8. ୮. ଈଶ୍ପର୍ ଆଯୋଷେଫ୍ ମାରି ଆମାଏନ୍ ଡିଅନ୍ରେନ୍ ରକିଆ ଡ଼େମ
ଜାକୁବ କିଣାନ୍ ଦେଶ୍ବ ଜବର୍ ବରଷ୍ ସଗ୍ସେ ଡିକୁଡେଙ୍ଗା, ଉଣ୍ଡୋଇଲ ମାଇ ଡକ୍ରା ଡେଙ୍ଗ୍ଇଗା, ମାଇ ମାଇନା ଲାଡ୍ଲା ଗୁ, ଆଯୋଷେଫ,ମାଇନ୍ ଆର୍ନା ବିଆଙ୍ଗ୍ଲେ ଗୋଇତାଙ୍ଗ୍ ଗିମେଲେ ଚରାଇବାର୍ ଡେଙ୍ଗା ଗିତିନ୍ ମାମାଗ୍ ପାଲାଇ ପାଟାୟ।
ଯୋଷେଫ୍ ନା ବିଆଙ୍ଗ୍ଲେ ଜବର୍ ଆକାର୍ ଡ଼େମ ମାସାଡନା ମାଇନା ବା ଆମାଇ ଜବର୍ ଆଲାଦ୍ ଡେଡେମ୍ ଡେଙ୍ଗା, ମାଇ ଯୋଷେଫ୍ ମୁଇ ମୁସୁଡିଙ୍ଗ୍ ଜୁଲ ମାଇ ମାଏନ୍ ବାଗ୍ବ ଶାସନ୍ ଡେମ୍ତ। ଉଣ୍ଡୋଇଲ ଯୋଷେଫ୍ ମାଇନ୍ ବିୟାଙ୍ଗ୍ ଲେନ୍ବ ସାଗା, ମାଏଲେ ଆମାଇ ସବସୁଙ୍ଗ୍ ମାରି ଗତି ବେପାରିନ୍ବ ସୁଙ୍ଗ ବେଡ଼।
ଯୋଷେଫ୍ ନା ବିୟାଙ୍ଗ୍ଲେ ଡିଅବ ସାକୁନ୍ ଆକ୍ତୁ,ମାଏଲେ ଯୋସେପ୍ ନା ଷକା ଚିର୍ଲ ସୁଙ୍ଗ। ମାରି ଗିମେନା ବନି ବ ଡାଗ୍ଡାଗ ଡିଗା। ତୁର୍ଗୁ ମାଏଲେ ଯୋଷେଫ୍ ନା ବନି ଡାଗ୍ଡାଗ କୁନ୍ ସକା ଆମାଇନା ବା ଅଜୁଲ,ମାଇନ୍ ବା ଡିକନ୍ ଏତୁଗା ଜେ, ଆର୍ନାଲନ୍ ବନ୍ ଜନ୍ତୁ ଆଯୋଷେଫ୍ ସୁମସୁଙ୍ଗତା। ଉଣ୍ଡୋଇଲ ଜାକୁବ ଗିତିନ୍ ଅଙ୍ଗ ମାଇ ଜବର୍ ଦୁଃକ୍ ଡେଙ୍ଗା।
ବେପାରିଲେ ଆଯୋଷେଫ୍ ମିସର୍ଦେଶ୍ବ ରୁଙ୍ଗଇଗା। ମାରି ମିସର୍ ମୁଇ ମୁନାଗ୍ ବାଇ,ଜବର ବପୁବାଇ ଦେଶ୍ ଆର୍ନାକି ନିଲି କିଣ୍ଡାଗ୍ ପାଲି ଡିଗା। ବେପାରିଲେ ଆଯୋଷେଫ୍ ମୁୟଙ୍ଗ୍ ସର୍କାର୍ ପାଇଟି ଡେଡେମ୍ ରେମ ବ ସୁଙ୍ଗ ବେଡ଼। କାଆମୁଇ ସାକାର୍ ବାଇ ରେମବ ଆଯୋଷେପ୍ ମୁଇ ଗତିରେମ ବ ସୁଅଁ ବେଡ। ଯୋଷେଫ୍ ମାଇନା ସାକାର୍ନା ବାନିସୁଗ ସେବା ଡ଼େମ ମାରି ଈଶ୍ପର୍ ଆଯୋଷେଫ୍ ଆଶିର୍ବାଦ୍ ଡ଼େମ।
ସାକାର୍ ନା କୁନି ଆଯୋଷେଫ୍ ଖାରାପ୍ କାମ୍ ଡେଡେମ୍ ପାଲାଇ ସୁନ, ମାତର୍ ଯୋଷେଫ୍ ଈଶ୍ପର୍ବ ପାପ୍ ମ ଡେଡେମ୍ ପାଲାଇ ମନା ଡ଼େମ। ଗିତିନ୍ ସାକାର୍ନା କୁନି କିଜ୍ରାଇଗା ମାରି ମିଛ୍ କାତା ସୁନ ସେ ଆଯୋଷେଫ୍ ନିନ୍ଦା ଡ଼େମ। ଆତିନେ ଆଯୋଷେଫ୍ ସବସେ ବନ୍ଦିଶାଲ୍ ବ ଅଗାୟ। ବନ୍ଦିଶାଲ୍ ବ ଲନା ଯୋଷେଫ୍ ଆଈଶ୍ପର୍ ବିସ୍ବାସ୍ ଡ଼େମ ସେ ଡିଗା, ଗିନ୍ସା ଈଶ୍ପର୍ ଆମାଇ ଆଶିର୍ବାଦ୍ ଡ଼େମ।.
ଦସ୍ ଆଡିଗ୍ନା ସା ଯୋଷେଫ୍ ବନ୍ଦିଶାଲାବ ୨ ବରଷ୍ ଜାକ ଡିକୁନ୍ ବେଲା। ମିସିଙ୍ଗ୍ ମିଣ୍ଡି ଫାରୋ,ଆଜାକି ମିସର୍ନା ରାଜା ସୁସୁଡେଙ୍ଗା,ଉମ୍ୱାର୍ ମୁସୁଡିଙ୍ଗ୍ ଜୁଲ, ଜାନ୍ ପାଲାଇ ମାଇ ଜବର୍ ଅଶାନ୍ତି ଡେଙ୍ଗା। ମାଇନା ମାସା ଶିକାୟ କୁନ୍ଲେ ଗିତିନ୍ ମୁସୁଡିଙ୍ଗ୍ନା ଅରତ୍ ସୁଁସୁ ଆଗଙ୍ଗା।
ମାତର୍ ଈଶ୍ପର୍ ଆଯୋଷେଫ୍ ମୁସୁଡିଙ୍ଗ୍ ନା ଅରତ୍ ଅମାଗ୍ସେ ସୁଁସୁ ପାଲାଇ ଜ୍ଞାନ୍ ବେଡ଼ଡିଗା, ଫାରୋ ରାଜା ଆଯୋଷେଫ୍ ବନ୍ଦିଶାଲ୍ ନାନେ ୱାରୁରୁଙ୍ଗ୍ ପାଲାଇ ଆଦେଶ୍ ବେଡ଼। ଯୋଷେଫ୍ ଗିତିନ୍ ମୁସୁ ଡିଙ୍ଗ୍ନା ଅରତ୍ ବୁଜାୟସେ ସୁନ, “ଈଶ୍ପର୍ ସାତ୍ ବରଷ୍ ସୁସୁମ୍ନା ଡ଼େନ୍ତା ମାରି ତୁର୍ଗୁ ପାଲାଇ ମାରି ସାତ୍ ବରଷ୍ ମର୍ଡ଼ି ପାଟାଇବାର୍ ଇଗାନି।
ଫାରୋରାଜା ଯୋଷେଫ୍ନା କାତା ଅଙ୍ଗସେ ଜବର୍ ସାରଦା ଡେଙ୍ଗା, ମାରିମାଇ ଆଯୋଷେଫ୍ ମିଶର୍ ଦେଶ୍ନା ମାର୍ମୁଇ ଗୁଲାଇ ନାନେ ମୁନାରେମ୍ ସୁଗ ଡ଼େମ!
ଯୋଷେଫ୍ ଆରେମଲେ ସାତ୍ ବରଷ୍ ଜାକ ବାନି କେରଙ୍ଗ୍ ନାନେ ଜବର୍ ସୁଗ ମୁଇ ରୁଣ୍ଡାଇବାର୍ସା ସୁନ। ଉଣ୍ଡୋଇଲ ସାତ୍ ବରସ୍ନା ମର୍ଡି ସାଗା, ଗିତିନ୍ କେରଙ୍ଗ୍ଲେ ରେମଲେନ୍ବ ସୁଙ୍ଗ୍ସୁଙ୍ଗ୍ ପାଲାଇ ଆଯୋଷେଫ୍ ସୁନ,ମାରି ମାଏନା ଜବର୍ କାଦି ଡିଗା।
ମର୍ଡି ମିସର୍ବ ଆକା ଆଡିତା,ମାତର୍ କିଣାନ୍ବ ଲନା ଆରିକି ଯୋଷେଫ ମାରି ମାଇନା ଡିଅନ୍ରେମ୍ ଡିକୁ ଡେଙ୍ଗା।
ଆତିନେ ଜାକୁବ ମାଇନା ଆଗୁଲେ କେରଙ୍ଗ୍ ସସବ ପାଲାଇ ମିଶର ଦେଶବ ପାଟାୟ, ଯୋଷେଫ୍ନା ବିୟାଙ୍ଗ୍ଲେ ଆଯୋଷେଫ୍ ସମବାର୍ ଆଗଙ୍ଗା, ଉଣ୍ଡୋୟଲ ମାଏ କେରଙ୍ଗ୍ ସସବ ପାଲାଇ ମାଇନା ଆଗତୁ ତଙ୍ଗା। ମାତର୍ ଯୋଷେଫ୍ ଆମାଏ ସମଡ଼।
ଆରନି ମାଇ ମାଏନା ବିୟାଙ୍ଗ୍ଲେ ବଦଲ୍ ଗା କି ଆଣ୍ଡା ଗିତିନ୍ ମାମାଗ୍ ପାଲାଇ ପରିକ୍ୟା ଡ଼େମ ମାରି ଯୋଷେଫ୍ ଆମାଲେ ସୁନ,“ନିଙ୍ଗ୍ ପେନ୍ ବିୟାଙ୍ଗ୍ ”ଆବୁତୁଙ୍ଗା। ପେଲେ ଆନିଙ୍ଗ୍ ଗତିରେମ୍ ବ ସୁଙ୍ଗ ସେ ଖାରାପ୍ କାମ୍ ଡ଼େମପେ, ମାତର୍ ଈଶ୍ପର୍ ଆଗିତିନ୍ ଆକାରାପ୍ କାମ୍ ବାନି କାମ୍ ବ ଲାଗାୟ! ମିସର୍ ଦେଶ୍ବ ସାଗ୍ସେ ଡିଗ୍ଲା ମିରିକି ନିଙ୍ଗ୍ ପେ ପାଲାଇ ମାରି ପେନ୍ ଡିଅନ୍ ରେମ୍ ପାଲାଇ କାଦି ଟାନ୍ଇବାର୍ ଗନ୍ତିଙ୍ଗ୍।
ଉଣ୍ଡୋଇଲ ଯୋଷେଫ୍ନା ବିୟାଙ୍ଗ୍ଲେ ଡିଅବ ସାଗା, ମାରି ଆମାଏନ୍ ବା ଜାକୁବ ସୁନ। ଯୋଷେଫ ଅଇଜାକ ବୁରଗିତା ଆତିନେ ଜାକୁବ କନ୍ ଅଁଗ୍ସେ ଜବର୍ ସାର୍ଦା ଡେଙ୍ଗା।
ଜାକୁବ ଅଇ ଡକ୍ରା ଡେଙ୍ଗ୍ଡିଗା। ମାଇ ମାଇନା ଡିଅନ୍ରେମ୍ ବେରଙ୍ଗ୍ ମିସରଦେଶ୍ ବ ଇଗା ମାରି ଗୁଲାଇରେମ ଆର ବାସାଗ୍ ଡିଗା,ମାରି ଜାକୁବ ଗଇକୁନ୍ ଆଗ୍ତୁ ମାଇନା ଆଗୁଲାଇ ଗୁଲେ ଆଶିର୍ବାଦ୍ ଡ଼େମ।
ଆର୍ନା ନିୟମ୍ ଈଶ୍ପର୍ ଅବ୍ରାହମ୍ ବେରଙ୍ଗ୍ ଡ଼େମଡିଗା ଗିତିନ୍ ଇସାକ୍ ବେରଙ୍ଗ୍ ଡେଙ୍ଗା ତର୍ଗୁ ଜାକୁବ୍ନା ବାଗ୍ବ, ତୁର୍ଗୁ ଜାକୁବନା ୧୨ ଟା ଗୁ ମାରି ମାଏନ୍ ଡିଅନ୍ ରେନ୍ ବେରଙ୍ଗ୍ ଡେଙ୍ଗା।ମାଏନା ୧୨ ଗୁଲେନ୍ କୁଲ୍ ରେମଲେ ନା ଇସ୍ରାଏଲ୍ ନା ୧୨ କୁଟୁମ୍ ଡ଼େଙ୍ଗା।
ବାଇବଲ୍ ନା ମୁଇ ଉସାରାମ୍ : ଆଦିପୁସ୍ତକ ୩୭-୫୦
Free to use, adapt, and share under an open license (CC BY-SA 4.0).