24. ୨୪. ଯୋହନ ଆଯୀଶୁ ଡୁବନ୍ ବେଡ଼

ଜିଖରିୟ ମାରି ଏଲିଜାବେଥ୍ ନା ଗୁ ଯୋହନ ମୁନାଡେଙ୍ଗ୍‌ସେ ବାବବାଦି ଡେଙ୍ଗା। ମାଇ ମରୁଭୁମି ବ ଡିକୁଡେଙ୍ଗା,ମାଇ ଉର୍‌ବ ମାରି ଚିଟ୍‌କା ସୁସୁମ୍ ଡେଙ୍ଗା,ଉଟ୍‌ ନା ଚେଣ୍ଡି ନାନେ ଅରେଙ୍ଗ କୁନ୍ ସକା ତୁଙ୍ଗ୍‌ ତୁଙ୍ଗ୍ ଡେଙ୍ଗା

ଜବର୍ ରେମ ଯୋହନ୍ ନା କାତା ଅଁଙ୍ଗ୍ ପାଲାଇ ମରୁଭୁମି ବ ସାଗା। ମାଇ ଆମାଏଲେ ପ୍ରଚାର୍ ଡ଼େମ ସେ ସୁନ,ମନ୍ ବଦ୍‌ଲାଇ,“ମାସାଡନା ଈଶ୍‌ପର୍‌ନା ରାଜି ଲଗେ କେଟ୍‌ଗା ନି”।

ଉଣ୍ଡୋଇଲ ରେମଲେ ମାଇନା କାତା ଅଁଙ୍ଗ, ମାଏନ୍ ବିତ୍‌ରେ ଜବର୍ ରେମ ମାଏନ୍ ପାପ୍ ନାନେ ମନ୍ ବଦ୍‌ଲାୟ, ମାରି ଯୋହନ୍ ଆମାଏ ଡୁବନ୍ ବେଡ଼। ଜବର୍ ଦରମ୍ ଡେଡେମ୍ ନା ନେତାଲେ ଯୋହନ୍ ନା କାତା ଅଙ୍ଗ୍ ପାଲାଇ୍ ସାଗା, ମାତର୍ ମାଏ ପାପ୍ ନାନେ ମନ୍‌ ଆବଦ୍‌ଲାୟତ ମାରି ଆଏନ୍ ପାପ୍ ଡ଼େମକୁନ୍ ମାସା ଆସୁନ୍‌ତ।

ଯୋହନ ଦରମ୍‌ବାଇ ଆନେତାଲେ ସୁନ, “ପେଲେ ବିସ୍ ଡିକୁନ୍ ବୁବୁଲେ! ମନ୍ ବଦଲାଇ,ମାରି ପେନା କାରାପ୍‌ ବୁଦିଲେ ବଦ୍‌ଲାଇ । ଗୁଲାଇ ସେମୁଗ୍ ବାନି ଫଲ୍ ଆସୁଉଗ୍ ନା ଈଶ୍‌ପର୍ ଆତିନ୍ ଗୁଲାଇ ଗଡସୁଙ୍ଗ୍‌ତ ମାରିମାଇ ସୁଙ୍ଗବ ଅଡସୁଙ୍ଗ୍‌ତ।“ ବାବବାଦିଲେ ଆର୍‌ନା ସୁନ ଡିଗା,ଯୋହନ୍ ଗିତିନ୍ ଗୁଲାଇ ଡ଼େମ,“ଜୁ ନିଙ୍ଗ୍ ସୁରି ବେଟାଇ ତିଙ୍ଗ୍ ନନ୍ ସାର୍‌ମ ଆଗ୍‌ତୁ ଦୁତ୍ ଡିତା,ଜା କି ଗାରି ଅରେଙ୍ଗ୍‌ ତ।

ଅଇଜା ଦରମ୍‌ବାଇ ନେତାଲେ ଆଯୋହନ ପାଚାର୍‌ଲୋ, ନ ମା କିସ୍‌ଟ କି? ଯୋହନ ସୁନ,“ନିଙ୍ଗ୍ କିସ୍‌ଟ ଆଣ୍ଡା, ମାତର୍ ମାଇ ନିଙ୍ଗ୍‌ନା ତୁର୍‌ଗୁ ସାଗାନି। ମାଇ ଅକନ୍ ମୁନା ଜେ ନିଙ୍ଗ୍ ମାଇନା ଜୁତା ତତଗ୍‌ ପାଲାଇ ସମାନ୍ ଆଣ୍ଡା”।

ମାତର୍‌ ଯୀଶୁ ଡୁବନ୍ ରୁରୁଙ୍ଗ୍ ସା ଯୋହନ୍ ବ ସାଗା। ଉଣ୍ଡୋଇଲ ଯୋହନ ଆମାଇ ଜୁଲ ସେ ସୁନ,“ଜୁ! ଈଶ୍‌ପର୍ ନା ମେଣ୍ଡା ଅଁଅ ସୁଗ ଡ଼ିତା ଜାକି ଦର୍‌ତନି ନା ପାପ୍ ୟନସୁଙ୍ଗ୍‌ତ।”

ଯୋହନ ଆଯୀଶୁ ସୁନ,“ନିଙ୍ଗ ଆନ ଡୁବନ୍ ବେବେ ପାଲାଇ ସମାନ୍ ଆଣ୍ଡା।କନ୍ ବାଦୁଲ୍ ଆନିଙ୍ଗ୍ ଡୁବନ୍ ବେ”। ମାତର୍ ଯୀଶୁ ସୁନ, “ନ ଆନିଙ୍ଗ୍ ଡୁବନ୍ ବେ, ମାସାଡନା କନ୍ ଡେଡେମ୍‌ନା ଠିକ୍ ଡିତା” ଆତିନେ ଯୋହନ ଆମାଇ ଡୁବନ୍ ବେଡ ମାରି ଯୀଶୁ ଉଣ୍ଡୋଇଲସା ପାପ୍ ଡ଼େମ ଆଡିତା।

ଉଣ୍ଡୋଇଲ ଡୁବନ୍ ରୁଙ୍ଗ୍‌କୁନ୍ ତୁର୍‌ଗୁ ଯୀଶୁ ଡାଗ୍‌ନାନେ ତୁର୍‌ସେ ସାଗା, ଈଶ୍‌ପର୍‌ନା ଆତ୍‌ମା ପାରା ସୁଗ ଅଜୁସେ ଜର୍‌ଗା ମାରି ମାଇନ୍ ବାଗ୍‌ବ ଲେଗା। ଗିତିନ୍‌ ବେଲା, ଈଶ୍‌ପର୍ ସରଗ୍‌ନାନେ କାତା ଡେଙ୍ଗା। ମାଇ ସୁନ,“କନ୍ ନିଙ୍ଗ୍‌ନା ଗୁ। ନିଙ୍ଗ୍ ଆମାଇ ଆଲାଦ୍ ଡେମ୍‌ନିନିଙ୍ଗ୍‌, ମାରି ନିଙ୍ଗ୍ ମାଇନ୍ ବ ଜବର୍ ସାର୍‌ଦା।”

ଈଶ୍‌ପର୍ ଆଯୋହନ ସୁନଡିଗା,“ଡୁବନ୍ ରୁଙ୍ଗ୍ କୁନ୍ ମୁଇ ରେମନ୍ ବାଗ୍‌ବ ପବିତ୍‌ର ଆତ୍‌ମା ଜର୍‌ସେ ସାତା ମାରି ମାଇ ବେରଙ୍ଗ୍ ଡିତା। ଗିତିନ୍‌ ରେମ ଈଶ୍‌ପର୍ ନା ଗୁ” ମାଇ ସାଗ୍‌ମିଣ୍ଡା ଆକା ଈଶ୍‌ପର୍। ମାତର୍ ଉଣ୍ଡୋଇଲ ଯୋହନ ଆଯୀଶୁ ଡୁବନ୍ ବେଡ, ଗିତିନ୍‌ ଈଶ୍‌ପର୍ ବା ନା କାତା ଅଁଙ୍ଗ, ଆମାଇନ୍ ଗୁ ଈଶ୍‌ପର୍ ଜୁଲ,ଜାକି ଯୀଶୁ ଆକା,ମାରି ମାଇ ଆପବିତ୍‌ର ଆତ୍‌ମା ଜୁଲ।