42. ୪୨. ଯୀଶୁ ସରଗ୍ ବ ଲେଉଟ୍ସେ ଇତା
ଯୀଶୁ ଆର୍ନା ଦିନ ଗଇକୁନ୍ ରେମ୍ଲେନ୍ ନାନେ ତଗ୍ଡାଗା,ଗିତିନ୍ ଦିନ୍ ଉମ୍ୟଙ୍ଗ୍ ଶିଷ୍ଲେନ୍ ମୁଇ ଲଗେନ୍ ଉଙ୍ଗ୍ମ୍ ବ ଇଗ୍ଡେଙ୍ଗା। ମାଏଲେ ଉରିଙ୍ଗ୍ ବାର୍ ବେଲା,ଯୀଶୁନ୍ ବେରଙ୍ଗ୍ ମା ଘଟ୍ ଡିଗା ଗିତିନ୍ କାତା ମାଏଲେ ହଁ ଇ ଡେଙ୍ଗା। ମାଏଲେ ଆଶା ଡେଡେମ୍ ଡେଙ୍ଗା ଜେ ମାଇ କିସ୍ଟ ଡିଗା ମାରି ଆମାଇ ଅଗଇସ ବେଡ଼ୋଡିଗା। ଅଇକା ଗିତିନ୍ ସେଲାନେ ସୁନ ଜେ ମାଇ ମାର୍ ମୁସ ଜିବନ୍ ଡିତା। ମାଏଲେ ମାମାଗ୍ ଆଗଙ୍ଗ୍ତା ଆଜା ବିସାସ୍ ଡେମ୍ତ।
ଯୀଶୁ ମାଏନ୍ବ ସାଗା ମାରି ମାଏଲେନ୍ ବେରଙ୍ଗ୍ ଉରିଙ୍ଗ୍ ବାର୍ ଆରାମ୍ ଡ଼େମ,ମାତର୍ ମାଏଲେ ଆମାଇ ଆସମତ । ମାଏଲେ ଆର୍ନା କତା ହଁଇ ଡେଙ୍ଗ୍ପେନି ଡସେ ମାଇ ଆମାଏଲେ ପାଚାର୍ଲ। ଇତି ଦିନ୍ ଆଗ୍ତୁ ଯୀଶୁନ୍ ବେରଙ୍ଗ୍ ମାଗୁଲାଇ ଘଟ୍ଡିଗା ଗିତିନ୍ କାତା ଡସେ ମାଏଲେ ଆମାଇ ସୁନ। ମାଏଲେ ବାବ୍ଲ ଜେ ମାଏଲେ ମିଣ୍ତା ପାଲ୍ଦେଶ୍ନା ରେମ ବେରଙ୍ଗ୍ ହଁୟ ନି ଜାକି ଯିରୁଶାଲାମ୍ ବ ଘଟ୍ ଇକୁନା କାତା ଆମାଗ୍ତ।
ମାଇନା ତୁର୍ଗୁ ଯୀଶୁ ଆମାଏଲେ ବୁଜାୟ ସୁସୁ ଆରାମ୍ ଡ଼େମ ଜେ ଈଶ୍ପର୍ ନା ବାକିୟ କିସ୍ଟନା କାତା ମା ସୁନ୍ତ। ମାଇ ଆମାଏଲେ ଆଗ୍ତୁନ୍ କାତା ଏତାୟସେ ସୁନ ଜେ କିସ୍ଟ ବା ଲେନ୍ ବେରଙ୍ଗ୍ ଦୁକ୍ ବାମ୍ତା ମାରି ଅଗ ଇତା। ମାତର୍ ବାବବାଦିଲେ କନା ଲନା ସୁନତା ଜେ ତିନ୍ଦିନ୍ ମାରିମୁସ ତଗ୍ଡ଼ାଗ୍ତା।
ଉଣ୍ତୋଇଲ ମାଏଲେ ଉଙ୍ଗମ୍ କେଟ୍ଲ ଗିତିନ୍ ଉମ୍ବାୟଙ୍ଗ୍ ମାଏଲେନ୍ ବେରଙ୍ଗ୍ ଡିକୁ ପାଲଇ ଆଯୀଶୁ ୱାୟ, ଗିତିନ୍ସା ମାଇ ମାଏଲେଏନ୍ ବେରଙ୍ଗ୍ ଇଗା। ମାଏଲେ ମିଣ୍ତି ସୁସୁମ୍ ପାଲାଇ ତିଆର୍ ଡେଙ୍ଗା। ଯୀଶୁ ମୁଇ ରୁଟି ଜୁଗ୍ସେ ଆଈଶ୍ପର୍ ଦନିୟବାଦ୍ ବେଡ୍ ମାରି ଆକନା ଅପୁରୁଗ। ସାଙ୍ଗେ ସଥଙ୍ଗେ ମାଇ ଜେ ଯୀଶୁ ଡସେ ମାଏଲେ ସମ୍ଡ। ମାତର୍ ଗିତିନ୍ ବେଲା ମାଇ ମାଏନ୍ ମ ନାନେ ତିପାଉଇଗା।
ଗିତିନ୍ ଉମ୍ବାୟଙ୍ଗ୍ ତରଇ ତରଇ ଅଁସୁ ଆଁସା ଡେଙ୍ଗା, “ମାଇ ଯୀଶୁ ଡିଗା! ଗିତିନ୍ ସା ମାଇ ଆନାଇଲେ ଇଶ୍ପର୍ କାତା ବୁଜାଇ ବାର୍ନା ବେଲା ନେନା ମନ୍ ଜିବ୍ନ ପେର ଇ ଡେଙ୍ଗା ! “ସଙ୍ଗେ ସଙ୍ଗେ ମାଏଲେ ଆଯିରୁଶାଲାମ୍ ବ ଲେଉଟ୍ ସାଗା । ମାଏଲେ ଉଣ୍ତଇଲ କେଟ୍ଲ,ମାଏ ଆଶିଷ୍ଲେ ସୁନ, “ଯୀଶୁ ଜିବନ୍ ଡିତା! ନେଲେ ଆମାଇ ଜୁଲତ୍ ନେ!”
ଶିଷ୍ଲେ ଉଣ୍ତଇଲ ହଁଇ ଡେଙ୍ଗା,ଯୀଶୁ ମାଏଲେ ଡିକୁଡେଙ୍କୁନ୍ ବାକ୍ରାବ ମାଏନା ସାର୍ମଗାର୍ ଅଜୁଗା। ମାଇ ସୁନ, “ ପେଲେନା ଶାନ୍ତି ଡେମେ!”ଶିଷ୍ଲେ ବାବ୍ଲ ଜେ ମାଇ ମୁଇ ବୁତ୍ ମାତର୍ ଯୀଶୁ ସୁନ,“ମାପାଲାଇ ବତୁଙ୍ଗ୍ ପେନି ମାରି ବିସ୍ବାସ୍ ଆଡେମ୍ ତପେ ? ନିଙ୍ଗ୍ନା ତିତି ମାରି ଆପାଦ୍ ଜୁ। ନିଙ୍ଗ୍ନା ମିରି ଗାଗଡ୍ ଡିତା ଭୂତ୍ଲେନା ଡିତିନ୍ ଗାଗଡ୍ ଆଡିତା।”ମାଇ ଜେ ଭୂତ୍ ଆଣ୍ତା ଗିତିନା ପର୍ମାନ୍ ବାବାଙ୍ଗ୍ ପାଲାଇ,ମାଇ ସୁସୁମ୍ ପାଲାଇ ଇତି କିୟାଙ୍ଗ୍ ଲୁଡ। ମାଏଲେ ଆମାଇ ରାଙ୍ଗଡିକୁନ୍ ଆଡଙ୍ଗ୍ ବେଡ, ମାରି ମାଇ ଆକନା ସୁମ।
ଯୀଶୁ ସୁନ “ନିଙ୍ଗ୍ ଆପେଲେ ସୁନଡିନିଙ୍ଗ୍ ଜେ ନିଙ୍ଗ୍ନା କତା ଈଶ୍ପର୍ନା ବାକିଅବ ଲେକା ଡିକୁନ୍ ଗୁଲାଇ ବିଷୟ୍ ସତଇସା ସପଲ୍ ଡେଡେମ୍ ପଡ୍ତା।”ମାଇନା ତୁର୍ଗୁ ମାଇ ମାଏଲେନ୍ ଆମନ୍ ରୁଗବେଡ ମିରିକି ମାଏଲେ ଈଶ୍ପର୍ନା କାତା ବାନି ସୁଗ ବୁଜ୍ବାର୍ ଗଙ୍ଗ୍ତା। ମାଇ ସୁନ, “ଆଗ୍ତୁନା ବାବବାଦିଲେ ଲେକ୍ଲ ତା ଜେ ନିଙ୍ଗ୍, କିସ୍ଟ, ଦୁକ୍ ବାଙ୍ଗ୍ସେ ଗଇତା, ମାରି ତିନ୍ ଦିନ୍ବ ତଗ୍ଡ଼ାଗ୍ ତା।
ବାବବାଦି କନା ଲନା ଲେକ୍ଲତା ଜେ ନିଙ୍ଗ୍ନା ଶିଷ୍ଲେ ଈଶ୍ପର୍ନା ବାକିଅ ସୁନ ବୁଲ୍ ତ। ମାଏଲେ ଆଗୁଲାଇ ରେମ୍ ମନ୍ ବଦ୍ଲାଇ ବାର୍ନା କବର୍ ସୁନ ବୁଲ୍ତ। ଯଦି ମାଏଲେ ମନ୍ ବଦ୍ଲାଇତ ଡିତିନ୍ଲ ଈଶ୍ପର୍ ମାଏନ ପାପ୍ କେମା ଡେମ୍ତ। ମାଏଲେ କନା ଯୀରୁଶାଲାମ୍ ନାନେ ଆରାମ୍ ଡ଼େମସେ ଗୁଲାଇ ଟାନ୍ ବ ଡିକୁନ୍ ଗୁଲାଇ ରେମଜାତି ଲେନ୍ବ ଇଗ୍ସେ କବର୍ ସୁନ୍ତ। ଆରନା ନିଙ୍ଗ୍ ସୁନ ତିଙ୍ଗ୍ ମାରି ଡ଼େମତିଙ୍ଗ୍ ମାରି ଆର୍ନା ଗୁଲାଇ ନିଙ୍ଗ୍ ବେରଙ୍ଗ୍ ଘଟ୍ଗିତା କନା ଗୁଲାଇ କାତା ନା ପେଲେ ସାକି।
ତୁର୍ଗୁନା ଚାଲିଶ୍ ଦିନ୍ ସଗ୍ସେ,ଯୀଶୁ ଜବର୍ ଥର୍ ଆଶିଷ୍ଲେ ଅଜୁଗା। ମୁସ, ମଇ ଏକାଥର୍ ୫୦୦ ନାନେ ଜବର୍ ଆରେମଲେ ଅଜୁଗା ! ମାଇ ଜେ ଜିବନ୍ ଡିତା କନ୍ ପାଲାଇ ମାଇ ଇଜାଥର୍ ଆମାଇନା ଶିଷ୍ଲେନ୍ ବ ପର୍ମାନ୍ ଡ଼େମ,ମାରି ମାଇ ଇଶ୍ପର୍ ରାଜିନା କାତା ଶିକିୟା ବେଡ।
ଯୀଶୁ ଆମାଇନା ଶିଷ୍ଲେ ସୁନ, “ସରଗ୍ ମାରି ଡର୍ତନିନା ଗୁଲାଇ ଆଧିକାର୍ ଆନିଙ୍ଗ୍ ବେଡତା। ଗିତିନ୍ସା ୟା, ମାରି ଗୁଲାଇ ରେମଜାତି ବ ଇଗ୍ସେ ଶିଷ୍ ଡେମ୍ ମାରି ବା,ଗୁ ମାରି ପବିତ୍ର ଆତ୍ମାନା ଅମି ବ ଆମାଏଲେ ଡୁବନ୍ ବେ। ମାରିନିଙ୍ଗ୍ ଆପେଲେ ଆର୍ ଆର୍ନା ଆଦେଶ୍ ବେଡତିଙ୍ଗ୍ ଗିତିନ୍ ଗୁଲାଇ ପାଲ୍ବାର୍ ପାଲାଇ ଶିକିଆ ବେ। ମନେପାକାୟ ଡିଗ୍ଲା,ନିଙ୍ଗ୍ ଗୁଲାଇ ବେଲା ପେନ୍ବେରଙ୍ଗ୍ ସଙ୍ଗ୍ ସଙ୍ଗ୍ ଡିତିଙ୍ଗ୍।”
ଯୀଶୁ ଗଇକୁନ୍ ନାନେ ତଗ୍ଡାଗ୍ ନା ଚାଲିଶ୍ ଦିନ୍ ତୁର୍ଗୁ,ମାଇ ଆମାଇନା ଆଶୀଷ୍ଲେ ସୁନ, “ନିଙ୍ଗ୍ନା ବା ନାନେ ଶକ୍ତି ବାବାଙ୍ଗ୍ ଜାକ ପେଲେ ଯିରୁଶାଲେମ୍ ବ ଡିଗ୍ଲା”। ମାଇ ପବିତ୍ରଆତ୍ମା ପେନ୍ ବାଗ୍ବ ବେଟାୟସେ ଗିତିନ୍ ଡେମ୍ତ।” ମାଇନା ତୁର୍ଗୁ ଯୀଶୁ ସରଗ୍ ବ ଇଗା,ମାରି ମୁୟଙ୍ଗ୍ ବାଦଲ୍ ମାଏନ୍ ସାର୍ମନାନେ ଆଯୀଶୁ ଅତିପାଡ ବେଡ। ଯିଶୁ ଗୁଲାଇକାତାବ ଶାସନ୍ ଡେଡେମ୍ ପାଲାଇ ଈଶ୍ପର୍ନା ସୁସୁମ୍ ତିତି ଗାର୍ ଲେଗା।
ବାଇବଲ୍ନା ମୁଇ ଉସାରାମ୍ :ମାଥିଉ ୨୮:୧୬-୨୦; ମାର୍କ ୧୬:୧୨-୨୦; ଲୂକ ୨୪:୧୩-୫୩; ଯୋହନ ୨୦:୧୯-୨୩; ପ୍ରେରିତ ୧:୧-୧୧
Free to use, adapt, and share under an open license (CC BY-SA 4.0).