4. ୪. ଈଶ୍ପର୍ ଆବ୍ରାହମ୍ ବେରଙ୍ଗ୍ ନିୟମ୍ ଡ଼େମ
ପୁର୍ଡାଗ୍ ଡେଙ୍କୁନ୍ ଜବର୍ ବରଷ୍ ତୁର୍ଗୁ, ଅଇତିନ୍ ବେଲା ଦର୍ତନିବ ଜବର୍ ରେମ ଡିଗା, ମାରି ମାଏ ଅଇତିନ୍ ବେଲା ଈଶ୍ପର୍ ବିରୋଧ୍ ମାରି ମାଏନ୍ ମାଏନ୍ ଭିତରେ୍ ଜବର୍ ପାପ୍ ଡେଡେମ୍ ଡେଙ୍ଗା। ମାସାଡନା ମାଏଲେ ଗୁଲାଇ ରେମ ସାଗ୍ମୁଇ କାତା ଡେଡେମ୍ ଡେଙ୍ଗା, ମିରିକି ଈଶ୍ପର୍ ଆମାଏ ଦର୍ତନି ବ ଗୁଲଇଗାରି ଡେଡେମ୍ ପାଲାଇ ଆଦେଶ୍ ବେଡ଼ଡିଗା ମାତର୍ ମାଇନ୍ ବାଦୁଲ୍ ମାଏ ଗୁଲାଇ ରେମ୍ ସାଗ୍ମୁଇବ ଡେଙ୍ଗ୍ସେ ମାରି ମୁଇ ସହର୍ ଅରେଙ୍ଗ୍ବାର୍ ମୁଲାୟ।
ମାଏ ଜବର୍ ବଡ଼ପୁନ୍ ବାଇ ଡିଗା, ମାରି ମାଏ ମିରି ବୁରତା ଗିତିନ୍ସା ମାପୁର୍ନା ଆଦେଶ୍ ମାନ୍ବାର୍ ଆଡ଼େନ୍ତା। ମାଏଲେ ସରଗ୍ବ କେଟ୍କୁନ୍ ସୁଗ ମୁଇ ଡେଙ୍ଗ୍ବାଇ ଡିଅ ଆରେଙ୍ଗ୍ବାର୍ ମୁଲାୟ। ଈଶ୍ପର୍ ଆମାଏ ଜୁଲ, ଆନ୍ଲ ମାଏ ଗୁଲାଇ ରେମ ମିଶ୍ସେ ଖାରାପ୍କାମ୍ ଡେଡେମ୍ସା କାମ୍ ଡେମ୍ତ, ଡ଼ିତିନ୍ଲ ମାଏଲେ ମାରି ଜବର୍ ପାପ୍ନାକାମ୍ ଡେଡେମ୍ ଗଙ୍ଗ୍ତା।
ଗିତିନ୍ସା, ଈଶ୍ପର୍ ମାଏନା ବାଷାଲେ ପାଲ ପାଲ ଡ଼େମ ମାରି ଆ ରେମଲେ ଦର୍ତନି ନା ଗୁଲାଇ ଗାରି ଡ଼େମ ସୁଙ୍ଗ। ଆର୍ନା ମାଏ ଦେଶ ଅରେଙ୍ଗ ବାର୍ ମୁଲାୟ ଡିଗା, ଆତିନା ବବିଲ ଡସେ ସୁସୁଡେଙ୍ଗା, ଜାନା ଅରତ୍ ଡେଙ୍ଗାନି “ଗୁଲ୍ମାଲ୍।“
ଜବର୍ ବରଷ୍ ତୁର୍ଗୁ, ଅବ୍ରାହମ୍ ଅମିନା ମିଣ୍ଡା ଆରେମ ସୁନ। ଈଶ୍ପର୍ ଆମାଇ ସୁନ, “ନନ୍ ଦେଶ୍ ମାରି ଆ ଡିଅନ୍ ରେମ୍ ଅନ୍ତୁର ମାରି ନିଙ୍ଗ୍ ଆନ ଆରନା ଦେଶ୍ ଅଜୁତିଙ୍ଗ୍ ନ ଗିତିନ୍ ଦେଶ୍ବ ୟା। ନିଙ୍ଗ୍ ଆନ ଆଶିର୍ବାଦ୍ ଡ଼େମତିଙ୍ଗ୍, ମାରି ମୁଇ ମୁନା ଦେଶ୍ ଅରେଙ୍ଗ୍ ତିଙ୍ଗ୍। ମାରି ନନ୍ ଅମି ମୁନା ଡ଼େମତିଙ୍ଗ୍। ନିଙ୍ଗ ଆମାଏ ଆଶିର୍ବାଦ୍ ଡ଼େମତିଙ୍ଗ୍ ଜା ଜାଲେ ଆନ ଆଶିର୍ବାଦ୍ ଡେମ୍ତ। ମାରି ଜା ଆନ ଅବିଶାପ୍ ବେଡ଼ତା ନିଙ୍ଗ ଆମାଇ ଅବିଶାପ୍ ବେତିଙ୍ଗ୍। ନନ୍ ବେଡ଼ସେ ଦର୍ତନି ବ ଡିକୁନ୍ ଗୁଲାଇ ଡିଅନ୍ରେମ୍ ଆଶିର୍ବାଦ୍ ବାଙ୍ଗେ।“
ଅବ୍ରାହମ୍ ଈଶ୍ପର୍ ନା କାତା ମାନ୍ଲ। ମାଇ ଆମାଇ ନା କୁନି ସାରା, ମାରି ଗୁଲାଇ ଗତିରେମ୍ଲେ ମାରି ଅରଜ୍ଲ କୁନ୍ ଧନ୍ ଦଲତ୍ ଗୁଲାଇ ରୁଙ୍ଗ ଇଗା, ମାରି ଈଶ୍ପର୍ ଅଶିସକୁନ୍, କିଣାନ୍ ଦେଶ୍ବ ଇଗା।
ଉଣ୍ଡୋଇଲ ଅବ୍ରାହମ୍ କିଣାନ୍ ଦେଶ୍ବ କେଟ୍ଗା, ଈଶ୍ପର୍ ସୁନ, “ନନ୍ ଗୁଲାଇ ଗାରି ଜୁ। ନିଙ୍ଗ୍ କନ୍ ଗୁଲାଇ ଦେଶ୍ ଆନ ବେତିଙ୍ଗ୍, ମାରି ନନ୍ କୁଲ୍ ରେମଲେ ଗୁଲାଇ ବେଲା ପାଲାଇ ତୋରଇନା ଡେମ୍ତ।“ ଆତିନେ ଅବ୍ରାହମ୍ ଗିତିନ୍ ଦେଶ୍ବ ବାସାଗା।
ମଲ୍କିଷେଦକ୍ ଅମିନା ମିଣ୍ଡା ରେମ ଡିଗା, ଜାକି ଗୁଲାଇ ନାନେ ମୁନା ଈଶ୍ପର୍ ନା ପୁଜାରୀ ଡିଗା। ଆବ୍ରାହମ୍ ଜୁଜ୍ ନାନେ ଲେଉଟ୍ସେ ସାକୁନ୍ ତୁର୍ଗୁ, ମାଇ ମାରି ଆବ୍ରାହମ୍ ମିସ୍ ଗା। ମଲ୍କିଷେଦକ ଆ ଆବ୍ରାହମ୍ ଆଶିର୍ବାଦ୍ ଡ଼େମ ମାରି ସୁନ,“ ଗୁଲାଇନାନେ ମୁନା ଈଶ୍ପର୍, ଜା କି ସରଗ୍ ମାରି ଦର୍ତନି ନା ସାଉକାର୍ ଆଆବ୍ରାହମ୍ ଆଶିର୍ବାଦ୍ ଡେମ୍।“ ମାରି ଆବ୍ରାହମ୍ ଯୁଜ୍ବ ଜିତ୍କୁନ୍ ଗୁଲାଇ୍ ଜିନିଷ୍ନା ଦଶ୍ ବାଟା ନାନେ ବାଟେକ୍ ଆମଲ୍କିଷେଦକ ବେଡ଼।
ଜବର୍ ବରଷ୍ ଡେଙ୍ଗଇଗା, ମାତର୍ ଅଇଜାକ ଆବ୍ରାହମ୍ ମାରି ସାରାନା ମୁଇସା ଗୁ ଡେଙ୍ଗ୍ ଆଡିତା। ମାରି ଈଶ୍ପର୍ ପର୍ମାନ୍ ଡ଼େମସେ ଆ ଆବ୍ରାହମ୍ ସୁନ, ଜେ ମାଇନା ମୁଇ ଗୁ ଜନମ୍ ଡ଼େନ୍ତା, ମାରି ବାଦଲ୍ ବ ଡିକୁନ୍ ତାରାଲେ ସୁଗ ମାଇନା କୁଲ୍ ଡ଼େନ୍ତା। ଆବ୍ରାହମ୍ ଈଶ୍ପର୍ନା ପରମାନ୍ ବ ବିସ୍ବାସ୍ ଡ଼େମ। ମାସାଡନା ଆବ୍ରାହମ୍ ଈଶ୍ପର୍ନା ପର୍ମାନ୍ ବ ବିସ୍ବାସ୍ ଡେଡ଼େମ୍ ଡ଼େଙ୍ଗା, ଡିକନ୍ସା ଈଶ୍ପର୍ ଆମାଇ ଦରମ୍ ଡସେ ଏଜ୍ଲ।
ଆତିନେ ଈଶ୍ପର୍ ଆବ୍ରାହମ୍ ବେରଙ୍ଗ୍ ନିୟମ୍ ଡ଼େମ। ମୁୟଙ୍ଗ୍ ନିୟମ୍ ଡେଙ୍ଗାନି ଉମ୍ବାଇନୁ ନା ଦଲ୍ବ ତରୋଇ ତରୋଇନା ପାଲାଇ ମାସା କାମ୍ ଡେଡେମ୍ନା ବୁଜାମାନା। ମାତର୍ କନ୍ ଗଟ୍କୁନ୍ ବ, ଉଣ୍ଡୋଇଲ ଆବ୍ରାହମ୍ ଲେମ ଡିଗା ମାତର୍ ଈଶ୍ପର୍ନା କାତା ଅଁଙ୍ଗ୍ ଗଗଙ୍ଗ୍ ଡେଙ୍ଗା, ଅଇତିନ୍ବେଲା ଈଶ୍ପର୍ ପରମାନ୍ ଡ଼େମ। ଈଶ୍ପର୍ ସୁନ, “ନିଙ୍ଗ୍ ନନ୍ ବନି ନାନେ ମୁଇ ଗୁ ବେତିଙ୍ଗ୍।” ନିଙ୍ଗ୍ ଆନନ୍ କୁଲ୍ ଗିତିନ୍ କିଣାନ୍ ଦେଶ୍ ବେତିଙ୍ଗ୍।” ମାତର୍ ଅଇଜାକ ଆବ୍ରାହମ୍ନା ମୁଇସା ଗୁ ଆଡିତା।
ବାଇବଲ୍ ନା ମୁଇ ଉସାରାମ୍ :ଆଦିପୁସ୍ତକ ୧୧-୧୫
Free to use, adapt, and share under an open license (CC BY-SA 4.0).