9. દેવાને મુસાદય સાદી

યુસુફચે મરણ મંગે તાચે આખે સગાવાળે મિસરમાં રહીન. તે ને તાંહચે વંશજો ઘણે વરીસ હુધી તથય રહીન ને તાંહદય ઘણાં પોસાં હોન તે ઇઝરાએલી લોક આખાન.

ઘણે વરીસ મંગે, ઇઝરાયલીચી સંખ્યા ઘણી વધીન, મીસરીદય આતાં યુસુફ અગર તેહેં તાંહદય કશેક રીતે મદદ કરની આશી તો તાંહદય યાદ રહનો નાહાં આશી, તે ઇઝરાએલીશીં બિહો મંડીન કશા કાય તે સંખ્યામાં ઘણે આશી, તાચેન મિસરમાં તે વખતે જો ફારુન રાજ કરત આશી, તેહેં ઇઝરાએલીદય મીસરીહાંચો ગુલામ બનાવી.

મીસરીઆંહે ઇઝરાએલીવર મટે બંગલે અને આખે કોટ બાંધોદય દબાવ કરી,કડક મહેનતચે લીધે તાંહ્ચી જિંદગી ખરાબ બનુંજાયની આશી. પણ દેવાને તાંહદયઆશીર્વાદ ઓપનો ને તાંહદય ઘણે પોસે હોન.

ફારુનને નાંગી કાય ઇઝરાયલીદય ઘણેં પોસે આહાત, તાચેન તેહેં તાચે માણસાદય હુકમ ઓપી કાય તે ઇઝરાયલીચે આખે પોસાંદય નાઈલખાડીમાં મેલુંને મારત.

એક ઈઝરાયલી બાઈલેને પોસાદય જલમ ઓપી. તેહેં ને તાચે નોવરાને તે પોસાદય બનું શક્ય તલો ટાઈમ દપવું રાખી.

જંય પોસાચે આઈસ–બાહાસ તાદય ઘણોવાર દપવું સકીન નાંહાતંય તાંહે તાદય એક ટોપલામાં ઠોવી ને બરુચેવચ્ચેનાઈલ ખાડીમાં કાંઠાવર તરતાં ઠોવી. જેથી તેતાદય મરણશીં બચાવું સકત, તાચી મટી બહનીશ તાવર નજર રાખત આશી કાય, તાચો કાય હોય્દ?

ફારુનચી પોસી ટોપલાદય નાંધુને તાચેમાજ નાંગી, જંય તેહેં પોસાદય નાંગી કાય લગેજ તેહેં તાદય પોતાચો પોસો તરીકે ધીહું ધીદ. તેહેં ઇઝરાએલી બાઈલેદય ભાડે રાખી કાય તીપોસાચી કાળજી રાખય. તીયી જાણત નાહા આશી કાય તી પોસાચી જ આઈસ આશી, જંય પોસો મટો હોન કાય તાદય આંતા આય્સચે દુધાચી જરૂર નાહાં આશી, તેહેં તાદય ફારુનચે પોયરયેદય આઝુન ઓપી, જેહેં તાચો નાંવ મુસા પાડી.

એક દિસ જંય મુસા મટો હોન તંય તેહેં નાંગી કાય એક મીસરી એક ઇઝરાયલીદય કૂટત આશી, મુસા ને તાચે જોડીદાર ઇઝરાયેલીદય બચાવોંચી કોશીશ કરી.

જંય મુસાને વિચારી કાય કોની તાદય નાંગત નાંહાં આહાય, તંય તેહેં તે મીસરીદય મારું મેલી ને તાચો આંગ દાઠું દીન. પણ મુસા ને જાં કરના આશી તાં એખાદ ને નાંગના આશી.

મુસા ને જાં કરનાં આશી તાચી ખબર ફારુનદય હોન તંય તેહેં મુસાદય મારું મેલોંચી કોશીશ કરી.મુસા મિસરમાશીં રનમાં પળુંજાવ કાય જથય તો ફારુનચે સૈનિકોશીં બેસ રહું શકય.

મુસા મિસરશીં ઘણો દુર અશો રન માં ભરવાડ બનુંને રહીન તો તે જગ્યાચે એક બાઈલચે હારીં પરણીન,ને તાદય દોન પોસે હોન.

એક દિસ જંય મુસા ઘેટાંદય ચારત આશી, તંય તેહેં નાંગી કાય એક ઝાડ પેટત આશી. પણ ઝાડાચી લાખાડી નાહા હોત આશી. મુસા બેસ રીતે તાદય નાંઘુ શકાય તે સાઠીં તાચે પાસ જાવ. જશો તો પેટત ઝાડચે પાસ જાવ, દેવાચે જાબાને આખી, “મુસા, તુઝે વાંધાય ઉતાર, જે જગ્યાવર તું ઉભો આહાસ તી પવિત્ર આહાય.”

દેવા ને આખી, “મહેં માંઝે લોકાંચી દુઃખના નાંગી. મંય તુદય ફારુનશીં દવડંય, જેથી તું ઇઝરાયલીદય મિસરચે ગુલામીમાંશીં બાહેર આણું શકીશ. મંય તાંહદય કનાન દેશ ઓપંય્દ, યે વિષે મંય ઈબ્રાહીમદય, ઇસહાકદય અને યાકુબદય વાયદો ઓપનો આશી’’.

મુસા ને સુદકરી, “ જો લોક જાણો માઘીતકાય માંદય કોણેં દવડનો તે મંય કાય આખયં ? દેવા ને આખી, “મંય જો આહાંય,તો આહાંય તાંહદય આખ કાય “મંય આહાંય તેહેં માંદય દવડી આહાય” તાંહદય યો પણ આખીશ કાય, “મંય યહોવા આહાંય. તુમચે પૂર્વજ ઈબ્રાહીમ,ઇસહાક,ને યાકુબચો દેવ યો માઝો કાયમચો નાંવ આહાય.

મુસા ફારુનશીંજાંવદય બીહત આશી, કશા કાય તો માનત આશી કાય તો બેસ રીતે બોલું સકત નાંહા આશી, તાચેન દેવાને મુસાચે ભાવુસ હારુનદય તાચી મદદ કરોંદય દવડી, દેવાને મુસા ને હારુનદય ચેતવને આશી કાયફારૂનમાનય્દ નાહા .