1. ୧. ଦର୍ତନି ଅରେଙ୍ଗ କୁନ୍ ଉସାରାମ୍
ସିସେନୁଗ୍ ଈଶ୍ପର୍ କନ୍ ରକମ୍ ଗୁଲାଇ ବିଷୟଲେ ଅରେଙ୍ଗ। ଦର୍ତନି ମାରି ଗୁଲାଇ୍ ଦର୍ତନି ବ ଡିକୁନ୍ ଗୁଲାଇ ଜିନିଷଲେ ଚଅ ଦିନ୍ବ ମାଇ ଅରେଙ୍ଗ। ଉଣ୍ଡୋଇଲ ଈଶ୍ପର୍ ଆଦର୍ତନି ଅରେଙ୍ଗ, କନ ଦର୍ତନି ବ ମିଣ୍ଡି ମାରି ମାସା ଆଡିତା ଗିତିନ୍ ବେଲାଜାକ ଈଶ୍ପର୍ ମାସା ଅରେଙ୍ଗ ଆଡିତା। ଈଶ୍ପର୍ନା ଜୀବନ ଡ଼ାଗ୍ ବାଗ୍ବ ଡିଗା।
ମାରି ଈଶ୍ପର୍ ସୁନ, “ତାରା ଡ଼େ” ମାରି ଆର ତାରାଗା। ଈଶ୍ପର୍ ଆତାରାଗ୍ ଯୁଲସା ଗିତିନ୍ ବାନି ଡିଗା,ମାରି ମାଇ ଆତିନ୍ ସିମିଇ ଡୋ ସୁନ।” ଆତିନେ ଈଶ୍ପର୍ ଆଇୟୁଁର୍ ତାରାଗ୍ ନାନେ ପାଲ୍ଡ଼େମ, ମାରି ଆଗିତିନ୍ ୟୁଁର୍ “ମିଣ୍ଡି” ଡୁଗ।” ଈଶ୍ପର୍ ଡ଼େମକୁନ୍ ପର୍ତୁମ ଦିନ୍ ଆତାରାଗ୍ ଅରେଙ୍ଗ।
ତିଆର୍ ଡ଼େମକୁନ୍ ଦୁଇ ଦିନ୍ବ ଈଶ୍ପର୍ ସୁନ, “ଡ଼ାଗ୍ ପାଲ୍ ପାଲ୍ ଡେମେ,ମାରି ଡ଼ିତିନ୍ସୁଗ ଡେଙ୍ଗା। ଈଶ୍ପର୍ ଡାଗ୍ନା ବାଗ୍ବନା ଆବାଗ୍ “ବାଦଲ୍” ଡୋ ସୁନ।
ତିନ୍ ଦିନ୍ବ ଈଶ୍ପର୍ ସୁନ, “ଗୁଲାଇ ଡ଼ାଗ୍ ସାଗ୍ମୁଇ ବ ଡେମେ, ମାରି ଉଁସର୍କୁନ୍ ତୁବୁଗ୍ ତିନାଲେ ମାରି ଗିତିନ୍ ଉସର୍କୁନ୍ ଆତୁବୁଗ୍ “ଦର୍ତନି” ମାରି ଆଡାଗ୍ “କିଣ୍ଡାଗ୍” ଡସେ ସୁନ। ଈଶ୍ପର୍ ମା ଅରେଙ୍ଗ ଡିଗା ଗିତିନ୍ ବାନି ଡିଗା।
ମାରି ଈଶ୍ପର୍ ସୁନ, “ଦର୍ତନି ବ ଗୁଲାଇ ସେମୁଗ୍ ମାରି ଲାଟାବୁଟାଲେ ତୁରେ।” ମାରି ତିଡ଼ିନ୍ ସୁଗ ଡେଙ୍ଗା। ମାରି ଈଶ୍ପର୍ ଯୁଲ ଜେ ଗିତିନ୍ ବାନି ଡିଗା।
ତିଆର୍ ଡେଙ୍ଗ୍କୁନ୍ ଚାର୍ ଦିନ୍ବ ଈଶ୍ପର୍ ସୁନ, “ବାଦଲ୍ ବ ତାରାଗ୍ ଡେମେ।”ମାରି ସିଙ୍ଗ୍ ମାରି ଆର୍କେ ତାରାଲେ। ଈଶ୍ପର୍ ଆମାଏ ଦର୍ତନି ବାଗବ ତାରାଗ୍ ବେବେ ପାଲାଇ ସିମିହି ମାରି ମିଣ୍ଡି ମାସ୍ ମାରି ବରଷ୍ ନା ଚିନାସୁଗ ମାମାଗ୍ ପାଲାଇ ତିଆର୍ ଡ଼େମ। ମାରି ଈଶ୍ପର୍ ଯୁଲ ଜେ ଗିତିନ୍ ବାନି ଡିଗା।
ତିଆର୍ ଡେଙ୍ଗ୍କୁନ୍ ପାଞ୍ଚ୍ ଦିନ୍ବ ଈଶ୍ପର୍ ସୁନ, “ଗୁଲାଇ ଜୀବନ୍ ଡିକୁନ୍ ଜିବ୍ ଡାଗ୍ବ ବର୍ତି ଡେମେ, ମାରି ପିରିଗ୍ ଲେ ବାଦଲ୍ ବୋ ଉଡ଼ଲେ”। ଡିକନ୍ ସୁଗ ମାଈ ଡ଼ାଗ୍ବ ଡିକୁନ୍ ଗୁଲାଇ୍ ଜିବ୍ଲେ ମାରି ବାଦଲ୍ ବୋ ଉଡ଼ବାର୍ନା ଆପିରିଗ୍ଲେ ତିଆର୍ଡ଼େମ। ଈଶ୍ପର୍ ଯୁଲସା ଗିତିନ୍ ବାନି ମାରି ଆମାଏଲେ ଆଶିର୍ବାଦ୍ ବେଡ଼।
ତିଆର୍ ଡ଼େମକୁନ୍ ଚଅ ଦିନ୍ବ, ଈଶ୍ପର୍ ସୁନ, “ଦର୍ତନି ବାଗ୍ବ ଗୁଲାଇ ରକମ୍ ଜିବ୍ ଜନ୍ତୁଲେ ଡେମେ।” ମାରି ସୁନକୁନ୍ ସୁଗ ଡେଙ୍ଗା। ମାରି ଅଇଜା ଉଙ୍ଗମ୍ ବ ଡିକୁନ୍ ଜିବ୍ଜନ୍ତୁଲେ, ଅଇଜା ତୁବୁବ ରାଙ୍ଗ୍ଲ ବୁଲବାର୍ନା ଜନ୍ତୁଲେ ମାରି ଏନ୍ତୁଗ୍ କୁଣ୍ଡାବ ଡିକୁନ୍ ଜିବ୍ଜନ୍ତୁଲେ ଡିଗା। ମାରି ଈଶ୍ପର୍ ଯୁଲ ଜେ ଗିତିନ୍ ବାନି ଡିଗା।
ମାରି ଈଶ୍ପର୍ ସୁନ, “ନାଇ ତରୋଇନା ମୁର୍ତି ସୁଗ ମୁଇ ରେମ ଆରେଙ୍ଗ୍ନାଇ, ମିରକି ମାଏ ନାଇନ୍ ସୁଗ ଡ଼େନ୍ତା। ମାଏ ଦର୍ତନି ବ ଗୁଲାଇ ଜିବ୍ଜନ୍ତୁ ବାଗ୍ବ ଅଧିକାର ଡେମ୍ତ।”
ଆତିନେ ଈଶ୍ପର୍ ଇତି ତୁବୁଗ୍ ରୁଙ୍ଗ୍ସେ ମୁଇ ଇଙ୍ଗେରେ ଅରେଙ୍ଗ, ମାରି ମାଇନା ଇନ୍ସେମିବ ଉମ୍ପାରସେ ଜୀବନ ବେଡ଼। କନ୍ ରେମନା ଅମି ଆଦମ୍ ଡିଗା। ଆଦମ୍ ଡିକୁ ପାଲାଇ ଈଶ୍ପର୍ ମୁଇୟଙ୍ଗ୍ ଦିଙ୍ଗାବୁର୍ ଅରେଙ୍ଗ, ମାରି ଗିତିନ୍ ଦିଙ୍ଗାବୁର୍ନା ଜତନ୍ ରୁରୁଙ୍ଗ୍ ପାଲାଇ ଆମାଇ ଆର ବୁଙ୍ଗ।
ଡିଙ୍ଗାବୁର୍ ନା ମୋଜାଇ ଈଶ୍ପର୍ ପାଲ୍ ରୋକମ୍ ଉମ୍ବାର୍ ସେମୁଗ୍ ଉନଡିଗା, କନ୍ଲେ ଜୀବନ୍ ବାବଙ୍ଗ୍ନା ସେମୁ ଗ୍ ବାନ ମାରି କାରାପ୍ ବୁଦି ବେବେନା ସେମୁଗ୍। ଈଶ୍ପର୍ ଆ ଆଦମ ସୁନ, ବାନି ମାରି କାରାପ୍ ବୁଦି ବେବେନା ସେମୁଗ୍ନା ପଲ୍ ଅନ୍ତୁର ସେ ଗୁଲାଇ ସେମୁଗ୍ ନା ପଲ୍ ସୁସୁମ୍ ଗନ୍ତ୍ପେ, ମାତର୍ ଉଣ୍ଡୋଇଲ ଗିତିନ୍ ସେମୁଗ୍ ନା ପଲ ସୁମ୍ତପେ ଡନା, ସତୋଇସେ ଗଇତ୍ ପେ।
ମାରି ଈଶ୍ପର୍ ସୁନ, “ଇଙ୍ଗେରେ ମିଣ୍ଡା ଡିକୁନ୍ ବାନି ଆଣ୍ଡା।” ଆର୍ନା ସା ଜିବ୍ଜନ୍ତୁଲେ ଆଦମ୍ ବେରଙ୍ଗ୍ ସଙ୍ଗ୍ ଡେଡେମ୍ ଆଡ଼େନ୍ତା।
ଗିତିନ୍ସା ଈଶ୍ପର୍ ଆ ଆଦମ୍ ଜବର୍ ଅଲେମଡ଼। ମାରି ଈଶ୍ପର୍ ଆଦମ୍ ନାନେ ସିଗ୍ସାଙ୍ଗ୍ ରୁଙ୍ଗା ମାରି, ମୁୟଙ୍ଗ୍ ଆସେଲାନେ ଅରେଙ୍ଗ, ମାରି ଆତିନ୍ ସେଲାନେ ମାଇନ୍ କଣ୍ଡେ ରୁଙ୍ଗ।
ଆଦମ୍ ଆତିନ୍ ସେଲାନେ ଯୁଲ, ମାରି ମାଇ ସୁନ, ବାପ୍ ରେ! କନ୍ତ ନିଙ୍ଗ୍ସୁଗ, ଗିତିନ୍ସା ଆମାଇ ‘ସେଲାନେ’ ଡ ସେ ସୁନ, ମାସାଡନା ମାଇ ଇଙ୍ଗେର୍ ନାନେ ଅରେଙ୍ଗ୍ ଗିତା।” ଗିତିନ୍ସା ଇଙ୍ଗେର୍ ତରୋଇନା ଆବା ମାରି ଆୟଙ୍ଗ୍ ଅନ୍ତୁର୍ସେ ମାଇନ୍ କୁନି ବେରଙ୍ଗ୍ ସାଗ୍ମୁଇ ଡ଼େନ୍ତା।
ମାରି ଈଶ୍ପର୍ ଆଇଙ୍ଗେର୍ ମାରି ଆସେଲାନେ ମାଇନା ମୁର୍ତି ସୁଗ ଅରେଙ୍ଗ। ଈଶ୍ପର୍ ଆମାଏ ଆଶିର୍ବାଦ୍ ଡ଼େମସେ ସୁନ, “ଜବର୍ ଗୁ ଲେ ମାରି ଡାକୁଇଲେ ଇଗ୍ଲେ ଅଁଲେ ଡେଙ୍ଗ୍ସେ ଦର୍ତନି ବ ବେଗଲ ଇଗେ! ଈଶ୍ପର୍ ଯୁଲ, ମା ମାଲେ ଗୁଲାଇ ତିଆର ଡ଼େମଡିଗା ଗିତିନ୍ ଗୁଲାଇ ବାନି, ମାରି ମାଈ ମାଏ ଗୁଲାଇ ବ ସାର୍ଦାଗ୍ସେ କିଲେ। ଅରେଙ୍ଗ କୁନ୍ ଚଅ ଦିନ୍ବ କନ୍ ଗୁଲାଇ ତିଆର୍ ଡେଙ୍ଗା।
ଉଣ୍ଡୋଇଲ ସାତ୍ ଦିନ୍ ଡେଙ୍ଗା, ଈଶ୍ପର୍ ମାରି ମା ମା କାମ୍ଲେ ଡ଼େମଡିଗା, ଗିତିନ୍ ଅଡମ ଡିଗା। ମାଈ କନ୍ ଆସାତ୍ ଦିନ୍ ଆଶିର୍ବାଦ୍ ଡ଼େମ ମାରି ପବିତ୍ର ଡ଼େମ। ମାସାଡନା ଆକନ୍ ଦିନ୍ ମାଇ ଡ଼େମକୁନ୍ ଗୁଲାଇ କାମ୍ ବନ୍ଦ ଡ଼େମ। ଡିକନ ସୁଗ ଈଶ୍ପର୍ ଗୁଲାଇ ବାଦଲ୍ ବୋ, ଦର୍ତନି ବୋ ମାରି ଆରନା ଗୁଲାଇ ଜାକ ତିଆର୍ ଡ଼େମ।
ବାଇବଲ୍ ନା ମୁଇ ଉସାରାମ୍ : ଆଦିପୁସ୍ତକ ୧-୨
Free to use, adapt, and share under an open license (CC BY-SA 4.0).