27. ୨୭. ବାନି ଶମିରୋଣୀୟନା ଉସାରାମ୍

ମିସିଙ୍ଗ୍,ମିଣ୍ଡା ଈଶ୍‌ପର୍ ନା ନିୟମ୍ ମାଗକୁନ୍ ରେମ୍ ଯୀଶୁନ୍ ବ ସାଗା। ଯୀଶୁ ଜେ ଭୁଲ୍ ସୁଗ ଶିକ୍‌ୟା ବେଡନି କନା ଆଗୁଲାଇରେମ୍ ଅଜୁବାର୍‌ପାଲାଇ ମାଇ ଏତ୍‌ବାର୍ ଡେଙ୍ଗା। ଗିତିନ୍‌ସା ମାଇ ପାଚାର୍ ଲ,“ଗୁରୁ,ମଗଗଇନା ଜୀବନ୍ ବାବାଙ୍ଗ୍ ପାଲାଇ ନିଙ୍ଗ୍ ସତଇସା ମାଡେଡେମ୍ ଦର୍‌କାର୍?“ ଯୀଶୁ ଉତର୍ ବେଡ “ନିୟମ୍ ବ ମା ଲେକାଡିତା?“

ନିୟମ୍ ମାଗକୁନ୍ ରେମ୍ ଉତର୍ ବେଡ ଜେ ଈଶ୍‌ପର୍‌ନା ନିୟମ୍ ସୁନନି “ପେ ଈଶ୍‌ପର୍ ତରଇନା ଆଈଶ୍‌ପର୍ ଗୁଲାଇ ପାରାନ୍,ଗୁଲାଇଜୀବନ୍, ଗୁଲାଇ ବପୁ ମାରି ଗୁଲାଇ ମନ୍ ବେଡସେ ଆଲାଦ୍ ଡେମ୍। ମାରି ନ ଆ ଲଗେନ୍‌ ରେମ୍ ଜୀବନ୍ ସୁଗ ଆଲାଦ୍ ଡେମ୍।” ଯୀଶୁ ଉତର୍ ବେଡ, “ନ ଠିକ୍ ସୁନତ୍ ନ! କନା ଯଦି ନ ଡେମ୍‌ତନ,ଡନା ମଗଗଇନା ଜୀବନ୍ ବାଙ୍ଗତ୍‌ପେ।”

ମାତର୍‌ ନିୟମ୍ ମାଗକୁନ୍ ରେମ୍ ଆତରଇ ଦରମ୍ ଅଜୁପାଲାଇ, ଆଯୀଶୁ ପାଚାର୍‌ଲ ଗିନ୍‌ଲୋ “ନିଙ୍ଗ୍‌ନା ଡିଅ ଲଗେନ୍‌ ରେମ୍ ଜା?”

ଯୀଶୁ ନିୟମ୍ ମାଗକୁନ୍ ରେମ୍ ମୁଇ ଉସାରାମ୍ ସୁନସେ କନଙ୍ଗ୍‌ନା ଉତର୍‌ବେଡ।“ମିଣ୍ଡା ଯିହୁଦି ରେମ ଯିରୁଶାଲମ୍ ଉଙ୍ଗମ୍ ନାନେ ଯିରୀହୋ ଉଙ୍ଗମ୍ ବ ଈଇ ଡେଙ୍ଗା।”

ମାତର୍ ଅଇଜା ଚର୍‌ରେମଲେ ଆମାଇ ଜୁଲସେ ବୁଗ।ମାଇନ୍‌ବ ଡିକୁନ୍ ଗୁଲାଇ ଜିନିଷ୍‌ଲେ ମାଏଲେ ରୁଙ୍ଗଡୁଙ୍ଗା ମାରି ଆମାଇ ଗୋଇକୁନ୍ ସୁଗ ଡେଡେମ୍ ଜାକ ବୁଗ।ଗିତିନ୍‌ ତୁର୍‌ଗୁ ମାଏଲେ ଡୁଙ୍ଗା।”

“କନ୍ ତୁର୍‌ଗୁ,ମିଣ୍ଡା ଯିହୁଦୀ ପୁଜାରି ଗିତିନ୍ ଗାରି ବେଡସେ ଇଇଡେଙ୍ଗା।ଗିତିନ୍‌ ଦରମ୍ ଗୁରୁ ବୁନୁଗ୍‌ ସୁମସେ ଗାରିବ ଲୋ କୁନୁଙ୍ଗ୍ ଆରେମ ଜୁଲ। ଉଣ୍ଡୋଇଲ ମାଇ ଆମାଇ ଜୁଲ, ଗାରିନା ତଙ୍ଗ୍‌ରେ ପାଟ୍ ବେଡ଼ସେ ଉରିଙ୍ଗ ଡୁଙ୍ଗା। ମାଇ ଆମାଇ ଜୁଲସେ ମଜୁଜୁସୁଗ ଡେଙ୍ଗା।”

“ଇତି ବେଲା ତୁର୍‌ଗୁ,ଗିତିନ୍ ଗାରି ବେଡସେ ମିଣ୍ଡା ଲେବିୟ ସାଗା।(ଲେବିୟଲେ ଡେଙ୍ଗାନି ମୁଇ ଯିହୁଦିଲେନା ମୁଇ ଜାତି ଜାକି ଆପୁଜାରିଲେ ମନ୍ଦିର୍ ବ ସାଇଜ ଡେଡେମ୍ ଡେଙ୍ଗା।)ଲେବିୟ ଲନା ଆତିନ୍ ବୁନୁଗ୍ ସୁମକୁନ୍ ଆରେମ ଜୁଲ ମାରି ଗାରିନା ତଙ୍ଗ୍‌ରେପାଟ୍ ବେଡସେ ଉରିଙ୍ଗସେ ଡୁଙ୍ଗା।”

“ମାର୍‌ମୁଇବେଲେ ଆରନା ରେମ ଗିନ୍‌ଗାରି ବେଡସେତା ଇଗା ମାଇ ମିଣ୍ଡା ଶମିରୋଣୀୟ ରେମ ଡିଗା।(ଶାମିରୟାନା ରେମଲେ ମାରି ଯିହୁଦାନା ରେମଲେ ତରଇ ତରଇନା ଗୁର୍‌ନା ଡେଡେମ୍ ଡେଙ୍ଗା ) ଗିତିନ୍ ଶମିରୋଣିୟ ରେମ ଆର୍‌ନା ଗାରିବ ଲୋଗ୍‌କୁନ୍ ଆରେମ ଜୁଲ, ମାଇ ମିଣ୍ଡା ଯିହୁଦୀ ରେମ ଡିଗା।ଡେଙ୍ଗ୍‌ନାସା ମାଇ ମାଇନ୍ ବାଗ୍‌ବ ଦୟାଗ୍‌ସେ ଜିବନ୍ ଦୁକାୟ।ଗିନ୍‌ସା ମାଇନା ଯତନ୍ ରୁଙ୍ଗା ମାରି ମାଇନା ଆରେ ଗୁଲାଇ ତୁଲବେଡ।”

“ ମାଇନା’ତୁର୍‌ଗୁ ଗିତିନ୍ ଶମିରୋଣୀୟ ଆତିନ୍ ଆରେମ ଅମୁରାଗସେ ଗଧ ବାଗ୍‌ବ ଅଲେସ ମାରି ଆମାଇ ଗାରି କଣ୍ଡେନା ପୁଣ୍ଡ୍‌ବାର୍ ନା ଡିଅ ବ ରୁଙ୍ଗ ଇଗା ଆର୍‌କି ମାଇ ମାଇନା ଯତନ୍ ରୁଙ୍ଗା।

“ମାର୍‌ତଗା’ ଗିତିନ୍‌ ଶମିରୋଣୀୟ ଆରେମ ଆପୁଣ୍ଡ୍‌ସେ ଇଇ ପାଲାଇ ଦର୍‌କାର୍ ଡିଗା। ମାଇ ପୁଣ୍ଡ୍‌ବାର୍ ଡିଅନ୍ ଆସାଉକାର୍ ଇତି ଡାବୁ ବେଡସେ ସୁନ, “ମାଇନା ଯତନ୍ ରୁଙ୍ଗା ମାରି ନ ଯଦି କନ୍ ନାନେ ଜବର୍ ଡାବୁ କର୍‌ଚ ଡେମ୍‌ତନ, ଡିତିନ୍‌ଲୋ ନିଙ୍ଗ୍ ସାସାବ୍ ବେଲା ଗିତିନ୍‌ କର୍‌ଚ ଡେଙ୍ଗ୍ କୁନ୍ ଗୁଲାଇ ବେଡସୁଙ୍ଗ୍‌ତିଙ୍ଗ୍‌।”

ମାଇନ୍’ ତୁର୍‌ଗୁ ଯୀଶୁ ଗିତିନ୍‌ ଈଶ୍‌ପର୍‌ନା ନିୟମ୍ ମାଗକୁନ୍ ଆରେମ୍ ପାଚାର୍‌ଲୋ “ନ ମା ଏତାୟନନି? କନ୍ ତିନ୍‌ଟା ରେମ ବ ନାନେ ଜା ଚର୍‌ରେମବ ଲକୁନ୍‌ରେମନା ଲଗେନ୍‌ରେମ୍ ଚର୍‌ଲୋ ମାରି ବୁଗ ? ମାଇ ଉତର୍ ବେଡ, “ଜା ମାଇନ୍ ବାଗ୍‌ବ ଦୟା ଅଜୁଲ ଡିଗା,ମାଇ।”ଅଇତିନ୍‌ଲୋ ଯୀଶୁ ଆମାଇ ସୁନ, “ନ ସା ୟା ମାରି ଡିତିନ୍ ଡେମ୍।”