49. દેવના નવા કરાર

એક દેવદુતની એક જુવાન બાયકો મરિયમલા સાંગા કા તી દેવને પોસાલા જલમ દીલ. તી આજુ કુંવારી હતી, પન પવિત્ર આત્મા તી પાસી આના અન તી મીહનાવાળી હુયની. તીની એક પોસાલા જલમ દીદા જેના નાવ ઈસુ રાખા. તે સાટી, ઈસુ માનુસ અન દેવ દોની આહા.

ઈસુની ખુબ ચમત્કાર કરાત જી દાખવહ કા તો દેવ આહા. તો પાનીવર ચાલના અન તોફાનલા શાંત કરના. તેની ખુબ અજેરી સાહલા બેસ કરા અન ખુબ લોકા સાહમાસુન વેટ આત્મા સાહલા કાહાડના. તેની મરેલ માનસા સાહલા જીતા કરી દીદા, અન તેની પાંચ ભાકરી અન દોન માસા સાહલા 5,000 લોકા સાહલા ખાવલા સાટી પૂરતા જેવનમા પરિવર્તન કરી દીના.

ઈસુ એક મહાન સીકવનાર બી હતા. જી કાહી બી તેની સીકવા, તી તેની પરિપૂર્ણતાને હારી સીકવા. જી તો લોકા સાહલા કરુલા સાટી સાંગ હતા તી તેહી કરુલા પડ કાહાકા તો દેવના પોસા આહા. દાખલા તરીકે, તેની સીકવા કા તુમાલા દુસરે લોકા સાહલા યે રીતે માયા કરુની જરૂર આહા જીસા તુમી પદરલા માયા કરતાહાસ.

તેની યી બી સીકવા કા તુમાલા અખે વસ્તુસે કરતા વદારે અન પદર મિલકત કરતા બી વદારે દેવલા માયા કરુલા પડ.

ઈસુની સાંગા કા દુનેમા કને બી વસ્તુલા મેળવુલા તેને કરતા વદારે બેસ આહા કા દેવને રાજમા રહુલા. તેને રાજમા તુમાલા પરવેસ કરુલા સાટી જરૂરી આહા દેવ તુમાલા તુમને પાપ સાહપાસુન બચવ.

ઈસુની સાંગા કા થોડાક લોકા તેલા સ્વીકાર કરતીલ. દેવ તે લોકા સાહલા બચવીલ. પન દુસરા લોકા તેલા સ્વીકાર નીહી કરનાર. તેની યી બી સાંગા કા થોડાક લોકા ચાંગલી જમીનને જીસા આહાત, કાહાકા તે ઈસુને બારામા બેસ ગોઠલા સ્વીકાર કરી લેતાહા, અન દેવ તેહાલા બચવહ. પન થોડાક લોકા મારોગને કઠીન જમીનને જીસા આહાત. દેવના વચન બીને જીસા મારોગવર પડહ, પન તઠ કાહી બી નીહી ઉંગ. યે લોકા ઈસુને બારામા સંદેશલા અસ્વીકાર કરી દેતાહા. તે તેને રાજમા જાવલા સાટી નાકાર કરી દેતાહા.

ઈસુની સીકવા કા દેવ પાપી સાહવર પકા માયા કરહ. તો તેહાલા માફ કરુલા માગહ અન તેહાલા તેના પોસા બનવુલા માગહ.

ઈસુની યી બી સાંગા કા દેવ પાપલા તિરસ્કાર કરહ. કાહાકા આદમ અન હવાની પાપ કરા, તે સાટી તેને અખે વંશસી બી પાપ કરા. યે દુનેમા રહનારા દરેક માનુસ પાપ કરહ અન દેવ પાસુન દૂર આહા. દરેક માનુસ દેવના દુશ્મન આહાત.

પન દેવની યે દુનેમા રહનારા દરેક માનુસલા યે રીતે માયા કરી: તેની તેના એકના એક પોસાલા દી દીદા જેથી જો તેનેવર વીસવાસ કરહ દેવ તેહાલા દંડ નીહી દે. તેને જાગ, તો તેહને હારી કાયીમને સાટી રહતીલ.

તુમી મરુને યોગ્ય આહાસ, કાહાકા તુમી પાપ કરનાહાસ. તુમાવર દેવ રગ કર તી યોગ્ય જ આહા, તેને જાગ, તો ઈસુવર રગ કરના. તેની ઈસુલા કુરુસના મરન દીની દંડ દીદા.

ઈસુની કદી પાપ નીહી કરા, પન તેની દેવલા તેલા દંડ દેવુ દીના. તેની મરી જાવલા સ્વીકાર કરા. યે રીત કન, તુમને પાપ સાહલા અન દુનેમા રહનાર દરેક માનુસને પાપ સાહલા ઉચલી લી જાવલા સાટી તો દોષ વગરના બલિદાન હતા. ઈસુની પદરલા દેવને સાટી બલિદાન કરી દીના, તે સાટી દેવ કને બી પાપલા, હોડે સુદી કા ભયંકર પાપ સાહલા બી માફ કરહ.

ભલે હી જો તુમી ખુબ જ ચાંગલા કામા કરતા હવાસ, ત તેને મારફતે દેવ તુમાલા નીહી બચવનાર. તેના દોસ્તાર બનુલા સાટી ઈસા કાહી બી નીહી આહા જી તુમી કરી સકતાહાસ. તેને જાગ, તુમાલા વીસવાસ કરુલા આહા કા ઈસુ દેવના પોસા આહા, અન તો તુમને બદલે કુરુસવર મરી ગે, અન યી બી કા દેવની તેલા ફીરીની જીતા કરી દીદા. જો તુમી યેવર વીસવાસ કરસાલ, ત દેવ તુમને પાપસી માફી દીલ.

દેવ તે દરેક માનુસલા બચવીલ જો ઈસુવર વીસવાસ કરહ અન તેલા પદરના પ્રભુ સ્વીકાર કરહ. પન તો તેલા નીહી બચવનાર જો તેવર વીસવાસ નીહી કર. કાહી ફરક પડ નીહી કા તુમી ધનવાન આહાસ કા ત ગરીબ આહાસ, ગોહો આહાસ કા ત બાયકો આહાસ, ડવર આહાસ કા ત જુવાન આહાસ, કા ત તુમી કઠ રહતાહાસ. દેવ તુમાવર માયા કરહ અન તેની ઈચ્છા આહા કા તુમી ઈસુવર વીસવાસ કરા કા તો તુમના દોસ્તાર બની સક.

ઈસુ તુમાલા બોલવી રહનાહા કા તેનેવર વીસવાસ કરા અન બાપ્તીસ્મા લે. કાય તુમી વીસવાસ કરતાહાસ કા દેવના એકના એક પોસા, ઈસુ જ ખ્રિસ્ત આહા? કાય તુમી વીસવાસ કરતાહાસ કા તુમી એક પાપી આહાસ અન યી કા તુમી દેવ મારફતે તુમાલા દંડ કરવામા યે તેને યોગ્ય આહાસ? કાય તુમી વીસવાસ કરતાહાસ કા તુમને પાપ સાહલા મીટવુલા સાટી ઈસુ કુરુસવર મરના?

જો તુમી ઈસુવર અન જી તેની તુમને સાટી કરેલ આહા તેવર વીસવાસ કરતાહાસ, ત તુમી એક ખ્રિસ્તી આહાસ! સૈતાન તેને આંદારાને રાજમા આતા તુમાવર રાજ નીહી કર. આતા દેવ તેને ઉજેડને રાજમા તુમાવર રાજ કરહ. તેની તુમાલા પાપ કરુ પાસુન અટકવી દીદાહા, જી તુમી કરે કર હતાસ. તેની તુમાલા એક નવા, યોગ્ય જીવન દીયેલ આહા.

જો તુમી એક ખ્રિસ્તી આહાસ ત જી ઈસુની કરેલ આહા તેને કારને દેવની તુમને પાપ સાહલા માફ કરી દીદાહા. આતા, દેવ તુમાલા એક દુશ્મનને જીસા નીહી પન એકદમ નજીકના દોસ્તાર માનહ.

જો તુમી દેવના દોસ્તાર આહાસ અન પ્રભુ ઈસુના સેવક આહાસ ત તુમી તે ગોઠી સાહલા પાળુની ઈચ્છા કરસેલ જી ઈસુ તુમાલા સીકવહ. ભલે બી તુમી એક ખ્રિસ્તી હવાસ, સૈતાન આતા બી પાપ કરુલા સાટી તુમની પરીક્ષા કરીલ. પન દેવ કાયીમ તી કરહ જી તો સાંગહ કા તો કરીલ. તો સાંગહ કા જો તુમી પદરને પાપ સાહલા માની લે, ત તો તુમાલા માફ કરી દીલ. તો તુમાલા પાપને ઈરુદ લડુના સામર્થ દીલ.

દેવ તુમાલા પ્રાર્થના કરુલા અન તેને વચનલા વાંચુલા સાટી સાંગહ. તો તુમાલા દુસરે વીસવાસીસે હારી મીળીની તેની આરાધના કરુલા સાટી બી સાંગહ. તુમાલા દુસરે લોકા સાહલા બી દાખવુલા આહા કા તેની તુમને સાટી કાય કરેલ આહા. જો તુમી યે અખે કામા સાહલા કરા, ત તુમી તેના પાકા દોસ્તાર બની જાસેલ.