20. બંદીવાસ અન પરત આનાત (સુટકારા)

ઈસારાયેલના રાજ્ય અન યહુદાના રાજ્ય દોનીસી દેવને ઈરુદ પાપ કરા. તેહી તે કરારલા તોડી દીદા જો દેવની તેહને હારી સીનાય ડોંગરવર કરેલ હતા. દેવ તેહાલા પસ્તાવા કરુલા અન ફીરીની તેની આરાધના કરુલા સાટી ચેતવની દેવલા તેને દેવ સહુન બોલનાર સાહલા દવાડના, પન તેહી તેહને ગોઠી માનુલા સાટી નાકાર કરી દીનાત.

તાહા દેવની તેહને દુશ્મન સાહલા તેહાલા નાશ કરુલા મજબુત કરુકન દોની રાજ્ય સાહલા દંડ દીના. આશુર એક દુસરા દેશ હતા જો ખુબ શક્તિશાળી હુયી ગે હતા. તે દુસરે દેશસે સાટી ખુબ દયા વગરના હતાત. તેહી યીની ઈસરાયેલને રાજ્યલા નાશ કરી દીનાત. આશુરીસી યીની ઇસ્રાયેલને ખુબ જના સાહલા મારી ટાકા, જી મનમા આના તી લુટી લીદા, અન દેશના ખુબ ભાગ સાહલા બાળી દીનાત.

આશુરીસી ખુબ આગેવાનો, ધનવાન લોકા, અન ઈસા લોકા જે કિંમતી વસ્તુ બનવી સકહતાત તેહાલા એક હારી ગોળા કરાત અન તે તેહાલા આશુર દેશમા લી ગેત. ઈસરાયેલમા ફક્ત થોડાક ગરીબ ઈસરાયેલી જ બચનાત.

માગુન આશુરી લોકા તે દેશમા રહુલા સાટી દુસરે દેશને લોકા સાહલા લી આનાત. તે દુસરે દેશને લોકાસી તે સાહરા સાહલા ફીરીની બનવનાત. જે ઈસરાયેલના તઠ બચલા તેહને હારી તેહી લગીન કરનાત. તે લોકાસા વંશ સમરુની સાંગાયનાત.

યહુદાને રાજ્યને લોકાસી હેરા કા કીસાક દેવની તેહાવર વીસવાસ નીહી કરુને અન તેની ગોઠ નીહી માનુને કારને ઈસરાયેલને રાજ્યને લોકા સાહલા દંડ દીયેલ હતા. તરીપન તેહી કનાનીસે દેવાસી મુરતીસી પુંજા કરી. દેવની તેહાલા ચેતવની દેવલા સાટી દેવ સહુન બોલનાર સાહલા દવાડા, પન તેહી આયકુલા સાટી નાકાર કરી દીનાત.

લગભગ 100 વરીસ માગુન આશુરીસી ઈસરાયેલને રાજ્યલા નાશ કરી દીનાત. દેવની બાબીલના રાજા, નબુખાદનેસરલા યહુદાને રાજ્યવર હુમલા કરુલા સાટી દવાડા. બાબીલ એક શક્તિશાળી દેશ હતા. યહુદાના રાજા નબુખાદનેસરના ગુલામ બનુલા અન દર વરીસ ખુબ ધન દેવલા સાટી સહમત હુયી ગે.

પન થોડાક વરીસ માગુન, યહુદાને રાજાની બાબીલને ઈરુદ બળવા કરા. તાહા બાબીલના રહનારાસી પરત યીની યહુદાને રાજ્યવર હુમલા કરી દીદા. તેહી યારુશાલેમ સાહારવર કબજા કરી લીનાત, મંદિરના નાશ કરી દીનાત અન સાહાર અન મંદિરને ખજાનાલા લુટી લી ગેત.

બળવા કરુને કારને યહુદાના રાજાલા દંડ કરુલા સાટી, નબુખાદનેસારને સયનીકસી રાજાને પોસાલા તેને પુડ મારી ટાકનાત અન માગુન તેલા આંદળા કરી દીનાત. તેને માગુન, તે રાજાલા લી ગેત જેથી તો બાબીલને ઝેલમા મરી જા.

નબુખાદનેસાર અન તેના સયનીક યહુદાને રાજ્યના લગભગ અખે લોકા સાહલા બાબીલ લી ગેત, ફક્ત અખેસે કરતા વદારે ગરીબ લોકા સાહલા માગ રાખનાત જેથી તે ખેતી કરત. સમયને યે કાળલા બંદીવાસ સાંગાયજહ જેમા દેવને લોકા સાહલા વચનને દેશ માસુન નીંગી જાવલા સાટી મજબુર કરવામા યીયેલ હતા.

ભલે હી દેવની તેને લોકા સાહલા તેહને પાપને સાટી બંદીવાસમા લી ગેત તે મારફતે દંડ કરના, તરીપન તો તેહાલા કા ત તેને કરારલા નીહી ભૂલનેલ. દેવ તેને લોકા સાહવર નદર કાયીમ જ રાખના અન તેહને હારી દેવ સહુન બોલનારસે મારફતે ગોઠી કરત રહના. તેની કરાર કરા કા સીતેર વરીસ માગુન, તે ફીરીની વચનને દેશમા યેતીલ.

લગભગ સીતેર વરીસ માગુન, પર્શિયાના રાજા કોરોસની બાબીલલા હરવા, તે સાટી બાબીલને રાજને કરતા પર્શિયાના રાજની ખુબ દેશ સાહવર રાજ કરા. ઈસરાયેલી લોકા આતા યહૂદી સાંગાયજ હતાત. તેહને માસુન ખુબજ જનાસી તેહના પુરા જીવન બાબીલમા પુરા કરેલ હતા. ફક્ત ખુબ વાય ડવરા યહૂદી સાહલા જ યહુદાના દેશ આઠવ હતા.

પર્શિયાના લોકા ખુબ શક્તિશાળી હતાત, પન તેહી તેહને જીતેલ લોકા સાહવર દયા કરી હતી. પર્શિયા લોકાસા રાજા બનના તેને થોડાક સમય માગુન, કોરોસની એક હુકુમ કરા કા કોની બી યહૂદી જો યહુદીયા જાવલા માગ હવા, તો પર્શિયા માસુન નીંગીની પરત યહુદીયાલા જાયી સકહ. હોડે સુદી કા તેની તેહાલા મંદિરલા ફીરીની બનવુલા સાટી ધન બી દીના. તાહા બંદીવાસને સીતેર વરસા માગુન, યહૂદીસી વાયજ લોકા યહુદીયાને યરુશાલેમ સાહારમા ફીરી આનાત.

જદવ તે લોકા યરુશાલેમ યી પુરનાત ત તેહી મંદિરલા અન સાહારને ચારી ચંબુતની દીવાલલા ફીરીની બનવનાત. પર્શિયાના લોકા આજુ બી તેહાવર રાજ કર હતાત પન એક વખત ફીરીની તે વચનને દેશમા રહ હતાત અન મંદિરમા આરાધના કર હતાત.