13. ઈસરાયેલીસે હારી દેવના કરાર

ઈસરાયેલી સાહલા લાલ દરેને તેહુન લી ગે માગુન, દેવ તેહાલા રાન માસુન સીનાય સાંગાયજહ તે ડોંગરસવ લી ગે. યો તો જ ડોંગર હતા જઠ મુસાની પેટતા ઝુરુડલા હેરનેલ. તે લોકાસી તે ડોંગરને ખાલ તેહને તંબુ સાહલા ઉબા કરાત.

દેવની મુસા અન ઈસરાયેલને અખે લોકા સાહલા સાંગા, “તુમાલા કાયીમ માને ગોઠી સાહલા માનુલા આહા અન જો કરાર મા તુમને હારી કરાહા તેલા જાળવી રાખુલા આહા. જો તુમી ઈસા કરતાહાસ, ત તુમી માના ઈનામ ખુબ કિંમતી ધન, યાજકસા રાજ, અન એક પવિત્ર જાતિ ઠરસે.

દેવ મારફતે તેને પાસી યેવલા સાટી લોકાસી તીન દિસ પાવત પદરલા તયાર કરા. તાહા દેવ સીનાય ડોંગરને ટીગરીવર ખાલ ઉતરના. જદવ તો આના ત ધરતીકંપ હુયના, ઈજ ચમકની, ઢુંકટ હુયના, અન કાહળેસા પકા અવાજ આના. તાહા મુસા પદર ડોંગરવર ચડી ગે.

તાહા દેવની લોકાસે હારી એક કરાર કરા. તેની સાંગા, “મા તુમના દેવ, યહોવા આહાવ. મા જ આહાવ જેની તુમાલા મિસરને ગુલામી માસુન સોડવનાવ. કને દુસરા દેવની આરાધના નોકો કરસે.

મુરતી નોકો બનવસે અન તેહની આરાધના નોકો કરસે, કાહાકા મા, યહોવા, તુમના એકમાત્ર દેવ આહાવ. અયોગ્ય રીતકન માને નાવના ઉપેગ નોકો કરસા. ઈસવુને દિસલા પવિત્ર માનુલા સાટી આઠવ રાખજા. દુસરે શબ્દમા સવ દિસમા તુમના અખા કામ કરા, સાતવા દિસ તુમને સાટી ઈસવુના અન માલા આઠવ કરુના દિસ આહા.

“તુમને આયીસ અન બાહાસલા માન દીજા. ખુન નોકો કરસે. સીનાળી નોકો કરસે. ચોરી નોકો કરસે. તુમને સેજારીની બાયકો, તેના ઘર, કા ત તેને કને પન સામાનલા લી લેવની ઈચ્છા નોકો કરસી.”

તાહા દેવની યે દસ આજ્ઞા સાહલા દગડાને દોન પાટી સાહવર લીખીની મુસાલા દી દીદા. દેવની પાળુલા સાટી લોકા સાહલા દુસરા ખુબ નેમ દીદાત. જર તેહી તે નેમસા પાલન કરા ત દેવની તે લોકા સાહલા આસીરવાદ દેવલા અન તેહના રક્ષણ કરુની પ્રતિજ્ઞા કરી. પન તેની સાંગા કા જો તે તેના પાલન નીહી કરનાર ત તો તેહાલા દંડ કરીલ.

દેવની ઈસરાયેલી સાહલા એક ખુબ મોઠા માંડવ બનવુલા સાટી બી સાંગા – મીળુના માંડવ. તેની તેહાલા ચોક્કસ રીતે સાંગા કા માંડવલા કનેરીતે બનવુલા આહા, અન તેને મદી કને વસ્તુ સાહલા રાખુલા આહા. તેની તે માંડવલા દોન ખોલે સાહમા ભાગ પાડુલા સાટી એક ખુબ મોઠા પડદા બનવુલા સાટી બી સાંગના. દેવ તે પડદાને માગલે ખોલીમા યીલ અન તઠ રહીલ. જઠ દેવ હતા તે ખોલીમા જાવલા સાટી પરવાનગી ફક્ત મહાયાજક સાહલા જ હતી.

તે લોકા સાહલા તે મીળુને માંડવાને પુડ એક વેદી બનવુલા પડીલ. કોની બી જો દેવના નેમલા નીહી માનનાર તો તે વેદીવર એક જાનવરલા લી યીલ. તાહા યાજક તેલા બલિદાન કરીલ અન વેદીવર દેવને સાટી બલીદાનને રૂપમા બાળીલ. દેવની સાંગા કા તે જાનવરના રગત તે માનુસને પાપલા ઢાંકી લીલ. યે રીતે, આતા દેવ તે પાપલા નીહી હેરનાર. તો માનુસ દેવને નદરમા “શુદ ઠરીલ. દેવની મુસાના ભાવુસ હારુનલા અન હારુનને વંશ સાહલા તેના યાજક બનુલા સાટી પસંદ કરના.

દેવની તે લોકા સાહલા જે નેમ દીયેલ હતાત તે તેહાલા પાળુલા સાટી સહમત હુયનાત. તે ફક્ત દેવના લોકા હુયુલા અન ફક્ત તેની આરાધના કરુલા સાટી સહમત હુયનાત.

ખુબ દિસ પાવત, મુસા સીનાય ડોંગરને ટીગરીવર જ રહના. તો દેવ હારી ગોઠ કર હતા. પન લોકા તેલા પરત યેવલા તેની વાટ હેરી-હેરી થકી ગેત. તે સાટી તે હારુન પાસી સોના લીની આનાત અન તેની એક મુરતી બનવુલા સાટી સાંગનાત જેથી તે દેવ સીવાય તેની આરાધના કરી સકત. યે રીતે, તેહી ભયંકર રીતે દેવને ઈરુદ પાપ કરા.

હારુનની વાસરુને આકારમા સોનાની એક મુરતી બનવી. તે લોકાસી તે મુરતીની આરાધના કરુલા ચાલુ કરી દીનાત અન તેલા બલિદાન ચડવનાત! તેહને પાપને કારને દેવ તેહાવર ખુબ રગવાજેલ હતા. તો તેહાલા નાશ કરી દેવલા માગ હતા. પન મુસાની તેહાલા નીહી મારુલા સાટી દેવલા વિનંતી કરી. દેવની તેની વિનંતી આયકી અન તેહના નાશ નીહી કરા.

સેલે મુસા સીનાય ડોંગરવરહુન ખાલ ઉતરી આના. તો તે દોન દગડાસે પાટી સાહલા લીની હતા જેનેવર દેવની દસ આજ્ઞા સાહલા લીખેલ હતા. માગુન તેની તે મુરતીલા હેરના. તો હોડા રગમા આના કા તેની તે પાટી સાહલા ભુગા કરી દીના.

માગુન મુસાની તે મુરતીલા તોડીની તેના ભુગા બનવી દીના, અન તે ભુગાલા પાનીમા ભેગળવીની તે લોકા સાહલા તી પાની પેવાડી દીના. દેવની તે લોકા સાહવર એક મરકી દવાડી અન તેહને માસુન ખુબ લોકા મરી ગેત.

જે પાટી સાહલા મુસાની તોડી દીયેલ હતા તેની જાગા લેવલા સાટી મુસાની તે દસ આજ્ઞાસી દગડની નવે દગડાસે પાટે સાહલા બનવેત. તાહા તો ફીરીની ડોંગરવર ચડી ગે અન પ્રાર્થના કરના કા દેવ તે લોકા સાહલા માફ કર. દેવની મુસાના આયકા અન તેહાલા માફ કરી દીના. નવી પાટી સાહવર દસ આજ્ઞા સાહલા લીની મુસા ડોંગરવરહુન ખાલ ઉતરી આના. તાહા દેવની સીનાય ડોંગર પાસુન ત વચનને દેશ પાવત ઈસરાયેલીસી આગેવાની કરના.