3. ୩. ପୁର୍ ଡାଗ୍
ଜବର୍ ବେଲା ତୁର୍ଗୁ, ଦର୍ତନି ବ ଜବର୍ ରେମ ଡିକୁ ଡେଙ୍ଗା। ଗିତିନ୍ ରେମାଲେ ଜବର୍ ଟେମ୍ପରବାଇ ମାରି ଗିସେଗ୍ବାର୍ନା ରେମ୍ ଡିଗା। କନ୍ ଗୁଲାଇ ରେମଲେ ଅକନ୍ କାରାପ୍ ଡିତା ଈଶ୍ପର୍ ମୁଇ ମୁନାଡ଼ାଗ୍ ଅଗୁର୍ତ ମାରି ପୁର୍ଡାଗ୍ ବେରଙ୍ଗ୍ ଆଗୁଲାଇ ଦର୍ତନି ବୁଡାୟ ସୁଙ୍ଗ୍ତିଙ୍ଗ୍ ଡ଼ସେ ଜଜ୍ନା ଡ଼େମ।
ମାତର୍ ନୋହନ୍ ବାଗ୍ବ ଈଶ୍ପର୍ ସାର୍ଦା ଡିଗା। ମାଈ ମିଣ୍ଡା ଦରମ୍ ବାଇ ରେମ ଡିଗା ଜାକି ଟେମ୍ପର ବାଇ ରେମଲେନ୍ ବେରଙ୍ଗ୍ ଡିକୁ ଡେଙ୍ଗା। ଈଶ୍ପର୍ ଆନୋହ ସୁନ, ଜେ ମାଇ ମୁୟଙ୍ଗ୍ ମୁନା ପୁର୍ଡାଗ୍ ଅଡେମ୍ତ। ଗିତିନ୍ସା, ମାଇ ଆନୋହ ମୁୟଙ୍ଗ୍ ମୁନାବାଇ ଡ଼ଙ୍ଗା ଅରେଙ୍ଗବାର୍ ପାଲାଇ ସୁନ।
ଈଶ୍ପର୍ ଆନୋହ ଡ଼ଙ୍ଗା ଅରେଙ୍ଗ୍ବାର୍ ପାଲାଇ ସୁନ, ଆର୍ନାକି ୧୪୦ ମିଟର୍ ଲମ୍ ଓସାର୍ ୨୩ ମିଟର୍, ମାରି ଡେଙ୍ଗ୍ ୧୩.୫ ମିଟର୍। ନୋହ ଆଗିତିନ୍ ଡ଼ଙ୍ଗା ସେମୁଗ୍ନା ପାଟା ବେରଙ୍ଗ୍ ଅରେଙ୍ଗ ଡ଼ିଗା, ମାରି ୩ଟା ବାକ୍ରା ଜବର୍ କୁଡିଆ, ମୁୟଙ୍ଗ୍ ସୁଲପ୍, ମାରି ଜର୍କା ଅରେଙ୍ଗ୍ବାର୍ ଡିଗା। ପୁର୍ଡାଗ୍ ବେଲା ନୋହ, ମାରି ମାଇନା ଡିୟନ୍ ରେମ, ମାରି ଗୁଲାଇ ରକମ୍ନା ଜିବ୍ଜନ୍ତୁଲେ ଈଶ୍ପର୍ ଡ଼ଙ୍ଗାବ ଆମାଏ ରକିଆ ଡ଼େମସେ ବୁଙ୍ଗ୍ତ ।
ନୋହ ଈଶ୍ପର୍ନା କାତା ମାନ୍ଗା। ମାଇ ମାରି ମାଇନା ତିନ୍ଟା ଗୁଲେ ଈଶ୍ପର୍ ମିରି ସୁନ ଡିଗା ଆମାଏ ଡ଼ିତିନ୍ ଡ଼ଙ୍ଗା ଅରେଙ୍ଗ୍ ବାର୍ ପାଲାଇ ଜବର୍ ବରଷ୍ ଲାଗ୍ଗା ମାସାଡୋନା କନ୍ ଡ଼ଙ୍ଗାଜବର୍ ମୁନାବାଇ ଡିଗା। ନୋହ ଆରେମଲେ ପୁର୍ଡାଗ୍ ସାସାଗ୍ନା ତରକ୍ ଡ଼େମ ମାରି ଈଶ୍ପର୍ ଗାରି ସାସାପାଲାଇ ଆମାଏ ସୁନ, ମାତର୍ ମାଏଲେ ଆମାଇ ବିସ୍ବାସ୍ ଆଡେମ୍ତ।
ଈଶ୍ପର୍ ଆନୋହ ମାରି ମାଏନ୍ ଆଡିଅନ୍ରେମ୍ ତରୋଇ ପାଲାଇ ମାରି ଗୁଲାଇ ଜୀବଜନ୍ତୁଲେ ପାଲାଇ, ଜବର୍ ସୁସୁମ୍ ନାଲେ ରୁଣ୍ଡାଇବାର୍ ପାଲାଇ ଆଦେଶ ବେଡ଼। ଅଇଜାବେଲା ଗୁଲାଇ ତିଆର୍ ଡେଙ୍ଗା, ଈଶ୍ପର୍ ଆନୋହ ସୁନ କନା ମାଏନ୍ ପାଲାଇ, ମାଏନ୍ କୁନି ପାଲାଇ,ମାଇନା ତିନ୍ଟା ଗୁଲେ ମାରି ମାଏନ୍ କୁନିଲେ ପାଲାଇ,ମାଏଲେ ଡ଼ଙ୍ଗାବ ଇବେଲା ମାଏଲେ ଗୁଲାଇ ରେମ ୮ ଲୋକ ଡିଗା।
ଈଶ୍ପର୍ ଗୁଲାଇ ରକମ୍ବାୟ୍ ମାଇବାଇ ମାରି ଆଣ୍ଡ୍ରାବାଇ ଜିବ୍ଜନ୍ତୁଲେ ମାରି ଆପିରିଲେ ନୋହ ବ ବେଟାୟ, ମିରିକି ମାଏଲେ ଡ଼ଙ୍ଗାବ ଇଗ୍ସେ ପୁର୍ଡାଗ୍ ବେଲା ନିମାନ୍ ଡିତା। ଈଶ୍ପର୍ ଗୁଲାଇ ରକମ୍ ସାତ୍ଟା ଆଣ୍ଡ୍ରାବାଇ ମାରି ମାଇବାଇ ଜିବ୍ଜନ୍ତୁଲେ ବେଟାୟ, ଆର୍ନାକି ସେସେବ୍ ପାଲାଇ ଦରକାର୍ ଡ଼େନ୍ତା। ଉଣ୍ଡୋଇଲ ମାଏଗୁଲାଇ ଡ଼ଙ୍ଗା ଭିତରେ ଡିଗା, ଈଶ୍ପର୍ ଆକା ଆଙ୍ଗ୍ତେ କାପାଟ୍ ଅନ୍ତୁଡ଼ ବେଡ଼।
ଆତିନେ ପୁର୍ଡାଗ୍ ସାସା ଆରାମ୍ ଡେଙ୍ଗା, ଡାଗ୍ ଗୁଗୁର୍ ଡେଙ୍ଗା, ମାରି ଗୁଗୁର୍ଅ ଡେଙ୍ଗା। ଆଅନ୍ତୁରସେ ଚାଲିଶ୍ ଦିନ୍ ମାରି ଚାଲିଷଶ୍ ମିଣ୍ଡିବ୍ ଡାଗ୍ ଲାଗ୍ସେ ଡିଗା! ଦର୍ତନି ନାନେସା ଡାଗ୍ ତୁତୁର୍ ଡେଙ୍ଗା। ଦର୍ତନିବ ଡାଗ୍ ବର୍ତି ଡେଙ୍ଗା, ଡିକନା ମୁନାନାନେ ମୁନା କୁଣ୍ଡାସା ଡାଗ୍ ବ ବୁଡ଼୍ଡିଗା।.
ଡ଼ଙ୍ଗାବ ଡିକୁନ୍ରେମଲେ ମାରି ଜିବ୍ଜନ୍ତୁ ମାରି ପିରିଲେ ବୁରୋଗା, ମାତର୍ ଉନ୍ସର୍ କୁନ୍ ତୁବୁ ବୋ ଡିକୁନ୍ ଅଇଜା ଜନ୍ତୁଲେ ଗୁଲାଇ ଗଇଗା। ଡ଼ଙ୍ଗା ଡାଗ୍ ବାଗ୍ବ ପଙ୍ଗର୍ସେ ଡିଗା ମାରି ଡ଼ଙ୍ଗା ବ ଡିକୁନ୍ ଆଗୁଲାଇ ବୁଡ୍ଉଇ ନାନେ ବାନି ବୁଙ୍ଗ ଡିଗା।
ଡାଗ୍ ଅନ୍ତୁର କୁନ୍ ତୁର୍ଗୁ, ଡ଼ଙ୍ଗା ପାଞ୍ଚ୍ମାସ୍ ଜାକ ଡାଗ୍ ବାଗ୍ବ ଉପକ୍ସେ ଡିଗା, ମାରି ଅକନ୍ ବେଲା ଡାଗ୍ ଉନାବାର୍ ଲାଗ୍ଗା। ମାଇନା ତୁର୍ଗୁ ମିସିଙ୍ଗ୍ ଡ଼ଙ୍ଗା ମୁଇ କୁଣ୍ଡାନା ବାଗ୍ବ ଇଗ୍ସେ ଡିଗା, ମାତର୍ ଦର୍ତନି ଡାଗ୍ବ ବୁଡ଼୍ସେ ଡିଗା। ତିନ୍ ମାସ୍ ତୁର୍ଗୁ, କୁଣ୍ଡାବ ଡିକୁନ୍ ଦାମୁଲ୍ ଗୁଲାଇ ତିନାଗା।
ଚାଲିସ୍ ଦିନ୍ ତୁର୍ଗୁ, ନୋହ ଡାଗ୍ ଉନାଗା କି ଆଣ୍ଡା ଡସେ ଜୁଜୁପାଲାଇ ଗାଗାଗ୍ ଅମିନା ଆପିରି ମୁଇ ବାଇରି ବେଟାୟ।, ଗିତିନ୍ ଗାଗାଗ୍ ଉଡ୍ସେ ଇଗା ଉନ୍ସର୍କୁନ୍ ତୁବୁ ଜୁଜୁପାଲାଇ ଉଡ଼ବୁଲ୍ଲ, ମାତର୍ ମାଇ ମାସା ଆବାଙ୍ଗ୍ତା।
ତୁର୍ଗୁ ନୋହ ପାରା ଅମିନା ଆମୁଇ ପିରି ବାଇରି ବେଟାୟ। ମାରି ଗିତିନ୍ ପିର ଆର୍ନାସା ଉନ୍ସର୍ କୁନ୍ ତୁବୁଗ୍ ଆବାଙ୍ଗ୍ତା, ଗିନ୍ସା ମାଇ ନୋହ ବୋ ଲେଉଟ୍ସେ ସାଗା। ଆଟେକ୍ ତୁର୍ଗୁ ମାଇ ମାରିମୁସ ଆପାରା ବେଟାୟ, ମାରି ଗିତିନ୍ ପିରି ଜିତ୍ ସେମୁଗ୍ନା ଉଲା ଚଣ୍ଡି ବେରଙ୍ଗ୍ ରୁଙ୍ଗସାଗା! ଡାଗ୍ ଉନା ଡେଡେମ୍ ଡେଙ୍ଗା, ସେମୁଗ୍ଲେ ମାରିମୁସ ମୁନାବାର୍ ଲାଗ୍ଗା।
ନୋହ ମାରି ଆଟେକ୍ ଜାଗ୍ଲୋ ମାରି, ମାଇ ତିନ୍ ମୁଠି ବେଟାୟ। ଅକନ୍ବେଲା ଗିତିନ୍ ପାରା ମୁଇ ଟାନ୍ ବାଙ୍ଗ୍ସେ ମାରି ଆସାତା। ଡାଗ୍ ଗୁଲାଇ ଉନ୍ସର୍ ଇ ଡେଙ୍ଗା!
ଦୁଇମାସ୍ ତୁର୍ଗୁ, ଈଶ୍ପର୍ ଆନୋହ ସୁନ, “ନ ମାରି ନନା ଡିଅନ୍ ରେମ୍ ଗୁଲାଇ ଜୀବ୍ ଜନ୍ତୁଲେ ଅଇକା ଡ଼ଙ୍ଗା ନାନେ ଜଜର୍ ଗନ୍ତ୍ପେ। ଜବର୍ ଗୁ ଡାକୁଇ ମାରି ଇଗ୍ଲେ ଅଁ ଜନମ୍ ଡ଼େମସେ ଆଦର୍ତନି ବେଗ୍ଲାୟବେ।” ତୁର୍ଗୁ ନୋହ ମାରି ମାଏନା ଡିଅନ୍ ରେମ୍ ଡ଼ଙ୍ଗା ନାନେ ଜର୍ସାଗା।
ନୋହ ଡ଼ଙ୍ଗା ନାନେ ଜରକୁନ୍ ତୁର୍ଗୁ, ମାଇ ମୁଇ ପୁଜାବେଦି ତିଆର୍ ଡ଼େମ, ମାରି ଆର୍ନା ସେସେବ୍ ପାଲାଇ ଦର୍କାର୍ ଡ଼େନ୍ତା ଗିତିନ୍ ସୁଗ ଗୁଲାଇ ରକମ୍ ବାୟ୍ ଆଜୀବଜନ୍ତୁ ଲେ ସେବ। ଈଶ୍ପର୍ ସେବକୁନ୍ ସା ସାର୍ଦା ଡେଙ୍ଗା ନୋହ ମାରି ଆମାଏନ୍ ଡିଅନ୍ ରେମ୍ ଈଶ୍ପର୍ ଆଶିର୍ବାଦ୍ ଡ଼େମ।
ଈଶ୍ପର୍ ପରମାନ୍ ଡ଼େମସେ ସୁନ, “ରେମଲେନ୍ କାରାପ୍ କାମ୍ ପାଲାଇ ଆଦର୍ତନି ଅବିଶପ୍ ଆବେତିଙ୍ଗ୍, ଆନ୍ଲ ଉଡିଆଗ୍ ଡାଗ୍ ବେରଙ୍ଗ୍ ଆଦର୍ତିନ୍ ଆବୁଡାଇତିଙ୍ଗ୍, ଡିତିନ୍ଲ ରେମଲେ ଡାଉଲ ବାନ୍ସା ପାପ୍ ବ ଡିତା।“
ଉଣ୍ଡୋଇ ଉଣ୍ଡୋଇ ବିଙ୍ଗ୍ଲାଟି ବାଦଲ୍ବ ତିନାଗ୍ନା, ଈଶ୍ପର୍ ମା ପର୍ମାନ୍ ଡ଼େମତା ଗିତିନ୍ ଏତାଇତ ମାରି ମାଏନା ରେମଲେସା ଏତାଇତ। ଗିତିନ୍’ ତୁର୍ଗୁ ଈଶ୍ପର୍ ଆଗ୍ତୁ ଆବିଙ୍ଗ୍ଲାଟି ମାଏନା ପର୍ମାନ୍ ନା ଚିନା ସୁଗ ଅରେଙ୍ଗ।
ବାଇବଲ୍ ନା ମୁଇ ଉସାରାମ୍ : ଆଦିପୁସ୍ତକ ୬-୮
Free to use, adapt, and share under an open license (CC BY-SA 4.0).