12. ૧૨. નિર્ગમન

ઈસરાયેલી લોકા મિસર માસુન નીંગીની ખુબ ખુશ હતાત. તે આતા ગુલામ નીહી હતાત, અન તે વચનને દેશમા જાઈ રહલા. જી કાહી બી ઈસરાયેલીસી માગા, મિસરીસી તેહાલા તી અખા દીદા, હોડે સુદી કા સોના અન ચાંદી અન દુસરી કિંમતી વસ્તુ. દુસરે દેશને થોડાક લોકાસી દેવવર વીસવાસ કરા અન જદવ ઈસરાયેલી લોકા મિસર માસુન નીંગનાત ત તે બી તેહને હારી ગેત.

દિસના મોઠા આબુટના ગોળા તેહને પુડ-પુડ ચાલના. અન રાતને સમયમા યી ઈસતોના ગોળા બની ગે. જો કે દેવ તે આબુટને ગોળામા અન ઈસતોને ગોળામા હતા, કાયમ તેહને હારી હતા અન તેની મુસાફરી કરતા સમય તેહની આગેવાની કરી. તેહાલા ફક્ત હોડાક કરુલા હતા કા તેને માગ ચાલત.

થોડાક સમયને માગુન, ફારુન અન તેને લોકાસી તેહના મન બદલી દીદા. તે ઈસરાયેલી સાહલા આજુ ગુલામ બનવુલા માગ હતાત. તે સાટી તેહી ઈસરાયેલીસે માગ ગેત. યો દેવ જ હતા જેની તેહને મન સાહલા બદલી દીનેલ. તેની ઈસા યે સાટી કરા કાહાકા તેની ઈચ્છા હતી કા દરેક જના યી જાની લેત કા ફારુન કરતા અન મિસરીસે અખે દેવાસા કરતા તો, યહોવા, અધિક શક્તિશાળી આહા.

તહાં ફારુન અન તેના નોકર ઇઝરાયેલ સહલા આજુ પાદર ના ગુલામ બનવુંલા સાટીમાંગુન ગયલા.જદવ ઈસરાયેલીસી મિસરની સેનાલા યેતા હેરનાત ત તેહાલા માહિત પડી ગે કા તે ફારુનની સેના અન લાલ દરેને મદી ફસી ગેહેત. તે પકા બીહી ગેત અન સંગુલા લાગલા, “આમી મિસરલા કજ સોડનાવ? આમી મરુલા આહાવ!”

મુસાની ઈસરાયેલી સાહલા સાંગા, “બીહુલા બંદ કરા! દેવ આજ તુમને સાટી લડીલ અન તુમાલા બચવીલ.” તાહા દેવની મુસાલા સાંગા, “યે લોકા સાહલા લાલ દરે સવ પુડ જાવલા સાટી સાંગ.”

તાહા દેવની તે આબુટને ગોળાલા લીની ઈસરાયેલીસે અન મિસરીસે મદી ઠવી દીના જેથી મિસરી લોકા ઈસરાયેલી લોકા સાહલા હેરી નીહી સકત.

દેવની મુસાલા દરેવર હાત ઊંચા કરુલા સાટી સાંગના. માગુન દેવની વારાકન દરેને પાનીલા જેવે અન ડાવે સવ કરવી દીના, જેકન કા દરે માસુન હુયીની એક મારોગ બની ગે

ઈસરાયેલી લોકા તેહને દોની સહુન પાનીની દીવાલસે હારી કોરડી જમીનવર હુયીની દરે માસુન ચાલીની નીંગી ગેત.

તાહા દેવની તે મારોગ માસુન આબુટને ગોળાલા ઊંચલી લીદા જેથી મિસરી લોકા ઈસરાયેલી સાહલા બચી ન જાતા હેરત. મિસરીસી તેહાલા ધરુલા સાટી તેહને માગ જાવલા નકી કરી લીનાત.

તાહા તેહી દરેને મદી માસુન તે મારોગવર ઈસરાયેલીસે માગ ગેત, પન દેવની મિસરી સાહલા ઘાબરવી દીના અન તેહને રથ સાહલા અટકવી દીના. તે આરડુલા લાગનાત, “પોળા! ઈસરાયેલી સહુન દેવ લડી રહનાહા!”

અખા ઈસરાયેલી દરેને દુસરે સહુન જાયી પુરનાત. તાહા દેવની મુસાલા સાંગા કા તો ફીરીની પાનીવર હાત લાંબા કર. જદવ મુસાની ઈસા કરા, ત પાની મિસરને સેનાવર યી પડના અન તેને સામાન્ય સ્થિતિમા યી ગે. અખી મિસરની સેના બુડી ગય.

જદવ ઈસરાયેલીસી હેરા કા મિસરી મરી ગેહેત ત તેહી દેવવર વીસવાસ કરા. તેહી વીસવાસ કરનાત કા મુસા દેવ સહુન બોલનાર આહા.

ઈસરાયેલી લોકા યે સાટી બી ખુબ આનંદમા હતાત કાહાકા દેવની તેહાલા મરન પાસુન અન ગુલામ હુયુ પાસુન બચવી લીનેલ. આતા તે દેવની આરાધના કરુલા અન તેની આજ્ઞાલા પાળુલા સાટી સ્વતંત્ર હતાત. ઈસરાયેલીસી તેહની સ્વતંત્રતાના સન પાળુલા સાટી અન દેવલા વાનુલા સાટી ખુબ ગાના લાવનાત કાહાકા તેની તેહાલા મિસરીસે સેના પાસુન બચવેલ હતા.

દેવની ઈસરાયેલી સાહલા દર વરીસ એક સન પાળુલા સાટી હુકુમ દીદા યી આઠવ કરુલા સાટી કા કીસાક કરી દેવની મિસરી સાહલા હરવી દીદા અન તેહાલા ગુલામ હુયુ પાસુન સ્વતંત્ર કરા. યો પાસખાના સન સાંગાય જ હતા. તેમા તેલા તેના સન પાળુલા સાટી એક નીરોગી મેંડાના બલિદાન કરુલા હતા, તેલા ભુજુલા હતા, અન તેલા ખમીર વગરને ભાકરને હારી ખાવલા હતા.