9. ୯. ଈଶ୍ପର୍ ଆମୋଶା ୱାୟ
ଯୋଷେଫନା ଗଇକୁନ୍ ତୁର୍ଗୁ,ମାଇନ୍ ଗୁଲାଇରେମ ମିସର୍ଦେଶ୍ବ ଡିଗା। ମାଏଲେ ମାରି ମାଇନା କୁଲ୍ରେମ୍ଲେ ଜବର୍ ବରଷ୍ ଆତା ଡିଗା, ମାରି ଜବର୍ଗୁଲେ ଡାକୁଇଲେ ଜନମ୍ ବେଡ଼,ଆମାଏ ଇସ୍ରାଏଲ୍ୟ ଡସେ ସୁନ।
ଜବର୍ ବରଷ୍ ତୁର୍ଗୁ,ଇସ୍ରାଏଲ୍ନା ରେମଲେ ଜବର୍ ଡେଙ୍ଗ୍ଇଡିଗା, ଯୋଷେଫ ଆର୍ନା କାମ୍ ମିସରିୟ ରେମଲେନ୍ ସାଇଜ ପାଲାଇ ଡ଼େମଡିଗା, ଆତିନ୍ ସାଇଜ ମିସରିୟଲେ ମାରି ଆଏତାଇତ । ମିସରିୟଲେ ଇସ୍ରାଏଲ୍ନା ଆରେମଲେ ଜୁଲସେ ବୁତୁଙ୍ଗା, ମାସାଡନା ମାଏଲେ ଇସାବ୍ ଡ଼େମନା ଜବର୍ରେମ ଡିଗା। ଆତିନେ ଗିନ୍ବେଲା ମିସର୍ଦେଶ୍ ଶାସନ୍ ଡେଡେମ୍ନା ରାଜା ପାରୋ ଆଇସ୍ରାଏଲିୟଲେ ମିସରିୟରେମନା ଗତିରେମ୍ ଡ଼େମଡିଗା।
ମିସରିୟଲେ ଆଇସ୍ରାଏଲ୍ ନା ରେମଲେ ଜବର୍ ମୁନା ଡିଅଲେ ମାରି ଗୁଲାଇ ସହର୍ବଲେ ତିଆର୍ ଡେଡେମ୍ ଲାପାଇ ବାଦ୍ୟ ଡେଡେମ୍ଡେଙ୍ଗା। ଜବର୍ କଷ୍ଟ ବାଇ ପାଇଟି ମାଏନା ଆଜୀବନ ଜବର୍ ଦୁକ୍ଃ ଡ଼େମ, ମାତର୍ ଈଶ୍ପର୍ ଆମାଏ ଆଶିର୍ବାଦ୍ ଡ଼େମ, ମାରି ମାଏନା ଜବର୍ ଗୁଲେ ଡାକୁଲେ ଡେଙ୍ଗା।
ଫାରୋ ଜୁଲଜେ, ଇସ୍ରାଏଲ୍ନା ରେମଲେନ୍ ଜବର୍ ଗୁଲେ ଜନମ୍ ଡେଡେମ୍ ଡେଙ୍ଗା,ଆତିନେ ମାଇ ଇସ୍ରାଏଲ୍ନା ଆଗୁଲାଇ ଡାଉଗୁଲେ ନିଲି ବାଇ କୁଣ୍ଡାବ ରାପୁଡ଼ସେ ଅଡ଼ାବ ସୁସୁଙ୍ଗ୍ ପାଲାଇ ଆଦେଶ୍ ବେଡ।
ଇସ୍ରାଏଲ୍ ନା ସେଲାନେ ମୁୟଙ୍ଗ୍ ଅଁ ଅଁଗୁ ଜନମ୍ ଡ଼େମ,ମାରି ମାଇ ଆତିନ୍ ଅଁଗୁ ଗଙ୍ଗ୍କୁନ୍ ଜାକ ତିପାଡ଼ସେ ବୁଙ୍ଗ।
ଉଣ୍ଡୋୟଲ ଗିତିନ୍ ଗୁ ନା ୟଙ୍ଗ୍ ଜବର ଦିନ୍ ତିପାଗ୍ବାର୍ ଆଗଙ୍ଗ୍ସେ, ମାଇ ମୁଇ ବଙ୍ଗଲ୍ ବାର୍ନା ମୁଇ ଟାକ୍ଲାବ ଆତିନ୍ ଗୁ ବୁଅଁ ମାରି ଆମାଇ ନିଲି କିଣ୍ଡାବ ବଙ୍ଗ୍ଲା ବେଡ଼ ମିରିକି ମାଇ ଗୋଇକୁନ୍ ନାନେ ରକିଆ ଡେଡେମ୍ ଗଙ୍ଗ୍ତା। ମାଇନା ମୁନାଗ୍ ବୁନ୍ଲୁ ମାଇବେରଙ୍ଗ୍ ମା ଡ଼େନ୍ତା ଗିତିନ୍ ମାଇ ଜୁଜୁ ଡେଙ୍ଗା।
ପାରୋରାଜା ନା ମୁଇ ଡାକୁଇ,ଆତିନ୍ ବଙ୍ଗଲ୍ ବାର୍ନା ଟାକ୍ଲା ଜୁଲ ମାରି ଇଗ୍ସେ ଗିତିନ ଟାକ୍ଲା ବିତ୍ରେ ମା ଡିତା ଡସେ ଏରୁଙ୍ଗ। ଉଣ୍ଡୋଇଲ ମାଇ ଆତିନ୍ ଗୁ ଜୁଲ,ମାଇ ତରୋଇନା ଗୁ ଡେଡ଼ମ୍ସା ରୁଙ୍ଗା। ଗୁନା ଜତନ୍ ରୁରୁଙ୍ଗ୍ ସା ମାଇ ଆମାଗସେ ମୁଇ ଆଇସ୍ରାଏଲ୍ନା ଆସେଲାନେ ବାଚ୍ଲ,ଜାକି ଗିତିନ୍ ଗୁନା ତରୋଇନା ୟଙ୍ଗ୍ ଡିଗା। ଉଣ୍ଡୋଇଲ ଗିତିନ୍ ଗୁ ମୁନାଗା ମାରି ୟଙ୍ଗ୍ ନା ଦାତୁକୁଇ ଦର୍କାର୍ ଆଡ଼େନ୍ତା,ଗିତିନ୍ ବେଲା ମାଇ ଫାରୋନା ଆଡାକୁଇ ଲେଟାବେଡ଼, ମାରି ମାଇ ଗିତିନ୍ ଗୁ ନା ଅମି ମୋଶା ବେଡ଼।
ମିସିଙ୍ଗ୍ ଅଇଜବେଲା ମୋଶା ମୁନାଡେଙ୍ଗ୍ ଇଡିଗା,ମିଣ୍ଡା ଇସ୍ରାଏଲିୟ ଆଗୋତିରେମ୍ ମିଣ୍ଡା ମିସରିୟ ରେମ ବୁବୁଗ୍ନା ଜୁଲ। ମୋଶା ଆତିନ୍ ଇସ୍ରାଏଲିୟ ଆଗୋତିରେ ବୁରବାର୍ ପାଲାଇ ଚେସ୍ଟା ଡ଼େମ।
ଉଣ୍ଡୋଇଲ ମୋଶା ଏତାୟ ଜେ ଆମାଇ ଜା ଆଜୁତ, ଗିତିନ୍ସା ମାଇ ଆମିସରିୟ ଅଡ଼ାବ ମାରି ମାଇନା ଆମଡ୍ ତୁବୁଗ୍ବ ଆତିଲୋ ବେଡ। ମାତର୍ ଜାକି ମିଣ୍ଡା ଆମୋଶା କନ୍ ଡ଼େମକୁନ୍ ଜୁଲ ଡିଗା।
ମୋଶା ମାଡ଼େମ ଡିଗା ଗିତିନ୍ ଫାରୋ ଅଙ୍ଗ। ମାଇ ଆମାଏ ଅଡ଼ ବାର୍ସା ଚେଷ୍ଟା ଡ଼େମ, ମାତର୍ ମୋଶା ମିସର୍ନାନେ ମରୁବୁମିବ ଡୁଙ୍ଗା।ଫାରୋ ସୈନିକ୍ଲେ ଆମାଇ କଜ୍ ବାର୍ ଆଗଙ୍ଗା।
ମୋଶା ଉଣ୍ଡୋଇଲ ମିସର୍ ନାନେ ଡୁଙ୍ଗା, ମାଇ ମରୁବୁମିବ ମୁଇ ମେଣ୍ଡା ସାରାଇବାର୍ ରେମ୍ ଡେଙ୍ଗା। ମୋଶା ମୁଇ ଆସେଲାନେ ବିବା ଡେମୋ ମାରି ମାଏନ୍ ଜୋଡେକ୍ ଗୁ ଜନମ୍ଡେଙ୍ଗା।
ମୋଶା ମାଇନ୍ ମାମାଡ଼େଙ୍ଗନା ମେଣ୍ଡା ଲେନା ଜତନ୍ ରୁରୁଙ୍ଗ୍ ଡେଙ୍ଗା, ମିଶିଙ୍ଗ୍ ମୁଇ ଲାଟାବ ସୁଙ୍ଗ ଡକୁନ୍ ମାଇ ଜୁଲ, ଗିତିନ୍ ଡ଼ଡେଙ୍ଗା ମାତର୍ ଗେବୋଆଇତା। ମାଇ ଆତିନ୍ ଲାଟାବ ଜୁଯୁ ପାଲାଇ ଲଗେ ଇଗା।ଉଣ୍ଡୋଇଲ ମାଇ ଜବର୍ ଲଗେ ଇଗା,ଈଶ୍ପର୍ ଆମାଇ ସୁନ,“ମୋଶା ନନା ପାଣ୍ଡୋଇଲେ ଜୁଗ ସୁଙ୍ଗ୍। ନ ମୁଇ ପବିତ୍ରଟାନ୍ବ ତଙ୍ଗ୍ଗିତ୍ନ।
ତୁର୍ଗୁ ଈଶ୍ପର୍ ସୁନ, “ନିଙ୍ଗ୍ ଇସ୍ରାଏଲ୍ ରେମୋଲେନା ଦୁଖ୍ ଜୁଲୋତିଙ୍ଗ୍। ନିଙ୍ଗ୍ ଆନ ଇଶ୍ରାଏଲ୍ନା ଆରେମୋଲେ ମିସର ଦେଶ୍ନା ଗତିନାନେ ରକିଆ ଡେଡେମ୍ ପାଲାଇ ପାରୋବ ବେଟାୟତିଙ୍ଗ୍। ନିଙ୍ଗ୍ ଆମହେ କିଣାଣ୍ଦେଶ୍ ବେତିଙ୍ଗ୍, ଆର୍ନାକି ନିଙ୍ଗ ଆବ୍ରାହମ୍ ଇସାକ୍ ମାରି ଜାକୁବ ବେରଙ୍ଗ୍ ପର୍ମାନ୍ ଡ଼େମତିଙ୍ଗ୍।”
ମୋଶା ପାଚାର୍ଲ, ଜଦି ରେମଲେ ଆନିଙ୍ଗ୍ ଜା ବେଟାୟତା ଗିତିନ୍ ମାମାଗ୍ସା,ଦିତିନ୍ଲ ନିଙ୍ଗ୍ ମା ସୁନ୍ତିଙ୍ଗ୍ ? ଈଶ୍ପର୍ ସୁନ, “ ନିଙ୍ଗ୍ ଜା ନିଙ୍ଗ୍ ମାଇ। ଆମାଏସୁଁ ଈଶ୍ପର୍ ଆନି ବେଟାୟତା। ମାରି ଆମାଏ ସୁ, ଆବ୍ରାହମ୍, ‘ଈଶାକ୍ ଜାକୁବ୍ ପେନା ଆନିଦାଦିଲେନ୍ନା ବା ନିଙ୍ଗ୍ ଈଶ୍ପର୍ ଜିହୋବା’। ମଡ଼ୋଡଙ୍ଗ୍ ଦିନ୍ ଜାକ କନ୍ ନାଏନା ଅମି।”
ମୋଶା ବୁତୁଙ୍ଗ୍ ଡିଗା ମାରି ମାଇ ଫାରୋନ୍ବ ଇପାଲାଇ ମନ୍ ଆଡେମ୍ତ। ମାସାଡନା ମାଇ ହେତୁଗା ଜେ ମାଇ ନିମାନ୍ କାତା ସୁନ୍ସୁ ଆଗଙ୍ଗ୍ତା,ଆତିନେ ଈଶ୍ପର୍ ମୋଶା ନା ବିୟାଙ୍ଗ୍ ଆଆରନ୍ ଆମାଇ ସାଇଜ ଡେଡେମ୍ସା ବେଟାୟ।
ବାଇବଲ୍ ନା ମୁଇ ଉସାରାମ୍ :୧-୪
Free to use, adapt, and share under an open license (CC BY-SA 4.0).