39. ୩୯. ଯୀଶୁନା ବିଚାର୍ ଡ଼େମ
ଅଇତିନ୍ଲୋ କନ୍ ମଜାମିଣ୍ଡିବ୍ ଡିଗା। ମୁନା ପୁଜାରି ମିରି ଆଯୀଶୁ ପ୍ରଶ୍ନ ପାଚାର୍ତ ମାଇନା ପାଲାଇ ସୈନିକ୍ଲେ ଆମାଇ ମୁନା ବାବବାଦିନା ଡିଅବ ରୁଙ୍ଗୋଇଗା। ପିତର ସୁଲୁଙ୍ଗ୍ ଡିଗ୍ସେ ମାଏନ୍ ଗୁଡାଙ୍ଗ୍ ଗୁଡାଙ୍ଗ୍ ଇଡେଙ୍ଗା। ଆଯୀଶୁ ଉଣ୍ଡୋଇଲ ମାଇନା ଡିଅବ ରୁଙ୍ଗୋଇଗା,ପିତର ବାଇରି ଡିଗ୍ସେ ସୁଁଙ୍ଗ ସେକ୍ବାର୍ ଡେଙ୍ଗା।
ଡିଅ ବ,ଯିହୁଦୀନେତାଲେ ଈଶ୍ପର୍ନା ବିଚାର୍ ଡ଼େମ। ମାଏଲେ ଜବର୍ ମିଚ୍ ସାକି ସୁସୁନ୍ରେମ୍ ରୁଙ୍ଗ ଜାଜାଲେ ମାଇନ୍ ବିରୁଦ୍ବ ମିଚ୍ ସୁନ। ମାତର୍ ମାଏନା କାତା ଗୁଲାଇ ମାଏନ୍ ମାଏନ୍ ବ ସମାନ୍ ମିସ୍ବାର୍ ଆଡ଼େନ୍ତା,ଗିତିନ୍ସା ଯୀଶୁ ଜେ ବୁଲ୍ ଡ଼େମତା ଗିତିନ୍ ଯିହୁଦୀନେତାଲେ ପୋର୍ମାନ୍ ଡେଡେମ୍ ଆଗଙ୍ଗା। ଡେଙ୍ଗ୍ନାସା ଯୀଶୁ ମାସା ଆସୁନ୍ତ।
ଡଡମ୍ଲ, ମୁନା ପୁଜାରି ଆଯୀଶୁ ଗାରି ସିଦା ସାର୍ମବ ଜୁଲ ସେ ଆମାଇ ପାଚାର୍ଲୋ “ଆନେଲେ ସୁଁ, ନ କି ଜିବନ୍ ଈଶ୍ପର୍ନା ଗୁ କିସ୍ଟ?“
ଯୀ୍ଶୁ ସୁନ “ନିଙ୍ଗ୍ ମାଇନା,ମାରିପେଲେ ଆନିଙ୍ଗ୍ ଈଶ୍ପର୍ ନା ଆସନବ ଲେଲେନା ମାରି ସରଗ୍ନାନେ ଜଜର୍ନା ଜୁତପେ।”ମୁନା ବାବବାଦି କିଜ୍ରାସେ ତରୋଇନା ସକା ଚିର୍ଲୋସେ ପାଲ୍ ଧରମ୍ନା ଆନେତାଲେ ଆଉଲି, “ଡେଙ୍ଗ୍ସେ ସୁନ “ନାଇନା ମାରି ଜାସା କନ୍ରେମ ମା ଡ଼େମତା ଡସେ ସୁସୁନା ମାସା ସକି ଦର୍କାର୍ ଆଣ୍ଡା ! ପେଲେ ତରୋଇ ଅଙ୍ଗପେ ଜେ ମାଇ ଈଶ୍ପର୍ ନା ଗୁ ଡସେ ସୁନନି। ମାଇନ୍ ସା ପେନା ବିଚାର୍ ମା?
ଯିହୁଦୀ ନେତାଲେ ଆମୁନାବାବବାଦି ଉତର୍ ବେଡ, “ମାଇ ଗଗିନା ଡଣ୍ଡ୍ ବାବଙ୍ଗ୍ ଡିତା!”ମାଇନା ତୁର୍ଗୁ ମାଏଲେ ଯୀଶୁନା ମୋବ ଗଣ୍ଡ୍ରା ତୁଲ,ଆମାଇ ବୁଗ, ମାଇନ୍ ବାଗ୍ବ ବୁଇତୁର ମାରି ଆମାଇ ଗେଚୁଲ୍ ଡ଼େମ।
ପିତର ଡିଅନା ବାଇରି ଜାଗ୍ଲ ଡିକୁନ୍ ବେଲା, ମିଣ୍ଡା ଦାସି ଡାକୁଇ ଆମାଇ ଜୁଲସେ ସୁନ, “ନସା ଯୀଶୁନ୍ ବେରଙ୍ଗ୍ ଡିଗ୍ନ!”ଆତିନେ ପିତର ଆମାନ୍ତା।ତୁର୍ଗୁ, ମାର୍ ମିଣ୍ଡା ଡାକୁଇ ଡିତିନ୍ ଅଁ ସୁନ,ମାତର୍ ପିତର କନ୍ସା ଆମାନ୍ ତା।ଡଡମ୍ଲୋ,ଇତି ରେମଲେ ସୁନ,ନେଲେ ମାଗତ୍ନେ ଜେ ନ ଯୀଶୁନ୍ ବେରଙ୍ଗ୍ ଡିଗ୍ନ ମାସାଡନା ପେ ଉମ୍ବାଇନୁ ଗାଲିଲୀ ନାନେ ସାଗିତ୍ପେ।“
ଆତିନେ ପିତର ଶପତ୍ ଡ଼େମସେ ସୁନ,“ନିଙ୍ଗ୍ ଯଦି ଆକନ୍ ରେମ ମାଗଡିନାଲ ଈଶ୍ପର୍ ଆନିଙ୍ଗ୍ ଅବିଶାପ୍ ବେଡେ“!ସୁରି ସୁରି ଗିସିଙ୍ଗ୍ ସୁଗା,ମାରି ଯୀଶୁ କିନ୍ଦର୍ସେ ଆପିତର ଜୁଲ।
ପିତର ଇଗା ମାରି ଜବର୍ ଦୁକ୍ ସେ ଉଗା। ଅଇତିନ୍ବେଲା,ଯିହୁଦା ଜାକି ଆଯୀଶୁ ବିସ୍ବାସ୍ ସେ ନାଡ୍ଲ,ମାଇ ଜୁଲ ଜେ ଯିହୁଦିନେତାଲେ ଆଯୀଶୁ ଗଗୋଇସା ଦଷି ଡ଼େମତା। ଯିହୂଦା ଜବର୍ ଦୁକ୍ ଡେଙ୍ଗା ମାରି ଇଗ୍ସେ ଉସ୍କିଡଙ୍ଗ୍ ସେ ଗୋଇଗା।
ପିଲାତ ଯୀହୁଦା ରାଜିନା ରାଜ୍ୟପାଲ୍ ଡିଗା।ମାଇ ରୋମ୍ଲେ ପାଲାଇ କାମ୍ ଡେଡେମ୍ ଡେଙ୍ଗା। ଯୀହୁଦି ନେତାଲେ ଆଯୀଶୁ ପିଲାତ ରାଜା କଣ୍ଡେ ରୁଙ୍ଗ। ପିଲାତ ଆଯୀଶୁ ଦଷ୍ ବେଡସେ ଗଗୋଇନା ଡଣ୍ଡ୍ ବେ ଡସେ ମାଏନ୍ ମନ୍ ଡେଡେମ୍ ଡେଙ୍ଗା। ପିଲାତ ଆଯୀଶୁ ପାଚାର୍ଲ "ନ ମା ଯିହୁଦୀଲେନା ରାଜା?”
ଯୀଶୁ ଉତର୍ ବେଡ, “ନ ସତ୍ ସୁନ ନନ। ମାତର୍ ନିଙ୍ଗ୍ନା ରାଜି କନ୍ ଦର୍ତନିବ ଆଣ୍ଡା। ଡିକନ୍ ଜଦି ଡେଙ୍ଗ୍ନା, ନିଙ୍ଗ୍ନା ଦାସ୍ଲେ ନିଙ୍ଗ୍ ପାଲାଇ ଜୁଜ୍ ଡେମ୍ନା। ଈଶ୍ପର୍ ନା ସତ୍ କାତା ସୁସୁ ପାଲାଇ ନିଙ୍ଗ୍ କନ୍ ଦର୍ତନିବ ସାଗିତିଙ୍ଗ୍। ଜସା ରେମ ଆସତ୍ ଆଲାଦ୍ ଡେମ୍ତ ମାଇ ନିଙ୍ଗ୍ ନା କାତା ଅଙ୍ଗ୍ତ।”ପିଲାତ ରାଜା ସୁନ “ସତ୍ ମା?”
ପିଲାତ ଯୀଶୁନ୍ ବେରଙ୍ଗ୍ କାତା ସୁନ ଅଡମକୁନ୍ ତୁର୍ଗୁ,ରେମଲେ ରୁଡ୍ ଡିକୁନ୍ବ ଇସେ ସୁନ, “କନ୍ ରେମ ଜେ ଗଗୋଇନା ଡଣ୍ଡ ବାବାଙ୍ଗ୍ ସା ଡିକନ୍ ମାସା ଦଷ୍ ନେ ମାଇ ନନେ ଆବାଙ୍ଗ୍ ନେ।” ମାତର୍ ଯିହୁଦୀନେତାଲେ ମାରି ରୁଣ୍ଡ୍ ଡିକୁନ୍ ରେମଲେ ଆଉଲି ଡେଙ୍ଗ୍ ସେ ସୁନ,“ଆମାଇ କୁରୁସ୍ବ ଅଡାଇ!”ପିଲାତ ରାଜା ଉତର୍ ବେଡ, “ମାଇ ବ ଇତିସା ବୁଲ୍ ଡ଼େମକୁନ୍ ଦସ୍ ଆଣ୍ଡା।” ମାତର୍ ମାଏଲେ ଜବର୍ ଆଉଲି ଡେଡେଙ୍ଗ୍ ମୁଲାୟ। ମାଇନା ତୁର୍ଗୁ ପିଲାତ ରାଜା ତିନ୍ ତର୍ ସୁନ, “ମାଇ ଦସି ଆଣ୍ଡା!”
ପିଲାତ ବୁତୁଙ୍ଗ୍ ଇଡିଗା ଜେ ଉଣ୍ଡୋଇଲନା ରେମଲେ କିରମର ଡେଡେଙ୍ଗ୍ ମୁଲାଇତ,ଗିନ୍ସା ଆଯୀଶୁ କୁରୁସ୍ବ ଅଡାଇବାର୍ ପାଲାଇ ମାଇ ମାଇନା ଆସୈନିକ୍ଲେ ଆଦେଶ୍ ବେଡ।ରୋମିୟ ସୈନିକ୍ଲେ ଆଯୀଶୁ ଚାବୁକ୍ ବେରଙ୍ଗ୍ ବୁଗ ମାରି ରାଜାଲେ ତୁତୁଙ୍ଗ୍ନା ସକା ମାରି ବୋବ୍ବ ଗିରାଇନା ମୁକୁଟ୍ ଅତୁଙ୍ଗ। ମାଇନା ତୁର୍ଗୁ ମାଏଲେ ଆମାଇ “ଯୀହୁଦୀଲେନା ଆରାଜା ଜୁ!”ସୁନସେ କିଜାୟ।
ବାଇବଲ୍ନା ମୁଇ ଉସାରାମ୍ ୨୬:୫୭-`୨୭; ମାର୍କ:୧୪:୫୩-୧୫:୧୫; ଲୁକ:୨୨:୫୪-୨୫; ଯୋହନ୧୮:୧୨-୧୯:୧୬
Free to use, adapt, and share under an open license (CC BY-SA 4.0).