41. દેવ ઈસુલા મરેલ માસુન જીતા કરહ

સયનીકસે મારફતે ઈસુલા કુરુસવર ટાંગી દીદા માગુન, યહૂદી આગેવાનસી પિલાતલા સાંગા, “તો ઠગ, ઈસુની સાંગેલ હતા કા તો તીન દિસ માગુન મરેલ માસુન જીતા હુયી ઉઠીલ. એખાદલા યી નક્કી કરુલા સાટી મસાનની ચોકીદારી કરુલા પડીલ કા તેના ચેલા તેને શરીરલા ચોરી કરી નીહી લી જાત. જો તે તીસા કરતાહા ત તે સાંગતીલ કા તો મરેલ માસુન જીતા હુયી ઉઠનાહા.”

પિલાતની સાંગા, “થોડાક સયનીક સાહલા લી જા, અન જીસા તુમી કરી સકતાહાસ તીસા મસાનની ચોકીદારી કરા.” તે સાટી તેહી તે મસાનને દારને દગડવર એક મોહર મારી દીદી. તેહી યી નક્કી કરુલા સાટી તઠ સયનીક સાહલા બી બીસવી દીનાત કા કોની બી તેહને શરીરલા ચોરી નીહી સકત.

ઈસુને મરનને માગુન ઈસવુના દિસ હતા. કોની બી ઈસવુને દિસી કામ નીહી કરી સક હતા, તે સાટી ઈસુના કોની બી દોસ્તાર મસાનમા નીહી આનેલ. પન ઈસવુને દિસને દુસરે દિસી, સકાળીસના મોઠે પાહાટલા, થોડેક બાયકા ઈસુને મસાનવર જાવલા સાટી તયાર હુયનેત. તે તેને શરીરવર આજુ બી મસાલા લાવુલા માગ હતેત.

તે બાયકા જાયી પુરત તેને પુડ, મસાનમા એક મોઠા ધરતીકંપ હુયના. સરગ માસુન એક દેવદુતની યીની તે દગડલા સરકવી દીના જો મસાનને દારલા ઢાંકેલ હતા અન તેનેવર બીસી ગે. યો દેવદુત ઉજેડને જીસા ચમકી રહનેલ. મસાનમા જે સયનીક હતાત તેહી તેલા હેરા. તે હોડા બીહી ગયલા કા મરેલને જીસા જમીનવર પડી ગેત.

જદવ તે બાયકા મસાનમા યી પુરનેત ત તે દેવદુતની તેહાલા સાંગા, “બીહસે નોકો. ઈસુ અઠ નીહી આહા. તો મરેલ માસુન જીતા હુયી ઉઠનાહા, જીસા કા તેની સાંગેલ હતા કા તો જીતા હુયી ઉઠીલ! મસાનમા ગવસા અન હેરા.” તે બાયકાસી મસાનને મદી અન જઠ ઈસુના શરીરલા ઠેવેલ હતા તઠ ગવસનેત અન હેરનેત કા તેના શરીર તઠ નીહી હતા!

તાહા તે દેવદુતની તે બાયકા સાહલા સાંગા, “જાયીની તેને ચેલા સાહલા સાંગા, ‘ઈસુ મરેલ માસુન જીતા હુયી ઉઠનાહા અન તો તુમને પુડ-પુડ ગાલીલલા જાયીલ.’”

તે બાયકા સાહલા નવાય લાગની અન પકા આનંદ હુયના. તે ચેલા સાહલા બેસ ગોઠ આયકવુલા સાટી ધાંવદનેત.

જદવ તે બાયકા ચેલા સાહલા યી બેસ ગોઠ સાંગુલા સાટી તેહને મારોગમા હતેત, ત ઈસુ તેહને પુડ પરગટ હુયના. તે તેને પાયે પડનેત. તાહા ઈસુની સાંગા, “બીહસે નોકો. જાયીની માને ચેલા સાહલા ગાલીલ જાવલા સાટી સાંગા. તે માલા તઠ હેરતીલ.”