pewö pi kupö töna sa ku pöa köle.” Ina a kutalonö: “¡Lázaro, a atua kopalo!" Ina a ku sotama. ![](https://cdn.door43.org/obs/jpg/360px/obs-en-37-10.jpg) ¡Lázaro atua kopasoma! Jaloösö asawösönö a oka asoko totio soama. Jesús japalonö: “¡A oka asokole i toto kusa kopalönö a jula kopalö!" I töpöna ina a ku sotasoma. Itö aipa apa pöle itö pina pitilita Jesús na ai Judio tili töpö pi ku totilasoma. ![](https://cdn.door43.org/obs/jpg/360px/obs-en-37-11.jpg) Maike, sateje epi sanöma töpönö Jesus pi ipa asale itöna, judio töpö kaiakananö Tiosö japalowi itö wapamawi i töpö pi jiso totia apa salo, Jesús, Lázaro ina kipi töpö söpalöpö töna töpö pi kupalo opama. *Juan tököna 11:1-46 töna Tiosö nö tö tamanoi itö tosokama kule itö* ## 38. Jesús namo simökönoi itö https://openbiblestories.org/l/xsu/story-38/ ![](https://cdn.door43.org/obs/jpg/360px/obs-en-38-01.jpg) Itö inama pewöna, Judio tili töpönö Pascua tö tama sinimoma. Egipto tö ulina Tiosö nö kolo pata töpö ta kopalönoi itö pina töpö pi mönajapalo sinimowi itö wakala kuoma. Jesús nö Tiosö wösö kolo kupasonoi itöna 3 inamatö kupasopö tö jöka apa waikiataja, kamani wapamawi i töpönaja, Jerusalen tö ulina kamaka kaina Pascua satö jasuama pi topa apa kölati, ia sa söpaso tasopö tö kua köle, ina Jesús kuma. ![](https://cdn.door43.org/obs/jpg/360px/obs-en-38-02.jpg) Jesús nö töpö wapamawi ia sami ipi aia wani Judas a jilo kuoma. Judas nö i töpö i sitipa pi suapalawi a kuo pasioma, ianö sitipa pi ipa sisa pasio kötönö itöna sitipa tomöma jato pasitioma. Jerusalen tö ulina Jesús nö kamani wapamawi i töpö kai waloköiaja, judio töpö kaikanana Judas jua sotalolönö sitipa pina Jesús totoköpö töna a japalo pasio tasoma. Jesus liki a Saipalönoi ia maikötö judio töpö kaikana pi ku upa kötönö a söpa pi topa apawi, Judas nö itö taö öpa waikioma. ![](https://cdn.door43.org/obs/jpg/360px/obs-en-38-03.jpg) Judas nö Jesus namo simököpö töna judio töpö i kaikana pata tönö 30 sitipa mano tota taköma. Tiosö kai wösöwi i töpö kunoi itö sai kua jötoma. Topa köle Judas ku jötoma, i sitipa sulönö a jua sotasolöma. Ianö Jesus totoköpö töna tö topa tapala kolo kua sotasoma. ![](https://cdn.door43.org/obs/jpg/360px/obs-en-38-04.jpg) Jerusalen tö ulina, Jesus nö kamani wapamawi i töpö kaina pascua tö wakala jasuamatima. Pascua tö wakala pina töpö iapalopaja Jesus nö pantö sulönö tö jusitia sotalönö: “Jitö oaje. Kamaka pina sa sai pewö toto piale itö. Sa taö öpa sotiopö töna i matö tama sinimo pökö.” Ina a kuma. A söpo piale i töpöna Jesus nö itö wösöma. ![](https://cdn.door43.org/obs/jpg/360px/obs-en-38-05.jpg) Itö nojana Jesus nö mokota sua ösa sotalönö: “Jitu koaje. Tutetö japalo topamo nomo kowi itu, kamaka ote ta kopö töna Sa iipö löso piale itu. Sa taö sotiopö töna ina matö tama sinimo pökö.” Ina a kuma ![](https://cdn.door43.org/obs/jpg/360px/obs-en-38-06.jpg) Kamani wapamawi i töpönaja: “Jisa aiwanö sa namo sima piaköle.” Jesus ku nomo sotama. I töpö pi kilijo opa salo, witipilanö itö tama pasio piaköle töpö kupaloiaja: “Aiwana ji pan satö asawösö totoköwi i wanö sa namo sima piaköle.” Ina Jesus kuma. Ina a kunö Judas na pantö tota sotaköma. ![](https://cdn.door43.org/obs/jpg/360px/obs-en-38-07.jpg) Judas nö i pantö oa toitalöiaja, iana Satanas wani titia sotaköma. Judas atua sotalonö judio töpö kaikanana Jesus namo simamo jua sotasolöma. Tö mumi ipa waikioma. ![](https://cdn.door43.org/obs/jpg/360px/obs-en-38-08.jpg) Töpö iapalo mapalonö, Olivo tö jiu patana Jesus nö kamani wapamawi i töpö kai jua sotasolöma. I töpönaja: “Jitö mumina kamakanö sa takölöpö tö kua köle. 'Oveja kökö löapalawi i sa ninimanöiaja kamani oveja kökö pewö salekepaso piasalo.' Ina tosokamatö ku köle" Ina Jesus kuma. ![](https://cdn.door43.org/obs/jpg/360px/obs-en-38-09.jpg) Ina a kuiaja: “¡Aipö waninö wa ta pasikölöma maike, wa ta pasioolö maikötö!” Ina Pedro kuma. Pedro naja: “Satanas nö makö pewö tapo pi topa apa köle, maike, Pedro pitilita wa pi ku salilia totiopö töna kawa pina Tiosö na sa japalo waikitia köle. Inatö kua pölataja, jitö mumina, kalaka wani komö pialataja, I sa wani mö taimi ipö 3 wa pi ku kua piaköle.” Ina Jesus kuma. ![](https://cdn.door43.org/obs/jpg/360px/obs-en-38-10.jpg) Ina a kuiaja: “¡Sa söpasopö tö kua pölata maike I sa wani mö taimi ipö sa ku maikötö!” Ina Pedro ku satea jötoma. Ina kamani ai töpö ku naio sotama. ![](https://cdn.door43.org/obs/jpg/360px/obs-en-38-11.jpg) Getsemani aitö uli jilo kuawi iamö Jesus nö kamani i töpö kai jua nomösolöma. Sai toninö makö wapama ma apapö töna Tiosö na pö japalo totio opa, ina kamani wapamawi i töpöna Jesus kuma. Ina a kutalonö kama sai pina Tiosö na a japalomo jua sotasolöma. ![](https://cdn.door43.org/obs/jpg/360px/obs-en-38-12.jpg) “Japa, watö pi ipa könaja, ji mokotana wasisamawi tu kule i satu koa ma apapö satö pi ipa köle. Maike, sanöma töpö wanisana apawi i wa töpö ote ta konöpö töna ai tikotö tama nomopö tö ma apaiaja, Watö pi ipawi tö tama.” Ina 3 Jesus pi ku kuama. Jesus pi kupalo opama, a wakeje keopo pöle i iitu kuina itu kuoma. A pi ku loteteapalo kopö töna Tiosö nö a simötawi ia waloa jötökö solöma. ![](https://cdn.door43.org/obs/jpg/360px/obs-en-38-13.jpg) Tiosö na Jesus japalo matalo paiopaja, kamani wapamawi i töpöna a juko soatalo opa paio tasoma, maike i töpö mijitioma. 3 a ju pi kua kotale itaja: “¡Pö nakono! Sa namo sima pöle jisa ia ju waikia köle! Ina a kuma. ![](https://cdn.door43.org/obs/jpg/360px/obs-en-38-14.jpg) Judas nö judio töpö kaikana, löapalawi töpö, sateje epi ai sanöma töpö ina kipi töpö kai walo solöma. I töpönö poa, jitiji, inatö sua tapalama. Jesus na Judas juo sota kösölönö: “Wapamawi ia,” A kutalonö a juku ususa sotalöma. Judio töpö kaikananö a taöpalonö a julöpö töna itö tamama. Inatö kuaiaja: “¿Judas, kaunö sa juku ususulönö sa namo sima alukule?” Ina Jesus kuma. ![](https://cdn.door43.org/obs/jpg/360px/obs-en-38-15.jpg) Löapalawi i töpönö Jesus jupala pasilataja, Pedro nö kamani poa löka sotalönö judio patatö kaikana simo pasiowi ia sömöka patipalöma. Pedro naja. “¡Au poa ta topa kokö! Sa löapalapö töna ipa Jaoaninö töpö simawi i sa töpö naka sota kötö. Maike ipa Jaoani simonoi i satö tama pi topa apa sisa köle.” Ina Jesus ku löoma. Itö nojana Jesus nö i wanotö sömöka ta koköma. Jesus julöiaja kamani wapamawi i töpö pewö toka salekepasoma. *Mateo tököna 26:14-56 tönaja; Marcos 14:10-50 tönaja; Lucas 22:1-53 tönaja; Juan 12:6; 18:1-11 tönaja Tiosö nö tö tamanoi itö tosokama kule itö* ## 39. Jesus tamapö tö saipalö piasalo a sulölönoi itö https://openbiblestories.org/l/xsu/story-39/ ![](https://cdn.door43.org/obs/jpg/360px/obs-en-39-01.jpg) Tö mumi tateo opa waikioma. Jesus na Tiosö saia totiapalawi ia kaikana japalopö töna löapalawi i töpönö iawani saiana a kai jua sotasolöma. I töpö nojana pi pasökö ipi Pedro ju nojapalo jaioma. Saia osimöna Jesus kai lisipasolöiaja, koataka kasöna atua Pedro pumo jia pasipasoma. ![](https://cdn.door43.org/obs/jpg/360px/obs-en-39-02.jpg) Judio töpö kaikananö Jesus tamapö töna, saia osimöna tö saipa piama. Sanöma töpö wöo jolisimo opawi, i töpönö töpö taipalöma, i töpönö Jesus kuawi tö jolisi wösö nomatalo jötoma. Maike, i töpönö tikotö wösö nomatalo opa puoma, inatö kua kötönö judio töpö kaikananö Jesus tamapö tö jatuko ma apama. Jesus jatolo pasio ma apama. ![](https://cdn.door43.org/obs/jpg/360px/obs-en-39-03.jpg) Itö pewö nojana, Tiosö saia totiapalawi a kaikananö Jesus möa salilia sotalönö: "¿Tiosö pata toi ipi ia pata i uluwa, wa saipalöma wa? Kamisamaköna itö wösö." Ina a kuma. ![](https://cdn.door43.org/obs/jpg/360px/obs-en-39-04.jpg) "Kamisa sai, kamakanö Tiosö kotöna sa lole i matö tapaö, jutömösökö patana sa itipoiaja matö tapaö ina makö kua piasalo." Ina Jesus ku jötoma. Tiosö saia totiapalawi ia kaikana jiso toia apa salo kamani jaloösö kakapalönö, Tiosö simowi itö wapamawi i töpö naja: "¡Aitö wöo kotapö tö pimo ma apöle!" Tiosö i Ulu sa kama sai kuiaja matö jinia waikilö ke. ¿Wina makö pi ku köle?" Ina a kuma. ![](https://cdn.door43.org/obs/jpg/360px/obs-en-39-05.jpg) "¡Kama waninö tö taia pasipalöma a wani söpalö!" Ina Tiosö simonoi itö wapamawi i töpö pewö kupalo sotama. Inatö kuanö, i töpönö Jesus mamo sosa sotamakönö, a nakija sotamani, a sö sota, ina a tamanö iana töpö ikiapalo totio opama. ![](https://cdn.door43.org/obs/jpg/360px/obs-en-39-06.jpg) Atua Pedro opia jaia soa pasilataja, i töpöna ai sutö nokapalo naiowi anö a talalönö: "¡Jesus kaina kawa ju naio köpili! Ina a kuiaja, jolisi Pedro ku puoma. Pi tatejepaso noiaja, ina ai sutö ku kotaiaja, jolisi Pedro ku kotasoma. Itö nojana kotawö: "Polakapi makö liki Galilea tili makö kötönö Jesus na wa nokapalonoi i samatö taö öpa waikia köle." Ina ai töpö kupalo opa nomoma. ![](https://cdn.door43.org/obs/jpg/360px/obs-en-39-07.jpg) Inatö kuaiaja, pitilitö saina sa ku köle Pedro kunö: "¡Ji sa wani mö taö öpa könaja kamisana Tiosö nö wanisanatö tama totio opa pökö!" Ina a ku sotama. Itö nojana sotawö ai kalaka wani koma sotasoma, ia Jesus nomöjöpalonö Pedro möa sotalöma. ![](https://cdn.door43.org/obs/jpg/360px/obs-en-39-08.jpg) Pedro jua kononönö kama nisi tamo sapamo konö a ököpalo totio opama. Inatö kuataja, judio töpö kaikananö Jesus söpa piale i Judas nö a namo simökönoi ianö itö tapa apama. Itöna Judas pi jonipo opa salo tikiamö a julolönö kama söa pasia kopaso tasoma. ![](https://cdn.door43.org/obs/jpg/360px/obs-en-39-09.jpg) Itö janata janasaita, judio töpö kaikananö romano tilitö kaikana Pilato na Jesus kai julasolöma. Wa jiopa apama Jesus na ina Pilato kunö a wani söpalö pökö ina i töpö pi ku upama. Jesus naja: "¿Kawa liki judio töpö i kaikana wa?" Pilato kuma. ![](https://cdn.door43.org/obs/jpg/360px/obs-en-39-10.jpg) Jesus ki: "I wa ku waikia köle, maike masitatö ulina sa kaikanamowi sa pasi maikötö. Inatö kua könaja kamisa pina ipa sa töpö simawi i töpö söso waikilapi. Pitilitö saina Tiosö kuwi i satö wösöpö töna ji masitatö ulina sa juma. Pitilitö sai pi ipawi i töpönö sa jiniwi sa." Ina a ku jötoiaja: "kapilitö liki i pitilitö pasiwö?" ina Pilato kuma. ![](https://cdn.door43.org/obs/jpg/360px/obs-en-39-11.jpg) Jesus na a japalo mapalonö, sanöma töpöna Pilato japalo nomo sotanö: "Ji wanotö wanisanawi satö tapa ma apöle." Ina a kuma. Maike: "¡Jitina a wani saumakö!" Ina Tiosö simowi itö wapamawi i töpö kaina sateje epi sanöma töpö komö kuto puoma. "Ai wanisanatö ma apöle." Pilato ku jöto kotama. Maike i töpö komöto satia apa asa puoma. Inatö kuaiaja: "¡Ai wanisanatö ma apöle!" Tres tö pina Pilato ku jöto kotasoma. ![](https://cdn.door43.org/obs/jpg/360px/obs-en-39-12.jpg) Sanöma töpö pewö kokamo totisopö töna Pilato kili ipa waikitama, itö pina kama löapalawi i töpönö jitina Jesus saumaköpö töna a namo sima sotaköma. Roma tili töpö löapalawi i töpönö Jesus soa totilali, kaikanatö jaloösö jaloa sotamaki, pila jena kaikana tönö tö tapowi mösökötö sinonö inisimötö tapalönö Ia jena tö ta naia sotaki ina töpö kuama. Itö nojana: "¡Pike, judio töpö i kaikanatö!" Ina töpö kutinö töpö ikiapalo totio nomotioma. *Mateo tököna 26:57-27:26 tönaja; Marcos 14:53-15:15 tönaja; Lucas 22:54-23:25 tönaja; Juan 18:12-19:16 tönaja Tiosö nö tö tamanoi itö tosokama kule itö* ## 40. Jitina Jesus saumakönoi itö https://openbiblestories.org/l/xsu/story-40/ ![](https://cdn.door43.org/obs/jpg/360px/obs-en-40-01.jpg) Jesus na töpö ikiapalo mapalonö, jitina a saumakö tasopö töna a sua nomö lölöma. Jitina a saukönö a noma piale i kamana iti maua sotamaköma. ![](https://cdn.door43.org/obs/jpg/360px/obs-en-40-02.jpg) Löapalawi i töpönö "Calavera" tö uli jilo kuawi ia jitina pila amösöna tö satimaki, a amösökö satimaki inatö tamama. Maike: "Japa, i töpö ote talö tö taimi ipö kötönö itö tama pöa köle." Ina Jesus ku sisama. Ai jiti patetena "Judio töpö i Kaikanatö" inatö tosokama kulatö Jesus jösökana tö pi saumaköpö töna Pilato simoma. ![](https://cdn.door43.org/obs/jpg/360px/obs-en-40-03.jpg) A sua asasowi ianö Jesus jalonoi ösö sulöpö töna ai sapökowi toina löapalawi i töpö sapökoma. I töpö sapökonö: "I töpönö ipa jaloösö salekelalöma, ipa jaloösö pina töpö sapökoma" Ina sutu upa tö ku waikionoi itö kua totio opa jötoma. ![](https://cdn.door43.org/obs/jpg/360px/obs-en-40-04.jpg) Polakapi oka töpö mötalöna Jesus saumaköma. Jesus na aia pi wani wasöa pasioma, maike aia wani ki: "¿Tiosö na wa kili pasio mi ipö kia? Makö jiopa apawi makö pasiwö maike jianö wanisanatö tama pasio ma apama." Ina a wani kunö, Jesus naja: "Wa kaikanamo kopa kaunö sa taö öpa naiopö satö pi ipa köle." Ina a ku sotama. Inatö kuaiaja: "Juki ipi, kamisa kaina topa apapa wa kuo naioko sota piaköle." Iana ina Jesus ku sotama. ![](https://cdn.door43.org/obs/jpg/360px/obs-en-40-05.jpg) Judio töpö kaikana, sanöma töpö pewö, Jesus na töpö pi wasöa totio opanö: "¡Tiosö i Ulu wa salo i jitina wa itua kopalonö Kama nö löa kopalo! Ina wa kua könaja, pitilita kauna samakö pi ku sisa piasalo." Ina töpö kutoma. ![](https://cdn.door43.org/obs/jpg/360px/obs-en-40-06.jpg) Inatö kuanö, mötala tö motoko wöa soa köle maike itö uli pewö muma totiköma. Tres tö motokona tö muma toitioma. ![](https://cdn.door43.org/obs/jpg/360px/obs-en-40-07.jpg) Inatö kuanö: "¡Tö pewö ma waikipaso ke! Japa, kaunö Sa janepolepö ta konö." ina Jesus komö kuma. Itö nojana a je wöla sotakönö A janepolepö ikua koköma. Ia nomasoiaja, tö uli pata kalipalolasi, kokamotawi ia sai osimö patana jaloösö pata sawowi ösönö Tiosö kuta pasiowi itö osimö lapo pasile, ösö mötalö pata kakatotipasi, inatö kuama, koma tö kakapalonö ösamö tö kakama wöo totio lasoma. ![](https://cdn.door43.org/obs/jpg/360px/obs-en-40-08.jpg) Jesus nomalonö Tiosö na sanöma töpö walopö töna pilitiso jakopalöma. Löapalawi Jesus na ia mamo löapalo pasile ianö tö pewö kua pöle itö pewö tapala totio opanö: "Pitilitö saina, ji wano tönö ai wanisanatö tama ma apama. Ia liki Tiosö i ula sai kuo totio opama." Ina a kuma. ![](https://cdn.door43.org/obs/jpg/360px/obs-en-40-09.jpg) Inatö kuanö, Jesus Saipalöma polakapi judio töpö kaikana pi ku upawi i Jose, Nicodemo ina kipi töpönö Pilato na Jesus noma naka konöma. I töpönö jaloösönö a pewö jalopalönö mama kaikana a titiköma. I töpönö i takana mama pata la sotaköma. *Mateo tököna 27:27-61 tönaja; Marcos 15:16-47 tönaja; Lucas 23:26-56 tönaja; Juan 19:17-42 tönaja Tiosö nö tö tamanoi itö tosokama kule itö* ## 41. Tiosö nö Jesus toia kopamanönoi itö https://openbiblestories.org/l/xsu/story-41/ ![](https://cdn.door43.org/obs/jpg/360px/obs-en-41-01.jpg) I töpönö Jesus saua waikimakö noiaja, pitilita judio töpö kaikana pi ku pasio mi ipi, i töpö ki: "I Jesus wani ki tres wakala töna sa toia kopaso piasalo ina a jolisi wani ku köpili. Kamani wapamawi i töpönö a noma wani toma konönö a toia kopasoma pö jolisi wani ku ma apapö töna a patilile ia aitö mamo löapalopö samatö pi ipa köle." Ina Pilato na töpö kuma. ![](https://cdn.door43.org/obs/jpg/360px/obs-en-41-02.jpg) Pilato ki: "Ai ma töpö lömakönö pö kua pasio." Ina a ku jötoma. Inatö kuanö aitönö a noma toma ma apapö töna, i takana mama la aköka topa totimakönö löapalawi töpö löa naia sotamaköma. ![](https://cdn.door43.org/obs/jpg/360px/obs-en-41-03.jpg) Jesus noma titikönoi itö janata mota mapowi tö wakala kuoma, itö wakalana nomawötö titiopa ai judio tö ju paiopö tö pi mi ipi tö kuoma. Inatö kuaiaja mota mapowi itö wakala jasumakönö aitö janata janasaita, Jesus nomana taputapu tu jisamo toita api tu juluka koköpö töna ai su töpö jusupalo janama. ![](https://cdn.door43.org/obs/jpg/360px/obs-en-41-04.jpg) Ia tö uli pata kalipalo soa pötasoma. Tö samisamimoiaja tö wakala kua kuawina ina Tiosö nö a simötawi ia kui jutumösököna a kuowi a tapamo soa pötasoma. Ianö mama kaika lale itö jakoa kopalönö i ma jösökana a loa sotaköma. Ia töpö mamo löapalo pöle kilikili tönö masita töna i töpö nomaso kuawina ina töpö kupalonö töpö kelasoma. ![](https://cdn.door43.org/obs/jpg/360px/obs-en-41-05.jpg) Noma patilitawi ia i su töpö waloköiaja: "pö kilipaloti. Jisa Jesus ma apöle. ¡Ina Sa kua piasalo a ku waikioma kötönö, A toia kopaso ke! Makö lisipalonö tö mö." Ina Tiosö nö a simötawi ia ku löoma. I su töpö lisia jötöpalonö Jesus noma pakönoi ia tö mö sotama. ¡Ia A noma pa ma apama! ![](https://cdn.door43.org/obs/jpg/360px/obs-en-41-06.jpg) Itö nojana i su töpönaja: "Makö juakononönö, töpö wapamawi i töpöna 'Jesus toia kopasoke, Galilea tö ulina makö ju paita maiaja a ju soma piakömati' Ina pö ku kotö." Ina Tiosö nö a simötawi ia kuma. ![](https://cdn.door43.org/obs/jpg/360px/obs-en-41-07.jpg) I su töpö pi mönaja apa, töpö kili ipa ina töpö kuama. I su töpönö wapamawi i töpöna itö toita api itö wöamo lölako sotaköma. ![](https://cdn.door43.org/obs/jpg/360px/obs-en-41-08.jpg) I su töpönö wapamawi i töpöna itö wösömo ju koonöpa, i töpö suna Jesus tapamonasoma, inatö kuaiaja ia amösö öpapa i töpö maiko jitata sotaköma. I töpö su naja: "Pö kiliti. Makö julolönö ipa wapamawi i töpöna Galilea tö ulina pö julolo pö kutakö tö. I töpönö iamö sa mö taso pökö." Ina Jesus kuma. *Mateo tököna 27:62-28:15 tönaja; Marcos 16:1-11 tönaja; Lucas 24:1-12 tönaja; Juan 20:1-18 tönaja Tiosö nö tö tamanoi itö tosokama kule itö* ## 42. Jutumösököna Jesus Jua konasolönoi itö https://openbiblestories.org/l/xsu/story-42/ ![](https://cdn.door43.org/obs/jpg/360px/obs-en-42-01.jpg) Jesus toia kopasonoi itö wakalana, aitö ulina polakapi Jesus nö töpö wapamawi i töpö jutiilöma. töpö juulö pölanö Jesus na tö pewö kuanoi itöna töpö Japalotima. Ia Saipalönoi ia i töpö pi ku upama, maike, ¿A söa pasipalönoiaja wina töpö pi ku satea soa pasio piasalo? Kuataja, A toia kopasoma su töpö ku naia koa, inatö kuama. Pitilita töpö pi ku tomöpo ma apama. ![](https://cdn.door43.org/obs/jpg/360px/obs-en-42-02.jpg) I töpöna Jesus ju jöka naipalonö i töpö kaina a ju naiolöma, maike ia jatowö i töpö pi ku ma apama. I töpönaja kapili töna makö japaloti köle a kuiaja, i töpö ki, nojatö wakala pewö jasupasonoi itaja Jesus kaina toita api tö kuatinoi itöna samakö japaloti köle ina töpö ku jötoma. Tikotö ulina a kuowi anö Jerusalen tö ulina tö kuanoi itö taimi ipi ana samakö japalo jatoa alukule töpö pi ku upama. ![](https://cdn.door43.org/obs/jpg/360px/obs-en-42-03.jpg) Inatö kuaiaja Tiosö tosokama töna a Saipalöwi iana tö kuawi tö kule Jesus nö itö wösö sotama. A Saipalöwi ia wasisama totio opanö a söpalö piasalo, maike tres tö wakalana a toia kopaso piasalo ina Tiosö kai wösöwi i töpö kunoi, ianö i töpöna itö taöa kopamanöma. Itö ulina makö mio pökö töpö kunoi ia töpö walopataja, tö muma pia waikioma. ![](https://cdn.door43.org/obs/jpg/360px/obs-en-42-04.jpg) Polakapi i töpö kotöna Jesus kua naia paiköpö töna töpö japaloma, ia a kua naia jöta paiköma. Töpö iapalo piasalo töpö pewö loa topaköiaja, Jesus nö pan tö sulönö, Tiosö na topa köle a kutalonö tö jusitia sotalalöma. Inatö kuaiaja, töpö pi taoa kononö ji Jesus kowö töpö ku sotama. Maike iakö sotawö, i töpöna a mota ko sotaköma. ![](https://cdn.door43.org/obs/jpg/360px/obs-en-42-05.jpg) "¡Ji Jesus kuo ke! ¡Itö pina Ianö Tiosö tosokamatö wösöiaja makö kosiomopö sopi jaö öpa ke!" Ina polakapi i wano töpö kupaloma. Lope epi Jerusalen tö ulina i töpö juako sotasolöma. Töpö waloa kokötasonö: "¡Jesus toi ipö sowö! ¡Sama tapa ke!" Ina ai wapamawi i töpöna i töpö kuko tasoma. ![](https://cdn.door43.org/obs/jpg/360px/obs-en-42-06.jpg) Töpö wapamawi i töpö japalo solataja, Jesus tapamo soa pötalonö: "¡Pö kiliti, pö pi moti kukö! Ina a kuma. Janepolepö tö jatowö i töpö pi ku upama, maike: "¿Kapilitö pina makö kilipalo, pitilita makö pi ku tomöpo ma apa ina makö kua köle? Sa amösö mö, sa amösö juwi itö mö. Sa pewö tapamo kuawina ina janepolepö töpö kua pasio maikötö." Ina Jesus ku puoma. Ai janepolepö toni pöwö i töpö pi ku ma apapö töna, aitö oalöpö töna tö nakama. I töpönö salaka noki aswösö tota jötököiaja, Ianö tö oa jötölöma. ![](https://cdn.door43.org/obs/jpg/360px/obs-en-42-07.jpg) Jesus ki: "Tiosö tosokama töna kamisana tö kuapö tö kule itö pewö kua toitaso piasalo kamakana ina sa ku köpili." Ina a kuma. Inatö kuanö, i töpönö Tiosö tosokamatö jinia topalöpö töna, Ianö töpö pi jatukupamanöma. Itö nojana: "A saipalöwi ia peama piasalo, a söpalö piasalo, maike 3 wakala töna a toia kopaso piasalo, inatö kuwi sutu upa tö tosokama ku waikioma." Ina a ku sotasoma. ![](https://cdn.door43.org/obs/jpg/360px/obs-en-42-08.jpg) "Makö ote ta kopö töna, makö wanisana apawi itö josa konö, ina sanöma töpöna Ipa wapamawi i töpö ku piasalo, ina tosokamatö ku naio sotama. Jerusalen tö ulina itö wösö kolo kupalonö, itö nojana aitö uli pewöna tö wösö jötöpo toitio piasalo. Kamakanö sanöma töpöna i matö pewö wösö totio piasalo." Ina a ku sotama. ![](https://cdn.door43.org/obs/jpg/360px/obs-en-42-09.jpg) Cuarenta wakala töna, Kamani wapamawi i töpöna sateje epi Jesus pi tapamo kuako paitioma. ¡Aitö wakalana 500 sanöma töpöna sami ipi a pi tapamo naisoma! A toi ipö sowi, kamani wapamawi i töpöna itö möna totio opanö, Tiosö kaikanamowi itö pewö wöa totiköma. ![](https://cdn.door43.org/obs/jpg/360px/obs-en-42-10.jpg) Kamani wapamawi i töpönaja: "Jutumösököna kaikanamopö töjö, masitatö ulina kaikanamopö töjö Kamisana tö pewö totopö ke. Inatö kua kötönö makö ju jötöponö kamisana sanöma töpö nokapalo naiopö ma töpö tamanö, Pöa pata, kama Ula, kama Kosiomopö Osi Ikitipö, ina matö katea kuanö ma töpö mai oma soatalo opa pökö, ina makö kuanö kamakana sa simo pöli itö kili taö totio opapö töna ma töpö wapama totio pökö. Kamaka kaina sa kuapalo sotio piasalo, i matö taö sotio pökö." Ina Jesus kuma. ![](https://cdn.door43.org/obs/jpg/360px/obs-en-42-11.jpg) Jesus toia kopasonoi itöna Cuarenta wakalatö kua waikilataja, Kamani wapamawi i töpönaja: "Jerusalen tö ulina pö kua opiki, jisa makö kulataja ipa Jaoani nö kamakana kama Kosiomopö Osi Ikitipö totoköiaja makö lotete epa piasalo." Ina Jesus kuma. Itö nojana jutumösököna Jesus jua ösa kopasolöma, ölasi tönö i töpöna a sosa sotamaköma. Itö pewöna Jesus kaikanamopö töna Tiosö kateja poko kuomö kuopa Jesus loa sotaköma. *Mateo tököna 28:16-20 tönaja; Marcos 16:12-20 tönaja; Lucas 24:13-53 tönaja; Juan 20:19-23 tönaja; Hechos 1:1-11 tönaja Tiosö nö tö tamanoi itö tosokama kule itö* ## 43. Pitilita töpö pi ku upawi töpö kokamo kolo kuponoi itö https://openbiblestories.org/l/xsu/story-43/ ![](https://cdn.door43.org/obs/jpg/360px/obs-en-43-01.jpg) Jutumösököna Jesus jua ösa kopasolö noiaja, Jesus na töpö waponoi Jerusalen tö ulina i töpö kuo jaio jötoma. Pitilita töpö pi ku upawi, Tiosö na i töpö japalo piasalo töpö kokamo sinimo opatima. ![](https://cdn.door43.org/obs/jpg/360px/obs-en-43-02.jpg) Inamatö pewöna, Pascua tö wakala tamatima, ia 50 wakalatö jasupo nomo koataja, Pentecostes aitö wakala jilo kuawi tö wakalana judio töpö pi mönajapalo sinimo naioma. Nitö pewö pata api tö pewö suakowi itö wakala liki Pentecostes tö wakala jiloma. I Pentecostes tö wakalana tikiamö judio töpö kuomö kuowi töpö pewö kokamo totio opama. Itö inamana, sami semana töna jutumösököna Jesus jua ösa kopasolöma tö kulataja Pentecostes tö wakala kupasoma. ![](https://cdn.door43.org/obs/jpg/360px/obs-en-43-03.jpg) Pitilita töpö pi ku upawi i töpö kokamo pasilataja, ipokotö kuawina ina saia osimöna töpö lole ia inatö kuanö tö salio totio opama. Inatö kuanö, pitilita töpö pi ku upawi i töpö pewö jösökana koataka si jili kuawina inatö kuama. Tiosö Kosiomopö Osi Ikitipönö töpö osi pewö matija toitaköiaja tiko töpö kaina töpö japalo sotama. ![](https://cdn.door43.org/obs/jpg/360px/obs-en-43-04.jpg) Itö salio opöle i Jerusalen tö ulina sanöma töpönö itö jininönö, tö kua pöle itö ta piasalo sateje toti ipi töpö waloa totiköma. I töpö japalo pöle sanöma töpönö itö jini kukema, kamani itö kai saina Tiosö toita api itö pewö katea totio opaiaja, töpö pi kilijo opa salo töpö pi moti öpaja totio opama. ![](https://cdn.door43.org/obs/jpg/360px/obs-en-43-05.jpg) Pö wani poleamo pöa köle, ai töpö ku pasioma. Maike Pedro öpapalonö: "¡Sa jinije! ¡Ji töpö poleamo ma apöle! Sutu upa: 'Tö wakala pewö mapo pölati itaja, sanöma töpöna Sa Kosiomopö Osi ikitipö wanimo piasalo.' Ina Tiosö kai wösöwi i Joel na Tiosö kunoi itö kuati köle." ![](https://cdn.door43.org/obs/jpg/360px/obs-en-43-06.jpg) "Israel tilipö, Tiosö lotete epi itö pina Jesus nö aipa apawi tö mömaö, toita api tö tamaö ina a kuanoi i matö ta waikioma, i matö taö öpa waikia köle.¡Maike kamakanö i ma saumakönö ma söpalöma!" ![](https://cdn.door43.org/obs/jpg/360px/obs-en-43-07.jpg) "Jesus noma pölasonoia maike, Tiosö nö a toia kopamanöma. 'Nomawötö tititawi itö osimöna wa Saipalöwi iwa jotema pasio maikötö' Ina sutu upa tö kunoi itö kua waikia köle. Tiosö nö Jesus toia kopamanönoi i samatö ta totio opa köpili." ![](https://cdn.door43.org/obs/jpg/360px/obs-en-43-08.jpg) Juki ipi Tiosö kama pöa kateja poko kuomö kuopa Jesus loa koa köle. I satö tama piasalo Jesus kunoi i Tiosö Kosomopö osi ikitipö sima jötöpalö ke. Matö möö, matö jini makö kua pöle Tiosö kosiomopö osi ikitipönö itö tama köle." ![](https://cdn.door43.org/obs/jpg/360px/obs-en-43-09.jpg) "Kamakanö i Jesus ma saumakönö ma söpalöma. ¡Maike Tiosö nö Jesus liki a Saipalöwi a tapali, Kaikanatö tapali, ina a kuanoi i matö taö öpa pökö." Ina Pedro kuma. ![](https://cdn.door43.org/obs/jpg/360px/obs-en-43-10.jpg) Sanöma töpönö Pedro japalo jini pöle i töpö pi jonipo totio opama. Inatö kuaiaja, Pedro, kama ai töpö nokapalowi i töpö, ina kipi töpönaja: "¿Ipa aipö, wina samakö kua piasalo?" Ina i töpö kuma. ![](https://cdn.door43.org/obs/jpg/360px/obs-en-43-11.jpg) Pedro japalo jötonö: "Tiosö nö makö ote ta konöpö töna makö wanisana apawi i matö josa konönö Jesucristo jilo pina pö mai omono. Ina makö kua kukema Ianö kamakana kama Kosomopö osi ikitipö totokö kötö." Ina a ku sotama. ![](https://cdn.door43.org/obs/jpg/360px/obs-en-43-12.jpg) Pedro Japalo pöle itöna pitilita 3 mil sanöma töpö pi kulonö Jesus na nokapalowi töpö kua naipasoma. Töpö mai omolonö Jerusalen tö ulina töpö kokamowi i töpöna töpö söta naipasoma. ![](https://cdn.door43.org/obs/jpg/360px/obs-en-43-13.jpg) Jesus na töpö waponoi i töpönö tö wapamaiaja pitilita töpö pi ku upawi i töpönö itö jini sinimo sotioma, töpö noimo kokapalo sotio, töpö iapalo kokapalo sinimo opati, Tiosö na töpö japalo kokapalo nai sotio, ina töpö kuatima. Matijitö mi ipö pasi i töpöna kamani itö kuo asawi i töpönö tö töpö, töpö jonia totiatalo opatinö Tiosö na töpö pewö japalo pi mönajapalo sinimo sotioma. I töpöna sanöma töpö japalo toita apama. Samitö wakalana, pitilita ai tute sanöma töpö pi ku nomatalo opa kotionö töpö pala totio opaalöma. *Hechos tököna 2 töna Tiosö nö tö tamanoi itö tosokama kule itö* ## 44. Pedro, Juan ina kipi töpönö aitönö sitipa nakawi a nö löakonönoi itö https://openbiblestories.org/l/xsu/story-44/ ![](https://cdn.door43.org/obs/jpg/360px/obs-en-44-01.jpg) Aitö wakalana, kokamotawi a saina Pedro, Juan ina kipi töpö juulöma. Kokamotawi ia saina takatakana töpö ju jöka apataja, aitö ju mi ipi anö sitipa naka löatalo opatima. ![](https://cdn.door43.org/obs/jpg/360px/obs-en-44-02.jpg) Pedro nö a ju mi ipi ia mö sotanö: "Kauna sitipa sa totoköpö ipatö ma apöle. Maike ipatö kule i satö toto piaköle. ¡Jesus jilo pina wa öpa kopalonö a jupalo ko!" Ina a kuma. ![](https://cdn.door43.org/obs/jpg/360px/obs-en-44-03.jpg) Iakö sotawö, a juatalo ma apanoi Tiosö nö ia nö löako sotalöma, ia jupaloko sotaki, a jilijilimo totia apa, Tiosö na a japalo pi mönajapalo opa ina a kuama. Kokamotawi ia sai sikana sanöma töpö öpajale i töpöna itö aipa apama. ![](https://cdn.door43.org/obs/jpg/360px/obs-en-44-04.jpg) A löa konasonoi ia möpö töna lope epi sanöma töpö walopa totio opa solöma. I töpönaja: "¿Kapilitö pina ji wanotö nö löa konasoiaja makö pi kilijo opa köle? Samakö totiatalo opawi tö pina Kamisamaköna lotetetö kuowi tönö, i sama löako ma apaje. Jesus lotete epi itöjö, pitilita pi ku upapö Jesus nö tö totomawi itöjö, itö pewö pina ia nö löako pölasoke." ![](https://cdn.door43.org/obs/jpg/360px/obs-en-44-05.jpg) "Jesus söpalöpö töna Kamakanö romano tilitö kaikanana ma namo sima totio opama. Toi ipi tö totomawi kamakanö i ma söpalöma, maike Tiosö nö a toia kopamanöma. Matö taimi ipö salo i matö tamama, maike A Saipalöwi ia peamaö, a söpali ina a tama piasalo sutu upa inatö kunoi itö kupasopö töna Tiosö pina i matö tama puoma. Inatö kua kötönö, makö wanisana apawi i matö josa konönö Tiosö na makö pi ku sapa kopasoma, makö ote ta konö kötö." Ina Pedro kuma. ![](https://cdn.door43.org/obs/jpg/360px/obs-en-44-06.jpg) Pedro, Juan ina kipi töpö japalo pöle itöna kokamowi ia saina töpö kaikanamowi i töpö jiso opama. Inatö kuanö, töpö julönö töpö pöka kasömaköma. Maike Pedro japalonoi itöna pitilita sateje epi sanöma töpö pi ku totilasoma, itö wakalana Jesus na pitilita 5,000 sanöma töpö pi ku totisoma. ![](https://cdn.door43.org/obs/jpg/360px/obs-en-44-07.jpg) Itö janataja, judio töpö kaikananö kamani kaikana pata töjö, Tiosö simowi itö wapamawi i töpö ina kipi töpönaja Pedro, Juan ina kipi töpö totokö tasoma. Pedro, Juan ina kipi töpönaja: "¿I kapilitö lotetenö ji wano matö löa konöma?" Ina i töpö kuma. ![](https://cdn.door43.org/obs/jpg/360px/obs-en-44-08.jpg) I töpö na Pedro ki: "Ji wano matö mö pöle Jesus a Saipalönoi ia lotete epi itönö ia nö löa konöma. ¡Kamakanö Jesus ma saumakönö ma söpalöma, maike Tiosö nö a toia kopalöma! ¡Kamakanö i ma pi ma apama, maike Jesus lotete epi itönö makö nö lömoko sisaso piasalo, aitö kua soa maikötö!" Ina Pedro ku jötoma. ![](https://cdn.door43.org/obs/jpg/360px/obs-en-44-09.jpg) Pedro, Juan ina kipi töpönö wajetatö tosokama ma apanoi i kaikana töpönö itö taö öpa köle, maike töpö kili pölanö kunumai töpö japalo totio opa jötoiaja töpö pi kilijo opama. Maike Jesus na töpö nokapalotinoi i töpönö itö taöa kopasoma. Itö nojana, ina makö kua kota kukema makö wasisama piasalo ina töpö kunö, Pedro, Juan ina kipi töpö julakopalöma. *Hechos tököna 3:1-4:22 töna Tiosö nö tö tamanoi itö tosokama kule itö.* ## 45. Felipe, Etiope tö kaikana pina a tatapajamowi a ina kipi töpö kuanoi itö https://openbiblestories.org/l/xsu/story-45/ ![](https://cdn.door43.org/obs/jpg/360px/obs-en-45-01.jpg) Pitilita sanöma töpö pi ku upawi i töpöna Esteban a jilo kuawi a kaikanamo naioma. Iana sanöma töpö japalo toita apö, Tiosö Kosiomopö Osi Ikitipönö a osi matija apa, a pi tao opaö ina iana tö kuoma. Esteban nö tö aipama apanö Jesus na pitilita sanöma töpö pi tama soatalo toitioma. ![](https://cdn.door43.org/obs/jpg/360px/obs-en-45-02.jpg) Aitö wakalana, Esteban nö Jesus na tö kuawi tö wösötitaja, pitilita Jesus na ai judio töpö pi ku pasio mi ipi Esteban sola i töpö japalo pi jisujupaso lasoma. Inatö kuanö, Tiosö tosokamatö wapamawi i töpö kaikanana Esteban wösö jolisimoko tasoma. "¡Moises, Tiosö ina kipi töpöna a wani japalo wanisana toitiataja sama wani jininö ke!" Ina töpö jolisi kuma. Itö pina i kaikana töpönö Esteban julönö, kaikana pata töpöna a totoköma, ia ai töpönö Esteban wösö jolisimo naioko sotama. ![](https://cdn.door43.org/obs/jpg/360px/obs-en-45-03.jpg) Esteban naja: "¿I töpö ku pöle i pitilita?" Ina kaikanatö kuma. Esteban japalo jötonö, Tiosö nö Abraham na toita api tö tama kolo kupalonö Jesus kupasonoi itö wakala waloa toitakönoi itö pewö wösö, Tiosö i töpönö A Simowi itö kili taöti ma apanoi itö pewö taöa kopamani ina a kuama. Itö nojana: "Matö jini mi ipö, makö waitili ipö, Tiosö ma Kosomopö Osi Ikitipö jasiama sotio ina makö kua köle, ina kamaka i kolo pata töpö kua sotama Tiosö jasiama sotio, A kai wösöwi i töpö sö sotio ina töpö kua sotama. ¡Maike kamakanö wanisanatö pe epi matö tama satia apa pasioma! ¡A Saipalönoi Kamakanö i ma söpalöma!" Ina a ku sotama. ![](https://cdn.door43.org/obs/jpg/360px/obs-en-45-04.jpg) Kaikana töpönö itö jininönö, töpö pi jisuja apa salo töpö sömöka pewö kasöa sotakönö töpö lalupalo sotama. I töpönö atuamö Esteban sulölönö a söpalö piasalo mamanö a sösaja sotama. ![](https://cdn.door43.org/obs/jpg/360px/obs-en-45-05.jpg) Esteban söpo opa waikilanö a komönö: "Jesus, sa janepolepö sua konö." Ina a kunö, a maiko jitata sotakönö: "Kaikana, ji töpönö ji wanisanatö tama pöle itö ösajama jatöti." Ina a kunö a noma sotasoma. ![](https://cdn.door43.org/obs/jpg/360px/obs-en-45-06.jpg) Sanöma töpönö Esteban söpalöiaja ai jisatö Saulo a jilo kuawi a pi mönaja apama, i töpönö mamanö a sösaja pasilataja i Saulo nö ia jalonoi ösö sua pasilöma. Itaja sateje epi sanöma töpönö pitilita Jesus na töpö pi ku upawi i töpö nasö suapala kolo kupasoma, inatö kuaiaja, pitilita töpö pi ku upawi tikiamö i töpö toköa jötaja totilasoma. Inatö kua pölata maike, töpö ju paja Jesus kuawi itö wösö soatalo opama. ![](https://cdn.door43.org/obs/jpg/360px/obs-en-45-07.jpg) Pitilita Jesus na a pi ku upawi Felipe a jilo kuawi Jerusalen tö ulina a toköa nailonö tikia a kuo naioma. Samaria tö ulina a julolönö Jesus kuawi itö wösö kukema sateje epi pitilita sanöma töpö pi ku totia apa naisoma. Inatö kuanö aitö wakalana, Tiosö nö a simötawi ianö pölösana ai pilitiso kuowi tisona Felipe simama. Itisona a juulötaja, Etiopia tilitö kaikanana a tatamo sötapalowi kamani katoana ia pi lölö koonöma. I wano töna Felipe japalo tasopö töna Tiosö Kosiomopö Osi Ikitipönö a sima sotama. ![](https://cdn.door43.org/obs/jpg/360px/obs-en-45-08.jpg) Katoana Felipe walopakö tasoma, etiope tili tönö Tiosö kai wösöwi i Isaias nö tö tosokopalönoi itö kateatima. "Oveja wai söpalö piasalo awai sua talölö kuawina i töpönö ina a sua talölöma, Oveja wai lalupalo mi ipö kulena ina a lalupalo ma apa kuama, Ia jatolo ma apama. Ai wanisanatö tama ma apama maike i töpönö a wasisama totio opama. I töpönö a söpalöma." Inatö tosokama kuwi tö kateatima. ![](https://cdn.door43.org/obs/jpg/360px/obs-en-45-09.jpg) Etiope tilitöna: "¿Watö kateati pöle i watö jini jöta alukule?" Ina Felipe kuma. "Ma. Ai tönö tö wösö pasio mi ipö kötönö satö jini mi ipö. Japo kamisa kotöna a loa naiköso. ¿Kamana, Isaias ku ko jatoma, ai tikoana a ku puo jatoma?" Ina i etiope tilitö ku sotama. ![](https://cdn.door43.org/obs/jpg/360px/obs-en-45-10.jpg) Jesus na tö kuapö Isaias nö tö tosokama puoma ina etiope tili töna ina Felipe ku jötoma. Felipe nö ai tiko tosokamatö katea naionö iana Jesus kuawi itö pewö wöa totiköma. ![](https://cdn.door43.org/obs/jpg/360px/obs-en-45-11.jpg) Felipe, i etiope tilitö ina kipi töpö pi lölö ölöpamö, matu kuopa töpö walopaköma. "¡Pike! ¡Ia ai matu kua köle! ¿Sa mai omonasoma kini?" Ina etiope tilitö ku sotalonö, katoa opimaköpö töna a simo sotama. ![](https://cdn.door43.org/obs/jpg/360px/obs-en-45-12.jpg) Inatö kuanö, matu kuopa töpö itopasoma, ia Felipe nö i etiope tilitö mai oa sotapamanöma. I matuna töpö jösöka kopasoiaja, Tiosö Kosiomopö Osi Ikitöpönö Felipe sua konönönö tikiamö a jila noma kokö tasoma, itö ulina ianö Jesus kuawi tö wösö nomoko sota tasoma. ![](https://cdn.door43.org/obs/jpg/360px/obs-en-45-13.jpg) I etiope tili tönö Jesus mö taöpasoma kötönö a pi mönaja apa koonöma. *Hechos tököna 6:8-8:5; 8:26-40 töna Tiosö nö tö tamanoi itö tosokama kule itö.* ## 46. Jesus na pitilita Pablo pi ku naikönoi itö https://openbiblestories.org/l/xsu/story-46/ ![](https://cdn.door43.org/obs/jpg/360px/obs-en-46-01.jpg) Esteban söpalönoi Saulo jisanö ia i jaloösö tapoma. Jesus na pitilita ia pi ku mi ipö kötönö pitilita töpö pi ku upawi i töpö nasö suapala totio opama. Jerusalen tö ulina, saipö pewöna a ju jötöpo totionö wano töpö, su töpö, ina töpö jua tamanö töpö pöka kasöma soatalo opama. Damasco tö ulina pitilita ai töpö pi ku upawi i töpö julö tasonö Jerusalen tö ulina töpö jila kokö solöpö töna judio patatö kaikananö Pablo na tosokama tö totoköma. ![](https://cdn.door43.org/obs/jpg/360px/obs-en-46-02.jpg) Damasco tö ulina Saulo ju ulöpa, jutumösököna wakalatö kuowi tönö a josöka soa pötalöiaja, masita töna a kelasoma. Saulo nö tö jini kukema: "¡Saulo! ¡Saulo! ¿kapilitö pina kaunö sa nasö suapala köle?" Inatö kuma. "¿Wapamawi ia witipili wa?" Ina Saulo ku jötoiaja. "Kamisa liki Jesus sa. Kaunö sa nasö suapalati köle" Ina Jesus ku sotasoma. ![](https://cdn.door43.org/obs/jpg/360px/obs-en-46-03.jpg) Saulo öpa kopasoma tö mö ma apama. Ai töpö nokapalo pöle i töpönö Damasco tö ulina a jila pökö tasoma. Saulo iapalo mi ipö, koamowi aitu koatala mi ipö tres wakala tö kupasoma. ![](https://cdn.door43.org/obs/jpg/360px/obs-en-46-04.jpg) Damasco tö ulina, Jesus na aitö sötapalowi Ananias a jilo kuawi a kuoma. Ia naja: "Saulo kulati ia saina a julolö. Ianö tö mö kopö töna pila jösökana wa amösö walikö pökö." InaTiosö kuma. Maike, "Kaikana, ia waninö kauna pitilita töpö pi ku upawi i töpö nasö suapalatiwi i satö jini ipa köle." Ina Ananias kuma. Maike Ia naja: "¡A julolö! Judio töpö, ai tiko sanöma töpö i töpö pewönamö sa jilo wösö jötöpopö töna i sa saia waikipalö ke. Kamisa jilo pina pe epi ia peama totio opa piasalo." Ina Tiosö ku puoma. ![](https://cdn.door43.org/obs/jpg/360px/obs-en-46-05.jpg) Inatö kuanö, Saulo kuo tasopa Ananias jua jötösolöma, ia jösökana a amösö walea jötökönö: "Watö mö koo, Tiosö Kosiomopö Osi Ikitipönö wa osi matijiki, ina wa kuapö töna, jisimö wa ju tasataja kauna Jesus tapamonasonoi ianö sa simöpalö ke." Ina a kuma. Iakö sotawö Saulo nö tö möko sotama, Ananias nö a mai oa sotamanöma. Itö nojana Saulo iapalo konö a lotetea kopasoma. ![](https://cdn.door43.org/obs/jpg/360px/obs-en-46-06.jpg) Damasco tö ulina Saulo nö lope epi tö wösö kolo kua sotalonö: "¡Jesus liki Tiosö i Ula!" Ina a ku sotama. ¡Pitilita töpö pi ku upawi i töpöna wanisanatö tama pi topa apanoi, Jesus na pitilita ia pi ku naikömaja judio töpö pi ku tomöpo ma apama! Judio töpöna Saulo japalonö, Jesus a Saipalönoi itö möma totio opama. ![](https://cdn.door43.org/obs/jpg/360px/obs-en-46-07.jpg) Sateje epi wakalatö jasupaso noiaja, Saulo söpalöpö töna judio töpö japaloma. I töpönö itö ulina takataka kule i takana Saulo atupo tapala konö a söpalöpö töna ai töpö simököma. Maike Saulo sötapalowi i töpönö itö taöa jötömanönö a toka jöta komanöma. Mumaiaja i töpönö wöana a titikönö itö uli pata jokolole itö julu patana a pi itoa jöta kopamanöma. Damasco tö ulina Saulo toka kononö, Jesus kuawi itö wösö kolo kuako sopasoma. ![](https://cdn.door43.org/obs/jpg/360px/obs-en-46-08.jpg) Jesus na töpö waponoi i töpö mö taöpo pi topa apa salo Jerusalen tö ulina Saulo julasolöma, maike iana i töpö kili ipama. Inatö kuaiaja, pitilita aitö pi ku upawi Bernabe a jilo kuawi anö Jesus na töpö waponoi i töpöna Saulo kai julolönö Damasco tö ulina Saulo kili pölanö kunumai tö wösö totio opanoi itö wösö jötoma. Itö nojana, i töpönö Saulo pi nai jötököma. ![](https://cdn.door43.org/obs/jpg/360px/obs-en-46-09.jpg) Jerusalen tö ulina töpö nasö suapalaiaja pitilita ai töpö pi ku upawi töpö toköa paja apö solöma, Antioquia tö ulina i töpö walokönö ia Jesus wösö sotama. Sateje epi Antioquia tili töpö liki judio töpö mi ipö maike, pitilita Jesus na töpö pi ku kolo kua naia sotaköma. Itö ulina Bernabe, Saulo ina kipi töpönö pitilita sanöma tute töpö pi ku kolo kupowi i töpöna Jesus kuawi itö wapama satea soanö töpö pi ta loteteama piasalo iamö töpö jua jaisolöma. I Antioquia tö ulina Jesus na pitilita töpö pi ku upawi i töpö liki "Cristo tili töpö" töpö jilo ta kolo kupasoma. ![](https://cdn.door43.org/obs/jpg/360px/obs-en-46-10.jpg) Aitö wakalana, Antioquia tö ulina pitilita töpö pi ku upawi i töpö iapalo mi ipi Tiosö na töpö japalotitaja: "Kamisa pina Bernabe, Saulo ina kipi töpö sokapalö, ai tatao tö tamapö töna sa töpö naka köle." Ina Tiosö Kosiomopö Osi Ikitöpö kuma. Inatö kuaiaja, Bernabe, Saulo ina kipi töpö pina pitilita Antioquia tili töpö pi ku upawi Tiosö na i töpö japalonö, itö nojana i töpö jösökana töpö amösö walia sotaköma. Itö tama mapasoiaja, tikiamö Jesus kuawi itö wösö jötöpopö töna töpö sima sotalöma. Bernabe, Saulo ina kipi töpönö tiko sanöma töpö wapama jötöpo totioma, pitlita sateje epi Jesus na töpö pi ku totio opama. *Hechos tököna 8:3; 9:1-31; 11:19-26; 13:1-3 töna Tiosö nö tö tamanoi itö tosokama kule itö.* ## 47. Filipos tö ulina Pablo, Silas ina kipi töpö kuanoi itö https://openbiblestories.org/l/xsu/story-47/ ![](https://cdn.door43.org/obs/jpg/360px/obs-en-47-01.jpg) Romano tö uli pewöna Saulo ju jötöpotipaja roma tili töpö kaina "Pablo" a jilo kua nomöpasoma. Aitö wakalana, Filipos tö ulina Jesus kuawi itö wösö tasopö töna Pablo nö kamani sötapalowi i Silas kai julasolöma. Matu jöka apapa Tiosö na sanöma töpö japalo sinimo tasowi iamö i töpö julasolöma. Ia Lidia ai sutö jilo kuawi a mö taöpasoma, i sutö liki wanitö noa tamawi a kuoma. Tiosö na ia japalo toita apö, A pi ipaö, ina a kuawi a kouma. ![](https://cdn.door43.org/obs/jpg/360px/obs-en-47-02.jpg) Jesus na tö kuawi itö wösö pöle Lidia nö itö jininönö pitilita api ku naisopö tönaja Tiosö nö a kosiomopö jöpöpalöma, itö nojana i su töjö, kamani ai töpö ina kipi töpö mai opamonasoma. Kamani saiana Pablo, Silas ina kipi töpö kuo paiopö tö pi ipaiaja, ia i töpö kua opia jöta paiköma. ![](https://cdn.door43.org/obs/jpg/360px/obs-en-47-03.jpg) Tiosö na töpö japalo sinimowi ia Pablo, Silas ina kipi töpönö sanöma töpö kai kokamo sinimotatima. Itö wakala pewöna iamö i töpö jupatipaja, ai töpönö mokotö simawi ana saitö titiowi a nokapalo sinimota naiolöma. I saia pi wanina ianö sanöma töpöna tö kua piale itö wösöwi a kuoma, itönö, a tapo pöle sitipana i töpö pilapalama toitioma. ![](https://cdn.door43.org/obs/jpg/360px/obs-en-47-04.jpg) I töpö ju pimati i töpö nojana a ju jaio pölanö: "¡Jituamö Tiosö pata kulali ianö ji wanö töpö simawi i töpö. Makö löa konasopö töna ji töpönö pilitiso namo simati köle!" Ina i mokotö komö kuto jaioma. Sateje epi a pi ku kua waikiolöiaja Pablo pi jisujupasoma. ![](https://cdn.door43.org/obs/jpg/360px/obs-en-47-05.jpg) Aitö wakalana ia komö kotaiaja, Pablo nomöja sotalonö: "Jesus jilo pina i su töna a atua kopalo." Ina sai tonina a kuiaja, lope epi sai toninö a tako sotakölöma. ![](https://cdn.door43.org/obs/jpg/360px/obs-en-47-06.jpg) ¡I mokotö simawi i töpö pi jisujupasoma! Ia osimöna saia wani titia mi ipöiaja, i moko tönö tö kua piale itö wösö kotapö tö ma apama. Ianö sanöma töpö kua piale itö wösö kota ma apa kukema kama töpönö sitipa sua kotapö tö ma apama. ![](https://cdn.door43.org/obs/jpg/360px/obs-en-47-07.jpg) Inatö kuaiaja, i mokotö simatinoi i töpönö roma tili töpö kaikanana Pablo, Silas ina kipi töpö totamo jua sotasolöma, i töpönö töpö soalalönö töpö pöka kasököma. ![](https://cdn.door43.org/obs/jpg/360px/obs-en-47-08.jpg) Pablo, Silas ina kipi töpö toka konasopö tö jatuko ma apapa i töpönö töpö titikönö söpalasö totonö pö amösökö oka satia apa naiköma. Inatö kua pölata maike mumaiaja, Tiosö na töpö amamo satia apa jaluma. ![](https://cdn.door43.org/obs/jpg/360px/obs-en-47-09.jpg) ¡Lotete epi tö uli pata kalipalo soa pötasoma! Takataka pewö jakolaso, töpö pöka kasöle i töpö amösöna söpalasö toto pewö kea konaso, inatö kuama. ![](https://cdn.door43.org/obs/jpg/360px/obs-en-47-10.jpg) A mamo löapalo jötöle ia na kononö, tö mö kukema takataka pewö jakole itö talalöma, ¡Pe epi a kila apösoma! Töpö pöka kasöle i töpö toka konasonöma a pi ku upa salo, kama söpamoko piama. (Töpö pöka kasöle i töpö toka konasöa könaja roma tili töpö kaikananö a söa sotalöpö kamanö itö taö öpa waikioma.) Maike Pablo nö a talalönö: "¡A opia paikö! Kama söpo koti. Samakö pewö titia soa köle." Ina Pablo komö ku sotasoma. ![](https://cdn.door43.org/obs/jpg/360px/obs-en-47-11.jpg) Pablo, Silas ina kipi töpöna ia ju ulöpa a satitimo opölanö: "¿Kapili satö tamanö sa nö löa konaso piasalo? Ina a kuiaja. "Pitilita Kaikana Jesus na wa pi ku kukema, kawa, au pusupa, au ulu kökö makö pewö löa konaso piasalo." Ina Pablo ku jötoma. Itö nojana, ianö sotawö kamani saiana Pablo, Silas ina kipi töpö nini ipi itö salöa kopalö piasalo töpö kai julasolöma. Ia saina töpö kule i töpöna Pablo nö Jesus kuawi itö wösö sotama. ![](https://cdn.door43.org/obs/jpg/360px/obs-en-47-12.jpg) Pöka kasömawi ia, kamani ai töpö, Jesus na pitilita töpö pi ku nailonö töpö mai opamonasoma. Itö nojana ianö Pablo, Silas ina kipi töpöna nitö totokönö töpö iapalo kokamo pi mönajapalo sotama. ![](https://cdn.door43.org/obs/jpg/360px/obs-en-47-13.jpg) Itö janata kaikana töpönö Pablo, Silas ina kipi töpö jula kopalöma. Lidia na Pablo, Silas ina kipi töpö noimo, kamani sötapalowi töpöna töpö noimo, ina töpö kua paionö itö nojana tikiamö töpö jua noma konasolöma. Jesus toita api itö jino paukupo totio opama, pitilita töpö pi ku upawi i töpö pala totio opa soaalöma. ![](https://cdn.door43.org/obs/jpg/360px/obs-en-47-14.jpg) Tiko töpö ulina Pablo, Jesus na ai töpö sötapalowi töpö kaikana ina kipi töpö ju salekeanö Jesus kuawi itö wösö jötöpo totio opama. I töpönö pitilita töpö pi ku upawi i töpö wapo satea apanö, töpö pi ku utitipo ma apapö tönaja sateje epi wajeta tökö tosokama naioma. I wajeta tökö tosokama liki Tiosö japalowi i tököna i tökö tikilia naia kömaköma. *Hechos tököna 16:11-40 töna Tiosö nö tö tamanoi itö tosokama kule itö* ## 48. A Saipalöwi a ju piasalo kunoi ia liki i Jesus https://openbiblestories.org/l/xsu/story-48/ ![](https://cdn.door43.org/obs/jpg/360px/obs-en-48-01.jpg) Tiosö nö jitö uli pata tapalönoi itaja, tö pewö topa totio opama. Wanisanatö ma apama. Adan, Eva ina kipi töpönö Tiosö pi ipanö töpö piposomo opama. Kamakalitö mi ipö, nomapowi tö mi ipö inatö kuama. Ina jitö uli pata kua sotiopö, Tiosö nö tö pi ipama. ![](https://cdn.door43.org/obs/jpg/360px/obs-en-48-02.jpg) Eva mönamanö piasalo olökökö wanina satanas wani titikönö a wani japaloma. Inatö kuanö, Tiosö na i su töjö, Adan ina kipi töpönö wanisanatö tapalöma. I töpönö wanisanatö tapalöma kötönö, jitö ulina sanöma töpö pewö kamakalimo, töpö nomapo inatö kupasoma. ![](https://cdn.door43.org/obs/jpg/360px/obs-en-48-03.jpg) Adan, Eva ina kipi töpönö wanisanatö tapalönoi itaja aitö jiopu sati ipi tö kua naipasoma. I töpö, Tiosö ina kipi töpö nisi tapasowi töpö kupasoma. Inatö kuama kötönö, sanöma töpö kupo kukema wanisanatö kaina töpö kupo soatalo opaö, inatö kuanö ia liki Tiosö sola töpö nisi tapasowi a kua sotaso. Wanisanatö pina Tiosö na sanöma töpö noimo saliliawi itö mapasoma. Maike itö topa kopalöpö töna Tiosö pi kupalo waikioma. ![](https://cdn.door43.org/obs/jpg/360px/obs-en-48-04.jpg) Eva ai ulutö olanö Satanas je patikipalöiaja, Satanas nö a amösö tisiana ninia jötömakö piasalo, Ina sutu upa Tiosö kuma. A Saipalöwi Satanas nö ia söpalö piasalo, maike Tiosö nö a toia kopalöiaja, a Saipalöwi ianö Satanas lotetetö patikia totipalö piasalo ina itö ku pasio puoma. Sateje epi inamatö jasupaso noiaja Tiosö nö Jesus Saipalönö a möma jötoma. ![](https://cdn.door43.org/obs/jpg/360px/obs-en-48-05.jpg) Tiosö nö matu okimanöiaja itö uli pewöna sanöma töpö nasö tupasonoi itaja, pitilita Iana töpö pi ku upa asawi i töpöna kutiata pata pe epi ösö totokönö töpö löa asa konöma. Itö kuanoi ina, sanöma töpö wanisana apawi i töpö söpo kua naiopö tö, maike Jesus na pitilita makö pi ku upa asawi i makö löa konöpö töna Tiosö nö a simöpalöma. ![](https://cdn.door43.org/obs/jpg/360px/obs-en-48-06.jpg) Sateje toti ipi inama töna, sanöma töpönö wanisanatö tamawi i töpönö tö tapö tönaja i töpö söpa maiaja Tiosö saia totiapalawi i töpönö salopö wani sö sotioma. Maike i salo kökö wani söwi itönö i wanisanatö josa kopasopö tö ma apama. Jesus liki Tiosö saia totiapalawi i töpö i kaikanatö. Tiosö saia totiapalawi i töpö pewöna A kua tikopa pasionö, Sanöma töpö pewö wanisana apawi itö josa kopö töna kama tota totiköma. Jesus nö sanöma töpö pewö wanisana apanoi itö pewö noa koa totimaköma kötönö Ia liki Tiosö saia totiapalawi i töpö i kaikana kupasoma. ![](https://cdn.door43.org/obs/jpg/360px/obs-en-48-07.jpg) Abraham na Tiosö ki: "Kawa pina masitatö ulina sanöma töpö pewö kua topa apa piasalo" Ina a kuma. Jesus liki Abraham ai ulutö ola kuoma. Ia pina sanöma töpö pewö kua topa apawi tö, wanisana matö tamawi, Jesus na pitilita i makö pi kuiaja makö löa konasowi, Abraham i makö kupo nai soatalo opa kötö. ![](https://cdn.door43.org/obs/jpg/360px/obs-en-48-08.jpg) Au ula Isaac söpalö Abraham na ina Tiosö kunoi itaja, Isaac söpa maiaja Oveja wai söa pöpalöpö töna Tiosö nö a totoköma. ¡Makö pewö wanisana apawi tö pina makö söpasopö tö! Maike makö söpo piale ia Jesus söa löpaso pö töna Tiosö nö kamani i Oveja wai totoköma. ![](https://cdn.door43.org/obs/jpg/360px/obs-en-48-09.jpg) Tiosö nö Egipto tö ulina, nojatö saina wanisanatö tamawi tö simöpalönoi itaja, Israel tili töpö pewöna Oveja wai toita api ma söpalönö ia iipönö takaka kolo jösöka, pili taka kasö ina matö juluka tama pökö ina Tiosö kuma. Tiosö nö i iitö mö kukema i saia jitu pewöna a janokönö, i töpö ulu töpö kuo somatawi i töpö söpa ma apama. Itö kuanoi i Pascua itö jilo kua. ![](https://cdn.door43.org/obs/jpg/360px/obs-en-48-10.jpg) Jesus liki Pascua töna Oveja wai sönoi ia. A topa apaö, ai wansanatö tama mi ipö ina a kuama, i Pascua töna töpö pi mönajapalowi itö wakalana a söpalöma. Jesus na pitilita aitö pi ku kukema, Jesus iipönö ia noa koa sotamaki, inatö kuanö Tiosö nö tö wasisamawi, ia jösökana itö janoa sotaki. ![](https://cdn.door43.org/obs/jpg/360px/obs-en-48-11.jpg) Israel tili töpö liki kamani sanöma töpö saipalönoi i töpö kötönö, i töpö, Tiosö ina kipi töpö japalo topamonasoma. Maike juki ipi kamakö pewöna Tiosö japalo topamo nomösoma. I Tutetö japalo topa noma kopasonoi itö pina, Jesus na pitilita aiwa pi ku upa könaja Tiosö i töpöna iwa söta naio sotalo opawi tö. ![](https://cdn.door43.org/obs/jpg/360px/obs-en-48-12.jpg) Moises nö Tiosö japalowi itö wösöwi a kuoma. Maike Jesus liki Tiosö kai wösöwi i töpö pewö i kaikanatö. Ia liki i Tiosö, inatö kua kötönö Ianö tö pewö tamanoi, a japalonoi i Tiosö nö tö tamawi itö pewö kuoma. Itö pina, Jesus na Tiosö Japalowi itö inatö kuto. ![](https://cdn.door43.org/obs/jpg/360px/obs-en-48-13.jpg) Ipa sanöma töpöna au ai olatö kaikanamo sotiopö a kupaso piasalo kaikana David na ina Tiosö kuma. Jesus liki Tiosö Ula, a Saipalönoi ia, inatö kua kötönö Ia liki David ulutö ola kaikanamo sotiopö A. ![](https://cdn.door43.org/obs/jpg/360px/obs-en-48-14.jpg) ¡David liki Israel tili töpö i kaikanatö kuoma, maike Jesus liki jitö uli pewö pata i kaikanatö! Ia ju kotanö a kaikanamo konasoi itaja, noi ipi sanöma töpö kuo totio opa piasalo, toita api a kaikanamo totikö piasalo. *Génesis tököna 1-3, 6, 14, 22 tönaja; Éxodo 12, 20 tönaja; 2 Samuel 7 tönaja; Hebreos 3:1-6, 4:14-5:10, 7:1-8:13, 9:11-10:18 tönaja; Apocalipsis 21 tönaja Tiosö nö tö tamanoi itö tosokama kule itö* ## 49. Tute töna Tiosö japalo topa noma kopasonoi itö https://openbiblestories.org/l/xsu/story-49/ ![](https://cdn.door43.org/obs/jpg/360px/obs-en-49-01.jpg) Ai sutö mamo taimi ipi a naja, kaunö Tiosö Ulu wa tapalö piasalo, Tiosö nö a simötawi ia kuma. Inatö kuanö, a mamo taimi ipö pölata maike, Tiosö Kosiomopö Osi Ikitipönö a osi matijimaköiaja a sipinapilasoma. Ianö i ula tapalönö Jesus a jilo tapalöma. Inatö kua kötönö Jesus liki: I Tiosö, sanöma töjö, ina a kuoma. ![](https://cdn.door43.org/obs/jpg/360px/obs-en-49-02.jpg) Jesus liki i Tiosö, töpö pi ku upapö töna, aipa apawi tö möma totio opama. Matu Jösökana A juma, ipokotö pi moti tatama totio koma, sanöma töpö kamakali ipi töpö löa totio opa koma, sai töpö sasu totio opa koma, nomawö töpö toipama totio opa koma, (5) cinco pan töpö wai, polakapi salaka kökö inatö kuo pötama maike pe epi tö ta kopalönö 5,000 sanöma töpö iapalama naioma. ![](https://cdn.door43.org/obs/jpg/360px/obs-en-49-03.jpg) Jesus nö tö wapama toita apa naioma, Tiosö i Ula kötönö kaikana tönö tö wapama kuawina ina a kua sotama. Kama makö pimo opa kuawina ina ai tiko ma töpö pi tama naio sota pökö inatö wapama tamama. ![](https://cdn.door43.org/obs/jpg/360px/obs-en-49-04.jpg) Kamaka ai matö pi ipa jöta köle maike Tiosö ma pi toleja satia apa asa pökö, makö pilapalo opa pölata Ma pi satea naio soa pökö, inatö wapama tama naioma ![](https://cdn.door43.org/obs/jpg/360px/obs-en-49-05.jpg) Jitö ulina tö noa api tö kuja apa jöta köle maike Tiosö kaikanamowi itö noa sati ipö asa kötö, ina Jesus kuma. Tiosö kaikanamopa makö kuo naiopö, sanöma makö pewöna itö toita sati ipi asawi itö. Tiosö kaikanamopa wa lisipo pi topa apa kukema, wanisana apawi töna wa nö löamo konasopö tö. ![](https://cdn.door43.org/obs/jpg/360px/obs-en-49-06.jpg) Pitilita kamisana ai sanöma töpö pi kunö töpö lömo asako piasalo, maike ai töpö pasi kunumai ina Jesus kuma. Masitatö uli toita apö kulena ina ai sanöma töpö kua asa kötö, ina A kuma. I töpönö Jesus toita api itö jininönö pitilita töpö pi ku asanö töpö löa konaso piasalo. Masitatö ulina ai pilitiso amano opi tisona Tiosö japalowi imo wai keköma maike mowai jaö mi ipö kulena ina ai töpö kua pasio piasalo. I sanöma töpönö Jesus japalowi itö jini wani ipi i töpö pasiwö, itö pina Ia kaikanamopa töpö lisipo pasio maikötö. ![](https://cdn.door43.org/obs/jpg/360px/obs-en-49-07.jpg) Wanisanatö tamawi Tiosö nö i töpö pi totio opa kötö. Töpö ote ta konönö kamani ulu töpö tapa pi topa apa köle, ina Jesus kuma. ![](https://cdn.door43.org/obs/jpg/360px/obs-en-49-08.jpg) Tiosö nö wanisanatö pi maikötö, ina Jesus ku naioma. Adan, Eva ina kipi töpönö wanisanatö tapalönoi i kamani ulu töpöna itö ola tolea naia sopasoma. Itö pina, jitö ulina sanöma töpönö wanisanatö tamanö Tiosö na töpö soka sotio. Inatö kuanö, Tiosö nö sanöma makö mö asöpowi makö kupasoma. ![](https://cdn.door43.org/obs/jpg/360px/obs-en-49-09.jpg) Maike Tiosö nö jitö ulina makö pewö kule pe epi i makö pi ipa salo, Jesus na pitilita makö pi ku asawi i makö nö löa kononö, Tiosö kotöna makö kuo sotio naiopö töna kamani Ula sami ipö pölata a totoköma. ![](https://cdn.door43.org/obs/jpg/360px/obs-en-49-10.jpg) Kama wa wanisana apatipa, watö taipalöma kötönö wa nomasopö tö kua köle. Kauna Tiosö jiso opapö tö, maike kauna A jiso maiaja Jesus na a jiso opa asa puoma. Kawa wasisamapö tö kuonoi i jitina Jesus nomalonö, itö tama löoma. ![](https://cdn.door43.org/obs/jpg/360px/obs-en-49-11.jpg) Jesus nö wanisanatö tama ma apama, maike jitö ulina wanisana matö tamawi itö pewö josa kopalöpö töna A toita api a söpamonasopö, kamanö tö saipalöma. Jesus Kama söpamo konasoma kötönö, Tiosö nö wanisanatö pewö ote ta ko soatalo opaö, wanisana satia apa pölata. ![](https://cdn.door43.org/obs/jpg/360px/obs-en-49-12.jpg) Toita api watö tamawi itö pina wa nö löpoko maikötö. Kama wa kua soa pötanö Tiosö na wa sötapalopö tö mi ipö kötö. Jesus nö wa wanisana apawi itö ausipako sisa kötö. Jesus liki i Tiosö Ula sai, wa pi ku totio opaö, kamisa söpo piale i jitina A söa löpasoma, maike Tiosö nö a toia kopalöma, ina wa pi ku totio opa pökö. ![](https://cdn.door43.org/obs/jpg/360px/obs-en-49-13.jpg) Jesus liki ipa kaikanatö, sanöma töpö kunö pitilita töpö pi ku upawi Tiosö nö i töpö löa ko sisa piasalo. Maike Iana pitilita töpö pi ku pasio mi ipi Tiosö nö i töpö löa ko pasio maikötö. Wa pilapalo pölataja, wa pepalo pölataja, wanowa pölataja, suwa pölataja, jisawa pölataja, wa patasipö pölataja, tikiamö wa kua pölataja,Tiosö nö wa pi ipa kötönö wa sötapalo jöka naiopö töna tö pi ipa salo Jesus na pitilita wa pi kupö, tö pi ipa köle. ![](https://cdn.door43.org/obs/jpg/360px/obs-en-49-14.jpg) Kamana pitilita makö pi kunö makö mai omonasopö Jesus nö tö pi ipa köle. ¿Jesus liki a Saipalönoi ia, Tiosö i Ula, wa pi ku totia apa köle? ¿Sa wanisana apawi sa kötönö Tiosö nö sa wasisamapö sa wa pi ku upa köle? ¿Sa wanisana apawi itö josa konöpö töna jitina Jesus nomasoma wa pi ku upa köle? ![](https://cdn.door43.org/obs/jpg/360px/obs-en-49-15.jpg) ¡Jesus na pitilita wa pi ku upa, kawa pina a kuanoi itöna pitilita wa pi ku upa ina wa kua pöle i Cristo tiliwa! Mumimumi töna Satanas wani kaikanamowi ia Tiosö nö wa ta kopalönö wakala apapa kama kaikanamowi ia wa ta noma koköma wa. Kauna wanisanatö titikönö wa kua jiopa soa pöatalo opanoi Tiosö nö itö josa konönö wa kua topa pi topa apa nomo kopö töna tute wa ta noma kopalöma. ![](https://cdn.door43.org/obs/jpg/360px/obs-en-49-16.jpg) Cristo tiliwa könaja, Jesus nö tö tamanoi itö pina Tiosö nö wa ote ta konöma wa. Juki ipi Tiosö nö wa mö asöpo pölanö kunumai wa sötapalamako sisa köle. ![](https://cdn.door43.org/obs/jpg/360px/obs-en-49-17.jpg) Tiosö na wa sötapalowi wa, Kaikana Jesus simoiaja watö tamawi wa, i wa könaja Jesus nö wa wapamawi i watö tama pi topa apa kötö. Cristo tiliwa waiki pölata maike, wanisanatö tamapö töna wa wapama satia soa piasalo. Maike Tiosö nö wa josa maikötö, watö tama jiopawi i watö wösö kukema Ianö wa ote ta konö kötö. Wanisana töna wa kasijapalo jötopö töna Ianö tö totokö piasalo. ![](https://cdn.door43.org/obs/jpg/360px/obs-en-49-18.jpg) Kamisana a japalo, ipa wajeta tökö katea sotio, ai cristo tili töpö kaina wa kokamo naionö kamisana a japalo toita apa, kauna satö tamatiwi ai töpöna itö wösö naio, kauna ina Tiosö kuti köle. Ina wa kuati kukema Iana wa sötapalo jöka toitioolö piasalo *Romanos tököna 3:21-26, 5:1-11 tönaja; Juan 3:16 tönaja; Marcos 16:16 tönaja; Colosenses 1:13-14 tönaja; 2 Corintios 5:17-21 tönaja; 1 Juan 1:5-10 tönaja Tiosö nö tö tamanoi itö tosokama kule itö* ## 50. Jesus ju kota piasalo https://openbiblestories.org/l/xsu/story-50/ ![](https://cdn.door43.org/obs/jpg/360px/obs-en-50-01.jpg) Jesus, a Saipalönoi ia kuawi Sanöma töpö pewönö itö jini jötöpo soa paja 2,000 inamatö kupo toitia köle. Pitilita töpö pi kuwi i töpö pala toitia köle. Ji masitatö uli pata mapo ko pölati ita sa ju kota piasalo ina Jesus kuma. A juko paio mi ipö maike, A kunoi itö tama toita piasalo. ![](https://cdn.door43.org/obs/jpg/360px/obs-en-50-02.jpg) Jesus ma walo tako pölanö, toita api makö kua totiki, I ma kili taö totio opaö ina makö kuapö töna Tiosö nö tö pi ipa köle. Ia pata Kaikanamowi ai tiko töpöna i matö wösö naiopö töna tö pi ipa naia köle. Ji masitatö ulina Jesus ju naia solanö: "Kamisana ipa töpö sötapalowi i töpönö itö uli pewönamö Tiosö kaikanamowi itö wöa jötöja toitaköia, itaja, jitö uli pata mapaso piasalo." Ina a kuma. ![](https://cdn.door43.org/obs/jpg/360px/obs-en-50-03.jpg) Sateje epi ai töpö ulina Jesus kuawi itö jini pasio paio mi ipö. Jutumösököna a ösöpö ko pialanö, sanöma töpönö tö Toita api itö jini taimi ipi i töpöna matö wösö totio opa pökö, kamani wapamawi i töpöna ina Jesus kuma. “¡Makö ju jötöponö sanöma ma töpö wapama totio opa pökö!” “¡Jikaliana ni matö suapö töna nitö pewö pata apö waikiwö!” Ina Jesus kuma. ![](https://cdn.door43.org/obs/jpg/360px/obs-en-50-04.jpg) “Kamani kaikana töna a simawi ia toleja maikötö. Jitö ulina töpö kaikanamowi i töpönö sa nisi taö öpa köle manukule, i töpönö makö wasisama apaö, makö sö öpaö Kamisa pina ina makö tama piasalo. Jitö ulina Satanas wani kaikanamo pöle i sa wani utitia waikipalöma kötönö jitö ulina makö wasisama pölata makö kasijapalo satia apa pökö. Kamisana makö sötapalo sotiopa makö nomaso könaja, ¡Tiosö nö makö löa konö kötö!” Ina Jesus ku naioma. ![](https://cdn.door43.org/obs/jpg/360px/obs-en-50-05.jpg) Kamani wapamawi i töpönö jitö uli pata mapasoiaja sanöma töpö kua piale itö jini saliliapö töna sutu upa tö kuanoi Jesus nö tö wösöma. “Ai sanöma tönö kamani jikaliana nitö toita api mo tököma. A mia pasilataja, ia nisi taö öpawi anö i mo kaina sikisiki mo töa tikilia nai jatokönö, a jua konasolöma.” ![](https://cdn.door43.org/obs/jpg/360px/obs-en-50-06.jpg) “I mo pewö patasoiaja, kamani simawi i töpö ki: ‘¡Kaikana, ji jikaliana nitö toita api wa mo sino tökö köpili. ¿Winatö kauiaja sikisiki tiki tikilia apa köle?´ töpö kuiaja, i kaikanatö ki: ’Sa nisi taö öpawi a waninö tiki töaja naiköma.’ Ina a kuma.” ![](https://cdn.door43.org/obs/jpg/360px/obs-en-50-07.jpg) “Inatö kuaiaja kamani kaikana tönaja: ‘¿I sikisiki samatö uka konanö? Simawi i töpö kuiaja: ‘Ma. I matö tama kukema ni ma tiki sai uka naipalö kötö. Pö opia paikö, tiki pewö pata paiso pökö, matö suako paja, i sikisikitö isimanöpö töna matö pa sokapa pasio ko sisa pökö, maike ipa nitö patawi ia ni matö papa totioko sisa solö pökö.’ Ina i kaikanatö kuma.” ![](https://cdn.door43.org/obs/jpg/360px/obs-en-50-08.jpg) Sutu upa itö kuanoi wapamawi i töpönö itö jini tomöpo mi ipö salo, tö wösö topa toita Jesus na töpö kuiaja. “Wano tönö nitö toita api mo tökönoi i a Saipalönoi ia. Jikalia liki ji masitatö uli pata. Nitö toita api i mo liki Tiosö i sanöma töpö pi ku toita api i töpö.” ![](https://cdn.door43.org/obs/jpg/360px/obs-en-50-09.jpg) “Sikisiki tiki pewö liki wanisanatö tamawi ia pina sanöma makö kua pasiowi i makö. Sikisiki mo töa tikilikönoi i Saia wani pasiwö. Nitö pewö patasowi itö liki jitö uli pata mapasopö itö. Nitö sua salekea ko piale i Tiosö nö töpö simötawi i töpö.” ![](https://cdn.door43.org/obs/jpg/360px/obs-en-50-10.jpg) “Jitö uli pata mapasoiaja, Tiosö nö töpö simötawi i töpönö Saia wani i sanöma töpö pewö soka kopalönö koataka pata jilipaja töpö kemakö piasalo, i töpö ökö totio opaö, töpö naköpö wötömo opanö töpö pepelo totio opaö ina ia töpö kua piasalo. Inatö kuanö, a Saipalönoi ia pina töpö kua topa apawi, pila motoko pata wakala apö kulena ina Tiosö kaikanamowi ia ina i töpö wakala kua totio opa piasalo.” Ina Jesus kuma. ![](https://cdn.door43.org/obs/jpg/360px/obs-en-50-11.jpg) Jitö uli pata mapo pialataja sa ju kota piasalo, ina Jesus ku naioma. A jua kua konasolönoi ina a ju kua kotapö tö, kötönö, sanömatö sai kuina ina a kui ölasi töna a ju ko piasalo. Jesus ju ko pöle itaja, pitilita sanöma töpö pi ku upawi töpö nomaponoi i töpö joka kopalonö jutumösököna Ia kotöna töpö kokamo kolaso piasalo. ![](https://cdn.door43.org/obs/jpg/360px/obs-en-50-12.jpg) Inatö kuaiaja, pitilita töpö pi ku upawi töpö toi ipi jutumösököna i töpö ösa naia kopalonö nomawö töpö toia kopasonoi i töpöna töpö kokamo naio kolaso piasalo. I töpö pewö liki, Jesus kaina töpö kokamo kolaso piasalo. Itö pewö kupasoiaja, Jesus nö toita api kamani sanöma töpö kai kua topa totikö piasalo. ![](https://cdn.door43.org/obs/jpg/360px/obs-en-50-13.jpg) Kamisana pitilita töpö pewö pi ku upawi i töpöna kaikanatö jena tö kutawi inisimö satö tota jötöja totikö piasalo ina Jesus kuma. Tiosö kotöna i töpö kukönö toita api töpö kaikanamo sötapalo naio sotio piasalo. ![](https://cdn.door43.org/obs/jpg/360px/obs-en-50-14.jpg) Maike pitilita Jesus na töpö pi ku pasio mi ipi Tiosö nö i töpö wasisama tötio opa piasalo. Pepalo mapo mi ipi ia töpö sösökö piasalo, ia töpö ökö totio opanö pi jonipowi tönö töpö naköpö wötömo totio sotio piasalo. Koataka luo ko mi ipi takanö töpö isima toitio piasalo, mosapö waninö pö wani oa mapoti ma apa piasalo. ![](https://cdn.door43.org/obs/jpg/360px/obs-en-50-15.jpg) Jesus ju kotale itaja, Ianö Satanas wani utitipalönö a kaikanamowi itö ma kopamanö piasalo. Ianö pepalo mapo mi ipi ia koatakanö Satanas wani isima toitiopö töna a wani sösökö piasalo, Tiosö simowi itö tama pölanö kunumai ia wanina töpö nokapalo pi topa apa pasionoi ia i töpö pewö titio koka naio sota piasalo. ![](https://cdn.door43.org/obs/jpg/360px/obs-en-50-16.jpg) Adan, Eva ina kipi töpönö Tiosö kili taö ma apanö jitö ulina wanisanatö walomaköma, itö pina Tiosö nö jitö uli wania kopalöpö töna a japaloma. Maike aitö wakalana Tiosö nö ai tute jutumösökö, ai tute masitatö uli inatö ta kopalö piasalo, itö pewö toita apako piasalo. ![](https://cdn.door43.org/obs/jpg/360px/obs-en-50-17.jpg) Tute masitatö ulina Jesus nö kamani sanöma töpö kai kua kokönö ia tö kuowi itö pewöna A kaikanamo totio sotio piasalo. Ianö i töpö mamuku pu pewö jasitia kopali, pepalowi itö mapamani, pi jonipowi itö mapani, ökö kota mi ipö, wanisanatö mapaso, nini kota mi ipö, noma kota mi ipö, inatö kua piasalo. Kamani itö ulina toita api Jesus kaikanamo topa totio piasalo, kamani Sanöma töpö kotöna A kuo sotio piasalo. *Sutu upa tö kuanoi: Mateo 24:14; 28:18; Juan 15:20, 16:33; Apocalipsis 2:10; Mateo 13:24-30, 36-42; 1Tesalonicenses 4:13-5:11; Santiago 1:12; Mateo 22:13; Apocalipsis 20:10, 21:1-22:21. I tökö pewöna tö kule itö.*