37. ୩୭. ଯୀଶୁ ଆଲାଜାର୍ ଗଇକୁନ୍ ନାନେ ଅତଗ୍ଡାକ୍ତ
ଲାଜାର୍ ଅମିନା ମୁଇ ରେମ ଡିଗା। ମରିୟମ୍ ମାରି ମର୍ଥା ଅମିନା ମାଏନା ଉମ୍ବାୟଙ୍ଗ୍ ତୁନା ଡିଗା। ମାଏଲେ ଯୀଶୁନ୍ ବାନିବାଇ ସାଙ୍ଗ ଡିଗା। ମିସିଙ୍ଗ୍ ଲାଜାର ଜବର୍ ସି ଡିତା ଡସେ ଆଯୀଶୁ ଜା ମିଣ୍ଡା କବର୍ ବେଡ। ଉଣ୍ତୋଇଲ ଯୀସୁ କନା ଆଙ୍ଗ,ମାଇ ସୁନ, କନା ସି ଲାଜାରନା ଗଗଇ ପାଲାଇ ଆଣ୍ତା,ମାତର୍ କନା ଈଶ୍ପର୍ନା ଅମି ଉଚ୍ ଡେଡେମ୍ ପଲାଇ,ଜାନ୍ସା ରେମଲେ ଈଶ୍ପର୍ନା ଲାଡ୍ ଡେମ୍ତ।”
ଯୀଶୁ ଆମାଇନା ସାଙ୍ଗଲେ ଆଲାଦ୍ ଡେଡେମ୍ ଡେଙ୍ଗା ମାତର୍ ମାଏଲେ ଆର୍ନା ଟାନ୍ବ ଡିଗା ମାରି ଦୁଇଦିନ୍ ଡିଗ୍ ଇଗା। ଦୁଇଦିନ୍ ତୁର୍ଗୁ, ଯୀଶୁ ମାଇନା ଆଶିଷ୍ଲେ ସୁନ, “ଲ,ନାଇ ଯିହୁଦା ଦେଶ୍ବ ୟାନାଇ।” ଶିଷ୍ଲେ ଉତର୍ ବେଡ଼,“ମାତର୍ ଗୁରୁ ଇତି ବେଲା ଆଗ୍ତୁ ରେମଲେ ଆନ ଅଗଇ ପାଲାଇ ଏତାଇ ବାର୍ ଡେଙ୍ଗା!”ଯୀଶୁ ସୁନ“ନାଇନା, ସାଙ୍ଗ ଲାଜାର ନିନ୍ଦ୍ ବାଙ୍ଗିତା, ମାରି ନିଙ୍ଗ୍ ଆମାଇ ସତଇସା ନିନ୍ଦ୍ ନାନେ ନିଙ୍ଗ୍ ଅତଗ୍ଡାଗ୍ ବାର୍ ଲାଗ୍ତା।”
ଶିଷ୍ଲେ ଉତର୍ ବେଡ “ଗୁରୁ ଯଦି ଲାଜାର୍ ଲେମ ଇଗିତା,ତେବେ ମାଇ ତଗ୍ଡାଗ୍ତା।“ମାଇନ୍ ତୁର୍ଗୁ ଯୀଶୁ ଆମାଏଲେ ସୁସ୍ତାସେ ସୁନ, “ଲାଜାର୍ ଗଇଗିତା। ନିଙ୍ଗ୍ ସାର୍ଦା ଜେ ନିଙ୍ଗ୍ ଆର ଆଡିତିଙ୍ଗ୍,ମିରିକି ପେଲେ ନିଙ୍ଗ୍ ବ ବିସ୍ବାସ୍ ଡେମ୍ତପେ।”
ଉଣ୍ତୋଇଲ ଯୀଶୁ ଲାଜାର୍ ନା ଙ୍ଗମ୍ ବ ସାଗା,ଲାଜାର୍ ଗ ଇସେ ଆମାଇ ଆତିଲ ଡିକୁନ୍ ଚାର୍ ଦିନ୍ ଡେଙ୍ଗ୍ ଇଡିଗା। ମାର୍ଥା ଆଯୀଶୁ ବେଟ୍ ଡେଡେମ୍ ଇଗ୍ସେ ସୁନ, “ପରବୁ, ଯଦି ନ ଆକା ଡିଗ୍ନାଲ, ଡନା ନିଙ୍ଗ୍ନା ବିୟାଙ୍ଗ୍ ଆଗୋଇସାନା। ମାରୀ ନିଙ୍ଗ୍ ବିସ୍ବାସ୍ ଡେମ୍ ତିଙ୍ଗ୍ ଆନ ନ ଆଈଶ୍ପର୍ ମା ଗୁଲାଇ ଲୁତନ ମାଇ,ଆନ ବେତ।
ଯୀଶୁ ଉତର୍ ବେଡ “ ନିଙ୍ଗ୍ ମାରମୁସ ମୁରାତିଙ୍ଗ୍ ମାରି ଜୀବନ୍ ଡିତିଙ୍ଗ୍ । ଜାନିଙ୍ଗ୍ ବ ବିସ୍ବାସ୍ ଡେମ୍ତ ଡନା ମାଇ ଗିତା ଡନା ମାଇ ବୁରତା। ଆର୍ନାସା ରେମ ନିଙ୍ଗ୍ ବ ବିସ୍ବାସ୍ ଡେମ୍ ତ ମାଇ ଉଣ୍ତୋଇସା ଆଗୋଇତା। ପେ କନା ବିସ୍ବାସ୍ ଡେମ୍ କି?“ ମାର୍ଥା ଉତର୍,ହାଁ ଗୁରୁ! ନିଙ୍ଗ୍ ବିସ୍ବାସ୍ ଡ଼େମନିନିଙ୍ଗ୍ ଜେ ନ ଈଶ୍ପର୍ ନା ଗୁ କିସ୍ଟ।“
ମାଇନା ତୁର୍ଗୁ ମରିୟମ୍ କେଟ୍ଲ। ମାଇ ଯୀଶୁନା ପାଦ୍ ବ ଲଗ୍ସେ ସୁନ, ”ପରବୁ ଯଦି ନ ଆକା ଡିଗ୍ଲାନ,ନିଙ୍ଗ୍ ନା ବିୟାଙ୍ଗ୍ ଆଗୋଇସାନା।“ଯୀଶୁ ଆମାଏଲେ ପାଚାର୍ଲ,“ପେଲେ ଆଲାଜାର୍ ଆରି ଜୁଲତ୍ପେ ?”ମାଏଲେ ସୁନ, “ରେସାଙ୍ଗ୍ବ। ଲ ମାରି ଜୁ।“ମାଇନା ତୁର୍ଗୁ ଯୀଶୁ ଉଗା।”
ରେସାଙ୍ଗ୍ ଟାନ୍ମୁଇ ପାଟ୍ନା ସୁଗ ଡିଗା ମାରି କନଙ୍ଗ୍ ନା ସାର୍ମବ ମୁୟଙ୍ଗ୍ ବିରେ ଡାବ୍ଲ ବେଡ ଡିଗା। ଯୀଶୁ ଉଣ୍ତୋଇଲ ରେସାଙ୍ଗ୍ ବ କେଟ୍ଗା,ମାଇ ଆମାଏଲେ ସୁନ, ”ଆବିରେ ରେସାଙ୍ଗ୍ ନାନେ ଗୁସାୟ ବେ। “ମାତର୍ ମାର୍ଥା ସୁନ, “ମାଇ ଗ ଇସେ ଚାର୍ଦିନ୍ ଡେଙ୍ଗାନି। ଆର ବାସ୍ନା ଡିତା।”
ଯୀଶୁ ଉତର ବେଡ, “ନିଙ୍ଗ୍ ମା ଆପେ ସୁନ୍ ଆଡିତିଙ୍ଗ୍ କି ଜେ ପେଇଲେନ୍ ବ ନିଙ୍ଗ୍ ବ ବିସ୍ବାସ ଡ଼େମନା ଈଶ୍ପର୍ନା ମହିମା ଜୁତପେ ?“ ଗିତିନ୍ସା ମାଏ ଆବିରେ ପେଲାୟ ବେଡ।
ମାଇନା ତୁର୍ଗୁ ଯୀଶୁ ବାଦଲ୍ ଗାରି ବାଗ୍ବ ଜୁଲସେ ସୁନ “ବା ନିଙ୍ଗ୍ନା ପାର୍ନା ଅଁଙ୍ଗ ଡିକୁନ୍ସା ଧନ୍ୟବାଦ। ନିଙ୍ଗ୍ ମାଗତିଙ୍ଗ୍ ଗୁଲାଇ ବେଲା ନିଙ୍ଗ୍ନା ପାର୍ତନା ଅଙ୍ଗଡିତ୍ନ,ମାତର୍ ନ ଆନିଙ୍ଗ୍ ବେଟାୟତ୍ନ ଡସେ ଆକା ତଙ୍ଗ୍ କୁନ୍ ରେମଲେ ମିରିକି ବିସ୍ବାସ୍ ଡେମ୍ତ ଗିତିନ୍ ପାଲାଇ ନିଙ୍ଗ୍ ସୁନ ନିନିଙ୍ଗ୍। “ମାଇନା ତୁର୍ଗୁ ଯୀଶୁ ଆଉଲି ଡେଙ୍ଗ୍ସେ ସୁନ ”ଲାଜାର୍, ତୁର୍ସାବା!“
ଗିତିନ୍ସା ଲାଜାର୍ ତୁର୍ସେସାଗା! ଗିତିନ୍ ବେଲା ମାଇ ଆତିଲକୁନ୍ ସକା ବେରଙ୍ଗ୍ ଆକା ଗୁଡାଇଡେଙ୍ଗ୍ ଡିଗା। ଯୀଶୁ ଆମାଏଲେ ସୁନ,“ଗିତିନ୍ ଆତିଲକୁନ୍ ସକା ମାଇନା ନାନେ ତଗସେ ଆମାଇ ଅତୁର୍!” କନ୍ ରାଗ୍ତିଗ୍ନା କାମ୍ ପାଲାଇ ଜବର୍ ଯିହୁଦୀଲେ ମାଏନ୍ବ ବିସ୍ବାସ୍ ଡ଼େମ।
ମାରି ଯିହୂଦୀଲେନ୍ ଧରମ୍ ନେତାଲେ ଆକାର୍ ଡେଙ୍ଗା, ଗିତିନ୍ସା ମାଏଲେ ମିରି ସୁଗ ଯୀଶୁ ମାରି ଆଲାଜାର୍ ଅଗଇତ ଗିନା ମୁଇବ ଡେଙ୍ଗ୍ସେ ଯୋଜନା ଡେଡେମ୍ ଲାଗ୍ଗା ।
ବାଇବଲନା ମୁଇ ଉସାରାମ୍ ଯୋହନ ୧୧;୧-୪୬
Free to use, adapt, and share under an open license (CC BY-SA 4.0).