38. ୩୮. ଯୀଶୁନ୍ ବେରଙ୍ଗ୍ ବିସ୍ବାସ୍ ବ ନାଡ୍ଲ
ଗୁଲାଇ ବରଷ୍ ଯିହୁଦିଲେ ନିସ୍ତାର୍ ପରବ୍ ପାଲ୍ବାର୍ ଡେଙ୍ଗା। ଶହେ ଶହେ ବରଷ୍ ଆଗ୍ତୁ ଈଶ୍ପର୍ ମିରି ଆମାଏନା ଆ ଆନି ଦାଦି ଲେ ମିସର୍ ଦେଶ୍ନା ଗତିରେମ୍ସୁଗ ଡିକୁନ୍ଲ ଆମାଏ ରକିୟା ଡ଼େମ ରୁଙ୍ଗଡିଗା ଆମାଇ ଏତାଇବାର୍ ପାଲାଇ ମାଏଲେ କନ୍ ପରବ୍ ମାନ୍ଲ। ଯୀଶୁ ଗୁଲାଇ ରେମ ବ ପର୍ଚାର୍ ମାରି ଶିକ୍ୟା ମୁଲାଇବାର୍ ନା ପାକାପାକି ତିନ୍ ବରଷ୍ ତୁର୍ଗୁ ଯୀଶୁ ଆମାଏନ୍ ଆଶିଷଲେ ସୁନ ଜେ ମାଇ ମାଏଲେ ବେରଙ୍ଗ୍ ଯିରୁଶାଲମ୍ ବ ନିସ୍ତାର୍ ପରବ୍ ମାନ୍ବାର୍ ପାଲାଇ ମନ୍ଡ଼େମ, ମାରି ଆର ଆମାଇ ଅଡାବ୍ତ।
ଯୀଶୁନା ଶିଷ୍ଲେ ନାନେ ଯିହୁଦା ଅମିନା ମିଣ୍ଡା ଶିଷ୍ ଡିଗା। ଯିହୁଦା ଶିଷ୍ଲେନା ଡାବୁ ବେସ୍ନି ନା ଦାଇତ୍ ବ ଡିଗା, ମାତର୍ ମାଇ ଜବର୍ ବେଲା ଗିତିନ୍ ବେସ୍ନି ନାନେ ଡାବୁ ଚର୍ବାର୍ ଡେଙ୍ଗା। ଯୀଶୁ ମାରି ମାଇନ୍ ଶିଷ୍ଲେ ଯିରୁଶାଲମ୍ ବ କେଟ୍କୁନ୍ ତୁର୍ଗୁ, ଯିହୁଦା ଯିହୁଦୀ ନେତାଲେନ୍ ବ ଇଗା। ମାଇ ଡାବୁ ବାଦୁଲ୍ ଆଯୀଶୁ ମାଏନ୍ ତିତିବ୍ ସରପ୍ଲ ବେବେ ପାଲାଇ ଆଯିହୁଦୀ ନେତାଲେ କାତା ବେଡ। ଯୀଶୁ ଜେ କିସ୍ଟ, କନ୍ ଯିହୁଦୀ ନେତାଲେ ମାନ୍ବାର୍ ଆଡ଼େନ୍ତା। ମାଏଲେ ଆଯୀଶୁ ଅଡାବ୍ ବାର୍ପାଲାଇ ଜଜ୍ନା ଡେଡେମ୍ ଡେଙ୍ଗା କନ୍ ମାଇ ମାଗଡିଗା।
ଯିହୁଦୀ ନେତାଲେ ମୁନା ପୁଜାରିଲେ ବେରଙ୍ଗ୍ ଆଯୀଶୁ ମାଏନ୍ ତିତିବ ସରପ୍ବାର୍ ପାଲାଇ ତିରିଶିଟା ରୁପା ଡାବୁ ବେଡ ଡିଗା। ଆକ୍ତୁନ୍ ବାବବାଦିଲେ ସୁନ କୁନ୍ ସୁଗ କନ ଗଟ୍ଗା। ଯିହୁଦା ଆର ରାଜିଡେଙ୍ଗ୍ ସେ ଡାବୁ ରୁଙ୍ଗ୍ ସେ ଡୁଙ୍ଗା। ମାଇ ମିରିକି ଆଯୀଶୁ ଅସବ୍ସେ ମାଏନ୍ ତିତିବ ସରପ୍ଲ ବେବେପାଲାଇ ବେଲା କଜ୍ବାର୍ ଡେଙ୍ଗା।
ଯିରୁଶାଲମ ବ ଯୀଶୁ ମାଇନ୍ ଶିଷ୍ଲେ ବେରଙ୍ଗ୍ ନିସ୍ତାର୍ପରବ୍ ପାଲ୍ଲ। ନିସ୍ତାର୍ ପରବ୍ନା ବଜି ସୁସୁମ୍ ବେଲା ଯୀଶୁ ରୁଟି ରୁଙ୍ଗ୍ସେ ଆମାଇ ପୁରୁଗ। ମାଇ ସୁନ “ କନ୍ ରୁଙ୍ଗ୍ସେ ସୁମ।କୁନ୍ ନିଙ୍ଗ୍ନା ଗାଗଡ, ଆର୍ନା ପେନ୍ ପାଲାଇ ବେଡ୍ତା। ଆନିଙ୍ଗ୍ ଏତୁବାର୍ ପାଲାଇ କନ୍ ଡେମ୍। “ଡିକନ୍ ସୁଗ ଯୀଶୁ ସୁନ ଜେ, ମାଏଲେ ପାଲାଇ ମାଇ ଗୋଇତା ମାଏଲେ ପାଲାଇ ମାଇନ୍ ଗାଗଡ୍ ସେବକୁନ୍ ସୁଗ ବେତ।
ମାଇନା ତୁର୍ଗୁ ଯୀଶୁ ମାଇ ଗାଲାସ୍ ଦ୍ରାକ୍ଷା ରସ୍ ରୁଙ୍ଗା ମାରି ସୁନ,“ ଆକନା ଉ। କନା ନିଙ୍ଗ୍ନା ତିମେ ନିୟମ୍ ନା ବନି ମିରିକି ଈଶ୍ପର୍ ପେନ୍ ପାପ୍ ଗୁଲାଇ କେମା ଡେମ୍ତ କନ୍ସା ଗିତିନ୍ ନିଙ୍ଗ୍ ଜରାଇତିଙ୍ଗ୍। ଆର୍ନା ନିଙ୍ଗ୍ ଅଇ ଡ଼େମ ନିନିଙ୍ଗ୍ ଗିତିନ୍ ଆନିଙ୍ଗ୍ ଅଇଜା ତର୍ ଏତାଇ ବାର୍ ପାଲାଇ ଉ।”
ମାଇନା ତୁର୍ଗୁ ଯୀଶୁ ମାଇନା ଆଶିଷ୍ଲେ ସୁନ, “ପେନ୍ ନାନେ ଆନିଙ୍ଗ୍ ମିଣ୍ଡା ବିସ୍ବାସ୍ ଡ଼େମସେ ନାଡ୍ତ (ଦକା)।” ଶିଷ୍ଲେ ରାଗ୍ତି ଡେଙ୍ଗ୍ ଇଗା,ମାରି ଜା ଡିକନ୍ ଡେମ୍ତ ଡସେ ପାଚାର୍ଲ। ଯୀଶୁ ସୁନ,“ନିଙ୍ଗ୍ ଆଜା କନ୍ ପୁରୁକୁନ୍ ରୁଟି ବେତିଙ୍ଗ୍ ମାଇ ବିସ୍ବାସ୍ ଡ଼େମସେ ନାଡ୍ତ।” ମାଇନା ତୁର୍ଗୁ ଗିତିନ୍ ରୁଟି ଆଯିହୁଦା ବେଡ।
ଯିହୁଦା ଗିତିନ୍ କାପ୍ ବାଇ ରୁଟିଲେ ରୁଙ୍ଗ୍କୁନ୍ ତୁର୍ଗୁ,ଶୋଇତାନ୍ ମାଇନ୍ ବ ଗାଇଗା। ଯିହୁଦା ଗିତିନ୍ ଟାନ୍ ଅନ୍ତୁରସେ ଆଯୀଶୁ ବନ୍ଦି ଡେଡେମ୍ ପାଲାଇ ଆଯିହୁଦୀ ନେତାଲେ ସାଇଜ ଡେଡେମ୍ ପାଲାଇ ମାଏନ୍ କଣ୍ଡେ ଇଗା। ଗିତିନ୍ ମିଣ୍ଡି ବେଲା ଡିଗା।
ସୁମ ଅଡମକୁନ୍ ତୁର୍ଗୁ, ଯୀଶୁ ମାରି ମାଇନା ଶିଷ୍ଲେ ଜିତ୍ ଅମି ନା ମୁଇ କୁଣ୍ଡାବ ଉରିଙ୍ଗ ଇଗା। ଯୀଶୁ ସୁନ, “କନ୍ ମିଣ୍ଡିବ୍ ପେ ଗୁଲାଇରେମ ଆନିଙ୍ଗ୍ ଅନ୍ତୁର୍ତ ପେ। ଲେକା ଡିତା “ନାଇଲେ ଆମେଣ୍ଡାଚାରାଉ ବୁଗ୍ନାଇ ମାରି ଗୁଲାଇ ମେଣ୍ଡା ଅତକ୍ ତଙ୍ଗ୍ରେ ଡେଙ୍ଗ୍ଇତା।”
ପିତର ଉତର୍ ବେଡ, “ଗୁଲାଇ ରେମଲୋ ଆନ ଅନ୍ତୁର୍ ତ,ନିଙ୍ଗ୍ ଆନ ଆନ୍ତୁର୍ ତିଙ୍ଗ୍!”ଗିନ୍ଲୋ ଯୀଶୁ ଆପିତର ସୁନ, “ସୋଇତାନ୍ ଆପେ ଆଗୁଲାଇରେମ ବିସ୍ବାସ୍ ନାନେ ପାଲ୍ ଡେଡେମ୍ ପାଲାଇ ମନ୍ ଡ଼େମନି,ମାତର୍ ବିସ୍ବାସ୍ ବ ପେଲେ ମିରି ଉନା ଆଡ଼େନ୍ତା କନ୍ ପାଲାଇ ନିଙ୍ଗ୍ ପାର୍ତନା ଡ଼େମ ତିଙ୍ଗ୍। ଡିକନ୍ କି, ଅଇକା ମିଣ୍ଡିବ୍ ଗିସିଙ୍ଗ୍ ସୁସୁ ନା ଆଗ୍ତୁ ଆନିଙ୍ଗ୍ ପେ ତିନ୍ ତର୍ ଆମାନ୍ ତନ।”
ମାଇନା ତୁର୍ଗୁ ପିତର ଆଯୀଶୁ ସୁନ, “ ଡନା ଆନିଙ୍ଗ୍ ଗୋଗୋଇନା ଡ଼େନ୍ତା,ଡେନ୍ ନାସା ନିଙ୍ଗ୍ ଆନ ଆ ଅନ୍ତୁର୍ ତିଙ୍ଗ୍!”ପାଲ୍ ଗୁଲାଇ ଶିଷ୍ଲେ ସା ଡିତିନ୍ ଆକ ସୁନ।
ମାଇନା ତୁର୍ଗୁ ଯୀଶୁ ମାଇନା ଶିଷଲେ ବେରଙ୍ଗ ଗେଥଶିମନୀ ଅମିନା ମୁଇ ଟାନ୍ବ ଇଗା। ଶିଷ୍ଲେ ମିରି ପରିକୟାବ ଆଲତା ବତିନ୍ ପାଲାଇ ଯୀଶୁ ତରିନା ଆଶିଷ୍ଲେ ପାର୍ତନା ଡେଡେମ୍ ପାଲଇ ସୁନ। ମାଇନ୍ ତୁର୍ଗୁ ଯୀଶୁ ତରେ ପାର୍ତନା ଡେଡ଼େମ ମାଲାଇ ଇଗା।
ଯୀଶୁ ତିନି ଥର ପାଥନା ଡ଼େମ “ ନିଙ୍ଗ୍ ନା ବା, ଯଦି ଡ଼େନ୍ତା ଲ କନ୍ ଦୁକ୍ ବଗ୍ବାର୍ ନା ଆକପ୍ ନିଙ୍ଗ୍ ନାନେ ସୁଲୁଙ୍ଗ୍ ଡେମ୍। ମାତର୍ ରେମଲେନ୍ ପାପ୍ କେମା ପାଲାଇ ମାରି ମାସା ଗାରି ଆଡ଼ିଗ୍ନା, ନନ୍ ଇଚା ସପଲ୍ ଡ଼େମ।” ଯୀଶୁ ଜବର୍ ଦୁକ୍ ବ ମୁର୍ ମୁରା ଡେଙ୍ଗା ମାରି ମାଇନା ସୁଲେଙ୍ଗ୍ ବନି ଟିପା ସୁଗ ଡେଙ୍ଗା। ଈଶ୍ପର୍ ମୂୟଙ୍ଗ୍ ଆଦୁତ୍ ବେଟାୟ ସେ ଆମାଇ ଶକ୍ତି ବେଡ଼।
ଗୁଲାଇ ତର୍ ପାର୍ ତନା ଡ଼େମ ଡମ କୁକ୍ ତୁର୍ଗୁ,ଯୀଶୁ ମାଇନା ଶିଷ୍ଲେନ୍ବ ସାସା ଡେଙ୍ଗା ମାତର୍ ମାଏଲେ ଲେମଗ୍ ଡିଗା। ଉଣ୍ଡୋଇଲ ମାଇ ତିନ୍ତର୍ ବ ସାଗା, ଯୀଶୁ ସୁନ, “ତଗ୍ଡାଗା! ନିଙ୍ଗ୍ନା ବିସ୍ ବାସ୍ ଅପୁରୁଗ୍ ରେମ୍ ଆକା କେଟ୍ଲ ତା।”
ଯିହୁଦୀ ନେତାଲେ, ସୈନିକ୍ଲେ ମାରି ଜବର୍ ରେମ ବେରଙ୍ଗ୍ ଯିହୁଦା ବ ସାଗା।ମାଏ କାଣ୍ଡା ମାରି ଅ ଲାଲେ ସଗ୍ ଡିଗା।ଯିହୁଦା ଯୀଶୁନ୍ କଣ୍ଡେ ସାଗ୍ସେ ସୁନ,“ହ ଗୁରୁ ଜୁଆର୍”,ମାରି ଆମାଇ ବୁଇତମ। ଯିହୁଦୀ ନେତାଲେ ଆଜା ସବ୍ତ କନା ଆରନା ମୁଇ ଚିନା ଡିଗା। ମାଇନା ତୁର୍ଗୁ ଯୀଶୁ ସୁନ, “ଯିହୁଦା, ବୁଇତମସେ କି ଆନିଙ୍ଗ୍ ଶତ୍ରୁନା ତିତିବ ବେଡ଼ପେନି ?”
ଉଣ୍ଡୋଇଲ ସୈନିକଲେ ଆଯୀଶୁ ସୋସବ୍ ଡେଙ୍ଗା, ପିତର୍ ମାଇନା ଖାଣ୍ଡା ଆତୁର ମାରି ମୁନା ପୁଜାରିନ୍ ଦାସ୍ନା ଲୁନ୍ତୁର୍ ଗଡ଼ ସୁଙ୍ଗ। ମାତର୍ ଯୀଶୁ ସୁନ,“ଖାଣ୍ଡା ସୁଲୁଙ୍ଗ୍ ବୁଙ୍ଗ୍! ଆନିଙ୍ଗ୍ ରକିଆ ଡେଡେମ୍ ପଲାଇ ନିଙ୍ଗ୍ ଆନିଙ୍ଗ୍ ନା ବା ଦୁତ୍ ଲେନା ମୁଇ ଆସୈନିକ୍ ଦଲ୍ ଲୁଲୁଗ୍ ଗନ୍ତିଙ୍ଗ୍। ମାତର୍ ସତୋଇସା ନିଙ୍ଗ୍ ନିଙ୍ଗ୍ନା ବା ନା କାତା ମାନ୍ ତିଙ୍ଗ୍। ମାଇନା ତୁର୍ଗୁ ଯୀଶୁ ଗିତିନ୍ ରେମନା ଲୁନ୍ତୁର୍ ବାନଇ ଡ଼େମ ।
ବାଇବଲ୍ ନା ଉସାରାମ୍ ମାଥିଉ:୨୬:୧୪-୫୬;ମାର୍କ ୧୪:୧୦-୫୦;ଲୁକ ୨୨:୧-୫୩ ଯୋହନ୍ ୧୮:୧-୧୧
Free to use, adapt, and share under an open license (CC BY-SA 4.0).