12. ୧୨. ତୁର୍ସେ ଇନା
ଇସ୍ରାଏଲ୍ନା ରେମଲେ ମିସର୍ଦେଶ୍ ଅନ୍ତୁରସେ ଜବର୍ ସାର୍ଦା ଡିଗା। ମାଏଲେ ମାରି ଗତିରେମ ଆଡିତା,ମାରି ମାଏଲେ ପର୍ମାନ୍ ଡ଼େମକୁନ୍ ଦେଶ୍ବ ଇଡେଙ୍ଗା!
ସିମିହି ବେଲା, ମୁଇ ମୁନାବାଇ ବାଦଲ୍ ମାରି ମିଣ୍ଡିବ୍ ବେଲା ମୁୟଙ୍ଗ୍ ସୁଅଁଗୁଲା ଡେଙ୍ଗ୍ସେ ମାଏନା ଆଗ୍ତୁ ଆଗ୍ତୁ ଇଡ଼େଙ୍ଗା। ଗିତିନ୍ ବାଦଲ୍ ସୁଁଅବାଦଲ୍ ବ ଡିକୁନ୍ ଈଶ୍ପର୍ ଗୁଲାଇ ବେଲା ମାଏନ୍ ବେରଙ୍ଗ୍ ଡିଗା,ମାରି ଇବେଲା ଆମାଏ ଆଗ୍ତୁ ୱାରୁଙ୍ଗା। ଆମାଏ ମାଇନା ତେଙ୍ଗୁ ତେଙ୍ଗୁ ଇଡେଙ୍ଗା।
ଇତି ବେଲା ତୁର୍ଗୁ, ଫାରୋ ମାରି ମାଇନା ରେମଲେ ମାଏନା ମନ୍ ବଦ୍ଲାୟ।ମାଏଲେ ଆଇସ୍ରାଏଲିୟଲେ ମାର୍ମୁସ ମାଏନା ଗତିରେମ୍ ଡେଡେମ୍ ପାଲାଇ ମନ୍ ଡେଡେମ୍ ଡେଙ୍ଗା। ଗିତିନ୍ସା ମାଏଲେ ଇସ୍ରାଏଲ୍ ଗାରି ଇଗା।ଈଶ୍ପର୍ ଆକା ମାଏନା ମନ୍ ବଦ୍ଲାୟ ଡିଗା। ମାଇ କନ୍ ଡିକନ୍ ପାଲାଇ ଡ଼େମ, ମାସାଡନା ମାଇ ମନ୍ ଡ଼େଡେମ୍ ଡେଙ୍ଗା ଜେ ଗୁଲାଇ ରେମ ମାଗେ। ମାଇ, ଯିହୋବା, ଫାରୋ ମାରି ମିସର୍ନା ଗୁଲାଇ ଦେବ୍ତା ନାନେ ଜବର୍ବପୁ ବାଇନା।
ଉଣ୍ଡୋଇଲ ଇସ୍ରାଏଲିୟଲେ ମିସର୍ ନା ଆସୈନିକ୍ଲେ ସାସା ନା ଜୁଲ, ମାଏଲେ ଫାରୋନା ସୈନିକ୍ଲେ ଲନା ରଙ୍ଗ୍ କିଣ୍ଡାଗ୍ ମଜାଇ ଗାଇଗିତ୍ନେ ଡସେ ମାମାଗ୍ ଗଙ୍ଗା। ମାଏଲେ ଜବର୍ ବୁତୁଙ୍ଗ୍ ସେ ଉଗ୍ ମୁଲାୟ, “ନେ ମାପାଲାଇ ମିସର୍ ଅନ୍ତୁର ନେ? ନେ ଗଗୋଇ ପାଲାଇ ଇଗ୍ନେନେ!”
ଗିତିନ୍ସା ମୋଶା ଆଇସ୍ରାଏଲିୟରେମଲେ ସୁନ, ଆବୁତୁଙ୍ଗ୍ଗା!ଅଇ ଈଶ୍ପର୍ ପେନ୍ ପାଲାଇ ଜୁଜ୍ ଡେମ୍ତ ମାରି ଆପେ ରକିୟା ଡେମ୍ତ”ଗିତିନ୍ ତୁର୍ଗୁ ଈଶ୍ପର୍ ଆମୋଶା ସୁନ,“ଆକନ୍ ରେମଲେ ରଙ୍ଗ୍ କିଣ୍ଡାଗ୍ ଗାରି ଇପାଲାଇ ସୁଁ।”
କନ୍ ତୁର୍ଗୁ ଇସ୍ରାଏଲିୟରେମଲେନ୍ ବ ମାରି ମିସରିୟରେମଲେନ୍ ବ ସାଗା ମାରି ମିଣ୍ଡିନା ସୁଁଅ ଗୁଲା ଡେଙ୍ଗ୍ଇଗା। ମିସରିୟରେମଲେ ଗୁଲାଇ ମିଣ୍ଡି ଇସ୍ରାଏଲ୍ରେମଲେନ୍ ବ ସାସା ଆଗଙ୍ଗା।
ଈଶ୍ପର୍ ଆମୋଶା କିଣ୍ଡାଗ୍ ବାଗ୍ବ ତିତି ଲମାଇବାର୍ ପାଲାଇ ସୁନ। ଆତିନେ ଈଶ୍ପର୍ ଉଡିୟାଗ୍ ବେରଙ୍ଗ୍ ଆଡାଗ୍ ଦୁଇ ବାଗ୍ ଡ଼େମବେଡ ମିରିକି କିଣ୍ଡାଗ୍ ବେଡସେ ମୁୟଙ୍ଗ୍ ଗାରି ତିଆର୍ ଡେଡେମ୍ ଗଙ୍ଗ୍ ଡିଗା।
ଇସ୍ରାଏଲିୟଲେ ମାଏନା ଉମ୍ବାର୍ ଗାରି ଡାଗ୍ ନା କତି ବେରଙ୍ଗ୍ ଉନ୍ସର୍ କୁନ୍ ତୁବୁଗ ବେଡ଼ ସେ କିଣ୍ଡାଗ୍ବ ଆକ୍ତୁ ଇଗା।
ଉଣ୍ଡୋଇଲ ମିସରୟରେମଲେ ଇସ୍ରାଏଲିୟନା ଆରେମଲେ ଫିସଲ୍ସେ ଇନା ଜୁଲ, ମାଏଲେ ମାରିମୁସ ଇସ୍ରାଏଲିୟ ରେମଲେନା ତୁର୍ ଗୁ ୟଁ ୟଁ ଆରମ୍ ଡ଼େମ।
ଆତିନେ ମାଏଲେ କିଣ୍ଡାଗ୍ ବେଡସେ ଇସ୍ରାଏଲିୟରେମଲେନା ତେଙ୍ଗୁ ତେଙ୍ଗୁ ଇଗା, ମାତର୍ ଆମିସରିୟଲେ ଅବୁତୁଙ୍ଗ ମାରି ମାଏନା ରଥ ଗୁଲାଇ ଗାଇଗା। ମାଏଲେ ଆଉଲି ଡେଙ୍ଗ୍ସେ ସୁନ,” ଉର୍! ଈଶ୍ପର୍ ଇସ୍ରାଏଲିୟଲେ ପାଲାଇ ଜୁଜ୍ ଡ଼େମନି।”
ଗୁଲାଇ ଇସ୍ରାଏଲିୟରେମଲେ କିଣ୍ଡାନା ତଙ୍ଗ୍ରେ ପାଟ୍ କେଟ୍ଗା। ଗିନ୍ ତୁର୍ଗୁ ଈଶ୍ପର୍ ଆମୋଶା ମାର୍ମୁସ ଡାଗ୍ ବାଗ୍ବ ତିତି ଲମାଇବାର୍ ସା ସୁନ। ଉଣ୍ଡୋଇଲ ମୋଶା ଗିତିନ୍ ଡ଼େମ, ମିସରିୟନା ସୈନିକ୍ଲେନ୍ ବାଗ୍ବ ଡାଗ୍ ଲୋଗା ମାରି ଆଗ୍ତୁନ୍ ସୁଗ ଡେଙ୍ଗ୍ଇଗା। ଗୁଲାଇ ମିସରନା ସୈନିକ୍ଲେ ବୁଡସେ ଗୋଇଗା।
ଉଣ୍ଡୋଇଲ ଇସ୍ରାଏଲିୟରେମଲେ ଜୁଲ ଜେ ମିସରିୟଲେ କିଣ୍ଡାଗ୍ ବ ବୁଡ଼୍ସେ ଗୋଇଗିତା, ମାଏଲେ ଈଶ୍ପର୍ ବ ବିସ୍ବାସ୍ ଡ଼େମ। ମାଏଲେ ବିସ୍ବାସ୍ ଡେଡେମ୍ ଡେଙ୍ଗା ଜେ ମୋଶା ଈଶ୍ପର୍ ନା ମିଣ୍ଡା ବାବବାଦି ଡିଗା।
ଇସ୍ରାଏଲିୟରେମଲେ ଲନା ଜବର ସାର୍ଦା ଡେଙ୍ଗା ମାସାଡନା ଈଶ୍ପର୍ ଆମାଏ ଗଗୋଇ ନାନେ ମାରି ଗତି ପାଇଟି ନାନେ ରକିୟା ଡ଼େମ। ଅଇକା ମାଏଲେ ଈଶ୍ପର୍ନା ପୁଜା ଡେଡେମ୍ ସା ମାରି ଆମାଇ ମାନ୍ବାର୍ ସା ମୁକଲ୍ ସେ ଡିଗା। ଇସ୍ରାଏଲିୟଲେ ମାଏନା ମୁକଲ୍କୁନ୍ ଦିନ୍ ମୁକ୍ତିନା ସୁଗ ମାନ୍ବାର୍ ପାଲଇ ମାରି ଆଈଶ୍ପର୍ ସାର୍ଦା ଡେଡେମ୍ ପାଲାଇ ଜବର୍ ସିନେର୍ ସେର ମାସାଡନା ମାଇ ଆମାଏ ମିସର୍ନା ସୈନିକ୍ଲେ ନାନେ ରକିୟା ଡ଼େମଡିଗା।
ଈଶ୍ପର୍ ଆଇସ୍ରାଏଲିୟଲେ ଗୁଲାଇ ବରସ୍ ମୁଇ ପରବ୍ ପାଲ୍ବାର୍ ସା ଆଦେଶ୍ ବେଡ। ଈଶ୍ପର୍ ମିରି ଆମାଏଲେ ମାଏନ୍ ଶତ୍ରୁ ମିସରିୟଲେନ୍ ଆରାୟ ମାରି ଗତିନାନେ ମୁକ୍ଲାୟ। ଆକନ୍ ପରବ୍ ନିସ୍ତାର୍ ପରବ୍ ଡସେ ସୁନ୍ତ। ଆକନ୍ ପରବ୍ ପାଲ୍ବାର୍ ପାଲାଇ ମୁଇ ବାନିବାଇ ମେଣ୍ଡା ସେବସେ,ଆକନ୍ ସୁରସେ,ମାରି ସଡ଼ା ମପାକାକୁନ୍ ରୁଟି ବେରଙ୍ଗ ସୁସୁମ୍ ଡିଗା।
ବାଇବଲ୍ନା ମୁଇ ଉସାରାମ୍ :ଜାତ୍ରା ପୁସ୍ତକ :୧୨:୩୩-୨୧
Free to use, adapt, and share under an open license (CC BY-SA 4.0).