7. ૦૭. દેવની યાકુબલા આસીરવાદ દેહે

જદવ તે પોસા મોઠલા હુયનાત ત યાકુબલા ઘર જ રહુલા બેસ લાગના, પન એસાવલા જાનવરાસા શિકાર કરુલા ગમ હતા. રીબકા યાકુબવર માયા કર હતી, પન ઈસાહાક એસાવવર માયા રાખના.

એક દિસ, જદવ એસાવ શિકાર કરીની પરત આના ત તો ખુબ ભુક હતા. એસાવની યાકુબલા સાંગા, “જી તુ રાંદનાહાસ તે માસુન થોડાક જેવન માલા દે.” યાકુબની જવાબ દીદા, પુડ માને હારી યી પ્રતિજ્ઞા કર કા વડીલ આહાસ તેને કારને દરેક વસ્તુ જી તુલા મીળુલા પડ, તી અખા માલા દેસીલ.” તાહા એસાવની તી અખી વસ્તુ સાહલા યાકુબલા દેવલા સાટી પ્રતિજ્ઞા કરી દીના. તાહા યાકુબની તેલા થોડાક જેવન દીદા.

ઈસાહાકા એસાવલા આસીરવાદ દેવલા માગ હતા. પન ઈસા હુય તેને પુડ તેહી ઈસા કરા, રીબકા અન યાકુબની યાકુબના એસાવ હુયુના ઢોંગ કરીની તેને હારી ધોકા કરનાત. ઈસાહાક ડવર હતા અન આતા હેરી નીહી સક હતા. તે સાટી યાકુબની એસાવના કપડા પોવાત અન બકરીને કાતડાલા તેને ગળા અન હાત સાહવર લાવી લીના.

યાકુબ ઈસાહાક પાસી આના અન સાંગના, “મા એસાવ આહાવ. મા યે સાટી આનાહાવ કા તુ માલા આસીરવાદ દેસ.” જદવ ઈસાહાકની બકરીને કેસા સાહલા અનુભવ કરના અન કપડા સાહલા ઘનાવના, ત તેની ઈચારા કા યો એસાવ આહા અન તેલા આસીરવાદ દીના.

એસાવની યાકુબવર રગ કરી કાહાકા યાકુબની તેના પુડલે પોસાને અધિકારલા અન હારી હારી તેને આસીરવાદ સાહલા બી ચોરી લીયેલ હતા. તાહા તેની તેના બાહાસ મરી જાયીલ તેને માગુન યાકુબલા મારી ટાકુની યોજના બનવી.

પન રીબકાની એસાવની યોજનાલા આયકી લીની. તે સાટી તીની અન ઈસાહાકની યાકુબલા તીને સગાવાળાસે હારી રહુલા સાટી ખુબ દૂર દવાડી દીનાત.

યાકુબ ખુબ વરસા પાવત રીબકાને સગાવાળાસે હારી રહના. તે સમય દરમ્યાન તેની લગીન કરા અન બારા પોસા અન એક પોસીલા જલમ દીના. દેવની તેલા પકા ધનવાન બનવી દીના.

વીસ વરસા પાવત કનાનમા તેને ઘર પાસુન દૂર રહના માગુન, યાકુબ તેના કુટુંબ, તેના દાસો, અન તેને જાનવરાસે ટોળાસે હારી તઠ પરત આના.

યાકુબ યે સાટી ખુબ ભેવમા હતા કાહાકા તેની ઈચારા કા એસાવ આતા બી તેલા મારી ટાકુલા માગ હતા. તે સાટી તેની ભેટને રીતે જાનવરાસે ટોળા સાહલા એસાવ પાસી દવાડના. જે દાસ તે ટોળા સાહલા લી ગે હતાત તેહી સાંગા, “તુના દાસ યાકુબ, યે જાનવરા સાહલા તુલા દેહે. તો લેગ જ યી રહનાહા.”

પન એસાવ આતા યાકુબલા નુકશાન કરુલા નીહી માગ હતા. તેને જાગ, તો તેલા એક વખત આજુ હેરી ખુબ ખુશ હતા. તેને માગુન યાકુબ કનાનમા શાંતિથી રહના. માગુન ઈસાહાક મરી ગે અન યાકુબ અન એસાવની તેલા દાટી દીદા. કરારની પ્રતિજ્ઞા સાહલા જી દેવની ઈબ્રાહીમહારી કરેલ હતી તી આતા ઈસાહાક પાસુન યાકુબવર યી ગયેલ હતી.