5. ୫. ପର୍ମାନ୍ ନା ଗୁ
ଦଶ ବରଷ ତୁର୍ଗୁ, ଆବ୍ରାହମ୍ ମାରି ସାରି ଗିତିନ୍ ଦେଶ୍ବ କେଟ୍ଗା ଆଜାକି କିଣାନ ଦେଶ୍ ସୁନ୍ତ, ଅଇଜାକ ମାଏନା ମୁଇ ସା ଗୁ ଆଡିତା। ଆତିନେ ଆବ୍ରାହମ୍ନା କୁନି, ସାରି ଆମାଇ ସୁନ, “ଅଇପନ୍ତେକ୍ ଈଶ୍ପର୍ ଆନିଙ୍ଗ୍ ଗୁ ଆବେତ, ମାରି ଆଇକା ନିଙ୍ଗ୍ ଗୁ ଅଗ୍ସା ଜବର୍ ଡକ୍ରି ଡ଼େଙ୍ଗ୍ ଗିତିଙ୍ଗ୍, କନ୍ ନିଙ୍ଗ୍ନା ଦାସି, ମାଇନା ଅମି ହାଗାର୍, ଆମାଇସା ବିବା ଡେମା, ମିରିକି ମାଈ ନିଙ୍ଗ ପାଲାଇ ମୁଇ ଅହଁ ଜନମ୍ ଡେମ୍।“
ଆତିନେ ଆବ୍ରାହମ୍ ଆ ହାଗାର ବିବା ଡେଙ୍ଗା। ମାଈ ମୁଇ ଗୁ ଜନମ ବେଡ଼ଡିଗା, ମାରି ଆବ୍ରାହମ୍ ମାଈନା ଅମି ଇସ୍ମାଏଲ୍ ଡସେ ଅମିଲ। ଆତିନେ ସାରା ଗିତିନ୍ ଜୁଲସେ ଆହାଗାର୍ ଆକାର୍ ଡ଼େମ। ଉଣ୍ଡୋଇଲ ଆଇସ୍ମାଏଲ୍ ତେର ବରଷ୍ ଡେଙ୍ଗ ଦିଗା, ଈଶ୍ପର୍ ମାରିମୁସ ଅବ୍ରାହମ୍ ବେରଙ୍ଗ୍ କାତା ଡେଙ୍ଗା।
ଈଶ୍ପର୍ ସୁନ, “ସରଗ୍ ବନା ଜବର୍ ବପୁ ଡିକୁନ୍ ଈଶ୍ପର୍ ନିଙ୍ଗ୍। ନନ୍ ବେରଙ୍ଗ୍ ମୁୟଙ୍ଗ୍ ନିୟମ୍ ଡେମ୍ତିଙ୍ଗ୍।” ଆତିନେ ଅବ୍ରାହାମ୍ ତୁବୁଗ୍ବ ଲଗ୍ସେ ମୁଣ୍ଡିଆ ମାର୍ଲ। ଈଶ୍ପର୍ ଆଅବ୍ରାମ୍ ସୁନ, “ନ ଗୁଲାଇ ଜାତିନା ବା ଡେନ୍ତନ। ନିଙ୍ଗ୍ ଆନ ମାରି ଆନନ୍ କୁଲ୍ରେମଲେ କିଣାନ୍ଦେଶ୍ନା ଦନ୍ ସମ୍ପତି ସୁଗ ବେତିଙ୍ଗ୍,ନିଙ୍ଗ୍ ଗୁଲାଇ ବେଲା ପାଲାଇ ମାଏନା ଈଶ୍ପର୍ ଡେନ୍ତିଙ୍ଗ୍। ନନ୍ ଡିଅନ୍ରେମ୍ ଗୁଲାଇ ଇଙ୍ଗେର୍ ଗୁନା ସୁନତ୍(ଚାମ୍ଡ଼ା ଗଡ଼)ଡେମ୍ତ।“
“ନନ୍ କୁନି ସାରି, ମୁଇ ଗୁ ଜନମ୍ ଡେମ୍ତ ମାଇ ପରମାନ୍ନା ଗୁ ଡ଼େନ୍ତା। ମାଇନା ଅମି ଈଶାକ୍ ବେତନ। ନିଙ୍ଗ୍ ମାଈ ବେରଙ୍ଗ୍ ମୁଇ ନିୟମ୍ ଡେମ୍ତିଙ୍ଗ୍, ମାରି ମାଇ ମୁୟଙ୍ଗ୍ ମୁନାବାଇ ଦେଶ୍ ଡ଼େନ୍ତା। ନିଙ୍ଗ୍ ଆଇସ୍ମାଏଲ୍ ଲନା ମୁୟଙ୍ଗ୍ ମୁନାବାଇ ଦେଶ୍ ଡେମ୍ତିଙ୍ଗ୍, ମାତର୍ ନିଙ୍ଗ୍ନା ନିୟମ୍ ଈଶାକ୍ ବେରଙ୍ଗ୍ ଡିତା।” ଆତିନେ ଈଶ୍ପର୍ ଅବ୍ରାହମ୍ ନା ଅମି ଆବ୍ରାହାମ୍ ଡସେ ଅମିଲ, ଗିତିନ୍ ଅମିନା ଅରତ୍ ”ଗୁଲାଇ ରେମଲେନା ବା”। ଈଶ୍ପର୍ ସାରିନା ଅମି ସା ସାରା ବେଡ଼, ଗିତିନ ଅମିନା ଅରତ୍ “ରାନୀ।”
ଗିତିନ୍ ଦିନ୍ବ ଆବ୍ରାହାମ୍ ମାଏନ୍ ଗୁଲାଇ ଗୁ ଲେନା ସାମ୍ଲେ ଗଡ଼ ସୁଙ୍ଗ। ମୁଇ ବରଷ୍ ତୁର୍ଗୁ, ଉଣ୍ଡୋଇଲୋ ଆ ଅବ୍ରାହାମ ୧୦୦ ବରଷ୍ ମାରି ଆସାରା ୯୦ ବରଷ୍ ଡେଙ୍ଗ୍ ଡିଗା, ଅଇତିନ୍ ବେଲା ସାରା ଆବ୍ରାହମ୍ ପାଲାଇ ମୁଇ ଗୁ ଜନମ୍ ଡ଼େମ। ଈଶ୍ପର୍ ମିରି ସୁନ ଡିଗା, ଡିତିନ୍ ମାଇନା ଅମି ଈଶାକ୍ ବୁଙ୍ଗ।
ଉଣ୍ଡୋଇଲ ଈଶାକ୍ ଇଙ୍ଗେର୍ ଗୁ ଡେଙ୍ଗା, ଆବ୍ରାହାମ୍ ନା ଆବିସ୍ବାସ୍ ପରିକ୍ଷା ଡେଡେମ୍ସା ଈଶ୍ପର୍ ସୁନ, “ ନନା ମୁୟଙ୍ଗ୍ ଆକା ଗୁ ଆଈଶାକ୍ ରୁଙ୍ଗା ମାରି ନିଙ୍ଗ୍ ପାଲାଇ ଆମାଇ ଅଡାବ ସୁଙ୍ଗ୍।“ ମାରିମୁସ, ଆବ୍ରାହାମ୍ ଈଶ୍ପର୍ ନା କାତା ମାନ୍ଲ। ମାରି ମାଇ ମାଇନା ଆଗୁ ଅଡାବ ସୁସୁଙ୍ଗ୍ ପାଲାଇ ତିଆର୍ ଡେଙ୍ଗା।
ଆବ୍ରାହାମ୍ ମାରି ଈଶାକ୍ ସେସେବ୍ନା ଟାନବ ଇକୁନ୍ ବେଲା, ଈଶାକ୍ ପାଚାର୍ ଲ, “ବା, ସୁସୁର ପାଲାଇ ଶୁଙ୍ଗ ଡିତା, ମାତର୍ ମେଣ୍ଢା ଆର୍ କଣ୍ଡେ ?” ଆବ୍ରାହାମ୍ ଆ ଈଶାକ୍ ସୁନ,“ନିଙ୍ଗ୍ନା ଗୁ, ଈଶ୍ପର୍ ଅଡ଼ାବ ପାଲାଇ ମେଣ୍ଢା ବେତ।
ଉଣ୍ଡୋଇଲ ମାଏ ଅଡ଼ାବ୍ ବାର୍ନା ଟାନ୍ବ କେଟ୍ଲ, ଆବ୍ରାହାମ୍ ଆଈଶାକ୍ ତୁଲ ବେଡ଼ ମାରି ମୁୟଙ୍ଗ୍ ବେଦୀ ବାଗ୍ ବ ଅଡ୍ରିସ। ଉଣ୍ଡୋଇଲ ଆବ୍ରାହାମ୍ ଆ ମାଇନା ଗୁ ଅଡାବାର୍ସା ଇଡେଙ୍ଗା, ଈଶ୍ପର୍ ସୁନ, “ଡିକିଲା! ଆତିନ୍ ଗୁ ଆ ଅଡାବ! ଅଇକା ନିଙ୍ଗ୍ ମାଗନିଙ୍ଗ୍ ଜେ ନ ଆନିଙ୍ଗ୍ ବତୁଙ୍ଗ୍ ନନ, ମାସାଡନା ନନା ସାଗ୍ ମୁଇ ଗୁ ନିଙ୍ଗ୍ ପାଲାଇ ଅଡାବ୍ସା ଆ ଇଁସାଙ୍ଗ୍ତ୍ନ।
ଲଗେ ଡିକୁନ୍ ଟାନ୍ବ, ଆବ୍ରାହାମ ଯୁଲ ମୁୟଙ୍ଗ୍ ମେଣ୍ଢା ମୁୟଙ୍ଗ୍ ଲାଟାବ ଆଲଜ୍ ଡିଗା। ଈଶ୍ପର୍ ଈଶାକ ନା ବାଦୁଲ୍ ସେସେବ୍ ପାଲାଇ ମୁୟଙ୍ଗ୍ ମେଣ୍ଢା ବେଡ଼। ଆବ୍ରାହାମ୍ ସାର୍ଦା ଡେଙ୍ଗସେ ଆଗିତିନ୍ ମେଣ୍ଢା ସେବ। ମାରି ଈଶ୍ପର୍ ଆ ଆବ୍ରାହାମ୍ ସୁନ, “ମାସାଡନା ନ ଆନିଙ୍ଗ୍ ଗୁଲାଇ ଜାକ ଦେବେ ପାଲାଇ ମନ୍ ଡ଼େମନ, ନନା ସା ଆମୁଇ ଗୁସା ଅଡ଼ାବାର୍ ପାଲାଇ ମନ୍ ଡ଼େମନ, ଆତିନେ ନିଙ୍ଗ୍ ଆନ ଆଶିର୍ବାଦ୍ ଡେଡେମ୍ ପାଲାଇ୍ ପରମାନ୍ ଡ଼େମ ନିନିଙ୍ଗ୍। ନନା କୁଲ୍ ବାଦଲ୍ ବନା ମମର୍ତ ନାନେ ଲସା ଜବର୍ ଡ଼େନ୍ତା। ମାସାଡନା ନ ନିଙ୍ଗ୍ନା କାତା ମାନ୍ଲନ, ଗିତିନ୍ସା ନିଙ୍ଗ୍ ଦର୍ତନିନା ଆଗୁଲାଇ ଆଡିୟନ୍ ରେମଲେ ନନ୍ ଡିଅନ୍ ରେମ୍ ବେରଙ୍ଗ୍ ଆଶିର୍ବାଦ୍ ଡେମ୍ତିଙ୍ଗ୍।“
ମାରି ଈଶ୍ପର୍ ଆ ଆବ୍ରାହାମ୍ ସୁନ, “ମାସାଡନା ନ ଆନିଙ୍ଗ୍ ଗୁଲାଇ ଜାକ ଦେବେ ପାଲାଇ ମନ୍ ଡ଼େମନ, ନନା ସା ଆମୁଇ ଗୁସା ଅଡ଼ାବାର୍ ପାଲାଇ ମନ୍ ଡ଼େମନ, ଆତିନେ ନିଙ୍ଗ୍ ଆନ ଆଶିର୍ବାଦ୍ ଡେଡେମ୍ ପାଲାଇ୍ ପରମାନ୍ ଡ଼େମ ନିନିଙ୍ଗ୍। ନନା କୁଲ୍ ବାଦଲ୍ ବନା ମମର୍ତ ନାନେ ଲସା ଜବର୍ ଡ଼େନ୍ତା। ମାସାଡନା ନ ନିଙ୍ଗ୍ନା କାତା ମାନ୍ଲନ, ଗିତିନ୍ସା ନିଙ୍ଗ୍ ଦର୍ତନିନା ଆଗୁଲାଇ ଆଡିୟନ୍ ରେମଲେ ନନ୍ ଡିଅନ୍ ରେମ୍ ବେରଙ୍ଗ୍ ଆଶିର୍ବାଦ୍ ଡେମ୍ତିଙ୍ଗ୍।“
ବାଇବଲ୍ ନା ମୁଇ ଉସାରାମ୍ : ଆଦିପୁସ୍ତକ ୧୬-୨୨
Free to use, adapt, and share under an open license (CC BY-SA 4.0).