29. ୨୯. ଦୟା ମୋଡିକୁନ୍ ଗତିରେମ୍ନା ଉସାରାମ୍
ମିସିଙ୍ଗ୍,ପିତର ଆଯିଶୁ ପାଚାର୍ଲ “ଅ ଗୁରୁ ଉଣ୍ଡୋଇ ନିଙ୍ଗ୍ ନା ବିୟାଙ୍ଗ୍ ନିଙ୍ଗ୍ ସା ପାପ୍ ଡ଼େମନା,ଗିନ୍ଲୋ ନିଙ୍ଗ୍ ଅଇଜା ତର ଆମାଇ କେମା ଡେଡେମ୍ ନା ? ମା ସାତ୍ଥର୍ ଜାକ କି?” ଯିଶୁ ସୁନ, “ସାତ୍ଥର୍ ଆଣ୍ଡା,ମାତର୍ ସତୁରିସାତ୍ ଥର୍ !”କନ୍ ସା,ଆଯିଶୁ ସୁସୁନା ଅରତ୍ ଡିଗା ଜେ ନେ ଗୁଲାଇବେଲା କେମା ଡେଡେମ୍ ଦରକାର୍। ଗିତିନ୍ ତୁର୍ଗୁ ଯିଶୁ କନ୍ ଉସାରାମ୍ ସୁନ।
ଯିଶୁ ସୁନ “ ଈଶ୍ପର୍ ନା ରାଜି ଡିକନ୍ ସୁଗ। ମୁଇ ରାଜା ଜାକି ମାଇନ୍ ଗତିଲେ ବେରଙ୍ଗ୍ ଲେସେ ଇସାବ୍ ଆଡମ୍ ବାର୍ ଡେଡେମ୍ ସା ମନ୍ଡ଼େମ। ମାଇନ୍ ଗତିଲେ ନାନେ ମିଣ୍ଡା ୧୦,୦୦୦ ମୁନା ସୁନା ଉଦାର୍ ରୁଙ୍ଗ୍ଡିଗା।”
ମାତର୍ ଗିତିନ୍ ଗତିରେମ ମାଇନା ଋନ୍ ସୁଜ୍ବାର ଆଗଙ୍ଗା,ଆତିନେ ରାଜା ସୁନ “ମାଇନା ଋନ୍ ସୁଜ୍ବାର ପାଲାଇ ଆକନ୍ ରେମ ମାରି କନଙ୍ଗ୍ ନା ଆଡିଅନ୍ରେମ ଗତିଆରେମ୍ ସୁଗ ସୁଙ୍ଗ ବେ।”
ଗିତିନ୍ ଗତିରେମ୍ ରାଜାନା ତେସୁଙ୍ଗ୍ ଜକ୍ତ ଲସେ ସୁନ ‘ଦୟାଡ଼େମସେ ନିଙ୍ଗ୍ ସା ଡାଟ୍ ବୁଙ୍ଗ୍ ମାରି ନିଙ୍ଗ୍ ନନ୍ ନାନେ ରୁଙ୍ଗ୍ ଡିକୁନ୍ ଗୁଲଇ୍ ରିନ୍ ସୁଜ୍ଲ ବେତିଙ୍ଗ୍। ରାଜା ଗିତିନ୍ ଗତିରେମ୍ ବାଗ୍ବ ଦୟାଡେଙ୍ଗା, ଆତିନେ ମାଇ ମାଇନା ଗୁଲାଇ ଆରିନ୍ ଅନ୍ତୁରବେଡ।”
ମାତର୍ ଗିତିନ୍ ଗତିରେମ୍ ଉଣ୍ଡୋଇଲ ରାଜା ନାନେ ଇଗା,ଅଇତିନ୍ଲୋ ମାଇ ମାରିମିଣ୍ଡା ସାଙ୍ଗ୍ ନାଗତିରେମ୍ ଅଜୁଗା ଜାକି ମାଇନାନେ ରୁଙ୍ଗ୍ ଡିକୁନ୍ ଉନାଇଗ୍ତି ଋନ୍ ସୁଜ୍ବାର୍ ଡିଗା।ଗିତିନ୍ ଗତିରେମ୍ ମାଇନା ଗିତିନ୍ ସାଙ୍ଗ୍ ଗତିରେମ୍ନା ସକ୍ବ ସବ ମାରି ସୁନ “ନିଙ୍ଗ୍ ନାନେ ଉଦାର୍ ରୁଙ୍ଗ୍ କୁନ୍ ରିନ୍ ସୁଜ୍ !”
ସାଙ୍ଗ୍ ଗତିରେମ୍ ଗିତିନ୍ ଗତିରେମ୍ନା ପାଦ୍ବ ଲସେ ସୁନ, ‘ଦୟାଡ଼େମସେ ନିଙ୍ଗ୍ ସା ଡାଟ୍ ବୁଙ୍ଗ୍,ମାରି ନିଙ୍ଗ୍ ଉଦାର୍ ଡେଙ୍ଗ୍ କୁନ୍ ଗୁଲାଇ ରିନ୍ ଆନ ବେଡସୁଙ୍ଗ୍ ତିଙ୍ଗ୍।’ମାତର୍ ଗିତିନ୍ ଡେଡେମ୍ ବାଦୁଲ୍ ମାଇ ରିନ୍ ସୁଜ୍ବାର୍ ଜାକ ଆମାଇ ଜିଲ୍ବ ଅଗାୟ।
“ଆର୍ନାଗତିରେମ୍ଲେ କନ୍ ଘଟ୍ନା ଜୁଲଡିଗା,ମାଏଲେ ଜବର୍ କଲିକରମ୍ ଡେଙ୍ଗା। ମାଏଲେ ରାଜା ବ ଇଗା ମାରି ଗୁଲାଇ କାତା ସୁନବେଡ।
“ରାଜା ଆତିନ୍ ଗତିରେମ ୱାୟସେ ସୁନ, ‘ଅ ଦୁସ୍ଟ ବାଇ ଗତିରେମ!“ନ ଆନିଙ୍ଗ୍ କେମା ସା ବିକ୍ ଲୁଡ଼ କୁନ୍ ସା, ନିଙ୍ଗ୍ ନନାଗୁଲାଇ ଋନ୍ ଅନ୍ତୁର ବେଡନିଙ୍ଗ୍! ନ ଲସ୍ନା ସତ୍ ଡିକନ୍ ସୁଗ ଅଁ ଡେଡେମ୍ ନା ଡିଗା।ଆତିନେ ରାଜା ଅକନ୍ ରିସା ଡେଙ୍ଗ୍ ଇଗା ଜେ ଆଗିତିନ୍ ଦୁସ୍ଟ ଗତିରେମ ଗୁଲାଇ ଋନ୍ ସୁଜ୍ବାର୍ ଜାକ ଜୋଇଲ୍ ବ ଅଗାୟ ବେଡ।
ଗିତିନ୍ ତୁର୍ଗୁ ଯିଶୁ ସୁନ “ଡିତିନ୍ ପେଲେ ତରୋଇନା ଆବିୟାଙ୍ଗ୍ ଲେ ଜୀବନ୍ ବେରଙ୍ଗ୍ କେମା ଆଡ଼େମନା, ଗିତିନ୍ଲୋ ନିଙ୍ଗ୍ ନା ସରଗ୍ବନ୍ ବା ଲସା ପେନ୍ବଲେ ବାଗ୍ବ ଡିତିନ୍ ଡେମ୍ତ।”
ବାଇବଲ୍ନା ମୁଇ ଉସାରାମ୍ :ମାଥିଉ ୧୮:୨୧-୩୫
Free to use, adapt, and share under an open license (CC BY-SA 4.0).