13. ୧୩. ଈଶ୍ପର୍ ଇଶ୍ରାଏଲ୍ ବେରଙ୍ଗ୍ ନିୟମ୍ ଡ଼େମ
ଆଇସ୍ରାଏଲିୟ ରେମଲେ ରଙ୍ଗ୍ କିଣ୍ଡାଗ୍ ବେଡସେ ଇକୁନ୍ ତୁର୍ଗୁ, ଈଶ୍ପର୍ ଆମାଏଲେ ମରୁଭୁମି ବେଡସେ ସିନୟ କୁଣ୍ଡା ବ ୱାରୁଙ୍ଗା। କନ୍ ଗିତିନ୍ କୁଣ୍ଡାଡିଗା ଆରିକି ମୋଶା ସୁଁଙ୍ଗ ଡକୁନ୍ ସେମୁ ଜୁଲଡିଗା। ମାଏଲେ ଗିତିନ୍ କୁଣ୍ଡା ଜଗ୍ତ ମାଏନା ଚାମ୍ଡ଼ା ଅରେଙ୍ଗ।
ଈଶ୍ପର୍ ଆମୋଶା ମାରି ଇସ୍ରାଏଲ୍ନା ଆଗୁଲାଇରେମ ସୁନ, ପେ ଗୁଲାଇ୍ ବେଲା ନିଙ୍ଗ୍ନା କାତା ମାନ୍ତପେ, ମାରି ଆର୍ନା ନିୟମ୍ ପେନ୍ ବେରଙ୍ଗ୍ ଡେମୋ ନିନିଙ୍ଗ୍ ଗିତିନ ମାନ୍ତପେ। ଜଦି ପେ କନା ଡେମ୍ତ ପେ, ଗୁଲାଇରେମ ନାନେ ପେ ନିଙ୍ଗ୍ ନା ତରୋଇନା ଦନ୍ ଦଲତ୍ ଡେନ୍ତ୍ପେ, ପୁଜାରିଲେନା କୁଲ୍, ମାରି ମୁୟଙ୍ଗ୍ ପବିତର୍ ଜାତି ଡ଼େନ୍ତା।
ତିନ୍ ଦିନ୍ ଜାକ ରେମଲେ ଈଶ୍ପର୍ ବ ସାସା ପାଲାଇ ଆତରୋଇ ତିଆର୍ ଡ଼େମ। ଗିତିନ୍ ତୁର୍ଗୁ ଈଶ୍ପର୍ ସିନୟ କୁଣ୍ଡାନାଟିପେ ନାନେ ଜରସାଗା। ଉଣ୍ଡୋଇଲ ମାଇ ସାଗା, ଆର ଗଡ଼୍ଗଡ଼ି, ବିଜ୍ଲି, ମଗ୍ସିଙ୍ଗ୍ ମାରି ପିନେନା ଶବଦ୍ ଡେଙ୍ଗା। ତୁର୍ଗୁ ମୋଶା ନିଜେ କୁଣ୍ଡା ବାଗ୍ବ ଇଗା।
ମାଇନା ତୁର୍ଗୁ ଈଶ୍ପର୍ ରେମଲେ ବେରଙ୍ଗ୍ ମୁୟଙ୍ଗ୍ ନିୟମ୍ ଡ଼େମ। ମାଇ ସୁନ,“ ନିଙ୍ଗ୍ ପେନା ଈଶ୍ପର୍ ଜିହୋବା। କନା ନିଙ୍ଗ୍ ଜା ଆପେ ମିସର୍ନା ଗତିଦାଙ୍ଗ୍ଡା ନାନେ ରକିୟ ଡ଼େମନିଙ୍ଗ୍। ପାଲ୍ ଆଜାସା ଆଦେବ୍ତାଲେ ପୁଜା ଆଡ଼େମ।”
“ ମାସା ମୁର୍ତି ତିଆର୍ ଆଡେମ୍ ତପେ ମାରି ମାଏନା ପୁଜା ଆଡେମ୍ ତପେ, ମାସାଡନା ନିଙ୍ଗ୍, ପେନା ମୁୟଙ୍ଗ୍ ଆକା ଈଶ୍ପର୍ ଯିହୋବା। ନିଙ୍ଗ୍ ନା ଅମି ମିସ୍ସା ଆସବ। ପୁଣ୍ଡ୍ବାର୍ନା ଦିନ୍ ବାନି ସୁଗ ପାଲନ୍ ଡେମ୍, ପାଲ୍ ଶବଦ୍ ନାନେ ସୁନ, ପେନ୍ ଗୁଲାଇ୍ ପାଇଟି ଛଦିନ୍ ବ ଡେମ୍, ମାସାଡନା ସାତ୍ ଦିନ୍ବ ପୁଣ୍ଡ୍ ବାର୍ନା ଦିନ୍ ମାରି ଆନିଙ୍ଗ୍ ଏତାଇବାର୍ନା ଦିନ୍।
ଆନନ୍ ବା, ୟଙ୍ଗ ଆଲାଦ୍ ଡେମ୍। ରେମ ଆଅଡାବ। ଦାରେଲା ପାଇଟି ଆଡ଼େମ। ଚର୍ ଆଡ଼େମ। ପେ ପେନ୍ କଣ୍ଡେ ଡିକୁନ୍ ରେମଲେନା ଆକୁନି,କି ଡିଅ ମାରି ମାସା ଆଜିନିଷ୍ ଲବ୍ ଲାଲାଇ ଆଡେଙ୍ଗା।
ଇଶ୍ପର୍ ବେଡ଼ କୁନ୍ ଗୁଲାଇ ନିୟମ୍ ରେମଲେ ମାନ୍ବାର୍ ପାଲାଇ ରାଜି ଡେଙ୍ଗା। ମାଏଲେ ଈଶ୍ପର୍ ନା ଆକା ପୁଜା ଡେଡେମ୍ ପାଲାଇ ମନ୍ ଡ଼େମ।
ଈଶ୍ପର୍ ଆଇସ୍ରାଏଲ ନା ରେମଲେ ମୁୟଙ୍ଗ୍ ମୁନାବାଈ କୁଡିୟା ତିଆର୍ ଡେଡେମ୍ ପାଲାଇ ସୁନ, କନା ମିଶ୍ ବାର୍ କୁଡ଼ିଆ। କନ୍ କୁଡିୟା ମିରି ତିଆର୍ ଡ଼େନ୍ତା, ଆର ମିର୍ ବାଇ ଜିନିସ୍ଲେ ବୁଙ୍ଗ୍ତ ମାଇ ଆମାଏ ବାନି ଡ଼େମ ସୁନଡିଗା। ଆକୁଡିୟା ଉମ୍ବାର୍ ଆବାକ୍ରା ବାଗ୍ ଡେଡେମ୍ ପାଲାଇ ମାଇ ମୁଇ ମୁନାବାଇ ପାର୍ଦା ତିଆର୍ ଡେଡେମ୍ ପାଲାଇ ସୁନଡିଗା। ଈଶ୍ପର୍ ଗିତିନ୍ ପାର୍ଦାନା ଗୁଡାଙ୍ଗ୍ ଗାରି ଡିକୁନ୍ ବାକ୍ରାବ ସାଗ୍ସେ ଆର ଡିଗା। ଆରିକି ଈଶ୍ପର୍ ଡିଗା ଗିତିନ୍ ବାକ୍ରାବ ଇଇନା ଆଦେଶ୍ ଆମୁନା ପୁଜାରିବ ଡିଗା।
ରେମଲେ ମିସ୍ବାର୍ନା କୁଡିୟା ଆକ୍ତୁ ମୁଇ ବେଦି ଅରେଙ୍ଗ୍ବାର ଡିଗା। ଯଦି ଆର୍ନା ରେମ ଈଶ୍ପର୍ ନା ନିୟମ୍ ଆମାନ୍ତ ମାଇ ଗିତିନ୍ ବେଦିବ ମୁଇ ଜନ୍ତୁ ରୁଙ୍ଗ୍ତ। ଗିତିନ୍ ତୁର୍ଗୁ ପୁଜାରି ଅଡାବ୍ତ ମାରି ବେଦି ବାଗ୍ବ ଈଶ୍ପର୍ ପାଲାଇ ସେବକୁନ୍ ସୁଗ ଆମାଇ ଅଗେପ୍ତ। ଈଶ୍ପର୍ ସୁନ କି, ଗିତିନ୍ ଜନ୍ତୁନା ବନି ଗିତିନ୍ ରେମନା ପାପ୍ ଗୁଡ୍ୟାଗ୍ତ। ଡ଼ିକନ୍ ସୁଗ, ଈଶ୍ପର୍ ଆଗିତିନ୍ ପାପ୍ ମାରି ମନେ ଆବୁଙ୍ଗ୍ତ। ଗିତିନ୍ ରେମ ଈଶ୍ପର୍ନା ସାର୍ମବ ଗୁଡିୟାଗ୍ତା, ଈଶ୍ପର୍ ମୋଶାନା ବିୟାଙ୍ଗ୍ ଆହାରଣ ମାରି ହାରଣନା ଆକୁଲ୍ରେମଲେ ମାଏନା ପୁଜାରି ସୁଗ ବାଚ୍ଲ।
ମାଇନା ତୁର୍ଗୁ ଈଶ୍ପର୍ କନ୍ ଦଶ୍ଟା ଆଦେଶ୍ ଉମ୍ବାର୍ ପାଟା ବାଇ ବିରେବ ଲେକ୍ଲସେ ଆମୋଶା ବେଡ଼। ଈଶ୍ପର୍ ଆରେମଲେ ମାନ୍ବାର୍ ପାଲାଇ ଜବର୍ ଆଦେଶ୍ ମାରି ନିୟମ୍ଲେ ବେଡ଼। ଯଦି ରେମଲେ ଈଶ୍ପର୍ ବେଡ଼ କୁନ୍ ଆଦେଶ୍ଲେ ମାନ୍ତା ଡନା ଈଶ୍ପର୍ ଆମାଏଲେ ଆଶିରବାଦ୍ ମାରି ରକିଆ ଡ଼େଡ଼େମ୍ନା ପର୍ମାନ୍ ଡ଼େମ। ମାତର୍ ମାଇ ସୁନତା ଜେ ମାଏ ଜଦି କନ୍ ଆମାନ୍ତ ଗିତିନ୍ ଲୋ ମାଇ ଆମାଏ ଡଣ୍ଡ୍ ବେତ।
ଜବର୍ ଦିନ୍ ଜାକ ମୋଶା ଚାଇନା କୁଣ୍ଡା ବାଗ୍ବ ଡିଗା। ମାଇ ଈଶ୍ପର୍ ବେରଙ୍ଗ୍ ଅଁଅୟ ଡେଙ୍ଗା। ମାତର୍ ରେମଲେ ମାଇ ଲେଉଟ୍ ସାସାଗ୍ନା ଜାଗ୍ଲ ଜାଗ୍ଲସେ ଲାକାର୍ ଇଗା। ଆତିନେ ମାଏ ସୁନାଲେ ହାରୋଣବ ରୁଙ୍ଗସେ ମୁୟଙ୍ଗ୍ ମୁର୍ତି ଅରେଙ୍ଗ୍ ବାର୍ ପାଲାଇ ସୁନ, ମୁୟଙ୍ଗ ମୁର୍ତି ତିଆର୍ ଡେମ୍ ମିରିକି ମାଏଲେ ଆମାଇ ଈଶ୍ପର୍ ବାଦୁଲ୍ ପୁଜା ଡେମ୍ତ। ଡିକନ ସୁଗ ମାଏଲେ ଈଶ୍ପର୍ ବିରଦ୍ବ ମୁନା ପାପ୍ ଡ଼େମ।
ହାରୋଣ ଡାଉବାୟ୍ ଅଁଅ ଗୋଇନା ମୁଇ ମୁର୍ତି ତିଆର୍ ଡ଼େମ। ମାଏଲେ ଆତିନ୍ ମୁର୍ତି ପୁଜା ଡେଡେମ୍ ପାଲାଇ ମୁଲାୟ, ମାରି ସେବସେ ବେଡ଼! ମାଏନ୍ ପାପ୍ ପାଲାଇ ଈଶ୍ପର୍ ମାଏନ୍ ବାଗ୍ବ ଜବର୍ କିଜ୍ରା ଡେଙ୍ଗା। ଈଶ୍ପର୍ ଆମାଏ ବୁଡାଇବାର୍ ସା ମନ୍ ଡ଼େମ। ମାତର୍ ମୋଶା ଆଈଶ୍ପର୍ ପାର୍ତନା ଡ଼େମ ମାରି ଗୁଆର୍ଲ ଜେ ଆମାଏ ଆଅଡାବ। ଈଶ୍ପର୍ ମାଇନା ପାର୍ତନା ଅଁଙ୍ଗ ମାରି ଆମାଏ ଆ ଅଡାବ୍ତ।
ଉଣ୍ଡୋଇଲ ମୋଶା ଚାଇନା କୁଣ୍ଡା ନାନେ ଜର୍ଗା, ମାଇ ଉମ୍ବାର୍ ପାଟାବିରେ ସଗ୍ଡିଗା ଆରିକି ଈଶ୍ପର୍ନା ଦଶ୍ଟା ଆଦେଶ୍ ଲେକ୍ଲ ଡିଗା। କନ୍ ତୁର୍ଗୁ ମୋଶା ଆତିନ୍ ମୁର୍ତି ଜୁଲସେ ଅକନ୍ କିଜ୍ରା ଡେଙ୍ଗା ଜେ ମାଇ ଆତିନ୍ ପାଟାବିରେଲେ ପୁରୁଗ ସୁଁଙ୍ଗ।
ଗିତିନ୍ ତୁର୍ଗୁ ମୋଶା ଆମୁର୍ତି ଅଗେବ ମାରି ଗୁଣ୍ଡ୍ ଗୁଣ୍ଡା ଡ଼େମ। ମାଇ ଡାଗ୍ ବେରଙ୍ଗ୍ ମିସାୟସେ ଆତିନ୍ ଡ଼ାଗ୍ ଆମାଏ ଅଉଡ଼। ଈଶ୍ପର୍ ଗିତିନ୍ ରେମଲେନ୍ ବାଗ୍ବ ରୋଗ୍ ବେଟାୟ ମାରି ମାଏଲେନ୍ ନାନେ ଜବର୍ ରେମ ଗୋଇଗା।
ମୋଶା ପୁରୁଗ କୁନ୍ ପାଟାବିରେଲେ ବାଦ୍ଲାଇ ବାର୍ସା ମାଇ ଦଶ୍ଟା ଆଦେସ୍ନା ତିମେ ବିରେ ପାଟା ତିଆର୍ ଡ଼େମ। ମାଇନା ତୁର୍ଗୁ ମାଇ ମାର୍ମୁସ କୁଣ୍ଡା ବାଗ୍ବ ଡାଇଗା, ମାରି ରେମଲେନ୍ ପାପ୍ କେମା ପାଲାଇ ପାର୍ତନା ଡ଼େମ। ଈଶ୍ପର୍ ମୋଶାନା ପାର୍ତନା ଅଙ୍ଗ ମାରି ଆମାଏ କେମା ଡ଼େମ। ମୋଶା ତିମେବାଇ ପାଟା ବିରେବ ଦଶ୍ଟା ଆଦେଶ୍ ରୁଙ୍ଗ୍ସେ କୁଣ୍ଡା ନାନେ ଜର୍ଗା।ଗିତିନ୍ ତୁର୍ଗୁ ଈଶ୍ପର୍ ଆଇସ୍ରାଏଲିୟ ରେମଲେ ସିନୟ କୁଣ୍ଡା ନାନେ ପର୍ମାନ୍ ଡ଼େମକୁନ୍ ଦେଶ୍ବ ରୁଙ୍ଗୋଇଗା।
ବାଇବଲ୍ନା ଉସାରାମ୍ :ଜାତ୍ରା ପୁସ୍ତକ ୧୯-୩୪
Free to use, adapt, and share under an open license (CC BY-SA 4.0).