49. ૪૯. પરમેશ્વર જો નયો કરાર

હેકડો સર્ગ ડુત મરીયમ નાંલે જી કુંઆરી કે ચેં કે તું પરમેશ્વર જે પોત્તર કે જનમ ડીને, એતરે ઈ અયાં કુંઆરી વઈ, ઈ હેકડે પોત્તર કે જનમ ડેને ને ઈ એનજો નાંલો ઇસુ રખે. એતરે લા, ઇસુ માડુ ને પરમેશ્વર બોય આય.

ઇસુ ગચ મેડે ચમત્કાર ક્યા. ઈ સાભીત થીએતો કે ઈ પરમેશ્વર આય. ઈ પાણી મથે હલ્યા, તુફાન કે સાંત ક્યા, ગચ ભીમારે કે સાજા ક્યા, ભોછ્ડે આત્મા કે કઢી છ્ડ્યા, મરેલે ક જીરા ક્યા, ને પંજ માની ને બ નન્ઢી મછલી સે ૫૦૦૦ માડુ કે ખારાયા.

ઇસુ હકડા વડા ગુરુ પણ વા. ને ઈ અધીકાર સે કોછ્ધા વા, કીં કે ઈ પરમેશ્વર જા પોત્તર વા. એનીને સખાયા કે આંઈ બ્યે કે એડો પ્રેમ કયો કે જેડો આંઈ પેન્ઢ કે ક્યોતાં.

એનીને પાં કે સખાયા કે આંકે બઈ મડે ચીજું કે ધન ધોલત કના જજો પ્રેમ પરમેશ્વર તે હુણો ખપે.

ઇસુ ચ્યાં કે પરમેશ્વર જો રાજ હી ધોનીયા જી મડે ચીજું સે પણ જજો મોલ વારો આય. પરમેશ્વર જે રાજ મેં હોણું ઈ કો પણ માડુ લા જજી જરૂર જી ગાલ આય. પરમેશ્વર જે રાજ મેં ધાખલ થે લા, આંકે આંજે પાપ સે ઓધાર ગને જી જરૂર આય.

ઇસુ ચ્યાં કેતરાક એની કે ખીકારીન્ધા ને ઓની જો ઓધાર થીન્ધો, પણ કેતરાક એડો નઈ કરીએં. ઈ ચ્યાં કે કતરાક ખાસી મટી જેડા વેં તા. ઉ ઇસુ જા ખાસા વાવડ જો સ્વીકાર ક્યા ને ઓનીજો ઓધાર થ્યો. ને બ્યા રસ્તે જી કઠણ મટી જેડા આય, જતે પરમેશ્વર જે વચન જા બેજ ધાખલ થીએ નતા, ને કોઈ મોલ પેધા થીએ નતો. એડા માડુ પરમેશ્વર જે બોધ કે નફરત કેંતા ને પરમેશ્વર જે રાજ મેં ધાખલ થઈ સકે નતા.

ઇસુ સખાયા કે પરમેશ્વર પાપીએ કે બોરો પ્રેમ કરીએંતા. ઈ એનીં કે પાપ જી માફી ડે લા મંગેતા ને પેન્ઢ જા બચા ભનાય લા મંગેતા

ઇસુ પાં કે હી પણ ચ્યાં કે પરમેશ્વર પાપ કે ધીકાર કરેતા. જડે આધમ ને હવા પાપ ક્યા તડે એનજી અસર એનીજે મડે સંતાન મથે થઇ આય. એનજો પરીણામ હી વો કે, ધોનીયા જા મડે માડુ પાપ કેં તાં ને પરમેશ્વર નું છેટા આય. એતરે લા મડે માડુ પરમેશ્વર જો ધોસ્મણ ભન્યો આય.

પણ પરમેશ્વર ધોનીયા જા મડે માડુ કે એતરો પ્રેમ ક્યા કે એનીને પેન્ઢ જો હકડે મેં હકડો પોત્તર ડેઇ ડેના,એતરે જકો એની મથે વેસ્વાસ કેં તાં એન કે પાપ જી સજા નઈ જુડે, પણ ઈ પરમેશ્વર ભેરા હમેસ રોન્ધા.

આંજે પાપ સે, આંઈ ગોનેગાર અયોં ને મોત જે લાયક અયોં. પરમેશ્વર આં મથે ખારા થીણા ખપે. પણ ઈ પેન્ઢ જો ખાર આંજે ભધલે ઇસુ મથે કઢે. જડે ઇસુ કરોસ મથે મરી વ્યા, તડે ઈ પાંજી સજા ભોગવે.

ઇસુ કેની એ કોઈ પાપ નાય ક્યા, પણ ઈ સજા ભોગવે ને મોત પસંધ ક્યા. એની ને પુરેપુરો ભલીધાન જે વારે પાંજા ને ધોનીયા જે મણી લા પેન્ઢ જી જાત જો ભલીધાન ક્યા. કીં કે ઇસુ પેન્ઢ જો ભલીધાન ડેના એતરે પરમેશ્વર કોઈ પણ પાપ જી માફી ડેઇ સકેતા. એતરે સુધી કે ઈ કેતરા પણ જજા પાપ વે.

ખાસા કમ આંકે ભચાય સકે ન. કોઈ એડો કમ નાય જકો પરમેશ્વર ભેરે પાંજે તોટલ સભંધ કે જોડી સકે. ફકત ઇસુ જ આંજે પાપ કે માફ કેઈ સકેતા. આંકે વેસ્વાસ કેણો ખપે કે ઇસુ પરમેશ્વર જા પોત્તર આય, ઈ આંજી જગા તે કરોસ મથે ભલીધાન થઇ વ્યા ને પોય પરમેશ્વર એનીકે મરે મેં નું વરી જીરા ક્યા.

જકો ઇસુ મથે વેસ્વાસ કેન્ધા ને એનીકે પરભુ મનીન્ધા એન જો પરમેશ્વર ઓધાર કેન્ધા. પણ જકો વેસ્વાસ નતા કરીએ એડે કોઈ પણ માડુ જો પરમેશ્વર ભચાવ નઈ કરીએ. હી ગાલ મથે વેસ્વાસ કરે જી આય કે આંઈ ગરીભ વો કે અમીર, માડુ કે બાઈમાડુ, ગેઢા કે જુઆન, કે પોય કો પણ ડેસ જા વો. પરમેશ્વર આંકે પ્રેમ કેં તાં, ને ઇન્છા રખેતા કે આંઈ ઇસુ મથે વેસ્વાસ કયો જેસે ઈ આં ભેરો હેકડો ખાસો સભન્ધ રખી સકે.

ઇસુ આંકે એની મથે વેસ્વાસ કરે લા ને બાપ્તીસમાં ગને લા કોઠાયતા. કોરો આંઈ વેસ્વાસ ક્યોતા કે ઇસુ જ મસીહા આય ને પરમેશ્વર જા હકડે મેં હકડા પોત્તર આય. કોરો આંઈ વેસ્વાસ ક્યોતા કે આંઈ પાપી અયોં ને પરમેશ્વર જી સજા કે લાયક અયોં. કોરો આંઈ વેસ્વાસ ક્યોતા કે ઇસુ આંજે પાપે લા કરોસ મથે મરી વ્યા?

એતરે આંઈ ઇસુ મથે ને એની ને જકો પાં લા ક્યા એન મથે વેસ્વાસ ક્યોતાં ત આંઈ હકડા ખ્રીસ્તી અયોં! પરમેશ્વર આંકે સેતાણ જે રાજ જે અંધારે મેં નું બારા કઢ્યા, ને આંકે પરમેશ્વર અજવારે જે રાજ મેં રખ્યા આય. પરમેશ્વર આંજા જોને કમ કરેજી પાપી રીત કે ગની ને આંકે કમ કરે લા નયો સચો મારગ ડેના આય.

જ આંઈ હેકડા ખ્રીસ્તી અયોં ત જકો ઇસુ ક્યા એન કારણ પરમેશ્વર આંજા પાપ માફ કઈ છ્ડ્યા આય. હાણે પરમેશ્વર આંકે ધોસ્મણ ન પણ ખાસ ભાઈબન્ધ મનેતા.

જ આંઈ પરમેશ્વર જા ભાઈબંધ અયોં ને પરભુ ઇસુ જા ચાકર અયોં ત ઇસુ જકો સખાઈન્ધા એનજો આંકે પાલન કેજો આય. જ આંઈ ખ્રીસ્તી અયોં, ત પણ પાપ જી કસોટી મેં અચીન્ધા. પણ પરમેશ્વર વેસ્વાસ જે જોગ્ય આય ને ઈ ચેતા કે જ આંઈ આંજા પાપ કે કભુલ ક્યોતા ત ઈ આંકે માફ કેન્ધા. ઈ પાપ સામે લડાઈ કરે લા આંકે સકતી ડીન્ધા.

પરમેશ્વર ચેતા કે આંઈ બ્યે ખ્રીસ્તી ભેરા મલી ને પ્રાર્થના કયો, એનીજા વચન વાંચ્યો, ને એનીજો ભજન કયો. ને જકો ઈ પાં લા ક્યા આય ઈ બ્યે કે ચેં સોણાયો. હી મડે ગાલ્યું પરમેશ્વર ભેરે હકડે ખાસે સભન્ધ રખે લા આંજી મધધ કેંતાં.