1. ୧- ଗଡ଼଼ାପଣ୍ଡି ବିସୟ
ପାଟିଟେ ଇ ୱାଡିନ୍ ଗଡ଼଼ା ଏନେ, ସଅ ଦିନ୍ ସିରିସ୍ ମାପ୍ରୁ ସରଗ୍ ଆରେ ପୁର୍ତି ଆରେ ଆମାନ୍ ମାନଣ୍ଡି ପାଟିଟେ ବିସୟ ଗଡ଼଼ାତଣ୍ଡ୍। ମାପ୍ରୁ ଗଡ଼଼ାତାନ୍ କୁଣ୍ତେଲ୍ ପୁର୍ତିନ୍ ସିକାଟ୍ ଆରେ ସିଲିମ୍ ସିମ୍ରା ମାଟେ। ଏନାମେନ୍ ବିସୟ୍ଗୁଲ୍ ଗଡ଼଼ାଏରାଦି ମାଟେ। ମାତର୍ ମାପ୍ରୁନେ ଆତ୍ମା ନିର୍ ପୟ୍ତାନ୍ ମାଟେ।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ପକେଣ୍ତ୍, ୱିଣ୍ତ୍ ଏକା। ଆମାଟୁକ୍ ୱିଣ୍ତ୍ ଏନେ। ମାପ୍ରୁନ୍ କାନୁଲ୍ତୁନ୍ ୱିଣ୍ଡ୍ ନିୟା ତଣ୍ଡେଟେ। ଆରେ ଆଦିଙ୍ଗ୍ ଦିବସ୍ ଏଞ୍ଜି ପକେଣ୍ତ୍। ଅଣ୍ତ୍ ଆଦିଙ୍ଗ୍ ସିକାଟ୍ଟୁକ୍ ୱେନେଲ୍ କେନଣ୍ଡ୍। ଆରେ ଆଦିନେ ପିଦିର୍ ଇରେଣ୍ଡ୍ “ନାର୍କାମ୍”। ମାପ୍ରୁ ତିୟାର୍ ଏରଣ୍ଡି ପର୍ତୁମ୍ଟେ ସିରିସ୍ ୱିଣ୍ଡିଙ୍ଗ୍ ଗଡ଼଼ାତଣ୍ଡ୍।
ଦୁତିୟ ସିରିସ୍ ମାପ୍ରୁ ପୁର୍ତି ପୟ୍ତାନ୍ ଆକାସ୍ ଉବ୍ଜା ଏରିଙ୍ଗ୍ ପକେଣ୍ତ୍, ଅଣ୍ତ୍ ପୁର୍ତିଟେ ନିର୍ଟୁକ୍ ଆକାସ୍ଟେ ନିରିଙ୍ଗ୍ ୱେନେଲ୍ କେତାଲିନ୍ ଆକାସ୍ ଉବ୍ଜା ଏନେ।
ତୁର୍ତିୟ ସିରିସ୍ ମାପ୍ରୁ ପକେଣ୍ତ୍ ଆରେ ୱାଟ୍ବାସେଟୁକ୍ ନିରିଙ୍ଗ୍ ଦୁଇ ବାଗ୍ କେନଣ୍ତ୍। ଅଣ୍ତ୍ ୱାଟ୍ବାସେଙ୍ଗ୍ ପୁର୍ତି ଏଞ୍ଜି ପକେଣ୍ତ୍। ଆରେ ଅଣ୍ତ୍ ନିରିଙ୍ଗ୍ ସମ୍ଦୁର,ଏଞ୍ଜି ପକେଣ୍ତ୍। ମାପ୍ରୁ ସୁଡେଣ୍ତ୍ ଏରେଦ୍ ଅଣ୍ତ୍ ଗଡ଼଼ାସିମାଟଣ୍ଡ୍ ଆଦ୍ ଅଣ୍ଡୁନ୍ କାନୁଲ୍ତୁନ୍ ପେରିନ୍ ନିୟା ତଣ୍ଡେଟେ।
ଆଦିଙ୍ଗ୍ କୁଣ୍ତେ୍ଲ୍ ମାପ୍ରୁ ପକେଣ୍ତ, “ ପୁର୍ତିନ୍ ପାଟିନ୍ ବାନିଟେ ମାର୍କିଲ୍ ଆରେ ଲାଟାଲ୍ ଆଗ୍କାୱ୍। ଆଟେଲ୍ ଆୟ୍ ୱାଡ଼଼ିନ୍ ଏନେ। ମାପ୍ରୁ ସୁଡ଼଼େଣ୍ଡ୍ ଏରେଦ୍ ଅଣ୍ଡ୍ ତିୟାର୍ କେୟି ମାଟଣ୍ଡ୍, ଆଦ୍ ପେରିନ୍ ନିୟା ତଣ୍ଡେଟେ।
ଗଡ଼଼ାପଣ୍ଡିଟେ ସାର୍ଦିନ୍ ସିରିସ୍, ମାପ୍ରୁ ପକେଣ୍ତ୍ ୱେଲେ ନେଲିଙ୍ଗ୍ ପୁତ୍କୁଲ୍ ପାଟିନ୍ ଗଡ଼଼ାତଣ୍ତ୍। ମାପ୍ରୁ ଆୟ୍ ପାଟିନିଙ୍ଗ୍ ପୁର୍ତିନ୍ ୱିଣ୍ତ୍ ସିଗିଙ୍ଗ୍ ଆରେ ଦିନ୍, ନାର୍କାମ୍, ରୁତୁଲୁଙ୍ଗ୍ ଆରେ ବାରିସ୍ଗିଲ୍ ପୁନୁଙ୍ଗ୍ ପାୟିଟ୍ କାମେ କେଗିଙ୍ଗ୍ ପକେଣ୍ତ୍। ମାପ୍ରୁ ସୁଡେଣ୍ତ୍ ଏରେଦ୍ ଅଣ୍ତ୍ ଗଡ଼଼ାସି ମାୟାଣ୍ଡ୍ ଆଦ୍ ପେରିନ୍ ନିୟା ମାଟେ।
ପାସ୍ଦିନ୍ଟେ ସିରିସ୍ ମାପ୍ରୁ ପକେଣ୍ତ୍ ଆରେ ନିର୍ତିନ୍ ମାନଣ୍ଡି ଜିୟାତ୍ଗିଲିଙ୍ଗ୍ ଆରେ ଉଡ୍ଏରଣ୍ଡି ତିତେଲିଙ୍ଗ୍ ତିୟାର୍ କେନଣ୍ତ୍। ମାପ୍ରୁନ୍ କାନୁଲ୍ତୁନ୍ ଆଦ୍ ପେରିନ୍ ନିୟା ତଣ୍ଡେଟେ ଆରେ ଅଣ୍ତ୍ ଆୱ୍ଗୁଲୁଙ୍ଗ୍ ଆସିର୍ବାଦ୍ କେନଣ୍ତ୍।
ସୁସ୍ଟିନେ ଚଅଦିନ୍ ସିରିସ୍, ମାପ୍ରୁ ପକେଣ୍ତ୍,ବାସେଟେ ପାଟିନ୍ ବାନିଟେ ପସୁଲ୍ ପାଟିନ୍ ସୁସ୍ଟି ଏକାୱ୍। ମାପ୍ରୁ ଏଟେନ୍ ପକେଣ୍ତ୍ ଆପାଡି ଆୟାୱାଡିନ୍ ଏନେ। ଏଙ୍ଗିଟ୍ ତାସ୍କାମେ କେୟଣ୍ଡି ପସୁଲ୍ ମାଟେୱେ୍, ଏଙ୍ଗିଟ୍ ବାସେ ପୟତାନ୍ ତାକଣ୍ଡି ଜିୟାତ୍ଗିଲ୍ ଆରେ ଏଙ୍ଗିଟ୍ କପେ ପୟ୍ତାନ୍ ପସୁଲ୍ ମାଟେୱେ୍। ଆରେ ମାପ୍ରୁ ଆୱ୍ଗୁଲୁଙ୍ଗ୍ ନିୟା ସୁଡେଣ୍ତ୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ପକେଣ୍ତ୍, ୱାର୍ରୁ, ଆମ୍ ଲକ୍ଗୁଲୁଙ୍ଗ୍ ଆମ୍ ୱାଡିନ୍ ଆମ୍ ରୁପ୍ନାନା ସୁସ୍ଟି କେଗିକାର୍। ପୁର୍ତି ପୟତାନ୍ ଆରେ ପାଟିନ୍ ପସୁଲୁଙ୍ଗ୍ ପୟତାନ୍ ଆୟ୍ ଲକ୍ନେ ଅଦିକାର୍ ସେଇଦା।
ଆଦିଙ୍ଗ୍ ମାପ୍ରୁ ତୁକୁଡ୍ କାଣ୍ତେକ୍ ଉୟି ନରୁଙ୍ଗ୍ ତିୟାର୍ କେନଣ୍ତ୍। ଆରେ ଅଣ୍ତୁଙ୍ଗ୍ ତାନିର୍ ଜିୱେଟେ ପୁଣ୍ତା ସିନଣ୍ତ୍। ଇ ନର୍ନେ ପିଦିର୍ ଆଦମ୍ ସିନଣ୍ତ୍। ମାପ୍ରୁ ଉକୁଟ୍ ଏଦନ୍ବଗିଚା ତିୟାର୍ କେନଣ୍ତ୍, ଆରେ ଆମାନ୍ ଆଦମ୍ ସେୟ୍ଦାଣ୍ତ୍। ଆମାନ୍ ଅଣ୍ତୁଙ୍ଗ୍ ଜତନ କେଗିଙ୍ଗ୍ ପାୟିଟ୍ ଅଣ୍ତୁଙ୍ଗ୍ ଆମାନି ଇରେଣ୍ତ୍।
ୱାଡ଼଼େ ତାନିର୍, ମାପ୍ରୁ ଜଡେଙ୍ଗ୍ ମୁଲିକାଟେ ମାର୍କିଲ୍ ଉଣ୍ତୁତଣ୍ତ୍। ଜିୱେ ମାନଣ୍ତି ମାରିନ୍ ଆରେ ନିୟା ଆରେ ଉୟା ଗିୟାନ୍ ମାନଣ୍ତି ମାରିନ୍। ମାପ୍ରୁ ଆଦମୁଙ୍ଗ୍ ପକେଣ୍ତ୍ ଯେ ଉୟା ଆରେ ନିୟା ଗିୟାନ୍ ମାନଣ୍ତି ମାରିନ୍ଟେ ପଲୁଙ୍ଗ୍ ସାକାରି ୱାଡ଼଼େନ୍ ମାନଣ୍ତି ପାଟିନ୍ ମାର୍କିଲ୍ଟେ ପଲ୍ ତିନିଙ୍ଗ୍ ଅଡ୍ତାର୍। ଜଦି ଏୟିଣ୍ତ୍ ଇ ମାରିନ୍ଟେ ପଲ୍ ତିୟାଣ୍ତ୍, ଅଣ୍ତ୍ ସାଦାଣ୍ତ୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ପକେଣ୍ତ୍, ନର୍ ଉକୁରି ମାନଣ୍ତି ନିୟାମାନା। ମାତର, ଏରେମେନ୍ ପସୁ ଆଦମୁଙ୍ଗ୍ ପାୟିଟ୍ ସାଇଜ କେୟଣ୍ଡି ମାନାମାଟେ।
ଆଦିଙ୍ଗ୍ ପାୟିଟ୍ ମାପ୍ରୁ ଆଦମୁଙ୍ଗ୍ କୁର୍କାଲ୍ନାଟ୍ ଅଡୁସି ସିନଣ୍ତ୍। ଆଦିଙ୍ଗ୍ କୁଣ୍ତେଲ୍, ମାପ୍ରୁ ଆଦମ୍ନେ ଉକୁଟ୍ ପାଜ୍ରା ପୁନ୍ ପୁସ୍କି ଅକାଲ୍ ନାରିଙ୍ଗ୍ ତିୟାର୍ କେନଣ୍ତ୍ ଆରେ ଆଦମୁଙ୍ଗ୍ କାକେଲ୍ ଇନ୍ଦ୍ରେଣ୍ତ୍।
ଏସେବେଲ୍ ଆଦମ୍ ଆଦିଙ୍ଗ୍ ସୁଡେଣ୍ତ୍। ଅଣ୍ତ୍ ପକେଣ୍ତ୍ ଇଦ୍ ଆନ୍ ୱାଡିନ୍, ଆଦିଙ୍ଗ୍ ନାରି ଏଞ୍ଜି ଅର୍ଗୁଙ୍ଗ୍ ଏଦା, ଏନାଦିଙ୍ଗ୍ କି ଇଦ୍ ନରଲକୁଙ୍ଗ୍ ପେଲ୍ଟୁକ୍ ତିୟାର୍ ଏରିମାୟା। ଇ କାରନ୍ଟୁକ୍ ନର୍ ଅଣ୍ତୁନେ ଆୟା ଆବାଙ୍ଗ୍ ସାକାରି ତାନ୍ ଆୟାଲ୍ନା ଉକୁଟି ଏଦାଣ୍ଡ୍।
ମାପ୍ରୁ ନର୍ ଆରେ ନାରୀଙ୍ଗ୍ ଅଣ୍ତୁନେ ନିଜେଟେ ରୁପ୍ ନା ତିୟାର୍ କେନଣ୍ତ୍। ଅଣ୍ତ୍ ଆୟ୍ଲକୁଙ୍ଗ୍ ଆସିର୍ବାଦ୍ କେନଣ୍ତ୍ ଆରେ ପକେଣ୍ତ୍ ପେଙ୍ଗିଟ୍ ସିଣ୍ତିଲ୍ ମାସିଲ୍ ଆରେ ସିଣ୍ଡିଲ୍ମାସିଲ୍ ଜନମ୍ କେୟୁର୍ ଆରେ ପୁର୍ତିଙ୍ଗ୍ ପରିପୁରୁନ୍ କେୟୁର୍।ମାପ୍ରୁ ଏରେଦ୍ ପାଟିନ୍ ତିୟାର୍ କେୟିମାଟଣ୍ତ୍, ଆଦ୍ ପାଟିନ୍ ନିୟା ଇ ସୁଡେଣ୍ତ୍। ଅଣ୍ତ୍ ଇଦ୍ ପାଟିନ୍ତିନ୍ ପେରିନ୍ କିର୍ଦେ ମାଟଣ୍ତ୍। ଏଦ୍ ପାଟିନ୍ ବିସୟ୍ରେନ୍ ସୁସ୍ଟି ଚଅ ଦିନ୍ ସିରିସ୍ ଏନେ।
ଏସେବେଲ୍ ସାତ୍ଟେ ଦିନ୍ ୱାନେ, ମାପ୍ରୁ ଅଣ୍ତୁନେ ପାଟିନ୍ କାମେ ସେସ୍ କେନଣ୍ତ୍। ଆଦିଙ୍ଗ୍ ମାପ୍ରୁ ପାଟିନ୍ ଦିନ୍କାମେ କେନଣ୍ତ୍ , ବିସ୍ରାମ୍ ଉନଣ୍ତ୍। ଅଣ୍ତ୍ ସାତ୍ଟେଦିନ୍ ସିରିସ୍ ଆସିର୍ବାଦ୍ କେନଣ୍ତ୍। ଆରେ ପବିତ୍ର କେନଣ୍ତ୍ ଆୟ୍ ଦିନ୍ସିରିସ୍ଟୁକ୍ ଅଣ୍ତ୍ ଅଣ୍ତୁନେ କାମେଟୁକ୍ ବିସ୍ରାମ୍ ଉନଣ୍ତ୍। ଇ ୱାଡିନ୍ ମାପ୍ରୁ ସାରା ପୁର୍ତିଙ୍ଗ୍ ଆରେ ଦେସିଙ୍ଗ୍ ପାଟିନ୍ ବିସୟ୍ରେନ୍ ତିୟାର୍ କେନଣ୍ତ୍।
ବାଇବଲ୍ଟେ ଉକୁଟ୍ କେରାଲ୍: ଆଦି ୧-୨
Free to use, adapt, and share under an open license (CC BY-SA 4.0).