36. ૩૬. રૂપાંતર

એક દિસ, ઈસુની તેના તીન ચેલા પિતર, યાકુબ અન યોહાનલા તેને હારી લીના. (યો યોહાન નાવના ચેલા તો માનુસ નીહી આહા જેની ઈસુલા બાપ્તિસમા દીયેલ હતા.) તે પ્રાર્થના કરુલા સાટી ઉંચે ડોંગરવર ગેત.

જદવ ઈસુ પ્રાર્થના કરી રહનેલ ત તેના ચેહરા દિસને જીસા ઉજેડવાળા હુયી ગે. તેના કપડા ઉજેડને જીસા ધવળા હુયી ગેત, જીસા ધરતીવર કોની કરી સક તેને કરતા બી વદારે ધવળા.

તાહા મુસા અન એલિયા દેવ સહુન બોલનાર પરગટ હુયનાત. યે ગોહો યે ધરતીવર યે સમય પાસુન ખુબ સેંબર વરીસ પુડ રહ હતાત. તેહી ઈસુને મરનને બારામા ગોઠ કરી, કાહાકા તો લેગજ યરુશાલેમમા મરી જાયીલ.

જદવ મુસા અન એલિયા ઈસુ હારી ગોઠી કર હતાત તાહા પિતરની ઈસુલા સાંગા, “આપલે સાટી અઠ રહુલા બેસ આહા. આપલે તીન માંડવા સાહલા બનવુ, એક તુને સાટી, એક મુસાને સાટી અન એક એલિયાને સાટી.” પન પિતરલા માહિત નીહી હતા કા તો કાય સાંગી રહનાહા.

જદવ પિતર ગોઠ કર હતા, ત એક ઉજળા ઢગ ખાલ યીની તેહાલા ઢાંકી દીના. માગુન તેહી ઢગ માસુન એક અવાજલા યેતા આયકનાત. તેની સાંગા, “યો માના પોસા આહા તેલા મા માયા કરાહા. મા તેનેકન ખુશ આહાવ. તેના આયકા.” તે તીની ચેલા બીહી ગેત અન જમીનવર પડી ગેત.

તાહા ઈસુની તેહાલા હાત લાવા અન સાંગા, “બીહા નોકો. ઉઠી જા.” જદવ તેહી ચારી ચંબુત હેરનાત, ત જો બી તઠ હતા તો ફક્ત ઈસુ હતા.

ઈસુ અન તે તીની ચેલા તે ડોંગર વરહુન પરત ખાલ ઉતરી આનાત. તાહા ઈસુની તેહાલા સાંગા, “આતા જી અઠ હુયના તેની ચર્ચા કોનાહારી નોકો કરસાલ. મા થોડાક સમયમા મરી જાયીન અન માગુન જીતા હુયી જાયીન. તેને માગુન, તુમી લોકા સાહલા સાંગી સકતાહસ.”