2. ୨. ଦର୍ତନି ବ ପାପ୍ ଗାଇଗା
ଆଦମ୍ ମାରି ଆମାଇନା କୁନି ଈଶ୍ପର୍ ମାଏନ୍ ପାଲାଇ ଅରେଙ୍ଗ କୁନ୍ ବଲ୍ଟାବାଇ ଦିଙ୍ଗାବୁର୍ ବ ସାରଦାଗ୍ସେ ଡିକୁଡେଙ୍ଗା୍। ମାତର୍ ମାଏ ଡୁମ୍ଡ଼ା ଡିଗା, ମାତର୍ ଆମାଏ ଲାଜ୍ ଆଡିତା, ମାସାଡନା ଦର୍ତନି ବ ପାପ୍ ଆଡିତା। ମାଏଲେ ଦିନ୍କେ ଡିଙ୍ଗାବୁର୍ ବ ବୁଲବାର୍ ଡେଙ୍ଗା, ମାରି ଈଶ୍ପର୍ ବେରଙ୍ଗ୍ ଅଁୟ ଡେଙ୍ଗା।
ମାତର୍ ଗିତିନ୍ ଡିଙ୍ଗାବୁର୍ ବ ମୁଇଁ ବୁବୁ ଡିଗା। ଗିତିନ୍ ବୁବୁଗ୍ ଜବର୍ ଚାଲାକି। ମାଇ ଆସେଲାନ୍ ପାଚାର୍ ଲୋ, ଈଶ୍ପର୍ ସତେଇସେ କନ୍ ଡିଙ୍ଗାବୁର୍ ନା ଆର୍ନାସା ସେମୁଗ୍ ନା ଫଲ୍ ସୁସୁମ୍ ପାଲାଇ ମନା ଡ଼େମତା କି?
ଗିତିନ୍ ସେଲାନେ ସୁନ ଈଶ୍ପର୍ ଆନେ ସୁନତା, ବାନି ମାରି ଖାରାପ୍ ବୁଦ୍ଧି ବେବେନା ସେମୁଗ୍ବନା ପଲ୍ ଅନ୍ତୁରସେ ଆର୍ନାସା ସେମୁଗ୍ବନା ପଲ୍, ସୁସୁମ୍ ଗନ୍ତ୍ପେ ଡସେ ଈଶ୍ପର୍ ଆନେ ସୁନତା, ପେ ଯଦି ଗିତିନ୍ ସେମୁଗ୍ନା ପଲ୍ ସୁମନା କି ତାରାମନା ପେ ଗଇତ୍ ପେ।
ବୁବୁ ଆସେଲାନେ ସୁନ,“ଗିତିନ୍ ସତ୍ ଆଣ୍ଡା! ପେ ଆଗଇତ୍ ପେ। ଈଶ୍ପର୍ ଗିତିନ୍ ମାଗତା ଜେ ପେ ସୁମକୁନ୍ ଦାପ୍ରେ, ପେ ଈଶ୍ପର୍ ସୁଗ ଡେଙ୍ଗ୍ଇତ୍ପେ ମାରି, ମାଇନ୍ ସୁଗ ବାନି ମାରି କାରାପ୍ ମାମାଗ୍ ଗନ୍ତ୍ପେ।”
ସେଲନେ ଆତିନ୍ ପଲ୍ ଯୁଲ ଜେ ଗିତିନ୍ ଫଲ୍ ବାନି ସୁବୁସୁଗ ତିନାଡେଙ୍ଗା। ମାଇ ବୁଦ୍ଧି ରେମ୍ ଡେଡେମ୍ସା ମନ୍ ଡ଼େମ, ମାଈ ଇତି ପଲ୍ ମଈସସେ ସୁମ। ମାଇନ୍ ତୁର୍ଗୁ ମାଈ ଆମାଇନା ଉମ୍ପର ଇତି ବେଡ଼, ଜା ମାଈ ବେରଙ୍ଗ୍ ଡିଗା, ମାରି ମାଇସା ସୁମ।
ଆତିନେ ମାଏନା ମ ରୁଗ୍ଇଗା ମାରି ମାଏ ଡୁମ୍ଡ଼ା ଡିକୁନ୍ ମାମାଗ୍ ଗଙ୍ଗା। ମାଏନ୍ ଗାଗଡ୍ବ ଡାଲୁ ପାଲାଇ ଉଲାଗ୍ ପଡ଼ସେ ଉମ୍ପ ତିଆର୍ ଡ଼େମ।
ଆତିନେ ଆଦମ୍ ମାରି ମାଇନ୍ କୁନି ଅବା ଦିଙ୍ଗାବୁର୍ ବ ଈଶ୍ପର୍ ଉରିଙ୍ଗ୍ବାର୍ନା ଅଙ୍ଗ। ମାଏ ଉମ୍ବାଇନୁ ଈଶ୍ପର୍ ନାନେ ତିପାଗା। ଅଇତିନ୍ଲ ଈଶ୍ପର୍ ଆ ଆଦମ୍ ୱାୟସେ ସୁନ “ନ ଆର୍ ଡିତ୍ ନ?” ଆଦମ୍ ଉତ୍ତର୍ ବେଡ଼, “ ନ ଦିଙ୍ଗାବୁର୍ ବୋ ଉରିଙ୍ଗ୍ବାର୍ ନା ଅଙ୍ଗନିଙ୍ଗ୍, ମାରି ବୁତୁଙ୍ଗ୍ସେ ତିପାଗ୍ନିଙ୍ଗ୍, ମାସାଡୋନା ନିଙ୍ଗ୍ ଡୁମ୍ଡା ଡିଗ୍ନିଙ୍ଗ୍।”
ଆତିନେ ଈଶ୍ପର୍ ପାଚାର୍ ଲୋ, “ ଆପେ ଜା ସୁନସା ପେ ଡୁମ୍ଡାଗ୍ ପେ? ଗିତିନ୍ ପଲ୍ ସୁମପେ କି ଆର୍ ନା ନିଙ୍ଗ୍ ସୁସୁମ୍ ପାଲାଇ ମନା ଡ଼େମ ଡିଗ୍ନିଙ୍ଗ୍?” ଆଦମ ସୁନ, “ଆନିଙ୍ଗ୍ ଆର୍ ନା ସେଲାନେ ବେଡ଼ନ ଗିତିନ୍ ସେଲାନ୍ ଆନିଙ୍ଗ୍ ଗିତିନ୍ ପଲ୍ ସୁସୁମ୍ ପାଲାଇ ବେଡ଼।” ଆତିନେ ଈଶ୍ପର୍ ଆସେଲାନେ ପାଚାର୍ ଲ, “ କନ୍ ମା ଡ଼େମନ?” ସେଲାନେ ସୁନ,“ ବୁବୁ ଆନିଙ୍ଗ ବୁଲ୍କାୟ।”
ଈଶ୍ପର୍ ଆତିନ୍ ବୁବୁ ସୁନ, “ ନ ଅବିଶାପ୍ ବାଙ୍ଗା! ସୁଲଇ ବେରଙ୍ଗ୍ ଉରିଙ୍ଗ୍ତନ ମାରି ବାଲି ସୁମ୍ତନ। ନ ମାରି ଗିତିନ୍ ସେଲାନ୍ ବେରଙ୍ଗ୍ ଗୁର୍ନା ଡେମ୍ତନ, ମାରି ନନ ଗୁ ମାରି ମାଇନ୍ ଗୁଲେ ବେରଙ୍ଗ୍ ମାଏନ୍ ମାଏନ୍ବ ଗୁର୍ନା ଡେମ୍ତ। ସେଲାନେ ନନ୍ କୁଲ୍ରେମ୍ ଆନନ୍ ବବ୍ ବିଲ୍ବିଲା ଡେମ୍ତ, ମାରି ନ ମାଇନା ପାଦ୍ ଗଠିବ ଟକ୍ତନ।“
ଈଶ୍ପର୍ ଆତିନ୍ ସେଲାନେ ସୁନ, “ନ ବାନି ଡେଡେମ୍ଲ ଜବର୍ କଷ୍ଟ ବାଙ୍ଗ୍ତନ। ନନା ଉମ୍ଫର୍ ବାଗ୍ବ ନନ୍ ମନ୍ ଡିତା, ମାରି ମାଈ ନନ୍ ବାଗ୍ବ ଶାସନ୍ ଡେମ୍ତ।”
ଈଶ୍ପର୍ ଆଇଙ୍ଗେର୍ ସା ସୁନ, “ନ ନନା କୁନି ନା କାତା ଅଙ୍ଗନ, ମାରି ଆନିଙ୍ଗ୍ ଆମାନ୍ ତନ। ଗିତିନ୍ସା ତୁବୁଗ୍ ଅବିଶାପ୍ ବାଙ୍ଗା, ପେ କାଦି ବାବାଙ୍ଗ୍ ପାଲାଇ ଜବର୍ ପାଇଟି ଡେମ୍ତ ପେ। ମାରି ପେ ଗଇତ୍ ପେ, ମାରି ପେନ୍ ଗାଗଡ୍ ତୁବୁଗ୍ ବ ମିସ୍ତା।“ ଗିତିନ୍ ଇଙ୍ଗେର୍ନା କୁନିନା ଅମି ଅବା, ଅବା ନା ଅରତ୍ ଡେଙ୍ଗାନି “ଜୀବନ୍ ବେବେରେମ୍, ” ମାଈ ଗୁଲାଇ ରେମନା ୟଙ୍ଗ୍ ଡ଼େନ୍ତା। ଈଶ୍ପର୍ ଆ ଆଦମ୍ ମାରି ଆ ଅବା ଚାମ୍ନା ସକା ଅରେଙ୍ଗ ସେ ଅତୁଙ୍ଗ।
ଆତିନେ ଈଶ୍ପର୍ ସୁନ,“ ରେମ ବାନି ମାରି କାରାପ ବୁଦ୍ଧି ମାଗ ମାଏ ନିଙ୍ଗ୍ନା ସୁଗ ଡେଙ୍ଗ୍ ଗିତା। ଜୀବନ୍ ସେମୁଗ୍ନା ପଲ୍ ସୁମସେ ମାଏ ମୋ ଗଗଇନା ଜୀବନ୍ ବାବାଙ୍ଗ୍ ପାଲାଇ ଆମାଏ ଆଦେଶ୍ ମ ବେବେନା ବାନି।“ ଗିତିନ୍ ସା ଈଶ୍ପର୍ ଆ ଆଦମ ମାରି ଆ ଅବା ଡିଙ୍ଗାବୁର୍ ନାନେ ୟନ ଶୁଙ୍ଗ। ଜାସା ରେମ ମିରିକି ଜୀବନ୍ ସେମୁନା ପଲ୍ ମୋ ସୁସୁମ୍ ପାଲାଇ ଗିତିନ୍ସା ଈଶ୍ପର୍ ବପୁବାଇ ଆ ଦୁତ୍ଲେ ଦିଙ୍ଗାବୁର୍ ନା ଗାଗାଇ ଗାରି ବ ଟାନ୍ୟ।
ବାଇବଲ୍ନା ମୁଇ ଉସାରାମ୍ : ଆଦିପୁସ୍ତକ ୩
Free to use, adapt, and share under an open license (CC BY-SA 4.0).