30. ୩୦. ଯୀଶୁ ପାଞ୍ଚ୍ ଅଜାର୍ ଆରେମଲେ ଅସୁମ୍ତ
ଜବର୍ ପାଲ୍ ପାଲ୍ ଉଙ୍ଗମ୍ ବଲେ ବାନି କବର୍ ସୁଁସୁ ସା ମାରି ଶିକ୍ୟା ବେବେସା ଯୀଶୁ ଆମାଇନା ଆଶିଷ୍ଲେ ବେଟାୟ। ଯୀଶୁ ଆରି ଡିଗା ଆର ମାଏଲେ ଉଣ୍ଡୋଇଲ ଲେଉଟ୍ଗା,ମାଏ ମା ଡ଼େମଡିଗା ଗିତିନ୍ ଗୁଲାଇ ଆମାଇ ସୁନ। ଗିତିନ୍ ତୁର୍ଗୁ ଯିଶୁ କିଣ୍ଡାନା ତଙ୍ଗ୍ ରେପାଟ୍ ସିମ୍ରା ଡିକୁନ୍ ମୁଇ ଟାନ୍ବ ଇଇ ପାଲାଇ ଆମାଏଲେ ୱାୟ। ଆତିନେ ମାଏ ମୁଇ ଡ଼ଙ୍ଗାବ ଲେଗା ମାରି କିଣ୍ଡା ତଙ୍ଗ୍ରେ ପାଟ୍ ଉଇଗା।
ମାତର୍ ଜାଜାଲେ ଆର ଯୀଶୁ ମାରି ମାଇନ୍ ଆଶିଷ୍ଲେ ଡ଼ଙ୍ଗାବ ଇଇନା ଜୁଲ ଡିଗା। ରେମଲେ କନ୍ ମାଗସେ ତଙ୍ଗ୍ରେ ପାଟ୍ ଇଇପାଲାଇ କିଣ୍ଡା ପାଲି ଉରୋଇଗା ମାରି ମାଏଲେ କେଟ୍ବାର୍ନା ଆଗ୍ତୁ କେଟ୍ଗା। ଗିତିନ୍ସା ଯୀଶୁ ମାରି ମାଇନା ଶିଷ୍ଲେ ଉଣ୍ଡୋଇଲ କେଟ୍ଗା,ମୁନା ରେମଲେ ଜବର୍ ମାନ୍ଦା ଡିକୁନ୍ବ କିଣ୍ଡାନା ତଙ୍ଗ୍ ରେ ପାଟ୍ ଆମାଏ ଜାଗ୍ଲୋ ସେ ଡିଗା।
ମାଏଲେ ପାକାପିକି ୫୦୦୦ ଇଙ୍ଗେରେ ଡିଗା,ଆସେଲାନେ ମାରି ଆଗୁଲେ ଇସାବ ଡ଼େମ ଆଡିତା। ଜାଶୁ ଆକନ୍ ରେମଲନ୍ ବାଗ୍ବ ଜବର୍ ଆଲାଦ୍ ଡେଙ୍ଗ୍ ଇଗା। ମାସାଡନା ଯୀଶୁ ପାଲାଇ କନ୍ ରେମଲେ ମେଣ୍ଡାଲେ ସୁଗ ଡିଗା, ଜାନାକି ଜାସା ମେଣ୍ତା ଚାରାଉରେମ୍ ଆଣ୍ଡା। ଆତିନେ ମାଇ ଆମାଏ ଶିକ୍ୟା ବେଡ ମାରି ମାଏନ୍ ବ ଜାଜାଲେ ରୋଗ୍ବ ଡିଗା ଆମାଏଲେ ବାନି ଡ଼େମ।
ମିସିଙ୍ଗ୍ ଡଡମ୍ଲୋ, ଶିଷ୍ଲେ ଆଯୀଶୁ ସୁନ, “ବେଲା ଜବର୍ ଡେଙ୍ଗ୍ଇଗାନି ମାରି ଲଗେ ମାସା ଉଙ୍ଗମ୍ ଆଣ୍ଡା। ଆରେମଲେ ପାଟାୟବେ ମିରିକି ମାଏଲେ ଇସେ ଇଗ୍ତି ସୁସୁମ୍ନା ବାବାଙ୍ଗ୍ ଗଙ୍ଗ୍ତା।
ମାତର୍ ଯୀଶୁ ଆଶିଷ୍ଲେ ସୁନ, “ପେ ଆମାଏ ଇଗ୍ତି ସୁସୁମ୍ ପାଲାଇ ବେ !” ମାଏଲେ ଉତର୍ବେଡ, “ଆକା ନେ ଗିତିନ୍ ଡେଡେମ୍ ଆଗଙ୍ଗ୍ତନେ । ନେନ୍ ବ ପାଞ୍ଟା ରୁଟି ମାରି ଉମ୍ବାର୍ ଆଡଙ୍ଗ୍ ଡିତା।”
ମାଇନା ଆଶିଷ୍ଲେ ସୁନ ଆରେମଲେ ସୁଁ କିରେଙ୍ଗ୍ ବ ପଚାଶ୍ ପଚାଶ୍ ଡ଼େମସେ ଲେସେ।
ଇନା’ ତୁର୍ଗୁ ଯୀଶୁ ଆତିନ୍ ପାଞ୍ଚ୍ଟା ରୁଟି ମାରି ଉମ୍ବାର୍ ଆଡଙ୍ଗ୍ ରୁଙ୍ଗ୍ସେ ବାଦଲ୍ ଗାରୀ ସାର୍ମ ଡ଼େମ, ମାରି ଗିନ ରୁଟି ପାଲାଇ ଆ ଈଶ୍ପର୍ ଦନ୍ୟବାଦ୍ ବେଡ୍।
ମାଇନା ତୁର୍ଗୁ ଯୀଶୁ ଆରୁଟିଲେ କାପ୍ କାପ୍ ଡ଼େମସେ ଆରେମଲେ ବାଟା ବାର୍ ପାଲାଇ ଆଶିଷ୍ଲେ ବେଡ଼। ମାରି ଆଡଙ୍ଗ୍ ଲେସା ଗିତିନ୍ ରେମଲେନ୍ ବ ବାଟାଲ୍। ଶିଷ୍ଲେ ଆତିନ୍ ରୁଟିଲେ ବାଟାଲ ବାଟାଲ ଇଗା, କନ୍ ମାରୀ ଆଡମ୍ତ! ଗୁଲାଇ ରେମ ସୁମ ମାରି ଶାନ୍ତି ଡେଙ୍ଗା।
ମାଇନ୍ ତୁର୍ଗୁ, ଅଗଲ୍ ଡିକୁନ୍ କାପ୍ବାଇ ଆରୁଟି ଶିଷ୍ଲେ ରୁଣ୍ଡାୟ,ମାରି ମାଏଲେ ରୁଟି ମାରି ଆଡଙ୍ଗ୍ କାପ୍ଲେ ୧୨ ଡାମୁଙ୍ଗ୍ ରୁଣ୍ଡାୟ। କନ୍ ଗୁଲାଇ ମାତ୍ରମ୍ ପାଞ୍ଚ୍ ଟା ରୁଟି ମାରି ଉମ୍ବାର୍ ଆଡଙ୍ଗ୍ ନାନେ ସାଗ୍ଡିଗା।
ବାଇବଲ୍ନା ମୁଈ ଉସାରାମ୍ :ମାଥିଉ ୧୪:୧୩-୨୧;ମାର୍କ ୬:୩୧-୪୪;ଲୁକ ୯:୧୦-୧୭;ଯୋହନ ୬:୫-୧୫
Free to use, adapt, and share under an open license (CC BY-SA 4.0).