35. ୩୫. ଆଲାଦ୍‌ ବା ନା ଉସାରାମ୍‌

ମିସିଙ୍ଗ୍, ଯୀଶୁ ଜବର୍ ଆରେମଲେ ଶିକ୍‌ୟା ବେବେଡେଙ୍ଗା ଜାଜାଲେ ମାଇନାନେ ଅଅଙ୍ଗ୍ ପାଲାଇ ସାମୁଇବ ଡେଙ୍ଗ୍ ଡିଗା। ଗିତିନ୍‌ ରେମଲେ ସିସ୍ତୁ ଲୁଲୁରେମ୍ ମାରି ମୋଶାନା ନିଅମ୍ ମାନ୍‌ବାର୍ ପାଲାଇ ସେଚ୍‌ଟା ମ ଡେଡେମ୍ ରେମଲେ ସା ଡିଗା।

ଆର ଡିକୁନ୍‌ ଅଇଜା ଧରମ୍ ନେତାଲେ ଆଯୀଶୁ ଗିତିନ୍‌ ରେମଲେ ବେରଙ୍ଗ୍ ସାଙ୍ଗ୍‌ସୁଗ ବେବାର୍ ଡେଡେମ୍‌ନା ଜୁଲ। ମାରି ମାଏଲେ ତରୋଇ ତରୋଇ ସୁସୁ ମୁଲାୟ ଜେ ମାଇ ବୁଲ୍ ଡ଼େମନି। ଗିନ୍‌ସା ଯୀଶୁ ଆମାଏ କନ୍ ଉସାରାମ୍ ସୁନ।

“ମିଣ୍ଡା ରେମନା ଉମ୍ବାର୍ ଗୁ ଡିଗା।ଡାଉ ଗୁ ଆମାଇନ୍ ବା ସୁନ, ‘ବା,ଦନ୍‌ଦଲତ୍‌ନା ଆର୍‌ନା ବାଗ୍‌ବାଟା ନିଙ୍ଗ୍‌ନା ଡିତା ଗିତିନ୍ ଆନିଙ୍ଗ୍ ଦର୍‌କାର୍!’ ଆତିନେ ମାଏନ୍‌ ବା ଉମ୍ବାର୍ ମାଇନ୍‌ ଗୁ ବ ଦନ୍‌ଦଲତ୍ ବାଗ୍‌ବାଟା ଡ଼େମ ବେଡ଼।”

ଚଟ୍‌ନା ମାଇନା ଡାଉ ଗୁ ମାଇନ୍ ଗୁଲାଇ ଆଦନ୍‌ଦଲତ୍ ରୁଙ୍ଗ୍‌ସେ ସୁଲୁଙ୍ଗ୍ ଡିକୁନ୍‌ ଦେଶ୍ ବ ଡୁଙ୍ଗା ମାରି କାରାପ୍ କାମ୍ ବାଇ ଜିବନ୍ କାଟ୍‌ଲସେ ଗୁଲାଇ ଦନ୍‌ଦଲତ୍ ଉଡାସୁଙ୍ଗ।”

“ମାଇନା ତୁର୍‌ଗୁ, ଡାଉ ଗୁ ଆର୍‌ନା ଦେଶ୍‌ବ ଡିକୁଡେଙ୍ଗା ଗିତିନ୍‌ ଦେଶ୍‌ବ ମୁଇ ବୋଇଁକାର୍ ମର୍‌ଡି ଡେଙ୍ଗା,ମାରି କିୟାଙ୍ଗ୍ ସସବ୍ ପାଲାଇ ମାଇବ ଡାବୁ ଆଡିତା। ଗିତିନ୍‌ସା ଆଗୁବୁଲେ ଚାରାଇବାର୍ କାମ୍ ଅନ୍‌ତୁରସେ ମାରି ମାସା କାମ୍ ଆମାଇ ଆମିଲ୍‌ତା। ମାଇ ଅକନ୍ ଦୁକ୍ ସେ ମାରି କୁଡୁଗ୍‌ସେ ଡିଗା ଜେ ମଇ ଗୁବୁଲେନା କିୟାଙ୍ଗ୍ ସୁସୁମ୍ ସା ମନ୍‌ଡେଙ୍ଗା।” `

“ଡଡମ୍‌ଲ, ଡାଉ ଗୁ ତରୋଇ ସୁନ ‘ନିଙ୍ଗ ଆକା ମାଡେମ୍‌ତିଙ୍ଗ୍ ? ନିଙ୍ଗ୍ ନା ବାନା ଗୁଲାଇ ପାଇଟିଡେଡେମ୍ ରେମଲେ ପାଲାଇ ଜବର୍ କିୟାଙ୍ଗ୍ ଡିତା, ମାତର୍ ନିଙ୍ଗ୍ ଆକା କୁଡୁଗ୍‌ସେ ଗୋଇ ନିନିଙ୍ଗ୍। ନିଙ୍ଗ୍ ନିଙ୍ଗ୍‌ନା ବାନା କଣ୍ଡେ ଲେଉଟ୍ ଇତିଙ୍ଗ୍ ମାରି ଆନିଙ୍ଗ ମାଇନା ପାଇଟି ଡେଡେମ୍ ରେମ ସୁଗ ବୁବୁଙ୍ଗ୍ ପାଲାଇ ଆମାଇ ନିଙ୍ଗ୍ ଗୁଆର୍ ତିଙ୍ଗ୍ ।”

“ଆତିନେ ଡାଉ ଗୁ ମାଇନା ବାନା ଡିଅବ ଲେଉଟ୍ ଇପାଲାଇ ତୁର୍‌ଗା। ମାଇ ଉଣ୍ଡୋଇଲ ସୁଲୁଙ୍ଗ୍ ଅଁ ଡିଗା, ମାଇନ୍’ ବା ଆମାଇ ସୁଲୁଙ୍ଗ୍ ନାନେ ଜୁଲସେ ଆଲାଦ୍‌ସେ କଲ୍‌ବଲ୍ ଡେଙ୍ଗା। ମାଇ ମାଇନା ଗୁ କଣ୍ଡେ ଉରିସେ ପାଟାଲ୍ ମାରି ବୁଇତମ୍ ।”

“ଗୁ ସୁନ, ‘ବା, ନିଙ୍ଗ୍ ଇଶ୍‌ପର୍‌ ମାରି ନନ୍ ବ ପାପ୍ ଡ଼େମତିଙ୍ଗ୍। ନନ୍ ଗୁ ଡସେ ୱାୱାଇସା ଆନିଙ୍ଗ୍ ମାରି ଅଦିକାର୍ ଆଣ୍ଡା।

ମାତର୍ ମାଇନା’ବା ମାଇନ୍ ପାଇଟିଡେଡେମ୍‌ରେମ୍ ନାନେଆମିଣ୍ଡା ସୁନ, ’ଚଟ୍‌ନା ୟା ଗୁଲାଇ ନାନେ ବାନିବାଇ ସକା ରୁଙ୍ଗସାବା ମାରି ଗିତିନ୍ ନିଙ୍ଗ୍‌ନା ଆଗୁ ଅତୁଙ୍ଗ୍!ମାଇନ୍ ଆଙ୍ଗ୍‌ଟି ମୁଦି ମାରିପାଦ୍‌ବ ଜୁତା ଅତୁଙ୍ଗ୍। ମାଇନା ତୁର୍‌ଗୁ ଗୁଲାଇ ନାନେ ବାନିବାଇ ଗୋଇତାଙ୍ଗ୍ ଅଡାବ୍ ମାରି ନାଇ ବଜି ରାଙ୍ଗ୍‌ସେ ପରବ୍ ଡେମ୍‌ନାଇ, ମାସାଡନା ନିଙ୍ଗ୍‌ନା ଗୁ ଗୋଇଡିଗା,ମାତର୍ ଅଇ ମାଇ ବୁର ଗିତା!ମାଇ ବୁଇଡିଗା,ମାତର୍ ଅଇ ନାଇ ଆମାଇ ବାଙ୍ଗ୍ ଗିତ୍‌ନାଇ!”

“ଆତିନେ ରେମଲେ ପରବ୍ ମାନ୍‌ବାର ପାଲାଇ ମୁଲାୟ।ଇତି ବେଲା ତୁର୍‌ଗୁ, ଲିଙ୍ଗ୍ ବ ପାଇଟି ଡେଡେମ୍‌ନା ମୁନା ଗୁ ଡିଅବ ସାଗା।ମାଇ ସିନେର୍ ମାରି ବୁଡ଼ିଙ୍ଗ୍ ବାର୍‌ନା ଅଙ୍ଗ ମାରି ମାଡେଙ୍ଗ୍‌ଗିତା ଡସେ କାବା ଡେଙ୍ଗ୍‌ଇଗା।”

ଉଣ୍ଡୋଇଲ ମୁନା ଗୁ ମାଗ ଜେ ମାଇନା ଡାଉ ବିୟାଙ୍ଗ୍ ଡିଅବ ଲେଉଟ୍ ସା ଗିତା ସା କନ୍ ଗୁଲଇ ପରବ୍ ନା ଡେଡେମ୍ ଡେଙ୍ଗା, ଅଇତିନ୍‌ଲ ବେଲା ମାଇ ଜବର୍ କିଜ୍‌ରା ଡେଙ୍ଗା ମାରି ଡିଅବିତ୍‌ରେ ଆଇତା। ମାଇନ୍‌’ ବା ତୁର୍ ସାଗା ମାରି ଆମାଏ ବେରଙ୍ଗ୍ ପରବ୍ ପାଲ୍‌ବାର୍ ସା ଗୁଆର୍‌ଲ, ମାତର୍ ମାଇ ମନାଡ଼େମ।”

“ମୁନା ଗୁ ମାଇନା ଆବା ସୁନ, “ଅକନ୍ ବରଷ୍ ସଶେ ନିଙ୍ଗ୍ ବିସ୍‌ବାସ୍ ସୁଗ ନନା ପାଇଟି ଡ଼େମସାନିନିଙ୍ଗ୍! ନିଙ୍ଗ୍ ଉଣ୍ଡୋଇ ନନା ଆକାତା ଆମଟ୍‌ତିଙ୍ଗ୍, ଅକନ୍‌ସା ନ ନିଙ୍ଗ୍ ପାଲାଇ ମୁଇ ଡାଉବାଇ ଅଅଁମେ ଲନା ଆବେତନ ମିରିକି ନିଙ୍ଗ୍ ନିଙ୍ଗ୍‌ନା ସାଙ୍ଗ୍‌ଲେ ବେରଙ୍ଗ୍ ପରବ୍ ଡେଡେମ୍ ଗଙ୍ଗ୍ ତିଙ୍ଗ୍। ମାତର୍ ନନା କନ୍ ଆର୍‌ନା ଗୁ ପାପ୍ କାମ୍ ବ ଗୁଲାଇ ଡାବୁ ବୁଡ଼ୟ ସେ ଡିଅବ ସାଗା ପେ ମାଇନ୍ ପାଲାଇ ପରବ୍ ଡେଡେମ୍ ପାଲାଇ୍ ଗୁଲାଇ ନାନେ ଗାଗଡ ବାଇ ଗୋଇତାଙ୍ଗ ବୁଗନ!”

“ବା ଉତର୍ ବେଡ,ଗୁ, ନ ଗୁଲାଇ୍ ବେଲା ନିଙ୍ଗ୍ ବେରଙ୍ଗ୍ ଡିତ୍‌ନ,ଆର୍ ନା ଗୁଲାଇ ନିଙ୍ଗ୍‌ନା ଗିତିନ୍‌ ଗୁଲାଇ ସା ନନା। ମାତର୍ ନାଇନ୍ ପାଲାଇ ପରବ୍ ପାଲ୍‌ବାର୍ ସା ଡିଗା ମାସାଡନା ନନ୍ ବିୟାଙ୍ଗ୍ ଗୋଇଡିଗା,ମାତର୍ ଅଇ ମାଇ ଜୀବନ୍। ମାଇ ବୁଇଡିଗା, ମାତର ଅଇ ନେ ଆମାଇ ବାଙ୍ଗିତ୍‌ନେ!”